Abrahamachea puta Davidachea puta, Krista Jezuche he vonxa-vollichi xivddi. Abraham’ Izakacho bapui; Izak Jakobacho bapui; Jakob Judasacho ani tacheam bhavancho bapui; Judas Faresacho ani Zaracho bapui (tanchi avoi Tamar); Fares Ezronacho bapui; Ezron Araamacho; Araam' Aminadabacho; Aminadab Naxonacho bapui; Naxon Salmonacho; Salmon Boazacho bapui (tachi avoi Rahab); Boaz Obedacho bapui (tachi avoi Ruth); Obed Jes’secho bapui; Jes’se David razacho bapui. David Solomanvacho bapui (tachi avoi Uriasachi potinn); Solomanv Roboa-macho bapui; Roboam’ Abijacho; Abija Asacho; Asa Josafatacho bapui; Josafat Joramacho; Joram’ Uzziahcho; Uzzziah Jotamacho bapui; Jotam’ Ahazacho; Ahaz Hezekiahcho; Hezekiah Manas’sesacho bapui; Manas’ses Amosacho; Amos Josiacho Josia Jekoniacho ani tacheam bhavancho bapui; he Babilioniechea pordesachea kallar zolmole. Babiloniechea pordesa uprant: Jekonia Salatielacho bapui; Salatiel Zerubabelacho; Zerubabel Abiudacho; Abiud Eliaki-macho bapui; Eliakim’ Azoracho; Azor Zadokacho; Zadok Akimacho bapui; Akim’ Eliudacho; Eliud Eleiazaracho; Eleiazar Mat’thanacho bapui; Mat’than Jakobacho; Jakob bapui Juzecho; ho Mariecho poti; hinnem Krist mhonntat tea Jezuk zolm dilo. Mhonntôch soglleô pinddka mellun hixôb oso: Abrahama thaun Davida porian chouda pinddka; Davida thaun Babiloniechea pordesa porian chouda; ani Babiloniechea pordesa thaun Krista porian chouda. Kristacho zolm oso zalo: Tachê avoi Mariek ani Juzek lognachem utor zal’lem; punn tim ektthãi jieunchê adinch, Povitr Atmeachê podven ti gorbest asa mhonn gomun ailem. Ticho poti Juze nitivont monis aslo ani tichem nanv ubounk taka khuxi nasli, dekhun tika guptim soddun diunk to ievjitalo. Oxem korunk tannem tharav ghetlo tedna, ovchituch taka sopnant Sorvesporacho êk dut dixtti poddlo. Devdutan sanglem: “Juze, Davidachea puta, Mariek tuji potinn korun gheunk bhie naka; kiteak tichea kusveant gôrb asa to Povitr Atmeachê podven sombhovla. Ti eka putak zolm diteli ani tum Taka Jezu mhonn nanv ditoloi, kiteak Aplê porjek ticheam patkantli soddoitolo to Toch.” Sorvesporan provadea vorvim oxem sanglelem: “Polleiat, ek ankvar cheddum gorbest zatelem, ani tem eka putak zolm ditelem, ani taka Immanuel (mhonngê ‘Amchê sovem Dev’), oxem nanv ghaltelim.” Hem utor pallon ieunchê khatir hem sogllem ghòddlem. Nhidentlo utthun, Devdutachea hukume pormannem Juzen kelem, ani tika apli potinn korun ghetli; ani tinnem aplea Putak zolm dii-sôr tannem tichê lagim linga-ekvôtt korunk na. Ani Juzen taka Jezu mhonn nanv dilem. Herod raza razvôtt choloitalo tedna, Judeiachea Bethlehemant Jezu zolmolea uprant ovchituch Udenti thaun kãi vidvan Jeruzaleak aile ani oxem tãnnim vicharlem: “Zolmola to Judevancho raza khõi asa? Tachem noketr udetanam ami pollelam ani sorpottun taka nomoskar korunk ami aileanv.” Hem aikun Herod raza ghaborlo ani tachê borabôr akhem Jeruzalem. Somest mukhel iadnikank ani porjecheam dhormxastreank zomoun, Krist khõi zolmuncho asa tê vixim to tanchê kodde khobor kaddunk laglo. Tãnnim taka oso zobab dilo: “Judeiachea Bethlehemant, kiteak provadea vorvim oxem boroilelem asa: ‘Ani tum, Judachea prantantlea Bethlehema, Judacheam mukheleam modem koxêch bhaxen soglleam-vôn lhan nhoi tum! Kiteak tujê thaun nipzotolo êk fuddari ani toch Mhojê Israel-porjecho gonvlli zatolo.’ Tedna Herodin team vidvanank guptim kuxin vhele ani noketr kedna dixtti poddlelem tê vixim tannem tanchê kodde barkaien khobor kaddun ghetli, ani tankam Bethlehemak dhaddun mhonn’lem: “Vochat, ballkachi sarki khobor gheiat, ani to tumkam melltôch, hanvem-i sorpottun taka nomoskar korunk vechê khatir, mhaka kolloiat.” Razachem aikun te vattek lagle; ani tãnnim udetanam dekhlelem tem noketr ovchit tanchê mukhar vochunk laglem, ani ballôk aslo thuim tharlem. Noketr polleun te ekdomuch khuxalbhorit zale. Ani ghorant bhitôr sorun ballkak Tachê avoi Mariechea sangata tãnnim dekhlo, ani saxttangim poddun tãnnim Taka nomoskar kelo. Uprant, aplim bhanddaram ugddun, Taka him dennim somorpilim: bhangar, dhump ani gondhrôs. Punn Herodi-xim porot vochona zaunk, Devan tankam sopnant xiddkaile, ani dusrê vatten aplea desant te portole. Te vochona fuddem, ovchituch êk devdut Juzek sopnant dixtti poddlo; tannem mhonn’lem: “Utth, tôr Herod ballkacho jiv kaddunk Tachi sôd korcho asa dekhun ballkak ani Tachê avoik ghe ani Ejiptak pollun voch, ani hanv sangin porian thõi rav.” Juze utthlo ani, Ballkak ani Tachê avoik gheun, têch rati Ejiptak pollun gelo, ani Herod moro-sôr thõi ravlo. “Ejiptak thaun Mhojea putak Hanvem apoun haddlo”, oxem Sorvesporan provadea vorvim sanglelem utor pallon ieunchê khatir hem ghòddlem. Tedna Vidvanamnim apnnak fottoilo mhonn polleun, Herod ekdom’ ragabhorit zalo ani Bethlehemant ani tea akhea jil’leant, aple monis dhaddun vidvanam kodde khobor kaddun ghetlelea kallachea hixoba pormannem, don vorsancheam vô unnê piraiecheam ballkank marun uddoile. Tedna, “Mottea roddnneachi ani vilapachi êk bob Ramant aikunk aili, Aplim bhurgim anink nant dekhun, tanche khatir rodd’to Rakel buzvônn gheunk nakarta”, oxem Jeremias provadea udexim sanglelem aslem tem pallon ieilem. Herod mortôch ovchituch devdut Ejiptant Juzek sopnant dixtti poddlo; tannem oxem mhonn’lem: “Utth, ballkak ani Tachê avoik ghe ani Israel desant porto voch, kiteak ballkacho jiv kaddunk sôdtale te morun gele.” To utthlo ani ballkak ani Tachê avoik gheun Israel desant porot gelo. Punn aplea bapai Herodichê svater Arkelav Judeiant razvôtt choloita mhonn aikun, thõi vochunk to bhielo; ani sopnant apnnak oso xiddkailo mhonnun, Galileia prantant gelo. Thõi Nazaret mhonntat tea nogrant tannem tthikann kelem. “Taka Nazaretkar mhonn nanv poddtelem”, oxem provadea udexim sanglelem utor pallon ailem. Team disamnim Juanv Batist oso porgottit ani sangit eilo: ‘Devachem Raj ieunchem zalem dekhun jivit-mon bodlat.’ “Oronnneant arddoto ekleacho tallo: ‘Somiacho rosto toiar korat tacheo vatto nitt korat’ ”, oxem Izaias provadea udexim Devan sanglem tem hachech vixim Ho Juanv unttachê lhonvechem angavlem nhestalo ani penkttak chamddeacho potto bandtalo ani toll ani ran’vott mhonv khaun jietalo. Tedna Jeruzaleacho ani akhea Judeiacho ani Jordana-bhonvtonnchê sogllê talukecho lôk taka mellunk vetalo ani aplim patkam ucharun Jordanant tachê koddlo batism ghetalo. Zaite Farizev ani Saduki batism gheunk ietat tem polleun, tannem tankam mhonn’lem: “Furxeanchi zat tumi! Ieuncho asa to krôdh vattaiat mhonn konnem tumkam xiddkaileat? Tumchem jivit-mon bodllonnechim purtim follam dakhoiat, ani hanv tumkam sangtam, heam fatranchim Abrahamak bhurgim upzounk Devak tank asa dekhun “Amcho bapui koso amkam Abraham asa”oxem tumi tumkanch mhonno nakat. Atam legun zhaddanchea mullak kuradd ghal’li asa. Mhonntôch jem-jem zhadd borem foll dinam, tem-tem Dev katortolo ani ujeant uddoitolo. Jivit-mon bodlopa khatir hanv tumkam udkan batism ditam khorem, punn mhojê pattlean ieta To mhojê-von bollvont, ani Tacheô vhannô hatant dhorunk mhaka favo na. To zalear Povitr Atmean ani ujean tumkam batism ditolo. Aplo moddkull Tachea hatant asa ani To Aplem kholl nitoll kortolo, Aplo gonv koddeant bhôrtolo ani pol palovnam toslea ujeant lastolo.” Tedna Juanvan Apnnak batism diunchê khatir Jezu Galileia thaun Jordanak Juanvaxim ailo. Punn “Mhaka Tujê koddlo batism gheunchi goroz asa, ani Tum mhojê sorxim ietai?!”, oxem mhonnun, Juanv Taka addaitalo. Punn Jezun taka oso zobab dilo: “Tem atam asum-di; oxem korun, jem Devachê sogllê taronnik ievzonnê pormannem korchem asa, tem sogllem ami palltelenv.” Tedna Juanv kobul zalo. Jezu batism gheun udkantlo bhair sorun ienam fuddem, ovchituch sôrg ugòddlo ani Devacho Atmo Apnnacher parvo koso denvun ieta to Tannem dekhlo. Ani okosmat sorgar thaun êk tallo oso gazlo: “Ho Mhozo Put, sogllê opurbaiecho; Tacher asa Mhojem dhadosponn.” Tedna, Devcharan Jezuk naddche khatir, Povitr Atmean Taka oronneant vhelo. Challis dis ani challis rati Jezun upas kelo, ani tea uprant Taka bhuk lagli. Atam lagim sorun, Naddpean oxem mhonn’lem: “Zor Tum Devacho Put, tôr heam fatranche undde zaunk adnea kôr.” Punn Tannem oso portipall kelo: “Povitr Pustokar boroil’lem asa tem hem: ‘Unddeach vorvim nhoi, punn Devachea tonddantlem bhair sorta tea-tea utra vorvim monis jieta.’ ” Magir Devcharan Taka Povitr Xarant vhelo ani, Devmondirachea kollsar Taka ubo korun, oxem mhonn’lem: “Zôr tum Devacho Put, tôr hanga thaun sokla uddki mar, kiteak oxem boroil’lem asa: ‘Tujê vixim To Apleam dutank hovalo ditolo ani tuzo pãi fatracher adllonam zaunk, te apleam hatamnim tuka uklun dhôrtele.’ ” Jezun taka oso zobab dilo: “Oxem-i boroil’lem asa: ‘Sorvespora tujea Devachi tunvem porikxa korum noiê.’ ” Tea uprant Devcharan Taka eka bhov unch dongrar vhelo ani sonvsarantleô soglleô razvottkeô ani tancho dobazo Taka dakhoilim. Tannem mhonn’lem: “Sorpottun tum mhaka nomoskar korxi zalear, hanv hem sogllem tuka ditolom.” Tedna Jezun taka oso portipall kelo: “Pois sor, Soitana, kiteak oxem boroil’lem asa: ‘Sorvespora tujea Devak tum bhôztoloi ani Tachi ekleachich seva kortoloi.’ ” Xekim Devchar Tachê sorxilo koddsorlo ani devdut ieun Tachi seva korunk lagle. Juanvak koidi kelo mhonn aikolea uprant Jezu Galileiak gelo. “Zabu-lonachea ani Neftalichea ganva! Doriachê vatter Jordanachê pelê toddi asto Raxttranche Galileia! Kallokant ravtelea lokan êk vhôdd uzvadd dekhlo: mornnachi savlli poddlelea ganvant ravteleank êk uzvadd udelo.”, oxem Izaias provadean sanglelim him utram pallon ieunche khatir, Nazaret soddun, Zabulonachê ani Neftalichê ximer, doria-deger asto Kapernaumant Tannem tthikann kelem. Tedna thaun Jezu oxem mhonnun updês diunk laglo: “Jivit-mon bôdlat kiteak Sorginchem Raj ieunchem zalem.” Galileiachea Doriachê deger choltana Tannem dogam bhavam, Simanv mhonnlelea Pedruk ani tachea bhava, Andrek doriant pager martale te dekhle; te kharvi asle. Tannem tankam mhonn’lem: “Mhojê pattlean ieiat ani tumkam Hanv mon’xank dhôrtat tosle kharvi kortolom.” Ani rokddech, zallam sanddun, te Tachê pattlean gele. Ani thõi thaun fuddem vochun, anink dusream her dog bhavam Jakoba, Zebedevachea putak ani tachea bhava, Juanvak hoddear, Zebedeva aplea bapaichea sangata apleô rampnni xinvtale te Tannem dekhle, ani tankam apoile. Rokddech, hoddem ani aplea bapaik sanddun, te Tachê pattlean gele. Jezu akhea Galileiant bhonvun-firun tancheam devsthanamnim xikovnn ditalo, Rajeachem Xubhvhortoman porgôtt’talo, ani loka modem sogllea jin’sacho pidda-rôg boro kortalo. Tedna Tachem nanv akhê Siriek gazlem, ani somest vaittakarank, sobar jin’sanchê pidden ani koxttam-dogdamnim vollvollteleank, devchar bosleleank, morluk marteleank ani aren poddleleank Tachê sorxem haddtalim ani Tannem tankam borim kelim. Galileia thaun, Dha Nogranchea Pranta thaun, Jeruzalea thaun, Judeia thaun ani Jordana-poltoddchea Pranta thaun ieun, lokacheô vhodd urponji Tachê pattlean vetaleô. Lokacheô urponji polleun Jezu dongrar choddlo. Thõi To boslo ani Tache xis Tachê sorxem aile. Tedna Aplem tondd ugddun, oxem To tankam xikounk laglo: Otmean apunn gorib mhonn zannant tim subhagi, Sorginchem Raj tanchem. Rudon kortat tim subhagi: Dev tankam buzvônn ditolo. Bholim tim subhagi: prithum’ daiz tanchem. Promannikponnak tanetat ani bhuketat tim subhagi: Dev tankam dhadoxi kortolo. Doiall tim subhagi: Dev tanchi doia kortolo. Kallzan nitoll tim subhagi: tim Devak polletelim. Xanti kortat tim subhagi: Dev tankam Aplim bhurgim mhonntolo. Promanikponna khatir dhumallo sõstat tim subhagi: Sorginchem Raj tanchem. Mhojê khatir tumkam opman’tit, tumkam dhumallo ditit ani sogllea jin’sachem vaitt tumcher add uloitit tedna tumi subhagi. Khuxal ani sontosbhorit zaiat, kiteak sorgar bhov vhoddli mozuri tumchi. Tumchê adim provadeank tosoch tãnnim dhumallo dila. Tumi prithumechem mitt. Punn mittachi kharsann bigòddlea zalear, tem kiteak upartelem? Tem fokot bhair uddounchem ani pãiam tolla mostunchem, anink kiteakuch upkarona. Tumi sonvsaracho uzvadd. Dongrachea mathear bandlelem xar lipon urona. Pailê pondak dhampun dovrunk konnuch ponntti laina; ghorant asto soglleank ticho uzvadd poddunk, ti eka peddar dovortat. Têch porim tumcheô boreô kornneô polleun sorgar asto tumchea Bapak mon’xamnim vakhannchê khatir, tumcho uzvadd tanchê mukhar porzollum-di. Somurt vô Provadi, hankam kaddun uddounk Hanv ailam mhonn tumi somzonakat; tankam kaddun uddounk nhoi, punn sopurnnaiek pavounk Hanv ailam. Khorench tumkam sangtam: sôrg ani sonvsar soro porian ghoddonk zai titlem-i ghòddlea xivai, Somurtintlem ek soglleam-vôn lhan okxor vô okxorank lail’li êk supurli thikli legun na zaunchi na. Mhonntôch, zôr konn heam supurleam adneam bhitorli êk porian môddtit ani toxem korunk herank xikoitit, tankam Dev Sorginchea Rajeant soglleam-vôn lhan mhonn lêkhtolo; punn teô samballtit ani herank xikoitit, tankam Dev Sorginchea Rajeant vhodd mhonn man’tolo. Dekhun Hanv tumkam sangtam: Devak man’ta tem korunk xastream ani Farizevam poros tumi odik raji nant zalear, Sorginchea Rajeant tumi bhitôr sorchinch nant. ‘Jivexim marum noiê’, purvozank oxem sanglelem mhonn tumi aikolam; ani jivexim martit tancher neaisobhechê khastichem formonn poddtelem. Tôr Hanv tumkam sangtam: konn-ui aplea peleacher rag dhôrta zalear, tacher khastichem formonn poddtelem; konn-ui aplea peleak okman kortit zalear, tacher Mha-Dhormsobheche khastichem formonn poddtelem; ani konn-ui taka noxtto mhonntit zalear, ujeachea iemkonddachi khast taka favo zateli. Mhonntôch, tujem dan vedi-xim gheun ietai zalear, ani tujea pelea add kitem-i asa mhonn tuka thõi ugddas zait zalear, thõisoruch vedi mukhar tujem dan toxench sôdd ani poilim vochun tujea pelea lagim somadhan kôr; magir portun ie ani tujem dan bhettoi. Tujea vadea lagim upraslolo tonn’to tachê borabôr vatter astananch borê bhaxen sompoi; na zalear to tuka nitidarachea hatant diit bi, ani nitidar tuka choukidarachea tabeant ghalun bondkhonnint uddoit. Hanv tuka khorench sangtam: tuzo nimanno pav-as’sarion tunvem farik kori-sôr thõisorli tuka suttka mellchich na. ‘Pordvar korum noiê’, oxem sanglelem asa mhonn tumi aikolam. Tôr Hanv tumkam sangtam: zôr konn-ui êkê ostriecher kamcharim dolle ghalit, tannem aplea kallzant tichê kodde pordvar keloch mhonn opradi. Patok adarunk tuzo uzvo dollo tuka oddun vhorta zalear to umttun kadd ani bhair uddoi, kiteak tuji akhi kudd emkonddant uddoun gheunchê poros, tujea ekach sandeacho nas zal’lo tuka odik borem. Ani tuzo uzvo hat patok korunk tuka oddun vhorta zalear, to katôr ani bhair uddoi, kiteak tuji akhi kudd emkonddant gel’lê bodlek, tuzo êkuch sando bigòddlo zalear tuka odik borem. Oxem-i sanglelem asa: ‘Konn-ui aplê potinnik soddun ditolo zalear, poilem tannem tika ghottsfottichem potr boroun diunchem.’ Punn Hanv tumkam sangtam: Somurticher add logn-sombondant jieteleanchi mat gozal kuxin dovrun, zo aplê potinnik soddun dita, to tika pordvarinn zai-xi korta; ani konn ghottsfottichem potr diun sôddlolê bailê kodde logn zait zalear, to pordvar adarta. Anink-ui purvileank sanglelem tumi aikolam: ‘Soput môddum noiê, punn Sorvesporak tunvem dil’leam soputank pallo di.’ Tôr Hanv tumkam sangtam: soput diunchoch nhoi: zaum sorgachean, kiteak Devachem xinvason tem; zaum prithumechean, kiteak Tacheam pãianchi monnoi ti; nhoi mhonn Jeruzaleachean, kiteak Vortea Razachem xar tem. Tujea matheachean-ui soput dium noiê, kiteak tacho êk-ui kens dhovo vô kallo tujean korunk zaina. Tumchem ulovop itlench zaum-di: hôi zalear hôi, nhoi zalear nhoi; hachê-von ogllem tem vaittovea koddlem ieta. ‘Dolleak dollo, dantak dant’: oxem mhonnlelem tumi aikolam. Punn Hanv tumkam sangtam: vaitt mon’xak tum addainaka; konnei tuka uzvea polear marit zalear, dusro-i polo taka dakhoi. Konn tujem angavlem vhorunk neaisobhent vivad korit zalear, taka tuzo jubo-i vhorum-di. Ani konn-ui tuka êk kôs cholunk boll korit zalear, don kos tachê sangatim chol. Tujê kodde magit taka di; ani tujê lagim uxnnem magun gheunk sôdta taka patt vollinaka. Tujea peleacho môg kortoloi ani tujea dusmanacho dvês dhôrtoloi oxem sanglelem tumi aikolam. Punn Hanv tumkam sangtam: Sorgincho tumcho Bap Aplo suria vaitt toxench boream mon’xancher ude-so korta, ani Aplo paus promannik toxench khotteam mon’xancher ghalta dekhun tumi Tachim bhurgim zauncheak, tumcheam dusmanancho môg korat ani tumkam piddapidd diteleam pasot magat; Tumcho môg korteleancho tumi môg korxeat zalear, kosli tumkam mozuri mellot? Dônddvosuldar-ui toxench korinant? Ani tumcheam bhavbhoinninkuch tumi solam’ korxeat zalear, vhodd-xem kitem kelem tumi? Onbhavarti legun oxench kortat ki na? Mhonntôch, zoso tumcho sorgincho Bap sopurnn, toxinch tumi-i sopurnn zaiat. Mon’xank dakhounchea monan Devachê bhokticheô kornneô mon’xam hujir korina zaunk chotrai dhôrat; na zalear, sorgar asto tumchea Bapa-xim koslich mozuri tumkam mellchi na. Dekhun tum bhik ghaltai tedna, tujê mukhar tuturi vazoinaka. Ddhongi devsthanamnim ani rosteancher, apnnank monxam mukhar man mellchê khatir, toxem kortat. Hanv tumkam khorench sangtam: tãnnim apli mozuri ghetli. Punn tum dan ditai tedna, tuzo uzvo hat kitem korta tem tujea davea hatak kollchem nhoi; tujem dan gupit zaunk zai, ani Zo guptim kel’lem polleta, To tumcho Bap tuka mozuri ditolo. Ani tumi magnnem kortat tedna, ddhongeam porim zaum nakat. Lokan apnnank polleunchê khatir, devsthanamnim ani rosteancheam nakeanr ube ravun aplim magnnim korchi tankam motti khuxi. Hanv tumkam khorench sangtam: tãnnim apli mozuri ghetli. Punn tum magnnem kortai tedna, tujea khasgi kuddant bhitôr voch, ani dar dhamplea uprant, thõi guptim asto tumchea Bapak magnnem kôr; ani Zo guptim kel’lem tem polleta, To tumcho Bap tuka inam ditolo. Ani apleam utranchea boddboddak lagun apnnak aikotele mhonn videxi somzotat dekhun Tumi prarthon kortat tedna, videxeam porim portun-portun teach-teach utramnim magnnem korinakat. Hea pasot Bapakodde tumi magche adinch tumkam team vostunchi goroz asa mhunn Bap zanna dekhun tumi tanche porim zaum nakat. Dekhun tumi oxem prarthon korchem: ‘Amchea Bapa sorginchea, Tujem nanv povitr zaum, Tujem Raj ieum, Tuji khuxi sorgar zata toxi sonvsarant zaum. Amcho dispotto giras az amkam di, Ani ami amcher chukleleank bhôgxitanv toxem amchim patkam bhogôs, ani amkam tallnnent poddunk dium naka, punn Vaittakarachea hatantlim amkam nivar.’ Khorench, tumi dusreancheô chuki bhôgxixeat zalear, tumcho sorgincho Bap tumkam-i bhôgxitolo. Punn tumi dusreank bhôgxina zaxeat zalear, tumcho Bap tumcheô-i chuki bhôgxicho na. Tumi upas kortat tedna, ddhongeam bhaxen khontichem rup tumi gheum noiê; apunn upas kortat mhonn lokak dakhounk tim aplea tonddar kallôk ghaltat. Hanv tumkam khoreponnim sangtam: tãnnim apli mozuri ghetli. Punn tum upas kortai tedna, tuzo upas lokak nhoi bogor gupit asto tumchea Bapak dixtti poddchê khatir, tujea matheak tel lai ani tujem tondd dhu; ani Zo guptim kel’lem polleta, To tuzo Bap tuka mozuri ditolo. Sonvsarant tumkam ttheve ektthãi korinakat; thõi sannôs ani kidd te khaun ibadd kortat ani chor fôddtat ani chorun vhortat; punn tumkam ttheve sorgar zomoun dovrat; thõi tancho ibadd korunk sannôs vô kidd na, ani te foddun vhorunk chor-ui nant. Kiteak tuzo tthevo asa thõich tujem kalliz-ui astelem. Kuddicho divo dollo. Mhonntôch tuzo dollo nivôll asot zalear, soglli tuji kudd uzvaddik zateli. Punn tuzo dollo nivôll nasot tôr, soglli tuji kudd kallokant buddteli. Hea pasot, tujê bhitôr asa to uzvadduch kallôk zait zalear, to kallôk kedo vhoddlo zauncho na! Konnacheanuch borabôr dogam dhoniancho gulam zaum nozo; kiteak to ekleak zolltolo ani dusreacho môg kortolo, vô ekleak chikttun ravtolo ani dusreachi beporva kortolo. Tumchean Devache ani borabôr Girestkaieche gulam zaum nozo. Dekhunuch Hanv tumkam sangtam: tumchea jiva khatir kitem khaunchem-pieunchem, vô tumchê kuddi khatir kitem nheschem-pangurchem, tê vixim huskeum nakat. Jevnna poros jiv ani nhesnna poros kudd vorti nhoi? Varea veleam suknneancher nodor marat; tim vompinant, lunvi-i nant ani kodde-i bhorinant; tori tumcho sorgincho Bap tankam pôsta. Tumi tanchê-von odik molachim nhoi tôr? Ani huske kaddun, aplem auk hat-bhôr vaddounk tumchê bhitorlea konnachean zata zait? Ani nhesnnam vixim tumkam dhasti kiteak? Xetantlim fulam koxim vaddtat tem chintun polleiat; tim koxtt korinant, tim sut-ui kaddinant. Tôr Hanv tumkam sangtam: Solomanv legun sogllea aplea dobajeant tantlea eka sarko nheslo na. Tôr az asa ani faleam kaddun ujeant uddoitat tem xetantlem tonn hea jin’san Dev nhesoita zalear, tea-vôn kitlo odik tumkam To nettouncho na, holkea bhavartacheam mon’xamnô? Mhonntôch ‘ami kitem khatelenv? kitem pietelenv? kitem nhestelenv?’, oxem mhonnun huske kaddinakat. Oslea soglleachi vaspus kortat onbhavarti. Tumkam heam soglleam vostunchi goroz mhonn tumcho sorgincho Bap tôr zannoch. Devachem Raj ani tumkam To Apnnak manovlelim korta to bhes tumi poilim sodat ani heo soglleo vostu To tumkam ditolo. Mhonntôch faleachea disa vixim husko kaddinakat, faleacho dis aploch husko kaddtolo. Tea-tea disak tras asat tech puro taka. Dev tumchi nit korina zauncheak, tumi dusreanchi nit kori nakat. kiteak tumi nit korxeat têch toren To tumchi nit kortolo; ani tumi zôkxeat teach mapan To tumkam porot zôktolo. Tujea peleachea dolleant asa tem kisor tum kiteak polletai, ani tujea dolleant asa ti patti tuka dixtti poddona? Tujea dolleant êk patti astana, tujea peleak, tujea dolleantlem kisor mhaka kaddum-di’, oxem tujean koxem mhonnunk zata? Arê ddhongea, tujea dolleantli patti poili kadd, ani magir tujea peleachea dolleantlem kisor kaddunk tuka nivoll dixtti poddtelem. Povitr tem kaddun sunneank ghalinakat; ani tumchim motiam dukranchea fuddeant uddoinakat, kiteak tim ghoddiek pãiam tolla maddoitit ani porot tumchea angar ieun tumche kuddkean’-kuddke kortit. Magat ani tumkam melltelem; sôdat ani tumkam gavtelem; darar marat ani tem tumkam ugòddtelem kiteak magtat tankam mellta, sôdtat tankam gavta; ani darar martat tankam tem ugòddtolem. Aplea putan unddo magit zalear taka fatôr kaddun dita toslo konn monis tumchê modem asa zait? Ani maslli magit zalear, to taka sorôp kaddun ditolo? Tumi vaittovim zaun-ui, tumcheam bhurgeank boreô vostu diunk tumi zannont zalear, kitlo odik tumcho sorgincho Bap Apnna lagim magtat tankam boreô vostu diuncho na? Mhonntôch, dusreamnim tumchê thãi korchem mhonn tumkam zai, toxench tumi-i dusream thãi korat: Somurt ani Provadi xikoitat tem hench. Oxir darvontteantlean bhitôr sorat, kiteak ghorttannak pavoita to darvontto rund ani to marôg viskôll, ani tantlean veta to lôk puskôll. Punn jivitak pavoita to darvontto kitlo mhonn oxir ani to marôg kitlo mhonn kotthin! Ani bhov thoddeank to mellta. Fottkiream provadeam vixim chotraien ravat; menddreanchem rupnnem gheun tumchê-xim ietat, punn bhitorlean krur landdge te. Tanchim follam polleun tumi tankam ollkhun kaddtelet. Kanttiancheô konnem dakô kaddleat zait? Ani sorantteanchim konnem anjiram kaddlim-xim asat? Têch bhaxen, borem zhadd borim follam dita ani vaitt zhadd vaitt follam dita. Borea zhaddachean vaitt follam dium nozo, nhoi mhonn vaitt zhaddachean borim follam dium nozo. Borem foll dinam toslem zhadd katortat ani ujeant uddoitat. Dekhun tanchim follam polleun tumi tankam ollkhun kaddtelet. Mhaka ‘Somia, Somia!’ mhonn’tat tim sogllinch Sorgarajeant bhitôr sorchim nant punn fokot sorgar asto Mhojea Bapachi khuxi kortat tinch Sorgarajeant bhitôr sortelim. To Dis ietôch sobar zanna Mhaka mhonntelim: ‘Somia, Somia, Tuzo sondêx ami porgôttlo, nhoi? Ani Tujea Nanvan ami devchar kaddle, nhoi? Ani Tujea Nanvan sobar vismitam ami kelim, nhoi? Ani tednam Hanv tanchea tonddar martolom: ‘Khotteponn korteleamnô, Mhojê sorxilim koddsorat, kiteak Hanvem tumkam kednanch ollkhunk nant.’ Dekhun, him Mhojim utram aikotat ani tanchê pormannem choltat tim aplem ghor khoddpar bandlelea eka xannea mon’xa porim hanv taka dortam. Paus poddlo, udkache lott aile, vadoll suttlem ani tea ghorar marlem, tori tem mòddlem na, kiteak tem khoddpar bandlelem. Punn him Mhojim utram aikun, tanchê pormannem cholonant tim aplem ghor renver bandlelea eka pisatt mon’xa sarkim. Paus poddlo, udkache lott aile, vadoll suttlem ani tea ghorar marlem, ani tem mòddlem, ani tachem sarkem ghorttann zalem! Jezun Aplem ulovop sompoilem ani Tachi xikovnn aikun lôk zobôr ojap zatalo, kiteak tancheam xastream bhaxen nhoi, punn odhikaran To tankam xikovnn ditalo. Dongra velo denvlea uprant, lokacheô urponji Tachê pattlean geleô. Ovchituch eka koddkaran lagim sorun Taka nomoskar kelo, ani mhonn’lem: “Saiba, Tuka zai zalear, Tujean mhaka nitôll korunk zata.” Jezun Aplo hat vistarun taka lailo ani mhonn’lem: “Hôi, Mhaka zai: nitôll za.” Ani teach vellar to koddantlo nitôll zalo. Tedna Jezun taka sanglem: “Polle, hem konnakuch sangi naka, punn voch ani tujem ang iadnikak dakhoi ani tankam ek govai koxi Moizesan formailelem dan bhettoi. Jezu Kapernaumant bhitôr sorlea uprant êk xotpoti upkar magunk Tachê sorxem ailo; Tannem mhonn’lem:” Saiba, mhozo chakôr ghorant aren poddlolo asa ani ekdomuch vollvollta.” Jezun taka mhonn’lem: “Hanv ietam ani taka boro kortam.” Portipallun xotpotin mhonn’lem: “Saiba, tunvem mhojea ghora ieunk mhaka favonam; ek utor mat uloi ani mhozo chakôr boro zatolo. Tôr hanv-ui dusreachea hata khal asam ani mhojê-i khal xipai asat; ani tantlea ekleak hanv sangtam: ‘Voch!’, ani to veta; dusreak: ‘Ie!’, ani to ieta; mhojea chakrak: ‘Omkem kôr!’, ani to korta.” Hem aikun Jezu ekdom’ ojap zalo ani Apnna pattlean ieteleank Tannem mhonn’lem: “Hanv tumkam khorench sangtam, iedo vhoddlo bhavart mhaka Israelant pasun mellunk na. Hanv tumkam anink ek sangtam: Udenti ani Ostomtê thaun zaitim zonnam ietelim ani Abrahama’, Izaka ani Jakoba sangata Sorginchea Rajeant jevnnak bostelim, punn razacheam putam-dhuvank Dev bhailea kallokant uddoitolo; thõi tim rudon korun ani dant korkoraun astelim.” Ani Jezun xotpotik mhonn’lem: “Tum voch, apleak zatelem mhonn tunvem bhavart dhôrloi toxem tuka zaum-di.” Ani teach vellar chakôr boro zalo. Ani Pedruger vochun, tachê sasuk zoran antrunnar poddloli Jezun dekhli; Tannem tichea hatak dhorina fuddem ticho zôr poddlo ani utthun ti Tacho poramôs korunk lagli. Sanz zatôch devchar bosleleam zaiteam zannank Tachê sorxem haddlim; Izaias provadean oxem sanglelem, Tannem amche velo pidda-rôg ubarlo ani amcheô boll’llikô apnnacher ghetleô”, tem pallon ieuncheak Tannem eka utran devchar kaddle ani soglleam vaittakarank borim kelim. Apnna bhonvtonnim lokachi khêtt polleun, Jezun doriachê pelê toddi vochunk lailem. Eka dhormxastrean lagim sorun Taka mhonn’lem: “Guruji, tum vexi thõi hanv Tujê pattlean ietolom.” Ani Jezun taka sanglem: “Koleank dholi asat ani varea veleam suknneank nhidunk zage asat, punn Mon’xachea Putak Apli tokli tenkounk khõisoruch svat na.” Tacheam xisantlea anink eklean Taka mhonn’lem: “Poilim mhaka vochun mhojea bapaik matiek lavum-di.” Jezun taka sanglem: “Tum Mhojê pattlean ie, ani meleant tannnim apleam mel’leank matiek lavum-di.” Tedna Jezu eka hoddear choddlo; Tache xis-ui Tachê pattlean gele. Ani ovchituch doriant itlem khor ek tufan upraslem, ki lharam hoddea voir pavtalim. Punn To nhidlolo aslo. Lagim sorun Tacheam xisamnim Taka zago kelo ani mhonn’lem: “Amkam vattai, Saiba, ami mortanv!” Ani Tannem mhonn’lem: “Tumi itle bhezudd kiteak? Itlo holko tumcho bhavart?” Magir utthun Tannem vareak ani doriak bexttaile ani ekdom’ thonddai zali. Te ojap zale ani mhonnunk lagle: “Ho varo ani ho doria pasun aikotat tem, kosle torecho monis ho!’ Gadara prantant, doriachê pelê toddi To ailea uprant, somadhintle bhair sorto, devchar boslele, dog monis Taka mell’le; itle marekar te asle, ki konnacheanunch tê vatten vochunk zainaslem. Ani ovchituch te bob marunk lagle: “Jezu, Devachea Puta, Tuka amchê kodde koslem kam’ asa? Vêll pavchê adinch amkam vollvollaunk ailai kitem?” Te aslele thõi thaun matxe pelean dukrancho êk vhoddlo hindd chortalo, Mhonn’toch devchar Jezu lagim oxem prarthun magunk lagle: “Hangasorle amkam bhair ghaltai zalear, hinddantleam dukram bhitor vochun rigunk amkam rojea di.” Ani Tannem tankam mhonn’lem: “Vochat!” Ani te bhair sorun dukram bhitôr vochun rigle; ani ovchit sogllo hindd kollsa velean nettan doriant dhanvun gelo ani udkant buddon melo. Rakhnne pollun gele ani nogrant vochun, devchar bosleleank kitem ghòddlelem tem soit sogllem tãnnim kollit kelem. Ovchit nograntlo sogllo lôk Jezuk mellunk bhair sorun ailo, ani, Taka pollenam fuddem, aplea ganva bhair voch mhonn Tachê lagim magunk laglo. Hea pasot hoddear bosun Tannem poltôdd marli ani To khud’Aplea nogrant ailo. Ani tednanch kai zonnamnim antrunnar poddlelea eka arkarak Jezu-xim haddlo; tancho bhavart polleun, Jezun arkarak mhonn’lem: “Dhir dhôr, puta, tujim patkam tuka bhògxileant.” Hem aikun thoddeam xastreamnim apnnam bhitôr mhonn’lem: “Ho monis devninda korta!” Tanchim chintnam ollkhun, Jezun mhonn’lem: “Tumchea monant vaitt kiteak chint’tat tumi? Tôr heam donantlem khõichem mhonnunk odik sompem: ‘Tujim patkam tuka bhògxileant!’, oxem mhonnunk, vô ‘utth ani chollunk lag!’, oxem mhonnunk? Punn Mon’xachea Putak sonvsarant patkam bhogsunchi podvi asa mhonn tumkam kollon ieunchê khatir — Tannem arkarak mhonn’lem: — “Utth, tujem antrunn ukôl ani ghora voch.” Ani to utthlo ani aplea ghora gelo. Hem polleun lôk bhielo ani mon’xank osli podvi dilea dekhun Devak tãnnim vakhann’lo. Ani thõicho cholot vetana, manddvir boslelea, Matêv nanvachea, eka mon’xak Jezun dekhlo, ani taka mhonn’lem: “Mhojê pattlean ie.” Ani to utthun Tachê pattlean gelo. To ghorant jevnnak boslolo astana, sobar dônddvosuldar ani vaitt chaliche monis aile ani Jezuchea ani Tacheam xisam sangata jevnnak bosle. Hem polleun Farizevamnim Tacheam xisank mhonn’lem: “Dônddvosuldaram ani vaittoveam sangatim tumcho Guru jevnnak bosta tem kitem?” Hem aikun Jezun zobab dilo: “Borim asat tankam nhoi, punn vaittakarank ki voizachi goroz. Vochat ani heam utrancho ôrth konn to xikat: ‘Iôdn naka Mhaka, doia zai.’ Khorench sangtam, tumi apnnank promannik mhonn dhôrtat tankam nhoi, punn konn apnnank patki mhonn lêkhtat tankam apounk Hanv ailam.” Juanvache xis Jezu sorxem aile ani tãnnim vicharlem: “Ami ani Farizev upas kortanv, punn tuje xis upas korinant tem koxem?” Ani Jezun tankam sanglem: “Apnnam borabôr novro aso-sôr, novreache pavnne dukhant asunk zata zait? Punn novreak tanchê sorxilo kaddun vhorcho vêll pavtolo ani tedna te upas kortele. Pornnea vostrak konnuch anvllonk naslelea novea lugttacho kopo marinam, kiteak to vostra thaun oddon bhair sorta ani fallo odik vhoddlo zata. Nhoi mhonn novo soro pornneam cham-bddeam-potiamnim bhorinant; bhôrlo zalear, chambddeam-potio futt’tat, soro vhanvun veta ani chambddeam-potiancho-i ibadd zata. Na, novo soro noveam chambddeam-potiamnim bhôrtat ani don-ui samballon urtat.” Oxem To tanchê kodde uloita thõich astana, ovchit êk odhikari ailo ani Tacheam pãiam poddun tannem mhonn’lem: “Saiba, mhoji dhuv atanch melea; punn Tum ie ani ticher Tuzo hat dovor ani ti porot jivi zateli.” Jezu utthlo ani Apleam xisank gheun tachê pattlean gelo. Okosmat bara vorsam rogtpat zal’li êk bail Tachê pattlean aili ani Tachea avoronnachê degek tinnem hat lailo; kiteak ti apleach monant mhonntali: “Tachea avoronnak tori hanv hat lain zalear, hanv borim zatelim.” Pattim vollon ani ticher nodor marun Jezun mhonn’lem: “Dhir dhôr, dhuvê, tujea bhavartan tuka bori keli.” Ani têch ghoddiê thaun ti bail bori zali. Tea odhikariachea ghora pavlea uprant, vennu vazoitale ani lôk goddbôdd kortalo tem polleun, Jezun mhonn’lem:” Bhair sorat; cheddum morunk na, tem nhidlam.” Ani tim Taka kenddtalim. Punn lokak bhair ghaltôch, bhitôr vochun Tannem cheddvachea hatak dhôrlo, ani tem utthun ubem ravlem. Hi khobor tea akhea prantant gazli. Thõisorlo Jezu fuddem vetalo tedna,”Davidachea Puta, amchi kaklut kôr!”,oxi bob marit dog kurdd’de Tachê pattlean aile. Ani To ghora pavtôch, te kurdd’de Tachê sorxim aile ani Jezun tankam mhonn’lem: “Hem Mhojean tumkam korunk zata mhonn tumkam bhavart asa?” Tãnnim mhonn’lem: “Hôi, Saiba.” Tedna tancheam dolleank Tannem hat lailo ani mhonn’lem: “Tumchea bhavarta pormannem tumkam zaum-di.” Ani tanche dolle ugòddle. Ani Tannem tankam khoraien sanglem: “Khoborddar, hem konnakuch gomchem nhoi.” Punn vochun tea akhea prantant tãnnim Tachem nanv gazoilem. Te vochona fuddem ovchit devchar boslelea eka moneak Tachê sorxem gheun ailim; ani devchar kaddtôch mono uloilo, ani lokan ojap zaun mhonn’lem: “Israelant oslem kednanch konnench dekhunk na. Punn Farizev mhonnunk lagle: “Ho monis devcharanchea pordhana udexim devchar kaddta.” Tedna lokam modli soglli pidda-rog boro korit, Rajeachi bori khobor porgottit ani tancheam devosthanamnim xikovnn diit Jezu soglleam nogram-ganvamnim gelo. Ani lokacheô urponji polleun, teo gonvlli nasleleam menddram porim teô dogdovtaleô ani niradari zal’leô asleô dekhun tanchê vixim To churchurtalo. Tedna Tannem apleam xisank mhonn’lem: “Pik khorench khup, punn vavraddi thodde; hea pasot pikechea Dhonia lagim aple lunvnnê-môllnnek vavraddi dhadd mhonn magat.” Apleam bara xisank apoun haddun, Jezun tankam mhelleam atmeancher odhikar dilo ani devchar kaddunk ani sogllea jin’sacho pidda-rôg boro korunk tankam podvi dili. Bara Apostlanchim nanvam him: poilo Simanv (Pedru mhonntat to) ani tacho bhav Andre; Zebedevacho put Jakob ani tacho bhav Juanv; Filip ani Bartolomêv; Tomas ani dônddvosuldar Matêv; Alfevacho put Jakob, ani Tadêv; Krantikar Simanv, ani Tacho ghat ghetlo to Judas Iskariot. Heam bara zannank Jezun oso updês diun dhaddle: “Onbhavarteancheam ganvanchi vatt dhorinakat ani Samariekarancheam nogramnim bhitôr soronakat; punn odik korun Israelacheam Ghoranneacheam sanddleleam menddram sorxem vochat. Ani vochun ‘Sorginchem Raj ieunchem zalem!’, oxem porgott korat. Vaittakarank borim korat, mel’leank jivont korat, koddkarank nitoll korat, devchar kaddat. Tumi funkott ghetlam, funkea diat. Tumchê kodde bhangar, rupem, tambem legun potient aschem nhoi; nhoi mhonn vattek bhuti, vô don angavlim, vô vhannô, vô danddo; kiteak vavraddeak aplem jevonn-khann favo. Khõichea eka nogrant vô ganvant bhitôr sortôch, tantum konn mannsugecho monis asa to sodun kaddat ani thõisorle bhair soro-sôr tanger ravat. Tachea ghorant bhitôr sortana, ‘hea ghorak xanti!’, oxem mhonnun taka noman korat. Ani tea ghorak favo zalear, tumchi xanti tacher denvteli; favo nhoi zalear, tumchi xanti tumkam porot ieteli. Ani konn-ui tumkam ievkar dinam zatit zalear, nhoi mhonn tumchim utram aikonam zatit zalear, tea ghorantle vô nograntle bhair sorun tumcheam pãianchi dhull fafddun uddoiat. Hanv tumkam khorench sangtam: Zhôddtechea disa Sodom’ ani Gomorra nogranchi zhôddti hea nograchê zhôddtê itli khôr zaunchi na. Aikat! Landdgeam modem menddram koxim Hanv tumkam dhaddtam. Hea pasot sorpam porim chotur, tori parveam porim sadim zaiat. Mon’xam thãi xidduk ravat; tim tumkam dhorun dhormsobhent vhortelim ani apleam devsthanamnim tumkam jerbond martelim. Mhojê pasot odhikaream ani razam mukhar, tanchea ani onbhavarteanchea fuddeant tumi govai diunchê khatir, tumkam vhortelim. Punn tumkam dhorun ditôch, tê ghoddier tumi kitem ulounchem tem, Dev tumkam kolloitolo kiteak uloitat tim tumi nhoi, punn tumchê udexim uloita To, tumchea Bapacho Atmo To, te khatir koxem ani kitem ulounchem te vixim husko kaddinakat Jivexim marunk bhav-bhoinn, bhavam-bhoinnink ani avoi-bapui putam—dhuvank lavun ditelim; bhurgim avoibapaicher uprasun tancho prann kaddunk laitelim. Mhojea nanva pasot sogllo lôk tumcho dvês kortolo; punn xevottak porian thir ravtit tanchench taronn zatelem. Mon’xacho Put ieunchê fuddem Israelachim nogram tumi bhonvun sarchinant nant mhonn Hanv tumkam khorench sangtam dekhun, eka nogrant tumkam dhumallo ditit zalear, dusrea nogrant pollun vochat. Aplea guru poros xis ani aplea dhonia poros chakôr vorto nhoi; xis aplea guru sarko, ani chakôr aplea dhonia sarko zaunk puro! Ghorabeachea dhoniak Beelzebul mhonnla zalear, tacheam ghorcheank tea-vôn anink kitem mhonnchim nant! Tea pasot kitench dhamplelem asa tem ugttem zainastana urchem na ani liplelem asa tem kollo nastana urchem na dekhun tankam bhie nakat. Hanv tumkam kallokant sangtam tem tumi disa-uzvadda sangat; ani kanant futfutlelem tumi aikolam tem pattsar thaun porgott korat. Kuddicho jiv kaddtat punn jiv-prannacho nas korunk zaina tankam bhienakat, punn emkonddant kudd ani jiv-prannacho ekach farak nas korunk xokti asa Taka odik bhieiat. Eka as’sarionak don xerkam viktat nhoi? Toripunn tantlem ek-ui tumchea Bapachea hukume virêt bhi poddona. Tumchê tokleche kens porian soglle mêzlele asat. Mhonntôch tumi bhienakat. Xerkanchea bhirea poros tumi odik vortim. Hea pasot konn-ui Mhaka mon’xam hujir ollkhun ghetit zalear, tankam sorgar asto Mhojea Bapa hujir Hanv-ui ollkhun ghetolom; punn mon’xam hujir konn-ui Mhaka ollkhun ghenam zatit tôr, tankam sorgar asto Mhojea Bapa hujir Hanv-ui ollkhun gheuncho na. Hanv prithumecher xanti haddunk ailam mhonn somzo nakat; xanti nhoi, punn torvar haddunk Hanv ailam; karann putak tachea bapaicher add, dhuvek tichê avoicher add, sunek tichê sasucher add doxim korunk Hanv ailam; eka mon’xache dusman tachoch ghorcho lôk. Mhojê-vôn aplea bapaicho vô avoicho odik môg kortat tim Mhaka laik nhoi; Mhojê-vôn aplea putacho vô dhuvecho odik môg kortat tim Mhaka iukt nhoi; aplo khuris gheun Mhojê pattlean ienant tim Mhaka purtim nhoi. Aplo jiv samballunk sôdtat tim aplo jiv hogddaitelim, ani Mhojê pasot aplo jiv hogddaitat tankam aplo jiv melltolo. Tumkam ievkar ditat tim Mhaka ievkar ditat, ani Mhaka ievkar ditat tim Mhaka dhaddla Taka ievkar ditat. Eka provadeak, to provadi mhonn, svagôt kortat tim provadeacho inam ghetelim; ani promannik eka mon’xak, to promannik mhonn svagôt kortat tim promannik mon’xacho inam ghetelim. Hanv tumkam sot sangtam: heam lhanantlea ekleak, to Mhozo xis mhonn, thondd udkacho êk pelo legun konnem pieunk dilo zalear, tankam koxei toren aplo inam mellonastana urcho na.” Apleam Bara Xisank updês diun sompoilea uprant, Jezu tancheam heram nogramnim xikovnn diunk ani provochon korunk thõi thaun vochunk bhair sorlo. Tedna, Kristacheam kornneanchi khobor bondkhonnint aikun, Juanvan Tachê kodde oxem vicharunk apleam xisank dhaddle: “Ieuncho asa to tunch to, vô ami dusrea konnachi vatt polleunchi?” Jezun tankam oso zobab dilo: “Tumi aikolam ani dekhlam tem vochun Juanvak sangat: kurdd’dim polleunk lagtat, thonttim choltat, koddkaram nitoll zatat, bherim aikotat, melelim jivim zatat, goribank bori khobor porgott zata; ani Mhojê vixim zancho bhavart halonam tim mon’xam bhagi.” Te niropi thõisorle vetanam, Juanva vixim Jezu urponjik mhonnunk laglo: “Tumi kitem mhonn polleunk oronneant gel’leat? Varean halta tosli bet? Na tôr, kitem mhonn tumi polleunk gel’leat? Nazuk-mov vostram neslolo monis? Na; nazuk-mov vostram nestat tim razvadde-amnim astat. Tôr kiteak mhonn polleunk gel’leat tumi? Eka provadeak polleunk? Hôi, ani to provadea-vôn vorto mhonn Hanv tumkam sangtam. ‘Ho polle tujê mukhar Hanv Mhojea dutak dhaddtam ani to tuji vatt tujê fuddem toiar kortolo’, oxem mhonn zachê vixim boroilelem asa to hoch to. Hanv tumkam khorench sangtam: bailank zolmol’leam bhurgeam bhitôr Juanva Batista poros vhôdd dusro konn zolmunk na; toripunn Sorginchea Rajeant odik lhan tim tachê-von vhodd. Juanv Batist aila tedna thaun tem az porian Sorginchem Raj nêtt bhôgta, ani nêtt kortat tim tem zhombun ghetat. Soglleam provadeamnim ani Somurtin Juanv ieit porian bhakit kelem. Ani tem mandun gheunk tumkam khoxi asot zalear,ieuncho asa to Elija hoch to. Aikunk kan asat tãnnim aikunchem. He atanche pinddkek konnak mhonn Hanvem sôr korchi? Ttinttear bosun asleleam apleam boraborcheank oso ulo marto bhurgeam porim ti: ‘Ami tumkam nachpachim songitam vennuncher vazoilim, punn tumi nachunk nant’; ‘ami tumkam vilapachim gitam gailim, punn tumi roddunk nant.’ Tôr Juanv jevonn toxem pivonn chakinastanam ailo, ani lôk mhonnta: ‘Tacher devchar bosla.’ Mon’xacho Put khaun-pieun ailo, ani lôk mhonnta: ‘Ho asa pottio ani bebdo, dônddvosul-darancho ani patkeancho ixtt.’ Tori Devachê zannvaiecheo kornneo tika sakxi ditat.” Magir, zõi-zõi Apnnem ogllim vismitam kel’lim, team nogrank, tãnnim jivit-mon bodôl’lem na dekhun, Jezu oso bexttaunk laglo: “Korazin, tujem kotta! Bethsaidê, tujem kotta! Tôr tumchê modem kel’lim vismitam Tir ani Sidon nogramnim kel’lim zalear, kedna tim sakafottem ani gobôr ghalun prachit korto aslim! Hanv tumkam khorench sangtam: Zhôddtechea Disa Tirachi ani Sidon’chi zhôddti tumchê-itli khôr zaunchi na. Ani tum Kapernauma, voir mollba porian tum ubaron pavtoli mhonn ravtai kitem? Emkondda porian tum sokla xevttotoli, kiteak tujê sovem keleant tim vismitam Sodomant kel’lim zalear, az porian tem ubem urto aslem. Hanv tumkam khorench sangtam: Zhôddtechea Disa, Sodomachi zhôddti tujê-itli khôr zaunchi na.” Tedna Jezu oso udgarlo: “Bapa, sorga ani prithumechea Dhonia, heô vostu zannarank ani xanneank lipoun dovorleôi ani supurleam ballkank ugteô keleôi mhonn Hanv Tuka dhin’vastam. Hôi, Bapa, oxench korunk Tuka borem dislem. Sogllem Mhojea Bapan Mhojea hatant dilam. Ani Putak konnuch ollkhona, bogor ekloch Bap; toxench Bapak konnuch ollkhona, bogor ekloch Put ani zankam Put Aplê khuxen Bap dakhoun diit, tinch mon’xam. Sogllim tumi koxtt kortat ani ojeachea bhara khal asat tim, Mhojê-xim ieiat ani Hanv tumkam somadhan kortolom. Mhojem zum tumcher gheiat ani Mhojê lagim xikat, kiteak Hanv dulôb ani lhan’vik kallzacho, ani tumchea jivak somadhan melltelem; tôr Mhojem zum gheunk sompem, ani hollu Mhojem ojem.” Team disamnimn, eka Sabbatha disa, Jezu xetantlean vetalo. Tache xis bhukel’le dekhun konnsam toddun khaunk lagle. Farizevamnim tem polleun Taka mhonn’lem: “Sabbatha disa korum nozo toslem kam’ he polle Tuje xis kortat.” Punn Tannem tankam sanglem: “Davidak ani tacheam sangateank bhuk lagli tedna, tannem kitem kelem tem tumi vachunk na kitem? Mhonngê, koxê bhaxen to Devachea ghorant bhitôr sorlo ani taka ani tacheam boraborcheank khaunk sot’tea nasli punn fokot iadnikamnim khavum-ietale te Devak bhettoilele undde tãnnim khele — hem tumi vachunk na kitem? Vô Sabbatha disa iadnik Devmondirant Sabbath môddtat, torui guneanvkar zainant, hem-i tumi Somurtint vachunk na bi? Tôr Hanv tumkam sangtam: Devmondira-vôn vhôdd Konn-Eklo hanga asa. ‘Iôdn naka Mhaka, doia zai’, heam utrancho ôrth tumi zanno asleat zalear, kednanch niropradi mon’xank tumi guneanvkar korche nasleat. Tôr Mon’xachea Putak Sabbathacher-ui odhikar asa.” Thõi thaun To fuddem gelo ani tanchea devsthanant bhitôr sorlo. Ani zalem oxem: hatak ar zal’lo êk monis thõisôr aslo. Jezucher koslo-i êk guneanv ghalunk mellot kai mhonn polleunk, “Sabbatha disa konnak boro korum-ieta?”, oxem tãnnim Tachê kodde vicharlem. Tannem tankam sanglem: “Tumchê bhitôr konn-eklea kodde êk menddro asot ani to Sabbatha disa eke khonddint poddot zalear, to taka dhorun bhair kaddcho na kai? Menddrea poros monis kitlo mhonn vorto! Mhonntôch Sabbatha disa borem korum-ieta, oxem zalem.” Magir Tannem tea mon’xak mhonn’lem: “Tuzo hat sôdd.” Ani tannem to sôddlo; ani tachea dusrea hata bhaxen to adim aslo toso sarko boro zalo. Tedna te Farizev thõisorle bhair sorle ani Jezucho ghat koso gheuncho tê vixim guddmêll korunk lagle. Punn tem somzun To thõisorlo koddsorlo. Zaitim zannam Tachê pattlean gelim ani tankam soglleank Tannem borim kelim, punn Apnnak porgôtt korinakat mhonn Tannem tankam xiddkailim. Izaias provadean sanglelem tem oxem khorem zalem: “Polleiat, Hanvem vinvchun kaddla To, Mhozo Sevok Ho, To Mhojê opurbaiecho! Tacher purnn sontôs Mhozo! To Mhojem taronn sorv raxttrank porgott korunk, Hanv taka Mhojea Atmean bhôrtolom. Vad-vivad to korcho na, bob marun ardduncho na, tacho tallo rosteancher konnak aikunk ieuncho na. Sotak zoit mellot porian futtloli bet môddcho na, ozun dhunvorto vat to kodinch palouncho na. Tachea Nanvar sogllim raxttram aplo bhorvanso dovortelim!” Tedna devchar boslolea eka kurddea-moneak Jezu sorxem haddlo ani Tannem taka boro kelo; ani to ulounk ani polleunk laglo. Sogllo lôk thottakun mhonntalo: “Davidacho Put zait kai Ho?” Punn Farizevamnim hem aikun mhonn’lem: “Ho monis devchar kaddta to, fokot devcharanchea pordhana Beelzebulachea odhikaran kadd’ta.” Tanchim chint’nam ollkhun Jezun tankam mhonn’lem: “Khõichea-i eka rajea bhitôr nagrikanche pongodd ekamekacher uprasun zhuz korunk lagle zalear, tem raj padd zatelem; ani khõichea-i eka xarantlea loka modem vô eka kuttumbantleam vangddeam modem zhogddim-zhuzam upraslear, tem xar vô tem kuttumb ubem dhòrchem na. Soitanachea rajeant-ui ekamekacher zhuztele pongodd astit zalear, tem raj fantton gelem, oxem zalem. Tôr tem anink koxem mhonn ubem urtelem? Ani zôr Hanv Beelzebulachê podven devchar kaddtam, tumchim bhurgim konnachê podven kaddtat tôr? Mhonntôch tinch tumchi nit kortelim. Punn Hanv Devachea Atmea udexim devchar kaddtam zalear, Devachem Raj tumchê thãi pavlem, oxem zalem. Tea bhair, bollixtt mon’xak poilo bandlea bogor, tachea ghorant bhitôr sorun tacho mal luttunk zait? Taka bandlear mat tachem ghor luttunk zata. Mhojea bhaga nant tim Mhojer add; ani Mhojê borabôr punzainant tim ximpddaitat. Hea pasot Hanv tumkam sangtam: sogllim patkam ani devninda Dev mon’xank bhôgxitolo, punn Atmeacher kel’li devninda Dev bhôgxicho na. Ani konn-ui Mon’xachea Putacher vaitt uloitit zalear, tankam Devachem bhogsonnem astelem; punn konn Povitr Atmeacher add uloitit zalear, tankam bhogsonnem aschem na, zaum atanchea zaum fuddlea kallant Zhadd borem korat ani tachim follam borim zatelim; zhadd vaitt korat ani tachim follam vaitt zatelim, kiteak follam pormannem zhadd ollkhunk mellta. Furxeancheam pileamnô, tumi vaitt zaun tumchean borem ulounk koxem zatelem? Kallzantlem bhoron òt’ta tench tonddantleam utramnim vhanvta. Borim mon’xam aplea borea bhanddarantlem borem kaddtat; vaitt mon’xam aplea vaitt bhanddarantlem vaitt kaddtat. Hea pasot Hanv tumkam sangtam: mon’xachea tonddantlem bhair sorta tea dor-eka sabsubea utracho Zhôddtechea Disa hixôb diuncho poddtolo. Tujeanch utramnim tum niropradi mhonn ruzu zatelem, ani tujeanch utramnim tum opradi mhonn tujer xikxechem formonn poddtelem.” Tedna dhormxastream ani Farizevantleam kãi zannamnim Tachê kodde uloun mhonn’lem: “Guruji, Tujê koddli amkam êk khunna polleunk zai.” Tannem oxi zap dili: “Hi atanchi khotti ani ghatki pinddka êk khunna sôdta. Punn, Jonas provadeachi khunna kaddun, Dev tika dusri khunna diuncho na; mhonngê, zoso Jonas tin dis ani tin rati tivmaxeachea pottant aslo, tosoch Mon’xacho Put tin dis ani tin rati zomnichea pottant astolo. Zhôddtechea Disa Ninivecho lôk hê pinddkê borabôr ubo zatolo ani ticho guneanv dakhoun ditolo, kiteak Jonasachem provochon aikun tannem aplem jivit-mon bodôl’lem; ani polleiat, Jonasa poros vorto hanga asa Eklo. Zhôddtechea Disa Dokhinnechi ranni hê pinddkê borabôr ubi zateli ani ticho guneanv dakhoun diteli, kiteak ti prithumechê ximer thaun Solomanvachem xanneponn aikunk ail’li; ani polleiat, Solomanva poros vorto hanga asa Eklo.” “Mhello atmo mon’xa velo bhair sortôch sukea soddear visôv sodit bhonvta, punn taka visôv mellonam. Tedna to mhonnta: ‘Bhair sorlolom tea mhojea ghorant porot rigtolom hanv.’ Ani thõi ie zalear, tem ritem, zhaddlelem ani nettoilelem taka mellta; tedna vochun, apnna-vôn odik noxtte anink sat atme apnna borabôr gheun ieta; ani bhitôr rigun, thõi to aplem tthikann korta, ani tea mon’xachi magirli doxa adlê goti poros paxtt zata. Hê khottê pinddkek-ui toxench ghòddtelem.” Oxem To loka kodde uloita thõich astana, ovchit Tachi avoi ani Tache bhav pavun sorlim ani bhair ubim ravun Tachê kodde ulounk sôdtalim. Punn Apnnak ti khobor ditelea lagim uloun, Jezun oxem mhonn’lem: “Mhoji avoi konn? Mhoje bhav konn?” Ani Apleam xisank hat dakhoun Tannem mhonn’lem: “Him asat Mhoji avoi ani Mhoje bhav; karonn sorgar asto Mhojea Bapachi khuxi kortat titlim-i Mhozo bhav, Mhoji bhoinn ani Mhoji avoi.” Teach disa Jezu ghorantlo bhair sorun doriachê dhodder vochun boslo; punn lokache itle vhodd zome Tachê sorxem aile, ki To eka hoddear choddun boslo ani sogllo lôk dhodder ravlo. Ani tanchekodde uloun, Tannem tankam sobar vostu voparimnim sangleô. Tannem mhonn’lem: “Polleiat, konn-eklo vomp’pi vompunk gelo. Vomptanam thoddem bim vatte-deger poddlem ani suknnim ailim ani tãnnim tem khelem. Biak zobor mati nasli te koddpi-zomnir thoddem poddlem; te matiek kholai na zaun tem rokddench kirlolem. thõi chôdd-xi mati nasli; ani matiechi kholai nasli dekhun, tem rokddench kirlolem khorem, punn vot khor zatôch ulpolem, ani pallam na zaun suklem. Her kantteam modem poddlem, ani kantte vadd’toch taka chepun dhôrlem. Her borê zomnir poddlem ani pik zalem: ekak xembhôr, dusreak satth, ani tisreak tis. Kan asleleamnim aikunchem.” Tedna xisamnim lagim sorun Taka vicharlem: “Voparimnim tanchê kodde kiteak uloitai?” Tannem portipall kelo: “Kiteak Sorginchea Rajeache gutt ollkhunchem dennem tumkam dil’lem asa; team herank na. Asa tankam Dev anink-ui ditolo ani tanchem map bhoron òt’telem; punn na tankam, asa tem porian tanchê koddlem Dev kaddun ghetolo. Hea pasot Hanv tanchê kodde voparimnim uloitam, kiteak polleun-ui tankam disona, ani aikun-ui tim chit dinant nhoi mhonn somzo-i nant. Adinch Izaiasan oxem sanglolem:dolleamnim tankam disona zanucheak, kanamnim tankam sarkem aikunk mellona zaunche khatir, monan tankam somzona zauncheak, ani, tim Mhojê-xim portun ieun, Hanvem tankam borim korina zaunche khatir. ’hea lokachem kalliz zodd-nibor zalam, tanche kan bhere zaleat, ani tannim aple dolle dhampleat’, tea pasot Aikun-aikun tumkam kãi somzochem na polleun-polleun tumkam kãi dischem na.’, tem tanchê sovem pallon ieta. Punn polletat dekhun, te tumche dolle ani sarkem aikotat dekhun, te tumche kan bhagi! Hanv tumkam khorench sangtam: tumi polletat tem polleunk zaite provadi ani nitivont mon’xam axelim, punn tankam polleunk mell’lem na; ani tumi aikotat tem aikunk-ui tim axelim, punn tankam aikunk mell’lem na. Chit diun aikat, tor, ani Vomp’p-eache voparicho orth kitem to zomzun gheiat. Rajeachem utor aikotat ani tem somzonant tim vatter vomplelea bia sarkim; devchar ieun tanchea kallzant vomplelem tem kaddun vhorta. Khoddpi zomnir poddlelem bim utor aikotat ani rokddinch tem hurben manun ghetat tim mon’xam; punn tankam apnnam bhitôr pallam nant; ani tim thoddoch vêll thir urtat; tea utrak lagun upodre ani dhumallo iena fuddem tancho bhavart rokddoch halta. Kantte-amnim vomplelem bim utor aikotat tim mon’xam, punn hea sonvsaracheô dhasti ani girestkaiechi bhul utor damun dhôrtat ani taka pik zainam. Borê zomnir vomplam tem, utor aikotat ani somzotat tim mon’xam; him pik ditat, ekak xembhôr, dusreak satth, tisreak tis.” Aniêk vopar tankam ghalun Tannem mhonn’lem: “Aplea xetant borem bim vomplelea eka momxa porim sorginchem raj. Sogllim nhidlelim astana, tacho dusman ailo ani gonva modem nêr vompun gelo. Xet vaddon konnsam ietôch, nêr-ui dixtti poddlo. Ghorkaracheam vavraddeamnim tachê sorxem ieun mhonn’lem: ‘Dhonia, tujea xetant tunvem borem bim vomplelem nhoi? Tôr nêr khõicho ailo?’ Tannem oxi tankam zap dili: ‘Hem dusmanan kel’lem kam’. ‘Chakramnim taka vicharlem: ‘Ami vochun xet nôddlelem tuka zai?’ Tannem zobab dilo: ‘Naka; nêr umttitanam, ghoddiek tumi tea borabôr gonv-ui umttixeat. Lunvnni ieit porian don-ui borabôr vaddom-di; ani lunvnnechea vellar, poilo nêr ektthãi korun ujeak lavchê khatir, tachim penddkulam bandat; magir gonv mhojea koddeant bhôrat mhonn hanv lunvteleank sangtolom.’ ” Ani êk vopar ghalun, Tannem tankam sanglem: “Sansvachem bim gheun, eka mon’xan tem aplea porsant lailem tea sansvachea bia porim sorginchem raj. Tem khorench soglleam bia-vôn lhan; punn vaddtôch, sogllea zhadd-palea vôn vhodd zaun, ek zhadd zata, ki varea velim suknnim ieun tacheam khandiancher vosti kortat.” Jezun anink êk vopar tankam sangli: “Êkê bailen khomir gheun, vhoddlim tin mapam môll’lo-pittant to misoll kelo ani sogllench pitt fuglem; tea khomira porim sorginchem raj.” “Voparimnim uloitolom, sonvsar rochloleak gupit asleleô vostu ugteô kortolom”, oxem provadeachem hem utor khorem zaunche khatir Jezun voparimnim soglleô heô vostu porjek sangleô ani voparim bogor To tanchê kodde kainch uloinaslo. Tedna, lokak dhaddtôch, Jezu ghorant bhitôr gelo, ani Tacheam xisamnim Tachê sorxem ieun mhonn’lem: “Xetantlea nerachê voparichi somzonni amkam di.” Tannem portipallun tankam sanglem: “Borem bim vompta to Mon’xacho Put. Xet mhonngê sonvsar. Borem bim mhonn’lear Rajeachim bhurgim. Nêr, Noxtteachim bhurgim. Nêr vomplo to dusman, devchar. Lunvnnecho vêll, kallachi sompadnni. Lunvpi, devdut. Zoxem nêr ektthãi korun ujeant lastat, toxem kallachê sompadnnek zatelem. Mon’xacho Put Apleam dutank dhaddtolo ani dusreank patok korunk oddun vhortat team soglleank ani her soglleo noxtteo vostu kortat tankam Tachea rajeantlim zomoun te ujeachea agtteant uddoitele. Thõi sogllim rudon korun ani dant korkoraun astelim. Tedna Devak manovlelim mon’xam aplea Bapachea rajeant suria vori porzolltelim. Aikunk kan asleleamnim aikunchem. eka xetant liplo-aslo êk tthevo mell’toch, to novean lipoun dovorun, ani itlo khuxal zaun ki vochun, magir apnna kodde aslem titlem-i vikun ani porot vochun tem xetuch viktem gheta tea konn eklea monxa porim sorginchem raj. Têch bhaxen ek unch molachem motim mellona fuddem vochun, apnna kodde aslem titlem-i vikun ani tem motinch viktem gheta tea, nazuk motiam sodunk bhonvto, eka veparea sarkem Sorginchem Raj. Toxench êk rampônn doriant marlea uprant, tika soglleam jin’sanchi maslli podd’toch, ti bhòrlea uprant, ti oddun haddtat ani veller bosun, bori maslli panttleamnim ghaltat ani upkaronam ti bhair uddoitat te porim sorginchem raj. Kallachê sompadnnek toxench zatelem: devdut bhair sortele ani boream mon’xam modlim noxtteank kuxin kaddtele ani tankam ujeachea agtteant uddoitele: thõi tim rudon korun ani dant korkoraun astelim. Hem sogllem somzoleat tumi?” Jezun tanchekodde vicharlem. Tannim mhonn’lem: “Hôi.” Ani Tannem tankam sanglem: “Mhonntôch, sorginchea rajeacho xis zalolo dôr-eklo dhormxastri aplea bhanddarantleô noveô ani pornneô vostu bhair kaddtelea eka ghorkara sarko.” Heô vopari sangun sompoitôch, Jezu thõicho bhair sorun gelo. Ani Aplea khaxa ganvant vochun To tanchea devsthanant oxi xikovnn ditalo, ki lôk ojap zaun mhonntalo: “Hi zannvai ani vismitam korchi podvi haka khõichi? Ho thov’iacho put nhoi? Maria mhonntat ti tachi avoi nhoi? Ani Jakob, Juze, Simanv ani Judas tache bhav nhoi? Ani tacheô bhoinni soglleô amchêch modem asat nhoi? Tôr hem sogllem taka khõichem ailem?” Ani Taka mandun gheunk tanchean zainaslem. Punn Jezun tankam mhonn’lem: “Eka provadeak fokot aplea khaxa desant ani aplea ghorant man na.” Ani tankam bhavart naslo dekhun Jezun thõi chodd-xim vismitam kelim nant. Team disamnim Jezuchi kirti upraza Herodichea kanar poddli ani tannem aplea razvaddeantleam mon’xank mhonn’lem: “ Juanv Batist ho; to mel’leantlo jivont zala; hea pasot tachê vorvim ochoriam zatat.” “Tujea bhavachê bailek tum gheun asai tem tujem kortub sarkem nhoi.”, oxem Juanv Batistan Herodik sanglelem dekhun, Herodias mhonnlolê, aplea bhava Filipachê bailek lagun, Herodinuch Juanv Batistak dhorun bandlolo ani bondkhonnint ghal’lo. To taka jivexim marunk sôdtalo, punn lokak bhietalo, kiteak lôk Juanvak provadi mhonn man’talo. Uprant, Herodichea zolmachea disa Herodiasichi dhuv soglleam mukhar ieun nachli ani Herod itlo khuxi zalo, ki apnna kodde ti magit titlem-i tika ditolom mhonn soput gheun tannem bhasailem. Aple avoiche xikovnne pormonnem tinnem maglem: “Eka tattant anga ani atam mhaka Juanv Batistachem xins ghalun di.” Raza khontibhorit zalo, punn soputak lagun ani ponkttik bosleleanchê bhiddek poddon, tannem ti tika diunk laili; ani monis dhaddun bondkhonnint Juanvachem xins kaplem. Tachi tokli eka tattant ghalun haddli ani cheddvak dili ani tannem ti aplê avoi-xim vheli. Juanvache xis aile ani tãnnim tachi kudd vhorun nikhipili, ani vochun Jezuk hi khobor dili. Hem aikona fuddem, Jezu thõicho bhair sorlo ani hoddear bosun êkê eksurê svater, eklo ravchê khatir, koddsorun gelo; punn hem lokak kolltôch, nogram thaun tim Tachê pattlean pãi-vatten cholun gelim. Hoddea velo denvun Tannem puskôll lokak dekhlo; ani tanche churchure dhorun tancheam vaittakarank borim kelim. Sanjechea vellar Tacheam xisamnim lagim sorun mhonn’lem: “Hi svat eksuri ani sanz zali; mhonntôch lokak dhaddun di; tankam apnnank jevonn-khann viktem gheum-di.” Jezun tankam mhonn’lem: “Tãnnim khõisoruch vechi goroz na; tankam khaunk-jevunk tumich diat.” Punn tãnnim portipall kelo: “Panch undde ani don maslleô kaddun, amchê lagim hanga kãich na.” Tedna Tannem mhonn’lem: “Tim hanga Mhojê-xim haddat.” Lokak Tannem tonnacher jevnnak bosunk lailem; panch undde ani don maslleô hatant gheun, Tannem sorgak dolle ubarle ani Devak dhin’vaslo; magir unddeanche kuddke kele ani xisam lagim dile, ani xisamnim te lokak vanttle. Sogllim jevlim ani dhadoxi zalim; ani urlole kuddke-tukdde tãnnim ektthãi kele, bara panttleô upott bhòrloleô. Bailank ani bhurgeank dhorinastanam jevlele te dadlech sumar panch hozar asle. Ani rokddench Apunn lokak ghora dhaddta mhonnosôr, Jezun xisank hoddear choddunk ani Apnna adim pelê toddi vochunk lailem. Lokak dhaddlea uprant, To ekloch magnnem korunk dongrar gelo. Sanje vell zatôch porian To thõi ekloch aslo. Hoddem bhair doriant pavun lharamnim boddovtalem, kiteak portem varem martalem. Fantea parar Jezu doriacher cholun tanchê sorxem ailo. Ani Taka doriacher cholun ieta to polleun, bhut mhonn somzun te bhiele, ani bhirantin tãnnim bob marli. Punn rokddench Jezun tanchê kodde uloun mhonn’lem: “Dhir dhôrat, Hanv To! Bhienakat!” Pedrun portipall korun mhonn’lem: “Saiba, Tunch zalear, udkacher cholun Tujê sorxem hanv ie-so kôr.” Jezun mhonn’lem: “Ie.” Tedna Pedru hoddea velo denvun Jezu sorxim vochunk udkacher cholunk laglo; punn vadoll polleun bhielo ani buddunk laglo. Bob marun tannem mhonn’lem: “Somia, mhaka vattai!” Ani rokddoch Jezun hat pavoun taka dhôrlo ani mhonn’lem: “Holkea bhavartachea mon’xa, kiteak mhonn dubhavloi tum?” Ani te hoddear choddtat mhonnosôr, varem thamblem. Hoddeant asle tãnnim Tachê mukhar sorpottun mhonn’lem: “Khoreponnim Devacho Put Tum!” Ani pelê toddi pavtôch, te Genezaret ganvant aile. Tea ganvcheam mon’xamnim Taka ollkhotôch char-ui kodden sangunk dhaddlem; tedna somest vaittakarank Tachê sorxim haddlim; Tachea vostrachê degek tori hat lavunk di mhonn Tachê lagim magtalim, ani hat lailo titlim-i sarkim borim zalim. Tedna Jeruzalea thaun Farizev ani dhormxastri Jezu-xim aile. Tãnnim mhonn’lem: “Purvozamnim korun dovorleli chal Tuje xis kiteak môddtat? Tôr te jevnna adim aple hat dhuinant.” Tannem portipall kelo: “Ani tumi tumchê chalik lagun Devachi adnia môddtat tem kiteak? Tôr Devan sanglam: ‘Bapaik ani avoik man di’; ani ‘bapaik vô avoik xiraptat tim morun vochum.’ Punn ‘Mhojê koddlem kitem-i tuka upkarto aslem, tem hanvem Devak bhettoilam,’ oxem Konn-ui bapaik vô avoik mhonnta tedna bapaik vô avoik man diuncho tankam anink kaido na.’ tumi mhonntat He baxen tumchê chalik lagun tumi Devachi adnia nopoit keli. Ddhongiamnô! ‘Ho lôk onttamnim Mhaka vakhannta, punn tanchem kalliz Mhojê thaun pois asa. Ho lok Mhoji puza korta ti polki puza. Ho lok xikoita tim xastram fokot mon’xamnim kel’le kaide!”’, oxem Izaiasan tumchê vixim adim- fuddench sarkench tem sangun dovorlam. Lokak Apnna sorxem apoun Tannem tankam sanglem: “Aikat ani somzun gheiat: tonddant bhitôr veta tem mon’xank mhellim korina; punn tonddantlem bhair sorta tench mon’xank mhelloita.” Tedna xisamnim lagim ieun mhonn’lem: “Hem Tujem utor aikun Farizevank opman zalo mhonn zannoi tum?” Tannem portipall kelo: “Mhojea sorginchea Bapan lavunk nant tim sogllim zhaddam umtton vetelim. Tanchi khoboruch naka. Te apunnuch kurdde; ani eklo kurdd’do dusream kurddeank vatt dakhoita tedna dog-ui fonddant poddtele. Tedna Pedrun uloun mhonn’lem: “Amkam hê voparichi somzonni di.” Jezun zap dili: “Tumkam ozun somzonni na? Tonddant bhitôr veta titlem-i pottant pavta ani pottantlem bhair veta mhonn tumi somzonant kitem? Punn jem tonddantlem bhair sorta tem kallzant thaun ieta ani tench mon’xank mhelloita. Tôr kallzant thaun bhair sortat vaitt ievzonnô, prannghat, pordvar, kazar zainasleam ekamekacho lingbhog, choriô, lottik govaiô, ninda. Mon’xank mhellim kortat tim hinch. Punn hat dhuinastanam jevlear mon’xam mhellim zainant.” Ani Jezu thõicho bhair sorlo ani Tirachea ani Sidon’chea prantant koddsorun gelo. Ani ovchit teach prantantli Khanaan’chi êk bail, bhair sorun, “Somia, Davidachea Puta, mhoji kaklut kôr! mhojê dhuvek devchar zobôr piddapidd dita.”, oxi huiêli marit, Tache xim aili. Punn Tannem tika êk zap kaddli na. Mhonntoch lagim sorun Tacheam xisamnim Tachê kodde oxem poratun maglem: “ ti amchê pattlean bob marit ieta dekhun tika vochum-di” Punn Tannem portipallun mhonn’lem: “Devan Mhaka fokot Israelachea ghoranneacheam sanddleleam xelliam thãi dhaddla.” Toripunn lagim ieun, “Somia, mhaka pav!”, oxem mhonnun ti Tachê mukhar sorpottli. Tannem zabab diun, oxem mhonn’lem: “Bhurgeancho unddo kaddun, sunneank ghalop mhonnlear sarkem nhoi.” “Khorem, Saiba”, Tinnem mhonn’lem: “ Punn aplea dhoniachea meza vele dhornnir poddtat te kuddke sunnim-i khatat.” Tedna portipallun Jezun tika mhonn’lem: “Eh ostore, vorto tuzo bhavart! Tuka zai toxem zaum.” Ani tichi dhuv têch ghoddier bori zali. Thõicho bhair sorun, Jezu Galileiachea doria-degechean gelo ani dongrar choddun thõi boslo. Ani lokacheô urponji longddeank, kurdd’deank,thontteank, moneank ani zaiteam herank gheun Tachê sorxim aileô, ani Tacheam pãiam lagim tãnnim tankam dovorlim ani tankam soglleank Tannem borim kelim. Mhonn’toch monim uloito, osad poddlelim sarkim zato, longddim cholto ani kurdd’deank dixtti podd’to polleun teo urponji ojap zaleô ani tannim Israelachea Devak mhoima dili. Punn Apnna xim apoun, Jezun Apleam xisank mhonn’lem: “Tin dis zale tim Mhojê borabôr asat ani jevunk-khaunk tanchê kodde kãich na dekhun Mhaka tanche churchure distat. Ani tankam upaxim dhaddunk Mhaka naka. Na zalear tim vatter ghunvoll ieun poddtit.” Xisamnim Taka mhonn’lem: “Tôr hê eksurê svater itlea lokak dhadoxi korunk amchê kodde itle undde khõiche astele?” Jezun tankam vicharlem: “Tumchê lagim kitle undde asat?” Tãnnim sanglem: “Sat, ani thoddeo daktteo maslleo.” Tedna Jezun lokak dhornnir bosunk lailo. Tannem sat undde ani maslleô ghetlim ani Devak dhin’vasun tanche kuddke kele ani Tannem te xisankodde dile ani xisamnim te lokak vanttle. Tim sogllim jevlim ani dhadoxi zalim. Ani urloleam kuddkeam-tukddeancheô sat panttleô tãnnim bhôrleô. Bhurgeank ani bailank dhorinastanam jevlele te dadlech char hozar asle. Ani lokak ghora dhaddtôch To hoddear choddlo ani Magedan’chea prantant gelo. Farizev ani Saduki Tachê-xim aile ani Tachi porikxa korunk apnnank sorga veli êk khunna dakhoi mhonn Tachê kodde magunk lagle. Tannem oso portipall kelo: “Sanz zatôch tumi oxem mhonntat: ‘Mollob tambddem zal’lem asa dekhun, az xitollai asteli’; ani sokallim tumi mhonntat: ‘Mollob tambsar zalam ani molbhott asa dekhun, az modd astelem.’ Mhonntôch mollbachem rup tumi ollkhunk zannont, punn hea kallacheô khunna mat tumchean ollkhunk zaina! Hi atanchi khotti ani bhavart-nasleli pinddka khunna sodta! Punn Jonasachê khunnê bhair Dev tika her dusri anink khuinchi-i khunna diuncho na.” Ani tankam thõich sanddun To gelo. Xis doriachê pelê toddi ietana undde haddunk visorlole. Jezun tankam sanglem: “Polleiat, Farizevanchê ani Sadukinchê fugi vixim chotraien cholat.” Ani te apnnam modem mhonnunk lagle: “Ami undde haddunk nant dekhun To oxem mhonnta.” Ani te vixim zanna zaun Jezun mhonn’lem: “Undde haddunk nant dekhun mhonn kiteak tumchêch modem uloitat tumi? Unnea bhavartacheamno? Ozun porian somzunk nant tumi? Panch undde panch hozar dadleank pavoile ani kitleô panttleô tumi bhorun kaddleô, hacho tumkam ugddas na? Toxench sat undde char hozar dadleank pavoile ani kitle korondd tumi bhorun kaddle, tacho-i bi tumkam ugddas na? Unddeam vixim nhoi, punn Farizevanchê ani Sadukinchê fugi vixim chotraien cholunk, Hanv tumche kodde uloilom tem tumi somzunk nant tem koxem?” Tedna unddeanchê fugi vixim nhoi, punn Farizevanchê ani Sadukinchê xikovnnê vixim chotraien cholat, oxem Tannem mhonnlelem mhonn te somzole. Filipa Xezareiachea prantant pavtôch Jezun Apleam xisam kodde vicharlem: “Mon’xachea Putak lôk konn mhonn dhôrtat?” Ani tãnnim zobab dilo: “Kãi zonnam Juanv Batist, konn-konn Elija, dusrim konn-konn Jeremias vô provadeantlo konn-eklo, oxem mhonntat.” Tannem vicharlem: “Tôr tumi Hanv konn mhonntat?” Tedna Simanv Pedru oso uloilo: “Krist To Tum, jivea Devacho Put!” Zobab diun, Jezun taka mhonn’lem: “Simanv, Jonachea puta, tum subhagi, kiteak rogta-masan nhoi punn sorgar asto Mhojea Bapan hem tuka ugtem kelam. Tôr Hanv-ui tuka sangtam: tum Pedru, mhonngê khoddop ani hea khoddpacher Hanv mhoji sobha bandtolom, ani ticher zoit vhorunk emkonddak legun podvi aschi na Hanv tuka Sorginchea Rajeacheô chaviô ditolom; jea kiteak sonvsarant tum na mhonnxi, taka sorgar Dev na mhonntolo; ani jea kiteak sonvsarant tum hôi mhonnxi, taka sorgar Dev hôi mhonntolo.” Magir Apunn Krist mhonn konnakuch sanginam zaunk Tannem xisank khôr adnea dili. Tedna thaun Jezu Apleam xisank spôxtt sangunk laglo: “Devachê khuxê pormannem, Hanv Jeruzaleak vecho asam; zannteanchea, mukhel iadnikanchea ani dhormxastreanchea hatantlem Hanvem zaitem sõschem asa; te Mhaka jivexim martele; ani tisrea disa Dev Mhaka punorjivont kortolo.” Tedna, Taka kuxin vhorun, Pedru oso Taka bhexttaunk laglo: “Kednanch na, Saiba! hem Dev Tuka kednanch nirminam zaum!” Ani Tannem vollon Pedruk sanglem: “Mhojê mukhavelo voch, Soitana! Hanv adllon poddunk Mhojê vatter ubo zal’lo fatôr tum; kiteak tujem chintop mon’xanchem, tem Devachem nhoi.” Tedna Jezun Apleam xisank mhonn’lem: “Konnank Mhozo pattlav korchi khuxi asa zalear, tãnnim apnnanchêch khuxechi vatt sôddchi, aplo khuris ukôlcho ani Mhojê pattlean ieunchem. Kiteak jim konn aplo jiv samballun dhorunk sôdtat, tim aplo jiv hogddaitelim; punn jim konn Mhojê khatir aplo jiv hogddaitat, tim aplo jiv samballun dhôrtelim. Tôr sogllo sonvsar zôddit ani aplo jiv ibaddit zalear, mon’xak koslo adav? Vô aplea jivachê bodlek mon’xan kitem diunk zait? Mon’xacho Put Apleam dutam borabôr Aplea Bapachê mhoimen ietolo, ani tedna zonn-ekleak ap-apleam kornneam pormannem inam’ ditolo. Hanv tumkam khorench sangtam: hanga asat tantlim kãi zonnam Aplea rajeant ieto, Mon’xachea Putak polleunchê adim morchim nant.” Sov disam uprant Pedruk, Jakobak ani tachea bhava Juanvak Jezun eka unch dongrar kuxin vhele ani tanchê mukhar Tachem rup bodòl’lem. Tachem mukhamoll suria porim loklokit zalem ani Tachim vostram uzvadda porim dhovim-ful zalim. Ovchituch Moizes ani Elija Tachê kodde uloito tankam dixtti poddle. Tedna Pedrun Jezuk mhonn’lem: “Somia, ami hangach ravlear borem. Tuka zai zalear, tin tombu hanga hanv ubartam: êk Tuka, êk Moizesak ani êk Elijak.” To uloita thõich astana, tankam eka porzollit kupan dhample ani, “Ho Mhozo Put, kherit opurbaiecho; Tacher asa Mhojem dhadosponn. Tachem tumi aikat.” oso tea kupantlo êk tallo aikum ieilo. Hem aikun, xis omte poddle ani ekdom’ bhiele. Punn Jezun lagim sorun tankam hat lailo ani mhonn’lem: “Utthat, bhieum nakat.” Dolle ugddun polle zalear, tankam Jezu bogor anink konnuch dislo na. Dongra vele denvtastana, Jezun tankam oxem formailem: “Mon’xacho Put mel’leantlo punorjivont zait porian hea dorxonachi khobor konnakuch sanginakat.” Ani Tacheam xisamnim Tachê kodde oxem vicharlem: “Elija poilo ieunk zai, oxem dhormxastri kiteak mhonntat tôr?” Tannem oxi zap dili: “Elija ietolo khoro, ani sogllem tharear ghaltolo; punn Elija ailo mhonn Hanv tumkam sangtam, ani tãnnim taka ollkhun ghetlo na ani apnnank zai toxem tannim taka kelem. Têch porim Mon’xachea Putan-ui tanchea hatantlem sõschem asa.” Tedna Juanv Batista vixim To uloitalo mhonn xis somzole. Ani Jezu lôk aslo thõi pavtôch êk dadlo Tachê sorxim ailo, ani Tachê mukhar dimbi ghalun, tannem mhonn’lem: “Somia, mhojea putachi kaklut kôr! taka moddnnem marta ani to chôdd koxttovta; sobar pavtti ujeant ani bhonvn-bhonvn udkant to poddta; hanvem taka Tujeam xisam sorxim vhelo, punn tanchean taka boro korunk zalem na.” Tedna Jezun portipallun mhonn’lem: “Bhavart nasloli ani khotti pinddka tumi! Kitlo vêll mhonn tumchê sorxem Hanvem ravchem? Kedna porian Hanvem tumkam sõschim? Taka hanga Mhojê-xim haddat.” Ani Jezun taka bobatt kortôch, devchar tachê velo bhair sorlo ani to bhurgo têch ghoddier thaun boro zalo. Tedna Jezu sorxem kuxin ieun xisamnim vicharlem: “Taka bhair ghalunk amchê kodde kiteak ghòddunk na?” Jezun tankam sanglem: “Tumcho bhavart unno dekhun. Hanv tumkam khorench sangtam: sansvachea konnea edo tumkam bhavart asot zalear, hea dongrak tumi mhonntelet: ‘Hanga thaun thõi voch!’, ani to vetolo; ani tumchean korunk zaina toslem kãich aschem na.” Te Galileiant ektthovlele astana, Jezun tankam mhonn’lem: “Mon’xacho Put mon’xanchea hatant poradhin zatolo, te Taka jivexim martele ani tisrea disa Dev Taka punorjivont kortolo.” Hem aikun tankam motti khônt zali.Devmondirachi Pott’tti Farik Korop Te Kapernaumant pavtôch, Devmondirachi pott’tti gheteleamnim Pedru sorxem ieun vicharlem: “Tumcho Guru ordea staterachi devosthana-pott’ti farik korinam?” Tannem zobab dilo: “Korta.” Ani oxem mhonnun to ghorant bhitôr gelo. Punn to ulounchê adinch Jezun taka mhonn’lem: “Simanv, tuka kitem dista? Sonvsarantle raza konnam koddcho dôndd vô pott’tti ghetat? Apleam nagrikam koddcho vô porkeam koddcho?” Tannem zobab dilo: “Porkeam koddcho.” “Mhonntôch nagrik suttlim. Punn tankam vaitt dêkh dina zaunk, doriant vochun gori ghal, ani poili choddta ti maslli dhôr, tichem tondd ugôdd ani tantum tuka êk stater melltolo; to ghe ani Mhojea ani tujea nanvan tankam di.” Ekdam xisamnim Jezu-xim ieun vicharlem: “Sorgarajeant soglleam-von vhôdd konn?” Tedna Jezun, eka dhakttea bhurgeak apoun haddun, taka tanchê modem ubo kelo ani mhonn’lem: “Hanv tumkam sot sangtam: tumchem jivit-mon bodòl’lea bogor ani tumi novean dhakttuleam bhurgeam vori zalea xivai, tumi Sorgarajeant bhitôr sorchinch nant. Mhonntôch konn-ui apnnankuch hea bhurgea porim lhan kortit zalear, tim Sorgarajeant soglleam-von vhodd. Eka dhakttulea oslea bhurgeak konn Mhojea nanvan ghetit zalear, tim Mhakach ghetat. Punn Mhojer bhavart dovorteleam heam lhanam modlea ekleak ho bhavart soddunk konn-ui oddun vhortit tôr, danteachem ek pedd tanchea golleak bandun tankam khôl doriant buddoilear odik borem. Dusreank bhavart soddunk oddun vhortat tosleam mon’xam pasot sonvsarachem kotta! herank bhavart soddunk oddun vhortat toslim mon’xam astelinch; punn jim konn dusreank bhavart soddunk oddun vhortat, tanchem kotta-kotta! Tumcho hat vô pãi bhavart soddunk tumkam oddun vhorta zalear, to katrun uddoiat ani bhair marat; don hat vô don pãi asun sasnnachea ujeant tumkam uddoil’lê poros, lunddim vô thonttim zaun Jivitant bhitôr sorlear tumkam odik borem. Ani tumcho dollo bhavart soddunk tumkam oddun vhorta zalear, to umttun kaddat ani bhair uddoiat; don dolle asun ujeachea emkonddant tumkam uddoil’lê poros, êkuch dollo gheun Jivitant bhitôr sorlear tumkam odik borem. Polleiat, heam dhakttuleantlea ekleachi legun tumi beporva korum noiê, karonn, Hanv tumkam sangtam, sorgar tanche dut sorgar asto Mhojea sorgim-Bapachem mukhamoll thambonastanam polleit asat. Tumkam kitem dista? Konn-eklea mon’xa kodde xembhôr xelliô astit ani tantuntli êk sanddlea zalear, nnoian’nnoi dongrancher soddun, hinddantli koddsorun gelea tika to sodunk vecho na kai? Ani Hanv tumkam khorench sangtam: ti mell’li zalear, sanddunk nasleleam nnoian’nnoi xelliam poros, hichê vixim to odik khuxal zata. Hêch baxen heam dhakttuleam bhitorlo eklo-i ibaddlolo tumchea Sorgim-Bapak naka. Tuzo bhav tujer patok korit zalear, voch ani tumam-doganchêch bhitôr tachi chuk taka dakhoi. Tujem to aikot zalear, tujea bhavak tunvem zoddun ghetlo. Tuka to aikona zait zalear, ‘dogam vô tegam sakxeanchê govaikecher sogllo tonn’to ruzu zaunk zai’ dekhun, tujê borabôr anink ekleak vô dogank gheun voch. Punn tankam-i aikona zait zalear, sobhek kolloi; sobhek aikonai zait zalear, tedna tosleak sobhê bhailo vô dônddvosuldar zaum-di. Hanv tumkam khorench sangtam: jea kiteak sonvsarant tumi na mhonnxeat, taka sorgar Dev na mhonntolo; ani jea kiteak sonvsarant tumi hôi mhonnxeat, taka sorgar Dev hôi mhonn’tolo. Anink ek Hanv tumkam sangtam: tumchê bhitorlim dogam zannam sonvsarant kiteai vixim magunk eka monachim zatit zalear, Mhozo sorgim-Bap tem tumkam ditolo; kiteak dogam vô tegam zannam Mhojea nanvan ektthãi zatat thõi tanchê modem Hanv asam.” Tedna Tachê sorxem vochun Pedrun Taka mhonn’lem: “Somia, kitlê pavtti mhojea pelean mhojer chuk kelear hanvem taka bhôgsuncho? Sat pavtti legun?” Jezun taka oso zobab dilo: “Sat pavtti nhoi, punn sot’tôr pavtti sat! Hea pasot, Apleam chakrancho hixôb tharear ghalunk sodto konn eka patxaia porim sorginchem raj. Hixôb gheunk suru kortôch, dha hozar talentanchem vorixtt rinn aslelea eka chakrak raza mukhar haddlo. Farik korunk tachê kodde kãich naslem dekhun, tachê bailek, bhurgeank soit tachê lagim aslem-naslem titlem-i vikunk ani rinn farik korunk tachea dhonian hukum’ ghalo. Mhonn’toch, ‘Tokôs kaddun matso rav, sogllem tujem hanv farik kortam.’ oxem mhonnun, to chakor tacheam pãiam poddlo. Tea chakrache churchure dhorun, tea dhonian taka soddlo ani tem rinn-ui taka bhogxilem. Ho chakôr bhair gelea uprant, taka fokot xembhôr holke dinar devo aslolo êk vangddi-chakôr taka mell’lo ani taka dhorun to tachi gomtti pillunk laglo. Tannem mhonn’lem: ‘Mhojem rinn farik kôr!’ Punn tacho vangddi tacheam pãiam poddun tachê kodde oxem magunk laglo: ‘Tokôs kaddun matso rav, sogllem tujem hanv farik kortam.’ Tori to aikonam zalo, punn gelo ani aplem rinn farik korit porian tannem tea vangddea-chakrak bondkhonnint ghalo. Hem ghòddlelem polleun, tache her vangddi-chakor bhov dukhovle, ani vochun ghòddlelem titlem-i tãnnim aplea dhoniak kollit kelem. Tedna dhonian taka apoun haddun mhonn’lem: ‘Khottea chakra, tunvem mhojê kodde magli dekhun, hanvem tuka sogllem tujem rinn bhôgxilem. Tôr mhaka tuji doia disli toxich, tuka tujea vangddea-chakrachi doia disunk naka asli?’ Ani ragabhorit zaun, tannem sogllem aplem rinn farik kori porian, dhonian taka kosabanchea hatant ghalo. Tumi zonn-eklo tumchea peleak kallzant thaun bhôgxina zaxeat zalear, Mhozo sorgincho Bap-ui tumkam bhôgxicho na.” Ho updês dilea uprant, Jezu Galileia soddun gelo ani Jordanachê poltoddi Judeiachea prantant ailo. Puskôll lôk Tachê pattlean gelo ani thõi Tannem tankam borim kelim. Farizev Tachê-xim aile ani Taka kosak lavunk tãnnim vicharlem: “Koslea-i karonnak lagun ghovachean aplê bailek soddun dium-ieta?” Tannem oso zobab dilo: “Survatek Devan tankam kelim, ‘tankam dadlo ani bail kelim’, ani Tannem mhonn’lem: ‘Hea pasot monis aplea avoibapaik sanddtolo ani aplê potinnik ektthovtolo ani dogam-i êk zatelim’, oxem tumi vachinaslam? Mhonntôch tim anink dogam nhoi, punn êk. Hea pasot Devan zôddlam tem mon’xan doxim korum noiê.” Tãnnim Taka vicharlem: “konn aplê potinnik soddun dita zalear, tika ghottsfottichem potr diun sôddchi mhonn Moizesan hukum’ ghala tachem karonn kitem tor?” Tannem zap dili: “Tumchea kallzache niborsannek lagun Moizesan tumcheam potinnink soddun diunk tumkam rojea dili; punn orombak thaun oxem nhoi aslem. Tôr Hanv tumkam sangtam: Somurticher add logn-sombondant jietelea karanna bhogor konn-ui aplê potinnik soddun diit ani dusrê kodde logn zait, to pordvar korta.” Tacheam xisamnim Taka mhonn’lem: “Aple potinikodde dadleachi poristhiti oxi zait zalear, lognuch zainastanam ravlear odik borem.” Punn Tannem oxi tankam zap dili: “Hem mandun gheunk soglleanchean zainam. Zankam Devan hem dennem favo kelam tancheanuch zata. Avoichea kusveant thaun izdde zolmolele asat, ani mon’xamnim kel’le izdde asat, ani sorginchea rajeak lagun apnnankuch izdde korun ghevpi asat. Mandun gheunk zata tãnnim hem mandun gheunchem.” Jezun supurleam bhurgeancher Aple hat dovrunk ani magnnem korunk lokan tankam Tachê sorxem haddlim. Xis tankam bobatt korunk lagle, punn Jezun sanglem: “Bhurgeank Mhojê sorxim ieunk diat ani tankam addainakat, kiteak Sorginchem Raj osleanchench.” Magir tancher Tannem Aple hat dovorle ani thõicho bhair sorun To Aplê vatten gelo. Ani ovchit lagim ieun konn-eklean Taka vicharlem: “Guruji, mhaka sasnnik jivit mellcheak hanvem kitem borem korunk zai?” Ani Tannem zap diun taka sanglem: “Kitem borem tea vixim Mhojê lagim kiteak vichartai? Boro to Ekloch Dev. Punn tum jivitant bhitôr sorunk sôdtai zalear, adnea samball.” Tannem vicharlem: “Konn teô?” Jezun sanglem: “Heô: jivexim marum noiê; pordvar korum noiê; chorum noiê; lottik-govai dium noiê; tujea bapaik ani avoik man di; ani tuzo môg kortai tosoch tujea peleacho kôr.” Tea tornnattean Taka zabab dilo:”Heô soglleô adnea hanvem samball’leat; mhaka kitem ozun unnem asa?” Jezun taka sanglem: “Tuka sompurnn zaunchi khuxi zalear, voch, tujê lagim asa titlem-i vikun goribank di, ani sorgar tuka tthevo melltolo; tea magir Mhojê pattlean ie.” Punn hem utor aikotôch to khontibhorit zaun gelo; tôr taka puskôll girestkai asli. Tedna Jezun Apleam xisank mhonn’lem: “Hanv tumkam sot sangtam: eka girest mon’xak Sorginchea Rajeant bhitôr sorunk kotthin. Hôi, anink-ui sangtam: eka girest mon’xak Sorginchea Rajeant bhitôr sorchê poros, eka unttak suiechea birddeantlean vochunk odik sompem.” Hem aikun xis bhov thottakle. Tãnnim mhonn’lem: “Toxem zalear, konnak mhonn taronn melltelem?” Jezun tancher nodor marun mhonn’lem: “Mon’xam kodde hem zaina, punn Deva lagim sogllem zata.” Tedna zap diun Pedrun mhonn’lem: “Polle, ami sogllem sanddlam ani Tuzo pattlav kela; tôr amkam kitem melltelem?” Jezun tankam sanglem: “Khorench Hanv tumkam sangtam: Novo Sorg ani Novi Prithum zaunchea vellar, Mon’xacho Put Aplea mhoimechea xinvasonar bostolo tedna, Mhozo pattlav kela te tumi-i bara xinvasonancher bostelet ani Israelacheam bara kullancher odhikar choloitelet. Ani zãnnim Mhojea Nanva khatir ghor-dar vô bhav vô bhoinni vô bapui vô avoi vô bail vô bhurgim-ballam vô xetam-bhattam sanddleant, tim xembhôr pavtti odik ghetelim, ani sasnnik jivit tanchem daiz zatelem. Sobar zannam poilim asat tim nimannim zatelim ani nimannim tim poilim zatelim.” “Aplea dakam-molleant vauraddi launk bhov sokallim bhair sorun gelelea eka bhattkara porim Sorginchem Raj. Disvoddeak êk dinar farik korunk vavraddeam lagim koblat korun, tannem tankam aplea molleant dhaddle. Sumar nov vaztam bhair sorun tinttear bekar asleleam herank tannem dekhle ani tankam mhonn’lem: ‘Tumi-i mhojea molleant vochat ani hanv tumkam favo tem ditolom.’ Ani te gele. Portun bara ani sanjechim tin vaztam bhair sorun tannem toxench kelem. Sumar panch vaztam to anink êk pavtt bhair sorlo ani anink-ui ube aslele taka mell’le, ani tannem tankam mhonn’lem: ‘Tumi akho dis hangasôr kiteak bekar ravleat?’ Tãnnim zobab dilo: ‘Amkam konnench vavrak lavunk nant dekhun.’ Tannem tankam sanglem: ‘Tumi-i mhojea molleant vochat.’ Tin’sanam molleachea dhonian aplea mukdomak mhonn’lem: ‘Vavraddeank apoi ani nimanneam thaun suru korun poileank porian disvoddo di.’ Sumar panch vaztam kamak laglele te aile ani zonn-ekleak êk dinar mell’lo. Poile ailele te lagim sorun apnnank odik melltelem mhonn somzole, punn tankam-i zonn-ekleak êkuch dinar mell’lo. Tãnnim to ghetlo khoro, punn te bhattkaracher gunn-gunnun mhonnunk lagle: ‘Heam nimanneamnim êkuch tas-bhôr kam’ kelam ani ami zalear akhea disacho bhar ani hulop ghetleat, tori amkam ani tankam tunvem eksarke kelei.’ Punn tantlea ekleak zobab diun tannem sanglem: ‘Ixtta, hanv tuka onit korinam; tôr eka dinarachi tunvem mhojê kodde koblat korunk nãi? Tujem tem ghe ani voch. Tuka dilam titlench heam nimanneank-ui diunk mhaka khuxi. Tôr mhojeam poixeanchem mhaka zai tem mhojean korum nozo? Vô hanv boro mhonn tuzo dollo futtlo?’ Hêch porim nimannim tim poilim zatelim ani poilim tim nimannim zatelim.” Jeruzaleak choddon vetana, Jezun vatter bara xisank kuxin vhele ani tankam sanglem: “Polleiat, ami Jeruzaleak choddot vetanv ani Mon’xachea Putak mukhel iadnikanchea ani dhormxastreanchea hatant ghaltele; Tacher te mornnachem formonn martele ani Tacheô moskoreô korunk, Taka jerbond diunk ani khursar marunk Taka videxeanchea hatant poradhin kortele; ani tisrea disa Dev Taka punorjivont kortolo.” Tedna Zebedevacheam putanchi avoi Tachê sorxem apleam putank gheun aili ani Tacheam pãiam poddun Tachê kodde ek upkar magunk lagli. Tannem tika mhonn’lem: “Tuka kitem zai?” Tinnem mhonn’lem: “Heam mhojeam dogam putank, ekleak Tujea uzvea hata ani dusreak davea hata, Tujea Rajeant bosunk lai.” Jezun portipall kelo: “Tumi kitem magtat tem tumich nokllot. Hanv pietolom tea patrantlem tumchean pieum ietelem?” Tãnnim mhonn’lem: “Hôi, pieum ieta.” Tannem tankam sanglem: “Mhojea patrantlem tumi pietelet khore, punn Mhojea uzveak vô daveak bosunk diunk Mhojê adhin na; te zage Mhojea Bapan nirmun dovorleat tankam.” Hem aikun her dha zann team dogam bhavancher chiddle. Punn Jezun tankam Apnna sorxem apoun haddun sanglem: “Videxeam modem tanche odhikari tancher apli podvi zobordosten choloitat mhonn ani toxench tanche vhoddil aplê sot’techo bhar tancher ghaltat mhonn tumi zannont. Tumchê modem oxem zaunchem nhoi! Na, tumchê modem konn vhoddlo zaunk sodit to tumcho sevôk zauncho; tumchê modem konn poilo zaunk sodit to tumcho gulam’ zauncho. Oxench Mon’xacho Put herank Aplê chakrek lavunk ieunk na, bogor heranchi chakri korunk ani somestanchê soddvonnê pasot Aplo jiv diunk aila.” Te Jerikea thaun vetana, lokachi vhôdd urpônz Jezu pattlean geli. Ovchit dog kurdde vattechê deger bosun asle; tevxilean veta to Jezu mhonn aikotôch, te oxi bob marunk lagle: “Saiba, Davidachea Puta, amchi kaklut kôr!” Oge ravat mhonn lokan tankam bobatt keli; toripunn te odik vhoddlean toxich bob marit ravle: “Saiba, Davidachea Puta, amchi kaklut kôr!” Jezu thamblo ani tankam apoun haddun Tannem vicharlem: “Hanvem tumkam kitem kel’lem zai?” Tãnnim mhonn’lem: “Saiba, Tunvem amche dolle ugôddlele amkam zai.” Tanche churchure dhorun Jezun tancheam dolleank hat lailo; ani rokddich tankam nodor aili ani te Tachê pattlean gele. Jeruzalea lagim ietôch, Olivet Dongra sorxim Betfage pavlea uprant, Jezun dogam xisank daddle, tankam oxem sanglem:”Tumchea fuddeant asa tea gramant vochat. Thõi rokddem ek bandlelem gaddum ani tachea sangata tachem xingrum tumkam melltelim. Tankam sôddat ani Mhojê sorxim haddat. Konn-ui tumkam kitem mhonnot tôr, Somiak tanchi goroz asa mhonn sangat, ani to rokddoch tankam vhorunk ditolo.” Provadea vorvim Devan sangun dovorlelem tem pallchê khatir: “Zion Xarak sangat: Ho polle tuzo Rai tujê-xim ieta; to vinômr-khalto; eka gaddvacher ani tachea xingracher, zum ghetlelê avoichea poracher, to bosun ieta.”, hem sogllem ghoddon ailem. Xisamnim vochun Jezun tankam formail’lem toxem kelem. Ani gaddvak ani xingrak haddun tãnnim tancher aplim avoronnam ghalim ani Jezuk voir bosoilo. Khup lokan aplim avoronnam vatter patllailim; dusrim kãi zannam, zhaddanche talle moddun, te vatter ximpddaitalim. Fuddlean ani pattlean vetalo to lôk bob marun mhonntalo: “Davidachea Putak zôi! Sorvesporachea nanvan ieta taka zôi! Bhov vortea Devak zôi! zôi!” Ani Jeruzaleant provês kortôch, “ho konn kai?” mhonnun akhem xar chollboll’lem. Lôk zobab diun mhonntalo: “Ho Jezu, Galileiantlea Nazaretcho provadi!” Magir Jezu Devmondirant bhitôr sorlo ani Mondirant vikteleam ani gheteleam soglleank bhair ghalunk laglo; savkaranchim mezam ani parve vikteleanchim asonam Tannem omtun uddoilim. Tannem mhonn’lem: “Mhojem Ghor magnneachem ghor, oxem Povitr Pustokar boroil’lem asa, punn tachi tumi choranchi dhôl kelea.” Kurddim ani thonttim Tachê sorxim Devmondirant ailim ani Tannem tankam borim kelim. Tannem kel’lim ojapam polleun, ani toxench “Davidachea Putak zôi!” oxem mhonnun bhurgim Mondirant arddotalim tem polleun, mukhel iadnik ani dhormxastri zobor chiddle, ani tãnnim Taka vicharlem: “Him kitem mhonntat tem tunvem aikolãi mum?” Jezun oso zobab dilo: “Hôi! ‘Tuvem toiar kel’li, bhurgeanchea ani dud pieteleam ballanchea tonddantli vakhann’nni Tunvem ghetli!’— oxem tumi kednanch vachunk nam bi?” Ani tankam sanddun, xara bhair sorun To Betaniek gelo ani thõi vostek ravlo. Sokallim Xarant portun ietana Taka bhuk lagli. Ek anjirachem zhadd vattechê degek polleun, To tachê sorxem ailo ani panam bogor tacher kãich Taka mell’lem na. Ani Tannem taka mhonn’lem: “Hea fuddem kednanch tuka foll zaum noiê!” Ani tem anjirachem zhadd teach vellar suklem. Hem polleun xis ojap zale. Tãnnim mhonn’lem: “Arê, koxem mhonn hem anjirachem zhadd khinna bhitôr sukun gelem?!” Jezun portipall kelo: “Tumkam bhavart asot ani kosloch dubhav tumi dhorinam zaxeat, anjirachea zhaddak Hanvem kelam tem tumi-i kortelet; itlench nhoi, punn hea dongrak porian tumi oxem mhonnxat zalear: ‘Umtton voch ani doriant vochun podd!’, toxem ghòddtelem. Ani prarthon kortana bhavartan tumi magxeat titlem-i tumi ghetelet.” Devmondirant vochun To xikoita astana, mukhel iadnikamnim ani lokacheam zannteamnim lagim sorun Taka vicharlem: “Koslê sot’ten heô vostu kortai tum? Ani konnem dilea tuka hi sot’tea?” Jezun portipall kelo: “Hanv-ui tumchê kodde ekuch vichartam: tumi tem Mhaka sangxeat zalear, koslê sot’ten Hanv heô vostu kortam, tem Hanv-ui tumkam sangtolom. Juanvacho batism khõi thaun ailo? Sorgar thaun vô mon’xam thaun?” Ani te apnnanchêch bhitôr oxem chintunk lagle: “Ami ‘sorgar thaun’ mhonnin zalear, to amkam vichartolo: ‘Tor tumi tachem kiteak aikunk na?’ Punn ami ‘mon’xam thaun’ mhonnin zalear, ami lokak bhietanv, kiteak sogllim Juanvak provadi mhonn man’tat.” Hea pasot Jezuk portipallun tãnnim mhonn’lem: “Ami nokllonv.” Ani Tannem sanglem: “Koslê sot’ten Hanv heô vostu kortam tem Hanv-ui tumkam sanginam.” “Tumkam kitem dista? Konn-eka mon’xak dog put asle; tannem poilea sorxem ieun mhonn’lem: ‘Puta, voch ani dakanchea molleant az kam’ kôr.’ Putan mhonn’lem: ‘Hanv vechonam punn uprant tannem aplem mon bodol’lem ani gelo. Magir dusrea lagim vochun, tannem toxench mhonn’lem. Putan zobab dilo: ‘Hanv vetam, Saiba punn uprant vochunk na. Heam dogam bhitôr konnem bapaichi khuxi keli?” Tãnnim mhonn’lem: “Poilean.” Jezun tankam sanglem: “Hanv tumkam khorench sangtam: dônddvosuldar ani xindoll bailô tumchê adim Sorginchea Rajeant vetat. Karonn Juanv Devak man’ta toslea jivitachi vatt dakhounk tumchê-xim ailo, punn tumi tachem mandun gheunk na; punn dônddvosuldaramnim ani xindoll bailamnim tachem aikolem. Tem polleun tori, tachem mandun gheun tumim tumchem jivit-mon bodlunk na.” “Anink êk vopar aikat: Konn-êk bhattkar aslo; tannem êk dakancho mollo lailo, tachê bhonvtonnim addo ghalo, khonnun êk kollombi toiar keli, ani êk gopur bandlo; magir to mollo tannem kullvaddeank kumlleak dilo ani apunn poixilea ganvant gelo. Pikecho vêll lagim pavtôch, aplem kumllem gheunk tannem team kullvaddeam-xim apleam chakrank dhaddle; punn kullvaddeamnim, tacheam chakrank dhorun, ekleak mar ghalo, dusreak jivexim marlo, ani tisreak fatrailo. Anink êk pavtt poilê pavtti-vôn odikchodd, tannem dusream chakrank dhaddle, ani tãnnim tankam-i toxench kelem. ‘Mhojea putak bhiddetele’, oxem mhonnun xekim tannem aplea putak tanchê-xim dhaddlo; punn kullvaddeamnim putak polleun apnnam bhitôr mhonn’lem: ‘Ho tacho daiji; ieiat, haka jivexim marum-ia ani tachem daiz amchem korun gheum-ia.’ Ani tãnnim taka dhorun mollea bhair vhelo ani jivexim marlo. Atam molleacho dhoni ieta tedna, team kullvaddeank to kitem kortolo?” Tãnnim zap dili: “Team noxtteancho vhôdd bhosm kortolo ani dusream kullvaddeank, apnnak kalla-follam diteleank, aplo mollo kumlleak ditolo.” “ ‘Zo fatôr bandpiamnim soddun dil’lo toch zalo mhuk’ki-konnxea fatôr. Hem Sorvesporanuch ghoddun haddlam: ani tem polleun ami thottak zaleanv.’ oxem Povitr Pustokant, tumi kednanch vachunk na?” Jezun tanchekodde vicharlem. Mhonntôch Aplem Raj Dev tumchê koddlem kaddun ghetolo ani tachim follam dito eke porjek ditolo.” Ani konnui hea fatracher adllun podd’ta tache kuddkean kuddke zatele; punn konnancher to podd’ta tanchi pudd zateli. Tacheô vopari aikolea uprant mukhel iadnik ani Farizev apnnam vixim To uloita mhonn somzole; ani Taka te dhorunk sôdtale, punn lokak bhiele, kiteak provadi mhonn lôk Taka man’talo. Jezu novean tanchê lagim voparimnim ulounk laglo: “Sorginchem Raj oxem: Aplea puta khatir logna-jevonn dil’lea eka raza porim Sorginchem Raj. Lognak amontronn dhaddleleank apoun haddunk tannem apleam chakrank dhaddle, punn ieunk tankam naka zalem. ‘Apoileleank oxem sangat: Polleiat, Mhojem jevonn toiar asa, mhoje padde ani chorboil’lim zonavoram hanvem marlim, ani sogllem toiar zalam; jevnnak ieiat.’, oxem sangun, aniêk pavtt tannem dusream chakrank dhaddle. Punn tãnnim kan diunk na, ani eklo aplea bhattant, dusro aplea vepar-dhondeak gelo; heramnim chakrank dhôrle, tankam mostin vagoile ani tancho jiv kaddlo. Hem aikun razacho rag pettlo ani aplim loskoram dhaddun team khuneancho tannem bhosm kelo ani tanchem nogor lasun uddoilem. Uprant, ‘Logna-jevonn tôr toiar asa,punn apoil’leank tem favonam zalem; he khatir tumi mukhel rosteam-nakeanr vochat ani tumkam melltit titleank-ui lognak apoun haddat.’, oxem tannem apleam chakrank sanglem: Ani mukhel-rosteancher vochun, apnnank mell’lim titleank-ui, boreank toxem vaittank, chakramnim zomoilim, ani logna-vosro soireamnim bhòrlo. Jevnnak bosleleank pollounchê khatir raza bhitôr ie zalear, lognachi nesônn ghalinastanam thõi aslelea eka mon’xak tannem dekhlo, ani taka vicharlem: ‘Ixtta, lognachem vostr nastanam tum hanga koso bhitôr ailoi?’ Punn tannem zap kaddli na. Tedna razan chakrank sanglem: ‘Tache hat-pãi bandun taka kallokant bhair uddoiat; thõi sogllim rudon korun ani dant korkoraun astelim.’ Kiteak apoil’lim zaitim, punn vinchun kaddlelim thoddim.” Tedna Farizev gele ani Jezuk koso utrak dhôrcho tê vixim tãnnim ektthãi zaun tharav ghetlo. Ani Herodicheam pokxvadeam borabôr tãnnim apleam xisank oxem mhonnunk Jezu-xim dhaddle: “Guruji, tum sotan choltai ani Devachi vatt sotan xikoitai; ani tuka konnachich bhidda na, kiteak mon’xanchem tondd polleun tum uloinãi: hem ami borem zannonv. Tôr tuka kitem dista? Somrazak dôndd farik korunk kaideachem ki na?” Punn tanchem noxtteponn ollkhun, Jezun oso portipall kelo: “Arê ddhongeamnô! Tumi kiteak mhonn Mhaka fas mandd’tat? Mhaka êk donddacho nanno dakhoiat, polleum-ia.” Tãnnim Taka êk dinar dakhoilo. Jezun tankam vicharlem: “Hem rup konnachem? Ani hem borouop konnachem?” Tãnnim zobab dilo: “Somrazachem.” Tedna Jezun tankam sanglem: “Borem tôr, Somrazachem tem Somrazak diat, ani Devachem tem Devak diat.” Tacho zobab aikun te thottakle ani Taka sanddun gele. Teach disa Saduki, punorjivontponn na mhonntat te, Jezu-xim aile ani tãnnim Tachê lagim oxem vicharlem: “Guruji, Moizesan mhonn’lam: ‘Sonsôt nastanam konn-ui morot zalear, tachea bhavan tachê bailê lagim logn zaunchem ani aplea bhavak bhurgim utpon korchim.’ Tôr amchê modem sat bhav asle; poilo logn zalo ani melo; ani sonsôt na zaun, apli potinn aplea bhavak dovrun gelo; têch porim dusro ani tisro ani toxench satvo porian. Ani te soglle mortôch, bail-ui meli. Tôr, punorjivontponnachea somoiar, sat zannam bhitôr konnachi potinn zateli ti? Kiteak mhonn’lear soglleanchi ti potinn zal’li.” Jezun portipallun tankam mhonn’lem: “Povitr Pustokanchi, nhoi mhonn Devachê podvechi, tumkam ollokh na dekhun tumi chuktat. Karonn, punorjivontponnachea somoiar dadle logn zainant ani bailank logn korun dinant, punn tim sorgar asto Devacheam dutam sarkim zatat. Punn mel’leanchea punorjivontponna vixim ‘Abrahamacho Dev, Izakacho Dev, ani Jakobacho Dev Hanv.’, oxem Devan tumkam sanglam tem tumi vachunk na? Mel’leancho nhoi, bogor jivim asleleancho Dev To!” Ani lokan hem aikotoch tim Tachê xikovnnê vixim ojap zalim. Punn Sadukink Tannem oge kele mhonn aikun, Farizev ektthãi zaun aile, ani Tachi porikxa korunk, tanchê bhitorlea eklea vokilan ek oso vichar kelo: “Guruji, Somurtinit vhoddli adnea ti khõichi?” Jezun portipall kelo: “soglleam-vôn vhoddli ani poili adnea ti hi: ‘Sogllea tujea kallzan, sogllea tujea jivachea bollan, ani sogllea tujea monan, Sorvespora tujea Devacho môg kôr.’ Ani tichech baxen dusri ti hi: ‘Tuzoch kortai toso, tujea peleacho môg kôr.’ Heam don adneancher dhòrleli asa soglli Somurt ani Provadi.” Farizev ektthovlele astana, Jezun tanchê kodde ho vichar kelo: “Tea Krista vixim tumkam kitem dista? Konnacho put To?” Tãnnim Taka zobab dilo: “Davidacho.” Tannem vicharlem: “Toxem zalear, Atmeachea preronnan David taka Somi mhonnta tem koxem? Tôr tannem mhonn’lam: ‘Sorvesporan mhojea Somiak mhonn’lem: Tujeam dusmanank tujeam pãianchi monnoi Hanv koriin porian, tum Mhojea uzvea hatak bos.’ Zôr David taka Somi mhonnta, to tacho put koso tôr?” Konnachean Taka êk zap diunk zaunk na, nhoi mhonn to dis meren anink Tachê kodde kitem-i vicharunk konnakuch kalliz zaunk na. Tedna loka ani Apleam xisam kodde Jezu oso uloilo: “Moizesachea asonacher dhormxastri ani Farizev bosleat. Mhonntôch te tumkam sangtat titlem-i tumi korat ani pallat, punn tancheam kortubam pormannem tumi cholo nakat, kiteak te herank sangtat tem apunnuch korinant. Zodd ani sõsum nozo toslim ojim te bandtat ani herancheam bhuzancher ghaltat, punn tim ubarunk aplem bott legun launk kobul nant. Mon’xank dakhounk soglleô apleô kornneô kortat, dekhun Somurtintlim sutram asleleam pettulancheô vadiô te lamboit asat, toxench apleam avoronnanchê degek lail’le gondde lamb-lamb korun bhonvtat. Jevnnank poileô svatô, devsthanamnim poile-voile zage, tinttear salam’ ghevop, ani apnnank mon’xamnim ‘Guru’ mhonnun pacharop, hich tanchi as-ruch. Punn tumkam ‘Guru’ mhonnun pacharchim nant kiteak tumcho Guru ekloch ani tumi sogllim bhavbhoinni. Sonvsarant konnakuch tumcho ‘Bap’ mhonno nakat kiteak tumkam asa To sogar asto Ekloch Bap. Ani tumcho Guru Ekloch To Krist dekhun tumi apnnank ‘Guru’ mhonnun ghe nakat. Tumchê bhitorlo konn vhôdd to tumcho sevôk zauncho. Apnnankuch unch kaddtat tankam Dev khala uddoitolo ani apunnuch khaltim zatat tankam Dev unch kaddtolo.” “Dhormxastreamnô ani Farizevamno, kotta tumchem, ddhongeamno! Kiteak Sorginchem Raj tumi mon’xam mukhar dhamptat ani tumi-i bhitôr soronant, nhoi mhonn bhitôr sorunk sôdtat tankam-i bhitôr sorunk dinant. Ddhongeam dhormxastreamnô ani Farizevamnô, kottakotta tumchem! Kiteak êk novxis korchê khatir doriacher ani dhortorecher tumi firtat ani, konn-ekleak sampddailea uprant, don pavtt odik emkondd favo-aslolo tumchê sarko tumi taka kortat. Kurddeam fuddareamnô, kottakotta tumchem! Tumi oxem mhonntat: ‘Devmondirachean konn-ui soput ghetit zalear, tem kãich nhoi; punn Devmondirachea bhangarachean soput ghetit zalear, tim rinnkarim zatat.’ Arê murkheam-kurdd’deamnô! Kitem odik vortem? Bhangar vô bhangar povitr zai-xem korta tem Devmondir? Toxench tumi mhonntat: ‘Vedichean konn-ui soput ghetit zalear, tem kãich nhoi; punn vedicher asa tea danachean soput ghetit tim rinnkarim zatat.’ Arê kurdd’deamnô! Kitem odik vortem? Dan vô dan povitr zai-xem korta ti vedi? Tôr vedichean soput ghetat tim tichean ani ticher asa titleaichean soput ghetat. Ani Devmondirachean soput ghetat tim tachean ani tantum ravta tea Devachean soput ghetat. Ani sorgachean soput ghetat tim Devachea xinvaso-nachean ani tacher boslolo asa tea Devachean soput ghetat. Ddhongeam dhormxastreamnô ani Farizevamnô, kottakotta tumchem! Hortelanv, boddixêp ani jirem, osleancho dhavo vantto tumi Devak mhonn farik kortat, punn Somurtintle odik molache kaide, mhonngê neainit, doia ani visvaxiponn, he tumi soddun dileat. Te her bhairainastana tumi he poile pallche asle. Êk zollar gallun kaddtat ani akhem untt gilltat te kurdd’de fuddari tumi! Ddhongeam dhormxastreamnô ani Farizevamnô, kottakotta tumchem! Tôr patra ani tatta bhailean asa tem tumi nitoll kortat ani bhitorlean dusreakoddchem apleak zai tem bollan kaddun gheupa ani apleak zai titleanthuim meklleponnan dadosponn gheupa-axen bhòrlele asat tumi. Arê kurdd’dea Farizeva! Bhailean asa tem-i nitoll zaunchê khatir, patra ani tatta bhitorlean asa tem poilem nitoll kôr. Ddhongeam dhormxastreamnô ani Farizevamnô, kottakotta tumchem! Tôr tumi chuno kaddleleam somadhim sarke; teô bhailean mon’xank sobit distat, punn bhitorlean mel’leancheam haddamnim ani sogllea jin’sachê ollxiken bhòrleat. Têch porim tumi-i bhailean lokak promannik distat khore, punn bhitorlean tumi ddhongeponnan ani khotteponnan bhòrlole asat. Ddhongeam dhormxastreamnô ani Farizevamnô, kottakotta tumchem! Tumi provadeancheô somadhi bandtat ani nitivont mon’xancheô iadgiri nettoitat, ani mhonntat: ‘Amcheam purvozancheam disamnim ami asleleanv zalear, provadeanchem rogot varounk ami tanchê borabôr vantto gheunche nasleanv. Mhonntôch provadeank jivexim martleanchi tumi sonsôt mhonn tumchech tumi govai. Oxem tôr, tumcheam purvozanchea patkachem map tem tumi bhôrun kaddat. Sorpamnô, furxeancheam pileamnô, emkonddachea formonnantle koxe mhonn vattovtoleat tumi? Tôr polleiat, Hanv tumchê thãi provadeank, zannarank ani xastreank dhaddtam. Punn tumi tantleam kãi zannank jivexim martelet ani khursar khillaitelet, ani kãi zannank tumcheam devsthanamnim jerbond ditelet ani eka nogrant thaun dusrea nogrant tanchê pattapattik lagtelet. Devak manovlelea Abelachea rogta thaun tem Gabharea ani vedi modekot tumi jivexim marlelea Barakiachea puta Zakariasachea rogta meren prithumer niropradi rogot varoilam titlem-i tumcher buzchê khatir tumi oxem kortelet. Hanv tumkam khorench sangtam: hem sogllem hê pinddkechea mathear ietelem. Jeruzalea, Jeruzalea! Tum provadeank jivexim martai ani tujê thãi dhaddleleank fatraitai! Zoxem kombi apleam paktteam tolla apleam pilank ektthãi korta, toxem kitlê pavtti mhonn tujeam bhurgeank ektthaunk Hanvem sôdlem, punn tem tumkam naka zalem! Chotrai dhôrat, tumchem ghor tumkam padd zal’lem urtelem. Hanv tumkam khorench sangtam: ‘Sorves-porachea nanvan ieta taka zôi!’, oxem tumi mhonnxeat porian tumi Mhaka hea fuddem anink polleunchim nant.” Jezu Devmondirantlo bhair sorun vetastanam, Devmondirachê bandavollicher lokx lai mhonn Taka sangunk Tache xis lagim sorle. Tannem zap diun tankam mhonn’lem: “Hem sogllem tumi polletat nhoi? Hanv tumkam khorench sangtam: hanga nisontton zaun fatrar fatôr urcho na.” To Olivet dongrar bosun aslo, tedna ekvodde ieun xisamnim Tachê kodde vicharlem: “Hem kedna ghòddtelem tem, ani Tujea ienneachi ani kallachea xevottachi khunna konn ti, amkam sang.” Ani portipallun Jezun tankam sanglem: “Tumkam konnem fottoinam zaunk chotraien ravat; kiteak sobar zann Mhojem nanv gheun ani apunn Krist mhonnun ietele, ani zaiteank fottoitele. Tumi zhuzancho avaz ani loddaianchi khobor aikotelet. Uchamboll zaina zaunk chotrai dhorat; tôr hem sogllem ghoddon ieunk zaik; punn xevôtt rokddoch ieuncho na. Kiteak raxttr raxttracher ani raj rajeacher uprastelim. Hanga-thõi bhuk poddteli ani bhikamp zateli. Punn hem sogllem fokot porsuttvenninchi survat. Tedna piddapidd diunk tumkam dhorun ditelim ani tumkam jivexim martelim ani Mhojea nanva pasot sogllim raxttram tumkam zolltelim. Tedna sobar zannancho bhavart haltolo; mon’xam ekamekak lavun ditelim ani ekamekak zolltelim. Sobar khotte provadi uprastele ani zaiteank fottoitele; ani kaido-modd’ni vaddta tea mapan zaiteancho môg xellmoddo zatolo. Xevottak porian thir ravtit tankam Dev taronn ditolo. Ani heam soglleam porzank ek sakxi mhonn hea Rajeachi hi bori khobor akhea sonvsarant porgott zateli. Ani tea uprant xevôtt ietolo. Daniel provadean sangun dovorlolo to ‘Sotianasacho kanttallo’ polletat tedna, (konnui vachta tem taka somzun ieum-di) povitr zagear ubo aslolo tumi polletôch (vachtat tãnnim hem somzunchem), Judeiant asleleamnim dongracher pollun vechem; pattsar aslelean aplea ghorantlem kitench vhorunk sokla denvchem nhoi; xetant aslelean aplem avoronn vhorunk porot ieunchem nhoi. Te dis ietôch gorbest bailanchem ani dud diteleanchem kotta! Tumchi pollapôll hinvalleant vô Sabbatha disa zaina zaunk magat; kiteak tedna sonvsarachea orombak thaun tem atam porian zaunk na ani hea fuddem zauncho na toslo êk vhôdd sontap ietolo. Ani te dis unne korunk nasle zalear, konnuch vattavoncho naslo; punn vinchun kaddloleam khatir te dis unne keleat. Tedna, ‘polle, Krist hanga asa’ vô ‘To thõi asa’ mhonn konnuch tumkam sangit zalear, tumi tem sotmani nakat; kiteak lottik Krist ani lottik provadi upzotele ani zata zalear, vinchun kaddleleank porian fosounk, vhoddleô khunna ani ochoriam korun dakhoitele. Chotrai dhôrat, Hanvem tumkam hem adinch sangun dovorlam. Dekhunuch oxem konn tumkam mhonntit zalear, ‘ho polle to oronneant asa’, tumi bhair soronakat; vô ‘ho polle to ghorant bhitôr asa’, tem tumi sotmaninakat; kiteak zoxem zhogla-nnem udentik marta ani ostomtek porian zhogzhogta, toxench Mon’xachea Putachem iennem zatelem. Moddem asa thõi gid-ui ektthovtele. Team disancho sontap iena fuddem suriacher kallôk poddtolo, chondrim’ aplo uzvadd diuncho na, noketram mollba velim sokla poddtelim ani ontralla veleô xokti kolkolteleô. Ani tedna Mon’xachea Putachi khunna mollbar dixtti poddteli; sonvsarantlim kullam dhuk kortelim ani podven ani vhoddê mhoimen mollba-cheam kupancher ieto Mon’xachea Putak dekhtelim. Ani kornneachea eka mottea avazan To Apleam dutank dhaddtolo, ani sonvsaracheam char-ui dixam veleam, ontrallachê êkê ximê thaun dusrê ximê porian asleleam Tacheam vinchleleank te zomoitele. Anjirachea zhaddachi vopar somzun gheiat: tacheô khandiô rosbhorit zatat ani tankam kombreô futt’tat tedna, gim’ lagim pavla mhonn tumkam kollon ieta; têch porim tumi hem sogllem pollelea uprant, To lagim pavlo, darachea umbrear asa mhonn zanno zaiat. Hanv tumkam khorench sangtam: hem sogllem ghòddlea bogor hi pinddka ontorchi na. Ontrall ani prithum’ sortelim, punn Mhojim utram kednanch sorchim nant. Punn ekleach Bapak kaddun, anink konnakuch, sorgincheam dutank vô Putak legun, tea disachi ani tê ghoddiechi khobor na. Noacheam disamnim zoxem zalem, toxench Mon’xacho Put ieta tedna zatelem. Buddtê adleam disamnim Noa pett-tarvant bhitôr sorlo to dis meren lôk khata-pietalo, logn zaun ani logn korun diun aslo, ani poriallo ieun tancho soglleancho nas zait porian, tankam kãi ek koll’lem na; toxench Mon’xacho Put ietolo tedna zatelem. Tedna xetant asleleam dogam dadleantlea ekleak vhortele, dusreak sanddtele; dantear dollunk asleleam dogam bailantlê eklêk vhortele, dusrêk sanddtele. Mhonntôch, tumcho Somi khõichea disa ietolo tem tumi nokllot dekhun zagrut ravat. Punn hem mat monant dhôrat: konn-ui ghorkar ratichea khõichea parar chôr ietolo mhonn zanno aslo zalear, to zagrut ravto aslo ani aplem ghor foddun nagounk diuncho naslo. Mhonntôch tumi-i toiar ravat, kiteak tumi chintinant tê ghoddier Mon’xacho Put ietolo. Ghorant asleleam heram chakrank vogtar jevonn diunk dhoni aplea ghorabeacher chakrak odhikar dita to visvaxi ani xanno chakor konn zait? Aplo dhoni ieta tea vellar taka oxem korto mell’tolo to chakor subhagi. Hanv tumkam khorench sangtam: to taka sogllê aplê dovloticher odhikar ditolo. Punn baskôll chakôr apnnach bhitôr oxem mhonnot zalear: ‘Mhozo dhoni ieunk kallav korta’, ani apleam boraborcheam chakrank marunk ani bebdeam borabôr jevunk ani pieunk lagot zalear, to ravonaslolea disa ani to nokllo aslelê ghoddier tea chakracho dhoni pavtolo; ani taka koddok xikxa ditolo, ani tachi gôt ddhongiam sarki zai-xi kortolo. Thõi sogllim rudon korun ani dant korkoraun astelim.” “Dha ankvari apleô divleô gheun novreak ievkar diunk bhair sorleô: tankam ghoddlem toxem Sorginchea Rajeant zatelem. Tanchê modleô panch pisatt ani panch xanneô asleô. Panch pisatt ankvarimnim divleô ghetleô, punn apnnam borabôr tel gheunk na; xanneamnim divleam borabôr apleam xinsleamnim tel-ui vhelem. Novreak uxir zalo ani teô soglleô jemieunk lagleô ani nhidleô. Punn modianir oso avaz zalo: ‘Ho polle novro! Taka ieukar diunk vochat.’ Tedna teô soglleô ankvari zageô zaleô ani apleam divleam-vati toiar korunk lagleô. Pisattamnim xanneank mhonn’lem: ‘Tumchem ilem tel amkam diat, amcheô divliô palovtat.’ Punn xanneamnim oxi zap dili: ‘Tumkam ani amkam titlem aschem na. Vikteleager vochat ani tumkam viktem gheiat: hench odik borem’. Teô tel viktem gheunk vetat mhonnosôr novro pavlo; toiar asleô teô ankvari tachê borabôr kazra-vosreant bhitôr geleô ani dar bond kelem. Xekim dusreô ankvari pavleô ani mhonnunk lagleô: ‘Saiba, Saiba, amkam dar ugôdd!’ Punn tannem zap dili: ‘Hanv tumkam khoreponnim sangtam, hanv tumkam ollkhonam.’ Mhonntôch zagrut ravat, kiteak dis, nhoi mhonn ghoddi, tumi nokllot.” “Têch bhaxen, apleam chakrank apoun haddun ani tanchekodde apli girestkai diun apunn ekdom poixil’lea desant ek monis veto aslo zal’lea porim Sorginchem Raj. ekleak tannem panch talent dile, dusreak don ani tisreak êk, zonn-ekleak ap-aplê kuveti pormannem. Magir to bhair sorun gelo. Panch talent ghetlele to rokddoch gelo ani te gheun tannem vepar-dhondo kelo ani anink panch zôddle. Têch porim don talent ghetlele tannem-i anink don zôddle. Punn êk talent ghetlolo tannem vochun zomin khonnli ani thõi aplea dhoniacho duddu purun lipoilo. Zaito kall bolanddlea uprant team chakrancho dhoni portun ailo ani tannem tanchê lagim hixôb maglo. Panch talent ghetlele to lagim sorlo ani, anink panch talent dakhoun, tannem mhonn’lem: ‘Saiba, tunvem mhaka panch talent dil’lei, tôr polle hanvem anink panch zôddleat.’ Tachea dhonian taka mhonn’lem: ‘Xabas, borea ani visvaxi chakra! Thoddeach vostumnim apunn visvaxi mhonn tunvem dakhoili dekhun, hanv oglleô vostu tuka patietolom. Ie ani tujea dhoniachea sukhant vantto ghe.’ Uprant don talent ghetlele to-i lagim ailo ani tannem mhonn’lem: ‘Saiba, tunvem mhaka don talent dil’lei, tôr polle hanvem anink don zôddleat.’ Tachea dhonian taka mhonn’lem: ‘Xabas, borea ani visvaxi chakra! Thoddeach vostumnim apunn visvaxi mhonn tunvem dakhoili dekhun, hanv oglleô vostu tuka patietolom. Ie ani tujea dhoniachea sukhant vantto ghe.’ Êk talent ghetlolo tannem-i lagim sorun mhonn’lem: ‘Saiba, tum khôr monis mhonn hanv zannom: tunvem vompunk nãi thõi tum lunvtai, ani lavunk nãi thõichem tum punzaitai; dekhun bhieun hanv gelom ani tuzo talent dhornnint purun hanvem lipoilo. Ho polle to hanga asa; tuzo to tum ghe.’ Punn dhonian portipallun taka mhonn’lem: ‘Khottea ani allxea chakra, hanvem vompunk na thõi hanv lunvtam ani lavunk na thõichem hanv punzaitam mhonn tum tôr zanno asloi; mhonntôch mhozo duddu tunvem savkaram kodde dovrunk zai aslo, portun ietôch, mhojem tem, tea bhair kolantor, hanv gheto aslom. Mhonntôch tachê lagcho to talent kaddun gheiat ani dha talent asat taka diat; kiteak asleleank Dev anink-ui ditolo ani tanchi bhôr zateli; punn nasleleanchem asa tem-i Dev kaddun ghetolo. Kiteakuch upkaronaslelea hea chakrak kaddun bhair kallokant uddoiat; thõi sogllim rudon korun ani dant korkoraun astelim.’ ” Mon’xacho Put soglleam Apleam dutank gheun mhoimen ietolo, tedna To Aplea mhoimechea xinvasonar bostolo, ani Tachê mukhar sogllim raxttram zomtelim, ani zoso gonvlli bokdde-ankoddchim xelliank doxim korta toso To-i soglleam raxttrank ekak dusrea-koddchim doxim kortolo. Xelliank Aplea uzveak ani bokddiank Aplea daveak dovortolo. Tedna Raza Aplea uzveak asleleank mhonntolo: ‘Mhojea Bapacho axirvad ghetleleamnô, ieiat ani sonvsar rochleleak tumkam toiar kel’lem tem raj, tumchem daiz gheiat. Kiteak Hanv bhukel’lom ani tumi Mhaka jevunk vaddlem; Hanv tanel’lom ani tumi Mhaka pieunk dilem; Hanv vattsur koso ail’lom ani tumim Mhaka biradd dilem; Hanv vingllo aslom ani tumi Mhaka nhesunk dilem; piddent aslom ani tumi Mhoji khobor-mat ghetli, bondkhonnint aslom ani tumi Mhaka bhett dili.’ Tea vellar promannik mon’xam Taka zobab korun vichartelim: ‘Somia, kedna mhonn ami Tuka bhukel’lo polleun jevunk dilem? Tanel’lo polleun Tuka pieunk dilem? Kedna mhonn Tuka vattsur koso polleun amger biradd dilem? Vingllo polleun Tuka nhesunk dilem? Ani Tum piddent vô bondkhonnint astanam, kedna Tuka bhett diunk ieileanv?’ Ani zap diun Raza tankam mhonntolo: ‘Hanv tumkam sot sangtam: Mhojeam lhanantleam lhanam bhavam-bhoinnim modlea ekleak jem tumi kelem, tem tumi Mhakach kelem.’ Magir Aplea daveak asleleank To mhonntolo: ‘Xirap poddleleamnô, devcharak ani tacheam dutank toiar kel’lea sasnnachea ujeant Mhojê thaun koddsorun vochat. Kiteak Hanv bhukel’lom, punn tumi Mhaka jevunk vaddunk na; Hanv tanel’lom, punn tumi Mhaka pieunk diunk na; vattsur koso ail’lom, punn tumi Mhaka biradd diunk na; vingllo zal’lom, punn tumi Mhaka nhesunk diunk na; piddent ani bondkhonnint poddlolom, punn tumi Mhaka bhett diunk na.’ Tea vellar him-i Taka zobab korun vichartelim: ‘Somia, kedna mhonn ami Tuka bhukel’lo, tanel’lo, vattsur vô vingllo zal’lo, piddent vô bondkhonnint poddlolo polleun, Tuji chakri korunk na?’ Tedna To tankam zap diun mhonntolo: ‘Hanv tumkam sot sangtam: heam lhanantleam lhanam modlea ekleak-ui jem kitem tumi korunk na, tem tumi Mhaka-i korunk na.’ Ani him sasnnachê khastik vetelim, punn Devak manovlelim mon’xam sasnnik jivit bhogunk vetelim.” Hem sogllem uloun sompoilea uprant Jezun Apleam xisank mhonn’lem: “Don disamnim Pask zaunchem asa mhonn tumi zannont; ani Mon’xachea Putak khursar marunk dhorun ditele.” Tedna mukhel iadnik ani porjeche zann’te Kaifas nanvachea porom’-iadnikachea nivasant zomle ani visvas ghat korun Jezuk dhorunk ani jivexim marunk tãnnim guddmêll kelo. Tori astana tãnnim mhonn’lem: “Hem Porbecheam disamnim naka; na zalear lokachi uchambollai zaum ieit.” Jezu Betanient Simanv koddkarachea ghorant astana, êk bail eka chon-drokanti aidonant unch molachem pormollit tel gheun aili, ani jevnnak boslolo thõi Tachea mathear tinnem tem ôtlem. Hem polleun xis chiddle; tãnnim mhonn’lem: “Ho ibadd kiteak? Hem vhodd molak vikun, goribank diunk zatem.” Hem aikun Jezun tankam mhonn’lem: “Hê bailek tumi kiteak kimar kortat? Êk bori kornni tinnem Mhojê sorim kelea. Gorib mon’xam tumchê modem sodam asatuch, punn Hanv sodanch tumchea sangata na. Mhojê kuddir hem tel otoun tinnem Mhaka nikhipinnek toiar kelo. Akhea sonvsarak, khuim-i hem Xubhvhortoman porgott zata titlei kodden, tinnem kitem kelam tem-i tichea ugddasak mhonn porgott’tele mhonn Hanv tumkam khorench sangtam.” Tedna Barantlo eklo, Judas Iskariot nanvacho, mukhel iadnikam-xim gelo; tannem mhonn’lem: “Hanv Taka tumchea hatant ghalin zalear, tumi mhaka kitem diunk raji asat?” Tãnnim taka rupeache tis nanne mezun dile. Ani to dis thaun Jezuk dhorun diunk boro soêg to polleun aslo. Fug-nasloleam Unddeanchea poilea disa xis Jezu lagim vicharunk aile: “Tujem Pask-Jevonn khõi ami toiar kel’lem Tuka zai?” Ani Jezun sanglem: “Omkea mon’xak hea xarant mellunk vochat ani taka mhonnat: ‘Guruji oxem sangta: Mhozo vêll lagim pavla; Mhojeam xisam borabôr tujea ghorant Hanv Pask kortam.” Mhonn’toch Jezun tankam hukum’ dil’lo to xisamnim pall’lo ani Pask toiar kelem. Sanz zatôch, Apleam bara xisam sangatim To jevnnak boslo. Ani te jevtastanam Tannem mhonn’lem: “Hanv tumkam khorench sangtam: tumchê bhitorlo eklo Mhozo ghat gheuncho asa.” Te zobor khontibhorit zale ani ek-eklo Taka mhonnunk laglo: “Somia, hanv nhoi mum to?” Tannem oso portipall kelo: “Mhojê borabôr tattant hat ghala to Mhozo ghat ghetolo. Mon’xacho Put Tachê vixim boroil’lem asa tea pormannem veta khoro, punn zannem Mon’xachea Putacho visvas-ghat ghetla tachem kottakotta! Zolmakuch ieunk naslolo zalear, tea mon’xak odik borem zato aslem!” Tacho visvas-ghat gheupea Judasan oxem vicharlem: “Guruji, hanv nhoi mum to?” Jezun taka zap dili: “Oxench tum sangtai.” Ani te jevtastanam Jezun unddo ghetlo, Devak dhin’vasun to môddlo, to xisank dilo ani mhonn’lem: “Gheiat ani khaiat, hi mhoji kudd.” Magir Tannem patr ghetlem ani Devak dhin’vasun tem tankam dilem ani mhonn’lem: “Patkanchea bhogsonnea khatir, soglleam monxam pasot varoilam tem, novea korarachem, hem mhojem rogot dekhun tumi sogllim tantlem pieiat. Ani tumkam sangtam: tumchea sangata Mhojea Bapachea rajeant novo to soro Hanv piein porian, hea fuddem dakechea follachem Hanv anink pieuncho na.” Stotram gailea uprant, te Olivet dongrar vochunk bhair sorle. Tedna Jezun tankam sanglem: “‘Hanv gonvlleak martolom ani xellianchi duspôtt zateli.’, oxem boroilelem asa te khatir, aichêch rati tumi soglle Mhaka soddun vetelet. punn Devan Mhaka punorjivont kortôch Hanv tumchê adim Galileiant vetolom.” Hea utrak Pedrun mhonn’lem: “Tuka lagun sogllech pasun Tuka soddun vetit zalear, hanv kosoch Tuka sôddun vecho nam.” Jezun taka zap dili: “Hanv tuka sot sangtam: aichê rati, kombean sad ghalchê adim, Mhaka ollkhonãi mhonn tin pavtti sangtoloi.” Pedrun taka mhonn’lem: “Tujê borabôr mhaka morchem poddlem zalear-ui, hanv Tuka kodinch soddun vechonam.” Heram-i xisamnim toxench mhonn’lem. Tedna Jezu tanchê borabôr Getsemani mhonnlelea molleant gelo ani Tannem xisank mhonn’lem: “Ho-thõi vochun Hanvem magnnem kori-sôr tumi hanga bosat.” Ani Pedruk ani Zebedevacheam dogam putank Tannem Apnna borabôr vhele; tedna To tollmollunk ani khontibhorit zaunk laglo. Tedna Tannem tankam mhonn’lem: “Ekdom chodd khontin bhoron Mhozo jiv mornnachê tonnir pavla. Tumi hanga ravat ani Mhojê sangatim zagrônn korat.” Ani matso fuddem vochun To omto poddlo ani oxem magnnem korunk laglo: “Bapa Mhojea, zata zalear, Mhojê velem hem patr pois vochum-di; toripunn Mhaka zai toxem nhoi, Tuka zai toxem zaum-di.” Xisam sorxem porot ietoch, te Taka nhidlele mell’le, ani Tannem Pedruk mhonn’lem: “Mhonntôch êk hor-bhôr Mhojê borabôr zage ravunk tumchean nozo zalem mum? Tumi tallnnent poddonam zaunk zagrut ravat ani magnnem korat. Otmo raji asa khoro, punn kudd osokt.” Tanchê sorxilo vochun, Tannem novean, dusrê pavtti, oxem magnnem kelem: “Bapa Mhojea, Hanvem hem patr pielea bogor tem pelean kaddunk zaina zalear, Tuji khuxi zaum.” Ani portun ietoch, tanche dolle jemen zodd zal’le dekhun te Taka nhidlele mell’le. Tankam thõich sanddun novean To pois gelo ani tinch utram mhonnun Tannem tisrê pavtt magnnem kelem. Uprant xisam sorxem porto ieun, Tannem mhonn’lem: “Azun porian nhidtat atam ani visôv ghetat tumi? Polleiat, Mon’xacho Put patkeanchea hatant poradhin zauncho vêll pavlo atam. Utthat! Vochum-ia! Mhozo ghat ghetolo to ho polle laginch asa.” Oxem uloita thõich astanam, Judas, Barantlo eklo, thõi pavlo ani tachê borabôr torvari ani tonnke gheun porom’-iadnikamnim ani porjecheam zannteamnim dhaddlolo lokacho êk vhoddlo zomo. Ghatkean tankam oxem mhonnun khunna dil’li: “Hanv umo ghetolom polle, toch to; taka dhôrat.” Hea pasot rokddoch Jezu-xim ieun tannem mhomm’lem: “Noman Tuka, Guruji!”, ani Tacho umo ghetlo. Jezun taka mhonn’lem: “Ixtta, tum anga korunk ailai tem kam’ kôr.” Tedna te fuddem sorle ani Jezuchea angar hat ghalun tãnnim Taka dhôrlo. Ani ovchit Jezu sangatim asleleantlea eklean, rokddoch aplê torvarik hat ghalun, ti bhair kaddli ani porom’-iadnikachea chakracher marun tacho kanuch katrun uddoilo. Tedna Jezun taka mhonn’lem: “Tuji torvar tichê svater ghal, kiteak torvar kaddtat te torvarin mortele. Mhojea Bapa kodde Hanvem maglear, To bara-vôn ogllim devdutanchim loskoram atanch Mhojea adarak dhaddcho na mhonn dista tuka? Punn oxem zaunk zai mhonn Povitr Pustok sangta tem koxem ghoddon ietelem tôr?” Tea vellar Jezun te urponjik mhonn’lem: “Tumi torvari ani tonnke gheun Mhaka dhorunk ieunk Hanv konn pundd kitem? Dispottim tumchê modem bosun Hanv Devmondirant xikovnn ditalom tedna tumi Mhaka dhôrunk na.” Punn provadeanchim borovpam pallon ieunchê khatir hem sogllem ghòddlem. Tea vellar soglle xis Taka sanddun pollun gele. Jezuk dhôrlolo team mon’xamnim Taka porom’-iadnika, Kaifasager vhelo; thõi xastri ani zannte ektthãi zal’le. Pedru pois thaun Tachê pattlean cholun porom’-iadnikachea angnnant porian gelo ani bhitôr sorun hachi sompadnni koxi zait ti polleunk kamdaram borabôr boslo. Mukhel iadnik akhê Mha-Dhormsobhê borabôr Jezuk mornnachem formonn diunchê khatir Tacher add firiad korunk konn-ui lottik aropi melltit kai mhonn sôdtale; punn sobar fottkire aropi fuddem sorun-ui, tankam zai tosli firiad tankam mellonam zali. Xekim dog zann fuddem sorle ani tãnnim sanglem: “Hannem mhonn’lam: ‘Devachem Mondir môddunk ani tem tin disamnim bandunk mhaka podvi asa.’ ” Tedna ubo ravun porom’-iadnikan Tachê kodde vicharlem: “Kãich zap dinãi? He tujer add hi firiad ditat tem kitem?” Punn Jezun zap kaddli na. Ani porom’-iadnikan Taka mhonn’lem: “Jivea Deva mhukar soputa khal ulounk hanv Tujekodde magtam, Krist To, Devacho Put To, Tunch zalear amkam sang.” Jezun taka portipall kelo: “Tunvem sanglem toxench tem. Tôr Hanv tumkam sangtam: Mon’xachea Putak dev-podvechea uzvea hata boslolo ani sorgincheam kupam velean ieto tumi dekhtelet.” Tedna aplim vostram pinzun porom’-iadnikan mhonn’lem: “Hannem devninda keli! Sakxidaranchi anink kosli goroz amkam? Chotrai dhôrat, tumi atanch devninda aikolea. Tôr tumkam kitem dista?” Tãnnim zobab dilo: “Taka moronn favo!” Tedna kãi zannamnim Tachea tonddar thimpi uddoili ani Tacher thapttam marlim; heramnim Tacher mutti marun mhonn’lem: “konnem marla tuka? Are Krista! bhakit kor amkam.” Itlea mhonnosôr Pedru bhair angnnant bosun aslo; ani êkê chakornnin tachê sorxem vochun mhonn’lem: “Tum-vui Galileikar Jezu borabôr astaloi.” Punn soglleam hujir na mhonnun tannem sanglem: “Tum kitem mhonntai tem hanv nokllom.” To darvonttea bhair vetanam dusrê êkê chakornnin taka pollelo ani thõi asleleank tinnem mhonn’lem: “Ho Nazaretkara Jezu borabôr aslo!” Ani tannem soput gheun novean na mhonn’lem ani sanglem: “Hea mon’xak hanv ollkhoch na!” Anink thoddea vogtan thõi asleleamnim lagim sorun Pedruk mhonn’lem: “Dubhava vinnem tum-vui tanchê bhitorlo eklo, ani tujem ulouopuch tuka dakhoun dita.” Tedna to apnnacher xirap ghalun ani soput gheun mhonnunk laglo: “Hanv hea mon’xak ollkhoch na!” Teach vellar kombean sad ghalo, ani apnnak Jezun kitem sanglelem to Pedruk ugddas ailo: “Kombean sad ghalchê adim tum tin pavtti Mhaka ollkhonãi mhonn sangtoloi.” Ani bhair vochun Pedru dukhamnim roddunk laglo. Dis uzvaddonam fuddem, soglleam mukhel iadnikamnim ani porjecheam zannteamnim Jezucho jiv kaddunk lavcho mhonn tharav ghetlo. Tãnnim Taka bandlo ani vhorun Pilat razpalachea hatant ghalo. Jezuk formonn marlelem polleun, Tacho ghat ghetlolo tea Judasak ontoskornnacho kiddo taka khaunk laglo dekhun, rupeache tis nanne mukhel iadnikank ani zannteank portun dile ani mhonn’lem: “Niropradi rogtacho ghat gheun hanvem patok kelem.” Tãnnim mhonn.lem: “Tem amkam kiteak poddlam? Tujem tunch polle.” Tannem te rupeache nanne Devmondirachea Gabhareant apttun uddoile ani vochun gôll ghetlo. Mukhel iadnika-mnim te nanne kaddun mhonn’lem: “Te rogtachem mol dekhun, te Devmondi-rachea bhanddarant ghalum noiê.” Ani tharav gheun, pordexeank purunk team poixeamnim tãnnim kumbhara-chem ek bhatt viktem ghetlem. Hea karonnak lagun tê svatek az porian Hakeldama, mhonngê “Rogtachem Bhatt”, mhonn nanv asa. Tedna, “Ani rupeache te tis nanne, Israelachea loka modem, taka lagun, diunchem tharailelem tem mol, tannim ghetle ani Sorvesporan mhaka hukum’ ghal’lo tea pormannem kumbharachea bhattak te môddle.”, oxem Devan Jeremias provadea vorvim sanglolem tem khorem zalem. Magir Jezuk razpala mukhar ubo kelo; ani razpalan Tachê lagim oxem vicharlem: “Judevancho raza tum?” Jezun taka mhonn’lem: “Tum sangtai toxem tem.” Ani mukhel iadnik ani zannte Tacher add garannem korit astana, Tannem zapuch kaddunk na. Tedna Pilatan Taka mhonn’lem: “Kitleô govaiô Tujer add te ditat teô tum aikonãi?” Punn Tannem eka utrak legun, apnnak zap kaddunk na mhonn razpalak ekdom’ mottem ojap dislem. Dôr porbecheam somoiar khõichea-i eka koideak, lokak zai taka, razpalan suttka diunchi sonvoi asli. Tedna Barab’bas mhonnlolo, soglleanchê ollkhicho, êk koidi aslo. Hea pasot thõi ektthãi zal’leam lagim Pilatan vicharlem: “Konnak hanvem sôddlolo tumkam zai? Barab’basak vô Krist mhonntat tea Jezuk?” Nattkaien tãnnim Jezuk apnnachea hatant ghala mhonn Pilat borem zanno aslo. Razpal niti-sodrer boslolo astana, tachê potinnin oxem taka sangunk dhaddlem: “Taka lagun aiz eka sopnnant hanvem zaitem sonslam dedkhun tea promannik mon’xachê ban’goddent tum poddo naka.”, Tea mhonnosôr mukhel iadnikamnim ani zannteamnim Barab’basak suttka ani Jezuk mor-nnachem formonn magunk lokachea monant ghalem. “Heam dogam bhitorlea konnak hanvem suttka dil’li tumkam zai?”, oxem tea razpalan tankam vicharlem. “Barab’basak.”, oso tãnnim zobab dilo. Pilatan tankam mhonn’lem: “Tôr Krist mhonntat tea Jezuk hanvem kitem korchem?” Soglleamnim zobab dilo: “Taka khursar mar!” Tannem tankam vicharlem: “Tôr Tannem vaitt kitem kelam?” Punn tim odik vhoddlean bob marunk laglim: “Taka khursar mar!” Tedna, aplea-chean kainch korunk zaina zalem punn uchambollai odikuch vaddta ti polleun, “Hea promannik mon’xachea rogta vixim mhozo kosloch guneanv na. Hi zobabdari tumchi!”, oxem mhonnun Pilatan udok ghetlem ani loka hujir aple hat dhule. Ani akhê porjen portipall kelo: “Tachem rogot amcher ani amcheam bhurgeam-ballancher poddum!” Tedna, tannem tankam Barab’basak sôddun dilo ani Jezuk jerbond diun khursar marunk tanchê adhin kelo. Tedna razpalacheam soinikamnim Jezuk raznivasant vhelo ani Tachê bhonvtim soglli polttonn ektthãi keli. Tachim vostram kaddun Tacher ek tambddem-lal avoronn ghalem; ani kantteancho êk mukutt vinnun Tachea mathear ghalo, ani Tachea uzvea hatant êk boddi dili. Tachê mukhar dimbi moddun, te Taka kenddun mhonntale: “noman tuka Judevanchea raza!” Tacher thimpi uddounk lagle ani boddi kaddun gheun ti Tachê tokler marunk lagle. Tachim khebaddam kelea uprant tãnnim tem tambddem avoronn kaddlem ani novean Taka Tachim khaxa vostram ghalim; ani khursar marunk te Taka gheun gele. Bhair sortôch, Simanv nanvacho, Siren ganvcho, konn-êlo monis tankam mell’lo ani tãnnim taka Jezucho khuris bollan vhorunk lailo. Ani Golgota mhonnlolea zagear (mhonngê Kortteachea zagear) pavtôch, tãnnim soreant pint misllun Taka pieunk dilem, punn tem chaklea uprant To pienam zalo. Taka khursar marlea uprant, tãnnim sorti ghalun Tachim vostram vanttlim, ani thõi bosun te Taka rakhunk ravle. Tachea mathea voir Tacho guneanv oso boroun ghalo: “Judevancho Raza To Jezu Ho” Tedna Tachê borabôr dogam punddank-ui khursar marle, ekak uzvean ani dusreak davean. Tennem ieto-veto lôk apli tokli haloit Jezucheô kenddnneô kortalo ani mhonntalo: “Devmondir moddun uddoupacho ani tem tin disamnim novean bandpacho to tum mum rê?! Tum Devacho Put zalear, tukach nivar ani khursa velo denv atam!” Têch porim dhormxastream ani zannteam borabôr mukhel iadnik-ui Tachi ninda korun mhonntale: “Dusreank soddoilim hannem, hachê lagim apnnakuch soddounk zaina! To Israelacho raza khõi! Tôr taka atam khursa velo denvum-di ani tedna ami tacher bhavart dovortolenv! Hannem Devacher visvas tthevlo, atam Devak to zai zait zalear, Tannench haka soddouum-di tôr ‘Hanv Devacho put’, oxem hannem sanglelem asa!” Têch bhaxen Tachê borabôr khursar marlele te pundd-ui Tacheô kexttaeô kortale. Don’par thaun tin vazo porian sogllea desacher kallôk poddlo ani sumar tin vaztam Jezun vhoddlea tallean mhonn’lem: “Eli, Eli, lama sabakthani?” mhonngê “Deva Mhojea, Deva Mhojea, kiteak Tunvem Mhaka sanddloi?” Hem aikun thõi asleleam kãi zannamnim mhonn’lem: “Ho Elijak ulo marta.” Ani tanchê modlea eklean dhanv marun ek allombem haddlem, ani tem xirkeant buddoun ani êkê boddiek lavun tannem Jezuk pieunk dilem. Heramnim mhonn’lem: “Rav! Elija Taka soddounk ieta zalear polleum-ia.” Punn aniêk pavtt vhoddlean arddun Jezun prann sôddlo. Tedna Devmondirantlea Gabhareacho podd’do voir thaun sokol doxim pinzlo, bhi kampli, khoddpam futtlim, somadhi ugteô zaleô, ani zaiteam meleleam promannik mon’xancheô kuddi jivont zaleô, ani Tachea punorjivontponna uprant tim apleam somadhintlim bhair sorun povitr xarant gelim ani sobar zannank dixtti poddlim. Bhikamp ani her ghòddtalem tem polleun, xotpoti ani tachê borabôr Jezuk rakhtale te zobor bhieun mhonnunk pavle: “Ho khoreponnim Devacho Put aslo!” Jezuchi seva-chakri korun Galileiak thaun Tachê pattlean aileleô sobar bailô thõi asleô ani pelean ravun hem sogllem polletaleô. Tanchê bhitôr Mari Magdalen, Jakobachi ani Juzechi avoi Maria, ani Zebedevacheam putanchi avoi. Sanz zalea uprant, Juze nanvacho, Arimateiacho êk girest monis ailo; to-i Jezucho xis zal’lo. Tannem Pilata-xim vochun Jezuchi kudd magli. Tedna Pilatan ti kudd diunk laili. Kudd gheun, Juzen ti êkê nitôll olin guttlaili ani khoddpant katrun kel’lê aplê novê somadhint ti nikhipili. Magir tannem êk vhoddli fatôr lonvddun haddli ani, somadhichea darak ti lavun, apunn gelo. Mari Magdalen ani dusri Maria somadhi mukhar bosun ravleô. Dusrea disa, mhonngê Toiarechea Disa uprant, mukhel iadnik ani Farizev Pilata-xim ektthãi zale; tãnnim mhonn’lem: “Xrêxtt Razpala, tea fottingan jivo astanam oxem sanglam mhonn amkam ugddas asa: ‘Tin dis zatôch hanv novean jivont zatolom.’ Mhonntôch tisro dis porian somadhi bori korun rakhunk lai; na zalear, tache xis ghoddiek ieun taka choriam vhortit ani lokak sangtit: ‘To mel’leantlo jivont zala.’ Hi nimanni fottovnni adim zaun gelam tachê poros odik paxtt zateli.” Pilatan tankam sanglem: “He polle rakhonndar asat; tôr vochat ani tumkam tankta tê bhaxen rakhônn korat.” Thõisorle te bhair sorle ani, fatrik xik’ko marun ani rakhonndarancho paro dovrun, somadhi ghôtt korun gele. Sabbath sorlea uprant, satolleacho poilo dis uzvadd’tana, Mari Magdalen ani dusri Maria somadhi polleunk geleô. Ani Sorvesporacho êk dut sorga velo denvtana ovchituch motti êk bhikamp zali. ani somadi-xim vochun tannem fatôr lonvddun kuxin kaddli ani apunn ticher boslo. Tachem rup zhoglannea bhaxen ani tachem anglem hima porim dhovem-ful aslem. Taka polleun rakhonndar bhirantin thorthorle ani mel’le koxe zale. Punn devdutan uloun team ostoreank mhonn’lem: “Bhienakat! Khursar marlelea Jezuk tumi sôdtat mhonn hanv zannom. To hangasôr na, kiteak, Tannem sanglelem tea pormannem, Devan Taka punorjivont kela. Taka dovorlolo ti svat ieun polleiat Tor vegim vochun Tacheam xisank sangat: ‘Devan Taka mel’leantlo punorjivont kela ani, polleiat, To tumchê fuddem Galileiak veta; thõi tumi Taka dekhtelet. Polleiat, hench tumkam sangunk hanv ailam.” Teô ostoreô bhieun-bhieun ani vhôdd khuxalkaien somadhi sorxileô vegim koddsorleô ani dhanvim-dhanvim Tacheam xisank kollit korunk geleô. Ani ovchituch Jezu tankam mellunk ailo ani mhonn’lem: “Noman tumkam!” Ani tãnnim lagim sorun Tache pãi dhôrle ani Taka nomoskar kelo. Tedna Jezun tankam mhonn’lem: “Bhienakat; vochat ani Mhojeam bhavank Galileiak vochat mhonn sangat. Thõi te Mhaka dekhtele.” Teô vatter astananch paro korteleam kãi zannamnim xarant ieun ghòddlelem titlem-i mukhel iadnikank kollit kelem. Hãnnim zannteam borabôr sobha zomoun borech poixe soinikanchea hatant ghalunk êk tharav ghetlo. Tannim tankam mhonn’lem: “Tumi oxem sangchem: ‘Ami nhidlele astana, ratiam ieun tacheam xisamnim taka chorun vhelo.’ Ani hem razpalachea kanar poddot zalear, ami taka somzaitelenv ani tumkam trasantle vattaitelenv.” Mhonntôch soinikamnim poixe ghetle ani apnnank xikoilelem tea pormannem kelem. Ani hi khobor Judevam modem ximpoddli ani aicho dis porian ti cholta. Apnnak mellunk Jezun sanglelea dongrar.Ikra xis Galileiak gele, Taka pollenam fuddem, tannim Taka bhozlo; tori tantle thodde dubhavle. Jezun fuddem sorun mhonn’lem: “Sorgar ani sonvsarar Devan Mhaka sogllo odhikar dila. Mhonntôch vochat ani soglleam raxttrank Bapachê ani Putachê ani Povitr Atmeachê Nanvim tankam batism diun, ani Hanvem tumkam dileat teô soglleô adnea pallunk tankam xikoun Mhoje xis korat. Ani zanno zaiat, sodanch-sodam, hôi, ho sonvsar soro porian, Hanv tumchea sangata asam! Amen!” Devachea Puta, Jezu Kristachea xubhvhortomanachi survat. Oxem Izaias provadeachea pustokar boroil’lem asa: “Polle, tujê fuddem Hanv Mhojea dutak dhaddtam; to tuji vatt toiar kortolo. ‘Sorvesporacho marôg toiar korat, Tacheô vattô nitt korat.’, oxem oronneant arddoto tallo to.” Batism diit ani patkanchea bhogsonnea khatir jivit bodôlnnecho ek batism porgôttit Juanv Batist oronneant ieilo. Akhea Judeiachea prantantlo ani Jeruzaleacho sogllo lôk tachê-xim vetalo, ani aplim patkam ucharun, Jordan nodint tachea hatantlo batism ghetalo. Juanv unttachê lhonvechem angavlem nhestalo ani penkttak chamddeacho êk potto bandtalo ani toll ani ran’vott mhonv khaun jietalo. “Mhojê pattlean mhojê-vôn bollvont Konn-Eklo ieta; sorpott poddun Tacheam vhannanchi vadi soddunk mhaka favona. Hanvem tumkam udkan batism dila khorem, punn To ki tumkam Povitr Atmean batism ditolo.”, oxem tannem porgottlem. Ani team disamnim oxem zalem: Galileiachea Nazareta thaun Jezu ailo ani Juanvan Taka Jordanant batism dilo. ani udkantlo voir sorona fuddem, sôrg ugto zal’lo ani Povitr Atmo parveachea rupan denvun Apnnacher tharlolo Jezun dekhlo. Ani sorgar thaun oxi zap zali: “Tum Mhozo Put, sogllê opurbaiecho; Tujer asa Mhojem dhadosponn.” Magir rokddoch Povitr Atmean Taka bhair kaddun, oronneant vhelo. Challis dis To oronneant ravlo ani Soitan Tachi porikxa kortalo; zonavoram borabôr thõi To ravlo ani devdut Tachi seva kortale. Juanvak dhorun koidi kelea uprant, “Nemlolo kall bhòrlo ani Devachem Raj ieunchem zalem. Jivit-mon bôdlat ani xubhvhortoman mandun gheiat.”, oxi Devachea Rajeachi bori khobor porgottit Jezu Galileiak ieilo, Ekdam To Galileiachea doriachê degechean cholot vetalo. Tea doriant Simanv ani tacho bhav Andre pageram martale, kiteak te kharvi asle: tankam Tannem dekhle. Ani Jezun tankam mhonn’lem: “Mhojê pattlean ieiat ani tumkam Hanv mon’xank dhôrtat tosle kharvi kortolom.” Ani rokddech te, zallam thõich sanddun, Tachê pattlean gele. Ani thõi thaun matso fuddem vochun, Zebedevacho put Jakob ani tacho bhav Juanv hoddear rampnni sarkeô kortale te Tannem dekhle, ani rokddech tankam apoile; ani Zebedevak, aplea bapaik, manaiam borabôr hoddear sanddun, te Tachê pattlean gele. Te Kapernaumak gele ani rokddoch Son’vara disa devsthanant bhitôr sorun To tankam xikounk laglo. Ani dhormxastream porim nhoi, punn odhikar asto eklea porim To tankam xikoitalo dekhun, Tachê xikovnnê vixim lôk ojap zatalo. Teach vellar mhello atmo boslolo êk monis tanchea devsthanant aslo, ani tannem bob marun mhonn’lem: “Nazaretchea Jezu, amchê kodde tuka koslem kam’ asa? Amcho bhosm korunk ailai kitem? Tum konn to hanv zannom: Devacho Povitr To Eklo.” Punn Jezun taka dhomkaun mhonn’lem: “Ogo rav ani hea mon’xa velo bhair sor!” Ani mhello atmo taka foddfoddaun ani motti bob marun tachê velo bhair sorlo. Sogllo lôk ojap zalo ani ekamekak vichartalo: “Hem anink kitem? Odhikar asleli, hi novi xikovnn! Mhelleam atmeank legun to hukum’ ghalta ani te tachem aikotat.” Ani rokddench Galileiachea akhea prantant sogllê kodden Tachem nanv gazlem. Devsthanantlo bhair sorun, Jakoba ani Juanva sangatim To samko Simanv ani Andrechea ghora gelo. Simanvachi sasu zoran antrunnar poddleli asli ani tãnnim Taka rokddich tichi khobor dili. To lagim sorlo ani tichea hatak dhorun Tannem tika utthoili, ani teach vellar ticho zôr poddlo ani ti tancho poramôs korunk lagli. Sanz zatôch, dis dharir poddlea uprant, soglleam vaittakarank ani devchar bosleleank Tachê sorxem haddlim. Tachea darar nogor-bhôr lôk zomun khêtt zali, ani jin’sam bhasancheam khup boll’llikarank Tannem borim kelim; zaite devchar-ui kaddle; Apunn konn to te zanno asle dekhun, Tannem tankam ulounk diunk na. Dusrê sokallim, ozun kallôk astana, utthun To bhair sorlo ani eka eksurea zagear vochun thõi magnnem kelem. Simanv ani tache sangati Taka sodunk gele; ani To melltôch, tãnnim Taka mhonn’lem: “Sogllo lôk Tuka sôdta.” Tannem tankam sanglem: “Dusrê koddenui, Hanvem xikovnn diunche khatir, lagxileam ganvamnim ani nogramnim vochum-ia; kiteak heach pasot Hanv ailam.” Ani tancheam devsthanamnim updês diit ani dev-charank bhair ghalit To akhea Galileant bhonvlo. Tache kodde upkar magit, ek koddkar Tachê sorxem ailo ani dimbier ravun tannem Taka mhonn’lem: “Tuka khuxi asot zalear, Tujean mhaka nitôll korunk zata.” Tache churchure dhorun, Jezun Aplo hat vistarlo ani to taka lavun mhonn’lem: “Hôi, Mhaka khuxi asa; nitôll za.” Ani oxem mhonnona fuddem tachem kodd nanch zalem ani to nitôll zalo. “Polle, konnakuch hem sanginaka; punn voch ani tujem ang iadnikak dakhoi; ani porjek tuji pekovnni ruzu korchê khatir, tuje nitôllsannik lagun Moizesan formail’lem dan bhettoi.”, oxem sangun, taka khoraien xiddkaitoch, Jezun taka veginch daddlo. To gelo, punn hi khobor oxê bhaxen porgottunk ani soglleank sangunk laglo, ki Jezuchean ugtim khõicheach nogrant vochunk zaina zalem ani bhair, eksuream svatancher, Taka ravchem poddlem: tori astana sogllê koddecho lôk Tachê-xim ietalo. Thoddeam disamnim Jezu novean Kapernaumant ailo tedna, To ghora asa mhonn khobor zali, ani itlo lôk thõi ektthovlo, ki dara bhair porian tankam zago naslo. Ani Jezu tankam sondex ditalo. Tedna choug zann ar-zal’lea eka mon’xak uklun Tachê sorxem gheun aile. Punn tea lokak lagun tea mon’xak Tache-xim haddunk tanchean zainaslem dekhun, Jezu aslo tea zagea voilo pattôs tãnnim ugto kelo ani, oxi vatt korun, add poddlelea arkara soit tachem antrunn denvoilem. Tancho bhavart polleun Jezun arkarak mhonn’lem: “Puta, tujim patkam bhògsolim.” Tedna thõi bosun aslele kãi dhormxastri aplech bhitor oxem chintunk lagle: “Ho oxem uloita tem kitem? Devninda korta ho! Devak ekleakuch soddun, konnachean patkam bhogsunk zatat?” Te tanchê bhitôr oxem chint’tat mhonn Aplea otmeant rokddench umzun, Jezun tankam oxi zap dili: “Oslim chintnam tumchech bhitor kiteak gholloitat tumi? ‘Tujim patkam bhògsolim!’, oxem mhonnunk, vô ‘tujem antrunn ukôl ani chol!’, oxem arkarak mhonnunk khoinchem odik sompem? Punn, sonvsarant patkam bhogsunk Mon’xachea Putak podvi asa mhonn tumchea monant rigounchê khatir”... Tannem arkarak mhonn’lem: “Hanv tuka sangtam; utth, tujem antrunn ukôl ani tujea ghora voch.” To monis utthlo ani rokddoch aplem antrunn uklun soglleam hujir thõicho bhair sorun gelo. Hea pasot sogllo lôk ojap zalo ani “Oslem ami kednanch dekhlem na!”, oxem mhonnun tannim Devak vakhannlo. Galileache doria deger Jezu porot gelo; ani sogllo lôk Tachê sorbhonvtim ekttovlo, ani Tannem tankam xikovnn dili. Fuddem vochun, manddvir boslelea Alfevachea puta, Levik, Tannem dekhlo ani taka mhonn’lem: “Mhojê pattlean ie!” Ani to utthun Tachê pattlean gelo. Ani oxem ghòddlem: tachea ghorant jevnnak boslolo astana, sobar dônddvosuldar ani patki mhonn lêkhlele monis-ui Jezu ani Tacheam xisam borabôr jevnnak boslele; tôr Tacho pattlav korto zaite zann asle. Ani To dônddvosuldaram ani patkeam borabôr jevta-khata tem polleun, Farizêv pokxacheam dhormxastreamnim Tacheam xisank mhonn’lem: “Dônddvosuldaram ani patkeam sangatim tumcho Guru kiteak khata-pieta?” Hem aikun, Jezun tankam mhonn’lem: “Borim asat tankam nhoi, punn vaittakarank ki voizachi goroz; tôr Hanv sugunneank nhoi punn ogunneank apounk ailam.” Ekdam Juanvanche xis ani Farizev upas kortale tedna, kãi zannamnim ieun Taka mhonn’lem: “Juanvache xis ani Farizevache xis upas kortat, punn Tuje xis korinant tem koxem?” Ani Jezun tankam sanglem: “Lognacheam pavnneamnim, novro tanchê sangatim asot porian, upas korunk zata zait? Tanchea sangata novro aso-sôr tanchean upas korunk zaina. Punn novreak tanchê modlo kaddun vhorcho vêll pavtolo ani tedna, to dis ietôch, te upas kortele. Pornnea vostrak konn-ui anvllonk naslelea novea lugttacho kopo marit zalear, novo kopo pornnea vostrachim sutam oddun bhair kaddta ani fallo odik vhodd korta. Nhoi mhonn novo soro pornneam chambddea-potiamnim konn bhorina; bhôrlo zalear, soro chambddea-potio fôddtolo ani soreacho ani tosoch chambddea-potiancho-i ibadd zatolo. Na, novea soreak noveo chambddea-potio.” Ekdam oxem ghòddlem: Jezu eka Sabbatha disa xetantlean vetalo, ani Tache xis cholot astana konnsam toddunk lagle. Tedna Farizevamnim Taka mhonn’lem: “Polle, Sabbathachem korum nozo tem kam’ te kiteak kortat?” Ani Tannem tankam sanglem: “Davidak ani tacheam sangateank goroz poddli ani bhuk lagli tedna, tannem kitem kelem tem tumi vachunk na kitem? Mhonngê koxê bhaxen to, Abiatar porom’-iadnikachea kallar, Devachea ghorant bhitôr sorlo, ani iadnikam bhair konnakuch khaunk sot’tea nasli te Deva mukhar dovorlele undde tannem khele ani apleam sangateank-ui dile, hi soglli khobor tumi vachunk na bi?” Ani Tannem tankam sanglem: “Devan Sabbath mon’xam khatir kela, mon’xank Sabbatha khatir korunk nant. Mhonn-tôch Mon’xachea Putak Sabbathacher-ui odhikar asa.” Anink êk pavtt Jezu eka devsthanant bhitôr sorlo ani hatak ar zal’lo êk monis thõi aslo. Tacher guneanv ghalchê pasot, Sabbatha disa To tea mon’xak boro korit kai mhonn te Taka tellun asle. Hatak ar zal’lea mon’xak Tannem mhonn’lem: “Utth, soglleam modem ubo rav.” Magir tankam vicharlem: “Sabbatha disa borem korum-ieta ki vaitt? Jiv vanchoum-ieta ki kaddum-ieta?” Punn te ogech ravle. Tedna ragan tancher nodor bhonvddaun, tanchea kallzachê darunnaiê pasot khontibhorit zaun, Tannem tea mon’xak mhonn’lem: “Tuzo hat sôdd!” Tannem to sôddlo, ani tacho hat adlê bhaxen sarko zalo. Torui Farizev bhair gele ani koxê bhaxen Taka nattak korcho tê vixim Herodichea pokxacheam mon’xam borabôr rokddoch Tacher add guddmêll korunk lagle. Jezu Apleam xisam borabôr doria lagim koddsorun gelo ani Tachê pattlean Galileiachea lokachi khêtt zali; tea bhair Judeia thaun, Jeruzalea-sun, Idumeia thaun, Jordanachê pelê toddi thaun, ani Tir ani Sidon hanchê bhonvtonnchea lokachi vhôdd urpônz, To kortalo tem aikun, Tachê-xim aili. Te lokache urponjik lagun, ti Apnnak chirdd’dun uddoit mhonn, Apnnak ek hoddem toiar dovrunk Tannem Apleam xisank sanglem. To sobar lokak boro kori dekhun, vaittakaram aslim titlim-i Taka hat lavunk Tacher poddtalim; ani mhelle atme, Taka pollena fuddem, Tachê mukhar pãiam poddun huiêl martale ani mhonn’tale: “Tum Devacho Put!” Punn Apnnak dakhoun dina zaunk To khoraien tankam xiddkaitalo. Ani dongrar choddun Jezun Apnnak zai tankanch Apnna-xim apoile; ani te Tachê-xim gele. Ani Apnna borabôr aschê pasot ani provochon korunk tankam dhaddchê khatir Tannem bara zannank nemle, ani Tannem tankam apostl mhonn’le, ani devchar kaddunk-ui Tannem tankam podvi dili. Mhonntôch nemlele bara zann Te he: Simanv — haka Pedru mhonn Jezun nanv ghalem; Zebedevacheam putam, Jakobak ani Jakobachea bhava Juanvak, Boanerges, mhonngê Goddgoddeache Put, mhonn addnanv dilem; Andre, Filip, Bartolomêv, Matêv, Tomas, Alfevacho put Jakob, Tadêv, Krantikar Simanv, ani Tacho ghat ghetlo to Judas Iskariot. Ani Jezu eka ghorant gelo ani novean itlo lôk thõi ektthovlo ki jevunk porian tankam fursôt nasli. Ani “tachi môt firlea”, oxem lok mhonn’ta dekhun, tachim soirim, hem aikolea uprant, Taka dhorun haddunk bhair sorlim; Ani “Tacher Beelzebul bosla ani devcharanchea pordhana udexim to devchar kaddta.” oxem Jeruzaleak thaun denvun ail’le dhormxastri mhonntale. Tankam Apnna sorxim apoun, To tankam voparimnim sangunk laglo: “Soitanachean koso mhonn Soitanak bhair ghalunk zata? Khõicheim-i ek raj apnnacheach bhitôr fantton pongodd zaun eka-mekacher zuztit zalear, tem raj ubem dhorom nozo; ani ek ghorabo apnnach bhitor fanttlear, to ghorabo ubo urom nozo. Toxench, Soitan apnna-cheruch uprasun fanttlear, ubo urom nozo, tacho xevôtt pavla. Punn tea bollixitt monxak poilo bandlea xivai, tachea ghorant konnachean rigunk zaina, ani tacho mal-ui luttunk zaina; poilo tea bollixtt mon’xak bandlea uprant tachem ghor luttunk zata. Tanchea patkank ani kosleoi devninda tim uloitat tankam lagun, mon’xancheam putam-dhuvank Dev bhogxitolo mhunn, Hanv tumkam khorench sangtam; Punn Povitr Atmeacher devninda kortit tankam kednanch bhogsonnem aschem na, punn tim sasnnak urta toslea patkachim guneanvkarim.” “Mhello atmo tacher bosla”, oxem te mhonntale dekhun, hem To uloilo. Jezuchi avoi ani Tache bhav pavun sorlim ani, bhair ravun, tãnnim Taka apounk dhaddlo. Tachê bhonvtonnim khup lôk boslolo aslo, ani “Polle, Tuji avoi ani Tuje bhav bhair asat ani Tuka sôdtat.”, oso Taka nirôp dilo. “Mhoji avoi ani Mhoje bhav konn?”, oxem Tannem vicharlem. Ani Apnna bhonvtim bosleleancher nodor bhonvddaun, “Him asat Mhoji avoi ani Mhoje bhav. Devachi khuxi kortat tinch Mhozo bhav ani Mhoji bhoinn ani Mhoji avoi.”, oxem Tannem mhonn’lem. Novean To doriachê dodder xikounk laglo; punn lokacho hedo vhoddlo zomo Tachê bhonvtim ektthovlo, ki To doriant aslelea eka hoddear choddun boslo, ani sogllo lôk doriachê vatten dhodder ravlo. To tankam sobar vostu voparimnim xikounk laglo, ani xikoitam-xikoitam Tannem oxem mhonn’lem: “Aikat! Êk vomp’pi vompunk gelo; ani vomptana thoddem bim vattechê deger poddlem ani suknneamnim ieun tem khelem. Dusrem zobôr-xi mati nasli toslê khoddpi zomnir poddlem; ani matiechi kholai na zaun, tem veginch kirlolem, punn vot ietôch korpolem, ani mull na zaun suklem. Dusrem kantteam modem poddlem; kantte vaddle ani tãnnim taka fugar kelem, ani pik zalem na. Ani her bim borê zomnir poddlem; tem kirlolem ani vaddlem ani taka pik zali; ekak tis, ekak satt ani ekak xembhôr.” Ani Tannem mhonn’lem: “Aikunk kan asleleamnim aikunchem.” Ani To eklo aslo tedna, baram xisam borabôr Tachea sangata asleleamnim voparinchi somzonni Tachê kodde vicharli. Ani Tannem tankam oxem sanglem: “Devachea Rajeacho gutt ollkhunk Devan tumkam dennem dilam; punn bhair asat tankam soglli xikovnn voparimnim. Oxem kiteak “polletam-polletam tankam disona zauncheak, ani aikotam-aikotam tankam somzona zauncheak, na zalear tim aplem jivit bodôltit ani tankam bhogsonnem mellot.’ Magir Tannem tankam mhonn’lem: “Hi vopar tumi somzonant? Tôr her soglleô vopari koxeô somzotelet? Vomp’pi vompta tem, Utor. Tannim aikona fuddem, Soitan rokddoch ieta ani tanche bhitor vomplelem bim kaddun vhorta tem, vatter vomplam tem utor, him tim. Têch porim, Utor aikotôch rokddinch khuxalkaien tem ghetat, punn tankam apnnam bhitôr pallam nant dekhun, tim chôdd vogôt togonant; Utrak lagun vign vô dhumallo iena fuddem, tim rokddinch bhavarta thaun koddsorun vetat tem, khoddpi zomnir vomplem tem utor, him tim. Ani her dusrim Utor aikotat, punn hea sonvsarache huske, girestkaiechi bhul ani her dusream vostunchi axa bhitôr sorun Utor damun dhôrtat ani taka pik zaina tem, kantteam modem vomplam tem utor, him tim. Ani Utor aikotat, tem mandun ghetat, ani ekak tis, ekak satt, ani ekak xembhôr pik ditat tem, borê zomnir vomplam tem utor, him tim.” Tannem oxem-i mhonn’lem: “Konn tori ponntti pailê pondak vô bajê tolla dovrunk haddta? Eka peddacher dovrunk nhoi? Tôr ugtem zalea bogor kãich thuim liplelem na; ani uzvadda ieilea bogor kainch thuim gupit na. Aikunk konnank kan aslear, tãnnim aikunchem.” Tannem tankam anink sanglem: “Tumi aikotat tachi chotrai dhôrat. Tumi zôkxeat teach mapan Dev tumkam porot zôktolo ani odik-ui ditolo; kiteak asa tankam Dev anink ditolo ani na tanchê koddlem kitem asa tem-i To kaddun ghetolo.” Anink-ui Tannem mhonn’lem: “Ek monis aplea xetant bim vompta; rat ani dis, to nidlolo asum vô zago asum, bim kirlota ani vaddta; hem koxem tem to kãich nokllo. Zomin apnna osttongim foll dita, poilim palo, magir konnos ani xekim konnsant gulgulit gotto. Ani xet piktôch, luvnni pavli mhonnun rokddoch to villo laita.”, oxem Devachem Raj. Tea bhair Tannem mhonn’lem: “Devachem Raj kiteak sôr korum-ia? Vô kosli vopar ghalun tem chitarum-ia? Sansvacho konno zomnir vomptana, sonvsarant asat titleam-i biam poros supurlo, punn vomplea uprant vaddta ani porsantleam soglleam zhaddam poros vhôdd zata; ani taka hedeô vhoddleô khandiô futt’tat, ki varea veleam suknneank tachê savllê tolla asro gheunk mellta, tea sansvachea konnea porim, Devachem Raj.” Tanchean aikun gheum ieta tosleam sobar voparimnim To tankam Aplo nirôp ditalo; voparim xivai tanchê kodde uloinaslo, punn kuxin astana Apleam xisank sogllem foddun sangtalo. Teach disa, sanz zatôch, Tannem tankam sanglem: “Poltoddi ia.” Ani tea lokak soddun, Taka aslo toso hoddeant vhelo; Tachê borabôr anink-ui hoddim aslim. Tedna êk mottem vadoll-modd suttlem ani lharam hoddeacher futt’talim ani hoddem udkan bhoron buddonk pavlem. Ani To Apunn verea-xim uxeacher nidlolo. Tãnnim Taka utthoun mhonn’lem: “Guruji, ami mortanv tem Tuka kãich poddunk na?!” Utthun Tannem vareak bexttailem ani doriak mhonn’lem: “Gopchip! Thôndd za.!” Ani varem thamblem ani vhôdd thonddai zali. Magir Tannem tankam mhonn’lem: “Tumi itle bhezudd kiteak? Ozun-ui tumkam bhavart na?” Tedna te zobor bhiele ani ekamekak mhonnunk lagle: “Ho konn mhonn zait? Tôr varo ani doria porian Tachem aikotat!” Te doriachê pelê toddi Gerajenanchea mulkant pavle. Ani Jezu hoddeantlo bhair sortôch, mhello atmo boslolo êk monis somadhim modlo bhair sorun rokddoch Taka mellunk ailo. Tannem somadhim modem aplem biradd kel’lem ani sanklleamnim legun konnachean taka bandunk zainaslem, kiteak sobar pavtti taka khoddeamnim ani sanklleamnim bandlolo, punn tannem sanklleo tôddloleô ani khodde moddun uddoil’le. Konnachean taka domaunk zainaslem. Sogllea vellar, disacho toso ratcho, to somadhim modem ani dongrancher astalo, ani huieli marun apnnakuch fatramnim ghave kortalo. Pois thaun Jezuk polleun to dhanvun ailo, Tachê mukhar sorpottlo ani vhoddlean bob marun tannem mhonn’lem: “Jezu, Bhov Vortea Devachea Puta, mhojê kodde tuka koslem kam’ asa? Devachean, tujê lagim hat zoddun magtam: mhaka dogdainaka!” Kiteak Jezu taka mhonntalo: “Mhellea atmea, hea mon’xa velo bhair sor!” Ani Jezun taka vicharlem: “Tujem nanv kitem?” Ani tannem Taka zap dili: “Mhojem nanv Loskor, kiteak ami khup zann.” Ani apnnak mulka bhair ghalinaka mhonn tannem Tachê kodde laleun maglem. Thõi dongra lagim dukrancho êk vhôdd hindd chortalo; ani devchar Tachê lagim oxem magunk lagle: “Amkam team dukramnim dhadd; tanchê bhitôr amkam rigum-di.” Jezun tankam rojea dili ani te mhelle atme bhair sorun dukramnim rigle, ani sumar don hozar dukrancho to akho hindd koddxea velean doriant xevttolo ani buddun melo. Tanche rakhnne pollun gele ani nogrant ani kheddeam-ganvamnim tãnnim hi khobor kollit keli. Ani lôk kitem zalem tem polleunk ailo; ani Jezu sorxem ieun, devchar koxttaitalo to monis — mhonngê, zacher Loskor boslolem toch — angavlim nhesun ani toklen sarko zal’lo thõi bosla to polleun, tim bhielim. Zãnnim devchar bosleleak kitem ghòddlem ani dukram vixim kitem zalem tem dekhlelem, tãnnim herank sanglem. Tedna to lôk aplea mulkantlo bhair sorun voch mhonn Jezu kodde magunk laglo. Ani To hoddear choddtanam, devchar boslolo to monis apnnak Tachea sangata ravunk di mhonn magunk laglo, punn Jezun dilem na, ani taka sanglem: “Tujea ghora ani tujea loka-xim voch ani Sorvesporan tujê khatir kedeô vhoddleô vostu keleô ani koxi Tannem tuji doia keli, tem tankam sang.” To gelo ani Jezun apnna khatir kedeô vhoddleô kornneô keleô teô Dha Nogranchea mulkant porgottunk laglo; ani sogllim ojap zalim. Jezu novean hoddear choddun doriachê pelê toddi vetôch, lokachi vhôdd urpônz Tachê sorxem ektthovli; ani To doriachê dhodder aslo. Tedna Jairus nanvacho eka devsthanacho odhikari ailo ani Taka polleun Tacheam pãiam poddlo, ani Tachê kodde oxem laleun maglem: “Mhoji dhuv mornnachê tonnir pavlea; ie ani ticher tuje hat dovor, tika bori kôr, tika vanchum-di.” oxem Tachê kodde laleun maglem. Ani To tachê borabôr gelo; puskôll lôk Tachê pattlean vetalo ani Taka chênchtalo. Bara vorsam rogt-pat zal’li thõi êk bail asli; sobar voizanchem vokhod kortanam zaitem sosun-ui ani sogllo aplo duddu khorchun-ui tika kãich gunn poddunk naslo, punn tichi gôt odik paxtt zal’li. Jezuchi khobor aikun, “Tacheam vostrankuch hat lain zalear, hanv borim zatelim”, oxem tinnem mhonn’lem dekhun, loka modlean tachea pattlean ti geli ani Tinnem pattlean Tachea avoronnak hat lailo. Ani rokddich tichea rogtachi zhôr sukli ani apunn piddentli bori zali mhonn tichea angant tika bhòglem. Ani tech ghoddier, Apnnakoddcho gunn bhair sorlolo mhonn Apnnachêch bhitôr rokddoch zanna zaun, “Mhojeam vostrank konnem hat lailo?”, oxem mhonnun, Jezun loka vatten vollon vicharlem. Punn “Lôk Tuka chênchta mhonn Tum tôr polletai, ani torui ‘Mhaka konnem hat lailo?’ ”, oxem Tacheam xisamnim Taka mhonn’lem. Ani oxem konnem kelem tem polleunk, Tannem sorbhonvtim nodor marli. Tedna bhieun ani kampun apnnak kitem ghòddlelem tem zanno zaun, ti bail lagim sorli ani Tacheam pãiam poddli ani sogllem sot tinnem Taka sanglem. Tannem tika mhonn’lem: “Dhuvê mhojê, tujea bhavartan tuka bori keli. Xantin voch atam ani tujê piddentli meklli za.” To uloita thõich astana, “Tuji dhuv bhair poddli; Gurujik anink tras kiteak ditai?”, oxem sangunk, devsthanachea odhikariager thaun dhaddlele monis pavle. Punn tãnnim mhonnlelem tem kanar gheun, “Tum bhienaka; bhavart mat dhôr!”, oxem Jezun devsthanachea odhikareak sanglem. Ani Pedru, Jakoba ani Jakobachea bhava Juanva, bogor Tannem konnakuch Apnna borabôr ieunk diunk na. Devsthanachea odhikarea-ghorant bhitôr sortôch Jezun lok vhoddlean rodd’to ani zaitem sangun vilapto ek gollbôll dekhlo. Bhitôr vochun, “Tumi kiteak mhonn gollbolltat ani roddtat? Cheddum morunk na, tem nhidlam.”, oxem Tannem tankam mhonn’lem. Ani lôk Taka hansunk laglo. Punn tankam soglleank bhair ghalun, cheddvachea bapaik ani avoik ani Apleam sangateank gheun, cheddum aslem thõi To gelo. Ani cheddvachea hatak dhorun, “Talitha, kum’!” mhonngê “Dakttea cheddva, utth!”, oxem Tannm mhonn’lem. Ani rokddench cheddum utthun bhonvunk laglem. Taka bara vorsam aslim. Ani lôk ojap zaun bharim thottaklo. Ani konnakuch hem gomoina zaunk Tannem khoraien formailem. Ani cheddvak khaunk diat mhonn tankam sanglem. Ani thõi thaun bhair sorun To Aplea ganv-ghora gelo ani Tache xis-ui Tachê borabôr gele. Ani Sabbath pavtôch To devsthanant xikounk laglo. Ani sobar zannam Taka aikun Tachê xikovnnê vixim ojap zaun mhonntalim: “Hem sogllem haka khõichem ailem? Ani taka dil’li asa ti zannvai kosli? Ani tacheam hatamnim oslim vismitam ghòddtat tim koxim? Ho thovoi nhoi? Ho Mariecho put nhoi? Jakob, Jose, Judas ani Simanv hancho bhav nhoi to? Tacheô bhoinni-i hanga amchê modem ravtat nhoi?” Ani tim Taka mandun gheunk kobul naslim. Jezun tankam sanglem: “Eka provadeak fokot aplea khaxa ganvant, apleam soiream-dhaiream modem ani aplea ghorabeant man na.” Bhov thoddeam piddevontancher Aple hat dovrun Tannem tankam borim kelim tanche bhair, Tachean thõi koslench vismit korunk zaina zalem, Ani tankam bhavart na mhonn Taka ojap dislem. Tedna bhonvtonncheam gramamnim vochun, To xikovnn ditalo. Magir Tannem bara zannank Apnna-xim apoile, ani mhelleam atmeancher tankam podvi diun, dogam-dogank To dhaddunk laglo. Ani Tannem tankam formailem: “Eka danddea bhair, vattek kãich vhoronakat, nhoi khann-jevonn, nhoi bhuti, nhoi mhonn penkttak duddu; pãiank vhannô ghalat; eka bhair dusrem anglem vhoronakat.” Ani tankam sanglem: “Khõisor-ui eka ghorant tumi bhitôr sorxeat, tea gramantle bhair sorun vexeat porian thõich ravat; ani khõicho-i ganv tumkam ievkar dina zait zalear ani thõicho lôk tumchem aikunk kobul nasot zalear, tankam êk xiddkavnni diunchê khatir, tê svatê vele bhair sortana, tumcheam pãianchi dhull zhaddun uddoiat.” Mhonntôch te gele ani soglleamnim jivit bôdolchem mhonn lokak porgottunk lagle. Ani khup devchar kaddtale ani sobar vaittakarank-ui tel lavun borim kortale. Jezuchem nanv gaztalem dekhun Herod razak Tachi khobor pavli. Kãi zannam mhonnot: “Juanv Batist mel’leantlo jivont zala, dekhun tachêkodde vismitam zatat.” Punn konn-konn mhonnot: “To Elija.” Anink-ui her konn-konn mhonnot: “To êk provadi, Adleam provadeantleam eklea porim, to ek provadi.” Tem aikun Herodin mhonn’lem: “Hanvem xins kapunk lail’lem toch Juanv novean jivo zala.” Tôr teach Herodin Herodias nanvachê aplea bhava Filipachê bailek apli bail kel’li; tika lagun tannem monis dhaddun Juanvak dhôrlolo ani bondkhonnint ghal’lo. Karonn Juanv Herodik mhonntalo: “Tujea bhavachê bailek tujean tuji bail korun dovrum nozo.” Punn Herodia-sichea kallzant tacho rag xiztalo ani ti taka jivexim marunk sôdtali, punn tika toxem korunk mellonaslem. To êk promannik ani bhoktivont monis mhonn zanno zaun, Herod Juanvak bhietalo ani taka rakhtalo. To sangta tem aikun pattim-fuddem sortalo, ani tori khuxê-monan taka kan ditalo. Oxem astam, Herodin aplea vadd-disa apleam odhikareank, apleam subedarank ani Galileiacheam vhodd-vhodd mon’xank ek vhoddlem ratchem jevonn kelem tedna ek soeg upraslo. Ani têch Herodiaxichi dhuv bhitôr sorun nachli, ani Herodik ani tachê sangatim jevteleank man’li; tedna tannem cheddvak mhonn’lem; “Tuka zai tem mhojê kodde mag ani hanv tuka ditolom.” Ani tika oso soput dilo: “Magxi titlem-i ditolom, mhojê razvottechem ord zalear legun.” Bhair vochun cheddvan avoi kodde vicharlem: “Kitem magum?” Tinnem zobab dilo: “Juanv Batistachem xins.” Rokddich, raza sorxim taktin bhitôr ieun, cheddvan oxem maglem: “Atanchea-atam, eka tattar, Juanv Batistachem xins tuvem mhaka dilelem zai.” Razacher vhôdd sontap ailo; punn apleam soputank ani hajir asleleam pavnneank lagun, cheddvak dil’lem utor moddunk taka khuxi na zali. Tech ghoddier, razan rakhonndarak dhaddlo ani Juanvachem xins eka tattar haddunk lailem. Tannem vochun bondkhonnint tachi tokli kapli, ani xins tattar ghalun haddlem ani cheddvak dilem, ani cheddvan tem aplê avoik dilem. Hem aikun, Juanvache xis aile ani tachi kudd vhorun tãnnim ti êkê somadhint ghali. Apostl Jezu-xim ektthovle ani apnnem jem kel’lem ani xikoil’lem, titlem-i tãnnim Taka kollit kelem. Tedna Tannem tankam sanglem: “Êkê eksurê svater tumi ekvodde ieiat ani matso visôv gheiat.” Kiteak ietim-vetim itlim zannam aslim ki jevunk legun tankam fursôt nasli. Ani hoddear choddun te êkê eksurê svater kuxin gele. Te vetat mhonn polleun, sobar zannamnim khõi tem parkilem ani pãi-vatten soglleam nogram thaun thõi tim vegim-vegim gelim ani tanchê adim pavlim. Ani hoddeantlo bhair sortana Jezun êk vhoddli urpônz dekhli ani gonvlli-nasleleam xelliam porim aslim dekhun, kallzant thaun tanche Taka churchure disle ani sobar vostu To tankam xikounk laglo. Chôdd uxir zalo mhonn polleun, Tacheam xisamnim lagim ieun mhonn’lem: “Hi svat eksuri ani zobôr uxir zalo; bhonvtonncheam molleamnim ani gramamnim vochun apnnank jevonn-khann viktem gheunchê khatir tankam dhadd.” Ani portipallun Tannem tankam sanglem: “Tumich tankam jevunk diat.” Ani tãnnim mhonn’lem: “Tôr vochun don’xim dinaranche undde vikte gheun ami tankam khaunk diunchem kitem?” Ani Tannem tankam vicharlem: “Tumchê kodde kitle undde asat? Vochun polleiat.” Ani chovkoxi korun tãnnim sanglem: “Panch undde ani don maslleô.” Soglleank chombeam-chombeamnim hirvea tonnacher jevnnak bosunk laiat mhonn Tannem tankam formailem. Mhonntôch tim xembhorancheam ani pon’nasancheam zomeamnim kuxin-kuxin boslim. Tedna Tannem panch undde ani don maslleô hatant gheun ani sorgak dolle ubarun Devak dhin’vasnni keli, magir undde môddle, ani te lokak vanttunk, Tanne te xisam kodde dile; toxeôch don maslleô Tannem soglleank vanttleô. Sogllim jevlim ani dhadoxi zalim. Unddeanche ani maslleanche urlele kuddke-tukdde ektthãi korun tãnnim bara panttleô bhôrleô. Undde khel’le te dadlech panch hozar asle. Magir Apunn lokak dhaddta mhonnosôr, Jezun Apleam xisank vegim, hoddear choddun, Apnna adim poltoddi Bethsaidê vochunk laile. Ani tankam dhaddtôch, Apunn dongrar magnnem korunk gelo. Ani tin’san zatôch hoddem doriant modem pavlem ani To ekloch dhodder aslo; ani portem varem martalem dekhun te tanddunk koxttovtale mhonn polleun, fantea parar doriacher cholun To tanchê-xim ailo, ani tanchê fuddem vochunk kori. Punn konn doriacher cholta tem polleun, bhut mhonn somzun, tãnnim killônch marli; kiteak soglleamnim Taka dekhlolo ani tancher akant ail’lo. Punn rokddoch tanchê lagim uloun Tannem mhonn’lem: “Dhir dhôrat, Hanv to! Bhienakat!” Ani To tanchê sorxim hoddear choddlo ani varem thamblem. Ani te apnnam bhitôr ekdomuch thottakle, kiteak, zodd monache zaun, vaddoil’leam unddeancho ôrth tankam mellunk naslo. Doria utrun te poltoddi Genezaretak pavle; thõi tãnnim hoddem lailem. Ani te hoddeantle bhair sorona fuddem, lokan rokddoch Jezuk ollkholo; ani akhea prantant dhanvim-dhanvim vochun, To khõi asa ti khobor aikun, thõi vaittakarank antrunnar ghalun haddunk laglim. Ani To veta thõisôr, zaum gramamnim, zaum nogramnim, zaum molleamnim, vaittakarank moidanar dovortalim ani Tachea vostrachê degek punn hat lavunk di mhonn tim Tachê lagim magtalim; ani Taka hat laitalim titlim-i borim zatalim. Farizev ani kãi dhormxastri Jeruzaleak thaun ieun Tachê sorxem ektthovle, ani Tacheam xisantle kãi zann mhelleam hatamnim, mhonnchê hat dhuinastanam, jevtat mhonn tãnnim pollelem. Farizev ani soglle Judev, purvileanchê chali pormannem, bogor-bogor hat samke bore-korn dhulea xivai jevinant; ani tinttear thaun ietôch, nhalea-dhulea xivai jevinant; ani te samballtat teo herui sobar chali asat teo heo: patram, kollxe ani kanxeachim aidonam dhuvpa vixim. Mhonntôch Farizevamnim ani dhormxastriamnim Tachê lagim vicharlem: “Zannteanchê chali pormannem tuje xis kiteak cholonant, punn mhelleam hatamnim kiteak jevtat-khatat?” Tannem portipallun tankam sanglem: “Izaiasan tumam ddhongeam vixim adinch sarkem sangun dovorlam, ‘Hi porza onttamnim Mhaka vakhannta, punn tanchem kalliz Mhojê-sun pois asa. Tôr mon’xamnim kel’le kaide xastram koxim xikoun, ti Mhoji polki puza korta.’,oxem boroun asa tea pormonnem, Devachi adnea sanddun, mon’xancheô chali tumi palltat.” Ani tankam mhonn’lem: “Aplich chal samballchê khatir, Devachi adnea kuxin kaddunk kitle mhonn huxar tumi! Tôr Moizesan sanglam: ‘Tujea bapaik ani avoik man di, ani bapaik vô avoik xirapta to morun vochum.’ Punn tumi sangtat: ‘Konn-ui bapaik vô avoik oxem mhonnot zalear: ‘Mhojê koddlem kitem-i tuka upkarto tem hanvem ‘korban’ kelem (mhonnchê Devak bhettoilem);’ tea uprant aplea bapai vô avoi pasot tumi taka kãich korunk dinant; he baxen tumi diun aileat te xikovnentlean Devachem utor tumi nirfoll kortat. Ani osleô zaiteô her vostu tumi kortat.” Ani novean lokak apoun Tannem sanglem: “Sogllim tumi, Mhojem aikat ani somzun gheiat: mon’xam bhailem kitench tanchê bhitôr vochun tankam mhellim korunk xokona; punn mon’xam bhitorleô vostu bhair sorun ietat teôch mon’xank mhellim kortat.” Ani lokak sanddun, ghorant bhitôr ietôch, Tacheam xisamnim hê vopari vixim Tachê kodde vicharlem. Ani Tannem tankam mhonn’lem: “Tumi-i somzo-naslele mum? Bhailem kitench mon’xam bhitôr vochun tankam mhellim korunk zaina; tem tanchea kallzant rigona; tem pottant veta ani xekim kuddintlem bhair veta mhonn tumi somzonant?” (Oxem uloun, sogllem khann nitoll mhonn Tannem dakhoun dilem.) Ani Tannem mhonn’lem: “Mon’xam-bhitorleô bhair sortat teôch vostu mon’xank mhellim kortat. Kiteak bhitôr thaun mon’xanchea kallzantle bhair sorta te vaitt xevott he: kazar zainasleam eka-mekacho lingbhog, choriô, khun, pordvar, apsvart, khotteponn, fottkirponn, kamchar, nirdukai, ninda, gorv, murkheponn. Him sogllim vaittam bhitôr thaun bhair sortat ani mon’xank mhellim kortat.” Ani thõicho utthun To Tirachea ani Sidon’chea prantant gelo; thõi To eka ghorant bhitôr sorlo. Hem konnak gomlelem Taka naka aslem, punn Tachi khobor lokak kollonastana urli na, Punn Tachê vixim aikona fuddem, aple dhuvecher ek mhello atmo aslo, ti êk bail bhitôr aili ani Tacheam pãiam poddli. Ti bail Grik, ani zolman Sirofenisiekarnn asli.Aplê dhuvê velo devchar kadd mhonn tinnem Jezukodde maglem. Tannem tika zap dili: “Bhurgeank poilim dhadoxi zaum-di; kiteak bhurgeancho unddo kaddun sunneank ghalop sarkem nhoi.” Punn tinnem portipallun Taka mhonn’lem: “Hôi, Somia, punn meza tolla poddtat te, bhurgeangele unddea-kuddke sunnim-i khatat.” Ani Tannem tika mhonn’lem: “Hea tujea zababak lagun, tujean vochum ieta; tujê dhuvê velo devchar bhair sorlo.” Ani ghora voch zalear, tachê velo devchar gel’lo, ani tika aplem bhurgem antrunnar add poddlelem mell’lem. Novean Tirachea prantantlo bhair sorun, Sidon’chê vatten, Dha-Nogranchea mulkant, Jezu Galileiachea Doria-kodde ailo. Tedna konn-eklea zôdd jibechea bhereak Tachê sorxem haddlo ani tacher hat dovor mhonn lokan Jezu kodde maglem. Ani loka modlo taka kuxin vhorun Jezun tacheam kanamnim Aplim bottam ghalim ani Apli thimpi kaddun tachê jibek laili. Magir sorgak dolle ubarun, Tannem suskar sôddlo ani mhonn’lem: “Ef’fatha!”,mhonnchê: “Tuje kan ugte zaum!”. Hem mhonnta mhonnosôr, tache kan ugòddle ani tachê jibecho bandpas suttlo ani to sarko ulounk laglo. Ani konnakuch sanginakat mhonn Jezun tankam formailem. Punn jitlo To tankam formaitalo, titlim odik tim porgôtt’talim ani sangum nozo titlim thottakun mhonntalim: “Hannem sogllem borem kelem; Tannem bhereank kan dile ani moneank jib dili.” Anink ekdam lokachi vhôdd urponz asli ani jevunk-khaunk tanchê kodde kãich naslem. Hea pasot, xisank apoun haddun, Jezun tankam sanglem: “Hea lokak polleun churchureamnim fòddta Mhojem kalliz! Kiteak, polleiat, az tin dis zale tim Mhojê sangatim asat ani jevunk-khaunk tanchê kodde kãich na; ani upaxim tankam aplea ghora Hanv dhaddin zalear, vatter thokun poddtelim, tôr tanchê bhitorlim kãi zannam pois thaun ail’lim asat.” Ani xisamnim Taka oso zobab dilo: “Hangasôr, hea padd zagear, khõiche mhonn undde haddun tankam dhadoxi korunk zatelem?” Ani Tannem vicharlem: “Tumchê kodde kitle undde asat?” Tãnnim sanglem: “Sat.” Tannem lokak dhornnir bosunk lailo ani sat undde gheun ani, Devak dhin’vasun, Tannem te môddle ani lokak vanttun diunk Apleam xisam kodde dile; ani tãnnim te vanttun lokak dile. Thoddim bovxim-i tanchê kodde aslim. Tancher-ui axirvad ghalun, tim vanttunk lailim. Ani lôk jevlo ani dhadoxi zalo; ani urleleam kuddkeam-tukddeancheô sat panttleô tãnnim bhorun kaddleô. Jevlolo lôk sumar char hozar aslo; ani Tannem tankam dhaddlim ani rokddoch Apleam xisam borabôr hoddear choddun To Dalmanuta prantant gelo. Ekdam Farizev bhair sorle ani Jezu lagim vad-vivad korunk lagle; ani Tachi porikxa korunk Tachê kodde sorga veli êk khunna magtale. Ani kallzant thaun suskarun Tannem mhonn’lem: “Hi pinddka kiteak mhonn khunna sôdta? Hanv tumkam khorench sangtam, hê atanchê pinddkek Dev khunna diunchoch na.” Ani tankam sanddun To novean hoddear choddlo ani pelê toddi gelo. Xis undde vhorunk visorlele: hoddear tanchê kodde êkuch unddo aslo. Tedna Tannem tankam oxem mhonnun xiddkaile: “Chit diat ani Farizevanchê ani Herodichê fugi vixim chotraien cholat.” Te ekamekak mhonnunk lagle: “Amchê kodde undde nant, dekhun To oxem uloita.” Hem zanno zaun Jezun tankam mhonn’lem: “Undde nant mhonn tumi kiteak tumchê modem uloitat? Ozun porian tumkam ollokh na? ginean-ui na? Ozun porian tumchê motik uzvadd na? Dolle asun tumkam dixtti poddona, ani kan asun tumkam aikom iena vô ugddas dhorona kai? Panch undde panch hozar lokak moddun dile tedna, kuddkeancheô kitleô panttleô tumi bhorun kaddleô?” Tãnnim mhonn’lem: “Bara.” “Ani sat undde char hozar lokak dile tedna, urleleam kuddkeancheô kitleô panttleô tumi bhorun kaddleô?” Ani tãnnim Taka sanglem: “Sat.” Ani Tannem tankam mhonn’lem: “Tôr ozun porian somzonant tumi?” Jezu ani Tache xis Bethsaidê pavle. Thõi eka kurddeak Tachê sorxem haddlo ani taka hat lai mhonn maglem. Kurddeachea hatak dhorun Tannem taka grama bhair vhelo ani tacheam dolleancher thimpi uddoili, tacher hat dovorle, ani kitem tori dixtti poddta gai mhonn vicharlem. Taka nodor ieunk lagleli; tôr tannem oxem mhonn’lem: “Mhojean mon’xank polleunk zata punn tim mhaka rukham porim cholto distat.” Tedna Jezun novean Aple hat tacheam dolleancher dovorle, ani taka sarki nodor aili, to boro zalo ani sogllem taka nigut disunk laglem. Ani “Gramant pasun vochonaka”, oxem sangun taka Tannem ghora dhaddlo. Jezu xisank gheun Filipie Xezareiacheam gramamnim bhair sorun vochunk gelo; ani Vatter Tannem Apleam xisank oxem vicharlem: “Hanv konn mhonn lôk Mhaka dhôrtat?” Ani tãnnim portipallun mhonn’lem: “Konn-konn Juanv Batist, konn-konn Elija, ani konn-konn provadeantlo eklo, oxem mhonntat.” Tedna Tannem tankam vicharlem: “Tôr tumi, Hanv konn mhonn dhortat?” Pedrun zobab diun mhonn’lem: “ Krist To Tunch.” Tedna Apnna vixim konnakuch sanginakat mhonn khoraien Tannem tankam hukum’ ghalo. Magir Devachê khuxê pormannem, Mon’xachea Putan zaitem sõschem asa; zannte, mukhel iadnik ani dhormxastri Taka nakartele; te Taka jivexim martele; ani tin dis zatôch Dev Taka punorjivont kortolo mhonn Jezu xisank xikounk laglo. Heô vostu Tannem spoxtt sangleô. Tedna, Taka kuxin vhorun, Pedru Taka bhexttaunk laglo. Punn, vollon ani Apleam xisank polleun, Jezun Pedruk oxem mhonnun bobatt keli: “Mhojê mukhavelo voch, Soitana! Kiteak tujem chintop mon’xanchem, tem Devachem nhoi.” Ani lokak ani Apleam xisank borabôr apoun Jezun tankam mhonn’lem: “Konnank Mhojê pattlean ieunchi khuxi asa zait zalear, tãnnim apnnachêch khuxechi vatt sôddchi, aplo khuris ukôlcho ani Mhojê pattlean ieunchem. Aplo jiv samballun dhorunk sôdtat tim aplo jiv hogddaitelim; punn Mhojê khatir ani Bore Khobre khatir aplo jiv hogddaitat tim aplo jiv samballun dhôrtelim. Sogllo sonvsar zôddit ani aplo jiv ibaddit zalear, mon’xak koslo adav? Vô aplea jivachê bodlek mon’xachean kitem diunk zait? Hê baskôll ani patki pinddkê modem Mhoji ani heam Mhojeam utranchi konnank loz disot zalear, Apleam bhagevont dutam sangatim Aplea Bapachê mhoimen To ietolo tedna, Mon’xachea Putak-ui tanchi loz disteli.” Ani Tannem mhonn’lem: “Hanv tumkam khorench sangtam: hanga ubim asat tantlim kãi zannam Devachem Raj podven ail’lem dekhlea bogor morchim nant.” Sov dis uprant, Jezu Pedruk, Jakobak ani Juanvak Apnna borabôr gheun ekvodde aschê khatir eka unch dongrar gelo, ani tanchê mukhar Tannem Aplem rup bodôl’lem. Tachim vostram itlim loklokit ki sonvsarant konnui moddvolla lagim dhovim korunk zainant titlim dhovim-ful zalim. Ani thuim, Moizes ani Elija Jezu lagim uloito tankam dixtti poddle. Tedna Pedrun uloun Jezuk mhonn’lem: “Rab’bi (mhonngê “Guruji”), ami hangasoruch aslear borem; tôr tin tombu korum-ia, êk Tuka, êk Moizesak ani êk Elijak.” Kitem mhonnchem tem toch nokllo aslo; te bhieun kamplele. Ani eka kupan tancher savlli ghali. Ani kupantli oxi êk zap zali: “Opurbaiecho To, Ho Mhozo Put, Tachem aikat!” Ovchit bhonvtonnim nodor martoch, Jezu bogor apnnam borabôr anink konn tankam dixtti poddlo na. Dongra vele denvtana, dekhlelem tem, Mon’xacho Put mel’leantlo punorjivont zai-sôr konnakuch sanginakat mhonn Tannem tankam hukum’ ghalo. Mornnantlo punornivont zaop, hem kitem zait kai mhonn vichar korit, tannim hi gozal apnnam bhitôr samball’li. Tedna, “Elija poilo ieunk zai, mhonn dhormxastri kiteak mhonntat?”, oxem tãnnim Tachê lagim oxem vicharlem. “Hôi, sogllem novean manddun haddunk Elija khoreaninch poilo ieta. Tori astana, Mon’xachea Putan zaitem sõsunk zai mhonn ani mon’xamnim Tachi beporva korunk zai mhonn koxem boroil’lem asa tôr? Punn Hanv tumkam sangtam: Elija nhoich ailo, punn, tachê vixim boroil’lem aslem tea pormannem, apnnank zai aslem toxem tãnnim tachê sorim kelem.”, oso Tannem zobab dilo. Xisam sorxem pavle tedna, tanchê bhonvtonnim lokachi vhôdd urpônz ektthovleli ti ani dhormxastri tanchê kodde vad-vivad kortale te tãnnim dekhle. Ani Jezuk pollena fuddem sogllo lôk ojap zaun thottaklo, ani Taka noman korunk dhanvun ailo. Ani Tannem tanchê lagim vicharlem: “Tanchê kodde tumcho koslo vad-vivad zatalo?” Portipallun lokantlea eklean mhonn’lem: “Guruji, mono devchar boslelea mhojea putak Tujê sorxim hanvem haddla; to taka dhôrta titlê-i pavtti taka dhornnir xevttita; ani to tonddantlean fenno kaddta, dant korkoraita ani tann zata. Ani taka kaddun uddoiat mhonn hanvem Tujeam xisank sanglem, punn tanchean nozo zalem.” Tannem portipallun mhonn’lem: “Bhavart-nasleli pinddka tumi! Kedna porian tumchê borabôr Hanvem aschem? Kedna porian Hanvem tumkam sônschim? Taka Mhojê sorxem haddat.” Ani tãnnim taka Jezu-xim haddlo. Ani Jezuk dekhona fuddem devcharan taka foddfoddailo ani to dhornnir poddun tonddantlean fenno kaddit lolltalo. Ani Jezun tachea bapaik vicharlem: “Taka kedna-san oxem zaun ieta?” Tannem zap dili: “Bhurgeponnar san; ani tacho nas korunk, devchar taka bogor-bogor ujeant ani udkant uddoita. Punn tujean kitem zata zalear, amche churchure dhorun amkam pav!” Punn Jezun taka sanglem: “ ‘Tujean zata zalear’, oxem sangtai? Bhavart dhôrta taka sogllem korunk zata.” Rokddoch cheddeachea bapain dukam golloun vhoddlean mhonn’lem: “Bhavart dhôrtam. Mhojea unnea bhavartak adar di.” Apnna-xim lotton ietelea lokak polleun, Jezun mhellea atmeak oxem mhonnun bhenkddailo: “Monea-bherea atmea, Hanv tuka hukum’ ghaltam: tachê velo bhair sor ani hea fuddem tacher ienaka!” Bob marun ani bharim taka foddfoddaun to tachê velo gelo; ani to cheddo itlo mel’lea porim zalo, ki sobar zannamnim mhonn’lem: “To melo!” Punn Jezun tachea hatak dhorun taka ubo kelo ani tachean ubo ravunk zalem. To ghorant bhitôr sortôch Tacheam xisamnim kuxin ieun Tachê lagim vicharlem: “Amchê kodde kiteak taka kaddunk zalem na?” Tannem tankam sanglem: “Osli zat magnneache udexinch bhair sorunk zata.” Thõiche bhair sorun te Galileiantlean vetale, punn hem konnakuch gomlelem Taka naka aslem, kiteak To Apleam xisank xikovnn ditalo ani tankam sangtalo: “Mon’xachea Putak mon’xanchea hatant ghalcho asa ani te Taka jivexim martele, ani Taka martôch tin disam uprant Dev Taka punorjivont kortolo.” Punn To sangtalo tem te somzunk nant ani Tachê lagim vicharunk-ui te bhietale. Te Kapernauma pavle, ani ghora ietôch Tannem tankam vicharlem: “Vatter koslo vivad kortaleat tumi?” Apnnam modem konn vhoddlo kai mhonn te vatter ekameka kodde vad-vivad kortale dekhun,Te ogech ravle. Bosun Tannem Bara Zannank apoile ani tankam sanglem: “Konnak poilo zaunchi khuxi aslear, to soglleam poros nimanno ani soglleancho chakôr zauncho.” Tedna, eka bhurgeak dhorun, taka tanchê modem ubo kelo; ani taka vengent gheun tankam sanglem: “Mhojê khatir osleam bhurgeantlea ekleak ghetat tim Mhaka ghetat, ani Mhaka ghetat tim Mhaka nhoi, punn Mhaka dhaddla Taka ghetat.” Juanvan Taka mhonn’lem: “Guruji, amcho pattlav korinaslolo êk monis Tujea nanvan devchar kaddtana ami dekhlo; ani amcho pattlav korina mhonnun, taka ami mona kelo.” Punn Jezun mhonn’lem: “Taka mona korinakat; kiteak Mhojea nanvan vismit kortit tim kednanch rokddim Mhojer vaitt ulounchim nant. Tôr amcher add nant tim amchea bhaga asat. Hanv tumkam khorench sangtam: tumi Kristachim pattlavdaram mhonn konn-ui tumkam êk pelo-bhôr udok pieunk ditit zalear, tanchi mozuri tankam mellonastana urchi na. Punn bhavart dhôrteleam heam lhanam modlea ekleak ho bhavart soddunk konn-ui oddun vhortit tôr, gaddum ôddta toslem ek danteachem pedd tanchea golleak bandun tankam doriant uddoilear odik borem zatelem. Ani tumcho hat patok korunk tumkam oddun vhorta zalear, to katrun uddoiat; don hat asun emkonddant, palovnam-toslea ujeant, vechê poros, lunddim zaun Jivitant bhitôr sorlear tumkam odik borem. Ani tumcho pãi patok korunk tumkam oddun vhorta zalear, to katrun uddoiat; don pãi asun emkonddant tumkam uddoil’lê poros, thonttim zaun Jivitant bhitôr sorlear tumkam odik borem. Ani tumcho dollo bi patok korunk tumkam oddun vhorta zalear, to bhair uddoiat; don dolle asun emkonddant tumkam uddoil’lê poros êkuch dollo gheun Devachea Rajeant bhitôr sorunk tumkam odik borem. Thõi emkonddant poddleleank khata to kiddo moron morona ani uzo kednanch palovn palovna. Mitta vorvim ghòddta toxem, ujea vorvim Dev zonn-eklea mon’xak xud’dh korun samballtolo. Mitt êk bori vôst, punn mittachi kharsann geli tôr, kitea vorvim tumi taka portun kharsann diteleat? Tumchê modem mitt asum-di, ani ekameka lagim xanti vosum-di.” Thõi thaun vochun Jezu udeiant Jordanachê pelê toddi ailo, ani novean lokacheô urponji Tachê bhonvtim ektthovleô. Ani Aplê sonvoiê pormannem To tankam dusrim xikounk laglo. Taka kosak lavunk, lagim sorun, kãi Farizevamnim Tachê kodde oxem vicharlem: “Ghovan aplê bailek soddun dium-ieta?” Tannem tankam portun vicharlem: “Moizesan tumkam koslo hukum’ ghala?” Tãnnim sanglem: “Ghottsfottichem potr boroun diun, tika soddun diunk Moizesan rojea dilea.” Tedna Jezun tankam oso zobab dilo: “Tumi apleach vadeache dekhun, tumkam hi adnea tannem boroun dili. Punn rochnnechea orombak thaun ‘Devan tankam dadlo ani bail kelim. Hea pasot monis aplea bapaik ani avoik sôddtolo [ani aplê potinnik ektthovtolo,] ani tim dogam-i êk zatelim.’ Dekhun tim hea fuddem dogam nhoi, punn êkuch. Mhonntôch Devan ektthãi kelam tem mon’xan doxim korum noiê.” Ghorant novean bhitôr sortôch, xisamnim hê vixim, dusrim Taka vichar kelo. Ani Tannem tankam sanglem: “Aplê bailek soddun diun, dusrê kodde logn zait to poilê bailecher add pordvar korta; ani êk bail aplea potik soddun dusrea kodde logn zait zalear, ti-i pordvar korta.” Tannem dhakttuleam bhurgeank hat lavchê khatir, lôk tankam Tachê sorxem haddtalo. Xisamnim tankam bobatt keli. Hem polleun, Jezu tiddkelo ani Tannem tankam mhonn’lem: “Supurleam bhurgeank Mhojê sorxem ieunk diat; Sorginchem Raj tosleanchench dekhun tankam addainakat. Hanv tumkam khorench sangtam: lhan bhurgea porim Devachem Raj manun ghenant tim tantunt bhitôr sorchim nant.” Uprant Tannem tankam vengent gheun ani tancher Aple hat dovrun tankam axirvad dilo. To vattek lagchea vellar êk monis dhanvun ailo. Tachê mukhar dimbi moddun tannem Jezu kodde vicharlem: “Borea Guruji, Sasnnik Jivit mhojem daiz korun gheunchê khatir hanvem kitem korunk zai?” Jezun taka mhonn’lem: “Mhaka boro kiteak mhonntai? Ekleach Devak kaddun konnuch boro nhoi. Tum adnea zannoi: ‘Jivexim marum noiê; pordvar korum noiê; chorum noiê; lottik govai dium noiê; peleak fosoum noiê; tujea bapaik ani avoik man di.’ ” Tea mon’xan Taka oso zobab dilo: “Guruji, mhojea bhurgeponnar thaun hem sogllem hanv pallun ailam.” Tedna tacher nodor martana Jezuk tachi opurbai disli, ani Tannem mhonn’lem: “Ek unnem tuka; voch, tujê kodde asa titlem-i vik ani goribank di, ani tuka sorgar tthevo melltolo; magir ie ani Mhozo pattlav kôr.” Punn him utram aikun tachea tonddar kallôk poddlo ani tachê lagim khup girestkai asli dekhun khontibhorit zaun to koddsorlo. Jezun Apnna bhonvtonnim nodor marun Apleam xisank mhonn’lem: “Girestkai asleleank Devachea Rajeant bhitôr sorunk kitlem kotthin!” Him utram aikun xis thottakle. Punn Jezun novean uloun mhonn’lem: “Mhojeam bhurgeamnô, Devachea Rajeant bhitôr sorunk kitlem mhonn kotthin! Eka girest mon’xak Devachea Rajeant bhitôr sorchê poros, eka unttak suiechea birddeantlean vochunk odik sompem.” Te odik thottakle ani ekamekak mhonnunk lagle: “Toxem zalear, konnak mhonn taronn mellonk zata?” Jezun tancher dolle lavun tankam sanglem: “Mon’xam kodde tem ghoddona; punn Deva kodde toxem nhoi, kiteak Deva lagim sogllem ghòddta.” Pedrun tondd ghalun oxem Taka mhonn’lem: “Polle, ami sogllem sanddlam ani Tuzo pattlav kela.” Jezun zobab dilo: “Hanv tumkam khorench sangtam: konn-ui Mhojê pasot ani Bore Khobre pasot ghor-dar, vô bhav, vô bhoinni, vô avoi, vô bapui, vô bhurgim-ballam, vô xetam-bhattam sanddtit zalear, tim atam, heach kallant, ekak xembhôr ghetelim — ghoram-daram, bhav, bhoinni, avoiô, bhurgim-ballam ani xetam-bhattam — punn dhumallo-i bhôgtelim, ani ieta tea kallant sasnnik jivit ghetelim. Poilim asat tim sobar zannam nimannim zatelim ani nimannim asat tim poilim zatelim.” Te Jeruzaleak choddun vetale; Jezu xisam fuddem choltalo; xis ghaborlele ani pattlean vetalim tim bhiel’lim. Bara zannank novean lagim gheun, Apnnak ghòddchem aslem tê vixim oxem To tankam sangunk laglo: “Polleiat, ami Jeruzaleak choddun vetanv; ani Mon’xacho Put mukhel iadnikank ani dhormxastriank poradhin zauncho asa; te Tacher mornnachem formonn martele ani Taka videxeanchê adhin kortele; ani te Tacheô kenddnneô kortele, Tacher thimpi uddoitele, Taka jerbond ditele ani jivexim martele; ani tin disam uprant Dev Taka punorjivont kortolo.” Zebedevache put Jakob ani Juanv Tachê sorxem aile ani tãnnim Taka mhonn’lem: “Guruji, Tunvem amkam êk upkar kel’lo amkam zai.” Tannem tankam mhonn’lem: “Hanvem tumchê khatir kitem kel’lem tumkam zai?” Tãnnim mhonn’lem: “Tujê mhoiment ekleak Tujea uzvea hatak ani dusreak Tujea davea hatak amkam bosunk di.” Jezun tankam mhonn’lem: “Tumi kitem magtat tem tumich nokllot. Hanvem pieunchem asa tea patrantlem tumchean pieunk zait? vô Hanvem gheuncho asa to batism tumchean gheunk zait?” Tãnnim Taka zobab dilo: “Amchean zata.” Jezun tankam sanglem: “Hanvem pieunchem asa tea patrantlem tumi pietelet ani Hanvem gheuncho asa to batism tumi ghetelet khore; punn Mhojea uzvea vô davea hatak bosunk diunk Mhojea hatant na; tem Devan toiar korun dovorlam tankam.” Bakiche dha zann hem aikun, Jakobacher ani Juanvacher chiddle. Dekhun tankam Apnna sorxem apoun, Jezun mhonn’lem: “Videxeam modem tanche odhikari mhonnlele apli podvi tancher zobordosten choloitat mhonn ani toxench tanche vhoddil aplê sot’tiecho bhar tancher ghaltat mhonn tumi zannont. Tumchê modem toxem zaunchem nhoi. Tumchê bhitôr konn vhôdd zaunk sodit to tumcho sevôk zauncho, ani tumchê modem poilo zaunk sodit to soglleancho gulam’ zauncho. Kiteak Mon’xacho Put Apunn-ui herank Aplê chakrek lavunk ieunk na, bogor heranchi chakri korunk ani Aplo jiv somestanchê soddvonnê pasun diunk aila.” Te Jerikek pavle; ani Jezu Apleam xisank gheun ani lokachea vhôdd zomea borabôr Jerikek thaun bhair sortalo tedna, Timevacho put,Bartimêv mhonnlolo êk kurddo rosteachê deger bhikek bosun aslo. Nazaretkar Jezu tevxilean veta mhonn aikotôch, to oxi bob marunk laglo: “Jezu, Davidachea Puta, mhoji kaklut kôr!” Sobar zannamnim taka bobatt keli ani ogo rav mhonn sanglem, punn to odik vhoddlean bob marit ravlo: “Davidachea Puta, mhoji kaklut kôr!” Jezu thamblo; Tannem tankam mhonn’lem: “Taka hanga apoiat.” Tãnnim tea kurddeak apoilo ani taka sanglem: “Dhir dhôr; utth; To tuka apoita.” Aplo zhubo sanddun ani uddun-uddun to Jezu sorxem ailo. Tedna Jezun mhonn’lem: “Tuje khatir tuka Hanvem kitem kel’lem zai?” Kurddean Taka oso zobab dilo: “Rab’boni (mhonngê ‘Guruji’), mhaka novean nodor ie-xi kôr.” Jezun taka mhonn’lem: “Voch, tujea bhavartan tuka boro kela.” Ani rokddich taka nodor aili ani Jezu vetalo tê vatten to Tachê pattlean gelo. Te Jeruzalea lagxim ietam-ietam, Olivet Dongra kodde Betfage ani Betania pavtôch, Tannem xisam bhitorleam dogank dhaddle ani tankam sanglem: “Tumchê samkar asa tea gramamt vochat ani, tumi thõi bhitôr sorona fuddem, konnuch ozun tacher bosunk naslelem gaddvachem ek xingrum bandlelem tumkam melltelem; taka sôddat ani hanga haddat. ‘Hem kiteak kortat tumi?’ oxem tumkam konn vicharit zalear, ‘Somiak tachi goroz asa ani To tem rokddoch hanga portun dhaddtolo’ mhonn sangat.” Te gele ani bhair bidint, eka dara mukhar, ek gaddvachem xingrum bandlelem tãnnim dekhlem ani taka sôddtana, thõi ubim asleleam kãi zannamnim tankam mhonn’lem: “Tea xingrak soddun tumi kitem kortat?” Jezun sanglolo zobab tãnnim tankam dilo. Ani team mon’xamnim tankam vhorunk dilem. Ani xingrak tãnnim Jezu sorxem haddlem. Tacher tãnnim aplim avoronnam ghalim, ani To tacher boslo. Sobar lokan aplim avoronnam vatter patllailim ani dusrim kãi zannamnim molleamntleo katrun kaddleleo khandiô rostear ximpddaileo. Ani fuddlean ani pattlean vetalim tim oxi bob martalim: “zôi! zôi! Sorvesporachea nanvan ieta Toch subhagi, Sorvesporak vakhann’ni! Amchea purvoza, Davidachem ieto raj subhagi, Bhov Vortea Devak zôi! zôi!” Jezu Jeruzaleant bhitôr sorlo ani Devmondirant gelo. Tannem sogllem chotraien polleun kaddlem; oxench, uxir zal’lo dekhun, To bara zannank gheun Betaniê gelo. Dusrea disa Betaniê thaun ietana Taka bhuk lagli. Pois thaun Tannem ek palel’lem anjirachem zhadd dekhlem ani kitem-i foll mellot kai mhonn To polleunk gelo, punn panam bogor kãich Taka mell’lem na; tôr to anjirancho kall nhoi aslo. Ani Tannem anjirachea zhaddak mhonn’lem: “Hea fuddem kednanch tujem foll konnuch khaunk pavona zaum.” Ani To oxem uloitana Tacheam xisamnim tem aikolem. Jeruzaleak pavtôch To Devmondirant gelo ani thõi viktale-ghetale tankam bhair ghalunk laglo; vattav-kaddpeanchim mezam ani parve viktoleanchim asonam Tannem omtun uddoilim; ani Devmondirantlean kitench haddunk-vhorunk To dina zalo. Ani Tannem tankam xikovnn diun oxem mhonn’lem: “Soglleam porzam khatir, Mhojea Ghor magnneachem Ghor mhonntelim, oxem Povitr Pustokar boroilelem asa nhoi? Punn tumi tem choranchi dhôl kelea.” Hem mukhel iadnikanchea ani dhormxastreanchea kanar poddlem ani koxê bhaxen Taka nattak korcho kai mhonn te sôdtale. To sogllo lôk Tachê xikovnnek lobdol’lo mhonnon te Taka bhietale. Ani sanz zatôch Jezu ani Tache xis xarantle bhair gele. Dusrê sokallim, tevxilean vetana, tem anjirachem zhadd pallam thaun suklelem tãnnim dekhlem. Pedrun ugddas korun Jezuk mhonn’lem: “Polle, Rab’bi (mhonngê Guruji), Tunvem xiraplelem anjirachem zhadd sukun gelem.” Jezun zap dili: “Devacher bhavart dovrat. konn aplea kallzant dubhav dhorinastanam, apunn mhonntat tem zatelem mhonn, bhavart dhorun, hea dongrak mhonntit: ‘Hangasorlo utth ani doriant voch’, tem tanchê sorim ghòddtelem mhonn Hanv tumkam khorench sangtam. Hea pasot, tumi prarthun magxeat titlem-i tumkam mell’lem mhonn bhavart dhôrat, ani tem tumchench zatelem mhonn Hanv tumkam sangtam. Ani tumi magnnem korunk ubim ravtat tedna, konnacher add tumkam asot titlem-i bhôgsat ani tumcho Sorgincho Bap tumcheô-i chuki bhôgxitolo. Te portun Jeruzaleak aile ani Jezu Devmondirant bhonvtastanam mukhel iadnik, dhormxastri ani zannte Tachê sorxem aile. Tãnnim Taka mhonn’lem: “Oxem tunvem korpak koslo odhikar asa tuka? Vô oxem korpak tuka sot’tea konnem dilea?” Jezun tankam mhonn’lem: “Hanv tumchê kodde ek vichartam; Mhaka zobab diat, ani tedna koslea odhikaran Hanv oxem kortam tem tumkam sangtolom. Juanvacho batism khõi thaun ailo? Sorgar thaun ki mon’xam thaun? Sangat, polleum-ia.” Ani te apnnam bhitôr oxem chintunk lagle: “ ‘Sorgar thaun’, oxem ami mhonn’lem zalear, to vichartolo: ‘Tôr tumi kiteak tacher bhavart tthevlo na?’ Punn ‘mon’xam thaun’, oxem ami mhonntelenv?” — Juanv khoro provadi mhonn sogllo lôk man’talo dekhun te lokak bhiele. Hea pasot, tãnnim mhonn’lem: “Ami nokllonv.” Ani Jezun tankam mhonn’lem: “Koslea odhikaran Hanv heô vostu kortam, tem Hanv-ui tumkam sanginam.” Ani To tanche kodde voparimnim ulounk laglo: “Eka mon’xan dakancho ek mollo lailo, tachê bhonvtim ek addo ghalo, khonnun êk kollombi toiar keli, êk gopur bandlo ani, to mollo kullvaddeank kumlleak diun, apunn poixilea ganvak gelo. Ani kall pavtôch, molleachea pikecho aplo vantto kullvaddeam lagcho gheunchê khatir, tannem eka chakrak tanchê-xim dhaddlo. Tãnnim taka dhorun mar dilo ani rikamo portun dhaddlo. Dusrê pavtt anink eka chakrak tanchê-xim dhaddlo; tachi tãnnim tokli daddaun, taka beman kelo. Novean tannem dusrea ekleak dhaddlo, ani tãnnim taka jivexim marlo; ani dhaddleleam sobar zannank oxench kelem; tantleam thoddeank tãnnim boddoile, her dusreank tannim jivexim marle. Taka ozun ekloch urlolo to tacho chôdd mogacho put. ‘Mhojea putak tori te man ditele’, oxem chintun tannem xekim putak tanchê-xim dhaddlo. Punn kullvaddeamnim ekamekak mhonn’lem: ‘Ho tacho daiji; ieiat, taka jivexim marum-ia ani daiz amchem zatelem.’ Ani tãnnim taka dhôrlo, tacho jiv kaddlo ani taka mollea bhair kaddun uddoilo. Atam molleacho dhoni kitem kortolo? To ietolo, kullvaddiancho nas kortolo ani mollo dusreank ditolo. ‘Zo fatôr bandpiamnim soddun dil’lo toch zalo konnxea-sondhicho fatôr. Hem Sorvesporanuch ghoddun haddlam!’ Tem polleun ami thottak zaleanv.” oxem Povitr Pustokar boroil’lem asa tem tumi vachinaslam? Tannem hi vopar apnnank lavun sangli mhonn te bore somzole tedna, te Taka dhorunk sôdtale, punn lokak bhiele; ani Taka sanddun gele. Magir, Jezuk utrak sampddaunk, Farizevantleam ani Herodichea pokxantleam kãi zannank Tachê-xim dhaddle. Tãnnim lagim sorun Taka oxem mhonn’lem: “Guruji, tum sotan choltai ani tuka konnachich bhidda na mhonn ami zannonv; kiteak mon’xanchem tondd polleun tum uloinãi ani Devachi vatt sotan xikoitai. Tôr Somrazak dôndd farik korunk zai ki na? Ami to farik korcho ki na?” Punn tanchem ddhongeponn ollkhun Tannem tankam mhonn’lem: “Tumi kiteak Mhaka ho fas manddtat? Êk dinar Mhaka haddun diat, polleum-ia.” Tãnnim Taka êk haddun dilo. Ani Tannem tankam mhonn’lem: “Hem rup konnachem? ani hem nanv konnachem?” Tãnnim mhonn’lem: “Somrazachem.” Portipallun Jezun tankam sanglem: “Borem tôr, Somrazachem tem Somrazak diat, ani Devachem tem Devak diat!” Ani Tacho zobab aikun te ojap zale. Uprant Saduki, punorjivontponn na mhonntat te, Jezu-xim aile ani Tachê kodde tãnnim vicharlem: “Guruji, Moizesan amkam oxem boroun dovorlam: ‘Bhurgem-ball nastana konn-ekleacho bhav aplê bailek pattlean dovrun morot zalear, hachea bhavan tachê bailê lagim logn zaunchem ani aplea bhavak sonsôt utpon korchi.’ Tôr sat bhav asle. Poilo êkê bailê lagim logn zalo ani sonsôt nastanam melo. Ani dusro tichê lagim logn zalo ani melo; taka-i sonsôt na zali. Ani tosoch tisro. Tê jin’xim sat-ui zannamnim bhurgem-ball dovrunk na. Soglleam uprant bail-ui meli. Tôr sat-ui zannanchi ti potinn zal’li dekhun, punorjivontponnant, mel’lim mon’xam novean jivont zatelim tedna, tanchê bhitorlea konnachi potinn zateli ti?” Ani Jezun portipallun tankam mhonn’lem: “Povitr Pustokam, nhoi mhonn Devachi podvi, tumi nokllot dekhun, tumi oxe chuktat nhoi? Punorjivontponnachea somoiar dadle logn zainant ani bailank logn korun dinant, punn tim sorgar asto devdutam sarkim zatat. Ani mel’leanchea punorjivontponna vixim, ‘Abrahamacho Dev To Hanv, Izakacho Dev To Hanv, Jakobacho Dev To Hanv’, oxem Devan Moizesak sanglem tem, jilkutta-khobrent, tachea pustokar, tumi vachinaslam? Mel’leancho nhoi To, bogor jivim asloleancho Dev To! Tumi bhov chuktat.” Ani dhormxastreantlea eklean, tanche vad-vivad choltat te aikun ani Jezun kai borê bhaxen zobab dilo tem polleun, Tachê kodde vicharlem: “Soglleam poros ekdom motvachi adnea ti khõichi?” Jezun taka zap dili: “Poili adnea hi: Aik, Israela! Amcho Dev To Sorvespor, Ekloch To Sorvespor, ani sogllea tujea kallzan, sogllea tujea jivan, sogllea tujea monan, ani sogllê tujê sokten Sorvespora Tujea Devacho tuvem môg korcho. Dusri ti hi: Tuzo môg kortai tosoch tujea peleacho tuvem môg korcho. Hanchê poros motvachi anink her dusri adnea na.” Ani dhorm-xastrean Taka mhonn’lem: “Borem asa, Guruji! Tunvem sanglãi tem khorem: To Ekloch, ani Tachê bhair anink her dusro na! Khorench, sogllea kallzan, sogllea monan, sogllea jivan, sogllê xokten Tacho môg korop, ani amcho kortanv tosoch mchea peleacho korop soglleam somorponnam ani bolidanam poros ekdom’ odik vortem.” Tannem xanneponnan portipall kelo mhonn polleun, Jezun taka mhonn’lem: “Tum Devachea Rajea thaun pois nãi.” Ani tea fuddem kosloch proxn Taka ghalunk konnakuch kalliz zainaslem. Ani “‘tujeam dusmanank Hanv Tujeam pãiam tolla ghalin porian, Mhojea uzvea hata bos, Sorvesporan Mhojea Somiak mhonn’lem, oxem Povitr Atmeachea preronnan uloun Davidanuch mhonn’lem zalear’, Krist Davidacho Put, dhormxastri mhonntat tem koxem tor?” Hem Devmondirant xikoitana Jezun vicharlem. Daviduch taka Somi mhonnta; mhonntoch To tacho put koso zaunk zata?” Ani lokacho vhôdd zomo khuxê-monan Taka kan ditalo. Ani Aplê xikovnnent Jezu tankam mhonntalo: “Dhormxastream vixim chotur ravat; lamb-lamb angavlim ghalun bhonvunk, tinttear apnnank manan kel’le lokache salam’ gheunk, devsthanamnim voileam-poileam zageancher bosunk, ani jevnnank poileô svatô dhorunk tankam zoboruch borem lagta; lamb magnneanchem song gheun vidvanchim ghoram-daram te khaun uddoitat. Tankam soglleam-von odik khôr zhôddti asteli.” Devmondirant dananchê pettê mukhar bosun, lôk koso pettent duddu ghalta tem Jezu polleun aslo. Ani sobar girest mon’xam khup duddu ghaltalim; tedna êk gorib vidva aili ani tinnem don lepton tantum ghale, mhonngê êk pav as’sarion Apleam xisank apoun haddun Tannem mhonn’lem: “Pettent duddu ghaleat team soglleam poros hê gorib vidven odik ghalam; tôr soglleamnim apnnank ogllem aslem tantlem ghalem; punn hinnem aplea goribponnantlem kaddun aslem titlem-i ghalem, aplea jivak zai aslem tem porian.” Ani To Devmondirantlo bhair sorun vetastanam, Tacheam xisantleam eklean Taka mhonn’lem: “Guruji, kede vhoddle fator polle ani kedeô bandavolli!” Zap diun Jezun taka mhonn’lem: “Heô vhoddleô bandavolli tum polletai nhoi? Tancho ek tori fatrar fatôr urcho na, sogllem ghorttann zatelem!” Ani Olivet Dongrar, Devmondira samkar To bosun astana, Pedrun, Jakoban, Juanvan ani Andren Tachê lagim vicharlem: “Hem kedna ghòddtelem tem amkam sang. Ani heam soglleam ghòddnneancho vêll pavlo mhonn ollkhunk kosli khunna?” Ani portipallun Jezu tankam oxem sangunk laglo: “Mhojem nanv gheun, ‘apunnuch to’ mhonnun, sobar zann ietele ani zaiteank fottoitele dekhun.Tumkam konnem fottoinam zaunk chotraien ravat; Laginch cholteleam loddaiancho gollbôll tumi aikotat tedna ani pois pettleleam zhuzanchi khobor tumkam pavta tedna, tumi akantum nakat; hem oxem ghoddonk zai, toripunn ho ozun xevôtt nhoi. Kiteak dês desacher ani raj rajeacher uprastelim, ani hanga-thõi bhikamp zateli ani dukôll poddtolo. Hem sogllem porsuttvenninchi survat. Tumi aple xidduk ravat. Tumkam dhormsobhent dhorun ditelim ani devsthanamnim tumkam boddoitelim. Mhojê pasot razpalanchea ani razanchea fuddeant, tumi tankam govai diunchê khatir, tumkam ube ravchem poddtelem. Xevotta adim soglleam raxttrank xubhvhortoman porgott zaunk zai. Ani dhorun diunk tumkam vhortat tedna, kitem ulounchem tê vixim adim-fuddem huskeum nakat; punn uloitele te tumi nhoi, punn Povitr Atmo To dekhun, tê ghoddier Dev tumkam ditolo, tench sangat. Jivexim marunk bhav bhavak ani bapui putak dhorun ditolo; put-dhuvô avoi-bapaicher kolpun tancho prann kaddunk laitelim. Mhojea nanva pasot sogllim tumcho dvês kortelim; punn xevottak porian thir ravtit tankam Dev taronn ditolo. ‘Soteanasacho Kanttallo’, taka favonaslelea zagear ubo aslolo tumi polletelim (vachtat tãnnim hem somzunchem). Tedna Judeiant asleleamnim dongrancher pollun vechem; Aplea ghorantlem kitench vhorunk, pattsar asleleamnim sokla denvchem nhoi vo bhitôr sorchem nhoi; xetam-molleamnim asleleamnim aplem avoronn vhorunk porot ieunchem nhoi. Te dis ietôch gorbest bailanchem ani dud diteleanchem kotta! Hinvalleant hem zaina zaunk magat. Devan sonvsar rochla tê meren az porian zaunk na ani hea fuddem zauncho na toslo sontap team disamnim ietolo. Ani Sorvesporan te dis unne korunk nasle zalear konnuch vattavonchim naslim, punn Apnnem vinchun kaddleleam khatir Tannem te unne keleat. Tedna ‘Polle, Krist hanga asa’ vô ‘Polle, To thõi asa’, oxem konn-ui tumkam sangtit zalear, tumi tem sotmaninakat; kiteak lobadde Krist ani lobadde provadi uprastele ani, zata zalear, vinchun kaddleleank porian fosounk puro tosleô khunna ani ochoriam korun dakhoitele. Mhonntôch chotrai dhôrat, Hanvem tôr tumkam sogllem adinch sangun dovorlam. Punn team disamnim, to sontap ietôch, suriacher kallôk poddtolo ani chondrim’ aplo uzvadd diuncho na, ani noketram mollba velim khala poddtelim ani ontralla veleô xokti kolkolteleô. Ani tedna sogllê podven ani dobajean kupancher ieto Mon’xachea Putak lok dekhtolo. Ani tedna To Apleam dutank dhaddun char-ui dixam veleam, prithumecheam ximam thaun ontrallacheam ximam porian asteleam, Apnnem vinchleleank zomoitolo. Anjirachea zhaddachi hi vopar somzun gheiat. Tacheô khandiô rosbhorit zatat ani tankam panam futt’tat tedna, gim’ lagim pavla mhonn tumkam kollon ieta; têch porim heô vostu ghòddtat mhonn polleun To lagim pavla, darachea umbrear asa mhonn zanno zaiat. Hanv tumkam khoreponnim sangtam: hem sogllem ghòddlea bogor hi pinddka ontorchi na. Sôrg ani prithum’ sortelim, punn Mhojim utram kedinch sorchim nant. Punn ekleach Bapak kaddun, anink konnakuch, sorgincheam dutank vô Putak legun, tea disachi vô ghoddiechi khobor na. To vêll kedna pavtolo to, tumi nokllot dekhun, chotrai dhôrat, zagrut ravat. Ek-ekleak ap-aplea vauran, apleam chakrank adhikari diun ani dar-rakhnneak rakhonn korunk laun, aplea ghorantlo bhair sorun ek provas korunk veto konn-eklea mon’xa porim to. Hea pasot, ghoracho Dhoni kedna ietolo, tin’sanam, modeanir, kombea-sadar, ki fantea-parar, tem tumi nokllot dekhun zagrut tavat; na zalear, To ovchituch pavot ani tumi Taka nhidlelim mellxeat. Tumkam sangtam tem soglleank sangtam: zagrut ravat.” Don disamnim Paskanchi ani Fug-nasleleam Unddeanchi porob zaunchi asli; ani mukhel iadnik ani dhormxastri Jezuk koso abghatan dhôrcho ani jivexim marcho tem sôdtale. Tôr te mhonnot: “He porbe-somoim nhoi, na zalear lokachi uchambollai bi zait.” Jezu Betanient Simanv koddkarachea ghorant jevnnak boslolo astana, êk bail unch molachem osôl zottamanxechem pormollit tel eka chondrokanti aidonant gheun aili ani aidon foddun tinnem tem tel Tachea mathear ôtlem. Thõi asleleam kãi zannamnim apnnam modem tiddun mhonn’lem: “Kiteak mhonn hea telacho ibadd? Tôr oslem tel tin’xeam voir dinarank vikunk ani duddu goribank diunk zatem.” Ani tika tannim bexttaili. Punn Jezun mhonn’lem: “Korum-di tika; tika tumi kiteak tras ditat? Tinnem Mhojê sorim êk bori kornni keli. Gorib lôk tumchê modem sodankal asach, ani tumkam zai tedna tumchean tankam borem korunk zata; punn Hanv sodanch tumchea sangata ascho nam. Tichê kodde korunk zatalem tem tinnem kelem; adim-fuddem Mhoji kudd tinnem nikhipinnek makhli. Khorench tumkam sangtam, akhea sonvsarak hem xubhvhortoman porgott zait titleam-i svatanr jem hinnem kelam tem-i tichea ugddasak porgott zatelem.” Tedna barantlo eklo, Judas Iskariot, Jezuk mukhel iadnikanchea hatant ghalunk tanchê- xim gelo. Tachem aikun tankam sontôs bhòglo ani taka duddu diunk te kobul zale. Mhonntoch, Taka tanchea hatant ghalunk êk boro soêg to sôdunk laglo. Fug-nasleleam Unddeanchea poilea disa, Paskacho menddro martat tedna, Jezucheam xisamnim Taka mhonn’lem: “Tujem Pask-Jevonn korunk khõi vochun ami toiar kel’lem Tuka zai?” ;Mhonntoch “Xarant vochat ani udkacho kollso khandar marun veto tumkam êk monis melltolo; tachê pattlean vochat ani ‘Mhojeam xisam borabôr Hanvem Pask-Jevonn korunk Mhaka divpacho vosro khõi asa?’, oxem, to bhitôr sorta tea ghorachea dhoniak vicharat. Ani to tumkam mallier, jevnnak borê bhaxen manddlolo êk vhoddlo vosro dakhoitolo; thõi amkam toiar korat.”, oxem sangun, Tannem Apleam xisantleam dogank dhaddle. Xis bhair sorun, Xarant gele ani Jezun sanglelem toxench tankam mell’lem ani tãnnim Pask-Jevnnachi toiari keli. Sanz zatôch, barank gheun Jezu ailo, ani “Mhojê borabôr jevta to, tumchê bhitorlo eklo, Mhozo ghat ghetolo mhonn Hanv tumkam khorench sangtam.”, oxem ap-aplea zagear bosun te jevtana, Jezun mhonn’lem. Te bhov khontibhorit zaunk lagle ani “Hanv Ga to?”, oxem eka pattlean dusro Taka vicharunk lagle. “Mhojê borabôr tattant unddo buddoita to, barantlo eklo to. Apna vixim boroil’lem asa tea pormannem, Mon’xacho Put xevottak veta khoro; punn zo monis Mon’xachea Putacho ghat gheta, tachem kotta! Zolmunkuch naslo zalear tea mon’xak odik borem zatem.”, oxem Tannem tankam sanglem. Ani tanchem jevonn cholta astana, Jezun unddo hatant ghetlo, Devak dhin’vasun to môddlo ani to tankam dilo ani mhonn’lem: “Gheiat, hi Mhoji kudd.” Magir patr ghetlem ani Devak dhin’vasun tem tankam dilem ani soglle tantlem piele. “somest mon’xam pasot, varoilam tem, hea Korarachem Mhojem rogot hem. Devachea Rajeant Hanv novo soro piein porian, hea fuddem ho soro Hanv anink pieuncho na mhonn Hanv tumkam khorech sangtam.”, oxem Tannem tankam mhonn’lem. Ani stotram gailea uprant, Olivetchea Dongrar vochunk te bhair sorle. “ ‘Hanv gonvlleak jivexim martolom ani xellianchi duspôtt zateli’, oxem Povitr Pustokar oxem boroilelem asa dekhun tumi soglle Mhaka soddun vetelet. punn Devan Mhaka punorjivont kortôch, Hanv tumche adim Galileiant vetolom.”, oxem Jezun tankam sanglem tedna, “Sogllech porian Tuka soddun gele zalear, hanv kednanch Tuka sôddcho na!”, ho Pedrun Taka zabab dilo. Jezun taka sanglem: “Az, aichêch rati, kombean don pavtti sad ghalchê adim, tin pavtti tum Mhaka ollkhonãi mhonn sangtoloi mhonn Hanv tuka sot sangtam.” Punn tannem odikuch bhasun mhonn’lem: “Tujê borabôr mhaka morunk legun poddlem zalear, hanv Tuka ollkonam mhonn sangchonam!” Heram soglleamnim toxench mhonn’lem. Getsemani mhonnlelea molleant te pavle. Jezun Apleam xisank mhonn’lem: “Hanvem magnnem korin porian tumi hanga bosat.” Ani Pedruk, Jakobak ani Juanvak Apnna borabôr vhorun, To thorthorunk ani middmiddunk laglo. Ani Tannem tankam sanglem: “Morunk pasun puro titlê khontin Hanv buddlam; hangach ravon zagronn korat.” Ani matso fuddem vochun To dhornnir poddlo ani zata zalear, ho vêll Apnna velo pois vochum mhonn Tannem magnnem kelem. Tannem mhonn’lem: “Ab’ba, Bapa Mhojea, Tujean kitem-i korunk zata; hem patr Mhojê thaun pois kadd; toripunn Mhaka zai toxem nhoi, Tuka zai toxem zaum-di.” Ani portun ieilo ani te Taka nhidlele mell’le. Tedna Tannem Pedruk mhonn’lem: “Simanv, tum nhidlai? Êk tas-bhôr tujean zago ravunk zalem na mum? Tumi tallnnent poddona zaunk zage ravat ani magnnem korat; otmo raji asa khoro, punn kudd osokt.” Ani novean vochun, tinch utram mhonnun Tannem magnnem kelem. Porot ieun te Taka nhidlele mell’le; tanche dolle jemen zodd zal’le ani Taka koxi zap diunchi ti te nokllo asle. Ani Tannem tisrê pavtt ieun tankam mhonn’lem: “Ozun nhidun, visôv ghetat tumi? Puro atam. Vêll pavlo. Polleiat, Mon’xachea Putak patkeanchea hatant ghala. Utthat, chol ia ami. Mhaka poradhin korpi to lagim asa.” Oxem uloita astananch Judas, barantlo eklo, thõi pavlo ani tachê sangatim torvari ani tonnke gheun, mukhel iadnikamnim, dhormxastriamnim ani zannteamnim dhaddlolo lokacho êk zomo aslo. Taka poradhin korpean tankam oxem mhonnun khunna dil’li: “Hanv umo ghetolom to eklo monis, toch to; taka dhôrun rakhonddara khal vhorat.” Ani iena fuddem, rokddoch Judas Jezu sorxem gelo “Rab’bi!” (mhonngê “Guruji!”), mhonnun Taka umo dilo. Ani tãnnim Tachea angar hat ghalun Taka dhôrlo; tedna Tachê borabôr asleleantlea eklean torvar kaddun porom’-iadnikachea chakracher marun tacho kanuch katorlo. Jezun tankam mhonn’lem: “Hanv ek pundd zal’lea porim torvari ani tonnke gheun tumi Mhaka dhorunk aileat kitem? Dispotto Devmondirant xikovnn diun tumchê modem Hanv aslom tedna, tumi Mhaka dhôrunk na. Punn Povitr Pustokachim utram pallon ieunk zai.” Tea vellar soglle xis Taka sanddun pollun gele. Konn-êk tornnatto, aplem ang fokot êkê olin pangrun, Tachê pattlean vetalo; tãnnim Taka dhôrlo, punn tanchea hatant ôl soddun diun, to vinglloch pollun gelo. Ani Jezuk porom’-iadnika mukhar haddlo; ani soglle mukhel iadnik, zannte ani dhormxastri thõi ektthovle. Pedru pois thaun Tachê pattlean cholun porom’-iadnikachea razangnnant bhitôr porian gelo, ani rakhonddaram borabôr dhogtteak bosun xektalo. Mukhel iadnik ani akhi Mha-Dhormsobha, Jezuk mornnachem formonn diunchê khatir, Tacher firiad korunk konn-ui aropi melltit gai mhonn sôdtale, punn tankam konnuch mellunk na. Khorem mhonn’llear, sobar zann Tacher add lottik firiad ditale, punn tancheô firiadi ekamekak zomonasleô. Ani kãi zann utthun Tacher oxem boglantt ghaltale: “Mon’xancheam hatamnim bandlelem hem Devmondir hanv môddtolom, ani mon’xancheam hatamnim bandunk naslelem dusrem ek tin disam bhitôr bandtolom’, oxem tannem sanglelem ami aikolam.” Punn hê-i babtint tanchê firiadichi govaiki zomonasli. Tedna tanche samkar ubo ravun “Kãich zap dinãi? He tujer add hi firiad ditat tem kitem?”, oxem porom’-iadnikan Jezu kodde vicharlem. Jezu ogoch ravlo ani Tannem zap kaddli na. “Subhagi Devacho Put To, krist To Tum?”, oxem novean porom’-iadnikan Tachê lagim vicharlem. Jezun taka sanglem: “Hôi, Hanvunch to! Ani dev-podvechea uzvea hatak boslolo ani sorginchea kupancher ieto Mon’xachea Putak tumi dekhtelet.” Tedna aplim vostram pinzun porom’-iadnikan mhonn’lem: “Anink sakxidaranchi amkam kosli goroz? Tuminch devninda aikolea. Tôr tumkam kitem dista?” Moronn favo aslea porim, soglleamnim Tacher formonn marlem. Tedna ‘Bhakit kor!’, oxem mhonnun, kãi zann Tacher thimpi uddounk lagle, ani, Tachem tondd dhampunk laglim, Tacher thapttam marunk laglim. Ani rakhonddaramnim-i Taka vhorun mar dilo. Pedru sokla razangnnant astana, porom’-iadnikachi konn-ekli chakornn aili, ani dhogtteak boslelea Pedruk dekhonam fuddem, taka boro korun polleun tinnem mhonn’lem: “Tum-i Nazaretkar Jezu borabôr astaloi!” Punn na mhonnun tannem sanglem: “Tum kitem mhonntai tem hanv nokllom; hanv tem somzo-i na.” Ani thõicho koddsorun to fuddlea angnnant bhair sorun gelo. [Tedna kombean sad ghalo.] Taka novean polleun ti chakornn thõi bhonvtim asleleank mhonnunk lagli: “Ho monis tache bhitorlo eklo!” Punn tannem novean na mhonn’lem. Ani matxea vogtan thõi asleleamnim novean Pedruk mhonn’lem: “Dubhava vinnem tum-i tanchê bhitorlo eklo; tum-i Galileikar mum rê!” Punn to apnnacher xirap ghalunk ani soput gheun mhonnunk laglo: “Tumi sangtat tea mon’xak hanv ollkhoch na!” Tedna rokddoch kombean dusrê pavtt sad ghalo; ani Jezun sanglelea hea utracho Pedruk ugddas ailo: “Kombean don pavtti sad ghalchê adim tin pavtti tum Mhaka ollkhonãi mhonn sangtoloi.” Ani to dukhamnim roddunk laglo. Ani sokallim fuddem mukhel iadnikamnim zannteam, xastream, ani akhê Mha-Dhormsobhê borabôr bhasabhas korun aplo tharav ghetlo: tãnnim Jezuk bandlo ani Taka vhorun Pilatachea hatant ghalo. Pilatan Tachê lagim vicharlem: “Judevancho raza tum?” Ani Jezun taka zap diun mhonn’lem: “Tum sangtai toxem.” Mukhel iadnik jinsovar garannim Tacher ghaltale. Pilatan Tachê lagim portun vicharlem: “Tum kãich zobab dinãi? Kitlim garannim, polle, tujer ghaltat te!” Punn Jezun anink zap kaddli na mhonn Pilatak ojap dislem. Porbechê somoim,lôk magit tea khõichea-i eka koideak, suttka diunchi chal asli. Tedna bonddaient khun kel’leam fituram modem Barab’bas nanvacho êk monis bondkhonnint aslo. Lokacho êk zomo voir choddun gelo ani sodanchê chali pormannem Pilat kortalo tench, apnnam khatir kôr mhonn tache kodde to lok magunk laglo. Ani Pilatan zap diun mhonn’lem: “Judevanchea razak hanvem suttka dil’li tumkam zai?” Mukhel iadnikamnim Taka nattkaien dhorun dila mhonn to tôr borem zanno aslo. Punn te bodlek, mukhel iadnikamnim uchambollai korun, tannim Barab’basak soddunk, taka lailo. Tedna Pilatan novean zap diun tankam mhonn,lem: “Toxem zalear, tumi Judevancho raza mhonntat taka hanvem kitem korchem?” Tãnnim novean huiêl marli: “Taka khursar mar!” Torui Pilatan tankam mhonn’lem: “Tôr tannem kitem vaitt kelam?” Punn tim odik vhoddlean huiêl marunk laglim: “Taka khursar mar!” Mhonntôch lokak khuxi korunk sôdtalo dekhun, tãnnim maglelem toxem, Pilatan Barab’basak suttka dili ani Jezuk jerbond diun khursar marunk tanchê svadhin kelo. Tedna soinikamnim Taka nitixallechea razangnnant vhelo ani akhi polttônn zomoili. Taka ek zambllem avoronn ghalem ani, kantteancho êk mukutt vinnun, to Tachea mathear ghalo. Ani te Taka oso noman korunk lagle: “Noman tuka, Judevanchea raza!” Ani êk boddi gheun Tachê tokler martale, Tacher thimpi uddoitale ani dimbi moddun Taka nomoskar kortale. Tachim khebaddam kelea uprant, zambllem avoronn kaddun, tãnnim novean Taka Tachim khaxa angavlim ghalim, ani Taka khursar marunk te Taka gheun gele. Konn-eklo Ciren’kar Simanv, Aleksandracho ani Rufusacho bapui, gramantlo ieun tê vatten vetalo; taka tãnnim Jezucho khuris vhorunk vettik dhôrlo. Ani Golgota zagear (mhonngê Kortteachea zagear) Taka vhelo. Ani tannim gondhrôsan misoll’lolo soro Taka dilo, punn Tannem to gheunk na. Taka khursar marlea uprant, konnak kitem vhorchem tem tharaunk, sorti ghalun, tannim apnnam modem Tachim vostram vanttlim. Taka khursar marlo tedna sumar donparcho vêll zal’lo. Tacher add garanneacho namlekh oso boroun ghal’lo aslo: “Judevancho Raza Ho”. Ani Tachê borabôr dogam punddank khursar marle, ekak Tachea uzvean ani dusreak davean. Te vatten pasar zaun ieto-veto lôk apli tokli haloit ani “Devmondir moddcho asloi ani tin disamnim bandcho asloi To tum. khursa velo denv ani Tuzoch jiv vanchoi atam. Aha...ha!”, oxem mhonnit Tacheô kenddnneô kortalo. Têch porim, borabor mellon, ani “Hannem herank soddoilim khõi, atam tachean apnnakuch soddounk zainam mum rê! Ami polleun tacher bhavart dovorchê khatir, Hea Krista, Israelacho razak atam khursa velo denvum-di!”, oxem mhonnit xastream borabôr mukhel iadnik ekameka lagim uloun Tachim khebaddam kortale. Tachê borabôr khursar marlole te-i Tacheô kexttaiô kortale. Don’par zatôch tin vazo porian sogllea desacher kallôk poddlo; ani sumar tin vaztam “Eloi, Eloi, lama sabakhtani,” mhonngê, “Deva Mhojea, Deva Mhojea, kiteak Tunvem Mhaka sanddloi?”, oxem Jezun vhoddlea tallean mhonn’lem. Hem aikun,”Ho Elijak apoita!”, oxem thõi ube asleleam kãi zannamnim mhonn’lem. Konn-eklo dhanvun gelo ani xirkeant alombem buddoun kaddun ani êkê boddiek lavun “Ravat, Elija taka denvounk ieta zalear polleum-ia.”, oxem mhonnun Taka pieunk diunk laglo. Tedna vhoddlean arddun, Jezun prann sôddlo. Devmondirantlea Gabhareacho podd’do voir thaun sokol doxim fanttlo. Tannem oso prann sôddlo mhonn polleun, “Ho monis khoreponnim Devacho Put aslo.”, oxem Tachea samkar aslo tea xotpotin mhonn’lem. Kãi bailô-i pois ravun polletaleô; tanchê bhitôr Magdalachi Maria, dhakttea Jakobachi ani Joxechi avoi Maria, ani Salome. To Galileiant astanam Tacho pattlav korun, teô Tachi seva kortaleô. Tea bhair Tachê sangatim Jeruzaleak choddun ail’leô sobar dusreô bailô. Sanz zalea uprant, Arimateiacho Juze ailo; to Mha-Dhormsobhecho êk xrêxtt vangddi aslo ani Devachea Rajeachi vatt polletalo. To Toiarecho Dis, mhonngê Sabhata adlo dis dekhun, dhir dhorun Pilata-xim vochun tannem Jezuchi kudd magli. Itlo vegim melo mhonn Pilatak ojap dislem ani, xotpotik apoun haddun, To morun thoddo vell pasar zala zalear tannem vicharun ghetlem. Xotpoti koddchi sarki khobor ghetôch, Juzek tannem kudd vhorunk dili. Juzen êk ôl vikti gheun haddli ani Taka denvoun, tê olin revddailo ani khoddpant khonnlelê êkê somadhint Taka dovorlo; magir êk fatôr lonvddun somadhichea tonddak laili. Mari Magdalen ani Joxetachi avoi Maria Taka khõi dovortat tem polleun asleô. Sabbath sorlea uprant, vochun Jezuchê kuddik lavunk, Mari Magdalen, Jakobachi avoi Maria ani Salome, hãnnim pormollit mosalo vikto gheun haddlo. Ani satolleachea poilea disa bhov sokallim, suria udetana, teô somadhi-xim aileô. Teô ekamekak mhonntaleô: “Somadhichea tondda veli fatôr konn amkam dhuklun ditolo?” Punn nodor mar zalear, ti fatôr, borich vhoddli asun-ui, dhukol’leli tãnnim dekhli. Somadhint bhitôr vochun, dhovem anglem neslolo êk tornnatto uzvean boslolo tãnnim dekhlo ani teô kampleô. Punn tannem mhonn’lem: “Bhiem nakat; khursar marlelea Nazaretkar Jezuk tumi sôdtat; Devan Taka punorjivont kelo; To hanga na. Taka dovorleli ti svat polleiat. Punn To tumchê adim Galileiak veta, ani Tannem sanglelea pormannem, tumi Taka thõi dekhtelet mhonn Tacheam xisank ani Pedruk sangat. Bhirantin borun ani ojab zaun te somadintlim bhair sorun, teô bailô pollun geleô; tancher bhõi ani kampero suttlolo dekhun tãnnim konnakuch kãi sangunk na. Satolleachea poilea disa, sokallim punorjivont zaun, Jezu poilo Mari Magdalenak dixtti poddlo; tichê vele Tannem sat devchar kaddlele. Tinnem vochun Tachê borabôr astalim ani atam dukh korun roddtalim tankam kollit kelem. Punn To jivo asa ani tika dixtti poddla mhonn tãnnim aikun-ui sotmanunk na. Hachê uprant tanchê bhitorle dog zann eka ganvant cholun vetale; dusrem ek rup gheun To tankam dixtti poddlo. Tãnnim ieun herank sanglem, punn hanchem-i tãnnim sotmandunk na. Xekim, ikra zann jevtastana, tankam To dixtti poddlo. Apnnak punorjivont zal’lo dekhlolo tanchem tãnnim sotmanun ghetlem na dekhun, bhavart dhôrchê svater aplench khorem korun ravle mhonnun Tannem tankam bexttaile. Ani Tannem tankam sanglem: “Akhea sonvsarak vochat, sogllê rochnnek xubhvhortoman porgôttat. Bhavart dhôrtit ani batism ghetit tankam soddvônn mellteli; punn bhavart dhôrinam zatit tim khastichem formonn ghetelim. Bhavart dhôrteleam sovem heô khunna dixtti poddteleô: Mhojea Nanvan devchar kaddtelim, noveô bhasô uloitelim, sorop dhôrtelim, ani jiv kaddpachem kitem-i tim pietit bi, tankam tem vaitt zaunchem na, piddevontancher hat dovrun tim tankam borim kortelim. Ani Somia Jezun tanchê kodde uloun sompoitôch, Devan Taka voir sorgar ubarun vhelo ani thõi To Devachea uzveak bosla. Xisamnim vochun sogllê kodden xubhvhortoman porgôttlem. Somi tanche borabor vaurun, ghodd’talim team vizmitam vorvim, tanchem utor sot mhonn thiraitalo. Survatek thaun amchê modem zaleat teô ghòddnneô dekhleleam sakxidaramnim ani Sobdacheam sevokamnim amkam sondêx dila tea pormannem, hi kotha boroun dovrunk zaite zann vavurleat. Hem zanna zaun, mhojê-i pallien, team soglleam ghòddnneanchi mhenotin chovkoxi kelea uprant, tich kotha tuka, xrêxtt Teofila, kroman boroun dovrunk hanvem ievjilem. Jeam ghòddnneanchi tuka xikovnn mell’lea, ti kitle khatrechi ti tuka tthavem zaunchê khatir, oxem korchem mhonn mhaka dislem. Judeiacho raza Herod raj choloitalo tedna, Abiasachea vangddacho, Zakarias nanvacho, êk iadnik aslo; tachi potinn, Elizabet nanvachi, Aaronachê sonstechi asli. Chukoinastana Sorvesporacheô soglleô adnea ani formavnneô pallun, dogam-i Devachê nodrê mukhar nitivont aslim. Tankam bhurgem-ball naslem, kiteak Elizabet vanztti asli ani dogam-i utar piraiek pavlelim. Ani oxem ghòddlem: aplea vangddachê pallien Deva mukhar iadnikachi seva korta astana, iadniki sevechê chali pormannem, tacher sort poddleli dekhun, dhump zollounk to Sorvesporachea Povitr-Sthanant bhitôr gelo. Dhump zollounchea vellar sogllo lôk bhair ravun magnnem kortalo. Dhumpa-vedichê uzvê kuxik ubo aslolo Sorvesporacho êk dut taka dixtti poddlo. Taka polleun, Zakarias ghaborlo ani tacher kampero denvlo. Punn devdutan mhonn’lem: “Zakarias, tum kamponaka; tujem magnnem Devan mandun ghetlem. Elizabet tujê potinni thaun tuka êk bhurgo zolmotolo, ani Juanv mhonn tum taka nanv ditoloi. Tum khuxal zaun murgott’toloi ani tachea zolman zaitim zannam khuxal zatelim; tôr to Sorvespora mukhar vhôdd zatolo; soro ani lagrem kitench to pieuncho na; ani aplê avoichea kusveant thaun to Povitr Atmean bhòrtolo. Israelacheam zaiteam putam-dhuvank Sorvespora tanchea Deva-xim to portun haddtolo. Avoi-bapaichim ani tancheam bhurgeanchim kallzam ekameka thãi to vollun haddtolo, fiturank to nitivont mon’xanchi zannvai xikoitolo, ani oxem Sorvesporak purti êk porza toiar korchê khatir, to Tachê fuddem Elijachem mon ani boll gheun choltolo.” Zakariasan devdutak mhonn’lem: “Hem khorem mhonn mhaka koxem gomtelem? Tôr hanv mhataro zalam ani mhoji potinn utar piraiek pavlea.” Devdutan zap diun mhonn’lem: “Hanv, Devachea fuddeant ubo asta to Gabriel. Tujê kodde ulounk ani hi bori khobor tuka diunk mhaka Devan tujê-xim dhaddla. Polle, mhojeam utrancher tunvem bhavart dovrunk nãi mhonnun, heô vostu ghoddo porian tum mono urtoloi, tujean ulounk zaunchem na! Mhojim utram mat tanchea vellar pallon ietelim!” Itlea mhonnosôr lôk Zakariasak ravtalo ani Povitr-Sthanant taka hedo uxir zalo mhonn polleun ojap zatalo. To bhair ietôch, tanchê lagim ulounk tachean nozo zalem dekhun, Povitr-Sthanant ek dorxon taka mell’lam mhonn tim somzolim. To tankam fokot kurvô kortalo, ani monoch urlo. Tache sevadhorm-seveche dis bhòrtôch, to porot aplea ghora gelo. Thoddeam disamnim, tachi potinn, Elizabet gorbest zali, ani panch mhoine ti bhitôruch ravli. Tinnem mhonn’lem: “Sorvesporanuch hem kelem. Mhojer Apli doiall dixtt ghalun, mon’xam modem hanvem bhôglolo beman Tannem pois kelo.” [Elizabetichea gorbestponnachea] sovea mhoineant Nazaret nanvachea Galileiantlea eka nogrant Devan Gabriel dutak êkê soirik-zal’lê ankvari sorxim dhaddlo. Davidachea Ghoranneantlea eka dadlea lagim tichi soirik zal’li. Tea dadleachem nanv Juze aslem, ani ankvarichem nanv Maria. Ti asli thõi vochun, devdutan mhonn’lem: “Noman tuka, Devachê chôdd opurbaiechê! Sorvespor tujê sovem asa.” Hem tachem utor aikun, ti ekdom’ ghaborli ani hem noman koslem zait tem chintunk poddli. Punn devdutan tika mhonn’lem: “Bhienaka, Mariê! Tum Devachê opurbaiechi. Aik! Tum gorbest zateli ani eka putak zolm diteli, ani Jezu hem nanv Taka ditelii. To vhôdd zatolo ani Bhov Vorto Dev Taka Aplo Put mhonntolo, ani Tachea bapai Davidachem xinvason Sorvespor Dev Taka ditolo. ani To Jakobachea Ghoranneacher sasnnachea sasnnak raj choloitolo, ani Tachem raj kednanch sompchem na.” Marien devdutak mhonn’lem: “Mhaka dadlea lagim sombond na mhonntôch, hem koxem ghòddtelem?” Ani devdutan zap diun mhonn’lem: “Povitr Atmo tujer ietolo ani Bhov Vortea Devachi xokti tujer savlli ghalteli. Heach khatir tum zolm diunchi asai tea povitr bhurgeak Devacho Put mhonn Sorvespor nanv ditolo. Ani polle, tujê soirê Elizabetin utar piraier eka putacho gorb samball’la ani vanztti mhonntalim ti atam sovea mhoineachi asa. Kiteak Devachean zaina mhonnlelem kãich na.” Tedna Marien mhonn’lem: “Hi asam hanv Sorvesporachi chakornn: zaum mhojê sovem tujea utra pormannem.” Ani devdut tichê sorxilo koddsorlo. Team disamnim Maria utthli ani dongri vattarant, Judachea eka nogrant, doddvoddan geli; ani Zakariasachea ghorant bhitôr sorun, tinnem Elizabetik noman kelem. Elizabetin Mariechem noman aikona fuddem, tichea kusveant aslelea ballkan uddi marli ani Elizabet Povitr Atmean bhòrli. Ani vhoddlea tallean udgarun tinnem mhonn’lem: “Ostoream modem subhagi tum, ani subhagi tujê kuxichem foll! Ani mhojea Somiachi avoi mhojê-xim ieunchi mhonn mhaka khõichean favo zalem? Tôr polle, tujea nomanacho sad mhojea kanar poddona fuddem, mhojea kusveant asto ballkan khuxalkaien uddi marli. Ani Devan tuka sanglam tem purnntaien pallon ietelem mhonn tunvem bhavart dhôrloi dekhun tum subhagi!” Marien mhonn’lem: “Mhozo otmo Sorvesporak vakhannta, Deva mhojea Taroka khatir mhozo jiv murgott’ta! Aplê chakornnichê lhan’vikaiecher Tannem dixtt ghali: hôi, atanchean soglleô pinddka mhaka subhagi mhonntelêo! Mhojê khatir vhodd-vhodd vostu keleô Tannem: Sorvbollixtt To, Povitr Nanv Tachem! Tachi bhokti korteleank pavta pinddkechê pinddkent Tachi doia. Aplea bavlleachi To xokti dakhoita, kallzant gorv dhôrteleank duspottaita. Podvedarank To sodram voile xevttita, hinn-holkeank unch ubarta. Bhukel’leank To boream-boream denneamnim bhôrta, girestank rikameam hatamnim porot dhaddta. Abrahama ani tachê sonsti khatir sorvkallak amcheam purvozank dil’lea utracho, Aplê kakluticho, Tannem ugddas kelo ani Israela, Aplea chakrak, xeronna ghetlo.” Maria sumar tin mhoine Elizabetichea sangata ravli ani magir aplea ghora portoli. Itlea mhonnosôr Elizabet porsutt zaunche dis pavle ani tika êk bhurgo zalo. Devan tichê thãi vhôdd doia dakhoili mhonn aikun, tichim xeza-samarim ani soirim-dhairim tika porbim diunk laglim. Atthvea disa ballkachi sunôt korunk ailim ani tachea bapaichea nanva pormanem Zakarias mhonn taka nanv diunk sôdtalim, punn tachê avoin utor ghalun mhonn’lem: “Na, taka Juanv mhonn nanv diunk zai.” Ani tãnnim tika sanglem: “Tujea gotrant tea nanvacho konnuch na.” Tedna taka kitem nanv diunchem kai mhonn tachea bapaichi khuxi sodun kaddunk, tãnnim bapai kodde kurvô korun vicharlem. Ani tannem folli magun gheun ticher boroilem: “Tachem nanv Juanv.” Ani sogllim ojap zalim. Teach vellar tachem tondd ugòddlem, tachi jib suttli ani Devachi tust korun to ulounk laglo. Sogllim xezarim thottaklim ani Judeiachea akhea dongri mulkant heô ghòddnneô gaztaleô ani aikoteleamnim teô aplea monant rigoun mhonn’lem: “Ho bhurgo koslo utortolo-so tumkam dista?” Kiteak Sorvesporacho hat tachê sovem aslo. Tacho bapui Zakarias, Povitr Atmean bhoron, oxem bhakit korun uloilo: “Vakhann’nni Sorvesporak, Israelachea Devak! Kiteak Aplê porjek Tannem bhett dili, Tika soddounk To ailo. Aplea sevoka Davidachea Ghoranneantlo Tannem amchê khatir eka bollvont Tarokak upzoilo. Amcheam dusmanachea tabeantlim, ani amcho dvês dhôrteleam soglleancheam hatantlim Apunn amkam soddoitolo mhonn Apleam bhoktivont provadianchê tonddim magam thaun Tannem bhasaillem. Amcheam purvozank apunn doia dakhoitolo ani aplea povitr koraracho ugddas kortolo mhonn Tannem sangun dovorlelem. Amcheam dusmanancheam hattantlim suttoun, bhiranti vinnem Tachi bhokti korunk, Apunn amkam favo kortolo mhonn soput gheun Tannem amchea bapa, Abrahamak utor dil’lem. Oxem ami sogllea amchea jivitant Tachea fuddeant povitr ani promannik zaunk pavtelenv mhonn dil’li bhasavnni ti, Tannem atam pall’li. Ani ballka mhojea, Bhov Vortea Devacho Provadi mhonn lôk tuka pachartolo, kiteak tum Sorvesporacheô vattô toiar korunk Tachê fuddem vetoloi. Apleam patkanchem bhogsonnea udexim aplem taronn zata ti ollokh tum Tachê porjek ditoloi: amchea doiall-maiall Devachea kallzachem dennem hem. Amchê voir sorga velo êk Suria To ude-so kortolo ani amkam bhett diunk dhaddtolo. Kallokant ani mornnachê savllent jieteleank to Suria uzvadd ditolo ani amchim panvlam xantichea margar ghaltolo.” Ani bhurgo vaddtam-vaddtam budhin ghôtt zait gelo. Israelak sobhêmazar dixtti poddo-sôr to oronneant ravtalo. Sogllea sonvsarachi lôkgonnti korchi mhonn team disamnim Bhov Xrêxtt August Somrazacho hukum’ bhair sorlo. Hi poilich lôkgonnti Kirin Siriecho razpal astana zali. Ani sogllim ap-aplem nanv lavun diunk ap-aplea ganvak vetalim. Apunn Davidachea Ghoranneantlo ani kuttumbantlo mhonntôch, Juze-i Galileiantlea Nazaret nogra thaun Judeiantlea Bethlehem’ mhonnlelea Davidachea nogrant gelo. Apnna lagim lognachem utor zal’lê ani gorbest aslelê Mariê sangatim aplem nanv lavun diunchê khatir tannem toxem kelem. Ani thõi astananch tiche porsutt zaunche dis bhòrle ani tinnem aplea malgoddea Putak zolm dilo; ani tankam khannavollint svat nasli dekhun, tinnem taka falliamnim guttlaun khavnnent dovorlo. Teach kheddea ganvant rat-paro korun gonvlli aple hindd rakhtale. Sorvesporacho êk dut tanchê sorxem ubo zalo ani Sorvesporachem tez tanchê bhonvtim porzoll’lem ani te bhieun thorthorle. Devdutan tankam mhonn’lem: “Bhienakat! Polleiat, vhodda sontosachi khobor hanv tumkam gheun ailam, ani hoch sontôs sogllê porjek bhògtolo; tôr az Davidachea nogrant tumkam êk Soddvonnar zolmola; Toch To Krist Somi. Ani hi tumkam khunna: falleamnim guttlail’lo ani khavnnent dovorlolo tumkam êk ballôk melltolo.” Tedna ovchituch tea devduta borabôr Devachi tust gaito devdutanchi êk urpônz sorgar thaun denvleli dixtti poddli; “Bhov unchlea sorgar asto Devak mhoima, ani prithver Tache opurbaiecheam mon’xank Tachi doia ani xanti!” Ani devdut tanchê sorxile kaddun sorgar vetôch gonvlli ekamekak mhonnunk lagle: “Ami Bethlehemak vochum-ia ani jem kitem ghòddlam ani Sorvesporan amkam kollit kelam tem polleun ieum-ia.” Ani vegim-vegim voch zalear, Maria, Juze ani khavnnent dovorlolo ballôk tankam mell’lim. Ballkak polleun, jem kitem Tachê vixim tankam sanglelem, tem tãnnim porgott kelem. Ani gonvlliamnim tankam sangleli khobor aikun sogllim ojap zalim. Maria heô soglleô ghòddnneô aplea kallzant gholloun samballtali. Ani apnnank sanglelem toxench sogllem aikolea ani pollelea uprant, Devak mhoima diit ani Tachi vakhann’nni korit gonvlli porot aile. Ballkachi sunôt korunk atth dis bhòrtôch, Jezu mhonn Taka nanv ghalem; hench nanv To Aplê avoichea kusveant sombhovchê adim devdutan Taka ghalchem mhonn sanglelem. Moizesachê Somurti pormannem tanchi xud’dhi korche dis bhòrle; tedna oxem zalem: “Kusvo ugôddta to dôr-eklo put Sorvesporak bhettoil’lo zatolo”, Sorvesporachê Somurtint boroil’lea hea utracho ugddas korun, ballkak Sorvespora mukhar dovrunk ani, Sorvesporachê Somurtint sanglelem asa tea pormannem, “kovddeanchê zoddiecho, na zalear parveancheam don pileancho” iôdn somorpunk, ballkak Jeruzaleak vhelo. Tedna Simeianv nanvacho êk promannik ani bhoktivont monis Jeruzaleant aslo; to Israelachê soddvonnechi vatt polletalo ani Povitr Atmo tacher aslo. Sorvesporachea Kristak pollelea xivai to morcho na mhonn Povitr Atmean taka kollit kel’lem. To Atmeachea preronnan Devmondirant ailo, ani Somurtichê chali pormannem ballka Jezuk korchem aslem tem korunk, avoibapain Taka bhitôr haddlo tedna, tannem-i Taka apleam hatamnim ghetlo ani Devachi tust korun mhonn’lem: “Tunvem mhaka sanglãi toxem, Tujea hea sevokak, Dhonia, xantin atam vochunk ditai; kiteak soglleam raxttram mukhar Tunvem toiar kel’li soddvônn mhojêch nodren hanvem dekhli: porzank uzvaddaito taronnik-Prokas, Tujê porjê Israel’cho Tunvench favo kel’lo protap!” Ani Tachê vixim mhonnot tem aikun tachea avoibapaik ojap distalem. Tedna Simeianvan tankam axirvad dilo ani Tachê avoi, Mariek tannem mhonn’lem: “Aik, Israelant zaitim zannam bhi poddunk, ani zaitim zannam novean utthunk, toxench konn-konn Tacher add vochunk, êk kuru koxi Devan Taka nemla. Hea vorvim zaiteanchim gupit chintnam ugtim zatelim. Ani êk torsad tujem kalliz aspas vidhteli.” Axerachea kullachi, Fanuelachi dhuv, An’na êk provadinn asli; ti utar piraiek pavleli; logn zalea uprant vidva zai-sôr ti sat vorsam aplea ghova borabôr jiel’li; ani atam piraiechim tika chouraixim vorsam zal’lim. Dis-rat upas ani magnnim korun, ti Devachi bhokti kortali ani Devmondirantuch astali. Ti-i teach vellar thõi pavun sorun Devak vakhannunk lagli ani Jeruzaleachê soddvonnechi vatt polleun asteleam soglleank ballkachi khobor ti sangunk lagli. Ani Sorvesporachê Somurti pormannem korchem aslem titlem-i kelea uprant, tim Galileiant, aplea Nazaret nogrant, porot ailim. Piraien vaddtana, Bhurgo ghôtt zait vetalo ani zannvaien bhortalo; ani Devacho axirvad Tacher aslo. Tacho avoibapui vorsachea-vorsa Paska-Porbek Jeruzalea vetalo. Ani To bara vorsancho zalo tedna, tim sodanchê bhaxen Porbek, Jeruzaleak gelim; ani porbeche dis sorlea uprant, portun ietalim tedna, Tachea avoibapaik kollonastana bhurgo Jezu Jeruzaleant pattim ravlo. Punn To vattecheam sangateam borabôr astolo mhonn somzun, tim eka disachi vatt cholun ailim ani soiream-dhaiream ani ollkhichea loka modem tãnnim Taka sôdlo. To mellonam zatôch, Taka sodit-sodit tim portun Jeruzaleak gelim. Ani tin disam uprant To tankam Devmondirant mell’lo: xastream modem bosun To tanchem aikotalo ani tankam vichar korit aslo. Tachem aikoteleam somestank Tachea gineanachem ani Tacheam zobabanchem mottem ojap dislem. Taka thõi polleun tim ojap zalim; ani Tachê avoin Taka mhonn’lem: “Puta, Tunvem amkam oxem kiteak mhonn kelvi? Polle, khonti-huske kaddun Tuzo bapui ani hanv Tuka sôdtaleanv.” Ani Tannem tankam mhonn’lem: “Tumi kiteak mhonn mhaka sôdtaleat? Tôr Mhojea Bapachea ghorant Hanvem asunk zai mhonn tumi nokllo asleat?” Punn To uloilo tem tankam somzunk na. Ani tanchê borabôr To gelo ani Nazaretak portun ailo; thõi To tankam khalto ravlo. Tachi avoi heô soglleô ghòddnneô aplea kallzant samballun dovortali. Ani Jezu zannvaien, piraien ani kurpen Deva ani mon’xam mukhar vaddot vetalo. Tiberius Somrazachê razvottkechea pondravea vorsa Pons Pilat Zudeiacho razpal, Herod Galileiacho upraza, ani Lizania Abilenecho upraza astana, An’nas ani Kaifas porom’-iadnik asle tedna, Zakariasachea puta, Juanvak, oronneant Sorvesporachem utor pavlem. Patkanchem bhogsonnem mellun gheunchê khatir jivit-mon bodlun batism gheiat mhonn to Jordanachea akhea vattarant porgottit bhonvtalo. Izaias provadeachea pustokar boroil’lem asa tea pormannem hem zalem. Tem oxem: “Oronneant arddoto ekleacho tallo to: Sorvesporacho marôg toiar korat; Tacheô vattô nitt korat: dôr-êk gall bhoron ietolo dôr-êk dongôr ani porvôt sokol poddtolo; vankdde-tinkdde marog nitt zatele, ani gunddeam-fatranche asat te sullsullit zatele, ani akhem mon’xakull Devachem taronn polletelem” Apnna koddcho batism gheunk bhair sorun ieto lokachê urponjik Juanv mhonntalo: “Furxeanchi zat tumi! Ieuncho asa to krôdh vattaiat mhonn konnem tumkam xiddkaileant? Punn tumchem jivit-mon bodòl’lam zalear, tem purteam follamnim dakhoiat, ani ‘amcho bapui Abraham’, oxem tumchê modem mhonnonakat. Tôr hanv tumkam sangtam: heam fatrantli Abrahamak sonsôt utpon korunk Devak tank asa. Atam legun zhaddanchea mullak kuradd ghal’li asa. Mhonntôch jem-jem zhadd borem foll dinam, tem-tem Dev katortolo ani ujeant ghaltolo.” Ani puskôll lokan taka vicharlem: “Tôr ami kitem korchem?” Ani zap diun tannem mhonn’lem: “Don angavlim asat tannem kãich na taka ek diunchem; ani jevunk-khaunk asa tannem toxench korchem.” Dônddvosuldar-ui batism gheunk aile ani tãnnim taka mhonn’lem: “Guruji, ami kitem korchem?” Tannem tankam sanglem: “Tumkam tharailam tachê-kui anink kãich ogllem gheum nakat.” Ani soinikamnim-i taka vicharlem: “Ami mhonn kitem korchem?” Ani tannem tankam oxi zap dili: “Konnak zobordosti korinakat, nhoi mhonn konnacher boglantt ghalinakat, ani tumkam kitem mozuri mellta ti gheun dhadoxi zaiat.” “Hoch bi Krist nhoi mum?” oso Juanva vixim lôk khup dubhav kaddun ani zonn-eklo aplea monant odmas korun aslo dekhun, Juanvan tankam somestank zap diun mhonn’lem: “Hanv tumkam udkacho batism ditam khoro, punn mhojê-vôn bollvont konn eklo ieta, ani tacheam vhannanchi vadi soddunk hanv upkarona. Toch Povitr Atmean ani ujean tumkam batism ditolo; Aplem kholl nitoll korunk ani gonv aplea koddeant bhorunk To Aplea hatant sup gheun asa, punn pol zalear palovna toslea ujeant To lastolo.” Heô ani dusreô-i zaiteô budhi diun to lokak xubhvhortoman porgôtt’talo. Herod uprazan aplea bhavachê baile, Herodiasik, apli bail kel’li dekhun, ani tacheam soglleam noxtteam kortubam pasot, Juanv Herodik bexttaitalo; tedna upraza odik paxtt vost kortub korunk pavlo ti hi: tannem Juanvak bondkhonnint ghalo. Magir oxem ghòddlem: sogllea lokan batism gheun somptôch, Jezun-ui batism ghetlo; uprant To magnnem korta astana, sôrg ugto zalo ani Povitr Atmo parveachem rup gheun Tacher denvlo; ani sorgar thaun oso êk tallo gazlo: “Tum Mhozo vhôdd opurbaiecho Put; Tujer Mhojem dhadosponn asa.” Aplo vavr suru kelo tedna Jezu sumar tis vorsancho aslo ani lôk To Juzecho put mhonn somzotalo. Juzecho bapui Heli; hacho Mat’that; hacho Levi; hacho Melki; hacho Jan’nai; hacho Juze; hacho Matatias; hacho Amos; hacho Nahum’; hacho Esli; hacho Nag’gai; hacho Maat; hacho Matatias; hacho Semein; hacho Joxek; hacho Joda; hacho Joanan; hacho Resa; hacho Zorobabel; hacho bapui Xalatiel; hacho Neri; hacho Melki; hacho Ad’di; hacho Kosam’; hacho Elmadam’; hacho Er; hacho Joxua; hacho Eliejer; hacho Jorim’; hacho Mat’that; hacho Levi; hacho Simeion; hacho Judas; hacho Juze; hacho Jonam’; hacho Eliakim’; hacho Meleia; hacho Men’na; hacho Mat’tatha; hacho Natham’; hacho bapui David; hacho Jes’se; hacho Obed; hacho Boaz; hacho Sala; hacho Naxon; hacho Aminadab; hacho Admin; hacho Arni; hacho Hesrom’; hacho Fares; hacho Juda; hacho Jakob; hacho Izak; hacho bapui Abraam’; hacho Thara; hacho Nahor; hacho Seruk; hacho Reu; hacho Peleg; hacho Eber; hacho Xela; hacho Kainam’; hacho Arfaxad; hacho Xem’; hacho bapui Noa; hacho Lamek; hacho Matusala; hacho Enok; hacho Jared; hacho Maleleel; hacho Kainam’; hacho Enos; hacho Set; hacho Adanv; hacho bapui Dev. Povitr Atmean bhòrlolo Jezu, Jordana thaun koddsorlo. Taka oronneant vhorun, thõisor challis dis Povitr Atmo Taka hanga-thõi bhonvddaitalo ani Devchar Taka naddit aslo. Team disamnim Tannem kãich khelem na, ani te dis zatôch Taka bhuk lagli. Devcharan taka mhonn’lem: “Tum Devacho Put zalear, hea fatrak unddo zaunk adnea kôr.” Punn Jezun taka oso portipall kelo: “Povitr Pustokar oxem boroil’lem asa: ‘Unddeanuch monis jiena.’ ” Magir Devcharan Taka eka unch zagear vhelo ani êkêch ghoddiê bhitôr sonvsarantlim sogllim rajeam Taka dakhoun mhonn’lem: “Heam soglleancher podvi ani tanchi mhoima hanv tuka ditolom, kiteak mhojê svadhin hem kel’lem asa ani mhaka khuxi asa taka hanv tem ditam; mhonntôch mhojeam pãiam poddun tum mhaka nomoskar korxi zalear, hem sogllem tujem zatelem.” Tedna Jezun portipall korun taka mhonn’lem: “Povitr Pustokar oxem boroil’lem asa: ‘Tujea Sorvespora Devak tum bhôztoloi ani Tachi ekleachich seva kortoloi.’ ” Magir Devcharan Taka Jeruzaleak vhelo ani Devmondirachea kollsar ubo korun Taka mhonn’lem: “Tum Devacho Put zalear, hanga thaun sokla uddki mar, kiteak Povitr Pustokar oxem boroilelem asa: ‘Tuzo samball korunk To Apleam dutank Tujê vixim adnea ditolo;’ ani anink êkê svater: ‘Tuzo pãi fatrak adollna zaunk, te tuka apleam hatamnim uklun dhôrtele.’ ” Punn portipall korun Jezun mhonn’lem: “Povitr Pustokar oxem boroil’lem asa: ‘Sorvespora tujea Devachi tunvem porikxa korum noiê.’ ” Heam soglleam bhasamnim Taka tall’neant ghalea uprant, Devchar thoddea vellak Tachê sorxilo koddsorun gelo. Jezu Povitr Atmeachea bollan Galileiak porot gelo ani Tachi kirti akhea prantant gazli. To tancheam devsthanamnim xikovnn ditalo ani sogllim Tachi vhoddvik sangtalim. To Nazaretak ailo; thõi To lhan-vhôdd zal’lo. Aplê sonvoiê pormannem Sabbatha disa To devsthanant gelo ani vachunk ubo ravlo. Izaias provadeachem pustok Taka kaddun dilem ani pustokacho kovllo usoitana oxem boroil’em asa ti svat Taka mell’li: “Sorvesporacho Atmo mhojer asa, kiteak goribank bori khobor diunk, Tannem mhaka Obhixêk kela. Koidiank suttka porgottunk, ani kurddeank portun nodor diunk, zulumak sampoddleleank soddounk, ani Sorvesporacheam upkaranchem voros porgott korunk Tannem mhaka dhaddla.” Ani pustokacho kovllo revddun ani to sevoka kodde porot diun To boslo. Devsthanant asleleam somestanche dolle Tacher lailele asle. Tedna Tannem tankam sangunk suru kelem: “Hem xastr-likhit az tumchea kanar poddtanch pallon ailem.” Ani sogllim Taka xabaski ditalim ani Tachea tonddantlim bhair sortalim tim mannkulim utram aikun ojap zatalim. Tim mhonnunk laglim: “Juzecho put nhoi rê ho?!” Ani Tannem tankam zap dili: “ ‘Voiza, tukach tum boro kôr’, hi mhonn’nni dubhavavinn tumi Mhaka laitelet, ani mhonntelet: ‘Kapernauma tunvem zaitem kelãi mhonn ami aikolam, tem hanga-i tujea khaxa ganv-ghora kôr.’ ” Tea fuddem Tannem mhonn’lem: “Hanv tumkam khorench sangtam, khõicheach provadeak aplea khaxa ganvant man mell’lo-so na. Anink ek sot tumkam sangtam: Elijachea kallar, tin vorsam ani sov mhoine Devan sôrg dhampun dovorlolo ani akhea ganvant vhôdd bhuk poddleli tedna, Israelant zaiteô vidva asleô, punn Sidon mulkantlea Sarepta nograntlê vidvek kaddun, tantlê eklê-i sorxim Devan Elijak dhaddunk na. Toxench Elizêv provadeachea kallar zaitim koddkar aslim, punn Siriechea Naamanak kaddun, tantlea ekleak-ui Devan nitôll kkorunk na.” Ani hem aikun devsthanant aslim titlim-i ekdom’ ragar zalim; ani utthun tãnnim Taka nogra bhair ghalo. Tanchem nogor bandlelem asa tea dongrachea mathear thaun Taka sokla xevttun uddounk, thõi porian tim Taka gheun gelim, punn sarko tanchê modlean cholun To Aplê vatten gelo. Ani Galileiantlea Kapernaum’ nogrant To denvun gelo ani Sabbatha disa tankam xikovnn diunk laglo. To odhikar aslelê porim uloitalo dekhun, Tachê xikovnnê vixim tim bharim ojap zatalim. Mhello devchar boslolo êk monis devsthanant aslo ani tannem vhoddlean arddun mhonn’lem: “Ai Saiba! Nazaretkara Jezu, amchê kodde Tuka koslem kam’ asa? Amcho bhosm korunk ailai kitem? Tum konn to hanv zannom: Devacho sonvskarlolo sondexkar Tum!” Punn Jezun taka dhomkaun mhonn’lem: “Ogo rav ani hea mon’xa velo bhair sor!” Ani soglleam modekot taka dhornnir apttun punn mat-ui dukhoinastana, devchar tachê velo bhair sorun gelo. Sogllim ojap zalim ani ekamekak mhonnunk laglim: “Koslem mhonn utor hem! Odhikaran ani podven To mhelleam atmeank adnea korta ani te bhair sorun vetat!” Ani Tachi khobor ganvam-ganvamnim akhea prantant gazli. Devsthanantlo bhair sorun Jezu Simanvachea ghora gelo. Simanvachi sasu mottea zoran foddfoddtali ani tãnnim tichê pasot Taka vinoti keli, Ticher oddôv ghalun Tannem zorak hukum’ ghalo ani ticho zôr poddlo; ani rokddich utthun ti tancho poramôs korunk lagli. Dis dharir poddlea uprant jin’sam-bhasancheam boll’llikarank Tachê sorxem haddlim. Ani ek-ekleacher hat dovrun Tannem tankam borim kelim; zaiteam zannam vele devchar-ui kaddle ani te bob marun mhonntale: “Tum Devacho Put!” Ani Apunn Krist mhonn te zanno asle dekhun To tankam bobatt korun ulounk dinaslo. Uzvaddtôch bhair sorun, To eka eksurea zagear gelo. Lôk Taka sodit-sodit To aslo thõi pavlo ani apnnank Tannem soddun vochona zaunk tim proitn kortalim. Punn Tannem tankam mhonn’lem: “Devachea Rajeachem xubhvhortoman heram-i ganvamnim Hanvem porgottunk zai, tôr heach pasot Devan Mhaka dhaddla.” Ani Judeiacheam devsthanamnim To provochon korit aslo. Uprant ghòddlem tem hem: Devachem utor aikunk lôk Jezu bhonvtim chenchon aslo ani To Genesaret Tolleachê dodder ubo aslo. Tedna thõi tolleachê deger Tannem don hoddim pollelim; kharvi denvun rampnni dhutale. Tantlem ek hoddem Simanvachem aslem; tacher To choddlo ani tem toddik thaun matxem pois vhorunk Tannem maglem; ani hoddear bosun, thõi thaun To lokak xikovnn ditalo. Uloun zatôch, Tannem Simanvak sanglem: “Khol udkant hoddem bhair vhor ani maslli dhorunk tumcheô rampnni ghalat.” Taka zap diun Simanvan mhonn’lem: “Guruji, rat-bhôr ami koxtt kele, punn amkam kãich sampoddo naslam; toripunn Tujea utrak hanv rampônn ghaltam.” Oxem kelea uprant tankam itli khup maslli poddli ki tancheô rampnni pinzunk pavleleô; ani ieun apnnank adar diunk dusrea hoddeant asleleam bhagidarank tãnnim khunna korun apoile. Te aile ani buddunk pavo-sôr don-ui hoddim bhòrlim. Tem pollena fuddem Simanv Pedrun Jezucheam pãiam poddon mhonn’lem: “Mhojê sorxilo pelean sor, Saiba: hanv êk patki monis!” To ani tachê borabôr aslele title-i, poddleli maslli polleun, sarkech thotthakle; têch porim Simanvache bhagidar aslele te, Zebedevache put, Jakob ani Juanv. Ani Jezun Simanvak mhonn’lem: “Bhienaka, hea fuddem tum mon’xank dhôrtoloi.” Ani hoddim toddik kaddun, sogllem sanddun, te Tachê pattlean gele. Jezu nogrant astana, ovchituch koddan bhòrlolo êk monis ailo ani Taka pollena fuddem dhornnir omto poddlo ani Tachê kodde oxem magunk laglo: “Saiba, Tuka zai zalear, Tujean mhaka nitôll korunk zata.” Ani Jezun Aplo hat soddun taka lailo ani mhonn’lem: “Hôi, Mhaka zai, tum nitôll za!” Têch ghoddier tachem kodd nanch zalem. Ani Jezun taka adnea keli: “Konnakuch sanginaka, punn voch ani tujem ang iadnikak dakhoi; ani porjek tuji pekovnni ruzu korchê khatir, tum nitôll zalai mhonn Moizesan formail’lem dan bhettoi.” Punn Tachi khobor odikuch gazot vetali ani Tachem utor aikunk ani aplea piddê-rogantlo boro zaunk urponjimnim lôk ietalo. Punn To khõi-khõi eksurê svater vochun magnnem kortalo. Ani êk dis oxem zalem: To xikovnn ditalo ani Galileiacheam ani Judeiacheam ganv-ganvantle ani Jeruzaleantle Farizev ani dhormxastri ieun thõi boslele. Ani lokak boro korunk, Sorvesporachi xokti Tachê sovem asli. Ovchituch ar zal’lea eka mon’xak antrunna soit gheun kãi dadle aile; ani taka bhitôr haddun Tachea fuddeant dovrunk sôdtale. Punn lokak lagun khõichêch vatten taka bhitôr haddunk mellonaslem dekhun, te patt’sacher choddle ani, nolle kaddun, antrunna soit tãnnim taka modekot Jezu mukhar denvoilo. Tancho bhavart polleun Tannem mhonn’lem: “Ixtta, tujim patkam tuka bhògsolim.” Ani dhormxastri ani Farizev aplea monant mhonnunk lagle. “Ho anink konn rê?! To sangta tem sarkich devninda! Devak ekleakuch soddun, konnachean patkam bhogsunk zatat?” Tanchem chintop zanno zaun Jezun portipall kelo: “Oslim chintnam tumchea monant kiteak gholloitat tumi? Heam donantlem khõichem mhonnunk odik sompem: ‘tujim patkam tuka bhògsolim!’, oxem mhonnunk, vô ‘utth ani chol!’, oxem mhonnunk? Punn Mon’xachea Putak sonvsarant patkam bhogsunk podvi asa mhonn tumi zanno zaunchê khatir,” (Tannem arkarak mhonn’lem:) “Hanv tuka hukum’ ghaltam, utth, ani tujem antrunn uklun tujea ghora voch!.” Ani rokddoch soglleam hujir utthun, apunn aslolo tem antrunn uklun, Devachi tust korit to aplea ghora gelo. Ani sogllim ekdom’ thottaklim ani Devak vakhanntalim ani bhirantin bhoron mhonntalim: “Vichitr vostu ami az dekhleô.” Hachê uprant Jezu bhair sorun gelo ani Levi nanvachea eka dônddvosuldarak manddvir boslolo Tannem dekhlo ani taka mhonn’lem: “Mhojê pattlean ie.” Ani sogllem sanddun to utthlo ani Tachê pattlean gelo. Ani Levin aplea ghorant Taka ek vhoddlem jevonn kelem ani dônddvosuldaranchi ani tanchê sangatim jevnnak bosleleam heranchi vhôdd khêtt asli. Tedna Farizevamnim ani tancheam dhormxastreamnim gunn-gunnun Tacheam xisank mhonn’lem: “Dônddvosuldaram ani patkeam borabôr tumi kiteak khata-pietat?” Portipall korun Jezun tankam mhonn’lem: “Borim asleleank nhoi, punn vaittakarank ki voizachi goroz. Tumi promannik mhonn dhôrtat tankam apounk Hanv ie naslam, punn tumi patki mhonn lêkhtat tãnnim aplem jivit-mon bodôlchê khatir, osleank ki Hanv apounk ailam.” Tedna tãnnim Jezuk mhonn’lem: “Juanvache xis, ani toxech Farizevanche, bhonvn-bhonvn upas ani magnnim kortat, punn tuje xis khaun-pieun khuxal asat tem koxem?” Ani Jezun tankam mhonn’lem: “Novro pavnneam borabôr astana tumchean tankam upas korunk lavum-iet? Novreak tanchê modlo kaddun vhorche dis ietele; magir, te dis ietôch, te upas kortele.” Oxi êk vopar ghalun Tannem tankam sanglem: “Konnuch pornnea vostrak kopo marunk novea vostracho kuddko pinzun kaddina; toxem kelear, novem vostr pinzlem tem pinzlem, tea bhair tacho kaddlolo kuddko pornnea vostrak sori zauncho na. Ani konnuch novo soro pornneam chambddea-potiamnim bhôrina; bhôrlo zalear, novo soro chambddea-potio foddun uddoitolo ani oton vetolo, ani chambddea-potiancho ibadd zatolo. Punn novo soro noveam chambddea-potiamnim bhorunk zai. Ani pornno soro pieun ail’leam konnankuch novo soro rokddoch boro lagona. ‘Pornno soro odik boro’, oxem tim mhonntat.” Eka Sabbatha disa Jezu xetantlean veta astana Tache xis konnsam toddun ani tim talltar murddun khatale. Kãi Farizevamnim tankam mhonn’lem: “Sabbathachem korum nozo tem kam’ tumi kiteak kortat?” Ani Jezun zap diun tankam sanglem: “Davidak ani tachea sangata asleleank bhuk lagli tedna tannem kitem kelem tem tumi vachunk na kitem? To Devachea ghorant bhitôr sorlo ani iadnikam bhair konnacheanuch khaum nozo asle te Deva mukhar dovorlele undde tannem kaddun khele ani apleam sangateank-ui dile — hem tumi vachunk na?” Ani Tannem tankam mhonn’lem: “Tôr Mon’xachea Putak Sabbathacher-ui odhikar asa.” Dusrea eka Sabbatha disa To devsthanant vochun xikovnn ditalo. Ani uzvea hatak ar zal’lo êk monis thõi aslo. Jezucho guneanv korchê khatir Sabbatha disa tea mon’xak boro korit kai mhonn dhormxastri ani Farizev Jezuk tellun polletale. Tanchim chintnam ollkhun, hatak ar zal’leak Tannem mhonn’lem: “Utth ani modekot ieun ubo rav.” To utthlo ani ubo ravlo. Ani Jezun tanchekodde vicharlem: “Sabbatha disa kitem korum-ieta: borem ki vaitt? Jiv vanchoum-iet vô kaddum-iet?” Tedna tancher soglleancher nodor bhonvddaun Tannem tea mon’xak mhonn’lem: “Tuzo hat sôdd.” Tannem toxem kelem ani adlê bhaxen tacho hat sarko zalo. Punn tancho rag ekdom’ choddlo ani Jezuk kitem korchem tem te ekameka lagim vicharunk lagle. Magir oxem zalem: magnnem korunk Jezu eka dongrar gelo ani Devak magnnem korun Tannem akhi rat sarli. Uzvaddtôch Tannem Apleam xisank apoile, tantleam bara zannank vinchun kaddle ani tankam apostl oxem nanv-ui dilem. Te he: Simanv — taka Pedru mhonn Tannem nanv dilem — ani tacho bhav Andre, Jakob, Juanv, Filip, Bartolomêv, Matêv, Tomas, Alfevacho put Jakob, ani Krantikar mhonnlolo Simanv, Jakobacho put Judas ani ghatki utorlo to Judas Iskariot. Tanchê borabôr sokla ieun Jezu eka mollar ravlo; thõi Tacheam xisancho vhôdd zomo ektthãi zalo, ani Judeia thaun, Jeruzalea thaun, ani doria-degecheam Tir ani Sidon nogram thaun, Tachem utor aikunk vô aplea piddê-rogantlo boro zaunk ail’lo puskôll lôk zomlo; ani mhelle atme tras ditale toslim mon’xam borim zatalim. Tachê koddsun êk gunn bhair sorun tankam borim kortalo dekhun, sogllo lôk Taka hat lavunk sôdtalo. Dolle ubarun ani Apleam xisank polleun Jezun sanglem:.3“Gorib tim tumi subhagi, kiteak Devachem Raj tumchem. Atam bhukeleant tim tumi subhagi, kiteak tumkam Dev dhadoxi kortolo. Atam rudon kortat tim tumi subhagi, kiteak tumi hansunk pavtelet. Mon’xachea Putak lagun tumcho dvês kortit ani tumkam sobhentlim bhairaitit tedna, tumkam opman’tit ani vaitt mhonnun tumchea nanvacher xirap ghaltit tedna, tumi subhagi. Tea disa tumi khuxal zaun uddiô marat, kiteak motti vhoddli mozuri tumkam sorgar mellteli. Tôr tancheam purvo-zamnim provadeank toxench kelem. Punn tumi girest mon’xamnô, tumchem kotta, kiteak tumchem sukh tumkam atanch mell’lem! Atam dhadoxi asat tim tumi, tumchem kotta, kiteak tumi upaxi astelet! Atam hanstat tim tumi, tumchem kotta, kiteak tumi roddtelet ani rudon kortelet! Sogllo lôk tumchem borem uloita tedna kottakotta tumchem, kiteak tanche purvoz fotting provadeank toxench kortale! Punn tumkam, Mhaka kan diteleank, sangtam: tumcheam dusmanancho môg korat, tumkam zolltat tankam borem korat, tumcher xirap ghaltat tankam axirvad diat, tumkam vaitt kortat tanchê pasot magat. Konn tuka eka polear marit zalear, dusro-i polo taka dakhoi; tujem angavlem kaddun gheit taka tuzo jubo-i vhorunk addainaka. Tujê lagim magit taka di, ani tuji vôst kaddun vhelea tachê koddchi ti portun maginaka. Heramnim tumchê sorim kel’lem tumkam zai, toxench tumi-i tanchê sorim korat. Tumcho môg korteleanchoch tumi môg korxeat zalear, tantum tumchem punnem koslem? Tôr patki porian apnnancho môg korteleancho môg kortat. Ani tumkam borem korteleank tumi borem korxeat zalear, tantum tumchem punnem koslem? Patki porian toxench kortat. Zanchê lagchem porot ghetelet mhonn tumi ravtat, tankam tumi kitem-i uxnnem dixeat zalear, tantum tumchem punnem koslem? Dilam titlem-i porot gheunchea monan patki-i patkeank uxnnem ditat. Punn tumi tumcheam dusma-nancho môg korat, tankam borem korat, ani porot gheunchi axa dhorinastana herank uxnnem diat. Tedna tumkam vhoddli mozuri mellteli ani Bhov Vortea Devachim bhurgim tumi zatelet; tôr onupkari ani khotteam mon’xam sorim To konnvallo. Zoso tumcho Bap doiall, toxinch tumi-i doiall zaiat. Konnachich nit korinakat ani tumchi-i Dev nit korcho na. Konnakuch guneanvkar korinakat ani tumkam-i Dev guneanvkar korcho na. Dusreank bhôgsat ani tumkam-i Dev bhôgxitolo. Diat ani tumkam-i Dev ditolo; borem-chikar map, damun-chepun, haloun ani oto-sôr suien bhôrlelem, Dev tumchê unttient ghaltolo; kiteak jea mapan tumi dusreank ditat, teach mapan Dev tumkam-i ditolo.” Jezun hi-i vopar tankam sangli: “Eka kurdd’deachean dusrea kurdd’deak vatt dakhounk zata? Dog-ui fonddant poddche nant? Xis aplea guru poros vorto nhoi; xikun purnn zal’lo xis, to ki aplea guru sarko utortolo. Tujea peleachea dolleant asa tem kisor tum kiteak polletai, ani tujeach dolleant asa ti patti tuka dixtti poddona? Tujea dolleantli patti tuka disonam, tori tujea peleak mhonntai: ‘Ixtta mhojea, rav; tujea dolleantlem kisor mhaka kaddum-di.’ — oxem tujea peleak mhonnunk koxem tankot tuka? Arê ddhongia, tujea dolleantli patti poili kadd ani magir tujea peleachea dolleantlem kisor kaddunk tuka nivoll dixtti poddtelem. Borem zhadd vaitt foll diit-xem na; nhoi mhonn vaitt zhadd borem foll diit-xem na. Tachea folla pormannem dor-ek zhadd ollkhunk mellta. Kantteanchim konnem anjiram kaddleant mhonn na, nhoi mhonn sorantteancheô konnench dakô kaddunk nant. Boro monis aplea kallzachea borea bhanddarantlem borem kaddun dakhoita; vaitt monis aplea vaitt bhanddarantlem vaitt kaddun dakhoita. Tôr kallzantlem bhoron òt’ta tench tonddantleam utramnim vhanvta. Mhaka tumi ‘Somia! Somia!’ mhonntat ani Hanv sangtam tem korinant kiteak? Jim konn Mhojê-xim ietat, Mhojem utor aikotat ani tea pormannem choltat, tim sogllim konna sarkim tem sangtam: Ghor bandtelea eka mon’xa sarkim tim; tannem khôl khonnun khoddpacher buniad marli. Anvr ailem tedna, tea ghoracher udkacho lôtt boslo, punn tem halounk zaunk na; kiteak tem ghott bandlelem. Ani jim konn aikotat, punn kãich korinant, tim buniad marinastana aplem ghor dhortorê borabôr bandtelea mon’xa sarkim; anvr ieun tacher udkacho lôtt bosonam fuddem tem rokddench mòddlem ani tachem sarkem ghorttann zalem!” Hi soglli Apli xikovnn aikotelea lokak dilea uprant, Jezu Kapernauma gelo. Konn-eklea xotpoticho chakôr, tachê kherit opurbaiecho, piddent poddun mornnachê tonnir pavlolo. Jezuchi khobor aikotôch, tannem Judevancheam vhoddilank Tachê-xim dhaddle ani ieun aplea chakrak vattai mhonn maglem. Ani Jezu-xim ieun, te Tachê lagim prarthun oxem magtale: “Tunvem tachê khatir hem korunk favo; tôr to amchea lokacho môg korta ani tannench amkam devsthan bandun dilam.” Ani Jezu tanchê borabôr vochunk laglo. Ani To tachea ghora-xim pavunk zobôr pois naslo tedna, xotpotin apleam ixttank Jezuk oxem sangunk Tachê-xim dhaddle: “Saiba, tras ghenaka; tunvem mhojea ghora ieunk mhaka favona; teach pasot hanv-ui khaxa Tujê-xim ieunk purto nhoi mhonn mhaka dislem. Ek utor mat sang ani mhozo chakôr boro zaum. Tôr hanv-ui dusreachea hata khal aslolo monis ani mhojê khal soinik asat; ani tantlea ekak hanv ‘voch’ mhonnon zalear, to veta; ani dusreak ‘ie’ mhonnon zalear, to ieta; ani mhojea chakrak ‘omkem kôr’ mhonnon zalear to korta.” Hem aikun Jezuk tachem ojap dislem ani porton Apnna pattlean ieto lokak Tannem mhonn’lem: “Hanv tumkam sangtam: hedo vhoddlo bhavart Hanvem Israelant porian polleunk na.” Ani dhaddlele monis ghora porot ie zalear, to chakôr boro zal’lo tankam mell’lo. Tachê magir oxem zalem: Jezu Nain mhonnlelea eka nogrant gelo ani Tachê borabôr Tache xis ani khup lôk vetalo. Nograchea darvonttea lagim pavtana, ovchit eka mel’leak purunk vhortalim; to aplê avoicho ekloch put aslo ani ti êk vidva; tichê sangatim nograntlo zaito lôk aslo. Tika polletôch, tiche churchure korun Jezun tika mhonn’lem: “Roddonaka.” Ani fuddem vochun Tannem tirddek hat lailo. Tirddi vhorpi thamble, ani Tannem mhonn’lem: “Tornnattea, Hanv tuka sangtam, utth!” Ani mel’lo to boslo ani ulounk laglo. Ani Jezun taka tachê avoichê adhin kelo. Sogllim thottaklim ani Devachi tust korun mhonntalim: “Êk vhôdd provadi amchê modem upzola ani Dev Aplê porjek bhett diunk aila.” Ani hi Tachi khobor akhê Judeia sobhonvtim ganv-bhôr gazli. Juanvancheam xisamnim hem sogllem taka sanglem ani Juanvan apleam xisantleam dogank apoun haddle ani oxem vicharunk Somia-xim dhaddle: “Ieuncho asa to tunch, vô ami dusrea konnachi vatt polleunchi?” Team mon’xamnim ieun mhonn’lem: “ ‘Ieuncho asa to tunch, vô ami dusrea konnachi vatt polleunchi?’ oxem vicharunk Juanv Batistan amkam tujê-xim dhaddleat.” Teach vellar Tannem sobar zannank piddê-rogantlim, upodreantlim ani vaitt atmeancheam hatantlim soddoilim ani zaiteam kurddeank-ui nodor dili. Ani zap diun Tannem mhonn’lem: “Tumi pollelam ani aikolam tem vochun Juanvak sangat: kurddim novean polleunk lagtat, thonttim cholunk lagtat, koddkaram nitoll zatat, bherim novean aikotat, mel’lim mon’xam jivont zatat, goribank xubhvhortoman porgott zata. Ani Mhojê vixim zancho bhavart halona tim mon’xam bhagi.” Ani Juanvache niropi gelea uprant, Jezu lokak Juanva vixim mhonnunk laglo: “Tumi kitem mhonn oronneant polleunk gel’leat? Varean halta-dolta tosli êk bet? Na tôr, kitem mhonn tumi polleunk gel’leat? Nazuk-mov vostram nheslolo monis? Na. Vhodd molachim vostram nhestat ani dobajean jietat tim razvaddeamnim astat mhonn tumi zannont. Mhonntôch tumi kitem mhonn polleunk gel’leat? Eka provadeak? Hôi, ani to eka provadea poros vorto mhonn Hanv tumkam sangtam. ‘Ho polle, tujê mukhar Hanv Mhojea dutak dhaddtam ani to tuji vatt tujê fuddem toiar kortolo’, oxem zachê vixim Povitr Pustokar boroil’lem asa to hoch to. Tumkam anink ek sangtam: bailank zal’leam soglleam bhurgeam bhitôr Juanv Batista poros vhôdd konn na. Toripunn Devachea Rajeant jim konn soglleam poros lhan, tim tachê-vôn vhodd. Tachem aikol’lea sogllea lokan, toxench dônddvosuldaramnim, Juanvacho batism gheun, Devachi manddavôll manun ghetli; punn Farizevamnim ani dhormxastreamnim batism gheunk na dekhun, apnnam vixim Devachi ievzônn tãnnim nirfôll keli. “Konnank mhonn hê pinddkecheam mon’xank Hanvem sôr korchi? Tim konnam sarkim? Moidanar bosun ravto ani ap-aplea khella-pongddacheam vangddeank oso ulo korto bhurgeam sarkim tim: ‘Ami tumkam nachpachim songitam vennuncher vazoilim, punn tumi nachunk nant’; ‘Ami tumkam vilapachim gitam gailim, punn tumi roddunk nant.’ Tôr Juanv Batist jevonn-khann chakinastana ani soro pienastana ailo, ani tumi mhonntat: ‘Tacher devchar bosla.’ Mon’xacho Put jevun ani pieun ailo, ani tumi mhonntat: ‘Ho asa pottio ani bebdo, dônddvosuldarancho ani patkeancho ixtt.’ Tori Devachi zannvai ollkhun, tichim bhurgim tika sakxi ditat.” Farizevantlea konn-eklean apnnager jevnnak ie mhonn Jezu lagim maglem; ani tea Farizevager vochun To jevnnak boslo. Ani tea nogrant vaitt nanvachi êk bail asli; To Farizevager jevnnak bosla mhonn aikun, ovchit ti chondrokanti aidonant pormollit tel gheun aili. Tacheam pãiam-xim ti pattlean ravli ani roddun-roddun apleam dukamnim Tache pãi bhizounk lagli; magir tinnem apleam kensamnim te pusun kaddle; ani tanche ume gheun-gheun, tankam ti tel lait asli. Taka jevnnak apoil’lo to Farizêv hem polleun aplea monant oxem mhonnunk laglo: “Ho monis provadi zal’lo zalear, apnnak afuddta ti konn ani kosli bail ti, to zanno zato aslo; kiteak ti êk patkinn.” Portipall korun Jezun taka mhonn’lem: “Simanv, Hanvem tuka kitem ek sangchem asa.” Ani tannem mhonn’lem: “Sang, Guruji.” “Eka savkarak dog rinnkari asle; eklo pãixim dinar devo aslo ani dusro pon’nas. Farik korunk tankam tank nasli dekhun, tannem dogãik-ui rinn bhôgxilem. Mhonntôch dogantlea konnak tacho odik upkar astolo?” Simanvan zap diun mhonn’lem: “Odik bhôgxilam taka, oxem mhaka dista.” Ani Tannem mhonn’lem: “Sarkem sangli tunvem.” Ani bailê vatten vollon Tannem Simanvak mhonn’lem: “Tunvem hê bailek polleleai mum? Hanv tumger ailom, ani Mhoje pãi dhuunk tunvem udok diunk nãi; punn hinnem apleam dukamnim Mhoje pãi bhizoile ani te apleam kensamnim pusle. Tunvem Mhozo umo gheunk nãi; punn hi, ailea tê meren, Mhojeam pãianche ume gheunuch asa. Tunvem Mhojea matheak tel ghalunk nãi; hinnem domdomit telan Mhoje pãi makhle. Hea pasot Hanv tuka sangtam: hinnem kel’leam zaiteam patkanchem bhogsonnem tika mell’lem, oxem mhonn hichea kallzacho vhôdd dhin’vas dakhoun dita. Zankam thoddem bhôgxilam tim thoddo dhin’vas dakhoitat.” Ani Tannem tika mhonn’lem: “Tujim patkam tuka bhògsolim.” Ani borabôr jevnnak boslele te apnnam bhitôr oxem mhonnunk lagle: “Patkam legit bhôgxita to konn ho?” Punn Tannem bailek mhonn’lem: “Tujea bhavartan tuka taronn dilem. Xantin voch atam.” Hachê uprant provochon korit ani Devachea Rajeachem xubh-vhortoman porgottit Jezu eka-eka nograntlean ani ganvantlean vetalo. Tachê sangatim te bara zann asle, ani zanchê voile Tannem devchar kaddlele ani zankam piddê-rogantleô Tannem boreô kel’leô kãi bailô; jichê vele sat devchar bhair sorlele Magdalen mhonntat ti Maria; ani Herodichea karbharea, Kusachi potinn Juana, ani Suzana, ani sobar dusreô bailô. Teô khud’ aplo duddu-addko moddun Tachi seva-chakri kortaleô. Dor-eka nogrant thaun lôk Jezu sorxem ietalo; oxem êk urpônz ektthãi zali tedna, Tannem vopar ghalun mhonn’lem: “Konn-eklo vomp’pi aplem bim vompunk gelo. Vomptana thoddem bim vatter poddlem ani lokan tem maddoilem ani mollba veleam suknneamnim ieun tem khelem. Ani dusrem khoddpacher poddlem; tem kirlolem, punn xêll nasli dekhun suklem. Her kantteam modem poddlem, ani kantte borabôr vaddle ani tãnnim tem damun dhôrlem. Her borê zomnir poddlem; ani kirlon xembhôr-pott taka pik zalem.” Ani vhoddlean arddun Tannem mhonn’lem: “Aikunk kan asleleamnim hem aikunchem.” Tacheam xisamnim hê voparicho ôrth Tachê kodde vicharlo; ani Tannem mhonn’lem: “Devachea Rajeache gutt ollkhunk tumkam dil’lem asa; punn herank te voparimninch sangpache, kiteak tim’dolleamnim polletat, punn tankam disona, kanamnim aikotat, punn tankam somzona.’ Tôr voparichi somzonni hi: bim Devachem Utor. Vatter asat tim, tem aikotat tim; punn magir, bhavart dhorina zaun tankam soddvônn mellona zaunk, devchar ieta ani tanchea kallzantlem Utor kaddun vhorta. Khoddpacher asat tim, Utor aikun tem khuxalkaien manun ghetat tim; punn tankam pallam nant. Tim thoddoch vêll bhavart dhôrtat ani porikxecho vogôt pavtôch, tim pattim sortat. Kantteam modem poddlam tem, Utor aikotat tim; punn vetam-vetam jivacheam dhastink ani girestkaiank ani mouzank lagun tim damon urtat ani pik diunk pavonant. Borê zomnir poddlam tem, borea ani udar kallzan Utor aikun tem samballtat ani aplê thiraiek lagun pik ditat tim. Ponntti pettoun konnuch ti êkê pailê pondak lipoina, vô bajê tolla dovrina, punn bhitôr ietat titleamnim uzvadd polleunchê khatir ti eka peddar dovortat. Kiteak xekim ugtem zaunchem na toslem atam kãich na liplelem; nhoi mhonn kollchem na vô uzvadda ieunchem nam toslem atam kãich na gupit. Mhonntôch tumi koxem aikotat tê vixim chotrai dhôrat; kiteak asa tankam Dev odik-ui ditolo, ani na tanchê lagchem, jem asa mhonn tim somzotat, tem-i Dev kaddun ghetolo.” Jezuk mellunk Tachi avoi ani Tache bhav pavun sorlim. Lokachi khêtt asli dekhun, Tachê sorxem tankam lagim ieunk zainaslem. Konnem Taka oxem sanglem: “Tuji avoi ani Tuje bhav bhair ravleant ani Tuka polleunk sôdtat.” Punn Tannem zap diun mhonn’lem: “Devachem utor aikotat ani palltat tim Mhoji avoi ani Mhoje bhav.” Êk dis Jezu ani Tache xis eka hoddear choddle ani Tannem tankam sanglem: “Poltoddi ia.” Ani te vochunk lagle; ani te tanddun vetana Jezuk nhid poddli. Tedna doriant ek vadoll-modd upraslem ani udok bhoron te sonkoxttant poddle. Tea vellar Tachê sorxem ieun tãnnim Taka zago kelo ani mhonn’lem: “Guruji, Guruji, ami mortanv!” Ani utthun, vareak ani uchamboll lharank Tannem bexttailim; ani tim thamblim ani thonnddai zali. Ani Tannem tankam mhonn’lem: “Khõi pavlo tumcho bhavart?” Bhieun ani ojap zaun te eka-mekak mhonntale: “Ho konn zait tôr?! Kiteak vareak ani doriak To hukum’ ghalta ani te Tachem aikotat!” Ani Galileia-Tollea samkar asto Gerasenanchea mulkant te khaddik pavle. Jezu dodder denvlo tedna, tea nograntlo, devchar boslolo konn-êklo monis Taka mellunk ailo; zaito kall to angak kãich ghalinaslo, ani ghorant nhoi, punn somadhim modem biradd korun astalo. Jezuk pollena fuddem tannem killônch marli ani, Tacheam pãiam poddun, mottea tallean mhonn’lem: “Jezu, Bhov Vortea Devachea Puta, mhojê kodde Tuka koslem kam’ asa? Mhaka dogdainaka mhonn Tujê lagim poratun magtam.” Kiteak tea mon’xa velo bhair sor mhonn Jezu tea mhellea atmeak hukum’ ghaltalo. Tôr zaitê pavtti devchar taka zôpt kortalo; dekhun khoddeam-sankllimnim taka bandun dovortale; punn devchar, bandpas toddun, taka eksuream zageancher dhanvddaun vhortalo. Jezun taka vicharlem: “Tujem nanv kitem?” Tannem zap dili: “Loskor!”, kiteak sobar devchar tachê bhitôr riglele. Ani apnnank patallant vochunk lainaka mhonn te Tachê lagim magtale. Tedna thõi dongrar khup dukrancho êk hindd chortalo. Apnnank team dukramnim vochun rigum-di mhonn tãnnim Tachê kodde maglem ani Tannem tankam vochunk dilem. Devchar mon’xantle bhair sorun dukramnim rigle; ani vhôdd nettan vochun kollsa velean doriant xevtton to hindd buddun melo. Ghòddlelem polleun rakhnne pollun gele ani nogrant ani kheddeam-ganvamnim tãnnim hi khobor kollit keli. Ani lôk kitem zalam tem polleunk bhair sorun Jezu-xim ie zalear, zachê vele devchar bhair sorlele to monis angavlim nheslolo, toklen sarko zal’lo, Jezucheam pãiam-xim boslolo tankam mell’lo; ani tim ghaborlim. Devchar bosloleak Tannem koso boro kelo tem khaxa dekhleleamnim herank sanglem. Tedna thõicho bhair sorun voch mhonn Gerasenanchea mulkantlo sogllo lôk Jezuk poratunk laglo, kiteak tankam motti bhirant lagleli. Hea pasot eka hoddear choddun To porot ailo. Zachê vele devchar bhair sorlele, to monis apnnak Tachê borabôr ravum-di mhonn Jezu lagim magtalo; punn Jezun taka oxem sangun dhaddlo: “Tujea ghora voch ani Devan tujê khatir kelam titlem-i herank sang.” Mhonntôch apnna khatir Jezun kel’lem titlem-i tannem vochun nogor-bhôr lokak kollit kelem. Jezu porot ailo tedna, lokan Taka ievkar dilo kiteak sogllim Tachi vatt polleun aslim. Ani ovchit eka devsthanacho odhikari, Jairus nanvancho eklo monis ailo ani Jezucheam pãiam poddun apnnager ie mhonn Taka poratunk laglo, kiteak bara vorsanchi tachi eklich dhuv mornnachê tonnir asli. Ani veta astana lôk Taka chênchtalo. Tedna bara vorsam rogt-pat zal’li êk bail asli; sogllo aplo duddu voizank ghalun-ui konnacheach vokhtan ti bori zainasli. Tea vellar Jezu pattlean ieun Tachea avoronnachê degek tinnem hat lailo ani tichem rogot vetalem tem rokddench thamblem. Ani Jezun vicharlem: “Mhaka konnem hat lailo?” Apnnem lavunk na mhonn soglleamnim mhonnlea uprant, Pedrun mhonn’lem: “Guruji, Tujê bhonvtim kedi gordi, ani sogllo lôk Tuka chênchta!” Ani Jezun mhonn’lem: “Konnem-i tori Mhaka hat laila, kiteak Mhojê bhitorlo êk gunn bhair sorla mhonn Mhaka koll’lam.” Apunn atam sampoddlich mhonn polleun, ti bail kampun aili, ani Tacheam pãiam poddun apnnem kitea pasot Taka hat lailo ani koxi teach vellar apunn bori zali tem, sogllea loka hujir, tinnem sanglem. Ani Tannem tika mhonn’lem: “Dhuvê, tujea bhavartan tuka bori keli. Xantin voch atam.” To uloita thõich astana, konn-eklean devsthanachea odhikariager thaun ieun haka sanglem: “Tuji dhuv bhair poddli; Gurujik anink tras dinaka.” Punn Jezun hem aikun cheddvachea bapaik mhonn’lem: “Bhienaka. Bhavart mat dhôr ani tem borem zatelem.” Ghora pavtôch, Pedru, Juanv ani Jakob ani cheddvacho avoibapui, hanchê bhair konnakuch Apnna borabôr bhitôr vochunk Tannem diunk na. Sogllo lôk cheddva khatir roddtalo ani vilap kortalo; punn Jezun mhonn’lem: “Roddonakat; cheddum morunk na; tem nhidlam.” Ani lôk tem melam mhonn zanno aslo dekhun, Tacheô moskoreô korunk laglo. Punn cheddvachea hatak dhorun, Tannem mottea tallean mhonn’lem: “Cheddva, utth!” Ani tacho jiv porot ailo ani tem rokddench utthlem. Tedna taka kitem-i khaunk diat mhonn Jezun sanglem. Cheddvacho avoibapui thottaklo; punn ghòddlam tem konnank sanginakat mhonn Jezun tankam adnea keli. Jezun bara zannank ektthãi apoun haddle ani soglle devchar kaddunk, toxench pidda-rôg boro korunk, tankam podvi ani odhikar dilo, ani Devachem Raj porgott korchê khatir ani vaittakarank borim korchê khatir, Tannem tankam daddle. Tannem tankam oxem sangun dhaddle: “Vattek danddo, poti, khann-jevonn, duddu, kãich vhoronakat; ani don angavlim tumchê kodde aschim nhoi. Khõichea-i eka ghorant bhitôr sorxeat, tê svatê vele bhair soro porian, thõich ravat. Konn tumkam ghena zatit zalear, tea nograntle bhair sortana, tancher add govaiki diunchê khatir tumcheam pãianchi dhull porian zhaddun uddoiat.” Mhonntôch te bhair sorle ani veta thõi xubhvhortoman porgottit ani piddevontank borim korit ganvan-ganv bhonvle. Herod upraza ghòddtalem titlem-i aikun ghuspolo; kiteak kãi zannam Juanv mel’leantlo jivont zala, oxem mhonnot; dusrim konn Elija novean dixtti poddla mhonnot; tori her konn-konn adleantlo konn-êk provadi jivo zala, oxem mhonnot. Punn Herod mhonnunk laglo: “Juanv? Tachem xins hanvem tôr kaplem! Zachê vixim heô khobrô hanv aikotam, to konn tôr?” Ani Taka khaxa polleunk to axetalo. Apostlamnim porot ieun, apnnem kel’lem titlem-i Jezuk sanglem; magir, ekvodde aschê khatir, Bethsaida mhonnlelea eka zagear To tankam gheun gelo. Tem aikun lôk Tachê pattlean gelo ani Tannem tankam ievkar dilo. Devachea Rajea vixim To tanchê lagim uloilo ani jeam konnank borim zaunchi goroz asli, tankam Tannem borim kelim. Dis poddcho vêll zal’lo ani bara xisamnim lagim ieun Taka sanglem: “Lokak dhaddun di. Ami hanga eksurê svater asanv. Mhonntôch tankam bhonvtonncheam nogramnim ani gramamnim vochun biradd sodum-di ani apnnanchea jevnna-khannachem polleum-di.” Ani Tannem portipall kelo: “Tankam khaunk-jevunk tuminch diat.” Punn tãnnim oxem mhonn’lem: “Panch undde ani don maslleô kaddun, amchê lagim anink kãich na; ami vochun hea sogllea lokak puro-xem jevonn viktem ghetlear bi zait!” Kiteak sumar panch hozar dadle asle. Punn Tannem Apleam xisank sanglem: “Sumar pon’nas-pon’nasancheam zomeam-zomeamnim tankam jevnnak bosoiat.” Tãnnim toxem kelem ani soglleank bosoilim. Tedna Tannem, panch undde ani don maslleô hatant gheun ani sorgar dolle ubarun, Tannem Devak dhinvaslo ani tanche kuddke kele ani lokak vanttunk, Tannem te xisam kodde dile. Sogllim jevlim ani dhadoxi zalim ani urlele kuddke-tukdde ektthãi korun tãnnim bara panttleô bhorleô. Apleam xisam mukhar êk dis Jezu ekloch magnnem korun aslo. Tedna Tannem tankam vicharlem: “Lôk Mhaka konn-so dhôrta?” Ani tãnnim oxi zap dili: “Kãi zann Juanv Batist, dusrim konn Elija ani her konn-konn jivont zal’lo konn-êk adleantlo provadi.” Tannem vicharlem: “Punn tumi Mhaka konn mhonn dhôrtat?” Zobab diun Pedrun mhonn’lem: “Devacho Krist Tunch!” Punn hem konnankuch sanginakat mhonn Jezun khoraien tankam adnea keli. Tannem mhonn’lem: “Mon’xachea Putan zaitem sõsunk zai: zannte, mukhel iadnik ani dhormxastri Taka bhairaitele ani jivexim martele, ani Dev Taka tisrea disa punorjivont kortolo. Hem sogott Tachê vixim Devachi khuxi.” Magir Tannem soglleam lagim uloun mhonn’lem: “Konnank Mhozo pattlav korchi khuxi asa zait, tãnnim apnnanchêch khuxechi vatt sôddchi, dôr-disa aplo khuris ukôlcho ani Mhojê pattlean ieunchem. Kiteak aplo jiv samballun dhorunk sôdtat tim aplo jiv hogddaitelim, punn Mhojê khatir aplo jiv hogddaitat tim aplo jiv samballun dhôrtelim. Mhonntôch akho sonvsar zôddit ani apnnachoch ibadd vô apnnachench ghorttann korit zalear, mon’xak koslo adav? Tôr Mhoji ani Mhojeam utranchi konnank loz disot zalear, Aplê ani Bapachê ani bhagevont dutanchê mhoimen Apunn ietolo tedna, Mon’xachea Putak-ui tanchi loz disteli. Hanv tumkam khorench sangtam, Devachem Raj dekhlea bogor morchim nant toslim kãi zannam hanga asat.” Hem uloun sumar atth dis zatôch, Pedruk, Juanvak ani Jakobak gheun Jezu magnnem korunk eka dongrar choddun gelo. Magnnem korta astana, Tachea mukhamollachem rup bodòl’lem ani Tachi nhesônn loklokit, dhovi-ful zali. Ovchituch dog dadle thõi hajir zale: te Tachê lagim uloitale. Te mhonn’lear Moizes ani Elija. Te mhoimen bhòrlele dixtti poddle ani koxê bhaxen Jezu Jeruzalea Aplem jivit sompadun vecho aslo tê vixim te gozal kortale. Pedru ani tache sangati jemen zodd zal’le, punn te zagech ravle ani Tachi mhoima tãnnim polleli ani Tachê borabôr ube aslele team dogank-ui dekhle. He Jezu sorxile koddsorun vetale tedna, Pedrun Taka mhonn’lem: “Guruji, ami hangasoruch ravlear borem! Mhonntôch tin tombu tãnnum-ia: êk Tuka, êk Moizesak ani êk Elijak.” Apunn kitem mhonnta tem toch nokllo aslo. Oxem to uloita thõich astana, ek kup ailem ani kupan tancher savlli ghali, ani tea kupant rigtôch xis bhiele. Ani kupantlo oso ho tallo aikunk ailo: “Ho Mhozo Put, Hanvem vinchun kaddlolo; Tachem aikat!” Ani ho tallo gaztôch, Jezu ekvoddo tankam dixtti poddlo. Team disamnim, apnnem dekhlelem tê vixim, xis ogech ravle ani tãnnim tem konnakuch kãi sangunk na. Dusrea disa te dongra vele denvtastana khup lôk tankam mellunk ailo. Ovchit lokachea zomeantlea eka mon’xan vhoddlean uloun mhonn’lem: “Guruji, doia korun mhojea putak polle mhonn magtam: to mhozo ekloch put. Ani, polle, devchar taka ghôtt dhôrta, okosmat killônch marta ani tonddantlean fenno kaddi-sôr taka foddfoddaita; ani bhurgeak boroch koxttainastana to sompeponnim bhair sorona. Taka kaddun uddoiat mhonn hanvem Tujeam xisam kodde maglem, punn tanchean nozo zalem.” Jezun portipallun mhonn’lem: “Kosli mhonn bhavart-nasleli ani khotti pinddka hi! Anink kitlo mhonn vêll tumchê sorxem Hanvem aschem ani tumkam Hanvem sôschim? Tujea putak hangasôr hadd.” Ani to bhurgo lagim ieta astanach, devcharan taka foddfoddaun dhornnir apttilo. Punn Jezun mhellea atmeak mottean hukum ghalun bhurgeak boro kelo ani tachea bapaichê adhin dilo. Devachi thorai polleun sogllim thottaklim. Jezu kortalo titlea-i vixim soglleank ojap distalem tedna, Tannem Apleam xisank mhonn’lem: “Chotraien tumi him utram ghott monant dhôrat: Mon’xacho Put mon’xanchea hatant poddcho asa.” Punn Tannem sanglem tem, te somzunk nant, tôr tacho ôrth tankam mellcho nhoi mhonn tanchea gineanak tem lipon urlem; ani tea utra vixim Tachê lagim vicharunk-ui tankam bhem distalem. Apnnam modem konn vhôdd zait tê vixim tanchê bhitôr êk vad upraslo. Punn tanchea monant gholltalim tim chintna polleun, Jezun eka bhurgeak ghetlo ani, taka Aplê kuxik dovrun, tankam mhonn’lem: “Jim konn hea bhurgeak Mhojea nanvan ghetat, tim Mhaka ghetat; ani Mhaka ghetat tim Mhaka dhaddla Taka ghetat. Kiteak tumam-somestam modem zo konn odik lhan toch soglleam poros vhôdd.” Juanvan tondd ghalun mhonn’lem: “Guruji, amchê sangatim Tuzo pattlav korinaslelea konn-ekleak Tujea nanvan devchar kaddtastanam ami dekhlo ani taka ami mona kelo.” Ani Jezun taka mhonn’lem: “Taka mona korinakat; kiteak tumcher add nant tim tumchea bhaga asat.” Jezuk sorgar ubarun vhorche dis bhoron ietale tedna, Tannem Jeruzaleak vechem mhonn Aplem mon thir kelem; ani Apnna fuddem Tannem niropi dhaddle. Tachê pasot toiari korchê khatir te vochun Samariekaranchea eka ganvant bhitôr sorle. Punn Jeruzaleak vochunk Tannem tharail’lem dekhun, hãnnim Taka ievkar diunk na. Tem polleun Tacheam xisam, Jakoban ani Juanvan, vicharlem: “Tankam lasun uddounk hukum’ ghalun sorga velo uzo ami denvoil’lo Tuka zai?” Ani vollon Tannem tankam bobatt keli ani te dusrea eka ganvant gele. Tê vatten cholta astana konn-eklean Taka mhonn’lem: “Tum vexi thõisor Tujê pattlean hanv-ui ietolom.” Jezun zap dili: “Koleank dholi ani varea veleam suknneank nhidunk zage asat, punn Mon’xachea Putak Apli tokli tenkounk khõisoruch zago na.” Dusrea konn-ekleak Tannem mhonn’lem: “Mhojê pattlean ie.” Punn tea mon’xan oso zabab dilo: “Poilo vochun hanvem mhojea bapaik matiek lavunk mhaka rojia di.” Punn Jezun taka zap dili: “Meleant tankam apleam mel’leank matiek lavum-di; punn tum voch ani Devachem Raj porgott kôr.” Anink eklean mhollem: “Saiba, hanv Tujê pattlean ietam, punn poilim mhaka mhojeam ghorcheank adêus korun ieum-di.” Taka Jezun sanglem: “Konn-ui nangrak hat ghalea uprant pattlean vollon polletit, tim Devachea Rajeak purtim nhoi.” Hachê uprant Somian anink beastôr zannank nemle ani Apunn vecho aslo tea-tea nogrant ani tê-tê svater tankam dogam-dogank Apnna fuddem dhaddle. Ani Tannem tankam mhonn’lem: “Pik khorench khup, punn vavraddi thodde; hea pasot pikachea dhonia lagim aplê lunvnnê-môllnnek vavraddi dhadd mhonn magat. Vochat, punn landdgeam modem menddre koxe Hanv tumkam dhaddtam mhonn chotrai dhôrat. Bhokxem vô bhuti vô vhannô vhoronakat, ani vatter konnakuch hoddkinakat. Khõichea-i ghorant bhitôr sorxeat zalear, ‘hea ghorak xanti!’ oxem poilench mhonnat. Xanti favo-aslelim mon’xam thõi astit zalear, tumchi xanti tancher denvteli; na tôr, ti tumchê thãi porot ieteli. Ekach ghorant ravun, tim kitem-i tunkam ditat tem khaiat ani pieiat, tôr vavraddeak aplo muxaro favo. Ghora-ghorim bhonvonakat; ani khõichea-i nogrant bhitôr sorxeat ani tim tumkam ievkar ditit zalear, tumkam vaddtat tem jevat. Thõi astit team vaittakarank borim korat ani ‘Devachem Raj tumchê thãi ieunchem zalem’, oxem sangat. Punn khõichea-i nogrant bhitôr sorxeat ani tim tumkam ievkar dina zatit zalear, rosteancher vochun mhonnat: ‘Amcheam pãiank lagloli tumchea nograchi dhull porian ami tumcher add zhaddun uddoitanv. Toripunn Devachem Raj ieunchem zalem mhonn zanno zaiat.’ Hanv tumkam sangtam: tea Disa Sodomachi zhôddti toslea nogra itli khôr zaunchi na. Kotta tujem, Korazin! kotta tujem, Bethsaidê! Tôr tumchê modem keleant tim vismitam Tir ani Sidon nogramnim kel’lim zalear, patkachi dhuk dhorun, aplem jivit-mon bodlun, kamblleachem saka-fottem ghalun ani gobracher bosun tednanchê tednanch tim Devaxim portoto aslim. Zhôddtechea Disa Tirachi ani Sidon’chi zhôddti tumchê itli khôr zaunchi na. Ani tum, Kapernauma, voir mollba porian ubaron pavteli mhonn ravtai kitem? Na! patalla porian tum sokla xevttoteli. Tumchem aikotat tim Mhojem aikotat; tumchi beporva kortat tim Mhoji beporva kortat; ani Mhoji beporva kortat tim Mhaka dhaddla Tachi beporva kortat.” Te beastôr xis khuxalbhorit zaun porot aile. Tãnnim mhonn’lem: “Saiba, Tujea nanvan devchar porian amkam khalte zale.” Ani Tannem tankam sanglem: “Viz koso sorgar thaun poddlolo Hanvem Soitanak dekhlo. Polleiat, sorop ani vinchu ani dusmanachi soglli podvi pãiam tolla mostunk Hanvem tumkam odhikar dila; kãi-ek tumkam vaitt zaunchem na. Toripunn devchar tumkam khalte zatat mhonn khuxi zaunchê bhaxek, tumchim nanvam sorgar boroil’lim asat mhonn khuxal zaiat.” Teach vellar Povitr Atmea udexim sontosan bhoron, Tannem mhonn’lem: “Bapa, sorga ani pritumechea Dhonia, heô vostu zannarank ani xanneank lipoun dovorleôi ani supurleam bhurgeank teô ugteô keleôi mhonn Hanv Tuka vakhanntam. Hôi, Bapa, tôr hench Tuka borem dislem. Sogllem Mhojea Bapan Mhojea hatant ghal’lem asa; ani Put konn to konnuch nokllo bogor Bap; ani Bap konn to konnuch nokllo bogor Put ani zankam Bap dakhoun diunchi Putak khuxi asot tim mon’xam.” Ani Apleam xisam vatten vollon ani tankam kuxin gheun Tannem mhonn’lem: “Tumi polletat tem polletele dolle bhagi; tôr Hanv tumkam sangtam: tumi polletat tem polleunk zaite provadi ani patxai axele, punn tankam mellunk na; ani tumi aikotat tem aikunk-ui te axele, punn tankam aikunk mellunk na.” Tedna Jezuk kosak lavunk eka dhormxastrean utthun oxem vicharlem: “Guruji, sasnnik jivit mellonk, hanvem kitem korunk zai?” Tannem taka oxi zap dili: “Somurtint kitem boroil’lem asa? Tem koxem vachtai, sangxi?” Tannem portipallun mhonn’lem: “Sogllea tujea kallzan, sogllea tujea jivachea bollan, sogllê tujê xoktin, ani sogllea tujea monan Sorvespora tujea Devacho tum môg kortoloi, ani tuzo môg kortai tosoch tujea peleacho kortoloi.” Ani Jezun taka sanglem: “Tuzo zobab sarko asa; toxench kôr ani tuka jivit melltelem.” Punn aplea vicharak karonn asa mhonn dakhounk tannem Jezuk vicharlem: “Tôr mhozo pelo konn?” Jezun oso portipall kelo: “Konn-êk monis Jerikeak vochunk Jeruzalea thaun denvun ietalo; vatter to choranchea hatant sampoddlo; tãnnim tachê kodde aslem titlem-i kann gheun, taka ghai poddo-sôr mar ghalo, taka ordo-mel’lo korun sôddlo ani apunn pollun gele. Tedna oxem ghòddlem: konn-eklo iadnik têch vatten denvun ietalo; tannem taka dekhlo ani dusrê kuxin soron to cholot ravlo. Tosoch êk levit tevxilean pavun sorlo ani taka polleun, to-i dusrê kuxin soron cholot fuddem gelo. Punn êk vattsur Samariekar tevxilean vetana tachê sorxem pavlo ani, taka polleun, tea babddeache taka churchure disle. To lagim ailo, tel ani soro lavun tannem tache ghai bandle, taka aplea gaddvacher ghalo ani êkê khannavollint taka vhorun tacho poramôs kelo. Dusrea disa tannem don dinar kaddun khannavollkarak dile ani mhonn’lem: ‘Tacho samball kôr ani kitem-i ogllo khôrch tuka zait zalear, hanv porot ietam tedna tuka farik kortolom.’ Team choranchea hatant sampoddleleacho, heam tegam bhitôr konnem apunn pelo zaun dakhoilem-xem tuka dista?” Tannem zap dili; “Tachi doia korun dakhoili tannem.” Tedna Jezun taka sanglem: “Voch ani tum-vui toxench kôr.” Magir ghòddlem tem hem: Apli bhonvddi korta astana, Jezu eka ganvant bhitôr sorlo ani Marta nanvachê êkê bailen aplea ghorant Taka soniman kelo. Tika Maria mhonnleli êk bhoinn asli; ti Somiachem utor aikunk Tacheam pãiam kodde bosun ravli. Punn Marta ghoracheam rattimnim bharim harpit zatali; Tachea fuddeant ieun tinnem mhonn’lem: “Jevnnacho sogllo bhar mhojê bhoinnin mhojeruch sôddlo mhonn Tuka kãich poddona? Ie ani mhaka adar di mhonn sang mum tika!” Ani portipallun Somian mhonn’lem: “Marta, Marta, kitleam vostunchi mhonn dhasti tuka? Thoddeôch vostu puro, khorem mhonn’lear êkuch gorjechi. Marien boro to vantto vinchun kaddla ani konnuch tichê lagcho to kann gheuncho na.” Jezu êkê kodden magnnem korun aslo, ani Tannem tem sompoilea uprant, Tacheam xisantlea konn-eklean Taka mhonn’lem: “Somia, Juanvan apleam xisank magnnem korunk xikoilam toxem, Tum-i amkam xikoi.” Tannem tankam sanglem: “Tumi magnnem kortat tedna oxem mhonnat: ‘Bapa, Tujem nanv Povitr zaum; Tujem Raj ieum; Tuji khuxi sorgar zata toxi sonvsarant zaum! amcho dispotto giras disachea disa amkam di; ani amchim patkam bhogôs, kiteak amcher chukleleank ami-i bhôgxitanv; ani amkam tallnnent poddunk dium naka.” punn vaitt vignantlim amkam nivar. Ani Tannem tankam sanglem: “Tumchê modem konn-ekleak êk ixtt asa mhonn somzat; ani ho modianir tachê-xim vochun taka oxem mhonnta: ‘Ixtta, mhaka tin undde uxnne di; mhozo êk ixtt vattecho pavun sorla ani taka vaddunk mhojê lagim kãich na.” Ani tea mon’xan bhitôr thaun oxi zap dili: ‘Mhaka tras dinaka; atam darak khill ghali ani mhojim bhurgim ani hanv nhidunk geleanv; mhojean utthun tuka diunk zaina.’ Ani to darar marituch ravot zalear, Hanv tumkam sangtam, to monis ixttagotik lagun utthun dina zalear-ui, tachê korandaiek lagun taka goroz tem kaddun ditolo. Toxench Hanv tumkam sangtam: magat ani Dev tumkam ditolo, sôdat ani tumkam melltelem, darar marat ani tem tumkam ugòddtelem; kiteak magtat tim ghetat, sôdtat tankam mellta, ani darar martat tankam tem ugòddtelem. Maslli magto aplea putak masllechê svater êk sorôp diit toslo tumchê modem konn bapui asa zait? Vô tantim magit zalear, bapui taka vinchu kaddun diit? Tumi vaittovim zaun-ui, tumcheam bhurgeank boreô vostu diunk tumi zannont zalear, tea-vôn kitlo odik tumcho sorgincho Bap Apnna lagim magteleank Povitr Atmo diuncho na?” Mono korun sodd’lo eka monxa velo ek devchar Jezu kaddtalo. Punn to devchar kaddina fuddem to mono ulounk laglo, ani sogllo lôk ojap zalo. Tori astana tea lokantleam kãi zannamnim mhonn’lem: “Beelzebul, devcharanchea pordhana udexim ho monis devchar kaddta.” Her konn-konn Tachi porikxa korunk sorga veli êk khunna Tachê kodde magtalim. Tanchim chintnam ollkhun Jezun oxem tankam mhonn’lem: “Khõichea-i eka rajea bhitôr nagrikanche pongodd ekamekacher uprasun zhuz korunk lagle zalear, tem raj padd zatelem ani ghorar ghor moddon poddtelem. Mhonntôch Soitanachea rajeant-ui ekamekacher zhuztele pongodd asat tôr, tachem raj koxem mhonn ubem dhòrtelem? Hem Hanv sangtam kiteak Beelzebulachê podven Hanv devchar kaddtam mhonn tumi mhonntat! Hanv Beelzebulachê podven devchar kaddtam zalear, tumche pattlavdar konnachê podven kaddtat tôr? Mhonntôch tinch tumchi nit kortelim. Punn Hanv Devachê podven devchar kaddtam zalear, Devachem Raj tumchê thãi khorench pavl’lench asa. Konn-êk bollixtt monis aplim sogllim hatiaram gheun aplem ghor rakhit zalear, tachê kodde asa titleak-ui kãich bhirant na. Punn tachê-kui bollixtt dusro eklo ieun taka haroit tedna, jeam hatiarancher to patietalo tim sogllim ho odik bollixtt monis kann ghetolo ani tacho mal vantt’tolo. Mhojea bhaga nant tim Mhojer add asat; ani Mhojê borabor punzainant tim ximpddaitat. Mhello atmo mon’xa velo bhair sortôch, sukea soddear visôv sodit bhonvta, ani taka visôv mellona zaun mhonnta: ‘Hanv bhair sorlolom tea mhojea ghora bhitôr hanv porot rigtolom.’ Ani thõi ie zalear, tem zhaddlelem ani nettoil’lem taka mellta. Tedna to vochun apnna-vôn odik noxtte anink sat atme apnna borabôr gheun ieta; ani bhitôr rigun, thõi te aplem tthikann kortat; ani tea mon’xachi magirli doxa tachê adlê goti poros paxtt zata.” To oxem uloita thõich astana zomlelea lokantlê konn-êklê bailen vhoddlea tallean Taka mhonn’lem: ‘Tuka samball’lo to kusvo ani Tuka dud dilem tem horddem bhagi.’ Punn Tannem mhonn’lem: “Hem khorem; toripunn Devachem utor aikotat ani samballtat tim odik bhagi!” Lokachi urpônz Jezu bhonvtonnim vaddot vetali; tedna To oxem mhonnunk laglo: “Hi atanchi pinddka noxtti pinddka; ti êk khunna magta, punn Jonasachi khunna kaddun Dev tika dusri khunna diuncho na; kiteak zoso Ninivechea lokak Jonas khunna zal’lo, toso Mon’xacho Put hê pinddkek zatolo. Zhôddtechea Disa Dokhinnechi Ranni hê pinddkecheam mon’xam borabôr ubi zateli ani ticho guneanv dakhoun diteli, kiteak ti pritumecheam ximam thaun Solomanvachem xanneponn aikunk ail’li; ani, polleiat, Solomanva poros vorto hanga asa Eklo! Ninivecho lôk Zhôddtechea Disa hê pinddkê borabôr ubo zatolo ani ticho guneanv dakhoun ditolo, kiteak Jonasachem provochon aikun tannem aplem jivit-mon bodlun Deva xim porot ailo; ani, polleiat, Jonasa poros vorto hanga asa Eklo! Ponntti lavun konnuch ti êkê lhan kuddint lipoun dovrinant, nhoi mhonn pailê tolla dovrinant, punn bhitôr sortat tãnnim uzvadd polleunchê khatir ti eka peddar dovortat. Tujea jivitachi ponn’ti tuzo dollo; tuzo dollo nivôll aslear, sogllem tujem jivit diptibhorit zata; punn tuzo dollo nivôll naslear, tujem jivit-ui kallokant buddon urta. Mhonntôch tujê bhitôr asa to uzvadd kallôk zaina zaunk chotrai dhôr. Hea pasot, tujem akhem jivit, kosloch kallôk nastana, diptivont zait zalear, tujer aplim kirnnam ghaltelê ponnttê bhaxen, tujem jivit uzvadduch fankoitelem.” Jezu uloun thamblo tedna, konn-eklea Farizevan Taka apnnager jevnnak apoilo. Ani To tanger vochun jevnnak boslo. Jevnna adim Tannem kiteak hat dhuvunk nant tem polleun, to Farizêv aplea monantuch gholloun vichartalo. Ani Somian taka sanglem: “Arê, tumi Farizev patr ani tatt bhailean nitoll kortat, punn tumi bhitorlean nagovnnen ani khotteponnan bhòrleat. Kitle mhonn pixe tumi! Bhailem toxench bhitorlem teach Devan kelam nhoi? Dekhunuch, tumchê kodde asa tantlem kaddun dublleank diat, ani, polleiat, tumchem sogllem nitoll zatelem. Farizevamnô, kottakotta tumchem! Hortelanv, koddipat, ani sogllê torecho bhaji-palo hancho dhavo vantto tumi Devak mhonn farik kortat, punn neainit ani Devacho môg tumi sôddtat. He kaide ki tumi pallunk zai asle, ani te-i chukounche nhoi asle. Farizevamnô, kottakotta tumchem! Devsthanamnim poile-voile zage ani tinttear salam’ tumkam zoboruch ruchtat. Tumchem kotta! Dixtti poddonant ani lôk nokllo zaun tancher cholta tosle fondd tumi.” Dhormxastreantlea eklean Taka portipallun mhonn’lem: “Guruji, oxem uloun tum amkam-i opman kortai.” Ani Tannem oxi zap dili: “Dhormxastreamnô, tumchem-i kottakotta! Sõsunk zainant toslim ojim tumi mon’xank vhorunk laitat, punn team ojeank ek bott porian tumi laixat-xe nant. Kottakotta tumchem! Kiteak provadeank iadgiri bandtat tumi, punn tumcheanch purvozamnim tankam jivexim marle. Tãnnim tancho jiv kaddlo ani tumi tankam iadgiri bandtat, ani oxem tumcheam purvozanchim kortubam tumi monzur kortat mhonn tumi sarkich govai ditat. Tea pasot Devachê Zannvaien legun oxem mhonn’lam: ‘Hanv tanchê thãi provadi ani apostl dhaddtolom ani tantleam kãi zannank te jivexim martele ani dhumallo ditele.’ Hea pasot, sonvsar rochla tethun thaun soglleam provadeanchea vikrail’lea rogtacho hê pinddken Devak hixôb diuncho poddtolo. Abelachea rogta thaun tem vedi ani Devmondira modem jivexim marlelea Zakariasachea rogta porian. Hôi, Hanv tumkam sangtam, hê pinddken Devak hea soglleacho hixôb diunchoch poddtolo! Dhormxastreamnô, kottakotta tumchem! Kiteak Zannvaiechi chavi tumi gheun geleat; tumi bhitôr sorunk nant te sorunk nant, ani bhitôr sorunk sôdtalim tankam-i tumi bhitôr sorunk diunk na.” Hem sangun Jezu thõisorlo bhair sorlea uprant, Farizev ani dhormxastri ekdomuch Tacheam pallank lagle ani tonddak tondd zaunchea monan Taka sobar proxn ghalit ravle. Te Taka fas manddun Tachea tonddantlea koslea-i utracher Taka dhorunk ravtale. Tea mhonnosôr Jezu bhonvtim khup gordi zali ani hozaramnim lôk ekamekak chirdditalo; tedna poilo Apleam xisam lagim uloun Tannem mhonn’lem: “Farizevanchea khomira vixim mhonngê tanchea ddhongeponna vixim chotrai dhorat.. Atam dhamplolem asa titlem-i ugtem zalea xivai ravchem na. Tôr kallokant tumi sanglam tem disa-uzvadda aikunk ietelem ani khasgi kuddant futfutun tumi uloileant tem pattsancher porgott zatelem. Tumkam, Mhojeam ixttank, Hanv sangtam: kuddicho jiv kaddtat ani tachê magir anink kãi-ek tanchean korunk zaina, tosleank tumi bhienakat. Punn tumi konnak bhieunchem tem tumkam sangtam: jiv kaddlea uprant emkonddant uddounk tank asa Taka bhieiat. Hôi, Hanv tumkam sangtam, Taka mat bhieiat. Don as’sarionank panch xerkam viktat nhoi? Tori astana, tantlea ekleachi-i Devak visôr poddona. Tumchê tokleche kens porian soglle mêzlele asat. Mhonntôch bhienakat. Xerkanchea bhirea poros tumi odik unch molachim. Tumkam sangtam: mon’xam hujir konn-ui Mhaka mandun ghetit zalear, tankam Mon’xacho Put-ui Devacheam dutam hujir manun ghetolo. Punn konn-ui mon’xam hujir Mhaka manun ghena zatit, tankam Devacheam dutam hujir Hanv-ui manun gheuncho na. Ani konn Mon’xachea Putacher add kitem-i uloitit, Dev tem tankam bhôgxitolo; punn konn Povitr Atmeachi ninda kortit zalear, Dev ti tankam bhôgxicho na. Tumkam devsthanamnim ani nitidaram vô odhikaream mukhar vhortit tedna, koso ani kitem zobab diuncho, vô kitem ulounchem tem, husko dhorinakat. Tôr tumi kitem mhonnunk zai tem Povitr Atmo, to vêll ietôch, tumkam xikoitolo.” Lokachea zomeantlea konn-eklean Jezuk mhonn’lem: “Guruji, amkam poddlam tea daizacho mhozo vantto kuxin kaddun mhaka di mhonn mhojea bhavak sang.” Punn Tannem taka oxi zap dili: “Mon’xa, tumchê bhitôr neainit vô vanttop korunk Mhaka konnem nemla?” Magir Tannem tankam sanglem: “Chotrai dhôrat ani dhon-girestkaiechi axa sarkich soddun diat, kiteak konnank puskôll girestkai asli-i zalear, tanchem jivit ticher dhòrlelem na.” Magir Tannem tankam êk vopar sangli: “Êk girest monis aslo ani tacheam xetam-bhattank khup pik zalem; tedna to apnnach bhitôr chintunk poddlo: ‘Mhozo pik-paddo bhorun dovrunk mhojê lagim zago na. Hanvem kitem korchem?’ Ani tannem mhonn’lem: ‘Oxem kortolom: mhoje kodde moddun, tanchê-kui vhoddle bandtolom ani mhojeam xetam-bhattanchem sogllem utpon ani mhozo asto-mal tantum bhorun dovortolom. Magir mhakach oxem mhonntolom: jiva mhojea, sobar vorsank puro-so khup mal tujê adhin asa; visôv ghe, kha-pie ani mouz mar.’ Punn Devan taka mhonn’lem: ‘Arê pixea, az rati tujê koddlo tuzo jiv porot magcho asa. Mhonntôch tunvem toiar korun dovorlãi tem konnank?’ Apnnak ttheve ektthãi kortat punn Deva mukhar girest zaunk nant, tanchi gôt hi!” Uprant Tannem Apleam xisank mhonn’lem: “Dekhunuch Hanv tumkam sangtam: jiva khatir kitem jevchem-khaunchem, vô kuddi khatir kitem nheschem-pangurchem, tê vixim huskenakat. Kiteak mhonn’lear jiv jevnna poros odik molacho ani kudd nhesnna poros odik molachi. Kavlleancher barkaien nodor marat; te vompinant vô lunvinant, ani tanchê lagim kodde ani orôv dovorche zage nant; tori Dev tankam pôsta. Suknneam poros kitlim odik molachim nhoi tôr tumi?! Ani huske kaddun tumchem auk êk hat-bhôr vaddounk tumchê bhitorlea konnak tank asa? Itli lhan vôst tumchê kodde ghoddona tôr, kiteak mhonn her vostum vixim tumi huske kaddtat? Konelam koxim vaddtat tem chintun polleiat. Tim koxtt korinant, sut-ui kaddinant; tôr Hanv tumkam sangtam: Solomanv porian sogllea aplea dobajeant tantlea eka sarko nhesunk na. Tôr az xetant asa ani faleam kaddun ujeant uddoitat tem tonn hea jin’san Dev nhesoita zalear, tea-vôn kitlo odik tumkam To nettouncho na, holkea bhavartacheam mon’xamnô? Mhonntôch kitem khaunchem, vô kitem pieunchem, hacho vichar korunk bosonakat, ani monant husko dhorun jienakat. Oslea soglleacher iklo dovorta sonvsarantlo onbhavarti lôk. Tumkam heam soglleam vostunchi goroz mhonn tumcho Bap tôr zannoch. Tumi zalear, Devachea Rajeacheam nemam pormannem manddlelea jivitacher tumcho iklo dovrat ani sogllem ier-ui To tumkam ditolo. Supurlea hindda, kosloch husko dhorum nakat, kiteak tumkam Raj diunchem mhonn tumchea Bapak khuxi zalea. Tumchê kodde asa tem vikun dhormdan korat. Pornneô zaun pinzonant tosleô potiô, soron-sorona toslo tthevo, sorgar tumkam ballgun dovrat: thõi chôr pavona ani sannôs-ui khaun ibadd korina. Tuzo tthevo asa thõi tujem kalliz-ui astelem. Tumchea penkttak bandat ani tumcheam hatamnim pettleleô ponntteô gheun ravat. Aplo dhoni logna-porbe thaun porot ieun darar marina fuddem, taka dar ugôddchê khatir tachi vatt polleun ravtat tosleam mon’xam porim tumi zaiat. Dhoni ieta tedna taka zagrut melltit te chakor bhagi! Khorench tumkam sangtam, to aplea penkttak bandtolo, tankam jevnnak bosoitolo, ani apunn tanchê modem bhonvun tanchi seva kortolo. Ani modianir vô fantea para adim porian to pavot zalear ani te taka toxench melltit tôr, te chakor bhagi! Hem mat zanno zaiat: khõichea vogtar chôr ietolo to ghoracho dhoni zanno aslo zalear, dubhava-vinn to zagrut ravto aslo ani aplem ghor foddun nagounk diuncho naslo. Tumi-i toxinch toiar ravat, kiteak chintinaslelea vellar Mon’xacho Put ietolo.” Tedna Pedrun mhonn’lem: “Somia, amkanch vô heram somestank-ui Tum hi vopar sangtai?” Somian oxi zap dili: “Ghorant asleleank vogtar jevonn vaddun diunk, dhonian aplea ghorabeacher odhikar dil’lo konn visvaxi ani xanno karbhari zait-so tumkam dista? Aplo dhoni ieta tea vellar, aplem kam’ korit astam taka mellot to chakôr subhagi. Hanv tumkam khorench sangtam, apnna kodde asa titleacher-ui to taka odhikar ditolo. Punn ‘porot ieunk mhozo dhoni lambai korta’, oxem to chakôr apnnach bhitôr mhonnun, heram chakrank ani chakornnink marunk ani apunn khaunk-pieunk ani bebdikai korunk lagot zalear, to ravonaslelea disa ani to nokllo aslelê ghoddier tea chakracho dhoni pavtolo ani taka mornnachi xikxa laitolo ani bhavart-nasleleam mon’xanchea vangdda taka bhair uddoitolo. Aplea dhoniachi khuxi kitem ti zanno zaun-ui, ti pallunk toiari porian korunk na toslea chakrak khup sotteancho mar poddtolo. Ti kitem ti nokllo asleleak, tacheam kortubank khast favo zalear taka thoddech sotte poddtele. Jeam konnank Devan chodd dilam, tanchê koddchem To chodd magtolo; ani jeam konnank Devan chodd patielam, tanchê koddlem To chodd gheunk ravtolo. Prithumer uzo pettounk Hanv ailam, tori to petton bhogbhogtalo zalear, kitlo mhonn Hanv khuxi zauncho naslom! Hanvem ek batism gheuncho asa, ani to ghei porian Mhaka koxê bhaxen jivan jiv na zala! Hanv prithumecher xanti haddunk ailam, oxem tumkam dista? Hanv tumkam sangtam: na, bogor bhêd ghalunk Hanv ailam. Hea fuddem ekach kuttumbant panch zannam modem oxi futt poddteli: tegam dogancher add ani dogam tegancher add; bapui putacher add ani put bapaicher add; avoi dhuvecher add ani dhuv avoicher add; sasu sunecher add ani sun sasucher add.” Tannem lokak anink-ui mhonn’lem: “Ostomtê thaun ek kup choddon manddta tem polleun, tumi rokddinch paus ieta mhonntat, ani toxench ghòddta; ani dokhinnê thaun varem martôch tumi mhonntat: ‘Borich gormi zateli’, ani toxench ghòddta. Arê ddhongeamnô, prithumechem ani mollbachem tondd koxem parkunchem tem tumi zannont; ho kall parkunk tumchê lagim koxem zaina tôr? Nitt-sarkem kitem tem tumchinch tumi kiteak tharainant? Tujea vadea borabôr odhikarea-xim vetastana, tumcho tontto sompounk vatteruch zata titlem-i kôr; na zalear, tim tuka nitidara-xim oddun vhortit, ani nitidar tuka kosabachea hatant diit, ani kosab tuka bondkhonnint ghalit. Hanv tuka sangtam, tuzo nimanno lepton tunvem farik kori-sôr thõisorli tuka suttka mellchich na.” Thoddeam Galileikarank marun, Pilatan tanchem ani te bhettoitale team bolianchem rogot ek kelem, tê vixim thõi asleleam kãi zannamnim teach vellar Jezuk khobor dili. Ani portipall diun Tannem mhonn’lem: “Oxem tãnnim bhôgchem poddlem dekhun, soglleam heram Galileikaram poros he Galileiache monis odik patki asle mhonn tumkam dista kitem? Hanv tumkam sangtam: toxem nhoi! Punn tumi jivit-mon bôdlina zaxeat zalear, tumi-i toxench mortelet. Siloamacho gopur poddlo tedna jim otthra zannam morun gelim, tim Jeruzaleant ravteleam heram soglleam mon’xam poros odik guneanvkar aslim, oxem tumkam dista? Hanv tumkam sangtam: toxem nhoi! Punn tumi jivit-mon bôdlinam zaxeat zalear, tumi-i toxinch mortelet.” Ani Tannem hi vopar sangli: “Konn-eklean aplea dakanchea molleant ek anjirachem zhadd lail’lem, ani to tachem foll sodunk ailo tedna, taka kãi-ek mellunk na. Tedna tannem mollo vosoiteleak mhonn’lem: ‘Polle, az tin vorsam zalim hanv hea anjirachem foll sodunk ietam ani mhaka ek-ui mellona. Mhonntôch tem katrun uddoi; bexttich kiteak svat addaita?’ Punn tannem oxi zap dili: ‘Dhonia, hem-i aniek voros tem asum-di; tachea mundak allem kaddun, taka hanv sarem ghaltam; ghoddiek taka foll zait; na tôr, magir katôr.’ “ Jezu, eka Sabbatha disa, eka devsthanant xikovnn ditalo. Ovchit Tachê mukhar dixtti poddli otthra vorsam devcharan opangull kel’li êk bail; ti samkich pongi zal’li ani tichean tokli uklun nitt ubi ravunk zainaslem. Jezun tika polleli ani Apnna-xim tika apoun haddun mhonn’lem: “Agê, tujea vaittantli tum suttlii.” Ani Tannem Aple hat ticher dovrinam fuddem, ti sarki ubi zali ani Devak dhin’vasunk lagli. Punn Jezun Sabbatha disa pidda-rôg boro kelo dekhun, devsthanacho odhikari pinddollun oso lokak ulounk laglo: “Vavr korunk sô dis dil’le asat; team disamnim ieiat ani borim zaun vochat, Sabbatha disa naka.” Portipallun Somian taka mhonn’lem: “Arê ddhongeamnô, tumchê bhitorlo zonn-eklo davnnek bandlelea paddeak vô gaddvak soddun, taka Sabbatha disa udkak vhoronam? Tôr otthra vorsam devcharan bandun dovorlelê hê Abrahamachê dhuvek hea Sabbatha disa sôddchi nhoi asli?” Oxem To mhonnta astana soglleam Tacheam dusmanank loz zali, punn Tacheô ojapancheô kornneô polleun sogllea lokak motti khôs zali. Ani Tannem mhonn’lem: “Devachem Raj kitea sarkem mhonnchem? Khõichê vostuk Hanvem tachi sôr korchi? Tem sansvachea bia sarkem. Eka mon’xan tem ghetlem ani aplea porsant roilem; tem vaddlem ani tachem vhodd zhadd zalem ani varea veleam suknneamnim ieun tacheam khandiamnim vosti keli.” Tannem anink ek sanglem: “Devachem Raj koslê vostuk sôr korum? Tem oxem: êkê bailen khomir ghetlo ani, môll’lelea pittachim tin vhoddlim mapam dhorun, tantum to purlo, ani sogllench pitt fuglem.” Dor-eka nogrant ani ganvant vochun, To xikovnn diit Jeruzaleachi vatt choltalo. Tedna konn-eklean Tachê lagim vicharlem: “Saiba, soddvônn gheunk pavtelim tim thoddinch kai?” Tannem tankam oxi zap dili: “Oxir darvontteantlean bhitôr sorunk zata toxem vavrat, kiteak, Hanv tumkam sangtam, zaitim zannam bhitôr vochunk sôdtelim, punn tanchean zaunchem na. Ghorachea Dhonian bhitôr vochun ekdam dar dhamplea uprant, tumi, bhair ravun, darar marun mhonnunk lagtelet: ‘Dhonia, amkam dar ugôdd.’ Ani To tumkam oxem mhonntolo: ‘Tumi khõichim tim Hanv nokllom.’ Tedna tumi mhonnteleat: ‘Tujea murean ami jevleanv ani pieleanv ani amcheam rosteancher Tunvem xikovnn dileai.’ Ani To tumkam sangtolo: ‘Tumi khõichim tim Hanv nokllom; vaitt korteleamnô, sogllim tumi Mhojê thaun pois sorat!’ Tedna Abraham’, Izak, Jakob ani somest provadi Devachea Rajeant aslele ani tumkam bhair uddoil’lim polleun, koxim mhonn tumi thõi rudon korun ani dant korkoraun astelet! Udenti, ostomtê, ut’tori ani dokhinnê thaun lôk ietolo ani Devachea Rajeant jevnnak bostolo. Ani, polleiat, atam nimannim asat tim poilim zatelim ani poilim asat tim nimannim zatelim.” Têch ghoddier Farizevantle kãi zann Jezuk sangunk lagle: “Hangasorlo bhair sorun voch, tôr Herod tuzo jiv kaddunk sôdta.” Ani Tannem mhonn’lem: “Vochat ani tea koleak oxem sangat: ‘Chotrai dhôr, Hanv az ani faleam devchar kaddtam ani pidda-rôg boro kortam, ani tisrea disa Mhozo xevôtt zôddtolom.’ Toripunn az, faleam ani porvam Hanvem cholot ravunk zai, tôr Jeruzalea bhair morunk eka provadeak puttovna. Jeruzalea, Jeruzalea, tum provadeank jivexim martai ani Devan tujê thãi dhaddleleank fatraitai! Kombi apleam pakotteam tolla apleam pilank korta toxem, kitlê pavtti mhonn tujeam bhurgeam-ballank ektthãi korunk Hanv axetalom, punn tem tuka naka zalem! Chotrai dhôr, tumchem ghor Dev tumkam soddun dita. ‘Sorvesporachea nanvan ieta taka zôi!’ oxem tumi mhonncho vêll pavo-sôr tumi Mhaka anink polleunchim nant mhonn Hanv tumkam sangtam.” Magir oxem zalem: eka Sabbatha disa Farizevanchea konn-eklea mukheliager Jezu jevnnak gel’lo tedna, te Taka tellun polletale. Udok angant bhoron suzlolo êk monis Tachea mureant aslo. Dhormxastream ani Farizevam lagim uloun Jezun mhonn’lem: “Sabbatha disa piddevontank borim korum-ieta ki na?” Punn te ogech ravle. Tedna Tannem taka dhorun boro kelo ani dhaddlo. Ani tanchê lagim uloun Jezun mhonn’lem: “Tumchea konnachoi put vô paddo bãit poddlo zalear, Sabbath mhonnun rokddoch taka kaddinastana to ravot mum?” Hea utrak zobab diunk tanchean nozo zalem. Poile-voile zage koxê bhaxen vinchun kaddtale tem polleun, jevnnak apoil’leank Jezun oxi êk vopar sangli: “Tuka lognachea jevnnak konn apoit tedna, vochun manachê svater bosonaka; kiteak tujê-vôn odik manadik dusrea konnak tannem ghoddiek apoila zait, ani tumkam dogãik-ui apoileat to thõi ieun tuka mhonnot: ‘Tuji svat haka di.’ Ani tedna, loz zaun, tunvem nimanni svat gheunchi poddot. Hea pasot konn tuka jevnnak apoit tedna, vochun nimannê svater bos; hê porim tuka apoila to iet tedna, taka oxem mhonnunk melltelem: ‘Ixtta, voilê svater vochun bos.’ Tedna borabôr jevnnak bosleleam hujir tuka man zatolo. Kiteak apnnankuch unch kaddtat tankam Dev khala uddoitolo ani apunnuch khaltim zatat tankam Dev unch kaddtolo.” Ani Apnnak apoil’lo taka-i Jezun sanglem: “Tum donparchem vô ratchem jevonn ditai tedna, tujeam ixttam-ixttinnink, vô bhavam-bhonnink, vô soireank, vô girest xezareank apoinaka, kiteak ghoddiek tim-i tuka porot apnnanger apoitit ani tujem apovnnem bad kortit. Punn jevonn ditai tedna, dublleank, khoddeank, thontteank ani kurddeank apoi. Tanchean tujem apovnnem bad korunk zainam mhonntôch, tum bhagi zatoloi; punn promannik mon’xam punorjivont zatelim tedna, tuji tuka mozuri mellteli.” Hem aikun, borabôr jevnnak bosleleantlea konn-eklean Jezuk mhonn’lem: “Devachea Rajeant jevnnak bostit tim subhagi!” Punn Jezun taka sanglem: “Konn-eklea mon’xan ek vhoddlem rat-jevonn kelem ani zaitea lokak apoilo. Jevnnacho vogôt zatôch, ‘Ieiat, sogllem toiar zalam!’, oxem apoil’leank vochun sangunk, tannem aplea chakrak dhaddlo. Punn sogllech eksarke nibam diunk lagle. Poilean chakrak mhonn’lem: ‘Hanvem bhatt viktem ghetlam, tem mhaka vochun polleunk zai; dekhun mhaka mafi kôr mhonn upkar magtam.’ Dusrean mhonn’lem: ‘Hanvem paddeanchim panch zotam viktim ghetleant, tim topasunk vetam; dekhun mafi kôr mhonn upkar magtam.’ Tisrean mhonn’lem: ‘Hanv halinch logn zalam, mhonntôch mhaka ieunk zaina.’ Hem sogllem chakran porot ieun aplea dhoniak kollit kelem. Tedna pinddollun ghorkaran aplea chakrak sanglem: ‘Nogracheam rosteancher ani bidimnim vegim voch ani goribank, panglleank, kurddeank ani thontteank hanga gheun ie.’ Magir chakran mhonn’lem: ‘Dhonia, tujea hukuma pormannem kelem; tori astana anink-ui svat asa.’ Ani dhonian chakrak sanglem: ‘Nogra-bhaileam rosteancher ani oddpam modem voch ani mhojem ghor bhòrta toxem lokak bhitôr ieunk boll kôr. Hanv tumkam sangtam: apoil’leam bhitorlo eklo legun mhojem jevonn chakunk pavcho na.’ ” Khup lokache zome Jezu borabôr choltale ani Tannem vollon tankam mhonn’lem: “Zôr konn-ui Mhojê-xim ietit ani aplea bapaicho, avoicho, bailecho, bhurgeancho, bhavancho ani bhoinnincho, ani aplea jivacho porian dvês korina zatit, tankam Mhojeam xisam modem zago na. Ani jim konn aplo khuris gheun Mhojê pattlean ienant, tankam Mhojeam xisam modem zago na. Tumchê bhitorlo konn-ui êk gopur bandunk sodit zalear, to sompounk goroz titlo khôrch korunk apnna lagim zait ki na, hacho adim-poilo bosun odmas korcho na gai? Na tôr, buniad marlea uprant, tem xarti pavounk taka tank na zait zalear, polletat titlim-i tacheô moskoreô korun mhonntelim: ‘Hea mon’xan bandunk addailem, punn tachean sompounk nozo zalem.’ Vô konn raza dusrea eka razacher zhuz korunk vetolo zalear, dha hozar soinik gheun vis hozaranchi fouz haddta taka apnnachean fuddo korunk zata ki na, tem adim-poilem bosun chintina zait? Zaina tôr, to poisuch astana, niropi dhaddun ‘somadhanachi boli korum-ia’ mhonn magtolo. Têch bhaxen tumchê modlim konn-ui apnnam lagim asot titlem-i soddun dina zatit zalear, tankam Mhojeam xisam modem zago na. “Mitt borem; punn mittachi kharsann bigòddli zalear, taka anink kitean portun kharsann diunchi? Tem zomnik vô gairik-ui upkaronam. Tem kaddun bhair uddoitat. Aikunk kan asleleamnim aikunchem.” Dônddvosuldar ani sogllê torechim patki mon’xam Jezuk aikunk Tachê-xim ietalim; ani Farizev toxe dhormxastri gunngunnun oxem mhonntale: “Ho monis patkiank borê bhaxen gheta ani tanchê borabôr jevta-khata.” Tedna Tannem tankam oxi êk vopar sangli: “Tumchê modem xembhôr menddre aslolo konn-êk monis asa mhonn somzat; tantlo ek menddro sanddlo mhonnum-ia; nnoian’nnoi oronneant soddun, sanddla to mello-sôr taka sodunk vochonastam to ravot gai? Ani to mell’lea uprant, to khuxal zaun taka khandar ghalta ani, ghora pavtôch, ixttank ani xezareank apoun to mhonnta: ‘Mhojo sanddlolo menddro mell’lo mhonn mhojea vangdda khuxal zaiat.’ Têch bhaxen, Hanv tumkam sangtam, êk patki monis jivit-mon bôdlit zalear, tachê pasot sorgar kedo vhoddlo sontôs zatolo! Jivit-mon bodôlpachi apnnank goroz na mhonn chint’telim nnoian’nnoi promannik mon’xam astit tôr, hanchê pasot sorgar hedo sontôs na mhonn Hanv tumkam sangtam! Vô rupeache dha nanne asleli konn-êk bail asa mhonn somzat; tantlo êk sanddot zalear, ponntti pettoun, ghorak sarônn marun, to nanno mello-sôr mhenotin to sodinastana ti ravot kai? Ani to mell’lea uprant, ti apleam ixttinnink ani xezarnnink apoun mhonnta: ‘Mhozo sanddlolo nanno mhaka mell’lo mhonn mhojea vangdda khuxal zaiat.’ Têch porim, Hanv tumkam sangtam, êk patki monis jivit-mon bôdlit zalear, Devache dut sontosbhorit zatele.” Anink-ui Tannem sanglem: “Konn-eklea mon’xak dog put asle ani tanchê modlea dhakttean bapaik oxem mhonn’lem: ‘Bapa, mhaka poddta to daizacho vantto mhaka kaddun di.’ Ani tannem tankam daiz vanttun dilem. Ani thoddeam disam bhitôr dhakttea putan apnnachem aslem titlem-i ektthãi kelem ani ghorantlo bhair sorun to eka poixilea ganvant gelo; ani thõi mostem jivit jieun tannem aplê girestkaiechi vatt laili. Ani tannem sogllem hogddaun uddoitôch, tea ganvant êk khôr bhuk poddli ani to-i oddchonnik sampoddlo. Tedna vochun to tea ganvantlea konn-ekleager chakrek ravlo; ani tannem taka aplea xetant dukram chorounk dhaddlo; ani dukram khatat teô sangô tori khaun aplem pott bhorunk taka khuxi ietali, kiteak konn taka jevnnak kãich dinaslo. Xekim, soirannar ieun, tannem mhonn’lem: ‘Kitle disvoddeache manai mhojea bapaichea ghorant naka-puro zai-sôr jevun-khaun asat, ani hanv hanga bhuken mortam! Tôr hanv utthun mhojea bapai-xim vetolom ani taka mhonntolom: ‘Bapa, hanvem sorgacher ani tujer add patok kelam; mhaka tuzo put mhonnunk anink mhaka favo na; tujeam manaiantlo eklo koso mhaka dhôr.’ Ani utthun to aplea bapai-xim gelo. Poisuch astana tachea bapain taka dekhlo ani tachem kalliz churchurlem; ani dhanvun vochun tannem taka veng marli ani tache ume gheit ravlo. Putan taka mhonn’lem: ‘Bapa, hanvem sorgacher ani tujer add patok kelam; mhaka tuzo put mhonnunk anink mhaka favo na.’ Tedna bapain apleam chakrank sanglem: ‘Boreantlem borem ek vostr veginchê-vegim haddun taka nhesoiat; tachea bottak mudi ani pãiank vhannô ghalat; gulgulit paddkulo haddun marat; jevonn korum-ia ani borem-borem khaun-pieun khuxal zaum-ia. Kiteak ho mhozo put mel’lo, to novean jivont zala; sanddlolo, to porot mell’la.’ Ani tãnnim jevunk suru kelem. Tedna tacho vhoddlo put xetant aslo ani ieun ghora lagim pavtam-pavtam tannem songit ani nach zatat tim aikolim ani, eka chakrak apoun, kitem zalam kai mhonn tannem vicharlem. Chakran zap dili: ‘Tuzo bhav aila, ani to solamoti pavlo mhonn tujea bapain gulgulit paddkulo marla.’ Punn to zobôr ragar zalo ani portipallun tannem bapaik oxem mhonn’lem: ‘Polle, itlim vorsam zalim hanv tuji seva-chakri kortam ani tujem utor hanvem kednanch moddunk na, tori mhojeam ixttam borabôr jevunk-pieunk tunvem mhaka kednanch êk bokddo legun dilo nãi; punn xindoll bailam borabôr aplem daiz khaun-hogddaun ho tuzo put iena fuddem tunvem tachê pasot datto-motto paddkulo marloi!’ Punn tannem taka sanglem: ‘Puta mhojea, tum sodanch mhojea sangata asai ani jem kitem mhojê lagim asa tem sogllem tujench. Punn borem jevonn korunk ani khuxal zaunk purtem karonn aslem: tôr ho tuzo bhav mel’lo, to novean jivont zala; sanddlolo, to porot mell’la.” Jezun Apleam xisank oxem sanglem: “Konn-eklo girest monis aslo ani taka êk mukdom’ aslo; ho tachê girestkaiechi vatt laita mhonn konnem tachê sorxem vochun hacher firiad dili. Haka apoun haddun, dhonian vicharlem: ‘Tujê vixim hanv hem aikotam tem kitem? Tujea karbharacho hixôb di; tôr hea fuddem mhozo mukdom’ zaunk tuka mellchem na!’ Tedna mukdoman apnnach bhitôr mhonn’lem: ‘Mhozo dhoni mhojê koddchem mukdom’ponn kann gheta mhonntôch, hanv atam kitem korum? Khonnunk mhaka sokot na; bhik magunk mhaka loz dista. Xabas, koll’lem mhaka! Mhaka mukdom’ponna velo nikllailea uprant, konnem tori mhaka apnnager gheunchê khatir hanvem kitem korchem tem mhaka ievzolem!’ Aplea dhoniachea ek-eklea rinnkareak apoun, tannem poilea lagim vicharlem: ‘Mhojea dhoniak tum kitlem devo asai?’ Tannem zap dili: ‘Xembhôr mapam tel.’ Mukdoman taka sanglem: ‘Hem polle tujem lêkhpotr; bos hanga ani vegim tacher pon’nas boroi.’ Magir dusreak vicharlem: ‘Ani tum kitlem devo asai?’ Tannem portipall kelo: ‘Xembhôr khanddiô gonv.’ Mukdoman taka sanglem: ‘Hem polle, tujem lêkhpotr ghe ani oixim boroi.’ Tozviten aplem kam’ kelem mhonn Dhonian tea naddbudhichea mukdomak vornnilo, kiteak sonvsari mon’xam apleam sarkeam lagim cholta-gholltana uzvaddacheam mon’xam poros odik tozvitechim. Tôr Hanv tumkam sangtam: girestkai sonvsari, punn tumkam ixtt-ixttinni zoddun gheunk ticho upêg korat; oxem, ti ontrun veteli tedna, tim tumkam sasnnacheam biraddamnim svagôt korun ghetelim. Jim ekdom’ unnea molacheam vostumnim khatrechim, tim unch molacheam vostumnim-i khatrechim; ani jim ekdom’ unnea molacheam vostumnim khottim, tim unch molacheam vostumnim-i khottim. Mhonntôch, zôr he sonvsari girestkaiecho favo to upêg korunk tumkam patieunk nozo zalem, tôr khori-osôl girestkai tumchea hatant ghalunk konn tumkam patietolo? Devan tumkam dil’leam tumcheô nhoi team vostumnim tumi zôr visvaxi ravunk nant, tôr tumcheôch zauncheô asat teô vostu Dev koso ditolo tumkam?” Khõicheach chakran dogam dhonianchi borabôr chakri korum nozo, kiteak to ekleak zolltolo ani dusreacho môg kortolo, vô ekleak chikttun ravtolo ani dusreachi beporva kortolo. Tumchean Devachim ani borabôr girestkaiechim gulam zaum nozo.” Hem sogllem aikun, dhon-girestkaiek lobhdol’le Farizev Tacheô moskoreo korunk lagle. Ani Tannem tankam sanglem: “Mon’xanchê nodrek apunn promannik mhonn dakhounk sôdtat te tumich te, punn Dev tumchim kallzam boro ollkhota; tôr mon’xam unch molachem mhonn lêkhtat tem Deva mukhar kanttallo. Somurt ani Provadeanchi xikovnn Juanvachea kalla porian choltaleô; tê meren Devachem Raj porgott zata ani tantum bhitôr sorunk sogllim nêtt kortat. Somurtintlem ek kuskutt bhair poddchê poros, sôrg ani prithum’ nopoit zaunk odik sompem. Zo aplê potinnik soddun dusrê lagim logn zait, to pordvar korta; ani ghovan soddlelê bailê lagim zo logn zait, to-i pordvar korta.” Konn-êk girest monis aslo; to tambddim ani nazuk sonni vostram nhestalo ani disachea-disa borim-borim jevnnam korun dhadoxi jietalo. Ani Lazar nanvacho êk bhikari, soglloch chovnamnim bhoron, tachea darvonttea-xim poddon astalo; girestachea meza velem poddta tem khaun aplem pott bhorunk to axetalo. Sunnim legun ieun tachim chovnam lenvtalim. Magir êk dis to bhikari melo ani devdutamnim taka Abrahamachea gopant vhorun dovorlo. To girest-ui melo ani taka vhorun purlo. Iemkonddant attevitte bhôgta astana, tannem aple dolle ubarun Abrahamak ani tache kuxik aslelea Lazarak pois dekhle, ani oxi bob marli: ‘Abraham’ bapa, mhoje churchure kôr ani aplea bottachi tembi udkant buddoun mhoji jib thôndd korunk Lazarak dhadd, kiteak hea ujeant hanv bharim vollvolltam.’ Ani Abrahaman mhonn’lem: ‘Puta mhojea, tujea jivitant jitlem tunvem sukh bhôglem, titlem Lazaran dukh sôslem mhonn ugddas kôr; mhonntôch atam taka buzvônn mellta ani tum dogdogtai. Titlench nhoi, konn hanga thaun tumchê-xim vochunk sodit zalear, tachean zaina, nhoi mhonn thõi thaun hanga ieunk-ui zaina, kiteak amchê ani tumchê modem mottem vhoddlem patall thirail’lem asa.’ Tedna tannem mhonn’lem: ‘Toxem zalear, bapa, taka mhojea bapaichea ghora dhadd mhonn tujê lagim poratun magtam; tôr mhaka panch bhav asat; te-i hê volvolleanchê svater iena zaunk tannem tankam xiddkaunche.’ Punn Abrahaman taka sanglem: ‘Tankam Moizes ani provadi asat; tanchem tãnnim aikunchem.’ Punn tannem portun mhonn’lem: ‘Toxem nhoi, Abraham’ bapa; mel’leantlo konn-ui tanchê-xim vochot zalear, te jivit-mon bodôltele.’ Xekim Abrahaman taka sanglem: ‘Moizesachem ani provadeanchem te aikonant zalear, mel’leantlo konn-ui jivont zalear legun tanchea monant sot rigchem na.” Jezun Apleam xisank mhonn’lem: “Bhavart soddun divpacheô tallnneô asteleôch; punn jeam mon’xam udexim teô ietit, tanchem kotta! Heam lhanantlea ekleak porian tãnnim bhavart soddunk oddun vorchê adim, tankam golleak danteachem pedd bandun doriant uddoilim zalear, tankam odik borem zato aslem. Chotrai dhôrat: tuzo pelo tujer chuk korit tôr, taka xiddkai; ani to apli chuk ollkhun ghetit zalear, taka bhogôs. Ani to tujer disak sat pavttim chuk korit ani sat pavttim tujê-xim porot ieun ‘mhozo guneanv zalo’, oxem mhonnot zalear, tunvem taka bhôgsuncho.” Apostlamnim Somiak mhonn’lem: “Amcho bhavart vaddoi.” Tedna Somian mhonn’lem: “Sansvachea konnea itlo tumkam bhavart asot zalear, ‘umtton voch ani doriant rigun pallam sôdd’, oxem hea amorichea zhaddak tumchean mhonnunk zatelem, ani tem tumchem aikotelem. Tumchê modem konn-eka mon’xak êk chakôr asa mhonn somzat; xet kosun vô menddram choroun to chakôr porot ghora ieta tedna ‘chol vegim ani jevnnak bos’, oxem taka dhoni mhonntolo kai? Hachê bhaxek, ‘mhojem jevonn toiar kôr ani hanv khai-pie-sôr, penkttak kas marun mezachem kam’ kôr ani magir tum kha-pie’, oxem to mhonncho na kai? Apnnem sanglelim kamam chakran kelim dekhun dhoniak chakracho upkar astolo kai? Toxench, tumkam sanglelem titlem-i kelea uprant, tumi-i mhonnat: ‘Chaltim-bexttim chakor ami; amcho kaido aslo toch ami pall’la.’ ” Jeruzaleak veta astana, Jezu Samariechê ani Galileiachê ximê velean cholot vetalo. Eka ganvant bhitôr sortana, kodd futtlele dha zann Taka vatter mell’le; te pois ube ravle ani, vhoddlean ulo marun, tãnnim mhonn’lem: “Jezu, Guruji, amchi kaklut kôr!” Tannem tankam polleun mhonn’lem: “Vochat ani iadnikank tumchem ang dakhoiat.” Ani thõi veta astananch te nitoll zale. Tantlo eklo, apunn boro zalo mhonn dekhona fuddem, Devak vhoddlean vakhannit portun ailo, ani Jezucheam pãiam-xim sorpottun tannem Tache abhar man’le; ani to êk Samariekar aslo. Hem polleun Jezun taka oxem mhonn’lem: “Dha-i zann nitoll zale, nhoi? Her nnov khõi pavle tôr? Hea porkea mon’xa bhair porot ieun Devachi tokhnnai kortolo konnuch na zalo!” Ani Tannem taka mhonn’lem: “Utth ani voch; tujea bhavartan tuka boro kelo.” Devachem Raj kedna ieunchem asa tem Farizevamnim Jezu lagim vicharlem tedna, Tannem oxi zap dili: “Nodrek poddtat tosleam khunnamnim Devachem Raj ieunchem na. ‘Hem, polle, hanga asa; tem, polle, thõi asa’, oxem lôk mhonncho na. Tôr zanno zaiat: Devachem Raj tumchê modem asa.” Ani Tannem Apleam xisank sanglem: “Mon’xachea Putacho êk dis tori polleunk tumi axetelet toslo dis ietolo, punn tumkam to polleunk mellcho na. Tedna konn tumkam sangtolo: ‘Ho thõi polle!’ vô ‘Hangasôr polle!’ Bhair soronakat ani tanchê pattlean vochonakat. Zoxem zoglavnnem marta tedna, tacho loklôk ontrallachê êkê ximer thaun dusrê ximer porian poddta, toxench, Tacho Dis ieta tedna, Mon’xachea putachem zatelem. Punn tea adim To zaitem sôstolo ani hi atanchi pinddka Taka bhairaiteli: hi Devachi khuxi. Zoxem Noachea kallar zalem, toxench Mon’xachea Putachea kallar zatelem. Noa tarvant bhitôr sorlo to dis porian lôk khata-pietalo, logn zaun ani logn korun diun aslo; tea mhonnosôr poriallo ailo ani tachê vorvim tim sogllim nattak zalim. Ani zoxem Lotacheam disamnnim ghòddlem, toxench zatelem. Lôk khata-pietalo, viktalo ani viktem ghetalo, laita-roitalo ani ghoram bandtalo; punn jea disa Lot Sodomantlo bhair sorlo, tea disa sorgar thaun ujea-gondhokacho pavs poddun tachê vorvim soglleancho bhosm zalo. Mon’xachea Putachi prokasnni zateli tea disa toxench zatelem. To Dis ietôch konn pattsar astit ani tanchi mustaiki ghorant asot zalear, ti vhorunk tãnnim sokol ieunchem nhoi; toxench xetant astit tãnnim kiteakuch lagun porot vechem nhoi; Lotachê bailek kitem ghòddlem tacho ugddas korat. Aplo jiv samballunk sôdtat tim aplo jiv ibadd kortelim, ani aplo jiv ibadd kortat tim aplo jiv vanchoitelim. Hanv tumkam sangtam: tê rati dogam zannam eka antrunnar nidlelim astelim, punn tantlea ekleak vhortele ani dusreak sanddtele. Dogi bailô eka dantear dollun asteleô, punn tantlê eklêk vhortele ani dusrêk sanddtele.” Tãnnim Jezu lagim vicharlem: “Saiba, khõi?” Ani Tannem tankam sanglem: “Moddem asot thõi gid-ui ektthovtele.” Sodanch magnnem korchi goroz ani jiv sôddcho nhoi mhonn Jezun xisank hi vopar sangli: “Eka nogrant konn-êk nitidar aslo; taka Devachi bhirant, nhoi mhonn mon’xachi bhidda-i nasli; ani tea nogrant konn-ekli vidva-i asli. Tachê-xim ieun-ieun ti oxi magtali: ‘Neai korun mhojea dusmanachea hatantli mhaka nivar.’ Punn zaito kall tannem tichem aikunk na. Tori magir tannem apnnach bhitôr mhonn’lem: ‘Hanv Devak bhienam ani mon’xachi-i bhidda hanv dhorinam khoro; toripunn hi vidva mhaka tras dita dekhun, hanv tika neai korun ditolom; na zalear ieun-ieun xekim ti mhozo jiv khateli.’ ” Somian fuddem mhonn’lem: “To khotto nitidar kitem sangta taka chit diat. Tôr Dev Apnnak dis-rat ulo marteleam Apleam vinchleleank sosnnikaien kan diuncho na ani tancho neai korun tankam nivarcho na? Hôi, Hanv tumkam sangtam, To tankam veginch nivartolo. Toripunn Mon’xacho Put ietolo tedna, Taka sonvsarant bhavart melltolo kai?” Apunn promannik mhonn somzun, apnnancheruch patietalim ani herank lekhinaslim tosleam kãi mon’xank Tannem oxi êk vopar sangli: “Dog monis, eklo Farizêv ani dusro dônddvosuldar, magnnem korunk Devmondirant choddun gele. To Farizêv nitt ubo ravun oso aplea monant magnnem kortalo: ‘Deva, hanv Tuka dhin’vastam, kiteak hanv heram mon’xam sarko nhoi; te chor-nagovnne, oneaii, pordvari; he-tea dônddvosuldara-i sarko nhoi hanv. Satolleak don pavttim hanv upas kortam, mhojê kodde asa titleacho-i dhavo vantto farik kortam.’ To dônddvosuldar aplo pois ubo ravlo; dolle porian sorgar lavunk taka kalliz zaina zalem; punn horddem boddoun-boddoun to mhonntalo: ‘Deva, hanv êk patki! mhoji kaklut kôr!’ Hanv tumkam sangtam, ho monis Devak manovlolo zaun aplea ghora portolo, punn to dusro Devak manovlolo zaunk na. Kiteak apnnankuch unch kaddtat tankam Dev khala uddoitolo, apunnuch khaltim zatat tankam Dev unch kaddtolo.” Bhurgeam-ballank Jezun hat lavchê khatir, Tachê-xim lôk tankam gheun ietalo; hem polleun xis tankam addaunk lagle. Tedna Jezun team bhurgeank Apnna-xim apoun mhonn’lem: “Bhurgeank Mhojê-xim ieunk diat ani tankam addainakat; kiteak Devachem Raj osleanchench. Bhurgea bhaxen zaun Devachem Raj mandun ghenant tim tantum bhitôr sorchinch nant.” Odhikareantlea eklean Jezu lagim oxem vicharlem: “Borea Guruji, Sasnnik Jivit mellun gheunk hanvem kitem korunk zai?” Jezun taka mhonn’lem: “Mhaka boro kiteak mhonntai? Ekleach Devak kaddun, dusro konnuch boro nhoi. Tum adnea tôr zannoi: ‘Jivexim marum noiê; pordvar korum noiê; chorum noiê; lottik govai dium noiê; tujea bapaik ani avoik man di.’ ” Tea mon’xan Taka zobab dilo: “Bhurgeponnim-san hem sogllem hanv pallun ailam.” Hem aikun Jezun taka sanglem: “Anink ekuch tuka unnem: tujê kodde asa titlem-i vik ani duddu goribank di, ani tuka sorgar tthevo melltolo; magir ie ani Mhozo pattlav kôr.” Him utram aikun, to bhov khontovlo kiteak to khup girest aslo. Oso taka polleun Jezun mhonn’lem: “Girestkai asleleank Devachea Rajeant bhitôr sorunk kitlem mhonn kotthin! Devachea Rajeant êk girest monis bhitôr sorchê poros, eka unttak suiechea birddeantlean vochunk odik sompem.” Aikoteleamnim mhonn’lem: “Toxem zalear, konnak taronn melltelem?” Tannem zap dili: “Jem mon’xam kodde ghoddona, tem Deva lagim ghòddta.” Tedna Pedrun mhonn’lem: “Polle, ami sogllem sanddun Tuzo pattlav kela.” Jezun taka portipall kelo: “Konn-ui Devachea Rajea pasot ghor-dar vô bail, vô bhav-bhoinni, vô avoi-bapui vô bhurgim-ballam sanddtit zalear, Hanv tumkam khorench sangtam, tim hea kalla-iugant hachê-kui zaitem ogllem, ani ieta tea kall-iugant sasnnik jivit ghetelim.” Bara zannank kuxin vhorun, Jezun mhonn’lem: “Ami atam Jeruzaleak choddun vetanv, ani Mon’xachea Puta sombondim provadeam udexim boroil’lem asa titlem-i sompadon ietelem. Taka videxeanchê adhin kortele, he Tacheô moskoreô kortele, Taka jerbond ditele, Tacher thimpi uddoitele, ani jerbond dilea uprant Taka jivexim martele, ani tisrea disa To punorjivont zatolo.” Punn hantlem kãich te somzunk nant ani heam utrancho ôrth tankam lipon urlo ani kitea vixim Jezu oxem uloitalo tem te somzukuch nant. Jezu Jerikea lagim pavta astanam, konn-eklo kurddo rosteachê deger bhikek bosun aslo. Khup lôk tevxilean veta tacho avaz aikun, tem kitem gai mhonn tannem vicharlem. Nazaretkar Jezu tennem veta mhonn taka sangtôch, to arddun mhonnunk laglo: “Jezu, Davidachea Puta, mhoji kaklut kôr!” Ani fuddem vetalim tãnnim ogo rav mhonn taka bobatt keli. Punn odikuch arddun to mhonnot ravlo: “Davidachea Puta, mhoji kaklut kôr!” Jezu thamblo ani taka Apnna-xim haddunk lavun, to lagim sortôch, Tannem Tachê kodde vicharlem: “Hanvem tuka kitem kel’lem zai?” Tannem mhonn’lem: “Saiba, mhaka novean nodor ie-xi kôr.” Jezun taka sanglem: “Novean nodor ghe. Tujea bhavartan tuka boro kelo.” Ani rokddich taka nodor aili ani Devachi tust korit to Tachê pattlean gelo. Ani hem polleun, sogllea lokan Devak vakhannlo. Jezu, Jerikeant bhitôr sorun, nograntlean cholot vetalo. Zakêv nanvacho mukhel dônddvosuldarantlo eklo ani astik monis ovchituch thõi pavlo. Jezu konn to, Zakêv polleunk sôdtalo. Punn angan mottvo dekhun, lokachê khettik lagun tachean nozo zalem. Tea pasot Jezuk polleunchê khatir to fuddem dhanvun vochun eka rumbddichea zhaddar choddlo, kiteak Jezu tê vatten vecho aslo. Tea zagear pavtôch, Jezun voir nodor marli ani taka polleun mhonn’lem: “Zakêv, vegim denvun ie, tôr az Mhaka tumger vochun ravunk zai.” Ani to vegim-vegim denvlo ani khuxalkaien Taka apnnager soniman kelo. Hem polleun sogllea lokan gunngunnun mhonn’lem: “Patki mon’xager ravunk gela mum rê ho!” Soglleanchê nodrek ubo ravun Zakevan Somiak mhonn’lem: “Saiba, polle, mhaka asa titleacho-i ordo vantto hanv goribank ditam, ani hanvem konnank fosoileant zalear chovpott portun ditam.” Jezun taka mhonn’lem: “Az hea ghorak taronn ailem, kiteak ho-i Abrahamacho put. Tôr Mon’xacho Put sanddleleank sodun kaddunk ani taronn diunk aila.” Lôk hem aikota astana, Tannem anink êk vopar sangli, kiteak To Jeruzaleak lagim pavlolo ani Devachea Rajeachi veginch prokasnni zateli mhonn tim somzotalim. Mhonntôch Tannem sanglem: “Konn-êk unch kulliecho monis apnnak raza korun gheun porot ieunchê khatir eka poixilea desant gelo. Apleam dha sevokank apoun haddun, tankam tannem dha bhangra-nanne vanttun dile ani mhonn’lem: ‘Hanv portun ie-sôr, he gheun vepar-dhondo korat!’ Tache ganvbhav taka zolltale ani tachê pattlean tãnnim niropi dhaddun oxem sanglem: ‘Ho monis amcho raza zal’lo amkam naka.” Toripunn to raza zaun porot ailo, ani jeam sevokank tannem duddu dil’lo, tantlea zonn-eklean kitlo-so veparacho adav kaddlo tem polleunk tannem tankam apounk laile. Poilean ieun mhonn’lem: ‘Dhonia, tujea eka bhangra-nannean dha bhangra-nanne zôddle.’ Tannem zobab dilo: ‘Xabas, borea sevoka! ilê-xê vostunt tum visvaxi zaloi dekhun hanv tuka dha nograncher odhikar ditam.’ Ani dusrean ieun mhonn’lem: ‘Dhonia, tujea eka bhangra-nannean panch bhangra-nanne zôddle.’ Ani haka-i tannem mhonn’lem: ‘Ani tuka hanv panch nograncher odhikar ditam.’ Magir tisrean ieun mhonn’lem: ‘Dhonia, tujo bhangra-nanno ho polle asa; eka rumalak bandun hanvem to kuxin dovorlolo; kiteak mhaka tuji bhirant asli, tôr tum khôr monis; tunvem dovrunk nãi tem tum uklun vhortai ani tunvem vompunk nãi tem tum lunvun ubartai.’ Razan taka zap dili: ‘Arê noxttea chakra, tujinch utram dhorun tujer hanv khastichem formonn martam. Hanv khôr monis, hanvem dovrunk na tem hanv uklun vhortam, ani hanvem vompunk na tem hanv lunvun ubartam mhonn tum tôr zanno asloi. Toxem zalear, mhozo duddu tunvem benkent kiteak ghalo nãi? Porot ieun kolantora soit hanv to gheto aslom.’ Ani thõi asleleank tannem sanglem: ‘Hachê koddcho to bhangra-nanno kaddun gheiat ani dha bhangra-nanne asat taka to diat.’ Ani tãnnim taka mhonn’lem: ‘Dhonia, tachê lagim dha bhangra-nanne asat mum!’ ‘Tôr hanv tumkam sangtam: jea konna lagim asa, taka anink-ui melltelem; punn jea konna lagim na, tachê lagchem asa tem-i kann ghetele. Punn hanv tancho raza zal’lom naka asleleam team mhojeam dusmanank hangasôr haddat ani mhojeam dolleam hujir tancho jiv kaddat.’ ” Oxem uloilea uprant, Jeruzaleak choddun vochpachi vatt dhorun, Jezu fuddem gelo. Ani oxem ghòddlem: Olivet mhonntat tea Dongra sorxem asto Betfage ani Bethaniê lagim pavtôch, Tannem dogam Apleam xisank dhaddle oxem sangun: “Tumchê samkar asto gramant vochat; thõi bhitôr sortanch, ozun porian tacher konnuch bosunk na toslem, ek gaddvachem xingrum, bandlelem tumkam melltelem; tem sôddun hanga haddat. ‘Taka kitea pasot tumi sôddtat?’, oxem konn-ui tumkam vicharit zalear, Somiak tachi goroz asa mhonn taka sangat.” Dhaddlele te gele ani, sanglelem toxem, ek gaddvachem xingrum tankam mell’lem. Tea xingrak te sôddtastana, tacheam dhoniamnim tankam mhonn’lem: “Tea xingrak kiteak sôddtat tumi?” Tãnnim oxi zap dili: “Somiak tachi goroz.” Ani tãnnim taka Jezu-xim haddlem; aplim avoronnam tea xingracher ghalun, Jezuk tacher bosoilo. To fuddem veta astana, lôk aplim vostram vatter patllaitalo. Ani Olivet Dongrachê denvtê lagim pavtôch, Tacheam xisancho vhôdd zomo, apnnem dekhleleam soglleam Tacheam vismitam pasot, vhoddlea tallean, khuxalkaien Devak oso porkondunk laglo: “Sorvesporachea nanvan ieta tea Razak zôi! Sorgar xanti! Bhov Vortea Devak mhoima!” Loka modleam kãi Farizevamnim Taka mhonn’lem: “Guruji, Tujeam xisank oge ravat mhonn formai.” Ani Tannem tankam oso portipall kelo: “Hanv tumkam sangtam: him ogim ravtit zalear, fator porian arddunk lagtele.” Ani lagim pavtam, Xar nodrek poddtôch, tachê voir dukam golloun Tannem mhonn’lem: “Aichea disa tori, tuka xantik pavoupacheo vattô tunvem mat ollkhun ghetloleôi zalear! Punn na; tujeam dolleank teô atam liploleô asat. Hôi, tuje dusman tujê bhonvtim matiechim durgam ubartele, tuka veddho ghaltele, ani soglleam vattamnim tuka chinrgôtt’tele, osle tujer dis ietele; te tuka ani tujeam kottam bhitôr asleleam tujeam bhurgeam-ballank dhornnir apttitele; ani tujê bhitôr fatrar fatôr ubo urunk te diunche nant; kiteak Dev tuka bhett diunk ailo to dis tunvem ollkholo nãi!” Ani Devmondirant bhitôr sorun thõi vikri korteleank oxem mhonnun To bhair ghalunk laglo: “ ‘Mhojem Ghor magnneachem ghor’, oxem Povitr Pustokar boroil’lem asa, punn tem tumi choranchi dhôl kelea.” Ani dispotto Devmondirant xikoit aslo. Mukhel iadnik, xastri, ani porjeche vhoddil Tacho nas korunk sôdtale; punn kitem ani koxem korchem tem tankam somzoch naslem, kiteak sogllo lôk Tacheam utrank bhul’lolo. Êk dis To Devmondirant lokak xikovnn dita ani xubhvhortoman porgôtt’ta astana, mukhel iadnik ani dhormxastri zannteam borabôr ektthãi zaun aile ani Tachê lagim oxe uloile: “Amkam ek sang: khõichê sot’ten hem tum kortai? Vô konnem dilea tuka hi sot’tea?” Jezun portipallun tankam mhonn’lem: “Hanv-ui tumchê kodde ekuch vichartam, tem tumi Mhaka sangat: Juanvacho batism sorgar thaun vô mon’xam thaun ailo?” Punn te apnnanchêch bhitôr oxem torkunk lagle: “Ami ‘sorgar thaun’ mhonn’lem zalear, to amkam mhonntolo: ‘Toxem zalear, kiteak tumi Juanvak mandun gheunk na?’ Punn ami ‘mon’xam thaun’ mhonn’lem zalear, soglli porza amkam fatraiteli; tôr Juanv êk provadi mhonn tankam dubhavuch na.” Tea pasot tãnnim oxi zap dili: “To batism khõicho to ami nokllonv.” Tedna Jezun tankam sanglem: “Tôr khõichê sot’ten Hanv heô vostu kortam, tem Hanv-ui tumkam sangina.” Tedna Tannem lokak hi vopar sangunk suru keli: “Konn-eka mon’xan êk dakancho mollo lailo ani, kullvaddeank to kumlleak diun, zaito kall apunn poixilea ganvant vochun ravlo. Vêll pavtôch, molleachea pikacho aplo vantto kullvaddeam koddcho gheunchê khatir tannem eka chakrak tanchê-xim dhaddlo. Tãnnim taka dhorun mar dilo ani rikamo portun dhaddlo. Novean tannem dusrea eka chakrak dhaddlo; punn tãnnim haka-i mar dilo, beman kelo ani riteam hatamnim portilo. Tea uprant tisrea eka chakrak dhaddlo; tãnnim taka ghai poddo-sôr marun bhair ghalo. Tea molleachea dhonian mhonn’lem: ‘Atam kitem korum? Mhojea opurbaiechea putak dhaddtolom; taka polleun te ghoddiek tachi bhidda dhôrtele.’ Punn kullvaddeamnim, putak pollena fuddem, apnnanchê bhitôr chintun mhonn’lem: ‘Ho tacho daiji; taka jivexim marum-ia ani daiz amchem zatelem.’ Ani tãnnim taka dhorun mollea bhair oddun haddlo ani jivexim marlo. Atam molleacho dhoni tankam kitem kortolo? Ieun team kullvaddeancho bhosm kortolo ani aplo mollo dusreanchea hatant ditolo.” Hem aikun, tãnnim mhonn’lem: “Dev hem nirmum noiê.” Punn Tannem tancher nodor marun mhonn’lem: “Mhonntôch oxem boroil’lem asa tem kitem? ‘Zo fatôr bandpeamnim soddun dil’lo toch zalo konnxea-sondhicho fatôr.’ Jim konn hea fatracher adllun poddtat, tanche kuddkean’kuddke zatele, ani jeam konnancher to fatôr poddot, tanchi pudd zateli.” Tea vellar mukhel iadnik ani dhormxastri Tacher hat ghalunk sôdtale, punn porjek bhiele; Tannem hi vopar apnnank lavun sanglea mhonn te bore somzole. Ani razpalanuch Tacher aplo odhikar ani podvi cholounchê khatir, Jezuk utrak sampddaunk ani razpalachê adhin korunk tãnnim ievjilem; dekhun te Taka tellun asle. Oxem astam, satvik mon’xanchem ddhong gheiat mhonn xikoun, tãnnim Tachê-xim bhedi dhaddle. Hãnnim ieun Tachê lagim oxem vicharlem: “Guruji, tum sarkem tench uloitai ani xikoitai, mon’xanchem tondd pollenãi, ani Devachi vatt khoreponnan xikoitai mhonn ami zannonv. Amchean Somrazak dôndd farik korum-ieta ki na?” Punn Tannem tanchi naddvidhea ollkhun oso portipall kelo: “Êk dinar Mhaka haddun diat, polleum-ia. Hacher asa tem rup konnachem? ani nanv konnachem?” Tãnnim zap dili: “Somrazachem.” Tedna Tannem tankam sanglem: “Borem tôr, Somrazachem Somrazak diat, ani Devachem tem Devak diat.” Ani Tachea ulovpant Taka loka hujir sampddaunk tanchê lagim ghòddunk na; ani Tachea zobaba vixim te ojap zale ani ogech ravle. Ekdam kãi Saduki Jezu-xim aile: te punorjivontponn na mhonntat tosle monis. Tãnnim Taka ho proxn ghalo: “Guruji, Moizesan oxem amkam boroun dovorlam: ‘Konn-ekleacho logn-zal’lo bhav bhurgem-ball nastana morot zalear, tachea bhavan tachê bailê lagim logn zaunchem ani aplea bhavak sonsôt utpon korchi.’ Tôr sat bhav asle. Poilo logn zalo ani burgem-ball nastana melo. Magir dusro, ani tachê uprant tisro tichê lagim logn zalo; têch porim sat-ui zann sonsôt dovrinastana mele. Soglleam-vôn nimanni, bail-ui meli. Tôr satam-i zannanchi potinn ti zal’li mhontôch, mel’lim mon’xam punorjivont zatelim tedna, tanchê bhitorlea konnachi potinn zateli ti?” Jezun tankam sanglem: “Hea kall-iugantlim mon’xam, dadle logn zatat ani bailank logn korun ditat; punn tea dusrea kalla-iugak ani mel’leantlea punorjivontponnak jim konn purtim zal’lim melltit, tanchê modem logn zavop ani logn korun divop aschench na; tanchean anink morunk zaina, tim devdutam sarkim, ani punorjivont-ponnachim bhurgim dekhun, tim Devachim bhurgim. Mel’lim mon’xam portim jivont zatat mhonn Moizesan legun jhilkuttachi khobor sangta thõi dakhoilam; tôr thõi Sorvesporak to Abrahamacho Dev, Izakacho Dev, Jakobacho Dev mhonnta; mhonntôch, meleleancho nhoi, bogor jiveancho Dev To; Tachê mukhar sogllim jivim.” Xastreantleam kãi zannamnim mhonn’lem: “Guruji, tunvem borem sangli.” Ani tea uprant konnakuch ani-anink Tachê kodde kosle-i vichar korunk kalliz zaunk na. Tannem tankam mhonn’lem: “Krist Davidacho Put mhonn lôk koxem mhonnta? Tôr Stotranchea Pustokar Daviduch oxem mhonnta: ‘Mhojea Somiak Sorvesporachem utor hem: Mhojea uzvea hata bos! Tujeam dusmanank tujeam pãiam tolla ghaltam.’ Mhonntôch David taka aplo Somi mhonnta; toxem zalear, tacho put to koso zata?” Sogllea lokak aikonk ieta toxem Tannem Apleam xisank sanglem: “Dhormxastream vixim chotur ravat; lamb-lamb angavlim ghalun bhonvunk, tinttear lokan apnnank manan kel’le salam’ gheunk, devsthanamnim voileam-poileam zageancher bosunk ani ratcheam jevnnank unch-unch svatô vinchunk tankam zoboruch borem lagta; lamb magnneanchem song gheun, vidvanchim ghoram-daram te khaun uddoitat. Tankam soglleam-vôn odik khôr zhôddti asteli.” Dhormpettent aplem dan-dennem ghaltalim team astik mon’xank Jezun chotraien pollelim; ani konn-eklê gorib-dolldirê vidvek-ui don lepton ghaltana Tannem dekhli ani mhonn’lem: “Hanv tumkam khorench sangtam, hê gorib vidven soglleam poros odik ghalem; tôr hãnnim somestamnim apnnank ogllem aslem tantlem kaddun Devak somorpil’leam danam modem ghalem, punn hinnem apnnak unnem aslem tantlem, aplea jevnna-khannak nibel zai aslem tem-i ghalem.” Devmondirachi gozal korun, tem kai-boream fatramnim ani Devak bhettoileam danamnim nettoilam, oxem mhonnteleank Jezun sanglem: “Tumi jem polletat, tacho fatrar fatôr ubo urcho na tosle dis ietele, tem samkem moddun uddoitele.” Tãnnim Tachê lagim vicharlem: “Guruji, hem kedna ghòddtelem ani heam ghòddnneancho vêll lagim pavla mhonn ollkhunk kosli khunna zateli?” Tannem mhonn’lem: “Tumkam konnem fottoina zaunk chotraien ravat; tôr zaite zann Mhojea nanvan ieun ‘Hanvuch to’ ani ‘kall lagim pavlo’, oxem mhonntele; tumi tanchê pattlean vochonakat. Tumi zhuzanchi ani bonddanchi khobor aikoxeat tedna, akantonakat; hem poilem ghoddonkuch zai khorem, punn xevôtt rokddoch ieuncho na.” Magir Tannem tankam sanglem: “Raxttracher raxttr ani rajeacher raj uprastelem; hanga-thõi vhoddleô bhikampi zateleô, hanga-thõi dukôll poddtolo, ani voxeachi pidda posorteli; ontrallar bhirankull ghòddnneô ani vhoddleô khunna dixtti poddteleô. Punn hem sogllem zaunchê adim, Mhojea nanva khatir tumchea angar hat ghaltelim, tumkam devsthananchê adhin korun, bondkhonnint ghalun, razam ani razpalanchea fuddeant oddun vhorun, tumkam dhumallo ditelim. Mhojê vixim govai diunk ho tumkam soêg melltolo. Mhonntôch tumchi rakhônn koxi korchi ti adim-fuddench tumi chintchem nhoi mhonn ghott monan dhôrat. Tôr Hanv tumkam oxi jib ani zannvai ditolom, ki ti addaunk ani ticher portem ulounk tumcheam soglleam dusmanam kodde ghòddchem na. Tumcho avoibapui, bhavbhoinn, soirim-dhairim, ixtt-mitr tumkam dhorun ditelim ani tumchê bhitorleam kãi zannank jivexim martelim; ani Mhojea nanva pasot sogllim tumcho dvês kortelim; punn tumchea matheachea eka kensacho legun nas zauncho na. Thir ravat, ani Dev tumkam vattaitolo. Jeruzaleak foujen veddho ghal’lo tumi polletelet tedna tachem ghorttann pavlem mhonn somzat. Tedna Judeiant asat tãnnim dongrancher pollun vechem ani Xarant asat tãnnim bhair sorun vechem, ani kheddeam-ganvamnim asat tãnnim Xara bhitôr vechem nhoi; tôr sudd ghevpache dis he ani boroil’lem asa tem sogllem atam pallon ietelem. Te dis ietôch gorbest bailanchem ani ballkank dud diteleanchem kotta! Desacher bhoinkor attevitte ietele ani hê pinddkecher krodhachi xirôntt poddteli ani, videxeancho kall bhoro-sôr, tim torvarin moron poddtelim ani tankam koidi korun soglleam raxttram modem tanchi duspôtt zateli ani videxi Jeruzaleak pãiam tolla mostitele. Suriacher, chondrimacher ani noketrancher khunna zateleô. Somdir gorozta to aikun ani lharam uchamboll zaleant tim polleun, sonvsarar raxttram sarkinch ghabortelim ani tollmolltelim. Prithumecher ieunchem asa tachea huskean kampun mon’xancho jiv vetolo virghun, tôr ontrallacheô xokti kolkolteleô. Tedna Mon’xacho Put podven ani vhoddlê mhoimen eka kupa modem ietana tim dekhtelim. Hem ghoddonk suru zata tedna ghott ravat ani tumcheô tokleô uklun dhôrat, kiteak tumchi soddvonn lagim pavlea.” Ani Tannem êk vopar sangli: “Anjirachea zhaddak ani heram soglleam zhaddank polleiat. Tankam kombreo futt’tat tedna gim’ lagim pavla mhonn tumkam kollon ieta; toxench heô soglleô vostu ghòddleleô tumi polletôch, Devachem Raj lagim pavlam mhonn zanno zaiat. Hanv tumkam khorench sangtam: hem sogllem ghòddlea bogor hi pinddka ontorchi na. Ontrall ani prithum’ sortelim, punn Mhojim utram sorchim nant. Tumi tumchi chotrai dhôrat; na tôr, kamcharak lobhdon, bebdikai korun, ani hea jivitache huske kaddun, tumchim kallzam zodd zatit ani to Dis tumcher okosmat pavot. Akhê prithumer asleleam soglleam mon’xancher fas koso to ietolo. Ieuncheô asat team ghòddnneam modlean surokxitponnim fuddem vochunk ani Mon’xachea Puta mukhar bhiranti vinnem ubim ravunk tumkam ghottai mellchê khatir, sogllea vellar magnnem korun zagrut ravat.” Heam disamnim Jezu dis-bhôr Devmondirant xikovnn diit aslo, punn rati kaddtalo xara bhair, Olivet mhonnlelea Dongrar. Tachem utor aikunchê axen fantearuch utthun sogllo lôk Tachê-xim Devmondirant ietalo. Pask mhonntat ti, Fug-nasloleam Unddeanchi Porob lagim pavtali; ani mukhel iadnik ani dhormxastri Jezuk koso dhorun jivexim marcho tem polletale, punn tankam porjechi bhirant asli. Judas, add-nanvan Iskariot, barantlo eklo, hachea kallzant Soitan riglo. Jezuk koxê bhaxen tanchea hatant dhorun diuncho tê vixim tannem vochun mukhel iadnikam ani Devmondirancheam sordaram kodde gozal-mat keli. Te khuxal zale ani taka duddu diunk te kobul zale. Hannem utor dilem; ani lokak kollonastana Taka dhorun diunk boro soêg to polleun aslo. Xekim Paskacho menddro marun bhettouncho to, Fug-nasloleam Unddeancho dis pavlo. Pedruk ani Juanvak Jezun oxem sangun dhaddle: “Ami Pask-Jevonn korchê khatir, tumi vochun tem toiar korat.” Tãnnim vicharlem: “Khõi toiar korchem? Tuji khuxi kitem?” Tannem tankam sanglem: “Aikat: tumi Xarant bhitôr sortana udkacho kollso gheun veto konn-êk monis tumkam melltolo; to bhitôr sorta tea ghora porian tachê pattlean vochat, ani tea ghorachea dhoniak oxem mhonnat: ‘Guruji tujê lagim vicharta: Mhojeam xisam borabôr Hanvem Pask-Jevonn korunk soireancho vosro khõi asa?’ Ani to tumkam mall’ier êk vhoddlo borê bhaxen jevnnak manddlolo vosro dakhoitolo; thõi toiar korat.” Te gele ani Tannem sanglelem toxem tankam mell’lem; ani tãnnim Pask toiar kelem. Vêll zatôch Jezu jevnnak boslo ani Tachê sangatim Tache apostl. Tannem tankam sanglem: “Koxtt sõschê adim tumchê sangatim hem Pask-Jevonn korunk Hanv otrekun otrektalom. Khorench tumkam sangtam: hea Paskachi Devachea Rajeant sompadnni zai-sôr, Hanv hem Pask-Jevonn novean korcho na.” Ani Tannem patr ghetlem ani Devak dhin’vasun mhonn’lem: “Hem gheiat ani tumchê bhitôr vanttat. Khorench tumkam sangtam: Devachem Raj ie-sôr dakancheam follanchem hea fuddem Hanv anink pieuncho na.” Ani Tannem unddo ghetlo, Devak dhin’vasun to môddlo, ani to tankam dilo ani mhonn’lem: “Hi mhoji kudd: Hanvem ti tumchê pasot somorpilea. Mhozo ugddas korun hem tumi korat.” Têch porim, jevonn zatôch, Tannem patr gheun mhonn’lem: “Hem patr Mhojea rogtan xik’ko marlolo Devacho novo korar: hem Mhojem rogot tumchê pasot Hanvem varoilam. Tori astana, Mhaka dhorun diteleacho hat Mhojê borabôr hea mezar asa. Devan tharailam tea pormannem, Mon’xacho Put veta khoro, punn zo monis Tacho ghat gheunk veta, tea mon’xachem kotta!” Tanchê modlo oxem konn korit kai mhonn te ekamekak vicharunk lagle. Tanchê bhitôr konnak soglleam poros vhôdd mhonn lêkhcho, hê vixim tanchê modem êk vivad-ui zalo. Tedna Tannem tankam sanglem: “Raxttranche raza aplea lokacher apli podvi choloitat, ani lokacher odhikar asa tankam ‘borem-dekhto’ mhonntat. Tumchê modem oxem zaum noiê! Portench zalear, tumchê modem konn vhoddlo asot to soglleam poros dhaktto zal’lê porim zauncho; ani konn odhikari asot to chakôr zal’lê porim zauncho. Tôr konn vhoddlo, jevnnak bosta to, vô tachi chakri korta to? Jevnnak bosta to ki na? Hanv tôr chakri kortelea sarko tumchê modem asam. Mhojeam upodreamnim visvaxi-ponnim Mhojea sangata ravleat te tumich; hea pasot Mhojea Bapan zoxem Mhaka Raj nemun dilam, toxench Hanv tumchê sorim kortam; tumi Mhojea Rajeant Mhojea mezar khaun-pieun astelet ani Israelacheam bara kullanchi mon’subi korunk xinvaso-nancher bostelet. Simanv, Simanv, polle, gonva porim tumam soglleank challunk Soitanan sot’tea magun ghetlea; punn tuzo bhavart ddonvddollna zaunk Hanvem tujê pasot magnnem kelam, ani tum Mhojê thãi porot ietôch tujeam bhavank ghott kôr.” Tannem mhonn’lem: “Somia, Tujê borabôr bondkhonnintuch vochunk nhoi, punn morunk-ui hanv toiar.” Punn Tannem mhonn’lem: “Pedru, Hanv tuka sangtam: az, kombean sad ghalchê adim, Mhaka ollkhoch nãi mhonn tin pavttim tum negar vetoloi.” Ani Tannem tankam mhonn’lem: “Tumkam bhokxem, bhuti ani vhannô nastana Hanvem dhaddle tedna tumkam kitem-punn unnem zalem?” Tãnnim zap dili: “Kãich unnem zaunk na.” Tannem sanglem: ‘Tôr atam, bhokxem asa tannem tem hatant gheunchem, bhuti asa tannem toxench korchem; torvar na tannem aplem avoronn vikun êk torvar vikti gheunchi. ‘Khotteam modem taka lêkhlo’, oxem jem Povitr Pustokar boroil’lem asa, tem Mhojê sorim sompadon ieunchem mhonn Devachi khuxi. Hôi, Mhojê vixim jem kitem boroil’lem asa, tem pallon ieta.” Tãnnim mhonn’lem: “Somia, heô polle don torvari asat.” Ani Tannem mhonn’lem: “Puro.” Ani bhair sorun, Jezu Aplê sonvoiê pormannem Olivet Dongrar vochunk laglo; Tache xis Tachê pattlean vetale. Tê svater pavtôch, Tannem tankam sanglem: “Tallnnent poddona zaunk tumi magnnem korit ravat.” Ani fatrachê oddi itlo Apunn tanchê-sun pois gelo ani dimbier poddun oxem magnnem korunk laglo: “Bapa, Tuji khuxi zalear, Mhojê velem hem patr pois kadd. Toripunn Mhoji khuxi nhoi, Tujich khuxi zaum-di.” [ Tedna Taka dhir diunk sorgar thaun êk devdut Taka dixtti poddlo. Ani soglloch kollvollon, odik utsuktaien To magnnem korit aslo. Ani dhornnir gollto rogtacheam datt thembeam vori zalo Tacho gham’.] Ani magnnem kortôch, dhuki-khontin thokon, xisam sorxem utthun ie zalear, te khontin nidlele Taka mell’le. Ani Tannem tankam mhonn’lem: “Tumi nidtat kiteak? Tallnnent poddona zaunk utthun magnnem korat.” Oxem uloita thõich astanam, ovchit khup lôk dixtti poddlo ani barantlo eklo, Judas nanvacho, tanchê fuddem ietalo; to Jezucho umo gheunk lagim sorlo. Tedna Jezun taka mhonn’lem: “Judas, umo gheun Mon’xachea Putak poradhin kortai mum tum?” Tachê bhonvtim asleleamnim, kitem zata tem polleun, Taka vicharlem: “Somia, torvar ubarchi?” Ani tanchê bhitorlea eklean porom’-iadnikachea chakracher apli torsad marun tacho uzvo kanuch katorlo. Jezun uloun mhonn’lem: “Itlean puro.” Ani tachea kanak hat lavun taka boro kelo. Apnnak dhorunk ail’leam mukhel iadnikank, Devmondiracheam sordarank ani zannteank Jezun mhonn’lem: “Tumi torsadi ani tonnke gheun ieunk, Hanv konn pundd kitem? Hanv dispotto tumchê modem Devmondirant aslom tedna, tumi Mhojer hat ghalunk na! Punn ho tumcho vêll ani kallokachi podvi.” Jezuk dhorun vhelo ani porom’-iadnikager pavoilo. Pedru pois-pois ravun Tachê pattlean vetalo. Razangnnant modekot dhogtto korun bhonvtim bosleleam modem Pedru vochun boslo. Konn-eklê chakornnin taka dhogtteak boslolo dekhlo ani boro korun taka polleun mhonn’lem: “Ho-i tachê borabôr aslo.” Punn tannem na mhonn bhasun portipall kelo: “Agô, hanv taka ollkhoch nam!” Ani matso vêll uprant, eklean taka polleun mhonn’lem: “Tum-vui team mon’xantloch.” Ani Pedrun mhonn’lem: “Arê mon’xa, hanv nhoi!” Ani sumar êk hor uprant, anink eklo bhasunk laglo: “Ho-i tachê borabôr aslo mhonn dubhav na; ho-i Galileiacho mum rê!” Ani Pedrun mhonn’lem: “Arê, tum kitem mhonntai tem hanv nokllom.” Ani rokddoch, to uloita astananch, kombean sad ghalo. Ani porton, Jezun Pedrucher dixtt ghali. Tedna “kombean sad ghalchê adim tin pavttim tum Mhaka ollkhonãi mhonn sangtoloi”, oxem jem Somian sanglelem, tacho Pedruk ugddas ailo, ani bhair sorun Pedru dukamnim roddlo. Jezuk dhorun asle te Taka marun Tacheô chesttaiô-moskoreô korunk lagle. Tannim Tache dolle bandle ani Tachea tonddar thapttam marun, Tachê lagim vichartale: “Arê provadea! konnem marlo rê tuka? sang, polleum-ia!” Ani ninda korun, zaitem Tacher add uloit asle. Dis uzvaddtôch, lokache vhoddil, mukhel iadnik ani xastri ektthãi zale; Taka aplê neaisobhent vhorun, tãnnim mhonn’lem: “Tum Krist zalear sang amkam.” Ani Tannem tankam mhonn’lem: “Hanv tumkam sangin zalear, tumi Mhaka sotman’cheak nant; Hanv tumkam êk vichar korin zalear, tumi kãi Mhaka zap diunche nant. Hea fuddem Mon’xacho Put Dev-podvechea uzveak bosun astolo.” Tãnnim soglleamnim vicharlem: “Toxem zalear, tum Devacho Put?” Tannem zap dili: “Tumcheach tonddantlem bhair sorlem utor: Hanv Devacho Put!” Punn tãnnim mhonn’lem: “Anink govai kiteak zai amkam? Tacheach tonddantlem ami tôr aikolem.” Tedna zomloli soglli sobha utthli ani Jezuk gheun Pilata-xim geli. Ani te Jezucher oxim garamnim korunk lagle: “Amchea lokak bonddai korunk fuloitanam, Somrazak dôndd farik korunk mona kortana, ani apunn Krist, êk rai mhonn sangtana ami taka dhôrla.” Pilatan Tachê lagim vicharlem: “Tum Judevancho raza, hôi?” Tannem zap dili: “Oi tum sangtai toxench tem.” Pilatan mukhel iadnikank ani lokachê zhunddik mhonn’lem: “Hea mon’xacho kosloch guneanv mhaka mellona.” Punn tãnnim tench zhoroun mhonn’lem: “Ak’khea Judeiant, Galileia meren hangasôr porian, aplê xikovnnen lokak to unchambollaita.” Oxem mhonnlelem aikotôch, To Galileikar kai mhonn Pilatan vicharlem; ani, Herodichea odhikara khal To poddta mhonn gomlea uprant, tannem Taka Herodi-xim dhaddlo, Herodi-i team disamnim Jeruzaleak aslo. Jezuk polleun Herod zobôr khuxi zalo, kiteak Taka polleunk zaito kall-sun to axetalo, karonn Tachi khobor tannem aikol’li, ani Tachea hatantlem koslem-i ek vismit apnnak polleunk melltelem mhonn to ravtalo. Sobar bhasamnim tannem Jezuk vichar kele, punn Jezu taka kãich zapuch kaddina zalo. Mukhel iadnik ani dhormxastri Tacher thambo-nastanam guneanv ghalit ravle. Tedna Herodin apleam soinikam borabôr Taka beman kelo, Taka kenddlo ani sobit dhovem anglem nesoun Taka Pilata-xim porot dhaddlo. Ani Herod ani Pilat, hachê adim ekamekache dusman asle te, teach disa ixtt zale. Mukhel iadnikank, vhoddilank ani lokak ektthãi korun Pilatan mhonn’lem: “Lokak bonddai korunk fuloita mhonnun tumi hea mon’xak mhojê-xim haddla; ani, polleiat, tumchê hujir hanvem tachi chovkoxi keli ani tumi tacher firiad ditat tê vixim mhaka hea mon’xacho êk legun guneanv mell’lo na. Ani Herodik-ui mell’lo na. Tannem tôr taka amchê-xim porot dhaddla. Ani, tumi zannont, moronn favo toslem kãi-ek tannem korunk na. Hea pasot taka khast laitam ani sôddtam.” [17 Porbe somoim Pilatan lokachê khuxê pormannem eka koideak soddun diunk zai aslo.] Lokachea akhea zomean huiêl marun mhonn’lem: “Haka kadd ani amkam Barab’basak soddun di.” Xarant razbhông ani prannghat tannem kel’lo dekhun, Barab’basak bondkhonnint ghal’lo. Jezuk suttka diunk sôdtalo dekhun, Pilat novean tanchê lagim uloilo, punn tim odikuch arddunk laglim: “Taka khursar mar! Khursar mar taka!” Tannem tisrê pavtti tankam mhonn’lem: “Punn tannem kitem vaitt kelam? Moronn favo toslo guneanv tachê sovem mhaka melloch na. Tea pasot khast lavun taka soddun ditam.” Punn vhoddlean boball korun, Taka khursar marcho mhonn tim thambonastana magtalim; ani tanche talle choddot vetale. Xekim tim magtat toxem korchem mhonn Pilatan tharailem. Mhonntôch bonddai ani khun kel’lê khatir bondkhonnint ghal’lea mon’xak, tim magtalim toxem, tannem suttka dili ani tankam zai toxem korunk Jezuk tanchê adhin kelo. Taka gheun vetastana, konn-eklo Siren’kar, Simanv, gramantlo ietalo; tãnnim taka dhôrlo ani Jezu pattlean khuris gheun vochunk tachea khandar to dilo. Tachê pattlean lokachi ani toxench Tachê pasot roddun unch tallean vilap korteleam bailanchi vhoddli urpônz choltali. Tedna tanchê vatten vollon Jezun mhonn’lem: “Jeruzaleacheam dhuvamnô, Mhojê khatir roddonakat, punn tumchê khatir ani tumcheam bhurgeam-ballam khatir roddat. Tôr, chotrai dhôrat, oxem mhonnpache dis ietele: ‘Bhagi teô vanztteô bailô, bhagi te zolm diunk naslele kusve, bhagi tim dud diunk naslelim hordd’dim!’ Tedna porvotank ‘Amcher poddat!’ ani dongrank ‘Amkam dhampat!’ oxem mhonnunk lagtelim. Olea lankddak oxem kortat zalear, sukea lankddachem kitem zaunchem na?” Anink dogam guneanvkarank Tachê borabôr jivexim marunk vhortale. Ani Kortto mhonntat tea zagear pavtôch, Taka ani team dogam guneanvkarank-ui thõi khursar marle, ekak Tachê uzvê kuxik ani dusreak davê kuxik. [34 Jezun mhonn’lem: “Bapa, tankam bhogôs; apunn kitem kortat tem te nokllot.”] Magir tãnnim sorti ghalun Tachim vostram vanttlim. Ani lôk ubo ravun polletalo, punn vhoddil Tacheô kenddnneô korun mhonntale: “Hannem dusreank soddoilim; ho Devanuch vinchum kaddlolo Devacho Krist zalear, hannem apnnakuch soddouncho.” Soinik-ui Tacheô kexttaiô kortale ani lagim ieun ani Taka xirko diun mhonntale: “Tum Judevancho raza zalear, tukach suttka di!” Ani Tachea mathea voir boroun marlolo lêkh oso aslo: “Judevancho raza To Hoch.” Khursar umkollteleam guneanv-karantlea eklean Tachi ninda korun mhonn’lem: “Tum Krist nhoi? Tôr tuka ani amkam-i soddoi!” Punn dusrean zap diun oxi taka bobatt keli: “Têch khastik tum sampoddlolo astana, tum Devak bhienãi? Amkam tori hem nitin favo zalam: amcheam kortubam pormannem ami bhôgtanv; punn hannem kãich vaitt korunk na.” Ani tannem mhonn’lem: “Jezu, raiponnachi podvi gheun tum ietai tedna, mhozo ugddas kôr.” Jezun taka zap dili: “Hanv tuka khorench sangtam, az tum Mhojea sangata voikunttant astoloi!” Sumar donpar zal’lo ani tisrea para porian sogllea desacher kallôk poddlo. Suria palovlo; ani Devmondirantlea Gabhareacho podd’do modekot doxim fanttlo. Ani vhoddlean arddun Jezun mhonn’lem: “Bapa, Tujea hatant ghaltam Mhozo otmo.” Oxem mhonnun Tannem prann sôddlo. Ghòddlam tem polleun, xotpotin Devak vakhann’nni diun mhonn’lem: “Khoreaninch ho boro monis aslo.” Hea dekhaveak zomlolo sogllo lôk, zal’lim ghodditam polleun, hordd’dim boddoit porot vochunk laglo. Tachê ollkhichim sogllim zannam pois ubim ravun hem polletalim, toxench Galileia thaun Tachê pattlean ail’leô teô bailô. Ovchit thõi pavlo Juze nanvacho êk dadlo; to Mha-Dhormsobhecho vangddi aslo, êk boro ani nitivont monis. To Judeiachea Arimateia nograntlo aslo. Tanchê ieuzonnek ani kortubank to kobul zaunk na; ani Devachea Rajeachi vatt to polleun aslo. Tannem Pilata-xim vochun Jezuchi kudd magli; ani ti denvoun êkê olin guttlaili ani tethun-ver konnakuch dovrunk naslo toslê khoddop katrun kel’lê somadhint Taka dovorlo. To dis Toiarecho Dis aslo ani Sabbath suru zauncho vêll pavlolo. Galileia thaun Tachê borabôr ail’leam bailamnim, pattlean vochun, somadhi polleli ani koxê bhaxen Tachi kudd tantum dovorlea ti, hem-i chotraien polleun ghetlem. Magir porot vochun pormollache ani makhnneche nog toiar kele. Sabbatha disa kaidea pormannem tãnnim visôv ghetlo. Ani Sabbath zatôch poilea disa, bhov sokallim, apnnem toiar kel’le pormoll gheun teô bailô somadhi-xim aileô; ani somadhi veli fatôr pelean dhukol’leli tãnnim dekhli. Punn bhitôr voch zalear, Somia Jezuchi kudd tankam mellunk na. Ani hê vixim mottea gondhollak sampoddleleô astana, ovchituch loklokit vostram nheslele dog dadle tanchê kuxik ube zale. Tãnnim bhieun khala man bagaili tedna, hãnnim tankam mhonn’lem: “Jivo asa Taka tumi mel’leam modem kiteak mhonn sôdtat? To hanga na; Taka Devan punorjivont kela! Galileiant astana To tumchê lagim kitem uloil’lo tacho ugddas korat; Tannem oxem sanglelem: ‘Mon’xachea Putak Dev patki mon’xanchê adhin kortolo, Taka khursar morunk pavoitolo, ani tisrea disa Taka punorjivont kortolo. Hem sogott Tachê vixim Devachi khuxi.’ ” Tedna tankam Tacheam utrancho ugddas ailo. Ani somadhi sorxileô porot vochun, tãnnim team ikra zannank ani heram somestank hem sogllem kollit kelem. Hi khobor apostlank sangli teô bailô heô: Mari Magdalen, Juana, Jakobachi avoi Maria ani tanchea sangata asleô teô her bailô. Tankam him utram naka zal’li kanni koxi disli ani tãnnim tanchem sotmanunk na. [12 Punn Pedru utthun somadhi-xim dhanvun gelo ani voddôv ghalun tannem oli mat kuxin dovorleleô dekhleô, ani kitem zalem kai mhonn apnnach bhitôr ojap zaun to porot gelo.] Teach disa oxem ghòddlem: tanchê bhitorle dog zann Jeruzalea thaun sumar ikra kilometr pois aslelea Emaus nanvachea gramant vetale; ani heam soglleam ghodditanchi gozal ekameka lagim te korit asle. Ani oxem zalem: te ekameka lagim uloun bhasabhas kortastana, khud Jezu lagim sorun tanchê borabôr cholunk laglo. Punn tãnnim Taka ollkhona zaunk tancheam dolleancher sai koxi ail’li. Tannem tankam mhonn’lem: “Vatter choltana ekameka lagim tumi kortat teô gozali kosleô?” Te thamble; tanchem tondd chintest-dukhest aslem. Kleopas nanvachea tantlea eklean zap diun mhonn’lem: “Jeruzaleant heam disamnim ghòddlam tachi khobor naslolo tum ekloch hanga iatrekar kitem?” Hea utrak Tannem mhonn’lem: “Kitem ghòddlam?” Tãnnim Taka mhonn’lem: “Nazaretkara Jezu vixim ghòddlam tem: Deva ani akhê porjê mukhar kornneamnim toso utramnim podven bhòrlolo provadi To aslo. Amcheam mukhel iadnikamnim ani vhoddilamnim Tacher mornnachem formonn marunk Taka dhorun dilo ani khursar marlo. Tôr Israelak soddoitolo to Hoch mhonn ami ravtaleanv. Titlench nhoi: heô soglleô vostu ghòddlear az tisro dis. Tea bhair, amchê bhitorleam kãi bailamnim amkam ghabrailim: uzvaddchê adim Tachê somadhi-xim teô geleô, punn Tachi kudd tankam mellunk na; thõi apnnank devdut-ui dixtti poddle ani To jivo asa, oxem te sangtat mhonn porot ieun tãnnim amkam khobor dili. Hea pasot amchê boraborchê kãi zann somadhi-xim gele ani bailamnim sanglelem toxench tankam mell’lem, To mat dixtti poddunk na.” Tedna Tannem tankam mhonn’lem: “Kitle mhonn gollie tumi! Provade-amnim sanglelem titlem-i sotmanunk kitle mhonn zodd monache monis tumi! Devachê khuxê pormannem, Kristan hem sogllem sõschem ani oxem Aplê mhoiment provês korcho, mhonn nokllo asleat tumi?” Magir Moizesa ani soglleam provadeam meren Apnnak lagtat titleam-i xastrancho ôrth To tankam sangunk laglo. Itlea mhonnosôr, apunn vetale tea grama lagim te pavle, ani Jezun Apunn fuddem veta-xem korun dakhoilem. Punn tãnnim poratun mhonn’lem: “Amchê-xim rav, tôr sanz zait aili ani dis dharir poddcho zalo.” Ani To tanchê sangatim ravunk bhitôr gelo. Tanchea sangata jevnnak boslolo astana, Tannem unddo ghetlo, Devak dhin’vaslo ani to moddun tankam dilo. Tedna tanche dolle ugòddle ani tãnnim Taka ollkholo, punn To tancheam dolleam mukhavelo nanch zalo. Tedna tãnnim ekamekak mhonn’lem: “To vatter amchê kodde uloitalo ani Povitr Pustokancho ôrth amkam ditalo tedna, amchem kalliz bhitorlê-bhitôr hulpotalem nhoi?” Ani teach vellar utthun te Jeruzaleak porot gele ani ikra zann ani tanchea sangata ektthovlolim aslim tim tankam mell’lim. Hãnnim team dogank sanglem: “Somi khoroch punorjivont zala ani Simanvak dixtti poddla.” Ani team dogamnim vatter ghòddleleachi khobor dili ani koxê bhaxen unddo môddta astana apnnem Taka ollkholo, tem sanglem. Oxem uloita thõich astana, khud Jezu tanchê modekot ubo zalo; Tannem tankam mhonn’lem: “Xanti tumkam!” Ghabrun ani bhieun, apunn polletat to êk bhut mhonn tim somzolim. Punn Tannem tankam mhonn’lem: “Tumi ghaborleat kiteak? ani osle dubhav tumchea monant uprastat te kiteak? Mhoje hat-pãi polleiat; tôr Hanvuch to. Sanspun polleiat: Mhaka mas ani haddam asat mhonn tumi dekhtat toxem bhutak asonant.” Oxem uloun Tannem Aple hat ani pãi tankam dakhoile. Khuxalkaien bhoron, tim ozun dubhavtalim ani itlim thottaklelim dekhun, Tannem vicharlem: “Tumchê kodde hanga kitem tori khaunk asa?” Tãnnim Taka bhazlelê masllecho kuddko dilo; to Tannem tanchê hujir khelo. Ani Tannem tankam sanglem: “Tumchê sangatim Hanv ozun aslom tedna, Hanvem tumkam sanglelem tem hench: Moizesachi Somurt, Provadi ani Stotram, hantum Mhojê vixim jem boroil’lem asa tem sogllem, Devachê khuxê pormannem, sompadon ieunchem aslem.” Magir xastrancho ôrth somzunk Tannem tanchi môt ugti keli ani tankam mhonn’lem: “Boroil’lem asa tem oxem: Krist koxtt-moronn sõstolo, tisrea disa To mel’leantlo punorjivont zatolo, ani Jeruzalea thaun suru korun Tachea nanvan jivit-mon bodlop ani patkanchem bhogsonnem soglleam porzank porgott zatelem. Tumi heam ghòddnneanchi sakxi diunk zai. Polleiat, Mhojea Bapan bhasailam tem Hanv tumcher dhaddcho asam; mhonntôch sorga velê xoktin tumi bhoro-sôr xarant ravat.” Magir Jezu tankam bhair Betaniê porian gheun gelo. Ani hat uklun tancher Tannem axirvad ghalo. Ani oxem ghòddlem: Tancher axirvad ghalta astana Jezu tanchê sorxilo koddsorlo ani Devan Taka sorgar ubarun vhelo. Ani saxttangim poddun tãnnim Jezuk nomoskar kelea uprant, vhoddê khuxalkaien tim Jeruzaleak porot gelim ani thambonastanam Devmondirant Devachi tust ani vhoddvik korit aslim. Orombak sogllê rochnnê adim, Sôbd aslo, ani Sôbd Deva sovem aslo ani Sôbd Dev aslo. Orombak To Deva sovem aslo; Tachê vorvim sorv vostu rochleat ani rochleleam vostum modem Tachê vinnem rochun ail’lem kãich na. Tachê sovem jivit aslem, ani tem jivit zaun aslem mon’xancho uzvadd. Uzvadd kallokant porzollta, ani kallokan uzvaddak jikunk zaunk na. Devan dhaddlolo êk monis dixtti poddlo: tachem nanv Juanv. Tachê vorvim soglleamnim bhavart dhôrchê khatir uzvadda vixim govaiki diunk mhonn, to govai koso ailo. To apunnuch uzvadd nhoi aslo, punn Uzvadda vixim govaiki diunk to ail’lo. Zo soglleam mon’xancher prokas ghalta to khoro Uzvadd sonvsarant ietalo. To sonvsarant aslo, ani sonvsar Tannench rochlolo, tori sonvsaran Taka ollkhun gheunk na. Apleanch modem To ailo, ani jim Tachim aslim, tãnnim Taka mandun ghetlo na. Punn Taka mandun ghetleleank, Tacher bhavart tthevteleank, Devachim bhurgim zaunchem Tannem dennem kelem. Hankam mon’xasoimbachê vondovnnen nhoi, mon’xachê khuxen-ui nhoi, punn Devan zolm dila. Sôbd monis zaun dixtti poddlo: ani oxem Tannem amchê modem tthikann kelem. Tachi mhoima ami dekhlea: hi Bapachea ekleach Putachi khaxa mhoima, doiallaien ani sotan bhòrlolo To dixtti poddlo. Tachê vixim govai diun, Juanvan arddun mhonn’lem: “To mhojê uprant ieta khorem, tori, mhojê adim aslo dekhun, To mhojê-von vhôdd, oxi hanvem tumkam zachi khobor sanglea to Hoch.” Ani Tachê doiallaieche bhortentlem ami soglleamnim ghetla, axirvadacher axirvad. Kiteak Somurt Devan Moizesa vorvim dil’li, doiallai ani sot Jezu Krista vorvim aileant. Devak konnem kodinch polleunk na; punn Zo Bapachea gopant asa tea ekleach Putan Tachi ollokh dilea. Juanvachi govaiki hi: tum konn kai mhonn tachê lagim vicharunk jedna Judevamnim iadnikank ani Levitank Jeruzalea thaun pattoile, tedna tannem ugteponnim sanglem: “Hanv Krist nhoi.” Ani tãnnim taka mhonn’lem: “Kitem tôr? Tum Elija?” Tannem tankam mhonn’lem: “Hanv Elija nhoi.” “Tum ami ravtanv to Provadi bi?” Ani tannem mhonn’lem: “Na.” Tedna tãnnim taka mhonn’lem:”Tum konn tôr? Amkam pattoileat tankam ami kitem sangchem? Tujêch vixim tum kitem mhonntai?” Juanvan mhonn’lem: “Izaias provadean sangun dovorlam: ‘Sorvesporachi vatt nitt korat, oso oronneant êk tallo bob marta’, ho tallo hanv.” Tankam Farizevamnim pattoil’le. Tãnnim tachê lagim anink-ui vicharlem: “Tum Krist nhoi, Elija nhoi ani Provadi-i nhoi zalear, batism koso ditai?” Juanvan portipall kelo: “Hanv udkan batism ditam, hem khorem; punn tumi ollkhonaslolo Eklo tumchê modem asa. To mhojê uprant ietolo, ani Tacheam vhannanchi vadi soddunk mhaka favo na.” Hem Betanient, Jordanachê poltoddi, Juanv batism ditalo thõi, ghòddlem. Dusrea disa, Juanvan Jezuk apnna-xim ieta to dekhlo ani mhonn’lem: “Polleiat, ho Devacho Menddro, sonvsarachem pap kaddta to! Hachich khobor sangun hanvem tumkam oxem mhonn’lem: Mhojê uprant konn-eklo ieta, punn, mhojê adim To aslo dekhun, To mhojê-von vhôdd. Hanvuch Taka ollkhonaslom, punn Tachi ollokh Israelak diunchê khatir, hanv udkan batism diit ailam.” Ani Juanvan oxi-i govai dili: “Parvea sarko sorgar thaun Atmo denvlo ani Tacher tharlo To hanvem dekhlo. Hanvuch Taka ollkhonaslom, punn Zannem mhaka udkan batism diunk dhaddla, Tannem mhaka mhonn’lem: ‘Zacher tum Atmo denvlolo ani tharlolo dekhxi, Toch Povitr Atmean batism ditolo. ’ Hem hanvem dekhlem, ani ho Devacho Put mhonn hanv govai ditam Dusrea disa Juanv apleam dogam xisam sangatim novean thõi aslo; ani Jezuk cholun vetalo to tannem dekhlo ani mhonn’lem: “Ho polleiat, Devacho Menddro!” Him tachim utram aikun, te dog xis Jezu pattlean gele. Tedna, Apnna pattlean ieteleank vollon polleun, Jezun tankam mhonn’lem: “Tumkam kitem zai?” Tãnnim Taka zobab dilo: “Rab’bi (mhonngê ‘Guruji’), Tum khõi ravtai?” Tannem tankam mhonn’lem: “Ieiat ani polleiat.” Te gele ani To ravtalo ti svat tãnnim dekhli; ani to dis te Tachê-xim ravle. Sanjechim sumar char zal’lim. Juanvachim utram aikun, Jezu pattlean gel’le team dogam bhitorlo eklo, Andre nanvacho, Simanv Pedrucho bhav aslo. Rokddoch Andre aplea bhava Simanvak mellunk gelo; tannem taka mhonn’lem: “Amkam Mesias (mhonngê Krist) mell’la.” Ani tannem Simanvak Jezu-xim vhelo. Tacher barik nodor ghalun Jezun mhonn’lem: “Juanvacho put, tum Simanv; tujem nanv atam, Kefas (mhonngê Khoddop) zatelem.” Dusrea disa, Jezun Galileiak vochunk ievjilem; tedna Taka Filip mell’lo; ani Jezun taka mhonn’lem: “Mhojê pattlean ie.” Filip Bethsaidecho aslo; Andre ani Pedru he-i teach nograntle asle. Filipak Natanael mell’lo, ani tannem haka mhonn’lem: “Moizesachê Somurtint ani Prova-deanchea Pustokamnim zachi khobor asa, to amkam mell’la: to Nazaretcho Jezu, Juzecho put.” Natanaelan taka mhonn’lem: “Nazaretantlem kitem-i tori borem ieunk xokta?” Filipan Taka mhonn’lem: “Ie ani polle.” Apnna-xim ieto Natanaelak polleun, Jezun tachê vixim mhonn’lem: “Polleiat, koslench baskollponn-naslolo khoro Israelkar ho! Natanaelan Taka mhonn’lem: “Tum mhaka khõi ollkhotai?” Jezun taka zobab dilo: “Filipan tuka apounchê adim, tum anjirachea zhadda tolla asloi tedna, Hanvem tuka dekhlo.” Natanaelan Taka portipall kelo: “Rab’bi (mhonngê ‘Guruji’), Devacho Put To, Tum; Israelacho Raza To, Tum!” Jezun taka mhonn’lem: “Tuka anjirachea zhadda tolla Hanvem dekhlo, itlench tuka Hanvem mhonn’lem dekhun, tum bhavart dhôrtai? Heam-vôn odik vhoddleô vostu tum dekhtoloi.” Ani taka mhonn’lem: “Khorench Hanv tumkam sangtam, sôrg ugto zal’lo tumi dekhtelet, ani Devache dut Mon’xachea Putacher choddtana ani denvtana tumi polletelet.” Tisrea disa, Galileiachea Kana ganvant ek logn aslem, ani Jezuchi avoi thõi asli; tea lognak Jezuk-ui ani Tacheam xisank apovnnem aslem. Soro somplo. Tedna Jezuchê avoin Taka mhonn’lem: “Tanchê lagim soro na.” Jezun tika mhonn’lem: “Ostorê, tuka ani Mhaka hem kiteak poddlam? Mhozo vêll ozun pavunk na.” Tachê avoin chakrank mhonn’lem: “To sangit titlem-i tumi korat.” Thõi, Judevanchê xud’dhi korpachê riti pormannem, fatrachim sô donnam aslim; dor-ekant char te sô kollxe zatale. Jezun tankam mhonn’lem: “Donnam udkan bhôrat.” Ani tãnnim tim oto-sôr bhôrlim. Tannem tankam mhonn’lem: “Tantlem ilem kaddun logna-porbechea karbhareak vhorun diat.” Tãnnim toxem kelem. Karbharean soro zal’lem udok chakun pollelem. To soro khõicho ailo tem to nokllo aslo, punn udok kaddlelem te chakor mat zanno asle. Hea pasot karbharean novreak apoun haddlo, ani taka mhonn’lem: “Soglleanger poilo boro soro ditat, ani lôk borench pietôch, holko to vantt’tat. Punn tunvem boro soro atam porian dovorlai.” Hi apleam khunnam modli poili khunna Jezun Galileiachea Kana ganvant keli, ani Apli mhoima fankoili; ani Tacheam xisamnim Tacher bhavart tthevlo. Tea uprant, Aplê avoik, bhavank ani xisank sangatak gheun to Kapernauma denvun gelo; punn tim chodd-xe dis thõi ravunk nant. Judevanchem Pask lagim pavlelem; Jezu Jeruzaleak choddun gelo. Devmondirant boil, xelliô ani parve viktale te, ani aplea veparachea manddar boslele savkar Taka sampoddle. Tannem dorianchi êk soiti keli, ani tankam soglleank, xelliam-boilam soit, Devmondirantle dhanvddaile, savkarancheam nanneancheô raxi xevttun uddoileô ani tanche mandd omtile. Parve vikteleank Tannem mhonn’lem: “Hem sogllem hangasorlem kaddat; ani Mhojea Bapachem ghor tumi veparachem ghor korinakat.” “Tujea ghoracho man rakhchê axen lhasta mhojem kalliz”, oxem Povitr Pustokar boroil’lem asa mhonn Tacheam xisank tedna ugddas ieilo. Judevamnim Taka mhonn’lem: “Oxem korunk Tuka podvi asa mhonn kosli khunna Tujean amkam dakhounk zata?” Tankam portipall korun Jezun mhonn’lem: “Hem Devmondir tumi môddat, ani tin disamnim Hanv tem novean bandun ditam.” Judevamnim Taka mhonn’lem: “Hem Devmondir bandunk sovêchallis vorsam laglim ani tin disamnim tem Tum novean bandtoloi?” Punn To Aplê kuddichea Devmondirachi khobor kortalo. Jedna Devan Jezuk mel’leantlo punorjivont kelo, tedna Tannem oxem mhonnlelem mhonn Tacheam xisank ugddas ieilo; ani Povitr Pustokacher ani Jezun uloil’lea utracher tãnnim bhavart tthevlo. Paska-Porbek To Jeruzaleant astana, Tannem kel’leô khunna polleun puskôll lokan Tacher bhavart dovorlo; punn Jezun zalear Aplo visvas tancher tthevunk na, kiteak To soglleam mon’xank pok’ko ollkhotalo, konnachêch vixim konnench Taka kitench sangchi goroz nasli; mon’xam bhitôr kitem cholta tem Taka tthavem aslem. Nikodem’ nanvacho, Farizevanchea pokxantlo, Judevanchê Mha-Dhormsobhecho vangddi, konn-eklo monis aslo, To ekdam ratcho Jezu-xim ailo. Tannem Jezuk mhonn’lem: “Rab’bi (mhonngê ‘Guruji’), Tum Deva koddsun ail’lo xastri mhonn ami zannonv, kiteak apnna sovem Dev na zalear, Tum kortai tosleô khunna konnuch korunk xokona.” Jezun taka portipall kelo; “Khorench khorem Hanv tuka sangtam: novean zolmolea bogor, konnachean Devachem raj polleunk zaina.” Nikodeman Taka mhonn’lem: “Mhataro zal’lo monis koso mhonn zolmotolo? Tachean anink êk pavtt aplê avoichea kusveant bhitôr sorunk ani zolmunk zait?” Jezun portipall kelo: “Khorench khorem Hanv tuka sangtam: udka ani Atmea thaun zolmolea xivai, konnuch Devachea Rajeant bhitôr sorunk xokona. Mon’xa thaun zolmotat tim mon’xa-soimbachim, ani Atmea thaun zolmotat tim Atmeachea soimbachim. Tumi novean zolmunk zai, oxem Hanvem tuka mhonn’lam dekhun, tum ojap zaum naka. Varem apnnak zai thõi marta, ani tum tacho avaz aikotai, punn tem khõi thaun ieta vô khõi veta tem tum noklloi; jim konn Atmea thaun zolmoleant tanchê sovem toxench ghòddta.” Nikodeman Taka porot mhonn’lem: “Hem koxem zaunk xokta?” Jezun taka zobab dilo: “Tum Israel-porjecho xastri ani tori tum hem noklloi? Khoreponninch Hanv tuka sangtam: ami zannonv tem uloitanv, ani ami dekhlam tachi sakxi ditanv, punn tumi amchi sakxi manun ghenant. Tumkam sonvsaracheam vostunchi khobor sangtam tedna tumi sotmaninant; sorgincheam vostunchi khobor sangin tôr, tumi ti koxi sotman’telet? Sorgar thaun denvlelea Mon’xachea Puta bogor konnuch sorgar choddunk na. Zoso Moizesan oroneant sorôp ubarlo, tosoch Dev Mon’xachea Putak ubartolo: oxem Putacher bhavart tthevteleam somestank sasnnik jivit astelem. Khorench, Tacher bhavart tthevta tea dôr-eka mon’xacho nas zaina zaunk punn taka Sasnnik Jivit mellchê khatir, Devan Aplea ekleach Putak dilo: itlo Tannem sonvsaracho môg kelo!. Kiteak sonvsaracher khastichem formonn marunk nhoi, punn Puta vorvim sonvsarachem taronn zaunchê khatir Devan Taka sonvsarant dhaddlo. Jim konn Tacher bhavart tthevtat tankam khastichem formonn na; punn jim konn Tacher bhavart tthevinant, tancher khastichem formonn poddlelem asa, kiteak tãnnim Devachea ekleach Putacher bhavart dovrunk na. Ani hoch to nivaddo: sonvsarant uzvadd ailo, punn mon’xamnim Uzvadda poros kallokacho odik môg kelo, kiteak tanchim kortubam noxttim aslim. Khorench, khotteponn kortat tim uzvaddak kanttalltat ani aplim kortubam koslim tim kollon iena zaunk uzvaddak ienant. Punn sota pormannem choltat tim, apleô kornneo Devache khuxê pormannem keleat mhonn ugddapim kollon ieunchê khatir, uzvaddak ietat.” Uprant Jezu ani Tache xis Judeiachea prantant gele; thõi To tanchea sangata ravlo ani batism ditalo. Salima lagim, Aenonant, thõi udok chodd dekhun, Juanv-ui batism ditalo; ani lôk thõi vetalo ani batism ghetalo. Juanvak ozun bondkhonnint ghalunk naslo. Ekdam Juanvacheam kãi xisamnim eka Judeva lagim xud’dhi vixim vivad suru kelo. Ani Juanva-xim ieun tãnnim mhonn’lem: “Rab’bi (mhonngê ‘Guruji’) Jordana poltoddi zo tujea sangata aslo ani zachê vixim tunvem govai dilii, to polle apunn-ui batism dita ani sogllo lôk tachê-xim veta.” Juanvan zap diun mhonn’lem: “Devan dilea xivai konnak kãich mellona. ‘Hanv Krist nhoi, punn Tachê mukhar vochunk Devan mhaka dhaddla, ’ oxem hanvem sanglam mhonn tumich mhojê vixim govaiki ditat. Hokol mhonn’lear novreachi; taka lagim aslolo novreacho ixtt, novreacho tallo aikun, vhoddê khuxalkaien murgott’ta. Hich mhoji khuxalkai; ti atam bhoron ailea. To vaddot vochunk zai, punn hanv zalear odik-odik lhan zaunk zai.” Voir thaun ieta To soglleam-von vorto. Prithumentlim upzotat tim prithumechim, ani tanchem ulovnnem prithumechem. Sorgar thaun ieta To soglleam-von vorto. Apnnem dekhlam ani aikolam tachi To sakxi dita, toripunn konn Tachi sakxi mandun ghena; Tachi sakxi mandun ghetat tim Dev sotevont mhonn ruzu kortat, kiteak zaka Devan pattoila, To Devachim utram uloita: Dev Taka map-mezop nastana Atmo dita. Bap Putacho môg korta ani Tannem soglleô vostu Tachea hatant dileat. Putacher bhavart dovortat tanchê sovem sasnnik jivit asa; Putak khaltim zaunk kobul nant tankam jivit mellchem na, punn Devacho krôdh tanchea mathear asa. Apunn Juanva poros odik chodd xis korta, ani tankam batism dita, oxem Farizevanchea kanar poddlam mhonn Jezuk gomun ailem. (Khorem mhonn’lear, Jezu Apunn batism dinaslo, punn batism ditale te Tache xis.) Tedna To Judeiantlo bhair sorlo ani portun Galileiant gelo. Taka Samarientlean vechem poddtalem. Sikar nanvachea Samariechea eka nogrant To pavlo; Jakoban aplea puta Juzek dil’lea xeta laginch hem nogor aslem. Jakobachi bãi thõi asli, ani Jezu, cholun-cholun thoklolo dekhun, bãichea kanttar boslo. Sumar donpar zal’lo. Samariechi êk bail udok kaddunk thõi aili. Jezun tika mhonn’lem: “Mhaka ilem pieunk dixi?” Tache xis jevnnak kitem-i gheunk mhonn nogrant gel’le. Samariechê bailen Taka mhonn’lem: “Tum Judêv ani hanv Samariekarnn, tôr koso mhonn tum mhojê kodde pieunk magtai?” Khorem mhonn’lear, Judêv lôk ani Samariekar lôk ekamekachim aidonam vaprinant. Jezun tika portipall kelo: “Devachem dennem koslem tem tuka tôr gomlelem ani ‘Mhaka ilem pieunk dixi?, ’ oxem tuka mhonnta To konn to tum zanno aslii zalear, tunch Tachê kodde magto aslii ani To tuka jivem udok dito aslo.” Bailen Taka mhonn’lem: “Saiba, udok kaddunk tujê lagim xidi kãi na, ani bãi khôl asa; tôr tujê kodde jivem udok khõichem? Amchea purvoza Jakoba poros tum vhôdd kitem? Tannem amkam hi bãi dili, apunn tichem udok pielo, toxench tachim bhurgim-ballam ani tache hindd.” Jezun tika mhonn’lem: “Hem udok pietat tankam soglleank portun tan lagteli, punn Hanv diin tem udok pietit tankam kodinch tan lagchi na Hanv tankam diin tea udkachi tanchê bhitôr êk zhôr zateli ani ti tankam Sasnnik Jivit diit vhanvteli.” Bailen Taka mhonn’lem: “Saiba, tem udok mhaka di, oxi mhaka anink tan lagchi na ani udok kaddunk hanga ieunk-ui poddchem na.” Jezun tika mhonn’lem: “Voch, tujea ghovak apoun hadd ani hanga ie.” Bailen zap dili: “Mhaka ghôv na.” Jezun tika portun mhonn’lem: “ ‘Mhaka ghôv na, ’ hem tunvem sarkem sangli, ‘kiteak tuka panch asle ani tujea sangata atam asa to-i tuzo ghôv nhoi; hem tunvem sarkem sangli. ’ ” Bailen Taka mhonn’lem: “Saiba, Tum provadi mhonn mhaka koll’lem. Amcheam purvozamnim hea dongrar Devak bhôzlo, punn tumi Taka Jeruzaleantuch bhozunk zai mhonn sangtat.” Jezun tika mhonn’lem: “Mhojem aik, bai: tumi hea dongrar zaum vô Jeruzaleant zaum Bapak bhôzchim nant oslo vêll ieuncho zalo. Tumi ollkhonant Taka bhôztat; ami zalear ollkhotanv Taka bhôztanv, kiteak taronn Judêv loka thaun ieta. Punn oslo vêll ieta, khorench mhonn’lear ho vêll pavlo, ki khore bhôzpi atmean ani sotan Bapachi bhokti kortele, kiteak mhollear oslech bhôzpi Bap sôdta. Dev Atmo, ani Tacheam bhôzpiamnim Taka atmean ani sotan bhozunk zai.” Bailen Taka mhonn’lem: “Mesias - mhonngê Krist - ieuncho zalo mhonn hanv zanno. To ietolo tedna amkam sogllem sangtolo.” Jezun tika mhonn’lem: “Hanvuch to, tujê kodde uloitam to.” Teach vellar Tache xis thõi pavle. Ani êkê bailê lagim To uloita mhonn tankam ojap dislem, punn “tichem Tuka kitem zai?” vô “tichê kodde Tum kiteak uloitai?” oxem konnench vicharunk na. Tedna ti bail udkacho kollso thõich sanddun nogrant geli ani lokak mhonnunk lagli: “Hanvem kelam titlem-i konn-eklean mhaka sanglam; ieiat ani taka polleiat; hoch Krist zait kai?” To lôk nograntlo bhair sorun Taka mellunk ailo. Itlea mhonnosôr xis Tachê kodde magtale: “Rab’bi, jêv atam.” Punn Tannem tankam mhonn’lem: “Mhaka jem khann-jevonn asa, tanchi tumkam ollokh na.” Dekhun xis ekamekak mhonnunk lagle: “Taka konnem jevunk haddun dilam kai?” Jezun tankam mhonn’lem: “Zannem Mhaka pattoila Tachi khuxi korunk ani Tachem kam’ sompadunk, hench Mhojem jevonn-khann. ‘Char mhoine, uprant lunvnni’, oxi tumchê modem mhonn’nni asa nhoi? Hanv tumkam sangtam: tumche dolle uklun polleiat, xetam zalim dhovim, lunvchim zalim! Lunvtat tim apli mozuri ghetat ani sasnnik jivitak pik ektthãi kortat ani oxe vomp’pi ani lunvpi borabôr sontostat. Hanga hi mhonn’nni lagta: ‘eklo vompta, dusro lunvta’: jea xetache koxtt tumi kaddunk nant, tea xetant tumkam Hanvem lunvunk dhaddleat; dusreamnim tache koxtt kaddleat, ani tancheam koxttanchea follant tumkam bhag mell’lam.” “Hanvem kelam titlem-i tannem mhaka sanglam,” oxi tê bailen govai dil’li dekhun, tea nograntleam puskoll Samariekaramnim Tacher bhavart dovorlo. Hea pasot, Samariekaram Tachê-xim ailim tedna, apnnam-xim rav mhonn tãnnim Tachê kodde maglem; ani thõi To don dis ravlo. Ani Tachea utrak lagun anink khup-khup zannamnim Tacher bhavart tthevlo. Tim bailek mhonntalim: “Atam anink tujeam utrank lagun nhoi, punn aminch Taka aikola dekhun ami bhavart dhôrtanv, ani To khoroch sonvsaracho Tarôk mhonn amkam kollon ailam.” Thõi don dis ravlea uprant, Jezu Galileiak gelo. “Khõicheach provadeak aplea ganv-ghora man mellona”, oxi Jezunuch govaiki dil’li. Galileiantlo lôk Porbek gel’lo; Jeruzaleant Porbechea somoiar Jezun kel’lem tem sogllem tãnnim dekhlem; dekhun, To Galileiant ailo tedna, tãnnim Taka boro ievkar diun ghetlo. Mhonntôch Tannem udkacho soro kel’lo tea Galileiachea Kana ganvant anink êk pavtt To ailo. Ani Kapernau-nt eka raj-odhikareacho put piddent aslo. Jezu Judeiak thaun Galileiant pavla mhonn aikun, to Taka mellunk gelo. Mornnachê tonnir pavlelea aplea putak boro korunk ie mhonn to Jezu lagim magtalo. Jezun taka mhonn’lem: “Khunna ani vismitam dekhlea xivai tumi bhavart dhôrpak nant.” Raj-odhikarean Taka mhonn’lem: “Saiba, mhozo bhurgo morchê adim ie”. Jezun taka mhonn’lem: “Voch tum, tuzo put jivo asa.” Jezuchea utracher bhavart dovrun to monis aplê vattek laglo. To vatter astananch, tache chakor taka mellunk aile, ani tacho put jivo asa mhonn tãnnim taka sanglem. Hea pasot, khõichea vogtar taka borem dislem kai mhonn tannem tankam vicharlem. Tãnnim taka sanglem: “Kal, donparchea eka voracher tacho zôr gelo.” Jea vellar Jezun apnnak “tuzo put jivo asa”, oxem mhonnlelem, teach vellar hem ghòddlem mhonn bapaik gomun ailem; hea khatir tannem ani tachea akhea ghorabean Jezucher bhavart tthevlo. Judeiantlo Galileiant portun ietôch hi Jezun kel’li dusri khunna. Hachê uprant, Judevanchi êk porob asli ani Jezu Jeruzaleak choddun gelo. Jeruzaleak, Xelliam-Darvonttea-kodde ek tolloi asa; Hebrêv bhaxen tika Bethsaida mhonntat; hi tichi bandavôll: tika panch tarangnnam asat. Thôi kurddim, thonttim, aren dhòrlolim, oslim khup piddevont poddlelim astalim; [tim sogllim udok haltelem mhonn ravtalim. Kiteak Sorvesporacho dut kedna-kedna tollient denvtalo ani udok haloitalo; udok haltôch zo konn heram adim udkant bhitôr sortalo, to koslê-i piddentlo boro zatalo.] Thõi êk monis aslo, tachê piddek atthtis vorsam zal’lim. Jezun taka add poddlolo dekhlo ani, to thõi zaito kall oslê gotir aslo mhonn zanno zaun, taka mhonn’lem: “Tum boro zaunk sôdtai?” Piddevontan Taka zap dili: “Saiba, udok halta tedna mhaka tollient ghalunk mhozo konn na, ani hanv vetam mhonnosôr, dusro ieun apunn mhojê fuddem denvta.” Jezun taka mhonn’lem: “Utth, tujem antrunn ukôl ani chol.” Ani teach vellar to boro zalo ani aplem antrunn uklun cholunk laglo. To dis Sabbath aslo. Hea pasot, boro zal’lea mon’xak Judevamnim mhonn’lem: “Az Sabbath, tujean antrunn uklum nozo.” Tannem tankam zap dili: “Zannem mhaka boro kela, tannem mhaka oxem mhonn’lem: ‘tujem antrunn ukôl ani chol. ’ ” Tãnnim tachê kodde vicharlem: “ ‘Tujem antrunn ukôl ani chol’, oxem tuka mhonn’lem to monis konn?” To konn to boro zal’lo monis nokllo aslo; kiteak thõi ji lokachi lutt zal’li, tichê modem Jezu nanch zal’lo. Uprant to Jezuk Devmondirant mell’lo, ani Jezun taka mhonn’lem: “Polle, tum atam boro zaloi; anink patok korinaka, na tôr tuka anink kitem-i paxtt zait.” To monis gelo ani apnnak boro kela to Jezu mhonn tannem Judevank sanglem. Ani Jezu osleô vostu Sabbatha disa kori dekhun, Judev Tachê pattlean laglele. Jezun tankam mhonn’lem: “Mhozo Bap ozun porian vavr korit asa, toso Hanv vavr korit asam.” Hea pasot Judev odikuch Taka jivexim marunk sôdtale; karonn, To nhoich Sabbath môddtalo, punn Devak Aplo Bap mhonnun, Apnnakuch Deva sarko kortalo. Jezun tankam mhonn’lem: “Khorench khorem Hanv tumkam sangtam: Apnnachêch osttongim Putachean kãich korunk zaina; punn Bap korta mhonn jem To polleta, tench To korunk xokta; ani jem Bap korta tench Put-ui korta. Karonn Bap Putacho môg korta, ani Apunn korta titlem-i Putak dakhoita; ani tumi ojap zaunchê khatir hanchê-vôn vhodd kortutvam To Taka dakhoitolo. Zoso Bap mel’leank utthoita ani tankam Jivit dita, tosoch Put Apnnak zai tankam Jivit dita. Zoso Bapak man ditat tosoch Putak soglleamnim man diuncho mhonn, Bap konnachich mon’subi korina, punn Tannem mon’subi korcho sogllo odhikar Putachea hatant dila. Jim konn Putak mandinant, tim Taka dhaddla tea Bapak mandinant. Khorench Hanv tumkam sot tem sangtam; jim konn Mhojem utor aikotat ani Mhaka dhaddla Tacher bhavart dovortat, tanchê sovem sasnnik jivit asa; osleank anink khastichem formonn na, punn tim mornnantlim jivitak utorlim. khorench Hanv tumkam sot tem sangtam: mel’lim mon’xam Devachea Putacho tallo aikotelim, ani jim konn to aikotat tankam jivit melltelem, oslo vêll ieuncho zalo - hoch to vêll! Karonn, zoxem Bapak jivit Apnnachêch sovem asa, toxench Putak-ui jivit Tachêch sovem aschem mhonn Bapan Taka dennem kelam, ani mon’subi korchi Taka podvi dilea, kiteak To Mon’xacho Put. Hachê vixim ojap zaum nakat: somadhimnim asat tim sogllim Tacho tallo aikun tantlim bhair sortelim: zãnnim borem kelam tim jivit bhogunk, ani zãnnim vaitt kelam tim khast sõsunk utt’telim — oslo vêll ieuncho zalo! Mhojêch podven Mhojean kãich korunk zaina; zoso Hanv aikotam toso Hanv nirnnoi ditam; ani Mhozo nirnnoi niticho, kiteak Hanv Mhoji khuxi nhoi punn Mhaka pattoila Tachi khuxi korunk sôdtam. Hanvuch Mhojê vixim govai diin zalear, Mhojê govaikek mol na. Mhojê vixim govai ditolo dusro konn asa, ani ji govai To Mhojê vixim dita tika purnn mol asa mhonn Hanv zannom. Tumi tumcheam niropiank Juanva- xim pattoile, ani tannem sota vixim govai dili. Hanv mon’xanchê govaikecher dhòrlolo na; punn Hanv oso uloitam zalear, tumchea taronna pasot uloitam. Juanv êk zollti ani loklokit ponntti zaun aslo ani tachea uzvaddak ilo vêll murgottunk tumkam borem dislem. Punn Mhaka asa ti govaiki Juanvachê govaikê poros vhôdd: jim kamam Bapan Mhaka sompadunk dileant — Hanv kortam tinch kamam — Bapan Mhaka pattoila mhonn Mhojê vixim govai ditat. Bapan Mhaka pattoila ani Tannench Mhojê vixim govai dilea. Tacho tallo tumi kodinch aikunk na, Tachem rup-ui tumi kodinch polleunk na, ani Tacho Sôbd tumchê bhitôr riglolo na, kiteak Zaka Tannem dhaddla Tacher tumi bhavart tthevinant. Dhormxastracheam borovpamnim sasnnik jivit asa mhonn somzun, tumi tim chit ghalun xiktat; khorem mhonn’lear tinch Mhojê vixim sakxi ditat; toripunn tumkam jivit mellchê khatir Mhojê-xim ieunk tumi raji nant. Mon’xancho zo man Mhaka mellot, tachi Hanv porva korich na. Punn Hanv tumkam pok’kim ollkhotam: Devacho môg tumchê sovem nanch. Mhojea Bapachea nanvan Hanv ailam, tori tumi Mhaka mandun ghenant; dusro konn apleach nanvan ailo tôr, taka tumi mandun ghetelet. Tumkam bhavart koso asum-iet? Kiteak mhollear tumi ekamekacho man gheun khuxi zatat, punn ekleach Deva koddcho zo man ieta tachi tumi porva korich nant. Bapa mukhar Hanv tumkam lavun ditolom mhonn somzonakat; Moizesacher tumi bhorvanso dovortat, tôr toch Moizes tumkam lavun ditolo. Tumi Moizesacher bhavart dovorlolo zalear, Mhojer-ui tumi bhavart dovorto aslet, karonn tannem boroilam tem Mhojê vixim boroilam. Punn tacheam borovpancher tumkam bhavart na zalear, Mhojeam utrancher koso mhonn tumkam bhavart asum-iet?” Magir Jezu Galileiachea vô Tiberiasachea Doriachê poltoddi gelo. Ani lokachi urpônz Tachê pattlean geli, kiteak piddevontam khatir To kortalo teô khunna tãnnim dekhleleô. Jezu dongrar choddlo ani Apleam xisam sangatim thõi boslo. Judevanchi Paska-Porob lagim pavleli. Aple dolle uklun ani lokachi vhôdd urpônz Apnna-xim ieta ti polleun, Tannem Filipak mhonn’lem: “Hea lokak khaunk diunk khõiche mhonn ami undde gheunche?” Tachi porikxa korunk Tannem hem mhonn’lem, kiteak Apunn kitem korto aslo tem To boro zanno aslo. Filipan Taka zobab dilo. “Ek-ekleak ilo-so kuddko poddtolo zalear, don’xim dinaranche undde tankam pavche nant.” Tacheam xisam modlea eklea, Simanv Pedruchea bhava, Andren Taka mhonn’lem: “Hangasôr konn-eklea bhurgea lagim panch undde ani don maslleo asat; punn itlea lokak hem khõi pavta?” Jezun mhonn’lem: “Lokak bosoiat.” Tê svater zaitem tonn aslem; mhonntôch lôk boslo: dadlech sumar panch hozar asle. Tedna Jezun undde ghetle ani Devak dhin’vasun bosleleank te vanttle; têch porim maslleô-i vanttleô. Tankam zai titlem vanttun dilem. Ani tim dhadoxi zatôch, Tannem Apleam xisank mhonn’lem: “Kuddke urleat te ektthãi korat; kãich ibadd zaum noiê.” Hea pasot, tanchem khaun zatôch, zovacheam panch unddeanche urlele kuddke tãnnim ektthãi kele, ani oxeô bara panttleô bhòrleô. Hi Tannem kel’li khunna lokan dekhli tedna, tãnnim mhonn’lem: “Sonvsarant ieuncho asa to Provadi dubhava virêt hoch to!” Tim ieun Apnnak bollan dhorun raza korunk sôdtalim mhonn Jezu zanno aslo, dekhun To koddsorun Apunn eklo novean dongrar gelo. Sanz zatôch Tache xis doria-xim denvun gele, eka hoddear choddle, ani Kapernauma vochunk doria utrunk lagle. Jezu tanchê sorxem pavchê adim kallôk zalo. Zhonnzhonnit varo suttlo ani doria uchambôll zaunk laglo. Sumar tin ki char kilometranchi vatt tanddun kaddtôch, tãnnim Jezuk doriacher cholta ani hoddea lagim pavta to dekhlo. Tankam bhem dislem, punn Tannem tankam mhonn’lem: “Hanv to, bhienakat!” Tedna te Taka hoddeant gheunk kortale, punn, thõichê-thõich, te vetale tê toddik hoddem laglem. Dusrea disa, thõi ekuch hoddem aslem ani Jezu Apleam xisam sangatim tea hoddear choddunk naslo, punn fokot Tache xis gel’le: hem sogllem poltoddi ravlelea lokan pollelem. Somian Devak dhin’vaslea uprant tãnnim undde khel’le tea zagea lagim anink hoddim Tiberiasa thaun pavlelim. Jezu thõi naslo mhonn lokan dekhlem, ani Tache xis-ui thõi nant mhonn polleun, to lôk hoddeamnim choddun Jezuchê sodik Kapernauma ailo. To tankam toddir mell’lo; tedna tãnnim Taka mhonn’lem: “Guruji, Tum hanga kedna ailoi?” Jezun tankam zap diun mhonn’lem: “Khorench Hanv tumkam sot tem sangtam, tumi khunna dekhleô mhonn nhoi, punn undde khaun dhadoxi zaleant dekhun tumi Mhojê sodik aileant. Khaun sorta toslea khanna khatir tras gheum nakat, punn sasnnik jivitak togta toslea khanna khatir tras gheiat; oslem khann Mon’xacho Put tumkam ditolo; karonn khud Deva, Bapan, Tacher Aplo xik’ko marla.” Tedna tãnnim Taka mhonn’lem: “Devak zai toslim kamam korunk ami kitem korchem?” Jezun tankam mhonn’lem: Zaka Devan dhaddla, Tacher bhavart dovrat: hench tem Devak zai tem kam’ ”. Tãnnim Taka mhonn’lem: “Toxem zalear, khunna polleun Tujer ami bhavart dovorchê khatir kosli khunna korun amkam dakhoixi? Kitem kortoloi Tum? Amcheam purvozamnim oronneant man’na khelo; ‘Tannem tankam sorgincho unddo khaunk dilo’, oxem Povitr Pustokar boroil’lem asa.” Jezun tankam mhonn’lem: “Khorench Hanv tumkam sot tem sangtam, Moizesan tumkam sorgincho unddo diunk na; Mhozo Bap ki tumkam khoro sorgincho unddo dita, Kiteak zo sorga thaun denvta ani sonvsarak jivit dita, toch Devacho unddo.” Tãnnim Taka mhonn’lem: “Saiba, ho unddo amkam sodam di.” Jezun tankam mhonn’lem: “Jivitacho Unddo To Hanv; Mhojê-xim ietat tankam kodinch bhuk lagchi na, ani Mhojer bhavart dovortat tankam kodinch tan lagchi na. Punn Hanvem tumkam oxem sanglam: tumi Mhaka dekhla, tori Mhojer tumi bhavart dovrinant. Mhozo Bap Mhaka dita tim sogllim Mhojê-xim ietelim; ani Mhojê-xim ietat tankam Hanv poro ghalcho na. Mhoji khuxi korunk nhoi, punn Mhaka pattoila Tachi korunk Hanv sorgar thaun denvlam; ani Mhaka pattoila Tachi khuxi hi: jim sogllim Tannem Mhaka dileant tantlea konnakuch Hanvem ibaddcho nhoi, punn nimannea disa tankam soglleank Hanvem punorjivont korchim. Hich ti Mhojea Bapachi khuxi: jim konn Putak polletat ani Tacher bhavart tthevtat, tankam soglleank sasnnik jivit mellchem, ani nimannea disa Hanvem tankam punorjivont korchim.” ‘Hanv sorgar thaun denvlolo unddo’, oxem Tannem mhonn’lem dekhun, Judev Tachê vixim gunngunnunk lagle. Tim mhonntalim: “Ho Jezu nhoi rê, Juzecho put?! Tachea avoibapaik ami ollkhonanv kitem? ‘Hanv sorgar thaun denvlam’, oxem tachean koxem mhonnum-ieta?” Jezun tankam zap diun mhonn’lem: “Tumchêch modem gunngunnum nakat. Bapan Mhaka dhaddla, ani, Tannem konnak Mhojê-xim oddun haddlea xivai, konnacheanuch Mhojê-xim ieunk zaina; ani Mhojê-xim ieteleank Hanv nimannea disa punorjivont kortolom. ‘Tim sogllim Devan xikoil’lim mon’xam zatelim’, oxem provadeancheam pustokamnim boroil’lem asa. Jim konn Bapachem aikotat ani xiktat, tim sogllim Mhojê-xim ietat. Konnem Bapak dekhla mhonn nhoi, punn Zo Deva thaun aila, Tannem mat Bapak dekhla. Khorench Hanv tumkam sot tem sangtam, jim konn bhavart tthevtat, tankam sasnnik jivit mellta. Jivitacho unddo To Hanv. Tumcheam purvozamnim oronneant man’na khelo ani tim morun gelim. Punn sorgar thaun denvta to unddo ho, osle torecho ki to khatit tim morchim nant. Sorgar thaun denvlolo to jivo unddo Hanv; ho unddo khatat tim sasnnak jivim astelim; ani sonvsarak jivit mellchê khatir Hanv ditolom to unddo Mhojench mas.” Tedna team Judevam modem vad-vivad zalo; tim ekamekak mhonnunk laglim “Arê, ho anink amkam aplem mas khaunk koso ditolo rê?” Hea pasot Jezun tankam mhonn’lem: “Khorench Hanv tumkam sot tem sangtam, tumi Mon’xachea Putachem mas khelea bogor ani Tachem rogot pielea xivai, tumchê sovem jivit asum nozo. Jim konn Mhojem mas khatat ani Mhojem rogot pietat, tanchê sovem sasnnik jivit asa, ani tankam nimannea disa Hanv punorjivont kortolom. Kiteak Mhojem mas khorem khann ani Mhojem rogot khorem pivonn. Mhojem mas khatat ani Mhojem rogot pietat tim Mhojê sovem jietat ani Hanv tanchê sovem jietam. Jivea Bapan Mhaka dhaddla ani Bapa thaun Hanv jivit ghetam; toxench mhaka khatat tim Mhojê thaun jivit ghetelim. Sorgar thaun denvlo to unddo ho; tumcheam purvozamnim khelo toslo unddo nhoi ho; tim morun gelim. Ho unddo khaun jietat tim sasnnak jivim astelim.” Hem Tannem Kapernaumachea devsthanant xikovnn ditana mhonn’lem. Hem aikun, Tacheam xisantleam zaiteam zannamnim mhonn’lem: “To sangta tem kotthin lagta; konnachean toslem aikun gheunk zait?” Aple xis oxe gunngunntat mhonn Apnna bhitôr zanno zaun, Jezun tankam mhonn’lem: “Hem mandun gheunk tumkam zodd lagta? Ani Mon’xachea Putak poilo aslo thõi choddtana tumi dekhxeat zalear, tedna kitem mhonntelet tumi? Atmo ki jiv dita, mas kiteakuch upkarona. Tumkam hanv uloilam tim utram Atmo ani Jivit. Punn tumchê modem bhavart dhorinant toslim kãi zannam asat.” Konn-konn bhavart dhôrchim naslim, ani konn Aplo ghat gheto aslo, tem Jezu poilinch thaun zanno aslo. Ani Tannem mhonn’lem: “Dekhunuch Hanvem oxem sanglam: Bapan hem dennem favo kelea bogor, konnuch Mhojê-xim ieunk xokona.” Hea uprant, Tacheam xisantlim zaitim zannam koddsorun gelim, ani Tachea sangata anink bhonvona zalim. Jezun bara zannank mhonn’lem: “Tumi-i vochunk sôdtat bi?” Simanv Pedrun Taka zobab dilo: “Saiba, konna-xim mhonn vetelenv ami? Tujim utram sasnnik jivitachim! Ami bhavart dhôrtanv, ani Tum Devan sonvskarlolo mhonn amkam khatri zalea.” Jezun tankam zobab dilo: “Tumkam bara zannank Hanvem vinchun kaddleat ki na? tori tumchê modlo eklo devchar.” Simanv Iskariotacho put Judas, hachê vixim Tannem oxem mhonn’lem, kiteak ho, barantlo eklo zaun-ui, Tacho ghat gheuncho aslo. Tea uprant, Apnnak Judev jivexim marunk sôdtale dekhun, mud’dom Judeiant bhonvonastana, Jezu Galileiant bhonvunk laglo. Judevanchea Tombunchi Porob lagim pavleli, hea pasot Tacheam bhavamnim Taka mhonn’lem: “Hangasorlo bhair sor ani Judeiant voch, ani Tum kortai tim kamam thõisorleam-i Tujeam xisank polleum-di. Konn apli ollokh ugddapim diunk sôdta tôr, to aplim kamam guptim korina. Tum oslim kamam kortai zalear, Tum khaxa sobhêmazar dixtti podd.” Tacheam bhavamnim porian Tacher bhavart dhorunk na. Jezun tankam mhonn’lem: “Mhozo vêll ozun pavunk na, punn tumcho vêll sodanch pavlolo asa. Sonvsarachean tumcho dvês korunk zaina, punn to Mhozoch dvês korta, kiteak Hanv tachim kortubam vaitt mhonn sakxi ditam. Tumi Porbek choddun vochat; Hanv hea Porbek choddun vochona, kiteak Mhozo vêll ozun pavunk na.” Oxem mhonnun, To Galileiant ravlo. Punn Tachim bhav Porbek choddun vetôch, Jezu Apunn-ui gelo, ugteponnim nhoi, punn konnak kollonastana. Porbechea somoiar Judev Taka sôdtale ani mhonntale: “To khõi asa?” Ani Tachê vixim lôk zaitem futfut’talo. Konn-konn mhonno: “To boro monis.” Ani konn-konn mhonno: “Na, to lokak fosoita.” Toripunn, Judevanchê bhirantin konn Tachê vixim ugteponnim uloinaslo. Porob modem-xi pavtôch, Jezu Devmondirant choddun gelo ani xikounk laglo. Hem polleun, Judev ojap zaun mhonntale: “Haka zannvai khõichi rê? Xikxonn kãi na taka.” Jezun tankam portipall kelo: “Mhoji xikovnn Mhoji nhoi, punn Mhaka pattoila Tachi; konn Tachi khuxi korunk raji asat zalear, Mhoji xikovnn Devachi vô Mhojeach monantli, tem tankam kollon ietelem. Apleach monantlem kaddun uloitat tim aplich vhoddvik sôdtat; punn apnnank dhaddla tachi vhoddvik sôdtat tim sota pormannem choltat; osleam mon’xam sovem lottikponn na. Moizesan tumkam Somurt dilea ki na? Toripunn tumchê modlo konnuch Somurt samballina. Kiteak mhonn Mhaka jivexim marunk sôdtat tumi?” Lokan mhonn’lem: “Tujer devchar bosla! Konn Tuka jivexim marunk sôdta?” Zap diun, Jezun tankam sanglem: “Hanvem ek kam’ kelam ani tem polleun tumi sogllim ojap zatat. Chintun polleiat: Moizesan tumkam sunôt korcho kaido ghalo (ti Moizesa koddchi mhonn nhoi, punn purvozam koddchi ailea) ani Sabbatha disa tumi mon’xachi sunôt kortat. Moizesachi Somurt môddina zaunk konn-eka mon’xachi Sabbatha disa sunôt zata zalear, Hanvem Sabbatha disa eka mon’xachem sogllem ang borem kelam dekhun, kiteak mhonn tumi Mhaka zolltat? Voilea-voir polleun nit korinakat, punn nitivontponnan nit korat.” Jeruzaleantleam kãi zannamnim mhonn’lem: “Jivexim marunk sôdtat to monis ho nhoi? Ani ho polle To sot’ten uloita ani te Taka kãich mhonnonant! Khoreponnim Krist To Hoch mhonn amcheam vhoddilank kollon ailam kai? Tori Ho khõicho To ami zannonv; punn Krist ietolo tedna, To khõicho To konnak kollchem na.” Hea pasot Devmondirant xikoitana Jezun arddun mhonn’lem: “Tumi Mhaka ollkhotat khorem? ani Hanv khõicho ailam, tem-i tumi zannont? Khorem mhollear, Hanv Mhojêch osttongim ieunk na; Mhaka pattoila To sotevont, ani Taka tumi ollkhonant. Hanv zalear Taka ollkhotam, kiteak Hanv Tachê thaun ailam ani Tannem Mhaka pattoila.” Te Taka dhorunk sôdtale; punn konnench Tacher hat ghalunk na, kiteak Tacho vêll ozun pavunk naslo. Tori loka modlean zaiteamnim Tacher bhavart dovorlo; tim mhonntalim: “Krist ietolo tedna, hannem keleat tanchê-vôn odik chodd khunna kortolo kai?” Tachê vixim futfutun lôk osleô gozali korta mhonn Farizevamnim aikolem. Mukhel iadnikamnim ani Farizevamnim Taka dhorun haddunk chovkidarank pattoile. Tedna Jezun mhonn’lem: “Anink ilo vêll Hanv tumchê modem asam ani uprant Mhaka pattoila Tachê-xim vetam; tumi Mhaka sôdtelet, punn Hanv tumkam mellcho na. Hanv astolom thõi tumchean ieunk zaina.” Judevamnim ekamekak mhonn’lem: “Amkam mellona zaunk Ho khõi vochunk korta kai? Zõi videxeam modem amcho lôk ximpoddla, thõi videxeank xikovnn diunk vetolo kai? ‘Tumi Mhaka sôdtelet ani hanv tumkam mellcho na’, ani ‘hanv astolom thõi tumchean ieunk zaina’, oxem to mhonnta tacho ôrth kitem?” Porbechea nimannea ani dobajik disa, ubo ravun Jezun arddun mhonn’lem: “Konnank zôr tan laglea, tãnnim Mhojê-xim ieunchem, ani Mhojer bhavart tthevtat tãnnim pieunchem.” Povitr Pustok oxem mhonnta: “Tachê bhitorleô jivea udkacheô zhori ghosghoxit vhanvteleô.” Jim konn Jezucher bhavart tthevto aslim, tankam Atmo mellcho aslo, hachê vixim Tannem oxem mhonn’lem. Jezu ozun mhoimevont zaunk naslo, dekhun Devan ozun Atmo diunk naslo. Him utram aikun, kãi zannamnim mhonn’lem: “Khorench ho êk provadi.” Dusreamnim mhonn’lem: “Hoch to Krist.” Punn heramnim mhonn’lem: “Krist Galileiantlo ievpacho na, oxem nhoi? Krist Davidachê sonstintlo ani Davidachea Bethlehem’ nograntlo ietolo mhonn Povitr Pustok sangina?” Oxi Tachê vixim loka modem futt poddli. Kãi zann Taka dhorunk sôdtale, punn konnench Tacher hat ghalunk na. Tedna chovkidar mukhel iadnikam ani Farizevam sorxim portun gele. Hãnnim tankam mhonn’lem: “Tumi taka kiteak dhorun haddunk na?” Chovkidaramnim mhonn’lem: “Ho monis uloita tê bhaxen kodinch konn ulounk na!” Farizevamnim tankam zobab dilo: “Tumi-i fosovleat kitem? Vhoddilantlea ani Farizevantlea konnem tori tacher bhavart dovorlo mhonn asa? Punn hi zat Xastrachi ollokh nasleli, xirap poddleli!” Tanchê modlea eklea, Jezu-xim adim ail’lo, tea Nikodeman, tankam mhonn’lem: “Eka mon’xachem poilem aikolea bogor, ani to kitem korta tachi ollokh ghetlea xivai, amchem Xastr tachi mon’subi korta zait?” Tãnnim mhonn’lem: “Tum-i bi Galileikar kitem? Chovkoxi korun polle ani eklo-i provadi Galileiantlo upzona mhonn tuka kollon ietelem.” [ Te ap-aplea ghora portole. Ani Jezu Olivet Dongrar gelo. Ani bhov sokallim To novean Devmondirant ailo; sogllo lôk Tachê-xim zomlo ani bosun To tankam xikounk laglo. Dhormxastreamnim ani Farizevamnim pordvarant sampoddlelê êkê bailek haddli ani tancheam soglleam modem ubi keli. Tãnnim Taka mhonn’lem: “Guruji, hi bail atanch pordvar korta thõich astana sampoddlea. Xastrant Moizesan osleam bailank fatraun marunk amkam formailam. Tôr tum kitem mhonntai?” Jezuk Tachea zobabant dhorun Tacher arôp manddchê khatir tãnnim oxem vicharlem. Voddôv ghalun Jezu Aplea bottan zomnir borounk laglo. Ani te Tachê kodde vicharit ravle dekhun, ubo ravun Tannem tankam mhonn’lem: “Tumchê modem zaka patok na, to ticher fatôr marunk poilo zauncho.” Anink êk pavtt voddôv ghalun To zomnir boroit ravlo. Hem aikun, te soglle, eka pattlean êk, koddsorunk lagle; odik zannte te poile gele. Ekloch urlo Jezu ani modem, ubi asli thõich, ti bail. Novean, nitt zaun, Jezun tika mhonn’lem: “Bai, te khõi asat? Konnench tujer khastichem formonn marunk na mum?” Tinnem mhonn’lem: “Konnench na, Saiba.” Ani Jezun mhonn’lem: “Hanv-ui tuka atam guneanvkarnn mhonnona. Voch ani hea fuddem anink patok korinaka.”] Uprant Jezun novean loka kodde uloun mhonn’lem: “Hanv sonvsaracho Uzvadd. Mhozo pattlav kortat tim kallokant cholchim nant, punn tankam Jivitacho Uzvadd astolo.” Tedna Farizevamnim Taka mhonn’lem: “Tum Tujêch vixim govai dita; Tujê govaikek mol na.” Jezun portipall kelo: “Hanv Mhojêch vixim govai ditam zalear-ui, Mhoji govaiki osôl-khori; karonn Hanv khõicho ailam ani khõi vetam tem Hanv zannom; punn Hanv khõicho ailam ani khõi vetam tem tumi nokllot. Tumi mon’xasoimbachê nodren mon’subi kortat; Hanv konnachich mon’subi korina. Punn mon’subi korin zalear, Mhoji mon’subi osôl-khori; kiteak Hanv ekloch na: Zannem Mhaka pattoila to Mhozo Bap Mhojê borabôr asa. Dogam mon’xanchê govaikek mol asa, oxem tumchea xastrant boroil’lem asa. Hanv Mhojêch vixim govai ditam, ani Zannem Mhaka pattoila to Mhozo Bap Mhojê vixim govai dita.” Tea pasot tãnnim Taka mhonn’lem: “Tuzo bap? Khõi asa rê to?” Jezun zap diun mhonn’lem: “Tumi Mhaka ollkhonant ani Mhojea Bapak-ui ollkhonant; tumi Mhaka ollkhol’lo zalear, Mhojea Bapak-ui ollkhoto aslet.” Him utram Devmondirant xikoitana dananchê pettê-xim To uloilo; punn Tacho vêll ozun pavunk naslo dekhun, konnench Taka dhôrlo na. Anink êk pavtt Jezun tankam mhonn’lem: “Hanv chol’lom, ani tumi Mhaka sôdtelet ani tumchea patkant tumi mortelet. Hanv vetam thõi tumchean ieunk zaina.” Judevamnim mhonn’lem: “ ‘Hanv vetam thõi tumchean ieunk zaina’, oxem to sangta mhonntôch, to aploch jiv ditolo mhonn to sangunk sôdta gai?” Tannem tankam mhonn’lem: “Tumi sokoilim, Hanv voilo; tumi hea sonvsarantlim, Hanv hea sonvsarantlo nhoi. Tumi tumcheam patkamnim mortelet mhonn Hanvem tumkam sanglam, kiteak ASAM TO HANVUCH mhonn tumi bhavart dhorina zaxeat zalear, tumcheam patkamnim tumi mortelet.” Tãnnim Taka mhonn’lem: “Tum konn tôr?” Jezun tankam zobab dilo: “Poilinch thaun Hanvem tumkam sanglam Toch. Tumchê vixim zaitem sangchem ani nivaddchem asa; punn Mhaka pattoila To sotevont, ani jem Hanvem Tachê koddsun aikolam tench Hanv sonvsarak sangtam.” To Bapachi khobor sangta mhonn tim somzunk nant. Tea pasot Jezun mhonn’lem: “Tumi Mon’xachea Putak ubartelet tedna, tumkam hem kollon ietelem, ki ASAM TO HANVUCH. ani Mhojêch osttongim Hanv kãi korina, punn zoxem Bapan Mhaka xikoila toxem Hanv uloitam. Ani Zannem Mhaka pattoila To Mhojê sovem asa; Tannem Mhaka eklo sanddunk na, kiteak Taka man’ta tench Hanv sodam kortam.” To oxem uloilo tedna, zaiteamnim Tacher bhavart dovorlo. Apnnacher bhavart dovorlo team Judevank Jezun mhonn’lem: “Tumi Mhojem utor tumchê bhitôr rigun dovorxeat zalear, tumi khoreponnim Mhoje xis zatelet. Ani tumkam sot kollon ietelem ani sot tumkam svotontr kortelem.” Tãnnim Taka mhonn’lem: “Ami Abrahamachi sonsôt, ani konnachinch gulamam ami kednanch zaunk nanv. ‘Tumi svotontr zatelet’, oxem tum koso mhonntai tôr?” Jezun tankam portipall kelo: “Hanv tumkam sot sangtam, patok kortat tim patkachim gulam. Gulam’ sodanch ghorabeant urona; put to sodanch ghorabeachoch. Hea pasot Put zôr tumkam svotontr korit, tôr tumi khoreponnim svotontr zatelet. Tumi Abrahamachi sonsôt mhonn Hanv zannom; tori Mhojem utor tumchê bhitôr rigona dekhun, tumi Mhozo jiv kaddunk sôdtat. Jem Hanvem Mhojea Bapa sovem dekhlam tem Hanv sangtam, ani jem tumi tumchea bapaichem aikolam tem tumi kortat.” Tãnnim Taka portipall kelo: “Abraham’ amcho bap.” Jezun tankam mhonn’lem: “Tumi Abrahamacheô put-dhuvô zal’leat zalear, jem Abrahaman kelem tem tumi korto aslet. Punn Deva koddsun aikol’lem sot Hanvem tumkam sanglam, tori astana tumi Mhozo jiv kaddunk sôdtat. Abrahaman oxem korunk na. Tumi kortat tim kamam tumchea bapaichim.” Tãnnim Taka mhonn’lem: “Kamcharan ami zolmak ieunk nanv; amkam ekloch Bap asa, to mhollear Dev. Jezun tankam mhonn’lem: “Dev tumcho Bap zal’lo zalear, tumi Mhozo môg korto aslet, kiteak Hanv Deva thaun upzolam ani ailam; Mhojêch khuxen Hanv ieunk na, punn Tannem Mhaka dhaddla. Hanv sangtam tem tumi kiteak somzun ghenant? Kiteak Mhojem utor tumchean kanar gheunk zaina. Tumcho bap devchar, ani tumchea bapaik zai tem korunk tumchi khuxi. Mullak thaun to prannghatki, to kednanch sotant riglo na, kiteak tachê sovem sot na. To lottikponnam sangta tedna aplea soimba pormannem uloita, kiteak to fottkiro ani fottincho bapui. Punn Hanv sot uloitam dekhunuch, tumi Mhojer bhavart dovrinant. Tumchê bhitorlo konn-ui Mhaka patok asa mhonn dakhoit? Hanv tumkam sot sangtam zalear, kiteak Mhojer tumi bhavart dovrinant? Jim konn Devachim, tim Devachim utram aikun ghetat; tumi Devachim nhoi dekhun, tumi tim aikun ghenant.” Judevamnim Taka portipall kelo: “Tum Samariekar ani tujer devchar bosla, oxem ami mhonntanv tem sarkem zalem na?” Jezun portipall kelo: “Mhojer devchar na, punn Mhojea Bapak Hanv man ditam ani tumi Mhaka beman kortat. Tori Hanv Mhoji khaxachi vhoddvik sodina; ti sôdtolo ani nit kortolo Eklo Konn asa. Khorench Hanv tumkam sot tem sangtam: jim konn Mhojem utor samballtat, tim kodinch morchim nant.” Judevamnim Taka mhonn’lem: “Tujer devchar asa mhonn atam amkam sarkench koll’lem. Abraham’ melo ani provadi-i morun gele; ani tum amkam sangtai: ‘jim konn mhojem utor samballtat, tim kodinch morchim nant! ’ Amcho bap Abraham’ morun gelo; tachê poros tum vhôdd kitem? Ani provadi-i morun gele. Tum apunn konn mhonn sangunk sôdtai?” Jezun portipall kelo: “Hanv Mhojich vhoddvik korin zalear Mhoji vhoddvik kãich nhoi; Mhoji vhoddvik korpi Mhozo Bap asa, tumi tumcho Dev mhonntat Toch; tori tumi Taka ollkhunk na. Punn Hanv Taka ollkhotam; Taka ollkhonam mhonn Hanvem mhonnlelem zalear, tumchê bhaxen Hanv-ui fottkiro zato aslom. Punn Hanv Taka ollkhotam ani Tachem utor samballtam. Mhozo Dis polleunchê axen Abraham’ tumcho bap khuxal zalo; tannem to dekhlo ani taka khup anond zalo.” Tedna Judevamnim Taka mhonn’lem: “Tuka ozun pon’nas vorsam zaunk nant, ani tunvem Abrahamak dekhloi?” Jezun tankam portipall kelo: “Khorench Hanv tumkam sot tem sangtam: Abraham’ aschê adim HANV ASAM!” Hea pasot tãnnim Tacher fator marunk ukôl’le; punn Jezu liplo ani Devmondirantlo bhair sorun gelo. Vetam-vetam Jezun eka zolmachea kurdd’deak dekhlo. Ani Tacheam xisamnim Tachê kodde vicharlem: “Guruji, konnachea patkak lagun ho monis kurddo zolmolo? tachea vô tachea avoibapaichea patkak lagun?” Jezun zobab dilo: “Hea mon’xan vô tachea avoibapain patok kelem mhonn nhoi, punn Devachim kortutvam tachê sovem porgott zaunchim mhonn to oso zolmolo. Disacho uzvadd astana, Zannem Mhaka pattoila, Tachim kamam Hanvem korunk zai; rat ieta tedna konnachean vavr korunk zaina. Hanv sonvsarant aso-sôr, Hanv sonvsaracho Uzvadd.” Oxem uloun Tannem zomnir luti uddoili, lutien chiktti keli, ani ti chiktti kurdd’deachea dolleank kaddli, ani taka mhonn’lem:” Voch ani Siloamachê tollient dhu (Siloam’ mhonngê ‘Dhaddlolo’).” Kurdd’dean vochun dhulem, ani taka nodor aili, magir to portun ailo. Tachim xeza-samarim ani taka adim bhik magtana pollel’lo tim mhonnunk laglim: “Bhik magunk bostalo to ho nhoi?” Konn-konn mhonntalim: “Hoch to”. Dusrim mhonntalim: “Na; punn ho tachê bhaxen dista.” Tannem mhonn’lem: “Hanvuch to.” Tãnnim taka vicharlem: “Tuje dolle koxe ugòddle?” Tannem zobab dilo: “Jezu nanvachea mon’xan chiktti keli ani mhojeam dolleank kaddli ani mhaka mhonn’lem: ‘Siloam’ tollient vochun dhu. ’ Mhonntôch hanv gelom, hanvem dhulem ani mhaka nodor aili.” Tãnnim taka mhonn’lem: “To khõi asa?” Tannem zap dili: “Hanv nokllom.” Adim kurdd’do asleleak tãnnim Farizevam-xim haddlo. Jezun chiktti korun tache dolle ugôddlele to dis Sabbath aslo. Taka nodor koxi aili kai mhonn Farizevamnim novean vicharlem. Ani tannem tankam mhonn’lem: “Tannem chiktti mhojeam dolleank kaddli, hanvem dhulem ani atam mhaka dixtti poddta.” Farizevantleam kãi zannamnim mhonn’lem: “Ho monis Devacho khoro bhokt nhoi. To Sabbath pallina.” Punn dusreamnim mhonn’lem: “Patki monis osleô khunna koxeô korunk xokot?” Tanchê modem veg-vegllim motam zalim. Hea pasot adim kurdd’do asleleak anink êk pavtt tãnnim mhonn’lem: “Tuje dolle ugôddleat tachê vixim tum kitem mhonntai?” Tannem sanglem: “To êk provadi.” To kurdd’do aslolo ani magir taka nodor aili mhonn Judev sotmaninam zale; hea pasot nodor ail’leachea avoibapaik apoun haddun, tãnnim tanchê kodde vicharlem: “Ho tumcho put? To kurddo zolmol’lo mhonn tumi sangtat, to atam koso polleta tôr?” Tachea avoibapain zap dili: “Ho amcho put ani to kurdd’do zolmol’lo mhonn ami zannonv; punn to atam koso polleta tem ami nokllonv, ani konnem tache dolle ugôddleat tem-i bi ami nokllonv. Tachê kodde vicharat; taka apli pirai asa; to aplem sangtolo.” Tacho avoibapui Judevank bhietalo dekhun tãnnim oxem sanglem; kiteak Jezu Krist mhonn konnem-i mandun ghetlem zalear, taka devsthanantlo bhair ghalcho mhonn tãnnim tharail’lem. Tea pasot tachea avoibapain mhonn’lem: ‘Taka apli pirai asa, tachê kodde vicharat. ’ Tedna, adim kurdd’do aslelea mon’xak tãnnim dusrê pavtti apoilo ani taka sanglem: “Devak mhoima di. To monis patki mhonn ami zannonv.” Tannem zobab dilo: “To patki zalear mhaka khobor na; hanv zannom tem itlench: hanv adim kurddo aslom, punn atam mhaka dixtti poddta.” Tãnnim taka novean vicharlem: “Tannem tuka kitem kelem? Tuje dolle tannem koxe ugôddle?” Tannem tankam zap dili: “Hanvem tumkam atanch sanglam, ani tumi tem kanar ghenant. Anink êk pavtt kiteak aikunk sôdtat? Tumi-i tache xis bi zaunk sôdtat?” Te taka oxe hinddsunk lagle: “Tum za tacho xis! Ami zalear Moizesache xis! Dev Moizesa kodde uloilo mhonn ami zannonv, punn ho monis khõicho to ami nokllonv.” Tea mon’xan zobab diun mhonn’lem: “Ojap tem hem! To khõicho to tumi nokllot, ani tori tannem mhoje dolle ugôddle. Dev patkeanchem aikona mhonn ami zannonv, punn konn Devachi bhokti kortat ani Tachi khuxi palltat zalear, Dev tanchem aikota. Sonvsar ghôddleleak konnem kurddo zolmol’leache dolle ugôddleat mhonn kodinch konnench aikunk na. Ho monis Devacho khoro bhôkt nhoi aslo zalear, tachean kitench korunk zaunchem naslem.” Tãnnim taka portipall kelo: “Tum nibêl patkant zolmolai ani amkam xikounk ailai?” Ani tãnnim taka bhair ghalo. Tãnnim taka bhair ghalo mhonn Jezuchea kanar poddlem, ani Taka to mell’lo tedna Jezun taka vicharlem: “Tum Mon’xachea Putacher bhavart dovortai?” Tannem portun zap dili: “Saiba, hanvem Tacher bhavart tthevunk, To konn To mhaka sang.” Jezun mhonn’lem: “Tunvem Taka dekhlai ani tujê lagim uloita Toch To.” Tannem mhonn’lem: “Saiba, hanv bhavart dhôrtam.” Ani pãiam poddun, tannem Jezuk nomoskar kelo. Jezun mhonn’lem: “Nit korunk Hanv hea sonvsarant ailam: zankam dixtti poddona tankam nodor mellchê khatir, ani zankam dixtti poddta tim kurdd’dim zaunchê khatir Hanv ailam.” Tachê sorxim asleleam thoddeam Farizevamnim hem aikun Taka mhonn’lem: “Ami-i kurdde bi?” Jezun tankam mhonn’lem: “Tumi kurdd’de zal’leat zalear, tumkam guneanv ascho naslo; punn atam ‘amkam dixtti poddta, ’ oxem tumi mhonntat dekhun, tumi patkantuch asat. Hanv tumkam khoreponnim sot sangtam: zo menddranchea oddpant darantlean nhoi punn dusrê vatten choddun bhitôr sorta, to chôr ani nagovnno; punn zo darantlean bhitôr sorta, to menddrancho gonvlli. Taka dar-rakhnno dar ugôddta; menddram tacho tallo aikotat ani apleam menddrank to ap-aplea nanvan ulo korta ani tankam bhair vhorta. Apleam menddrank bhair haddtôch to tanchê fuddem cholta, ani tacho tallo ollkhotat dekhun, menddram tachê pattlean vetat. Porkea pattlean tim vochonant, punn tachê sorxilim tim pollun vetat, kiteak porkeancho tallo tim ollkhonant.” Jezun tankam hi vopar sangli, punn jem To tankam sangtalo, tacho ôrth tankam mell’lo na. Hea pasot Jezun anink êk pavtt tankam mhonn’lem: “Hanv tumkam khoreponnim sot sangtam: Hanv menddranchem dar. Mhojê adim aileat te soglle chor ani nagovnne, punn menddramnim tankam lekhunk na. Hanv dar; Mhojeantlean jim konn bhitôr sortat, tanchem taronn zatelem: tim bhair-bhitôr sortelim ani tankam chorôv melltolo. Chôr ieta to fokot chorunk, marun uddounk ani ibadd korunk ieta; Hanv ailam to tankam jivit mellchê khatir, poripunn jivit mellchê khatir ailam. Hanv boro Gonvlli. Boro gonvlli menddram pasot aplo jiv dita. Êk muxarekar, to khoro gonvlli nhoi mhonn, ani menddram tachim khaxachim nhoi mhonn, landdgo ieta to polleta ani menddrank soddun dita ani apunn par kaddta; ani landdgo tankam ubarun vhorta ani duspottaita. To muxarekar ani taka menddranchem kãi poddunk na dekhun, to par kaddta. 14 a Hanv boro Gonvlli; Zoso Bap Mhaka ollkhota ani Hanv Bapak ollkhotam, toso Hanv Mhojeank ollkhotam ani Mhojim tim Mhaka ollkhotat, ani Mhojeam menddram pasot Hanv Mhozo jiv ditam. Ani Mhaka anink-ui menddram asat; tim hea oddpantlim nhoi; tankam-i Hanvem haddunk zai. Tim-i Mhozo tallo aikotelim. Ani oso êkuch hindd zatolo ani êkuch Gonvlli. Hanv Mhozo jiv ditam ani uprant to portun ghetam dekhun, Bap Mhozo môg korta. Konn Mhozo jiv zhombun kaddina, punn ap-khuxen Hanv Mhozo jiv ditam. Mhozo jiv diunk Mhaka podvi asa ani to portun gheunk-ui Mhaka podvi asa; hi adnia Mhojea Bapa koddli Hanvem ghetlea.” Heam utrank lagun anink êk pavtt Judevam modem veg-vegllim motam zalim. Tanchê modleam zaiteamnim mhonn’lem: “Tacher devchar bosla, tachi môt firlea; tachem kiteak aikotat tumi?” Dusreamnim mhonn’lem: “Devchar laglolo monis oso uloina. Devchar kurddeanche dolle ugte korunk xokta?” Hinvalleachea somoiar Jeruzaleant Bhettovnnechi Porob choltali; Jezu Devmondirant Solomanvachea Tarangnnant bhonvtalo. Tedna Tachê bhonvtonnim ektthãi zaun, Judevamnim Taka mhonn’lem: “Kedna porian Tum amkam dubhavant dovortoloi? Tum Krist zalear, amkam sarkem sang.” Jezun tankam portipall kelo: “Tumkam Hanvem sanglam, tori tumi bhavart dhorinant. Mhojea Bapachê nanvim Hanv kortam tim kamam Mhojê vixim govai ditat; punn tumi bhavart dhorinant, kiteak tumi Mhojeam menddrantlim nhoi. Mhojim menddram tim Mhozo tallo aikotat ani Hanv tankam ollkhotam, ani tim Mhozo pattlav kortat; ani tankam Hanv sasnnik jivit ditam, ani tim sasnnak ibadd zaunchim nant, ani tankam Mhojeam hatantlim konn zhombun vhorcho na. Tankam Mhojea Bapan Mhaka dileant, To soglleam-vôn vhôdd, ani Mhojea Bapachea hatantlim tankam konnacheanuch zhombun vhorunk zaina. Hanv ani Bap êk.” Tedna Jezuk fatraunk Judevamnim novean fator ukôl’le. Jezun tankam sanglem: “Bapachê podven zaiteô boreô kornneô Hanvem tumcheam dolleam mukhar korun dakhoileat; tantlê khõichê kornnê pasot tumi Mhaka fatraunk sôdtat?” Judevamnim Taka zobab dilo: “Borê kornnek lagun ami tuka fatraunk sodinanv, punn tujê devnindê pasot: kiteak tum monis zaun apnnakuch Dev kortai.” Jezun tankam zap dili: “ ‘Tumi dèv mhonn Hanvem sanglam’, oxem tumchea Xastrant boroil’lem asa ki na? Mhonntôch, zankam Devachem utor pavlam, tankam tumchem Xastr ‘dèv’ mhonnta — ani Povitr Pustok moddum nozo. Ani atam, Bapan Mhaka sonvskarla ani sonvsarant dhaddla mhonn, ‘Hanv Devacho Put’ oxem Mhojean mhonnunk zaina? Tôr tumchean Mhaka ‘tum devninda kortai’, oxem koxem mhonnum-ieta? Hanv Mhojea Bapacheô kornneô korina zalear, tumi Mhojer bhavart dovrinakat; punn Hanv teô kortam zalear, tumi Mhojer bhavart dovrinant zalearui, team kornneancher tori bhavart dovrat; ani, oxem, Bap Mhojê sovem asa ani Hanv Bapa sovem asam mhonn tumkam khatren kollon ietelem.” Tea vellar Taka te novean dhorunk sôdtale, punn To tancheam hatantlo sutton gelo. Juanv poilim Jordana poltoddi batism ditalo thõi Jezu porot vochun ravlo. Zaiteam zannamnim Tachê-xim ieun mhonn’lem: “Juanvan koslich khunna korunk na, punn hea mon’xa vixim tannem sanglam titlem-i khorem zalem.” Ani thõi zaiteam zannamnim Jezucher bhavart tthevlo. Betaniecho, Lazar nanvacho konn-eklo monis piddent aslo. Taka dog bhoinni asleô: Maria ani Marta. Somiak pormollit telan makhlo ani Tache pãi apleam kensamnim pusle ti Maria hi. Ticho bhav Lazar boro naslo. Hea pasot bhoinnimnim Jezuk sangun dhaddlem: “Somia, Tuzo ixtt boro na.” Hi khobor aikun, Jezun mhonn’lem: “Hê pidden to morcho na; ti Devachê mhoimê khatir ailea; tichê vorvim Devachea Putak-ui mhoima mellteli!” Marta, tichi bhoinn Maria ani Lazar, hancho Jezu môg kori. Toripunn to boro na mhonn Taka khobor pavli tedna, aslo têch svater Jezu anink don dis ravlo. Tea uprant, Tannem xisank mhonn’lem: “Anink êk pavtt Judeiant vochum-ia.” Xisamnim zobab dilo: “Guruji, niktech porian Judev Tuka fatraunk kortale, ani Tum porot thõi vetai?” Jezun portipall kelo: “Eka disak bara horam asat ki na? Disachim choltat tanche pãi adollnant, kiteak tim hea sonvsaracho uzvadd polletat. Punn konn ratchim choltat zalear, tanche pãi adolltat, kiteak tankam uzvadd na!” Oxem uloun zatôch, Tannem tankam mhonn’lem: “Amcho ixtt Lazar nhidla, punn Hanv taka utthounk vetam.” Xisamnim Taka sanglem: “Somia, to nhidla zalear, boro zatolo.” Jezun tachea mornnachi khobor kel’li, punn To nhidechea visovachi khobor sangtalo mhonn tankam dislem. Tedna Jezun tankam spoxtt sanglem: “Lazar melo; ani Hanv thõi naslom mhonn, tumchê pasot khuxal zatam, kiteak atam tumcho bhavart ghôtt zatolo. Punn chol-ia, tachê-xim vochum-ia.” Zonvllo mhonnlelea Tomasan apleam vangddeam xisank mhonn’lem: “Ami-i vochum-ia, Tachê borabor ami-i morum-ia.” Jezu pavlo tedna, Lazarak somadhint ghalear char dis zale mhonn Taka koll’lem. Betania Jeruzaleak laginch asli, sumar tin kilometranchi vatt. Ani zaitim Judeikar Martak ani Mariek, tanchea bhava pasot, pacharunk ail’lim. Jezu ieta mhonn aikun, Marta Taka mellunk geli, punn Maria ghorant bosun ravli. Martan Jezuk mhonn’lem: “Somia, Tum hangasôr asloi zalear, mhozo bhav morcho naslo. Ani ozun porian Tum Deva lagim magxi titlem-i Dev Tuka ditolo mhonn hanv zannom.” Jezun tika mhonn’lem: “Tuzo bhav novean jivo zatolo.” Martan Taka mhonn’lem: “To nimannea disa, punorjivontponnachea somoiar, novean jivont zatolo mhonn hanv zannom.” Jezun tika portipall kelo: “Punorjivontponn ani Jivit Hanvuch. Jim konn Mhojer bhavart dovortat, tim melim zalear-ui jivim astelim; ani jim konn jivim asat ani Mhojer bhavart dovortat tim sasnnak morchim nant. Ho bhavart asa mum tuka?” Tinnem taka mhonn’lem: “Hôi, Somia, sonvsarant ieuncho aslo to Krist Devacho Put to Tunch mhonn mhaka bhavart asa.” Oxem mhonntôch, ti aplê bhoinni Mariek apounk geli, ani tika kuxin vhorun mhonn’lem: “Guruji hanga asa ani tuka apoita.” Hem aikun, ti rokddich utthli ani Tachê sorxem geli. Jezu ozun gramant pavunk naslo, punn Marta Taka mell’leli thõich aslo. Tika ghorant buzvônn ditalim tim Judeikaram, Maria veginch utthta ani bhair veta tem polleun, ti somadhi sorxem roddunk veta mhonn chintun, tichê pattlean gelim. Jezu aslo thõi pavtôch, Taka polleun Maria Tacheam pãiam poddli; tinnem mhonn’lem: “Somia, Tum hanga asloi zalear, mhozo bhav morcho naslo.” Maria roddtali ti ani tichê sangatim ail’lim tim Judeikaram roddtalim tim polleun, Jezu bhov kollvoll’lo ani soglloch thorthorlo. Tannem vicharlem: “Taka tumi khõi ghala?” Tãnnim Taka sanglem: “Somia, ie ani polle.” Jezuk roddlo. Hea pasot Judeikaramnim mhonn’lem: “Polleiat, ho tacho kitlo môg kori!” Punn tanchê bhitorleam thoddeamnim mhonn’lem: “Kurddeache dolle ugôddle te, Hannem nhoi rê te? tôr tachean haka mornnantlo nivarunk zainaslo?” Tedna novean soglloch kollvollon, Jezu somadhi-xim ailo; ti êk dhôl asli ani tichea tonddar êk fatôr ôddleli. Jezun mhonn’lem: “Fatôr kuxin kaddat.” Mel’leachê bhoinni, Martan, Taka mhonn’lem: “Somia, atam taka ghann marteli; taka char dis zale.” Jezun tika sanglem: “Tum bhavart dhôrxi zalear, Devachi mhoima polleteli mhonn Hanvem tuka sangunk na?” Mhonntôch tãnnim fatôr kuxin kaddli. Tedna dolle ubarun Jezun mhonn’lem: “Bapa, Mhojem aikoli dekhun Hanv Tuka dhin’vastam. Mhojem sodanch aikotai mhonn Hanv zannom aslom, punn bhonvtonnim aslelea loka pasot, Tunvem Mhaka dhaddlai mhonn tãnnim bhavart dhôrchê khatir Hanv oso uloilam.” Hem mhonnlea uprant to vhoddlean oso arddolo: “Lazar, bhair sor!” Mel’lo to bhair ailo, tache hat ani pãi falliamnim bandlele, ani tachem tondd rumalan dhamplelem. Jezun tankam sanglem: “Tache bandpas sôddat, taka vochum-di.” Tannem kel’lem tem polleun, Mariê-xim ail’leam Judeikarantleam zaiteam zannamnim Tacher bhavart tthevlo. Punn tanchê bhitorleam kãi zannamnim Farizevam-xim vochun, Jezun kel’lem tem tankam kolloilem. Mhonntôch mukhel iadnikamnim ani Farizevamnim Mha-Dhormsobhechi boska apoili. Tãnnim mhonn’lem: “Ho monis zaiteô khunna korun dakhoita ani ami kitem kortanv? Ami taka osoch sôddlo zalear, sogllo lôk tacher bhavart dovortolo, ani Romi odhikari ietele ani amchea Devmondiracho ani amchea raxttracho bhosm kortele.” Tanchê modlo eklo, Kaifas nanvacho, tea vorsacho porom’-iadnik aslo; tannem tankam mhonn’lem: “Tumi kãich somzonant. Amchea ak’kea raxttracho bhosm zaunchê poros, porjê pasot eklo melear, tumkam odik faideachem: hem tumi somzoch nant.” Hem tannem apleach monantlem sangunk na; punn tea vorsacho porom’-iadnik koso tannem oxem bhakit kelem, ki Jezu porjê pasot morcho aslo, ani nhoi fokot porjê pasot, punn Devacheam ais-pois ximpoddleleam bhurgeank zoma korun êk korchê pasot. Tea disa thaun Taka jivexim marunk tãnnim tharav ghetlo. Hea pasot Jezu Judeikaram modem ugteponnim bhonvona zalo, punn thõisorlo bhair sorun oronnea lagim aslelea prantant, Efraim’ nanvachea nogrant, gelo ani thõi Apleam xisam borabôr ravlo. Judevanchem Pask lagim pavlelem. Paska adim apli xud’dhi korunk zaito lôk ganv-ganvam thaun Jeruzaleak choddun gel’lo. Tim Jezuk sôdtalim ani Devmondirant ekamekak mhonntalim: “Tumkam kitem dista? To Porbek ietolo ki na?” Jezuk dhorchê khatir to khõi asa ti konnak khobor asot zalear apnnank tem kollounchem mhonn mukhel ladnikamnim ani Farizevamnim hukum ghalo. Paskachê Porbek sô dis asat mhonn’lear, Jezu Betaniek ailo; Tannem mel’leantlo jivont kel’lo to Lazar hanga ravtalo. Thõi Taka ek jevonn kelem; Marta poramôs kortali ani Tachê borabôr jevnnak bosleleam modem Lazar aslo. Osôl zottamanxechem chodd molachem êk rat-bhôr pormollit tel gheun, Marien Jezuche pãi makhle ani apleam kensamnim te pusle, ani telachea domdomit pormollan ghor bhòrlem. Tedna Tacheam xisam modlo eklo, Tacho ghat gheuncho aslo to, Judas Iskariot, hannem mhonn’lem: “Kiteak mhonn hem pormollit tel tin’xim dinarank vikunk na ani tache poixe kiteak mhonn goribank diunk nant?” Taka goribanchem poddlelem mhonn nhoi, punn to chôr aslo dekhun tannem toxem mhonn’lem; tachê lagim pongtichi gantt astali ani tantum lôk ghaltalo tem to apnnak kaddi. Jezun mhonn’lem: “Asum-di tika! Mhojea nikhipinneachea disak tika ho pormôll samballum-di. Dubllim sodanch tumchê modem asat, punn Hanv tumchê modem sodanch na.” Jezu thõi asa mhonn Judei-karantleam zaiteam zannank koll’lem. Mhonntôch tim thõi ailim Jezuchêch pasot mhonn nhoi, punn Tannem mel’leantlo novean jivont kel’lea Lazarak-ui polleunk. Mhonn’toch mukhel iadnikamnim Lazarak-ui jivexim marunk tharailem, kiteak, taka lagun, zaitim Judeikaram tankam soddun Jezucher bhavart tthevtalim. Dusrea disa, Porbek ail’lea zaitea lokan Jezu Jeruzaleak ieta mhonn aikolem. Hea pasot, maddancheô chuddtiô gheun Taka mellunk to lôk bhair sorlo ani oso arddunk laglo: “Zôi! Zôi! Sorvesporachea nanvan ieta Taka zôi! Israelachea Raiak zôi!” Ani Jezuk ek lhan–xem gaddum mell’lem ani tacher To boslo; kiteak oxem boroil’lem aslem: “Zionachê porjê, bhieum naka; ho polle tuzo Raza ieta, gaddvachea poracher bosun ieta!” Tache xis poilim heô vostu somzunk nant, punn jedna Devan Jezuk mhoimevont kelo, tedna Tachê vixim oxem boroil’lem aslem mhonn ani Taka oxem kel’lem mhonn tankam ugddas ailo. Lazarak somadhintlo bhair apoilo ani taka mel’leantlo utthoilo tedna Jezu borabôr aslo to lôk hê ghòddnê vixim govai ditalo. Heach pasot lokachi urpônz Taka mellunk bhair sorli: Jezun hi khunna kel’li mhonn tãnnim aikol’lem. Tedna Farizevamnim ekamekak mhonn’lem: “Pollelem mum? Amchem kãich cholona: akho sonvsar tachê pattlean chol’lo!” Porbechea somoiar, Devak bhozunk Jeruzaleak choddun ail’leam modem thoddo Grik lôk aslo. Galileiantlê Bethsaidechea Filipa sorxim ieun, tãnnim oxi magnni keli: “Saiba, ami Jezuk polleunk sôdtanv.” Filipan vochun Andrek sanglem; Andren ani Filipan borabôr Jezuk sanglem. Jezun tankam portipall kelo: “Devan Mon’xachea Putak mhoimevont korcho vêll pavlo. Hanv tumkam khoreponnim sot sangtam: gonvacho konno zomnir poddun moronam zalear, to tosoch urta; punn morot zalear, zaitem pik dita. Jim konn aplea jivacho môg kortat, tim aplo jiv ibaddtat; ani jim konn hea sonvsarant aplea jivacho dvês kortat tim aplo jiv sasnnik jivitak samballtat. Konn-ui Mhoji seva kortat zalear, tãnnim Mhozo pattlav korunk zai; ani zõi Hanv asam, thõi Mhojim sevok-ui astelim. Konn-ui Mhoji seva kortat zalear, Mhozo Bap tankam man ditolo.” “Atam Mhojea jivacher akant aila. Hanvem kitem mhonnchem? Bapa, hea vellantlo Mhaka nivar, oxem mhonnum? Na, heach pasot Hanv hea vellak pavlam. Bapa, Tujea Nanvak mhoima zoddun ghe.” Tedna sorgar thaun êk tallo ailo: “Hanvem Mhojea Nanvak mhoima zoddun ghetlea ani novean mhoima zoddun ghetolom.” Hem aikun, lagim aslelea lokan mhonn’lem: “Gôddgôdd marla.” Dusreamnim mhonn’lem: “Êk devdut Tachê kodde uloila.” Jezun portipall kelo: “Ho tallo Mhojê pasot nhoi, tôr tumchê pasot aila. Atam hea sonvsarachi mon’subi zata; atam hea sonvsarachea odhikareak Dev bhair ghaltolo. Ani jedna Mhaka zomni velo ubartit, tedna Hanv soglleam mon’xank Mhojê-xim oddun haddtolom.” Oxem mhonnun, Apunn koslê torechem moronn bhôgcho aslo, tem Tannem khunnailem. Lokan Taka zobab dilo: “Krist sodankal jivo astolo mhonn ami Xastrantlem aikolam. Mon’xachea Putak ubarunk zai mhonn tum koso sangtai tôr? Konn to Mon’xacho Put?” Jezun tankam mhonn’lem: “Anink iloch vêll tumchê sovem uzvadd asa. Uzvadd astana cholot ravat, na tôr tumi kallokak sampoddtelet; kallokant choltat tim apunn khõi vetat tem nokllot. Tumi uzvaddachim bhurgim zaunchê khatir tumkam uzvadd astana uzvaddacher bhavart dovrat.” Oxem sangun, Jezu tanchê sorxilo gelo ani liplo. Zori Tannem itleô khunna tanchê hujir kel’leô, tori tãnnim Tacher bhavart tthevunk na; Izaias provadean sangun dovorlelem tem ghoddon ieunchê khatir hem oxem zalem; tachim utram him asat: “Sorvespora, ami porgôttlea ti khobor konn sotmandit? Ani hê ghòddnnent Sorvesporacho bollixtt hat konnak tori dokhôl zala zait?” Khorench tanchean sot-manunk zaunk na, kiteak mhonn’lear oxem-i Izaiasan sangun dovorlelem: “Apleam dolleamnim tãnnim pollena zaunk, aplea monan tankam somzona zaunk ani Hanvem tankam borim korchê khatir tim Mhojê-xim portun iena zaunk, tanche dolle Tannem kurdde keleat ani tanchem kalliz datt nibor kelam.” Jezuchi mhoima dekhli tedna Tachê sombondim Izaias oso uloil’lo. Tori astana, odhikareantleam zaiteam zannamnim Tacher bhavart dovorlo, punn te hem bhailean dakhoinasle, kiteak tankam Farizevanchi bhirant asli ani apnnank devsthanantle bhair ghaltit mhonn te bhietale; karonn, Devachê mhoimê poros, mon’xam modem zôddlolê vhoddvikechi te odik porva kortale. Jezun vhoddlean mhonn’lem: “Mhojer bhavart tthevtat tim Mhojeruch nhoi, bogor Mhaka pattoila Tacher bhavart tthevtat. Ani Mhaka polletat tim Mhaka pattoila Taka polletat. Hanv sonvsarant uzvadd koso ailam; dekhun Mhojer bhavart dovortat tim kallokant urchim nant. Mhojim utram aikoleam astana konn- ui tim pallinant zalear, Hanv tanchi mon’subi korina, kiteak sonvsarachi mon’subi korunk Hanv ieunk na, punn sonvsarachem taronn korunk ailam. Jim konn Mhoji beporva kortat ani Mhojim utram manun ghenant, tanchi mon’subi korunk asa konn: jem utor Hanv uloilam tench nimannea disa tanchi mon’subi kortelem. Kiteak Mhojêch osttongim Hanv ulounk na; Bapan Mhaka pattoila ani Hanvem kitem sangchem ani kitem ulounchem, hachê vixim Tannench Mhaka adnea dilea. Ani Tachê adnê pormannem Hanv uloitam tem sasnnik jivit haddta mhonn Hanv zannom. Mhonntôch jem kitem Hanv uloitam, tem Bapan Mhaka sanglam toxench uloitam.” Paskache Porbe adim, Jezu hea sonvsarantlo bhair sorun Bapa-xim vecho Aplo vêll pavlo mhonn zanno aslo. Sonvsarant asleleam Apleancho Tannem sodanch môg kel’lo, punn hea vellar Tannem sopurnnaien tancho môg korun dakhoilo. Tanchem rat-jevonn choltalem. Jezucho ghat gheuncho mhonn devcharan Simanvachea puta, Judas Iskariotachea monant ghal’lem. Sogllem Aplea hatant Bapan dilam, Apunn Deva thaun aila ani Deva-xim veta mhonn zanno zaun, Jezu jevnna velo utthlo, Tannem Aplem avoronn kaddlem ani êk rumal gheun to Aplea penkttak bandlo. Uprant, eka tostant udok otun, To xisanche pãi dhuvunk laglo, ani Apnnak bandlolo tea rumalak te pusunk laglo. To Simanv Pedru sorxem gelo; Pedrun Taka mhonn’lem: “Somia, Tum mhoje pãi dhutai?!” Jezun Taka portipall kelo: “Hanv kortam tem tuka atam somzona, punn magir somzotelem.” Pedrun Taka mhonn’lem: “Mhoje pãi dhuvunk hanv Tuka kodinch diuncho na!” Jezun taka portun mhonn’lem: “Hanv tuka dhuinam zalear, Mhojea vangdda tuka kãich aschem na.” Simanv Pedrun portipall kelo: “Toxem zalear, Somia, mhoje pãich nhoi, bogor mhoje hat ani mhoji tokli-i dhu.” Jezun taka mhonn’lem: “Nhala tannem fokot pãi dhulear puro: to soglloch nitôll asa; tumi tôr nitoll asat, punn soglle nitoll nant.” Apnnacho ghat konn gheto aslo tem To zanno aslo; tea pasot Tannem mhonn’lem: “soglle tumi nitoll nant.” Tanche pãi dhuun zatôch, Aplim vostram ghalun, Jezu Aplê svater portun ailo. Tannem mhonn’lem: “Hanvem tumkam kitem kelam tem tumi somzoleat mum? Tumi Mhaka Guru ani Somi mhonntat; ani tumi sarkem uloitat, kiteak Hanv khorench Guru ani Somi. Mhonntôch, tumcho Somi ani Guru zaun-ui, Hanvem tumche pãi dhule zalear, tumi-i ekamekache pãi dhuunk zai. Hanvem tumkam dêkh dilea: Hanvem tumkam kelam toxench tumi-i korat. Hanv tumkam sot sangtam: aplea dhonia-vôn gulam’ vhôdd nhoi; toxench pattoil’lo konn apnnak pattoila tachê-vôn vhôdd nhoi. Hem zanno zaun, tumi toxench korxeat zalear, tumi subhagi! Hanv tumchi soglleanchi khobor korinam; konnank Hanvem vinchun kaddleat te Hanv zannom; punn Povitr Pustokantlem hem utor pallon ieunk zai: ‘Zo mhojê borabôr jevnnak boslolo asa, tannench Mhojer khôntt ubarli. ’ Hem ghoddon ietelem tedna, Hanvuch to mhonn tumi bhavart dhôrchê khatir, hem ghòddchê adinch Hanv tumkam sangun dovortam. Hanv tumkam sot sangtam: Hanv dhaddtam tankam mandun ghetat tim Mhaka manun ghetat, ani Mhaka manun ghetat tim Mhaka pattoila Taka manun ghetat.” Oxem uloun zatôch, Jezu soglloch thorthorlo ani ugteponnim Tannem mhonn’lem: “Hanv tumkam sot sangtam: tumchê bhitorlo eklo Mhozo ghat ghetolo.” To konnachi khobor kortalo kai mhonn dubhavun, xis ekamakak polleunk lagle. Tacheam xisam modlo eklo, Jezu môg kori to, Jezuchê kuxik jevnnak bosun aslo; Khunna korun, Simanv Pedrun hea xisak mhonn’lem: “To konnachi khobor korta?” Tannem Jezuchea horddear bagavon Taka mhonn’lem: “Somia, to konn?” Jezun portipall kelo: “Zaka Hanv unddeacho kuddko buddoun ditolom, toch to.” Ani Tannem unddeacho kuddko ghetlo ani to buddoun, Simanv Iskariotachea puta, Judasak, dilo. Unddeacho kuddko ghetlea uprant, tachê bhitôr Soitan riglo. Jezun taka mhonn’lem: “Tum korunk vetai tem veginch kôr.” Kitea pasot Tannem oxem taka mhonn’lem, hem jevnnak boslelea dusrea konnakuch somzonk na. Judasa lagim pongtichi gantt asli dekhun, Jezu taka oxem mhonnta mhonn kãi zannank dislem: “Porbek amkam gorjechem tem ghe” vô “goribank kitem-i ghal.” Mhonntôch, unddeacho kuddko ghetlea uprant, to rokddoch bhair sorun gelo. Rat zal’li. To bhair vetôch, Jezun mhonn’lem: “Atam Mon’xachea Putak mhoima mell’lea ani Tachê sovem Devak mhoima mell’lea. Devak Tachê sovem mhoima mell’lea zalear, Dev-ui Taka Apnna sovem mhoima ditolo, ani rokddoch Taka mhoimevont kortolo. Mhojeam supurleam bhurgeamnô, anink thoddoch vêll Hanv tumchê sangatim asam. Tumi Mhaka sôdtelet; ani zoxem Hanvem Judeikarank mhonn’lam, toxem Hanv atam tumkam-i sangtam: Zõi Hanv vetam thõi tumchean ieunk zaina. Êk novi adnea tumkam ditam; ekamekacho môg korat; Hanvem tumcho môg kela, tosoch tumi-i ekamekacho môg korat. Ekamekacho môg korxeat zalear, tumi Mhoje xis mhonn soglleam mon’xank kolltelem.” Simanv Pedrun Taka vicharlem: “Somia, Tum khõi vetai?” Jezun portipall kelo: “Hanv vetam thõi tujean atam Mhojê pattlean ieunk zaina, punn magir, Mhojê pattlean ietoloi.” Pedrun Taka vicharlem: “Somia, kitea pasot mhojean atam Tujê pattlean ieunk zaina? Tujê pasot hanv mhozo jiv diunk toiar!” Jezun zobab dilo: “Hôi? Mhojê pasot tum jiv diunk toiar asai? Hanv tuka sot sangtam, kombean sad ghalchê adim, tin pavtti tum Mhaka ollkhonãi mhonn sangtoloi.” “Tumchim kallzam uchamboll zaunk dium nakat. Devacher visvas dovrat, tosoch Mhojer-ui dovrat. Mhojea Bapachea ghorant ravunk puskoll svatô asat; oxem nhoi aslem zalear, Hanv tumkam svat toiar korunk vetam mhonn tumkam sangto aslom? Ani vochun tumkam svat toiar kelea uprant, Hanv novean ietolom ani tumkam Mhojê-xim vhortolom; oxem, zõi Hanv asam, thõi tumi-i astelet. Ani Hanv vetam, ti vatt tumi zannont.” Tomasan Taka mhonn’lem: “Somia, Tum khõi vetai tem ami nokllonv, tôr vatt koxi zanno zatelenv?” Jezun taka oxi zap dili: “Vatt, Sot ani Jivit Hanvuch; Konnuch Bapa-xim vochona bogor Mhojê-vorvim. Tumkam Mhoji ollokh asli zalear, Mhojea Bapachi-i ollokh tumkam asto asli; atanchean tumi Taka ollkhotat ani tumi Taka dekhla.” Filipan Taka mhonn’lem: “Somia, amkam Bap dakhoi: itlench amkam puro!” Jezun taka portipall kelo: “Filip, itlo vêll tumchê sangatim asam, ani ozun tumi Mhaka ollkhunk na? Jim konn Mhaka polletat, tim Mhojea Bapak polletat; tôr ‘amkam Bap dakhoi’, oxem tujean koxem mhonnum-ieta? Hanv Bapa sovem asam ani Bap Mhojê sovem asa mhonn tuka bhavart na? J em kitem Hanv tumkam sangtam, tem Hanv Mhojêch osttongim uloina; punn Mhojê sovem asa to Bap Aplim kortutvam korit asa. Mhojer bhavart dovrat: Hanv Bapa sovem asam, ani Bap Mhojê sovem asa; kortutvank lagun tori bhavart dhôrat. Khorench Hanv tumkam sot tem sangtam: jim konn Mhojer bhavart dovortat, tim Hanv kortam tim kortutvam apunn-ui kortelim, ani tanchê poros xrextt kortutvam kortelim, kiteak Hanv Bapa-xim vetam. Tumi Mhojea nanvan magxeat titlem-i Hanv kortolom, ani oxi Puta sovem Bapak mhoima mellteli; tumi kitem-i Mhojê nanvim magxeat zalear, Hanv tem kortolom. Tumi Mhozo môg kortat zalear, Mhojeô adnea samballtelet. Ani Hanv Bapa kodde magtolom ani To tumkam anink êk Xerati ditolo ani Ho tumchê sovem sodankal astolo. Toch to Deva sombondim sot ugddapem korta to Atmo. Sonvsar Taka gheunk xokona, kiteak sonvsarak To dixtti poddona ani sonvsar Taka ollkho-i na; Punn tumi Taka ollkhotat, kiteak To tumchê sangatim asa, ani To tumchê bhitôr ravtolo. Hanv tumkam onath koxe sanddcho nam; punn tumchê-xim ietolom. Anink thoddoch vêll, sonvsar Mhaka anink polleuncho na, punn tumi Mhaka polletelet, kiteak Hanv jivo asam dekhun, tumi-i jive astelet. Hanv Mhojea Bapa sovem asam mhonn, toxench tumi Mhojê sovem asat ani Hanv tumchê sovem asam mhonn tea disa tumkam kollon ietelem. Mhojeô adnea ghetat ani palltat tinch Mhozo môg kortat; ani Mhozo môg kortat tancho Mhozo Bap môg kortolo, ani Hanv-ui tancho môg kortolom ani tankam Mhoji ollokh ditolom.” Judasan (ho Iskariot nhoi, punn dusro) Taka mhonn’lem: “Somia, Tum sonvsarak Tuji ollokh diuncho nãi punn amkam ditoloi, hem oxem kitem?” Jezun taka portipall kelo: “Mhozo môg kortat tim Mhojem utor samballtelim, ani Mhozo Bap tancho môg kortolo, ani Ami tanchê thãi ietelenv ani tanchê sovem tthikann kortelenv. Mhozo môg korinant tim Mhojim utram samballinant; ani tumi aikotat tem utor Mhojem nhoi, punn Mhaka pattoila tea Bapachem. Tumchê modem astana, Hanvem tumkam heô vostu sangleat. Punn Bap Mhojê nanvim tumkam dhaddtolo to Xaroti, mhonngê Povitr Atmo, tumkam sogllem xikoitolo ani Hanvem tumkam sanglam tem sogott tumchea monant haddtolo. Xanti tumkam dovortam, Mhoji xanti tumkam ditam; sonvsar dita toxi Hanv ti tumkam dinam. Tumchem kalliz uchamboll zaunk dium nakat, soglli bhirant sôddat. Hanv vetam ani Hanv tumchê-xim ietam, oxem Hanvem tumkam sanglam mhonn tumi aikolam. Tumi Mhozo môg kel’lo zalear, Hanv Bapa-xim vetam mhonn tumi sontosbhorit zato aslet; kiteak Bap Mhojê-vôn vhôdd. Hem ghoddon ailea uprant tumi bhavart dhôrchê khatir, atam hem ghòddchê adim Hanvem tumkam sanglam. Anink tumchê lagim chodd Hanv ulouncho nam. Hea sonvsaracho odhikari ieuncho zalo; Mhojê voir taka koslich podvi na; punn Hanv Bapacho môg kortam mhonn ani Bapan Mhaka dilea ti adnea Hanv sarki palltam mhonn sonvsarak kollon ieunk zai. Utthat tôr! hangasorle vochum-ia!” “Hanv khori Dak-Vêl ani Mhozo Bap kullvaddi, Mhojê sovem riglolo na zaun follam dina to dôr-êk fantto To katrun uddoita; ani follam dita to dôr-êk fantto, tannem odik follam diunchê khatir, To bhênddta. Hanv tumchê lagim uloilam tea utra vorvim tumi nitoll zaleat. Mhojê sovem rigun ravat ani Hanv-ui tumchê sovem rigun ravtam. Zoxem êk fantto dak-velint rigun ravlea xivai, tachean apnnachêch osttongim follam diunk zainant, toxench tumi Mhojê sovem rigun ravlea xiva, tumchean-ui follam diunk zainant. Hanv Dak-Vêl, tumi fantte. Jim konn Mhojê sovem rigun ravtat ani zanchê sovem Hanv rigun ravtam, tim subham’ follam ditat; kiteak Mhojê virêt tumchean kãich korunk zaina. Mhojê sovem rigun ravonant tim eka katrun uddoil’lea fanttea sarkim suktat; osle fantte zoma kortat ani ujeant uddoitat, ani te lastat. Tumi Mhojê sovem rigun ravxeat ani Mhojim utram tumchê sovem rigun ravtit zalear, tumkam zai tem magat ani tumkam tem ghòddtelem. Tumi subham’ follam diunchim, ani Mhoje xis tumi zaunche, hantum Mhojea Bapak mhoima mellta. Zoso Bapan Mhozo môg kela, toso Hanvem-i tumcho kela: Mhojea mogant ravat. Zoxem Hanvem Mhojea Bapacheô adnea samball’leat ani oso Tachea mogant Hanv asam, toxench tumi-i, Mhojeô adnea tumi samballxeat zalear, Mhojea mogant ravtelet. Mhoji khuxalkai tumchê sovem aschê khatir ani tumchi khuxalkai purnn zaunchê pasot Hanvem tumkam heô vostu sangleat. Mhoji adnea hi: zoso Hanvem tumcho môg kela, tosoch tumi-i ekamekacho korat. Konnem zôr apleam ixttam pasot aplo jiv dilo, hachê poros vhôdd môg konnak na! Mhojê adnea pormannem tumi cholxeat zalear, tumi Mhoje ixtt. Hea fuddem Hanv tumkam chakor mhonncho na, kiteak aplo dhoni kitem korta tem chakôr nokllo; punn Hanv tumkam ixtt mhonntam, kiteak Mhojea Bapa koddchem Hanvem aikolam titlem-i Hanvem tumkam kolloilam. Tumi Mhaka vinchun kaddunk na: Hanvem ki tumkam vinchun kaddleat. Ani hea pasot tumkam nemleat ki tumi vechem ani follam diunchim, togtat toslim follam. Oxem Mhojê nanvim Bapa kodde tumi magtat titlem-i To tumkam ditolo. Hi Mhoji adnea tumkam: ekamekacho môg korat. Sonvsar tumkam zollta zalear, tumkam zollchê adim to Mhaka zoll’la mhonn zanno zaiat. Tumi sonvsarache asleat tôr, sonvsar tumkam aple mhonn manun tumcho môg korto aslo. Punn tumi sonvsarache nhoi mhonn ani Hanvem tumkam sonvsarantle vinchun kaddleat dekhun, sonvsar tumkam zollta. Chakôr aplea dhonia poros vhôdd nhoi: oxem Hanvem tumkam sanglam tea utracho ugddas dhôrat. Tãnnim Mhaka dhumallo dila zalear, tim tumkam-i dhumallo ditelim; tãnnim Mhojem utor samball’lam zalear, tumchem-i samballtelim. Punn hem sogllem Mhojea nanva pasot tim tumkam kortelim, kiteak Mhaka pattoila Tachi tankam ollokh na. Hanv ieunk naslom ani tankam Mhozo sondêx Hanvem diunk naslo zalear, tankam patok aschem naslem; punn atam tanchem patok tancher thapina zaunk tankam nimituch na. Mhaka zolltat tim Mhojea Bapak-ui zolltat. Dusrea khõicheach mon’xan korunk nant tosleô kornneô Hanvem tanchê modem korunk nasleô zalear, tankam patok aschem naslem; punn atam tãnnim hem sogllem pollelam, tori astam tim Mhaka ani Mhojea Bapak-ui zolltat. ‘Karonn nastana Mhozo dvês kelo’, hem tanchea xastrant boroil’lem utor ghoddonk zai mhonn oxem zalem. Hanv Bapa koddsun tumchê-xim êk Xerati pattoitolom; To Bapa-sun nipzota ani Deva sombondim sot ugddapem korta to Atmo: To ietolo tedna, To Mhojê vixim sakxi ditolo; ani survatek thaun tumi Mhojê sangatim asat dekhun, tumi-i Mhoje sakxi zatelet. Tumcho bhavart ddonvddollna zaunk hem Hanvem tumkam sanglam. Tim tumkam devsthanantle bhairaitelim; khorem mhollear oslo vêll pavot ailo, ki jim konn tumkam jivexim martat, tim apunn Devachi bhokti kortat mhonn somzotelim. Ani tãnnim Bapak ani Mhaka-i ollkhunk na dekhun, tim oxem kortelim. Tancho vêll pavtôch Hanvem tumkam heô vostu sangleleô mhonn tumkam ugddas zaunchê khatir, Hanvem teô tumkam sangleat. Hanv tumchea sangata aslom dekhun, survatek thaun Hanvem tumkam heô vostu sangunk nant. Punn atam Hanv Mhaka pattoila Tachê- xim vetam; tori Tum khõi vetai kai mhonn tumchê bhitorlo eklo-i Mhaka vicharina. Punn Hanvem tumkam heô vostu sangleat dekhun, tumchim kallzam khontin bhòrleant. Tori astam, Hanv tumkam sot sangtam: Hanv gelom zalear, tumkam adavachem; Hanv vochona zain zalear, Xerati tumchê thãi ieuncho na; punn Hanv gelom zalear, Taka tumchê thãi dhaddtolom. Ani To ietolo tedna, patka vixim, Devak manonvto goti vixim, ani Devachea nirnnoia vixim, hem sogott dakhoun To sonvsaracho guneanv-sid’d kortolo. Monxank tanchem patok To Povitr Atmo dakhoitolo, kiteak tim Mhojer bhavart dovrinant; Devak manovto goti vixim To mon’xank dakhoitolo, kiteak Hanv Bapa-xim vetam ani tumi Mhaka anink polleunchim nant; Devacho nirnnoi konn to, Toch Povitr Atmo dakhoitolo, kiteak hea sonvsarachea odhikariacher Devan khastichem formonn marlem. Ozun zaiteô vostu Hanvem tumkam sangcheô asat, punn teô tumchean atam monant gheunk zainant. Deva sombondim sot ugddapem korta to Atmo ietolo tedna, To tumkam purnn sotachê vatten choloitolo, kiteak To Aplea podorchem ulouncho na, punn jem kitem To aikota tem To sangtolo, ani ghòddchem asa tem sogllem tumkam kolloitolo. To Mhaka mhoima ditolo, kiteak jem To tumkam kolloitolo, tem To Mhojê koddsun ghetolo. Jem Bapachem tem sogllem Mhojem; hea pasot Hanvem oxem mhonn’lam: jem To tumkam kolloitolo, tem To Mhojê koddsun ghetolo. Thoddeach vellan tumi Mhaka polleunche nant; ani uprant thoddea vellan tumi Mhaka novean polletelet.” Tacheam xisantleam kãi zannamnim ekamekak mhonn’lem: “To sangta: ‘thoddeach vellan tumi Mhaka polleunche nant, ani uprant thoddea vellan tumi Mhaka novean polletelet, ani ‘Hanv Bapa-xim vetam’—hem To amkam mhonnta tem kitem?” Tôr te mhonntale: “To ‘ thoddo vêll’ mhonnta tem kitem? To sangta tem amkam somzonam.” Te Apnna kodde vicharunk kortale mhonn zanno zaun, Jezun mhonn’lem: “ ‘Thoddeach vellan tumi Mhaka polleunche nant ani uprant thoddea vellan tumi Mhaka novean polletelet’, oxem Hanvem mhonn’lem tacho ôrth tumi ekameka kodde vichartat? Hanv tumkam sot sangtam: tumi roddtelet ani pinrgotelet, punn sonvsar khuxalbhorit zatolo; tumi khontibhorit zatelet, punn khontichê bodlek tumkam melltolo sontôs. Êk bail, porsutt zaunchea vellar, aplo vogôt pavlo mhonn khontibhorit zata, punn bhurgeak zolm ditôch sonvsarant êk monis zolmola mhonn sontosun, tika anink khonticho ugddas zaina. Toxench tumkam atam khônt zalea, punn Hanv tumkam novean polletolom, ani tumchem kalliz khuxalborit zatelem, ani tumchi khuxalkai konnuch tumchê thaun kaddun vhorcho na. To dis ietolo tedna, tumi Mhaka kãi vicharche nant. Hanv tumkam sot sangtam: Mhojea nanvan Bapa lagim tumi kitem-i magxeat zalear, To tumkam ditolo. Ozun porian tumi Mhojê nanvim kitench magunk na. Magat ani tumkam melltelem, ani oso tumcho anond purnn zatolo.” “Hem sogllem Hanvem tumkam voparimnim sanglam; punn oslo vêll pavot ailo, ki Hanv anink tumchê kodde voparimnim ulouncho na, punn Bapa vixim ugddapim uloitolom. Tea disa tumi Mhojê nanvim magtelet; ani tumchê khatir Hanv Bapa lagim magtolom mhonn Hanv tumkam sangina; karonn Bap khaxa tumcho môg korta, kiteak tumi Mhozo môg kela ani Hanv Tachech-sun upzolam mhonn tumi bhavart dhôrla. Hanv Bapa-sun upzolam ani sonvsarant ailam; atam Hanv sonvsar sôddtam ani Bapa-xim vetam.” Tacheam xisamnim mhonn’lem: “Atam ki Tum ugddapim uloitai, ani koslich vopar vaprinãi. Tum sogllem zannoi mhonn atam amkam koll’lem ani konnem kitench vicharchi Tuka goroz na; hea pasot Tum Deva thaun ailai mhonn ami bhavart dhôrtanv.” Jezun tankam portipall kelo: “Atam tori tumi bhavart dhôrtat? Oslo vêll pavot ailo, khoreponnim to pavlo, ki tumi soglle ap-aplê vatten ximpoddtelet ani Mhaka ekloch sanddtelet. Khorench mhollear, Hanv eklo na, kiteak Mhojea sangata Bap asa. Mhojê sovem tumkam xanti mellchê khatir Hanv tumchê kodde heô vostu uloilam. Sonvsarant tumkam khônt astelich; punn kalljidar zaiat! Hanvem sonvsaracher zoit vhelem!” Oxem uloilea uprant, Aple dolle sorgak lavun Jezun mhonn’lem: “Bapa, vêll pavlo: Putan Tuka mhoima diunchê pasot, Tujea Putak mhoimevont kôr. Tunvem Taka dil’leam somestank Tannem sasnnik jivit diunchê khatir, akhea mon’xakullacher Tunvem Taka odhikar dilai. Tuka, ekleach khorea Devak, ani Zaka Tunvem pattoilai tea Jezu Kristak ollkhun ghevop,” hench tem sasnnik jivit. Hanvem Tuka prithumecher mhoima dili; Tunvem Mhaka korunk dil’lem kam’ Hanvem sompadlem. Atam, Bapa, sonvsar aschê adim ji Mhaka Tujea sangata mhoima asli, têch mhoimen Mhaka bhôr. Sonvsarantle kaddun Tunvem Mhaka dileai team mon’xank Hanvem Tuka ollkhunk pavoile; te Tuje asle, ani Tunvem te Mhaka dilei, ani tãnnim Tujem utor samball’lam. Jem sogllem Tunvem Mhaka dilãi tem Tujê koddsun ieta mhonn atam tankam koll’lem. Ji xikovnn Tunvem Mhaka dileai ti Hanvem tankam dilea, ani tãnnim ti mandun ghetlea, ani Hanv Tujê-sun ailam mhonn tãnnim khoreponnim ollkhun ghetlam; ani Tunvench Mhaka pattoilai mhonn tãnnim bhavart dhôrla. Tanchê pasot Hanv magtam; sonvsara pasot magina, punn Tunvem Mhaka dileai tanchê pasot magtam, kiteak te Tuje. Jem Mhojem tem sogllem Tujem, ani jem Tujem tem sogllem Mhojem; ani tanchê vorvim Mhaka mhoima mell’lea. Ani atam Hanv anink sonvsarant na, punn te sonvsarant asat, ani Hanv Tujê-xim ietam. Povitr Bapa, Tunvem Mhaka dileai te Amchê vori êk zaunchê khatir, tankam Tujê Nanvim samball. Tanchê sangatim astana, Tunvem Mhaka dileai tancho Tujê Nanvim Hanvem samball kelo. Hanvem tankam rakhle, ani Povitr Pustokantlem utor khorem zaunchê khatir, zachem nisontton zaunk zai aslem taka ekleakuch bhairaun, tanchê bhitorlo konnuch ibadd zalo na. Punn atam Hanv Tujê sorxim ietam, ani Mhozo sontôs tankam sopurnnaien mellchê pasot, Ozun sonvsarant astana heô vostu uloitam. Hanvem Tujem utor tankam dilam; ani zoso Hanv sonvsaracho nhoi, toxe te-i sonvsarache nhoi dekhun, sonvsar tancho dvês korta. Tum tankam sonvsarantle kadd mhonn Hanv magina, punn Noxtteachea hatantle tankam rakh mhonn magtam. Zoso Hanv sonvsaracho nhoi, toxe te-i sonvsarache nhoi. Sota vorvim tankam sonvskarlole kô: Tujem utor-uch tem sot. Zoxem Tunvem Mhaka sonvsarant pattoilai, toxench Hanvem-i tankam sonvsarant pattoileat. Ani te sota vorvim sonvskarlole zaunchê khatir, tanchê pasot Hanv Mhakach sonvskartam. Hanv magnnem kortam tem hanchêch pasot nhoi, tôr jim konn tanchea utra vorvim Mhojer bhavart dovortelim, team-i mon’xam pasot. Tim sogllim êk zaum. Zoxem Tum, Bapa, Mhojê sovem asai ani Hanv Tujê sovem asam, toxench tim-i Amchê sovem êk zaum, ani, hê porim, Tunvem Mhaka pattoilai mhonn sonvsar bhavart dhorum. Zoxem Ami Êk, toxim tim êk zaunchê khatir, Tunvem Mhaka dileai ti mhoima Hanvem tankam dilea. Hanv tanchê sovem ani Tum Mhojê sovem asun tim sopurnnaien êk zaum; oxem, Tunvem Mhaka pattoilai mhonn, ani zoso Tunvem Mhozo môg kelai, tosoch Tunvem tancho môg kelai mhonn sonvsar ollkhun gheum. Bapa, zõi Hanv asam, thõi Tunvem Mhaka dileãi tim-i aschim mhonn Mhoji khuxi, ani oxem Tunvem Mhaka dileai ti mhoima tãnnim polleunchi, kiteak sonvsar rochchê adim Tunvem Mhozo môg keloi. Nitivont Bapa, sonvsaran Tuka ollkhun gheunk na, punn Hanv Tuka ollkhotam ani Tunvem Mhaka pattoilai mhonn hãnnim ollkhun ghetlam. Hanvem tankam Tuji ollokh dilea ani ozun ditolom; hê porim, jea mogan Tunvem Mhozo môg kelai toch môg tanchê sovem astolo; ani Hanv-ui tanchê sovem astolom.” Oxem uloitôch, Jezu Apleam xisam sangatim Kedron gallachê poltoddi gelo. Thõi êk bag asli; tantum To Apleam xisam borabôr bhitôr sorlo. Ghatki Judas-ui hea zageachi khobor zanna aslo, kiteak sobar pavtti Jezu thõi Apleam xisam borabôr vocho. Soinikancho êk zomo ani mukhel iadnikamnim ani Farizevamnim dhaddleleam chovkidarank gheun, Judas ailo: lampianv ani chuddô ani ostram-xostram gheun te thõi pavle. Tedna Jezu, Apnnak kitem ghòddto aslem tem sogllem zanno zaun, fuddem sorlo; Tannem tankam mhonn’lem: “Konnak sodunk aileat tumi?” Tãnnim Taka zobab dilo: “Nazaretkara Jezuk.” Jezun tankam mhonn’lem: “Hanv To.” Ani ghatki Judas tanchê borabôr ubo aslo. “Hanv To.” Jezun mhonn’lem tedna, te pattim sorle ani zomnir xevttole. Novean Tannem tanchê kodde vicharlem: “Konnak sodunk aileat tumi?” Ani tãnnim mhonn’lem: ‘Nazaretkara Jezuk. ’ Jezun portipall kelo: “Nazaretkar Jezu”, “To Hanv.” mhonn Hanvem tumkam sanglem; “Mhonntôch, tumi Mhaka sodunk aileat zalear, hankam vochum-di.” “Tunvem Mhaka dileai tanchê bhitorlea ekleak legun Hanvem ibadd zaunk diunk na.”, oxem Tannem mhonnlelem tem utor ghoddon ieunk zai aslem. Simanv Pedru kodde êk torsad asli, ti tannem bhair kaddli, ani porom’-iadnikachea chakracher marun tacho uzvo kanuch katorlo. Tea chakrachem nanv Malku. Jezun Pedruk mhonn’lem: “Tuji torsad poteant ghal; Bapan Mhaka dilam tem patr pieunchem nhoi Hanvem?” Soinikanchea sordara soit, tanchea zomean, ani Zudevancheam chovki-daramnim Jezuk dhôrlo ani bandlo. Tãnnim Taka poilo An’nasager vhelo, tea vorsachea porom’-iadnika, Kaifasacho to sasro aslo. Porjê khatir eklo monis melear odik faideachem mhonn Zudevank budh dil’li to hoch to Kaifas. Simanv Pedru ani dusro eklo xis Jezu pattlean gele. Ho xis, porom’-iadnikachê ollkhicho aslo dekhun, Jezu borabôr porom’-iadnikachea angnnant bhitôr sorlo, punn Pedru dara bhair ravlo. Porom’-iadnikachê ollkhicho aslo tea dusrea xisan dar-rakhnnê kodde utor ghalem ani tinnem Pedruk bhitôr vochunk dilem, punn teach dar-rakhnnê cheddvan Pedruk mhonn’lem: “Tum-i hea mon’xacheam xisantlo nhoi?” Tannem mhonn’lem: “Hanv nhoi.” Itlea mhonnosôr, hinv khatalem dekhun, kollxeancho dhogtto kel’lo tachê bhonvtim ravun chovkidar ani chakram xektalim; Pedru-i tanchê borabôr ubo aslo ani xektalo. Porom’-iadnik, Jezuk kãi vichar ghalun, Tacheam xisam ani xikovnnê vixim Tachi chovkoxi korunk laglo. Jezun taka zobab dilo: “Hanv sobhêmazar spoxtt uloilam; sodanch Hanvem devsthanant ani Devmondirant, sogllo Judêv lôk ektthãi zata thõi, xikovnn dilea; guptim Hanv kitench ulounk na. Mhojê lagim kiteak vichartai? Hanvem kitem mhonn’lam tem Mhaka aikolam tanchê lagim vichar; Hanvem sanglam tem tim borim zannont.” Tannem oxem mhonnona fuddem, thõi ubo aslelea eka chovkidaran Jezucher thapott marlem ani mhonn’lem: “Porom’-iadnikak tum oso zobab ditai?” Jezun oxi zap dili: “Hanv vankddem uloilam zalear, vankddem kitem tem dakhoi; punn zôr Hanv sarkem uloilam, zalear kiteak mhonn tum Mhaka martai?” Tedna Anasan Taka bandun, porom’-iadnika, Kaifasager pattoilo. Simanv Pedru ozun thõi ubo aslo ani xektalo. Tãnnim taka mhonn’lem: “Tum-i tacheam xisantlo nhoi?” Tannem na mhonn’lem: “Hanv nhoi.” Porom’-iadnikachea eka chakran Pedruk mhollem: “Arê! hanvem tuka tachê borabôr bagent polleunk nam rê?” (Ho chakôr Pedrun kan katorlolo tacho soiro aslo). Pedrun anink êk pavtt na mhonn’lem, ani tednanch kombean sad ghalo. Sokall zatôch tãnnim Kaifasager thaun Jezuk nitixallent vhelo. Apunn battona zaunk, punn apnnank Pask-Jevonn korunk mellchê khatir, te nitixallent bhitôr vochunk nant. Hea pasot, apunnuch tanchê-xim bhair ieun, Pilatan mhonn’lem: “Hea mon’xacher tumi koslo arôp gheun aileat?” Tãnnim taka zobab dilo: “Ho monis noxtto nhoi aslo zalear, ami taka tujê adhin korche naslenv.” Pilatan tankam mhonn’lem: “Tumich taka vhorat ani tumchê Somurti pormannem tachi nit korat.” Judevamnim taka mhonn’lem: “Amchean konnachoch jiv kaddum nozo.” Apunn koso mortolo aslo, hachê vixim jem Jezun sangun dovorlelem, tem khorem zaunchê khatir oxem ghòddlem. Pilat novean nitixallent gelo ani Jezuk apoun tannem Taka vicharlem: “Judevancho raza tum?” Jezun portipall kelo. “Hem tum tujêch osttongim mhonntai vô dusreamnim tuka Mhojê vixim oxem sanglam?” Pilatan mhonn’lem: “Hanv Judêv tôr? Tujeach lokan ani mukhel iadnikamnim tuka mhojê adhin kela. Kitem kelãi tôr tunvem?” Jezun portipall kelo: “Mhojem raj hea sonvsarantlem nhoi; Mhojem raj hea sonvsarantlem zal’lem zalear, Hanv Judevanchea hatant poddona zaunk Mhoje sevok zhuzto asle; punn Mhojem raj hangasorlem nhoi.” Pilatan Taka mhonn’lem: “Mhonntôch, raza tum?” Jezun zobab dilo: “Hanv Raza mhonn tunvench sangli tem sarkem asa. Heach pasot Hanv zolmolam ani sotak govai diunk sonvsarant ailam. Jim konn sot mandun gheunk toiar asat, tim Mhozo tallo aikotat.” Pilatan Taka vicharlem: “Sot mhonngê kitem?” Oxem uloun, novean Judevam sorxem bhair vochun, tankam mhonn’lem: “Mhaka tacho kosloch guneanv mellona. Punn Paskachea somoiar, tumchi chal asa tea pormonnem tumche khatir hanvem sodanch eklea koideak suttka dil’lea dekhun Judevanchea patxaiak hanvem suttoil’lo tumkam zai?” Tãnnim porot bob marun mhonn’lem: “Haka soddinaka, punn Barab’basak!” (Barab’bas mhollear êk pundd aslo.) Tedna Pilatan Jezuk dhorun Tacher jerbond marunk laile. Soinikamnim kantteancho êk mukutt vinnlo ani Tachea mathear bosoilo, ani Tacheam bhuzancher ek zambllem avoronn uddoilem. Te Tachê-xim ieun mhonntale: “Noman, Judevanchea raza!” ani Tacher thapttam martale. Novean bhair ieun, Pilatan tankam mhonn’lem: “Polleiat, tacho mhaka kosloch guneanv mellonam mhonn tumkam kollon ieunchê pasot hanv taka bhair haddtam.” To kantteancho mukutt ani tem zambllem anglem ghalun Jezu bhair ailo. Pilatan tankam mhonn’lem: “Polleiat, ho asa to monis!” Taka pollena fuddem, mukhel iadnikamnim ani chovkidaramnim oxi bob marli: “Taka khursar mar! khursar mar Taka!” Pilatan tankam mhonn’lem: “Tumich taka vhorat ani khursar marat; mhaka tacho kosloch guneanv mellona.” Judevamnim taka portipall kelo: “Amkam xastr asa, ani amchea xastra pormannem taka moronn favo, karonn to apnnakuch Devacho Put korta.” Him utram aikolim tedna, Pilat odik bhielo. Porot nitixallent vochun, tannem Jezuk vicharlem: “Tum khõicho ga?” Punn Jezun taka zabab diunk na. Tea pasot Pilatan Taka mhonn’lem: “Tum mhojê kodde uloinãi? Tuka soddunk ani tuka khursar marunk mhaka odhikar asa mhonn tum noklloi?” Jezun taka portipall kelo: “To tuka voir sorgar thaun diunk naslo zalear, Mhojer tuka kosloch odhikar ascho naslo; hea pasot zannem Mhaka tujea hatant dila, taka odik vhôdd guneanv asa.” Hê ghoddiê meren Pilat Taka soddunk kosli-i tori vatt sôdtalo, punn Zudevamnim bob marli: “Hea mon’xak sôddxi zalear, tum Somrazacho ixtt nhoi; apnnakuch raza korta to monis Somrazacho virodhi zata!” Pilatan him utram aikolim tedna, tannem Jezuk bhair haddlo ani Chirebondi mhonntat tê svater (Aramaik bhaxen Gab’bata) apunn nitisodrer boslo. To dis Paskachê toiarecho dis aslo; sumar don’par zal’lo. Pilatan Zudevank mhonn’lem: “Ho polleiat tumcho raza!” Tim arddunk laglim: “Taka nanch kôr! Taka nanch kôr! Taka khursar mar!” Pilatan tankam mhonn’lem: “Tumchea razak hanv khursar marum?” Mukhel iadnikamnim zobab dilo: “Somraza bogor amkam dusro raza na!” Tedna Taka khursar marunk Pilatan Jezuk tanchê adhin kelo. Tednam tãnnim Jezuk aplea tabeant ghetlo. Ani to Aplo khuris gheun Kortt’to mhonnlelea zagear vochunk bhair sorlo: hea zageachem nanv Aramaik bhaxen Golgota. Thõi Taka ani Tachê borabôr anink dogank tãnnim khursar marle: Jezuk modem ani team dogank Tachê êk-êkê kuxik. Pilatan êk namlêkh boroilo ani to khursa voir ghalo; tacher oxem boroil’lem aslem: “Nazaretkar Jezu, Judevancho Raza Ho.” Jezuk khursar marlo ti svat xara lagim asli dekhun, zaiteam Judeikaramnim to namlêkh vachlo; to Aramaik, Latin ani Grik bhasamnim boroil’lo. Tedna Judevancheam mukhel iadnikamnim Pilatak mhonn’lem: “Judevancho Raza mhonn boroinaka. Punn ho monis apunn Judevancho Raza mhonntalo mhonn boroi.” Pilatan zobab dilo: “Hanvem boroilam tem boroun urlem.” Jezuk khursar martôch, soini-kamnim Tachim vostram ghetlim ani tanche char vantte kele, dôr soinikak êk vantto. Toxench Tachem anglem ghetlem. Angleak xivônn nasli; tem voir-tem sokol eksarkem vinnlelem; hea pasot tãnnim ekamekak mhonn’lem: “Ami tem pinzchem nhoi, punn sorti ghalun tem konnak poddta tem polleum-ia.” Hê porim Povitr Pustokantlim him utram ghoddon ailim: “Tãnnim mhojim vostram apnnam modem vanttlim ani mhojea angleacher sorti ghaleô.” Oxem soinikamnim kelem. Jezuchea khursa sorxim Tachi avoi, Tachê avoichi bhoinn Kleofasachi potinn Maria, ani Magdalachi Maria, heô ubeô asleô. Aplê avoik ani tichê kuxik ubo aslelea mogachea xisak polleun, Jezun avoik mhonn’lem: “Ostriê, ho tuzo put!” Uprant xisak mhonn’lem: “Hi tuji avoi!” Ani tea vellar thaun tea xisan tika apnnager ravunk vheli. Hea uprant, sogllem sompadlem mhonn zanno zaun, Povitr Pustok sopurnnaien pallon ieunchê khatir, Jezun mhonn’lem: “Mhaka tan laglea.” Xirkean bhòrlelem donddul thõi aslem; tãnnim xirkeant buddoil’lem ek allombem boddiek lavun Tachea tondda-xim pavoilem. Xirko chaklo tedna, Jezun mhonn’lem: “Sompadlem!” Ani, tokli bagaun, Tannem prann sôddlo. To Toiarecho dis aslo, ani kherit dobajeacho Sabbath lagim pavlolo. Sabbatha disa kuddi khursar uronk tankam naka aslem dekhun, tanche pãi môddche ani tancheô kuddi kaddun vhorcheô mhonn Judevamnim Pilata kodde maglem. Soinik aile ani Jezu borabôr khursar marleleanche, poileache toxench dusreache-i, tãnnim pãi môddle; punn Jezu-xim pavtôch, To melo mhonn polleun tãnnim Tache pãi môddle nant. Punn eka soinikan êk bhalo gheun Tachi kus vidhli, ani rokddench rogot ani udok vhanvlim. Zannem hem khaxa pollelem, tannench, tumi-i bhavart dhôrchê pasot, hi govaiki dilea: tachi govaiki khori ani apunn sot uloita mhonn to zanno. Povitr Pustok oxem mhonnta: “Tachem ek-punn hadd môddchim nant.” Hem utor khorem zaunchê khatir heô vostu ghòddleô. Povitr Pustok oxem-i mhonnta: “Tannim aspas vidhleleak tinch polletelim.” Hachê uprant, Judevanchê bhirantin guptim ravlelea, Jezuchea xisa, Arimateiachea Juzen Jezuchi kudd kaddun vhorunk Pilata kodde maglem. Pilatan rojia dili. Tannem ieun Jezuchi kudd kaddun vheli. Ani Nikodem’-ui (Jezu-xim poilim ratcho ail’lo to) sumar xembhôr rat gondhrosachi ani musambhorachi misollnni gheun ailo. Tãnnim Jezuchi kudd ghetli, ani Judevanchê nikhipinneachê riti pormannem, pormoll lavun ti olimnim guttlaili. Taka khursar marlolo tê svater êk bag asli, ani tê bagent ozun konnak ghalunk naslo tosli ek novi somadhi asli. To Judevancho Toiarecho dis aslo mhonnun ani ti somadhi laginch asli dekhun, tãnnim Jezuk thõi ghalo. Satolleachea poilea disa, Mari Magdalen bhov sokallim, ozun kallôk astana, somadhi-xim aili. Tinnem somadhi veli fatôr kaddleli polleli. Mhonnun, Simanv Pedru ani Jezu môg kortalo to dusro xis asle thõi vochun, tinnem mhonn’lem: “Somiak soma-dhintlo kaddun vhelo ani Taka khõi ghala tem ami nokllonv.” Dekhun Pedru ani dusro xis borabôr bhair sorle ani somadhi-xim vochunk gele. Te dog-ui dhanvunk lagle, punn to dusro xis Pedru poros vegim dhanvlo ani somadhi-xim poilo pavlo; ani, voddôv ghalun, tannem zomnir asleleô oli polleleô, punn to bhitôr vochunk na. Tedna tachê pattlean Simanv Pedru-i pavlo ani somadhint bhitôr gelo; ani, polle zalear, thõi zomnir oli asleô teô tannem polleleô, ani Tachê tokler ghal’lo to rumal, olim sorxem dovorlolo nhoi, punn kuxin kovoll’lolo. Tedna somadhi-xim poilo pavlolo to-i xis bhitôr sorlo, ani tannem pollelem ani bhavart dhôrlo. Povitr Pustoka pormannem To mel’leantlo punorjivont zaunk zai aslo mhonn te ozun nokllo asle. Uprant xis ghora portole. Punn Maria somadhi lagim bhair ubi ravun roddtali, ani roddtana voddôv ghalun somadhint polle zalear, dhovim angavlim nheslele dog devdut tinnem pollele: zõi Jezuchi kudd dovorleli, thõi te bosun asle, eklo toklê vattten ani dusro pãiam vatten. Hãnnim tika mhonn’lem: “Bai, tum kiteak roddtai?” Tinnem tankam mhonn’lem: “Kiteak mhojea Somiak kaddun vhelo ani Taka khõi ghala to hanv nokllom.” Oxem mhonnlea uprant, pattlean vollon polle zalear, tinnem Jezuk thõi ubo aslo to pollelo. Punn To Jezu mhonn tinnem Taka ollkhunk na. Jezun tika mhonn’lem: “Bai, tum kiteak roddtai? konnak sôdtai tum?” To mali mhonn chintun, tinnem Taka mhonn’lem: “Saiba, tunvem Taka kaddun vhelai zalear, Taka khõi ghalai to mhaka sang, ani hanv Taka kaddun vhortelim.” Jezun tika mhonn’lem: “Mariê!” Tinnem vollon Judeikaranchê bhaxen Taka mhonn’lem: “Rab’buni!” (mhonngê “Guruji!”). Jezun tika mhonn’lem: “Mhaka dhorun ravonaka! Hanv ozun Bapa sorxim choddunk na. Te bodlek mhojeam bhavam-xim vochun tankam oxem sang: ‘Mhojea Bapa ani tumchea Bapa-xim, Mhojea Deva ani tumchea Deva-xim, Hanv choddun vetam. ’ ” Mari Magdalen geli ani apnnem Somiak pollela ani Tannem apnnak oxem-oxem sanglam mhonn tinnem xisank kolloilem. Têch sanjê, mhonngê satolleachea poilea disa, xis zomlole asle thõichim daram Judevanchê bhirantin bond korun dovorlelim; Jezu bhitôr sorlo ani tanchê modem ubo ravlo. Tannem tankam mhonn’lem: “Xanti tumkam!” Hem mhonnun, Tannem tankam Aple hat ani Apli kus dakhoilim. Somiak polleun, xis khuxal zale. Novean Jezun tankam mhonn’lem: “Xanti tumkam! Zoso Bapan Mhaka pattoila, tosoch Hanv tumkam pattoitam.” Oxem uloun, Tannem tancher svas sôddlo ani tankam mhonn’lem: “Povitr Atmo gheiat. Tumi mon’xanchim patkam bhogxixeat zalear, Dev tim tankam bhogxita; ani tumi tim bhogxina zaxeat zalear, Dev tankam tim bhogxicho na. Jezu ailo tedna, Baram modlo eklo, Zonvllo mhonnlolo Tomas, tanchê borabôr naslo. Hea pasot dusream xisamnim taka mhonn’lem: “Ami Somiak pollela.” Punn tannem tankam mhonn’lem: “Tacheam hatancher hanvem khilleanchi khunna pollelea xivai, ani khilleanchê svater mhojem bott ghalea bogor, ani mhozo hat Tachê kuxint ghalina zain zalear, hanv sotman’cheak na.” Atth disam uprant, xis novean ghorant asle, ani tanchê borabôr Tomas. Daram bond astana, Jezu bhitôr ailo, ani tanchê modem ubo ravun Tannem mhonn’lem: “Xanti tumkam!” Uprant tannem Tomasak mhonn’lem: “Tujem bott hanga ghal: he polle asat Mhoje hat! Tuzo hat lagim hadd ani Mhojê kuxint ghal! Hea fuddem bhavart-naslolo zaum naka, punn bhavart dhôr.” Tomasan Taka zap diun mhonn’lem: “Mhojea Somia ani mhojea Deva!” Jezun taka mhonn’lem: “Mhaka polleloi mhonn tunvem bhavart dhôrloi; pollenastana bhavart dhôrtat tim khorench subhagi!” Jezun xisam hujir kel’leô anink zaiteô khunna hea pustokar boroun dovrunk nant; punn Jezu khore-ponnim Krist ani Devacho Put mhonn tumi bhavart dhôrchê khatir ani, bhavart dhorun, Tachea Nanva vorvim tumkam Jivit mellchê pasot, heô vostu boroun dovorleat. Tea uprant, Tiberiasachea Doria- xim Jezu novean xisank dixtti poddlo. Hê porim To dixtti poddlo: Simanv Pedru, Zonvllo mhonnlolo Tomas, Galileiantlea Kanacho Natanael, Zebedevache put, ani Tacheam xisam modle anink dog ektthãi asle. Simanv Pedrun tankam mhonn’lem: “Hanv maslli marunk vetam.” Tãnnim taka mhonn’lem: “Ami-i tujê borabôr ietanv.” Te gele ani hoddeant choddle; punn tê rati tankam kãich mell’lem na. Sokall zatôch Jezu veller ubo aslo; to Jezu mhonn xisank kollunk na. Jezun tankam mhonn’lem: “Arê babamnô, maslli kitem tori poddlea mum?” Tãnnim Taka zobab dilo: “Kãich na.” Tannem tankam sanglem: “Hoddeachê uzvê vatten rampônn ghalat ani tumkam maslli poddteli.” Tãnnim rampônn ghali, ani maslli ekdom’ chôdd poddli dekhun, tanchean rampônn oddunk zaina zali. Jezu môg kori tea xisan Pedruk mhonn’lem: “To Somi!” To Somi mhonn aikun, Simanv Pedrun aplem voilem anglem penkttak bandlem (kiteak to sarko nheslolo naslo) ani doriant uddki marli. Punn ier xis hoddear bosun ani masllen bhòrloli rampônn oddit-oddit aile; te toddik laginch asle, sumar deddxem hat bhair. Toddir pavle tedna, tãnnim thõi kollxeanchea ujear dovorloli maslli ani unnddo dekhlim. Jezun tankam mhonn’lem: “Tumi atam dhôrlea tantli maslli hanga haddat.” Hoddear choddun Simanv Pedrun rampônn toddir oddun haddli. Ti ekxem trepon’n vhoddleam maslliamnim bhòrleli asli; ani itleô maslleô astanam-i, rampônn pinzunk na. Jezun tankam mhonn’lem: “Nasteak ieiat.” Tum konn kai mhonn vicharunk nasteak bosleleantlea konnakuch kalliz zaunk na; To Somi mhonn te zanno asle. Tedna Jezun fuddem sorun unddo ghetlo ani tankam dilo; toxench maslli-i dili. Mel’leantlo punorjivont zalea uprant Jezu xisank dixtti poddlo ti hi tisri pavtt. Nasto zatôch Jezun Simanv Pedruk mhonn’lem: “Ximanv, Juanvachea puta, hanchê poros odik Mhozo môg kortai mum tum?” Tannem Taka mhonn’lem: “Hôi, Somia, hanv Tuzo môg kortam mhonn Tum zannoi!” Jezun taka mhonn’lem: “Mhojeam menddrank chorvak vhor.” Dusrê pavtti Tannem taka vicharlem: “Simanv, Juanvachea puta, Tum mhozo môg kortai?” Tannem Taka zobab dilo: “Hôi, Somia, hanv Tuzo môg kortam mhonn Tum zannoi.” Jezun mhonn’lem: “Mhojeam xelliank rakh.” Tannem taka tisrê pavtti vicharlem: “Simanv, Suanvachea puta, Mhozo môg kortai mum tum?” ‘Mhozo môg kortai mum tum?’, oxem apnnak tisrê pavtt vicharlem dekhun Pedruk khônt zali, ani tannem oso portipall kelo: “Somia, Tum sogllem zannoi; hanv Tuzo môg kortam mhonn Tum zannoi.” Jezun taka mhonn’lem: “Mhojeam xelliank chorvak vhor. Khorench khorem Hanv tuka sangtam: tum lhan asloi tedna, tujea penkttak bandtaloi ani tuka zai thõi tum vetaloi; punn tum mhataro zatôch, tuje hat vistartoloi ani dusro konn tujea penkttak bandtolo ani tuka naka thõi tuka gheun vetolo.” Koslea mornna vorvim to Devak mhoima diuncho aslo tem dakhounk, Jezun toxem mhonn’lem. Tea uprant mhonn’lem: “Mhojê pattlean ie.” Pedru voll’lo ani Jezucho mogacho xis apnna pattlean ieto tannem pollelo; heach xisan, ratchea jevnnar Jezuchea horddeak tenkun, Taka mhonnlelem: “Somia, Tuzo ghat ghetolo to konn?” Taka pollelo tedna, Pedrun Jezuk mhonn’lem: “Somia, hachem kitem?” Jezun taka mhonn’lem: “Hanv ie-sôr to ravlolo Mhaka zai zalear, tuka kiteak poddlam? Tum Mhojê pattlean ie.” Ho xis morcho na mhonn bhavam-bhoinnim modem khobor zali; punn “to morcho na”, oxem Jezun Pedruk mhonnunk na, punn “Hanv ie-sôr to ravlolo Mhaka zai zalear, tuka kiteak poddlam?” Hoch xis heam vostunchi govai dita: tannench heô vostu boroun dovorleat; ani tachi govaiki khori mhonn ami zannonv. Jezun kel’leô anink-ui zaiteô vostu asat; teô soglleô ekan-êk boroun dovorleleô zalear, borounk poddtelim aslim tim pustokam dovrunk sonvsar legun pavcho naslo mhonn mhaka dista. Jezun Aplo vavr suru kelo tedna thaun Devan Taka sorgar ubarun vhelo tea disa porian Tannem kelem ani xikoilem titleachi-i khobor, mogall Teofila, mhojea poilea pustokar hanvem boroun dovorlea; toxench Apnnem vinchun kaddleleam apostlank Povitr Atmeachea bollan Tannem dil’leam updesanchi-i khobor thõi hanvem dilea. Aplea koxttam-mornna uprant Apunn jivo asa mhonn jin’nsavar purave diun Tannem tankam dakhoilem; challis dis To tankam dixtti poddlo ani Devachea Rajea vixim tanchê kodde uloilo. Tanchê sangatim jevnnar astana, Jeruzaleantle koddsoronam zaunk, punn Bapan kel’lê bhasavnnek ravunk Jezun tankam formailem. Jezun sanglem: “Hi bhasavnni kosli ti Mhojeach tonddantli tumi aikolea: Juanvan udkan batism dila, punn thoddeanch disamnim tumkam Povitr Atmean batism melltolo.” Te zomlele astana, tãnnim Jezu kodde vicharlem: “Somia, atam Israel-raxttrachi razvoddki Tum novean sthapun ditoloi to vêll pavlo kai?” Jezun tankam zobab dilo: “Bapan Aplea odhikaran nemlole kall ani ghoddiô zanno zaunk tumkam poddlem na. Punn tumcher denvun ietolo tea Povitr Atmeachem boll tumi ghetelet ani Jeruzaleant, akhea Judeiant ani Samarient ani sonvsaracheam ximam porian tumi Mhoje govai zatelet.” Hem sanglea uprant, te polletat thõich astana, Jezuk Devan voir-voir ubarun vhelo ani tancheam dolleam mukhavelo eka kupan Taka lipoilo. To choddun veta astana, te aple dolle sorgak lavunuch asle. Ovchit dhovim vostram ghalun dog dadle tanchê kuxik ube zale. Tãnnim mhonn’lem: “Galileikaramnô, tumi oxe sorgak nodor lavunuch kiteak ube asat? Tumchê modlo Devan voir ubarun vhela toch Jezu, tumi sorgar vetana pollelo tosoch, porto ietolo.” Olivet mhonnlelea dongrar thaun te Jeruzaleak portole; ho dongôr sumar êk kilometr Jeruzalea thaun pois asa. Xarant bhitôr sortôch, apunn ravtale tea unchlea vosreant te gele. Te mhonn’lear he: Pedru, Juanv, Jakob, Andre, Filip, Tomas, Bartolomêv, Matêv, Alfevacho put Jakob, krantikar Simanv ani Jakobacho put Judas. Te soglle ekach monan magnnem korit asle; tanchea vangdda aslo êk bailancho zomo; hanchê modem Jezuchi avoi Maria, ani tea bhair Tache bhav. Hachê uprant kãi disamnim, sumar ekxem-vis bhavarteam modem ubo ravun, Pedrun mhonn’lem: “Bhavam-bhoinnimnô, Judasa vixim Povitr Atmean Davidachê tonddim adim-fuddench sangun dovorlelem Povitr Pustokantlem utor pallon ieunk zai aslem. To amchea vangdda aslo ani he sevent taka-i vantto mell’lolo; punn Jezuk dhorunk aile tankam vatt dakhounk to fuddem sorlo. Aplea khotteponnachi mozuri gheun tannem ek xet viktem ghetlelem; ani tondd zomnir apttota toxem to xevttolo, ani pott futton tacheô soglleô antkiddiô bhair sorun ximpoddleô. Jeruzaleant ravteleam soglleank hachi khobor pavli, ani oxem hea xetak tanchê khaxa bhaxen ‘Hakeldama’ mhonngê ‘Rogtachem Xet’ mhonn nanv poddlem. Stotranchea Pustokar oxem boroil’lem asa: ‘Tachem ghor padd zaum ani tantum ravunk konnuch urona zaum.’ Hea bhair oxem-i boroil’lem asa: ‘Tachi zutti anink konn gheum.’ Hea pasot, Somi Jezu punorjivont zala mhonn amchea vangdda sakxi divpi dusro eklo amkam zai. Somi Jezu amchê modem dixtti poddlo ani bhonvlo team disamnim, mhonngê Juanv batism ditalo tedna-san, Jezuk amchê thaun Devan ubarun vhelo to dis porian, hea sogllea kallar amchea vangdda asle team dadleam modlo eklo to zaunk zai.” Tedna tãnnim doganchim nanvam suchoilim: Barsab’bas mhonnlolo Juze, addnanvan Nitivont, ani Matias. Magir tãnnim oxem magnnem kelem: “Somia, soglleanchim kallzam Tum ollkhotai; tôr aplea khaxa zagear vochunk Judasan soddun dilo te sevecho vavr ani apostlanchem kam’ korunk heam dogam bhitorlea konnak Tunvem vinchun kaddlai to amkam dakhoi.” Tedna tãnnim sorti ghaleô ani sort Matiasacher poddli. Ani ikra apostlam modem taka lêkhlo. Pon’nasvea Disachea Porbechea somoiar tim sogllim êkêch svater zomlelim aslim. Ovchituch zonnzonnit varea sarko sorga velo êk avaz aikunk ailo; hea avazan tim aslim tem ak’khem ghor bhòrlem. Ani ujeacheô koxeô jibô tankam dixtti poddleô; teô fanttleô ani tancher ek-ekleacher bosleô. Tim sogllim Povitr Atmean bhòrlim ani, Atmean tankam dil’lo ulovpacho gunn gheun, tim veg-veglleam bhasamnim ulounk laglim. Mollba khala aslelea dor-eka raxttrachim bhoktivont Judev mon’xam Jeruzaleak vostek ail’lim aslim. Ho avaz aikun khup lôk ekttaim zalo ani apli zonn ekleachi bhas tim uloitat tem aikun to lôk ghuspolo. Thottakon ani ojap zaun to lôk mhonnunk laglo: “Him uloitat tim sogllim Galileikaram nhoi? Amchê modlea zonn-ekleachê avoi-bhaxen tim uloitat mhonn ami aikotanv tem koxem tôr? Ami Parthi, Medi ani Elamit; ami Mezopotamientlo, Judeiantlo ani Kapadoxientlo lôk; ami Pontusant, Aziechea prantant, Frijient ani Panfilient, Ejiptant ani Sirena bhonvtim aslelea Libiechea prantant ravpi; ami Roma thaun-ui ail’lo Judêv lôk ani tanchim novxisam; tea bhair Kretkaram ani Arbi. Tori Devachim xrextt kortutvam, amcheam zonn ekleacheam bhasamnim tim porgôtto, ami aikotanv tem koxem tor?!” Tim sogllim tthottaklim ani sarkinch ghuspon ekamekak mhonnunk laglim: “Hem anink kitem?!” Punn dusrim moskoreô korun mhonntalim: “Him mon’xam novo soro pieun borinch lal zaleant.” Tedna Pedru Ikram borabôr ubo ravun ani aplo tallo ubarun oso uloilo: “Judevamnô, ani Jeruzaleant vostek asleleam somestamnô, hem zanno zaiat ani hanv sangtam taka chit diat. Tumi somzotat toxem him mon’xam bebdim zaunk nant, kiteak atam sokallchim novuch voram zaleant. Punn Joel provadea vorvim jem Devan sanglelem tem atam ghoddon ieta: ‘Nimanneam disamnim — uloita to Sorvespor — sogllea mon’xakullacher Hanv Mhozo Atmo ghaltolom, tumcheô put-dhuvô sondêx ditelim, tumchim tornnattim dorxonam dekhtelim, ani tumchim zanntim sopnam sopnetelim. Ani khorench team disamnim Mhojeam gulamancher porian, dadleancher toxem bailancher, Hanv Mhozo Atmo ghaltolom, ani tim sondêx ditelim. Voir mollbar Hanv vizmitam korun dakhoitolom ani sokla prithumer khunna-ojapam: rogot, uzo ani dhunvrachim kupam. Xrêxtt ani tezvont Sorvesporacho Dis udeunchê adim suriacho zatolo kallôk ani chondrimachem zatolem rogot. Tedna Sorvesporachem Nanv ghetat team soglleank soddvonn mellteli.’ Israel-porjecheam bhavam-bhoinnimnô, him mhojim utram chitan aikat! Devan tumchê modem Nazaretkar Jezu Apnnak manovlolo monis mhonn dakhoilo: To tumchê modem aslo tedna, Tachê udexim Devan ochoriam ani vismitam ani khunna kelim – hi soglli khobor tumi zannont. Aplê tharail’lê ievzonnê pormannem, sogllem adim-fuddench zanno zaun, Devan Jezuk poradhin kelo, ani tumi Taka Somurt-nasleleam mon’xanchê adhin korun khursar umkollailo ani jivexim marlo. Punn Devan Taka mornnachea bandpasantlo soddoun Taka punorjivont kelo. Kiteak Taka aplea chopkeant dhorunk mornnak koxêch bhaxen podvi asum nozo asli. Tôr Tachê vixim David oxem mhonnta: ‘Hanv Sorvesporak sodanch mhojeam dolleam mukhar dovortam, To mhojea uzveak asa mhonntôch, Hanv kodinch halonam. Dekhun mhojem kalliz murgott’ta, mhoji jib ul’lasta, mhoji kudd porian bhorvanxean sust zateli, kiteak Tum mhozo jiv Norkant sanddcho nãi ani Tujea visvaxi bhoktacho vinas zaunk diuncho nãi. Tum mhaka jivitachi vatt dakhoitoloi, Tujê mukhar mhaka mellteli anondachi bhorti.’ Bhavam-bhoinnimnô, hem mhojean tumkam khatren amchea porzapoti Davida vixim sangum-ieta: to melo ani taka purlo ani tachi somadhi aichea disa porian amchê modem asa. Mhonntôch, provadi zaun, apnnak Devan kel’lê bhasavnnechi Davidak khobor asli: tachê sonstichea ekleak tachea xinvasonar Apunn bosoitolo mhonn khud Devan taka soput dil’lo. Hea pasot tannem Kristachem punorjivontponn adim-fuddench pollelem ani oxem porgott kelem. Devan norkant sanddunk na to Hoch! Jicho Devan vinas zaunk diunk na, ti kudd Hachich! Hea Jezuk Devan punorjivont kelo ani ami soglle Tache govai. Devan Taka Aplê podven sorgar ubarun vhelea uprant, bhasail’lo Povitr Atmo Tannem Bapa koddlo ghetlo ani amcher dhaddlo. Tumi polletat ani aikotat tem hench! Kiteak David sorgar choddunk na; tori tannem mhonn’lam: ‘Mhojea Somiak Sorvesporachem utor hem: Mhojea uzvea hatak bos, tujeam dusmanank Hanv tujeam pãiam tolla ghaltam.’ Mhonntôch tumi khursar marlo tea Jezuk Devan Somi ani Krist kelo mhonn Israelachem ak’khem ghorannem sogllê khatren zanno zaunchem.” Him utram aikolim tankam vhôdd khônt bhògli ani Pedruk ani heram Apostlank tãnnim mhonn’lem: “Bhavamnô, ami kitem korchem?” Pedrun zap diun mhonn’lem: “Jivit-mon bôdlat, ani tumcheam patkanchem bhogsonnem gheunk zonn-eklean Jezu Kristachea nanvan batism gheuncho, ani tumkam Povitr Atmeachem dennem melltelem. Kiteak ji Devan bhasavnni kelea, ti tumchê khatir ani tumcheam bhurgeam-ballam khatir ani pois asleleam somestam khatir, amcho Sorvespor Dev Apnna-xim apoun haddtolo titleam-i khatir.” Zaitem her sangun tannem apli govaiki dili ani tankam oso ulo kelo: “Hê noxttê pinddkentli tumkam soddvonn mellun gheiat.” Tedna tãnnim tachem utor mandun batism ghetlo. Tea disa sumar tin hozar lôk tanchea zomeant bhitôr sorlo. Tim apostlanchi xikovnn gheunk, bhavponnacho ekchar samballunk, toxench unddeachê môddnnent ani magnneannim vantto gheunk kodinch chukonaslim. Sogllo lôk thottak zatalo, kiteak apostlam vorvim puskoll vismitam ani khunna ghòddtalim. Bhavarti sogllim ekvottant jietalim ani tanchem sogllem bhaga aslem; tim aplim bhattam-vit’tam viktalim ani vikrecho duddu zonn-ekleachê gorjê pormannem vantt’talim. Ekach monan dispottim tim Devmondirant vetalim ani unddo moddunk tanchea eka-eka ghorant ektthãi zatalim, ani khuxalkaien ani kallzachea bholeponnan tim Devak vakhanntalim ani sogllea lokak manovtalim. Zankam taronn mellchem aslem, tankam tanchea vangdda haddun, disan’dis Sorvespor tancho ank choddoitalo. Ekdam Pedru ani Juanv sanjecheam tin voranchea prarthonak Devmondirant vetale. Tedna eka mon’xak ubarun vhortalim. To zolma thaun opangull aslo; ani Devmondirant bhitôr sortoleam lagim tannem bhik magchê khatir, Devmondirachea Sundôr mhonnlelea Darvonttea sorxim dispottim taka dovortalim. Pedru ani Juanv Devmondirant bhitôr sortat tem polleun tannem tanchê lagim bhik magli. Pedrun ani Juanvan tacher dolle laile ani Pedrun taka mhonn’lem: “Amkam polle.” Apnnak tanchem kitem-i tori melltelem mhonn chintun, to axen tanchê vatten polleunk laglo. Punn Pedrun mhonn’lem: “Mhojê lagim rupem na, bhangar-ui na, punn jem kitem mhojê lagim asa tem hanv tuka ditam: Nazaretkar Jezu Kristachea nanvan utth ani cholunk lag.” Tedna Pedrun tachea uzvea hatak dhorun taka ubo kelo. Thõichê-thõich tacheam pãiank ani khubeank ghottai mell’li; uddi marun to ubo ravlo ani cholunk laglo; ani cholot ani uddiô marit ani Devak vakhannit to tanchê borabôr Devmondirant bhitôr sorlo. To cholta ani Devak vakhannta mhonn soglleamnim pollelem. Devmondi-rachea Sundôr Darvonttea sorxem bosun bhik magi to hoch mhonn tãnnim taka ollkholo ani tea mon’xak ghòddlem tê vixim tim ojapun tthottaklim. To monis Pedruchi ani Juanvachi patt sôddinaslo; itlea mhonnosôr, Solomanvacho Darvontto mhonnlelea zagear sogllo lôk ojap zaun, dhanvun-dhanvun ailo. Lokak polleun Pedru oso uloilo: “Israel-porjecheam bhavam-bhoinnimnô, tumi hachê vixim kiteak mhonn ojap zatat vô kiteak mhonn amcher dolle lavunuch asat? Ami amchê khaxa podven vô bhoktiponnan hea mon’xak cholunk xokti dilea kitem? Amcheam purvozam, Abrahamachea, Izakachea ani Jakobachea Devan, Aplea sevoka Jezuk mhoimevont kelo; tumi Taka mon’subidarachê adhin kelo ani, Pilatan Taka soddunk tharail’lem tedna, tachêch mukhar, Jezu apnnank naka mhonn tumi sanglem. Jezu bhoktivont ani Promannik aslo, tori To tumkam naka zalo; eka khuniak mafi diun soddouncho mhonn tumi apnnank upkar maglo, punn Jivit-Datarak tumi jivexim marlo. Tori Devan Taka mel’leantlo punorjivont kelo ani hache ami govai. Tumi hanga hea mon’xak polletat ani taka boro ollkhotat. Tôr Jezuchea Nanvan, Tacher ami bhavart dovorlo dekhun, hea mon’xak ghottai dili; Tacher tthevlolea bhavartan ki hea mon’xak sarko boro kelo mhonn tumi sogllim polletat. Punn hanv zannom, bhavam-bhoinnimnô, jem tumi kelam, tem tumi ani tumcheam fuddareamnim nennarponnan kelam. Punn Aplea Kristan koxtt- dogd bhogunk zai mhonn soglleam provadeam vorvim jem Devan adim sanglelem, tem Tannem hê bhaxen xarti pavoilem. Mhonntôch, jivit -mon bodlun tumi Deva sorxim portun ieiat; hê porim tumcheam patkanchem bhogsonnem tumkam melltelem ani Sorvespora koddsun tumkam xanti-somadhanacho kall ietolo. Tedna Apnnem tumchê khatir nemlelea Kristak, mhonngê Jezuk, To tumchê-xim pattoitolo; kiteak Apleam bhoktivont provadeamchê tonddim Devan orombak thaun porgott kela to soglleam vostunchê novsornnecho kall ie porian Jezu sorgar asunk zai. Moizesan tôr oxem sanglam: ‘Tumcheam bhavam-bhoinnim modlo mhojê sarko êk provadi Sorvespor Dev tumchê khatir upzoitolo; to sangit titlem-i tumi chitan aikunchem. Jim konn tea provadeak aikonant, tankam porjentlim bhairaunchim.’ Khorench, Samuela thaun suru korun je soglle provadi uloun geleat, tãnnim heam disanchi khobor sangun dovorlea. Team provadeamchim tumich tim bhurgim ani Devan amcheam purvozam kodde kel’lea korarachim daiji. Kiteak Abrahamak Devan oxem mhonn’lem: ‘Tujê sonsti vorvim prithumecheam soglleam kuttumbank axirvad melltolo.’ Tôr tumchea khotteponnantlim soddoun, tumkam soglleank axirvad diunk, Devan Aplea Sevokak punorjivont korun poilo tumchê-xim dhaddlo.” Pedru ani Juanv loka lagim uloitat thõich astana, iadnik ani Devmondiracho karbhari ani Saduki tanchê-xim aile. He apostl lokak xikoitale ani mel’leantlo punorjivont zal’lea Jezu vorvim sogllim punorjivont zatelim mhonn te porgôtt’tale dekhun, tankam borench vaitt dislem. Tãnnim tankam dhôrle ani, sanz zali mhonn, dusrea disa porian tankam bond-khonnint dovorle. Punn tanchem utor aikol’lem tantleam zaiteam zannamnim bhavart dhôrlo ani dadleanchoch ank sumar panch hozarancher pavlo. Dusrea disa Judevanche fuddari, zannte ani xastri Jeruzaleant zomle ani tanchê borabôr porom’-iadnik An’nas, Kaifas, Juanv, Aleksandr ani porom’-iadnikanchea ghoranneantle soglle. Apostlank modem ube korun, tãnnim vicharlem: “Konnachê podven vô konnachea nanvan tumi hem kelam?” Tedna, Povitr Atmean bhoron, Pedrun tankam mhonn’lem: “Porjecheam fuddareamnô ani zantteamnô! Eka piddevonta thãi ami êk doiall kornni keli mhonn tumi az amchi zhôddti kortat ani to konnachê podven boro zalo tem tumi zanno zaunk sôdtat. Tôr soglle tumi ani Israelache akhe porje, hem zanno zaunchem: tumi khursar marlo punn Devan mel’leantlo punorjivont kelo tea Nazaretkar Jezu Kristachea nanvan ani Tachêch podven ho monis hanga tumchê mukhar boro zaun ubo asa. Tumi bandpeamnim soddun dil’lo fatôr To, punn atam khorem mhonn’lear Taka Devan konnxea-sondhicho fatôr kela. Ani dusrea konnachêch vorvim soddvonn mellunk xokona, kiteak amkam soddvonn diunk xokta toslem anink dusrem nanv mollba khala Devan mon’xank diunk na!” Pedruchem ani Juanvachem kalljidarponn polleun sobheche vangddi ojap zatale, kiteak te oxikxit ani chalte monis mhonn te somzotale; punn te Jezu borabôr astale mhonn tankam khobor asli. Punn boro kel’lea ani tanchê modem ubo aslelea mon’xak polleun tanchean kãich add sangunk zainaslem. Tãnnim tankam Mha-Dhorm-sobhentle bhair ravunk hukum’ ghalo ani magir te apnnam modem oxi bhasabhas korunk lagle: “Heam mon’xank ami kitem korum-ia? Tanchê vorvim ghòddlam tem mottem vismit Jeruzaleant ravteleam soglleank kollit zalam ani amchean tem na mhonnunk zaina. Punn hi khobor loka modem anink ximpoddnam zaunchê khatir, hea nanvan konnakuch anink uloina zaunk ami tankam dhomkavnni dium-ia.” Tankam bhitôr apoun, Jezuchea Nanvan koxêch bhaxen anink uloina zaunk ani xikovnn dinam zaunk tãnnim tankam formailem. Punn Pedrun ani Juanvan porti-pallun mhonn’lem: “Tumkam aikun Devak aikonam zaunk, hem Devacheam dolleam mukhar sarkem zalear tumich nirnnoi diat. Ami kitem dekhlam ani aikolam tem porgott korinastana amchean ravunk zaina.” Tãnnim tankam anink êk pavtt dhomkaile ani sôddle; khõichêch vatten tankam khast lavunk mellonasli, kiteak sogllo lôk ghòddlam tachê khatir Devak vakhanntalo. Vismita vorvim boro zal’lo tea mon’xak challis vorsam voir aslim. Pedruk ani Juanvak sôddlea uprant, te aplea zomea-xim gele ani mukhel-iadnikamnim ani zantteamnim tankam sanglelem titlem-i tãnnim tankam kollit kelem. Tem aikolea uprant, tãnnim soglleamnim borabôr aplo tallo Devak ubarun mhonn’lem: “Dhonia, sôrg, prithum’, somdir ani tachê bhitôr asa titlem-i Tunvem rochlãi. Ani Povitr Atmea vorvim, amchea bapa Tujea sevoka Davidachê tonddim sanglãi: ‘Raxttram kiteak challovtat? Kiteak heô porza bextteô gunngunntat, kunnkunntat? Pritumeche raza uprastat, Sorvesporacher ani Tachea Kristacher kunvor guddmêll kortat.’ Khorench, Herod ani Pons Pilat raxttram ani Israelachê porjê borabôr ektthãi zaun, Jezucher, Tunvem makhlelea Sevokacher, add guddmêll kelo, ani oxem, jem ghòddchem mhonn Tujê podven ani zannvaien Tunvem adim-fuddench tharail’li, tem tãnnim xarti pavoilem. Ani atam, Sorvespora, tancheô dhomkavnneô Tum polle ani sogllea kalljidarponnan Tuzo nirôp porgottunk Tujeam sevokank nirmi; ani Tujea povitr Sevoka Jezuchê nanvim pidda kaddun uddounk ani ochoream ani vismitam korunk Tujea hatachi podvi dakhoi.” Oxem magnnem kortastanam tim zomlelim ti dhornn kampli, tim sogllim Povitr Atmean bhòrlim ani kalljidarponnan Devachem utor porgottit ravlim. Bhavarteancho akho zomo eka kallzacho ani eka monacho aslo; apnna lagim kitem aslem tem apnnachench mhonn konn dhorinaslo, punn tanchê lagim aslem tem sogllem soglleanchem mhonn tim dhôrtalim. Apostl vhodda bollan Somia Jezuchea punorjivont-ponnak govai ditale ani tankam soglleank vhôdd man aslo. Tanchê modem gorjek sampoddlelim konn naslim, kiteak, zanchê lagim bhattam vô ghoram aslim, tim vikun tim tancho vikrecho duddu haddun apostlan-cheam pãiam-xim dovortalim. Magir zonn-ekleak ap-aplê gorjê pormannem ho duddu vantt’talim. Oxem Juze nanvacho Xiprusacho êk Levit aslo; taka apostlamnim Barnabas (mhonngê “dhir divpi”) mhonn nanv ghalem. Tacho êk bhattacho kuddko aslo to tannem viklo ani vikrecho duddu haddun apostlancheam pãiam-xim dovorlo. Ananias mhonnlolo êk monis aslo; tachê bailechem nanv Safira. Tannem aplea bhattacho êk kuddko viklo ani, tachi bail bhedi asun, vikrechea duddvancho êk vantto lipoun dovorlo ani urlolo vantto haddun apostlancheam pãiam-xim dovorlo. Pedrun taka mhonn’lem: “Ananias, Soitanak tujea kallzant kiteak itlo rigunk dilai tunvem, ki vikrechea duddvancho êk vantto lipoun dovrun Povitr Atmeak fôtt marunk pavloi? Bhatt vikchê adim tem tujench aslem. Toxem tem viklea uprant, vikrecho duddu-i tuzoch nhoi? Osli khotti kornni tujea kallzant koxi mhonn ievzon aili? Tunvem fôtt marleai ti mon’xank nhoi punn Devak.” Him utram aikonam fuddem, Ananias bhi poddlo ani melo. Ani hem aikolem titleancher-ui vhôdd bhirant aili. Uprant kãi tornnatte aile ani tachem pret êkê olin revddailem ani bhair vhorun purlem. Sumar tin voram uprant tachi bail bhitôr aili, punn kitem-kat ghòddlem tachi tika kãi khobor nasli. Pedrun tika vicharlem: “Tumi viklam tem bhatt itleach molak viklam?” Tinnem zobab dilo: “Hôi, titleakuch.” Tedna Pedrun tika mhonn’lem: “Somiachea Atmeachi porikxa korunk koxem mhonn tumi dogam-i zannam kobul zaleant? Polle, tujea ghovak purun aileat tanche pãi darachea umbrearuch asat ani te tuka-i vhortele.” Thõichê-thõich ti tacheam pãiam-xim poddli ani meli. Tedna tornnatte bhitôr aile ani ti tankam meleli mell’li; ani tika bhair vhorun tichea ghovachê kuxik tãnnim purli. Hi khobor aikun akhê povitr-sobhecher ani heram soglleancher vhôdd bhirant aili. Porjê modem apostlamnim khup khunna ani ojapam kelim. Tim sogllim eka monan Solomanvachea Tarangnnant ektthãi zatalim. Lôk tankam vakhanntalo, punn anink konnuch tanchea zomeant bhitôr sorunk fuddem soronaslo. Somiacher bhavart dovorteleam dadleam ani bailanchi sonkia choddon-vaddon vetali. Ani oxem zatalem ki, Pedru choltana, tachi savlli punn konnam-konnancher poddun tim ap-aplê piddentlim borim zaunchim mhonn lôk piddevontank choukancher vhoro ani khattincher ani antrunnancher tankam dovri. Jeruzalea bhonvtonncheam nograntlo-i lôk zomeamnim ietalo ani apnnam borabôr piddevontank ani mhelle otme bosloleank haddtalo, ani tim sogllim borim zatalim. Tedna porom-iadnik ani tache soglle bhageli, mhonngê Sadukinchea pokxache vangddi, nirdukaien bhòrle, ani Apostlank dhorun tãnnim tankam êkê sarvzonnik bondkhonnint ghale. Punn tê rati Sorvesporachea dutan bondkhonnichim daram ugôddlim ani tankam bhair kaddun oxem mhonn’lem: “Vochat ani Dev-mondirant ube ravat ani porjek hea Jivitachi soglli khobor kolloiat.” Tankam sanglolê pormannem, dis uzvaddchê adim te Devmondirant gele ani xikovnn diunk lagle. Porom’-iadnik ani tanche bhageli pavle tedna, tãnnim Mha-Dhormsobha zomoili, mhonngê Israel-porjecheam zantteanchi ak’khi sobha, ani apostlank bondkhonnintle haddunk laile. Punn subedar bondkhonnint pavle tedna, bhitôr tankam konn mellunk na; dekhun, portun ieun tãnnim sanglem: “Amkam bondkhônn sarki dhampleli mell’lea, ani paredar daram mukhar paro korun ube asle; punn ti ugôddtôch bhitôr amkam konnuch mellunk na.” Hi khobor aikun, Devmondiracho sordar ani mukhel iadnik tankam kitem ghòddlem kai mhonn chintunk poddle. Tednach konn-eklo hi khobor gheun ailo: “Tumi bondkhonnint ghal’le te monis he polleiat Devmondirant ube asat ani porjek xikovnn ditat.” Tedna sordar apleam subedarank gheun gelo, punn, lôk apnnank fatrait mhonn bhieun, boll korinastanam tãnnim tankam haddle. Tankam Mha-Dhormsobhê mukhar haddun ube kortôch, porom’ -iadnikan tankam oxem vicharlem: “Hea nanvan anink xikovnn dina zaunk ami tumkam khôr xiddkavnni dil’li, tori, polleiat, tumchê xikovnnen tumi Jeruzalem bhôrlam ani hea mon’xachea mornnachi zobabdari tumi amcher ghalunk sôdtat.” Portipall korun, Pedrun ani apostlamnim oxem mhonn’lem: “Mon’xanchi adnea nhoi, punn Devachi adnea ki ami pallunk zai. Eka rukhar umkollavun tumi jivexim marlo tea Jezuk amcheam purvozanchea Devan punorjivont kelo. Taka Fuddari ani Soddvonnar korunk ani Tachê vorvim Israelak jivit-mon bodlop ani patkanchem bhogsonnem diunk, Aplê podven Devan Taka voir ubarlo. Heam soglleam ghòddnneanche ami govai asanv ani Devan Apleô adnea pallteleank zo Povitr Atmo dila, To-i amchê borabôr govai.” Hem aikun, tancho rag itlo pettlo ki te tankam nattak korunk sôdtale. Tedea vellar Mha-Dhormsobhecho êk vangddi ubo zalo: to Gamaliel nanvacho êk Farizêv, ani nanvvosto xastri mhonn akhi porza taka lekhtali. Team mon’xank thoddo vêll bhair kaddat mhonn tannem maglem. Magir Mha-Dhormsobhek heam utramnim to uloilo: “Israel porjecheam mon’xamnô, heam mon’xam vixim tumi kitem korunk sôdtat tachi tumi borich chotrai dhôrat. Tumi zannont, hea adim Teudas nanvacho konn-eklo upzolo ani apunn konn mhotvacho mhonn sangunk laglo; ani sumar charxim monis tachê pattlean gele; punn taka jivexim marlo ani tache pattlavdar ximpoddle ani nanch zale. Uprant, lôkgonntechea somoiar, Galileikar Judas upraslo ani apnna pattlean zaitea lokak tannem ôddlo; taka-i jivexim marlo ani tache-i xis zollim-mollim ximpoddle. Tôr hanv tumkam sangunk sôdtam tem hem: heam mon’xam thaun pois sorat ani tankam sôddat. Kiteak hem kam’ mon’xam thaun upzolam zalear, tem apxinch fiskotton vetelem; punn tem Deva thaun ieta zalear, tumchean tem nattak korunk zaunchem na; tea bhair, tumi Devacher add zhuzunk pavxeat.” Tachem tãnnim manun ghetlem. Tãnnim apostlank apounk dhaddle, tankam mar dilo, Jezuchea Nanvan anink uloina zaunk tankam xiddkaile ani sôddle. Jezuchea Nanva pasot beman sõsunk apnnank bhag mell’lem mhonn khuxal zaun, te Mha-Dhormsobhentle bhair sorun gele. Te dispottim Devmondirant ani ghoram-ghoramnim xikovnn diit ani Jezu Kristachem xubhvhortoman porgottit ravle. Tedna, xisancho ank vaddot vetana, Grik bhas ulovpi Judev mon’xam Hebrêv bhas ulovpi Judevancher gungunnunk laglim, kiteak dispottim jevonn vaddtanam tancheam vidvanchi favo tê fikirin seva zainasli. Hea khatir bara apostlamnim xisanchi êk zomat apoili ani tankam mhonn’lem: “Devachem utor kuxin dovrun, jevonn vaddchi seva amkam bori sobonam. Tea pasot tumi, bhavam-bhoinnimnô, tumchê modleam sat dadleank sodun kaddat: te boro man aslele ani Povitr Atmean ani zannvaien bhòrlele zaunche; ani hi jevnnachi seva ami tanchea hatant sompoitelenv. Magir ami sogllo amcho vêll prarthon korunk ani Devachem utor porgottunk bhettoitelenv”. Hi ievzônn sogllê sobhen mandun ghetli, ani bhavartan ani Povitr Atmean bhòrlelea Istevak vinchun kaddlo, ani tachê borabôr Filipak, Prokorak, Nikanorak, Timonak, Parmenasak ani Antiokiechea novxisa, Nikolavak. Hankam tãnnim apostlam mukhar ube kele ani hãnnim magnnem korun tancher hat dovorle. Sorvesporachem utor ximpddot vetalem ani Jeruzaleant xisancho ank vaddot-choddot vetalo, ani puskoll iadnikamnim porian bhavart manun ghetlo. Devacheam subham’ denneamnim ani bollan bhòrlolo Istêv loka modem vhoddleô khunna ani vismitam kortalo. “Svotontr zal’leam mon’xanchem devsthan”, hea nanvachem ek devsthan aslem; hache vangddi asle Sirenache, Aleksandrieche, Silisieche ani Aziechea Prantantle kãi Judev. Tea devsthanantle kãi zann fuddem sorle ani Isteva kodde vad-vivad korunk lagle. Punn to zannvaien ani Atmean bhoron uloitalo dekhun, taka fuddo korunk tanchê lagim ghoddonaslem. Tea pasot, tãnnim thoddeam mon’xank sodun kaddle ani tankam oxem mhonnunk xikoilem: “To Moizesacher ani Devacher ninda uloita tem ami aikolam.” Oxem tãnnim lokak ani zantteank ani xastreank fuloile. Te soglle aile ani Istevak dhorun tãnnim taka Mha-Dhormsobhê mukhar vhelo. Ani thõi oxem sangunk lottik sakxidarank tãnnim ube kele: “Ho monis hea Povitr Zageacher ani Somurticher add uloit asa. ‘Nazaretkar Jezu hea Povitr Zageachem nisontton kortolo ani Moizesan dil’leô riti-rovisô bodôltolo’ — oxem tannem mhonnlelem ami amcheach kanamnim aikolam.” Ani tellun tacher nodor mar zalear, neaisobhent boslole tankam tachem mukhamoll eka devdutachem mukhamoll koxem distalem. Porom’-iadnikan Istevak vicharlem: “Te sangtat tem khorem?” Istevan portipall kelo: “Mhojeam bhavamnô, mhojeam vhoddilamnô, mhojem utor aikat: Harran ganvant tthikann korunk vechê adim, Mezopotamient astana, amchea bapa Abrahamak mhoimecho Dev dixtti poddlo. Tannem taka mhonn’lem: ‘Tuzo dês sôdd, tujea ghoranneantlo bhair sor, ani Hanv tuka dakhoitolom tea desant voch.’ Tedna to Kaldeikaranchea desantlo bhair sorlo ani Harran ganvant ravunk gelo. Ani tacho bapui mortôch, Devan taka thõisorlo bhair kaddlo ani hea tumi atam ravtat tea desant haddlo. Tori hea desant êk vet bhôr porian taka daiz dilem na. Punn taka ozun bhurgo naslo tedna, taka ani tachê uprant tachê sonstik Apunn to dês ditolo mhonn Devan bhasailem. Tôr Dev Abrahama kodde oso uloilo: ‘Tuji sonsôt porkea desant videxi koxi jieteli. To lôk tankam charxim vorsam gulam’ponnant dovrun dogdaitolo.’ Sorvesporan anink-ui mhonn’lem: ‘Jem raxttr tankam gulam’ponnant dovortelem, tea raxttrachi Hanv nit kortolom, ani uprant tim thõisorlim bhair sortelim ani hê svater tim Mhaka bhôztelim.’ Ani Devan Abrahamak sunoticho korar dilo; ani hê porim Izak tacho put zolmotôch, atthvea disa tannem tachi sunôt keli: magir Izakan Jakobachi sunôt keli, ani uprant Jakoban bara porzapotinchi sunôt keli. He porzapoti, aplea bhava Juzechê nattkaien bhoron, taka gulam’ koso viklo ani oso to Ejiptak pavlo, punn Dev tachê sovem aslo; ani Tannem taka soglleam vignantlo vattailo ani Ejiptachea raza Farao mukhar itlo taka axirvadan bhôrlo ani xanno kelo, ki Faraon Ejiptacho ani aplea akhea ghoranneacho karbhar tachea hatant ghalo. Tedna akhea Ejiptant ani Kanaanant dukôll poddun, lokak zaite hal ani upodre bhògche poddle, ani amcheam purvozank jevonn-khann mellona zalem. Punn Ejiptant orôv asa mhonn Jakobachea kanar poddlem tedna, poilê pavtti amcheam purvozank tannem thõi pattoile. Dusrê pavtti gele tedna, Juzen apleam bhavank apunn konn to dakhoun dilem, ani Juzechea kuttumbachi soglli khobor Faraok gomli. Tedna Juzen aplea bapaik Jakobak ani soglleam apleam soiream-dhaireank apounk dhaddlim; tim sogllim mellun ponchastôr zannam aslim. Ani Jakob Ejiptak denvun gelo; ani uprant, to ani amche purvoz mele. Tancheô kuddi Xekem’ ganvant porteô vheleô ani Abrahaman thõi Xekemant kimôt farik korun Hemoracheam putam koddli vikti ghetleli tê somadhint teô ghaleô. Devan Abrahamak bhasail’lo kall lagim pavtam-pavtam, Ejiptant porjecho ank vaddot-choddot gelo. Itlean Ejiptant dusro eklo raza razvoddki cholounk laglo; taka Juzechi khoboruch nasli. Tannem amchê porjek naddbudhin vagoili ani amcheam purvozank itli piddapidd dili, ki nigtech zolmol’leam ballank, te vanchche nhoi mhonn, osadd ghalunk tankam hukum’ ghalo. Oslea vellar Moizes zolmolo ani Devak manovlo: tin mhoine porian taka aplea bapaichea ghorant pôslo. Magir, taka osadd ghalchea vellar, Faraochê dhuven taka apnnailo ani aploch put koso taka lhan-vhôdd kelo. Ejiptkaranchi vidhya asli titli-i Moizesak xikoili ani to utramnim ani kornneamnim bollvont zalo. Challis vorsanchê piraier, apleam bhavam-bhoinnink, mhonngê Israelacheam putam-dhuvank, bhett diunk tachea monant ailem. Tanchê modlea ekleak konn-eklo Ejiptkar zulum’ kortalo mhonn polleun, Moizes tachea adarak gelo ani, Ejiptkarak jivexim marun, piddapidd bhôgloleacho tannem sudd ghetlo. Apnna vorvim Dev tankam suttka diunk veta mhonn aplim bhavbhoinn somzotelim mhonn Moizes chint’talo; punn khorench mhollear hem tankam somzonk na. Dusrea disa, dog zann Israelkar zhogoddtale tedna, Moizes novean thõi dixtti poddlo, ani tanchê modem xanti korunk mhonn tannem mhonn’lem: ‘Ixttamnô, tumi ekamekache bhav; kiteak tôr ekamekak dukhoitat tumi?’ Punn aplea bhavak opman kortalo tea mon’xan Moizesak dhuklun uddoilo ani mhonn’lem: ‘Amchê voir fuddari ani nitidar tuka konnem nemla? Kal tea Ejiptkarak jivexim marloi tosoch mhaka-i bi marunk sôdtai kitem?’ Hem aikun Moizes pollun gelo ani Madian ganvant ravlo; thõi taka dog put zolmole. Challis vorsam bhòrlea uprant, Sinai dongra lagchea oronneant, eka zolltea jhilkuttantlea agtteant eka devdutachem taka dorxon mell’lem. Tem polleun Moizesak ojap dislem. Bariksannen polleunk lagim voch zalear, Sorvesporacho tallo taka aikunk ailo: ‘Tujeam purvozam, Abrahamacho, Izakacho ani Jakobacho Dev Hanv.’ Moizes koddkoddlo ani tea fuddem mhenotin polleunk taka kalliz zalem na. Tedna Sorvesporan taka mhonn’lem: ‘Tujeam pãiancheô vhannô kadd, kiteak tum ubo asai ti svat povitr. Mhoji porza Ejiptant kitli piddapidd bhôgta ti Hanvem dekhlea ani tancheô huieli Hanvem aikoleat ani tika suttka diunk Hanv denvun ailam. Atam ie, Hanv tuka Ejiptant dhaddunk vetam.’ ‘Tuka fuddari ani nitidar konnem nemla?’, oxem mhonnun pois kel’lo to konnak? Moizesak nhoi? Tori jhilkuttant devdut konnak dixtti poddlo? Ani tea devduta vorvim Devan konnak mhonn porjecho fuddari ani soddvonnar zaunk dhaddlo? Teach Moizesak! Ejiptant ani Tambddea Doriant ani challis vorsam bhôr odbhutam ani vismitam korun konnem tankam bhair kaddlim? Teach Moizesan. ‘Tumcheam bhavam-bhoinnim modlo mhojê sarko êk provadi tumchê khatir Dev upzoitolo’, oxem Israel porjek uloilo to konn? Toch Moizes. Sinai Dongrar devdut uloilo to konna kodde uloilo? Moizesa kodde nhoi? Ani oronneant sobha bhòrtali tedna, porje borabôr, amcheam purvozam borabôr ani devduta borabôr aslo to konn? Ani jivitachim utram, amkam diunk, ghetlim to konn? To toch Moizes! Tori amche purvoz taka aikunk kobul na zale, tãnnim taka patt keli, ani portun Ejiptak vochpachi khuxi dakhoun tãnnim Aaronak sanglem: ‘Amchê mukhar vochunk amkam dèv korun di; kiteak amkam Ejiptantlim bhair kaddlim tea Moizesachem kitem zalam tachi amkam khoboruch na.’ Tedna tãnnim êk paddkulo kelo ani hê murtik iôdn bhettoilo. Apleanch hatamnim kel’lea kamam pasot tim murgottlim. Punn Devan tankam patt vôll’li ani ontralla velê foujechi puza korunk tankam soddun dilim. Tôr oxem provadianchea pustokar boroil’lem asa: ‘Israelachea Ghorannea, challis vorsam porian oronneant boliô ani bolidanam tunvem Mhaka bhettoileant? Na. Punn Molokacho tombu ani Refan devachem noketr tumcheam khandar tumi vhelim, heôch teô bhozunk kel’leô murti. Tôr atam, Babiloniê pelean Hanv tumkam pordesant dhaddunk vetam.’ Amcheam purvozam sangatim oronneant Govaikecho Tombu aslo; Devan Moizesak formail’lem toxem ani taka nomuno dakhoil’lo tea pormannem, to Tombu kel’lo. Magir to gheun, amcheam purvozamnim pinddkê-pinddkent samball’lo; xekim, jedna amcheam purvozank zago diunk, Devan tanchea fuddeant raxttrank dhanvddailim ani team raxttrancho dês amchea purvozanchea tabeant kelo, tedna Joxuachea fuddariponna khal to Tombu hea desant bhitôr kaddlo. Davidachea kalla porian to hanga aslo. David Devak manovlo ani Jakobachea Deva khatir ek mondir toiar korunk tannem maglem, punn hem mondir Solomanvan Taka bandlem. Toripunn Bhov-Vorto Dev mon’xancheam hatamnim bandleleam mondiramnim ravona, kiteak provadi oxem mhonnta: ‘Sôrg Mhojem xinvason ani prithvi Mhojeam pãianchi monnoi: Koslem mhonn mondir tumi Mhaka bandtelet? oxem mhonnta Sorvespor. Vô Hanvem visôv gheunchê khatir koslo mhonn zago tumi Mhaka toiar kortelet? Heô soglleô vostu Mhojea hatan vrochleat ki na?’ Tumchem kanttem kitlem mhonn nibor! Tumchim kallzam ani kan Devachea Korarak ovisvaxi! Tumi tôr Povitr Atmeak sodam virôdh kortat; tumcheam purvozamnim kelem toxench tumi-i kortat. Khõichea tori provadeak tumcheam purvozamnim dhumallo dinastana dovorla? Devak Manovlolo a ieuncho asa mhonn adim-fuddem porgôtt’tale tankam tãnnim jivexim marle. Ani atam tuminch, Tacho ghat gheun, Taka jivexim marlo. Devdutam udexim tumi Somurt ghetleli, tori ti pallunk na te tumich!” Hem aikun tanchea kallzant rag xiztalo ani te tacher add aple dant korkoraunk lagle. Punn Istêv, Povitr Atmean bhòrlolo zaun, sorgak tellun polleunk laglo ani tannem Devachem tez dekhlem, ani Devachea uzvea hatak ubo aslolo Jezuk tannem pollelo. Tannem mhonn’lem: “Ho polleiat, sôrg ugto zal’lo ani Mon’xacho Put Devachea uzveak ubo aslolo mhaka dixtti poddta.” Punn tãnnim vhoddlean huieli marleô, hatamnim aple kan dhample, ani soglle borabôr tachea angar gele. Uprant taka Xara bhair oddun vhelo ani fatramnim marunk lagle. Ani sakxidaramnim aplim avoronnam Saulu nanvachea eka tornnatteacheam pãiam-xim dovorlim. Istevak fatramnim martale tedna, tannem oxem magnnem kelem: “Somia Jezu, mhozo otmo Tujea hatant ghe.” Magir, dimbi ghalun, vhoddlea tallean tannem oxi bob marli: “Somia, tankam hea patkache guneanvkar korinaka.” Ani hem mhonnun to ontorlo. Hea khunak Sauluchi soglli maniotai asli. Tedna Jeruzaleant aslelê povitr-sobhecher add êk vhôdd piddapidd suru zali ani sogllim, apostl mat bhairaun, Judeiachê ani Samariechê bhonvtonn-cheam ganvamnim ximpo-ddlim. Bhoktivont mon’xamnim Istevak nikhipilo ani tachê pasot motto vilap kelo. Povitr-sobhechem nisontton korunk Saulu vavurtalo; ghora-ghorant bhitôr sorun, dadleank toxem bailank bhair kaddun to bondkhonnint ghaltalo. Punn ximpoddlelim tim zollim-mollim xubhvhortoman porgottit gelim. Oso Filip Samariechea eka nogrant gelo ani tanchê modem Kristak porgôtt kelo. Tacheam vismitanchi khobor aikun ani khaxa tim polleun sogllea lokan Filip porgôtt’talo to sondêx eka monan mandun ghetlo. Zaiteam devchar-bosleleam thaun mhelle atme bob marun bhair sortale ani puskoll ar-zal’lim ani thonttim borim zatalim. Haka lagun tea nogrant vhôdd sontos vostalo. Teach nogrant Simanv nanvacho êk monis ravtalo ani ghaddiponnam korun Samariekar lokak bhuloitalo. To apunnuch vhôdd mhonn dakhoun uloitalo. Sogllim, vhoddam toxinch lhanam, tachem chitan aikotalim ani mhonntalim: “Devachi xrêxtt podvi mhonntat to hoch.” Tim taka chitan aikotalim kiteak zaito kall thaun aplê ghaddividien to tankam bhuloitalo. Punn Filipan Devachea Rajeachem ani Jezu Kristachea nanvachem xubhvhortoman porgôttlem tedna, dadleamnim toxem bailamnim bhavart dhôrlo ani batism ghetlo. Simanvan-ui bhavart dhôrlo ani, batism ghetlea uprant, to Filipachi patt sôddinaslo. Khunna ani vhoddlim vismitam zalim tim polleun, to ojap zalo. Samariechea lokan Devachem utor manun ghetlem mhonn Jeruzaleant asleleam apostlamnim aikolem; ani Pedruk ani Juanvak tanchê-xim dhaddle. Thõi denvun pavlea uprant, bhavarteank Povitr Atmo mellum mhonn tãnnim magnnem kelem, karonn tanchê modlea ekleacher porian Povitr Atmo ozun denvunk naslo; tankam fokot Somia Jezuchea nanvan batism dil’lo. Tedna Pedrun ani Juanvan tancher hat dovorle ani tãnnim Povitr Atmo ghetlo. Apostlanchê hat-dovornnê vorvim tankam Povitr Atmo mell’lo mhonn Simanvan pollelem tedna, Pedruk ani Juanvak tannem poixe dile ani mhonn’lem: “Jeam konnancher hanv hat dovrin, tankam Povitr Atmo mellcho mhonn mhaka-i osli podvi diat.” Punn Pedrun taka zobab dilo: “Devan funkea dil’lem dan poixeamnim viktem gheunk zata mhonn tum somzoloi dekhun tuka ani tujeam poixeank uzo lai. Hea denneant tuka bhag na, vantto na, kiteak Deva mukhar tujem mon soroll nhoi. Tujea khotteponnak patt kôr ani tujea monant jem kitem tunvem chintlãi tachem Somia lagim bhogsonnem mag. Koddu pintachem vik tunvem ghetlãi ani patkacho gulam’ tum zalai mhonn hanv polletam.” Simanvan zobab diun mhonn’lem: “Tumi sanglam tantlem kãi mhojer iena zaunk mhojê pasot Somia lagim magat.” Apli govaiki dilea uprant ani Somiacho sondêx porgôtt kortôch, te portun Jeruzaleak gele. Ani Samarie-karancheam zaiteam gramamnim tãnnim xubhvhortoman porgôttlem. Tedna, Sorvesporachea dutan Filipak uloun mhonn’lem: “Utth ani dokhinnek Jeruzalea thaun Gaza denvun veto margan voch.” Hea margan atam konn vochona. Mhonntôch to utthun aplê vattek laglo. Ovchituch taka êk Etiopiekar dixtti poddlo; ho êk hizddo ani Etiopiechê Kandaki Ranniechea akhea bhanddaracho odhikari aslo. To Devak bhozunk Jeruzaleak gel’lo ani aplê gaddier bosun to ghora portotalo. Vatter Izaias provadeachem pustok to vachtalo. Atmean Filipak mhonn’lem: “Voch ani gaddiê lagim sor.” Filip dhanvlo ani to Etiopiekar Izaias provadeachem pustok vachta tem aikun tannem vicharlem: “Tum vachtai tem somzotai mum?” Tannem portipall kelo: “Mhaka somzonni diunk konn na zalear, mhojean koxem somzunk zait?” Mhonntôch, gaddient choddun apnna-xim bos mhonn tannem Filipa lagim maglem. Povitr Pustokantlo to vachtalo to bhag ho aslo: “Marunk vhortat toslea lhan menddrea sarko, apnnak tastelea mukhar ogich ravtelê xelliê bhaxen, tachea tonddantli zap bhair sorunk na! Tachea hinnponnant tachi nit korun ghetolo konn na zalo. Tachem jivit hea sonvsarant veginch toddun kaddlem; Dekhun tachê pinddkechi khobor konn sangunk xoktolo?” Tedna tea hizddean Filipak mhonn’lem: “Ho provadi apnnachêch vixim vô dusrea konna vixim uloita, tem tum mhaka sangxi?” Tedna aplem tondd ugddun ani Povitr Pustokantlim tinch utram dhorun Filipan taka Jezucho xubh sondêx porgôttlo. Fuddem vetam-vetam te udka-xim pavle ani hizddean mhonn’lem: “Polle, hanga thoddem udok asa; hanvem batism gheunk kosli add-khôll asa?” Tannem gaddi thamboili ani te dog-ui, Filip ani hizddo, udkant denvle ani Filipan taka batism dilo. Udkantle voir sortôch, Sorvesporachea Atmean Filipak ubarun vhelo ani hizddean taka anink polleunk na; ani sogllo sontosbhorit zaun, tannem aplo fuddlo rosto dhôrlo. Punn Filip Azotak pavlo ani, soglleam nogramnim bhonvun, Xezareiak vocho porian xubhvhortoman porgottit ravlo. S1 Sauluchem Porivorton Itlea mhonnosôr, Saulu Somia- cheam xisancho apunn jiv kaddtolo mhonn tankam bhenkddaunk bhonvtalo ani hê axen tacheach jivak thar naslo. To porom’-iadnika-xim gelo ani hê Vattecheam apnnak melltit team pattlavdarank, dadleank toxench bailank, dhorun Jeruzaleak haddunk Damaska-devsthanancheam vhoddilank diunchim tannem potram maglim. Damaskachê vatter, xara lagim pavtam-pavtam, ovchit sorga velo êk uzvadd tachê sobhonvtim porzoll’lo. To dhornnir xevttolo ani tedna tannem êk tallo aikolo. To Taka oxem mhonntalo: “Saulu, Saulu, kiteak mhonn tum Mhaka piddapidd ditai?” Tannem vicharlem: “Tum konn, Saiba?” Tallean zap dili: “Hanv Jezu, ani Mhakach tum piddapidd ditai. Atam utth ani xarant voch ani tunvem kitem korunk zai tem konn tuka sangtolo.” Tachê borabôr provas kortale te thottakun mone zale, kiteak tãnnim tallo aikol’lo khorem, punn konnakuch polleunk naslo. Saulu zomni velo utthlo ani, tache dolle ugte asun-ui, taka kãich disonaslem. Tea pasot Damaska porian tãnnim taka hatak dhorun vhelo. Tin dis porian tachean kãich polleunk nozo aslem ani to kãi jevunk na ani pieunk-ui na. Damaskant Ananias nanvacho êk xis aslo. Dorxonant Somi apnna kodde oxem uloita mhonn tannem aikolem: “Ananias!” Tedna tannem zap dili: “Ho polle hanv asam, Somia.” Somian taka mhonn’lem: “Utth ani Ubo mhonntat tea Rostean voch ani Judasachea ghorant, Tarsusachea Saulu mhonnlelea konn-ekleachi khobor kadd; to magnnem korta.” Ani apnnak novean nodor mellunk Ananias mhonnlolo konn-eklo bhitôr ieun apnnacher hat dovorta mhonn Saulun dorxonant pollelem. Tedna Ananiasan mhonn’lem: “Somia, hea mon’xa vixim ani Jeruzaleant Tujeam bhoktank tannem kitle koxtt dileat tê vixim zaiteam zannam koddchem hanvem aikolam. Ani Tujem nanv gheteleam somestank dhorunk mhonn mukhel iadnikanchi podvi gheun to hanga aila.” Somian taka zobab dilo: “Tori astana tum voch, kiteak, raxttram toxench razam mukhar ani Israel-porjê mukhar, Mhojem nanv porgottunk ho monis Mhojem vinchun kaddlelem hatiar. Mhojea Nanva pasot tannem kitlem sõsunk poddtelem tem Hanv taka dakhoitolom.” Tedna Ananias gelo. To ghorant bhitôr sorlo ani rokddench Saulucher aple hat dovrun tannem mhonn’lem: “Saulu bhava, tuji nodor tuka porti mellche khatir ani tum Povitr Atmean bhorche khatir, tum ietaloi tê vatter tuka dixtti poddlo tea Somia Jezun mhaka dhaddla.” Thõichê-thõich Saulu-cheam dolleantlim khovollam koxim bhi poddlim ani taka novean nodor aili; ani utthun tannem batism ghetlo. Jevlea uprant taka novean ghottai mell’li. Damaskant xisam borabôr thodde dis sarlea uprant, Jezu Devacho Put mhonn to devsthanamnim rokddoch porgottunk laglo. Taka aikotalim tim sogllim ojap zaun mhonntalim: “Hem Nanv ucharteleancho Jeruzaleant bhosm korunk vavurtalo to ani hanga asleleam xisank dhorun mukhel iadnikam fuddem vhorunk hangasôr ail’lo to monis hoch nhoi?” Punn Saulu odik-odik bollixtt zait vetalo ani, Jezu Krist mhonn ruzu korun, Damaskant ravteleam Judevank gondhollak ghaltalo. Zaiteam disam uprant, Judeva-mnim Sauluk jivexim marunk guddmêll kelo; punn hi khobor Sauluk pavli. Tacho prann kaddunk darvonntteam-xim te rat-dis paro korun asle, punn xisamnim taka vhelo ani êkê panttlent ghalun taka ratcho kotta velean denvoilo. Jeruzaleant pavlo tedna, xisanchea zomeak ektthãi zaunk to proitn kortalo, punn tim sogllim taka bhietalim: to khorench êk xis zala mhonn sotmanunk tim pattim sortalim. Barnabasan taka ghetlo ani apostlam-xim vhelo, ani vatter astana Somi Sauluk koso dixtti poddlo ani kitlea kalljidarponnan Saulun Damaskant Jezuchea nanvan xubhvhortoman porgôttlem, hem sogllem Barnabasan tankam sanglem. Tedna Saulu tanchê borabôr Jeruzaleant bhonvunk laglo ani hurben Somiachea nanvan tannem provochon korunk suru kelem. Punn Grik bhas ulovpi Judevam kodde uloun vad-vivad zalea uprant, te taka jivexim marunk ievjitale. Hem aikun bhavam-bhoinnimnim taka Xezareiak vhelo ani hanga thaun taka porot Tarsusak dhaddun dilo. Ak’kea Judeiant, Galileiant, ani Samarient povitr-sobha sovosthaien jietali ani Somiachi bhokti korun ani Povitr Atmeachê ghottaien ani urben bhoron ti vaddot vetali. Ganvam-ganvamnim bhett diunk vochun Pedru xekim Lid’dent ravteleam bhoktam-xim pavlo. Thõi taka Eneias nanvacho êk arkar mell’lo; atth vorsam to khattir poddlolo aslo. Pedrun taka mhonn’lem: “Eneias, Jezu Krist tuka boro korta. Utth ani tujem bixannem sarkem kôr.” Ani to rokddoch utthlo. Lid’dent ani Xaronant ravteleamnim taka dekhlo ani tim sogllim Somiachim pattlavdar zalim. Jop’pa nogrant Tabita nanvachi êk bhavarti asli (tichea nanvacho ôrth chitoll). Aplea jivitant ti sodanch khup doiall kornneo kortali ani bhik ditali. Team disamnim ti bori na zali, ani meli; tãnnim tika dhuli ani uprant voilea vosreant dovorli. Lid’da Jop’pak lagim mhonntôch, Pedru thõi asa mhonn xisamnim aikolem tedna, “Vegim-vegim amchê-xim ie.”, oxem sangun dogam dadleank tachê-xim pattoile. Pedru utthlo ani tanchê borabôr gelo. Thõi pavona fuddem taka tãnnim unchlea vosreant vhelo. Taka veddho ghalun soglleô vidva roddtaleô ani apnnank Tabitan anglim ani avoronnam kel’lim tim taka dakhounk lagleô. Pedrun tankam soglleank bhair dhaddleô ani dimbier ravun magnnem kelem; uprant mel’lê kuddi vatten porton, tannem mhonn’lem: “Tabita, utth!” Tinnem aple dolle ugôddle ani Pedruk polleun ti bosli. Hat diun tannem tika ubi keli ani uprant bhavarteank ani vidvank apoilim ani tankam ti jivi zal’li dakhoili. Hi khobor sogllea Jop’pak gazli ani zaiteamnim Somiacher bhavart dovorlo. Ani Pedru konn-eka Simanv chamarager Jop’pant zaite dis ravlo. Xezareiant Kornel nanvacho êk monis aslo. Romi loskorachê “Italiani” mhonnlolê Polttonnecho to xotpoti aslo. To bhoktivont monis aslo ani aplea ghorabeacheam soglleam mon’xam borabôr Devak bhôztalo. Lokak to zaito adar ditalo ani sodanch Devak magnnem kortalo. Êk dis, sanjecheam sumar tin vorancher, Devacho êk dut aplea ghorant bhitôr sortalo ani “Kornel” mhonnun apnnak ulo kortalo to tannem dorxonant sarko dekhlo. Devdutak polleun to koddkoddlo. Tannem mhonn’lem: “Kitem ga, Saiba?” Devdutan portipall kelo: “Tuzo ugddas koso, tujim magnnim ani tujim danam Deva mukhar choddun pavleant. Atam Pedru mhonnlolea konn-eka Simanvak apounk Jop’pa nogrant mon’xank dhadd. To eka Simanv chamarager vostek asa ani hachem ghor doriachê kinarer asa.” Tachê lagim uloilo to devdut vetôch, Kornelan dogam chakrank ani aplê sevek asleleantlea eka bhoktivont soinikak apoile, ani, kitem ghòddlelem tem tankam sangun, tankam Jop’pak dhaddle. Dusrea disa, te apli vatt cholun, nogra lagim pavtana, don’parchea vellar prarthon korunk Pedru pattosar choddlo. Taka bhuk lagli ani to jevnnak ravtalo, punn jevonn toiar zatanam, Povitr Atmeacho bhar tacher ailo. Sôrg ugto zal’lo tannem dekhlo ani char-ui konnxeamnim dhôrloli ani sorgar thaun zomni porian denvoil’li êk vhoddli ôl koxi kitem tannem dekhlem. Ticher asleô sonvsarantleô char pãiancheô soglleô mon’zati ani jivannim ani ontralla velim suknnim ticher aslim. Tedna taka oxem mhonntalo to êk tallo tannem aikolo: “Pedru, utth, mar ani kha.” Punn Pedrun zobab dilo: “Na, Saiba, kodinch na! Opovitr ani mhellem kitench hanvem kednanch khaunk na.” Anink êk pavtt tea tallean taka mhonn’lem: “Devan xud’dh kelam tem tum opovitr mhonnonaka.” Hem oxem tin pavtti ghòddlem ani rokddench sogllem portun sorgar ubaron gelem. Hea dorxonachi somzonni kitem kai mhonn to chintunk poddlo. Itlea mhonnosôr, Kornelan dhaddlele monis pavle. Simavachem ghor khõi asa tem sodun kaddlem ani te darachea umbrear thamble. Ani ulo korun Pedru mhonnlolo Simanv thõi vostek asa kai mhonn tãnnim vicharlem. Pedruchem lokx ozun dorxonacher astana, Atmean taka mhonn’lem: “He polle, teg monis tuka sôdtat. Utth, sokol denv ani tanchê borabôr voch; pattim-fuddem sorum naka, kiteak Hanvench tankam dhaddleat.” Sokla denvun vochun, Pedrun team mon’xank mhonn’lem: “Tumi sôdtat to monis hanvuch; kiteak aileat tumi?” Tãnnim zobab dilo: “Kornel xotpoti êk promannik ani Devachi bhokti korpi monis; taka Judevanchi akhi porza man dita. Tuka apnnager apoi mhonn ani tunvem taka kitem sangchem asa tem aikun ghe mhonn Devan taka Aplea povitr duta vorvim sanglam.” Pedrun team mon’xank bhitôr apoile ani tankam vostek dovorle. Dusrea disa to tanchê borabôr vattek laglo ani tanchê sangatim Jop’pache thodde bhav-ui gele. Anink eka disan te Xezareiak pavle. Apleam soiream ani lagxileam ixttam sangatim Kornel tankam ravtalo. Ani Pedru ghorachea umbrea-xim pavtôch, Kornel taka mellunk gelo ani pãiam poddun taka nomoskar kelo. Punn Pedrun taka oxem mhonnun utthoilo: “Utth, tôr hanv-ui êk monis.” Uloit-uloit te bhitôr gele ani hanga ektthãi zal’lo to khup lôk tankam mell’lo. Tannem tankam oxem mhonn’lem: “Eka Judêv mon’xan eka videxeak ektthovunk ani tanger ravunk kitlem vittechem tem tumi zannont. Punn khõicheach mon’xak hanvem opovitr ani mhello mhonncho nhoi mhonn Devan mhaka dakhoilam. Heach pasot tunvem mhaka apounk dhaddtôch hanv pattim-fuddem soronastana ailam. Tôr hanv tujê lagim vichartam: tunvem mhaka kiteak mhonn apounk dhaddlai?” Kornelan zobab dilo: “Tin dis zale, hêch ghoddier, mhojea ghorant sanjecheam tin voranchem hanv magnnem kortalom; ovchit zhogzhogit vostr ghalun êk monis mhojea fuddeant ubo zalo. Tannem mhaka oxem mhonn’lem: ‘Kornel, Devan tujem magnnem aikun ghetlem ani tujeam danancho Deva mukhar ugddas zalo. Tôr Jop’pak aslelea Simanv mhonntat tea Pedruk apounk dhadd. To Simanv chamarager ravta ani tachem ghor doriachê kinarer asa.’ Tea pasot hanvem tuka rokddoch apounk dhaddlo ani tunvem ieun borem kelem. Tôr polle, hanga ami tujê mukhar ektthãi zal’lim asanv, Sorvesporan tuka kitem sangunk formailam tem aikunk ami toiar asanv.” Tondd ugddun Pedrun ulounk suru kelem. Tannem mhonn’lem: “Dev tonddak polleun mon’xam modem ontôr korina: hem sot mhonn mhaka tthavem zalem; punn konn-ui monis, khõichea-i raxttracho to zaum, Devachi bhokti korta ani Devachê khuxê pormannem cholta tôr, to ki Devak manovta. Devan Jezu Krista vorvim xantichem xubhvhortoman porgottunk Israelacheam putam-dhuvank nirôp dhaddlo; Toch soglleancho Somi. Akhea Judeiant kitem ghòddlam tem tumi zannont: Juanvan batism porgôttlo tethun thaun, Jezun Galileia-sun Aplem kam’ suru kelem. Devan hea Nazaretchea Jezuk Povitr Atmean ani xoktin makhlo. Veta thõi Tannem borem kelem ani devcharachê podvê khal asleleank suttka dili, kiteak Dev Tachê sovem aslo. Judeikaranchea prantant ani Jeruzaleant Tannem keleô team soglleam vostunche ami govai. Eka lankddar umkollaun tãnnim Taka jivexim marlo. Punn tisrea disa Devan Taka punorjivont kelo ani To dixtti poddunk nirmilem: Sogllea lokak nhoi, punn Devan adim-fuddem nemleleam govaiank; amich te govai, To mel’leantlo punorjivont zatôch Tachê borabôr jevleanv ani pieleanv te. Jiveam ani mel’leancho Mon’subidar Apnnak Devan nemla mhonn lokak porgottunk ani haka govai diunk Tannem amkam adnea dilea. Tacher bhavart dovortat tim sogllim Tachea nanvan patkanchem bhogsonnem ghetat mhonn soglle provadi govai ditat.” Pedru oxem uloita thõich astana, tachem utor aikoteleam soglleancher Povitr Atmo denvun ailo. Videxeank porian Devan Povitr Atmeachem dennem favo kelem mhonn Pedru borabôr ail’le te sunôt kel’le soglle bhavarti thottakle. Kiteak tim atveô bhasô uloitalim ani Devak vakhanntalim mhonn tankam aikum ietalem. Tedna Pedrun mhonn’lem: “Amkam mell’lo toch Povitr Atmo tankam-i mell’lo mhonntôch, tankam udkacho batism diunk konnachean addaum-ieta?” Tannem tankam Jezu Kristachea nanvan batism diunk formailem. Uprant, thodde dis apnnam-xim rav mhonn tãnnim tachê kodde maglem. Videxeamnim-i Devachem utor mandun ghetlem mhonn Judeiant asleleam apostlamnim ani bhavam-bhoinnimnim aikolem ani, Pedru Jeruzaleak ailo tedna, sunôt kel’leamnim tachi ttika korun mhonn’lem: “Sunôt korunk naslo-leanger kiteak ravloi tum, ani tanchê borabôr kiteak mhonn jevloi?” Tedna, zobab diun, Pedrun ekan-ek viskuttaun sanglem: Êk dis hanv Jop’pa nogrant aslom tedna, magnnem kortam astana Povitr Atmeacho bhar mhojer ailo; tedna eka dorxonant char-ui konnxeamnim dhôrleli sorgar thaun zomni porian denvoil’li êk vhoddli ôl koxi kitem hanvem dekhlem. Hem nitt mhojê-xim denvun ailem. Hanvem tancher barik nodor marli ani sonvsarantleô mon’zati, zonavoram ani jivannim ani varea velim suknnim hanvem pollelim. Tedna oxem mhaka mhonntalo to êk tallo hanvem aikolo: ‘Pedru, utth, mar ani kha!’ Punn hanvem mhonn’lem: ‘Na, Saiba! Koxench na! opovitr ani mhellem kodinch mhojea tonddant bhitôr sorunk na!’ Anink êk pavtt tea sorga velea tallean mhaka mhonn’lem: ‘Devan nitoll kelam tem tum opovitr mhonn lekhinaka.’ Hem oxem tin pavtti ghòddlem ani uprant sogllem portun sorgar ubaron gelem. Tednanch ovchit hanv ravtalom tea ghorachea umbrea-xim teg monis ube zale. Xezareia thaun mhaka mellunk tankam dhaddlele. Ani tanchê borabôr vochunk pattim-fuddem soronaka mhonn Povitr Atmean mhaka sanglem. Tedna sô bhav mhojê borabôr aile ani ami tea mon’xachea ghora geleanv. Aplea ghorant êk devdut ubo aslolo apnnak dixtti poddlo ani apnnak oxem mhonn’lem mhonn tannem amkam sanglem: ‘Jop’pak Pedru mhonnlelea Simanvak apounk dhadd; to uloitolo team utram vorvim tuka ani tujea akhea kuttumbak taronn melltelem.’ Hanvem ulounk suru kelem tedna, survatek amcher denvlolo toch Povitr Atmo tancher denvlo. Tedna mhaka Somiacheam heam utrancho ugddas ailo: ‘Juanvan udkan batism dilo, punn tumkam Povitr Atmeacho batism melltolo.’ Somia Jezu Kristacher ami bhavart tthevlo tedna Devan amkam dilam tench dennem Tannem tankam-i dilem zalear, Devak addkhôll ghalunk hanv konn?” Hem aikun te oge poddle ani Devak vakhannun tãnnim oxem mhonn’lem: “Mhonntôch, Jivitak pavoita toslem jivit-mon bodlop videxeank-ui Devan dilem.” Isteva pasot piddapidd diunk suru kelem tedna zollim-mollim ximpoddlo to bhavarti lôk Fenixiek, Xiprusak ani Antiokiek porian pavlo, punn, Judevam bhair, tim anink konnankuch Devachem utor porgottinaslim. Tantle thodde Xiprusache ani Xirenache dadle Antiokiek gele ani thõi Grikank-ui Somia Jezuchem xubhvhortoman porgottunk tãnnim suru kelem. Somian tankam adar dilo ani zaitim zannam bhavart dhorun Somia-xim portolim. Hi tanchi khobor Jeruzaleachê povitr-sobhechea kanar poddli ani tãnnim Barnabasak Antiokiek dhaddlo. Thõi pavtôch, Devachem dennem polleun, to kuxal zalo ani kallzant thaun Somiak visvaxi ravunk tannem tankam hurba dili. Kiteak to êk boro ani Povitr Atmean ani bhavartan bhòrlolo monis aslo. Ani Somiacho pattlav korteleancho ank zaito choddlo. Uprant Barnabas Pauluk sodunk Tarsusak gelo ani, to mell’lea uprant, tannem taka Antiokiek haddlo. Ek akhem voros thõichê povitr-sobhê modem te jiele ani puskôll lokak tãnnim xikovnn dili. Ani oxem Antiokient xisank poilêch pavtti “Kristanv” mhonn addnanv poddlem. Tedna thodde provadi Jeruzaleak thaun Antiokiek aile. Tanchê modlo eklo, Agabus mhonnlolo, utthlo ani akhea sonvsarar dukôll poddtolo mhonn Atmeachea preronnan sangunk laglo. Ani Klaudius somrazachea kallar toxem ghòddlem. Zonn-ekleak tankta tea pormannem Judeiant ravteleam bhavam-bhoinnink modôt diunchi mhonn xisamnim tharav ghetlo. Ani tãnnim oxem kelem ani Barnabasachea ani Sauluchea hatant ghalun tãnnim zannteank adar pattoun dilo. Teach kallar povitr-sobhe- cheam thoddeam vangddeank Herod raza piddapidd diunk laglo. Juanvachea bhava, Jakobak tannem torsadin jivexim marlo. Judevank hem man’lem mhonn polleun, tannem Pedruk-ui dhorunk lailo. Hem Fug-nasleleam Unddeanche Porbecheam disamnim ghòddlem. Pedruk dhôrlea uprant, tannem taka bondkhonnint ghalo ani chougam-chougam soinikanche char pongodd tacher paro korunk bosoile. Pask-Porbe uprant porjê mukhar to Pedruk ubo korunk sôdtalo. Pedru bondkhonnint aslo titlo-i vêll povitr-sobha tachê pasot thambonastanam Devak vinoti korit asli. Herod Pedruk porjê mukhar ubo korunk sôdtalo tea disachê adlê rati, Pedru dogam soinikam modem nhidlolo aslo; taka don sankllimnim bandlolo ani paredar bondkhonnichem dar rakhtale. Ovchituch Sorvesporacho êk dut ubo zalo ani tem bondkhonni-kudd uzvaddan bhòrlem. Pedrucheam bhuzancher hat marun devdutan taka utthoilo ani mhonn’lem: “Vegim utth!” Thõichê-thõich tacheam hatancheô sanklli bhuim poddleô. Tedna devdutan taka mhonn’lem: “Tuzo pott’tto band ani tujeô vhannô ghal.” Pedrun toxem kelea uprant devdutan taka mhonn’lem: “Tujem avoronn ghal ani mhojê pattlean ie.” Pedru tachê pattlean gelo, punn devdut kortalo tem khoreponnim ghòddta mhonn to nokllo aslo, kiteak apunn fokot êk dixttavo polleta mhonn to chint’talo. Pareachi poili ani dusri chouki utrun, Xarant pavoita tea lokhonddachea darvonttea-xim te pavle. To apxinch tankam ugto zalo. Ani bhair sorun te êk akho rosto chol’le ani thõichê-thõich devdut tachê thaun koddsorun gelo. Tedna, soirannar ieun, Pedrun mhonn’lem: “Somian Aplea dutak dhaddlo ani Herodichea hatantlo ani Judevancho lôk ravtalo tantuntlo Tannem mhaka vattailo mhonn atam mhaka khorench kollon ailem.” Apunn khõi asa tem taka gomlea uprant, to nitt Marku-i mhonnlelea, Juanvachê avoi Mariechea ghora gelo; thõi zaito lôk ektthovl’lo ani magnnem kortalo. Pedrun darar marlem tedna, Roda nanvachem ek cheddum, konn darar marta tem polleunk dara-xim gelem. Tannem Pedrucho tallo ollkholo ani itlem khuxal tem zalem ki dar ugddinastanam bhitôr dhanvun vochun Pedru darar ubo asa mhonn tannem sanglem. Tãnnim taka mhonn’lem: “Tum pixem zalãi.” Punn to khoroch aila mhonn tem portun-portun sangunk laglem tedna, tãnnim mhonn’lem: “To tacho devdut zaunk zai.” Tea mhonnosôr Pedru darar marit ravlo. Xekim tãnnim dar ugôddlem ani taka polleun tim thottaklim. Ogim ravat mhonn tannem aplea hatan khunna keli ani koxê bhaxen Somian apnnak bonkhonnintlo bhair kaddlo tem sanglem, ani mhonn’lem: “Jakobak ani amcheam bhavam-bhoinnink hem kollit korat.” Magir to bhair sorun dusrê kodden gelo. Sokall zatôch soinikam modem boroch ghuspagondhôll zalo. Pedruk kitem ghòddlem tem tankam kãich somzona zalem. Taka sodun kaddunk Herodin hukum’ ghalo, punn to tankam mellunk na. Hea khatir paro korteleanchi tãnnim barik vaspus korunk ani tankam jivexim marunk laile. Magir to Judeia thaun Xezareiak gelo ani thõi ravlo. Tir ani Sidon’chea lokacher Herod raza tiddlolo aslo dekhun, tantle kãi zann ek mot korun taka mellunk gele. Blastus hea raz-mhalantlea karbhareachi ixttagôt zoddun, tãnnim xanti korunk magli, kiteak tancho dês Herod razachea desantlo orôv vhortalo. Eka nemlolea disa Herodin aplim raiponnachim vostram ghalim ani eka xinvasonar bosun tannem porjek êk boli keli; Lôk gorozlo: “Uloita to êk dêv, to monis nhoi.” Punn teach vellar thõichê-thõich Sorvesporachea dutan taka xikxa dili, kiteak tannem Devak man diunk na; ani kiddeamnim khaun to melo. Devachem utor ximpoddtalem ani vaddtalem. Apli seva sompoitôch Barnabas ani Saulu Jeruzalea thaun portole ani Marku mhonnlelea Juanvak tãnnim apnnam borabôr haddlo. Antiokiechê povitr-sobhent provadi ani xastri asle te he: Barnabas, Kallo mhonnlolo Simanv, Xirenacho Luxius, Herod up-razachea vangdda raznivasant lhan-vhôdd zal’lo Manaen, ani Saulu. Êk dis, te upas kortale ani Somiak bhozunk ektthãi asle tedna, Povitr Atmean tankam mhonn’lem: “Barnabasak ani Sauluk kuxin kaddat: eka kherit kama khatir Hanvem tankam apoileat.” Tedna upas ani magnnem korun, tãnnim tancher hat dovorle ani tankam dhaddle. Hê bhaxen Povitr Atmean tankam pattoitôch, te dog-ui Xeleuxiek gele ani thõi thaun, tarvar bosun, Xiprusachi vatt tãnnim dhôrli. Salamisak pavtôch, Judevancheam devsthanamnim Devachem utor tãnnim porgôttlem; aplea vavrant adhar diunk tãnnim Juanv Markuk bhaga ghetlolo. Te ak’kho zunvo bhonvle ani Pafosak pavtôch, Bar Jezu nanvacho êk Judêv tankam mell’lo; to ghaddi ani khotto provadi aslo. To razpalachê sevek aslo. Razpal tedna Sergius Paulu aslo, gineanan huxar monis. Devachem utor aikunk sôdtalo dekhun, hannem Barnabasak ani Sauluk apnna-xim apounk dhaddle. Bar Jezu ghaddi mhonnun, taka Elimas mhonntalim (kiteak ghaddi Grik bhaxen Elimas). To tankam addaunk vavurtalo kiteak to razpalak Kristi bhavarta thaun pois dovrunk proitn kortalo. Punn Saulun — haka Paulu-i mhonn nanv aslem – Povitr Atmean bhoron, nitt tea ghaddiak tellun mhonn’lem: “Arê todd’ddokea, arê fottinga, devcharachea pora, Devachê sogllê taronnik ievzonnechea dusmana, Sorvesporache nitt roste vankdde korchem kam’ tum sôddchoch nãi? Ani atam Sorvesporachea hatak tum sampoddloi, tum kurddo zatoloi ani thoddo vêll tuka dixtti poddchem na.” Teach vellar, tacher kallôk-gidd poddlo ani apnnak hatak dhorunk konn mellot kai mhonn to sodunk laglo. Hem ghòddlem tem polleun, ani Somia vixim ji xikovnn taka mell’li tichê pasot soglloch ojap zaun, razpalan bhavart dhôrlo. Paulu ani tache sangati Pafosa thaun tarvar bosun Panfiliechea Pergak gele; punn tankam thõich dovrun, Juanv Mark Jeruzaleak portolo. Her, Pergantlean bhonvun, choltam-choltam Pixidiechê Antiokient pavle. Ani Sabbatha disa, devsthanant bhitôr sorun, te thõi bosle. Somurtintlim ani Provadeancheam pustokantlim vachpam zatôch, devsthanacheam vhoddilamnim tankam oso nirôp dhaddlo: “Bhavamnô, porjek dhir divpachim don utram sangunk tumkam khuxi zalear, upkar korun sangat.” Paulu ubo ravlo ani, ogim ravunk hatan khunna korun, ulounk laglo: “Israelacheam mon’xamnô, ani Devachi bhokti kortoleamnô, aikat! Amchê Israel porjechea Devan amcheam purvozank vinchun kaddle ani, te Ejiptant pordexi koxe asle tedna, tanchê thaun Tannem êk porza utpon keli; ani vhoddlê podven tankam thõisorlim bhair kaddlim ani challis vorsam oronneant tancho Tannem samball kelo. Saddê-charxim vorsam bhòrtat mhonnosôr, Khanaanant sat raxttrancho bhosm korun hanche ganv, daiz koxem Tannem tanchê adhin kele. Hea uprant, Samuel provadi porian, Tannem tankam fuddari dile. Magir tãnnim êk raza maglo ani Devan Benjaminachea kullacho êk dadlo, Kixacho put Saulu, tankam dilo; hannem challis vorsam razvôtt choloili. Taka nikllailea uprant, Devan Davidak tancho raza zaunk voir kaddlo ani tachê vixim govai diun mhonn’lem: ‘Mhojea Kallza sarko Mhaka David, Jes’secho put, mell’la; soglleô Mhojeô khuxeô to kortolo.’ Aplê bhasavnnê pormannem, Davidachê sonstintlo Devan Israelak Jezu Soddvonnar upzoilo. Jezu ieunchê adim, akhê Israelachê porjek jivit-bodôlpacho batism Juanv porgott’talo. Aplem kam’ sompounchea vellar, Juanv mhonntalo: ‘Tumi chint’tat to hanv nhoi; punn, polleiat, mhojê pattlean Konn-Eklo ieta ani Tacheam vhannancheô vadiô soddunk mhaka favonam.’ Mhojeam bhavam-bhoinnimnô, Abrahamachê kulliecheam putam-dhuvamnô, ani Devachi bhokti kortoleam heramnô, ho soddvonnecho nirôp Devan tumkam dhaddla. Jeruzaleachea lokan ani tancheam fuddariamnim Jezuk ollkhonastanam, nhoi mhonn Sabbathachea Sabbatha vachtat tim provadeanchim utram somzonastanam, Tacher mornnachem formonn marlem ani tim ghoddon ie-xim kelim. Taka jivexim marunk tankam koslench karonn mellunk na, tori tãnnim Tacher mornnachem formonn Pilata kodde marun ghetlem. Tachê vixim boroil’lem aslem titlem-i xarti pavoilea uprant, tãnnim Taka lankdda velo denvoilo ani êkê somadhint dovorlo. Punn Devan Taka mel’leantlo utthoilo. Ani Galileia thaun Tachê borabôr Jeruzaleak gel’lim tankam zaite dis To dixtti poddlo; ani porjê mukhar him ozun Tachim sakxidaram. Devan amcheam purvozank bhasavnni kel’li, tich ti bori khobor tumkam ami porgôtt kortanv. ti Tannem, Jezuk punorjivont korun, amam, tancheam bhurgeam thãi pallun dili. Khoreponnim oxem Dusrea Stotrant boroil’lem asa: ‘Tum Mhozo put: Hanvem Tuka aichea disa zolm dila.’ Taka Devan mel’leantlo punor-jivont korun Tacho kednanch vinas zauncho na mhonn khud Devan heam utramnim adinch sangun dovorlelem: ‘Davidak bhasail’lim khorim ani povitr dennim Hanv tumkam ditolom.’ Heach khatir anink êkê svater oxem mhonnlelem asa: ‘Tujea visvaxi bhoktacho vinas zaunk diuncho nãi.’ Aplea jivitant Devachi ievzônn pall’lea uprant, David melo; tacheam purvozank to ektthovlo ani tachê kuddicho vinas zalo. Punn Zaka Devan punorjivont kela, Tacho vinas zaunk na. Tôr, mhojeam bhavam-bhoinnimnô, Jezu vorvim tumkam patkanchem bhogsonnem porgott zata mhonn tumi zanno zaiat; Moizesachê Somurti vorvim team soglleam patkanchem bhogsonnem tumchean gheunk zaunk na, punn atam Tacher bhavart dovortat tim sogllim Devak manovlelim zatat. Jem provadeamnim sanglam tem tumchê-xim ghoddonam zaunk chotrai dhôrat: ‘Moskoriô kortoleamnô, polleiat, ojapat, ani nanch zaiat! Tumcheam disamnim, Hanv kitem korunk fuddem sorlam, tachi ollokh legun tumkam dilear, tem tumi sotman’cheak nant!’ Paulu ani Barnabas devsthanantle bhair sorun vetana, fuddlea Sabbathak heam vostum vixim novean uloiat mhonn lokan tanchê lagim maglem. Sobha utthlea uprant, Judêv lokantlim ani Devak bhôzpi novxisantlim zaitim zannam Paulu ani Barnabasa pattlean gelim, ani hãnnim tanchê kodde uloun Devachea denneak visvaxi ravunk tankam nettan ulo kelo. Dusrea Sabbatha ogllem-unnem akhem xar Devachem utor aikunk ektthãi zalem. Itli urpônz polleun Judêv lôk nattkaien bhòrlo ani ninda korun Paulu sangtalo tacher addvem-tiddvem ulounk laglo. Tedna Paulun ani Barnabasan kalljidarponnan mhonn’lem: “Devachem utor ami poilem tumkam porgott korunk zai aslem, punn tumi tem manun ghenant dekhun ani Sasnnik Jivit tumkam favo nhoi mhonn tumich nivaddo ghetat dekhun, atam ami videxeanchê vatten chol’leanv. Kiteak oxem amkam Sorvesporan formailam: ‘Prithumecheam ximam porian Mhojem taronn pavchê khatir, raxttrancho uzvadd Hanvem tuka nemla.’ ” Hem aikun videxi khuxal zalim ani Somiachea sondexak lagun tãnnim Taka vakhannlo, ani sasnnik jivit gheunk adim-fuddem nemlelim aslim titleamnim bhavart dhôrlo. Hê porim Somiachem utor soglleam ganvamnim ximpoddtalem. Punn Judevamnim unch kulliecheam kãi bhoktivont bail-novxisank ani xarantleam vhoddam-vhoddam mon’xank uchambollailim ani Pauluk ani Barnabasak piddapidd diunk fuloilim, ani tankam apleam prantantle bhair ghale. Punn tancher add aplea pãiancho dhul’lo fafddun te Ikoniumak gele. Punn xis khuxalkaien ani Povitr Atmean bhòrle. Ikoniumant pavtôch, Paulu ani Barnabas borabôr Judevan-cheam devsthanamnim gele ani itlea nettan uloile ki Judevanchea ani Grikanchea puskôll lokan bhavart dhôrlo. Punn bhavart dhorunk na team Judevamnim videxeank uchambollailim ani tanchem mon amcheam bhavam-bhoinnincher add vikailem. Tori Paulu ani Barnabas borech-xe dis thõi ravle, ani, Somia koddcho dhir gheun, bhiranti vinnem tãnnim apli sakxi dili. Tãnnim dil’lo sondêx khoro mhonn dakhounk, Somian tanchê vorvim ojapam ani khunna kelim. Nograntlea loka modem futt poddli: konn-konn Judevanchê vatten ani konn-konn Apostlanchê vatten ravlim. Tedna odhikareancho tenko gheun, apostlank piddapidd diunk ani fatraun marunk Judevanchi ani videxeanchi ucham-bollai zali. Apostlank hem gomtôch, te Likaoniek pollun gele, ani thõicheam Listra ani Derbe nogramnim ani bhonvtonncheam ganvamnim tãnnim xubhvhortoman porgôttlem. Listrant êk opangull monis bosun aslo; to zolman thontto zaun kednanch cholunk naslo. Paulu provochon kortalo tem tannem aikolem. Paulun apli nodor tacher laili ani, boro zaunk taka bhavart asa to polleun, tannem vhoddlea tallean mhonn’lem: “Tujeam pãiancher nitt ubo rav!” Ani uddi marun to cholunk laglo. Paulun kelem tem lokanchê urponjin pollena fuddem, Likaoniechê bhaxen tãnnim vhoddlean mhonn’lem: “Mon’xanchea rupan dèv amchê modem denvleat.” Barnabasak tãnnim Zeus mhonn nanv ghalem ani, Paulu mukhêl ulovpi dekhun, taka Hermes mhonn nanv dilem. Xara fuddem aslelea Zeusachea mondirachea iadnikan har ghalun nettoil’le padde darvonttea-xim haddle ani loka sangatim to iôdn bhettounk sôdtalo. Hem aikun, Barnabasan ani Paulun aplim avoronnam pinzlim ani, loka-xim dhanvun vochun, tãnnim arddun mhonn’lem: “Ixttamnô, tumi kitem mhonn korunk fuddem sorleat? Ami-i fokot monis, tumchêch mon’xagotiche. Punn tumkam ami bori khobor gheun aileanv; heam polkeam vostunk patt korun, jivea Deva-xim tumkam vollun haddunk ami aileanv: tôr sôrg ani sonvsar ani somdir ani tanchê bhitôr asa titlem-i Tannench rochlam. Adleam pinddkamnim soglleam videxeank ap-apli vatt dhorunk Tannem nirmilem. Tori astana, bholeponnan tumkam zaite upkar korun, Apnnakuch govai dinastana To ravunk na: sorgar thaun To paus dhaddta, somoiam pormannem follam utpon korta, tumkam jevunk-khaunk dita ani tumchim kallzam dhadoxi korta.” Itlem sangun-ui, apnnank iôdn korinam zaunk, lokak addaunk tankam bhov avghodd zalem. Tedna Antiokiê and Ikoniuma thaun kãi Judev aile; lokak khubdaun, tãnnim Pauluk fatrailo ani to melo mhonn somzun taka xara bhair oddun vhelo. Punn xis ieun tachê bhonvtim extthovle tedna, to utthlo ani portun xarant gelo. Ani dusrea disa to Barnabasa borabôr Derbek gelo. Tea xarant xubhvhortoman porgottun zaite xis kelea uprant, Paulu ani Barnabas Listrek, Ikoniumak ani Antiokiek portole. Tãnnim xisank ghottai dili ani bhavartant thir ravat mhonn sanglem. “Devachea Rajeant bhitôr sorunk zaite koxtt-dogd ami sõsunk zai”, oxem te mhonntale. Dôr-êkê povitr-sobhek tãnnim zannte nemle ani, magnnim ani upas korun, jea Somiak tãnnim bhavartan mandun ghetlolo, tea Somiachê adhin tankam kele. Pixidia prantantlean te Pamfiliek pavle. Pergant Devachem utor porgôtt’tôch, te Ataliek denvun gele. Ani thõi thaun tarvar bosun te Antokiek pavle. Hea xara thaun te bhair sorlele tedna, Paulun ani Barnabasan atam sompoil’lea vavra pasot thõichea bhavarteanchea zomean tankam Devachi mozôt magun, Tacheach hatant ghal’le. Hanga pavtôch, thõichi povitr-sobha tãnnim zomoili ani apnnam vorvim Devan kelem titleachi-i khobor tankam dili, ani koxê bhaxen videxeank Tannem bhavartachem dar ugôddlem, tem bi tankam sanglem. Xisam borabôr te thõi zaito kall ravle. Tedna Judeiak thaun kãi monis ieun amcheam bhavam-bhoinnink oxem xikounk lagle: “Moizesan sthaplelê chali pormannem tumi sunôt kelea xivai, tumi taronn gheunk xokonant.” Hê vixim he monis Paulucher ani Barnabasacher uprasle ani tanchê modem motto vad-vivad zalo. Xekim Paulun ani Barnabasan ani tanchê modleam thoddeam zannamnim Jeruzaleak vochun hea tonttea vixim apostlam ani zannteam kodde bhasabhas korchi mhonn tharav zalo. Mhonntôch povitr-sobhen tankam pattoile, ani Fenixientlean ani Samarientlean vetana, koxê bhaxen videxeamnim bhavart dhôrlo tem te sangit gele; ani hi khobor aikun, soglleam bhavam-bhoinnink vhôdd khuxalkai bhògli. Te Jeruzaleak pavle tedna, tankam povitr-sobhen, apostlam-nim ani zannteamnim ievkar dilo; ani tãnnim apnnam vorvim Devan kelem titleachi-i khobor sangli. Punn Farizevanchea pongddantleam kãi bhavarteamnim oxi addkhôll haddli: “Tanchi-i sunôt korunk zai ani tankam Moizesachi Somurt samballunk lavunk zai.” Hea tonttea vixim bhasabhas korunk apostl ani zannte ektthãi zale. Motto vad-vivad zalea uprant, ubo ravun Pedrun tankam mhonn’lem: “Bhavam-bhoinnimnô, videxeamnim mhojea tonddantlem xubhvhortoman aikunk ani bhavart dhorunk poileam disam thaun tumche modem Devan mhaka vinchun kaddlo mhonn tumi zannont. Ani soglleanchim kallzam ollkhota tea Devan amkam dil’lo tosoch tankam-i Povitr Atmo diun, tim-i Apnnak man’tat mhonn dakhoun dilem. Bhavarta vorvim tanchim kallzam nitoll korun, amchê ani tanchê modem koslich ontôr Tannem korunk na. Mhonntôch amchean, nhoi mhonn amcheam purvozamnim, vhorunk zaum naslam toslem zum xisanchê manir ghalun, tumi kiteak mhonn Devachi porikxa korunk sôdtat? Punn Somia Jezuchea dennean amkam toxench tankam taronn mellta mhonn ami sotman’tanv.” Zomlolo sogllo lôk ogo ravlo; ani apnnam vorvim Devan videxeam modem kel’leam soglleam khunnanchi ani vizmitanchi ji khobor Barnabas ani Paulu sangtale, ti akhê sobhen aikoli. Tanchem ulovop zatôch, Jakoban oxem aplem mot sanglem: “Bhavam-bhoinnimnô, mhojem aikat: Aplea nanvak bhettoil’li videxeam modli êk porza survatek thaun vinchun kaddunk Devachi khuxi mhonn Simeianvan tumkam atanch sanglam. Ani hem provadeancheam utram pormannem asa, kiteak oxem boroil’lem asa: ‘Hea uprant, Hanv portun ietolom, ani Davidacho moddon poddlolo tombu Hanv novean tanntolom. To Hanv ghorttannantlo ubo kortolom ani novean bandtolom. Tedna sogllim mon’xam Sorvesporak sôdtelim, Mhojea nanvak bhettoil’lim asat tim sorv raxttram. Zannem zaitea kalla thaun hem kollit kelam, to Sorvespor oxem sangta.’ Mhonntôch mhojem mot oxem: Deva-xim portun ietat team videxeanchem jivit ami odik avghodd korchem nhoi. Punn tankam oxem ami boroun dhaddchem: murtim-puttleank bhettoun bhoxttail’leô vostu tãnnim khauncheô nhoi, Somurticheam kaideam virudh logn korchem nhoi, ani gomtti pillun marlelê mon’zatichem mas khaunchem nhoi ani rogot xevchem nhoi. Karonn adlea kallar thaun soglleam nogramnim Moizesachi Somurt porgôtt korpi asat ani dôr Sabbatha devsthanamnim ti vachtat.” Tedna apnnam modleam thoddeam mon’xank vinchun kaddunk ani Paulu ani Barnabasa sangatim Antiokiek dhaddunk apostlamnim ani zannteamnim akhê povitr-sobhê borabôr tharav ghetlo. Judas, add-nanvan Barsab’bas ani Silas, hankam tãnnim vinchun kaddle; he bhavarteam modem mhotvache monis asle. Tanchê kodde diun oxem ek potr tãnnim dhaddlem: “Apostl ani zannte, tumche bhav, Antiokient, Sirient ani Xilixient videxeam modlim amchim bhavbhoinn zaleant tankam noman kortat. Amchê modleam thoddeam bhavamnim aplê xikovnnen tumkam ghuspailim ani tumchim monam uchamboll kelim mhonn ami aikolam. Oxem korunk tankam amchi rojea nasli. Hea pasot ami êk sobha apoili, ani amchê-modleam thoddeank vinchun kaddun amcheam mogacheam Barnabasa ani Paulu borabôr tumchê-xim dhaddunk ami soglleamnim tharailem. Jezu Kristachea, amchea Somiachea, nanva khatir Barnabas ani Paulu aplo jiv sonkottant ghalunk pattim sorle nant. Mhonntôch tanchê borabôr Judasak ani Silasak ami tumchê-xim dhaddtanv: hea potrar ami boroilam tench te tumkam tonddan sangtele. Heam gorjecheam kaideam bhair anink koslench vozon tumcher ghalina zaunk Povitr Atmeak ani amkam borem dislem: murtim-puttleank bhettoil’lem jevonn tumi jevchem nhoi, rogot xevchem nhoi, ani gomtti pillun marlelê mon’zatichem mas khaunchem nhoi; Somurticheam kaideancher add logn korchem nhoi. Heam vostunk patt korun tumi borea rostear astelet. Noman.” Tedna tankam dhaddle ani te Antiokiek gele; hanga sobhek apoun tãnnim tem potr dilem. Sobhen tem vachlem ani tachê vorvim apnnak ghottai mell’li mhonn khuxal zali. Judasan ani Silasan, apunnuch provadi zaun, loka lagim zaitem uloun bhavam-bhoinnink ghottai ani thirai dili. Thõi thodde dis kaddlea uprant, bhavam-bhoinnincho nirôp gheun, apnnank dhaddlele tanchê-xim te xantin portun gele. Punn Paulu ani Barnabas Antiokiek ravle ani thõi zaiteam dusream borabôr tãnnim xikovnn dili ani Somiachem utor porgôttlem. Thoddeam disamnim Paulun Barnabasak mhonn’lem: “Atam ami portun vochun Somiachem utor porgôttlelem team soglleam nogramnim amcheam bhavam-bhoinnink bhett korum-ia ani tim koxim-kat choltat tem polleum-ia.” Tanche borabôr Marku mhonnlelea Juanvak-ui vhorunk Barnabasan khuxi dakhoili. Punn tanchê borabôr vavr soddun Panfilient tanchê thaun koddsorlolo teach mon’xak novean bhagak gheuncho nhoi mhonn Pauluchem mot aslem. Tôr hê vixim tanchê bhitôr huzôt zali ani te ekameka thaun koddsorle, ani Markuk gheun Barnabas tarvar bosun Xiprusak gelo. Paulun Silasak aplea bhagak ghetlo ani, bhavam-bhoinnimnim tachê khatir Somiachi mozôt maglea uprant, to bhair sorlo. Povitr-sobhank ghottai diun to Xirientlean ani Xilixientlan bhonvot gelo. Magir Paulu Derbek ani uprant Listrak gelo. Thõi Timot nanvacho êk xis aslo; tachi avoi bhavart dhôrleli Judêv bail, punn tacho bapui Grik. Listrent ani Ikoniumant aslim tim amchim bhavbhoinn tachem borem uloitalim. Paulun taka apnna borabôr vhorunk ievjilem. Hea pasot thõi jieteleam Judevam pasot tannem tachi sunôt keli, kiteak tacho bapui Grik mhonn sogllim zanno aslim. Nogram-nogramnim bhonvtanam, Jeruzaleak apostlamnim ani zannteamnim tharav ghetlele tanchi khobor tannem tankam dili ani te pallunk zai mhonn sanglem. Hê bhaxen teô povitr-sobha odik-odik bhavartan mozbut zaleô ani disan’dis tancho ank-ui vaddon gelo. Frijient ani Galaxiechea prantant bhonvle punn Devachem utor Aziechea prantant porgott korunk Povitr Atmean tankam addvarle. Mixiechê ximer te pavle tedna, ti utrun te Bitinient vochunk kortale, punn Jezuchea Atmean tankam vochunk diunk na. Mhonntôch Mixientlean bhonvon te Troasak gele. Ani êkê rati Paulun êk dixttavo dekhlo: Maxedoniecho êk monis ubo aslo ani tachê lagim oxem magtalo: “Maxedoniek ieun amkam adar di.” Ho dixttavo dekhlea uprant, rokddench Maxedoniek vochunk ami bondabôst keli, karonn tankam xubhvhortoman diunk Dev amkam apoita mhonn amkam khatri zali. Troasa thaun tarvar bosun ami nitt Samotraxiek geleanv ani dusrea disa Neapolik. Ani hanga thaun ami Filipik pavleanv; tea Maxedoniechea jilheachem tem mukhel xar aslem ani Romkarancho êk zomo thõi ravtalo. Hea xarant thodde dis ravlea uprant, Sabbatha disa ami tea xarachea darvonttea bhair nodi-xim geleanv; kiteak ti magnnem korchi svat mhonn ami aikol’lem. Ami thõi bosleanv ani zomatik ail’leam bailam kodde ulounk lagleanv. Tanchê modem Lidia nanvachi Devak bhôzpi êk bail amkam aikotali; ti Tiatira nograntli asli ani thõi zambllea-rongacheam lugttancho dhondo kortali. Paulu sangtalo tem aikunk Somian tichem kalliz ugôddlem. Tika ani tichea kuttumbak batism dilea uprant, tinnem amchê lagim oxem maglem: “Hanv khoreponnim Somiacher bhavart tthevtam mhonn tumi manun ghetlam zalear, amger ravunk ieiat.” Ani ami ieunkuch zai mhonn tinnem nêtt kelo. Êk dis ami magnnem korunk vetana, amkam ek gulam’-cheddum mell’lem; hea cheddvak parkhuncho gunn aslo. Ani noxib parkhun apleam dhoniank tannem khup duddu zôddlolo. Pauluchê ani amchê pattlean ieun tem bob marun mhonnunk laglem: “He monis Bhov-Vortea Devache chakor. Soddvonnechi vatt te tumkam porgôtt kortat.” Zaite dis tem oxem korit aslem. Xekim Paulu bejar zalo ani vollon tea atmeak mhonn’lem: “Jezu Kristachea nanvan hanv tuka hukum’ ghaltam, tachê velo bhair sor!” Ani teach vellar to bhair sorlo. Tea cheddva vorvim anink duddu zomouncho aplo bhorvanso somplo tem polleun, tacheam dhoniamnim Pauluk ani Silasak dhôrle ani chouker odhikariam-xim oddun vhele ani tankam mon’subidaram mukhar ube korun mhonn’lem: “He monis Judev ani xarant te uchambollai kortat. Ani ami Romkar mhonntôch, amchean mandun gheunk zainant, nhoi mhonn pallunk zainant, tosleô riti-sonvoiô xikoitat.” Urpônz Pauluchea ani Silasachea angar aili; mon’su-bidaramnim tanchim vostram pinzun kaddlim ani tankam jerbond marunk laile. Khup mar dilea uprant, tankam bhondkhonnint ghale ani tanchi borê bhaxen rakhônn korunk bondkhon-nichea rakhonndarak formailem. Hukuma pormannem tannem tankam bondkhonnichea bhitorlea kuddant dovorle ani tanche pãi lankdda-khoddeamnim ghalun ghott kele. Sumar modianir Paulu ani Silas magnnem kortale ani gaionam korun Devak vakhanntale tem dusream koideamnim aikolem. Ovchit êk vhôdd dhornnkamp zali ani bondkhônn buniadi soit hal’li. Rokddinch sogllim daram ugtim zalim ani soglleancheô sanklli poddleô. Bondkhonnicho rakhonndar zago zalo ani bondkhon-nichim daram ugtim zal’lim polleun ani koidi pollun gele mhonn somzun, torvar bhair kaddun to aplo jiv kaddunk sôdtalo. Punn Paulun vhoddlea tallean mhonn’lem: “Tuka kãich vaitt korinaka, ami soglle hangach asanv.” Rakhonndaran dive haddunk laile; magir to taktin bhitôr gelo ani soglloch koddkoddun Paulucheam ani Silasacheam pãiam poddlo. Ani tankam bhair haddun, tannem mhonn’lem: “Saibamnô, mhaka taronn mellunk hanvem kitem korunk zai?” Tãnnim taka sanglem: “Somia Jezucher bhavart dovor ani tuka ani tujea kuttumbak taronn melltelem.” Tedna taka ani tachea ghorant asleleam soglleank Somiachem utor tãnnim porgôttlem. Ratchea teach vellar tankam vhorun tannem tanchim chovnnam dhulim; ani thõichê-thõich tannem ani sogllea tachea kuttumban batism ghetlo. Uprant tannem tankam aplea ghora vhele ani jevonn vaddlem ani, Devacher bhavart dovrunk apnnak favo zalem dekhun, sogllea aplea kuttumba borabôr sontoslo. Dusrea disa mon’subidaramnim ho hukum’ diun naikank dhaddle: “Team mon’xank sôddat.” Rakhonndaran Pauluk sanglem: “Tumkam sôddat mhonn sangun mon’subidaramnim hukum’ dhaddla, mhonntôch atam bhair sorun tumi xantin vochat.” Punn Paulun tankam mhonn’lem: “Ami Romi nagrik zaun-ui, tãnnim amkam sobhêmazar mar dilo, nit korinastana amkam bondkhonnint ghale, ani atam guptim amkam soddunk sôdtat? Oxem zaum nozo! Apunnuch ieun tãnnim amkam bhair kaddche.” Naikamnim hem mon’subidarank kolloilem; ani Paulu ani Silas Romi nagrik mhonn tankam gomtôch, te bhiele. Ani, apunn khaxa ieun, tãnnim tankam bondkhonnintle bhair kaddle ani tem xar soddun vochat mhonn maglem. Bondkhonnintle bhair sorun, Paulu ani Silas Lidiechea ghora gele. Thõi bhavam-bhoinnink te mell’le ani tankam dhir diun tãnnim apli vatt dhôrli. Anfipolisantlean ani Apolon- ientlean vatt dhorun, te Tesalonikek pavle; hanga Judevanchem ek devsthan aslem. Aplê sodanchê sonvoiê pormannem, Paulu tanchê zomatik gelo. Ani tin Sabbatha porian tannem tanchê lagim Povitr Pustok dhorun bhasabhas keli; ani Kristan sõsunk zai aslem ani To mel’leantlo punorjivont zaunk zai aslo mhonn tankam somzonni diun tannem dakhoilem. To oxem sangtalo: “Hanv tumkam porgôtt kortam to Jezu, hoch To Krist!” Tantleam thoddeam zannamnim hem mandun ghetlem, ani Pauluk ani Silasak tim ektthovlim; hanchê bhair, Devak bhôztelea Grik lokachea eka vhoddlea chombean ani unch kulliecheam zaiteam bailamnim toxench kelem. Punn Judev nirddukaien bhòrle, rostea veleam kãi noxtteam mon’xank tãnnim ektthãi kele ani êk chumbo toiar korun akhea nogrant uchambollai ximpddaili. Pauluk ani Silasak sodunk ani uprant tankam loka fuddem ube korunk mhonn te Jasonachea ghora gele. Punn te tankam thõi mellunk nant dekhun, Jasonak ani thoddeam amcheam bhavank nogracheam mon’subidaram-xim haddle ani oxi bobatt marli: “He monis akho sonvsar uchambollaitat ani atam hangasôr pavleat. Tankam Jasonan apnnager biradd dilam, ani Jezu mhonnlolo anink eklo raza asa mhonnun, Somrazache soglle kaide te môddtat.” Him utram aikun lôk ani nograche mon’subidar challvole, punn Jasonachi ani heranchi zamin’ki ghetlea uprant tãnnim tankam sôddle. Kallôk zatôch, bhavam-bhoin-nimnim Pauluk ani Silasak rokddech Bereiak dhaddle. Thõi pavtôch te Judevanchea devsthanant gele. Hea ganvcho Judêv lôk Tesalonikecheam Judevam poros odik ugtea monacho aslo; tãnnim sondêx vhoddê utsuktaien aikolo, ani to khoro zalear polleunk tim dôr-disa Povitr Pustok barkaien topastalim. Tanchê modleam zaiteam zannamnim bhavart dhôrlo ani Grik lokantleam unch kulliecheam bailamnim ani puskoll dadleamnim toxench kelem. Bereiant-ui Paulu Devachem utor porgôtt’ta mhonn Tesalonikecheam Judevank gomtôch, lokak challvounk ani uchamboll korunk te thõi gele. Tedna bhavam-bhoinnimnim rokddoch Pauluk doriachê kinarer dhaddun dilo, punn Silas ani Timot thõi pattim ravle. Pauluk vatter rakhunk gel’le tãnnim taka Aten porian pavoilo, ani Silasan ani Timotan zata titlê vegim apnna-xim ieunchem mhonn Paulucho nirôp gheun te porot aile. Paulu apunn Atenant tanchi vatt polleun ravlo, ani hem xar puttleam-murtimnim bhòrlelem polleun, to soglloch kanttall’lo. Judevam lagim ani Devak bhôzteleam kodde to devsthanant toxench ttintteamnim ieto-veto loka kodde bhasabhas kortalo; Thodde Epikuri ani Istoiki totvgineani tachê lagim huzôt kortale. Kãi zann oxem mhonntale: “Ho boddboddio kitem sangunk sôdta?” Dusre konn mhonntale: “To porkeam devam vixim porgott korta dista.” Karonn Paulu Jezucho ani punorjivontponnacho tankam prochar kortalo. Tãnnim Pauluk dhorun Areiopagachê Mha-Sobhê fuddem vhelo ani tachê lagim vicharlem: “Tum novê xikovnnecho prochar kortai: ti kosli ti amkam sangxi? Tum sangtai tantleô thoddeô vostu amkam atveôch lagtat, mhonntôch ami tancho ôrth kitem to zanno zaunk sôdtanv.” Sogllim Aten’karam ani xarant vostek ravpi bhailo lôk noveam-noveam kolponanchi khobor sangun vô aikun aplo vêll sartalo. Paulu Areiopagachê Mha-Sobhê fuddem ubo ravlo ani oso uloilo: “Aten’karamnô, sogllêch vatten tumi ekdom’ dhormik mon’xam mhonn hanv polletam. Tôr tumchea xarant bhonvtana ani tumcheô dharmik iadgiri ekan-êk polletana, ‘Onollkhi devak’ ho boroil’lo namlêkh asleli êk vedi-i hanvem dekhli. Borem tôr: tumi ollkhonastanam bhôztat toch Dev hanv tumkam porgôtt kortam. Sonvsar ani tachê bhitôr asa titlem-i rochlam to Dev, sorgacho ani prithumecho Dhoni zaun, mon’xancheam hatamnim bandlelea mondirant ravona, nhoi mhonn kiteachich Apnnak goroz asa mhonn mon’xanchi sevachakri To ghena; ufrattim, soglleank jivit ani svas ani soglleô vostu dita to Toch. Akhi prithum’ bhorunk ekach mon’xa thaun sogllem mon’xakull Tannem utpon kelem. Hea bhair, ek-ek raxttr kitlo kall togchem tem Tannem tharailam ani tea-tea raxttrachea desak ximô ghaleat. Heam vostum vorvim sanspun-sanspun zal’lê porim mon’xamnim Apnnak sodun kaddunk Devan oxem kelam. Tori To amchê thaun pois na, kiteak ‘Tachê sovem ami jietanv, bhonvtanv ani asanv’. Oxench tumchê-modleam kãi koveamnim sangun dovorlam: ‘Ami sogllim khoreponnim Tachim bhurgim.’ Ami Devachim bhurgim mhonntôch, Dev mon’xanchê kolen ani hikmotin kel’lê bhangarachê, rupeachê ani fatrachê murti sarko mhonn ami somzunk favona. Oslea nennar-ponnachea kallacher Devan lokx ghalunk na, punn atam sogllê kodden asleleam soglleam mon’xamnim jivit -mon bodôlchem mhonn To porgott korta. Kiteak sonvsarachi nitivont-ponnan nit korunk Tannem êk dis tharaila ani eka Mon’xak Nitidar nemla; ani hea Mon’xak mel’leantlo punorjivont korun, tachi khatri Tannem amkam soglleank dilea.” Mel’leanchea punorjivontponnachi khobor aikona fuddem, thoddeamnim tacheô moskoreô keleô, ani dusreamnim mhonn’lem: “Hê vixim ami dusrê pavtti tujem aikunk sôdtanv.” Oso Paulu tanchê modlo koddsorlo. Tori kãi zannamnim taka ektthovon bhavart dhôrlo. Hanchê modem aslo Dioniz nanvacho Areiopagachê Mha-Sobhecho êk vangddi, Damaris nanvachi êk bail ani tanchê borabôr anink-ui dusrim. Tea uprant, Atenantlo bhair sorun Paulu Korintak gelo. Thõi zolman Pontusacho, Akuila nanvacho, êk Judêv taka mell’lo; to aplê bailê Prixil’la borabôr niktoch Italiê thaun ail’lo, kiteak soglleam Judevamnim Roma xarantle bhair sorchem mhonn Klaudiusan hukum’ ghal’lo. Paulu tankam bhett diunk gelo. Ani aplea sarko tim dhondo kortalim dekhun, tanchea sangata to ravlo ani tanchê borabôr vavr kortalo, kiteak tim-i tachê bhaxen tombu-korpi. Dôr Sabhata devsthanant to vad-vivad choloitalo ani Judevank toxem Grikank bhavartak jikun gheunk sôdtalo. Silas ani Timot Maxedoniê thaun pavle tedna, sogllo vêll Devachem utor to porgottit aslo ani Jezu Krist mhonn Judevank govai ditalo. Punn te tacher kolpole ani taka nindechim utram ulounk lagle tedna, aplim vostram fafddun tannem mhonn’lem: “Tumi zôr Deva thaun koddsorun poddxeat, hi tumchich zobabdari; mhaka zalear, hantum koslich zobabdari na. Atam thaun hanv videxeank sondêx diunk vetolom.” Thõisorlo bhair sorun, to Tixius Justus mhonnlelea konn-ekleager gelo. Ho Devak bhôztalo ani tachem ghor devsthana lagim aslem. Devsthanachea vhoddila, Krispan ani tachea akhea kuttumban Somiacher bhavart dovorlo. Korintkarantleam zaiteam zannamnim Pauluchem aikun bhavart dhôrlo ani batism ghetlo. Êkê rati, Somian Pauluk dorxonant mhonn’lem: “Bhienaka, punn uloi ani ogo ravonaka, kiteak Hanv tujea sangata asam. Hea xarant Mhojê vatten khup lôk asa, mhonntôch tuka vaitt korunk konn fuddem sorcho na.” Oso Paulu Korintant dedd voros ravlo ani Devachem utor tanchê modem porgottit aslo. Punn Galion Akaiecho odhikari aslo tedna, soglle Judev ekmotan Paulucher kolpole ani taka neaisobhê mukhar ubo kelo. Tãnnim mhonn’lem: “Ho monis lokak Somurticheam nemancher add Devak bhôzat mhonn aplê xikovnnen ôddta.” Paulu ulounk vetalo, punn tea adinch Galionan Judevank mhonn’lem: “Judevamnô, aikat: Koslea khotteponnacho vô opradacho proxn zal’lo zalear, tumcho arôp hanv favo tê porim aikoto aslom; punn ho tontto utrancho ani nanvancho ani tumchê somurti vixim dekhun, tumich to suttavo korat. Osleam vostunchi nit korunk mhaka khuxi na.” Uprant tannem tankam neaixallentle bhair sorunk laile. Tãnnim soglleamnim devsthanachea vhoddila, Sostenesak ghôtt dhôrlo ani neaixallê mukhar taka boddoilo. Ani team gollbollanchi Galionan porva keli na. Borech-xe dis Korintant ravlea uprant, bhavam-bhoinnincho nirôp gheun, Prixil’la ani Akuila borabôr tarvan Paulu Siriek gelo. Kenkresak pavtôch, apnnem êk angovnn kel’li ti pallunk, Paulun aple kens tasle. Efezak pavtôch, Paulun tankam thõi sanddlim ani devsthanant vochun Judevam kodde to bhasabhas korunk laglo. Thõi anink thodde dis rav mhonn tãnnim tachê lagim maglem tedna, tannem hem mandun gheunk na, punn tancho nirôp ghetanam mhonn’lem: “Devak zai zalear, hanv portun ietolom.” Oso to tarvar bosun Efezantlo bhair sorun gelo. Xezareiak pavlo tedna, povitr-sobhek bhett kortôch to Antiokiek gelo. Hanga thoddo vêll ravtôch, Galaxiechea prantantlean ani Frijientlean bhonvun Paulu soglleam xisank ghottai ditalo. Zolman Aleksandriecho, Apol’lo nanvacho, êk Zudêv Efezak pavlo. To ulovpant bhov huxar aslo ani Povitr Pustokam vixim bori zannvai aslolo. Somiachê Vattechi taka bori xikovnn mell’leli ani to kallzachê vhoddê hurben uloitalo ani barkaien Jezu vixim xikovnn ditalo; punn taka fokot Juanvachea batismachi khobor asli. Devsthanant to vhodda kalljidarponnan xikounk laglo; Prixil’lan ani Akuilan taka aikolo tedna, tãnnim taka apnnam-xim vhelo ani Somiachê Vattechi taka odik barik somzonni dili. Akaiek vochunk Apol’lon khuxi dakhoili tedna, bhavam-bhoinnimnim taka hurba dili ani taka borê bhaxen gheiat mhonn xisank boroilem. To thõi pavlo tedna, Devachea dennean bhavarti zal’leank tannem khup adar dilo. Sobhêmazar to Judevam kodde bollan vad-vivad choloitalo ani Jezu To Krist mhonn to tankam Povitr Pustokantlean dakhoitalo. Apol’lo Korintant astana, Paulu ut’toricheam desamnim bhonvun Efezak pavlo; hanga taka thodde xis mell’le. Tannem tanchê kodde vicharlem: “Tumi bhavart dhôrlo tedna, Povitr Atmo tumi gheunk na?” Tãnnim zobab dilo: “Na. Povitr Atmo asa mhonn porian ami aikunk na.” Tannem tankam vicharlem: “Tôr tumim koslo batism ghetlo?” Tãnnim portipall kelo: “Juanvacho,” Paulun mhonn’lem: “Apnna pattlean ieuncho asa Tacher, mhonngê Jezucher, porjen bhavart dovrunk zai mhonn sangun, Juanvan jivit-mon bodôlpacho batism dil’lo.” Him utram tãnnim aikolea uprant, Somia Jezuchea nanvan tankam batism dilo. Paulun tancher hat dovorle tedna, tancher Povitr Atmo denvlo ani te porkeô bhasô ani Devacho sondêx diunk lagle. Te soglle mellun sumar bara dadle asle. Devsthanant bhitôr sorun, tin mhoine to kalljidarponnan uloit aslo ani Devachea Rajea vixim tanchê lagim vad-vivad kortalo ani khatri diunk vavurtalo. Punn tantuntlim thoddim, aplea vadeachim zaun, bhavart dhorunk kobul naslim, punn sobhêmazar hê novê Vattê vixim vaitt ulounk laglim. Hea pasot, Paulun tankam sanddlim ani apleam xisank tanchê modle kuxin kaddle ani tankam gheun konn–eklea Tiranusachê xallent to dispottim vad-vivad kortalo. Hem oxem don vorsam tannem kelem ani hea pasot Aziechea prantant jietalo to lôk, zaum Judêv, zaum Grik, Somiachem utor aikunk pavlo. Paulu udexim Dev itlim bhov vichitr vismitam kortalo, ki to vaportalo te rumal ani tachê katik laglolim vostram lokan piddevontank lailim tôr, tancheô pidda boreô zataleô ani mhelle atme bhair sorun vetale. Punn bhut kaddpi kãi vattsur Judev mhelle atme bosleleancher Somia Jezuchem nanv gheunk sôdtale; te oxem mhonntale: “Paulu porgôtt’ta tea Jezuchea nanvan tumkam hukum’ ghaltam.” Oxench kortale konn-eka Skiva nanvachea Judevanchea mha-iadnikache sat put. Punn mhellea atmean tankam mhonn’lem: “Jezuk hanv ollkhotam, Pauluk-ui hanv ollkhotam, punn tumi konn?” Ani mhello atmo boslolo to monis tancher upraslo ani eka pattlean ekak tannem tankam domaile ani itlea bollan tankam boddoile ki te sarkech vinglle zaun ani boroch mar khelea uprant gaiall zaun, tea ghorantle pollun gele. Efezant ravteleam soglleam Judevank ani Grikank hê ghòddnnechi khobor pavli tedna, tim sogllim bhirantin bhòrlim, ani Somia Jezuchea nanvak vhôdd man mell’lo. Bhavarti zal’lim tantlim puskoll zannam fuddem sorlim ani apunn kosleô-kosleô achari chali palltalim teô sobhêmazar sangunk laglim. Ani jadu korteleam modleam zaiteam zanna-mnim aplim pustokam punzaun haddlim ani soglleam hujir tankam uzo lailo. Heam pustokanchem mol pon’nas hozar rupeache nanne zatele mhonn odmas kelo. Oxem vhodda nettan Somiachem utor odik-odik ximpodd-talem ani ghott zatalem. Heam soglleam ghòddnneam uprant, Atmeachea preronnan Paulun Maxedonientlean ani Akaientlean Jeruzaleak vochunk ievjilem. Tannem oxem mhonn’lem: “Thõi gelea uprant, hanvem Romak-ui bhett korunk zai.” Hea pasot apleam dogam adaream, Timotak ani Erastusak, tannem apnna fuddem Maxedoniek dhaddle ani apunn thoddo kall Aziechea prantant ravlo. Hea kallar, Somiachê Vattek lagun borech gollboll zale. Demetrius mhonnlolo êk xêtt Artemis devichim rupeachim murti-pettulam kortalo, ani hea tachea dhondea vorvim tacheam kamdarank khup faido melltalo. Soglleam apleam kamdarank ani tachê oslo dhondo korteleam herank tannem ektthãi kele ani mhonn’lem: “Ixttamnô, amchi zôdd hea dhondea vorvim ieta mhonn tumi zannont. Jem kitem ho Paulu sangta, tem tumi pollelam ani aikolam. Mon’xancheam hatamnim kel’le dèv dèvuch nhoi mhonn sangun, Efezantuch nhoi, punn akhê Aziechea prantant Paulun zaiteam zannanchem mon bodôl’lam. Amcho dhondoch poddot mhonn nhoi, punn xrêxtt Artemis devichea mondiracho dobazo buddon vochot mhonn bhirant asa. Ani oxem ak’khê Aziechea prantant ani akhea sonvsarant tika vhôdd man asa to ubon vetolo.” Hem aikun te ragan bhòrle ani oxeô bobô marunk lagle: “Xrêxtt-vorti amchi Efezkaranchi Artemis!” Akhem xar gollboll’lem. Xarant nattkancho ugto zago aslo; thõi sogllo lôk borabôr lotton gelo, ani Paulucheam bhonvddê-sangateam, Maxedoniekaram, Gaiusak ani Aristarkak tãnnim thõi porian borborit oddun vhele. Zomlelea loka fuddem vochun, Paulu tankam ulo korunk sôdtalo, punn xisamnim taka addailo. Tannem nattkanchea zagear dixtti poddchench nhoi mhonn budh diun, Aziechea prantacheam odhikaream modleam tacheam thoddeam ixttamnim Pauluk nirôp dhaddlo. Itlea mhonnosôr zoma zal’lea loka modem gondhôll odikuch vaddtalo: zonn-eklo veg-vegllê bhaxen huiêl martalo, ani tantlim zaitim zannam kiteak ektthovleant tem porian nokllo aslim. Kãi zannam konn-eka Aleksandrak fuddem sorun uloi mhonn suchounk laglim; tedna Judevamnim taka mukhar lôttlo. Aple hat ubarun ogim ravat mhonn to lokak somzaunk sôdtalo. Punn to Judêv mhonn lokak gomtôch, sogllim ekach tallean don voram sumar oxi huiêl marit ravlim: “Xrêxtt-vorti amchi Efezkaranchi Artemis! “ Xevttim xarachea karkunan urponjik somadhan korun oxem mhonn’lem: “Efezkaramnô, xrêxtt Artemixichea mondirachi ani sorgar thaun poddlelê tichê murtichi rakhônn, Efezkaranchem xar korta mhonn sonvsarant konn nokllo zait? Konnacheanuch hem na mhonnum nozo. Mhonntôch tumi xant ravat ani uttavollaien kãich korinakat. Heam mon’xank tumi hanga haddleat, punn tãnnim amchim mondiram chorunk nant, nhoi mhonn amchê devicher add kãi ninda te ulounk nant. Demetriusacho ani tacheam kolakarancho konnacher virudh arôp asa zalear, neaisobha bhòrtat ani xarache odhikari asat thõi tãnnim arop dakhounche. Hachê bhair tumkam anink kitem vicharpachem asa zalear, kaideaxir sobhent ho proxn tumchean voir kaddum ieta. Aiz ghòddlam tea bonddachi zobabdari amcher poddunk xokta, kiteak ho oslo gollbôll korunk koslench karonn na.” Oxem sangun tannem zomlolea lokak portun dhaddlo. Uchambollai thambtôch, xisank ektthãi korun ani tankam xiddkavnni diun, Paulun tancho nirôp ghetlo ani Maxedoniek vochunk to bhair sorlo. Thõisorleam ganvam-ganvamnim bhonvddi martôch ani zaitem sangun tankam dhir ditôch, to Akaiek portolo ani hanga tin mhoine to ravlo; thõi thaun Siriek tarvan vochunk to toiari korta mhonnosôr, Judev aplo ghat gheunk sôdtat mhonn taka gomlem. Tea khatir tannem Maxedonientlean porot vochunk ievjilem. Tachê borabôr gele te he: Bereiecho Sopater, Pirrucho put; Tesalonikeche Aristark ani Sekundus; Derbecho Gaius; Timot; ani Aziechea prantantle Tikikus ani Trofim’. Te amchê mukhar gele ani Troasant amkam ravle. Fug-nasleleam Unddeanche dis zatôch, Filipi thaun tarvar bosun ami bhair sorleanv ani panch disam uprant tankam Troasant mell’leanv; hanga ami ek satollem sarlem. Satolleachea poilea disa ami ekchara-jevnnak ektthovleanv. Paulun tankam êk boli keli ani to sokallim vecho aslo dekhun modianir porian tannem aplem ulovop chalu dovorlem. Ami ektthãi zal’leanv tea unchlea vosreant zaiteô ponntteo lail’leô. Eutik nanvacho êk tornnatto zonelacher boslolo; Paulu uloitam-uloitam, taka borich nhid poddli ani nhidechê bhormen to tisrê malloier thaun zomnir poddlo ani tankam melolo mell’lo. Paulu sokol denvlo ani tacher add poddun ani taka vengoun mhonn’lem: “Bhienakat, taka ozun jiv asa.” Uprant voir vochun tannem unddo môddlo ani khelo. Magir tanchê lagim khup uloilo ani fantear thõicho bhair sorun gelo. Jivo kel’lea tornnatteak tãnnim ghora vhelo ani tankam zaiti khuxalkai bhògli. Ani amchi fuddli vatt dhorun doriantlean ami As’sosak geleanv; hanga Paulu amchea tarvar choddcho aslo, kiteak tannem adim oxem tharail’lem ani to thõi porian ganvantlean cholun ieuncho aslo. To amkam As’sosant mell’lea uprant, taka ami tarvar ghetlo ani Mitilenak vochunk ami bhair sorleanv. Thõi thaun amchem tarum fuddem gelem ani Khiosa mukhar thamblem. Dusrea disa ami Samosak pavun thambleanv, ani tisrea disa Miletak pavleanv. Aziechea prantant thambun vogôt korina zaunk, Efez soddun Paulun fuddem vochunk tharailem, karonn Pon’nasvea Disache Porbek, zata zalear, Jeruzaleak pavunk to takit kortalo. Mileta thaun Paulun Efezachê povitr-sobhecheam zannteank apounk dhaddle ani, te pavle tedna, tannem tankam oxem mhonn’lem: ‘Aziechea prantant hanvem pãi dovorlo tea poilea disa thaun hanv tumchê modem aslom titlo-i vêll koso vaglam tem tumi zannont; Judevancheam addkam-naddkank lagun mhojer ail’leam koxttam modem dukam golloun, sogllê lhan’vikaien hanvem Somiachi seva kelea. Tumkam kitench boreak poddta tem porgott korunk hanv kednanch pattim sorunk nam. Hanvem tumkam nirop porgôtt kela ani sobhêmazar ani tumcheam ghoramnim hanvem tumkam xikovnn dilea. Deva-xim portun ieiat ani amchea Somia Jezucher bhavart dovrat mhonn Judevank ani Grikank hanvem ulo marla. Ani atam, polleiat, Atmo mhaka Aplo koidi korun vhorta mhonn hanv Jeruzaleak vetam; thõi mhaka kitem ghòddtelem tem hanvuch nokllom, punn mhaka bondkhônn ani koxtt ravtat mhonn Povitr Atmo dor-eka xarant mhaka kolloit asa. Punn mhojea jivak koslench mol na mhonn hanv dhôrtam. Devachê doiallaiechea xubhvhortomanak sakxi diunchi seva Somia Jezu koddchi hanvem ghetlea ti xarti pavounk ani oxem mhojem jivit sompounk — hi êkuch mhoji axa. Hanvem tumchê modem bhonvun Raj porgôttlam khorem, tori atam tumi sogllim novean mhojem tondd polleunchim nant mhonn hanv boro zannom. Hea pasot aichea disa hanv tumkam khochit sangtam: tumam-soglleam modem konnacho-i ibadd zalo zalear, hanv zobabdar nhoi, kiteak Devachi akhi ievzônn tumkam kollit korunk hanv pattim sorunk na. Devachê povitr-sobhecho samball korunk Povitr Atmean tumkam odhikari keleat, tôr tumchê vixim ani akhea hindda vixim tumi zagrut ravat; hi povitr-sobha Tannem Apleach Putachea rogta vorvim Apli kelea. Hanv gelea uprant tumchê modem krur landdge rigtele ani hindd ibadd korun sôddtele mhonn hanv borem zannom. Apnnam pattlean xisank oddun vhorchê pasot, khotti xikovnn diunk tumchêch bhitorle monis upzotele. Tea khatir zagrut ravat, ani hanvem dukam varoun tin vorsam porian thambonastanam dis-rat tumchê modlea zonn-ekleak budh dilea ani xiddkaila mhonn ugddas dhôrat. Ani atam Devachea hatant tumkam ghaltam ani Tachê doiallaiechea utrak tumkam patietam; tumkam bandun haddunk ani soglleam povitr kel’leam borabôr tumkam daiz diunk tea utrak podvi asa. Hanvem konnacheach rupeachi, vô bhangarachi, vô nhesnnechi axa dhorunk na. Heam mhojeam hatamnim vavr korun mhojeam ani mhojeam boraborcheancheam gorzank hanv pavlam mhonn tumkam khobor asa. ‘Dusream koddchem gheunchê poros dusreank divop odik vhodd sontosachem — heam Somia Jezucheam khaxa utrancho ugddas dhorun, koxtt korun osoktank adar diunk zai mhonn sogllê bhaxen hanvem tumkam dakhoilam.” Hem uloilea uprant, tanchê borabôr dimbier ravun Paulun magnnem kelem. Te soglle dukamnim roddunk lagle ani Pauluk veng marun tacho umanv ghetlo. Te anink kednanch tachea tonddar nodor ghalunk pavche nant mhonn tannem sangil’lean, tankam bhov vhôdd khônt bhògli. Uprant tarvar porian te taka pavounk gele. Xekim tancho nirôp gheun tankam sanddtôch, tarvar bosun ami nitt geleanv ani Kosak pavleanv; dusrea disa Rodesak pavleanv ani thõi thaun Patarak geleanv. Fenixiek vetalem tem ek tarum hanga amkam mell’lem; tea tarvar choddun ami fuddem geleanv. Xiprus dixtti poddtôch, ho zunvo amchea dhaveak sanddun ami Siriek geleanv ani Tirachea bondrar utorleanv: thõi tea tarvantlo mal denvouncho aslo. Thõisôr thodde xis amkam gavle ani tanchea sangata ek satollem ami ravleanv. Jeruzaleak vochonaka mhonn Atmeachea preronnan tim portun-portun Pauluk sangtalim. Punn amcho vogôt pavtôch, ami amchi fuddli vatt dhôrli. Ami xara bhair pavo porian, dadle apleam bailank-bhurgeank gheun amkam pavounk aile. Veller pavtôch dimbier ravun ami magnnem kelem. Ekamekacho nirôp ghetôch ami tarvar choddleanv ani tim aplea ghora portolim. Tira thaun doriantlean amcho provas somptôch, ami Ptolemaisak utorleanv. Hanga ami bhavam-bhoinnink bhettleanv ani tanchê modem êk dis ravleanv. Dusrea disa ami bhair sorleanv ani Xezareiak pavleanv. Thõi xubhvhortoman porgôttnnara Filipager ravleanv; to team satam modlo eklo. Taka char ankvar dhuvô asleô ani hankam Devacho sondêx divpacho vorgunn aslo. Ami thõi borech-xe dis ravlea uprant, Agabos nanvacho Judeiantlo êk provadi thõi pavlo. To amchê-xim ailo ani Paulucho pott’tto kaddun tannem aplech hat ani pãi bandle; magir to oso uloilo: “Povitr Atmo oxem mhonnta: hea pott’tteachea dhoniak Judev Jeruzaleant oxe bandtele ani taka videxeanchê adhin kortele.” Hem aikun, ami ani thõisorlea lokan Jeruzaleak vochonaka mhonn Paulu kodde vinoti korun maglem. Tedna Paulun oso zobab dilo: “Oxem roddun ani mhojem kalliz dukhoun, tumi kitem kortat? Hanv zalear, Somia Jezuchea nanva khatir Jeruzaleant bondkhonnint poddunkuch nhoi, punn morunk porian toiar asam.” Amchem aikunk to bilkul kobul zaina mhonn polleun, ami taka somzav-pachem sôddlem; ami mhonn’lem: “Somiachi khuxi zaum.” Thoddeam disam uprant, ami amchi toiari korun Jeruzaleak geleanv. Xezareiache thodde xis amchê borabôr aile; ami biddarak vetaleanv tea mon’xager tãnnim amkam pavoile. Ho êk Xipruskar aslo, poileam xisam modlo eklo; tachem nanv Mnason. Ami Jeruzaleak pavleanv tedna, bhavam-bhoinnimnim amkam khuxal-kaien ievkar dilo. Dusrea disa, amchê borabôr Paulu Jakobak bhett korunk gelo; soglle zannte thõi zomlele asle. Tankam noman kortôch, aplea vavra vorvim videxeam modem Devan kitem-kitem kelem, tem sogott Paulun tankam sanglem. Hem aikun tãnnim Devak vakhannlo ani Pauluk mhonn’lem: “Polle, bhava, Judevam modem hozaramnim bhavart dhôrla ani tim sogllim Somurt hurben samballpi ani rakhpi mon’xam. Videxeam modem jieteleam soglleam Judevamnim Moizesak soddun diuncho, mhonngê apleam putanchi sunôt korchi nhoi ani Judevancheô chali-riti pallcheô nhoi, oxem tum xikoitai mhonn tãnnim tujê vixim aikolam. Tôr atam kitem korum-ia? Lôk ektthãi zalea bogor ravcho na, kiteak tum hanga pavlai mhonn tankam khobor pavtelich. Tôr ami tuka sangtanv toxem tum kôr. Amchê modem apnnam vixim Somurti pormonnem Devak bhas dil’le choug dadle hanga asat. Tankam tujê borabôr vhor, tanchea sangata tuji xud’dhi kôr ani tãnnim aple kens tasunk tum poixe farik kôr. Tedna tujê vixim tãnnim aikolam tem sarki fôtt mhonn ani tunch tujeam kornneamnim Somurt samballtai mhonn soglleank kollon ietelem. Punn bhavart dhôrla team videxeamnim murtim-puttleank bhettoil’lem mas, rogot ani gomtti pillun marleleô mon’zati khauncheô nhoi; Somurticheam kaideam virudh logn korchem nhoi: oxem ami tharailam tachi khobor diun tankam boroun dhaddlam.” Tedna Paulun team chougam dadleank apnna borabôr ghetle ani dusrea disa tanchê sangatim xud’dhichi rit pall’li. Uprant to Devmondirant gelo ani xud’dhiche dis sompoun khõichea disa ek-eklean apnna khatir iôdn somorpunk zai mhonn tannem sanglem. Te sat dis somptat mhollear, Aziecheam prantantleam Judevamnim Pauluk Devmondirant pollelo. Tãnnim sogllê urponjik khubdaili ani Pauluk dhorun bob marli: “Israelkaramnô, pavat! Sogllê kodden ani soglleank amchê porjecher, Somurticher ani hea zageacher add xikoita to monis ho! Itlench nhoi, videxeank tannem Devmondirant bhitôr haddle ani ho Povitr Zago bhoxttailo.” Tãnnim oxem mhonn’lem, kiteak Efezkara, Trofim’ak Paulu borabôr tãnnim Xarant pollel’lo ani Paulunuch taka Devmondirant bhitôr kaddlolo mhonn te somzole. Sogllem xar uchamboll zalem ani sogllê koddcho lôk dhanvun ailo; tãnnim Pauluk dhôrlo ani taka bôrbôrit ôddun Devmondira bhair kaddlo ani rokddinch Devmondirachim daram dhamplim. Pauluk jivo marunk toiar zatale tedna, akhem Jeruzalem uchamboll zalam mhonn polttonnechea sordarak khobor pavli. Kãi xotpotink ani soinikank gheun sordar porjê-xim dhanvun gelo. Sordarak ani soinikank polleun, Pauluk boddoitale te thamble. Tedna sordar Paulu-xim ailo, tannem taka dhôrlo, ani doddeam sankllimnim taka bandunk lailo; magir to konn ani kitem kelam kai mhonn to vicharunk laglo. Chombeantlo lôk bob marun veg-vegllem sangtalo. Ani hea gondhollant taka sarkich mhaiti mellona zaun, sordaran Pauluk kottant vhorunk formailem. Paulu panvddeancher pavlo tedna, urpônz itli uchambôll zali ki soinikamnim taka uklun vhorcho poddlo. Soglli urpônz tanchê pattlean vetali ani oxi bob martali: “Taka jivexim marat!” Pauluk kottant bhitôr kaddchê adim, tannem sordarak mhonn’lem: “Tujê kodde mhojean ek utor uloum-ieta?” Sordaran zobab dilo: “Tum Grik bhas zannoi tôr? Thoddo kall adim, ek bondd upzoun, char hozar punddank oronneant vhel’le to Ejiptkar nhoi tum?” Paulun zobab dilo: “Hanv êk Judêv, Xilixientlea Tarsus ganvcho; hea fanki xaracho hanv nagrik. Hea loka kodde ulounk mhaka porvangi di mhonn hanv tujê kodde magtam.” Sordaran rojea ditôch, Paulu panvddeancher ubo ravlo ani aplo hat ubarun tannem lokak ogi ravpak khunna keli. Sogllim sarkim ogim ravlim tedna, tannem Hebrêv bhaxen oxem ulounk suru kelem: “Mhojeam bhavam-bhoinnimnô, mhojeam vhoddilamnô, mhoji rakhônn korunk tumchê mukhar hanvem atam kitem sangchem asa tem chit diun aikat.” To Hebrêv bhaxen uloitalo tem aikun, lôk odikuch ogo ravlo ani Paulun aplem ulovp suru kelem. “Hanv êk Judêv; Xilixiechea Tarsusant hanv zolmolom, punn hea Xarant hanv lhan-vhôdd zalom. Amcheam purvozanchi Somurt Gamalielacheam pãiam-xim hanv bariksannen xiklam; zoxem tumi sogllim aiz hurba dakhoitat, toxench hanvem sogllê hurben Devachi seva kelea. Novê Vattecheam pattlavdarank hanvem mornnak pavoi-sôr dhumallo dila; dadleank toxem bailank sankllimnim bandun hanvem bondkhonnint ghaleant. Ani hachêch vixim porom’-iadnik ani zannteancho akho zomo mhaka govai diunk xoktat; kiteak tanchê koddchim, Damaskant asleleam Judev bhavank hanvem potram ghetlim ani heam mon’xank kheast lavchê pasot tankam dhorunk ani sankllimnim bandun Jeruzaleant haddunk mhonn hanv Damaskak vetalom. Provas kortanam ani Damaskak lagim pavtam-pavtam, don’parchea vellar sorgar thaun ovchit vhôdd uzvadd mhojê bhonvtim porzoll’lo; tedna hanv zomnir poddlom ani oxem sangto êk tallo hanvem aikolo: ‘Saulu, Saulu, kiteak mhonn tum Mhaka dhumallo ditai?’ Hanvem vicharlem: ‘Saiba, konn ga tum?’ Tannem mhaka zobab dilo: ‘Hanv Nazaretkar Jezu, ani Mhakach tum piddapidd ditai.’ Mhojê borabôr asle tãnnim uzvadd pollelo, punn mhojê lagim uloitalo tacho tallo tãnnim aikunk na. Hanvem vicharlem: ‘Somia, kitem korum hanv?’ Somian mhaka sanglem: ‘Utth, Damaskant voch ani tunvem kitem korunk zai tem sogllem konn thõi tuka sangtolo.’ Tea uzvaddachea loklokan mhaka kãi ek dixtti poddona zalem, dekhun mhojeam sangateamnim mhaka hatak dhorun Damaskak vhelo. Thõi Ananias mhonnlolo konn-eklo Somurti pormannem bhoktivont monis jietalo ani taka tea xarantlo sogllo Judêv lôk man ditalo; to mhaka bhettunk ailo; mhojê-xim ubo ravun tannem mhonn’lem: ‘Saulu bhava, novean polleunk lag.’ Thõichê-thõich hanv taka polleunk laglom. Uprant tannem mhaka mhonn’lem: ‘Amcheam purvozanchea Devan tuka adim-fuddench nivddun kaddla: Apli ievzônn konn ti ollkhunk, Devak Manovleleak polleunk, ani tacheach tonddantlim utram aikunk Devan tuka vinchla. Kiteak tunvem dekhlãi ani aikolãi tem sangun soglleam mon’xam mukhar tum Tacho sakxidar zatoloi. Ani atam anink ravchem kiteak? Utth ani batism ghe ani Tachem Nanv gheun tujim patkam dhuun kadd.’ Hanv Jeruzaleak portotôch, Devmondirant magnnem kortana, Povitr Atmeacho bhar mhojer ailo ani hanvem Somiak pollelo. Tannem Mhaka oxem mhonn’lem: ‘Jeruzaleantlo vegim bhair sor; kiteak Mhojê vixim tum govai ditoloi ti tim mandun gheunchim nant.’ Hanvem zobab dilo: ‘Somia, dor devsthanant bhonvun, Tujer bhavart dovorteleank hanv bondkhonnint ghaltalom ani mar-far kortalom mhonn tim borim zannont. Tujea sakxidara Istevachem rogot varoilem tedna, hanv khud thõi aslom, tacho khun hanvem mandun ghetlo ani taka jivo marteleanchim angavlim hanvem rakhlim!’ Tedna Tannem mhaka mhonn’lem: ‘Voch, Hanv tuka pois asleleam videxeam-xim dhaddtolom.’ ” Itlo vêll porian tãnnim tachem aikolem; uprant, vhoddlea tallean tãnnim oxi huiêl marli: “Oslea mon’xak prithumê velo nanch korat! Taka anink jivo dovrunk favona.” Lôk bobô-huieli martalo ani aplim avoronnam voir kaddun haloitalo ani dhull varear uboitalo. Tedna sordaran taka kottant vhorunk formailem ani Judêv lôk oxeô bobô-huieli kiteak martat tem zanno zaunchê khatir, taka soitincho mar ghalun tachi chovkoxi korunk hukum’ ghalo. Taka doramnim bandtôch, thõi ubo asto xotpotik Paulun mhonn’lem: “Tumchea kaidea pormannem, koslich zhôddti korinastana eka Romi nagrikacher tumchean jerbond marum-ietat?” Hem aikun xotpoti sordara-xim gelo ani taka vicharlem: “Kitem mhonn kortai tum? To monis êk Romi nagrik!” Paulu-xim vochun, sordaran mhonn’lem: “Tum Romi nagrik zalear mhaka sang.” Paulun zobab dilo: “Hôi.” Sordaran mhonn’lem: “Khup duddu moddun hem nagrikponn mhaka mell’lam.” Paulun portun mhonn’lem: “Mhaka zalear, zolmanuch tem mhojem.” Mhonntôch vichar korun Pauluchi chovkoxi korche asle te rokddea-rokdde pattim sorle, ani sankllimnim apnnem bandlolo to êk Romi nagrik mhonn lokak gomlea uprant, sordar-ui bhielo. Dusrea disa, Judev Paulucher koslo arôp ghaltat to sarko zanno zaunk sôdtalo dekhun, sordaran Pauluk soddunk lailo ani mukhel iadnikanchi ani akhê Mha-Dhormsobhechi zomat apoili. Uprant Pauluk haddlo ani tanchê mukhar ubo kelo. Paulun Mha-Dhormsobhek tellun polleun mhonn’lem: “Mhojeam bhavamnô, aiz porian Deva mukhar nitoll ontoskornnan hanv chol’lam.” Hea vellar Ananias porom’-iadnikan apleam sevokank Pauluchea tonddar thapott marunk lailem. Paulun taka mhonn’lem: “Chunno kaddloli vonnôt tum! Dev tuka martoloch! Somurti pormannem mhoji nit korunk tum boslai ani Somurticheruch add mhaka marunk laitai?” Sevokamnim taka mhonn’lem “Kitem? Devachea porom’–iadnikak okman kortai tum?” Paulun zobab dilo: “Bhavamnô, to porom’–iadnik mhonn mhaka khobor nasli, kiteak oxem boroil’lem asa: ‘Tujê porjechea fuddareacher tum xirap ghalcho nãi.’ “ Tanchê modem êk pôkx Sadukincho ani dusro Farizevancho aslo mhonn zanno zaun, Paulun Mha-Dhormsobhent mhonn’lem: “Bhavamnô, hanv êk Farizêv, Farizevancho put hanv. Mel’lim mon’xam punorjivont zatat mhonn hanv bhorvanso dhôrtam dekhun, mhoji aiz zhôddti zata.” Oxem mhonnona fuddem Farizevam ani Sadukim modem vad-vivad suru zalo ani sobha don vantteamnim futtli. Punorjivontponn, devdut ani atmo asat mhonn Saduki sotmaninant, punn Farizev tin-ui manun ghetat. Haka lagun motti bobatt zali ani Farizevam modle thodde xastri ube ravun nettan nixêd marunk lagle: “Hea mon’xa sovem amkam kãich vaitt mellonam. Tachê kodde êk atmo vô êk devdut uloila zalear konn zanno!” Huzôt odikuch vaddli ani Pauluche pinzun kuddkean’-kuddke kortit mhonn sordar bhielo dekhun, apleam soinikank dhaddun, Pauluk tanchê modlo bollan kaddun kottant vhorat mhonn tannem formailem. Dusrê rati, Somi Paulu-xim ieun ubo zalo; Tannem mhonn’lem: “Ghôtt rav, tunvem Mhojê vixim Jeruzaleant sakxi dileai, toxich atam Romant-ui diunk zai.” Dis uzvaddtôch, Judevamnim guddmêll kelo ani Paulucho jiv kaddlea xivai apunn jevche nant, nhoi mhonn pieunche nant mhonn tãnnim soput ghetlo. Ho soput ghetlele te sumar challis-am voir asle. Uprant mukhel iadnikam-xim ani zannteam-xim vochun, tãnnim mhonn’lem: “Pauluk jivexim marlea xivai ami kãich chakche nanv mhonn ami khôr soput ghetla. Pauluchi sarki topasnni korchê khatir mhonn nib dhorun, taka tumchê-xim dhadd mhonn tumi Mha-Dhormsobhê borabôr sordarak sangunk dhaddat. To hanga pavchê adinch tacho jiv kaddunk ami amchê pallien toiar asanv.” Punn Pauluchê bhoinnichea putan hi moslôt aikoli ani kottant vochun soglli khobor Pauluk sangli. Tedna Paulun eka xotpotik apnna-xim apounk dhaddlo ani taka mhonn’lem: “Hea tornnatteak sordara-xim vhor, to taka kitem sangunk sôdta.” Xotpotin taka sordara-xim vhorun mhonn’lem: “Bhondkhonnint aslelea Paulun mhaka apounk dhaddlo ani hea tornnatteak tujê-xim vhor mhonn mhojê lagim maglem; ho tuka kitem sangunk sôdta.” Sordaran tachea hatak dhôrlo ani kuxin vhorun vicharlem: “Kitem sangunk sôdtai tum mhaka?” Tannem mhonn’lem: “Pauluchi odik bori choukoxi korchi mhonn nib dhorun, taka faleam Mha-Dhormsobhê fuddeant tunvem dhaddun diuncho mhonn tujê lagim magunk Judevamnim tharailam. Punn tum tanchem aikum naka, kiteak tanchê modem challis-am voir monis tacho ghat gheunk sôdtat ani taka jivexim marlea xivai apunn jevche nant nhoi mhonn pieunche nant mhonn tãnnim soput ghetla. Hem korunk te toiar asat ani tujê maniotaiek ravtat.” Apnnak gomoilea ti khobor anink konnakuch tannem sangchi nhoi mhonn sordaran taka formailem ani taka dhaddlo. Magir sordaran dogam xotpotink apoile ani mhonn’lem: “Ratcheam tin vorancher thaun, Xezareiak vochunk don’xim soinikank, sot’tôr ghoddes-varank ani don’xim bhalekarank toiar korat. Pauluk bosunk thodde ghodde toiar korat ani taka Feliks razpala fuddeant borê bhaxen vhorat.” Ani tannem oxem ek potr boroilem: “Klaudius Lixias xrêxtt Feliks razpalak noman korta. Judevamnim hea mon’xak dhôrlo ani te taka jivexim marunk asle. To êk Romi nagrik mhonn mhaka khobor pavli mhonnun, mhojeam soinikank gheun hanv taka tancheam hatantlo soddunk gelom. Te tacher kosle arop ghaltale te hanv zanno zaunk sôdtalom dekhun, hanvem tanchê Mha-Dhormsobhê mukhar taka vhelo. Tacher mornnachem formonn marunk vô taka bondkhonnint ghalunk koslench karonn na mhonn mhaka gomlem; tacher arôp aslo to fokot tanchê Somurticheam proxnam vixim. Taka jivexim marunk Judev moslôt kortat mhonn mhaka khobor pavli, dekhun taka tujê-xim dhaddun diunk hanvem tharailem. Tacher koslem garannem asa zalear, tem tujê mukhar dokhol korat mhonn tancheam aropeank-ui hanvem sanglam. Noman.” Apnnank ghal’lo hukum’ soinikamnim pall’lo. Ratiam tãnnim Pauluk Antipatris porian vhelo. Dusrea disa ghoddesvarank Paulu borabôr vochunk dovrun soinik porte kottant aile. Xezareiak pavtôch tãnnim tem potr razpala kodde dilem ani Pauluk tachea fuddeant ubo kelo. Razpalan potr vachlem ani to khõichea prantantlo kai mhonn Paulu kodde vicharlem; to Xilixiecho mhonn taka gomtôch, tannem taka mhonn’lem: “Tuje aropi ietôch hanv tuka aikotolom.” Ani Pauluk Herodin bandlolea razvaddeant dovrunk tannem formailem. Panch disam uprant, Ananias porom’–iadnik kãi zannteank ani vokila, Tertulak gheun Xezareiak gelo. Te razpala mukhar gele ani Paulucher add tãnnim aple arop manddle. Pauluk bhitôr haddlo ani Tertulan tacher add heam utramnim garannem suru kelem: “Bhov xrêxtt Feliksa, tuka ani tujea huxar karbharak lagun nirontôr xanti ami bhogunk pavleanv. Ani amchea raxttra khatir kel’leô khub sudharnneô teô tujeach durdorxiponnak lagun amkam favo zaleat. Hea sogtta pasot, sodanch ani sogllê kodden, ami tuka bhov abhari asanv. Tuzo chôdd vêll hanv kaddunk sodinam ani dekhun mhojim donuch utram upkar korun aik mhonn magtam. Ho monis êk noxtti pidda mhonn amkam gomun ailam. Akhea sonvsarar ximpoddleleam soglleam Judevam modem to bonddai upzoita ani Nazaretanchea pongddacho to mukhêl fuddari. Devmondir porian bhoxttaunk tannem proitn kele tedna, taka ami dhôrlo. [Ami amchê Somurti pormannem tachi nit korunk sôdtaleanv, punn Lixias sordar hea tontteant bhitôr sorlo ani bollan amcheam hatantlo taka kaddun ghetlo; tacher arôp ghaltat tãnnim tujê mukhar ieunk zai mhonn tannem hukum’ ghalo]. Tunch tachê lagim vicharxi zalear, amchea aropant sot asa mhonn tuka gomtelem.” Judevamnim Tertulak palôv dilo ani hem sogllem khorem mhonn sanglem. Paulun uloum-ieta mhonn razpalan khunna keli tedna, tannem mhonn’lem: “Khup vorsam thaun hea raxttracher mon’subidaracho odhikar tum choloit ailai mhonn hanv zannom, dekhun tujê mukhar visvasan mhozo khottlo manddtam. Bara dis zaunk nant, Devak bhozunk hanv Jeruzaleak gel’lom, ani Devmondirant vô devsthan-amnim vô Xarant konnachêch kodde vad-vivad kortana vô lokak khubdaitana hanv tankam sampddonk na: hem sogott tujean ruzu korum-ieta. Mhojer atam thaptat team guneanvanche legun tuka purave diunk te xokonant. Punn ek mat khorem mhaka sangchem asa: Xastracher virodhi pôkx mhonn te sangtat tê Vattecho pattlav korun amcheam purvozanchea Devak hanv bhôztam. Somurtint ani provadean-cheam pustokamnim boroun dovorlelem asa tem sogllem hanv sotman’tam. Ani boream toxench vaitt mon’xanchem punorjivontponn astelem mhonn tanchê bhaxen hanv Devacher bhorvanso dovortam. Hea pasot Deva ani mon’xam mukhar sodanch nitoll ontoskornnan bhonvunk hanv bharim vavurtam. Atam khup vorsamnim mhojê porjek danam diunk ani iôdn bhettounk hanv ail’lom. Hench hanv kortalom tedna, hanv tankam Devmondirant mell’lom; mhoji xud’dhi hanvem kel’li; mhojê bhonvtim konn lôk naslo ani kosloch gollbôll zaunk naslo. Aziechea prantantle kãi Judev thõi asle. Tankam mhojer kitem-i aslem zalear, tech hanga tujê mukhar mhojer arôp ghalunk asche asle. Hanv Mha-Dhormsobhê mukhar aslom tedna, mhojê vixim koslo guneanv tankam mell’la zalear, hanga hajir asat tãnnim sangchem. Tanchê modem aslom tedna, bob marun hem mat hanvem mhonn’lem dekhun zalear: ‘Mel’lim mon’xam punorjivont zatelim mhonn hanv sotman’tam dekhun, az tumi mhoji nit kortat.’ “ Feliksak hê novê Vattechi ekdom’ bori ollokh asli; tannem aikunchem fuddem vhelem ani mhonn’lem: “Lixias sordar hanga ietôch, hanv tumcho khottlo topastolom.” Pauluk bondkhonnint dovorcho, punn ili sot’tea taka diunchi ani tacheam ixttantlea konnakuch tachi seva korunk addauncho nhoi mhonn Feliksan xotpotik hukum’ ghalo. Thoddeam disam uprant, Feliks aplê bailê Druxil’lachea sangata ailo. Ti êk Judêv bail asli. Tannem Pauluk apounk lailo ani Jezu Kristacher bhavarta vixim Paulu uloilo tem tannem aikolem. Punn promannik jivitachi chal, apdomavnni ani ieunchi asa ti zhôddti, hanchê vixim Paulu sangtalo tem aikun, Feliks bhielo. Tannem mhonn’lem: “Borem, sod’deak puro, tujean vochum-ieta; mhaka borem dista tedna, hanv tuka novean apounk dhaddtolom.” Teach borabôr, Paulu apnnak duddu-i ditolo mhonn to ravtalo ani heach khatir sobar pavtti to taka apounk dhaddtalo ani tachê lagim gozal kortalo. Don vorsam somplea uprant, Feliksachê svater Porxius Festus ailo. Judevank manunk sôdtalo dekhun, tannem Pauluk bondkhonnintuch dovorlo. Prantant pavtôch tin disam uprant, Festus Xezareiak thaun Jeruzaleak choddun gelo. Thõi mukhel iadnik ani Judevanche fuddari Paulucher add apli firiad gheun aile. Pauluk Jeruzaleak dhaddun diun apnnank upkar kôr mhonn tãnnim Festusa lagim maglem. Khorem mhollear, ghatkeponnim vatteruch te tacho jiv kaddunk sôdtale. Festusan oso zobab dilo: “Pauluk Xezareiak koidi koso dovrunk zai ani hanvuch thoddeam disamnim thõi portun vetolom. Tumcheam fuddareank mhojê-xim ieum-di ani tea mon’xacho koslo guneanv asa zalear, tãnnim arôp manddcho.” Tanchê modem Festusan anink atth vô dha dis sarle ani uprant to Xezareiak gelo. Dusrea disa to neaisobhent aplê sodrer boslo ani Pauluk bhitôr haddunk lailo. Paulu pavlo tedna, Jeruzaleak thaun ail’leam Judevamnim taka veddho ghalo ani te tacher sobar gombhir guneanv thapunk lagle, punn heam guneanvanche tanchean purave diunk zaunk na. Tedna apli rakhônn korunk Paulun mhonn’lem: “Judevanchê Somurticher, Devmondiracher vô Somrazacher koslich chuk hanvem korunk na.” Festus Judevank manunk sôdtalo dekhun, tannem Pauluk mhonn’lem: “Hanvem heam aropam vixim tuji nit korunk Jeruzaleak vechi tuka khuxi asa?” Punn Paulun zobab dilo: “Somrazachea fuddeant hanv ubo ravtam, thõi ki mhoji nit zaunk zai. Judevank hanvem koslench vaitt korunk na mhonn tum boro zannoi. Hanv khoro guneanvkar zalear, vô moronn favo toslo koslo-i oprad hanvem kela zalear, hanv morunk pattim sorona. Mhojer thaptat team aropamnim sot na zalear, fokot tankam man’chê pasot konnacheanuch mhaka tanchê adhin korum nozo. Hanv Somrazacho nirnnoi magtam.” Tedna, apleam budhvon-tanchê monddolli lagim gozal kortôch, Festusan zobab dilo: “Tunvem Somrazacho nirnnoi maglai, tôr Somraza fuddeant tum ubo ravtoloi.” Thoddeam disam uprant, Festusak bhett korunk Agripa raza ani Bernis Xezareiak ailim. Tim hanga zaite dis ravlim ani Festusan Paulucho proxn raza fuddean ghalun oxem mhonn’lem: “Hanga Feliksan koidi korun dovorlolo êk monis asa. Hanv Jeruzaleak aslom tedna, Judevancheam mukhel iadnikamnim ani zannteamnim tacher arop ghale ani kheastichem formonn mar mhonn mhojê lagim maglem. Guneanvkar ani aropi ekamekak mell’lea bogor ani zacher guneanv thaptat te xid’d korunk guneanvkarak sondhi dilea bogor, taka khastichem formonn diunk Romkaram modem sonvoi na mhonn hanvem tankam sanglem. Mhonntôch, te hanga mhojê boglek aile ani, vêll ibaddinastana, dusrea disa neaisodrer bosun hanvem tea mon’xak bhitôr haddunk lailo. Tacheam aropeamnim taka veddho ghalo, punn hanv ravtalom tosle arop tãnnim tacher thapunk nant. Punn tanchea dhorma vixim ani Jezu mhonnlelea konn-eklea mel’lea vixim tachê kodde tanchi huzôt zali, kiteak ho Jezu jivo asa mhonn Paulu khatren sangtalo. Ho tontto koso suttavo korcho to nokllo zaun, hê vixim Jeruzaleak vochun thõi nit korun gheunchi khuxi asa gai mhonn hanvem Paulu kodde vicharlem. Punn bhovxrêxtt Somrazan apnna vixim choukoxi korun nirnnoi diuncho mhonn Paulun maglem dekhun, taka Somraza-xim dhaddi-sôr bondkhonnint dovrunk hanvem formailem.” Agripan Festusak mhonn’lem: “Hea mon’xak aikunk mhaka-i khuxi asli.” Festusan zobab dilo: “Tum taka faleam aikotoloi.” Tôr dusrea disa Agripa ani Bernis vhodda dobajean ailim ani, sordaram ani nogracheam mukhel mon’xam borabôr, neaisobhent bhitôr sorlim. Festusan Pauluk bhitôr haddunk lailo ani mhonn’lem: “Agripa Raza, ani soglleam amchê borabôr asleleamnô, tumi hanga polletat tea mon’xa vixim Jeruzaleak toxem hangasôr-ui Judevanchi porza firiad gheun mhojê-xim aili. Taka anink jivo dovrunk favonam mhonn tãnnim huieli marun maglem. Punn mornnachem formonn favo toslem tannem kel’lem kãi ek mhaka mellunk na. Punn bhovxrêxtt Somraza mukhar apli nit zaunchi mhonn tannem maglem dekhun, hanvem taka Somraza-xim dhaddun diunk ievjilem. Tachê vixim sarkem kitem-kat amchea bhovxrêxtt Dhoniak borounchem mhollear mhaka kãich na: hea pasot hanvem taka tumchê mukhar ani kheritponnim, Agripa Raza, tujê fuddean haddla; tachi choukoxi kelea uprant, mhaka kitem-i tori borounk melltelem mhonn hanv ravtam. Eka koideacher arop ghaltat te dakhoinastana taka dhaddun divop, hem ginean-naslelea mon’xachem kam’ mhonn mhaka dista.” Agripan Pauluk mhonn’lem: “Tuji rakhônn korunk tujean atam uloum-ieta.” Tedna, aplo hat soddun, Paulu apnna khatir ulounk laglo: “Judev mhojer arop ghaltat tancher add az tujê mukhar, Agripa Raza, mhoji rakhônn korunk mhaka darzonnem mhonn hanv somzotam. Kiteak Judevancheô chali ani tanche vad-vivad tum ekdom’ boro ollkhotai; tea pasot sosnnikaien mhojem aikun ghe mhonn hanv tujê lagim prarthun magtam. Bhurgeponnar thaun mhojem jivit koslem zalem tem, ani survatek thaun mhojea khaxa loka modem ani uprant Jeruzaleant hanv koso jielom tem, soglle Judev bore zannont. Zaitim vorsam porian tãnnim mhaka ollkhola ani amchea dhormachea soglleam poros odik khôr pokxa pormannem êk Farizêv koso hanv jielom mhonn tanchean govai diunk zata. Devan amcheam purvozank kel’lê bhasavnnecher hanvem bhorvanso dovorlo dekhun, hanv hanga zhôddtek ubo asam. Amchim bara kullam, hi bhasavnni xarti pavtoli mhonn bhorvanso dhorun, sogllê fikirin dis-rat Devak bhôztat. Bhovxrêxtt Raza, hea bhorvanxea pasot Judev mhojer arop ghaltat! Mel’leank Dev punorjivont korta, hem koxêch bhaxen sotmanunk zaina mhonn kiteak dista tumkam? Nazaretkara Jezuchea nanvacher add zata titlem zhuzunk mhozo kaido mhonn hanv ekdam somzotalom. Jeruzaleant astana hench hanvem kelam. Mukhel iadnikancho hukum’ gheun hanvem zaiteam bhoktank bondkhonnint ghaleant ani, tancher mornnachem formonn martale tedna, hanvem tancher virudh mot dilam. Toxench khup pavtti soglleam devsthanamnim gelam ani, tankam piddapidd diun, Jezucher dovortalim to bhavart soddunk hanvem tankam boll kelam. Tancher mhozo rag itlo pettlolo ki porkeam nogramnim porian hanv tancheam pallank laglolom. Oso êk pavtt mukhel iadnikancho odhikar ani rojea gheun, hanv Damaskak vetalom. Ani don’parchea vellar, hanv mhojê vatten choltanam, Bhovxrêxtt Raza, suria poros loklokit sorgar thaun êk uzvadd hanvem pollelo; mhojê ani mhojeam sangateanchê bhonvtonnim to jhigjhiglo. Ami soglle zomnir xevttoleanv; tedna hanvem êk tallo aikolo, to mhojê kodde Hebrêv bhaxen oxem uloilo: “Saulu, Saulu, kiteak mhonn tum Mhaka piddapidd ditai? Eka kantteacher khôntt marun tunch dukhovtai.” Hanvem vicharlem: ‘Tum konn Saiba?’ Somian zobab dilo: ‘Hanv Jezu, ani Mhakach tum piddapidd ditai. Punn utth atam ani tujeam pãiancher ubo rav! Hea dorxonant tunvem Mhaka pollelai ani fuddleam-i dorxonamnim tum Mhaka polletoloi, tôr Mhozo sevôk ani sakxidar tuka nemchê khatir, Hanv tuka dixtti poddlam. Tujech porjecheam hatantlo ani videxeancheam hatantlo Hanv tuka vattaitolom ani heanch raxttram-xim Hanv tuka dhaddunk vetam: kallokantlim bhair sorun tim uzvaddak ieunchim ani Soitanachea rajeantlim sutton Deva-xim portun ieunchim mhonn, tanche dolle ugddunk Hanv tuka dhaddtam: Mhojer bhavart dovrun ki tim apleam patkanchem bhogsonnem ghetelim ani bhoktanchem daiz bhogunk pavtelim.’ Mhonntôch, Agripa Raza, hea sorginchea dorxonak pallo dinastana mhojean ravunk zaina zalem. Hea pasot, poilim Damaskachea lokak, uprant Jeruzaleant ravteleank ani Judeiachea akhea prantachea lokak, ani toxench videxeank hanv ho sondêx porgottunk laglom. Tãnnim jivit-mon bodôlchem ani Deva-xim portun ieunchem ani bodôl’lelea jivitachim purtim kamam korchim mhonn hanv tankam updês ditalom. Hea pasot Judevamnim mhaka Devmondirant dhôrlo ani te mhozo jiv kaddunk sôdtale. Punn Devacho adar mhaka favo zal’lean, aiz porian lhanank toxem vhoddank hanv sakxi diit asam ani provadeamnim ani khud Moizesan ghòddtelem mhonn sanglam, tachê bhair hanv kãich sanginam: mhonngê Krist koxtt sôscho aslo ani, mel’leantlo soglleam-vôn poilo punorjivont zaun, amchê porjek ani videxi raxttrank-ui uzvadd fanklo mhonn to porgott korcho aslo.” Oxi Paulu apli rakhônn kortana, Festusan vhoddlean mhonn’lem: “Paulu, tum piso zalai. Chôdd xiklai mhonn tuji môt firlea.” Paulun zobab dilo: “Bhovxrêxtt Festusa, hanv piso zaunk na, punn sot tem uloitam, ok’kol aslim utram mhojim. Kiteak raza heô vostu boro zanno ani dekhun sogllea visvasan hanv tachê lagim uloitam; hantlem kitench taka liplelem na mhonn mhaka khatri asa, kiteak heô vostu khõichea eka konnxeak ghoddonk nant. Agripa Raza, provadeancher tum bhavart dovortai? Tum dovortai mhonn hanv zannom.” Agripan Pauluk mhonn’lem: “Thoddea bhitôr tum mhaka Kristanv kortoloi mhonn dista tuka?” Paulun zobab dilo: “Thoddea bhitôr mhonn vô chodda bhitôr mhonn, tukach nhoi, tôr aiz mhaka aikoteleam soglleank Dev mhojê sarkim korum; punn mhojeô sanklli mat konnak sõsunk poddcheô nhoi!” Tedna raza, razpal ani Bernis, ani tanchê borabôr bosun aslim tim utthlim. Ani kuxin sorun, apnnam modem tim oxem ulounk laglim: “Moronn vô bondkhônn favo zaunk hea mon’xan kãich korunk na.” Agripan Festusak mhonn’lem: “Hea mon’xan Somrazak ulo marunk naslo zalear, taka soddum-ietalo.” Tarvar bosun ami Italiek vechem mhonn tharav zatôch, Pauluk ani ieram thoddeam koidiank Juliusachê adhin kele. “Somrazachi Polttonn” mhonnlelê polttonnecho ho xotpoti aslo. Adramitiuma thaun ail’lea tarvar ami choddleanv ani vattek lagleanv; hem tarum Aziechea prantacheam bondrank lagchem aslem. Amchê borabôr Tesalonikecho Maxed-oniekar Aristark aslo. Dusrea disa ami Sidonak pavleanv. Juliusan Pauluk moipas dakhoilo ani apleam ixttank mellunk vochunk ani tanchi seva-chakri gheunk tannem Pauluk rojea dili. Thõiche bhair sortôch, amcher virudh varo martalo dekhun, ami Xiprusachê asro-ditolê kinarê vatten fuddem geleanv; tea uprant, Xilixia ani Pamfilia heam prantanchê kinarê bhailea doriantlean vochun, Lixiechea prantachea Mirak ami pavleanv. Thõi ek Aleksandriechem tarum xotpotik gavlem, tem Italiek vetalem; tantum amkam tannem choddoile. Khup dis amchem tarum bhov sovkas chol’lem ani oxem Knidusachea bondra samkar porian pavunk amkam kotthin zalem. Varo amkam fuddem vochunk dinaslo dekhun, Salmona samkar pavtôch ami Kretachi asro-dito kinari dhorun fuddem chol’leanv, ani vhoddê avghoddaien kinari dhorunuch Laxeia nogra-xim Surokxit Bondram mhonnlelea zagear ami pavleanv. Oxem amcho khup vêll ibaddon gel’lo, ani tarvar bosun poinn korop hea kallar surokxit nhoi aslem, kiteak patkanchem bhogsonnem mellchê khatir bhettoil’lo Judevancho upas porian bollandlolo: voros itlem fuddem pavlelem. Hea pasot Paulun tankam oxe xiddkaile: “Ixttamnô, hem poinn atam amkam chodd sonkoxttachem mhonn hanv polletam; amchea samonnak ani amchea tarvakuch nhoi, punn amchea jivak porian mottem nuksann zatelem.” Punn xotpotin Pauluchê xiddkavnnê poros kopitacher ani tarvacher odik visvas dovorlo. Ani hinvallo sarunk tem bondir upkaronaslem dekhun, Feniksak hinvallo kaddunk zatolem mhonn bhorvanso dhorun, fuddem vechem mhonn chôdd lokachem mot zalem. Feniks bondir Kretachê dokhinn-ostomtek ani ut’tôr-ostomtek fuddo korun aslem. Oxem dokhinnechem xitoll varem suttlem tedna, apli ievzônn xarti pavtolich mhonn somzun, nangor uklun tãnnim tarum sôddlem ani tem Kretachê kinarê kuxik vochunk laglem. Punn rokddem tea zunveantlean “Ut’tôr-Udenticho Varo” nanvachem ek mottem vadoll suttlem. Tarum vadollak sampoddlem, ani oslea vareak amchean fuddo korunk zaina zaun, tarum ami vadollak soddun dilem, ani varean amkam lottun vhelim. Kauda mhonnlelea eka dhakttea zunveachê kuxik ami dhanvleanv ani kotthin proitn korun tarvacho ponêll ghôtt dhorunk ami pavleanv. To tãnnim tarvacher voir kaddlo ani tarva bhonvtonnim razu ghott bandle. Libiê samkar renvecheam battiamnim tarum rombon xirkon urot mhonn te bhiele ani xiddam denvoun tãnnim tarvak varean lotton vochunk dilem. Tufan tarvak itlea bollan lottun vhortalem dekhun, tantlem thoddem samon doriant uddoilem ani tisrea disa apleanch hatamnim tarvachim thoddim autam legun doriant uddoilim. Zaite dis porian suria ani noketram dixtti poddonaslim ani varem têch khoraien martalem; xekim jivim urpacho sogllo bhorvanso ami sôddlo. Zaite dis porian tãnnim kãich jevunk-khaunk na; tedna tanchê modem ubo ravun, Paulun mhonn’lem: “Ixttamnô, tumi khorench mhojem aikunk zai aslem ani Kreta thaun tarum soddunk favo naslem. Oxem ho sogllo sonkoxtt ani nuksann tumchean vattaunk zatalem. Punn zalem tem zalem, atam hanv tumkam sangtam tem aikat, kalliz soddum nakat. Tumchê modlea konnacheach jivacho ibadd zauncho na, punn fokot tarvacho. Jea Devacho hanv bhôkt ani Zachi hanv seva kortam, Tachea dutan kal rati mhaka dixtti poddun sanglem: “Paulu, bhienaka, Somraza fuddean tum ubo ravunk zai. Tujê borabôr poinn kortoleam soglleancho jiv Devan tujê pasot vhoddê korunnaien samball’la.’ Tôr, ixttamnô, kalliz ghott dhôrat, mhaka sanglam toxem zatelem mhonn mhaka Devacher bhavart asa. Punn ami eka zunvear poddche asanv.” Chovdavê rati hevtten-tevtten ami Adriatik doriant lottot asleanv tedna, sumar modianir eka ganvak apunn lagim pavtat mhonn tarvotteank dubhav poddlo. Tãnnim kholaiecho tthav ghetlo ani sumar sat’tis metr mell’le; ile fuddem vetôch, novean tthav gheun sumar otth’tthavis metr mell’le. Ami êkê khoddpi kinarer vochun poddunk asanv mhonn bhieun, tãnnim tarvachê pattlê vatten char nangor sôddle ani dis vegim uzvaddum mhonn te axetale. Jedna tarvotti, tarvachê fuddlê vatten nangor ghaltat mhonn nib diun, tarvacho ponêll denvoun pollun vochunk sôdtale, tedna Paulun xotpotik ani tacheam soinikank sanglem: “He monis tarvar ravonant zalear, tumi vattavonchech nant.” Tedna soinikamnim ponellachim doram katorlim ani ponêll poddunk sôddlo. Jhenzunttear, soglleamnim kitem-i khaunchem mhonn Paulun oxem prarthun maglem: “Chovda dis legun tumi zagrut ravleat, kãich khainastana tumi upas kela. Hea pasot hanv tumchê lagim magtam, tumi kitem-i tori jevat, kiteak tem tumche jiv vanchounk gorjechem. Konnachêch toklecho êk kens porian ibadd zauncho na.” Hem mhonnun, tannem unddo ghetlo, soglleam hujir Devak dhin’vaslo ani to moddun to khaunk laglo. Tankam boll mell’lem ani te-i jevunk lagle. Tea tarvar soglleank dhorun ami don’xim xeastôr lôk asleanv. Zai titlem jevlea uprant, gonv doriant uddoun tem tarum tãnnim hollu kelem. Dis uzvaddtôch to ganv khoincho to tãnnim ollkhunk na, punn vêll asleli doriachi êk khaddi tankam dixtti poddli. Ani thõi ghòddta zalear tarum toddik kaddunk tãnnim ievjilem. Tea khatir tãnnim nangor doriant soddun dile, teach borabôr vereanchim doram sôddlim. Magir mukhailem xidd vareak voir kaddun tarum kinarechê vattek lailem. Punn tarum renvechê êkê battient romblem ani zomnik laglem. Tarvacho fuddlo bhag ghôtt rombon halona zalo, punn futt’to lharamnim boddovon-boddovon tacho pattlo bhag mòddlo. Koidi penvun pollun vochtit mhonn soinikamnim tankam jivexim marunk ievjilem. Punn xotpoti Paulucho jiv samballunk sôdtalo dekhun, tanem tankam addaile. Penvunk zata tãnnim poili doriant uddki marchi ani thoddik vechem mhonn tannem hukum’ ghalo. Punn urleleam konn-konn mòddlelea tarvacheam veg-veglleam kuddkeancher bosun toddik vechim mhonn tannem formailem; hê porim sogllim solamoti toddik pavlim. Ami surokxit suttlea uprant hea zunveachem nanv Malta mhonn amkam gomun ailem. Tea ganvchea lokan amkam khup moipas dakhoilo. Paus poddtalo ani hinv khatalem dekhun, tãnnim ek agttem pettoilem ani tachê bhonvtonnim amkam soglleank soniman kelo. Paulun xirputtanchi êk bhori haddun ujeant ghaltalo tedna, gormek lagun tantlem ek furxem bhair sorlem ani tachea hatak chablem. Tachea hata thaun tem jivannem umkolltalem tem polleun, tea ganvcheam mon’xamnim ekamekak mhonn’lem: “Khorench, ho monis êk khuni; to doriantlo suttlo khoro, tori Devachi nit taka jieunk dina.” Punn tannem tem ujeant fafuddlem ani taka kãich vaitt zaunk na. To suztolo vô ovchit bhi poddun mortolo mhonn tim somzotalim. Punn zaito vêll ravlea uprant ani taka kãich vaitt zaina tem polleun, tãnnim aplem mot bodôl’lem ani to êk dêv mhonn tim sangunk laglim. Thõi laginch tea zunveachea odhikariachim bhattam-vit’tam aslim. Tachem nanv Publius. Tannem amkam soniman kelo ani tin dis porian ixttagotin amcho poramôs kelo. Publiusacho bapui zoran foddfoddtalo ani taka rogtachim bhairam zatalim. Paulun taka bhett keli ani magnnem korun tacher hat dovorle ani taka boro kelo. Tea uprant tea zunveachim sogllim piddevontam ailim ani tim borim zalim. Tea lokan amkam zaiteam bhasamnim man dakhoilo ani tarvan provas korchea vellar goroz teô vostu tãnnim amkam dileô. Tin mhoineam uprant, ami eka tarvar choddleanv; hem tarum tea zunvear hinvallo sartalem; tem Aleksandriechem aslem ani tacher asli “Zonvlleam Devanchi” khunna. Ami Sirakusak thambleanv ani tin dis thõi ravleanv. Uprant, kinarê bhonvtonnim vochun, ami Rejiumak pavleanv; eka disa uprant dokhinnchem varem marlem ani don disamnim ami Puteolisak pavleanv. Hanga amkam amchim thoddim bhavbhoinn mell’lim ani apnnanchea sangata sat dis ravunk amchê lagim maglem. Xekim ami Romak pauleanv Thõi amcheam bhavam-bhoinnink amchi khobor mell’li ani tim Ap’piusacho Bazar ani Tin Khannavolli hanga porian amkam mellunk ailim. Tankam polleun Paulun Devak dhinvasun dhir ghetlo. Ami Romak pavtôch eka khasgi ghorant ravunk Pauluk rojia mell’li ani taka rakhunk êk soinik dovorlo. Tin disam uprant, tannem Judevancheam fuddareank apoile. Te ektthãi zatôch tannem tankam mhonn’lem: “Bhavamnô, amchea lokacher ani amcheam purvozancheam chalim-ritincher add hanvem kãich korunk na, tori Jeruzaleant mhaka koidi kelo ani Romkaranchea hatant ghalo. Tãnnim mhoji choukoxi kortôch mhojer mornnachem formonn marunk mhojê sovem tankam kãich mellunk na dekhun, te mhaka soddunk sôdtale. Punn Judevamnim ozun virôdh kelo; dekhun, zori mhojê porjecher add mhojem koslench garannem naslem, tori hanvem mhoji zhôddti korunk Somrazak ulo marcho poddlo. Ani heach pasot tumkam polleunk ani tumchê kodde ili-xi gozal mhaka korunk diat mhonn hanvem maglem, kiteak Israelachea bhorvanxeak lagun heam sankllimnim hanv bandlolo asam.” Tãnnim taka zobab dilo: “Judeiak thaun tujê vixim amkam koslinch potram ieunk nant ani amcheam bhavam-bhoinnim modlea konnench thõi thaun hanga ieun tujê vixim kosloch vaitt nirôp haddunk na vô koslich vaitt gozal amkam sangunk na. Toripunn tujea monant asa titlem-i amkam sang: tem tujê koddchem ami aikunk axetanv, kiteak hea pokxacher veta thõi virôdh asa, hem ami zannonv.” Tedna tãnnim êk dis tharailo and Paulu ravtalo tea ghorant zaitim zannam taka mellunk ailim. Tanchê kodde uloun, tannem Devachea Rajeak sakxi dili ani Moizesachê Somurtint ani provadeancheam pustokancher jem Jezu vixim boroil’lem asa, tachi to sokallim thaun sanjê porian tankam khatri diunk proitn korit ravlo. To sangtalo tem thoddeamnim mandun ghetlem, punn heramnim tem mandun gheunk na. Tanchê modem ek mot zaunk na; dekhun, tim bhair sortana, Paulun tankam hem nimannem utor sanglem: “Izaias provadea vorvim Povitr Atmean tumcheam purvozank sangleant tim utram khorench sarkim asat: ‘Hê porjê-xim voch ani tankam sang: Aikat, aikot ravat, punn tumkam kãi somzochem na; polleiat, polleit ravat, punn tumkam kãich dixtti poddchem na. Hê porjechem kalliz nibor zalam. Dolleamnim tankam disona zaunk, kanamnim tankam sarkem aikona zaunk, monan tankam somzo iena zaunk, ani tim Mhojê-xim portun ieun Hanvem tankam borim korina zaunk, tanche kan bhere zaleat, tãnnim aple dolle ghott dhampleat.’ Mhonntôch hem zanno zaiat: Aplea taronnacho nirôp Devan videxeank dhaddla. Tim to aikotolim.” Don akhim vorsam Paulu bhaddeachea ghorant ravlo, apnnak mellunk ietalim titleank-ui to borê bhaxen ghetalo ani kalljidarponnan ani koslich addkhôll nastana Devachem Raj porgôtt’talo ani Somia Jezu Krista vixim xikovnn ditalo. Mon’xasoimban To Davidachê kullientlo; punn povitr korta tea Atmeachê podven Taka mel’leantlo punorjivont korun, Devan Taka Aplo bollvont Put mhonn sthapun porgôtt kelo tea Amchea Somia, Tachea Puta, Jezu Krista vixim Apleam provadeam udexim Povitr Pustokamnim Devan adim-fuddem bhasail’le, Devache Bore Khobre pasot kuxin kaddlolo, Devan ek apostl zaunk apoilolo, Jezu Kristacho sevôk, hanv Paulu, Jezuchea nanvak man zoddun gheunk sogllim videxi raxttram bhavartan Devak khaltim zaunchê khatir, Tachê vorvim favo zalem amkam hem vortem dennem, mhonngê apostlachem sevokponn ani tanche modem tumam-somestam, Romak asleleam, Jezu Kristachim zaunk apoileant tankam hem potr boroitam. Tumi Devachea mogachim ani Tachi povitr porza zaunk apoilelim. Tôr Deva amchea Bapachi ani Somia Jezu Kristachi doiallai ani xanti tumkam favo zaum. Poilê svater, tumchea bhavartachi khobor sogllea sonvsarar gazot asa dekhun, Jezu Krista udexim, tumam-somestam pasot mhojea Devak hanv dhin’vastam. Tachea Putachem xubhvhortoman porgottun mhojea otmean hanv Devak bhôztam; hanv thambonastanam tumcho ugddas kortam mhonn toch Dev mhozo govai. Tumche xim ieunk, atam nimnne kodden, Devachi khuxen mhaka koxei baxen vatt ugtti zaunk hanv Taka sodanch vinoti korit asam. Mhojê bhettê vorvim Devachea Atmeachem dennem tumkam mellun tumi ghott zaunchim mhonn hanv tumkam polleunk axetam; odik borem oxem sanglear: mhaka ani tumkam asa tea ekach bhavarta vorvim ami ekamekak dhir diuncho mhonn mhoji axa. Bhavam-bhoinnimnô, zoxem heram videxeam modem mhaka fôll mell’la, toxench tumchê-i modem koslo tori fôll mhaka melltolo mhonn patieun, tumkam bhett diunk sobar pavttim mhojem mon aslem mhonn tumi zanno zal’lim mhaka zai; punn hê vô tê addkhollik lagun tem mhojê lagim ozun porian ghòddlem na. Grik mon’xam sorim toxench heram sorim, zannaram toxench nennaram sorim mhaka toch kaido asa, hea pasot, mhojean zata tê bhaxen, Romak asleleam tumkam-i xubhvhortoman porgottunk mhaka vhôdd hurba asa. Bhavart dhôrtoleam soglleam mon’xank, poilim Judevank, uprant Grikank-ui xubhvhortoman taronn divpi Devachi xokti dekhun, xubhvor-tomanacho mhaka purnn visvas asa, Hea pasot, “Dev Apnnak manovlolo korta to monis bhavartan jietolo”, oxem boroilelem asa tea pormonnem, tantunt Jezuche Bore Khobrent, bhavarta sun bhavartak Devan Apnnak manovto korop ugddapem zalam. Khorench, khotteponnan sot damun dhôrtat team dêv-bhokti nasleleam mon’xanchea sorv khotte-ponnacher Devacho krôdh sorgar thaun denvlolo dixtti poddun ieta. Karonn Deva vixim jem ollkhunk zata, tem tim borim zannont, kiteak Devanuch tankam tem ugtem kelam. Tôr polleunk zainant te Tache gunn, mhonngê Tachi sasnnik podvi ani devponn, sonvsar rochla tê meren rochleleam vostum vorvim gineanacheam dolleank nivoll dixtti poddtat; dekhun hê aplê vagnnukecho apnnank guneanv na mhonn koxêch bhaxen tanchean mhonnunk zaina. Kiteak mhonn’lear, Devak ollkhun-ui favo to man tãnnim Taka diunk na. Tache upkar-ui tãnnim attounk nant; punn tanchem sogllem chintopuch holkem-polkem zalem ani tanchem ok’kol-naslelem ginean kallokant buddlem. Apunn xannim mhonn dakhounk sôdtat, punn khorem mhonn’lear tim pixim; ani ovinaxi Devachi mhoima soddun, vinaxi mon’xancheam, suknneancheam, chovpãii mon’zatincheam ani sorpancheam rupnneamnim murti-puttle tãnnim korun ghetle. He khatir, tãnnim ekameka lagim apleanch kuddincho man hogddauncho mhonn, tancheam kallzancheam vondovnneam pormannem Devan tankam pozoddponnachê adhin sôddlim; ani Deva vixim sota bodlek tãnnim fôtt mandun ghetli, ani Rochnnarak bhôzchê bodlek tim rochnnek bhôzlim. Hea Rochnnarak sasnnak vakhann’nni. Amen! Heach pasot, Devan tankam lojecheam khor vondovnneanchê adhin sôddlim; tôr tancheô bailô legun, soimbacho linga-sombond sanddun, soimbacher add sombond dhôrtat; toxench dadle bailam lagim soimbacho linga-sombond sôddtat ani ekameka lagim kamcharachea ujean lastat: dadle dadleam lagim kanttalleachim kortubam kortat ani aplê khottê vagnnukecho purto muxaro apleach mathear ghetat. Heach khatir, Devak lekhunk tim kobul zalim nant dekhun, Devan tankam apleam khotteam chintpam pormannem cholunk ani sobonam tosli jivitachi chal dhorunk sôddleant. Tim sogllea torechea khotteponnan, mhonngê kusddaien, apsvartan, noxtteponnan, buddlolim asat; nattkaien, khunamnim, zhogddeamnim, fottingponnamnim, vikottaien, bhòrlam tanchem jivit; tim zaleant chaddio sangpi, ekamekacher boglanttam ghalpi; Devacho dvês dhôrpi; urmottaiechi, gorvachi ani mijaxichi tanchi chal; vaitt korpacheô manddnneô tim sodun kaddit asat; avoibapaik man dinant; somjikai naslelim, patieum-zainaslim, mog naslelim, kakut naslelim tim zaleant, dil’lem utor tim pallinant; Oxem vagtoleank Devachea nirnnoia pormannem moronn favo mhonn tim besborim zannont; tori, nhoich apunn toslim kortubam korit ravtat, punn toxench vagteleank-ui borê bhaxen manun ghetat. Ixtta mhojea, dusreancher tum nitichem formonn martai? Karonn dusrim mon’xam kortat tinch kortubam tum-i adartai; mhonntôch, team dusreanchi tum zhôddti kortai tedna, tum tujeruch tujea guneanvachem khastichem formonn martai dekhun, konn-ui tum zaxi, tuka koslench nib na. Oslim kortubam kortoleancher Dev khastichem formonn marta tedna, Tachem formonn nitichem mhonn ami zannonv. Ani oslim kortubam korteleancher nivaddo ditai ani tinch kortubam tum kortai tedna, O monxa, Devachi khast vattaitoloi mhonn dista tuka? Vô Jivit-mon bodlunk tuka oddun haddto Devachi konnvallaiechi khobor nastana, To subham’ konnvallaiecho, vhôdd sosnnikaiecho ani mhatme-ponnacho mhonn, tum Tachi beporva kortai? Tujem kalliz nibor korun jivit bodlunk tum kobul zainãi; oxem korun, Devacho niticho nirnnoi porgôtt zatolo tea Tachea krodhachea Disak Tachea krodhacho bhar tujea mathear tum vaddoit asai. Tea disa To zonn-ekleak ap-apleam kornneam pormannem farik kortolo: jim konn borem tem korit ravtat ani mhoima ani man ani ovinaxiponn sôdtat, tankam To sasnnik jivit ditolo; punn jim konn aploch adav sôdtat, sot mandun ghenant ani khotteponnak lobhdol’lim asat, tankam krodhacho uzo dovorlolo asa. Vaitt adartelea zonn-eklea mon’xak Koxtt ani tollmolle ravtat — Judevank poilê svater, punn Grikank-ui; mhoima ani man ani xanti borem kortolea zonn-ekleak - Judevank poilê svater, punn Grikank-ui. Tôr Dev hachem-tachem tondd polleun Aplo nirnnoi dina. Zãnnim Somurti virêt patok kelam, team mon’xancho Somurti virêt nas zatolo; zãnnim Somurt gheun patok kelam, tanchi Somurti pormannem mon’subi zateli. Somurti vixim aikopi konnuch Devak manov-lelim zainant; punn Somurt palltat tankam ki Dev Apnnak manovlolim kortolo. Somurt naslolim videxi mon’xam soimbachea uzvaddan Somurti pormannem choltat tedna, zorui tankam Somurt na, torui tim apnnankuch somurt zatat. Somurt formaita tem apleam kallzancher boroil’lem asa mhonn tim aplê chalin dakhoitat; tanchem ontoskornn hakach govai dita, kiteak mhollear tanchinch chintnam kedna-kedna tim opradi mhonn ani kedna-kedna tim niropradi mhonn tankam dakhoitat. Hanv porgôtt’tam tea xubhvhortomana porma-nnem, Jezu Krista vorvim mon’xan-cheam gupit chintnam-bhavnanchi porian Dev, tea Disa, mon’subi kortolo. Atam tujem kitem? Tum apunn Judêv mhonntai, Somurticher tum patieun asai, tujea Devacho tuka obhiman asa, Tachi khuxi tum ollkhotai, ani Somurt xiklai dekhun vaitt soddun kitem borem vinchun kaddchem tem tum somzotai; tum kurddeank vatt dakhovpi, kallokant asleleancho tum uzvadd, budh-nasleleancho tum xikovpi, sadeam-bholeancho tum guru mhonn tuka tujich khatri zalea, kiteak Somurtint soglli zannvai ani sogllem sot attaplolim tuka melltat. Tum herank tôr xikoitai, tukach kiteak xikoinãi? Chorchem noiê mhonn dusreank updês ditai, tôr tunch chôrtai? Pordvar korum noiê mhonn sangtai to tum, ani tunch pordvar kortai? Murtim-puttleancho kanttallo dhôrtai to tum ani tunch devllam nagoitai? Somurtichi vhoddvik sangtai to tum tor tunch Somurt môddtai mhonntôch, ti somurt moddun tum Devak okman kortai? Tôr Povitr Pustokar oxench boroilolem asa: “Raxttram modem Devachea Nanvachi ninda zata ti tumkanch lagun.” Tum Somurt samballtai zalear, sunôt tuka upkarta khori; punn Somurt môddtai zalear, sunôt tunvem kelea astam-i, ti korinaslelê porim zaloi. Sunôt korunk na to videxi monis Somurtiche kaide pallta zalear, Deva mukhar to sunôt kel’lea Judêv mon’xa sarko zauncho na? Boroileli Somurt hatant gheun ani sunôt korun-ui tum Judêv Somurt môddtai mhonntôch, aplê kuddichi sunôt korunk na to videxi monis Somurt pallun tum opradi mhonn dakhoun ditolo. Judev mhonn’lear bhailean dista to nhoi; ani sunot mhonn’lear bhailean, kuddicher asa ti nhoi. Portench zalear, bhitorlean zaun aspi, to ki khoro Judev; ani khori sunot, kallzachi, nhoi boroilele somurtichi, punn Devachea Atmeachem kam’ tem. Oslea mon’xak her dusream koddchi nhoi, bogor Devakoddchi vakhann’ni mellta. Mhonntôch Judêv zaun ogllo adav koslo? Vô sunôt korun upêg koslo? Khup, soglleam vattamnim. Poilê svater, Devan Aplo sondêx tanchê svadhin kelo. Tanchê bhitorlim thoddim zannam ovisvaxi zalim zalear, kitem zalem? Tim ovisvaxi zalim mhonnun, Devachem-i visvaxiponn bhongtolem kitem? Na ki na! Sogllim mon’xam fottkirim zalear-ui, Dev sotevont zaunkuch zai; tôr Povitr Pustokar oxem boroil’lem asa: “Mhojer formonn martai tedna, Tujem formonn nitichem; mhoji zhôddti kortai tedna, chuki virêt Tuji zhôddti.” Punn zôr jitlim ami onitivont zatanv titlo odik Dev Tachê doiallaien nitivont mhonn dokhol zata, tôr ami kitem mhonnchem? Mon’xachê chaltê bhaxen vichartam: Aplea krodhachi xikxa Dev amcher tapta tedna, To oneai korta mhonn amchean sangum-ieta? Na ki na! Dev zôr onit korta, koso mhonn To sonvsaracho Mon’subidar zatolo? Zôr hanv fottkiro dekhun Dev sotevont mhonn odikuch dokhol zata ani oxi Tachi mhoima vaddta, tor mon’subent hanv guneanvkar mhonn mhojer formonn kiteak? Oxem zal’lem tôr, borem kitem utpon zaunchê khatir kiteak vaitt korchem nhoi? Oxench hanv xikoitam mhonn sangun mhojer kãi zannam boglanttam ximpddaitat. Osleam mon’xank ki guneanv asa mhonn sanglear onit na. Mhonntôch kitem? Videxeanchê poros Judevanchi poristhiti odik bori? Kednanch na. Judev ani Grik, sogllinch ami patkachê adhin asanv mhonn hanvem tôr spoxtt sangun dakhoilam. Povitr Pustokar oxem boroilolem asa: “Boro mhonnlolo monis eklo porian na, Somzota toslo konnuch na, Devak sôdta to konn-êklo na! Sogllim kuxin sorleant, soglleanchi chal zaun gelea noxtti. Borem korta to konnuch na, na, eklo porian na! Ugtea fondda sarko tancho gollo, tanchê jiber fokot ghatki utram. Onttantlean gollta furxeachem vikh; tanchem tondd xirapamnim ani koddsannin bhòrlam. Niropradi rogot vikraunk tanche pãi suddsuddit dhanvtat, vetat thõisôr fokot nisonttonn ani odruxtt. Xantichea margachi tankam khoboruch na, tancheam dolleam mukhar Devachi bhirant mhonn’lear nanch!” Apleam kortubank konnench koslinch nibam diunk zaina zaunk ani soglleam mon’xamnim Devachê mon’subecho nirnnoi gheunchê khatir, Somurt sangta titlem-i Somurtichê adhin asat tankanch lagu zata mhonn ami zannonv. Somurti udexim patkachi ollok asta dekhun, Somurtichim kortubam korun, konnuch Devak manovlelim zainant. Punn atam Somurtichê manddavolli bhair, Jezucher bhavart dhorteleam monxank, Dev Apnnak manovlelim korta tem zalam ani te vixim Somurtin ani Provadeamnim-i govai dilea. Dev koslich ontôr korina dekhun, tench Devachê doiallaiechem nitivontponn Jezu Kristacher bhavart tthevtoleam somestank pavta. Khorench, sogllim patki zalim, ani Aplê mhoiment vantto gheunk jem Devan mon’xank nirmil’lem tem tankam chuklem. Atam, Devachê funkott-doiall kurpen, Jezu Kristan mon’xank dil’le suttke udexim, tim funkea Devak manovlelim zatat. Bhavart dhôrteleam khatir Devan Jezuk Aplê rogot varoun bhogsonnem divpachi boli zaunk nemla: oxem korun Tannem Aplem doiallaiechem nitivont-ponn porgott kelem, poilê svater adlea kallar kel’leam patkam pasot, kiteak tea kallar Tannem sosnnikai dhorun patkank favo asleli xikxa lavunk na; ani toxench atam hea amchea kallar kel’leam patkam pasot, kiteak Aplem nitivontponn doiallaiechem mhonn ani Jezucher bhavart tthevteleam somestank Apunnuch Apnnak manovlelim korta mhonn Dev dokhol korta. Mhonntôch boddai anink khõi asa tor? Ti kuxin dovorli. Kosle somurti vorvim? Vaura-korneam somurti vorvim? Na. Bhavartach vorvim. Kiteak Somurtiche kaide pallun nhoi, punn bhavarta udexim ki mon’xam Devak manovlolim zatat: hi amchi khatri. Dev Judevanchoch Dev tôr? Videxiancho-i nhoi To? Videxiancho-i to Dev mhonn dubhavuch na. Kiteak Dev Ekloch: To sunôt kel’leank, tanchea bhavartak lagun, Apnnak manovloeim korta; ani Toch sunôt korunk na tankam-i, tanchea bhavarta udexim, Apnnak manovlelim korta. Mhonntôch kitem? Bhavart bhitôr kaddun ami Somurticho ôrth bhair martanv? Na ki na! Ufrattim, ami Somurticho khoro ôrth dakhoun ditanv. Rogta-masa pormannem amchea purvoza, Abrahamak kitem mell’lem ami mhonnchem? Zôr apleam kornniam udexim Abraham’ Devak manovlolo zal’lo, tôr tannem boddai dakhoum-iet, punn Deva mukhar nhoi. Tôr Povitr Pustok kitem sangta? “Abrahaman Devacher bhavart dovorlo ani, hea tachea bhavartak lagun, taka Devan Apnnak manovlolo kelo.” Apnnem kel’leam kamancho konn muxaro ghetat tôr, ho tancho muxaro funkeachem dennem mhonn konnuch lekhinant, punn to tankam devo mhonn lêkhtat. Ufrattim, konnui, apnnem kel’lim kamank lagun nhoi mhonn, ani patkeank porian Dev Apnnak manovlelim korta mhonn hea Devacher bhavart dovortat, toslea tanchea bhavartak lagun, Dev tankam Apnnak manovlelim korta. Mhonn’toch, Dev Apnnak manovlolim korta tem, tancheam korneam-vaurak lagon nhoi mhonn, Devacher bhavart dortat tim bhagi mhonn, David oso uloita: “Guneanvachem bhogsonnem zôr mell’lem, patkachem khot zôr dhuun kaddlem, monis kitlo bhagi! Zancher Dev tancho guneanv tapina, tim mon’xam kitlim mhonn bhagi!” Hem bhagiem konnank lagta? Sunôt kel’leankuch, vô sunôt korunk na tankam-i? Tôr ‘Abrahamak tachea bhavartak lagun Devan Apnnak manovlolo kelo’, oxem ami mhonntanv. Hem kedna ghòddlem? Tannem sunôt kelea uprant, ki korchê adim? Kelea uprant nhoi, punn ti korchê adim; Sunot korche adim, apnnak aslolo tea bhavartak lagun, Devan apnnak manovlolo korpacho ek xik’ko koso sunotichi khunna tannem ghetli. Sunot korche adim bhavart dhortat ani Dev Apnnak manovlelim korta tancho to purvoz zaunche khatir Devan oxem kelem. Ani sunôt kel’leancho bapui, nhoi fokot sunôt kel’lim asat tancho, punn bogor sunot korche adim amchea puvoza, Abrahamak aslo tea bhavartan choltat tancho-i bapui to. Abrahaman Somurt pall’leli mhonn nhoi, punn tannem Devacher tthevlelea bhavartak lagun taka Devan funkea Apnnak manovlolo kelo dekhun, sonvsar tanchem daiz zatelem mhonn Devan Abrahamak ani tachê sonstik bhasavnni keli. Kiteak daiz Somurt palltat tanchench zait zalear, bhavart zalo polko ani bhasavnni zali ôrth-nasleli. Khorench Somurt fokot Devachea krôdhak zago korta; punn Somurt zôr na, thõi Somurt moddunk konnuch xokona. Mhonntôch Devachi bhasavnni bhavartak lagun mellta; oxi ti ek funkeachem dennem tem ani Abrahamachê sogllê sonstichi ti jerul zata - mhonngê fokot Devachi Somurt pavlea tanchich nhoi, punn Abrahama porim bhavart dhôrtat tanchi-i ti zata, kiteak Abraham amam-somestancho bapui. Tôr Povitr Pustokar oxem boroilolem asa: “Khub raxttrancho Hanvem tuka bapui kela.” Khorench, zo Dev mel’leank jivit dita ani nant teô vostu aso-xeô korta, Tea Deva mukhar Abrahaman bhavart dhorlo. “Tuji sonsôt itli vhôdd zateli”, oxem taka Devan dil’lea utra pormannem, bhorvanxeachem ek kirnn porian asum nozo aslem tedna, “khub raxttrancho bapui” apunn zatolo mhonn tannem bhorvanso dhorun, bhavart dhorlo. Taka ogllim-unnim xembhôr vorsam zal’lim; tôr apli kudd mel’lea mon’xachê kuddi sarki zalea ani tosoch Saracho kusvo jiv-naslolo zala mhonn polleun-ui, tacho bhavart donvddoll’lo na; Devachê bhasavnnê mukhar dubhavun to pattim-fuddem sorlo na; punn bhavartantli tannem ghottai ghetli ani Devak vakhann’nni dili. Tôr Apnnem bhasailam titlem-i xarti pavounk Devak podvi asa mhonn taka purnn khatri asli; Heach pasot, hea tachea bhavartak lagun, Abrahamak Devan Apnnak manovlolo kelo. Punn “bhavartak lagun taka Devan Apnnak manovlolo kelo”, oxem jem Povitr Pustokar boroilolem asa, tem tachêch pasot nhoi, punn amchê-i pasot. Amchea Somia Jezuk mel’leantlo punorjivont kela Tacher ami bhavart dovortanv ani haka lagun amkam-i Dev Apnnak manovlelim kortolo; kiteak khorem mhollear amcheam opradank lagun Devan Taka mornnachê adhin kelo ani amkam Apnnak manovlelim korchê pasot Taka punorjivont kelo. Bhavarta vorvim Devan amkam Apnnak manovlelim keleant dekhun, amchea Somia Jezu Krista udexim Deva thaim ami xantin jietanv; tôr ami atam onnbhovtanv ti Devachi doiallai Tannench amkam bhavarta vorvim bhogunk pavoileant; ani Takach lagun Devachi mhoima amkam mellteli mhonn bhorvanso dhorun ami murgott’tanv. Titlench nhoi; dhumalleam thaun sosnnikai upzota, sosnnikaiê vorvim amchi topasnni zaun Devak ami manonk pavtanv; ani topasnnen Devak manovleanv mhonntôch, amcheam kallzamnim bhorvanso upzota mhonn zanna zaun. ami dimalleamnim murgott’tanv Amkam dil’lea Povitr Atmea udexim, Devan amcheam kallzamnim Aplo môg ôtla dekhun, bhorvanso amkam fottoina, Zorui amchean samkench kainch korunk zainaslem torui Kristan, Aplo nemlolo vêll pavtôch, khotteam pasot Aplo jiv dilo. Eka promannik mon’xa pasot legun jiv diunk konnak-ui kotthin; tori eka borea mon’xa pasot konn-êk eka vellar morunk fuddem sortolo. Punn ami patki zaunui, Krist amchê pasot melo te vixim Dev amkam Aplea mogacho puravo dita. Tachea bolidanik mornnak udexim Devak ami atam manovlelim zaleanv mhonntôch, Taka lagun, Aplea krodhantlim Dev amkam odikuch nivartolo. Ami dusman asleanv tedna tor, Aplea Putachea mornna udexim Devan amkam Aplea mogachê vengent portun ghetlim tor; amkam Aplea mogachê vengent portun ghetlea uprant, teach Aplea Putachea jivita udexim To amkam purnn taronn ditolo. Itlaenuch nhoi, punn Tachê vorvim amkam atam Aplea mogachê vengent portun ghetleant mhonn amchea Somia Jezu Krista udexim Deva sovem ami sontostanv ani murgott’tanv! Hea pasot, eka mon’xa udexim patok hea sonvsarant bhitôr sorlem ani patka udexim moronn; ani oxem, soglleamnim patok kelem dekkhun soglleam mon’xank moronn pavlem. Devan Somurt diunchê adim patok sonvsarant aslem. Somurt nasli mhonntôch, Somurt môddlea mhonn konnachoch guneanv korunk zainaslo. Tori astanam, dil’lo kaido mon’xamnim Adanva porim moddunk nastanam-i, Adanva thaun Moizesa porian mornnan somestancher raj choloilem. Adanv mhollear ieuncho aslo tea Mon’xacho purv-rupkar. Adanvachem patok ani Devachi funkea dakhoiloli doiallai, hanchê modem sôr korunkuch zaina. Eka mon’xachea guneanvan soglleam mon’xank moronn pavlem zalearui, eka mon’xa Jezu Krista vorvim somest mon’xank tea von odik subham’ponnan funkea favo kel’lem, Devachê doiallaiechem tem dennem zalem! eka mon’xachea guneanvan monxank kitem mell’lem tem, Devachea dennean monxank kitem mell’lem taka sôr korunkuch zainam! Kiteak mhonn’lear, eklea mon’xachea patka uprant zhôddti zali ani khastichem formonn poddlem, punn khub-khub guneanvam uprant, mon’xank Devak manovlelim korta tem funkea Devan dil’lem dennem ailem! Eka mon’xa vorvim, tachea opradak lagun, somestancher mornnan raj choloilem zalearui, Ekleach Jezu Krista udexim Aple subham’ doiallien Devan Apnnak manovlelim korta tim somest monxam tea von odik chodd jivitchem raj choloitelim. Mhonntôch, zoxem eka mon’xachea guneanvan somest mon’xancher khastichem formonn poddlem, tech porim, eka mon’xache Devak monovto purnn kornne udexim Dev Apnnak monovlelim korta tem funkea dennem somest mon’xank mell’lem. Eklo monis Devachê adneak khalto ravlo na dekhun sogllim mon’xam patki zalim; toxench eklo monis Devachê khuxek khalto ravun, sogllim mon’xam Devak manovlelim zatelim. Somurt bhitôr sorli ki guneanv choddon-vaddon gelo; punn zõi patok choddlem-vaddlem, thõi Devachi doiallai tachê-von odik choddli-vaddli; hê porim, zoxem patkan mornna vorvim raj choloilem, toxench atam Devachi doiallai, amchea Somia Jezu Krista udexim, amkam Sasnnik Jivitak pavoita ani amkam Devak manovlelim korun raj choloita. Mhonntôch, ami kitem mhonnchem? Devachi doiallai odik subham’ zaunchê khatir, ami patkantuch ravchem? Na ki na! Patkak meleanv tim ami koxim mhonn ami ozun patkantuch jietoleanv? Jezu Kristachea ekovottant batism ghetla titlim-im ami sogllim Tachea mornant batism ghetla mhonn nokllot tumi? Tea passot, batisma udexim, Tachea vangdda Tacheach mornnant amkam nikhipileant tem, zoso Bapan Aplê mhoimêbhorit podven Kristak mel’leantlo punorjivont kelo, toxench ami-i jivitache nove chalin ami cholchê khatir. To mela toso morun, ami Tache bori ek zaleanv zalear, To jivont zala toso ami-i jivont zaun, Tache bori ek zatelenv. Hea amchea patki soimbacho bhosm korchê khatir ani patkachea gulam’ponnantli amkam suttka mellchê pasot, amchea adlem-pornnem soimb khursar marlam mhonn ami zannonv. Kiteak meleant tim mon’xam patkachê podventlim suttleant. Punn Krista borabôr ami meleanv zalear, Tachê borabôr ami jietelenv mhon amkam bhavart asa. Kiteak Kristak Devan mel’leantlo punorjivont kelo mhonntôch, Taka ani-anink moronn na; mornnak Tacher ani-anink koslich podvi na mhonn ami zannonv. Ani oso To melo dekhun, patkak ani-anink Tacher podvi na, ani To atam jieta tem jivit sogllench Devachea ekcharant jieta. Tôr tumchê-i vixim oxench somzat ki tumi-i patkachê podvek mel’lim zaleant, ani Krista Jezu udexim Devachea ekcharant tumchem-i jieop. Hea pasot tumi tumcheam kuddicheam vondovnneank pallo diunk poddona zauncheak, tumchê mornnadik kuddicher patkan ani-anink raj cholounchem nhoi. nhoi mhonn tumchê kuddiche sande patkachea khotteponnachim hatiaram zaunk dinakat, portench zalear, mornnantlim jivim zal’lim koxim Devak tumchench somorponn korat ani tumche sande Devan Apnnak manovlelim kel’lea bhesachim hatiaram koxim Devak somorponn korat. ani tedna khoreponnim patok anink tumcher apli podvi cholounchem na, kiteak tumi Somurtichê adhin nhoi, punn Devachê doiallaiechê adhin asat. Mhonntôch kitem? Ami Somurtichê adhin nhoi, punn Devachê doiallaiechê adhin asanv dekhun, ami atam patok korchem? Na ki na! Jea konn-ekleacheô adnea pallunk tumi tumkanch gulam’ koxim ditat tedna, tea-ekleachim, zaum mornnak vhorto patkachim, zaum Apnnak monovlelim kel’lea bhesak vhorto adnea-pallnnêchim gulam tumi zatat mhonn nokllot tumi? Ekdam patkachim gulam’ zaunui, tumkam dil’lê bhavartachê xikovnnek kallzant thaun tumi khaltim zaleant mhonn Devak un-unit argam; Patkachea gulam’po-nnantlim sutton, tumi Devak man’ta toslea jivitachê chakrek lagleant. Tumchea soimbachê osoktaiek lagun, mon’xancheam chalteam utramnim uloitam: khotteponnache ani odik fuddem vhorto khotteponnache gulam koxe tumchê kuddiche sandhe vompun dil’le, mhonn’toch povitrponnak lagun Devan Apnnak manovlelim kel’lea bhesache gulam koxe tumche sande vompun diat. Tumi patkache gulam’ asleat tedna, Dev Apnnak manovlelim korta tea bhesa vixim tumi aplê sot’techim asleat. Tumkam atam loz dista team kortubancho tumi tedna koslo fôll kaddlo? Moronn xevôtt tancho. Atam patkantlim mekllim zaun ani Devachê sevek laglea uprant, tumcho fôll povitrtai ani hicho xevôtt Sasnnik Jivit. Patok dita to muxaro moronn; Dev dita tem funkeachem dennem amchea Somia Jezu Kristachea ekvottant Sasnnik Jivit. (Somurtichi ollokh asa tankam hanv uloitam dekhun), monis jivo asot porian, Somurtik tacher odhikar asa mhonn nokllot tumi, bhavam-bhoinnimnô? Oxem ek kazari bail aplo ghôv jivo asot porian, ti bail tea aplea ghôvak somurti pomonnem bandon urta. Punn to ghôv morot zalear, ti ghôv-bailechea kaidea meklli zata. Mhonntôch aplo ghôv jivo astana dusrea dadlea lagim ti vochot zalear, tika lôk pordvarinn mhonntolo; punn ticho ghôv melo zalear, ti ghôv-bailechea kaidea meklli zata, ani dusrea dadlea lagim ti kazar zait zalear ti pordvarinn zaina. Toxench, mhojeam bhavam-bhoinninmô, tumi dusreakodde, mhonngê Devak foll uttpon korchê pasot, mel’leantlo punorjivont zala Tachim tumi zauncheak Kristachê kuddi udexim tumi-i Somurti sorim mel’lim zaleant. Ami amchea mon’xasoimba pormannem jietaleanv tedna, amchem jivit mornnachê sevek upkartalem zaunk, Somurtin zagoiloleô patki vondovnneô amcheam kuddicheam sandheamnim vavurtaleô. Punn boroiloleam nemanchê adlê manddavolli pormannem nhoi, punn Povitr Atmeachê novê manddavolli pormannem ami chakri korchê pasot, Amkam bandun dovortali tê Somurtik morun, tê Somurtintlim ami atam suttleanv. Tôr kitem mhonnchem atam? Somurtuch patok, oxem mhonnchem? Na ki na! Ji mhaka patkachi ollokh mell’lea, ti Somurti udexinch mell’lea, kiteak “axa dhorum noiê”, oxem zôr Somurtin mhonnunk naslem, tôr axa kitem tem mhaka gomchem naslem. Somurti bhair patkak jivuch na dekhun, adneachi sondi dhorun, patkan sogllê torecheô axa mhojê bhitôr upzoileô. Adim, Somurt nasli tedna, hanv jivo aslom; adnea aili tedna, patkak jiv ailo, ani hanv melom. Jiv diunchê khatir dil’lê adneanuch mhaka zalear mornnak pavoilo. He adneachi ek sondi dhorun, patkan mhaka fosoilo ani adnea udexim mhozo jiv kaddlo. Mhonntôch Somurt povitr mhonn dubhav na, ani adnea-i povitr, neaii ani bori. Tôr kitem borem tench mhaka mornnachem karonn zalem? Na ki na! Patok tem patok mhonn zanna zaunchê khatir borê vostucho—mhonngê adneacho— upêg korun, patkan mhaka moronn haddlem; ani hê porim, adnea udexim patkan sogllea mapa-bhaili apli bhoikôr patki podvi choloili. Somurt atmik mhonn ami zannonv, punn hanv zalear patkachea gulam’ponnant vikun soddlolo masa-rogtacho monis. Hanv kortam tem mhaka somzonam; tôr jem borem mhaka zai, tem hanv korinam; punn jem vaitt mhaka bilkul naka, tench hanv kortam; mhaka naka tench hanv kortam zalear, Somurt bori mhonn hanv man’tam-xem zalem. Punn khorem mhonnlear, kitem kortam tem, hanv nhoi toxem zalem, punn mhojê bhitôr rigun ravlam tem patok. Jem kitem borem tem mhojê bhitôr, mhonngê mhojea mon’xasoimbant, tthikann korun ravona mhonn hanv zannom; kiteak boreachi axa dhorunk mhojea hatant asa khorem, punn tem korunk hanv xokona; mhonntôch jem borem korunk hanv axetam, tem hanv korina; punn jem vaitt mhaka naka, tench hanv kortam. Mhaka naka tem hanv kortam zalear, mhojea kallzant rigun ravlam tem patok ki tem korta; hanv ani-anink nhoi to. Hea pasot, ho nêm’ mhojea jivitant cholta mhonn hanv dekhtam: borem korunk sôdtam tedna, vaitt tench hanv vinchun kaddtam. Devachê Somurti pasot mhojem mon anondan bhoron ieta; punn mhojea mon’xasoimbant êk veglloch nêm’ hanv polletam: mhojea gineanan hanv mandun ghetam tê Somurticher to zhuz korta ani mhojea mon’xasoimbant asa tea patkachea nemacho mhaka koidi korta. Kitlo nirbhagi monis hanv! Mhaka mornnachê vatten oddun vhorta tea mon’xasoimbantlo konn mhaka nivarunk xoktolo? Amchea Somia Jezu Krista udexim Ekloch Dev! Taka vakhann’nni! Mhonntôch hi mhoji gôt: ginean aslolo monis koso Devachê Somurticho chakôr zaunk hanv kobul; punn hanv patki mon’xasoimbacho dekhun, patkachea nemacho hanv gulam’. Mhonntôch, Jezu Kristachea ekvottant asat tankam atam koslench khastichem formonn na. Kiteak Jezu Kristachea jivit dito Atmeachê Somurtin patkachê ani mornnachê Somurtintlim tumkam nivarlim. Mon’xasoimbachê osoktaiek lagun jem Somurti kodde ghodd-onaslem, tem Devan kelem: Tannem Apleach Putak dhaddlo. Ho Put, patkacho nas korchê khatir, patki mon’xasoimb gheun ailo ani patka khatir Apunnuch boli zalo. Oxem mon’xa-soimbachea patkacher Devachê khastichem formonn poddlem. Ami atam patki mon’xasoimb vondaita tê vatten nhoi, punn Povitr Atmo oddun vhorta tê vatten cholun jietanv, tem promannikponn Somurticho hetu, amche sovem pallon ieunchem kam Aplea Putak daddun, Devan kelem. Jim konn mon’xasoimbacheam vondov-nneam pormannem jietat, tancho iklo mon’xasoimbak avoddta tacheruch dovorlolo asa; punn jim konn Povitr Atmo oddun vhorta tê vatten cholunk axetat, tancho êkuch iklo: Atmeak avoddtat teô vostu. Mon’xasoimbacher iklo dovorlear, tuka mellta fokot moronn; punn Povitr Atmeacher to dovorlo zalear, tuka mellta jivit ani xanti. Monxasoimbacher iklo dovortat tim Devachim dusmanam zatat, kiteak amchem mon’xasoimb Devachê khuxek khaltem ravonam, nhoi mhonn tachean khaltem ravunk zaina. Mon’xasoim-bacheam vondovnniam pormannem choltat tanchean Devak manom nozo; punn tumchem jivit mon’xasoim-bacheam vondovnniam pormannem nhoi; Devacho Atmo tumchê sovem tthikann korun jieta mhonntôch, tumchem jivit Atmean choloilolem jivit. Khorench, jeam mon’xam sovem Kristacho Atmo na, tim Kristachim nhoi. Punn zôr Krist tumchê sovem asa, tumchi kudd patkak lagun melear-ui, Apnnak manovlelim Devan tukam korun, jivim dovrunk tumchê sovem Atmo asa. Zannem Jezuk mel’leantlo punorjivont kela, Tacho Atmo tumchê bhitor rigun asa zalear Zannem Jezu Kristak mel’leantlo punorjivont kela, Toch, tumchê sovem jietelea Aplea Atmea vorvim, tumcheô vinaxi kuddi novean jivont kortolo. Mhonntôch bhavam-bhoinnimnô, amkam kaido asa khoro, punn mon’xasoimbacheam vondovnneam pormannem jieunchem mhonn amkam mon’xasoimba sorim kaido na. Kiteak mon’xasoimbacheam vondovnneam pormannem jiexeat zalear, tumi mortelet; punn Atmeachea bollan mon’xasoimbacheam vondovnn-eanchem boll môddxeat zalear, tumkam Jivit astelem. Zankam Devacho Atmo choloita, tim sogllim Devachim bhurgim. Tumkam anink êk pavtt bhirantin bhôrta toslo gulam’ponnacho atmo tumi gheunk na; khorem mhonn’lear, tumkam Devachim apnnailelim bhurgim korta to Atmo ki tumi ghetla; Tachê udexim ‘Ab’ba!’ mhonngê ‘Bapa’, oso ami ulo martanv. Ani oxem ami Devachim bhurgim mhonn Povitr Atmo, amchea otmea borabôr, Apunnuch govai dita. Bhurgim mhonntôch ami daiji; hôi, daiji-bhurgim Devachim ani daiji-bhavbhoinn Kristachim: Tachê mhoimechim ami bhagidar zatelenv zalear, Tacheam koxttanchim-i ami bhagidar zaunk zai. Hea kallache koxtt-dogd ani Dev amkam ugddapi kortolo ti mhoima, hanchê bhitôr koslich sôr zaina, oxem mhaka dista; kiteak Devacheam bhurgeanchê prokasnnek ak’khi rochnna otrekun otrekta. Aplo xevôtt xarti pavounk rochnnechean nozo zalem tem tichêch khuxen nhoi, punn Apli ievzônn pallun haddchea bhorvanxean Devanuch oso nirnnoi ghetlo. Ho to bhorvanso: Apleam bhurgeanchea mhoimêbhorit svadhinponnant rochnnek vantto diunchê pasot, khud Dev tika kusddeponnachea gulam’ponnantli soddoun svotontr kortolo. Akhi rochnna ballontiche vollvolle ozun porian bhôgta mhonn ami zannonv; ani fokot rochnna nhoi: bogor ami-i amchêch bhitôr pirgon asanv, kiteak Devan Aplo Atmo prothom’ foll mhonn amkam dila, ani tea pasot To amkam sopurnnaien Aplim bhurgim kortolo, mhonngê amcheam kuddink suttka ditolo tea disachi vatt ami polleun asanv. Kiteak mhollear, bhorvanxean amkam taronn mell’lam; ravtanv tem dixtti poddlelem zalear, tantum bhorvanso na; tôr dixtti poddta tacho konn anink bhorvanso dhôrta? Punn dixtti poddonam tacho ami bhorvanso dhôrtanv tedna, sosnnikaien ami tachi vatt polleun ravtanv. Têch porim, ami osokt mhonnun, Povitr Atmo amchea adarak ieta. Favo tê bhaxen kitem magchem tem ami nokllonv dekhun, utramnim ucharunk zainant tosle haskar-suskar soddun, Atmo amchê khatir Apunnuch vinoti korta. Dev kallzam topasun ollkhota, ani Povitr Atmeachi axa konn ti To borem zanno, kiteak Devachêch khuxê pormannem povitr kel’leam pasot To vinovnni korta. Jim konn Tacho môg kortat ani jeam konnank Tannem Aplê ievzonnê pormannem apoileant, tanchê borabôr soglleam vostumnim Dev tanchea boreak vavurta mhonn ami zannonv. Mon’xamnim Devachea Putacho rupkar gheunchê khatir ani oso To somest bhavam-bhoinnim modlo Malgoddo zaunchê khatir, Devan tankam adim-fuddench mogan ollkhun kaddleant ani nemleant. Jeam konnank adim-fuddem Tannem nemleant, tankam Tannem apovnnem-i kelam; jeam konnank Tannem apovnnem kelam, tankam Tannem Apnnak manovlelim-i keleant; jeam konnank Tannem Apnnak manovlelim keleant, tankam Tannem mhoimevont-ui keleant. Hem sogllem dolleam mukhar dovrun, atam ami kitem mhonnchem? Dev zôr amchê vatten asa, amcher add konn asot? Aplea khaxa Putak legun Devan vattaunk na, punn amam-somestam pasot Taka dilo mhonntôch, Tachê borabôr koso To amkam sogott funkea diuncho na? Devan vinchun kaddleant tancho konn guneanv kortolo? Tim atam guneanva-mekllim mhonn khud Dev nirnnoi dita nhoi? Tôr khastichem formonn martolo konn? Khastichem formonn marpi to konn? Amchê khatir melo Jezu Krist nhoi? Itlench nhoi, To punorjivont-ui zala, ani atam To Devachea uzvea hatak bosla ani Deva mukhar amchê khatir vinoti-i korta. Mhonntôch Kristachea moga thaun konn amkam toddun kaddit? Upodre toddun kaddtele? Oddchonni vô dhumallo bi? bhuk ani vinglleponn? sonkoxtt vô torvar bi? Oxem tôr Povitr Pustokar boroil’lem asa: “Tujêch pasot amkam dis-bhôr vollvollaun martat, marunk toiar kel’leam xelliam vori amkam lêkhtat.” Punn amcho môg kela Taka lagun heam sorv ghodditamnim ami bharim zoitivont. Khorench, Jezu Krista amchea Somia udexim Devacho môg ami onnbhovunk pavleanv tea moga koddsun zaum moronnachean vô jivitachean, devdutchean vô ontralla veleô xokti ani podveo asat tanchean, sonvsarant atam ghòddta ani fuddarak ghoddon iet titleaichean, prithvê voir vô prithvê pondak asa tea sogttachean amkam toddun kaddunk koxêch bhaxen zaunchem na mhonn mhaka dubhavuch na! Kristachea ekvottant asun hanv sot uloitam, fôtt sangina; Povitr Atmea udexim mhojem ontoskornn-ui mhaka govai dita: jim masa-rogta pormannem mhojêch porjechim, team mhojeam bhavam-bhoinnim pasot, mhaka êk vhôdd khônt asa ani thar dina tosli dukh mhojea kallzant asa. Hea pasot tankam upkarot zalear, Devacho xirap mhojer poddun mhakach Krista thaun toddun kadd mhonn hanv magtalom. Tim Israelkar, tankam Devan Aplim bhurgm korun ghetleant, tankam Aple mhoiment vantto dila, tanche lagim korar keleat; Somurt tanchea hatant ghalea, Devachi bhozonn tankam xikoilea, ani tankam bhasavnneo keleat; porzapoti tanche, ani tanche thaun rogta-masa pormannem Krist utpon zala: To sogtta-sorvam poros vorto Dev, Taka sasnnachea sasnnak vakhann’ni! Amen! Devan dil’lem utor nirfôll zal’lea porim nhoi tem. Zolman Israelachê kulliechim tim sogllinch khori Israel-porza nhoi. Toxench Abrahamachê sonstichim tim sogllinch tacheô put-dhuvô nhoi, punn “Heach somoiar Hanv portun ietolom ani tedna Sarak bhurgo zatolo.”, heam utramnim bhasavnni kel’li asa dekhun, “Izaka vorvim tujê sonstik tujem nanv melltolem.” Mhonngê masa-rogta pormannem zolmol’lim bhurgim Devachim bhurgim nhoi, punn bhasavnnê pormannem zolmol’lim bhurgim ki khori sonsôt mhonn lekhun ietelim. Kiteak bhasavnni heam utramnim kel’li asa: “Heach somoiar Hanv portun ietolom ani tedna Sarak bhurgo zatolo.” Itlench nhoi, eklea ghova, amhchea purvoza, Izaka udexim Rebek’kanui dogam zonvlleam putancho gorbh samballolo tedna oxench ghoddlem. Te zolmunchê adim ani tãnnim kitench borem vô vaitt korchê adim, kornneam udexim nhoi punn Dev Apunn korta tea apovnnea udexim, Aple venchnnukecho xevôtt pallon ieunche khatir, Devan tika mhonn’lem: “Vhoddlo bhav dhaktteachi chakri kortolo.” Hench dakhoun, Povitr Pustokar oxem boroil’lem asa: “Jakobacho Hanvem môg kelo, punn Ezaucho Hanvem dvês dhôrlo.” Tôr kitem mhonnchem? Dev onit korta mhonn sangchem? Na tem na! Tôr Moisesak To oxench sangta: “Mhaka zai tankam Hanv doia dakhoitolom, ani Mhaka zai tanche Hanv churchure dhôrtolom.” Mhonntôch mon’xam kitlim axetat vô proitn korun kitlim khorxetat, hacher kãich dhòrlolem na, sogllem fokot doiallai dakhoito Devacher dhòrlelem asa. Tôr Povitr Pustok Faraok sangta: “Tujê sorim Mhoji podvi dakhounchê khatir ani Mhojem Nanv sogllea sonvsaracher porgott zaunchê pasot, Hanvem tuka mud’dom’ upzoila.” Mhonntôch Apnnak zai tanche To churchure dhôrta ani Apnnak zai tanchem kalliz To nibor korta. Toxem zalear, tum mhaka mhonnxi: “Koso Tachean konnachoch guneanv korum-iet? Tôr Konnachean Tachê khuxecher add vochunk zata?” Mon’xa, Deva lagim vad-vivad korunk tum konn ga? Ek matiechem aidon apnnak kel’lea kumbharak “Tunvem mhaka hê baxen kiteak kelãi?”, oxem vichartelem? Êkêch matiechem ek aidon kherit somoiar vaprunk ani dusrem sadharonn upegak korunk kumbharak aplê matiecher sot’tea na kitem? Devan kelam tem-i toxench. Aplo krôdh dakhounk ani Apli podvi porgôtt korunk Tachi khuxi asli. Tea pasot, Aplea krodhachim hatiaram kelea uprant, zancho To nas korunk sôdtalo, tankam Tannem tokôs kaddun sõslim. Dusrê vatten, Aplê mhoimechi girestkai dakhounk sôdtalo dekhun, amkam Tannem adinch thaun Aplê mhoimek toiar kelim ani heach pasot Apli doiallai amkam bhogunk dili. Tannem apoiloli porza ti ami, fokot Judêv lokantli nhoi punn videxi-i lokantli. Tôr Hoseiasachea pustokar Toch oxem mhonnta: “Mhojea porza nhoi asli tika mhoji porza mhonntolom: Ani Mhojea mogachi nhoi asli tika: Mhojea mogachi mhonntolom!” Ani zõi tankam Hanvem mhonnlelem: ‘Tumi Mhoji porza nhoi!’, teach zagear tankam lôk oxem pachartolo: ‘Him jivea Devachim bhurgim!’ ” Ani Israela vixim Izaias oso arddota: “Israelacheam bhurgeanchi sonkia vellechê renvê itli zait zalear-ui, fokot eka urlolea zomeak soddvonn mellteli, kiteak veginchê vegim Sorvespor Aplem xikxechem formonn prithumecher sadhun haddtolo to haddtoloch.” Izaiasan toxench bhakit korun sanglem: “Dolbharanchea Sorvesporan amchê modleam thoddeam zannank rakhun dovrunk naslim zalear, ami Sodoma sarkim zavpachim, Gomorra bhaxen ami zaun vochpachim.” Mhonntôch, ami kitem mhonn-chem? Itlench: mon’xank promannik korta tem Devache doiallaiechem nitivontponn videxi raxttram sodinaslim; punn tem tankam bhavarta vorvim mell’lem. Portem, Israel-porza apunn Devak manovleli zaunchea monan kaide palltali, punn oxem korun ti Devak manovleli zaunk pavunk na. Kiteak na? Kiteak ti bhavartacher nhoi, punn apleanch kornneancher patietali. Addkhôll zaunk Devan tanchê vatter ubo kel’lea adlloto fatrak adllon tim poddleant. Povitr Pustokar oxem boroilolem asa: “Polleiat, Xionant Hanv lokachê vatter addkhôll zavpacho êk fatôr ubo kortam, mon’xam adllon poddtat toslo fatôr; punn tacher bhavart dovortat tim lojek sampoddchim nant.” Bhavam-bhoinnimnô, tankam taronn mellum mhonn mhojea kallzant hanv otrektam ani Deva lagim magtam. Deva sorim tankam khotkhotit hurba asa, punn ti goirsomozacher dhòrleli asa mhonn hanvuch govai ditam, Kiteak, Dev Apnnak manovlelim korta tea nitivontponna vixim ollok na zaun ani aplem khaxa dusrem nitivontponn sthapunk sodtana, tannim Devachem nitivontponn manun gheunk na. Punn Kristan Somurt sompadnnek pavoili ani atam bhavart dhôrtoleam somestank Devachem doiallaiechem nitivontponn mellta. Somurti thaun ieta tea promannik-ponna vixim Moizesan oxem boroilam: “Somurt palltat tim tichê vorvim jivit ghetelim.” Punn bhavarta udexim Dev Apnnak manovlelim korta tea dennea vixim to oxem sangta: “Tujeach monant oxem mhonninaka: ‘Konn mhonn voir sorgar choddun vetolo?’ – mhonngê Kristak sokla denvoun haddunk – vô ‘konn mhonn sokla patallant denvun vetolo?’ - mhonngê Kristak mel’leantlo utthounk. Tôr Povitr Pustok mhonnta: “Utor tuka laginch asa: tujea tonddant ani tujea kallzant.” Hem utor, ami porgôtt’tanv tem bhavartachem utor. Khorench, Jezu Somi mhonn tujea tonddan ucharxi ani Devan Taka mel’leantlo punorjivont kelo mhonn kallzant thaun bhavart dhôrxi zalear, tuka taronn melltelem. Kallzant thaun bhavart dhorun ami Devak manovlelim zatanv; tonddan ucharun amkam taronn mellta. Kiteak “Tacher bhavart dovortat tim sogllim kodinch lojek sampoddchim nant”: oxem Povitr Pustok sangta. Mhonntôch Judev ani Grik mon’xam modem koslich ontôr anink na; kiteak soglleancho Somi ekloch. Apnnak ulo martoleam somestank pavunk khup girest To, kiteak Povitr Pustokar boroil’lem asa tea pormannem, “Somiachem Nanv gheun Taka ulo martat titleank-ui taronn melltelem.” Mhonntôch tannim Tacher bhavart dhorinasla zalear, Taka ulo martelim koxim? Ani Tachi khoboruch aikonasleam zalear, bhavart dovortelim koxim? Konnench sondêx porgôttinasla zalear, aikotelim koxim? Ani tankam dhaddlea xivai porgott kortelim koxim? Tôr Povitr Pustokar oxem boroilolem asa: “Xubh khobor porgôtt’tat tanchim panvlam kitlim sobit!” Punn xubh khobor sogllinch mandun ghenant. Heach pasot Izaias mhonnta: “Sorvespora, ami porgôttlam tem konnem mandun ghetlam?” Mhonntôch sondêx kanar poddun, bhavart utpon zata, ani sodex kanar poddop Krist-porgott’ne vorvim. Tôr hanv vichartam: to sondêx tanchea kanar poddunk na bi? Dubhava virêt poddla, karonn “Xekan’xek prithumecher tancho tallo gazlo, sonvsaracheam ximam porian tancho sondêx pavlo.” Anink ek vichartam: Israelachê porjek hea sondexacho ôrth mell’lo na bi? Khud Moizes apunnuch poilo zobab dita: “Raxttr legun nhoi toslea lokachi tumkam nattkai zaunk kortolom; eka murkea raxttracher tumcho rag pettonk kortolom.” Ani Izaias oxem porian mhonnunk pattim sorona: “Mhaka sodinaslim tankam Hanv mell’lam, ani Mhoji khobor kaddinaslim tankam Hanvem Mhojem dorxon dilam.” Ani Israel-porjê vixim to mhonnta: “Mhojer bhavart dovrina punn portench Mhojer kolpota toslea lokak dis-bhôr Hanvem Mhoje hat vistarleat.” Tôr vichartam: Devan Aplê porjek soddun dili zait! Kodinch zaum nozo! Tôr hanv-ui Israelkar, Abrahamachê sonsticho, Benjaminachea kullacho. Apnnem vinchun kaddlele porjek Devan soddun diunk na. Povitr Pustok vachtana, Deva mukhar konn baxen Elijan Israel porjecho guneanv kelo to tumkam ugddas na? Tannem mhonn’lem: “Sorvespora, Tujeam provadiank tãnnim jivexim marle ani Tujeô vedi moddun uddoileô. Urlam to ekloch hanv, ani mhozo-i zalear te jiv kaddunk sôdtat.” Ani Devan taka kitem zobab dilo? “Baala mukhar dimbi moddunk na tosle sat hozar dadle vinchun Hanvem kuxin kaddun Mhaka dovorleat.” Toxench atam-i Devachê doiallaien vinchleleancho êk urlolo lhan zomo asa. Favo naslele Devache doiallaiek lagun hem ghodd’ta ani nhoi tanche koslei kornnek lagun. Devache doiallaie bogor tem ghoddum nozo. Mhonntôch kitem? Israel-porza sôdtali tem tika mellunk na. Vinchun kaddleleank tem mell’lem, punn heranchim kallzam nibor zalim. Povitr Pustokar oxem boroilelem asa: “Devan tankam zodd monachim keleant; aicho dis porian, Devan tankam dolle dile punn tankam dischem na, kan dile punn tankam aikom ieunchem na.” Toxench David mhonnta: “Tanchem jevonn tankam ek fas zaum dusreank manddlelea zallant tinch farom, dusreank manddleleam addkhollink adllon tinch khala poddum, dusreank ghal’li birmôt tancheruch poddum. Tankam dixtti poddona toxem tancheam dolleancher kallôk ieum, tancho patticho konno sarko bagovlolo urum.” Tôr hanv vichartam, tim pãi adllon poddleant tim, tanchem nisonttonn zaunchem mhonn adllon poddleant tim? Kednanch na! Punn tanchea guneanvak lagun videxiank taronn mell’lem, ani Judevamnim atam hurben tanchi dêkh gheunk zata. Tanchea guneanvan akhem mon’xakull girest zalem zalear ani tanchea ovisvaxiponnan videxiank subham’ axirvad mell’lo zalear, sogllo Judêv lôk bhavart dhorunk pavtolo tedna somestancher denvtolo to axirvad kitlo odik vhôdd to! Tôr tumkam, videxiamnô, oxem sangtam: hanv videxiancho apostl mhonntôch, mhojeam Israel-porjentleam bhavam-bhoinnim modem nattkai vaddoun, tanchê modleam kãi zannank taronn favo korche mhoje sevent mhaka obhiman bhogta. Tim bhavarta thaun koddsoron mon’xakullak zôr Deva-xim ieunk favo zalem, tim apunuch bhavart dhorun Deva-xim portun pavtelim tedna, kitem mhonnchem? Khorench, mel’lim mon’xam novean jivont zaleant mhonnpachem! Poilench mhonn, Devak sonv-skarl’lem, mutt-bhôr kaddl’lem pitt povitr zalear, sogllench mollun toiar kel’lem pitt povitr zalem. Toxench Devak sonvskarl’lim, rukhachim pallam povitr zalear, tache khande-i povitr sonvskarlele zale. Ballgil’lea eka olivache thodde khande pendun kaddun, ani tumi, eka zonglli olivacho khando zal’lea porim, tumcho garf korun atam ballgil’lea olivachea palla thaun choddlolê puxtticho vantto mellunk, tumkam tachea bhitôr rigoileant, Toxem zalear, moddun uddoileleam khandeam mukhar mhonngê Judevam mukhar tumi boddai dakhoinakat; tumi boddai dakhoixeat zalear, tumi pallak ghottai-puxtti dinant, pall ki tumkam ghottai-puxtti dita mhonn monant dhorat. “Mhaka garf korun olivak lavchê khatir, te khande pendun kaddleat”, oxem tumi mhonntelet. Hôi, tem khorem. Tãnnim bhavart dhôrlo na dekhun, tankam pendun kaddleant; tumi ghôtt ubim asat tim tumchea bhavartak lagun. Mhonntôch hachê vixim gorvan bhoronakat, bhirantin cholat. Devan zôr soimbacheam khandeank soimba pormannem vaddonk dovorle nant, tôr tumkam-i To vaddonk dovrinam zait. Hea pasot, borabôr Devachê dulôbaiê ani khôraiê vixim bariksannen ieuzun polleiat. Bhavart dhorunk na tanche sovem khorai; punn tumche sovem dulôbai, tumi Tachê dulôbaient rauxeat zalear; na zalear, To tumkam-i moddun kaddtolo. Judêv lokan aplo onbhavart soddun dilo zalear, tankam To portim bhitôr kaddtolo; kiteak novean bhitôr kaddunk Devak tank asa. Zonglli olivache fantte tumi, tori astanam Tannem tumkam tumchê zati bhair ballgil’lea olivak garf korun laileant; toxem tôr, je zatin ballgil’lea olivache khande asle, te tanchea khaxa olivak porot lavunk Devak kitlem odik sompem! Sorv videxi raxttrancho lok bhitor sortit porian, Israel porjecho ek vantto aplea vadeacho zaun gelo, tea gutta vixim tumi nennar zalelim mhaka naka, bhavam-bhoinnimnô, na zalear apunnuch xannim mhonn chintun tumi tumchech sombondim murgott’telet. Ani hê bhaxen, “Xiona thaun ietolo Toronn-Dinnar, Jakobachea Ghorannea thaun tanchi obhokti To pois kortolo. Jedna tanchim patkam kaddun uddoitolom, tedna Hanv tanchê kodde ho korar kortolom.”, oxem boroilolem asa tea pormonnem Dev akhea Israelak soddvonn ditolo. Bore Khobre sobondim, tãnnim ti manun gheunk na dekhun, tumam-videxeank lagun Judêv lôk Devacho dusman zalo tori tim vinchun kaddloli Devachi porza mhonntôch, tancheam purvozank lagun, tim vixexponnim Devachê chôdd opurbaiechim. Karann, dil’lim dennim Dev pattim ghena, zankam apoileant tanchem apovnnem To pattim kaddina. Zoxem, tumi-i eka vellar Devacheam adneank khaltim nasleat, punn Judêv lôk Devak khalto na zalo dekhun, tumam videxeank atam Tachi doiallai favo zali; toxench, tumam videxeank favo zal’li doiallaiê udexim, tankam-i ti Devachi doiallai favo zaunchê khatir, Judev lôk atam Devak khalto na. Soglleank Apli doiallai dakhounchê khatir, sogllim mon’xam Devacheam adneank khaltim zaina zaunk, apnnench kel’lê hê bond-khonnint poddunk Devan tankam nirmilem. Kitlo mhonn khôl Devachê girestkai, Tachê zannvaiechi ani Tachea gineanachi Kitli mhonn kholai! Tacheam nirnnoiancho koso mhonn tthav gheuop! Tacheô vattô koxeo mhonn somzop! “Sorvesporachem mon konn tori zanno zala? vo Taka budh diupi konn tori asa? Taka konnem adim-poilim dennem dilem, dekhun tacho upkar Devan farik korcho poddlo mhonn asa?” Sogllem Tachê koddsun ieta, sogott Tachê udexim ani Tachêch pasot asa. Taka sasnnachea sasnnak mhoima! Amen! Mhonntôch, bhavam-bhoinn- imnô, Devachê vhôdd konnva-llaiecho ugddas korun, tumchê lagim hanv magtam tem hem: povitr ani Devak man’ta tosli êk jivi boli koxi tumchench Taka somorponn korat – tumchi khori bhokti mhollear hich zaunchi. Hea atanchea sonvsaracheam nemam pormannem tumi cholum nakat; punn, zoxem Devan tumchea monachi novsornni kelea, toxench tumchea jivitachi chal-ui sarki novi zaum-di. Oxem Devachi khuxi konn ti, kitem borem, kitem Taka man’ta, ani kitem sopurnn tem tumi ollkhunk pavtelet. Karann, favo tachê poros odik tumchêch vixim chintinakat; punn, Devan mapun dil’lea bhavarta pormannem, zonn-eklean moriadin aplem mol korchem mhonn mhaka Devan funkea dil’lê doiallaiê udexim, tumkam zonn-ekleak sangtam. Zoxem amchê kuddik sobar sandhe asat, punn soglle sandhe tench kam’ korinant; toxench, ami sobar zannam zaun-ui, Krista sovem amcho ekchar zal’lean, ami êkuch kudd, ani amchê-modlo zonn-eklo hê kuddicheam dusream soglleam sandheank zôddlolo asa. Devan zonn-ekleak dil’lê doiallaiê pormannem, amkam veg-vegllim dennim asat: Devacho sondêx diunchem dennem zalear, ap-aplea bhavartachea mapa pormannem tacho upêg korcho; sobhechi seva korchem dennem zalear, zotnaien ti seva korchi; xikovpachem dennem zalear, fikirin xikounchem; dusreank dhir diunchem dennem zalear, hurben dhir diuncho. Dusreank kitem-i ditai tedna, udar monan di; tuka dusreancher odhikar dil’lo asa zalear, bhar gheun kaido pall; doiall kornneô kortai tedna, hanstea tonddan teô kôr. Tumcho pritimôg dhông-naslolo zaum-di. Vaittacho dvês dhorun, borem tench korit ravat. Khorim bhavbhoinn mhonn, moipasan ekamekachi opurbai korun dakhoiat; apnnam poros chôdd dusreank man diat. Sogllea monan, besarmai korinastana, kallzachê hurben Somiachi seva korat. Tumkam bhorvanso asa mhonnun khuxal ravat; koxttam-dogdamnim thir ravat; thambonastanam magnnem korat; gorjek sampoddleleam tumcheam bhavam-bhoinnink modôt korat; vattsuran udarponn dakhoiat. Tumkam dhumallo diteleank axirvad diat: hôi, axirvad mhonntam, tancher xirap ghalum nakat. Khuxal asteleam borabôr khuxal zaiat; dukhest asteleam borabôr dukhest zaiat. Soglleankuch êkêch toren manan vagoiat. Gorvan fulon bhonvum nakat, punn lhanank-khalteank lagim gheiat. Apunnuch xannim mhonn chintinakat. Konnakuch vaitt vaittan farik korinakat, punn soglleam mon’xanchê nodrek kitem vortem tem korunk sôdat. Ghòddta zalear, soglleam lagim xantin jieunk tumchê kodde zata titlem korat. Mogacheamnô, peleachi sudd gheunk sodinakat, farikponn ghevpi Dev asa. Povitr Pustokar oxem boroilelem asa: “Farikponn ghetolo to Hanv; diunk zai tem ditolo to Hanv, uloita to Sorvespor.” Anikui oxem boroilelem asa:”Tuzo dusman bhukela zalear, taka jevunk di; tanela zalear, taka pieunk di; kiteak oxem korun tum taka apleam kornneanchi loz bhogo-xi kortoloi.” Vaittak tujer zoit vhorunk dium naka, punn borem tem korun vaittak haroi. Sogllim mon’xam sorkari odhikareank khaltim ravchim, kiteak Devan dilea xivai odhikar na, ani team odhikareank Devanuch nemleat. Mhonntôch, jim konn odhikar choloitoleank virôdh kortat, tim Devachê sthapnnek virôdh kortat; virôdh kortat tim apunnuch apnnancher khastichem formonn oddun haddtat. Borem korteleank nhoi, punn vaitt korteleank ki odhikareanchi bhirant asunk zai. Odhikareank bhienastanam asunk sôdtai? Tôr borem tem kôr ani tanchi tuka vakhann’nni asteli. Tujea boreak tim Devachi seva kortat. Vaitt mat korxi zalear bhieun rav, kiteak khast launk niz tanchi podvi; tim Devachi seva kortat dekhunuch, vaitt kortat tankam Devachi khast launk tim Devache chakor. Mhonntôch, Devachea krodhachê bhirantikuch lagun nhoi, punn tumchea ontoskornnak lagun tumi odhikareank khaltim ravchem poddta. Tumi dôndd farik kortat tachem karonn tench; kiteak sorkari mon’xam ghas gheun ho aplo kaido palltat tedna, tim Devachi seva kortat. Zonn-ekleak farik korchem asa tem taka farik korat: dôndd farik korunk zai taka dôndd farik korat; xidav farik korunk zai taka xidav farik korat; bhidda dhorunk zai tanchi bhidda dhôrat; man diunk zai tankam man diat. Konn eklo peleacho mog korta tannem somurt pall’lea dekhun, peleachea moga bhair konnacheach kosleach rinnant ravonakat. Heo adnea: “Pordvar korum noiê; jivexim marum noiê; chorum noiê; axa dhorum noiê; ani asat titlêo her soglleô adnea hê êkêch adnent attaploleô asat: “Tuzo môg kortai toso tujea peleacho kôr.” Môg peleak kãich vaitt korina; mhonntôch, jim konn môg kortat, tim Somurt sopurnnaien palltat. Kall pavlo mhonn tumi tôr zannont; nhidentlim utthcho vogôt zalo. Ami bhavart dhôrlo tea disa poros amchi soddvonn atam odik lagim asa. Rat sorot aili, dis lagim pavlo; dekhun kallokacheô vaitt kornneô soddun dium-ia ani zhuzachim hatiaram gheun disa-uzvaddacheam kornneank lagum-ia. Disa-uzvaddak sobta toxem, mannsugen ami cholum-ia; mouza naka, bebdikai naka, pozoddponn vô bemoriad naka, zhogddim ani nattkaiô nakat. Tumchea patki soimbacheam vondovnneam pormannem cholum nakat; punn tancher zhuz korunk, khud’ Somia Jezu Kristak chittkun ravat. Bhavartant ghott nhoi tankam lagim gheiat, punn tancheam khasgi motanchê babtint vad korinakat. Konn-konn aplea bhavarta pormannem apnnanchean sogllem khaum-ieta mhonn somzotat; punn dusrim, osokt tim, fokot xak-bhaji khatat. Jim konn apnnanchean kitem-i khaum-ieta mhonn somzotat, tãnnim kitem-i khainant tanchi beporva korchi nhoi; toxench jim konn kitem-i khaunk toiar nant, tãnnim kitem-i khatat tanchi zhôddti korchi nhoi, kiteak Devan hankam mandun ghetleant. Ani tum, dusreacheam chakranchi zhôddti korunk tum konn? Tim ubim asat ki bhi poddleant tem tancheach dhonian polleunchem; ani tim ubim ravtelinch, kiteak tankam ubim dovrunk Somiak podvi asa. Konn-konn disam modem ontôr kortat; dusrim soglle dis ekach mhotvache mhonn dhôrtat. Zonn-eklean ap-apli khatri korun gheunchi. Disam modem ontôr kortat tim Somiachea manak ti ontôr kortat; ani kitem-i khatat tim Somiachea manak khatat ani apunn khatat tea pasot Devak dhin’vastat. Toxench kitem-i khainant tim Somiachea manak khainant ani apunn khainant mhonn Devak dhinvastat. Amchê bhitorlim konnuch apnnan-chêch khatir jienant, ani konnuch apnnanchêch khatir moronant. Ami jivim asanv tim Somia khatir jietanv, ani morun vetanv zalear, Somia khatir mortanv. Mhonntôch, zaum jivim zaum melelim, ami Somiachim. Heach karannak lagun, mhonngê morun geleant tancher, toxench jivim asat tancher, Apnnem Aplo odhikar cholounchê pasot, Krist melo ani punorjivont zalo. Tôr kiteak mhonn tum tujea bhavachi vô bhoinnichi zhôddti kortai? Ami sogllim Devachea neai-asona mukhar ubim ravteleanv. Kiteak Povitr Pustokar oxem boroilolem asa: “Mhojea jivachean — uloita to Sorvespor – sogllim Mhaka dimbi môddtelim; ani soglleô jibô Devak mhoima diteleô.” Mhonntôch, amchê bhitorlea zonn-eklean ap-apnnacho hixôb Devak diuncho poddtolo. Hea pasot, ami ekamekachi zhôddti ani-anink korchi nhoi; portench zalear, khõicheach bhavachê vô bhoinnichê vatter addkhôll ghalun tankam sokla uddoina zaunk vô patkant poddunk tankam soêg dina zaunk tumi tharav gheuncho. Somia Jezuchea ekcharant asun hanv hem sogllê khatren zannom: koslich vôst apnnapinch mhelli nhoi, punn ti mhelli mhonn chint’tat team mon’xank ti mhelli. Jevnna-khanna udexim tuzo bhavak vô bhoinnik dukhoilea zalear, tunch pritimogan cholonãi. Jea bhava vô bhoinni pasot Krist mela, tea bhavacho vô bhoinnicho tujea jevnna-khannak lagun nas zaunk dium naka Jem kitem borem mhonn tumi dhôrtat, tachem konnuch vaitt ulounk pavum noiê. Kiteak Devachem Raj mhonn’lear, khann-pivonn nhoi; punn Dev amkam Apnnak manovlelim korta to amcho bhês ani Povitr Atmeachea ekcharant ami bhogtanv ti xanti ani sontos. Kiteak hê ritin Kristachi seva kortat tim Devak manovtat ani mon’xam modem borem nanv zôddtat. Mhonntôch, xanti bhogunk ani ekamekak dhir diunk pavoita tê vatten cholum-ia. Jevnna-khannak lagun, Devan kela to vaur padd korinaka. Jevnna-khannacheô soglleô vostu xud’dh, khorem; punn omkem tem khaun peleak patkant ghaltai mhonn tuka dista zalear, tem ki vaitt. Mas khainastana, vô soro pienastana, vô tujea bhavak vô bhoinnik patkant ghalta tem korinastam ravlear odik borem. Jem tum khatren manun ghetai, tem tujê bhitôr Deva mukhar samball. Jeam konnank apunn kortat tem aplea mona pormannem sarkem asa mhonn dista, tim mon’xam bhagi. Apunn khatat tachê vixim dubhav dhôrtat tim Deva mukhar guneanvkar zatat, kiteak tanchi kornni bhavartachê khatrecher dhòrloli na, ani bhavartachê khatrecher dhòrlelem na tem sogllem patok. Ami ghott asanv tannim, osokt asat tancheô osoktaiô sõsun gheunk amcho kaido; amchich khuxi ami korchi nhoi. Bhavam-bhoinnink bhavartant ghott korchê khatir tankam kitem borem tem polleun, zonn-eklean dusreank man’ta tem korchem. Tôr Kristan-ui Apnnakuch man’ta tem korunk sôdlem na. Portench zalear, Povitr Pustokar boroilelem oxem asa: “Tuka kênddtat tancheô kênddnneô mhojer poddleô.” Jem sogllem adim boroun dovorlam, tem amcho bhorvanso upzounk boroilam, kiteak Povitr Pustokar boroilelem asa tem amkam thir ravunk xikoita ani dhir dita. Tumi Krista Jezucho pattlav kortat dekhun, sosnnikaiechea ani ghottaiechea Devan tumkam tumchêch modem, eka monachim korum; oxem tumi borabôr eka tallean Devak, amchea Somia Jezu Kristachea Bapak, vakhannunk pavtelet. Mhonntôch, zoxem Kristan tumkam moipasan lagim haddleant, toxench, Devak mhoima diunchê pasot, tumi-i ekameka thãi moipaxi zaiat. Hoi, hanv tumkam sangtam: porzapotink kel’leo bhasavnneo visvasponnan pallche khatiruch nhoi, bogor vedexeamnim Devak Tache doiallaie pasot vakhannche khatir, Krist sunot kel’leam Judevancho chakor zalo. Tor Povitr Pustok sangta: “Hea pasot raxttram modem Tuka nanvaddtolom, Tujea Nanvachea manak stotram-gitam gaitolom.” Ani dusrea eka zagear oxem sangta: “Raxttramnô, Tachê porjê borabôr anondbhorit zaiat.” Ani anink êkê kodden oxem sangta: “Somest raxttramnô, Sorvesporak vakhannat; sorvoi porzamnô, Taka nanvaddat.” Tea bhair, Izaias-ui mhonnta: “Jes’sechem Pall ubem zatelem, raxttrancher odhikar cholounk To dixtti poddtolo: Tacher raxttram aplo bhorvanso dovortelim.” Bhorvanso dita to Dev tumchea bhavartant tumkam anondan ani xantin bhorum; oxem Povitr Atmeachea bollan tumcho bhorvanso odik-odik vaddot vochum. Mhojeam bhavam-bhoinnimnô, tumchê vixim mhaka mhojea monant kosloch dubhav na: tumi khorench borim mon’xam, soglleachi tumkam bori ollokh asa, ani hea pasot tumchean ekamekak budh diunk zata. Devan mhaka dil’ea doiallaieachea hea dennaek lagun,tumkam novean ugddas korunk, mhonnun thoddê kodden kalljidarponnan hanvem tumkam boroilam. Videxean-chem somorponn Devak man’ta toslem ani Povitr Atmean sonvskarlelem zaunk, Devachi bori khobor porgottunk, iadnikponnache zababdaren, videxeank Jezu Kristacho hanv sevok zaunk, Tôr, hanv Deva pasot vavurlam tê vixim, Jezu Kristachea ekvottant mhaka obhiman bhogunk nimit asa. Videxeank Devak khaltim korunk, mhojeam utram ani kornneam vorvim, jem Kristan kelam, tachi mat khobor hanv dhir dhorun sangtam: mhoje udexim Tannem vhodd-vhodd khunna ani vismitam kelim ani mhojê sovem Devachea Atmeachi xokti fankoili. Oxem Jeruzalea thaun Ilirikuma porian bhonvun kaddun Kristachea Xubvor-tomanachi hanvem porgottni kelli. Punn, “Zankam Tachi khobor porgott zaunk na, tim Taka polletelim; ani zãnnim Tachê vixim aikunkuch na, tim somzotelim.”, Oxem Povitr Pustok sangta tea pomonnem, Her dusreanche buneadir hanvem bandina zauche pasot, zõi Kristak porgottinasla, thõi bori khobor porgottunk hanvem mhozo hetu kela. Heach karannak lagun, tumche-xim ieunk, zaite pauttim addvon urlam. Punn atam heam ganvamnim mhozo vaur korun zala, ani sobar vorsam thaun, tumchê sorxem ieunk, mhaka axa aslea, te khatir, Ispaniek hanv vochon tedna, vatter tumkam bhett diunk sôdtam. Ani tumcho sangat thoddo vêll bhôglea uprant, fuddem vochunk tumi mhaka adar diteleat mhonn ravtam. Punn atam sodeak, Jeruzaleant asteleam Devacheam bhoktanchi seva korunk hanv thõi vochunk asam. Jeruza-leacheam Devacheam bhoktantleam gorib-dublleam pasot êk bhavponnachi vorgonni zomoun dhaddunk Maxe-doniek ani Akaient asleleam povitr-sobhamnim udar monan tharailam. Hôi, oxem hãnnim ap-khuxen tharailam, punn khorem mhollear tim tanchea rinnant asat; kiteak tancheam atmik denneamnim bhavarti videxiank vantto mell’la mhonntôch, hea sonvsaracheam denneamnim tankam bhav-bhoinnponnan modôt korun videxi bhavarti ek rinn farik kortat. Hem kam’ sompoitôch ani zoma kel’li ani mhozo xik’ko asleli akhi vorgonni tanchea hatant dilea uprant, hanv tumchê vatten sorun Ispaniek vetolom. Tumchê-xim ietolom tedna, Kristachea axirvadachi bhorti gheun pavtolom mhonn mhaka khatri asa. Judeiant ravtat ani amcho bhavart manun ghenant team Zudevanchea hatantlo hanv suttom mhonn ani Jeruzaleant hanvem korchi asa ti seva Devacheam bhoktank manche khatir, ani oxi, Devachi khuxi zalear, tumchê sorxem khuxalkaien ieun tumchê sangatim mhozo jiv somadhan zaunk, Bhavam-bhoinnimnô, mhoje khatir, amchea Somia Jezu Kristachea nanvan, ani Povitr Atmean kallzamnim ghalta tea moga pasot, mhojea vangdda ravun ani khotkhotit magnneamnim Devak vinoti korunk, hanv tumkam ulo kortam. Xanti dita to Dev tumam-somestam sovem asum. Amen. Febe bhavartant amchi bhoinn mhonn tumkam tichi ollokh korun ditam. Kenkreiant asa tê povitr-sobhechi ti sevika. Somiachea nanvan Devacheam bhoktank sobta toxem tika borê bhaxen gheiat; ani tumchi tika kosli-i goroz poddot zalear, tika adar diat, tôr sobar zannank ani mhaka-i ti pavlea. Priskek ani Akuilak hanvem vicharlam mhonn sangat; Jezu Kristachê sevent tim mhojim bhagidaram. Mhozo jiv rakhunk aploch jiv sonkottant ghalunk tim pattim sorunk nant; dekhun hanvuch nhoi, punn videxeancheô soglleô povitr-sobha tanchea upkarant asat. Tanchea ghorant zomta tê povitr-sobhek-ui mhozo nomoskar. Epenetak, mhojea ixttak, hanvem vicharlam mhonn sangat; to Aziechea prantan Kristak dil’lem prothom’ foll. Mariek mhojem noman; tinnem tumchê pasot zaito vavr kela. Andronikak ani Juniusak mhozo manacho nomoskar; te mhojê bhaxen Judêv porjentle ani mhojea vangdda te bondkhonnint asle; te nanvvoste dhormdut asle ani mhojê adim Kristachê pattlavdar. Ampliatusak noman: Somia sovem to mhozo chôdd mogacho ixtt. Kristachê sevent amchea sohovangddia Urbanak ani Stakusa, mhojea mogachea ixttak, noman. Apel’lesak noman: Kristacho apunn visvaxi sevôk mhonn tannem dakhoilam. Aristobolus hachea ghoranneantlea zonn-ekleak noman. Herodionak vicharlam mhonn sangat: mhojê bhaxen to-i Judêv. Somiacho pattlav kel’leam Narxizachea ghorann-eantleank noman. Somiachê sevê-chakrent vaur korpeam, Trifenak ani Trifosak mhozo nomoskar. Perxis, mhojê chôdd mogachê ixttinnik, noman: tinnem-i Somia khatir khup vavr kela. Somiachea ekvottant vinchlelea sevoka, Rufusak,ani tachê avoik mhozo môg diat: ti mhaka aplo put koso ballgita. Axinkritus, Flegon, Hermes, Patrobas, Hermas, hankam ani tanchea vangdda asleleam amcheam bhavam-bhoinnink hanvem tancho ugddas kela mhonn sangat. Filologusak ani Juliek, Nereusak ani tachê bhoinnik, toxench Olipasak, ani tanchea vangdda asleleam Devacheam somest bhoktank noman kortam. Somiachea ekvottant tumi bhavbhoinn mhonnun, ekamekak tumchea mogachi khunna diat. Kristacheam soglleam povitr-sobhancho tumkam maiêmogacho nomoskar. Bhavam-bhoinnimnô, jim konn tumchê modem futti ghaltat ani tumi ghetlolê xikovnnechê vatter addkholli ghalun tumkam bhavarta thaun koddsoraunk sôdtat, tanchê vixim chotur ravat ani tankam pois dovrat mhonn hanv tumchê lagim magtam. Oslim mon’xam Krista amchea Somiachim nhoi, bogor aplea pottachi chakri kortat. Godd-godd ani bhulov-nnecheam utramnim tim nennteank fosoitat. Tumi bhavartak khaltim mhonn sogllê kodden khobor pavlea dekhun, tumchê vixim hanv dhadoxi; punn tumi fokot borea vixim xannim ani sogllea vaitta vixim nenntim zaiat: itlench mhaka zai. Ani xanti dita to Dev Soitanak veginch tumcheam pãiam tolla ghalun mostitolo. Jezu Krist amcho Somi tumkam sodanch Aplem bholeponn dakhoum mhonn magtam. Mhozo sohokari Timot tumkam noman korta; toxench Luxius, Jason ani Soxipater: he-i mhojê bhaxen Judev. Hanv, Terxius, hem potr boroun kaddlam to, Somiachea ekvottant tumkam noman kortam. Gaiusachea ghora hanv ravtam ani hangach amchi akhi sobha zomta. Tacho-i tumkam nomoskar; Erastus, hea xaracho bhanddari, ani amcho bhav Kuartus tumkam noman kortat. Devachê khuxen Jezu Kristacho ek apostl zaunk apoil’lo Paulu, ani amcho bhav Sostenes Korintant aslelê povitr-sobhek, Jezu Krista sovem povitr keleleank, soglle svater amchea toxench tanchea Somi Jezu Kristachem nanv uchartat tanchea sangata povitr zaunk apoileleank hi chitt boroitanv: Deva amchea Bapachi ani Somia Jezu Krista koddli doiallai ani xanti tumkam. Jezu Krista udexim tumkam dilele Devache doiallaiek lagun, Tumchê pasot hanv mhojea Devak sodanch dhinvastam, mhonngê Tachea ekvottant soglleam bhanddaranchi bhorti Deva koddsun tumkam mell’lea; Devan tumkam purnn zannvai dilea ani ti purnntaien ucharchem dennem favo kelam, kiteak Krista vixim dil’li govaiki tumchê modem ghôtt riglea. Amchea Somia Jezu Kristachê prokasnnek tumi ravtat; To ie-sôr kosloch vorgunn tumkam unno na. Toch tumkam xevottak porian thir korun dovortolo ani oxem Amchea Somia Jezu Kristachea Disa tumi oprada vinnem astelim. Devan tumkam Aplea Puta Jezu Kristak, amchea Somiak, ekvottonk apoileant, ani Dev visvaxi. Bhavam-bhoinnimnô, amchea Somia Jezu Kristachea nanvan hanv tumchê lagim prarthun magtam: tumi bhedamnim jienakat. Tumi kitem chin’tat tantunt eka monachim ani eka motachim zait. Tôr, mhojeam bhavam-bhoinnimnô, tumchê modem vivad zatat mhonn Kloechea kuttumba koddsun mhaka kollon ailam. Hanv oxem sangunk sôdtam: tumchê modlo konn-konn “hanv Paulucho”, konn-konn “hanv Apol’locho”, konn-konn “hanv Kefasacho”, ani konn-konn “hanv Kristacho”, oxem mhonntat. Kristache vantte zaleat kitem? Pauluk tumchê pasot khursar marlo kitem? Pauluchea nanvan tumkam batism dila tôr? Krispusa ani Gaiusa bogor, tumchê modlea konnakuch hanvem Batism diunk na mhonn hanv Devak dhinvastam. Mhojea nanvan apnnak batism dila mhonn tumchea modlea konnachean mhonnunk zaina. Ham—am, Oi, Istefanasachea ghorabeak bhair hanvem anink konnakuch batism dila zalear mhaka ugddas na. Kristan mhaka batism diunk pattounk na, punn xubhvhortoman porgottunk dhaddla; ani tem-i zalear sundorbhaxa vaprun nhoi; na tôr, Kristachea khursak anink ôrthuch ascho naslo. Khorench, khursacho nirôp mhonn’lear ibadd zatat tankam ek pixeponn; punn taronn mellta tankam, mhonngê amkam, to nirôp, vaurit asto Devachi xokti ti. Kiteak Povitr Pustokar oxem boroil’lem asa: “Tancheam zannaranchi zannvai padd kortolom ani tancheam budhvontanchi budh nir-orthi kortolom.” Khõi pavle atam tuje vidvan? Khõi gele tuje ponddit? Hea kalla-iugache vivad-korpi xastri khõi anink urle? Hea sonvsarachi zannvai Devan pixi korun sôddli nhoi? Hea sonvsaran aplich zannvai gheun, Devak ollkunk pavona zaunk Sorv-Zannar Devanuch nirmilem. Punn ami porgôtt’tanv tea niropachea pixeponna vorvim bhavart dhôrtat tankam fokot taronn mellchem mhonn Devan ieujilem. Tôr Judêv lôk khunna magta ani Grik lôk zannvai sôdta; punn ami porgôtt’tanv To khursar marlolo Krist. Judevank bhavart dhorunk To motti addkhôll, ani videxeank pixeponn; punn Devan apoil’leam Judevank toxem Grikank Amcho nirop Devachi xokti ani Devachi zannvai. Jem kitem Devachi pisai dista, tem mon’xanchê zannvaiê poros odik xannem; ani jem kitem Devachi osoktai dista, tem mon’xanchê xokte poros odik xoktivont. Bhavam-bhoinnimnô, tumi Devan apoil’lim mon’xam: tumchich gôt kosli ti polleiat: mon’xanchê nodren, tumchê modem vhodd xikxonnachim chodd-xim nant, podvi aslolim chodd-kãi nant, ani unch kulliechim-i chodd-xim nant. Tori zannarank lojek ghalunk, jeam konnank sonvsar pixim mhonn dhôrta, tankanch Devan vinchun kaddleant; ani xoktivontank lojek ghalunk, jeam konnank sonvsar osokt mhonn lêkhta, tankanch Devan vinchun kaddleant; toxench jeam konnank sonvsar holko lôk, koslench mol-naslolo lôk mhonn dhôrta, tankanch mol-asloleancho nas korunk Devan vinchleant. Hê porim konnacheanuch Deva mukhar apli vhoddvik korunk zaina. Tacheach dennean tumi Jezu Kristachea ekvottan jietat. Devan oxem kelam ki Tachê bhair anink amkam Zannvai na, Tacheach ekvottant Dev amkam Apnnak manov-lolim ani Aplêch povitrtaien povitr korta, ani Tachêch vorvim To amkam purnn taronn dita. Hea pasot, Povitr Pustokar boroil’lem asa tea pormannem, “Konn-ui apli vhoddvik gazounk sôdtat zalear, Sorvesporan apnnam khatir kelam tea pasot Tachi vhoddvik tãnnim gazounchi.” Bhavam-bhoinnimnô, tumchê mo dem hanv ailom tedna, Devan ugto kel’lo gutt hanvem tumkam porgôtt kelo, punn sundorbhaxecho porzôll fankoun vô mhojich unch zannvai dakhoun to hanvem porgottunk na. Tumchê modem ailom tedna, Jezu xivai, mhonngê khursar marlelea Krista xivai, soglli dusri ollokh kuxin dovrunk hanvem tharailem. Hanv tumchê modem aslom tedna, mhoji osoktai ollkhun ani boroch bhieun ani kampun aslom. Mon’xanchê zannvaiecheam utramnim tumkam jikun gheunk nhoi, punn fokot Atmeachê xoktin tumkam khatri diunk hanv uloilam ani mhozo nirôp hanvem porgôttla. Mhonntôch tumcho bhavart mon’xanchê zannvaiechê buniadir nhoi, punn Devachê xokticher bandlolo asa. Bhavartant sopurnnaiek pavleleam mon’xank uloitana, ami zannvaiênuch uloitanv punn hi zannvai hea kalla-iugachi nhoi, vô nattak zaunk veteleam hea kalla-iugacheam pordhananchi-i nhoi; punn ami porgôtt kortanv ti zannvai Devachi guddart zannvai: ti lipoun doverleli zannvai; ti Devan kallam-iugam adim amchê mhoimê khatir fuddench tharail’li. Hea kalla-iugachea eka pordhanak porian ti kollit zaunk na; kiteak, ti tankam kollit zal’li zalear, mhoimechea Somiak te khursar marche nasle. Punn “Devan Apnnacho môg korteleank toiar kelam tem dolleamnim polleunk na, kanamnim aikunk na, mon’xachea monan attapunk na.”, oxem jistuch Povitr Pustokant boroilelem asa tea pormonnem, heô vostu Devan amkam Aplea Atmea udexim ugddapeô keleat. Kiteak mhonn’lear Atmo sogttacho, Devacho porian, tthav gheta. Tujea monant kitem asa tem zannoi to, tum to ekloch, ani Devachea monant kitem asa tem, zanna To, Devacho Atmo Ekloch. Tôr Devan amkam dileant tim dennim ollkhunk Deva thaun ieta to Atmo ami ghetla, sonvsaracho atmo nhoi. Hea pasot, mon’xanchê zannvaien xikoil’leam utramnim nhoi, punn Povitr Atmean amkam xikoil’leam utramnim heanch denneam vixim ami uloitanv: Atmo ghetla tankam Atmeanuch xikoil’leam utramnim heam denneancho ôrth sangtanv. Jeam mon’xank Atmo mellunk na, tim Devachea Atmea thaun ieta tem ghenant; hem tankam ek pixeponn, ani tim, tem ollkhunk xokonant, kiteak Atmeachêch vorvim heô vostu topasun kaddunk zata. Punn jeam mon’xank Atmo mell’la, tanchean soglleam vostuncho ôrth topasun tharaunk zata: punn heam mon’xancho ôrth konnacheanuch tharaunk zaina. Kiteak, Povitr Pustokacheam utram pormannem, “Sorvesporachem mon konnem tori ollkhun kaddlam? Konnachean Taka budh diunk zait?” Amkam zalear, Kristachem mon mell’lam. Bhavam-bhoinnimnô, Atmo mell’la team mon’xam kodde hanv uloitam toxem, tumchê lagim mhojean ulounk zaunk na; punn mon’xa-soimbacheam vondovnneam pormannem cholteleam mon’xam lagim koxem, tumchê kodde hanv uloilam; kiteak Krista sovem tumi ozun supurlim ballkam. Dud hanvem tumkam pieunk dilam, sukem khann tumkam diunk na, kiteak toslem khann-jevonn gheunk tumchean tedna nozo aslem; ani ozun-ui nozo. Kiteak tumi ozun mon’xa-soimbacheam vondov-nneam pormannem jietat. Tumchê modem nattkai ani zhogddim vostat mhonntôch, tumchea jivitachi chal mon’xasoimbacheam vondovnneanchi zali ani tumi fokot masa-rogtachim mon’xam zaleant, oxem nhoi? Kiteak, jedna tumchê modlo konn-konn mhonnta ‘hanv Paulucho’, ani dusro mhonnta ‘hanv Apol’locho’, tedna tumchi chal fokot masa-rogtacheam mon’xanchi nhoi? Apol’lo konn? Ani Paulu konn? Tumkam bhavart dila te sevok ami; ani zonn-ekleachi seva fokot Somian dilam tea dennea pormannem. Hanvem roilem, Apol’lon ximplem, punn Devan vaddoilem. Tôr roitat vô ximptat tim mhotvachim nhoi; vaddoita To ki mhotvacho, ani Ho mhonn’lear Dev. Konn-konn roitat, dusrim konn-konn ximptat, punn roitoleam ani ximptoleam modem ontôr na; zonn-eklean kam’ kelam tea pormannem Dev taka mozuri ditolo. Kiteak ami ekamekak hat diun kam’ kortanv, punn kam’ Devachem, ani tumi tem Devan roil’lem xet. Tea bhair, tumi Devan bandlelem ghor. Devan mhaka dil’lem dennem vaprun, eka gholl’lelea ghor-bandpea bhaxen, hanvem buniad ghali, ani atam tê buniadir dusro konn bandta. Punn apunn koxem bandta tacher zonn-eklean lokx ghalchem. Kiteak ghal’li asa ti buniad Jezu Krist: hichê bhair, anink êk buniad konnachean ghalunk zaina. Hê buniadicher konn bandta zalear, to bhangar vô rupem vô moladik mannkam vaprun bandit; vô to lankudd vô tonn vô korodd vaprun bandit. Punn zonn-ekleacho vavr koslo to dakhôl kortolo to Sorvesporacho Dis udetolo; ho Dis uzo gheun ietolo ani ho uzo dôr-eka mon’xacho vavr kosak laitolo. Buniadir bandlelem konnachem kam’ ubem urlem zalear, taka mozuri mellteli. Zacho vavr ulpon vochot, taka nuksann ietelem; punn to apunnuch ujeantlean vattovl’lea porim taronn ghetolo. Tumi Devachem mondir ani Devacho Atmo tumchê sovem tthikann korun asa mhonn tumkam khobor na? Zôr konn-ui Devachea mondirachem nisontton kortit, tôr Dev tancho nas kortolo; kiteak Devachem mondir povitr, ani tumich hem mondir! Konnench apnnakuch fosoum noiê; tumchê-bhitorlim konn-ui hea kalla-iugacheam nemam pormannem apunn zannar mhonn somzotat zalear, tãnnim khorench zannar zaunchê khatir pixim zaunchem poddtelem. Karonn Deva mukhar hea sonvsarachi zannvai ek pixeponn, kiteak Povitr Pustokar oxem boroil’lem asa: “To, zannarank tanchêch naddbudhi vorvim, dhôrta.” Ani dusrê kodden oxem boroilolem mellta: “Zannar mon’xanchim chintnam polkim mhonn Sorvespor zanno.” Mhonntôch khõicheach mon’xa-chem nanv gheun, konnench apli vhoddvik gazounchi nhoi. Khorem mhonn’lear, sogllem tumchem: Paulu, vô Apol’lo, vô Kefas, sonvsar, vô jivit, vô moronn, atancho ani fuddlo kall — hem sogllem tumchench; punn tumi Kristachim, ani Krist Devacho. Ami Kristache sevok ani Devache gutt porgott korunk nemlele karbhari mhonn mon’xamnim amkam lekhche. Dôr karbhari visvaxi zauncho: hoch tankam ascho gorjecho gunn. Tumi vô mon’xanchê koslê-i neaisobhen mhoji nit keli mhonn hanv porva korich na; mhoji nit hanvuch porian korinam. Mhojem ontoskornn nitoll asa khorem, toripunn haka lagun hanv niropradi mhonn nirnnoi ghena: mhoji nit korunk asa To ekloch Somi. Hea pasot adim-fuddench Somi ie porian, konnachich vô kiteachich tumi nit korum noiê. Tea disa kallokant liplelem asa tem sogott To uzvadda haddtolo, ani soglleam monanchim kolpona ugddapim kortolo. Tedna Dev zonn-ekleak favo ti vakhann’nni ditolo. Bhavam-bhoinnimnô, hanvem sanglam tem tumchea faideak mhaka ani Apol’lok lailam. “Boroil’lem asa tachê bhair vochum nakat.” Hê mhonn’nnecho ôrth amkam lavun samballat. Konnench gorvan bhoron ekleacho pattlav korun dusreachi beporva korchi nhoi. Tôr ieram poros tum vhôdd mhonn tuka konn dhôrta? Dusrea koddchem gheunk naslolem tujê kodde asa kitem? Ani tunvem tem ghetlam zalear, gheunk naslolê bhaxen tuji boddai kiteak? Hôi, tumi dhadoxi zaleant! Tumi girest zaleant! Amkam konnxeak ghalun, tumi razvôtt cholounk lagleant! Xabas! Khorench tumi raiponn cholounk pavchim asleat! Tednam ami-i tumchea vangdda raiponn choloito aslenv! Punn sot kitem? Amam apostlank Devan nimanno vôrg dila mhonn mhaka dista; ami mornnachem formonnn poddleleam mon’xam porim zalenv; hôi, sogllea sonvsaran—devdutamnim ani mon’xamnim — amkam kenddnneancho mal korunk tanchê mukhar amkam ube kele. Krista khatir ami pixe, punn tumi Krista sovem xannim; ami osokt, punn tumi xoktivont; tumkam obhiman, punn amkam beman. Hê ghoddiê porian ami bhuk ani tan sôstanv ani sumarachim angostram nastana bhonvtanv; ami mar khatanv; ghor-dar amkam na; hat-pãi zhoroun ami koxttotanv; galli sonvun amkam opman’tat tedna, ami axirvad ghaltanv; dhumallo amkam ditat, punn to ami sõstanv; amkam xiraptat tedna, ami dulobaien uloitanv; ani az porian hea sonvsaracho kochro ani sogllea somazacho mhêll koso amkam dhôrtat. Tumkam lojek ghalunk mhonn hem hanv tumkam boroina; punn mhojim bhov mogachim bhurgim koxim tumkam budh diunk hem boroitam. Khorench, tumkam Krista sovem hozaramnim porian guru asle zalear-ui, tumkam zaite bapui nant; kiteak Jezu Krista sovem, xubhvhortomana udexim, hanvench tumkam zolm dila. Mhonntôch mhoji dêkh gheiat mhonn tumkam ulo kortam. Heach pasot Timotak hanvem tumchê-xim dhaddla; to Somia sovem mhozo chôdd mogacho ani visvaxi put. Krista sovem hanvem dhôrlolê vattecho to tumkam ugddas kortolo. Tich vatt sogllê kodden dôr-êkê povitr-sobhent hanv xikoitam. Hanv tumkam bhett diunk ieuncho na mhonn dhorun, tumchê modlim thoddim zannam gorvan ful’leant. Tori Somiachi khuxi zalear, hanv tumkam bhett diunk rokddo ietolom; ani tedna gorvan ful’leleanchim utram nhoi punn podvi kitli ti polletolom. Kiteak utrancher nhoi punn podvecher Devachem raj dhòrlelem asa. Tumkam kitem zai? Hatant boddi gheun hanvem tumchê-xim ieunchem, vô môg ani dulobai gheun ieunchem? Tumchê modem pozoddponn vosta mhonn sogllo lôk sangta; videxeam modem porian vosonam toslem pozoddponn! Kiteak mhonn’lear konn-eklo aplea bapaichê dusreponnim bailek gheun ravta! Ani tori tumi gorvan ful’lolim asat! Oslem kortub kelam taka tumchê modlo bhair ghalun, tumi rudon kel’lem zalear odik borem zatem. Zorui kuddin hanv tumchê thaun pois asam, monan hanv tumchê modem hajir asam, ani tumchê modem aslelêch porim, oslem pozddem kortub kelam tacher hanvem kheastichem formonn marlem. Amchea Somia Jezuchea nanvan tumchi zomat bhòrta tedna, hanv-ui monan tumchê zomatik hajir astolom; ani tedna amchea Somia Jezuchê podven tea mon’xachê kuddicho nas zaunchê khatir taka Soitanachê adhin korunk zai; oxem Somiachea Disa tachea otmeak taronn melltelem. Tôr tumchi boddai polki! Ilo-so khomir sogllem kaloil’lem pitt ambttaita mhonn tumkam khobor na? Tôr tumchea jivitantlo pornno khomir bhair uddoiat, khomir nastana kaloil’lem pitt zaiat, kiteak amcho Paskacho Utsôv pavlo: Kristak marlolean, amchea Paskanchea Menddreachem bolidan zalem. Mhonntôch Paskanchea Utsovacho somarombh korum-ia ani khotteponnacho khomir aslele undde gheun nhoi, punn khomir-naslele, mhonngê satvik jinneche ani khore-ponnache, undde gheun zaum-di amcho somarombh. Pozddea jivitacheam mon’xanchê songotik poddum nakat mhonn mhojea adlea potracher hanvem tumkam boroilam. Hea sonvsarantleam soglleam pozddeanchi vô svarteanchi vô nagovnneanchi vô puttleam-murtink bhôzteleanchi hanv khobor korinaslom; oxem zal’lem tôr, tumkam ho sonvsar soddun par kaddchi poddtoli asli. Hanv tumkam sangunk sôdtalom tem itlench: amchê sobhentlim bhavbhoinn zaun-ui, konn-konn pozddim, svarti, vô puttleam-murtink bhozpi, vô dusrea-nchem vaitt uloitat toslim, vô bebdim, vô nagovnnim zalear, osleam mon’x-anchê songotik tumi poddonakat, tanchea vangdda jevunk porian bosonakat. Amchê sobhê bhair asleleanchi nit korunk mhaka kiteak poddlam? Bhitôr asleleanchi ki nit korunk tumcho kaido, oxem nhoi? Bhair asleleanchi nit kortolo to Dev. “Hea noxttea mon’xak tumchê modlo bhair uddoiat”, oxem Povitr Pustok sangta. Tumchê modem konnancho dusream kodde vivad aslo tôr, nit korun gheunk, Devan povitr kel’leam bhavam-bhoinnink soddun, bhavart nasleleam mon’subidaram mukhar vochunk koxim mhonn tumi fuddem sortat? Devachim mon’xam hea sonvsarachi nit kortelim mhonn nokllot tumi? Hea sonvsarachi tumi nit kortelet zalear, heam kirkoll vivadanchi nit korunk tumi purtim nhoi? Devan rochleleam dutam modem atam bore ani vaitt konn te nirnnoi gheunk amchea hatant ghal’lem asa mhonn nokllot tumi? Mhonntôch heam dispotteam tonn’teanchi nit amchean korunk zainam? Tumchê modem osle tonn’te utpon zatat tedna, nit korun gheunk povitr-sobhent koslench mol nasleleam mon’xam fuddem tumi vetat tem kitem? Tumkam lojek ghalunk hem tumkam sangtam. Bhavam-bhoinnim modem utpon zal’lo tontto suttavo korunk, tumchêch modem sobhent êk-ui zannar na? Na zal’lê bhaxen, êk bhav vô bhoinn dusrea bhavak vô bhoinnik neaisobhent ubim kortat ani onbhavarteank nit korunk laitat! Tumchê modem khottle asat tench ekdomuch vaitt; tumi onit sõslear odik borem nhoi? Tumkam nagounk dilear odik borem nhoi? Punn portench, onit ani nagovnn tumich kortat ani teô-i bi tumcheanch bhavam-bhoinnink. Devachea Rajeachem daiz khotteam mon’xank mellchem na mhonn nokllot tumi? Tumi fosom nakat: pozddim mon’xam, kuddeam devank bhozpi, pordvari, kamchari, apleach lingachea mon’xa kodde pozoddponn korpi, choriô korpi, apsvarti, bebdim, ulovpan opman korpi, nagovnnim — osleam mon’xank Devachea Rajeachem daiz mellchem na. Tumchê modem oslim kãi zannam adim aslim; punn atam Somia Jezu Kristachea Nanvan ani amchea Devachea Atmea vorvim tumi batism gheun nitoll, povitr ani Devak manovlelim zaleant. Konn-konn mhonnot: “Mhojean sogllem korum-ieta.” Hôi, punn sogllench mhojea adavak poddona; sogllem mhojean korum-ieta khorem, punn kiteachoch hanv gulam’ zauncho na. Anink konn mhonnot: “Khann-jevonn pottak, ani pott khanna-jevnnak.” Hôi, punn him don-ui Dev nattak kortolo. Dôr-eka mon’xachi kudd pozoddponnak bhettovpachi nhoi, ti Somiak bhettoil’li asa; toxench Somi dôr-eka mon’xachê kuddint tthikann korun ti Apli korun gheta. Devan Somiak punorjivont kelo, tosoch To Aplê podven amkam-i punorjivont kortolo. Tumcheô kuddi Jezu Kristache kuddiche sandhe mhonn nokllot tumi? Mhonntôch Kristache sandhe gheun êkê xindôll baileche sandhe mhojean korum-iet? Na ki na! Zo monis êkê xindôll bailek ektthovta, to tichê kodde êkuch kudd zata mhonn nokllot tumi? Kiteak Povitr Pustokar oxem mhonnlelem asa: “Tim dogam-i êkuch kudd zatelim.” Punn Somia sovem ek zatat tim Tache kodde otmikponnim ek zatat. Pozoddponn nibêl soddun diat. Mon’xam kortat tim her sogllim patkam kuddi bhailim; punn pozoddponn kortat tim aplêch kuddicher add patok kortat. Tumi Deva koddcho Povitr Atmo ghetla ani To tumchê sovem tthikann korun asa; tôr tumchi kudd Tachem mondir ani tumi tumchinch nhoi: hem nokllot tumi? Devan tumkam gulam’po-nnantlim soddoileant, ani tem-i zalear kimôt farik korun. Mhonntôch tumchê kuddin Devak mhoima diat. Tumi mhaka boroun ghaleat team proxnanchi khobor korum-ia. Konn-êk dadlo bailê kodde logn zaina zalear vaitt nhoi. Punn oxem kamcharant poddot mhonnun, dôr-eka dadleak apli bail aschi ani dôr-êkê bailek aplo ghôv. Dadlean aplê bailê thãi ani toxench bailen aplea ghova thãi ap-aplo lognacho kaido pallcho. Bailek aplê khaxa kuddicher odhikar na, to tichea ghovak asa; têch bhaxen, ghovak aplê khaxa kuddicher odhikar na, to tachê bailek asa. Lognik hok’kacho upêg korunk ekamekak addainakat. Tori prarthonak tumchem mon odik lavchê khatir, tumchêch bhitôr kobul zaun tumchean thoddo vêll kuxin ravum-iet, punn magir novean ektthãi jieunk lagat; na tôr, tumchean tumcheô kuddicheô vondovnneô domaunk zaina zaun, Soitan tumkam tallnnent ghalit. Oxem sangun hanv tumkam êk kaido ghaltam mhonn somzum nakat; hanv fokot hi sovlôt asum-iet mhonn tumkam ugddas kortam. Tumi sogllim mhojê bhaxen zal’lim mhaka zai aslem; punn Devan zonn-ekleak kherit vorgunn dila; ekleak êkê torecho vorgunn ani dusreak dusrê torecho. Atam don utram logna bhair asat tankam ani vidvank: tim mhojê bhaxen ravlim zalear odik borem. Punn tanchean apleô vondovnneô domaunk zaina zalear, tim logn zaunchim, kiteak kamcharan lason vechê bodlek logn zalear odik borem. Logn zal’leank êk hukum’ ghaltam, ani to mhozo nhoi punn Somiacho: bail aplea ghova thaun veglli sorchi nhoi; veglli sorli zalear, tinnem anink ekdam logn zaunchem nhoi, bogor aplea ghova lagim sondhan korchem; ani ghôv aplê bailê thaun vegllo sorcho nhoi. Herank oxem sangtam: punn hem sangnnem mhojem, Somiachem nhoi. Amchea konn-eka bhavak onbhavarti bail asa ani ti tachea vangdda khuxê-monan jieunk kobul asa zalear, tannem tika soddun diunchi nhoi. Ani toxench konn-êkê bailek onbhavarti ghôv asa ani to tichea vangdda jieunk kobul asa tôr, tinnem taka soddun diuncho nhoi. Kiteak aplê bailê vorvim onbhavarti ghôv axirvadik zala; ani toxich amchea bhava vorvim tachi onbhavarti bail axirvadik zalea. Oxem nhoi aslem zalear, tumchim bhurgim-ballam axirvadik nhoi zato aslim, punn atam tim axirvadik. Punn onbhavarti logna-vangddi koddsoron vochunk sôdta zalear, taka koddsoron vochum-di; oslê poristhitint to bhav vô ti bhoinn lognant anink bandlelim uronant, kiteak Devan tumkam xantin jieunk apoileant. Agê bailê, tujea ghovak tuje udexim taronn mello-xem zaunchem na mhonn tum koxi zannoi? Ani tum, ghova, tujê udexim tuje bailek taronn mello-xem zaunchem na mhonn tum koso zannoi? Hem aikat: Devan zonn-ekleak apovnnem kelem tedna, Somian zonn-ekleak vanttun dilam tea dennea pormannem tannem cholchem, ani jea bhesar taka Devan apoila teach bhesar tannem ravchem. Soglleam povitr-sobhank hoch nêm’ hanv ditam. Sunôt kel’leak Devachem apovnnem ailam zalear, kel’li sunôt tannem lipounchi nhoi; toxench sunôt korunk nasleleak Devachem apovnnem ailam tôr, tannem sunôt korchi nhoi. Sunôt keli vô na keli, haka moluch na; punn Devacheô adnia pallop, hem ekuch ki molachem. Apovnnem ghetlam tedna jea bhesar zonn-eklo aslo, teach bhesar tannem ravchem. Devan tumkam apovnnem kelam tedna, tumi gulam asleat? Tôr kãi porva na. Svotontr zaunk sondi tumkam mellot zalear porian, tumi asat teach bhesacho zata titlo faido kaddat. Kiteak Somiachem apovnnem ghetlam tedna jim konn gulam aslim, tankam Somian svotontr kelim; toxench Somiachem apovnnem ghetlam tedna jim konn svontontr aslim, tim Kristachim gulam zaleant. Kimôt diun Devan tumkam gulam’ponnantlim soddoileant! Tôr mon’xanchim gulamam zaum nakat. Bhavam-bhoinnimnô, jea bhesar zonn-ekleak Devan apovnnem kelam, teach bhesar Deva mukhar tannem vô tinnem ravchem. Atam ozun logn zaunk nant tanchi khobor korum-ia: tanchê vixim Somian mhaka kãi hukum’ diunk na, punn, Somiachi doiallai mell’lelean hanv visvas favo aslolo sevôk zaunk pavlam mhonn zanno zaun, mhojem mot sangtam. Vaittam-vignanche dis lagim pavleat, dekhun jea bhesar monis asa, teach bhesar to ravlear borem. Êkê bailê kodde lognachea bandpasant asai? Tôr tika soddunk sodinaka. Bailechea logna-bandpasant nãi tum? Tôr potinn sodinaka. Punn logn zaxi zalear, tuka patok zaina. Toxench ek ankvar cheddum logn zait zalear, taka-i patok zainam. Tori logn zatat tankam hea sonvsari jivitache upodre-koxtt astele, tantlim tumkam hanv vattaunk sôdtam. Bhavam-bhoinnimnô, hanv sangunk sôdtam tem itlench: Devan tharail’lea kallachi sompadnni pavli. Dekhun hea fuddem bail asleleamnim logn zaunk naslelê porim; dukh kortat tãnnim dukh korinaslelê porim; utsôv kortat tãnnim utsôv korinaslelê porim; viktem ghetat tãnnim apnnam lagim kãich naslelê porim; hea sonvsaracheô vostu vaportat tãnnim osleanch vostumnim ghuspon naslelê porim jieunchem; kiteak hea sonvsarachem atanchem rup anink chôdd kall togpachem na. Tumi huskeam-vinnem jiel’lim mhaka zai. Logn zaunk naslelea eka dadleak Somiacheam vostuncho husko asa; apunn Somiak koso manovtolo, hachê vixim taka husko. Punn logn zal’lea dadleak hea sonvsaracheam vostuncho husko asa; aplê bailek koso khoxi kortolo, hachê vixim taka husko, ani oxem tachem mon veg-vegllê vatten oddon veta. Toxench êkê logn zaunk naslelê bailek vô êkê ankvarik Somiacheam vostuncho husko asa, kiteak ti kuddin ani monan Taka manovleli zaunk vavurta; punn logn zal’lê bailek hea sonvsaracho husko asa: aplea ghovak koxi manovteli, hachê vixim tika husko. Hem tumcheach adavak sangtam. Tumkam gorjê bhair bandun dovrunk mhojem mon nhoi; punn tumi mannsugen jieunchê khatir ani sogllea kallzan Somiak tumi somorponn korchê pasot hem sogott tumkam boroilam. Konn-ui aplê ankvar hoklê sorim apleô vondovnneo ap-domavnnechê ximê bhair vaddleat mhonn polleta, ani apli chal tichê lagim sarki nhoi mhonn takach disun ieta, ani tiche kodde lognuch zaunchem taka disot zalear, apnnak borem dista tem tannem korchem. Tim logn zaunchim; oxem korun patok aschem na. Punn êk novro, konnachench boll nastana, aplea ap-khuxen ghetlelea tharavant thir asa ani aplê ankvar hoklek toxich apli hokol koxi dovrunk sôdta zalear, to-i borem korta. Mhonntôch aplê ankvar hoklê lagim logn zata to borem korta; ani logn zaina to odik borem korta. Logn zal’li bail, ticho poti jivo asot porian, taka bandleli asta; punn ticho ghôv morot zalear, ti meklli zali ani apnnak zai tea dadlea lagim tichean logn zaum-ieta; to ghôv Somiacher bhavart aslolo mat zauncho. Ti vidvechea bhesar ravot zalear, ti odik bhagi; hem mhojem mot. Ani mhojê sovem Devacho Atmo asa mhonn hanv zannom. Atam puttleam-murtink bhettoi- l’leam khannanchi gozal korum-ia. Tanchê vixim amam-somestank ginean asa mhonn hanv boro zannom. Oslea gineanan ami fokot gorvan fulon ietanv; punn mogan ki ami khoreponnim vaddon vetanv. Apnnak kiteachi pok’ki ollokh asa mhonn konnam-konnank disot; toripunn ozun favo tosli ollokh tankam na. Punn konn-konn Devacho môg kortat, tankam Dev ollkhota. Puttleam-murtink bhettoil’leam khannam vixim khobor kelea zalearui pasun, hea sonvsarant khuincheai puttlea-murtik jiv-vacha na.Kiteim zaum, Dev fokot ekuch asa, anink her dêv nanch mhonn ami zannonv. Kiteak zorui zaum sorgar zaum sonvsarant “dèv” mhonnlele asat — ani khorench, tosle “dèv” ani “dhoni” khup! — torui amkam êkuch Dev asa ani To amcho Bap: Tachê thaun sogllem rochun ieta ani ami-i Tachê khatir asanv. Toxench ekloch amcho Somi, Jezu Krist: Tachê thaun sogllem ieta ani ami Tachê vorvim jietanv. Punn hem ginean soglleank na. Thoddeank osleam puttleam-murtinchi itli sonvoi zalea ki, aiz porian, bhettoil’lem khann khorench eka devak bhettoil’lem zal’lê porim tim ghetat, ani oxem tanchem osokt ontoskornn bhoxttota. Khorench mhollear, khanna vorvim ami Devak odik manovlelim mon’xam zainanv; tem khann ghenanv zalear, amkam kãi nuksann zaunchem na, ani tem gheun-ui amkam kãi faido na. Tumkam kitem-i khavpachi sot’tea asa khorem, punn hi tumchi sot’tea osoktank patkacho soêg zaina zaunk chotrai dhôrat. Tumi, ginean aslolim mon’xam, eka puttleam-murtinchea devosthanant jevnnak boslelim astana dusrim konn-konn osokt ontoskor-nnachim tumkam polletat mhonn somzum-ia. puttleam-murtink bhettoi-l’lem khann gheunk tankam-i dhir mellcho na? Hea tumchea osokt bhavam vô bhoinnim pasot Krist melo, ani atam, tumchea gineanak lagun, hinch tumchim bhavbhoinn ibadd zaun gelim! Hê porim, bhavam-bhoinn-incher add patok korun ani tancheam osokt ontoskornnank dhopko diun, Kristacher add tumi patok kortat. Mhonntôch jevnna-khannak lagun mhozo bhav vô bhoinn patok korunk pavta zalear, hea fuddem mhojea bhava vô bhoinnik khotti dêkh dina zaunk hanv anink mas kednanch khauncho na. Hanv svotontr nhoi? Hanv apostl nhoi? Amchea Somia Jezuk hanvem polleunk na? Somia sovem tumi mhojea vavrachem foll nhoi? Dusreank hanv apostl nhoi zain, punn tumkam tori hanv apostl, kiteak hanv apostl mhonn khatri diunk tumich Somia sovem mhozo xik’ko. Mhoji ttika kortat tankam ho asa toiar mhozo zobab. Ami kel’lea vavra pasot amchem udarposonn magun gheunk amkam hôk’k na kitem? Her apostl ani Somiache bhav ani Kefas porian ap-aplê bhavarti potinnik aplea sangata gheun bhonvtat: toch mhaka hôk’k na? Ani tanchê bhaxen tika mhojea sangata vhorunk hôk’k na mhaka? Vô fokot Barnabasak ani mhaka amchem udarposonn zoddchê khatir vavr korunk kaido asa? Soinik aplem pagar apnnakuch farik kortat? Konn tori êk dakancho mollo laita ani tachim follam khainam khõi? Êk hindd posun konn tori tachem dud pienas-tanam ravla mhonn asa? Fokot mon’xasoimbachê zannvaie-chem ulovop hem mhojem? Somurt-ui tench xikoinam kitem? Tôr Moizesachê Somurtint oxem boroil’lem asa: “Môllnni kortelea boilachea tonddak muskem ghalum noiê.” Devak boilachench poddon gelam zait? Vô sarkem amchê pasot, Dev oxem uloita mhonn sangchem? Dubhavavinn amchêch khatir hem boroilam, kiteak xet kôstat tãnnim tem bhorvanxean kôschem, ani xet môlltat tãnnim apnnank pikacho vantto melltolo mhonn bhorvanso dhorun tem môllchem. Atmik biam tumchê modem ami vomplea uprant, tumchê koddchem sonvsaracheam vostunchem pik ami ghetlem zalear, hem kitem chodd zalem? Dusreank tumchê voir oslo hôk’k asa zalear, amkam tanchê poros odik vhôdd hôk’k ascho nhoi? Tori astam hea hok’kacho ami upêg korunkuch na; portench zalear, Kristachea Xubvortomanachê porgô-ttnnek koslich addkhôll ghalinam zaunk sogllê torecheô oddchonni ami sõsun ghetanv. Devmondirant seva kortat te Devmondirantlench aplem jevonn-khann ghetat ani vedichi seva kortat te vedicher bhettoil’leam danancho vantto apnnank ghetat mhonn nokllot tumi? toxench, jim konn xubhvhortoman porgôtt’tat, tãnnim xubhvortoma-nachêch porgôttnnentlean aplem udarposonn gheunchem, oxi Somian adnea ghalea. Toripunn osleam hok’kantlea eka hok’kacho porian hanvem upêg korunk na; ani atam-i zalear, heam hok’kancho upêg korunk sôdtam mhonn hanv hem boroinam; oxem korchê poros hanv morunk toiar... Xubhvhortoman porgôttchem kam’ mhonn’lear mhaka vhoddvikechem karonn nhoi; tem Devan mhaka dil’li êk hukum; tem hanv porgott korinam zalear, mhaka zok’ mar! Mhojê ap-khuxen hem kam’ kel’lem zalear, mhaka mozuri mell’li. Punn, mhojê ap-khuxen hem kam’ nhoi zalear pasun, Devan mhojê adhin kel’lo karbhar hanv mandun ghetam, oxem zalem. Tôr mhoji mozuri kitem? Itlench: Xubhvhortoman mhaka dita te hok’k soddun, hanv tem funkott porgôtt’tam, hantunch asa mhoji mozuri. Soglleam mon’xam sorim hanv svadhin zaun-ui, zata titleank jikun gheunchê khatir hanv soglleancho gulam’ zalam. Judevank jikun gheunchê khatir, Judevam sorim hanv Judêv koso vaglom; Somurtichê adhin asleleank jikun gheunchê khatir, zorui hanv Somurtichea adhinponnant na, torui Somurtichê adhin aslelê porim hanv vaglom; toxench, Somurt nasleleank jikun gheunchê khatir hanv Somurt naslelê porim vaglom — tori hanv Devachê Somurti bhair aslolo monis mhonn mhaka dhorum nakat, sarkem sangun hanv Kristachê Somurtichea adhinponnant asam. Osoktank jikun gheunchê khatir osoktam modem hanv-ui osôkt zalom; thoddeank punn koxê-i bhaxen taronn mellun gheunk torê-torechea loka pasot hanv tanchê modloch eklo zalom. Xubhvhortoman haddta tea axirvadant mhaka vantto mellchê khatir, xubhvhortoman vistarchê pasot hem sogllem hanv kortam. Ronga-moidanar dhanvpi sogllech dhanvtat punn ekleakuch inam’ mellta mhonn nokllot tumi? Tôr inam’ jikun gheunchê axen nettan dhanvat. Dôr-êk pelvan soglleam vostuncho teag korta; te zalear êk vinaxi mukutt zoddunk oxem kortat, punn amkam melltolo to êk ovinaxi mukutt. Hanv dhanvtam to dolleam mukhar hetu dovrinastanam dhanvona; ani khusti khelltam to varear mutti marun khellona. Dusreank xubhvhortoman porgôttlea uprant hanvuch Devachi xikxa poddlolo zaina zaunk, mhoji kudd donddvonnun, gulama vori tika hanv domavun dhôrtam. Bhavam-bhoinnimnô, amcheam purvozank kitem zalem tem tumi sarkem somzun ghetlelem mhaka zai: tim sogllim eka kupa khal aslim ani doriantlean fuddem gelim. Hê toren kupant ani doriant tancho batism zalo ani oxem tim Moizesachim pattlav-daram zalim; ani sogllim Devan dil’lem ekuch jevonn jevlim, ani Devan dil’lem ekuch pivonn pielim; Devan dakhoil’lem khoddop tanchê pattlean vetalem ani hea khoddpantlem tim udok pietalim; ani tem khoddop mhonn’lear khud Krist. Tori astana tanchê modlim chodd zonnam Devak manonk nant, ani Devan tankam oronneant marun uddoilim. Vaitt vostunchi tãnnim axa dhôrli toxi ami dhorum noiê mhonnun hem sogott ghòddlem: amkam xiddkaunk hi êk Devan adinch dil’li khunna. Tanchê bhitorleam thoddeamnim kelem tê porim, tumi murti-puttleank bhozum nakat; kiteak tanchê vixim Povitr Pustokar oxem boroil’lem asa: “Jevunk ani pieunk porza bosli ani mouza marunk utthli.” Tanchê bhitorleam kãi zannamnim kelem toxem, ami pozoddponn korchem nhoi: tantlim tevis hozar zanna ekach disa-bhitôr morun poddlim. Tanchê modleam kãi zannamnim kelem toxem, ami Somiachi porikxa korum noiê; sorop chabun tim melim. Tanchê bhitorleam thodde-amnim kelem toxem, tumi gunngunnum noiê: Bhosm-Kornnaran tancho nas kelo. Tankam budh xikounchê khatir hem sogllem ghòddlem; ani kallam-iuganchê sompadnnek pavleleam amkam xiddkaunchê khatir heô vostu boroun dovorleat. Mhonntôch konn apunn thir ubim asat mhonn somzotat? Tôr tãnnim chotrai dhôrchi, na tôr tim bhi poddtit. Az porian tumcher aileat teô tallnneô soglleam mon’xank ietat tosleôch. Devacher visvas dovrat: tumchean sõsunk zata tea-vôn khôr tallnni tumcher ieunk To kednanch nirmicho na; punn kosli-i tallnni aili zalear, ti sõsunk To tumkam boll ditolo ani oxem tantlim bhair sorunk To tumkam vatt dakhoitolo. Bhov priticheam ixttam-ixttinnimnô, murtim-puttleanchi puza samkich soddun diat. Tumi somji-kaiechim mon’xam mhonn dhorun hanv tumchê lagim uloitam; hanv tumkam kitem sangtam tem tumich chintun polleiat. Jea patracher Devacho axirvad magun, ami tantlem pietanv tedna, tem axirvadachem patr Kristachea rogta kodde amcho sombond korta nhoi? Ani ami môddtanv to unddo Kristachê kuddi lagim amcho sombond korta nhoi? Êkuch unddo dekhun, zaitim zannam zaun-ui êkuch kudd ami, kiteak ami sogllim tea ekach unddeant vantto ghetanv. Judêv lôk kitem korta ani sotman’ta tem monant haddat. Bhettoil’leam bolianchem khatat tim vedi lagim sombond zôddinant? Punn hanv kitem sangunk sôdtam? murtim-puttleank bhettoil’lea khannak koslem tori mol asa mhonn sangtam? Vô teach murti-puttleak koslem tori mol asa mhonntam? Na ki na! Mhozo ôrth oso: Povitr Pustokacheam utramnim, je iodn onbhavarti bhettoitat, te devcharank bhettoitat, Devak bhettoinant. Devcharam lagim tumkam sombond aslolo mhaka naka. Somiachea patrantlem ani devcharanchea patrantlem tumchean borabôr pieunk zaina. Somiachea jevnnak ani devcharanchea jevnnak tumchean borabôr bosunk zaina. Ami Sorvesporachi premaxa challounk sôdtanv kitem? Tachê poros ami odik bollixtt? Konn-konn mhonnot: “Amchean sogllem korum-ieta.” Hôi, punn sogllench amchea adavak poddona; amchean sogllem korum-ieta khorem, punn sogllench amchem bhavartachem jivit ghott korunk upkarona. Konnench aplo faido sodum noiê, punn peleacho. Maskaranchea manddar viktat titlem-i khaiat; koslech anink vichar korinastana tumchem ontoskornn somadhan asum-di. Kiteak, Povitr Pustokacheam utram pormannem, “prithum’ Sorvesporachi ani ticher asa tem sogllem.” Konn-konn onbhavarti tumkam jevnnak apoitit zalear ani tanchem amontronn tumi mandun ghexat zalear, koslech vichar korinastana tumchea fuddeant dovortit titlem-i khaiat, tumchem ontoskornn somadhan asum-di. ‘Hem devank bhettoil’lem’, oxem tumkam konnem-konnem sanglem zalear, sanglam team mon’xam khatir ani ontoskornna khatir tem khainakat. Tumchea ontoskornnachi hanv khobor korina, punn tanchea ontoskornnachi. Punn konn vicharit: “Dusrim mon’xam aplea ontoskornnak lagun mhoji sot’tea kiteak mhonn bandun dovortolim? Dhin’vaxi monan jevtam zalear, Devak dhin’vasun ghetlelea jevnna pasot konnachean mhoji ttika korum-iet?” Mhonntôch tumi jevtat vô pietat vô kitem-i dusrem kortat, tem sogllem Devak mhoima diunchê khatir korat. Zudevank vô Grikank vô Devachê povitr-sobhek khotti dêkh dinakat. Hanv kortam toxench tumi-i korat: mhojeach faideachem kãi chintinastana punn soglleancho faido polleun, somestanchem taronn zaunche khatir, soglleam mhojeam kornneamnim hanv soglleank khuxi korunk vavurtam. Zoso hanv Kristachi dêkh ghetam, toxem tumi mhoji dêkh gheiat. Tumi sodanch mhozo ugddas kortat mhonn ani hanvem tumkam dili ti xikovnn tumi samballtat mhonn hanv tumkam vakhanntam. Dôr-eka dadleachem mostok Krist, ani dôr-êkê bailechem mostok ticho poti, ani Kristachem mostok Dev: hem tumi zanno zal’lim mhaka zai. Zo dadlo aplem mathem dhampun prarthon korta vô Devacho sondêx dita, to aplea mostokacho man kaddta. Ufrattim, ji bail aplem mathem dhampinastana prarthon korta vô Devacho sondêx dita, ti aplea mostokacho man kaddta, kiteak ti sarki êkê kens-taslolê bailê bhaxen zata. Zôr êk bail aplem mathem dhampina, tôr tinnem aple kens tasche; punn zôr kens katrunk vô mathem tasunk êk lojechi vôst, tôr tinnem aplem mathem dhampchem. Dadlo Devacho rupkar ani porzôll dekhun, tannem aplem mathem dhampunk favo na; punn bail dadleacho porzôll. Tôr dadlo bailê thaun nhoi, punn bail ki dadlea thaun rochun ailea. Itlench nhoi, dadleak bailê pasot rochunk na, punn bailek ki dadlea khatir rochlea. Hea pasot, devdutank favo to man dakhounchê khatir, ani apunn aplea poti khal asa mhonn dakhounk-ui, tinnem aplem mathem dhampchem. Tori astam, Somiachea uzvaddan hem ami somzunk pavtanv: zoxem dadlea vinnem bailek moluch na, toxench bailê vinnem dadleak-ui moluch na; kiteak bail dadlea thaun rochun ailea khorem, punn dôr-êk dadlo bailê thaun zolmun ieta, ani sogllench Deva thaun upzota. Tumich borem-korn chintun sangat: aplem mathem dhampinastam Devak prarthon korunk bailek sobta? Soimb legun kitem xikoita tem polleiat: dadleache lamb kens mhonn’lear tacho man kaddtat, punn baileche lamb kens ticho man vaddoitat, kiteak lamb kens bailek matheachi nhesônn koxi dil’le asat. Konn-ui hê vixim vivad korunk sôdta zalear, hanv itlench sangtam: amchê modem ani Devachê khõichêch sobhê modem oxench zaunk zai mhonn kainch na. ozun tumkam xikovnn diunchi asa: tumcheam zomatim vixim mhojean tumkam vakhannunk zaina, kiteak teô tumkam borem korchê bodlek tumkam odik vaitt kortat. Poilê svater, tumchi sobha bhòrta tedna tumchê modem futti asat mhonn hanvem aikolam, ani hem ogllem-unnem khorem-xem mhaka dista. Khorem mhonn’lear, tumchê modem konn visvas favo-aslelim tim ollkhun gheunchê khatir tumchê modem futti aslear borem. Tumchi sobha bhòrta tedna, tumi kortat tem Somiachem Rat-Jevonn nhoi! Kiteak tumi jevunk lagtat tedna, ek-eklo, dusreank ravonastanam, ap-aplem jevonn jevun kaddta; hê porim konn-konn upaxim urtat ani konn-konn bebdim zatat. Jevunk ani pieunk tumchim khaxa ghoram nant tumkam? Vô Devachê sobhechi beporva kortat tumi ani kãich na tankam lojek ghalunk sôdtat? Hanv tumkam kitem mhonn sangum? Xebaski dium? Hê vixim mhojean tumkam xebaski diunk zaina. Somia koddli ji hanvem xikovnn ghetlea, tich hanvem tumkam dilea: Somi Jezu poradhin zalo tê rati Tannem unddo ghetlo, Devak dhin’vasun to môddlo ani mhonn’lem: “Tumchê pasot somorpilea ti, hi mhoji kudd. Mhozo ugddas korun, hem tumi korat.” Têch porim, jevonn zatôch Tannem patr ghetlem ani mhonn’lem: “Hem patr mhojea rogtan sthaplolo novo korar. Tumi hantlem pietat titlê-i pavtti, Mhozo ugddas korun, hem tumi korat.” Kiteak tumi ho unddo khatat ani hea patrantlem pietat titlê-i pavtti, Somi ie porian Tachem moronn tumi porgott kortat. Mhonntôch, jim konn favo na tê bhaxen ho unddo khatat ani Somiachea patrantlem pietat, tim Somiachê kuddicher ani rogtacher add guneanv kortat. Hea pasot zonn-eklean poili apli chovkoxi korchi ani uprant ho Unddo khauncho ani hea patrantlem pieunchem. Kiteak jim konn hi Somiachi kudd mhonn ollkhun ghenastanam khatat ani pietat, tim aplench khastichem formonn khatat ani pietat. Hea pasot tumchê modem zaitim zannam piddevont ani osokt zal’lim asat ani sobar zannam morun geleant. Ami poili amchich chovkoxi kel’li zalear, amcher khastichem formonn poddchem naslem. Punn sonvsara borabôr amcher khastichem formonn poddonam zaunk, Somi amkam nitt margar haddchê khatir amkam xistichi kosli-kosli xikxa dita. Mhonntôch, mhojeam bhavam-bhoinnimnô, tumi jevnnak ektthãi zatat tedna, ekamekak ravat; konnank-ui bhuk lagta zalear, tãnnim aplea ghora jevun ieunchem; tednam tumchi zomat tumcher khastichem formonn haddchi na. Urloleam proxnam vixim, hanv ietolom tedna gorjeche nem’ ditolom. Bhavam-bhoinnimnô, Povitr Atmo vantt’ta team denneam vixim, tumi tancho ôrth ollkhun ghetlolo mhaka zai. Tumi onbhavarti asleat tedna, konn-ui tumkam oddun vhoro tê vatten tumi zap-nasleleam puttlea-murtincheam pãiam-xim vetaleat. Tea pasot, tumi hem zanno zal’lim mhaka zai: Devachea Atmeachea preronnan konnachean “Jezucher Xirap poddum!”, oxem mhonnunk zaina; toxench Povitr Atmeachea preronna vinnem konnachean “Jezu Somi!” oxem ucharunk zaina. Tôr veg-veglle vorgunn asat, punn Atmo êkuch; veg-veglli seva asa, punn Somi ekloch; veg-vegllim kamam, punn soglleam sovem sogllem korta to Dev Ekloch. Zonn-ekleak Povitr Atmean dil’lem dennem dixtti poddta tem soglleanchea faideak. Atmea vorvim konnak Dev Apleam vorteam guttanchi zannvai dita; anink konnak teach Atmea pormannem dil’li ollokh kollit korcho vorgunn; teach Atmea udexim Dev konnak thir-ghôtt bhavart dita; anink konnak teach Atmea vorvim piddevon-tank borim korchem dennem; ekleak ochoriam korchem dennem; anink konnak Devacho sondêx diunchem dennem; anink konnak kitem Povitr Atmea thaun ieta ani kitem dusream atmeam thaun ieta hanchê modem ontôr vivekan ollkhunchem dennem; anink konnak vichitr bhasô ulounchem dennem; dusrea konnak team bhasancho ôrth diunchem dennem. Hem sogott êk ani toch Atmo korta, mhonngê To Aplê khuxê pormannem zonn-ekleak iukt tem dennem vantt’ta. Khorench, zoxi mon’xachi kudd êk punn tika zaite sandhe astat, ani kuddiche soglle sandhe, puskoll zaun-ui, êk kudd ghôddtat, toso Krist. Kiteak mhonn’lear ami sogllim — zaum Judev zaum Grik, zaum gulam zaum svotontr mon’xam — êk kudd zaunchê khatir, amkam ekach Atmea udexim batism dila, ani heach Devachea Atmea udexim amam-somestank Devan dhadoxi keleant. Karonn kudd mhollear êkuch sandho nhoi, punn zaite sandhe. “Hanv hat nhoi, dekhun hanv kuddicho nhoi”, oxem pãi mhonnot zalear, to pãi kuddicho nhoi zata? “Hanv dollo nhoi, dekhun hanv kuddicho nhoi”, oxem kan mhonnot zalear, to kan kuddicho nhoi zata? Sogllich kudd fokot dollo zalo zalear, tika aikunk ietelem koxem? Ani sogllich kudd fokot kan zalo zalear, koso mhonn tichean vas-pormôll gheunk zatolo? Tea pasot, Aplê khuxê pormannem, Devan kuddint veg-veglle sandhe ghaleat. Te soglle êkuch sanhdo zal’lo zalear, kudd anink koxi asum-iet? Khorem mhollear, zaite sandhe punn êkuch kudd. Mhonntôch “mhaka tuji goroz na”, oxem dollean hatak mhonnunk zaina. Toxench toklen-ui pãiank mhonnunk zainam “Mhaka tumchi goroz na.” Punn portench, odik osokt distat te kuddiche sandhe chôdd gorjeche. Ani unnea manache mhonn somzotanv team kuddicheam sandheank ami kherit man ditanv; toxench je amche sandhe nirmoriadi distat, tankam odik moriadin ami lêkhtanv; moriadiche distat team amcheam sandheank osli goroz na. Jeam sandheank titlo man na-so dista, tankam odik man mellcho mhonn Devan kudd oxi ghôddlea; hê porim kuddint koslich futt aschi nhoi, punn soglleam sandheamnim ekamekachi zoton korchi. Eka sandheak dukh asa zalear, tachea vangdda soglle sandhe dukh sõstat; toxench eka sandheak man mell’lo zalear, tachea vangdda soglle sandhe khuxal zatat. Tôr tumi sogllim borabôr Kristachi kudd, ani zonn-eklo, ap-aplê pavttin, ticho êk sandho. Povitr-sobhent Devan zonn-ekleak ap-aplo zago nemun dila: poilê svater apostl; dusrê svater Devacho sondêx gheun to kollounk, provadi; tisrê svater bhavartachi xikovnn ditat tim; toxench torê- torechim dennim ghetleat tim: vismitam korchem dennem, pidda kaddchem dennem, loka-sevechem dennem, sobhecho karbhar cholounchem dennem, vichitr bhasanchem. Tôr sogllinch apostl, vô provadi, vô xikovpi? Vismitam kortat kai sogllim zonn? Pidda kaddchem dennem soglleank asa kai? Sogllim vichitr bhasô uloitat kitem? Team bhasancho ôrth diunk soglleank dennem asa bi? Odik vorteam denneancher tumcho iklo dovrat. Ani soglleam-vôn odik ut’tôm vatt ti hanv tumkam atam dakhoitam. Mon’xancheô ani devdutancheô porian bhasô hanv uloin punn mhaka pritimôg na zalear, mhojem ulovop vazun avaz korto ghanttê sarkem ani kinnkinnteam kansalleam sarkem. Devacho sondêx diunk provadeacho dennem mhaka asot, Devachim sogllim guddart sotam ollkhunk ani Tachê zannvaiecho tthav porian gheunk mhaka mellot, ani dongor êkê svater thaun dusrê svater kaddun dhaddunk bhavartachi iedi xokti mhaka asot, punn mhaka pritimôg na zalear hanv kãich nhoi. Mhojê lagim asa titlem-i goribank hanv vanttin, mhoji kudd legun lasunk diin, punn mhaka pritimôg na zalear, mhaka kosloch faido na. Pritimôg konnachem-i kitem-i sõsun ghevpi ani soglleam thãi doiall-movall; pritimogak nattkai na, boddai na, gorv-ui na; pritimôg dusream kodde mannsugen vagta-cholta ani kednanch aplo adav sodinam; pritimôg rag choddunk dina; koslench vaitt monant dhorinam. Konnem vaitt kelem mhonn pritimôg khuxal zaina, punn konn-ui borem korit tôr pritimôg sontosta. Pritimôg dusreancheô chuki-khoddi somzun gheta, dusreancher visvas dovorta, bhorvanso dhorun ravta, sosnnikaien ani dhiran soglleak fuddo korta. Devacho sondêx divpi provadi asat? Tôr tanchem kam’ somptelem; vichitr bhasô ulovpi asat? teô bond zateleô; konnak vidhya asa? ti ubon veteli; punn pritimôg êkuch kodinch sompcho na. Kiteak amchi vidhya opurnn, amchem provadiponn-ui opurnn; jem kitem sopurnraiek pavta tedna, opurnn tem sogllem nattak zatelem. Hanv bhurgo aslom tedna mhojem ulovop, mhoji vagnnuk, mhojem chintop, sogllem bhurgeachem aslem; punn zanntê piraiek pavtôch, bhurgeponnachem sogllem hanvem soddun dilem. Atam tôr Dev amkam sarko spoxtt disona, punn fokot arxeantlean zal’lê porim Tachim kirnnam amkam pavtat; punn magir Devak ami rup-rup polletelenv. Atam mhaka asa ti Devachi ollokh opurnn; punn magir, Dev mhaka ollkhota tosoch, hanv-ui Taka sopurnnaien ollkhotolom. Hea amchea jivitant asat bhavart, bhorvanso ani pritimôg, he tin; punn hanchê modem ut’tôm to pritimôg! Mogan cholunk zaum-di tumcho vhoddantlo vhôdd husko. Punn tea bhair denneanchi-i axa dhôrat, bhov-korun Devacho sondêx diunchea denneachi. Jim konn vichitr bhasamnim uloitat, tim Deva kodde uloitat, mon’xam kodde nhoi, kiteak konn tankam somzonant; tôr tim Atmea udexim guddart sotanchi khobor kortat. Punn jim konn Devacho sondêx ditat, tim mon’xam kodde uloitat ani tankam bhavartant ghott kortat, dhiran bhortat ani buzvonn ditat. Vichitr bhasô uloitat tim apunn bhavartant ghôtt zatat; punn Devacho sondex ditat tim zomleleam bhavam-bhoinnink bhavartachi ghottai ditat. Tumi sogllim vichitr bhasamnim uloixeat zalear hanv khuxi, punn tea-vôn chodd tumkam soglleank Devacho sondêx diuncho vorgunn mell’lolo zalear hanv odik khuxal; zomleleam bhavam-bhoinnink bhavartant ghott korchê khatir, jem vichitr bhaxen sanglam tacho ôrth diunk konn asa zalear borem asa, punn sodanch vichitr bhasamnim uloitat tanchê poros Devacho sondêx ditat team mon’xank odik mol asa. Mhonntôch, mhojeam bhavam-bhoinnimnô, vichitr bhasamnim uloun hanv tumchê-xim ailom zalear, koslo faido tumkam? Kosloch na! Punn mhojea ulovopan Devachem koslem sot tumkam ugddapem kelem ani tacho ôrth tumkam ugto kelo, vô Devacho koslo sondêx tumkam haddlo, vô êk xikovnn tumkam dili zalear, tem tumkam faideak poddtelem. Jiv-naslolem vazontr dhôrlear toxench zata: veg-veglle svor dina zalear, vinno vô sitar koslo nad vazoita, tem koxem gomun ietelem? Toxench, tuturecho kherit avaz spoxtt aikunk iena zalear, konn mhonn zhuzachi toiari korunk lagtolo? Tumchê sobhent toxench ghòddta: uloitana somzunk ietat tosleam utramnim tumi uloinant zalear, tumi sangtat tem konnak gomtelem? Tumchim utram bexttim varear ubun vetelim. Hea jogant kitleô bhasô asat teô mhaka khobor na; punn tantleo, ôrth nasleli êk-ui na; punn team-team avazancho ôrth hanv nokllom zalear, uloiteleank hanv porko zatolom ani uloitat tim-i mhaka porkim zatelim. Mhonntôch tumi-i, Povitr Atmeache vorgunn gheunk axetat dekhun, bhavam-bhoinninchem bhavar-tachem jivit ghott korunk upkartat team vorgunnancho odik-odik upêg korunk zaum-di tumchi axa. Tea pasot, jim konn êkê vichitr bhaxen uloitat, tãnnim apunn sangtat tacho ôrth diuncho vorgunn magcho. Kiteak hanv êkê vichitr bhaxen prarthon korin zalear, mhozo otmo prarthon korta punn mhojea gineanak adav na. Mhonntôch kitem? Mhojea otmea vorvim magnnem kortolom ani borabôr mhojea gineanan-ui magnnem kortolom; toxench mhojea otmean gaitolom ani borabôr mhojea gineanan-ui gaitolom. Na tôr, fokot tujea otmean Devak dhin’vastai zalear, tumchê zomatint vantto ghevpi chaltim mon’xam koxim mhonn tujê dhin’vasnnek “Amen” mhonntelim? Kiteak tum kitem mhonntai tem tim kãi nokllot. Dubhava vinnem tum Devak borê bhaxen dhin’vastai; punn team dusream mon’xanchea bhavartachea jivitak ghottai mellona. Tumam-soglleam poros chodd vichitr bhasamnim hanv uloitam mhonn Devak dhin’vastam; tori bhavam-bhoinninchê sobhent xikovnn diunchê pasot, mhojea gineanan panchuch utram uloun hanv khuxi zato aslom. Bhavam-bhoinnimnô, chintpan ballkam sarkim zaum nakat, punn vikottaien ballkam sarkim zaiat, chintpan vaddlelim mon’xam zaiat! Somurtint oxem boroil’lem asa: “Vichitr bhasamnim ani videxeanchea onttamnim Hanv hê porjê kodde uloitolom, ani, tori astana, tim Mhaka kan diunchim nant, mhonnta Sorvespor.” Mhonntôch vichitr bhasamnim ulouncho vorgunn bhavarteank nhoi, punn onbhavarteank êk khunna; ufrattim, Devacho sondêx diuncho vorgunn onbhavarteank nhoi, punn bhavarteank khunna. Mhonntôch soglli sobha bhòrta tedna sogllim vichitr bhasamnim uloitat mhonn somzat; tea vellar bhavartachi sarki xikovnn naslelim vô onbhavarti mon’xam thõi pavlim zalear, tumkam pixem laglam mhonn mhonnchim nant? Punn sogllim provadiponnacho sondêx ditat zalear, ani tedna êk onbhavarti vô bhavartachi sarki xikovnn naslelim konn-konn thõi pavtit tôr, tim aikotat titlea-i vorvim apleach ontoskornnachi poristhiti tankam topasunk poddtelem ani tim aplich mon’subi korunk pavtelim, ani tanchea kallzache gutt uzvadda ietele; ani oxem, Dev khorench tumchê modem asa mhonn ollkhun, tim saxttagim poddtelim ani Devak bhôztelim. Mhonntôch kitem, bhavam-bhoinnimnô? Tumi zomtat tedna, konn-konn ek stotr gaitat, dusrim konn êk xikovnn ditat, anink konn Devachi ievzônn ugti kortat, Ozun konn-konn êkê vichitr bhaxen uloitat, ani dusrim konn tichi somzonni ditat. Hem sogott tumchem bhavartachem jivit ghott korunk zaum-di. Vichitr bhaxen konn-konn uloitat zalear, dogam vô chodduch zalear tegam zannam ulounk fuddem sorchim, ani tem-i zalear eka pattlean ek, ani konna-i eklean somzonni diunchi. Punn somzonni diunk konn na zalear, sobhent tim ogim ravchim ani apnna ani Deva sovem ulounchem. Provadiponnachem dennem ghetlelim astit zalear, dogam vô tegam zannamnim Devacho sondêx diuncho ani heram somestamnim team sondexank chit diun aikunchem. Lagim bosun aslolea dusrea konnak Devachi ievzônn ugti zali zalear, tachê adim uloitelean ogi ravchem. Devacho sondêx sogllea-mnim dium-ieta, punn ek-eklean ap-aplê pallien; tedna soglleank kosli tori xikovnn mellteli, ani soglleancho dhir vaddtolo. Provadiponnachem ulovop tea-tea provadeachê vô provadinnichê adhin asunk zai, kiteak Dev goddboddacho Dev nhoi punn xanti-somadhanacho. Zoxem bhoktancheam soglleam sobhamnim chal asa, toxem tumchê-i sobhent bailamnim ogi ravchem, kiteak thõi ulounk tankam rojea dil’li na: Somurt-ui sangta tea pormannem, fuddariponn tanchea hatant na. Kitem-i teô zanna zaunk sôdtat zalear, ghqra vochun tãnnim apleam ghovam kodde nimgun gheunchem. Sobhent êk bail uloit zalear, ti apli ixim’ hogddaita. Kitem chint’tat tumi? Devachem utor tumchê koddsun bhair sorlam kitem? Vô tumkanch tem pavlam kai? Konn-ui apunn êk provadi mhonn somzota, vô apnnank Atmean dil’lo êk vorgunn asa mhonn chint’ta zalear, tãnnem, hanv tumkam boroitam tem Somiachi adnea mhonn ollkhun gheunchem. Konn zôr hem ollkhun ghenant, Dev-ui tankam ollkhun ghenam mhonn sangchem. Mhonntôch, bhavam-bhoinnimnô sondêx diunk tumkam axa asum; teach borabôr vichitr bhasamnim ulounk addvaddum nakat. Punn sogllem mannsugen ani manddavollin zaum-di. Bhavam-bhoinnimnô, hanvem tumkam porgott kelam tea xubhvhortomanacho tumkam atam ugddas kortam; tench tumi manun ghetlam ani thir bhavartan tem tumi samballtat; tachêch vorvim tumkam taronn mellta, tumi tantunt thir rauxeat zalear. Na tor tumcho bhavart nirfoll. Borem tôr, mhaka porgott kelam toxench, hanvem tumkam choddan-chodd mhotvachem porgott kelam tem hem: ki Povitr Pustokam pormannem Krist amcheam patkam pasot melo, ani Taka nikhipilo, ani Povitr Pustokam pormannem tisrea disa Devan Taka punorjivont kelo; To Kefasak ani uprant barank dixtti poddlo. Tea uprant, ekach farak, pãixeam-vôn choddam amcheam bhavam-bhoinnink To dixtti poddlo; hantlim chodd zannam ozun jivim asat, punn thoddim morun gelim. Magir dixtti poddlo Jakobak ani tea uprant soglleam apostlank. Soglleam pattlean, hea ovchituch bollan zolma haddleleak, mhaka-i To dixtti poddlo. Apostlam modem soglleam-vôn hanv hinn-holko; Devachê povitr-sobhek hanvem dhumallo dilo dekhun, mhaka apostlachem nanv porian favo na. Punn, Devachea funkeachea dennean, hanv khoro apostl, ani Tannem mhaka favo kel’lem dennem nirfoll zaunk na. Portench zalear, heram soglleam poros hanvem odik chôdd vavr kela; khorem mhollear to vaur mhoje ostongim nhoi zalearui, to vaur mhojê sovem asa tea Devachea dennea vorvim. Punn gorjechem tem hem: te zaum vô hanv zaum, oxench ami porgott kortanv, ani oxench tumi bhavartan mandun ghetlam. Kristak Devan mel’leantlo punorjivont kela mhonn ami porgôtt’tanv zalear, mel’leanchem punorjivontponn na mhonn tumchê modlim thoddim zannam sangtat tem koxem tôr? Mel’leanchem punorjivontponn nanch zalear, Devan Kristak-ui punorjivont korunk na. Ani Kristak Devan punorjivont korunk na zalear, amchi porgôttnni pokôll, ani tumcho bhavart-ui pokôll. Itlench nhoi: ami Devache khotte sakxidar mhonn sangchem poddlem, kiteak Devan Kristak punor-jivont kela mhonn ami sakxi dilea; punn mel’leam mon’xank Dev punorjivont korcho na mhonn khorem zalear, Devan Kristak-ui punorjivont korunk na, oxem mhonnchench poddlem. Mhonntôch, Devan Kristak punorjivont kela mhonn sangun ami dil’li sakxi Devacher add sakxi zali. Mel’leam mon’xank Dev punorjivont korcho na mhonn khorem zalear, Kristak-ui Devan punorjivont korunk na. Ani Devan Kristak punorjivont korunk na zalear, tumcho bhavart sarko nirfôll, tumi ozun tumcheam patkamnim asat. Mhonntôch jim Kristacher bhavart dovrun meleant, tancho ibadd zalo. Kristacher ami dovortanv to bhorvanso fokot hea jivitak amkam faideacho zalear, soglleam mon’xam-vôn amchi gôt odik churchureanchi. Punn Kristak Devan Taka mel’leantlo punorjivont kela tem sot ani hachi khatri koxi morun geleant tankam-i Dev punorjivont kortolo. Kiteak, zoxem eka mon’xa vorvim moronn ailam, toxench eka mon’xa vorvim mel’leanchem punorjivontponn-ui ailam. Hôi, zoxem Adanva sovem sogllim mortat, toxench Krista sovem soglleank Dev punorjivont kortolo. Punn sogllim Devan tharail’lea kroma pormannem: poilo, Malgoddo mhonn, Krist; magir, Krist ietolo tedna, Kristachim tim sogllim. Uprant sompadnni: tedna To soglleam Pordhanancho ani soglleam Odhika-riancho ani Podviancho bhosm korun, Raj, Deva, Aplea Bapachê, adhin To kortolo. Kiteak soglleam Tacheam dusmanank Tacheam pãiam tolla Dev ghalit porian, Krist razvôtt choloitolo: hi Devachi ievzônn. Bhosm zavpacho dusmanam modlo nimanno dusman mhonn’lear moronn. Khorench, Povitr Pustokacheam utramnim, “Devan sogott Tacheam pãiam tolla ghalam.” Sogott Tacheam pãiam tolla ghal’lem asa mhonntana, Povitr Pustok Devak mat bhair dovorta, kiteak Tannem ki sogott Kristachea pãiam tolla ghalam. Sogott Tacheam pãiam tolla ghalun zalea uprant, toch Put Apleam pãiam tolla sogott ghalam Tachê adhin, mhonngê Aplea Bapachê adhin, Apnnakuch kortolo. Hê porim Dev Ekloch Eklo Apunnuch zatolo sogtta-sorvanchi Bhorti ani Sompadnni. Na zalear, mel’leam khatir batism ghetat tankam koslo faido asa zait? Dev zôr mel’leam mon’xank punorjivont korchoch na, tanchê khatir kiteak mhonn batism ghetat? Ami-i zalear, kiteak mhonn ami ghoddiechê ghoddiê sonkoxttamnim jietanv? Bhavam-bhoinnimnô, amchea Somia Jezu Krista sovem tumchê khatir zo mhaka obhiman bhògta, tachean soput gheun hanv tumkam sangtam: dôr disa mornnachea sonkoxttant hanv asam. Fokot mhojem mon’xasoimbachem boll dakhounk Efezant team savzam kodde hanv loddai korunk pavlom zalear, koslo faido mell’la mhaka? Dev zôr mel’leam mon’xank punorjivont korcho na, Povitr Pustokar melltat team utram pormannem, “borench khaum-ia ani pieum-ia, kiteak faleam ami mortolenv.” Fosonakat: khotteam sangateank gheun bhonvxi, tujench borem jivit padd korxi. Utthat, soirannar ieiat ani tumchi vankddi vatt soddun diat! Tumchê modleam thoddeank Devachi sarki ollokh na: loz tumkam, punn hem tumkam hanvem sangchench poddta. Punn konn-konn oxem mhonntit: “Meleant tankam Dev koxim punorjivont kortolo? Kosli kudd gheun tim portim ietelim?” Arê pixea! Jem bim tum vomptai, tem melea xivai taka novo jiv mellona. Tum vomptai tem bim magir dixtti poddtelem tem nhoi, punn fokot bim, mhonnum-ia gonvachem vô anink koslem-i. Tea biak Dev, Apnnench tharailam toxem, ang ditolo, ani dor-eka jin’sachea biak ap-aplem ang. Sogllem mas ekuch mas nhoi; mon’xanchem mas ek, mon’zatinchem mas dusrem, suknneanchem mas vegllem, ani masllêchem anink-ui vegllem. Prithver kuddi asat toxench ontrallar-ui kuddi asat; ontralla veleam kuddink sundorai asa ti êk, ani prithver asat team kuddinchi sundorai veglli. Suriacho porzôll êk, chondrimacho porzôll dusro, ani noketrancho porzôll tori vegllo. Ani noketram modem porian porzôll veg-vegllo. Mel’leanchem punorjivontponn-ui toxench: biam vori ami vomptanv ti kudd vinaxi, Dev voir kadta ti ovinaxi; ami vomptanv tem hinn-holkem, Dev voir kaddta tem mhoimen bhòrlolem; ami vomptanv tem osokt, Dev voir kaddta tem xoktivont; ami vomptanv ti, soimbik kudd; Dev voir kaddta ti, otmik kudd. Soimbik kudd asa, toxich otmik kudd asa. Povitr Pustokar boroil’lem asa tea pormannem, “poilea mon’xak, Adanvak, Devan êk jivo monis kelo”; nimannea Adanvak Tannem Jivit-divpi Atmo kelo. Punn poilo aila to otmik nhoi, punn soimbik; uprant ailo to, otmik. Poilo monis, zomni thaun ghôddlolo to, matiecho; Dusro Monis sorgincho. Zoso poilo matiecho to, toxim matiechim tim tachê sarkim; ani zoso ho Dusro sorgincho, toxim sorginchim tim Hachê sarkim. Mhonntôch, zoxem ami matiechea mon’xachem sarkem gheun aileanv, toxench sorginchea Mon’xachem sarkem ami ghetelenv. Bhavam-bhoinnimnô, hanv sangunk sôdtam tem hem: amchea masa-rogtak Devachea Rajeachem daiz gheunk tank nam: vinaxi soimbak ovinaxiponn mellunk xokti na. Aikat, hanv khobor kaddtam ti eka guddart sotachi: ami sogllim morchim nanv, punn êkê ghoddiê bhitôr, dollo bittbitt’ta mhonnosôr, nimannê tuturechea sadar Dev amam-sogllean-chem rupantor kortolo. Tôr êk tuturi vaztoli ani mel’leam mon’xank Dev ovinaxi soimban punorjivont kortolo ani oxem Toch amchem rupantor kortolo. Kiteak vinaxi tem ovinaxi zaunchem mhonn ani morun veta tem omor zaunchem mhonn Devachi khuxi. Vinaxi tem ovinaxi zalea uprant, ani morun veta tem omor zalea uprant, Povitr Pustokar boroil’lem asa tem utor ghoddon ietelem: “Zoit mell’lem, mornnacho bhosm zalo!” “Ê Mornna! Tujem zoit khõi atam? Ê Mornna! Tujem kuns khõi anink urlam?” Moronn haddta tem kuns mhollear patok, ani patkak boll dita ti Somurt. Amchea Somia Jezu Krista vorvim Dev amkam zoit ditach: tôr Devak amcho dhin’vas gavum-ia! Mhonntôch, mhojeam bhov priticheam bhavam-bhoinnimnô, sodanch ghott ravat, thir ravat, odik-odik hurben Somiachi seva korit ravat. Tumcho koxtti vavr Somi bhov follabhorit kortolo mhonn monant dhôrat. Bhoktank adar diunchê khatir danam ektthãi korchê vixim, Galaxientleam povitr-sobhank hanvem dileat tech nem’ tumi-i samballat. Dor satolleachea poilea disa zonn-eklean ap-aplê tanki pormannem kitem-i ganttik marun kuxin dovorchem; hê porim, hanv tumchê-xim ietôch, vorgonni kaddchi anink goroz poddchi na. Hanv tumchê-xim ietôch tumchi maniotai asleleam mon’xam kodde hanv potram ditolom ani tanchê udexim tumchim danam Jeruzaleak dhaddtolom. Hanvem-i vechem poddlem zalear, te mhojê borabôr vetele. Maxedonientlean mhaka vochunk zai, tôr Maxedoniek bhett dilea uprant hanv tumchê-xim ietolom. Tumchê modem ghoddiê hanv thoddo vêll ravtolom, ani ghoddiê hinvallo porian tumchêch modem sartolom; uprant khõisor-ui hanv vochon zalear, mhojê fuddlê vattek tumi mhaka adar ditelet mhonn ravtam. Fokot vatter thoddo vêll tumkam bhett diunchi mhaka khuxi na. Somiachi khuxi zalear, tumchê modem boroch vêll sarunk sôdtam. Pon’nasvea Disachea Porbe porian hanv Efez xarant ravtolom; Khorench hanga zaito faideacho vavr korunk dar ugtem asa, punn thõi virôdh kortelim-i zaitim zannam asat. Timot tumchê-xim iet zalear, taka bhirant vô husko asunk koslench karonn dium nakat; to-i mhojêch bhaxen Somiachem kam’ korta. Konnench tachi beporva korchi nhoi. Mhojê-xim borê bhaxen portun ieunk taka adar diun vatter ghalat: kiteak amcheam bhavam-bhoinnim borabôr tachi vatt polleun asam. Amchea bhava Apol’lo vixim hem sangchem asa: dusream bhavam-bhoinnim borabôr tumkam bhett di mhonn hanvem tachê lagim prarthun maglem, punn oxem korunk taka atam bilkul khuxi na zali, bori sond’ mellot tedna to tumchê-xim ietolo. Zagrut ravat, bhavart thirponnan samballat; kalljidarponn dakhoiat, ghott ravat; Tumi kortat tem sogllem pritimogan korat. Bhavam-bhoinnimnô, anink êk vôst tumchê lagim magchi asa: Istefanak ani tachea kuttumbak tumi ollkhotat. Akaient soglleam-vôn poilim tãnnim amcho bhavart dhôrlo, ani Devacheam bhoktanchê sevek tãnnim aplem jivit bhettoilam. Tumi-i tumchê pallien, osleam mon’xanchi ani tanchea vangdda ghas gheun vavr kortat, tanchi seva korat. Istefanas, Fortunat ani Akaikus pavle mhonn mhaka khub anond zala, kiteak tumi hanga nant mhonntôch, tumchea zagear tãnnim mhaka dhadoxi kelo. Kiteak tãnnim mhojem ani tumchem-i somadhan kelem. Osleam mon’xanchi tumi opurbai korun dakhoiat. Aziechea prantantleô povitr-sobha tumkam noman kortat. Akuila ani Priska ani tanchea ghorant bhòrta ti povitr-sobha Somia sovem vhoddê ixttagotin tumkam vicharta. Sogllim bhavbhoinn tumkam nomoskar kortat. Somiachea ekvottant tumi bhavbhoinn mhonnun ekamekak tumchea mogachi khunna diat. Mhojeach hatan hi vôll hanv boroitam: Pauluchem noman tumkam. Konn-ui Somiacho môg korinant zalear, tanchem kotta! Marana tha. Somi Jezu tumkam Apli dulobai dakhoum. Jezu Kristachea ekvottant tumam-somestancho hanv môg kortam. Paulu, Devachê khuxen Jezu Kristacho apostl, ani amcho bhav Timot Korintant aslolê Devachê povitr-sobhek ani sogllê Akaient asleleam somest bhoktank hem potr boroitat. Deva amchea Bapachi ani Somia Jezu Kristachi doiallai ani xanti tumkam favo zaum. Dev, amchea Somia Jezu Kristacho Bap, sodanch doiall Bapui ani soglleam amcheam gorzamnim amkam dhir-divpi: tôr Taka vakhannum-ia. Soglleam amcheam koxttam-dukhimnim To amkam dhir dita; hê porim ami-i, Deva koddlo amkam ieta to dhir gheun, sogllê torecheam trasank sampoddleleank dhir diunk xoktanv. Zoxem Bap amkam Kristachea koxttamnim bhorpur vantto dita, toxench To amkam Krista udexim bhorpur dhir-ui dita. Ami attevitte kaddtanv? Tôr te tumkam dhir ani soddvonn mellchê pasot. Amkam dhir mellta? Tôr ho-i tumkam dhir mellchê khatir. Oxem ami bhôgtanv tech koxtt-dogd tumi-i thirponnan bhogunk pavtelet. Tumchê vixim amcho bhorvanso thir, kiteak koxttam-dogdamnim amchim bhagidaram zaun, dhirant-ui tumi amchim bhagidaram zatelet mhonn ami zannonv. Bhavam-bhoinnimnô, Aziechea prantant kede ami upodre-koxtt bhôgleat, tem tumi zanno zal’lim mhaka zai: kitlo zôdd bhar amcher poddlo! To amchean sõsum nozo titlo! Team upodream-koxttantle ami jive utortelenv mhonn amkam bhorvansoch naslo. Khorench, mornnachem formonn amcher poddlem-xem amkam dislem; ami koxêch bhaxen amcher patiena zaunk hem oxem ghòddlem: fokot Devacher ascho sogllo amcho visvas, kiteak mel’leank porian jivont korunk Taka tank asa. Mornnachea iedea vhodda sonkottantle Tannem amkam nivarle, ani hea fuddem-i To amkam nivartolo mhonn amcho bhorvanso. Tumcheam-i magnneancho amkam adar mellum; oxem zaiteam zannancheam magnneamnim Devan amkam kela tea upkara khatir zaitim zannam amchea nanvan Taka dhin’vastelim. Soglleam kodde, punn bhov-korun tumchê kodde vagtana, amchi chal sodanch, Devak zai toxi, promannik-ponnachi ani sadeponnachi zali; hantum mon’xachê zannvaiecher patieun nhoi, punn Devan funkea dil’lea denneachê podvecher patieun ami chol’leanv. Hachê pasot amkam obhiman bhògta ani hem tumkam khatren sangtanv. Amchea borovpant tumkam spoxtt vachunk zaina ani sarkem somzunk mellona toslem kãich ami tumkam boroinanv. Tumi tem samkem somzotelim mhonn mhaka visvas asa. Zoxem tumi ozun porian amchi chal ili-ili somzunk pavleant, toxench tumi ti sarkich somzunk pavtelet mhonn bhorvanso ballgitam; oxem, amchea Somia Jezucho Dis ietolo tedna, zoso tumchê khatir amkam obhiman bhògta, tosoch amchê khatir tumkam-i obhiman bhògtolo. Hea soglleachi khatri mhaka asli dekhun, hanv poilim tumchê-xim vochunk ani oxi tumkam dupêtt khuxalkai diunk sôdtalom. Mhonngê, mhoji ievzônn oxi asli: tumchea ganvantlean Maxedoniek vochunk ani Maxedoniê thaun portun ietana novean tumchê-xim ieunk; magir, vattek goroz to adar tumchê koddlo gheun, Judeiak vochunk ievjitalom. Oxi mhoji ievzônn asli mhonntôch, hanvem ti voilea-voir bodôl’lea mhonn dista tumkam? Vô mhojea mon’xasoimbak avoddta tem polleun, mhojeô ievzonnô kortam ani mhojea monant borabôr “Hôi, hôi” ani “Na, na” asa mhonn somzotat tumi? Zoso Dev dil’lem utor visvaxiponnan pallta, toxem amchem utor tumkam borabôr “Hôi” ani “Na”, oxem zaunk na. Hanvem, Silvanan ani Timotan tumkam porgôttla to Devacho Put, Jezu Krista, borabôr “HÔI” ani “NA” oso kednanch zalo na; To sodanch “HÔI”. Kiteak Devan keleat titleô-i bhasavnneô Tachê sovem “HÔI” zaleat, ani heach pasot Tachê vorvim Devak mhoima diunchê khatir ami “AMEN” mhonntanv. Khud’ Devan amkam ani tumkam borabôr Jezu Krista sovem ghott rigoun dovorleant; Devanuch amkam Aplê sevek makhleat, ani ami sogllim Tachim mhonnun amcher Tannem Aplo xik’ko marla, ani Apnnem amkam dovorlelem asa tea soglleacho isaro zal’lê porim Tannem amcheam kallzamnim Atmo ghala. Mhojea jivachean sangtam, hanv novean Korintak vochunk na zalear, hachem karonn ekuch: tumkam anink dukh dina zaunk; hacho govai Dev. Khorench, tumchem bhavartachem jivit zobordosten cholounk amchem mon nhoi, tumcho sontôs vaddounchea monan tumchê borabôr vavrunk amchi khuxi; kiteak tumchem bhavartachem jivit thir. Tumkam dukh diunchi nhoi mhonn tumkam novean bhett dinam zaunk hanvem tharav ghetlo. Tumkam hanvem khônt dili tôr, mhaka khuxal korunk anink konn asa? Tumich nhoi tim, hanvem khontibhorit keleant tim? Tumich tim mhaka sontosbhorit kortat tim dekhun, tea vellar tumkam bhett diun mhakach hanv fokot khônt haddto aslom; mhonnun hanvem tumkam tem potr boroun dhaddlem. Jedna hanv sontosbhorit asam, tedna tumkam-i sontôs zata mhonn mhaka khatri asa. Tumkam khontibhorit korunk mhonn nhoi, punn tumam-soglleancho kitlo hanv môg kortam tem tumi zanno zaunche khatir, khontint ani dukhint buddlolea kallzan ani dukam golloun hanvem tumkam tem potr boroilem Konnem zôr khônt dilea, ti tannem mhaka diunk na, punn êkê bhaxen — vhoddlem korun sangina zaunk — ti tumam-soglleankuch dilea. Tumchê sobhen tea mon’xak khast lailea ti puro. Tumi taka bhôgsuncho ani taka dhir diuncho, na zalear aplê vhôdd khontint to buddon vochot. Tumi tachi opurbai korun dakhoiat mhonn hanv tumkam ulo kortam. Tumchi porikxa korunk ani kitlê khaltikaien tumi adnia palltat tem polleunk hanvem tem potr boroilem. Tumi konnak bhôgxitat tedna, hanv-ui taka bhôgxitam. Ani hanvem kitem bhogxilem tem, – hanvem-i bhôgsunchi goroz asli zalear – hanvem Krista hujir bhogxilam. Oxem Soitan amcher zoit vhorunk pavcho na. Tacheô naddbudhi ami borim zannonv. Kristachem xubhvhortoman porgottunk Troas ganvant hanv pavlom tedna, Somian mhaka ek dar ugddun dilem. Punn Tit mhozo bhav mhaka thõi mellunk na dekhun, mhaka thar na zalo. Tea pasot tea lokacho nirôp gheun hanvem Maxedoniechi vatt dhôrli. Punn Devak dhin’vastam, kiteak To amkam Kristachea ekvottant dovrun sodam Tachea zoitachea porivarant vantto dita ani amchê udexim Kristachê ollkhicho domdom’ soglleak ximpddaita: khorench mhonn’lear, ami Deva mukhar choddta toslo Kristacho domdomit pormôll: soddvonn ghetat tanchê modem, toxench ibadd zaunchê vatter asat tanchê modem. Heam nimanneank mornnak pavoita toslem mornnadik ghann-ordd’dann, ani poileank jivan bhorit veta toslo domdomit sugondh. Oslea kamak khand marunk konn purto zait? Ami zalear, Devachea utracho dhondo kortat tosle veapari ami nhoi; osle veapari khub. Punn ami Deva hujir, khud Devan pattoil’le porgôttnnar mhonnun, sadea monan Krista sovem utor porgôtt’tanv. Ami novean amchich vhoddvik sangunk sôdtanv kai? Kãi zannank goroz asa toxi, tumkam dakhounk vô tumchê koddli gheun dusreank dakhounk visvas-potrachi amkam goroz asa mhonn dista tumkam? Tumich amchem visvas-potr; tem amcheam kallzamnim boroil’lem asa ani soglleank tem vachunk ani somzunk mellta. Dubhava vinnem Kristachem potr tumi, amcheam hatamnim boroun kaddlelem: xaien nhoi, punn jivea Devachea Atmean; fatracheam folliancher kantoil’lem nhoi, punn masacheam kallzacheam folliancher boroil’lem. Deva mukhar Krista udexim Ho visvas amkam asa: amchêch osttongim ami kitem-i kelam mhonn sangunk ami xokonanv, punn amchi xokti Deva koddsun ieta. Tannench amkam novea korarache iukt sevok keleat. Ho Korar boroil’leam kaideam vixim nhoi, punn Atmea vixim; kiteak mhonn’lear boroil’le kaide jiv kaddtat, punn Atmo jiv dita. Somurt okxoramnim fatracheam folliancher kantoil’li; ani Devan ti Moizesak dili tedna, Devachi mhoima fankli. Moizesachem mukhamoll tê mhoimechea porzollan fankunk laglem, punn ho porzôll palovon vetalo; ani tori Moizesachea mukhamollacher to itlo loklokit aslo, ki Israelacheô put-dhuvô tacher apli nodor lavun dovrunk xokonasleô. Mon’xank moronn haddta ti Somurt itlê mhoimen denvun aili zalear, Atmeacho Korar sthapon ailo tedna, kitlê odik vhôdd mhoimen to fankunk favona? Amkam khastichem formonn haddta ti seva mhoimevont zali tôr, amkam Devak manovlelim mon’xam korta ti seva kitli odik mhoimevont zaunk favonam? Khorench, atanchê ut’tôm’ mhoimek sôr kelear, adli mhoima kãich nhoi asli mhonn amchean mhonnunk zata. Kiteak palovon vechem aslem tem mhoimen fanklem zalear, togta tem kitlê odik mhoimen fankunk favona zait? Amkam oslo bhorvanso asa dekhun, ami kalljidarponnan uloitanv. Aplea mukhamolla velo porzôll palovon vetana, Israelacheam putam-dhuvamnim polleuna zaunche khatir, aplem mukhamoll eka podd’dean dhampto, Moizesa bhaxen ami nhoi. Punn tanchea gineanacher kallôk poddlolo; khorem mhonn’lear, az porian, Adlo Korar vachtat tedna, toch podd’do thõich asa; kiteak konn-ui Kristak ekvott’ta tedna mat, to podd’do koddsoron veta. Ozun porian Moizesachi Somurt vachtat tedna, tanchim monam eka podd’dean dhamplelim asat. punn vollon Somia-xim tim ietelim tedna mat, to podd’do koddsoron vetolo. Tôr Somi mhonn’lear Atmo, ani zõi Somiacho Atmo asa thõi svotontrtrai asa. Oxem tôr, amchea mukhamolla voilo podd’do kaddun, eka arxea porim Somiachê mhoimechim kirnnam ami portim fankoitanv; oxem ami sogllim bodlon, Zacho porzôll ami portun fankoitanv, Tachê sarkim ami odik-odik zait vetanv, Tachi mhoima odik-odik amchea jivant fankta. Hem kam’ sogllem Somiachem, ani hoch to Atmo. Devan hi seva amchê adhin kelea dekhun, ami ang kaddinanv. Lojek lagun guptim dovortat tim kortubam ami soddun ditanv, amchi chal naddbudhichi nhoi, Devachem utor ami borsun porgott korinanv; portench zalear, sot tem ami spoxtt porgôtt’tanv ani, Devak amcho govai korun ani somest mon’xancheam ontoskornnank ulo korun, ami amkanch sakxi ditanv. Amchem xubhvhortoman dhamplelem asa zalear, fokot ibadd zaunchê vatter asat tankam tem dhamplelem asa. Mhonngê Krist khoreponnim Devacho rupkar, tori Tachea mhoimêbhorit xubhvhortomanacho porzôll onbhavar-teank fankona zaunk, hea kalla-iugachea devan tanchim monam kurdd’dim keleant. Ami amkanch porgott korinanv, punn Jezu Kristak Somi mhonn ami porgôtt kortanv, ani ami zalear Jezu khatir tumche sevok. “Kallokan uzvadd porzollum”, oxem Devan mhonn’lem; tôr Tannench, Kristachea mukhamollar porzollta tê Aplê mhoimechi ollokh amcheam kallzamnim fankoili. Punn ami fokot matiechim aidonam, ani hem bhanddar osleam aidonamnim ghal’lem asa; mhonntôch hi amkam dil’li vorti podvi amchê thaun upzona; ti sogllich Devachi. Soglleam jin’sancheam koxttancho bhar ami sõstanv, punn Dev amkam chepon poddunk dina; ami sogllech ghuspotanv, punn niraxi zainanv; piddapidd bhôgtanv, punn Dev amkam kednanch sanddinam: amkam khala uddoitat, punn amcho jiv kaddunk pavonant; hea amchê kuddichea jivitant Jezuchem punorjivit dixtti poddchê khatir, teach amchê kuddichea jivitant sodanch ami Jezuk Tachea mornnant ekvottlele asanv. Jezuchem punorjivit amchê vinaxi kuddint ugddapim dixtti poddchê khatir, jivech astana Jezu pasot ami mornnachea sonkottant bhonvtanv. Hê bhaxen moronn amchê sovem aplem kam’ korit asa, punn tumchê sovem punorjivit aplem kam’ korit asa. “Hanvem bhavart dhôrla dekhun hanv uloilom”, oxem Povitr Pustokar boroil’lem mellta, tench bhavartachem mon amkam-i asa dekhun, bhavart dhorun ami-i uloitanv. Devan Somia Jezuk punorjivont kela mhonn ami zannonv; toxench To amkam-i Jezu borabôr punorjivont kortolo ani amkam tumchê sangatim Apnna mukhar vhortolo mhonn ami zannonv. Hem sogllem tumchea boreak; hê porim jitli Devachi doiallai odik-odik lokak bhogunk mellta, titli odik-odik Devak mhoima diunchê khatir loka modem Tachi dhin’vasnni-i vaddot veteli. Hea pasot ami kednanch ang kaddinanv. Zorui bhailean amchem jivit bigddun veta, torui bhitorlean tem disan’dis novsoron veta. Kiteak heô amcheô lhan ani thoddea kallacheô khonti-dukhi sasnnachê ut’tôm’ mhoimek amkam toiar kortat: heam khontim-dukhim ani hê sasnnachê ut’tom’ mhoimê modem koslich sôr korunkuch zaina. Mhonntôch dolleank dixtti poddtat tosleam vostuncher ami amchem dhean-mon lainanv, punn dixtti poddonant tosleam vostuncher; dixtti poddtat teô vostu thoddoch vêll urtat, punn dixtti poddonant teô sasnnak togtat. Hea sonvsarant ami hê kuddichea tombunt biradd korun asanv to tombu moddon gelo zalear, mon’xan-cheam hatamnim bandunk naslelem, sasnnak togpachem ani Deva koddlem ghevpachem, ek ghor amkam sorgar toiar kel’lem asa mhonn ami zannanv. Vingllim zal’leam mon’xam vori ami hea tombu bhair poddlelim zaun nhoi, punn ozun hea tombunt jietana, hea atanchea biraddacher tem amchem sorginchem ghor gheunk ami axetanv, ani hê axen amchê sonvsari ghotint ami pinrgotanv. Kiteak hea tombuchi, mhonngê hê kuddichi, nhesônn kaddun uddounk amchi khuxi nhoi, punn hêch nhesonnicher dusri nhesônn gheunk amchi khuxi; dekhun hea tombunt, mhonngê amchê kuddint, jietana, eka bhara khal chepon aslelê bhaxen ami pinrgotanv; oxem jem kitem amchê bhitôr vinaxi asa, tacho bhosm zatolo: hem ovinaxi jivitachem zoit! Heach xevottak khud Devan amkam toiar keleant; ani Tannench hacho ixaro koso amkam Atmo dila. Mhonntôch, kuddint aso-sôr Somia thaun ami pois asanv mhonn zanno zaun-ui, ami visvasan bhoron jietanv. Kiteak ami dolleamnim polleun nhoi punn bhavartan choltanv. Khorench ami visvasan bhoron jietanv; ani khorench mollear, hê kuddintlim bhair sorun Somia sorxem jieunk amchi axa. Ami kuddint jieum vô kuddi bhair jieum, amchi êkuch khuxi mhollear Taka manonk. Hê kuddichea jivitant astana jem kitem zonn-eklean vaitt vô borem kelam, tea pormannem apnnak favo tem gheunk ami sogllim Kristachê neaisodrê mukhar ubim ravchim mhonn Devachi khuxi. Mhonntôch Somiachi bhokti khorea monan korun, mon’xank jikun gheunk ami vavurtanv. Amchi vagnnuk Deva mukhar ugti; ani tumchea-i ontoskornna mukhar ti ugti asa mhonn ami visvas dhôrtanv. Ami vhodd mhonn tumkam dakhounk ami novean proitn korinanv, punn tumkanch amchê vixim vhoddvik bhogunk ami tumkam soêg ditanv; oxem jim konn kalliz ani mon polleun nhoi, punn fokot bhailich vagnnuk polleun boddai sangtat, tankam tumchean fuddo korun zobab diunk zatelem. Ami pixe mhonn dista konnak? Hôi zalear, Deva pasot ami pixe; punn khorench mhonn’lear ami pixe nhoi, ani amchem xanneponn tumchea faideak. Karonn Kristacho môg amkam thar dina, kiteak Eklo soglleam khatir melo zalear, sogllinch meleant mhonn amkam khatri asa. Khorench, To soglleam mon’xam khatir melo. Oxem kiteak? Jivim asat tim apnnam khatir ani-anink jieunchim nhoi mhonn, punn tanchê pasot melea uprant Zaka Devan punorjivont kela, Tachêch khatir. Hea pasot, hem sot ami ollkhunk pavleanv tedna thaun, ami konnakuch mon’xasoimbachê nodren polleun lekhinanv; ani zorui ami ekdam Kristak mon’xasoimbachê nodren lêkhla, torui atam Taka toso anink ami lekhinanv. Mhonntôch, konn-ui Kristachea ekvottant asat tôr, tim êk novi rochnna; pornnem tem gelem, atam sogllench novem! Hem sogllem Deva koddsun ailam; Tannench, Krista vorvim sondhan korun, amkam Aplê vengent portun haddleant, ani hea sondhanachi seva amchea hatant ghalea. Hanv sangunk sôdtam tem hem: Dev mon’xanchim patkam tancher add monant dhorinam, punn Krista sovem Dev sonvsarantleam soglleam mon’xank Aplê vengent portun gheta, ani atam hea sondhanacho sondêx Tannem amchê adhin kela. Mhonntôch ami Kristache protinidhi, amchê udexim khud Dev tumkam ulo korta. Kristachea nanvan ami tumkam oxi vinoti kortanv: Devachê vengent portun ieiat! Jezuk koslench patok naslem; punn Tachea ekvottant ami Devak manovlelim zaunchê khatir, Devan amchem patok Tacher ghalem. Ami Devache sohokari mhonn tumkam oso ulo kortanv: tumi ghetlea ti Devachi doiallai nirfôll zaunk dium nakat. Kiteak Dev oxem sangta; “Xubh vellar Hanvem tuzo ulo aikolo, ani taronnachea disa Hanvem tuka adar dilo.” Polleiat: hoch to xubh vêll; taronnacho dis to hoch! Amchea muniarponnant koslich chuk mellona zaunk, konnachêch sudharnnechê vatter ami koslich addkhôll ghalinanv. Portench zalear, soglleam vattamnim ami Devache sevok mhonn dakhoitanv: koxtt-dukhi, oddchonni ani hal-upodre ami bhôgle; ami mar ghetlo, amkam bondkhonnint uddoile, amcher bonddai keli; koxtti vavr amim kelo, amkam nhid porian na zali ani upas-tapas ami kaddcho poddlo; hea sogttant ami thir ravleanv. Chuki virêt amchi vagnnuk; zannvaiechi amchi xikovnn; sosnnikaiechi ani bhole-ponnachi amchi chal; Povitr Atmeache bhorpur gunn amkam; amcho pritimôg ddhông-naslolo; sotacho amcho nirôp; amkam asa ti ghottai Devachich; dusmana virudh zhuztana ani amchi rakhônn kortana, amcheam hatamnim fokot Devak man’ta toslea jivitachim hatiaram; dôr disachea amchea jivitant amkam melltat man ani beman, konn-konn amchi ninda kortat ani konn-konn amkam vakhanntat; ami sot tem porgôtt’tanv, tori amkam fotting koxe lêkhtat; sogllo lôk amkam ollkhota, tori ami konn nhoi aslelê porim amkam dhôrtat; ami morpachech, tori he polle ami jivech asanv; amkam boroch mar ghala, tori amcho jiv kaddunk pavunk nant; khonti-dukhint buddlele astam, ami sodanch sontoxi; ami khorench gorib, tori dusrê vatten ami puskoll zannank girest korit asanv; jogant amkam kãich na khorem, tori sogllo sonvsar amcho. Korintkaramnô, tumchê kodde ami ugteponnim uloileanv, amchem kalliz tumkam sarkench ugtem kelam. Môg unno zala zalear, to amchê vatten nhoi, to tumchêch vatten unno zala zait. Tumi mhojim bhurgim zal’lê porim oxem tumkam sangtam: môg mogan farik korunk, tumchim-i kallzam mhaka sarkim ugtim korat. Onbhavarteam kodde favo nhoi toslo sombond zoddum nakat. Promannikponn ani khotteponn koxim mhonn vangddi zaunk xoktat? Uzvadd ani kallôk hanchê modem koslem bhagidarponn asum-iet? Krist ani Soitan, hanchê modem kedna tori koblat asum-iet? Bhavart asloleam ani bhavart nasloleam modem koslem bhagidarponn ghoddunk zata? Devachea mondira ani murtim-puttleam modem koxêch bhaxen ekmot asum nozo, kiteak ami khoreponnim jivea Devachem mondir. Tôr Devan oxem mhonn’lam: “Tanchê modem Mhojem tthikann kortolom ani tanchê modem jietolom; Hanv zatolom tancho Dev ani tim zatolim Mhoji porza.” “Tea pasot, mhonnta Sorvespor, tanchê modlim bhair sorat ani mekllim ravat; koslêch mhellê vostuk hat lavum nakat, tedna Hanv tumkam vengent ghetolom. Hanv tumcho Bapui zatolom, ani tumi zatelet Mhoje put ani Mhojeô dhuvô. Oxem mhonnta Sorvpodvedar Sorvespor.” Priticheamnô, osleô bhasavnneo amkam kel’leô asat dekhun, kuddin ani otmean soglleam khotantlim nitoll zaum-ia ani Devachi bhokti korun amchi povitrtai sompadnnek pavoum-ia. Tumcheam kallzamnim amkam zago diat. Ami konnakuch vaitt korunk na, konnakuch nuksann korunk na, konnachoch faido kaddunk na. Konnachoch guneanv korunk hanv hem sanginam; tumkam hanvem adim sanglam toxem, tumkam mhojea kallzant ballgun dovortam; oxem vangdda ami jietanv ani vangdda ami mortanv. Tumchê lagim ugteponnim mhojean ulounk zata; ani tumchê vixim mhaka vhôdd obhiman bhògta: oxem soglleam amcheam koxttam-dogdamnim mhaka bhorpur ghottai asta, ani mhojem kalliz sontosan bhoron òt’ta. Ami Maxedoniek pavlea uprant porian hê amchê kuddik visovuch naslo. Portench zalear, veta thõi sogllea jin’sache koxtt-dogd ami bhôgle: bhailean zhuzam, bhitorlean huske. Punn mon mòddleleank Dev ghottai dita, oxem Titak amchê-xim pavoun amkam-i Tannem ghottai dili; nhoich tachea iennean, punn tumi taka dil’lea dhiran. Kitlim tumi amkam polleunk axetat, kedi vhôdd tumchi khônt, ani mhozo man rakhunk kitli umêd tumkam asa, hem sogllem tannem mhaka kolloilem; hi soglli khobor aikun, hanv odikuch sontosan bhòrlom. Mhojea potrak lagun tumkam vaitt dislem khorem, tori tem hanvem boroilem mhonnun mhaka dukh disonam. Tumkam thoddoch vêll vaitt dislem mhonn zanno zaun, zori poili mhaka dukh bhògleli, tori atam hanv khuxal asam: tumkam vaitt dislem mhonn nhoi, punn vaitt disun tumi borea rostear pavleant dekhun; tumkam khônt zali ti Devak man’ta tosli ani oxem amchê vorvim tumkam koslench nuksann ailem na. Devak man’ta tosli khônt jivit bodlunk ani taronn gheunk pavoita, ani oxem zalem tôr, kãich vaitt na; fokot mon’xasoimbantli upzota ti khônt mornnak pavoita. Tumkanch kitem ghòddlem tem polleiat: Devak man’ta tosli khônt tumkam bhogon, ticho koslo fôll mell’lo to chintat — kitli tumchi umêd vaddli! Tumchoch man rakhunk kitlim tumi suddsuddit zaleant! Tumchê modem vostelea vaittacho kitlo tumkam kanttallo dislo, xikxechi kedi bhirant, mhaka polleunchi kitli axa! Mhozo-i man rakhunk ani guneanvkareak khast lavunk tumchi hurba kitli vaddli! Hê sogllê babtint tumkam kosloch guneanv na mhonn tumi dakhoun dilem. Mhonntôch, opman kela vô opman bhôgla tanchê khatir tem potr hanvem borounk na. Tumi amkam bhoktin manun ghetat: hem Dev zanno ani hem tumkanch dokhol korunk zai aslem mhonn tem potr hanvem boroun dhaddlem. Ani oxem zalem mhonn amkam ghottai mell’li. Amkam ghottai mell’lea tichê bhair, Titak sontôs bhòglo mhonn ami odikuch sontoxi zaleanv, kiteak tumi soglleamnim tachem somadhan kelem. Ani tumchi vhoddvik hanvem taka sanglea zalear, mhaka loz bhogunk na; portench zalear, zoxem tumkam sodanch khorem tem sanglam, toxem Titak hanvem tumchi vhoddvik sanglea ti-i khori. Ani tumi soglleamnim khaltikaien tachem aikolem ani bhirantin ani koddkoddean taka tumchê modem ghetlo, tacho ugddas korun tachem kalliz opurbaien tumchê vatten odikuch oddon veta. Tumcher purnn visvas mhojean dovrunk zata mhonn hanv sontoxi. Atam, bhavam-bhoinnimnô, Maxedoniecheam povitr-sobhank Devan doiallai dakhoili tichi khobor tumkam sangtam. Bhov vhoddam koxttam-dogdamnim tanchi porikxa zali. Tim ekdom’ gorib zal’lim, tori tim sodanch khuxal aslim. Oslê poristhitint bhoron òt’ta toslem udarponn tãnnim dakhoilem. Kiteak aplê kuveti pormannem ani kuveti voir porian, amcheam bhavam-bhoinnink mozôt korpachê sevent apnnank-ui vantto di mhonn teô sobha ap-khuxen amchê kodde prarthun magtaleô: hachi hanv govai ditam. Itleak ami ravonasleanv. Kiteak mhollear, Somiak tãnnim aplem jivit somorpilem, ani atam, hi Devachi khuxi mhonn somzun, amkam-i tem somorpun dilem. Mhonntôch, zoxem Titan hem udar kallzachem kam’ tumchê modem suru kel’lem, toxench tannem tem sompounchem mhonn ami tachekodde maglem. Tôr, zoxim tumi soglleant poilim—mhonngê bhavartant, ulovpachê huxarkaient, zannvaient, sogllê zotnaient ani amkam dakhoil’lea tumchea pritimogant — toxinch hea-i udar kallzachea kamant poilim zaiat. Tumkam ek hukum’ ghalunk hanv hem sanginam; punn, heranchem udarponn tumkam dakhoun, tumcho pritimôg kosak lavun kitlo khoro to polleunk sôdtam. Jezu Kristan, amchea Somian, kitlea udar kallzan amcho môg kelo, ti tumkam bori khobor asa: To girest aslo, punn amchê modem ietana amchê pasot gorib zaun ailo; oxem hea Tachea goribponna vorvim tumi deivik denneamnim girest zaunchim mhonn Tannem oxem kelem. Hê babtint hanv tumkam mhoji budh ditam; ti tumkam khorench boreak poddteli. Kiteak gel’lea vorsa hea kamak tumi hat ghal’lo, khorem mhonn’lear tem tuminch ievzun kaddlelem; tôr atam tem fuddem vhorun sompoiat. Hê porim, zoxem hea kamak hat ghalunk tumi umêd dakhoil’li, toxench, tumchê kuveti pormannem mozôt korun, tem kam’ sompounk-ui umêd dakhoiat. Khuxê-monan kitem-i diunk umêd-hurba asa zalear, mon’xa kodde asa tem Dev manun gheta; mon’xa kodde na tem Dev magina. Dusreancho bhar hollu korun tumich oddchonninchea bhara khal chepon urchim mhonn mhojea monant na, punn sangunk sôdtam tem hem: vanttpant soglleank sarkem mellchem. Tumkam atam chodd asa tantlem kaddun tancheam gorzank tumi pavat, ani êk dis tankam chodd astelem tantlem kaddun tim tumcheam gorzank pavtelim: oxem vanttop sarkem zatelem. Tôr Povitr Pustokar oxem boroil’lem asa: “Zankam chodd mell’lam, tankam kãi ogllem urunk na; ani zankam thoddem mell’lam, tankam kãi unnem zaunk na.” Tumche sovem mhaka aslem tench chintop Titachea kallzant Devan upzoilem mhonn hanv Taka dhin’vastam. Nhoich amchea uleak tannem umedin kan dilo, punn to apunnuch sogllê hurben bhoron ap-khuxen tumchê-xim vochunk vattek laglo. Tachea sangata ami eka bhavak dhaddla: xubhvhortoman porgott korchea kamant tachi kirti soglleam povitr-sobhamnim gazta. Itlench nhoi; ganvam-ganvamnim bhonvtanam, amchê borabôr vochunk ani hea mogachea kamant amkam adar diunk povitr-sobhamnim taka vinchun kaddla; Somiak mhoima diunchê khatir ani gorjevontank pavcho amcho husko dakhounchê khatir hem kam’ ami hatant ghetlam. Udar monan dil’lim itlim danam pavounchi zobabdari palltanam, konnench amchi ttika korchi nhoi mhonn oxem ami manddun haddlam. Kiteak nhoich Deva mukhar punn mon’xanchê-i nodrek sarkem asa tem korunk ami vavurtanv. Hanchê borabôr anink eklea amchea bhavak ami dhaddla: tachi hurba portun-portun ani zaiteam bhasamnim ami topasun kaddlea; taka tumcho chôdd visvas asa dekhun, tachi hurba atam odik vaddlea. Tit zalear mhozo bhageli ani tumchi seva korunk mhozo sohokari; heram bhavam vixim oxem sangchem asa: te povitr-sobhanche dut ani Kristak mhoima haddtat tosle sevok. Oxem tôr, povitr-sobham mukhar tumi tanchi opurbai kortat mhonn dakhoiat, ani tumchê vixim mhaka obhiman bhògta to khorench bhogunk favo mhonn dakhoun diat. Amcheam bhavam-bhoinnink adar diunchê vixim hanvem tumkam borounchi gorozuch na; kiteak tumchi hurba hanv bori ollkhotam, ani tichê pasot Maxedoniekarank hanv tumchi vhoddvik sangit asam, oxem mhonnun: “Gel’lea vorsa thaun Akaia toiar zalea.” Ani tumchê hurben dusream zaiteam zannanchi hurba vaddlea. Tumchê vixim ami kelea ti vhoddvik polki nhoi mhonn dakhounk heam bhavank ami dhaddleat; tumi toiar astelet mhonn hanvem tankam sanglam, mhonntôch tumi toiar ravat; oxem kãi Maxedoniekar bhavank gheun hanv thõi pavon tedna, tumchim danam zomounk tumi ozun toiar nant mhonn tãnnim dekhlelem mhaka naka; visvas dovorlea uprant oxem ghòddlem zalear, kedi loz mhaka! Khorem mhollear, tumkam-i kedi loz! Hea pasot mhojê fuddem tumchê-xim vochat mhonn heam amcheam bhavank hanvem vinoti keli; thõi vochun tumi bhasail’leam dananchi vevostha, tãnnim korun dovorchi: hem mhaka gorjechem dislem. Hê bhaxen tumchim danam tumchê koddlim oddun kaddlolim zaunchim nant, punn khuxê-monan kel’lem somorponn. Sangtam tem monant dhôrat: jim konn thoddem vomptat, tim thoddem lunvtat; ani jim konn chodd vomptat, tim chodd lunvtat. Apnnem diunk tharailam tem zonn-eklean diunchem, tondd vankddem korun vô diunchem suttonam mhonn nhoi; kiteak jim konn hanstea tonddan ditat, tancho Dev môg korta. Tôr soglleam denneamnim tumkam subham’ponnan bhorunk Devak tank asa; oxem tumkam sodanch goroz titlem melltelem ani tea bhair jin’sam-jin’sancheô boreô kornneô korunk tumkam bhorpur upai astele. Kiteak Povitr Pustokar oxem boroil’lem asa: “Sodôll hatan tim dublleank vantt’tat; tanchem boreponn togtelem sodankal.” Dev vomp’peank bim ani tankam posunk khann-jevonn dita; Toch tumkam-i subham’ponnan bim ditolo ani tumchea udar monachim follam vaddoitolo. Sogllê vatten girest zaun, tumi sogllê toren udar zaunk pavtelet, ani oxem amchê udexim ghetleleam tumcheam danam pasot khub lôk Devak dhin’vasunk pavtolo. Kiteak hi Devachê bhoktin kel’li peleachi seva, nhoich amcheam bhavam-bhoinnin-cheam gorzank pavta, punn zaitea lokachi dhin’vasnni Deva mukhar choddo-xi korta. Hê tumchê sevê vorvim apunn Konnachim pattlavdaram tim tumi dakhoun ditat; ani Kristachem xubhvhortoman tumi koxem manun ghetlam tem polleun, amchim bhavbhoinn Devak vakhanntelim; toxench kitlea udar kallzan tumchim dennim apnnank vanttun ditat ani herank-ui pavoitat tachê pasot tim Devak mhoima ditelim. Devan tumkam itlo môg dakhoila dekhun, tim sogllim tumchê khatir prarthon korun aplo moipas tumchê thãi dakhoitelim. Devan amkam kel’lem dennem utramnim ucharunk zaina: oslea dennea khatir Devak dhin’vasum-ia. Hanvuch, Paulu, Kristachê linttuvaien ani dulobaien tumchê lagim prarthun magtam. Tumchê modem astana nômr-khalto, ani pois astam tedna, khor to, hanv to Paulu. Hanv tumchê lagim prarthun magtam: tumchê modem pavtam tedna khoraien mhoji povdvi dakhounk soêg dium nakat! Hanv sonvsari nemam pormannem vagtam-choltam mhonn sangun jim konn mhojer arôp ghaltat, tanchê thãi hanv khôr zaunk zannom. Ami sonvsarant jietanv khorem, punn sonvsari hatiaram gheun amchem zhuz ami choloinanv. Amchim zhuzachim hatiaram sonvsari hatiaram nhoi; Devachê podvechim hatiaram tim, ani kottam moddun uddounk tankam boll asa. Ami môddtanv tim fottkiream torkam-chintnanchim kottam: mhonngê Devachê khorê ollkhi virudh urmottaien uprastat te soglle fottkire vad-vivad ami moddun uddoitanv, ani mon’xamnim aplem sonvsari mon soddun Kristachem mon dhorunk ami vavurtanv. Tumi amkam sarkinch khaltim zaleant mhonn dakhoilea uprant, khaltim zaunk kobul nant tankam xikxa lavunk ami toiar asanv. Tumi voilea-voiruch polleun mon’xachem mol kortat. Konn-ui apunn Kristachea odhikaran ulovpi, Tache sevok mhonn chint’tat? Tôr hanv-ui tanchê-itlo Kristachea odhikaran ulovpi, Tacho sevôk mhonn tãnnim chintchem ani ollkhun gheunchem. Somian mhaka dila to odhikar tumkam voir kaddun ghott korchê khatir, tumkam moddun uddounchê khatir nhoi. Ho odhikar mhaka dil’lo asa mhonn hanvem ghoddiê mhoji vhoddvik chôdd sanglea zalear-ui, mhaka koslich loz bhògonam. Fokot potram boroun mhojean tumkam bhenkddaunk zata mhonn somzonakat. Konn-konn oxem mhonnta: “Tachim potram khor ani bollixtt; punn taka khaxa pollexi zalear, tachê kuddik sokot na, tachea ulovpak-ui boll na.” Team mon’xamnim hem somzun gheunchem: hanv pois astanam mhojeam potram vorvim zoso hanv tankam distam, hanv khaxa tumchê modem ietolom tedna, mhojeam kornneam vorvim hanv tosoch mhonn dakhoitolom. Apnnachich vhoddvik sangtat tanchea panvddear ami asanv mhonn dakhounk vô tanchê kodde amkam sôr korunk ami fuddem soronanv. Kosle mhonn pixe te! Apunnuch zokh tharaitat ani tea pormannem ap-aplem zokh ghetat, ani tench zokh dhorun apnnan-kuch ekameka kodde sôr kortat! Ami zalear favo tea mapa bhair amchich vhoddvik korche nanv, punn Devan amkam tharaun dileat team ximam bhitôruch ami ravteleanv, ani heam ximam bhitôr ravunuch tumchê-xim ami pavtanv. Ami poilinch thaun tumchê-xim ieunk nasleanv zalear, atam tumchê-xim vochun amcheam ximam bhair pavteleanv asleanv; khorem mhonn’lear, Kristachi bori khobor gheun tumchê-xim pavleat te amich mhonn ugddas dhôrat. Mhonntôch ami amcheam ximam bhair kel’lea vavrachi vhoddvik sanginanv, kiteak mhollear dusreanchea vavracheam ximam bhitôr ami pãi dovrunk na. Sodanch Devan amkam tharaun dil’leam ximam bhitôr amcho vavr. Tumcho bhavart vaddon vetolo ani oso tumchêch modem amcho vavr odik-odik follabhorit zatolo mhonn amcho bhorvanso. Oxem zalem tôr, uprant tumchea pranta pelean vochunk ani thõi xubhvhortoman porgottunk amchea monant asa; punn Devan tharaun dil’leam ximam bhitôr konnem dusrean kel’lea vavrachi vhoddvik amkam na. Jim konn vhoddvik sangunk sôdtat, tãnnim Sorvesporan kel’lea kamachi vhoddvik sangchi. Jim konn apnnankuch voir kaddtat, tim Devak manovnant; punn jim konn Devak manovtat, tankam Dev voir kaddta. Mhojem pixeponn ilem-xem tori sõsun gheiat mhonn magtam — khorem mhonn’lear, tem tumi sõsun ghetlam. Mhaka tumchê pasot premaxa bhògta ti Devachich premaxa, kiteak hanvem tumkam Krista kodde logn korun dileant, êk nirmôll ankvar hokol koxi hea ekach Potichea hatant tumkam ghaleant. Punn Evek zalem tem tumkam-i zait mhonn mhaka bhirant dista: sorpan aplê naddbudhin Evek patkant ghali; toxench tumchem mon bigddon vochot ani tumi Kristak ovisvaxi zaxeat, Tachi sorôll ani nirmôll bhokti soddun dixeat — ho mhozo husko. Kiteak mhonn’lear, konn-ui tumchê-xim pavle ani, ami tumkam porgôtt kel’lo tea Jezuk soddun, dusroch Jezu tãnnim tumkam porgôtt kelo zalear, tanchem tumi sompeponnim aikun ghetat! Tanchê koddcho êk dusroch atmo gheunk tumi kobul asat, amchê koddsun tumi ghetla tea Povitr Atmea thaun vegllo; ani toxench, tumi manun ghetlam tea xubhvhortomana thaun vegllem xubhvhortoman tumi khuxen manun ghetat! Punn khorem mhonn’lear, tumcheam team xrextt apostlam poros hanv khõicheanuch unno nhoi. Sundorbhaxen ulovpak hanv huxar nhoi, khorem, punn zannvai mhaka komi na: hem hanvem tumkam sogllea vellar ani soglleam hujir spoxtt dakhoilam. Devachem xubhvhortoman tumkam hanvem funkea porgott kelam, ani tumkam uklun dhôrchê khatir tumchê modem hanv lhan-khalto zalom: hantum mhoji kosli chuk asa? Tumchi seva korchê khatir dusream povitr-sobham koddcho mhozo dispotto giras mhaka magcho poddlo: tumchê pasot tankam hanvem luttleô, oxem mhonnunk mhojea monant ieta. Tumchê modem aslom tedna, mhaka poixeanchi goroz asli, punn tumcher hanvem kosloch bhar ghalunk na; Maxedonientle ail’le team amcheam bhavamnim mhaka goroz titlem haddun dilem. Koxêch bhaxen tumcher ho bhar ghalinam zaunk hanvem sodanch chotrai dhôrlea; fuddarak-ui toxench kortolom. Khoreponnim zoso Krista vixim hanv sot uloitam toxench, Akaiechea akhea prantant konnach-eanuch hi mhoji vhoddvik kaddun gheunk zaunchem na. Ani hem oxem kiteak? Tumcho hanv môg korinam dekhun? Hanv tumcho môg kortam mhonn Dev zanno. Az porian korun ailam toxench hanv kortolom; oxem korun, je konn mhojê sarke mhonn vhoddvik dakhounk sôdtat, tancho soeg hanv moddun uddoitolom. He monis khotte apostl. Kristacheam apostlanchem sovong gheun ietat, punn khorem mhonn’lear te fottkire vavraddi. Hantum koslench ojap na, kiteak khud Soitan porian tezvont devdutachem sovong gheun dixtti poddta. Mhonntôch tache chakor-ui khorea Devacheam chakranchem sovong gheun ietat mhonn kãi ojap na. Xevottak tancheam kortubank favo ti mozuri tankam mellteli. Novean sangtam: hanv piso mhonn konnench mhaka dhôrcho nhoi; punn tumkam zai zalear, mhaka piso mhonn dhôrat ani mhoji boddai mhaka sangum-di. Hanv mhoji boddai sangtam zalear, Somian mhaka oxem sangunk lailam mhonn hanv oxem uloinam; punn piso koso uloitam, kiteak mhoji boddai sangunk mhaka nimit asa mhonn mhoji khatri. Zaiteam zannanchi boddai sonvsari vhoddvikechi, tôr mhaka-i boddai dakhoum-di. Tumi xannim mon’xam, tori khuxê-monan pixeank sõsun ghetat; tumkam gulam kortat, tumkam lutt’tat, tumcho faido ghetat, tumchi kirkont kortat vo tumcher pãi dovrun aplo odhikar choloitat, ani tumchea polear legun thapttam martat, osleam pixeank tumi khuxê-monan sõsun ghetat. Hem sogllem sangunk mhaka loz bhògta; amich ghoddiê osokt zaleanv kai? Konn-ui apli boddai sangunk fuddem sorta? Tôr piso koso uloun, hanv-ui boddai sangunk fuddem sortam. Te konn Hebrev? Tôr hanv-ui Hebrêv. Israelkar te? Tôr hanv-ui Israelkar. Te Abrahamachê sonstintle? Hanv-ui têch sonstintlo. Kristache sevok te? Mhojem ulovp atam pixeachench disot, punn hanv-ui Tacho sevôk ani khoreaninch odik xrêxtt sevôk. Odik koxtti zala mhozo vavr, portun-portun mhaka bondkhonnint ghala, hanvem hixôb-nasloleam jerbondancho mar khala, puskolldam mhaka mornnachê toddik pavoila. Panch pavtti Judevanchea hatantlo ekonnchallis jerbondancho hanvem mar ghetlo; tin pavtti danddeamnim mhaka boddoilo; êk pavtt mhaka fatrailo; tin pavtti mhojem tarum futtlem ani ekdam êk akhi rat ani akho dis hanv somdiracheam lharancher urlom. Ganvam-ganvamnim bhonvtanam khub sonkoxttank hanv sampoddlom; kosle te sonkoxtt? Bhoron òt’teleam nodinche sonkoxtt, choram-luttnnaranche sonkoxtt, mhojê porje-cheam hatantle sonkoxtt, videxi lokanche sonkoxtt, xaram-nogramnim ani ranamnim sonkoxttt, doriant sonkoxtt, ani tea bhair khorim nhoi asleleam amcheam bhavam-bhoinnim thaun ieto sonkoxtt. Hat-pãi daddaun ani ghas gheun hanvem vavr kela, zaiteô rati hanvem fôddleat, bhuk ani tan hanvem sõslea, jevonn nastanam zaite dis hanvem kaddleat, goroz to asro ani nesônn mhaka na zaleant. Her sogllem soddun, dôr-disa mhojea mathear choddon ieto soglleam povitr-sobhanchi huskeabhorit dhasti. Osokt asat konn? Tôr tanchê borabôr hanv-ui osokt. Manddlolea fasant poddleant konn? Mhaka kedo mhonn kanttallo bhògta! Hanvem boddai sangchi asa tôr, hanv sarkoch osôkt mhonn dakhoitat team vostum vixim boddai sangtolom. Dev, Somia Jezucho Bap, hanv fôtt sanginam mhonn boro zanno: Tachem nanv vhodd zaum! Hanv Damaskant astanam, mhaka dhôrchê khatir Aretas razachea razpalan xar rakhunk rakhonndar dovorlele. Punn kottachê vonntik aslelea eka zonelantlean mhaka eka pantteant ghalun denvoilo, ani oso hanv tacheam hatantlo suttlom. Vhoddvik sangun kosloch faido na; tori hanv sangit ravtolom kiteak sangchi goroz asa, ani Somian mhaka favo kel’leam kãi dorxonanchi ani prokasnnianchi khobor kortolom. Kristachea ekvottant aslelea eka mon’xak hanv ollkhotam. Chovda vorsam adim taka sorgar khud Deva mukhar ubarun vhelo: hi ubarnni mhojê kuddi soit zali vô mhojê kuddi bhair zali tem hanv nokllom — Devuch zanno. Hea mon’xak Voikunttant ubarun vhelo mhonn hanv zannom: hem-i mhaka kuddi soit vô kuddi bhair ghòddlem zalear hanv nokllom — Devuch zanno. Thõi mon’xacheam utramnim ucharunk zainant ani zanchi gozal korunk mon’xank favona tosleô gupit vostu tannem aikoleô. Hea mon’xak favo kel’lea onnbhova vixim vhoddvik sangunk hanv toiar asam; punn mhojêch vixim zalear, fokot hanv kitlo osôkt mhonn dakhoun ditat team vostum vixim vhoddvik sangtolom. Oxem korun, vhoddvik sangunk sodin zalear, hanv piso zauncho na kiteak sot tench sangtolom. Tori oxem hanv korcho na; kiteak mhonn’lear mhaka polleun ani mhojem aikun mhojem mol korunk zata titlench puro; hachê poros, mhojeam oprub prokasnneank lagun, mhojem odik unch mol konnench kel’lem mhaka naka. Teanch mhojeam ut’tom’ prokasnneam pasot, hanv gorvan fulonam zaunk, mhojea angant Devan romblolo êk kantto asa: to mhaka sotaunk dhaddlolo Soitanacho êk dut; haka lagun hanv gorvan fulonk xokonam. Hea vixim, hea sonnso-nnantlo mhaka nivar mhonn tin pavtti prarthon korun hanvem Somia lagim maglem, punn Somian mhaka oxem sanglem: “Mhoji mozôt puro tuka, kiteak osoktaient Mhojem boll sopurnnaien porzollta.” Dekhun, Kristachem boll mhojê sovem voschê khatir, bhov vhoddê khuxen mhojeam osoktaianchi hanv vhoddvik kortolom. Mhonntôch hanv osôkt mhonn, mhaka beman kelo mhonn, veg-veglleam gorzank sampoddlom mhonn, dhumallo bhôglo vô torê-torecheam oddchonnimnim cheplom mhonn, porvach na: Krista pasot hê sogllê gotint hanv murgott’tam, kiteak jitlo hanv osôkt titlo hanv Kristachê xoktin soktivont. Atam hanv khorench piso zalam, punn tuminch mhaka piso kela. Tumi ki mhozo man rakhunk zai aslo; hanv kãich nhoi zalear-ui, tori team tumcheam xrextt apostlam poros hanv kãich unno nhoi. Tumchê modem sogllê sosnnikaien hanv vavurtalom tedna, hanv khoro apostl mhonn khatri diunk mhojê udexim Devan zaiteô khunna, ojapam ani vismitam korun dakhoilim. Heram povitr-sobham poros koxê bhaxen hanvem tumkam kitem-i unnem kelam? Ek mat khorem, mhojea udarposonnacho bhar hanvem tumcher ghalunk na. Hi mhoji onit tumi mhaka bhôgsat! Polleiat, tisrê pavtti hanv tumkam bhett diunk toiar asam, ani mhojea udarposonnacho bhar atam-i tumcher ghalcho na: kiteak tumcheô vostu mhaka nakat; tumi zai mhaka! Avoibapai pasot poixe zomoun dovrunk putam-dhuvancho kaido nhoi; portench zalear, apleam bhurgeam pasot poixe zomoun dovrunk avoibapaicho kaido. Tumchê khatir mhojê kodde asa titlem-i khorchunk, mhozo jiv porian khorchunk, hanv bhov khuxi. Hanv tumcho itlo odik môg kortam dekhun, tumi mhozo unno môg korcho? Borem tôr: hanvem tumcher mhozo bhar ghalunk na khorem, punn, naddbudhicho zaun, mhojê naddbudhin tumkam hanvem mhojea chopkeant dhôrlim. Tumchê-xim hanvem pattoileat team mon’xam modlea eklea vorvim tori hanvem tumcho faido kaddla zait? Tumchê-xim voch mhonn hanvem Tita kodde maglem ani tachea vangdda anink eklea bhavak hanvem dhaddlo. Titan tumcho koslo tori faido kaddlo zait? To ani hanv ekach monan vagunk nant kai? Ami êkêch toren cholunk nant zait? Tumchê mukhar ho sogllo vêll amchem nanv rakhunk ami sôdlam mhonn chintinakat. Na. Ami sanglam titlem Kristachea ekvottant ani Deva hujir sanglam; ami sogllem kortanv tem, priticheamnô, tumchea Kristi jivitant ghott korunk, ami kortanv. Tori, tumchê-xim pavtam tedna, mhaka tumi mellunk zai aslim toxim mellona zaxeat mhonn ani hanv tumkam mellunk zai aslom toso mellona zain mhonn, mhaka husko asa: tumchê modem zhogddim, nattkai, rag, svart, boglanttam, chaddiô, gorv ani gondholl-gollboll astit mhonn mhaka husko. Tumchê modem novean pavtolom tedna, adim ghòddlam tench ghoddot mhonn mhaka bhirant dista: mhozo Dev mhaka tumchê mukhar lojek ghalit. Adim patkamnim jietalim team zaiteam zannam pasot mhaka khub dukam gollounk poddot mhonn mhaka bhirant dista, kiteak mhonn’lear tãnnim ozun aplem pozoddponnachem, kamchari ani soddeponnachem jivit soddun diunk na. Atam tisrê pavtti tumchê-xim hanv ieuncho asam. Koslem-i garannem ruzu korchê khatir dogam vô tegam sakxidaranchê govaikechi goroz. Tumchê modem dusrê pavtti ail’lom tedna hanvem sanglelem toxench, atam-i, tumchê modem nastana, adim pap kelam tankam ani heram soglleank sangtam; hanv porto ien zalear, hanv konnakuch xikxa lainastana ravcho na. Krist mhojê sovem uloita mhonn khatri zai tumkam? Tumchêch sovem To osôkt nhoi, punn tumchê modem To soktivont. Kiteak Taka khursar marlo tedna To osôkt aslo khorem, punn atam Devachi xokti gheun To jivo asa. Tachea ekvottant asun Tachi osoktai ami-i bhôgtanv khorem, punn Tacheach ekvottant ami jive astelelenv ani tumchea boreak Devachi xokti dokhôl kortelenv. Tumi tumchea bhavarta pormannem jietat zalear polleunk tumchich tumi chovkoxi korat. Tumchich tumi porikxa korun gheiat. Tumchê sovem Jezu Krist asa mhonn nokllot tumi? Na tôr, tumcho bhavart sarko nhoi mhonn porikxen-tlean gomon ieta. Punn amcho bhavart zalear sarko asa mhonn tumkam khatri mell’lea asteli mhonn hanv patietam. Ami khatreche mhonn gomun ailam ki na, hachi hanv porva korina. Tumi mat borem tem korchem mhonn Deva lagim ami magtanv. Ami khatreche mhonn disun ieunchem, ho mhozo husko nhoi; punn tumi sarkem asa tem korchem, ho êkuch mhozo husko. Sotacher add vochunk amkam koslich xokti na; fokot sota khatir amkam xokti dil’li asa. Ami osokt zalear zaum-di, punn tumi mat soktivont zaxeat zalear ami khuxal. Tumi sudharot vechim mhonn Deva lagim ami magtanv. Dekhun ozun pois astana hem hanv tumkam boroitam: hê porim tumchê-xim ietolom tedna, Somian mhaka dil’lea odhikaran khoraien tumkam vagounchi mhaka goroz poddchi na; kiteak moddun uddounk nhoi punn bandun haddunk mhaka ho odhikar dil’lo asa. Atam, bhavam-bhoinnimnô, amcho adês tumkam;/mog asum-di; odik-odik sudharonk vavrat; mhojea uleak kan diat, eka monachim zaunk vavrat ani tumchê modem xantin jieiat ani mogacho ani xanticho Dev tumchê sovem astolo. Khorim bhavbhoinn koxim ekamekak ixttagotichi khunna diat. Amcheam bhavam-bhoinnincho nomoskar tumkam. Amchea Somia Jezu Kristachi doiallai, Devacho môg ani Povitr Atmeacho ekchar tumam-somestam sovem asum. Hanv Paulu apostl hem potr boroitam. Apostlanchem apovnnem mhaka mon’xam thaun vô khõicheach eka mon’xa udexim ieunk na; punn Jezu Kristan ani Taka mornnantlo punorjivont kel’lea Deva, Tachea Bapan, mhaka apostl zaunk apoila. Mhojea sangata asat team soglleam bhavam-bhoinnim borabôr Galaxiecheam povitr-sobhank hanv noman kortam: Dev amcho Bap ani Jezu Krist amcho Somi tumkam Apli doiallai ani xanti bhogunk dium. Hea atanchea noxttea kallantlim amkam nivarunk, amcheam patkam pasot Jezun Apnnachench somorponn kelem: hi Deva, amchea Bapachi, khuxi asli. Sasnnachea sasnnak Takach mhoima! Amen. Devan tumkam Kristachi doiallai bhogunk apoileant: Taka itlê vegim sanddun dusri kosli bori khobor tumi dhôrlea mhonn mhaka ojap dista. Khorem mhonn’lear, dusri bori khobor mhonnleli nanch, punn tumkam gondhollant ghalunk ani Kristachi bori khobor donsounk sôdtat tosle monis tumchê modem upzoleat. Punn ami tumkam porgott kelea te bhore khobre bhair konn-ui — amich zaum te, vô sorgar thaun ail’lo to êk devdut zaum — dusri ek Bhori Khobor porgott koritit zalear, Devacho xirap tacher poddum! Adim ami sanglam tench atam anink êk pavtt sangtanv: tumi mandun ghetlea te bhore khobre bhair konn-ui dusri ek tumkam porgott korit zalear, Devacho xirap tacher poddum! Atam hanv konnak manonk sôdtam-so tumkam dista — mon’xank ki Devak? Mon’xank khuxi korunk hanv bhair sorlam kai? Ozun porian mon’xanchi khuxemôt korunk hanvem sôdlolem zalear, Kristacho sevôk hanv zauncho naslom. Hea pasot bhavam-bhoinnimnô, hanvem porgôttlea ti Bhori Khobor mon’xam thaun upzunk na mhonn tumi zanna zalelim mhaka zai; khõicheach mon’xa koddlem hanvem tem gheunk na, vô konnench mhaka tachi somzonni diunk na. Khud Jezu Kristan ti mhaka ugddapi korun dilea. Adim, Judevanchem xastr palltalom tedna, Hanv koso choltalom, koso hanv povitr-sobhek hispa bhair dhumallo ditalom ani ticho nas korunk vavurtalom, tem tumi aikun zannont. Toxench, Judevanchem xastr pallunk ani mhojeam purvozamnim korun dovorleleô chali bhoktin rakhunk mhojê piraiecheam boraborcheam Judevam poros ekdom’ odik hanv hurben bhòrlolom. Mhojê avoichea kusveant-sun Devan mhaka kuxin kaddlo ani Aplê doiallaien mhaka apoilo. Taka zai zalem tedna, Aplea Putachi Bhori Khobor hanvem videxeank porgott korchê khatir, hea Aplea Putachi ollokh Devanuch mhaka ugddapi korun dili. Tea vellar konnachich budh hanvem magunk na, nhoi mhonn mhojê adim apostl zal’leank mellunk Jeruzaleak hanv vochunk na, punn Arabiechea prantant gelom ani porot Damaskak ailom. Hachê magir, tin vorsam uprant, Pedruchi ollokh korunk Jeruzaleak gelom ani tachê sorxem pondra dis ravlom. Dusrea khõicheach apostlak hanvem polleunk na; mhaka mell’lo fokot Somiacho bhav Jakob. Hanv tumkam boroitam tem fôtt nhoi mhonn Deva hujir sangtam. Magir Siria ani Cilicia heam prantantleam thoddeam ganvamnim hanv bhonvlom. Judeiant asleô teô Kristacheô povitr-sobha mhaka tonddan ollkhonasleô. Tãnnim aikol’lem tem itlench: “Zo monis adim amkam dhumallo ditalo ani amchea bhavartacho eka vellar nas korunk vavurtalo, toch monis atam amcho bhavart porgôtt’ta!” Ani mhojê khatir teô Devak mhoima ditaleô. Uprant, chovda vorsamnim, Barnabasa borabôr ani Titak-ui sangata gheun, hanv novean Jeruzaleak choddun gelom. Devan mhaka oxem kollit kelem dekhun hanv thõi gelom; ani videxeam modem hanv porgottit ailam ti Bhori Khobor hanvem fuddaream mukhar khasgi boskent ghali; kiteak mhonn’lear mhozo atancho ani adlo vavr nirfôll zal’lo mhaka naka aslo. Tedna, mhojea sangata aslelea Titak porian, to Grik zaun-ui, sunôt korunk konnench boll korunk na. Jezu Kristacher bhavart dovrun ji amkam svotontrtai mell’lea, ti guptim polleun kaddunk ani amkam novean gulam’ponnant uddounk, amchê modem fals bhav ghusle dekhun ho prosnn upraslo. Punn tumkam porgott kel’le bhore khobrechem sot surokxit rakhun dovorchê khatir, tanchê mukhar ami ek khinn-bhôr porian man bagaunk na. Thõi manan lekhlele fuddari asle (hachê adim te khõichea panvddear asle te mhaka poddonk na, kiteak Dev mon’xank tanchea tondda pormannem lekhinam); tôr heam manan lekhleleam fuddareamnim hanvem kitench bodôlchem mhonn koslich suchnna mhaka korunk na. Ufrattim, sunôt-kel’leank Bhori Khobor porgôttchem kam’ Devan Pedruchê adhin kelam toxench, sunôt korunk nasleleank ti Bhori Khobor porgott korchem kam’ Devan mhojê adhin kelam mhonn tãnnim ollkhun ghetlem. Kiteak, khorench, Zannem Pedruk Judevancho apostl kela, teach Devan mhaka videxeancho apostl korun dhaddla. Jakob, Kefas ani Juanv, hankam povitr-sobheche khambe mhonn lekhtalim; tôr heanch mon’xamnim, Devan mhaka dil’lem dennem manun gheun, Barnabasak ani mhaka bhagidar-ponnachi khunna koxi aplo uzvo hat dilo: hê khunnê voilean ami videxeam vatten ani tãnnim Judevam vatten vechem mhonn amchi koblat zali. Goribancho mat ugddas korunk tãnnim amchê lagim maglem; tôr tench hanv zotnaien korit ailam. Punn Kefas Antiokiek ailo tedna hanvem taka sobhêmazar virôdh kelo, kiteak mhon’llear tachi chal sarki vankddi asli. Karonn Jakoba thaun ailole kãi monis thõi pavchê adim to videxi bhavam-bhoinnim borabôr jevtalo; punn te ietôch, sunôt kel’leam heam bhavank bhieun, to ilo-ilo pattim sorlo ani videxi bhavam-bhoinnim borabôr jevpachem tannem sôddlem. Ani heram Judev bhavarteamnim tachea ddhonge-ponnachi oxi dêkh ghetli, ki Barnabas porian tankam lagun teach ddhonge-ponnachê vatten oddon gelo. Punn Bhore Khobrechea sotachê vatten te nitt-sarke cholonant mhonn polletôch, hanvem soglleam hujir Kefasak mhonn’lem: “Tum êk Judêv, tori Judevanchi chal soddun videxeam bhaxen tum jietai. Oxem zalear, videxeank Judevanchi chal pallunk lavunk sôdtai tem koxem?” Zolman ami Judev, videxeam baxen patki nhoi ami. Toripunn hem ami zannonv: somurt formaita tim kortumbam korun nhoi, punn Jezu Kristacher bhavart dovrun ki khõichim-i mon’xam Devak manovlelim zatat. Mhonntôch, Somurtin formaile-leam kortumbam vorvim, konnankuch Dev Apnnak manovlelim korcho na dekhun, somurt formaita tim kortumbam korun nhoi, punn Jezu Kristacher bhavart dovrun Devak manovlelim zaunchê khatir, ami-i Jezu Kristacher bhavart dovorla. Punn ami Kristak bhavartan ekvotton Dev amkam Apnnak manovlelim kortana, videxeam porim aminch patki mhonn spoxtt disot zalear, khud’ Krist amkam patki bhesant ghalpachem karonn zalo zait? Na ki na! Jem hanvem moddun uddoilelem, tench hanv novean bandunk laglom zalear, hanvem tem moddun vaitt kelam mhonn dakhoitam. Deva pasot jieunche khatir, hanv somurti vorvim somurtik melom. Krista borabor mhaka khursar killaila. hanv atam jietam to hanv nhoi; tor Krist mhojê thãi jieta; Mhojea osokt mon’xasoimbant hanv atam jietam tem jivit, mhozo môg kela ani mhojê khatir Apnnakuch somorpun dila tea Devachea Putacher bhavart dovrun hanv jietam. Devachê doiallaiechem dennem hanv soddun dinam; kiteak Somurti udexim Dev mon’xank Apnnak manovlelim korta zalear, Krist funkott melo-so zalo. Ok’kol-nasleleam Galasiekaramnô, tumkam konnem montr bi kelam? Khursar marlolo Jezu Krist tumcheam dolleam mukhar nivôll chitarlolo tôr asa! Ek mat tumchê koddchem hanv zanno zaunk sôdtam: tumi ghetla to Povitr Atmo, Somurt formaita tim kamam keleant dekhun ghetla, vô tumkam porgôttlea ti bori khobor tumi bhavartan mandun ghetlea dekhun? Devacho Atmo gheun tumi novem jivit suru kel’lem, tench tumi atam kuddiche xokten sompounk sôdtat? Itli tumchi môt uddli? Itleam vorteam denneancho tumkam mell’la to onnbhôv sogllo funkôtt gelo kai? To sogllo funkôtt gela zaum nozo. Dev tumkam subham’ponnan Aplo Atmo dita ani tumchê modem vismitam korta: tumi Somurtichim kamam kortat dekhun To oxem korta zait, vô tumkam porgôttlea ti bori khobor tumi bhavartan mandun ghetlea dekhun? Povitr Pustokar oxem boroilelem asa: “Abrahaman Devacher bhavart dovorlo, ani hea tachea bhavartak lagun taka Devan Apnnak manovlolo kelo.” Mhonntôch bhavart dhôrla tinch mon’xam Abrahamachi sonsôt mhonn tumi somzunchem. Bhavarta udexim videxeank Dev Apnnak manovlelim kortolo mhonn adinch polleun, Povitr Pustokar Abrahamak ho xubh sondêx oso adim-fuddench porgôttlo: “Tujê udexim Dev soglleam raxttrank axirvad ditolo.” Mhonntôch Abraham bhavartacho monis, ani jim konn bhavart dhôrtat, tim tachê borabôr Devacho axirvad ghetat. “ Somurtichea pustokar boroilele asat te soglle kaide samballinant ani pallinant, tancher xirap poddum.” oxem Povitr Pustokar boroilolem asa dekhun somurtin formaileleam kamancher visvas tthevtat titlim-i xirap poddlelim. Mhonn’toch, “Bhavarta udexim Dev Apnnak manovlelim korta tim Jivit ghetelim.” oxem Povitr Pustokar boroil’lem asa dekhun, konnuch Somurti udexim Devak manovlelim zainant mhonn dubhavuch na. Tor Somurt bhavarta thaun upzona, kiteak, portench zalear Povitr pustokar oxem boroilelem asa: “Heo soglleo adnea palltat tinch tanche udexim jivit ghetelim” Jezu Krista udexim Abrahamak dil’lo axirvad videxeank pavchê khatir ani bhasailolo Atmo bhavarta vorvim amkam mellchê pasot, “ Lankddar umkollta to monis xirap-poddlolo.”, oxem Povitr Pustokar boroilelem asa tea pormonnem, Apunnuch amchê khatir xirap poddlolo zaun, Kristan amkam Somurtichea xirapantlim soddoun ghetlim; Bhavam-bhoinnimnô, chaltea jivitachi vopar ghalun sangtam: mon’xam modem sôi-xik’ko marun thir-monzur kel’lo korar, konnachean to moddunk zaina, nhoi mhonn taka kitench choddounk zaina. Abrahamak ani tachea putak Devan bhasavnneô keleô. Povitr Pustok sobar zannam zal’lê porim “putam-dhuvank” mhonnonam, punn ekleachich khobor korta dekhun oxem mhonnta: “ani tujea putak”; ho put mhollear Krist. Hanv sangunk sôdtam tem hem: Devan thir-monzur kel’lo korar charxim-tis vorsam uprant ailolê Somurtichean rôd’d korunk zaina ani tichean bhasavnni nirfôll korum nozo. Kiteak, zôr daiz Somurtik lagun pavta, tôr tem bhasavnnek lagun nhoi-xem zalem; punn Devan Aplê bhasavnnek lagun tem dennem Abrahamak favo kelem. Somurt koslea xevottak lagun asli tor? Zache vixim bhasavnni kel’li,To ieit porian, kaide portun-portun moddon ieunchê khatir,Devan Somurt sthapun dil’li. Devdutam koddlean eka modestea udexim lokak paunche khatir Devan dil’li ti. Fokot dogam vô choddam modem koslo-i vevhar sompouncho asa zalear, modesteachi goroz asa; punn (Abrahamak bhasavnni kortana) Dev ekloch aslo. Mhonntôch Devan kel’lê bhasavnnecher Somurt add veta zait? Na ki na. Kiteak Jivit diunk podvi asleli Somurt Devan dil’li zalear, mon’xam Somurt pallun khoreponnim Devak manovlelim zato aslim. Sogllo sonvsar patkachê podvê khal asa, mhonn Povitr Pustok sangta, ani oxem Jezu Kristacher dovorlelea bhavarta thaun bhasailelem dennem bhavart dhôrteleank mell’ta Punn bhavartacho kall ieunchê adim, Jezucher bhavart dovorchi goroz mhonn Devan ugddapem kori-sôr, amkam soglleank Somurtin koidi korun dovorlelim. Mhonntôch, bhavarta udexim Apnnak manovlelim Devan amkam korche khatir, Krist ieit porian, amcher odhikar cholounk Devan dil’li somurt ti. Punn atam bhavartacho kall ieilo, mhonntôch Somurt amcher anink Odhikar choloina. Kristachea ekvottant buddoileant tim sogllim tumi Krista sovem ek zaleant dekhun, Jezu Kristachea ekvottant, bhavartak lagun ki sogllim tumi Devachim bhurgim. Judêv anink na, Grik na; gulam’ na, svotontr monis na; dadlo na, bail na; tôr Jezu Krista sovem tumi sogllim êk! Ani zôr tumi Kristachim, tôr Abrahamachi sonsôt tumi, ani bhasavnnê pormannem daiji tumi. Fuddem vochum-ia: sogttacho dhoni zaun-ui, daiji lhan asot porian, tachê ani gulama bhitôr koslich ontôr na; tachea bapain tharailelê piraiek to pavot porian, taka rakhunk ani tacho vevhar cholounk nemlole monis astat. Têch porim ami sotachê ollkhichê babtint lhan asleanv tedna, srixtti choloitat teô podveô amkam aplea gulam’ponnant dovortaleô. Punn nemlolo kall bhòrlo tedna, Devan Apleach Putak dhaddlo. Ho Put êkê bailê thaun zolmun ailo ani Somurti khal To jielo. Somurti khal jieteleank suttka gheun diunchê khatir ani amkam Devachim apnnailelim bhurgim korchê pasot, Devan Taka dhaddlo. Tumi Aplim bhurgim mhonn dakhoun diunk, “Ab’ba Bapa”, oxem mhonnun ulo marto Aplea Putacho Atmo Devan amcheam kallzamnim ghalo. Hea pasot tum hea fuddem gulam’ nhoi; tum put. Tum put, mhonntôch, Devan Apleam bhurgeank dovorlelem daiz tujem. Adim tumi Devak ollkhonasleat, dekhun khore dèv nhoi tanche gulam tumi zal’leant. Punn atam tumi Devak ollkholea uprant — vô, oxem mhonn’lear odik borem, Devan tumkam ollkhun ghetlea uprant — srixtti choloitat team nirbolli ani dolldiream podveam vatten koxim mhonn tumi portun vetat? Koxim mhonn tumi novean tanchim gulam zaunk sôdtat? Omkeam-omkeam disancho, mhoineancho, somoiancho ani vorsanchi porob korun, osleanch somarombhancher asa tumchem lokx. Tumchê modem kel’lo koxtti vavr sogllo funkôtt gelo kai? Ho mhozo husko. Bhavam-bhoinnimnô, hanv tumchê lagim porathun magtam: mhojê sarkim zaiat, kiteak hanv-ui tumchê sarko zalom. Adim tumi mhaka koslench vaitt korunk na. Piddek lagun tumkam bori khobor poilêch pavtti porgottunk mhaka soêg mell’lo: hem tumi zannont. Punn mhoji pidda tumkam bhov zhôdd zaun-ui, tumi mhoji beporva korunk na, nhoi mhonn mhaka pois korunk na; ufrattim, hanv êk devdut zal’lê porim, hôi, hanv khud Jezu Krist zal’lê porim, tumi mhaka ievkar dilo. Tedna tumkam itli khuxalkai bhògtali: ti soglli khõi pavli atam? Tumchê vixim hanvuch sakxi ditam: ghòddlelem zalear, tumche dolle konchoun kaddun mhaka ditele asleat. Tôr tumkam hanvem sot sanglem dekhun, tumcho dusman hanv zalom kai? Bori khobor donsounk bhonvtat te tumkam apnnam vatten jikun vhorunk hurba dakhoitat, punn tanchem mon sarkem nhoi; tumkam apnnam vatten jikun gheunchê khatir, tumkam te mhojê thaun toddunk sôdtat. Borea karonnak lagun herank jikun gheunk sôdlear borem; punn sodanch toxem zaunchem, fokot hanv tumchê modem asam tednach nhoi. Mhojeam supurleam bhurgeamnô, tumchê sovem Kristacho akar purto zai-sôr hanv tumkam zolm diunk novean ballontiche vollvolle bhôgtam. Hea vellar tumchê modem hajir aslom zalear, mhozo sobhav vegllo zato aslo! Tumkam lagun hanv ekdom’ huskelam! Sangat mhaka: Somurti khal tumi jieunk sôdtat mum? Tôr Somurt sangta tem aikunk na tumi? Abrahamak dog put asle mhonn boroil’lem asa: eklo gulam’-cheddvacho ani dusro svontontr bailecho. Gulam’-cheddvacho to soimbacheam nemam pormannem zolmol’lo, ani svadhin bailecho to Devan Abrahamak kel’lê bhasavnnê udexim zolmol’lo. Heam ghòddnneantli êk vopar kaddum-ieta. Heô dogi bailô mhonngê don korar: êk mhon’llear Sinai Dongra velo; tacho rupkar Hagar ani ti apleam bhurgeank gulam zaunk zolma haddta. Hagar mhonn’lear Arabient aslelea Sinai Dongracho rupkar, teach borabôr atanchea Jeruzaleacho-i rupkar, kiteak hem Jeruzalem apleam bhurgeam soit gulam’ponnant asa. Punn adim sanglea ti svotontr bail sorgar thaun denvlelea Jeruzaleacho rupkar, ani hi ki amchi avoi. Kiteak oxem Povitr Pustokar boroilelem asa: “Sontosbhorit za, bhurgem-ball naslelê, vanzttê bailê! Ballonticheô dukhi bhogunk naslelê, khuxal za, anondache ul’las sôdd! Tôr sôddlelê bailek odik bhurgim, ghovan kodinch soddunk na tichê poros chodd!” Mhonntôch, mhojeam bhavam-bhoinnimnô, tumi Isaka porim bhasavnnechim bhurgim. Tedna soimbacheam nemam pormannem zolmol’lo bhurgo Devachê bhasavnnê udexim zolmol’lea bhurgeak piddapidd ditalo, toxench atam-i ghòddta. Punn Povitr Pustok kitem sangta? “Gulam’-cheddvak ani tachea putak bhair ghal; kiteak svotontr bailechea puta borabôr gulam’-cheddvachea putak daizant vantto ascho na.” Mhonntôch, bhavam-bhoinnimnô, ami gulam’-cheddvachim bhurgim nhoi, punn svotontr bailechim. Ami atam svotontr zaleanv, kiteak Kristan amkam svotontr keleant. Mhonntôch thir ravat, ani novean gulam’ponnachem zum tumcher ghe nakat. Hanv, Paulu, tumkam sangtam: tumi sunôt korunk dixeat zalear, Krist tumkam kiteakuch upkaronam zalo. Sunôt korunk ditat titleank-ui novean xiddkaitam: akhi Somurt pallunk tankam kaido asa. Somurti vorvim zôr apunn Devak manovlelim zatelet mhonn tumi ravtat, tôr tumcho ani Kristacho sombond tumi toddun uddoilo, Devachi doiallai tumkam ontorli. Ami zalear, bhavartak lagun, Povitr Atmo amchê sovem korta tea vavra udexim, Dev amkam Apnnak manovlelim kortolo mhonn bhorvanso dhorun axeun ravtanv. Jezu Kristachea ektarant asleleank tãnnim sunôt keli vô na keli mhonn porvach na; mhotvachem tem ekuch — pritimogachê sfurtin aplo vavr korit asa to bhavart. Bhavartachea margar kitlea nettan tumi dhanvot asleat; tumkam vatter addaunk pavlo konn? sotachea marga velim konnem tumkam koddsorailim? Devan tumkam apoita tea Devan, koxêch bhaxen hem tumchea monant ghalum nozo. Sogllench pitt fugounk thoddench ambttem puro, oxem nhoi? Somiachea ekvottant ami asanv, dekhun tumchem ani mhojem mon vegllem zaunchem na mhonn tumcher hanv patietam; ani toxench, tumkam khubdaita to, konn-ui to zaum, Devachê khastik sampoddtolo mhonn hanv ravtam. Bhavam-bhoinnimnô, sunôt gorjechi mhonn hanv ozun porgôtt’tam zalear, kiteak mhonn hanvem ozun dhumallo bhôgcho poddta? Tem khorem zal’lem zalear, hanv kortam ti khursachi porgôttnni mhaka kosleach trasant ghalchi nasli. Tumkam khubdaitat tãnnim, sunôt korchê korun, apnnankuch vochun izdde korun sôddche. Bhavam-bhoinnimnô, Devan tumkam svotontr zaunk apoileant; punn svotontrtaiechea niban mat patki soimbacheô khuxeo pallinakat; hachê svater ekamekachi pritimogan seva korat. Kiteak akhi Somurt ekach utran attapleli asa: “Tuzo môg kortai toso tujea peleacho mog kôrcho.” Chotrai dhôrat: ekamekak ghans marun khaxeat zalear, tumi ekamekacho nas kortelet. Sangtam tem hem: Povitr Atmeachê sfurti pormannem cholat ani patki soimbacheô khuxeo pallunk tumi pavchim nant. Patki soimbacheô khuxeô Povitr Atmeacheam khuxencher add, ani Atmeacheô khuxeô patki soimbacheam khuxencher add; Povitr Atmo ani patki soimb ekamekacher zhuztat dekhun, tumchea patki soimbacheam vondovnneam pormannem tumi cholum nozo. Povitr Atmo tumkam choloita zalear, Somurt tumcher aplo odhikar choloina. Patki soimba pormannem choltat tanchim kamam ollkhunk sompem. Oslim mon’xam pozoddponnant, mhelleponnant ani kamcharant lolltat; Murti-puttleank bhôztat ani ghaddianger dhanvtat; dusman’kai samballtat ani zhogddeamnim dis kaddtat; nattkaien bhoron astat ani krodhan zolltat; hixpa bhair vhodd-vhodd vostunche axen bhonvtat; dusongam ani pokxam udexim loka modem bhed-futti ghaltat; futtloleam dolleamnim peleak polletat; soreak lobhdol’lim astat; dhumxannamnim rat sartat. Ani anink-ui oslim khotteponnam kortat. Tumkam adim xiddkaileant toxem, atam-i xiddkaitam: oslim kamam kortat tankam Devachea Rajeachem daiz bhogunk mellchem na. Povitr Atmo, dusrê vatten, oslem foll utpon korta: mon’xam modem pritimôg vaddoita; kallzamnim khôl khuxalkai upzoita; ekameka lagim sondhan korun xanti vosoita; domkavnneam mukhar thôndd ravunk adar dita; peleak borem korunk ani moipasan vagounk xikoita; ek-ekleak visvas favo-aslolo monis korta; mon’xank dulob kallzachim korta; ap-apleô vondavnneô domaunk ghottai dita. Hê bhaxen jieteleancho, somurt kosloch guneanv korunk xokona. Jim konn Jezu Kristachim, tãnnim apleam ogunnam ani vondovnneam borabôr aplem patki soimb khursar marun dovorlam. Zôr Povitr Atmo amchem jivit, tôr Atmo amkam choloun vhorta toxim cholum-ia. Ami amchich boddai korum noiê, ekamekak challoum noiê, ekamekachi nattkai dhorum noiê. Mhojeam bhavam-bhoinnimnô, konn-ui koslea-i eka guneanvak sampoddlim zalear-ui, Povitr Atmo tumkam choloita mhonntôch tankam dulobaien nitt margar haddat; ani tumi zonn-eklean, apunn-ui toxench tallnnent poddona zaunk, chotrai dhôrchi. Ekamekacho bhar vhorunk adar diat, oxem korun tumi Kristachi somurt palltelet. Jim konn, apunn kãich nhoi astana, apunn kitem tori mhonn somzotat, tim apnnankuch fosoitat. Zonn-eklean ap-apli vagnnuk topasun kaddchi ani, ti bori zalear, dusream lagim sôr korinastanam, tachean vô tichean apnnachêch khatir khuxalkai bhogum-ieta; kiteak zonn-ekleak ap-aplem ojem uklun vhorchem asa. Devachea Utrachi xikovnn ghetat tãnnim sogllê aplê asticho vantto apnnank xikoiteleank diuncho. Tuminch fosovo nakat: Devak fosounk zaina. Tôr ami vomptanv tench ami lunvteleanv. Patki soimbacheam vondovnneanchea xetant ami vomplem zalear, hea patki soimbantli ami lunvtelenv kusddai; punn Povitr Atmeachea xetant ami vomplem zalear, heach Atmea thaun ami lunvtelenv sasnnik jivit. Mhonntôch thokona-stana borem tem korum-ia: kiteak borem korchem soddun dinanv zalear, tachem pik vêll pavtôch amkam melltelem. Dekhun amkam dil’lo vogôt asot porian, soglleank borem korum-ia, bhov-korun bhavarta vorvim amchim bhavbhoinn zal’leank. Atam mhojeach hatan him utram boroitam: kedeam vhoddleam okxoramnim hanv boroitam tem borem-korn polleiat. Je konn mon’xanchê nodrek boddai dakhounk sôdtat, tech te tumkam sunôt korunk boll kortat te. Ani oxem kiteak kortat zait? Fokot Kristachea khursak lagun apnnancher piddapidd iena zaunk. Te apunnuch sunôt kortat khorem, punn Somurt kãi pallinant; Fokot tumchê kuddi vorvim apnnank man mellchê khatir, tumi sunôt kel’li tankam zai. Mhaka zalear, vhoddvikechem karonn ekuch: Jezu Krist amcho Somi khursar melo, hich mhoji vhoddvik. Hea Tachea khursa vorvim mhaka sonvsar khursar mela ani sonvsarak hanv khursar melam. Sunôt keli vô na keli, haka koslich bixat na: novi rochnna zaunk hem ekuch sorv mhotvachem! Hea nema pormannem choltat titleancher-ui ani Devachê Israel-porjecher denvum xanti ani-kaklut! Itlem sanglea uprant konnench mhaka anink tras dium noiê; kiteak mhojê kuddir asat te dag Jezu pasot hanvem bhôgleleam koxttanche. Bhavam-bhoinnimnô, amchea Somia Jezu Kristachi doiallai tumi odik-odik bhogunk pavum. Amen. Paulu, Devachê khuxen, Krista Jezucho apostl, Krista Jezuchea ekvottan aplea jivitant vixvaxi asa te Devache porjek hem potr boroita. Deva amchea Bapa ani Somia Jezu Krista koddchi doiallai ani xanti tumkam. Soglleam atmik denneamnim unch sorgim Krista sovem amkam bhorleant Tea Amchea Somia Jezu Kristachea Deva-Bapak vakhann'ni- dhinvasnni, Apnna samkar, ami povitr ani patkam-mekllim, maiêmogachim zaunche pasot, Kristakodde amchea ekvotta udexim, ami Aplim zaunk, Sonvsar rochchê adim pasun Tannem amkam vichun kaddunuch dovorlelim. Aplea Pritivont Puta sovem, Devan amkam dilem tea Aplea udar mogachea vortea denneak lagun, ami Apnnak vakhannuk, Jezu Krista sovem Apunn amkam Apleo put-dhuvo kortolo mhunn Tannem tharailelench aslem. Hi Tachi udar ieuzonn asli. Thav naslele khol zannvaien ani bariksannen, Tannem amcher xim-mer nastana otoile te doiallaieche bhorte pormonnem, Tachê sovem, Tacheach rogtan, amkam atam mell'li soddvonn, amchim patkam bhogsun gelim. Kallam-iuganchê sompadnnek, sorgar-prithver asa titlem-i Tachêch adhin ektthãi korunk, Apnnem Krista sovem tharaileli te bore ievzônne pormonnem, Aplê khuxecho gutt Tannem amkam ugto korun dilo; Kristacher bhorvonso dovrunk poilim tim ami, Tache kirte-mhoimek jieunche khatir, Apnnachêch khuxê pormannem Zo ekloch sogllem ievjita, Zo ekloch sogllem tharaita, Tannench amkam [Judêv lokak] Jezu sovem Aplim mhonnun Aplea sasnnant nirmun haddleant. Kristachea ekvottant atam tumi-i bhitôr sorleant, kiteak tumi-i sotacho sondêx aikola, soddvonnechi bori khobor bhavart dhorun mandun ghetlea. Tumi-i Aplim mhonn dakhouncheak Devan tumcher xik'ko marla: Bhasailolo Povitr Atmo Tannem tumcher dhaddun dila. Amkam dovorlelea daizacho khud Povitr Atmo isaro. Ani Aplim asat tankam Dev sompurnn suttka ditolo mhonn Amkam khatri hich! Devak mhoima ani vakhann'ni Hea pasot, Somia Jezucher tumi bhavart dovorla ani soglleam bhoktancho tumi môg kortat mhonn hanvem aikolam tê meren tumchê khatir hanv Devak argham diit asam, ani mhojeam magnneamnim hanv tumcho ugddas korit asam. Apli poripurnn ollokh tumkam mellche khatir, Amchea Somia Jezu Kristacho Dev, mhoimevont Bap, Aplo zannvaiecho ani prokasnnecho Atmo tumkam dium. Tannem tumkam apoileant to bhorvanso bhoktam sovem Aple mhoimevont daizachi ti sompurnai, ani bhavart dovortat tanche sovem kitli xim-mer nasleli Tachi xokti ti! Devan Kristak meleleantlo punorjivont kelo ani sorgar Aplea uzveak bosoilo tedna, Tannem Krista sovem Apli podvi dakhoili ti tich vorti podvi To amche sovem dakhoita ti hi ti tumi zanna zaunche pasot tumchea gineanacheam dolleank uzvadd diuncheakui hanv magit asam. Thõi sorgar soglleam sorgincheam pordhanam, odhikaream, podveam ani rajeam voir, toxench atanchea vô fuddlea iugantlea kosli-i sot'tea-aslelea xrextt nanvacher, Devan Kristak odhikar dilo. Devan soglleô vostu Kristacheam pãiam tolla ghaleat ani soglleam voir ubarun Taka povitr-sobhechem mostok korun dila. Ti tachi kudd, Tachi poripurnntai: Zo akhi srixtti poripurnn korit asa, Tachich poripurnntai ti. Tumcheam opradank ani patkank lagun tumi mel'leant, tedna tumi hea sonvsarachê vaitt chali pormannem choltaleat; varear podvi choloita tacho odhikar tumi man'taleat; mhonngê devcharak tumi khaltim asleat, kiteak Devacher kolpotat tim sogllim tachê adhin astat. Khorench mhonn'lear, adim ami-i sogllim tanchê sarkim asleanv, amchea patki soimbacheam vondovnneam pormannem ami choltaleanv, kuddicheôch khuxeo palltaleanv, ani amcheach vadeachim zal'leanv. Oxem amchea patki soimbachê goti pormannem ami soglleam heram mon'xam bhaxen Devachea krodhak sampoddleleanv. Punn kitli vhodd Devachi konnvallai! Kitlo mhonn Devan amcho mog kelo! Amcheam patkank lagun ami mel'lim asleanv, ani tednanch Kristachea ekvottant, Tachea vangdda, Devan amkam novo jiv dilo! Tachea funkeachea dennean tumkam soddvonn mell'lea! Jezu Krista sovem, Tachea vangdda, Devan amkam punorjivont keleant ani Tachea vangdda amkam sorgar bosoileant Jezu krista sovem amche thaim Devan Aplem boleponn dakhoilem, fuddleam kallam-iugank Tannem Apli oprimit doiallai porgott keli. Karonn Devachech doiallaien, bhavarta udexim, tumkam soddvonn mell'lea; ti tuminch kel'leam proitnancho foll nhoi, punn Devachem funkeachem dennem. He baptint konnench mijas korum noie, kiteak amchi soddvonn amcheanch kornneam udexim upzona. Ami Devachi rochnna: Apnnem adim-fuddench toiar kel'leo boreo kornneo korun ami jieunche khatir Devan amkam rochleant! Hea pasot, tumi ekdam zolman videxi mhonn ugddas dhorat; Judev lok mon'xachea hatan kuddir kel'lê kornnek lagun apnnankuch “sunôt kel’le” mhonntat te, tumkam “sunôt korunk naslele” mhonn lekhtat. Adim tumkam Kristachi ollokh naslich; Israel porjechem vorteponn tumkam lagonaslem; Devan Aplê porjek bhasavnneô korun tichê kodde korar kel'le tantum tumkam vantto naslo; bhorvanso ani Dev-ui nastana hea sonvsarant tumi jietaleat mhonn ugddas dhôrat. Adim tumi pois asleat; punn atam, Jezu Kristachea ekvottant, Kristachea rogta vorvim, Devan tumkam lagim haddleant. Khorench khursar marlelê Aplêch kuddint tankam doxim korteli ani tanche modem dusmankai dovorteli vonnôt môddli. Judevanchi ani videxeanchi êkuch porza korun Kristanuch amche modem xanti haddli. Oxi xanti sthapun, Apnna sovem dogãichi êkuch novi porza rochun haddche khatir, ani khursa udexim, sogllê dusman'kaiecho nas korun, tankam êkêch kuddint dogãik-ui ektthaun, Apnnem tankam Deva-xim sondhan korun portun haddche khatir, Tannem Somurt, ticheam kaideam-nemam soit kaddun uddoili. Oso To ailo ani Deva koddche pois asleleam videxeank toxench Taka lagim asleleam Judevank Tannem xantichi bori khobor Tannem porgôtt keli. Tachê udexim atam tumchean ani amchean ekach Atmea udexim Bapa mukhar rig gheum ieta. Mhonntôch tumi atam porkim vô bhailim mon'xam nhoi: bhoktanchea vangdda tumi-i sohonagrik ani Devachea ghorabeache vangddi. Tumi apostl-anchê ani provadeanchê buneadir bandlolem ghor ani toch Jezu Krist tea ghoracho konnxea-sondhicho fatôr. Toch hi soglli bandavôll ekvottim samballta ani ti Sorvesporak bhettoil'lem Mondir koxem vaddoita. Tumi-i, Tachê sovem, ieram borabôr Atmea udexim Devachem ghor koxem bandon ietat. Hea pasot hanv Paulu, videxeam khatir Jezu Kristacho koidi, tumkam sangtam: Tumchê khatir, Devan Aple doiallaie udexim, ho vaur korunk, mhojea hatamnim ghala mhonn, ani hanvem thoddeach utramnim boroilam tea pormonnem, Aplo gutt ugto korun Devan mhaka tachi ollokh dilea mhonn dubhavavinn tumi aikolanch, tem tumi vachtoch, Kristachea guttachi kitli mhaka somzonni asa ti tumkam kollon ieteli. Hea guttachi khobor adleam pinddkanchea khõicheach mon'xak kollounk na; punn atam, Atmea udexim, Devan to gutt Apleam bhoktivont apostlank ani provadeank ugto kela: mhonngê xubhvortomana udexim, Jezu Kristachea ekvottant, videxeank tench daiz favo zalam, têch kuddiche sandhe zaunk tim pavleant, ani têch bhasavnnent tankam-i vantto mell'la. Aple vaurto podve udexim, mhaka favo kel'le Devachê doiallaiechea dennea pormonnem he Bore Khobrecho hanv sevôk zalam. Bhoktam modem soglleam-vôn lhan to hanv zaunui, tthav-nasleli Kristachi dovlôt videxeank porgôtt korchem hem dennem Devan mhaka favo kelam, ani Aplea guttachi manddavôll kosli ti sobhêmazar uzvaddaunchem kam' Tannem mhaka dilam. Sogtta-sorvanchea Rochnnara Devan ho gutt kallam-iuganchea orombak thaun Apnnachêch bhitôr lipoun dovorlolo; hê porim Devachi vividh zannvai fokot atam, povitr-sobhê vorvim, ontrallaveleam pordhanank ani odhikareank kollit zaunchi asli. Hich ti amchea Somia Jezu Krista sovem Devan sasnnak thaun ievjil'li manddavôll. Tachê sovem, Tacher bhavart dovrun, Deva mukhar visvasan vochunk amkam dhir mellta. Mhonntôch, tumchê khatir hanv koxtt-dogd bhôgtam mhonn polleun, tumi niraxi zaum nakat mhonn hanv tumchê kodde magtam: he mhoje koxtt-dogd tumchi vhoddvik. Amcho sorgincho Bap sorgar ani prithver aslolea sogllê torechea ghoranneacho Oromb; tôr Tachê mukhar saxttangim poddun oxem magtam: Tumchê bhitorlê-bhitôr novim zal'leam mon'xancho akar Bapachea Povitr Atmea vorvim, ghottaien vaddot vochunk ani bhavarta vorvim Kristan tumcheam kallzamnim tthikann korunk, tumchim pallam ani bunead mogant rigunk, Aple mhoimeche bhorten tumkam favo korunk hanv Devakodde magtam. Devacheam somest bhoktam borabôr Jezucho môg kitlo rund, kitlo lamb, kitlo unch ani kitlo khôl to somzum mhonn khorem mhon’llear, Kristacho môg kodinch poripurnntaien ollkhum nozo, tori to tumi onnbhovunk pavum mhonn, ani oso, hô mog purnntaien onnbhovun, tumi Devachich poripurnntai bhogunk pavum mhonn hanv magtam. Aplê podven amchê bhitôr Zo Aplem kam' korit asa, amchean magunk-prarthunk zata, vô ami kolpunk xoktanv, tachê poros ogllem korunk Zaka podvi xokti asa, Taka, amchea Bapak, mhoima, akhê povitr-sobhê modem, Jezu Krista sovem, pinddkê-pinddkent, sasnna- sasnnak! Amen! Tea pasot, hanv, atam Somiachea ekvottant koidi, tumchê lagim porathun magtam: tumchea apovnneak sobta toslem tumchem jivit zaum-di: sodanch khaltim zaiat, dulob ani sosnnikaiechim; ekamekak mogan sõsat; Devachea Atmean tumchê modem ekvôtt rochun haddla, tôr atam tumkam ektthãi dovorta ti xanti samballunk zata titlem korat. Tumi sogllim êkuch kudd ghôddtat, soglleank êkuch Povitr Atmo dil'lo asa, toxench tumchea apovnneak êkuch bhorvanso asa; amcho Somi ekloch, êkuch amcho bhavart, ek amcho batism; Dev-ui ekloch, sogtta-sorvancher odhikar choloita To, sogtta-soglleam udexim Aplem kam' korit asa To, ani sogtta-sorvam sovem tthikann korun asa To, amam-somestancho Bap. Kristan vanttun dilam tea mapan amchê modlea zonn-ekleak êk kherit vorgunn dil'lo asa. Hea pasot Povitr Pustok mhonnta: “Unch choddun vechê vellim, Apnna borabôr Tannem zaiteank koidi korun vhelim, mon'xank dennim vanttun dilim.” Tôr “To unch choddlo”, hachi somzonni kitem? Tacho ôrth oso: To poilo sokla, mhonngê amchê prithver, denvun ailo. Zo sokla denvun ailo ani magir voir choddun gelo to Toch: sogllê srixttint Tacho odhikar dixtti poddchê khatir Devan Taka soglleam rochnnam voir ubarlo. Tannench mon'xank him dennim dileant: thoddeank apostl keleat, konna-konnank Devacho sondêx gheun to kollit korunk provadi keleat, kãi zannank xubhvortoman porgott korunk dhaddleant, thoddeank sobheche gonvlli zaunk ani bhavartachi xikovnn diunk vinchun kaddleant. Heam denneancho xevôtt mhonn'lear ho: bhoktank Devachê sevek toear korunk ani oxem Kristachi kudd bandun haddunk. Oxem okherek ami sogllim, Devachea Putacher bhavart tthevlelim ani Tachi podvi onnbhovunk pavlelim mon'xam, sarkinch êk zatelenv; ani Kristachê poripurnntaient odik-odik vaddon, aminch Tachê poripurnn-taiechea mapak vaddlelim mon'xam zaunk pavtolenv. Tedna ami anink dhakttuleam bhurgeam bhaxen zaunchim nanv; fottkirim mon'xam herank-ui teach fottinchea margar oddun vhorunk apli naddbudhichi xikovnn gheun ietolim, punn ami toslê xikovnnecheam lharancher lotton vechim nanv; ani koslea-i vareachê funkin ami halchim-dholchim nanv. Portench zalear, mogan sotachi vatt dhorun, Kristacho akar purteponnim ghei-sôr soglleam vattamnim ami vaddot vetelenv. Povitr-sobha Tachi kudd ani To hê kuddichem mostok: Toch ak’khê kuddiche veg-veglle sandhe ap-aplea zagear ghalun choloita ani ekamekak ekvottaun dhôrta; oxem êk-êk sandho ap-aplem kam' korunk pavta ani kuddichi ghottai vaddoita. Hê porim akhi kudd choddot-vaddot moga vorvim sarki bandon ieta. Mhonntôch atam hanv tumkam sangtam ani Somiachea ekvottant oso tumkam ulo martam: hea fuddem anink videxeam porim jie nakat; tanchem mon polkem, tanchea gineanacher kallôk poddlolo asa; aplim kallzam tãnnim nibor keleant ani tankam sotachi ollokh na dekhun, Devachea jivitant tankam vantto na. Vaitt kortubanchi soglli loz ani khônt soddun, kamchari jivitant tim buddleant ani sogllea jin'sachim pozddim kortubam korit asat. Krista vixim osli xikovnn tumi gheunk na, kiteak dubhava virêt Jezu sovem asto sot tumkam porgôttlam ani xikoilam. Mhonntôch tumchea adlea jivitachi chal tumi soddun diunk zai; khotteam vondovnniam vorvim padd zait veta tem tumchem adlem-pornnem patki soimb soddun diunchem. Tumchea kallzachi ani monachi sarki novsornni tumi korchi, ani Devachea sarkeachim rochlelim, Taka man'ta toslea jivitachim ani povitrtaien cholpi novim mon'xam tumi zaunchem. Mhonntôch fôtt marop sarkench sôddat; ekameka lagim sot tench uloiat, kiteak ami ekamekache sandhe. Rag tumkam ietoloch, tori ragak lagun patok korinakat; vêll poddot porian rag dhorun ravo nakat; ani tumchea kallzant devcharak rig dinakat. Chori korchi sonvoi asli tannem anink choriô korcheô nhoi, punn apleam hatamnim koxtt korun koslo tori boro vavr korcho, ani oso gorjevontak adar diunk tachê lagim kitem tori astelem. Tumchea tonddantlim bhair sortat tim utram bemoriadichim zaunchim nhoi; portench zalear, aikoteleank soega pormannem bori dêkh ditat ani faideak poddtat toslim zaunchim tumchim utram. Devachea Povitr Atmeak khônt dium nakat, kiteak Dev tumkam purnn suttka ditolo to Dis ietolo mhonn, tumi Aplim mhonn dakhounk, ho Atmo Devachoch tumcher xik'ko, tumkam ek khatri. Soglli kôddsann kallzantli bhair ghalat; rag ani krôdh monant dhorunkuch nakat; bob marum nakat; jasteo marop bond korat; sogllê torechem khotteponn soddun diat. Ekameka thãi doiall-movall kallzachim zaiat. Krista sovem Devan tumkam bhogxilim, têch bhaxen tumi-i ekamekak bhôgsat. Tumi Devachim opurbaiechim bhurgim dekhun, Tachi dêkh gheiat. Kitlo mhonn Kristan tumcho môg kelo! Amchê khatir Tannem, Devak man'pachem, domdomit pormollachem, Apnnachench somorponn ani bolidan kelem; tôr tumi-i Tachêch bhaxen mogan cholat. Kamcharachi, soddeponnachi ani sonvsari vostunchê bhagonaslolê axechi gozal porian tumchê modem aschich nhoi, kiteak osleô vostu bhoktank sobonant. Toxench mhellem vô burxem ulovop ani bemoriadichim fokannam tumche modem aschem nhoi: hem sogllem tumkam puttvona; ufrattim, tumchim utram zaum-di Devak dhin'vas divpachim. Hem mat monant dhôrat: kamchari mon'xank, pozddea lokak, sonvsari vostunchi odik-odik axa dhorunuch jietat tankam, Kristachea ani Devachea rajeant daiz na. (Osli sonvsari vostunchi axa khorench mhonn'lear murtim-puttleanchi puza.) Polkeam utramnim konnench tumkam fosoinam zaunk chotrai dhôrat. Osleanch vostunk lagun Devak khaltim ravonant team mon'xancher Tacho krôdh denvun ieta. Osleam mon'xanchea bhaga tumi poddum nakat. Eka kallar tumi-i kallokant asleat, punn atam Somiachea ekvottant tumi uzvaddak pavleant; tôr uzvaddacheam bhurgeanchi chal dhôrat; khorench, uzvaddachim kamam sogllea jin'sachem boreponn, promannikponn ani sot. Somiak kitem odik man'ta tem sodun kaddat. Ani kallokachim holkim kortubam korteleam kodde kosloch sombond dovrum nakat; portench zalear, tanchem patok tankam dakhoun diat. Guptim kortat team kortubanchi khobor porian korunk loz dista. Punn uzvaddak haddtat teô soglleô vostu kosleô teô sarkeô kollon ietat; ani kosli-i vôst uzvaddak haddtôch, tichem khorem soimb dison ieta. Dekhun Povitr Pustokar oxem mhonnlelem asa: “Zagim zaiat nhidentlim! Jivont zaiat mornantlim, ani Kristuch tumchê voir porzolltolo.” Mhonntôch tumchea jivitachi chal kosli ti mhenotin polleiat, ani nennar mon'xanchi nhoi punn xanneam mon'xanchi tumchea jivitachi chal zaum-di. Hea kallar vaitt khub vaddlam, dekhun tumi tumkam dil'lea vellacho zata titlo faido kaddat. Chotraien cholonant toslim mon'xam zaum nakat, punn Somiachi khuxi konn ti sodun kaddat. Soro pieun bebdikai korum nakat, oxem tumi tumchea jivitachi vatt laitoleat. Portench zalear, Povitr Atmean bhòrlelim mon'xam zaiat. Tumcheam zomatimnim stotram, gitam ani bhoktichim gaionam gaiat ani tumcheam kallzamnim gitam-gaionam korun Somiak vakhannit ravat. Amchea Somia Jezu Kristachea Nanvan Devak, amchea Bapak, sodanch ani sogllê svater dhin'vaxit ravat. Tumi Kristak man ditat mhonn dakhounk ekamekak khaltim zaiat. Bailô apleam ghovank khalteô zauncheô ani oxem apunn Somiak khalteô asat mhonn tãnnim dakhounchem. Kiteak, zoso Kristak, Aplê kuddichea -- mhonngê povitr-sobhechea -- Soddvonnarak, ticher odhikar asa, toso ghovak aplê bailecher odhikar asa. Ani oxem, zoxi povitr-sobha Kristak khalti asa, toxeô bailô apleam ghovank sogttant khalteô asunk zai. Tumi potimnô, aikat: zoso Kristan povitr-sobhecho môg kelo ani tichê khatir Aplo jiv dilo, toxench tumi tumcheam potinnincho môg korat. Tannem he sobhek Aplea utra-podven povitr keli ani udka-dhuvnnen nitoll nirmoll korun Devak bhettoili. Povitr-sobhek sundôr-sobit korun, Tannem tika Apnna mukhar ubi keli! Khot nasloli, miri nasloli, koslich khôdd nasloli, povitr ani nixkollonk Tannem tika keli! Hêch porim, aplo môg kortat toso, potimnim apleam potinnincho môg korunk zai. Aplê potinnicho môg korta to aploch môg korta. Konnuch monis aplê kuddicho dvês korina, punn ti pôsta ani ticho poramôs korta; Krist-ui povitr-sobhê thãi toxench korta, kiteak ami Tachê kuddiche sandhe. Dekhun “dadlo aplea avoibapaik sanddtolo ani aplê potinnik ekvott'tolo ani tim dogam-i êk zatelim.” Povitr Pustokantleam heam utramnim ek unch molachem gupit sot attaplelem asa: tem Kristak ani povitr-sobhek lagu zata mhonn hanv dhôrtam. Punn tim utram tumkam-i lagu zatat: mhonntôch tumchê modlea zonn-eklean, aplo môg korta toso, aplê potinnicho korcho, ani potinnin aplea potik man diuncho. Bhurgeamnô, tumi-i Somiachea ekvottant asat, tôr tumchea avoibapaichem aikat: oxem korop sarkem. “oxem tuka borem zatelem ani lamb auk desant tuka melltelem.”, oxem eke bhasavnne soit poili ad’nea ti hi: “Tujea avoibapaik man di.” Avoibapaiamnô, tumcheam bhur-geank tumchê vagnnuken rag ie-so kori nakat. Xistin ani borê dekhin Somiachi vatt xikoun tankam lhan-vhodd korat. Gulamamnô, Kristak tumi khaltim asat mhonn dakhoun, hea sonvsarantleam dhoniank vhodda manan ani sadhea kallzan khaltim ravat; tankam khuxal korche khatir, nhoi fokot tanche dolle tumcher asat tednanch, bhogor kallzant thaun Devachi khuxi korto tumi Kristachim chakram mhonnon. Zonn-ekleak, gulamak toxem svotontr mon'xak, ap-aplea borea vavra pormannem Somi mozuri ditolo mhonn zanna zaun, mon'xam khatir nhoi punn urben Somia khatir bhar gheun kam' korat. Ani tumi, dhoniamnô, hêch bhaxen tumcheam gulamam sorim cholat ani tankam bhenkddaunchem sôddat; tancho ani tumcho Dhoni sorgar asa ani To konnacheach tonddak pollenam mhonn ugddas dhôrat. Xekim, Somia sovem, Tachê podvechea bollan, tumi ghott ravat. Devcharacheam soglleam mandd-nneancher zoit vhorunk Devan dil'lem zhuzachem angtrann ghalun ravat. Kiteak mhonn'lear, rogta-masacheam dusmanam lagim amkam zhuz na; punn pordhanam lagim, odhikaream kodde, hea kallokachea sonvsari-razkarbhar choloitelea lagim, ontrallar vosti korteleam khotteam atmeam kodde amchem zhuz. Hea pasot tea vaitt disa heam dusmanam virudh zhuzunk zaunche khatir ani soglle upai gheun-ui tumchean thir ubim ravunk zaunche khatir Devan dil'lem angtrann tumi ghalun ravat. Mhonntôch sogllim hatiaram gheun toiar ravat: tumi ollkhunk pavleant tem Devachem sot zaum-di tumchea benddacho potto; Devak man'ta toslem jivit zaum-di tumchê chhatichem kott'ttem; Xantichi bori khobor porgôttchi hurba zaum-di tumcheam pãianche butt. Devcharache soglle zollte bann tumchean palounk zaunchê khatir, tumchea hatant sodam bhavartacho ddhal dhôrat; xevttim soddvonnechem xirostrann ghalat ani Povitr Atmean dil'li torsad, mhonngê Devachem Utor, dhorun ravat. Atmeachea preronna pormannem soglleam somoianr magnnem ani vinovnni korat, soglleam bhoktam khatir zagrut ravun prarthon korunk pattim sorum nakat. Bore Khobrecho gutt kalljidarponnan porgottunk, hanv mhojem tondd ugoddta tedna Devan utram dilear puro mhonn mhojê-i pasot magat. mhojem tondd ugddun favo tosleam utramnim ani kalljidarponnan xubhvortomanacho gutt hanvem porgôtt korcho mhonn magat. Te bore khobrecho hanv dut bondkhonnint asam. Hanv uloitam tedna, to gutt hanvem kalljidarponnan porgottum mhonn magat. Mhaka hanga kitem ghòddta tem ani hanv kitem kortam tem tumi zanno zal'lim mhaka zai: Tikikus, mhozo opurbaiecho bhav ani Somiachea kamant visvaxi sevôk, mhojê vixim soglli gozal tumkam sangtolo. Heach pasot hanv taka tumchê-xim dhaddtam, amchi khobor tumkam diunk ani tumchim kallzam ghott korunk. Dev amcho Bap ani Jezu Krist amcho Somi soglleam bhavam-bhoinnink xanti, pritimôg ani bhavart dium. Jezu Kristacho, amchea Somiacho, môg kortat tankam soglleank Devachi doiallai bhogunk mellum, atam ani kednanch somponam tea jivitant. Filipi xarantleam Jezu Kristachea ekvottant asleleam soglleam bhoktank, tancheam vhoddilank ani sevokank, Paulu ani Timot, Jezu Kristache chakor, noman kortat. Deva amchea Bapakoddchi ani amchea Somia Jezu Kristakoddchi doiallai ani xanti tumkam. Tumcho ugddas kortam titlê-i pavtti tumchê pasot hanv mhojea Devak dhin’vastam, ani tumam-somestam khatir prarthon kortam titlê-i pavtti khuxalkaien tem kortam, kiteak poilea disa thaun tem az porian xubhvorto-manachea mhojea vavrant tumi mhaka adar dila. Devan tumchê modem ho boro vavr suru kela, tôr Toch, Jezu Kristacho Dis ie porian, ho vavr xarti pavoitolo mhonn mhaka khatri asa. Tumkam mhojea kallzant hanv gheun asam, ani tumam-somestam vixim him bhavnna mhaka asunk favoch. Kiteak Devan mhaka favo kel’lea denneant, mhonngê mhojeam sankllimnim ani xubhvhortoman rakhchea ani thir korchea kamant, tumi sogllim mhojim bhagidar. Jezu Kristachea kallzachea mogan tumam-somestancho hanv kitlo môg kortam, hacho khud Dev mhozo govai. Devache mhoime ani vhoddvike khatir, Devak man’ta toslea jivitachim follam Jezu Kristan amchê sovem utpon kortoch, Kristachea tea disak, nirmoll ani niropradi tumi zaunche pasot, kitem odik borem tem tumi sodanch vinchun kaddunk, sotachi odik unch ollokh ani odik khôl onnbhov tumkam mellun, tumcho môg odik-odik vaddom, mhonn mhojim magnnim. Bhavam-bhoinnimnô, mhoji atanchi poristhiti xubhvhortomanachê porgôttnnek odik faideachi zali: hem tumi zanno zal’lim mhaka zai. Krista khatir mhaka bondkhonnint ghala mhonn, nhoi fokot razvaddeantleam soglleam modem, punn heram-i sogllea loka modem gazlam, ani mhoje bondkhonnek lagun, Somiacher dovorlolo zaiteam bhavam-bhoinnincho bhavart odik ghôtt zaun, tim odik dhiran ani bhiranti vinnem Devachem utor porgottunk lagleant. Tantlim kãi zannam nattkaien ani ekamekak virôdh korun Kristak porgôtt’tat tem khorem, punn dusrim borea monan kortat. Bore khobre-rakhnnechea vaurak lagun. mhaka bondkhonnent ghala mhonn zanna zaun,him nimannim tim, mogan Kristak porgott’tat. Anink her tim khorea monan nhoi, punn nattkaien Kristak porgôtt’tat, mhojê bondkhonniche tras vaddoitelim mhonn somzotat. Punn kãi porva na: koxê-i bhaxen, borea vô vaitt monan, Krist porgôtt zata, ani hakach lagun hanv khuxal asam; ani hanv khuxaluch ravtolom, kiteak tumcheam magnneamnim ani Jezu Kristachea Atmeachea adaran, hem mhaka suttka mellunk upkartelem mhonn hanv zannom. Mhozo khotkhotit anvddo ani bhorvanso hoch, ki hanv kiteantuch lojek poddcho na ani, hanv morum vô jivo asum, sodanch toxem atam-i, kalljidarponnan bhoron hanv fuddem vetolom, ani mhojê kuddint Kristak vhoddvik mellteli. Mhonntôch mhojea jivitak koslo ôrth asa? Fokot Krist mhojea jivitak ôrth dita; punn hanv moron zalear, odik faido zatolo. Oxem astana, jivo urun mhojean odik faideachem kam’ korunk zata zalear, hanvem kitem vinchun kaddchem tem mhaka somzona. Donim-i vattamnim hanv oddon vetam: êkê vatten hem jivit sompoun Krista sorxem asunk hanv otrektam, ani hem ekdom’ odik borem; punn, dusrê vatten, hanv jivo urlolo tumchê pasot odik gorjechem. Tumkam odik dhir diunk ani bhavartant tumchi khuxalkai vaddounk hanv jivo urtolom ani tumam-somestanchea vangdda astolom mhonn hanv khatren zannom. Ani hê bhaxen, hanv tumchê modem portun ietôch, mhojê khatir Jezu Krista sovem tumkam obhiman bhògta to ekdom’ vaddtolo. Tem kitem-i zaum, Kristachea xubhvhortomanak sobta toslem tumchem jivit zaunk zai; oxem, tumchê modem vochun hanv khaxa polleunk pavum vô pois thaun tumchi khobor aikum, tumi eka kallzachim zaun thir ubim asat mhonn ani xubhvhortomanachea bhavarta khatir ekach monan vangdda zhuztat mhonn mhaka gomun ieum. Tumcheam dusmanank koxêch bhaxen tumi bhieum nakat. Tanchem nisontton zatelem ani tumkam suttka mellteli mhonn, hi êk Devan dil’li khunna zateli. Kiteak Kristacher bhavart dovrunkuch nhoi, punn Tachê khatir koxtt-dogd sõsunk-ui Devan tumkam favo kelam. Tumi mhaka zhuzlolo pollela ani ozun porian hanv zhuztam mhonn tumi aikotat, teach zhuzant tumkam-i vantto asa. Apnna sovem Krist tumchem jivit ghott korta. Aplea mogan tumkam buzvonn dita. Povitr Atmeacho-i tumkam ekchar asa ani tumkam eka-mekachi opurbai asa ani ekamekachi konnvollai dista zalear ekchitachim, ekach mogachim, ekach monachim ani êkêch khuxechim zaiat; tednam ki tumi mhaka sarko dhadoxi kortelet. Svarti axen kãich korinakat, suki boddai korinakat, punn khalteponnan dusrim tumchê-von vortim mhonn dhôrat; ap-aplea faideachem kitem tem pollenakat, punn dusreak kitem faideak poddtolem tem polleiat. Jezu Kristachea monant ani kallzant aslem tench tumchea monant ani kallzant asum-di: Devachea soimbacho To, punn Devachi gôt Tannem axen samball’n dhorunk na. Apnnakuch khali kelo, mon’xachem sarkem ghetlem, gulama-akar dhôrlo. Mon’xanchê gotint jieun, lhan’vik vinômr To zalo. Moronn, khursachem moronn, Apnnacher ghei porian Devak To khalto zalo. Dekhunuch Devan Taka unch sorgar ubar’n vhelo ani Nanv Taka dilem soglleam nanvam-vôn vortem. Mhonnun atam sorv rochnna sorgar, prithver, patallant Jezuchea Nanva mukhar saxttangim vondon korum, ani Jezu Krist Somi mhonn porgôtt korun soglleô jibô umallean Deva Bapak mhoima dium. Mhonntôch, mhojeam pritich-eamnô, hanv tumchê modem aslom tedna, tumi mhojea utrak khaltim asleat; têch bhaxen atam, hanv tumchê thaun pois astana, tumi khaltim aschi odik goroz; ani tumchi purnn suttka tumkam mellchê khatir bhieun ani kampun proitn korit ravat; kiteak mhonn’lear, Aple mogache ievzônnek lagun, tumi aunvddeunk ani vaurunk tumche bhitor vaurta Toch khud Dev. Jivitachea utrak thir ravun, hea sonvsarant noketram porim, tumi jigjigtat te khottê ani baskôll pinddkê modem khot-naslelim Devachim bhurgim tumi zaunche khatir gunngunni vô vivad korinastana, kitem korchem asa tem korat. Jivitachea utrak, tumche thirauannenuch, ki hanv nirfollim vaurunk na mhonn Kristachea Disak mhojean vhoddvik korunk zata. Khorench, Devak bhettoil’lea tumchea bhavartachea iodnacher mhojem-i rogot varoun somorponn korchem poddlem tôr, hanv khuxal ani tumam-soglleam borabôr hanv-ui sontosbhorit zatolom. Toxench tumi-i khuxal zaun mhojê borabôr sontosbhorit zaiat. Timotak vegim tumchê-xim dhaddunk zatolo mhonn hanv Somia Jezucher patietam; hê bhaxen tumchi khobor gheun mhojem mon somadhan zatelem. Mhojeach kallza-monacho ani tumchi khorea monan kallji ghevpi dusro konn mhojê lagim na. Heram soglleank Jezu Kristachem poddunk na, te ap-aplench polleun asat. Punn Timot koso chol’la to tumi tôr dekhlam: êk put aplea bapaichea vangdda kam’ korta, toxem tannem mhojê borabôr xubhvhortomanachem kam’ kelam. Mhojem koxem cholta tem pollena fuddem, hanv taka veginch tumchê-xim dhaddunk zatelem mhonn ravtam. Ani hanv legun rokddo tumchê-xim pavtolom mhonn mhaka Somiacher visvas asa. Amchea bhava Epafroditak tumchê-xim dhaddchi goroz asa mhonn mhaka dislam. Mhojea vavrant ani mhojea zhuzant to mhozo vangddi zaunk pavlo; tumi taka pattoil’lo mhonnon, hanga ieun tannem mhaka adar dilo. To tumkam soglleank polleunk axetalo, ani apunn piddest zala mhonn tumkam khobor pavli dekhun taka khônt zali. Khorench to ekdom’ boro naslo ani morunk pavlolo, punn Devan tachi doia keli; tachich nhoi punn mhoji-i Tannem doia keli ani oxem dukhacher-dukh mhaka asona-xem kelem. Hea pasot taka polleun tumi novean khuxal zaunche khatir ani mhojê khontint mhaka-i buzvônn mellche khatir, zata title vegim taka tumchê-xim dhaddunk odikuch hanv anvddetam, taka polleun tumi novean khuxal zatelet ani mhojê khontint mhaka-i buzvônn mellteli. Mhonntôch Somia sovem sogllê khuxallkaien taka gheiat; tachê-osleam soglleam mon’xank man diat; tumchean mhaka diunk zainaslo to adar diunk tannem aploch jiv sonkottant ghalo ani oso Kristachea kama khatir to morunk pavlolo. Xekim, bhavam-bhoinnimnô, Somia sovem khuxal ravat. Tumkam adim boroilam tem anink êk pavtt sangunk mhojê vatten koslich addkhôll na, ani tumchich rakhônn korunk tem upkartelem. Team sunneank lagim gheunkuch nakat! Te khotte vavraddi! Ang katrunk bhonvtat tosle monis te! Ami ki sunotichi khori porza, kiteak ami Devachea Atmea vorvim Taka bhôztanv; angar kel’lê khunnecher amcho visvas na, punn Jezu Kristacher amcho obhiman. Mhojean-ui masa-rogtacher visvas dovrunk zatalo; ani konn-ui angar kel’lê khunnecher visvas tthevunk apnnak karonn asa mhonn somzota zalear, mhaka odik karonn asa. Atth disancho astana mhoji sunôt keli, hanv zolman Israelachea raxttracho, Ben’jamin’chea kullacho, Hebrevank zolmol’lo Hebrêv. Somurt pallchê babtint hanv êk Farizêv; hurben itlo bhòrlolo, ki povitr-sobhek hanvem dhumallo dilo. Somurti thaun upzota tea promannikponnachê babtint mhaka koslich chuk nasli. Heô soglleô vostu mhaka faideacheô asleô, punn atam Krista pasot teô hanvem nuksann mhonn lekhleô. Jezu Krista, mhojea Somiachi, ollokh itlea unch molachi ki Kristak jikun gheunche khatr, ani mhojeanch kornneam udexim zôddlelem, Somurti thaun upzoto promannikponn mhaka asun nhoi, punn bhavarta udexim Kristacher visvas dovortana Dev Apnnak manovlelim korta tem promannikponn mhaka asun, hanv Kristachea ekvottant hanv asche khatir, hanvem Tachê pasot sogllem soddun dilem, sogott xenn mhonn dhôrlem. Oxem Jezuk ollkhunk, Tachea punorjivontponnachem boll onnbhovunk, Tacheam koxttamnim vantto gheunk, Tachea mornnant Tachê-sarko zaunk: itleakuch hanv otrektam. Hê bhaxen mel’leantlo punorjivont zaunk pavtolom mhonn mhaka bhorvanso asa. Hanv xevottak pavlom vô sopurnn zalom mhonn somzo nakat. Na! Hanv inam’ jikunk ozun dhanvot asam, kiteak heach pasot Jezu Kristan mhakach jikun ghetla. Bhavam-bhoinnimnô, jiklom mhonn somzun hanv murgottnam; punn itlench sangtam: pattim sôddlam tem visrun, fuddem asa tacheruch dolle lavun, sogllea mhojea bollan nitt xevottak hanv dhanvun vetam. Jezu Krista sovem voir sorgar inam’ jikunk Dev amkam apoita: to inam’ mhozo xevôtt. Ami bhavartant vaddlelim mon’xam mhonnon, hêch bhaxen ami chintchem; punn konnachem-i mot vegllem zalear, hem-i tumkam Dev ugddapem kortolo. Kitem-i zaum, ami az porian pavleanv thõi thaun teach rostean fuddem vochum-ia. Mhojeam bhavam-bhoinnimnô, sogllim tumi vangdda mhoji dêkh gheiat ani mhoji dêkh gheun cholteleancher dolle dovrat. Atam hanv sangunk vetam tem adim zaitê pavtti tumkam sangtalom, punn atam tench novean sangchem poddta; mhaka itli khônt bhògta ki mhaka roddunk ieta, kiteak mhonn’lear zaitim zannam khursar mel’lea Kristachim dusman zal’lê porim choltat; oslim mon’xam nisonttonak pavtelim; tim bhôztat to dêv tanchem pott; jê vostuchi tankam loz dischi asli, tichi tankam vhoddvik bhògta; tanchem dhean-mon fokot sonvsari vostuncher asa. Punn amcho khaxa dês sorgar asa; ani sorgar thaunuch amchea Soddvonnara, Somia Jezu Kristak, ami axeun ravtanv. To hê amchê holkê kuddichem rupantor korun ti Aplê mhoimevont kuddi sarki kortolo; soglleô vostu Apnnachê adhin To korunk xokta têch podven To hem rupantor kortolo. Mhonntôch, mhojeam bhavam- bhoinnimnô, kitli mhaka tumchi opurbai asa ani kitlo mhonn hanv tumkam polleunk axetam! Tumchê vixim kitlo sontôs ani obhiman mhaka bhògta! Oxem tôr, mhojeam priticheamnô, Somia sovem thir ravat. Somia sovem eka monachim zaunk, Euodiê kodde prarthun magtam, toxench Sintikê kodde prarthun magtam. Ani tum, mhojea visvaxi vangddea, tujê lagim hanv vinoti kortam, tankam adhar di: heô bailô, Klementi ani heram mhojeam sohokaream borabôr, xubhvhortoman porgottunk mhojea vangdda zhuzleat: hanchim nanvam jiveanchea pustokar boroil’lim asat. Somia sovem sodanch khuxal ravat; novean sangtam: khuxal ravat. Tumchi dulobai soglleank dixtti poddum-di. Somi ieuncho zalo. Koslech huske kaddi nakat; kallzache dhinvasnnen, soglleam tumcheam magnneamnim tumkam goroz titlem-i Devak kollit korat. Ani amchea gineana poros vorti Devachi xanti tumchim monam ani kallzam Jezu Krista sovem rakhteli. Xekim, bhavam-bhoinnimnô, kitem khorem, manachem, nitichem, nirmoll, opurbaiechem, kirtivont, gunnest ani xrestt tem tumcheam monant golloiat. Mhojê koddlem tumi xikleant titlem-i tumi korat: hanvem tumkam dileat teô chali, mhojea tonddantlem tumi aikolam tem vô mhojê vagnnukentlean tumi dekhlam tem. Hê porim amchim kallzam xantin bhôrta to Dev tumchê sovem astolo. Boroch vêll korun, atam tori anink êk pavtt mhojê vixim tumi novean husko dakhoila mhonn Somia sovem hanv ekdom’ khuxal zalam. Adim porian mhozo tumkam husko aslo mhonn hanv manun ghetam, punn to dakhounk tumkam soêg mellunk na. Mhaka kitem unnem zalem mhonn hanv oxem sangina, kiteak mhojê lagim asa titleanuch sodam dhadoxi asunk hanv xiklam. Gorjecheô vostu nastana vô goroz tea-vôn odik asun jieuncho mhaka onnbhov asa; khõisor-ui ani koslê-i poristhitint jieuncho gutt hanv xiklam: upaxim ravunk vô pott-bhôr jevunk-khaunk, subham’ponnant vô lachar-ponnant jieunk, kiteak-ui hanv toear! Mhaka xokti dita tea Jezu vorvim hanv kitem-i korunk xoktam. Tori mhojeam koxttamnim mhaka adar diun tumi borem kelem. Poilinch xubh-vortoman porgottunk hanv Maxe-donientlo bhair sorlom tedna, tumchê bhair khõichêch povitr-sobhen mhaka adar diunk na: tumkam, Filipkaramnô, hi soglli khobor asa. Fokot tumi mhaka poixe dhaddun dile. Tesalonikent astana mhaka goroz poddli tedna, êkuch pavtt nhoi punn don pavtti tori, tumi mhaka pavleant. Tumcheam dananchi axa mhaka asa mhonn somzo nakat, punn udar monan kel’leam tumcheam danam udexim, tumchea ixopant ekttaim zato faido, tumkam mell’lolo mhaka zai. Sod’deak goroz tem ani tachê-vôn chodd mhojê lagim asa. Epafrodita kodde diun tumi dhaddlelim danam gheun hanv bhòrlolo asam. Tim danam domdomit pormollachem somorponn, Devak avoddta ani To manun gheta toslo iôdn. Mhozo Dev, Jezu Krista vorvim, Aplê subham’ dovlotintlem kaddun tumcheam gorzamnim tumkam pavtolo. Oxem tôr, Devak, amchea Bapak, mhoima sasnnachea sasnnak. Amen. Jezu Kristachea ekvottant aslelea dôr-eka bhoktak noman kortam. Mhojea sangata asat tim bhavbhoinn tumkam noman kortat. Soglleam bhoktancho nomoskar tumkam, bhov-korun Somra-zachea razvaddeantleam bhoktancho. Somia Jezu Kristachi doiallai tumchê sovem asum. Paulu, Devachê khuxen Jezu Kristacho apostl, ani amcho bhav Timot Kolos xarantleam bhoktank, Krista sovem amcheam visvaxi bhavam-bhoinnink, noman kortat. Deva amchea Bapakoddlii doiallai ani xanti tumkam. Amcheam magnneamnim tumchê khatir Devak, amchea Somia Jezu Kristachea Bapak, ami sodanch dhin’vastanv. Kiteak Jezu Kristacher tumi bhavart dovorla mhonn ani soglleam bhoktancho tumkam môg asa mhonn amkam khobor pavlea. Sorgar tumkam bhorvanso dovorlolo asa tachê thaun to bhavart ani môg nipzotat. Sotacho nirôp, mhonngê xubhvhortoman, tumkam porgôtt zalo tedna, hea bhorvanxeachi khobor tumi aikoli. Tumkam pavlem tem xubhvhortoman tumi aikun Devachi doiallai sogllea sotan tumi somzolim tea disa sun tumche modem ghoddtalem toxench sogllê kodden ak’kea sonvsarak follam diun tem vistarot veta. Hem tumkam mhojea mogachea vangddi-chakra, Epafrasan xikoilam. To amchea nanvan tumchê modem visvaxiponnan vavr korpi Kristacho sevôk. Povitr Atmeachea ekvottant tumchê modem vosta tea mogachi khobor tannench amkam dilea. Hea pasot, tumchi khobor ami aikolea tethun thaun ami sodanch tumchê khatir magnnem kortanv, ani Povitr Atmeache purnn zannvaien ani somjikaien Devache khuxeche ollok tumi gheum mhonn ami magtanv. Oxem Somiak favo ani soglleanch vattamnim Taka manovta toslem tumchem jivit zatelem, ani sogllea jin’sacheo boreo kornneo tumi kortelet, ani Devachê zannvaient tumi vaddon vetelet. Tumi sosnnikaien ani mhatmeponnan cholunk, Aplê mhoimechea bollan Dev tumkam ghott kortolo. Bapak dhin’vasat anondan! Tannem tumkam bhoktam vangdda uzvadda-daiz favo kelam. Kallokachê razvoddkentli Tannench amkam suttka dili, Aplea mogachea Putachea rajeant amkam bhitôr kaddlim. Tachê sovem amkam mell’li amchi suttka, patkam-mafi: Disonaslolea Devacho Jezu khoro jivo Rupkar, rochnnam modlo To Malgoddo! Sorgar prithver soglleô rochnna, distat ani disonant teô, — konn-ui teô zaum: raza, pordhan, odhikari vo raj choloupi — Tachêch vorvim rochun aileat. Asa tem sorv Tachê vorvim ani Tachêch khatir rochlam. Khõichich rochnna rochchê adim Krist aslo. Soglleam rochnnank ektthãi korun To Apunn eklo samball’n dhôrta. Toch To Aple kuddi povitr sobhechem mostok. Toch povitr sobhechea jivitachi zor, mel’leam modlo Tocch To malgoddo, soglleant prothom,’soglleant poilo! Devsoimbachi sorv sopurnnai Tachea mon’xasoimbant aschi, oxem Devak borem dislem. Tachech vorvim, Tannench khursar vikrailelea rogta udexim, xanti sthap’pun sorgar ani prithver asa titlem Apnna xim ektthãi korunk Devachich khuxi zali! Eka vellar tumcheam khotteam kortubank lagun tumi Deva thaun koddsorlelim asleat, ani tumcheam monam pormonnem tumi Tachem dusman zal’leat. Punn atam, Tannem Apnna mukhar tumkam povitr, nixkollonk ani niropradi ubim korun dovorche khatir, Tachea Putan Aplê vinaxi kuddint bhôglelea mornna vorvim, sondhan korun Devan tumkam portun Aplê vengent ghetleant, Atam tumi bhavartache buneadir thir ani ghott ravat. Xubhvhortoman mandun gheun tumkam mel’la to bhorvanso tumi halonk-ddonvddolunk dium nakat. Hem xubhvhortoman mollba khala asleleam soglleam monxam modem porgott zalam, ani hanv Paulu tacho sevok zalam. Tumchê khatir, hanv atam mhojeam koxttamnim sontostam, ani hê bhaxen jem Kristacheam koxttank kitem unnem asa, tachem map Tachê kuddi, povitr sobhê khatir, hanv mhojêch kuddint bhorun haddtam. Aplo sondêx purnnponnim tumkam porgôtt korunk Apnnem nemun dil’lea kamant zababdari diun, Devan mhaka povitr-sobhecho chakôr kelo. Ho sondêx kallam-iuganchea ani mon’xakullachea orombak thaun Devan lipoun dovorlolo gutt, punn atam Tannem Apleam bhoktank to dokhôl kela. Hea guttache kitle mhoimebhorit porzoll to videxeam modem porgott korunk Devan tankam nemle. To gutt mhonn’lear tumche sovem asa to Krist mhoimecho bhorvonso. Jezu Krista sovem sogllim sopurnn zaunchê khatir, sogllê zannvaien soglleam mon’xank xiddkavun ani xikoun ami Heach Kristak porgott’tanv. Heach khatir mhojê bhitôr vavurtelea Kristachea xoktivont bollan hanv ghas gheun vavurtam ani zhuztam. Tumchê khatir, toxench Laodixe- iantlea loka pasot ani mhaka rup-rup kodinch polleunk na team khub-khub zannam khatir hanv koso zhuztam, tem tumi zanna zal’lim mhaka zai. Ani tem kitea pasot? Tanchem kalljidarponn vaddounchê khatir, ekamekachea pritimogant tankam thir korchê khatir ani Devachea guttachi soglli girestkai ollkhun tachi sopurnn somzonni tankam mellchê pasot. Hea Krista sovem xanneponnachim ani zannvaiechim sogllim bhanddaram liplelim asat. Bhulovpacheam punn polkeam vivadamnim konnench tumkam fosoina zauche khatir hem hanv tumkam sangtam. Kuddin tumchê thaun pois asun-ui, monan tumchea sangata hanv asam. Tumchi xist polleun ani Kristacher tumcho bhavart kitlo ghôtt asa to ollkhun, mhaka anond bhògta. Jezu Kristak tumcho Somi mhonn tumi mandun ghetla mhonntôch, Tachea ekvottant jiet ravat. Tumchim pallam Tachê bhitôr khôl-khôl riglelim asum-di. Tumchem jivit Tacher bandun haddat, ani, tumkam xikoilam toxem, tumchea bhavartant odik ghott zaiat. Ani dhin’vasnnen bhoron tumchim kallzam ieum-di. Mon’xanchea polkea xanneponnan tumkam fosoun, konnench tumkam aplea tabeant korinam zaunk chotur ravat. Oslem xanneponn mon’xam thaun tumkam pavleleam xikovnnanchi vatt dakhoita zait, vô tem tumkam srixtti choloitat team odhikariancheam nemanchea margar ghaltat zait, punn tem Kristachi zannvai nhoi. Kiteak Tachea mon’xasoimbant Devponnachi soglli poripurnntai asa, ani Tachê sovem tumi-i poripurnntaiek pavleant. Hem monant dhôrat: soglleam odhika-rianchem ani odhipotinchem Toch mostok. Tachêch sovem tumchi sunôt kelea: hi sunôt mon’xachea hatan kel’li nhoi. Kristan sthaplelê, hê sunotin tumchem patki soimb sarkench kaddun uddoilam. Tumkam batism dila tedna, tumkam Tachea vangdda nikhipilim, ani teach batisma vorvim tumkam Tachea vangdda punorjivont kelim, kiteak Taka mel’leantlo punorjivont kelo tea Devachê podvecher tumi bhavart dovorlo. Tumcheam opradank lagun ani sunôt korunk naslolê tumchê kuddi pasot tumi mel’leant; punn atam, soglleam opradanchem bhogsonnem diun, Devan tumkam Tachea vangdda punorjivont keleant. Somurticheam kaideam-nemam pasot amcher add aslem tem rinnachem lêkh-potr Tannem kaddun uddoilem ani tem khursar khillaun tacho nas kelo. Oxem Tannem odhikarianchi ani odhipotinchi podvi kaddun ghetli, ani, koidi koxe Aplea zoitachea porivarant tankam vhorun, soglleam rochnnam mukhar tankam firoile. Tumcheam khannam-pinneam vixim, toxench porbam-utsovanchê, punovanchê, ani Sabbathachê babtint konnench tumkam nem’-kaide ghalche nhoi. Heô soglleô vostu fuddarak ieuncheô asleô team vostunchi savlli; sodam togpachem sot mhollear ekloch Krist! Apleach vadean khaltikaiechem rup ghetat ani devdutank bhôztat, ani apnnank dorxonam gheunk sôdtat tosleam mon’xam pattlean vochun, tumkam dovorlelem inam’ hogddaum nakat; oslim mon’xam aplem mon’xasoimbachem chintop dhorun gorvan bhòrleant. Tim mostokak ekvottlelim nant. Hea mostoka-sun akhi kudd sandheam ani gotram udexim aplem posonn gheta, ani, oxi ekvottant samball’leli, Devak zai tê bhaxen vaddot veta. Krista borabôr morun srixtti choloitat team odhikarianchea tabeantlim tumi mekllim zaleant; oxem zalear, ozun hea sonvsarachim zal’lê porim kiteak jietat tumi ani tache nem’ kiteak manun ghetat? “Haka hat lavum naka”, “tem dusrem chakinaka”, “tem tisrem sansponaka”: kosle nem’ he? Vaprun ibadd zatat tosleam vostum vixim mon’xanchê zannvaien dil’leô adnea ani xikovnnô! Tankam bhailean zannvaiecho rông asot, punn hi soglli polki puza, ôrth-nasleli khaltikai, map-nasleli kuddichi donddvônn; punn patki mon’xasoimbacheô vondovnneo domaunk osle nem’ kiteakuch upkaronant. Krista borabôr Devan tumkam punorjivont keleant mhonntôch, sorginchea vostunche zaum-di tumche otrek: thõi sorgar Krist Devachea uzvea hatak boslolo asa. Tumchem dhean-mon sorgincheam vostuncher asum-di, sonvsarantleam vostuncher nhoi; karonn tumi meleant ani tumchem jivit Krista borabôr Deva sovem liplelem asa. Tumchem jivit mhonn’lear Krist, ani To dixtti poddtolo tedna, tumi-i Tachê borabôr dixtti poddtelet ani Tachê mhoiment tumkam vantto melltolo. Hea pasot tumchea soimbant asat te sonvsari anvdde marun uddoiat: pozoddponn, mhelleponn, kamchar, khotteô vondovnneô, ani ti mannsugê-bhaili girestkaiechi axa — hi axa khorench mhonn’lear murtim-puttleanchi puza. Osleam vostunk lagun, Devachem aikonant tancher Tacho krôdh denvun ieta. Ani tanchê modem tumi jietaleat tedna, tumchem-i jivit toslench aslem. Punn atam hem sogllem tumi soddun diunkuch zai: rag, krôdh ani vikottai; jastiô ani pozddeô khobrô tumchea tonddantleô kodinch bhair sorcheô nhoi; Tacheam chalim soit adlem patki soimb tumi soddun dilam dekhun, ekamekak kodinch fotti marinakat. ani novea monxacho akar ghetla dekhun Apli purnn ollokh mello porian toch Rochnnar hea novea mon’xak odik-odik Aplea sarkeacho novo korit asa. Hantum anink Grik ani Judêv mhonn na, sunôt kel’lo ani sunôt na-kel’lo mhonn na, porko ani zonglli monis mhonn na, gulam’ ani svotontr monis mhonn na. Asa to ekloch Krist — soglleam sovem Toch! Tumi Devan vinchun kaddlelim, povitr kel’lim ani Tachê opurbaiechim: dekhun tumi doiall-movall kallzachim, bholim, khaltim, dulob ani vhôdd sosnnikaiechim mon’xam zaiat. Dusreacher garannem korunk nimit aslear, tumi ekamekak sõsun bhogsat. Somian tumkam bhôgxileant, toxench tumi-i ekamekak bhôgsat. Heam soglleam sugunnancho mukutt koso, pritimôg tumchê modem vosum-di, kiteak tachê vorvim soglleam sugunna-ncho sopurnn ekvôtt zata. Êkuch kudd ghoddun Krist dita ti xanti bhogunk Devan tumkam apoileant; tôr hi xanti dolleam mukhar dovrun tumchem jivit choloiat. Ani Devak sodam dhin’vaxit ravat. Kristacho sondêx subham’ponnan tumcheam kallzamnim tthikann korum. Sogllê zannvaien ekamekak xikoiat ani budh diat. Tumchim kallzam dhin’vasan bhoron, stotramnim, gitamnim ani Povitr Atmo upzoita team gaionamnim Devachi vakhann’nni korat. Tumi mhonntat ani kortat titlem-i Somia Jezuchea nanvan korat ani Tachê vorvim Devak, amchea Bapak, argham diat. Potinnimnô, Somiachea ekvottant asleleank sobta toxem tumcheam potink khalteô ravat. Potimnô, tumcheam potinnincho môg korat ani tanchê thãi khoraien vagum nakat. Bhurgeamnô, sogttant tumchea avoibapaik khaltim ravat: hem Somiak man’ta. Avoi-bapaiamnô, tumcheam bhurgeank tiddkaum nakat, na zalear tanchem mon mòddtelem. Gulamamnô, tanchi xebaski zôddchea monan fokot tancho dollo tumcher asa tedna nhoi, punn sadea kallzan Somiak man diunchê khatir. tumcheam sonvsarantleam dhoniank sogttant khaltim ravat Tumi kortat titlem-i, mon’xam khatir nhoi punn Somia khatir, sogllea kallzan korat. Mozuri koxi tumkam dovorlelem daiz Somi tumkam ditolo mhonn ugddas dhôrat. Kiteak, khorench mhollear, tumi chakri kortat ti Kristachi, amchea Somiachi. Peleak vaitt korta taka apleam vaitt kortubank favo ti khast melltoli. Kiteak Dev mon’xachem tondd pollenam. Dhoniamnô, mannsugê ani niti pormannem tumcheam gulamank vagoiat. Tumkam-i sorgar êk Dhoni asa mhonn ugddas dhôrat. Magnneant thir ravat, ani tumchim prarthonam kortana zagrut ravat ani Devak dhin’vasat. Amchê-i pasot magat; Kristacho gutt ugtto korun Devacho sondêx porgottunk Devanuch mhaka bori sondi diunchi mhonn magat: heach pasot hanv atam bondkhonnint asam. Hanvem to sondêx favo tê bhaxen spoxtt porgôtt korcho mhonn magat. Tumkam mellta tê dôr-êk sondicho boro upêg korun, amchea bhavartachim nhoi, team mon’xam sorim xanneponnan vagat. Tumchem ulouop sodam chit-mon oddun hadd’to zaum-di. Teach borabôr zonn-ekleak favo toslo zobab diunk zanno zaiat. Tikikus, mhozo opurbaiecho bhav, visvaxi adari ani mhojea vangdda Somiacho sevôk, mhoji soglli khobor tumkam ditolo. Heach pasot, tumcheam kallzank dhir diunk, hanv taka mud’dom’ tumchê-xim dhaddtam. Tachê borabôr ietolo Onezim’, tumchêch sobhentlo visvaxi ani mogacho bhav. Hangachi soglli khobor te tumkam ditele. Mhojê borabôr bondkhonnint asa to Aristark tumkam noman korta. Tosoch Marku, Barnabasacho bapulbhav. Tumchê vatten to pavot zalear, taka koso boro ievkar diuncho, tem hanvem tumkam adim sanglam. Joxua (dusrea nanvan Justus) apunn-ui tumkam nomoskar korta. Amcho bhavart dhôrlo team Judevam modle he teguch zann Devachea Rajea khatir mhojê borabôr vavurtat, ani tãnnim mhaka khup adar dila. Tumchêch sobhentlo Epafras-ui tumkam noman korta. Ho Jezu Kristacho sevôk tumcho zaito husko korta, ani tumi sopurnnaien ani thirponnan Devachi khuxi korchi mhonn ani oxem tumchea apovnneak tumi visvaxi ravchim mhonn sodam tumchê pasot to magnnem korta. Tumchê khatir ani Laodixeia ani Hierapolis nograntlea loka pasot to kitlo bhar gheun vavurta, hachi hanvuch govai ditam. Luk, amcho priticho voiz, ani Demas-ui tumkam noman kortat. Laodixeia nograntleam soglleam bhavam-bhoinnink hanvem vicharlam mhonn sangat; toxench Ninfek ani tichea ghorant zomta tê povitr-sobhek. Tumi hem potr vachlea uprant Laodixeiantlê povitr-sobhek-ui tem vachunk dhaddat. Têch bhaxen Laodixeiantlim bhavbhoinn tumkam dhaddtelim tem potr tumi-i vachun kaddat. Ani Arkipak oxem sangat: ‘Somian tuka dilam tem kam’ sompounk soglli fikir ghe.’ Mhojeach hatan hem nimannem noman boroitam — PAULU. Hanv bondkhonnint asam mhonn ugddas dhôrat. Devachi doiallai tumchê sovem asum. Paulu, Silvan ani Timot Deva amchea Bapachea ani Somia Jezu Kristachea ekvottant asa tê Tesalonikechê povitr-sobhek noman kortat. Devachi doiallai ani xanti tumchê sovem asum. Thambonastanam amcheam magnneamnim tumcho ugddas korun, tumam-somestam pasot ami sodanch Devak dhin’vastanv. Tumcho bhavart kornneamnim tumim dakhoilo, koxtt korun mogan tumi vavurleant, ani Krista amchea Somia Jezucher bhorvanso dovrun tumi thir ravleant; hem amchea Deva ani Bapa mukhar amchea monant ghott asa. Mhojeam bhavam-bhoinnimnô, tumi Devachê opurbaiechim ani Tannem tumkam Aplim zaunk vinchun kaddleant mhonn ami zannonv. Ami tumkam xubhvhortoman porgott kelam: tem fokot utramnim nhoi punn Povitr Atmeachea bollan kel’leam khunnamnim; tea vellar hea sondexachi amchi purnn khatri-i ami tumkam dakhoili. Ani tumcheach boreak tumchê modem ami koxe chol’leanv tem tumi borim zannont. Tumchê pallien tumi amchi ani Somiachi dêkh ghetli ani Devachem utor sobar koxttam-dogdam modem Povitr Atmeachê khuxalkaien tumi oxem mandun ghetlem, ki Maxedonient ani Akaient soglleam bhavarteank tumi êk nomuno zaleant. Hôi, Somiachem utor, tumchê udexim nhoi fokot Maxedonient ani Akaient gazot gelem; punn sogllê kodden tumi Devacher bhavart dovorlo mhonn khobor pavli; oxem he vixim ami kitench sangchi goroz na. Tumi kitlo boro ievkar amkam dilo, ani jivea ani khorea Devachi chakri korchê khatir koxim tumi murti-puttle sanddun ani ieuncho asa tea krodhantlim nivarta tea Jezuk Tannem mel’leantlo punorjivont kelo ani sorgar thaun ieuncho asa teach Jezu, Tachea Putachi, tumi vatt polleun asunk tumi Devaxim vollon aileant mhonn toch lôk sangta. Bhavam-bhoinnimnõ, tumkam ami bhett dili ti nirfôll zali na mhonn tumi zannont. Tumchê-xim pavchê adim Filipi xarant amkam tras diunche diun kosle okman kele te tumi zannont. Devachem xubhvhortoman tumkam porgottunk khub addkhollink amkam fuddo korcho poddlo, punn hi porgôttnni korunk amchea Devan amkam dhir dilo. Ami tumkam ulo marla zalear, sotachi vatt ami sôddli mhonn nhoi, kosleach burxeponnak lagun nhoi, tumkam fosounchea monan-ui nhoi. Portench zalear, xubhvhortoman amchê adhin korunk Devak borem dislem dekhun, ami Tacho nirôp ditanv. Ani mon’xank nhoi punn amchim kallzam topasta tea Devak manonk amcho êkuch hetu. Amchem ulouop kednanch fuslavnnechem zalem na mhonn tumi besborim zannont; vô kallzant duddvachi koslich axa dhorun ami ulounk nanv: hacho govai Dev. Kristache apostl zaun-ui tumcher amcho bhar ghalunk amchean zatalem khorem. Tori ami mon’xam koddcho man zoddunk sodunk na, zaum tumchê koddcho, zaum heram koddcho. Punn tumchê modem ami dulobaien vagleanv, ani apleam bhurgeam-ballank opurbaien postelê ani ballgitelê avoiê bhaxen ami zaleanv. Amchea kallzant tumcho itlo môg rigla ki Devachem xubhvhortoman tumkam diunchê diun, amcho jiv porian tumkam diunk amkam vhôdd khuxi asli: itlim tumi amkam opurbaiechim zaleant! Ami kosle koxtt kaddtaleanv ani koxe harpit zataleanv, hacho, bhavam-bhoinnimnô, tumkam ugddas asa; tumchê modlea konnakuch zodd zaina zaunk, tumkam ami Devachem xubhvhortoman porgôtt’taleanv tedna, dis-rat ami vavr kortaleanv. Bhavart mandun ghetleleam tumam sorim koxê bhaxen osôl bhoktichi, promannikponnachi ani nixkollonk zali amchi vagnnuk, hache tumich govai, ani tumchê borabôr Dev-ui. Bapui apleam bhurgeank vagoita toxench ami tumchê modlea zonn-eklea sorim kelem mhonn tumi zannont. Aple mhoimêbhorit Rajeak Devan tumkam apoileant dekhun, Taka man’ta toslea jivitachi chal dhorunk tumkam ami vinonti keli, dhir dilo ani nettan ulo marlo. Devak nirontorim dhin’vasunk anink ek karonn hem: amchê koddsun tumi Devacho nirôp ghetlo tedna, mon’xanchem utor koxem to tumi manun ghetlo na, punn Devachem utor koxem; tôr tem khorench Tachem utor ani tumam bhavarteam modem aplem boll dakhoit asa. Bhavam-bhoinnimnô, Jezu Kristachea ekcharant Judeiant asleleam povitr-sobhank ghòddlam tem tumkam-i ghòddlam; kiteak mhonn’lear, jem tãnnim Judevam koddsun bhôglem, tench tumi-i tumchê kulliecheam bhavam-bhoinnim koddsun bhôgchem poddlem. Judevamnim Somia Jezuk ani provadeank jivexim marle ani amkam-i dhumallo dilo. Him tanchim kortubam Devak koxêch bhaxen manonant, ani oso Judêv lôk sogllea mon’xakullak add zaunk pavla. Videxeank taronn-mellto Devacho sondêx porgottunk amkam ho lôk addaita. Hê bhaxen soglleam tancheam patkanchem map bhoron ailam. Xevottak Devacho krôdh tancher denvun aila. Tôr, bhavam-bhoinnimnô, ami thoddoch vêll tumchê thaun pois asleanv tedna — kallzan nhoi, punn fokot tumchê nodrê thaun pois — zata titlê vegim tumkam tondda-tonddim polleunk kitle mhonn ami axetaleanv! Tumkam bhett diunk zaite ami proitn kele; hanvem, Paulun, komich zalear don pavtti tori oxe proitn kele, punn Soitanan mhaka addailo. Amcho bhorvanso ani amcho sontôs konn dista tumkam? Ani Jezu amcho Somi ietolo tedna, Tachê mukhar amchê vhodd-vikecho mukutt konn? Tumich nhoi tim? Khorench, amcho obhiman ani amcho sontôs tumich! Hea khatir, amchem mon anink somadhan zaina zaun, Atenant hanv ekloch ravcho mhonn ami tharailem. Oxem astam, ami Timotak tumchê-xim dhaddlo: to amcho bhav ani Kristachem xubhvhortoman porgôttchea vavrant Devacho chakôr. Tôr tumkam ghottai diunchê khatir ani tumcho bhavart thiraunchê pasot ani oxem, tumi bhôgtat team koxttam-dogdam modem konnuch halchona. Osli piddapidd Devanuch nirmil’li amchi gôt mhonn tumi zannont. Tumi koxtt-dogd bhôgche poddtele mhonn tumchê modem ami asleanv tedna ami tumkam sangunuch dovorlelem, ani toxench ghòddlem mhonn tumi pollelam. Teach pasot, amchean anink ravum nozo zaun, tumchea bhavartachi khobor gheunk mhonn ami Timotak dhaddlo: Soitanan tumkam eka vellar naddlim zait ani sogllo amcho vavr nirfôll zala zait mhonn amkam vhôdd husko zalo. Atam tumkam bhett diun Timot amchê-xim porot ailo ani tumchea bhavarta ani pritimoga vixim tannem amkam bori khobor dili. Tumi sodanch moipasan amcho ugddas kortat mhonn, ani zoxem ami tumkam polleunk axetanv, toxench tumi-i amkam polleunk otrektat mhonn tannem amkam sanglam. Ani ani hea pasot, bhavam-bhoinnimnô, tumcho bhavart polleun amcheanch soglleam oddchonnimnim ani koxttam-dukhim modem tumchê vorvim amkam dhir mell’lo. Tumi Somia sovem ghott ravleant mhonntôch, atam amkam novo jiv bhòrla. Tumkam lagun, ami amchea Deva mukhar itlo vhôdd sontôs bhôgtanv tea khatir, tumchê vixim amchean koxem mhonn favo tê porim Devache upkar attounk zait? Tumkam rup-rup polleunk ani tumchea bhavartak kitem unnem asa tem bhorun diunk amkam favo kôr mhonn ami dis-rat kallzant thaun Tachê lagim magtanv. Khud Dev amcho Bap ani amcho Somi Jezu ami tumchê-xim pavo-xem korum. Ami tumcho môg kortanv titlo vhôdd tumcho môg ekameka thãi ani soglleam mon’xam thãi Somian odik-odik vaddoum. Soglleam Apleam bhoktam borabôr Jezu amcho Somi ietolo tedna, amchea Deva ani Bapa mukhar tumi xud’dh-nirmoll aschê khatir, toch Jezu tumchim kallzam povitrtaient thir korum. Xekim, bhavam-bhoinnimnô, Somia Jezuchea nanvan ami tumkam vinoti kortanv ani poratun magtanv tem hem: Devak manonk koxê bhaxen tumi jieunk zai tem tumi amchê koddlem xikleant; toxim tumi jietat khorem, punn tumchem jivit odik ani odik sudharunk vavrat. Somia Jezuchea nanvan ami tumkam xikovnn dilea ti soglli tumi tôr zannont. Devak zai tem hench: tumi povitr zal’lim. Kamchar tumi pois korcho; Devachi ollokh nasleleam raxttram porim tumi kuddicheô vondovnneô bhagouncheô nhoi, punn zonn-eklean povitrtaien ani mannsugen aplê potinnichea sangata jieunk zanno zaunchem. Hê babtint konnench aplea bhavak onit korum noiê ani taka fottoun tacho adav kaddum noiê. Ami tumkam adim hem kollit kelam ani Deva mukhar oxi xiddkavnni dilea: osleam soglleam patkeank Somi khast laitolo. Devan amkam kamchari zaunk nhoi, punn povitr zaunk apoileant. Mhonntôch, jim konn hê xikovnnechi beporva kortat, tim mon’xanchi nhoi punn tumkam Aplo Povitr Atmo dita tea Devachi beporva kortat. Ekamekachea pritimoga sombondim ami tumkam borounchi goroz na; tôr ekamekacho pritimôg korunk Devan tumkam xikoilam; ani akhê Maxedonient soglleam bhavam-bhoinnim thãi tumi oxem korun aileant-uch. Tori astana, to odik-odik vaddot vochum-di mhonn ami tumchê lagim magtanv. Ami tumkam sanglam toxem, xantin jieunk vavrat, zonn-eklean ap-aplem kam’ korchem, ani tumche hat-pãi zhoroun pott bhôrat. Oxem korun dusro lôk tumkam man ditolo, ani tumcheam gorzank konnachich modôt magunk tumkam poddchi na. Bhavam-bhoinnimnô, bhorvanso-nasleleam ieram mon’xam porim tumi khontibhorit zaina zaunk, morun geleant tanchê vixim sot tem tumi zanno zal’lim mhaka zai. Jezu melo ani punorjivont zalo mhonn ami tôr sotman’tanv, têch porim Jezucher bhavart dovrun meleant tankam Dev Tachê borabôr haddtolo. Ami tumkam atam xikoitanv ti Somiachich xikovnn: ami, jivim asanv tim, Somiachea ienneak Dev ozun jivim dovortolo tim, morun geleant tanchê adim Somiachea sangata aschim nanv. Kiteak hukum’ porgôtt zatolo, Mha-devdutacho tallo gaztolo ani Devachi tuturi vazteli; tedna Somi Apunn khaxa sorgar thaun denvtolo, ani Kristacher bhavart dovrun meleant tim poilim punorjivont zatelim: uprant ami jivim asteleanv tim, Dev ozun jivim dovortolo tim: Kristak ontrallar mellchê khatir, amkam tanchê borabôr kupancher uklun vhortele. Oxem ami Somiachea sangata asteleanv sodam-sodankal. Mhonntôch, him utram monant dhorun, ekamekak ghottai diat. Bhavam-bhoinnimnô, hem kedna ani khõichê ghoddier ghòddtolem tê vixim ami tumkam borounchi goroz na. Kiteak chôr zoso ratcho ieta, toso Somiacho Dis ietolo mhonn tumi besborim zannont. “Sogllem xant asa, koslich bhirant na!” oxem mhonntat thõich astana, ravonaslelem nisontton tancher ietelem: zoxeô ballonteracheô dukhi êkê gorbest bailecher okosmat ietat, toxem tem nisontton pavtelem, ani tantlo konnuch suttcho na. Punn to Dis chôr koso ieun tumkam sampddaunk, tumi, bhavam-bhoinnimnô, kallokant nant; tumi sogllim uzvaddachim mon’xam, disachim mon’xam; ami ratichim ani kallokachim mon’xam nhoi. Mhonntôch, heram mon’xam bhaxen ami nhidun aschim nhoi, punn zagrut ravum-ia ani sogttant moriad samballum-ia. Nhidtat tim ratchim nhidtat, ani bebdikai kortat tim ratchi bebdikai kortat. Punn ami disachim mon’xam ani amchem jivit moriadichem zaunchem. Amchi shhat’ti rakhpachem hatiar zaum-di amcho bhavart ani pritimôg; toxench tokli rakhunk amchem xirastronn zaum-di soddvonnecho bhorvanso. Kiteak ami Aplea krodhak sampoddchim mhonn nhoi, punn amchea Somia Jezu Krista udexim ami soddvonn gheunchi mhonn amchê sorim Devachi ievzônn. Jezu ietolo tedna ami mel’lim vô ozun jivim asum, Tachea ekvottant ami jieunchê khatir To amchê pasot melo. Mhonntôch, zoxem tumi korun aileant, toxench ekamekak dhir diat ani ekamekacho bhavart ghôtt korunk vavrat. Bhavam-bhoinnimnô, tumchê modem koxtti vavr kortat ani Somiachea nanvan tumchê voir odhikar choloitat ani tumkam bori budh ditat tankam manan lekhat; Tanchea vavrak lagun tankam vhôdd man ani opurbai dakhoiat. Tumchê modem xantin cholat. Bhavam-bhoinnimnô, xist nasloleank xiddkaiat, bhezuddank dhir diat, osoktank boll diat, soglleam sorim sosnnikaien cholat. Konnench dusreak vaitt vaittan farik korina zaunk chotrai dhôrat, punn zata titlem borem korat, zaum tumchêch modem ekamekak zaum soglleam heram mon’xank. Sodanch khuxal ravat. Thambo-nastanam magnnem korat. Ani khõichê-i poristhitint argham diat, kiteak Jezu Krista sovem oxem korun tumi Devachi khuxi palltat. Povitr Atmeak addkoll ghallinakat. Provadeanchea sondexachi beporva korinakat; punn sogllem topasun kaddun, kitem borem tem ghott samballat. Sogllê torechem vaitt pois korat. Xanti dita to Dev tumkam sopurnnaien povitr korum; ani Jezu Krist amcho Somi ietolo tea Disak, tumcho otmo jiv ani kudd To chuki virêt samballum. Tumkam apoileant To Apunn visvaxi dekhun To tem kortoloch. Bhavam-bhoinnimnô, amchê-i pasot magat. Soglleam bhavam-bhoinnink tumchea mogachi khunna diat. Hem potr somest bhavam-bhoinnink vachat mhonn Somiachea nanvan hukum’ ghaltam. Amchea Somia Jezu Kristachi doiallai tumchê sovem asum. Tesalonikek aslolê, Deva amchea Bapache ani Somia Jezu Kristache povitr-sobhek Paulu, Silvan ani Timot noman kortat. Deva amchea Bapachi ani amchea Somia, Jezu Kristachi, doiallai ani xanti tumchê sovem asum. Tumcho bhavart ekdom’ vaddot veta, ani ekameka thãi tumcho pritimôg choddot veta dekhun, tumchê khatir bhavam-bhoinnimnô ami sodam Devacho upkar attounk zai. Hea pasot, tumi sõstat team dhumalleam ani koxttam-dogdam modem tumchea thirponna ani tumchea bhavarta vixim uloun, Devacheam povitr-sobhamnim ami tumchi vhoddvik sangtanv. Hea sogttantlean Devacho nirnnoi nitivont-ponnacho mhonn dakholl zata, ani tumi koxtt-dumalle sonstat-ui mhonnon, Aplem Raj bhogunk Dev tumkam purtim korolo. Kiteak jim konn tumkam atam dogdaitat, tankam Dev Aplê niti pormannem dogdaitolo, ani Somi Jezu Apleam bollixtt devdutam borabôr sorgar thaun ieta to dixtti poddtolo tedna, tumkam, atam koxtt-dogd bhôgtoleank, toxench amkam-i Dev visov ditolo. Kiteak Somi Jezu ujeachea agttea modem denvun ietolo ani Devak ollkhun ghenant ani amchea Somia Jezuchem xubhvortoman mandun gheunk kobul nant tankam To xikxa laitolo Sasnnachea ghorttannachê khastik tim sampoddtolim, Somiachem mukhamoll ani Tachê podvechi mhoima bhogunk tankam mellchi na. Tea Disa Apleam bhoktam modem mhoima ani Apleacher bhavart dovorla tanche modem abru-man bhogunk To ietolo; hanchê modem tumi-i asteleat, kiteak ami dil’li govaiki tumi mandun ghetli. Hench monant dhorun ami sodanch tumchê pasot magtanv: tumchea apovnneak sobta toslem tumchem jivit zaum mhonn amchea Deva lagim ami magtanv. Tumche soglle bore otrek Aplê podven To bhorten bhagaum ani tumchea bhavarta pormannem jieunk tumi kortat te proitn To purnntaien sufoll korum. Hê bhaxen, amchea Devachem ani Somia Jezu Kristachem hem funkeachem dennem tumkam favo zatelem: mhonngê, amchea Somia Jezu Kristachea nanvak tumchê sovem mhoima mellteli, ani toxench tumkam Tachê sovem. Amchea Somia Jezu Kristi-ennea ani Tachê bhonvtim ami sogllim zom’pa pasot, to Somiacho Dis atanch pavlo mhonn, amcheach udexim dil’lea porim, bhakitan vo utran vo chittin, tumchem mon, bhavam-bhoinnimnô, sompeponnim ghusponk dinakat mhonn vô tumi akantonakat mhonn ami tumchê lagim magtanv. Koxei toren konnench tumkam fosounk dinakat. Kiteak akhea sonvsarar lôk Devacher virudh poilo upraslea bogor, ani Khotto to, xirap poddlolo, dixtti poddlea xivai, to Dis ieuncho na. Deva-virodhi to hoch! Lôk dev mhonn manta vô bhôzta titleacher-ui to uprastolo; itlench nhoi, Dev zal’lê porim apunnuch dakhoun Gabhareant xinvasonar bostolo. Tumchê modem aslom tedna hem sogllem hanv tumkam sangtalom mhonn tumkam ugddas asa kai na? Nemlolea kalla adim to dixtti poddonam zaunk kitem taka addaun dovorta, tem-i tumi zannont. Gupit bollan khotteponn korta tem kam’, atam addaun dovorta to na zai porian, gupit bollan kotteponn korta tem kam’ korit asach. Tedna mat Khotto to ugtim dixtti poddtolo. Somi Jezu Aplea tonddachea bafan tacho jiv kaddtolo ani Aplea ienneachea dobajean tacho nas kortolo. To Khotto Soitanachê podven ietolo, ani sogllê torecheô bollvont kornneo, fottkirim ojapam ani vismitam korun dakhoitolo; ani ibadd zaunchim asat tankam sotacho môg korun apli soddvonn gheunk tankam naka zalem dekhun, to tankam sogllea jin’sachea khotteponnan fosoitolo. Hea pasot sot nhoi tachem boll Dev tancher denvoita ani tankam fôtt mandun gheunk pavoita. Hê porim, sot mandun gheunk na punn khotteponnak lobdoleant titlim-i khastichea formonnak sampoddtelim. Devachê opurbaiecheam bhavam-bhoinnimnô, tumchê vixim Taka sodanch ami dhinvasunk favo; kiteak amkam povitr korta tea Povitr Atmea udexim ani sot bhavartan mandun gheun soddvonn gheunchê khatir, Devan tumkam soglleam-vôn poilim vinchun kaddleant. Ami tumkam porgott kel’lea xubhvortomana udexim, Jezu Krista, amchea Somiachê, mhoiment vantto gheunk Devan tumkam apoileant. Mhonntôch, bhavam-bhoinnimnô, thir ravat ani zaum amche tonddim zaum amchea potran tumkam xikoileat tim sotam ghott samballat. Amcho môg kela ani Aplê doiallaien amkam soronaslolo dhir ani thir bhorvanso dila to Dev, amcho Bap, khud Jezu Krist amcho Somi tumcheam kallzank dhir dium ani sogllê torecheam boream kornneamnim ani utramnim tumkam thir ani ghott korum. Xekim, bhavam-bhoinnimnô, amchê pasot magat, ani oxem, tumchê modem zalam toxem, Devachem utor suddsuddit porgott zait vochum ani lôk tem mandun gheum. Ani soglleank bhavart na dekhun, vaitt ani khotteam mon’xanchea hatantle Dev amkam nivarum mhonn magat. Punn Somi visvaxi: To tumkam ghottai ditolo ani Vaittoveachea hatantlim tumkam rakhtolo. Ani, Somi amkam tumche vixim khatri dita; tumkam ami dileat teô adnea tumi palltat ani palltoleat mhonn ami patietanv. Dev tumcho môg korta tacho purnn onnbhôv ani Krist dita tem thirponn Somi tumkam favo korum. Bhavam-bhoinnimnô, amchea Somia Jezu Kristachea nanvan ami tumkam ho hukum’ ghaltanv: bekar bhonvtat ani ami dil’lê xikovnnê pormannem cholonant team bhavam-bhoinnim thaun pois ravat. Amchi dêkh tumi koxi gheunk zai ti tumi tôr zannont: tumchê modem ami asleanv tedna, ami bekar bhonvo-nasleanv; konnanch koddchem funkea ami jevunk nanv; portench zalear, konnakuch zodd zaina zaunk, koxtt korun ani harpit zaun dis-rat ami vavr kela. Amkam to hôk’k na mhonn nhoi, punn tumi amchi dêkh gheunchê khatir amkanch tumcho nomuno korun dovrunk ami oxem kelem. Hea pasot ami tumchê modem asleanv tedna, ami tumkam dila to nêm’ oso: konnank vavr korchi khuxi na tãnnim jevchem-i nhoi. Tumchê modem kãi zannam bekar bhonvtat ani soglleant ghusolltat-luddbuddtat mhonn ami aikolam. Somia Jezu Kristachea nanvan osleank ami oso hukum’ ghaltanv ani xidd-kaitanv: dusreanchea vhevarant tondd ghalinastanam, tãnnim vavr korun aplem pott bhôrchem. Tumi, bhavam-bhoinnimnô, thokonastanam borem korit ravat. Hea potrar ami sanglam tem konn aikun ghenam zatit zalear, tanchi chotrai dhôrat ani, tankam apnnanchich loz dischê khatir, tankam pois dovrat. Tori tankam dusmanam porim lekhinakat, punn tumchim bhavbhoinn mhonn tankam xiddkaiat. Xanti dita to Somi tumkam sodam ani sogllê vatten xanti dium. Somi tumam-somestam sovem asum. Hem noman mhojeach hatan boroitam — Paulu. Dor-eka potrar hi mhoji nixanni. Mhojeach hatachem borovp hem. Amchea Somia Jezu Kristachi doiallai tumam-somestam sovem asum. Ami bhorvanso tthevtanv teach Jezu Kristache ani Deva amchea Soddvonnarache hukume pormonnem, Jezu Kristacho apostl hanv Paulu, bhavartant mhojea khorea puta, Timotak noman: Deva amchea Bapachi ani Jezu Krista, amchea Somiachi doiallai, konnvallai ani xanti. Hanv Macedoniek vetalom tedna tuka hanvem sanglelem toxem, tum Efezantuch rav. Thõi kãi zannam khotti xikovnn ximpddaitat; tankam tunvem bond korchim. Toxench, polkeam kanniancher ani purvozacheam vonxavollincher dhean-mon dovrun vêll ibaddinakat mhonn tankam sang. Bhavarta vorvim Devachi ievzônn fuddem vheche bodlek, osleam vostumnim polke vivad mat upzotat. Mhojê xiddkavnnecho hetu ho: xud’dh kallzantlo, nitoll ontoskornnantlo ani osôll bhavartantlo upzota toslo pritimôg amchê modem vaddounk. Kãi zannam hem sogllem sanddun ani dusri vatt dhorun naka zal’leam vivadank sampoddleant. Oslim mon’xam Somurt xikounk fuddem sortat, punn sangtat tem apunnuch somzonant, ani aplench khorem korunk sôdtat, te-i vixim, tim kãich nokllot. Somurt bori mhonn ami sogllim zannonv, punn ticho favo to upêg kelearuch. Kaide boream mon’xam pasot korunk nant mhonn monant dhôrchem; te kaido moddteleank ani fiturank, Devak mandinasleleank ani patkeank, Dev-bhirant nasleleam ani fotting mon’xank keleat; toxench apleam avoi-bapaink jivexim marteleank ani her prannghatkeank; bhoxttavnneam ani povitr vostunchi bhidda nasleleam mon’xam pasot; soddeam ani apleach lingacheam mon’xam kodde pozoddponn korteleam pasot, mon’xank chorun vhorteleam pasot, lobaddeam ani lottik soput gheteleam mon’xam pasot, ani rokh-borea xikxonnacher koxê-i bhaxen add veteleam pasot. Hem rokh-borem xikxonn mhonn’lear ami vornnitanv tea Devachea mhoimêbhorit xubhvhortomana pormannem asa tem, ani hem xubhvhortoman Devan mhojê adhin kelam. Jezu Kristak, amchea Somiak, hanv dhin’vastam, kiteak mhojê adhin kel’lea kamak Tannem mhaka boll dilem. Mhaka khatrecho mhonn dhorun, Aplê sevek Tannem mhaka nemlo. Jezuchi hanvem adim ninda kel’li, Taka dhumallo dil’lo ani Taka okman kel’le. Tori Devan mhoji kaklut keli, kiteak mhaka bhavart naslo tedna nokllo zaun hanvem toxem kelem; ani mhojea Somiachi doiallai mhojer ufallun aili, ani Jezu Kristachea ekvottant jieteleanchea bhavartachi ani bhavam-bhoinninchea pritimogachi bhorti mhaka mell’li. Sogllê khatrechi ani soglleamnim manun ghevpachi sangnni hi: Jezu Krist patkeank soddvonn diunk hea sonvsarant ailo, ani team patkeantlo paxtt patki hanv. Punn mhaka kaklut mellunk karonn hem: Teach pasot Somia Jezun soglleam-vôn chodd mhojê sorim Apli xim’-mer nasleli sõsnnikai dakhounchê khatir, Devan mhoji kaklut keli; hê bhaxen jim konn Jezucher bhavart dovorun sasnnik jivit gheunchim aslim, tankam hanv êk nomuno zaunk. Tor kallam-iuganchea Raiak, ovinaxi ani amkam disonaslelea ekleach Devak, man ani mhoima sodam-sorvodam! Amen! Timot, mhojea puta, tujê vixim provadeamnim ucharleleam utram pormannem, tuka oso updês ditam: tanchea uzvaddan cholun boro soinik koso tum zhuztoloi; bhavart ani nitoll ontoskornn samballun, tum tem zhuz zhuztoloi. Aplem ontoskornn kuxin kaddun dovorlem dekhun, kãi zannam, tanchea bhavartachem tarum futtun, buddlim. Tanchê modem Himenêv ani Aleksandr; Devninda korchi nhoi mhonn tankam gomun ieunchê khatir, tankam hanvem Soitanachê adhin keleat. Patkeank soddvonn diunk, hea sonvsarant Jezu Krist ailo mhonnununch, sogllea adim, Devachi bhokti ami purnntaien korchê khatir ani soglleam modem favo ti moriad ami samballchê khatir, amkam xantin ani sovostkaien jieunk mellche khatir, somest mon’xam khatir razam ani odhikaream pasot magat; hanv magtam tem hench: prarthonam, magnnim, ani vinoti korat ani dhin’vasnni diat; Oxem korun ami borem kortanv ani hem Deva, amchea Soddvonnarak, man’ta, Soglleam monxank soddvonn mell’leli ani somestank purnn sotacho onbhov mell’lolo Taka zai, Kiteak Dev Ekloch; Deva ani monxam modekot Modest-ui Ekloch To Khud’ Monis, Krist Jezu. Somestanche soddvonneche mol mhonnun, Tannem Apnnachench somorponn kelem. Hich govai Tannem iukt vellar dili. Ho nirôp porgottunk ani videxeank khoro bhavart xikounk Devan mhaka apostl nemlo; sot tem uloitam, fôtt sanginam. Hea pasot kosloch rag dhorinastana ani sogllo vad-vivad sôddun, veta thõi dadleamnim povitr hat ubarun magnnem kel’lem mhaka zai. Toxench bailamnim tankam sobta tê bhaxen moriadin ani mannsugen nhesun ieunchem; mudialle kens korche nhoi; bhangar-xringar, mannkam-motiam ani unch molachim vostram ghalun ieunchem nhoi. Bhoktivont bailank sobta toslo, boream kornneancho zaum-di tancho xringar. Zap kaddinastanam, sogllê nomrutaien bailen xikovnn gheunchi. Xikovnn diunk vô dadleacher odhikar cholounk hanv bailek rojia dina. Ti ogi ravchi. Kiteak Devan Adanvak poilo rochlo, magir Evek; ani Adanv fosovlo na, punn bail ki fosovli ani Devachi adnea tinnem môddli. Moriadin bhavartant, pritimogant ani povitrponnant thir ravtit zalear, bhurgeank zolm ditana, Dev bailancho samball kortolo. Hi sangnni khatrechi: zo konn sobhecho fuddari zaunchi axa ballgita, to borea kamachi axa ballgita. Punn fuddari sobhê mukhar guneanv naslolo zauncho. To êkê bailê lagim logn zal’lo, olfobhozonni, somjikaiecho, porkeank moipasan ghevpi, ani xikovnn diunk iukt zaunk zai. To soreak lobhdol’lo vô tiddken zollta toslo zauncho nhoi, punn dulôb; to zhogddekar vô girestkaiechê axecho zauncho nhoi, punn aplem kuttumb borê bhaxen choloita ani apleam bhurgeank apnnak khaltim dovorta ani borê dekhin lhan-vhodd korta toslo. Kiteak zôr konn-êk aplea kuttumbacho vhoddil zaunk nokllo, tôr to Devachê povitr-sobhechi mhenôt koso ghetolo? To halinch bhavart-dhôrlolo zauncho nhoi; na zalear to gorvan fulon devcharachea khastichea formonnak sampddot. Tea bhair, bhailea loka modem to borê abrucho zaunk zai; na tôr, to aplem nanv hogddait ani devchara-chea fasak sampddot. Têch bhaxen, prodhan-sevok manest monis zaunk zai; te don tonddanche zaunche nhoi, nhoi mhonn chôdd soro pietat tosle, vô mhellê zoddiechê axeche. Bhavarta udexim prokaxit-onbhovik zal’lea sotak nitoll ontoskornnan tannem thir rauchem. Poile tankam topasun kaddche, ani tanchê sovem kosloch guneanv mellonam zait tôr, tannnim ti seva korchi. Têch porim bailô manacheô zaunk zai. Teô chaddiô sangpi zauncheô nhoi, punn olfobhozonni, ani soglleam vostumnim khatrecheô. Prodhan-sevok êkê bailê lagim logn-zal’lo monis zaunk zai, apleam bhurgeank ani apleam kuttumbank sarke choloitat tosle. Prodhan-sevokanchi seva te borê bhaxen kortit zalear te sobhê modem apnnank vhôdd man zôddtole, ani Jezu Kristacher dovorcho asa to bhavart vhodda kalljidarponnan porgottunk pavtele. Hem tuka borounchea vellar hanv tujê-xim veginch ietolom mhonn ravtam; punn mhaka lambai zait zalear, Devachea kuttumbant koxê bhaxen cholchem tem tunvem zanno zaunchem mhonn hem atam boroitam; aminch hem kuttumb, jivea Devachi povitr-sobha. Hi povitr-sobha Devan ugddapem kel’lem sot. Toch tem zotnaien samballta ani thiraien rakhta. Ami bhoktin vonditanv to gutt dubhavavinn xrêxtt-ut’tôm’: Amchea soimban To dixtti poddlo, Atmo Tacho sakxidar zalo, devdutamnim Taka vondilo, videxeank-ui To porgôtt zalo, xekan’xek prithvecheam lokancho bhavart Tacher asa tthevlolo, mhoimen Taka ubarun vhelo. Xevottachea kallar kãi zannam, khotteam atmeank ani devcharan-cheam xikovnnank kan diun, bhavart soddun vetelim: oxem Povitr Atmean spoxtt sanglam. Heô xikovnnô fottkiream mon’xanchea dhongeponna udexim ieteleô; tancheam ontoskor-nnancher devcharan dag diun aplo xik’ko marla. Tim amcheam bhavam-bhoinnink logn addvartat ani thoddeô vostu khauncheô nhoi mhonn xikoitat; punn soglleô khavpacheô vostu ami khaunk mhonn Devan rochleat, ani Devacher bhavart dovrun sot ollkhotat tannim teô vostu Devak dhin’vasun gheuncheô. Devachi dôr-êk rochnna bori, ani Devak dhin’vasun ti gheunchi zait zalear, koslich khavpachi vôst naka mhonnchi nhoi, kiteak Rochnnar Devachea utran ani amchea dhin’vas-nnechea magnnean sogllem khann Devak somorpil’lem zata. Bhavartachea ani sodam pallun ailai tê rôkh-borê xikovnnechea posonnan tum ghôtt zalai. Tôr hanvem voir sanglam tem sogott bhavam-bhoinnim mukhar ghalun, Jezu Kristacho tum boro sevôk zatoloi. Devachê bhoktik upkaronant tosleô naka-zal’leô xamaicheô kanniô pois kôr. Devachê khorê bhoktint vaddonk proitn korit rav. Kuddichê kosrotik thoddo faido asa khoro, punn Devachi bhokti soglleak upkarta, tôr tantum atanchea ani fuddlea jivitak bhasavnni asa. Sogllê khatrechi ani soglleamnim mandun gheunk favo tosli sangnni hi: Jivo Dev akhea mon’xakullacho ani vixexponnim Tacher bhavart dovortat tancho Soddvonnar; Tacher dovorlolo asa amcho bhorvanso, ani heach pasot ami koxtt kortanv ani zhuzot asanv. Heô adnea ghalun tankam xikovnn diit rav. Tum tornnê piraiecho mhonn konnench tuji beporva korum noiê. Punn tum tujeam utramnim toxench tujê chalin, tujea pritimogan, visvaxiponnan ani nirmoll jivitan bhavarteancho nomuno za. Hanv iein porian, sobhek Povitr Pustok vachunk, updesunk ani xikovnn diunk lokx di. Provadi tujê vixim uloile ani zannteamnim tujer hat dovorle tedna Devan tuka dil’lem dennem tujê sovem asa; tachi beporva korinaka. Sangleat team vostum vixim suddsuddit zaun teo pallit rav, ani tuzo vikas sogllea lokak ugtim dixtti poddtolo. Kitem kortai ani kitem xikoitai tachê vixim chotrai dhôr; hantum thir rav; oxem korun, tuka ani tujem utor aikoteleank Dev soddvônn ditolo. Zanntea dadleak zupatti dinaka, punn tujea bapai sorim kortolo asloi toso taka ulo kôr; tornneam mon’xank te tuje bhav zal’lê porim vagoi; zannteam bailank avoiô koxeô vagoi, unnê piraiecheam bailam lagim sogllê mannsugen teô tujeô bhoinni zal’lê porim chol. Konn na team vidvank manan vagoi. Konn-êkê vidvek bhurgim vô natram astit zalear, hãnnim poilê svater apleam ghorcheam sovem apli zababdari dakhounk xikchem ani apnnank zolma haddleleank zata tê bhaxen aplem rinn farik korunk zanno zaunchem. Hem Devak man’ta toslem kam’. Punn zôr konn khorich vidva ani tika konnuch na, tinnem Devacher aplo bhorvanso dovorlolo asa ani ti dis-rat vinoti ani magnnem korit asa. Punn ji vidva fokot kuddichem sukh bhogunk sôdta, ti jivi asun-ui melea mhonn mhonnum ieta. Guneanva-meklleô teô zaunchê khatir hi xikovnn tankam di. Konn apleam soiream-dhaireancho, odik korun apleanch ghorcheancho, samball korinant zalear, tãnnim bhavart sôddla ani tim eka onbhavartea poros paxtt. Êkê vidvechem nanv vidvanchê xivdder ghalunk, tika satt tori vorsam aschim ani ti eka poti kodde logn zal’li zaunchi. Ticheam boream kornneam pasot tinnem apnnak borem nanv zôddlelem aschem; apleam bhurgeam-ballank rit-rovixen vaddoileant, porkeancho apnnager poramôs kela, bhoktanche pãi dhuleat, oddchonnink sampoddleleank adar dila, sogllea jin’sacheô boreô kornneô keleat, tosli ti zaunchi. Tea-vôn unnê piraiecheam vidvanchim nanvam xivdder ghalinaka; kiteak Kristak bhasavnni kelea uprant, tancheô kuddicheô vondovnneô vaddtat tedna, teô logn zaunk sôdtat, ani poilim dil’lem utor moddunk pavtat ani oxem guneanvkarnni zatat. Tea bhair, bekar ravunk ani ghoran’ghor bhonvunk xiktat; ani bekar ravunkuch nhoi, punn chaddiô sangunk, dusreanchea jivitant ghusunk ani naka zal’lem ulounk-ui xiktat. Hea pasot, tornnê piraiecheam vidvamnim novean logn zaunchem, bhurgim zolma haddchim, aplem ghor-dar korchem, ani amcher vaitt ulovpak dusmanak sondi diunchi nhoi: oxem mhaka zai. Thoddeô tosleô bhavart soddun Soitanacho pattlav korunk geleô. Konn-êklê bhavarti bailecheam soiream modem vidva asat zalear, tinnench tancho samball korcho; ani povitr-sobhecher tancho bhar ghalcho nhoi; oxem povitr-sobha konn-nasloleam vidvancho samball korunk pavteli. Aplo odhikar borê bhaxen choloitat team povitr-sobhecheam zannteank dupêtt mozuri diunchi, bhov-korun utor porgottunk ani xikovnn diunk ghas ghetat tankam. Tôr Povitr Pustok sangta: “Môlltolea paddeachea tonddak muskem ghalchem nhoi”; ani dusrê kodden tem sangta: “Vavraddeak aplo muxaro favo.” Dogam vô tegam zannanchê govaikê virêt eka fuddarean-cher koslem-i garannem manun ghenaka. Chovkoxi korun zancho guneanv ruzu zala, tankam soglleam hujir bobatt kôr; oxem herank-ui bhirant lagteli. Deva ani Jezu Krista mukhar, toxench Tacheam vinchleleam devdutam hujir, hanv tuka oso hukum’ ghaltam: konnacheach tonddak pollenastana vô konnakuch favo-naslolo upkar kori-nastana, heam kaideank pallo di. Doddvoddan konnacher-ui hat dovrinaka, ani dusreanchea patkacho bhagidar zaum naka. Tujem jivit nitoll-nirmoll zaum-di. Tujê jirvonnek ani bhonvun-bhonvun tuka ieta tê piddek lagun hea fuddem udokuch pieun ravum naka, punn thoddo-so soro-i ghe. Thoddeam mon’xanchim patkam, zhôddti zaunchê adinch spoxtt distat; heranchim patkam fokot zhôddtechea disa ugtim zatat. Têch bhaxen mon’xancheô boreô kornneo spoxtt dixtti poddtat; punn toxem ghoddonam zalear-ui, teô sodanch lipon urum nozo. Jeam mon’xanchê manir gulam’ponnachea bhesachem zum asa, team somestamnim apleam dhoniank sogllo man favo mhonn somzun cholchem; toxem kelear Devachea nanvachi ani amche xikovnnechi konnuch ninda korunk pavchim nant. Dhoni amchea bhavartacho zalear, to aploch bhav mhonn nib gheun gulamamnim tachi beporva korchi nhoi; ufrattim tãnnim odik vhoddê zotnaien tachi seva korchi, kiteak gulamanchê chakrecho adav kaddtat tim teach bhavartachim ani mogachim bhavbhoinn. Hanvem sanglam tem xikoi ani pallunk lai. Konn-konn vegllem kitem xikoitat ani Jezu Krista, amchea Somiachi, osôl xikovnn ani Devachê khorê bhoktik pavoita ti xikovnn manun ghenant. Oslim mon’xam gorvan ful’leant ani sarkim nennar. Tancho sobhav oso ki kitea-i vixim vad-vivad korinastana ani utram dhorun zhogddim korinastana tanchean ravum nozo. Dekhun tankam nattkai bhogta, tim zhogddim manddtat, ekamekak okman kortat, ekamekacho dubhav dhorun bhonvtat, thambonastanam vad kortat. Osleank budh-ginean na, sotachi ollokh-ui na. Devachi bhokti korun apnnank khub girestkai mellteli mhonn somzotat. Devache bhokte borabor, dadosponn khub adavachem. Sonvsarant ietana kitem ami gheun aileanv? Kãich nhoi! Sonvsar soddun vetanam kitem tori ami gheun veteleanv? Kãich nhoi! Mhonn-tôch amkam jevunk-khaunk ani nhesunk-pangrunk aslear, itlean ami dhadoxi zaunchem. Girest zaunk sôdtat tim tallnnek ani devcharachea fasak sampoddtat, kiteak nirbudhi ani noxttadik vondovnneô tankam oddun vhortat; osleô vondovnneô mon’xank nisonttonak ani ghorttannak pavoitat. Soglleam vaittanchem mull mhon’llear girestkaiechi axa; osli axa dhorun, kãi zannam bhavarta thaun koddsorun geleant ani oxem sobar koxtt-dogd aplea mathear tãnnim oddun haddleat. Punn tum, Devachea bhokta, osleô vostu soddun di. Apnnak manovlolo Devan tuka kela tea bhesacher jiet rav; Tachi khori bhokti korit rav; bhavarta pormannem chol ani bhavam-bhoinnincho môg kôr; koxttam-dogdank sosnnikaien fuddo kôr; soglleank dulobaien vagoi. Bhavartachem borem zhuz zhuzot rau, Devan tuka apoila tea pormonnem, sobar govaiam mukhar tunvem bhavartachem ut’tom’ ucharonn korun, sasnnik jivit tuka mell’lam tantunt thir rau. Soglleak jivprann dita tea Deva mukhar ani Pons Pilata hujir govai diun ut’tom’ ucharonn kelam tea Jezu Krista mukhar hanv tuka oso hukum’ ghaltam: Jezu Krist, amcho Somi, dobajean dixtti poddo-sôr, chuki virêt ani guneanv nastana tuje kaide pall. Apnnem nemlolea kallar Taka porgôtt kortolo Ekloch omôr asa To, ogom’ uzvaddant ravpi, mon’xan polleunk naslolo, polleunk-ui zainam toslo, Ekloch sogtta-sorvancho Bhagevont Odhikari! Toch to razancho Raza ani dhoniancho Dhoni! Taka man ani podvi sasnnachea sasnnak! Amen! Gorvan fulona zaunk, ani othir gireskaiancher aplo bhorvonso dovrina zaunk punn amcheam gorzank zai titlem amkam Dev bhorpur dita dekhun, Tacher aplo visvas dovrunk, hea sonvsarachi girestkai asleleank xikoi. Borem tem korunk, boream kornneamnim girest zaunk, udar kallzan ierank vanttun diunk tankam adnea kor. Oxem korun tim aplea fuddarak omolik bhanddarachi ghôtt buniad ghalun dovortelim, ani hê porim apnnak mell’lam tea sasnnik jivitant thir rautelim. Timot mhojea pritichea, tujê adhin kela to tthevo rakh; Devachê bhokticher add ani ôrth-naslole vad-vivad vattai; osle vad-vivad konn-konn zannvai mhonn somzotat, punn khorench mhollear tantum zannvai bilkul na. Osli polki zannvai dhorun kãi zannamnim bhavartuch soddun dilo. Devachi doiallai tumam-somestam sovem asum. Jezu Krista sovem asa tea jivitache bhasavnnek lagun, Devachê khuxê pormannem Jezu Kristacho apostl, Hanv Paulu Timota, mhojea opurbaiechea putak, hem potr boroitam. Dev amcho Bap ani Jezu Krist, amcho Somi, Apli doiallai, kaklut ani xanti tuka bhogunk dium. Mhojeam magnneamnim thambo-nastana rat-dis tuzo ugddas kortam tedna hanv Devak dhin’vastam; Mhojeam purvozamnim kelam toxench, hanv-ui nitoll ontoskornnan Tachi seva-bhokti kortam. Tujeam dukancho mhaka boro ugddas asa, ani tuka novean polleun dhadoxi zaunk hanv axetam. Ddhông-naslolo tuzo bhavart mhojea monant asa. Tujê adim Lois tujê ajiek ani Eunike tujê avoik aslo toch bhavart tuka-i asa mhonn mhaka kosloch dubhav na. Heach khatir, hanvem tujer hat dovorle tedna zo vorgunn Devan tuka dila, tacho uzo odik peroi mhonn tuka ugddas kortam. Kiteak Devan amkam dila to Atmo amkam bhezudd korina, punn Devacho Atmo amkam ghottaien bhôrta, bhavam-bhoinnincho môg amcheam kallzamnim vaddoita, ani amcheô vaitt vondovnneo domavunk xokti dita. Mhonntôch amchea Somiacho govai koso ubo ravunk lojenaka, vô hanv Tachê khatir bondkhonnint poddlam mhonn mhojê-i pasot lojenaka. Portench zalear, Dev dito bollar patieun, xubhvhortomana khatir koxtt ani dhumalle sõsun tuzo bhag ghe, Amcheam kornneam pasot nhoi, punn xarti pavounche Aple ieuzônnek ani doiallaek lagun, Tannem amchi soddvônn kelea ani Apli khaxea porza zaunk amkam apoileant; soglleam kallam-iugam adim, Jezu Krista sovem amkam Tannem hi doiallai dilea. punn atam mornnacho bhosm kelo ani xubhvhortomana vorvim omor jivit bhogunk amkam favo kelem to amcho Soddvonnar Jezu Krist sonvsarar dixtti poddlo tedna Devan hi doiallai amkam ugddapi kelea. Mornnacho bhosm kelo ani xubhvhortomana vorvim omor jivit bhogunk amkam favo kelam Hem xubhvhortoman porgottunk ani xikounk Devan mhaka apostl nemla. Teach pasot hanv he koxtt bhôgtam; tori hanvem kalliz soddunk na, kiteak konnacher hanvem visvas tthevla tem hanv borem zannom, ani mhaka rakhunk dil’lo tthevo to Dis ie porian samballunk Taka tank asa mhonn mhaka dubhavuch na. Jezu Kristacher amcho bhavart asa ani Tachea ekcharant ami ekamekacho môg kortanv mhonn monant dhorun tuka sangtam: mhojê koddsun tum xiklai tench dolleam mukhar dovrun tum-vuim dusreank xikoi. Tujê adhin kel’lo tthevo amchê sovem jietolea Povitr Atmeachea bollan rakhun dovor. Aziechea prantantle sogllech mhaka soddun geleat mhonn tum zannoi; tanchê modem Fijel ani Hermojen. Amcho Somi Onexiforachea kuttumbak kaklut dakhoum mhonn magtam, kiteak tannem mhaka zaitê pavtti dhir dila ani mhojeam sankllinchi taka loz disunk na. Itlench nhoi, punn to Romak pavlo toso, mhaka mellunk tannem zaito bhar ghetlo ani xekim mhaka sodun kaddlo. Tea Disa Somiachi doia bhogunk toch Somi taka favo korum. Efezant tannem mhaka kitlo adar dilo to tum boro zannoi. Hea pasot, tum, puta mhojea, Jezu Krista sovem mellta tê doiallaientli ghottai ghe. Ani jem sobar govaiam hujir tunvem mhojê koddlem aikolãi, tem tum herank-ui xikounk purte zauncheam khatrecheam mon’xanchê adhin kôr. Jezu Kristacho bollvont soinik za ani tuka ietat team koxttank dhiran fuddo kôr. Soinik koso seva korto konnuch, hea jivitacheam ieram rattimnim kednanch ghusollna, apnnak soinikachê sevek ghetla tea senapotik taka manonk zai. Toxench, pelvan’ke-cheam nemam pormannem tantum vantto ghetlea xivai, khõicheach pelvanak inam’ mellona Têch porim, pikechem foll soglleam-vôn poilim koxtt korto xetkamteak mellunk zai. Hanv sangtam tachê vixim boro niall kôr ani Somi soglleachi tuka somzonni ditolo. Hanv porgott kortam tea xubhvor-tomana pormannem, Davidachê kullientlo zolmol’lea, Devan mel’leantlo punorjivont kel’lea Jezu Kristacho ugddas monant dhôr. Hea xubhvor-tomana pasot hanv koxtt bhôgtam ani guneanvkar zal’lê porim mhaka sankllimnim porian bandlo. Punn Devachem utor konnacheanuch bandun ghalunk zaina. Hea pasot, Devan vinchlelank sasnnik mhoime soit, Jezu Krista sovem mellta tem taronn tankam mell’che khatir, hanv hem sogllem tankam lagun sosnnikaien bhôgtam. Hem utor khatrechem: Tachea vangdda meleanv zalear, Tachea vangdda jietelenv. Thir-ghott ami ravleanv zalear, Tachea vangdda-i raj kortelenv. Taka ami sôddlo zalear, To-i amkam soddun dit’lo. Ami ovisvaxi zalear, To mat visvas samballtolo: kiteak Apnnench dil’lem utor Tachean kodinch moddum nozo! Aikoteleancho nas zauncho zaun, ani-anink kiteakuch upkaronant team utram vixim, tãnnim vivad korche nhoi mhonn bhavarteank ugddas kôr ani Somiachea nanvan tankam xiddkai. Sot viskottaun sangun, loz bhògchi poddona toslea vavraddea bhaxen, Devak manovlolo monis zaunk, tujench Devak somorponn korunk zata titlo vhaurun proitn kôr. Deva thaun mon’xank odik-odik pois vhortat tosleô otmeak faideacheo nhoi teo bekar gozali vattai; tosli tanchi boddboddnni angant posortolea ghaia sarki. Osleam mon’xam modem Himenêv ani Filet asat; bhavarteanchem punorjivontponn zaunuch gelam mhonn sangun, te apunnuch sota thaun koddsorche koddsorun, tãnnim oslê xikovnnen kãi zannancho bhavart moddun uddoilo. Punn “Apnnachim konn tim Dev ollkhota”ani “jim konn Somiachem nanv ghetat, tãnnim khotteponn pois korchem.”, oxem ticher boroup asun, Devan ghal’li bunead thir-ghôtt togta. Eka vhoddlea ghorant torê-torechim aidonam astat: thoddim bhangarachim ani rupeachim, ani thoddim lankddachim ani matiechim; thoddim vixex somoiar vaporpachim, ani thoddim sodam vaporpachim. Oxem, jim konn voir sangloleô khotteô xikovnnô soddun xud’dh ravtat tim, Devak bhettoil’lim ani aplea Dhoniak upegachim aidonam zatat ani Tachea koslea-i borea kamak tim aitim astat tim kherit baxechim aidonnam zaunk pavtelim. Tornnê piraiecheô vaitt vondovnneo domaun dovor; sodam Devak manovlolo zaunk tujem dhean-mon lai; bhavartant thir rav; bhavam-bhoinnincho môg kôr ani soglleam kodde xantin jie. Somiachem Nanv xud’dh-nirmoll kallzan ghetat tanchê borabôr heam soglleam sugunnanchi zotnaien vatt dhôr. Ôrth-naslele ani xisti-bhaile vivad vattai; tankam lagun tonddak tondd zata mhonn tum zannoi. Somiacho chakôr zhogddekar zauncho nhoi, punn soglleam thãi thôndd, boreponnan ani sosnnikaien dusreank xikovnn dita toslo. Apli khuxi pallunk, soitanan dhorun dovorl’leank tachea fasantlim suttche khatir Dev ghoddie tanchem mon bodlun, sotachi ollok gheunk pavunk favo korit mhonn Devacho chakor apleam virôdheank sarkea margar haddta Tedna tim portun soirannar ietelim ani devcharachea fasantlim tim sutt’telim, kiteak mhon’llear devchar khorench apli khuxi tãnnim pallchi mhonn tankam dhorun asa. Hem mat tuvem zanno zaunchem: nimanneam disamnim êk bhirankull kall ieuncho asa. Mon’xam zatelim aplem dhean-mon apnnancheruch dovortat toslim, girestkaiechê axechim, gorvi, mosti-modondh, galli marpi avoibapaichem aikonant toslim, onupkari, bhokti naslelim; tim moipas naslelim, darunn kallzachim, boglantti, kamchari, nixttur, sogllea boreponnacher virudh zatelim; tim ghatki, bezobabdar, boddaien fuglolim, Deva poros chodd kuddicheam sukhancho môg korpi zatelim. Tim devbhokticheam mon’xanchem sovong ghetelim, punn tanchea jivitant khore devbhoktichem boll dixtti poddchench na. Osleam mon’xam thaun pois rav. Oslim kãi zannam kuttumbamnim rigun, apleam patkanchea bharan chèpleleam ani veg-veglleam vondov-nneamnim oddon veteleam holkott bailank bhuloun aplea zallant dhôrtat. Oslim kãi zannam aikun xikunk sôdtat, punn kednanch sot ollkhunk pavonant. Zoxem Jan’nes ani Jambres Moizesacher uprasle, toxench him mon’xam sotacher uprastat. Tanchim monam kusddim zaleant ani tancho bhavart khotto zala. Punn chôdd vêll tankam ies mellchona, kiteak zoxem team dogam zannanchi, toxench hanchi-i pisai soglleank ugddapi zatoli. Punn tum, Timota, hanv kitem xikoitam tem tum boro zannoi. Toxench hanv koso choltam, mhojea jivitacho hetu konn, mhozo bhavart koslo, hem sogott tunvem dekhlãi; kitlê sosnnikaien hanvem tras ghetleat, kitlo hanv mhojeam bhavam-bhoinnincho môg kortam, ani kitlo thir hanv ravlam, hem-i tuka tthavem. Antiokient, Ikoniumant ani Listrent hanvem bhôgleat team koxtt-dumalleanchi khobor tuka asa. Kosle mhonn dhumalle hanvem bhôgleat! Tori team soglleantlo Somian mhaka nivarlo. Jezu Krista sovem khorea bhoktiponnan jieunk sôdtat tim sogllim dhumallo sõstelinch! Punn tim khottim ani bhulovnnar mon’xam, dusreank fosoun ani apunnuch fosovon, odik-odik paxtt zaun vetelim. Tum zalear, jem tum xiklai ani jem tunvem mandun ghetlãi, tantum ghôtt rav. Tem konna koddsun tum xiklai tem monant dhôr. Bhurgeponnar-san tum xiklai tim Povitr Pustokam, Krista Jezucher asa tea bhavarta udexim, soddvonnek pavoum ietat. Sogllem Povitr Pustok Devachea preronnan boroilam; xikovnn diunk, chuki kaddun dakhounk, lokak nittaier haddunk, tankam Devak man’ta toslea jivitachê vatter fuddem vhorunk, tem upkarta. Taka lagun, Devachi seva korta to ut’tom zata ani koslea-i borea kamak purto zaunk pavta. Deva mukhar ani jiveanchea ani mel’leanchea Nitidara, Jezu Krista mukhar, Tachem dobajik iennem ani Tachem Raj monant dhorun, hanv tuka ho kukum ghaltam Tacho sondex porgott kor; lokak to manom vo na manom tum to tanchea kanar ghalit rav; khotteam xikovnnancher vad korun sotacho uzvadd ghal; khoddi kaddun dakhoi; tanchea gineanak ulo mar, punn soglle sosnnikaien xikovnn diunchea monan toxem kor. Monxam rokh-bori xikovnn mandun gheunchi nant to kall ieuncho asa. Aple kan khorzon dovorto axen, apnnank man’tat tosle ekar-ek guru tim vinchun kaddtelim. Aple kan sotak bhere korun, gopam-talam aikunk tim bhonvtelim. Punn tum zalear zagrut rav, ietat title koxtt-dogd dhir gheun sons, bori khobor porgottunk bhar ghe, tuje seveche kaide zotnaien pall. Mhoje vatten, ek bolidan koxem mozo jiv zalach ani sonvsar soddun vecho mhozo vell pavla Xevott porian hanv borem zhuz zhuzlam, dhanvchi asli ti vatt hanvem dhanvun kaddlea, bhavartant hanv thir ravlam. Atam, tea disak mhaka ditolo to, ani fokot nhoich mhaka punn Tachea dobajik ienneak otrektat titleankui ditolo to, Apnnak manovto korta tea jivitachea zoitacho mokutt Devan mhaka dovol’lolo asa. Hea sonvsarache axek lagun, Demas mhaka soddun Tesaloniek gelo; Kresens Galasiek ani Tit Dalmasiek gela dekhun, zata title vegim mhoje xim ie. Ekloch Luk mhoje sorxim asa. Markuk tuje borabor gheun ie, kiteak to mhojea vaurant bhov adaracho. Tikikusak hanvem Efesak daddla. Troasant Karpusakodde mhojea matheachem avronn hanv dovrun ailam ietana gheun ie; toxench mhoje kovlle ani bhov-korun mhojim boroupachim barik chamachim potram. Alexandr, kansaran mhaka khub vaitt kelam; tacheam kortubanchem farikponn Somi taka ditolo. Tum-vuim tache xim chotur rav, kiteak amchea niropacher to samko virudh zalo. Poile pautt mon’subidara mukhar mhaka ubo kelo tedna, mhoje vatten konnuch ulounk na. Hachi khast Dev tankam laina zaum. Mhoje udexim xubvor-tomanachi purnn porgottni zaunche khatir, ani soglleam videxeamnim tem aikunche khatir, Somi mhoje vatten ubo raulo ani Tannem mhaka boll dilem. Mhonntoch Somian mhaka xinvanchea tonddantlo nivarlo. Sogllea noxttantlo Somi mhaka nivartolo ani Aplea sorginchea Rajeant pavoun To mhaka taronn ditolo. Taka mhoima sasnnachea sasnnak! Amen. Priskak, Akilak ani Onesiforachea ghorcheank hanvem vicharlam mhonn sang. Erast Korintak raula. Trofim’ boro na zalo ani Miletant taka pattim dovrun hanv ailom. Hinvallea adim taktin hanga ieunk proitn kor. Eubul, Prudens, Lin ani Kladia, hancho ani soglleam bhavam-bhoinnincho tumkam nomoskar. Somi Jezu Krist tumche sovem asum. Tachi doiallai tumi sodam bhogum. Hanv Paulu, Devacho sevôk ani Jezu Kristacho apostl, amchea ekach bhavartant mhojea khorea puta Titak Deva Bapachi ani amchea Soddvonnara Jezu Kristachi doiallai ani xanti magtam. Apnnem vinchun kaddleleank bhavartan vaddonk adhar diunk Devan mhaka nemla. Tankam hanvem khorê bhoktik pavoita tea sotachi ollokh diunchi mhonn Tannem mhaka dhaddla. Sasnnik jivitacho bhorvanso tancheam kallzamnim upzounchem kam’ Devan mhojê adhin kelam. Dev kednanch konnak fottoina; tôr Tannem kallachê survatek thaun hem jivit bhasail’lem. Punn tacho iukt vêll pavtôch, Deva, amchea Tarokan, Aplo sondêx fankoilo; ani Tannem mhaka dil’lea hukuma pormannem hanv to porgôtt kortam. Tuka Kretant pattim dovrunk karonn hem: thõi jem kitem opurtem urlam, tem tunvem purtem korchem ani dor-eka nogrant tunvem zannte nemche. Hanvem tuka sanglam tem monant dhôr: dôr-êk zannto guneanv-naslolo zauncho ani taka êkuch potinn aschi; tachim bhurgim zaunk zai bhavarti, ani tim pamprel vô avoibapaichem aikonant mhonn konnench tancher dad diunk zaina toslim. Ek sobhecho fuddari, Devachea vauracho karbhari to dekhun, to guneanva mekllo zauncho, to modondh vo ragist zauncho nhoi nhoi mhonn bebdo vo zobordost vo duddvanche axecho zauncho nhoi. Portench, to porkeancho poramôs korta toslo zauncho ani bholeponnan bhòrlolo; to moriadik zaunk zai, Devak man’ta toslea jivitacho ani Tachê bhokticho, ani apnnakuch domaunk zanno aslolo. Xikoilam tea pormannem bhavartacho nirôp ghôtt samballta toslo to zaunk zai; oxem to oputt sarki xikovnn diun herank updesunk xoktolo ani ticher add uloiteleam kodde vivadunk zanno zatolo. Kiteak attponant toslim, suki boddai uloitat toslim ani bhulovnnim zaitim zannam asat, bhov-korun sunotichea pongddachim. Tankam ogim korunk zai: holkea faideachê axek lagun, xikounk favona toslem xikoun, akheam ghorabeancho bhavart tim gondhollak ghaltat. Tanchê bhitorlea eklean, tanchêch modlea eka vortea zannaran oxem mhonnlelem asa: “Kretkaram sodanch fottkirim, noxtteô mon’zati, samkinch allxi potti-im.” Ani hem mhonnop sarkem. Dekhun khoraien tankam bobatt kôr ani tankam bhavartant ghott kôr. Toxem tim Judevancheam kanniank ani sotachea marga velim koddsorleant tosleam mon’xank kan diunk pavchim nant. Jim konn apunnuch xud’dh-nirmoll, tankam sogllem xud’dh-nirmoll; punn bhoxttol’leank ani bhavart nasleleank kitench xud’dh-nirmoll na, kiteak tanchem mon ani ontoskornn bhoxttoleant. Apunn Devak ollkhotat mhonn sangtat, punn apleam kortubamnim Taka ollkhonant mhonn dakhoitat; khorench ollxikonnim, Devacher kolpotat ani kosleach borea kamak upkaronant toslim mon’xam tim. Punn tum tujê pallien osol ani dhodd xikovnnek kitem lagta tench xikoi. Zannteam dadleank somadonache, somjikaieche, xanne zaunk; toxench aplea bhavartan, pritimogan ani sosnnikaien thir-dhodd zaunk xikoi. Têch porim zannteô bailô bhoktivont jivitacheô zauncheô; tãnnim chaddiô sangcheô nhoi ani bebdikai korchi nhoi; tãnnim borê dekhichi vatt dusreank xikoichi; tanchê koddchem tornneam bailamnim ap-aplea ghovacho môg korunk ani apleam bhurgeanchi opurbai korunk xikchem; têch porim Devachea utrak beman zaunche khatir, tannim moriadicheô, nirmoll jivitacheô, aplea ghora-daracheô, moipaxi, ani ap-aplea ghovak khalteô zauncheô. Toxench tornneam dadleank mannsugen cholunk budh di. Soglleanch vattamnim boream kornneanchi dêkh di; soroll monan ani fikirin tuji xikovnn di; Koslich khôdd sampddo na zaun, amcheam dusmanank loz bhògche khatir, tujem ulovp itlem borem ani sarkem zaum-di, ki konnachean amcher kitench vaitt ulounk zaunchem na. Apleam dhoniank sogttant khaltim zaunk zai mhonn, tankam portea-portem dinastana, tãnnim tankam khuxi korchim mhonn gulamank xikoi. Tãnnim tanchem kãich chorun kaddchem nhoi; portench zalear, soglleam kamamnim apunn sarkim khatrechim mhonn tãnnim dakhoun-chem. Hê bhaxen Deva amchea Soddvonnarachê xikovnnek soglleam vattamnim tim man haddtelim. Amcho Vorto Dev ani Soddvonnar, Jezu Krist mhoimen dixtti podd’tolo tedna, tea sukhest bhorvonxean polleun rautana, obhokti jivit ani sonvsari vonddavnneo soddun diunk ani ami mannsugechem ani Devak mantelem ani bhokti jivit jieunk xikoito ani somest mon’xank soddvonn dito Apli doiallai Devan ugddapi kelea. Sorv torechea khotteponantlim amkam soddounk, ani amkam xud’dh-nirmoll khud’ Apli khaxa porza korunk ani boreô kornneô korunk sodam aitim asunk Tannem amchê pasot Apnnachench bolidan kelem. Hem sogllem tankam sang, tankam ghottai di ani sogllea odhikaran tankam bobatt kôr. Konnench tuji beporva korchi nhoi. Sordarank ani sorkari odhikariank khaltim zaunk, tanchea utrak pallo diunk ani koslea-i borea kamak kobul asunk tankam ulo kôr. Konnachench vaitt uloina zaunk, zhogddim manddina zaunk, punn somest mon’xam thãi mannsugechim zaunk ani sodam rit-rovis samballunk tancho kaido mhonn tankam xikoi. Tôr amkam-i eka vellar Devachi sarki ollokh nasli, Devachi khuxi ami korinasleanv, ami vatt chuklolim mon’xam asleanv; khotte-ponnant ani nattkaient amche dis ami kaddtaleanv; dusrim mon’xam amkam zolltalim ani aminch ekamekak zolltaleanv. Punn udelem amkam bholeponn Deva amchea Soddvonnarachem, udelo Tacho vhôdd maiêmôg mon’xam thãi! Tannem amkam taronn dilem tem, ami keleleam boream kortubank lagun nhoi, punn Aplêch kaklutin, amkam nitoll korun, novo zolm ani novem jivit dito Povitr Atmeache podven Tannem amkam taronn dilem. Dev amkam Apnnak manovlelim korta te Tache doiallaien ami bhorvonxean rautanv tea sasnnik jivitachim daiji zaunche khatir, Amchea Soddvonnara Jezu Krista udexim Tannem Povitr Atmo subham’ponnim amkam dilo. Hi xikovnn khatrechi. Hi soglli xikovnn tunvem nettan diunchi mhonn mhaka zai; hê bhaxen, Devacher bhavart dovorla tim umedin boream kornneank aplem dhean-mon lavunk pavtolim. Hi xikovnn ut’tôm’ ani soglleam mon’xank faideachi. Punn ôrth-naslole vad-vivad vattai, toxench teô vonxavollincheô khobrô ani Somurti vixim dusongam ani zhogddim: tancho kosloch faido iena ani tankam moluch na. Bhêd ghalteleam mon’xank êk-don pavtti xiddkailea uprant, tanchi vatt sôdd, kiteak oslim mon’xam khottea monachim ani papi; apleach ontoskornna mukhar tim guneanvkar. Artemasak ani Tikikusak hanvem tujê-xim dhaddina fuddem, tum vogôt moddinastana Nikopolisak mhojê-xim ie; tôr thõi hanvem hinvallo kaddcho kela. Zenas vokilak ani Apol’lok aplê vattek lagunk zotnaien adar di, tankam vattek kitench unnem zaina-xem kôr. Aplea jivacheam gorzank upkarta toslo boro vaur-dhondo korunk amchea sogllea lokan xikchem; konnench bekar ravchem nhoi. Mhojê-xim asat tim sogllim tuka noman kortat. Bhavartachea ekvottant amcho môg kortat tankam amcho nomoskar. Devachi doiallai tumam-somestam sovem asum. Hanv Paulu, Jezu Krista pasot bondkhonnint poddlolo, ani amcho bhav Timot tuka, Filemon, Jezuchê sevent amchea mogachea vangddeak, Toxench noman kortanv Apfiek, amchê bhoinnik, ani Arkipusak, amchê bhaxen bhavarta khatir itle koxtt gheteleak, ani tujea ghorant zomtelê povitr-sobhek noman kortanv. Dev amcho Bap ani Jezu Krist amcho Somi tumkam Apli doiallai ani xanti bhogunk dium. Mhojeam magnneamnim tumcho ugddas kortam titlê-i pavtti mhojea Devak dhin’vastam, kiteak Devacheam soglleam bhoktam sovem tumchea moga vixim ani Somia Jezucher tumkam bhavart asa te vixim, hanvem aikolam. Tumcho ani amcho êkuch bhavart; tôr ho bhavart dakhounk Krista pasot kitlem borem amchean korunk zata tachi purnn ollokh amkam mellum mhonn ami magtanv. Tujea mogachi khobor aikun mhaka vhôdd sontôs bhòglo ani ghottai mell’li; amcheam bhavam-bhoinnin-chim-i kallzam tunvem, mhojea bhava, somadhan keleãi. Hea pasot, Krista sovem dhir gheun, mhojean tuka tuzo kaido pallunk hukum’ ghalunk zatalo; tori, hanv Paulu, mhatarê piraiek pavlolo ek monis ani tea-vôn odik atam Jezu Krista khatir bondkhonnint poddlolo, mogan ulo martam tedna, bondkhonnint astana hanvem zolm dil’lea mhojea puta Onezima khatir hanv tuka ulo martam Eka vellar to tuka faideacho zaunk na; punn atam, mhaka faideak poddlo toso, tuka-i to faideacho zatolo. Hanv taka tujê-xim portun dhaddtam; taka dhaddun, êkê bhaxen, mhojem kallizuch dhaddtam. Xubhvhortomana khatir hanv bondkhonnint astana, khuxen tum mhaka adar dita asloi tech tuje suater mhaka adar diunk, taka hanga mhojê-xim dovrunk mhoji khuxi asli. Punn tuji maniotai nastana kitench korunk mhaka borem disunk na; tuzo upkar tujê ap-khuxecho zauncho ani tuka boll korun nhoi. Tujexim Onesimus porot ascheak, thoddea kallak, tuje thaun pois urlo ghoddie zait. punn atam gulam’ koso nhoi, tôr gulama poros odik vorto, êk opurbaiecho bhav koso: mhakach tachi itli opurbai zalear, ek monis koso ani Somia sovem êk bhav koso to tuka kitlo odik opurbaiecho zauncho na? Tôr amchê modem asa tea ekcharak tum mol ditai zalear, mhaka tumger moipasan gheto asloi, teach moipasan taka-i ghe. Tannem zôr tuka koslem nuksann haddlam vô to tuka kitem dennem asa zalear, tem mhojea hixeobak lai. Hanv, Paulu, mhojeach hatan hem boroun ditam: hanv farik kortolom. Tuka hanvem tujea rinnacho ugddas korchi goroz na: mhojê kodde tuka asa tem rinn mhollear mhojê vorvim tuka mell’lam tem bhavartachem jivit. Tôr, mhojea bhava, Somia khatir tujer patieun ravtam. Krista sovem mhozo jiv somadhan kôr. Hem boroitana hanv magtam tem tum kortoloi mhonn mhaka khatri asa; khorem mhollear, tea-vôn chodd kortoloi mhonn hanv borem zannom. Teach borabôr anink êk upkar magtam: mhaka-i ravunk ilo zago dixi? kiteak tumam-soglleanchim magnnim aikun, Dev mhaka tumchê-xim portun pavoitolo mhonn mhaka visvas asa. Epafras Jezu Krista khatir mhojê borabôr bondkhonnint asa: to tuka noman korta. Têch bhaxen mhoje sohokari Marku, Aristark, Demas ani Luk tuka noman kortat. Somia Jezu Kristachi doiallai tumam-somestank bhogunk mellum. Zaitê pavtti ani veg-vegllê toren magam provadeam vorvim Dev amcheam purvozam kodde uloilo. Punn heam xevottacheam disamnim, hea amchea kallar, Aplea Puta vorvim To amchê lagim uloilo. Devan Taka soglleam vostuncho daiji kela, Tachêch vorvim soglli srixtti rochlea. To Devachê mhoimecho porzôll ani Devacho sopurnn rupkar. Aplea bollixtt utran akho sonvsar To samballta; ani, mon’xank patkantli xud’dhi zôddlea uprant, sorgar choddun thôr Devachea uzvea hatak bosla. Jitlem devdutancheam nanvam poros xrextt nanv Devan Taka dilem, titlo To tanchê poros vorto. Khorench Devan kednanch khõicheach dutak mhonnunk na: “Tum Mhozo Put, az Hanvem Tuka zolm dila.” Toxench khõicheach devduta sombondim Devan sangunk na “Hanv Tacho Bapui zatolom ani To zatolo Mhozo Put.” Punn Aplea Malgoddea Putak sonvsarant pattoitana, Tannem mhonn’lem: “Soglle devdut Taka saxttangim poddum.” Devdutam vixim Devan sanglem: “Apleam dutank varea sarke ani Apleam sevokank ujeacheam agtteam sarke To korta.” Punn Aplea Putak zalear, Dev oxem mhonnta: “Tujem xinvason, Deva, sasnnachea-sasnnak togtelem,” ani “Promanikponnan Tum razvôtt choloitoloi. Promannikponnacho Tum môg kortai ani khotteponnak vittetai. Hea pasot soglleam Tujeam vangddeam modlo voir kaddun, Deva, Tujea Devan, anondan bhôrtelea telan Tuka makhlo.” Tea bhair Povitr Pustokar oxem boroil’lem asa: “Tunvem, Dhonia, prithum’ rochlear kallanche kall zaun gele, sôrg-ui Tujeam hatanchem kam”; tim sorun vetelim, Tum ekloch urtoloi; pornneam vostram vori tim kotteun vetelim, ani zhoron gel’leam angavleam vori Tum tim kaddun uddoitoloi, ani novim vostram ghaltoloi. Punn Tum asai tosoch astoloi, Tujeam vorsank ont-par na! Khõicheach devdutak Devan kednanch mhonnunk na: “Mhojea uzveak bos. Tujeam dusmanank Hanv Tujeam pãiam tolla ghaltam.” Devdut konn tôr? Te soglle atme; te Devachi chakri kortat, ani taronn gheunchim asat tankam adar diunk Dev tankam pattoita. Hea khatir, ami lotton vochona zaunk, amkam xikoileant team sotank odik zotnaien ami lokx diunk zai. Devdutam vorvim amcheam purvozank porgott zal’lem utor visvas favo aslelem, tem môddlem vô taka kan diunk na titlei pauttim tãnnim favo ti khast ghetli zalear, hede soddvonnechi ami beporva korin zalear, koxim mhonn ami khastintlim sutt’telenv? Hi soddvônn khud Somia vorvim porgôtt zali ani Tachi porgôttnni aikoli tãnnim amkam tichi khatri dili, teach borabôr, khunnam, ochoriam ani jin’nosvar vismitam vorvim, toxench Aplê khuxê pormannem vanttleleam Povitr Atmeacheam denneam vorvim Devan Apli govaiki dakhoun dili. Êk novi prithum’, mhonngê mon’xanchea jivitachi êk novi manddavôll, ieunchi asa: tichi khobor ami hanga kortanv. Hê novê prithumecho odhikar Devan devdutanchê adhin korunk na. Povitr Pustokar êkê svater konn-eklean oxem sangun hea vixim govai dilea: “Monis konn Ga, Tunvem tacho ugddas korcheak?! Mon’xacho put konn, Tunvem tachi porva korcheak?! Tori astana Tunvem taka devdutam poros matso sokla dovorlai, mhoimecho ani manacho mukutt tachea mathear ghalai. Ani soglleô vostu Tunvem tacheam pãiam tolla ghaleôi.” Soglleô vostu mon’xacheam pãiam tolla ghaleô zalear, tachê khal ghalinastana kãich ek dovrunk na. Punn khorem mhonn’lear, soglleô vostu mon’xachea hata khal asat mhonn ami ozun pollenanv. Tori Devache doiallaie udexim ek-eklea monxam pasot, moronn bhogunk poddche khatir, devdutam-vôn matso lhan zal’lea Jezuk ami polletanv. Tannem moronn sõslem dekhun, atam mhoimecho ani manacho mukutt Tachea mathear ghal’lo asa. Dev sorv vostuncho Oromb ani Xevôtt; zaiteam Apleam putam-dhuvank mhoimek vhorunk Tachi ievzônn asli dekhun, mon’xank soddvonnechê vatten choloun vhorto Jezuk koxttam-dogdam vorvim, Tannem sompadnnek pavounk zai aslo. Karonn mon’xank patkantlim xud’dh korta Taka ani Tannem xud’dh kel’leant tankam êkuch Bap asa. Heach khatir tankam Aplim bhavbhoinn mhonnunk To lojena. Dekhun To oxem Devak mhonnta: Mhojeam bhavam-bhoinnink Tujem Nanv porgott kortolom, tanchi zomat bhòrta tedna sobhêmazar Tuka vakhanntolom.: Oxem-i To sangta: “Tacher Hanv visvas tthevtolom.” Anink-ui To mhonnta: “Ho polle Hanv asam, ani Devan Mhaka dileant tim bhurgim” Sogllim bhurgim ekach rogta-masachim dekhun, Jezu teach tanchea masa-rogtacho zaun ailo. Oxem mornnacher podvi choloitalo tacho, mhonngê devcharacho, Aplea mornna udexim Tannem nas kelo, ani mornnachê bhirantin akhea aplea jivitant gulam’ponnant jietalim tankam Tannem suttka dili. Khorench, devdutank modôt korunk To ieunk na, punn Abrahamachê sonstik. Hea pasot, porjecheam patkanchem bhog-sonnem zoddun gheunchê khatir Devachea fuddean doiall ani visvaxi Porom’-Iadnik zaunk, sogttant Tannem apleam bhavam-bhoinnim sarko zaunchem poddlem. Koxttam-upodream vorvim Tachich poili porikxa zali dekhun, atam zanchi porikxa zata tankam adar diunk To xokta. Bhavam-bhoinnimnô, Apli povitr porza zaunk Devan tumkam vinchun kaddleant. Mhonntôch, ami uchartanv tea bhavartacho Devan pattoil’lo Porom’-Iadnik To Jezu mhonn tumchem lokx dovrat. Moizes Devachea ak’khea ghoranneant Taka visvaxi aslo tosoch, To Apnnak nemla Taka visvaxi ravlo. Ghor bandta tea mon’xak ghora poros chôdd man favo tosoch Jezuk-ui Moizesa-vôn vorto man favo. Khorench, khõichea-i ghorak tacho bandpi asta, punn soglleô vostu bandun haddleat to mhonn’lear Dev. Dev fuddarak sangcho aslo team vostunchi govaiki diunk, chakôr koso Moizes, Devachea ghoranneant visvaxi ravlo. Toripunn Put koso Krist, visvaxi Devachea ghoranneacher visvaxi odhikari zalo, ani kalljidarponnan ani thiraen amcho bhorvanso ami samballin zalear, Devachem ghorannem tem aminch. Hea pasot, Povitr Atmo mhonnta toxem, Az tori Tacho tallo tumi aikoxeat zalear, Challis vorsam-bhôr Mhojim kortutvam dekhlim zalearui, porikxechea disa oronneant tumcheam purvozamnim Mhoji porikxa fiturponnan korunk sôdli, toxi fiturponnan zal’lea porim, tumchim kallzam nibor kori nakat. Tea pasot, hê pinddkecho Mhaka kanttallo ailo. ani Hanvem mhonn’lem: ‘Tanchim kallzam sodanch vankddi vatt dhôrtat. Mhojeam vattanchi tankam ollokhk naslea!’ Mhojea ragachea vellar ho soput Hanvem ghetlo: ‘Hanvem bhasail’lea tea visovachea desant tim kodinch bhitôr sorchim nant.’ Bhavam-bhoinnimnô, itlem nibor ani noxttea kallzacho ki jivea Devakoddcho koddsortolo toslo, tumchê bhitôr konnuch asona zaunk chotraien ravat. Portench zalear, voir sanglam to “AZ”, mhonnlolo aicho dis, asot porian, tumi ekamekak disan’dis dhir diat, oxem patkak bhulon konnuch tumche bhitorlim nibor kallzachim zaunchim nant. Kiteak survatek thaun amkam visvas aslo, to ami xevottak porian thirponnim samballin zalear, ami Kristachim bhagidar zaleanv; Povitr Pustok oxem sangta nhoi? Az tori Tacho tallo tumi aikoxeat zalear, fiturechea disa tumche purvoz zale toxe tumchim kallzam nibor korinakat! Devacho tallo aikolo ani Tacher kolpolim tim konn zait? Moizesan Ejiptantlim bhair kaddun vhelim tim sogllim nhoi tim? Konnacho Devak challis vorsam porian kanttallo dislo? Patok kelem ani oronneant morun poddlim tanchoch Taka kanttallo ailo nhoi? “Hanvem bhasail’lea visov-somadhanachea desant tim kodinch bhitôr sorchim nant”: Oso Devan soput ghetlo tedna, konnachi khobor kortalo To? Tacher kolpol’lim tanchi nhoi? Mhonntôch, tim ovisvaxi zalim dekhun, tanchean bhitôr sorunk zaunk na mhonn ami polletanv. Aplea visov-somadhanant bhitôr sorpachi ti Devachi bhasavnni ozun amkai togta, dekhun tea bhasail’lea visov-somdhanant bhitôr sorunk, amche modlo konnuch chukona zaunk ami chotrai dhôrchi. Khorench, tanchê bhaxen ami-i tich bori khobor aikolea, punn ti aikoli tedna, tãnnim ti bhavartan gheunk na dekhun, tãnnim aikol’li ti bori khobor, tankam kiteakuch upkarunk na, Karann, “Mhojea ragachea vellar Hanvem soput ghetlo: ‘Hanvem bhasail’lea visov-somadhanant tim kodinch bhitôr sorchim nant.’ ”, oxem Tannem mhonn’lam tea pormonnem, Sonvsar rochla tê meren Devacho vavr somplo zalearui, atam, bori khobor bhavartan sotmandun ghetat tim ami tea visov-somadhanant bhitôr sortanv. Kiteak êkê svater Povitr Pustokar satvea disachi khobor korun oxem mhonnlelem asa: “Aplo vavr sompoun, satvea disa Devan visôv-somadhan ghetlo.” Tori astana visov-somadhanachi gozal dusrê kodden oxi sangleli asa: “Hanvem bhasail’lea visov-somadhanachea desant tim kodinch bhitôr sorchim nant.” kãi zannank visov-somadhan bhogunk Dev ozun bhitôr sorunk dita ani Devachi bori khobor poili pavli, tanchea ovisvasak lagun, tankam visov-somadhanant bhitôr sorunk mellunk na dekhun, “Az tori Tacho tallo tumi aikat: tumchim kallzam nibor korum nakat!”voir sangleleach utramnim, zaitea kalla uprant, “AZ”, oxem Davidachê tonddim uloun, Dev anink êk dis tharaun dovorta. Joxuan tê porjek Devan bhasail’lo visov-somadhan dil’lo zalear, tea uprant anink eka disachi khobor Dev kednanch korcho naslo. Mhonntôch, zoxem Devacho visôv-somadhan, Aplea vavrantlo thamblo To, têch bhaxen, bhasail’lea visov-somadhanant bhitôr sortat tim aplea vavrantlim thambtat dekhun, Devan satvea disa visôv-somadhan ghetlo, toxench Devachê porjek-ui êk satvea disacho visôv-somadhan dovorlolo asa. Toxem tôr, tea visov-somadhanant bhitôr sorunk nettan fuddem vochum-ia; na zalear, oxem tanchê bhaxen ovisvaxi zaun, tankam visov-somadhan chuklo toxem amchea modlea konnakuch to visov-somadhan chukona zaum. Khorench Devachem utor jivem ani suddsuddit. Tem don-ui vattamnim pazlelê torvari sarkem. Zõi mon’xacho prann ani otmo toxench sandhe ani mendu doxim zatat, thõi porian tem rigunk xokta. Mon’xachea kallzache otrek ani chintnam topasun, tanchê vixim aplo nivaddo dita. Deva mukhar lipon urta tosli koslich rochna na, punn Tachê nodrek sogllem vingllem ani ugtem, ani Takach ami amchea jivitacho hixôb diunk zai. Mhonntôch sorgar riglolo êk xrêxtt Porom’-Iadnik Jezu, Devacho Put asa dekhun, ami uchartanv to bhavart thirponnim samballum-ia. Khorench, amcheam tallnneam-osoktaiamnim amkam buzvonn diunk xokona toslo ek porom iadnik nhoi to punn patok mat bhairaun, amchê bhaxen soglleam jin’sancheam tallnneam-koxttamnim Tachi porikxa zali toslo Eklo amkam asa. Tôr Devachê doiallaiechea xinvasona-xim dhir gheun vochum-ia. Thõi, adarachi amkam samki goroz tedna, kaklut and doiallai amkam mellteli. Khorench, mon’xanchê votin Devachi seva korunk, patkanchea bhogsonnea khatir danam ani iodn somorpunk dôr-êk porom’-iadnik loka modlo kaddlolo ani nemlolo asta. To apunnuch soglleam vattamnim osokt dekhun, nennarponnim jietat ani vatt chukun geleant tanchê thãi to dulobaien vagunk xokta. Ani porjecheam patkam khatir to iodn bhettoita têch porim, aplêache-i osoktaiê pasot tannem iodn bhettounk zai. Porom’-iadnik zauncho ho man konnachean apnnakuch gheunk zaina: Aaronak dilem toxem, Devan taka apovnnem diunk zai. Têch porim Kristan Porom’-Iadnik zaunchi mhoima Apnnench Apnnak gheunk na; punn Devan Taka oxem mhonn’lam: “Tum Mhozo Put, Hanvem Tuka aichea disa zolm dila.” Toxench anink êkê svater Devan Taka oxem mhonn’lam: “Melkixedeka porim, konn adlo- fuddlo nastana, Iadnik Tum sasnna-sasnnak!” Apnnak mornnantlo nivarunk Ekleach Devak tank asa dekhun, Aplea sonv-sarantlea jivitacheam disamnim, Jezun vhoddlean bob marun ani dukam golloun Devak magnnim ani prarthona kelim, To khalto ani visvaxi dekhun Devan Tachem aikolem. Ani Devacho Put zaun-ui, apleam koxttam-dogdam vorvim sodam Devachê khuxek khalto zaunk To xiklo. Ani Devan Taka sompadnnek pavoun ani Taka Melki-xedeka porim Porom’-Iadnik mhonnun porgottun, khalteponnan Apli khuxi korteleam soglleank To sasnnik sodd-vonnechem mull-karonn zalo. Hê vixim zaitem sangchem asa; punn kitem-i somzunk tumi zodd monachim zaleant dekhun, tachi-i somzonni tumkam diunk kottin. Khorench, itlea mhonno-sor tumi dusreak xikovnn diunk zai asli; anink konnem tumkam Devacheam utranchi mullavi xikovnn novean diunchi goroz asa. Tumkam dudachi goroz ani nhoi nibor jevnnachi! Konnui dudacheruch asta to dudachem ball zaun, Apnnak manovlelim Dev amkam korta te xikounne vixim taka khobor nasta. Vaddlelim mon’xam nibor jevonn jevtat; borea ani vaitta modem ontôr ollkhunk tankam obheas ani onnbhôv asa. Oxem atam Krista vixim mullavi xikovnn sanddun, odik sopurnn xikovnnecher lokx ghalun fuddem vochum-ia. Mullaveam sotanchi anink khobor korchi nhoi. Tim mullavim sotam mhonn’lear him: moronn haddtat tim kortubam soddun divop, Devacher bhavart dovrop, batismam vixim, hat dovorpa vixim, mel’leanchea punorji-vontponna vixim ani sasnnik zhoddte vixim xikovnn. Mhonntôch fuddem vochum-ia, ani Devachi khuxi zalear, hench korunk amcho hetu. Mon’xank zôr êk pavtt uzvaddak pavoilim, sorginchem dennem tãnnim chaklem, tankam Povitr Atmo mell’lo, Devachea utrachi gôddsann tãnnim chakli ani ieuncho asa tea kalla-iugachem boll tãnnim onnbhovlem, ani tori astana bhavartachea marga velim zôr tim koddsorlim — tôr osleank novean jivit-mon bodlunk portun haddunk zaunchench na: tim apnnancheruch khast magun Devachea Putak novean khursar martat, sobhêmazar Tacheô kenddnneo kortat. Khorench zomin, apnnacher portun-portun poddta tem pavsachem udok pieun, roiteleank adavachim zhaddam utpon korun, Devacho axirvad gheta. Punn ti kantte ani sorantte utpon korit zalear, ti kiteakuch upkarona ani tika Devacho xirap favo zaupachi zata. Dev ticho ujean nas kotolo. Punn tumi, priticheamnô, hê bhaxen ami uloileanv zalear-ui, tumchi gôt odik bori ani soddvonnechê vatter tumi asat mhonn amkam khatri asa. Dev onitivont nhoi. Tachea Nanva khatir tumcho vaur ani bhoktanchi seva korun ani ozun-ui seva korun, tumi dakhoilo to mog To visorcho na. Borvanxeachi samki khatri tumkam mellunk, tumchê modlea zonn-eklean tich hurba dakhounk, amchi vhôdd axa. He baxen tumi allxi zaunchim nant punn aplea bhavartan ani thiraien Devan bhasail’lem daiz ghetat tanchi dêkh tumi ghetelet. Devan Abrahamak bhasavnni keli tedna, Apnna-vôn vhôdd konn na dekhun, “Khorench, Hanv tuka subham’ axirvadan bhôrtolom ani tuji sonsôt hispa bhair vaddoitolom.”, oxem mhonnun, Tannem Apnnacheach nanvan soput ghetlo. Abraham’ sosnnikaien thir zalo ani oxem, Devan bhasail’lem tem taka mell’lem. Mon’xam soput ghetat tedna, apnnam-vôn konn vhôdd asa tachea nanvan soput ghetat, ani kitem sanglem tem thiraita ani koslo-i vad soputa vorvim mitton ieta. Têch porim, Aplê ievzonnê vixim Apli khuxi kednanch Apunn bodôlcho na mhonn bhasavnneancheam daijeank Dev ugteponnim dakhounk sôdtalo dekhun, Tannem ti bhasavnni soput gheun thir keli. Mhonntôch atam bodlunk zainant tosleam Devan kel’leam don vostum mhonnge bhasavnne ani soputa vixim Devachean amkam fottounk zaina. Hea pasot amchê mukhar dovorlelea bhorvanxeacher amchem mon ghott lavun dovrunk, amkam, Tachea asrea khal ail’leank, vhôdd dhir mellta. Zoxem nangôr doriant hoddem thir-surokxit dovorta, toxem ho bhorvanso amchem jivit thir-surokxit samballta. Melkixedekachea jin’sacho sasnnak sthaplolo Jezu, amcho Porom’-Iadnik, Sorgim-Devmondirachea podd’deantlean vochun Gabhareant amchê pasot riglolo asa: thõi ami pavo-sôr ho amcho bhorvanso amchea jivitak surokxa dita. Razancher zoit vhorun Abraham’ porto ietalo tedna, Melkixedek, Salemacho raza ani Bhov-Vortea Devacho iadnik taka mell’lo ani tannem Abrahamak axirvad dilo. Tedna Abrahaman apunn gheun ail’lo titleacho-i dhavo vantto taka dilo. Melkixedek, poilê svater tachea nanvacho ôrth, “Promannikponnacho Raza”; dusre suater, to Salemacho raza, mhonnge “Xanticho Raza”. Tachea bapaichi vô avoichi, nhoi mhonn tachea khõicheach purvozachi, khoboruch na; to kedna zolmolo vô kedna melo hachi-i khobor na. Tachem iadnikponn Devachea Putachea iadnikponna sarkem: sodankal Melkixedekachi itlich khobor urteli, ki to iadnik. Kedo vorto to! Amchea porzapoti Abrahaman porian zhuzachê soglle luttichea malacho dhavo vantto taka dilo. Soglli Israelachi porza Abrahamachi sonsôt, punn fokot Levichea kullantle ki iadnik zatat; tori, je iadnik asat, tankam Somurti pormannem porjê koddsun, mhonngê apleanch bhavam-bhoinnim koddsun, dhavo vantto vosul korcho kaido asa. Melkixedek Abrahamachê sonstintlo nhoi aslo. Tori astana, tannem Abrahama koddcho dhavo vantto ghetlo ani Devacheô bhasavnneo ghetlelea Abrahamak tannem axirvad dilo. Dubhava virêt axirvad dita to axirvad ghetelea poros vorto. Eke vatten iadnikank laun polletana, dhavo vantto ghetat te iadnik mornnadik sade monis; punn Melkixedekak laun pollelear, dhavo vantto vosol kelo to Melkixedek, Povitr Pustok sangta tea pormannem, jivoch aspi. Mhonntôch, oxem Levi dusream koddcho dhavo vantto vosul korta zalearui, jedna Abrahaman dhavo vantto farik kelo, tedna Levin-ui kelo, oxem zalem. Karonn Melkixedek Abrahamak mell’lo tedna, Levi, aplea purvoza Abrahamak zolmuncho aslo. Porjek dil’li ti Somurt Levichea iadnikponnacher dhòrleli asli; tôr, Levichem iadnikponn porjek sopurnnaiek pavounk upkarlelem zalear, Aaronachea jin’nsachea iadnika bodlek, Melkixe-dekachea jin’nsacho anink dusro Iadnik kiteak mhonn ieunk zai aslo? Mhonntôch, iadnikponnachi bodôlnni asta tedna, Somurtichi-i bodôlnni jerul zaunk zai. Heô vostu amchea Somia vixim sangleleô asat, punn To dusrea kullantlo. Ani hea kullantlea eklean-ui kednanch vedichi seva korunk na. To Judachea kullantlo zolmolo mhonn soglleank khobor asa; ani Moizesan, iadnikanchi khobor kortana, hea kulla vixim kãich sangunk na. Melkixedeka sarko anink eklo Iadnik ubo asta tedna, ami kitem sanglam tem odik spoxtt zata. To Iadnik zalo tem mon’xacheam kaidea-nemam pormonnem nhoi punn ovinaxi jivitachea bollan To Iadnik zalo. Khorench Tachê vixim Povitr Pustokar oxi govaiki dil’li asa: “Melkixedeka porim konn adlo- fuddlo nastana Iadnik Tum sasnna-sasnnak!” Mhonntôch kitench sompadnnek pavounk somurtik xokti nasli dekhun, adlo kaido kaddun uddoilo, kiteak to osokt ani nirupegi aslo, ani êk odik vorto bhorvanso Devan ude-so kela, ani hea bhorvanxea vorvim amkam Deva sorxim vochunk provês mellta. Tea bhair, hê vixim Devacho soput asa. Dusreank iadnik kel’le tedna oslo soput naslo. Punn Jezu Iadnik zalo kiteak Devan soput gheun Taka oxem mhonn’lem: “Sorvesporan soput dila, dil’lem utor To pattim gheuncho na: Iadnik Tum sasnna-sasnnak!” Soput gheun Devan ho korar sthaplo dekhun, hea odik ut’tôm’ korarachi khatri Jezu zala, Hache bhair, adlea Korarache iadnik zaite zann asle, kiteak ek-eklo morun vetalo ani oxem sodankal seva korunk uronaslo. Punn Jezu sasnnak jivo asa dekhun Tachem iadnikponn sasnnak togta. Hea pasot, atam ani sodankal Tachê udexim Deva sorxem vochunk sôdtat tanchê khatir Deva mukhar vinoti korunk To atam ani sodankal, sasnnak jivo asa dekhun To tankam taronn diunk xokta. Khorench, Devak manovlelea, niropradi, nixkollonk, patki mon’xam thaun kuxin kaddlelea, sorga voir ubarlelea—oslea Porom’-Iadnikachi amkam goroz asli. Tancheam patkam khatir, sorkallim Tannem, tê êkech pauttim Apnnachoch iôdn kelo dekhun, To her porom’-iadnikam sarko nhoi. Taka poilê svater apleam patkam khatir ani uprant porjecheam patkam khatir disan’dis iodn bhettounchi goroz na. Devan dil’lê Somurtin nemlele iadnik soglle osokt monis; punn Somurti uprant toch Dev soput gheun sasnnak sompadnnek pavoil’lea Putak Iadnik nemta. Ami sangun aileanv tantlem chodd mhotvachem mhonn’lear hem: sorgar, Bhov Vortea Devachea xinvaso-nachea uzveak boslolo Porom’-Iadnik amkam asa To, ani mon’xamnim nhoi punn khud Devan bandlelea osôl-khorea Tombucho mhonnge Gabhareacho Sevok To. Dôr-êk porom’-iadnik danam ani iodn somorpunk sthaplolo asta; hea-i Porom’-Iadnika lagim kitem-i tori somorpunk asunk zai. Ani Somurtin formail’lim danam bhettounk dusre iadnik astat dekhun, Jezu hea sonvsarant aslolo zalear, Somurti pormannem To iadnik nhoi asto aslo. Moizes Tombu tannunk vetalo tedna, Devan taka sanglem: “Dongrar tuka dakhoil’lo tea nomunea pormannem sogllem chotraien kôr.” Moizesa sombondim ghòddlem toxench, he iadnik kortat to, ho vaur sorgar kitem asa tachem fokot ek chitr ani savlli. Tôr atam, jitlo Adlea Korara von odik xrêxtt Koraracho Jezu, Modêst zaun asa, title tanche seve von odik xrextt hi Tachi seva; ho Korar odik vorteam bhasavnneancher sthaplolo asa. Khorem mhonn’lear, tea poilea korarak koslich khôdd nasli zalear, dusrea anink korarachi koslich goroz aschi nasli. Tôr tea lokacho guneanv korun Dev oxem sangta: “Polleiat, Hanv Israelachea ghorannea kodde ani Judachea ghorannea kodde êk novo korar kortolom, te dis ietat — uloita to Sorvespor! Tancheam purvozanchea hatak dhorun Ejipt desantlim hanvem bhair kaddlim, toslo ho korar zauncho na. Tim Mhojea korarak visvaxi ravlim nant ani hea pasot Hanvem tankam soddun dilim — uloita to Sorvespor! Te dis pavtôch, Israelachea ghorannea kodde Hanv korar kortolom to oslo: — mhonnta Sorvespor — tanchea monant Hanv Mhoje kaide ghaltolom, ani tancheam kallzancher Hanv te boroitolom. Ani Hanv zatolom tancho Dev ani tim zatelim Mhoji porza. ‘Sorvesporachi ollokh korun ghe’, oxem mhonnun xezarean vô xezarnnin apleam xezareank ani bhavan vô bhoinnin apleam bhavam-bhoinnink anink xikounchi goroz poddchi na: Hanv aplo Dev mhonn tumchê modlim sogllim Mhaka ollkhotelim vhodd-vhodd toxim lhan-lhan mon’xam, Kiteak Hanv tanche oprad bhôgxitolom ani tancheam patkancho ani-anink ugddas korcho na.” Novea eka korarachi khobor korta mhonntôch, to poilo korar Devan rôd’d kelo. Tôr kitench pornnem zaun dis bhortat tem xekim nanch zaunk pavta. Bhoznne toxench sonvsari povitr- sthana khatir poilea korarant kaide-formavnneô asleô. Êk Tombu bandlolo aslo, tachea poilea bhagant dovorlolo aslo êk zhumbôr, ek mez ani Devak bhettoil’le undde: hea Tombuk “Povitr Sthan” mhonntat. Dusrea bhagant, podd’dea uprant, “Porom’-Povitr Sthan” vô “Gabharo” mhonnlolo anink êk tombu bandlolo aslo. Hantum bhitôr dhump zollounk bhangarachi vedi asli ani soglleam vattamnim bhangaran nettoil’li korarachi pett; hê pettent aslem man’na bhôrlelem ek bhangarachem pettul, panam futtleli Aaronachi betkatti ani koraracheô fatriô. Pettê voir Devachem bhogsonnem ghevpachi êk svat asli, ani thõi mhoimevont Devachem hajirponn dakhounk, pakotte aslele devdut hê svatê voir aple pakotte vistarun astale. Punn hea soglleachi barkaien khobor kaddcho ho vêll nhoi. Heô vostu hê bhaxen manddleleô astana, aple seveche kaide pallunk iadnik dôr-disa poilea tombunt bhitôr sortat. Punn dusrea tombunt, fokot porom’-iadnik provês korta, ani tem-i zalear, nennarponan kel’leam apleam ani pojecheam patkam khatir, rogot gheun, vorsak êkuch pavtt bhitor sorta ani tem bhettoita. Oxem, hea sonvsarantlea Gabhareacho tombu ozun togtalo titlo-i kall sorginchea Gabhareachi vatt ugti zaunk nasli mhonn Povitr Atmo dakhoun dita. Tacheam team nemam pormannem Devak somorpitat, team danank ani iodnank, bhozpeanchim ontoskornnam sopurnn korchi podvi na mhonn dakhoito atanchea kallachi êk khunna ti hich. Heô soglleô formavnneo kuddichea jivitak lagu zatat tosleô: khannam, pinneam ani kudd nitoll korpacheô veg-veglleô riti; Devan ek novi manddavoll stapit porian kuddichea jivitak lagu zatat teo formavnneo-nem choltat. Punn ieuchim aslim team boream denneancho Porom’-Iadnik koso Krist ailo ani odik vortea ani odik sopurnn tea, mon’xamnim bandlolo nhoi tea mhonngê hê rochnnecho nhoi tea Tombuntlean Tannem provês kelo. Toxench To bokddeanchem vô paddkuleanchem rogot gheun bhitôr vochunk na; punn Aplench rogot gheun sorvkallim Tannem tê êkêch pavttim Gabhareant provês kelo ani sasnnik taronn amkam zôddlem. Bokddean-chem ani paddkuleanchem rogot ani laslelê paddiecho gobôr oxud’dh asloleancher xitoddaun, tim tancho mhêll kaddun, tankam riti-nemam pormannem xud’dh kortat zalear, Kristan sasnnik Atmea vorvim nixkollonk boli koxi Apnnakuch Devak bhettoilo; mhonntôch, ami jivea Devak bhôzchê khatir, ekdomuch odik Tachem rogot amchim ontoskornnam mornnadik kortubantlim xud’dh kortelem! Adlea korarachea kallar kel’leam opradantli suttka diunk Jezu melo; Devan apoil’leank bhasail’lem sasnnik daiz mellchê khatir, To Novea Koraracho Modêst zalo. Moronn-potr asot thõi, thõi tem potr korun dovorlo to monis mela mhonn ruzu korchi goroz asa. Moronn-potr korta to jivo aso-sôr tem potr upkartelem zaina; fokot tea mon’xachea mornna udexim tem potr upkartelem zata. Heach khatir, poilo korar-ui rogta viret sthapunk na. Tôr, Moizesan Somurtiche soglle kaide akhê porjek vachlea uprant, tannem paddkuleanchem ani bokddeanchem rogot ghetlem, tantum ilem udok misoll kelem, ani tambddi lonv ani xitoddeachi thalli gheun tem Pustokacher toxench sogllê porjecher xitoddaun mhonn’lem: “Devan tumchê kodde korar korunk tharaila: tea korarachem rogot hem.” Têch porim, Moizesan tombucher ani Devak bhozunk vapuddtat team soglleam aidonancher tem rogot xitoddailem. Ani somurti pormannem chodd-chodd vostunchi xud’dhavnni rogot vaprun zata ani rogot vikrailea xivai bhogsonnem na. Atanch sangleat teô vostu sorgincheam vostuncheô proti, ani teô hê bhaxen xud’dh korunk zai aslêo mhonntôch, sorgincheam vostum pasot xud’dhavnni korunk tea-vôn odik vorteam bolidananchi goroz. Mon’xa-mnim kel’lo Gabharo khorea Gabhareachem fokot ek chitr: oslea Gabhareant Krist bhitôr sorunk na; To khorem mhon’lear khud sorgar bhitôr sorlo ani oso To atam amchê khatir Deva mukhar ubo zalo. Zoxem aplem nhoi tem rogot gheun, vorsachea vorsa porom’-iadnik Gabhareant provês korta, toxem Kristak Apli bhettovnni bogor-bogor korchi goroz na; na tôr, sonvsar rochla tê meren Tannem zaitê pavtti sõschem poddto aslem. Punn atam, kallam-iuganchê sompadnnek, Apnnacho iôdn korun, patok kaddun udounk, sorvkallim To tê êkêch pavtti dixtti poddlo. Zoxem êk pavtt mon’xak morunk ani tea uprant tanchi zhôddti zaunk nirmilam; toxench somestan-chim patkam kaddun uddounk Kristan Apnnakuch êkêch pavtti somorpun dilo; dusrê pavtti, patok kaddunk nhoi, punn Apli vatt polleun asteleank taronn diunk, To dixtti poddtolo. Dev fuddarak diuncho aslo team denneanchem Somurtint khorem sorup na; Somurt tanchi fokot êk savlli. Ti portun-portun, vorsachea vorsa, tech-tech iodn bhetounk formaita. Toxem zalear Deva sorxem ieunk sodteleank sopurnn korunk Somurtik podvi na. Karonn Devak bhôztat tim êkêch pavttin xud’dh zal’lim zalear, tanchea ontoskornnant kosleach patkacho bhar ascho naslo ani oxem, iodn sodankal bhettovpachem bond zato aslem. Punn portench, team iodnam vorvim vorsachea vorsa patkancho ugddas zata. Kiteak boilanchea ani bokddeanchea rogtak patkam kaddun uddounk koslich podvi na. Heach pasot sonvsarant bhitôr sortana Jezun oxem mhonn’lem: “Iodn ani bhettovnneô Tuka naka zalim, punn Mhaka Tunvem êk kudd toiar keli; hom’ ani patkam pasot boliô Tuka manonk nant. Tednam Hanvem mhonn’lem: ho polle Hanv ietam. Pustokachea kovlleacher Mhojê vixim oxem boroilelem asa. Tuji khuxi korunk, Deva, Hanv ietam.” Voir sanglam toxem, jim danam Somurt vopunk formaita – mhonngê “iodn ani bhettovnneô, hom’ ani patkam pasot boliô”, tim — To mhonnta — “Tuka naka zalim” ani “Tuka manonk nant”; uprant To oxem sangta: “Ho polle Hanv ietam! Tuji khuxi korunk Hanv ietam!” Oxem Dev Adlea Korarant formail’le soglle iodn rod’d korta ani tanchê svater Novea Koraracho, Jezu Kristacho, êkuch iôdn sthapun dovorta. Jezu Kristan hi Devachi khuxi mandun ghetli dekhun, Tannem sorvkallim Apnnachêch kuddicho tê êkêch pavttim iôdn kel’lean, amkam povitrtai mell’lea. Ani koxêch bhaxen patkam kaddun uddounk xokonant tosle portun-portun tech-tech iodn somorpun Adlea Koraracho dôr-êk iadnik apli seva-riti pallunk dispottim Devmondirant asta. Kristan zalear, patkam khatir Apnnachoch êkuch sasnnak sufoll iôdn bhettoilo ani To atam Devachea uzveak bosla. Ani oso, tedna thaun, Jezu Apleam pãiam tolla, Dev Apleam dusmanank ghaltolo tê ghoddiechi vatt, polleit asa. Mhonntôch, tê êkêch bhettovnnê vorvim povitr keleant tankam Tannem sasnnak sopurnnaiek pavoileant. Ani hachê vixim Povitr Atmo-i amkam govai dita; poilim To mhonnta: “Team disam uprant — uloita to Sorvespor - Hanv tanchê kodde korar kortolom to oslo: tanchea kallzant Hanv Mhoje nem’-kaide ghaltolom ani tanchea monant te rigoitolom.” Uprant To mhonnta: “Tancheam patkancho ani khotteam kortubancho hea fuddem Hanv anink ugddas korcho na.” Oxem tôr, patkanchem bhogsonnem mell’lam mhonntôch, patkam khatir ani-anink bhettovnni na. Mhonntôch, mhojeam bhavam-bhoinnimnô, Jezun Aplem rogot vikrailem mhonnun, Gabhareant provês korunk amkam purnn sot’tea asa. Tannem amkam podd’do pinzun, mhonngê Aplê kuddichea somorponna vorvim, êk novi vatt ugddun dili; hi novi vatt mhon’llear khud Krist. Oso Devachea Ghoracho karbhar cholounk êk xrêxtt Iadnik amkam asa. Oxem tôr, khorea monan, poripurnn bhavartan, amchea guneanva-mekllem ontos-kornnachea kallzan ani amcheô kuddi nitoll udkan dhuun, provês korum-ia. Ami uchartanv to bhorvanso thirponnim samballum-ia, kiteak Dev Aplê bhasavnnek visvaxi mhonn amkam khatri asa. Pritimôg dakhounk ani boreô kornneô korunk ekamekak hurba diunk vavrum-ia. Zomati bhorun ektthãi zaunchi amchê modem sonvoi asa ti thoddim zannam môddtat. Ami toxem korchem nhoi. Portench zalear, jitlo “Somiacho Dis” lagim pavta mhonn polletanv, titlim ami ekamekak dhir dium-ia. Amkam sotacho uzvadd mell’la astana ami ap-khuxen patkam korit ravleanv zalear, heam patkam pasot dusro kosloch anink iôdn na. Ekuch urlam tem hem: ieunchi asa ti bhoikôr zhôddti ani Devacheam dusmanancho bhosm kortolem tem ujeachem agttem. Moizesachê Somurticher konn-ui add vochtit zalear ani dogam vô tegam sakxidaranchê govaiken tancho guneanv ruzu zait zalear, koslich doia nastana tankam jivexim martat. Oxem zalear, jim Devachea Putak apleam pãiam tolla mostitat, jim apnnank povitr kel’lem tem Korarachem rogot opovitr mhonn lêkhtat, ani jim Povitr Atmeak, Devachê doiallaiechea hea Denneak, okman kortat, tosleam monxank kitli odik khôr khast favo zaunchi na? “Hanv sudd ghetolonch; Hanv tankam farik kortolom”: him utram Konnem mhon’lleant tim ami zannonv. Tannench oxem-i mhonn’lam: “Sorvespor Aplê porjechi zhôddti kortolo.” Jivea Devachea hatant poddunk kitlem bhirankull! Devacho uzvadd tumkam mell’lolo tedna, tumkam zaite koxtt-dogd sõsunk poddle, punn tanchê modem tumi thir ravleant, team adleam disancho tumi ugddas dhorat. Thoddê pavtti tumkam sobhêmazar opman kela ani jastiamnim koxttaileant. Kedna-kedna osle koxtt bhôgtoleanchea bhagak tumi asleat. Hôi, bondkhonnint aslim tancheam koxttamnim tumi vantto ghetlo; ani tumkam aslem titlem-i kaddun vhelem tedna, tumi tem khuxalkaien soddun dilem, kiteak tumchê lagim odik unch molachi ani sodankal togta tosli girestkai asa mhonn tumi zanno asleat. Tôr atam tumchem kalljidarponn soddun dium nakat, kiteak taka vhoddlo inam’ asa. Devachi khuxi korun, Tannem bhasailam tem tumi ghetelet zalear, tumkam sosnnikaiechi goroz asa. Kiteak Povitr Pustok oxem sangta: “Thoddoch vêll urla, bhov thoddo vêll, ieuncho asa To ietolo; To uxir korcho na. Mhaka manovlelim Mhojim bhoktam bhavartant thir ravun Jivit zôddtelim; punn tim pattim sorun gelear, Mhaka tim man’vochim nant.” Ami pattim sorun Jivit hogddavpi mon’xam nhoi; punn portench, bhavartant thir ravun soddvônn zôddtanv toslim mon’xam ami. Bhavart asop mhonngê, bhorvonxean rautanv team vostunchi khatri ani amkam dixtti poddonant team vostuncho visvas. Khoreponnim tanchea bhavartak lagun Devan amcheam purvileank manun ghetlim. Akhi srixtti Devan ekach utran rochun haddlea, ani oxem jem kitem dixtti poddta, tem sogllem dixtti poddona tantlem upzon ailam mhonn bhavartak lagun ami somzunk pavtanv. Bhavartak lagun Abelan Kainachea iodna-vôn vorto iôdn Devak bhettoilo ani hea bhavartan taka Devan Apnnak manovlolo kelo, kiteak khud Devan tachi bhettovnni manun ghetli. To melo zalear legun, bhavarta vorvim to ozun uloita. Bhavartak lagun Devan Enokak mornnantlo vattaun uklun vhelo, ani to konnakuch mellunk na, kiteak Devan taka ubarun vhelo. Karonn, taka uklun vhorchê adim, Enok Devak manovlolo monis mhonn Povitr Pustok sangta. Bhavarta virêt konnacheanuch Devak koxench manonk zaina, kiteak Deva-xim veteleamnim Dev asa mhonn ani Apnnak zotnaien sôdteleank To inam’ dita mhonn bhavart dhorunk zai. Bhavartak lagun Noan oxem kelem: ozun dixtti poddunk nasleleô vostu Devan taka gomoilea uprant, tannem Devachi xiddkavnni mandun ghetli, ani aplea ghoranneak vattaunchê khatir tannem tarum bandlem. Aplea bhavartan tannem sonvsaracher khastichem formonn marlem; ani jem Devak manovlelim zaunchem bhag bhavarta vorvim mon’xank mellta, tea bhagacho Noa daiji zalo. Bhavartak lagun Abraham’ apunn daiz koxem gheuncho aslo tea desant vochunk; ani apunn khõi veta tem nokllo zaun-ui to vattek laglo tedna, apnnak apoil’lea Devak to khalto zalo. Bhavartak lagun to Devan taka bhasail’lea desant porko koso jielo. Tache borabor, têch Devachê bhasav-nneche daiji zaun Izakan ani Jakoban tombumnim biradd kelem. Karonn to Devan ievjil’lea ani Devanuch ghôtt buneadir bandlelea xarak ravtalo. Bhavartak lagun, Abraham zann’to zal’lo zalearui—Sarah legun vanztti asli zalearui—Dev Aplê bhasavnnek visvaxi ravtolo mhonn to patielo dekhun, Devan taka bapui zaum-so kelo. Heach khatir, mel’leam modem vochpachê piraiek pavlelea ekach mon’xa thaun mollba veleam noketram itli ani vellê velê renvecheam mezunk zainasleleam konniam porim sonsôt utpon zali. Him sogllim bhavart dhorun melim. Devan bhasail’leô vostu tim bhogunk pavlim nant, punn pois thaun teô polleun tim sontoslim, ani sonvsarant apunn porkim ani iatrekaram mhonn tãnnim ugteponnim sangun dilem. Oxem uloitat tim aplo khaxa dês apunn ozun sodit asat mhonn dakhoitat. Tanchem dhean-mon apunn soddun aileant tea desacher naslem; aslem zalear, thõisôr portun vochunk tanchean borem zatalem. Punn tim odik vortea desak axetalim, sorginchea desak otrektalim; dekhunuch Dev Apnnak tãnnim aplo Dev mhonn ulo marunk diunk pattim sorona, kiteak Devan tankam ek xar toiar kelam. Bhavartak lagun Abrahaman, Devan tachi porikxa keli tedna, Izakak vopun dilo.”Tujem nanv fuddem vhorteli ti sonsôt Izaka vorvim utpon zateli.”, oxem mhonn Devan sanglelem ani bhasavnneô kel’leô toch Abraham aplea ekleach putachem bolidan korunk kobul zalo. Mel’leank legun novean jivont korunk Devak xokti asa mhonn Abrahamak visvas aslo, ani êkê bhaxen mhonnun, tannem Izakak mel’leantloch porto ghetlo. Bhavartak lagun Izakan fuddarak ieunchim aslim tim dennim Jakobak ani Ezauk mellchim mhonn tankam aplo axirvad dilo. Bhavartak lagun, aplê boddiecher bagon Devak bhôzun, Jakoban morchê adim Juzechea dôr-eklea putak aplo axirvad dilo. Bhavartak lagun, mornnachê tornnir aslo tedna, Israelacheô put-dhuvô Ejiptantleô bhair sorun vochpache vixim uloun Juzen apleam haddanchem kitem-kat korchem tea vixim kaido ghalo. Bhavartak lagun, Moizes zolmo-tôch, tin mhoine porian tachea avoibapain taka lipoun dovorlo. To sobit-sundôr ballôk mhonn tãnnim dekhlem ani patxaiachea hukumachi tankam bhirant disunk na. Bhavartak lagun Moizesan, danddgo zatoch, apnnak Faraochê dhuvecho put mhonnlolo saf naka zalem. Thoddo kall patkachem dadosponn bhogchê bodlek, Devachê porjê vangdda koxtt-dogd sõsunk tannem vinchun kaddlem. Tache dolle fuddlea inamacher lail’le asle dekhun, Krista pasot kosle-i attevitte sõsunk Ejiptachê girestkaiê-vôn vortem bhag mhonn tannem manun ghetlem. Bhavartak lagun patxaiachea ragachi bhirant dhorinastanam Moizes Ejiptantlo bhair sorlo; dixtti poddona tea Devak dekhlolê porim to thir ravlo. Bhavartak lagun, tannem Pask somorombhlem ani, aplê porjê modem malgoddeank Bhosm-Kornnaran hat laina zaunk, tanchea darancher tannem rogot xitoddaunk lailem. Bhavartak lagun, tãnnim Tambddo Doria suki zomin zal’lê porim utrailo; punn Ejiptkar toxench korunk sôdtana buddun mele. Bhavartak lagun porjen sat dis kottam bhonvtonnim bhonvadde marlea uprant, Jerikochim kottam moddon poddlim. Bhavartak lagun, ti xindôll bail Rahab, bhedeank tinnem borê bhaxen ghetle dekhun, onbhavarteam borabôr morunk na. Anink-ui hanvem sangchi goroz asa? Gideon, Barak, Samson, Jefta, toxench David, Samuel ani provadi, heam soglleanchi khobor korunk laglear, mhaka vêll ascho na. Bhavartak lagun tãnnim raxttram jikun ghetlim, Devak man’ta toslea jivitachi chal tãnnim dhôrli, ani Devan bhasail’lem tem tankam mell’lem. Tãnnim xinvanchim tonddam dhamplim, ujeachim agttim paloilim, ani zhuzant te torsadin morun poddunk nant. Te osokt asle, punn ghott zale, zhuzant bollixtt zale ani porkeam fouzank tãnnim pattim dhanvddaileô. Kãi bailank tanche ghov mornnantle jivont zaun porte mell’le. Thoddeam zannamnim, apli suttka soddun diun, odik borea jivitak punorjivont zaunchê khatir moro porian koxtt-dogd bhôgle. Kitleam zannamnim kenddnneô ani chhabkancho mar khelo, ani dusream kitleam zannank khoddeam-sankllimnim bandlim ani bondkhonnint uddoilim. Tankam fatrailim, tankam khorvontin chirlim, torsadin tancho jiv kaddlo. Xellianchea ani bokddeanchea chama bhair ang pangrunk tankam anink kãi naslem. Lacharponnant, hal-upo-dreamnim ani dogdogamnim tim aple dis kaddtalim. Khorench him mon’xam sonvsarak favo naslim. Nirvaxi zaun tim oronneamnim ani dongrancher bhonvtalim ani zomnicheam bhiaramnim ani khoddeamnim jietalim. Heam soglleamnim bhavartak kedi mhonn vir-bhoktanchi sakxi dili! Tori Devan bhasail’lem tem tankam mellunk na; kiteak amchê khatir Devan odik vorti ievzônn tharailea: tim sogllim fokot amchê borabôr sopurnnaiek pavlelim Tachi khuxi. Tôr atam hi sakxidaranchi urpônz eka vhodda porzollit kupa vori amkam veddho ghalun asa mhonn ami polletanv. Mhonntôch aplea bharan amkam chepun dovorta tem sogott ani ghott chittkon rauta tem patok ami soddun dium-ia, ani amche mukhar dhanvun kaddpachi dhanvodd asa ti, thirponnan dhanvot ravum-ia. Jezucher amche dolle lavun dovrum-ia, kiteak To amchea bhavartacho Fuddari ani Sompadnnar. Apnnak mellchem asa tea sukh-sontosak lagun, loz mhonn pollenastana, Tannem khursachem moronn sõslem, ani atam To Devachea xinvasonachea uzveak bosla. Tannem koxê bhaxen Apnnacher add patkeancho virôdh sõslo tem niallat, ani oxem tumi pattim sorchem nhoi punn kalljidar zaunchem. Patkacher add zhuztana, tumkam ozun rogot varoi porian tumkam zhuzunk poddunk na. “Mhojea puta, Sorvespor tujeô chuki tuka dakhoita tedna, tum Taka chit di; ani To tuka zupatti dita tedna, tujem mon moddonk dium naka. Kiteak zancho Sorvespor môg korta, tankam xist laita, ani zankam Apleô put-dhuvô mhonn lêkhta, tankam to xikxa dita.”, oxem tumi Aplim bhurgim mhonn Dev dakhoun dita to dhir-ghottaiechim utram tumi visorleant. Dev tumkam Aplim bhurgim koxim vagoita mhonn somzun, tumi xist xikchê khatir xikxa sosnnikaien gheiat. Bapain xikxa diunk naslolim konn tori bhurgim astit? Dusream bhurgeam porim tumkam Tachi xikxa poddona zalear, tumi Tachim khaxa bhurgim nhoi: tumi oniz bhurgim. Amche soimbache khaxa bapui amkam xikxa ditale ani tori ami tankam man ditaleanv; tôr, amkam Jivit mellpak, amchea sorginchea Bapaik kitlo odik ami man diunk favo na zait? Amche soimbache bapui, heam thoddeam disanchea jivita pasot, apnnank borem distalem tea pormannem, amkam xikxa ditale; punn Dev, amkam Aplê povitrtaient vantto diunk aitim korche khatir, kitem khoreponnim amkam faideachem tem polleun, amkam xikxa dita. Xikxa poddta tea vellar ti khuxalkaiechi vôst nhoi, punn xikxen aitim zaleant tim Devak man’ta toslea jivitache xanticho inam gheunk pavtat. Tôr tumche thoklele hat voir ubarat ani tumchim koddkoddtelim dompram ghott korat, ani nitt rostear tumchim panvlam ghalun fuddem vochat; oxem kitem longddem tem sandea-ganttintlem bhair poddchem na, punn portench zalear adlem boll taka melltelem. Soglleam mon’xam kodde xantin chol’lea bogor ani tumi povitrtaiechem jivit jielea bogor, konnachean Sorvesporak polleunk zaina. Devachi doiallai konnakuch chukona zaunk chotraien cholat. Tumchê modem koddsannicheô kombriô vaddona zaunk ani tras upzonk dina zaunk chotrai dhôrat ani hanche udexim zaiteam zannanchim monam vikan bolltat. Tumchê bhitôr pozddim-onitivont vô Esau porim sonvsari monachim konnuch aschim nhoi. Tannem eka jevnnachê bodlek malgoddea putache aple hok’k vikle. Ani uprant to aplea bapaicho axirvad gheunk sôdtalo tedna, bapain taka portilo mhonn tumi zannont; dukamnim roddun porian tannem to maglo, punn bapaicho tharav bodlunk tachean ghòddlem na. Oronneant Israel-porjek zal’lem toxem, sanspunk zatat tosleam vostum-xim tumi ieunk nant: Sinai dongrar aslo toso, hanga zollto uzo na, kallôk-andhar na, tufan na, tuturecho sad na, gaztolea talleacho avaz-ui na. Tedna ho Devacho tallo aikoteleamnim apnnank anink ek porian utor aikunk naka mhonn nettan sanglem. Karonn, “Êk mon’zat porian dongrak afuddlear tika fatramnim marchi.”, oso Devan ghal’lo khôr kaido tanchean sõsun gheunk zainaslo. Ani tem dorxon itlem bhirankull aslem, ki Moizesan mhonn’lem: “Hanv ttharea bhielam, hanv koddkoddtam!” Punn tumi Sion Dongrar, jivea Devachea xara, hixôb-naslele devdut porbek zomlo-aslea, sorginchea Jeruzaleak pavleant: Sorgar nanvam boroilelim asat team Devacheam malgoddeam putam-dhuvanche povitr sobhek tumi pavleant. Soglleam monxakullachi nit korto Deva xim ani sopurnnaiek pavoileant team Devak manovloleam mon’xancheam otmeam sorxim tumi pavleant. Jezu Novea Koraracho Modêst, Tache-xim tumi aileant; Abelachea rogta von odik chodd ani boreo vostu bhasaito, amkam xudh’ korto vikrailelea Jezuchea Rogta-xim tumi pavleant. Mhonntôch chotrai dhôrat: Dev tumchê kodde uloita tedna Taka kan dinastana ravum nakat. Devacho sondêx sonvsarant porgott’talo tachem aikunk na tim tachê khastik chukunk nant; toxem tôr sorgar thaun amchê lagim uloita Taka ami kan dinanv zalear, koxim mhonn ami sutt’toleanv? Tachea tallean tedna prithum’ kampoili; ani atam Tannem oxi bhas dil’li asa: “Hanv anink ekdam prithumuch nhoi punn akhi srixtti kampoitolom.” “Anink ekdam” heam utranchi somzonni oxi: kampoil’leô vostu, teô rochleleô dekhun, nanch zatoleô,ani kampunk zainant teô vostu oxeôch urteleô. Nas korunk zaina toslem raj ami ghetanv dekhun dhin’vaxi zaum-ia ani, adoran ani bhoktin, Devak man’ta tê bhaxen Taka bhozum-ia. Kiteak amcho Dev mhollear bhosm korta toslo zollto uzo. Ekamekachim bhavbhoinn koxim mogan jieiat. Porkeank tumger biradd diunk visrum nakat. Oxem korun, thoddeam zannamnim nokllo zaun Devacheam dutank apleam ghoramnim gheun tancho poramôs kelo. Koidi zal’leam borabôr tumi-i koidi zal’lê porim, bondkhonnint asleleancho ugddas korat; ani tumi-i piddapidd sonsteleam porim, piddapidd sõstat tancho ugddas korat, Soglleamnim lognak favo to man diuncho, ani lognachi baz khot nastana samballchi, kiteak pozddeanchi ani pordvareanchi Dev nit kortolo. Tumchea jivitant girestkaiechi axa dhorum nakat, ani tumchê kodde asa titleanuch dhadoxi zaiat, kiteak khud’dh Devan oxem sanglam: “Hanv tuka kednanch sôddcho na nhoi mhonn sanddcho-i na.” Tôr ami kalljidarponnan mhonnum-ia: “Sorvespor mhaka adar diupi.Tôr mhaka kosli bhirant? Monis mhaka kitem korunk xokta?” Tumkam Devachem utor porgott kelam team tumcheam vhoddilancho ugddas korat; te koxe jiele ani ontorle tem lokxant dhorun tanchea bhavartachi dêkh gheiat. Jezu Krist kednanch bodòlna: kal, az ani sodankal To tosoch! Veg-veglle atvech xikovnnen tumkam nitt rostea velim koddsoraunk dium nakat. Jevnna-khannache nem’ palltat tankanch te kiteakuch upkarunk nant, team nemamnim nhoi punn Devachê doiallaien tumchim kallzam mozbut kelear ekdom’ borem. Amkam amchi khaxa vedi asa ani Adlea Korarachea povitr-sthanant seva kortat tankam amchê vedicher bhettoil’lem khaunk hôk’k na. Adlea Koraracho porom’-iadnik mon’zatinchem rogot patkanchea bhogsonnea khatir Gabhareant vhorta; punn team mon’zatincheô kuddi xara bhair vhorun lastat. Heach khatir Jezu Apunn-ui Aplea khaxa rogtan porjek povitr korunk xarachea darvonttea bhair koxtt sõsun melo. Tôr ami-i Tachê-xim xara bhair vochum-ia ani Tachea mornnachê lojent vantto gheum-ia. Kiteak hea sonvsarant togta toslem xar amkam na; amchem zaunchem asa tea xarachê vatter ami asanv. Tôr To Somi mhonn amcheam onttamnim ucharun, Devak Jezu vorvim nirontorim amcho vakhann’nnecho iôdn bhettoum-ia. Bhavponnachea mogan ekamekak adar diun borem korunk visrum nakat: kiteak osle iodn Devak manovtat. Tumche vhoddil bhar gheun tumchea jivachi kallji ghetat, kiteak tãnnim aplea vavracho Devak hixôb diunk zai; tôr tanchem utor aikat ani tankam khaltim ravat. Hê bhaxen, te aplo vavr khuxal monan kortele; na zalear, te aplo vavr kortele punn haskar-suskar soddun, ani hem tumkam faideachem zaunchem na. Amchê-i pasot magit ravat. Amchea ontoskornnant koslich chuk na mhonn amkam khatri asa ani ami kortanv titleant-ui sarkem tem korunk amchi thir khuxi. Ani zata titlê vegim tumchê-xim hanv porot pavunk khotkhotean prarthonam korat: oxi mhoji vinoti. Apleam koxttanchea mornna udexim sasnnik korar staplo tea xellianchea vortea Gonvllea amchea Somia Jezuk Devan mornnantlo punorjivont kelo. Apli khuxi korunk tumkam goroz teo soglleo boreo vostu xanticho Dev tumkam dium, ani Apleak manovta tem amche sovem, Jezu Krista udexim To korum. Ani Teach Jezu Kristak sasnnachea sasnnak mhoima. Amen. Mhojeam bhavam-bhoinnimnô, tumkam ghottai diunk boroil’lim him mhojim utram borê bhaxen gheiat mhonn hanv magtam; heach khatir hem potr hanvem lamb korunk na. Amchea bhava Timotak bond-khonnintlo sôddlo mhonn tumkam khobor ditam. To rokddo pavot zalear, hanv tumkam polleunk ietolom tedna taka mhojê borabôr haddtolom. Soglleam tumcheam fuddareank ani somest bhoktank noman kortam. Italiecheam bhoktancho-i tumkam nomoskar. Sodanch tumi Devachi doiallai bhogum. Amen. Hanv Jakob, Devacho ani Somia Jezu Kristacho sevôk, zollim-mollim ximpoddlelê Devachê akhê porjek noman kortam. Mhojeam bhavam-bhoinnimnô, tumcher jin’nsovar koxtt-dogd ietat tedna, khuxal zaunchi gozal mhonn monant dhorat. Kiteak mhonn’lear, oslê bhavartachê porikxent Jezucher tumcho bhavart halona zait zalear, bhavarta pasot koslê-i piddapiddê modem tumi odik thir astelet; oslea thirponnan tumi soglleanch vattamnim Tache poripurnn xis zaunk pavtelet, kosloch sugunn tumkam unno ascho na. Dev dita ti zannvai tumchê modlea konnank-ui na zalear, tãnnim ti Deva lagim magchi; To ti tankam ditolo, kiteak To soglleank udarponnan borê khuxen dita. Punn kosloch dubhav dhorinastana, bhavartan ti magunk zai; dubhav dhôrtat tim varean halta-dolta toslea doriachea lhara sarkim. Doxim-i oddon, sodam othir panvlamnim choltat tosleam mon’xamnim apunn magtat tem Sorvespora koddchem ghetelim mhonn chintunk favo na. Konnui amcho bhav vô amchi bhoinn gorib zalear, Dev apnnak voir kaddtolo mhonn tannim visvas dhorun sontôs bhogunk zai; toxench konn bhav vô bhoinn girest zalear, Dev tankam khala poddunk dita tedna tannim-i sontôs bhogunk zai. Kiteak tonnachea fula bhaxen girest mon’xam nanch zatelim. Suria mollbar voir choddtam-choddtam, tachem koddok vot tonn sukoita, tonnachem ful poddta ani fulachi surupai ubun veta. Oxench, aplo vepar-dhondo korit astana, girest mon’xam bavun-sukun vetelim. Koxttam-dogdam modem thir ravtat tim subhagi: oslim monxam porikxent iesvont zatat tedna, Aplo môg korteleank bhasail’lo, jivitacho mukutt Sorvespor tankam ditolo. Apnnacher tallnni ieta tedna, konnench oxem mhonnchem nhoi: “Dev mhaka hê tallnnent ghalta”; kiteak tallnni Devak lagoch na, nhoi mhonn Dev-ui konnakuch tallnnent ghalina. Punn zonn-ekleak ap-apli vondovnni vaittachê vatten ôddta ani bhuloita. Zoxi êk bail gorbest zaun bhurgeak zolm dita, toxi amchi vondovnni vaittacho gôrb dhorun patkak zolm dita, ani magir patka thaun upzota tem sasnnachem moronn. Mhojeam bhov mogacheam bhavam-bhoinnimnô, tumi tumkanch fottoum nakat. Sogllem borem ani sompurnn dennem voir thaun uzvadd rochlelea Bapa thaun denvta. Tache sovem koslench bodlop na. Prothom’ follam vori soglleam Apleam rochnnam modem ami poilim zaunchê khatir, Aplêch khuxechê ievzonnen, sotachea utra vorvim Tannem amkam novo zolm dilo. Mhojeam priticheam bhavam-bhoinnimnô, hacho tumi ugddas dhôrat: ami sogllim aikunk suddsuddit zaunchim, punn ulovpant ani rag dakhovpant amkam uttavollai aschi nhoi. Kiteak ami mon’xam ragan kitem-i kortanv tedna, Devak zai tem uttpon zaina. Hea khatir sogllem mhelleponn ani sogllê torechem khotteponn soddun diat. Devan tumcheam kallzamnim Aplem utor vomplam, ani tumkam taronn diunk xokta tem Utor khaltikaien mandun gheiat. Devachem utor fokot aikun tumkanch fottoum nakat, punn Devachea utra pormannem cholat. Jim konn Utor aikotat punn tem pallinant, tim aplench tondd eka arxeant polleteleam mon’xam sarkim: Tãnnim apnnankuch borê bhaxen pollelim, magir tim gelim ani apnnanchem rup koslem aslem tem tim visorlim. Punn sot’techi sompurnn somurt niallta ani tika thir rauta ani aikun ticher visôr ghalinastana, apleam kornneamnim ti pallta to apunn korta titleantui axirvadik zatolo. Konn apunn bhoktivont mon’xam mhonn chint’tat punn apli jib tim damun dhorinant zalear, tanchi bhokti polki; tim apnnankuch fosoitat. Onathanchi ani vidvanchi tancheam trasamnim ani gorzamnim kallji ghevop ani patkak lobhdol’lea sonvsara thaun mekllim ravop, hem ki Deva amchea Bapa mukhar xud’dh ani nixkollonk bhoktiponn. Mhojeam bhavam-bhoinnimnô, Jezu Krista, amchea mhoimevont Somiacher, tumi bhavart dovortat zalear, tonddak polleun lokak vagoum nakat. Tumchi sobha bhòrta tedna, dogam mon’xam bhitôr sortat mhonn somzat: eklo bhangarachi mudi ani nazuk vostram ghalun, ani dusro bondram nhesun konn gorib monis. Borem nhesun ail’leak tumi manan ghetat ani taka mhonntat: “Hê manachê svater bos.” Ani tea goribak mhonntat: “Ho-thõi ubo rav”, vô “hanga sokol, mhojeam pãiam lagim bos.” Hem kitem? Tumchêch modem vegllochar kortat nhoi tumi? Khotto nêm’ dhorun ho nirnnoi tumi dila! Aikat, mhojeam bhov mogacheam bhavam-bhoinnimnô: sonvsara porma-nnem konn gorib asat? Tankam Devan vinchun kaddleant ani bhavartachi girestkai dilea mhonn nokllot tumi? Ani hankam ki Tannem Apnnacho môg korteleank, bhasail’lea Rajeachem daiz dilam. Punn tumi zalear goribank beman kortat. Zobordosten tumkam piddapidd diun neaisobhent oddun vhortat tim konn? Girest lôk nhoi? Tumchê voir ucharlam tea vondivont Nanvachi ninda kortat tim tinch nhoi? “Tuzo môg kortai tosoch tujea peleacho kôr!” — ho Povitr Pustokant dil’lo Devachea Rajeacho mukhêl kaido tumi samballxeat zalear, borem kortat. Punn tumi mon’xank tondda pormannem lêkhtat zalear, tumi pap kortat ani tumkam guneanv asa mhonn Somurt nirnnoi dita. Karonn jim konn akhi Somurt samballtat punn ticho êk nêm’ porian môddtat, tim akhi Somurt môddlelê porim guneanvkar zatat. Kiteak Zannem mhonn’lam: “Pordvar korum noiê”, Tannem oxem-i mhonn’lam: “Jivexim marum noiê.” Tunvem pordvar korunk nãi mhonn dhorum-ia punn konnak jivexim marloi zalear, tunvem Somurt môddlich. Amkam suttka dita tê Somurti pormannem Dev amchi zhôddti kortolo, tôr tê Somurti pormannem uloiat ani cholat. Peleak doia dakhounk na team mon’xanchi zhôddti kortana Dev-ui tankam doia dakhouncho na. Mhonntoch doia dakhoi ani zott’te disak tuka doia mellteli. Mhojeam bhavam-bhoinnimnô, apnnank bhavart asa mhonn konn-konn mhonntit punn kornneamnim tim aplo bhavart dakhoina zatit zalear, to bhavart tankam kiteak upkarot? Ho bhavart tankam suttka diunk xokta? Êk bhav vô bhoinn vingllim bhonvtat ani tankam dispotto giras na, ani tumchê modlim konn-konn oxem tankam mhonntat mhonn somzat: “Xantin vochat, ubek angak kitem-i ghalat, ani pott-bhôr jevat.” Punn heam tancheam kuddicheam gorzank tumi pavonant zalear, kiteak upkarot? Bhavarta vixim oxench ghòddta: kornneo nant zalear, bhavart mel’lo zata. Ghoddiek konn mhonnot: “Thoddeam amcheam bhavam-bhoinnink bhavart asa, dusrim boreô kornneô kortat. Hachê vixim kitem sangchem?” Boreô kornneo korinant tosleam mon’xank khorench bhavart asa mhonn dakhoixi tum mhaka? Hanv zalear boreô kornneo korun mhaka bhavart asa mhonn dakhoitam. Dev êkuch mhonn tum sotman’tai mum? Borem kortai. Denvchar-ui toxench sotman’tat ani bhirantin koddkoddtat. Arê dêddxannea, kornneam vinnem bhavart mel’lo zata mhonn tuka dakhoum? Amchea bapa, Abrahaman vedicher aplea puta, Izakak somorpun dilo tedna, kornneank lagun taka Devan Apnnak manovlolo korunk na? Hê bhaxen, tacheam kornneam vangdda tacho bhavart vavurtalo, ani teach kornneam vorvim tacho bhavart sompadnnek pavlo, hem lokxant ghe. Oxem hem Povitr Pustokantlem utor ghoddon ailem: “Abrahaman Devacher bhavart dovorlo ani hea bhavartak lagun taka Devan Apnnak manovlolo kelo.” Ani Devan taka Aplo ixtt mhonnlo. Mhonntôch bhavarta pasotuch nhoi, punn kornneam pasot mon’xak Dev Apnnak manovlolo korta mhonn tumi polletat. Toxench Rahab xindôll bailê vixim ghòddlem: tinnem bhedeank borê bhaxen ghetle ani dusrê vatten tankam dhaddle dekhun, ticheam heam kornneank lagun tika Devan Apnnak manovleli keli, oxem nhoi? Zoxi pranna vinnem kudd mel’li zata, tosoch bhavart kornneam vinnem mel’lo zata. Mhojeam bhavam-bhoinnimnô, tumchê modlim chodd-xem xikoupi zaunk fuddem sorchim nhoi, kiteak toxem ami odik khôr zhôddtek sampddonk xoktanv mhonn ami zannonv. Khorench ami sogllim zaiteam vattamnim chuki kortanv. Utramnim kednanch chuk korinant tim mon’xam sompurnn; apnnankuch tanchean purnntaien domaunk zata. Amkam zai tem korunk ghoddeachea tonddant logom’ ghalem mhonntôch, taka soglloch amkam zai toso bhonvddaunk zata. Vô tarvank polleiat: kedim-i vhodd tim zaum, kitlea-i khôr varean tim lotton vochum, eka dhakktulea verea udexim tanddelan apnnak zai thõi tim vhorunk zata. Oxench jibê sorim ghòddta: ti êk lhan sandho khoro, punn apnnachich vhôdd boddai ti sangunk xokta. Ujeachi êk dhakttuli kitt koxê bhaxen ek vhoddlem ran lasun uddounk xokta tem chintat. Jib-ui ujeachêch bhaxen. Amcheam sandheam modem jib apunnuch êk khotteponnacho sonvsar: akhi amchi kudd ti khotaita ani, emkonddantlea ujean apunnuch lason, aplea ujean akhea mon’xakullachea jivitachem chokr ulpaun uddoita. Sogllê torechi ran’votti mon’zat, suknnim, jivannim ani maslli mon’xanchean domaunk zata ani mon’xamnim domaileant; punn jib domaunk konnuch xokona. Ti mon’xank thar-dinaslelem vaitt, marekar vikan bhòrlelem. Tichê udexim Deva, amchea Bapak, ami dhin’vastanv, ani tichêch udexim Devachea sarkeachim rochleleam mon’xank xiraptanv. Axirvad ani xirap teach tonddantle bhair sortat. Mhojeam bhavam-bhoinnimnô, hem oxem zaunk favona. Êkêch zhorichea ekach tonddantlean godd udok ani koddu udok kedna tori vhanvtat? Mhojeam bhavam-bhoinnimnô, eka anjirachea zhaddak dakô zaleô ani êkê dakanchê valik anjiram zalim mhonn asat? Toxench kharem udok vhanvta thõisorlem godd udok vhanvum nozo. Tumchê modem zannvaiechim ani somjikaiechim asat konn? Tãnnim aplea jivitachê borê chalin, mhonngê nomrutaien ani zannvaien kel’leam kornneam vorvim, apunn toslim mhonn dakhounchem, Punn tumchea kallzant nirddukaiechi kôddsann vô svarti axa asa zalear, tumchi boddai korinakat vo sot tem fottimnim lipoinakat. Osli zannvai sorgar thaun iena ti sonvsarantli, mon’xa-soimbachi ani devcharachi. Zõi nirddukai ani apleponn asat, thõi duspôtt ani sogllê torechem vaitt. Sorgar thaun ieta ti zannvai poilê svater nirmôll; tea bhair xant, dulôb ani bholi; ti konnvallaien bhòrleli ani boream kornneanchem pik dita tosli; ti tonddam polleun kamam korina, ddhongeponnan-ui cholona. Xanti-korpi mon’xam jitlim xantichim biam vompun vetat, titlem Devak man’ta toslea jivitachi pik tim lunvunk pavtat. Zhuzam ani zhogddim tumchê mo dem khõi thaun upzotat? Tumchêch bhitôr zhuz kortat team vondovnneam thaun tim upzotat, oxem nhoi? Tumkam kitem zai tem, tumkam mellona; mhonntôch tumi dusreacho jiv kaddunk toiar astat. Vhôdd axen kiteachê pattim tumi lagtat, punn ti vôst tumchea hatant poddona; tedna tumi tumchê modem zhogddim ani zhuzam kortat. Tumkam zai tem tumkam mellona, kiteak tumi tem Deva lagim maginant. Tumi girestkai magtat ani Dev ti tumkam dina kiteak vaittovea monan tumi magtat: mhonngê tumcheô vondovnneô bhagoun ti girestkai hogddaunk tumchem mon asa. Tumi Devak ovisvaxi! Hea sonvsarachi ixttagôt Devachi dusman’kai mhonn nokllot tumi? Kiteak khorench, jim konn hea sonvsarachi ixttagôt zôddtat, tim Devachim dusman zatat. “Devan amchê bhitôr tthikan korunk Aplo Atmo ghala To amchea mogak premaxen otrekta”, oxem Povitr Pustok sangta tem bexttench dista tumkam? Tori To odik udarponnan Apli doiallai amkam bhogunk dita; hea pasot Povitr Pustok sangta: “Dev gorvixttank zollta ani khalteank Apli doiallai bhogunk dita.” Oxem tôr, Devak khaltim zaiat; devcharacher zhuz korat ani to tumchê thaun pollun vetolo. Jitlim tumi Devak lagim sortat, titlo Dev tumkam lagim sortolo. Patkeamnô, tumche hat nitoll korat! Sonvsaracho ani Devacho borabôr môg korunk sôdtat tim tumi, tumchim kallzam xud’dh korat! Tumchem dolldirponn polleun khontiborit zaiat ani roddat; hanschê svater rudon korat, ani khuxal aschê svater dukh korat. Sorvespora mukhar khaltim zaiat ani To tumkam voir kaddtolo. Mhojeam bhavam-bhoinnimnô, ekamekachem vaitt uloinakat. Jim konn aplea bhavachem vô bhoinnichem vaitt uloitat vô tanchi nit kortat, tim Somurticher add uloitat ani tichi nit kortat; ani Somurtichi tum nit kortai zalear, tum ti pallinãi punn ticho mon’subidar zatai. Dev ekloch Somurt-Datar ani To ekloch Mon’su-bidar. Taka ekleakuch taronn diunk ani nas korunk tank asa. Punn tujea peleachi nit korunk tum konn? “Az vô faleam omkea nogrant ami vetelenv, thõi ek voros-bhôr ravtelenv, dhondo kortelenv ani khup girestkai zomoitelenv” — oxem mhonntat tim tumi, mhojem aikat. Faleam kitem zatelem tem tumi kãich nokllot. Tumchem jivit mhon’llear kitem? Tem dova sarkem: thoddo vêll to dixtti poddta ani uprant nanch zata. Tumi mhonnchem tem itlench: “Devak zai zalear ami jivim astelenv ani hem vô tem kortelenv.” Punn atam gorvan bhoron tumi boddai sangtat! Osli boddai sodanch vaitt. Mhonntôch, jim konn kitem sarkem tem zannont ani tori tem korinant, tankam guneanv asa. Atam tumkam girestank sangtam: tumcher ieunche asat team hal-upodreank lagun vilap ani rudon korat. Tumcheô girestkaiô kusun geleat ani tumchim vostram sannxen kheleant. Tumcheam bhangarak ani rupeak kollom’ laglea ani tanchi kollom’ tumcher add govai diteli ani tumchem mas khaun uddoiteli. Nimanne dis pavot ietat, ani tumi punzaileat teô girestkaiô team disank tumkanch girasunk êk uzo. Tumcheam xetanchi lunvnni kelea team vavraddeank tumi mozuri diunk na: tich atam tumcher add bob marta. Tancheam huielincho sad Sorvespora Sorpodvedar Devachea kanar poddla. Hea sonvsarant tumchem jivit sust-sukhachem ani dobajeachem zalam, ani oxem tumi gorvam bhaxen chorbevun geleant, punn tumkam marun uddovpacho dis lagim asa. Niropradi mon’xancher formonn marun tankam tumi jivexim marlim; ani tãnnim tumcher add boll korunk na. Mhojeam bhavam-bhoinnimnô, Somi ie porian sosnnikai dhôrat. Xetkamteacho ugddas korat: zomin utpon korteli tea moladik pikechi axa dhorun, to xorod-kallachea ani vosont-kallachea pausak sosnnikaien ravta. Toxench tumi-i sosnnikai dhôrat; thir asum tumcho bhorvanso, kiteak Somi ieuncho zalo. Tumcher khastichem formonn poddona zaunk, bhavam-bhoinnimnô, ekamekacher gunngunnum nakat; ho polle Nitidar tumchea darachea umbrear ubo asa. Mhojeam bhavam-bhoinnimnô, Sorvesporachea nanvan uloileat team provadeancho ugddas korat: tankam khup koxtt-dogd sôsche poddle tedna, tãnnim te vhoddê sosnnikaien ghetle; tôr tanchi dêkh gheiat. Tanchê sosnnikaiê pasot tankam ami subhagi mhonntanv. Jobachê sosnnikaiechi khobor tumi aikolea, ani koso Sorvesporan xevottak taka subham’ axirvad dilo, tem tumi zannont. Kiteak Sorvespor konnvallo ani maiêmogacho. Choddan-chodd, mhojeam bhavam-bhoinnimnô, soput gheum nakat — zaum sorgachean, zaum sonvsarachean, zaum dusrê koslê-i vostuchean. Tumchem ulovop itlench zaum-di: hôi zalear “Hôi”, ani nam zalear “Na”. Na tôr, tumi Devachê nitik sampoddtelet. Tumchê modem konn trasank sampoddleant? Tãnnim prarthon korchem. Konn khuxal asat? Tãnnim dhin’vasnnechim gitam gavchim. Tumchê modem konn piddest asat? Tãnnim povitr-sobhecheam zannteank apounche: hãnnim tanchêr magnnem korchem ani Somiachea nanvan tankam telan makhchim. Bhavartan kel’lea magnnea vorvim piddest mon’xam piddentlim utthtelim ani Somi tankam novean bholaiki ditolo; ani tãnnim patkam keleant zalear, tankam Devachem bhogsonnem melltelem. Mhonntôch Devan tumkam bholaiki diunchê khatir ekamekak tumchim patkam ucharat ani ekameka pasot magat. Devak manovlelea mon’xachem magnnem bolladik ani gunnvont. Elija amchêch bhaxen monis aslo; paus poddona zaunk tannem khotkhotean maglem ani saddê-tin vorsam prithumer paus poddunkuch na. Uprant tannem novean magnnem kelem ani mollban paus ghalo ani zomnin aplim follam dilim. Mhojeam bhavam-bhoinnimnô, tumchê modlo konn-konn sota thaun koddsorlim zalear ani dusrim konn tankam portun haddtit zalear, hãnnim hem motint dhôrchem: jim konn khottea rostean cholteleam patkeank portun haddtat, tim tankam mornnantlim vattaitelim ani zaiteam tancheam patkank Devachem bhogsonnem favo kortelim. Hanv Pedru, Jezu Kristacho apostl, Pontusachea, Galaxiechea, Kapado-xiechea, Aziechea ani Bitiniechea prantamnim ximpoddleleam bhavam-bhoinnink noman kortam. Tumi tumchea khaxa desa thaun pois asleli, Devan vinchleli, vattsur porza. Aplê sasnnik ievzonnen Deva, amchea Bapan, tumkam Aplim zaunk vinchun kaddleant; Aplo Atmo tumkam diun Tannem tumkam povitr keleant; Jezu Kristak khaltim zaun, Tannem vikrailelea rogtan tumchim patkam dhuun gelim. Devachi doiallai ani xanti chodd ani chodd tumi bhogunk pavum mhonn hanv magtam. Devak, amchea Somia Jezu Krista-chea Bapak, sodanch vakhannum-ia! To amcho chôdd-chôdd môg korta dekhun, Jezu Kristak mel’leantlo punorjivont korun Tannem amkam novo zolm dila. Oxem amkam atam kedinch sorona toslo bhorvanso asa: mhonngê Devan Apleam bhurgeank bhasaun dovorlelem jivitachem daiz gheunk ami ravtanv. Hem daiz Tannem tumkam sorgar samballun dovorlam: tem kedinch padd zaunchem na, tem sodankal sundor-sobit urtelem, tachem mol kednanch ubun vechem na. Tumi bhavartan Jezuk mandun ghetat dekhun, Dev tumkam Aplê podven rakhun dovorta. Oxem tumkam toiar kel’li soddvonn bhogunk tumi axeun ravtat. Kallachea xevottak To ti tumkam ugddapi kortolo. Mhonntôch atam matso vogôt jin’sam-jin’sanche upodre tumi bhôgche poddlear pasun khuxal ravat. kiteak tanchê vorvim tumchea bhavartachem mol gomun ieta. Sodam togonam tem bhangar porian ujeant ghalun topastat; toxench hal-upodreamnim tumchea bhavartachi topasnni zata. Ani jedna Jezu Krist dixtti poddtolo, tedna tumkam vakhann’nni, mhoima ani bhovman melltolo. Tumi Taka polleunk na, tori tumi Tacho môg kortat; tumi ozun Taka pollenant zalearui, Tacher tumi bhavart dovortat. Hea pasot tumi itlê ut’tôm’ khuxalkaien bhòrleat ki ti vornnunk utranch mellchim nant. Ani hea tumchea bhavartachem sompurnn foll, mhonngê tumchem purnn taronn, tumkam melltelem mhonn tumkam khatri asa. Heach taronnak provadi ravtale ani zotnaien te tachi sod korit asle; ani Dev tumkam diuncho aslo tea dennea vorvim tãnnim adim-fuddench bhakitam kelim. Kristacho Atmo provadeam sovem aslo ani Kristan koxtt sõsche asle ani uprant Taka mhoima mellchi asli mhonn teach Atmean tankam adinch sanglelem. Hem sogllem kedna ani koxem ghòddto aslem tem te provadi sodun kaddunk vavurle. Te porgôtt’tale to sondex apleach faideak nhoi, punn tumchea faideak mhonn Devan provadeank kollit kelem. Ani jem kitem tãnnim sangun dovorlem, tench atam xubhvhortoman porgôttlam team mon’xamnim tumkam ugtem kelem. Hem xubhvhortoman porgôtt’tana Devan sorgar thaun dhaddlolo Povitr Atmo tanchim monam uzvaddaitalo. Devdut legun heam vostunchi ollokh axen gheunk sôdtat. Hea pasot, tumchim monam sarkim mekllim korun aitim ravat, ani Jezu Krist dixtti poddtolo tedna jem soddvonnechem dennem tumkam melltelem, tacher purnn visvas tthevat. Devachim khaltim-pallok bhurgim zaiat, ani tumi sot ollkhonasleat tedna tumi tumcheam moriadi bhaileam vondovnneam pormannem choltaleat toxem atam korinakat. Portench, sogllê tumchê chalint povitrponnim jieiat, kiteak Zannem tumkam apoileant To povitr; oxench Povitr Pustok sangta: “Hanv povitr dekhun tumi-i povitr zaiat.” Omko-tomko mhonn pollenastana zonn-ekleacheam kornneam pormannem zonn-ekleachi nit korta Taka tumi “Bapa” mhonnun ulo martat; tea khatir hea pordesant jietana Tachi khori bhokti korun cholat. Tumi tumcheam purvozam koddchi polkea jivitachi chal ghetleli; tê chalintlim Devan tumkam soddoileant, nhoi koslêch vinaxi vostu vorvim, nhoi mhonn rupea vô bhangara vorvim, punn nixkollonk ani khotavinn Menddreachea, mhonngê Kristachea, omolik rogta vorvim: hacho ugddas dhôrat. Sonvsar rochchê adim Devan Kristak nemun dovorlolo, punn hea nimannea kallar tumchê khatir Taka porgôtt kelo. Tachê udexim tumi atam Devacher bhavart dovorla: khorem mhonn’lear, Devan Taka mornnantlo punorjivont korun mhoimek ubarlo dekhun, tumi Devacher bhavart ani bhorvanso dovrunk pavleant. Sotak khaltim zaun tumi xud’dh zaleant ani atam tumchean khorea monan bhavbhoinn koxim ekamekacho môg korunk zata. Tôr sogllea kallzan ekamekacho môg korat; kiteak tumkam Devan novo zolm dila: Toch tumcho Bap. To vinaxi nhoi punn ovinaxi. Tannem tumkam Aplea sobda vorvim jivit dilam: ho sôbd jivo ani sasnnak jivo. Karonn Povitr Pustok oxem mhonnta: “Ak’khem mon’xakull mhonn’lear tonn ani tachi sobitai xetantlea fula itli: tonn sukta, ful bavta, punn Devacho sôbd sodam-sorvodam togta.” Teach Sobdachem xubhvhor-toman tumkam porgôttlam. Hea pasot, vaitt monan kãich korinakat, konnak fotti marinakat, dhongeponnan cholonakat, konnachich nattkai dhorinakat ani chaddiô sap sanginakat. Tumi halinch zolmak aileant; tôr, zoxem ballam avoichea dudak axetat, toxem tumchea novea jivitak pochta tem osol dud pieunk otrekat; oslea dudan tumi ghott zaun tumi tumchea taronnant vaddtelet. Kiteak khorench Somi mhonvall-gôdd mhonn tumi chakun ghetlam. Jivo Fatôr To, mon’xamnim poro ghal’lo, punn Devan vinchun kaddlolo ani Tachê mukhar moladik Fatôr; tôr Tachê sorxim ieiat. Oxim tumi-i jive fator zaun, tumchem ek jivem devmondir bandon ieunk diat; tantum tumi povitr iadnik zatelet ani Jezu Krista vorvim Devak man’tat tosle atmik iodn bhettoitelet. Heach pasot Povitr Pustok oxem mhonnta: “Polleiat, Sionant Hanv êk fatôr ubo kortam, vinchun kaddlolo, konnxea-sondhicho moladik fatôr”, ani “Tacher bhavart dovortat tim kedinch lojek sampoddchim nant.” Mhonntôch tumkam, bhavart dhôrteleank, to fatôr moladik. Punn bhavart dhôrinant tankam, “zo fatôr bandpeamnim poro ghal’lo, toch konnxea-sondhicho fatôr zalo”, punn mon’xam adllon poddtat toslo fatôr, mon’xank sokla uddoita toslem khoddop.” Sobdacher bhavart dovrunk na mhonnun, tim taka adllon poddtat: hench tankam Devachem nirmonn. Punn tumi Devan vinchun kaddlelem kull; tumi rajki iadniki-kull; tumi Devachê sevek sonvskarlelem raxttr; tumi Devan Apli korun ghetleli porza. Tannench tumkam patkachea kallokantlim bhair kaddun Aplea mhoimêbhorit uzvaddak pavoileant. Tumchê khatir Apnnem kel’lim ojapanchim kortutvam tumi vakhannchê khatir Devan tumkam vinchun kaddleant. Adim tumi Devachi porza nhoi asleat, punn atam tumi Tachi porza zaleant; adim tumkam Devachi kaklut mellunk nasli, punn atam tumkam Tachi kaklut mell’lea. Bhov priticheam bhavam-bhoi-nnimnô, hanv tumkam oso ulo kortam: tumi pordexi ani vattsur dekhun, otmeacher zhuz kortat teô kuddicheô vondovnneô soddun diat. Amcho bhavart dhorinant team lokam modem, tumchi chal itle mannsugechi zaum-di ki, tumkam tim opradi mhonnun lavun ditat zalearui, tumcheô boreô kornneô polleun, To ietolo tea Zhôddtechea disa, tim Devak vakhannunk pavtelim. Mon’xa-somazant odhikar asleleam soglleank, Somia pasot, khaltim ravat: zaum somrazak, taka soglleam voir odhikar asa dekhun; zaum razpalank, kaide môddteleank khast lavunk ani kaide pallteleank vakhannunk tannem tankam nemleat dekhun. Pixim mon’xam aplem nennarponn dakhoun uloitat; punn tanchem tondd tumi tumcheam boream kornneamnim bond korchem mhonn Devachi khuxi. Tumi konnachinch chakram nhoi, punn fokot Devachim; dekhun svotontr mon’xam koxim cholat, ani tumchi svotontrtai koslich vikottai dhampun dovrunk vaprinakat. Soglleam mon’xank manan lêkhat, tumcheam bhavam-bhoinnincho môg korat, Devachi bhokti korat, somrazak man diat. Chakramnô, tumcheam dhoniank khaltim ravat ani tankam sogllo man diat, nhoich borea ani dulob sobhava-cheank, punn khor mon’xank-ui. Kiteak, Devak oxem zai mhonn somzun, favo nastana bhogunk poddtat te koxtt sosnnikaien ghetle zalear, hem ek Devachem dennem. Vaitt kelam mhonnun mar ghetlo zalear, hantum kosli vhoddvik? Punn borem kelam astam khast bhôglear, Deva mukhar mol asa. Khorench mhonn’lear, Devan tumkam heach khatir apovnnem dilam, kiteak khud’ Kristan tumchê khatir koxtt sõsle ani Apleam panvlamnim tumi cholunk tumkam Tannem dêkh dovorlea. Tannem koslench patok korunk na, Tachea tonddant koslich lobaddi mellunk na. Taka jasteo marleô tedna Tannem portun jasteo marunk nant; Taka dogdaitale tedna Tannem konnakuch domkaunk na, punn nitivont Mon’subidarachea hatant visvasan Aplem jivit sôddlem. Khursar Tannem amcheam patkancho bhar Aplê kuddicher ubarun ghetlo. Patkak patt korun Devak man’ta tê bhaxen ami jieunchê khatir Tannem oxem kelem. Tacheam ghaiamnim tumi borim zaleant. Sanddleleam xelliam porim, tumi bhonvtaleat, punn atam tumchea khorea Gonvllea ani Rakhnnea-xim Devan tumkam portun haddleant. Têch bhaxen, tumi, bailamnô, tumcheam ghovank khalteô zaiat. Oxem tanchê modle konn-ui ozun Sôbd mandun gheunk naslele asat zalear, utram vinnem apleam potinninchê chalinuch te jikon ietele, kiteak apleô potinni mannsugen ani nirmollponnan jietat mhonn te polletele. Venttlele kens, bhangarache olonkar, nazuk nhesônn, osleam bhaileam vostunchi tumchi xringarnni zaum noiê. Tumchi xringarnni zaum-di bhitorli, kallzachi, bigoddna tosli: êk xant ani dulôb sobhav, hi asa Deva mukhar chodd mol asleli xringarnni. Hêch bhaxen, adlea kallar, Devacher visvas tthevun jietaleô teô bhoktivont ostoreô apleam potink khalteô ravun apli xringarnni kortaleô. Oxi Sara asli; Abrahamak aplo dhoni mhonn ulo marun, ti taka khalti ravo. Boreô kornneo korun jiexeat zalear, tumi ticheô dhuvô; ani tumche poti amchea bhavartache nhoi zaun tumkam koslem vaitt kortit mhonn koslich bhirant vô husko dhorinakat. Têch porim, potimnô, tumcheam potinnim vangdda ekamekak somzun jieiat; favo to man tankam diat; bail odik osokt zait, tori poti borabôr ti ekach sasnnik jivitachi daijinn. Oxem korxeat zalear, tumcheam prarthnamnim tumkam koslich addkhôll aschi na. Xekim, tumi sogllim tumchê modem eka monachim zaiat, dusreanchem sukh-dukh tumchem korat, tumcheam bhavam-bhoinnincho môg korat, peleak konnvallaien vagoiat, khaltea kallzachim zaiat. Vaitt kodinch vaittan farik korinakat, vô beman bemanan; ufrattim, tankam borem magat. Oxench korunk Devan tumkam apoileant ani hê porim axirvadachem daiz tumchem zatelem. Povitr Pustok oxem mhonnta: “Tujea jivacho tum môg kortai mum? Lamb auk, sukh-sontôs tum axetai mum? Khotteponn pois kôr, tuji jib damun dhôr; fottkirem utor tujea tonddantlem kodinch bhair soro noie; sogllem vaitt tem sôdd, borem tem kôr; xanti sodun ticheam panvlamnim chol. Sorvespor khotteam mon’xank patt korta, Sorvesporache dolle boream mon’xancher asat, tanchea magnneachi bob Tachea kanar pavta.” Borem korpacher tumchem mon asot zalear, konnachean tumkam vaitt korunk zait? Tori Devak man’ta tê bhaxen jieunchê khatir tumkam kitem-i bhògchem poddlem zalear-ui, tumi khorench subhagi! Mon’xank bhienakat; tanchê pasot akantum nakat. Ufrattim, Krist tumcho Somi mhonn tumcheam kallzamnim Tachi bhokti korat. Ani “Kristacher kiteak mhonn tumi visvas-bhorvanso dovortat?”, oxem tumchê lagim konnem-i vicharlem zalear, osleank zobab diunk sodanch toiar ravat. Punn tumcho zobab dulobaien ani mannsugen diat, ani oxem tumchem ontoskornn guneanva-mekllem astelem. Hê bhaxen, Kristachea ekvottant tumi jietat tea borea jivita pasot jim konn tumcheô chaddiô sangtat, tim lojek sampoddtelim. Ani zôr hi Devachi khuxi, tôr vaitt korun sõschê poros, borem korun koxtt-dogd bhôglear odik borem. Kiteak mhonn’lear, amchim patkam sarkinch nattak korun amkam Deva sorxim pavounchê khatir, khud’ Kristan êkê pavttin moronn sõslem: niropradi zaun, opradeam pasot To melo. To amchea vinaxi mon’xa-soimbacho aslo dekhun, Tacho jiv kaddunk pavle; punn Devan Taka punorjivont kelo tedna, To Atmean bhòrlolo ovinaxi zalo. Ani oso To bondkhonnint asleleam mon’xank soddvonnechi khobor porgottunk gelo. Magam, Noa tarum bandtalo tea kallar, Dev ozun sosnnikai dhorun aslo tedna, him mon’xam Devak khaltim zaunk raji na zalim; fokot êk dhaktto atth zannancho zomo udka vorvim vattovlo. Tem udok atam tumkam taronn ditelea batismachi khunna: ho batism kuddi-bhailo mhêll dhuvun kaddina, punn hea batismant Jezu Kristachea punorjivontponna vorvim amchem ontoskornn nitoll zata, ani ami oslea borea ontoskornnan Jezucho pattlav korunk Devak bhas ditanv. Ho Jezu sorgar bhitôr sorla, ani devdutank, odhikareank ani podveank Apnna khal dovrun Devachea uzveak boslolo asa. Kristan Aplea mon’xasoimbant kosle koxtt-dogd bhôgle hacho ugddas dhôrat, ani oxem korun ghottai gheiat: kiteak jim konn aplea mon’xasoimbant koxtt-dogd sõstat, tim patki-chal ani-anink dhorunk sodinant. tim kuddicheam vondovnneam pormannem ani-anink cholonant, punn atam thaun Devachi khuxi korun apnnank hea sonvsarant urleat te dis tim kaddtat. Tumi adim onbhavarteanchê chali pormannem jieleant tim puro: tedna tumchem jivit kamchari aslem, tumcheam vaitt vondovnneam porma-nnem tumi choltaleat, bebdikaiek lobhdol’lim asleat, dumxannamnim dis kaddtaleat, ani vitt haddpachi puttleam-murtinchi bhozônn korun bhonvtaleat. Hea pasot, nisonttonnak pavoita tea lottant, apnnam borabôr tumi kiteak, oddon vochonant tem tankam somzona, ani tea pasot tumcher jasteo marunk lagtat. Punn Zo jiveanchi ani mel’leanchi mon’subi korunk toiar asa, tea Mon’subidara mukhar tankam hacho hixôb diuncho poddtolo. Ani heach pasot mel’leank-ui Soddvonnechi khobor porgôtt keli; hê bhaxen, hea sonvsarant soglleam mon’xam porim tankam mornnachem formonn poddlem zalear-ui, tancheam otmeank tori Devachem jivit mellum-iet aslem. Soglleam vostuncho xevôtt lagim pavla. Hea pasot, favo tê porim prarthon korchê khatir, xant ravat ani zagrutaien cholat. Bhov-korun, ekamekak vhodda pritimogan vagoiat, kiteak pritimôg khub-khub patkam kaddun uddoita. Borê khuxen ekamekak biradd diat. Zonn-ekleak Devan êk kherit dennem dil’lem asa; tôr bore karbhari koxe heam veg-veglleam denneancho upêg korun ekamekachi chakri korat. Tujem dennem sondêx divpacho? To Devacho sondêx mhonn ollkhun tuzo sondêx di. Tujem dennem seva korpachi? Dev dita tê ghottaien seva kôr. Hê bhaxen soglleam vostumnim Jezu Krista vorvim Devak vakhann’nni mellteli. Takach mhoima ani podvi sasnnachea sasnnak! Amen! Bhov priticheam bhavam-bhoinnimnô, tumkam ujeant uddoilelê porim tumchi koddok topasnni zata mhonn ojap zaum nakat: hantum kãi vichitr na. Punn jitlo tumkam Kristacheam koxttamnim vantto mellta, titlim tumi sontosbhorit zaiat; oxem, jedna To mhoimen dixtti poddtolo, tedna tumi-i sontosan murgott’telet. Kristachea nanva khatir tumkam beman bhògcho poddlo zalear, tumi subhagi, kiteak mhoimecho Atmo To, Devacho Atmo, tumcher vosti korun asa. Prannghatki vô chôr vô ghusottnno vô dusrem koslem-i khotteponn korpi mhonnun tumchê modlea konnakuch khast poddchi nhoi; punn Kristachim mhonnun konnank khast bhôgchi poddli zalear, tankam koslich loz na, portench zalear Kristachea nanva khatir Devak argam diat. Kiteak mon’subecho vêll pavlo ani Devachea ghorabea thaun ti suru zateli; ani amchê thaim suru zata zalear, Devachem xubhvhortoman manun ghenant tankam kitem ghòddchem na? Povitr Pustok oxem sangta: “Promannik mon’xak porian soddvônn mellunk avghodd zalear, odhormi ani patki mon’xachem kitem mhonn zaunchem na!” Mhonntôch, jim konn Devachê khuxê pormannem sõstat, tãnnim borem tem korit ravchem ani aplo jiv aplea Rochnnarachea hatant sôddcho, kiteak To Apleô bhasavnneô visvaxiponnan palltoloch. Atam tumchê modem asleleam vhoddilank ulo kortam. Hanv-ui vhoddil ani Kristacheam koxttancho sakxi; prokaschi asa tê mhoiment mhaka-i vantto melltolo. Tôr tumkam oso ulo kortam: Tumchê adhin kel’lea Devachea hinddachi gonvlleam vori rakhônn korat: tachi kallji gheiat, kaido pallunk konn tumkam boll korta mhonn nhoi, punn ap-khuxen, Devak zai tea pormannem; mhellê zoddichê axen nhoi, punn kallzachê hurben. Tumchê adhin asleleancher zobordosten odhikar choloinakat, punn tumchea hinddache nomunne zaiat. Ani Porom’ Gonvlli dixtti poddtolo tedna, bigoddna toslê mhoimecho mukutt tumkam melltolo. Têch bhaxen tumkam, tornna-tteamnô, ulo kortam: zannteank khaltim zaiat. Sodanch ekameka thãi nomrutaien vagat, kiteak Povitr Pustok oxem sangta: “Dev gorvixttank virôdh korta ani vinomr-khalteam kallzancheank Aplem bholeponn dakhoita.” Hea pasot, Devachea bollixtt hata khal vinomr-khaltim zaiat ani To tumkam Aplea xubh vellar voir kaddtolo. Povitr Pustok oxem sangta: “Soglleam tumcheam huskeancho bhar Tacher ghalat, kiteak Taka tumchi kallji asa.” Chotur ravat, zagrut ravat. Devchar, tumcho dusman, gôroz ghaltelea xinva sarko, apnnak konn-ui girasunk sampddot gai mhonn polleun tumchê bhonvtonnim firot asa. Devacher thir bhavart dovrun, taka virôdh korat. Sonvsarant ximpo-ddleleam tumcheam bhavam-bhoinnink toxench bhògchem poddta mhonn ugddas dhôrat. Dev tumcho chôdd môg korta; Tannench tumkam Krista sovem sasnnachê mhoimek apoileant; tôr matso vogôt tumi koxtt-dogd sõslea uprant, Toch tumkam novean somadhan kortolo, tumkam thir ani ghott korun samballtolo. Taka ki adhikar-podvi sasnnachea sasnnak! Amen. Silvan amcho visvaxi bhav mhonn dhôrtam; tachea adaran hem lhan potr tumkam boroilam. Tumkam dhir diunk ani hench Devachem khorem dennem mhonn govai diunk mhoji khuxi: tem ghott dhorun ravat. Tumchê bhaxen Devan vinchun kaddleli Babilonient asa ti povitr-sobha tumkam noman korta. Tosoch Marku mhozo put. Ekamekak pritimogachi khunna diat. Kristachea ekvottant asleleam tumam-somestank xanti! Hanv Simanv Pedru, Jezu Kristacho sevôk ani apostl, hem potr boroitam. Zankam amchea bhavarta sarko moladik bhavart mell’la, tankam boroitam. Ami bhôztanv tea Devachê, amchea Sodd-vonnara Jezu Kristachê, taronnik doiallaien tumkam ani amkam toch bhavart favo zala. Devak ani amchea Somia, Jezuk odik-odik ollkhun, tumkam odik ani odik Devachi doiallai ani xanti subham’ponnan bhogunk mellum. Favo tê porim ami jieunk ani Tachi bhokti korunk goroz titlem Kristan Aplê divia podven amkam dilam. Apli poripurnn ollokh Tannem amkam dilea ani Aplê mhoiment ani vorteponnant vantto gheunk amkam apoileant. Hea Aplea udar boreponnak lagun unch molachim ani vortim dennim Tannem amkam bhasaileant. Hê porim, sonv-sarantlea kusddeponnantlim ani fottkirê axentlim sutton, tumi Devachea jivitachim bhagidar zaunk pavtat. Hea khatir, bhavartan tir ravunk ani tumche sugunn vaddounk sogllê umedin tumi vavrunk zai; teach borabôr Devache onbhovi-vagnnuken cholunk proitn korat; zagrutaien tumcheô vaitt vondovnneô domauncheô; toxench addkhollim modem thir ravat; teach borabôr tumchi bhokti vaddon veteli; oxench soglleam bhavam-bhoinninchi opurbai tumi korchi ani soglleam mon’xam lagim pritimogan cholchem. He sugunn tumkam astit ani tantun tumi vaddot vexeat zalear, tumchem jivit bexttem ani nirfoll urchem na; punn tanchê vorvim tumi Jezu Kristak, amchea Somiak, odik-odik ollkhunk pavtelet. Jeam mon’xank he sugunn nant, tim kurdd’dim vô mottvê dixttichim; aplim adlim patkam dhuun gelim mhonn tim visorleant. Bhavam-bhoinnimnô, Devan tumkam apoileant ani vinchun kaddleant: hea apovnneachi ani vinchnnukechi khatri thir samballunk umedin vavrat. Oxem korxeat zalear, tumi koddsorun vexeat mhonn bhirantuch na. Oxem korun, amchea Somia ani Soddvonnara Jezu Kristachea sasnnik rajeant bhitor sorunk, tumkam un-unit ievkar astolo. Hea pasot, zori tumi heô vostu zannont ani tumkam mell’lam tem sot tumchea jivitant tumi ghott dhorun asat, tori hanv tumkam tancho ugddas korit ravtolom. Ho sonvsar soddun vochpacho mhozo vogôt lagim pavlo mhonn amchea Somia Jezu Kristan mhaka kolloilam; hea pasot, hanv jivo ason porian heô vostu tumchea monant haddun tumkam zagrut dovorchim mhonn mhaka dista. Ani hanv morun gelea uprant tumi sodanch heam vostuncho ugddas korcho mhonn hanv umedin vavurtolom. Amcho Somi Jezu Krist podven ietolo mhonn ami tumkam xikoilem tedna, dusreamnim hikmotin ghôddlolim gop’pam-talam ami tumkam sangunk nant. Na; ami Tachi thôr mhoima amcheam khaxa dolleamnim dekhlea. “Ho Mhozo bhov opurbaiecho Put; Tacher asa Mhojem dhadosponn”: jedna hem utor dobajik voibhovantlem Taka pavlem, tedna Tannem Deva, Aplea Bapa koddchi mhoima ani man ghetlo. Ami Tachê borabôr povitr dongrar asleanv tedna, sorgar thaun ail’lo ho tallo ami khaxa aikolo. Tea bhair amkam odik ghôtt khatri diunk provadeanchem utor asa; taka tumi chit dixeat zalear borem kortelet. Fantem pavot ani sokallchem noketr tumcheam kallzamnim udet porian, kallokant uzvadd ghalto divtti koxi tem utor dhôrat. Sogllea adim hem zanno zaiat: Povitr Pustokantlê koslêch provadeanchê sangnnechi zonn-eklean ap-apli khasgi somzonni dium nozo. Provadeancho khõichoch sondêx mon’xanchê khuxentlo upzunk na; punn jedna mon’xamnim Devachea nanvan sondêx dila, tedna Povitr Atmo tankam to sondêx diunk oddun vhortalo. Israel-porjê modem kotte provadi ieun gele, toxench tumchê-i modem khotte guru ietele. Te tumchê modem tumchi vatt laitat tosle sota-add xikovnn bhitôr kaddtele, ani apnnank suttka dito Dhoniak patt vollun, apnnachoch rokddo nas korun uddoitele. Amchê modlim zaitim zannam tanchi pozddi chal dhôrtelim, ani tankam lagun dusro lôk Sotachê Vattechi ninda korunk pavtolo. Tankam duddvanchi vhôdd axa, ani tumkam khotteô xikovnnô diun te tumcheam poixeamnim apnnank faido kaddtele. Punn magam thaun Mon’subidaran tancher formonn marlelem asa, ani tancho nas kortolo To zagoch asa. Devdutamnim patok kelem tedna Devan tankam bhogsunk nant, punn Zhôddtechea Disa tanchi mon’subi korunk, Tannem tankam norkant xevttile ani kallokachea konddant sôddle; Devan adlea kallachea lokak-ui bhogsunk na; punn noxtteanchê prithumecher poriallo dhaddlo tedna, fokot Devak man’ta toslea jivitachea porgôttnnara, Noank, ani tachê borabôr anink sat zannank Tannem vattailim. Fuddaracheam noxtteam mon’xank dêkh xikounchê khatir, Devan Sodom’ ani Gomorra nograncher khastichem formonn marlem ani tancho bhosm kelo; ani heam noxtteam mon’xanchem pozddem jivit Lotak kanttallo haddtalem mhonnun, Devan hea Apnnak manovlelea mon’xak nivarlo. Karonn ho sugunni monis tanchê modem jieun, dispottim tanchim noxttim kortubam polleun ani aikun, apnnachêch bhitôr tollmolltalo. Mhonntôch bhoktivont mon’xank porikxentlim nivarunk Sorvesporak tank asa, ani noxtteank Zhôddtechea Disa khast lavpa khatir dovrunk Taka podvi asa, bhov korun pozddê axen kuddicheam vondovnneank lobhdotat ani Tachea odhikarachi beporva kortat tankam. Ami sangtaleanv te khotte guru, tovnnas ani gorvixtt monis zaun, mhoimevont devdutanchi ninda korunk pattim soronant. Punn devdut, odik bollixtt ani podvedar zaun-ui, tancher add Sorvespora mukhar koslench garannem vô firiad korinant. Ginean-nasleleam mon’zatink lôk dhôrta ani marta, osleam mon’zatim sarke he guru; apnnank ollokh na tachi ninda kortat, punn jem apunn nisonttonn haddunk sôdtat, tea nisonttonnak apunnuch sampoddtele. Dusreank koxtt dileat dekhun, tankam Dev koxtt diun farik kortolo. Disacho porian kamchar tanchem sukh: khorench mhelle monis te, tanchi chal sarki lojechi. Tumchê borabôr jevnnak bostat tedna porian tumkam fottoun khuxi zatat. Tancheam dolleamnim fokot pordvar ani tanchi patkachi axa kodinch dhadoxi zainam tosli. Othir-osokt mon’xank te fas manddtat. Apli axa bhagounk te ekdom’ huxar. Devacho xirap poddlele monis te! Nitt marôg soddun vatt chukun gele; Bosorachea puta, Balaamachi, tãnnim vatt dhôrli. Apnnak bori mozuri mellteli mhonn axa dhorun patok korunk to toiar aslo; punn tachea gaddvanuch tachi axa vaitt mhonn rokddench taka dakhoun dilem: oxi vacha-naslelea gaddvan mon’xa bhaxen uloun provadeachi pisai addaili. Osle monis sukleleam zhorim sarke, vadollan lottun vhel’leam kupam sarke. Tankam Devan dovorlolo zago mhonn’lear norkantlo kallôk. Kudde-ponnachea kallokant jieteleam modlim halinch sutton ail’leam amcheam bhavam-bhoinnink he monis ghonn-ghonnit punn polkim bhaxonnam kortat ani aplê pozddê chali vorvim tancheô kuddicheô vondovnneô challoitat. Tankam apunn svotontrtai ditat mhonn bhasaitat, punn khorem mhonn’lear te apunnuch kusddepo-nnache gulam’: karonn jim konn kiteak-ui apnnancher odhikar cholounk ditat, tim tachim gulam zatat. Amchea Somia ani Soddvonnara Jezu Kristak ollkhun gheun, mon’xam sonvsarantlea mhelle-ponnantlim mekllim zatat; punn uprant konn-ui teach mhelleponnant portun lollonk vetat zalear ani tea mhelle-ponnachim novean gulam zatat zalear, tanchi gôt adlê goti poros paxtt zali. Devak man’ta toslea jivitachi vatt ollkholea uprant apnnank dil’li povitr adnea soddun diunchê poros, ti vatt tãnnim ollkhunkuch nasli zalear odik borem zatem. Êk khori mhonn’nni asa: “Sunnem apnnench onklelem tachê sorxim portun gelem”; ani anink êk mhonn’nni oxi: “Dukornnik nhavoilea uprant ti novean chiklant lollta.” Hem tankam ghòddlem. Bhov priticheam bhavam- bhoinnimnô, hem mhojem dusrem potr tumkam; donant-ui amchea bhavartacho ugddas haddun, tacho khoro somôz tumchê bhitôr zagounk hanvem sôdlam. Jem provadeamnim adinch sangun dovorlelem, tacho ugddas korat; toxench tumcheam apostlamnim tumkam dil’lê amchea Somia ani Soddvonnarachê adneacho-i ugddas korat. Poilê svater, nimanneam disamnim amchea bhavartacheô moskoreo korpi zaitim zannam ietelim mhonn visronakat. Tim apleam vaitt vondovnneam pormannem choltelim ani mhonntelim: “Apunn ietolo mhonn tannem bhas dil’li ti khõi pavli atam? Amche purvoz morun gele tedna thaun sogllem toxench cholta, ani rochnnechea orombak thaun-ui toxench.” Punn orombak mollob aslem ani Devachea utrak prithum’ udkantli ani udka modem upzoli mhonn tim mud’dom’ visortat. Ani hea udkachêch buddten tea kallachea sonvsaracho nas zalo. Punn teach Devachea utran atanchem mollob ani atanchi prithum’ ujean lasun uddounk dovorleant; tea disa onbhavarteanchi zhôddti zaun tancho bhosm zatolo. Priticheam bhavam-bhoinnimnô, hi êk vôst tumi kodinch visrunk favo na: ki Sorvespora mukhar êk dis hozar vorsam sarko ani hozar vorsam eka disa sarkim. Kãi zonnam To kallav korta mhonn sangtit, punn Sorvespor Apnnem bhasailam tem pallunk kallav korina. Khorem mhonn’lear, To tumkam sosnnikaien vagoita, kiteak konnachench nisonttonn zal’lem Taka naka, soglleamnim aplem jivit bodôl’lelem Taka zai. Sorvesporacho Dis êk chôr koso ietolo; tea disa mollob goddgoddan nanch zatelem, srixttiche dhatu koddhon vetele, prithumecho ani tantum aslelea sogttacho bhosm zatolo. Jea disa mollob agttem zaun nanch zatelem ani srixttiche dhatu lasun koddtele, to Devacho Dis vegim pavum mhonn axeun ravat. Ani sogllem hê bhaxen somptelem mhonntôch, tumchem jivit patkavinn ani Devak manovto zaunk zai. Ami novea mollbachi ani novê prithumechi vatt polletanv, kiteak oxi Devan amkam bhas dilea: thõi sogllem Devak man’ta toxem zatelem. Dekhun tea mhonnosôr, bhov priticheam bhavam-bhoinnimnô, tumi Taka xantin mellchê khatir, tankta titlê umedin nixkollonkponnan ani guneanva vinnem jieunk vavrat. Sorvespor bhov sosnnikaiecho; hem tachem mhatmeponn tumchê soddvonne khatir mhonn somzat. Toxench apnnak Devan dil’lê zannvaien, amchea bhov mogachea bhava, Paulun, tumkam boroilam. Soglleam apleam potramnim to heam vostunchi gozal korta. Tantum somzunk avghodd kãi vixoi melltat: bhavartant xikovnn ani thirai naslolo lôk tancho, ani heram-i Povitr Pustokancho, sarko ôrth bigddaun uddoitat ani oxem aplench nisontton magun ghetat. Hea pasot, tumi, bhov mogacheam ixttamno, tumkam hanvem xiddkaileant mhonntôch, chotrai dhôrat: na zalear, noxtteam mon’xanchi vankddi vatt dhorun, tumi-i tumchem thirponn sanddun vexeat. Ufrattim Jezu Kristachi, amchea Somia ani Soddvonnarachi, doiallai bhôgat ani Tacho odik-odik onnbhôv korun gheiat. Taka mhoima atam ani sasnnachea sasnnak! Amen! Jivitachea Sobda vixim ho amcho sondêx: To orombak thaun aslo, Taka ami aikola ani amcheanch dolleamnim dekhla, Taka ami tellun pollela. Taka ami amcheanch hatamnim sanspila. Khorench, Jivit dixtti poddlem, Tem ami dekhlam ani Taka ami govai ditanv. Bapa sovem aslem ani Tannench amkam dakhol kelam tem Sasnnik Jivit ami tumkam porgôtt’tanv. Tumi-i amchea ekcharant aschê khatir, jem ami pollelam ani aikolam tench ami tumkam-i kollit kortanv. Amcho ekchar mhonn’lear Bapa kodde ani Tachea Puta Jezu Krista kodde. Amam-somestancho sontôs purnn zaunchê khatir, hem ami tumkam boroitanv. Tachê koddcho ami aikola ani tumkam ami porgôtt kortanv to sondêx ho: Dev mhonn’lear Uzvadd ani Tachê sovem kosloch kallôk na. Kallokant ami choltanv astana, Devachea ekcharant ami asanv mhonn ami sanglem zalear, amchim utram ani amchem jivituch êk fôtt, kiteak sota pormannem ami jienanv. Punn zoso Dev Uzvaddant asa, toxim ami-i Uzvaddant choltanv zalear, ekamekachea ekcharant ami asanv, ani Tachea Puta Jezuchem rogot sogllea patkantlim amkam xud’dh-nirmoll korta. “Amkam patok na’’, oxem ami mhonn’lem zalear, ami amkanch fottoitanv ani sot amchê sovem na. Punn amchim patkam ami ollkhun ghetlim zalear, Dev amchim patkam bhôgxita ani sogllea khotteponnantlim amkam nitoll korta, kiteak To visvaxi ani sogllêch vatten boro. Ami patok korinaslam, oxem ami mhon’nlem zalear, ami Taka fottkiro kortanv ani Tachem utor amchê sovem na zata. Mhojeam supurleam bhurgeamnô, tumi patok korchem nhoi mhonn hanv hem tumkam boroitam. Punn konn-ui patkant poddlim zalear, Bapa mukhar amkam sogllêch vatten Devak man’ta toslo eklo Xerati asa: to Jezu Krist. Toch amchim patkam nattak korta ti Boli: amchinch nhoi, punn akhea sonvsarachim. Zôr tôr ami Tacheô adnea palltanv, ami Taka ollkhola mhonn hê khunnê vorvim gomun ieta. “Mhaka Tachi ollokh asa”, jim konn oxem mhonntat punn Tacheô adnea pallinant, tim mon’xam fottkirim: osleam mon’xam sovem sot na. Punn Tachea utrak pallo ditat tim Dev amcho kitlo môg korta to sopurnnaien ollkhunk pavleant. Hachêch vorvim ami Tachê sovem asanv mhonn amkam kollon ieta. Jim konn Deva sovem apunn asat mhonn sangtat, tãnnim Jezu chol’lo toxench cholchem. Mhojeam mogacheam bhurgeamnô, hanv tumkam novi adnea boroun dhaddinam, punn êk adli adnea, survatek thaun tumi ghetlea tich. Hi adli adnea mhonn’lear tumi poilim thaun ghetlo toch sondêx. Tori astana, hanv tumkam novean boroun dhaddtam ti khorench novi adnea: karonn kallôk na zata ani khoro Uzvadd porzollunk laglo. Jim konn apunn Uzvaddant asat mhonntat punn aplea bhavak vô bhoinnik zolltat, tim ozun kallokant asat. Punn jim konn apleam bhavam-bhoinnincho môg kortat, tim Uzvaddant jietat: tankam adllon poddo-xim korunk kãich na. Aplea bhavacho vô bhoinnicho dvês kortat tim kallokant asat ani kallokant choltat; oslim mon’xam apunn khõi vetat tem tinch nokllot, kiteak kallokan tanche dolle kurdd’de keleat. Mhojeam supurleam bhurgeamnô, Tachê nanvim tumchim patkam bhògsoleant dekhun tumkam boroitam. Avoibapaiamnô, orombak thaun asa Taka tumi ollkhunk pavleant. Tornnatteamnô, tumi Noxtteacher zoit vhelam dekhun tumkam boroitam. Supurleam bhurgeamnô, tumi Bapak ollkhola dekhun tumkam boroitam. Avoibapaiamnô, orombak thaun asa Taka tumi ollkhola dekhun tumkam boroitam. Tornnatteamnô, tumi bollixtt zaleant, Devachem utor tumchê bhitôr riglam ani tumi Noxtteacher zoit vhelam dekhun tumkam boroitam. Sonvsaracho ani sonvsarantleam vostuncho môg korinakat. Sonvsaracho môg kortat team mon’xam sovem Bapacho môg na: kiteak sonvsarant mellta tem itlench: kuddichi moriadi-bhaili vondovnni, dolleanchi lobhi axa ani jivita-boddai. Hem sogllem Bapa-sun nhoi punn sonvsarantlem upzota. Tôr sonvsar ani tacheô vondovnneô don disam bhitôr nanch zatat. Punn jim konn Devachi khuxi palltat, tim sasnnak jietat. Mhojeam supurleam bhurgeamnô, xevottacho kall ho. Eklo Krist-Virodhi ieuncho asa mhonn tumi aikolam. Atanch legun zaite Kristache-virodhi dixtti poddleat: hantum amkam ho xevottacho kall mhonn gomun ieta. Te amchê modle bhair sorleat, punn khorench mhonn’lear amche niz vangddi te nhoi asle; kiteak amche niz vangddi zal’le zalear, amchea sangata te ravto asle; punn sogllech zann amche niz vangddi nhoi mhonn dakhounchê khatir, hem oxem ghoddonk zai aslem. Tumkam zalear Kristacho Povitr Atmo diun Devan makhleant ani oxem tumkam soglleank sotachi ollokh mell’lea. Mhonntôch sotachi ollokh tumkam na zal’lê porim tumkam hanvem borounk na, punn portench tumi sot ollkhotat ani sotantli koslich fôtt upzona dekhun, oxem tumkam boroitam. Fottkirim konn? Jezu, To Krist mhonn mandun ghenant tim. Hinch tim Krist-Virodhi! Bapak toso Putak-ui tim mandun ghenant. Jim konn Putak nakartat, tankam Bap-ui na. Punn jim konn Putak ollkhun ghetat, tankam Bap-ui asa. Tumi zalear, zo sondêx orombak thaun aikola, to tumcheam kallzamnim sodam samballat. Survatek thaun aikol’lo sondêx tumchê sovem toglo zalear, tumi-i Puta sovem ani toxench Bapa sovem rigun astelet. Tannench tumkam hi bhasavnni kelea: Sasnnik Jivitachi bhasavnni! Tumkam fosounk bhonvtat tanchê vixim, itlem tumkam boroilam. Deva-koddcho tumi Povitr Atmo ghetla; To tumchê sovem asa mhonntôch dusrea konnachêch xikovnnechi tumkam goroz na. Punn Tacho Atmo tumkam soglli xikovnn dita, ani hi Tachi xikovnn khori, fottkiri nhoi; mhonnun hê Tachê xikovnnê pormannem cholat ani Jezu sovem rigun ravat. Hea pasot atam, supurleam bhurgeamnô, Tachê sovem rigun ravat. Hê porim, To dixtti poddtolo tea Tachea ienneachea Disa, vhodda visvasan ami Taka ghetelenv, ani lojen Tachê thaun pois vechim nanv. Dev sogllêch vatten boro mhonn tumi zannont; tôr hem-i zanno zaiat: jim konn Devak man’ta toxem jietat, tim sogllim Tachê thaun zolmoleant. Polleiat, Bapan amcho kedo vhod môg korun dakhoilo to, Khud’ Bap amkam Aplim bhurgim mhonnta, ani khorench ami Tachim bhurgim! Taka ollkhunk na dekhun sonvsar amkam-i ollkhona. Mhojeam mogacheam bhurgeamnô, atanch thaun ami Devachim bhurgim, punn fuddarak ami kitem zatelenv tem ozun porian ugddapem zaunk na. Punn jea disa tem ugddapem zatelem, tea disa ami Tachê-sarkim zatelenv mhonn amkam khatri asa, kiteak zoso To asa, tosoch ami Taka polletelenv. Zoso Jezu nibêl xud’dh, toxem Tacher ho bhorvanso dovrun asat tim sogllim apunn-ui nixkollonk zaunk vavurtat. Jim konn patok kortat, tim Somurtik patt kortat, kiteak patok mhonn’lear Somurtik patt-korop. Tôr amchim patkam kaddun uddounk To ailo ani Taka koslench patok na mhonn tumi zannont. Tachê sovem rigun ravtat tim patok korinant, punn patok kortat tãnnim Taka polleunk na ani ollkhunk-ui na. Priticheam bhur-geamnô, konnakuch tumkam fosounk dinakat: zoso Krist Devak manovlo, toxench Devachê khuxê pormannem jietat tim Devak manovtat. Jim konn patok kortat, tim devcharachim, karonn devchar orombak thaun patki. Devcharacheam kortubancho bhosm korchê khatiruch Devacho Put ailo. Jim konn Deva thaun zolmoleant, tim patok korit rauchinant, kiteak Devachi jinn tanchê sovem asa. Deva thaun zolmoleant dekhun tanchean patok korum nozo. Devachim bhurgim ani devcharachim bhurgim hacheruch ollkhum-ietat: jim konn Devachê khuxê pormannem jienant vô apleam bhavam-bhoinnincho môg korinant, tim Devachim nhoi. Ekamekacho ami môg korcho: hoch sondêx tumi survatek thaun aikola. Kain-a sarkim ami zaum noiê: to Noxtteacho put aslo dekhun, aplea bhavacho tannem jiv kaddlo. Kitea pasot tacho jiv kaddlo zait? Kiteak tachim kortubam baskoll aslim, punn tachea bhavacheô kortubam Devak man’tat toslim aslim. Bhavam-bhoinnimnô, sonvsar tumcho dvês korta zalear, tumi ojap zaum nakat. Mornnantlim bhair sorun ami Jivitak pavleanv mhonn ami zannonv, karonn amcheam bhavam-bhoinnincho ami môg kortanv. Môg korinant tim mornnantuch asat. Aplea bhavacho vô bhoinnicho dvês kortat tim mon’xam prannghatki; khõicheach prannghatkea sovem Sasnnik Jivit kednanch asona mhonn tumi zannont. Tannem amchê pasot Aplo jiv dilo: hachê velean môg kitem tem ami ollkhunk pavleanv. Toxench ami-i amcheam bhavam-bhoinnim pasot amcho jiv diunk zai. Konna-konnak sonvsarachi girestkai asun-ui gorjek sampoddlelea aplea bhavak vô bhoinnik polleun tanchea kallzant doia-maia upzona zalear, koxê bhaxen Devacho môg tanchê sovem asot? Supurleam bhurgeamnô, khoro môg mhonn’lear utramnim ani jibenuch nhoi, punn kornneamnim ami dakhounk zai. Hê ekêch khunnê vorvim ami sota pormannem choltanv mhonn amkam gomum ietelem ani amchim kallzam Tachê mukhar ami xant kortelenv. Devak sogllem tthavem, ani amchem ontoskornn amkam koslo-i guneanv dakhoit zalear porian, amchea ontoskornna poros Devachem kalliz odik doiall-movall. Priticheam bhurgeamnô, amchem ontoskornn amcho kosloch guneanv dakhoina zait zalear, Deva mukhar amkam purnn visvas asa; ani kitem-i ami Tachê lagim maglem zalear, tem amkam Tachê koddchem melltach, kiteak Tacheô adnea ami palltanv ani Taka mandta tem ami kortanv. Hi tôr Tachi adnea: Tachea Puta Jezu Kristacher ami bhavart dovorcho ani, Tannem amkam adnea dilea tea pormannem, ekamekacho ami môg korcho. Ani jim konn Tacheô adnea samballtat, tim Deva sovem jietat ani Dev tanchê sovem jieta. Tannem amkam Aplo Atmo dil’lean To amchê sovem jieta mhonn ami ollkhunk pavtanv. Mhojeam mogacheam bhurgeamnô, Devachea Atmeachem preronn apnnak mell’lam, oxem sangtelea dor-ekleak mandun ghenakat; punn him preronnam kosak lavun, khorench tim Devachea Atmea thaun ietat zalear polleiat, karonn zaite fottkire provadi sonvsarant ailele asat: Devachea Atmeachea preronna vorvim êk sondêx ieta zalear, hachê voilean to tumi ollkhunk xoktat: Jezu mon’xasoimbant ail’lo Krist mhonn mandun gheta to sogllo sondêx Deva thaun ieta; ani zo sondêx Jezuk oso mandun ghena, to Deva thaun iena: oslo sondêx Krist-virodheacho. Ho Krist-virodhi ieuncho asa mhonn tumi aikol’lem; khorench mhollear, atam legun to sonvsarant ail’lo asa. Tumi, Supurleam bhurgeamnô, Devachim ani team fottkiream prova-deancher, tumi zoit vhelam. Karonn Zo tumchê sovem asa, To sonvsarant asa tachê poros odik bollixtt. Te zalear sonvsarantle; dekhun sonvsarachi bhas te uloitat ani sonvsar tanchem aikota. Punn ami, Devachim, Jezuche sakxidar, ani jim konn Devak ollkhotat, tim amchem aikun ghetat; jim konn Devachim nhoi, tim amkam kan dinant. Hachêch vorvim konnacho sondêx sotacho ani konnacho fottkiro to ami ollkhunk xoktanv. Mhojeam opurbaiecheam bhur-geamnô, ekamekacho môg korum-ia, kiteak môg mhonn’lear Deva koddchoch ani jim konn môg kortat, tim Deva thaun zolmoleant ani Devak ollkhotat. Jim konn môg korinant, tankam Devachi ollokh mellunk na, kiteak Dev mhonn’lear Môguch! Aplea ekleach Puta udexim ami jieunchê khatir, Devan Taka sonvsarant dhaddlo: hantum Dev amcho môg korta mhonn ugddapem zalem. Hanv môg mhonntam to ho: ami Devacho môg kela to nhoi, punn Tannem amcho môg kelo to, amchim patkam nattak korunk, boli koso Apleach Putak dhaddun, Aplo môg dakhoilo to. Mhojeam priticheam bhurgeamnô, Devan zôr amcho itlo môg kelo, ami-i ekamekacho môg korunk zai. Devak konnench kodinch polleunk na. Punn ami ekamekacho môg kelo zalear, Dev amchê sovem jieta ani Tacho môg amchê sovem sompadnnek pavla. Tannem Aplo Atmo amkam dila: hê khunnê vorvim ami Tachê sovem jietanv ani To amchê sovem jieta mhonn amkam kollon ieta. Bapan Aplea Putak sonvsaracho Tarôk koso dhaddlo mhonn ami amcheam dolleamnim pollelam ani hachi ami govai ditanv. Jim konn Jezu Devacho Put mhonn mandun ghetat, tanchê sovem Dev jieta ani tim Deva sovem jietat. Dev amcho môg korta, ho môg ami ollkhun ghetla ani tacher ami bhavart tthevla. Dev mhollear Môguch! Jim konn mogant jietat, tim Deva sovem jietat ani Dev tanchê sovem jieta. Zhôddtechea Disak purnn visvasan ami ravchê khatir amchê sovem môg sompadnnek pavot asa: karonn hea sonvsarant ami Jezu sarkim zait asanv. Môg asa thõi bhirant na; portench, sopurnn môg bhirant pois korta; kiteak zõi khast asum-iet, thõi bhirant asa; ani zaka bhem dista, tacho môg sompadnnek pavunk na. Tannem poilo amcho môg kelo dekhun, ami-i môg kortanv. “Hanv Devacho môg kortam’’, oxem konn mhonntit, punn aplea bhavacho vô bhoinnicho dvês kortit zalear, him mon’xam fottkirim: apunn dekhtat tea bhavacho vô bhoinnicho tim môg korinant zalear, apnnem polleunk na tea Devacho koxim mhonn tim môg kortelim? Tachê koddchi ami ghetlea ti adnea hi: jim konn Devacho môg kortat, tãnnim apleam bhavam-bhoinnincho-i môg korcho. Jim konn Jezuk Krist mhonn bhavartan mandun ghetat, tim Deva thaun zolmoleant. Ani jim konn Bapacho môg kortat, tim Tacheam bhurgeancho-i môg kortat. Ami Devacho môg kortanv ani Tacheô adnea palltanv zalear, dubhava virêt ami Devacheam bhurgeancho-i môg kortanv mhonn amkam kollon ieta. Karonn Devacho môg korop mhonngê Tacheô adnea pallop. Ani Tacheô adnea zhodd nhoi, kiteak zankam Devan zolm dila, tãnnim sonvsaracher zoit vhelam. Sonvsaracher ami zoit vhelam tem hem: amcho bhavart. Sonvsaracher zoit vhortat tim konn zait? Jezu Devacho Put mhonn bhavart dhôrtat tinch. Ailo to Jezu Krist; udka ani rogta vorvim To ailo. Udkachêch vorvim nhoi, tôr udka ani rogta vorvim. Ani Povitr Atmo haka govai dita, kiteak Atmo mhonn’lear Sot. Haka tin govaianchi sakxi asa: Atmo, udok ani rogot, ani heam tegãichi govaiki êkuch. Mon’xanchi govaiki ami manun ghetanv; punn Devachi govaiki odik visvas favo asleli. Ani hi govaiki Devan Aplea Puta vixim dil’li asa. Jim konn Devachea Putacher bhavart dovortat, tanchê sovem hi Devachi govaiki asa. Jim konn bhavart tthevinant, tim Devak fottkiro korun sôddtat, kiteak ji govaiki Devan Aplea Puta vixim dilea, ti tãnnim mandun gheunk na. Hi asa ti govaiki: Devan amkam Sasnnik Jivit dilam. Ani hem Jivit Tachea Puta sovem asa. Jeam mon’xam sovem Devacho Put asa, team mon’xank Jivit asa; jeam mon’xam sovem Put na, team mon’xank Jivit-ui na. Tumchê sovem Sasnnik Jivit asa, kiteak tumi Devachea Putacher bhavart dovorla; hem tumi zanno zaunchê khatir hem sogllem hanvem tumkam boroilam. Kitem-i ami Devachê khuxê pormannem Tachê lagim magum, To amkam aikota: Tacher ho amcho purnn visvas asa. Ani zôr sogllim amchim magnnim To aikota mhonn ami zannonv, tôr jem ami Tachê lagim maglam, tem amkam mell’lem mhonn amkam khatri asa. Jim konn aplo bhav vô bhoinn mornnank pavoina toslem patok korta mhonn polletit, tãnnim tea bhava vô bhoinni khatir prarthon korchem ani oxem tanchê vorvim tea bhavak vô bhoinnik—novean sangtam, mornnak pavoina toslem patok korteleank — Jivit melltelem. Mornnak pavoita toslem patok asa: oslem patok korteleam khatir tumi prarthon korchem mhonn hanv sangina. Koxê-i bhaxen vaitt korop mhonn’lear patok, punn sogllim patkam mornnak pavoita toslim nhoi. Jim konn Devachim bhurgim, tim patok korinant, punn Devacho Put tankam ballgun dovorta, ani Noxtteak tancher hat ghalunk koslich podvi na: hem ami zannonv. Ami Devachim, ani akho sonvsar Noxtteachea tabeant asa: hem-i ami zannonv. Anink-ui ami zannonv: Devacho Put ailo ani Khorea Devak ollkhunk Tannem amkam poripurnn somzoni dilea. Hea Deva sovem ani Tachea Puta Jezu Krista sovem ami asanv. Hoch To Khoro Dev ani hench tem Sasnnik Jivit. Priticheam bhurgeamnô, puttleam-murtim sorxilim tumi pois ravchim. Amchê sovem riglelem asa ani sasnnak amchê sovem rigun ravtelem tea sota khatir, Hanv, Vhoddil, Devan vinchun kaddlelê ostorek ani ticheam bhurgeank noman kortam. Tumcho hanv khoreponnim môg kortam; hanvuch nhoi, punn sot ollkhunk pavleant tim sogllim. Sota pormannem ani mogan zôr ami jieleanv, Deva amchea Bapachi ani Bapachea Puta Jezu Kristachi doiallai, konnvallai ani xanti ami sodam bhogunk pavtelenv. Bapa koddchi zoxi ami adnea ghetlea, toxim sota pormannem tujim bhurgim choltat mhonn polleun, mhaka khub anond bhòglo. Tujê lagim ekuch magtam: ekamekacho môg korum-ia. Oxem tuka boroun, Bai, êk novi adnea tuka dinam, punn orombak amkam dil’li tich adnea. Môg korop ani Tacheam adneam pormannem cholop mhonn’lear ekuch; orombak thaun tumi hi adnea aikolea: tichê pormannem cholum-ia. Jezu Krist mon’xasoimb gheun ailo mhonn mandun ghenant tosle zaite fosovpi sonvsarant ximpoddleat. Konnui osle toreche te, fosovpi ani Krist-Virodhi te. Chotraien cholat, na zalear sogllo tumcho vavr nirfôll zatolo ani tumkam purnn inam’ mellchem na. Jim konn Kristachê xikovnnecheam ximam bhitôr ravonant, punn tea-vôn pelean vetat, tanchê sovem Dev na. Jim konn Tannem xikoilam tem samballtat, tanchê sovem Bap ani Put asat. Veglli kosli-i xikovnn gheun konn-ui tumchê modem ietit zalear, tankam tumchê-xim gheum nakat, ani tankam noman legun korinakat. Tumi osleank noman korxeat zalear, tancheam noxtteam kortubamnim tumi tanchim bhagidar zatat. Tumkam zaitem sangchem asa, punn kagdar ani xaien korchem nhoi mhonn mhaka dislem. Punn tumchê-xim ietolom ani tumchê lagim tondda-tonddim uloitolom mhonn mhaka bhorvanso asa, ani oso amcho sontôs sopurnn zatolo. Devan vinchun kaddlelê, tujê bhoinnichim bhurgim tuka noman kortat. Hanv, Vhoddil, Gaiusak, mhojea bhov mogachea ani khorea ixttak, noman kortam. Pritichea ixtta, sogllem tujem borem cholchem mhonn magtam, ani zoxem atmea vatten tum boro asai, toxich tuji kuddichi-i bholaiki bori aschi. Sotak tum visvaxi ravtai ani sota pormannem tum choltai mhonn thõicheam kãi bhavam-bhoinnimnim ieun govai dilea; hem aikun mhaka khub anond zalo. Mhojim bhurgim sota pormannem choltat mhonn aikun, hanv itlo sontoxi zatam, ki mhaka hedo vhôdd sontôs diteli dusri koslich khobor na. Pritichea ixtta, he bhav bhailea ganvche zaun-ui, tum tanchê pasot ghas ghetai mhonn’lear, hem tujem visvaxiponnachem kortub. Ak’khê povitr-sobhek te tujea pritimogachi govai ditat. Devak mandta tê bhaxen tankam vattek goroz tem dixi zalear, borem kortoloi. Te vattek lagle fokot Nanva khatir, ani amchea bhavartachim nhoi team mon’xam koddsun te kãich ghenant. Osleam mon’xank borê bhaxen gheunk ani sota pasot te vavr kortat tantum tankam sohokar diunk amcho kaido. Tumchê povitr-sobhek hanvem ek potr boroilam; punn thõi podvi choloun murgott’ta to Diotrefes amcho odhikar manun gheunk toiar na. Hea pasot, hanv iein zalear, to koso cholta tacho soglleank ugddas kortolom, ani amcheô to koxeô chaddiô korta ani amcher koslim boglanttam ghalta, tem-i bhair kaddtolom. Itlench nhoi; punn jim konn amcheam bhavam-bhoinnink gheunk toiar asat, tankam to addaita ani povitr-sobhentlim bhair ghalta! Pritichea ixtta, osli vaitt dêkh tum dhorinaka, punn borem tem kôr; jim konn borem kortat, tim Devachim bhurgim; punn jim konn vaitt kortat, tãnnim Devak polleunkuch na. Demetriusa vixim sogllim borem sangun govai ditat; ani khud’ Sot govai dita. Ami-i tachê vixim govai ditanv, ani amchi govaiki khori mhonn tum zannoi. Anink-ui zaiteô vostu tuka sangpacheô asleô, punn xaien ani likhnnen sangunk mhaka khuxi na. Khorench mhollear, rokddoch hanv tuka polleunk pavtolom mhonn ravtam, ani tedna tondda-tonddim ami uloitelenv. Xanti tuka! Tuje ixtt ani ixttinni tuka noman kortat; amcheam bhavam-bhoinnink, ek-ekleachem nanv gheun, vicharlam mhonn sang. Judas, Jezu Kristacho chakôr ani Jakobacho bhav, Devan apoil’leam somestank hem potr boroita. Deva amchea Bapache opurbaiechim bhurgim tumi ani Jezu Kristachea asrea khal tumi surokxit asat. Devachi doiallai tumi odik-odik bhogunk pavum, tumchem jivit sodam xantin-somadhanan cholum ani tumchê modem pritimôg subham’ponnan vaddot vochum: he mhoje otrek. s1 Khotte Guru Mhojeam priticheam bhavam-bhoinnimnô, amam-somestanchea taronna vixim hanv tumkam borounk axen otrektalom; punn hea vellar tumkam hanvem borounchi vhôdd goroz asa mhonn mhaka dislem; ani ti mhonn’lear Devacheam soglleam bhoktank sorvkallim dil’lea teach bhavarta pasot tumi dhiran zhuzchem mhonn tumkam ulo marunk. Tumchê modem kãi zannam guptim ghusleant; magam thaun osleam devdhorm nasleleam mon’xancher khastichem formonn poddlelem asa; amchea Devachi doiallai soddun tim kamcharachi vatt dhôrtat, ani Jezu Krist amcho ekloch Patxai ani Somi mhonn tim mandun ghenant. Sorvesporan Aplê porjek Ejiptantli soddoili, punn uprant zãnnim bhavart dhorunk na tanchem Tannem nisontton kelem: hem sogllem tumi bêsborim zannont, tori tancho hanv tumkam ugddas kortam. Devdutancho-i ugddas kortam: tankam vhôdd odhikar dil’lo aslo, punn tãnnim to samballunk na, ani aplem tthikann soddun dilem; Vhoddlea Disachê Zhôddtek Devan tankam kallokachea konddant sasnnak sankllimnim bandun dovorleat. Têch bhaxen, Sodomacho, Gomorracho ani bhonvtonncheam nograncho lôk pozoddponnant lollon aslo ani soimbacher add xindoll patkam kori, dekhun tankam sasnnachea ujeachi khast poddli: hea lokachi khast amkam soglleank êk xiddkavnni. Hanv tumkam sangtalom tim devdhorm naslelim mon’xam toxench kortat: apnnankuch fosovpachim sopnnam tanchim. Oslim sopnam gheun tim apleô kuddi bhoxttaitat, Devachea odhikarachi beporva kortat ani mhoimevont devdutank opman’tat. Mikael mha-devdutan porian oxem korunk na: Moizesachê kuddi vixim devchara kodde vad-vivad kortana, Mikael opmanacheam utramnim tacher khastichem formonn marunk fuddem sorunk na; tannem fokot oxem mhonn’lem: “Sorvespor tujer khastichem formonn marum.” Punn him mon’xam zalear apunn somzonant team vostunchi ninda kortat; thoddeô vostu tim somzotat khorem, punn fokot soimbachea gunnan, ginean-nasloleam mon’zatim bhaxen, punn heôch vostu tancho nas korun uddoiteleô. Tanchem kotta! Tãnnim Kain-achi vatt dhôrli; Balaaman kel’lem toxem, duddvachê axek lagun tim tachêch chukik sampoddlim; Korasa bhaxen tim kolpolim ani tachêch bhaxen tanchem nisontton zata. Tumchê sobhecheam jevnnank tim êk kanttallo: loz nastana pott-bhôr jevtat ani apnnanchoch poramôs kortat. Varem oddun vhorta toslim udok naslelim kupam tim; xorod kallar porian follam dinant toslim zhaddam tim; pallam soit umttun kaddlelim ani sarkinch mel’lim zhaddam tim. Tim dorianchim unchamboll zal’lim lharam, ani tancho fenno mhonn’lear tanchinch lojechim kortubam. Mollbar zollim-mollim firteleam noketram porim him mon’xam: sasnnak kallka-giddachem kondd tankam nirmil’lem asa. Adanva pattlo satvo mullpurux Enok, hannem tanchê vixim adim-fuddem oxem bhakit korun dovorlam: “Ho polleiat, hozaranche hozar apleam povitr dutank gheun Sorvespor ieta. Soglleanchi mon’subi korunk ani devdhorm nasleleancher tancheam odhormi kortubam pasot ani tãnnim Devachi ninda kel’lea pasot khastichem formonn marunk To ieta.” Him mon’xam sodanch gunngunnit astat ani dusreancher guneanv thaptat; tim apleanch vaitt vondovnneam pormannem choltat; tim apnnanchich boddai sangtat, apleach adavak dusreank fulam malltat. Punn, mhojeam mogacheam bhavam-bhoinnimnô, amchea Somia Jezu Kristacheam Apostlamnim tumkam adim-fuddench sangun dovorlam tacho ugddas korat. Tãnnim tumkam oxem sanglam: “Nimanneam disamnim apleam khotteam vondovnneam pormannem choltat toslim mon’xam dixtti poddtelim ani tim tumcheô moskoreo kortelim.” Tinch tim tumchê modem futti ghaltat tim, soimba pormannem choltat tim; tankam Povitr Atmo na. Punn tumi, mhojeam priticheam bhavam-bhoinnimnô, tumchea bhov povitr bhavartacher tumchem jivit bandun haddat ani Povitr Atmeachea preronnan prarthon korat. Devachea mogant thir ravat, ani amcho Somi Jezu Krist Aplê kaklutin ditolo tea Sasnnik Jivitachi vatt polleit ravat. Zancho bhavart donvddollta, tankam doien somzun gheiat; tankam ujeantlim nivarunk vavrat. Herank chotrai gheun kaklut dakhoiat; tanchea patki jivitacho voso lagla tea angleachi porian vitt dhôrat. Atam amchea ekleach Devak ani Tarokak vakhannum-ia! Tumchea bhavartantlim tumi koddsorona zaunk tumkam samballunk Taka podvi asa; toxench Aplea mhoimevont mukhamolla mukhar tumkam niropradi korun ani sontosan bhorun haddunk Taka tank asa. Amchea Somia Jezu Krista udexim hea ekleach Devak mhoima, thorponn, odhikar ani podvi asa kallam-iugam adim thaun, toxench atam-i ani sodam sorvodam. Amen. Jezu Kristan prokasoilem tem hea pustokar boroil’lem asa: Rokddea-rokddem kitem-kitem ghòddchem asa, tem Apleam sevokank dakhounk, hi prokasnni Tannem Deva koddchi ghetli. Aplea dutak dhaddun Jezun ti prokasnni Aplea sevoka Juanvak kollit kelea. Apnnem dekhlam titlem-i, ho Juanv hanga sangta ani oxem Devachea utrak ani Jezu Kristan dil’lê govaikek sakxi dita. Ieuncheô asat team ghòddnneancho kall lagim pavla. Hea pasot jim konn hem bhakit vachtat, ani jim konn tem aikotat ani tantum boroil’lem asa tem palltat, tim subhagi! Aziechea Prantantleam sat povitr-sobhank Juanv he sondex dhaddta. Zo asa, Zo aslo ani Zo ieuncho asa, To, Tachea xinvasona fuddem asat team sat atmeam borabôr, tumkam Aplo mogacho axirvad dium ani xantin bhorum. Khatrecho Sakxi, mel’leam modlo punorjivont zal’lo Poilo, sonvsarantleam patxaiancho Patxai, To Jezu Krist. To amcho môg korta ani Aplea rogtan Tannem amkam amcheam patkantlim soddoileant, ani Aplea Devachi ani Bapachi seva korunk Tannem amkam ladniki razvoddki keleant, Taka ki mhoima ani podvi sodam-sorvodam. Amen! Ho polleiat kupam voir To ieta! Sogllim, Taka tôpla tim legun, Taka polletelim. Ani sonvsarantleô soglleô porza Tachem dukh korteleô! Oxench tem zat’lem! Amen! “Hanv Orômb ani Xevôtt!” “Asa To, aslo To ani ieuncho asa To, Sorvpodvedar”, oxem mhonnta To Somi Dev. Jezuchea ekvottak ani rajeak lagun sosnnikaien koxtt ani dukhi bhògchim poddto tumcho, hanv bhageli, bhav Juanv. Devachem utor hanvem porgôttlem ani Jezu Kristak hanvem sakxi dili dekhun, Patmos nanvachea zunvear mhaka koidi korun dovorlolo. To Somiacho Dis aslo. Tea disa Povitr Atmeacho bhar mhojer ailo, ani mhojê pattlean tuturechea avaza sarko êk motto tallo hanvem aikolo; to oxem mhonntalo: “Tum polletai tem sogllem eka pustokar boroi ani Efez, Smirna, Pergam’, Thiatira, Sardis, Filadelfia ani Laodixeia, heam sat-ui xarancheam povitr-sobhank tem dhaddun di.” Mhojêkodde uloito tallo, konnacho to polleunk hanv voll’lom tedna, bhangaracheô sat divliô hanvem dekhleô. Ani team divleam modem Mon’xachea Puta sarko konn-eklo thõi aslo. To pãiam porian lamb ek vostr nheslolo, ani tachea horddeak êk bhangaracho pott’tto bandlolo aslo hanvem dekhlo. Tachê tokleche kens dhove asle, lonvê sarke, hima bhaxen dhove-ful; ani tache dolle ujea porim zhogzhoktale; agtteant nirbhêl kel’lê pitullê sarke tache pãi chokchoktale, ani ghosgoxit udkachea lotta sarko tachea talleacho avaz. Aplea uzvea hatant to sat noketram dhorun aslo, tachea tonddantli donim-i vattamnim pazleli torsad bhair sortali, ani tachem mukhamoll donparchea zhogzhokit suria sarkem rosrostalem. Hanvem Taka pollelo tedna, êk mel’lo monis koso Tacheam pãiam-xim hanv poddlom. Tannem Aplo uzvo hat mhojer ghalo ani mhonn’lem: “Bhienaka! Hanv To, Poilo ani Nimanno. Hanv To, Jivo asa To! Hanv mel’lom, punn atam Hanv sorvkallak jivo asam! Mornnacheô ani Patallacheô chaviô Mhojê adhin asat. Hea pasot, tum polletai titlem-i boroun dovor — zaum atam ghòddta tem, zaum fuddarak ieunchem asa tem. Mhojea hatant dhôrlelim sat noketram tunvem polleleãi ani toxench sat bhangaracheô divleô, tanchi gupit somzonni hi: sat noketram mhonn’lear sat povitr-sobhanche dut, ani sat divliô mhonngê sat povitr-sobha.” “Efezantlê povitr-sobhechea dutak oxem boroi: ‘Aplea hatant sat noketram dhorun asa ani sat bhangara-cheam divleam modem bhonvta Tacho sondêx ho: Tunvem kitem-kitem kam’ kelãi tem Hanv zannom, kitlo bhar tunvem ghetlai ani kitlê thiraien tum vavurlai, tachi mhaka khobor asa; khotte monis tuka manonant mhonn Hanv zannom; ani konn apostl nhoi astana apunn apostl mhonn sangtat tanchi porikxa tunvem keleai, ani te fottkire mhonn tuka kollon ailam. Tuka sosnnikai asa, Mhojê pasot tunvem zaitem sõslãi ani kalliz soddunk nãi. Tori astana, tum poilim Mhozo môg kortaloi toso atam korinãi: hoch tujer add Mhozo xinn. Tum kitlo khala poddlai tem chint! Tujem jivit bodôl ani poilim kortaloi toxem kôr. Tujem jivit bôdlinam zaxi zalear, Hanv tujê-xim ietolom, tuji divli tichê svatê veli kaddtolom. Tori hi êk bori vôst tuji: Nikolaitanchea pongddachim mon’xam kortat tacho Mhojêch bhaxen tum dvês dhôrtai. Jem kitem Atmo povitr-sobhank sangta, tem kan asleleamnim aikunchem: zoit vhortoleank Devachea Voikunttant asa tea Jivitachea rukhachem foll Hanv khaunk ditolom.’ ” “Smirnentlê povitr-sobhechea dutak oxem boroi: ‘Zo Poilo ani Nimanno, Zo mel’lo ani punorjivont zala, Tacho sondêx ho: Tuje attevitte Mhaka tthave. Tum gorib mhonn Hanv zannom, punn khorem mhonn’lear tum girest! Judev nhoi astana apunn Judev mhonntat ani tuji ninda kortat tanchi Mhaka khobor asa; khorem mhollear, te Soitanacho êk pongôdd! Tuka sõsunk poddtelem tachi bhirant dhorinaka. Aik! Tumchi porikxa korunk devchar tumchê modleam kãi zannank bondkhonnint uddoitolo; dha dis tumi attevitte kaddche poddtele. Morunk poddlear porian visvaxi rav, ani Hanv tuka jivitacho mukutt ditolom. Jem kitem Atmo povitr-sobhank sangta, tem kan asleleamnim aikunchem: zoit vhorteleank dusrea mornnachi bhirantuch na!’ ” “Pergamachê povitr-sobhechea dutak oxem boroi: ‘Donim-i vattamnim pazleli torsad gheun asa Tacho sondêx ho: tum khõi ravtai tem hanv zannom: Soitanachem xinvason asa thõi. Mhojem Nanv tum ghott dhorun asai, ani Soitan ravta thõi Mhojea visvaxi sakxidara, Antipasak jivexim marlo tedna porian Mhojer dovorlolo visvas tunvem soddunk nãi. Tori astana tujer Mhaka êk xinn korcho asa: tumchê modem Balaamachim pattlavdar asat; murtim-puttleank voplelim danam khaun ani kamchar korun Israelacheam putam-dhuvank patkachea fasant ghalunk to Balakak xikoitalo. Têch bhaxen Nikolaitanchê xikovnnechim kãi pattlavdaram tumchê modem asat. Hea pasot jivit bodôl, na tôr Hanv rokddo ietolom, Mhojea tonddantli bhair sorta ti torsad gheun tancher add zhuz manddtolom. Jem kitem Atmo povitr-sobhank sangta, tem kan asleleamnim aikunchem: zoit vhorteleank Hanv liplolo man’na ani êk dhovo fatôr ditolom, ani tacher boroil’lem ek novem nanv. Hem nanv ghetlam tankam mat soddun, anink konnak hea nanvachi khobor na.’ ” “Thiatirentlê povitr-sobhechea dutak oxem boroi: ‘Ho sondêx Devachea Putacho; Tache dolle ujea porim jhigjhigtat, Tache pãi nirbhêl kel’lê pitullê sarke chokchoktat. Tum kitem kortai tem hanv zannom. Tum Mhozo môg kortai, tum Mhaka visvaxi ravlai, tum hurben seva kortai, ani koxttam modem thir ravlai: hem sogllem Hanv ollkhotam. Adim poros atam tum odik borem kortai mhonn Mhaka khobor asa. Tori astana hem Mhaka tujem manona: ti bail Jezabel apunn provadinn mhonn sangun Mhojeam chakrank pozoddponn korunk ani murtim-puttleank bhettoil’lem khann khaunk xikoita ani oxem tankam fosoita, ani tum tika ogo ravtai! Aplem jivit bodlunk Hanvem tika vêll dila, punn aplem pozddem jivit bodlunk tika mon na. Polle, Hanv tika pidda dhaddun aplê khatticher uddoitolom, ani tichê borabôr pozoddponn korteleank bharim vollvo-llaitolom; aplim khottim kortubam sanddun aplem jivit tim bôdlinant zalear, Hanv oxem kortolonch. Ticheam bhurgeancho-i Hanv jiv kaddtolom, ani tedna mon’xanchim monam ani kallzam Hanv topasun kaddtam ani zonn-ekleak ap-apleam kornneam pormannem Hanv farik kortam mhonn soglleam povitr-sobhank kollon ietelem. Punn tumi heramnim Thiatirent ti khotti xikovnn gheunk na, Soitanache khol gutt mhonntat te tumi xikunk nant, dekhun tumcher anink koslench vozon Hanv ghalcho na. Punn Hanv iein porian, tumkam asa to khoro bhavart mat thir samballat. Zoit vhorteleank ani xevôtt porian Mhoji chakri korteleank Mhojea Bapa koddsun Hanvem ghetla toch odhikar taka raxttrancher ditolom ani, matiecheam aidonancho churo kortat toxem, to lokhonddachê betkattien tancher raj choloitolo. Ani Hanv taka fantea velem Noketr ditolom. Jem kitem Atmo povitr-sobhank sangta, tem kan asleleamnim aikunchem.’” “Sardisantlê povitr-sobhechea dutak oxem boroi: ‘Devache sat atme ani sat noketram dhorun asa Tacho ho sondêx: Tum kitem kortai tem hanv zannom. Lôk tum jivo asai mhonn dhôrta, punn khorench mhonn’lear tum mel’lo asai. Tujem jivit Mhojea Devacheam dolleam mukhar sopurnn mhonn Mhojean mhonnunk zaina dekhun, zago za, ani jem kitem tuka ozun urlam, taka novi ghottai di; na tôr tem-i sarkench morun vetelem. Hea pasot kosli xikovnn tuka dil’li ani tunvem aikol’li ticho ugddas kôr, ti samball ani tujem jivit bodôl. Tum zago zaina zaxi zalear, chôr koso Hanv ietolom, ani Hanv ieun tujer poddtolom ti ghoddi tuka kollchi porian na. Punn Sardisant tumchê modleam kãi zannamnim aplim vostram nitoll samball’leant; tim Mhojê borabôr dhovem nhesun bhonvtelim, karonn oxem korunk tim purtim. Zoit vhortoleank osli dhovi nhesônn Dev nhesoitolo ani tanchem nanv Jivitachea pustoka velem Hanv kaddun uddouncho na, punn Mhojea Bapa mukhar ani Tacheam dutam hujir tim Mhojim mhonn ollkhun ghetolom. Jem kitem Atmo povitr-sobhank sangta, tem kan asleleamnim aikunchem.’ ” “Filadelfientlê povitr-sobhechea dutak oxem boroi: ‘Zo Povitr ani Khoro, Tacho ho sondêx: Tachê lagim Davidachi chavi asa: jem To ugôddta tem konnacheanuch dhampunk zaina, jem To dhampta tem konnacheanuch ugddunk zaina. Tum kitem kortai tem Hanv zannom; tujê fuddem Hanvem ek dar ugôddlam, tem konnacheanuch dhampunk zaina. Tuka ili-xi xokti asa, tori Mhoji xikovnn tunvem pall’leai ani Mhaka tum visvaxi ravlai. Polle, Soitanacheam pongddacheank, Judev nhoi astam apunn Judev mhonn sangtat team fottkireank, tujê mukhar haddtolom ani tuka pãiam poddunk laitolom; tuzo Hanv môg kortam mhonn tedna tankam kolltelem. Addkhollimnim thir ravunk Mhoji adnea tunvem pall’leai dekhun, Hanv-ui Mhojê pallien akhea sonvsaracher ieunchem asa tea noxttantlo tuka vattaitolom; hem noxtt soglleam lokanchi porikxa korchê khatir sonvsaracher ietelem. Hanv ieuncho zalom. Tuka asa to bhavart surokxit samball; tujea zoitacho mukutt tujê koddcho kaddunk konnakuch dium naka. Zoit vhorteleank Mhojea Devachea Mondirantle Hanv khambe kortolom, ani thõisorlim tim anink bhair sorchim nant. Tancher Mhojea Devachem Nanv ani Mhojea Devachea Xarachem nanv, mhonngê Mhojea Deva koddsun sorgar thaun denvto novea Jeruzaleachem nanv, Hanv boroitolom. Mhojem-i novem Nanv Hanv tacher boroitolom. Jem kitem Atmo povitr-sobhank sangta, tem kan asloleamnim aikunchem.’ ” “Laodixeientlê povitr-sobhechea dutak oxem boroi: ‘Zo Amen, Zo Visvaxi ani Khoro Sakxi, akhê Devachê rochnecho Orômb, Tacho ho sondêx: Tum kitem kortai tem Hanv zannom. Tum xello-i nhoi ani un-ui nhoi. Kitem tori êk, xello vô un, tum zaunk zai asloi! Punn, xello-i ani un-ui nhoi zaun, tum xellmoddo dekhun, tuka Hanv onkun Mhojea tonddantlo bhair uddoitolom! “Hanv girest ani xrimont, ani mhaka kãi unnem na”, oxem tum mhonntai; punn kitlo tum dolldiro, konixtt, gorib, kurddo ani vingllo, tem tum noklloi. Hea pasot Hanv tuka hi budh ditam: girest zaunchê khatir Mhojê koddsun ujean nirbhel kel’lem bhangar tum viktem ghe, ani tuka nhesunk ani tujea vinglleponnachi loz dhampunk dhovim vostram ghe, ani tuka dixtti poddchê khatir dolleank kaddunk lêp ghe. Zancho Hanv môg kortam, tankam Hanv zupatti ditam ani dêkh xikoitam. Hea khatir hurben bhoron tujem jivit bodôl. Ho polle Hanv darachea umbrear asam ani darar martam; Mhozo tallo aikun konn Mhaka dar ugtem kortit, tanchea ghorant Hanv bhitôr sortolom, tanchê borabôr jevtolom, ani tim Mhojê borabôr jevtelim. Hanv zoitivont zalam ani atam Mhojea Bapachê kuxik Tachea xinvasonar boslam, têch porim zoit vhorteleank Mhojê kuxik Mhojea xinvasonar bosunk ditolom. Jem kitem Atmo povitr-sobhank sangta, tem kan asloleamnim aikunchem.’ ” Hea uprant, mhaka hem dorxon mell’lem: ovchituch sorgar ek ugttem dar hanvem pollelem. Ani tuturê sarko sadovto, hanvem adim aikol’lo tallo mhaka oxem mhonn’talo: “Hangasôr voir ie, ani fuddarak kitem ghòddchem asa tem Hanv tuka dakhoitolom.” Tednanch Povitr Atmean mhaka Aplea tabeant ghetlo. Thõi sorgar konn-eklo bosun asto ek xinvason aslem hanvem dekhlem. Ani thõi bosun asleleachem mukhamoll eka jhighikit mannka porim ani eka tambddea motia vori zhog-zhoktalem; xinvasona bhonvtim pachu sarkem ek donddubal aslem. Hea xinvasona bhonvtim chovis sodreo asleô ani tancher dhovem nheslele ani tokler bhangarache mukutt ghalun aslele chovis zannte asle. Xinvasona thaun bhair sortalim zhoglannim ani goddgoddeancho avaz. Xinvasona mukhar sat pettlele dive zolltale te Devachê chakrek aslele sat atme. Toxench xinvasona mukhar suriakanta vori aspas porzolltolo konvchecho somdir koso aslo. Modem xinvasona bhonvtonnim, pattlean ani fuddlean zaiteam dolleancheô chear jiveô rochnna asleô. Poili rochnna eka xinva bhaxen distali, dusri eka paddkulea bhaxen, tisrek eka mon’xachem tondd aslem, ani chovti rochnna êkê udd’to ghonni sarki distali. Char-ui jiveam rochnnank, ek-ekleak, sov pakotte asle ani tankam sobhonvtim, bhailean ani bhitorlean, khub dolle asle. Dis ani rat tham-bonastana teô rochnna oxem gait asleô: “Povitr, Povitr, Povitr Sorvespor Dev, Sorvpodvedar! To aslo, To asa, ani To ieuncho asa!” Jitlê pavtti teô rochnna xinvasonar boslolo asa ani sodam-sorvodam jieta Taka mhoimechim, stutichim ani dhin’vasnnechim gitam gaitaleô, titlê-i pavtti chovis-ui zannte xinvasonar boslolo asa Tacheam pãiam poddtale ani sodam-sorvodam jieta Tachi puza kortale. Aple mukutt xinvasona mukhar uddoun te mhonntale: “Sorvespora, amchea Deva, soglleam vostuncho Rochnnar Tum, Tujê khuxen teô rochun aileat ani vortunk lagleat, dekhun, Tuji podvi ollkhun, soglleamnim Tuka mhoima ani bhovman diunk favo.” Xinvasonar bosun aslo Tachea uzvea hatant êk kovllo hanvem dekhlo; fuddlean-pattlean tacher boroil’lem aslem, ani sat xik’ke marun to bond kel’lo aslo. Ani hanvem êk khoddegant devdutak pollelo; to vhoddlean oso arddolo: “He xik’ke foddunk ani kovllo ugddunk konnak tank asa?” Punn sorgar, nhoi mhonn sonvsarant ani mel’leanchea konddant porian, kovllo ugto korunk ani vachunk tank aslolo konnuch mell’lunk na. Kovllo ugddunk ani to vachunk purto konnuch mell’lo na dekhun hanv dukamnim roddlom. Tedna zannteam modlea eklean mhaka mhonn’lem: “Roddum naka; polle, Judachea kullantlea Xinvan, Davidachê Kombren, zoit vhelem; te sat xik’ke foddunk ani kovllo ugddunk Taka tank asa.” Tedna polle zalear, char jiveam rochnnam ani zannteam modem xinvasonachea mazar êk Menddro ubo aslolo hanvem dekhlo; hea Menddreak jivexim marlolo mhonn Tache ghai dakhoitale; Taka sat xingam ani sat dolle asle; he dolle mhollear Devachê sevek aslele ani akhea sonvsarant pattoil’le sat atme. Fuddem sorun Menddrean xinvasonar bosun Asloleachea uzvea hatantlo kovllo ghetlo. Tannem to ghena fuddem, char jiveô rochnna Menddrea mukhar sorpott poddleô; toxench chovis zannte-i sorpott poddle. Hanchê modlea zonn-eklea lagim êk kin’nori asli ani dhumpan bhòrlelim bhangarachim aidonam; him aidonam mhonn’lear bhoktanchim magnnim. Te ek novem git oxe gaitale: “Kovllo gheunk ani tache xik’ke foddunk Tum purto, karonn Tuzo jiv kaddlo; ani soglleam kullancheam, soglleam bhasancheam, soglleam porzancheam ani raxttrancheam mon’xank Tujea vikrail’lea rogta udexim Tunvem soddoun Devak dileãi. Amchea Devachi seva korunk Tunvem tankam Tujê razpodvent ani iadnikent vantto diloi, ani tim prithumer raj choloitelim.” Mhojea dorxonant devdutanchê êkê urponjicho tallo hanvem aikolo. Te xinvasona, jiveam rochnnam ani zannteam bhonvtonnim asle. Tancho ankddo mhonn’lear kottincheô kotti ani hozaranche hozar. Ani te soglle arddun oxem gaitale: “Jivexim marlelea Menddreak favo soglli podvi, toxench doulôt, zannvai, boll, mhoima, stuti ani vakhann’nni!” Ani sorga veleô ani sonvsarantleô, patallantleô ani somdirantleô soglleô rochnna — mhonngê akhê srixttint asat teô soglleô rochnna — oxem mhonntaleô teô hanvem aikoleô: “Xinvasonar boslolo asa Taka ani Menddreak vakhann’nni, mhoima, stuti ani podvi sasnnachea sasnnak!” Char jiveô rochnna oso zobab ditaleô: “Amen!” Ani zannte saxttangim poddun bhôztale. Magir mhojea dorxonant Menddro satantlo poilo xik’ko fôddta to hanvem dekhlo, ani char jiveam rochnnantlea ekan goddgoddeacho koso avaz korun “Ie” mhonnta tem hanvem aikolem. Ani polle zalear, êk dhovo ghoddo hanvem dekhlo. Ghoddear bosleleakodde ek dhonu aslem: taka êk mukutt dilo. To jikit jikit gelo ani zoita pattlean zoit vhorunk bhair sorlo. Uprant Menddrean dusro xik’ko fôddlo, ani dusri jivi rochnna “Ie” mhonnta tem hanvem aikolem. Dusro êk ghoddo bhair sorlo; to tambddo-lal aslo. Tacher bosleleak sonvsarant xanticho nas korunk ani mon’xamnim ekamekacho jiv kaddchê khatir tankam challounk podvi dili; dekhun tachea hatant êk vhoddli torsad ghal’li asli. Uprant Menddrean tisro xik’ko fôddlo, ani tisri jivi rochnna “Ie” mhonnta tem hanvem aikolem. Polle zalear, êk kallo ghoddo mhaka dixtti poddlo; tacher bosleleachea hatant êk tagddi asli. Char jiveam rochnnam modlo ail’lê porim êk tallo hanvem aikolo. To oxem sangtalo: “Eka dinarak xêr-bhôr gonv, ani eka dinarak zovache tin xer. Olivancheam ani dak-velincheam molleancho ibadd mat korinakat.” Uprant Menddrean chovto xik’ko fôddlo; ani chovti jivi rochnna “Ie” mhonnta tem hanvem aikolem. Polle zalear, mhaka matso pachvea rongacho êk ghoddo dixtti poddlo. Tacher bosleleachem nanv Moronn, ani tachê pattapatt mel’leancho patall vetalo. Torsadin, bhuken, pidden ani ran’vott zonavoram udexim sonvsarachea chovtea vantteak marun uddounk tankam podvi dil’li asli. Tedna Menddrean panchvo xik’ko fôddlo. Jivexim marleleanche zaite otme hanvem vedi khala dekhle. Devachem utor tãnnim porgôttlelem dekhun ani aplea jivitantlean tãnnim thiraien sakxi dil’li dekhun, tankam jivexim marlelim. Tãnnim vhoddlean oxi bob marli: “Povitr ani Satvik Dhonia, sonvsarantleam mon’xanchi zhôddti korunk ani amchea vikrail’lea rogtacho sudd gheunk kedna porian ravtoloi?” Tedna tanchê modlea zonn-ekleak Devan êk dhovi nhesônn dili ani tancheam vangddeam-chakranchi ani bhavam-bhoinnincho ankddo bhoron ie-sôr anink thoddo kall ravat mhonn sanglem: kiteak zoxem tankam jivexim marlelim, toxench hancho-i jiv kaddcho asa. Ani Menddrean sovo xik’ko fôddlo to hanvem dekhlo. Tedna êk motthi dhornnkamp zali, ani suria eka kallea sakottea porim kallo zalo, ani chondrim’ rogta vori tambddo-lal zalo; zoxem vhoddlem modd ietôch tornnim anjiram rukha velim dhornnir zhoddun poddtat, toxim mollba velim noketram sonvsarar nikllon poddlim. Eka revoddlelea kovllea porim mollob nanch zalem, ani dôr-êk porvôt ani dôr-êk zunvo ap-aplê svatê vele halon pois gele. Tedna sonvsarantle patxai, razpal ani senapoti, girest ani podvedar mon’xam, sogllim gulamam ani svotontr mon’xam, bhiaramnim ani dongracheam khodd-pamnim lipun ravlim. Tãnnim dongrank ani khoddpank oso ulo marlo: “Amcher poddat ani xinvasonar Bosleleachea mukha velim ani Menddreachea krodhantlim amkam lipoiat; karonn Tachea Krodhacho Bhirankull Dis pavla, ani tachê mukhar ubo ravunk konn xokta?” Hachê uprant sonvsaracheam char konnxeancher char devdut aslele hanvem pollele. Pritumecher vô doriacher, vô khõichea-i zhaddar varo marchoch nhoi mhonn, pritumeche char-ui vare te addaun dhôrtale. Ani jivea Devacho xik’ko gheun dusro êk devdut udenti thaun ieto hanvem pollelo. Pritumek ani somdirak vaitt korunk Devan podvi dil’li team chovgam devdutank tannem vhoddlean oso ulo marlo: “Amchea Devacheam chakranchea kopalar êk xik’ko ami marin porian, tumi pritumek, vô somdirak, vô zhaddank vaitt korinakat.” Ani zancher xik’ko marlo tancho ank kitlo to hanvem aikolo: Israelacheam putam-dhuvancheam soglleam kullantlim ekxem-chovêchallis (144) hozar xik’ko marlelim aslim. Judacheam kullantlim bara hozar xik’ko marlelim; Rubenachea kullantlim bara; Gadachea kullantlim bara hozar; Axerachea kullantlim bara hozar; Naftalichea kullantlim bara hozar; Manas’sechea kullantlim bara hozar; Simanvachea kullantlim bara hozar; Levichea kullantlim bara hozar; Isakarachea kullantlim bara hozar; Zebulunachea kullantlim bara hozar; Juzechea kullantlim bara hozar; Ben’jaminachea kullantlim bara hozar xik’ko marlelim. Hachê uprant ovchit êk bhov vhôdd lokachi urpônz hanvem polleli, konnachean mezunk zainasli titli! Soglleam desantli, soglleam kullantli, soglleam porzantli ani soglleam bhasanchi ti urpônz; ani dhovi nesônn ghalun ani apleam hatamnim talliô dhorun, xinvasona mukhar ani Menddrea mukhar ti ubi asli. Tim arddun mhonn’talim: “Xinvasonar bosun aslolea amchea Devak zôi! Toxench Menddreak zôi! Tãnnim amchi soddvônn keli!” Xinvasona, zannteam ani char jiveam rochnnam bhonvtonnim ube asle te soglle devdut xinvasona mukhar saxttangim poddle ani Devak tãnnim bhôzlo; tedna tãnnim oxem mhonn’lem: “Amen! Vakhann’nni, mhoima, zannvikai, dhin’vasnni, bhovman, podvi ani boll amchea Devak sasnnachea sasnnak! Amen!” Zannteam modlea eklean mhojê kodde vicharlem: “Dhovem nhesleant tim konn, ani khõi thaun tim aileant?” Hanvem oso zobab dilo: “Tunch sang mhaka, saiba.” Tannem mhaka sanglem: “Nixttur dhumalleantlo solamoti pavlo to lôk ho. Tãnnim aplim vostram Menddreachea rogtan dhuleant ani dhovim keleant. Hea pasot tim Devachea xinvasona mukhar ubim asat ani Tachea Gabhareant dis ani rat Tachi seva kortat. Xinvasonar bosun asa To tanchê modem tthikann korun tankam xeronna ghetolo. Tankam anink kednanch bhuk lagchi na, tan-ui lagchi na; suriachem unet tankam hulpaun-chem na, nhoi mhonn koddok-ulpoto gormi lagchina; kiteak xinvasonachea mazar asa to Menddro tancho Gonvlli zatolo, ani To tankam jivea udkacheam zhorim-xim pavoitolo; ani Dev tancheam dolleantlim sogllim dukam pusun kadtolo. Menddrean satvo xik’ko fôddlo tedna sumar vordo tas-bhôr sogllem gopchup poddlem. Tedna Deva mukhar ube asto sat devdutankodde tutureo dil’leô hanvem dekhleô. Anink êk devdut ek bhangarachem dhumpel gheun ailo ani vedi-xim ravlo. Xinvasona mukhar aslelê bhangarachê vedicher bhettounk, soglleam bhoktan-cheam magnneam soit zaito dhump taka dil’lo. Devdutacheam hatantlo dhump-dunvor soit bhoktancheam prarthonam Deva mukhar voir choddlim. Tedna devdutan dhumpel ghetlem, tantum vedi vele zollte inglle ghale, ani tem prithumecher xevttilem. Teach farak goddgoddeancho ghonnghonn aikum ailo, zhoglavnnim zhogzhoglim ani dhornn kampli. Magir devdut ap-apleô tutureô gheun teô vazounk toiar zale. Poilea devdutan apli tuturi vazoili. Rogta borabôr korveancho ani ujeacho paus prithumecher poddunk laglo. Prithumecho êk tisro vantto lasun gelo, toxench rukham-zhaddancho êk tisro vantto hulpolo, ani soglli axi lasun geli. Uprant dusrea devdutan apli tuturi vazoili. Ujean lasun veto êk vhoddlo dongôr koso somdirant xevtton poddlo. Somdirachea tisrea vantteachem rogot zalem, somdirant asleleam jiveam mon’zatincho êk tisro vantto melo ani tarvancho tisro vantto futtun gelo. Tedna tisrea devdutan apli tuturi vazoili. Ek vhoddlem noketr, ujeachem agttem zal’lê porim, mollbar thaun konsllun poddlem. Tem nodinchea tisrea vanttear ani udkancheam zorincher poddlem. Tea noketrachem nanv Kôddsann. Udkacho êk tisro vantto koddu zalo, ani koddu zal’lem udok pieun zaito lôk melo. Magir choutea devdutan apli tuturi vazoili ani suriachea eka tisrea vantteak mar laglo, toxench chondrimachea eka tisrea vantteak, ani noketranchea eka tisrea vantteak. Oso tea-tea tisrea vantteacho porzôll palovlo, mhonntôch disachea porzollacho tinantlo êk vantto komi zalo, toxench ratichea porzollacho. Uprant polle zalear, unch varear êk gorudd uddto hanvem dekhlo. To oso arddoto hanvem aikolo: “Teg nimanne devdut apleô tutureo vazoitele tedna prithumer jieteleanchem kotta, kotta, kotta!” Tedna panchvea devdutan apli tuturi vazoili. Ani mollba thaun prithumecher ek noketr poddlelem tem hanvem dekhlem: tea devdutak Devan khol-khol Patallachi chavi dil’li. Noketran patall ugôddlem ani tantlo dhunvôr voir choddlo, eka lamb-rund agtteachea dhunvra sarko. Patallachea dhunvran suria kallo zalo ani akhê prithumecher soglloch kallôk zalo. Tea dhunvrantle toll bhair sorun prithu-mecher ximpoddle ani sonvsarant vinchvank boll asa toslench tankam-i boll dilem. Zomnichea tonnak, vonospotik ani rukhank-zhaddank kitench vaitt korina zaunk, punn aplea kopalar Devacho xik’ko naslo team mon’xank mat vaitt korunk Devan adnea ghali. Mon’xank jive marunk, tollank odhikar diunk na, punn fokot panch mhoine tankam vollvollaunk tanchean zatalem. Vinchvan mon’xak kuns laitôch veg martat tosli foddafôdd toll mon’xank ditale. Tea somoiar mon’xam morunk sôdtelim punn tankam mellchem na, mornnak axetelim punn moronn tanchê thaun pois dhanvtelem. Zhuzak toiar zal’leam ghoddeam porim te toll distale; bhangarache koxe disto tanchê tokler mukutt asle, ani mon’xancheam tonddam sarkim tanchim tonddam aslim. Bailancheam kensam porim tanche kens asle, ani tanche dant xinvancheam dantam osle. Tanchê chhatiek lokhonddachem korttem koxem aslem, ani zaiteam ghoddeancheô ghaddiô nettan zhuzak dhanvtana avaz kortat toslo tancheam pakotteancho avaz aslo. Tankam vinchvam porim xempddiô asleô ani xempddiank kunsam, ani apleam xempddiamnim mon’xank panch mhoine vollvollaunk tankam podvi asli. Tankam êk patxai aslo, ani to mhonn’lear Patallacher podvi aslolo devdut; Hebrêv bhaxen tachem nanv Ab’badon, ani Grik bhaxen Apol’lion, mhonngê nisontton korpi. Poilem noxtt oxem somplem; hachê magir anink don noxttam ieunchim asat. Uprant sovea devdutan apli tuturi vazoili ani Deva mukhar bhangarachi vedi asa ticheam konnxeantlean êk tallo ietalo to hanvem aikolo. “Vorixtt Eufrat nodi-xim char devdut sankllimnim bandlele asat tankam sôdd.”, oxem tea tallean tuturi gheun aslo tea sovea devdutak mhonn’lem. Team char devdutank sôddle; hea vorsachea hea mhoineachea hea disachea heach vorak mon’xakullacho tisro vantto jivexim marunk uddounk tankam Devan toiar korun dovorlele. Tanchem loskor kitlem aslem tem hanvem aikolem: don’xim lak ghoddesvar. Ani mhojea dorxonant ghodde ani tancher boslele ghoddesvar hanvem dekhle: tanchê chhatiek ujea vori korttim aslim, rotna vori nillim ani gondhoka vori hollduvim. Ghoddeancheô tokliô xinvancheam tokleam sarkeô asleô, ani tancheam tonddantlean bhair sortalo uzo, dhunvôr ani gondhok. Heam tin piddamnim — tancheam tonddantlean bhair sortalo to uzo, dhunvôr ani gondhok — mon’xakullacho tisro vantto marun uddoilo. Karonn ghoddeanchem boll tanchea tonddant ani toxench tancheam xempamnim asa, kiteak tancheô xempô sorpam sarkeô, ani tankam lokak mar ditat tosleô tokliô asat. Heam piddamnim marinastana urlolo tea lokan apleanch hatancheam kamank patt korunk na, nhoi mhonn devcharank bhôzpachem soddunk na. Aikunk ani cholunk xokonant tosleam bhanga-racheam, rupeancheam, pitullcheam, fatracheam ani lankddacheam murtim-puttleanchi bhozônn tim korit ravlim. Toxench tãnnim aple khun, aple jadu, aplem pozoddponn ani apleô choriô-nagovnnô soddun diunk nant. Tedna anink eklo bollixtt devdut sorgar thaun denvtalo to hanvem dekhlo. To eka kupan revoddlolo aslo ani tachê toklê bhonvtim ek donddubal aslem; tachem mukhamoll suria vori ani tache pãi ujeache khambe koxe asle. Tachea hatant êk usoil’li kovlli asli. Tannem aplo uzvo pãi somdiracher ani dhavo pãi zomnicher dovorlo ani xinv gorôz ghaltat tê bhaxen vhoddlea tallean to arddolo. To arddolo tedna sat pauttim goddgodd marlo. Ani goddgodd bond zatôch hanv borounk vetalom, punn sorgar thaun oxem uloitalo to êk tallo hanvem aikolo: “Sat pauttim goddgodd marla tem gupit samball; tem boroinaka.” Magir somdiracher ani zomnicher ubo ravlolo hanvem dekhlolo, tea devdutan aplo uzvo hat sorga vatten ubarlo ani Zo sodam-sorvodam jivo asa Tachea nanvachean, ani Zannem sôrg ani tantum asa tem sogllem, pritvi ani tantum asa tem sogllem, ani somdir ani tantum asa tem sogllem rochlam Tachea nanvachean, tannem oso soput ghetlo: “Anink vogôt ascho na! Punn jedna satvo devdut apli tuturi vazoitolo, tedna Devan Apleam sevokank, mhonngê Apleam provadeank, kolloilam tea pormannem, Devachi gupit ievzônn sompadnnek pavteli.” Uprant hanvem sorgar thaun mhojê lagim uloil’lo hanvem aikol’lo to tallo novean mhojê lagim oso uloilo: “Voch ani somdiracher ani zomnicher ubo asa tea devdutachea hatant asa to usoil’lo kovllo ghe.” Hanv tea devduta-xim gelom ani to daktto kovllo mhaka di mhonn hanvem tachê lagim maglem. Tannem mhaka mhonn’lem: “To ghe ani kha; tujea pottant to ambôtt zatolo, punn tujea tonddant mhonva sarko gôdd.” Devdutanchea hatantlo hanvem kovllo ghetlo ani khelo, ani to mhojea tonddant godd-godd mhonv laglo. Punn to gill’lea uprant, pottant to ambott-ambott zalo. Tedna tannem mhaka mhonn’lem: “Anink êk pavtt tunvem zaiteam porzam, desam, bhasam ani patxaiam vixim De vacho sondêx diunk zai.” Tedna zokhpachi êk bet koxi Devan mhaka êk boddi dili ani mhaka sanglem: “Utth ani Devachea Gabhareachem ani vedichem zokh ghe ani thõi kitlo lôk Devak bhôzta to mezun kadd. Punn Gabharea bhailem angonn sôdd; tachem zokh gheum naka kiteak tem raxttranchea lokak dil’lem asa, ani to lôk bavêchallis mhoine Povitr Xar môstitolo. Punn sakotto nhesleleam Mhojeam dogam sakxidarank Hanv dhaddtolom ani te baraixim-satth dis Mhozo sondêx porgôtt’tele. Te dog sakxidar mhonn’lear ajetinachim don zhaddam ani pritu-mechea Dhonia hujir ubeô asleleô don divleô. Konn-ui tankam vaitt korunk sôdtat zalear, tanchea tonddantlo uzo bhair sorta ani tancheam dusmanank nopoit korta; ani toxench konn-ui tankam vaitt korunk sôdtat tannnim he toren morchem podd’ta. Devacho sondêx te diit astele titlo-i kall paus poddona zaunk mollob dhampun dovorchi tankam podvi asa; toxich udkachem rogot korunk zhorincher tankam podvi asa; ani apnnank zai tosli pidda haddun pritumek sotaunk tankam podvi asa. Tancho sondêx porgottun zatôch, Patallantli voir choddun ieta ti mon’zat tancher virudh zhuz korteli; ti tankam haroiteli ani jivexim marteli. Ani tanchea Dhoniak khursar marlolo tea vhodd Xarachea chovkacher tancheô kuddi uddoil’leô asteleô. Tea xarachem khunnadik nanv Sodom’ ani Ejipt. Tancheô thõi sôddloleô kuddi saddê-tin dis soglleam porzancheam, kullancheam, bhasancheam ani raxttran-cheam mon’xancheam dolleam mukhar asteleô, ani teô somadhimnim ghalunk rojea diunchim nant. Pritumentlo lôk tanchea mornna khatir sontostolo. Tim somarombh kortelim, ani ekamekak danam ditelim, kiteak team dogam provadeamnim akhea mon’xakullak khub konixttai haddleli.” Punn saddê-tin disam uprant Devan jivitacho svas tanchê bhitôr ghalo ani te apleam pãiancher ube zale; hem pollelem tim sogllim bharim kamplim. Tedna tãnnim sorgar thaun êk tallo nettan apnnank oxem sangtalo to aikolo: “Hanga voir ieiat!” Ani tancheam dusmanancheam dolleam mukhar eka kupant te sorgar choddle. Têch ghoddiek êk koddok dhornn-kamp zali; xaracho êk dhavo vantto padd zalo, ani sat hozar lôk melo. Urlelea lokan, ttharea kampun, sorginchea Devachi stuti keli. Dusrem noxtt oxem somplem; punn rokddench tisrem noxtt ieunchem zalem. Uprant satvea devdutan apli tuturi vazoili, ani sorgar vhoddlean oxem bob martele talle gazle: “Sonvsarachi razvoddki cholounchi podvi atam amchea Sorvesporachi ani Tachea Kristachi zali, ani sasnnachea sasnnak To raj choloitolo!” Tedna Deva mukhar apleam sodrancher bosun asle te chovis zannte saxttangim poddle, ani Devak tãnnim bhôzlo heam utramnim: “Sorvespora, sorvpodvedar Deva, Tum asai ani Tum asloi! Tuji vhôdd podvi Tujea hatant Tunvem ghetleai dekhun ani Tum raj cholounk laglai dekhun Tuka ami dhin’vastanv! Raxttram challovlim; Tujea ragachi xirantt ieunchi ani mel’leanchi zhôddti korchi hi ghoddi! Tujeam sevokam-provadeank, Tujeam bhoktank ani Tujea Nanvak man diteleank, lhanank toxem vhoddank, inam’ diuncho vêll ho! Sonvsar padd kortat tankanch padd korcho vêll ho!” Sorgar Devacho Gabharo ugto zalo ani tantum Korarachi pett dixtti poddli. Tedna zhoglaunnim zhogzhoglim, goddgoddeancho ghonnghonn gazlo, dhornnkamp zali, korveancho paus poddlo. Tedna sorgar êk vichitr khunna dixtti poddli; suriachea porzollan nhesleli êk bail; ticheam pãiam tolla aslo chondrim’ ani tichea mathear bara noketrancho mukutt. Ti ballônt zaunchi asli ani apleam porsutt-vennink lagun ti bobô-huieli martali. Anink êk khunna sorgar dixtti poddli: ovchituch êk vorixtt tambddo-lal sat tokleancho ani dha xingancho ar; tachê dôr-êkê tokler êk mukutt aslo. Tannem aplê xempdden mollba veleam noketrancho êk tisro vantto nikllaun prithumer uddoilo; ani porsutt zaunchi asli tê bailek bhurgo zaina fuddem taka girasunk, tichê mukhar to ar ubo ravlo. Bailek êk bhurgo zolmolo: to lokhonddachê betkattien soglleam porzancher raj choloitolo. Punn hea bhurgeak Deva sorxim ani Tachea xinvasona sorxim nitt ubarun vhelo. Ti bail apunn oronneant pollun geli; thõi tika baraixim-satth dis udarposonn mellchem mhonn Devan tika êk asro toiar kel’lo. Uprant sorgar ek zhuz suru zalem. Mikael apleam dutank gheun aracher zhuzlo. Ar apleam dutank gheun tanchê virudh zhuzlo, punn he harovle ani tankam sorgar anink zago urlo na. Vorixtt arak bhair uddoilo. Toch to adlo sorôp, ak’khea sonvsarak fosoilo to; tachem nanv Devchar ani Soitan; taka ani tachê borabôr tacheam dutank khala prithumer xevttile. Tedna sorgar oxem vhoddlean mhonntalo to êk tallo hanvem aikolo: “Atam ki amchea Devan Aplê porjechem taronn kelem! Atam Aplea hatant podvi gheun Apunn raza mhonn To dakhoitolo! Atam Tacho Krist sonvsaracher Aplo odhikar cholounk lagtolo! Karonn amcheam bhavam-bhoinnincher add garannem korun tancher amchea Devachea mureant dis-rat arôp ghaltalo taka xevttun uddoilo! Tãnnim Menddreachea rogta pasot ani aplê govaikê khatir tacher zoit vhelem, ani morunk porian kobul asun tãnnim aplea jivachi porva keli na. Hea pasot, sorga ani thõi asleleamnô, sontosbhorit zaiat! Punn prithumechem ani somdirachem kotta! Kiteak devchar bhov ragixtt zaun tumchê modem denvun aila, ani apnnak thoddoch kall asa mhonn to zanno.” Apnnak prithumer xevttilo mhonn arak koll’lem tedna, bhurgeak zolm dil’lo tê bailecheam pallank to laglo; punn oronneant aplea asrear uddun vochunk te bailek eka vorixtt goruddache don pakotte dile; thõi arachê piddapiddentli meklli zaun saddê-tin vorsam tichi bori poramôs zateli. Tedna ti bail lotton vechê khatir aran ticher êk udkachi nôd koxi aplea tonddantli nettan xevttili. Punn dhortori bailechea adarak aili, kiteak aran aplea tonddantli xevttil’li ti nôd dhortoren tondd ugddun gill’li. Uprant ar bailecher ekdom’ tiddlo ani tichê urlolê sonsticher, mhonngê Devacheô adnea palltat ani Jezun dil’lê govaikek visvaxi ravtat tancher, zhuzunk bhair sorlo. Hanv veller ubo aslom. Tedna somdirantlem ek savoz voir sorta tem hanvem pollelem. Taka dha xingam ani sat tokleô asleô; tachea dor-eka xingacher êk mukutt ani dôr-êkê toklecher Devachi ninda kortelem ek nanv aslem. Hanv dekhtalom tem savoz bibttea vaga sarkem distalem: tache pãi vansve-lacheam pãiam sarke asle ani tachem tondd xinvachea tondda sarkem. Tea aran tea savozak apli podvi toxench apli sodôr ani aplo vhôdd odhikar dilo. Tea savzache êkê toklek êk mornnadik ghavo zala mhonn diso, punn to gombhir ghavo peklolo. Sogllo sonvsar ojaplo ani tea savoza pattlean vochunk laglo. Sogllo lôk arak saxttangim poddtalo, kiteak tannem aplo odhikar tea savozak dil’lo. Ani lôk savzak-ui saxttangim poddun oxem mhonntalo: “Savza sarko anink konn asa? Tachê lagim zhuzunk konnak tankot?” Savzak gorvan ulounk ani Devachi ninda korunk rojea dil’li, ani bavêchallis mhoine odhikar cholounk dil’lo. Tem Devacher, Tachea Nanvacher, Tachea Tombucher ani sorgar ravteleancher jastiô marunk laglem. Bhoktancher add zhuzunk ani tankam harounk savzak rojea dil’li, ani soglleam kullancher, porzancher, bhasancher ani raxttrancher taka odhikar dil’lo. Mhonngê, sonvsarachea orombak thaun, jivexim marlelea Menddreachea Jivitachea pustokar zanchim nanvam boroil’lim nant, tim pritumevoilim sogllim mon’xam tea savzak nomoskar kortelim. Kan asleleamnim aikunchem! Zankam bondkhônn nirmil’li asa, tankam bondkhônn chukchi na; zankam torvarin morunk nirmil’lem asa, tankam torvar chukchi na. Dekhun bhoktank thirai ani ghôtt bhavart asunk zai. Uprant anink ek savoz zomnin-tlem voir sortalem tem hanvem dekhlem. Taka eka menddrea vori don xingam aslim, ani tem eka ara bhaxen uloitalem. Hem dusrem savoz poilea savzacho sogllo odhikar tachêch mukhar choloitalem, ani zacho mornnadik ghavo peklolo, tea poilea savzak bhozunk prithumek ani ticher jietolea sogllea lokak boll kortalem. Hem dusrem savoz mottim vismitam kortalem, soglleancheam dolleam mukhar tannem sorgar thaun uzo porian prithumer denvo-so kelo. Poilea savza zagear vismitam korunk dil’lim tanchê vorvim, tannem prithumecheam mon’xank fosoilim, ani torvarincho ghavo zal’lo ani tori jivem aslem tea poilea savzachi êk murti korunk sanglem. Poilea savzachê murti bhitôr jivitacho svas ghalun tika ulounk porian diunk dusrea savzak podvi dil’li asli; ani jim konn tê murtik nomoskar korina zatit, tancho jiv-ui kaddunk taka podvi dil’li asli. Lhanank toxem vhoddank, girestank toxem goribank, svadhin mon’xank toxem gulamank, hankam soglleank aplea uzvea hatar vô kopalar êk xik’ko marunk tem boll kortalem. Ani tea savzachea nanvacho vô tachea nanvachea ankddeacho xik’ko aslea bogor konnakuch vikunk vô viktem gheunk rojea nasli. Hem somzunk zannvaiechi goroz asa. Zannar mon’xamnim savzachea ankddeacho odmas korun gheuncho; to eka mon’xachea nanvacho ankddo. To ankddo soixim-sasoxtt (666). Magir polle zalear, ovchit Sion Dongracher ubo aslelea Menddreak hanvem dekhlo; Tachê borabôr ekxem-chovêchallis hozar (144,000) lôk aslo: tanchea kopolar Tachem Nanv ani Tachea Bapaichem Nanv boroil’lem aslem. Ani udka-ghosghoxeachea avaza bhaxen ani khoddegant goddgoddeachea ghonn-ghonna sarko sorgar thaun ietalo to êk tallo hanvem aikolo; ani toxench hanvem aikolo to avaz kin’noreô vazoiteleanchea nada porim aslo. Xinvasona mukhar ani char jiveam rochnnam ani zannteam fuddem ho lôk ek novem git gaitalo; sonvsarantlim soddoun ghetleant team ekxem-chovêchallis hozar mon’xam bhair konnacheanuch tem git xikunk zainaslem. Him mon’xam sarkinch nirmoll, kedinch boxttonk naslelim; tim sodanch Devachi purnn bhokti korun aileant ani murtim-puttleank tim kedinch bhozunk nant. Zõi Menddro veta, thõi Tachê pattlean tim-i vetat. Devak ani Menddreak bhettoil’lem prothom’ foll koxem mon’xam modlim tankam soddoun ghetleant. Tãnnim kednanch fôtt marunk na ani tanchea jivitant koslench kollonk-khot na. Tea uprant anink êk devdut unch varear uddtalo to hanvem dekhlo; prithumer jieteleank, mhonngê dôr-eka desak, dor-eka kullak, dôr-êkê bhaxechea lokak, ani dôr-êkê porjek porgôttchê khatir, tachea hatant sasnnachem xubhvhortoman aslem. Tannem vhoddlean mhonn’lem: “Devachi bhokti korat ani Taka mhoima diat! Kiteak Tannem mon’subi korcho vêll pavlo. Zannem rochleat sôrg ani sonvsar, somdir ani udkacheô zhori, Taka saxttangim poddun nomoskar korat.” Dusrea eka devdutan uprant mhonn’lem: “Poddlem! Tem vorixtt Babiloniechem xar poddlem! Tannem aplo soro — aplea kamcharacho khôr soro — soglleam porzank dilo.” Tedna tisrea eka devdutan tanchê pattlean vhoddlean mhonn’lem: “Jim konn tea savzak ani tichê murtik saxttangim poddun nomoskar kortat ani aplea kopolar vô aplea hatar tacho xik’ko ghetat, tankam-i Devachea krodhacho soro pieuncho poddtolo; to nirbhêl soro Tannem Aplea krodhachea patrant otun dovorla! To soro pietit titlim-i povitr devdutam hujir ani Menddrea hujir ujeant ani gondhokant tollmolltelim, tankam tollmollaita tea ujeacho dhunvôr sodam-sodam choddot astolo. Tea savzak ani tachê murtik pãiam poddtat tankam ani tachea nanvacho xik’ko ghetla titleank-ui dis-rat visôv na. Hea pasot Devacheô adnea samballtat ani Jezucher bhavart tthevtat team bhoktank thirai asunk zai. Tea uprant sorgar thaun oxem mhonntalo to êk tallo hanvem aikolo: “Hem boroi: Somiachea ekvottant mortat tim subhagi! Khoreponnim sot hem! tanche koxtt ani vavr somple, atam thaun tankam somadhan melltelem, kiteak tim aple bore sevecho fôll gheun vetat. Hôi, khorench tim bhagi, mhonnta Atmo!” Anink-ui polle zalear, ovchit ek dhovem kup mhaka dixtti poddlem ani tacher boslolo konn-eklo mon’xachea puta sarko; tachê tokler êk bhangaracho mukutt ani hatant dharicho êk villo aslo. Tedna anink êk Devdut Gabhareantlo bhair sorlo ani kupacher bosun aslo taka tannem vhoddlean mhonn’lem: “Tuzo villo lai ani lunv, karonn lunvnnecho vêll pavlo ani prithumechem xet pikun suklam.” Uprant kupacher boslolo aslo tannem prithumek aplo villo lailo ani prithumechi lunvnni keli. Tedna sorginchea Gabhareantlo anink êk devdut tosloch dharicho villo gheun bhair sorlo. Magir ujeacher odhikar aslolo anink êk devdut vedi thaun bhair sorlo. Tannem dharicho villo aslelea dutak vhoddlean sanglem: “Tuzo dharicho villo lai ani prithumechê dak-velicheô dakô katrun kadd, karonn dakanche gons pikle.” Tedna devdutan aplo villo prithumek lailo ani prithumechê dak-velicheô soglleô dakô katrun kaddleô ani Devachea krodhachea vhoddlea sorea-ghanneant ghaleô. Dakô pãiamnim pillun kaddpacho ghanno xara bhair aslo; thõi teô dakô pillun kaddleô ani tancho rogta-sarko tambddo ros bhair sorlo; rosacho vhall tis kilometranchê lambaiek pavlo ani sumar dêdd metr unch aslo. Tedna êk vhôdd ani vichitr khunna hanvem dekhli: sat devdut sat noxttam gheun asle. Him nimannim noxttam, kiteak tanchê vorvim Devachea krodhachi xirantt sompadteli. Magir uzo laglelê konvchecho êk doria koso hanvem pollelo; ani zãnnim savzacher ani tachê murticher ani tachea nanvachea ankddeacher zoit vhel’lem, tankam hanvem pollelim: him konvche-chea doria sorxim ubim aslim. Devan dil’leô kin’noriô gheun, tim Devachea chakra Moizesachem ani Menddreachem git gaitalim: “Sorvespora, sorvpodvedar Deva, kitlim vhoddlim ani vichitr Tujim kortutvam! Raxttranchea Raia, kitleô nitivontponnacheô ani sotacheô Tujeô vattô! Sorvespora, konn Tujem bhem dhorina zait? Tuji tust korinastana konn ravot? Karonn Tum ekloch Povitr ani Tujeô formavnneo soglleank tthaveô; dekhun sogllim raxttram ietelim ani Tujê mukhar saxttangim poddtelim.” Tea uprant sorgar Gabharo, mhonngê, Devachê govaikecho Tombu, ugto zal’lo hanvem dekhlo. Sat noxttam gheun asle te sat devdut Gabhareantle bhair sorle; te dhovem-ful sonnachem anglem nheslele, ani tanchê chhatiek bhangarache pott’tte bandlele asle. Tedna char jiveam rochnnantlea ekan sat devdutank sat bhangaracheo vattio dileo: heo sasnnachea sasnnak jietelea Devachea krodhan bhòrleleo asleo. Devachê mhoimê ani podvê thaun upzol’lea dhunvran Gabharo bhòrlo, ani sat devdutanchim sat noxttam sompado-sôr konnacheanuch Gabhareant bhitôr sorunk zainaslem. Tedna Gabharea thaun, team sat devdutank vhoddlean oxem sangto êk tallo hanvem aikolo: “Cholat ani Devachea krodhacheo sat vattio prithumer ôtat!” Poilea devdutan vochun apli vatti prithumer ôtli. Savzacho xik’ko aslo tankam ani tachê murti mukhar sorpottalim tankam, kanttalleachim ani vikallim chovnam zalim. Dusrea devdutan apli vatti somdi-racher ôtli. Udok mel’lea mon’xachea kinn’nnevlelea rogta sarkem zalem ani somdirantli soglli rochnna meli. Tisrea devdutan apli vatti nodincher ani udkacheam zhorincher ôtli ani tanchem rogot zalem. Udkancher odhikar aslelea devdutan oxem mhonnto hanvem aikolem: “Sorvespora, soglleanch Tujeam nirnnoiamnim Tum nitivont, oxe Tuje nirnnoi dekhun, Povitr To Ekloch Tum asai ani Tunch asloi, kiteak bhoktan-chem ani provadeanchem rogot tãnnim vikrailem ani Tunvem tankam-i rogot pieunk dili. Hôi, hem tankam favo!” Ani khud ti vedi oxem uloito hanvem aikolem: “Khorench, sotache ani nitiche Tuje nirnnoi, Sorvespora, Sorvpodvedar Deva!” Choutea devdutan apli vatti suriacher ôtli, ani mon’xank ujea vorvim lasun-bhazun uddounk suriak podvi dili. Lason-bhazto gormen mon’xam jivit bodlun Devak mhoima diunchê svater, tim heam noxttancho odhikar aslelea Devachi ninda korunk laglim. Panchvea devdutan apli vatti savzachê sodrer ôtli. Savzachea akhea rajeacher kallôk poddlo ani aplê dukhik lagun mon’xam apleôch jibô chabunk laglim. Ani apleam kortubam vixim dhuk dhorun, aplem jivit bodôlchê svater, apleam dukhink ani chovnank lagun tãnnim sorginchea Devchi ninda keli. Sovea devdutan apli vatti vorixtt Eufrat nodicher ôtli. Nôd sukli ani tantuntlean udenticheam patxaiank vatt toiar zali. Tedna tin mhelle atme hanvem dekhle: te bebe koxe distale. Tantlo êk atmo arachea tonddantlo, dusro savzachea tonddantlo ani tisro khottea provadeachea tonddantlo bhair sorlo. Vismitam kortat tosle devcharanche atme te. Sorpodvedar Devachea Vhoddlea Disak sonvsarantleam razank te tin atme zhuzak ektthãi kortat. “Polleiat! Hanv eka chora porim ietam! Zagrut ravtat ani aplim vostram rakhtat tim subhagi: hê bhaxen tim vingllim bhonvchim nant ani loka mukhar tankam loz bhògchi na.” Tedna team atmeamnim Hebrêv bhaxen Armaged’don mhonntat tea zagear razank ektthãi kele. Tedna satvea devdutan apli vatti varear ôtli. Gabhareantlea xinvasona thaun êk motto tallo gazlo: “Somplem!” Zhoglannim, goddgoddeanche ghonnghonn ani khoddegant dhornn-kamp zalim. Mon’xakull rochlam tê meren hedi motti dhornnkamp kednanch zaunk na; soglleam poros paxtt hi dhornnkamp! Vorixtt Xar futtun tiche tin vantte zale, ani raxttram-raxttramnim xaram padd zalim. Devan xrêxtt Babiloniecho ugddas kelo ani Aplea krodha-soreachea patrantlem tika pieunk dilem. Zunve soglle pollun gele ani dongor-porvot nanch zale. Korveanche vhoddle fator, dôr-êk sumar pon’nas kilogramanchea vozonacho, mollbar thaun mon’xancher poddle. Ani korveanchea pausachea noxttak lagun, mon’xamnim Devachi ninda keli, itlem marekar vign tem. Sat vattio gheun asle team sat devdutantlo eklo mhojê-xim ailo; tannem mhaka oxem sanglem: “Zaiteam udkam sorxim aplea asonar bosli asa te nanvoste xindôll-bailek kosli xikxa poddunk veta ti hanv tuka dakhoitolom. Tichê kodde prithume-cheam soglleam razamnim kamchar kela ani sonvsarantlo lôk tichê xindollkecho soro pieun bebdo zalo.” Tedna Atmeachea ekcharant astana devdutan mhaka oronneant vhelo. Thõi êk bail hanvem polleli; sogllem ang devnindecheam utramnim bhorlelea eka tambddea savzacher ti bosun asli; tea savzak sat tokleô ani dha xingam aslim. Ti bail zambllea ani tambddea rongachim vostram nhesun asli, tinnem bhangar-xringar ani mannkam-motiam ghal’lim. Tichea hatant ek bhangarachem patr aslem, ani hem tichea kamchari jinnechê ollxiken ani kanttallean bhòrlelem. Tichea kopalar ek gupit orthachem nanv boroil’lem aslem; tem hem: “Hanv podvedar Babilonia! Sogllê xindollkechi avoi hanv, sonvsarant upzotat titleam-i ollxikank hanvuch zolm ditam.” Ani bhoktanchem rogot ani Jezucheam sakxidaranchem rogot pieun ti bail bebdi zal’li hanvem polleli. Hanvem tika oxi dekhli tedna, hanv sarkoch thottaklom. Devdutan mhaka vicharlem: “Tum kiteak itlo thottak zalai? Hê bailecho gupit ôrth ani ti boslea tea sat tokleanchea ani dha xinganchea savzacho gupit ôrth hanv tuka sangtam. Tunvem dekhlãi tem savoz ekdam jivem aslem, punn atam jivem na; tem patallantlem voir sorchem asa ani tachem nisontton zatelem. Sonvsarachea orombak thaun jeam mon’xanchim nanvam jiveanchea pustokar boroil’lim nant, tim sogllim savzak polleun thottaktelim, karonn tem ekdam jivem aslem, uprant jivem na zalem, punn novean portun dixtti poddtelem. Hanga zannvaiechi ani somjikaiechi goroz: sat tokleô mhonngê bail bosloli asat te sat dongor. Têch bhaxen sat patxai; tantle panch sorun gele, eklo atam raj choloita, ani nimanno eklo azun ieunk na. To ietolo tedna ilo-so vêll sodrer urtolo. Ekdam jivem aslem punn atam jivem na tem savoz, tem-i atthvo patxai, punn tea satantlo eklo, ani tachem nisontton ieunchem asa. Tunvem polleleãi tim dha xingam dha patxai: te ozun razkarbhar cholounk lagunk nant, punn te savza borabôr ek vor-bhôr razodhikar ghetele. Apli podvi ani odhikar savzachea hatant ghalunk te soglle ekmotache. Te Menddrea virudh zhuztele, punn Menddro Tannem apoil’leam, vinchloleam, visvaxi pattlavdaram borabôr tankam haroitolo, kiteak To dhoniancho Dhoni ani patxaiancho Patxai. Devdutan mhaka anink-ui sanglem: “Jeam udkam sorxim aplea asonar xindôll-bail bosloli asa mhonn tunvem pollelãi, tim udkam mhonn’lear soglleô porza, urponji, raxttram ani bhasô. Punn tunvem polleleãi tim dha xingam ani savoz xindôll-bailecho dvês kortelim; tichê lagim asa titlem-i luttun kaddtelim, ani tika nagddi korun sôddtelim; tichem mas khatelim ani ujean ticho bhosm kortelim. Kiteak Devachem utor pallon ie porian, Devan Aplo hetu tanchea monant ghala ani oso tãnnim aplo razodhikar savzachê adhin korcho mhonn Tannem tankam ekmotache keleat. Ani tunvem polleleai ti bail pritumecheam patxaiancher razvoddki choloita ti, tem vorixtt xar. Tea uprant anink êk devdut sorgar thaun denvun ieto hanvem pollelo. Taka vhôdd odhikar aslo ani tachea tezan sogllo sonvsar jhigjhiglo. Tannem vhoddlean oxi bob marli: “Poddlem rê, poddlem! Tem vorixtt Babiloniechem xar poddlem! Tantum atam firtat devchar ani mhelle bhut; tem atam zalam soglleam jin’sacheam ollxikonneam suknneanchem biradd ani mhelleam ani bhirankull zonavorancho vivôr. Sogllim raxttram tachea pozoddponnacho khôr soro pielim, prithumecheam soglleam razamnim tachê kodde kamchar kelo; ani tachea nirmoriadi xindollken sonvsarantle veapari girest zale.” Magir anink êk tallo sorgar thaun oxem sangto hanvem aikolo: “Bhair sorun ie, Mhojê porjê! Thõisorli bhair sor! Ticheam patkamnim tumi vantto gheum nakat; ticher poddlea tê xikxechim tumi bhagidar zaum nakat. Kiteak ticheam patkanchi ras mollba itli unch pavlea, ani ticheam khotteponnancho Devak ugddas aila. Ti tumchê kodde vaglea toxench tumi-i tiche kodde vagat; jem sogllem tinnem kelam, tem dupett mapan tika farik korat. Tumkam tinnem aplea patrant pieunk toiar korun dilam, tôr atam don pavtti odik khôr sorean tichem patr bhorun diat. Jitlea dobajean ani rubapan tinnem apleakuch vaddoilea, titli tika atam tollmolle ani dukh bhogunk diat. Kiteak ti aplea monant oxem mhonnot asa: ‘Sodrer bosloli ranni hanv! Vidva bail nhoi hanv, ani vidvechem dukh kodinch mhaka bhogunk poddchem na!’ Haka lagun ekach disa bhitôr soglleô khasti ticher poddteleô: pidda, dukh ani bhuk; tosoch ujean ticho bhosm zatolo, kiteak ticher khastichem formonn marta to Sorvespor Dev bollixtt!” “Tichê xindollkent ani dobajeant bhag ghetale te raza, ujean ticho bhosm zatana voir sorto dhunvôr polleun, tichê vixim roddtele ani vilaptele. Tiche vollvolle apnnank-ui lagtit mhonn bhieun, pois-pois ravun te mhonn’tat: ‘Kotta! Babilonia, vortea xarachem kotta! kitlem tezvont asli tum! Ani kitlem podvedar! Tori eka vora bhitôr tujem nisontton zalem!’ Sonvsarantle soglle veapari tichê pasot roddtat ani vilaptat, kiteak tarvamnim haddlolo tancho mal vikto gheunk ani-anink konnuch na: Tanchem bhangar, tanchem rupem, tanchim mannkam ani motiam, tanchem sonnachem ani zambllem lugott, tanchem rosmichem ani tambddem lugott, tanchim chondonachim lankddam, tanche hotia-dantache ani moladik lakddache, pitullche, lokhonddache ani pakhonnache nog konnuch ghena toxench konnuch ghena atam tanchi tiki, mosalo, gondhrôs ani dhump, ani pormollit molôm’; konn ghevpak na tancho soro ani oliv-tel, tanchem pitt and gonv, tanchim gorvam ani menddram, tanche ghodde ani gaddiô, tanchim gulamam ani koidi kel’lim mon’xam. Veapari taka mhonntat; ‘Tum axetali teô moladik vostu nanch zaleô; sogllo tuzo dobazo ani jivitacho porzôll ubun gelo ani anink kednanch te tuka portun mellpache nant!’ Tea xarant veapar korun girest zal’le veapari tea xarachê khastichê bhirantin pois-pois ravun oxe pinrgunn vilaptele; te mhonntele: ‘Kotta! Vorixtt xarachem kotta! Tem sonni ani zambllim vostram nhestalem, mannkam-motianchea xringaran jhigjhiktalem! Tori eka vora bhitôr hea sogllea dobajeacho bhosm zalo!’ Tarvanche kopit ani poinnari, tarvotti ani doriantlem aplem udarposonn zôddtat te, borech pois ravun ani bhosm zal’lea xara thaun voir sorto dhunvôr polleun, oxem arddun mhonntele: ‘Hea vorixtt xara oslem ek xar kednanch aslem?’ Tãnnim aplê tokler dhull uddoili, ani pinrgun ani vilapun oxi bob marli: ‘Kotta! Tea vorixtt xarachem kotta! Doriantlean firtoleam tarvancheam soglleam dhoniank aplê dobajik jinnê vorvim tem girest kortalem! Tori eka vora bhitôr tem sarkem padd zalem!’ Sorga, tachea ghorttanna khatir khuxal za! Bhoktamnô, apostlamnô, ani provadeamnô, tumi-i khuxal zaiat! Kiteak tumkam tannem vaitt kel’lê khatir Devan taka ho nisonttonacho nirnnoi dilo!” Uprant eka bollixtt devdutan danteachea vhodda pedda sarki êk fatôr ghetli ani oxem mhonnun somdirant ti uddoili: “Hê bhaxen ekach faran vorixtt Babiloniechem xar nettan xevtton vetelem ani portem tem kednanch anink dixtti poddchem na. Anink kednanch tujeam rosteancher, Babiloniê, aikunk ieuncho na songitancho nad: vinno vazoitoleancho ani gavpeancho nad, tosoch pirlukecho ani tuturecho avaz! Koslêch torecho kolakar tujê bhitôr anink kodinch dixtti poddcho na! Danteacho avaz anink kodinch tujeam kottam bhitôr aikunk ieuncho na! Anink kodinch tujeam ghoramnim diveacho uzvadd loklokcho na! Anink kodinch tujê-xim aikunk ieunchim nant hoklê-novreachea lognachim khuxal gitam! Tuje vepari sonvsarache kunvor zal’le, ani tujeam ghaddiponnamnim sogllim raxttram fosovlim! Ani provadeanchem, bhoktanchem ani sonvsarant jivexim marleant team soglleanchem rogot Babiloniecheam rosteancher vikrail’lem dixtti poddlem.” Tedna sorgar asto motte urponjiche boballa sarko hanvem to avaz oso aikolo; “Sorvesporak zôi! Devan amchem taronn kelem, Takach favo mhoima, Tachich soglli podvi! Nitin To zhôddti korta ani neaia pormannem To khast laita! Aplea pozoddponnan sonvsar kusoitali te nanvvostê xindôll-bailek Tannem khast laili; Apleam chakranchem tinnem rogot vikrailem dekhun Tannem tika khast laili.” Anink êk pavtt tãnnim oxi bob marli: “Sorvesporak zôi! zôi! Babiloniecho dhunvôr voir choddto kednanch thambchona!” Tedna chovis zann-teamnim ani char jiveam rochnnamnim xinvasonar bosun aslelea Deva mukhar saxttangim poddun oxem mhonn’lem: “Amen! Sorvesporak zôi!” Uprant, “Sogllim tumi, Devacheam chakramnô, Tachi bhokti kortoleam dhaktteam-vhoddleamnô, amchea Devachi tust korat!”, oxem mhonn’to, xinvasona thaun êk tallo ailo. Magir eka ghosghoxeachea avaza sarko ani zonnzonnit goddgoddeachea boballa vori êkê vhôdd urponjicho koso êk tallo hanvem aikolo; to oso mhonntalo: “Sorvesporak zôi! Sorvesporan, amchea Sorvpodvedar Devan, Apli razvoddki hatant ghetli! Khuxal zaum-ia, anondbhorit zaun Devak vakhannum-ia! Kiteak Menddreachea lognacho vogôt pavlo ani Tachi potinn lognak toiar zali. Jhigjhigit sonnachi dhovi-ful nhesônn Devan tika ghalunk dilea.” Sonnachi nhesônn mhonngê bhoktancheô boreô kornneo. Tedna devdutan mhaka sanglem: “Oxem boroi: Menddreachea lognachea jevnnak amontronn ghetlam tim subhagi!” Tea bhair tannem mhonn’lem: “Ho khoreponnim Devacho sondêx.” Tea uprant taka nomoskar korunk hanv tacheam pãiam poddlom, punn tannem mhaka sanglem: “Toxem korinaka. Jezuchi sakxi mandun ghetleleam tujeam bhavam-bhoinnim soit, tujê bhaxen, hanv ek chakôr. Devakuch tunvem oso bhôzcho.” Jezuk sakxi ditat tim Atmeachea preronnan aplo sondêx ditat. Tedna mhaka sôrg ugto zal’lo dixtti poddlo, ani thõi êk dhovo ghoddo aslo. Tacher boslolo aslo Tachem nanv Visvaxi ani Satvik; To nitivontponnan mon’subi korta ani nitivontponna pasot zhuzta. Tache dolle ujeachem agttem koxem, ani Tachê tokler zaite mukutt asle. Tacher ek nanv boroil’lem aslem, punn Tachê bhair tacho ôrth konnuch nokllo aslo. Tannem ghal’lem tem vostr rogtan xitoddail’lem. “Devacho Sôbd” Tachem nanv. Tachê pattlean vetalim dhoveam ghoddeancher bosun ani dhovem-ful sonnachem nhesun sorginchim loskoram. Raxttrank harounk Tachea tonddantli êk pazleli torsad bhair sortali. Êkê lokhonddachê betkattien To tancher raj choloitolo, ani Sorvpodvedar Devachea krodhachea ghanneant dakô mollun soro bhair kaddtolo to Toch. “Tachea vostracher ani Tachea zangllacher boroil’lem asa hem nanv: “patxaiancho Patxai ani dhoniancho Dhoni!” Uprant suriacher ubo aslolo êk devdut hanvem pollelo. Tannem varear uddto soglleam suknneank vhoddlean bob marli: ‘Ieiat, ani Devachea vhoddlea jevnnak ektthãi zaiat! Razanchem, senapotinchem, podvedar viranchem mas, ghoddeanchem ani tancheam ghoddesvaranchem mas, sogllê torechea lokachem, mhonngê svadhin mon’xanchem ani gulamanchem, lhananchem ani vhoddanchem mas, khaunk ieiat.” Uprant savzak ani sonvsarantleam patxaiank ani tancheam loskorank hanvem pollelim; Ghoddesvaracher ani Tachê foujecher zhuz manddunk tim zomlelim. Savzak dhôrlem, ani tachê borabôr fottkirea provadeak; savzachea nanvan tannem vismitam kel’lim tanchê vorvim tea savzacho xik’ko ghetleleank ani tachê murtik bhôzleleank tannem fosoil’lim. Ani savzak ani khottea provadeak zolltea gondhokachea ujeachea konddant jivinch xevttun uddoilim. Ghoddesvarachea tonddantli bhair sorto torsadin urloleam soglleancho jiv kaddlo, ani sogllim suknnim tanchem mas khaun dhadoxi zalim. Tedna aplea hatant patallachi chavi ani êk zôdd sankôll gheun, sorgar thaun denvto êk devdut hanvem pollelo. Tedna arak, adlea sorpak — mhonngê Devcharak vô Soitanak — dhôrlo ani taka hozar vorsank sankllin bandun dovorlo. Ani tim hozar vorsam soro porian tannem anink raxttrank fosoina zaunk taka patallant xevttilo, tea patallak chavi marun daracher xik’ko marlo. Tea uprant thoddo-so vêll taka soddunk Devachi ievzônn asa. Uprant hanvem sodrô polleleô, ani je konn tancher boslele tankam Devan zhôddti korchi podvi dili. Toxench Jezuk sakxi dil’lê khatir ani Devachem utor porgôttlam mhonnun zanchem xins kaplelem, tankam hanvem dekhlim. Tãnnim savzak ani tachê murtik bhozunk naslim ani savzacho xik’ko aplea kopolar vô aplea hatar gheunk naslo. Tim sogllim novean jivim zalim ani hozar vorsam-bhôr tãnnim Krista borabôr razvoddki choloili. Hem poilem punorjivontponn. Hozar vorsam bhòrchê adim her mel’lim mon’xam punorjivont zaunk nant. Poilea punorjivontponnant zankam vantto mell’lo, tim subhagi ani povitr. Ujeachea konddant dusrea mornnachê podvê khal tim aschim nant, punn Devachi ani Kristachi seva korunk tim iadnik zatelim, ani Tachea sangata êk hozar vorsam raj choloitelim. Êk hozar vorsam bhòrlea uprant, Dev Soitanak bondkhonnintlo soddoitolo ani to akhea sonvsaracheam raxttrank fosounk bhair sortolo. Team raxttranchim nanvam Gog ani Magog; Soitan tankam zhuzak ektthãi kortolo; doriachê deger renvecheô konniô asat titli vhôdd team fouzancho ank. Heô fouzô ak’khea desacher choddun geleô ani bhoktanchea penneak, mhonngê Devachê opurbaiechea Xarak, tãnnim veddho ghalo. Punn sorgar thaun uzo denvlo ani ujean tancho bhosm kelo. Tedna tankam fosoitalo tea devcharak Devan zolltea gondhokachea konddant xevttilo; tantum to savzachea ani khottea provadeachea vangdda dis-rat tollmolltolo sasnnachea sasnnak. Uprant hanvem dekhlem ek vhoddlem dhovem xinvason ani tacher bosun aslo Taka hanvem pollelo. Tachê mukha velim prithum’ ani mollob pollun gelim ani tanchi savlli porian urunk na. Ani mel’leam mon’xank hanvem pollelim, vhoddank toxem lhanank: tim xinvasona mukhar ubim aslelim. Pustokam ugôddlim, ani uprant anink ek pustok ugôddlem; hem mhonn’lear Jivitachem pustok. Pustokancher tancheô kornneo boroil’leô asleô tea pormannem mel’leanchi mon’subi zali. Aplea pottant aslim tim mel’lim mon’xam somdiran portun dilim. Toxench mornnan ani patallan apnnachê adhin asleleam mon’xank portun dilim. Ani ek-ekleacheam kornneam pormannem Devan tanchi zhôddti keli. Tedna mornnak ani patallak ujeachea konddant xevttilim. (Hem ujeachem kondd mhollear dusrem moronn.) Zanchim nanvam jiveanchea pustokar boroil’lim naslim, tankam soglleank ujeachea konddant xevttilim. Hanvem ek novo sorg ani êk novi prithum’ dekhlim. Poilo sorg ani poili prithum’ nanch zalelim, ani thuim ani-anink somdir naslo. Aplea nhovreak nettoun toiar kel’lê hoklê porim Povitr Xar, novem Jeruzalem, sorgar thaun Deva koddsun denvto hanvem pollelem. “Ho polleiat mon’xam modem Devacho Tombu! To tanchea sangata ravtolo, tim zatolim Tachi porza ani Hoch tanchea-sangata-Dev zatolo tancho Dev. Tancheam dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant. Adlem sogott soron gelem.”, oxem Xinvasona thaun vhoddlean oso uloito, êk tallo-i hanvem aikolo. Uprant xinvasonar bosun aslo Tannem mhonn’lem: “Polleiat, soglleô vostu Hanv noveô kortam!” Tannem mhaka anink-ui sanglem: “Hem boroun dovor, kiteak him utram khatrechim ani sotachim.” Ani Tannem mhaka mhonn’lem: “Zalem! Hanv Alfa ani Omega, mhonngê Orômb ani Xevôtt. Jivitachem udok vhanvta tê zhorintlem tanel’leank Hanv funkott pieunk ditolom. Zoit vhorteleank Mhojê koddsun hem daiz melltelem; ani Hanv tancho Dev zatolom, ani tim zatelim Mhoje put ani Mhojeô dhuvô.” Punn jim konn sakxi diunk bhirantin pattim sorleant, vô bhavartak visvaxi ravlim nant, jim konn noxtt korun bhoxttotat vô khun kortat, jim konn pozoddponnant lolltat vô ghaddiponn choloitat, jim konn murtim-puttleank bhôztat vô dusreank fosounk bhonvtat — heam soglleanchem daiz, gondhokan zollto ujea-kondd. Hem tem dusrem moronn.” Nimanneam sat noxttamnim bhòrleleo vattio gheun asleleam sat devdutantlo eklo mhojê-xim ailo; tannem mhaka mhonn’lem: Hanga ie, hanv tuka ti hokol, Menddreachi potinn ti dakhoitam. Tedna, otmea-ekcharant, tannem mhaka eka unch ani vhoddlea dongrachê tonkxer vhelo, ani sorgar thaun, Deva koddsun denvto Jeruzalem, Povitr Xar tem, mhaka dakhoilem. Tem Devachê mhoimen porzolltalem toxench tem eka bhov moladik mannka porim, eka gomeda vori, aspas polleunk dita toslea suriakanta bhaxen chok-choktalem. Taka ek vhoddlem ani unch kott aslem ani kottak bara darvontte asle, ani dôr-êk darvontto rakhunk êk devdut aslo. Darvon-tteancher Israelacheam putam-dhuvan-cheam bara kullanchim nanvam boroil’lim aslim. Udentik tin darvontte asle, ut’torik tin, dokhinnek tin, ani ostomtek tin. Xarachem kott bara buneadincher bandlelem, ani team buneadincher Menddreacheam bara apostlanchim nanvam boroil’lim aslim. Tea Xarachem, tacheam darvon-tteanchem ani tachea kottachem zok kaddchê khatir, mhojê lagim uloitalo tea devdutachea hatant zok-kaddpa êk bhangarachi boddi asli. Xar sarkem chovkott aslem, êkêch lambaiechem ani rundaiechem. Devdutan tê boddien tea Xarachem zok kaddlem: tem don hozar charxim kilometr lamb aslem; tachi rundai ani unchai titlich. Uprant tannem kottachem-i zok kaddlem: tachem zok charxim trepon metr asle. Devdutan tem mon’xanchea chaltea zokan mêzlelem. Tem kott suriakan-tachem bandlelem, ani xar zalear osol bhangarachem, ani hem bhangar aspas polleunk dita toslê konvchê vori jhigjhigtalem. Kottacheô buneadi soglleam jin’sancheam mannkam-motiamnim nettoil’leô. Poili bunead suriakant, dusri nillrotn, tisri xivdhatu, chovti pach, panchvi gomêd, sovi indronill, satvi chondrokant, atthvi berozô, novi hollduvem-mannik, dhavi bhangari mannik, ikravi zambllem-mannik, ani baravi iakutt. Bara darvontte mhonngê bara motiam, dor-êk darvontto eka motiacho. Xaracho mukhêl rosto osol bhangaracho, konvchê porim aspas polleunk dita toslea bhangaracho. Xarant hanvem Gabharo polleunk na, kiteak tacho Gabharo khud Sorv-podvedar Sorvespor Dev ani Menddro. Xarak suriachea vô chondrachea uzvaddachi goroz na, kiteak Devachi mhoima tacher aplo porzôll ghalta ani Menddro tacho Divo. Raxttram tachea uzvaddak bhonvtelim ani pritumeche patxai apli dhon-girestkai taka haddun ditele. Xarache darvontte dis-bhôr ugtech astele kiteak thõi rat aschich na. Raxttranchi dovlôt ani bhanddaram thõi pavtelim. Mhellem kitench Xarant bhitôr sorchem na: jim konn ollxik vô khottepon kortat, tim koxêch bhaxen bhitôr sorchim nant. Zanchim nanvam Menddreachea Jivitachea pustokar boroil’lim asat, fokot him Xarant provês kortelim. Tedna Devdutan mhaka Jivitachea Udkachi, konvchê porim jhigjhigit, êk nôd dakhoili: Devachea ani Menddreachea xinvasona thaun ti bhair sortali, ani Xarachea mukhêl rostea porian vhanvun pavtali. Nodichê dôr-êkê deger Jivitachem ek zhadd aslem; tankam vorsant bara pavtti, dôr-mhoineant êk pavtt, follam zatat; raxttrancheô pidda kaddunk tancheam panank gunn asa. Xirap-poddlolem thõi kãi aschench na. Xarant Devachem ani Menddreachem xinvason astelem; Tachim chakram Taka bhôztelim. Tim Taka rup-rup polletelim ani tancheam kopolar Tachem Nanv boroil’lem astelem. Rat ani-anink aschi na ani tankam diveanchea vô suriachea uzvaddachi goroz aschi na, kiteak khud Sorvespor Dev tancher Aplo uzvadd ghaltolo ani tim sasnnachea sasnnak razvôtt choloitelim. Uprant devdutan mhaka sanglem: “Him utram visvas favo-aslelim ani khorim. Provadeank preronn dita tea Sorvespora Devan, vegim kitem ghòddchem asa tem Apleam chakrank dakhounk, Aplea dutak dhaddla.” “Polleiat — mhonnta Jezu — Hanv rokddo ieuncho zalom! Hea pustokantlim bhakitam samballtat tim subhagi!” Hanvem, Juanvan, heô soglleô vostu aikoleat ani polleleat. Ani sogllem aikun ani polleun zaina fuddem, mhaka hem sogllem dakhoil’lem tea devdutak bhozunk tacheam pãiam saxttangim poddlom. Punn tannem mhaka sanglem: “Oxem korum naka! Tujeam bhavam-provadeam ani hea pustokantlim utram samballteleam soit, tuje sarko hanv-ui chakôr. Fokot Devak tunvem bhozunk zai.!” Ani tannem mhaka sanglem: “Hea pustokantlim bhakitam xik’ko marun dhampun dovrinaka; kiteak kall lagim pavla. Khotteponn kortat tãnnim khotteponn korit ravchem, ani mhellim asat tim odik mhellim zaunchim; punn Devak manovleleam mon’xamnim Devak man’ta tench korit ravchem, ani povitr mon’xamnim povitrponnan cholot rauchem.” “Polleiat hanv porot ieuncho zalom! Soglleank, tancheam zonn-ekleacheam kornneam pormannem, farik korunk, Mhoji mozuri gheun Hanv ietam. Hanv Alfa ani Omega, mhonngê Poilo ani Nimanno, Orômb ani Xevôtt!” Aplim vostram dhutat tim subhagi; oxem korun Jivitachea Zhaddachem foll khaunk ani darvontteantlean Xarant provês korunk tankam hôk’k astolo. Punn ier sogllim Xara bhair astelim: khottim-noxttim mon’xam, ghaddiponn choloitat tim, pozoddponnak lobhdol’lim, khun korpi, murtim-puttleank bhôzpi, ani utramnim toxench jivitachê chalin fottingponnam kortat tim. Hanv Jezu: povitr-sobhank heô vostu kollit korunk Hanvem Mhojea dutak tumchê-xim dhaddla. Hanv To, Davidachê kulliechi Kombri, Hanv To, Fantea-jhigjhigit Noketr! Atmo ani Hokol oxem mhonntat: “Ie!” Hem aikotat titleamnim-i mhonnchem: “Ie!” Konnank tan laglea? Tumi lagim ieunchem! Jivitachem udok zai tumkam? Tumi ieunchem ani funkea tem gheunchem! Jim konn hea pustokantlim bhakitam aikotat, tankam hanv Juanv hi xiddkavnni ditam: heam bhakitank kitem-i choddounk konn-ui fuddem sortit zalear, tankam favo ti khast lavchê lavun, hea pustokar boroil’lim asat tim-i noxttam Dev tanchea mathear denvoitolo. Ani hea pustokantleam bhakitantlem konn-ui kitem-i unnem korunk fuddem sortit zalear, tankam Dev hea pustokar boroil’leô asat teô bhasavnneo bhogunk diuncho na: jivitachea zhaddachem foll khaunk ani Povitr Xarant tthikann korunk tankam mellchem na. Heam vostunchi sakxi dita To oxem sangta: “Hôi, Hanv veginch ietam!” Amen! Ie, Somia Jezu! Somia Jezuchi doiallai tumam-somestank bhogunk mellum. Amen!