﻿<?xml version="1.0" encoding="utf-8"?>
<bible language="Kumaoni (सोरियाली नय्या नियम) 2020" status="Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License" link="https://www.bible.com/bible/3246/REV.17.SORNT">
	<testament name="New">
		<book number="40">
			<chapter number="1">
				<verse number="1">यो यीशु मसीहक पूर्वजून का नाम छन, उ राजा दाऊदाका वंशज छ्यो, जो अब्राहमो को वंशज छ्यो।</verse>
				<verse number="2">अब्राहम भटे इसहाक, इसहाक भटे याकूब, और याकूब भटे यहूदा और उक भाई पैद भ्यान,</verse>
				<verse number="3">यहूदा का च्याला फिरिस और जोरह छ्या, और उनेरि ईजा को नाम तमार छ्यो, फिरिस भटे हिस्रोन, और हिस्रोन भटे एराम पैद भ्योछ।</verse>
				<verse number="4">एराम भटे अम्मीनादाब पैद भ्योछ, अम्मीनादाब भटे नहशोन, नहशोन भटे सलमोन पैद भ्योछ</verse>
				<verse number="5">सलमोन च्योलो बोअज छ्यो, और उकी ईजा को नाम राहाब छ्यो, बोअज च्योलो ओबेद छ्यो, और उकी ईजा को नाम रूत छ्यो, ओबेद भटे यिशै पैद भ्योछ,</verse>
				<verse number="6">और यिशै भटे राजा दाऊद पैद भ्योछ। और राजा दाऊद भटे सुलैमान उ स्यैनि भटे पैद भ्योछ जो पैलि उरिय्याह की घरवाली छी।</verse>
				<verse number="7">सुलैमान भटे रहबाम, रहबाम भटे अबिय्याह, और अबिय्याह भटे आसा पैद भ्योछ,</verse>
				<verse number="8">आसा भटे यहोशाफात, यहोशाफात भटे योराम, और योराम को उज्जियाह पैद भ्योछ,</verse>
				<verse number="9">और उज्जियाह भटे योतान, योतान भटे आहाज, और आहाज भटे हिजकिय्याह पैद भ्योछ,</verse>
				<verse number="10">हिजकिय्याह भटे मनश्शिह, मनश्शिह भटे आमोन, और आमोन भटे योशिय्याह पैद भ्योछ।</verse>
				<verse number="11">योशिय्याह यकुन्याह और उक भाईन को बुबू छ्यो, जो इस्राएलीन का बेबीलोन देश में गुलामी में जान है पैलि पैद भ्यान।</verse>
				<verse number="12">और बेबीलोन देश की गुलामी भटे यीशु का जन्म तक यो उक पूर्वज यो छ्या, यकुन्याह भटे शालतिएल, और शालतिएल भटे जरूब्बाबिल पैद भ्योछ,</verse>
				<verse number="13">जरूब्बाबिल भटे अबीहूद, और अबीहूद भटे इल्याकीम, और इल्याकीम भटे अजोर पैद भ्योछ,</verse>
				<verse number="14">अजोर भटे सदोक, और सकोद भटे अखीम, और अखीम भटे इलीहूद पैद भ्योछ,</verse>
				<verse number="15">इलीहूद भटे इलियाजार, और इलियाजार भटे मत्तान, और मत्तान भटे याकूब पैद भ्योछ,</verse>
				<verse number="16">याकूब भटे यूसुफ पैद भ्योछ, जो मरियम को घरवालो छ्यो, और मरियम भटे यीशु पैद भ्योछ जो मसीह कहलूछो।</verse>
				<verse number="17">इसीकैं अब्राहम भटे राजा दाऊद तक चौदा पुस्त भ्यान, और राजा दाऊद का बखत भटे इस्राएल देशा का लोगून गुलाम बनाभेरन बेबीलोन देश खिन लीजान तक चौदा पुस्त भ्यान, और इस्राएली लोगून गुलाम बनाभेरन बेबीलोन देश की गुलामी भटे यीशु मसीह तक चौदा पुस्त भ्यान।</verse>
				<verse number="18">यीशु मसीह का पैद हुन है पैलि यो भ्योछ, कि जब उकी ईजा मरियम की माँग-जांगी यूसुफ नामाका आदिमी का दगाड़ हो गैछी, और उनोरो ब्या हुन है पैलि उ पवित्र आत्मा का द्वारा गर्भवती हो जाछी।</verse>
				<verse number="19">यूसुफ जो मरियम को मंगेतर छ्यो, उ एक धर्मी जन छ्यो, जब ऊस यो बातो को पत्तो चलछो, त उ मरियम की बदनाम नी करून चाछ्यो, येक कारण उले मनै-मन में रिशता तोड़ना को बिचार करछ्य।</verse>
				<verse number="20">लेकिन जब उ इन बातुन सोचूनै मरेछ्यो, त प्रभु को स्वर्गदूत ऊस स्यून में दिखाई दीभेरन कुंछो। “हे यूसुफ! राजा दाऊदाका वंशज, तैं मरियम स अपूनी घरवाली बनून है जन डर, क्याखिनकि जो बच्चा उक पेट में छै, उ पवित्र आत्मा का सामर्थ ले छै।</verse>
				<verse number="21">और उ एक च्याला स जन्म देली, तैं उको नाम यीशु राखैं, क्याखिनकि उ अपून लोगून पापून भटे मुक्ति दिलालो।”</verse>
				<verse number="22">यो सब येक कारण भ्योछ, कि परमेश्वरो को संदेश दिनवाला यशायाह का द्वारा यीशु मसीह का बारिमें जो कईनाको छ्यो, उ पुरो हो,</verse>
				<verse number="23">यशायाह ले इसो लिखीना को छै “देखा, एक कुँवारी कन्या गर्भवती होलि, और उ एक च्याला स जन्म देली, और उको नाम इम्मानुएल राखि जालो,” जैको मतलब छै, कि परमेश्वर हमार दगाड़ छै।</verse>
				<verse number="24">तब यूसुफ नीन भटे जागी भेरन स्वर्गदूत का कईना का अनुसार मरियम का दगाड़ ब्या करभरेन ऊस अपून घर लियूछो।</verse>
				<verse number="25">और जब तक मरियम ले च्याला स जन्म नै दीनो, तब तक यूसुफ ले मरियम का दगाड़ शाररीक सम्बध नै राँख्यो, और जब च्योलो पैद भ्योछ, त यूसुफ ले उको नाम यीशु राँखछ्य।</verse>
			</chapter>
			<chapter number="2">
				<verse number="1">जब राजा हेरोदेस, यहूदिया प्रदेश में राज्य करछ्यो, त यीशु को जन्म उई प्रदेशा का बैतलहम गौं में भ्योछ, तब पूरब दिशा भटे कई बुद्धिमान आदिमी, जो तारान को ज्ञान राँखनान, उन यरूशलम शैहर में आभेरन पुछून लागनान,</verse>
				<verse number="2">“उ नान्तिनो काँ छै जो यहूदीन को राजा हुन खिन पैद होर्योछ? क्याखिनकि हमूले पूरब दिशा में उको जन्म का बारिमें बतून वालो तारा स देखछ्य, और हम उकी अराधना करून खिन आरयाँ।”</verse>
				<verse number="3">जब राजा हेरोदेस ले, यहूदीन का राजा का जन्म बारिमें सुणछै, त उ और उक दगाड़ यरूशलम शैहरा का भौत सारा लोग ले घबरा जानान।</verse>
				<verse number="4">तब उले सब प्रधान याजकून और मूसा का नियम सिखून वाला जाम करभेरन पूछ्छै, “कि मसीह जन्म का बारिमें पवित्र-शास्त्र की कुंछो? मसीह को जन्म काँ हुन चैछो?”</verse>
				<verse number="5">उनूनले उथैं क्योछ, “मसीह को जन्म यहूदिया प्रदेशा का बैतलहम गौं में हुन चैछो,” क्याखिनकि परमेश्वरो को संदेश दिनवाला मीका का द्वारा इसो लिखीना को छै।</verse>
				<verse number="6">“हे यहूदिया प्रदेशा का बैतलहम गौं का लोगो, तैं कोई ले तरीकाले यहूदा का अधिकारीन में भटे नानो नाहातिन; क्याखिनकि तैंमें भटे एक आदिमी अधिकारी बनभेरन आलो, जो मेरि प्रजा इस्राएल देशा का लोगून की देख-भाल करोलो।”</verse>
				<verse number="7">राजा हेरोदेस ले उ पैद होईना का बच्चा का उमरा का बारिमें जाणून खिन, उन बुद्धिमान आदिमीन चुपचाप ले बुलाभेरन उनूनथैं पुछ्छै, कि उ तारो कै बखत दिखाई दीछ,</verse>
				<verse number="8">और उले उन बुद्धिमान आदिमीन यो कैभैरन बैतलहम गौं भेजछ्य, “जा, उ बच्चा का बारिमें ठीक-ठीक पत्तो लगा, और जब तुमून उको पत्तो चल जालो, त तुम आभेरन मैंस ले खबर दीया, ताकि मैंले वाँ आभेरन उकी अराधना करूँ।”</verse>
				<verse number="9">और उन राजा की बात सुणभरेन न्हैजानान, और बाटा में उई तारो उनून देखीई दीछ, और उन सब उ तारा स देखिभेरन भौत खुश हुनान, जो पूरब में देखीई दीछ, यो तारो उनार अघिल-अघिल हिटनै रूछो, और उ जाग में जाभेरन रूक जाछो जा यीशु छ्यो।</verse>
				<verse number="10"></verse>
				<verse number="11">उनूनले उ घर में पुजिभेरन नान्तिना स उकी ईजा मरियम का दगाड़ देखछ्य, और उक खुटान में पड़ी भरेन ऊस ढोक दीछ, और अपून-अपून थैलान खोलभेरन सुनो, खुशबुदार धूप, और गन्धरस भेंट चढ़ाछ।</verse>
				<verse number="12">येका बाद स्यून में उन लोगून परमेश्वर भटे चेतावनी मिलछ्य, कि राजा हेरोदेस पास वापस जन जाया, तब उनूले राजा हेरोदेस स यो बात की जानकारी नै दीनी, और उन दुसारा बाटा भटे अपून देश खिन वापस न्हैजानान।</verse>
				<verse number="13">और उनार न्हैजानान का बाद प्रभु का एक स्वर्गदूत स्यून में यूसुफ स दिखाई दीछो, और कुंछो, “उठ, यो नान्तिना स और उकी ईजा लीभेरन मिस्र देश खिन भाग जा; और जब तक मैं तैथैं नै कुँ, तब तक वाँई रये; क्याखिनकि राजा हेरोदेस जो यो नन्तिनास मारन खिन खोजून मर्योछ।”</verse>
				<verse number="14">तब यूसुफ रात मेंई उठाभेरन नान्तिना स और उकी ईजा लीभेरन मिस्र देश खिन न्हैजाछो,</verse>
				<verse number="15">और राजा हेरोदेस का मरून तक उन मिस्र में रूनान। येक कारण कि प्रभु ले जो बात परमेश्वरो को संदेश दिनवाला होशे का द्वारा कईना को छ्यो, पुरो हो “मैंले अपून च्याला स मिस्र देश भटे बुलाछ।”</verse>
				<verse number="16">जब राजा हेरोदेस स मालूम चलछ्य कि बुद्धिमान आदिमीन ले उक दगाड़ ध्वाका करछ्य, तब ऊस भौत रीस आछ। फिर उले बुद्धिमान आदिमीन का बाताईना का जाग का अनुसार बैतलहम गौं, में अपून सिपाई भेजिभेरन और उक आश-पासा का जागान का सब च्याला जो द्वी साल और उ है नान उमर का छ्या उन सबून मरवा दीछ।</verse>
				<verse number="17">यो येक कारण भ्योछ, कि पवित्र-शास्त्र में परमेश्वरो को संदेश दिनवाला यिर्मयाह ले कईना छ्यो, उ पुरो हो:</verse>
				<verse number="18">“लोगून ले रामाह शैहर में कैकी डण्यून की आवाज सुणछ्य, राहेल अपून ननतिनान खिन डण्यून मरेछी, और शान्त नी हुन चाछी, क्याखिनकि उन मर गैछ्या।”</verse>
				<verse number="19">राजा हेरोदेस का मरना का बाद यूसुफ, मरियम और बालक यीशु ऐल तक मिस्र मेंई छ्या, त वाँ प्रभु को स्वर्गदूत को यूसुफ स स्यून में दिखाई दीछो और कुंछो,</verse>
				<verse number="20">“उठ, नन्तिनास और उकी ईजा लीभेरन इस्राएल देश खिन जा, क्याखिनकि राजा हेरोदेस मर ग्योछ जो यीशु स मारून चाँछ्यो।”</verse>
				<verse number="21">तब यूसुफ उठछो और यीशु और उकी ईजा लीभेरन मिस्र भटे इस्राएल देश खिन वापस आ जाछो।</verse>
				<verse number="22">लेकिन जब यूसुफ ले यो सुणछ्य कि अरखिलाऊस जो अपून बबा राजा हेरोदेस का जाग में यहूदिया प्रदेश में राज्य करून मर्योछ, तब उ वाँ जान खिन डर जाछो, और स्यून में परमेश्वर भटे चेतावनी पाभेरन गलील प्रदेश खिन जाछो।</verse>
				<verse number="23">और नासरत गौं में जाभेरन रून लागछ्य, ताकि उ बात पुरी हो जो परमेश्वरो को संदेश दिनवालान का द्वारा यीशु का बारिमें कईना छी, “उ नासरत गौं को कहलाई जालो।”</verse>
			</chapter>
			<chapter number="3">
				<verse number="1">उन दिनून में बपतिस्मा दिनवालो यहूना, जो पानि की एक रसम करछ्यो, जैस बपतिस्मा कुंनान। जो यहूदिया प्रदेशा का बिरान जागा में आभेरन यो प्रचार करून लागछो,</verse>
				<verse number="2">“अपून पापून खिन पश्चताप करा क्याखिनकि स्वर्ग को राज्य नजिक आग्योछ।”</verse>
				<verse number="3">योई छै जैका बारिमें परमेश्वरो को संदेश दिनवाला यशायाह ले कईना छ्यो, “उ बिरान जागान में रौलो और लोगून धध्या-धध्याभेरन यो बतालो, कि प्रभु परमेश्वरा का ऊँन खिन तुम तैयार हो ज्या और उन बाँटान ठीक करून जैमें भटे हो भेरन उ ऊँनवालो छै।”</verse>
				<verse number="4">यहूना ऊँट का बालून का बनाईना का साधारण कपाड़ा पैन छ्यो और उ अपून कमर में चमड़ाक पट्टा बादछ्यो, और मौ और पिटींग खाँछ्यो।</verse>
				<verse number="5">तब यरूशलम शैहरा का और सारा यहूदिया प्रदेश, और यरदन नदी का आश-पासा का रूनवाला लोग निकल भेरन यहूना का पास उनान।</verse>
				<verse number="6">और लोगून ले यो मानभेरन कि हम पापी छा, त यहूना का हात ले यरदन नदी में बपतिस्मा लीछ।</verse>
				<verse number="7">लेकिन जब उले भौत फरीसीन और सदूकी लोगून अपून पास बपतिस्मा लीन खिन उन देखछ्य, तो उले उनूनथैं क्योछ, “हे स्याँपा का जैसा जहरीला लोगो, तुमून कैले बता दीछ, कि परमेश्वरा का उनवाला कोप है भागा?</verse>
				<verse number="8">येक कारण भल काम करभेरन सबूत दी, कि तुमून ले सच्ची में पापून है पश्चताप कर ली है।</verse>
				<verse number="9">और अपून-अपून मन में यो जन सोचा कि ‘हम अब्रहाम का वंश का छा; कि हम बच ज्यूला।’ क्याखिनकि मैं तुमूनथैं कुंछू कि परमेश्वर इन ढ़ुगान भटे अब्राहम खिन सन्तान पैद कर सकछो।</verse>
				<verse number="10">अब इसी बात छै कि परमेश्वर हरेक स जो अपून पापून है पश्चताप नै करून चानो, ऊस सजा दीन खिन बिलकुल तैयार छै। ठीक उसीकैं जसीकैं बनकाटो रूखून का जाड़ा में राखिना को छै, येका कारण जो-जो रूख निको फल नै ल्यून, उ काटि जालो और आग में डाली जालो।</verse>
				<verse number="11">मैंले त तुमून पानि ले पापून को पश्चताप करून खिन बपतिस्मा दी छूँ, लेकिन जो म्यारा बाद उनवालो छै, उ मैं है महान छै। और मैं इसो लाकारी को ले नाहातिनू कि उको सेवक बनभेरन उको जूताका खोलि सकू लेकिन मैंले त तुमून पानि को बपतिस्मा दीछ, लेकिन उ तुमून पवित्र आत्मा और आगा ले बपतिस्मा द्यालो।</verse>
				<verse number="12">उले अपून हातून में सूप्पो ल्हीछ, और उ अपूनी खेती की फसल स निकीकैं साफ करोलो, और ग्यूँका दानान अपून भखार में जाम करोलो, और भूसा स उ आग में जालो, जो कभे नै बुझनी।”</verse>
				<verse number="13">तब उ बखत यीशु गलील प्रदेश भटे यरदन नदी का किनार यहूना पास उथैं बपतिस्मा लीन खिन आछ।</verse>
				<verse number="14">लेकिन यहूना यो कैभेरन मना करछ्य, “कि मैंस त तेरा हात भटे बपतिस्मा लीना की जरूरत छै, और तैं म्यारा पास आ रैछै?”</verse>
				<verse number="15">तब यीशु ले ऊस जबाब दीभेरन क्योछ, “अब इसो हुन दे क्याखिनकि हमून इसीकैं परमेश्वर की मरजी स पुरो करून ठीक छै।” तब यहूना ले यीशु की बात मान लीछ।</verse>
				<verse number="16">और यीशु बपतिस्मा लीभेरन पानि भटे भ्यार आछ, और देखा उ खिन स्वर्ग खुलि ग्यो, और यहूना ले उक मलि में परमेश्वरे का आत्मा स कबूतर का रूप में उतरून देखछ्य।</verse>
				<verse number="17">और स्वर्ग भटे परमेश्वर ले यो क्योछ, “यो म्येरो लाड़िल च्योलो छै, जैस मैं प्रेम करछूँ और मैं यो भटे भौत खुश छूँ।”</verse>
			</chapter>
			<chapter number="4">
				<verse number="1">येका बाद पवित्र आत्मा, यीशु स बिरान जागा में येक कारण लिग्योछ, ताकि शैतान का द्वारा ऊस परखी जौ।</verse>
				<verse number="2">यीशु ले चालीस दिन और चालीस रात के नै खायो, तब ऊस भुख लागछ्य।</verse>
				<verse number="3">तब शैतान परीक्षा लीन खिन वाँ उक पास आभेरन उथैं कुन लागछ्य, “अगर तैं परमेश्वरो को च्योलो छै, त इन ढ़ुगान रोटा बनना को हुकुम दीभेरन साबित कर, ताकि तैं उनून खा सको।”</verse>
				<verse number="4">तब यीशु ले जबाब दीछ, “पवित्र-शास्त्र में की लिखीना को छै, ‘आदिमी केवल रोटान ले नै, लेकिन हरेक उ बचन स जो परमेश्वर कुंछो, उ ज्यून रौलो।’”</verse>
				<verse number="5">तब शैतान, यीशु स पवित्र नगर यरूशलम में ली ग्योछ, और परमेश्वरा का मन्दिर का टुक्का में ठाड़ कर दीछ,</verse>
				<verse number="6">और उथैं क्योछ, “अगर तैं परमेश्वरो को च्योलो छै, तैं याँ भटे तलि फटंग हाण भेरन साबित कर; क्याखिनकि पवित्र-शास्त्र में लिखीना को छै, ‘कि परमेश्वर तेरा बारिमें अपून स्वर्ग स्वर्गदूतून हुकुम द्योलो, और उन तैंस हातो-हात उठा ल्याला। और इसो होलो त्यारा खुटान में ढ़ुगान ले ठैस नै लागो।’”</verse>
				<verse number="7">यीशु ले शैतन थैं क्योछ, “यो ले पवित्र-शास्त्र में लिखीना को छै, ‘तैं प्रभु अपून परमेश्वर की परीक्षा जन करे।’”</verse>
				<verse number="8">फिर शैतान ऊस एक भौत ऊच्चा डाँण में लिजाछो और सारा संसारा को राज्य और उकी धन-दौलत दिखाभेरन,</verse>
				<verse number="9">उथैं कुन लागछ्य, “अगर तैं झुकभेरन म्येरो आदर और मेरि भक्ति करले, तो मैं यो सब कुछ तैंस दीयूलो।”</verse>
				<verse number="10">तब यीशु ले उथैं क्योछ, “हे शैतान मैं है दूर हो जा, क्याखिनकि पवित्र-शास्त्र में लिखीना को छै ‘तैं केवल अपून प्रभु परमेश्वर स झुकभेरन आदर कर, और केवल उकी भक्ति कर।’”</verse>
				<verse number="11">तब शैतान ऊस छोड़भेरन न्हैग्यो, और स्वर्गदूत आभेरन उकी देख-भाल करून लाग्यान।</verse>
				<verse number="12">जब यीशु स यो मालूम चलछै कि यहूना स पकड़ भेरन जेल में बन्द कर दीछ, तब उ यहूदिया प्रदेश स छोड़भेरन गलील प्रदेशा का नासरत गौं में वापस आग्यो।</verse>
				<verse number="13">और फिर नासरत गौं छोड़ी भरेन कफरनहूम गौं में रून लागछो, जो गलील झीला का किनार जबूलून और नप्ताली का इलाका में छै।</verse>
				<verse number="14">ताकि जो परमेश्वरो को संदेश दिनवाला यशायाह ले कईना छ्यो, उ पुरो हो:</verse>
				<verse number="15">“तुम लोग जो जबूलून और नप्ताली गोत्र का अधिकार वाला इलाका में रूछा, उ बाटा में छै जो गलील प्रदेश की झील का पास और यरदन नदी का पूरबा का इलाका में छै।</verse>
				<verse number="16">परमेश्वर स जाणै बिना अन्यारा में रून वाला लोगून एक तेज उज्यालो देखाला। यो उज्यालो उन लोगून मुक्ति का मार्ग दिखालो जो परमेश्वर स जाणै बिना जीवन बितूनान और अनन्तकाल का मौता का बाटा में छन।”</verse>
				<verse number="17">उ बखत भटे यीशु ले प्रचार करून और यो कुन शुरू करछ्य, “अपून पापून खिन पश्चताप करा, क्याखिनकि परमेश्वरो को राज्य नजिक आग्योछ।”</verse>
				<verse number="18">तब गलील प्रदेशा का झील का किनार में हिटून-हिटून यीशु ले द्वी भाईन झील में जाल डाली भेरन माछा पकड़ून देखछ्य, किलैकी उन द्वीवै मछुवारा छ्या; उनूनमें एक को नाम शमौन जो पतरस ले कहलाईछो, और उक नान भाई को नाम अन्द्रियास छ्यो।</verse>
				<verse number="19">यीशु ले उनून बुलाभेरन क्योछ, “तुम म्यार दगाड़ आ, जस तुम माछान पकड़ छा; उसीकैं मैं तुमून लोगून अपूनो शिष्य बनूनो सिखूलो।”</verse>
				<verse number="20">तब उनूले तुरन्त अपूनो माछा पकड़ना को काम बन्द कर दीछ, और उक शिष्य बन ग्या।</verse>
				<verse number="21">वाँ भटे थ्वाड़ा अघिल जाभेरन, यीशु ले और द्वी भाईन देखछ्य, जो जब्दी का च्याला छ्या उनूनमें भटे एक को नाम याकूब और उक नान भाई को नाम यहूना छ्यो, उन अपून बबा का दगाड़ नाव में अपूनी जालून ठीक करून मरेछ्या। और उले उनूनले बुलाछ।</verse>
				<verse number="22">और उनूनथैं क्योछ, “म्यार दगाड़ आ और म्यारा शिष्य बना।” उनूनले तुरन्त अपून बबा स और नाव छोड़िभेरन उक शिष्य बन ग्या।</verse>
				<verse number="23">यीशु सारा गलील प्रदेश में घुमनै, उनार यहूदी सभाघर में उपदेश दीछो, और परमेश्वरा का राज्य सुसमाचार प्रचार करछो, और लोगून की हर प्रकार का बिमारीन और कमजोरीन दूर करनै रूछ्यो।</verse>
				<verse number="24">और सारा सीरिया देश में उको नाम फैल ग्यो; और लोग सब बिमारीन जो हरैक प्रकारे की बिमारीन में दुखून में पड़ीना का छ्या, और भूत लागीनाका और मीर्गी रोगीन यीशु का पास ल्यान, और उले सबून चंगो कर दीछ।</verse>
				<verse number="25">गलील प्रदेश और दिकापुलिस, यरूशलम शैहर, यहूदिया प्रदेश, यरदन नदी का पार भटे भीड़ की भीड़ उक पछिल हो जाछी।</verse>
			</chapter>
			<chapter number="5">
				<verse number="1">यीशु लोगून की भीड़ स देखिभेरन एक ऊच्चा डाणा में न्हैग्यो, और उनून शिक्षा दीन खिन बैठग्यो, तब उक शिष्य उक पास आयान।</verse>
				<verse number="2">और तब उ यो भेरन उनून उपदेश दी लागछ्य,</verse>
				<verse number="3">“धन्य छन उन, जो मन का दीन छन, क्याखिनकि स्वर्ग का राज्य उनून खिन छै।</verse>
				<verse number="4">धन छन उन, जो शोक करनान, परमेश्वर उनून तसली द्योलो।</verse>
				<verse number="5">धन्य छन उन, जो नम्र छन, क्याखिनकि उन धरतीका अधिकारी होला।</verse>
				<verse number="6">धन्य छन उन, जो धार्मिकता ले जीन्दगी जीना की सच्ची इच्छा राखनान, क्याखिनकि परमेश्वर उनून तृप्त कराला।</verse>
				<verse number="7">धन्य छन उन, जो दया करूनवाला छन, परमेश्वर उनूनमें दयालु होलो।</verse>
				<verse number="8">धन्य छन उन, जिनारा मन शुद्ध छन, क्याखिनकि उन परमेश्वर स देखाला।</verse>
				<verse number="9">धन्य छन उन, जो मेल-मिलाप करूनवाला छन, क्याखिनकि उन परमेश्वरा का सन्तान कहलाई जाला।</verse>
				<verse number="10">धन्य छन उन, जो धार्मिकता की जीन्दगी जीना का कारण सताई जानान, क्याखिनकि स्वर्ग का राज्य उनोरो छै।</verse>
				<verse number="11">धन्य छा तुम, जब लोग म्यारा कारण तुमेरि निन्दा कराला और सताला, क्याखिनकि तुम म्यारा शिष्य छा, और झूठ बोलभेरन तुमार खिलाफ में सब प्रकार का गलत आरोप लगूनान।</verse>
				<verse number="12">तब तुम खुशी मनाया, क्याखिनकि तुमून खिन स्वर्ग में भौत ठूलो ईनाम राखिना को छै। येक कारण उनूनले परमेश्वरो को संदेश दिनवालान भौत बखत पैलि इसीकैं सता छै।</verse>
				<verse number="13">तुम यो संसार का लोगून खिन नून का जसा छा; लेकिन अगर नूनो नमकीनपन खतम हैज्यो, त उ फिर ऊस दुबार कसीकैं नमकीन करि जालो? फिर उक के कामो को नै रूनो, केवल भ्यार खिती जाछो और लोगून का खुटान ले कुचली जाछो।</verse>
				<verse number="14">तुम यो संसार लोगून खिन रोशनी जसा छा। और जो गौं ऊँचा डाँणा में बसिना को छै उ लुक नै सकूनो।</verse>
				<verse number="15">और लोग दीया जलाभेरन भांणाका तलि नै ढकना, लेकिन ऊँचा जाग में राखनान कि उले सब घरा का लोगून उज्यालो मिलो।</verse>
				<verse number="16">उसीकैं तुमार उज्यालो लोगून का सामुनि चमको कि उन तुमार भल कामून देखिभेरन तुमार बबा जो स्वर्ग में छै, उकी तारीफ करून।</verse>
				<verse number="17">यो नै समझा कि मैं मूसा का नियम या परमेश्वरो को संदेश दिनवालान की लेख हटून खिन नै आरयूँ, मगर पुरो करून खिन आरयूँ।</verse>
				<verse number="18">मैं तुमूनथैं सच्ची कुछूँ, कि जब तक आकाश और धरती टल नी जालो, परमेश्वरा का नियमून में भटे सब कुछ याँ तक कि सबून है नानि बात को असर तब तलक रौलो जब तलक उको मक्शद पुरो नी हो जालो।</verse>
				<verse number="19">येक कारण जो कोई ले इन नान है नान हुकुम में भटे कोई एक स तोड़ोलो, और ऊसो लोगून ले सिखालो, उ स्वर्ग का राज्य में सबून है नानो समझी जालो; और जो कोई उन हुकमून पालन करोलो और लोगून ले सिखालो उ स्वर्ग का राज्य में महान होलो।</verse>
				<verse number="20">मैं तुमूनथैं सच्ची कुछूँ, अगर तुम मूसा का नियम सिखून वालान और फरीसी लोगून का हुकमून है बढ़भेरन परमेश्वरा का हुकमून को पालन करला, तब तुम स्वर्ग का राज्य में प्रवेश कर पाला।</verse>
				<verse number="21">तुम यो बात स जाणछा, कि परमेश्वर ले मूसा का नियम में हमार पूर्वजून बताईन को छ्यो, ‘हत्या जन कर्या,’ और ‘जो कोई हत्या करोलो यो उ सजा को हकदार होलो।’</verse>
				<verse number="22">लेकिन मैं तुमूनथैं कुछूँ, जो कोई अपून भाई खिन रीस करोलो, उ यहूदी सभा में सजा को हकदार होलो। और जो कोई अपून भाई थैं निकम्मा कौलो उ यहूदी महासभा में सजा को हकदार होलो, और जो कोई कौलो ‘हे मूर्ख’ उ नरक की आग में सजा पालो।</verse>
				<verse number="23">येक कारण अगर तैं अपूनी भेंट परमेश्वरा का सामुनि वेदी में चढ़ून खिन ल्यूछै, वाँ तैं याद कर, कि म्यारा भाई का मन में म्यारा तरफ भटे के विरोध छै,</verse>
				<verse number="24">तो अपूनी भेंट वेदी का सामुनि छोड दे, पैलि जाभेरन अपून भाई थैं मेल कर और तब आभेरन अपूनी भेंट चढ़ौ।</verse>
				<verse number="25">और जब तुम यहूदी महासभा खिन जान बखत अपून बिरोधी का दगाड़ बाटा में होला, उक दगाड़ जल्दी मेल-मिलाप कर ले काँई इसो नै हो कि बिरोधी तैंस हाकिम स सौप, और हाकिम तैंस सिपाई स सौंप दे, और तैंस जेल में डाल द्याला।</verse>
				<verse number="26">मैं तैथैं सच्ची कुछूँ कि जब तक उको भुकतान पुरो नै कर दे, जो तैंमें बकाया छै, तब तक तैं जेल खाना है कभै नी निकल पाले।</verse>
				<verse number="27">तुम यो बात स जाणछा कि मूसा का नियम में लिखीना को छै, कि ब्यभिचार जन कर्या।</verse>
				<verse number="28">लेकिन मैं तुमूनथैं यो कुछूँ कि जो कोई, कोई स्यैनि स बुरी नजर ले देखोलो, उ अपून मन में उक दगाड़ ब्यभिचार कर है छ।</verse>
				<verse number="29">अगर तेरो दैन आँख तैथैं पाप करूँछो, त ऊस निकालभेरन खित दी, क्याखिनकि तैखिन योई ठीक छै कि त्यारा शरीर में भटे एक हिस्सा नष्ट हो जौ और तेरो पुरो शरीर नरक की आग में नै डाली जौ।</verse>
				<verse number="30">और अगर तेरो दैन हात तैथैं पाप करूँछो, त ऊस काटिभेरन खिती दी, क्याखिनकि तैखिन योई ठीक छै कि त्यारा अंगून में भटे एक हिस्सा नष्ट हो जौ और तेरो पुरो शरीर नरक की आग में जान है बच जौ।</verse>
				<verse number="31">मूसा का नियम में यो ले कै राख छ्यो, कि जो कोई अपूनी स्यैनि स तलाक दिन चाँछो त ऊस त्यागपत्र दे।</verse>
				<verse number="32">लेकिन मैं तुमूनथैं यो कुछूँ कि जो कोई अपूनी स्यैनि स ब्यभिचार का अलावा कोई और कारण ले तलाक दी छ्यो त उ उथैं ब्यभिचार करूँछो, और जो कोई उ छोड़िना कि स्यैनि का दगाड़ ब्या करछो उ ब्यभिचार करछो।</verse>
				<verse number="33">फिर तुम यो बात स ले जाणछा, कि परमेश्वर ले मूसा का नियम में हमार पूर्वजून बताईन को छ्यो झूठ्ठी कसम जन खाया, लेकिन परमेश्वर खिन अपूनी कसम स पुरी कर्या</verse>
				<verse number="34">लेकिन मैं तुमूनथैं यो कुछूँ कि कभै कसम जन खाया, नै त स्वर्ग की कसम खाया, क्याखिनकि उ परमेश्वरो को सिंहासन छै।</verse>
				<verse number="35">और नै धरती की क्याखिनकि उ उकी खुट्टा राखना की चौंकी छै; और नै यरूशलम शैहर की, क्याखिनकि उ महाराजा परमेश्वरो को शैहर छै।</verse>
				<verse number="36">अपून खोराकी ले कसम जन खाया क्याखिनकि तैं एक ले बाल स ले नै सफेद और नै कालो कर सकनै।</verse>
				<verse number="37">तुमेरि बात ‘हाँ’ की ‘हाँ’ या ‘ना’ की ‘ना’ हो; क्याखिनकि जो कुछ ले उ है ज्यादा हुछो उ शैतान भटे हुछो।</verse>
				<verse number="38">तुम यो बात स ले जाणछा, कि मूसा नियम में लिखीना को छै, कि आँखा बदला में आँखो, और दाँत का बदला में दाँत।</verse>
				<verse number="39">लेकिन में तुमूनथैं कुछूँ कि बुर आदिमी जसो जन कर्या, बल्कि जो कोई त्यारा दैन गाल में थप्पड़ मरो, उक तरफ दुसोरो गाल ले कर दीये।</verse>
				<verse number="40">अगर कोई त्यारा दगाड़ जबरदस्ती करभरेन तेरो कुरता लीन चाछो, तो तैं ऊस अपूनो भ्यार वालो कोट ले दी दे।</verse>
				<verse number="41">और अगर कोई तैमें मुकरदमा करभेरन एक किलोमीटर में लिजाछो, तैं उक दगाड़ द्वी किलोमीटर और न्हैजा।</verse>
				<verse number="42">और कोई तैंथैं माँगो ऊस दे, और जो कोई तैंथैं उधार माँगो ऊस मना जन करे।</verse>
				<verse number="43">तुम यो बात स जाणछा कि मूसा का नियम में लिखीना को छै, अपून पड़ोसी का दगाड़ प्रेम कर्या, और अपून बैरी का दगाड़ बैर।</verse>
				<verse number="44">लेकिन मैं तुमूनथैं यो कुछूँ कि अपून बैरी का दगाड़ प्रेम राखा और अपून सतून वालान खिन प्रार्थना करा,</verse>
				<verse number="45">जेले तुम अपून स्वर्गीय पिता की संतान बनला, क्याखिनकि परमेश्वर भलो और बुर द्वीवै लोगून में अपूनो सूरज उदय करछो, और धर्मी और अधर्मी द्वीवै लोगून खिन बरखा करछो।</verse>
				<verse number="46">क्याखिनकि तुम अपून प्रेम राखूनवालान थैं ही प्रेम राखछा, तो परमेश्वर तुमून के ईनाम नी द्योलो, क्याखिनकि चुंगी लिनवाला ले इसोई करनान।</verse>
				<verse number="47">अगर तुम केवल अपून भाईन नमस्कार करछा, तो कौन सा ठूलो काम करछा? याँ तक कि गैर-यहूदी लोग ले इसोई करनान, जो परमेश्वरा का नियमून नै जाणनान।</verse>
				<verse number="48">येक कारण चैछो कि तुम सिद्ध बना, जसो तुमोरो स्वर्गीय पिता सिद्ध छै।</verse>
			</chapter>
			<chapter number="6">
				<verse number="1">सतर्क रौ! तुम लोगून देखून खिन भल काम जन करा, नै त तुम अपून स्वर्गीय पिता थैं भटे केले ईनाम नी पाला।</verse>
				<verse number="2">येक कारण जब तुम दान करछा, त ढिंढोरा जन करवाये, जसो कपटी लोग, यहूदी सभाघरून में और गलिन में करनान, ताकि लोग उनेरि बड़ाई करून। मैं तुमूनथैं सच्ची कुछूँ की उन अपूनो ईनाम पा चुक ग्यान।</verse>
				<verse number="3">लेकिन जब तैं गरीबून दान करछै, जो तैं दान दीछै, ऊस दुसारा लोग नै जाणून पान।</verse>
				<verse number="4">ताकि तेरो दान गुप्त रौ, और जब तेरो पिता जो गुप्त में देखछो, तैंस उक ईनाम द्यलो।”</verse>
				<verse number="5">और जब तैं प्रार्थना करले, त कपटिन का नियाती जन कर, किलैकी उन लोगून देखून खिन यहूदी सभाघर में और सड़कून का मोडून में ठाड़ हो भेरन प्रार्थना करून उनून निको लागछो। मैं तुमूनथैं सच्ची कुछूँ कि उन ले अपूनो ईनाम पा हैछ।</verse>
				<verse number="6">लेकिन जब तैं प्रार्थना कर, त अपून कमरा में जा, और द्वार बन्द करभेरन अपून स्वर्गी पिता थैं प्रार्थना कर जैस कोई नै देख सकूनो। तब तेरो स्वर्गी पिता जो सब बातुन जाणछो, उ तैंस उको ईनाम द्यलो।</verse>
				<verse number="7">प्रार्थना करून बखत गैर-यहूदी लोगून की नियाती बक-बक जन करा क्याखिनकि उन समझनान कि उनार भौत बोलना ले उनेरि सुणि जालि।</verse>
				<verse number="8">येक कारण तुम उनार समान जन बना, क्याखिनकि तुमोरो पिता तुमार माँगून है पैलि जाणछो कि तुमेरि कि-कि जरूरत छै।</verse>
				<verse number="9">येक कारण तुम इसीकैं प्रार्थना करा, हे हमार पिता, तैं जो स्वर्ग में छै; तेरो नाम पवित्र मानी जौ।</verse>
				<verse number="10">तेरो राज्य हरेक जाग में हो। और तेरि मरजी जसकै स्वर्ग में पुरी हुछी, उसीकैं धरती मेंले पुरी हो।</verse>
				<verse number="11">हमरि दिन की रोटो आज हमून दे।</verse>
				<verse number="12">जसीकैं हमूले अपून अपराधीन माफ करनू, उसीकैं तैंले हमार अपराधून माफ कर।</verse>
				<verse number="13">और हमून परीक्षा में जन पड़ून दे, और हमून बुराई भटे बचौ; (क्याखिनकि राज्य पराक्रम और महिमा सदा की तेरि छै। आमीन)।</verse>
				<verse number="14">येक कारण अगर तुम लोगून का अपराधून माफ करला, त तुमोरो स्वर्गीय पिता ले तुमून माफ करोलो।</verse>
				<verse number="15">और अगर तुम लोगून का अपराधून माफ नी कराला, त तुमोरो स्वर्गीय पिता ले तुमार पाप माफ नी करोलो।</verse>
				<verse number="16">जब तुम बर्त राखछा, त कपटिन की नियाती तुमार मुँख उदास नै हो, क्याखिनकि उन अपूनो मुँख इसो यो खिन बना राखनान, ताकि लोग जाण सकून की उनूले बर्त राख रैछ। मैं तुमूनथैं सच्ची कुंछू कि उन अपूनो ईनाम पा चुक ग्यान।</verse>
				<verse number="17">लेकिन जब तुम बर्त राखछा मुँख धो और अपून ख्वारा में तेल हाल,</verse>
				<verse number="18">ताकि लोग नै पर तेरो परमेश्वर जैस कोई देख नै सकूनो, तैंस बर्त राखून देखिभेरन तैंस उको ईनाम देलो।</verse>
				<verse number="19">अपून खिन यो संसार में धन जामा जन करा, जाँ कीड़ा और काँई खराब कर दीनान, और चोर घात लगाभेरन चोरी लीनान,</verse>
				<verse number="20">लेकिन भलाई करभेरन अपून खिन स्वर्ग में धन जामा करा, जाँ नै त कीड़ा और काँई खराब करूनो, और जाँ चोर घात लागा भेरन नै चोरी कर सकूनो।</verse>
				<verse number="21">क्याखिनकि तेरो मन हमेशा वाँई लाग रौ जा तेरो धन छै।</verse>
				<verse number="22">आँखो शरीर खिन दीया को जसो छै, येक कारण अगर तेरा आँखा निको होलि त तेरो पुरो शरीर मेंले उज्यालो होलो।</verse>
				<verse number="23">पर अगर तेरा आँखा बुर छन, त तेरो पुरो शरीर अन्यारो हो जालो; त जो उज्यालो तैंमें छै अगर अन्यारो हो ज्यो त उ अन्यारो भौत ज्यादा कालो हो जालो।</verse>
				<verse number="24">कोई ले आदिमी एक बखत में द्वी मालिकून की सेवा नै कर सकूनो, क्याखिनकि उ एक्का दगाड़ बैर और दुसरा का दगाड़ प्रेम राखोलो, या एक्का दगाड़ मिलीना को रौलो और दुसरा स तुच्छ समझलो। तुम ले परमेश्वर और धन द्वीवैन की सेवा नै कर सकना।</verse>
				<verse number="25">येक कारण मैं तुमूनथैं कुंछू कि अपून रोजमर्रा जीवन का बारिमें यो फिकर जन करा, कि हम की खूँला और की पियूला और नै अपून शरीर का बारिमें यो फिकर जन कर्या की हम की पैनला। क्या जीवन खान भटे या शरीर कपाड़ा भटे ज्यादा कीमती नाहतिन?</verse>
				<verse number="26">आकाश का चिड़ियान देखा! नै उन बुना, नै कटना, और नै खत्तान में जामा करनान, फिरले तुमोरो स्वर्गीय पिता उनूनले खिलूछो। क्याखिनकि तुम त उनून है ले ज्यादा कीमती छा।</verse>
				<verse number="27">तुमून में भटे इसो को छै, जो चिन्ता करभेरन अपूनी उमर में एक पल ले बढ़ा सको?</verse>
				<verse number="28">“और कपाड़ान खिन क्याखिन चिन्ता करछा? जंगली फुलून देखा उन कसीकैं बढ़नान नै त उन मेहनत करना और नै कपाड़ा बनूना।</verse>
				<verse number="29">तो मैं तुमूनथैं कुंछू कि राजा सुलैमान ले अपून पुर राजपाठ वाला जीवन में इन जंगली फुलून का जसा सुन्दर कपाड़ा नै पैन्या।</verse>
				<verse number="30">येक कारण जब परमेश्वर जंगले की घास जो आज छै और भोल आगो में भड़ाई जालि, फिरले उ उको इदुक ज्यादा सुन्दरता दीछो, त उ जरूर तुमोरो उ है ले ज्यादा ध्यान राखोलो। तुमोरो विश्वास परमेश्वर में इदुक कम किलैं छै।</verse>
				<verse number="31">येक कारण तुम चिन्ता जन करा कि हम कि खूँला, या कि पियूला, या कि पैनला।</verse>
				<verse number="32">क्याखिनकि गैर-यहूदी लोग इनी सब चीजून की खोज में रूनान, लेकिन तुमोरो स्वर्गीय पिता जाणछो कि तुमून इन सब चीजून की जरूरत छै। येक कारण चिन्ता जन करा।</verse>
				<verse number="33">येक कारण तुम पैलि परमेश्वरा का राज्य और धर्मी जीवन जीना की कोशिश करा, त इन सब चीज तुमून मिल जाला।</verse>
				<verse number="34">और भोल की चिन्ता जन करा, भोल अपूनी चिन्ता अफी कर ल्यलो; आज खिन आजो को दुख भौत छै।</verse>
			</chapter>
			<chapter number="7">
				<verse number="1">तुम कैमें दोष जन लगा, कि परमेश्वर ले तुमून में दोष नै लगायो।</verse>
				<verse number="2">क्याखिनकि जसीकैं तुम लोगून में दोष लगाला, उसीकैं परमेश्वर ले तुमोरो न्याय करोलो; परमेश्वर तुमार दगाड़ ऊसो बर्ताव करोलो, जसो तुम दुसरान का दगाड़ करछा।</verse>
				<verse number="3">तैं किलैं अपून विश्वासी भाई की नानि-नानि गलतिन देखिभेरन उमें दोष लगूछै जो उक आँख में एक तिन्का नियाती छै, जब कि तेरा जीन्दगी में ठूलो पाप छै, जो त्यारा अपून आँख में एक लठ्ठा नियाती छै। उ तैंस किलैं नै दिखाई दीनो?</verse>
				<verse number="4">जब त्यारा खुदै का भितर भौत ठूलो पाप छै, त तैंस अपून है कम पाप वाला कोई ले आदिमी की मद्दत करना की कोशिश नै करूँ चैंनी।</verse>
				<verse number="5">हे कपटी, पैलि तैं अपूनी ठूला-ठूला गलतिन निकीकैं सुधार, तब तैं अपून भाई की नानि-नानि गलतिन निकीकैं सुधार पाले।</verse>
				<verse number="6">उन लोगून परमेश्वरो को संदेश जन सुणा, जो येस नै सुणून चाँनान। अगर तुम इसो करछा, त यो इसो होलो जसो कोई पवित्र चीज कूकुरुन का सामुनि डालूनो, और नै अपून मोती सुंअरून का सामुनि डालीया, काँई इसो नै हो कि उन उनून अपून खुटान का तलि रौंद दीयाला, और पलट भेरन तुमून में हमला कर दीयून।</verse>
				<verse number="7">तुमून जे चैंछो उ परमेश्वरथैं माँगा और उ तुमून द्योलो। परमेश्वरेस खोजला उ तुमून मिल जालो, खटखटाला त तुमून खिन उ द्वार खोलि द्योलो।</verse>
				<verse number="8">क्याखिनकि जो कोई परमेश्वरथैं माँगछो उ ऊस दीछो, और जो कोई ऊस खोजछो उ ऊस मिलछो, और जो द्वार खटखटाछो उ खिन खोलि जालो।</verse>
				<verse number="9">अगर तुमोरो च्योलो तुमूनथैं रोट माँगो तो क्या तुम ऊस ढूंगो द्यालाई?</verse>
				<verse number="10">अगर तुमोरो च्योलो तुमूनथैं माँछा माँगो तो क्या तुम ऊस स्याँप द्यालाई?</verse>
				<verse number="11">जब तुम बुर हो भेरन अपून नान्तिनान निकी चीज दिन जाणछा, तो तुमोरो पिता जो स्वर्ग में छै अपून माँगून वालान निकी चीज किलैं नी द्योलो।</verse>
				<verse number="12">येक कारण जो ले तुम चाँछा कि लोग तुमार दगाड़ करून, तुम ले उनार दगाड़ ऊसोई ब्यवहार करा, क्याखिनकि मूसा नियम और परमेश्वरो को संदेश दिनवालान को लेखना को अर्थ योई छै।</verse>
				<verse number="13">तुम परमेश्वरा का राज्य में शागूणो बाट भटे जानान, क्याखिनकि उ चौड़ो छै, जो बिनाश का तरफ लिजाछो, उ फाटक सरल छै, और भौत सारा लोग छन, जो उमें भटे जानान।</verse>
				<verse number="14">क्याखिनकि शागूणो छै उ फाटक और कठिन छै उ बाटो जो अनन्त जीवन का तरफ लिजाछो, और थ्वाड़ा लोग छन जो ऊस पानान।</verse>
				<verse number="15">परमेश्वरा का बारिमें झूठ्ठो संदेश दीन वाला लोगून है सतर्क रौ, जो भेड़ून का जसो भेष बनाभेरन तुमार पास ऊँनान, लेकिन उ असल में फाड़ खान वाला भेड़िया का जसा छन।</verse>
				<verse number="16">उनार कामून ले तुम उनून पछ्याणी ल्याला। क्या लोग झाड़िन भटे अंगूर या काँणान वाली झील-झालू भटे अंजीर तोड़ी सकनानी?</verse>
				<verse number="17">और इसीकैं हरेक निको रूख निको फल दीछ, लेकिन खराब रूख बुरो फल दीछो।</verse>
				<verse number="18">निको रूख बुरो फल नै दी सकनो, और बुरो रूख निको फल नै दी सकनो।</verse>
				<verse number="19">जो-जो रूख निको फल नै दीनो, ऊस काटिभेरन आंग में डाली जाछो, और उसीकैं परमेश्वरा का बारिमें झूठ्ठो संदेश दीन वाला लोगून सजा दी जालि।</verse>
				<verse number="20">और इसकैं तुम उनार कामून ले उनून पछ्याणी ल्याला।</verse>
				<verse number="21">जो मैंथैं, ‘हे प्रभु! हे प्रभु!’ कुंनान उनूनमें भटे हरेक स्वर्ग का राज्य में नी जान पालो, लेकिन उई जान पालो जो म्यारा स्वर्गीय पिता की इच्छान में हिटछो।</verse>
				<verse number="22">और न्याय का दिन भौत लोग मैंथै कौला, ‘हे प्रभु, हे प्रभु, क्या हमून ले त्यारा नामेंले भविष्यवाणी नै कर्या और त्यारा नामेंले भूतून नै निकाल्याई, और त्यारा नामेंले भौत चमत्कारा काम नै कर्या?’</verse>
				<verse number="23">और तब में उनूनथैं साफ कै द्यूलो, ‘मैं तुमून कभै नै जाणनू, हे बुरा काम करून वालो म्यारा पास है दूर न्हैजा।’</verse>
				<verse number="24">और जो कोई म्यारा इन बचनून सुणिभेरन उनून मानछो उ, उ बुद्धिमान आदिमी का नियाती छै, जेले अपूनो घरो को नींव चट्‍टान में डालभेरन बनाछ।</verse>
				<verse number="25">और बरखा भैछ, बाढ़ आयान, आँधी-तूफान चलछ्य और उ घर में टकरायान फिरले नै खितीनो क्याखिनकि उकी नींव चट्‍टान में डालीना की छी।</verse>
				<verse number="26">लेकिन जो कोई म्यारा इन बातुन सुणछो और उनोरो पालन नै करूनो, उ, उ मूर्खाका समान छै जेले अपूनी घर रेत में बनाछ</verse>
				<verse number="27">और बरखा भैछ, बाढ़ आयान, आँधी-तूफान चलछ्य और उ घर में टकरायान और उ घर खितीभेरन पुरी तरह नाश हो ग्यो।”</verse>
				<verse number="28">जब यीशु यो उपदेश दी चुकछय, त भीड़ उनार उपदेश सुणिभेरन हैरान होगै।</verse>
				<verse number="29">किलैकी उ मूसा का नियम सिखून वालान का अनुसार नी सिखूछो, बल्कि उ उनूनथैं एक इसा गुरू की नियाती उपदेश दी छ्यो, जैका पास सच्चो अधिकार छ्यो।</verse>
			</chapter>
			<chapter number="8">
				<verse number="1">जब यीशु डाणा में भटे उतर भेरन तलि आछ, त भौत भीड़ उनार पछिल उन लागछ्य।</verse>
				<verse number="2">और देख, एक कोढ़ी यीशु का पास आछ, और झुकभेरन ऊस ढोक दीछ, और कुन लागछ्य, “हे प्रभु, मैंस चंगो कर दे, क्याखिनकि मैं जाणछूँ, कि तैं मैंस चंगो कर सकछै।”</verse>
				<verse number="3">यीशु ले हात बढ़ाभेरन ऊस छूँछ और क्योछ, “होई, मैं चाँछू, तैं चंगो है जा।” और उ कोढ़ भटे तुरन्त चंगो है ग्यो।</verse>
				<verse number="4">यीशु ले उथैं क्योछ, “सुण, कैंथैं के जन कये, कि मैंले तैंस चंगो करछ्य, पर जाभेरन अपूनास याजक स दिखाये, और कोढ़ भटे ठीक हुना का बारिमें, जेले मूसा ले जो भेंट ठैरा राखछ्य, उ भेंट चढ़ाये, ताकि लोग जाण सकून की तैं चंगो है गैछै।”</verse>
				<verse number="5">और जब यीशु कफरनहूम गौं में आछ, तब एक रोमी सुबेदार उक पास आछ, और गिड़-गिड़ा भेरन विनती करून लागछो,</verse>
				<verse number="6">“हे प्रभु, म्यरो सेवक घर में लकवा का रोगा का कारण चल फिर नै सकूनो, और उ भौत दुखी छै।”</verse>
				<verse number="7">यीशु ले उथैं क्योछ, “मैं आभेरन ऊस चंगो करोलो।”</verse>
				<verse number="8">लेकिन रोमी सुबेदार ले क्योछ, “हे प्रभु में इस लायक न्हैतिनू कि तुम म्यारा घर में आ, पर तैं केवल याँई भटे कै दे, और म्येरो सेवक चंगो है जालो।</verse>
				<verse number="9">मैंस ले पत्तो छै कि मैंले अधिकारीन का अधिकार में काम करून वालो आदिमी छूँ, और म्यारा अधिकार में थ्वाड़ा सिपाई काम करनान। जब मैं एक स हुकुम दीभेरन कुछूँ जा! त उ जाछो, और दुसारा थैं ‘अ!’ त उ उछो, और जब अपून दास थैं कुछूँ, यो काम कर! त उ करछो।”</verse>
				<verse number="10">जब यीशु ले यो सुणिछ्य त चकित भ्यान, और अपून पछिल उनवालान थैं क्योछ, “मैंले पुर इस्राएल देशा का एक आदिमी मैंले इसो विश्वास नै देख्यो, जो यो गैर-यहूदी आदिमी नियाती मैंमें विश्वास करून वालो हो।</verse>
				<verse number="11">मैं तुमूनथैं कुछूँ कि भौत सारा गैर-यहूदी लोग पूरब और पश्चिम दिशा भटे आभेरन अब्राहम, इसहाक और याकूब का दगाड़ स्वर्ग का राज्य की दावत में शामिल होला।</verse>
				<verse number="12">लेकिन इस्राएल देशा का लोग भ्यार अन्यारा में डाली दी जाला, और जा रूनो और दाँतून को पिसून होलो।”</verse>
				<verse number="13">और यीशु ले रोमी सुबेदार थैं क्योछ, “अपून घर जा, त्यारा विश्वास का अनुसार तैखिन हो।” और उनजैई उको सेवक ठीक है ग्यो।</verse>
				<verse number="14">और जब यीशु पतरसा का घर पुजियान, तब उनूनले देखछ्य कि पतरस कि सासू स भौत बुखार में पड़ीना की छै।</verse>
				<verse number="15">यीशु ले उको हात स छूछ, और उई बखत उको बुखार ठीक है ग्यो, और उ उनेरि आदर-खातर करून लागछ्य।</verse>
				<verse number="16">और जब ब्याल भैछ त लोग भौत लोगून जिनून में भूत लागिना का छ्या, उनून यीशु का पास ल्यान। और यीशु ले वचन ले उन भूतून इनून में भटे निकाल दीछ, और उन सब बिमारून चंगो करछ्य,</verse>
				<verse number="17">ताकि जो वचन परमेश्वरो को संदेश दिनवाला यशायाह द्वारा कई ग्योछ, उ पुरो हो; “उनूनले अपून मलि में हमरि कमजोरीन ली ल्हीछ, और हमार रोगून उठा ल्हीछ।”</verse>
				<verse number="18">यीशु ले जब अपून चारू तरफ भीड़ स उन देखछ्य, त यीशु ले अपून शिष्यून थैं क्योछ, आ हम गलील झील का पार जानू।</verse>
				<verse number="19">जसीकैं उन झीला का पार जाना की तैयारी करून मरेछ्या, तो उई बखत मूसा का नियम सिखून वाला एक आदिमी ले आभेरन उथैं विनती करछ्य, “गुरू जी, जा काँई तुम जाला, मैं तुमोरो च्योलो बनून खिन मैं तुमार पछिल हिटलो।”</verse>
				<verse number="20">यीशु ले ऊस जबाब दीछ, “सियाल का रून खिन गुफा छै और आकाशा का चिड़ियान खिन बसेरा छै, लेकिन मैं आदिमी का च्याला का पास कोई घर नाहातिन जा मैं रै सकू।”</verse>
				<verse number="21">एक दुसारा शिष्य ले उथैं विनती करछ्य, “प्रभु जी, मैंस पैलि घर खिन वापस जान दे। ताकि म्यारा बबा का मरना का बाद ऊस दफना सकू और फिर आभेरन तेरो शिष्य बनूलो।”</verse>
				<verse number="22">लेकिन यीशु ले क्योछ, “म्येरो शिष्य बन जा, और जो लोग आत्मिक रूप ले मरिना का छन, उनून अपून मुर्दान दफनून दी।”</verse>
				<verse number="23">जब यीशु नाव में चढ़ी ग्यो त उक शिष्य ले उक पछिल न्हैग्या।</verse>
				<verse number="24">और झील में अचानक इदुक ज्यादा आँधी चलछ्य, कि नाव लहरून ले ढकीन लागछ। लेकिन यीशु उ बखत पड़ी रियोछो।</verse>
				<verse number="25">तब उनूले यीशु का पास भेरन ऊस जगाछ, “प्रभु हमून बचा! हम डूबून मरिया।”</verse>
				<verse number="26">और यीशु ले उनूनथैं क्योछ, “हे अविश्वासियों, तुम किलैं डरून मरेछा?” और तब उले उठाभेरन आँधी और पानि का लहरून डांटछ्य, और उई बखत सब शान्त है ग्यो।</verse>
				<verse number="27">और शिष्य चकित है भेरन कुन लाग्यान, “यो कसो आदिमी छै, कि आँधी और पानि की लहर ले येको हुकुम मान्नान।”</verse>
				<verse number="28">और जब उन झीला का पार गदरेनियों का प्रदेश में पुजियान, त द्वी आदिमी जिनून में भूत लागिना को छ्यो, कबरिस्तान भटे निकल भेरन उथैं मिलीयान। उन द्वीवै इदुक ज्यादा उग्र छ्या, कि कोई ले उ बाट भटे नै निकल सकछ्यो।</verse>
				<verse number="29">और यीशु स देखभेरन, उन द्वीवै ले चिल्ला-चिल्ला भेरन कुन लाग्यान, “परमेश्वरा का च्याला, हमोरो तैंथैं कि काम? क्या तैं याँ हमून बखत है पैलि परेशान करून खिन आ रैछै?”</verse>
				<verse number="30">वाँ थ्वाड़ा दूर में भौत सुंअरून को एक ठूलो झुंड चरून मरेछ्यो।</verse>
				<verse number="31">भूत ले यो कैभेरन यीशु थैं विनती करछ्य, “अगर तैं हमून निकालूनई चाँछै त हमून उन सुंअरून झुंड में भेज दे।”</verse>
				<verse number="32">यीशु ले उनूनथैं क्योछ, “जा!” और उन निकल भेरन सुंअरून में समा ग्यान, और देख, उ पुरो झुंड डाणा छ्यो, और पुरो झुंड ओरालो में तेज भाग भेरन झील में फटंग हाड़ी भेरन डुबिभेरन मर्यान।</verse>
				<verse number="33">तब सुंअरून का ग्वाला भाजि भेरन, नगर जाभेरन सारी बात, और उन द्वी आदिमी का जिनून भूतून ले जकड़ीना का छ्या, उनोरो पुरो हाल बताछ।</verse>
				<verse number="34">यो बात सुणिभेरन सारा नगरा का लोग यीशु मिलून खिन आयान, और जब उनूनले ऊस देखछ्य, त उनूनथैं विनती करछ्य कि हमार प्रदेश भटे भ्यार न्हैजा।</verse>
			</chapter>
			<chapter number="9">
				<verse number="1">रफिर यीशु नाव में बैठभेरन पार ग्योछ, और अपून नगर में आछ।</verse>
				<verse number="2">और देखा, कुछ लोग एक लकवा पड़ीना का आदिमी स चरपाई में राखभेरन यीशु का सामुनि लायान। यीशु ले उनोरो विश्वास देखिभेरन उ लकवा का रोगी थैं क्योछ, “हे पुत्र, हिम्मत राख, मैं त्यार पापून माफ करछूँ।”</verse>
				<verse number="3">यो सुणभेरन कई मूसा का नियम सिखून वाला लोग सोचू लाग्यान, “यो त परमेश्वर की बुराई करून मेरियोछ।”</verse>
				<verse number="4">यीशु ले उनार मनाका बिचार जाणिभेरन क्योछ, “तुम अपून-अपून मन में कि सोचन मर्यान?</verse>
				<verse number="5">इसो कुनो आसान छै? कि त्यार पाप माफ है ग्यान, ‘या यो कुन उठ और चल फिर?’</verse>
				<verse number="6">येक कारण कि तुम जाणि ली मैं आदिमी का च्याला स धरती में पाप माफ करना को ले अधिकार छै।” यीशु ले उ लकवा का रोगी थैं क्योछ, “मैं तैथैं कुछूँ उठ, अपूनो बिछान उठाभेरन अपून घर खिन जा।”</verse>
				<verse number="7">उ उठाभेरन अपून घर खिन न्हैग्यो।</verse>
				<verse number="8">भीड़ा का लोग यो देखिभेरन चकित हो ग्या, और लोग परमेश्वर की बड़ाई करून लाग्यान, जेले लोगून इसो अधिकार दी रैछ।</verse>
				<verse number="9">जसीकैं यीशु वाँ भटे अघिल बढ़ियान त उनूनले मत्ती नामोको एक आदिमी स चंगी का चौकी में बैठिना को देखछ्य, यीशु ले ऊस बुलाभेरन क्योछ, “म्यार दगाड़ अ और म्येरो शिष्य बन जा।” और उ मत्ती ले उई बखत अपूनो काम छोड़ी दीछ, और यीशु को शिष्य बन ग्यो।</verse>
				<verse number="10">और जब यीशु उक घर में खान खिन बैठिना को छ्यो, भौतसा चुंगी लिनवाला और पापी आभेरन यीशु और उनार शिष्यून का दगाड़ खानो खान बैठ रै छ्या।</verse>
				<verse number="11">और यो देखिभेरन फरीसी लोगून ले, यीशु का शिष्यून थैं क्योछ, “तुमोरो गुरू चुंगी लिनवाला और पापी का दगाड़ किलैं खाछो?”</verse>
				<verse number="12">यो सुणिभेरन, यीशु ले उनूनथैं क्योछ, “जसिकै कि भल-चंगान लोगून डाक्‍टर कि के जरूरत नाहातिन, लेकिन जो बिमार छन उनुस डाक्‍टर कि जरूरत छै।</verse>
				<verse number="13">येक कारण जा और उको मतलब समझा मैं बलिदान नै पर दया चाँछू। क्याखिनकि मैं धर्मीन नै, लेकिन पापिन बुलून खिन आरयू।”</verse>
				<verse number="14">तब यहूना का शिष्य यीशु पास आभेरन कुन लाग्यान, “कि कारण छै कि हम और फरीसी लोग त बर्त करनू, लेकिन त्यारा शिष्य बर्त नै करना?”</verse>
				<verse number="15">यीशु ले उनूनथैं क्योछ, “जब तलक मैं अपून शिष्यून का दगाड़ छूँ, उन बर्त कसीकैं कर सकनान? क्याखिनकि उन खुशी मनून मर्यान; ठीक उसीकैं जसकैं एक ब्योला का मित्र उक दगाड़ उको ब्याकी दावत में खुशी मनूनान। लेकिन इसो बखत आला जब ब्योलो भटे अलग करि जालो, तब उ बखत उन बर्त राखाँला।”</verse>
				<verse number="16">“लोग नय्या कपाड़ा में पुरान कपाड़ा को टॉल नै लगूना, क्याखिनकि नय्या कपाड़ा धुना का बाद छ्वोटो हो जाछो, जैल पुरानो कपाड़ा और ज्यादा फाटि जालो।</verse>
				<verse number="17">इसीकैं यीशु ले एक और उदारण दीभेरन उनुस समझूंनान, लोग नय्या अंगूर रस पुरानो चमड़ा का थैल में नै राखनो, क्याखिनकि जब अंगूर को रस बढ़लो, तब थैलास फाड़ी द्यलो, और अंगूर रस और थैल द्वीवै बरबाद है जाला। येक कारण हम नय्या अंगूरो को रस नय्या चमड़ा को थैल में राँखनू।” और तब द्वीवै सुरक्षित रूनान।</verse>
				<verse number="18">जब यीशु उनूनथैं यो कुनमरेछ्यो, त यहूदी सभाघरो को एक अधिकारी आछ, और यीशु स प्रणाम करछ्य और क्योछ, “मेरि नानि चेलि अल्यै मरि रै, तुम हिटभेरन उमें अपून हात राखला त, उ ज्यून है जालि।”</verse>
				<verse number="19">यीशु और उक शिष्यून उक दगाड़ जानान।</verse>
				<verse number="20">और देख एक स्यैनि स जैस बारा साल भटे खून बगना की बिमारी छी। उनार पछिल है आभेरन उक कपाड़ास छू लीछ।</verse>
				<verse number="21">क्याखिनकि उ अपून मन में कुछी “अगर मैं उक कपाड़ास ले छूँ ल्यूलो, तब चंगी हो ज्यूलो।”</verse>
				<verse number="22">यीशु ले मुड़भेरन ऊस देखछ्य और क्योछ, “चेलि हिम्मत राख, तैले मैंमें विश्वास करछ्य, यो बात ले तैंस चंगो करछ्य।” और उ स्यैनि उई घड़ी चंगी है ग्यै।</verse>
				<verse number="23">जब यीशु उ अधिकारी का घर पुजियान, त उले लोगून भौत डाड़ मारून और रून-कलानो करून देखछ्य।</verse>
				<verse number="24">तब यीशु ले उनूनथैं क्योछ, “तुम किलैं इदुक हाल्ला-गुल्ला करून मरेछा, यो चेलि मरि नै रै, पर पड़ रैछ।” यो सुणिभेरन लोग उनेरि हसी करून लाग्यान।</verse>
				<verse number="25">लेकिन उनूनले सबून भ्यार भेजि दीछ और यीशु भितर ग्यान और उनूनले हात पकड़ भेरन चेलि स उठाछ, और चेलि ज्यून हो ग्यै।</verse>
				<verse number="26">यो बात की खबर उ पुर देश में फैल गै।</verse>
				<verse number="27">जब यीशु वाँ भटे अघिल ग्यान, त द्वी अन्धा उनार पछिल यो चिल्ला भेरन कुन मरेछ्या “हे यीशु, राजा दाऊद की सन्तान, हमून में दया कर।”</verse>
				<verse number="28">और जब यीशु घर में पुजियान, त उन अन्धा उनार पास आयान, और यीशु ले उनूनथैं क्योछ, “क्या तुम मैंमें विश्वास करछा, कि मैं तुमून चंगो कर सकछूँ?” उनूनले यीशु थैं क्योछ, “होई, प्रभु। हमून विश्वास छै, कि तुम हमून चंगो कर सकछा।”</verse>
				<verse number="29">तब यीशु ले यो कैभेरन उनार आँखान छूँछ, “तुमार विश्वास का अनुसार तुमून खिन है जौ।”</verse>
				<verse number="30">और उन देखून लागनान, और यीशु ले उनून चेतावनी दीभेरन उनूनथैं क्योछ, “देख, तुम यो बात कैसै जन बताया कि मैंले तुमून खिन की करछ्य।”</verse>
				<verse number="31">लेकिन उनूनले जाभेरन पुर प्रदेश में यो खबर फैला दीछ।</verse>
				<verse number="32">जब उन द्वी अन्धा आदिमी भ्यार जानमरेछ्या, त थ्वाड़ा लोग यीशु का पास एक आदिमी स ल्यान जो बोल नी सकछ्यो, क्याखिनकि उमें एक भूत छ्यो।</verse>
				<verse number="33">जब यीशु ले भूत स उ आदिमी भटे भ्यार निकाल दीछ, त उ बोलान लागछ्य। यो देखभेरन भीड़ कुन लागछी, “इस्राएल देश में हमून ले कभै इसो नै देख्यो।”</verse>
				<verse number="34">लेकिन फरीसी लोगून ले क्योछ, “यो त भूतून का सरदार शैताना का मद्दत ले भूतून निकालछ्यो।”</verse>
				<verse number="35">तब यीशु और उक शिष्य गलील प्रदेशा का कई शैहरून का और गौंन में घुमनै रियान, और उनार यहूदी सभाघर में जाभेरन उपदेश दी छ्यो, और परमेश्वरा का राज्य सुसमाचार प्रचार करछो, और लोगून की हर प्रकार का बिमारीन और कमजोरीन दूर करनै रियोछ।</verse>
				<verse number="36">जब यीशु ले भीड़ स देखछ्य, त उन लोगून में ऊस दया आछ, क्याखिनकि उ उन भेड़ून का जसा छ्या, जिनोरो कोई ले रखवाला नाहातिन, उन बेचैन और भटकिना का छ्या।</verse>
				<verse number="37">तब यीशु ले अपून शिष्यून थैं क्योछ, “जसीकैं गाड़ा में भौत फसल हुछी, इसा यो भौत लोग छन जो परमेश्वरो को बचनून में विश्वास करून खिन तैयार छन। लेकिन परमेश्वरा का राज्य बारिमें बतून खिन लोग कम छन।</verse>
				<verse number="38">येक कारण फसला का मालिक थैं बिनती करा कि उ फसल काटून खिन मजदूर भेजौ।”</verse>
			</chapter>
			<chapter number="10">
				<verse number="1">फिर यीशु ले अपून बारा शिष्यून अपून पास बुलाछ, और उनून भूत-परेतून निकालना को अधिकार दीछ, कि उनून निकालून और सब प्रकारे की बिमारी और सब प्रकारे की कमजोरी स दूर करून।</verse>
				<verse number="2">उन बारा प्रेरितून को नाम यो छन, जिनून यीशु ले चुनछ्य, पैलो शमौन जैक दुसोरो नाम यीशु ले पतरस राँखछ्य, और उको भाई अन्द्रियास, जब्दी को च्योलो याकूब और याकूब को नानो भाई यहूना,</verse>
				<verse number="3">फिलिप्पुस, बरतुल्‍मै, थोमा और चुंगी लिनवालो मत्ती, हलफई को च्योलो याकूब और तद्दै,</verse>
				<verse number="4">देशभक्त शमौन कनानी और यहूदा इस्करियोती जेले यीशु स दुश्मनून का हात बाद में धोखा ले पकड़ावा ले दीछ।</verse>
				<verse number="5">इन बारा शिष्यून यीशु ले यो आदेश दीभेरन भेजछ्य, गैर-यहूदी का पास जन जाया और नै सामरी लोगून का नगर में प्रवेश कर्या।</verse>
				<verse number="6">इस्राएल का घराना का लोगून का पास जा, जो परमेश्वर भटे दूर हो ग्यान, जसकै हराईना का भेड़ अपून रखवाला भटे दूर हो जाछी।</verse>
				<verse number="7">और जानै-जानै तुम प्रचार करभेरन कया, “स्वर्ग राज्य नजिक आग्योछ।”</verse>
				<verse number="8">बिमारून ठीक करा, मुरदान ज्यून करा कोढ़िन शुद्ध करा, भूतून निकाला। किलैकी तुमून ले मुफ्त में पा रैछ, मुफ्त में दी दीया।</verse>
				<verse number="9">सफर में अपूनी थैल में सुनो, चाँदी या ताँबा सिक्का जाम जन करा।</verse>
				<verse number="10">अपून बाँट खिन नै झवाला, याँ तक कि दुसोरो जोड़ो कपाड़ ले जन लिया, और नै जूता और नै लठ्ठी लिया, क्याखिनकि मजदूर स उकी मजदूरी मिलूनी चैछी।</verse>
				<verse number="11">जो कोई नगर या गौं में तुम जा, त पत्तो करा कि वाँ को भलो छै? जब तक वाँ भटे नै निकला, तब तक उई घर में मेहमान बनभेरन रया।</verse>
				<verse number="12">जब तुम उ घर में प्रवेश करा त आशीष दीया।</verse>
				<verse number="13">अगर उ घरा लोग योग्य होलो त तुमेरि आशीष उनूनमें बनिना की रौली, अगर नै हो तो तुमेरि आशीष तुमार पास वापस आ जालि।</verse>
				<verse number="14">जो कोई तुमोरो आदर नै करना, नै तुमोरो बात सुणनान, तब उ घर या नगर भटे जान बखत अपून खूटाकि धुल झाड़ी लिया।</verse>
				<verse number="15">मैं तुमूनथैं सच्ची कुछूँ कि न्यायक दिन उ नगर की हालत भटे सदोम और अमोरा का नगरून की हालत ज्यादा सहन योग्य होलि।</verse>
				<verse number="16">देख, मैं तुमून भेड़ून का समान भेड़ियान का बीच में भेजछूँ। येक कारण स्याँप की नियाती चालाक और कबूतर का नियाती भोला बन्या।</verse>
				<verse number="17">लेकिन लोगून भटे सतर्क रया, क्याखिनकि उन तुमून महासभान में सौपाला और अपून यहूदी सभाघरून में तुमून कोड़ा माराला।</verse>
				<verse number="18">तुम म्यारा कारण अधिकारीन और राजान का सामुनि उनूनमें, और गैर-यहूदी में गवै हुन खिन पेश करि जाला।</verse>
				<verse number="19">लेकिन जब उन तुमून पकड़वाला त फिकर जन कर्या, कि तुमून कसकैं या कि कुन होलो; क्याखिनकि जेले तुमून कुन होलो, उई बखत तुमून बता दी जालो।</verse>
				<verse number="20">क्याखिनकि बोलून वाला तुम नी हो, लेकिन यो तुमोरो पिता परमेश्वरे का आत्मा छै, जो तुमार द्वारा बोलोलो।</verse>
				<verse number="21">भाई अपून भाई स, और च्योलो अपून बबास मारून खिन दी द्यलो, और बच्चा अपून ईजा-बबाका खिलाफ हो भेरन मरवा द्याला। क्याखिनकि तुम मैंमें विश्वास करछा।</verse>
				<verse number="22">और म्यारा नामका कारण सब लोग तुमार दगाड़ बैर करला लेकिन जो आखरी तलक धीरज धरोल, उको उद्धार होलो।</verse>
				<verse number="23">जब उन तुमून एक नगर में सताला त दुसारा में भाजि जाया। क्याखिनकि मैं तुमूनथैं सच्ची कुछूँ कि यो है पैलि कि तुम इस्राएल देशा का सब नगरून में घुमून खतम नी कर राँखा, मैं आदिमी को च्योलो आ जूलो।</verse>
				<verse number="24">ना शिष्य अपून गुरू है और नै दास अपून मालिक है बढ़भेरन हुछो।</verse>
				<verse number="25">शिष्य अपून गुरू का और दास का अपून मालिक का बराबर हुनोई भौत छै, जब उनूनले मैं घरा का मालिक थैं शैतान क्योछ, त घरा का सदस्यून और ले बुर नामून ले किलैं नी पुकाराला।</verse>
				<verse number="26">येक कारण उनून है जन डरा, क्याखिनकि बखत उन मर्योछ जब सब कुछ जो ढकीन को छै उ सामुनि आ जालो, और जेले लुका रैछ उ सबून पत्तो चल जालो।</verse>
				<verse number="27">जो मैं तुमूनथैं अन्यारा में कुछूँ, ऊस तुम उज्याला में कया, और जो ले तुम कान लगाभेरन सुणछा, ऊस छत में चढ़भेरन प्रचार करा।</verse>
				<verse number="28">उनून भटे जन डरा जो शरीर स मारनान करनान, पर आत्मा स मारनान नै कर सकना, लेकिन परमेश्वर है डरा जो आत्मा और शरीर द्वीवै स नरक की आग में नाश कर सक्छ्यो।</verse>
				<verse number="29">क्या एक पैंस में द्वी चिड़िया नै बेचिना? फिरले तुमार पिता की मरजी का बिना उनूनमें भटे एक ले भिमें नै खिती सकनी।</verse>
				<verse number="30">परमेश्वर तुमार जीवन हर बात की परवाह करछो। और उ यो ले जाणछो की तुमार खोरा में कतुक बाल छन।</verse>
				<verse number="31">येक कारण डरा जन। तुम भौत चिड़ियान है ले कई ज्यादा कीमती छा।</verse>
				<verse number="32">जो कोई लोगून का सामुनि मैंस स्वीकार करोलो, मैंले ऊस अपून पिता का सामुनि, जो स्वर्ग में छै, स्वीकार करोलो।</verse>
				<verse number="33">लेकिन अगर उन दुसरान का सामुनि यो कुनाले डरनान की उन म्यारा च्याला छन, त मैं अपून पिता थैं जो स्वर्ग में छै, कै द्यूलो की उन म्यारा च्याला नाहातिन।</verse>
				<verse number="34">यो जन सोचा कि मैं धरती में लोगून का बीच में मेल-मिलाप करून खिन आरयूँ। मैं लोगून का बीच में मेल-मिलाप करून खिन नै बल्कि लड़ाई करून खिन आरयूँ।</verse>
				<verse number="35">मैं त येक कारण आरयूँ कि लोगून उनार बबा का, चेलि स उकी ईजा का, और ब्वारी स उकी सासू खिलाफ करून खिन आरयूँ।</verse>
				<verse number="36">और आदिमी का बैरी उक परिवार का लोग होलो।</verse>
				<verse number="37">“जो अपून ईजा-बबा स मैं है ज्यादा प्रेम करछ्यो, उ म्येरो शिष्य बनना को योग्य नाहातिन, जो अपून नान्तिनान मैं है ज्यादा प्रेम करछ्यो, उ म्येरो शिष्य बनना को योग्य नाहातिन।</verse>
				<verse number="38">और जो म्यारा शिष्य हुना का कारण दुख उठून खिन और मरून खिन ले तैयार हो, जो म्यारा पछिल नै हिटन, उ म्येरो शिष्य बनना को योग्य नाहातिन।</verse>
				<verse number="39">और जो अपून प्राण संसारिक जीन्दगी जीन खिन बचालो, उ परमेश्वरा का दगाड़ अनन्त जीवन पाना को मौका खो द्योलो, लेकिन जो मैं खिन और सुसमाचार खिन अपून प्राणस दीछो, उ अनन्त जीवन पालो।</verse>
				<verse number="40">उ, जो तुमून अपनूछो, उ मैंस अपनूछो म्येरो स्वागत करछो, उ सिर्फ म्येरो नै बल्कि म्यारा भेजून वाला को स्वागत करछो।</verse>
				<verse number="41">जो परमेश्वरो को संदेश दिनवाला स, परमेश्वरो को संदेश दिनवाला जाणिभेरन ग्रहण करो, उ परमेश्वरो को संदेश दिनवाला का नियाती ईनाम पालो, और जो धर्मी आदिमी स, धर्मी आदिमी मानिभेरन ग्रहण करौ, त उ धर्मी आदिमी का नियाती ईनाम पालो।</verse>
				<verse number="42">जो कोई इन नानान में भटे कैस एक शिष्य जाणिभेरन ठन्डो पानि को एक गिलास ले पिलालो, मैं तुमूनथैं सच्ची कुछूँ, कि परमेश्वर ऊस ईनाम जरूर द्याला।”</verse>
			</chapter>
			<chapter number="11">
				<verse number="1">जब यीशु अपून बारा शिष्यून आदेश दी चुकछ्य, त उनार गलील प्रदेशा का नगरून में उपदेश दिन और प्रचार करून खिन न्हैग्या।</verse>
				<verse number="2">जब जेल खान में यहूना ले मसीह का कामून कि चर्चा सुणछ्य, त अपून शिष्यून उक पास यो पुछून खिन भेजछ्य।</verse>
				<verse number="3">“क्या तैंई उनवालो मसीह छै, जैस भेजना को वादा परमेश्वर ले कर राँखछ्यो, या हम कै दुसरा को इन्तजार करनू?”</verse>
				<verse number="4">यीशु ले उनून जबाब दीछ, “जो तुम सुणछा और देखछा, उ सब जाभेरन यहूना स बताया दीया,</verse>
				<verse number="5">कि अन्धा देखनान, लंगड़ा हिटनान, कोढ़ी शुद्ध करि जानान, टौव्ला सुणनान, मुर्दा ज्यून करि जानान और गरीबून सुसमाचार सुणायी जाछो।</verse>
				<verse number="6">और धन्य छन उन, जो मैंमें शक नै करना।”</verse>
				<verse number="7">जब यहूना च्याला जान लाग्यान, तब यीशु ले भीड़ का लोगूनथैं यहूना का बारिमें क्योछ, तुम बिरान जागा में कि देखून खिन गैछा, हवा ले हिलते हुये सरकण्डान,</verse>
				<verse number="8">फिर तुम कि देखून खिन गैछा, क्या एक आदिमी का जेले भौत मेहंगा कपाड़ा पैनिना छ्या? देखा जो मेहंगा कपाड़ा पैनान उन महलून में रूनान।</verse>
				<verse number="9">फिर तुम किलैं गैछा, कोई परमेश्वरो को संदेश दिनवाला स देखून खिन? होई, मैं तुमूनथैं कुछूँ, परमेश्वरो को संदेश दिनवाला है ले ठूला आदिमी स।</verse>
				<verse number="10">पवित्र-शास्त्र में परमेश्वर उक बारिमें कुंछो, देख, मैं अपूनो संदेश दिनवाला स त्यारा अघिल भेजछूँ, जो लोगून त्यारा उन तैखिन तैय्यार करोलो।</verse>
				<verse number="11">मैं तुमूनथैं सच्ची कुछूँ कि स्यैनि भटे जन्म लीनवालान में भटे यहूना बपतिस्मा दिनवालो है ठूलो कोई ले नै भ्यो; पर जो स्वर्ग का राज्य में नान है नान छै उ यहूना है ठूलो छै।</verse>
				<verse number="12">और जब यहूना बपतिस्मा दिनवाला ले प्रचार करून शुरू करछ्य, उ बखत भटे अब तक स्वर्ग का राज्य में पुरी शक्ति ले फैलून मर्योछ, और जो अत्याचारी लोग छन उ येको नाश करून मर्यान।</verse>
				<verse number="13">क्याखिनकि सब परमेश्वरो को संदेश दिनवालान का सब किताबून में, और मूसा का नियम में यहूना बपतिस्मा दीन वाला का ऊँन तक परमेश्वरा का राज्य का बारिमें भविष्यवाणी करनै रियान।</verse>
				<verse number="14">अगर तुम मेरि बात मानून चाँछा तो सुणा, कि परमेश्वरो को संदेश दिनवाला एलिय्याह जो उनवालो छ्यो उ योई छै।</verse>
				<verse number="15">जो कोई ले सुणून खिन तैयार हो ऊस सुणून और समझून चैछो।</verse>
				<verse number="16">मैं यो बखता का लोगून तुलना कै दगाड़ करूँ? उ उन नान्तिनान का समान छन, जो बजारून में बैठि भेरन एक-दुसरान आवाज दीभेरन कुंनान।</verse>
				<verse number="17">हमूले तुमून खिन बांसुरी बजाछ और तुम नै नाचिया; और हमून ले शोक का गीत ले गायान, फिरले तुम नै रोया।</verse>
				<verse number="18">क्याखिनकि यहूना बार-बार बर्त राँखछो, और अंगूरो को रस नै पिनो, और फिरले उन कुंनान उमें भूत छै।</verse>
				<verse number="19">लेकिन जब मैं आदिमी को च्योलो खान-पिनै आछ, और उन कुंनान, देखा, पेटू और पियक्कड़ लोगून को और चुंगी लिनवालो और पापिन को मित्र छै! हालाकि, एक आदिमी का काम यो साबित कराला की बुद्धिमान को छै।</verse>
				<verse number="20">तब यीशु ले उन लोगून फटकार लगाछ, जो उन शैहर रून में रूछ्या, जैमें उले भौत चमत्कारा का काम करिना का छ्या; क्याखिनकि उनूनले अपून पापून भटे पश्चाताप नी करिना को छ्यो</verse>
				<verse number="21">“हाय, खुराजीन शैहर और बैतसैदा शैहर का लोगो! जो चमत्कारा का काम तुमून में करि ग्यान, अगर उन काम सोर और सिदोन शैहरा का रून में करि जाना, तो वाँ का लोग भौत पैलि टाट ओड़ लीना और अपून मलि में छारो छिड़क लीना यो दिखून खिन कि हमूले अपून पापून है पश्चाताप कर है छ।</verse>
				<verse number="22">लेकिन मैं तुमूनथैं कुछूँ कि न्याय का दिन जो सजा परमेश्वर सोर और सिदोन शैहरा का रून ला लोगून द्योलो, तुमून परमेश्वर उ है ले ज्यादा सजा द्योलो।</verse>
				<verse number="23">हे कफरनहूम गौं का लोगो, क्या तैं स्वर्ग तक उच्चो करि जालै? तैं त अधलोक तक तलि जालै! जो चमत्कारा का काम तैंमें करि ग्यान, अगर सदोम शैहर में करि जाना, तो उ आज तक बनिना को रून।</verse>
				<verse number="24">लेकिन मैं तुमूनथैं कुछूँ कि न्याय का दिन जो सजा परमेश्वर सूर और सदोम का शैहरा का लोगून द्योलो, तुमून परमेश्वर उ है ले ज्यादा सजा द्योलो।”</verse>
				<verse number="25">उई बखत यीशु ले क्योछ, “हे पिता, स्वर्ग और धरतीका प्रभु, मैं तेरो धन्यवाद करछूँ, कि तैले इन बातुन ज्ञानिन और समझदार लोगून भटे लुका रैछ, और साधरण लोगून में भेद प्रगट करछ्य।</verse>
				<verse number="26">होई, पिता जी, किलैंकी तैंस योई निको लागछ्य।</verse>
				<verse number="27">म्यारा बबा ले मैंस सब कुछ दीछै, केवल उई छै जो च्याला स जाणछो। केवल च्योलो छै जो सच्ची में बबा स जाणछो। जिन लोगून च्योलो चुनछो, उन लोग बबा स जाणाला।</verse>
				<verse number="28">हे सब मेहनत करनवालो और बोझ है दबीना का लोगों, म्यारा पास आ, मैं तुमून आराम द्यूलो।</verse>
				<verse number="29">म्येरो जुवा अपून मलि में उठा ली, मैथैं सिखा, किलैकी मैं नम्र और मन में दीन छूँ; और तुम अपून मन में आराम पाला।</verse>
				<verse number="30">किलैकी म्येरो जुवा सहन करून खिन आसान और म्येरो बोझ हलको छै।”</verse>
			</chapter>
			<chapter number="12">
				<verse number="1">जब यीशु और उक शिष्य सबत दिन ग्यूका गाँड़ान भटे हो भेरन जानमरेछ्या, तब उक शिष्यून भुख लागछी और उन बालान टोड़-टोड़ भेरन खान लाग्यान।</verse>
				<verse number="2">तब फरीसी लोगून ले यो देखिभेरन यीशु थैं क्योछ, “देख तुमार शिष्य इसो काम किलैं करनान, जो काम मूसा का नियम का अनुसार सबत दिन करून ठीक नाहातिन?”</verse>
				<verse number="3">तब यीशु ले उनूनथैं क्योछ, “क्या तुमूनले परमेश्वरा का बचन में कभै नै पढ़यो कि जब दाऊद राजा और उक दगड़ियान भुख लागछ्य त उनूनले कि करछ्य?</verse>
				<verse number="4">कसीकैं परमेश्वरा का घर में ग्योछ और अपून दगड़ियान का दगाड़ भेंट चढ़ाईना रोटा खयान, उन भेंट चढ़ाईना का रोटान दाऊद और उक दगड़ियान खानो नियम-कानून का अनुसार मना छ्यो। भेंट चढ़ाईना का रोटा केवल याजक खा सकछ्या।</verse>
				<verse number="5">क्या तुमूनले मूसा का नियम में नै पढ़यो कि याजक सबता का दिन मन्दिर में सबता का दिन की विधि स तोड़ून में निर्दोष ठहरनानी?</verse>
				<verse number="6">मैं तुमून बतून चाँछू की येको की मतलब छै, मैं तुमार पास आयूँ, और मैं मन्दिर है ले बढ़भेरन छू।</verse>
				<verse number="7">तुम जाणछा की पवित्र-शास्त्र में इन बातुन को की मतलब छै, ‘मैं खिन, बलिदान चढ़ूना का बजाय, मैं चाछूँ की तुम दुसरान खिन दयालु बना।’ तो तुम म्यारा इन निर्दोष शिष्यून की निन्दा नी करना।</verse>
				<verse number="8">क्याखिनकि मैं आदिमी का च्योलो, सबतो को ले प्रभु छूँ।”</verse>
				<verse number="9">यीशु वाँ भटे निकल भेरन उनार यहूदी सभाघर में आयान।</verse>
				<verse number="10">वाँ एक आदिमी छ्यो, जैक एक हात सुखी ग्यो छ्यो। तब उन लोगून ले यीशु में दोष लगून खिन पुछनान, “क्या सबता का दिन चंगो करून उचित छै?”</verse>
				<verse number="11">यीशु ले उनूनथैं क्योछ, “तुमून में इसो को छै जैकी एक भेड़ हो, और उ सबता का दिन गड्डा में खितीजो, त उ ऊस पकड़ भेरन भ्यार नी निकाल?</verse>
				<verse number="12">त एक आदिमी का मोल भेड़ भटे कतुक बढ़भेरन छै, येक कारण सबता का दिन लोगून चंगो करून ठीक छै।”</verse>
				<verse number="13">तब यीशु ले उ सुखीना का हात वाला आदिमी थैं क्योछ, “अपून हात सिददो कर।” और उले अपूनो हात अघिल बढ़ा छै, और तब उको हात दुसारा हात की नियाती बिल्कुल ठीक है ग्यो।</verse>
				<verse number="14">तब कुछ फरीसी लोग यहूदी सभाघर है भ्यार निकलनान और उनार दगाड़ मिलभेरन योजना बुन मरेछ्या, कि “यीशु की हत्या कसकैं करूनू?”</verse>
				<verse number="15">यो जाणिभेरन यीशु वाँ भटे न्हैजानान, और भौत लोग उक पछिल जानान, और उले सब लोगून चंगा करछै।</verse>
				<verse number="16">और यीशु ले उनून चेतावनी दीभेरन हुकुम दीछ, “कैसे जन बताया कि मैं परमेश्वरो को पुत्र छूँ।”</verse>
				<verse number="17">ताकि जो परमेश्वरो को संदेश दिनवाला यशायाह द्वारा परमेश्वर ले कईना को छ्यो उ बात पुरी हो।</verse>
				<verse number="18">“देखा यो म्येरो सेवक छै, जैस मैंले चुन रैछ; और म्येरो प्रिय, जै भटे में भौत खुश छूँ, मैं ऊस अपूनी आत्मा ले भर दीयूलो, और उ गैर-यहूदी लोगून न्याय सुसमाचार द्योलो।</verse>
				<verse number="19">उ नै त झगाड़ा करोलो, और उ लोगून का बीच में कोई घमण्ड ले भरि भेरन भाषण नी द्योलो।</verse>
				<verse number="20">उ कैसे ले नुकशान नी पुजालो जो एक कुचलीना का सरकंडा की नियाती कमजोर हो, जैस ले परेशानी हो उ सुलगती बत्ती का नियाति छै, जब तक उ न्याय स जीत नै बदल दे।</verse>
				<verse number="21">और अन्यजाति उक नाम में आश राखाला।”</verse>
				<verse number="22">तब लोग एक अन्धा-गूँगा आदिमी स जैमें भूत लागिना को छ्यो, ऊस यीशु का पास ल्यान; और यीशु ले ऊस ठीक करछ्य, और उ बोलून और देखून लागछै।</verse>
				<verse number="23">यो देखिभेरन सब लोगून ताजुब हुछो, और कुन लागनान, कि “क्या यो आदिमी मसीहा हो सकछी जो दाऊद राजा को वंशज हो, जेको हम उनाको इन्तजार करूनमर्या।”</verse>
				<verse number="24">लेकिन फरीसी लोगून ले यो सुणिभेरन क्योछ, “यो त भूतून का सरदार शैतान का मद्दत का बिना भूतून नै निकालनो।”</verse>
				<verse number="25">यीशु ले उनार मने की बात जाणिभेरन उनूनथैं क्योछ, “अगर एक देशा का लोग आपस मेंई लड़ते रून, उ देश नाश हो जानान; अगर नगर या केका घर में फुट पड़ जौ, त उ नगर या घरा का लोग कसीकैं मिलभेरन रै सकनान।</verse>
				<verse number="26">और अगर शैतान, भूतून निकालो, त उ अपूनो विरोधी हो ग्यो; त फिर उक राज्य कसकै बनिना को रै सकछो?</verse>
				<verse number="27">अगर मैं शैतान का मद्दत ले भूतून निकाल छूँ, त तुमार च्याला कैका मद्दले भूतून निकालनान? येक कारण उई तुमोरो न्याय करोलो।</verse>
				<verse number="28">और अगर मैं परमेश्वरे का आत्मा की मद्दत ले भूतून निकाल छूँ, तो परमेश्वरो को राज्य तुमार पास आ पुजिग्योछ।</verse>
				<verse number="29">या कोई ले आदिमी एक ताकतवर आदिमी का घर भितर घुस भेरन उकी सम्पत्ति लुट सकछो, जब तक कोई उ है ज्यादा ताकतवर हो उई ऊस हरा और बाँद सकछो, और उक घर स लुट सकछो।</verse>
				<verse number="30">जो म्यारा दगाड़ नाहतिन उ म्यारा बिरोध में छै, और जो म्यारा दगाड़ नै बुटलनो उ बिखरछो।</verse>
				<verse number="31">येक कारण मैं तुमूनथैं कुछूँ, आदिमीन को सब प्रकार को पाप और परमेश्वर की बुराई जो उन करनान, माफ करि जाला, लेकिन जो कोई पवित्र आत्मा खिन बुराई करोलो, परमेश्वर उ कभै ले माफ नी कराला।</verse>
				<verse number="32">जो कोई ले आदिमी का च्याला का बिरोध केले बात कलो, उको अपराध माफ करि जालो, लेकिन जो कोई पवित्र आत्मा का बिरोध बुरो बोलोलो, परमेश्वर उकी यो गलती नै यो लोक में और नै उना वाला युग में माफ करोलो।</verse>
				<verse number="33">अगर एक रूख निको छै, त उक फल ले निको होलो। अगर रूख खराब होलो, त उक फल ले खराब होलो क्याखिनकि रूख अपून फलून ले पछ्याणी जाछो।</verse>
				<verse number="34">तुम जहरीला स्यापा का ननतिना का नियाति छा, तुम बुर हो भेरन कसीकैं भलि बात कै सकछा? क्याखिनकि जो तुमार मन में भरिना को छै, उई तुमार मुँख भटे उछो।</verse>
				<verse number="35">भलो आदिमी अपून मन का भल भण्डार भटे भलि बातुन निकालछो, और बुरो आदिमी अपून बुर भण्डार भटे बुरी बात निकालछो।</verse>
				<verse number="36">और मैं तुमूनथैं कुंछू कि जो-जो बुरी बात आदिमी कुंनान, न्याय का दिन उन हर एक बातुन को हिसाब द्याला।</verse>
				<verse number="37">क्याखिनकि परमेश्वर न्याय करोलो और हरेक आदिमी का द्वारा कईना का बातुन का कारण निर्दोष, या दोषी ठैहरालो।”</verse>
				<verse number="38">तब कुछ मूसा का नियम सिखून वालान ले और फरीसी लोगून ले यीशु थैं क्योछ, “हे गुरू हम तेरो एक चमत्कारो को चिन्न देखून चानू, जेले यो पत्तो लागोलो की तैंस परमेश्वर ले भेज रैछ।”</verse>
				<verse number="39">और यीशु ले उनून जबाब दीछ, “यो बखत का बुर और ब्यभिचारी लोगून चमत्कारा का चिनै की माँग नै करून चैछी, लेकिन परमेश्वरो को संदेश दिनवाला योना का दगाड़ जो भ्योछ, उक अलावा यो बखत का लोगून चिन नी दिखाई जालो।</verse>
				<verse number="40">योना तीन दिन और रात माछा का पेट में रियोछ, उसीकैं मैं आदिमी को च्योलो ले तीन दिन और तीन रात धरतीका भितर रौलो।</verse>
				<verse number="41">नीनवे का लोग न्याय का दिन यो पीढ़ीका लोगून दगाड़ उठ ठाड़ होला और उनून दोषी ठहराल, क्याखिनकि उनूनले योना का प्रचार सुणिभेरन लोगून ले अपून पापून है पश्चताप करछै; और याँ उ छै जो योना है ले ठूलो छै, लेकिन तुम पश्चताप करून है इन्कार करछा।</verse>
				<verse number="42">और न्याय का दिन दक्षिण की रानी यो पीढ़ी लोगून का दगाड़ ठाड़ होलि और इनून दोषी ठहराली, क्याखिनकि उ राजा सुलैमान को ज्ञान सुणून खिन धरतीका छोर भटे आयीना की छी, और देखा याँ उ छै जो राजा सुलैमान है ले ठूलो छै, लेकिन तुम पश्चताप करून है इन्कार करछा।</verse>
				<verse number="43">जब भूत उ आदिमी में भटे निकल जाछो, त उ आराम करून खिन डाणा-काँणा में भटकछी; मगर ऊस आराम नै मिलूनो।</verse>
				<verse number="44">तब उ अपून आप थैं कुंछी, ‘मैं जै आदिमी में जूलो।’ जा भटे आरयूँ और वाँ आभेरन उ आदिमी का जीवन स उ घरा का नियाती पाछी, जैस साफ-सुथरा करि ग्योछ, पर उ खाली छ्यो।</verse>
				<verse number="45">तब उ भूत जाभेरन अपून है बुर सात भूतून अपून दगाड़ ल्यूछी, और उको भितर जाभेरन रून लागछी, और उ आदिमी की हालत पैलि भटे और ले बुरी हो जाछी। यो बखत का बुर लोगून का दगाड़ ले इसोई होलो।”</verse>
				<verse number="46">जब यीशु भीड़ का दगाड़ बात करून मरेछ्यो, तब उकी ईजा और भाई भ्यार ठड़ा छ्या और उक दगाड़ बात करून चाँछ्या।</verse>
				<verse number="47">कैले यीशु थैं क्योछ, “तेरि ईजा और त्यारा भाई भ्यार ठाड़ छन, और तेरा दगाड़ बात करून चाँनान।”</verse>
				<verse number="48">यो सुणिभेरन यीशु ले ऊस जबाब दीछ, “को छै मेरि ईजा? और को छै म्येरो भाई?”</verse>
				<verse number="49">और अपून शिष्यून का तरफ इशारा करभेरन क्योछ, “देखा यो छन मेरि ईजा और भाई।</verse>
				<verse number="50">किलैकी जो कोई ले म्यारा स्वर्गीय पिता इच्छा में चलछो, उई म्येरो भाई और मेरि बैनि, और मेरि ईजा छै।”</verse>
			</chapter>
			<chapter number="13">
				<verse number="1">उई दिन यीशु घर भटे निकल भेरन झील का किनार में जा बैठियान।</verse>
				<verse number="2">और उक पास भौत भीड़ जामा हो जाछी, कि यीशुस नाव में बैठून पड़छो और सारी भीड़ झीला किनारा में ठड़ीना की छी।</verse>
				<verse number="3">और यीशु ले कहानी सुणाभेरन उनार दगाड़ भौत बात कर्यान, “एक किसान बी बुन खिन ग्योछ।</verse>
				<verse number="4">जब उ बी बुनमरेछ्यो, त थ्वाड़ा बी बाँट का किनार में पड़छो, और चिड़ियान ले आभेरन उनुस खा लीछ।</verse>
				<verse number="5">थ्वाड़ा बी पथरीली भूमि में पड़छो, और उन माँटाक कमीक कारण जल्दी जाम ग्या।</verse>
				<verse number="6">और जब तेज घाम लागछ्य, तो उन सुखी ग्या, किलैकी उनार जाड़ गैल माँट में नी छ्या।</verse>
				<verse number="7">और थ्वाड़ा बी झाड़िन का बीच में पड़ीयान, और झाड़िन ले ठूलो हो भेरन उनुस दबै दीछ,</verse>
				<verse number="8">और थ्वाड़ा बी निको भूमि में पड़छ, और यो बी जामियान और भौत सारा फल ल्यान, कोई सौ गुना, कोई साठ गुना, और कोई तीस गुना।</verse>
				<verse number="9">जो कोई यो बात स सुण सकछो जो मैं कुन मरेयू, उन यो समझना की कोशिश करून।”</verse>
				<verse number="10">यीशु का शिष्यून ले उथैं आभेरन क्योछ, “तैं लोगून थैं कहानी सुणाभेरन किलैं बात करछै?”</verse>
				<verse number="11">तब यीशु ले जबाब दीछ, “यो येक कारण कि तुमून स्वर्ग का राज्य को गुप्त भेद की समझ दी रैछ, लेकिन उनून नै।</verse>
				<verse number="12">क्याखिनकि जैक पास समझना की इच्छा छै, परमेश्वर ऊस और ले समझ द्ययोलो, पर जैका पास समझना की इच्छा नाहातिन, उथैं उले ली, ली जालि, जो उक पास छै परमेश्वर उ समझ ले उथैं है ली ल्योलो।</verse>
				<verse number="13">मैं उनार दगाड़ येक कारण कहानीन में बात करछूँ, कि उन देखनान त सही पर उन पछ्याण नै पान, उन सुणनान त सही पर समझ नै सकना।</verse>
				<verse number="14">उनार बारिमें यशायाह की यो भविष्यवाणी पुरी हुछी: तुम कानून ले त सुणला, लेकिन समझला नी; और आँखन ले त देखला, लेकिन समझ में नी आ।</verse>
				<verse number="15">क्याखिनकि इन लोगून को मन कठोर हो ग्यान, और उन कानून ले कम सुणनान, उनूनले अपून आँखा बन्द कर हलियान; काँई इसो नै हो की उन आँखान ले देखून, और कानून ले सुणून और मन में समझून, और अपून पापून है पश्चताप करून और मैं उनून चंगो करूँ।</verse>
				<verse number="16">लेकिन धन्य छन तुमार आँखा, कि उ देखनान; और तुमार कान कि उन सुणनान।</verse>
				<verse number="17">क्याखिनकि मैं तुमूनथैं सच्ची कुंछू, भौत परमेश्वरो को संदेश दिनवाला और धर्मी लोग चाँछ्या कि जो बातुन तुम देखछ्या उन देखून चाँछ्या, लेकिन नै देख पाया; और जो बात तुम सुणछा, उन सुणून चाँछ्या लेकिन नै सुण पाया।</verse>
				<verse number="18">अब तुम बीज बुन वाला किसान को कहानी समझा।</verse>
				<verse number="19">जो कोई परमेश्वरा का राज्य को बचन सुणिभेरन नै समझूनो, उक मन में जो कुछ बोईना को छ्यो, ऊस आभेरन शैतान छीन भेरन लिजाछो। यो उई छै जो बाटान का किनार बोईन वाला बीज छ्यो।</verse>
				<verse number="20">और जो बी पथरीली भूमि में पड़ीयान, यो उन लोग नियाती छन जो बचन सुणिभेरन खुशी-खुशी मान्नान।</verse>
				<verse number="21">लेकिन उन परमेश्वरा का बचन अपून मन में गहराई ले नै बढून दीना, और उन थ्वाड़ा बखत तलक विश्वास करनान, जब बचन का कारण ले उनूनमें दुख और कलेश उछो, तब उन जल्दी बचन में चलूनो छोड़ दीनान।</verse>
				<verse number="22">और जो बी झाड़िन का बीच पड़ीनान छन, यो उन लोग का नियाती छन जिनूनले बचन तो सुणनान, पर यो जीन्दगी चिन्ता, और धन-दौलत और दुसारा चीजून को लालच परमेश्वरा का बचन में रूकावट डालछी। और उक जीन्दगी में बचन कै काम नै कर पानो।</verse>
				<verse number="23">और जो बी निकी भूमि में पड़ीयान, यो उन लोगून की नियाती छन, बचन स सुणभेरन समझछो, और उनार जीन्दगी निका परिनाम हुनान, और उन उ बोटा जसा हुनान जिनून में कोई-कोई सौ, कोई साठ और कोई तीस गुना फल ल्यूनान।”</verse>
				<verse number="24">यीशु ले उनून एक और कहानी सुणाभेरन क्योछ, “स्वर्ग को राज्य उ किसान को जस छै जेले अपून गाड़ान में निको बीज बोछै।</verse>
				<verse number="25">लेकिन जब उन लोग पड़ेछ्या त उक शत्रुले आभेरन ग्यूँका दगाड़ जंगली बीज बोभेरन न्हैजाछो।</verse>
				<verse number="26">जब बीज जामनान और बाला दिखाई दिन लाग्यान, त जंगली बीज का बोट ले दिखाई दीनान।</verse>
				<verse number="27">यो देखिभेरन दासले आभेरन मालिक थैं क्योछ, ‘हे मालिक, क्या तैले अपून गाड़ान में निको बीज नै बोईना को छ्यो? त जंगली बोट काँ भटे आयान?’</verse>
				<verse number="28">मालिक ले उथैं क्योछ, ‘यो कोई शत्रु को काम छै।’ दासून ले उथैं क्योछ, ‘क्या तैं चाँछै की हम जाभेरन जंगली बोटून निकालभेरन जामा करा?’</verse>
				<verse number="29">उले क्योछ, नै इसो जन करा। काँई इसो नै हो कि जंगली बोटून निकालून में काँई ग्यूँका बोटून ले नै उखड़ ज्यून।</verse>
				<verse number="30">त कटनी का बखत द्वीवैन एक दगाड़ बढ़ून दी, और कटनी का बखत में कटून वालानथै कुंलो कि पैलि जंगली बोटून जामा करभेरन जलून खिन उनार पूला बाँदि ली, और ग्यूँ स म्यारा खत्ता में जाम करा।”</verse>
				<verse number="31">यीशु ले उनून एक कहानी सुणाछ “स्वर्गो को राज्य राई दाना का समान छै, जैस कोई आदिमी ले अपून गाड़ा में बोछ।</verse>
				<verse number="32">उ सब बीजून में भटे सबून है नानो हुछो लेकिन जब बढ़छो तब सब साग-पात है ठूलो हुछो, और इसो रूख हो जाछो कि आकाश का चिड़िया आभेरन उक हांगान में अपूनी बसेरा बनुनान।”</verse>
				<verse number="33">यीशु ले उनून एक आजि कहानी सुणाछ, “स्वर्गो को राज्य खमीर का समान छै, जैस कोई स्यैनि लीभेरन तीस किलो धुलो में मिलाछ और इसीकैं पुरो धुलो खमीर हो ग्यो।”</verse>
				<verse number="34">यीशु ले यो सब बात कहानी सुणाभेरन लोगून समझाछ। और उ बिना उदारण दीये लोगून थैं के लै नी कुंछ्यो।</verse>
				<verse number="35">परमेश्वरो को संदेश दिनवाला का जरिये कईनाकि बात पुरी भैछ। “मैं कहानी सुणून खिन अपूनी मुँख खोललो, संसारा का शुरूवाद भटे जो बात छिपीना की छै, उनून प्रगट करोलो।”</verse>
				<verse number="36">यीशु भीड़ स विदा करभेरन घर आयान, और तब उक शिष्यून ले उक पास आभेरन क्योछ, “गाड़ा का जंगली बीज का कहानी का बारिमें हमून समझो।”</verse>
				<verse number="37">यीशु ले उनून जबाब दीछ, “निको बीज बुनवालो मैं आदिमी को च्योलो छूँ।</verse>
				<verse number="38">गड़ो संसार लोग छन, निको बीज राज्य का लोग छन, और जंगली बीज बुराई करूनवाला की लोग छन।</verse>
				<verse number="39">बुनवालो शत्रु शैतान छै कटनी संसार अन्त स दिखूछी, और काटून वाला स्वर्गदूत छन।</verse>
				<verse number="40">जसीकैं जंगली बीज का बोटून जलून खिन जाम करनान, उसीकैं संसारो को ले अन्त इसो होलो।</verse>
				<verse number="41">मैं आदिमी को च्योलो अपून स्वर्गदूतून भेजोलो, और उन उक राज्य में भटे सब ठोकर का कारणून और बुरा काम करून वालान जामा करला,</verse>
				<verse number="42">और स्वर्गदूत उनून आग का कुण्ड में खिताला, जा रूनो और दाँतून को किट-किटून हमेशा हुनै रोलो।</verse>
				<verse number="43">उ बखत धर्मी लोग अपून पिता परमेश्वरा का राज्य में सूरज का नियाती चमकाला। जो कोई यो बात स सुण सकछो जो मैं कुन मरेयू, उन यो समझना की कोशिश करून।”</verse>
				<verse number="44">“स्वर्ग को राज्य गाड़ा में लुकाईनाको खजाना समान छै, जैस कोई आदिमी ले पाछ और लुका दीछ, और येक कारण खुशी हो भेरन उले अपूनी सब कुछ बेची दीछ, और उ गाड़ास मोल ली लीछ।</verse>
				<verse number="45">फिर स्वर्ग को राज्य एक व्यापारी समान छै जो कीमती मोतिन की खोज में छ्यो।</verse>
				<verse number="46">जब ऊस एक अनमोल मोती मिल छै त उले जाभेरन अपूनी सब कुछ बेची दीछ और उ मोती मोल ली लीछ।</verse>
				<verse number="47">और स्वर्ग को राज्य उ माछा पकड़ून वाला जाल का समान छै, जो समुंद्र में डाली ग्यो हर प्रकार का माछान खिच भेरन ल्याछ।</verse>
				<verse number="48">और जब जाल भरि जाछी, त मछुवारा ऊस किनार में खींच ल्यूनान, और बैठि भेरन निका-निका माछान त थैला में राखनान और जो माछा खराब हुनान उनून खिती दीनान।</verse>
				<verse number="49">संसारा का अन्त में इसोई होलो। स्वर्गदूत आभेरन दुष्ट लोगून, धर्मी लोगून भटे अलग करला,</verse>
				<verse number="50">और दुष्ट लोगून आग का कुण्ड में डाल द्याला। जाँ रूनो और दाँतून को किट-किटून हमेशा हुनै रोलो।</verse>
				<verse number="51">यीशु ले उनूनथैं क्योछ, क्या तुम इन बातुन समझ छ्या?” उनूले जबाब दीछ, “होई।”</verse>
				<verse number="52">यीशु ले उनूनथैं क्योछ, “येक कारण हरेक मूसा का नियम सिखून वालान जो स्वर्ग राज्य का बारिमें शिक्षा पा रैछ, उ घरा का मालिका का समान छै, जो अपून भण्डार भटे नय्या और पुरानी चीजून निकालछो।”</verse>
				<verse number="53">यीशु इन सब कहानी को मतलब समझूना का बाद वाँ न्हैजानान।</verse>
				<verse number="54">और अपून नगर में आभेरन उनार यहूदी सभाघर में उनून इसो उपदेश दीन लाग्यान, कि उन ताजुब करभेरन कुन लाग्यान, येस यो ज्ञान और चमत्कारा का काम करना सामर्थ काँ भटे मिलछ्य?</verse>
				<verse number="55">उनूनले यो कैभेरन उको अपमान करछ्य, क्या येको बाब लाकड़ो मस्त्री नाहतिनी? क्या येकी ईजा मरियम नाहतिनी? क्या याकूब, यूसुफ, शमौन और यहूदा येका भाई नाहतिनी?</verse>
				<verse number="56">क्या येकी बैनिन हमार बीच नै रूना? त येस यो सब सामर्थ काँ भटे मिलछ्य?</verse>
				<verse number="57">यो बातुन का कारण लोगून भैम हुछो, लेकिन यीशु ले उनूनथैं क्योछ, “एक परमेश्वरो को संदेश दिनवाला हरेक जाग आदर पाछो, लेकिन अपून गौंन का लोगून में और अपून नगर और घर खानदान मेंई अपमान हुछो।”</verse>
				<verse number="58">और लोगून का अविश्वास कारण यीशु ले वाँ चमत्कारा का ज्यादा काम नै कर्या।</verse>
			</chapter>
			<chapter number="14">
				<verse number="1">जब हेरोदेस राजा ले उन कामून की चर्चा सुणिछ्य, जो यीशु करून मरेछ्या,</verse>
				<verse number="2">और ले अपून सेवकून थैं क्योछ, “यो यहूना बपतिस्मा दिनवालो छै! उ मरिना में भटे ज्यूनो है ग्योछ, येक कारण यीशु में इसा चमत्कारा का काम करना की सामर्थ प्रगट हुन मर्यान।”</verse>
				<verse number="3">किलैकी राजा हेरोदेस ले कुछ बखत पैलि अपून भाई फिलिप्पुस की घरवाली हेरोदियास का दगाड़ ब्या कर लीछ, यो बात में यहूना ले राजा स डाटछ्य, येक कारण यहूना ले राजा हेरोदेस थैं क्योछ, “मूसा का नियम अनुसार तैंस अपून भाई का घरवाली का दगाड़ ब्या करून ठीक नाहातिन।” तो हेरोदेस राजा ले सिपाईन भेजभेरन यहूना स पकड़वा भेरन जेल खान में डाल दीछ।</verse>
				<verse number="4"></verse>
				<verse number="5">और उ ऊस मार डालून चाँछ्यो, लेकिन लोगून भटे डरछ्यो किलैकी उन ऊस परमेश्वरो को संदेश दिनवाला मानछ्या।</verse>
				<verse number="6">लेकिन जब राजा हेरोदेस को जन्मदिन आछ, त हेरोदियास की चेलि ले उत्सव में मेहमानू का सामुनि नाच दिखाभेरन राजा हेरोदेस स खुश करछ्य।</verse>
				<verse number="7">येक कारण तब राजा हेरोदेस ले उथैं कसम खाभेरन वादा करछ्य, “कि तैं जो कुछ ले मांगलि मैं द्यूलो।”</verse>
				<verse number="8">उ ईजा ऊस पैलि भटे सिखा राँछ्यो, येक कारण उ कुंछी, “यहूना बपतिस्मा दिनवालो को खोरो कटवा भेरन थाली में याँई मंगवा दे।”</verse>
				<verse number="9">यो सुणिभेरन राजा भौत दुखी हुछो, लेकिन अपून वादा और दगाड़ में बैठिना का वालान कारण उकी माँग स मना नी कर सक्यो, और हुकुम दीछ, कि यहूना खोरो येस दी, दी जौ।</verse>
				<verse number="10">तब राजा ले तुरन्त सिपाईन स हुकुम दीछ, कि यहूना खोरो कटवा दीछ।</verse>
				<verse number="11">और उले जेल खान में जाभेरन यहूना का खोरो काटिभेरन एक थाली में राखभेरन चेलि स दीछो, और उ अपून ईजा पास लिजाछी।</verse>
				<verse number="12">यो खबर सुणिभेरन यहूना का शिष्यून आयान, उकी लाश स ली ग्यान, और ऊस दफना दीछ और जाभेरन यीशु बताछ।</verse>
				<verse number="13">जब यीशु ले यो सुणछ्य, त नाव में चढ़भेरन उ वाँ भटे एकान्त जाग में न्हैजाछो। और लोग यो सुणिभेरन नगर-नगर भटे पैदल उक पछिल उनान।</verse>
				<verse number="14">नाव भटे उतर भेरन यीशु ले एक भौत ठूली भीड़ देखछ्य, और उनूनमें तरस खाछ, और उ भीड़ में जो बिमार छ्या चंगो कर्यान।</verse>
				<verse number="15">और ब्याल हुन मसछ्य त यीशु का शिष्यून ले उक पास आभेरन क्योछ, “यो त बिरान जागा छै, और देर हो गै; त तुम इन लोगून विदा करा कि इन आश-पासा का बसतीन में जाभेरन अपून खिन खानो मोल ली लिया।”</verse>
				<verse number="16">लेकिन यीशु ले उनूनथैं क्योछ, “उनोरो जानो जरूरी नाहातिन! तुम इन लोगून खिन खान का इन्तजाम करा।”</verse>
				<verse number="17">उनूनले यीशु थैं क्योछ, “याँ हमार पास पाँच रोटा और द्वी माँछा का अलावा केले नाहतिन।”</verse>
				<verse number="18">यीशु ले क्योछ, “उनून म्यारा पास ल्या।”</verse>
				<verse number="19">तब यीशु ले लोगून घास में बैठून खिन क्योछ, और उनून पाँच रोटान और द्वी माँछा हात में थामीयान, और स्वर्ग का तरफ चाँभेरन, परमेश्वरो को धन्यवाद करछ्य और रोटान टोड़ी-टोड़ी भेरन शिष्यून दीनै रैयान, और शिष्यून ले लोगून दीछ।</verse>
				<verse number="20">और उन लोगून ले पेट भर भेरन खान खिन खाछ। जब सबून ले खाना खा लीछ, तब शिष्यून ले बचिना का रोटान ले बारा टोकरी भर भेरन उठायान।</verse>
				<verse number="21">और खान में स्यैनिन और ननतिनान छोड़िभेरन लगभग पाँच हजार आदिमी छ्या।</verse>
				<verse number="22">और यीशु ले अपून शिष्यून थैं क्योछ, कि तुम तुरन्त अपून नाव में चढ़भेरन मैं है पैलि झील का पार खिन न्हैजा, तब तक मैं भीड़ स विदा करछूँ।</verse>
				<verse number="23">और यीशु ले लोगून विदा करनाका बाद उ प्रार्थना करून खिन एक डाँण में न्हैग्या, और ब्याल हुन तक वाँई एकलो छ्यो।</verse>
				<verse number="24">उ बखत नाव झील का बीच में छी, और लहरून ले डगमगान मरेछ्यी, क्याखिनकि हवा उलटा दिशा में चलून मरेछ।</verse>
				<verse number="25">और यीशु रात्तै तीन है छ: बजे का बीच में, यीशु गलील प्रदेश की झील में पानि हिटभेरन उनार पास आयान।</verse>
				<verse number="26">शिष्य यीशु स पानि में हिटून देखिभेरन घबरा जानान, और कुन लागनान, “यो भूत छै!” और डरा का मारिले हकाक करून लागनान।</verse>
				<verse number="27">तब यीशु ले उनूनथैं बात करछ्य और क्योछ, “हिम्मत करा, डरा जन, मैं छूँ।”</verse>
				<verse number="28">और पतरस ले ऊस जबाब दीछ, “हे प्रभु अगर तैं छै, त मैंस अपून पास पानि में हिटभेरन उनाको हुकुम दे।”</verse>
				<verse number="29">यीशु ले क्योछ, “अ!” तब पतरस नाव भटे उतर भेरन यीशु का पास जान खिन पानि में हिटून लागछो।</verse>
				<verse number="30">लेकिन उ हवा देखिभेरन डर ग्यो, और जब डूबून लागछो त हकाक करभेरन कुंछो, “हे प्रभु मैंस बचौ।”</verse>
				<verse number="31">और यीशु ले तुरन्त उको हात पकड़छ्य और क्योछ, “हे अविश्वासी, तैले क्याखिन शक करछ्य?”</verse>
				<verse number="32">और जब उन नाव में चढ़ ग्या, त हवा थामी जाछी</verse>
				<verse number="33">जो शिष्य नाव में छ्या, उन यीशु का खुटान में पड़भेरन कुंनान, “सच्ची में तैं परमेश्वरो को च्योलो छै।”</verse>
				<verse number="34">और जब यीशु और उक शिष्य नाव में गलील प्रदेशा का झील का पार गन्नेसरेत गौं में पुजियान।</verse>
				<verse number="35">और वाँ का लोगून ले यीशु स पछ्याणी लीछ, और आश-पासा का सब गौन में उकी खबर फैला दीछ, और उन सब बिमारीन यीशु का पास ल्यान।</verse>
				<verse number="36">और यीशु थैं विनती करून लाग्यान, कि अपून कपाड़ा को एक किनार छुन दे, और जो उक कपाड़ास छू छ्यो उ चंगो हो जा छ्यो।</verse>
			</chapter>
			<chapter number="15">
				<verse number="1">तब यरूशलम शैहर भटे कुछ फरीसी लोग और मूसा का नियम सिखून वाला यीशु का पास आभेरन कुन लागनान।</verse>
				<verse number="2">“तेरा शिष्य पुरखान का रीति-रिवाज किलै टालनान, कि बिना हात धोईनाका खानो किलै खानान?”</verse>
				<verse number="3">यीशु ले उनून जबाब दीछ, “तुम अपून रीति-रिवाजून मानन खिन परमेश्वरा का हुकमून बड़ी चालाकी ले टाल दीछा?</verse>
				<verse number="4">क्याखिनकि परमेश्वर ले कईनाको छै, ‘अपून ईजा-बबा को आदर कर,’ और ‘जो कोई अपून ईजा-बबा स बुरो कलो, उ पक्का जान है मार डाली जालो।’</verse>
				<verse number="5">लेकिन तुम लोग यो कुँछा, कि अगर कोई आदिमी अपून ईजा-बबाथै कुंछो, ‘म्येरो जो कुछ छै उ तुमार काम आ सकछो, लेकिन उ मैंले परमेश्वर स भेंट चढ़ा है छ।’</verse>
				<verse number="6">तो उ अपून ईजा-बबा को आदर नै करो, इसो तरीका ले तुम अपून रीति रिवाजून का कारण ले जिनून तुमूनले बना राख्यान, परमेश्वरा का दीईनाका नियम-कानून नै मानना,</verse>
				<verse number="7">हे कपटी, लोगो परमेश्वरो को संदेश दिनवाला यशायाह ले तुमार बारिमें ठीक भविष्यवाणी कर रैछ।</verse>
				<verse number="8">‘इन लोग बातुन ले त म्येरो आदर करनान, लेकिन इनोरो मन मैं है दूर रूछो।</verse>
				<verse number="9">और बेकार में मेरि अराधना करनान, क्याखिनकि आदिमीन का बनाईना का नियमून सिखूनान।’”</verse>
				<verse number="10">फिर यीशु ले सब लोगून अपून पास बुलाभेरन क्योछ, “तुम सब मेरि बातुन सुणिभेरन समझ ली।</verse>
				<verse number="11">जो मुँख भटे जाछो, उ आदिमी स अशुद्ध नै करूनो; लेकिन जो मुँख भटे भ्यार उछो, उई आदिमी स अशुद्ध करछो।”</verse>
				<verse number="12">तब यीशुका शिष्यून ले आभेरन यीशुथै क्योछ, “क्या तुम जाणछा कि तुमार यो बातुन ले फरीसी लोगून बुरो लागछ्य?”</verse>
				<verse number="13">तब यीशु ले जबाब दीछ, “जो बोट म्यारा स्वर्गीय पिता नै लगा राख्या, उन उखाड़ि जाला।</verse>
				<verse number="14">उनून रून दी; उन अन्धा बाट दिखून वाला छन, और अन्धा अगर अन्धा बाटो देखो त द्वीवै गड्डा में खितीला।”</verse>
				<verse number="15">यो सुणिभेरन पतरस ले क्योछ, “येको कहानी को मतलब हमून समझा दे।”</verse>
				<verse number="16">यीशु क्योछ, “कि तुम इदुक अनजान छा?</verse>
				<verse number="17">क्या तुम इदुक ले नै समझना कि जो ले खानो मुख भटे जाछो, उ पेट में जाछो, और सनडांस भटे भ्यार निकल जाछो?</verse>
				<verse number="18">लेकिन जो बुरी बात आदिमी का मुँख भटे निकल छी, उ मन भटे निकल छी, और उई उ आदिमी स अशुद्ध करछ्यो।</verse>
				<verse number="19">क्याखिनकि मन भटे बुर-बुर बिचार, ब्यभिचार, चोरी, हत्या, परस्त्रीगमन, झूठ्ठी गैवे, और निन्दा जस विचार मन भटे निकलानान।</verse>
				<verse number="20">योई छन जो आदिमी स अशुद्ध करनान, लेकिन बिना हात धोये खानो खाना का द्वारा आदिमी स अशुद्ध नै करूनो।”</verse>
				<verse number="21">यीशु और उक शिष्य वाँ भटे निकल भेरन, सोर और सिदोन शैहरा का तरफ न्हैजानान।</verse>
				<verse number="22">उ देश में एक कनान देश की स्यैनि आछ और धध्या-धध्याभेरन कुन लागछ्य, “हे प्रभु! दाऊद का सन्तान, मैंमें दया कर! मेरि चेलि स भुतले भौत सता रैछ।”</verse>
				<verse number="23">लेकिन यीशु ले ऊस केले जबाब नै दीनो। तब उक शिष्यून ले आभेरन उथैं बिनती करछ्य, “येस विदा कर, क्याखिनकि उ हमार पछिल हकाक करून उन मरेछ्य।”</verse>
				<verse number="24">उले जबाब दीछ, “इस्राएल देशा का घराना कि हराईना की भेड़ून छोड़ी मैं कैका पास नै भेजि गयूँ।”</verse>
				<verse number="25">लेकिन उ स्यैनि यीशु का पास आभेरन उक खुटान में खिती जाछी। और यीशु थैं कुछी, “हे प्रभु मेरि मद्दत करा।”</verse>
				<verse number="26">यीशु ले ऊस जबाब दीछ, “यो ठीक नाहातिन कि नानतिनान को खानो, कूकुरुन का सामुनि डालून।”</verse>
				<verse number="27">उले क्योछ, “यो बात सच्ची छै प्रभु! लेकिन कुकुर ले अपून मालिका मेज भटे खीतिनको चूर-चार खानान।”</verse>
				<verse number="28">यो बात सुणिभेरन यीशु ले ऊस जबाब दीछ, “हे स्यैनि तेरो विश्वास भौत ठूलो छै, जसो तैं चाँछी ऊसोई हो।” और उकी चेलि उई बखत चंगी हो जाछी।</verse>
				<verse number="29">यीशु वाँ भटे गलील प्रदेशा का नदी का पास आयान, और एक डाण में जाभेरन बैठि जानान।</verse>
				<verse number="30">और वाँ भीड़ै की भीड़ उनार पास उन लागछी, और उन अपून दगाड़ लंगड़ान, अन्धान, गूँगान, और भौत बिमारीन ल्यूनान और यीशु का खुटान का पास राख दीनान, और यीशु ले उनून चंगो कर दीछ।</verse>
				<verse number="31">और जब लोगून ले देखछ्य, कि गूँगा बोलून मर्यान, लूला ठीक हुन मर्यान, और लंगड़ा हिटून मर्यान और अन्धा देखून मर्यान। उन ताजुब करून मसनान, और इस्राएल देशा का परमेश्वर की बड़ाई करनान।</verse>
				<verse number="32">तब यीशु ले अपून शिष्यून बुलाभेरन क्योछ, “इन लोग तीन दिन भटे म्यार दगाड़ छन, और उनार पास अब खान खिन केले नाहातिन, मैंस इन लोगून देखिभेरन दया उछी, इनून में है कुछ लोग भौते दूर भटे आईना का छन, अगर मैं इन लोगून भुखो घर भेजि द्यूँलो, त उनून हिटन-हिटन बाट में चक्कर आ जालो।”</verse>
				<verse number="33">शिष्यून ले यीशु थैं क्योछ, “हमून यो बिरान जागा में इदुक लोगून का खाना को इंतजाम कसीकैं है सकछै?”</verse>
				<verse number="34">यीशु ले अपून शिष्यून थैं पुछ्छै, “तुमार पास कतुक रवाट छन?” उनूनले क्योछ, “सात रोटा और थ्वाड़ा माच्छा छन।”</verse>
				<verse number="35">तब यीशु ले लोगून भिमें बैठना को हुकुम दीछ,</verse>
				<verse number="36">और उन बैठिग्या, येक बाद सात रोटान और माँछा लीभेरन उनूनले परमेश्वर स धन्यवाद दीछ, फिर उनूले रोटान टोड़िभेरन अपून शिष्यून दीनै रयान, और शिष्य लोगून स दीनै रयान।</verse>
				<verse number="37">और सब लोगून ले पेट भरि खाछ, उक बाद उनूनले बचिना का रोटा का टुकुड़ान ले सात टोकरी भर भेरन जामा कर्यान।</verse>
				<verse number="38">खान वालान में भटे स्यैनि और नान्तिनान छोड़िभेरन चार हजार आदिमी छ्या।</verse>
				<verse number="39">तब उन भीड़ स विदा करभेरन नाव में चढ़ और भेरन, मगदन इलाका में आयान।</verse>
			</chapter>
			<chapter number="16">
				<verse number="1">फरीसी लोग और सदूकी लोग यीशु का पास आयान और ऊस परखून खिन यीशु थैं क्योछ, “हम तैथैं एक स्वर्गीय चिन दिखूना चानू, ताकि उन अपूनो अधिकार साबित कर सकूनो।”</verse>
				<verse number="2">यीशु ले उनून जबाब दीछ, “ब्याल खिन तुम लोग कुँछा कि मौसम ठीक रौलो, क्याखिनकि आकाश लाल छै,</verse>
				<verse number="3">और रात्तै खिन कुँछा, आज आँधी-तूफान आलो, क्याखिनकि आकाश लाल और बादल घेरिना को छै। तुम लोग आकाश का लक्षण देखिभेरन बता सकछा, लेकिन बखता का लक्षणून को भेद क्याखिन नै बता सकना?</verse>
				<verse number="4">यो बखत का बुर और ब्यभिचारी लोगून स्वर्गी चिन की माँग नै करून चैछी, लेकिन परमेश्वरो को संदेश दिनवाला योना का चिन को छोड़िभेरन यो बखत का लोगून स्वर्ग भटे चिन नी दिखाई जालो।” और यीशु उनून छोड़िभेरन न्हैजाछो।</verse>
				<verse number="5">और शिष्य झीला का किनार पुजनान, लेकिन अपून दगाड़ ज्यादा रोटा लीन भूल गैछ्या।</verse>
				<verse number="6">यीशु ले उनूनथैं क्योछ, “देखा, फरीसी और सदूकी लोगून का खमीर भटे सर्तक रया।”</verse>
				<verse number="7">तब शिष्य आपस में बिचार करभेरन कुन लाग्यान, “हम ज्यादा रोटा लीभेरन नै आया, उ इसो येक कारण कुन मरियोछ।”</verse>
				<verse number="8">यो जाणिभेरन यीशु ले उनूनथैं क्योछ, “हे अविश्वासियों, तुम आपस में क्याखिन सोचून मरेछा कि हमार पास रोटा नाहतिन?</verse>
				<verse number="9">क्या तुम एल तक नै समझिया? क्या तुमून उन पाँच हजार लोगून खिन पाँच रोटा याद नाहातिनी, और तुमूले कदुक डाला जामा कर्यान?</verse>
				<verse number="10">और उ जो चार हजार की भीड़ स सात रोटान ले खवाछ, तो तुमून ले कतुक भरिनाका टोकरी जामा कर्यान।</verse>
				<verse number="11">तुम क्याखिन नै समझिया कि मैं को छूँ, कि मैंले तुमूनथैं रोटा का बारिमें नै क्यो, बल्कि फरीसी और सदूकी लोगून का खमीर का बारिमें सर्तक रया।”</verse>
				<verse number="12">तब उनार समझ में आछ कि यीशु ले उनूनथैं रवाटा खमीर खिन नै, पर फरीसी और सदूकी लोगून की शिक्षान भटे चौकुना रून खिन क्योछ।</verse>
				<verse number="13">यीशु कैसरिया फिलिप्पी का देश में आछ, और यीशु ले अपून शिष्यून थैं पुछ्छै, “लोग म्यारा बारिमें कि कुंनान कि मैं को छूँ?”</verse>
				<verse number="14">तब शिष्यून ले यीशु स जबाब दीछै, “लोग कुछ लोग त यहूना बपतिस्मा दिनवालो; या परमेश्वरो को संदेश दिनवाला एलिय्याह कुंनान, और कुछ लोग परमेश्वरो को संदेश दिनवाला यिर्मयाह में भटे कोई एक परमेश्वरो को संदेश दिनवालान में भटे कुंनान।”</verse>
				<verse number="15">यीशु ले अपून शिष्यून थैं पुछ्छै, “और तुम मैंथै कि कूंछा की मैं को छूँ?”</verse>
				<verse number="16">शमौन पतरस ले जबाब दीछ, “तुम जीवित परमेश्वरो को च्योलो मसीह छै।”</verse>
				<verse number="17">तब यीशु ले जबाब दीछ, “हे शमौन, योना च्याला, तैं धन्य छै; क्याखिनकि यो बात कोई आदिमी ले नै पर म्यारा स्वर्गीय पिता तैंमें प्रगट करछ्य।</verse>
				<verse number="18">और मैं तैथैं कुंछू कि तैं पतरस छै, और में येमें एक विश्वासीन की मण्डली बनूलो, और अधलोक को फाटक उमें हाबी नी होला।</verse>
				<verse number="19">मैं तैंस स्वर्ग राज्य चाबी द्यूलो, और जो कुछ तैं धरती में बाँधले, उ स्वर्ग में बाँदिना को रोलो, और जो कुछ तैं धरती में खोल ले उ स्वर्ग में खोलि जालो।”</verse>
				<verse number="20">तब यीशु ले शिष्यून चेतावनी दीछ, “कि तुम कैसे यो जन बताया कि मैं मसीह छूँ।”</verse>
				<verse number="21">उ बखत भटे यीशु अपून शिष्यून यो समझून लागछ्य, “मैं यरूशलम शैहर जूलो, यो जरूरी छै, कि वाँ यहूदी अगुवा और प्रधान याजक और मूसा का नियम सिखून वाला लोगून का हात भटे भौत दुख उठूंलो, और मार डाली ज्यूलो और तीन दिन बाद ज्यून हो ज्यूलो।”</verse>
				<verse number="22">तब पतरस यो सुणभेरन यीशुस अलग ली जाभेरन उक दुख उठून और मारी जाना का बात कारण यीशु स डाठून लागछ। “हे प्रभु परमेश्वर तेरा दगाड़ इसो कभै जन करो।”</verse>
				<verse number="23">तब यीशु ले पछिल मुड़भेरन पतरस का तरफ देखभेरन क्योछ, “हे शैतान, तैं म्यारा सामुनि है दूर न्हैजा, तैं मैं खिन ठोकर को कारण छै, क्याखिनकि तैं परमेश्वर नियाती नै सोचनै, बल्कि लोगून की नियाती सोचछ्य।”</verse>
				<verse number="24">तब यीशु ले अपून शिष्यून थैं क्योछ, “अगर कोई म्यार शिष्य बनून चाँछ, त उ अपूनी सब इच्छान छोड़ी द्यो। और मैं खिन मरून खिन तैयार हो ज्यो।</verse>
				<verse number="25">क्याखिनकि जो अपून प्राण संसारिक जीन्दगी जीन खिन बचालो, उ परमेश्वरा का दगाड़ अनन्त जीवन पाना को मौका खो द्योलो, लेकिन जो मैं खिन और सुसमाचार खिन अपून प्राणस दीछो, उ अनन्त जीवन पालो।</verse>
				<verse number="26">एक आदिमी स की फेदा होलो, अगर उ पुरा संसार में धनवान हो, पर परमेश्वरा का दगाड़ अपूनो अनन्त जीवन स खो दे? उ परमेश्वर स कि दी सकछ्यो, जो उको अनन्त जीवन खरीदोलो?</verse>
				<verse number="27">जब आदिमी को च्योलो अपून स्वर्गदूतुका दगाड़ अपून बबा का महिमा में आलो, उ बखत उ हरेक स उक कामून का अनुसार फल द्योलो।</verse>
				<verse number="28">मैं तुमूनथैं सच्ची कुंछूँ, कि जो याँ ठाँड़ छन, इनून में कुछ लोग इसा छन, जब तलक मैंस आदिमी को च्योलो को परमेश्वरा का राज्य स सामर्थ का दगाड़ उन नै देख ल्यून, तब तलक उन कभै नी मराँला।”</verse>
			</chapter>
			<chapter number="17">
				<verse number="1">और छ: दिन का बाद यीशु अपून शिष्य पतरस, याकूब और यहूना स अपून दगाड़ एक ऊँचा डाँण में ली ग्यो जा उन एकला छ्या।</verse>
				<verse number="2">वाँ शिष्यून का सामुनि उको रूप बदल ग्यो, और यीशु को मुँख सूरज को जसो चमकून लागछ्य और उक कपाड़ा उज्याला की नियाती चमकून लाग्यान।</verse>
				<verse number="3">और मूसा और एलिय्याह यीशु का दगाड़ बात करनै उनून दिखाई दीयान।</verse>
				<verse number="4">यो सब देखिभरेन पतरस ले यीशु थैं क्योछ, “हे गुरू जी, हमोरो या रून ठीक छै; अगर तेरि इच्छा हो त मैं याँ तीन तम्बू ठाड़ करूँ, एक तुमून खिन, एक मूसा खिन और एक एलिय्याह खिन।”</verse>
				<verse number="5">पतरस यो कुन मरछ्यो, तब अचानक एक बादल ले प्रगट हो भेरन उनुस ढक लीछ, परमेश्वर ले बादल में भटे हो भेरन बात करछ्य, “यो म्येरो लाड़िलो च्योलो छै, जैस देखभेरन मैं भौत खुश छू, येकी बातुन सुणा।”</verse>
				<verse number="6">शिष्य यो सुणिभेरन मुँखा का बल खितीनान और भौत त डरी जानान।</verse>
				<verse number="7">यीशु ले उनून पास आभेन छूँछ, और क्योछ, “उठा जन डरा।”</verse>
				<verse number="8">तब शिष्यून ले चारू तरफ नजर घुमाछ, और यीशु छोड़ कैसे नै देख्यो।</verse>
				<verse number="9">जब उ तीन शिष्य डाँण भटे तलि उतुरून मरेछ्या तब यीशु ले उनून हुकुम दीछ, “जब तलक मैं आदिमी को च्योलो मरिना में भटे ज्यून नी हो ज्यू, तब तक तुमून ले जो कुछ ले पहाड़ में देखछ्य, उ कैसे जन बताया।”</verse>
				<verse number="10">तब शिष्यून ले यीशु थैं पुछ्छै, “मूसा का नियम सिखून वाला लोग किलैं कुंनान मसीहा का उन है पैलि एलिय्याह को उन जरूरी छै?”</verse>
				<verse number="11">यीशु ले जबाब दीछ, “एलिय्याह जरूर आलो, और सब कुछ सुधारोलो।</verse>
				<verse number="12">लेकिन में तुमूनथैं कुछूँ, कि एलिय्याह त आग्योछ, और लोगून ले ऊस नै पछ्याणो; लेकिन जस चाछ उक दगाड़ करछ्य। इसीकैं मैं आदिमी को च्योलो ले उनार हातून ले दुखी उठालो।”</verse>
				<verse number="13">तब शिष्यून ले समझछ्य कि उले हमून थैं यहूना बपतिस्मा दिनवाला का बारिमें कुन मरेछ्य।</verse>
				<verse number="14">और जब उन भीड़ का पास पुज्यान, त एक आदिमी उनार पास आछ, और घुण टेकी भेरन कुंछो,</verse>
				<verse number="15">“हे प्रभु, म्यारा च्याला में दया करा! क्याखिनकि ऊस मीर्गी उछी, और उ भौत तखलीफ उठूछो; और बार-बार आग और पानि में खिती जाछो।</verse>
				<verse number="16">मैं ऊस त्यारा शिष्यून का पास ल्यायू, लेकिन इन त नै निकाली सक्या।”</verse>
				<verse number="17">तब यीशु ले उनून जबाब दीछ भेरन क्योछ, “हे अविश्वासी लोगो मैं कब तक तुमार दगाड़ रूलो, और मैं कब तक तुमोरो इन्तजार करूँ की तुम मैंमें विश्वास करा, उ च्याला स म्यार पास ल्या।”</verse>
				<verse number="18">तब यीशु ले भूत स डांटछ्य और उ उमें भटे निकल जाछो; और उ लडौ उतुंजैई ठीक हो जाछो।</verse>
				<verse number="19">तब शिष्यून ले ऐकाला में यीशु का पास आभेरन क्योछ, “हमु उ भूत किलैं नै निकाली सकियो?”</verse>
				<verse number="20">उले क्योछ, “तुमार विश्वास का कमी का कारण, क्याखिनकि मैं तुमूनथैं सच्ची कुंछूँ, अगर तुमोरो विश्वास राई का दान का बराबर ले हो, त यो डाँणान थैं कौला, ‘याँ भटे हट जा,’ त उ हट जालो; और कोई ले बात तुमून खिन असम्भव नी होलि।</verse>
				<verse number="21">लेकिन यो जाति प्रार्थना और बर्त बिना नै निकलनी।”</verse>
				<verse number="22">जब उन गलील प्रदेश में छ्या, त यीशु ले अपून शिष्यून थैं क्योछ, “मैं आदिमी को च्योलो, दुश्मनून का हात पकड़ाई जालो।</verse>
				<verse number="23">और उन मैंस मार द्याल, लेकिन मैं मरिनान में भटे तीसारा दिन फिर ज्यून है ज्यूलो।” यो सुणिभेरन शिष्य भौत दुखी हुनान।</verse>
				<verse number="24">जब उन कफरनहूम गौं पुज्यान, त मन्दिर का कर लिनवाला ले पतरस का पास आभेरन पुछ्छै, “क्या तुमोरो गुरू मन्दिर कर नै दिनोई?”</verse>
				<verse number="25">उनूनले जबाब दीछ, “दीनान।” जब पतरस घर पुजछ्य, त उक कुन है पैलि यीशु ले उथैं पूछ्छय, “हे शमौन तैं कि सोचछ्य? संसार का राजा खिन लोगूनथै कर उगूनान? अपून च्यालानथैं या परायान थैं?”</verse>
				<verse number="26">तब पतरसले जबाब दीछ, “परायान थैं।” त यीशु ले क्योछ, “तब त च्याला कर भटे मुक्त हो ग्या।</verse>
				<verse number="27">फिरले हमून उन लोगून खिन बुरो उदारण नै बनून चैनो, तुम नदी का किनारा में जाभेरन बलछी लगा, जो माँछो पैलि फसोलो, उको मुँख खोल्या उमें एक चाँदी को सिक्का मिलोलो, उ सिक्का लीभेरन उनून म्यारो और अपून कर दी दीया।”</verse>
			</chapter>
			<chapter number="18">
				<verse number="1">उ बखत शिष्य यीशु का पास आभेरन पुछून लागनान, “स्वर्ग का राज्य में भटे सबून है ठूलो को छै।”</verse>
				<verse number="2">यो सुणिभेरन यीशु ले एक नानतिनास पास बुलाभेरन उनार बीच में ठाँड़ करछ्य,</verse>
				<verse number="3">और क्योछ, “मैं तुमूनथैं सच्ची कुछूँ, अगर तुम अपून पापून को पश्चाताप करभेरन नान-नानतिना का समान बनला, तभै तुम स्वर्ग का राज्य में जा सकला।</verse>
				<verse number="4">जो कोई अपून आपस यो नन्तिनाका नियाति नानो करोलो, उ स्वर्ग का राज्य में ठूलो होलो।</verse>
				<verse number="5">जो कोई म्यारा नाम ले इसा नान नानतिनास अपनूछो और उकी मद्दत करछो, मैंस अपनूछो और जो म्येरो स्वागत करछो।</verse>
				<verse number="6">फिर यीशु ले क्योछ, जो कोई इन नान है नान मैंमें विश्वास करनान, कैथैं ले पाप करून को कारण बननान, उ खिन यो निको छै, कि उ गाल में एक ठूलो ढूंगो बाँदीभेरन झील में फटंग हाँड़ो।</verse>
				<verse number="7">ठोकरून का कारण ले संसार में धिक्कार! ठोकरून को लागून जरूरी छै; लेकिन धिक्कार छै उ आदिमी खिन जैका दवारा ठोकर लागछी।</verse>
				<verse number="8">अगर तेरो हात या तेरो खुटो तैथैं पाप करूँछो, त उनून काटिभेरन खिती दे, टुण्डो या डुणो हो भेरन तैं परमेश्वरा का राज्य में जाले यो तैखिन निको छै। इसो नै हो कि तुम द्वी हात और द्वी खुटान लीभेरन हमेशा की आग में खिती जला, जांक आग में तैंस हमेशा तलक जलनै रौला।</verse>
				<verse number="9">अगर तेरो आँख तैथैं पाप करूँछो, त ऊस निकालभेरन खिती दी, क्याखिनकि एक आँख लीभेरन तैं परमेश्वरा का राज्य में जाले यो तैखिन निको छै। इसो नै हो कि तैं द्वी आँख लीभेरन नरक की आग में खिती जला, जांक आग में तुम हमेशा तलक जलनै रौला।</verse>
				<verse number="10">देखा, तुम इन नान है-नान स कैसे ले तुच्छ जन समझया; क्याखिनकि मैं तुमूनथैं कुंछू कि स्वर्ग में उक स्वर्गदूत हमेशा म्यारा पिता का सामुनि ठाड़ रूनान।</verse>
				<verse number="11">क्याखिनकि मैं आदिमी को च्योलो भटकिना का लोगून बचुन खिन आ रियो छै।</verse>
				<verse number="12">तुम कि सोचछा? अगर कोई आदिमी का सौ भेड़ हुन, उमें भटे एक हरा जौ, तो क्या उ उन निन्यानबे भेड़ू अपून दगाड़ वाला का पास सुरक्षित जॉगा में छोड़भेरन उ हराईना कि भेड़स खोजन खिन नी जालो?</verse>
				<verse number="13">और उ ऊस मिल जौ, त मैं तुमूनथैं सच्ची कुंछू उ उन निन्यानबे भेड़ून खिन जो हराईना का नी छ्या, उ पाईना का भेड़ खिन ज्यादा खुशी मनालो।</verse>
				<verse number="14">इसो तुमोरो स्वर्गीय पिता ले नै चानो कि कोई नान है-नानो ले नाश हो।</verse>
				<verse number="15">अगर एक विश्वासी भाई तेखिन बुरो करो, त जाभेरन एकला में उक दगाड़ बात कर और ऊस समझो; और अगर उ विश्वासी भाई पश्चताप करो, तो तैले अपून भाई वापस पा हालछै।</verse>
				<verse number="16">अगर उ तेरि बात नै माननो, त अपून दगाड़ एक-द्वी जन लिजा, क्याखिनकि मूसा का नियम का अनुसार, कोई ले आरोपस द्वी या उ है ज्यादा गवैन का द्वारा ठीक साबित करि जान चैंछो।”</verse>
				<verse number="17">अगर उ उनेरि ले नै सुणो तो विश्वासीन की मण्डली थैं कै दे, अगर उ मण्डली कि ले नै सुणो, तो उक दगाड़ ऊसोई ब्यवहार कर जसो तुम गैर-यहूदी या चुंगी लीनवालान का दगाड़ करछा।</verse>
				<verse number="18">मैं तुमूनथैं सच्ची कुछूँ, जो ले तुम धरती में बांधला, उ स्वर्ग में बाँदि जालो। और जो कुछ तुम धरती में खोलला, उ स्वर्ग में खुलि जालो।</verse>
				<verse number="19">मैं तुमूनथैं फिर कुछूँ, अगर तुमून में भटे द्वी जन धरती में कोई विनती खिन एक मन हो त, उ म्यारा स्वर्गीय पिता तरफ भटे उनून खिन पुरी हो जालि</verse>
				<verse number="20">क्याखिनकि जाँ द्वी या तीन म्यारा नाम में जामा हुनान, वाँ में उनार बीच में छूँ।</verse>
				<verse number="21">तब पतरस ले पास आभेरन यीशु थैं क्योछ, “प्रभु अगर कोई विश्वासी भाई म्यारा विरूद्ध बुराई करनै रौ, त मैंस ऊस कतुक बार माफ करूँ, क्या सात बार तक?”</verse>
				<verse number="22">यीशु ले उथैं क्योछ, “मैं तैथैं यो नै कुनूं कि सात बार तक बल्कि सात बाराका सत्तर गुना तक माफ कर।”</verse>
				<verse number="23">स्वर्ग राज्य उ राजा जसो छै, जेले अपून दासूनथैं लेखा लीन चाँछ।</verse>
				<verse number="24">जब उ हिसाब लीन लागछ्यो, त एक आदिमी उक सामुनि आछ जैमें सुना का सिक्कान को दस हजार बोरिन को कर्जदार छ्यो।</verse>
				<verse number="25">लेकिन जब उक पास कर्ज चुकून खिन के नी छ्यो त उक राजा ले आज्ञा दीछ कि ऊस और उकी स्यैनि, नान्तिनान, और जो कुछ उक पास छै, सब बेचिभेरन कर्ज चुका दी जौ</verse>
				<verse number="26">येक कारण उ दास ले राजा का खुटान में पड़भेरन ऊस प्रणाम करछ्य, और क्योछ, मालिक धैर्य रखा। मैं सब कुछ चुका द्यूलो।</verse>
				<verse number="27">तब राजा ले उ दास में तरस खाभेरन ऊस छोड़ दीछ, और उको सब कर्ज माफ कर दीछ</verse>
				<verse number="28">लेकिन उ दास भ्यार निकलछ्य, त उकी मुलाकात अपून दगड़िया दासून में भटे एक थैं भैछ जो उको सौ चाँदी का सिक्कान को कर्जदार छ्यो; उले ऊस पकडछ्य और उको गलो दबाभेरन क्योछ, “म्येरो कर्ज चुकौ।”</verse>
				<verse number="29">तब उको दगड़िया दास उ पड़भेरन विनती करून लागछ्य, धैर्य राख, मैं सब कुछ द्यूलो।</verse>
				<verse number="30">फिरले उ नै मानियो और ऊस तब तक खिन जेल में डाल दीछ, जब तक उले कर्ज चुका नै दीयो।</verse>
				<verse number="31">यो देखिभेरन उक दगड़िया दास भौत दुखी भ्यान, और उनूनले जाभेरन राजा स यो घटना बताछ।</verse>
				<verse number="32">तब उक राजा ले ऊस बुलाभेरन क्योछ, हे दुष्ट दास! तैले जो मैंथै विनती करछ्य, तो मैंले तेरो सब कर्ज माफ कर दीछ।</verse>
				<verse number="33">येका कारण जसी दया मैंले तैंमें करछ्य, क्या तैले अपून दगड़िया दास में दया नै करून चैछी?</verse>
				<verse number="34">और राजा ले क्रोध में आभेरन ऊस सजा दिनवालान का हात में सौप दीछ, कि कर्ज चुकूनो तब तक उनार हातून में रौ।</verse>
				<verse number="35">इसीकैं अगर तुमून में भटे हरेक अपून विश्वासी भाई मन है माफ नै करोलो त म्येरो स्वर्गीय पिता ले तुमार दगाड़ ऊसो करोलो।</verse>
			</chapter>
			<chapter number="19">
				<verse number="1">जब यीशु इन बातुन कै चुकियान त गलील प्रदेश भटे विदा हो भेरन यरदन नदी का पार यहूदिया प्रदेश में आयान।</verse>
				<verse number="2">तब एक भौत ज्यादा भीड़ उनार पछिल उछी और उनूनले वाँ उनून चंगो करछै।</verse>
				<verse number="3">तब फरीसी लोग यीशुस परखून खिन उक पास आभेरन कुन लाग्यान, “क्या हरेक कारण ले अपूनी स्यैनि स त्यागून ठीक छी?”</verse>
				<verse number="4">यीशु ऊस जबाब दीछ, “क्या तुमूनले नै पढ़ियो कि जेले उनून बनाछ, उले शुरू भटे नर और नारी बनाभेरन क्योछ,</verse>
				<verse number="5">‘येक कारण आदिमी अपून ईजा-बबा भटे अलग हो भेरन अपूनी स्यैनि का दगाड़ रौलो और द्वीवै एक तन होलो?’</verse>
				<verse number="6">क्याखिनकि अब उनून द्वी मिलभेरन एक हो जानान, अब उ द्वी नै पर एक छन। येक कारण परमेश्वर ले जैस एक दगाड़ जोड़ रैछ, उनून कोई आदिमी अलग जन करा।”</verse>
				<verse number="7">उनूनले उथैं क्योछ, “मूसा ले यो किलैं ठैरा रैछ कि तलाक-पत्र दीभेरन छोड़ दे?”</verse>
				<verse number="8">यीशु ले उनूनथैं क्योछ, “मूसा ले तुमार मन का कठोर हुना का कारण ले तुमून अपूनी स्यैनि स छोड़ दिनाकी आज्ञा दीछ, लेकिन शुरू भटे इसो नै छ्यो।</verse>
				<verse number="9">और मैं तुमूनथैं कुछूँ, कि जो कोई ब्यभिचार छोड़ और कोई कारण ले अपूनी स्यैनि स तलाक दीछो, और दुसरी का दगाड़ ब्या करौ त उ ब्यभिचार करछ्यो और जो उ छोड़िना की स्यैनि दगाड़ ब्या करोलो, उले ब्यभिचार करछो।”</verse>
				<verse number="10">शिष्यून ले उथैं क्योछ, “अगर आदिमी को स्यैनि का दगाड़ इसो सम्बन्ध छै, तब त यो निको होलो कि ब्या करि नै जौ।”</verse>
				<verse number="11">उनूनले उनूनथैं क्योछ, “सब यो वचन ग्रहण नै कर सकना, केवल उनी जिनून परमेश्वरा का तरफ यो दान दी ग्योछ।</verse>
				<verse number="12">किलैकी कुछ नपुंसक इसा छन, जो जन्म भटे है इसा हुनान; और कुछ नपुंसक इसा छन, जिनून लोगून ले नपुंसक बनाछ; और कुछ नपुंसक इसा छन, जिनून स्वर्गा का राज्य खिन अपून आपस नपुंसक बना रैछ। जो येस समझ सक्छो, उ समझ ले।”</verse>
				<verse number="13">तब लोग नानतिनान उक पास ल्यान कि उनूनमें हात राँख भेरन प्रार्थना करौ, लेकिन शिष्यून ले उनून डाटछ्य।</verse>
				<verse number="14">यीशु ले उनूनथैं क्योछ, “नानतिनान म्यारा पास उन दी, और उनून मना जन करा, क्याखिनकि उई लोग जो इन नानतिनान की नियाती भरोसामंद छन, उई परमेश्वरा का राज्य रौला।”</verse>
				<verse number="15">और यीशु ले उनार खाँरा में हात राखभेरन वाँ भटे न्हैग्या।</verse>
				<verse number="16">और एक आदिमी यीशुका पास आछ और उनूनथैं क्योछ, “हे गुरू, मैं कि निको काम करूँ जेले मैंस परमेश्वर अनन्त जीवन द्योलो?”</verse>
				<verse number="17">यीशु ले उथैं क्योछ, “तुम मैंथैं भलो किलैं कुँछा, सिर्फ परमेश्वर स छोड़िभेरन और कोई लै भलो नाहातिन, लेकिन अगर तैं अनन्त जीवन में प्रवेश करून चाँछै, त आज्ञान मानून कर।”</verse>
				<verse number="18">उले उनूनथैं पुछ्छै, “को वाली आज्ञा?” यीशु ले क्योछ, “यो कि खून जन करिये, ब्यभिचार जन करिये, चोरी जन करिये, झूठ्ठी गवै जन दीये,</verse>
				<verse number="19">अपून बबा और अपूनी ईजा को इज्जत करिये, और अपून पड़ोसीस अपून समान प्रेम राखिये।”</verse>
				<verse number="20">उ जौवान ले यीशु थैं क्योछ, “इन सबून त मैले मानछूँ; अब मैंमें कि बाते की कमी छै?”</verse>
				<verse number="21">यीशु ले उथैं क्योछ, “अगर तैं सिद्ध हुन चाँछै, त जा, अपूनी सब कुछ जो तेरो छै ऊस बेच भेरन गरीब लोगून में बाड़ दे, अगर तैं इसो करछै तो तैंस स्वर्ग में धन मिलोलो, और म्यारा दगाड़ अ और म्येरो शिष्य बन जा।”</verse>
				<verse number="22">लेकिन जब उले यो सुणछ्य त उदास हो भेरन न्हैग्यो, क्याखिनकि उक पास भौत धन-सम्पति छी।</verse>
				<verse number="23">तब यीशु ले अपून शिष्यून थैं क्योछ, “मैं तुमूनथैं सच्ची कुछूँ कि धनवान लोगून को स्वर्ग राज्य में प्रवेश करून भौत मुश्किल छै।</verse>
				<verse number="24">मैं तुमूनथैं फिर कुंछूँ, कि परमेश्वरा का राज्य में धनवान लोगून को पुजून ऊँट का शियूण का छेद में भटे पार हुनो आसान छै।”</verse>
				<verse number="25">यो सुणभेरन शिष्यून ले एक दुसारा थैं क्योछ, “तो केको ले परमेश्वरा का राज्य में बचाई जानो कसीकैं सम्भव छै।”</verse>
				<verse number="26">यीशु ले उनार तरफ देखभेरन क्योछ, “यो लोगून खिन भौत असम्भव छै, लेकिन परमेश्वर भटे हो सकछो।”</verse>
				<verse number="27">तब पतरस ले क्योछ, “हमार बारिमें क्या? हमूले तेरो शिष्य बनून खिन अपूनो सब कुछ छोड़ दीछ?”</verse>
				<verse number="28">फिर यीशु ले उनूनथैं क्योछ, “मैं तुमूनथैं सच्ची कुछूँ कि तुम जो म्यारा बातुन मानछा, उ बखत जब सब कुछ नय्या हो जालो और मैं आदिमी को च्योलो अपून महिमामय सिंहासन में बैठोलो त तुम ले बार सिंहासनून में बैठभेरन इस्राएल देशा का बार गोत्रून को न्याय करला।</verse>
				<verse number="29">यीशु उनूनथैं क्योछ, मैं तुमूनथैं कुछूँ, कि इसो कोई नाहातिन जेले सुसमाचार खिन अपूनो घर-बार, ईजा-बबा, भाई-बैनि, बाल-बच्चान या गाड़ा-भीड़ सुसमाचार खिन छोड़िना को हो तो सौ गुना ज्यादा पाल, और उ अनन्त जीवन ले पाल।</verse>
				<verse number="30">लेकिन भौत सारा लोग जो महान और अघिल छन, उ बखत पछिल होला; और जो पछिल छन, उन उ बखत अघिल होला।”</verse>
			</chapter>
			<chapter number="20">
				<verse number="1">“स्वर्ग को राज्य यो उदारण नियाती छै, कि एक बगीचा का मालिका जो रात्तै जाछो कि मजदूरून अपून अंगूर का बगीच में काम करून खिन लगूँ।</verse>
				<verse number="2">जब उ मजदूरून एक दीनार रोज की मजूरी में राजी हो ग्यो, त उले उनून अपून अंगूर का बगीच में भेजछ्य।</verse>
				<verse number="3">फिर रात्तै लगभग नौ बजे जब उ भ्यार आछ, त कुछ लोगून बाजार में बेकार ठाड़ देखछ्य,</verse>
				<verse number="4">और उनूनथैं क्योछ, ‘तुमूले म्यारा अंगूर का बगीच में जा, जो ठीक होलो उ मजूरी तुमून ले द्यूलो। तब उन ले काम करून खिन जानान।</verse>
				<verse number="5">दुबारा फिर उले बारा बजे और तीन बजे का लगभग उले भ्यार आभेरन ऊसो करछ्य।</verse>
				<verse number="6">उक बाद लगभग ब्याला का पाँच बजे फिर भ्यार आभेरन, उले थ्वाड़ा लोगून ठाड़ देखछ्य और उनूनथैं क्योछ, तुम याँ दिन भर बेकार में किलैं ठाड़ रैछा?’ उनूनले उथैं क्योछ, ‘किलैकी केले हमून काम में नै लगायो।’</verse>
				<verse number="7">उले उनूनथैं क्योछ, ‘तुमूनले अंगूर का बगीच में जा और काम करा।’</verse>
				<verse number="8">ब्याल हुन पर अंगूर का बगीचा का मालिक ले मुन्सीस बुलाभेरन क्योछ, ‘सब मजदूरून बुलाभेरन जो आखरी में उनूनले और जो पैलि उनूनले मंजूरी दी दे।’</verse>
				<verse number="9">और उन मजदूर जो ब्याल का पाँच बजे भटे काम में लगीना का छ्या, उनून पुरी दिन की मजूरी मिलछ्य।</verse>
				<verse number="10">जो मजदूर काम में रात्तैनि आईना का छ्या, उनूनले यो समझछ्य की हमून ज्यादा मजूरी मिलेलि, लेकिन उनूनले पुरी दिन की मिलछ्य।</verse>
				<verse number="11">जब उनून एक्कै दीनार दीछ, तो उन बगीचा का मालिक खिन नाराज हो भेरन कुन लागनान,</verse>
				<verse number="12">‘तैले जो पाँच बजे आयान, जिनुले बगीचा में एक घंटा काम करछ्य, उनूनले उतुकैं मंजूरी दीछ, जदुक हमून दीछ, हमून ले इदुक घाम में पुर दिन भौत मेहनत ले काम करछ्य?’</verse>
				<verse number="13">और तब बगीचा का मालिक ले उनूनमें भटे एक्कै स जबाब दीछ, ‘हे भाई, मैंले तुमार दगाड़ कोई बेमानी नी करि। क्या तैले मैंथैं एक दिन की एक दीनार मंजूरी तय नी कर राखछी?</verse>
				<verse number="14">तुम अपूनी मंजूरी ली और जा; मेरि यो इच्छा छै कि मैं उनून उतुकैं दीयू, जदुक तुमून दीरैछ।</verse>
				<verse number="15">क्या मैंस यो अधिकार नाहातिनी में अपून धन स अपून मरजी ले बाड़ सकनू? क्या म्यारा दयालु हुन तुमार आँखान में खटकनानी?’</verse>
				<verse number="16">इसीकैं जो अपून-आप स महान समझछो, उ तुच्छ होलो; और जैस लोग तुच्छ समझनान, उ महान होलो।”</verse>
				<verse number="17">और यीशु यरूशलम शैहर खिन जान बखत अपून बारा शिष्यून एकान्त में लिजाभेरन उनूनथैं कुंनान।</verse>
				<verse number="18">यीशु ले क्योछ, “देखा, हम यरूशलम शैहर खिन जानू, और मैं आदिमी को च्योलो प्रधान याजकून का और मूसा का नियम सिखून वाला लोगून का हवाला करि जूलो, और उन मैंस जानले मारू खिन इलजाम लगाल,</verse>
				<verse number="19">और गैर-यहूदी लोग का हवाला कर द्याला। उन म्येरो मजाक उड़ाला, मैंमें थुकाला, और कोड़ा ले माराल और मैंस सूली में चढ़ाभेरन जान है मार द्याल, लेकिन मैं तीसारा दिन मुर्दान में है ज्यून हो ज्यूलो।”</verse>
				<verse number="20">तब जब्दी च्यालान कि ईजा ले अपून च्यालान का दगाड़ यीशु का पास आभेरन ढोक दीछ और उथैं कुछ माँगून लागछी।</verse>
				<verse number="21">तब यीशु ले उनूथैं पुछ्छै, “तैं कि चाँछी?” तब उ यीशुथै कुछी, “तैं मैंस वचन दे कि म्यारा इन च्यालान अपून राज्य में एक त्यारा देन तरफ और दुसोरो बौं तरफ बैठाया।”</verse>
				<verse number="22">यीशु ले जबाब दीछ, “तुम नै जाणना कि तुम कि माँगून मरेछ्या? जो सताव मैं सहन करून वालो छूँ, क्या तुम उ सताव सहन करून खिन तैयार छाई?” शिष्यून ले यीशु थैं क्योछ, “होई, हम सहन कर सकनू।”</verse>
				<verse number="23">यीशु उनूनथैं क्योछ, “तुमून म्यारा दगाड़ बराबर सताव स त सहन कर सकछा, लेकिन मैंस यो तय करना को अधिकार नाहातिन, म्यारा दैन और बौं तरफ की जाग कैस मिलेलि। परमेश्वर ले उन जाग उनून खिन तैयार कर राख्यान, जैस उले चुन रैछ।”</verse>
				<verse number="24">यो सुणभेरन बाकि दस शिष्य, याकूब और उक नान भाई यहूना में गुस्सा हुन लाग्यान।</verse>
				<verse number="25">तब यीशु ले अपून शिष्यून पास बुलाभेरन क्योछ, “तुम जाणछा, कि जो यो दुनिया में अधिकारी हुनान, उ उनूनमें अपूनी ताकत दिखाभेरन राजा करनान। और उनूनमें है जो ठूला छन, उ लोगून में हक जमूनान।</verse>
				<verse number="26">लेकिन तुमूनमें इसो नी हो; और जो कोई तुमून में ठूलो हुन चाँछ, तब उ सबून है नान बनो और सबून को दास बनो।</verse>
				<verse number="27">और तुमून है जो कोई प्रधान बनून चाँछो, उ तुमोरो दास बनोल।</verse>
				<verse number="28">जसीकैं मैं आदिमी को च्योलो अपूनी सेवा करून खिन यो संसार में नै आरयूँ। बल्कि मैं दुसरान की सेवा करून खिन आरयूँ। येक कारण आरयूँ कि मैं अपूनी जान की कीमत दीभेरन भौतून लोगून का पापून है बचुन खिन आरयूँ।”</verse>
				<verse number="29">और जब यीशु और उक शिष्य यरीहो शैहर जानमरेछ्या, त भौत लोगून की भीड़ उनार पछिल चल पड़छय।</verse>
				<verse number="30">उई सड़का किनार द्वी अन्धा बैठिना का छ्या, जब उनूले सुणछ्य कि यीशु याँ भटे जान मर्यान, त उन धध्याभेरन कुन लाग्यान, “हे प्रभु दाऊद का वंशज, हमून में दया कर।”</verse>
				<verse number="31">तब लोग उनून डाठून लाग्यान, कि चुप रौ; लेकिन उन और ले जोरले चिल्ला भेरन कुन लाग्यान, “हे प्रभु, दाऊद का वंशज, हमून में दया कर।”</verse>
				<verse number="32">तब यीशु ले रूक भेरन, उनून बुलाभेरन क्योछ, “तुम कि चाँछै मैं तुम खिन कि करूँ?”</verse>
				<verse number="33">उनूनले यीशु थैं क्योछ, “हे प्रभु की हम चाँछू कि हमार आँखा खुल ज्यून।”</verse>
				<verse number="34">और यीशु ले उनूनमें तरस खाभेरन उनार आँखान छूँयान, और उन उई बखत देखन लागछ्य, और यीशुका पछिल हो लीनान।</verse>
			</chapter>
			<chapter number="21">
				<verse number="1">जब यीशु और उक शिष्य यरूशलम शैहरा का नजिक जैतून पहाड़ का बैतफगे गौं का पास आयान, तब यीशु ले अपून द्वी शिष्यून यो कैभेरन भेजछ्य,</verse>
				<verse number="2">“सामुनि गौं में जा, वाँ पुजनै तुमून एक गधी बाँदिना कि मिलेलि, और उक दगाड़ एक बच्चाले होलो। उनून खोल भेरन म्यारा पास ल्या।</verse>
				<verse number="3">अगर कोई तुमूनथैं पुछोलो, तो कया, ‘हमार प्रभु स येकी जरूरत छै, और उ उई बखत याँ भेज द्यालो।’ ”</verse>
				<verse number="4">यो येक कारण भ्योछ कि जो बात परमेश्वरो को संदेश दिनवालान का द्वारा कईनाको छ्यो, उ बात पुरी हो,</verse>
				<verse number="5">“यरूशलम शैहरा का लोगूनथैं कौ, देख! तुमोरो राजा तुमार पास उन मर्योछ; उ नम्र छै, और गधा में बैठिना को छै; बल्कि गधा का बच्चा में बैठभेरन त्यारा पास उछो।”</verse>
				<verse number="6">शिष्यून ले जाभेरन, जसो यीशु ले उनूनथैं कईना को छ्यो, उनूनले ऊसो करछ्य।</verse>
				<verse number="7">और उन गधा और उक बच्चा ल्यान, और शिष्यून ले गधी का पीठ में अपून कपाड़ा डाल्यान, जिनून में यीशु बैठियान</verse>
				<verse number="8">और तब भौत लोगून ले यीशु का स्वागत करून खिन बाँट में अपून-अपून शौल और कपाड़ा बिछा दीयान। और कुछ लोगून ले त रूखून में है हांगान काटि-कटि भेरन बाँट में बिछा दीयान।</verse>
				<verse number="9">और लोग यीशु का दगाड़ अघिल-पछिल हिटू मेछ्या, उन जोरले चिल्ला-चिल्ला भेरन कुछ्या, “दाऊद की संतान की होशाना; धन्य छै उ जो परमेश्वरा का नाम ले उछो। सबून है ऊच्चा जाग में होशाना।”</verse>
				<verse number="10">जब यीशु यरूशलम शैहर में पुज्यान, त सारा शैहर में हलचल मचि गै, और लोग कुन लागनान, “यो को छै?”</verse>
				<verse number="11">और लोग कुन लाग्यान, “यो गलील प्रदेश को नासरत गौं को परमेश्वरो को संदेश दिनवाला यीशु छै।”</verse>
				<verse number="12">और यीशु ले परमेश्वरा का मन्दिर का खाला में ग्यान; वाँ जो लोग बैठभेरन ब्यापार करून रेछ्या, यीशु उनुस वाँ भटे भ्यार निकालून लागछ्य, और उनार रूपयान बदलून वालान का मेज और कबूतर बेचन वालान का तखता पलट दीयान।</verse>
				<verse number="13">और यीशु ले क्योछ, “पवित्रशास्त्र में लिखीना को छै, ‘म्येरो घर सबै देशून का लोगून खिन प्रार्थना को घर होलो,’ पर तुमून ले यो प्रार्थना घर स डाकून को अड्डा बना रैछ।”</verse>
				<verse number="14">तब अन्धा और लंगड़ा, मन्दिर में यीशुका पास आयान, और उनूनले उनून चंगो करछ्य।</verse>
				<verse number="15">लेकिन जब प्रधान याजकून और ले मूसा का नियम सिखून वालान ले यीशु का चमत्कार काम देख्यान, और च्यालान मन्दिर में दाऊद का वंशज की होशाना करून देखिभेरन भौत गुस्सा हुना।</verse>
				<verse number="16">और उन यीशुथै कुन लाग्यान, “क्या तैं सुणून मरछ्य, कि इन लोग की कुन मर्यान?” यीशु ले क्योछ, “होई सुणून मरयूँ; क्या तुमूनले पवित्र-शास्त्र में यो नै पढ़योई, ‘तैले च्यालान और दूध पिन वाला नान्तिनान का मुँख भटे अपूनी जै जैकार कराछ?’”</verse>
				<verse number="17">तब यीशु उनून छोड़िभेरन, वाँ भटे बैतनियाह गौं खिन न्हैजानान और वाँई रात बितूनान।</verse>
				<verse number="18">रातैनि जब यीशु नगर खिन वापस उनमरेछ्या, तब बाँट में हिटून-हिटून यीशु स भुख लागछ्य।</verse>
				<verse number="19">बाटका किनार में एक हरिया-भरिया तिमूला का रूख स देखिभेरन उक पास ग्योछ, लेकिन उ रूख में पातून का अलावा के नै पायो, यीशु ले क्योछ, “आज भटे तैंमें फल नी लागून।” और तिमूला उई बखत रूख तुरन्त सुखग्यो।</verse>
				<verse number="20">यो देखिभेरन यीशुका शिष्यून ताजुब भ्योछ और उनूनले क्योछ, “यो तिमूला को रूख कसकैं जाड़ा तक सुख गैछ्यो?”</verse>
				<verse number="21">यीशु ले उनून जबाब दीछ, “मैं तुमूनथैं सच्ची कुंछू, अगर तुम विश्वास राखला और भैंम नी करला, नै त केवल यो करला जो यो तिमूलो को रूखाँक दगाड़ करि ग्यो, त जो ले विश्वास ले यो पहाड़ थैं कौलो, ‘तैं याँ भटे उखड़ भेरन झील में जा पड़,’ जा तो उ तुमेरि बात मान लेलो।”</verse>
				<verse number="22">और जो कुछ ले तुम प्रार्थना में विश्वास ले माँगला उ सब तुमून मिल जालो।</verse>
				<verse number="23">फिर यीशु मन्दिर में जाभेरन उपदेश दिन मरेछ्या, तब प्रधान याजक और यहूदी अगुवान ले यीशु थैं पुछ्छै, “तैं इन काम कै अधिकार ले करछ्य? और यो अधिकार तैंस कैले दी रैछ?”</verse>
				<verse number="24">यीशु ले उनूनथैं क्योछ, “मैंले तुमूनथैं एक सवाल पुछ्छू, और अगर तुम मैंस येक जबाब द्यला, तब मैं तुमून बतुलो कि यो काम केका अधिकार ले करछूँ।”</verse>
				<verse number="25">तब यीशु ले उनूनथैं पुछ्छै, यहूना स लोगून बपतिस्मा दीन खिन कैले भेजछ्य? क्या यो परमेश्वर ले भेजिना को छ्यो, “या आदिमी ले? तुम मैंस येक जबाब दी।” तब उन लोग आपस में यो बात करून लाग्यान, “अगर हम कुंनू, कि यहूना परमेश्वरा का अधिकार ले बपतिस्मा दी छ्यो, तो उ हमून थैं पुछोलो, फिर तुमूले यहूना में विश्वास क्याखिन नै करछ्य?</verse>
				<verse number="26">और अगर हम कुंनू लोगून का तरफ भटे त लोग हमून ढ़ुगान ले लोड़ियाला, क्याखिनकि भौत सारा लोग यो बात स जाणनान, कि यहूना सच्ची में परमेश्वरो को संदेश दिनवाला छ्यो।”</verse>
				<verse number="27">तब उनूले यीशु स जबाब दीछ, “हमून पत्तो नाहातिन।” तब यीशु ले क्योछ, “मैंले तुमून नै बतूनू कि मैं कै अधिकार ले यो काम करछूँ।</verse>
				<verse number="28">तब यीशु ले तुम यो कहानी की सोचछा, एक आदिमी का द्वी च्याला छ्या, उले ठूलवाला च्याला थैं क्योछ, आज तैं अंगूर का बगीच में जाभेरन काम कर।</verse>
				<verse number="29">च्याला ले क्योछ, ‘मैं नै जानू’ लेकिन थ्वाड़ा देर बाद अपून बात में पछता भेरन गाड़ा में काम करून खिन न्हैजाछो।</verse>
				<verse number="30">फिर उ आदिमी ले अपून नान वाला च्याला थैं ले इसो कुंछू, नानवाल च्याला ले क्योछ, ‘होई बबा जाछूँ’ लेकिन नै जानो।</verse>
				<verse number="31">यीशु ले उनूनथैं पुछछै, इन द्वीवै च्यालान में भटे केले अपून बबा की बात मानछ्य?” उनूनले यीशुथै क्योछ, “पैला ले।” फिर यीशु ले उनूनथैं क्योछ, “मैं तुमूनथैं सच्ची कुछूँ कि चुंगी लिनवाला और बेश्या तुमून है पैलि परमेश्वरा का राज्य में प्रवेश करला।</verse>
				<verse number="32">मैं इसो येक कारण कुछूँ, क्याखिनकि यहूना बपतिस्मा दिनवालो तुमून बताछ कि कसकै धार्मिकता ले जीवन जीन छै, तो तुमूले उको विश्वास नै कर्यो, लेकिन चुंगी लीन वाला ले और वेश्यान ले पश्चताप करछ्य और पापून छोड़ दीछ। और यो देखभेरन ले तुम बाद मैंले नै पछताया कि तुम यहूना बपतिस्मा दिनवाला को विश्वास कर लीना।</verse>
				<verse number="33">उक बाद यीशु ले उनून एक कहानी सुणाभेरन क्योछ, एक आदिमी ले अंगूर का बगीच लगाछ, और उ बगीच का चारों तरफ दीवार लगाछ, और अंगूरो को रस निकालून खिन और जामा करून खिन एक जाग बनाछ, और देखभाल करून खिन पक्को छाँनो बनाछ; और किसानून उको ठेका दीभेरन खुद दूर देश न्हैग्यो।</verse>
				<verse number="34">जब अंगूर पाक्नाका बखत आछ, त बगीच का मालिक ले अपून सेवकून किसानून का पास फसलून को हिस्सा लीन खिन भेजछ, जिनुले बगीच को ठेका ली राखछ्यो।</verse>
				<verse number="35">लेकिन किसानून ले उन सेवकून पकड़ भेरन उनूनमें भटे कैका दगाड़ मार-पीट करछ्य, और कैसे जान है मार दीछ और कैसे ढ़ुगा ले मार डालछ्य।</verse>
				<verse number="36">येक बाद फिर मालिक ले पैलि है ले ज्यादा सेवक स भेजछ, लेकिन उन किसानून ले उनार दगाड़ ले ऊसो करछ्य।</verse>
				<verse number="37">आखिर में बगीच का मालिक ले अपून च्याला स यो सोचभेरन किसानून का पास भेजछ, कि उन म्यारा च्याला को आदर करला।</verse>
				<verse number="38">लेकिन किसानून ले देखछ्य, कि बगीच का मालिक को च्योलो ऊनमर्योछ, तब उनूले आपस में यो बात करछ्य, योई त असली वारिस यो छै, आ, हम यैस जान हे मारी दीनू, तो फिर उकी सारी जैजाद हमरि है जालि।</verse>
				<verse number="39">और उनूनले ऊस पकड़ भेरन बगीच भटे भ्यार निकालभेरन जान है मार दीछ।</verse>
				<verse number="40">तब यीशु ले उनूनथैं क्योछ, जब अंगूर का बगीच मालिक प्रदेश भटे वापस आलो तब उन किसानून का दगाड़ कि करोलो?”</verse>
				<verse number="41">उनूनले क्योछ, “उ मालिक उन किसानून बुर तरीका ले नाश करोलो; और अपून बगीच का ठेका दुसारा किसानून द्योलो, जो ऊस बखत में फसल की हिसा द्याला।”</verse>
				<verse number="42">यीशु ले उनूनथैं क्योछ, क्या तुमूले कभे पवित्रशास्त्र में यो नै पढ़योई कि, जो ढूंगास मिसत्रीले बेकार समझछ्य, उई बेकार ढ़ुगा कुनिया ढूंगो है ग्यो? यो प्रभु का तरफ भटे भ्योछ, जो हमरि नजरून में कतुक अद्धभुत छै।</verse>
				<verse number="43">येक कारण मैं तुमूनथैं कुछूँ, कि परमेश्वरो को राज्य तुमूनथैं भटे वापस ली जालो और इसी जाति दी, दी जालो जो काम उ कुंछो उई करछी।</verse>
				<verse number="44">जो यो ढ़ुगा में खितीलो उ चूर-चूर हो जाला; और जेमें यो ढूंगो खितीलो उ पीसी जालो।</verse>
				<verse number="45">तब प्रधान याजक और फरीसी लोग यो कहानी सुणिभेरन समझ ग्या कि यीशु यो बात हमार बारिमें कुनमर्योछ।</verse>
				<verse number="46">तब उन यीशु स पकड़ून चान मरेछ्या, लेकिन भीड़ का डर का कारण ले उन उ बखत यीशु स नै पकड़ सक्या, क्याखिनकि लोग यीशु स परमेश्वरो को संदेश दिनवालान समझ छ्या।</verse>
			</chapter>
			<chapter number="22">
				<verse number="1">यीशु ले फिर उनून एक कहानी सुणाछ,</verse>
				<verse number="2">“स्वर्ग को राज्य यो कहानी का नियाती छै, एक राजा ले अपूनो च्याला को ब्या करछ्य।</verse>
				<verse number="3">और राजा ले अपून दासून ब्याक दावत में न्यूतो दिन खिन भेजछ्य, लेकिन उनूनले उनो नै चायो।</verse>
				<verse number="4">फिर राजा ले अपून दासून इसो कैभेरन भेजछ्य, ‘कि लोगून थैं इस कया कि दावत को सब खानो तैय्यार छै, और तुम ब्याका खान में आ।’</verse>
				<verse number="5">लेकिन उनूनले राजा की बातुन नजर अंदाज करभेरन, कोई अपून गाड़ान खिन कोई अपून काम में न्हैजानान।</verse>
				<verse number="6">और जो लोग घर में छ्या, उनूनले राजा का दासून की बेजत्ती करभेरन उनून मार डालछ।</verse>
				<verse number="7">यो सुणभेरन राजा स भौत गुस्सा आछ, और उले अपूनी सेना भेजभेरन उनून खतम करवा दीछ, और उनार देशले नष्ट कर दीछ।</verse>
				<verse number="8">तब राजा ले अपून दासूनथैं क्योछ, ‘ब्याह को दावत को खान त तैयार छै, लेकिन जिनून न्यूत में बुला राखछ्यो, उन इस लकारिका नी छ्या।</verse>
				<verse number="9">लेकिन अब तुम चौहरान में जाभेरन जदुक लोग तुमून मिलनान, उन सबून बुला ल्या।’</verse>
				<verse number="10">तब राजा का दासून ले जाभेरन जदुक ले लोग चाहे भल या बुर छ्या, उनून मिल्यान, उन सबून ब्याह का दावता का खान में बुला ल्यूनान और उनून ब्याह का कपाड़ा पैनून खिन दीयान।</verse>
				<verse number="11">तब राजा उनून जो ब्याह का खान में आरेछ्या, उनून देखन खिन आछ, और राजा ले वाँ एक आदिमी स देखछ्य, जेले ब्याका कपाड़ा नी पैनिना राँख छै।</verse>
				<verse number="12">राजा ले उथैं पुछ्छै, ‘हे मित्र; ब्या वाला कपाड़ा जो मैंले सबून दी राँछ्या तैं उनून पैनिन बिना याँ क्याखिन आछ?’ और उ पास कोई जबाब नी छ्यो।</verse>
				<verse number="13">तब राजा ले अपून दासूनथैं क्योछ, ‘येका हात-खुट बाँदि भेरन काल कोठरी में हाल दी, जा रून-कलान और दाँतून को किट-किटून छै।’</verse>
				<verse number="14">तब यीशु ले यो कहानी सुणाभेरन लोगूनथै क्योछ, बुलाईना त भौत छन लेकिन चुनिना का कम छन।”</verse>
				<verse number="15">तब फरीसी लोगून वाँ भटे जाभेरन आपस में यो प्लान बनूना की यीशु स कसीकैं उक बातुन में फसाई जौ।</verse>
				<verse number="16">तब उनूनले हेरोदेस राजा कुछ समर्थक और फरीसी लोगून यीशु का पास यो कुंन खिन भेजियान, कि “गुरू! हम यो जाणनू, कि तैं हमेशा सच्चो छै, और सच्चाई ले परमेश्वरो को बाटा की शिक्षा दीछा, और कैकी परवाह नै करना, क्याखिनकि तैं लोगून को मुँख देखिभेरन बात नै करनै।</verse>
				<verse number="17">येक कारण हमून यो बतो, क्या त्यारा विचार में महाराजा स कर दीन ठीक छी या नाहातिन?”</verse>
				<verse number="18">उनेरि चालाकी स जाणिभेरन यीशु ले उनूनथैं क्योछ, “हे कपटी लोगो तुम मैंस क्याखिन परख छा?</verse>
				<verse number="19">राजा-करो को सिक्का मैंस दिखा।” तब उन एक राजा-करो सिक्का उक पास ल्यान।</verse>
				<verse number="20">तब यीशु ले उनूनथैं पुछ्छै, “यो सिक्का में कैको छाप और नाम छै?”</verse>
				<verse number="21">उनूनले यीशुस जबाब दीछ, “कैसर राजा।” तब यीशु ले उनूनथैं क्योछ, “ जो कैसर राजा को छै, उ कैसर महाराजा स दी, और जो परमेश्वरो को छै उ परमेश्वर स दी।”</verse>
				<verse number="22">यो बात सुणिभेरन उन लोगून ताजुब भ्योछ, और उन वाँ भटे न्हैग्या।</verse>
				<verse number="23">सदूकी लोग यो विश्वास नी करछ्या, कि मरिना को लोगून को दुबारा ज्यून हुनो छैई नै, येक कारण सदूकी लोग यीशु का पास आभेरन उथैं पुछून लागनान,</verse>
				<verse number="24">“गुरू जी, मूसा का नियमून में हमून खिन लिखीना को छै, कि कोई आदिमी बिना संतानै को मर जाछो, त उको भाई उ आदिमी का स्यैनि का दगाड़ ब्या करभेरन अपून भाई खिन वंश पैद करो।</verse>
				<verse number="25">हमार याँ एक घर में सात भाई छ्या; और सबून है ठूला भाई को ब्या भ्योछ, और उ बिना औलाद का मर ग्यो, और अपूनी घरवाली स अपून भाई खिन छोड़ी जाछो।</verse>
				<verse number="26">इसीकैं दुसारा और तिसरा ले करछ्य, और सातू तक योई भ्योछ।</verse>
				<verse number="27">और सातू भाईन ले उ विध्वा का दगाड़ ब्या करछ्य। और सबै बिना औलाद का मर ग्या, और सबून का बाद उ स्यैनि ले मरि ग्यै।</verse>
				<verse number="28">हे गुरू जी, अब हमून बतो, जब उ ज्यून होलि तब उ सातू भाईन में भटे कैकी घरवाली होलि? क्याखिनकि उ उन सब भाईन की घरवाली हो गैछी?”</verse>
				<verse number="29">तब यीशु ले उनूनथैं क्योछ, “तुम नै जाणना पवित्रशास्त्र कि कुंछो, और नै परमेश्वरे की सामर्थ स जाणना, यो कारण ले भूल में पड़ीना का छा।</verse>
				<verse number="30">क्याखिनकि जब लोग मरिन में भटे ज्यून होला, तो उन लोग ब्या नी करून, जसीकैं स्वर्ग में रूनवाला स्वर्गदूत ब्या नै करना।</verse>
				<verse number="31">यीशु ले उनूनथैं क्योछ, जाँ तक मरिन में भटे ज्यून हुना को बारिमें वचन छै, क्या तुमूनले पवित्र-शास्त्र में नै पडियो, जो परमेश्वर ले तुमूनथैं कै रैछ।</verse>
				<verse number="32">‘मैं त्यारा पुरखा अब्राहम और इसहाक और याकूबो को परमेश्वर छूँ?’ परमेश्वर मरिना का लोगून को नै, बल्कि ज्यून लोगून को परमेश्वर छै।”</verse>
				<verse number="33">यो सुणिभेरन सदूकी लोग उकी शिक्षा ले हैरान हुनान।</verse>
				<verse number="34">जब फरीसी लोगून ले सुणछ्य, कि यीशु ले सदूकी लोगून को मुँख बन्द कर हालछ्य, तब उन सब जामा भ्यान।</verse>
				<verse number="35">तब मूसा का नियम सिखून वाला में भटे एक आदिमी ले यीशुस परखून खिन पुछ्छै,</verse>
				<verse number="36">“गुरू जी, हमून बतो परमेश्वरा का दीईना का हुकुम में भटे सबून है मुख्य हुकुम कि छै?”</verse>
				<verse number="37">यीशु ले उथैं क्योछ, “सबून है मुख्य हुकुम त यो छै कि तैं अपून प्रभु अपून परमेश्वर स पुर मन ले, पुर प्राण ले और पुरी बुध्दिले प्रेम कर।</verse>
				<verse number="38"></verse>
				<verse number="39">और येक समान दुसोरो हुकुम यो छै कि जसो प्रेम तैं अपनास करछै, ऊसो प्रेम अपून पड़ोसिन का दगाड़ ले कर।</verse>
				<verse number="40">मूसा का पुर नियम-कानून और परमेश्वरो को संदेश दिनवालान की शिक्षा इन द्वी हुकुम में निर्भर करछी।”</verse>
				<verse number="41">जब फरीसी लोग एक दगाड़ छ्या, तब यीशु ले उनूनथैं पुछ्छै,</verse>
				<verse number="42">“कि मसीह का बारिमें तुम लोग की सोचछा? उ केको च्योलो छै?” तब उनूनले जबाब दीछ, “दाऊद राजा को वंशज छै।”</verse>
				<verse number="43">फिर यीशु ले उनूनथैं पुछ्छै, “त दाऊद मसीहा स प्रभु किलैं कुंछो?</verse>
				<verse number="44">‘प्रभु ले म्यारा प्रभु थैं क्योछ, म्यारा दैन तरफ बैठ, जब तक कि मैं तेरा दुश्मनून तेरा सामुनि झुकून द्यू।’</verse>
				<verse number="45">अगर दाऊद राजा त मसीह थैं प्रभु कुँछो, फिर उ उको वंशज कसीकैं हो सकछ्यो?”</verse>
				<verse number="46">यो बात में कोई ले केले जबाब नै दी सक्यो। उ दिन भटे कैसे ले यीशु थैं केले सवाल पुछना की हिम्मत नै भ्ये।</verse>
			</chapter>
			<chapter number="23">
				<verse number="1">तब यीशु ले भीड़ का लोगून थैं और अपून शिष्यून थैं क्योछ,</verse>
				<verse number="2">मूसा का नियम सिखून वाला और फरीसी लोगून मूसा का नियम-कानून स बतूना को और दुसरान सिखूना को अधिकार छै।</verse>
				<verse number="3">येक कारण उ तुम लोगून थैं जेलै कलो, उ करनै और माननै रया, लेकिन उनार जस काम जन करया; क्याखिनकि उन जसी शिक्षा दीनान, ऊस काम नै करना।</verse>
				<verse number="4">उन भौत सारा नियम-कानून बतुनान, जिनून लोगून खिन मानून भौत कठिन छै। लेकिन अपून बनाईना का नियमून-कानून मानून खिन त उ जरा ले कोशिश नै करना।</verse>
				<verse number="5">उन अपून सब काम लोगून देखून खिन करनान, और उन पवित्र-शास्त्र का वचन ताबिजून में लिखभेरन अपून गला और हातून में पैननान, और अपून कपाड़ान का किनारान लम्बो करनान।</verse>
				<verse number="6">दावतून में खास-खास जागान में और यहूदी सभाघर में खास आसून में बैठून पसन्द करनान,</verse>
				<verse number="7">और बजार में लोग उनून नमस्कार करून पसन्द करनान, और गुरू कहलून उनून निको लागछ्य।</verse>
				<verse number="8">लेकिन तुम लोगून यो मौका जन दीया कि तुमूनथैं गुरू कुन, क्याखिनकि तुमोरो एक्कै गुरू छै, और तुम सब आपस में भाई-बैनिन का समान छा।</verse>
				<verse number="9">संसार में तुम कोई ले धर्म गुरू थैं अपूनो पिता जन कया, क्याखिन तुमोरो एक पिता छै; जो स्वर्ग में छै।</verse>
				<verse number="10">और तुम लोगून यो मौका जन दीया कि तुमूनथैं कोई गुरू कुन, क्याखिनकि तुमोरो एक्कै गुरू छै जो मसीह छै।</verse>
				<verse number="11">जो तुमून में जो ठूलो होलो, उ तुमोरो दास बननोलो।</verse>
				<verse number="12">जो कोई अपनास ठूलो समझछो, उ नानो करि जालो, और जो कोई अपनास नानो करोलो, उ ठूलो करि जालो।</verse>
				<verse number="13">फिर यीशु ले क्योछ, “हे कपटी मूसा का नियम सिखून वालान और फरीसी लोगों तुमून में धिक्कार हो! तुम लोगून खिन स्वर्ग राज्य को बाटो बन्द करछा, और नै खुद उमें चलछा और नै लोगून उ बाट में जान दीछा।</verse>
				<verse number="14">हे कपटी मूसा का नियम सिखून वाला और फरीसी लोग तुमून में धिक्कार हो! तुम विध्वाऊन का घरून लुट छा, और फिर लोगून दिखून खिन कि तुम धर्मी छा देर तलक प्रार्थना करछा, लेकिन परमेश्वर तुमून कड़ी सजा द्योलो।”</verse>
				<verse number="15">हे कपटी मूसा का नियम सिखून वाला और फरीसी लोग तुमून में धिक्कार हो! तुम एक आदिमी स अपून दल में मिलून खिन लम्बी-लम्बी यात्रा करछा, लेकिन जब उ आदिमी तुमार दल में शामिल हो जाछो तब ऊस अपून है ज्यादा नरक की आग को भागीदार बना दीछा।</verse>
				<verse number="16">“हे अन्धा यहूदी अगुवा तुमून में धिक्कार हो! तुम जो यो शिक्षा दीछा, अगर कोई मन्दिर की कसम खाछो त कोई बात नै, लेकिन अगर कोई मन्दिरा का सुना कि कसम खालो त उ कसम में बाधी जाछो।</verse>
				<verse number="17">हे मूर्खो ठूलो को छै, सुना या मन्दिर जैमें राखिना को सुनो पवित्र हो जाछो?</verse>
				<verse number="18">फिर तुम यो शिक्षा दीभेरन कुँछा, अगर कोई वेदी कि कसम खाछो त कोई बात ने, लेकिन जो भेंट वेदी मैं राखिना की छै अगर कोई उकी कसम खाछो त तुम उ कसम में बाँदि जाछो।</verse>
				<verse number="19">हे अन्धो यहूदी अगुवो, को ठूलो छै; भेंट या वेदी जेमें भेंट चढ़ाभेरन पवित्र हुछी?</verse>
				<verse number="20">येक कारण जो वेदी की कसम खाछो, उ वेदी और जो केले उ चढ़ा जाछो उकी ले कसम खाछो।</verse>
				<verse number="21">जो कोई मन्दिर की कसम खाछो, उ मन्दिर और उमें रून वाला परमेश्वर की कसम खाछो।</verse>
				<verse number="22">और जो स्वर्ग की कसम खाछो, उ परमेश्वर की सिंहासन की और उमें बैठून वाला की ले कसम खाछो।</verse>
				<verse number="23">हे कपटी मूसा का नियम सिखून वाला और फरीसी लोग, तुमून में धिक्कार हो! तुम अपून खेती में भटे पोदीना और सौंप और जीरा को दसवाँ हिस्सा दीछा, लेकिन तुम लोग पवित्रशास्त्र का मुख्य बातुन छोड़ दीछा, जसकैं न्याय, दया और भरोसमंद हुनो। और दसवाँ हिस्सा दीन चैंछो, लेकिन तुमून खिन यो ठीक छ्यो कि तुम इन बातुन ले करना और उनूनले नी छोड़ना।</verse>
				<verse number="24">हे अन्धा अगुवा, तुम नान-नान नियम-कानून त बड़ ध्यान ले मानछा, जसकैं तुम पानि पीछा उ भटे मच्छर दूर करछा। लेकिन परमेश्वर की मुख्य आज्ञान और नियमून टालि दीछा, जसकैं ऊँट स निगलून।</verse>
				<verse number="25">हे कपटी मूसा का नियम सिखून वाला और फरीसी लोग, तुमून में धिक्कार हो! तुम थाली और ब्यालान त भ्यार भटे मांजछा, लेकिन उन भितर भटे गन्दा छन उसीकैं तुमार मन भितर भटे लालची और मतलबी छन।</verse>
				<verse number="26">हे अन्धा फरीसी लोगों, पैलि तुमून लालची और स्वार्थी हुन बंद कर दिन चैछो। तब तुम उई कर पाला जो धर्मी छै। उ एक इसा ब्याला का नियाति होलो जो भ्यार और भितर द्वीवै तरफ साफ हो। तब तुम उई कर पाला जो पवित्र छै। एक इसी थाली की नियाति होलि जो भ्यार और भितर द्वीवै जागान साफ हो।</verse>
				<verse number="27">हे कपटी मूसा का नियम सिखून वाला और फरीसी लोग, तुमून में धिक्कार हो! तुम त इसा दिखाई दीछा, जसीकैं कबर में चूनो लगाईनाको जो मलि भटे सुन्दर दिखाई दीछी, लेकिन भितर भटे मुरदान की हड्डी और हर प्रकार की गंदगी ले भरिना की छै।</verse>
				<verse number="28">इसीकैं तुम ले भ्यार भटे आदिमीन धर्मी दिखाई दीछा, लेकिन भितर भटे कपट और बुरा काम भरिनाका छा।</verse>
				<verse number="29">हे कपटी मूसा का नियम सिखून वाला और फरीसी लोग, तुमून में धिक्कार हो! तुमार पुरखानले जिन परमेश्वरो को संदेश दिनवालान मारिना को छ्यो, तुम उनार कबरून सँवार छा और धर्मीन कि कबरून आदर दिन खिन बनूछा,</verse>
				<verse number="30">और कुँछा कि अगर हम अपून बाब-दादान का जागा में हुना त परमेश्वरो को संदेश दिनवालान की हत्या में शामिल नी हुना।</verse>
				<verse number="31">तुम साबित करभेरन गवाही दीन मरेछा की तुम वास्तव में परमेश्वरो को संदेश दिनवालान की हत्या करून वालान का वंशज छा।</verse>
				<verse number="32">तुम उ बुराई पुर करूनवाला छा जैकी शुरूवाद तुमार पुरखानले शुरू करछ्य।</verse>
				<verse number="33">हे स्यापों, और स्याँपा का समान जहरीला लोगों, तुम नरक की आगा की सजा भटे नै बच सकना।</verse>
				<verse number="34">येक कारण में तुमार पास परमेश्वरो को संदेश दिनवालान और बुद्धिमानून और मूसा का नियम सिखून वालान भेजछूँ; और तुम उनूनमें भटे कुछ लोगून मार डालला और सूली में चढ़ाला, और कुछ लोगून यहूदी सभाघरून में कोड़ा लगाभेरन एक शैहर भटे दुसारा शैहर खदेड़ला।</verse>
				<verse number="35">जसीकैं धरती में जदुक धर्मी लोगून को खून बगाई ग्योछ, धर्मी हाबिला का खून भटे लीभेरन बिरिक्याह का च्याला जकर्याह का खून तक, जैस तुम लोगून ले पवित्र जाग और वेदी के बीच में मार डालछ्य, उ सबोको इलजाम तुमार ख्वारा में पड़ोलो।</verse>
				<verse number="36">फिर यीशु ले क्योछ, मैं तुमूनथैं सच्ची कुछूँ, कि इन सब हत्यान की यो सजा योई बखत का लोगून में आ पड़ेलि।</verse>
				<verse number="37">हे यरूशलम शैहरा का लोगों, तुमूनले जो परमेश्वरो को संदेश दिनवालान मार दीछ, और जो त्यारा पास भेजि ग्यान उनून ढ़ूगांन ले मारछा। फिर यीशु ले क्योछ, कतुक बार मैंले यो चाछ कि जसकै मुर्गी अपून प्वाथान अपून पंखान का तलि जामा करछी, उसीकैं मैंले तुमून जामा करूँ लेकिन तुम लोगून ले नै चाँयो।</verse>
				<verse number="38">देख तुमोरो मन्दिर तुमून खिन उजाड़ छोड़ दी जालो।</verse>
				<verse number="39">मैं तुमूनथैं कुछूँ अब भटे मैंस तुम तब तक नी देखा, जब तक तुम यो नी कौला, ‘धन्य छै उ, जो प्रभु अधिकार का दगाड़ उछो’ तब तक तुम मैंस कभे नै देखला।”</verse>
			</chapter>
			<chapter number="24">
				<verse number="1">जब यीशु मन्दिर भटे निकल भेरन जानमरेछ्या, तो उक शिष्य यीशुस मन्दिर की बनावट दिखून खिन उक पास आयान।</verse>
				<verse number="2">तब यीशु उनूनथैं क्योछ, “तुम जो यो सब कुछ देखून मरेछा! मैं तुमूनथैं सच्ची कुछूँ, यो सब ढ़ुगा का बनाईना का मकान एक दिन पुरी रीति ले नाश करि जाला।”</verse>
				<verse number="3">जब यीशु जैतून का पहाड़ में बैठिना को छ्यो, तब यीशुका शिष्यून ले यीशु का पास आभेरन क्योछ, “गुरू जी, हमून बतो यो सब बात कब होला? तेरा वापस उनाको और संसार को अन्त को कि चिन होलो?”</verse>
				<verse number="4">यीशु ले उनूनथैं क्योछ, “सतर्क रौ कि तुम कैका बहकाव में जन आया।</verse>
				<verse number="5">क्याखिनकि भौतसा झूठ्ठा लोग तुमार पास म्यारा नाम ले आला, और मसीह हुना को दावा करभेरन भौत लोग बहका द्याला।</verse>
				<verse number="6">और जब तुम लड़ै-झगड़ान की खबर सुणला, तब तुम डरिया जन, क्याखिनकि पैलि इसो हुन जरूरी छै, लेकिन उ बखत दुनिया का अन्त नी होलो।</verse>
				<verse number="7">एक जाति को लोग दुसारा जाति का लोगून में हमला कराला, और एक राज्य दुसारा राज्य में हमला करोलो, और सब जागान में अकाल पड़ोलो और भूचाल आलो।</verse>
				<verse number="8">लेकिन यो सब घटनान केवल मुसीबतून की शुरूवाद छै, जसीकैं एक गर्भवती स बच्चा पैद हुन है पैलि पीड़ हुछी।”</verse>
				<verse number="9">तब उन लोग तुमोरो बिरोध करभेरन तुमून पकड़वा द्याला, और मार डालला, क्याखिनकि तुम मैंमें विश्वास करछा, येक कारण सब जातिन का लोग तुमून देखभेरन घृणा कराला।</verse>
				<verse number="10">तब भौत लोग डरा कारण मैंमें विश्वास करून बन्द कर द्याला, और एक दुसरा स पकड़वाला, और एक दुसरा स देखिभेरन घृणा कराला।</verse>
				<verse number="11">और भौत परमेश्वरा का संदेश दिनवाला झूठ्ठा लोग आला, और भौत लोगून ध्वाका द्याला।</verse>
				<verse number="12">अधर्म और पाप का बढ़नाले भौत लोग एक दुसरा थैं प्रेम करून बन्द कर द्याला।</verse>
				<verse number="13">लेकिन जो अपून जीन्दगी में आखरी तलक मैंमें विश्वास राँखाला, उको उद्धार होलो।</verse>
				<verse number="14">और परमेश्वरो को राज्यो को यो सुसमाचार पुरा संसार में सुणायी जालो, ताकि सबै जातिन का लोगून ग्रहण करना को मौक मिल्लो, तब दुनिया को अन्त आ जालो।</verse>
				<verse number="15">फिर यीशु ले उनूनथैं क्योछ, जो पढ़ो, उ समझ ले। येक कारण जब तुम पवित्र जाग में आदिमीन का हात की बनाईना की घृणित मुरतिन देखला, जैकी चर्चा परमेश्वरो को संदेश दिनवाला दानिय्येल कि किताब में बताईना की छै;</verse>
				<verse number="16">तब जो यहूदिया प्रदेश में हो उन डाणान में भागी भेरन न्हैजून।</verse>
				<verse number="17">और उ जो दिन में पाख में होला उ अपून सामान लीन खिन तलि जन उतरौ।</verse>
				<verse number="18">और जो गाड़ान में होला उन अपून कपाड़ा लीन खिन वापस अपून घर खिन जन लौटिया।</verse>
				<verse number="19">फिर यीशु ले क्योछ, उन स्यैनिन खिन भयानक बखत होलो, जो गर्भवती और जो नान्तिन दूध पिलून वाली होलि, उ बखत उनून खिन भाजून भौत मुश्किल होलो।</verse>
				<verse number="20">परमेश्वर थैं प्रार्थना करा, कि तुमून जाड़ान में या सबता का दिन में भाजून नै पड़ो।</verse>
				<verse number="21">किलैंकी उ बखत इसो भारी क्लेश होलो, जसो संसारा का शुरू भटे ले अब तक नै भ्यो और नै कभै होलो।</verse>
				<verse number="22">अगर उन भयानक दिन कम नी करि जाना त कोई ले नी बचनो, लेकिन चुनिना लोगून का कारण उन दिन कम करि जाला।</verse>
				<verse number="23">उ बखत लोग अगर तुमूनथैं कौलो, देखा, मसीह याँ छै! या वाँ छै। त तुम बिल्कुल उनूनमें विश्वास जन कर्या।</verse>
				<verse number="24">क्याखिनकि झूठ्ठा मसीहा और परमेश्वरो को संदेश दिनवाला झूठ्ठा लोग आला, और उन चिन और चमत्कार दिखाला, और अगर है सको त परमेश्वरा का चुनिना का लोगून भरमा द्याला</verse>
				<verse number="25">फिर यीशु ले क्योछ, देखा, क्याखिनकि मैंले तुमून पैलि बता हालछ्य कि संसार का अन्त में की-की होलो।</verse>
				<verse number="26">अगर उन तुमूनथैं कुन, “कि मसीहा बिरान जागा में छै, त भ्यार जन निकल्या, देखा, उन कौला कि उ घर में छै, और उन केले कौला त उनोरो विश्वास जन कर्या।”</verse>
				<verse number="27">क्याखिनकि द्य घड़कून बखत जसीकैं बिजिली आकाश में पूरब भटे पश्चिम तक चमकछी, उसीकैं मैं आदिमी को च्योलो ले ऊँनो होलो।</verse>
				<verse number="28">जाँ काँई लाश होला वाँ गिद्ध जामा हुनान।</verse>
				<verse number="29">लेकिन उन दिनून का क्लेश खतम हुना का बाद, तुरन्त बाद सूरज की रोशनी खतम हो जालि, और चन्द्रमा को उज्यालो दीन बन्द कर द्योलो, और आकाश भटे तारा भिमें खिती जाला और आकाश की शक्ति हिलाई जाला।</verse>
				<verse number="30">तब आदिमी का च्याला का चिन आकाश में दिखाई द्योलो, और संसार का सब जातिन का लोग छाती पिटाल; और मैं आदिमी का च्याला स भौत सामर्थ और महिमा का दगाड़ आकाश भटे बादलून में उनो दिखाला।</verse>
				<verse number="31">और तब मैं आदिमी को च्योलो तुरी का तेज आवाज का दगाड़ अपून स्वर्गदूतून भेजोलो, और उन आकाशा का चारो दिशाउन में भटे परमेश्वरा का चुनिना का लोग जाम कराला।</verse>
				<verse number="32">फिर यीशु ले क्योछ, “कि तिमूला का रूख भटे यो बात सिखा, जब उक हांगा और पात निकलून लागनान, तब तुम जाण लीछा कि गर्मी को मौसम उनवालो छै।</verse>
				<verse number="33">इसीकैं जब तुम इन सब बातुन हुन देखला जैका बारिमें मैंले तुमून बता रैछ, तब तुम जाणि लिया कि मैं आदिमी को च्योलो भौत जल्दी उनवालो छै, बल्कि द्वार मेंई छूँ।</verse>
				<verse number="34">मैं तुमूनथैं सच्ची कुछूँ, कि यो पीढ़ी लोग तब तक नी मराला, जब तक यो सब बात पुरी नी हो जालि।</verse>
				<verse number="35">यो आकाश और धरती ले नाश हो जाला, लेकिन जो बात मैंले कै राख्यान, उ हमेशा तक रौला।</verse>
				<verse number="36">यीशु ले फिर क्योछ, कोई ले नै जाणनो उ दिन और उ बखता कब आलो, नै त स्वर्गदूत और नै त मैं आदिमी को च्योलो, यो केवल म्येरो स्वर्गीय पिता जाणछो।</verse>
				<verse number="37">जसो नूह दिनून में भ्योछ, ऊसोई मैं आदिमी का च्याला को ले उनो होलो।</verse>
				<verse number="38">क्याखिनकि जसीकैं जल प्रलय है पैलि का दिनून में, जब तक नूह जहाज में नै चढ़ियो, उ दिन तक लोग खान-पिन में और ब्या-बरयात करनै रियान।</verse>
				<verse number="39">और जब तक जल प्रलय आभेरन उनून बगा नै लिग्यो, तब तक उनून के पत्तो नै चल्यो; उसीकैं मैं आदिमी का च्याला को ले उनो होलो।</verse>
				<verse number="40">उ बखत द्वी जन गाड़ान में होला, एकेस स्वर्ग में उठा ली जालो और दुसोरो वाँई छोड़ी दी जालो।</verse>
				<verse number="41">और द्वी स्यैनिन चक्की पिसून में होलो, एकेस स्वर्ग में उठा ली जालि और दुसरा स वाँई छोड़ी दी जालि।</verse>
				<verse number="42">यीशु ले फिर अपून शिष्यून थैं क्योछ, किलैकी तुम नै जाणना कि तुमोरो प्रभु कै दिना आलो, येक कारण तुम जागनै रौ।</verse>
				<verse number="43">और तुम यो बात निकीकैं समझ ली, अगर घरो को मालिकस यो मालूम हुनो कि चोर चोरी करून खिन कै बखत आलो, त उ बिजो रूनो, और अपून घर में चोरी नी हुन दीनो।</verse>
				<verse number="44">येक कारण तुम तैय्यार रौ, क्याखिनकि उ बखता का बारिमें तुमूनले सोचीना को ले नै होलो, उई बखत आदिमी को च्योलो आ जालो।</verse>
				<verse number="45">एक विश्वासी और दिमाकदार दास उ हुछो, जैस घरो को मालिक दुसारा दासून की निगरानी करून खिन ठैरूछो। उ ऊस ठीक बखत में खानो दिन खिन कुंछो। फिर उ खुद लम्बा सफर में न्हैजाछो।</verse>
				<verse number="46">धन्य छै, उ दास जैस उको मालिक ऊसो काम करनै देखछो।</verse>
				<verse number="47">मैं तुमूनथैं सच्ची कुंछूँ, उ मालिक उ दास स अपून पुरी जैजाद को अधिकारी ठहरालो।</verse>
				<verse number="48">लेकिन अगर उ दुष्ट दास यो सोचून में रोलो कि म्यारा मालिका का उन में देर छै।</verse>
				<verse number="49">और उ दास अपून दगड़िया दासून मारून और पीटून लागौ, और पियक्कड़ून का दगाड़ पिन-खान करौ।</verse>
				<verse number="50">त उ दास को मालिक इसा दिन वापस आलो, जब उ उक बारिमें सोचिना को ले नै हो और इसा बखत जैस उ जाणनो ले नै हो।</verse>
				<verse number="51">तब उ मालिक आभेरन, उ दास स कड़ी सजा द्योलो। और ऊस पापिन का दगाड़ काल कोठरी में डाल द्योलो, जा रून और दाँत किट-किटून होलो।”</verse>
			</chapter>
			<chapter number="25">
				<verse number="1">“फिर यीशु ले अपून शिष्यून थैं क्योछ, जब मैं आदिमी को च्योलो वापस उलो, तब स्वर्ग को राज्य उन दस कुँवारी सामान होलो, जो अपून मशाल लीभेरन ब्योला का ब्या में खुशी मनून खिन ग्यान।</verse>
				<verse number="2">उनूनमें भेंट पाँच मूर्ख और पाँच समझदार छ्या।</verse>
				<verse number="3">मूर्ख कुँवारिले अपून दगाड़ मशाल त लियान, लेकिन उनूनमें डालून खिन जादा तेल नै लियो।</verse>
				<verse number="4">लेकिन समझदारून ले अपून मशालून का दगाड़ अपून कुप्पिन में तेल ले भर लीछ।</verse>
				<verse number="5">जब ब्योला का उन में देर भैछ, तब उनून नीन उन लागछी और उन सब पड़ ग्या।</verse>
				<verse number="6">लेकिन जब अधरात में हल्ला भ्योछ, देखा ब्योलो उन मर्योछ! उक दगाड़ भेंट करून खिन हिटा।”</verse>
				<verse number="7">तब उन सब कुँवारी उठाभेरन अपून मशालून ठीक करून लाग्यान।</verse>
				<verse number="8">और तब मूर्खूनले समझदारून थैं क्योछ, “अपून तेल में भटे थ्वाड़ा हमून ले दी, क्याखिनकि हमार मशाल बुझून मर्यान।”</verse>
				<verse number="9">लेकिन समझदारून ले उनूनथैं क्योछ, यो तेल में भटे हमार और तुमार मशालून खिन पुरो नी हो; ठीक त यो होलो कि तुम लोग बैचून वालान का पास जाभेरन मोल लिया।</verse>
				<verse number="10">और जब उन तेल मोल लीन खिन जा रेछ्या, त वाँ ब्योलो पुज जाछो, और जो तैय्यार छ्या, उन ब्योला का दगाड़ ब्याका घर में न्हैजानान और द्वार बन्द कर दी ग्यो।</verse>
				<verse number="11">येक बाद उन पाँच कुँवारीन ले वापस उनान, और रो भेरन ब्योला थैं कुन लाग्यान, “हे मालिक, हमून खिन ले द्वार खोल दे।”</verse>
				<verse number="12">तब भितर भटे ब्योला ले जबाब दीछ, मैं तुमूनथैं सच्ची कुछूँ, मैं तुमून नै जाणनू।</verse>
				<verse number="13">येक कारण चकूना रौ, क्याखिनकि तुम नै जाणना कि म्येरो वापस उनाको दिन और उ बखत कब आलो।</verse>
				<verse number="14">फिर यीशु ले एक उदारण दीभेरन क्योछ, जब मैं वापस उलो, त “स्वर्ग को राजा उ आदिमी का नियाति छै, जो प्रदेश खिन जान बखत अपून दासून बुलाभेरन अपूनी जैजाद में भटे उनून थ्वाड़ा दीछ और क्योछ जब मैं न्हैजूलो त तुम इन पैसान ले ब्यापार कर्या और पैसा कमाया।</verse>
				<verse number="15">एक सेवक स पाँच सुना का सिक्का, और दुसारा स द्वी, और तिसरा स एक, जैकी जदुक सामर्थ छी उक अनुसार उनून दीछ, और फिर उ प्रदेश खिन न्हैजाछो।</verse>
				<verse number="16">और जैस पाँच सिक्का मिलीना का छ्या, उले झट्ट जाभेरन उन सिक्कान ले ब्यापार करभेरन, और पाँच सिक्का कमायान।</verse>
				<verse number="17">और जैका का पास द्वी छ्या, उले ले उसीकैं द्वी सिक्का और कमायान।</verse>
				<verse number="18">लेकिन जैस एक सिक्का मिलीना को छ्यो, उले जाभेरन अपून मालिक का सिक्का स गड्डा खड़िभेरन उमें लुका दीछ।</verse>
				<verse number="19">और भौत दिनून का बाद उन दासून का मालिक आभेरन उनूनथैं हिसाब-किताब लीछो।</verse>
				<verse number="20">और जैस पाँच सिक्का दीईनाका छ्या, उले और पाँच सिक्का ल्याभेरन क्योछ, ‘हे मालिक, तैले मैंस पाँच सिक्का दी राँछ्या, और देख मैंले और पाँच सिक्का कमा राख्यान।’</verse>
				<verse number="21">तब मालिक ले उथैं क्योछ, ‘शाबाश, हे म्यारा भल और ईमानदार सेवक! तैं थ्वाड़ा में ईमानदार रैछै, मैं तैंस भौत चीजून में अधिकार द्यूलो। अब तैं म्यारा दगाड़ खुशी मनौ।’</verse>
				<verse number="22">येक बाद उ आछ, जैस द्वी सिक्का दीईनाका छ्या, और उले आभेरन क्योछ, ‘हे मालिक तैले मैंस द्वी सिक्का दीयान, और देख मैंले द्वी सिक्का और कमा राख्यान।’</verse>
				<verse number="23">तब मालिक ले उथैं ले क्योछ, ‘शाबाश, हे म्यारा भल और ईमानदार सेवक! तैं थ्वाड़ा में ईमानदार रैछै, मैं तैंस भौत चीजून में अधिकार द्यूलो। अब तैं म्यारा दगाड़ खुशी मनौ।’</verse>
				<verse number="24">आखरी में उ आछ, जैस एक सिक्का दिईनाको छ्यो, हे मालिक, मैं जाणछूँ कि तैं भौत कठोर आदिमी छै, तैं दुसरा लोगून का कामून भटे अपून फैद कमूना की उम्मीद करछै।</verse>
				<verse number="25">येक कारण मैं डर गयूँ कि अगर म्यारा कयाँ तेरो दीईनाका सिक्कास हरा जानो त तैं मैंस सजा दीनै, और जाभेरन मैंले त्यार दिईनाको सिक्कास माटा में लुका दीछ; देख योई सिक्का छै जो तैले दिईनाको छ्यो।</verse>
				<verse number="26">तब मालिक ले उथैं क्योछ, ‘हे दुष्ट और आलसी दास, जब तैं यो बात जाण छै कि मैं दुसरा लोगून का कामून भटे अपून फैद कमूना की उम्मीद करछूँ।’</verse>
				<verse number="27">त तैले इसो करून छ्यो कि म्येरो दिईनाको सिक्कास ब्याज में दी दीनै, तब मैं आभेरन अपूनी सिक्का ब्याज सहित ली लीनू।</verse>
				<verse number="28">तब मालिक दुसारा सेवक थैं कुंछो, तैथैं भटे तो सिक्का लीभेरन ऊस दी जैथैं दस सिक्का छन।</verse>
				<verse number="29">किलैकी जैका पास समझना की इच्छा छै, परमेश्वर ऊस और ले समझ दईजालो, पर जो यो समझना की इच्छा नै राँखनो, कि जो मैं सिखूछूँ, जो उले समझ छै, परमेश्वर उ समझ ले उथैं है ली ल्योलो।</verse>
				<verse number="30">तब उ मालिक ले क्योछ; यो निकम्मा और आलसी सेवक स भ्यार अन्यारा में डाल दी, जा रूनो और दाँत किट-किटून छै।</verse>
				<verse number="31">जब मैं आदिमी को च्योलो फिर आपस उलो, मैं अपूनी महिमा में उलो और सब स्वर्गदूत उक दगाड़ आला, तब मैं सब लोगून को न्याय करून खिन अपून महिमा का सिंहासन में बैठलो।</verse>
				<verse number="32">और संसार का सब जातिक लोग उक सामुनि जामा करि जाला; और जसीकैं ग्वाला भेड़ून बाकरान भटे अलग करछो; उसीकैं मैंले उन लोगून एक-दुसारा भटे अलग करोलो।</verse>
				<verse number="33">मैं भेड़ून, जो धर्मीन लोग छन दैन तरफ और बाकरान, जो अधर्मीन लोग छन बौं तरफ ठाँड़ा करूँलो।</verse>
				<verse number="34">तब प्रभु अपून दैन तरफ वालान थैं कलौ, ‘हे म्यारा स्वर्गीय पिता धन्य लोगो, आ, उ राज्य का अधिकारी होज्या, जो संसारा का पैलि भटे तुमून खिन तैय्यार करिना को छै।</verse>
				<verse number="35">क्याखिनकि जब मैं भुखो छूँ, तुमूले मैंस खानो खवाछ प्यासो छूँ तुमूले मैंस पानि पिलाछ, और मैं परदेशी छ्यूँ, तुमूले मैंस अपून घर में जाग दीछ।</verse>
				<verse number="36">जब मैं नागड़ो छ्यूँ, त तुमूले मैंस पैनून खिन कपाड़ा दीयान, जब मैं बिमार छ्यूँ, तुमूले मेरि देख-भाल करछ्य, और जेल में छ्यूँ, तुम मैंस मिलन खिन आछ।’</verse>
				<verse number="37">तब धर्मी जन उथैं कौला, ‘हे प्रभु हमूले कब तैंस भुखो देखछ्य और कब खानो खवाछ? तैंस प्यासो देखिभेरन पानि पिलाछ?</verse>
				<verse number="38">और कब हमूले तैंस परदेशी देखिभेरन अपून घर में जाग दीछ? या कब तैंस नागड़ो देखिभेरन कपाड़ा पैनायान?</verse>
				<verse number="39">या हम तैंस कब बिमार या जेल में तैंस मिलन खिन आया?’</verse>
				<verse number="40">तब प्रभु उनून जबाब द्योलो, ‘मैं तुमूनथैं सच्ची कुछूँ कि तुमूनले जो म्यारा इन नान है नान भाईन में भटे कोई एक्का ले दगाड़ करछ्य उ म्यारा दगाड़ करछ्य।’</verse>
				<verse number="41">और तब फिर उ बौं तरफ वालान थैं कलौ, हे पापी लोगो, म्यारा सामुनि भटे हमेशा की आग में न्हैजा, जो जाग शैतान और उक दुष्ट दूतून खिन तैय्यार कर रैछ।</verse>
				<verse number="42">क्याखिनकि मैं भुखो छ्यूँ, तुमूले मैंस खानो नै दीनो, और मैं प्यासो छयूं तुमूले मैंस पानि नै पिलायो।</verse>
				<verse number="43">और मैं परदेशी छ्यूँ, तुमूले मैंस अपून घर में जाग नै दीनो, मैं नागड़ो छ्यूँ, तुमूले मैंस पैनून खिन कपाड़ा नै दीया, मैं बिमार छ्यूँ, तुमूले मेरि देख-भाल नै कर्यो, और जेल में छ्यूँ, और तुम मैंस मिलन खिन नै आया।</verse>
				<verse number="44">जब उन जबाब द्याला ‘हे प्रभु, कब हमूले तैंस भुखो, या प्यासो, या परदेशी, या नागड़ो, या बिमार, या कैद में देखछ्य, और कब तेरि सेवा टहल नै कर्यो?’</verse>
				<verse number="45">तब मैं उनून जबाब द्योलो, ‘मैं तुमूनथैं सच्ची कुछूँ, कि तुमूले जो म्यारा इन नान है नान भाईन में भटे के एक्का दगाड़ ले नै कर्यो, उ तुमूले म्यारा दगाड़ ले नै कर्यो।’</verse>
				<verse number="46">और बौं तरफ वाला हमेशा खिन सजा भुकताला लेकिन धर्मी लोग हमेशा खिन अनन्त जीवन में प्रवेश कराला।”</verse>
			</chapter>
			<chapter number="26">
				<verse number="1">यीशु का इन सब बतून कईना का बाद अपून शिष्यून थैं क्योछ,</verse>
				<verse number="2">“तुम जाणछा कि द्वी दिन बाद फसह त्यार छै, मैं आदिमी का च्याला स सूली में चढ़ून खिन पकड़वाई जूलो।”</verse>
				<verse number="3">तब प्रधान याजक और प्रजा का यहूदी अगुवा कैफा नामाका महायाजक का महला का खाल में जाम भ्यान।</verse>
				<verse number="4">और आपस में बातचीत करून लाग्यान कि कसीकैं यीशुस छल ले गिरफ्तार करिभरेन ऊस मार डालि जौ।</verse>
				<verse number="5">लेकिन उन कुछया, “फसह का त्यारा का दिनून में इसो करून ठीक नाहातिन, काँई इसो नै हो कि लोग दंगा-फसाद करून लागून।”</verse>
				<verse number="6">उ बखत जब यीशु बैतनियाह गौं में अपून शिष्यून का दगाड़ शमौना का घर में छ्यो, जैस कोढ़ भटे यीशु ले चंगो कर राँछ्यो,</verse>
				<verse number="7">जब उन खानो खान मरेछ्या, तब एक स्यैनि संगमरमर की शीशी में जटामांसी को भौत मेहंगा इत्र लीभेरन वाँ आछ; और इत्र स यीशु का ख्वारा में डाल दीछ।</verse>
				<verse number="8">यो देखभेरन यीशु का शिष्य गुस्सा हो भेरन कुन लाग्यान, “यो इत्र स किलैं बर्बाद करछ्य?</verse>
				<verse number="9">किलैंकी यो इत्र स त बड़िया दाम में बेच भेरन गरीबून में बाड़ी जा सकछ्यो।”</verse>
				<verse number="10">यो जाणिभेरन यीशु ले उनूनथैं क्योछ; “यो स्यैनि स किलैं सतुछा? येले त म्यार दगाड़ भलाई करछै।</verse>
				<verse number="11">यीशु ले क्योछ, गरीब त तुमार दगाड़ हमेशा रलौ, लेकिन मैं तुमार दगाड़ हमेशा नी रूँलो।</verse>
				<verse number="12">उले तैं म्यारा आंग में जो यो इत्र डालछय; उ म्यारा अन्तिम संसकार खिन करछ्य।</verse>
				<verse number="13">मैं तुमूनथैं सच्ची कुंछूँ, सारा दुनिया में जाँ ले सुसमाचार सुणाई जालो, वाँ येका काम की चर्चा ले उक याद में करि जालि।”</verse>
				<verse number="14">तब यहूदा इस्करियोती ले, जो बारह शिष्यून में भटे एक छ्यो, उले प्रधान याजक का पास जाभेरन क्योछ,</verse>
				<verse number="15">“अगर में यीशुस तुमार हात पकड़ावा द्यू त तुम मैंस कि द्याला?” उनूनले ऊस तीस चाँदी का सिक्का तोलि भेरन दी दीयान।</verse>
				<verse number="16">और उ उई बखत भटे यीशुस पकड़ूना का फिराक में रूछो।</verse>
				<verse number="17">त्याराक पैल दिन शिष्य यीशुका पास आभेरन पुछून लागनान, “तैं कि चाछ कि तैखिन फसह को खानो काँ तैय्यार करनू?”</verse>
				<verse number="18">यीशु ले उनूनथैं क्योछ, “नगर में अमुक याँ जाभेरन उथैं कया कि ‘गुरू कुछूँ कि म्येरो बखत नजिक छै। मैं अपून शिष्यून का दगाड़ त्यारा या फसह त्यार मनूलो।’”</verse>
				<verse number="19">तब शिष्यून ले यीशुका क्यूँ मानभेरन फसह को खानो की तैयारी करछ्य।</verse>
				<verse number="20">जब ब्याल भैछ यीशु बारा शिष्यून का दगाड़ खान खिन बैठछ्य।</verse>
				<verse number="21">जब उन खान मेरछ्या तब यीशले क्योछ, “मैं तुमूनथैं सच्ची कुछूँ, कि तुमून में भटे एक जन मैंस पकड़वालो।”</verse>
				<verse number="22">यो बात स सुणिभेरन उन सब उदास है ग्या, और सब यीशुथै पुछून लागयान कि “गुरू जी, क्या उमें छूँ?”</verse>
				<verse number="23">तब यीशु ले उनून जबाब दीछ, जेले म्यारा दगाड़ थाली में हात डाल रैछ उई मैंस पकड़वालो।</verse>
				<verse number="24">म्यारा बारिमें पवित्रशास्त्र में जसो लिखीना को छै उ तैं पुरो होलो, लेकिन धिक्कार छै उमें जैका कारण मसीहा पकड़वाई जालो, उ खिन त योई ठीक छ्यो कि उको जन्म नी हुनो।</verse>
				<verse number="25">तब उक पकड़ून वाला यहूदा ले क्योछ, “गुरू जी, क्या उ मैं छूँ?” यीशु ले उथैं क्योछ, “तै खुदै के चुक गैछै।”</verse>
				<verse number="26">जब उन खानो खान मेरछ्या यीशु ले एक रोटो पकड़छ्य और प्रार्थना करभेरन रोटो तोड़िछ्य, और शिष्यून दीभेरन क्योछ, येस खा यो म्येरो आंग छै।</verse>
				<verse number="27">फिर यीशु ले कटोर लीभेरन धन्यवाद करछ्य, और शिष्यून दीभेरन क्योछ, “तुम सब येस पी,</verse>
				<verse number="28">क्याखिनकि यो म्येरो नय्या वाचा को खून छै जो भौतून का पापून की माफी खिन बगाई जाछो।</verse>
				<verse number="29">मैं तुमूनथैं सच्ची कुछूँ कि अंगूरो को रस तक नी पियू जब तक तुमार दगाड़ अपून स्वर्गी पिता का राज्य में नय्या अंगूरो को रस नै पिलियू।</verse>
				<verse number="30">फिर उन भजन गा भेरन जैतून नामका डाणा में न्हैजानान।</verse>
				<verse number="31">तब यीशु ले उनूनथैं क्योछ, तुम आज रात अपून विश्वास में भटक जाला; क्याखिनकि पवित्र-शास्त्र में लिखीना को छै कि, ‘मैं ग्वाला स मारलो और झुण्डा का भेड़ तितर-बितर होज्ला।’</verse>
				<verse number="32">लेकिन में अपून ज्यून हुना का बाद तुमून है पैलि गलील प्रदेश खिन जूलो।”</verse>
				<verse number="33">तब पतरसले यीशुथै क्योछ, “अगर सब जन त्यारा विश्वास में भटक जाला तैं भटक ज्यून लेकिन मैं कभै नी भटकू।”</verse>
				<verse number="34">यीशु ले उथैं क्योछ, “मैं तैथैं सच्ची कुछूँ, कि आजै कि रात मुर्गा का रात्तै बाँक दिन है पैलि, तैं मैंस पछ्याणून है तीन बार इनकार करले।”</verse>
				<verse number="35">यो सुणिभेरन पतरसले क्योछ, अगर मैंस त्यारा दगाड़ मरून ले पड़लो त मैं पछिल नी हठू और इसो सब शिष्यून ले लै क्योछ।</verse>
				<verse number="36">तब यीशु अपून शिष्यून का दगाड़ गतसमनी नामाक जाँग में आयान, और फिर यीशु ले अपून शिष्यून थैं क्योछ, “तुम सब याँई रौ, तब तक मैं वाँ जाभेरन परमेश्वर थैं प्रार्थना करछूँ।”</verse>
				<verse number="37">यीशु अपून दगाड़ पतरस और जब्दी का च्यालान लिग्यो, और उ उदास और बैचेन हुन लागछ्य।</verse>
				<verse number="38">तब यीशु ले उनूनथैं क्योछ, “म्येरो मन भौत उदास छै, या तक कि म्येरो प्राण निकलून वालो जसो हो र्योछ। तुम याँई रूका और म्यारा दगाड़ जागनै रौ।”</verse>
				<verse number="39">फिर यीशु थ्वाड़ा अघिल जाभेरन भिमें खोरो करभेरन प्रार्थना करछो, “हे म्यारा स्वर्गीय पिता, अगर हो सको त यो तखलीफ म्यार अघिल है दूर कर दे, लेकिन फिरले जसो तैं चाछ ऊसोई हो।”</verse>
				<verse number="40">फिर यीशु ले अपून शिष्यून पड़ीनाको देखभेरन पतरस थैं क्योछ, “क्या तुम म्यारा दगाड़ एक घड़ी ले जागिना नै रे सक्या?</verse>
				<verse number="41">जागिना का रौ और प्रार्थना करनै रौ कि तुम परीक्षान में नै पड़ा, आत्मा तैय्यार छै, लेकिन शरीर कमजोर छै।”</verse>
				<verse number="42">फिर यीशु ले दुसरी बार जाभेरन यो प्रार्थना करछय, “हे म्यार पिता, अगर यो दुखो को बखत म्यारा सहे बिना नै हट सकनो त तेरि इच्छा; पुरी हो।”</verse>
				<verse number="43">फिर आजि यीशु ले उनून आभेरन पड़ीनाको पाछ; किलैकी उनार आँख नीनले भरिना का छ्या।</verse>
				<verse number="44">फिर आजि यीशु तिसरा बार जाभेरन उई प्रार्थना करछो।</verse>
				<verse number="45">फिर यीशु ले शिष्यून का पास आभेरन उनूनथैं क्योछ; “अब पड़ीना का रौ, और आराम करा, देखलि उ बखत आग्योछ; कि मैं आदिमी को च्योलो पापिन का हात पकड़ाई जाछो।</verse>
				<verse number="46">अब उठा और देखलि म्यरो पकड़ून वालो नजिक आग्योछ।”</verse>
				<verse number="47">जब यीशु यो कुनै मरेछ्यो, उ बखत यहूदा इस्करियोती वाँ आछ जो बार च्यालान में भटे एक छ्यो; और उ अपून दगाड़ प्रधान याजकून यहूदी अगुवान का तरफ भटे लोगून की एक ठूली भीड़ तालवार और डंडा लीभेरन आग्या।</verse>
				<verse number="48">यीशु स पकड़ून वाला यहूदा ले प्रधान याजक थैं क्योछ, “जैस में गल लगूँलो तुम समझ लिया उई यीशु होलो ऊस पकड़ लिया।”</verse>
				<verse number="49">और यहूदा इस्करियोती तुरन्त यीशु का पास आभेरन कुंछो, “गुरू जी नमस्कार।” और यीशुस चुमून लागछै।</verse>
				<verse number="50">यीशु ले उथैं क्योछ; “हे मित्र, तैं जो काम खिन आ रैछ; उ करलै।” तब उन लोगून ले नजिक आभेरन यीशु कसभेरन पकड़ लीछ।</verse>
				<verse number="51">तब यीशु का च्यालान में भटे एकले अपूनी तलवार ले एक महायाजक का दास को कान काटि दीछ।</verse>
				<verse number="52">तब यीशु ले उनूनथैं क्योछ; अपूनी तलवार अपून म्यान में राखलै किलैकी जो तलवार चलुनान उन लोग तलवार ले नाश होला।</verse>
				<verse number="53">क्या तुम नै जाणनाई कि मैं अपून पिता थैं विनती कर सकछू? और उ मैं खिन बार सेना का दल भटे ले ज्यादा स्वर्गदूत भेज सकछो?</verse>
				<verse number="54">अगर मैं इसो करछूँ त, पवित्रशास्त्र में लिखीना की बात कसीकैं पुरी होलि जेको हुनो जरूरी छै?</verse>
				<verse number="55">उ बखत यीशु ले उ भीड़ थैं क्योछ, “क्या तुम लोग मैंस डाकू समझछाई, जो तुम तलवार और डन्डा लीभेरन मैंस पकड़ू खिन आ रैछा, मैं त रोज मन्दिर में उपदेश दी छूँ तब तुमूले मैंस नै पकड़ीयो।”</verse>
				<verse number="56">यो सब येक कारण हुन मर्योछ कि पवित्रशास्त्र में जो लिखीना को छै; उ पुरो है जौ। तब सब शिष्य यीशुस छोड़िभेरन भाजि जानान</verse>
				<verse number="57">तब यीशुस पकड़ून वाला; ऊस कैफा नामक महायाजक का पास ली ग्यान, जाँ मूसा का नियमून सिखून वाला और यहूदी अगुवान जाम छ्या।</verse>
				<verse number="58">तब पतरस दूर भटे यीशुका पछिल-पछिल ग्योछ; और उ काईफा महायाजक का घरा का खाल में जाछो, और भितर सेवकून का दगाड़ बैठछो; और देखछो कि उन यीशुका दगाड़ कि करून मर्यान।</verse>
				<verse number="59">प्रधान याजकून की महासभा में यीशुस मारनका मक्शद ले झूठ्ठी गवाही का खोज में छ्या,</verse>
				<verse number="60">लेकिन भौत झूठ्ठा गवाही दीना का बाद लै उमें दोष नै पायो। तब आखरी में द्वी जन आयान।</verse>
				<verse number="61">और कुंनान, येले क्योछ, “मैं परमेश्वरा का मन्दिर स हूधारि भेरन तीन दिन में बना सकछूँ।”</verse>
				<verse number="62">तब महायाजक ले महासभा का सामुनि ठाँड़ा हो भेरन यीशु थैं क्योछ, “इन लोग त्यारा बारिमें कि गवाही दिनमर्यान? त क्या कोई जबाब नै दिनैई?”</verse>
				<verse number="63">लेकिन यीशु चुप रियोछ। तब महायाजक ले उथैं क्योछ, “मैं तैंस जीवित परमेश्वर की कसम दी छूँ अगर तैं परमेश्वरो को च्योलो मसीहा छै त हमून बता दे।”</verse>
				<verse number="64">तब यीशु ले जबाब दीछ, “तैले अफी कुछै, बल्कि मैं तैथैं कुछूँ, अब भटे तुम मैंस आदिमी को च्याला स भौत सामर्थ का दगाड़ सर्वशक्तिमान परमेश्वरा का दैन तरफ बैठिना, और आकाश भटे बादलून में ऊँन देखला।”</verse>
				<verse number="65">यो बात सुणिभेरन महायाजक ले अपून कपाड़ा फाड़भेरन क्योछ, “येले परमेश्वरो को अपमान करछ्य, अब हमून गवाही कि के जरूरत नाहतिन? देखा, तुमूनले सुणछ्य कि यो परमेश्वरो को अपमान करछो।</verse>
				<verse number="66">त तुम लोगून को कि विचार छै?” तब और लोगून ले जबाब दीछ, “यो त मौत की सजाक लायक छै”</verse>
				<verse number="67">तब उन लोगून ले यीशु का मुँख में थूकछ्य और घूँसा मारियान। और कुछ लोगून ले थप्पड़ मारभेरन यीशु थैं क्योछ,</verse>
				<verse number="68">“अगर तैं मसीहा छै त हमून बतौ कि तैंस केले मारछ्य?”</verse>
				<verse number="69">जब पतरस भ्यार खाला में बैठिना को छ्यो तब एक स्यैनि ले उक पास आभेरन क्योछ, “तैले त यीशु गलीली का दगाड़ को छै।”</verse>
				<verse number="70">तब सबून का सामुनि यो कैभेरन मना करछ्य, “मैं नै जाणनू कि तैं कि कुछी।”</verse>
				<verse number="71">येक बाद पतरस उले है न्हैजाछो, लेकिन एक दुसरी स्यैनि ऊस देखिभेरन, जो वाँ बैठिना का छ्या उनूनथैं क्योछ, “यो ले त यीशु नासरी को दगाड़ को छ्यो।”</verse>
				<verse number="72">तब पतरसले कसम खाभेरन क्योछ, “मैं यीशुस नै जाणनू।”</verse>
				<verse number="73">थ्वाड़ा देर बाद जो लोग वाँ ठाड़ छ्या, पतरस का पास आभेन क्योछ, “सच्ची में तैंले उनूनमें भटे एक छै क्याखिनकि तेरि बातुन ले पत्तो चलून मरियोछ की तैले गलीली छै।”</verse>
				<verse number="74">तब पतरस फिर कसम खाभेरन कुंछो “मैं ऊस नै जाणनू।” और उई बखत मुर्गा ले बाँक दीछ।</verse>
				<verse number="75">तब पतरस स यीशु की कईनाकि बात याद आछ “कि मुर्ग बाँक दिन है पैलि तैं तीन बार म्येरो इनकार करले।” और तब पतरस भ्यार जाभेरन जोर-जोरले रून मसछ्य।</verse>
			</chapter>
			<chapter number="27">
				<verse number="1">और भौत रात्तैनि जब सब प्रधान याजकून ले और यहूदी अगुवा लोगून ले यीशुस मार डालना कि योजना बनाछ।</verse>
				<verse number="2">उनूनले यीशु स बाँदीभेरन उ बखत का रोमी राज्यपाल पिलातुस का हात सौंप दीछ।</verse>
				<verse number="3">जब यीशुका पकड़ून वाला यहूदा इस्करियोती स यो पत्तो चलछै कि यीशु दोषी ठैहर ग्योछ तो उ भौत पछताछ, और उ चाँदी का तीस सिक्कान लीभेरन, प्रधान याजकून और यहूदी अगुवान वापस लौटा दीछ।</verse>
				<verse number="4">और क्योछ, “मैंले निर्दोष आदिमी स घात करून खिन पकड़वा भेरन पाप करछ्य।” तब प्रधान याजकून ले क्योछ, “हमून यो बारिमें कोई परवाह नाहातिन? तैं खुदै येको जिम्मेदार छै।”</verse>
				<verse number="5">तब उ उन सिक्का मन्दिर में खितभेरन वाँ भटे न्हैजाछो, और भ्यार जाभेरन अपनास फाँसी लगा लीछ।</verse>
				<verse number="6">और प्रधान याजकून ले उन सिक्का लीभेरन क्योछ, “हमार कानून का हिसाब ले नै लेकिन मूसा का नियम का अनुसार इन पैंसान मन्दिर का खजाना में राखून ठीक नाहतिन, क्याखिनकि यो एक आदिमी स मरून खिन दिईनाको दाम।”</verse>
				<verse number="7">तब उनूनले आपस में बात-चीत करभेरन उन सिक्कान ले परदेशीन का दफनून खिन एक गड़ो मोल ली लीछ।</verse>
				<verse number="8">येक कारण उ गड़ो आज ले खूनो को गड़ो कहलाई जाछो।</verse>
				<verse number="9">जो बात परमेश्वरो को संदेश दिनवाला यिर्मयाह का द्वारा कईना की छी; उ बात पुरी भैछ, “उनूनले उ तीस सिक्का मतलब उ कीमत जो इस्राएल देशा का लोगून ले उ खिन दिन खिन राजी छ्या, ली लीछ,</verse>
				<verse number="10">और जसो मैंस प्रभु ले हुकुम दिईनाको छ्यो, उनूनले यो सिक्का कुम्हार की जमीन खरीदन खिन दे दीयान।”</verse>
				<verse number="11">जब यीशु राज्यपाल पिलातुस क सामुनि ठाँड़ा छया, त राज्यपाल पिलातुस ले यीशु थैं पुछ्छै, “क्या तैं यहूदीन को राजा छै?” यीशु ले उथैं क्योछ, “त खुद कुन मरेछै।”</verse>
				<verse number="12">जब प्रधान याजक और यहूदी अगुवा यीशु में भौत ज्यादा झूठ्ठा दोष लगून लाग्यान, त यीशु ले के जवाब नै दीनो।</verse>
				<verse number="13">तब राज्यपाल पिलातुस ले यीशु थैं पुछ्छै; “क्या तैंस सुणाई नै दीन मर्यो, कि इन लोग त्यारा विरोध में कतुक गवै दिनमर्यान?”</verse>
				<verse number="14">लेकिन यीशु ले ऊस एक ले बात को जवाब नै दीनो, त यो बात ले राज्यपाल पिलातुस स भौत ताजुब भ्योछ।</verse>
				<verse number="15">राज्यपाल पिलातुस की यो रीति छी; कि उ त्यारा का बखत एक कैदी स जैस उन चाँछै; ऊस छोड़ दी छ्यो।</verse>
				<verse number="16">उ बखत बरअब्बा नामोको एक जाना-माना आदिमी स जेल में बन्द छ्यो।</verse>
				<verse number="17">राज्यपाल पिलातुस ले जामा होईना की भीड़ थैं क्योछ; “तुम कि चाँछा, मैं तुमून खिन कैस छोड़ द्यू? बरअब्बा स या यीशुस जो मसीह कहलूछो?”</verse>
				<verse number="18">किलैकी राज्यपाल पिलातुस जाण छ्यो कि इनुनले यीशुस जलना का कारण पकड़वा रैछ।</verse>
				<verse number="19">जब राज्यपाल पिलातुस न्याय का गद्दी में बैठिना को छ्यो, उक स्यैनिले उ खिन जवाब भेजवाछ; “तैं उ धर्मीका मामला में अपूनो हात जन हालै, किलैकी मैंले आज स्यून में उक कारण भौत दुख उठाछ।”</verse>
				<verse number="20">तब प्रधान याजक और यहूदी अगुवान ले और लोगून भड़काछ; कि बरअब्बा स छोड़न खिन कौ और यीशु खिन मौत माँग।</verse>
				<verse number="21">राज्यपाल पिलातुस ले फिर लोगूनथैं पुछ्छै, “कि तुम कि चाँछा; इन द्वीन में भटे तुमून खिन कैस छोड़ू?” लोगून ले क्योछ, “बरअब्बा स।”</verse>
				<verse number="22">राज्यपाल पिलातुस ले उनूनथैं पुछ्छै, “त यीशु जो मसीह कहलूछो; उक दगाड़ कि करू?” सबून ले क्योछ; “येस सूली में चढ़ा दे।”</verse>
				<verse number="23">फिर राज्यपाल पिलातुस ले पुछ्छै, “क्याखिन, येले कि बुराई कर रैछ?” लेकिन लोग और ले ज्यादा जोर-जोरले कुन लाग्यान, “तैंस सूली में चढ़ाई जौ।”</verse>
				<verse number="24">जब पिलातुस ले देखछ्य कि यीशुस बचुन में असफल छै; बल्कि लोगून को उपद्रव बढ़नै जानमरेछ्यो, त उले एक भांण में पानि मंगाभेरन भीड़ का सामुनि अपूनो हात धोभेरन क्योछ; “मैं यो धर्मीका खून भटे निर्दोष छूँ अब तुमी जाणा।”</verse>
				<verse number="25">तब सब लोगून ले जवाब दीछ; “तैको खून इल्जांम हमून में और हमार संतान में हो।”</verse>
				<verse number="26">यो बात सुणिभेरन राज्यपाल पिलातुस ले उनून खिन बरअब्बा स छोड़ दीछ, और यीशु स कोड़ा लगवा भेरन सूली में चढ़ून खिन उनार हात सौंप दीछ।</verse>
				<verse number="27">तब राज्यपाल पिलातुस का सिपाईन ले यीशु स राजभवन का भितर ली ग्यान, और उनूनले अपून सब सिपाईन यीशु का सामुनि जाम करछ्य,</verse>
				<verse number="28">और यीशु का कपाड़ान खोलभेरन यीशुस बैजनी रंगा का राजा का कपाड़ा पैनायान,</verse>
				<verse number="29">और काँणान को मुकुट बनाभेरन उक ख्वारा में लगाछ और उक दैन हात में सरकंडा थमा दीछ; और उक अघिल घुणा टेकी भेरन उकी मजाक उड़ून लागनान और कुंनान, “हे यहूदीन का राजा, तैंस नमस्कार।”</verse>
				<verse number="30">और यीशुक मुँख में थुकनान और उई सरकंडा लीभेरन उक ख्वारा में हाड़नान।</verse>
				<verse number="31">उन यीशु की मजाक करनाका बाद, तब यीशु को बैजनी कपाड़ा उताभेरन, यीशु का कपाड़ा पैनायान, और सूली में चढ़ून खिन ली ग्यान।</verse>
				<verse number="32">जब यीशु स सूली में चढ़ून खिन शैहर भटे भ्यार ली जानमरेछ्या, उई बखत शमौन नामोको एक कुरेनी गौं को आदिमी मिलछ्य। सिपाईन के उ जबरदस्ती पकड़ भेरन क्योछ, यीशु की सूली लीभेरन चल।</verse>
				<verse number="33">जब उन सब गुलगुता नामाका जाग में पुज्यान, जै जागा स खोपड़ी जाग ले कुंनान।</verse>
				<verse number="34">और उनूनले यीशु स सूली में चढ़ून है पैलि दर्द कम हुन खिन ऊस पित्त मिलीना को अंगूर को रस पिन खिन दीछ; लेकिन यीशु ले चाख त लीछ, लेकिन ऊस पियो नै।</verse>
				<verse number="35">येका बाद उनूनले उक हात-खुटान में कील ठोकभेरन सूली में चढ़ा दीछ; और उक कपाड़ान आपस में बाणून खिन उनूनले परची डालियान,</verse>
				<verse number="36">और वाँ बैठि भेरन यीशु की चौकीदारी करून लाग्यान।</verse>
				<verse number="37">और सिपाईन ले लाकड़ा को की पट्टी में दोषपत्र लिखभेरन उक ख्वारा का मलि में सूली में लागा दीछ, “कि यो यहूदीन को राजा यीशु छै।”</verse>
				<verse number="38">तब यीशुका दगाड़ द्वी डाकून ले अलग-अलग सूली चढ़ायान, एक स दैन और दुसरा स बौं तरफ।</verse>
				<verse number="39">और उन जानवाला लोग अपूनी खोरो हिला-हिलाभेरन उको अपमान करून मरेछ्या।</verse>
				<verse number="40">और कुछ्या “वा रे मन्दिर स उधारून वाला और तीन दिन में बनून वाला, अपून आपस बचो। अगर तैं परमेश्वरो को च्योलो छै; त सूली में भटे उतरि अ।”</verse>
				<verse number="41">और यो तरीका ले प्रधान याजक और मूसा का नियमून सिखून वाला और यहूदी अगुवान का दगाड़ यीशु की मजाक बनाभेरन कुन छ्या,</verse>
				<verse number="42">“येले दुसरा लोगून त बचाछ, लेकिन अपूनास नै बचा सकनोई। ‘यो त इस्राएल देशो को राजा छै।’ अब सूली में भटे उतर अ त फिर हम विश्वास करला।</verse>
				<verse number="43">और कुंनान तैले परमेश्वर में भरोस राँखछ्य, अगर परमेश्वर यो है खुश छै, त येस बचाले, किलैकी तैं कुछै, कि मैं परमेश्वरो को च्योलो छूँ।”</verse>
				<verse number="44">और इसीकैं जो द्वी डाकू यीशु का दगाड़ सूली में लटकाईना का छ्या, उन ले उको अपमान करून लाग्यान।</verse>
				<verse number="45">छकाला का बारा बजे भटे तीन बजे तक उ पूरा देश में अन्यारो रियोछ।</verse>
				<verse number="46">तिसरा पहरा का बखत यीशु ले जोरले धध्याभेरन क्योछ, “एली, एली, लमा शबक्तनी?” जैको मतलब छै, “हे परमेश्वर, हे परमेश्वर, तैले मैंस किलैं छोड़ी दीछ?”</verse>
				<verse number="47">जो वाँ ठाड़ छ्या, यो सुणिभेरन कुन लाग्यान, “यो त एलिय्याह बुलून मरियोछ।”</verse>
				<verse number="48">तब उन सिपाईन में भटे एक तुरन्त दौड़भेरन ग्योछ, स्पंज लीभेरन सिरका में डुबाछ, और लम्बा डन्डा ले यीशु स चुसू खिन दीछ।</verse>
				<verse number="49">फिर कुछ लोग कुन लाग्यान, “थ्वाड़ा देर इन्तजार करभेरन देख लीनू एलिय्याह येस बचुन खिन उछोई कि नै।”</verse>
				<verse number="50">तब यीशु ले जोरले चिल्ला भेरन अपून प्राण छोड़ दीयान।</verse>
				<verse number="51">और तब उई बखत मन्दिर को मोटो परदा जो सबून है पवित्र जाग में जान भटे रोक छ्यो, मलि भटे लीभेरन तलि तक फाटि भेरन द्वी टुकड़ा है ग्यो, और धरती हिलगै और चट्‍टान टुट ग्या,</verse>
				<verse number="52">और कबर खुलि ग्या, और मरिनका पवित्र लोगून ज्यून है ग्या,</verse>
				<verse number="53">और यीशु का ज्यून होईना का बाद उन मरिना का आदिमी कबर में भटे निकल भेरन पवित्र नगर में ग्यान, और भौतून दिखाई दीयान।</verse>
				<verse number="54">तब सुबेदार और उन लोग जो यीशुक पहरा दीन मरेछ्या, भूचाल और जो कुछ हो र्योछ उ देखिभेरन भौत डर ग्या, और कुन लाग्यान, “सच्ची में यो परमेश्वरो को च्योलो छ्यो।”</verse>
				<verse number="55">और वाँ भौत स्यैनिन छ्या जो गलील प्रदेश भटे यीशु की सेवा करून खिन उक दगाड़ आईना की छी, और उन दूर ठाड़ हो भेरन देखन मरेछ्या।</verse>
				<verse number="56">उनूनमें भटे मरियम मगदलीनी, और याकूब और योसेस कि ईजा मरियम, और जब्दी कि च्यालान की ईजा छी।</verse>
				<verse number="57">जब ब्याल भेछ त यूसुफ नामोको अरिमतिया शैहरो को एक धनी आदिमी आछ, जो खुद यीशु को शिष्य छ्यो।</verse>
				<verse number="58">उले पिलातुस का पास जाभेरन यीशु की लाश स माँगछ्य। और पिलातुस ले लाश स दिना को हुकुम दीछ।</verse>
				<verse number="59">तब यूसुफ ले यीशु की लाश स लीभेरन सफेद चादर में लपेटछ्य,</verse>
				<verse number="60">और यीशु की लाश स नय्या कबर में राखछ्य, जो चट्‍टान में खुदवाईना की छी, और कबर का मुँख स एक ठूल्ला ढूंगा ले ढकी दीछ।</verse>
				<verse number="61">और मरियम मगदलीनी और दुसरी मरियम वाँई कबर का पास बैठिना का छया।</verse>
				<verse number="62">दुसोरो दिन जो सबत को दिन छ्यो, तब प्रधान याजक और फरीसी लोग पिलातुसा का पास जाभेरन कुंनान,</verse>
				<verse number="63">“हे महाराजा, हमून याद छै कि उ झूठ्ठा आदिमी यीशु ले जब उ ज्यून छ्यो, तब उले कै राखछ्यो, कि ‘म्यारा मरना का तीन दिन बाद मैं ज्यून है जूलो।’</verse>
				<verse number="64">येक कारण सिपाईन हुकुम दे कि उन तीन दिन तक लगातार ध्यान ले कबर की रखवाली करून, अगर तैं इसो नी करले, त काँई इसो नै हो कि उक शिष्य आभेरन की लाश चोरी लिजुन, और लोगूनथैं कुन लगाला, ‘उ मरिन में भटे ज्यून है ग्योछ।’ अगर अब इसी बात है जालि त यो पैलि भटे लै खतरनाक होलो।”</verse>
				<verse number="65">पिलातुस ले उनूनथैं क्योछ, “तुमार पास पहरेदार त छन, जा, अपूनी समझ अनुसार कबर की रखवाली करा।”</verse>
				<verse number="66">तब उन पैहरेदार अपून दगाड़ ली ग्यान और ढूंगा मलि में मोहर लगाभेरन कबर कि रखवाली करनान।</verse>
			</chapter>
			<chapter number="28">
				<verse number="1">सबता का दिना का बाद हफ्ताका पैल दिन रातिब्यान मरियम जो मगदला गौं छी और दुसरी मरियम कबर स देखन खिन आयान।</verse>
				<verse number="2">और देखा, एक बड़ो भूचाल भ्योछ, किलैकी प्रभु को एक स्वर्गदूत स्वर्ग भटे उतर छै और कबर का पास आभेरन उले कबर का मुँख स ढूंगास हटा दीछ, और उक मलि में बैठग्यो।</verse>
				<verse number="3">उको रूप बिजली नियाति चमकून मरेछ्यो और उक कपाड़ा बरफ का नियाति सफेद छ्या।</verse>
				<verse number="4">और उ स्वर्गदूत का डर का कारण उन पेहरा दिनवाला डर ग्या और मरिनाका जस हो ग्या।</verse>
				<verse number="5">स्वर्गदूत ले उन स्यैनि थैं क्योछ, “जन डरा, मैं जाणछु कि तुम यीशुस जैस सूली में चढ़ाईना को छ्यो, ऊस खोजून मरछा।</verse>
				<verse number="6">उ या नाहातिन, लेकिन उक कईना का अनुसार उ ज्यून है ग्योछ। आ, उ जाग स देखा जा प्रभु स राखिना को छ्यो,</verse>
				<verse number="7">और जल्दी जाभेरन उक शिष्यून बता, कि उ मुर्दान भटे ज्यून है ग्योछ, और उ तुमून है पैलि गलील प्रदेश खिन जाछो, और तुम वाँ उक दर्शन पाला! देखा मैले तुमूनथैं कै हैलछ्य।”</verse>
				<verse number="8">तब उन स्यैनिमैंसी डर और भौत खुशी है भेरन जल्दी यीशुका शिष्यून बतून खिन दौड़भेरन जानान।</verse>
				<verse number="9">तब यीशु उनून मिलछो और कुंनान, “सलाम।” उनूनले यीशुका पास आभेरन ऊस ढोक दीछ।</verse>
				<verse number="10">तब यीशु ले उनूनथैं क्योछ, “जन डरा; म्यारा शिष्यून थैं जाभेरन को गलील प्रदेश खिन हिटा, वाँई मैंस देखला।”</verse>
				<verse number="11">जब उन स्यैनिन यीशु का शिष्यून यो समाचार दीन खिन जानमरेछ्या, कि सिपाई जो कबर की रखवाली करून मरेछ्या उनूनमें भटे कुछ लोगून ले नगर में आभेरन प्रधान याजकून सब हाल बताछ।</verse>
				<verse number="12">तब प्रधान याजक यहूदी अगुवान का पास ग्यान, और उनूनले आपस में योजना बनाछ। उनूनले सिपाईन भौत चाँदी दीभेरन क्योछ,</verse>
				<verse number="13">“तुम सब लोगूनथै इसो कया, जब हम रात में पैड़ रै छ्या, उक शिष्य आभेरन उक लाश स चोरी ली ग्यान।</verse>
				<verse number="14">और अगर यो बात राज्यपाल पिलातुसा का कानून तक पुजी ले जालि, त हम ऊस समझा द्यूला और तुमून के बात की फिकर करना की जरूरत नाहातिन हम तुमून बचा ल्यूला।”</verse>
				<verse number="15">तब सिपाईन ले रूपाया लीभेरन ऊसो क्योछ जसो उनून सिखाईना को छ्यो। यो बात आज तक यहूदीन में प्रचलित छै।</verse>
				<verse number="16">तब यीशु का इग्यार शिष्य गलील प्रदेश में उ डाणा में ग्यान जा यीशु ले उनून बताईना को छ्यो।</verse>
				<verse number="17">तब शिष्यून ले यीशु स देखभेरन ढोक दीछ, और कैसे-कैसे सकले भ्योछ की उ ज्यून हो ग्योछी कै</verse>
				<verse number="18">लेकिन यीशु ले उनार पास आभेरन क्योछ, “स्वर्ग और धरती को पुरो अधिकार मैंस दी ग्योछ।</verse>
				<verse number="19">येक कारण तुम जा, सब जातिन का लोगून शिष्य बना; और उनून पिता, और पुत्र, और पवित्र आत्मा का नाम ले बपतिस्मा दीया,</verse>
				<verse number="20">और उनून सब बात जो मैंल तुमून सिखा राख्यान उनूनले मानून सिखा, और देखा मैं संसार का अन्त तक हमेशा तुमार दगाड़ छूँ।”</verse>
			</chapter>
		</book>
		<book number="41">
			<chapter number="1">
				<verse number="1">परमेश्वरो को च्योलो यीशु मसीह का बारिमें सुसमाचारे की शुरूवात, इसकै भैछ।</verse>
				<verse number="2">जस यशायाह परमेश्वरो को संदेश दिनवालान की किताब में लिखीना छै, की परमेश्वर ले अपून च्योलो मसीह थैं क्योछ, “देख, मैं अपूनो दूतस त्यारा अघिल भेजछूँ, जो तैखिन बाटो सुधारोलो।</verse>
				<verse number="3">उ बिरान जागा में रौलो और लोगून धध्या-धध्याभेरन यो बतालो, ‘कि प्रभु परमेश्वरा का ऊँन खिन तुम तैयार हो ज्या, और उ बाँटान तैयार करा जैमें भटे हो भेरन उ उनवालो छै।’”</verse>
				<verse number="4">यो दूत यहूना परमेश्वरो को संदेश दीन वाला छ्यो, उले बिरान जागा यरदन नदी का किनार में अपूनो काम शुरू करछै। जो लोग उक पास आयान उले उनूनथैं क्योछ, “अपून पापून खिन पश्चताप करा और बपतिस्मा ली तब परमेश्वर तुमार पापून माफ कराला।”</verse>
				<verse number="5">यहूदिया प्रदेश और यरूशलम शैहरा का रूनवाला भौत लोग बिरान जागा में यहूना को प्रचार सुणन खिन आयान, और उक बाद उन लोगून ले यो मानभेरन कि हम पापी छा, यहूना का हात ले यरदन नदी में बपतिस्मा लीछ।</verse>
				<verse number="6">यहूना ऊँट का बालून का बनाईना का साधारण कपाड़ा पैन छ्यो और उ अपून कमर में चमड़ाक पट्टा बादछ्यो, मौ और पिटींग खाँछ्यो।</verse>
				<verse number="7">और जब यहूना प्रचार करछ्यो, उले लोगून थैं क्योछ, “म्यारा बाद जो उनवालो छै, उ मैं है महान छै, और उ म्यारा बाद जल्दी उनवालो छै और मैं इसो लाकारी को ले नाहातिनू कि उको सेवक बनभेरन झुकभेरन उको जूताक फित्तो खोलि सकू।</verse>
				<verse number="8">मैले त तुमून पानि को बपतिस्मा दीछ, लेकिन उ तुमून पवित्र आत्माले बपतिस्मा द्यालो।”</verse>
				<verse number="9">उ बखत जब यहूना बपतिस्मा दीन मरेछ्यो, यीशु नासरत गौं भटे गलील प्रदेश में आछ, और यहूना थैं यरदन नदी में बपतिस्मा लीछ।</verse>
				<verse number="10">और जब यीशु पानि भटे भ्यार निकल्यान, उ बखत उ खिन आकाश खुलि ग्यो और यहूना ले यीशु का मलि में पवित्र आत्मा स कबूतर का समान उतरून देखछ्य।</verse>
				<verse number="11">और स्वर्ग भटे परमेश्वर की आवाज सुणाई दीछ, “तैं म्येरो लाड़िल च्योलो छै, तैं है मैं भौतै खुशी छूँ।”</verse>
				<verse number="12">यीशु मसीह का बपतिस्मा लीना का बाद पवित्र आत्मा ले ऊस बिरान जागा का तरफ तुरन्त भेज दीछ।</verse>
				<verse number="13">उ बिरान जागा में चालीस दिन और रात र्योछ, और शैतान का द्वारा उकी परीक्षा भैछ, और वाँ जानवर छ्या पर यीशु की देख-भाल स्वर्गदूत द्वारा हुन मरेछी।</verse>
				<verse number="14">थ्वाड़ा बखत का बाद जब राजा हेरोदेस ले यहूना स जेल खान में डलवा दीछ, तब यीशु गलील प्रदेश में ग्यान और लोगून का बीच में परमेश्वरो को राज्य को सुसमाचार प्रचार करछ्य।</verse>
				<verse number="15">उले लोगूनथैं क्योछ, “उ बखत आ चूकि ग्योछ, परमेश्वर हरेक लोगून में राज्य करोलो, येक कारण अपून पापून खिन पश्चताप करा और सुसमाचार में विश्वास करा।”</verse>
				<verse number="16">एक दिन जब यीशु गलील प्रदेशा का झील का किनार-किनार भटे जानमरेछ्या, तब उनूनले शमौन और उक नान भाई अन्द्रियास झील में जाल ले माछा पकड़ून देखछ्य, किलैकी उन मछुवारा छ्या।</verse>
				<verse number="17">यीशु ले उनून बुलाभेरन क्योछ, “तुम म्यार दगाड़ आ, जसकैं तुम माछान पकड़ छा; उसीकैं मैं तुमून लोगून अपूनो शिष्य बनूनो सिखूलो।”</verse>
				<verse number="18">तब उनूले तुरन्त अपूनो माछा पकड़ना को काम बन्द कर दीछ, और उक शिष्य बन ग्या।</verse>
				<verse number="19">उक बाद थ्वाड़ा और अघिल जाभेरन, फिर यीशु ले देखछ्य, जब्दी का च्याला याकूब और उक भाई यहूना स नाव में अपूनी जालून माँछा पकड़न खिन सुधारून मरेछ्या।</verse>
				<verse number="20">यीशु ले उनून बुलाभेरन क्योछ, “म्यारा दगाड़ आ और म्यारा शिष्य बना।” उन अपून बबा जब्दी स मजदूरून का दगाड़ नाव में छोड़िभेरन उक शिष्य बन ग्या।</verse>
				<verse number="21">तब यीशु और उक शिष्य कफरनहूम गौं में पुजियान, और जब सबतो को दिन आछ, त यीशु यहूदी सभाघर में जाभेरन उपदेश दीन लागछ।</verse>
				<verse number="22">लोग यीशुक उपदेश सुणिभेरन हैरान रैग्या, क्याखिनकि उ मूसा का नियम सिखून वाला नियाती नै, बल्कि उ उनून एक इसा गुरू की नियाती सिखूछ्यो, जैका पास सच्चो अधिकार छ्यो।</verse>
				<verse number="23">जब यीशु यहूदी सभाघर में उपदेश दीन मरेछ्यो, तभै वाँ एक आदिमी छ्यो, जैस भूत ले अपून बश में कर राँछ्यो।</verse>
				<verse number="24">उले जोर-जोरले चिल्ला भेरन क्योछ, “हे यीशु नासरी, तैं हमून किलै परेशान करून मरेछै? क्या तैं हमून नाश करून खिन आ रैछै? मैं तैंस जाणछूँ कि तैं को छै? तैं परमेश्वरो को पवित्र च्योलो छै।”</verse>
				<verse number="25">यीशु ले उ भूत स डांटिभेरन क्योछ, “चुप रौ; और यो आदिमी में भटे भ्यार निकल जा।”</verse>
				<verse number="26">तब भूत उ आदिमी स जोरले मरोड़भेरन, चिल्लाट करभेरन, उमें भटे भ्यार न्हैग्यो।</verse>
				<verse number="27">यो देखिभेरन यहूदी सभाघरा का सबै लोग भौतै हैरान हो भेरन, एक-दुसारा थैं पुछून लाग्यान, “यो कसो उपदेश छै? यो तैं कोई नय्या उपदेश छै, उ सच्चा अधिकारा का दगाड़ भूतून ले हुकुम दीछो, और भूत उको हुकुम स मान्नान।”</verse>
				<verse number="28">और उको नाम उई बखत गलील प्रदेशा का आश-पासा का इलाकान में फैल ग्यो।</verse>
				<verse number="29">जब यीशु और उक शिष्य यहूदी सभाघर है निकल्यान, तब उन याकूब और यहूना का दगाड़ शमौन और अन्द्रियास का घर में ग्यान।</verse>
				<verse number="30">उ बखत शमौन की सासू स भौत बुखार आ रियोछ, और उ बिछान में पड़ीना की छी, और तब शिष्यून ले यीशु स उक बारिमें बताछ।</verse>
				<verse number="31">तब यीशु ले उक बिछान का पास जाभेरन उको हात पकड़ भेरन उठाछ; और उ बखत उको बुखार ठीक है ग्यो, और उ उनेरि आदर-खातर करून लागछ्य।</verse>
				<verse number="32">उई ब्याल सबता का दिन खतम हुना का बाद लोग भौत बिमारून, और भूत लागिना का लोगून यीशु का पास ल्यान।</verse>
				<verse number="33">और शैहरा का भौत सारा लोग घरा का भ्यार द्वार का पास जामा है ग्या।</verse>
				<verse number="34">और यीशु ले भौत लोगून जो कई प्रकारा का बिमारीन ले दुखी छ्या, उनून चंगो करछ्य, भौत लोगून में है भूतून ले निकालछ्य, और यीशु ले भूतून बोलून नी दीछ्या क्याखिनकि भूत यीशु स पछ्याण छ्या कि उ परमेश्वरो को च्योलो छै।</verse>
				<verse number="35">यीशु रात खुलून है पैलि जब अन्यारो छ्यो उठियान, और घर भटे भ्यार बिरान जागा में जाभेरन प्रार्थना करून लाग्यान।</verse>
				<verse number="36">थ्वाड़ा बखत का बाद शमौन और उक दगड़ियान ले देखछ्य कि यीशु घर में नाहातिन, तब उन ऊस खोजून खिन ग्यान।</verse>
				<verse number="37">जब यीशु मिल ग्या तो उनूनले उथैं क्योछ, “भौत सारा लोग तैंस खोजून मर्यान।”</verse>
				<verse number="38">तब यीशु ले उनूनथैं क्योछ, “हिटा; हमून आश-पासा का गौंन में ले जान चैछो, क्याखिनकि मैं संसार में येक कारण आरयूँ, ताकि मैं उन लोगून ले खुशखबरी सुणा सकू।”</verse>
				<verse number="39">कि यीशु गलील प्रदेशा का सब गौंन में ग्यान, और उले यहूदी सभाघर में जाभेरन सुसमाचार सुणाछ, और भौत लोगून में है भूतून ले निकालछ्य।</verse>
				<verse number="40">एक दिन एक कोढ़ी आदिमी ले यीशु का पास आभेरन, उथैं विनती करभेरन उक खुटान में पड़ी भेरन कुन लागछ्य, “प्रभु, अगर तैं चाँछै मैंस चंगो कर सकछै।”</verse>
				<verse number="41">यीशु ले दया करभेरन अपूनो हात उमें राँखछ्य, और क्योछ, “होई, मैं चाँछू, तैं चंगो है जा।”</verse>
				<verse number="42">और उई बखत उक कोढ़ ठीक हो ग्या, और उ बिलकुल चंगो है ग्यो।</verse>
				<verse number="43">तब यीशु ले उ आदिमी स कड़ी चेतावनी दीभेरन विदा करछ्य।</verse>
				<verse number="44">यीशु ले उथैं क्योछ, “सुण, कैंथैं के जन कये, कि मैंले तैंस चंगो करछ्य, पर जाभेरन अपूनास याजक स दिखाये, और कोढ़ भटे ठीक हुना का बारिमें, जेले मूसा ले ठैरा राखछ्य, उ भेंट चढ़ाये, ताकि लोग जाण सकून की तैं चंगो है गैछै।”</verse>
				<verse number="45">पर उ भ्यार, जाभेरन यो बात स भौत सारा लोगून यो बतून लागछ्य कि यीशु ले मैंस चंगो करछ्य, यो कारण ले यीशु फिर सरे आम गौंन में नै जा सक्या, पर भ्यार बिरान जागा में रून लाग्यान; फिरले चारू तरफ भटे लोग उक पास ऊँन लाग्यान।</verse>
			</chapter>
			<chapter number="2">
				<verse number="1">येक थ्वाड़ा दिनक बाद यीशु कफरनहूम गौं में लौट आयान, और वाँ का लोगून यो मालूम भ्योछ कि उ घर में वापस आग्यो छै।</verse>
				<verse number="2">तब उ घर में इदुक लोग जामा है ग्या, कि देलिका सामुनि ले ठाड़ हुना की जगा नै मिली, और यीशु लोगून परमेश्वरो को बचन सुणून मरेछ्या।</verse>
				<verse number="3">और उ बखत कुछ लोग एक लकवा पड़ीना का आदिमी स चार लोगून थैं उठाभेरन यीशु का सामुनि ल्यान।</verse>
				<verse number="4">लेकिन वाँ भीड़ इदुक ज्यादा हुना कारण ले उन ऊस यीशु सामुनि नै ल्या सक्या, त उनूले उ पाँखाका कुछ हिस्सा जैका तलि उ छ्यो, उक पाथर निकाल दीयान; और उई बाँट भटे उ लकवा का रोगी स बिछान समीत यीशुक सामुनि उतारी दीछ।</verse>
				<verse number="5">यीशु ले उनोरो विश्वास देखछ्य, तो उले लकवा पड़ीना का रोगी थैं क्योछ, “हे पुत्र, मैं त्यार पापून माफ करछूँ।”</verse>
				<verse number="6">तब कुछ मूसा का नियम सिखून वाला घर में बैठि रेछ्या, तो जो कुछ यीशु ले क्योछ, उक बारिमें अपून-अपून मन में सोचून लाग्यान,</verse>
				<verse number="7">“यो आदिमी इसो कसीकैं कुछ? यो त परमेश्वर की बुराई करून मेरियोछ! परमेश्वरा का अलावा दुसोरो कोई ले पाप माफ नै करि सकनो।”</verse>
				<verse number="8">यीशु ले उई बखत अपून आत्मा में जाणि लीछ, कि उन अपून-अपून मन में कि सोचन मर्यान, उले उनूनथैं क्योछ, “तुम, इसो किलैं सोचन मरेयोछा?</verse>
				<verse number="9">क्या लकवा पड़ीना का आदिमी थैं इसो कुनो आसान छै? कि त्यार पाप माफ है ग्यान, या इसो कुन आसान छी, उठ, और अपूनो बिछान उठाभेरन चल फिर?</verse>
				<verse number="10">मैं चाछूँ कि तुम जाणि ली मैं आदिमी का च्याला स धरती में पाप माफ करना को ले अधिकार छै।” यीशु ले उ लकवा का रोगी थैं क्योछ,</verse>
				<verse number="11">“मैं तैथैं कुछूँ उठ, अपूनो बिछान उठाभेरन अपून घर खिन जा।”</verse>
				<verse number="12">तुरन्त लकवा को रोगी अपूनो बिछान स उठाभेरन, उ घर खिन न्हैग्यो। और यो देखिभेरन सब लोग हैरान रैग्या, और उनूनले परमेश्वर की बड़ाई करछ्य, और क्योछ, “कि आज तलक हमूले इसो कभै नै देख्यो।”</verse>
				<verse number="13">फिर यीशु गलील प्रदेशा का झील का किनार में ग्यान, और भौत सारा लोग उक पास आयान, और उन उनून उपदेश दीन लागछ्य।</verse>
				<verse number="14">हिटून-हिटून यीशु ले लेवी स जो हलफई का च्याला स चुंगी का चौकी में बैठिना को देखछ्य, यीशु ले ऊस बुलाभेरन क्योछ, “म्यार दगाड़ अ और म्येरो शिष्य बन जा।” और उ लेवी ले अपूनो काम छोड़ी दीछ, और यीशु को शिष्य बन ग्यो।</verse>
				<verse number="15">येक बाद यीशु अपून शिष्यून का दगाड़ लेवी का घर में रातो को खानो खान मरेछ्या, और उक दगाड़ त भौत सारा चुंगी लिनवाला और पापी लोग ले छ्या, क्याखिनकि उन यीशु का दगाड़ आ रै छ्या।</verse>
				<verse number="16">जब मूसा का नियम सिखून वाला और फरीसी लोग, ले छ्या यो देखिभेरन कि यीशु चुंगी लिनवाला और जो पापी समझी जाछ्या, उनार दगाड़ खानो खानमरियोछ, तब उनूनले यीशु का शिष्यून थैं पुछ्छै, “तुमोरो गुरू पापिन का दगाड़ खानों-पिनो किलैं खाछो?”</verse>
				<verse number="17">यो सुणिभेरन, यीशु ले उनूनथैं क्योछ, “जसिकै भल-चंगान लोगून डाक्‍टर की के जरूरत नाहातिन, लेकिन जो बिमार छन उनुस डाक्‍टर कि जरूरत छै। जिनून लोगून धर्मी समझनान, उनून नै बल्कि जिनून लोग पापी समझनान उन लोगून बुलून खिन आरयूँ।”</verse>
				<verse number="18">यहूना का शिष्य और फरीसी लोग बर्त राखछ्या और उक द्वारान के नी खाछ्या; एक दिन कुछ लोग यीशु का पास आयान और पुछनान, “यहूना का शिष्यून और फरीसी का शिष्य त बर्त राखछ्या, लेकिन त्यारा शिष्य बर्त किलैं नै राखना?”</verse>
				<verse number="19">यीशु ले उनूनथैं क्योछ, “जब तलक मैं अपून शिष्यून का दगाड़ छूँ, उन बर्त कसीकैं कर सकनान? उन नै कर सकना, क्याखिनकि उन खुशी मनून मर्यान; ठीक उसीकैं जसकैं एक ब्योला का मित्र उक दगाड़ उको ब्याकी दावत मनूनान।</verse>
				<verse number="20">लेकिन इसो बखत आला जब कि ब्योलो अपून मित्रून भटे अलग करि जालो, तब उक मित्र उ बखत बर्त राखाँला।”</verse>
				<verse number="21">यीशु ले एक कहानी सुणाछ, “लोग नय्या कपाड़ा में पुरान कपाड़ा को टॉल नै लगूना, क्याखिनकि नय्या कपाड़ा धुना का बाद छ्वोटो हो जाछो, जैल पुरानो कपाड़ा और ज्यादा फाटि जालो।</verse>
				<verse number="22">इसीकैं यीशु ले एक और उदारण दीभेरन उनुस समझूंनान, लोग नय्या अंगूर को रस पुरानो चमड़ा का थैल में नै राखनो, क्याखिनकि जब उ अंगूर को रस बढ़लो, तब चमड़ा को थैलास फाड़ी द्यलो, और अंगूर को रस और चमड़ा को थैलो द्वीवै बरबाद है जाला। येक कारण हम नय्या अंगूर को रस नय्या चमड़ा को थैल में राँखनू।”</verse>
				<verse number="23">जब यीशु और उनार शिष्य सबत का दिन ग्यूका गाँड़ान भटे हो भेरन जानमरेछ्या, और उक शिष्यून ले हिटन-हिटनै ग्यूका बालान तोड़भेरन खान लाग्यान।</verse>
				<verse number="24">तब फरीसी लोगून ले यीशुथै क्योछ, “देखा तुमार शिष्य इसो काम किलैं करनान, जो सबता का दिन काम करून मूसा का नियम का अनुसार ठीक नाहातिन?”</verse>
				<verse number="25">यीशु ले उनूथैं क्योछ, “क्या तुमूनले कभै पवित्रशास्त्र में यो नै पढ़ियो कि भौत बखत पैलि हमार पुरखा राजा दाऊद ले की करछ्य, जब अबियातार महायाजक छ्यो। तब राजा दाऊद और उक दगड़िया भुखा छ्या, तब उ मिलाप वाला तम्बू में ग्यो और उ रोटान खाछ जो परमेश्वर स भेंट चढ़ाईना का छ्या, और अपून दगड़ियान ले दीछ। मूसा का नियम का अनुसार केवल याजक स उ रोटो खाना को अधिकार छ्यो।”</verse>
				<verse number="26"></verse>
				<verse number="27">तब यीशु ले उनूनथैं क्योछ, “परमेश्वर ले लोगून की भलाई खिन सबत को दिन बना राखछ्य, उले सबत लोगून का मलि में बोझ डालन खिन नै बनायो।</verse>
				<verse number="28">मैं आदिमी को च्योलो, सबतो को ले प्रभु छूँ।”</verse>
			</chapter>
			<chapter number="3">
				<verse number="1">दुबारा है जब यीशु यहूदी सभाघर में ग्यान, वाँ एक आदिमी छ्यो, जैक एक हात सुखी ग्यो छ्यो,</verse>
				<verse number="2">कुछ फरीसी लोग यीशु में दोष लगूना को मौका खोजून मरेछ्या, येक कारण उन यीशुस ध्यान ले देखून मरेछ्या, सबता का दिन उ आदिमी स ठीक करछो या नै।</verse>
				<verse number="3">यीशु ले जैका हात सुखीना को छ्यो उथैं क्योछ, “सब लोगून का बीच में ठाँड़ है जा।”</verse>
				<verse number="4">फिर यीशु ले लोगून थैं पुछ्छै, “क्या परमेश्वर ले हमून हुकुम दी रैछी, सबत में भलाई का काम करून ठीक छी या बुरो करून? क्या परमेश्वर ले हमून हुकुम दी रैछी, कैसे बचुन या मारून?” लेकिन उन सब चुप रयान।</verse>
				<verse number="5">यीशु ले उनार तरफ गुस्सा ले देखछ्य, उ उनेरि मने की कठोरता देखभेरन भौत दुखी भ्योछ, फिर यीशु ले उ आदिमी थैं क्योछ, “अपून हात सिददो कर।” तब उको हात बिल्कुल ठीक है ग्यो।</verse>
				<verse number="6">तब थ्वाड़ा फरीसी लोग यहूदी सभाघर है भ्यार आभेरन, और यहूदी लोग जो हेरोदेस राजा के समर्थक छ्या, और उनार दगाड़ मिलभेरन योजना बुन मरेछ्या, कि “यीशु की हत्या कसकैं करूनू?”</verse>
				<verse number="7">येक बाद यीशु और उनार शिष्य गलील प्रदेशा का झील तरफ ग्यान; और लोगून की भौत ज्यादा भीड़ उक पछिल होगै।</verse>
				<verse number="8">उन लोग यरूशलम शैहर, और यहूदिया प्रदेश, इदूनिया प्रदेश, और इलाका भटे जो यरदन नदी का पूरब में छै वाँ भटे, और सोर सिदोन शैहरा का आश-पास भटे आईना का छ्या। यो सब लोग यीशु का पास येक कारण ले आरेछ्या, क्याखिनकि उनूनले उन सब चमत्कारा का कामून का बारिमें सुणि को छ्यो; जो यीशु करून मरेछ्यो।</verse>
				<verse number="9">यीशु ले अपून शिष्यून थैं क्योछ, “म्यारा बैठन खिन एक नानि नाव ल्या, ताकि लोग म्यारा पास भीड़ नै लगा सकून।”</verse>
				<verse number="10">क्याखिनकि उ दिन यीशु ले भौत बिमारून ठीक करछ्य, येक कारण बिमार लोग यीशु का पास भीड़ लगून मरेछ्या, ऊस छुना की कोशिश करून मरेछ्या।</verse>
				<verse number="11">जब ले भूत लागिना का लोग ऊस देखछ्या, उन उक सामुनि ऊस आदर दीन खिन गिर पड़छ्या और उन जोर-जोरले कुन लाग्यान, “तैं परमेश्वरो को च्योला छै।”</verse>
				<verse number="12">तब यीशु ले भूतून कड़ी चेतावनी दीभेरन हुकुम दीछ, “कैसे जन बताया कि मैं परमेश्वरो को च्योलो छूँ।”</verse>
				<verse number="13">येक बाद यीशु पासा का एक डाण में ग्यान, और उले उन लोगून अपून पास बुलाछ, जिनून उले अपूनो शिष्य बनून खिन चुनिना को छ्यो, और उन भीड़ में है उक पास आयान।</verse>
				<verse number="14">और उले उनूनमें भटे बारा लोगून चुनछ्य, जो कि उक प्रेरित हुन खिन बुलाई ग्यान, यीशु ले इसो येक कारण करछ्य ताकि उन दगाड़-दगाड़ रून, और उनून प्रचार करून खिन भेजू।</verse>
				<verse number="15">और उनूनले उनुस भूतून ले निकालना को अधिकार ले दीछ।</verse>
				<verse number="16">यो उन बारा शिष्य छन, जिनून यीशु ले चुनछ्य, पैलो शमौन जैक दुसोरो नाम यीशु ले पतरस राँखछ्य,</verse>
				<verse number="17">और जब्दी को च्योलो याकूब और याकूब को नानो भाई यहूना, जैस यीशु ले बुअनरगिस कुछ्या, उको नामोको मतलब गर्जन नियाती आदिमी छयो,</verse>
				<verse number="18">और अन्द्रियास, फिलिप्पुस, बरतोलोमी, लेवी चुंगी लिनवाला जैक दुसोरो नाम मत्ती छ्यो, थोमा, हलफई का च्योलो याकूब, तद्दै, देशभक्त शमौन कनानी।</verse>
				<verse number="19">और यहूदा इस्करियोती जेले यीशु स दुश्मनून का हात बाद में धोखा ले पकड़ावा ले दीछ।</verse>
				<verse number="20">येक बाद यीशु एक घर में आयान, और उक चारों तरफ भौतै भीड़ जॉम है ग्यै, जेले उनुस खाना को मौक ले नै मिली सक्यो।</verse>
				<verse number="21">यो सब बात सुणिभेरन यीशु का रिश्तेदार यो कुन लाग्यान, “कि उ पगली ग्योछ,” तो उन ऊस घर लिजाना की कोशिश करून मस्यान।</verse>
				<verse number="22">मूसा का नियमून सिखून वाला जो यरूशलम शैहर भटे आईनाक छ्या, यो कुछ्या, “उमें शैतान छै,” यो ले, “उ भूतून का सरदार शैतान का मद्दत ले भूतून निकालछ्यो।”</verse>
				<verse number="23">और उ उनून अपून पास बुलाभेरन उनुस कहानी सुणाभेरन कुन लागछै, “क्या शैतान अपून भूतून लोगून भटे भ्यार निकलन खिन कसकैं मजबूर कर सकछो?</verse>
				<verse number="24">अगर एक देशा का लोग आपस मेंई लड़नै रूनान, तो उन ज्यादा बखत तक कसीकैं टीक सकनान?</verse>
				<verse number="25">अगर केका घर में फुट पड़ जौ, त उ घरा का लोग कसीकैं मिलभेरन रै सकनान</verse>
				<verse number="26">त अगर शैतान अपूनई भूतून का बिरोध में लड़ो, तो उ अपूनोई बिनाश करछो।</verse>
				<verse number="27">कोई ले आदिमी कैका आदिमी का घर स लुटि नै सकूनो, जो कि शैतान नियाती ताकतवर हो, जो कोई उ है ज्यादा ताकतवर हो उई ऊस हरा और बाँद सकछो, और उक घर स लुट सकछो।</verse>
				<verse number="28">यीशु ले फिर क्योछ, मैं तुमूनथैं सच्ची-सच्ची कुछूँ, कि आदिमी का द्वारा सब पाप और परमेश्वर की बुराई जो उन करनान, माफ करून लायक छै,</verse>
				<verse number="29">लेकिन जो कोई पवित्र आत्मा स बुरो बोलोलो, परमेश्वर उ कभै ले माफ नी कर, परमेश्वर यो पाप खिन उ आदिमी स हमेशा खिन दोषी मानोलो।”</verse>
				<verse number="30">यीशु ले यो येक कारण क्योछ, क्याखिनकि उन यो कुछ्या कि “यीशु में भूत की आत्मा छै।”</verse>
				<verse number="31">फिर यीशु की ईजा और उक भाई आयान, और भ्यार ठाँड़ा हो भेरन ऊस बुलून खिन कैसे भेजछ्य।</verse>
				<verse number="32">जो भीड़ यीशु का आश-पास बैठिना की छी, उनूनमें भटे कुछ लोगून ले उथैं क्योछ, “देख, तेरि ईजा और त्यारा भाई तैंस बुलून मर्यान।”</verse>
				<verse number="33">यीशु ले उनून जबाब दीछ, “मेरि ईजा और म्यारा भाई को छन?”</verse>
				<verse number="34">फिर यीशु ले अपून चारों तरफ बैठिना का लोगून का तरफ चाँभेरन क्योछ, “देखा यो छन मेरि ईजा और म्यारा भाई।</verse>
				<verse number="35">जो लोग परमेश्वर की इच्छा में चलाला, उन म्यार भाई, मेरि बैनि और मेरि ईजा छन।”</verse>
			</chapter>
			<chapter number="4">
				<verse number="1">येक बाद यीशु गलील प्रदेशा का झील का किनार में उपदेश दीनान, और उनार दगाड़ भौत ज्यादा भीड़ जाम है गै कि उनुस उपदेश दीन खिन एक नाव में बैठून पड़छो, और सारी भीड़ झील का किनार भिमें ठाँड़ा रैछ।</verse>
				<verse number="2">यीशु उनून कहानी द्वारा भौत बातुन सिखून लागछै, और अपून उपदेश में उनूनथैं क्योछ,</verse>
				<verse number="3">“सुणो, एक किसान बी बुन खिन ग्योछ।</verse>
				<verse number="4">जब उ बी बुनमरेछ्यो, त थ्वाड़ा बी बाँट का किनार में पड़छो, और चिड़िया ले आभेरन उनुस खा लीछ।</verse>
				<verse number="5">और थ्वाड़ा बी पथरीली भूमि में पड़छो, और उन माँटाक कमीक कारण जल्दी जाम ग्या।</verse>
				<verse number="6">और जब तेज घाम लागछ्य, तो उन सुखी ग्या, किलैकी उनार जाड़ गैल माँट में नी छ्या।</verse>
				<verse number="7">थ्वाड़ा बी झाड़िन का बीच पड़ीयान, और झाड़िन ले ठूलो हो भेरन उनुस दबै दीछ, येक कारण उन फल-फूल नै सक्या।</verse>
				<verse number="8">लेकिन थ्वाड़ा बी निको भूमि में पड़छ; और यो बी जामियान और भौत सारा फल ल्यान; कोई तीस गुना, कोई साठ गुना और कोई सौ गुना फल ल्याछ।”</verse>
				<verse number="9">तब यीशु ले क्योछ, “जो कोई यो बात स सुण सकछो जो मैं कुन मरेयू, उन यो समझना की कोशिश करून।”</verse>
				<verse number="10">तब येक बाद बारा शिष्यून ले, और उक मान्या वाला ले यीशु स एकान्त में देखछ्य, तो उनूनले उथैं इन कहानी को मतलब का बारिमें पुछैछ्य।</verse>
				<verse number="11">तब यीशु ले उनूनथैं क्योछ, “तुमून परमेश्वरा का राज्य को गुप्त भेद की समझ दी रैछ, लेकिन उनून जो मैंमें विश्वास नै करना उनून खिन सब बात कहानीन का द्वारा हुछी।”</verse>
				<verse number="12">जसो कि पवित्रशास्त्र में लिखीना को छै, “कि उन देखनान त सही पर उन पछ्याण नै पान, उन सुणनान, त सही पर समझ नै सकना; इसो हुनो त उन पापो को पछ्ताव करून, और उन माफ करि जान।”</verse>
				<verse number="13">फिर यीशु ले उनूनथैं क्योछ, “अगर तुम यो कहानी नै समझना, त बाकि उन सब उदारणुन कसीकैं समझला जो मैं तुमून बतून वालो छूँ?</verse>
				<verse number="14">यो उदारण को अर्थ यो छै, बी बुनवालो किसान उक नियाती छै, जो परमेश्वरो को बचन बतूछो।</verse>
				<verse number="15">जो बी बाँट का किनार में पड़ीना का छन, यो उन लोगून का नियाती छन, जब उनूनले परमेश्वरो को बचन सुणछ्य, पर जो बचन उनूनले सुणछ्य, शैतान तुरन्त आभेरन उनार मनून में भटे बचन स उठा ली जाछो।</verse>
				<verse number="16">उसीकैं जो बी पथरीली भूमि में पड़ीयान, यो उन लोग नियाती छन जो बचन सुणिभेरन खुशी-खुशी मान्नान।</verse>
				<verse number="17">लेकिन उन परमेश्वरा का बचन अपून मन में गहराई नै बढून दीना, और उन थ्वाड़ा बखत तलक विश्वास करनान, जब बचन का कारण ले उनूनमें दुख और कलेश उछो, तब उन जल्दी बचन में चलूनो छोड़ दीनान।</verse>
				<verse number="18">जो बी झाड़िन का बीच पड़ीनान छन, यो उन लोगून का नियाती छन जिनूनले बचन तो सुणनान,</verse>
				<verse number="19">पर यो जीन्दगी चिन्ता, और धन-दौलत और दुसारा चीजून को लालच परमेश्वरा का बचन में रूकावट डालछी। और उक जीन्दगी में बचन कै काम नै कर पानो।</verse>
				<verse number="20">जो बी निकी भूमि में पड़ीयान, यो उन लोगून की नियाती छन, जो बचन स सुणभेरन मान लीनान और उनार जीन्दगी निका परिनाम हुनान, और उन उ रूखा जसा हुनान जिनून में कोई-कोई तीस, कोई साठ और कोई सौ गुना फल ल्यूनान।”</verse>
				<verse number="21">फिर यीशु ले उनून एक आजि उदारण दीभेरन क्योछ, “कोई ले आदिमी दीया स जलाभेरन ऊस एक चारपाई का ताल नै राखनो, बल्कि ऊस ऊँचा जाँग में राखि जाछो, ताकि उको उज्यालो सबून पुज सको।</verse>
				<verse number="22">म्येरो कुना को मतलब छै, परमेश्वर हर उ बात स प्रगट करोलो, जस लोग ऐल तक नै जाणना। उ हर उ बात स प्रगट कर द्योलो जो ऐल तक गुप्त छन।</verse>
				<verse number="23">तब यीशु ले क्योछ, जो कोई यो बात स सुण सकछो जो मैं कुन मरेयू, उन यो समझना की कोशिश करून।”</verse>
				<verse number="24">फिर यीशु ले उनूनथैं क्योछ, “जदुक ध्यान ले मेरि बातुन सुणला उदुक ज्यादा तुम समझ पाला। बल्कि परमेश्वर तुमून और ले ज्यादा समझ द्योलो।</verse>
				<verse number="25">क्याखिनकि जैक पास समझना की इच्छा छै, परमेश्वर ऊस और ले समझ द्ययोलो, पर जो यो समझना की इच्छा नै राँखनो, कि जो मैं सिखूछूँ, जो उले समझ छै, परमेश्वर उ समझ ले उथैं ली ल्योलो।”</verse>
				<verse number="26">फिर यीशु ले लोगून थैं क्योछ, “परमेश्वरो को राज्य एक किसान नियाती छै, जो गाँड़ान में बी बूँछो,</verse>
				<verse number="27">रात खिन किसान पड़छो और दिन में उ काम करछो, और उ बी जामछो और बढ़छो, पर उ नै जाणनो यो कसीकैं हुछो।</verse>
				<verse number="28">भूमि खुद फल ल्यूछी, पैलि पत्ति फिर बाला और फिर जाभेरन बालान में पक्को गुदा उनान।</verse>
				<verse number="29">आखरी में जब फसल पुरी रीति ले तैयार हो जाछी, तब किसान तुरन्त लोगून येस काटून खिन भेजछो, क्याखिनकि यो कटना को बखत छै।”</verse>
				<verse number="30">फिर यीशु ले क्योछ, “हम परमेश्वरा का राज्य की तुलना इसीकैं कर सकनू, मैं तुमून एक कहानी बतूछूँ,</verse>
				<verse number="31">परमेश्वरा का राज्य एक राई का बी का समान छै; जब उ धरती में बोई जाछो, तब उ सारी भिमें में सबून है नान बी हुछो।</verse>
				<verse number="32">लेकिन बोई जानाक बाद जब उ जामछो, तब सब साग-पात है ठूलो हो जाछो, और उक हांगा इदुक ठूलो है जानान, कि उई में आकाशा का चिड़िया अपूनी घोल बना सकनान।”</verse>
				<verse number="33">यीशु इसा भौत कहानी सुणाभेरन लोगून उनेरि समझ का हिसाब ले, परमेश्वरो को बचन सुणूछ्यो।</verse>
				<verse number="34">और उ हमेशा कहानी सुणाभेरन लोगून परमेश्वरा का राज्य बारिमें बतूछ्यो, लेकिन ऐकला में अपून शिष्यून सब बातुन को अर्थ निकीकैं कैभेरन समझा दीछ्या।</verse>
				<verse number="35">उ दिन ब्याल बखत यीशु ले अपून शिष्यून थैं क्योछ, “आ, हम गलील प्रदेश झील का पार जानू।”</verse>
				<verse number="36">और भीड़ स बिदा करनाका बाद, शिष्य यीशु स उई नाव में ली ग्यान, जैमें यीशु बैठिना को छ्या, और उनार दगाड़ और ले नाव छ्या।</verse>
				<verse number="37">जब झील पार करून मरेछ्या, तब जोरले आँधी तूफान उठछै और लहर इदुक जोरले नाव में टकरान लाग्यान, और नाव पानि ले भरिभेरन डूब लागछ्य,</verse>
				<verse number="38">उ बखत यीशु नाव का पछिल हिस्सा में शिरान लगाभेरन पड़ै रेछ्या। तब शिष्यून ले ऊस उठाभेरन क्योछ, “हे गुरू जी, हम त डूबून मरेया, लेकिन तैंस हमार बारिमें केले फिकर नाहातिनी?”</verse>
				<verse number="39">यीशु ले उठाभेरन आंधीस डांटछ्य, और लहरून थैं क्योछ, “शांत है जा, थामी जा।” और तुरन्त आँधी थामी ग्यो, और झील पुरी रीति ले शांत है गै।</verse>
				<verse number="40">तब उनूनले अपून शिष्यून थैं क्योछ, “तुम किलैं डरून मरेछा? किलैं तुमून आजि तलक ले मैंमें विश्वास नाहातिनी?”</verse>
				<verse number="41">शिष्यून भौत डर है गै और उन आपस में इसो कुन लाग्यान, “यो कसो आदिमी छै, कि आँधी और पानि की लहर और ले येको हुकुम मान्नान।”</verse>
			</chapter>
			<chapter number="5">
				<verse number="1">तब यीशु अपून शिष्यून का दगाड़ गलील प्रदेश झील का पार का इलाका में पुज्यान, जा गिरासेनी लोग रूनान।</verse>
				<verse number="2">और जब यीशु जसीकैं नाव भटे भिमें उतरीयान, एक भूत लागिना को आदिमी कबरिस्तान भटे निकल भेरन आछ।</verse>
				<verse number="3">उ कबरिस्तान का आश-पास रूँछ्यो, और उ इदुक खतरनाक छ्यो, कि लोग ऊस जंजीरून ले बाधना की कोशिश करछ्या, पर कोई ले ऊस नी बाधी सकछ्यो।</verse>
				<verse number="4">किलैकी ऊस बार-बार जंजीरून ले और बेड़िन ले बादीनाको छ्यो, लेकिन उले जंजीरैस तोड़ी दी छ्यो, और बेड़िनका टुकुड़-टुकुड़ कर दीयान, ऊस कोई ले काबू में नै करि सकछ्यो।</verse>
				<verse number="5">उ रात-दिन लगातार कबरिस्तान और आश-पासा का डाँणान में चिल्लाट करछो, और ढूंगा ले अपनास हांड़ि-हांड़िभेरन घायल करि राखछ्यो।</verse>
				<verse number="6">उ यीशु स दूर है देखिभेरन दौड़ने आछ, और खुटा पड़भेरन ढोक दीन लागछ्य,</verse>
				<verse number="7">और जोरले चिल्ला भेरन कुन लागछ्य, “हे यीशु, सर्वशक्तिमान परमेश्वरो को च्योलो, तैं हमून परेशान किलैं करछ? तैं परमेश्वरा का नाम ले मैंथै वादा कर, कि तैं मैंस दुखी नी करे।”</verse>
				<verse number="8">उ आदिमी ले इसो येक कारण ले क्योछ, क्याखिनकि यीशु ले उथैं पैलि कईना छ्यो, “हे भूत की आत्मा, यो आदिमी में है भ्यार निकल अ।”</verse>
				<verse number="9">यीशु ले उथैं पुछ्छै, “त्यार नाम कि छै?” उ भूत ले जबाब दीछ, “म्येरो नाम सेना छै, क्याखिनकि हम भौत ज्यादा छा।”</verse>
				<verse number="10">और उन भूत यीशु थैं विनती करून लाग्यान, “कि हमून यो इलाका भटे भ्यार जन भेजे।”</verse>
				<verse number="11">उ बखत वाँ डाँण में सुंअरून को एक ठूलो झुंड चरून मरेछ्यो।</verse>
				<verse number="12">भूत ले यो कैभेरन यीशु थैं विनती करछ्य, “कि हमून उन सुंअरून में भेज दे, ताकि हम उनार भितर जा सका।”</verse>
				<verse number="13">यीशु ले उनून यो हुकुम दी दीछ, उ सारा भूत उ आदिमी में है भ्यार निकभेरन सुंअरून का झुंड में न्हैजानान, उ झुंड में लगभग द्वी हजार सुंअर छ्या। उन ओरालो में दौड़भेरन आयान और झील में डुबिभेरन मरग्या।</verse>
				<verse number="14">और सुंअरून का ग्वाला भाजि भेरन, नगर और गौन में जानान जेले डांणा में भ्योछ यो खबर बता दीनान, और सब लोग यो देखून खिन आयान कि बात छै।</verse>
				<verse number="15">लोग जब यीशु का पास आयान, उनूले देखछ्य जैमें पैलि भौत सारा भूत छ्या, ऊस कपाड़ा पैनिना क और निकीकैं बैठिना को देखभेरन लोग डर ग्या।</verse>
				<verse number="16">देखन वालान ले जैमें भूत लागिना को छ्यो, और सुंअरून को पुरो हाल लोगून बता दीछ।</verse>
				<verse number="17">और इन लोग यीशु थैं विनती करून लाग्यान, कि तैं हमार इलाका भटे न्हैजा।</verse>
				<verse number="18">जब यीशु वापस नाव का तरफ जान लागछ्य, तब उ आदिमी ले जैस भूतून भटे छुटकारा मिलीना को छ्यो, उथैं विनती करून लागछ्य, “मैंस अपून दगाड़ उन दे।”</verse>
				<verse number="19">लेकिन यीशु ले ऊस अपून दगाड़ उनाकी इजाजत नै दीनो, और उथैं क्योछ, “अपून घर जाभेरन अपून लोगून बतो, कि तैंमें दया करभेरन प्रभु ले तैखिन कसा ठूला काम करछ्य।”</verse>
				<verse number="20">तब उ आदिमी अपून घरा का तरफ न्हैजाछो, फिर उले जाभेरन पुर दिकापुलिस इलाका में यो बतून शुरू कर दीछ, “कि यीशु ले मैं खिन कतुक ठूलो काम करछ्य।” यो सुणिभेरन सब लोग हैरान रैग्या।</verse>
				<verse number="21">जब यीशु फिर नाव ले गलील प्रदेश झील पार ग्यान, और किनार में ठाँड़ो छ्यो, तब भौत ज्यादा भीड़ यीशु का पास जामा हो ग्यै।</verse>
				<verse number="22">इदुक में यहूदी सभाघर का अधिकारीन में भटे एक अधिकारी आछ, उको नाम याईर छ्यो, और यीशु का खुटान में पड़छो।</verse>
				<verse number="23">और विनती करभेरन कुन लागछ्यो, “गुरू जी, मेरि नानि चेलि बिमार छै और मरन्या हैरैछ; दया करभेरन म्यार दगाड़ म्यारा घर हिट दीया, और उमें हात राँखा ताकि उ चंगी है जौ और मरून है बच ज्यौ।”</verse>
				<verse number="24">और यीशु उक दगाड़ जानमरेछ्या, उनार दगाड़ भौत भीड़ छी, और लोग ऊस छुना की कोशिश करून मरेछ्या,</verse>
				<verse number="25">एक स्यैनि उ भीड़ में छी, ऊस बारा साल भटे खून बगना की बिमारी छी।</verse>
				<verse number="26">उ इलाज खिन कई वैदूनका पास ग्यैछ, और अपून पुरो धन दौलत ले खर्च भेरन के फरक नै पढ़ियो, पर उ और ज्यादा बिमार हो गैछी।</verse>
				<verse number="27">जब उले सुणछय कि यीशु ले लोगून चंगो करछो, और उले सोचछै, “अगर मैं उक कपाड़ास ले छूँ ल्यूलो, तो मैं चंगी हो ज्यूलो।” येक कारण भीड़ में उले पछिल है आभेरन उक कपाड़ास छू लीछ।</verse>
				<verse number="28">क्याखिनकि उ कुछी, “अगर मैं उक कपाड़ास ले छूँ ल्यूलो, तब चंगी हो ज्यूलो।”</verse>
				<verse number="29">और उ बखत भटे उको खून बगूना की बिमारी बन्द हो ग्यो, और उले अपून आंग में चिताछ कि मेरि यो बिमारी ठीक है ग्यै।</verse>
				<verse number="30">यीशु भीड़ में है पछिल के मुड़भेरन पुछ्छै, “म्यारा कपाड़ास कैले छूँछ?” उले इसो येक कारण क्योछ, क्याखिनकि उले जाणि लीछ कि उ मैंमें है सामर्थ निकछ्य।</verse>
				<verse number="31">उनार शिष्यून ले क्योछ, “गुरू जी, तुम खुद देखून मरेछा, कि भीड़ में है लोग तैंस छुन खिन धक्का-मुक्का करून मर्यान। तब ले तुम पूछुनमरेछा कि मैंस कैले छूछ?”</verse>
				<verse number="32">यीशु उ जन स खोजन खिन अपून चारों तरफ देखून लाग्यान कि मैंस कैले छूँछ?</verse>
				<verse number="33">उ स्यैनि ले जाण लीछ मैं चंगो हो गयूँ, तब उ यीशु का पास आछ उक खुटान में पड़गै, और कुंछी मैंले तैंस छूँछ और उले सोचछ्य कि उ उमें गुस्सा करोलो, येक कारण उ भौत डरून और थरथरान मसछय।</verse>
				<verse number="34">यीशु ले उथैं क्योछ, “चेलि, तैले मैंमें विश्वास करछ्य, और यो बात ले तैंस चंगो करछ्य, तैं खुशी ले जा अब तैं अपून बिमारी है पुरी तरीका ले चंगी हो गैछी।”</verse>
				<verse number="35">जब यीशु उक दगाड़ बात करून मरेछ्या, उई बखत याईर का घर भटे कुछ लोगून ले आभेरन याईर थैं क्योछ, “अब गुरू स परेशान करना कि जरूरत नाहातिन। क्याखिनकि तेरि चेलि मर गैछ।”</verse>
				<verse number="36">लेकिन यीशु ले उनेरि बात सुणिभेरन याईर थैं क्योछ, “जन डर। केवल मैमें विश्वास राख।”</verse>
				<verse number="37">तब यीशु ले केवल पतरस, याकूब, उक भाई यहूना का अलावा और याईर स अपून दगाड़ ऊनकी इजाजत दीछ। उले भीड़ में है कैसे नै उन दीयो।</verse>
				<verse number="38">जब उन याईर का घराका भ्यार पुजनान, तब यीशु ले लोगून भौत डाड़ मारून और रून-कलानो करून देखछ्य।</verse>
				<verse number="39">तब उनूले भितर जाभेरन उनूथैं क्योछ, “चेलि मरि नै रैं, पर पड़ै रैछ, येक कारण तुम इदुक हाल्ला-गुल्ला और रून-कलाना की जरूरत नाहातिन।”</verse>
				<verse number="40">यो सुणिभेरन लोग उमें हँसू लाग्यान, येक कारण उनूनले सबून भ्यार भेजि दीछ, और सिर्फ चेलि का ईजा-बाब और अपून तीन शिष्यून लीभेरन, उ कमरा में ग्यान जाँ चेलि स राँखि राखिछ्यो।</verse>
				<verse number="41">और यीशु ले चेलि का हात पकड़ भेरन क्योछ, “तलीता कूमी।” जैको मतलब छै, “हे नानि चेलि, मैं तैथैं कुछ, उठ।”</verse>
				<verse number="42">तब उ नानि चेलि उई बखत चलन फिरन लागछ्य; जो बार साल की छी। यो देखभेरन उन लोग भौत ज्यादा ताजुब में पड़ ग्या।</verse>
				<verse number="43">तब यीशु ले उक ईजा-बबा स कड़ी चेतावनी दीभेरन क्योछ, जो याँ भ्यो, येक बारिमें तुम कैथैं केले जन कया, और उनूथैं क्योछ, “अब येस के खान खिन दी-दी।”</verse>
			</chapter>
			<chapter number="6">
				<verse number="1">कफरनहूम गौं भटे जाना का बाद, यीशु अपून शिष्यून का दगाड़ अपून गौं नासरत में आयान।</verse>
				<verse number="2">उन सबता का दिन, यहूदी सभाघर में परमेश्वरा का बचन को उपदेश दिन लाग्यान, और वाँ भौत लोग उनार उपदेश स सुणना का बाद हैरान है भेरन कुन लाग्यान, “यो आदिमी ले यो बात काँ सिख्यान? ऊस इसो ज्ञान और इसो चमत्कारा का काम करना कि सामर्थ कैले दीछ?</verse>
				<verse number="3">उनूनले यो केभेरन उको अपमान करछ्य, क्या यो उई लाकड़ा को मिस्त्री नाहातिनी, जो मरियमो को च्योलो छै, क्या यो केवल याकूब, योसेस, यहूदा और शमौन को ठूलो भाई नाहातिनी, और क्या येकी नानि बैनिन हमार गौं में नै रूना?” येक कारण उन लोग ले ऊस स्वीकार नै कर्यो।</verse>
				<verse number="4">तब यीशु ले उनूनथैं क्योछ, “एक परमेश्वरो को संदेश दिनवाला हरेक जाग आदर पाछो, लेकिन अपून गौंन का लोगून में और अपून घर खानदान मेंई अपमान हुछो।”</verse>
				<verse number="5">क्याखिनकि वाँ का लोगून ले उमें विश्वास नै कर्यो, येक कारण यीशु भौत सारा ज्यादा चमत्कार नै कर सक्या, पर केवल थ्वाड़ा बिमारीन में अपूनो हात राखभेरन ठीक करछ्य।</verse>
				<verse number="6">और उले उनार अविश्वास स देखभेरन ताजुब लागछो, येका बाद यीशु आश-पास गौंन में ग्योछ, और वाँ लोगून उपदेश दीन लागछ्य।</verse>
				<verse number="7">और यीशु ले अपून बारा शिष्यून अपून पास बुलाछ, और उनून भूत-परेतून निकालना को अधिकार दीछ, तब उले उनून द्वी-द्वी करि भेरन अलग-अलग गौंन में भेजून लागछ्य।</verse>
				<verse number="8">और यीशु ले उनून हुकुम दीछ, “अपून बाँट खिन केवल लठ्ठी लिया, नै त अपून खान खिन के लिया, नै त कोई झोलो और नै बटवा में डबल लिया।</verse>
				<verse number="9">तुम खुटॉन में जूतो पैन सक्छा, येक अलावा दुसोरो जोड़ो कपाड़ जन ली जाया।”</verse>
				<verse number="10">यीशु ले उनूनथैं क्योछ, “अगर कोई तुमून अपून घर बुलूछो, तो जब तक तुम उ गौं में रूछा, तब तक उकई मेहमान बन रौ।</verse>
				<verse number="11">जांक लोग तुमोरो आदर नै करना, नै तुमोरो बात सुणनान, तब उ जॉगा भटे जान बखत अपून खूटाकि धुल तलक यो दिखून खिन झाड़ी लिया, यो उ गौं का लोगून दिखालो कि परमेश्वर उनोरो न्याय करोलो।”</verse>
				<verse number="12">और शिष्यून ले जाभेरन प्रचार करछ्य, अपून पापून खिन पश्चताप करा और दुखी हो भेरन सुसमाचार में विश्वास करा,</verse>
				<verse number="13">और उनूनले भौत लोगून में भटे भूत-परेतून निकालछ्य, और बिमार लोगून में जैतून तेल लगाभेरन उनुस चंगो करछ्य।</verse>
				<verse number="14">जब राजा हेरोदेस ले उन कामून की चर्चा सुणछ्य, जो यीशु करून मरेछ्या, क्याखिनकि भौत सारा लोग यीशुका बारिमें जाण छ्या उको बारिमें चर्चा करून मरेछ्या, और कुन मरेछ्या, “कि यो यहूना बपतिस्मा दिनवालो छै, जो मरिना में भटे ज्यूनो है ग्योछ, येक कारण उ इसा चमत्कारा का काम करछो।”</verse>
				<verse number="15">और थ्वाड़ा लोग कुन मरेछ्या, कि यो परमेश्वरो को संदेश दिनवाला एलिय्याह छै, लेकिन और कुछ लोग कुन मरेछ्या, “कि यो कोई पैलि का परमेश्वरो को संदेश दिनवालान में भटे कैका एक समान छै।”</verse>
				<verse number="16">यो सुणिभेरन राजा हेरोदेस ले क्योछ, “यो यहूना बपतिस्मा दिनवालो छै, जैको मैंले खोरो कटवाछ, पर उ मरिना में भटे ज्यून है ग्योछ।”</verse>
				<verse number="17">राजा हेरोदेस ले कुछ बखत पैलि अपून भाई फिलिप्पुस की घरवाली हेरोदियास का दगाड़ ब्या कर लीछ, येक कारण यहूना ले राजा हेरोदेस थैं क्योछ, “मूसा का नियम का अनुसार तैंस अपून भाई का घरवाली का दगाड़ ब्या करून ठीक नाहातिन, यो बात में यहूना ले राजा स डाटछ्य।” तो राजा हेरोदेस ले सिपाईन भेजभेरन यहूना स पकड़वा भेरन जेल खान में डाल दीछ।</verse>
				<verse number="18"></verse>
				<verse number="19">येक कारण हेरोदियास यहूना भटे भौत नफरत करछी, और उ मौकाकि तलाश में रुंछी कि कसीकैं ऊस मरवाई जौ; लेकिन इसो नै हो पायो,</verse>
				<verse number="20">क्याखिनकि राजा हेरोदेस यहूना स एक धर्मी और पवित्र आदिमी समझभेरन उ भटे डरछ्यो, और ऊस बचूने रूछ्यो। और उकी बातुन सुणछ्यो त भौत डर जाछयो, फिरले उ यहूना की बातुन सुणून पसन्द करछ्यो।</verse>
				<verse number="21">थ्वाड़ा बखत का बाद, राजा हेरोदेस ले अपूनो जन्मदिन मनूछो। उले अपून ऊच्चा अधिकारीन, सेना का सब है खास अगुवान और गलील प्रदेश अगुवान दावत में बुलाछ। यो दावत का द्वारान, हेरोदियास स यहूना स मरूना को मौको मिलछ्य।</verse>
				<verse number="22">तब हेरोदियास की चेलि भितर उछी और नाचभेरन, राजा हेरोदेस और सब दावत में आयान का मेहमानून खुश करछ्य, तब राजा हेरोदेस ले क्योछ, “तैं जेले मांगलि, मैं तैंस दयूलो।”</verse>
				<verse number="23">और उथैं कसम खाछ, और क्योछ, “जेले तैं मांगलि मैं द्यूलो।” चाहे उ म्येरो आधा राजा किलैं नै हो।</verse>
				<verse number="24">तब उले अपूनी ईजा का पास जाभेरन पुछ्छै, “मैं कि मांगू?” तब उकी ईजा क्योछ, “तैं उथैं कौ कि उ यहूना बपतिस्मा दिनवाला को खोरो कटवा भेरन मैंस दी दे।”</verse>
				<verse number="25">तब उ भितर आभेरन राजा थैं बिनती करछी, “मैं चाछूँ कि तैं मैंस अल्ले यहूना बपतिस्मा दिनवालो को खोरो कटवा भेरन और थाली में राँख भेरन मैंस दी दे।”</verse>
				<verse number="26">यो सुणिभेरन राजा भौत उदास भ्योछ, क्याखिनकि अपून वादा और मेहमानून का कारण उकी माँग स मना नी कर सक्यो।</verse>
				<verse number="27">तब राजा ले तुरन्त एक सिपैस हुकुम दीछ और क्योछ, “जेल खान में जा और यहूना को खोरो काटिभेरन म्यारा पास लीभेरन अ।”</verse>
				<verse number="28">उले जेल खान में जाभेरन यहूना को खोरो काटिभेरन एक थाली में राखभेरन चेलि स दीछो, और उले अपून ईजा दीछी।</verse>
				<verse number="29">जब यहूना का शिष्यून मालूम चलछ्य की ऊस मार दी ग्योछ, त उकी लाशस ली ग्यान और ल्याभेरन ऊस दफनै दीछ।</verse>
				<verse number="30">जब बारा प्रेरित जिनून यीशु ले भेजिना का छ्या, उन यीशु पास वापस आयान। और उक पास जामा भ्यान, और जो कुछ ले उनूले करछ्य और सिखाछ, सब कुछ यीशु स बता दीछ।</verse>
				<verse number="31">क्याखिनकि वाँ भौत लोग उन-जानमरेछ्या, यीशु और उक शिष्यून खान को मौका नी मिलछ्यो, तब यीशु ले उनूनथैं क्योछ, “आ हम एक इसा बिरान जागा में जानू जाँ एकान्त में रै सका, और कुछ देर आराम कर सका।”</verse>
				<verse number="32">येक कारण उन नाव में चढ़भेरन, एकान्त जाग में न्हैजानान।</verse>
				<verse number="33">लेकिन भौत लोगून ले यीशु और उक शिष्यून जान देखछ्य, और जाण ग्या कि उन काँ जान मर्यान, येक कारण लोग उ जाग का आश-पास सबै गौंन में है पैदल दौड़भेरन उनार है पैलि वाँ पुजी ग्या।</verse>
				<verse number="34">जब यीशु नाव भटे उतछ्य, त उले भौत ज्यादा भीड़ देखछ्य, और उन लोगून देखिभेरन यीशुस दया आगै, क्याखिनकि उन भेड़ून का जसा छ्या जिनोरो कोई देख-भाल करूनवाला नाहातिनी; और यीशु उनून परमेश्वरा का राज्य बारिमें भौत सी बातुन सिखून लाग्यान।</verse>
				<verse number="35">जब भौत ब्याल होगै, त यीशु का शिष्यून ले उक पास आभेरन कुन लाग्यान, “यो जाग भौत सुनसान छै, अन्यारो ले हुन लागि ग्यो।</verse>
				<verse number="36">अब तुम इन लोगून थैं कै दी, कि इन आश-पासा का गौन में जाभेरन अपून खिन थ्वाड़ा खानो मोल ली लिया।”</verse>
				<verse number="37">यो बात सुणिभेरन यीशु ले उनूनथैं क्योछ, “तुम इन लोगून खिन खान का इन्तजाम करा।” तब शिष्यून ले यीशु थैं क्योछ, “इदुक रोटान की कीमत द्वी सौ दिन का मजूरी बराबर होलि। क्या तैं चाँछै की हम इदुक रोटा मोल ल्यूनू?”</verse>
				<verse number="38">यीशु ले शिष्यून थैं पुछ्छै, “तुम लोगून का पास कतुक रोटा छन? उनूनले जाभेरन मालूम करछ्य।” और यीशु स बताछ, “पाँच रोटा और द्वी माँछा छन।”</verse>
				<verse number="39">यीशु ले सब लोगून हरिया घास में झुंडून में बैठना को हुकुम दीछ।</verse>
				<verse number="40">लोग सौ-सौ और पचास-पचास को झुंड बनाभेरन बैठि ग्याय।</verse>
				<verse number="41">यीशु ले उन पाँच रोटान और द्वी माँछा हात में थामीयान, और स्वर्ग का तरफ चाँभेरन, परमेश्वरो को धन्यवाद करछ्य और रोटान टोड़ी-टोड़ी भेरन शिष्यून दीनै रैयान, और उन लोगून बाढ़नै रयान, और उनूनले द्वी माँछा ले सबून बाड़छ्य।</verse>
				<verse number="42">और उन लोगून ले पेट भर भेरन खान खिन खाछ।</verse>
				<verse number="43">जब सबून ले खाना खा लीछ तब शिष्यून ले रोटान और माँछान का बचिना का टुकडान जामा कर्यान, और उनूले बारा टोकरी भर भेरन उठायान।</verse>
				<verse number="44">जिन लोगून ले रोटा खायान, उनूनमें लगभग पाँच हजार आदिमी छ्या, और उनून स्यैनिन की और बच्चान की गिनती नी छी।</verse>
				<verse number="45">तब यीशु ले अपून शिष्यून थैं क्योछ, कि तुरन्त अपून नाव में बैठभेरन मैं है पैलि झील का पार बैतसैदा शैहर खिन न्हैजा, तब तक मैं भीड़ स विदा करछूँ।</verse>
				<verse number="46">और भीड़ का लोगून विदा करनाका बाद उ प्रार्थना करून खिन एक डाँण में न्हैग्या।</verse>
				<verse number="47">और ब्याल बखत जब अन्यारो हो गैछ्यो, त नाव गलील प्रदेश की झील का बीच में छी, और यीशु झील का किनार में ऐकलो छ्यो।</verse>
				<verse number="48">तब यीशु ले गलील प्रदेश की झील का तरफ देखछ्य, कि हवा उलटा दिशा में चलून मरेछ, और शिष्यून नाव चलून में भौत मेहनत करून पड़ रैछ। रात्तै तीन है छ: बजे का बीच में, यीशु गलील प्रदेश की झील में हिटभेरन उनार पास आछ, और उनून है अघिल जान चांछो।</verse>
				<verse number="49">पर जब उनूले यीशु स पानि में हिटून देखछ्य, तो उनूनले चिल्लान शुरू कर दीछ, क्याखिनकि उनूनले सोचछ्य, कि यो भूत छै।</verse>
				<verse number="50">और उन यो देखिभेरन भौत डर ग्या। तब तुरन्त यीशु ले उनूनथैं बात करछ्य और क्योछ, “हिम्मत करा, डरा जन, मैं यीशु छूँ।”</verse>
				<verse number="51">फिर उ उनार दगाड़ नाव में चढ़ ग्यो, और हवा थामी ग्यो, यो देखिभेरन शिष्य भौते हैरान रैग्या।</verse>
				<verse number="52">हालाकि उन लोगून ले यीशु का सामर्थ स देख राँखछ्य, जब पाँच हजार लोगून रोटा खावायान, पर उन अब तक ले यो नै समझ पाया यीशु वास्तव में को छै। उनोरो मन उमें विश्वास करून खिन कठोर हो गैछ्या।</verse>
				<verse number="53">जब यीशु और उक शिष्य नाव में गलील प्रदेशा का झील का पार गन्नेसरेत गौं में पुजियान, और उनूनले नाव किनारा में लगा दी।</verse>
				<verse number="54">जब यीशु नाव भटे भ्यार आयान, तब वाँ का लोगून ले तुरन्त उनुस पछ्याणी लीछ।</verse>
				<verse number="55">और उन पुर प्रदेश में भाग भेरन ग्यान, और जाँ-जाँ उनूनले सुणछ्य कि उ वाँ छै, उन बिमारून बिछान में राँख भेरन, उक पास ल्यून लाग्यान।</verse>
				<verse number="56">जब ले यीशु गौं, नगरून और शैहरून में जा छ्यो, त लोग बिमारून बजार में राखि राखछ्या और उनूनथैं विनती करछ्या, कि अपून कपाड़ा को एक किनार छुन दीया, और जो उक कपाड़ास छू छ्यो उ चंगो हो जा छ्यो।</verse>
			</chapter>
			<chapter number="7">
				<verse number="1">एक दिन फरीसी लोग और थ्वाड़ा मूसा का नियम सिखून वाला जो यरूशलम शैहर भटे आईना का छ्या, उन यीशु का बात सुणन खिन जामा हुनान।</verse>
				<verse number="2">और उनूनले यीशु का थ्वाड़ा शिष्यून बिना हात धोयै खान-खानो देखछ्य।</verse>
				<verse number="3">किलैंकी फरीसी और सब यहूदी लोग, अपून पुरखान कि परमपरा मानछ्या, जब तक निकी कै हात नी धूछ्या, तब तक खानो नी खाँछ्या;</verse>
				<verse number="4">और बाजार भटे घर आभेरन, जब तक नी नहाछ्या, तब तक खानो नी खाँछ्या; और ले भौत रिवाज छ्या जो मानछ्या, जसीकैं ब्याला, कसिणो और तामाका भाणान धुनाको और माजन को रिवाज छ्यो।</verse>
				<verse number="5">येक कारण उन फरीसी और मूसा का नियम सिखून वाला लोगून ले यीशु थैं पुछ्छै, “तेरा शिष्य पुरखान का रीति-रिवाज किलै नै मानना, और बिना हात धोईनाका खानो किलै खानान।”</verse>
				<verse number="6">यीशु ले उनूनथैं क्योछ, “यशायाह परमेश्वरो को संदेश दिनवाला तुम कपटी लोगून का बारिमें ठीक भविष्यवाणी कर रैछ; जसो पवित्रशास्त्र में लिखीना को छै, ‘इन लोग बातुन ले त म्येरो आदर करनान, लेकिन इनोरो मन मैं है दूर रूछो।</verse>
				<verse number="7">यो बेकार में मेरि अराधना करनान, क्याखिनकि यो लोगून का द्वारा बनाईना का नियमून को परमेश्वरा का नियम बताभेरन सिखूनान।’</verse>
				<verse number="8">क्याखिनकि तुम परमेश्वरा का हुकमून छोड़ी भेरन, लोगून का बनाई रीति-रिवाजून को पालन करछा।”</verse>
				<verse number="9">यीशु ले फरीसी और मूसा का नियम सिखून वाला लोगून थैं क्योछ, “तुम अपून रीति-रिवाजून मानन खिन परमेश्वरा का हुकमून बड़ी चालाकी ले टाल दीछा।</verse>
				<verse number="10">परमेश्वर ले मूसा का द्वारा नियम में के रैछ, ‘अपून ईजा-बबा को आदर कर,’ और ‘जो कोई अपून ईजा-बबा स बुरो कलो, उ पक्का जान है मार डाली जालो।’</verse>
				<verse number="11">लेकिन तुम लोग यो कुँछा, कि अगर कोई आदिमी अपून ईजा-बबाथै कुंछो, ‘म्येरो जो कुछ छै उ तुमार काम आ सकछो, लेकिन उ मैंले परमेश्वर स भेंट चढ़ा है छ।’ क्या इसो कुंनो ठीक छी?</verse>
				<verse number="12">तो तुम उ आदिमी स उक ईजा-बबा की सेवा नै करून दिना।</verse>
				<verse number="13">इसो तरीका ले तुम परमेश्वरा का दीईनाका नियम-कानून नै मानना, ताकि तुम उन रीति-रिवाजून मान सका, जिनून तुमार पुरखान का द्वारा बना राख्यान, और तुम परमेश्वरा का खिलाफ इसा-इसा भौत बुर काम करछा।”</verse>
				<verse number="14">फिर यीशु ले सब लोगून अपून पास बुलाभेरन क्योछ, “तुम सब मेरि बातुन सुणिभेरन समझ ली।</verse>
				<verse number="15">इसी कोई चीज नाहातिन, जो भ्यार भटे आदिमी का भितर जाभेरन ऊस अशुद्ध करो; लेकिन जो बात आदिमी का भितर भटे निकलछी, उई ऊस अशुद्ध करछो।</verse>
				<verse number="16">तब यीशु ले क्योछ, जो कोई यो बात स सुण सकछो जो मैं कुन मरेयू, उन यो समझना की कोशिश करून।”</verse>
				<verse number="17">जब यीशु भीड़ में है निकल भेरन ग्योछ, तब उक शिष्यून ले उथैं उ कहानी को मतलब पुछ्छै।</verse>
				<verse number="18">तब यीशु ले क्योछ, “कि तुम इदुक अनजान छा? क्या तुम इदुक ले नै समझना कि जो ले खानो भ्यार भटे आदिमी का भितर जाछो, उ आदिमी स अशुद्ध नै करि सकनो?</verse>
				<verse number="19">क्याखिनकि उक मन में नै, बल्कि पेट में जाछो, और सनडांस भटे भ्यार निकल जाछो।” यो कैभेरन यीशु ले सब खाना की चीजून शुद्ध ठैराछै।</verse>
				<verse number="20">फिर यीशु ले यो ले क्योछ, “जो बुरी बात आदिमी का मन भटे निकल छी, उई उ आदिमी स अशुद्ध करछ्यो।</verse>
				<verse number="21">क्याखिनकि भितर है, मतलब आदिमी का मन भटे बुर-बुर बिचार, ब्यभिचार, चोरी, हत्या, परस्त्रीगमन,</verse>
				<verse number="22">लालच, बुराई, ध्वाकबाजी, लुचपन, बुरी नजर, निदा, घमंन्ड, मूर्खता निकल छी।</verse>
				<verse number="23">यो सब बुरी बात मन भटे निकलनान और उ आदिमी स अशुद्ध करछी।”</verse>
				<verse number="24">येक बाद यीशु और उक शिष्य सोर और सेदा का देशून का आश-पासा का इलाकान में ग्यान। और उन एक घर में ग्यान, और उ नी चाँछ्यो कि कैस ले उनार उनाको पत्तो चलो, पर तब ले लोगून पत्तो चल जाछो कि उ वाँ छै।</verse>
				<verse number="25">एक अन्यजाति स्यैनि जैकी नानि चेलि में भूत लागिना को छ्यो, उले यीशु का बारिमें सुणिभेरन उनार पास आछ, ऊस आदर दीन खिन उक खुटान में पड़छ्य।</verse>
				<verse number="26">यो स्यैनि सीरिया प्रदेशा का फिनीकि शैहर की रून वाली छी, उले यीशु थैं बिनती करछ्य, “कि तुम मेरि चेलि में भटे भूत स निकाल दी।”</verse>
				<verse number="27">फिर यीशु ले उथैं क्योछ, “पैलि मैंस अपून परिवार की मदत करून दे जो की यहूदी छन, यो ठीक नाहातिन कि नान्तिनान को खानो, कूकुरुन का सामुनि डालून।”</verse>
				<verse number="28">उ स्यैनि ले यीशु थैं क्योछ, “यो बात सच्ची छै प्रभु! फिरले कुकुर ले त नानतिनान को जुठ-पिठ खा लीनान।”</verse>
				<verse number="29">तब यीशु ले क्योछ, “क्याखिनकि तैले ठीक जबाब दीछ, येक कारण तैं बेफिकर है भेरन अपून घर जा, क्याखिनकि तेरि चेलि में भटे भूत निकल ग्योछ।”</verse>
				<verse number="30">और उ स्यैनि ले घर पुजिभेरन, देखछ्य, कि उकी चेलि अपून चारपाई में पड़िनाकि छी और भूत उमें भटे निकल ग्योछ।</verse>
				<verse number="31">उक बाद यीशु और उक शिष्यून ले सोर शैहरा का आश-पासा का इलाका छोड़भेरन, उन सिदोन शैहर भटे होभेरन दिकापुलिस का सरद पार गलील प्रदेश झील का किनार पुजियान।</verse>
				<verse number="32">वाँ यीशु का पास लोग एक बिमारी स ल्यान जो कान नी सुणिछ्यो, और निकी कै बोल ले नी सकछ्यो, और उनूनले यीशु थैं विनती करछ्य, कि “अपूनी हात उमें राख दे, ताकि उ चंगो है जौ।”</verse>
				<verse number="33">तब यीशु उ आदिमी स भीड़ भटे अलग लाग्यान और उक कान में अपूनी आंगुलो डालछ्य, तब उले अपूनो थूक अपून आंगुलो में लगाछ और उ आंगुला ले उ आदिमी को जिबोड़ो छूँछ।</verse>
				<verse number="34">तब यीशु ले लम्बी साँस लीभेरन स्वर्ग तरफ चाँभेरन उथैं क्योछ, “इप्फतह।” जैको आरामी भाषा में मतलब छै, “खुल जा।”</verse>
				<verse number="35">जसीकैं यीशु ले क्योछ खुल जा, तो उ आदिमी पुर तरीका ले सुणून और उकी जबान ले खुल गै, और उ साफ-साफ बोलून लागछ्य।</verse>
				<verse number="36">यीशु ले लोगून थैं क्योछ, “यो बात का बारिमें तुम कैथैं जन कया।” पर जदुक उनूनले मना करछै, उन उतुक उनार बारिमें ज्यादा प्रचार करून लाग्यान।</verse>
				<verse number="37">और उन लोग भौत ताजुब ले कुन लाग्यान, “येले जो ले यो काम कर्यान भौत भल कर्यान; या तक कि उ टोलान सुणनाकि और गूँगान बोलना की ताकत दीछ।”</verse>
			</chapter>
			<chapter number="8">
				<verse number="1">यो उन दिनून की बात छै, जब यीशु दिकापुलिस का इलाकून में छ्यो, तब भौत भीड़ उक पास जमा हुछी, उन लोगून का पास में खान खिन केले नी छ्यो, तब यीशु ले अपून शिष्यून बुलाभेरन क्योछ,</verse>
				<verse number="2">“इन लोग तीन दिन भटे म्यार दगाड़ छन, और उनार पास अब खान खिन केले नाहातिन, मैंस इन लोगून देखिभेरन दया उछी,</verse>
				<verse number="3">इनून में भटे थ्वाड़ लोग भौते दूर भटे आईना का छन, अगर मैं इन लोगून भुखो घर भेजि द्यूँलो, त उनून हिटन-हिटन बाट में चक्कर आ जालो।”</verse>
				<verse number="4">तब उक शिष्यून ले क्योछ, “यो बिरान जागा में इदुक लोगून का खाना को इंतजाम कसीकैं है सकछो?”</verse>
				<verse number="5">यीशु ले अपून शिष्यून थैं पुछ्छै, “तुमार पास कतुक रवाट छन?” उनूनले क्योछ, “सात रोटा छन।”</verse>
				<verse number="6">तब यीशु ले लोगून भिमें बैठना को हुकुम दीछ, और उन बैठिग्या, येक बाद रोटान लीभेरन यीशु ले परमेश्वर स धन्यवाद दीछ, और रोटान टोड़िभेरन अपून शिष्यून दीनै र्यान, और शिष्य लोगून स दीनै रयान।</verse>
				<verse number="7">उनार पास थ्वाड़ा नान-नान माँछा ले छ्या, यीशु ले परमेश्वर स धन्यवाद दीभेरन क्योछ, “यो माँछा ले बाँणि दी।”</verse>
				<verse number="8">और सब लोगून ले पेट भरि खाछ, उक बाद उनूनले बचिना का रोटा का टुकुड़ान ले सात टोकरी भर भेरन जामा कर्यान।</verse>
				<verse number="9">खान वाला लगभग चार हजार आदिमी छ्या; फिर यीशु ले लोगून विदा करछ्य,</verse>
				<verse number="10">यीशु अपून शिष्यून का दगाड़ नाव में चढ़भेरन दलमनूता इलाका खिन न्हैग्या।</verse>
				<verse number="11">फिर फरीसी लोग यीशु का पास आभेरन उक दगाड़ बहस करून लाग्यान, उन यीशु स फसून चाँछ्या, येक कारण उनूनले एक स्वर्गीय चिन दिखूना की माँग करछ्य ताकि उन अपूनो अधिकार साबित कर सकूनो।</verse>
				<verse number="12">यीशु ले उनार अविश्वास कारण लम्बी साँस लीभेरन क्योछ, “यो बखत का लोगून स्वर्गी चिन की माँग नै करून चैछी, मैं तुमूनथैं सच्ची कुछूँ, यो बखत का लोगून स्वर्ग भटे चिन नी दिखाई जालो।”</verse>
				<verse number="13">फिर उ फरीसी लोगून छोड़िभेरन, अपून शिष्यून का दगाड़ फिर नाव में चढ़ी ग्या, और उन गलील प्रदेशा का झीला का पार न्हैग्या।</verse>
				<verse number="14">यीशु का शिष्य अपून दगाड़ ज्यादा रोटा लीन भूल गैछ्या, येक कारण एक रोटा का अलावा उनार पास नाव में और रोटा नी छ्या।</verse>
				<verse number="15">और यीशु ले उनुस जोर दीभेरन सतर्क करछ्य, “फरीसी लोग और राजा हेरोदेस का खमीर भटे सर्तक रया।”</verse>
				<verse number="16">तब शिष्य आपस में बिचार करभेरन कुन लाग्यान, “क्याखिनकि हम ज्यादा रोटा लीभेरन नै आया उ इसो येक कारण कुन मरियोछ?”</verse>
				<verse number="17">यीशु ले यो जाणिभेरन उनूनथैं क्योछ, “तुम आपस में यो बिचार किलैं करून मरेछा कि हमार पास रोटा नाहातिन? क्या तुमून अपून मन स इदुक कठोर बना हालछी कि ऐल तलक तुम लोग नै समझ पाया?</verse>
				<verse number="18">तुमार पास और कान त छन, लेकिन तुम देख और सुण नै सकना। क्या तुमून केले याद नाहातिन।</verse>
				<verse number="19">और तुमून याद नाहतिनी जब मैंले उन पाँच हजार लोगून केवल पाँच रोटान ले खवाछ, तब तुमून ले कतुक भरिनाका टोकरी जामा कर्यान?” उनूले क्योछ, “बारा टोकरी।”</verse>
				<verse number="20">और जब चार हजारून लोगून खवाछ, “तब तुमून ले कतुक भरिनाका टोकरी जामा कर्यान?” उनूनले क्योछ, “सात टोकरी।”</verse>
				<verse number="21">फिर यीशु ले उनूनथैं क्योछ, “क्या तुम आजि ले नै समझिया कि मैं को छूँ?”</verse>
				<verse number="22">तब यीशु और उक शिष्य बैतसैदा शैहर में आयान, और लोग एक अन्धा स उक पास ल्यान, और उथैं बिनती करून लाग्यान कि उ आदिमी स छू भेरन चंगो कर दे।</verse>
				<verse number="23">यीशु उको हात पकड़ भेरन गौं भटे भ्यार ल्हीग्यान, उनूले उक आँख में अपूनो थूक लगाभेरन उमें अपून हात राँखछ्य, और उथैं क्योछ, “कि तैंस के देखीन मरेछ्यो?”</verse>
				<verse number="24">उ आदिमी ले इथकैं-उथकैं देखभेरन क्योछ, “मैं लोगून देख सकछू लेकिन मैं उनून ठीक तरीका ले नै देख पान मरेयू, उन चलता-फिरता रूख-डाला का नियाती देखीन मर्यान।”</verse>
				<verse number="25">येक बाद फिर यीशु ले उ अन्धा का आँख में अपूनी हात राखियान, और जसीकैं उ अन्धा ले ध्यान ले देखछ्य, और उक आँखान में रोशनी आ जाछी, और सब कुछ साफ-साफ देखून लागछ्य।</verse>
				<verse number="26">येक बाद यीशु ले ऊस यो हुकुम दीछ और क्योछ, अपून घर खिन न्हैजा, लेकिन जो ले याँ भ्योछ, उ गौं वालान जन बताये, और अब यो गौं में दुबारा जन आये।</verse>
				<verse number="27">फिर यीशु और उनार शिष्य बैतसैदा शैहर छोड़ी भेरन और कैसरिया फिलिप्पी का शहरून का आश-पासा का गौंन खिन न्हैजानान; और बाट में यीशु ले अपून शिष्यून थैं पुछ्छै, “लोग म्यारा बारिमें कि कुंनान कि मैं को छूँ?”</verse>
				<verse number="28">शिष्यून ले यीशु स जबाब दीछै, “कुछ लोग तैथैं यहूना बपतिस्मा दीन वालो; और कोई-कोई परमेश्वरो को संदेश दिनवाला एलिय्याह और कुछ-कुछ लोग त पुराना जमाना का परमेश्वरो को संदेश दिनवाला भटे कोई एक परमेश्वरो को संदेश दिनवालान में भटे कुंनान।”</verse>
				<verse number="29">यीशु ले अपून शिष्यून थैं पुछ्छै, “और तुम मैंथै कि कूंछा की मैं को छूँ?” पतरस ले जबाब दीछ, “तैं परमेश्वरो को भेजिना को मसीह छै।”</verse>
				<verse number="30">तब यीशु ले उनून सतर्क करछ्य, “कि तुम कैसे यो जन बताया कि मैं मसीह छूँ।”</verse>
				<verse number="31">तब यीशु ले अपून शिष्यूनथैं क्योछ, कि यो जरूरी छै, “मैं आदिमी को च्योलो भौत दुख उठालो, और यहूदी अगुवा और प्रधान याजक और मूसा का नियम सिखून वाला लोग मैंस नीच समझभेरन मार द्याला, और मैं तीन दिन बाद मुरदान में भटे ज्यून हो जूंलो।”</verse>
				<verse number="32">यीशु ले यो बात उनून खुलभेरन बता दीछ। यो सुणभेरन पतरस यीशुस अलग ली जाभेरन उक दुख उठून और मारी जाना का बात कारण यीशु स डाठून लागछ।</verse>
				<verse number="33">लेकिन तब यीशु ले पछिल मुड़भेरन अपून शिष्यून का तरफ देखछ, और पतरस स डाँठ भेरन कुन लागछ्य, “हे शैतान, तैं म्यारा सामुनि है दूर न्हैजा, क्याखिनकि तैं परमेश्वर नियाती नै सोचनै, बल्कि लोगून की नियाती सोचछ्य।”</verse>
				<verse number="34">तब यीशु ले अपून शिष्यून और लोगून बुलाभेरन क्योछ, “अगर कोई म्यार शिष्य बनून चाँछ, त उ अपूनी सब इच्छान छोड़ी द्यो। और मैं खिन मरून खिन तैयार हो ज्यो।</verse>
				<verse number="35">किलैंकी जो अपून प्राण संसारिक जीन्दगी जीन खिन बचालो, उ परमेश्वरा का दगाड़ अनन्त जीवन पाना को मौका खो द्योलो, लेकिन जो मैं खिन और सुसमाचार खिन अपून प्राणस दीछो, उ अनन्त जीवन पालो।</verse>
				<verse number="36">एक आदिमी स की फेदा होलो, अगर उ पुरा संसार में धनवान हो, पर परमेश्वरा का दगाड़ अपूनो अनन्त जीवन स खो दे?</verse>
				<verse number="37">उ परमेश्वर स कि दी सकछ्यो, जो उको अनन्त जीवन खरीदोलो?</verse>
				<verse number="38">अगर तुमून में भटे कोई मैंस प्रभु ना जानो, और मेरि शिक्षा नै मानो, किलैंकी तुम डर छा कि अविश्वासी और यो बखत का पापी लोग तुमोरो मजाक उड़ाला, तो मैं आदिमी को च्योलो ले तुमून अपून शिष्य हुन है ले इनकार कर द्यूलो, जब मैं धरती में अपून पवित्र स्वर्गदूतून का दगाड़ अद्धभुत तेज में वापस उलो। तब हर कोई मेरि उई अद्धभुत तेज स देखाला जस म्यारा पिता को तेज छै।”</verse>
			</chapter>
			<chapter number="9">
				<verse number="1">तब यीशु ले अपून शिष्यून और भीड़ का लोगून थैं क्योछ, “मैं तुमूनथैं सच्ची कुछूँ, कि जो याँ ठाँड़ छन, इनून में थ्वाड़ा लोग इसा छन, जब तलक परमेश्वरा का राज्य स सामर्थ का दगाड़ उन नै देख ल्यून, तब तलक उन कभै नी मराँला।”</verse>
				<verse number="2">छ: दिन का बाद यीशु अपून शिष्य पतरस, याकूब और यहूना स अपून दगाड़ एक ऊँचा डाँण में ली ग्यो जाँ उन एकला छ्या, वाँ शिष्यून का सामुनि उको रूप बदल ग्यो।</verse>
				<verse number="3">और उक कपाड़ा इसा चमकून लाग्यान, और इदुक सफेद है ग्या कि धरती में कोई ले धोबि इदुक सफेद नै करि सकनो।</verse>
				<verse number="4">और इन तीन शिष्यून ले पुराना जमाना का द्वी परमेश्वरा का संदेश दिनवाला मूसा और एलिय्याह स यीशु का दगाड़ बात करून देखाई दीयान।</verse>
				<verse number="5">त यो सब देखिभरेन पतरस ले यीशु थैं क्योछ, “हे गुरू जी, हमोरो या रून ठीक छै; येक कारण हम याँ तीन तम्बू बना लीनू, एक तुमून खिन, एक मूसा खिन और एक एलिय्याह खिन।”</verse>
				<verse number="6">पतरसले यो येक कारण क्योछ, क्याखिनकि उ और द्वी शिष्य डर गैछ्या, और उन नी जाणछ्य कि कुंनू या कि करनू।</verse>
				<verse number="7">तब अचानक एक बादल ले प्रगट हो भेरन उनुस ढक लीछ, परमेश्वर ले बादल में भटे हो भेरन बात करछ्य, “यो मेरो लाड़िलो च्योलो छै, येकी बातुन सुणा।”</verse>
				<verse number="8">तब शिष्यून ले चारू तरफ नजर घुमाछ, और यीशु छोड़ कैसे नै देख्यो।</verse>
				<verse number="9">जब यीशु और उक तीन शिष्य डाँण भटे उतर भेरन तलि उनमरेछ्या, तब यीशु ले उनून हुकुम दीछ, “जब तलक मैं आदिमी को च्योलो मरिना में भटे ज्यून नी हो ज्यू, तब तक तुमून ले जो कुछ ले पहाड़ में देखछ्य, उ कैसे जन बताया।”</verse>
				<verse number="10">शिष्यून ले उन बातुन जो डाँण में भ्यान, अपून बीच में राखछ्य; लेकिन उन आपस में चर्चा करनान, “कि मरिभेरन ज्यून है जाना को कि मतलब छै?”</verse>
				<verse number="11">और शिष्यून ले यीशु थैं पुछ्छै, “मूसा का नियम सिखून वाला लोग किलैं कुंनान मसीह का उन है पैलि एलिय्याह को उन जरूरी छै?”</verse>
				<verse number="12">यीशु ले उनून जबाब दीछ, “एलिय्याह को पैलि उन सचमुच जरूरी छै, क्याखिनकि मैं खिन, लोगून का मनून तैयार करून खिन पवित्रशास्त्र में लिखीना को छै मैं आदिमी को च्योलो, भौत दुख उठालो और तुच्छ गिनीजालो?</verse>
				<verse number="13">लेकिन में तुमूनथैं कुछूँ, कि एलिय्याह त आग्योछ और जस उक बारिमें पवित्रशास्त्र में लेखिना को छै, और यहूदी अगुवान ले जो कुछ चाँछ, उई उक दगाड़ करछ्य।”</verse>
				<verse number="14">जब यीशु और उक तीन शिष्य दुसारा शिष्यून का पास वापस आयान, तब उनूनले देखछ्य, कि भौते लोग उनार चारों तरफ जामा है र्यान, और मूसा का नियम सिखून वाला लोग उनार दगाड़ बहस करून मरेछ्या।</verse>
				<verse number="15">जसीकैं भीड़ का लोगून ले यीशु स देखछ्य, ऊस देखभेरन हैरान हुन लाग्यान, और उक तरफ दौड़भेरन आभेरन उनुस ढोक दीछ।</verse>
				<verse number="16">तब यीशु ले शिष्यून थैं पुछ्छै, “तुम इनारा दगाड़ कि बात में बहस करून मरेछ्या?”</verse>
				<verse number="17">भीड़ में भटे एक आदिमी ले ऊस जबाब दीछ, “हे गुरुजी, मैं अपून च्याला स तुमार पास ल्यायू, क्याखिनकि उमें जो भूत छै उले येस गूँगो बना है छै।</verse>
				<verse number="18">जब ले यो भूत येमें हमला करछो, तो येस वाँई पटक दीछो, और येका मुँख भटे गाज निकालछो, और दाँतून किट-किटा भेरन लकड़ी जाछो, मैले त्यारा शिष्यून थैं क्योछ, कि यो भूत स निकालन दी, लेकिन इन त नै निकाली सक्या।”</verse>
				<verse number="19">यो सुणिभेरन यीशु ले उनून जबाब दीछ भेरन क्योछ, “हे अविश्वासी लोगो मैं कब तक तुमार दगाड़ रूलो, और मैं कब तक तुमोरो इन्तजार करूँ की तुम मैंमें विश्वास करा, उ लड़का स म्यार पास ल्या।”</verse>
				<verse number="20">तब लोग उ लड़का स यीशु का पास ल्यान, और भूत ले यीशु स देखछ्य, तो उ भूत ले उ लड़का स जकड़ दीछ, और ऊस भिमें खितीभेरन लौट-पोट करून लागछ्य, और उक मुँख भटे ले गाज उन लागछ्य।</verse>
				<verse number="21">तब यीशु ले उ लड़का बबा थैं पुछ्छै, “येकी यो हालत कब भटे छै?” उले क्योछ, “नान छना भटे।</verse>
				<verse number="22">कई बार यो भूत येस आगो और पानि में खितीभेरन मारना की कोशिश ले करछ्य; पर तुम के कर सकछा त हमून में दया करभेरन हमरि मद्दत करा।”</verse>
				<verse number="23">यीशु ले उथैं क्योछ, “तैं यो कसी बात करून मरेछै? परमेश्वर में विश्वास करून वालान खिन सब कुछ हो सकछो।”</verse>
				<verse number="24">तब उ लड़का बबा ले गिड़-गिड़ा भेरन क्योछ, “हे प्रभु, मैं विश्वास करछूँ। पर म्यारा अविश्वास स दूर कर दीया।”</verse>
				<verse number="25">जब यीशु ले देखछ्य कि लोगून की भीड़ बढ़नै जानमरेछ्, तो उले भूत स डाँठ भेरन क्योछ, “हे भूत जो यो नानतिनस गूँगा और बैरा बनूछी, येमें भटे निकल जा, और फिर कभै वापस जन आये।”</verse>
				<verse number="26">तब उ भूत चिल्लाट करभेरन उ लड़का स मरोड़भेरन उमें भटे निकल जाँछो, और उ लड़का मरिना को जसो हो जाछो। और या तक कि लोग कुन लाग्यान कि यो मरि ग्योछ।</verse>
				<verse number="27">लेकिन यीशु ले उ लड़का हात पकड़ भेरन ऊस उठाछ और उ ठाँड़ है ग्यो।</verse>
				<verse number="28">उक बाद जब यीशु अपून शिष्यून का दगाड़ घर एकोलो छ्यो, तब शिष्यून ले उनूथैं पुछ्छै, “हमूनले उ भूत स किलैं नै निकाली सक्यो?”</verse>
				<verse number="29">यीशु ले शिष्यून जबाब दीछ, “इस तरीका भूत केवल बर्त का दगाड़ प्रार्थना करभेरन लोगून में है निकाल सकनान।”</verse>
				<verse number="30">येक बाद यीशु और उक शिष्य वाँ भटे गलील प्रदेश हो भेरन जानमरेछ्या, उ चाँछ्या कि कैसे ले पत्तो नै चलो,</verse>
				<verse number="31">क्याखिनकि यीशु अपून शिष्यून उपदेश दीभेरन उनूले क्योछ, “मैं आदिमी को च्योलो, दुश्मनून का हात पकड़ाई जालो। और उन मैंस मार द्याल, लेकिन मैं मरिनान में भटे तीसारा दिन फिर ज्यून है ज्यूलो।”</verse>
				<verse number="32">लेकिन शिष्यून का समझ में यो बात नै आई, और उन उथैं येक बारिमें पुछून में डर छ्या।</verse>
				<verse number="33">येक बाद फिर यीशु और उक शिष्य कफरनहूम गौं में आयान, और घर आभेरन उले शिष्यून थैं पुछ्छै, “बाँट में तुम क्या बारिमें बात-चीत करून मरेछ्या?”</verse>
				<verse number="34">लेकिन शिष्य चुप रैयान, क्याखिनकि उन बाँट में यो बात-चीत करून मरेछ्या कि हमून में भटे सबून है ठूलो को छै।</verse>
				<verse number="35">तब यीशु ले बारा शिष्यून बुलाभेरन उनूनथैं क्योछ, “अगर तुमून में कोई ठूलो हुन चाँछ, तब उ सबून है नान बनो और सबून को दास बनो।”</verse>
				<verse number="36">फिर यीशु ले एक नानतिनास लीभेरन उनार बीच में ठाँड़ करछ्य, और ऊस गोदी में लीभेरन क्योछ,</verse>
				<verse number="37">“जो कोई म्यारा नाम ले इसा नान नानतिनास अपनूछो और उकी मद्दत करछो, क्याखिनकि उन मैंस प्रेम करनान, यो इसो छै कि मैंस अपनून, और जो म्येरो स्वागत करछो, उ सिर्फ म्येरो नै बल्कि म्यारा भेजून वाला को स्वागत करछो।”</verse>
				<verse number="38">तब यहूना नामोको शिष्य ले क्योछ, “गुरू जी, हमूले एक आदिमी स त्यारा नाम ले भूतून निकालून देखछ्य, और हमुले ऊस रोकना की कोशिश करछ्य, क्याखिनकि उ हमरि नियाती तेरो शिष्य नी छ्यो।”</verse>
				<verse number="39">तब यीशु ले जबाब दीछ, “उ आदिमी स तुम जन रोकिया, क्याखिनकि जो आदिमी म्यारा नाम ले चमत्कारा का काम करछो, उन इदुक जल्दी मेरि बुराई नै कर सकनो।</verse>
				<verse number="40">क्याखिनकि जो हमोरो विरोधी नाहातिन, उ हमार तरफ छै।</verse>
				<verse number="41">जो कोई एक गिलास पानि को तुमून यो समझभेरन पीलो, कि तुम मसीह का शिष्य कहलूछा, तो मैं तुमूनथैं सच्ची कुछूँ, कि परमेश्वर ऊस ईनाम जरूर द्याला।”</verse>
				<verse number="42">“यीशु ले क्योछ, जो कोई इन नान है नान मैंमें विश्वास करनान, कैस ले पाप करून को कारण बननान, उ खिन यो निको छै, कि उ गाल में एक ठूलो ढूंगो बाँदीभेरन समुद्र में फटंग हाँड़ो।</verse>
				<verse number="43">अगर तेरो हात तैथैं पाप करूँछो, त ऊस काटिभेरन खिती दी, अगर एक हात लीभेरन तैं स्वर्ग में जाले यो तैखिन निको छै। इसो नै हो कि तुम द्वी हात लीभेरन नरक की आग जला, जाँक आग में तैंस हमेशा तलक जलनै रौला।</verse>
				<verse number="44">नरक में शरीर स खान वाला कीड़ा कभै नै मरना, और वाँ आगो कभै नै बुझुनो।</verse>
				<verse number="45">अगर तेरो खुटो तैथैं पाप करूँछो, त ऊस काटिभेरन खिती दी, अगर एक खुटो लीभेरन तैं स्वर्ग में जाले यो तैखिन निको छै। इसो नै हो कि तैं द्वी खुटा लीभेरन नरक की आग में खिती जला, जाँक आग में तैं हमेशा तलक जलनै रौला।</verse>
				<verse number="46">नरक में शरीर स खान वाला कीड़ा कभै नै मरना, और वाँ आगो कभै नै बुझुनो।</verse>
				<verse number="47">अगर तेरो आँख तैथैं पाप करूँछो, त ऊस निकालभेरन खिती दी, अगर एक आँख लीभेरन तैं परमेश्वरा का राज्य में जाले यो तैखिन निको छै। इसो नै हो कि तैं द्वी आँख लीभेरन नरक की आग में खिती जला, जाँक आग में तुम हमेशा तलक जलनै रौला।</verse>
				<verse number="48">नरक में शरीर स खान वाला कीड़ा कभै नै मरना, और वाँ आगो कभै नै बुझुनो।</verse>
				<verse number="49">क्याखिनकि हरेक जन आगा ले शुद्ध करि जालो, जसीकैं बलिदान स नून ले शुद्ध करि जाछो।</verse>
				<verse number="50">नून एक निको चीज छै, लेकिन अगर नूनो को नमकीनपन खतम हैज्यो, फिर ऊस दुबार कसीकैं नमकीन करि जालो। इसीकैं तुम नूना का नियाति गुण राख्या, और आपस में मेल-मिलाप ले रया।”</verse>
			</chapter>
			<chapter number="10">
				<verse number="1">यीशु ले अपून शिष्यून का दगाड़ कफरनहूम गौं छोड़ दीछ, और उन यहूदिया प्रदेश है हो भेरन यरदन नदी का पार आयान। फिर एक बार उक पास भौत ज्यादा भीड़ जामा है ग्यै, और यीशु उनुस अपून तरीका ले उपदेश दिन लाग्यान।</verse>
				<verse number="2">तब फरीसी लोग यीशु का पास आयान, और परीक्षा लीन खिन उनूनथैं पुछून लाग्यान, “क्या यो ठीक छी कि मूसा का नियमा का अनुसार कोई आदिमी अपूनी स्यैनि स तलाक दीभेरन छोड़ी सकछ्यो?”</verse>
				<verse number="3">तब यीशु ले उनून जवाब दीछ, “परमेश्वर ले मूसा का नियम में की हुकुम दी रैछ?”</verse>
				<verse number="4">उन फरीसी लोगून ले क्योछ, “मूसा ले आदिमीन यो अनुमति दी रैछ, कि जो अपूनी स्यैनि स तलाक दिन चाछ, उ ऊस तलाक-पत्र दीभेरन छोड़ी सकछ्यो।”</verse>
				<verse number="5">यीशु ले उनूनथैं क्योछ, “क्याखिनकि तुम लोग हमेशा परमेश्वर मानून है इनकार करछा, तुमार मन का कठोर हुना का कारण मूसा ले यो हुकुम पवित्रशास्त्र में लिखछ्य,</verse>
				<verse number="6">कि जब परमेश्वरे ले शुरूवाद में संसार में सब कुछ बनाछ, और उले उनून नर और नारी करभेरन बनाछ।</verse>
				<verse number="7">येक कारण आदिमी ब्या करभेरन, अपून ईजा-बाब है अलग हो भेरन अपूनी स्यैनि का दगाड़ मिलभेरन रौलो,</verse>
				<verse number="8">क्याखिनकि अब उनून द्वी मिलभेरन एक हो जानान, अब उ द्वी नै पर एक छन।</verse>
				<verse number="9">येक कारण परमेश्वरे ले जैस एक दगाड़ जोड़ रैछ, उनून कोई आदिमी अलग जन करो।”</verse>
				<verse number="10">येक बाद जब यीशु अपून शिष्यून का दगाड़ घर में एकोलो छ्यो, तब उनूनले यो बारिमें पुछ्छै।</verse>
				<verse number="11">यीशु ले उनून जबाब दीछ, “जो कोई ले अपूनी स्यैनि स तलाक दीभेरन दुसारा स्यैनि स दगाड़ ब्या करछ्यो, उ अपूनी पैलि स्यैनि का खिलाफ ब्यभिचार करछ्यो।</verse>
				<verse number="12">और जो स्यैनि अपून पैल आदिमी स तलाक दीभेरन दुसारा आदिमी दगाड़ ब्या करछी, उ अपूनी पैला आदिमी का खिलाफ ब्यभिचार करछी।”</verse>
				<verse number="13">फिर लोग नानतिनान यीशु का पास ल्यून लाग्यान, ताकि यीशु उनार खाँरा में हात राँख भेरन उनून आशीर्वाद दे, लेकिन शिष्यून ले उन डाटछ्य।</verse>
				<verse number="14">यीशु ले यो देखिभेरन और गुस्सा है भेरन अपून शिष्यून थैं क्योछ, “नानतिनान म्यारा पास उन दी और उनून मना जन करा, क्याखिनकि उई लोग जो इन नानतिनान की नियाती भरोसामंद छन, उई परमेश्वरा का राज्य में रौला।</verse>
				<verse number="15">मैं तुमूनथैं सच्ची कुछूँ, परमेश्वरा का राज्य उन लोग द्योलो, जो उक निमयून एक नान-नान्तिना का समान मानछो।</verse>
				<verse number="16">फिर यीशु ले नानतिनान स अपूनी गोदी में लीछ, और उनार खाँरा में हात राखभेरन उनून आशीर्वाद दीछै।”</verse>
				<verse number="17">जसीकैं यीशु अपून शिष्यून का दगाड़ बाट में जान देखना, तब उ बखत एक आदिमी दौड़भेरन उक पास आछ, और उक सामुनि ऊस आदर दीन खिन गिर पड़छ्या, और कुन लागछ्य, “हे गुरू जी, मैं कि काम करूँ जेले मैंस परमेश्वर अनन्त जीवन द्योलो।”</verse>
				<verse number="18">यीशु ले ऊस जबाब दीछ, “तैं मैंथैं भलो किलै कुँछा, सिर्फ परमेश्वर स छोड़िभेरन और कोई लै भलो नाहातिन।</verse>
				<verse number="19">तैं जाण छै, कि मूसा का नियमून में कि लिखीना को छै, ‘हत्या जन कर्या, ब्यभिचार जन करा, चोरी जन करा, झूठ्ठी गवै जन दीया, और अपून फैदा खिन लोगून जन ठग्या, और अपून ईजा-बबाकि इज्जत करा।’ ”</verse>
				<verse number="20">उले यीशु थैं क्योछ, “हे गुरू जी, यो सब हुकमून त मैं नानछना भटे माननै आरयूँ।”</verse>
				<verse number="21">यीशु ले ऊस प्रेम ले देखछ्य, और क्योछ, “लेकिन एक और चीज छै जो तैंस करना की जरूरत छै। जा, और जो कुछ तेरो छै ऊस बेच भेरन गरीब लोगून में बाड़ दे, अगर तैं इसो करछै तो तैंस स्वर्ग में धन मिलोलो, और म्यारा दगाड़ अ और म्येरो शिष्य बन जा।”</verse>
				<verse number="22">जब उ आदिमी ले यीशु स यो कुन सुणछ्य, तो उको चेहरा में उदासी छा जाछी, और उ निराश है भेरन वाँ भटे न्हैग्यो, क्याखिनकि उक पास भौत धन-सम्पति छी।</verse>
				<verse number="23">तब यीशु ले चारू तरफ देखिभेरन अपून शिष्यून थैं क्योछ, “धनवान लोगून को परमेश्वरा का राज्य में पुजून भौत मुश्किल छै।”</verse>
				<verse number="24">शिष्य यीशु की यो बात सुणिभेरन भौत चकित है ग्या। त यीशु ले फिर उनूनथैं क्योछ, “हे भाईयो, जो धन-दौलत में भरोस राखनान, उनून खिन परमेश्वरा का राज्य में पुजून भौत मुश्किल छै।</verse>
				<verse number="25">जसीकैं ऊँट का शियूण का छेद में भटे भ्यार निकालून कठिन छै, उसीकैं धनवान लोगून को परमेश्वरा का राज्य में पुजून कठिन छै।”</verse>
				<verse number="26">जब शिष्यून यो सुणछ्य, तो उन भौत हैरान हो भेरन एक-दुसरा थैं कुन लाग्यान, “एक आदिमी खिन यो हो सकछो की उ बचाई जौ और परमेश्वरा का राज्य में प्रवेश कर सको।”</verse>
				<verse number="27">यीशु ले उनार तरफ देखभेरन क्योछ, “यो लोगून खिन भौत असम्भव छै, लेकिन परमेश्वर भटे हो सकछो। क्याखिनकि परमेश्वर खिन सब कुछ सम्भव छै।”</verse>
				<verse number="28">पतरस ले यीशु क्योछ, “हमार बारिमें क्या? हमूनले तेरो शिष्य बनून खिन अपूनो सब कुछ छोड़ दीछ।”</verse>
				<verse number="29">यीशु ले क्योछ, “मैं तुमूनथैं सच्च कुंछूँ, कि जेले मैं खिन और सुसमाचार खिन अपूनो घर-बार, भाई-बैनि, ईजा-बबा और अपून बाल-बच्चान या गाड़ा-भीड़ को छोड़ रैछ,</verse>
				<verse number="30">ऊस यो जीन्दगी में सौ गुना ईनाम मिलोलो, घर-बारो, भाईयो-बैनिन और ईजा-बबा और गाड़ा-भीड़न यो सब मुसीबतून का दगाड़ पालो, पर उ आदिमी स स्वर्ग में अनन्त जीवन जरूर मिलोलो।</verse>
				<verse number="31">लेकिन जो अपून-आप स महान समझछो, उ तुच्छ होलो; और जैस लोग तुच्छ समझनान, उ महान होलो।”</verse>
				<verse number="32">और यीशु और उक शिष्य यरूशलम शैहर खिन जान बखत बाट में छ्या; और यीशु उनार अघिल-अघिल हिटून मरेछ्या, शिष्यून भौत हैरान छ्या। उन वाँ जानमरेछ्या जाँ भौत लोगून ले उनोरो बिरोध कर राँखछ्यो, और जो दुसारा लोग जो उनार दगाड़ छ्या, उन यो बातुन ले डरून मरेछ्या, कि यरूशलम शैहर में उनार दगाड़ कि होलो। फिर यीशु अपून बारा शिष्यून एकान्त में ली ग्यो, और उन चीजून का बारिमें बात करछ्य, जो उक दगाड़ हुन वाली छी,</verse>
				<verse number="33">यीशु ले क्योछ, “देखा, हम यरूशलम शैहर खिन जानू, और मैं आदिमी को च्योलो प्रधान याजकून का और मूसा का नियम सिखून वाला लोगून का हवाला करि जूलो, और उन मैंस जानले मारून खिन इलजाम लगाल, और गैर-यहूदीन का हवाला कर द्याला।</verse>
				<verse number="34">उन म्येरो मजाक उड़ाला, मैंमें थुकाला, और कोड़ा ले माराल और मैंस जान है मार द्याल, लेकिन मैं तीसारा दिन मुर्दान में है ज्यून हो ज्यूलो।”</verse>
				<verse number="35">तब जब्दी को च्याला याकूब और उको नान भाई यहूना ले यीशु का पास आभेरन क्योछ, “हे गुरू जी, हम चाँनू कि जेलै हम तुमूनथैं माँगला, उ तैं हमून खिन करे।”</verse>
				<verse number="36">तब यीशु ले उनूनथैं पुछ्छै, “तुम कि चाँछा मैं तुमून खिन कि करूँ?”</verse>
				<verse number="37">उनूनले यीशु थैं क्योछ, “जब तैं अपून महिमा का राज्य में आले, तब हमून त्यारा आदर का जाग में एक्कै स त्यारा दैंन तरफ और दुसोरो बौं तरफ बैठाया।”</verse>
				<verse number="38">यीशु ले उनूथैं क्योछ, “तुम नै जाणना कि तुम कि माँगून मरेछ्या? जो सताव मैं सहन करून वालो छूँ, क्या तुम उ सताव सहन करून खिन तैयार छाई? और क्या तुम मरून खिन तैयार छाई, जसीकैं मैं मरून खिन तैयार छूँ?”</verse>
				<verse number="39">शिष्यून ले यीशु थैं क्योछ, “होई, हम ली सकनू।” फिर यीशु ले क्योछ, “जो सताव मैं सहन करून वालो छूँ, तुम सहन कर सक्छाई, और क्या तुम मरून खिन तैयार छाई, जसीकैं मैं मरून खिन तैयार छा।</verse>
				<verse number="40">हालाकि मैंस यो तय करना को अधिकार नाहातिन, म्यारा दैंन और बौं तरफ की जाग कैस मिलेलि। परमेश्वर ले उ जाग उनून खिन तैयार कर राख्यान, जैस उले चुन रैछ।”</verse>
				<verse number="41">यो सुणभेरन बाकि दस शिष्य, याकूब और उक नान भाई यहूना में गुस्सा हुन लाग्यान।</verse>
				<verse number="42">तो यीशु ले सब शिष्यून अपून पास बुलाभेरन क्योछ, “तुम जाणछा, कि जो यो दुनिया में अधिकारी हुनान, उ उनूनमें अपूनी ताकत दिखाभेरन राजा करनान। और उनूनमें है जो ठूला छन, उ लोगून में हक जमूनान।</verse>
				<verse number="43">लेकिन तुम लोगून इसो नै हुन चैनो, और तुमून है जो कोई महान बनून चाँछो, उ तुम सबून को दास बनो।</verse>
				<verse number="44">और तुमून है जो कोई प्रधान बनून चाँछो, उ सबून को दास बनोल।</verse>
				<verse number="45">क्याखिनकि मैं आदिमी को च्योलो अपूनी सेवा करून खिन यो संसार में नै आरयू। बल्कि मैं दुसरान की सेवा करून खिन आरयू। येक कारण आरयू कि मैं अपूनी जाने की कीमत दीभेरन भौतून लोगून का पापून भटे बचुन खिन आरयू।”</verse>
				<verse number="46">यरूशलम खिन जान बखत यीशु और उक शिष्य यरीहो शैहर में आयान। जब उ और उक शिष्य बाँट में छ्या, तो एक भौत भीड़ उनार पछिल-पछिल उन मरेछी। तब तिमाई को च्योलो बरतिमाई जो एक अन्धा भिखारी छ्यो, जो सड़का किनार बैठिना को छ्यो।</verse>
				<verse number="47">जब उले लोगून थैं सुणिछ्य, कि यीशु जो नासरत शैहर को छै, उ यो बाँट भटे जानमर्योछ, तब उले चिल्ला भेरन क्योछ, “हे यीशु, दाऊद की संतान, मैंमें दया कर।”</verse>
				<verse number="48">उनूनमें भटे थ्वाड़ा लोग ऊस डाठून लाग्यान, “कि चुप रौ।” लेकिन उ और लै जोरले चिल्ला भेरन कुन लागछो, “हे यीशु, दाऊद की संतान, मैंमें दया कर।”</verse>
				<verse number="49">जब यीशु ले ऊस यो कुन सुणछ्य, तो उ रूक ग्यो, और लोगून थैं क्योछ, “तैंस म्यारा पास ल्या।” और लोगून ले उ अन्धा स बुलाभेरन क्योछ, “हिम्मत राँख। उठ यीशु तैंस बुलून मरियोछ।”</verse>
				<verse number="50">उई बखत उले अपून ओढ़ीना कि चादर स खितीभेरन जल्दी उठछै, और यीशु का पास आग्यो।</verse>
				<verse number="51">तब यीशु ले उथैं पुछ्छै, “तैं कि चाँछै मैं तैखिन कि करूँ?” उ अन्धा ले क्योछ, “हे गुरू जी, मैं चाँछू कि मैं देखून लागू।”</verse>
				<verse number="52">यीशु ले उथैं क्योछ, “जा जो विश्वास तैं मैंमें करछै उले तैंस चंगा करछ्य।” और उ बखत भटे उ देखून लागछ्यो, और उ यीशु का दगाड़ न्हैग्यो।</verse>
			</chapter>
			<chapter number="11">
				<verse number="1">जब यीशु और उनार शिष्य यरूशलम शैहर आयान, त उन बैतफगे और बैतनियाह गौं में पुजनान, यो गौं जैतून पहाड़ा का पास छ्या। तो यीशु ले अपून शिष्यून में भटे द्वी शिष्यून यो कैभेरन भेजछ्य,</verse>
				<verse number="2">“कि सामुनि वाला गौं में जा, और उ गौं में पुजनै तुमून एक किल में गधीक बच्चा बाँदिना को मिलोल, जैमे ऐल तलक कोई नै बैठि र्यो। तुम ऊस खोलभेरन म्यारा पास ल्या।</verse>
				<verse number="3">अगर कोई तुमूनथैं पुछोलो, ‘कि येस खोल भेरन काँ ली जानमरेछ्या?’ तो कया, ‘हमार प्रभु स येकी जरूरत छै, और उ उई बखत याँ भेज द्यालो।’ ”</verse>
				<verse number="4">शिष्यून ले जाभेरन गधीक बच्चा स घरा का भ्यार बाँट में बाँदिना को देखछ्य, और ऊस खोलून लाग्यान।</verse>
				<verse number="5">तब वाँ ठाँड़ लोगून ले पुछ्छै, “यो कि करून मरेछा? तुम यो गधीक बच्चास किलैं ली जानमरेछ्या?”</verse>
				<verse number="6">जसो यीशु ले कईनाको छ्यो, ऊसोई शिष्यून ले उन लोगून थैं क्योछ; तब उन लोगून ले गधी का बच्चास लीजान दीछ।</verse>
				<verse number="7">उन शिष्यून ले गधीक बच्चास यीशु का पास ल्यान, और उक मलि में अपून कपाड़ा डाल्यान और यीशु उमें बैठियान।</verse>
				<verse number="8">तब भौत लोगून ले यीशु का स्वागत करून खिन बाँट में अपून-अपून शौल और पंखि बिछा दीयान, और थ्वाड़ा लोगून ले त गाड़ान में भटे खजूर का हांगान काटि-कटि भेरन बाँट में बिछा दीयान।</verse>
				<verse number="9">और लोग यीशुका दगाड़ अघिल-पछिल हिटू मेछ्या, उन जोरले चिल्ला-चिल्ला भेरन कुछ्या, “होशाना।” धन्य छै उ जो परमेश्वरा का नाम ले उछो।</verse>
				<verse number="10">हमोरो बाब दाऊद को राज्य जो उन मेरियोछ; उ धन्य छै। “परमेश्वर की होशाना; जो स्वर्ग में रूँछो।”</verse>
				<verse number="11">फिर यीशु यरूशलम शैहर में पुजभेरन मन्दिर में आछ, और चारू तरफ चीजून देखछ्य, अपून बार शिष्यून का दगाड़ वापिस बैतनियाह गौं खिन न्हैजाछो, क्याखिनकि भौत ब्याल हो गैछी।</verse>
				<verse number="12">दुसारा दिना रात्तै जब यीशु और उक शिष्य बैतनियाह गौं भटे यरूशलम शैहरा का तरफ जानमरेछ्या, तब बाँट में हिटून-हिटून यीशु स भुख लागछ्य।</verse>
				<verse number="13">तब वाँ थ्वाड़ा दूर में उ एक हरिया-भरिया तिमूला का रूख स देखिभेरन उक पास ग्यो, कि उमें भटे खान खिन के फल मिलज्यौ, लेकिन पातून का अलावा और केले नै पायो, क्याखिनकि उ फलो को बखत नै छ्यो।</verse>
				<verse number="14">तब यीशु ले उ रूख थैं क्योछ, “आज भटे तेरो फल कभै कोई नी खा।” और यो बात उक शिष्य सुणन मरेछ्या।</verse>
				<verse number="15">येक बाद यीशु और उनार शिष्य यरूशलम शैहर में आयान, और उन मन्दिर का खाला में ग्यान; वाँ जो लोग बैठभेरन ब्यापार करून रेछ्या, यीशु उनून वाँ भटे भ्यार निकालून लागछ्य, और उनूनले रूपयान बदलून वालान का मेज और कबूतर बेचन वालान का तखता पलट दीयान।</verse>
				<verse number="16">और यीशु ले लोगून हुकुम दीछ, कि उन मन्दिर का खाला का आश-पास चीजून लीजान बन्द करून।</verse>
				<verse number="17">फिर यीशु ले लोगून थैं क्योछ, “पवित्र-शास्त्र इसो कुंछो, म्येरो मन्दिर सबै जातिन का लोगून खिन प्रार्थना को घर होलो, पर तुमून ले यो प्रार्थना घर स डाकून को अड्डा बना रैछ।”</verse>
				<verse number="18">जब प्रधान याजकून ले और मूसा का नियम सिखून वाला लोगून ले सुणछ्य, कि यीशु ले की करछ्य और की क्योछ, तो उन ऊस मारना का मौका खोजून लाग्यान, पर उन इसो करून खिन डर छ्या, क्याखिनकि भीड़ का सब लोग उकी शिक्षा ले हैरान छै।</verse>
				<verse number="19">और जब ब्याल भैछ, तो यीशु और उक शिष्य बैतनिय्याह गौं खिन न्हैजानान।</verse>
				<verse number="20">दुसारा दिन रातैनि यीशु और उक शिष्य फिर यरूशलम शैहर खिन, उई बाँट भटे वापस जानमरेछ्या, जै बाँट भटे उन आ रै छ्या, तब उनेरि नजर उई तिमूला का रूख में पड़छ्य, जैस यीशु ले श्राप दी रेछ्यो, उ रूख जाड़ तक सुख ग्यान।</verse>
				<verse number="21">तब पतरस स उ बात याद आछ, और उले यीशु थैं क्योछ, “हे गुरू जी, देखा, तिमूलो को रूख जैस तैंले श्राप दी रेछ्यो, उ रूख जाड़ा तक सुख ग्यान।”</verse>
				<verse number="22">यीशु ले ऊस जबाब दीछ, “विश्वास करा कि जो तुमूनले माँग रैछ, उ परमेश्वर तुमून खिन करोलो।</verse>
				<verse number="23">मैं तुमूनथैं सच्ची कुंछूँ, जो ले विश्वास ले यो पहाड़ थैं कौलो, ‘तैं याँ भटे उखड़ भेरन समुद्र में जा पड़,’ और उ अपून मन में शक जन करो, बल्कि यो विश्वास करो कि जो उले माँ रैछ परमेश्वर ऊस पुरो करोलो, तब परमेश्वर उ खिन कर द्योलो।</verse>
				<verse number="24">येक कारण मैं तुमूनथैं कुंछूँ, कि जो तुम प्रार्थना में मांगछा, तो विश्वास करा कि परमेश्वर ले पैलि है तुमेरि बिनती सुण है छ्य, और परमेश्वर तुमून खिन कर द्योलो।</verse>
				<verse number="25">इसीकैं यीशु ले फिर क्योछ, कि प्रार्थना करून बखत अगर तुमार मन में के खिनै कोई शिकायत छै; तो पैलि ऊस माफ कर दी, तब तुमोरो पिता जो स्वर्ग में छै, तुमार पाप ले माफ करोलो।</verse>
				<verse number="26">अगर तुम दुसरान का गलतिन माफ नै करला, तो तुमोरो पिता जो स्वर्ग में छै, तुमार पापून ले माफ नी कर।”</verse>
				<verse number="27">एक बार फिर यीशु और उक शिष्य यरूशलम शैहर में वापस आयान, जब उ मन्दिर में घुमून मरेछ्यो, तब उ बखत प्रधान याजक और मूसा का नियम सिखून वाला लोग और यहूदी अगुवा यीशु का पास आभेरन पुछून लाग्यान,</verse>
				<verse number="28">“तैं यो काम केका अधिकार ले करछै? और यो काम करना को अधिकार तैंस कैले दीछ?”</verse>
				<verse number="29">यीशु ले उनूनथैं क्योछ, “मैंले तुमूनथैं एक सवाल पुछ्छू, और अगर तुम मैंस येक जबाब द्यला, तब मैं तुमून बतुलो कि यो काम केका अधिकार ले करछूँ।</verse>
				<verse number="30">यहूना स लोगून बपतिस्मा दीन खिन कैले भेजछ्य? क्या यो परमेश्वर ले भेजिना को छ्यो, या आदिमी ले? तुम मैंस येक जबाब दी।”</verse>
				<verse number="31">तब उन लोग आपस में यो बात करून लाग्यान, “अगर हम कुंनू, कि यहूना परमेश्वरा का अधिकार ले बपतिस्मा दीछ्यो, तो उ हमून थैं पुछोलो, फिर तुमूले यहूना में विश्वास किलैं नै कर्यो?</verse>
				<verse number="32">और हम यो ले नै के सकना, कि यहूना स अधिकार लोगून का तरफ भटे छयो, उन डर छ्या कि अगर हम इसी कुंनू, तो लोग गुस्सा हो ज्याला, क्याखिनकि भौत सारा लोग यो बात स जाणनान, कि यहूना सच्ची में परमेश्वरो को संदेश दिनवाला छ्यो।”</verse>
				<verse number="33">तब उनूले यीशु स जबाब दीछ, “हमून पत्तो नाहातिन।” तब यीशु ले क्योछ, “मैंले तुमून नै बतूनू कि मैं कैका अधिकार ले यो काम करछूँ।”</verse>
			</chapter>
			<chapter number="12">
				<verse number="1">उक बाद यीशु ले उन कुछ यहूदी अगुवान एक कहानी सुणाभेरन क्योछ, “एक आदिमी ले अंगूर का बगीच लगाछ, और उ बगीच का चारों तरफ दीवार लगाछ, और अंगूरो को रस निकालन खिन और जामा करून खिन एक जाग बनाछ, और देखभाल करून खिन पक्को छाँनो बनाछ; और किसानून उको ठेका दीभेरन खुद दूर देश न्हैग्यो।</verse>
				<verse number="2">जब अंगूर पाक्नाका बखत आछ, त बगीच का मालिक ले अपून सेवक स, उन किसानून का पास फसलून को हिस्सा लीन खिन भेजछ, जिनुले बगीच को ठेका ली राखछ्यो।</verse>
				<verse number="3">लेकिन किसानून ले उ सेवक स पकड़ भेरन मारछ्य, और खाली हात वापस उ भेज दीछ।</verse>
				<verse number="4">फिर मालिक ले दुसोरो सेवक स भेजछ, उन किसानून ले उ सेवको को खोरो फोड़ि दीछ, और उकी बेजती करछ्य।</verse>
				<verse number="5">येक बाद फिर बगीच का मालिक ले तीसोरो सेवक भेजछ, पर उन किसानून ले उ सेवक स ले मार दीछ; फिर और कतुक सेवक भेजियान, किसानू ले कईन की पिटाई करछ्य, और कई सेवकून तैं जान है मारी दीछ।</verse>
				<verse number="6">आखिर में बगीच का मालिका का पास केवल एक जन बचिना को छ्यो, उ उको च्योलो छ्यो, बगीच का मालिक ले अपून च्याला स यो सोचभेरन किसानून का पास भेजछ, कि उन म्यारा च्याला को आदर करला।”</verse>
				<verse number="7">लेकिन जब किसानून ले देखछ्य, कि बगीच का मालिक को च्योलो ऊनमर्योछ, तब उनूले आपस में यो बात करछ्य, योई त असली वारिस यो छै, “आ, हम यैस जान हे मारी दीनू, तो फिर उकी सारी जैजाद हमरि है जालि।</verse>
				<verse number="8">तब उनूले ऊस पकड़ भेरन जान है मारी दीछ, और उकी लाश उठाभेरन बगीच है भ्यार खित दीछ।”</verse>
				<verse number="9">तब यीशु ले उन यहूदी अगुवान थैं पुछ्छै, “अब अंगूरो बगीच का मालिक की करिलो? उ आभेरन उन ठेकदारून मार द्योलोई, और अंगूरो बगीच स दुसारा ठेकदारून दी द्योलो।”</verse>
				<verse number="10">क्या तुमून ले पवित्रशास्त्र में यो बचन नै पढ़ियो, “जो ढूंगा स राजा मिस्त्रीन ले बेकार समझछ, उई कुना को ढूंगो बन ग्यो,</verse>
				<verse number="11">यो प्रभु का तरफ भटे भ्योछ, और यो हमार नजर में भौत अद्धभुत छै।”</verse>
				<verse number="12">यहूदी अगुवा समझी ग्या, “कि यीशु ले यो कहानी हमार बारिमें क्योछ।” येक कारण उन यीशु स पकड़ून चाँछ्या, लेकिन भीड़ का डर का कारण ले उन उ बखत यीशु स नै पकड़यो, ऊस छोड़िभेरन न्हैग्या।</verse>
				<verse number="13">तब यहूदी अगुवान ले हेरोदेस राजा का थ्वाड़ा समर्थक और फरीसी लोगून यीशु का पास भेजियान कि यीशु स बातुन में फसा सकून।</verse>
				<verse number="14">और उनूनले आभेरन यीशु थैं क्योछ, “हे गुरू जी, हम यो जाणनू कि तैं हमेशा सच्ची बतूछै, और तैं उनून है चिन्ता नै करने कि उन त्यारा बारिमें की सोचनान, क्याखिनकि तैं सबून का दगाड़ एक समान बरताव करछै। चाहे कोई ले हो, बल्कि सच्चाई ले परमेश्वरा का बाँट का उपदेश दीछै। तो क्या मूसा नियम-कानून का अनुसार कैसर महाराजा स कर दिन निको छी, या नाहातिन?”</verse>
				<verse number="15">हमून दीन चैछो या नै दीन चैछो? पर यीशु ले उनोरो छल कपट स जाणी भेरन क्योछ, “तुम मेरि परीक्षा किलैं लिंछा? एक चाँदी सिक्का ल्या और मैंस दिखा।”</verse>
				<verse number="16">तब उन एक सिक्का ल्यान, यीशु ले उनूनथैं क्योछ, “यो सिक्का में कैको छाप और कैका नाम छै?” उनूले जबाब दीछ, “महाराजा को।”</verse>
				<verse number="17">और यीशु ले उनूनथैं क्योछ, “जो कैसर महाराजा को छै उ कैसर दी, और जो परमेश्वरो को छै ऊस परमेश्वर स दी।” तब यो बात सुणिभेरन उन लोग हैरान है ग्या।</verse>
				<verse number="18">सदूकी लोग यो विश्वास नी करछ्या कि मरिनाका लोगून को ज्यून हुनो छैई नै, येक कारण कुछ सदूकी लोग यीशु का पास आभेरन उनूथैं यो पुछून लागनान,</verse>
				<verse number="19">“हे गुरू जी, मूसा का नियम-कानून में हमून खिन लिख रैछ, कि अगर कैको घरवालो बिना औलाद का मेरि जाछो, तब उक भाई उ विध्वा का दगाड़ ब्या करभेरन अपूनी भाई खिन औलाद पैद कर सको, जैल उक वंश अघिल कै बढ़ सको।</verse>
				<verse number="20">और उनूनले यीशु थैं क्योछ, एक घर में सात भाई छ्या, और सबून है ठूला भाई ब्या भ्योछ, लेकिन उ बिन औलाद का मरि ग्यो,</verse>
				<verse number="21">तब दुसारा भाई ले उ विध्वा का दगाड़ ब्या करछ्य, और उले बगैर औलाद का मरि ग्यो। फिर तिसरा ले इसो करछ्य।</verse>
				<verse number="22">और सातू भाईन ले उ विध्वा का दगाड़ ब्या करछ्य, और सबै बिना औलाद का मर ग्या, और सबून का बाद उ स्यैनि ले मरि ग्यै।</verse>
				<verse number="23">अब हमून बतो उ उन सातू भाईन की घरवाली भैछ, जब उ ज्यून होलि तब उ स्यैनि कैकी घरवाली होलि?”</verse>
				<verse number="24">तब यीशु ले उनूनथैं क्योछ, “क्या तुम यो कारण ले भूल में नै पड़िग्या? क्याखिनकि तुम नै जाणना पवित्रशास्त्र कि कुंछो, और नै परमेश्वरे की सामर्थ स जाणना।</verse>
				<verse number="25">क्याखिनकि जब लोग मरिन में भटे ज्यून होला, तो उन लोग ब्या नी करून, जसीकैं स्वर्ग में रूनवाला स्वर्गदूत ब्या नै करना।</verse>
				<verse number="26">जाँ तक मरिन में भटे ज्यून हुना को बारिमें छै, तो क्या तुमूनले मूसा कि किताब में नै पडियो, जाँ जलीना की झील की घटनाक बारिमें छै, परमेश्वरे ले मूसा थैं क्योछ; ‘मैं त्यार पुरखा अब्राहम, इसहाक और याकूब का परमेश्वर छूँ।’</verse>
				<verse number="27">क्याखिन तुम भ्रम में पड़ै रैछा, कि परमेश्वर मरीनाक लोगून को नै बल्कि ज्यून लोगून को परमेश्वर छै।”</verse>
				<verse number="28">और मूसा का नियम सिखून वाला लोगून में भटे एकले यो सब बात सुणछ्य और समझी ग्यो, कि यीशु ले सदूकिन सही जबाब दीछ। और उले यीशु थैं पुछ्छै, “हे गुरू जी, परमेश्वर की दीईना का जदुक आज्ञा छन, उनूनमें है सबून है खास आज्ञा को छै?”</verse>
				<verse number="29">यीशु ले ऊस जबाब दीछ, “सबून है जरूरी यो छै। ‘हे इस्राएली लोगो सुणा, हम जै परमेश्वर की उपासना करनू, उई एकमात्र परमेश्वर छै।</verse>
				<verse number="30">तुमूले अपून प्रभु अपून परमेश्वर स पुर मन ले, पुर प्राण ले, पुर बुद्धि ले, पुर ताकतले प्रेम करून चैंछ।’</verse>
				<verse number="31">दुसोरो आज्ञा यो छै, ‘जस प्रेम तुम अपून दगाड़ करछा, ऊसोई प्रेम तुमूनले अपून पड़ोसिन का दगाड़ ले करून चैंछ।’ इन द्वी आज्ञा है ठूली और कोई आज्ञा नाहातिन।”</verse>
				<verse number="32">मूसा का नियम सिखून वाला आदिमी ले यीशु थैं क्योछ, “हे गुरू जी, तैं ठीक और सच्ची कुछै, कि केवल प्रभु परमेश्वर छै, और उक सिवाय कोई परमेश्वर नाहातिन।</verse>
				<verse number="33">हमूले अपून प्रभु अपून परमेश्वर स पुर मन ले, पुर प्राण ले, पुर बुद्धि ले, पुर ताकतले प्रेम करून चैंछ।” दुसोरो आज्ञा यो छै, “जस प्रेम तुम अपून दगाड़ करछा, ऊसोई प्रेम तुमूनले अपून पड़ोसिन का दगाड़ ले करून चैंछ। यो आज्ञा सब बलिदान और भेंट चढ़ून है ज्यादा बढ़भेरन छै।”</verse>
				<verse number="34">जब यीशु ले देखछ्य, उले ठीक जबाब दीछ, तब उनूले उथै क्योछ, “तुम परमेश्वरा का राज्य नजिक छा, और येक बाद कैसले यीशु थैं केले सवाल पुछना की हिम्मत नै भ्ये।”</verse>
				<verse number="35">फिर यीशु ले मन्दिर में उपदेश दिन बखत यो पुछ्छै, “मूसा का नियम सिखून वाला लोगून क्याखिन कुंनान कि मसीह दाऊद राजा को वंशज छै?</verse>
				<verse number="36">पवित्र आत्माले दाऊद राजा का द्वारा क्योछ, ‘प्रभु ले म्यारा प्रभु थैं क्योछ, म्यारा दैन तरफ बैठ जब तक कि मैं त्यारा बैरिन त्यारा खुटान का चौकी नै कर द्यूँलो।’</verse>
				<verse number="37">दाऊद राजा त खुद मसीह थैं प्रभु कुँछो, फिर उ उको वंशज कसीकैं हो सकछ्यो?” और फिर भौत लोग यीशु का पास आभेरन उनेरि बात खुशी-खुशी सुण छ्या।</verse>
				<verse number="38">यीशु ले उपदेश दीभेरन उनूनथैं क्योछ, “तुम यो मूसा का नियम सिखून वाला लोगून है सतर्क रया, जो लम्बा-लम्बा मेहंगा चोला पैन भेरन घुमन और बजार में लोगून थैं उनुस नमस्कार करून पसन्द करनान,</verse>
				<verse number="39">और यहूदी सभाघर में आदर वाली जागान और दावतून मेंले खास-खास जागान में बैठून पसन्द करनान।</verse>
				<verse number="40">लेकिन इन ठगभेरन विध्वाऊन की सब जैजाद खुद लुट लीनान, और फिर लोगून दिखून खिन देर तलक प्रार्थना करनान, लेकिन परमेश्वर उनून कड़ी सजा द्योलो।”</verse>
				<verse number="41">मन्दिर में जाँ दानपात्र राखिना का छ्यो, वाँ बैठि भेरन यीशु लोगून दान दिन देखून मरेछ्या; भौत सेठ लोग भौत कुछ दान डालछ्य।</verse>
				<verse number="42">तब एक गरीब विध्वा ले आभेरन द्वी ताँबा सिक्का दानपात्र में डाल्यान जिनरी कीमत भौत कम छी।</verse>
				<verse number="43">यो देखिभेरन यीशु ले अपून शिष्यून बुलाभेरन उनूनथैं क्योछ, “मैं तुमूनथैं सच्ची कुंछू, कि दान दिन वालान में सबून है ज्यादा दान यो विध्वा ले दीछ।</verse>
				<verse number="44">किलैंकी सबून ले अपूनी कमाइकी ज्यादा बचत में है थ्वाड़ा हिस्सा दीछ, लेकिन यैले अपूनी गरीबी में लै येक पास जतुक छ्यो, सबै दी दीछ, और अपून खिन के नै बचायो।”</verse>
			</chapter>
			<chapter number="13">
				<verse number="1">येक बाद जब यीशु मन्दिर भटे भ्यार जानमरेछ्या, तब उक एक शिष्य ले क्योछ, “गुरू जी, देखा, इन शानदार मकानून कतुक ठूलो ढुगाले बनाईना का छन।”</verse>
				<verse number="2">यीशु ले उथैं क्योछ, “क्या तुम इन शानदार मकानून देखून मरेछा? यो सब ढ़ुगा का बनाईना का मकान एक दिन पुर तरीका ले नाश करि जाला।”</verse>
				<verse number="3">तब यीशु जैतून का पहाड़ में जाभेरन ओराला में बैठ रियोछो, और वाँ भटे सामुनि मन्दिर दिखाई दियूछो, तो पतरस याकूब, यहूना और अन्द्रियास ले यीशु थैं पुछ्छै।</verse>
				<verse number="4">“हमून बता कि, यो बात कब होलि? और जब यो सारी चीज होला, त उन बातुन को पुरो हुना को कि चिन होलो?”</verse>
				<verse number="5">यीशु ले उनूनथैं क्योछ, “सतर्क रौ कि तुम कैका बहकाव में जन आया।</verse>
				<verse number="6">येक कारण भौतसा झूठ्ठा लोग तुमार पास म्यारा नाम ले आला, और मसीह हुना को दावा करभेरन भौत लोग बहका द्याला।</verse>
				<verse number="7">जब तुम लड़ै-झगड़ानकि खबर सुणला, तब तुम डरिया जन, क्याखिनकि पैलि इसो हुन जरूरी छै, लेकिन उ बखत दुनिया का अन्त जल्दी नी हो।</verse>
				<verse number="8">एक जाति को लोग दुसारा जाति लोगून में हमला कराला, और एक राज्य दुसारा राज्य में हमला करोलो। सब जागान में भूचाल आलो, और अकाल पड़ाला। लेकिन यो चीज केवल मुसीबतून शुरूवाद छै जसीकैं एक गर्भवती स बच्चास पैद हुन है पैलि पीड़ हुछी।”</verse>
				<verse number="9">जब इन बातुन की शुरूवाद होलि, “तुम सतर्क रया, क्याखिनकि लोग तुमून महासभा में सौंप द्याला, तुमून यहूदी सभाघर में लीभेरन माराला, और उन म्यार कारण ले तुमून राजा और मंत्रीन का सामुनि लै ठाँड़ करि जाला, फिर तुम उनून म्यारा बारिमें गवाही देला।</verse>
				<verse number="10">लेकिन संसार खतम हुना है पैलि पुर संसार का सब जातिन का लोगून सुसमाचार प्रचार करि जौ।</verse>
				<verse number="11">जब लोग तुमून पकड़ भेरन कचैरी में सौपाला, त यो चिन्ता जन कर्या, ‘कि हम कि बोलला।’ उई बखत तुमून बताई जालो की बोलून छै, क्याखिनकि बोलून वाला तुम नै बल्कि पवित्र आत्मा होलो।</verse>
				<verse number="12">भाई अपून भाई स, और च्योलो अपून बाबस मारून खिन दी द्यलो, और बच्चा अपून ईजा-बाब का खिलाफ हो भेरन मरवा द्याला।</verse>
				<verse number="13">क्याखिनकि तुम मैंमें विश्वास करछा, और म्यारा नामका कारण सब लोग तुमार दगाड़ बैर करला लेकिन जो आखरी तलक धीरज धरोल, उको उद्धार होलो।”</verse>
				<verse number="14">यीशु ले फिर क्योछ, पढ़ून वाला समझ ली। “जब तैं उ उजाड़नवाली घृणित चीज स जाँ नै हुन चैनी वाँ ठड़ीनाकि देखला, उ बखत जो आदिमी यहूदिया प्रदेश में होला, उन भाजभेरन डॉण न्हैजून।”</verse>
				<verse number="15">जो घरा का पाखा में होला, उन अपून समान ल्यूनखिन भितर जन जाया।</verse>
				<verse number="16">और जो गाड़ान में होलो, उन अपून कपाड़ा ल्यूनखिन वापस अपून घर में जन लौटिया।</verse>
				<verse number="17">उन स्यैनिन खिन भयानक बखत होलो जो गर्भवती और जो नानतिना दूध पिलून वाला होला, उ बखत उनून खिन भागून भौत मुश्किल हो जालो।</verse>
				<verse number="18">परमेश्वर थैं प्रार्थना करा, कि यो सब जाड़ान का दिनून में जन हो।</verse>
				<verse number="19">क्याखिनकि परमेश्वरा का बनाईना का संसार में उ दिनून में भौत क्लेश होलो, जो आज तलक नै हैरोछ और नै कभै होलो।</verse>
				<verse number="20">परमेश्वर ले उ बखतो को क्लेश स कम करना को फैसला लीछ, नै त हर कोई मर जानो, लेकिन उनूले अपून चुनिना का लोगून का कारण ले उ बखत स कम कर रैछ।</verse>
				<verse number="21">उ बखत अगर कोई तुमूनथैं कौल, “देखा, मसीह याँ छै,” या वाँ छै, लेकिन तुम बिल्कुल उनूनमें भरोस जन कर्या।</verse>
				<verse number="22">क्याखिनकि झूठ्ठा मसीह और परमेश्वरो को संदेश दिनवाला झूठ्ठा लोग, और उन लोग चिन और चमत्कारा का काम लै दिखाभेरन परमेश्वरा का चुनिना का लोगून भरमा द्याला।</verse>
				<verse number="23">येक कारण तुम सतर्क रया, क्याखिनकि मैले तुमून पैलि बता हैछ कि दुनिया का अन्त है पैलि कि-कि होलो।</verse>
				<verse number="24">“लेकिन उ दिनून में क्लेश का खतम हुना का बाद, सूरज की रोशनी खतम हो जालि और चन्द्रमा उज्यालो दीनो बन्द कर द्योलो।</verse>
				<verse number="25">और आकाश भटे तारा खितीन लागल; और आकाश की शक्ति हिलाई जालि।</verse>
				<verse number="26">उ बखत लोग, मैं आदिमी का च्याला स बड़ी सामर्थ और महिमा का दगाड़ बादलून में उन देखला।</verse>
				<verse number="27">उ बखत मैं अपून स्वर्गदूतून भेजिभेरन, संसारा का चारों तरफ का दिशाओं भटे अपून चुनिना का लोगून जामा करूँलो।”</verse>
				<verse number="28">फिर यीशु ले शिष्यून थैं क्योछ, “यो तिमुल को रूख स देखिभेरन सिखा। जब उक हांगा और पत्ता निकलून लागनान; तब तुम जाणछा कि गरमी मौसम उनवालो छै।</verse>
				<verse number="29">इसीकैं जब तुम यो सब बातुन हुन देखला, जैका बारिमें मैंले तुमून बताछ, तब जान लिया कि मैं आदिमी को च्योलो भौत जल्दी वापस उनवालो छूँ, बल्कि द्वार मेंई छूँ।</verse>
				<verse number="30">मैं तुमूनथैं सच्ची कुंछूँ, कि यो पीढ़ी लोग तब तक नी मरून, जब तलक यो सब बात पुर नी है जालि।</verse>
				<verse number="31">यो आकाश और धरती लै नाश है जाला, लेकिन जो बात मैंले कै राख्यान हमेशा तक रोला।</verse>
				<verse number="32">यीशु ले फिर क्योछ, कोई लै नै जाणून, कि उ बखत और दिन कब आलो, ना त स्वर्गदूत और ना त मैं आदिमी को च्योलो, लेकिन केवल पिता परमेश्वर जाणनान।</verse>
				<verse number="33">देखा, सतर्क रया और प्रार्थना करनै रया; क्याखिनकि तुम नै जाणना इन चीज कब होलो, और मेरो उनाको बखत की होलो।</verse>
				<verse number="34">सुणा म्यारा जाना को और वापस उना इसो होलो, जसीकैं उ आदिमी जो अपून घर छोड़ी भेरन लम्बी यात्रा में जाछो, और जान है पैलि अपून सब नौकरून बतूछो, कि को काम कैले करूँन छै, और अपून घराका चौकदार थैं कूछो मेरो उनाको इन्तजार करे।”</verse>
				<verse number="35">यीशु ले फिर अपून शिष्यून थैं क्योछ, “क्याखिनकि तुम नै जाणना घरो को मालिक कब आलो, यो कारण तुम सतर्क रौ, घरो को मालिक ब्यालकै, या आधा रात में या फिर रात ब्यान बखत या रात्तै बखत।</verse>
				<verse number="36">अगर मैं अचानक आभेरन तुमून उ आदिमी की नियाती तैयार नै देखूलो, जो पड़ीनाको रूनान।</verse>
				<verse number="37">और जो मैं तुमूनथैं कुंछूँ, उई सबूनथैं कुंछूँ; ‘हमेशा म्यारा उन खिन तैयार रौ।’”</verse>
			</chapter>
			<chapter number="14">
				<verse number="1">फसह और अखमीरी रोटा को त्यार शुरू हुन खिन द्वी दिन बचिना का छ्या, तब प्रधान याजक और मूसा का नियम सिखून वाला लोग यीशु स चुप-चापल पकड़ भेरन मारूना कि तरकीब सोचून लाग्यान।</verse>
				<verse number="2">लेकिन उन कुन मरेछ्या, कि पर्व का बखत इसो करून ठीक नाहातिन, काँई इसो नै हो कि लोग दंगा करून लागून।</verse>
				<verse number="3">उ बखत जब यीशु बैतनियाह गौं में अपून शिष्यून का दगाड़ शमौना का घर में छ्यो, जैस कोढ़ी भटे यीशु ले चंगो कर राँछ्यो, जब उन खान खा मरेछ्या, तब एक स्यैनि संगमरमर का शीशी में जटामांसी को भौत मेहंगा इत्र लीभेरन वाँ आछ; और उको आदर करून खिन उले शीशी को मुँख तोड़ी भेरन, पुर इत्र यीशु का ख्वार में डाल दीछ।</verse>
				<verse number="4">लेकिन उनूनमें भटे थ्वाड़ा लोग गुस्सा हो भेरन कुन लाग्यान, “येले इदुक मेहंगा इत्र स बरबाद नै करूँ चैछ।</verse>
				<verse number="5">क्याखिनकि यो इत्र इदुक कीमती छै, जदुक एक आदिमी एक साले कि मजूरी है ज्यादा छ, और येस ले इदुक कीमत में बेच भेरन उन गरीबून की मद्दत कर सकछ्या।” और उन लोग उ स्यैनि स डाठू लाग्यान।</verse>
				<verse number="6">लेकिन यीशु ले उनूनथैं क्योछ, “तुम येस बकस दी और परेशान जन करा; येले मैं खिन निको काम कर रैछ।</verse>
				<verse number="7">गरीब तैं तुमार दगाड़ हमेशा रोला, जब ले तुम चाला तुम उनेरि मद्दत कर सकछा, पर मैं तुमार दगाड़ हमेशा नी रू।</verse>
				<verse number="8">यो स्यैनि जो निको काम कर सकछी उले मैं खिन करछ्य, क्याखिनकि येले म्यारा अन्तिम संस्कार है पैलि म्यारा आंग में इत्र लगाछ, ताकि ऊस खिन तैयार करि जौ।</verse>
				<verse number="9">मैं तुमूनथैं सच्ची कुंछूँ, सारा दुनिया में जाँ ले सुसमाचार सुणाई जालो, वाँ येक काम की चर्चा ले उक याद में करि जालि।”</verse>
				<verse number="10">तब यहूदा इस्करियोती जो उनार बार शिष्यून में भटे एक छ्यो, उ प्रधान याजकून का पास ग्योछ, और उनूनथैं कुंछो मैं यीशु स पकड़ून में तुमेरि मद्दत करूँलो।</verse>
				<verse number="11">और याजक यो बात सुणिभेरन खुश भ्यान, और उनूले यहूदा इस्करियोती स धन दिना का वादा करछ्य। और उई बखत है उ यीशुस धोखा ले पकड़ूना का ताक में रूछो, कि कसीकैं यीशु स उनार हवाला करूँ द्यू।</verse>
				<verse number="12">अखमीरी रोटा का पर्व का पैलि दिन, जैमें उन भेड़ को पाठाकी बलि करछ्या, तब यीशु का शिष्यून ले उथैं पुछ्छै, “तैं काँ चाँछै कि हम काँ जानू और फसह को खानो तैयार करा?”</verse>
				<verse number="13">तब यीशु ले अपून द्वी शिष्यून यो कैभेरन भेजछ्य, “यरूशलम शैहर में जाँ,” वाँ तुमून एक आदिमी पानि को भरिना फूँलो लीजान देखला, तुम उक पछिल-पछिल जाया,</verse>
				<verse number="14">और जो घरा का भितर उ जालो, उ घरा का मालिक थैं तुम इसो कया, कि गुरू जी ले पुछ रैछ, “कि मैं खिन उ कमरा काँ छै, जाँ मैं अपून शिष्यून का दगाड़ फसह को खानो खूलो?</verse>
				<verse number="15">फिर तुमून उ घरा का द्वी मंजिल में एक सजाईना को ठूलो कमरा दिखीलो; वाँ हम सबून खिन पर्व खान खिन तैयारी कर्या।”</verse>
				<verse number="16">तब द्वी शिष्य निकल भेरन शैहर में आयान, और जसो यीशु ले उनूथैं कईना को छ्यो, ऊसोई भ्योछ और उनूले फसह को खानो तैयार करछ्य।</verse>
				<verse number="17">जब ब्याल हुन लागछी, तब यीशु अपून बारा शिष्यून का दगाड़ उ घर में आछ।</verse>
				<verse number="18">और जब उ बैठि भेरन खान-खान मरेछ्या, तब यीशु ले उनूनथैं क्योछ, “मैं तुमूनथैं सच्ची कुंछूँ, कि तुमून में भटे एक जो म्यारा दगाड़ खानो खान मर्योछ, उ मैंस म्यारा दुश्मनून का हवाला करोलो।”</verse>
				<verse number="19">यीशु की यो बात सुणिभेरन शिष्य उदास हो जानान, और एक-एक कैभेरन उथैं पुछून लाग्यान, “क्या उ मैं छूँ?”</verse>
				<verse number="20">यीशु ले जबाब दीछ, “उ तुम बार शिष्यून में भटे एक छ, और जो म्यारा थाली में रोटो डूबाभेरन खान मर्योछ।</verse>
				<verse number="21">मैं आदिमी को च्याला का बारिमें यो पवित्र-शास्त्र में लिखीना को छै, मैं उसीकैं मारीजूलो लेकिन उ आदिमी खिन भयानक सजा होलि, जो मैंस धोखा ले उनार हवाल कर द्योलो। उ खिन त योई निको छ्यो, कि उ यो संसार में पैदाई नी हुनो।”</verse>
				<verse number="22">जब उन खानो खानमरेछ्या, तब यीशु ले रोटो लीछ और परमेश्वरो को धन्यवाद करभेरन टोड़छै, और अपून शिष्यून दीभेरन क्योछ, “येस ली, और खा, यो म्येरो आंग छै।”</verse>
				<verse number="23">फिर उनूले कटोर में अंगूरो को रस लीभेरन परमेश्वरो को धन्यवाद करछ्य, और अपून शिष्यून दीछ, और सबून ले उमें भटे बारी-बारी ले पीछ।</verse>
				<verse number="24">तब यीशु ले उनूनथैं क्योछ, “यो कटोर में अंगूरो को रस म्येरो खून छै, म्येरो खून बलिदान का रूप में भौतून लोगून का पापून खिन बगाई जाछो। यो उ नय्या वाचा स पुरो करछो जो परमेश्वर ले भौत लोगून खिन कर रैछ।</verse>
				<verse number="25">मैं तुमूनथैं सच्ची कुंछूँ, कि मैं अंगूर को रस तब तलक दुबाँर कभै नै पियूँ, जब तलक कि मैं परमेश्वरा का राज्य में जाँ भरेन ताजो रस नी पियूँ।”</verse>
				<verse number="26">तब यीशु और उक शिष्य परमेश्वर की स्तुति करने-करनै यरूशलम शैहर है निकल भेरन, पासा का जैतून पहाड़ में न्हैजानान।</verse>
				<verse number="27">जब उन पहाड़ का तरफ जानमरेछ्या, तब यीशु ले अपून शिष्यून थैं क्योछ, “तुम सब मैंस छोड़ी भेरन भाग जाला, जसो। कि पवित्र-शास्त्र में म्यारा बारिमें लिखीना को छै, उ पुरो हो। जो कुंछो ‘मैं अपून लोगून का ग्वाला की नियाती देख-भाल करूनवाला स मार डाललो, और उन सब भेड़ का नियाती तितर-बितर हो जाला।’</verse>
				<verse number="28">लेकिन मैं मरिनान में है ज्यून हुना का बाद मैं तुम सबून है पैलि गलील प्रदेश खिन जूँलो, और वाँ तुमून मिलूलो।”</verse>
				<verse number="29">पतरस ले यीशु थैं क्योछ, “गुरू जी, चाहे सब तैंस छोड़भेरन भाग ले जून, लेकिन मैं तैंस छोड़भेरन नी जूँ।”</verse>
				<verse number="30">यो सुणिभेरन यीशु ले पतरस थैं क्योछ, “मैं तैथैं सच्ची कुछूँ, कि आज का रात ब्यान बखत मुर्गा का द्वी बार बाँक दिन है पैलि, तैं मैंस तीन बार पछ्याणून है मना करले।”</verse>
				<verse number="31">लेकिन पतरस ले और लै जादा जोर दीभेरन क्योछ, “चाहे मैंस तुमार दगाड़ मरून लै पड़लो, तब लै मैं तैंस पछीयाणून है कभै नी मुकरूँ।” और सब शिष्य ले पतरस को जसो कुन लाग्यान।</verse>
				<verse number="32">जब यीशु और उक शिष्य गतसमनी नामाका बगीच में आयान, और यीशु ले अपून शिष्यून थैं क्योछ, “तुम याँ बैठि रौ, तब तलक मैं परमेश्वर थैं प्रार्थना करछूँ।”</verse>
				<verse number="33">और यीशु अपून बारा शिष्यून में भटे तीन शिष्यून पतरस, याकूब और यहूना स अपून दगाड़ ली ग्योछ। और यीशु भौत उदास और दुखी हुन लागछ्य।</verse>
				<verse number="34">और यीशु ले उन तीन शिष्यून थैं क्योछ, “म्येरो मन भौत ज्यादा दुखी छै, इसो लागछो जसो मैं मरून वालो छूँ। तुम याई ठैहरा और जागनै रौ।”</verse>
				<verse number="35">और उ थ्वाड़ा अघिल के जाभेरन भिमें में घुणान का बल बैठभेरन प्रार्थना करछो, “हे म्यारा पिता अगर तैं चाँछै, तो मैंस यो दुख है बचाले जो म्यारा मलि में उनवालो छ। तैखिन सब कुछ समभव छ, इसो कर की यो दुख म्यारा मलि में नै अ, पर जसो मैं चाँछू ऊसो नै हो बल्कि जसो तुम चाँछा ऊसो हो।”</verse>
				<verse number="36"></verse>
				<verse number="37">जब यीशु प्रार्थना करभेरन वापस आछ, तब उले अपून तीन शिष्यून पड़ीना का देखिभेरन पतरस थैं क्योछ, “हे शमौन पतरस, क्या तैं पड़ी रौछै? क्या तैं घंटाभर ले म्यारा दगाड़ बिज्जो नै रै सकये?</verse>
				<verse number="38">तुम सब बिज्जो रैभेरन प्रार्थना करा कि तुम परीक्षा में नै पड़ा। तुमेरि आत्मा त तैयार छै, लेकिन शरीर कमजोर छै।”</verse>
				<verse number="39">यीशु ले फिर जाभेरन दुबाँरा उई प्रार्थना करछ्य।</verse>
				<verse number="40">और फिर दुबारा वापस आभेरन उले अपून शिष्यून आजि पड़ीना का पाछ, क्याखिनकि उन भौत थकीना और उनीलो में छ्या; और नी जाण छ्या की उथैं कि कुंनू।</verse>
				<verse number="41">यीशु जब तिसर बार शिष्यून का पास आयान, तब उनूनले उनूनथैं क्योछ, “अब तुम आराम ले पड़ रौ, क्याखिनकि उ बखत आग्योछ। देखा मैं आदिमी को च्योलो पापिन का हवाला करि जानवालो छूँ।</verse>
				<verse number="42">उठा, हम हिटनू। देखा, मैंस धोखा ले उनार हवाला करून वालो नजिक आग्योछ।”</verse>
				<verse number="43">जब यीशु इसो कुनमरेछ्यो, उ बखत यहूदा इस्करियोती वाँ आछ जो बारा शिष्यून में एक छ्यो। और उ अपून दगाड़ भौत ज्यादा लोगून की भीड़ जांठ और तलवार लीभेरन, जो प्रधान याजकून, मूसा का नियम सिखून वाला और यहूदी अगुवान का तरफ भटे आ रैछी।</verse>
				<verse number="44">यहूदा जो यीशु स उनार हवाला करून में उनेरि मद्दत करून मरेछ्यो। उले यो भीड़ का लोग पैलि बताभेरन राँखछ्य, “कि जेस मैं गल लगूलो और प्रेम करूँलो उई यीशु होलो। ऊस पकड़ भेरन सावधानी ले ली जाया।”</verse>
				<verse number="45">यहूदा आछ, और यीशु स नमस्कार करछ्य, और उक पास आभेरन कुन लाग्छय, “गुरू जी।” और यीशु का गला लाग्छय और प्रेम करछ्य।</verse>
				<verse number="46">तब उन लोगून ले यीशु स कसी भेरन पकड़ लीछ।</verse>
				<verse number="47">उन बारा शिष्यून में भटे जो यीशु का दगाड़ में छ्या, उमें है एक शिष्य ले अपूनी तलवार निकालभेरन महायाजक का सेवक में चलाछ और उको कान काटि दीछ।</verse>
				<verse number="48">यीशु ले उ भीड़ का लोगून थैं क्योछ, “क्या तुम लोग मैंस डाकू समझछा, जो तलवार और जांठा लीभेरन मैंस पकड़न खिन आ रेछा?</verse>
				<verse number="49">जब मैं हर-रोज तुमार दगाड़ रैभेरन मन्दिर में उपदेश दीछ्यू, तब तुमूले मैंस नै पकड़ीयो। पर अब यो येक कारण हुनमरेछ, कि पवित्रशास्त्र में लिखीना का बात पुरो हो।”</verse>
				<verse number="50">यो देखभेरन सब शिष्य यीशु स छोड़िभेरन भाग जानान।</verse>
				<verse number="51">और उई बाट भटे एक नौ जवान अपून नंगा आंग में चादर ओड़ भेरन यीशु का पछिल ग्योछ। और लोगून ले ऊस यीशु शिष्य समझभेरन पकड़ू मस्यान,</verse>
				<verse number="52">तो उ नौ जवान चादर छोड़िभेरन नंगो भागी जाछो।</verse>
				<verse number="53">और उन यीशु स महायाजक का घर में ली ग्यान। और सारा प्रधान याजकून, मूसा का नियम सिखून वाला और यहूदी अगुवा वाँ जामा छ्या।</verse>
				<verse number="54">पतरस यीशु का पछिल-पछिल महायाजक का घरा का खाल तक ग्योछ, और वाँ मन्दिर का चौकदारून का दगाड़ बैठि भेरन आगो तापून लागछो।</verse>
				<verse number="55">प्रधान याजक और पुरी यहूदी महासभा का लोग यीशु स मरूना का विचार ले उक खिलाफ गवैन की तलाश में लाग रै छ्या, लेकिन उनून एक ले गवा नै मिल्यो।</verse>
				<verse number="56">भौत लोग यीशु खिलाफ झूठ्ठी गवाही दीन मरेछ्या, पर उनार गवाही आपस में मेल नी खान मरेछी।</verse>
				<verse number="57">तब कुछ लोगून ले ठाड़ हो भेरन यीशु का खिलाफ यो झूठ्ठी गवाही दीछ,</verse>
				<verse number="58">“हमून ले यो आदिमी स इसो कुन सुणि रैछ, ‘कि मैं लोगून का द्वारा बनाई का मन्दिर स उधारी द्यूलो, और तीन दिन में दुसोरो मन्दिर बना द्यूलो, जो लोगून का हात ले बनाई नै हो।’”</verse>
				<verse number="59">लेकिन यो बात का बारिमें ले उनेरि गवाही आपस में मेल नी खान मरेछी।</verse>
				<verse number="60">तब महायाजक ले महासभा का सामुनि ठाड़ है भेरन यीशु थैं पुछून लागछो, “यो त्यारा विरोध में जो गवाही दीन मर्यान, क्या त्यार पास कोई जबाब नाहातिन?”</verse>
				<verse number="61">पर यीशु चुप र्योछ, और केले जबाब नै दीनू। महायाजक ले यीशु थैं फिर पुछ्छै, “क्या तैं परम-प्रधान परमेश्वरो को च्योलो मसीह छै?”</verse>
				<verse number="62">यीशु ले जबाब दीछ, “होई मैं छूँ। और तुम मैं आदिमी का च्याला स बड़ी सामर्थ का दगाड़ सर्वशक्तिमान परमेश्वरा का देन तरफ बैठिना को और स्वर्ग भटे आकाश में बादलों का दगाड़ उन देखला।”</verse>
				<verse number="63">यो बात स सुणिभेरन महायाजक गुस्सा भ्योछ, और अपून कपाड़ा फाड़भेरन क्योछ, “अब हमून और कोई ले गवाही जरूरत नाहातिन।</verse>
				<verse number="64">तुमूले येस परमेश्वर की बुराई करून अपून कानून ले सुणि है। यो बात में तुमोरो की फैसला छै?” वाँ का सब लोग यो बात में सहमत छ्या, “कि यीशु दोषी छै, और मौत सजा का लायक छै।”</verse>
				<verse number="65">तब कुछ लोग त यीशु में थुकून और उक आँख में पट्टी बादिभेरन ऊस मुक्का मारून लाग्यान, और उथैं पुछून लाग्यान, “हे गुरू, अगर तैं परमेश्वरो को संदेश दिनवाला छै, तो हमून बतो तैंस कैले मारछैं?” और चौकीदारून ले यीशु स थप्पड़ मारियान।</verse>
				<verse number="66">जब पतरस तलि खाला में आगो तापून खिन बैठि रियोछ, तब महायाजक की दासीन में भटे एक दासी वाँ आछ,</verse>
				<verse number="67">जब उले पतरस स आग तापून भौत ध्यान ले देखछ्य, और कुन लागछ्य, “तैंले त उ यीशु नासरी का दगड़िया छै।”</verse>
				<verse number="68">यो सुणिभेरन पतरस मुकर ग्यो और कुंछो, “मैं नै जाणनू और नै समझछूँ कि तैं कि कुन मरेछी।” तब पतरस वाँ भटे उठाभेरन द्वारून तलक ग्योछ, और मुर्गा ले बाँक दीछ।</verse>
				<verse number="69">येक थ्वाड़ा देर बाद जब उ दासी ले पतरस स दुबारा वाँ देखछ्य, तब उले जो लोग उल्ले ठाड़ छ्या उनूनथैं क्योछ, “यो आदिमी ले उनूमें भटे एक छै।”</verse>
				<verse number="70">लेकिन पतरस दुसारा बार यीशु स पछीयाणून है मुकर ग्यो, तब थ्वाड़ा देर बाद वाँ ठाड़ होईना का लोगून ले पतरस थैं क्योछ, “यो बात पक्की छै, तैंले उनूनमें भटे एक छै, क्याखिनकि त्यारा बातुन ले पत्तो चलून मरियोछ कि तैं गलीली छै।”</verse>
				<verse number="71">तब पतरस उनार सामुनि अपनास कोसून लागछ्य और कसम खाभेरन कुन लागछो, “जैक बारिमें तुम कुन मरेछा मैं उ आदिमी स नै जाणनू।”</verse>
				<verse number="72">उ बखत मुर्गा ले दुसारा बार बाँक दीछ। तब पतरस स यो बात याद आछ, जो यीशु ले उथैं के राँख छी, “मुर्गा का द्वी बार बाँक दिन है पैलि तैं तीन बार मैंस पछीयाणून है मुकर जाले।” और उ यो बात सोचभेरन जोर-जोरले रून लागछो।</verse>
			</chapter>
			<chapter number="15">
				<verse number="1">रात्तैनि झट प्रधान याजक लोग, यहूदी अगुवा, मूसा का नियम सिखून वाला और पुर यहूदी महासभा का लोगून ले सलाह-मशवरा करभेरन, यीशु स बाधी भेरन ली ग्यान, और न्याय करून खिन ऊस रोमी राज्यपाल पिलातुस का पास ली ग्यान।</verse>
				<verse number="2">तब पिलातुस ले यीशु थैं पुछ्छै, “क्या तैं यहूदीन को राजा छै?” यीशु ले क्योछ, “सच्चाई उई छै जो तैं कुन मरेछ।”</verse>
				<verse number="3">फिर प्रधान याजकून ले यीशु में भौत ज्यादा झूठ्ठा दोष लगून लाग्यान।</verse>
				<verse number="4">तब पिलातुस ले यीशु थैं पुछछै, “तैं जबाब किलैं नै दिने? देख, इन कतुक बातुन का बारिमें तैंमें दोष लगूनान?”</verse>
				<verse number="5">फिरले यीशु ले ऊस के जबाब नै दीनू; यो देखिभेरन पिलातुस स भौत ताजुब भ्योछ।</verse>
				<verse number="6">हर साल फसह त्यार का मौक में एक कैदी आजाद करून पिलातुसोको रिवाज छ्यो, और जैस लोग चाँछ्या उ ऊस आजाद कर दीछ्या।</verse>
				<verse number="7">बरअब्बा नामोको एक कैदी दंगा-फसाद करूनवाला लोगून का दगाड़ जेल में बन्द छ्यो, जेले रोमी सरकार का खिलाफ दंगा-फसाद में कुछ लोगून जान है मार डालछ्य।</verse>
				<verse number="8">और तब भीड़ का लोग पिलातुस का पास आयान, और उथै विनती करभेरन कुन लाग्यान, “जसीकैं तैं हर साल हमून खिन कर रैछ, ऊसोई कर।”</verse>
				<verse number="9">पिलातुस ले उनूथैं पुछ्छै, “तुम कि चाँछा, क्या मैं तुमून खिन यीशु जैस तुम यहूदीयून को राजा कूंछा, ऊस छोड़ी दीयू?”</verse>
				<verse number="10">क्याखिनकि पिलातुस जाण छ्यो, कि प्रधान याजकून ले डाह का कारण यीशु स पकड़वाछ।</verse>
				<verse number="11">लेकिन प्रधान याजकून ले भीड़ का लोगून यो केभेरन भड़का कि यीशुका बदाला में उ बरअब्बा स उनून खिन छोड़ दे।</verse>
				<verse number="12">यो सुणिभेरन फिर पिलातुस ले उनूथैं पुछ्छै, “जैस तुम यहूदीयून को राजा कुँछा, उको मैं कि करूँ?”</verse>
				<verse number="13">भीड़ का लोगून ले चिल्ला भेरन क्योछ, “ऊस सूली में चढ़ा दे।”</verse>
				<verse number="14">तब पिलातुस ले उनूथैं पुछ्छै, “किलैं, येले कि गलती करि रैछ?” लेकिन लोग और लै ज्यादा जोरले कुंनान, “यहूदीन का राजा सूली में चढ़ा दे।”</verse>
				<verse number="15">पिलातुस भीड़ स खुश करून चांछ्यो, और येक कारण उले बरअब्बा उनून खिन छोड़ी दीछ। और यीशुस कोड़ा लगाभेरन सूली में चढ़ून खिन, ऊस रोमी सिपाईन दी दीछ।</verse>
				<verse number="16">तब रोमी सिपाई यीशु स पिलातुस का महल का भितर वाला खाला में ली ग्यान, जो प्रीटोरियुम नाम ले जाणि जाछो, और उनूनले अपूनी पुरी पलटनस वाँ बुला लीछ।</verse>
				<verse number="17">तब सिपाई ले यीशु स बैंगनी रंग को कपाड़ा पैनायान, जसकैं उ एक राजा छै, और उको मजाक उड़ून खिन काँणान को एक मुकुट बनाभेरन यीशु का ख्वार में लगा दीछ, जसीकैं की उकी सम्मान करून मरेयान</verse>
				<verse number="18">और यो कैभेरन ऊस नमस्कार करून लाग्यान, “हे यहूदीन का राजा जी, तुमून हमोरो नमस्कार छै।”</verse>
				<verse number="19">और उन बार-बार यीशु का ख्वार में डन्डा ले मारछ्या, और उनूनले उको अपमान करून खिन, कई बार उमें थुननान, और घुणा टेकी भेरन ऊस नमस्कार करनाको नाटक ले करछ्या।</verse>
				<verse number="20">उन यीशु की मजाक बाईना का बाद, तब यीशु का बैगनी कपाड़ास उतार भेरन, यीशुस उक कपाड़ा पैनायान; और फिर ऊस सूली में चढ़ून खिन शैहर भटे भ्यार लीग्यान।</verse>
				<verse number="21">जब उ यीशु स सूली में चढ़ून खिन शैहर है भ्यार ली जानमरेछ्या, उ बखत सिकन्दर और रूफुस को बाब शमौन नामोको एक कुरेनी गौं को आदिमी, दुसारा गौं भटे उनमरेछ्यो। सिपाईन ले ऊस जबरदती पकड़ भेरन क्योछ, यीशु की सूली स लीभेरन चल।</verse>
				<verse number="22">तब सिपाई यीशु स गुलगुता नामाका जाग में ली ग्यान, जै नामको मतलब छै खोपड़ी की जाग।</verse>
				<verse number="23">वाँ सिपाईन ले यीशु स सूली में चढ़ून है पैलि दर्द मिटून खिन ऊस मुर्र नामक की जड़ी-बूटी अंगूर को रस में मिलाभेरन यीशु स दिन लाग्यान, पर उले नै पियो।</verse>
				<verse number="24">येक बाद उनूनले उक हात-खुटान में कील ठोकभेरन सूली में टाँग दीछ। और उक कपाड़ान आपस में बाँड़ुन खिन परची डाल्यान की कैस को कपाड़ा मिलोल।</verse>
				<verse number="25">उ बखत रात्तै को नौ बाज रेछ्यो, जब उनूनले यीशु स सूली में चढ़ा।</verse>
				<verse number="26">सिपाईन ले लाकड़ा का पट्टा में दोषपत्र लिखी भेरन उक खारा मलि में सूली में टाँग दीछ, कि यो यहूदीन को राजा छै।</verse>
				<verse number="27">और यीशु दगाड़ द्वी डाकू लै अलग-अलग सूली में चढ़ै राखछ्या, एक स दैन तरफ और दुसरा स बौं तरफ।</verse>
				<verse number="28">तब पवित्रशास्त्र में लिखीना को यो बचन पुरो भ्योछ, “कि उ गिनती अपराधीन का दगाड़ करि गै।”</verse>
				<verse number="29">वाँ भटे उन-जाना वाला लोग खोरो हिलाभेरन और यो केभेरन अपमान करून लाग्यान, “वा रे मन्दिर उधारन्या वाला और तीन दिन में बनून वाला,</verse>
				<verse number="30">सूली भटे भिमें उतर भेरन अपनास बचा।”</verse>
				<verse number="31">और इसीकैं प्रधान याजक और मूसा का नियम सिखून वाला लोग आपस में मजाक करभेरन कुछ्या, “यैले दुसरा लोगून त बचा, लेकिन यो अपूनास नै बचा सकूनो।</verse>
				<verse number="32">यो आदिमी जो मसीह और इस्राएल देशो को राजा हुना को दावा करछो, अगर अब यो सूली भटे तलि उतरि आला, तो हम ले देखभेरन विश्वास करला।” और जो द्वी डाकू यीशु का दगाड़ सूली में लटकाईना का छ्या, उन ले यीशु को अपमान करून मरेछ्या।</verse>
				<verse number="33">और उ दिन बार बजे भटे तीन बजे तक पुरा देश में अन्यारो र्योछ।</verse>
				<verse number="34">लगभग तीन बजे यीशु ले अपूनी भाषा में जोरले चिल्ला भेरन क्योछ, “एलोई, एलोई, लमा सबक्तानी?” जैक मतलब छै, “म्यार परमेश्वर, म्यार परमेश्वर, तुमूले मैंस क्याखिन छोड़ी दीछ?”</verse>
				<verse number="35">जो लोग आश-पास ठाड़ छ्या, उन यो सुणिभेरन कुन लाग्यान, “देखा, यो एलिय्याह स बुलून मरियोछ।”</verse>
				<verse number="36">इदुक में एक सिपाई दौड़भेरन ग्योछ, और स्पंज स सिरका में डुबाछ, और डन्डा में बाधी भेरन यीशु स चुसून खिन दीछ, और उले क्योछ, “कुछ देर तक इन्तजार करभेरन देख लीनू, कि एलिय्याह यैस बचुन खिन उछो या नै उनो।”</verse>
				<verse number="37">येक बाद यीशु जोर चिल्लाछ और मर ग्यो।</verse>
				<verse number="38">तब उई बखत मन्दिर को मोटो पर्दा जो मन्दिर में परमेश्वरा का पास जान है रोक छ्यो, मलि भटे तलि तलक फाटभेरन द्वी टुकुड़ है ग्यो।</verse>
				<verse number="39">जो सुबदार वाँ सामुनि ठाड़ है रैछ्य, उले यीशु स चिल्ला भेरन मरून देखछ्य, तो उले क्योछ, “सच्ची में यो आदिमी परमेश्वरो को च्योलो छ्यो।”</verse>
				<verse number="40">और वाँ कुछ स्यैनिन दूर ठाड़ है भेरन देखून मरेछ; उनूनमें है मरियम जो मगदला गौं छी, और नान भाई याकूब और योसेस की ईजा मरियम और सलोमी छी।</verse>
				<verse number="41">जब यीशु गलील प्रदेश में छ्यो, तो यो स्यैनिन उक पछिल आभेरन उकी सेवा-टहल करछ्या। और वाँ और ले भौत स्यैनिन छ्या, जो यीशु का दगाड़ यरूशलम शैहर भटे आईना का छ्या, उन यीशुस दूर है देखछ्या।</verse>
				<verse number="42">जै दिना यीशु सूली में चढ़ाछ, उ तैयारी को दिन छ्यो, जैको मतलब छै सबत को दिन है पैलि वालो दिन।</verse>
				<verse number="43">अरिमतिया शैहर को रून वालो यूसुफ आछ, जो महासभा को खास सदस्य छ्यो, और खुद ले परमेश्वरा का राज्य का इंतजारी में छ्यो। उ हिम्मत करभेरन पिलातुस राज्यपाल का पास ग्योछ, और उले यीशु की लाश दफनून खिन माँगछय।</verse>
				<verse number="44">यो सुणिभेरन पिलातुस भौत हैरान भ्योछ, कि उ इदुक जल्दी मरि ग्यो। तब उले सुबदारस बुलाभेरन पुछ्छै, “क्या यीशु मरि ग्योछी?”</verse>
				<verse number="45">जब उले सुबदार भटे यो सब कुछ जाणिभेरन कि यीशु सच्ची में मर ग्योछ, तब पिलातुस ले यीशु की लाश यूसुफ स दीना की आग्या दीछ।</verse>
				<verse number="46">तब यूसुफ ले एक मलमल को कफन ल्याछ, और यीशु की लाश स सूली भटे उतार भेरन, कफन में लपेटिभेरन एक कब्र में जो चट्‍टान में खोदीना की छी, उमें राख दीछ, और कबरो को मुँख में एक भौत भारी ढूंगो लगा दीछ।</verse>
				<verse number="47">और मरियम जो मगदला गौं छी और योसेस की ईजा मरियम यो देख रैछी, कि यीशु स काँ राँखून मर्यान।</verse>
			</chapter>
			<chapter number="16">
				<verse number="1">जब सबत को दिन खतम हो ग्योछ, तब मरियम जो मगदला गौं छी और याकूब की ईजा मरियम और सलोमी ले यीशु की लाश में लगून खिन खुशबुदार चीजून खरीदयान।</verse>
				<verse number="2">और हफ्ता का पैल दिन रात्तै सूरज निकलून है पैलि उन कब्र में आयान।</verse>
				<verse number="3">और आपस में यो बात करून मरेछ्या, “हमून खिन कब्र का मुँख में है ठूलो ढूंगास को खिसकालो?”</verse>
				<verse number="4">लेकिन जब उन कब्र में पुजनान, तब उनूनले देखछ्य, कि कब्र मुँख में भटे ढूंगो हटीना को छै। और उ ढूंगो भौत ठूलो छ्यो।</verse>
				<verse number="5">और उन स्यैनिन ले कब्र का भितर जाभेरन एक नौ जवान स जेले भौत सफेद कपाड़ा पैनिना का छ्या, दैन तरफ बैठिना को देखछ्य। और उन भौत हैरान हो ग्या।</verse>
				<verse number="6">उ नौ जवान ले उन स्यैनिनथैं क्योछ, “डरा जन। तुम यीशु नासरी स जैस सूली में चढ़ाईना को छ्यो, ऊस खोजून मरेछा। उ ज्यून है ग्योछ और याँ नाहातिन, देखा यो उई जाग छै जाँ उकी लाश राख रैछी।</verse>
				<verse number="7">पर तुम जा, पतरस और उक शिष्यून थैं कया, ‘कि यीशु तुमून है पैलि गलील प्रदेश खिन जालो। और जस उले तुमूनथैं कै राँखछ्यो, तुम ले यीशु वाँई देखला।’ ”</verse>
				<verse number="8">और उन कब्र भटे निकल भेरन दौड़भेरन ग्यान, और उनूनले बाट में कैथैं के नै क्यो क्याखिन उन भौत डरीना का छ्या।</verse>
				<verse number="9">और हफ्ता का पैला दिना रातैनि, यीशु मरिनान में भटे ज्यूनो हो भेरन, सबून है पैलि मरियम जो मगदला गौं छी जेमें भटे उले सात भूतून निकालीना को छ्या, ऊस दिखाई दीछ।</verse>
				<verse number="10">तब मरियम जो मगदला गौं छी उले यीशु का शिष्यून जो दुखी छ्या, और रून मरेछ्या उनार पास जाभेरन यो समाचार दीछ।</verse>
				<verse number="11">लेकिन जब उनूनले उथैं सुणछ्य, कि यीशु ज्यून हो ग्योछ, और उले ऊस दिखछ्य, त उनूनले उक बात में विश्वास नै कर्यो।</verse>
				<verse number="12">फिर येक बाद यीशु द्वी जनून दिखाई दीछ, जो यरूशलम शैहर भटे गौं खिन जानमरेछ्या, लेकिन उनूनले ऊस पैलि बार में नै पछाड़ियो, क्याखिनकि उको भेष-भूसा बदलीना की छी।</verse>
				<verse number="13">जब उनूनले ऊस पछयाण लीछ, तो उन द्वीवै यरूशलम शैहर खिन वापस ग्यान, उनूनले और शिष्यून ले यो बारिमें बताछ, पर शिष्यून ले उनेरि बातनू में विश्वास नै कर्यो।</verse>
				<verse number="14">येका बाद फिर यीशु उन इग्यार शिष्यून ले, जब उन खानो खान मरेछ्या दिखाई दीछ, उले उनून डाटछ्य, क्याखिनकि उनार मन भौत कठोर हो गैछ्या, कि उनूनले उन लोगून का बातुन में विश्वास नै कर्यो, जिनूनले यीशु ज्यून हुना का बाद देखछ्य।</verse>
				<verse number="15">तब यीशु ले उनूनथैं क्योछ, “तुम सारा संसार में जाभेरन सारा लोगून सुसमाचार प्रचार करा।</verse>
				<verse number="16">जो परमेश्वर में विश्वास करोलो और बपतिस्मा ल्योलो उको उद्धार होलो, लेकिन जो परमेश्वर विश्वास नी करोलो उ अपून पापून की सजा मिलेलि।</verse>
				<verse number="17">और विश्वास करून वालान में यो चिन होला, कि उन म्यारा नामेले भूतून निकालाल; और नय्या-नय्या भाषा बोलला।</verse>
				<verse number="18">और स्याँपून उठाला, और अगर उन जहर वाला चीज ले पी ल्याला, तब ले उनेरि कै हानि नी हो और उन बिमारून में हात राखाला, और उन चंगा हो जाला।”</verse>
				<verse number="19">तब प्रभु यीशु उनार दगाड़ बात करनाका बाद स्वर्ग में उठा ली ग्यान, और परमेश्वरा का दैन तरफ बैठ ग्यान।</verse>
				<verse number="20">और उन शिष्यून ले जाभेरन हर जाग प्रचार करछ्य, और प्रभु यीशु ले उनून सामर्थ दीछ, और उनार द्वारा करिना का चमत्कारून यो बात साबित करछ्या कि उको संदेश सच्चो छ्यो। आमीन।</verse>
			</chapter>
		</book>
		<book number="42">
			<chapter number="1">
				<verse number="1">लूका लिखछो, हे श्रीमान थियुफिलुस जी, भौत लोगून ले हमार बीच होईना का बातुन का बारिमें एक दस्तावेज लिखना की कोशिश करछै।</verse>
				<verse number="2">उनूनले ठीक उई लिखछै जो उन लोगून का द्वारा हमून बताई ग्योछ, जिनूनले यीशु की सेवकाई स शुरूवाद भटे देखीना को छ्यो, और जो बाद में परमेश्वरा का वचना का दास बन ग्या।</verse>
				<verse number="3">मैंले ले इन बातुन की ध्यान ले जाँच करछै, और मैंस यो निको लागछ कि मैं तुमून खिन उन बितिनाक का हुना का बातुन का अनुसार एक-एक करभेरन लिखूँ।</verse>
				<verse number="4">और मैं येक कारण लिखूनमरयूँ, ताकि तुमून हरेक बात की पुरी सच्चाई पत्तो चलो, जो लोगून का द्वारा तुमून बताई गैछ।</verse>
				<verse number="5">यो उ बखत की छै, जब यहूदिया प्रदेश में हेरोदेस राजा को राज्य छ्यो, वाँ अबिय्याह नाम में बनिनाक याजकून का दल बनिना को छ्यो उमें जकर्याह नामोको एक याजक छ्यो, उ और उकी घरवाली द्वीवै हारूनाक वंशाक छ्या, और उकी घरवाली को नाम इलीशिबा छ्यो।</verse>
				<verse number="6">जकर्याह और उकी घरवाली परमेश्वरा का नजरून में धर्मी छ्या; और प्रभु की सब आज्ञा और नियमून मानछ्या।</verse>
				<verse number="7">लेकिन उनेरि कोई संतान नी छी, क्याखिनकि इलीशिबा बाँझ छी, और उन बुढ़ा हो गैछ्या।</verse>
				<verse number="8">जब जकर्याह अपून मण्डली का दगाड़ यरूशलमा का मन्दिर में परमेश्वरा का सामुनि याजक को काम करछ्यो, क्याखिनकि उ हफ्ता में उकी मण्डली का याजकून की सेवा करना की बारी छी।</verse>
				<verse number="9">त याजकून का रीति का अनुसार जकर्याह नाम की चट्ठी निकल छी, कि उ प्रभुक मन्दिर में धूप जलौ।</verse>
				<verse number="10">जकर्याह का धूप जलून बखत मण्डली का सब लोग भ्यार मन्दिराक खाला में प्रार्थना करून मरेछ्या।</verse>
				<verse number="11">तब प्रभु को एक स्वर्गदूत वेदी का दैन तरफ प्रगट भ्योछ और जकर्याह स दिखाई दीछ।</verse>
				<verse number="12">और जकर्याह ऊस देखिभेरन घबरा ग्यो और उक मलिमें भौत डर छा ग्यो।</verse>
				<verse number="13">लेकिन स्वर्गदूत ले उथैं क्योछ, “हे जकर्याह, डर जन क्याखिनकि परमेश्वर ले तेरि प्रार्थना सुण हलछ्य और तेरि घरवाली इलीशिबा भटे तैंखिन एक च्योलो पैद होलो, और तैं उको नाम यहूना राखे।”</verse>
				<verse number="14">और उक पैद हुना में तुम त खुश होला, लेकिन भौत लोग ले खुश होला।</verse>
				<verse number="15">क्याखिनकि उ प्रभुक नजरून में महान होलो, और उ अंगूर को रस और शराब कभै नी पियोलो, और अपून जन्म है पैलिकैं भटे पवित्र आत्मा भरि जालो।</verse>
				<verse number="16">उ इस्राएलाक कई लोगून उनार प्रभु परमेश्वरा का पास वापस ल्यालो।</verse>
				<verse number="17">यहूना एक इसो आदिमी होलो जो परमेश्वरो को संदेश दिनवाला एलिय्याह नियाती आत्मा में सामर्थी होलो। उ प्रभु को बाटो तैय्यार करोलो। और ईजा-बाबको उनार संतानून का दगाड़ मेल करालो, और आज्ञा नै मानून वाला लोगून परमेश्वर की आज्ञान मानून सिखालो, और परमेश्वर खिन एक निकी प्रजा तैय्यार करोलो।</verse>
				<verse number="18">जकर्याह ले स्वर्गदूत थैं पुछ्छै, “मैं यो बात में कसीकैं यकीन करूँ? क्याखिन मैं और मेरि घरवाली त बुढ़ा हो ग्या।”</verse>
				<verse number="19">स्वर्गदूत ले ऊस जबाब दीछ, “मैं जिब्राईल स्वर्गदूत छूँ, जो परमेश्वरा का सामुनि ठाड़ रूछूँ। और परमेश्वर ले मैंस तैथैं बात करून खिन और तैंस यो सुसमाचार दिन खिन भेज रैछ।</verse>
				<verse number="20">और देख, जै दिन तक यो बात पुरी नी हो होलि, तैं उ दिन तक तैं गूँगो रौले, और बोल नी सकैं; येक कारण तैले मेरि बातुन की जो अपून बखत में पुरी होलि, उनूनमें तैंले विश्वास नै कर्यो।”</verse>
				<verse number="21">और जो लोग मन्दिर का खाला में जकर्याह को इन्तजार करून मरेछ्या, और उन लोग हैरान छ्या कि जकर्याह स मन्दिर में इदुक देर क्याखिन हो गैछ?</verse>
				<verse number="22">मन्दिर भटे भ्यार आभेरन जब जकर्याह उनार दगाड़ बात नै कर सक्यो, त उन लोग समझ ग्या कि उले मन्दिर कोई दर्शन देखछै। और उ हाते ले इशारा करनै र्योछ, और मुँख ले के नै बोल सक्यो।</verse>
				<verse number="23">मन्दिर में जकर्याह को एक याजक को सेवा बखत पुरो हो ग्यो, उ यरूशलम भटे अपून घर खिन न्हैजाछो।</verse>
				<verse number="24">कुछ दिनून का बाद में जकर्याह कि घरवाली इलीशिबा गर्भवती भैछ; लेकिन उले अपूनास पाँच मैंन तक लोगून है लुका भेरन राँख छै।</verse>
				<verse number="25">और उले क्योछ, “कि समाज में म्येरो अपमान दूर करून खिन प्रभु ले म्यारा मलि में दया करभेरन मैं खिन इसो करछय।”</verse>
				<verse number="26">जब इलीशिबा छयूं मैंनो लागछै, तब परमेश्वरा का तरफ भटे जिब्राईल स्वर्गदूत गलील प्रदेशा का नासरत गौं में, एक कुँवारी चेलि का पास भेजि ग्यो।</verse>
				<verse number="27">जैकी मँगनी यूसुफ नामाका लड़का का दगाड़ हो रैछ, और उ दाऊद राजा को वंश को छ्यो, और उ कुँवारी चेलि को नाम मरियम छ्यो।</verse>
				<verse number="28">और स्वर्गदूत ले मरियमा का पास आभेरन क्योछ, “मरियम तैंस म्येरो नमस्कार, आनन्द और जय तेरि हो, तैमें परमेश्वर की दया भौत हो रैछ, और उ त्यारा दगाड़ छै।”</verse>
				<verse number="29">जब मरियम ले स्वर्गदूत की बात सुणछै त उ भौत ज्यादा घबरा गै, और मन में सोचून लागछ्य यो नमस्कारो को की मतलब छै?</verse>
				<verse number="30">तब स्वर्गदूत ले उथैं क्योछ, “हे मरियम, जन डर, क्याखिनकि परमेश्वर कि दया तैमें हो रैछ।</verse>
				<verse number="31">और देख, तैं गर्भवती होलि, और तैं एक च्याला स जन्म देली, तैं उको नाम ‘यीशु’ राखे।</verse>
				<verse number="32">और उ महान होलो, और उ परमप्रधान परमेश्वरो को च्योलो कहलालो, और प्रभु परमेश्वर ऊस उक पूर्खा दाऊद राजा को जसो राजा बनालो।</verse>
				<verse number="33">और उ याकूबा का वंश में हमेशा राज्य करोलो, और उक राज्य को कभै अन्त नी होलो।”</verse>
				<verse number="34">मरियम ले स्वर्गदूत थैं क्योछ, “यो कसीकैं हो सकछो? क्याखिनकि म्येरो त ब्या ले नै हो र्यो।”</verse>
				<verse number="35">स्वर्गदूत ले मरियम स जबाब दीछ, “तैंमें पवित्र आत्मा उतरोलो और परमप्रधान परमेश्वर की सामर्थ तैमें छाया करली; और तैंमें भटे जन्म लिनवालो बालक पवित्र होलो, और परमेश्वरोको च्योलो कहलालो।</verse>
				<verse number="36">और सुण, तेरि कुल की इलीशिबा को ले बुढ़ापा में च्योलो हुन वालो छै, उ जो बाँझ छी, उको छयूं मैंन छै।</verse>
				<verse number="37">किलैकी परमेश्वर खिन केले काम कठिन नाहातिन।”</verse>
				<verse number="38">तब मरियमले क्योछ, “देख मैं प्रभु की दासी छूँ, जसो तैं कुँछै, ऊसो म्यारा दगाड़ हो।” और तब स्वर्गदूत वाँ भटे न्हैजाछो।</verse>
				<verse number="39">थ्वाड़ा दिनून का बाद मरियम तैय्यार हो भेरन वाँ भटे यहूदिया प्रदेशा का पहाड़ी इलाका का नगर में जकर्याह घर जाछी।</verse>
				<verse number="40">और वाँ पुजभेरन जकर्याह की घरवाली इलीशिबा स नमस्कार करछ्य।</verse>
				<verse number="41">और जसीकैं इलीशिबा ले मरियम को नमस्कार सुणछ्य, उसीकैं बच्चा उक पेट में उछलछो, और इलीशिबा पवित्र आत्मा ले भरि गै।</verse>
				<verse number="42">और उ मरियम थैं बड़ी जोरले कुन लागछी, तैं सब स्यैनिन में धन्य छी, और धन्य छै उ बच्चा जैस तैं जन्म दीन वाली छी।</verse>
				<verse number="43">म्येरो यो सौभाग्य छै, कि म्यारा प्रभु की ईजा मैंथैं मिलन खिन आ रैछ।</verse>
				<verse number="44">क्याखिनकि देख, जसीकैं मैंले त्यारा नमस्कार की आवाज सुणछ्य, उसीकैं म्यारा पेट में बच्चा खुशी ले उछल पड़छ्य।</verse>
				<verse number="45">तैं धन्य छी क्याखिनकि तैंले विश्वास करछ्य, कि प्रभु ले जो क्योछ, उ ऊस पुर करोलो।</verse>
				<verse number="46">तब मरियम ले क्योछ, “मैं परमेश्वर की स्तुति करछूँ।</verse>
				<verse number="47">और मेरि आत्मा म्यारा उद्धार करूनवाला परमेश्वर भटे खुश भैछ।</verse>
				<verse number="48">क्याखिनकि उले अपूनी दासी की दीनता स देखिभेरन दया करछ्य, येक कारण सुणा, अब भटे सब युगा का लोग तैंस धन्य कौला।</verse>
				<verse number="49">क्याखिनकि उ सर्वशक्तिमान परमेश्वर मैं खिन ठुल-ठुल काम करिना का छन। और उको नाम पवित्र छै।</verse>
				<verse number="50">जो लोग परमेश्वरो को डर मान्नान, उनूनमें उकी दया पीढ़ी भटे पीढ़ीन तक बनिना की रूछी।</verse>
				<verse number="51">और उ अपूनी महान सामर्थ को उपयोग महान काम करून खिन करछो, और जो अपून-आप में घमण्ड करनान, उनून उ तितर-बितर कर द्योलो।</verse>
				<verse number="52">परमेश्वर राजान थैं राज्य करना को अधिकार ली लीछो, और दीन लोगून को उठूछो।</verse>
				<verse number="53">और उले भुखा लोगून बड़िया खाना ले तृप्त करछ, और धनवानून खाली हात निकाल दीछ।</verse>
				<verse number="54">उले हमार पूर्वजून थैं करिना का वादा स याद करछ्य, और अपूनो इस्राएल देशाक लोगून की मद्दत करून खिन आ रियो छै।</verse>
				<verse number="55">उले अब्राहम और उक वंश में हमेशा खिन दया दिखून खिन याद करछ्य।”</verse>
				<verse number="56">मरियम लगभग तीन मैंना इलीशिबा दगाड़ रैभेरन अपूनो घर खिन वापस आ जाछी।</verse>
				<verse number="57">तब इलीशिबा का नन्तिनो पैद हुना को बखत पुरो भ्योछ, और उले एक च्याला स जन्म दीछ।</verse>
				<verse number="58">तब उक पड़ोसिन ले और रिस्तदारून ले सुणछै, कि परमेश्वर ले उमें अपूनी बड़ी दया करछ्य, तब उनूनले इलीशिबाक दगाड़ खुशी मनाछ।</verse>
				<verse number="59">और अठूँ दिन उन उ नानतिनास खतना करून खिन ल्यान। उन उको नाम उक बबा का नाम पर जकर्याह राखून चाँछ्या।</verse>
				<verse number="60">लेकिन नानतिना की ईजा इलीशिबा ले क्योछ, “येको नाम जकर्याह नै, बल्कि यहूना राखि जौ।”</verse>
				<verse number="61">तब उन लोगून ले क्योछ, “त्यारा कुल में केको ले यो नाम नाहातिन।”</verse>
				<verse number="62">तब उनूनले जकर्याह थैं ईशार भेरन पुछ्छै, कि तैं येको नाम कि राखून चाँछै?</verse>
				<verse number="63">तब जकर्याह ले पाठ्ठी मंगाभेरन लिखछ्य, “येको नाम यहूना राखि जौ।” और सब लोग यो बात ले ताजुब में पड़ ग्या।</verse>
				<verse number="64">उई बखत उकी आवाज लौट आछ, और उक जिबाड़ा का बंधन खुल ग्या और उ परमेश्वरे की महिमा करून लागछो।</verse>
				<verse number="65">और जकर्याह का आश-पास रून वाला लोगून में डर छा ग्यो, और उन सब बातुन की चर्चा यहूदिया प्रदेशा का सार पहाड़ी इलाका में फैल गै।</verse>
				<verse number="66">और सब सुणून वाला अपूनो-अपूनो मन में विचार करभेरन कुंनान, “यो नान्तिनो कसो होलो?” क्याखिनकि प्रभु की सामर्थ उक दगाड़ छी।</verse>
				<verse number="67">और उ नान्तिन को बाब जकर्याह पवित्र आत्मा ले भरि भेरन, भविष्यवाणी करून लागछो।</verse>
				<verse number="68">“धन्य छन प्रभु, इस्राएलाक परमेश्वर की स्तुति करा, क्याखिनकि उ अपून लोगून में दया करून खिन आ र्योछ, और उनोरो उद्धार करछ्य।</verse>
				<verse number="69">और उले अपून सेवक दाऊदाका वंश में हमून खिन एक शक्तिशाली मुक्तिदाता स भेज छै।</verse>
				<verse number="70">भौत पैलि भटे, प्रभु अपून संदेश दीन वाला पवित्र लोगून का द्वारा यो कुँनै आ र्योछ,</verse>
				<verse number="71">दुश्मनून और उन सबून है जो हमून खिन बैर राखनान उनून भटे बचा राँखछ्य।</verse>
				<verse number="72">उ अपूनी पवित्र वाचा स याद करभेरन हमार पुरखान में दया करोलो।</verse>
				<verse number="73">और उले कसम खाभेरन हमार पूर्वज अब्राहम थैं कईना को छ्यो,</verse>
				<verse number="74">कि उ हमून हमार दुश्मनून का हात भटे बचाल,</verse>
				<verse number="75">उक सामुनि पवित्र और धर्मी हो भेरन, जीवन भर निडर हो भेरन उकी सेवा करनै रू।</verse>
				<verse number="76">हे बालक, तैं परमेश्वरो को संदेश दिनवाला कहलालै। क्याखिनकि तैं प्रभु को बाटो तैय्यार करून खिन उक अघिल-अघिल हिटलै, और उक उन खिन लोगून तैय्यार करोलो।</verse>
				<verse number="77">और परमेश्वरा का लोगून का पापून माफ करना का द्वारा उनून मुक्ति का बारिमें ज्ञान द्योलो।</verse>
				<verse number="78">हमार परमेश्वरे की हमून में इसी दया भैछ, जसीकैं सूरज हमून रोशनी दीन खिन चमकछो, उसीकैं मसीह ले हमून खिन स्वर्ग भटे आलो।</verse>
				<verse number="79">पाप में जीन्दगी जीन वालान और मौत का खतरा में बैठन वालान उज्यालो द्योलो, और यो उज्यालो हमार जीन्दगी स ठीक बाटा में लिजालो।”</verse>
				<verse number="80">और जकर्याह को च्योलो यहूना ठूलो हुनै ग्यो और आत्मा में ले ताकतवर हुनै ग्यो, और इस्राएली लोगून का बीच में उपदेश दीन है पैलि तक बिरान जागा में रूछो।</verse>
			</chapter>
			<chapter number="2">
				<verse number="1">यो उन दिनून की घटना छै, जब रोमी महाराजा औगुस्तुस कैसर ले यो हुकुम दीछ, कि सारे रोमी सम्राज्य का लोगून की गिनती करभेरन उनार नाम लिखी जून।</verse>
				<verse number="2">यो पैलि जनगणना छी, जब क्विरिनियुस सीरिया देशो को राज्यपाल छ्यो।</verse>
				<verse number="3">और उ सम्राज्य का सब लोग अपूनो-अपूनो नाम लिखून अपून-अपून नगर खिन जानान जाँका उनार पूर्खा छ्या।</verse>
				<verse number="4">यूसुफ दाऊद को वंश को छ्यो, येक कारण उ गलील प्रदेशाका नासरत गौं भटे यहूदिया प्रदेशाका बैतलहम गौं खिन ग्योछ।</verse>
				<verse number="5">उ अपूनी गर्भवती घरवाली मरियमा का दगाड़ नाम लिखून खिन ग्योछ।</verse>
				<verse number="6">जब उन बैतलहम गौं में छ्या, तो उनून सराय में किराया में रून खिन कोई कमरा नै मिली, येक कारण उनून वाँ रून पड़छो जाँ गोरू-बाछा राखनान। जब उन वाँई छ्या तब मरियम का नान्तिनो हुना को बखत आ जाछो, त उले वाँई अपून पैला च्याला स जन्म दीछ, और ऊस एक टाल में लपेटिभेरन ऊस उ जाग राखछै जाँ लोग गोरू-बाछा का खान खिन घास डालनान।</verse>
				<verse number="7"></verse>
				<verse number="8">और उ देश में कुछ ग्वाला छ्या जो रात में खुला मैदान में रैभेरन अपून भेड़-बाकारान को झुण्डो को पहरा दीन मरेछ्या।</verse>
				<verse number="9">तब अचानक स्वर्ग भटे परमेश्वरो को एक स्वर्गदूत वाँ प्रगट हो भेरन उनार पास ठाड़ भ्योछ, और प्रभु को तेज उनार चारू तरफ चमकछै, और ग्वाला भौत डरी ग्या।</verse>
				<verse number="10">तब स्वर्गदूत ले उनूनथैं क्योछ, “तुम डरा जन, देखा, मैं तुमून खिन एक सुसमाचार लीभेरन आरयूँ! जो सब लोगून खिन छै।</verse>
				<verse number="11">आज दाऊद राजा का गौं बैतलहम में, तुमून खिन एक मुक्तिदाता पैद हो र्योछ, योई मसीह प्रभु छै।</verse>
				<verse number="12">तुमून खिन उकी यो पछ्याण होलि, कि तुम एक बच्चा स टाल में लपटीना को और जाँ लोग गोरू-बाछा खान खिन घास डालनान वाँ दिखाई द्योलो।”</verse>
				<verse number="13">तब एकाएक उ स्वर्गदूताक दगाड़ भौत स्वर्गदूतून को दल परमेश्वर की जै-जैकार करून और यो कुँनै दिखाई दीछ,</verse>
				<verse number="14">“स्वर्ग में परमेश्वर की महिमा हो, और धरती में उन लोगून शान्ति मिलौ, जिनून देखिभेरन परमेश्वर खुशी छै।”</verse>
				<verse number="15">जब स्वर्गदूत उनार पास भटे स्वर्ग खिन न्हैग्या, तब ग्वालान ले आपस में क्योछ, “हिटा, हम ले बैतलहम गौं जाभेरन यो घटना स देखनू, जैस प्रभु ले हमून में प्रगट कर रैछ।”</verse>
				<verse number="16">और वाँ जाभेरन उनूनले यूसुफ, मरियम और उ नन्तिना स जाँ लोग गोरू-बाछा का खान खिन घास डालनान वाँ राखिना को देखछै।</verse>
				<verse number="17">ऊस देखिभेरन उनूनले जो बात स्वर्गदूत ले नानतिना का बारिमें बता राखछी, उन लोगून बातुन लाग्यान।</verse>
				<verse number="18">जिनूनले ग्वालान की बातुन सुणछै उन सब लोग हैरान हो ग्या।</verse>
				<verse number="19">लेकिन मरियम इन सब बातुन का बारिमें अपून मन में सोचनै रैछ।</verse>
				<verse number="20">और ग्वालान जसो स्वर्गदूत ले बताईना को छ्यो, ऊसो सब कुछ देखभेरन और सुणभेरन, परमेश्वर स्तुति और महिमा करनै-करनै वापस लौट ग्या।</verse>
				<verse number="21">यीशुक जन्माक अठूँ दिन यहूदीन का रीति का अनुसार जब उको खतना को बखत आछ, उ दिन यूसुफ और मरियम ले उको नाम यीशु राखछ्य, यो नाम परमेश्वरे ले उ बखत मरियम स अपून स्वर्गदूता का द्वारा बताईना को छ्यो, जब मरियम गर्भवती ले नी हो रैछी।</verse>
				<verse number="22">जब मूसा का नियमा का अनुसार शुद्ध हुनान दिन पुर हो गैछ्या, त उन उ नान्तिना स यरूशलम शैहरा का मन्दिर में परमेश्वरा का सामुनि ली ग्यान,</verse>
				<verse number="23">जसीकैं प्रभु की नियम की किताब में लिखीना को छै, “हरेक जेठो च्योलो प्रभु खिन पवित्र मानी जालो।”</verse>
				<verse number="24">और उन वाँ “पंडुकों को एक जोड़ो, या कबूतर का द्वी पोथा” बलिदान चढ़ून खिन लियान। क्याखिनकि प्रभु को नियम को पालन करून छ्यो।</verse>
				<verse number="25">और उ बखत यरूशलम शैहर में शमौन नामोको एक आदिमी छ्यो, और उ धर्मी और भक्त छ्यो; और उ बेसबरी ले मसीह को उनाको इन्तजार करून मरेछ्यो जैस भेजना को वादा परमेश्वर ले करिना को छ्यो कि उ अ, और इस्राएल देशा का लोगून तसल्ली द्यो। और पवित्र आत्मा उक दगाड़ छ्यो।</verse>
				<verse number="26">और ऊस पवित्र आत्मा ले यो बता राखछ्यो, कि जब तक उ परमेश्वरा का मसीह को दर्शन नी कर ल्योलो, तब तक उ नी मर।</verse>
				<verse number="27">और उ दिन पवित्र आत्मा का बताई जाना द्वारा ले मन्दिरा का खाला में आछ; जब मरियम और यूसुफ यीशु स मन्दिरा का भितर ल्यान, कि मूसा का नियम का अनुसार विधि स पुरी करून।</verse>
				<verse number="28">तब शमौन ले बालक यीशु स अपना गोदी में पकड़ भेरन परमेश्वर स धन्यवाद दीभेरन क्योछ,</verse>
				<verse number="29">“हे प्रभु, अब अपून दास स अपून वादा का अनुसार शान्ति ले मरून दे,</verse>
				<verse number="30">क्याखिनकि अब मैंले उ मुक्तिदाता स देख हालछै,</verse>
				<verse number="31">जैस तैले सब संसारा का लोगून का उद्धार करून खिन भेजिना को छै।</verse>
				<verse number="32">उ गैर-यहूदीन में परमेश्वर स प्रकट करून वाली ज्योति छै, और त्यारा अपून इस्राएल देशा का लोगून की महिमा हो।”</verse>
				<verse number="33">और यीशु का ईजा-बबा इन सब बातुन जो शमौन ले उक बारिमें कर्यान सुणिभेरन ताजुब में पड़ ग्या।</verse>
				<verse number="34">तब शमौन ले उनून आशीष दीभेरन मरियम थैं क्योछ, “देख यो बालक एक इसो चिन्ह का रूप में भेजि ग्योछ, जैको लोग विरोध कराला। येक कारण इस्राएल में भौतून को विनाश और उद्वार को कारण होलो।</verse>
				<verse number="35">एक भयानक दुख, एक तलवार की नियाती तुमार मन स आर-पार छिद द्योलो, इसीकैं भौत लोगून का मन में विचार प्रगट हो जाला।”</verse>
				<verse number="36">आशेर का गोत्र में भटे हन्ना नामोको फनूएल की एक चेलि छी जो परमेश्वरो को संदेश दिनवाली छी। और उ भौत बुढ़ी छी, और अपून ब्या हुना का सात सालून तक अपून घरवाला का दगाड़ रैछ।</verse>
				<verse number="37">और उ विध्वा चौरासी साल की छी, और उ मन्दिर नी छोड़ छी, लेकिन उ उपवास और प्रार्थना करभेरन रात-दिन परमेश्वर की सेवा में लाग रूछी।</verse>
				<verse number="38">और उ उई बखत वाँ आभेरन प्रभु को धन्यवाद करून लागछी, और उ सबून बालक यीशु का बारिमें बातुन लागछी, जो कि यरूशलम शैहरा का लोगून का छुटकारा दीन वाला परमेश्वरा का भेजिनाक मसीह का इन्तजार में छ्या।</verse>
				<verse number="39">जब यूसुफ और मरियम सब कुछ परमेश्वरा का नियम अनुसार सब कुछ पुरो कर चुक्यान त उन गलील प्रदेश में अपून नगर नासरत गौं खिन वापस न्हैजानान।</verse>
				<verse number="40">और यीशु ठूलो और ताकतवर होनै ग्यो, और समझ और बुद्धि में बढ़नै ग्योछ; और परमेश्वर की दया उमें छी।</verse>
				<verse number="41">यीशुक ईजा-बबा हर साल फसह त्यारा का दिन यरूशलम शैहर जाछ्या।</verse>
				<verse number="42">और जब यीशु बार सालो को भ्योछ, त उन पर्व रीति का अनुसार यरूशलम शैहर खिन ग्यान।</verse>
				<verse number="43">पर्व खतम हुना का बाद यूसुफ और मरियम यरूशलम शैहर भटे वापस आयान, लेकिन यीशु यरूशलम शैहर में रूक ग्यो, और यो बात उक ईजा-बबा स मालूम नै छी।</verse>
				<verse number="44">उन यो समझून मरेछ्या कि उ दुसारा यात्रिन का दगाड़ होलो, एक दिना का यात्रा करनाका बाद उनून पत्तो चलछ्य कि यीशु उनार दगाड़ नाहातिन, त उन ऊस अपून रिश्तेदार और जाण पछ्याण वाला लोगून में खोजना।</verse>
				<verse number="45">जब उ काँई नै मिलनो, तब उन यीशु स खोजून-खोजून यरूशलम शैहर खिन वापस जानान।</verse>
				<verse number="46">और तीन दिनून का बाद उनूनले यीशु स मन्दिरा का खाला में यहूदी धर्म गुरून का बीच बैठिना को और उनार दगाड़ सवाल-जबाब करून देखछ्य।</verse>
				<verse number="47">और जतुक लोग उकी बात सुणून मरेछ्या उक जबाबून देखिभेरन ताजुब में छ्या।</verse>
				<verse number="48">तब यीशुक ईजा-बबा यीशुस देखिभेरन ताजुब पड़ ग्या, और उकी ईजा ले उथैं क्योछ, हे “च्याला! तैं हमार दगाड़ इसो क्याखिन करछै? देख, त्यारा बबा और मैं कदुक परेशान छ्या, और तैंस खोजून मरेछ्या।”</verse>
				<verse number="49">और तब यीशु ले अपून ईजा-बाब थैं क्योछ, “तुम मैंस क्याखिन खोजून मरेछा? क्या तुम नी जाण छ्या, मैंस अपून बबा का घर में हुन जरूरी छै?”</verse>
				<verse number="50">लेकिन जो बात यीशु ले उनूनथैं क्योछ, उनार समझया में नै आया।</verse>
				<verse number="51">तब यीशु उनार दगाड़ नासरत गौं खिन ग्योछ, और अपून ईजा-बबा का दगाड़ र्योछ, लेकिन यीशु का ईजा यो सब बात अपून मन में राख्यान।</verse>
				<verse number="52">और यीशु बुद्धि और डील-डौल में, और परमेश्वर और लोगून का अनुग्रह में बढ़नै ग्योछ।</verse>
			</chapter>
			<chapter number="3">
				<verse number="1">रोमी महाराजा तिबिरियुस कैसराक राज्य का पंद्रवां साल में, जब पुन्तियुस पिलातुस यहूदिया प्रदेश को राज्यपाल छ्यो। और राजा हेरोदेस गलील प्रदेशा का इलाका में राज्य करछ्यो, और उक भाई फिलिप्पुस इतूरैया और त्रखोनीतिस प्रदेश में राज्य करछया, और लिसानियास अबिलेने जिला में राज्य करून मरेछ्यो।</verse>
				<verse number="2">और जब हन्ना और कैफा महायाजक छ्या। उ बखत परमेश्वरो को बचन बंजर जाग में जकर्याह च्योलो यहूना का पास पुजछै।</verse>
				<verse number="3">और यहूना यरदन नदी का आश-पासा का सारा प्रदेश में घुम-घुम भेरन, लोगून यो बतूछ्यो कि अपून पापून भटे पश्चताप करा और तब परमेश्वर तुमार पापून माफ करोलो और बपतिस्मा ली।</verse>
				<verse number="4">जसो परमेश्वरो को संदेश दिनवाला यशायाह की किताब में लिखीना को छ्यो, कि उ बिरान जागान में रौलो, और लोगून धध्या-धध्याभेरन यो बतालो, कि प्रभु परमेश्वरा का उन खिन तुम तैयार हो ज्या और उन बाँटान ठीक करून जैमें भटे हो भेरन उ उनवालो छै।</verse>
				<verse number="5">हरेक घाटी भर दी जालि, हरेक डाँण-काँणा नीचा करि जाला, और जो टयाड़ा बाटा छन उन सीधा करि जाला और जो बाटा ऊबड-खाबड छन उन बराबर करि जालो</verse>
				<verse number="6">और सब लोग मुक्तिदाता को दर्शन करला, जैस परमेश्वरा का तरफ भटे मुक्ति दीन खिन भेजि रैछ।</verse>
				<verse number="7">जो लोग यहूना थैं बपतिस्मा लीन खिन उछ्या, यहूना उनूनथैं कुछ्यो, तुम लोग जहरीला स्यापा का नियाति दुष्ट छा! तुमोरो यो सोचून गलत छै की केवल बपतिस्मा लिनाले तुम अपून पापून खिन परमेश्वरा का द्वारा सजा पान है बच सकछा!</verse>
				<verse number="8">येक कारण भल काम करभेरन सबूत दी, कि तुमून ले सच्ची में पापून है पश्चताप कर है छै। और अपून-अपून मन में यो जन सोचा कि हम अब्राहमा का वंशा का छा कि हम बच ज्यूला। क्याखिनकि मैं तुमूनथैं कुछूँ कि परमेश्वर इन ढ़ुगान भटे अब्राहम खिन सन्तान पैद कर सकछो।</verse>
				<verse number="9">अब बात इसी छै कि परमेश्वर हरेक स जो अपून पापून है पश्चताप नै करून चानो, ऊस सजा दीन खिन बिलकुल तैयार छै। ठीक उसीकैं जसीकैं बनकाटो रूखून का जाड़ में राखिना को छै, येका कारण जो-जो रूख निको फल नै लियून, उ काटि जालो और आग में डाली जालो।</verse>
				<verse number="10">तब भीड़ में भटे लोगून ले यहूना थैं पुछ्छै, “तो हम परमेश्वर की सजा भटे बचुन खिन की करनू?”</verse>
				<verse number="11">यहूना ले जबाब दीछ, “जैका पास द्वी कुरता छन, उ जैका पास नाहातिन ऊस एक कुरता दी दे, और जैका पास भौत अनाज छै, उले इसो करा।”</verse>
				<verse number="12">चुंगी लीन वाला ले बपतिस्मा लीन खिन आयान, और उनूनले यहूना थैं पुछ्छै, “गुरू जी, परमेश्वरा का सजा भटे बचुन खिन हम कि करनू?”</verse>
				<verse number="13">और तब यहूना ले उनूनथैं क्योछ, जो चुंगी रोमी सरकार ले तुमून लीन खिन बताईना को छै, उ है ज्यादा चुंगी जन लिया।</verse>
				<verse number="14">और सिपाईनले ले पुछ्छै, कि “हम कि करनू? तब यहूना क्योछ, कैखिन ले उपद्रव जन करया और नै कैमें झूठ्ठो आरोप लगाया, और जतुक मजूरी तुमून मिलछी, उमें खुश रया।”</verse>
				<verse number="15">और जदुक लोग मसीह का जल्द उना का आश में लागिना का छ्या, उन वाँ आईना का छ्या, उन सब अपून मन में सोचून मरेछ्या, कि काँई यो यहूना मसीह त नाहतिनी,</verse>
				<verse number="16">तब यहूना ले उनेरि बात जाणिभेरन उन सबूनथैं क्योछ, मैं त तुमून पानि ले बपतिस्मा दी छूँ, लेकिन जो उनवालो छै, उ मैं है महान छै; मैं इसो लाकारी को ले नाहातिनू कि उको सेवक बनभेरन झुकभेरन उको जूताका खोलि सकू। मैले त तुमून पानि को बपतिस्‍मा दीछ, लेकिन उ तुमून पवित्र आत्मा ले बपतिस्मा द्यालो।</verse>
				<verse number="17">उले अपून हातून में सूप्पो ली हैछ, और उ अपूनी खेती की फसल स निकीकैं साफ करोलो, और ग्यूँका दानान अपून भखार में जामा करोलो, और भूसा स उ आग में जालो, जो कभै नै बुझनी।</verse>
				<verse number="18">इसीकैं यहूना भौत सी शिक्षा दीभेरन लोगून सुसमाचार सुणूनै र्योछ।</verse>
				<verse number="19">लेकिन जब यहूना ले गलील प्रदेशा का इलाका का राजा हेरोदेस जो अपून भाई फिलिप्पुस की घरवाली हेरोदियास स अपूनी घरवाली बनूना का बारिमें और उन सब बुर कामून का बारिमें जो उले करिना का छ्या, ऊस डाटछ्य।</verse>
				<verse number="20">यो बाता का कारण राजा हेरोदेस ले यहूना स कैदी बनाभेरन एक और अपराध कर दीछ।</verse>
				<verse number="21">जब सब लोगून का बपतिस्मा लीन बाद यीशु ले बपतिस्मा लीभेरन प्रार्थना करून मरेछ्या, तो स्वर्ग खुल ग्यो।</verse>
				<verse number="22">और पवित्र आत्मा कबूतर का समान यीशु का मलि में उतर छै, और स्वर्ग भटे परमेश्वर ले क्योछ, तैं म्येरो लाड़िल च्योलो छै। मैं तैं है भौत खुश छूँ।</verse>
				<verse number="23">जब यीशु ले शिक्षा दिन शुरू करछ, उ बखत यीशु की उमर तीस साल की छी, (जसीकैं कि लोग यीशुस यूसुफ को च्योलो समझ छ्या) तो उनेरि वंशावली इसीकैं छी कि यीशु यूसुफ को च्योलो छ्यो और यूसुफ एली को च्योलो छ्यो,</verse>
				<verse number="24">और उ मत्तात को च्योलो छ्यो और उ लेवी को च्योलो छ्यो और उ मलकी को च्योलो छ्यो और उ यन्ना को च्योलो छ्यो और यूसुफ को च्योलो छ्यो,</verse>
				<verse number="25">और उ मत्तिन्याह को च्योलो छ्यो, और उ आमोस को च्योलो छ्यो, और उ नहूम को च्योलो छ्यो, और उ असत्याह को च्योलो छ्यो, और उ नोगह को च्योलो छ्यो</verse>
				<verse number="26">और उ मात को च्योलो छ्यो, और उ मत्तित्याह को च्योलो छ्यो, और उ शिमी को च्योलो छ्यो, और उ योसेख को च्योलो छ्यो, और उ योदाह को च्योलो छ्यो,</verse>
				<verse number="27">और उ यहूना को च्योलो छ्यो, और उ रेसा को च्योलो छ्यो, और उ जरूब्बाबिल को च्योलो छ्यो, और उ शालतिएल को च्योलो छ्यो, और उ उनेरि को च्योलो छ्यो,</verse>
				<verse number="28">और उ मलकी को च्योलो छ्यो, और उ अद्दी को च्योलो छ्यो, और उ कोसाम को च्योलो छ्यो, और उ इलमोदाम को च्योलो छ्यो, और उ एर को च्योलो छ्यो,</verse>
				<verse number="29">और उ यहोशू को च्योलो छ्यो, और उ एलीएजर को च्योलो छ्यो, और उ योरीम को च्योलो छ्यो, और उ मत्तात को च्योलो छ्यो, और उ लेवी को च्योलो छ्यो</verse>
				<verse number="30">और उ शमौन को च्योलो छ्यो, और उ यहूदा को च्योलो छ्यो, और उ यूसुफ को च्योलो छ्यो, और उ योनान को च्योलो छ्यो, और उ इलयाकीम को च्योलो छ्यो,</verse>
				<verse number="31">और उ मलेआह को च्योलो छ्यो, और उ मिन्नाह को च्योलो छ्यो, और उ मत्तता को च्योलो छ्यो, और उ नातान को च्योलो छ्यो, और उ दाऊद को च्योलो छ्यो</verse>
				<verse number="32">और उ यिशै को च्योलो छ्यो, और उ ओबेद को च्योलो छ्यो, और उ बोअज को च्योलो छ्यो, और उ सलमोन को च्योलो छ्यो, और उ नहशोन को च्योलो छ्यो</verse>
				<verse number="33">और उ अम्मीनादाब को च्योलो छ्यो, और उ अरनी को च्योलो छ्यो, और उ हिस्रोन को च्योलो छ्यो, और उ फिरिस को च्योलो छ्यो, और उ यहूदा को च्योलो छ्यो,</verse>
				<verse number="34">और उ याकूब को च्योलो छ्यो, और उ इसहाक को च्योलो छ्यो, और उ अब्राहम को च्योलो छ्यो, और तिरह को च्योलो छ्यो, और उ नाहोर को च्योलो छ्यो</verse>
				<verse number="35">और उ सरूग को च्योलो छ्यो, और उ रूऊ को च्योलो छ्यो, और उ फिलिग को च्योलो छ्यो, और उ एबिर को, और उ शिलह को च्योलो छ्यो,</verse>
				<verse number="36">और उ केनान को च्योलो छ्यो, और उ अरफक्षद को च्योलो छ्यो, और उ शेम को च्योलो छ्यो, और उ नूह को च्योलो छ्यो, और उ लिमिक को च्योलो छ्यो,</verse>
				<verse number="37">और उ मथूशिलह को च्योलो छ्यो, और उ हनोक को च्योलो छ्यो, और उ यिरिद को च्योलो छ्यो, और उ महललेल को च्योलो छ्यो, और उ केनान को च्योलो छ्यो,</verse>
				<verse number="38">और उ एनोश को च्योलो छ्यो, और उ शेत को च्योलो छ्यो, और आदम को च्योलो छ्यो, और उ परमेश्वरो को च्योलो छ्यो।</verse>
			</chapter>
			<chapter number="4">
				<verse number="1">यीशु बपतिस्मा लीना का बाद पवित्र आत्मा की सामर्थ ले भरि भेरन, यरदन नदी भटे वापस आयान; और पवित्र आत्मा अगुवाई ले बिरान जागान में घुमूनै र्योछ।</verse>
				<verse number="2">और चालीस दिन तक शैतान ऊस परखनै र्यो। उन दिनून में यीशु ले चालीस दिन और रात केले नै खायो, और जब उन दिन पुर भ्यान यीशु स भुख लागछ्य।</verse>
				<verse number="3">और तब शैतान ले यीशु थैं क्योछ, “अगर तैं परमेश्वरो को च्योलो छै, त इन ढ़ुगान रोटा बना को हुकुम दे।”</verse>
				<verse number="4">यीशु ले शैतान स जबाब दीछ, कि पवित्रशास्त्र में यो लिखीना को छै, कि मनुष्य केवल रोटा ले ज्यून नी रौ।</verse>
				<verse number="5">तब शैतान यीशुस भौत ऊच्चा डाणा में लिजाछो और पल भर में संसार को राज्य दिखूछो,</verse>
				<verse number="6">और शैतान ले यीशुथैं क्योछ, मैं यो संसारो को पुरो राजपाठ तैंस द्यूलो, क्याखिनकि यो सब म्यारा अधिकार में छै, और जैस मैं चाँ ऊस दी सकछूँ।</verse>
				<verse number="7">अगर तैं झुकीभेरन म्येरो आदर और मेरि भक्ति करले, तो मैं यो सब कुछ तैंस दीयूलो।</verse>
				<verse number="8">तब यीशु ले ऊस जबाब दीछ, पवित्र-शासत्र में लिखीना को छै, कि तैं केवल प्रभु अपून परमेश्वरो को आदर कर और उकी अराधना कर।</verse>
				<verse number="9">तब शैतान यीशु स यरूशलम शैहरा का मन्दिर में लिजाछो और मन्दिरा का किनार में ठाड़ करछो, और यीशु थैं कुंछो अगर तैं परमेश्वरो को च्योलो छै, याँ है फटंग हाण।</verse>
				<verse number="10">क्याखिनकि त्यारा बारिमें पवित्रशास्त्र में लिखीना को छै, कि परमेश्वर स्वर्गदूतून हुकुम द्योलो कि उन तेरि मद्दत करला।</verse>
				<verse number="11">और उन तैंस हातून में उठा ल्याला, काँई इसो नै हो कि त्यारा खुट में ले ढूंगा ले ठेस लागो।</verse>
				<verse number="12">तब यीशु ले शैतान स जबाब दीछ, पवित्र-शासत्र में यो ले लिखीना को छै, कि तैं अपून प्रभु परमेश्वरे की परीक्षा जन करे।</verse>
				<verse number="13">जब शैतान यीशु की सब तरीकाले परीक्षा कर चुकछै, तब उ कुछ बखत खिन ऊस छोड़भेरन वाँ है न्हैजाछो।</verse>
				<verse number="14">फिर यीशु परमेश्वरा का सामर्थ में भरि भेरन गलील प्रदेश खिन वापस ग्योछ, और उकी चर्चा आश-पासा का सारा देश में फैल जाछी।</verse>
				<verse number="15">और यीशु यहूदी सभाघर में उपदेश दीछ्यो, और सब उकी बड़ाई करछ्या।</verse>
				<verse number="16">यीशु नासरत गौं में वापस आछ जाँ उ पालि-पोसी ग्योछ, और अपून रीति अनुसार सबता का दिन यहूदी सभाघर में जाभेरन पवित्र-शास्त्र में भटे पढून खिन ठाड़ भ्योछ,</verse>
				<verse number="17">और ऊस यशायाह परमेश्वरो को संदेश दिनवाला की किताब पढून खिन दी गै, और उले उमें जाँ इसो लिखीना को छ्यो, पढ़छै।</verse>
				<verse number="18">कि प्रभु को आत्मा मैंमें छै, येक कारण कंगालून सुसमाचार सुणून खिन म्येरो अभिषेक करिना को छै। और मैंस येक कारण भेजिनाको छै, कि मैं जो कैद में छन उनोरो छुटकार करूँ और अंधान आँखा पाना को संदेश दीयू, और मैं बोझ में दबीना का लोगून छुडूलो,</verse>
				<verse number="19">और परमेश्वरा का खुश रूना को सालो को प्रचार करूँ।</verse>
				<verse number="20">तब यीशु ले किताब बन्द करछ्य और सेवक का हात में दी दीछ, और बैठ जाछो, और यहूदी सभाघरा का सब लोगून की नजर यीशु का तरफ छी।</verse>
				<verse number="21">तब यीशु ले उन लोगून थैं क्योछ, तुमार सुणना ले आज पवित्रशास्त्र को यो लेख ले पुरो है ग्योछ।</verse>
				<verse number="22">और सब लोगून ले यीशु का तारीफ करछ्य, और भलि बात यीशु का मुँख भटे निकलछ्या, उन बातुन में सब लोगून ताजुब करनान, और कुंनान, “क्या यो यूसुफ को च्योलो नाहतिनी?”</verse>
				<verse number="23">यीशु ले उनूनथैं क्योछ, तुम मैंथैं यो कहावत जरूर कौला, कि हे वैघ, अपून आपस ठीक कर। और कफरनहूम गौं में जो कुछ करछ्य याँ अपून देश में ले कर।</verse>
				<verse number="24">तब यीशु ले उनूनथैं क्योछ, मैं तुमूनथैं सच्ची कुछूँ, कि कोई ले परमेश्वरो को संदेश दिनवाला अपून देश में मान-सम्मान नै पानो।</verse>
				<verse number="25">मैं तुमूनथैं सच्ची कुंछू कि परमेश्वरो को संदेश दिनवाला एलिय्याहा का दिनून जब साढ़े तीन साल तक बरखा नै भै, या तक कि सारा देश में अकाल पड़छ्य, तो इस्राएल देश में भौत विध्वा स्यैनिन छ्या।</verse>
				<verse number="26">लेकिन परमेश्वरो को संदेश दिनवाला एलिय्याह स इस्राएल देश में कोई ले विध्वा पास नै भेजि ग्यो, केवल सिदोन शैहरा का सारफत इलाका में रून वाली एक विध्वा का पास।</verse>
				<verse number="27">और एलिशा परमेश्वरो को संदेश दिनवाला का दिनून में इस्राएल देश में भौत कोढ़ी छ्या, लेकिन परमेश्वर ले सीरिया देशा का गैर-यहूदी नामान स छोड़भेरन कैसे ले चंगो नै कर्यो।</verse>
				<verse number="28">इन बातुन सुणिभेरन जदुक यहूदी सभाघर में छ्या, सब गुस्सा ले भरि जानान।</verse>
				<verse number="29">और यीशुस वाँ भटे भ्यार निकाल दीनान, और जो डाण में उनोरो नगर बसिना को छ्यो, उन यीशुस डाणा का किनार में ली ग्यान, कि ऊस वाँ भटे तलि खितीभेरन मार दीयूलो,</verse>
				<verse number="30">लेकिन यीशु उनार बीच है निकल भेरन न्हैजानान।</verse>
				<verse number="31">फिर यीशु वाँ भटे गलील प्रदेशा का कफरनहूम गौं खिन ग्यान; और सबता का दिन लोगून उपदेश दिन मरेछ्या।</verse>
				<verse number="32">और सुणून वाला उक उपदेश सुणिभेरन हैरान रैग्या, क्याखिनकि उको बचन सच्चा अधिकार का दगाड़ छ्यो।</verse>
				<verse number="33">यहूदी सभाघर में एक आदिमी छ्यो, जैस भूत ले अपून बश में कर राँछ्यो। उले जोर-जोरले चिल्ला भेरन क्योछ,</verse>
				<verse number="34">“हे नासरत के यीशु, तैं हमून किलैं परेशान करून मरेछै? क्या तैं हमून नाश करून खिन आ रैछै? मैं तैंस जाणछूँ कि तैं को छै? तैं परमेश्वरो को पवित्र च्योलो छै।”</verse>
				<verse number="35">यीशु ले उ भूत स डांटिभेरन क्‍योछ, चुप रौ, और यो आदिमी में भटे भ्‍यार निकल जा। तब भूत उ आदिमी स जोरले मरोड़भेरन ऊस बीच में पटक भेरन बिना नुकशान करे उमें भटे भ्‍यार न्‍हैग्यो।</verse>
				<verse number="36">यो देखिभेरन यहूदी सभाघरा का सबै लोग भौतै हैरान हो भेरन, एक-दुसारा थैं पुछून लाग्यान, कि यो कतुक ताकतवर और सामर्थी बचन छन, क्याखिनकि उ सच्चा अधिकार ले और सामर्थ का दगाड़ भूतून हुकुम दीछो, और उन निकल जानान।</verse>
				<verse number="37">इसीकैं यीशु की चर्चा आश-पासा का इलाकान में हुन लागछ्य।</verse>
				<verse number="38">फिर यीशु यहूदी सभाघर भटे उठाभेरन शमौना का घर जानान। उ बखत शमौन की सासू स भौत बुखार आ रियोछ, और उनूनले यीशुथै बिनती करछ्य कि उको ज्वर ठीक करा।</verse>
				<verse number="39">तब यीशु ले उक पास जाभेरन ज्वर स डाँठ छै और शमौन को सासू बुखार ठीक है ग्यो, और उ उनेरि आदर-खातर करून लागछ्य।</verse>
				<verse number="40">और ब्याल बखत लोग कई प्रकाराक बिमारीन यीशु का पास ल्यान। यीशु ले एक-एक में हात राखभेरन उनून चंगो कर दीछ।</verse>
				<verse number="41">भौत लोगून भटे भूत चिल्ला भेरन और यो कुँनै निकलग्या, कि “तैं परमेश्वरो को च्योलो छै।” लेकिन यीशु उनून डाँटछो और बोलून नी दीछ्यो, क्याखिनकि उन जाणि छ्या कि उ परमेश्वरो को च्योलो मसीह छै।</verse>
				<verse number="42">और दुसारा दिन रात्तैनि एक बिरान जागा में न्हैजानान, और भीड़ की भीड़ यीशुस खोजून-खोजून यीशुका पास पुजनान और यीशुस यो कैभेरन रोकून लागना कि हमून छोड़भेरन जन जा।</verse>
				<verse number="43">लेकिन यीशु ले उनूनथैं क्योछ, “मैले और ले गौं और नगरून में जाभेरन परमेश्वरा का राज्य को सुसमाचार सुणून ले जरूरी छै, क्याखिनकि मैं यो काम खिन भेजिनाको छूँ।”</verse>
				<verse number="44">और यीशु गलील प्रदेशा का उन यहूदी सभाघर में प्रचार करनै रयान।</verse>
			</chapter>
			<chapter number="5">
				<verse number="1">एक दिन जब यीशु गलील का झील का किनार ठाड़ छ्या, त लोगून की भौत ठूली भीड़ उनार चारू-तरफ ठाड़ हो भेरन परमेश्वरो को बचन सुणून मेरछी, त इसो भ्योछ,</verse>
				<verse number="2">कि यीशु ले झील का किनार में द्वी नाव देख्यान, और मछवारा लोग नाव में भटे उतर भेरन अपून जाल धुन मरेयछ्या।</verse>
				<verse number="3">उन नावून में भटे एक नाव शमौन की छी, यीशु ले उमें चढ़भेरन उनूनथैं क्योछ, “नाव स किनार भटे थ्वाड़ा दूर ली जा, तब यीशु नाव में बैठि भेरन लोगून उपदेश दिन लागछ्य।”</verse>
				<verse number="4">जब यीशु लोगून उपदेश दी चुकियान, तब उले शमौन थैं क्योछ, “नाव गैंर पानि में लिजा, और माछा पकड़ून खिन अपूनी जाल डाला।”</verse>
				<verse number="5">तब शमौन ले यीशु स जबाब दीछ, “गुरू जी हमूले पुरी रात मेहनत करछ्य पर हमूले के नै पकड़ीयो, लेकिन तुम कुँछा त मैं फिरले तुमार कुन में जाल डाल छूँ।”</verse>
				<verse number="6">जब पतरस और उक दगड़ियान ले जाल डालछ्य त जाल में इदुक माँछा फँस जाना कि जाल फाटना को खतरा लागून मरेछ्यो।</verse>
				<verse number="7">तब शमौन ले दुसारा नाव वाला स ईशार करभेरन बुलाछ, और द्वीवै नाव माछान ले इदुक भरि जानान कि उन डूबून वाला छ्या।</verse>
				<verse number="8">यो देखिभेरन शमौन पतरस ले यीशु का खुटान में खितीभेरन क्योछ, “हे प्रभु म्यारा सामुनि भटे न्हैजा, क्याखिनकि मैं पापी छूँ।”</verse>
				<verse number="9">क्याखिनकि इदुक ज्यादा माँछा पकड़ना का कारण उ और उक दगड़िया हैरान हो जानान।</verse>
				<verse number="10">और शमौन पतरस का दगड़िया याकूब और यहूना जो जब्दी का च्याला छ्या, उन ले यो देखिभेरन हैरान छ्या, तब यीशु ले शमौन पतरस थैं क्योछ, “जन डर, जसीकैं तैंले माछा पकड़ छै, उसीकैं आज का बाद तैं लोगून म्येरो शिष्य बनून खिन जामा करलै।”</verse>
				<verse number="11">और उन नाव किनार में ली ग्यान, और येका बाद उनूले सब छोड़ दीछ, और उक शिष्य बन ग्या।</verse>
				<verse number="12">एक बार यीशु एक गौं में छ्या, तब वाँ एक कोढ़ी उक पास आभेरन उक खुटान पड़भेरन बिनती करछो, “हे प्रभु, मैंस चंगो कर दे, क्याखिनकि मैं जाणछूँ, कि तैं मैंस चंगो कर सकछै।”</verse>
				<verse number="13">यीशु ले हात बढ़ाभेरन ऊस छूँछ और क्योछ, “होई, मैं चाँछू, तैं चंगो है जा।” और उ कोढ़ भटे तुरन्त चंगो है ग्यो।</verse>
				<verse number="14">तब यीशु ले ऊस हुकुम दीछ, “कि यो बात कैथैं जन कये, पर जाभेरन अपूनास याजक स दिखाये, और कोढ़ भटे ठीक हुना का बारिमें, जेले मूसा ले ठैरा राखछ्य, उ भेंट चढ़ाये, ताकि लोग जाण सकून की तैं चंगो है गैछै।”</verse>
				<verse number="15">लेकिन यीशु का बारिमें समाचार और ज्यादा फैल गै, और भीड़ कि भीड़ यीशु की सुणन खिन और बिमारी लोग चंगा हुन खिन जामा हुनान।</verse>
				<verse number="16">लेकिन यीशु उनून है दूर बिरान जागा में जाभेरन एकान्त में प्रार्थना करछ्यो।</verse>
				<verse number="17">एक दिना इसो भ्योछ कि यीशु उपदेश दिन मरेछ्या, और फरीसी लोग और मूसा का नियम सिखून वाला वाँ बैठिना का छ्या, जो गलील और यहूदिया प्रदेशा का इलाकान और यरूशलम शैहर और यरूशलम शैहर भटे आईना का छ्या, और चंगो करून खिन प्रभु की सामर्थ यीशु का दगाड़ छी।</verse>
				<verse number="18">उई बखत थ्वाड़ लोग एक लकवा पड़ीना का आदिमी स चरपाई में ल्यूनान, और उन लोग उ बिमारी यीशु का पास भितर लीजान चाँछ्या, लेकिन भीड़ इदुक छी की भिरत जाना को बाटो नी छ्यो।</verse>
				<verse number="19">तब उनूनले पाखा में जाभेरन पाखाका खपरेल निकालभेरन चरपाई में उ लकवा का बिमारी बाँदीभेरन लोगून का बीच में यीशु का सामुनि उतार छै।</verse>
				<verse number="20">यीशु ले उनोरो विश्वास देखिभेरन उ लकवा का बिमारी थैं क्योछ, “मैं त्यार पापून माफ करछूँ।”</verse>
				<verse number="21">तब मूसा का नियम सिखून वाला और फरीसी लोग यो बात सुणिभेरन आपस में कुन लागनान, यो त परमेश्वर की बुराई करून मेरियोछ। परमेश्वरा का अलावा दुसोरो कोई ले पाप माफ नै करि सकनो, केवल परमेश्वरा का पास पापून माफ करना को अधिकार छै?</verse>
				<verse number="22">यीशु ले उनेरि मनेंकि बात जाणिभेरन, उनूनथैं क्योछ, तुम अपून-अपून मन में कि सोचन मरेछा?</verse>
				<verse number="23">इसो कुनो आसान छै? क्या यो कुन कि त्यार पाप माफ है ग्यान, या यो कुन कि उठ और चल फिर?</verse>
				<verse number="24">येक कारण कि तुम जाणि ली “मैं आदिमी का च्याला स धरती में पाप माफ करना को ले अधिकार छै।” यीशु ले उ लकवा का रोगी थैं क्योछ, “मैं तैथैं कुछूँ उठ, अपूनो बिछान उठाभेरन अपून घर खिन जा।”</verse>
				<verse number="25">और उ लकवा को बिमारी तुरन्त सबून का सामुनि ठाड़ हो ग्यो, और अपूनी बिछान उठाभेरन और परमेश्वर की बड़ाई करनै अपून घर खिन न्हैग्यो।</verse>
				<verse number="26">और सबून ताजुब हुछो, और परमेश्वर की बड़ाई करून लाग्यान, और भौत डरभेरन कुन लाग्यान, “आज हमून ले अनोखी बात देखी छै।”</verse>
				<verse number="27">येक बाद यीशु भ्यार खिन आयान, और एक लेवी नामोको चुंगी लिनवालो आदिमी स चुंगी चौकी में बैठिना को देखछ्य, यीशु ले ऊस बुलाभेरन क्योछ, “म्यार दगाड़ अ और म्येरो शिष्य बन जा।”</verse>
				<verse number="28">तब उ लेवी ले अपूनो काम छोड़ी दीछ, और यीशु को शिष्य बन ग्यो।</verse>
				<verse number="29">और उ लेवी अपून घर में दावत को इतजाम करछो, और यीशु और उक शिष्य खान खिन बैठियान, और उनार दगाड़ भौत भीड़ छी।</verse>
				<verse number="30">तब फरीसी लोग और मूसा का नियम सिखून वाला लोग यीशुका शिष्यून थैं कुंनान, “तुम चुंगी लिनवाला और पापी का दगाड़ खानो क्याखिन खाछा?”</verse>
				<verse number="31">तब यीशु ले उनून जबाब दीछ, “जसिकै कि भल-चंगान लोगून डाक्‍टर कि के जरूरत नाहातिन, लेकिन जो बिमार छन उनुस डाक्‍टर कि जरूरत छै।</verse>
				<verse number="32">अपून-आपस धर्मी समझून वाला लोगून खिन मैं नै आरयूँ, बल्कि जो लोग अपूनास पापी समझनान, मैं उन लोगून पापून भटे पश्चाताप करून खिन बुलून आरयूँ।”</verse>
				<verse number="33">तब उनूनले यीशुथै क्योछ, “यहूना और फरीसी लोगून का शिष्य त उपवास और प्रार्थना करनान, लेकिन त्यारा शिष्य खानै-पिनै रूनान।”</verse>
				<verse number="34">तब यीशु ले उनूनथैं क्योछ, “जब तलक मैं अपून शिष्यून का दगाड़ छूँ, उन बर्त कसीकैं कर सकनान? उन नै कर सकना।</verse>
				<verse number="35">लेकिन इसो बखत आला जब कि ब्योलो उनून भटे अलग करि जालो, तब उ बखत उन बर्त राखाँला।”</verse>
				<verse number="36">तब यीशु ले उनून एक कहानी सुणाछ, “लोग नय्या कपाड़ा में पुरान कपाड़ा को टाँलो नै लगूना, क्याखिनकि नय्या कपाड़ा धुना का बाद छ्वोटो हो जाछो, जैल पुरानो कपाड़ा और ज्यादा फाटि जालो, और उ पुरानो कपाड़ा उक दगाड़ मेल नी खा।</verse>
				<verse number="37">इसीकैं यीशु ले एक और उदारण दीभेरन उनुस समझूंनान, लोग नय्या अंगूर को रस पुरानो चमड़ा का थैल में नै राखना, क्याखिनकि जब उ अंगूर रस बढ़लो, तब थैलास फाड़ी द्यलो, और अंगूर रस और थैल द्वीवै बरबाद है जाला।</verse>
				<verse number="38">येक कारण हम नय्या अंगूर रस नय्या थैल में राँखनू।</verse>
				<verse number="39">और कोई आदिमी पुरानो अंगूर रस पी भेरन नय्या नै मांगनो, किलैकी ऊस पुरानो निको लागछो।”</verse>
			</chapter>
			<chapter number="6">
				<verse number="1">जब यीशु और उनार शिष्य सबता का दिन गाँड़ान में भटे हो भेरन जानमरेछ्या, और उक शिष्य बालान टोड़न भेरन हात में माणी-माणी भेरन खानै जानमरेछ्या।</verse>
				<verse number="2">तब फरीसी लोग यो देखिभरेन यीशु थैं क्योछ, “त्यारा शिष्य इसो काम किलैं करनान, जो काम मूसा का नियम का अनुसार सबत दिन में करून ठीक नाहातिन?”</verse>
				<verse number="3">तब यीशु ले उनून जबाब दीछ, “क्या तुमूनले यो नै पढ़ियो, कि जब दाऊद और उक दगाड़िया भुखा छ्या त उनूनले कि करछ्य?</verse>
				<verse number="4">उ कसीकैं परमेश्वरा का घर में ग्योछ, और अपून दगड़ियान का दगाड़ भेंट चढ़ाईना का रवाटा खायान, और उले उ रवाटा अपून दगड़ियान ले दीछ, जिन रोटान सिर्फ याजक खा सकछ्या?”</verse>
				<verse number="5">और यीशु ले उनूनथैं क्योछ, “मैं आदिमी को च्योलो, सबतो को ले प्रभु छूँ।”</verse>
				<verse number="6">और एक बार इसो हुछो कि यीशु सबता का दिन यहूदी सभाघर में जाभेरन उपदेश दिन लागनान, और वाँ एक आदिमी छ्यो, जैक दैन हात सुखी ग्यो छ्यो।</verse>
				<verse number="7">और वाँ मूसा का नियम सिखून वाला और फरीसी लोग यीशु में दोष लगूना का ताक में छ्या, कि यीशु सबता का दिन उ आदिमी स ठीक करछो या नै।</verse>
				<verse number="8">लेकिन यीशु उनार विचारून जाण छ्या, येक कारण यीशु ले जैका हात सुखीना को छ्यो उथैं क्योछ, “सब लोगून का बीच में ठाँड़ है जा।” और उ आदिमी ठाणो हो जाछो।</verse>
				<verse number="9">तब यीशु ले लोगून थैं पुछ्छै, “कि सबता का दिन कि करून ठीक छै, भलो करून या बुरो करून, प्राण बचुन या नाश करून?”</verse>
				<verse number="10">तब यीशु ले चारू तरफ देखिभेरन उ आदिमी थैं क्योछ, “अपूनो हात सिददो कर।” और उले जसीकैं अपूनो हात सिददो करछ्य, तब उको हात बिल्कुल ठीक है ग्यो।</verse>
				<verse number="11">यो देखभरेन फरीसी और मूसा नियम सिखून वाला गुस्साले चिड़ून लाग्यान, कि हम यीशु का दगाड़ कि करनू?</verse>
				<verse number="12">उन दिनून में यीशु पासाक एक डाण में प्रार्थना करून खिन ग्यान, और पुरी रात परमेश्वर थैं प्रार्थना करून में बिताछ।</verse>
				<verse number="13">और दुसारा दिन यीशु ले अपून शिष्यून बुलाछ, और उनूनमें भटे बार शिष्य चुनियान और उनून प्रेरित क्योछ।</verse>
				<verse number="14">और यो उन बारा शिष्य छन, जिनून यीशु ले चुनछ्य, पैलो शमौन जैक दुसोरो नाम यीशु ले पतरस राँखछ्य, और उको भाई अन्द्रियास, और याकूब, और याकूब को नानो भाई यहूना, और फिलिप्पुस, और बरतुल्‍मै,</verse>
				<verse number="15">और मत्ती, और थोमा, और हलफई को च्योलो याकूब। और शमौन जो जेलोतेस ले कहलूछो,</verse>
				<verse number="16">और याकूब को च्योलो यहूदा, और यहूदा इस्करियोती जेले यीशु स दुश्मनून का हात बाद में ध्वाका ले पकड़ावा ले दीछ।</verse>
				<verse number="17">तब यीशु अपून शिष्यून का दगाड़ उतर भेरन मैदान में आयान, और यीशुका मानन वालान की भौत ज्यादा भीड़, जो सारा यहूदिया और यरूशलम शैहर और सोर और सिदोन शैहरा का झील का किनारा का भौत लोग,</verse>
				<verse number="18">यीशु उपदेश सुणन खिन और अपूनी बिमारीन भटे चंगा हुन खिन उक पास आईना का छ्या, और उन जो भूतून का सताईना का लोग ले ठीक हो जाछ्या।</verse>
				<verse number="19">और सब लोग यीशु स छुन चाँछ्या, क्याखिनकि यीशु में भटे सामर्थ निकलून मरेछी और लोग चंगा हुन मरेछ्या।</verse>
				<verse number="20">यीशु ले अपून शिष्यून देखभेरन क्योछ, धन्य छा तुम जो मनाका दीन छा, क्याखिनकि परमेश्वरा का राज्य तुमोरो छै।</verse>
				<verse number="21">धन्य छा तुम जो ऐल भुखा छा, क्याखिनकि तुम तृप्त करि जाला। धन्य छा तुम जो ऐल डाण मारून मरेछा क्याखिनकि तुम हँसला।</verse>
				<verse number="22">धन्य छा तुम जब म्यार कारण ले लोग तुमेरि निन्दा करला, तुमोरो विरोध और बेईजती करला, और तुमून बदनाम करभेरन निकाली द्याला।</verse>
				<verse number="23">“उ दिन खुश होई और आनंद मनाया, क्याखिनकि येक बदला स्वर्ग में तुमून ठूलो ईनाम मिलोल! उनार पुरखानले परमेश्वरो को संदेश दिनवालान का दगाड़ इसो करछ्या।</verse>
				<verse number="24">तुम धनवान लोगून खिन कतुक भयानक होलो, क्याखिनकि तुम अपूनी सुख-शांति पा चुक गैछा।</verse>
				<verse number="25">हाय तुमून खिन जो ऐल भर पेट खाछा, क्याखिनकि तुम भुखा रौला। हाय तुमून खिन जो ऐल हँस छा, क्याखिनकि तुम दुखी होलो और डाण मारला।</verse>
				<verse number="26">हाय तुमून खिन जब लोग तुमेरि बड़ाई करून, क्याखिनकि तुमार पुरखानले उन लोगून का बारमे निकी बात करछ्य जो परमेश्वरा का संदेश दिनवाला झूठ्ठा लोग छ्या। येल पत्तो चलछो की तुम ले उनेरि नियाती परमेश्वरा का संदेश दिनवाला झूठ्ठा लोग छा।</verse>
				<verse number="27">लेकिन मैं तुमूनथैं सुणन वालान थैं कुछूँ कि अपून दुश्मनून का दगाड़ ले प्रेम करा। जो तुमार दगाड़ दुश्मनी करनान, उनून खिन भलाई करा।</verse>
				<verse number="28">जो तुमून श्राप दीनान उनुस आशीर्वाद दीया, जो तुमार दगाड़ बुरो बर्ताव करनान उनून खिन प्रार्थना करा।</verse>
				<verse number="29">जो तुमार एक गाल में थप्पड मारछो, ऊस दुसोरो गाल ले फेर दीया, जो तुमोरो कुरता ल्योलो, त ऊस अपूनो भ्यार वालो कोट ले दी दे।</verse>
				<verse number="30">जो कोई ले तुमूनथैं केले माँगछो, ऊस उ दीया। जो तुमोरो चीज छणुछ, उथैं उ वापिस जन माँगिया।</verse>
				<verse number="31">दुसरान का दगाड़ ठीक ऊसो ब्यवहार करा जसो ब्यवहार की आश तुम अपून खिन करछा।</verse>
				<verse number="32">अगर तुम उनार दगाड़ प्रेम करछा जो तुमार दगाड़ प्रेम करनान, तब येमें तुमेरि कि बड़ाई छै? क्याखिनकि पापी जो प्रभु स नै मानना, उन ले अपून प्रेम करून वालान का दगाड़ प्रेम करनान।</verse>
				<verse number="33">अगर तुम उनेरि भलाई करछा जो तुमेरि भलाई करनान, तब येमें तुमेरि कि बड़ाई छै? क्याखिनकि पापी लै इसो करनान।</verse>
				<verse number="34">अगर तुम उनुस कर्ज दीछा जिनूनथैं वापिस पाना की आश राखछा, त तुमेरि कोई किलैं बड़ाई करो? क्याखिनकि पापी ले पापिन कर्ज दीनान कि उनूनथैं फिर उदुकैं वापिस पा ल्याल।</verse>
				<verse number="35">लेकिन तुम अपून दुश्मनून का दगाड़ ले प्रेम कर्या, उनेरि भलाई कर्या और वापिस पाना की आश नै राखभेरन कर्ज दीया, तभै तुमोरो ईनाम ले ठूलो होलो, और तुम महान परमेश्वर की संतान बनाई जॉला, क्याखिनकि उन बुर लोगून में दयालु छन जो धन्यवाद नै करना।</verse>
				<verse number="36">जसो तुमोरो पिता परमेश्वर दयालु छन उसीकैं तुम ले दयालु बँन्या।</verse>
				<verse number="37">तुम दुसरान में दोष जन लगा, तब परमेश्वर तुमूनमें ले दोष नै लगा। कैका खिलाफ न्याय जन करा, तब परमेश्वर तुमार खिलाफ ले न्याय नै कर। दुसरान माफ करला, तब परमेश्वर तुमून ले माफ करोलो।”</verse>
				<verse number="38">दीया करा, त तुमून ले द्योलो। लोग तुमून नापेले चेपि-चेपि भेरन और हिला-हिला भरेन तुमार काखि में डाली जालो, क्याखिनकि जो नापेले तुम नापछा, उई नापेले तुमून खिन ले नापी जालो।</verse>
				<verse number="39">फिर यीशु ले उनूनथैं एक कहानी सुणाभेरन क्योछ, कि अन्धा-अन्धा स बाटो बता सकछी? क्या द्वीवै जन गड्डा में नी खिती जाला?</verse>
				<verse number="40">शिष्य अपून गुरू है ठूलो नै, लेकिन जो सिद्ध होलो, अपून गुरू का समान होलो।</verse>
				<verse number="41">यीशु ले फिर क्योछ, “तुम किलैं अपून भाई की नानि-नानि गलतिन में दोष लगूछा, क्या तुम अपूनी ठूली-ठूली गलतिन नै देखना।</verse>
				<verse number="42">और जब तुमूनले गलती कर रैछ, त तुम कसकैं अपून भाई थैं कै सकछै, ‘कि तैं गलत छै।’ हे कपटी पैलि तैं अपूनी ठूली-ठूली गलतिन सुधार, तब तैं अपून भाई की नानि-नानि गलतिन निकीकैं सुधार पालै।”</verse>
				<verse number="43">कोई ले निको रूख बुरो फल नै ल्यून और नै कोई बुरो रूख निको फल नै ल्यून।</verse>
				<verse number="44">हरेक रूख अपून फलून ले पछ्याणी जाछो, क्याखिनकि झील-झाड़िन भटे अंजीर नै तोड़ना और नै कंटीली झाड़िन भटे अंगूर तोड़ना।</verse>
				<verse number="45">और भल आदिमी मन का भण्डार भटे भल बात निकलनान, और बुरा आदिमी मन का भण्डार भटे बुर बात निकलनान, क्याखिनकि आदिमी का मन में जो हुछो उई मुँख भटे निकलछो।</verse>
				<verse number="46">जब तुम म्येरो कयू नै मानना, “तैं मैंथैं हे प्रभु हे प्रभु” किलैं कुँछा?</verse>
				<verse number="47">जो कोई म्यारा पास उछो और म्यारा बातुन सुणभेरन मानछो, मैं तुमून बतूछूँ उ कैको जस छै</verse>
				<verse number="48">उ आदिमी को जस छै, जेले अपूनो घर बनून बखत घरा का खडशिला गैरा खोदियान और मजबूत चट्टान में घर की बुनियाद राखछै, और जब आँधी तूफान आछ उ घर नै हिला सकियो, क्याखिनकि उ घर मजबूत बनिना को छ्यो।</verse>
				<verse number="49">लेकिन जो सुणिभेरन नै माननो उ आदिमी को जस छै, जेले माटा में बिना खडशिला खड़भेरन घर बनाछ, जब आँधी तूफान आछ त उ घर खिती जाछो और उको सत्यानाश हो जाछो।</verse>
			</chapter>
			<chapter number="7">
				<verse number="1">यीशु लोगून यो सब उपदेश दिना का बाद, कफरनहूम गौं में आयान।</verse>
				<verse number="2">वाँ कोई रोमी सुबदारो को दास जो उको प्रिय छ्यो, उ बिमारी ले मरून मरेछ्यो।</verse>
				<verse number="3">जब उ सुबदार ले यीशु की चर्चा सुणछ्य, त उले कुछ यहूदी अगुवान यीशु का पास यो विनती करभेरन भेजछ्य, कि उ आभेरन म्यारा यो दास स चंगो कर दे।</verse>
				<verse number="4">तब उन यीशु का पास आयान, और उथैं भौत बिनती करभेरन कुन लाग्यान, उ इसो लायक छै कि तैं उ खिन यो कर।</verse>
				<verse number="5">क्याखिनकि उ हमरि जाति का दगाड़ प्रेम राखछो, और उलेई हमार यहूदी सभाघर बनायान।</verse>
				<verse number="6">यीशु उनार दगाड़ ग्यान, जब यीशु सुबदार का घरा का नजिक पुजून वाला छ्या, त सुबदार ले यीशु का पास अपून कई मित्रून कुन खिन भेजछ्य “हे प्रभु, तैं कष्ट जन कर, क्याखिन मैं इसो लकारिको नाहतिनू कि तैं म्यारा घर भितर अ।</verse>
				<verse number="7">येक कारण मैं अपनास इसो लकारिको नै समझनू की त्यारा पास आ सकू, तैं ताँई भटे कैं दे, तैं म्येरो सेवक चंगो है जालो।</verse>
				<verse number="8">मैंस पत्तो छै, कि मैंले अधिकारीन का अधिकार में काम करून वालो आदिमी छूँ, और म्यारा अधिकार में थ्वाड़ा सिपाई काम करनान, और जब मैं एक स हुकुम दीभेरन कुछूँ ‘जा,’ त उ जाछो; और दुसारा थैं कुछूँ ‘अ,’ त उ उछो; और जब अपून कोई सेवक थैं कुछूँ, यो काम कर। त उ ऊस करछो।”</verse>
				<verse number="9">यो सुणभेरन यीशुस बड़ो ताजुब हुछो, और यीशु ले फरकी भेरन उ भीड़ थैं जो उक पछिल उनमरछी उनूनथैं क्योछ, “मैं सच्ची कुछूँ कि मैंले पुरा इस्राएल देशा का एक ले आदिमी में इसो विश्वास नै देख्यो, जो यो गैर-यहूदी आदिमी की नियाती मैंमें करछो।”</verse>
				<verse number="10">और सुबदार का मित्रून ले घर वापस आभेरन, उ दास चंगो पाछ।</verse>
				<verse number="11">थ्वाड़ा दिनून का बाद यीशु नाईन नाम नगर में ग्यान, उक शिष्य, और भौत भीड़ उक दगाड़ जानमरेछी।</verse>
				<verse number="12">जब यीशु उ नगरा का गेट में पुजियान, त देखा, लोग एक मुरदा स अर्थी में अन्तिम संस्कार करून खिन ली जानमरेछ्या। जो अपूनी ईजा को एकलौतो च्योलो छ्यो, और उ विध्वा छी; और उ नगरा का भौत लोग उक दगाड़ छ्या।</verse>
				<verse number="13">ऊस देखिभेरन प्रभु तरस आछ, और उले क्योछ, “जन रौ।”</verse>
				<verse number="14">तब उले पास जाभेरन अर्थीस छूँछ, और ली जानवाला रूक जानान। तब यीशु ले क्योछ, “हे जवान मैं तैंथैं कुछूँ, उठ जा।”</verse>
				<verse number="15">तब तुरन्त उ मुरदा उठाभेरन बैठि जाछो, और बोलून लागछो। तब यीशु ले ऊस उक ईजा स सौंप दीछ।</verse>
				<verse number="16">यो देखिभेरन सब लोग हैरान हो ग्यो, और परमेश्वर की बड़ाई करभेरन कुन लागनान, “हमार बीच में परमेश्वर की तरफ भटे परमेश्वरो को संदेश दिनवाला एक महान आदिमी आ र्योछ, और परमेश्वर ले अपून लोगून की मद्दत करून खिन भेज रैछ।”</verse>
				<verse number="17">और यीशुका बारिमें यो बात सारा यहूदिया प्रदेश और आश-पासा का सारा इलाका में फैल जाछी।</verse>
				<verse number="18">यहूना स उक शिष्यून ले इन बातुन का बारिमें ऊस बताछ।</verse>
				<verse number="19">तब यहूनाले अपून शिष्यून में भटे द्वी जनून बुलाभेरन यीशुका पास यो पूछन खिन भेज छै, “क्या तैं उई मसीह छै, जैस भेजना को वादा परमेश्वर ले कर राखछ्यो, या हम कै दुसरा को इन्तजार करनू?”</verse>
				<verse number="20">तब उनूले यीशु का पास आभेरन क्योछ, “हमून तेरा पास यहूना बपतिस्मा दिनवाला ले यो पूछन खिन भेज रैछ, क्या तैं उई मसीह छै, जैस भेजना को वादा परमेश्वर ले कर राखछ्यो, या हम कै दुसरा को इन्तजार करनू?”</verse>
				<verse number="21">उई बखत यीशु ले भौत लोगून की बिमारीन और तखलीफ, और भूतून भटे छुड़ाछ; और भौत अंधान आँखा दीयान।</verse>
				<verse number="22">और यीशु ले यहूनाका शिष्यून थैं क्योछ, जो तुमूनले देखछ्य, और सुणछ्य, जाभेरन यहूना थैं कै दीया; कि अन्धा देखनान, लंगड़ा हिटनान, और कोढ़ी ठीक हो जानान, और टोला सुणनान, और मुरदा ज्यून करि जानान, और कंगालून सुसमाचार सुणाई जाछो।</verse>
				<verse number="23">धन्य छन उन जो म्यारा बारिमें शक नै करना।</verse>
				<verse number="24">जब यहूनाका शिष्य वापस न्हैजानान, तब यीशु यहूना बारिमें लोगूनथैं कुन लागछो, तुम बिरान जागान में कि देखन खिन गैछा? क्या हवा ले हिलते हुये सरकण्डान?</verse>
				<verse number="25">तो फिर कि देखून गैछा? क्या मेंहंगा कपाड़ा पैनिना का आदिमीन? देखा, जो भड़कीला कपाड़ा पैनना, और सुख-विलास रूनान, उन राजमहलून में रूनान।</verse>
				<verse number="26">तो फिर कि देखन खिन गैछा? क्या कोई परमेश्वरो को संदेश दिनवाला स? होई मैं तुमूनथैं कुछूँ, कि परमेश्वरो को संदेश दिनवाला है ले ठूला आदिमी स।</verse>
				<verse number="27">यो उई छै, जैका बारिमें पवित्रशास्त्र में लिखीना को छै, देख, मैं अपूनो संदेश दिनवाला स त्यारा अघिल भेजछूँ, जो तैखिन बाँट सुधारोलो।</verse>
				<verse number="28">“मैं तुमूनथैं कुंछूँ जो स्यैनि में भटे जन्मीना को छै, उनूनमें भटे यहूना है कोई ले ठूलो नी भ्यो, लेकिन जो परमेश्वरा का राज्य में नानो है नानो ले छै, उ यहूना है ले ठूलो छै।”</verse>
				<verse number="29">जब उनूनले यीशु की कईना की बातुन सुणछै, त सब लोगून ले याँ तक की चुंगी लीनवालान ले यहूना थैं बपतिस्मा लीभेरन क्योछ, कि परमेश्वर स धर्मी छै।</verse>
				<verse number="30">लेकिन फरीसी लोग और मूसा नियम सिखून वालान ले यहूना भटे बपतिस्मा लीन है इन्कार कर दीछ। और परमेश्वर की मनसा जो उनार बारिमें छी ऊस टाल दीछ।</verse>
				<verse number="31">तब यीशु ले क्योछ, मैं यो युग का लोगून की तुलना कैका दगाड़ करूँ? कि उन कैका जसा छन?</verse>
				<verse number="32">उन उ नानतिनान का जस छन, जो बजार में बैठि भेरन एक दुसारा थैं धध्याभेरन कुंनान, हमूले तुमून खिन मुरली बजाछ, और तुम नै नाचिया, हमून ले दुख करछ्य, लेकिन तुम रोया नै।</verse>
				<verse number="33">क्याखिनकि यहूना बपतिस्मा दिनवालो बार-बार बर्त राखछो और अंगूर को रस नै पिनो, और फिर उन कुंनान कि उमें भूत छै।</verse>
				<verse number="34">और मैं आदिमी को च्योलो खानै-पिनै आरयूँ, और तुम कुँछा, देखा, कि खाना को ढाणी और पियक्कड आदिमी, चुंगी लीनवालान और पापिन को मित्र छै।</verse>
				<verse number="35">लेकिन परमेश्वरो को ज्ञान अपूनी सब सन्तानून का कारण ले सच्चो ठैराई ग्यो।</verse>
				<verse number="36">तब एक फरीसी लोग ले यीशु थैं बिनती करछ्य, कि उक दगाड़ उक घर खान खिन हिटा, त यीशु फरीसी का घर खान खिन जानान, और खानो खान खिन बैठनान।</verse>
				<verse number="37">त उई नगरे की एक पापिनी स्यैनि ले यो जाणिभेरन कि यीशु उ फरीसी लोगून का घर में खान खिन आ रियोछ, तैं उ स्‍यैनि संगमरमर का शीशी में जटामांसी को भौत मेहंगो इत्र लीभेरन वाँ आछ,</verse>
				<verse number="38">और उ यीशुका खुटान का पास, ठाड़ हो भेरन, रो-रो भेरन उक खुटान अपून आंशून ले भिगूछी और अपून ख्वारा का बालून ले उक खुटान पोछछी, और बार-बार उक खुटान में इत्र लगाभेरन उको आदर करछी।</verse>
				<verse number="39">यो देखिभेरन उ फरीसी लोग जेले यीशुस अपून घर में बुलाईना को छ्यो, अपून मन में सोचून लागछ्य, अगर यो परमेश्वरो को संदेश दिनवाला हुनो तैं यो जाणि लीनो कि यो स्यैनि कसी छै, क्याखिनकि उ पापिनी छी।</verse>
				<verse number="40">यीशु ले उक मने की बात जाणिभेरन उथैं क्योछ, “हे शमौन, मैंस तैथैं कुछ कुन छै।” उले क्योछ, “गुरू जी क।”</verse>
				<verse number="41">तब यीशु ले एक उदारण दीभेरन क्योछ, कि एक धनवाना का द्वी कर्जदार छ्या, एक पाँच सौ दिनून की मजूरी का बराबर कर्जदार छ्यो, दुसोरो पचास दिना का मजूरी बराबर कर्जदार छ्यो।</verse>
				<verse number="42">और उन द्वीवैन का पास कर्ज चुकून खिन केले नी छ्यो, येक कारण धनवान ले उनोरो कर्ज माफ कर दीछ। उन द्वीवैन में भटे को धनवान स ज्यादा प्रेम को करोलो?</verse>
				<verse number="43">शमौन ले जबाब दीछ, “म्यारा समझले जैको ज्यादा कर्ज माफ करछ्य।” यीशु ले शमौन थैं क्योछ, तैं ठीक कूंछै।</verse>
				<verse number="44">और उ स्‍यैनि का तरफ देखिभेरन यीशु ले शमौन थैं क्योछ, क्या तैंले यो स्यैनि स देखछी येले कि करछै? मैं त्यारा घर आयू तैले मैंस खुटा धुन खिन पानि नै दीयो, लेकिन येले म्यारा खुटान अपून आंशून ले धोयान और अपून बालून ले पोछियाना।</verse>
				<verse number="45">तैले मैंस गला लगाभेरन म्येरो स्वागत नै कर्यो, लेकिन जब भटे मैं या आरयूँ, तब भटे येले म्येरो आदर करून नै छोड़ियो।</verse>
				<verse number="46">तैले म्यारा ख्वारा में तेल लगाभेरन म्येरो आदर नै कर्यो, लेकिन येले म्यारा खुटान में मेहंगो इत्र लगाभेरन म्येरो आदर करछै।</verse>
				<verse number="47">येक कारण मैं तैंथैं कुछूँ, भौत ज्यादा पाप जो येले कर राखछ्या, उ सब माफ करि ग्यान, क्याखिनकि येले भौत प्रेम करछ्य, लेकिन जैको थ्वाड़ा पाप माफ भ्योछ, उ कम प्रेम करछो।</verse>
				<verse number="48">और यीशु ले उ स्यैनि थैं क्योछ, तेरा पाप माफ भ्यान।</verse>
				<verse number="49">तब जो लोग उक दगाड़ खान खिन बैठिना का छ्या, उन अपून-अपून मन में सोचून लाग्यान, “यो को छै जो पापून ले माफ करछो?” लेकिन पापून त केवल परमेश्वर माफ कर सकछो।</verse>
				<verse number="50">पर यीशु ले स्यैनि थैं क्योछ, परमेश्वर ले तैंस बचा हालछै, क्याखिनकि तैले मैंमें विश्वास करछै, खुशी-खुशी अपून घर खिन न्हैजा।</verse>
			</chapter>
			<chapter number="8">
				<verse number="1">येक बाद यीशु नगर-नगर और गौं-गौं घुम भेरन परमेश्वरा का राज्य को सुसमाचार सुणन लाग्यान, और उक बारा शिष्य उक दगाड़ छ्या,</verse>
				<verse number="2">और कुछ स्यैनिन ले छ्या, जिनून में भूतून भटे और बिमारीन भटे ठीक होईना का छ्या, और उ यो छन; मरियम जो मगदला गौं छी, जैमें भटे सात भूत निकलीना का छ्या,</verse>
				<verse number="3">और राजा हेरोदेस का एक कर्मचारी खुजे की घरवाली योअन्ना, और सूसन्नाह, और ले भौत स्यैनिन छ्या। जो अपून सम्पत्ति ले यीशु और उनार शिष्यून की सेवा करछ्या।</verse>
				<verse number="4">और जब भौत भीड़ जामा हो रैछी, त नगर-नगर भटे लोग यीशुका पास उनमरेछ्या, तब यीशु ले एक कहानी सुणाछ,</verse>
				<verse number="5">एक किसान बी बुन खिन ग्योछ। जब उ बी बुनमरेछ्यो, त थ्वाड़ा बी बाँट का किनार में पड़छो, और आकाशा का चिड़िया ले आभेरन उनुस खा लीछ।</verse>
				<verse number="6">और थ्वाड़ा बी चट्‍टान में पड़छो, और जल्दी जाम ग्या, लेकिन ज्यादा माँटा नै हुना का कारण जल्दी सुखी ग्या।</verse>
				<verse number="7">और थ्वाड़ा बी झाड़िन का बीच पड़ीयान, और झाड़िन ले ठूलो हो भेरन उनुस दबै दीछ,</verse>
				<verse number="8">और थ्वाड़ा बी निको भूमि में पड़छ, और यो बी जामियान और सौ गुना फल ल्यान। यो कैभेरन यीशु ले जोरले क्योछ, “जो कोई यो बात स सुण सकछो जो मैं कुन मरेयू, उन यो समझना की कोशिश करून।”</verse>
				<verse number="9">यीशु का शिष्यून ले उथैं पुछ्छै, कि यो कहानी की मतलब छै?</verse>
				<verse number="10">यीशु ले क्योछ, “तुमून परमेश्वरा का राज्य को गुप्त भेद की समझ दी रैछ, लेकिन औरून कहानी में सुणाई जाछो, येक कारण पवित्रशास्त्र लिखीना को छै, कि उन देखनान त सही पर उन पछ्याण नै पान, उन सुणनान, त सही पर समझ नै सकना।</verse>
				<verse number="11">यो कहानी को मतलब यो छै; बीज का गुदा परमेश्वरो को बचन छै।</verse>
				<verse number="12">बाटा का किनार को मतलब उन लोग छन जिनूनले परमेश्वरो को बचन सुणछ्य, लेकिन शैतान उनार मन भटे उ बचनून चुरा लिजाछो, कि काँई इसो नै हो कि विश्वास करभेरन उन उद्धार पान।</verse>
				<verse number="13">और जो बी चट्‍टान में पड़ीयान, यो उन लोगून का नियाती छन जो बचन सुणिभेरन खुशी-खुशी मान्नान। और उन थ्वाड़ा बखत तलक विश्वास करनान, और परीक्षा का बखत बहक जानान।</verse>
				<verse number="14">और जो बी झाड़िन का बीच पड़ीनान छन, यो उन लोग का नियाती छन जिनूनले बचन तो सुणनान, लेकिन बाद में चिन्ता, धन-दौलत, और जीन्दगी का सुख-विलास में फँस जानो परमेश्वरा का बचन में रूकावट डालछी। और उक जीन्दगी में बचन कै काम नै कर पानो।</verse>
				<verse number="15">और जो बी निकी भूमि में पड़ीयान, यो उन लोगून की नियाती छन, जो बचनून सुणभेरन भल मन मानभेरन पक्का विश्वासी बननान।</verse>
				<verse number="16">कोई ले आदिमी दीया जलाभेरन भांणाका तलि नै ढकनो, और नै चरपाई ताला राखनो, लेकिन ऊस ऊँचा जाग में राखनान, कि सब भितर उनवालान उज्यालो मिलो।</verse>
				<verse number="17">म्येरो कुंना को मतलब छै, परमेश्वर हर उ बात स प्रगट करोलो, जस लोग ऐल तक नै जाणना। उ हर उ बात स प्रगट कर द्योलो जो ऐल तक गुप्त छन।</verse>
				<verse number="18">येक कारण तुम चौकूंना रौ कि कसीकैं सुणछा? क्याखिनकि जैक पास समझना की इच्छा छै, परमेश्वर ऊस और ले समझ द्ययोलो, पर जो यो समझना की इच्छा नै राँखनो, कि जो मैं सिखूछूँ, जो उले समझ छै, परमेश्वर उ समझ ले उथैं है ली ल्योलो, जैस उ अपूनी समझछो।</verse>
				<verse number="19">और यीशु की ईजा और उक भाई उक पास आयान लेकिन भीड़ का कारण नै मिल पाया।</verse>
				<verse number="20">तब लोगून ले यीशुथै क्योछ, त्यारा ईजा और त्यारा भाई लोग भ्यार ठाड़ हो र्यान, त्यारा दगाड़ मिलून चाँनान।”</verse>
				<verse number="21">यीशु ले उनून जबाब दीभेरन क्योछ, “म्यारा ईजा और म्यारा भाई इन छन जो परमेश्वरो को बचन सुणना और माननान।”</verse>
				<verse number="22">फिर एक दिना यीशु और उक शिष्य नाव में चढ़ियान और यीशु ले उनूनथैं क्योछ, “आ हम गलील प्रदेश झील का पार जानू।”</verse>
				<verse number="23">और जब नाव चलून मसछ्य त यीशु पड़ जानान, और तूफान उठछो, और नाव में पानि भरिन मसछो और उन लोग खतरा में छ्या।</verse>
				<verse number="24">तब उनूनले यीशुस जगाछ, और क्योछ, “हे मालिक! मालिक! अब हम डबून मरिया।” तब यीशु ले उठाभेरन आंधीस और पानि का लहरून डांटछ्य, और उ थामी ग्यो।</verse>
				<verse number="25">तब यीशु ले अपून शिष्यून थैं क्योछ, “तुमोरो विश्वास काँ छै?” लेकिन उन डर जानान और ताजुब हो भेरन आपस में इसो कुन लाग्यान, यो को छै, जो तूफान और पानि की लहर ले हुकुम दीछो, और उ येकी बात मान्नान?</verse>
				<verse number="26">फिर यीशु और उक शिष्य गिरासेनी लोगून का प्रदेश में पुजनान, जो उ पार गलील प्रदेशा का सामुनि छै।</verse>
				<verse number="27">जब यीशु और उक शिष्य झील का किनारा में पुजियान वाँ एक आदिमी का दगाड़ मिल्यान जैमें भूत छ्या। उ भौत दिनून भटे ना त कपाड़ा पैन छ्यो और नै घर में रूछ्यो बल्कि उ एक कब्रिस्तान में रूछ्यो।</verse>
				<verse number="28">उ यीशुस देखिभेरन चिल्लान लागछो, और यीशु का सामुनि खितीभेरन कुंछो, “हे सर्वशक्तिमान परमेश्वरो को च्याला यीशु! तैं हमून परेशान किलैं करछै? मैं तैथैं बिनती करछूँ, मैंस तखलीफ जन दे।”</verse>
				<verse number="29">क्याखिनकि यीशु उ आदिमी में भटे भूत थैं निकलून हुकुम दिन मरेछ्या, येक कारण भूत ऊस बार-बार परेशान करून मरेछ्यो। और लोग ऊस साँगुलान और जंजीरून ले बाद छ्या, लेकिन उ उनून तोड़ दीछ्यो, और भूत ऊस बिरान जागान में खिन लिजा छ्यो।</verse>
				<verse number="30">तब यीशु ले उ भूत थैं पुछ्छै, “त्यार नाम कि छै?” उले क्योछ, “सेना” क्याखिनकि उमें भौत भूत लागिना का छ्या।</verse>
				<verse number="31">और उन भूतून ले यीशु थैं बिनती करछ्य, कि हमून गैरा गड्डा में जाना को हुकुम जन दे।</verse>
				<verse number="32">वाँ एक डाणा में एक सुंअरून को एक ठूलो झुंड चरून मरेछ्यो, उन भूत ले यो कैभेरन यीशु थैं विनती करछ्य, हमून तैं उन सुंअरून झुंड में जान दे, यीशु ले क्योछ जा।</verse>
				<verse number="33">तब तुरन्त भूत उ आदिमी में भटे निकल भेरन सूअरून का झुंड में न्हैजानान। और तब सब सुंअर ओरालो में दौड़भेरन आयान और झील में डुबिभेरन मरि ग्या।</verse>
				<verse number="34">और जो उ सुंअरून का ग्वाला छ्या, उन लोग यो सब देखिभेरन, भाजि जानान और गौं में जाभेरन सबून बतुनान।</verse>
				<verse number="35">यो सुणिभेरन सब लोग देखन खिन आयान, और यीशु का पास आभेरन देखना कि जै आदिमी में भटे भूत निकलीना का छ्या, ऊस यीशुका खुटान का पास बैठिना को और कपाड़ा पैनिना को और शांत हालत में बैठिना को देखिभेरन डर जानान।</verse>
				<verse number="36">और देखन वालान ले उनून बताछ, कि यो आदिमी जैस भूतून ले सताईना को कसीकैं ठीक भ्योछ।</verse>
				<verse number="37">तब सब गिरासेनी का आश-पासा का गौं का लोगून ले यीशु थैं बिनती करछ्य, की तैं हमार याँ भेंट न्हैजा, क्याखिनकि उन लोग भौत डर गैछ्या। त यीशु नाव में चढ़भेरन वापस न्हैजानान।</verse>
				<verse number="38">जै आदिमी में भटे भूत निकलीना कि छ्यो, उ यीशु थैं विनती करून लागछ्य, कि मैंस अपून दगाड़ उन दे, लेकिन यीशु ले ऊस बिदा करछ्य।</verse>
				<verse number="39">और उथैं क्योछ, “अपून घर खिन जा और लोगून बताये कि परमेश्वर ले त्यारा दगाड़ कतुक ठूलो काम करछ्य।” और उ आदिमी जाभेरन पुर नगर में प्रचार करून लागछो कि यीशु ले मैं खिन कतुक ठूलो काम करछ्य।</verse>
				<verse number="40">जब यीशु वापस आयान त लोगून ले यीशु को स्वागत करछ्य, क्याखिनकि लोग उक इन्तजार में छ्या।</verse>
				<verse number="41">तब वाँ एक याईर नामोको आदिमी उछो, जो यहूदी सभाघरा का अधिकारी छ्यो, और यीशुका खुटान पड़छो और बिनती करछो कि म्यारा घर हिटा,</verse>
				<verse number="42">क्याखिनकि उकी बारा साल की एकलौती चेलि छी, जो बिमार ले मरन खिन बटि रैछी। जब यीशु उक घर खिन जानमरेछ्यो, त लोगून की भौत भीड़ ऊस चारू तरफ भटे घेर राखछी।</verse>
				<verse number="43">एक स्यैनि उ भीड़ में छी, ऊस बारा साल भटे खून बगना की बिमारी छी, और उले अपूनी सारी समपत्ति वैदून में लुटा दीछ, फिरले ऊस कोई ठीक नै कर पानो।</verse>
				<verse number="44">तब उले पछिल है आभेरन यीशुका कपाड़ास छू लीछ, और तुरन्त उको खून बगून बिमारी ठीक हो जाछी।</verse>
				<verse number="45">तब यीशु भीड़ में है पछिल के मुड़भेरन पुछ्छै, “म्यारा कपाड़ास कैले छूआ?” तब पतरस और उक शिष्यून ले क्योछ “गुरू जी, तुम भीड़ ले चारू तरफ भटे घेरी रैछ और लोग तैंमें गिर पड़नान।”</verse>
				<verse number="46">लेकिन यीशु ले क्योछ, “केले मैं छूँछ, क्याखिनकि मैंले जाण है छ कि मैंमें भटे सामर्थ निकालछै।”</verse>
				<verse number="47">परन्तु जब उ स्यैनि ले देखछ्य, कि उ अब लुक नै सकनी, तब उ स्यैनि भौत डरनै और थरथरानै यीशु का पास आभेरन उक खुटान में पड़गै, और उले सबून का सामुनि बतूछी, मैंले कि कारण ले यीशु का कपाड़ा छूयान, और उ कसीकैं तुरन्त चंगी हो गैछ।</verse>
				<verse number="48">यीशु ले उथैं क्योछ, “चेलि, तैले मैंमें विश्वास करछ्य, और यो बात ले तैंस चंगो करछ्य, खुशी ले घर खिन न्हैजा।”</verse>
				<verse number="49">जब यीशु उक दगाड़ बात करून मरेछ्या, उई बखत याईर का घर भटे कुछ लोगून ले आभेरन याईर थैं क्योछ, “अब गुरू स परेशान करना कि जरूरत नाहातिन। क्याखिनकि तेरि चेलि मर गैछ।”</verse>
				<verse number="50">यीशु ले यो सुणभेरन उथैं क्योछ, तैं जन डर। केवल मैमें विश्वास राख। त उ बच जालि।</verse>
				<verse number="51">जब यीशु याईर का घर पुज्यान त उले पतरस, यहूना, याकूब और चेलि का ईजा-बबास छोड़भेरन और भितर कैसे नै उन दीनो।</verse>
				<verse number="52">और सब लोग रून मरेछ्या, लेकिन तब यीशु ले उनूनथैं क्योछ, जन रो, नानतिनी मर नै रै बल्कि पड़ रैछ।</verse>
				<verse number="53">सब लोग यो जाणिभेरन कि उ चेलि मर गैछ उन लोग यीशु में हँसून मस्यान।</verse>
				<verse number="54">लेकिन यीशु ले उ चेलि को हात पकड़ भेरन क्योछ, “हे चेलि उठ।”</verse>
				<verse number="55">यीशुका कुन तक उ चेलि का प्राण वापस आग्या और उठाभेरन बैठ जाछी। फिर यीशु ले उक ईजा-बबा थैं क्योछ येस के खान खिन दी।</verse>
				<verse number="56">उक ईजा बबास यो बात ले भौते ताजुब भ्योछ, लेकिन यीशु ले उनूनथैं क्योछ, यो बात कैथैं जन कया।</verse>
			</chapter>
			<chapter number="9">
				<verse number="1">फिर यीशु ले अपून बारा शिष्यून अपून पास बुलाछ, और उनून सब भूत-परेतून और बिमारीन ठीक करना को सामर्थ और अधिकार दीछ,</verse>
				<verse number="2">और उनून परमेश्वरा का राज्य का प्रचार करून खिन और बिमारून ठीक करून खिन भेजछ।</verse>
				<verse number="3">और उले उनूनथैं क्योछ, “अपून बाँट खिन के जन लिया, नै त लठ्ठी, नै त खान खिन रवाटा लिया, नै त कोई झ्वाल और नै बटवा में डबल लिया, नै दुसोरो जोड़ो कपाड़ लिया।”</verse>
				<verse number="4">अगर कोई तुमून अपून घर बुलूछो, तो तब तक तुम उई घर में मेहमान बन रया; और वाँई भटे विदा होई।</verse>
				<verse number="5">जो कोई तुमोरो आदर नै करना, नै बात सुणनान, तब उ नगर भटे जान बखत अपून खूटाकि धुल झाड़ी लिया, यो उ गौं का लोगून दिखालो कि परमेश्वर उनोरो न्याय करोलो।</verse>
				<verse number="6">तब उक शिष्य गौं-गौं जाभेरन सुसमाचार सुणून लाग्यान, और सब बिमारी लोगून ठीक करून लागयान।</verse>
				<verse number="7">जब राजा हेरोदेस उन कामून की चर्चा सुणभेरन घबरा ग्यो, जो यीशु करून मरेछ्या, क्याखिनकि कुछ लोग कुन मरेछ्या कि यहूना मरिना में भटे ज्यूनो है ग्योछ।</verse>
				<verse number="8">और कुछ लोगून ले क्योछ, कि परमेश्वरो को संदेश दिनवाला एलिय्याह प्रगट होर्योछ; और कुछ लोगून ले क्योछ, कि कुछ पुराना परमेश्वरो को संदेश दिनवालान में भटे कोई ज्यून है ग्योछ।</verse>
				<verse number="9">लेकिन राजा हेरोदेस ले क्योछ, यहूना को त मैंले खोरो कटवाछ, अब यो को छै जैका बारिमें मैं इसी बात सुण छूँ? और उले ऊस देखना कि इच्छा जाहिर करछै।</verse>
				<verse number="10">फिर प्रेरितून वापस आभेरन जो कुछ ले उनूले करछ्य और सिखाछ, सब कुछ यीशु स बता दीछ। और यीशु उनून अलग करभेरन बैतसैदा नामक शैहर में लिग्यो।</verse>
				<verse number="11">यो जाणिभेरन सब लोग उक पछिल न्हैग्या, और यीशु भौत खुशिले उनार दगाड़ मिलछ्य, और उनार दगाड़ परमेश्वरा का राज्य का बात को करून लागछ्य, और जो लोग ठीक हुन चाँछ्या उनून यीशु ले चंगा करछै।</verse>
				<verse number="12">जब भौत ब्याल हुन लागछी, त सब शिष्यून ले यीशु थैं क्योछ, “गुरू जी इन लोगून जान दे कि यो आश-पासा का गौन और बसतीन में जाभेरन अपून खिन रूना को जाग, और खाना को इन्तजाम कराला, क्याखिनकि हम सब याँ बिरान जागा में छा।”</verse>
				<verse number="13">यीशु ले उनूनथैं क्योछ, “तुम इन लोगून खिन खान का इन्तजाम करा।” उनूनले यीशु थैं क्योछ, “हमार पास पाँच रोटा और द्वी माँछा का अलावा केले नाहतिन, लेकिन इसो हो सकछो कि हम जाभेरन इनून खिन मोल ल्यूनू।” खान खाँनवाला लगभग पाँच हजार लोग छ्या।</verse>
				<verse number="14">(क्याखिनकि वाँ उनूनमें भटे लगभग पाँच हजार आदिमी छ्या) तब यीशु ले शिष्यून थैं क्योछ, “इनून पचास-पचास को झुंड बनाभेरन बैठा दी।”</verse>
				<verse number="15">और उनूनले इसो करछ्य, और उनुस बैठा दीछ।</verse>
				<verse number="16">तब यीशु ले उन पाँच रोटान और द्वी माँछा हात में थामीयान, और स्वर्ग का तरफ चाँभेरन, परमेश्वरो को धन्यवाद करछ्य और रोटान टोड़ी-टोड़ी भेरन शिष्यून दीनै रैयान, और उन लोगून बाढ़नै रयान।</verse>
				<verse number="17">और उन लोगून ले पेट भर भेरन खान खिन खाछ, जब सबून ले खाना खा लीछ, तब शिष्यून ले बचिना का रोटान ले बारा टोकरी भर भेरन उठायान।</verse>
				<verse number="18">एक दिना यीशु और उक शिष्य एकान्त में प्रार्थना करून मरेछ्या, तब यीशु ले उनूनथैं पुछ्छै, कि “लोग म्यारा बारिमें कि कुंनान कि मैं को छूँ?”</verse>
				<verse number="19">शिष्यून ले जबाब दीछ, कुछ “यहूना बपतिस्मा दीन वालो, और कुछ लोग परमेश्वरो को संदेश दिनवाला एलिय्याह और कुछ लोग पुराना जमाना का परमेश्वरो को संदेश दिनवालान में भटे कोई ज्यून है ग्यो।”</verse>
				<verse number="20">यीशु ले अपून शिष्यून थैं पुछ्छै, “और तुम मैंथै कि कूंछा की मैं को छूँ?” पतरस ले जबाब दीछ, “तैं परमेश्वरो को भेजिना मसीह छै।”</verse>
				<verse number="21">तब यीशु ले उनून चेतावनी दीभेरन क्योछ, “तुम कैसे यो जन बताया मैं मसीह छूँ।”</verse>
				<verse number="22">फिर यीशु ले क्योछ, “मैं आदिमी को च्योलो भौते दुख उठालो, और यहूदी अगुवा और प्रधान याजक और मूसा का नियम सिखून वाला लोग ऊस तुच्छ समझभेरन मार द्याला, और उ तीन दिन बाद मुरदान में भटे ज्यून हो जालो।”</verse>
				<verse number="23">फिर यीशु ले सबूनथैं क्योछ, “अगर कोई म्यार शिष्य बनून चाँछ, त उ मैं खिन मरून खिन तैयार हो ज्यो। आखरी मैं म्यारा शिष्य नियाति ऊस मेरो अनुसरण करून होलो</verse>
				<verse number="24">जो अपून प्राण संसारिक जीन्दगी जीन खिन बचालो, उ परमेश्वरा का दगाड़ अनन्त जीवन पाना को मौका खो द्योलो, लेकिन जो मैं खिन और सुसमाचार खिन अपून प्राणस दीछो, उ अनन्त जीवन पालो।</verse>
				<verse number="25">एक आदिमी स की फेदा होलो, अगर उ पुरा संसार में धनवान हो, पर परमेश्वरा का दगाड़ अपूनो अनन्त जीवन स खो दे? उ परमेश्वर स कि दी सकछ्यो, जो उको अनन्त जीवन खरीदोलो?</verse>
				<verse number="26">अगर तुमून में भटे कोई मैंस परमेश्वरा का रूप नै जानो, और मेरि शिक्षा नै मानो, तो मैं आदिमी को च्योलो ले तुमून अपून शिष्य हुन है ले इनकार कर द्यूलो, जब मैं धरती में अपून पवित्र स्वर्गदूतून का दगाड़ अद्धभुत तेज में वापस उलो। तब हर कोई मेरि उई अद्धभुत तेज स देखाला जस म्यारा पिता को तेज छै।”</verse>
				<verse number="27">मैं तुमूनथैं सच्ची कुछूँ, “कि जो याँ ठाँड़ छन, इनून में कुछ लोग इसा छन, जब तलक परमेश्वरा का राज्य स सामर्थ का दगाड़ उन नै देख ल्यून, तब तलक उन कभै नी मराँला।”</verse>
				<verse number="28">इन बातुन का कोई आठ दिनून का बाद यीशु अपून तीन शिष्यून पतरस, यहूना और याकूब स प्रार्थना करून खिन लीभेरन एक डाँण में ग्यान।</verse>
				<verse number="29">जब यीशु प्रार्थना करून मरेछ्या, त उको चेहरा का रूप बदल ग्यो, और उक कपाड़ा सफेद और चमकून लाग्यान।</verse>
				<verse number="30">और देखा, पुराना जमाना का परमेश्वरो को संदेश दिनवाला मूसा और एलिय्याह, उक यीशु दगाड़ बात करून मरेछ्या।</verse>
				<verse number="31">इन लोग महिमा का दगाड़ दिखाई दीयान, और मसीहा का मरना की चर्चा करून मरेछ्या, जो यरूशलम शैहर में हुन वाली छी।</verse>
				<verse number="32">पतरस और उक द्वी दगड़िया यहूना और याकूब गैहरी नीन में पड़ रेछ्या, जब उन पुरी तरह जॉगा ग्या, त उनूनले यीशु की महिमा और उन द्वी लोगून यीशुका दगाड़ ठाड़ देख्यान।</verse>
				<verse number="33">जब उन यीशुक पास जान लाग्यान, त पतरस ले यीशु थैं क्योछ; “हे प्रभु हमोरो या रून ठीक छै; अगर तेरि इच्छा हो त मैं याँ तीन तम्बू ठाड़ करूँ, एक तुमून खिन, एक मूसा खिन और एक एलिय्याह खिन।” ऊस यो पत्तो नी छ्यो कि उ कि कुन मरियोछ।</verse>
				<verse number="34">उ यो कुन मरछ्यो, तब अचानक एक बादल ले प्रगट हो भेरन उनुस ढक लीछ, और उन डर ग्या।</verse>
				<verse number="35">तब परमेश्वर ले बादल में भटे हो भेरन बात करछ्य, “यो म्येरो लाड़िलो च्योलो और म्येरो चुनिना को छै, तुम येकी बातुन सुणा।”</verse>
				<verse number="36">यो बात हुना का बाद यीशु उनून एकोलो दिखाई दीछ; और उन चुप रियान, और जो कुछ उनूनले देखछ्य, उ बात उनूनले कैथैं नै क्यो।</verse>
				<verse number="37">दुसरा दिन यीशु और उक शिष्य डाणा भटे उतरनान उनून एक ठूली भीड़ मिलछी।</verse>
				<verse number="38">उ भीड़ में भटे एक जन ले चिल्ला भेरन क्योछ, “गुरू जी, मैं तैंथैं बिनती करछूँ कि म्यारा च्याला में दया कर क्याखिनकि यो म्येरो एकलौतो च्योलो छै।</verse>
				<verse number="39">एक भूत येस बार-बार पकड़छो; और यो जोर-जोरले चिल्ला उठछो; और मुख भटे गाज खितुछो। और येस मरोड़भेरन बड़ी मुशकील ले छोड़छो।</verse>
				<verse number="40">मैंले त्यारा शिष्यून थैं क्योछ, येस ठीक कर दी, लेकिन इन त नै निकाली सक्या।”</verse>
				<verse number="41">यीशु ले उनून जबाब दीछ भेरन क्योछ, “हे अविश्वासी लोगो मैं कब तक तुमार दगाड़ रूलो, अपून च्याला स म्यार पास ल्या।”</verse>
				<verse number="42">उ ऊस यीशुका पास ल्यून मरछ्या, कि भूत ले ऊस भिमें पटक भेरन मरोड़ दीछ, लेकिन यीशु ले उ भूत स डाटछ्य और उको च्योलो उतुंजैई ठीक करभेरन उक बबा स दी दीछ।</verse>
				<verse number="43">तब सब लोग परमेश्वरो को ठूलो काम स देखिभेरन हैरान हो ग्या, लेकिन जब सब लोग उन कामून कि जो उ करछ्यो हैरान छ्या।</verse>
				<verse number="44">त उले अपून शिष्यून थैं क्योछ, “तुम सब इन बातुन में ध्यान दी, क्याखिनकि मैं आदिमी को च्योलो, दुश्मनून का हात पकड़ाई जूलो।”</verse>
				<verse number="45">लेकिन यो बात शिष्यून का समझ में नै आई, और यीशु थैं येक बारिमें पुछून में डर छ्या।</verse>
				<verse number="46">फिर शिष्यून में आपस में यो वाद-विवाद हुन मसछ्य कि हमून में भटे सबून है ठूलो को छै।</verse>
				<verse number="47">तब यीशु ले उनेरि मनेकी बात जाण लीछ, और एक नान्तिना स लीभेरन अपून पास ठाँड़ करछ्य,</verse>
				<verse number="48">और उले उनूनथैं क्योछ, जो कोई म्यारा नाम ले इसा नान नान्तिना स अपनूछो और उकी मद्दत करछो, क्याखिनकि उन मैंस प्रेम करनान, यो इसो छै कि जो मैंस अपनून, और जो म्येरो स्वागत करछो, उ सिर्फ म्येरो नै बल्कि म्यारा भजून वाला को स्वागत करछो, क्याखिनकि जो तुमून में भटे नानो छै उ सबून है ठूलो छै।</verse>
				<verse number="49">तब यहूना ले यीशु ले क्योछ, “गुरू जी, हमूले एक आदिमी स त्यारा नाम ले भूतून निकालून देखछ्य, और हम ऊस रोकना की कोशिश करछ्य, क्याखिनकि उ हमरि नियाती तेरो शिष्य नी छ्यो।”</verse>
				<verse number="50">तब यीशु क्योछ, “उ आदिमी स तुम जन रोकिया, क्याखिनकि जो तुमोरो विरोधी नाहातिन, उ तुमार तरफ छै।”</verse>
				<verse number="51">जब यीशु का स्वर्ग खिन उठाई जाना का दिन नजिक छ्या, त उले यरूशलम शैहर जाना को फैसला करछ्य।</verse>
				<verse number="52">यीशु ले संदेश दिनवालान अपून अघिल भेजछ्य। उन पैलि ग्यान कि सामरी लोगून का एक गौं में पुजभेरन यीशु खिन तैय्यारी करनू।</verse>
				<verse number="53">लेकिन वाँ का लोगून ले ऊस वाँ नै उन दीयो, क्याखिनकि उ यरूशलम शैहर खिन जानमरेछ्या।</verse>
				<verse number="54">यो देखिभेरन उक शिष्य याकूब और यहूनाले क्योछ, “ हे प्रभु जी, क्या तैं चाँछै कि हम हुकुम द्या कि स्वर्ग भटे आगो खितभेरन इनून भस्म करा?”</verse>
				<verse number="55">लेकिन यीशु ले उनून डाँठ छै, और क्योछ “तुम नै जाणना कि तुम कसी आत्मा का छा। क्याखिनकि आदिमी को च्योलो लोगून का प्राण नाश करून खिन नै बल्कि बचुन खिन आ र्योछ।”</verse>
				<verse number="56">और यीशु और उक शिष्य कोई दुसारा गौं खिन न्हैजानान।</verse>
				<verse number="57">जब यीशु अपून शिष्यून का दगाड़ बाट में जानमरेछ्या, त कैले यीशु थैं क्योछ, जा काँई तुम जाला, मैं तुमोरो च्योलो बनून खिन मैं तुमार पछिल हिटलो।</verse>
				<verse number="58">तब यीशु ले उथैं क्योछ, “सियाल का रून खिन गुफा छै और आकाशा का चिड़ियान खिन बसेरा छै, लेकिन मैं आदिमी को च्योलो हो भेरन ले म्यारा पड़ून खिन घर नाहातिन।”</verse>
				<verse number="59">लेकिन यीशु ले दुसारा आदिमी थैं क्योछ, “म्यारा पछिल हिट।” उले यीशु थैं क्योछ, “गुरू जी, पैलि मैंस जान दे, कि मैं अपून बबा का मरना का बाद उको अन्तिम संस्कार कर सकूँ, फिर आभेरन तेरो शिष्य बनूलो।”</verse>
				<verse number="60">यीशु ले क्योछ, “जो लोग आत्मिक रूप ले मरिना छन, उनून अपून मुरदा दफनून दी।” लेकिन तैं जाभेरन परमेश्वरा का राज्य का बारिमें बतौ।</verse>
				<verse number="61">एक और ले क्योछ, “हे प्रभु, मैं त्यारा पछिल उलो, लेकिन मैं पैलि अपून घरवालान की इजाजत लीभेरन उछूँ।”</verse>
				<verse number="62">तब यीशु उथैं क्योछ, जो कोई आदिमी अपून गाड़ा में हल जोतून बखत पछिल कै देखछो, उ परमेश्वरा का राज्य का लायक नाहतिनी।</verse>
			</chapter>
			<chapter number="10">
				<verse number="1">इन बातुन का बाद यीशु ले सत्तर और शिष्यून चुनियान और नियुक्त कर्यान, और जो-जो शैहर और जागान जाँ उले खुद जाना की योजना बना राखछी, वाँ उले उनून द्वी-द्वी करभेरन अपून है पैलि भेजियान।</verse>
				<verse number="2">और उनूनथैं क्योछ, “खेती तैय्यार छै, लेकिन मजदूर कम छन, येक कारण गाड़ा का मालिक थैं बिनती करा कि उ अपून गाड़ान की फसल काटून खिन मजदूर भेजो।</verse>
				<verse number="3">जा और देखा मैं तुमून भेडून का नियाती भेड़ियान का पास भेजछूँ।</verse>
				<verse number="4">और अपून बाँट खिन नै त कोई थैला, नै त झ्वाला लिया, और नै जूता लिया, और नै बाटा में कैस ढोक दीया।</verse>
				<verse number="5">और जैका ले घर जाला, पैलि कया, कि ‘उ घर में परमेश्वरे की शान्ति हो।’</verse>
				<verse number="6">अगर उ घर में परमेश्वर की शान्ति पान वाला लोग होला, त उ शान्ति उ घर में ठहरली। अगर कोई नी होलो त उ तुमार पास वापस आ जालि।</verse>
				<verse number="7">और उई घर में मेहमान बनभेरन रया, और जो केले तुमून खान खिन द्याला, उई खाया और पिया, क्याखिनकि मजदूर स उकी मजूरी मिलून चैछी, और घर-घर जन जाया।</verse>
				<verse number="8">जो ले गौं या शैहर में जाला, और वाँ का लोग तुमोरो स्वागत करून, और जो कुछ उन तुमून खान खिन द्याला उई खाया।</verse>
				<verse number="9">और वाँ का बिमारून चंगा करा, और उनूनथैं कया, परमेश्वरो को राज्य तुमार नजिक आग्योछ।</verse>
				<verse number="10">लेकिन जो ले गौं या शैहर में जाँछा, और वाँ का लोग तुमोरो आदर नै कराला, त उनार बजारून में जाभेरन कया,</verse>
				<verse number="11">तुमार याँ को माटो जो हमार खुटान में लागि र्योछ, हम तुमार सामुनि झाड़ी दीनू, फिरले यो जाँणलि कि परमेश्वरो को राज्य तुमार नजिक आग्योछ।</verse>
				<verse number="12">मैं तुमूनथैं कुछूँ, कि उ दिना नगरा का लोगून की हालत सदोम शैहरा का लोगून की हालत भटे ज्यादा खराब होलि।</verse>
				<verse number="13">हाय खुराजीन शैहर, और, बैतसैदा शैहरा का लोगून में! जो चमत्कारा का काम तुमून में करि ग्यान अगर उ सोर और सिदोन शैहर में करि जाना, त यो दिखून खिन वाँ का लोग भौत पैलि टाट ओढ़ी भेरन और अपून मलि में छारो छिड़क भेरन कभै अपून पापून भटे पश्चताप कर लीन।</verse>
				<verse number="14">लेकिन परमेश्वर न्याय का दिन जो सजा सोर और सिदोन शैहरा का लोगून द्योलो, उ सजा तुमेरि सजा भटे कम होलि।</verse>
				<verse number="15">और हे कफरनहूम गौं, क्या तैं स्वर्ग तक ऊचो करि जालै? तैं त अधलोक है ले तलि करि जालै।</verse>
				<verse number="16">जो तुमेरि सुणछो, उ मेरि सुणछो; और जो तुमून तुच्छ समझछो, उ मैंस तुच्छ समझछो; और जो मैंस तुच्छ समझछो, उ म्यारा भजून वाला को तुच्छ समझछो।”</verse>
				<verse number="17">जब उन सत्तर शिष्य जिनून द्वी-द्वी करभेरन यीशु ले भेजिना का छ्यो, उन भौत खुश हो भेरन वापस आयान और यीशु थैं कुन लाग्यान, “हे प्रभु, भूतून ले हमरि बात मानछै जब हमून ले उनून त्यारा नाम ले हुकुम दीछ।”</verse>
				<verse number="18">यीशु ले उनूनथैं क्योछ, “ जब दुष्टआत्मान ले तुमोरो हुकुम नै मान्यो, त मैंले शैतान स अचानक आकाश भटे बिजली नियाती स्वर्ग भटे खितीन ग्योछ।</verse>
				<verse number="19">देखा मैंले तुमून स्याँपून और बिच्छून कूचलना को और शैतान जो तुमोरो शत्रु छै, उकी सारी सामर्थ में अधिकार दी राखछै; और कोई ले चीज ले तुमून केले नुकशान नी हो।</verse>
				<verse number="20">तब ले तुम यो बात ले खुश जन हो कि भूत तुमार बश में छै, लेकिन यो बात ले खुश हो कि तुमार नाम स्वर्ग में लिखीनाका छन।”</verse>
				<verse number="21">तब उई बखत यीशु पवित्र आत्मा में हो भेरन खुशी ले भरीग्यो, और कूछो, हे पिता, स्वर्ग और धरतीका प्रभु, मैं तेरो धन्यवाद करछूँ कि तैले इन बातुन बुद्धिमानून और समझदारून भटे दूर राखछ्य और नान्तिना में प्रगट करछ्य। होई, हे बाब तैंस योई निको लागछ्य।</verse>
				<verse number="22">म्यारा बबा ले मैंस सब कुछ दी हलछ्य; और कोई यो नै जाणनो कि च्योलो को छै, केवल बाब जाणनान, और बबा स ले कोई नै जाणनो, केवल च्योलो का अलावा जैमें च्योलो प्रगट करून चौ।</verse>
				<verse number="23">तब यीशु ले अपून शिष्यून का तरफ देखिभेरन एकान्त में क्योछ, धन्य छन उ आँखा, जो बातुन तुम देखन मरैछा उन ले देखनान।</verse>
				<verse number="24">क्याखिनकि मैं तुमूनथैं कुछूँ कि परमेश्वरो को संदेश दिनवाला भौत लोग और राजान ले लै चाँछ कि जो बात तुम देखून मरछा उन ले देखन चाँछ्या, लेकिन नै देखी पाया, और जो बात तुम सुणछा, उन सुणन चाँछ्या लेकिन नै सुण पाया।</verse>
				<verse number="25">एक दिन जब यीशु लोगून शिक्षा दीन मरेछ्या, तब मूसा का नियम सिखून वाला में भटे एक आदिमी ले यीशुस परीक्षा लीन खिन पुछ्छै, गुरू जी मैं कि काम करूँ, जेले मैंस परमेश्वर अनन्त जीवन द्योलो?</verse>
				<verse number="26">यीशु ले उथैं क्योछ, “मूसा का नियम में कि लिखीना को छै? तैं कसीकैं समझ छै?”</verse>
				<verse number="27">उले जबाब दीछ, मूसा का नियम में इसो लिखीना को छै कि, तैं अपून प्रभु परमेश्वर थैं अपून पुर मन ले और पुर प्राण ले और पुरी ताकतले और पुर बुद्धि ले प्रेम राख, और अपून पड़ोसी का दगाड़ अपूनो जसो प्रेम राख।</verse>
				<verse number="28">तब यीशु ले उथैं क्योछ, तैं ठीक कूंछै इसो तैले कर ले त अनन्त जीवन पालै।</verse>
				<verse number="29">लेकिन उ अपनास धर्मी समझभेरन यीशु थैं पूछ्छय, त म्येरो पड़ोसी को छै?</verse>
				<verse number="30">यीशु ले यो बात सुणभेरन कहानी सुणाछ, सुण “एक आदिमी यरूशलम शैहर भटे यरीहो शैहर खिन जान मरछ्यो, तब डाकून ले ऊस पकड़ भेरन उक कपाड़ा और जो कुछ उक पास छ्यो लुट लीछ, और मार-पीट करभेरन ऊस अधमरो करभेरन छोड़ी ग्यान।</verse>
				<verse number="31">और फिर इसो हुछो कि उई बाटा भटे एक यहूदी याजक जानमरेछ्यो, लेकिन उ देखिभेरन उकी मद्दत नै करूनो और वाँ भटे न्हैग्यो।</verse>
				<verse number="32">इसीकैं एक लेवी आदिमी ले उ जाग में आछ, जो मन्दिर में काम करछ्यो, और उले ऊस देखिभेरन उकी मद्दत नै करूनो और वाँ भटे न्हैग्यो।</verse>
				<verse number="33">फिर बाद में सामरी प्रदेश को एक आदिमी उ बाटा भटे हो भेरन जानमरेछ्यो, और ऊस जख्मी देखिभेरन तरस उछो।</verse>
				<verse number="34">और उक पास आभेरन उक घौन में तेल और दवै लगाभेरन पट्टी बाँद छो, और ऊस अपून गधा में बैठाभेरन अपून दगाड़ लियूछो और एक किराया में कमरा लीभेरन रात भर उकी देखभाल करछो।</verse>
				<verse number="35">दुसारा दिन उले कमरा का मालिकस द्वी दीनार दीयान, जो द्वी दिनाकी मजूरी का बराबर छै, और उथैं क्योछ, ‘येको इलाज ठीक ढ़गले करे, और येका अलावा तुमोरो जेले खर्च लागोलो में वापस आभेरन तैंस दीयूलो।</verse>
				<verse number="36">तब यीशु ले उथैं पूछ्छय, अब त्यारा समझ में जेंमे डाकून ले हमला करछ्य, इन तीनून में भटे को उको पड़ोसी भ्यो?</verse>
				<verse number="37">उले क्योछ, उई जेले उमें दया करछ्य। यीशु ले उथैं क्योछ, जा तैले इसो कर।</verse>
				<verse number="38">जब यीशु और उनार शिष्य बाट में हिटनै, तब एक गौं में पुजनान, त उ गौं में मार्था नामेंकी स्यैनि छी, जेले यीशु स अपून घर बुलाभेरन स्वागत करछ्य।</verse>
				<verse number="39">और मार्था की एक बैनि छी जेको नाम मरियम छ्यो। उ यीशुका पास बैठभेरन उकी बातुन सुणूनमरेछी।</verse>
				<verse number="40">लेकिन मार्था अपून घराका कामून कि भौत चिन्ता करूनमरेछी, और यीशुका पास आभेरन कुन लागछी, हे प्रभु क्या तैंस मेरि चिन्ता नाहतिनी कि मेरि बैनि ले मैंस घरो को सब करून खिन येकली छोड़ दीछ? येक कारण उथैं क, कि मेरि मद्दत करो।</verse>
				<verse number="41">प्रभु यीशु ले ऊस जबाब दीछ, हे मार्था, हे मार्था तैं भौत बातुन की चिन्ता करछी और भौत डर छी।</verse>
				<verse number="42">लेकिन एक बात जरूरी छै, कि मरियमले अपून खिन बड़िया जाग चुन है छ जो उथैं कोई नै छीन सकनो।</verse>
			</chapter>
			<chapter number="11">
				<verse number="1">एक बार यीशु एक जाग में प्रार्थना करून मरेछ्या। जब प्रार्थना कर चुक छै त शिष्यून में भटे एक शिष्य ले उथैं क्योछ, “हे प्रभु, जसीकैं यहूना ले अपून शिष्यून प्रार्थना करून सिखाछ, उसीकैं तुम ले हमून सिखा।”</verse>
				<verse number="2">तब यीशु ले अपून शिष्यून थैं क्योछ, जब तुम प्रार्थना करछा, तब इसो कया, हे पिता परमेश्वर, तैं जो स्वर्ग में छै, तेरो नाम सब लोगून में पवित्र मानी जौ। तेरो राज्य हमून में अ।</verse>
				<verse number="3">हमोरो दिन भरो रोटो हमून दे।</verse>
				<verse number="4">हमार पापून माफ कर, क्याखिनकि हम ले अपून अपराधीन माफ करनू। और हमून परीक्षा में जन पड़ून दे।’”</verse>
				<verse number="5">फिर यीशु ले उनूनथैं क्योछ, मान ली तुम अधरात में अपून एक दगड़िया का घर गया, और तीन रवाटा उधार लीन माँगछा।</verse>
				<verse number="6">तुम उथैं कुँछा, मेरो एक दगड़िया सफर करनै-करनै म्यार याँ पुजी रियोछ और म्यारा पास ऊस खऊन खिन केले नाहातिन।</verse>
				<verse number="7">और उ घर भितर भटे जबाब द्यो, मैंस परेशान जन कर। एले त मैंले दवार बन्द कर हाल्यान। और म्यारा नान्तिना म्यारा दगाड़ बिछान में पड़ र्यान, येक कारण मैं उठाभेरन तैंस के नै दी सकनू।</verse>
				<verse number="8">मैं तुमूनथैं कुछूँ, अगर उ आदिमी उक दगड़िया हुन पर ले ऊस उठाभेरन नै दे, फिरले मित्रा का बार-बार बिनती करून में उठाभेरन उकी जरूरत का अनुसार ऊस जरूर द्योलो।</verse>
				<verse number="9">येक कारण मैं तुमूनथैं कुछूँ, परमेश्वर थैं माँग, उ तुमून द्योलो। खोजला, त तुमून मिलोलो। खटखटाला तब तुमून खिन दवार खोल दी जालो।</verse>
				<verse number="10">क्याखिनकि जो कोई परमेश्वर थैं माँगछो, उ ऊस दीछो; और हरेक, जो ऊस खोजछो, उ ऊस पाछ; और जो कोई दवार में खटखटूछो, उ खिन खोलि जाला</verse>
				<verse number="11">तुमूनमें भटे इसो को बबा होलो, कि जब उको च्योलो रोटो माँगो, त ऊस ढूंगा दे? अगर च्योलो उथैं माँछा माँगो, त ऊस स्याँप द्यलोई?</verse>
				<verse number="12">और अगर उ अंडा माँगोलो, त ऊस बिच्छू दे?</verse>
				<verse number="13">जब तुम बुरा हो भेरन, अपून नानतिना निकी चीज दीन जाणछा, त तुमोरो स्वर्गीय पिता कई ज्यादा बढ़भेरन छै अपून मागून वालान पवित्र आत्मा किलैं नी द्योलो?</verse>
				<verse number="14">फिर उले एक गूँगा भुतस निकालछै। जब भूत निकल ग्यो तैं उ गूँगो बोलून लागछै; और यो बात स देखिभेरन लोगून ताजुब भ्योछ।</verse>
				<verse number="15">लेकिन उनूनमें भटे कुछ लोग कुंनान, “यो त भूतून का अधिकारी बालजबूल शैतान का मद्दत ले भूतून निकालछो।”</verse>
				<verse number="16">और कुछ लोगून ले यीशु की परीक्षा लीन खिन एक स्वर्गीय चिन दिखूना की माँग करछ्य।</verse>
				<verse number="17">यीशु ले उनार मने की बात जाणिभेरन उनूनथैं क्योछ, अगर एक देशा का लोग आपस मेंई लड़नै रून, उन देशा का लोग नाश हो जानान; अगर केका घर में फुट पड़ जौ, त उ घरा का लोग कसीकैं मिलभेरन रै सकनान।</verse>
				<verse number="18">अगर शैतान अपूनई भूतून का बिरोध में लड़ो, त उक राज्य कसकैं बनिना को रै सकछो? और तुम लोग मैखिन कुँछा कि मैं शैताने की मद्दत ले भूत निकाल छूँ।</verse>
				<verse number="19">अगर मैं शैतान का मद्दत ले भूतून निकाल छूँ, त तुमार च्याला कैका मद्दले निकालनान? येक कारण तुमोरो बंश ही तुमोरो न्याय करोलो।</verse>
				<verse number="20">लेकिन मैं परमेश्वर कि सामर्थ ले भूतून निकाल छूँ, तो परमेश्वरो को राज्य तुमार नजिक छै।</verse>
				<verse number="21">जब कोई ताकतवर हथियार का दगाड़ अपून घरकि रखवाली करछो, तो उकी संपत्ति बचिना की रूछी।</verse>
				<verse number="22">पर जब उ है बढ़भेरन को और ताकतवर उक दगाड़ लडभेरन ऊस हरा दीछो, और उक हथियारून जैमें उको भरोसा छ्यो उनून छड़ा लीछो और उकी संपत्ति स लुट लीछो।</verse>
				<verse number="23">जो म्यारा दगाड़ नाहतिन उ म्यारा बिरोध में छै, और जो म्यारा दगाड़ नै बुटलनो उ बिखरछो।</verse>
				<verse number="24">जब भूत उ आदिमी में भटे निकल जाछो, त उ आराम करून खिन डाणा-काँणा में भटकछो; मगर ऊस आराम नै मिलूनो। तब उ अपून आप थैं कुंछो, मैं जै आदिमी भटे निकल्यू वाँई वापस जूलो।</verse>
				<verse number="25">और जब उ उछो त आभेरन उ आदिमी का जीवन स उ घरा का नियाती पाछ, जैस साफ-सुथरा करि ग्योछ।</verse>
				<verse number="26">तब उ भूत जाभेरन अपून है बुर सात भूतून अपून दगाड़ ल्यूछी, और उन उमें वास करभेरन, दुबारा है घर बना लीनान, और उ आदिमी कि हालत पैलि भटे और ले बुरी हो जाछी।</verse>
				<verse number="27">जब यीशु यो बात कुन मरेछ्या त भीड़ में भटे एक स्यैनि ले जोरले बोलभेरन क्योछ, “धन्य छै उ स्यैनि जेले तैंस जन्म दीछ और तैंस दूध पिलाछ।”</verse>
				<verse number="28">लेकिन यीशु ले उथैं क्योछ, धन्य छन जो परमेश्वरो को वचन सुणनान और माननान।</verse>
				<verse number="29">जब और ले भीड़ जामा हुन लागछी, तब यीशु कुन लाग्यान, यो बखत का दुष्ट लोगून चिन खोजनान, लेकिन योना का चिन को छोड़ी और कोई चिन उनून नी दी जालो।</verse>
				<verse number="30">जसिकै परमेश्वरो को संदेश दिनवाला योना ले नीनवे का लोगून खिन एक चिन ठैराछ, उसीकैं आदिमी को च्योलो ले यो बखता का लोगून खिन एक चिन ठहरलो।</verse>
				<verse number="31">और न्याय का दिन दक्षिण की रानी यो पीढ़ी लोगून का दगाड़ ठाड़ होलि और जो यो पीढ़ीका लोगून दोषी ठहराली, क्याखिनकि उ राजा सुलैमान को ज्ञान सुणून खिन धरतीका छोर भटे आयीना की छी, और देखा याँ उ छै जो राजा सुलैमान है ले ठूलो छै।</verse>
				<verse number="32">नीनवे का लोग न्याय का दिन यो पीढ़ीका लोगून दगाड़ उठ ठाड़ होला और उनून दोषी ठहराल, क्याखिनकि उनूनले योना का प्रचार सुणिभेरन लोगून ले अपून पापून है पश्चताप करछै; और याँ उ छै जो योना है ले ठूलो छै।</verse>
				<verse number="33">कोई ले आदिमी दीया जलाभेरन लुका भेरन या भांणाका तलि नै राखनो, लेकिन दीया जलाभेरन ऊँचा जाग में राखनान कि घर भितर उनवालान उज्यालो मिलो।</verse>
				<verse number="34">तेरो आँखो शरीर खिन दीया को जसो छै, येक कारण अगर तेरा आँखा ठीक होला त तेरो पुरो शरीर में ले उज्यालो होलो; अगर उ ठीक नाहतिनी त तेरो पुरो शरीर में ले अन्यारो होलो।</verse>
				<verse number="35">येक कारण तैं चौकस रये जो उज्यालो तैंस मिलर्योछ काँई उ अन्यारो नै है जौ।</verse>
				<verse number="36">येक कारण अगर तेरो पुरो शरीर में उज्यालो हो और उको कोई हिस्सा में अन्यारो नै हो तब इसो उज्यालो होलो, जसो उ बखत हुछो जब दीया अपून किरणुन ले तैंस उज्यालो दीछो।</verse>
				<verse number="37">जब यीशु अपूनो उपदेश खतम कर चुकछै, त एक फरीसी लोग ले यीशु थैं बिनती करभेरन क्योछ, तैं म्यारा घर में खान खिन पधारा। और यीशुका घरा का भितर जाभेरन खान खिन बैठियान।</verse>
				<verse number="38">फरीसी लोगून यो देखिभेरन ताजुब हुछो, कि यीशु ले खान है पैलि अपून रिवाज का अनुसार हात-खुटा नै धोया।</verse>
				<verse number="39">तब यीशु ले उ फरीसी लोगून थैं क्योछ, हे फरीसी, तुम लोग थाली, कटरान का नियाती छा, जो भ्यार भटे साफ और भितर भटे गन्दा छा, उसीकैं तुमार मन का भितर बुराई और दुष्टता भरिना की छै।</verse>
				<verse number="40">हे मूर्खो, जेले भ्यार हिस्सा बनाछ, क्या उले भितरो को हिस्सा नै बनायो?</verse>
				<verse number="41">लेकिन होई, येक कारण गरीब लोगून दान दीभेरन भितर भटे मन साफ करा, और देखा, सब कुछ तुमून खिन निको हो जालो।</verse>
				<verse number="42">हे फरीसी लोग, तुमून में धिक्कार छै, तुम पोदीन और सौफ और सब साग-पात को त दसवाँ हिस्सा दीछा, लेकिन न्याय स और परमेश्वरा का प्रेम स टाल दीछा; यो ले करनै रूनान और उनूनले नी छोड़ना।</verse>
				<verse number="43">हे फरीसी लोगो, तुमूनमें धिक्कार छै, तुम लोग यहूदी सभाघर में खास-खास जाग और बजार में नमस्कार करून पसन्द करछा।</verse>
				<verse number="44">धिक्कार छै तुम लोगून में, क्याखिनकि तुम लोग उन ढकीन कबरूना का जसा छा जो, जिनून में लोग हिटनान लेकिन नै जाणना कि इन कबर छन।</verse>
				<verse number="45">तब मूसा का नियम सिखून वाला एक आदिमी ले यीशु थैं क्योछ, गुरू जी, तैं यो बात कैभेरन हमरि बेजत्ती करछ।</verse>
				<verse number="46">तब यीशु ले क्योछ, हे मूसा का नियम सिखून वाला लोगो तुमूनमें ले धिक्कार छै। तुम भौत सारा कानून बनूछा, जिनून लोगून का मानन खिन भौत कठिन छै। लेकिन अपून बनाईना का नियम-कानून मानन खिन जरा ले कोशिश नै करना।</verse>
				<verse number="47">तुमून में धिक्कार छै, तुम उन परमेश्वरो को संदेश दिनवाला नै की कबर बनूछा, जिनून तुमार बबा-दादान ले मार डालीना को छ्या।</verse>
				<verse number="48">इसिकै तुम अपून पूर्वजून का कामून की गवाही दीछा, उनार कामून में तुम ले सहमत छा; क्याखिनकि उनूनले उनून मार डालछ्य और तुम उनेरि कबर बनूछा।</verse>
				<verse number="49">येक कारण परमेश्वर की बुद्धि ले क्योछ, कि मैं उनार पास मेरो संदेश दिनवालान और प्रेरितून भेजूलो, और उन इनून में भटे कुछ मार डालला, और कुछ लोग सताला।</verse>
				<verse number="50">ताकि जदुक ले परमेश्वरो को संदेश दिनवाला को खून संसार का शुरूवाद भटे बगाईना को छै, उन सब को हिसाब यो बखत का लोगून थैं लिई जालो।</verse>
				<verse number="51">हाबिल की हत्या भटे जकर्याह हत्या तक, और जो वेदी और मन्दिर का बीच में घात करि ग्यो। मैं तुमूनथैं सच्ची कुछ, इन सबून को हिसाब योई बखत का लोगून थैं लिई जालो।</verse>
				<verse number="52">हे मूसा का नियम सिखूनवालो धिक्कार छै तुम में। तुमार पास स्वर्ग जानो ज्ञान छै, क्याखिनकि तुमूनले ऊस लुका है छ, लेकिन तुम उमें खुद प्रवेश नै करना और जो उमें प्रवेश करून चाँनान, उनून तुम रोकून मरेछा।</verse>
				<verse number="53">जब यीशु वाँ न्हैजानान, तब मूसा का नियम सिखून वाला और फरीसी लोग बुर तरीका ले यीशुका पछिल पड़ जानान और भौत बातुन का बारिमें सवाल करनान।</verse>
				<verse number="54">और यो बातुन का ताक में छ्या, कि यीशु का मुँख भटे के बुरी बात निकलो त ऊस पकड़ा।</verse>
			</chapter>
			<chapter number="12">
				<verse number="1">इदुक में जब हजारून की भीड़ लाग जाछी, या तक की उन एक दुसारा में खितीन मसनान, तैं यीशु ले सबून है पैलि अपून शिष्यून थैं क्योछ, फरीसी लोगून का कपट फैलून वाला खमीर भटे सर्तक रया,</verse>
				<verse number="2">के ढकीन को नाहातिन जो खोलि नै जौ; और नै के लुकीना को छै, जो सामुनि प्रगट नै करि जालो।</verse>
				<verse number="3">येक कारण जो कुछ तुमूले अन्यारा मैं क्योछ, उ उज्याला में सुणाई जालो; और जो तुमून ले घर भितर फुसफुसाट में क्योछ, उ पाखान में भटे धध्या-धध्याभेरन कयी जालो।</verse>
				<verse number="4">मैं तुमूनथैं जो म्यारा मित्र छा कुछूँ, कि जो शरीर स नुकशान पुजूनान और उक अलावा के नै कर सकना, उनून देखिभेरन जन डरा।</verse>
				<verse number="5">मैं तुमून बतूछूँ कि कैस देखिभेरन डरून चैंछो। उ परमेश्वर भटे डरा, जैस तुमून मारना का बाद नरक की आग में डालना को अधिकार छै, मैं तुमूनथैं कुछूँ, उथैंई डरा।</verse>
				<verse number="6">क्या द्वी पैसान में पाँच गौरेया नै बेचिना? फिरले परमेश्वर उनूनमें भटे एक स ले नै भूलना।</verse>
				<verse number="7">परमेश्वर तुमार जीवन की हर बात की परवा करछो। और उ यो ले जाणछो कि तुमार ख्वारा में कतुक बाल छन, येक कारण डरा जन। तुम भौत चिड़ियान है ले कई ज्यादा कीमती छा।</verse>
				<verse number="8">मैं तुमूनथैं कुछूँ, जो कोई लोगून का सामुनि मैंस स्वीकार करोलो, मैं आदिमी को च्योलो ले परमेश्वरा का स्वर्गदूतून का सामुनि ऊस स्वीकार करलो।</verse>
				<verse number="9">लेकिन जो कोई आदिमीन का सामुनि म्येरो इनकार करोलो, त मैंले ऊस परमेश्वरा का स्वर्गदूतून का सामुनि ले उको इनकार करूँलो।</verse>
				<verse number="10">जो कोई ले आदिमी को च्याला का बिरोध केले बात कलो, उको अपराध माफ करि जालो, लेकिन जो कोई पवित्र आत्मा स बुरो बोलोलो, परमेश्वर ऊस कभै ले माफ नी करून।</verse>
				<verse number="11">“जब लोग तुमून यहूदी सभाघरून में और अधिकारीन का सामुनि लिजाला, तैं जन डरिया कि हम अपून बचाव में इनून कि जबाब द्यूलो या कि कलौ।</verse>
				<verse number="12">क्याखिनकि पवित्र आत्मा तुमून उई बखत सिखा द्योलो, कि तुमून कि कुन छै।”</verse>
				<verse number="13">फिर लोगून की भीड़ में भटे एक आदिमी ले यीशु थैं कुन लागछै, “गुरू जी, म्यारा भाई थैं कैं दीया, कि हमार बबा की जैजाद को बटवारा म्यारा दगाड़ करो।”</verse>
				<verse number="14">तब यीशु ले क्योछ, “हे भाई, केले तुमेरि जैजाद को बटवारा करून वालो बनाछ?”</verse>
				<verse number="15">और फिर यीशु ले उनूनथैं क्योछ, “सतर्क रया, और हर प्रकारा का लोभ लालच भटे अपनास बचाभेरन राखा; क्याखिनकि केको ले जीवन उक जैजाद का आधार में नै हुनो।”</verse>
				<verse number="16">यीशु ले उनूनथैं एक कहानी सुणाभेरन क्योछ, “कि एक धनवानाक गड़ान में भौत अनाज हुछो।</verse>
				<verse number="17">तब उ धनवान अपून मन में सोचून लागछै, मैंस पत्तो नाहातिन कि करून चैछो? क्याखिनकि म्यारा पास इदुक ज्यादा अनाज स राखून खिन ज्यादा जाग नाहातिन।</verse>
				<verse number="18">और उ क्योछ, ‘मैंस पत्तो छै कि मैंस कि करून चैछो, अपून भखारून तोड़भेरन ठूला करोलो, और उनूनमें अपूनी सब अनाज और सम्पत्ति राखलो;</verse>
				<verse number="19">येक बाद अफु थैं कुलो, त्यारा पास भौत सालून खिन खान खिन भौत अनाज और सम्पत्ति राखिना की छै, आराम ले खा, पी और मौज कर।’</verse>
				<verse number="20">लेकिन परमेश्वर ले उथैं क्योछ, हे मूर्ख, योई रात तैं मर जालै; तो उन चीजून को ल्योलो, जो कुछ तैले जाम कर रैछ?</verse>
				<verse number="21">इसी हालत उन लोगून की होलि, जो अपून सम्पत्ति जाम करनान। क्याखिनकि उन परमेश्वर की सेवा खिन अपून आपस और सम्पत्ति को उपयोग नै करना।”</verse>
				<verse number="22">फिर यीशु ले अपून शिष्यून थैं क्योछ, येक कारण मैं तुमूनथैं कुछूँ, कि अपून रोजमर्रा जीवन का बारिमें चिन्ता जन करा कि हम खूँला; नै अपून शरीर का बारिमें फिकर जन करा की कि पैनला।</verse>
				<verse number="23">क्याखिनकि जीन्दगी खान भटे, और शरीर कपाड़ा भटे ज्यादा कीमती छै।</verse>
				<verse number="24">तुम कौव्वान ध्यान ले देखा! उन नै बुन और नै काटना, और नै उनार जाम करून खिन भण्डार हुना; फिरले परमेश्वर उनून पालछो। तुमेरि कीमत चिड़ियान भटे कई ज्यादा छै!</verse>
				<verse number="25">तुमून में भटे को इसो छै, जो चिन्ता करभेरन अपून जीवन में एक घड़ी ले बड़ा सकछो?</verse>
				<verse number="26">अगर तुम इदुक नाँनो काम ले नै कर सकना, त फिर दुसरी बातुन की चिन्ता किलैं करछा?</verse>
				<verse number="27">जंगली फुलून देखा उन कसीकैं बढ़नान नै त उन मेहनत करनान, और नै कपाड़ा बनुनान। तब ले मैं तुमूनथैं कुंछू, कि राजा सुलैमान ले अपूनी पुरी धन-दौलत में ले इन जंगली फुलून का जस सुन्दर कपाड़ा नै पैन्या।</verse>
				<verse number="28">येक कारण मैदान की घास जो आज छै, और भोल आगो में भड़ाई जालि, फिरले परमेश्वर ऊस इदुक ज्यादा सुन्दरता दीछो, त उ जरूर तुमोरो उ है ले ज्यादा ध्यान राखोलो। लेकिन तुमोरो विश्वास परमेश्वर में इदुक कम किलैं छै।</verse>
				<verse number="29">और तुम यो बातुन की चिन्ता जन करा की हम कि खूँला, या कि पियूला, और शक जन करा।</verse>
				<verse number="30">क्याखिनकि यो संसारा का लोग इन सब चीजून का खोज में रूनान, और तुमोरो स्वर्गीय पिता जाणछो, कि तुमून इन सब चीजून की जरूरत छै।</verse>
				<verse number="31">येक कारण पैलि तुम परमेश्वरा का राज्य की खोज करा त यो सब चीज तुमून मिली जालि।</verse>
				<verse number="32">“हे भेड़ून की नियाती नाँन झुण्ड, जन डर; क्याखिनकि तुमोरो पिता परमेश्वर ये है खुश छन, कि तुमून राज्य दे।</verse>
				<verse number="33">अपून जैजाद स बेचिभेरन दान करि दी; तब तुम अपून खिन इसो बटवा बना जो कभै नै फाटो, और स्वर्ग में इसो धन जाम करा जो कम नै हुनो, वाँ नै त चोर उनो और नै कीड़ा लागना।</verse>
				<verse number="34">हमेशा तैय्यार रौ, क्याखिनकि तेरो मन हमेशा वाँई लाग रौ जा तेरो धन छै।”</verse>
				<verse number="35">“परमेश्वरा का काम खिन हमेशा तैयार रौ, जसीकैं काम करून खिन लोग कमर कसभेरन सारी रात दीया जलाभेरन तैय्यार रूनान।</verse>
				<verse number="36">और तुम उन लोगून का जस जन बना जो अपून मालिका राह देखनै रूनान, कि उ ब्याह भटे कब वापस आलो, और जब उ आभेरन दवार खटखटालो त तुरन्त उ खिन दवार खो दे।</verse>
				<verse number="37">धन्य छन उन दास जिनोरो मालिक आभेरन उनून उक वापिस उना का इन्तजार में पाओ! मैं तुमूनथैं सच्ची कुछूँ, कि एक दास की नियाती कपाड़ा पैनाभेरन उनून खानो खान खिन बैठालो और एक-एक स खानो खिलालो और उनेरि सेवा करोलो।</verse>
				<verse number="38">और धन्य छन उन दास, जिनोरो मालिक राता का दुसारा या तीसारा पहर में ले उनून बिज्जो पालो।</verse>
				<verse number="39">लेकिन तुम यो बात निकीकैं समझ ली, अगर घरो को मालिकस यो मालूम हुनो, कि चोर चोरी करून खिन कै बखत आलो, त उ बिजो रूनो, और अपून घर में चोरी नी हुन दीनो।</verse>
				<verse number="40">तुम म्यारा वापस उन तक तुमून तैय्यार रूनो जरूरी छै, क्याखिनकि मैं आदिमी को च्योलो इसा बखत स्वर्ग भटे वापस ऊँलो जब तुम म्यारा उनाकी उम्मीद नै करून मरिया होला।”</verse>
				<verse number="41">तब पतरस ले क्योछ, “हे प्रभु, क्या यो कहानी तैं हमून थैं या सब खिन कुछै।”</verse>
				<verse number="42">प्रभु ले क्योछ, उ विश्वासयोग्य और बुद्धिमान दास को होलो, जैस घरो को मालिक दुसारा दासून की निगरानी करून खिन नियुक्त करछो। उ ऊस ठीक बखत में खानो दीन खिन कुंछो। फिर उ खुद लम्बी यात्रा में न्हैजाछो।</verse>
				<verse number="43">धन्य छै उ दास, जैस उको मालिक आभेरन ऊसो काम करनै देखो।</verse>
				<verse number="44">मैं तुमूनथैं सच्ची कुंछूँ, उ मालिक उ दास स अपून पुरी संमपत्ति को अधिकारी ठैरालो</verse>
				<verse number="45">लेकिन उ दास यो सोचून लागछै म्येरो मालिक का उन में देर छै, और उ दास अपून दगड़िया दासून मार-पीटून लागौ, और खान-पिन दगाड़ नशा करून लाग्यान।</verse>
				<verse number="46">त उ दास को मालिक इसा दिन वापस आलो, जब उ उको इन्तजार नी करूनमर्यो होलो, और इसा बखत जैस उ नै जाणून हो। तब मालिक आभेरन, उ दास स कड़ी सजा द्योलो, और उको भाग अविश्वासीन का दगाड़ ठैरालो।</verse>
				<verse number="47">उ दास जो अपून मालिका का इच्छा जाणछो, और तैयार नै र्यो और नै उकी इच्छा का अनुसार चलछै, भौत मार खालो।</verse>
				<verse number="48">लेकिन जो अनजान में मार खान लायक काम करो, उन थ्वाड़ा मार खाला। क्याखिनकि जैस भौत दी ग्योछ, उथैं भौत लिजालो; और जैस भौत सौंपी ग्योछ, उथैं भौत माँगी जालो।</verse>
				<verse number="49">“मैं यो संसार में आगो लगून खिन आरयूँ; और की चाछूँ कि यो अलै सुलग जौ!</verse>
				<verse number="50">मैंस त एक बपतिस्मा लीन छै, और जब तक उ पुरो नै हो ले तब तक म्यारा मन भौत बेचैन रोलो।</verse>
				<verse number="51">क्या तुम सोचछा कि मैं संसार में लोगून में मेल-मिलाप करून खिन आरयूँ? मैं तुमूनथैं कुछूँ; मैं मेल-मिलाप करून खिन नै लेकिन अलग करून खिन आरयू।</verse>
				<verse number="52">अगर एक घर में पाँच लोग हुन, त म्यारा कारण ले उन आपस में बाड़िना का होला, त तीन लोग जो मैं-में विश्वास नै करना, उन द्वी लोगून को बिरोध कराला जो मैं-में विश्वास करनान।</verse>
				<verse number="53">और बाब च्याला का दगाड़ और च्योलो बबा का दगाड़ विरोध राखोलो; ईजा चेलि का दगाड़, चेलि ईजा का और सासू ब्वारी का दगाड़ और ब्वारी सासू का दगाड़ विरोध राखलि।”</verse>
				<verse number="54">और यीशु ले भीड़ थैं ले क्योछ, जब तुम बादल स पश्चिम दिशा भटे उठून देखछा त तुरन्त कुँछा कि बरखा होलि, और इसो हुछो।</verse>
				<verse number="55">और दक्षिण भटे हवा चलछी त कुँछा कि लू चलली, और इसो हुछो।</verse>
				<verse number="56">हे कपटी लोगों, तुम धरती और आकाशा को भेद जाण सकछा, त यो युग में परमेश्वर कि करूनमर्योछ, यो भेद किलैं नै जाणना।</verse>
				<verse number="57">तुमूले खुदै फैसला करून चैंछ कि तुमून खिन कि करून ठीक छै?</verse>
				<verse number="58">जब तैं अपून दुश्मनून का दगाड़ महासभा का मुकदमा खिन जानमरेछै, त बाट में उक दगाड़ समझौता करना कि कोशिश कर, काँई इसो नै हो कि दुश्मन तैंस हाकिम का पास ली जौ, और हाकिम तैंस सिपाई पास ली जौ, और सिपाई तैंस जेल में डाल दे।</verse>
				<verse number="59">मैं तुमूनथैं कुछूँ कि जब तक तुम उ सब को भुकतान नै कर दे, जो तुमूनमें बकाया छै, तब तक जेल खान भटे कभै नी निकल पाला।</verse>
			</chapter>
			<chapter number="13">
				<verse number="1">उ बखत थ्वाड़ा लोग वाँ आयान, और उनूनले यीशु थैं क्योछ, कि रोमी राज्यपाल पिलातुस ले गलीला का जिला का थ्वाड़ा लोगून की हत्या कर दीछ, जब उन मन्दिर में बलिदान चढ़ून मरेछ्या।</verse>
				<verse number="2">यो सुणिभेरन यीशु ले जबाब दीभेरन उनूनथैं क्योछ, “तुम की समझछा कि इन गलीली लोग और गलीली प्रदेशा का लोगून भटे ज्यादा पापी समझ छ्या जिनारा दगाड़ सब कुछ भ्योछ? जैका कारण इनून में इसी मुसीबत आछ।”</verse>
				<verse number="3">मैं तुमूनथैं कुछूँ, कि इसो नाहातिनो; लेकिन अगर तुम अपून पापून भटे पश्चताप नी करला, तो तुम सब ले इसीकैं नाश हो जाला।</verse>
				<verse number="4">और तुम उन अठार आदिमी का बारिमें की कौला, जो तब मर गैछ्या जब यरूशलम शैहरा का पास शिलोह की गुम्मट उनूनमें खितीछ गैछी, उन यरूशलम शैहरा का सब रूनवाला लोगून है ज्यादा पापी छ्या?</verse>
				<verse number="5">मैं तुमूनथैं कुछूँ, कि नै, लेकिन जब तक तुम अपून पापून भटे पश्चताप नी करला, तो तुम सब ले इसीकैं नाश हो जाला।</verse>
				<verse number="6">फिर यीशु ले उनुस एक कहानी बताछ, एक आदिमी ले अंगूर का बगीच में एक अंजीरो को रूख ले लगा राखछ्यो, और उ हर साल उ रूख में फल चांनखिन आछ, लेकिन ऊस के नै मिल्यो।</verse>
				<verse number="7">तब उले अपून दास थैं क्योछ देख मैं तीन साल भटे यो अंजीरा का रूख में फल खोजनै रयूँ लेकिन के नै पानूं तैं यो रूखै स काटि दे, क्याखिनकि यो निकी जमीन स बरबाद करूनमर्यो छै।</verse>
				<verse number="8">त यो बात में दास ले अपून मालिक थैं क्योछ, यो साल यो रूख स रून दे मैं येक चारू तरफ खड़िभेरन खाद हाललो।</verse>
				<verse number="9">अगर अघिल साल यो रूख फल नी द्यलो त ठीक छै तब ऐस काटि द्यूला।</verse>
				<verse number="10">जब यीशु सबता का दिन एक यहूदी सभाघर में उपदेश दिन मरेछ्या।</verse>
				<verse number="11">और वाँ एक स्यैनि छी, जैस अठार साल भटे भुतले बिमार कर राखछ्यो और उ कुबड़ी हो गैछी, और उ कसीकैं ले सीधी नी हो सकछी</verse>
				<verse number="12">जब यीशु ले ऊस देखछ्य त अपून पास बुलाभेरन उथैं क्योछ, “ओ स्यैनि तैं अपून बिमारी भटे छुटी गै छी।”</verse>
				<verse number="13">और यीशु ले उमें हात राखछ्य और उ सीधी हो गै और उ परमेश्वर की महिमा करून लागि गै।</verse>
				<verse number="14">यो बात में यहूदी सभाघरो को सरदार गुस्सा हो भेरन कि यीशु ले सबतका दिन बिमारीन चंगा करछो, और लोगूनथैं कुन लागछो, “हफ्ता में छ: दिन छन, जैमें हमूले काम करून चैछ, उन दिनून में चंगा हो लेकिन सबतका दिन नै।”</verse>
				<verse number="15">यो सुणिभेरन प्रभु यीशु ले क्योछ, हे कपटी लोगो, क्या तुमून में भटे हरेक जन सबतका दिन अपून बल्द और गधास किल भटे खोलभेरन पानि पिलून खिन नै ल्हीजाना।</verse>
				<verse number="16">त यो स्यैनि जो अब्राहम का वंश भटे छै, जैस शैतान ले अठार साल भटे ले बाधी राखछ्यो, क्या सबतका दिन ऊस बन्धन भटे छुड़ून ठीक नी छोई?</verse>
				<verse number="17">जब यीशु ले यो बात क्यान त उक सब विरोधी लज्जित हो ग्या, और भीड़ा का लोग उन महिमा का कामून भटे जो यीशु करछ्यो देखिभेरन खुशी भ्यान।</verse>
				<verse number="18">फिर यीशु ले क्योछ, परमेश्वरो को राज्य कैका समान छै? और मैं येकी तुलना कैथैं करूँ।</verse>
				<verse number="19">उ राई का एक दाना का समान छै, जैस एक आदिमी ले अपून बगीच में बोछ उ ठूलो हो भेरन रूख बन ग्यो। और आकाशा का चिड़ियान ले उ रूखा का हांगा में घोल बनायान।</verse>
				<verse number="20">यीशु ले फिर एक उदारण दीभेरन क्योछ, परमेश्वरा का राज्य की तुलना मैं कैथैं करूँ?</verse>
				<verse number="21">उ ऊ खमीरा का समान छै, जस एक स्यैनिले लीभेरन तीस किलो धुल में मिलाछ और इसीकैं पुरो धुलो खमीर हो ग्यो</verse>
				<verse number="22">यीशु अपून शिष्यून का दगाड़ नगर-नगर और गौंन-गौंन हो भेरन उपदेश दिने यरूशलम शैहरा का तरफ जानमरेछ्या।</verse>
				<verse number="23">तो वाँ एक आदिमी ले उनूनथैं पुछ्छै, “हे प्रभु, क्या परमेश्वर कुछ लोगून हमेशा का दण्ड भटे बचालो? यीशु ले उनूनथैं क्योछ,</verse>
				<verse number="24">तुम परमेश्वरा का राज्य में सकरा द्वार भटे प्रवेश करना कि कोशिश करा, क्याखिनकि मैं तुमूनथैं सच्ची कुछूँ, कि भौत सारा लोग छन जो उ भटे प्रवेश करून त चाला लेकिन उन प्रवेश नी कर सकाला।</verse>
				<verse number="25">जब परमेश्वर, जो घरो को मालिक छै, उठाभेरन द्वार बन्द कर दे, और तुम भ्यार खड़ हो भेरन रून-कलान करभेरन दवार खोलून खिन बिनती करछा, ‘हे प्रभु, हमून खिन दवार खोल दे,’ और उ जबाब दे कि मैं तुमूनथैं नै जाणनू, तुम काँ का छा?</verse>
				<verse number="26">तब तुम कुन लागला, कि हमूले त्यारा सामुनि खाछ-पीछ और तैले हमार बजारून में उपदेश दीछ।</verse>
				<verse number="27">लेकिन उ कलौ मैं तुमूनथैं कुछूँ मैं नै जाणनू तुम काँ का छा, ओ कुकर्म करन्या वालो तुम सब मैं भटे दूर हो।</verse>
				<verse number="28">जब तुम अपून पूर्वज अब्राहम, इसहाक, याकूब और सब परमेश्वरो को संदेश दिनवालान परमेश्वरा का राज्य में बैठिना का, और अपून आपस भ्यार निकलूनै देखला जाँ रून और दाँतून को पिसून होलो।</verse>
				<verse number="29">तब पुर संसारा का लोग आभेरन परमेश्वरा का राज्य की दावत में शामिल होला।</verse>
				<verse number="30">और देख जो अपून-आप स महान समझछो, उ तुच्छ होलो; और जैस लोग तुच्छ समझनान, उ महान होलो।”</verse>
				<verse number="31">उई बखत थ्वाड़ा फरीसी लोग आभेरन उथैं कुन लाग्यान, “याँ भटे निकल जा, क्याखिनकि राजा हेरोदेस तैंस मार डालून चाँछो।”</verse>
				<verse number="32">उले उनूनथैं क्योछ जाभेरन उ लोमड़ीथैं कै दी, कि देख मैं आज और भोल भूतून निकाल छूँ और बिमारून स चंगो करछूँ और तीसारा दिन पुरो करोलो।</verse>
				<verse number="33">फिरले मैंस आज, भोल, और पोरखिन यात्रा करून जरूरी छै, क्याखिनकि परमेश्वरो को संदेश दिनवाला यरूशलम शैहर में मारी जालो।</verse>
				<verse number="34">“हे यरूशलम शैहरा का लोगों, तुमूनले जो परमेश्वरो को संदेश दिनवालान मार दीछ, और जो त्यारा पास भेजि ग्यान उनून ढ़ूगानले मारछा। फिर यीशु ले क्योछ, कतुक बार मैंले यो चाछ कि जसकै मुर्गी अपून प्वाथान अपून पंखान का ताला जामा करछी, उसीकैं मैंले तुमून जामा करूँ लेकिन तुम लोगून ले नै चाँयो।</verse>
				<verse number="35">देखा तुमोरो मन्दिर तुमून खिन उजाड़ छोड़ दी जालो। किलैकी मैं तुमूनथैं कुछूँ, जब तक तुम यो नी कौला, ‘धन्य छै उ, जो प्रभु अधिकार का दगाड़ उछो’ तब तक तुम मैंस कभे नै देखला।”</verse>
			</chapter>
			<chapter number="14">
				<verse number="1">फिर यीशु सबता का दिन फरीसी लोगून का सरदारून में भटे कैका घर खानो खान खिन ग्यान; और यीशु स ध्यान ले देखन मरेछ्या ताकि उमें कोई दोष लाग सकाँ।</verse>
				<verse number="2">वाँ एक आदिमी छ्यो, जैको हात-खुटान सूज गैछ्या।</verse>
				<verse number="3">ऊस देखभेरन यीशु ले मूसा का नियम सिखून वाला और फरीसी लोगून थैं क्योछ, “क्या सबतका दिन चंगो करून खिन हमार नियम में अनुमति छी या नाहातिन?”</verse>
				<verse number="4">लेकिन उन चुपचाप र्यान। तब यीशु ले अपूनो हात उमें राखभेरन ऊस चंगो करछ्य, और ऊस जान दीछ।</verse>
				<verse number="5">और यीशु ले क्योछ, “अगर तुमोरो बल्द कुँवा में खिती जाछो तो क्या तुम ऊस सबतका दिन ऊस भ्यार नै निकालला?”</verse>
				<verse number="6">उन लोग यीशुका बातुन को केले जबाब नै दी सक्या।</verse>
				<verse number="7">जब उले देखछ्य कि न्यूत में बुलाईना का लोग कसीकैं खास-खास जांगा चुनी लीनान, तब यीशु ले उनून एक कहानी सुणाछ।</verse>
				<verse number="8">जब तैंस कोई ब्या में बुलालो त तैं खास जाग में जन बैठे काँई इसो नै हो कि उले त्यारा है ले ठूलो आदिमी स न्यूत दिईनाको हो।</verse>
				<verse number="9">और जेले तुम द्वीवै न्यूत दी रैछ, उ आभेरन तुमूनथैं कौ, ऐस बैठून दी, तब तैंस अपमानित हो भेरन सबून है पछिल बैठून पड़ो।</verse>
				<verse number="10">अगर जब तैंस बुलाईना को हो त तैं सबून है पछिल जाभेरन बैठ, और जब उ, जेले तैंस बुला रैछ त्यारा पास आभेरन तैथैं कौल, हे मित्र, अघिल जाभेरन उ खास जाग में बैठ, तब त्यारा दगाड़ बैठून वालान का सामुनि तेरो आदर होलो।</verse>
				<verse number="11">और जो कोई अपून-आपस ठूलो बनालो, उ नानो करि जालो और जो कोई अपनास नानो बनालो उ ठूलो करि जालो।</verse>
				<verse number="12">तब उले अपून न्यूत दिनवाल थैं क्योछ, जब तैं दीनै की या रातै की दावद करले त अपून मित्रून या भाईन या रिश्तेदारून या धनवान पड़ोसिन जन बुलाये काँई इसो नै हो कि उन लै तैंस न्यूत द्यला और तेरो बदला हो जौ।</verse>
				<verse number="13">लेकिन जब तैं दावत करले, त कंगालून, लूला-लंगड़ान, और अन्धान बुलाये।</verse>
				<verse number="14">तब तैं धन्य हो ले, क्याखिनकि उनार पास तैंस दिन खिन कै नाहातिन, लेकिन जब धर्मी लोगून ज्यून होलो, तब परमेश्वर तैंस ईनाम द्योलो।</verse>
				<verse number="15">उक दगाड़ खान खाँनवालान में भटे एकले यो बात सुणिभेरन उथैं क्योछ, “धन्य छन उन जो परमेश्वरा का राज्य में खानो खाला।”</verse>
				<verse number="16">उले उथैं क्योछ, स्वर्ग को राज्य यो कहानी नियाती छै, “एक आदिमी ले ठूली दावत करछ्य और भौत लोगून बुलाछ।</verse>
				<verse number="17">जब दावतो को खान खिन तैय्यार हो ग्योछ, तब उले अपून दास थैं बुलाईना का लोगूनथै यो कुन खिन भेजछ्य आ सब कुछ तैय्यार हो ग्योछ।</verse>
				<verse number="18">लेकिन उन सबा का सब बहाना करून लाग्यान। पैल वाला ले उथैं क्योछ, ‘मैले जमीन खरीद रैछ, और मैंस ऊस देखून खिन जानो छै। मैं तैथैं विनती करछूँ, मैंस माफ कर दे।’</verse>
				<verse number="19">दुसरा ले क्योछ, मैले पाँच ज्वाड़ा बल्द खरीद राख्यान, और उनून परखून खिन जान छै, मैं तैथैं विनती करछूँ मैंस माफ कर दे।</verse>
				<verse number="20">और एकले क्योछ, मैले ब्या कर राखछ्य, येक कारण मैं नै आ सकनू।</verse>
				<verse number="21">दास ले आभेरन अपून मालिकस इन सब बात बतायान। तब घरा का मालिक ले गुस्सा में आभेरन अपून दास थैं क्योछ, नगर में बाजारून और गली-कूचान में तुरन्त जाभेरन कंगालून, लूला-लंगड़ा, और अन्धान याँ ली आ।</verse>
				<verse number="22">दासले फिर क्योछ, हे मालिक, जस तुमूले कै राखछ्यो, ऊसोई करि ग्योछ; और फिरले जाग बच रैछ।</verse>
				<verse number="23">तब मालिक ले दास थैं क्योछ, सड़कून में और गलीयून का तरफ जाभेरन लोगून बिबश कर कि म्येरो घर भरि जौ।</verse>
				<verse number="24">क्याखिनकि मैं तैथैं कुछूँ, कि जो लोग दावत में पैलि बुलाईना को छ्या, उनूनमें भटे कोई ले मेरि दावतो को खानो नै खान चाँछ्या।”</verse>
				<verse number="25">और जब एक ठूली भीड़ यीशुका दगाड़ जानमरेछी तब उले पछिल मुड़भेरन उनूनथैं क्योछ।</verse>
				<verse number="26">अगर कोई म्येरो शिष्य बनून चाँछो, और उ अपूनो बबा, ईजा, स्यैनि नान्तिना और भाई, बैनिन याँ तक कि अपून प्राणून सबून है ज्यादा प्रेम राखछो, उ म्येरो शिष्य नै हो सकनो।</verse>
				<verse number="27">और जो अपूनो दुखून को सूली उठाभेरन म्यारा पछिल नै हिटन, उ म्येरो शिष्य बनना को योग्य नाहातिन।</verse>
				<verse number="28">तुमूनमें भटे को इस छै, जो घर बनून चाँछो, और पैलि बैठभेरन खर्चा हिसाब नै लगून और यो नै देखून कि ऊस पुरो करून खिन पुजी उक पास छी?</verse>
				<verse number="29">काँई इसो नै हो कि जब उ घर की नीव डाल ले, लेकिन घर स तैयार नै कर सक्यो, त सब देखूनवाला यो कैभेरन उकी मजाक उड़ून करला।</verse>
				<verse number="30">यो आदिमी घर बनून त लागछ्य पर तैय्यार नै कर सक्यो?</verse>
				<verse number="31">को इसो राजा को होलो, जो दुसारा राजा का दगाड़ लड़ाई करून खिन जाछो, जो बीस हजार सिपाईन का दगाड़ उक खिलाफ युद्ध करून खिन आछ, त सबून है पैलि उ बैठभेरन यो बात को फैसला करोलो कि क्या उ दस हजार सिपाई लीभेरन उ दुसारा राजा का सामना कर सकछोई या नै।</verse>
				<verse number="32">अगर उ सामना नै कर सकनो त जब तक दुसारा राजा दूर छै, उ अपून राजदूतून भेजिभेरन उथैं समझौता करना की कोशिश करूँ चाँलो।</verse>
				<verse number="33">इसीकैं तुमूनमें भटे अपून सब कुछ छोड़ दे, तो उ म्येरो शिष्य बन सकछो।</verse>
				<verse number="34">फिर यीशु ले एक किस्सा सुणाछ, “नून त निको चीज छै, लेकिन अगर नूनो नमकीनपन खतम हैज्यो, तो फिर ऊस कि चीज ले नमकीन करि जालो।</verse>
				<verse number="35">उ नै त जमीना का और नै खादो को काम उछो, जो कोई यो बात स सुण सकछो जो मैं कुन मरेयू, उ यो समझना की कोशिश करून।”</verse>
			</chapter>
			<chapter number="15">
				<verse number="1">सब चुंगी लिनवाला और गैर-यहूदी जिनून लोग पापी समझ छ्या, उन यीशुका पास उपदेश सुणन खिन उछ्या।</verse>
				<verse number="2">यो देखिभेरन फरीसी लोग और मूसा का नियम सिखून वाला लोग कुड़कुड़ान भेरन कुन लाग्यान, “यो पापिन का दगाड़ मेल-जोल राखछो और उनार दगाड़ खानो ले खाछो!”</verse>
				<verse number="3">तब यीशु ले उनुस यो कहानी सुणाछ,</verse>
				<verse number="4">“तुमून में भटे को इसो आदिमी छै, जैक पास सौ भेड़ हुन, और उनूनमें भटे एक हरै जौ। तब उ निरानबे भेडून क्या जंगल में छोड़िभेरन, उ हराईना का भेड़स जब तलक उ मिल नै जौ उ बखत तलक खोजलो?”</verse>
				<verse number="5">जब उ मिल जाछी, तब उ भौत खुश है भेरन ऊस अपून कान में बैठाभेरन ल्यूछो।</verse>
				<verse number="6">और अपून घर जाभेरन अपून दगड़ियान और पड़ोसिन बुलाभेरन उनार दगाड़ खुशी मनालो, क्याखिनकि ऊस उक हराईना को भेड़ मिली ग्यो।</verse>
				<verse number="7">मैं तुमूनथैं कुछूँ, कि इसीकैं एक पश्चताप करूनवाला पापी का बारिमें ले स्वर्ग में इतुकै खुशी हुछी, जदुक की निरानबे इसा धर्मीन का बारिमें नै हुनी, जिनून पश्चताप करना की जरूरत नाहतिन।</verse>
				<verse number="8">यीशु ले एक और उदारण क्योछ, को इसी स्यैनि होलि, जैक पास चाँदी का दस सिक्का हुन, और उनूनमें भटे एक हरै जौ; तब उ दीया जलाभेरन और घर की सफाई करभेरन जब तलक मिल नै जौ, मन लगाभेरन खोजनि नी रौ?</verse>
				<verse number="9">और जब उ मिल जालो, तब उ अपून दगड़ियान और पड़ोसिन बुलाभेरन कौलि, म्यार दगाड़ खुशी मनाओ! क्याखिनकि मैले उ हराईना को सिक्कास पा है।</verse>
				<verse number="10">यीशु ले फिर क्योछ, “मैं तुमूनथैं सच्ची कुछूँ, इसीकैं एक पश्चताप करूनवाला पापी का बारिमें परमेश्वरा का स्वर्गदूतून का सामुनि भौत खुशी मनाई जाछी।”</verse>
				<verse number="11">यीशु ले दुबारा फिर उदारण दीभेरन क्योछ, एक आदिमी का द्वी च्याला छ्या।</verse>
				<verse number="12">उमें भटे नान वाला च्याला ले अपून बबा थैं क्योछ, “बाब, जमीन-जैदाद में भटे म्योर हिस्सा अब मैंस दी दीया।” बबा ले द्वीवै च्यालान जमीन-जैजाद बाणि दीछ।</verse>
				<verse number="13">थ्वाड़ा दिनून का बाद नान वाला च्योलो अपूनो हिस्सा की जमीन-जैजाद बेचिभेरन दूर देश न्हैग्यो, और वाँ बुरो कामून में अपूनी सब धन-दौलत बरबाद करि दीछ।</verse>
				<verse number="14">जब उले सब धन खर्च करि चुकछ, तब उ देश में भौत अकाल पड़छो, और उक पास के नै बच्यो, और उ भुखो मरून लागछ्य।</verse>
				<verse number="15">येक कारण उले उ देशा का एक नागरिक आदिमी का घर में काम करूँ लागछ, और उले ऊस अपून गाड़ान में सुंअर चरून खिन भेजछ्य।</verse>
				<verse number="16">उ इदुक ज्यादा भुखो छ्यो कि उ खानास ले खान खिन खुश छ्यो जिनून सुंअर खाँछ्या, ऊस खाभेरन अपून पेट भरौ, लेकिन ऊस कोई के नै दीछ्या।</verse>
				<verse number="17">जब ऊस समझ आछ, त सोचून लागछो, म्यार बबा का घर में कतुक मजदूर काम करनान और उनून पेट भर खानो मिलछो, और मैं याँ भुखो मरून मरयूँ।</verse>
				<verse number="18">पर मैं अपून बबा का पास जूंलो, और उनूनथैं कुंलो, बबा, मैंले परमेश्वरा का खिलाफ त्यारा नजरून में पाप करछ्य।</verse>
				<verse number="19">अब मैं तुमोरो च्योलो कुन लायक न्हैतिनू, तुम मैंस अपूनो एक मजदूर बनाभेरन राँख ले।</verse>
				<verse number="20">तब उ ऊ देश स छोड़भेरन अपून बबा का पास वापस जान खिन निकल पड़छो। जब उ दूरई छ्यो, उक बबा ले ऊस देखिभेरन तरस खाछ, और दौड़भेरन अपून नान च्याला स गाला लगाभेरन ऊस प्रेम करछ्य।</verse>
				<verse number="21">च्याला ले बबा थैं क्योछ, “बबा, मैंले परमेश्वरा का खिलाफ और तुमार नजरून में पाप कर रैछ; और मैं तुमोरो च्योलो कुन लायक न्हैतिनू।”</verse>
				<verse number="22">लेकिन उक बबा ले अपून दासून बुलाभेरन क्योछ, जल्दी बड़िया-बड़िया कपाड़ा ल्याभेरन येस पैना, येक आंगुलान में मुनेणि, और खुटान में जुत्ता पैना,</verse>
				<verse number="23">और इसी दावत को इंतजाम करा, ताकि हम सब खुशी मनूला।</verse>
				<verse number="24">क्याखिनकि मैंले सोचछै कि म्यार यो च्योलो मरि ग्योछ, उ मर्यो को नी छ्यो, लेकिन यो हरै ग्योछ, जो अब मिली ग्योछ। और उन सब उकी मिलना की खुशी मनून लाग्यान।</verse>
				<verse number="25">जब यो सब हो र्यो छ्यो, त उ बखत उक ठूलो च्योलो गाड़ में छ्यो। जब उ घर वापस आछ, तब उले घरा का भितर पुजभेरन, त उले गान-बजाना की आवाज सुणछ्य।</verse>
				<verse number="26">तब उले एक दास स बुलाभेरन उथैं पुछ्छै, “यो सब कि हो रैछ?”</verse>
				<verse number="27">उ दासले क्योछ, तेरो नानो भाई वापस आग्योछ, और तुमार बबा ले उक उना में भौत ठूली दावत इन्तजाम कर रैछ। क्याखिनकि उ ऊस सही सलामत मिल छै।</verse>
				<verse number="28">यो सुणिभेरन ठूलो च्याला स भौत गुस्सा हो भेरन भितर नी जान चाँन मरछ्यो। त उक बबा भ्यार आभेरन ऊस घरा का भितर उन खिन बिनती करून लागछ।</verse>
				<verse number="29">लेकिन उले अपून बबा थैं क्योछ, देख, मैं इदुक सालून भटे तुमेरि सेवा करछूँ, और कभै तुमोरो हुकुम नै टालनू, फिर लै तुमूले मैं खिन कभै इदुक बड़िया दावत को इन्तजाम नै कर्यो, कि मैं अपून मित्ररून दगाड़ खुशी मना सकू।</verse>
				<verse number="30">लेकिन जब यो तुमोरो नानो च्योलो, जेले सब धन-दौलत बेश्यान में उड़ाभेरन आ रियोछ, त तुमूले उ खिन भौत ठूली दावत को इन्तजाम कर रैछ।</verse>
				<verse number="31">बबा ले अपून ठूला च्याला थैं क्योछ, हे म्यारा च्योला, तैं त हमेशा म्यार दगाड़ रूछै; और जो कुछ ले म्येरो छै उ सब त्यारोई त छै।</verse>
				<verse number="32">लेकिन अब हमून खुशी मनून चैंछी, क्याखिनकि मैंले यो सोचछ्य की म्येरो नानो च्योलो मर ग्योछ, उ मरिना को नी छ्यो, लेकिन हरै ग्योछ, अब मिली ग्यो</verse>
			</chapter>
			<chapter number="16">
				<verse number="1">फिर यीशु ले एक कहानी अपून शिष्यून सुणाछ, कोई धनवान आदिमी को एक मुन्सी छ्यो, और लोगून ले उक सामुनि मुन्सी में यो दोष लाग्यान कि यो तेरि सब सम्पति उड़ा दीछो।</verse>
				<verse number="2">तब उले मुन्सीस बुलाभेरन क्योछ, यो कि छै जो मैं त्यार बारिमें सुणून मरयूँ? तैं म्यारा सम्पत्ति को हिसाब-किताब दे; क्याखिनकि तैं अघिल कै मुन्सी नै रै सकनै।</verse>
				<verse number="3">तब मुन्सी सोचून लागछ, अब कि करूँ? क्याखिनकि म्येरो मालिक अब मुन्सी को काम मैंथै छड़ून मर्योछ माँट त म्यार कयाँ खड़ी नै जानो और भीख माँगून में मैंस शर्म उछी।</verse>
				<verse number="4">अब मैं समझ गयूँ, कि मैंले कि करून छै, ताकि जब मैं मुन्सी काम भटे निकाली जूंलो। त लोग मेरि मद्दत कराला।</verse>
				<verse number="5">तब उले अपून मालिक का हरेक कर्जदारून बुलाछ, और पैल थैं पुछ्छै तैंमें म्येरो मालिक को कतुक कर्ज छै?</verse>
				<verse number="6">उले क्योछ, सौ कन्टर जैतून को तेल, तब उले उथैं क्योछ, अपून खाता स पकड़ और बैठभेरन पचास कन्टर लिख दे।</verse>
				<verse number="7">फिर उले दुसारा थैं पुछ्छै, तैंमें कतुक कर्ज छै? उले क्योछ, सौ मन ग्यूँको, तब उले उथैं क्योछ, अपून खाता स पकड़ और अस्सी मन ग्यूँको लिख दे।</verse>
				<verse number="8">तब उक मालिक ले उ बेमान मुन्सी की तारीफ करछ्य, कि उले बड़ी चालाकी ले काम करछ्य; क्याखिनकि यो संसाराका लोग अपून बखता का लोगून का दगाड़ ब्यवहार करून में ज्योतिका लोगून भटे ज्यादा चालाक छन।</verse>
				<verse number="9">और मैं तुमूनथैं कुछूँ, कि संसारिक धन-दौलत भटे अपून खिन मित्र बना ली, ताकि जब तुमार मरना का बाद धन-दौलत खतम हो जालि, त तुमोरो हमेशा का रूनवाला घर में स्वागत करि जालो।</verse>
				<verse number="10">जो नानि है नानि बात में ईमानदार छै, उ ठूली बातुन में ले ईमानदार छै और जो नानि है नानि बात में बेमान छै, उ ठूली बातुन में ले बेमान छै।</verse>
				<verse number="11">येक कारण जब तुम संसारा का धन-दौलत में ईमानदार नै ठैरिया, त स्वर्ग को धन-दौलत तुमून को द्योलो?</verse>
				<verse number="12">और अगर तुम पराया धन-दौलत में ईमानदार नै ठैरिया, जो तुमोरो छै, ऊस तुमून को द्योलो?</verse>
				<verse number="13">येक कारण मैं तुमूनथैं सच्ची कुछूँ, कि “कोई दास द्वी मालिकून की सेवा नै करि सकनो, क्याखिनकि उ त एक्का दगाड़ बैर और दुसरा का दगाड़ प्रेम राखोलो; या एक्का दगाड़ मिल रौलो और दुसरा स तुच्छ जाणोलो। उसीकैं तुम परमेश्वर और धन-दौलत द्वीवैन की सेवा नै कर सकना।”</verse>
				<verse number="14">फरीसी लोग जो लालची छ्या, यो सब बात सुणिभेरन यीशु की मजाक उड़ून लाग्यान।</verse>
				<verse number="15">यीशु ले उनूनथैं क्योछ, तुम त आदिमीन का सामुनि अपून-आपस धर्मी ठैरूछा लेकिन परमेश्वर तुमार मनेंस जाणनान, क्याखिनकि जो चीज आदिमीन की नजरून में भौत कीमती छै, उ परमेश्वरा का नजरून में घृणित छै।</verse>
				<verse number="16">यीशु ले क्योछ, मूसा का नियम और परमेश्वरो को संदेश दिनवालान को संदेश यहूना बपतिस्मा दीन वाला का बखत तक छ्यो, उ बखत भटे परमेश्वरोको राज्य को सुसमाचार सुणाई जानमर्योछ, और हरेक आदिमी उमें भौत मजबूती ले उन मर्यान।</verse>
				<verse number="17">परमेश्वरा का नियमून में भटे सब कुछ याँ तक कि सबून है नानि बात को प्रभाव तब तलक रौलो जब तलक उको मक्शद पुरो नी हो जालो।</verse>
				<verse number="18">और जो कोई अपूनी स्यैनि स छोड़भेरन दुसरा का दगाड़ ब्या करछो उ ब्यभिचार करछो, और जो कोई उ छोड़िना कि स्यैनि का दगाड़ ब्या करछो उले ब्यभिचार करछो।</verse>
				<verse number="19">फिर यीशु ले एक कहानी सुणाछ, “एक धनवान आदिमी छ्यो, जो मेहंगा कपाड़ा पैन छ्यो और हर रोज आलिशान जीन्दगी जीछो, और बड़िया दावत को खानो खाछ्यो।</verse>
				<verse number="20">और धनवाना का घरा का दवारा में लाजर नामोको एक गरीब पड़ीनाको रूछ्यो, उक पुरो आंग में घ ले भरिना को छ्यो।</verse>
				<verse number="21">और उ चांछ्यो कि धनवान आदिमी का खाना का बाद जो जूठो बच छ्यो, उले अपूनो पेट भर सकूँ; या तक कि कुकुर ले उको घ चाँटछ्या।</verse>
				<verse number="22">फिर कुछ दिनून का इसो भ्योछ कि उ गरीब लाजर मरग्यो, और स्वर्गदूतून ले ऊस लीभेरन हमार पूर्खा अब्राहम का दगाड़ आदर सम्मान का जाग में पुजाछ, और उ धनवान आदिमी ले मर ग्यो, और उको दफन कफन करछ्य।</verse>
				<verse number="23">और जब उले अधलोक में पीड़ा में पड़भेरन अपून नजर मलि के कर्यान, त दूर भटे उले लाजर स अब्राहमा का दगाड़ आदर-सम्मान का जाग में बैठिना को देखछ्य।</verse>
				<verse number="24">और उले जोरले धध्याभेरन क्योछ, ‘हे हमार पिता अब्राहम मैंमें दया करभेरन लाजर स भेज दी, ताकि उ अपून आंगुलो पानि में भिगा भेरन म्यारा जिबाड़ा स ठन्डो करौ, क्याखिनकि मैं यो आगा में भौत तड़पून मरियूँ।’</verse>
				<verse number="25">लेकिन अब्राहम ले क्योछ, च्याला याद कर तैं अपून जीवन में सब बड़िया चीजून ली चुकगै छै, और उसीकैं लाजर स धरती में बुरी चीज मिल्यान, लेकिन अब उ याँ शान्ति पान मरियोछ, और तैं आग में भौत तड़पून मरेछै।</verse>
				<verse number="26">और इन सब बातुन छोड़िभेरन हमार और त्यारा बीच में एक भौत भूलो गड्डा बनिना को छै, कि जो याँ है उ पार तुमार पास जानो चाँछो, उ नै जा सकनो; और कोई ताँ भटे हमार पास नै आ सकनो।</verse>
				<verse number="27">तब उ धनवान ले क्योछ, ‘हे हमार पिता मैं तुमूनथैं विनती करछूँ, कि तुम लाजर स धरती में म्यारा बबा का घर भेजि दी।</verse>
				<verse number="28">क्याखिनकि म्यारा पाँच भाई छन, मैं चाँछू, कि उ जाभेरन उन बातुन की चेतावनी दे, इसो नै हो कि उन ले यो तखलीफ का दीन वाली जाग में आ ज्यून।</verse>
				<verse number="29">अब्राहम ले उथैं क्योछ, उनार पास चेतावनी दीन खिन त मूसा का नियम और परमेश्वरो को संदेश दिनवालान का किताब छन, उन उनेरि सुणून चैछो और पश्चताप करून चैछो।’</verse>
				<verse number="30">तब उ धनवान ले क्योछ, ‘हे हमार पिता अब्राहम, अगर कोई मरिन आदिमी में भटे कोई उनार पास जाभेरन उनून चेतावनी दीनो, तो उन अपून पापून खिन पश्चताप कराला।</verse>
				<verse number="31">तब अब्राहम ले उथैं क्योछ, जब उन मूसा और परमेश्वरो को संदेश दिनवालान का हुकुम नी मानून, अगर याँ भटे मरिना को आदिमी ज्यून हो भेरन उनार पास जालो त उन उकी बातुन में विश्वास नी करून’।”</verse>
			</chapter>
			<chapter number="17">
				<verse number="1">फिर यीशु ले अपून शिष्यून थैं क्योछ, यो बात पक्की छै कि परीक्षा आदिमी में जरूर आलि जो उनोरो पाप करना को कारण बनोलो, लेकिन हाय, उ आदिमी खिन जैक कारण उछी।</verse>
				<verse number="2">यीशु ले क्योछ, “जो कोई इन नान है नान मैंमें विश्वास करनान, कैथैं ले पाप करून को कारण बननान, ऊस परमेश्वर सजा द्याला। लेकिन परमेश्वरा का सजा है यो निको छै, कि उ गाल में एक ठूलो ढूंगो बाँदीभेरन समुद्र में खित दी जानो।</verse>
				<verse number="3">सतर्क रौ; अगर तेरो विश्वासी भाई अपराध करौ तैं ऊस समझो, और अगर पापून भटे पश्चताप करौ तैं ऊस माफ कर।</verse>
				<verse number="4">अगर दिन भर में उ सात बार त्यारा विरूद्ध अपराध करौ, और सातू बार आभेरन तैथैं को मैं अपून अपराध खिन पश्चताप करछूँ, तो ऊस माफ कर दे।”</verse>
				<verse number="5">तब प्रेरितून ले प्रभु यीशु थैं क्योछ, हमोरो विश्वास मजबूत कर।</verse>
				<verse number="6">प्रभु यीशु ले उनूनथैं क्योछ, अगर तुमोरो विश्वास राई का दान का बराबर ले हो, त तुम विश्वास ले यो किमूका रूख थैं कुँछा कि उखड़ भेरन समुद्र में लगि जा, त उ तुमेरि मान लीनो।</verse>
				<verse number="7">लेकिन यीशु ले उनून एक कहानी सुणाछ, “तुमून में भटे इसो को छै, जैको दास गाड़ा में काम करभेरन या भेड़ून की चरा भेरन घर अ, त तुम कौला ‘जल्दी आभेरन खान खिन बैठ?’</verse>
				<verse number="8">नै, पर उ कलो, कि मैं खिन खान खिन बनौ, और तब तक मेरि सेवा करून खिन तैयार हो ज्या; और उक बाद तैंले खा-पी लिये।</verse>
				<verse number="9">तुम अपून दास स उ काम करून खिन धन्यवाद नी करला जो तुमूले ऊस करून खिन के राखछ्यो।</verse>
				<verse number="10">उई तरह ले, जब तुमूनले उ सब कुछ कर लीछ जो तुमूनथैं करून खिन के राख छ्यो, त तुमून यो कुन चैछो, हम निकम्मा दास छा, जो हमून करून चैछ्यो हमूले केवल उई करछ्य।</verse>
				<verse number="11">और इसो भ्योछ जब यीशु और उक शिष्य यरूशलम शैहरा का तरफ जानवाला बाटा में जानमरेछ्या, त उन सामरिया और गलील प्रदेशा का इलाका भटे हो भेरन जानमरेछ्या।</verse>
				<verse number="12">त एक गौं में पुजन बखत उनून दस कोढ़ी मिलीयान।</verse>
				<verse number="13">उन दूर ठाँड़ हो भेरन जोरले कुन लाग्यान, हे यीशु, हे मालिक, हमून में दया कर।”</verse>
				<verse number="14">तब यीशु ले उनून देखिभेरन क्योछ, “जा और अपून आपस यरूशलम का मंदिरा का याजकून दिखा।” और उन तुमून देखाला की तुम चंगा हो रैछा या नै।</verse>
				<verse number="15">तब उनूनमें भटे एक यो देखिभेरन कि मैं चंगो हो गयूँ, जोर-जोरले परमेश्वरे की स्तुति करनैई यीशु का पास वापस आछ।</verse>
				<verse number="16">उले यीशु स धन्यवाद दीनै उक खुट्टान में मुखा का बल पड़छ्य, और उ सामरी छ्यो।</verse>
				<verse number="17">तब यीशु ले उथैं क्योछ “क्या और उन चंगा नै भ्या, त उन बाकि नौ काँ ग्या?</verse>
				<verse number="18">क्या यो गैर-यहूदीन छोड़ी और कोई इसो नै निकल्योइ, जो वापस आभेरन परमेश्वरे की स्तुति करूनो?”</verse>
				<verse number="19">तब यीशु ले उथैं क्योछ, “उठ, जा। तैले विश्वास करछ्य येक कारण तैं चंगो भेज छै।”</verse>
				<verse number="20">जब फरीसी लोगून ले यीशु थैं पुछ्छै, कि परमेश्वरो को राज्य कब आलो? त यीशु ले उनुस जबाब दीछ, “परमेश्वरो को राज्य इसो नाहतिनी, जैस तुम देख सकछा।</verse>
				<verse number="21">और लोग यो नै सकून, कि ‘देखा, याँ छै या वाँ छै।’ क्याखिनकि देखा, परमेश्वरो को राज्य तुमार बीच में छै।”</verse>
				<verse number="22">तब यीशु ले शिष्यून थैं क्योछ, उन दिन आला, जिन दिनून में तुम मैंस जो आदिमी को च्योलो छै, एक दिन देखून चाला, लेकिन देखी नी पाला।</verse>
				<verse number="23">लोग तुमूनथैं कौला देखा, मसीह वाँ छै, या छै। त तुम वाँ जन जाया और उनार पछिल जन जाया।</verse>
				<verse number="24">क्याखिनकि जसीकैं बादल गरजून बखत बिजली चमकभेरन आकाशा का पूरब भटे पश्चिम तक चमकछी, उसीकैं मैं आदिमी को च्योलो ले अपून दिन में उलो, तब सब लोग देखाला।</verse>
				<verse number="25">लेकिन पैलि जरूरी छै, कि उ भौत भयानक दुख उठालो, और यो पीढ़ीका लोग ऊस तुच्छ ठैराला।</verse>
				<verse number="26">जस हमार पूर्खा नूह का दिनून में भ्योछ, ऊसो आदिमी को च्याला का दिनून में ले होलो।</verse>
				<verse number="27">जै दिन तक नूह जहाज में नै चढ़ियो, उ दिन तक लोग खाछ्या पीछ्या, और उनूनमें ब्या-बरात हुछ्या। तब जल प्रलयले आभेरन उन सबून को नाश कर दीछ।</verse>
				<verse number="28">और उसीकैं हमार पूर्खा लूत का दिनून में भ्योछ, जो सदोम शैहर में रूछ्यो कि लोग खाँछ्या-पीछ्या और लेन-देन करछ्या, रूख लगूछ्या और घर बनूछ्या।</verse>
				<verse number="29">लेकिन जैं दिन लूत सदोम शैहर भटे निकलछ्य, उ दिन आकाश भटे आग और गंधक की आकाश भटे बरस छै, और सब लोगून नाश कर दीछ, जो उ शैहर में छ्या।</verse>
				<verse number="30">और उ दिन ले इसो होलो, जब मैं आदिमी को च्योलो एकदम दुबारा वापस उलो।</verse>
				<verse number="31">और उ दिन जो पाख में हो, और उको सामान घर भितर में हो, उ ऊस लीन खिन तलि नै अ। और जो गाड़ में हो, उ अपूनो कपाड़ा लीन खिन वापस अपून घर खिन जन जौ।</verse>
				<verse number="32">हमार पूर्वज लूत कि स्यैनि स याद राख्या, कि उक दगाड़ की भ्योछ।</verse>
				<verse number="33">जो अपून प्राण संसारिक जीन्दगी जीन खिन बचालो, उ परमेश्वराका दगाड़ अनन्त जीवन पाना को मौका खो द्योलो, लेकिन जो मैं खिन और सुसमाचार खिन अपून प्राणस दीछो, उ अनन्त जीवन पालो।</verse>
				<verse number="34">मैं तुमूनथैं कुछूँ, उ रात द्वी आदिमी एक चरपाई में होला, एक स्वर्ग में उठा लिई जालो, और दुसरा वाँई छोड़ दी जालो।</verse>
				<verse number="35">और द्वी स्यैनिमैंसी चक्की पिसून में होलो, एक स्वर्ग में उठा ली जालि और दुसरा वाँई छोड़ी दी जालि। जालि।</verse>
				<verse number="36">उ बखत द्वी जन गाड़ान में होला, एक स स्वर्ग में उठा ली जालो और दुसोरो वाँई छोड़ी दी जालो।</verse>
				<verse number="37">यो सुणभेरन उनूनले यीशु थैं पुछ्छै “हे प्रभु यो काँ होलो?” उले उनूनथैं क्योछ, हरेक आदिमी जाणोलो, कि यो काँ होलो ठीक उसीकैं जसीकैं जाँ मुर्दा होला वाँ गिद्ध जमा हुनान।</verse>
			</chapter>
			<chapter number="18">
				<verse number="1">फिर यीशु ले अपून शिष्यून थैं क्योछ, लगातार प्रार्थना कर्या और हिम्मत नै छोड़ूनि चैंनी येक कारण उनूनथैं यो कहानी सुणाभेरन क्योछ:</verse>
				<verse number="2">“काँई नगर में एक न्याय करून वालो आदिमी रूछ्यो, जो नै परमेश्वर भटे डरछ्यो और नै कोई आदिमीन की परवाह करछ्यो।</verse>
				<verse number="3">और उई नगर में एक विध्वा ले रूछी, जो उक पास आभेरन कुछी, कि ‘म्येरो न्याय करभेरन मैंस दुश्मन भटे बचौ।’</verse>
				<verse number="4">भौत बखत तक उ नै मानियो लेकिन आखरीमें मन में विचार करभेरन क्योछ, मैं नै परमेश्वर भटे डर छूँ, और नै कोई आदिमी परवाह करनू।</verse>
				<verse number="5">तब ले यो विध्वा मैंस परेशान करछी, येक कारण में ऐको न्याय करोलो, काँई इसो नै हो कि बार-बार आभेरन आखरी में म्यारा नाक में दम करौ।”</verse>
				<verse number="6">प्रभु यीशु ले क्योछ, “यो अन्याय करूनवाला आदिमी थैं सिखा, यो अधर्मी को न्याय कि कुंछो।</verse>
				<verse number="7">त क्या परमेश्वर अपून चुनिना का लोगून को जल्दी न्याय नै करलोई, जो रात-दिन उक सामुनि रून कलानो करनान? और क्या उ उनार बार में देर करोलोई?</verse>
				<verse number="8">मैं तुमूनथैं सच्ची कुंछूँ, उ जल्दी उनोरो न्याय करोलो। लेकिन जब आदिमी को च्योलो वापस आलो, त क्या उ संसार में एक ले आदिमी मिलोल जो मैंमें विश्वास करून वालो हो?”</verse>
				<verse number="9">और यीशु ले उन लोग जो अपून-आप में भरोस राखछ्या, कि हम धर्मी लोग छै। और दुसारा लोगून नीच समझ छ्या, यो कहानी सुणाछ,</verse>
				<verse number="10">द्वी आदिमी प्रार्थना करून खिन मन्दिर में ग्यान। उनूनमें एक फरीसी लोग छ्यो और दुसोरो चुंगी लिनवाला छ्यो।</verse>
				<verse number="11">फरीसी लोग ठाड़ हो भेरन अपून मन में यो प्रार्थना करून लागछो, “हे परमेश्वर, मैं तेरो धन्यवाद करछूँ, कि मैं और लोगून की नियाती बुरो काम करून वालो, अन्यायी और ब्यभिचारी नाहातिनू, और नै यो चुंगी लीन वाला को जसो छूँ।</verse>
				<verse number="12">मैं हफ्ता में द्वी दिन बर्त राखछूँ और अपूनी पुरी कमाई में भटे दशवा हिस्सा ले दान दीछूँ।”</verse>
				<verse number="13">लेकिन चुंगी लिनवाला दूर में ठाँड़ हो भेरन, स्वर्ग का तरफ देखना की हिम्मत नै भै, उ अपून दुखाक दगाड़ छाती पिट-पीटभेरन कुन लागछ्य, “हे म्यारा परमेश्वर, मैं पापी में दया कर।”</verse>
				<verse number="14">यीशु ले क्योछ, “मैं तुमूनथैं कुछूँ कि उ धर्म गुरू नै बल्कि चुंगी लिनवाला का पाप माफ है भेरन अपून घर ग्यो। क्याखिनकि जो कोई लै अपनास ठूलो समझछो, उ नॉन करि जॉलो। लेकिन जो अपनास नॉन समझछो, उ ठुल करि जॉलो।”</verse>
				<verse number="15">और फिर लोग अपून नानतिनान ले यीशु का पास ल्यून लाग्यान, कि उन उनूनमें हात राँखून और शिष्यून ले यो देखिभेरन उनून डाटछ्य।</verse>
				<verse number="16">यीशु ले नानतिनान पास बुलाभेरन क्योछ, नानतिनान म्यारा पास उन दी, और उनून मना जन करौ, क्याखिनकि परमेश्वरा का राज्य उनोरो छै जो इन नान्तिनान जस छन।</verse>
				<verse number="17">मैं तुमूनथैं सच्ची कुछूँ, परमेश्वरा का राज्य उन लोग दीयूलो, जो उक नियमून एक नान-नान्तिना का समान मानछो।</verse>
				<verse number="18">फिर एक अधिकारी ले यीशु थैं पुछ्छै “सच्चा गुरू, मैं कि काम करूँ जेले मैंस परमेश्वर अनन्त जीवन द्योलो?”</verse>
				<verse number="19">तब यीशु ले ऊस जबाब दीछ, “तुम मैंथैं भलो किलै कुँछा, सिर्फ परमेश्वर स छोड़िभेरन और कोई लै भलो नाहातिन।</verse>
				<verse number="20">तैं जाण छै, कि मूसा का नियमून में कि हुकुम लिखीना को छै, ‘हत्या जन कर्या, ब्यभिचार जन करा, चोरी जन करा, झूठ्ठी गवै जन दीया, और अपून फैदा खिन लोगून जन ठग्या, और अपून ईजा-बबाकि इज्जत करा।’ ”</verse>
				<verse number="21">उले यीशु थैं क्योछ, “मैं यो सब हुकमून त नान छनान भटे माननै आरयूँ।”</verse>
				<verse number="22">जब यीशु ले यो सुणछ्य त उथैं क्योछ, “लेकिन एक और चीज छै जो तैंस करना की जरूरत छै, तैं अपूनी सब कुछ जो तेरो छै ऊस बेच भेरन गरीब लोगून में बाड़ दे, अगर तैं इसो करछै तो तैंस स्वर्ग में धन मिलोलो, और म्यारा दगाड़ अ और म्येरो शिष्य बन जा।”</verse>
				<verse number="23">उ यो सुणिभेरन भौत उदास भ्योछ, क्याखिनकि उकी भौत धन-सम्पति छी।</verse>
				<verse number="24">यीशु ले उक तरफ देखिभेरन क्योछ, “धनवान लोगून को परमेश्वरा का राज्य में प्रवेश करून भौत मुश्किल छै।</verse>
				<verse number="25">ऊँट का शियूण का छेद में भटे भ्यार निकालून आसान छै, लेकिन धनवान लोगून को परमेश्वरा का राज्य में पुजून कठिन छै।”</verse>
				<verse number="26">और सुणून वालान ले क्योछ, “एक आदिमी खिन यो हो सकछो की उ बचाई जो और परमेश्वरा का राज्य में प्रवेश कर सको।”</verse>
				<verse number="27">“तब यीशु ले क्योछ, जो आदिमीन थैं नै हो सकनो, उ परमेश्वर थैं हो सकछो।”</verse>
				<verse number="28">तब पतरस ले क्योछ, “हमार बारिमें क्या? हमूले तेरो शिष्य बनून खिन अपूनो घर-बार छोड़ दीछ।”</verse>
				<verse number="29">तब यीशु ले उनूनथैं क्योछ, मैं तुमूनथैं सच्ची कुछूँ, कि इसो कोई नाहातिन जेले परमेश्वरा का राज्य खिन अपूनो घर-बार, स्यैनि या भाई या ईजा-बबा या बाल-बच्चान छोड़िना को हो,</verse>
				<verse number="30">और यो बखत कई गुना ज्यादा नै पा, लेकिन उनवाला युग में अनन्त जीवन जरूर पालो।</verse>
				<verse number="31">फिर यीशु ले बारा शिष्यून एक तरफ लिजाभेरन उनूनथैं क्योछ, “देखा, हम यरूशलम शैहर खिन जानू और जतुक बात म्यारा बारिमें परमेश्वरो को संदेश दिनवालान का द्वारा जो कुछ लिखीना का छन, उन सब पुर होलो।</verse>
				<verse number="32">क्याखिनकि मैंस गैर-यहूदी लोगून का हवाला कर द्याला। उन म्येरो मजाक उड़ाला और म्यारा अपमान कराला, और मैंमें थुकाला,</verse>
				<verse number="33">और कोड़ा ले माराल और मैंस जान है मार द्याल, लेकिन मैं तीसारा दिन मुर्दान में है ज्यून हो जूलो।”</verse>
				<verse number="34">और उनूनले इन बातुन में भटे कोई बात नै समझ सकी और यो बात उनूनमें लुकीना की रैछ, और जो कईनाको छ्यो, उ उनार समझ में नै आयो।</verse>
				<verse number="35">जब उन यरीहो शैहरा का नजिक पुजियान, त एक अन्धो सड़का का किनार बैठभेरन भीख माँगून मरेछ्यो।</verse>
				<verse number="36">और उ भीड़ेकी हिटना की आवाज सुणिभेरन पूछन लागछ्य “यो कि हुन मर्योछ?”</verse>
				<verse number="37">तब उनूनले ऊस बताछ, “कि यीशु नासरी जानमर्योछ।”</verse>
				<verse number="38">तब उले धध्याभेरन क्योछ, “हे यीशु, राजा दाऊद का वंशज, मैंमें दया कर।”</verse>
				<verse number="39">उनूनमें भटे अघिल जानवाला कुछ लोग ऊस डाठून लाग्यान, “कि चुप रौ।” लेकिन उ और लै जोरले चिल्ला भेरन कुन लागछो, “हे यीशु, राजा दाऊद का वंशज, मैंमें दया कर।”</verse>
				<verse number="40">तब यीशु ले ठाड़ हो भेरन हुकुम दीछ कि ऊस म्यारा पास ल्या, और जब उ पास आछ, त यीशु ले उथैं पुछ्छै।</verse>
				<verse number="41">“तैं कि चाँछै मैं तैखिन कि करूँ?” उनूनले यीशु थैं क्योछ, “हे प्रभु जी, मैं चाँछू कि मैं देखून लागू।”</verse>
				<verse number="42">यीशु ले उथैं क्योछ, “देखन लाग क्याखिनकि त्यारा विश्वास ले जो तैंले मैंमें करछै उले तैंस चंगो करछ्य।”</verse>
				<verse number="43">उ उई बखत देखन लागछ्य, और परमेश्वर की स्तुति करून-करून उक पछिल न्हैग्यो, और सब लोगून ले देखिभेरन परमेश्वर की महिमा करछ्य।</verse>
			</chapter>
			<chapter number="19">
				<verse number="1">जब यीशु यरीहो शैहर में प्रवेश करभेरन जान मर्योछयो।</verse>
				<verse number="2">वाँ जक्कई नामोको एक आदिमी छ्यो जो चुंगी लीनवालान को सरदार और धनी छ्यो।</verse>
				<verse number="3">उ यीशुस देखन चांछ्यो कि उ कसो छै? लेकिन उ भीड़ा का कारण देख नै सकछ्यो क्याखिनकि उ बोना छ्यो।</verse>
				<verse number="4">तब यीशुस देखन खिन उ अघिल दौड़भेरन एक गुलरा का रूख में चढ़ ग्यो क्याखिनकि यीशु उई बाट भटे जानवाला छ्या।</verse>
				<verse number="5">जब यीशु उ जाग में पुजछै जाँ जक्कई छ्यो और उले उथैं क्योछ “हे जक्कई झट तलि उतर अ, क्याखिनकि आज मैंस त्यारा घर में रून जरूरी छै।”</verse>
				<verse number="6">उ तुरन्त रूख भटे तलि उतर छै और यीशु स अपून घर ली ग्योछ और खुशी ले उको स्वागत करछ्य।</verse>
				<verse number="7">और जब लोगून ले यो देखछ्य, तब उन सब यो कैभेरन कुड़कुड़ान लाग्यान “यीशु त एक पापी आदिमी को मेहमान बनून खिन ग्योछ।”</verse>
				<verse number="8">जक्कई खाना का बखत ठाड़ हो भेरन प्रभु यीशु थैं कुन लागछ्य, “हे प्रभु, देख मैं अपूनी आधी सम्पत्ति कंगालून दीछूँ और अगर केको कैले बेमानी करभेरन ली रैछ, त मैं ऊस चार गुना वापिस लौटा द्यूलो।”</verse>
				<verse number="9">तब यीशु ले उथैं क्योछ, “आज यो घराक लोगून में उद्धार आ र्योछ, येक कारण यो ले अब्राहमो को वंशज छै।</verse>
				<verse number="10">क्याखिनकि मैं आदिमी को च्योलो अनन्त सजा भटे बचुन खिन और उनोरो उद्धार करून खिन आरयूँ।”</verse>
				<verse number="11">जब लोग इन बातुन सुणून मरेछ्या, तब यीशु ले एक कहानी सुणाछ, क्याखिनकि उन यरूशलम शैहरा का नजिक छ्या, और उन समझ छ्या कि परमेश्वरो को राज्य तुरन्त प्रगट हुन वालो छै।</verse>
				<verse number="12">और उनूनले क्योछ, “एक धनी आदिमी दूर देश खिन ग्योछ, कि ताकि राजपद पाभेरन आपस लौट अ।</verse>
				<verse number="13">और उले अपून दासून में भटे दस दासून बुलाभेरन उनून दस सिक्का दीयान, जिनेरि कीमत तीन मैंनाकी मजूरी का बराबर छै, और उनूनथैं क्योछ, म्यारा वापस लौटून तक लेन-देन कर्या।”</verse>
				<verse number="14">“लेकिन उक नगर में रूनवाला उक दगाड़ बैर राखछ्या, और उक पछिल-पछिल अपून लोगून यो कुन खिन भेजछ्य, हम नै चाँना कि यो आदिमी हमून में राज्य करो।</verse>
				<verse number="15">जब उ राजपद पाभेरन वापस लौट आछ, त इसो भ्योछ कि उले अपून दासून जिनून उले धन दी राखछ्यो, उनून अपून पास बुलाछ, ताकि मालूम करो, कि इनूनले लेन-देन भटे कि-कि कमै रैछ।</verse>
				<verse number="16">तब पैल वाला ले आभेरन क्योछ, हे मालिक मैंले त्यारा सिक्कान ले दस और मुहर कमायान।</verse>
				<verse number="17">उले उथैं क्योछ, शाबाश भल और ईमानदार दास, तैं थ्वाड़ा में ईमानदार निकलछै, अब दस नगरून में अधिकार राख।</verse>
				<verse number="18">दुसरा ले आभेरन क्योछ, ‘हे मालिक त्यारा सिक्कान ले पाँच और मुहर कमायान।’</verse>
				<verse number="19">मालिक ले उथैं क्योछ, ‘तैले पाँच नगरून को अधिकार राख।’</verse>
				<verse number="20">तिसरा ले आभेरन क्योछ, ‘हे मालिक, देख, तेरो सिक्का यो छै, जैस मैले रूमाल में बाँदीभेरन राख रैछ।’</verse>
				<verse number="21">क्याखिनकि मैं तैंस देखिभेरन डर छूँ, येक कारण तैं एक कठोर आदिमी छै, जो तैले नै राख्यो, ऊस तैं ली लीछै, और जो तैले नै बोयो ऊस काट छै।</verse>
				<verse number="22">मालिक ले उथैं क्योछ, ‘हे दुष्ट दास, मैं त्यारा मुँख की बातूले तैंस दोषी ठैरू छूँ। तैं मैंस जाण छै कि मैं कठोर आदिमी छूँ, जो मैं नै राखनू ऊस मैं उठा लीछूँ, और जाँ मैंले नै बोयो, वाँ है काट छूँ।</verse>
				<verse number="23">तो तै म्यारा मुहर स ब्याज में लगा दीनै, तब मैं आभेरन अपून मुहर स ब्याज सहित ली लीनू।’</verse>
				<verse number="24">और जो लोग नजिक ठाड़ छ्या, मालिक ले उनूनथैं क्योछ, ‘उ मुहर उथैं भटे ली, ली और जैक पास दस मुहर छन, ऊस दी दे।’</verse>
				<verse number="25">उनूनले मालिक थैं क्योछ, हे मालिक, उक पास दस मुहर त छन।”</verse>
				<verse number="26">“मालिक ले उथैं क्योछ, कि जैक पास छै, परमेश्वर ऊस और ले द्योलो; पर जो पान की इच्छा राखछो, और जैका पास थ्वाड़ा छै। उथैं उले जो उक पास बचिना को छै ली लिजालो।</verse>
				<verse number="27">लेकिन म्यारा उन दुश्मन जो नी चाँछ्या कि मैं उनोरो राजा बनू, उनून याँ ल्याभेरन म्यारा सामुनि मार डाला।”</verse>
				<verse number="28">यो बात कैभेरन यीशु अपून शिष्यून का दगाड़ यरूशलम शैहरा का तरफ उनार अघिल-अघिल हिटनै ग्यो।</verse>
				<verse number="29">जब यीशु और उनार शिष्य जैतून नामाका डाण में बैतफगे और बैतनियाह गौं में पुजनान, तब यीशु ले द्वी शिष्यून थैं यो कैभेरन भेजछ्य।</verse>
				<verse number="30">“उ सामुनि का गौं में जा। वाँ जाभेरन तुमून एक किल में बाँदिना को गधीक बच्चा मिलोल, जैमें ऐल तलक कोई नै बैठि रियो। तुम ऊस खोलभेरन म्यारा पास ली आ।</verse>
				<verse number="31">और अगर कोई तुमूनथैं पुछो, येस खोल भेरन काँ ली जानमरेछ्या, तो यो कै दीया कि प्रभु स येकी जरूरत छै।”</verse>
				<verse number="32">जो द्वी शिष्यून ऊस ली खिन भेजिना को छ्यो उनूनले जाभेरन जसो यीशु उथैं कईनाको छ्यो, ऊसो भ्योछ।</verse>
				<verse number="33">जब उन गधा का बच्चा स खोलून मरेछ्या, त उक मालिक ले उनूनथैं पुछ्छै, “यो बच्चा स खोल भेरन काँ ली जानमरेछा?”</verse>
				<verse number="34">तब उनूनले क्योछ, “प्रभु स ऐकि जरूरत छै।”</verse>
				<verse number="35">तब उन लोगून ले शिष्यून जान दीछ। जब उन गधीक बच्चास यीशु का पास ली ग्यान और उमें अपूनी पंखि बिछा दीछ। फिर यीशु स उमें बैठाछ।</verse>
				<verse number="36">जब यीशु गधा में बैठभेरन जानमरेछ्यो, त भौत लोगून ले यीशु का स्वागत करून खिन बाट में अपून कपाड़ा बिछा दीयान।</verse>
				<verse number="37">जब यीशु अघिल ग्योछ, तो उ ऊ जाग में पुज ग्यो, पर जाँ भटे सड़क यरूशलम शैहरा का जैतून पहाड़ है तलि जाछी। तो शिष्यून की पुरी मण्डली उन सब चमत्कारा का कामून का कारण जो उनूनले देखीना का छ्या, खुश हो भेरन बड़ा जोर-जोरले परमेश्वर की स्तुति करून लाग्यान।</verse>
				<verse number="38">“धन्य छै उ राजा, जो परमेश्वरा का नामेंले उछो। स्वर्ग में शान्ति और परमेश्वर की स्तुति हो।”</verse>
				<verse number="39">तब भीड़ में भटे कतुक फरीसी लोग उथैं कुन लाग्यान, “गुरू जी, यो बात कुन खिन अपून शिष्यून डांठा।”</verse>
				<verse number="40">यीशु ले उनुस जवाब दीछ, “मैं तुमूनथैं कुछूँ अगर इन चुप रौला, त ढूंगा ले मेरि महिमा करून खिन चिल्लान लागाला।”</verse>
				<verse number="41">जब यीशु नजिक पुजियान त यरूशलम शैहर स देखिभेरन उमें रून लाग्यान।</verse>
				<verse number="42">और क्योछ, “तुमून खिन कतुक निको हुनो, कि तैं यो दिन परमेश्वर की शान्ति की बात समझ लीनै जो तुमून शान्ति दीनी, लेकिन अब उ त्यारा आँखान भटे लुका भेरन राख रैछ।</verse>
				<verse number="43">क्याखिनकि उ दिन तैंमें आला, कि त्यारा बैरी मोर्चा बांदिभेरन तैंस घेर ल्याल और चारूं तरफ भटे तैंस दबाल।</verse>
				<verse number="44">त्यारा बैरी तैंस पुरी तरीकाले नाश कर द्याला, और त्यारा सब लोगून मार डालला, और तैंमें ढ़ुगा का मलि में ढ़ुगा नी छोड़ून; क्याखिनकि जब परमेश्वर तैंस बचुन खिन आलो, तब तैले उ बखत स नै पछाणियो।”</verse>
				<verse number="45">तब यीशु मन्दिर का खाला में ग्यान, और जो वाँ लोग बैठभेरन ब्यापार करून मरेछ्या, भ्यार निकालून लाग्यान।</verse>
				<verse number="46">और उले क्योछ, “पवित्रशास्त्र में लिखीना को छै, ‘म्येरो घर प्रार्थना को घर होलो।’ पर तुमूनले यो प्रार्थना घरै स डाकून को अड्डा बना दीछ।”</verse>
				<verse number="47">और यीशु हरेक दिन मन्दिर में उपदेश दीछ्या, और प्रधान याजक और मूसा का नियम सिखून वाला और लोग ऊस मारना का मौका खोजून लाग्यान।</verse>
				<verse number="48">लेकिन कोई उपाय नै निकाल सक्या, कि यो कसकैं करनू, क्याखिनकि सब लोग भौत मन लगाभेरन उकी बातुन सुण छ्या।</verse>
			</chapter>
			<chapter number="20">
				<verse number="1">एक दिन इसो भ्योछ कि जब यीशु मन्दिर में उपदेश दिन मरेछ्या और सुसमाचार सुणून मरेछ्या, त उ बखत प्रधान याजक, महायाजक और मूसा का नियम सिखून वाला लोग और यहूदी अगुवान का दगाड़ पास आभेरन ठाड़ भ्यान।</verse>
				<verse number="2">और उन यीशु थैं कुन लाग्यान, “हमून बतो, तैं इन कामून कैका अधिकार ले करछै, और उ को छै जेले तैंस यो अधिकार दी रैछ?”</verse>
				<verse number="3">यीशु ले क्योछ, “मैंले तुमूनथैं एक सवाल पुछ छूँ, और अगर तुम मैंस येक जबाब द्याला, तब मैं तुमून बतुलो कि यो काम केका अधिकार ले करछूँ।</verse>
				<verse number="4">अब तुम यो बता, कि यहूना स लोगून बपतिस्मा दीन खिन कैले भेजछ्य? क्या ऊस परमेश्वरे ले भेजिना को छ्यो, या आदिमी ले? तुम मैंस येक जबाब दी।”</verse>
				<verse number="5">तब उन लोग आपस में यो बात करून लाग्यान, “अगर हम कुंनू, कि यहूना ले परमेश्वरा का अधिकार ले बपतिस्मा दीछ, तो उ हमून थैं पुछोलो, फिर तुमूले यहूना में विश्वास क्याखिन नै कर्यो?</verse>
				<verse number="6">लेकिन अगर हम कुंनू लोगून का तरफ भटे त लोग हमून ढ़ूगानले लोड़ियाला, क्याखिनकि भौत सारा लोग यो बात स जाणनान, कि यहूना सच्ची में परमेश्वरो को संदेश दिनवाला छ्यो।”</verse>
				<verse number="7">तब उनूले यीशु स जबाब दीछ, “हमून पत्तो नाहातिन, कि उ केका तरफ भटे आईना को छ्यो।”</verse>
				<verse number="8">तब यीशु ले क्योछ, “मैंले तुमून नै बतूनू कि मैं कैका अधिकार ले यो काम करछूँ।”</verse>
				<verse number="9">उक बाद यीशु ले उन कुछ यहूदी अगुवान एक कहानी सुणाभेरन क्योछ, “एक आदिमी ले अंगूर का बगीच लगाछ। और किसानून उ बगीच स ठेका दीभेरन खुद दूर देश न्हैग्यो।</verse>
				<verse number="10">जब अंगूर पाक्नाका बखत आछ, त बगीच का मालिक ले अपून सेवक स, उन किसानून का पास फसलो को हिस्सा लीन खिन भेजछ, जिनुले बगीच को ठेका लीईना को छ्यो। लेकिन किसानून ले उ सेवक स पकड़ भेरन मारछ्य, और खाली हात वापस भेज दीछ।</verse>
				<verse number="11">येका बाद फिर मालिक ले दुसारा सेवक स भेजछय, और उनूनले ऊस ले पीटभेरन और उको अपमान करभेरन ऊस खाली हात वापिस भेज दीछ।</verse>
				<verse number="12">फिर मालिक ले एक तीसोरो सेवक भेज छै, और उनूले ऊस ले घायल करभेरन भ्यार निकाल दीछ।</verse>
				<verse number="13">तब बगीच का मालिक ले क्योछ, मैं कि करूँ? मैं अपून प्रिय च्याला स किसानून का पास भेजलो, शायद उन म्यारा च्याला को आदर करला।</verse>
				<verse number="14">जब किसानून ले देखछ्य, त आपस में कुन लाग्यान, योई त असली वारिस यो छै, आ, हम यैस जान हे मारी दीनू, तो फिर उकी सारी जैजाद हमरि है जालि।</verse>
				<verse number="15">तब उनूले ऊस पकड़ भेरन जान है मारी दीछ, और ऊस उठाभेरन बगीच का भ्यार खित दीछ। तब अंगूरो बगीच का मालिक की करोलो?</verse>
				<verse number="16">उ आभेरन उन किसानून को नाश करोलो, और अंगूरा का बगीच स दुसारा किसानून दी द्योलो।” यो सुणभेरन लोगून ले क्योछ, “परमेश्वर इसो नै करो।”</verse>
				<verse number="17">यीशु ले उनार तरफ देखिभेरन क्योछ, “फिर यो पवित्रशास्त्र में कि लेख रैछ, जो ढूंगास मिस्त्रीन ले बेकार जाणिभेरन खित दीछ, उई ढुग नींव को कुना को ढुग बनछ्य।</verse>
				<verse number="18">जो कोई ले यो ढ़ुगा में खितीलो उ चूर-चूर हो जाला; और जेमें यो ढूंगो खितीलो उ पीसी जालो।”</verse>
				<verse number="19">उई बखत मूसा का नियम सिखून वाला और प्रधान याजक यो बात स समझ ग्या, कि यीशु ले यो हमार बारिमें कहानी क्योछ, येक कारण उन यीशुस पकड़ून चाँछ्या, लेकिन लोगून का डर का कारण यीशु नै पकड़ीयो।</verse>
				<verse number="20">और उन ऊस पकड़ना का खोज में लाग रूनान, और उनूनले उक पास कुछ लोग भेदी बनाभेरन भेजियान, कि उन धर्मी हुना को ढोग करभेरन यीशु स कोई नै कोई बात में फसाँ सका, और हम ऊस पकड़ भेरन राज्यपाल का हवाला कर सका।</verse>
				<verse number="21">येक कारण उन आभेरन यीशु थैं कुन लागनान, “गुरू जी, हम यो जाणनू कि तैं ठीक कुछै और सिखूछै, और कैको पक्षपात नै करने, बल्कि सच्चाई ले परमेश्वरा का बाटो बतूछै।</verse>
				<verse number="22">येक कारण हमून यो बतो, क्या कैसर महाराजा स कर दीन ठीक छी या नाहातिन?”</verse>
				<verse number="23">लेकिन यीशु ले उनोरो छल कपट स भांप भेरन उनूनथैं क्योछ,</verse>
				<verse number="24">एक सिक्का ल्या और मैंस दिखा। “तब उन एक सिक्का ल्यान, और यीशु ले उनूथैं पुछ्छै, यो सिक्का में कैको मोहर और नाम छै?” उनूले जबाब दीछ, कैसर महाराजा को।</verse>
				<verse number="25">तब यीशु ले उनूनथैं क्योछ, “जो कैसर महाराजा को छै ऊस कैसर राजा स दीया, और जो परमेश्वरो को छै ऊस परमेश्वर स दी।”</verse>
				<verse number="26">उन लोगून का सामुनि यीशु स बातुन में नै फसाँ सक्या, लेकिन उक जबाब ले हैरान हो भेरन चुप रैग्या।</verse>
				<verse number="27">फिर सदूकी लोग जो कुंनान कि मरिना को ज्यून हुनो छैई नै, उनूनमें भटे थ्वाड़ा लोगून ले उक पास आभेरन पुछ्छै,</verse>
				<verse number="28">“गुरू जी, मूसा ले हमून खिन यो लिख रैछ। ‘अगर कैको भाई अपून स्यैनि का रून तलक बिना औलादो को मरि जाछो, तब उक भाई उकी घरवाली दगाड़ ब्या करभेरन अपूनी भाई खिन वंश पैद करौ।’</verse>
				<verse number="29">एक घर में सात भाई छ्या, और सबून है ठूला भाई को ब्या करछ्य, और उ बिन औलाद का मरिग्यो।</verse>
				<verse number="30">दुसारा भाई ले करछ्य।</verse>
				<verse number="31">और तिसरा भाई उ विध्वा का दगाड़ ब्या कर लीछ, इसीकैं सातू भाई बगैर औलाद का मरिग्या।</verse>
				<verse number="32">और सबून का बाद उ स्यैनि ले मरि ग्यै।</verse>
				<verse number="33">तब सदूकी लोगून ले यीशु थैं पुछनान, कि गुरू जी, अब हमून बतो उ उन सातू भाईन की घरवाली भैछ, जब उ ज्यून होलि तब उ कैकी घरवाली होलि।”</verse>
				<verse number="34">तब यीशु ले उनूनथैं क्योछ, “यो युगा का आदिमी और स्यैनि ब्या करनान और ब्या खिन दी जानान;</verse>
				<verse number="35">लेकिन जो लोग इसा योग्य होला, उन यो युग और मरिन में भटे ज्यून होला, उन नै तैं ब्या करला और ना ब्या करून खिन दी जाला।</verse>
				<verse number="36">फिर उन कभै नी मराला; क्याखिनकि उन स्वर्गदूत का समान होला, और मरिन में भटे ज्यून हुना ले परमेश्वर की सन्तान हो जाला।</verse>
				<verse number="37">येक अलावा तुम यो बात नै मानना की लोग मरिभेरन फिर ज्यून हुनान, लेकिन पवित्रशास्त्र में मूसाका बारिमें लिखीना को छै कि जब मूसा का दगाड़ परमेश्वर ले आग की झाड़ी में भटे बात करछ्य, जाँ उ प्रभु स अब्राहम को इसहाक को और याकूब को परमेश्वर कुंछो।</verse>
				<verse number="38">परमेश्वर मरिनान को नै बल्कि ज्यूनानको परमेश्वर छै, क्याखिनकि उ खिन उन सब ज्यून छन।”</verse>
				<verse number="39">तब यो सुणिभेरन मूसा का नियम सिखून वालान में भटे थ्वाड़ा लोगून ले क्योछ, “गुरू जी, तुमूले ठीक क्योछ।</verse>
				<verse number="40">और येक बाद उनूनमें भटे कैसले यीशु थैं केले सवाल पुछना की हिम्मत नै भ्ये।”</verse>
				<verse number="41">फिर यीशु ले उनूनथैं पुछ्छै, “मसीह स दाऊद राजा को वंशज कसीकैं के सकनान?”</verse>
				<verse number="42">दाऊद भजन संहिता की किताब में कुछूँ कि “प्रभु ले म्यारा प्रभु थैं क्योछ।</verse>
				<verse number="43">म्यारा दैन तरफ बैठ, जब तक कि मैं त्यारा बैरिन त्यारा खुटान का तलि नै कर द्यूलो।</verse>
				<verse number="44">और दाऊद राज त उथैं प्रभु कुंछो, फिर उ उको वंशज कसीकैं हो सकछो?”</verse>
				<verse number="45">और जब सब लोग सुणून मरयछ्या, त यीशु ले अपून शिष्यून थैं क्योछ,</verse>
				<verse number="46">“तुम यो मूसा का नियम सिखून वाला लोगून भटे सतर्क रया, जो लम्बा-लम्बा मेहंगा चोला पैन भेरन घुमन और बजार में लोग उनूथैं नमस्कार करून यो पसन्द करनान, और यहूदी सभाघर में आदर वाली जागान और दावतून मेंले खास-खास जागान में बैठून पसन्द करनान।</verse>
				<verse number="47">लेकिन उन ठगभेरन विध्वाऊन की सब जैजाद खुद लुट लीनान, और फिर लोगून देखून खिन देर तलक प्रार्थना करनान, लेकिन परमेश्वर उनून भौत कड़ी सजा द्योलो।”</verse>
			</chapter>
			<chapter number="21">
				<verse number="1">मन्दिर में जाँ दानपात्र राखिना को छ्यो, वाँ बैठि भेरन यीशु धनवान लोग दान डालून देखून मरेछ्या।</verse>
				<verse number="2">तब यीशु ले देखछ्य कि गरीब विध्वा ले आभेरन द्वी ताँबा सिक्का दानपात्र में डाल्यान जिनेरि कीमत भौत कम छी।</verse>
				<verse number="3">यीशु ले अपून शिष्यून बुलाभेरन क्योछ, “मैं तुमूनथैं सच्ची कुछूँ, कि दान दिन वालान में सबून है ज्यादा दान यो विध्वा ले दीछ।</verse>
				<verse number="4">क्याखिनकि सबून ले अपूनी ज्यादा कमाई में भटे थ्वाड़ा दीछ, लेकिन येले अपूनी गरीबी में ले येक पास जतुक छ्यो सबै दी दीछ।</verse>
				<verse number="5">जब थ्वाड़ा लोग मन्दिराक बारिमें कुन मरेछ्या कि उ कतुक निको ढ़ुगान ले और भेंटा का समान ले सजावट करिना की छै, तब यीशु ले उनूनथैं क्योछ।</verse>
				<verse number="6">उन दिन आला, जिनून में यो सब जो तुम देखछा, उनूनमें भटे याँ कोई ढ़ुगा में ढ़ुगा नै रोलो, और एक दिन पुर तरीका ले नाश करि जाला।”</verse>
				<verse number="7">उनूनले यीशु थैं पुछछै “हे गुरू, यो सब कब होलो? और यो बात जब पुरी हुन खिन होलि, त उ बखत को कि चिन होलो?”</verse>
				<verse number="8">यीशु ले क्योछ, “सतर्क रौ कि तुम कैका बहकाव में जन आया। क्याखिनकि भौतसा झूठ्ठा लोग तुमार पास म्यारा नामेंले आला, और कौल, ‘मैं उई छूँ’ और ‘उ बखत आग्योछ।’ लेकिन तुम उनार पछिल जन जाया।</verse>
				<verse number="9">जब तुम लड़ै-झगड़ानकि खबर सुणला, तब तुम डरिया जन, क्याखिनकि पैलि इसो हुन जरूरी छै, लेकिन उ बखत दुनिया का अन्त जल्दी नी हो।</verse>
				<verse number="10">तब यीशु ले उनूनथैं क्योछ, एक जाति को लोग दुसारा जाति लोगून में हमला कराला, और एक राज्य दुसारा राज्य में हमला करोलो।</verse>
				<verse number="11">और सब जागान में भूचाल आलो। और अकाल पड़ाला। और महामारी पड़ेलि, और आकाश में खतरनाक बात और ठूला-ठूला चिन प्रगट होला।”</verse>
				<verse number="12">यीशु ले फिर क्योछ, “तुम सतर्क रौ, इन बातुन है पैलि लोग म्यारा नामाका कारण तुमोरो विरोध कराला और तुमून पकड़ भेरन सताला, और न्यायालय में सौंप द्याल, और जेल में डाल द्याला, और राजान और मंत्रीन का सामुनि लै ठाँड़ करि जाला।</verse>
				<verse number="13">और परमेश्वर यो हुन द्योलो, क्याखिनकि फिर तुम उनून म्यारा बारिमें गवाही दीना को मौका मिल जालो।</verse>
				<verse number="14">तब यो बात की फिकर जन कर्या कि तुम कि कौला।</verse>
				<verse number="15">क्याखिनकि मैं तुमून इसा-इसा शब्द और बुद्धि द्यूलो कि तुमार सब बिरोधी या बिरोध को सामना नी कर सकाला।</verse>
				<verse number="16">तुमार ईजा-बबा, भाई-बैनि, रिश्तेदार और मित्र तुमून पकड़वाला। याँ तक कि तुमून में भटे कतकून त मरवा दी जालो।</verse>
				<verse number="17">म्यारा नामाका कारण सब तुमार दगाड़ बैर कराला।</verse>
				<verse number="18">फिरले तुमोरो खोरा को एक बाल बांका नै कर सकाला।</verse>
				<verse number="19">लेकिन तुम अपून धीरजा का द्वारा अपूनी प्राणून स बचा राखला।”</verse>
				<verse number="20">“जब तुम यरूशलम शैहर स सेनान ले घेरिना को देखाला, त जाणि लिया कि उको उजड़ जान नजिक छै।</verse>
				<verse number="21">उ बखत जो आदिमी यहूदिया प्रदेश में होलो, उन भाजभेरन डाँण में न्हैजून, और जो यरूशलम शैहर में का भितर हो, उन दुसारा शैहरून खिन जाया; जो अपून गौं में छन, उन उ शैहर में जन जूंन।</verse>
				<verse number="22">क्याखिनकि यो बदला लीना का इसा दिन होला, जिनून में पवित्रशास्त्र में लिखीना की सब बात पुरी हो जालि।</verse>
				<verse number="23">उन दिनून में जो स्यैनिन गर्भवती, और जो नान्तिनान दूध पिलून वाला होला, तब उनून खिन दुखो को बखत होलो! क्याखिनकि उ बखत देश में भयानक संकट और इन लोगून में भौत मुसीबत आ पड़ली।</verse>
				<verse number="24">उन लोग तलवार की धार ले मौता का घाट उतारी जाला, और दुसारा राज्य का लोग उनून बन्दी बनाभेरन ली जाला। यरूशलम शैहरा का गैर-यहूदी लोगून का द्वारा तब तक रौंदी जालो, जब तक गैर-यहूदी लोगून को बखत पुरो नै हो जौ।</verse>
				<verse number="25">उ बखत सूरज, चन्द्रमा और तारा में अद्धभुत चिन दिखाई द्याला, और धरती में देश-देशा का लोगून में संकट होलो, क्याखिनकि उन उफनता समुन्द्रा का लहरून का कारण लोग घबरा जाला।</verse>
				<verse number="26">डरा का कारण और संसार में उनवाला संकटून को इन्तजार करून-करनै लोगून को जान में जान नी रौ, क्याखिनकि आकाश की शक्ति हिलाई जालि।</verse>
				<verse number="27">तब उन लोग मैंस, आदिमी को च्याला स सामर्थ और महिमा का दगाड़ बादलून में उन देखला।</verse>
				<verse number="28">जब इन बात हुन लागाला, त हिम्मत का दगाड़ सीधा ठाड़ हो भेरन ऊँन वाला संकटून को सामना करा; क्याखिनकि तुमोरो छुटकारा जल्दी होलो।”</verse>
				<verse number="29">फिर यीशु ले शिष्यून एक कहानी सुणाछ, “यो तिमूलो को रूख और सब रूखून देखा।</verse>
				<verse number="30">जसीकैं उमें मुलायम पात निकलनान, त तुम देखिभेरन जाणछा कि गरमी को मौसम उनवालो छै।</verse>
				<verse number="31">इसीकैं जब तुम इन बातुन हुन देखला, तब जाणि लिया कि परमेश्वरोको राज्य जल्दी उनवालो छै।</verse>
				<verse number="32">मैं तुमूनथैं सच्ची कुछूँ, कि यो पीढ़ी को लोगून को अन्त तब तलक नै होलो, जब तलक यो सब बात पुर नै है जालो।</verse>
				<verse number="33">यो आकाश और धरती ले खतम है जालि, पर म्यार बचन कभै खतम नै होलो।</verse>
				<verse number="34">तुम हमेशा जागनै रौ काँई इसो नै हो कि तुमोरो मन खुमार में पियक्कड़पन और यो जीन्दगी की चिन्तान में सुस्त हो जौ, और उ दिन तुमून में फन्दा का सामान अचानक आ पड़ो।</verse>
				<verse number="35">क्याखिनकि उ दीनो को प्रभाव सारी धरतीका सब रूनवालान में आ पड़ोलो।</verse>
				<verse number="36">येक कारण जागनै रौ और हर बखत प्रार्थना करनै रौ कि तुम इन सब ऊँन वाला संकटून है बचिना का रौ, और मैं आदिमी का च्याला का सामुनि ठाड़ हुना का योग्य बना।”</verse>
				<verse number="37">यीशु दिन में मन्दिर में उपदेश दीछ्या, और रात में जैतून नामाका डाँण में प्रार्थना करभेरन बितूछ्यो।</verse>
				<verse number="38">और रात्तै सब लोग उनोरो उपदेश सुणून खिन मन्दिर में उनार पास आ जाछ्या।</verse>
			</chapter>
			<chapter number="22">
				<verse number="1">अब अखमीरी रोटा को त्यार, जैस फसह को त्यार ले कुंनान, नजिक ऊँन मर्यो छ्यो।</verse>
				<verse number="2">तब प्रधान याजक और मूसा का नियम सिखून वाला इसा विचार में रूछ्या कि कसीकैं यीशुस जान है मारा, लेकिन उन डर छ्या।</verse>
				<verse number="3">तब शैतान उ यहूदा में समा ग्यो जो इस्करियोती नाम ले जाणि जा छ्यो, और बार शिष्यून में भटे एक छ्यो।</verse>
				<verse number="4">उले प्रधान याजकून का और अधिकारीन का दगाड़ मिलभेरन सलाह करछ्य, कि कसीकैं मैं यीशु स तुमार हवाला करलो।</verse>
				<verse number="5">यो बात में उन भौत खुश भ्यान, और उनूनले उक बदाला ऊस रूपाया दिनाको वादा करछ्य।</verse>
				<verse number="6">और यहूदा ले उनार दगाड़ वादा करछ्य, और मौका खोजून लागछ्य कि जब भीड़ में नै हो त यीशु स उनार हवाला कर द्यू।</verse>
				<verse number="7">तब अखमीरी रोटा को त्यारो को दिन आछ, जैमें फसह का मेम्ना बलि करि जा छ्यो।</verse>
				<verse number="8">और यीशु ले पतरस और यहूना स यो कैभेरन भेजछ्य, कि जाभेरन हमून खिन फसह को खाना की तैयारी करा।</verse>
				<verse number="9">तब उनूनले यीशु थैं पुछ्छै, “ हमून फसह को त्यारो को खाना की तैयारी काँ करून चाँछै, कि हम जाभेरन तैयारी कर सका?”</verse>
				<verse number="10">तब यीशु ले उनूनथैं क्योछ, देखा जब तुम नगर में जाला, त वाँ तुमून एक आदिमी मिलोल, जो एक पानि ले भरिना को फौलास ली जानमर्यो होलो, तुम उक पछिल-पछिल जाया और जो घरा का भितर उ जॉलो।</verse>
				<verse number="11">उ घराका मालिक थैं तुम इसो कया कि, “गुरू ले पुछ रैछ, कि उ कमरा काँ छै जैमें मैं अपून शिष्यून का दगाड़ फसह को खानो खा सकूँ।”</verse>
				<verse number="12">उ तुमून घराका दोल में एक सजी-सजायी ठूलो कमरा दिखालो। तुम वाँ हम सबून खिन फसह त्यार खाना की तैयारी कर्या।</verse>
				<verse number="13">यो सुणिभेरन शिष्य न्हैग्या और जसो यीशु ले उनूनथैं कैं कईना छ्यो, उनूनले नगर में जाभेरन सब चीज ठीक ऊसो पाछ, और उनूनले वाँ फसह को खाना की तैयारी करछ्य।</verse>
				<verse number="14">जब ब्याल हुन लागछी तब यीशु अपून बार प्रेरितून का दगाड़ खान खिन बैठियान।</verse>
				<verse number="15">तब यीशु ले उनूनथैं क्योछ “मेरि भौत इच्छा छी कि मैं दुख उठून है पैलि यो फसह को खानो तुमार दगाड़ खूँ।</verse>
				<verse number="16">क्याखिनकि मैं तुमूनथैं कुछूँ, कि जब तक उ परमेश्वरा का राज्य में पुर नै हो तब तक मैं फसह को त्यार को खानो कभै दुबारा नी खूलो।”</verse>
				<verse number="17">तब यीशु ले अंगूर का रस को कटोरो टिपभेरन परमेश्वर स धन्यवाद करछय और क्योछ, “येस ली और आपस में बारी-बारी ले पी ली।</verse>
				<verse number="18">क्याखिनकि मैं तुमूनथैं कुछूँ, कि जब तलक परमेश्वरोको राज्य नी आलो, तब तक मैं अंगूर को रस कभै नी पियूँ।”</verse>
				<verse number="19">फिर यीशु ले रोटो लीछ और परमेश्वरो को धन्यवाद करभेरन तोड़छ्य, और अपून शिष्यून दीभेरन क्योछ, “यो रोटो म्येरो आंग छै, जो तुमून खिन दी जानमर्योछ, और मेरि याद में इसो करनै रया।”</verse>
				<verse number="20">इसीकैं यीशु ले खाना का बाद अंगूर को रस स कटोरो यो कैभेरन दीछ, “यो अंगूरो को रस म्येरो उ खूनो को नय्या वाचा छै, जो तुमून खिन बगाई जाछो।</verse>
				<verse number="21">लेकिन देखा, मैंस ध्वाका ले पकडूवालो म्यारा दगाड़ यो दावत में शामिल छै।</verse>
				<verse number="22">मैं यो सब यो कारण कुन मरयूँ की मैं आदिमी को च्योलो, जैका म्यारा बारिमें तैय करि ग्योछ, ठीक उक अनुसार मैंस जानो छै, लेकिन धिक्कार छै उ आदिमी में जैक द्वारा मैं आदिमी को च्योलो पकड़ाई जालो।”</verse>
				<verse number="23">यो सुणभेरन उन एक दुसारा थैं पुछून लाग्यान कि हमून में भटे को होलो, जो यो काम करून वालो छै।</verse>
				<verse number="24">शिष्यून में यो विवाद हुन लागछै कि हमून में भटे सबून है ठूलो को समझि जालो।</verse>
				<verse number="25">तब यीशु ले शिष्यून थैं क्योछ, “तुम जाणछा, कि अन्यजाति का राजा उनूनमें अपूनी ताकत दिखाभेरन राज करनान, और जो उनूनमें अधिकार राखनान, उन उपकरी मानी जानान।</verse>
				<verse number="26">लेकिन तुम इसो जन कर्या, जो तुमून में ठूलो छै, उ नान का समान बनौ, और जो प्रधान छै, उ दास क समान बनौ।</verse>
				<verse number="27">क्याखिनकि ठुल को छै, उ जो खान खिन बैठ र्योछ, या उ जो सेवा करछ्यो? क्या उ नै जो खान खिन बैठ र्योछ? लेकिन मैं तुमार बीच में दास का नियाती छूँ।”</verse>
				<verse number="28">“तुम उ छा जो म्यारा संकट का बखत म्यारा लगातार दगाड़ रैछा।</verse>
				<verse number="29">जसो म्योरो पिता मैं खिन एक राज्य दी रैछ। ऊसोई मैंले तुमून यो राज्य दी छूँ।</verse>
				<verse number="30">ताकि तुम म्यारा राज्य में मेरि दावत में बैठभेरन म्यारा दगाड़ संगति करा, और सिंहासन में बैठभेरन इस्राएल लोगून को बारा गोत्रून को न्याय करला।”</verse>
				<verse number="31">“शमौन हे शमौन, देख शैतान ले परमेश्वर थैं आज्ञा माँग है छ, की तुम सबून परखो ताकि भलान बुरान भटे अलग कर सकों जसिकै किसान ग्यूँ स भुस भटे अलग करछो।</verse>
				<verse number="32">लेकिन मैंले तैखिन प्रार्थना करछ्य कि तेरो विश्वास कम नै हो, और जब तैं पापून है पश्चताप करले त अपून भाईन ले मैंमें विश्वास करून खिन मजबूत कर।”</verse>
				<verse number="33">लेकिन पतरसले और ले ज्यादा जोर दीभेरन क्योछ, “चाहे मैंस तुमार दगाड़ जेल जान पड़ो, या मरन पड़ो मैं तैय्यार छूँ।”</verse>
				<verse number="34">यो सुणिभेरन यीशु ले उथैं क्योछ, “पतरस मैं तैंथैं कुछूँ, आज राता का बखत मुर्गा का बाँक दिन है पैलिक, तैं मैंस तीन बार पछ्याणून भटे इन्कार कर करले, कि मैं ऊस नै जाणनू।”</verse>
				<verse number="35">फिर यीशु ले उनूनथैं क्योछ, “जब मैंले तुमून बटवा, और झवाला, और चप्पल बिना तुमून सुसमाचार प्रचार करून खिन भेजिछ्य, त क्या तुमून के चिजें कमी भैछी? उनूनले क्योछ, के चिजें कमी नै भ्यै।”</verse>
				<verse number="36">यीशु ले उनूनथैं क्योछ, “लेकिन अब लोग हमार बिरोध में छन, त जैक पास बटवा छै उ ऊस ले और उसीकैं झवाला ले, और जैक पास तलवार न्हैतिन उ अपून कोट बेचिभेरन एक खरीद ले।</verse>
				<verse number="37">क्याखिनकि मैं तुमूनथैं कुछूँ, पवित्रशास्त्र में म्यारा बारिमें लिख रैछ, उ पुरो भ्योछ। कि ‘उ अपराधीन का दगाड़ गिनी ग्यो’, येक पुर हुन जरूरी छै, और जो कुछ म्यारा बारिमें लिखीना की छै उ पुर हुन वालो छै।”</verse>
				<verse number="38">तब शिष्यून ले क्योछ “प्रभु! देख, याँ द्वी तलवार छन।” यीशु जबाब दीछ, “भौत छन।”</verse>
				<verse number="39">यीशु भ्यार निकल भेरन अपूनी आदत का अनुसार जैतून नामाका पहाड़ में ग्यान और शिष्य ले उक दगाड़ ग्यान।</verse>
				<verse number="40">उ जाग पुजभेरन यीशु ले शिष्यून थैं क्योछ प्रार्थना करा कि तुम परीक्षा में नै पड़ा।</verse>
				<verse number="41">और यीशु खुद अपून शिष्यून भटे लगभग तीस मीटर दूर ग्योछ, और भिमें घुण का बल प्रार्थना करून लाग्यान।</verse>
				<verse number="42">“हे पिता अगर तैं चाछै, तैं मैंस यो दुख भटे बचाले जो म्यारा मलि में उनवालो छै, फिरले मेरि नै, बल्कि तुमेरि मरजी पुरी हो।”</verse>
				<verse number="43">तब स्वर्ग भटे एक स्वर्गदूत उनुस दिखाई दीछ, जो ऊस सामर्थ दी छ्यो।</verse>
				<verse number="44">और उ भौत संकट में व्याकुल हो भेरन और ले जोरले प्रार्थना करून लाग्यान, और उको पसीनो माना खून का ठुल-ठुल तवाप नियाति भिमें खितीन मरेछ्या।</verse>
				<verse number="45">जब उ प्रार्थना करभेरन वापस आछ और अपून शिष्यून का पास आभेरन उनून उदासी का मारे पड़ीनाको पाछ।</verse>
				<verse number="46">और यीशु ले उनूनथैं क्योछ, “तुम लोग किलैं पड़िर्योछा? उठा, प्रार्थना करा, कि तुम परीक्षा में जन पड़ो।”</verse>
				<verse number="47">जब यीशु इसो कुनै मरेछ्या, कि देखा एक भीड़ आछ, और उन बारून में भटे एक जैको नाम यहूदा छ्यो, उनार अघिल-अघिल उनमरेछ्यो और उ यीशु स गल लगून खिन उक पास आछ।</verse>
				<verse number="48">यीशु ले उथैं क्योछ, “हे यहूदा क्या तैं गल लगाभेरन मैं आदिमी का च्याला स ध्वाका ले पकड़ू खिन आरैछ?”</verse>
				<verse number="49">यो पत्तो चलून में कि हुन वालो छै त यीशुका शिष्यून ले क्योछ, “प्रभु! क्या हम इनून में तलवार चलुनू?”</verse>
				<verse number="50">और उनूनमें भटे एकले महायाजक का दास में तलवार चलाभेरन उको कान काट दीछ।</verse>
				<verse number="51">यो बात में यीशु ले क्योछ, “बश! भौत भ्यो।” और उको कान छूँ भेरन पैलिक जसो कर दीछ।</verse>
				<verse number="52">जो प्रधान याजक और मन्दिरा का अधिकारी और यहूदी अगुवा यीशुस पकड़ून खिन आईना का छ्या यीशु ले उनूनथैं क्योछ, “क्या तुम मैंस डाकू समझभेरन जांठ-तलवार लीभेरन पकड़ून खिन आ रैछा?</verse>
				<verse number="53">जब मैं हर-रोज मन्दिर में तुमार दगाड़ रयूं तब तुमूनले मैंस नै पकड़ीयो; लेकिन यो तुमोरो बखत छै और अन्यारो को अधिकार छै।”</verse>
				<verse number="54">तब उनूले यीशुस पकड़ भेरन अपून कब्‍जा में करि लीछ, और महायाजक का घर में ली ग्यान यीशु है थ्वाड़ा दूर-दूर रैभेरन पतरस महायाजक का द्वार तलक ग्योछ।</verse>
				<verse number="55">जब लोग खाला का बीच में आगो जलाभेरन उक चारू तरफ बैठ रेछ्या, तब पतरस ले आभेरन उनार दगाड़ बैठग्यो।</verse>
				<verse number="56">यो बीच जब पतरस खाल में बैठिनाको छ्यो, तब महायाजक की एक दासी वाँ आछ। जब उले पतरस स वाँ आग तापून देखछ्य, तब भौत ध्यान ले ऊस देखिभेरन क्योछ, “यो ले त यीशुका दगड़िया छै।”</verse>
				<verse number="57">यो सुणिभेरन पतरसले क्योछ, “मैं नै जाणनू कि तैं कि कुन मरैछी।”</verse>
				<verse number="58">थ्वाड़ा देर बाद कोई औरून ले पतरस स देखिभेरन क्योछ तैंले उनूनमें भटे छै, पतरस ले जबाब दीछ, नै भाई! मैं ऊस नै जाणनू।</verse>
				<verse number="59">तब थ्वाड़ा देर बाद एक आदिमी ले पतरस थैं क्योछ, “यो बात पक्की छै क्या तैंले यीशुका दगड़ियान में भटे एक छै, क्याखिनकि तैंले गलीली छै।”</verse>
				<verse number="60">लेकिन पतरसले क्योछ “हे भाई मैं नै जाणनू तैं कि कुँछै,” जब उ यो करूनमर्योछ त मुर्गाले बाँक दीछ।</verse>
				<verse number="61">तब प्रभु ले मुड़भेरन पतरस स देखछ्य। तब पतरस स यो बात याद आछ जो यीशु ले उथैं कईना की छी आज मुर्गा का बाँक दिन है पैलि तैं म्येरो तीन बार इन्कार करले।</verse>
				<verse number="62">और उ भ्यार जाभेरन जोर-जोरले डाण मारून लागछ्य।</verse>
				<verse number="63">और उन लोग जिनूनले यीशुस पकड़ राखछ्यो, उनेरि मजाक बनाभेरन ऊस हांणून मरेछ्या।</verse>
				<verse number="64">और यीशु का आँखान में पट्टी बाँद भेरन फिर उनूनथैं पुछून लाग्यान “भविष्यवाणी कर” कैले तैंस हाणछ्य?</verse>
				<verse number="65">उन यीशु की मजाक करभेरन उनार खिलाफ कई और बात कुन मरेछ्या।</verse>
				<verse number="66">और जब दिन भ्योछ त लोगून और यहूदी अगुवान महासभा में बुलाई ग्योछ, जैमें प्रधान याजक और मूसा का नियमून सिखून वाला ले छ्या, और उनूनले यीशुस अपूनी महासभा ल्याभेरन पुछ्छै।</verse>
				<verse number="67">“अगर तैंई मसीह छै, त हमून थैं कै दे!” यीशु ले उनूनथैं क्योछ, “अगर मैं तुमूनथैं कुँ, त तुम विश्वास नी करला।</verse>
				<verse number="68">और अगर मैं सवाल पुछूँ, त तुम लोग जबाब नी द्याला।</verse>
				<verse number="69">लेकिन ऐल भटे मैं आदिमी को च्योलो सर्वशक्तिमान परमेश्वरा का दैन तरफ बैठाई जालो।”</verse>
				<verse number="70">तब सबून ले पुछ्छै “तैं क्या परमेश्वरोको च्योलो छै?” तब यीशु ले क्योछ, “तुम त कुँछा, क्याखिनकि मैं छूँ।”</verse>
				<verse number="71">तब उनूनले क्योछ “अब हमून और गवाही कि जरूरत छै? क्याखिनकि हमूले खुद ऐका मुख भटे सुणि है छै।”</verse>
			</chapter>
			<chapter number="23">
				<verse number="1">तब सारी सभा का लोग यीशु स राज्यपाल पिलातुसाक पास ल्हीग्यान।</verse>
				<verse number="2">उन यो कैभेरन यीशु में दोष लगून लाग्यान, कि “हमून ले यैस हमार लोगून भड़कून और महाराजा स कर दिन खिन मना करून और अपनास मसीह और राजा कुन सुणि रैछ।”</verse>
				<verse number="3">तब पिलातुस ले यीशु थैं पुछ्छै, “क्या तैं यहूदीन को राजा छै?” यीशु ले क्योछ, तैं खुद कुन मरेछ्य।</verse>
				<verse number="4">तब पिलातुस ले प्रधान याजकूनथैं और लोगूनथैं क्योछ, “मैं यो आदिमी में केले दोष नै पानू।”</verse>
				<verse number="5">उन और ले दबाब डालभेरन कुन लाग्यान, “यो गलील प्रदेश भटे लीभेरन याँ तक सार यहूदिया प्रदेशा का कुन-कुन में अपूनी शिक्षा ले लोगून दंगा खिन भड़कूछो।”</verse>
				<verse number="6">यो सुणिभेरन पिलातुस ले पुछ्छै “क्या यो आदिमी गलील प्रदेशों को रून वालो छै।”</verse>
				<verse number="7">और यो जाणिभेरन कि यीशु राजा हेरोदेस द्वारा शासन करि जानवाला इलाका भटे छ्यो, येक कारण उले यीशु राजा हेरोदेस का पास भेज दीछ, क्याखिनकि उ बखत यरूशलम शैहर में छ्यो।</verse>
				<verse number="8">राजा हेरोदेस यीशुस देखिभेरन भौते खुश भ्योछ, क्याखिनकि उ भौत दिनून भटे ऊस देखून चान मरेछ्यो, उले यीशुका बारिमें सुणि राँखि छ्यो, और उ यीशु का थ्वाड़ा चमत्कार देखूना की आश करून मरेछ्यो।</verse>
				<verse number="9">उ यीशु थैं भौत सारी बातुन पुछनै र्योछ, पर उले ऊस कोई जबाब नै दीयो</verse>
				<verse number="10">तब प्रधान याजक और मूसा का नियम सिखून वाला लोग ठाड़ हो भेरन पुरा जोर-सोर ले यीशु में दोष लगून मरेछ्य।</verse>
				<verse number="11">तब राजा हेरोदेस ले अपून सिपाईन का दगाड़ उको अपमान करभेरन मजाक उड़ाछ, और भड़कीला कपाड़ा पैनाभेरन ऊस पिलातुसा का पास वापस भेज दीछ।</verse>
				<verse number="12">उ बखत तक राजा हेरोदेस और पिलातुस एक-दुसरा का दुश्मन छ्या, लेकिन उई दिन भटे उन मित्र बन ग्या।</verse>
				<verse number="13">पिलातुस ले प्रधान याजकून और अधिकारीन और लोगून बुलवाछ।</verse>
				<verse number="14">और उले क्योछ, तुम लोगून ले यो दोष लगाभेरन यो आदिमी स म्यारा सामुनि पेश करछ्य कि लोगून दंगा करून खिन भड़कूनै रूछो, और देखा मैंले तुमार सामुनि येकी जाँच करछ्य लेकिन जिन बातुन को तुमूले येमें दोष लगूछा, उन बातुन का बारिमें मैंले येमें केले दोष नै पायो।</verse>
				<verse number="15">राजा हेरोदेस ले लै ऊस दोषी नै पायो, क्याखिनकि उले यैस म्यारा पास वापस भेज दीछ। और तुम देखूनमरेछा कि यो आदिमी ले इसो कोई ले गलत काम नै कर रैछ, जै कारण यैस मौत की सजा दी जौ।</verse>
				<verse number="16">येक कारण मैं ऊस कोंड़ा लगाभेरन छोड़ दी छूँ।</verse>
				<verse number="17">हर फसह का त्याराक मौक में पिलातुस एक कैदीस यहूदीन खिन छोड़ी दीछ्यो।</verse>
				<verse number="18">तब सब लोग मिलभेरन जोरले चिल्ला भेरन कुन लाग्यान, “यैस मौत की सजा दी जौ, और हमून खिन बरअब्बा स छोड़ी दी।”</verse>
				<verse number="19">यो उई छ्यो जो नगर में झगाड़ा-फसाद और खूनाका आरोप में जेल में बन्द छ्यो।</verse>
				<verse number="20">पिलातुस ले यीशुस छोड़ना की इच्छाले लोगून फिर समझाछ।</verse>
				<verse number="21">लेकिन उनूनले जोरले चिल्ला भेरन क्योछ, “ऊस सूली में मौते की सजा दे! सूली में मौते की सजा दे!”</verse>
				<verse number="22">तब उनूनले तीसारा बार उनूनथैं क्योछ, किलैं यो आदिमी ले कि बुराई कर रैछ? मैले येमें मरन लायक को कोई ले दोष नै पायो। यो कारण मैं येस कोड़ा लगाभेरन छोड़ दी छूँ।</verse>
				<verse number="23">लेकिन उन जोरले चिल्ला-चिल्ला भेरन पछिल पड़ ग्या, कि यैस सूली में चढ़ाभेरन मौते की सजा दी जौ, और उनोरो चिल्लान बढ़ ग्यो।</verse>
				<verse number="24">तब पिलातुस ले हुकुम दी दीछ, कि इनेरि माँग पुरी करि जौ।</verse>
				<verse number="25">उले उ आदिमी स छोड़ दीछ जो दंगा और खून का कारण कैद करिना को छ्यो और जैस उन छोड़ना की माँग करून मरेछ्या, लेकिन यीशु स लोगून की मरजी अनुसार उनुस सौंप दीछ।</verse>
				<verse number="26">जब सिपाई यीशुस सूली में चढ़ून खिन शैहर भटे भ्यार ली जानमरेछ्या त उ बखत शमौन नामोको एक कुरेनी गौं को आदिमी जो गौं भटे उनमरेछ्यो। तब सिपाईनले ऊस जबरदस्ती पकड़छ्य और उमें सूली राख दीछ, कि यीशुक पछिल-पछिल ली जौ।</verse>
				<verse number="27">और उक पछिल लोगूनकी एक ठूली भीड़ उन मरेछी, और उ भीड़ में स्यैनिन ले छ्या, जो यीशु खिन अपूनी छाती पीटभेरन रून मरेछ्या।</verse>
				<verse number="28">तब यीशु ले उनार तरफ मुड़भेरन क्योछ, “हे यरूशलम शैहरा का चेलियों, जो ले म्यारा दगाड़ हुनमरेछ्य, उ खिन जन रो, लेकिन अपून और अपून नान्तिनान खिन रौ।”</verse>
				<verse number="29">क्याखिनकि सुणा, मुसीबतून का दिन उन मर्यान, जब लोग कौला, “धन्य छन उन स्यैनिन जिनारा कभै नान्तिना नी छ्या, जिनूनले कभै नान्तिनान जन्म नै दीयो, और ना जिनूनले कभै दूध नै पिलायो।”</verse>
				<verse number="30">उ बखत लोग डाणानथैं कुन लागाला, कि हमून में खिती और डाणाले हमून ढक ली।</verse>
				<verse number="31">अगर इसो कोई आदिमी का दगाड़ हुनो, जो धर्मी छै, तो उ सोचो कि उन लोगून का दगाड़ कि होलो जो यो सजाक पान लाईक छन।</verse>
				<verse number="32">उनूनले यीशु का दगाड़ द्वी बुर काम करूनवाला आदिमी ले सूली में मौत की सजा दिन खिन ली ग्यान।</verse>
				<verse number="33">जब उन उ जाग में पुजियान, जैस खोपड़ी की जाग कुंनान, उनूनले यीशुस और उनार दगाड़ द्वी डाकू ले अलग-अलग एक स यीशु का दैंन तरफ और दुसरा स बौं तरफ सूली में चढ़ाछ।</verse>
				<verse number="34">लेकिन यीशु ले क्योछ “ओ पिता इनून माफ कर, किलैकी इन नै जाणना की कि करून मर्यान।” तब उनूनले परची डालभेरन यीशुका कपाड़ा बाँण लियान।</verse>
				<verse number="35">लोग ठाँड़ हो भेरन देखून मरेछ्या, और अधिकारी यो कुनै यीशु की मजाक उड़ून मरेछ्या, “येले दुसरान बचाछ, अगर यो परमेश्वरो को मसीहा छै, और यैस परमेश्वर ले चुनिना को छै, त यो अपूनास बचौ।”</verse>
				<verse number="36">सिपाईनले यीशु को मजाक उड़ून मरेछ्या, और उन ऊस सिरका दीभेरन कुछ्या,</verse>
				<verse number="37">“अगर तैं यहूदीन को राजा छै, त अपूनास बचौ।”</verse>
				<verse number="38">और सिपाईन ले लाकड़ा की पट्टी में दोषपत्र लिखभेरन उक ख्वारा का मलिमें सूली में लगा दीछ, “कि यो यहूदीन को राजा।”</verse>
				<verse number="39">जो बुर काम करूनवाला द्वी आदिमी यीशु का दगाड़ सूली में लटकाईना का छ्या, उनूनमें भटे एकले उकी निन्दा करभेरन क्योछ, “क्या तैं मसीहा छै? त अपनास और हमून बचौ।”</verse>
				<verse number="40">यो बात में दुसारा आदिमी ले ऊस डाठभेरन क्योछ, “क्या तैं परमेश्वर भटे ले नै डरनै? तैले त उई सजा पान मरैछ,</verse>
				<verse number="41">और हम त अपून बुर कामून कि सजा मिली रैछ, लेकिन इनूनले कोई ले बुरो काम नै कर्यो।”</verse>
				<verse number="42">यो कैभेरन उले यीशु थैं क्योछ, “हे यीशु, जब तुम अपून राज्य में राज हो भेरन आला, तब तुम मैंस याद कर्या।”</verse>
				<verse number="43">तब यीशु ले उथैं क्योछ, “मैं तुमूनथैं सच्ची कुछूँ, तैं आजै म्यार दगाड़ स्वर्गलोक में होलै।”</verse>
				<verse number="44">और लगभग दिना का बारा बजे भटे लीभेरन तीन बजे तक सारा देश में अन्यारो छा र्योछ,</verse>
				<verse number="45">और सूरजों को उज्यालो जानै र्योछ, और तब उ बखत मन्दिरो को मोटो पर्दा बीच भटे फाट ग्यो, और द्वी टुकूड़ा हो ग्या,</verse>
				<verse number="46">और यीशु ले जोरले ध्दयाछ, “ओ पिता, मैं अपूनी आत्मा स त्यारा हात में सौंप छूँ।” और यो कैभेरन यीशु ले अपून प्राण छोड़ दीयान।</verse>
				<verse number="47">जब सुबदार ले, यो सब कुछ जो हुन मरेछ्यो ऊस देखिभेरन उले परमेश्वर कि महिमा करछ्य और क्योछ, “सच्ची में यो आदिमी धर्मी छ्यो।”</verse>
				<verse number="48">और जो लोग यो घटना स देखून खिन जमा हो रैछ, उन यो सब देखिभेरन छाती पीटनै-पीटनै अपून घरून खिन वापिस न्हैग्या।</verse>
				<verse number="49">लेकिन यीशु स पछ्याणून वाला थ्वाड़ा लोग और उनूनमें स्यैनिन ले छ्या, जो गलील प्रदेश भटे उनार दगाड़ आ रै छ्या, और दूर ठाड़ हो भेरन यो सब कुछ देखून मरेछ्या।</verse>
				<verse number="50">और वाँ एक आदिमी जैक नाम यूसुफ छ्यो। जो यहूदी महासभा को सदस्य छ्यो और दगाड़ में इज्जतदार और धर्मी आदिमी ले छ्यो।</verse>
				<verse number="51">उले यहूदी सभा की योजना और उनार कामून में उनार दगाड़ नी छ्यो। उ यहूदिया प्रदेशों को अरिमतिया शैहर को रून वालो छ्यो और परमेश्वरा का राज्य का इंतजारी में छ्यो।</verse>
				<verse number="52">उ हिम्मत करभेरन राज्यपाल पिलातुस का सामुनि ग्योछ और उले उथै यीशु की लाश माँगछ्य।</verse>
				<verse number="53">तब यूसुफ ले लाश स सूली भटे उतार छै और एक सफेद कफन में ऊस लपेट भेरन इसी कबर में राख दीछ, जो चट्‍टान में खड़िनाकी छी, और उमें आज तलक कैसे नै राखिना को छ्यो।</verse>
				<verse number="54">उ दिन शुक्रबार को दिन छ्यो, और सबत को दिन शुरू हुन वालो छ्यो।</verse>
				<verse number="55">जो स्यैनिन यीशु का दगाड़ गलील प्रदेश भटे आ रै छ्या, उनूनले यूसुफ का पछिल-पछिल जाभेरन उ कबरै स देखछ्य, और यो ले कि यीशु की लाश कसीकैं राखि रैछ।</verse>
				<verse number="56">तब उनूनले अपून घर वापस जाभेरन खुशबुदार चीजून और इत्र यीशुक आंग में लगून खिन तैय्यार करछ्य, और सबत क दिन उनूनले मूसा का नियमाक अनुसार आराम करछ्य।</verse>
			</chapter>
			<chapter number="24">
				<verse number="1">लेकिन हफ्ता का पैल दिन रात्तै उनूनले उन खुशबुदार चीजून जो उनूनले तैय्यार कर राखछ्यो, लीभेरन कबर में आयान।</verse>
				<verse number="2">और जब उन वाँ पुजनान, तब उनूनले देखछ्य कि कबर को द्वारो को ठूलो ढूंगो हटीना को छै।</verse>
				<verse number="3">जब उन कबर का गुफा में ग्यान, लेकिन प्रभु यीशु की लाश वाँ नी छी।</verse>
				<verse number="4">और जब उन यो बात ले हैरान हो रेछ्या, तब द्वी आदिमी चमकदार सफेद कपाड़ा पैनिना का उनार सामुनि ठाड़ छ्या</verse>
				<verse number="5">और उन उनून देखिभेरन डर ग्या, और तलिकैं नजर झुकाभेरन ठाँड़ा हो रेछ्या। तब उन द्वी आदिमीन ले उनूनथैं क्योछ, “तुम ज्यूनास मरिनान में किलैं खोजून मरेछा।</verse>
				<verse number="6">उ याँ नाहातिन, उ मरिनान में भटे ज्यून है ग्योछ। याद करा जब उ तुमार दगाड़ गलील प्रदेश में रून बखत उले तुमूनथैं कि राखिछ्यो।</verse>
				<verse number="7">जरूरी छै, कि मैं आदिमी को च्योलो पापिन का हवाला करि जौ और सूली में चढ़ायी जौ, और तिसरा दिन मरिनान में भटे फिर जी उठौ।”</verse>
				<verse number="8">तब स्यैनिन यीशु की बात याद आयान।</verse>
				<verse number="9">और उनूनले कबर भटे वापस आभेरन उन ग्यारह शिष्यून और दुसारा सब शिष्यून यो सब बात बताछ।</verse>
				<verse number="10">जिन स्यैनिन ले शिष्यून यो बात बताछ, उ मरियम जो मगदला गौं छी, और उक दगाड़ योअन्ना और याकूब की ईजा मरियम और उनार दगाड़ और ले स्यैनिन छ्या।</verse>
				<verse number="11">लेकिन उनेरि बात उनूनले किस्सा जस समझछ्य, और उनूनले उनेरि बात में विश्वास नै कर्यो।</verse>
				<verse number="12">और तब पतरस उठछै और दौड़भेरन कबर में ग्योछ, और जब उले वाँ पुजभेरन कबर में केवल कफना का कपाड़ास देखछ्य, और जो भ्योछ, उ है दंग हो भेरन वापिस अपून घर आग्यो।</verse>
				<verse number="13">उई दिन यीशु का द्वी शिष्य इम्माऊस नामाका एक गौं में जानमरेछ्या, जो यरूशलम शैहर भटे कोई ग्यारह किलोमीटर दूर छ्यो।</verse>
				<verse number="14">और उन इन सब बातुन का बारिमें जो होईना का छ्या, आपस में बातचीत करनै जानमरेछ्या।</verse>
				<verse number="15">और जब उन आपस में बातचीत और पूछताछ करून मरेछ्या त यीशु खुद वाँ आभेरन उनार दगाड़ हिटन लाग्यान।</verse>
				<verse number="16">लेकिन परमेश्वर ले उनून पछ्याणून है रोक राखछ्यो, कि उन ऊस पछ्याण नै सक्यो।</verse>
				<verse number="17">तब यीशु ले उनूनथैं पुछ्छै, “यो कि बात छै, तुम जो हिटन-हिटने आपस में करून मरेछ्या?” उन रूक ग्या और उनार चेहरा भौत उदास लागून मरेछ्या।</verse>
				<verse number="18">यो सुणिभेरन उनूनमें भटे क्लियोपास नामोको एक आदिमी ले क्योछ, “शायद यरूशलम शैहर में तैं ऐकलो आदिमी छै, जो नै जाणनै, कि पैलिक थ्वाड़ा दिनून में कि-कि होर्योछ?”</verse>
				<verse number="19">तब यीशु ले उनूनथैं पुछ्छै, “इसो कि भ्योछ?” उनूनले उथैं क्योछ, “नासरत गौं यीशु का बारिमें जो परमेश्वर और सब लोगून का बीच काम और वचन में सामर्थी परमेश्वरो को संदेश दिनवाला छ्यो।</verse>
				<verse number="20">प्रधान याजकून और हमार अधिकारीन ले ऊस पकड़वा दीछ, कि ऊस मौत की सजा दी जौ; और ऊस सूली में चढ़ाई जौ।</verse>
				<verse number="21">लेकिन हमून आश करून मरेछ्या कि उई इस्राएल देशा का लोगून रोम देशा का लोगून भटे छुटकारा द्योलो। इन सब बातुन को अलावा यो घटना होईना को तीसरो दिन छ्यो।</verse>
				<verse number="22">और अब हमार समूह भटे स्यैनिन ले हमून (चकित) में डाल रैछ। जो आज रात्तै कबर में ग्यान।</verse>
				<verse number="23">और जब लाश नै मिली, तो यो कुँनै आयान, कि हमूले स्वर्गदूतून को दर्शन पाछ, जिनुले क्योछ कि यीशु ज्यून छै।</verse>
				<verse number="24">यो बात में हमार थ्वाड़ा दगड़िया कबर में ग्यान, और उनूनले सब कुछ ऊसो पाछ, जस स्यैनिन ले कै राखछ्यो, लेकिन उनूनले यीशु नै देख्यो।”</verse>
				<verse number="25">तब उले द्वीवै शिष्यून थैं क्योछ, हे मूर्ख लोगों! जो ले परमेश्वरो को संदेश दिनवालान ले पवित्रशास्त्र में लिखीना को छै तुम लोगून उमें विश्वास करून भौत कठिन लागछै।</verse>
				<verse number="26">क्या मसीह खिन यो जरूरी नी छ्यो उ सबै दुख उठाभेरन अपूनी महिमा में प्रवेश करो?</verse>
				<verse number="27">तब यीशु ले मूसा भटे और परमेश्वरो को संदेश दिनवाला है शुरू भटे पुर पवित्रशास्त्र में भटे अपून बारिमें लिखीनाका बातून को मतलब, उनून समझा दीछ।</verse>
				<verse number="28">जब उन उ गौं का नजिक पुज्यान जा जान मेरछ्या त उले इसो दिखाछ कि उ अघिल जान चाछ।</verse>
				<verse number="29">लेकिन उनूनले यो कैभेरन रोक छै, “हमार दगाड़ रौ; क्याखिनकि ब्याल हुन मरेछी और अब दिन भौत ढल ग्योछ।” तब उ उक दगाड़ रून खिन भितर ग्योछ</verse>
				<verse number="30">इसो भ्योछ कि जब उ उनार दगाड़ खान खिन बैठ छै, त उले रोटो लीभेरन धन्यवाद करछ्य, और ऊस तोड़भेरन उनून दीन लागछ्य।</verse>
				<verse number="31">यो बात में शिष्यून का आँख खुल ग्या और उनूनले यीशुस पछ्याणी लीछ, और यीशु उनार नजरून भटे हरै ग्या।</verse>
				<verse number="32">उनूनले एक दुसारा थैं क्योछ, “जब उन बाँट में हमून थैं बात करून मरेछ्या और पवित्रशास्त्र को मतलब हमून समझू छ्या त क्या हमार मन में जलन नै भै?”</verse>
				<verse number="33">तब उन उई बखत उठभेरन यरूशलम शैहर खिन वापिस न्हैग्या, वाँ उनूनले ईग्यार शिष्यून और उनार दगड़ियान जाम देख्यान,</verse>
				<verse number="34">उन यो कुन मरेछ्या, “प्रभु सच्ची में मरिन में भटे ज्यून हो ग्योछ और शमौन पतरस स दिखाई दीयान।”</verse>
				<verse number="35">तब द्वीवै शिष्यून ले बातछ कि बाटा में कि-कि भ्योछ और यो ले कि जब रोटो खान मरेछ्यो त उनूनले ऊस कसकै पछ्याण छै।</verse>
				<verse number="36">उन इन बातुन का बारिमें बातचीत करून मरेछ्या कि यीशु उनार बीच आ जाछो; और उनूनथैं क्योछ, “तुमून शान्ति मिलौ।”</verse>
				<verse number="37">उन यीशु स देखिभेरन दंग है भेरन सोचून लाग्यान कि काँई यो भूत त नाहातिनी?</verse>
				<verse number="38">यीशु ले उनूनथैं क्योछ, “किलैं डरून मरेछा? और मन में शक क्याखिन करछा?</verse>
				<verse number="39">म्यार हात और खुट देखा, कि मैं उई छूँ; मैंस छूँ भेरन देखा; क्याखिनकि भूत में हड्डी और मास नै हुनो, जस तुम मैंमें देखून मरेछा।”</verse>
				<verse number="40">इसो कैभेरन यीशु ले उनून अपून हात और खुट देखायान</verse>
				<verse number="41">यो सब देखिभेरन खुशी का कारण उनून विश्वास नै हुनो कि यीशु ज्यून है ग्योछ, और उन हैरान है भेरन चाँइनाक रैग्या। तब यीशु ले उनूनथैं पुछ्छै, “क्या याँ तुमार पास के खान खिन छी?”</verse>
				<verse number="42">उनूनले ऊस भुनीना को माँछा को टुकूड़ो दीछ।</verse>
				<verse number="43">और यीशु ले ऊस लीभेरन उनार सामुनि खाछ।</verse>
				<verse number="44">फिर यीशु ले उनूनथैं क्योछ, यो म्यारा उन बात छन, “जो मैंले तुमार दगाड़ छ्यूँ, तब मैंले तुमूनथैं कै राँखछ्यो, कि जरूरी छ्यो, कि जतुक बात मूसा का नियम और परमेश्वरो को संदेश दिनवाला और भजनून कि किताब में म्यार बारिमें जेले लिख रैछ, उ सब सच साबित भ्यो।”</verse>
				<verse number="45">तब यीशु ले पवित्रशास्त्र समझून खिन उनार मद्दत करछ्य,</verse>
				<verse number="46">और उनूनथैं क्योछ, पवित्रशास्त्र में लिखीना को छै कि मसीह दुख उठालो, और तिसर दिन मरिनान में भटे ज्यून हो जालो।</verse>
				<verse number="47">और यरूशलम शैहर भटे लीभेरन सब जातिन में पापून की माफी खिन पश्चताप करना को सुसमाचार को प्रचार उक नामेंले करि जालो।</verse>
				<verse number="48">तुम इन सब बातुन का गवाहा छा।</verse>
				<verse number="49">और सुणा, मैं खुद तुमार मलि में पवित्र आत्मा स भेजूलो जैको वादा म्यारा पिता ले कर रैछ। लेकिन तब तक तुमून शैहर में इन्तजार करूनो होलो, जब तक तुमून स्वर्ग भटे सामर्थ नी दीई जालि।</verse>
				<verse number="50">तब यीशु शिष्यून बैतनियाह गौं भटे भ्यार ली ग्यान, और अपून हात उठाभेरन उनून आशीष दीछ।</verse>
				<verse number="51">और उनून आशीष दीभेरन उ उनून भटे अलग हो भेरन स्वर्ग में उठा ली ग्यो।</verse>
				<verse number="52">और उन यीशु स प्रणाम करभेरन भौत खुशी हो भेरन यरूशलम शैहर खिन लौट ग्या</verse>
				<verse number="53">और उन हर रोज मन्दिर में जाम हो भेरन परमेश्वर की स्तुति और धन्यवाद करछ्या।</verse>
			</chapter>
		</book>
		<book number="43">
			<chapter number="1">
				<verse number="1">यो सारा संसारा का बनून है पैलि बचन छ्यो, उ बचन परमेश्वरा का दगाड़ छ्यो, और उ बचन परमेश्वर छ्यो।</verse>
				<verse number="2">योई बचन शुरूवाद में परमेश्वरा का दगाड़ छ्यो।</verse>
				<verse number="3">परमेश्वर ले सब कुछ उक द्वारा बनाई ग्योछ, और जै केले बनाई ग्योछ, उक बिना केले नै बन्यो।</verse>
				<verse number="4">उ जीवन को जरिया छ्यो, और उई सब लोगून उज्यालो दीछो।</verse>
				<verse number="5">और उज्यालो अन्यारो में चमकछो; और अन्यारा ले ऊस नै बुझा सकूनो।</verse>
				<verse number="6">परमेश्वर ले यहूना नामोको एक आदिमी स भेजछ्य।</verse>
				<verse number="7">उ उज्याला का बारिमें बतून खिन आछ, ताकि सब लोग उक द्वारा उ उज्याला में विश्वास करून।</verse>
				<verse number="8">यहूना खुद तैं उ उज्यालो नी छ्यो, लेकिन उ लोगून परमेश्वरो को उ उज्याला का बारिमें गवै दिन खिन आईना को छ्यो।</verse>
				<verse number="9">उ जो सच्चो उज्यालो छै, उ हरेक आदिमी स उज्यालो दीछो, उ संसार में उनवालो छ्यो।</verse>
				<verse number="10">उ संसार में छ्यो, और संसार उक द्वारा बनाई ग्योछ, और संसाराक लोगून ले ऊस नै पछ्याणो।</verse>
				<verse number="11">उ अपून लोगून में आछ, और उक अपून लोगून ले ऊस नै अपनायो।</verse>
				<verse number="12">लेकिन जिनूनले ऊस अपनाछ, उले उनून परमेश्वरो को संतान हुना को हक दीछ, मतलब जो उमें विश्वास राखनान।</verse>
				<verse number="13">उ नै त ईजा-बबा का इच्छा ले, नै शरीराक इच्छा ले, और नै एक आदिमी संतान प्राप्ती का इच्छा ले, लेकिन परमेश्वर की इच्छा उत्पन्न होईना का छै।</verse>
				<verse number="14">और बचन एक आदिमी बनछै; और अनुग्रह ले और सच्चाई भरिभेरन हमार बीच में डेरा करछ्य, और हमूले उकी इसी महिमा देखछ्य, जसीकैं पिता परमेश्वरा का तरफ भटे आईना का एकलौता च्याला की महिमा।</verse>
				<verse number="15">यहूना ले उक बारिमें गवै दीछ, और धधिया भेरन क्योछ, “यो उई छै, जैका बारिमें मैंले तुमून बताछ, कि जो म्यारा बाद में उनवालो छै, उ सच्ची में मैं है महान छै क्याखिनकि उ मैं है पैलि छ्यो।”</verse>
				<verse number="16">क्याखिनकि उकी दया ले हम सबून भरपूरी ले अनुग्रह में अनुग्रह मिलछ्य।</verse>
				<verse number="17">नियम-कानून त मूसा का द्वारा दीई ग्यान; लेकिन परमेश्वर ले अनुग्रह और सच्चाई यीशु मसीह का द्वारा दीछ।</verse>
				<verse number="18">परमेश्वर स कभै कैले नै देख्यो, केवल उक एकलौता च्याला ले जो वास्तव में परमेश्वर में छै, और पिता का सबून है नजिक छै, उले परमेश्वर स हमून देखाछ।</verse>
				<verse number="19">यहूना की गवै यो छै, कि जब यहूदी अगुवान ले यरूशलम शैहर भटे याजकून और लेवी लोगून उक पास यो पुछून खिन भेजछ्य, कि “तैं को छै?”</verse>
				<verse number="20">तो उले उनून साफ-साफ के दीछ, “मैं मसीह नाहातिनू।”</verse>
				<verse number="21">तब उन लोगून ले उथैं पुछ्छै, “तैं फिर को छै? क्या तैं परमेश्वरो को संदेश दिनवाला एलिय्याह छै?” उले जबाब दीछ, “मैं नाहातिनू।” “तो क्या तैं, जो परमेश्वर ले वादा करिना को छ्यो, उ संदेश दीन वाला छै?” उले जबाब दीछ, “नै।”</verse>
				<verse number="22">तब उनूनले उथैं पुछ्छै, “फिर तैं को छै? ताकि हमून अपून भेजून वाला स जबाब द्यूला। कि तैं अपून बारिमें कि कुँछै?”</verse>
				<verse number="23">तब उले उनूनथैं क्योछ, मैं उई छूँ जैका बारिमें परमेश्वरो को संदेश दिनवाला यशायाह ले कईना को छै, “मैं बिरान जागान में रौलो और लोगून धध्या-धध्याभेरन यो बतालो, ‘कि प्रभु परमेश्वरा का ऊँन खिन तुम तैंयार हो ज्या और उ बाँटान ठीक करा जैमें भटे उ हो भेरन ऊँनवालो छै’।”</verse>
				<verse number="24">उन लोग फरीसी लोगून का तरफ भटे भेजिना का छ्या।</verse>
				<verse number="25">उनूनले उथैं यो सवाल पुछ्छै, “तैं नै मसीह छै, और नै एलिय्याह, और नै उ परमेश्वरो को संदेश दिनवाला छै, तो तैं फिर बपतिस्मा क्याखिन दीछै?”</verse>
				<verse number="26">तब यहूना ले उनून जबाब दीछ, “मैं त पानि ले बपतिस्मा दीछूँ, लेकिन तुमार बीच में एक आदिमी ठाड़ छै, जैस तुम नै जाणना।</verse>
				<verse number="27">मतलब म्यार बाद जो ऊँनवालो छै, मैं इसो लाकारी को ले नाहातिनू कि उको सेवक बनभेरन झुकभेरन उको जूताका खोलि सकू।”</verse>
				<verse number="28">इन बात यरदन नदी पार बैतनिय्याह गौं में भ्यान, जा यहूना लोगून बपितस्मा दीछ्यो।</verse>
				<verse number="29">दुसारा दिना यहूना ले यीशुस अपून तरफ ऊँन देखिभेरन क्योछ, “देखा यो परमेश्वरो को मेम्ना छै, जो संसारा का पापून उठा लिजाछो।</verse>
				<verse number="30">यो उई छै, जैका बारिमें मैंले तुमूनथैं क्योछ, कि एक आदिमी म्यारा बाद उनवालो छै, जो मैं है महान छै, क्याखिनकि उ म्यारा हैं पैलि छ्यो।</verse>
				<verse number="31">मैं ऊस नी पछ्याण छ्यू, कि उ मसीह छै, इस्राएल का लोगून यो बतून खिन कि उको छै, मैं पानि में बपतिस्मा दीनै उन मरयूँ।</verse>
				<verse number="32">और यहूना ले यो गवै दीछ, कि मैंले पवित्र आत्मा स कबूतर का समान आकाश भटे उतरून और उमें बैठून देखछ्य।</verse>
				<verse number="33">और मैं त ऊस नी पछ्याणछूँ, लेकिन जेलै मैंस पानि बपतिस्मा दिन खिन भेजछ्य, उले मैंथै क्योछ, ‘जैमें तैं पवित्र आत्मा स उतरून और बैठून देखले; उई पवित्र आत्मा ले बपतिस्मा दिनवालो छै।’</verse>
				<verse number="34">और मैंले ऊस देख रैछ, और मैं तुमूनथैं सच्ची-सच्ची कुछूँ कि उई परमेश्वरो को च्योलो छै।”</verse>
				<verse number="35">दुसारा दिन फिर यहूना और उक शिष्यून में भटे द्वी जन वाँ ठाड़ छ्या।</verse>
				<verse number="36">तब यहूना ले यीशु वाँ भटे जान देखिभरेन क्योछ, “देखा, यो परमेश्वरो को मेम्ना छै।”</verse>
				<verse number="37">तब उन द्वी शिष्यून ले यहूना की बात सुणिभेरन यीशु का पछिल न्हैजानान।</verse>
				<verse number="38">यीशु ले उनून अपून पछिल उनो देखिभरेन उनूनथैं पुछ्छै, “तुम कैका खोज मैं छा?” उनूले उथैं क्योछ, “गुरू जी तुम काँ रूछा?”</verse>
				<verse number="39">उले उनूनथैं क्योछ, “हिटा, और देखा।” जब उनू उक दगाड़ ग्यान और देखछ्य कि उ काँ रूछो। येक कारण उन उ दिन उक दगाड़ रूकीयान, उ बखत ब्याला लगभग चार बाजीना का छ्या।</verse>
				<verse number="40">उन द्वीवैन में भटे, जो यहूना की बात सुणिभेरन यीशु का पछिल ग्यान, एक शमौन पतरस को भाई अन्द्रियास छ्यो।</verse>
				<verse number="41">उले पैलि अपून सांगो भाई शमौन थैं मिलभेरन उथैं क्योछ, “कि हमून ख्रिस्त मतलब मसीह मिलग्योछ।”</verse>
				<verse number="42">अन्द्रियास अपून भाई शमौन स यीशु का पास लीभेरन आछ, यीशु ले ऊस देखभेरन क्योछ, “तैं यहूना को च्योलो शमौन छै। तैं कैफा, पतरस का नाम ले जाणि जाले।”</verse>
				<verse number="43">दुसारा दिन यीशु ले गलील प्रदेश खिन जाना को फैसला करछ्य, और फिलिप्पुसथैं मिलभेरन क्योछ, “म्यारा शिष्य बनून खिन म्यारा दगाड़ हो ले।”</verse>
				<verse number="44">फिलिप्पुस त अन्द्रियास और पतरस का शैहर बैतसैदा शैहर को रूनवाला छ्या।</verse>
				<verse number="45">फिलिप्पुस ले नतनएल थैं मिलभेरन उथैं क्योछ, हमून उ आदिमी मिलग्योछ, जैका बारिमें मूसा का नियम-कानून में और परमेश्वरो को संदेश दिनवालान ले लिखीना को छ्यो। उ नासरत गौं को यूसुफ को च्योलो यीशु छै।</verse>
				<verse number="46">नतनएल ले उथैं क्योछ, “क्या कोई निकी चीज ले नासरत गौं भटे निकल सकछ्यी?” फिलिप्पुस ले उथैं क्योछ, “जाभेरन देखले।”</verse>
				<verse number="47">यीशु ले नतनएल अपून तरफ आते देखिभेरन उक बारिमें क्योछ, “देखो यो सचमुच इस्राएल को भरोसमंद वंशज छै, जो पुर तरीका ले ईमानदार छै।”</verse>
				<verse number="48">नतनएल ले उथैं क्योछ, “तैं मैंस कसीकैं जाणछ्य?” यीशु ले ऊस जबाब दीछ, “येहैं पैलि कि फिलिप्पुस ले तैंस बुलाछ, जब तैं तिमूला का रूखा तलि बैठि रैछ्य, तब मैंले तैंस देखछ्य।”</verse>
				<verse number="49">तब नतनएल ले ऊस जबाब दीछ, “हे गुरू तैं परमेश्वरो को च्योलो छै; तैं इस्राएल देशो को महाराजा छै।”</verse>
				<verse number="50">यीशु ले ऊस जबाब दीछ, कि “मैंले जो तैंस क्योछ, कि मैले तैंस तिमूला का रूखा ताल बैठिना को देखछ, क्या तैं येक कारण विश्वास करछै? तैं ये है ले ठूल्ला-ठूल्ला काम देखले।”</verse>
				<verse number="51">फिर उले क्योछ, “मैं तुमूनथैं सच्ची-सच्ची कुछूँ कि तुम स्वर्गे स खुलीना को, और परमेश्वरा का स्वर्गदूतून मलि जान और मैं आदिमी का च्याला का मलि में उतरून देखला।”</verse>
			</chapter>
			<chapter number="2">
				<verse number="1">द्वी दिन बाद गलील प्रदेशा का काना शैहर में कैको ब्याह छ्यो, और यीशु की ईजा ले वाँ छी।</verse>
				<verse number="2">और यीशु और उक शिष्य ले उ ब्याह में न्यूत में छ्या।</verse>
				<verse number="3">जब अंगूर को रस खतम हो ग्यो, तैं यीशु का ईजा उथैं क्योछ, “ इनारा पास अंगूरो को रस खतम हो ग्योछ।”</verse>
				<verse number="4">तब यीशु ले उथैं क्योछ, “हे ईजा तैं मैंस किलैं बतून मरेछी? आजि तक म्येरो अपून आपस प्रगट करना को बखत नै आर्यो।”</verse>
				<verse number="5">लेकिन यीशु की ईजा ले काम करून वालान थैं क्योछ, “जैले यीशु तुमूनथैं कूछो ऊसो कर्या।”</verse>
				<verse number="6">यहूदीन को अपून धार्मक का नियम का अनुसार हात धुन को रिवाज छ्यो। इसो करून खिन उनूनले वाँ ढूंगा का मलि में छ: फौला राखिना का छ्या, जिनून में भटे हरेक में सौ लीटर तक पानि भरिजा छ्यो।</verse>
				<verse number="7">यीशु ले उनूनथैं क्योछ, “फौलान पानि ले भर दी।” तब उनूनले उन फौलान में मुँख तक भर दीछ।</verse>
				<verse number="8">तब यीशु ले क्योछ, “अब फौला में भटे पानि निकालभेरन भोज का प्रधान का पास लिजा।” सेवकून ने ऊसोई करछ्य जसो उले उनूथैं करून खिन कईना को छ्यो।</verse>
				<verse number="9">जब भोज का प्रधान ले उ पानि स चाखछै, जो अंगूर को रस बन ग्यो छ्यो और उन नी जाण छ्या, कि यो काँ है आ र्योछ, लेकिन जिन सेवकून ले जो पानि निकालभेरन ल्या रै छ्या, उन जाण छ्या, तैं भोज का प्रधान ले ब्योला स बुलाभेरन, उथैं क्योछ,</verse>
				<verse number="10">“हर एक आदिमी पैलि बड़िया किस्म को अंगूर को रस दीछो, और जब लोग पीभेरन छक हो जानान, तब घटिया किस्मो को रस दीछो; लेकिन तैले ऐल तक बड़िया अंगूरो को रस राख रैछ।”</verse>
				<verse number="11">यीशु ले गलील प्रदेशा का काना शैहर में यो अपूनो पैलो चमत्कार दिखाभेरन अपूनी महिमा प्रगट करछ्य, और उक शिष्यून ले उमें विश्वास करछ्ये, कि सच्ची में योई मसीह छै।</verse>
				<verse number="12">येक बाद उक ईजा और उक भाई और उक शिष्य कफरनहूम गौं खिन ग्यान और थ्वाड़ा दिन वाँ रयान।</verse>
				<verse number="13">यहूदीन को फसह त्यार नजिक छ्यो, और यीशु यरूशलम शैहर खिन ग्यान।</verse>
				<verse number="14">और उले मन्दिर में बल्द, भेड़ और कबूतर बेचन वालान और डबलून बदलून वालान बैठिना को देखछ्य।</verse>
				<verse number="15">तब उले ज्योड़ा को कोड़ो बनाछ, और ले मन्दिर भटे भेड़ून और बल्दून ताड़छ्य, और डबलून बदलून वालान का सिक्का खित दीयान, और तखता पलट दीयान।</verse>
				<verse number="16">और कबूतर बेचून वाला नै थैं क्योछ, “इनून याँ भटे लिजा, और म्यारा पिता का मन्दिर स ब्यापारो को घर जन बना।”</verse>
				<verse number="17">तब यीशु का शिष्यून याद आछ कि “पवित्रशास्त्र में लिखीना को छै, कि त्यारा मन्दिर की चिन्ता म्यारा भितर आगो की नियाती जल रैछ।”</verse>
				<verse number="18">यो बात में यहूदी अगुवान ले उथैं क्योछ, “इन कामून में अपूनो अधिकार साबित करून खिन तुम हमून कि चिन देखा सकछा?”</verse>
				<verse number="19">यीशु ले उनून जबाब दीछ, “यो मन्दिर उधार दी, और मैं येस तीन दिन में बना द्यूलो।”</verse>
				<verse number="20">यहूदी अगुवान ले क्योछ, “यो मन्दिर स बनून में छियालीस साल लाग्यान, और तैं क्या ऊस तीन दिन में दुबारा बना देलैई?”</verse>
				<verse number="21">लेकिन यीशु जै मन्दिरा का बारिमें बोलून मरेछ्यो उ उको शरीर छ्यो।</verse>
				<verse number="22">फिर जब उ मर भेरन ज्यून भ्योछ, तब उक शिष्यून यो बात याद आछ, और तब उनूनले पवित्रशास्त्र और जो बचन यीशु ले कईना का छ्यो, उमें विश्वास करछ्य।</verse>
				<verse number="23">जब उ यरूशलम शैहर में फसह त्यार में छ्यो, तैं भौतून ले उन चिनून में जो उ दिखूछ्यो, उनून देखभेरन लोगून ले उमें विश्वास करछ्य।</verse>
				<verse number="24">लेकिन यीशु ले उनूनमें भरोस नै कर्यो कि उनूनले उमें विश्वास करछ्य, क्याखिनकि उ आदिमीन को स्वभाव स जाण छ्यो।</verse>
				<verse number="25">उनून यो जरूरत नी छी, कि कोई आदिमी का बारिमें बतौ, क्याखिनकि उ जाण छ्यो कि उनार मन में कि छै?</verse>
			</chapter>
			<chapter number="3">
				<verse number="1">नीकुदेमुस नामोको एक आदिमी छ्यो, जो यहूदीन को अगुवान को धार्मिक गुरू छ्यो, उ एक फरीसी आदिमी छ्यो।</verse>
				<verse number="2">उले रात में यीशु का पास आभेरन उथैं क्योछ, “गुरू जी, हम जाणनू, कि परमेश्वर ले तैंस हमून सिखून खिन भेज रैछ। क्याखिनकि कोई ले चमत्कार जो तैं देखूछै, अगर परमेश्वर उक दगाड़ नै हो, त उ नै दिखा सकनो।”</verse>
				<verse number="3">यीशु ले ऊस जबाब दीछ “मैं तुमूनथैं सच्ची-सच्ची कुछूँ, अगर कोई नय्या सिराले जन्म नै तो उ परमेश्वरा का राज्य स देखी नै सकून।”</verse>
				<verse number="4">नीकुदेमुस ले उथैं क्योछ, “आदिमी जब बढ़ो है जाछो, त कसीकैं जन्म ली सकछो? लेकिन यो बात ले सच्ची छै कि कोई आदिमी दुसरी बार जन्म लीन खिन अपून ईजा का गर्भ में वापस नै जा सकूनो।”</verse>
				<verse number="5">यीशु ले ऊस जबाब दीछ, “मैं तैंथैं सच्ची-सच्ची कुछूँ, जब तक कोई ले आदिमी पानि और आत्मा पवित्र ले जन्म नी ल्योलो, तब तलक उ परमेश्वरा का राज्य में नै जा सकूनो।</verse>
				<verse number="6">आदिमी केवल आदिमी स जन्म दीछो, येक कारण उ शरीर छै, लेकिन जो लोग पवित्र आत्मा का द्वारा जन्म लीनान, उन परमेश्वर है नय्या जीवन पानान।</verse>
				<verse number="7">ताजुब जन कर, कि मैले तैथैं क्योछ, ‘तुमून दुबारा जन्म लीनो जरूरी छै।’</verse>
				<verse number="8">हवा जै तरफ चलछी उई तरफ चलछी, और तैं उकी आवाज सुणछै, लेकिन नै जाणनै, कि हवा काँ भटे उनमरैछ और काँ खिन जानमरैछ? जो कोई पवित्र आत्मा भटे जन्म लीछो, उ इसो हुछो।”</verse>
				<verse number="9">नीकुदेमुस ले ऊस जबाब दीछ, कि “यो बात कसीकैं हो सकछी?”</verse>
				<verse number="10">यो बात सुणिभेरन यीशु ले ऊस जबाब दीछ, “तैं इस्राएल में एक महान गुरू छै। तैंस वास्तव में इन बातुन समझून चैछो।</verse>
				<verse number="11">मैं तैथैं सच्ची-सच्ची कुछूँ कि हम जो जाणनू, उ कुनू, और जैस हमून ले देखछ्य उकी गवै दीनू, लेकिन हम जो कुनू, तुम उमें विश्वास नै करना।</verse>
				<verse number="12">जब मैंले तुमूनथैं संसार में जो कुछ हुछो उक बारिमें बातछ, और तुम विश्वास नै करना, त अगर मैं तुमूनथैं स्वर्ग में की होलो उक का बारिमें बतुलो, त फिर कसीकैं विश्वास करला?</verse>
				<verse number="13">और कोई ले स्वर्ग में नै ग्यो, लेकिन केवल मैं आदिमी का च्योलो स्वर्ग भटे तलि आरयूँ।”</verse>
				<verse number="14">और जस तरीका ले मूसा ले बिरान जागा में स्याँप स ऊचां में चढ़ाछ, उसीकैं जरूरी छै कि मैं आदिमी का च्याला स लै ऊच्चां में चढ़ाई जालो।</verse>
				<verse number="15">ताकि जो कोई ले मैंमें विश्वास करोलो उ अनन्त जीवन पालो।</verse>
				<verse number="16">“क्याखिनकि परमेश्वर ले यो संसार का लोगून खिन इदुक प्रेम राखछ्य कि उले अपूनो एकलौतो च्योलो दी दीछ, ताकि जो कोई ले उमें विश्वास करोलो उ नाश नी हो, लेकिन अनन्त जीवन पालो।</verse>
				<verse number="17">क्याखिनकि परमेश्वर ले अपून च्याला स संसारा का लोगून में दंड दिन खिन नै भेजियो, लेकिन येक कारण भेजिछै कि संसार का लोग उक द्वारा उद्धार पान।</verse>
				<verse number="18">जो मैंमें विश्वास करछो उमें दंड आज्ञा नै हुनी, लेकिन जो मैंमें विश्वास नै करून, उ दोषी ठैराई जा चुक ग्योछ, येक कारण कि मैंमें मतलब परमेश्वरा का एकलौता च्याला का नाम में विश्वास नै कर्यो।</verse>
				<verse number="19">और दंड की आज्ञा को कारण यो छै कि उज्यालो संसार में आछै, और लोगून ले अन्यारो स उज्याल है ज्यादा निको मानछै क्याखिनकि उनार काम बुर छ्या।</verse>
				<verse number="20">क्याखिनकि जो बुराई करछ्यो, उ उज्याल है बैर राखछो, और उज्याल में उछो, इसो नै हो कि उक कामून में दोष लगाई जौ।</verse>
				<verse number="21">लेकिन जो सच्चाई में चलछो उ उज्याला में उछो, जैले यो प्रगट हो कि उक काम परमेश्वरा का तरफ भटे करि ग्यान।”</verse>
				<verse number="22">येका बाद यीशु और उक शिष्य यहूदिया प्रदेश में आयान; और वाँ उनार दगाड़ रैभेरन बपतिस्मा दीन लागछै।</verse>
				<verse number="23">और यहूना ले सामरिया प्रदेशा का शालेम शैहरा का नजिक ऐनोन गौं में बपतिस्मा दीछ्यो, क्याखिनकि वाँ भौत पानि छ्यो, और लोग आभेरन बपतिस्मा लीछ्या।</verse>
				<verse number="24">क्याखिनकि यहूना उ बखत तक जेल खान में नी डाली गैछ्यो।</verse>
				<verse number="25">वाँ यहूना का शिष्यून कैको कोई यहूदी अगुवा का दगाड़ हात धुना का रिवाजून का हिसाब ले शुद्धिकरण का बारिमें बहस भैछ।</verse>
				<verse number="26">और यहूना शिष्यून ले उक पास आभेरन उथैं क्योछ, “हे गुरू जी, जो आदिमी यरदन नदी का पूरब दिशा में त्यारा दगाड़ छ्यो, और जैका बारिमें तुम गवै दिन मरेछ्या, उको छ्यो, देख उ बपतिस्मा दीछो, और सबै लोग उक पास उनान।”</verse>
				<verse number="27">यहूना ले जबाब दीछ, “जब तलक आदिमी स स्वर्ग भटे नै दीई जानो तब तलक उ कै नै पा सकूनो।</verse>
				<verse number="28">तुम त खुद म्यारा गवै छा, कि मैं मसीह नाहातिनू, लेकिन उक पैलि यो संसार में भेजि गयूँ।</verse>
				<verse number="29">ब्योलो-ब्योलि का दगाड़ ब्या कर लीछो, लेकिन ब्योला को मित्र ठाड़ हो भेरन उकी सुणछो, और ब्योला की आवाज सुणभेरन खुश हुछो, उसीकैं म्येरो दिल ले खुशी ले भर ग्योछ।</verse>
				<verse number="30">जरूर छै कि उ बढ़नै जौ और मैं घटनै जू।</verse>
				<verse number="31">जो स्वर्ग भटे ऊँछो उ सबून है महान छै, धरती भटे ऊँछो उ धरती को छै; और उ संसारे की बात कुंछो: और जो स्वर्ग भटे ऊँछो उ सबून है मलि छै।</verse>
				<verse number="32">जो कुछ उले देखछ, और सुणछ, उक बारिमें कुंछो, लेकिन भौत कम लोगून ले उ संदेश ग्रहण करछ्य।</verse>
				<verse number="33">लेकिन जैले उक संदेश ग्रहण कर लीछ उले यो बात स साबित कर दीछ की परमेश्वर सच्चो छै।</verse>
				<verse number="34">क्याखिनकि जैस परमेश्वर ले भेज रैछ, उ परमेश्वर की बातुन करछो। क्याखिनकि यो उई जैस परमेश्वर ले पवित्र आत्मा भरपूरी ले दीछो।</verse>
				<verse number="35">पिता परमेश्वर च्याला का दगाड़ प्रेम राखछो, और उले सब चीज उक हात में दी दीछ।</verse>
				<verse number="36">जो परमेश्वर में विश्वास करछो, अनन्त जीवन उको छै, लेकिन जो च्याला स नै माननो, उ अनन्त जीवन स नै देख सकूनो, लेकिन परमेश्वरो को दण्ड उमें रूछो।”</verse>
			</chapter>
			<chapter number="4">
				<verse number="1">फिर जब प्रभु स पत्तो चलछै, कि फरीसी लोगून ले सुण रैछ, कि यीशु यहूना है ज्यादा शिष्य बनूछो, और उनून बपतिस्मा दीछ।</verse>
				<verse number="2">लेकिन यीशु बपतिस्मा नी दीछ्यो उक शिष्य बपतिस्मा दीछ्या,</verse>
				<verse number="3">तब उ यहूदिया प्रदेश स छोड़भेरन अपून शिष्यून का दगाड़ गलील प्रदेश खिन ग्यान।</verse>
				<verse number="4">और ऊस सामरिया प्रदेश भटे जानो जरूर छ्यो, क्याखिनकि परमेश्वर ले योई चाँछ्यो।</verse>
				<verse number="5">येक कारण उ सामरिया प्रदेशा का सूखार नामाका एक शैहर तक आछ, जो उ जाग का पास छै जो याकूब ले अपून च्योलो यूसुफ स दीईना को छ्यो।</verse>
				<verse number="6">और याकूब ले जो कुआँ खोदीना को छ्यो। उ कुआँ ले उई बाटा में छ्यो, तो यीशु थक भेरन उ कुआँ पास बैठग्यो। और यो बात छकाला बखत की छी।</verse>
				<verse number="7">इदुक में एक सामरी स्यैनि मैंस पानि भरून खिन कुआँ पास आछ। यीशु ले उथैं क्योछ, “मैंस पानि पिन खिन दी।”</verse>
				<verse number="8">क्याखिनकि उक शिष्य नगर में खानो मोल लीन खिन जाईना का छ्या।</verse>
				<verse number="9">उ सामरी स्यैनि ले यीशु थैं क्योछ, “तैं एक यहूदी छै, और मैं एक सामरी स्यैनि छूँ। तैं मैंथैं क्याखिन पानि माँगून मरैछै?” क्याखिनकि यहूदी लोग सामरी लोगून का दगाड़ के प्रकार को सम्बन्ध नी राखछ्या।</verse>
				<verse number="10">यीशु ले ऊस जबाब दीछ, “तैं नै जाणनी की परमेश्वर तैंस की दीनो चाछो, और तैं यो ले नै जाणनी कि को तैथैं पानि माँगून मरियोछ। अगर तैं जाणनी तैं मैंथैं माँगनी और मैं तैंस जीवन को पानि दीनू जो जीवन दीछ्यो।”</verse>
				<verse number="11">स्यैनि ले उथैं क्योछ, “हे प्रभु, त्यारा पास पानि भरून खिन केले नाहातिन, और कुआँ भौत गैरो छै; तो फिर उ जीवन को पानि त्यारा पास काँ है आछ?</verse>
				<verse number="12">क्या तैं हमार पूर्वज याकूब है ले ठूलो छै? जेलै हमून खिन यो कुआँ खोद भेरन बनाछ; और उ और उक संतान और उनार गोरू-बाच्छा ले योई कुआँ भटे पानि पीछ्या।”</verse>
				<verse number="13">यीशु ले ऊस जबाब दीछ, जो कोई ले यो पानि स पियोलो ऊस फिर प्यास होलि।</verse>
				<verse number="14">लेकिन जो कोई उ पानि में भटे पियोलो जो मैं ऊस द्यूलो, ऊस फिर कभै प्यास नी हो लेकिन जो पानि मैं ऊस द्यूलो उ उमें भटे एक पानि को स्रोत बनि जालो जो अनन्त जीवन खिन पानि दीनै रौलो।</verse>
				<verse number="15">स्यैनि ले यीशु थैं क्योछ, “हे प्रभु, उ पानि स मैंस ले दे ताकि मैले प्यासी नै रून और पानि भरून खिन बार-बार उनाकी जरूरत नी पड़ो।”</verse>
				<verse number="16">यीशु ले उथैं क्योछ, “जा अपून घरवाला स याँ बुला लियौ।”</verse>
				<verse number="17">स्यैनि ले जबाब दीछै, “ म्येरो घरवालो नाहातिन।” यीशु ले उथैं क्योछ, “तैं ठीक कुछी, कि तेरो घरवालो नाहातिन।</verse>
				<verse number="18">क्याखिनकि तैं पाँच आदिमीन छोड़ चुकगेछी, और जैका पास तैं आजकल रूछी उले तेरो घरवालो नाहातिन। यो तैले सच्ची क्योछ।”</verse>
				<verse number="19">स्यैनि ले उथैं क्योछ, “हे प्रभु, मैंस लागछो कि तैं परमेश्वरो को संदेश दिनवाला छै।</verse>
				<verse number="20">हमार पूर्वज योई डाणा में अराधना करछ्या, और तुम यहूदी लोग कुँछा कि उ जाग जाँ अराधना करूँ चैछी उ यरूशलम शैहर छै।”</verse>
				<verse number="21">यीशु ले उथैं क्योछ, “हे नारी, मेरि बात को विश्वास कर कि उ बखत उछो कि नै तैं यो डाणा में पिता परमेश्वर की अराधना कर सकला, नै यरूशलम शैहर में।</verse>
				<verse number="22">तुम सामरी लोग नै जाणना, उको अराधना करछा; और हम यहूदी लोग जैस जाणनू उको अराधना करनू; क्याखिनकि लोगून को उद्धार करून वालो यहूदीन में भटे आलो।</verse>
				<verse number="23">लेकिन उ बखत उछो, और आग्योछ कि जब सच्चा भक्त पिता परमेश्वर की अराधना आत्मा और सच्चाई ले कराला, क्याखिनकि पिता अपून खिन इसा अराधना करून वालान खोजछो।</verse>
				<verse number="24">परमेश्वर आत्मा छै, येक कारण उकी अराधना करूनवाला आत्मा और सच्चाई ले अराधना करून।”</verse>
				<verse number="25">स्यैनि ले उथैं क्योछ, “मैं जाणछूँ कि मसीह जो ख्रिस्त कहलूछो, उनवालो छै; जब उ आलो तब हमून सब बातुन बता द्योलो।”</verse>
				<verse number="26">यीशु ले उथैं क्योछ, “मैं जो तैथैं बोलून मरयूँ, उई छूँ।”</verse>
				<verse number="27">इदुक में यीशु का शिष्य आग्या, और ताजुब करून लाग्यान कि उ स्यैनि का दगाड़ बात करून मरियोछ; फिरले कैले उथैं कै नै क्यो, कि “तैं कि चाँछै?” या “क्याखिन उक दगाड़ बात करून मरछ्य?”</verse>
				<verse number="28">तब स्यैनि अपूनी फूंलौ छोड़ी भेरन नगर खिन न्हैजाछी और लोगूनथै कुन लागछ्य।</verse>
				<verse number="29">“हिटा, एक आदिमी स देखा, जेलै म्यारा बारिमें जो मैंले करिना को छ्यो मैंस सब सही बाता दीछ। काँई योई त मसीह त नाहतिनी?”</verse>
				<verse number="30">तो उन लोग अपून घरून भटे निकल भेरन यीशुस देखन खिन पास ऊँन लाग्यान।</verse>
				<verse number="31">इदुक में उक शिष्यून ले यीशु थैं बिनती करून लाग्यान, कि “गुरू जी खान खिन खा ली।”</verse>
				<verse number="32">लेकिन उले उनूनथैं क्योछ, “ खान खिन म्यारा पास इसो खानो छै जैका बारिमें तुम नै जाणना।”</verse>
				<verse number="33">तब शिष्य आपस में कुन लाग्यान, “क्या कोई उ खिन खान ल्याछी?”</verse>
				<verse number="34">यीशु ले उनूनथैं क्योछ, “म्येरो खानो परमेश्वर की इच्छा का पालन करछो जैले मैंस भेज रैछ, और उक काम स पुरो करून छै जो उले मैंस सौंप रैछ।</verse>
				<verse number="35">तुमी कुँछा, ‘कटनी हुन में आजि ले चार मैंना छन?’ देखा, मैं तुमूनथैं कुछूँ, अपून आँखान खोला और ऊँन वाला लोगून देखा। उन एक गाड़ा की नियाती छन जो काटून खिन तैंयार छन।</verse>
				<verse number="36">काटून वालो अपूनी मजूरी पाभेरन अनन्त जीवन खिन फसल जाम करूनमर्योछ, कि काटून वालो और बुनवालो द्वीवै मिलभेरन खुशी मनून।</verse>
				<verse number="37">क्याखिनकि येमें यो कहावत ठीक बैठछी; ‘बुनवालो कोई छै और कटून वालो कोई छै।’</verse>
				<verse number="38">मैले तुमून एक गड़ो कटून खिन भेजछ्य जैमें तुमून ले मेहनत नै करि, औरून ले मेहनत करछ्य तुम उ फल जाम करला जै खिन उनूनले मेहनत करछै।”</verse>
				<verse number="39">और उ नगरा का भौत सामरी लोगून ले उ स्यैनि का कुनाले यीशु में विश्वास करछ्य; जैले यो कईना छ्यो, कि उले सब कुछ जो मैंले कर रैछ, मैंस बता दीछ।</verse>
				<verse number="40">तब जब उन सामरी लोग यीशुका पास आयान, तब उनूनले उथैं बिनती करून लाग्यान कि तुम हमार याँ रूका, और उ वाँ द्वी दिन तक रियोछ।</verse>
				<verse number="41">और उक उपदेशा का कारण और ले भौत लोगून ले यीशु में विश्वास करछ्य।</verse>
				<verse number="42">और उ स्यैनि थैं क्योछ, “अब हम त्यारा कुनाले विश्वास नै करना; क्याखिनकि हमून ले खुद सुण हालछ्य, और जाणनू कि योई सच्ची में संसार को मुक्तिदाता छै।”</verse>
				<verse number="43">फिर द्वी दिनून का बाद उ वाँ भटे निकल भेरन गलील प्रदेश खिन ग्योछ।</verse>
				<verse number="44">क्याखिनकि यीशु ले खुद कै राख छ्यो कि परमेश्वरो को संदेश दिनवाला अपून देश में आदर नै पानो।</verse>
				<verse number="45">जब उ गलील प्रदेश में आछ, त गलीली लोगून ले उको स्वागत करछ्य; क्याखिनकि उनूनले सब कुछ देखीना को छ्यो जदुक काम उले यरूशलम शैहर में पर्व का बखत करिना का छ्या, क्याखिनकि उन सब लोग ले त्यार में जाईना का छ्या।</verse>
				<verse number="46">तब उ फिर गलील प्रदेशा का काना शैहर में आछ, जाँ उले पानि स अंगूर को रस बनाछ, और वाँ का राजा को एक अधिकारी छ्यो जैको को च्योलो कफरनहूम गौं में बिमार छ्यो।</verse>
				<verse number="47">यो सुणिभेरन कि यीशु यहूदिया प्रदेश भटे गलील प्रदेश में आ र्योछ, उक पास जाभेरन बिनती करून लागछो कि म्यारा घर हिट और म्यारा च्याला स चंगो कर दे क्याखिनकि उ मरन्या छै।</verse>
				<verse number="48">यीशु ले उथैं क्योछ, “जब तक तुम लोग चिन-चमत्कार नी देखाला तब तक कभै तुम मैंमें विश्वास नी करा।”</verse>
				<verse number="49">राजा का अधिकारी ले उथैं क्योछ, “हे प्रभु, म्यारा च्याला का मरना है पैलि हिट।”</verse>
				<verse number="50">यीशु ले उथैं क्योछ, “जा, तेरो च्योलो ज्यूनो छै।” उले आदिमी यीशु का कईना की बात में विश्वास करछ्य और न्हैग्यो।</verse>
				<verse number="51">जब उ बाट में छ्यो, त उक सेवक उथैं आभेरन मिल्यान और कुंनान, “तेरो च्योलो ज्यूनो छै।”</verse>
				<verse number="52">उले उनूनथैं पुछ्छै, “के बखत उ ठीक हुन लागछै?” उनूनले उथैं क्योछ, “कल छकाल दिन में एक बजे उको बुखार ठीक हो ग्यो छ्यो।”</verse>
				<verse number="53">तब बाब जाणि ग्यो कि यो उई बखत भ्योछ जंजै यीशु ले उथैं क्योछ, “तेरो च्योलो ज्यूनो छै,” और उले और उक पुर परिवार ले उमें विश्वास करछ्य।</verse>
				<verse number="54">यो यीशु को दुसोरो चमत्कार छ्यो जो यीशु ले यहूदिया प्रदेश भटे आभेरन गलील प्रदेश में वापस आभेरन करछ्य।</verse>
			</chapter>
			<chapter number="5">
				<verse number="1">इन बातुन का बाद यहूदीन को एक त्यार भ्योछ, और यीशु यरूशलम शैहर खिन ग्यान।</verse>
				<verse number="2">और यरूशलम शैहर में भेड़-फाटका पास एक ताल छ्यो जैस इब्रानी भाषा में बैतहसदा कुंनान, और उक चारू तरफ पाँच बरामदा छ्या।</verse>
				<verse number="3">इनून में भौतसा बिमार अन्धा, लंगड़ा, और लकवा का रोगी पानि का हिलनाका इन्तजार में पड़ीना का रूछ्या।</verse>
				<verse number="4">क्याखिनकि खास बखत में परमेश्वरो को स्वर्गदूत ताल में उतर भेरन पानि स हिलूछ्यो। पानि का हिलाई जाना का बाद, जो कोई पैलि उतर जा छ्यो, उ चंगो हो जा छ्यो, चाहे कसी ले बिमारी क्याखिन नै हो।</verse>
				<verse number="5">वाँ एक आदिमी छ्यो, जो अड़तीस सालून भटे बिमारी में पड़ीनाको छ्यो।</verse>
				<verse number="6">यीशु ले ऊस पड़ीनाको देखिभेरन और यो जाणिभेरन कि उ भौत दिनून भटे इसा हालत में छै, तब यीशु ले उथैं पुछ्छै, “क्या तैं चंगो हुन चाछैई?”</verse>
				<verse number="7">तब उ बिमारी ले ऊस जबाब दीछ, “हे प्रभु, म्यारा दगाड़ में कोई नाहातिन, कि जब पानि हिलाई जाछो, त ताल का पास लीजान खिन कोई ले मेरि मद्दत नै करूनो, मैं त ताल में जानान की कोशिश करछूँ, लेकिन कोई दुसोरो म्यारा है पैलि वाँ पुज जाछो।”</verse>
				<verse number="8">यीशु ले उथैं क्योछ, “उठ, अपूनो बिछान उठौ और चल फिर।”</verse>
				<verse number="9">उ आदिमी तुरन्त चंगो हो ग्यो, और अपूनी बिछान उठाभेरन चलून फिरून लागछ्य। जै दिना यो भ्योछ उ सबत को दिन छ्यो।</verse>
				<verse number="10">यो बात में यहूदी अगुवा जो चंगा होईना को छ्यो, “आज सबता का दिन छै, और मूसा का नियम-कानून का अनुसार तैंस बिछान उठाभेरन लीजानो ठीक नाहातिन।”</verse>
				<verse number="11">उले उनून जबाब दीछ, “जेलै मैंस चंगो करछ्य, उलेई मैंथैं क्योछ, ‘अपूनो बिछान उठाभेरन चल फिर’।”</verse>
				<verse number="12">उनूनले उथैं पुछ्छै, “उ आदिमी को छै, जेलै तैथैं क्योछ, ‘बिछान उठाभेरन चल फिर’?”</verse>
				<verse number="13">लेकिन जो चंगो हो ग्यो छ्यो, उ नी जाण छ्यो कि उको छ्यो; क्याखिनकि यीशु उ जाग में ज्यादा भीड़ हुना का कारण यीशु दिखाई नी दिन मरेछ्या।</verse>
				<verse number="14">थ्वाड़ा बखत का बाद उ यीशु स मन्दिर का आँगन में मिलछ्य, तब यीशु ले उथैं क्योछ, “देख, तैं अब चंगो हो ग्योछ; फिर पाप जन करे, काँई इसो नै हो कि यो भटे ले भारी बिपत्ति तैंमें आ पड़ो।”</verse>
				<verse number="15">उ आदिमी ले जाभेरन यहूदी अगुवान थैं कै दीछ, कि जेलै मैंस चंगो करछ्य, उ यीशु छै।</verse>
				<verse number="16">येक कारण यहूदी अगुवा यीशुस सतून लाग्यान, क्याखिनकि यीशु इसा-इसा काम सबता का दिन करछ्यो।</verse>
				<verse number="17">यो बात में यीशु ले उनूनथैं क्योछ, “म्येरो पिता परमेश्वर हमेशा काम करछ्यो और मैंस ले काम करूँ चैछो।”</verse>
				<verse number="18">क्याखिनकि यीशु की यो बात सुणभेरन यहूदी अगुवा ऊस मारना की और ज्यादा कोशिश करून लाग्यान, कि नै केवल सबता का दिन की नियम तोड़छो, बल्कि परमेश्वर स अपूनी पिता कैभेरन, अपूनास परमेश्वरा का बराबर बनू छ्यो।</verse>
				<verse number="19">यो बात में यीशु ले उनूनथैं क्योछ, “मैं तुमूनथैं सच्ची-सच्ची कुछूँ, मैं खुद के नै कर सकनू, केवल मैं जो पिता परमेश्वर करून देखछूँ, क्याखिनकि जिन-जिन कामून उ करछ्यो, मैंले उनून उई तरीका ले करछूँ।</verse>
				<verse number="20">येक कारण पिता परमेश्वर मैंस प्रेम करछो, और जो-जो काम उ करछो, उ काम मैंस दिखूछो; और मैंले येहैं ले ठूला काम ऊस दिखालो, ताकि तुम ताजुब करा।</verse>
				<verse number="21">क्याखिनकि जसकैं पिता परमेश्वर मरिना का लोगून फिर ज्यूनो करछो, उसीकैं मैंले जिनून चांछूँ, उनून फिर ज्यून करछूँ।</verse>
				<verse number="22">क्याखिनकि जसा तरीका ले लोग पिता परमेश्वरो को आदर करनान, उसीकैं म्येरो मतलब च्याला को ले आदर करून, पिता परमेश्वर ले मैंस न्याय करनान को पुरो अधिकार दी रैछ। अगर कोई म्येरो आदर नै करूनो, त उ पिता परमेश्वरो को ले आदर नै करूनो, जैले मैंस भेज रैछ।</verse>
				<verse number="23"></verse>
				<verse number="24">मैं तुमूनथैं सच्ची-सच्ची कुछूँ, जो म्येरो बचन सुणिभेरन म्यारा भेजून वाला में विश्वास करछो, अनन्त जीवन उको छै, और ऊस दंड नी दी जालो, लेकिन उन हमेशा की मौत भटे बच ग्यान और पैलि भटे नय्या जीवन में प्रवेश कर चुक ग्यान।</verse>
				<verse number="25">मैं तुमूनथैं सच्ची-सच्ची कुछूँ, उ बखत उछो, और ऐल छै, जैमें मरिनाका लोग परमेश्वरा का च्याला की मतलब मेरि आवाज सुणाला, और जो सुणाला उन हमेशा खिन ज्यून रौला।</verse>
				<verse number="26">क्याखिनकि जसा तरीका ले पिता परमेश्वर अपून आप में जीवन राखछ्यो, उसीकैं उले मैंस यो अधिकार दी रैछ कि अपून आप में जीवन राखूँ।</verse>
				<verse number="27">मैं आदिमी का च्योलो छूँ, येक कारण पिता परमेश्वर ले मैंस सब लोगून को न्याय करना को अधिकार दी रैछ।</verse>
				<verse number="28">येमें ताजुब जन करा; क्याखिन उ बखत ऊँनवालो छै, कि मरिनाका लोग जो कबरून में छन, उन सब मेरि आवाज सुणिभेरन ज्यून हो भेरन ठाड़ हो जाला।</verse>
				<verse number="29">जिनूनले भलाई काम करिना का छन, उन अनन्त जीवन पान खिन ज्यून होला, और जिनूनले बुर काम करिना का छन, उन दण्ड पान खिन ज्यून होला।</verse>
				<verse number="30">मैं खुद के नै कर सकनू; मैं लोगून को न्याय उसीकैं करछूँ जसीकैं पिता परमेश्वर उनोरो न्याय करून खिन कुंछो, और म्येरो न्याय सच्चो छै; क्याखिनकि मैं अपून मरजी ले नै, लेकिन अपून भेजून वाला की मरजी ले करछूँ।</verse>
				<verse number="31">अगर मैं अपूनी गवै अफी दी छूँ; तो मेरि गवै सच्ची नै हो सकनी।</verse>
				<verse number="32">एक और छै जो म्येरो पिता परमेश्वर छै, उ म्यारा बारिमें गवै दीछो, और मैं जाणछूँ कि मेरि जो गवै दीछो, उ सच्ची छै।</verse>
				<verse number="33">जब तुमून ले लोगून यहूना बपतिस्मा दिनवाला का पास म्यारा बारिमें पुछून खिन भेजछ्य, और उले सच्च की गवै दीछ।</verse>
				<verse number="34">लेकिन मैं अपून बारिमें आदिमीन की गवै नै चानू; फिरले मैंले गवै का बारिमें बताछै जो यहूना ले दीईना की छी ताकि तुम उद्धार पा सका।</verse>
				<verse number="35">यहूना एक दीया की नियाती जलछो और चमक छ्यो; और तुमून थ्वाड़ देर तक उक उज्याला में मगन हुन निको लागछ्य।</verse>
				<verse number="36">म्‍यारा पास यहूना है ठूली गवै छै, पिता परमेश्वर ले मैंस पुरो करनै खिन दी रैछ, उई म्यारा बारिमें गवै दीछो। जो काम मैं करछूँ, उ गवै दीछो कि पिता परमेश्वर ले मैंस भेज रैछ।</verse>
				<verse number="37">और पिता परमेश्वर जेलै मैंस भेज रैछ, उले मेरि गवै दी रैछ, तुमूले नै कभै उकी आवाज सुणछै और नै कभै ऊस आमने-सामने देखछै।</verse>
				<verse number="38">और उक संदेशून मन में मजबूती ले नै राखना, क्याखिनकि तुम मैंमें विश्वास नै करना, जैस परमेश्वर ले भेज रैछ।</verse>
				<verse number="39">तुम पवित्रशास्त्र का बचन ध्यान ले पढ़भेरन खोज छा, क्याखिनकि समझछा की उमें अनन्त जीवन मिलछो, और यो उई बचन छै, जो मेरि गवै दीछो;</verse>
				<verse number="40">लेकिन यो सब हुनै पर ले तुम अनन्त जीवन पान खिन म्यारा पास ऊँन नै चाँना।</verse>
				<verse number="41">मैं आदिमीन थैं आदर उमीद नै करनू।</verse>
				<verse number="42">क्याखिनकि मैं तुमून जाणछूँ, कि तुम अपून मन ले परमेश्वर स प्रेम नै करना।</verse>
				<verse number="43">मैं अपून पिता परमेश्वरा का अधिकार का दगाड़ आरयूँ, और तुम मैंस स्वीकार नै करना, और कोई अपून अधिकार ले आलो त ऊस स्वीकार कर लीछा।</verse>
				<verse number="44">तुम मैंमें विश्वास नै कर सकना, क्याखिनकि तुम एक दुसरा स खुश करून चाछा, और तुम सच्चा परमेश्वर भटे तारीफ पाना की कोशिश नै करना।</verse>
				<verse number="45">यो नै समझा कि मैं पिता परमेश्वरा का सामुनि तुमून में दोष लगूलो, तुमून में दोष लगून वालो त मूसा छै, जैमें तुम आश राखछ्या।</verse>
				<verse number="46">क्याखिनकि अगर तुम मूसा को विश्वास करना, त मैंमें ले विश्वास करना, येक कारण कि उले म्यारा बारिमें पवित्रशास्त्र का लेखून में लिख रैछ।</verse>
				<verse number="47">अगर तुम उकी लेखून में विश्वास नै करना, त तुम जरूर यो बातुन में ले विश्वास करना कि मैं कि कुंछूँ।”</verse>
			</chapter>
			<chapter number="6">
				<verse number="1">इन बातुन बाद यीशु गलील प्रदेशा की झील मतलब तिबिरियास का झील का पार ग्यो।</verse>
				<verse number="2">और भौत ठूली भीड़ उक पछिल चल पड़छी, क्याखिनकि जो चमत्कारा काम उ बिमारून में दिखूछ्यो उन उनुस देखछ्या।</verse>
				<verse number="3">तब यीशु डाणा में जाभेरन अपून शिष्यून का दगाड़ वाँ बैठि ग्यो।</verse>
				<verse number="4">और यहूदीन को फसह त्यार नजिक छ्यो।</verse>
				<verse number="5">तब यीशु ले भौत भीड़ अपून तरफ उन देखछ्य, त फिलिप्पुस ले क्योछ, “हम इनून खिन काँ है खान खिन मोल लियूनू?”</verse>
				<verse number="6">लेकिन यो बात उले ऊस परखून खिन क्योछ, क्याखिनकि उ खुद जाण छ्यो कि उ कि करोलो।</verse>
				<verse number="7">फिलिप्पुस ले उथैं क्योछ, कि “इदुक रोटान की कीमत द्वी सौ दिन का मजूरी बराबर होलि, और इदुक में ले उनून खिन पुर नी हुन लेकिन थ्वाड़ा-थ्वाड़ा सबून मिली ज्यालो।”</verse>
				<verse number="8">उक शिष्यून में भटे शमौन पतरस को भाई अन्द्रियास ले उथैं क्योछ,</verse>
				<verse number="9">“याँ एक लड़का छै, जैथैं पास पाँच रोटा और द्वी माँछा छन, लेकिन येले इदुक लोगून खिन उले कि होलो।”</verse>
				<verse number="10">यीशु ले क्योछ, “लोगून बैठा दी।” उ जाग में भौत घास छी, तब उन लोग जिनून में बैगमैंसून की संख्या लगभग पाँच हजार छी, उन बैठग्या।</verse>
				<verse number="11">तब यीशु ले रोटान अपून हातून में लियान, और परमेश्वरो को धन्यवाद करभेरन, बैठिना का लोगून में बाड़ी दीयान; उसीकैं माछान ले जदुक उन चाँछ्या बाड़ दीयान। करछ्य।</verse>
				<verse number="12">जब सब लोगून ले पेट भर भेरन खान खिन खा लीछ, तब यीशु ले अपून शिष्यून थैं क्योछ, “बचिना का रोटान का टुकुड़ान जाम कर ली, कि कुछ ले बरबाद नै करि जौ।”</verse>
				<verse number="13">त शिष्यून ले उन बचिना का टुकुड़ान जाम करछ्य, जो कि पाँच रोटान में भटे बचिना का छ्या, जिनूनले बारा टोकरी भर भेरन जाम कर्यान।</verse>
				<verse number="14">तब जो चमत्कार उले करभेरन देखाछ ऊस उ लोग देखभेरन कुन लाग्यान; कि “यो सच्ची में परमेश्वरो को संदेश दिनवाला छै, संसार में ऊँनवालो छ्यो।”</verse>
				<verse number="15">यीशु स पत्तो लागछै कि इन लोग मैंस राजा बनून खिन पकड़ून चाँनान, तब उ एकलो डाणान का तरफ न्हैग्या।</verse>
				<verse number="16">फिर जब ब्याल भैछ, त उक शिष्य झील किनार ग्यान।</verse>
				<verse number="17">और नाव में बैठभेरन झील का पार कफरनहूम गौं खिन जान लागनान, उ बखत अन्यारो है ग्योछ, और यीशु ऐल तक उनार पास नी आ रैछ्यो।</verse>
				<verse number="18">और तेज आँधी तूफान का कारण झील में लहर उठून लाग्यान।</verse>
				<verse number="19">जब उन लोग नाऊ स चलाभेरन पाँच-छ: किलोमीटर अघिल न्हैजानान, त उनूनले यीशुस झील में हिटनै नाव का नजिक ऊँनो देखछ्य, और शिष्य डर ग्या।</verse>
				<verse number="20">लेकिन यीशु ले उनूनथैं क्योछ, “मैं छूँ; डरा जन।”</verse>
				<verse number="21">तब शिष्य यीशुस नाव में चढ़ून खिन तैंयार भ्यान, और तुरन्त उ नाव उ जाग में पुज जाछी जा उनूले जानमरेछ्यो।</verse>
				<verse number="22">जो लोगून की भीड़ झील पार रै गैछी, दुसारा दिन उ भीड़ ले देखछ्य कि वाँ एक नाव छोड़भेरन और कोई नानि नाव छी, और यीशु अपून शिष्यनू का दगाड़ उ नाव में नै ग्यो, लेकिन केवल उक शिष्य नाव में ग्यान।</verse>
				<verse number="23">तब और ले नाऊन तिबिरियास शैहर भटे उ जाग में आयान, जा उनूनले प्रभु को धन्यवाद करिना का बाद रवाटा खाईनाका छ्या।</verse>
				<verse number="24">जब भीड़ का लोगून ले देखछ्य, कि याँ नै यीशु छै, और नै उक शिष्य छन, त उन लोग नाऊन में बैठभेरन यीशु खोजन खिन कफरनहूम गौं पुजियान।</verse>
				<verse number="25">जब उनूनले यीशुस झील पार देखछ्य, त उनूनले यीशु थैं क्योछ, “गुरू जी, तैं याँ कब आछ?”</verse>
				<verse number="26">यीशु ले उनून जबाब दीछ, “मैं तुमूनथैं सच्ची-सच्ची कुछूँ, तुम मैंस येखिन नै खोजून मरिया कि तुमूले चमत्कार काम देखीयान, बल्कि येक कारण कि तुमून ले पेट भरि रवाटा खायान।</verse>
				<verse number="27">तुम उ खान खिन मेहनत जन करा जो नाश हो जाछो, लेकिन उ खान खिन मेहनत करा जो अनन्त जीवन तक बनिना को रूछो, जैस मैं आदिमी का च्योलो तुमून द्योलो, क्याखिनकि पिता परमेश्वर ले मैंस येस दीना को अधिकार दी रैछ।”</verse>
				<verse number="28">उनूनले यीशु थैं पुछ्छै, “परमेश्वरा का काम करनै खिन हम कि करा?”</verse>
				<verse number="29">यीशु ले जबाब दीछ, परमेश्वर चाँछो कि तुम उमें विश्वास करा जैस उले भेज रैछ।</verse>
				<verse number="30">तब उनूनले उथैं पुछ्छै, “फिर तैं को वालो चमत्कार देखूछै कि हम ऊस देखिभेरन तैंमें विश्वास करा? तैं को वालो काम देखूछै?</verse>
				<verse number="31">हमार पुरखानले बिरान जागा में मन्ना खाछ, जसो पवित्रशास्त्र में लिखीना को छै, कि परमेश्वर ले मूसा का जरियाले उनून खान खिन स्वर्ग भटे रवाटा दीयान।”</verse>
				<verse number="32">यीशु ले उनूनथैं क्योछ, “मैं तुमूनथैं सच्ची-सच्ची कुछूँ कि तुमून उ रोटो स्वर्ग भटे मूसा ले नै दीनो, लेकिन म्येरो पिता परमेश्वर ले तुमून सच्ची को रोटो स्वर्ग भटे दीछ।</verse>
				<verse number="33">क्याखिनकि परमेश्वरो को रोटो उई छै, जो स्वर्ग भटे उतर भेरन संसारा का लोगून जीवन दीछ।”</verse>
				<verse number="34">तब उनूनले उथैं क्योछ कि हे प्रभु उ रोटो हमेशा हमून दिन कर।</verse>
				<verse number="35">यीशु ले उनूनथैं क्योछ, “मैं उ छूँ, जो अनन्त जीवन दीछो, जो म्यारा पास आलो उ कभै भुखो नै होलो, और जो मैंमें विश्वास करोलो, उ कभै प्यासो नी होलो।</verse>
				<verse number="36">लेकिन मैंले तुमून पैलि बताईना को छ्यो, कि तुमूले मैंस देखभेरन ले, मैं-में विश्वास नै करना।</verse>
				<verse number="37">जो कुछ पिता परमेश्वर मैंस दीछो, उ सब म्यारा पास आलो, और जो कोई म्यारा पास आलो ऊस मैं अपून दगाड़ राखलो।</verse>
				<verse number="38">क्याखिनकि मैं अपूनी मरजी नै बल्कि पिता परमेश्वर की जैले मैंस भेज रैछ उकी मरजी पुरो करून खिन स्वर्ग भटे आरयूँ।</verse>
				<verse number="39">और म्यारा पिता परमेश्वर, जैले मैंस भेज रैछ उकी योई मरजी यो छै, कि जो कुछ उले मैंस दी रैछ, उ सब कुछ मैं अपून पास राखू लेकिन ऊस आखिरी दिन फिर ज्यून करूँलो।</verse>
				<verse number="40">क्याखिनकि म्यारा पिता परमेश्वर की यो मरजी छै, कि जो कोई च्याला स देखिभेरन उमें विश्वास करोलो, उ अनन्त जीवन पालो, और मैं ऊस आखिरी दिन ज्यून करोलो।”</verse>
				<verse number="41">येक कारण यहूदी अगुवा लोग ऊस देखिभेरन चिड़ून लाग्यान, क्याखिनकि उले कईना छ्यो, “जो रोटो स्वर्ग भटे उतर छै, उ मैं छूँ।”</verse>
				<verse number="42">और उनूनले क्योछ, “क्या यो यूसुफ को च्योलो यीशु नाहातिन, जैका ईजा-बबा स हम जाणनू? त उ क्याखिन कुछूँ कि मैं स्वर्ग भटे आरयूँ?”</verse>
				<verse number="43">यीशु ले उनून जबाब दीछ, कि “आपस में जन कुड़कुड़ा।</verse>
				<verse number="44">कोई ले म्यारा पास तब तक नै आ सकूनो, जब तक पिता परमेश्वर, जेलै मैंस भेज रैछ, ऊस लीभेरन नै ऊँ; और मैं आखिरी दिन ऊस फिर ज्यून करोलो।</verse>
				<verse number="45">परमेश्वरो को संदेश दिनवालान का लेखून में यो लिखीना को छै; ‘उन सब परमेश्वरा का तरफ भटे सिखाईना का होला। ’ जै केले पिता परमेश्वर थैं सुणछ और सिखछै, उ म्यारा पास ऊँछो।</verse>
				<verse number="46">कैले ले पिता परमेश्वर नै देख रैछ, मैं एकलो छूँ, जो परमेश्वरा का तरफ भटे आरयूँ, जैले ऊस देख रैछ।</verse>
				<verse number="47">मैं तुमूनथैं सच्ची-सच्ची कुछूँ, कि जो कोई मैंमें विश्वास करछो, अनन्त जीवन उको छै।</verse>
				<verse number="48">मैं उ रोटो छूँ, जो जीवन दीछो।</verse>
				<verse number="49">तुमार पुरखानले बिरान जागा में मन्ना खाछ और मरग्या।</verse>
				<verse number="50">मैं जै रोटा का बारिमें कुंछूँ, उ स्वर्ग भटे उतर छै और जो आदिमी उमें भटे खाछो उ कभै नी मरोलो।</verse>
				<verse number="51">जीवित रोटो जो स्वर्ग भटे उतर छै उ मैं छूँ। अगर कोई यो रोटा में भटे खाछो, त उ हमेशा ज्यून रोलो; और जो रोटो में संसारा का जीवन खिन दीयूलो, उ म्येरो माँसो छै।”</verse>
				<verse number="52">यो बात में यहूदी लोग यो कैभेरन आपस में झगाड़ा करून लाग्यान, “यो आदिमी क्याखिन अपून माँसो खान खिन दी सकछो?”</verse>
				<verse number="53">यीशु ले उनूनथैं क्योछ, “मैं तुमूनथैं सच्ची-सच्ची कुछूँ, जब तक तुम मैं आदिमी का च्याला को माँसो नी खाला, और खून नी प्याला तब तक तुमून जीवन नी मिलोलो।</verse>
				<verse number="54">जो म्येरो माँसो खाछो, और म्येरो खून पीछो, अनन्त जीवन उको छै, और मैं न्याय का दिन ऊस फिर ज्यून करोलो।</verse>
				<verse number="55">क्याखिनकि म्येरो माँसो सच्ची में खाना की चीज छै, और म्येरो खून सच्ची में पीना की चीज छै।</verse>
				<verse number="56">जो म्येरो माँसो खाछो और म्येरो खून पीछो, उ मैंमें बनिनाको रूछूँ और मैं उमें बनिनाको रूछूँ।</verse>
				<verse number="57">मैंस म्यारा पिता परमेश्वर ले भेज रैछ, जो जीवन दीछो। जसा तरीका ले उले मैंस जीवन दी रैछ, उसीकैं मैंले उ आदिमी स जीवन द्यूलो जो म्येरो माँसो खाछो।</verse>
				<verse number="58">जो रोटो स्वर्ग भटे उतर रियोछ, उ योई छै, तुमार पुरखान का नयाति नाहातिन जैस खायो और मरग्या, जो कोई यो रोटो खालो, उ हमेशा ज्यून रौलो।”</verse>
				<verse number="59">यीशु ले यो बात तब क्यान, जब कफरनहूम गौं का एक यहूदी सभाघर में उपदेश दिन मर्यो छ्यो।</verse>
				<verse number="60">यीशुका शिष्यून में भटे भौतून ले यो बात सुणिभेरन क्योछ, “यो त भौत कठिन बात छै, येस को मान सकछो?”</verse>
				<verse number="61">यीशु ले अपून मन में यो बात जाणिभेरन कि म्यारा शिष्य यो बात ले आपस में कुड़कुड़ान मर्यान, उले उनूनथैं पुछ्छै, “क्या यो बात तुमून मैंमें विश्वास करून में रोकछी?</verse>
				<verse number="62">और अगर तुम मैं आदिमी का च्याला स स्वर्ग जानो देखला, जाँ उ पैलि छ्यो, त कि होलो?</verse>
				<verse number="63">परमेश्वर की आत्माई छै, जो जीवन दिनवालो छै, लेकिन शरीर नै दी सकूनो, जो बात मैंले तुमूनथैं कईना का छन उन पवित्र आत्मा ले बोली जानान, जो बात मैंले तुमूनथैं कईना का छन, उ आत्मा और जीवन ले छै।</verse>
				<verse number="64">लेकिन तुमून में भटे कतुक इसले छन जो विश्वास नै करना।” क्याखिनकि यीशु त पैलि भटे जाण छ्यो कि जो विश्वास नै करना उन को छन? और को ऊस पकड़वालो।</verse>
				<verse number="65">और उले क्योछ, “येक कारण मैंले तुमूनथैं कईनाको छ्यो कि जब तक कैसई पिता परमेश्वरा का तरफ भटे बरदान नै दीई जौ तब तक उ म्यारा पास नै आ सकनो।”</verse>
				<verse number="66">यो बातुन का कारण उक भौत शिष्य ऊस छोड़भेरन न्हैजानान, और उक बाद उनूनले उको दगोड़ो छोड़ दीछ।</verse>
				<verse number="67">तब यीशु ले उन बारा शिष्यून थैं क्योछ, “क्या तुम ले छोड़भेरन जान चाछाई?”</verse>
				<verse number="68">तब शमौन पतरसले ऊस जबाब दीछ, “हे प्रभु, हम कैका पास जानू? अनन्त जीवन का बात त्यार पास छन।</verse>
				<verse number="69">और हम तैंमें विश्वास करछ्य, और जाणिगया कि तुम पवित्र जन छा जैस परमेश्वर ले भेज रैछ।”</verse>
				<verse number="70">यीशु ले उनून जबाब दीछ, “क्या मैंले तुम बारून नै चूनछै? तब ले तुमून में भटे एक जनि शैतान बश में छै।”</verse>
				<verse number="71">यो बात यीशु ले शमौन इस्करियोती को च्योलो यहूदा का बारिमें क्योछ, जब कि यो उई बारा शिष्यून में भटे एक छ्यो, जो यीशुस धोखा दीन वालो छ्यो।</verse>
			</chapter>
			<chapter number="7">
				<verse number="1">इन बातुन का बाद यीशु गलील प्रदेश में घुमन-फिरनै र्योछ, क्याखिनकि यहूदी अगुवा ऊस मारना की साजिश करून मरेछ्या, येक कारण उ यहूदिया प्रदेश में घुमून नी चाछ्यो।</verse>
				<verse number="2">और यहूदी लोगून को झोपड़िन को त्यार नजिक छ्यो।</verse>
				<verse number="3">येक कारण यीशुका भाईन ले उथैं क्योछ, “तुम यो जाग छोड़िभेरन यहूदिया प्रदेश खिन न्हैजा, कि जो भल काम तुम करछा, उनून तुमार शिष्य ले देखून।</verse>
				<verse number="4">अगर तुम चाँछा उ कि लोग तुमार बारिमें जाणनू, त तुमून सबून का सामुनि भल काम करून चैंनान। अगर तैं काम करछै त दुनिया का सामुनि कर।”</verse>
				<verse number="5">क्याखिनकि यीशुका भाई ले यीशु में विश्वास नी करछ्या।</verse>
				<verse number="6">तब यीशु ले उनूनथैं क्योछ, म्येरो बखत आजि नै आर्यो; लेकिन तुमून खिन त कोई ले ठीक बखत छै।</verse>
				<verse number="7">संसारा का लोग तुमार दगाड़ बैर नै कर सकूना, लेकिन उ मैं खिन बैर करनान, क्याखिनकि मैं उनार बारिमें में यो बात की गवै दी छूँ कि उक काम बुर छन।</verse>
				<verse number="8">तुम लोग त्यार मनून खिन जा; मैं एल यो त्यार मनून खिन नै आ सकनू, किलैकी म्येरो बखत नै आर्यो।</verse>
				<verse number="9">यीशु ले उनूनथैं यो बात कैभेरन उ गलील प्रदेश में रुकि ग्यो।</verse>
				<verse number="10">लेकिन उक भाई त्यार में न्हैग्या, त यीशु ले उ त्यार में ग्योछ, लेकिन बिना कैसे बताये वाँ भटे न्हैग्यो।</verse>
				<verse number="11">उ त्यार में यहूदी लोग यीशुस खोजून मरेछ्या, उनूनले लोगून थैं पुछ्छै, “क्या उ या आ ग्योछी?”</verse>
				<verse number="12">और लोग यीशु का बारिमें खुश-फुसाट करभेरन बात करून मरेछ्या। उनूनमें भटे कोई कुछ्या कि “उ भौत निको आदिमी छै।” और कुछ लोग कुछ्या, उ त लोगून गुमराह करछो।</verse>
				<verse number="13">तब ले यहूदीन अगुवान का डर का कारण कोई ले आदिमी यीशु का बारिमें खुलभेरन नी बोलछो।</verse>
				<verse number="14">और जब त्यार का आधा दिन बितिग्यो; त यीशु मन्दिर में जाभेरन लोगून उपदेश दिन लागछ।</verse>
				<verse number="15">उक उपदेश स सुणभेरन यहूदी लोग ताजुब करून लाग्यान, और कुन लाग्यान, “येस बिना पवित्रशास्त्र पढ़ीना को यो ज्ञान काँ भटे मिलछ्य।”</verse>
				<verse number="16">यीशु ले उनून जबाब दीछ, “म्येरो उपदेश म्येरो अपूनो नाहतिनी, लेकिन यो पिता परमेश्वरा का तरफ भटे छै जैले मैंस भेज रैछ।</verse>
				<verse number="17">अगर कोई आदिमी परमेश्वर की मरजी में चलून चाछो, त उ यो उपदेशा का बारिमें जाणि जालो कि यो परमेश्वरा का तरफ भटे छै, या मैं अपून तरफ भटे कुछूँ।</verse>
				<verse number="18">जो अपूनी तरफ भटे के कुंछूँ, उ अपूनी बड़ाई चाँछो; लेकिन जो अपून भेजून वाला की बड़ाई चाँछो उई सच्चो छै, और उमें के बेमानी नाहातिन।</verse>
				<verse number="19">क्या परमेश्वरो को संदेश दिनवाला मूसा ले तुमून नियम-कानून नै दियाई? तब ले तुमून में भटे कोई ले नियम-कानून में नै चलनो। तुम किलैं मैंस मार डालून चाँछा?”</verse>
				<verse number="20">लोगून ले जबाब दीछ; “तैंमें भूत लागिना को छै! को तैंस मार डालून चाछ?”</verse>
				<verse number="21">यीशु ले उनून जबाब दीछ, “मैंले सबत वाला दिन एक चमत्कारो को काम करछ्य, और तुम सब ताजुब करछा।</verse>
				<verse number="22">तुम कुँछा कि मूसा ले तुमून खतना करना को आदेश दीछ, योई कारण तुम सबता का दिन आदिमी को खतना करछा। यो नै कि उ मूसा का तरफ भटे छै लेकिन यो पुरखान भटे चलिना को छै।</verse>
				<verse number="23">तुम सबता का दिन आदिमी को खतना येक कारण करछा कि मूसा का नियम-कानून तोड़ी नै जून, लेकिन तुम येक कारण मैं खिन गुस्सा करछा, कि मैंले सबता का दिन एक आदिमी स पुरी तरीका ले ठीक करछ्य।</verse>
				<verse number="24">तुम भ्यारो को रूप देखिभेरन न्याय जन करा, लेकिन सच्चाई ले ठीक-ठीक न्याय करा।”</verse>
				<verse number="25">तब यरूशलम शैहरा का थ्वाड़ा लोग कुन लाग्यान, “क्या यो उई आदिमी नाहतिनी, जैस यहूदी अगुवा मारना का फिराक में छन।</verse>
				<verse number="26">लेकिन देखा, उ भीड़ का लोगून थैं खुलेआम बात करछो और कोई उथैं के नै कुनो, इसो त नाहातिनी कि यहूदी अगुवान ले सच्ची में जाण हालछ्य कि योई मसीह छै?</verse>
				<verse number="27">क्याखिनकि हम त जाणनू, कि यो काँ भटे ऊँछो; लेकिन मसीह अब आलो, त कोई ले नी जाण पालो कि उ काँ भटे आछ।”</verse>
				<verse number="28">तब यीशु ले मन्दिर का खाला में उपदेश दीन बखत जोरले क्योछ, “तुम मैंस जाणछाई और यो ले जाणछा की मैं काँ आरयूँ। मैं त खुद नै आरयूँ, लेकिन म्यारा भेजून वाला सच्चो छै ऊस तुम जाणछा।</verse>
				<verse number="29">लेकिन मैं जाणछूँ; क्याखिनकि मैं उक तरफ छूँ और उलेई मैंस भेज रैछ।”</verse>
				<verse number="30">यो बात में अगुवा ऊस पकड़ून चाँछ्या, तब कैले ऊस नै पकड़ीयो, क्याखिनकि उको मरना को बखत एक तक नी आईना को छ्यो।</verse>
				<verse number="31">और भीड़ का भौत लोगून ले उमें विश्वास करछ्य, और कुन लाग्यान, “मसीह जब आलो, त क्या येहैं ज्यादा चमत्कारा का दिखालो जो येले दिखायान?”</verse>
				<verse number="32">फरीसी लोगून ले उक बारिमें यो बातुन चुपचाप ले करनै सुणछ; और प्रधान याजकून ले और फरीसीन ले ऊस पकड़ून खिन मन्दिर का रखवाला भेज्यान।</verse>
				<verse number="33">यो बात में यीशु ले क्योछ, “ मैं थ्वाड़ा देर तलक और तुमार दगाड़ छूँ; उक बाद मैं अपून भेजून वाला का पास वापस न्हैजूलो।</verse>
				<verse number="34">तब तुम मैंस खोजला, लेकिन नी पाला; और जा मैं जाछूँ तुम वाँ नै आ सकना।”</verse>
				<verse number="35">यहूदी अगुवा आपस में कुन लाग्यान, “यो काँ जाछो कि हमून तो दुबारा नै मिल सकूनो? शायद उन यहूदी लोगून पास जो यूनानी शैहरून में तितर-बितर हो भेरन रूनान, और उनूनले उपदेश द्योलो?</verse>
				<verse number="36">उ कि कुन चाछो कि, ‘तुम मैंस खोजला, लेकिन नी पाला: और जा मैं जाछूँ, वाँ तुम नै आ सकना?’”</verse>
				<verse number="37">फिर त्यार का आखिरी दिन, जो खास दिन छै, यीशु ठाड़ भ्योछ और जोरले कुन लागछ, “अगर कोई प्यासो छै त म्यारा पास अ और पीय।</verse>
				<verse number="38">जो मैमें विश्वास करोलो, जसो पवित्रशास्त्र में लिखीना को छै, उक दिल में भटे पानि की नदी जो जीवन दीछी निकलली।”</verse>
				<verse number="39">उले यो बात पवित्र आत्मा का बारिमें क्योछ, जो उमें विश्वास करनान उनून मिलून वालो छ्यो, क्याखिनकि एल तलक पवित्र आत्मा उतरीना को नी छ्यो, क्याखिनकि परमेश्वर ले एल तलक यीशु की महिमा स प्रगट नी करिना को छ्यो।</verse>
				<verse number="40">तब भीड़ में भटे केले-केले यो बातुन सुणभेरन क्योछ, “सच्ची में उ परमेश्वरो को संदेश दिनवाला छै, जैको हम इन्तजार करून मरिया।”</verse>
				<verse number="41">और उन में कुछ लोगून ले क्योछ, “यो मसीह छै,” लेकिन केले क्योछ, “क्या? क्या मसीह गलील प्रदेश भटे आलोई?</verse>
				<verse number="42">क्या पवित्रशास्त्र कुंछो कि मसीह राजा दाऊद का वंश भटे और बैतलहम गौं भटे आलो, जा राजा दाऊद रूछ्यो।”</verse>
				<verse number="43">और यीशु का कारण लोगून में आपस में फुट पड़छी।</verse>
				<verse number="44">उनूनमें भटे कदुक यीशु स पकड़ून चाँछ्या, लेकिन केले ऊस गिरफ्तार नै कर्यो।</verse>
				<verse number="45">तब मन्दिर का रखवाला प्रधान याजकून और फरीसी लोगून का पास लौट आयान, और उनूनले उनूनथैं क्योछ, “तुम ऊस क्याखिन नै लाया?”</verse>
				<verse number="46">उनूनले जबाब दीछ, “कोई ले आदिमी ले कभै इसा बात नै कर्या।”</verse>
				<verse number="47">फरीसी लोगून ले उनून जबाब दीछ, “क्या तुम ले गुमराह करि गैछा?</verse>
				<verse number="48">क्या शासकून में या फरीसी लोगून में भटे केले उमें विश्वास करछै?</verse>
				<verse number="49">लेकिन यो लोग मूसा का नियम-कानून नै जाणना, और परमेश्वरा का द्वारा शापित छन।”</verse>
				<verse number="50">नीकुदेमुस जो यीशु का पास पैलि आईना को छ्यो। और उनूनमें भटे एक छ्यो, उनूनथैं कुन लाग्छय।</verse>
				<verse number="51">“क्या हमार नियम-कानून कै आदिमी स जब तक पैलि उकी सुणभेरन जाणनै ले, कि उ कि करछो, दोषी ठैरूछी?”</verse>
				<verse number="52">उनूनले ऊस जबाब दीछ, “काँई तैंले गलीली त नाहातिनी? पवित्रशास्त्र में खोज तब तैं जाण पालै, कि गलील प्रदेश भटे कोई ले परमेश्वरो को संदेश दिनवाला पैद नै हुनो।”</verse>
				<verse number="53">तब उन सब लोग अपून-अपून घरून खिन वापस न्हैग्या।</verse>
			</chapter>
			<chapter number="8">
				<verse number="1">यीशु अपून शिष्यून का दगाड़ जैतून का डाणा में ग्यो।</verse>
				<verse number="2">और दुसारा दिन रात्तैनि उ मन्दिर का खाल में वापिस आछ, और भौत सारा लोग उक पास आयान, और उ बैठि भेरन उनून शिक्षा दिन लागछै।</verse>
				<verse number="3">तब मूसा का नियम सिखून वाला और फरीसी लोग ब्यभिचार में पकड़ी गै एक स्यैनि लीभेरन आयान, उनूनले ऊस भीड़ का सामुनि ठाड़ कर दीछ,</verse>
				<verse number="4">उनूनले यीशु थैं क्योछ, “गुरू जी, यो स्यैनि ब्यभिचार करनै पकड़ी गैछै।</verse>
				<verse number="5">मूसा ले नियम-कानून में हमून हुकुम दी रैछ कि इसा लोगून ढ़ुगान ले लोड़िया भेरन मार डाला; त तैं कि चाँछै कि हमून कि करून चैछो?”</verse>
				<verse number="6">उनूनले यीशु स अजमून खिन यो बात कर्यान ताकि यीशु में दोष लगूना को मौका मिली जौ, लेकिन यीशु झुकीभेरन आंगुला ले भिमें लिखून लाग्यान।</verse>
				<verse number="7">जब उन यीशु थैं पुछून मरैछ्या, त उले सिद्दो हो भेरन उनूनथैं क्योछ, “तुमून में भटे जेलै कभै पाप नै कर रैछ, उई ऊस पैलि ढूंग हाणौ।”</verse>
				<verse number="8">और फिर यीशु झुकीभेरन भिमें लिखून लाग्यान।</verse>
				<verse number="9">लेकिन उन यो सुणभेरन ठूला भटे लीभेरन नाना तक एक-एक करभेरन वाँ भटे न्हैग्या, यो जाणभेरन कि उन सब पापी छन, और यीशु एकलो रैग्यो, और उ स्यैनि तब ले वाँ ठाड़ छी।</verse>
				<verse number="10">यीशु ले सिददो हो भेरन उथैं क्योछ, “हे नारी, उन काँ खिन ग्यान? क्या कैले तैंमें दण्ड को हुकुम नै दिनोई?”</verse>
				<verse number="11">तब उ स्यैनि ले क्योछ, “प्रभु जी, कैले ले नै।” यीशु ले क्योछ, “मैंले तैंमें दण्ड को हुकुम नै दीनू; अब घर खिन जा, और फिर पाप जन करे।”</verse>
				<verse number="12">तब यीशु ले फिर लोगून थैं क्योछ, “संसार को उज्यालो मैं छूँ, जो म्यारा पछिल आलो, उ अन्यारो में नी हिटोलो, लेकिन उ, उ उज्यालो स पालो जो अनन्त जीवन दीछी।”</verse>
				<verse number="13">फरीसी लोगून ले उथैं क्योछ; “अगर तैं खुद अपूनी गवै दीछै; त तेरि गवै सच्ची नाहातिन।”</verse>
				<verse number="14">यीशु ले उनून जबाब दीछ, “अगर मैं अपूनी गवै खुद दी छूँ, तब ले मेरि गवै सच्ची छै, किलैकी मैं जाणछूँ कि मैं काँ भटे आरयूँ और काँ जाछूँ, लेकिन तुम नै जाणना कि मैं काँ भटे आईना को छूँ, और काँ खिन जाछूँ</verse>
				<verse number="15">तुम संसारा का लोगून का अनुसार न्याय करछा; मैं कैको न्याय नै करनू।</verse>
				<verse number="16">और अगर मैं न्याय ले करूँ, त न्याय सच्चो छै, क्याखिनकि मैं एकोलो नाहातिनू, लेकिन मैं पिता परमेश्वरा का दगाड़ छूँ, जैले मैंस भेजिना को छै।</verse>
				<verse number="17">और मूसा का नियम-कानून में ले लिखीना को छै; कि द्वी जनून कि गवै मिलभेरन ठीक हुछी।</verse>
				<verse number="18">एक त मैं अपूनी गवै खुद दीछूँ, और दुसोरो म्येरो पिता परमेश्वर मेरि गवै दीछो जेलै मैंस भेज रैछ।”</verse>
				<verse number="19">उनूनले उथैं पुछ्छै “तेरो पिता काँ छै?” तब यीशु ले उनून जबाब दीछ, “नै तुम मैंस जाणना, नै म्यारा पिता परमेश्वर स, अगर मैंस जाणना त म्यारा पिता परमेश्वर ले जाणना।”</verse>
				<verse number="20">यो बात उले मन्दिर का खाला में उपदेश दिन बखत भण्डार घर में है क्योछ, और कैले ऊस नै पकड़ीयो; क्याखिनकि उको मरना बखत एल तलक नी आईना को छ्यो।</verse>
				<verse number="21">यीशु फिर उनूनथैं क्योछ, “मैं जाणछूँ, और तुम मैंस खोजला, और तुम लगातार पाप करना ले मार जाला; जाँ मैं जाछूँ, वाँ तुम नै आ सकना।”</verse>
				<verse number="22">यो बात में यहूदी अगुवा ले क्योछ, “क्या उ आत्मा हत्या करून खिन जान मर्योछीई, जो कुन मरियोछ, ‘जा मैं जाछूँ तुम वाँ नै आ सकना’?”</verse>
				<verse number="23">तब यीशु ले उनूनथैं क्योछ, तुमूनले यो संसार में जन्म ली रैछ, लेकिन मैं यो संसार को नाहातिनू।</verse>
				<verse number="24">येक कारण मैं तुमूनथैं क्योछ, कि तुम लगातार अपून पापून में मर जाला। अगर तुम मैंमें विश्वास नी करना कि उई मैं छूँ, त तुमार पाप माफ नी करि जाला, और तुम मर जाला।</verse>
				<verse number="25">यहूदी अगुवान ले उथैं क्योछ, “ तैं को छै?” तब यीशु ले उनून जबाब दीछ, “जब भटे मैंले उपदेश दीन शुरू करछ्य, तब भटे मैं कुछूँ कि उई मैं छूँ।</verse>
				<verse number="26">तुमोरो न्याय करून खिन मैंस भौत कुछ कुन छै, और म्येरो भेजून वालो सच्चो छै; और जो मैंले उथैं भटे सुण रैछ उई संसार का लोगून थैं कुछूँ।”</verse>
				<verse number="27">उन अब तक यो नै समझ पाया कि यीशु हमून थैं पिता परमेश्वरा का बारिमें कुनमर्योछ।</verse>
				<verse number="28">तब यीशु क्योछ, “जब तुम मैं आदिमी का च्याला स ऊँचा में चढ़ाला, तुम जाणि ल्याला कि मैं उई छूँ, जो शुरू भटे तुमून उपदेश दीनै और बतूनै आरयूँ कि मैं छूँ; लेकिन जसो म्यारा पिता परमेश्वर ले मैंस सिखाछ ऊसी बात कुछूँ।</verse>
				<verse number="29">और म्येरो भेजून वालो म्यारा दगाड़ छै; उले मैंस एकोलो नै छोड़ियो; किलैकी मैं हमेशा में उई काम करछूँ, जैस देखिभेरन उ खुश हुछो।”</verse>
				<verse number="30">भौत लोगून ले यो जिनूनले यीशुस यो बातुन कुन सुणछ, उमें विश्वास करछ्य।</verse>
				<verse number="31">तब यीशु ले उन यहूदी थैं जिनूनले उमें विश्वास करछ्य, क्योछ, “अगर तुम म्यारा बातुन का अनुसार चलला, त सच्ची में म्यारा शिष्य बनला।</verse>
				<verse number="32">और तुम सत्य स जाणला, और सत्य तुमून आजाद करोलो।”</verse>
				<verse number="33">उनूनले यीशु थैं जबाब दीछ, “हम त अब्राहम का वंश का छा, और हम कभै केका गुलाम नै रया, फिर तैं क्याखिन कुछै, कि तुमून आजाद हो जाला?”</verse>
				<verse number="34">यीशु ले उनून जबाब दीछ, “मैं तुमूनथैं सच्ची-सच्ची कुछूँ, जो कोई पाप करछो, उ पापो को गुलाम छै।</verse>
				<verse number="35">और गुलाम हमेशा घर में नै रूनो; लेकिन च्योलो हमेशा घर में रूछो।</verse>
				<verse number="36">अगर मैं आदिमी को च्योलो तुमून आजाद करोलो त, तुम सच्ची में आजाद हो जाला।</verse>
				<verse number="37">मैं जाणछूँ कि तुम अब्राहम का वंश का छा; फिरले तुम म्यारा बातुन नै मानना, येक कारण तुम मैंस मार डालून चाछा।</verse>
				<verse number="38">मैं उ चीजून का बारिमें बतूनमरयूँ जिनून मैंले देखछ्य जब मैं अपून पिता परमेश्वरा का दगाड़ छ्यूँ, लेकिन तुम उई कुँछा जो तुमूनले अपून पिता परमेश्वर थैं सुणछै।”</verse>
				<verse number="39">उनूनले तब ऊस जबाब दीछ, “हमार पूर्वज त अब्राहम छै।” यीशु ले उनूनथैं क्योछ, “अगर तुम अब्राहम का वंशज हुना, त जो काम अब्राहम करछ्यो, उ काम तुम करना।”</verse>
				<verse number="40">लेकिन अब तुम मैंस मारून चाछा, क्याखिन मैंले तुमून उ सच्ची बताछ जो मैंले परमेश्वर थैं भटे सुणछ, अब्राहम ले इसो नै कर्यो।</verse>
				<verse number="41">तुम अपून बबा का नियाती काम करछा, उनूनले उथैं क्योछ, “हम ब्यभिचार ले नै जन्मीया, हमोरो केवल एक पिता छै और उ परमेश्वर छै।”</verse>
				<verse number="42">यीशु ले उनूनथैं क्योछ, “अगर परमेश्वर तुमोरो बबा हुनो, त तुम म्यारा दगाड़ प्रेम राखना; किलैकी मैं परमेश्वरा का तरफ भटे आरयूँ; मैं खुद नै आरयूँ; लेकिन उले मैंस भेज रैछ।</verse>
				<verse number="43">जो मैं कुछूँ ऊस क्याखिन नै समझना? येक कारण कि म्यारा संदेश स स्वीकार करून है इन्कार करछा।</verse>
				<verse number="44">तुम अपून बबा शैतान भटे छा, और अपून बबा मरजी स पुरो करून चाछा। उ त शुरू भटे हत्यारो छै, और उको सच्चाई भटे केले लीन-दिन नाहातिन; जब उ झूठ बोलछो, अपून स्वभाव कारण बोलछो, क्याखिनकि उ झूठ्ठो छै, बल्कि झूठ्ठो को बबा छै।</verse>
				<verse number="45">मैं जो सच्ची बोलछूँ, येक कारण तुम मैंमें विश्वास नै करना।</verse>
				<verse number="46">तुमून में भटे को मैंस पापी साबित कर सकछो? और अगर मैं सच्ची बोलछूँ, त तुम म्येरो विश्वास क्याखिन नै करना?</verse>
				<verse number="47">जो कोई परमेश्वर थैं रिशता राखछो, उ परमेश्वर की बात सुणछो; और तुम येक कारण नै सुणना की तुम परमेश्वर थैं रिशता नै राखना।”</verse>
				<verse number="48">यो सुण यहूदी अगुवान ले उथैं क्योछ, “क्या हमोरो यो कुनो ठीक नाहातिनी कि तैं सामरी छै और तैंमें भूत छै?”</verse>
				<verse number="49">यीशु ले उनून जबाब दीछ, मैंमें भूत नाहातिन; लेकिन मैं अपून पिता परमेश्वरो को आदर करछूँ, और तुम म्येरो निरादर करछा।</verse>
				<verse number="50">मैं अपूनो समान नै चाँनू, लेकिन एक छै जो म्येरो समान चाछो, और उई न्याय ले करछो।</verse>
				<verse number="51">मैं तुमूनथैं सच्ची-सच्ची कुछूँ, कि अगर कोई आदिमी मेरि बातुन मानोलो, त उकी मौत कभै नी होलि।</verse>
				<verse number="52">यहूदी अगुवान ले यीशु थैं क्योछ, “अब हम जाणिगया कि तैंमें भूत छै, अब्राहम मर ग्यो, और सब परमेश्वरो को संदेश दिनवाला ले मर ग्यान और तैं कुछै, ‘अगर कोई म्यारा बातुन नी मनोलो उ अनन्तकाल तक नी मरोलो।’</verse>
				<verse number="53">हमोरो पूर्वज अब्राहम त मरि ग्यो, क्या तैं उ है ले ठूलो छै? और परमेश्वरो को संदेश दिनवाला ले मर ग्यान, तैं अपून-आपस कि समझ छै की तैं को छै?”</verse>
				<verse number="54">यीशु ले उनून जबाब दीछ, “अगर मैं अपूनी बड़ाई करूँ, त मेरि बड़ाई कैले नी भै, लेकिन जो मेरि बड़ाई करछो, उ म्येरो पिता परमेश्वर छै, जैस तुम अपूनी परमेश्वर कुँछा।</verse>
				<verse number="55">और तुमूले त ऊस नै जाणना: लेकिन मैं ऊस जाणछूँ, और अगर मैं कुँ कि मैं ऊस नै जाणनू, त मैं तुमेरि नियाति झूठ्ठो ठैरूलो, लेकिन मैं ऊस जाणछूँ, और उक हुकमून में चलछूँ।</verse>
				<verse number="56">तुमोरो पूर्वज अब्राहम म्यारा दिन देखन खिन भौत आश में छ्यो; और उले देखछ्य और भौत खुश भ्योछ।”</verse>
				<verse number="57">यहूदीन ले उथैं क्योछ, “तैं ऐल तक पचास सालो को ले नाहातिनै; फिरले तैंले अब्राहम स देखछ्य?”</verse>
				<verse number="58">यीशु ले उनूनथैं क्योछ, “मैं तुमूनथैं सच्ची-सच्ची कुछूँ, अब्राहम का पैद हूनहै ले पैलि भटे मैं छूँ।”</verse>
				<verse number="59">यो बतून में लोगून ले यीशु स मारून खिन ढूंगा उठायान, लेकिन यीशु चुपचाप ले मन्दिर में भटे न्हैजाछो।</verse>
			</chapter>
			<chapter number="9">
				<verse number="1">जब यीशु अपून शिष्यून का दगाड़ जान मरिछ्यो, त जान बखत एक आदिमी स देखछ्य जो जन्म भटे अन्धो छ्यो।</verse>
				<verse number="2">और उक शिष्यून ले यीशु थैं पुछ्छै, “गुरू जी, कैल पाप करछ्य कि येक ईजा-बबा या यो आदिमी ले जो अन्धो छै?”</verse>
				<verse number="3">यीशु ले जबाब दीछ, “नै येले पाप कर राखछ्य, नै येका ईजा-बबा ले लेकिन यो येक कारण अन्धो पैद भ्योछ, ताकि परमेश्वरा का सामर्थ काम उमें देखाई जौ।</verse>
				<verse number="4">जेलै मैंस भेज रैछ, मैंस जल्दी ले उक काम दीईना का कामून पुरो करून जरूरी छै। उ रात ऊँन वाली छै जैमें कोई काम नै कर सकूनो।</verse>
				<verse number="5">जब तक मैं संसार मैं छूँ तब तक संसार को उज्यालो मैं छूँ।”</verse>
				<verse number="6">यो कैभेरन उले भिमें थूकछ्य और उ थूकले माटा स गिलो करछ्य, और उ माटो उ अन्धा का आँखान में लगाभेरन।</verse>
				<verse number="7">और यीशु ले उ अन्धा थैं क्योछ, “जा और अपूनो मुँख शिलोह का कुण्ड में धोले” (जैको मतलब छै “भेजिना को” छै)। और जाभेरन उले अपूनो मुँख धोछ, और देखनै वापस आछ।</verse>
				<verse number="8">तब उ आदिमी का पड़ोसी और दुसारा लोग जिनूनले पैलि ऊस भीख मागून देखछ्यो, एक दुसारा थैं कुन लाग्यान, “क्या यो उई नाहातिनी, जो मन्दिर में बैठि भेरन भीख माँग छ्यो?”</verse>
				<verse number="9">थ्वाड़ा लोगून ले क्योछ, “यो उई छै,” औरून ले क्योछ, “नै, लेकिन उको जसो छै” उले क्योछ, “मैं उई छूँ।”</verse>
				<verse number="10">तब उन उथैं पूछन लाग्यान, “त्यारा आँखा कसीकैं चंगा भ्यान?”</verse>
				<verse number="11">उले उनून जबाब दीछ, कि यीशु नामोको एक आदिमी ले माटो गिल भेरन, म्यारा आँखान में लगाभेरन मैंथैं क्योछ, “जा, और अपूनो मुँख शिलोह कुण्ड में जाभेरन धोले, त मैं शिलोह में गयूँ और मुँख धोछ और मैं देखून लाग गयूँ।”</verse>
				<verse number="12">उनूनले उथैं पुछ्छै, “उ आदिमी काँ छै?” उले क्योछ, “मैं नै जाणनू।”</verse>
				<verse number="13">जै दिना यीशु ले माटो गिल करछ्य और उ आदिमी का आँखान में लगाभेरन चंगो करछ्य, उ सबत को दिन छ्यो। येक कारण लोग उ आदिमी स फरीसी लोगून का पास ली ग्यान।</verse>
				<verse number="14"></verse>
				<verse number="15">फिर फरीसी लोगून ले उथैं पुछ्छै; कसीकैं देखून लागछ? उले उनूनथैं क्योछ, “उले म्यारा आँखा में गिलो माटो लगाछ, फिर मैंले शिलोह का कुण्ड में मुँख धो लीछ, और अब में देखून मरियूँ।”</verse>
				<verse number="16">यो बात में थ्वाड़ा फरीसी लोग कुन लाग्यान, “यो आदिमी परमेश्वरा का तरफ भटे नाहातिन, क्याखिनकि यो सबता का दिनस नै माननो।” और थ्वाड़ा लोगून ले क्योछ, “येको जसो पापी आदिमी इसीकैं चमत्कारा काम कसीकैं कर सकछो?” यो बात में उनूनमें फुट पड़ जाछी।</verse>
				<verse number="17">उनूनले फिर उ अन्धा थैं क्योछ, “जैले त्यारा आँखा खोलियान, तैं उक बारिमें कि कुछै?” उले क्योछ, “यो परमेश्वरो को संदेश दिनवाला छै।”</verse>
				<verse number="18">लेकिन यहूदीन अगुवान विश्वास नै भ्यो कि यो अन्धो छ्यो, अब देखछो येक कारण उनूनले उक ईजा-बबा स बुलाछ,</verse>
				<verse number="19">और उनूनथैं पुछ्छै, “क्या यो तुमोरो च्योलो छी, जैस तुम कुँछा कि यो अन्धो पैद भ्योछ? फिर अब यो कसीकैं देखून लाग ग्योछ?”</verse>
				<verse number="20">उक ईजा-बबा ले उनून जबाब दीछ, “हम त जाणनू कि यो हमोरो च्योलो छै, और यो जन्म भटे अन्धो छ्यो।</verse>
				<verse number="21">लेकिन हम ने जाणना कि यो कसीकैं देखून लागछै; और नै यो जाणना की कैले उक आँखा खुलियान; उ भौत समझदार छै; उथैंई पुछ ली; उ अपून बारिमें खुद बाता द्योलो।”</verse>
				<verse number="22">यो बात उक ईजा-बबा ले येक कारण क्यान क्याखिनकि उन यहूदी अगुवान भटे डर छ्या; क्याखिनकि यहूदी अगुवा में यो तय कर चुक गैछा, कि अगर कोई यीशु मसीह स मानोलो, त उ यहूदी सभाघर भटे निकाल दी जालो।</verse>
				<verse number="23">येक कारण उक ईजा-बबा ले क्योछ, “उ भौत समझदार छै; उथैंई पुछ ली।”</verse>
				<verse number="24">तब यहूदी अगुवान ले उ आदिमी जो अन्धा छ्यो दुसरी बार बुलाभेरन उथैं क्योछ, “परमेश्वरा का सामुनि वादा कर कि तैं सच्ची बतालै; हम त जाणनू कि उ आदिमी पापी छै।”</verse>
				<verse number="25">तब उले उनून जबाब दीछ, “मैं नै जाणनू कि पापी छी या नाहातिन; मैं एक बात जाणछूँ कि मैं अन्धो और अब देखून लाग गयूँ।”</verse>
				<verse number="26">उनूनले उथैं फिर पुछ्छै, कि उले त्यारा दगाड़ कि करछ्य? और उले तैंस कसीकैं चंगो करछ्य?</verse>
				<verse number="27">तब उले उनूनथैं क्योछ, “मैंले तुमून बाता हालछ्य, और तुमून ले नै सुणियो; अब दुबारा क्‍याखिन सुणून चाँछा? क्या तुम ले उक शिष्य बनून चाँछाई?”</verse>
				<verse number="28">तब उन उथैं बुरो-भलो कैभेरन बोलनान, “तैंई उको शिष्य छै; हम तैं परमेश्वरो को संदेश दिनवाला मूसा का शिष्य छा।</verse>
				<verse number="29">हम जाणनू कि परमेश्वर ले मूसा थैं बात कर्यान; लेकिन यो आदिमी स नै जाणनू कि उ काँ भटे आ र्योछ।” छै।</verse>
				<verse number="30">उ उनूनले जबाब दीछ, “यो त ताजुब की बात छै कि तुम ऊस नै जाणना कि उ काँ भटे आ र्योछ, तब ले उले म्यारा आँखा चंगा कर दीयान।</verse>
				<verse number="31">हम जाणनू कि परमेश्वर पापिन कि नै सुणूनो लेकिन अगर कोई परमेश्वरो को भक्त हो तैं और उकी बातुन में चलछो त उ उकी सुणछो।</verse>
				<verse number="32">जब भटे संसार बनिना को छै, तब भटे यो सुणन में नै आयो, कि केले ले जन्मा का अन्धा का आँखान चंगो करछ्य।</verse>
				<verse number="33">अगर यो आदिमी परमेश्वरा का तरफ भटे नी हुनो त केले नी कर सकूनो।”</verse>
				<verse number="34">उनूनले ऊस जबाब दीछ, “तैं त पाप में नन्तिना को छै, तैं हमून सिखूछै?” तब उनूनले उ आदिमी स यहूदी सभाघर भटे भ्यार निकाल दीछ।</verse>
				<verse number="35">जब यीशु ले सुणछ, कि उनूनले ऊस यहूदी सभा घर भटे भ्यार निकाल दी है छ, और जब यीशु का दगाड़ उकी भेंट भैछ, यीशु ले उथैं क्योछ, “क्या तैं परमेश्वरा का च्याला में विश्वास करछै?”</verse>
				<verse number="36">उले जबाब दीछ, “‍श्रीमान, मैंस बता कि यो परमेश्वरो को छै, ताकि मैं उमें विश्वास कर सकूँ?”</verse>
				<verse number="37">तब यीशु ले उथैं क्योछ, “मैं परमेश्वरो को च्योलो छूँ तैं पैलि मैंस देख चुक गैछ और उई मैं छूँ, जो अब त्यारा दगाड़ बात करून मरियोछ।”</verse>
				<verse number="38">उले क्योछ, “हे प्रभु, मैं तैंमें विश्वास करछूँ।” और उले ऊस ढोक दीछ।</verse>
				<verse number="39">तब यीशु ले क्योछ, “मैं यो संसार में न्याय करून खिन आरयूँ, ताकि अन्धा लोग देखून लागाला और जो लोग देखना उन अन्धा हो जाला।</verse>
				<verse number="40">जो फरीसी लोग उक दगाड़ छ्या, उनूनले यो बात सुणभेरन उथैं क्योछ, क्या तैं कुन मरैछ कि हम ले अन्धा छाई?”</verse>
				<verse number="41">यीशु ले उनूनथैं क्योछ, “अगर तुम अन्धा हुना त तुम पापी नी ठैरना अब कुँछा, कि हम त देखनू, येक कारण तुमोरो पाप माफ नी करि जाला।</verse>
			</chapter>
			<chapter number="10">
				<verse number="1">मैं तुमूनथैं सच्ची-सच्ची कुछूँ, कि जो कोई भेड़शाला का दवारून भटे नै ऊँनो, लेकिन और कोई दुसारा बाटा भटे उछो, उ चोर और डाकू छै।</verse>
				<verse number="2">लेकिन भेड़ून को ग्वाला दवारून भटे उछो।</verse>
				<verse number="3">उ खिन दवारपाल द्वार खोल दीछो, और भेड़ उकी आवाज पछयाणनान, और उ अपून भेडून को नाम लीभेरन बुलूछो और भेड़ून भ्यार लिजाछो।</verse>
				<verse number="4">और जब उ अपून सब भेड़ून भ्यार निकाल हालछो, त उनार अघिल-अघिल हिटछो, और भेड़ उक पछिल-पछिल उनान; क्याखिनकि उन उकी आवाज स पछ्याणनान।</verse>
				<verse number="5">लेकिन उन कोई पराया का पछिल नै जाला, लेकिन ऊस देखभेरन भाजाला, क्याखिनकि उन परायान की आवाज नै पछ्याणना।”</verse>
				<verse number="6">यीशु ले उनूनथैं यो उदारण क्योछ, लेकिन उन नै समझिया कि उको कुना को की मतलब छै।</verse>
				<verse number="7">तब यीशु ले उनूनथैं क्योछ, “मैं तुमूनथैं सच्ची-सच्ची कुछूँ, कि द्वार मैंई छूँ, जैल भेड़ भितर जानान।</verse>
				<verse number="8">जदुक म्यारा है पैलि आयान, उन सब चोर और डाकू छन लेकिन भेड़ून ले उनेरि नै सुणि।</verse>
				<verse number="9">मैंई द्वार छूँ, परमेश्वर उनोरो उद्धार करोलो जो म्यारा द्वारा उमें भितर जालो और भितर-भ्यार आ-जा सकोलो और खान खिन खानो पाल।</verse>
				<verse number="10">चोर सिर्फ भेड़ून चोरन, और मारून खिन और नाश करून खिन ऊँछो। मैं येक कारण आरयूँ कि उन सच्चाई में जीवन पाऊ, और पुरो तरीका ले जीवन पाऊनू।</verse>
				<verse number="11">मैं एक बड़िया ग्वाला का नियाती छूँ, बड़िया ग्वाला अपून भेड़ून खिन अपूनो जीवन बलिदान कर दीछो।</verse>
				<verse number="12">मजूरी में राखिना को नौकर जब भेड़िया स उन देखछो त उ भेड़ून छोड़भेरन भाग जाछो, क्याखिनकि उ ग्वाला नाहातिनो और भेडून को उक नाहातिन। येक कारण भेड़िया उनूनमें हमला करछो और झुण्ड स तितर-बितर कर दीछो।</verse>
				<verse number="13">उ येक कारण भाजि जाछो कि उ नौकर छै, और ऊस भेड़ून की चिन्ता नाहातिनी।</verse>
				<verse number="14">मैं एक बड़िया ग्वाला का नियाती छूँ; मैं अपून भेड़ून जाणछूँ, और म्यारा भेड़ मैंस जाणनान।</verse>
				<verse number="15">जस तरीका ले पिता परमेश्वर मैंस जाणछो और मैं पिता परमेश्वर स जाणछूँ। और मैं अपून भेड़ून खिन अपूनो प्राण दीन खिन तैंयार छूँ।</verse>
				<verse number="16">म्यारा और ले भेड़ छन, जो यो भेड़शाला में नाहातिन; मैंस उनूनले ल्यून जरूरी छै, उन मेरि आवाज सुणला, तब एक्कै झुण्ड होलो और एक्कै ग्वालो होलो।</verse>
				<verse number="17">मैं अपून जीवन को बलिदान दी छूँ और यो कारण परमेश्वर मैंस प्रेम करछो, लेकिन मैं इसो करनाका बाद फिर ज्यूनो हो जियूलो।</verse>
				<verse number="18">कोई म्यारा प्राण मैंथैं नै ली सकनो, मैं उ अपूनी मरजी दी छूँ, मैंस ऊस दिना को और फिर वापस लिनाको लै अधिकार छै, यो उई आज्ञा छै जो मैंस म्यारा पिता परमेश्वर भटे मिलीना की छी।”</verse>
				<verse number="19">इन बातुन का कारण फिर यहूदी लोगून में फुट पड़गै।</verse>
				<verse number="20">उनूनमें भटे भौत कुन लाग्यान, “उमें भूत छै, और उ पागल छै, उकी जन सुणा।”</verse>
				<verse number="21">और कईन ले क्योछ, “यो बात इसा आदिमी की नाहातिन जैमें भूत हो, क्या भूत एक अन्धा आदिमी स चंगो नै कर सकूनो?”</verse>
				<verse number="22">यरूशलम शैहर में मन्दिर को स्थापना को त्यार छ्यो, और जो जाड़ान का मौसम में छ्यो।</verse>
				<verse number="23">और यीशु मन्दिर का खाला छ्या उ, उ जाग में घुमून मर्यो छ्यो, जैस लोग राजा सुलैमान का बरामदे कुंनान।</verse>
				<verse number="24">तब यहूदी अगुवा ले वाँ आभेरन ऊस चारू तरफ भटे घेर भेरन उथैं पुछनान, “तैं हमून कब तक दुबिधा में राखलै? अब हमून साफ-साफ बता दे। क्या तैं मसीह छै?”</verse>
				<verse number="25">तब यीशु ले उनून जाबब दीछ, “मैंले तुमूनथैं कै हलछै, और तुम विश्वास करना नै, जो काम में अपून पिता परमेश्वरा का अधिकार ले करछूँ उई मेरि गवै छै।</verse>
				<verse number="26">लेकिन तुम येक कारण विश्वास नै करना क्याखिनकि तुम म्यारा भेड़ून में भटे नाहातिना।</verse>
				<verse number="27">जसीकैं म्यारा भेड़ अपून ग्वाला की आवाज सुणनान और पछयाणनान, उसीकैं म्यारा लोग ले मेरि बातुन में ध्यान दीनान। और मैं उनून जाणछूँ, और उन म्यारा शिष्य बन ग्यान।</verse>
				<verse number="28">और मैं उनून अनन्त जीवन दी छूँ, और उन कभै ले नाश नी हुन, और कोई उनून म्यारा हात भटे नै छड़ा सकनो।</verse>
				<verse number="29">म्यारा पिता परमेश्वर, जेलै उनून मैंस दी रैछ, उ सबून है ठूलो छै, और कोई ले उनून पिता परमेश्वरा का हात भटे नै छड़ा सकनो।</verse>
				<verse number="30">मैं और पिता परमेश्वर एक्कै छा।”</verse>
				<verse number="31">एक बार फिर यहूदी अगुवा ले यीशु मारून खिन ढूंगा उठायान।</verse>
				<verse number="32">यो बात में यीशु ले उनूनथैं क्योछ, “मैंले अपून पिता परमेश्वरा का तरफ भटे भौत भल काम दिखायान, उमें भटे को काम खिन तुम मैंस ढूंगान ले लोड़ियू छा?”</verse>
				<verse number="33">यहूदीन ले ऊस जबाब दीछ, “ भल कामून खिन हम तैंस नै लोणियूना, लेकिन परमेश्वर कि निन्दा का कारण, और आदिमी हो भेरन अपूनास परमेश्वर बनूना को दावा करछै।”</verse>
				<verse number="34">यीशु ले उनून जबाब दीछ, “क्या पवित्रशास्त्र में इसो लिखीना को छी कि परमेश्वर ले अपून लोगून का अगुवान थैं क्योछ, कि ‘तैं ईश्वर छै’?</verse>
				<verse number="35">और तुम जाणछा कि पवित्रशास्त्र में बदलाव नै करि जा सकूनो। येक कारण उनून ईश्वर क्योछ, जिनारा पास परमेश्वरो को बचन पुजछै।</verse>
				<verse number="36">जब मैं कुछूँ, ‘मैं परमेश्वरो को च्योलो छूँ।’ त तुम मैंथैं क्याखिन कुँछा, ‘तैं निन्दा करछै।’ मैंई उई छूँ जैस पिता परमेश्वर ले अलग कर रैछ और मैंस संसार में भेज रैछ।</verse>
				<verse number="37">अगर मैं अपून पिता परमेश्वरो को काम नै करनू त, तुम म्येरो विश्वास जन करा।</verse>
				<verse number="38">लेकिन अगर मैं करछूँ, त चाहे तुम म्येरो विश्वास जन करा, लेकिन उन कामून में विश्वास करा, तब तुमून पत्तो चलोलो, और तुम जाणला कि पिता परमेश्वर मैंमें रूछूँ, और मैं पिता परमेश्वर मैं रूछूँ।”</verse>
				<verse number="39">तब उनूनले फिर ऊस पकड़ना की कोशिश करछ्य, लेकिन उ उनार हात भटे बचभेरन न्हैग्यो।</verse>
				<verse number="40">फिर यीशु यरदन नदी का पार उ जाग में जाछो, जा यहूना पैलि बपतिस्मा दीछ्यो, और उ वाँई रूँछ्यो।</verse>
				<verse number="41">और भौत सारा लोग उक पास आभेरन कुछ्या, “यहूना ले त कोई ले चमत्कार नै दिखाया, लेकिन जो कुछ ले यहूना ले येका बारिमें कईना को छ्यो उ बिलकुल सच्ची छ्यो।”</verse>
				<verse number="42">और वाँ भौत लोगून ले उमें विश्वास करछै।</verse>
			</chapter>
			<chapter number="11">
				<verse number="1">बैतनियाह गौं में लाजर नामको एक आदिमी बिमार छ्यो। मरियम और मार्था उकी बैनि छ्या।</verse>
				<verse number="2">यो उई मरियम छी, जेलै प्रभु का खुटा में मेहंगो इत्र डालछ्य। उक खुटान अपून बालून ले पोछ्यान, येको भाई लाजर बिमार छ्यो।</verse>
				<verse number="3">तब उकी बैनिन ले उखिन जबाब भेजवाछ, “हे प्रभु, जैस तुम प्रेम करछै उ बिमार छै।”</verse>
				<verse number="4">यो सुणभेरन यीशु ले क्योछ, “यो बिमारी को अन्त ले मौत नी लेकिन परमेश्वर कि महिमा खिन छै। कि येक द्वारा मैं परमेश्वरा का च्याला कि महिमा हो।”</verse>
				<verse number="5">यीशु मार्था और उकी बैनि और लाजर स प्रेम करछ्यो।</verse>
				<verse number="6">लेकिन जब यीशु ले सुणछ्य कि लाजर बिमार छै, त जै जाग में उ छ्यो, वाँ द्वी दिन तक और रूक ग्यो।</verse>
				<verse number="7">द्वी दिन बाद यीशु ले अपून शिष्यनूथैं क्योछ, “आ, हम फिर यहूदिया प्रदेश खिन जानू।”</verse>
				<verse number="8">शिष्यून ले उथैं क्योछ, “गुरू जी, ऐल त तैंस यहूदी अगुवा तैंस ढूंगान ले लोणियून चाना, और तैं फिरले वाँई जान चाछै?”</verse>
				<verse number="9">यीशु ले उनून जबाब दीछ, “क्या दिन में बारा घंटा नै हुनाई? अगर कोई दिन में हिटोल त ठोकर नै खानोई, क्याखिनकि यो संसार को उज्यालो मतलब सूरज को उज्यालो देखछो।</verse>
				<verse number="10">लेकिन अगर कोई रात में हिटोलो, त ठोकर खाछो, क्याखिनकि उमें कोई उज्यालो नाहातिनो।”</verse>
				<verse number="11">और येका बाद यीशु शिष्यून थैं कुन लागछै, “हमोरो मित्र लाजर पड़ ग्योछ, लेकिन मैं ऊस बीजून खिन जाछूँ।”</verse>
				<verse number="12">तब शिष्यून ले उथैं क्योछ, “हे प्रभु, अगर उ पड़ ग्योछ, त उठ जालो।”</verse>
				<verse number="13">यीशु ले त उक मरना का बारिमें कईना छ्यो, लेकिन उन समझयान कि उले नीन में पड़ना का बारिमें क्योछ।</verse>
				<verse number="14">तब यीशु ले अपून शिष्यून थैं साफ कै दीछ, “लाजर मरग्योछ।”</verse>
				<verse number="15">और मैं तुमार कारण खुश छूँ, कि मैं वाँ नी छ्यूँ जेलै तुम विश्वास करला। लेकिन आ, “अब हम उक पास जानू।”</verse>
				<verse number="16">तब थोमा ले जैथैं दिदुमुस ले कुंनान, अपून दगाड़ का शिष्यून थैं क्योछ, “आ, हम ले उक दगाड़ मर खिन जानू।”</verse>
				<verse number="17">फिर जब यीशु बैतनिय्याह गौं में आछ, त ऊस मालूम भ्योछ, कि लाजर स दफनाईना का चार दिन हो ग्यान।</verse>
				<verse number="18">बैतनियाह गौं यरूशलम शैहर भटे कोई तीन किलोमीटर दूर छ्यो।</verse>
				<verse number="19">और भौत यहूदी लोग मार्था और मरियम का पास उक भाई का मौत में शान्ति दिन खिन आ रै छ्या।</verse>
				<verse number="20">जसीकैं मार्था ले यीशु की उनाकी खबर सुणछ्य, त उ ऊस मिलन खिन गैछ, लेकिन मरियम घर में बैठि रूछी।</verse>
				<verse number="21">मार्था ले यीशु थैं क्योछ, “हे प्रभु, अगर तैं या हुनै, त म्येरो भाई कभै नै मरूनो।</verse>
				<verse number="22">फिरले मैं जाणछूँ, कि जेलै तैं परमेश्वर थैं माँगले, परमेश्वर तैंस द्योलो।”</verse>
				<verse number="23">यीशु ले उथैं क्योछ, “तेरो भाई फिर ज्यून हो जालो।”</verse>
				<verse number="24">मार्था ले उनूनथैं क्योछ, मैं जाणछूँ, “न्याय का दिन जब हर कोई ज्यूनो हो जालो तब उले मरिनान में भटे ज्यून हो जालो।”</verse>
				<verse number="25">यीशु ले उथैं क्योछ, “मैं उई छूँ जो मरिना का लोगून को जीवन मैं वापस ल्यूछूँ, जो कोई मैंमें विश्वास करछो अगर उ मर जालो त, तब ले ज्यून रौलो,</verse>
				<verse number="26">जो कोई मैंमें विश्वास करछो उ ज्यूनो छै, उन कभै नी मराला, क्या तैं यो बात में विश्वास करछी?”</verse>
				<verse number="27">मार्था ले उथैं क्योछ, “होई, हे प्रभु, मैं विश्वास करछूँ, कि परमेश्वरो को च्योलो मसीह जो संसार में ऊँनवालो छ्यो उ तैंई छै।”</verse>
				<verse number="28">यो कैभेरन उ न्है जाछी, और अपूनी बैनि मरियम स चुपचाप ले बुलाभेरन कुछी, “गुरू याँई छै, और तैंस बुलून मर्योछ।”</verse>
				<verse number="29">यो सुणिभेरन उ तुरन्त उठाभेरन यीशु का पास आछ।</verse>
				<verse number="30">यीशु ऐल तलक गौं में नी पुज रेछयो, उई जाग में छ्यो जा मार्था उथैं मिलछय।</verse>
				<verse number="31">तब जो यहूदी लोग मरियम का घर में छ्या, और ऊस दिलासा दिन मरेछ्या, उनून के देखछ कि उ जल्दी में उठाभेरन भ्यार जानमरैछ। येक कारण गैछ, उन उक पछिल-पछिल ग्यान, यो सोचभेरन कि उ रून खिन कब्र में जानमरैछ।</verse>
				<verse number="32">जब मरियम वाँ पुजछ्य जाँ यीशु छ्यो, त उले यीशु देखनै उक खुटान में पड़भेरन कुछी, “हे प्रभु, अगर तैं या हुनै त म्येरो भाई नी मरूनो।”</verse>
				<verse number="33">जब यीशु ले मरियम और उन यहूदीन जो उक दगाड़ आईना का छ्या उनून रून देखछ्य, त उ भौत परेशान और बैचेन छ्यो, और फिर भौत दुखी हो भेरन उनूनथैं पुछ्छै,</verse>
				<verse number="34">“तुमून ले ऊस काँ दफना रैछ?” उनूनले क्योछ, “प्रभु हिट देखले।”</verse>
				<verse number="35">तब यीशु आँसू निकलून लाग्यान।</verse>
				<verse number="36">तब यहूदी लोग कुन लाग्यान, “देखा, तो तैंस कदुक प्रेम करछ्यो।”</verse>
				<verse number="37">लेकिन उनूनमें भटे थ्वाड़ा लोग कुन लाग्यान, “येले त उ अन्धा आदिमी का आँखा चंगा कर्यान, यो लाजर स मरून है बचा नी सकछो।”</verse>
				<verse number="38">यीशु भौत परेशान और बैचेन हो भेरन कबर का पास आछ, जो एक गुफा में छी, और एक ढूंगा ले गुफा को मुँख बंद करिना को छ्यो।</verse>
				<verse number="39">यीशु ले क्योछ, “ढूंगा स हटा।” उ मरिना वाला की बैनि मार्था उथैं कुछी, “हे प्रभु, अब तैं उ भटे बाश आलि, क्याखिनकि उ मरिनाका चार दिन हो ग्यान।”</verse>
				<verse number="40">यीशु ले उथैं क्योछ, “क्या मैंले तैथैं नै क्योई कि अगर तैं विश्वास करली, त परमेश्वर की महिमा देखलि।”</verse>
				<verse number="41">तब उनूनले उ ढूंगा स हटा दीछ, तब यीशु ले स्वर्ग का तरफ चाँभेरन क्योछ, “हे पिता परमेश्वर मैं तेरो धन्यवाद करछूँ, कि तैले मेरि सुण हलछय।</verse>
				<verse number="42">लेकिन जो भीड़ आश-पास में ठाड़ छी, येक कारण यीशु ले जोरले क्योछ, मैं जाणछूँ कि तैं हमेशा मेरि सुणछै, जैले उन विश्वास करून कि तैंले मैंस भेज रैछ।”</verse>
				<verse number="43">यो कैभेरन उले जोर ध्दयाभेरन क्योछ, “हे लाजर, कबर भटे भ्यार निकल अ!”</verse>
				<verse number="44">उ जो चार दिना को मरिना को छ्यो, कबर भटे भ्यार आग्यो, उक पुर शरीर पट्टीन ले और उक मुँख कपाड़ा ले लपटीना को छ्यो। यीशु ले क्योछ, “कबर का कपाड़ान खोल दी, और तैंस जान दी।”</verse>
				<verse number="45">तब यहूदी लोग जो मरियम स मिल खिन आ रै छ्या, और उको यो काम देखछ्य, उनूनमें भटे भौत लोगून ले विश्वास करछ्य।</verse>
				<verse number="46">लेकिन उमें भटे थ्वाड़ा आदिमीन ले फरीसी लोगून का पास जाभेरन यीशु का कामून का बारिमें बता दीछ।</verse>
				<verse number="47">यो बात में प्रधान याजक और फरीसी लोगून ले महासभा का लोगून जाम करभेरन क्योछ, “हम कि करनू? यो आदिमी तैं भौत चमत्कार दिखूछो।</verse>
				<verse number="48">अगर हम ऊस ऐल नी रोकना, त सब लोग उमें विश्वास कराला कि उई मसीह छै, और रोमी अधिकारी आभेरन हमार मन्दिर और हमार लोगून नाश कर द्याला।”</verse>
				<verse number="49">यहूदी सभा का सदस्यून में भटे कैफा नामोको एक आदिमी ले जो उ सालो को महायाजक छ्यो, उले उनूनथैं क्योछ, तुम केले नै जाणना;</verse>
				<verse number="50">और तुम यो नै समझना, कि यो तुमून खिन यो निको छै, कि हमार लोगून खिन एक आदिमी मरो, और पुरो इस्राएली देशा का लोगून नाश नै हुन।</verse>
				<verse number="51">उले यो बात खुद नै क्यो, उ सालो को महायाजक का रूप में उले यो भविष्यवाणी करछ्य, कि यीशु पुर इस्राएल देशा का लोगून खिन मरोलो।</verse>
				<verse number="52">लेकिन सिर्फ इस्राएल देशा का लोगून खिन नै। उ परमेश्वरा का और सन्तानून खिन ले मरोलो जो यो पुर संसारा में तितर-बितर हो र्यान, ताकि उनून जाम कर सको।</verse>
				<verse number="53">उई दिन भटे यहूदी अगुवा ऊस मरना डालना की साजिश करून लाग्यान।</verse>
				<verse number="54">योई साजिश का कारण यीशु उ बखत यहूदीन का सामुनि में खुलेआम घुमून बन्द कर दी, लेकिन वाँ भटे निकल भेरन बिरान जागा का नजिक इफ्राईम नामाका नगर में न्हैग्यो; और अपून शिष्यून का दगाड़ वाँई रूछो।</verse>
				<verse number="55">और यहूदीन को फसह त्यार नजिक छ्यो, और लोग फसह का त्यार भटे पैलि अपून आपस शुद्ध करून खिन भौत सारा लोग देहात शैहर भटे यरूशलम शैहर खिन ग्यान।</verse>
				<verse number="56">उन लोग यीशु खोजून लागनान और मन्दिर में ठाड़ हो भेरन आपस में कुन लाग्यान, “तुम कि सोचछा? क्या उ त्यार में नी आ?”</verse>
				<verse number="57">और प्रधान याजकून और फरीसी लोगून ले यो हुकुम दिईनाको छ्यो, कि अगर कैसे पत्तो हो कि यीशु काँ छै त उ उनून बतो, कि ऊस गिरफ्तार कर सकूना।</verse>
			</chapter>
			<chapter number="12">
				<verse number="1">फिर यीशु फसह त्यार है छ: दिन पैलि बैतनियाह गौं में आयान, जा उले लाजर स मरिन में भटे ज्यून करिना को छ्यो।</verse>
				<verse number="2">लोगून ले वाँ यीशु का आदर करून खिन दावत को खानो तैंयार करछ्य, और मार्था खानो बाड़ून मरेछी, और लाजर उनूनमें भटे एक छ्यो जो उक दगाड़ खानो खान खिन बैठिनाको छ्यो।</verse>
				<verse number="3">तब मरियम ले जटामांसी को आधा लीटर भौत मेहंगा इत्र लीभेरन यीशु का खुटान में मलछी और अपून बालून ले उक खुटान पोछ्यान, और इत्र की खुशबूले पुरो घर में खुशबू फैल जाछी।</verse>
				<verse number="4">लेकिन उक बारा शिष्यून में भटे यहूदा इस्करियोती नामोको एक शिष्य जो ऊस पकड़ून वालो छ्यो, उ कुन लागछ्य।</verse>
				<verse number="5">“यो इत्र तीन सौ दिन की मजूरी का बराबर छी, येस बेच भेरन गरीबून की मद्दत करि जा सकछी?”</verse>
				<verse number="6">उले यो बात येक कारण क्योछ, ऊस गरीबून की फिकर नी छी, लेकिन येक कारण कि उ चोर छ्यो और उक पास पैसान को थैलो रूछ्यो, और उ जै केले डालछ्या, उ निकाली ली छ्यो।</verse>
				<verse number="7">यीशु ले क्योछ, “येस परेशान जन करा, जो यो करून मरेछ येस करून दी, क्याखिनकि यो म्यार अन्तिम संस्कार की तैंयारी खिन छै।</verse>
				<verse number="8">लेकिन गरीब त तुमार दगाड़ हमेशा रूनान, और मैं तुमार दगाड़ हमेशा नै रूँ।”</verse>
				<verse number="9">जब यहूदीन लोगून ले सुणछ कि यीशु वाँ छै, तब लोगून की भौत ठूली भीड़ वाँ आछ। उन सिर्फ यीशु नै बल्कि लाजर स ले देखून चाँछ्या, जैस उले मरिन में भटे ज्यून करछ्यो।</verse>
				<verse number="10">तब प्रधान याजकून ले लाजर स ले मार डालना की साजिश करछ्य।</verse>
				<verse number="11">क्याखिनकि लाजर का कारण भौत लोग यहूदी अगुवान अस्वीकार करून लाग्यान, और उनूनले यीशु में विश्वास करछ्या।</verse>
				<verse number="12">दुसारा दिन भौतसा लोगून जो फसह को त्यार में आईना छ्या, यो सुणिभेरन कि यीशु यरूशलम शैहर में आ रियोछ।</verse>
				<verse number="13">तब लोगून ले खजूरा का हांगा लियान, और उक स्वागत करून खिन और ऊस मिलून खिन निकल्यान और जोर चिल्ला-चिल्ला भेरन कुन लाग्यान, “होशाना; धन्य छै, इस्राएल देशो को राजा उ जो परमेश्वरा का नाम ले उछो।”</verse>
				<verse number="14">जब यीशु स एक गधाको बच्चा मिलछ्य, उमें बैठभेरन उ यरूशलम शैहर आछ, जसो पवित्रशास्त्र में लिखीना को छै ऊसोई भ्योछ।</verse>
				<verse number="15">“हे यरूशलम शैहरा का लोगो, जन डरा! देखा, तुमोरो राजा, गधा का बच्चा में बैठभेरन, तुमार पास आलो।”</verse>
				<verse number="16">यीशु का शिष्य पैलि इन बातुन नी समझ छ्या; लेकिन जब यीशु की महिमा प्रगट भैछ, तब उनून याद आछ, कि जो कुछ ले यीशु ले दगाड़ भ्योछ उ ठीक ऊसोई छ्यो, जसो पवित्रशास्त्र में कईना को छ्यो।</verse>
				<verse number="17">तब भीड़ का लोग जो उ बखत यीशु का दगाड़ छ्या, जब उले लाजर स कबर में भटे बुलाभेरन, मरिन में भटे ज्यून करछ्य, उन दुसारा लोगून को गवै दीन लाग्यान।</verse>
				<verse number="18">येक कारण भौत लोग यीशु का दगाड़ मिलून खिन आ रै छ्या, क्याखिनकि उनूनले यो चमत्कारा बारिमें सुण राँखछ्यो।</verse>
				<verse number="19">तब फरीसी लोगून ले आपस में क्योछ, “देखा, हम के नै कर पान मरिया; देखा, संसार में हर कोई उक पछिल हो जाछो।”</verse>
				<verse number="20">जो लोग फसह का त्यार में अराधना करून खिन आ रै छ्या, उनूनमें थ्वाड़ा यूनानी लोग छ्या।</verse>
				<verse number="21">उन गलील प्रदेशा का बैतसैदा शैहरा का रून वालो फिलिप्पुसा का पास आभेरन उथैं बिनती करून लागनान, “श्रीमान हम यीशुका दगाड़ मिलून चानू।”</verse>
				<verse number="22">फिलिप्पुस ले आभेरन अन्द्रियास थैं क्योछ, तब अन्द्रियास और फिलिप्पुस ले जाभेरन यीशुस बताछ।</verse>
				<verse number="23">यो बात में यीशु ले उनूनथैं क्योछ, “मैं आदिमी का च्याला की महिमा करना को बखत आग्योछ।</verse>
				<verse number="24">मैं तुमूनथैं सच्ची-सच्ची कुछूँ, कि जब तक ग्यूँको दानो भूमि में पड़भेरन मर नै जानो, उ एकलो रूँछो लेकिन जब उ दानो मरि जाछो त भौत फल ल्यूछ, ऊसोई म्यारा दगाड़ ले होलो।</verse>
				<verse number="25">जो अपून प्राणस प्रिय जाणछो, उ ऊस खो दीछ, लेकिन जो संसार में अपून प्राणस अप्रिय जाणछो; उ उकी अनन्त जीवन तलक उकी रक्षा करोलो।</verse>
				<verse number="26">अगर कोई मेरि सेवा करौ, तो उ म्येरो शिष्य बनौ; तब जा मैं हुलो वाँ म्येरो सेवक ले होलो; अगर कोई मेरि सेवा करोलो, त पिता परमेश्वर उको आदर करोलो।</verse>
				<verse number="27">अब मैं भौत बैचेन छूँ। येक कारण अब मैं कि कू? ‘हे पिता परमेश्वर, मैंस यो दुख का बखत भटे बचौ?’ लेकिन मैं संसार में येक कारण आईना को छूँ ताकि दुख उठू, और अपून प्राण द्यूँ।</verse>
				<verse number="28">हे पिता परमेश्वर, अपूनी नाम की महिमा कर।” तब परमेश्वर ले स्वर्ग भटे क्योछ, “मैंले उकी महिमा करछै, और फिर दुबारा करूँलो।”</verse>
				<verse number="29">तब जो लोग ठाड़ हो भेरन सुणून मरेछ्या, उनूनले क्योछ; कि बादल गरजून मर्योछ, और थ्वाड़ा लोगून ले क्योछ, “कोई स्वर्गदूत उक दगाड़ बात करून मरियोछ।”</verse>
				<verse number="30">यो बात में यीशु ले क्योछ, “यो आवाज मैं खिन नाहातिन लेकिन तुमार भल खिन छ्यो।</verse>
				<verse number="31">अब उ बखत आग्योछ, जब परमेश्वर संसार में लोगून को न्याय करोलो, और यीशु यो संसारा का अधिकारी शैतान की ताकत स खतम कर द्योलो।</verse>
				<verse number="32">और जब मैं धरती में भटे ऊच्चा में चढ़ाई जूलो, त सबून अपून पास ल्यूलो।</verse>
				<verse number="33">इसो कैभेरन उले यो प्रगट कर दीछ, कि उ कसीकैं मरून वालो छै।”</verse>
				<verse number="34">यो बात में लोगून ले उथैं क्योछ, “हमून ले पवित्रशास्त्र कि यो बात सुणि रैछ, कि मसीह हमेशा ज्यून रौल, फिर तैं किलैं कुछै, कि मैं आदिमी का च्याला स ऊँच्चा में चढ़ाई जानो जरूरी छै? यो आदिमी को च्योलो छै?”</verse>
				<verse number="35">यीशु ले उनूनथैं क्योछ, “उज्यालो अब थ्वाड़ा देर तक तुमार बीच में छै, जब तक उज्यालो तुमार दगाड़ छै तब तक हिटनै रौ; इसो नै हो कि अन्यारो तुमून नाश कर द्यो; जो अन्यारा में हिटछो उन नै जाणना कि काँ जानमर्योछ।</verse>
				<verse number="36">जब तक उज्यालो तुमार दगाड़ छै, उज्याला में विश्वास कर कि तुम उज्याला का सन्तान बना।” यो बात कैभेरन यीशु न्हैग्यो और उनून भटे लुकीना को रियोछ।</verse>
				<verse number="37">और यीशु ले उनार सामुनि इदुक चमत्कार दिखाया, तब ले उनूनले उमें विश्वास नै कर्यो;</verse>
				<verse number="38">यो येक कारण भ्योछ ताकि परमेश्वरो को संदेश दिनवाला यशायाह ले कईना को छ्यो, उ पुरो है जौ। उले क्योछ, “हे प्रभु, हमार सुसमाचार में कैले विश्वास करछै? और परमेश्वर की महान सामर्थ केमें प्रगट भैछ? ”</verse>
				<verse number="39">येक कारण उन विश्वास नै कर सक्या, लेकिन यशायाह ले फिरले क्योछ,</verse>
				<verse number="40">“उले उनार आँखान अन्धो कर दीछ, और उनोरो दिमाग स बन्द कर दीछ, काँई इसो नै हो कि उ आँखा ले देखून, और दिमागले समझून, और अपून पापून भटे पश्चताप करून, और मैं उनून चंगो करूँ।”</verse>
				<verse number="41">यशायाह ले यो बात येक कारण क्योछ, कि उले बखत है पैलि उकी महिमा देखछ्य; और उले उक बारिमें बात करछ्य।</verse>
				<verse number="42">फिरले अगुवान में भटे ले भौतून ले उमें विश्वास करछ्य, लेकिन फरीसी लोगून का कारण यीशु स मानना ले डर छ्या, कि उनून यहूदी सभाघर भटे निकाल दी जालो।</verse>
				<verse number="43">क्याखिनकि लोगून की तारीफ उनून परमेश्वर की तारीफ है ज्यादा निकी लागछी।</verse>
				<verse number="44">यीशु ले भीड़ का लोगून ध्दयाभेरन क्योछ, जो मैंमें विश्वास करछो, उ केवल मैंमें नै, लेकिन उ म्यार भेजून वाला परमेश्वर में विश्वास करछो।</verse>
				<verse number="45">और जो मैंस देखछो, उ म्यारा भेजून वाला स देखछो।</verse>
				<verse number="46">मैं संसार में उज्यालो हो भेरन आरयूँ ताकि जो कोई मैंमें विश्वास करोलो, उ अन्यारो में नै रौ।</verse>
				<verse number="47">अगर कोई मेरि बात सुणिभेरन नै माननो, त मैं ऊस दोषी नै ठैरूनू, क्याखिनकि मैं संसार में दोषी ठैरून खिन नै लेकिन संसारा का लोगून की मुक्ति करून खिन आरयूँ।</verse>
				<verse number="48">जो मैंस तुच्छ जाणछो और मेरि बात नै माननो उको न्याय करून वालो एक छै, मतलब जो मैंले जो क्योछ, उ अन्तिम दिनून में उको न्याय करोलो।</verse>
				<verse number="49">क्याखिनकि मैं अपून तरफ भटे कोई ले बात नै करनू, लेकिन पिता परमेश्वर जेलै मैंस भेज रैछ उले मैंस आज्ञा दी रैछ, कि-कि कुँ? और कि-कि बोलू?</verse>
				<verse number="50">मैं जाणछूँ कि उकी आज्ञा मानून अनन्त जीवन छै, येक कारण मैं तुमूनथैं उई बोलछूँ जो पिता परमेश्वर ले मैंथै कै रैछ।</verse>
			</chapter>
			<chapter number="13">
				<verse number="1">फसह त्यार भटे पैलि जब यीशु ले जाणि लीछ, कि म्येरो संसार स छोड़भेरन पिता परमेश्वरा का पास वापस जाना को बखत आग्योछ। उ उनूथैं हमेशा प्रेम राखछो, जो संसार में उक लोग छ्या, उ उनून पुर तरीका ले प्रेम राखछ्यो।</verse>
				<verse number="2">यीशु और उक शिष्य रात को खानो खान मरैछ्या। शैतान ले पैलि भटे यीशु स ध्वाका दीन खिन शमौन को च्योलो यहूदा इस्करियोती का मन में ऊस गिरफ्तार करून वाली बात डाल चुकिनाको छ्यो।</verse>
				<verse number="3">यीशु यो जाणि छ्यो कि पिता परमेश्वर ले ऊस हर चीज में अधिकार दी रैछ और मैं परमेश्वरा का पास है आरयूँ, और परमेश्वरा का पास वापस जानमरियूँ।</verse>
				<verse number="4">खान छोड़भेरन यीशु ले अपून भ्यारा वाला कपाड़ा खोलि दीयान, और अपूनी कमर में तौलिया बाँदि लीछ।</verse>
				<verse number="5">तब उले भांण में पानि भर भेरन शिष्यून का खुटा धोयान, और जो तौलिया अपूनी कमर बाँदिना की छी उले उनार खुट पौछुन लगछ्य।</verse>
				<verse number="6">जब उ शमौन पतरसा का पास आछ, तब पतरस ले यीशु थैं क्योछ, “हे प्रभु, क्या तैं म्यारा खुट धोलेई?”</verse>
				<verse number="7">यीशु ले ऊस जबाब दीछ, “जो मैं करछूँ, तैं उको मतलब ऐल नै समझनै, लेकिन येक बाद समझ ले।”</verse>
				<verse number="8">पतरसले उथैं क्योछ, “तैं म्यारा खुट कभे नै धुन पालै!” यो सणु भेरन यीशु ले उथैं क्योछ, “अगर मैं तैंस नै धुलो! त तेरो म्यारा दगाड़ केले लीन-दीनो नाहातिन।”</verse>
				<verse number="9">शमौन पतरस ले उथैं क्योछ, “हे प्रभु, तैं म्यारा खुट नै, बल्कि म्यारा हात और खोरो ले धो दे।”</verse>
				<verse number="10">यीशु ले उथैं क्योछ, “जो आदिमी ले नाहा चुक ग्योछ, ऊस सिर्फ अपून खुटाका अलावा और के धुना कि जरूरत नाहातिन; क्याखिनकि उ बिलकुल शुद्व छै, और तुम शुद्ध छा, केवल एक स छोड़भेरन।”</verse>
				<verse number="11">उ त अपून पकड़ून वाला स जाण छ्यो येक कारण उले क्योछ, “तुम सब शुद्ध छा, सिर्फ एक स छोड़भेरन।”</verse>
				<verse number="12">जब यीशु उनार खुट धो चुकग्यो और अपून भ्यार वाला कपाड़ा पैन भेरन फिर बैठग्यो तब उनूनथैं कुन लागछो, “क्या तुम समझ छ्या कि मैंले तुमार दगाड़ कि करछ्य?</verse>
				<verse number="13">तुम मैंस गुरू और प्रभु कुँछा, और ठीक कुँछा, क्याखिनकि मैं तुमोरो प्रभु और गुरू छूँ।</verse>
				<verse number="14">अगर मैंले प्रभु और गुरू हो भेरन तुमार खुट धोयान, त तुमूले ले अपून आपस दीन करभेरन एक-दुसरा का खुट धुन चैंनान।</verse>
				<verse number="15">क्याखिनकि मैंले तुमून नमूना दिखाछ, कि जसो मैंले तुमार दगाड़ करछै, ऊसोई तुमूले करा।</verse>
				<verse number="16">मैं तुमूनथैं सच्ची-सच्ची कुछूँ, दास अपून मालिक भटे ठूलो नै हुनो, और नै भेजिना को अपून भेजून वाला भटे ठूलो हुछो।</verse>
				<verse number="17">अब जब कि तुम त इन बातुन जाणछा, त उनून करा ताकि तुम धन्य हो ज्या।</verse>
				<verse number="18">मैं तुम सबून का बारिमें नै कुनू, जिनून मैंले चुन रैछ, उनून मैं जाणछूँ; लेकिन यो येक कारण हुन मरियोछ ताकि पवित्रशास्त्र को यो लेख पुर हो, कि जो म्येरो रोटो खाँछो, उले म्यारा दगाड़ ध्वाका करछै।</verse>
				<verse number="19">अब मैं उ बात हुनै पैलि मैं तुमून जता दी छूँ कि जब यो बात पुरी हो जालि त तुम विश्वास कर्या कि मैं उई छूँ।</verse>
				<verse number="20">मैं तुमूनथैं सच्ची-सच्ची कुछूँ, कि जो म्यारा भजून वाला अपनूछो और स्वागत करछो। उ मैंस अपनूछो और म्यारा स्वागत करछो, और जो मैंस अपनूछो और म्यारा स्वागत करछो, उ म्यारा भजून वाला अपनूछो और स्वागत करछो।”</verse>
				<verse number="21">यो बात कुनाका बाद यीशु भौत परेशान और बैचेन भ्योछ, और यो गवै दीछ, कि मैं तुमूनथैं सच्ची-सच्ची कुछूँ कि तुमून में भटे एक मैंस पकड़वालो।</verse>
				<verse number="22">शिष्य एक-दुसरा स शक करभेरन देखून लाग्यान, कि गुरू यो कैका बारिमें कुन मरियोछ।</verse>
				<verse number="23">उक शिष्यून में भटे एक जैस यीशु प्रेम करछ्यो, उ यीशु का बगल में बैठिना को छ्यो।</verse>
				<verse number="24">तब शमौन पतरसले उक तरफ हात ले इशारा करभेरन पुछ्छै, “बता, त उ कैका बारिमें कुन मरियोछ?”</verse>
				<verse number="25">तब उले यीशु का पास जाभेरन पुछ्छै, “हे प्रभु, उको छै?”</verse>
				<verse number="26">यीशु ले जबाब दीछ, “जैस में यो रोटा को टुकूड़ो सुरवा में डूबाभेरन द्यूलो उई छै, और उले टुकूड़ो सुरवा में डूबभरेन शमौनका च्योलो यहूदा इस्करियोती स दीछ।”</verse>
				<verse number="27">यहूदा ले रोटो को टुकूड़ो लीना का बाद, यीशु ले उथैं क्योछ, “तैं जो करून खिन जानमरेछै, ऊस जल्दी कर।” उ बखत यहूदा स शैतान अपून बश में कर लीछ।</verse>
				<verse number="28">खाना का मेज में लेकिन बैठिन्या वालान में भटे कोई ले नै जाणि छ्यो कि यीशु ले उथैं यो बात क्याखिन क्योछ।</verse>
				<verse number="29">यहूदा का पास पैसान को थैलो रूछ्यो, येक कारण कैले-कैले समझछ, कि यीशु उथैं कुंछो, कि जो कुछ हमून त्यार खिन चैछो उ मोल लीले, या यो कि गरीबून ले थ्वाड़ा दे।</verse>
				<verse number="30">रोटा को टुकूड़ो खाना का बाद यहूदा तुरन्त भ्यार न्हैग्यो, और यो रातो को बखत छ्यो।</verse>
				<verse number="31">जब उ भ्यार न्हैग्यो त यीशु ले क्योछ, “अब मैं आदिमी का च्याला की महिमा भैछ, और परमेश्वर की महिमा मैंमें भैछ।</verse>
				<verse number="32">और परमेश्वर ले अपून च्याला की महिमा करोलो, और तुरन्त कराला।</verse>
				<verse number="33">म्यारा प्रियो, मैं थ्वाड़ा देर तुमार पास छूँ, फिर तुम मैंस खोजला, और जसो मैंले यहूदीयून थैं क्योछ, ‘जाँ मैं जान मरयूँ, वाँ तुम नै आ सकना,’ ऊसोई अब तुमूनथैं ले कुछूँ।</verse>
				<verse number="34">मैं तुमून एक नय्या आज्ञा दी छूँ, कि तुम एक-दुसरा स प्रेम करा। जसकैं मैंले तुमार दगाड़ प्रेम करछ्य, ऊसोई तुमूले एक-दुसरा स प्रेम करा।</verse>
				<verse number="35">अगर तुम आपस में प्रेम राखला त हर कोई जाण ल्याला कि तुम म्यारा शिष्य छा।”</verse>
				<verse number="36">शमौन पतरस ले उथैं क्योछ, “हे प्रभु, तैं काँ जाँछै?” यीशु ले जबाब दीछ, “जाँ मैं जाछूँ, वाँ तैं ऐल म्यारा पछिल नै आ सकने; लेकिन येक बाद म्यारा पछिल आलै।”</verse>
				<verse number="37">पतरसले उथैं क्योछ, “हे प्रभु, ऐल मैं त्यारा पछिल क्याखिन नै आ सकनू? मैं त तैखिन अपून प्राण दीन खिन ले तैंयार छूँ।”</verse>
				<verse number="38">यीशु ले जबाब दीछ, “क्या तैं मैं खिन अपूनो प्राण दीन खिन तैंयार छैई? मैं तैथैं सच्ची-सच्ची कुछूँ कि मुर्गा बाँक दीन है पैलि तैं तीन बार मैंस पछयाणून है मुकर जाले।”</verse>
			</chapter>
			<chapter number="14">
				<verse number="1">तुमोरो मन परेशान और बैचेन नै हो, तुम परमेश्वर में विश्वास राखा और मैंमें ले विश्वास राखा।</verse>
				<verse number="2">म्यारा पिता परमेश्वरा का घर में भौत रूना का जाग छन, अगर नी हुना त, मैं तुमूनथैं कै दीनू क्याखिनकि मैं तुमून खिन जाग तैय्यार करून खिन जाछूँ।</verse>
				<verse number="3">और अगर मैं जाभेरन तुमून खिन जाग तैय्यार करूँ, तो फिर आभेरन तैं तुमून अपून याँ ली जूलो, कि जाँ मैं रूलो वाँ तुमूले रौला।</verse>
				<verse number="4">और जाँ मैं जान मरयूँ तुम वाँ को बाटो जाणला।</verse>
				<verse number="5">थोमा ले उथैं क्योछ, “हे प्रभु, हम नै जाणना तैं काँ जान मरैछै; त उ बाटा स कसीकैं जाणला।</verse>
				<verse number="6">यीशु ले उथैं क्योछ, बाटो और सच्चाई और जीवन मैंई छूँ, बिना म्यारा कोई पिता का पास नै पुज सकूनो।</verse>
				<verse number="7">अगर तुमूले मैंस जाणिना को हुनो, त म्यारा परमेश्वर स ले जाणना, और अब ऊस जाणछा, और ऊस देख ले रैछ।”</verse>
				<verse number="8">फिलिप्पुस ले उथैं क्योछ हे प्रभु, पिता परमेश्वर स हमून दिखा दी; योई हमून खिन भौत छै।</verse>
				<verse number="9">यीशु ले उथैं क्योछ, “हे फिलिप्पुस, मैं कदुक दिन भटे तुमार दगाड़ छूँ, और क्या तैं मैंस नै जाणनै? जेलै मैंस देखछै, उले पिता स ले देखछै,” तैं किलैं कुछै कि पिता स हमून ले देखा?</verse>
				<verse number="10">क्या तैं मैंमें विश्वास करछैई, कि मैं पिता में रूछूँ और पिता मैंमें रूछो? यो बात जो मैं तुमूनथैं कुछूँ, मैं अपून अधिकार ले नै कुनू, लेकिन पिता परमेश्वर मैंमें रैभेरन उई करछो जो उ चाछो।</verse>
				<verse number="11">म्येरो विश्वास कर, कि मैं पिता मैं छूँ और पिता मैंमें छै; नै त जो चमत्कार मैंले कर्यान उनार कारण म्येरो विश्वास करा।</verse>
				<verse number="12">मैं तुमूनथैं सच्ची-सच्ची कुछूँ, कि जो मैंमें विश्वास राखछो, यो काम जो मैं करछूँ उले करोलो, बल्कि इनून है ले ठूला काम करोलो, क्याखिनकि मैं पिता का पास जाछूँ।</verse>
				<verse number="13">और जो कुछ तुम म्यारा नाम ले माँगला, मैं ऊस पुरो करूँलो, जैले च्याला का द्वारा पिता परमेश्वर की महिमा प्रगट हो।</verse>
				<verse number="14">अगर तुम मैंथैं म्यारा नाम ले केले माँगला, त मैं ऊस करूँलो।</verse>
				<verse number="15">अगर तुम मैंथैं प्रेम राखछा त मेरि आज्ञा को पालन करला।</verse>
				<verse number="16">और मैं पिता थैं प्रार्थना करूँलो, और उ तुमून खिन एक और मद्दगार द्योलो, कि उ हमेशा तुमार दगाड़ रौ।</verse>
				<verse number="17">उ सत्य को आत्मा, जो पवित्र आत्मा छै, उ परमेश्वरा का बारिमें सत्य प्रगट करछो, जैस संसार ग्रहण नै करि सकनो, क्याखिन उ नै ऊस देखछो और नै ऊस जाणनो तुम ऊस जाणछा क्याखिनकि उ तुमार दगाड़ रूछो, और उ तुमून में होलो।</verse>
				<verse number="18">“मैं तुमून अनाथ नी छोड़ू, मैं तुमार पास उछूँ।</verse>
				<verse number="19">थ्वाड़ा बखत बाद संसार का लोग मैंस नी देखाला, लेकिन तुम मैंस देखला, येक कारण मैं फिर ज्यून हो ज्यूलो, येक कारण तुमूले ज्यून रौला।</verse>
				<verse number="20">जब मरिना में भटे दुबारा ज्यून हो भेरन वापस उलो, तब तुम जाण ल्याला, कि मैं अपून पिता परमेश्वर में रूछूँ, और तुम मैंमें रूछा, और मैं तुमून में रूलो।</verse>
				<verse number="21">जो मेरि आज्ञान जाणछो। और उ उनून मानछो, उई मैंस प्रेम राखछो, और जो मैंस प्रेम राखछो, ऊस म्येरो पिता परमेश्वर ले प्रेम राखोलो, और मैं ऊस प्रेम राखूलो और अपूनास उमें प्रगट करोलो।”</verse>
				<verse number="22">उ यहूदा जो इस्करियोती नी छ्यो, उले क्योछ, “हे प्रभु, कि भ्योछ कि तैं अपूनास हमून में प्रगट करून चाछै, और संसारा का लोगून में नै।</verse>
				<verse number="23">यीशु ले उनुस जबाब दीछ, मैं अपूनास इसा लोगून दिखुछूँ जो मैंस प्रेम करनान, और जो म्यारा हुकमून मानोलो, और म्येरो पिता परमेश्वर उथैं प्रेम राखोलो, और हम उक पास ऊँला और उक दगाड़ रूला।</verse>
				<verse number="24">जो मैथैं प्रेम नै राखनो, उ म्यारा हुकमून नै माननो, और जो बात मैं तैथैं कुछूँ, मैं अपून अधिकार नै कुनू, लेकिन पिता परमेश्वरा का अधिकार ले कुछूँ, जेलै मैंस भेज रैछ।</verse>
				<verse number="25">यो बात मैंले तुमार दगाड़ रे भेरन तुमूनथैं क्योछ।</verse>
				<verse number="26">लेकिन मद्दगार मतलब पवित्र आत्मा जैस पिता परमेश्वर म्यारा अधिकार का दगाड़ भेजोलो, पवित्र आत्मा तुमून सब बातुन सिखालो, और जेलै मैंले तुमूनथैं कै रैछ, उ सब तुमून याद करालो।”</verse>
				<verse number="27">“मैं तुमून शान्ति दी जाछूँ, अपूनी शान्ति तुमून दी छूँ। यो शान्ति उ नाहातिनी जो संसार दीछो, मैं तुमून नै दीनू। तुम परेशान और बैचेन नै हो और डरा जन।</verse>
				<verse number="28">तुमूले मैंथैं पैलि भटे सुण रैछ, कि ‘मैं जाछूँ और तुमार पास फिर वापस उछूँ,’ अगर कोई मैथैं प्रेम राखछा, त यो बात ले खुशी हुछा कि मैं पिता परमेश्वरा का पास जाछूँ क्याखिनकि पिता मैं है ठूला छन।</verse>
				<verse number="29">और मैंले अब इन सब बातुन का हुन है पैलि तुमूनथैं कै है छ, कि जब उ हो जालो, त तुम मैंमें विश्वास करा।</verse>
				<verse number="30">म्यारा पास तुमार दगाड़ बात करून खिन ज्यादा बखत नै बचियो, क्याखिनकि यो संसारो को अधिकारी शैतान ऊँन मरियोछ, और मैंमें उको कोई बश नाहतीनो।</verse>
				<verse number="31">मैं ऊसोई करछूँ जसो पिता परमेश्वर ले मैंस हुकुम दी रैछ, ताकि संसारा का लोगून मालूम चल सको कि मैं पिता परमेश्वर थैं प्रेम करछूँ। उठा, याँ भटे हिटनू।”</verse>
			</chapter>
			<chapter number="15">
				<verse number="1">यीशु ले क्योछ, “मैं एक सच्ची अंगूर को ब्याल छूँ। और म्येरो पिता परमेश्वर किसान छै।</verse>
				<verse number="2">हरेक हांगो जो मैंमें जुड़ीना को छै, और फलनो नै ऊस उ काटि दीछो, और जो फलछो, ऊस उ छाटछो ताकि और फलो।</verse>
				<verse number="3">जो संदेश मैंले तुमूनथैं क्योछ, उक कारण तुम शुद्ध हो।</verse>
				<verse number="4">तुम मैंमें बनि रौ, और मैं तुमून बनि रूलो, जसीकैं हांगो अगर अंगूर का ब्याला में बनिनाको नै रौ, त अफी नै फल सकनो उसीकैं तुमूले केले निको नै कर सकना।</verse>
				<verse number="5">मैं एक अंगूर का ब्योलो छूँ, तुम उक हांगा छा; जो मैंमें बनिना को रूछो, और मैं उमें उ भौत फलछो, क्याखिनकि मैं भटे अलग हो भेरन तुम केले नै करि सकना।</verse>
				<verse number="6">अगर कोई मैंमें बनिना को नी रौलो, त उ हांगाका नियाती कट भेरन खिती दी जाछो, और जब उ हांग सुखी जाछो, त लोग ऊस जाम करभेरन आग में डाल दी जाछो, और उ जलि जाछो।</verse>
				<verse number="7">अगर तुम मैंमें बनि रौला, और मेरि शिक्षा तुमून में बनिना की रौली त जो कुछ ले तुम चाछा माँगा, मैं ऊस तुमून खिन पुरो करोलो।</verse>
				<verse number="8">म्यारा पिता परमेश्वर की महिमा येले हुछी, कि तुम भौत फल ल्या, तब तुम म्यारा शिष्य हुना को सबूत छा।</verse>
				<verse number="9">जसो पिता ले मैंथैं प्रेम राखछ्य, ऊसोई मैंले तुमार दगाड़ राखछ्य, म्यारा प्रेम में बनिना का रौ।</verse>
				<verse number="10">तुम म्यारा हुकमून मानला, त म्यारा प्रेम बनिना का रौला जसीकैं मैंले अपून पिता परमेश्वरा का हुकमून मानछ्य, और उक प्रेम में बनिनाको रूछूँ</verse>
				<verse number="11">मैंले यो बात तुमूनथैं येक कारण क्योछ, ताकि तुमूनमें ले उई खुशी हो जो मैंमें छै, और तुम पुर तरीका ले खुश रौ।</verse>
				<verse number="12">मेरि आज्ञा यो छै, कि जसकैं मैंले तुमूनथैं प्रेम राखछ, उसीकैं तुम ले एक-दुसरा थैं प्रेम राखा।</verse>
				<verse number="13">कैका पास यो दिखून खिन कि उ अपून मित्र थैं प्रेम करछो, यो है ठूलो कोई तरीका नाहातिन कि उ मित्रून बचुन खिन अपूनो जान तक दी दे।</verse>
				<verse number="14">जो कुछ मैं तुमून आज्ञा दी छूँ, अगर ऊसोई करला, त तुम म्यारा मित्र छा।</verse>
				<verse number="15">ऐल भटे मैं तुमूनथैं सेवक नी कुँलो, क्याखिनकि सेवक नै जाणनो, कि उको मालिक की करछो, लेकिन मैंले तुमूनथैं मित्र कै रैछ, क्याखिनकि जो बात मैंले अपून पिता परमेश्वर थैं सुणियान, उ सब तुमून बता दीयान।</verse>
				<verse number="16">तुमूले मैंस नै चुनयो लेकिन मैंले तुमून चुनछ्य और तुमून नियुक्त करछ्य ताकि तुम संसार में जा और फलवन्त हो ज्या, और तुमोरो फल बनिनाको रौ, तुम म्यारा शिष्य छा येक कारण जो कुछ तुम म्यारा नाम ले पिता परमेश्वर थैं माँगला, उ तुमून द्योलो।</verse>
				<verse number="17">इन बातुन की आज्ञा मैं तुमून येक कारण दीछूँ, कि तुम एक-दुसरा थैं प्रेम राखा।</verse>
				<verse number="18">अगर संसारा का लोग तुमून खिन बैर राखनान, त तुम जाणछा, कि उले तुमून है पैलि मैं खिन ले बैर राखछ्य।</verse>
				<verse number="19">अगर तुम संसारा का लोगून की नियाती हुना, त संसारा का लोग अपून थैं प्रेम राखनान, लेकिन येक कारण कि तुम संसार में सम्बन्ध नै राखना, लेकिन मैंले तुमून संसार में भटे चुन ली है छ; येक कारण संसारा का लोग तुम खिन बैर राखाला।</verse>
				<verse number="20">याद राखा की मैंले तुमूनथैं कि क्योछ, ‘दास अपून मालिक है ठुल नै हुनो,’ ऊस याद राख अगर उनूनले मैंस सताछ, त तुमून ले सताला; अगर उनूनले मेरि शिक्षा नै मान्यो, त तुमेरि शिक्षा स ले नी मानाला।</verse>
				<verse number="21">उन यो सब म्यारा नामाका कारण तुम क्याखिनकि जै परमेश्वर ले मैंस भेज छै, उ नै जाणना।</verse>
				<verse number="22">अगर मैं नी ऊँनू, और उनूनथैं बात नी करनू, तो उन पापी नै ठैरना लेकिन अब उनूनथैं उनार पापून खिन कोई बहाना नाहतिन।</verse>
				<verse number="23">जो मैंथैं बैर राखछो, उ म्यारा पिता परमेश्वरा का दगाड़ बैर राखछो।</verse>
				<verse number="24">अगर मैं उनार बीच में चमत्कार नी करनू, और जो कैले नै कर्यो त उन पापी नै ठैरून, लेकिन अब उनूनले मैंस देख लीछ, और उनूनले मैथैं और म्यारा पिता परमेश्वर और द्वीवै थैं नफरत करछ्य।”</verse>
				<verse number="25">यो येक कारण भ्योछ कि जो उनार पवित्रशास्त्र में लिखीना छै, “उनूनले बिना वजह मैं खिन नफरत करछ्य।”</verse>
				<verse number="26">मैं पिता परमेश्वरा का तरफ भटे तुमून खिन एक मद्दगार भेजूलो। उ पवित्र आत्मा छै जो पिता परमेश्वरा का तरफ भटे उछो और जो सत्य छै उ प्रकट करछो। जब उ आलो, त उ तुमून म्यारा बारिमें बतालो।</verse>
				<verse number="27">और तुम संसारा का लोगून म्यारा बारिमें बताला, क्याखिनकि तुम शुरू भटे म्यारा दगाड़ रैईनाका छा।</verse>
			</chapter>
			<chapter number="16">
				<verse number="1">यीशु ले क्योछ, यो बात मैंले तुमूनथैं येक कारण क्योछ, कि जो विश्वास तुमूले मैंमें करछ्य तुम उ विश्वास स छोड़ जन दी।</verse>
				<verse number="2">उन तुमून यहूदी सभाघर में भटे निकाली द्याला, बल्कि उ बखत ऊँन मरियोछ, कि जो कोई तुमून मार डालोल, उ यो समझोलो कि मैं परमेश्वर की सेवा करून मरयूँ।</verse>
				<verse number="3">और उन येक कारण कराला कि उनूनले नै पिता परमेश्वर जाण छै और नै मैंस।</verse>
				<verse number="4">लेकिन यो बात मैंले येक कारण तुमूनथैं क्योछ, कि जब उनोरो पुरो हुना को बखत आ जालो तैं तुमून याद जौ, कि मैंले तुमूनथैं पैलि भटे कै राखछ्यो, जब तुम शुरू में म्यारा शिष्य बन छ्या, मैंले इन बात तुमून शुरूवाद में येक कारण नै क्यो क्याखिनकि मैं तुमार दगाड़ छयूँ।</verse>
				<verse number="5">अब मैं अपून भेजून वाला का पास जाछूँ, और तुमून में भटे कोई ले मैंथैं नै पुछुनो, “तैं काँ जान मरछै?”</verse>
				<verse number="6">लेकिन मैंले जो यो बात तुमूनथैं क्यान, येक कारण तुमोरो मन भौत उदास हो ग्योछ।</verse>
				<verse number="7">फिरले मैं तुमूनथैं सच्ची कुछूँ, कि म्यारा जान तुमून खिन निको छै, क्याखिनकि अगर मैं नी जूलो, त उ मद्दगार तुमार पास नै आलो, और अगर मैं जूलो त उ मद्दगार तुमार पास भेजोलो।</verse>
				<verse number="8">जब उ आलो संसार का लोगून पाप और धार्मिकता और न्याय का बारिमें यकीन दिलालो।</verse>
				<verse number="9">उ पाप का बारिमें यकीन दिलालो कि उन मैंमें विश्वास करून है इन्कार करनान।</verse>
				<verse number="10">और धार्मिकता का बारिमें ले यकीन दिलालो कि मैं पिता परमेश्वरा का पास जाछूँ। और तुम मैंस फिर नै देखा।</verse>
				<verse number="11">और न्याय का बारिमें ले यकीन दिलालो कि यो संसारा अधिकारी, मतलब शैतान स दोषी ठैराई ग्योछ।</verse>
				<verse number="12">यीशु ले क्योछ, मैंले तुमूनथैं और ले भौत कुछ बतून छै, लेकिन ऐल तुम उन बातुन सह नै सकना।</verse>
				<verse number="13">लेकिन जब उ मतलब सत्य को आत्मा आलो, जो पवित्र आत्मा छै, उ परमेश्वरा का बारिमें सत्य प्रगट करछो, क्याखिनकि उ अपून अधिकार ले नै कलौ, लेकिन जो कुछ परमेश्वरा का तरफ भटे सुणोलो, उई कलौ, और ऊँन वाली बातुन तुमून बतालो।</verse>
				<verse number="14">और उ मेरि महिमा करोलो, क्याखिन ऊस मेरि तरफ भटे मिलीना को छै, उई तुमून बतालो।</verse>
				<verse number="15">जो कुछ पिता परमेश्वरो को छै, उ सब म्येरो छै; येक कारण मैंले क्योछ, कि उ मेरि बातुन में लीभेरन तुमून बतालो।</verse>
				<verse number="16">“थ्वाड़ा देर तुम मैंस नी देखला, और फिर थ्वाड़ा देर में तुम मैंस देखला।”</verse>
				<verse number="17">तब यीशुका थ्वाड़ा शिष्य आपस में कुंनान, “यो कि बात छै, जो उ हमून थैं कुंछो, ‘थ्वाड़ा देर में तुम मैंस नी देखला, और फिर थ्वाड़ा देर में तुम मैंस देखला?’ और यो ‘येक कारण कि मैं पिता परमेश्वरा का पास जाछूँ’?”</verse>
				<verse number="18">तब उनूनले क्योछ, “यो ‘थ्वाड़ा देर’ जो उ कुंछो, कि बात छै? हम नै जाणना, कि उ कि कुंछो।”</verse>
				<verse number="19">यीशु ले यो जाणिभेरन, कि उन मैंथैं इन बातुन पुछून चाँनान, उले उनूनथैं क्योछ, “थ्वाड़ा देर में तुम मैंस नी देखला, और फिर थ्वाड़ा देर बाद मैंस देखला?”</verse>
				<verse number="20">मैं तुमूनथैं सच्ची-सच्ची कुछूँ; कि तुम म्यारा मरना का बाद तुम रोला और विलाप करला, लेकिन संसार का लोग खुशी मनाला, तुमून दुख होलो, लेकिन जब मैं मरिनान में भटे दुबारा ज्यून हो भेरन वापस ऊँलो, तुमोरो दुख खुशी में बदल जालो।</verse>
				<verse number="21">जब स्यैनि बच्चा स जन्म दीन बखत उछो, त उ भौत तखलीफ में हुछी। क्याखिनकि उको दुखो को बखत आ जाछो, लेकिन जब उ बच्चा जन्म दी दीछी, त यो खुशी में कि संसार में एक आदिमी पैद भ्योछ, येक कारण उ स्यैनि उ तखलीफ स भूल जाछी।</verse>
				<verse number="22">उसीकैं तुमून ले ऐल दुख छै, लेकिन जब मैं तुमूनथैं फिर मिललो, और तुम भौत खुश हो जाला; और तुमेरि खुशी कोई तुमूनथैं छीन नै सकना।</verse>
				<verse number="23">उ बखत जब मैं तुमून फिर देखलो तब तुम मैंथैं के नी पूछला; मैं तुमूनथैं सच्ची-सच्ची कुछूँ, अगर पिता थैं कै माँगला त उ म्यारा शिष्य हुना का नाता ले तुमून द्योलो।</verse>
				<verse number="24">ऐल तक तुमून ले म्यारा शिष्य हुना का नाता ले पिता परमेश्वर थैं के नै माँगयो, पिता परमेश्वर थैं माँगला, त तुमून दीई जालो, ताकि तुम पुर तरीका ले खुश रौ।</verse>
				<verse number="25">मैंले यो बात तुमूनथैं उदारण में क्योछ, लेकिन अब उ बखत ऊँन मरियोछ, कि मैं तुमूनथैं उदारणुन में और फिर नी कुँलो, लेकिन खुलभेरन तुमून पिता का बारिमें बतुलो।</verse>
				<verse number="26">उ दिन तुम म्यारा शिष्य हुना का नाता ले पिता परमेश्वर थैं माँगला, और मैंस तुमूनथैं कुंछूँ कि मैं तुमून खिन पिता थैं प्रार्थना नी करूँलो।</verse>
				<verse number="27">क्याखिनकि पिता परमेश्वर त खुद तुमूनथैं प्रेम राखछो, येका कारण कि तुमून ले मैंथैं प्रेम राखछा, और यो विश्वास करछ्य, कि मैं पिता परमेश्वर में का तरफ भटे आरयूँ।</verse>
				<verse number="28">मैं पिता का तरफ भटे आरयूँ, फिर संसार स छोड़भेरन पिता परमेश्वरा का पास जाछूँ।</verse>
				<verse number="29">यीशुका शिष्यून ले क्योछ, “देखा, अब तैं तुम खुलभेरन कुँछै, और कोई उदारण नै कुँनै।</verse>
				<verse number="30">अब हम जाण ग्या, कि तैं सब कुछ जाण छै, और तैंस कैकी जरूरत नाहतिन कि कोई तैथैं सवाल पुछोलो, येमें हम विश्वास करनू, कि तैं परमेश्वरा का तरफ भटे आईना को छै।”</verse>
				<verse number="31">यो सुणभेरन यीशु ले उनुस जबाब दीछ, “क्या अब तुम विश्वास करछा?</verse>
				<verse number="32">देखा, उ बखत उछो, बल्कि आई ग्योछ कि तुम सब तितर-बितर हो भेरन अपून-अपून बाटा हो ल्याला, और मैंस ऐकलो छोड़ देला, फिरले उले मैंस ऐकलो नै छोड़ियो; क्याखिनकि पिता परमेश्वर म्यारा दगाड़ छै।</verse>
				<verse number="33">मैंले यो बात तुमूनथैं येक कारण क्यान, कि तुम म्यारा शिष्य छा शान्ति मिलो। लेकिन हिम्मत राखा, क्याखिनकि मैंले यो संसारा का अधिकारी मतलब शैतान स हरा दीछ।”</verse>
			</chapter>
			<chapter number="17">
				<verse number="1">यीशु ले अपून शिष्यून थैं यो बात कुना का बाद, स्वर्ग का तरफ देखिभेरन क्योछ, “हे पिता परमेश्वर, उ बखत आग्योछ, अपून च्याला की महिमा कर, कि च्योलो ले तुमेरि महिमा करो,</verse>
				<verse number="2">क्याखिनकि तैंले मैंस सब लोगून में अधिकार दीछ, कि जिनून तैले मैंस दी रैछ, उन सबून मैं अनन्त जीवन दीयू।</verse>
				<verse number="3">और अनन्त जीवन यो छै, कि लोग तैंस, मतलब एकमात्र सच्चा परमेश्वर स जाण सकून, और उन मैंस जाण सकून मतलब यीशु मसीह स जैस तैले भैजि रैछ।</verse>
				<verse number="4">जो काम तैले मैंस करून खिन दीईना को छ्यो, ऊस पुरो करभेरन मैंले धरती में तेरि महिमा कर रैछ।</verse>
				<verse number="5">और अब हे पिता परमेश्वर, तैं अपून दगाड़ मेरि महिमा उ महिमा स कर जो संसारा का बनून है पैलि म्यारा दगाड़ तेरि छी।”</verse>
				<verse number="6">“मैंले तेरो नाम उन शिष्यून में प्रगट करछ्य, कि तैं को छै, जिनून तैंले संसार में मैंस दीयान, उन त्यारा छ्या और तैंले उनून मैंस दीयान और उनूनले त्यारा शिक्षान को पालन करछै।</verse>
				<verse number="7">अब उन जाणि ग्यान, कि जो कुछ ले तुमूले मैंस दीछ, उ सब त्यारा तरफ भटे छै।</verse>
				<verse number="8">येक कारण जो संदेश तैंले मैंस दीछ, मैंले ऊस उनून दी दीछ, और उनूनले उ संदेश में विश्वास करछ्य और सच्ची-सच्ची जान लीछ, कि मैं तुमार तरफ भटे आरयूँ, और उनूनले यो विश्वास करछ्य कि तैले मैंस भेज रैछ।</verse>
				<verse number="9">मैं उनून खिन प्रार्थना करछूँ, जिनून तैले मैंस दीछ, क्याखिनकि उन त्यारा छन; लेकिन मैं उनून खिन बिनती नै करनू, जो संसार भटे संबन्ध राखनान।</verse>
				<verse number="10">और जेलै म्येरो छै उ सब तुमोरो छै; और जो तुमोरो छै उ म्येरो छै और इनून में मेरि महिमा प्रगट भैछ।</verse>
				<verse number="11">यीशु ले क्योछ, अब मैं संसार में नै रूलो, मैं तुमार पास ऊँन मरियूँ, लेकिन म्यारा शिष्य ऐल ले संसार में छन; हे पवित्र पिता परमेश्वर, जिनून तैले मैंस दीछ अपून नाम की सामर्थ ले उनेरि रक्षा कर कि उन एक हुन जस हम एक छा।</verse>
				<verse number="12">जब मैं उनार दगाड़ छयूँ, त मैंले तुमार उ नाम ले, जो तुमूले मैंस दीछ, उनेरि रक्षा करछ्य, और मैंले उनेरि देख-रेख करछ्य, और विनाशा का च्याला स छोड़, उनूनमें भटे कोई नाश नै भ्यो। ताकि पवित्रशास्त्र में जो लिखी ग्योछ उ पुरो हो।</verse>
				<verse number="13">लेकिन अब मैं तुमार पास उछूँ, और यो बात संसार में रैभेरन कुछूँ, उन म्यारा खुशी ले पुरो तरीका ले भर जाला।</verse>
				<verse number="14">मैंले तुमोरो संदेश उनून दीछ, और संसारका लोगून ले उनूनथैं बैर करछ्य, क्याखिनकि जसकैं मैं संसारो को नाहतिनूँ, उसीकैं उन ले संसारा का नाहातिन।</verse>
				<verse number="15">मैं यो प्रार्थना नै करनू कि तुम उनून संसार भटे उठा ली लेकिन यो कि तैं उनून शैतान भटे बचौ राख।</verse>
				<verse number="16">जसो मैं संसारो को नाहतिनूँ, उसीकैं उन ले संसारा का नाहातिन।</verse>
				<verse number="17">तेरो बचन सत्य छै। उनून सच्चाई में अपून खिन अलग कर।</verse>
				<verse number="18">जसीकैं तैले मैंस संसार में भेजछ्य, उसीकैं मैंले इनून संसार में भेजछ्य।</verse>
				<verse number="19">और उनार फैद खिन मैं अपून आपस अलग करछूँ, ताकि उन ले सत्य का द्वारा पवित्र करि जून।</verse>
				<verse number="20">मैं केवल इन शिष्यून खिन प्रार्थना नै करनू, लेकिन जो इनारा संदेश द्वारा मैंमें विश्वास कराला, मैं उनून खिन ले बिनती करछूँ।</verse>
				<verse number="21">कि उन सब एक हुन; जसो तैं पिता परमेश्वर मैंमें रूछै और मैं तुमून में रूछो छूँ, उसीकैं उन ले हम में रून, येका कारण कि संसारा का लोग विश्वास करून, कि तैंलेई मैंस भेजछ्य।</verse>
				<verse number="22">और उ महिमा जो तुमूले मैंस दीछ, मैंले उनून दी है छ, कि जसा हम एक छा उसीकैं उन ले एक हुन।</verse>
				<verse number="23">मैं उनूनमें और तुम मैंमें कि उन सिद्ध हो भेरन एक हो हुन, और संसार जाणौ कि तुमूले मैंस भेजछ्य, और जस तुमूले मैंस प्रेम राखछ, ऊसोई उनूनथैं प्रेम राखछ।”</verse>
				<verse number="24">फिर यीशु ले क्योछ, “हे पिता परमेश्वर मैं चाछूँ कि जिनून तुमूले मैंस दी रैछ, जा मैं छूँ, वाँ उन ले म्यारा दगाड़ हुन कि उन मेरि उ महिमा स देख सकून जो तुमूले मैंस दीछ, क्याखिनकि तुमूले संसारा का शुरू भटे मैथैं प्रेम राखछ।</verse>
				<verse number="25">हे धार्मिक पिता, संसारा का लोगून ले तुमून नै जाणियो, लेकिन मैंले तुमून जाणछ्य, और इन शिष्यून ले जाणछ्य कि तैंले मैंस भेजछ्य।</verse>
				<verse number="26">मैंले तैंस उनूनमें प्रगट करछै, और करनै रूँलो कि जो प्रेम तैंस मैंथैं छ्यो, उई प्रेम उनूनमें बश ज्यो और मैं उनूनमें करूँलो।”</verse>
			</chapter>
			<chapter number="18">
				<verse number="1">जब यीशु ले प्रार्थना करून खतम करछ्य, अपून शिष्यून दगाड़ किद्रोना का नालाका पार ग्यान, और वाँ एक बगीच छ्यो, जैमें उ और उक शिष्य ग्यान।</verse>
				<verse number="2">और उको पकड़ून वालो यहूदा ले, उ जाग स जाणि छ्यो, क्याखिन यीशु अपून शिष्यून का दगाड़ वाँ जा छ्यो।</verse>
				<verse number="3">तब यहूदा रोमी सिपाई को एक दल स और प्रधान याजकून और फरीसी लोगून का तरफ भटे सिपाईन लीभेरन वाँ लालटीन और मशालून और हथियारून का दगाड़ वाँ आयान।</verse>
				<verse number="4">तब यीशु उन सब बातुन जो उक दगाड़ हुन वाली छी, जाणिभेरन अघिल बड़छै, और उनूनथैं पुछून लागछ्य, “तुम कैस खोजून मरैछा?”</verse>
				<verse number="5">उनूनले जबाब दीछ, “नासरत शैहरा का यीशुस।” यीशु ले उनूनथैं क्योछ, “हाँ मैं उई छूँ।” और ऊस पकड़ून वालो यहूदा ले उनार दगाड़ छ्यो।</verse>
				<verse number="6">यीशु का यो कुँनै “हाँ मैं उई छूँ,” उन पछिल कै हटाभरेन भिमें खिती ग्या।</verse>
				<verse number="7">तब उले फिर उनूनथैं पुछ्छै, “तुम कैस खोजून मरैछा।” उन बोलियान, “नासरत शैहरा का यीशु स।”</verse>
				<verse number="8">यीशु ले जबाब दीछ, मैं त तुमूनथैं कै हालछ्य कि मैंई छूँ, अगर तुम मैंस खोजून मरैछा, त म्यारा शिष्यून जान दी।</verse>
				<verse number="9">इसो येक कारण भ्योछ ताकि यीशु ले जो पैलि कईना छ्यो उ बचन पुरो हो ज्यो, “जिनून तैले मैंस दीछ, उनूनमें भटे मैंले एक ले नै हराइयो।”</verse>
				<verse number="10">शमौन पतरसा ले तलवार जो उक पास छी, निकालछ्य और महायाजक का दास में चलाभेरन उको दैंन कान काट दीछ, और उ दासो को नाम मलखुस छ्यो।</verse>
				<verse number="11">तब यीशु ले पतरस थैं क्योछ, “अपूनी तलवार स दूर कर। जो दुख पिता परमेश्वर ले मैंस सहन करून खिन दी रैछ, क्या मैं ऊस सहन नै करूँ?”</verse>
				<verse number="12">तब सिपाई और उनार सुबदार और यहूदीन का तरफ भटे मन्दिरा का रखवालान ले यीशुस पकड़ भेरन बाँदि लीछ।</verse>
				<verse number="13">और पैलि ऊस हन्ना का पास ली ग्यान क्याखिनकि उ ऊस सालो को महायाजक कैफा को सौरो छ्यो।</verse>
				<verse number="14">यो उई कैफा छ्यो, जेलै यहूदीन सलाह दी राँख छी, कि हमार लोगून खिन एक आदिमी को मरन ठीक छै।</verse>
				<verse number="15">शमौन पतरस और एक शिष्य ले यीशु का पछिल जानान। यो शिष्य महायाजक को जाण-पछ्याणो को छ्यो, येक कारण उ यीशु का पछिल महायाजक का खाला में ग्योछ।</verse>
				<verse number="16">लेकिन पतरस भ्यार द्वार में ठाड़ रियोछ, तब उ दुसोरो शिष्य जो महायाजक को जाण-पछ्याणो छ्यो, भ्यार जाभेरन, और द्वार में नियुक्त करिना की उ दासी थैं केभेरन, पतरस स भितर ल्याछ।</verse>
				<verse number="17">द्वार में नियुक्त करिना की उ दासानी ले पतरस थैं क्योछ, “क्या तैले यो आदिमी का शिष्यून में भटे छै?” उले क्योछ, “नै, मैं नाहातिनू।”</verse>
				<verse number="18">वाँई तब सिपाई और उनार सुबदार और यहूदीन का तरफ भटे मन्दिरा का रखवाला जाड़ा का कारण आगो जलाभेरन तापून मरेछ्या, और पतरसले उनार दगाड़ ठाड़ हो भेरन आंग तापून मरेछ्यो।</verse>
				<verse number="19">तब महायाजक ले यीशु थैं उक शिष्यून का बारिमें और उक उपदेशा का बारिमें पुछछै।</verse>
				<verse number="20">यीशु ले ऊस जबाब दीछ, “मैंले संसारा का लोगून थैं खुलभेरन बात कर्यान; मैंले यहूदी सभाघरून में और मन्दिर में जा सब यहूदी जाम हुनान, और वाँ हमेशा उपदेश दीछ, और गुप्त में केले नै क्यो।</verse>
				<verse number="21">तैं मैंथै यो सवाल क्याखिन पुछून मरैछै? सुणून वाला थैं पुछ; कि मैंले उनूनथैं कि क्योछ? देख उन जाणनान कि मैंले कि-कि क्योछ?”</verse>
				<verse number="22">जब उले यो क्योछ, त मन्दिर का रखवालान में भटे एकले जो पास में ठाड़ छ्यो, यीशुस थप्पड़ मारभेरन क्योछ, “क्या तैं महायाजक स इसो प्रकार को जबाब दीछै?”</verse>
				<verse number="23">यीशु ले ऊस जबाब दीछ, “अगर मैंले बुरो क्योछ, त मेरि बात साबित कर, लेकिन अगर भलो क्योछ, त मैंस किलैं मार छै?”</verse>
				<verse number="24">यीशु स बाँदिना को छ्यो, और हन्ना ले ऊस कैफा महायाजक का पास भेज दीछ।</verse>
				<verse number="25">शमौन पतरस उक दगाड़ ठाड़ हो भेरन आगो तापून मरेछ्यो। तब उनार दगाड़ ठाड़ लोगून ले पतरस थैं पुछ्छै, “क्या तैले उक शिष्यून में भटे छैई?” उले इन्कार करभेरन क्योछ, “नै, मैं नाहतिनूँ।”</verse>
				<verse number="26">महायाजक का दासून में भटे एक जो उक रिशतेदार छ्यो, जैको कान पतरसले काटछ्य, तब उ बोलछ्य, “क्या मैंले तैंस उक दगाड़ बगीच में नै देख्यो?”</verse>
				<verse number="27">पतरसले फिर मुकर जाछो कि “नै मैं नी छूँ,” और मुर्गा ले झट बाँक दीछ।</verse>
				<verse number="28">और यहूदी लोग यीशुस कैफा का पास भटे रोमी राज्यपाल पिलातुस का महल का तरफ ली ग्यान और रात्तै को बखत छ्यो, येक कारण उन महल का भितर नै ग्या कि काँई फसह को खानो है पैलि मूसा नियम-कानून का अनुसार अशुद्ध नै हो ज्या।</verse>
				<verse number="29">तब पिलातुस उनार पास भ्यार निकल भेरन आछ, और उले क्योछ, “तुम यो आदिमी में कि बात को दोष लगूछ्या?”</verse>
				<verse number="30">उनूनले ऊस जबाब दीछ, “अगर यो आदिमी अपराधी नी हुनो त हम ऊस त्यारा पास नै ल्यूनान।”</verse>
				<verse number="31">पिलातुस ले उनूनथैं क्योछ, “तुमई येस ली जाभेरन अपूनी नियम-कानून के अनुसार उको न्याय करा।” यहूदी अगुवा ले उथैं क्योछ, “हमार पास कैसे ले मारना को कोई अधिकार नाहातिन।”</verse>
				<verse number="32">यो येक कारण भ्योछ, कि यीशु की उ बात पुरी हो जो उले कै राखछ्या कि उकी मौत कसीकैं होलि।</verse>
				<verse number="33">तब पिलातुस फिर महल में ग्योछ, और यीशुस बुलाभेरन, उथैं पुछ्छै, “क्या तैं यहूदीन को राजा छै।”</verse>
				<verse number="34">यीशु ले जबाब दीछ, “क्या तैं यो बात अपून तरफ भटे कुँछै या औरून ले म्यारा बार में तैथैं कै रैछ?”</verse>
				<verse number="35">पिलातुस ले जबाब दीछ, “तैं जाण छै कि मैं यहूदी नाहातिनू, त्यारा जाति का लोगून ले और प्रधान याजकून ले तैंस म्यारा हवाले कर रैछ, तैले कि कर रैछ?”</verse>
				<verse number="36">यीशु ले जबाब दीछ, “म्येरो राज्य यो संसार को नाहातिन, अगर म्येरो राज्य यो संसारो को हुन त, तैं म्यारा मानन्या वाला लड़ूना, कि मैं यहूदी अगुवान का हवाला नी करि जाँनू, लेकिन म्येरो राज्य याँ को नाहातिन।”</verse>
				<verse number="37">पिलातुस ले उथैं क्योछ, “तो क्या तैं राजा छै?” यीशु ले जबाब दीछ, “तैं कुछै, कि मैं राजा छूँ; म्येरो जन्म लीना को और संसार में उनाको कारण यो छै, कि मैं सत्य का बारिमें सिखा सकूँ। सत्य को पालन करून वाली सब मेरि बात सुणनान।”</verse>
				<verse number="38">पिलातुस ले उथैं क्योछ, “सच्चाई की छै?” और यो कैभेरन उ फिर यहूदी अगुवान का पास भ्यार ग्योछ और उनूनथैं क्योछ, “मैं उमें कैले दोष नै पानू।</verse>
				<verse number="39">लेकिन तुमोरो यो रीति रिवाजा छै कि फसह त्यार का बखत में तुमून खिन एक आदिमी स छोड़ दियूँ। त तुम कि चाछा, कि मैं तुमून खिन यहूदीन का राजा स छोड़ दियूँ?”</verse>
				<verse number="40">तब उनूनले चिल्ला भेरन क्योछ, “इसी नै, लेकिन हमून खिन बरअब्बा स छोड़ दे।” और बरअब्बा दंगा और हत्या करून वालो एक डाकू छ्यो।</verse>
			</chapter>
			<chapter number="19">
				<verse number="1">यो बात में पिलातुस ले अपून सिपाईन हुकुम दीछ कि यीशुस ली जाभेरन कोड़ा मारून।</verse>
				<verse number="2">और सिपाईन ले यीशुस बैंगनी रंगो को कपाड़ा पैनायान, जस एक राजा पैनछो, और काँणान को मुकुट बनाभेरन यीशुका ख्वार में लगा दीछ।</verse>
				<verse number="3">और उक पास आभेरन कुन लाग्यान, “हे यहूदीन का राजा जी, प्रणाम!” और ऊस थप्पड़ मारून लाग्यान।</verse>
				<verse number="4">तब पिलातुस ले फिर भ्यार निकल भेरन लोगूनथैं क्योछ, “देखा, मैं ऊस तुमार पास भ्यार लियून मरयूँ; ताकि तुम जाणली कि मैंस उमें केले दोष नै मिल्यो।”</verse>
				<verse number="5">तब यीशुस काँणाको मुकुट और बैजनी रंगोको कपाड़ा पैना भेरन भ्यार ल्यान और पिलातुस ले उनूनथैं क्योछ, “यो आदिमी स देखा।”</verse>
				<verse number="6">जब प्रधान याजकून ले और मन्दिरा का रखवालान ले ऊस देखछ्य, त उनूनले चिल्ला भेरन कुन लाग्यान, “येस सूली में चढ़ा, सूली में चढ़ा, तब पिलातुस ले उनूनथैं क्योछ, तुमी येस ली जाभेरन सूली में चढ़ा; क्याखिनकि मैं उमें कोई दोष नै पानू।”</verse>
				<verse number="7">यहूदी अगुवान ले ऊस जबाब दीछ, “हमार ले नियम-कानून छन और उ नियम-कानून का अनुसार येकी सजा मौतेकी लायक छै, क्याखिन उ अपून-आपस परमेश्वरो को च्योलो बतूछो।”</verse>
				<verse number="8">जब पिलातुस ले यो बात सुणियान त उ भौत डर ग्यो।</verse>
				<verse number="9">और फिर महला का भितर जाभेरन यीशुथै क्योछ, “तैं काँको छै?” लेकिन यीशु ले ऊस केले जबाब नै दीयो।</verse>
				<verse number="10">पिलातुस ले उथैं क्योछ, “तैं जबाब किलैं नै दीनै? क्या तैं नै जाणने कि तैंस छोड़ दीना को अधिकार मैंस छै, और तैंस सूली में चढ़ूनाको ले मैंस अधिकार छै।”</verse>
				<verse number="11">यीशु ले जवाब दीछ, अगर तैंस परमेश्वरा का तरफ भटे नी दिईजानो, त तेरो मैंमें के अधिकार नै हुनो; येक कारण जेलै मैंस त्यार हवाला करछ्य, उको पाप ज्यादा छै।</verse>
				<verse number="12">यो बात में पिलातुस ले ऊस छोड़ दिन चाछ, लेकिन यहूदी लोगून ले चिल्ला-चिल्लाभेरन क्योछ, “अगर तैं तैंस छोड़ देले, त तेरो भाईचारा कैसर महाराजा का तरफ भटे नाहतिनी। जो कोई अपून-आपस राजा बनूना को दावा करछ्यो उ कैसर महाराजा को दुश्मन छै।”</verse>
				<verse number="13">यो बातुन सुणिभेरन पिलातुस यीशुस भ्यार ल्याछ और वाँ न्याय का सिंहासन में बैठछो, जो कि ढूंगा का चबूतरा छ्यो, जैस इब्रानी में गब्बता कई जाछो।</verse>
				<verse number="14">यो फसह त्यार को हफ्ता की तैंयारी को दिन छ्यो, और लगभग छाकाला को बखत छ्यो; तब उले यहूदी लोगूनथैं क्योछ, “देखा, योई छै, तुमोरो राजा!”</verse>
				<verse number="15">लेकिन उन चिल्ला लाग्यान, “येस मार डाल! येस मार डाल! ऊस सूली में चढ़ा! ऊस सूली में चढ़ा!” पिलातुस ले उनूनथैं क्योछ, “क्या मैं तुमार राजा स सूली में चढ़ूई?” प्रधान याजकून ले जवाब दीछ, “महाराजा स छोड़ हमोरो और कोई राजा नाहातिन।”</verse>
				<verse number="16">तब पिलातुस ले यीशु स सूली में चढ़ून खिन उनार हवला कर दीछ।</verse>
				<verse number="17">तब सिपाईन ले यीशुस पकड़ लीछ, और उनूनले ऊस अपूनो सूली खुद उठाछ और यरूशलम शैहरा का भ्यार, “खोपड़ी का नामक जाग में ली ग्यान,” जैस इब्रानी में गुलगुता कुंनान।</verse>
				<verse number="18">वाँ उनूनले उक दगाड़ द्वी आदिमीन ले सूली में चढ़ाछ, एकेस एक तरफ और दुसरा स दुसरा तरफ और बीच में यीशुस।</verse>
				<verse number="19">और राज्यपाल पिलातुस ले यीशु ख्वारा एक दोषपत्र लिखभेरन सूली में टाँगी दीछ और उमें यो लिखीना को छ्यो, “नासरत गौं को यीशु यहूदीन को राजा।”</verse>
				<verse number="20">यो दोषपत्र भौत यहूदीन लोगून ले पढ़छ्य, क्याखिनकि जाँ यीशु सूली में चढ़ाई ग्यो छ्यो, उ जाग यरूशलम शैहरा का पास छी, और उ पत्र इब्रानी और लतीनी और यूनानी में लिखीना को छ्यो।</verse>
				<verse number="21">तब यहूदीन का प्रधान याजकून ले पिलातुस थैं क्योछ, “यहूदीन को राजा जन लिख, बल्कि उले क्योछ, मैं यहूदीन को राजा छूँ।”</verse>
				<verse number="22">पिलातुस ले जवाब दीछ, “मैंले जो लिख दीछ, उ बदली नी जालो।”</verse>
				<verse number="23">जब सिपाई ले यीशुस सूली में चढ़ा दीछ, त उक कपाड़ा लीभेरन उक चार टुकूड़ा कर्यान, और चारू सिपाईन ले एक-एक हिस्सा ली लीछ। और भ्यार वालो कुरताले ली लीछ, कुरता स सिलीना का नी छ्यो, बल्कि मलि भटे तलि एक ई कपाड़ा को बनिनाको छ्यो।</verse>
				<verse number="24">येक कारण सिपाई ले एक-दुसारा थैं क्योछ, “हम येस नै फाड़ना, लेकिन येमें चिठ्ठी डालनू कि उ कैको होलो।” कि पवित्रशास्त्र में जो लिखी ग्योछ उ बात पुरी हो, “उनूनले म्यारा कपाड़ा आपस में बाण लियान और म्यारा कपाड़ान में चिठ्ठी डालछ्य, उ योई छै जो सिपाईन ले वाँ करछ्य।”</verse>
				<verse number="25">लेकिन यीशु का सूली का नजिक उकी ईजा और उकी ईजा की बैनि, क्लोपासकि स्यैनि और मरियम मगदलीनी जो मगदला गौं छी वाँ ठाड़ छी।</verse>
				<verse number="26">यीशु ले अपूनी ईजा और उ शिष्य थैं जैथैं उ प्रेम राखछ्यो सामुनि ठाड़ देखिभेरन अपूनी ईजा थैं क्योछ “हे ईजा, देख, यो तेरो च्योलो छै।”</verse>
				<verse number="27">तब उले उ शिष्य थैं क्योछ, “देख, यो तेरि ईजा छै।” और उई बखत भटे उ शिष्य ले, ऊस परिवार को हिस्सा बना लीछ।</verse>
				<verse number="28">उक बाद यीशु ले यो जाणिभेरन कि अब सब कुछ पुरो कर हालछै; येक कारण पवित्रशास्त्र की बात सच्ची साबित हो, यीशु ले क्योछ, “मैं प्यासो छूँ।”</verse>
				<verse number="29">वाँ सिरका भरिना को एक भाणो राखिना को छ्यो, तब कैले सिरका में सम्पंज भिगा भेरन जूफा डन्डा में बाँदीभेरन ऊस चुसून खिन दीछ।</verse>
				<verse number="30">जब यीशु ले उ सिरका चाँख छै, त क्योछ, “ अब सब कुछ पुरो हो ग्योछ,” और खोरो झुकाभेरन उले प्राण छोड़ दीयान।</verse>
				<verse number="31">और उ तैंयारी को दिन छ्यो, दुसारा दिन सबत और फसह पर्व द्वीवै छ्या। यो यहूदी लोगून को खास दिन छ्यो, उन नी चाँछ्या कि यो दिन का दौरान लाश सूली मेंई रौ। येक कारण उनूनले राज्यपाल पिलातुस थैं बिनती करछ्य, “कि उन आदिमीन का टांग टोड़ी दी जौ, और ताकि उनेरि मौत जल्दी हो ज्यो, और लाशून सूली है तलि उतारी जा सकौं।”</verse>
				<verse number="32">येक कारण सिपाईन ले आभेरन उन आदिमीन में भटे पैलि एक्का टांग टोनियान और फिर दुसरा का ले, जो उक दगाड़ सूली में चढ़ाईना को छ्यो।</verse>
				<verse number="33">लेकिन जब यीशुका पास आभेरन देखछ्य कि उ मर ग्योछ, त उक टांग नै टोड़िया।</verse>
				<verse number="34">लेकिन सिपाईन में भटे एकले भाला ले यीशुका पसली में कर छै, और उमें भटे तुरन्त खून और पानि निकलछ्य।</verse>
				<verse number="35">जै आदिमी ले यो सब कुछ देखछ्य, उले गवै दीछ, ताकि तुमूले यीशु में विश्वास कर सका। और उकी गवै सच्ची छै। और उ जाणछो कि उ सच्ची बोलछो।</verse>
				<verse number="36">यो बात येक कारण भैछ, ताकि पवित्रशास्त्र में जो लिखीना छै उ पुरो हो ज्यो, “उकी कोई ले हड्डी तोड़ी नै जौ।”</verse>
				<verse number="37">फिर एक जाग में पवित्रशास्त्र में यो ले लिखीना छै, “जैस उनूनले मार छै, उन उक तरफ देखाला।”</verse>
				<verse number="38">इन बातुन का बाद अरिमतिया गौं को यूसुफ ले जो यीशु को शिष्य छ्यो, (लेकिन यहूदी अगुवान का डरले यो बात स लुका राखछ्यो), उले राज्यपाल पिलातुस थैं बिनती करछ्य, कि मैं यीशु की लाशस ली जाछूँ, और राज्यपाल पिलातुस ले उकी बिनती सुणिछ्य, और उ आभेरन यीशु की लाशस ली ग्योछ।</verse>
				<verse number="39">नीकुदेमुस ले जो पैलि यीशुका पास रात में ग्योछ, उ लगभग तीस किलो खुशबुदार सामान लियाछ।</verse>
				<verse number="40">तब उनूनले यीशु की लाश स लीछ और यहूदीन का अन्तिम संस्कार का रीति का अनुसार ऊस खुशबुदार सामान का दगाड़ सफेद कफन में लपेट दीछ।</verse>
				<verse number="41">उ जाग में जाँ यीशुस सूली में चढ़ाई ग्यो छ्यो, वाँ उक नजिक एक बगीच छ्यो, और उ बगीच में एक नय्या कबर छी; जैको पैलि कभै इस्तमाल नी कर राखछ्यो।</verse>
				<verse number="42">येक कारण उनूनले यीशु की लाशै स उई कबर का गुफा में राख दीछ किलैंकी उ पास में छी और उ यहूदीन का सबत को तैंयारी को दिन छ्यो।</verse>
			</chapter>
			<chapter number="20">
				<verse number="1">इतवारा का रात्तैनि मरियम जो मगदला गौं की छी, उ और उक दगाड़ और ले स्यैनिन रात्तैनि झुकमुका में कबर में आयान, और उनूनले ढूंगा स कबरा का द्वार में भटे हटीना को देखछ्य।</verse>
				<verse number="2">तब उ दौड़भेरन शमौन पतरस और उक दुसारा शिष्यून का पास गैछ, जैस यीशु प्रेम करछ्यो, और उनूनथैं कुछी, “उन प्रभु का लाशस कबर में भटे निकाल लीनै ग्यान; और हम नै जाणना, कि ऊस काँ राख रैछ।”</verse>
				<verse number="3">तब पतरस और उ दुसोरो शिष्य कबरा का तरफ दौड़ियान।</verse>
				<verse number="4">उन द्वीवै दगाड़-दगाड़ दौड़ून मरेछ्या, लेकिन दुसोरो शिष्य पतरस है तेज दौड़भेरन कबर में पैलि उमें पुज ग्यो।</verse>
				<verse number="5">और उले कबर में झुकभेरन सफेद कफन स पड़ीनाको देखछ्य; तब ले उ भितर नै ग्योछ।</verse>
				<verse number="6">तब शमौन पतरस उको पछिल-पछिल वाँ पुजछै और कबरा का भितर ग्योछ और कपाड़ा पड़ीना देख्यान।</verse>
				<verse number="7">और उ अंगोछा जो उक ख्वारा में बाँदिना को छ्यो, उ कपाड़ा को दगाड़ पड़ीनाको नी छ्यो, लेकिन अलग एक जाग बैड़ीना को देखछ्य।</verse>
				<verse number="8">तब दुसोरो शिष्य ले जो कबर में पैलि पुजिना को छ्यो भितर ग्योछ और देखिभेरन विश्वास करछ्य, कि यीशु मरिनान में भटे ज्यूनो हो ग्योछ।</verse>
				<verse number="9">पवित्रशास्त्र में यीशु का बारिमें यो पक्का तरीका ले लिखी ग्यो छ्यो कि उ अपून मौत का फिर ज्यूनो होलो, लेकिन उन ऐल तक येस समझ नै पाया।</verse>
				<verse number="10">तब उन शिष्य अपून घर खिन न्हैजानान।</verse>
				<verse number="11">लेकिन मरियम रुनि-रुनि कबरा का पास भ्यार ठाड़ रूछी, और उनूनले रूनै-रून झुकभेरन कबरा का भितर जाँकछैं।</verse>
				<verse number="12">त उनूनले जो जाग में यीशु की लाश राखिना की छी, वाँ सफेद चमकदार में द्वी स्वर्गदूत एक शिरान में और दुसोरो पैताना का पास देखछ्य।</verse>
				<verse number="13">उन द्वी स्वर्गदूत ले उथैं क्योछ, “हे ईजा, तैं किलैं रूछी?” मरियम ले स्वर्गदूतून थैं क्योछ, “उन म्यारा प्रभु की शरीर स उठाभेरन लीनै ग्यान, और मैं नै जाणनू कि ऊस काँ राख रैछ।”</verse>
				<verse number="14">यो कुनाका बाद उ पछिल फरकीछ त उले यीशुस ठाड़ देखछ्य, लेकिन उ पछ्याण नै सकी कि उ यीशु छै।</verse>
				<verse number="15">यीशु ले क्योछ, “हे ईजा, तैं किलैं रूछी? और कैस खोजून मरेछी?” उले माली समझभेरन उथैं क्योछ, “हे श्रीमान, अगर तैले उकी शरीर स उठा हालछै, त मैंस बता दे कि ऊस काँ राख रैछ, और मैं ऊस लीजूँलो।”</verse>
				<verse number="16">तब यीशु ले उथैं क्योछ, “मरियम!” अपूनो नाम सुणभेरन उक तरफ मुड़छय और उले इब्रानी भाषा में क्योछ, “रब्बूनी!” मतलब “हे गुरू।”</verse>
				<verse number="17">यीशु ले उथैं क्योछ, “म्यारा खुटान में पड़भेरन मैंस जन रोक। क्याखिनकि मैं अब तक पिता परमेश्वरा का पास मलि नै गयूँ, तैं म्यारा शिषयून का पास जाभेरन उनूनथैं कै दीये कि मैं अपून पिता और तुमार पिता, अपून परमेश्वर और तुमार परमेश्वरा का पास मलि जान मरयूँ।”</verse>
				<verse number="18">मरियम जो मगदला गौं छी, उले जाभेरन शिष्यून बताछ, “कि मैंले प्रभु स देखछ्य और उनूनले म्यारा दगाड़ बात कर्यान।”</verse>
				<verse number="19">उई इतवारा का ब्याल के, जो हफ्ता लो पैलो दिन छ्यो, जब ब्याला बखत सब शिष्य एक घर में जाम भ्यान त उनूनले द्वार बन्द कर दीयान क्याखिनकि उन यहूदी अगुवान भटे डरीना का छ्या, तब यीशु आछ और बीच में ठाड़ हो भेरन उनूनथैं क्योछ, “तुमून शान्ति मिलो।”</verse>
				<verse number="20">और यो कैभेरन यीशु ले उनून अपून हातून का और पसली का घ देखायान; तब शिष्य प्रभु स देखिभेरन भौत खुशी भ्यान।</verse>
				<verse number="21">यीशु ले फिर उनूनथैं क्योछ, “तुमून शान्ति मिलो; जस तरीका ले म्यारा पिता परमेश्वर ले मैंस संसार में भेज रैछ, उसीकैं मैंले तुमून संसार में भेजछूँ।”</verse>
				<verse number="22">यो कैभेरन उले उनूनमें फूंकछै और उनूनथैं क्योछ, “पवित्र आत्मा पा।</verse>
				<verse number="23">जिन लोगून का पाप तुम माफ करला, उनार पाप माफ करि जाला, और जिनारा पाप तुम माफ नी करला उनार पाप माफ नी करि जाला।”</verse>
				<verse number="24">लेकिन बारा शिष्यून में भटे एक आदिमी मतलब थोमा जो दिदुमुस कहलूछो, जब यीशु आछ, त उ उनार दगाड़ नी छ्यो।</verse>
				<verse number="25">जब और शिष्य उथैं कुन लाग्यान, “हमूले प्रभु स देखछ्य,” तब उले उनूनथैं क्योछ, “जब तक मैं उक हातून में कीलून का घ नी देख ल्यूँ, और उन घौन में अपून आंगुलो नै डालूँ और उक पसली में अपूनो हात डालभेरन विश्वास करूँलो कि उ मरिनान में भटे ज्यूनो हो ग्योछ।”</verse>
				<verse number="26">एक हफ्ता का बाद उक शिष्य फिर घर भितर छ्या, और थोमा उनार दगाड़ छ्यो, और द्वार बन्द छ्या, तब यीशु आभेरन और बीच में ठाड़ हो भेरन क्योछ, “तुमून शान्ति मिलो।”</verse>
				<verse number="27">तब यीशु ले थोमा थैं क्योछ, अपूनी आंगुलो याँ ल्याभेरन म्यारा हातून देख और अपूनो हात ल्याभेरन म्यारा पसली में डाल, और शक करून बन्द कर, लेकिन विश्वास कर कि मैं मरिनान भटे ज्यूनो हो गयूँ।</verse>
				<verse number="28">यो सुणिभेरन थोमा ले जवाब दीछ, “हे म्यारा प्रभु, हे म्यारा परमेश्वर!”</verse>
				<verse number="29">यीशु ले उथैं क्योछ, “तैले त मैंस देखभेरन विश्वास करछ्य, धन्य छन उन, जिनूनले मैंस नै देखयो लेकिन फिरले विश्वास करछ्य।”</verse>
				<verse number="30">यीशु ले और ले भौत चमत्कार शिष्यून का सामुनि देखायान, जो यो किताब में लिखी नै ग्या।</verse>
				<verse number="31">लेकिन यो येक कारण लिखी ग्यान, कि तुम विश्वास करा, कि यीशु ही परमेश्वरो को च्योलो मसीह छै, और विश्वास करभेरन उक नाम ले अनन्त जीवन पा।</verse>
			</chapter>
			<chapter number="21">
				<verse number="1">इन बातुन का हुना का बाद यीशु ले अपून आपस तिबिरियास झीला का किनार शिष्यून में प्रगट करछ्य, और यो इसा रीति ले भ्योछ।</verse>
				<verse number="2">शमौन पतरस और थोमा जो दिदुमुस कहलूछो, और गलील प्रदेशा का काना शैहर भटे नतनएल और जब्दी को च्योलो, और उको शिष्यून में भटे द्वी और जन जाम छ्या।</verse>
				<verse number="3">शमौन पतरसले उनूनथैं क्योछ, “मैं माच्छा पकड़ून खिन जाछूँ।” उनूनले उथैं क्योछ, “हम ले त्यारा दगाड़ ऊँनू।” येक कारण उन निकल भेरन नाव में चढ़ियान, और पुरी रात जाल डालनान, लेकिन एक ले माच्छो नै पकड़ सक्या।</verse>
				<verse number="4">और दुसारा दिन रात्तैनि यीशु झीलका किनार में आयान, फिरले शिष्यून ले ऊस नै पछ्याण कि यो यीशु छै।</verse>
				<verse number="5">तब यीशु ले उनूनथैं क्योछ, “हे म्यारा प्रियो, क्या तुमार पास के खान खिन छी?” उनूनले जवाब दीछ, “हमार पास केले नाहातिन।”</verse>
				<verse number="6">तब यीशु ले उनूनथैं क्योछ, “नाव का दैंन तरफ जाल डाला, तब तुमून माँछा मिलाला।” तब उनूनले अपूनी दैंन तरफ जाल डलछ्य, और उमें इदुक ज्यादा माच्छा मिल्यान कि उन जालै स खींच नै सक्या।</verse>
				<verse number="7">तब यहूना ले जैस यीशु प्रेम राखछ्यो पतरस थैं क्योछ, “यो त प्रभु छन!” जब शमौन पतरसले यो सुणछय कि उ प्रभु छै, त उले अपून उ कपाड़ा पैनून खिन जो उले काम करून बखत खोलीना का छ्या, और झील में कूद जाछो।</verse>
				<verse number="8">लेकिन और शिष्य नानि नाव में माँछा ले भरिना को जाल खींच आयान, क्याखिनकि उन किनार है कोई सौ मीटर दूर छ्या।</verse>
				<verse number="9">जब उन किनार में आयान, त उनूनले कौंलान को आग में माच्छा और नजिक रोटा राखिना का देख्यान।</verse>
				<verse number="10">तब यीशु ले उनूनथैं क्योछ, “ जो माच्छा तुमूले ऐल पकड़ियान, उनूनमें भटे थ्वाड़ा लिया।”</verse>
				<verse number="11">शमौन पतरस नान नाव में चढ़भेरन एक सौ तिरपन ठूला माँछान ले भरिना को जाल स किनार में खींच ल्याछ, इदुक माच्छा हुन में ले जाल में नै फाटियो।</verse>
				<verse number="12">यीशु ले उनूनथैं क्योछ, “आ, खान खा ली।” और शिष्यून में भटे कैसे यो पुछना की हिम्मतले नै भै कि “तैं को छा?” क्याखिनकि उन जाण छ्या कि उ प्रभु छै।</verse>
				<verse number="13">यीशु ले अघिल बढ़भेरन रोटो और माच्छा लीछ और खान खिन दीछ।</verse>
				<verse number="14">यो तिसर बार छै, जब यीशु मरिन में भटे ज्यून हुना का बाद शिष्यून दर्शन दीछ।</verse>
				<verse number="15">खान खाना का बाद यीशु ले शमौन पतरस थैं क्योछ, “यहूना का च्योलो शमौन, कि तैं सच्ची में इन दुसरा है ज्यादा मैंस प्रेम करछैई?” उले जवाब दीछ, “होई प्रभु, तैं जाण छै, कि मैं तैथैं प्रेम करछूँ।” उले उथैं क्योछ, “ जो लोग म्यारा छन उनेरि देखभाल कर, जसीकैं एक ग्वाला अपून भेड़ का बच्चान की देखभाल करछो।”</verse>
				<verse number="16">फिर यीशु ले दुसारा बार उथैं क्योछ, “यहूना का च्याला, शमौन, क्या तैं मैंस प्रेम करछैई?” उले उथैं क्योछ, “होई प्रभु, तैं जाण छै, कि मैं तैस प्रेम करछूँ।” उले उथैं क्योछ, “जो लोग म्यारा छन उनेरि देखभाल कर, जसीकैं एक ग्वालो अपून भेड़ून की देखभाल करछो।”</verse>
				<verse number="17">यीशु ले फिर तिसर बार उथैं क्योछ, “ हे शमौन, यहूना का च्याला, तैं मैंस प्रेम करछैई?” पतरस स भौत दुखी हुछो कि यीशु ले उथैं तिसार बार इसो क्योछ, “तैं मैंस प्रेम करछई?” और उले जवाब दीछ, “हे प्रभु, तुम सब कुछ जाणछा, यो ले जाण छै कि मैं तैंस प्रेम राखछूँ।” यीशु ले पतरस थैं क्योछ, “जो लोग म्यारा छन उनेरि देखभाल कर, जसीकैं एक ग्वालो अपून भेड़ून की देखभाल करछो।”</verse>
				<verse number="18">मैं तैथैं सच्ची-सच्ची कुछूँ, जब तैं जवान छ्य, त अपूनी कमर बाँदीभेरन जाँ चाछ्य, वाँ घूमछ्य; लेकिन जब तैं बूढ़ो हो जाले, त तैं अपून हातून फैलाले और कोई दुसोरो तैंस बादोलो और तैंस वाँ लिजाला जाँ तैं जान नै चाँलै।</verse>
				<verse number="19">यीशु ले इसो बताछ और क्योछ, कि पतरस कसीकैं मरोलो और परमेश्वर की महिमा करोलो; और यो कैभेरन उथैं क्योछ, “म्येरो शिष्य बन ज्या।”</verse>
				<verse number="20">पतरसले फिरकी भेरन ऊस शिष्यून का पछिल उन देखछ्य, जैस यीशु प्रेम करछ्यो, और जेले (फसह) खाना का बखत यीशु का पास बैठभेरन पुछ्छै छ्यो, “हे प्रभु, तैंस पकड़ू वालो को छै?”</verse>
				<verse number="21">ऊस देखिभेरन पतरसले यीशु थैं क्योछ, “हे प्रभु, उक दगाड़ कि होलो?”</verse>
				<verse number="22">यीशु ले उथैं क्योछ, “अगर मैं चाछूँ कि उ म्यारा उन तक ज्यूनो रौ, त तैंस कि? तैं म्येरो शिष्य बन ज्या।”</verse>
				<verse number="23">येक कारण भाईन मैं यो बात फैल गै, कि उ दुसोरो शिष्य नी मरोलो; तब ले यीशु ले उथैं यो नै क्यो, कि उ नी मरोलो, लेकिन यो कि “अगर मैं चाछूँ कि उ म्यारा वापस ऊँन तक ज्यूनो रौ, त तैंस यो भटे कि?”</verse>
				<verse number="24">जो आदिमी ले यो सब कुछ देखछ्य, उले यो बातुन की गवै दीछ, ताकि तुम यीशु में विश्वास कर सका। और जिनूनले इन बातुन लिख रैछ, और हम जाणनू, कि उकी गवै सच्ची छै।</verse>
				<verse number="25">और ले कई काम छन जो यीशु ले कर्यान। लेकिन अगर उनून एक-एक करभेरन लिखी जानो, त मैंस लागछो कि पुर संसार में ले उन किताबून संभालन खिन इदुक जाग नी हुनी जो लिखी जाना।</verse>
			</chapter>
		</book>
		<book number="44">
			<chapter number="1">
				<verse number="1">प्रिय थियुफिलुस, मैंले पैल किताब में उन सब बातुन का बारिमें लिखीना को छै, जो यीशु ले शुरू में कर्यान, और सिखूनै र्यान।</verse>
				<verse number="2">उ दिन तक जब कि उ परमेश्वरा का द्वारा स्वर्ग में उठा ली ग्योछ। उहै पैलि यीशु ले प्रेरितून, पवित्र आत्मा का द्वारा हुकुम दीछ, जिनून उनूनले खुद चुनिना को छ्यो।</verse>
				<verse number="3">यीशु ले अपून दुख उठूना का और मौत का बाद भौत पक्का सबुतून दीभेरन अपून आपस उनून ज्यून दिखाछ। और चालीस दिन तक उनून दिखाई दीनै र्योछ, और परमेश्वर उनार बीच में कसीकैं राज्य करोलो उक बारिमें बात करनै रियोछो।</verse>
				<verse number="4">एक बार जब उन एक दगाड़ छ्या, त उले उनून हुकुम दीछ, “यरूशलम शैहर स छोड़भेरन जन जाया, लेकिन उ दानो को इन्तजार कर्या जो म्यारा पिता परमेश्वर ले तुमून दीना को वादा कर रैछ, और तुमूले मैंस उक बारिमें बात करून ले सुण रैछ।</verse>
				<verse number="5">यहूना ले त तुमून पानि में बपतिस्मा दीछ, लेकिन थ्वाड़ा दिनूनका बाद परमेश्वर तुमार दगाड़ रून खिन पवित्र आत्मा भेजाला, ताकि तुमार भितर रौ।”</verse>
				<verse number="6">बाद में जब प्रेरित दुबारा यीशुथैं मिल्यान, त उनूनले उथैं पुछछै, “हे प्रभु, क्या अब तुम रोमी सामराज्य स नाश करन खिन और इस्राएल का राज्य स फिर बनालै?”</verse>
				<verse number="7">उले उनूनथैं क्योछ, “उ बखत और उ चीज कब होलि, केवल म्योरो पिता परमेश्वरा का पास तय करूना को अधिकार छै, तुमून जाणना की जरूरत नाहातिन।</verse>
				<verse number="8">लेकिन जब पवित्र आत्मा तुमून में आला, तब तुम सामर्थ पाला। और यरूशलम शैहर और पुर यहूदिया और सामरिया प्रदेश में और पुर संसार में लोगून म्यारा बारिमें बताला।”</verse>
				<verse number="9">यो कैभेरन यीशु उनार देखन-देखनै परमेश्वर ले ऊस स्वर्ग में उठा लीछ, और बादलून का कारण उन ऊस नै देखी सक्या।</verse>
				<verse number="10">और उक मलि जान बखत जब शिष्य आकाश का तरफ चाँन मरैछ्या, तब अचानक द्वी आदिमी सफेद कपाड़ पैनिना का उनार सामुनि ठाँड़ भ्यान,</verse>
				<verse number="11">और कुन लाग्यान, “हे गलीली जिला का लोगों, तुम किलैं याँ ठाड़ हो भेरन आकाश का तरफ चाँन मरैछा? योई यीशु जैस परमेश्वरले स्वर्ग में उठा ली हैछ, उसीकैं उ फिर आलो, जसकैं तुम लोगून ले ऊस स्वर्ग का तरफ जान देखछ्य।”</verse>
				<verse number="12">जब उन द्वी आदिमी न्हैग्या, तब प्रेरित जैतून नामाका पहाण भटे जो यरूशलम शैहर भटे लगभग एक किलोमीटर दूर छै, यरूशलम शैहर में वापस आग्या।</verse>
				<verse number="13">और जब शैहर में वाँ पुज्यान त उन घरा का दौल में जो प्रेरित वाँ थ्वाड़ा बखत खिन रूकीना का छ्या। उन यो छ्या, पतरस, यहूना, याकूब, अन्द्रियास, फिलिप्पुस, थोमा, बरतोलोमी मत्ती, हलफईक च्योलो याकूब, शमौन जो रोमी सामराज्य का बिरोध में छ्यो और याकूबो को च्योलो यहूदा।</verse>
				<verse number="14">उनार दगाड़ वाँ और ले स्यैनिन छ्या और यीशुक भाई और उकी ईजा मरियम प्रेरितून का दगाड़ एक मन होभेरन प्रार्थना में लाग रूछ्या।</verse>
				<verse number="15">उनी दिनून में जब वाँ लगभग एक सौ बीस विश्वासी लोग जाम छ्या। तब पतरस उनार बीच में ठाड़ है भेरन कुन लागछ,</verse>
				<verse number="16">“हे विश्वासी भाईयो, पवित्र आत्मा ले भौत बखत पैलि राजा दाऊद का द्वारा यहूदाका बारिमें पैलि भटे कईनाकों छ्यो, यो यहूदा यीशु स पकड़ून वाला लोगून की अगुवाई करून वालान में भटे एक छ्यो। यो जरूरी छ्यो कि उक बारिमें पवित्रशास्त्र में लिखीना की बात पुरी हो।</verse>
				<verse number="17">हालाकि उ त हमून में भटे एक छ्यो, और उ यो सेवा का काम में ले हमोरो दगड़िया छ्यो।</verse>
				<verse number="18">जसो कि तुम जाणछा, कि यहूदा ले यीशु स ध्‍वाका ले पकड़िनाक रूपयान ले एक गडो मोल लीछ। और वाँ उ ख्वारा का बल भिमें खिती ग्यो, और मर ग्यो और उको पेट फाटि ग्यो और उक सब अनाड़ा-पाताड़ा भ्यार निकली ग्या।</verse>
				<verse number="19">जो यहूदा का दगाड़ भ्योछ उ यरूशलम शैहरा का रूनवाला सब लोग जाणि ग्या, और येक कारण उन लोग उ जाग स अपूनी भाषा में ‘हकलदमा’ मतलब ‘खूनी गड़ो’ कुन लाग्यान।</verse>
				<verse number="20">राजा दाऊद भजन संहिता की किताब में लिखछो, ‘उको घर उजड़ जालो, और उमें कोई नी बश,’ दाऊद दुसारा जाग यो ले कुंछो, ‘कोई दुसोरो उको पद लीले।’</verse>
				<verse number="21">येक कारण यो जरूरी छै कि हमार दगाड़ जुड़ून खिन एक इसा आदिमी स चुनी जौ, जो प्रभु यीशुक मरिना में भटे ज्यून हूनाक गवा बनो। उ हर बखत हमार दगाड़ रईना को हो जब प्रभु यीशु हमार दगाड़ छ्यो, उ बखत भटे जब प्रभु यीशु मसीह स यहूना का द्वारा बपतिस्मा दी जान भटे लीभेरन स्वर्ग में उठाई लीई जान तक।”</verse>
				<verse number="22"></verse>
				<verse number="23">तब उनूनले द्वी आदिमीन को नामको सुझाव दीछ, पैल यूसुफस जैथैं बरसब्बा ले कुंनान, जैको खानदानी नाम यूस्तुस छै, दुसोरो मत्तियाह को।</verse>
				<verse number="24">और यो कैभेरन प्रार्थना करछ्य, “हे प्रभु, तुम सब लोगून का दिल स जाणछा, येक कारण तुम हमून बता इन द्वीवैन में भटे तुमून ले कैस चुन छै,</verse>
				<verse number="25">कि उ यो सेवा काम में और प्रेरिताक उ खाली पद समालो। यहूदा उ जाग में न्हैग्यो जो उखिन उचित छ्यो।”</verse>
				<verse number="26">तब उनूनले उन द्वीवैन की नामेंकी परची डालछ्य, तब परची मत्तियाहाक नामेंकी निकलछ, और उ उन इग्यार प्रेरितून का दगाड़ शामिल कर ली ग्यो।</verse>
			</chapter>
			<chapter number="2">
				<verse number="1">यहूदीन को पिन्तेकुस्त को त्यारो को दिन आछ, त सब विश्वासी लोग एक जाग में जाम छ्या।</verse>
				<verse number="2">तब अचानक आकाश भटे तेज आँधी की जसी आवाज भैछ, और उले पुरो घर जाँ उन बैठिना का छ्या, गूँजीग्यो।</verse>
				<verse number="3">तब उनार सामुनि आगा का इसा लपटून प्रगट भ्यान जिनोरो आकार जिबाड़ान जसो छ्यो, जो अलग होभेरन उनूनमें भटे हरेक जन का मलिमें आछ।</verse>
				<verse number="4">और उन सब पवित्र आत्मा ले भरि ग्या, और जसी काबलियत पवित्र आत्माले उनून दीछ उक अनुसार अलग-अलग भाषान में बोलनून लाग्यान।</verse>
				<verse number="5">उ बखत, परमेश्वरो को डर मान्या वाला कई यहूदी पर्यटक लोग जो कि हरेक देश भटे त्यार मनून खिन यरूशलम शैहर में आईना का छ्या।</verse>
				<verse number="6">जब उनून कई भाषान में आवाज सुणाई दीछ, तो पर्यटक की भौत भीड़ लाग गै और उन हैरान हो ग्या, क्याखिनकि हरेक अपून-अपून भाष में विश्वासी बोलून सुणून मरेछ्या।</verse>
				<verse number="7">और उन सब हैरान हो भेरन कुन लाग्यान, “देखा, यो जो बोलून मर्यान क्या इन सब गलील प्रदेशा का रूनवाला लोग न्हैतिनी?</verse>
				<verse number="8">तो यो कि हुन मर्योछ, जो हमून में भटे हरेक इनून अपूनी-अपूनी मातृ-भाष में बात करून सुणू मर्या?</verse>
				<verse number="9">हमून में भटे कुछ लोग पारथी इलाका भटे छा, कुछ मेदी, और कुछ एलामी, मेसोपोटामिया यहूदिया, कप्पदूकिया, पुन्तुस, आसिया प्रदेश,</verse>
				<verse number="10">और कुछ लोग फ्रूगिया और पंफूलिया प्रदेश भटे, और कुछ मिस्र और लिबियाका देशाका इलाक भटे छन जो कुरेन शैहरा का आश-पास छन, और रोम देश भटे आईना का पर्यटक।</verse>
				<verse number="11">उन यहूदी और गैर-यहूदी जिनूनले यहूदी धर्म अपना हाल छ्यो, क्रेती टापू का लोग और अरब देशा का लोग ले छन, लेकिन अपूनी-अपूनी भाषा में उनूनथैं परमेश्वरा का ठूला-ठूला कामून का बारिमें सुणून मर्यान।”</verse>
				<verse number="12">और उन सब हैरान होभेरन उलझन में पड़ ग्या और एक दुसरथैं कुन लाग्यान, “यो कि हुन मर्योछ?”</verse>
				<verse number="13">लेकिन कुछ लोगून ले मजाक उड़ाभेरन क्योछ, “उन त शराबाक नशा में चूर है र्यान।”</verse>
				<verse number="14">पतरस उन इग्यारा प्रेरितून का दगाड़ ठाड़ भ्योछ और जोरले कुन लागछ्य, तुम जो यहूदी छा, और यरूशलम शैहरा का रूनवाला छा, और मेरि बातुन ध्यान ले सुणा मैं तुमून बतूछो की इनोरो कि मतलब छै।</verse>
				<verse number="15">तुमून में कुछ लोगून लागछो कि हम नशा में छा, लेकिन हम नशा में नाहातिन, क्याखिनकि ऐल त रात्तै का नौ बाज र्यान।</verse>
				<verse number="16">लेकिन जो हमार दगाड़ होर्योछ यो उ बात छै जो परमेश्वरो का तरफ भटे संदेश दिनवालो योएल का द्वारा पवित्रशास्त्र में कईना छै:</verse>
				<verse number="17">परमेश्वर कुंछो, “आखिरी दिनून में इसो होलो, कि मैं अपूनी आत्मा सब लोगून दयूंलो, और तुमार च्याला-चेलि भविष्यवाणी करला, और तुमार जवान दर्शन, और बुढ़ा-बुजुर्ग स्यून देखाला।</verse>
				<verse number="18">उन दिनून में, मैं अपून दास और दासीन में अपूनो आत्मा द्यूलो, और उन भविष्यवाणी कराला।</verse>
				<verse number="19">और मैं आकाश में अद्धभुत काम और उक तलि धरती में चिन दिखूलो, मतलब खून और आगो और धुआँको बादल दिखूलो।</verse>
				<verse number="20">प्रभु को न्याय को दिन उन है पैलि सूरज अन्यारो हो जालो और चाँद खून जस लाल हो जालो। उ दिन महान और तेजस्वी दिन होलो।</verse>
				<verse number="21">और जो कोई प्रभुको नाम ल्यलो, उई उद्धार पालो।”</verse>
				<verse number="22">हे इस्राएल देशा का रूनवालो, यो बातुन सुणा, कि नासरत गौं को यीशु एक इसो आदिमी छ्यो, जैस परमेश्वरा का तरफ भटे हुना को प्रमाण उन सामर्थ का कामून और चमत्कारा का कामून और चिन्नूनले प्रगट छै, जो परमेश्वर ले तुमार बीच में उक द्वारा दिखायान जैस तुम खुद जाणछा कि यो सच्ची छै।</verse>
				<verse number="23">उ परमेश्वरा का द्वारा पैलि भटे बनाईना की योजनाक अनुसार, उ तुमार हात पकड़ाई ग्यो और तुमून ले ऊस बुर लोगून की मद्दत ले कीलून ले ठोकभेरन सूली में लटका भेरन मार दीछ।</verse>
				<verse number="24">लेकिन परमेश्वरे ले ऊस मौत का दर्द भटे छुड़ाभेरन मरिनान में भटे ज्यून कर दीछ, क्याखिनकि उ बिल्कुल मुशकील छ्यो कि मौत ऊस अपून बंधन में राँख सको।</verse>
				<verse number="25">क्याखिनकि राजा दाऊद मसीह का बारिमें लिखछो, मैं प्रभु स हमेशा अपून सामुनि देखनै रयूँ, क्याखिनकि उ म्यारा दैन तरफ छै, मैं उन लोगून है नी डरूलो जो मैंस नुकशान पुजून चाँनान।</verse>
				<verse number="26">येक कारण मैं खुश छूँ, और खुश हो भेरन बोलछूँ। क्याखिनकि परमेश्वर भटे मैंस एक नय्या आश मिलछी।</verse>
				<verse number="27">क्याखिनकि तैं मैंस मरिना को नी रून देले। और नै अपून पवित्र जन की लाश स सड़ून देले। और म्यार प्राणस अधलोक में नी छोड़ले।</verse>
				<verse number="28">तैले मैंस जीवनो को बाँटो बताछ; तैं मैंस अपून दर्शन का द्वारा खुशिले भर देले।</verse>
				<verse number="29">“हे भाईयों, मैं उ कुलपिता दाऊदाका बारिमें तुमूनथैं हिम्मतले यो कै सकछूँ, कि उ मरिग्यो और उकी लाश कबर में ले राँखि गै, और उ कबर आज ले वाँई छै।”</verse>
				<verse number="30">उ परमेश्वरो को संदेश देने वाला छ्यो, उ जाणछ्यो कि परमेश्वरे ले कसम खाभेरन उक दगाड़ वादा करछ्य, “मैं त्यारा वंश में भटे एक आदिमी स त्यारा राजगद्दी में बैठूलो।”</verse>
				<verse number="31">उले भविष्य में परमेश्वरे की करून जानमर्योछ, और यो देखिभेरन मसीह का ज्यून हुना का बारिमें यो भविष्यवाणी करछ्य, कि नै त ऊस मरीना को रून दीछ, और नै उकी लाश सड़ून पाछ।</verse>
				<verse number="32">योई यीशु स परमेश्वरे ले ज्यून करछ्य, जैक हम सब गवाह छा।</verse>
				<verse number="33">अब उ स्वर्ग में परमेश्वरा का दैन हाता का तरफ सबून है ऊँचा जाग में बैठिनाका छै। पिता परमेश्वरे ले जसो वादा करिना को छ्यो, ऊस पवित्र आत्मा दीछ, और उले पवित्र आत्मा हमून दीछ। जो आज तुम देखछा और सुणछा।</verse>
				<verse number="34">क्याखिनकि राजा दाऊद यीशु मसीह का नियाती शरीर सहित स्वर्ग में नै उठाई ग्यो; लेकिन उ खुद कुंछो, “प्रभु परमेश्वरे ले म्यारा प्रभु थैं क्योछ, म्यारा दैन तरफ बैठ,</verse>
				<verse number="35">जब तक मैं त्यारा बैरिन दीन करूँलो, उनून त्यारा खुटान की चौका नियाती नै कर दयू।”</verse>
				<verse number="36">येक कारण इस्राएल देशा का सब लोगून यो बात स जरूर जाण लीन कि परमेश्वरे ले उई यीशुस जैस तुमूले सूली में लटकाछ, ऊस प्रभु और मसीह ले ठैहराछ।</verse>
				<verse number="37">जब उन लोगूनले यो बात सुणछ्य, तब उनार मन भौत दुखी भ्यान। और उन पतरस और दुसारा प्रेरितून थैं पुछून लाग्यान, “हे विश्वासी भाईयो, हम कि करनू?”</verse>
				<verse number="38">तब पतरसले उनून जबाब दीछ, “तुम लोग पश्चताप करा। तुमून में भटे हरेक आदिमी अपून-अपून पापून की माफी खिन यीशु मसीह का नामले बपतिस्मा ली। इसकैं तुम पवित्र आत्मा को बरदान मिलोलो।</verse>
				<verse number="39">यो वादा तुम, तुमेरि और सन्तानून, और उन सब दूर-दूरा का लोगून खिन ले छै जिनून प्रभु हमार परमेश्वर अपून पास बुलाला।”</verse>
				<verse number="40">पतरसले भौत और बातुन में गवाही दी-दीभेरन उनूनथैं बिनती करछ्य, “कि अपून आपस इन बुर लोगून भटे बचा।”</verse>
				<verse number="41">जो केले पतरस ले क्योछ, उनूनले प्रभु में विश्वास करछ्य और बपतिस्मा लीछ; और उ दिना तीन हजार लोग लगभग विश्वासीन का झुण्ड में मिल ग्या।</verse>
				<verse number="42">और उन प्रेरितून थैं शिक्षा पान में और संगति करून में और प्रभु भोज में, और विश्वासी लोग एक दगाड़ खाँछ्या, और आपस में मिलभेरन प्रार्थना करछ्या।</verse>
				<verse number="43">और प्रेरितून का द्वारा भौत अद्धभुत काम और चिन्न हुनै र्यान, और यरूशलम शैहरा का सब लोगून में डर छा ग्यो।</verse>
				<verse number="44">सब विश्वासी आपस मिलछ्या, और जो केले उनार पास छ्यो ऊस उन आपस में बाँड़ छ्या।</verse>
				<verse number="45">और उन अपूनी सम्पत्ति और समान स बेचभेरन जस उनेरि जरूरत हुछी, ऊस उनूनमें बाँड़ दीछ्या।</verse>
				<verse number="46">और उन रोज मन्दिर में जाम हुछ्या। और उन घर-घर में प्रभु भोज लीभेरन यीशुक बलिदान याद छ्या।</verse>
				<verse number="47">और उन परमेश्वरेकि अराधना करछ्या, और सब लोग उनून देखिभेरन खुश छ्या और जो उद्धार पा जाँछ्या, उनून प्रभु हर रोज उनूनमें मिला दी छ्यो।</verse>
			</chapter>
			<chapter number="3">
				<verse number="1">एक दिन पतरस और यहूना दिनाक तीन बजे प्रार्थना करून खिन मन्दिर में जानमरेछ्या।</verse>
				<verse number="2">तब कुछ लोग एक आदिमी स जो जन्म भटेई लुलो छ्यो, ऊस लीभेरन उनमरेछ्या जैस उन हर रोज मन्दिर का द्वार का पास बैठा दीछ्या जैको नाम सुन्दर द्वार छ्यो, ताकि उ वाँ उन-जानवालान थैं भीख माँगौ।</verse>
				<verse number="3">जब उले पतरस और यहूनास परमेश्वराका भवन में जान देखछ्य, त उनूनथैं भीख माँगून लागछ्य।</verse>
				<verse number="4">पतरसले और यहूना ले ऊस ध्यान ले देखछ्य। और पतरसले उथैं क्योछ, “हमार तरफ देख।”</verse>
				<verse number="5">उ उनूनथैं के पाना की आश ले उनार तरफ देखून लागछ्य।</verse>
				<verse number="6">तब पतरसले क्योछ, “म्यारा पास सुन-चाँदी नाहतिन, पर जो म्यारा पास छै, उ मैं तैंस दीछूँ। यीशु मसीह नासरी का नामले उठ और हिटून लाग।”</verse>
				<verse number="7">तब पतरसले उक दैन हात पकड़ भेरन ऊस उठाछ। और एकदम उक खुटान में हिटना कि ताकत आगै।</verse>
				<verse number="8">और उ उछल भेरन ठाड़ हो ग्यो, और परमेश्वरेकि महिमा करनै-करनै पतरस और यहूना का दगाड़ मन्दिराक खाल में ग्योछ।</verse>
				<verse number="9">सब लोग ऊस चलून-फिरून और परमेश्वरे की महिमा करून देखिभेरन,</verse>
				<verse number="10">पछ्याण ग्या, कि यो मन्दिरा का भ्यार सुन्दर फाटक में बैठभेरन भीख मांगन्या वालो भिखारी छै; और यो घटनाले उन सब भौत दंग और हैरान भ्यान।</verse>
				<verse number="11">जब उ पतरस और यहूनास पकड़ीनाको छ्यो, सब लोग भौत ताजुब करभेरन उ बरानडा तरफ दौड़यान जैस राजा सुलैमानो को बरानडा कुंनान।</verse>
				<verse number="12">यो देखिभेरन पतरसले लोगूनथैं क्योछ, “हे इस्राएल देशाक रूनवालो, तुम येस इदुक हैरानी ले किलैं चाँनमरेछ्या, और तुम हमरि तरफ इसीकैं किलैं घुरूभेरन देखून मरैछा, जसीकैं कि हमूले येस अपूनी ताकतले या भक्तिले ठीक कर रैछ।”</verse>
				<verse number="13">हमोरो परमेश्वर जो कि अब्राहम और इसहाक और याकूबो को परमेश्वर छै, हमार पुरखान का परमेश्वर ले अपून सेवक यीशु मसीह की महिमा करछ्य, लेकिन तुमून ले ऊस मरवा डालून खिन रोमी अधिकारीन का हवाला कर दीछ, और जब पिलातुस ले ऊस छोड़ना को विचार करछ्य, तब तुमूले उक सामुनि यीशु को बिरोध करछ्य।</verse>
				<verse number="14">तुमून ले मसीह को इनकार करछ्य, जो पवित्र और धर्मी छ्यो, और तुमूनले चाछ कि उक बदला में तुमून खिन एक हत्यारा स छोड़ दी जौ।</verse>
				<verse number="15">और तुमूनले जो लोगून अनन्त जीवन दीछो ऊस मरवा दीछ, जैस परमेश्वरले मरिनान में भटे ज्यून करछ्य, जैक हम सब गवाह छै।</verse>
				<verse number="16">यीशुक नाम में विश्वासा का कारण यो आदिमी स जैस तुम जाणछा और यो बखत देखून मरैछा, जैस ताकत दी गैछ। यो आदिमी यीशुक नाम में और उक विश्वासा का द्वारा बिल्कुल ठीक हो ग्योछ जसो कि तुम खुद देख सकछा।</verse>
				<verse number="17">“हे भाईयो, मैं जाणछूँ कि तुम और तुमार अगुवान ले यीशु स मार दीछ, तब तुम उक बारिमें अनजान छ्या।</verse>
				<verse number="18">लेकिन जिन बातुन परमेश्वरे ले अपून सब संदेश दीन वालान का द्वारा पैलि भटे बताईना को छ्यो, कि उको मसीह दुख उठालो और मारी जालो, तुमारा द्वारा परमेश्वर ले इन बातुन पुर करभेरन दिखाछ।</verse>
				<verse number="19">येक कारण पश्चताप करा और परमेश्वरा का तरफ लौट आ, जेलै तुमार पाप माफ करि जून, तब परमेश्वरा का तरफ भटे शान्ति को दिन आला।</verse>
				<verse number="20">और परमेश्वर यीशुस भेजोलो, जो मसीह छै, जैस उले तुमून खिन पैलि भटे चुनिना को छै।</verse>
				<verse number="21">यीशु को स्वर्ग में उ बखत तक रूनो जरूरी छै, जब तक परमेश्वर उन सब चीजून नय्या नै बना द्यो जो उले बनाईना का छन। भौत बखत पैलि परमेश्वरेले लोगून यो बतून खिन पवित्र परमेश्वरो को संदेश दिनवालान का द्वारा इसो करना को वादा करछ्य।</verse>
				<verse number="22">जस कि मूसाले क्योछ, ‘प्रभु परमेश्वर तुमार भाईन में भटे म्येरो जसो एक परमेश्वरो को संदेश दिनवाला स भेजोलो, और जो कुछ ले उ तुमूनथैं कौल, तुम उकी सुणिया।</verse>
				<verse number="23">पर हरेक आदिमी स जो उ परमेश्वरो को संदेश दिनवालान की नै सुणनो, उ लोगून में भटे नाश करि जालो।’</verse>
				<verse number="24">और शमूएल भटे लीभेरन उक बाद जदुक लै परमेश्वरो को संदेश दिनवालान ले इन दिनून का बारिमें प्रचार करछ्य।</verse>
				<verse number="25">तुम सब परमेश्वरो को संदेश दिनवालान की संतान और वाचा का भागी छा, जो वादा परमेश्वरे ले तुमार पुरखान का दगाड़ कर राखछ्यो, जब परमेश्वरले अब्राहम थैं क्योछ, कि ‘त्यारा वंशाक जरियाले संसारा का सब लोग आशीष पाला।’</verse>
				<verse number="26">परमेश्वरे ले अपून सेवक चुन‍छ्य और सबून है पैलि तुमार पास भेजछ्य, कि हमून में भटे हरेक स पाप की जीन्दगी भटे परमेश्वरा का तरफ उन खिन मद्दत करौ।”</verse>
			</chapter>
			<chapter number="4">
				<verse number="1">जब पतरस और यहूना लोगूनथैं यो बात करून मरेछ्या, तब कुछ याजक और मन्दिरा का चौकीदार और धर्मीक सूमहा का लोग जिनून सदूकी लोग कुंनान उन ले उनार पास आयान।</verse>
				<verse number="2">क्याखिनकि उनून पतरस और यहूना स देखभेरन भौत रीस आ रैछी, उन लोगून सिखून मरेछ्या कि जो मर ग्यान परमेश्वर उनून दुबारा ज्यून कर द्योलो, जसीकैं उले यीशु स मरिनान में भटे ज्यून करछ्य।</verse>
				<verse number="3">उनूनले पतरस और यहूनास पकड़ भेरन दुसारा दिन तलक जेल में राँखछ्य, क्याखिनकि ब्याल हो गैछी।</verse>
				<verse number="4">लेकिन जो लोग संदेश स सुणन मरैछ्या, उनूनमें भटे भौत लोगूनले यीशु में विश्वास करछ्य, तो वाँ कुल मिलाभेरन लगभग पाँच हजार आदिमी छ्या, जो यीशु में विश्वास करूनवाला बन ग्या।</verse>
				<verse number="5">दुसारा दिन उनार यहूदी अगुवा, सयाना और मूसा का नियम सिखून वाला यरूशलम शैहर में एक जाग में जाम हो ग्या।</verse>
				<verse number="6">उन लोग जो सभा में शामिल छ्या, उनूनमें भटे महायाजक हन्ना और कैफा और यहूना और सिकन्दर‍ और जदुक महायाजका का घराना का छ्या, सब यरूशलम में जमा भ्यान।</verse>
				<verse number="7">तब उनूनले पतरस और यहूनास वाँ बुलाभेरन बीच में ठाँड़ करभेरन पुछ्छै, “यो आदिमी स चंगो करून खिन कैले तुमून शक्ति और अधिकार दीछ?”</verse>
				<verse number="8">तब पतरसले पवित्र आत्माका सामर्थ में भरिभेरन उनूनथैं क्योछ,</verse>
				<verse number="9">“हे लोगून का अधिकारी और स्यानान हमूले एक कमजोर आदिमी खिन निको काम करछ्य, और आज हमूनथैं पूछताछ करि जानमर्योछ कि उ कसकैं बिमारी भटे ठीक हो ग्योछ।</verse>
				<verse number="10">तो तुम सब और पुर इस्राएली देशा का लोग जाण लीन, कि यो नासरत गौंक यीशु मसीहक नामले करि ग्योछ। उई यीशु स तुम लोगून ले सूली में लटका दीछ, लेकिन परमेश्वरले ऊस मरिनान में भटे ज्यून करछ्य। आज उई नामाका द्वारा यो आदिमी तुमार सामुनि चंगो होभेरन ठाड़ छै।</verse>
				<verse number="11">यीशु मसीह उई ढूंगो छै, जैस तुम मिस्त्रियून ले बेकार जाणिभेरन खित दीछ, उई ढूंगो नींव को कुनाको ढूंगो बनछ्य।</verse>
				<verse number="12">यीशुक अलावा और कैका द्वारा उद्धार नाहातिन; क्याखिनकि स्वर्ग का तलि आदिमीन में और कोई दुसोरो नाम नै दी ग्यो जैका द्वारा हम उद्धार पा सका।”</verse>
				<verse number="13">पतरस और यहूना की बात सुणिभेरन यहूदी अगुवा दंग है ग्या कि प्रेरितून इतुक निडर है भेरन अपूनी बात बतुनान, जब की उन अनपढ़ और साधारण मैंस छन। तब यहूदी अगुवान ले पछ्याण लीछ कि उन यीशुक दगड़िया छन।</verse>
				<verse number="14">लेकिन उ आदिमी जो चंगो होईना को छ्यो, पतरस और यहूना का दगाड़ ठाड़ देखिभेरन, उनार दला का लोग उनार खिलाफ के नै कै सक्या।</verse>
				<verse number="15">येक कारण उनूनले पतरस और यहूनास महासभा का कमरा भटे भ्यार जाना को हुकुम दीछ। उक बाद उन सब आपस में बात-चीत करून लाग्यान,</verse>
				<verse number="16">“कि हम इन लोगून का दगाड़ कि करनू? क्याखिनकि यरूशलम शैहरा का सब लोग जाणनान, कि इनूनले एक ठूलो चमत्कारो को काम दिखा रैछ; और हम यो सच्चाई स इनकार नै कर सकना किलैकी जो हो रियो उ सत्य छै।</verse>
				<verse number="17">लेकिन लोगून में यो बातोको ज्यादा प्रचार नै हो, येक कारण हम इनून डरा-धमकाभेरन कुनू, कि तुम फिर यीशुक बारिमें कोई ले लोगून का दगाड़ बात-चीत जन कर्या।”</verse>
				<verse number="18">तब उनूनले पतरस और यहूनास बुलाभेरन उनुस डरा-धमकाभेरन क्योछ, “तुम यीशु का नामले और कोई लोगून का दगाड़ बात जन कर्या और नै उपदेश दीया।”</verse>
				<verse number="19">लेकिन पतरस और यहूना ले उनुस जवाब दीछ, “तुम यो बात को फैसला करा, कि परमेश्वरा का नजर में कि ठीक छै; हम तुमोरो हुकुम माना या परमेश्वरो को?</verse>
				<verse number="20">किलैकी यो त हम नै कर सकना, जो हमूले देखछ सुणछै, उ हम लोगून बतून नै छोड़ सकना।”</verse>
				<verse number="21">तब उनूनले पतरस और यहूनास डरा-धमकाभेरन छोड़ दीछ, उन अगुवान उनून सजा दीना को कैले कारण नै मिल्यो। किलैकी जो घटना भैछ उक कारण सब लोगून ले परमेश्वरकि बड़ाई करछ्य।</verse>
				<verse number="22">उ आदिमी जो अद्धभुत चमत्कार ले चंगो हो रेछ्यो, उकी उमर चालीस साल है ज्यादा छी।</verse>
				<verse number="23">जब पतरस और यहूना जेल भटे छूटभेरन अपून दगड़ियान का पास आयान, और जो कुछ प्रधान याजकून और सयानान ले उनूनथैं कईना को छ्यो, उनून बता दीछ।</verse>
				<verse number="24">यो सुणभेरन उनूनले एक मन होभेरन जोर-जोरले परमेश्वरथैं प्रार्थना करछ्य, “हे प्रभु तुम उई प्रभु छा, जैले आकाश, धरती, समुद्र और जेलै उमें छै, उ सब बना रैछ।”</verse>
				<verse number="25">तुमूले पवित्र आत्मा का जरियाले अपून सेवक हमोरो पितर राजा दाऊद का मुँख भटे क्योछ, “गैर-यहूदी किलैं आग-बबूला भ्यान? और देश देशा का लोगून ले किलैं षड्यन्त्र रचछ्य?</verse>
				<verse number="26">धरतिक राजान ले अपनास तैय्यार करछय, और अगुवा परमेश्वर और मसीहा का विरोध में जाम भ्यान।”</verse>
				<verse number="27">क्याखिनकि “सच्ची में त्यारा पवित्र सेवक यीशु का बिरोध में जैस तैले अभिषेक करछ्य, राजा हेरोदेस और पुन्तियुस पिलातुसले राज्यपाल गैर-यहूदी और इस्राएलीन का दगाड़ यो नगर में जाम भ्यान।</verse>
				<verse number="28">यो येक कारण भ्योछ क्याखिनकि तैले अपूनी इच्छा और सामर्थ ले यो करना को सोचीना को छ्यो।</verse>
				<verse number="29">अब हे प्रभु, उनेरि धमकिन सुण; और अपून दासून यो बरदान दे कि त्यारा बचनून निडर होभेरन लोगून सुणा सका।</verse>
				<verse number="30">और तैं चंगो करून खिन अपूनो हात बढ़ो और चिन्ह और चमत्काराक काम त्यारा पवित्र सेवक यीशु का नाम ले करिजून।”</verse>
				<verse number="31">जब उनेरि प्रार्थना खतम हो गै, तो उ जाग जाँ उन जाम छ्या, उ जाग हिलून लागछी, और उन सब पवित्र आत्मा ले भरग्या, और उन परमेश्वरको बचन निडर हो भेरन लोगून सुणून लाग्यान।</verse>
				<verse number="32">और विश्वास करूनवालान की मंडली एक मन और एक चीत छी, या तक कोई अपूनी सम्पति स अपूनी नी कुछ्या, लेकिन उनोरो सब कुछ साझाको छ्यो।</verse>
				<verse number="33">और प्रेरित भौत सामर्थले प्रभु यीशुक ज्यून हुना की गवाही दीनै र्यान और उन सबून में भौत अनुग्रह छ्यो।</verse>
				<verse number="34">उनूनमें कोई गरीब नै छ्यो, क्याखिनकि जिनारा पास जाग या घर छ्यो, उन उनुस बेच-बेचभेरन उन डबलून प्रेरितून दी दीछ्या,</verse>
				<verse number="35">और उन ऊस जरूरत का हिसाबले आपस में बाड़ी दीछ्या।</verse>
				<verse number="36">यूसुफ नामोको एक आदिमी छ्यो। उ लेवी गोत्र छ्यो और साइप्रस टापू को रूनवालो छ्यो प्रेरित ऊस बरनबास नामले बुलूछ्या, जैको मतलब छै, एक इसो आदिमी जो दुसरा को हौंसला बढ़ूछो।</verse>
				<verse number="37">उक पास थ्वाड़ा जमीन छी, जो डबल उ जमीन बेचभेरन मिलीयान, उले उन डबलून प्रेरितून दी दीयान ताकि प्रेरित लोगून की मद्दत कर सकून।</verse>
			</chapter>
			<chapter number="5">
				<verse number="1">हनन्याह नामोको एक आदिमी छ्यो और उकी घरवाली को नाम सफीरा छ्यो, उनूनले अपूनी जमीन को थ्वाड़ा हिस्सा बेचछ्य।</verse>
				<verse number="2">उनूनले जमीनाक दाम में भटे थ्वाड़ा डबल अपून खिन बचा लियान, और यो बात उकी घरवाली स ले मालूम छ्यो, और एक हिस्सा ल्याभेरन प्रेरितून दी दीछ।</verse>
				<verse number="3">पतरसले क्योछ, “हे हनन्याह! शैतान ले त्यारा मन में पवित्र आत्माथैं झूठ बोलना को बिचार डालछ्य। तैंले उकी किलैं सुणछ्य कि तैंले अपूनी बेचिना की जमीनाक दाम में भटे थ्वाड़ा हिस्सा अपून खिन राखले?</verse>
				<verse number="4">क्या बेचना है पैलि उ जमीन तेरि नी छी? और जब बेची गैछी त क्या उन डबल त्यारा नी छ्या? त्यारा मन में यो बुरो कामो को विचार किलैं आछ? तैले आदिमी थैं नै, लेकिन परमेश्वर थैं झूठ बोलछ्य।”</verse>
				<verse number="5">यो बात सुणते ही हनन्याह भिमें खिती पड़छ्य, और मर ग्यो और जिनुले यो बात सुणछ्य, उन भौत डरी ग्या।</verse>
				<verse number="6">फिर कुछ जवानूले आभेरन उकी लाश स कफन में लपट भेरन, और भ्यार लिजाभेरन दफना दीछ।</verse>
				<verse number="7">येक लगभग तीन घन्‍टाक बाद उकी घरवाली, ले भितर आछ। ऊस अपून घरवाला की मौत का बारिमें पत्तो नी छ्यो।</verse>
				<verse number="8">तब पतरसले उथैं पुछ्छै, “ मैंस बतौ क्या तुम द्वीवैन उ जमीन इदुक डबलून में बेचछ्य?” उले जबाब दीछ, “होई, इदुक में बेचछ्य।”</verse>
				<verse number="9">तब पतरसले उथैं क्योछ, “यो कि बात छै, क्या तुम द्वीवैन प्रभु की आत्मा का इम्तिहान लीन खिन एक मन करछ्य? देख, त्यार घरवालास दफनून-वाला भ्यार द्वारून में ठाड़ छन, और उन तैंस ले भ्यार लिजाला।”</verse>
				<verse number="10">यो बातस सुणते ही उकी मौत होगै और उ तुरन्त उक खुटान का पास भिमें खिती पड़छै; तब दफनू वालानले भितर आभेरन ऊस ले मरिना को पाछ, और भ्यार ली जाभेरन ऊस ले उक आदिमी का दगाड़ दफना दीछ।</verse>
				<verse number="11">और सब विश्वासीन की मण्डली जो यरूशलम शैहर में छ्या और इन बातुन सुणून वाला लोगून में डर बैठग्यो।</verse>
				<verse number="12">प्रेरितून का द्वारा भौत चिन और चमत्कारा का काम लोगून का बीच में दिखाई जाँछ्या, और मसीहक सब विश्वासी लोग एक मन हो भेरन राजा सुलैमान का बरानडा में जाम हुछ्या।</verse>
				<verse number="13">कुछ लोग प्रेरितून की बातुन को इज्जत त करछ्या, लेकिन उनूनमें विश्वासीन का समूह में जुड़ जाना को साहस नी छ्यो, फिरले लोग उनेरि तारीफ करछ्या।</verse>
				<verse number="14">प्रभु यीशु में विश्वास करूनवाला लोगून की गिनती बढ़नै जाछी और आदिमी और स्यैनिन को एक ठूलो दल बन ग्यो।</verse>
				<verse number="15">जो कुछ ले प्रेरित करून मरैछ्या, उक कारण लोग अपून बिमारून चरपाई और पटखाटून में ल्याभेरन बाँटान में राख दीछ्या, कि जब पतरस आलो उकी परछाई ले उनूनमें भटे कैमें पड़ि जौ।</verse>
				<verse number="16">और यरूशलम शैहरा का आस-पासा का सब गौंन भटे ले भौत लोग बिमार और भूताका सताईना का लोगून ल्या-ल्याभेरन प्रेरितून का पास उछ्या, और उन सब ठीक हो जाछ्या।</verse>
				<verse number="17">तब महायाजक और उनार दगड़िया जो सदूकी दला का सदस्य छ्या उन प्रेरितून का खिलाफ जलन करून लाग्यान।</verse>
				<verse number="18">और प्रेरितून पकड़ भेरन जेल में बन्द कर दीछ।</verse>
				<verse number="19">लेकिन रात में प्रभुक एक स्वर्गदूतले उनून जेल खाना को द्वार खोल भेरन भ्यार निकालछ्य और क्योछ,</verse>
				<verse number="20">“जा, और मन्दिर में ठाड़ होभेरन, लोगून यो नय्या अनन्त जीवन का बारिमें बता।”</verse>
				<verse number="21">प्रेरित यो सुणभेरन रात्तै हुन तक मन्दिर में ग्यान, और वाँ उन लोगून सिखून लाग्यान। जब महायाजक और उनार दगड़ियान आयान तब उनूनले इस्राएल देशा का सब यहूदी अगुवान कि महासभा बैठाछ, और जेल में यो जबाब भेजछ्य कि प्रेरितून याँ ल्याई जौ।</verse>
				<verse number="22">लेकिन जब मन्दिराक चौकदार जेल में पुज्यान, त उनूले वाँ प्रेरित नै पायो, और वापस आभेरन यो बात बताछ।</verse>
				<verse number="23">“हमूले देखछै कि जेल खानाक द्वार त निकीकैं बन्द करिना छ्या, और चौकीदारून ले वाँ भ्यार द्वारून का पास ठाड़ देख्यान; लेकिन जब द्वार खोल्यान त भितर कोई ले नै मिल्यो।”</verse>
				<verse number="24">जब मन्दिराक चौकीदारून का अधिकारी और प्रधान याजकून ले यो बात सुणिभेरन, और उनार बारिमें सोचभेरन भौत चिन्ता में पड़ ग्या कि येको की परिनाम होलो।</verse>
				<verse number="25">इदुक में केले आभेरन उनुस बताछ, “देखा, जिन लोगून तुमून ले पकड़ भेरन जेल खान में बन्द कर राखछ्यो, उन मन्दिर में लोगून उपदेश दीन मर्यान।”</verse>
				<verse number="26">जब उनूनले यो सुणछ्य, तब मन्दिरा का चौकदारून का अधिकारी चौकदारून का दगाड़ मन्दिरा में ग्यान, वाँ जाभेरन प्रेरितून महासभा का सामुनि दुबारा ल्यान, लेकिन उनून जबरदस्ती करभेरन नै ल्या, क्याखिनकि उनून डरछ्यो, कि लोग हमून ढूंगा ले लोड़िया भेरन नै मार दीन।</verse>
				<verse number="27">उनूनले प्रेरितून ल्याभेरन महासभा का सामुनि ठाड़ कर दीछ; तब महायाजक ले उनूनथैं पुछ्छै,</verse>
				<verse number="28">“कि हमूले तुमून धमकैभेरन यो हुकुम नै दिईनाको छ्योई, कि तुम यीशुक नामेले उपदेश जन दीया? फिरले तुमून ले पुर यरूशलम शैहर में यो उपदेश फैला दीछ, और तुम उ आदिमी को हत्या को इलजाम हमून में लगून चाँछा।”</verse>
				<verse number="29">तब पतरस और दुसारा प्रेरितून ले जबाब दीछ, “हमून खिन लोगून को हुकुम है ज्यादा जरूरी, परमेश्वरको हुकुम मानून हमोरो कर्तव्य छै।</verse>
				<verse number="30">हमार पुरखान का परमेश्वरले यीशु स मरिनान में भटे ज्यून करछ्य, जिनूस तुमूले सूली में लटका भेरन मार दीछ।</verse>
				<verse number="31">और ऊसई परमेश्वरले प्रभु और मुक्तिदाता ठैराभेरन अपून दैन हाता का तरफ ऊँच्चो पद दीछ, ताकि इस्राएली लोग पश्चाताप करून और अपून पापून खिन माफी पान सकून।</verse>
				<verse number="32">हम इन बातुन का गवाह छा, और पवित्र आत्मा ले गवाह छै जैस परमेश्वरले उनून दीछ, जो उक हुकुम माननान।”</verse>
				<verse number="33">जब महासभा का सदस्यून ले यो सुणभेरन जलनाक कारण प्रेरितून मारून चाँछ्या।</verse>
				<verse number="34">लेकिन गमलीएल नामोको एक फरीसी जो मूसा का नियम सिखूनवालो महासभा को सदस्य छ्यो और सब लोग उकी इज्जत करछ्या, उले महासभा में ठाड़ होभेरन प्रेरितून थ्वाड़ देर खिन भ्यार करि दीनान को हुकुम दीछ।</verse>
				<verse number="35">तब उले महासभा का सदस्यून थैं क्योछ, “हे इस्राएल देशाक लोगो, जो कुछ ले इन आदिमीन का दगाड़ करून चाँछा, सोच-समझभेरन कर्या।</verse>
				<verse number="36">क्याखिनकि इन दिनून है पैलि थियूदास नामोको आदिमी छ्यो, और उ यो दावा करछ्यो कि मैंले कुछ छूँ; और लगभग चार सौ लोग उक दगाड़ा हो गैछ्या। लेकिन उ मारी ग्यो, उक बाद उक मानन्या वाला तितर-बितर है ग्या, और उनोरो नामो-निशाल ले नै रियो।</verse>
				<verse number="37">उक बाद जनगणनाक दिनून में गलीलो को रूनवालो यहूदा आछ, और उले ले कुछ लोग अपून तरफ कर लियान; उ ले मारी ग्यो, और जतुक लोग ऊस मानछ्या उन सब तितर-बितर हो ग्या।</verse>
				<verse number="38">येक कारण अब मैं तुमूनथैं कुछूँ, तुम इन लोगून है दूर रौ, और उनार कोई काम में दखल जन दी; क्याखिनकि अगर यो योजना को काम लोगून का तरफ भटे होलो त तब एक दिन यो खतम हो जालो।</verse>
				<verse number="39">लेकिन अगर यो परमेश्वरा का तरफ भटे होलो, त तुम उनून कभै नै मिटा सकला; काँई इसो नै हो कि तुम परमेश्वरोको विरोध करूनवाला ठैरा।”</verse>
				<verse number="40">तब उन उकी बात सुणभेरन सहमत हो ग्या; और प्रेरितून भितर बुलाभेरन चाबुक लाग्यान; और उनून यो हुकुम दीछ, कि अब तुम लोगून यीशुक नामले कोई उपदेश जन दीया और फिर उनून छोड़ दीछ।</verse>
				<verse number="41">उन यो बात ले भौत खुश होभेरन महासभा का सामुनि भटे न्हैजानान, कि हम यीशुक कारण अपमानित हुन लायक छा।</verse>
				<verse number="42">येक बाद उन हरेक दिन, मन्दिर में और घर-घरून में प्रेरित लगातार सिखूछ्या और प्रचार करछ्या कि यीशु ही मसीह छै।</verse>
			</chapter>
			<chapter number="6">
				<verse number="1">उन दिनून में जब शिष्यून की गिनती बड़न मरैछी, तब यूनानी भाषा बोलून वाला यहूदी विश्वासी, इब्रानी भाषा बोलून वाला यहूदी विश्वासीन का खिलाफ कुड़कुड़ून लाग्यान, कि हर-रोज खानो बाटून में हमरि विध्वान को ध्यान नै राखि जानो।</verse>
				<verse number="2">तब बारा प्रेरितून ले यरूशलम शैहरा का दुसारा विश्वासीन अपून पास बुलाभेरन क्योछ, “हम प्रेरितून अपूनो बखत परमेश्वरको बचन सिखून में बितून चैछो, नै की खानो खिलून-पिलून की सेवा में।</verse>
				<verse number="3">येक कारण हे विश्वासी भाईयो, तुम अपून में भटे सात खास आदिमीन चुन ली, जो पवित्र आत्मा और बुद्धि ले भरिना, उनून चुन ली, कि हम उनून यो कामें की जिमेदारी सौंप सकाँ।</verse>
				<verse number="4">पर हम त प्रार्थना और बचन को प्रचार और शिक्षा दीन में समर्पित रूला।”</verse>
				<verse number="5">यो बात उन सबून निकी लागछ्य, और उनूनले स्तिफनुस नामोको एक आदिमीस जो विश्वासी और पवित्र आत्मा ले भरिना को छ्यो, और फिलिप्पुस, प्रुखुरूस, नीकानोर, तीमोन, परमिनास, और अन्ताकिया शैहरो को रून वालो नीकुलाऊस स जो यहूदी मत में आग्यो छ्यो, चुन लीछ।</verse>
				<verse number="6">येक बाद उनून प्रेरितून का सामुनि ठाड़ कर दीछ, उनूनले उनारा ख्वारा में हात राखभेरन प्रार्थना करभेरन, उ काम स करून खिन उनून नियुक्त करछ्य।</verse>
				<verse number="7">और इसकैं परमेश्वरको बचन फैलनै ग्योछ, और यरूशलम शैहर में शिष्यून की गिनती भौत बढ़नै गैछ, और कई यहूदी याजकून ले यीशु में विश्वासो को यो संदेश स्वीकार करछ्य।</verse>
				<verse number="8">येक बाद स्तिफनुसले, जो उन सात लोगून में भटे एक छ्यो, परमेश्वरा का अनुग्रह और सामर्थले भरिभेरन लोगून में भौत ठूला-ठूला चमत्करा का काम और चिन दिखूछ्यो।</verse>
				<verse number="9">लेकिन थ्वाड़ा लोगून ले स्तिफनुस को बिरोध करछ्य। उन उ यहूदी सभाघरा का सदस्य छ्या, जैस दास मुक्त लोगून को सभा घर कई जाछो; उन लोग कुरेनी और सिकन्दरिया शैहरून भटे और किलिकिया और आसिया प्रदेश भटे ले छ्या, यो लोग स्तिफनुसा का दगाड़ बहस करून लाग्यान।</verse>
				<verse number="10">लेकिन उले जो कुछ ले क्योछ, उन उको कोई जबाब नै दी सक्या। क्याखिनकि पवित्र आत्मा ले स्तिफनुसै स भौत बुद्धिमानी ले बोलना की मद्दत करछ्य।</verse>
				<verse number="11">दास मुक्त लोगून ले और लोगून भड़काछ कि उन झूठ बोलून, “हमूनले स्तिफनुसस मूसा का और परमेश्वरा का खिलाफ में बुराई करून सुणछ्य।”</verse>
				<verse number="12">उनूनले स्तिफनुस खिलाफ लोगून और यहूदी अगुवान और मूसा का नियम सिखून वालान भड़का दीछ, और उनूनले आभेरन स्तिफनुसस पकड़ भेरन महासभा का सामुनि ली ग्यान।</verse>
				<verse number="13">वाँ उनूनले झूठ्ठा गवाह पेश कर्यान जिनूनले स्तिफनुस में यो आरोप लगायान, कि “यो आदिमी पवित्र भवन और मूसा का नियम-कानून का बिरोध में बोलूनै रूछो।</verse>
				<verse number="14">क्याखिनकि हमूले ऊस यो कुन सुण रैछ, कि योई नासरत गौं को यीशु यो मन्दिर स उधारी द्योलो, और उन रीति-रिवाजून बदल डालोलो जो मूसाले हमून सौप रैछ।”</verse>
				<verse number="15">तब सब लोगूनले जो महासभा में बैठिना का छ्या, उनूनले स्तिफनुसका तरफ ध्यान ले देखछ्य, त उको मुँख स्वर्गदूतो को जसो चमकदार देखाई दीछ।</verse>
			</chapter>
			<chapter number="7">
				<verse number="1">तब महायाजक ले स्तिफनुस थैं पुछ्छै, “कि यो आरोप सच्ची छनी?”</verse>
				<verse number="2">उले क्योछ, “हे भाईयो, और अगुवो सुणा, हमार पूर्वज अब्राहम स उक हारान नगर में आभेरन बसन है पैलि, जो उ मेसोपोटामिया प्रदेश में छ्यो, तब महान परमेश्वरेले ऊस दर्शन दीछ और उथैं बात करछ्य।”</verse>
				<verse number="3">परमेश्वर ले क्योछ, “तैं अपून रिश्तेदारून और यो देशस छोड़िभेरन उ देश में जा, जो मैं तैंस दिखूँलो।”</verse>
				<verse number="4">उक बबाक मरना का बाद परमेश्वरेले अब्राहम हारान नगर भटे निकालभेरन याँ ली आछ जो तुम अगुवा रूछा।</verse>
				<verse number="5">उ बखत परमेश्वरेले ऊस कैले सम्पत्ति मतलब खुट राखना की जाग ले नै दीनी, हालांकि उ बखत उको कोई ले संतान नी छी। फिरले परमेश्वरेले उक दगाड़ यो वादा करछ्य, कि मैं यो पुर देश तैंस और त्यारा बाद त्यारा वंश स द्यूलो।</verse>
				<verse number="6">और परमेश्वरले उनूनथैं यो ले क्योछ, कि त्यारा वंशाक लोग पराया देश में परदेशी होलो, और परदेशी लोग उनून गुलाम बनाभेरन चार सौ साल तक उनार दगाड़ भौत बुरो कराला।</verse>
				<verse number="7">फिर परमेश्वरेले अब्राहम थैं क्योछ, जो जातिक लोग तुमून गुलाम बनाला, उनून मैं खुद सजा द्यूलो, और तेरा वंशजून उ देश भटे निकलभेरन योई जाग में ल्यूलो जाँ आभेरन उन मेरि अराधना करला।</verse>
				<verse number="8">और परमेश्वरेले अब्राहमा दगाड़ वाचा बादछ्य कि उ उको और उको वंशो को ख्याल राखोलो। वाचा का चिन्ह रूप में परमेश्वरले क्योछ, कि उक घराक सब बैगमैंसून को खतना हो। जब अब्राहमो को च्योलो इसहाक को जन्म भ्योछ, त अठूँ दिन उको खतना करि ग्योछ; इसा तरीका ले इसहाक ले अपून च्याला याकूबो को खतना कराछ, और याकूब ले अपून बारा च्यालान को खतना कराछ जो कि यहूदी जाति का कुलपिता बन्यान।</verse>
				<verse number="9">और यूसुफा का भाईन ले उथैं जलनाक कारण ऊस मिस्र देश खिन जानवाला लोगून का हाथ गुलामक रूप में बेच दीछ; फिरले परमेश्वर उक दगाड़ छ्यो।</verse>
				<verse number="10">पर परमेश्वरले यूसुफस सब विपतीन भटे बचाभेरन मिस्र देशा का राजा फिरौना का नजर में प्रिय और बुद्धिमान बना दीछ। तब राजा ले यूसुफस मिस्र देश में और अपून राजभवनाक सब लोगून में अधिकारी ठहराछ।</verse>
				<verse number="11">जब यूसुफस अधिकारी बनाछ, त पुर मिस्र और कनान देश में भयंकर अकाल पड़छय; जैले लोगून भौत तखलीफ उठून पड़छ्य, और हमार पुरखान अनाज नी मिलछ्यो।</verse>
				<verse number="12">लेकिन जब याकूब ले सुणछ्य कि मिस्र देश में अनाज छै, उले हमार पूर्वजून वाँ अनाज लीन खिन भेजछ्य और उन यूसुफ स मिल्यान और अनाज खरीदछ्य पर उनूनले यूसुफ स नै पछ्याणो।</verse>
				<verse number="13">दुसारा बार जब उन अनाज लीन खिन मिस्र देश में ग्यान, तब यूसुफले खुद अपून भाईन अपून बारिमें बताछ, और यूसुफ का गोत्र का बारिमें राजा फिरौन स मालूम हो ग्यो।</verse>
				<verse number="14">तब यूसुफ ले अपून बाब याकूब खिन जबाब भेजछ्य और अपून पुर परिवार स जैमें पचहत्तर लोग छ्या मिस्र देश में ऊँन खिन बुलावा भेजछ्य।</verse>
				<verse number="15">तब याकूब मिस्र देश में बश ग्यो; वाँई उ और हमार पुरखा मर ग्या।</verse>
				<verse number="16">उन याकूब की लाश स हमार देश कनान में लीभेरन आयान, और उकी लाश उ कब्र में दफनाछ, जैस अब्राहम ले कुछ रूपाया दीभेरन मोल लीईना को छ्यो। जब याकूब का च्यालान की मौत भैछ त उनेरि लाशून ले कनान देश में ल्यान और शकेम शैहर में उई जमीन में दफनाई ग्यो, जैस याकूब ले हमोरा का च्यालान भटे मोल लीईना को छ्यो।</verse>
				<verse number="17">“लेकिन जब उ वादा को पुर हुना को बखत आछ, जो परमेश्वरेले अब्राहम थैं कर राखछ्यो, तो मिस्र देश में हमारा पुरखा बड़ ग्या और भौत हो ग्या।”</verse>
				<verse number="18">तब मिस्र देश में दुसोरो राजा बनछो, जो यूसुफस नी जाणछ्यो।</verse>
				<verse number="19">उले हमार गोत्रा का दगाड़ चलाकी करभेरन हमार पुरखान का दगाड़ भौत बुरो बर्ताव करछ्य, कि उनार ईजा-बाब अपून नान-नातिनान खितून खिन मजबूर करछै, ताकि उन मर ज्यून।</verse>
				<verse number="20">“उ बखत मूसा पैद भ्योछ; उ परमेश्वरा का नजर में भौते सुन्दर छ्यो। और उक ईजा-बाब ले ऊस अपून घर में तीन मैंन तलक चोरी-छुप भेरन पालछै।”</verse>
				<verse number="21">जब उन ऊस भौत बखत तक लुका नै सक्या, त उक ईजा-बाब ले भ्यार राख दीछ, तब मिस्र देशा का राजा फिरौन की चेलि ले ऊस गोद लीछ और अपून घर ली गैछ, और अपून च्याला का नियाती ऊस पालछी।</verse>
				<verse number="22">और मूसास मिस्रिन की पुर ज्ञान-विज्ञान का बारिमें सिखाई ग्यो, और उ बात-चीत और कामून में ताकतबर हुनै ग्योछ।</verse>
				<verse number="23">“मूसा चालीस सालको भ्योछ, तब उक मन में आछ कि उ अपून इस्राएली भाईन का दगाड़ भेंट करूँ।”</verse>
				<verse number="24">तब वाँ उले एक मिस्री आदिमी का द्वारा एक इस्राएली आदिमी का दगाड़ बदसलूकी हुन देखिभेरन ऊस बचाछ, और मिस्री आदिमी स मारभेरन उ इस्राएली आदिमीक बदला लीछ।</verse>
				<verse number="25">उले सोचछ्य, कि उक अपून लोग समझाला कि परमेश्वर उक द्वारा उनून गुलामी भटे आजाद करोलो, लेकिन उन नै समझिया।</verse>
				<verse number="26">दुसारा दिन जब द्वी इस्राएली लोग आपस में लड़ून मरेछ्या, त उ वाँ आग्यो; और यो कैभेरन उनोरो आपस में मेल करून लागछो, “हे आदिमी, तुम त भाई-भाई छा, एक दुसारक दगाड़ किलैं बदसलूकी करछा?”</verse>
				<verse number="27">लेकिन जो अपून पड़ोसी का दगाड़ बदसलूकी करन मर्योछ, उले मूसास धक्का दीछ और यो क्योछ, “तैंस कैले हमून में अधिकारी और न्याय करनवालो बना रैछ?”</verse>
				<verse number="28">जसकैं तैले मिस्री आदिमी स मारछ्य। क्या तैं उसीकैं मैंस मारून चाँछै?</verse>
				<verse number="29">यो सुणिभेरन मूसा डर ग्यो और मिस्र देश भटे भाजि ग्यो, और मिद्यान देश में परदेशी बनभेरन रून लागछो। और वाँ उक द्वी च्यालान को जन्म भ्योछ।</verse>
				<verse number="30">“मिघान देश में मूसा का चालीस साल रूना का बाद परमेश्वरेले स्वर्गदूता का रूप में सीनै पहाड़ा का बिरान जागा में मूसास जलीना की झाड़ी का बीच में दर्शन दीछ।”</verse>
				<verse number="31">जब मूसा ले जलति झाड़ी स देखछै जो बुझून नी मरेछी, त मूसा दंग रैग्यो। जब उ देखन खिन नजिक ग्योछ, तब परमेश्वरेले उथैं क्योछ,</verse>
				<verse number="32">“मैं त्यारा पुरखा अब्राहम, इसहाक और याकूबो को परमेश्वर छूँ।” यो सुणिभेरन मूसा डरैले कामून लागछ्यो, और ऊस देखना की हिम्मत नै भ्ये।</verse>
				<verse number="33">तब परमेश्वरेले उथैं क्योछ, “अपून जुतान खोल ले, क्याखिनकि जै जाग में तैं ठाँड़ छै, उ पवित्र जाग छै।”</verse>
				<verse number="34">मैंले सच-मुची अपून लोगून की जो मिस्र देश में छन, उनेरि हालत देख रैछ, और उनोरो दुख और उनोरो रून मैले सुण रैछ; येक कारण मैं उनून बचुन खिन स्वर्ग भटे उतर भेरन आरयूँ। अब तैय्यार होज्या, मैं तैंस मिस्र देश भेजलो।</verse>
				<verse number="35">“यो उई मूसा छै जैस इस्राएली लोगून ले यो कैभेरन नकार दीछ, कि तैंस कैले हमून में अधिकारी और न्याय करून वालो बन रैछ?” मूसास परमेश्वर ले अधिकारी और छुणून वालो बनभेरन उ स्वर्गदूताक द्वारा भेजछै जैले ऊस झाड़ी में दर्शन दी राखछ्यो।</verse>
				<verse number="36">योई मूसा ले मिस्र देश और लाल समुद्र में अद्धभुत चिन और चमत्कार दिखयान और उनून वाँ है निकाल ल्याछ, और उले चालीस साल तलक बिरान जागा में उनेरि अगुवाई करछ्य।</verse>
				<verse number="37">यो उई मूसा छै, जेलै इस्राएल देशाक लोगूनथैं क्योछ, “परमेश्वर तुमार भाईन में भटे तुमून खिन मेरो जसो एक परमेश्वरो को संदेश दिनवालो ठाँड़ करोलो।”</verse>
				<verse number="38">“योई मूसा एक अगुवा क रूप में हमार पुरखान क दगाड़ छ्यो जब उन बिरान जागा में एक दगाड़ जाम छ्या। और उले उन लोगून का बीच उ परमेश्वरा का स्वर्गदूत क दगाड़ सीनै पहाड़ में बात कर्यान, और पहाड़ में मूसास परमेश्वरा का द्वारा अनन्त जीन्दगी दिनवालान बचन मिलछ्य, ताकि हमून तक पुजौ।”</verse>
				<verse number="39">लेकिन हमार पुरखानले उको हुकमून को पालन नै कर्यो ऊस नकार भेरन मिस्र देश खिन वापस जानाक बारिमें सोचून मरेछ्या।</verse>
				<verse number="40">तब लोगूनले मूसा का भाई हारून थैं क्योछ, “हमून खिन इसा देवता की मूर्ति बनौ, जो हमून मिस्र देश खिन वापस लीजान खिन हमार अघिल-अघिल हिटो। क्याखिनकि यो मूसा जो हमून मिस्र देश भटे लीभेरन आर्योछ हम नै जाणना कि उक दगाड़ कि भ्योछ।”</verse>
				<verse number="41">उन दिनून में उनूनले एक बाँच्छा की मूर्ति बनाछ, और उ मूर्ति का अघिल बलि चढ़ाछ और अपून हाथा का कामून खिन खुशी मनून लाग्यान।</verse>
				<verse number="42">“यो कारण ले परमेश्वरेले मुँख मोड़भेरन उनून आकाश में सूरज, चाँद और तारान अपून देवता का रूप में पुजून खिन छोड़ दीछ; जसो परमेश्वरा का संदेश दिनवालान की किताब में लिखीना को छै, हे इस्राएल देशा का लोगो। क्या सिर्फ तुम मैंखिन बिरान जागा में चालीस साल तक जानबरून की बलि और अन्नबलि चढ़ूनै रैछा?”</verse>
				<verse number="43">नै, तुम उ तम्बून लीभेरन घुमछा जैमें तुमार देवता मोलेक की मूर्ति और तुमोरो देवता रिफान की तारा की मूर्ति छी, इन मूर्तिन जिनून तुमून पुजून खिन बना राख छ्या, येक कारण अब मैं तुमून बेबीलोन देशा का पार ली जाभेरन बसूलो।</verse>
				<verse number="44">“यो तम्बू स गवाही को तम्बू कुंनान। जो बिरान जागा में हमार पुरखान का बीच में छ्यो; जैस परमेश्वरेले बनून खिन मूसाथैं क्योछ, जो आकार तैंले देखछ्य, उक मुताबिक येस बनौ।”</verse>
				<verse number="45">उई तम्बू स बाद में हमार पूर्खा यहोशू का अगुवाई में यो देश में ल्यान, जैमें उ बखत गैर-यहूदीन को कब्जा छ्यो लेकिन परमेश्वरेले उनून हमार पुरखान का सामुनि है निकाल दीछ, और यो तम्बू दाऊद राजा का बखत तलक रियोछ।</verse>
				<verse number="46">परमेश्वर दाऊद राजा भटे खुश छ्यो और उमें दया करछ्य। उले परमेश्वरथैं क्योछ, कि उ याकूबा का परमेश्वर खिन एक भवन बनूलो।</verse>
				<verse number="47">लेकिन दाऊद राजा का च्योलो राजा सुलैमानले परमेश्वर खिन घर बनाछ।</verse>
				<verse number="48">लेकिन परमप्रधान परमेश्वर आदिमी का हाथा का बनाईनाक घरून में नै रूनौ, जसो कि परमेश्वरो को संदेश दिनवाला यशायाह ले अपूनी किताब में लिख रैछ, कि परमेश्वर कुंछो,</verse>
				<verse number="49">“स्वर्ग म्योरो सिंहासन छै, और धरती मेरि खुटान की चौकी छै। तुम मैं खिन कसो घर बनाला? और म्यारा आराम की को जाग होलि?”</verse>
				<verse number="50">क्या मैंले इन सब चीजून नै बनायोई?</verse>
				<verse number="51">“हे हठीला लोगों, तुम परमेश्वरेकि बातुन मानून और सुणून है किलैं इनकार करछा! तुम हमेशा पवित्र आत्मा को बिरोध करछा। जसो तुमारा पुरखानले करछ्य।</verse>
				<verse number="52">परमेश्वरा का संदेश दिनवाला सब लोगून तुमारा पुरखानले सताछ। उनूनले उन परमेश्वरा का सन्देश दिनवालान मार डालछ्य जिनूनले जो उ धर्मी छै जैकी उनाकी भविष्वाणी करछ्य। और जब उ आछ, त तुमूले ले ऊस ध्वाक दीछ और उकी हत्या कर दीछ।</verse>
				<verse number="53">तुमून ले स्वर्गदूतून क द्वारा ठैराईनाका नियम-कानून त पायान, लेकिन उक पालन नै कर्यो।”</verse>
				<verse number="54">स्तिफनुस की यो बातुन सुणिभेरन यहूदी अगुवा आग बबूला हो ग्या और उमें गुस्सा हुन लाग्यान</verse>
				<verse number="55">लेकिन स्तिफनुसले पवित्र आत्मा में भरिभेरन स्वर्ग का तरफ देखछ्य, और उले परमेश्वरेकि महिमा देखछय। और उले यीशुस परमेश्वरा का दैंन तरफ ठाड़ देखछ्य।</verse>
				<verse number="56">तब उले क्योछ, “देखा, मैं स्वर्ग स खुलीना को और आदिमी च्याला स परमेश्वरा का दैंन तरफ ठाड़ देखूनमर्यू।”</verse>
				<verse number="57">पर उन अपून कान बन्द करभेरन एक दगाड़ स्तिफनुस में झपटैंयान।</verse>
				<verse number="58">और स्तिफनुस पकड़छ्य और घसीटनै यरूशलम शैहरा का भ्यार लीग्यान और वाँ उनूनले ऊस ढूंगान ले लोड़ियून शुरू करछ्य। उमें आरोप लगूनवाला लोगून ले अपून भ्यारा वाला कपाड़ खोल भेरन शाऊल नामाका एक जवाना का खुटान का पास राख दीयान।</verse>
				<verse number="59">और उन स्तिफनुस ढूंगा ले लोड़ियूनै र्यान, स्तिफनुसले प्रार्थना करछ्य, “हे प्रभु यीशु, मेरि आत्मा स स्वीकार कर।”</verse>
				<verse number="60">तब उले अपून घुणान टैकीभेरन जोर-जोरले क्योछ, “हे प्रभु, यो पाप की सजा इनून जन दीये।” और यो कैभेरन उ मरि ग्यो।</verse>
			</chapter>
			<chapter number="8">
				<verse number="1">शाऊल स्तिफनुस की हत्या करून में पुर तरीकाले ले सहमत छ्यो, उ दिनाक बाद यरूशलम शैहरा का विश्वासीन में भौत ज्यादा अत्याचार हुन लागछय और प्रेरितून छोड़ उन सब यहूदिया और सामरिया प्रदेश में तितर-बितर हो ग्या।</verse>
				<verse number="2">तब थ्वाड़ा विश्वासी लोगून ले स्तिफनुसस ली जाभेरन दफनाछ और उक खिन भौत शोक करछै।</verse>
				<verse number="3">और शाऊल विश्वासीन सतून मर्योछ्यो; और उ घरून में घुसभेरन विश्वासी स्यैनिन और आदिमीन घसीट भेरन जेलखान में डाली दी छ्यो।</verse>
				<verse number="4">लेकिन विश्वासी लोग जो तितर-बितर हो गैछ्या, उन घुम-घुमभेरन सुसमाचार प्रचार करनै रियान।</verse>
				<verse number="5">और फिलिप्पुस, सामरिया प्रदेशा का एक शैहर में जाभेरन मसीहक बारिमें प्रचार करून लागछो</verse>
				<verse number="6">जो बात फिलिप्पुस ले क्यान उनून लोगूनले सुणछ्य और जो चमत्कार दिखूछ्यो उनून देखभेरन, तब उनूनले एक मन हो भेरन उक बातुन में ध्यान दीन लाग्यान।</verse>
				<verse number="7">जब फिलिप्पुस ले हुकुम दीछ, त भौत लोगून में भटे भूत चिलाभेरन निकलग्या, और भौत लकवा पड़िनाका और लूला लोग ले ठीक करि ग्यान।</verse>
				<verse number="8">त, उ शैहर में भौत सारा लोग खुश भ्यान।</verse>
				<verse number="9">यो नगर में शमौन नामोको एक आदिमी रुंछो जेलै अपून जादू-टुनाले सामरिया प्रदेशा का लोगून हैरान करि राखिछ्यो, और यो दाव करछ्यो कि उ एक महान आदिमी छै।</verse>
				<verse number="10">और नाँन भटे लीभेरन ठुला तक सब उको आदर करछ्या और कुछ्या, “यो आदिमी में परमेश्वरेकि शक्ति छै, जो महान कहलूछी।”</verse>
				<verse number="11">उले भौत दिनून है अपून जादूगरी द्वारा लोगून चकित कर राखछ्यो, येक कारण उन ऊस बात मानछ्या।</verse>
				<verse number="12">जब लोगून ले परमेश्वरको राज्य को और यीशु मसीह को सुसमाचार फिलिप्पुस का द्वारा सुणभेरन विश्वास करछ्य, तब सब स्यैनि और आदिमी बपतिस्मा लीन लाग्यान।</verse>
				<verse number="13">और शमौन ले फिलिप्पुसाक उपदेश में विश्वास करछ्य और बपतिस्मा लीछ। और फिलिप्पुसाक दगाड़ संगति करून लागछ्य। उन सब चमत्काराक भौत ठूला-ठूला सामर्थ का काम देखभेरन चकित हो जाछ्यो।</verse>
				<verse number="14">जब यरूशलम शैहर में प्रेरितून यो मालूम भ्योछ, कि सामरिया प्रदेशा का लोगूनले परमेश्वरको बचन स मानून लाग्यान, त उनूनले पतरस और यहूनास उनार पास भेजछ्य।</verse>
				<verse number="15">उन द्वीवै वाँ ग्यान और उनूनले सामरिया प्रदेशा का लोगून खिन प्रार्थना करछ्य, कि उनून पवित्र आत्मा मिलौ।</verse>
				<verse number="16">क्याखिनकि ऐल तलक उनूनमें पवित्र आत्मा नी उतर रैछ्यो, केवल उनूनले यीशुको नामोको बपतिस्मा लीईना को छ्यो।</verse>
				<verse number="17">तब पतरस और यहूना ले लोगून में हात राँखछ्य, तब उनूनले पवित्र आत्मा पाछ।</verse>
				<verse number="18">जब शमौन ले यो देखछ्य कि प्रेरितूनका हात राखनाले लोगून पवित्र आत्मा मिल जाछो, त उ रूपाया लीभेरन उनार पास आछ, और उनूनथैं क्योछ।</verse>
				<verse number="19">“यो सामर्थ मैंस ले दीया, ताकि जिनूनमें लै मैं हात राँखू, उनूनले पवित्र आत्मा मिल जौ।”</verse>
				<verse number="20">लेकिन पतरसले क्योछ, “तैं और त्यारा डबलून को नाश हो, क्याखिन तैंले परमेश्वरा का बरदान स डबलून ले खरीदना को विचार करछ्य।</verse>
				<verse number="21">येक कारण तैं यो सेवा क भागीदार नै है सकनै, क्याखिनकि परमेश्वरा का सामुनि तेरो मन सिददो नाहातिन।</verse>
				<verse number="22">येक कारण तैं अपूनी यो बुराई भटे मन फिरा भेरन परमेश्वरथैं प्रार्थना कर, शायद परमेश्वर तैंस माफ कर दीयून।</verse>
				<verse number="23">मैं देखूनमर्यू कि तैंमें भौत जलन भरिना की छै और तैं पापून का गुलमी में छै।”</verse>
				<verse number="24">शमौनले जबाब दीछ, “तुम परमेश्वरथैं मैं खिन प्रार्थना कर्या, कि जो तुमूले क्योछ, उमें है कोई ले मैंमें नै आ पड़ो।”</verse>
				<verse number="25">तब पतरस और यहूना ले लोगून प्रभु यीशु का वचन सुणाभेरन, यरूशलम शैहर खिन वापस ऊँन बखत, और सामरिया प्रदेशा का भौत गौन में सुसमाचारो को प्रचार करछ्य।</verse>
				<verse number="26">फिर प्रभुक स्वर्गदूत ले फिलिप्पुसथैं क्योछ, “उठ और दक्षिण खिन उ बाटा में जा, जो यरूशलम भटे गाजा शैहर तरफ जाछो। यो रेगिस्तान बाटो छै।”</verse>
				<verse number="27">तब फिलिप्पुस दक्षिणाक तरफ ग्योछ, त ऊस बाट में इथोपिया देशो को एक अधिकारी मिलछ्य, जो उ देशो को महारानी को मंत्री और खजांछी छ्यो। उ परमेश्वर की अराधना करून खिन यरूशलम शैहर में जाईना को छ्यो।</verse>
				<verse number="28">जब उ अपून देश खिन रथ में बैठभेरन वापस जानमरेछ्यो। त उ परमेश्वरो को संदेश दिनवाला यशायाह की किताब पढून मरेछ्यो।</verse>
				<verse number="29">तब पवित्र आत्मा ले फिलिप्पुसथैं क्योछ, “अघिल जाभेरन रथा क दगाड़-दगाड़ हिट।”</verse>
				<verse number="30">फिलिप्पुस दौड़भेरन रथा का पास ग्योछ, और ऊस परमेश्वरो को संदेश दिनवाला यशायाह की किताब पढ़ून सुणिभेरन पुछ्छै, “क्या जो तैं पढ़ून मरेछै, ऊस समझून ले मरछै?”</verse>
				<verse number="31">उले क्योछ, “जब तलक कोई मैंस नै समजालो कि येक मतलब कि छै, तब तलक मैं कसीकैं समझू?” और उले फिलिप्पुसथैं बिनती करछ्य कि उ रथ में उक दगाड़ बैठ जौ।</verse>
				<verse number="32">पवित्रशास्त्रा का जो हिस्सा उ पढून मरेछ्यो उमें इसो लिखनाको छ्यो, कि “उ एक बलि चढ़ूनवालो भेड़क नियाती पुजाई ग्योछ। और जसकैं मेम्ना उन कुतरीन्या वाला का सामुनि चुपचाप ठाँड़ रूंछ, उसीकैं जब लोगून ले ऊस दुख दीछ त उले अपूनो मुँख नै खोल्यो।</verse>
				<verse number="33">उको भौत अपमान करि ग्यो और ऊस न्याय नै मिल्यो। कोई ले उक वंशजून का बारिमें नै बता सकनो, किलैंकी ये है पैलि धरती में उको कोई वंशज हुनो, लोगून ले ऊस मार डालछ्य।”</verse>
				<verse number="34">तब मंत्री ले फिलिप्पुसथैं क्योछ, “किरपा करभेरन मैंस बतौ कि यो बात परमेश्वरो को संदेश दिनवाला कैक बारिमें कुनमर्योछ, अपून बारिमें या कोई दुसरा का बारिमें?”</verse>
				<verse number="35">तब फिलिप्पुसले ऊस समझाछ कि परमेश्वरो को संदेश दिनवाला यशायाह ले भविष्यबाणी करभेरन यो बात यीशुक बारिमें क्योछ। और तब फिलिप्पुसले यशायाह का किताब में भटे मंत्रीस यीशुक सुसमाचार सुणाछ और उ मंत्री ले यो बातुन समझ लीछ और यीशु में विश्वास करछ्य।</verse>
				<verse number="36">उ बाटा में जानै-जान उन एक ताल का पास पुज्यान, तब मंत्री क्योछ, “याँ ताल में पानि छै, अब मैंस बपतिस्मा लीन में की रोक छै?”</verse>
				<verse number="37">फिलिप्पुसले क्योछ, “अगर तैं अपून पुर मनले विश्वास कर छै, तब तैं ली सकछै।” यो सुणिभेरन उले जबाब दीछ, “मैं पक्को विश्वास करछूँ कि यीशु मसीहा परमेश्वरो को च्योलो छै।”</verse>
				<verse number="38">तब मंत्री ले रथस रोकना को हुकुम दीछ। मंत्री और फिलिप्पुस द्वीवै पानिक ताल में ग्यान। और फिलिप्पुसले मंत्रीस बपतिस्मा दीछ।</verse>
				<verse number="39">जब उन पानि भटे भ्यार आयान, तब परमेश्वर की आत्मा फिलिप्पुसस उठाभेरन ली ग्यो। मंत्री ले ऊस फिर नै देख्यो, लेकिन परमेश्वर ले ऊस बचा हालछ्य येक कारण खुश हुनै अपून देश खिन वापस न्हैग्यो।</verse>
				<verse number="40">और फिलिप्पुसले अपून आपस अश्‍दोद शैहर में पाछ, और जब तक उ कैसरिया शैहर में नै पुजूनो तब तलक सब नगरून और गौं में सुसमाचार प्रचार करने ग्योछ।</verse>
			</chapter>
			<chapter number="9">
				<verse number="1">यो बीच में शाऊल स यीशुक शिष्यून डरून और मारनाको भूत सवार छ्यो। और उ महायाजक का पास ग्योछ।</verse>
				<verse number="2">दमिश्क नगरा का यहूदी सभाघरून का अधिकारीन का नाम में लिखीत रूप चिठ्ठी माँगछ्य, और ऊस यो अधिकार दीई ग्योछ कि अगर कोई यीशु की शिक्षा स मान्नान उन पकड़ी जून, चाहे उन आदिमी हुन या स्यैनिन उ उनून बाँदि भेरन यरूशलम शैहर में ल्या सकौ।</verse>
				<verse number="3">जब शाऊल यरूशलम भटे दमिश्क नगराक नजिक पुजछै, तब एकाएक आकाश भटे एक उज्यालो उक चारों तरफ चमकछ्य।</verse>
				<verse number="4">तब शाऊल भिमें खिती पड़छो, और उले एक आवाज सुणछ्य “हे शाऊल, हे शाऊल, तैं मैंस किलैं सतून मरेछ्य?”</verse>
				<verse number="5">तब शाऊल ले क्योछ, “हे प्रभु, तुम को छा?” उले जबाब दीछ, “मैं यीशु छूँ, जैस तैं सतून मरेछ्य।</verse>
				<verse number="6">अब उठभेरन नगर में जा। तैंस जो करून छै। उ तैंस बता दी जालो।”</verse>
				<verse number="7">जो लोग शाऊल का दगाड़ छ्या, यो सब देखिभेरन डर ग्या, क्याखिनकि उनूनले सिर्फ आवाज सुणछ्य और वाँ कैसे नै देख्यो।</verse>
				<verse number="8">जब शाऊल भिमें भटे उठछै, तब ऊस के नै देखीन मर्योछयो। येक कारण उक दगड़िया उक हात पकड़ भेरन दमिश्क नगर खिन ली ग्यान।</verse>
				<verse number="9">उ तीन दिन तलक देख नै सकियो और उले के खायौ-पियौ ले नै।</verse>
				<verse number="10">दमिश्क नगर में हनन्याह नामोको एक विश्वासी शिष्य छ्यो, ऊस प्रभु यीशु ले दर्शन दीभेरन क्योछ, “हे हनन्याह!” उले क्योछ “हाँ प्रभु।”</verse>
				<verse number="11">तब प्रभु ले उथैं क्योछ, “उठभेरन सीधी नाम वाली गली में जा, वाँ यहूदाक घर में शाऊल नामोको एक तरसुस शैहरो को रूनवालाक बारिमें पत्तो लगौ; क्याखिनकि उ वाँ प्रार्थना करूनमर्योछ,</verse>
				<verse number="12">और उले अपून दर्शन में हनन्याह नामाका आदिमीस भितर उन और अपून मलिमें हात राँखून देखछै; ताकि उ दुबाँरा देखून लागि ज्यो।”</verse>
				<verse number="13">पर हनन्याह ले क्योछ, “प्रभु, मैंले भौत लोगूनथैं यो आदिमी का बारिमें सुण रैछ, कि येले यरूशलम शैहर में तुमार विश्वासी लोगून भौत दुख दी रैछ;</verse>
				<verse number="14">और याँ ले येस प्रधान याजकून का तरफ भटे अधिकार मिलीना को छै, कि जो लोग तैमें विश्वास करनान, उन सबून पकड़भेरन यरूशलम शैहर में ली जून।”</verse>
				<verse number="15">लेकिन प्रभु ले उथैं क्योछ, “तैं जा, क्याखिनकि मैंले ऊस गैर-यहूदी और राजान और इस्राएली लोगून का सामुनि म्यारा बारिमें प्रचार करून खिन म्येरो चुनिना को जन छै।</verse>
				<verse number="16">और मैं ऊस बतुलो कि म्यारा बारिमें प्रचार करना का कारण ऊस कसो दुख उठून पड़ोलो।”</verse>
				<verse number="17">तब हनन्याह उ घर में ग्योछ जाँ शाऊल रूछ्यो, और उमें हात राखभेरन क्योछ, “हे भाई शाऊल, प्रभु यीशु जैले तैंस बाट में दर्शन दीछ, उले मैंस याँ भेज रैछ, कि तैं दुबाँरा देखून लागज्या और पवित्र आत्मा ले भरि जा।”</verse>
				<verse number="18">तब तुरन्त शाऊल का आँखान भटे छिलका का नियाती कोई चीज निकलियान और उक बाद उ दुबारा देखून लाग ग्यो। उ उठछै और उले बपतिस्मा लीछ।</verse>
				<verse number="19">फिर शाऊल स खानो खाभेरन ताकत आछ, और थ्वाड़ा दिनून तलक विश्वासीन का दगाड़ दमिश्क नगर में र्योछ।</verse>
				<verse number="20">और उ तुरन्त दमिश्क शैहर यहूदीन का सभाघरून में जाभेरन यीशुक बारिमें यो प्रचार करून लागछ्य, कि यीशु ही परमेश्वरो को च्योलो छै।</verse>
				<verse number="21">तब सब लोग यो देखभेरन हैरान हो भेरन कुन लाग्यान, “क्या यो उई आदिमी नाहातिनी, जो यरूशलम शैहर में यीशुक विश्वासी छ्या उनून नाश करछ्यो, और याँ ले येक कारण आर्यो छ्यो, कि उनून बाँदीभेरन प्रधान याजकून का पास ली जौ?”</verse>
				<verse number="22">लेकिन शाऊल प्रचार करून में और ले ज्यादा सामर्थी हुनै ग्यो, और यो बातोको प्रमाण दी-दीभेरन कि यीशु ही मसीह छै, दमिश्क नगर में रून वाला यहूदीन को मुँख बन्द करनै र्योछ।</verse>
				<verse number="23">जब शाऊल स दमिश्क में भौत दिन हो ग्या, त यहूदीन ले मिलभेरन ऊस मारना को योजना बनाछ।</verse>
				<verse number="24">उन त ऊस मार डालून खिन नगराक गेटाक सामुनि में रात-दिन उक इन्तजार में करनान, लेकिन उनार योजनाक बारिमें शाऊल स पतो चल जाछो।</verse>
				<verse number="25">एक रात शाऊल का शिष्यून ले उ ढूंगा का ऊँच्ची दीवार में लीग्यान, जो शैहरा का चारू तरफ छी। तब उनूनले दीवार में एक खुलीना का जाग भटे जियोड़ान ले एक ठूली टोकरी में बाँद भेरन शाऊल स उमें बैठाभेरन तलि उतार छै, इसकैं शाऊल दमिश्क नगर भटे बचभेरन निकल ग्यो।</verse>
				<verse number="26">येक बाद शाऊल ले यरूशलम शैहर में पुजभेरन शिष्यून का दगाड़ मिलना की कोशिश करछ्य। लेकिन उन सब ऊस देखिभेरन डरून मरेछ्या, क्यखिनकि उनुस विश्वास नै भ्यो कि उले उनार नियाती एक विश्वासी छै।</verse>
				<verse number="27">लेकिन बरनबास ऊस अपून दगाड़ प्रेरितून का पास ली ग्योछ, और उनुस बताछ, कि कसकैं ले दमिश्क नगरा का बाट में प्रभु यीशु ले दर्शन दीभेरन बात करछ्य; और दमिश्क में येले हिम्मत करभेरन यीशुक नामोको प्रचार करछ्य।</verse>
				<verse number="28">प्रेरितून ले बरनबासाक बातुन में यकीन करछ्य, और येक कारण शाऊल उनार दगाड़ रूछ्यो, और निडर है भेरन पुर यरूशलम शैहर में यीशुक नामको प्रचार करनै रियोछ।</verse>
				<verse number="29">उ यूनानी भाषा बोलूनवाला यहूदी लोगून का दगाड़ बातचीत और बाद-बिवाद करछ्यो; लेकिन उन ऊस मारना की कोशिश करून लग्यान।</verse>
				<verse number="30">तब बाकि शिष्यून यो बाता का बारिमें पतो चलछ्य त उन शाऊल स कैसरिया शैहर में ली आयान, और वाँ उ उखिन जहाज भटे तरसुस शैहर खिन जाना को इंतजाम करछ्य, जो उको अपूनो शैहर छ्यो।</verse>
				<verse number="31">इसीकैं यहूदिया प्रदेश, गलील प्रदेश और सामरिया प्रदेश में विश्वासीन शान्ति मिलछ्य, और प्रभु को डर और पवित्र आत्मा की मद्दत ले भौत लोगून ले प्रभु यीशु में विश्वास करछ्य; और विश्वासीन की मण्डली आत्मिक रूप में उन्नति हुनै रैछ।</verse>
				<verse number="32">फिर इसो भ्योछ पतरस उन सब प्रदेशून में घुमनै-घुमनै उन विश्वासीन का पास मिलून खिन ग्योछ, जो लुद्दा नगर में रूछ्या।</verse>
				<verse number="33">वाँ ऊस एक लकवा पड़ीना आदिमी मिलछो, जैक नाम एनियास छ्यो। और उ आठ साल भटे बिछान में पड़ीनाको छ्यो।</verse>
				<verse number="34">जब पतरसले उथैं क्योछ, “हे एनियास! यीशु मसीह तैंस चंगो करनान। उठ, अपूनो बिछान उठौ!” तब उ तुरन्त उठ ग्यो।</verse>
				<verse number="35">और लुद्दा और शारोन शैहरून में रूनवाला, सबून ले ऊस देखभेरन प्रभु यीशु में विश्वास करछ्य।</verse>
				<verse number="36">याफा नगर में तबीता नामकी एक विश्वासी स्यैनि रूछी, यूनानी भाषा में उको नाम दोरकास छ्यो। उ भौत भलाई काम और गरीब लोगून की मद्दत करछी।</verse>
				<verse number="37">उ बखत जब पतरस लुद्दा में छ्यो, उनि दिनून उ बिमार है भेरन मरि गै। और उनूनले ऊस नवै-धवैभेरन घराक मलिवाला कमरा में राँख दीछ।</verse>
				<verse number="38">लुद्दा नगर याफा नगरा का नजिक छ्यो शिष्यून ले यो सुणभेरन की पतरस वाँ छै द्वी आदिमीन भेजभेरन उथैं बिनती करछ्य “कि हमार पास ऊँन खिन देर जन कर।”</verse>
				<verse number="39">यो सुणिभेरन जब पतरस उनार दगाड़ याफा नगर में आछ, तब उन ऊस उ कमरा में ली ग्यान, जाँ मरिना की तबीता स राखिना की छ्यो, वाँ सब विध्वा स्यैनिन पतरसक चारों तरफ ठाड़ है भेरन डाण मारनै, और उन कपाड़ान दिखून लाग्यान, जिनून तबीता दोरकास ले उनून खिन बनाईका छ्या।</verse>
				<verse number="40">तब पतरसले सबून भ्यार करना का बाद घुणा टेकभेरन प्रार्थना करछ्य, और लाशा का तरफ चाँभेरन क्योछ, “हे तबीता, उठ।” तब उले अपून आँख खोलियान और पतरस स देखभेरन। उठभेरन बैठ जाछी।</verse>
				<verse number="41">तब पतरसले अपून हातले सहार दीभेरन ऊस ठाड़ करछ्य और विश्वासीन और विध्वान बुलाभेरन उनुस दिखाछ कि तबीता ज्यून और बिल्कुल ठीक-ठाक छै।</verse>
				<verse number="42">यो बात पुरी याफा नगर में फैल ग्यै; और वाँक भौत लोगूनले प्रभु यीशु में विश्वास करछ्य।</verse>
				<verse number="43">और पतरस याफा नगर में भौत दिनून तलक शमौन नामक एक चमड़ाक काम करन्या वाला आदिमीक घर में र्योछ।</verse>
			</chapter>
			<chapter number="10">
				<verse number="1">कैसरिया नगर में कुरनेलियुस नामको एक आदिमी छ्यो, उ ईटालयन सेनाक रेजीमेन्ट में एक सुबदार छ्यो।</verse>
				<verse number="2">उ और उक परिवार धार्मिक और परमेश्वरा का भक्त छ्या, येक अलावा उ यहूदी गरीब आदिमीन दान दीछ्या और हर बखत प्रार्थना में लाग रूछ्या।</verse>
				<verse number="3">उले एक दिन छकाल में लगभग तीन बजे दर्शन में साफ देखछया कि परमेश्वरा का स्वर्गदूत ले उक पास आभेरन क्योछ, “हे कुरनेलियुस।”</verse>
				<verse number="4">कुरनेलियुस ले ऊस ध्यान ले देखछ्य और डरभेरन क्योछ, “हे प्रभु, कि बात छै?” उले उथैं क्योछ, “परमेश्वरले तेरि प्रार्थना सुण हालछ्य, और त्यार दान दीनै ले उन खुशी छन।</verse>
				<verse number="5">येक कारण अब तैं याफा नगर में आदिमी भेजभेरन शमौन जैस पतरस ले कुंनान, ऊस बुलवा ले।</verse>
				<verse number="6">उ चमड़ाक काम करन्या शमौनक घर में रून मर्योछ, जेको घर समुद्रा का किनार में छै।”</verse>
				<verse number="7">येक बाद उ स्वर्गदूत वाँ भटे न्हैग्यो, और कुरनेलियुस ले द्वी सेवकून और जो हमेशा उक सेवा खिन ठहराईनाक छ्या उमें भटे एक भक्‍त सिपाई स बुलाछ,</verse>
				<verse number="8">और उनुस सब बात बताभेरन याफा नगर भटे पतरस स लियून खिन भेजछ्य।</verse>
				<verse number="9">दुसारा दिन तीन आदिमी जिनून कुरनेलियुस ले भेजनाक छ्या, उन लगभग बार बजे वाँ पुज्यान। उ बखत पतरस घराक पाख में प्रार्थना करन खिन ग्योछ।</verse>
				<verse number="10">ऊस भुख लागछ्य और उ के खान चाँछ्यो, लेकिन जब उन खान पकून मरैछ्या त उ बेसुध हो ग्यो।</verse>
				<verse number="11">तब पतरस ले एक दर्शन देखछ्य कि आकाश खुल ग्योछ; और एक ठूली चधरक जसी कोई चीज जो चारू कुंना में लटकिना की आकाश भटे उक पास धरती आछ।</verse>
				<verse number="12">जैमें धरतीका उ चार खुटान वाला और रेगूनवाला जानवर और आकाशाक चिड़िया छ्या, जिनारा बारिमें मूसा का नियम-कानून में लिखीनाक छै की उ अशुद्ध और अपवित्र छै और इनून खान खिन यहूदीन मना करिना को छै।</verse>
				<verse number="13">तब उले यो आवाज सुणछ, “हे पतरस, उठ और उनुस मारभेरन खा।”</verse>
				<verse number="14">लेकिन पतरसले क्योछ, “प्रभु, नै, मैं इसो नै कर सकनू, क्याखिनकि मैंले कभै अपवित्र और अशुद्ध चीज नै खा रै।”</verse>
				<verse number="15">फिर उले दुसारा बार यो आवाज सुणछ्य, “जैस परमेश्वरले शुद्ध कर दीछ, ऊस तैं अशुद्ध जन कौ।”</verse>
				<verse number="16">तीन बार इसो हुना का बाद, उ चधर दुबाँर आकाश खिन उठा लीगै।</verse>
				<verse number="17">जब पतरस यो दर्शनक बारिमें सोचून मर्योछ कि येक मतलब कि होलो, तब कुरनेलियुस का भेजिनाक आदिमीन शमौनो को घराक पतो लगाभेरन द्वारा का सामुनि ठाड़ है भेरन पुछून लाग्यान।</verse>
				<verse number="18">शमौन, जैस पतरस ले कुंनान, “क्या उ याँई मेहमान छी?”</verse>
				<verse number="19">पतरस उ दर्शन का बारिमें सोचून मर्योछयो, कि पवित्र आत्मा ले पतरस थैं क्योछ, “देख! तीन आदिमी तैंस खोजून मर्यान।</verse>
				<verse number="20">भले उन गैर-यहूदी छन, और उठभेरन तलि जा, और बिना सोचे उनार दगाड़ जा; मैंले उनून भेजिना को छै।”</verse>
				<verse number="21">तब पतरस ले तलि जाभेरन उनूनथैं क्योछ, “देख, जैक बारिमें तुम पूछुनमरेछा, उ मैं छूँ, तुम याँ किलैं आ रैछा?”</verse>
				<verse number="22">तब उनूनले क्योछ, “कुरनेलियुस सुबदार, जो धर्मी छै और परमेश्वर भटे डरछो, और जैकी पुर यहूदी जातिक लोग इज्जत करनान, ऊस एक पवित्र स्वर्गदूतले यो हुकुम दी रैछ कि उ तुमून अपून घर बुलाभेरन बचन सुणो।”</verse>
				<verse number="23">यो सुणभेरन पतरसले उनुस भितर बुलाछ, और उनेरि खातिरदारी करछ्य। और दुसारा दिन पतरस उनार दगाड़ ग्योछ, और याफा का थ्वाड़ा विश्वासी ले उनार दगाड़ ग्यान।</verse>
				<verse number="24">तिसार दिन उन कैसरिया नगर में पुजियान जाँ कुरनेलियुस अपून पुर परिवाराक और दोस्तून का दगाड़ उनोरो इन्तजार करून मरेछ्यो।</verse>
				<verse number="25">जब पतरस भितर उनमरेछ्यो, त कुरनेलियुस ले उक दगाड़ भेंट करछ्य, और उक खुटान में पड़भेरन उकी भक्ति करून लागछ्य।</verse>
				<verse number="26">लेकिन पतरसले ऊस उठाभेरन क्योछ, “मेरि भक्ति जन कर, मैंले तुमोरो जसो आदिमी छूँ।”</verse>
				<verse number="27">पतरस कुरनेलियुस दगाड़ बात-चीत करनै-करनै भितर ग्योछ, और वाँ भौत लोगून जाम देखिभेरन कुंन लागछ्यो,</verse>
				<verse number="28">“तुम जाणछा कि हम यहूदीन खिन कोई गैर-यहूदी का दगाड़ रिशता राँखून या उनार घर में जान मना छै, हम यहूदी लोगूनका नियमाक खिलाफ छै लेकिन परमेश्वरेले मैंस बताछ कि मैं कोई आदिमी स अशुद्ध नै कुँ।</verse>
				<verse number="29">येक कारण जब तुमूले मैंस बुलाछ, तब मैं बेहिचक आयूँ। अब बता, तुमूले मैंस याँ किलैं बुलाछ?”</verse>
				<verse number="30">तब कुरनेलियुस ले क्योछ, “आज भटे चार दिन पैलि योई बखत, जब मैं अपून घर में छकाल में तीन बजे प्रार्थना करन मरेछ्यू, तब एक चमकीला कपाड़ा पैनिना को आदिमी म्यार सामुनि आछ।”</verse>
				<verse number="31">और उले मैंथैं क्योछ, “हे कुरनेलियुस परमेश्वरले तेरि प्रार्थना सुण हालछै और त्यार दान दिनाले परमेश्वर खुश छन।</verse>
				<verse number="32">येक कारण कैसे याफा नगर भेजिभेरन शमौन जैस पतरस लै कुंनान, ऊस याँ बुला लै। उ समुद्रा का किनार चमड़ाक काम करन्या वाला शमौना का घर में महेमान छै।”</verse>
				<verse number="33">तब मैंले तैंस या बुला और तैंले याँ आभेरन बड़ी किरपा करछ्य। “अब हम सब या परमेश्वरा का सामुनि छा कि जो बात उनूनले तुमून बता रैछ, हम सब ले उक बारिमें जाण सका।”</verse>
				<verse number="34">तब पतरसले क्योछ, अब मेरि समझ में निकीकैं आग्योछ कि परमेश्वर कैका दगाड़ भेद-भाव नै करूनो।</verse>
				<verse number="35">लेकिन हरेक जाति को आदिमी जो परमेश्वर है डरछो और धार्मा का काम करछो, उ ऊस अपनूछो।</verse>
				<verse number="36">तुमून उ बाताक बारिमें मालूम छ्यो, जो परमेश्वरेले हमून खिन मतलब इस्राएल देशा का लोगून दीईना की छी। उले शान्ति का बारिमें सुसमाचार सुणाछ, जो लोगून यीशु मसीह में विश्वास करना का द्वारा मिल सकछो। उ सब लोगून को प्रभु छै।</verse>
				<verse number="37">तुमून उ बचन क बारिमें पतो छी, जो यहूना को बपतिस्माक प्रचाराक बाद गलील प्रदेश भटे शुरू होभेरन सारा यहूदी प्रदेश में फैल ग्यो।</verse>
				<verse number="38">परमेश्वरे ले उई यीशु जो नासरत गौ छ्यो जैको पवित्र आत्मा और सामर्थ ले अभिषेक करछ्य, और उ हरेक जाग भलाई करनै र्योछ और सब जो शैताना का सताइनाक छ्या, उन सबून ठीक कर्यान क्याखिनकि परमेश्वर उक दगाड़ छ्यो।</verse>
				<verse number="39">और हम प्रेरित, उन सब कामून का बारिमें, जो हमूले यीशु स यरूशलम शैहर में पुर यहूदी प्रदेशून में करून देखछ्य और यहूदी अगुवान ले ऊस सूली में मार दीछ।</verse>
				<verse number="40">लेकिन परमेश्वरले ऊस तिसार दिन मरिन में भटे ज्यून करभेरन उन लोगून दिखाछ।</verse>
				<verse number="41">सब लोगून ले ऊस नै देख्यो लेकिन उन गवाहन ले जो परमेश्वर ले पैलि चुन राख छ्या, मरिनान में भटे ज्यून हुना का बाद उक दगाड़ खाछ-पीछ;</verse>
				<verse number="42">और उले हमून हुकुम दीछ, कि सब लोगून में प्रचार करा और गवाही दीया, कि यीशु उई छै जैस परमेश्वरे ले ज्यून और मरिना को न्याय करन खिन ठैरा रैछ।</verse>
				<verse number="43">उनार बारिमें सब परमेश्वरो को संदेश दिनवालान ले गवाही दीछ कि जो लै उमें भरोस राखाला, उनुस उनार जरियाले पापून कि माफी मिलेली।</verse>
				<verse number="44">जब पतरस बोलन मर्यो छ्यो, तब पवित्र आत्मा सब सुणून वालान में आछ।</verse>
				<verse number="45">जो खतना करिना का यहूदी विश्वासी पतरस का दगाड़ आ रैछ्या, उन यो सब देखिभेरन दंग रैग्या कि पवित्र आत्मा को बरदान गैर-यहूदी ले मिलछ्य</verse>
				<verse number="46">किलैकी यहूदी विश्वासीन ले उनून अलग-अलग भाषा में बोलनान और परमेश्वरकि अराधना करून देखछ्य, तब पतरसले क्योछ।</verse>
				<verse number="47">“क्या इनून अब कोई पानि ले बपतिस्मा लीना ले रोक सकछोई, जिनून हमार समान पवित्र आत्मा परमेश्वर भटे मिलर्योछ?”</verse>
				<verse number="48">येक बाद पतरसले, जो लोग कुरनेलियुस क घर में जाम छ्या। तब उले हुकुम दीछ कि उनून यीशु मसीहक नामले बपतिस्मा दीई जौ। और उनूनले पतरस थैं बिनती करछ्य कि उ थ्वाड़ा दिनून तलक उनार दगाड़ रौ।</verse>
			</chapter>
			<chapter number="11">
				<verse number="1">फिर प्रेरितून और विश्वासीन ले जो यहूदिया प्रदेश में छ्या, उनूनले सुणछ कि गैर-यहूदी ले परमेश्वरको वचन मानून लाग्यान।</verse>
				<verse number="2">और जब पतरस उनार पास यरूशलम शैहर में आछ, खतना करिना का यहूदी विश्वासी लोग उक दगाड़ बाद-बिवाद करून लाग्यान,</verse>
				<verse number="3">“तैले गैर-यहूदीन का घर में जाभेरन खान किलैं खाछ?”</verse>
				<verse number="4">तब पतरसले जो बात कुरनेलियुस का घर में जान है पैलि भ्यान उनून शुरू भटे लीभेरन आखरी तक एक-एक करभेरन बतायान।</verse>
				<verse number="5">“जब मैं याफा नगर में प्रार्थना करमरेछ्यूँ, उ बखत मैं बेसुध होग्यू और मैंले दर्शन देखछ्य कि एक ठूली चधरका जसी कोई चीज चारों किनारान में लटकिना की आकाश भटे तलि उछी। और उ ठीक म्यार सामुनि आछ।”</verse>
				<verse number="6">और जब मैंले ऊस ध्यान देखछ्य, उमें धरतिक सब किसमा का घरेलू जानवर, और सब रिगनिया जीव-जन्तु और चिड़ियान देख्यान।</verse>
				<verse number="7">और फिर मैंले एक आवाज सुणछ्य, “पतरस, उठ, इनूस मारभेरन खा।”</verse>
				<verse number="8">लेकिन मैंले क्योछ, “प्रभु, मैंले कभै ले कोई अपवित्र और अशुद्ध चीज नै खा रै।”</verse>
				<verse number="9">तब दुसारा बार स्वर्ग भटे यो आवाज आछ, “परमेश्वरले जैस पवित्र बना रैछ, तैं ऊस अपवित्र और अशुद्ध जन कौ।”</verse>
				<verse number="10">तीन बार इसो हुछो, येक बाद सब स्वर्ग खिन खिच लिई ग्यो।</verse>
				<verse number="11">उई बखत कैसरिया नगर भटे जो कुरनेलियुस नामोको आदिमी ले जिन तीन आदिमी म्यारा पास भेजिना का छ्या, उन उ घर में पुजी ग्या जाँ हम रूकिनाका छ्या।</verse>
				<verse number="12">तब पवित्र आत्मा ले मैथैं क्योछ, “बेहिचक इनारा दगाड़ जा।” फिर इन छ: विश्वासी भाई लै म्यार दगाड़ आयान, और हम उ आदिमी का घर भितर ग्या।</verse>
				<verse number="13">तब उले हमून बताछ, कि उले स्वर्गदूत स अपून घर में देखछ्य, जेलै उथैं क्योछ, “तैं कैसे याफा नगर भेजिभेरन शमौन जैस पतरसले कुंनान याँ बुला।</verse>
				<verse number="14">उ तैंस इस बात बतालो, जेलै परमेश्वर तैंस और त्यारा घराना का सबै लोगून बचालो।”</verse>
				<verse number="15">जब मैं उनुस यीशुक बारिमें बतून मरेछ्यू, तब पवित्र आत्मा उनूनमें आछ, जसीकैं पैलि हमून में आछ।</verse>
				<verse number="16">तब मैंस उ बचन याद आछ जो यीशु ले हमूनथैं कईनाको छ्यो, कि यहूना ले तैं पानिको बपतिस्मा दीछ, पर तुम पवित्र आत्मा ले बपतिस्मा पाला।</verse>
				<verse number="17">येक कारण परमेश्वरले उनून यो बरदान दीछ, जो प्रभु यीशु मसीह में विश्वास करना ले मिलछो; त मैं को छूँ जो परमेश्वरा का खिलाफ जाछूँ? जब परमेश्वरले उनार दगाड़ कोई भेदभाव नै कर्यो, तब मैं किलैं करूँ?</verse>
				<verse number="18">यो सुणिभेरन, उन यहूदी विश्वासी चुप र्यान, और परमेश्वरै की तारीफ करून लाग्यान, “तब त परमेश्वरेले गैर-यहूदी लोगून ले अनन्त जीन्दगी खिन अपून पापून भटे पश्चाताप करून और यीशु मसीह में विश्वास करना को दान दी रैछ।”</verse>
				<verse number="19">स्तिफनुस की हत्या बाद, कई विश्वासीन ले यरूशलम शैहर स छोड़ दीछ, और उन घुमनै-घुमनै फीनीके प्रदेश, साइप्रस द्वीप और सीरिया देशाक अन्ताकिया शैहर में पुजियान; लेकिन यहूदी लोगून छोड़ और कैसे परमेश्वरो को वचन नी सुणूछ्या।</verse>
				<verse number="20">लेकिन उनूनमें भटे थ्वाड़ा विश्वासी साइप्रस का रूनवाला और कुरेनी का रूनवाला छ्या, जो अन्ताकिया शैहर में आभेरन गैर-यहूदी यूनानीन प्रभु यीशुक बारिमें सुसमाचार बतून लाग्यान।</verse>
				<verse number="21">और प्रभु की सामर्थ उनूनमें छी, और भौते गैर-यहूदी लोगून ले उनेरि बातुन में विश्वास करछ्य और प्रभु यीशु स ग्रहण करछ्य।</verse>
				<verse number="22">जब उनार बारिमें यरूशलम शैहरा का विश्वासीन ले सुणछ्य, तब उनूनले बरनबास स अन्ताकिया शैहर भेजछ्य।</verse>
				<verse number="23">बरनबास वाँ पुजभेरन यो वाँक लोगूनमें परमेश्वरै का अनुग्रह देखिभेरन खुश भ्योछ, और उन सबून उपदेश दीछो कि उन अपून पुर मनले परमेश्वर में भरोस करून खिन अटल रया।</verse>
				<verse number="24">उ एक निको आदिमी छयो; उ विश्वासी और पवित्र आत्मा ले भरिना को छ्यो, ऊस देखभेरन भौत लोग ले प्रभु में विश्वास करभेरन उनूनमें मिलग्या।</verse>
				<verse number="25">तब बरनबास अन्ताकिया शैहर छोड़भेरन शाऊल स खोजून खिन तरसुस शैहर खिन न्हैग्यो।</verse>
				<verse number="26">और जब उ मिलछ्य त ऊस अन्ताकिया शैहर ल्याछ। इसो भ्योछ की शाऊल और बरनबास एक साल तक विश्वासीन की मण्डली का दगाड़ मिलीयान और भौत लोगून प्रभु यीशुक बारिमें बतूनै र्यान। शिष्य सबून है पैलि अन्ताकिया शैहर मेंई मसीही कहलायान।</verse>
				<verse number="27">उ बखत थ्वाड़ा विश्वासी जो परमेश्वरो को संदेश दिनवाला छ्या यरूशलम शैहर भटे अन्ताकिया शैहर आयान।</verse>
				<verse number="28">उनूनमें भटे एक परमेश्वरोको संदेश दिनवालो जैको नाम अगबुस छ्यो, उ ठाड़ भ्योछ और पवित्र आत्मा की सामर्थ ले उनून बताछ कि सार धरती में भौत ज्यादा अकाल पड़ून वालो छै यो अकाल सम्राट क्लौदियुस राज्यकाल का बखत में पड़छ्य।</verse>
				<verse number="29">तब विश्वासीन ले फैसला करछ्य, कि उन यहूदा प्रदेश में रूनवाला विश्वासी भाई-बैनिन की मद्दत करून खिन अपूनी-अपूनी कमाई का अनुसार हम डबल जाम करभेरन भेजुंला।</verse>
				<verse number="30">उनूनले इसोई करछ्य; और बरनबास और शाऊल क हात विश्वासीन क बुज़ुर्गून का हात दान भेजछ्य।</verse>
			</chapter>
			<chapter number="12">
				<verse number="1">उ बखत हेरोदेस राजा ले विश्वासीन में भटे कई लोगून सतून खिन उनून बन्दी बना लीछ।</verse>
				<verse number="2">उले प्रेरितून में भटे यहूना क भाई याकूब स तलवार ले मरवा दीछ,</verse>
				<verse number="3">और जब उले देखछ्य कि यहूदी यो देखिभेरन खुशी हुनान, तब उले पतरसे स ले पकड़ लीछ। यो अखमीरी रवाटाक त्यारो को बखत छ्यो।</verse>
				<verse number="4">और राजा हेरोदेस ले पतरस स पकड़ भेरन जेल में डाल दीछ, और उले ऊस चार-चार सिपाईन चार दल स पहरा दिन खिन राँख राँखछ्यो, येक कारण कि उ फसह त्याराक बाद उक न्याय सब लोगून का सामुनि करनवाला छ्यो।</verse>
				<verse number="5">जब पतरस जेल खाना में बन्द छ्यो, भौत विश्वासी लोग उ खिन लौ लगाभेरन परमेश्वर थैं प्रार्थना करन मरेछ्या।</verse>
				<verse number="6">जब राजा हेरोदेस पतरस स लोगून का सामुनि ल्यूनवालो छ्यो, उक पैल रात पतरस स जंजीरून ले बादछ्य, द्वी सिपाईन का बीच में पड़ीनाको छ्यो और पैहरेदार द्वार क सामुनि पहरा दीन मरेछ्या।</verse>
				<verse number="7">तब एकाएक प्रभु एक स्वर्गदूत पतरसा का सामुनि वाँ आछ, और उ कोठरी में उज्यालो है ग्यो। और उले पतरस स हात ले हिलाभेरन नीन भटे जगाछ, और क्योछ, “जल्दी उठ।” और जसीकैं पतरस ठाड़ भ्योछ, और उक हाते की जंजीर खुलभेरन भिमें खिती ग्या।</verse>
				<verse number="8">और स्वर्गदूतले पतरस थैं क्योछ, “कपाड़ और जुत्ता पैन।” पतरसले इसो करछ्य, फिर उले पतरस थैं क्योछ, “चधर ओढ़भेरन म्यार पछिल अ।”</verse>
				<verse number="9">जब पतरस उक पछिल-पछिल जानमरेछ्यो, तब उक समझ में के नै आयो कि यो सब हकीकत छी या स्यून।</verse>
				<verse number="10">जब उन पैलि और फिर दुसोरो पैहरेदा भटे निकल भेरन उ लूवाक द्वार तक पुज्यान, जो कि नगराक तरफ जाछो, तब उ द्वार लै उनून खिन अफी खुलि ग्यो। और उन भ्यार निकल्यान और गली क किनार तक आयान कि अचानक स्वर्गदूत पतरस स छोड़भेरन न्हैजाछो।</verse>
				<verse number="11">तब पतरस स ऐहसास भ्योछ कि उक दगाड़ कि भ्योछ तब उले क्योछ, “अब मैंस यकीन है ग्योछ कि परमेश्वरले अपूनो स्वर्गदूत भेजिभेरन मैंस राजा हेरोदेस का कैद भटे छुड़ा लीछ, और यहूदी अगुवा की सब उम्मीद स नाकाम कर दीछ।”</verse>
				<verse number="12">और यो जाणिभेरन कि परमेश्चर ऊस बचा हालछ्य, पतरस उ यहूना, जैको नाम मरकुस ले छ्यो, उकी ईजा मरियमा का घर आछ। वाँ भौत विश्वासी लोग जाम है भेरन प्रार्थना करन मरेछ्या।</verse>
				<verse number="13">जब पतरसले गेट स खट-खटाछ, तब रूदे नामेंकी दासी आछ।</verse>
				<verse number="14">और पतरस की आवाज स पछ्याण भेरन खुशी हुनै बिना द्वार खोलियें भितर गै, और सबून बतून लागछी कि पतरस द्वार लै ठाड़ छै।</verse>
				<verse number="15">यो सुणिभेरन उनूनले उथैं क्योछ, “तैं पागल है गैछी।” पर उले और लै जोर दीभेरन क्योछ, “मैं सच्ची कुंछूँ, उ पतरसई छै।” पर उनूनले उक बात में भरोस नै करभेरन उथैं क्योछ, “उ पतरसको स्वर्गदूत होलो।”</verse>
				<verse number="16">यो बीच जब पतरस द्वार खटखटूनै र्योछ, तब उनूनले द्वार खोलछ्य और पतरस स देखिभेरन हैरान रैग्या।</verse>
				<verse number="17">लेकिन पतरसले उनुस हात ले इशारा करभेरन चुप रून खिन‍ क्योछ, और बताछ कि परमेश्वरले ऊस जेल भटे कसकैं भ्यार निकालछ्य। फिर उले क्योछ, “तुम याकूब और सब विश्वासी भाईन-बैनिन इन बातुन की खबर दी दीया कि मैं जेल भटे भ्यार आ गयूँ।” येक बाद पतरस वाँ भटे दुसारा जाग खिन न्हैग्यो।</verse>
				<verse number="18">रात्तै जब जेलखाना का सिपाईन ले पतरस स जेलखाना में नै पायो, तब उनूनमें हड़-बड़ाहट मचि गै कि पतरस काँ ग्यो।</verse>
				<verse number="19">तब राजा हेरोदेस ले पतरस स खोजना को हुकुम दीछ और ऊस सब जाग खोज भेरन नै पायो, तो उले पहरैदारून थैं सवाल जबाब कर्यान और जब उन ऊस जबाब नै दी सक्या, तब उले हुकुम दीछ कि पहरैदारून मार डाली जौ; और उ यहूदिया छोड़भेरन कैसरिया शैहर में कुछ बखत खिन रून लागछ्य।</verse>
				<verse number="20">राजा हेरोदेस सूर और सैदाक लोगून भटे भौत नाराज छ्यो, येक कारण उन शहरून का लोग हेरोदेस स मिलून खिन एक मन है भेरन उक पास आयान, सबून है पैलि उले बलास्तुसै की मद्दत माँछ्य जो राजा हेरोदस को एक कर्मचारी छ्यो। तब उनूनले राजा थैं समझौता करून खिन क्योछ क्याखिनकि अनाज की पूर्ति खिन उन राजा का क्षेत्र में निर्भर छ्या।</verse>
				<verse number="21">जै दिन हेरोदेस ले उन शैहरून का लोगून थैं मिलना कि योजना बनाछ, त राजा हेरोदेस उई दिन राजवस्त्र पैनभेरन अपून राज-गद्दी में बैठभेरन भाषण दिन लाग्यो।</verse>
				<verse number="22">उकी बातुन सुणिभेरन सूर और सैदाक लोग जोर-जोरले कुन लाग्यान, “यो कोई आदिमी की नै, पर कोई देवता की आवाज छै।”</verse>
				<verse number="23">तब तुरन्त उई बखत परमेश्वरा का स्वर्गदूतले हमला करछ्या, क्याखिनकि उले परमेश्वरकि महिमा नै करि। उक आंग में कीड़ा पड़भेरन मर ग्यो।</verse>
				<verse number="24">लेकिन परमेश्वरको बचन बढ़नै और फैलनै ग्यो, और विश्वासीन की तादात बढ़नै गै।</verse>
				<verse number="25">विश्वासीन द्वारा जाम करिनाक रूपाया यहूदिया प्रदेशा का विश्वासीन दीभेरन, बरनबास और शाऊल यरूशलम शैहर भटे अपून शैहर अन्ताकिया खिन वापस आयान। यहूना मरकुस उनार दगाड़ छ्या।</verse>
			</chapter>
			<chapter number="13">
				<verse number="1">अन्ताकिया शैहरा का विश्वासीन में कुछ परमेश्वरा का संदेश दिनवाला और शिक्षक छ्या, जसीकैं बरनबास और शमौन जैथैं नीगर ले कुंनान, और लूकियुस जो कुरेनी शैहर भटे छ्यो, और मनाहेम, जैको पालन-पोषण राज्य का चौथाई हिस्सा क राजा हेरोदेस क दगाड़ होईना को छ्यो और शाऊल।</verse>
				<verse number="2">जब उन उपवास में रैभेरन अराधना करन मरेछ्या, त पवित्र आत्मा ले क्योछ, “मैंखिन बरनबास और शाऊल स उ सेवा खिन अलग कर जैखिन मैंले उनुस बुला रैछ।”</verse>
				<verse number="3">तब उनूनले उपवास और प्रार्थना करभेरन शाऊल और बरनबास क ख्वारा में हात राखभेरन उनून परमेश्वर की सेवा खिन भेजछ्य।</verse>
				<verse number="4">येक कारण शाऊल और बरनबास पवित्र आत्माक द्वारा अन्ताकिया शैहर भटे सिलूकिया टापू खिन भेजि ग्यान; और वाँ भटे समुन्द्री जहाज में बैठभेरन साइप्रस टापू भटे सलमीस टापू खिन न्हैग्या;</verse>
				<verse number="5">और सलमीस शैहर में पुजभेरन यहूदी लोगून का सभाघर में जाभेरन परमेश्वरको बचन लोगून सुणून; लाग्यान। और यहूना मरकुस उनेरि मद्दत करून खिन उनार दगाड़ छ्यो।</verse>
				<verse number="6">उन सब टापू भटे होभेरन पाफुस टापू तक पुज्यान। वाँ उनेरि भेंट बार-यीशु नामोको एक जादूगरक दगाड़ भैछ, जो यहूदी और झूठ्ठो संदेश दिनवालो छ्यो।</verse>
				<verse number="7">बार-यीशु सिरगियुस पौलुसो को दगड़िया छ्यो, जो उ टापू को राज्यपाल छ्यो और बुद्धिमान आदिमी छ्यो। उ बरनबास और शाऊल स बुलाभेरन परमेश्वरोको बचन सुणून चाँछ।</verse>
				<verse number="8">लेकिन जादूगर बार-यीशु ले, जैस यूनानी भाष में इलीमास कुंनान, उनार खिलाफ छ्यो, और उ राज्यपाल सिरगियुस स परमेश्वर में विश्वास करून भटे रोकून चांछ्यो।</verse>
				<verse number="9">तब शाऊल ले जैको नाम पौलुसले छै, पवित्र आत्मा ले भरिभेरन एलीमास जादूगर कि तरफ गौरले देखभेरन क्योछ,</verse>
				<verse number="10">“हे छल और कपट ले भरिना का शैतान की सन्तान, और हरेक निको बातुनको दुश्मन लै छै! क्या तैं प्रभुक सच्चा बाटान झूठ्ठो बाटान में बदलून है नी छोड़लै?</verse>
				<verse number="11">अब प्रभु तैंस सजा द्याला। तैं कुछ बखत खिन अन्धो है जालै और थ्वाड़ा बखत तलक तैं सूरजो को उज्यालो नी देख सकलै!” और उई बखत उक आँखान का सामुनि अन्यारो है ग्यो और उ फिर लाचार है भेरन इथकैं-उथकैं टटोलुन लागछ्य कि कोई उक हात पकड़ भेरन ऊस ली जा दीयो।</verse>
				<verse number="12">तब राज्यपाल ले जो कुछ भ्योछ, ऊस देखभेरन और प्रभु की शिक्षान ले चकित होभेरन प्रभु यीशु में विश्वास करछ्य।</verse>
				<verse number="13">पौलुस और उक दगड़ियान ले पाफुस टापू भटे समुन्द्री जहाज में सफर शुरू करछ्य, और पंफूलिया प्रदेशा का पिरगा शैहर में आयान; और यहूना मरकुस उनून छोड़भेरन यरूशलम शैहर खिन वापस आग्यो।</verse>
				<verse number="14">और पिरगा शैहर भटे अघिल बढ़भेरन गलातिया प्रदेशा का पिसिदिया जिला का नजिक अन्ताकिया शैहर में पुज्यान। और सबताक दिन यहूदीनका सभाघर में जाभेरन बैठग्या।</verse>
				<verse number="15">मूसा का नियम कानून और परमेश्वरा का संदेश दिनवालान की किताब भटे पढ़ना क बाद यहूदी सभाघरा का अधिकारी ले उनार पास संदेश भेजछ्य, “हे भाईयो, अगर तुमून में भटे केका पास लोगून उत्साहित करून खिन कोई वचन छै त कृपा करभेरन ऊस याँ बता।”</verse>
				<verse number="16">तब पौलुसले ठाड़ होभेरन हात ले इशारा करभेरन उनून शान्त करभेरन क्योछ, “हे इस्राएली लोगो, और परमेश्वर भटे डरन वाला गैर-यहूदी, सुणा।”</verse>
				<verse number="17">इन इस्राएली लोगून का परमेश्वरले हमार पुरखान चुन लीछ, और जब इन सब मिस्र देश में परदेशी होभेरन रूछ्या, और उनेरि बढ़ोतरी करछ्य, और प्रभु अपूनी सामर्थ ले उनून उ देश भटे निकाल ल्याछ।</verse>
				<verse number="18">और उ चालीस सालून तक बिरान जागा में उनोरो ब्यवहार सहन-करनै र्योछ, हालांकि उनूनले बार-बार उनोरो हुकमून नै मान्यो।</verse>
				<verse number="19">और परमेश्वर ले कनान देश में सात जातिन को नाश करभेरन उनोरो देश इस्राएली लोगून बिरासत में दी दीछ।</verse>
				<verse number="20">हमार पुरखानले उनार पुरखान का मिस्र देश में पुजाई जान है लगभग चार सौ पचास सालून का बाद कनान में अधिकार करून शुरू करछय। परमेश्वरले संदेश दिनवालो शमूएल स इस्राएली लोगून में राज करन खिन अगुवा ठैराछ।</verse>
				<verse number="21">जब शमूएल उनोरो अगुवा छ्यो, तब लोगूनले अपून खिन एक राजा की माँग करछ्य। और परमेश्वरले बिन्यामीना का कुल में भटे एक आदिमी, मतलब कीशो को च्योलो शाऊल स उनोरो राजा नियुक्त करछ्य और उले इस्राएली लोगून में चालीस साल राज करछय।</verse>
				<verse number="22">फिर परमेश्वर ले शाऊल स राजा का पद भटे हटाभेरन दाऊद स उनोरो राजा बनाछ। जैक बारिमें उले गवाही दीछ, “मैंस एक आदिमी यिशै को च्योलो दाऊद मेरि मनसा अनुसार मिल ग्यो, उई मेरि सारी मनसा पुरी करोलो।”</verse>
				<verse number="23">उक वंश में भटे परमेश्वरले अपून वादा का अनुसार इस्राएल देशा का पास एक मुक्तिदाता यीशु भेजछ्य।</verse>
				<verse number="24">जैक उन है पैलि यहूना ले प्रचार करछ्य कि सब इस्राएली लोगून अपून पापून को पश्चाताप करून और परमेश्वरा का तरफ मन फिराव और बपतिस्मा लीना की जरूरत छै।</verse>
				<verse number="25">और जब यहूना अपूनी सेवा पुरी करून में छ्यो, त उले क्योछ, “तुम मैंस कि समझछा? मैं मसीह नाहातिनू। लेकिन सुणा! म्यारा बाद उनवाला छै, उ मैं है भौत महान छै और मैं त उक जूत्ताको तानो ले खोलना को लायक नाहातिनू।”</verse>
				<verse number="26">“हे भाईयो, तुम जो अब्राहम की संतान छा; और परमेश्वर भटे डरून वाला गैर-यहूदी सुणा, परमेश्वर ले हमून संदेश दी रैछ कि यीशु लोगून हमार पापून भटे बचुन खिन आईना को छै।</verse>
				<verse number="27">यरूशलम शैहरा का लोगूनले और उनार अगुवा ले यीशु स नै पछ्याण और उनूनले परमेश्वरा का संदेश दिनवाला लोगून का बचनून नै समझयो जिनून उन हरेक सबता का दिन पढ़ छ्या। येक कारण उनूनले क्योछ यीशु मारी जान लायक छै और इसीकैं परमेश्वरा का संदेश दिनवाला लोगून को बचनून पुरो करछ्य।</verse>
				<verse number="28">उनूनले मार डालना को कोई ले दोष उमे नै पायो, फिरले राज्यपाल पिलातुस थैं विनती करछय, की उ मार डाली जौ।</verse>
				<verse number="29">और जब उनूनले उ सब करछय जो पवित्र-शास्त्र उक बारिमें कुंछो, त ऊस सूली भटे उतार भेरन कबर में राखछै।</verse>
				<verse number="30">लेकिन परमेश्वरले तिसार दिन उनुस मरिन में भटे फिर ज्यून करछ्य,</verse>
				<verse number="31">और उन जो उनार दगाड़ गलील प्रदेश भटे यरूशलम शैहर में आईनाक छ्या। उ उनून भौत दिनून तक दिखाई दीनै र्योछ; जिनूनले ऊस देखछै अब उन हम यहूदीन खिन गवाह छन।</verse>
				<verse number="32">और हम तुमून उ वादाक बारिमें जो परमेश्वरे ले हमार पुरखानथैं करीन को छ्यो, यो सुसमाचार सुणूनू,</verse>
				<verse number="33">परमेश्वर ले यीशु स मरिनान में भटे ज्यून करछ्य। इसकैं उले अपून पुरखानथैं करिनाको वादा पुरो करछ्य। परमेश्वर ले हमारा पुरखान खिन इसो करछ्य। जसो दुसरो भजन में परमेश्वरे ले अपून च्यालाक बारिमें कईनाको छै; ‘तैं म्योरो च्योलो छै; आज मैं तेरो बाब बन गयूँ।’</verse>
				<verse number="34">परमेश्वर ले पवित्रशास्त्र में ऊस मुर्दान में भटे ज्यून हुना का और कभै नी सड़ बारिमें क्योछ। और परमेश्वर ले क्योछ, ‘मैं तैंस पवित्र और हमेशा की आशीष द्यूलो, जैको वादा मैंले राजा दाऊद थैं करिनाको छ्यो।’</verse>
				<verse number="35">येक कारण राजा दाऊद ले एक और भजन में ले क्योछ, ‘तैं अपून पवित्र जन स सड़ून नी देले।’</verse>
				<verse number="36">दाऊद त परमेश्वरेकि इच्छाक अनुसार अपून बखत में सेवा करभेरन मर ग्यो, और अपून पुरखान में मिल ग्यो, और उ सड़ ले ग्यो। येले हम जाणनू की दाऊद यो भजन में अपून बारिमें बात नै करूनमर्योछ।</verse>
				<verse number="37">लेकिन उ यीशु का बारिमें कुनमर्योछ जैस परमेश्वरले मरिन में भटे ज्यून करछ्य, और उ सड़ून नै पायो।</verse>
				<verse number="38">येक कारण, हे भाईयों, मैं चाछूँ कि तुम जाणली कि पापून की माफी को समाचार तुमून यीशुक द्वारा दीई ग्योछ।</verse>
				<verse number="39">और जिन बातुन ले तुम मूसा का नियम-कानून मानना का द्वारा निर्दोष नै ठैर सकना, उनूनमें सब में हरेक विश्वास करनवाला यीशुक द्वारा निर्दोष ठैरछो।</verse>
				<verse number="40">येक कारण तुम चौकुना रौ, काँई इस नै हो, कि जो परमेश्वरो को संदेश दिनवालान ले कै रैछ, उ तुमारा दगाड़ ले होलो।</verse>
				<verse number="41">उनूनले‍ क्योछ, ‘हे निन्दा करनवालो देखा और चकित हो और मर जा, क्याखिनकि मैं तुमार दिनून में एक काम करछूँ; इसो काम अगर कोई उक बारिमें बतालो ले तुम कभै विश्वास नी करला।’”</verse>
				<verse number="42">जब पौलुस और बरनबास सभाघर भटे भ्यार उनान, तब लोगूनले उनूनथैं बिनती करछ्य कि तुम इन बातुन अघिल सबता का दिन उनून फिर सुणाई जौ।</verse>
				<verse number="43">और जब यहूदी सभा उठ गै त यहूदिया और यहूदी मत में आईना का गैर-यहूदी भक्तून में भटे भौत पौलुस और बरनबासा का पछिल हो ग्या; और उनूनले उनूनथैं बात करभेरन समझाछ की परमेश्वरा का अनुग्रह में बनिनाक रौ।</verse>
				<verse number="44">अघिल सबत क दिन शैहरा का सारा लोग परमेश्वरो को बचन सुणून खिन जाम है ग्या।</verse>
				<verse number="45">लेकिन यहूदी अगुवा भीड़ देखभेरन जलन ले भरग्या, और पौलुसै कि बातुन को बिरोध और निन्दा करून लाग्यान।</verse>
				<verse number="46">तब पौलुस और बरनबासले निडर है भेरन उनूनथै क्योछ, “जरूरी यो छै कि पैलि परमेश्वरो को बचन तुमून सुणाई जानो, लेकिन जब तुम ऊस नकार दीछा, और अपूनास अनन्त जीन्दगी का लायक नै ठैरूना, त अब हम गैर-यहूदी लोगून का पास जूला।”</verse>
				<verse number="47">क्याखिनकि प्रभु ले हमून यो हुकुम दी रैछ, “मैंले तुमून गैर-यहूदी जातिक लोगून खिन उज्यालो बना रैछ, जेलै दुनिया का हरेक जाग में लोगून मुक्तिदाता का बारिमें बतून चैंछो।”</verse>
				<verse number="48">यो सुणभेरन गैर-यहूदी का लोग भौत खुश भ्यान, और परमेश्वरेकि बचन की तारीफ करन लाग्यान। और जतुक अनन्त जीन्दगी खिन ठैराईनाक छ्या, उनूनले विश्वास करछय।</verse>
				<verse number="49">तब प्रभु को बचन उ पुर प्रदेश में फैल ग्यो।</verse>
				<verse number="50">लेकिन यहूदीन का अगुवा ले भक्त और ठुल जाति का स्यैनिन और शैहरा का खास आदिमीन भड़काछ। उनूनले पौलुस और बरनबासा का खिलाफ उपद्रव कराभेरन उनून अपून इलाक भटे भ्यार निकाल दीछ</verse>
				<verse number="51">तब पौलुस और बरनबासले उनार सामुनि खूटाकि धुल झाड़ी दीछ, उनून यो देखून खिन की परमेश्वर ले उनून नकार दीछ और उनून सजा द्याला। फिर उन इकुनियुम शैहर खिन न्हैग्या।</verse>
				<verse number="52">और उन अन्ताकिया शैहर में शिष्य खुशी ले और पवित्र आत्मा ले भरिनै ग्यान।</verse>
			</chapter>
			<chapter number="14">
				<verse number="1">इकुनियुम शैहर में इसो भ्योछ, की पौलुस और बरनबास यहूदीन का सभाघर में दगाड़-दगाड़ ग्यान, असरदार तरीका ले बात कर्यान, की भौत यहूदी और गैर-यहूदी यूनानी लोगून ले विश्वास करछ्य।</verse>
				<verse number="2">लेकिन यहूदी जो विश्वास नी करून चाछया, उनूनले गैर-यहूदी लोगून को मन विश्वासी भाईन क खिलाफ भड़काछ, और भौत नफरत पैद कर दीछ।</verse>
				<verse number="3">पौलुस और बरनबास भौत दिन तलक वाँ र्यान और प्रभु की दयाक बारिमें हिम्मतले बात करछो; और प्रभु यीशु ले उनारा द्वारा चमत्कार और अनोखा काम करवाभेरन यो साबित करछ्य कि जै अनुग्रह का बारिमें उन प्रचार करून मर्यान उ सच्चो छ्यो।</verse>
				<verse number="4">लेकिन शैहरा का लोगून में फुट पड़गै, इनून में भटे कतुक यहूदीन का तरफ, और कतुक प्रेरितून का तरफ हो ग्या।</verse>
				<verse number="5">तब गैर-यहूदी लोग और यहूदी उनोरो अपमान करनान और अपून अधिकारीन का दगाड़ उनूनमें पत्थराव करनाकि कोशिश करन लाग्यान।</verse>
				<verse number="6">जब पौलुस और बरनबास यो बाते स जाण ग्या, और लुकाउनिया प्रदेश में लुस्त्रा और दिरबे शैहरून में, और आश-पासा का प्रदेशून में भाजि ग्या।</verse>
				<verse number="7">और वाँ मसीह को सुसमाचार सुणून लाग्यान।</verse>
				<verse number="8">लुस्त्रा शैहर में एक आदिमी बैठिनाको छ्यो, जो जन्म भटे लँगड़ो छ्यो, और चल फिर नी सकछ्यो।</verse>
				<verse number="9">उ पौलुस की बातुन ध्यान ले सुणून मरेछ्यो, और जब पौलुसले उक तरफ गौरले देखछ्य कि येस चंगो हो जाना को विश्वास छै।</verse>
				<verse number="10">तब पौलुसले जोरले क्योछ, “अपून खुटान क बल सिद्दो ठाड़ होज्या।” तब यो सुणिभेरन उ एकदम ठाँड़ है ग्यो और हिटून फिरून लागछै।</verse>
				<verse number="11">लोगून ले पौलुसो को यो काम देखभेरन लुकाउनिया प्रदेश की भाषा में जोरले क्योछ, “देवता आदिमीक रूप में होभेरन हमार पास उतर आर्यान।”</verse>
				<verse number="12">उनूनले बरनबास ज्यूस को नाम दीछ जो उनोरो मुख यूनानी देवता छै और पौलुस को हिरमेस को नाम दीछ, किलैकी उ अपूनो प्रभु को संदेश लोगून दिनवालो छ्यो।</verse>
				<verse number="13">और ज्यूस को उ मन्दिरो को पुजारी जो उनार शैहरा का सामुनि छ्यो, बल्द और फुलून की माला फाटकून में लगाभेरन लोगून का दगाड़ बलिदान करून चांछ्यो।</verse>
				<verse number="14">लेकिन प्रेरित बरनबास और पौलुसले जब यो सुणछ्य, त उन भौत परेशान भ्यान और येक कारण उनूनले खुद अपून कपड़ान फाड़ी दीयान, और भीड़ का बीच में आगै और जोरले कुन लाग्यान,</verse>
				<verse number="15">“हे लोगों, तुम कि करूनमरैछा? हम ले त तुमार समान आदिमी छा, और तुमून सुसमाचार सुणूनू, की तुम इन बेकारै की चीजून भटे दूर होभेरन ज्यून परमेश्वर की तरफ आ। उले स्वर्ग और धरती और समुन्द्र और जो ले उमें छै सब कुछ बनाछ।</verse>
				<verse number="16">उनूनले बितिनाक बखत में सब जाति का लोगून अपून-अपून बाँट में हिटून दीछ।</verse>
				<verse number="17">फिरले उन अपूनो भल काम करभेरन अपून बारिमें गवाही दीनै र्योछ। उ तुमून खिन आकाश भटे बरखा और अपून मौसम में हरेक फसल पैद करछो। उन तुमून अन्न दीभेरन तुमेरि भुख मिटूनान और तुमारा मनून खुशी ले भरछो।”</verse>
				<verse number="18">यो कैभेरन उनूनले लोगून भौत मुश्किल ले रोकछ्य की उनून खिन बलिदान जन करा।</verse>
				<verse number="19">लेकिन कतुक यहूदीन ले अन्ताकिया और इकुनियुम शैहर भटे आभेरन लोगून अपून तरफ कर लीछ, और पौलुस में पत्थराव करछ्य, और ऊस मरिना को समझभेरन ऊस शैहर भटे भ्यार घसीट ली ग्यान।</verse>
				<verse number="20">लेकिन जब शिष्य उक चारों तरफ आभेरन ठाड़ भ्यान, त उ उठभेरन शैहर में ग्योछ और दुसरा दिन बरनबासा का दगाड़ दिरबे शैहर में न्हैग्यो।</verse>
				<verse number="21">उक बाद पौलुस और बरनबासले उ नगराक लोगून सुसमाचार सुणाछ, और भौते शिष्य बनाभेरन। येक बाद, उन अपून बाट खिन वापस लौट ग्या। उन फिर लुस्त्रा शैहर खिन ग्या, फिर उन वाँ भटे इकुनियुम शैहर खिन ग्यान, और फिर उन पिसिदिया प्रदेशा का अन्ताकिया शैहर खिन ग्यान।</verse>
				<verse number="22">और हरेक शैहर में शिष्यून का मन मजबूत करनै र्यान, और यो उपदेश दीनै र्यान, कि विश्वास में बनिना रौ; और यो कुछ्या, हमून भौत दुख मुसीबत सहन करभेरन परमेश्वरा का राज्य में पुजून होलो।</verse>
				<verse number="23">पौलुस और बरनबासले हरेक विश्वासीन की मण्डली में भटे अगुवा बनून खिन लोगून चुनियान, और उपवासक दगाड़ प्रार्थना बिनती करभेरन उनुस प्रभुक हात में सौंप दीछ, जैमें उनूनले विश्वास करछय।</verse>
				<verse number="24">और पिसिदिया प्रदेश भटे हुनै उन पंफूलिया प्रदेश में पुजनान।</verse>
				<verse number="25">पंफूलिया प्रदेश में, उनूनले पिरगा शैहर में परमेश्वर बचन सुणाछ और फिर अत्तालिया शैहर में ग्यान।</verse>
				<verse number="26">और वाँ भटे उन समुन्द्री जहाज में बैठभेरन सीरिया देशाक अन्ताकिया शैहर में वापस आयान, जाँ उनूनले परमेश्वरा का अनुग्रह में सौंपभेरन जै काम खिन भेजि ग्योछ उ काम स पुरो करभेरन वापस आ गैछ्या।</verse>
				<verse number="27">और अन्ताकिया शैहर पुजभेरन उनूनले विश्वासीन की मंडली जमा करछय और बताछ, की परमेश्वरेले उनारा द्वारा कस ठूला-ठूला काम कर्यान, और कसीकैं गैर-यहूदीन लोगून यीशु में विश्वास करन लायक बनाछ।</verse>
				<verse number="28">वाँ पौलुस और बरनबास शिष्यून का दगाड़ भौत दिनून तक र्यान।</verse>
			</chapter>
			<chapter number="15">
				<verse number="1">फिर थ्वाड़ा यहूदी विश्वासी लोग यहूदा प्रदेशा का अन्ताकिया शैहर में आयान और विश्वासी लोगून सिखून लाग्यान, कि “अगर मूसा का नियमाक अनुसार तुमोरो खतना नै होईना का छै, त तुम उद्धार नै पा सकना।”</verse>
				<verse number="2">जब पौलुस और बरनबास यो बात खिन उनार दगाड़ सहमत नी छ्या, तब यो बातक बारिमें उनेरि बहस शुरू हो गै, और आखरी में यो फैसला भ्योछ, कि पौलुस और बरनबासा का दगाड़ अन्ताकिया का शैहरा का थ्वाड़ा लोग यो बारिमें बातचीत करन खिन प्रेरितून और बुज़ुर्गून का पास यरूशलम शैहर में ग्यान।</verse>
				<verse number="3">विश्वासी लोगून ले उनार सफर खिन थ्वाड़ा रूपाया और खानो को इतजाम करवाछ। पौलुस और बनरबास और विश्वास लोग जब फीनीके प्रदेश और सामरिया प्रदेश भटे जानमरेछ्या, त उनूनले वाँक विश्वासीन बताछ कि कसकैं दुसारा गैर-यहूदी लोगून सुसमाचार सुणभेरन यीशु मसीह में विश्वास करछ्य, और सब विश्वासी भाई भौत खुश भ्यान।</verse>
				<verse number="4">जब उन यरूशलम शैहर में पुजियान, तब वाँक विश्वासीन ले और प्रेरित और बुज़ुर्गून ले उनोरो स्वागत करछ्य, उक बाद पौलुस और बरनबासले उनुस बताछ कि परमेश्वर ले उनार जरियाले कि-कि काम कर्यान।</verse>
				<verse number="5">लेकिन फरीसी लोगून का दलक लोगून में भटे जिनूनले यीशु में भरोस करछ्या, उनूनमें भटे थ्वाड़ा ठाँड़ है भेरन कुन लाग्यान, “गैर-यहूदीन लोगून को खतना करून और मूसा का नियम-कानून मानना को हुकुमले दीनो चैछो।”</verse>
				<verse number="6">तब येक बारिमें बात-चीत करन खिन प्रेरित और सयाना जाम भ्यान।</verse>
				<verse number="7">जब भौत बहस होगै, तब पतरसले ठाँड़ है भेरन क्योछ, “हे विश्वासी भाईयों, तुमून पत्तो छी कि कुछ साल पैलि परमेश्वर ले तुमून में भटे मैंस चुन लीछ, कि म्यारा द्वारा गैर-यहूदी लोग सुसमाचार सुणभेरन विश्वास करून।”</verse>
				<verse number="8">और मन स परखून वाला परमेश्वर ले उनूनले हमार नियाती पवित्र आत्मा दीभेरन उनून अपना लीछ; जसकैं हमून अपनाछ।</verse>
				<verse number="9">परमेश्वर खिन हमार और उनार बीच में के फरक नाहातिन। जसीकैं उनूनले हमार पाप माफ कर्यान, उसीकैं उनार पाप लै माफ कर्यान, क्याखिन उनूनले यीशु में भरोस करछ्य।</verse>
				<verse number="10">तब फिर तुम गैर-यहूदी विश्वासी लोगून इन सब नियम-कानून को पालन करून खिन जोर-जबरदस्ती करभेरन परमेश्वर गुस्सा क्याखिन दिलून मरेछा? जैस नै कोई यहूदी मान पायो, और नै हमार पूर्खा और नै हम।</verse>
				<verse number="11">होई, “इसो करून ठीक नाहातिन, लेकिन हमोरो विश्वास त यो छै कि जसकैं उन प्रभु यीशु का अनुग्रह का द्वारा उद्धार पाला; उसीकैं हम ले पाला, ना कि मूसा का नियम-कानून को पालन करना ले उद्धार पाला।”</verse>
				<verse number="12">पौलुस और बरनबासले उन सब ठुल-ठुल कामून का बारिमें उनुस बताछ, जो परमेश्वर ले गैर-यहूदीन लोगून का बीच में उनार जरियाले करछ्या, और पुरी सभा का लोग चुपचाप हो भेरन उनेरि बात सुणून मरेछ्या।</verse>
				<verse number="13">जब उनेरि बात पुर है गै, तब याकूब कुन लागछै, “ हे म्यारा विश्वासी भाईयो, मेरि सुणा।</verse>
				<verse number="14">शमौन पतरसले हमून समझाछ, कि परमेश्वर ले गैर-यहूदी लोगून में भटे थ्वाड़ा लोगून अपूनी सेवा खिन चुन भेरन, सबून है पैलि कसीकैं उनूनमें दया करछ्य।</verse>
				<verse number="15">गैर-यहूदी लोगून को यो बदलाव उ बात का बारिमें बतूछो जैका बारिमें परमेश्वरो को संदेश दिनवालान ले पवित्रशास्त्र में भौत पैलि लिखीना को छ्यो।</verse>
				<verse number="16">परमेश्वर ले क्योछ, ‘येक बाद मैं फिर आभेरन राजा दाऊद को राज्य पैलि को जसो बना द्यूलो, जो उक दुश्मनून का द्वारा नाश कर दीई ग्योछ।</verse>
				<verse number="17">येक कारण बाकि लोग, मतलब सब गैर-यहूदी लोग जिनून मैंले अपून लोग हुन खिन चुन रैछ, प्रभु स खोजून,</verse>
				<verse number="18">योई प्रभु कुंछो जो संसाराक शुरूवाद भटे इन बातुन को समाचार दीनै आ र्योछ।’</verse>
				<verse number="19">येक कारण म्योरो विचार यो छै, कि गैर-यहूदी में भटे जो लोग परमेश्वरा का पास उनान उनूनमें दबाब जन डालीया कि उनून हमार पुर यहूदी नियम-कानून को और रिवाजून को पालन करून छै।</verse>
				<verse number="20">बल्कि हम उनुस चिठ्ठी लिखभेरन भेजा, यो बतून खिन कि उन उ खाना स जन खाऊन जैस लोगून ले मूर्तिन चढ़ा रैछ, और व्यभिचार जन करून और दम घोटभेरन मारीनाक जानवरून को शिकार जन खाया और नै जानवरून को खून खाया।</verse>
				<verse number="21">क्याखिनकि पुराना जमाना भटे शैहर-शैहर में मूसा का नियम-कानून में इन बातुन को प्रचार करूनवाला पाई जानान, और उन हर सबता का दिन यहूदी सभाघर में पढ़ी जानान।”</verse>
				<verse number="22">तब यरूशलम शैहरा का सब विश्वासी और प्रेरित और स्यानान क बीच यो फैसला भ्योछ, कि अपूनन में भटे थ्वाड़ा लोगून चुना मतलब यहूदा, जैस बरसब्बा लै कुछ्या और सिलासै स जो विश्वासी भाईन में भौत इजतदार छ्या; और उनून पौलुस और बरनबासा का दगाड़ अन्ताकिया शैहरा का विश्वासीन का पास भेजा।</verse>
				<verse number="23">यहूदा और सिलास यो चिठ्ठी अपून दगाड़ लीग्यान, “अन्ताकिया शैहर और सीरिया देश और किलिकिया प्रदेशा का रूनवाला विश्वासी भाईन जो गैर-यहूदी में भटे छन, प्रेरितून और स्याना भाईन का तरफ भटे तुमून नमस्कार।</verse>
				<verse number="24">हमूले सुण रैछ कि हमार याँ का थ्वाड़ा लोग तुमार आपस आयान, जिनून हमूनले अधिकार नी दीईना को छ्यो, उनून अपूना बातुन ले तुमून घबरा दीछ, और तुमारा मन स उलझन में डाल दीछ।</verse>
				<verse number="25">येक कारण हमूले मिलभेरन थ्वाड़ा आदिमीन चुननाको फैसला करि रैछ, और उनुस अपून प्रिय बरनबास और पौलुसक दगाड़ तुमार पास भेजुंला।</verse>
				<verse number="26">इन त इसा आदिमी छन, जिनुले हमार प्रभु यीशु मसीह खिन अपूनी जीन्दगी खतरा में डाल दीछ।</verse>
				<verse number="27">येक कारण हमून ले यहूदा और सिलासै स भेज रैछ, कि तुम खुद उनूनथैं इन बातुन सुण सका।</verse>
				<verse number="28">पवित्र आत्मा स, और हमूले यो ठीक लागछै की इन बातुन छोड़ी; तुमूनमें और बोझ नै डाला।</verse>
				<verse number="29">की तुम मूर्तिन का सामुनि बलि चढ़ाईना को शिकार, दम घोटभेरन मारी जानवरून को शिकार और कोई लै जानवर को खून जन खाया। और व्यभिचार भटे अपनास दूर रया, क्याखिन इसो करन ले तुमोरो भलो होलो। हमरि शुभकामना तुमार दगाड़ छै।”</verse>
				<verse number="30">विश्वासनी ले उनून वाँ भटे भेज दीछ, और उन अन्ताकिया शैहर पुज्यान, और जब वाँ उनूनले अपूनी सभा स जाम करछ्य, तब यो चिठ्ठी उनुस सौंप दीछ।</verse>
				<verse number="31">उन चिठ्ठीन में लिखीना की शिक्षा की बातुन पढ़भरेन भौत खुश भ्यान।</verse>
				<verse number="32">यहूदा और सिलास लै जो खुद ले परमेश्वरा का संदेश दिनवाला छ्या, भौत बातुन ले विश्वासी भाईन शिक्षा दीभेरन मजबूत करछै।</verse>
				<verse number="33">यहूदा और सिलास थ्वाड़ा बखत वाँई र्यान, और तब विश्वासी भाईन उनूनले शान्ति की आशीष दीभेरन यरूशलम शैहरा का विश्वासीन की मण्डली का पास भेज दीछ।</verse>
				<verse number="34">लेकिन सिलास ले अन्ताकिया शैहर में रूना का फैसला करछ्य, येक कारण यहूदा ऐकलो यरूशलम शैहर खिन वापस न्हैग्यो।</verse>
				<verse number="35">लेकिन पौलुस और बरनबास अन्ताकिया शैहर में रैग्या, और भौत लोगून का दगाड़ प्रभु यीशु को बचन और शिक्षा दीनै और सुसमाचार सुणूनै र्यान।</verse>
				<verse number="36">थ्वाड़ा बखत का बाद पौलुसले बरनबास थैं क्योछ, “जो-जो नगरून में हमूले प्रभु यीशु को बचन सुणाछ, अ, हिट वाँ जाभेरन वाँक विश्वासीन क दगाड़ भेंट-घाट करभेरन देखनू कि उनार हाल-चाल कस छन।”</verse>
				<verse number="37">तब बरनबासले यहूना स जैस मरकुस लै कुंनान, अपून दगाड़ लीयूनाक बिचार करछ्य।</verse>
				<verse number="38">लेकिन पौलुसले ऊस अपून दगाड़ लीजानो ठीक नै समझो क्याखिन उ पंफूलिया प्रदेश में अधूरो काम छोड़भेरन न्हैगै छ्यो।</verse>
				<verse number="39">उनार बीच में इतुक मतभेद बढ़ ग्या कि पौलुस और बरनबास एक दुसरा भटे अलग है ग्यो। और बरनबास मरकुसै स अपून दगाड़ लीभेरन जहाज ले साइप्रस टापू खिन न्हैग्यो।</verse>
				<verse number="40">लेकिन पौलुसले सिलास स चुनछ्य, और वाँक विश्वासी भाईन परमेश्वरा का अनुग्रह में सौंप भरेन अन्ताकिया शैहर भटे ले न्हैग्यो।</verse>
				<verse number="41">और उन पुर सीरिया देश और किलिकिया प्रदेश में विश्वासीन की विश्वासी मण्डलीस मजबूत करनै ग्यान।</verse>
			</chapter>
			<chapter number="16">
				<verse number="1">येक बाद उन दिरबे और लुस्त्रा शैहरून में लै ग्यान, और लुस्त्रा में तीमुथियुस नामोको एक शिष्य रूछो। उकी ईजा एक यहूदी विश्वासी छी, लेकिन उको बबा यूनान देशो को छ्यो।</verse>
				<verse number="2">उको लुस्त्रा और इकुनियुमा शैहरा का विश्वासी भाईन में निको नाम छ्यो।</verse>
				<verse number="3">पौलुस चांछ्यो कि तीमुथियुस उक दगाड़ हिटो; तीमुथियुस को बबा यूनान देशो को छ्यो और यूनानी लोग खतना नी करूछ्या पौलुसले उको खतना करवाछ, ताकि वाँक यहूदी लोग ऊस अपना लीन।</verse>
				<verse number="4">पौलुस और उक दगड़िया नगर-नगर जानै उन नियमून जो गैर-यहूदी विश्वासीन पुजूँ छ्या, जो यरूशलम शैहरा का प्रेरितून और बुज़ुर्गून ले ठैराईना का छ्या।</verse>
				<verse number="5">इसीकैं वाँक विश्वासीन को भरोस मजबूत और उनेरि गिनती लै हर रोज बढ़नै गैछ।</verse>
				<verse number="6">और उन फ्रूगिया और गलातिया प्रदेशून में भटे होभेरन ग्यान, किलैकी पवित्र आत्मा ले उनून आसिया प्रदेश में परमेश्वरे की बचन को प्रचार करून खिन रोकछ्य।</verse>
				<verse number="7">जब उन मुसिया प्रदेशा का नजिक पुजनान, तब उनूनले बितूनिया प्रदेश में जानो चाँछ्या। लेकिन इसो करून खिन यीशु की आत्माले उनुस मना करछ्य।</verse>
				<verse number="8">येक कारण उन मुसिया प्रदेश भटे होभेरन त्रोआस शैहर में आयान।</verse>
				<verse number="9">वाँ पौलुसले रात में एक दर्शन देखछ्य कि एक मकिदुनिया प्रदेशा का रून वालो आदिमी ठाँड़ है भेरन उथैं बिनती करभेरन कुंछो, “समुद्र पार करभेरन मकिदुनिया प्रदेश में अ, और हमरि मद्दत कर।”</verse>
				<verse number="10">जसीकैं यो दर्शन मिलछो, हमूले मकिदुनिया प्रदेश जानाकि योजना बनाछ। क्याखिनकि हम समझ ग्या कि परमेश्वरेले हमून उनून सुसमाचार सुणून खिन बुला रैछ।</verse>
				<verse number="11">येक कारण त्रोआस शैहर भटे पानि का जहाज में बैठभेरन हम सिद्दो सामोथ्रेसिया क टापू और दुसरा दिन नियापुलिस शैहर में आयाँ।</verse>
				<verse number="12">वाँ भटे हम फिलिप्पी शैहर में पुजियाँ, जो मकिदुनिया प्रदेशा का खास शैहर और रोमीन की बस्ती छै। हम उ शैहर में थ्वाड़ा दिन तक रयाँ।</verse>
				<verse number="13">सबताक दिन हम नगराक फाटक का भ्यार नदी का किनार यो समझभेरन ग्या की वाँ यहूदीन की प्रार्थना करना की जाग होलि। हम बैठभेरन उन स्यैनिनथैं जो जाम छ्या, बात-चीत करून लाग्यान।</verse>
				<verse number="14">उन स्यैनिन में भटे एकोक नाम लुदिया छ्यो, उ थुआतीरा नगरे की रूनवाली छी, और महैंगा बैगनी कपाड़ान को ब्यापार करछी। जो परमेश्वर कि अराधना करछी। उ हमरि बात सुणूनमरेछी और परमेश्वर ले ऊस पौलुसकि बात समझून खिन और अपनून खिन उक मन तैय्यार करछ्य।</verse>
				<verse number="15">जब उले और उक परिवारले बपतिस्मा ली लीछ। तब उले हमूनथैं बिनती करछ्य, “कि अगर तुम लोग समझछा कि मैं प्रभु यीशु सच्ची में भरोस करछूँ तब म्यार घर हिटो। इसकैं उ हमून मनाभेरन अपून घर ली गैछ।”</verse>
				<verse number="16">एक दिन जब हम फिर उ प्रार्थना जॉगा जानमरेछ्या, तब बॉट में हमरि भेंट एक जवान दासी का दगाड़ भैछ। उ एक भूतका जरियाले भविष्यबाणी करछी, जेले उ अपून मालिक खिन भौत डबल कमूंछी।</verse>
				<verse number="17">उ पौलुस और हमार पछिल आभरेन चिल्लान लागछी, “इन लोग परमप्रधान परमेश्वरा का सेवक छन, जो तुमून मुक्ति बॉटाको संदेश सुणून खिन आर्यान!”</verse>
				<verse number="18">उ भौत दिनून भटे इसो करूनमरेछी, आखरी में पौलुसले तंग हो भेरन पछिल मुड़भेरन उथैं क्योछ, “मैं यीशु मसीह का नामेंले तैंस हुकुम दीछूँ तैं यो चेलि में भटे भ्यार निकल!” और भूत उ बखत उमें भेट भ्यार निकल ग्यो।</verse>
				<verse number="19">जब उको मालिक ले देखछ्य, कि हमोरो रूपाया कमूनाको जरिया खतम है ग्योछ, तब उन पौलुस और सिलासै स पकड़भेरन नगराक चौक में प्रधानून का सामुनि खीचभेरन ली ग्यान।</verse>
				<verse number="20">और उनूथैं इसो क्योछ, “इन यहूदी आदिमी छन, और हमार नगर में अशान्ति फैलून मर्यान।</verse>
				<verse number="21">इन इस रीति-रिवाजून को प्रचार करून मर्यान, जैस हम रोम देशाका रूनवालान खिन अपनून और मानून ठीक नाहातिन।”</verse>
				<verse number="22">तब तलक वाँ एक ठूली भीड़ लै जॉम हो गै, और फिर हाकिमून ले उनार कपाड़ा फाड़भेरन इनूस चाबुक मारना को हुकुम दीछ।</verse>
				<verse number="23">उनूनले पौलुस और सिलासै स भौत डन्डा लगाभेरन और उक बाद जेल में डाली दीछ, और जेलरस हुकुम दीछ की उनून कड़ी निगरानी में राखा।</verse>
				<verse number="24">उले यो हुकुम पाभेरन उनुस जेलका भितर वाली कोठरी में राखछ्य और उनार खुटान लाकड़ाक साचान में ठोकभरेन जकड़ दीयान।</verse>
				<verse number="25">अधरात में जब पौलुस और सिलास प्रार्थना करून मरेछ्या और परमेश्वर खिन भजन गान मरेछ्या और उनेरि कैदी सुणून मरेछ्या,</verse>
				<verse number="26">तब एकाएक इदुक जोरदार भूचाल आछ, याँ तक कि जेल की नींव हिल ग्यै। और सब द्वार खुलि ग्या; और उनार दगाड़ सब कैदीन की जंजीर लै खुलि ग्या।</verse>
				<verse number="27">जेलर की नीन टुटून, और जब उले यो देखछ्य कि सब द्वार खुलि ग्यान, त उले सोचछ्य कि अब तलक सब कैदी भाजि ग्या होला, येक कारण उले अपूनी तलवार निकालभेरन अपूनास जान है मरून चान मरेछ्यो।</verse>
				<verse number="28">लेकिन पौलुसले जोर-जोरले क्योछ, “खबरदार, तैं अपनास जन मार, क्याखिनकि हम सब याँई छा!”</verse>
				<verse number="29">यो सुणिभेरन जेलर ले बत्ती मंगाभेरन जेलाक भितर दौड़भेरन ग्योछ, और डरनै-कामनै पौलुस और सिलासका खुटान में पड़ ग्यो।</verse>
				<verse number="30">और उनुस भ्यार ल्याभेरन क्योछ, “हे सज्जनो, उद्धार पान खिन मैं कि करूँ?”</verse>
				<verse number="31">तब उनूनले उथैं क्योछ, “प्रभु यीशु में विश्वास कर, तब तैं और त्यार पुर परिवार स उद्धार मिलोलो।”</verse>
				<verse number="32">तब उनूनले ऊस और उक परिवार स प्रभु को बचन सुणाछ।</verse>
				<verse number="33">रातकैं उई बखत उले उनून लिजाभेरन उनार घ धोयान, और उले और उक पुर परिवार का सब लोगून ले बपतिस्मा लीछ।</verse>
				<verse number="34">फिर जेलर ले पौलुस और सिलासै स अपून घर लिजाभेरन खान खवाछ, और अपूनो पुर परिवाराक दगाड़ परमेश्वर में विश्वास करभेरन उन सब खुश छ्या।</verse>
				<verse number="35">दुसारा दिन रात्तै अधिकारीन ले सिपाईन का हात खबर भेजवाछ की उन आदिमीन छोड़ी दी।</verse>
				<verse number="36">जब जेलर ले यो खबर पौलुस स बताछ, कि “अधिकारीन ले तुमून छोड़ दिनाकी हुकुम भेज रैछ, येक कारण अब तुम शान्ति ले जा सकछा।”</verse>
				<verse number="37">लेकिन पौलुसले उनूनथैं क्योछ, “ उनूनले हम जो रोम देशा का रूनवाला छा, मुकदमा ठैराये बिना लोगून का सामुनि मारछैं, और जेल में डालछ्य। और अब क्या हमून चुप-चाप भ्यार निकाल दिन चानान? इसो नै हो! लेकिन जब उन खुद आभेरन हमून भ्यार लिजाला।”</verse>
				<verse number="38">सिपाईनले अधिकारीन यो बात बताछ। पौलुस और सिलास रोमी नागरिक छन त उन डरी ग्या। किलैकी रोमी नागरिक स बिना कसूर और मुकदमाक मारून सजा लायक को अपराध छ्यो।</verse>
				<verse number="39">येक कारण उनूनले खुद आभेरन उनूनथैं माफी माँगछ्य, और जेल भटे भ्यार लिजाभेरन उनूनथैं यो बिनती करछ्य, कि तुम यो शैहर छोड़िभेरन न्हैजा।</verse>
				<verse number="40">उन जेल भटे निकल भेरन लुदिया नामेंकी एक स्यैनिक पास ग्यान, और विश्वासी भाईन थैं मिलभरेन उनून शान्ति दीछ, येक बाद वाँ भटे न्हैग्या</verse>
			</chapter>
			<chapter number="17">
				<verse number="1">फिर पौलुस और सिलास अम्फिपुलिस और अपुल्लोनिया शैहरून भटे होभेरन थिस्सलुनीके का शैहर में आयान, जाँ यहूदीन को एक सभा-घर छ्यो।</verse>
				<verse number="2">और पौलुस अपून रीति का अनुसार उनार यहूदी का सभाघर में ग्योछ, और तीन सबत तक पवित्रशास्त्र भेट पढ़भेरन लोगून दगाड़ सवाल जबाब करछ्य।</verse>
				<verse number="3">और परमेश्वरा का बचन भटे उनुस समझाछ और यो साबित करछ्य कि यो जरूरी छ्यो कि मसीह को दुख उठून और मरिन में भटे दुबाँरा ज्यून हो। उले क्योछ, “यो यीशु जैको मैं प्रचार करछूँ उई मसीह छै।”</verse>
				<verse number="4">उनूनमें भटे कुछ यहूदीन ले जो सुणछै उमें विश्वास करछ्य, पौलुस और सिलासाक दगाड़ा मिल ग्या, और भौत लोग परमेश्वरो को डर मानून वाला गैर-यहूदीन ले, और भौत खास स्यैनिन ले उनारा दगाड़ मिल ग्या।</verse>
				<verse number="5">यो देखिभेरन थ्वाड़ा यहूदी जलन करून लाग्यान, और वाँक बजार में भटे थ्वाड़ा बुर लोगून अपून दगाड़ ल्यान, और भीड़ लगाभेरन झगाड़-फसाद करून लाग्यान, उनूनले यासोनाक घर में हमला करभरेन पौलुस और सिलासै स नगर-सभाक सामुनि ठाँड़ करून चाछ।</verse>
				<verse number="6">लेकिन उन उनून वाँ नै मिलिया, उन यो चिल्लानै यासोन और थ्वाड़ा विश्वासी भाईन नगराक गैर-यहूदी विश्वासीन खीचभेरन हाल्ला-गुल्ला करने नगरा का सिपाई का सामुनि लिजैभेरन कुन लाग्यान, “इन लोग पुरी दुनिया में उलट-पलट मचूनान, और अब याँ लै आ ग्यान!</verse>
				<verse number="7">और यासोन ले उनुस अपून घर में राँख रैछ। और इन सबा का सब यो कुंनान की यीशु राजा छै, और महाराजा को हुकमून को बिरोध करनान।”</verse>
				<verse number="8">जब भीड़ और नगराक अधिकारीन ले इन बातुन सुणियान त उन परेशान हो ग्या।</verse>
				<verse number="9">और उनूनले यासोन और बाकि लोगून जमानत में छोड़ी दीछ।</verse>
				<verse number="10">फिर विश्वासी भाईन ले रातों-रात पौलुस और सिलासै स बिरीया नगर भेजि दीछ; और उन वाँ पुजभेरन यहूदीन का सभा घर में ग्यान।</verse>
				<verse number="11">इन लोग त थिस्सलुनी का शैहरा का यहूदीन है भला छ्या और उनूनले भौत लालसा ले वचन मानछ्य, और हरेक दिन पवित्रशास्त्र में खोजनै रूछ्या जो पौलुसले उनून सिखाछ उ बात वाँ छनी या नाहातिन।</verse>
				<verse number="12">उनूनमें भटे भौत लोग विश्वासी बन ग्या। और इनारा अलावा थ्वाड़ा खास यूनानी स्यैनिन का घरवाला लै उनेरि बातुन में विश्वास करछ्य।</verse>
				<verse number="13">लेकिन जब यो बात को पत्तो थिस्सलुनी यहूदीन चलछ्य, कि पौलुस बिरीया नगर मेंले परमेश्वरोको बचन सुणूछो तब उन वाँ आभेरन ले लोगून भड़कून लाग्यान।</verse>
				<verse number="14">तब विश्वासीन ले तुरन्त पौलुसैस वाँ भेट भेज दीछ, कि उ समुन्द्राक किनार खिन न्है जौ। पर सिलास और तीमुथियुस वाँ र्यान।</verse>
				<verse number="15">याँक लोग पौलुसा का दगाड़ एथेंस शैहर तलक ग्यान, और उक यो जवाब लीभेरन लौटियान, “जतुक जल्दी है सकछो, तुम सिलास और तीमुथियुस स म्यारा पास भेजि दीया।”</verse>
				<verse number="16">जब पौलुस एथेंस शैहर में उनोरो इंतजार करून मरेछ्यो, तब पुर नगर में मूर्तिनकि भरमार देखिभेरन उ दुखी भ्योछ।</verse>
				<verse number="17">येक कारण उ यहूदीयून का सभाघर में यहूदीनथैं और परमेश्वरा का डर मान्यावाल गैर-यहूदी लोगून का दगाड़ वाद-विवाद करछ्यो। और हर रोज जो ले ऊस बाजारून का चौक में मिलछ्या उन लोग का दगाड़ बाद-विवाद करछ्यो।</verse>
				<verse number="18">उन शिक्षक जो इपिकूरी या स्तोईकी जाणि जानान, उनूनमें भटे कुछ बाद-विवाद करून लाग्यान, “यो बकवादी हमून थैं कि कुन चाछो?” लेकिन कुछ दुसरान ले क्योछ, “यो कोई विदेशी देवी-देवतान का बारिमें जसो प्रचार लागछो, क्याखिनकि उ यीशु और उक दुबार ज्यून हुना का बारिमें सुसमाचार सुणूछ्यो।”</verse>
				<verse number="19">उन पौलुसैस एक अरियुपगुस नामेकी महासभा सामुनि ल्यान और उथैं पुछ्छै, “क्या हम जाण सकनू कि यो नय्या संदेश जो तै सुणूछा, कि छै?</verse>
				<verse number="20">तै इसी बात करछा, जो हमून अजीब लागछ्यो, और हम उनोरो मतलब जाणून चाँनू।”</verse>
				<verse number="21">येक कारण एथेंस नगराक सब लोग और वाँ रूनवाला परदेशी लोग ले नय्या-नय्या बात कुन और सुणून का अलावा और कोई काम नी करछ्या।</verse>
				<verse number="22">तब पौलुसले अरियुपगुस नामेकी महासभा का बीच में ठाँड़ हैभेरन कुन लागछ्य, “हे एथेंस शैहरा का लोगों, मैं इसो देखूनमर्यू, कि तुम हर बात में देवतान की भौत मानन्या वाला छा।”</verse>
				<verse number="23">क्याखिनकि मैं घुमनै-फिरनै तुमेरि पूजा करून वाली चीजून देखूनर्मयू छ्यूँ, तब मैंस एक वेदी मिलछ्य, जैमे लिखीना को छ्यो, “अनजान ईश्वर खिन।” येक कारण जैस तुम बिना जाणै पुजछा, मैं तुमून उ परमेश्वरा का बारिमें बतूछूँ।</verse>
				<verse number="24">जो परमेश्वरे ले यो संसार और जो यैमें छै, उले सब बनाछ, उ स्वर्ग और धरतिक मालिक छै। उ लोगून का हाता का बनाईनाका मन्दिरून में नै रून।</verse>
				<verse number="25">और नै उनुस के चीजून की कमी छै, जो कि उन लोगून का हात ले अपूनी सेवा लियो। उन सबून प्राण, जीन्दगी और सब कुछ दीनान।</verse>
				<verse number="26">उनूनले शुरू में एक्कै आदिमी भटे सब जातिन बनाछ, कि उन सारी धरती में रून खिन बनायान! उनूनले उनेरि जीन्दगी की उमर और उनेरि रूनाकि जाग तय करछ्य।</verse>
				<verse number="27">परमेश्वर ले इसो येक कारण करछ्य ताकि लोग ऊस खोजून, और शायद उन उक पास पुज सकून, फिरले, उ हमूनमें भटे के है ले दूर नाहातिन।</verse>
				<verse number="28">“उ उई छै जो हमारा जीना को और चलून-फिरून को कारण बनछो और हमून उ बनूछो जो हम छा। ठीक उसीकैं जसो तुमारा कवियूनले कै राखछ्य, हम त उकी सन्तान ले छा।”</verse>
				<verse number="29">सच्ची में हम परमेश्वरा का नॉनतिन छै, और हमून यो नै समझून चैंछो कि परमेश्वर सुन, चाँदी या ढुगाकि मूर्ति समान छै, जस लोगून माननान।</verse>
				<verse number="30">पुरान बखत में परमेश्वर ले लोगून का बातुन में ध्यान नै दीन जो उन करछ्या क्याखिनकि उन उनून नी जाणछ्या, लेकिन अब हरेक बात में लोगून मन फिरूना को हुकुम दीछो।</verse>
				<verse number="31">परमेश्वर ले एक दिन ठैरा रैछ, “जै दिन उन पैलि भटे अपून ठैराईनाका उ च्यालाक जरियाले धरतिक धर्मोको न्याय करला। जैस उनूनले यो काम खिन ठैरा रैछ, और ऊस मरिन में भटे दुबाँरा ज्यून करभेरन अपून यो बातोको सबूत लै दी राखछ्य।”</verse>
				<verse number="32">मरिन में भटे दुबाँरा ज्यून हुना की बात सुणिभेरन, थ्वाड़ा लोगून ले उकी हसी करछ्य, पर गैर-यहूदी लोगून ले इसो क्योछ, “यो बारिमें हम तुमेरि बात फिर कभे सुणूला।”</verse>
				<verse number="33">यो बात ले पौलुस उनार बीच भटे न्हैग्यो।</verse>
				<verse number="34">फिरले थ्वाड़ा लोग उक दगाड़ लागि ग्या और विश्वास करछ्य, उनूनमें दियुनुसियुस जो अरियुपगुस महासभा को सदस्य छ्यो, और दमरिस नामेंकी एक स्यैनि छी, और उनार दगाड़ और लै लोग छ्या।</verse>
			</chapter>
			<chapter number="18">
				<verse number="1">येक बाद पौलुस एथेंस शैहर छोड़िभेरन कुरिन्थुस नगर में आछ,</verse>
				<verse number="2">जाँ उकी मुलाकात अक्विला नामाका एक यहूदी आदिमीक दगाड़ भैछ, जैको जन्म पुन्तुस प्रदेश में भ्योछ। उ हाल में अपूनी स्यैनि प्रिस्किल्ला का दगाड़ इटली देश भटे याँ आईना को छ्यो, क्याखिनकि सम्राट क्लौदियुस ले यो हुकुम दी रॉखछ्यो कि सब यहूदी रोम शैहर भटे न्हैजून। यो कारण पौलुस उनून देखून खिन ग्योछ।</verse>
				<verse number="3">पौलुस और अक्विला को एकसो ब्यापार छ्यो, येक कारण पौलुस वाँ रैभेरन उनार दगाड़ काम करून लागछै, और उन द्वीवैन को तम्बू बनूना को काम छ्यो।</verse>
				<verse number="4">और पौलुस हर सबता का दिन यहूदी सभाघर में जाभेरन बात और बहस करभेरन यहूदी और यूनानीन समझूना की कोशिश करछ्यो यीशु मसीह में विश्वास करा।</verse>
				<verse number="5">जब सिलास और तीमुथियुस मकिदुनिया प्रदेश भटे आयान, तब पौलुसले अपून तम्बू बनूना को काम बंद कर दीछ और अपून पुरो बखत बचन सुणून में बितूंछो, और यहूदीन यो गवाही दिन लागछो कि यीशु ही मसीहा छन।</verse>
				<verse number="6">लेकिन जब यहूदी लोग पौलुसा की निन्दा और विरोध करून लाग्यान, तब उले उनार सामुनि अपून कपाड़ान की धुल झाड़ी भेरन उनूथैं क्योछ, “कि परमेश्वरा का संदेश स नै मानना क कारण तुम खुद उ सजा खिन जिमेदार छा, जो तुमून परमेश्वरा का तरफ भटे मिलोलो, मैं निर्दोष छूँ। अब भटे गैर-यहूदीन का पास जूंलो और उनार बीच में परमेश्वरो को संदेशो को प्रचार करोलो।”</verse>
				<verse number="7">पौलुस यहूदी सभाघर छोड़भेरन तीतुस यूस्तुस नामोको एक गैर-यहूदी याँ आछ, जो प्रभु की भक्ति करछो, जैको घर यहूदी सभा घरा का बगल में छ्यो।</verse>
				<verse number="8">तब यहूदी सभाघराक अधिकारी क्रिस्पुस और उक पुर परिवारले पौलुसकि बात सुणिभेरन यीशु में विश्वास करछ्य; और उनार अलावा भौत कुरिन्थियूस शैहरा का रूनवाला लोगून सुणभरेन विश्वास करछ्य और बपतिस्मा लीछ।</verse>
				<verse number="9">एक रात प्रभु परमेश्वर ले पौलुस स दर्शन दीभेरन क्योछ, “निडर है भेरन सबून बतूने जा और चुप जन रये।</verse>
				<verse number="10">मैं त्यार दगाड़ छूँ। कोई लै तैंमें हमला करभेरन तेरो नुकशान नै कर पालो; क्याखिनकि यो नगर में भौत म्यारा लोग छन जो मैंमें विश्वास कराला।”</verse>
				<verse number="11">फिर पौलुस डेढ़ साल तलक उ नगर में रैभेरन लोगून परमेश्वरा का बारिमें बतूने र्योछ।</verse>
				<verse number="12">लेकिन जब गल्लियो अखया प्रदेशो को राज्यपाल छ्यो, तब यहूदीनले मिलभेरन पौलुस में हमला करभेरन पकड़ लीछ और ऊस अदालत में राज्यपाला का सामुनि पेश करि ग्योछ।</verse>
				<verse number="13">और ऊस बतून लाग्यान कि पौलुस लोगून परमेश्वर कि अराधना करना को इसो तरीका बतूछो, जो नियम-कानून का अनुसार ठीक नाहातिन।</verse>
				<verse number="14">यो सुणिभेरन जसीकैं पौलुस अपूनी बात कुन खिन छ्यो, उसीकैं राज्यपाल ले यहूदीनथैं क्योछ, “ हे यहूदियों अगर यो अन्याय या बुराई की बात हुनी त ठीक छ्यो कि मैं तुमेरि बात सुणनू।</verse>
				<verse number="15">लेकिन यो बाद-विवाद शब्दून, नामून और तुमार नियम-कानून भटे सम्बन्ध राखछो। यो बातोको न्याय तुम खुद करा; और मैं इसी बातुन को फैसला नै करून चानू!”</verse>
				<verse number="16">और गल्लियो ले हुकुम दीछ कि उनून अदालत भटे भ्यार निकाली जौ।</verse>
				<verse number="17">तब उनूनले सभा-घराक मुखिया सोस्थिनेस पकड़ भेरन अदालता का सामुनि खूब मारछैं, लेकिन राज्यपाल ले कोई ध्यान नै दी।</verse>
				<verse number="18">पौलुस कुछ बखत तक कुरिन्थुस शैहर में र्योछ, और उक बाद विश्वासीन भाई-बैनिनथैं विदा लीभेरन। किंख्रिया में आछ वाँ उले यहूदी रीवाजाक अनुसार अपूनो मुंडन करवाभेरन अपूनी मन्नत स पुरो करछ्य, और वाँ भटे समुद्री जहाज में सीरिया देश खिन जाछो और उक दगाड़ प्रिस्किल्ला और अक्विला ले छ्या।</verse>
				<verse number="19">जब उन इफिसुस नगर पुजनान, तब पौलुस प्रिस्किल्ला और अक्विला स वाँई छोड़ दीछ और खुद यहूदी सभाघर में जाभेरन उनार दगाड़ बात-विवाद करून लागछै।</verse>
				<verse number="20">तब लोगून ले उथैं बिनती करछ्य, कि उ थ्वाड़ा दिन तलक उनारा दगाड़ वाँ रौ, पर उले नै मानियो।</verse>
				<verse number="21">और उनूनथैं विदा लीभेरन पौलुसले क्योछ, “अगर परमेश्वर चाल, तब मैं याँ तुमार पास दुबाँरा ऊँलो।” तब उ इफिसुस नगर भटे समुन्द्री जहाज में बैठभेरन न्हैग्यो।</verse>
				<verse number="22">और कैसरिया नगर में पूजिभरेन यरूशलम शैहर खिन ग्योछ और वाँ का विश्वासीन का दगाड़ मिलभेरन और फिर अन्ताकिया शैहर न्हैग्यो।</verse>
				<verse number="23">अन्ताकिया नगर में थ्वाड़ा बखत रैभरेन उ वाँ भटे न्हैग्यो और नगर-नगर सफर करनै सबै गलातिया और फ्रूगिया प्रदेशा का सब शिष्यून विश्वास में मजबूत करनै र्यो।</verse>
				<verse number="24">अपुल्लोस नामोको एक यहूदी आदिमी इफिसुस नगर में पुजछ्य। उक जन्म-भूमि सिकन्दरिया शैहर छ्यो, जो भौत विद्धवान आदिमी छ्यो, उ बात-बिचार और पवित्रशास्त्र स निकीकैं जाण छ्यो।</verse>
				<verse number="25">उले यीशुक बारिमें सुण रॉखछ्यो और येक बारिमें भौत उत्सुक है भेरन दुसरान ले सिखूछ्यो, पर उ केवल यहूनाकि बपतिस्मा की बात जाण छ्यो।</verse>
				<verse number="26">जब प्रिस्किल्ला और अक्विला ले यहूदी सभाघर में अपुल्लोस की बातुन सुणछ्य, तब उन ऊस अपून घर ल्यान और परमेश्वरा का बाटाक बारिमें ऊस भौत बारिकीले समझून लागछै।</verse>
				<verse number="27">जब उले अखया प्रदेश जानाको फैसला करछ्य त विश्वासी भाईन ले ऊस जान खिन हिम्मत दीभेरन शिष्यून खिन एक चिठ्ठी लिखछै, कि उन उथैं निकीकैं मिलून, और पौलुसले पुजिभेरन वाँ लोगून की भौत मद्दत करछै जो प्रभु कि अनुग्रहा का कारण विश्वासी बन गैछ।</verse>
				<verse number="28">क्याखिनकि उले सबून का सामुनि पवित्रशास्त्र भटे सबूत दीभेरन सब यहूदीन की बोलती बन्द कर दीछ, कि यीशु हमार मसीह छै।</verse>
			</chapter>
			<chapter number="19">
				<verse number="1">जब अपुल्लोस कुरिन्थुस नगर में छ्यो, पौलुस पाहाड़ी इलाकान भटे हुनै इफिसुस नगर पुजिछ्य। वाँ ऊस कुछ शिष्य मिल्यान।</verse>
				<verse number="2">उले उनूनथैं क्योछ, “जब तुमूनले प्रभु में विश्वास करून शुरू करछ्य तो क्या तुमूनले पवित्र आत्मा पाछी?” उनूनले क्योछ, “नै, हम येक बारिमें के नै जाणना।”</verse>
				<verse number="3">फिर पौलुसले उनूनथैं क्योछ, “त तुमून को तरीका को बपतिस्मा लीछ?” उनूनले क्योछ, की हमून ले उ बपतिस्मा लीछ जो “यहूना दी छ्यो।”</verse>
				<verse number="4">पौलुसले उनूनथैं क्योछ, “यहूना ले उन लोगून बपतिस्मा दीछ, जिन लोगून ले अपून पापून को पश्चाताप करभेरन परमेश्वरा का तरफ मुड़ ग्या लेकिन उले इस्राएली लोगून थैं क्योछ की उन यीशु में विश्वास राखून जो उको बाद उनवालो छै उ मसीह छै।”</verse>
				<verse number="5">यो सुणिभेरन उनूनले प्रभु यीशुक नामेंले बपतिस्मा लीछ।</verse>
				<verse number="6">जब पौलुसले उनूनमें हात राँखछ्य, तब उनूनमें पवित्र आत्मा उतरछ्य, जेले उन अलग-अलग भाषा में बोलून और भविष्यबाणी करन लाग्यान।</verse>
				<verse number="7">इन लगभग बारह आदिमी छ्या।</verse>
				<verse number="8">येक बाद पौलुस तीन मैंन तलक हिम्मतले यहूदी सभाघर में जाभेरन यहूदी लोगून परमेश्वरा का राज्य को बारिमें प्रचार करछ्यो और उनून समझूनै रूछो।</verse>
				<verse number="9">लेकिन उनूनमें भटे थ्वाड़ा लोग भौते जिद्दी छ्या और उनूनले इन बातुन में केले विश्वास नै कर्यो, और यहूदी सभाघर में सबून का सामुनि प्रभु की शिक्षाक खिलाफ में बोलून लाग्यान। येक कारण पौलुसै ले इनून छोड़ दीछ और विश्वासीन अपून दगाड़ लिग्योछ, और हर रोज परमेश्वरे की वचन की शिक्षा तुरन्नुसा का स्कूल में दीन लागछ्य।</verse>
				<verse number="10">उले यो काम द्वी साल तलक इसीकैं लगातार करछ्य, आसिया प्रदेशा का सब रूनवाला क्या यहूदी क्या यूनानी सबून ले परमेश्वरो को बचन सुणछ्य।</verse>
				<verse number="11">परमेश्वर ले पौलुसा का जरियाले चमत्कारक भौत अद्धभुत काम कर्यान।</verse>
				<verse number="12">याँ तलक कि अगर कोई बिमार आदिमी पौलुस को रूमाल या तौलिया स ले छू लीछ्या, तब उन अपूनी बिमारी भटे चंगा हो जाछ्या। और लोगून में भटे भूत ले निकल जाछ्या।</verse>
				<verse number="13">लेकिन झाड़-फुक करूनवाला कुछ यहूदी जो इथकैं-उथकैं घुमनै रूछ्या, और भूत लगिनाका लोगून में प्रभु यीशुक नामले यो कैभेरन कोशिश करून लाग्यान, “मैं तुमून यीशु की कसम दिलुछूँ यो आदिमी भटे भ्यार निकल जा जैको प्रचार पौलुस करछो।”</verse>
				<verse number="14">और स्विकवा नामोको एक यहूदी प्रधान याजक का सात च्याला छै, जो इसो करछ्या।</verse>
				<verse number="15">लेकिन भुतले उनूनथैं क्योछ, “मैं यीशुस जाणछूँ, और पौलुस स ले पछ्याणनू, लेकिन तुम को छा?”</verse>
				<verse number="16">यो कैभेरन उ आदिमी जैमे भूत छ्यो, उ सबून जै लागछ्यो। उले इनेरि इसी हालत करि दीछ, कि उन सब नंगा और घायल है भेरन वाँ भटे भाजि ग्या।</verse>
				<verse number="17">यो बात वाँक सब लोगून पत्तो चल ग्यो, और इफिसुस शैहरक यहूदी और यूनानी, सबून में डर छा ग्यो, और प्रभु यीशु की महिमा हुन लागछी।</verse>
				<verse number="18">जिनूनले विश्वास करि राखछ्यो, उनूनमें भटे भौत लोगून ले आभेरन अपून बुर कामून खुलेआम मानछै।</verse>
				<verse number="19">भौत जादू-टोना करून वालान ले अपून जादू-टोनाकी सबे किताब जाम करभेरन आग लगा दीछ। उन जालाईना की किताबून की कीमती पचास हजार चाँदी का सिक्का का बाराबर छ्या।</verse>
				<verse number="20">इसीकैं वाँ परमेश्वरो को बचन तेजी ले फैलनै और उक असर लै बढ़नै ग्यो।</verse>
				<verse number="21">इन सब बातुन का बाद पौलुसले मकिदुनिया और अखया प्रदेशा का बॉट भटे यरूशलम शैहर में जान को फैसला करछ्य। “उले क्योछ, यरूशलम शैहरा का बाद म्येरो रोम शैहर में जान होलो।”</verse>
				<verse number="22">उले अपून दगड़ियान में भटे तीमुथियुस और इरास्तुसैस मकिदुनिया प्रदेश अपून है अघिल भेज दीछ, और खुद थ्वाड़ा दिनून तक इफिसुस नगर में र्योछ।</verse>
				<verse number="23">उ बखत इफसुस नगर में पौलुसाक द्वारा प्रभुक बाटा की शिक्षा दिनाक कारण लोगून में भौत दंगा होग्यो।</verse>
				<verse number="24">वाँ देमेत्रियुस नामोको एक सुनार छ्यो, जो अरतिमिस देबी की मन्दिर की चाँदी की मूर्ति बनू छ्यो और उक यो ब्यापार ले कारीगरून भौत फैद हुन मरेछ्यो।</verse>
				<verse number="25">देमेत्रियुस ले इनून और इसा काम करूनवाला कारीगरून जाम करभेरन क्योछ, “हे भाईयों तुम सब जाणछा कि यो काम ले हमरि कतुक ज्यादा आमदनी हुंछी।</verse>
				<verse number="26">लेकिन तुमूले देख-सुणन मरैछा, कि उ पौलुसले केवल इफिसुस शैहर मेंई नै लेकिन आसिया प्रदेशा का सब गौंन का लोगून समझाछ और भरमा रैछ, कि हात ले बनाईनाक मूर्ति में ईश्वर नाहातिन।</verse>
				<verse number="27">और अब केवल यो बातोको डर नै कि हमार यो कारोबार को मान-सम्मान जानै रौलो, बल्कि यो महान देबी अरतिमिस मन्दिर की शोभा खतम हो जालि। जो देबी की पुज आसिया प्रदेश और पुरो संसार करछो, उको नामो निशान मिट जालो!”</verse>
				<verse number="28">यो सब बात सुणिभेरन लोगून रीस आगै, और उन जोर-जोरले कुन लाग्यान “इफिसियून की अरतिमिस देवी महान छै।”</verse>
				<verse number="29">यो बात ले पुर नगर में हड़-बड़ाहट मचि गै। उन पौलुसक दगड़िया गयुस और अरिस्तर्खुस, मकिदुनिया प्रदेशा का रूनवाला जो पौलुसाक दगाड़ यात्रा में छ्या, पकड़ लीछ, और एक दगाड़ होभेरन रंगशाला में भाग ग्या।</verse>
				<verse number="30">जब पौलुस भितर जाभेरन लोगून थैं बात करून चाछ्यो, लेकिन शिष्यून ले ऊस नै जान दीयो।</verse>
				<verse number="31">आसिया प्रदेशा का हाकिमून में भटे ले उक मित्रून ले उक पास संदेश भेजछ्य और बिनती करछ्य, कि रंगशालाक भितर जाभेरन अपूनी जान स खतरा में नै डालून चैनो।</verse>
				<verse number="32">उ सभा का भितर, सब लोग चिल्लान मरेछ्या कोई एक चीज खिन कोई दुसरी चीज खिन और कुछ लोगून पत्तो ले नी छ्यो हम किलै आरयाँ।</verse>
				<verse number="33">तब थ्वाड़ा यहूदी लोगून ले सिकन्दर समझा भेरन भीड़ में अघिल कर दीछ। सिकंदरले अपून हात ले ईशार करभेरन लोगून का सामुनि बात करून चाछ।</verse>
				<verse number="34">लेकिन जब उनूनले जाण लीछ कि उ यहूदी छै और उन यो ले जाणछ्या कि यहूदी लोग, मसीह लोगून की नियाती मूर्ति पूजा नै करना। त उनूनले उ बात स अनसुणी करभेरन द्वी घण्टा तक जोर-जोरले नारा लगूनै रियान, “इफिसियून की अरतिमिस देवी महान छै।”</verse>
				<verse number="35">तब उ नगराक मंत्री ले भीड़ स शांत करभेरन क्योछ, पुर संसारा का लोग जाणनाकि “हे इफसुस शैहरा का लोग महान देबी अरतिमिस का मंदिरे की देख-रैख करून मर्यान और उकी मूर्ति आकाश भटे खितीनाकी छी।</verse>
				<verse number="36">येक कारण क्या यो बात सांचि छी, तुमून शांत है जान चैछ्यो और बिना सोच-समझभेरन केले जन चैनो।</verse>
				<verse number="37">तुम जिनून पकड़ भेरन याँ ल्या रैछा, उनूनले नै त मंदिरे स अशुद्ध और नै हमरि देवी की बुराई करछ्य।</verse>
				<verse number="38">येक कारण अगर देमेत्रियुस और उक दगाड़क कारीगरून कैका खिलाफ शिकायत हो, तब येक खिन अदालत में जा सकनान, और वाँ उनोरो मुकदमा का फैसला करून खिन लोग छन, और उन उनार सामुनि अपून आरोप पेश कर सकनान।</verse>
				<verse number="39">लेकिन अगर तुम के और बात का बारिमें जाणून चाँछ्या तब स्याना पंचूनकी सभा में फैसला करि जौ।</verse>
				<verse number="40">मैंस डर छै की राज्यपाल पुर हंगामा का बारिमें सुणोलो की हम रोमी सरकार का खिलाफ बिरोध करना की कोशिश करूमर्या यो कारण ले हमून में दोष लागाई जाना को डर छै क्याखिनकि हम येक कोई ले ठीक-ठीक कारण नै बता सकना।”</verse>
				<verse number="41">यो सब कैभेरन उले सब लोगून वाँ भटे भेजि दीछ।</verse>
			</chapter>
			<chapter number="20">
				<verse number="1">यो हाल्ला-गुल्ला खतम हुना क बाद पौलुसले सब विश्वासीन बुलाभेरन उनेरि हिम्मत बढ़ाछ। फिर उनूनथैं विदा लीभेरन मकिदुनिया प्रदेश खिन न्हैग्यो।</verse>
				<verse number="2">और फिर उले पुर प्रदेश को दौर करछ्य, और उपदेश दी-दीभेरन विश्वासी लोगून हिम्मत दीनै, उ यूनान देश पुजछ्य।</verse>
				<verse number="3">और वाँ तीन मैंन बितूना का बाद उ समुन्द्री जहाज ले सीरिया देश जानवालो छ्यो, पर जब ऊस यो पत्तो चलछ्य, कि थ्वाड़ा यहूदी ऊस सफरका बीच में मारना की योजना बनून मर्यान, येक कारण उले मकिदुनिया क प्रदेश भटे सीरिया देश जाना को फैसला करछ्य।</verse>
				<verse number="4">और यो सफर में बिरीया प्रदेशो को रून वालो पुरूर्स को च्योलो सोपत्रुस, थिस्सलुनी की नगरो को रून वालो अरिस्तर्खुस और सिकुन्दुस, दिरबे को नगरो को गयुस, तीमुथियुस और आसिया प्रदेश को तुखिकुस और त्रुफिमुस उक दगाड़ सफर करून मरैछ्या।</verse>
				<verse number="5">उन लोग जाभेरन त्रोआस शैहर में हमोरो इन्तजार करून मर्यान।</verse>
				<verse number="6">तब हम फसह का त्याराक बाद फिलिप्पी नगर जो मकिदुनिया प्रदेश में छै, पानि का झीला का बाट अपून सफर शुरू करछ्य और पाँच दिनक बाद हम त्रोआस शैहर में पुजियाँ और अपून दगड़ियान थैं मिल्या। वाँ हम सात दिन तलक रया।</verse>
				<verse number="7">हफ्ताका पैल दिन हम प्रभु भोज खान खिन जाम भयाँ। क्याखिनकि पौलुस दुसारा दिन जानवालो छ्यो, येक कारण पौलुस अधरात तलक वाँ प्रचार करनै र्योछ।</verse>
				<verse number="8">और मलिवाला कमरा में हम जाम छ्या, उमें भौत दीया जला राख छ्या।</verse>
				<verse number="9">और वाँ यूतुखुस नामोको एक लड़का खिड़की ले बैठिनाको छ्यो। पौलुस अधरात तलक बात करून में छ्यो, उ जवान खिड़की में बैठभेरन नीन में झुमून मर्यो छ्यो। त उ नीन क कारण तीन मंजिल भटे तलि खिती ग्यो और थ्वाड़ा लोग तलखिन दौड़ियान और ऊस उठाछ और देखछै की उ मर ग्यो।</verse>
				<verse number="10">यो देखिभेरन पौलुस तलि आछ और झुकभेरन ऊस अपून छाती में लगाछ और सबूनथैं क्योछ, “डरा जन, किलैकी यो आजि ले ज्यून छै।”</verse>
				<verse number="11">येक बाद पौलुसले मलि जाभेरन प्रभु भोज लीछ और संगति करछ्य, और रात्तै हुन तक उनूनथैं बात करनै र्योछ। फिर उ वाँ भटे न्हैग्यो।</verse>
				<verse number="12">और यो बीच में उ जवान स ज्यूनै घर ल्यान, यैले उन भौत खुश भ्यान।</verse>
				<verse number="13">पौलुसले अस्सुस नगर खिन पैदल सफर करना को फैसला करछ्य। हम बाकि लोग समुन्द्री जहाज ले अघिल जुँला, और हम वाँ भटे ऊस अपून दगाड़ जहाज में लिजाना की योजना बनून मरेछ्या।</verse>
				<verse number="14">जब पौलुस अस्सुस नगर में हमून मिलछ्य त हम ऊस अपून दगाड़ जहाज में बैठाभेरन मितुलेने नगर लीभेरन आयान।</verse>
				<verse number="15">वाँ भटे हम जहाज ले दुसारा दिन खियुस टापू का नजिक पुजियाँ। और दुसारा दिन समुद्र पार करभेरन सामुस टापू और उक दुसारा दिन मीलेतुस में आया।</verse>
				<verse number="16">पौलुसले इफिसुस शैहर में उतरना को फैसला करछ्य क्याखिनकि उ आसिया प्रदेश में और ज्यादा बखत नै रून चांछ्यो; इफिसुस नगर छोड़िभेरन अघिल न्हैजूंलो ताकि उ पिन्तेकुस्त का त्यारा का दिन यरूशलम शैहर में रौ।</verse>
				<verse number="17">जब हम मीलेतुस शैहर में उतरियाँ, तब पौलुसले इफिसुस शैहरा का विश्वासीन संदेश भेजवाछ और बुज़ुर्गून वाँ बुलवाछ।</verse>
				<verse number="18">जब उन वाँ पुजियान तब पौलुसले उनूनथैं क्योछ, “तुम जाणछा कि म्यारा आसिया प्रदेश में आईनाक पैल दिन भटे मैं तुमार दगाड़ कसीकैं रयूँ।</verse>
				<verse number="19">मैंले परमेश्वर कि सेवा आँसू बगाभेरन भौत दीनताले दुख मुसीबत करछ्य। मैंले उन साजिश जो यहूदीन का द्वारा रचिनाकी छी ऊस सहन करछ्य।</verse>
				<verse number="20">और जो-जो बात तुमेरि भलाई का छ्या, उनून मैंले तुमून बतून में कभै के झिझक नै करि। बल्कि मैं सब लोगून का बीच में और घर-घर जाभेरन उन बातुन का बारिमें सिखूनै रयूँ।</verse>
				<verse number="21">मैं यहूदी और गैर-यहूदी सब लोगून का सामुनि संदेश दीनै रयूँ कि उन ले परमेश्वरा का सामुनि पश्चाताप करभरेन हमार प्रभु यीशु में विश्वास करून।</verse>
				<verse number="22">देख अब मैं पवित्र-आत्मा द्वारा मजबूर होभेरन यरूशलम शैहर जूंलो, और मैं नै जाणनू कि वाँ म्यार दगाड़ कि-कि होलो।</verse>
				<verse number="23">बश इदुकैं जाणछूँ कि हरेक नगर में पवित्र आत्मा मैंस खबरदार करनै रै, कि वाँ जेल और दुख म्यार इंतजार करनान।</verse>
				<verse number="24">पर मेरि नजर में मेरि जीन्दगी की के कीमत नाहातिन, मैं बश यो काम पुर करून चाँछू जो प्रभु यीशु ले मैंस सौंप रैछ, कि जो मैंले अनुग्रह का सुसमाचार में गवाही दीन खिन प्रभु भटे मैंस मिल रैछ।</verse>
				<verse number="25">अब देखा, मैं जाणछूँ कि तुम सब जिनून में परमेश्वरो को राज्य क प्रचार करनै रयूँ पर अब तुम मैंस दुबारा कभै नी देखला।</verse>
				<verse number="26">येक कारण मैं आज तुमूनथैं कुछूँ कि अगर तुमून में भटे कैको लै यीशु में विश्वास नै करना का कारण ले नाश होलो, तब मैं येक जिम्मेदार न्हैतिनू।</verse>
				<verse number="27">क्याखिनकि मैले तुमूनथैं केले नै लुकायो और तुमून पुरी बात बता रैछ जो परमेश्वर चाँछ्या की तुम जाणौ।</verse>
				<verse number="28">तुम सब लोग अपूनो ख्याल राखा और उ दलको ले जैक देख-भाल करून खिन पवित्र आत्मा ले तुमून चुन रैछ। की तुम परमेश्वरा का विश्वासीन की सबै मण्डलीन की देख-भाल करा जैस यीशु ले खुद अपूनो खून दीभेरन छुड़ै रैछ।</verse>
				<verse number="29">मैं जाणछूँ कि म्यार जानाक बाद तुमार बीच में झूठ्ठा शिक्षक आला और विश्वासीन नुकशान पुजाला। उन खतरनाक भेड़िया क जस होला जो भेड़ून मार डालनान।</verse>
				<verse number="30">याँ तक ले तुमार दल में भटे लै इस लोग निकलाल जो विश्वासीन झूठ्ठी शिक्षा सिखाला, और तुमून भटे कुछ लोग उनारा पछिल हो जाला।</verse>
				<verse number="31">येक कारण चौकून्ना रया, और यो ले याद राख्या कि मैं इन चीजून का बारिमें तीन साल तलक भौत आँसू बगाभेरन मैं तुमून रात-दिन खबरदार करनै रयूँ।</verse>
				<verse number="32">अब मैं तुमून परमेश्वर और उक अनुग्रहा बचनून की देख-रैख में सौंपून मरयू; कि तुमून विश्वास में मजबूत कर सकछूँ, परमेश्वर तुमून उ आशीष द्योलो जैस दीना को वादा उले उन सब लोगूनथैं करछ्य जो उक द्वारा पवित्र करि ग्यान।</verse>
				<verse number="33">मैंले कभै कैको चाँदी, सुन और कपाड़ान को लोभ नै कर्यो।</verse>
				<verse number="34">तुम सब जाणछा कि मैंले इनी हातून ले अपून और अपून दगड़ियान की जरूरतून पुर करून खिन खुद काम करछ्य।</verse>
				<verse number="35">मैंले हमेशा तुमार सामुनि यो उदारण राखछ्य, कि हमून खुद काम करभेरन दीन-दुखियून की मद्दत करून चैंछी, और तुमून प्रभु यीशुक यो बातुन याद राखून जरूरी छै, उले खुद कैरेछ, ‘लीन है दिन में ज्यादा निकोछ।’”</verse>
				<verse number="36">यो सब बातुन का बाद पौलुसले घुणा टेकभेरन प्रार्थना करछ्य।</verse>
				<verse number="37">उन सब लोग पौलुसैस गल लगाभेरन डाड़ मारून और ऊस प्रेम करन लाग्यान।</verse>
				<verse number="38">उन सब लोग खास कर यो बात ले दुखी छ्या, जो पौलुसले कईना को छ्यो, कि तुम ऊस कभै नी देखला। फिर उन सब लोग पौलुसैस छोड़ून खिन समुन्द्री जहाज तलक ग्यान।</verse>
			</chapter>
			<chapter number="21">
				<verse number="1">और हम इफिसुस शैहरा का सयानान थैं भटे विदा लीभेरन समुन्द्री सफर शुरू करछ्य, त सिद्दा बाट कोस टापू में आयान, और दुसारा दिन रुदूस टापू में पूज्याँ, और फिर उ बाद हम पतरा शैहर में पुज ग्या।</verse>
				<verse number="2">और वाँ एक समुन्द्री जहाज फीनीके प्रदेश खिन जानै मिल छै, और हम उ जहाज में बैठभेरन न्हैग्या।</verse>
				<verse number="3">फिर हमूले बौं तरफ साइप्रस टापू दिखाई दीछ। हम उक बगल भटे गुजर भेरन सीरिया देश तरफ जाभेरन सोर नगर जा पुजियान। क्याखिनकि वाँ जहाज भटे समान उतारून छ्यो।</verse>
				<verse number="4">“और हमूले विश्वासीन को पत्तो लगाभेरन हम वाँ सात दिन तक रयाँ। और सोर नगराक विश्वासीन ले पवित्र आत्माक द्वारा प्रेरित हो भेरन पौलुसथैं क्योछ, कि उ यरूशलम शैहर जाना को बिचार छोड़ दे।”</verse>
				<verse number="5">सात दिन बाद हमोरो वाँ भटे जाना को बखत आछ, त हम वाँ भटे जानवाला छ्या; त सब लोग, स्यैनिन और नान्तिना सहित हमून पुजून खिन नगर भटे भ्यार तलक आयान। फिर हमूले समुन्द्राक किनार में घुणा टेकभेरन प्रार्थना करछ्य।</verse>
				<verse number="6">तब एक दुसारा थैं विदा हो भेरन हम त समुन्द्री जहाज में बैठियाँ, और उन अपून-अपून घर वापस न्हैग्या।</verse>
				<verse number="7">सोर नगर भटे शुरू करिना को सफर पुरो करभेरन पतूलिमयिस नगर पुजियाँ। और विश्वासीन नमस्कार करभेरन हम उनार दगाड़ एक दिन रयाँ।</verse>
				<verse number="8">हम वाँ निकल भेरन दुसारा दिन कैसरिया शैहर में पुजियाँ। और हम फिलिप्पुस प्रचार का घर में जाभेरन उक दगाड़ रयाँ। जो उन सात आदिमी में भटे एक छ्यो, जैस यरूशलम का प्रेरितून ले विध्वान की देखभाल खिन चुनिना को छयो।</verse>
				<verse number="9">उकी चार कुँवारी चेलिन छ्या, जो भविष्यबाणी करछ्या।</verse>
				<verse number="10">जब हम वाँ भौत दिन रया, तब अगबुस नामोको परमेश्वरा का तरफ भटे संदेश दिनवालो यहूदा प्रदेश भटे वाँ आछ।</verse>
				<verse number="11">उले हमार पास आभेरन पौलुसो को बैलट लीभेरन अपून हात-खुट बादिभेरन क्योछ, “पवित्र आत्मा यो कुंछो, जो आदिमी को यो बैलट छै, ऊस यरूशलम शैहर में यहूदी लोग इसीकैं बादिभेरन गैर-यहूदीन का हात में सौंप द्याला।”</verse>
				<verse number="12">जब हमून ले यो बात सुणछय, त हम और वाँक सब लोगून ले पौलुसथैं बिनती करभेरन क्योछ, उ यरूशलम शैहर खिन जन जाये।</verse>
				<verse number="13">लेकिन पौलुसले उनुस जबाब दीछ, तुम कि करछा? तुम डाड़ मार-मारभेरन मैंस निराश किलैं करछा, मैं प्रभु यीशु मसीहक नाम ले यरूशलम शैहर में नै केवल बाँदि जान खिन पर मरून खिन ले तैय्यार छूँ।</verse>
				<verse number="14">जब पौलुस हमरि बात मानून खिन तैय्यार नै भ्यो, तब हम यो कैभेरन चुप है ग्या, “प्रभु की इच्छा पुरी हो।”</verse>
				<verse number="15">कुछ दिनून का बाद हमूले तैयारी करभेरन यरूशलम शैहरा का तरफ न्हैग्या।</verse>
				<verse number="16">कैसरिया शैहर में थ्वाड़ा विश्वासी हमार दगाड़ आयान, और जब हम यरूशलम शैहर पुजियाँ, तब उन हमून साइप्रस टापू को रून वालो मनासोन नामाका आदिमीक घर ली ग्यान, जो एक पुरानो शिष्य छ्यो और हमून उक पास वाँ रून छ्यो।</verse>
				<verse number="17">जब हम यरूशलम शैहर में पुजियाँ, त वाँ विश्वासीन ले भौत खुशी क दगाड़ हमोरो स्वागत करछ्य।</verse>
				<verse number="18">दुसारा दिन पौलुस और हम सब याकूबा का घर ग्या, जाँ सयाना जाम छ्या।</verse>
				<verse number="19">तब पौलुसले उनून नमस्कार करछ्य, जो-जो काम परमेश्वर ले उक जरियाले गैर-यहूदीन का बीच में करछ्य, एक-एक करभेरन सब बताछ।</verse>
				<verse number="20">उनूनले यो सुणिभेरन परमेश्वर कि महिमा करछ्य और पौलुसथैं क्योछ, “हे भाई, तैं जाण छै की यहूदीन में भटे कई हजार लोगून ले विश्वास करछ्य और उन सबून ले मूसा क नियम-कानून को पालन भौत मजबूती ले करछ्य।</verse>
				<verse number="21">उनूनले त्यारा बारिमें सुण रैछ कि तै गैर-यहूदीनका बीच में रूनवाला यहूदीन यो शिक्षा दीछै कि उन मूसा का नियम-कानून शिक्षा छोड़ी दी, और कूछो, की नै अपून नान्तिना को खतना करा और नै यहूदीन को रीति-रिवाजून पालन करा।</verse>
				<verse number="22">अब बता, हम कि करा? लोग जरूर सुणाला कि तैं याँ आ रैछ।</verse>
				<verse number="23">येक कारण हम जो तैथैं कुनू, उ कर। हमार याँ चार लोग छन, उनुस उ मन्नते स पुर करून छै जो उनूनले परमेश्वरा क सामुनि माँग रैछ।</verse>
				<verse number="24">उनून लीभेरन उक दगाड़ अपून-आपस शुद्ध करना की रसम पुर करा; और उनून खिन खर्चा दी कि उन मुंडन करून। तब सब जाणि जाला कि जो बात उनूनले त्यारा बारिमें सुणाई ग्यान, उन बातून में कोई सच्चाई नाहातिन, पर तैं खुद ले मूसा का नियम-कानून को पालन करभेरन उनार अनुसार चलछै।</verse>
				<verse number="25">जाँ तलक गैर-यहूदीन का बारिमें जिनूनले विश्वास करछ्य, हमूले यो फैसला करभेरन लिखभेरन भेजिछ्य, कि उन उ शिकारै स जो लोगून ले मूर्तिनक सामुनि चढ़ा रैछ, और जानवरून को खून भटे, और गल घोटभेरन मारिना का जानवरूनो को शिकार भटे और व्यभिचार भटे दूर रयाँ।”</verse>
				<verse number="26">दुसारा दिन पौलुसले उन आदिमीनका दगाड़ जाभेरन अपनास शुद्ध करछ्य। तब उ मन्दिर में ग्योछ और यो बताछ कि शुद्धि दिन कब खतम होला, और उनूनमें भटे हरेक खिन भेंट चढ़ाई जालि।</verse>
				<verse number="27">जब इन सात दिन पुर हुनवाला छ्या, तब आसिया प्रदेशा का कुछ यहूदीनले पौलुसैस मन्दिर में देखिभेरन उन सब लोगून भड़का भेरन पौलुसैस पकड़ लीछ और जोरले चिल्लान लाग्यान,</verse>
				<verse number="28">“हे इस्राएल देशाक लोगों हमरि मद्दत करा, यो उई आदिमी छै जो सब लोगून का, और मूसा का नियम-कानून का, और यो जाग का खिलाफ में हर जाग सब लोगून सिखूछो याँ तक ले गैर-यहूदीन ले मन्दिर में ल्याभेरन यो पवित्र जाग स अपवित्र करिना को छै।”</verse>
				<verse number="29">उनूनले इसो क्योछ, क्याखिनकि उनूनले ये है पैलिक इफिसुस शैहर में रूनवाला त्रुफिमुसैस पौलुस दगाड़ यो शैहर में देखछ्य, और उनूनले यो समझ छै कि पौलुस ऊस मन्दिर में ल्याछ।</verse>
				<verse number="30">और पुर नगर में सोर शराबा मच ग्यो, और लोगून ले एक दगाड़ जाम हो भेरन पौलुसैस पकड़ भेरन मन्दिर क भ्यार भटे खींच ल्यान, और तुरन्त द्वार बंद कर दीयान।</verse>
				<verse number="31">जब उन पौलुसैस मारना की कोशिश करून मरेछ्या, उ बखत यरूशलम शैहर में रोमी सेनाक सरदार स खबर भेजछ्य कि सब लोग दंगा करून मरेछ्या।</verse>
				<verse number="32">तब उ तुरन्त सिपाईन और अधिकारीन लीभेरन उनार पास तलि दौड़भेरन आछ; और लोगून की भीड़ ले अधिकारी और सिपाईन देखभेरन पौलुसैस मारून-पीटून छोड़ी दीछ।</verse>
				<verse number="33">तब अधिकारी ले पौलुसाक पास आभेरन पकड़ लीछ; ऊस द्वी जंजीरून ले बादनाको हुकुम दीभेरन लोगूनथैं पुछ्छै कि यो को छै और येले कि कर रैछ?</verse>
				<verse number="34">भीड़ में भटे कोई के कुनमर्यो छ्यो और कोई के। और उन ज्यादा सोर-शराबाक कारण यो सच्चाई स नै जाण पाया येक कारण पौलुसैस किला में ली जाना को हुकुम दीछ।</verse>
				<verse number="35">जब पौलुस सीढ़िन में पुजिछै, त इसो भ्योछ भीड़ को भंयकर रूप देखिभेरन सिपाईन ऊस उठाभेरन लीजान पड़छो।</verse>
				<verse number="36">भीड़ाक लोग “ऊस मारा, ऊस मारा।” चिल्लूनै पछिल-पछिल उनमरेछ्या।</verse>
				<verse number="37">जब उन पौलुसैस किला में ली जानमरेछ्या, तब पौलुसले सेनाक सुबदार थैं क्योछ, “क्या मैं तुमूनथैं एक निवेदन कर सकछूँ?” यो सुणिभेरन सुबदार ले क्योछ, “तैं यूनानी भाषा जाण छै।</verse>
				<verse number="38">क्या तैं मिस्र देशो को न्हैंतिनै जेले थ्वाड़ा बखत पैलि सरकार क खिलाफ बगावत करछ्या, और बंजर जाग में चार हजार खूनी लोगून ली गैछै?”</verse>
				<verse number="39">पौलुसले क्योछ, “नै, मैं त एक यहूदी आदिमी छूँ। और किलिकिया प्रदेशो को खास नगर तरसुस को रून वालो छूँ। मैं तुमूनथैं बिनती करछूँ, कि तुम मैंस लोगून का दगाड़ बात करून दी।”</verse>
				<verse number="40">जब उले हुकुम दीछ, त पौलुसले सीढ़िन में ठाँड़ है भेरन लोगून हात ले इशारा करभेरन शांत करछ्य। जब सब चुप है ग्या, तब उ उनार दगाड़ इब्रानी में बात करून लागछ्य!</verse>
			</chapter>
			<chapter number="22">
				<verse number="1">“हे भाईयो और अगुवा! म्योरो जबाब सुणा, जो मैं अब तुमार सामुनि कुछूँ।”</verse>
				<verse number="2">और जब लोगून ले सुणछ्य, कि उ उनूनथैं इब्रानी भाषा में बोलून मर्योछ, त उन और ले चुप हो ग्या। तब उले क्योछ,</verse>
				<verse number="3">“मैंले एक यहूदी छूँ, और म्योरो जन्म किलिकिया प्रदेशा का तरसुस शैहर में भ्योछ। पर मेरि पढ़ाइ-लिखाई यो नगर में गमलीएल का द्वारा भैछ। मैंले अपून पुरखान का सब नियमून निकीकैं समझछ्य; और परमेश्वर खिन जसो तुम सबून को जोश छ्यो, ऊसो म्योरो ले छै।”</verse>
				<verse number="4">मैंले प्रभु यीशु की शिक्षा स मान्या वाला लोगून सताछ और उनून मरवा ले दीछ। मैंले आदिमीन और स्यैनिन बाँद-बाँद भेरन जेल में डालछ्य।</verse>
				<verse number="5">यो बात में खुद महायाजक और महासभा का सब सयाना गवाह छन। की उनूनथैं मैं उन यहूदी अगुवान खिन चिठ्ठी लिखभेरन दमिश्क नगर जानमरेछ्यू, और चिठ्ठीन का द्वारा यो अनुमति मिलछ्य कि जो विश्वासी भाईन वाँक छन उनून बाँद भेरन यरूशलम शैहर में ल्या और उनून सजा दीयूलो।</verse>
				<verse number="6">जब मैं सफर करभेरन दमिश्क नगरा का नजिक पूज्यूँ, तब इसो भ्योछ की लगभग छकाल में अचानक एक ठूलो उज्यालो आकाश भटे म्यारा चारों तरफ चमकछ्य।</verse>
				<verse number="7">और मैं भिमें खिती गयूँ, तब मैले यो आवाज सुणछ्य, कोई मैथैं कुनमरेछ्यो “शाऊल, शाऊल, तैं मैंस किलैं सतूछै?”</verse>
				<verse number="8">मैंले जबाब दीछ, “हे प्रभु, तुम को छा?” उले मैंथैं क्योछ, “मैं नासरत नगरो को रूनवालो यीशु छूँ, जैस तैं सतूछै।”</verse>
				<verse number="9">और म्यारा दगड़ियान ले उज्यालो त देखछ्य, लेकिन जो मैंथै बोलछो उनूनले एक आवाज सुणछै, लेकिन उन समझ नै सक्या की आवाज ले मैंथै कि क्योछ।</verse>
				<verse number="10">तब मैले क्योछ, “प्रभु, मैं कि करूँ?” प्रभु ले मैथैं क्योछ, “उठभेरन, दमिश्क नगरा का तरफ जा, और जो ले तैंस करून खिन ठैराई ग्योछ वाँ तैंस सब बता दी जालो।”</verse>
				<verse number="11">क्याखिनकि तेज उज्याला का कारण ले मैंस के नी देखीन मर्योछयो कारण ले मैं अपून दगड़ियान को हात पकड़ भेरन दमिश्क नगर में आयूं।</verse>
				<verse number="12">तब हनन्याह नामोको एक आदिमी छ्यो, उ मूसा का नियम-कानून का पालन करून वालो एक भक्त छ्यो, जो वाँक रूनवाला सब यहूदीन में इजतदार छ्यो।</verse>
				<verse number="13">उले म्यार पास आभेरन क्योछ, “हे भाई शाऊल, तैं फिर देखून लाग।” उई बखत म्यारा आँखन में रोशनी आगै और मैंले ऊस देखछै।</verse>
				<verse number="14">तब उले क्योछ, “हमार पुरखान का परमेश्वर ले तैंस येक कारण चुन रैछ की तैं उकी इच्छा स जाण, और उ धर्मीस देख और उकी आवाज सुण।</verse>
				<verse number="15">क्याखिनकि तैं उकी तरफ भटे सब लोगून का सामुनि उन बातुन को गवाह होलै, जो तैंले देखछै और सुणछै।</verse>
				<verse number="16">येक कारण अब तैं बपतिस्मा लीन खिन देर जन कर, और प्रभु का नाम ले अपून पापून धोले।”</verse>
				<verse number="17">जब मैं यरूशलम शैहर में वापस आयू और मैं मन्दिर में प्रार्थना करून मरेछ्यू, त मैंले एक दर्शन देखछै।</verse>
				<verse number="18">तब मैंले प्रभु स मैंथै यो कुन सुणछै, “जल्दी यरूशलम शैहर स छोड़भेरन न्हैजा, क्याखिनकि उन लोग जो याँ छन म्यारा बारिमें तेरि गवाही नी मानाला।”</verse>
				<verse number="19">मैं क्योछ, हे परमेश्वर मैंस लागछो कि उन मेरि गवाही स्वीकार कराला, क्याखिनकि उन जाणनान कि मैं यहूदी सभाघर गयूँ, और लोगून गिरीफ्तार करछ्य मारछ्य तैं विश्वास करनान।</verse>
				<verse number="20">और जब तुमार गवाह स्तिफनुस को खून बगाई जानमर्योछ तब ले मैं वाँ ठाडा छूँ, और यो बात में राजी छूँ, और उक हत्यारून का कपाड़ान की देख-भाल करून मरेछूँ।</verse>
				<verse number="21">और प्रभु ले मैथैं क्योछ, “याँ भेट जा, क्याखिनकि मैं तैंस गैर-यहूदीन का पास दूर-दूर तलक भेजलो।”</verse>
				<verse number="22">याँ तक त लोग पौलुस की बात ध्यान ले सुणनै रयान; लेकिन उक बाद उन सब जोर-जोरले चिल्लाभेरन कुंन लाग्यान, “येस मार डाला; येको ज्यून रून ठीक नाहातिन।”</verse>
				<verse number="23">लेकिन तब उन जोरले चिल्लानै और अपून भ्यार वाला कपाड़ा खितना और अपूनो गुस्सा दिखून खिन आकाश में धुल उड़ून लाग्यान।</verse>
				<verse number="24">तब सेनापति ले क्योछ, “यैस किला में लिजाभेरन; कोड़ा मारभेरन पूछताछ करा, की मैं जाणून चाछूँ की लोग की कारण उको विरोध में इसकै चिल्लान मर्यान।”</verse>
				<verse number="25">जब उनूनले ऊस फित्तान ले बादछै त पौलुसले उ सुबदार जो उक पास ठाडा छ्यो क्योछ, “क्या यो ठीक छी, कि तुम एक रोमी आदिमी स और उले बिना दोषी ठैहराये कोड़ा मारा?”</verse>
				<verse number="26">सुबदार ले यो सुणिभेरन सेनापति क पास जाभेरन क्योछ, “तैं यो कि करछै? यो त रोमी आदिमी छै।”</verse>
				<verse number="27">तब सेनापति ले उक पास आभेरन पुछ्छै, “मैंस बतो, क्या तैं रोमी छै?” पौलुसले क्योछ, “होई।”</verse>
				<verse number="28">यो सुणभेरन सेनापति ले क्योछ, “मैंस रोमी पदवी भौते डबल दीभेरन मिलछ्य।” पौलुसले क्योछ, “मैं तैं जन्म भटे रोमी छूँ!”</verse>
				<verse number="29">तब जो लोग ऊस परखून मरेछ्या, उन झट्ट उक पास भटे हट ग्या; और सेनापति ले यो जाणभेरन कि यो रोमी छै, और उले ऊस बाँदि छै, डरी ग्यो।</verse>
				<verse number="30">दुसारा दिन उन ठीक-ठीक जाणभेरन की इच्छा ले यहूदी उमें किलैं दोष लगूनान, येक कारण उक बेड़िन खोल दीयान। और प्रधान याजकून ले और पुरी महासभा स जॉम हुना को हुकुम दीछ, और पौलुस स तलि ल्याभेरन उनार सामुनि ठाड़ कर दीछ।</verse>
			</chapter>
			<chapter number="23">
				<verse number="1">पौलुसले यहूदी महासभा का तरफ चाँभेरन क्योछ, “भाईयों, मैले आज तलक परमेश्वरा का नजरून में अपून सच्चा मन ले अपूनी जीवन बिताछ्य।”</verse>
				<verse number="2">जो पौलुसले क्योछ, उ बात स सुणिभेरन हनन्याह महायाजक ले, उनून जो उक पास ठाड़ छ्या, उक मुँख में थप्पड़ मारना को हुकुम दीछ।</verse>
				<verse number="3">तब पौलुसले उथैं क्योछ, “ओ कपटी, परमेश्वर तैंस माराला! तैं याँ नियम-कानून का अनुसार मेरो न्याय करून खिन बैठि रैछ, फिर लै नियम-कानून का खिलाफ मैंस मारना को हुकुम किलैं दिन मरेछा?”</verse>
				<verse number="4">तब जो सामुनि ठाँड़ा छ्या, उनूनले क्योछ, लोगून ले पौलुसथैं क्योछ, “क्या तैं परमेश्वरा का महायाजक स बुरो भाल कैभेरन निन्दा करछै?”</verse>
				<verse number="5">पौलुसले क्योछ, “भाईयो, मैं नी जाण छयू, कि यो महायाजक छै। किलैंकी पवित्रशास्त्र में लिख रैछ, ‘अपून लोगून का प्रधान स भल-बुरो जन कया।’”</verse>
				<verse number="6">तब पौलुसले यो जाणभेरन कि थ्वाड़ा सदूकी लोग और थ्वाड़ा फरीसी लोग वाँ छ्या, महासभा में उले जोरले क्योछ, “हे भाईयो, मैं फरीसी और फरीसीन को वंशो को छूँ, और यो मुरकदमा येक कारण हो र्योछ किलैकी मेरो विश्वास छै की परमेश्वर मरिना का लोगून दुबाँरा फिर ज्यून कराला।”</verse>
				<verse number="7">जब उले यो बात क्योछ त फरीसी और सदूकी लोगून में झगाड़ा हुन लागछो; और सभा में फुट पड़गै।</verse>
				<verse number="8">क्याखिनकि सदूकी लोगून को विश्वास छै, कि लोग मरना क बाद फिर ज्यून नी होला, नै स्वर्गदूत, और नै आत्मा छै; लेकिन फरीसी लोग इन सब बातुन में विश्वास करनान।</verse>
				<verse number="9">तब भौत सोर-खराब हुन लागछै और मूसा का नियम-कानून स सिखून वाला, जो फरीसी लोग छ्या, ठाड़ है ग्या, और यो कैभेरन झगाड़ा करून लाग्यान, “हम यो आदिमी में के बुराई नै पाना; और शायद है सकछो की आत्मा या खुद स्वर्गदूत ले यैथैं बात कर होलि।”</verse>
				<verse number="10">जब भौत झगाड़ हुन लागछ्य, त सेनापति ले यो डरले कि उन पौलुसा का टुकूण-टुकूण नै कर डालून। त उले सेना स हुकुम दीछ की आभेरन पौलुस स सभाक लोगून का बीच भटे जबरदस्ती निकाला, और किला में ली जा।</verse>
				<verse number="11">उई रात प्रभु यीशु ले पौलुसाक पास ठाड़ होभेरन क्योछ, “किलैकी जसकैं तैंले यरूशलम शैहर में मेरि गवाही दीछ, उसीकैं तैंले रोम शैहर में ले दीनी होलि।”</verse>
				<verse number="12">जब रात्तै भैछ, त थ्वाड़ा यहूदी लोगून ले साजिश रचछै, और उनूनले यो कसम खाछ की जब तलक उन पौलुस स नै मार डालाँ, तब तलक उन नै के खाला और नै के पियूला।</verse>
				<verse number="13">जिनूनले यो कसम खाईनाकी छी, उन चालीस लोगून है ज्यादा छ्या।</verse>
				<verse number="14">उनूनले प्रधान याजकून और यहूदी अगुवान का पास आभेरन क्योछ, “उनूनले कसम खाभेरन यो ठान रैछ कि जब तलक उन पौलुसैस मार नै डालूँ, तब तलक हम नै के खूँला और नै के पियूला।</verse>
				<verse number="15">येक कारण अब तुम यहूदी महासभा का दगाड़ रोमी सेनापति यो संदेश भेजा, की पौलुसैस तुमार पास इसकैं ल्यून, जसकैं माना की तुम यो मुद्दा बड़ी बारिकीले छानबीन करभेरन सुलझून चांछा। और याँ हम उक पुजून है पैलिकैं ऊस मार डालून खिन तैय्यार रूँला।”</verse>
				<verse number="16">लेकिन पौलुसाक बैनिका च्याला ले सुणछ्य कि यहूदी लोग पौलुस स मारना की योजना बनून मर्यान, त उले किला में जाभेरन पौलुस स खबर दीछ।</verse>
				<verse number="17">येक बाद पौलुसले सुबदारून में भटे एक स अपून पास बुलाभेरन उथैं क्योछ, “यो च्यालास सेनापति का पास ली जा, यो उथैं के कुन चांछो।”</verse>
				<verse number="18">येक कारण सुबदार पौलुसाक भानजास सेनाक सेनापति पास ली ग्योछ और कुन लागछै, “कैदी पौलुसले मैंस अपून पास बुलाभेरन क्योछ, कि यो जवान स मैं तुमारा पास ल्यू, क्याखिनकि यो तुमून के कुन चांछो”</verse>
				<verse number="19">सेनापति ले उक हात पकड़ भेरन एकांत में लिजाभेरन पुछ्छै, “तैं मैथैं कि कुन चाँछै?”</verse>
				<verse number="20">उले क्योछ, “यहूदी महासभा का लोगून ले एक हो भेरन योजना बना रैछ, कि उन भोल तुमूनथैं यो विनती कराल, कि तुम पौलुसैस सभाक सामुनि लीभेरन आ, जैल कि उन यो मामुले की बारिकीले जाँच-पड़ताल करून चानान।”</verse>
				<verse number="21">लेकिन तैं उन लोगून की बात जन मानै, क्याखिनकि उनूनमें भटे चालीस है ज्यादा लोग यो ताक में बैठिनाका छ्या कि पौलुसैस ल्याई जौ और हम ऊस मारा, जिनूनले कसम खाभेरन ठान रैछ, कि जब तलक उन ऊस नी मार लीन, तब तलक उन के नी खाला, और नै त प्याला, और अब उन तैय्यार छन, और त्यारा हाँ को इंतजार करून र्यान।</verse>
				<verse number="22">यो सुणिभेरन सेनापति ले उ च्योलास यो कैभेरन भेजि दीछ, “तैं कैसे जन बताये, कि तैले यो बात मैंस बताछ।”</verse>
				<verse number="23">सेनापति ले तब द्वी सुबदारून अपून पास बुलाभेरन उनूथैं क्योछ, “आज रात नौ बजे कैसरिया शैहर जान खिन द्वी सौ सिपाई, द्वी सौ भाला, और सत्तर घुड़सवार तैय्यार राखा।</verse>
				<verse number="24">और पौलुस खिन ले घोड़ो तैय्यार राखा, जेले कि उन पौलुस स सही सलामत फेलिक्स राज्यपाल का पास पूजा सकां।”</verse>
				<verse number="25">और सेनापित ले इसीकैं राज्यपाल खिन एक चिठ्ठी लिखछ्य।</verse>
				<verse number="26">क्लौदियुस लूसियास तरफ भटे “महामहिम फेलिक्स राज्यपाल स मेरो नमस्कार;</verse>
				<verse number="27">यो आदिमी स यहूदीन ले पकड़ छै और उन यैस मारून वाला छ्या, लेकिन जब मैंले जाण छै, अपून सिपाईन का दगाड़ जाभेरन येस छुड़ा लीछ, क्याखिनकि मैंस पत्तो चलछै कि यो रोमी छै।</verse>
				<verse number="28">और मैं जाणून चांछूँ की उन उमें कि कारण ले दोष लगूनान, येक कारण ऊस उनार सभा में ली गयूँ।</verse>
				<verse number="29">तब मैंले जाण लीछ, की उन अपून यहूदी नियम-कानून का विवादून का बारिमें उमें दोष लगूनान, लेकिन मौत या जेल जाना कि साजाक लायक उमें कोई दोष नाहातिन।</verse>
				<verse number="30">और जब मैंस बताई ग्योछ, कि उन यो आदिमीक फिराक में लाग रियान त मैंले तुरन्त ऊस त्येरा पास भेज दीछ; और उन यहूदीन जिनूनले उमें आरोप लगा रैछ बता दीछ कि त्यारा सामुनि उमें दोष लगाछ।”</verse>
				<verse number="31">सेनापित को यो हुकुम पाभेरन सिपाईन ले रातों-रात पौलुसैस अंतिपत्रिस पूजा दीछ।</verse>
				<verse number="32">दुसारा दिन उन घुड़सवारून पौलुसाक दगाड़ कैसरिया शैहर जान खिन भेजभेरन, सिपाई खुद पैदल हिटभेरन यरूशलम शैहरा का किला में लौट आयान।</verse>
				<verse number="33">उनूनले कैसरिया शैहर में पुजभेरन राज्यपाल स चिठ्ठी दीछ, और पौलुस स ले उनार सामुनि ठाड़ करछ्य।</verse>
				<verse number="34">राज्यपाल ले चिठ्ठी पढ़भेरन पौलुसथैं पुछ्छै, “तैं को प्रदेशो को छै?” और यो जाणिभेरन कि यो किलिकिया प्रदेशो को निवासी छै।</verse>
				<verse number="35">त उले क्योछ, “जब तैंमें दोष लगूनवाला यहूदी आला, तब मैं तेरि सुणवाई करोलो।” और उले पौलुस स राजा हेरोदेसाक राजमहल में, सिपाईन का पहरा में राखना को हुकुम दीछ।</verse>
			</chapter>
			<chapter number="24">
				<verse number="1">येक पाँच दिना का बाद महायाजक हनन्याह और कई यहूदी अगुवान और तिरतुल्लुस नामोको एक वकीले स दगाड़ लीभेरन कैसरिया शैहर खिन आग्या; और उनूनले राज्यपाल क सामुनि पौलुस में इसो कैभेरन दोष लगून शुरू करछ्य।</verse>
				<verse number="2">जब पौलुस स बुलाई ग्योछ त तिरतुल्लुस ले उमें दोष लगाभेरन कुन लागछै, “हे आदरणीय फेलिक्स, तुमार कारण ले हमार देश में भौत शांति छै; तुमार जरियाले यो जाति खिन भौत बुराई सुधारी जानान।”</verse>
				<verse number="3">यैस हम हर जाग और हर तरीकाले धन्यवाद का दगाड़ माननू।</verse>
				<verse number="4">लेकिन येक कारण मैं तुमार ज्यादा बखत नै लीन चांनू, मैं तैथैं विनती करछूँ, की किरपा करभेरन हमरि एक द्वी बात सुण ली।</verse>
				<verse number="5">यो आदिमी बगावत करून वालो छै और येले संसाराक सब यहूदी लोगून में दंगा फैलून मर्योछ, और उ पंथ को मुखिया छै जैथैं नासरी कुंनान।</verse>
				<verse number="6">येक अलावा यैले परमेश्वरा का मन्दिर स ले अशुद्ध करनाकि कोशिश करछ्य तब हमूले यैस पकड़ लीछ। (और हमूले यैस अपून नियम-कानून का अनुसार सजा ले दिईनाको हुनो।</verse>
				<verse number="7">लेकिन सेना का सेनापति लूसियास जबरदस्ती हमार हात भटे छड़ा लिग्यो।</verse>
				<verse number="8">और यैमें दोष लगून वालान ले त्यारा सामुनि उनाको हुकुम दीछ) इन सब बातुन का जिनारा बारिमें हम दोष लगूनू, तुम खुद ऊस परखभेरन सच्चाई को पत्तो लगा सकछा।</verse>
				<verse number="9">और आईनाक सब यहूदीन ले यो बात में राजी भ्यान।</verse>
				<verse number="10">जब राज्यपाल ले पौलुसैस बोलून खिन इशाँरा करछ्य। त उले जबाब दीछ: “मैं यो जाणिभेरन कि तुम भौत सालून भटे यो देशा का लोगून को न्याय करूनमरैछा, और येक कारण मैं खुशिले अपून बारिमें सफाई दिनमेरयू।”</verse>
				<verse number="11">तुम यो बातोको पत्तो करि सकछा कि मैंस परमेश्वर कि अराधना करून खिन यरूशलम शैहर जाईना का कुल बार दिन है ज्यादा नै होरिया।</verse>
				<verse number="12">कैले मैंस नै मन्दिर में, नै यहूदी सभाघरून में नै नगर में नै कैका दगाड़ बहस करून या लोगून भड़कून देखछी।</verse>
				<verse number="13">और नै त उन बातुन, जिनारा बारिमें उन अब मैंमें दोष लगूनान, त्यारा सामुनि सच साबित कर सकनान।</verse>
				<verse number="14">लेकिन मैं तुमार सामुनि यो मान लीछूँ, प्रभुक बाटा की शिक्षा स जो यहूदी अगुवा झूठ कुंनान। मैं उई शिक्षा का अनुसार अपून पुरखान का परमेश्वरे की सेवा करछूँ, और जो बात मूसा का नियम-कानून और परमेश्वरा का संदेश दिनवालान की किताब में लिखीना को छै, मैं उन सब बातुन में विश्वास करछूँ।</verse>
				<verse number="15">मैं परमेश्वर में भरोस राखछूँ, जसकै इन ले राखनान, कि धर्मी और पापी द्वीवैन परमेश्वर मरिन में भटे दुबारा ज्यून करोलो।</verse>
				<verse number="16">येक कारण मैं परमेश्वर और लोगून का सामुनि हमेशा अपून मन स लगातार निर्दोष बनूनाकी कोशिश करनै रूछूँ।</verse>
				<verse number="17">भौत सालून का बाद मैं गरीब लोगूनकी मद्दत करून खिन दान लीभेरन और मन्दिर में भेंट चढ़ून खिन यरूशलम शैहर आईना को छ्यूं।</verse>
				<verse number="18">उई बखत उनूनले वाँ मैंस मन्दिर शुद्ध हुना की रीति पुर करून देखछ्य। वाँ नै त कोई भीड़ छी और नै कोई बाद-विवाद भै। लेकिन वाँ आसिया प्रदेशा का थ्वाड़ा यहूदी लोग छ्या जिनूनले दंगा करछय।</verse>
				<verse number="19">अगर मैंले के गलत करिना को छ्यो, त उनून मैंमें दोष लगून खिन त्यारा सामुनि हुन चैछ्यो।</verse>
				<verse number="20">इन लोग खुद कुन कि जब मैं महा-सभाक सामुनि ठाड़ छयू, तब इनूनले मैंमें कि दोष पाछ।</verse>
				<verse number="21">यो एक बाते स छोड़ जो मैंले उनार बीच में ठाँड़ा हो भेरन जोरले यो बात जरूर क्योछ, आज मेरो तुमार जरियाले न्याय करि जानमर्योछ किलैकी मैं विश्वास करछूँ की परमेश्वर उन लोगून को जो मर ग्यान उनून दुबारा ज्यून करोलो।</verse>
				<verse number="22">राज्यपाल फेलिक्स ले जो मसीह का बाटा की शिक्षान जाणछ्यो, उनून यो केभेरन टाल दीछ, “जब सेनापति लूसियास आलो, तब मैं तुमरी बातोको फैसला करोलो।”</verse>
				<verse number="23">“और सुबदारस हुकुम दीछ, की पौलुस स हिरासत में राखि जौ और थ्वाड़ा आजादी दी जौ, और उक दगड़ियान में भटे कैसले उकी सेवा करून है जन रोकिया।”</verse>
				<verse number="24">येक थ्वाड़ा दिनून का बाद फेलिक्स राज्यपाल अपूनी स्यैनि द्रुसिल्ला का दगाड़ आछ। जो यहूदीनी छी, और उले पौलुस स बुलाभेरन उ विश्वासा का बारिमें जो यीशु मसीह में, उथैं सुणछ्य।</verse>
				<verse number="25">जब पौलुसले ऊस धार्मिकता और अपून में काबू राखून और परमेश्वरा का द्वारा उनवालो न्याय का बारिमें बतून शुरू करछ्य, तब फेलिक्स राज्यपाल ले डरभेरन क्योछ, “ऐल तैं जा, मौक मिलून पर मैं तैंस फिर बुलूलो।”</verse>
				<verse number="26">फेलिक्स राज्यपाल उन बातुन ले डरछ्यो जो पौलुसले कईनाका छ्या, फिरले ऊस बार-बार बुलाभेरन उक दगाड़ बात-चीत करछ्यो, किलैकी ऊस भरोस छ्यो की उ जेल भटे निकलून खिन ऊस रूपाया द्योलो।</verse>
				<verse number="27">लेकिन इसिकै द्वी साल बीत ग्या, तो फेलिक्स राज्यपाल का बदला में पुरकियुस फेस्तुस राज्यपाल बनछो। तब फेलिक्स ले यहूदीन खुश करनाकि इच्छाले पौलुसैस जेल में छोड़ दीछ।</verse>
			</chapter>
			<chapter number="25">
				<verse number="1">अपून प्रदेश में पुजिनाक तिसर दिन बाद फेस्तुस राज्यपाल कैसरिया शैहर भटे यरूशलम शैहर में आछ।</verse>
				<verse number="2">तब प्रधान याजकून ले, और यहूदी अगुवान ले, उ राज्यपाल का सामुनि पौलुसाक खिलाफ दोष लाग्यान।</verse>
				<verse number="3">उनूनले फेस्तुस थैं बिनती करभेरन क्योछ, “तुम पौलुस स यरूशलम शैहर बुलूनाकी किरपा करा।” क्याखिनकि उन ऊस बॉट में मारनाक विचार में छ्या।</verse>
				<verse number="4">लेकिन फेस्तुस राज्यपाल ले जबाब दीछ, “पौलुस कैसरिया क जेल में बन्द छै, और खुद मैंले वाँ जल्दी जान छै।”</verse>
				<verse number="5">फिर क्योछ, “तुमूनमें भटे जो अधिकार राखनान, उन म्यारा दगाड़ हिटा, और अगर यो आदिमी ले के गलत काम करि रैछ, त उमें दोष लगा।”</verse>
				<verse number="6">तब फेस्तुस राज्यपाल यरूशलम शैहर में आठ-दस दिन रैभेरन कैसरिया शैहर खिन न्हैग्यो; और दुसारा दिन न्याय आसन में बैठभेरन उले पौलुस स सभाक सामुनि ल्यूनाको हुकुम दीछ।</verse>
				<verse number="7">जब पौलुस आछ, त जो यहूदी अगुवा यरूशलम शैहर भटे आईनाक छ्या, चारों तरफ ठाड़ है भेरन उमें भौत दोष लगायान, जिनोरो उनार पास के सबूत नै छ्यो।</verse>
				<verse number="8">लेकिन पौलुसले अपून बचाव में क्योछ, “मैले नै त यहूदीन को नियम-कानून स टोड़छै, और नै मन्दिरा, और नै महाराजा का खिलाफ कोई अपराध करछ्य।”</verse>
				<verse number="9">यहूदी अगुवान खुश करना का इच्छाले तब फेस्तुस राज्यपाल ले पौलुसथैं पुछ्छै, “तैं की चाँछै की मैं यरूशलम शैहर में जाँ; और वाँ म्यारा सामुनि तेरो मुकरदमा तय करि जौ।”</verse>
				<verse number="10">पर पौलुसले क्योछ, “मैं महाराजा की अदालत का सामुनि ठाड़ छूँ, और योई जाग छै जाँ मेरो फैसला करि जान चैंछो। तुम ले निकीकैं जाणछा, कि मैले यहूदीन का खिलाफ केले अपराध नै कर्यो।</verse>
				<verse number="11">अगर मैंले मौतेकी सजाक लायक के कसूर कर रैछ, तब मैं मरून खिन तैय्यार छूँ। लेकिन इनारा लगाई दोष एक लै सच्ची नाहातिन, त कोई ले मैंस इनारा हात में नै सौंप सकनो। मैं महाराजा थैं अपील करछूँ!”</verse>
				<verse number="12">तब फेस्तुस राज्यपाल ले मंत्रीन का सभाक दगाड़ विचार करभेरन जबाब दीछ, “तैंले महाराजा का द्वारा न्याय करि जाना की माँग कर रैछ, त अब तैं उक पास जालै।”</verse>
				<verse number="13">थ्वाड़ा दिन हुना का बाद राजा अग्रिप्पा और उकी नानि बैनि बिरनीके फेस्तुस राज्यपाल थैं मुलाकात करून खिन कैसरिया शैहर में आयान।</verse>
				<verse number="14">उनारा भौत दिन वाँ रूना का बाद, फेस्तुसल राज्यपाल ले पौलुसो को मुकदमा राजा का सामुनि पेश करभेरन क्योछ, “याँ एक आदिमी छै, जैस फेलिक्स राज्यपाल कैद भटे छोड़ी ग्योछ।”</verse>
				<verse number="15">और जब मैं यरूशलम शैहर में छूँ, तब वाँ प्रधान याजकून का और यहूदी अगुवान ले उक खिलाफ दोष लगाभेरन बिनती करछ्य कि ऊस मौत सजा कि हुकुम दी जौ।</verse>
				<verse number="16">मैंले उनुस जबाब दीछ, “रोमीन को यो नियम-कानून छै कि जब तलक दोषीस उमें आरोप लगून वालाक सामुनि अपून बचाव में बोलना को मौक नै मिल जौ, तब तलक ऊस सजा खिन नै सौंपी जा सकूनो।”</verse>
				<verse number="17">येक कारण जब यहूदी अगुवा म्यारा दगाड़ याँ कैसरिया शैहर में आयान, तो मैले के देर नै करि, लेकिन दुसारा दिन अदालत में बैठाभेरन, मैंले हुकुम दीछ की पौलुस अदालत में ल्याई जौ।</verse>
				<verse number="18">जब उमें दोष लगूनवाला ठाड़ भ्यान, त उनूनले इसी बुरी बातुन को दोष नै लगा सक्या, जसो मैंले सोचि राखछ्यो।</verse>
				<verse number="19">लेकिन उनार मन-मुटाव उक दगाड़ अपून धर्माक थ्वाड़ा बाता का कारण छ्यो और यीशु नामोको एक आदिमी का बारिमें ले जो मरि ग्योछ, लेकिन पौलुस उक ज्यून हुना को दावा करछो।</verse>
				<verse number="20">म्यारा समझ में यो नै उन, कि यो बात की पुछ-ताछ कसीकैं करि जौ। येक कारण मैले उथै पुछ्छै, “क्या तैं यरूशलम शैहर खिन जालै, की वाँ इन बातुन को मुकदमा हो?”</verse>
				<verse number="21">“लेकिन जब पौलुसले यो विनती करछ्य, कि उकी सुणवाई महाराजा का याँ हो; येक कारण मैले हुकुम दीछ कि जब तलक मैं ऊस महाराजा का पास नै भेजून, तब तलक उ कैद में रौलो।”</verse>
				<verse number="22">तब राजा अग्रिप्पा ले फेस्तुस राज्यपाल थैं क्योछ, “मैले पौलुस की बात सुणून चाँछू,” तब राज्यपाल ले क्योछ, “तुम भोल सुण लिया।”</verse>
				<verse number="23">लेकिन दुसारा दिन, राजा अग्रिप्पा और उकी नानि बैनि बिरनीके भौत धूम-धामले आभेरन सेनापतिन और शैहरा का खास लोगून का दगाड़ अदालत में आयान, तब फेस्तुस राज्यपाल ले हुकुम दीछ, की पौलुस स ल्याई जौ।</verse>
				<verse number="24">फिर फेस्तुस राज्यपाल ले क्योछ, “हे राजा अग्रिप्पा, और याँ आईनाक सब लोगों, यो आदिमी स देखा, जैक बारिमें सब यहूदीन ले यरूशलम शैहर में और याँ ले जोर-जोरले मैंथैं विनती करछ्य, कि यो ज्यून रूना को लायक नाहातिन।”</verse>
				<verse number="25">लेकिन मैं समझ गयूँ कि यैले मौतेकी सजा का लायक कोई कसूर नै कर रैछ; और जब उले अपूनास कैसरा थैं फैसला करना की विनती करछय, तो मैंले ऊस रोम शैहर खिन भेजना को फैसला करछय।</verse>
				<verse number="26">हमारा सम्राट कैसर स उक बारिमें लिखून खिन कोई खास बात नै मिली; येक कारण मैं यैस तुमार सामुनि और खास करभेरन हे राजा अग्रिप्पा, तुमार सामुनि ल्या रयूँ, कि तुमार सामुनि पुछ-ताछ करना का बाद मैंस लिखून खिन कोई कारण मिल जौ।</verse>
				<verse number="27">क्याखिनकि कोई ले कैदी स जेल भेजून और जो आरोप उमें लगाई ग्या, उनून नै बतून, मैंस निको नै लाग्यो।</verse>
			</chapter>
			<chapter number="26">
				<verse number="1">राजा अग्रिप्पा ले पौलुसथैं क्योछ, “त्यारा पास अपून बचाव में बोलना को मौक छै।” तब पौलुसले ठाड़ होभेरन और हात ले ईशार करभेरन उनून शान्त करभेरन क्योछ,</verse>
				<verse number="2">“हे राजा अग्रिप्पा, जतुक बातुन को यहूदी अगुवा मैंमें दोष लगूनान, आज तुमार सामुनि उनोरो जबाब दीन खिन मैंमें अपूनास धन्य समझछूँ।”</verse>
				<verse number="3">की तैं यहूदीन की रीति-रिवाजून और विवादून जाणछा, येक कारण मैं तुमूनथैं विनती करछूँ, की आराम ले मेरि बात सुणो।</verse>
				<verse number="4">“म्योरो चाल-चलन जवानी भटे म्यारा देशाक लोगून में और यरूशलम शैहर में जसो छ्यो, यो सब यहूदी जाणनान।</verse>
				<verse number="5">उन मैंस जवानी भटे जाणनान, अगर उन चाँन उन यो गवाही दी सकनान की मैं त एक फरीसी लोगून की नियाती रयूँ, जो की हमार धर्मोको कट्टर समूह छै।</verse>
				<verse number="6">क्याखिनकि मैंले अपूना पूर्वजून का परमेश्वरा का द्वारा दीईना का वादा में अपूनी आश राखछ्य, येक कारण मैंमें मुकदमा चल र्योछ।</verse>
				<verse number="7">उई वादाक पुर हुना की आश में, हमार बारा कुल अपून पुर मनले दिन-रात परमेश्वरै की सेवा करनै र्यान, हे राजा, म्यारा योई वादाक कारण आज, यो यहूदी मैं-में दोष लगून मर्यान।”</verse>
				<verse number="8">तब पौलुसले भीड़ में सबै यहूदीनथैं क्योछ, जब की परमेश्वर मरीनाक लोगून ज्यून करछो, त तुमार याँ यो बात में विश्वास क्याखिन नै करि जानो?</verse>
				<verse number="9">मेरि अपूनी मान्यता ले योई छी कि नासरताक यीशुक नामाक बिरोध में मैंस भौत कुछ करून जरूरी छै।</verse>
				<verse number="10">और मैले यरूशलम शैहर में इसो करछ्य ले। मैले प्रधान याजकूनथैं अधिकार पाभेरन भौत पवित्र लोगून जेल में डाली दीछ, और जब उनुस मार डाली जाँछ्या, त मैंले उनार बिरोध में अपूनी राई दीछ।</verse>
				<verse number="11">हर यहूदी सभाघर में मैं उनून सजा दिलाभेरन मसीह यीशु की बुराई करून खिन मजबूर करना की कोशिश ले करछूँ। याँ तलक कि मैं गुस्सा का मारे इसो पागल हो गैछ्यू की दुसारा शैहर में जाभेरन उनून सतूछ्यूँ।</verse>
				<verse number="12">यो सफर में प्रधान याजकून भटे अधिकार और अनुमति लीभेरन दमिश्क नगर खिन जानमरेछ्यू।</verse>
				<verse number="13">त हे राजा, बाँट में छकाल का बखत मैंले सूरज है ले तेज उज्यालो आकाश भटे उन देखछ्य, जो म्यार और म्यार दगड़ियान चारों तरफ चमकून मरेछ्यो।</verse>
				<verse number="14">और जब हम सब भिमें खिती पड़ियाँ, तब मैंस इब्रानी भाषा में, मैंथैं कुनै यो आवाज सुणाई दीछ, “हे शाऊल, हे शाऊल, तैं मैंस किलैं सतून मरेछै? तै इसो करभेरन अपून खुटान में बन्काटो किलै मारून मरैछै।”</verse>
				<verse number="15">मैले क्योछ, “हे प्रभु, तुम को छा? प्रभु ले क्योछ, मैं यीशु छूँ, जैस तैं सतूछै।”</verse>
				<verse number="16">लेकिन तैं उठ, अपून खुटान में ठाड़ होज्या; किलैकी मैंले तैंस येक कारण दर्शन दीछ कि तैंस उन बातुन को ले सेवक और गवाह ठैरूँ, ताकि तैं लोगून बतालै यो दर्शनाक बारिमें जो तैंले देख्यान और उनोरो ले जिनून खिन मैं तैंस दर्शन द्यूलो।</verse>
				<verse number="17">मैं तैंस त्यारा लोगून भटे और गैर-यहूदीन का हात भटे बचूनै रूँलो, जिनारा पास मैं अब तैंस येक कारण भेजछूँ,</verse>
				<verse number="18">कि तैं उनार आँखान खोल, ताकि उनून अन्यारा में भटे निकालभेरन उज्याला तरफ उन, और शैतान का अधिकार भटे परमेश्वरा का तरफ उन, तब परमेश्वर उनार पापून माफ कराला, और उन लोगून का दगाड़ बिरासत पाला जो मैंमें विश्वास करना क द्वारा पवित्र करि ग्यान।</verse>
				<verse number="19">येक कारण, हे राजा अग्रिप्पा, मैंले उ स्वर्गीय दर्शन को पालन करछ्य।</verse>
				<verse number="20">पैलि दमिश्क नगर में, फिर यरूशलम शैहरा का रूनवाला में, और पुरा यहूदिया प्रदेश में और गैर-यहूदी लोगून में प्रचार करनै रयूँ, कि अपून पापून भटे पश्चाताप करा और परमेश्वरा का तरफ मन फिराव करभेरन निका कामूनको सबूत दी की उनूनले सच्ची-मुच्ची पापून भटे पश्चाताप कर है छै।</verse>
				<verse number="21">योई कारण छै कि जब मैं मन्दिर छ्यूँ, तब यहूदी ले मैंस पकड़ भेरन मारनाकि कोशिश करछ्य।</verse>
				<verse number="22">लेकिन मैं परमेश्वर की मद्दत ले आज तलक ज्यून छूँ, और नॉन-ठूला सबून का सामुनि गवाही दी छूँ, मैं उन बातुन छोड़ के नै कुनू, जो परमेश्वरो को संदेश दिनवालान ले और मूसा ले लै क्योछ की हुनवाली छन।</verse>
				<verse number="23">कि मसीह स दुख उठून होलो, और उई सबून है पैलि मरिन में भटे ज्यून है भेरन, यहूदीन और गैर-यहूदीन का बीच यो घोषणा करून खिन कि उन बच सकनान, जो उज्याला का नियाती छन।</verse>
				<verse number="24">जब पौलुस इसा तरीका ले अपून बचाव में यो सब कुनमरेछ्यो, तब फेस्तुसले राज्यपाल ले जोरले क्योछ, “ हे पौलुस, तैं पागल छै। भौत ज्ञान ले तैंस पागल कर हैछ।”</verse>
				<verse number="25">पौलुसले जबाब दीछ, “हे राज्यपाल फेस्तुस, मैं पागल न्हैतिनू, लेकिन सच्चाई और समझदारी ले बात कुछूँ।</verse>
				<verse number="26">राजा ले जिनारा सामुनि मैं निडर होभेरन बोलू मरयूँ, ये बातुन जाणछूँ, और मैंस विश्वास छै, कि इन बातुन में भेट कोई ले उहै छिपीनाकि नै रै, क्याखिनकि उ घटना का बारिमें सब लोगून पत्तो छै।</verse>
				<verse number="27">हे राजा अग्रिप्पा, क्या तै परमेश्वरा का संदेश दिनवाला में विश्वास करछै? होई मैं जाणछूँ, कि तै विश्वास करछै।”</verse>
				<verse number="28">यो सुणिभेरन राजा अग्रिप्पा ले पौलुसथैं क्योछ, “क्या तैं मैंस थ्वाड़ समझाभेरन मसीही बनून चाछै?”</verse>
				<verse number="29">तब पौलुसले क्योछ, “परमेश्वरथैं मेरि प्रार्थना यो छै, कि जल्दी ले याँ देर ले, केवल तैंई नै, पर जदुक लोग आज मेरि बात सुणनान, म्यारा यो कैद स छोड़िभेरन, उन म्यारा समान मसीह विश्वासी बन जूंन।”</verse>
				<verse number="30">तब राजा अग्रिप्पा और राज्यपाल फेस्तुत और उकी नानि बैनि बिरनीके और उनार दगाड़ बैठून वाला लोग सबै ठाड़ हो ग्या और न्हैग्या।</verse>
				<verse number="31">जब उन भ्यार जानमरेछ्या, उन एक दुसराथैं कुन लाग्यान, “यो आदिमी ले मौत की सजा या जेल में रून लायक को कोई कसूर नै रै।”</verse>
				<verse number="32">राजा अग्रिप्पा ले फेस्तुस राज्यपाल थैं क्योछ, “अगर यो आदिमी ले यो माँग नै करि हुनी महाराजा उको न्याय करो, त छुट सकछ्यो।”</verse>
			</chapter>
			<chapter number="27">
				<verse number="1">जब फेस्तुस राज्यपालाक द्वारा यो तय हो ग्यो कि हम समुन्द्री जहाज में इटली प्रदेश जूला, तब उले पौलुस और थ्वाड़ा कैदीन ले यूलियुस नामोको औगुसस्तुसा पलटनाक एक सुबदारस सौंप दीछ।</verse>
				<verse number="2">अद्रमुतियमु शैहरा का एक समुन्द्री जहाज में जो आसिया प्रदेशा का समुन्द्राक किनार क नगरून भटे होभेरन जान खिन तैयार छ्या। त हमूले उ जहाज में बैठाभेरन सफर खिन न्हैग्या। और उ सफर में जानवालो अरिस्तर्खुस नामोको एक आदिमी ले हमार दगाड़ छ्यो, जो मकिदुनिया प्रदेश को थिस्सलुनीके शैहर भटे आईना को छ्यो।</verse>
				<verse number="3">दुसारा दिन हम सब सिदोन शैहर में पुजियाँ, और यूलियुस सुबदार ले पौलुस में दया करभेरन ऊस उक दगड़ियान क पास जान दीछ की उनूनथैं जरूरी चीज ली अ।</verse>
				<verse number="4">क्याखिनकि जो दिशा में हम जान मरैछ्या उक उलटी दिशा खिन हवा चलून मरैछी, हमूले जहाज स साइप्रस टापू का किनार-किनार लीभेरन गया।</verse>
				<verse number="5">जब हम समुद्र में सफर करभेरन किलिकिया और पंफूलिया प्रदेशून का किनार होभेरन लूसिया का मूरा शैहर में पुज्या।</verse>
				<verse number="6">वाँ सुबदारस सिकन्दरिया शैहर को एक समुन्द्री जहाज मिलछ्य, जो इटली प्रदेश जानवालो छ्यो, और उले हमून उ जहाज में बैठाछ दीछ।</verse>
				<verse number="7">हमून धीरे-धीरे सफर करना ले भौत दिन हो ग्या, हमोरो क्नीदुस नगर पुजून भौत मुश्किल होग्यो किलैकी हवा उलटी दिशा में चलून मरैछी। येक कारण हम सलमोने का सामुनि भटे गुजर भेरन क्रेते टापू का पास भटे होभेरन अघिल बढ़ गयाँ।</verse>
				<verse number="8">और उक किनार-किनार मुश्किल ले जाभेरन उ बन्दरगाह में पुजियाँ जैथैं शुभ बन्दरगाह कुछ्या, जाँ भटे लसया शैहर नजिक छ्यो।</verse>
				<verse number="9">जब भौत दिन बीत ग्या, और समुन्द्री सफर में जोखिम येक कारण हुछ्या किलैकी पश्चातापो दीनो को त्यार खतम ग्योछ और यो उई मौसम छै जब समुंद्र में भौत तूफान हो जाछो। येक कारण, पौलुसले उन सबूनथैं क्योछ,</verse>
				<verse number="10">“हे भाईयो, मैंस लागून मरेछ्य कि हमोरो सफर भौत परेशानी वालो होलो, हमून नै केवल अपून माल और जहाज की परेशानी उठून पड़ोलो बल्कि हमार प्राणून को ले खतरा छै।”</verse>
				<verse number="11">लेकिन सुबदार ले पौलुस की बात का बदला कप्तान और जहाजा का और मालिका क बातुन में ज्यादा ध्यान दीछ।</verse>
				<verse number="12">उ शुभ नामाकी बन्दरगाह में जाड़ा का दिन बितून खिन भौत मुशकील छ्या, येक कारण ज्यादातर लोग वाँ भटे अघिल जान चाँछ्या। जेले कि उन फीनिक्स शैहर में पुजभेरन जाड़ा को मौसम वाँ काट सकां। यो क्रेते टापू को एक बन्दरगाह छै, जैको द्वार दक्षिण-पश्चिम और उत्तर-पश्चिमाक तरफ खुल छ्यो।</verse>
				<verse number="13">जब थ्वाड़ा-थ्वाड़ा दक्षिण भटे हवा चलून लागछ्य, उनूनले सोचछ्य कि उन करून सक्षम हो ज्यूला, जो उनूनले करना को फैसला करछ्य। येक कारण उनूनले लंगर उठाभेरन और क्रेते टापू का किनार-किनार जहाज चलूना की कोशिश करछ्य।</verse>
				<verse number="14">लेकिन थ्वाड़ा देर में जमीना का तरफ भटे उत्तर पूर्वी तूफान उठछ्य, जो “यूरकुलीन” कैहलूछो।</verse>
				<verse number="15">जब जहाज तूफान का चपेट में आछ, तब जहाज तूफान का सामुनि बेबस हो ग्यो, येक कारण हमूनले जहाज स तूफान का बहवा में छोड़ दीछ, और इसीकैं बगूनै न्हैग्यो।</verse>
				<verse number="16">तब कौदा नामाका एक नान टापू का आड़ में बगनै-बगनै हम मुश्किल ले जीवन रक्षक नाव स बश में नै कर पाया।</verse>
				<verse number="17">फिर जहाज का कर्मचारीन ले बचाव वाली नाव स जहाज में मलिकैं खींचभेरन जहाज को बचाव करून खिन तलि भटे लीभेरन मलि तक ज्योड़ान ले कसभेरन बाँदि दीछ। और सुरतिस का खाड़ी में कम पानिक कारण रेत में जहाज फँस जानाक डरले उनूले लंगर स पानि में डाल दीछ और ऊस पानिक दगाड़ बगून दीछ।</verse>
				<verse number="18">दुसारा दिन ले तूफान हमून जोरले झकजोरेनै रैछ, यो कारण ले हम जहाज को माल समुन्दर में खितून लाग्यान।</verse>
				<verse number="19">तीसारा दिन उनूनले अपून हातून ले जहाज का उपकरणून तलि खित दीछ।</verse>
				<verse number="20">और जब भौत दिनून तलक नै सूरज, नै कोई तारा देखीन मरेछ्या, और अब तूफान और ले तैज है भेरन चलून लागछो, त आखिर में हमरि बचना की पुरी आश लै खतम है गै।</verse>
				<verse number="21">जब उनोरो भौत दिनून तक चिन्ता कारण खानो खाना को ले मन नी छ्यो। तब पौलुसले उनार बीच में ठाँड़ होभेरन क्योछ, “भाईयो, निको त यो हुनो कि तुम मेरि बात मानभेरन क्रेते टापू भटे अघिल नी बढ़ना और नै यो मुसीबत उनी और नै यो नुकशान हुनो।</verse>
				<verse number="22">लेकिन मैं तुमून समझूछूँ कि तुम हिम्मत राँखा, किलैकी तुमून में भटे कैको ले प्राणै के नुकशान नै हो, केवल जहाज को नुकशान का अलावा।</verse>
				<verse number="23">किलैकी परमेश्वर जैको मैं छूँ, और जैकी सेवा करछूँ, उक स्वर्गदूत ले आज रात म्यार पास आभेरन क्योछ,</verse>
				<verse number="24">हे पौलुस, तैं जन डर! तैंस महाराजा का सामुनि ठाँड़ हुन छै। और देख, परमेश्वर ले सबून जो त्यारा दगाड़ सफर करनान, उन सब बच जाला।</verse>
				<verse number="25">येक कारण, हे भाईयो, तुम हिम्मत राँखा, क्याखिनकि मैं परमेश्वर में विश्वास करछूँ, कि जसो मैंथैं कई ग्योछ, ऊसो होलो।</verse>
				<verse number="26">हम जरूर कोई टापू में पुजून होलो।”</verse>
				<verse number="27">चौदवाँ दिन रात में, जब हम अद्रिया समुन्द्राक लहरून का थपेड़ून का बीच में अघिल बढ़ून मरैछ्या, अधरात में जहाज चलूनवालान यो अहसास भ्योछ कि उन जमीन पास पुजून मर्यान।</verse>
				<verse number="28">जब उनूनले समुन्दर की पानि कि गहराई नापछ्य जो सैतीस मीटर छी और थ्वाड़ा अघिल जाभेरन फिर गहराई नापछ्य तो सत्ताईस मीटर निकलछ्य।</verse>
				<verse number="29">उनुस डर लागून मरेछी कि काँई हम चट्टान में नै टकरै जू, येक कारण उनूनले जहाज रोकून खिन उक पछिल भटे चार लंगर पानि में खित दीयान और बेशबरीले उज्यालो हुना को इंतजार करून लाग्यान।</verse>
				<verse number="30">लेकिन जब नाव चलूनवाला जहाज भटे भाजून चाँनमरेछ्या, और उनूनले जहाज का अघिल वाला हिस्सा में लंगर खितनाक बहाना ले जीवन रक्षक नाव स समुन्द्र में उतारी दीछ।</verse>
				<verse number="31">त यो देखिभेरन पौलुसले सुबदार और सिपाईन थैं क्योछ, “अगर यो जहाज में नै रौला, तो तुम लोग नै बचि सकना।”</verse>
				<verse number="32">तब सिपाईनले जियोड़ा काटिभेरन जीवन रक्षक नाव स खित दीछ।</verse>
				<verse number="33">जब रात्तै हुन लागछी, त पौलुसले यो कैभेरन, सबून खानो खान खिन विनती करछ्य, “आज चौदा दिन हो ग्यान तुमूनले चिन्ता का कारण के नै खा राख्यो।</verse>
				<verse number="34">येक कारण मैं तुमून समझूछूँ कि के खा ली, जेले तुमोरो बचाव हौ; किलैकी तुमून में भटे कैको एक बाल ले नै खितीलो।”</verse>
				<verse number="35">और यो कैभेरन उले रवाटा लीभेरन सबून का सामुनि परमेश्वरो को धन्यबाद करछय और टोड़िभेरन खानो लाग्यान।</verse>
				<verse number="36">तब सबून हौंसला आछ और उनूनले खानो खाछ।</verse>
				<verse number="37">जहाज में हम सब मिलाभेरन द्वी सौ छिहत्तर लोग छ्या।</verse>
				<verse number="38">जब सबून ले पेट भरभेरन खा लीछ, तब उनूनले ग्यूँका बोरिन समुन्द्र में खितभेरन जहाज स हल्को करून लाग्यान।</verse>
				<verse number="39">जब दिन निकलछ्य, त तब उनूनले उ देश स नै पछ्याणियो, लेकिन उनेरि नजर एक सुखी जमीन में पड़छ्य, जैक किनार रेतीला छ्या। और सोचछै की अगर हो सकों त यो किनार में जहाज ठाँड़ कर दीनू।</verse>
				<verse number="40">तब उनूनले लंगर स खोलभेरन समुन्द्र में छोड़ दीछ, और उई बखत पतवारून का ज्योड़ो खोल दीयान। फिर उनूनले जहाजा का सामुनि वाला पाल उठाछ ताकि हवा जहाज अघिलकैं बढ़ौ और हम किनाराक तरफ जा सका।</verse>
				<verse number="41">जहाज पानि तलि रेत का टिला में टकराभेरन उको अघिलो हिस्सा फस ग्यो। और उ हिल नै सक्यो। और उक पछिलो को हिस्सा लहरून ले टुटून लागछ्य।</verse>
				<verse number="42">तब सिपाईनले इसो सोचछ्य कि काँई इसो नै हो कि कैदी बौं काटिभेरन भाजि जौ, येक कारण ले उन उनून मार दिन चाँछ्या।</verse>
				<verse number="43">लेकिन सुबदार युलियुस ले पौलुस स बचूनाकि इच्छाले उनुस इसो करून है रोक छै, और यो क्योछ, की जो तैर सकनान, उन पैलि फाटंग मारभेरन किनार में जून।</verse>
				<verse number="44">और बाकि लोग टूटिना का जहाजा का तखतान या मलवा में न्हैग्या। येक कारण सब लोग सुरक्षित बच ग्या।</verse>
			</chapter>
			<chapter number="28">
				<verse number="1">जब हम सब बचभेरन किनार पुजियाँ, तब हमून पत्तो चलछ्य कि ऐल हम माल्टा नामाका द्वीप में छै।</verse>
				<verse number="2">तब वाँक लोगून ले हमून में दया करछय; किलैकी बरखा हुना का कारण भौत ठंडो छ्यो, येक कारण उनूनले आगो जलाभेरन हमोरो स्वागत करछय।</verse>
				<verse number="3">जब पौलुसले लाकाड़ जाम करभेरन आग में राख्यान, तब एक स्याप आगा की ताप का कारण उमें भटे निकलछय और पौलुस को हात लपट दीछ।</verse>
				<verse number="4">जब वाँक लोगून ले उ स्यापस पौलुसा का हात में लटकिनाको देखिभेरन आपस में कुन लाग्यान, “पक्का यो आदिमी खूनी छै, समुन्द्र में त बचि ग्यो, लेकिन हमरि न्याय की देबी ले ऊस ज्यून नै रून दीयो।”</verse>
				<verse number="5">तब उले स्यापस आगो में छटक दीछ, और ऊस के नुकशान नै भ्यो।</verse>
				<verse number="6">और उन सब लोग यो देखून मरेछ्या, कि कब उक हात सुजल जालो उ बिहोश है भेरन मरि जॉलो। जब उन भौत देर तलक इंतजार करने में छ्या, और ऊस के नै भ्यो, तब उन अपूनी सोच बदलभेरन कुन लाग्यान, “यो कोई देवता छै।”</verse>
				<verse number="7">यो जाग का नजिक वाँक ठूलो अधिकारी पुबलियुस नामाका आदिमीक गाड़ा छ्या। उले हमून अपून घर लिजाभेरन तीन दिन तलक हमरि खातिरदारी करछ्य।</verse>
				<verse number="8">पुबलियुस को बबा जर और दस्त ले बिमारी पड़ी र्योछ, येक कारण पौलुस उनार पास भितर जाभेरन प्रार्थना करछय, और उमें हात राँखभेरन ऊस चंगो करछय।</verse>
				<verse number="9">जब इसो भ्योछ, त उ टापू का सब बिमार लोग उक पास आभेरन ठीक हुन लाग्यान।</verse>
				<verse number="10">उनूनले हमोरो भौत आदर करछय, और हम तीन मैंनाक बाद जब हम जान खिन तैय्यार छ्या, त जो ले हमून खिन जरूरी छ्यो, जहाज में राख दीछ।</verse>
				<verse number="11">तीन मैंनाक बाद जब हम एक जहाज में सफर शुरू करछ्य, जो सिकन्दरिया भटे आछ, और जो टापू में तूफान का कारण रूकीना को छ्यो। और यो जहाज का अघिल हिस्सा में यूनानी जुड़वा देवतान कि मूर्ति गड़ीना की छी।</verse>
				<verse number="12">सुरकूस बन्दरगाह में लंगर डालभेरन हम तीन दिन तलक वाँ रया।</verse>
				<verse number="13">वाँ भटे अघिल जाभेरन हम रेगियुस शैहर पुज्याँ। त अघिल दिन दक्षिण तरफ भटे हवा चलून लागछै, तब तिसार दिन पुतियुलि शैहर में आयान।</verse>
				<verse number="14">वाँ हमून थ्वाड़ा विश्वासी भाई मिल्यान, और उनार कुंनान ले हम याँ सात दिन तक उनार दगाड़ रया। और उक बाद, हम पैदल बाट भटे रोम शैहरा का तरफ अपूनो सफर शुरू करछ्य।</verse>
				<verse number="15">रोम शैहरा का थ्वाड़ा विश्वासी भाईन ले सुणछै, कि हम उनमरियाँ और हमून मिलून खिन और हमून रोम लीजान खिन अप्पियुस नगरा का बजार और तीन-सराय तक आयान। जिनून देखिभेरन पौलुस स भौते हिम्मत भैछ, और परमेश्वरो को धन्यबाद करछ्य।</verse>
				<verse number="16">हम रोम शैहर में पुज्या, तो पौलुसैस यो अनुमति मिलगै कि उ पैहरा दीन वाला एक सिपाई का दगाड़ जाँ चाछो, वाँ रै सकछो।</verse>
				<verse number="17">तीन दिनाक बाद उले यहूदीन का खास लोगून बुलाछ, और जब उन जॉम भ्यान, तब उले उनूथैं क्योछ, “हे भाईयो, मैले अपून लोगून या पुरखानका रीति-रिवाज का खिलाफ के नै कर्यो, फिरले मैंस यरूशलम शैहर भटे बन्दी बनाभेरन रोमी सरकार हात सौंपी ग्यो।”</verse>
				<verse number="18">उनूनले जाँच-पड़ताल करना का बाद मैंस छोड़ी दिन चाँछ, क्याखिनकि मैंमें मौतेकी सजा लालक कोई दोष नी छ्यो।</verse>
				<verse number="19">लेकिन जब यहूदी अगुवा बिरोध में बोलून लाग्यान, तब मैंस महाराजा स अपील करून पड़छ्य; यो नै की मैंस अपून लोगून में दोष लगून छ्यो।</verse>
				<verse number="20">येक कारण मैले तुमून याँ बुलाछ, कि मैं तुमार दगाड़ मिलभेरन बात-चीत करूँ; क्याखिनकि यीशु इस्राएली लोगून की उ आश छै, जै कारण ले मैं यो जंजीर ले जकड़ीना को छूँ।</verse>
				<verse number="21">उनूनले पौलुसथैं क्योछ, “नै हमून त्यारा बारिमें यहूदिया प्रदेशा का लोगून थैं चिठ्ठी मिली, और नै वाँ विश्वासी भाईन में भटे केले आभेरन त्यारा बारिमें के नै बतायो, और नै बुरो क्योछ।</verse>
				<verse number="22">लेकिन त्यारा बिचार कि छन? उई हम तैंथैं सुणून चाँनू, की क्याखिनकि हम जाणनू, कि हरेक जाग यो पंथा का बिरोध में लोग बात करनान।”</verse>
				<verse number="23">तब यहूदीन ले पौलुस का दगाड़ मिलना को दिन तय करछ्य। और उ दिन कई लोग जाँ उन रूकीना का छ्या, वाँ उन आयान। पौलुसले रात्तै भटे ब्याला तक उनून परमेश्वरा का राज्य बारिमें मूसा का नियम-कानून और परमेश्वरा का संदेश दिनवालान की किताबून में भटे बताछ। उले इसो येक कारण करछ्य ताकि उन लोग यीशुक बारिमें विश्वास करून।</verse>
				<verse number="24">और थ्वाड़ा लोगून ले पौलुस की बातुन में विश्वास करछ्य, और थ्वाड़ा लोगून ले विश्वास नै कर्यो।</verse>
				<verse number="25">उन आपस में यो बात में सहमत नै भ्या, त पौलुसा का यो एक बात कुना ले न्हैग्या, “पवित्र आत्मा ले परमेश्वरा का संदेश दिनवाला यशायाह जरियाले तुमार पुरखानथैं ठीक क्योछ।”</verse>
				<verse number="26">“जाभेरन इन लोगून थैं कौ, कि उन सुणनै रौला, लेकिन समझ नी सकाला और देखनै त रौला, लेकिन उन पछ्याण नी पाला।”</verse>
				<verse number="27">क्याखिनकि इन लोगून को मन निठूर है ग्यो, और यो कानून ले नै सुणनान, आँखून ले नै देखनान, इसो होलो कि इसो नै हो कि आँख ले देखनान, कानून ले सुणनान, मन ले समझून और उन म्यारा तरफ मुड़ून और मैं उनून चंगो करूँलो।</verse>
				<verse number="28">येक कारण, मैं चाछूँ कि तुम यो जाण ली कि परमेश्वरा का यो उद्धारो को सुसमाचार गैर-यहूदी लोगून का पास भेजि ग्योछ, और उन मानाला ले।</verse>
				<verse number="29">जब उले यो क्योछ त यहूदी आपस में भौत विवाद करून लाग्यान, और वाँ भटे न्हैग्या ।</verse>
				<verse number="30">येक बाद पौलुस अपून किराया में लिईनाक घर में पुर द्वी साल र्योछ और जो लोग उक पास उछ्या, उन सबून को स्वागत करछ्यो,</verse>
				<verse number="31">और बिना रोके-टोके और भौत हिम्मत राखभेरन परमेश्वरा का राज्य को प्रचार करछो और प्रभु यीशु की बातुन सिखूनै रूछो।</verse>
			</chapter>
		</book>
		<book number="45">
			<chapter number="1">
				<verse number="1">मैं पौलुस यो चिठ्ठी स लिखछूँ, जो यीशु मसीह को सेवक छूँ, परमेश्वरे ले मैंस प्रेरित हुन खिन चुन छै, और परमेश्वरा का तरफ भटे उ सुसमाचारो को प्रचार करून खिन अलग करिनाको छूँ।</verse>
				<verse number="2">परमेश्वरे ले पैलि भटे अपून संदेश दिन वालान का द्वारा पवित्रशास्त्र में उ सुसमाचारो को वादा करीना को छ्यो,</verse>
				<verse number="3">यो सुसमाचार उक च्योलो हमार प्रभु यीशु मसीहाक बारिमें छै। उको जन्म एक इन्सानाक रूप में दाऊद राजा का वंश में भ्योछ।</verse>
				<verse number="4">और पवित्र आत्माक अनुसार मरिन में भटे ज्यून हुना का कारण सामर्थ का दगाड़ परमेश्वरो को च्योलो ठैहरछ्य। उ यीशु मसीह हमोरो प्रभु छै।</verse>
				<verse number="5">मसीहाक द्वारा परमेश्वरे ले मैंस अनुग्रह और प्रेरिताई की सेवा दी गैछ, ताकि उक नामाका कारण सब जातिक लोग मसीह में विश्वास करून और उको हुकमो को पालन करून।</verse>
				<verse number="6">तुम जो रोम शैहर में रूछा, तुम ले इन लोगून को हिस्सा छा जिनून यीशु मसीहा का हुन खिन बुलाई गैछा।</verse>
				<verse number="7">मैं यो चिठ्ठी रोम शैहर में रून वाला उन सब लोगून खिन लिखूनमर्यू, जो परमेश्वरा का प्रिय छन, और जिनून परमेश्वरे ले अपून लोग हुनखिन चुनिनाक छन, हमार पिता परमेश्वर और प्रभु यीशु मसीह में तुमून अनुग्रह और शान्ति मिलनै रौ।</verse>
				<verse number="8">सबून है पैलि में तुम सबून खिन यीशु मसीहाक द्वारा अपून पिता परमेश्वरो को धन्यवाद करछूँ, किलैकी यीशु मसीह में तुमार विश्वास की चर्चा पुरो संसाराक लोगून में हुनमरेछ।</verse>
				<verse number="9">परमेश्वर जिनरी सेवा मैं अपून पुर मन ले उनार च्यालाक बारिमें सुसमाचार लोगून सुणाभेरन करछूँ, उई मेरि गवाही छै, कि मैं तुमून अपूनी प्रार्थना में लगातार याद करछूँ।</verse>
				<verse number="10">और रोज मैं अपूनी प्रार्थना में विनती करछूँ, कि अगर हो सकों त मैं परमेश्वरे की इच्छा का अनुसार मिलून खिन ऊँ।</verse>
				<verse number="11">क्याखिनकि मैंस तुमार दगाड़ मिलना की भौत इच्छा छै, ताकि मैं तुमून कोई आत्मिक आशीष दियूँ, जैले तुम विश्वास में मजबूत होज्या।</verse>
				<verse number="12">म्योरो कुनाको मतलब यो छै, जब मैं तुमार बीच में उलो, तब तुम और मैं आपस में एक-दुसराक विश्वासा का द्वारा हिम्मत पाला।</verse>
				<verse number="13">और हे म्यारा विश्वासी भाईयों, मैं चाछूँ कि तुम जाण ली कि मैं बार-बार तुमार पास उन चाछ, कि जसीकैं मैंले गैर-यहूदीन का बीच में मसीह खिन शिष्य बन्याँ, उसकैं तुमून में ले बनू, लेकिन अब तक यैमें रूकावट पढ़नै रूछी।</verse>
				<verse number="14">मेरि जिम्मेदारी सब लोगून सुसमाचार सुणूना की छै, चाहे उन यूनानी बोली जाणून वाला बुद्धिमान हुन या नै जाणून वाला मूर्ख हुन चाहे समझदार हुन या नासमझदार हुन।</verse>
				<verse number="15">येक कारण मैं तुम रोम शैहरा का लोगून सुसमाचार-प्रचार करून खिन बिल्कुल तैय्यार छूँ।</verse>
				<verse number="16">किलैंकी मैं यीशु मसीह को सुसमाचार में पुरो विश्वास करछूँ, अपूनी सामर्थ ले परमेश्वर उन सबून को उद्धार करछो, जो यो सुसमाचार में विश्वास करनान, सबून है पैलि त यहूदी लोगून खिन और फिर उनून खिन जो यहूदी नाहातिन।</verse>
				<verse number="17">क्याखिनकि सुसमाचार में परमेश्वर यो प्रकट करछो की उन लोगून पुर रूपले विश्वास करना का द्वारा धर्मी ठैहरूनाक लायक छन, जसकैं पवित्रशास्त्र में लिखीन को छै, “विश्वासले धर्मी जन ज्यून रोलो।”</verse>
				<verse number="18">परमेश्वरो को क्रोध त, जो सब बुराई और बुर करनान उन लोगून में स्वर्ग भटे प्रगट हुछो, जो अपून बुर कामून का द्वारा लोगून परमेश्वरा का बारिमें सच्चाई जाणून है रोकनान।</verse>
				<verse number="19">येक कारण उन आसानी ले परमेश्वरा का बारिमें सही ढंगले समझा सकछ्या क्याखिनकि परमेश्वरे ले यैस उनूनमें खुद प्रगट कर रैछ।</verse>
				<verse number="20">परमेश्वर की अनन्त सामर्थ और उनार गुणून नै देखी जा सकना, लेकिन इन बातुन परमेश्वरले संसाराक शुरू भटे, अपूनी बनाईनाक सब चीजून का द्वारा बताईना को छै। येक कारण उन लोगून का पास कोई बाहाना नाहातिन की उन परमेश्वर स नै जाणना।</verse>
				<verse number="21">येक कारण परमेश्वर स जाणिभेरन ले उनूनले ऊस परमेश्वरा का रूप में आदर नै दीयो और नै उनोरो धन्यवाद करछ्य, लेकिन मूर्खता की बात सोचनान, याँ तक कि उनार मूर्ख बिचार सब गलत छन।</verse>
				<verse number="22">उन अपून आपस बुद्धिमान समझभेरन मूर्ख बन ग्या।</verse>
				<verse number="23">उनूनले हमेशा ज्यून रूनवाला परमेश्वरे की महिमा छोड़भेरन, नाशवान लोगून, और चिड़ियान, चौपायों और रेगुन वाला जन्तुन कि मूर्तिन की अराधना करछ्य।</verse>
				<verse number="24">येक कारण परमेश्वरे ले उनून उनार मन कि अभिलाषानक अनुसार अशुद्धता खिन छोड़ दीयान, कि उन आपस में बुर कामून में अपून शरीरो को अनादर करून।</verse>
				<verse number="25">क्याखिनकि उनूनले परमेश्वरा का बारिमें सच्चाई में विश्वास करून है इनकार करनान, और उनूनले ऊस अपनाछ, जो झूठ छै। उनूनले परमेश्वरा का बजाय संसारे की अराधना और सेवा करछ्य। परमेश्वर जो सब चीजून को बनूनवालो छै उकी महिमा हमेशा हुनै रौ। आमीन।</verse>
				<verse number="26">येक कारण परमेश्वरले उनून उनार बुर बिचारून का बश में छोड़ दीछ; और याँ तक कि उनार स्यैनिन ले जायज रिश्तान दुसारा स्यैनिन का दगाड़ नाजायज रिश्तान में बदल डालछय।</verse>
				<verse number="27">उसीकैं आदिमी ले स्यैनिन का दगाड़ जायज रिश्ता छोड़भेरन, आपस में कुकर्म करभेरन बर्बाद हुन लाग्यान, और आदिमीन ले आदिमीन का दगाड़ कुकर्म करभेरन अपून गलत कामून की ठीक सजा पाछ।</verse>
				<verse number="28">किलैंकी जब उनूनले परमेश्वरे स अपनून मूर्खता समझछै, त परमेश्वरे ले लै उनून सब बुर काम करून खिन उनार बुर मनाक बश में छोड़ दीछ।</verse>
				<verse number="29">येक कारण कि उन सब प्रकाराक अधर्म, और दुष्टता, और लोभ, और बैरभाव ले भरि ग्यान; और डाह, और हत्या, और झगाड़, और छल, और जलन ले भरि ग्यान और चुगलखोरून,</verse>
				<verse number="30">बदनाम करूनवाला, निन्दा करूनवाला, परमेश्वर भटे घृणा करूनवाला, दुसरान को अनादर करूनवाला, घमंडी, डीगमार, बुर-बुर बातुन बोलूनवाला, ईजा-बाबको हुकुम नै मानून वाला।</verse>
				<verse number="31">मूर्ख और विश्वासघाती, निका ब्यवहाराक बिना, कठोर और निर्दयी हो ग्यान।</verse>
				<verse number="32">उन त परमेश्वरे की यो बात ले जाणनान कि इस-इस काम करून वालान मौत की सजा की हकदार हुनान, फिरले उन नै केवल खुद इसो काम करनान, बल्कि इसा बुर काम करून वालान की तारीफ ले करनान।</verse>
			</chapter>
			<chapter number="2">
				<verse number="1">येक कारण तैं यो सोचनै होलै की तैं इस लोगून में दोष लगा सकछै, तैं जो दुसरान में लगूछै त्यारा पास कोई बाहान नाहातिन। किलैकी जै बात में तैं दुसरान में दोष लगूछै, उई बात में अपूनास ले दोषी ठैहरू छै, येक कारण तैं जो दोष लगूछै, खुदै उई काम करछै।</verse>
				<verse number="2">हमून पत्तो छै, की परमेश्वर उनून जरूर सजा द्याला, जो इन बुर कामून करनान।</verse>
				<verse number="3">और जब की तैं जो बुर काम करून वालान में दोष लगूछै। और खुद उई काम करछै, त क्या तै यो समझछै कि परमेश्वरा का दण्ड है बचि जाले?</verse>
				<verse number="4">क्या तैं परमेश्वरे की भलाई, और शहनशीलता, और दया स तुच्छ जाण छै? क्या तैं यो नै समझनै की परमेश्वरे की भलाई तैंस पापून भटे पश्चाताप करना का बारिमें सिखूछी?</verse>
				<verse number="5">लेकिन तैं हठी छै और अपून पापून भटे पश्चाताप करून है मना करछै। येक कारण जै दिन परमेश्वर अपूनो क्रोध दिखालो, उमें परमेश्वरो को सच्चो न्याय होलो, जै दिन परमेश्वर न्याय कराला उ दिन परमेश्वर तैंस कड़ी सजा द्योलो।</verse>
				<verse number="6">उ हरेक स उक कामून का अनुसार ईनाम द्योलो।</verse>
				<verse number="7">और जो लोग निका कामून करभेरन महिमा, सम्मान और अनन्त जीवनै की खोज में छन, उनून परमेश्वर अनन्त जीवन द्योलो।</verse>
				<verse number="8">लेकिन जो लोग स्वार्थी छन, और सच्चाई स नै मानना, और जो बुर काम करनान उनूनमें परमेश्वर अपून क्रोध और कोप दिखालो।</verse>
				<verse number="9">और हरेक आदिमी में मुसीबत और खतरा आला, जो बुर काम करनान, परमेश्वर सबून है पैलि यहूदी लोगून को न्याय करोलो और फिर उनोरो जो यहूदी नाहातिन।</verse>
				<verse number="10">लेकिन हरेक निका काम करून वालान स महिमा, सम्मान और शान्ति मिलेली। परमेश्वर सबून है पैलि यहूदी लोगून द्योलो और फिर उनून जो यहूदी नाहातिन।</verse>
				<verse number="11">क्याखिनकि परमेश्वर सबून को न्याय एक समान करोलो।</verse>
				<verse number="12">येक कारण की जिनूनले मूसा का नियम-कानूनक जाणै बिना पाप करछ्य, उन बिना नियम-कानून परमेश्वर भटे सजा पाला; लेकिन जो यहूदी लोग मूसा का नियम-कानून स जाणभेरन पाप करनान, उन ले परमेश्वरे की सजा मूसा का नियम-कानूनक अनुसारै पाला।</verse>
				<verse number="13">क्याखिनकि परमेश्वर उन लोगून धर्मी नै ठैहरून जो मूसा का नियम-कानून स सुणनान लेकिन उनून धर्मी ठैहरूछो जो मूसा का नियय-कानून को पालन करनान जो उ उनून करून खिन कुंछो।</verse>
				<verse number="14">फिर गैर-यहूदी लोग जिनारा पास मूसा का नियम-कानून नाहातिन, उन स्वभाव है मूसा का नियम-कानून में लिखीना की बातुन करनान, तो मूसा का नियम-कानून उनार पास नै हुन पर ले उन यो साबित करनान की मूसा का नियम कानून उनार मनून में छन।</verse>
				<verse number="15">उन यो देखूनान की परमेश्वरा का द्वारा दीईनाक मूसा का नियम-कानून उनार मनून में लिखीनाक छन, किलैकी उनोरो जमीर ले यो बात की गवाही दीछो, की यो सच्ची छै किलैकी उनोरो विचार कभै उनूनमें दोष लगूनान त कभै उनून यो बतुनान की उन सही करून मर्यान।</verse>
				<verse number="16">यो सब उ दिन होलो जब परमेश्वर यीशु मसीहक द्वारा म्यारा जरियाले सुणाईना को सुसमाचाराक अनुसार लोगून का गुप्त विचारून को ले न्याय कराला।</verse>
				<verse number="17">किलैंकी तुम अपूनास यहूदी कुँछा, और मूसा का नियम-कानून में भरोस राखछा, और घमण्ड करछा की तुम परमेश्वरा का खास लोग छा।</verse>
				<verse number="18">तुमून परमेश्वर की मरजी पत्तो छै, तुम निकी-निकी चीजून खिन राजी छा किलैंकी तुमून इनारा बारिमें मूसा ले नियम-कानून भटे सिखाई ग्योछ।</verse>
				<verse number="19">तुमून भरोस छै की तुम लोग इसा छा जो अन्धा लोगून परमेश्वरो को बाट दिखो, तुम उन लोगून खिन एक उज्याला की नियाती छा जो अन्यारा में पड़ीनाक छन।</verse>
				<verse number="20">और बुद्धीहीनून सिखून वाला, और उन लोगून को गुरू छूँ, जो परमेश्वर में अब तक नान्तिन छन। और तुमून भरोस छै की मूसा का नियम-कानून हुना का कारण तुमून सब कुछ पुर रीतिले पत्तो छै और जो तुम कुँछा उ बिलकुल सच्ची छै।</verse>
				<verse number="21">लेकिन तुम जो दुसरान शिक्षा दीछा, अपूनास शिक्षा नै दिना? तुम प्रचार करछा, “चोरी जन करा,” और खुद चोरी करछा।</verse>
				<verse number="22">तुम जो कुँछा, “ब्यभिचार जन कर्या,” त खुदै ब्यभिचार किलै करछा? जो मूर्तिन भटे नफरत करछा, क्या खुदै मन्दिरून नै लुटना?</verse>
				<verse number="23">तुमून तुमार पास परमेश्वरो को नियम-कानून हुना को घमण्ड छै, क्या मूसा का नियम-कानून नै मानभेरन, परमेश्वरो को अनादर करछा?</verse>
				<verse number="24">येक कारण पवित्रशास्त्र में लिखीनाको छै, “कि तुम, यहूदीन का बुर कामून का कारण गैर-यहूदी लोग परमेश्वर की नाम की निन्दा करनान।”</verse>
				<verse number="25">मैं तुमूनथैं के कुंन चाँछूँ। तुमारा खतना करि जाना कीमत केवल तभै छै जब तुम मूसा का नियम-कानून को पालन करछा, लेकिन अगर तुम उ नै करना जो मूसा का नियम-कानून कूछो, तुम खतना करिना का यहूदी लोग उन लोगून की नियाती छा जो यहूदी नाहातिन और जिनोरो खतना नै भ्यो।</verse>
				<verse number="26">येक कारण अगर कोई आदिमी शरीरो को खतना करिनाक बिना मूसा का नियम-कानून को पालन करो, त परमेश्वर इसा आदिमी स उई नियाती देखछो जैको खतना हो र्योछ?</verse>
				<verse number="27">और जो लोग खतना कराये बिना पुरी नियम-कानून को पालन करछो, त क्या त्यारा पास मूसा का नियम-कानून छन और खतना करिजान में ले नियम-कानून को पालन नै करनै, क्या तै दोषी नै ठैहराई जालै?</verse>
				<verse number="28">किलैंकी यो इसो नाहातिन की तैं यहूदी पैद भैछै और किलैंकी तुमोरो खतना भ्योछ उ तुमून सच्चो यहूदी बनूछो।</verse>
				<verse number="29">लेकिन एक सच्चो यहूदी उई छै, जैको मन परमेश्वरा का दगाड़ सही छै और सच्चो खतना केवल मूसा का नियम-कानून मानून नाहातिन, पर मनोको बदलून छै जो की परमेश्वरे की आत्मा का द्वारा हुछो, इसा लोगून की महिमा लोगून का द्वारा नै लेकिन परमेश्वरे की तरफ भटे हुछी।</verse>
			</chapter>
			<chapter number="3">
				<verse number="1">त कोई कि कै सकछो, अगर खतना हुना ले परमेश्वर हम यहूदीन नै अपनूनो, त यहूदी हुन में गैर-यहूदी हुन है कोई फैद नाहातिन।</verse>
				<verse number="2">होई एक यहूदी हुन में भौत फैद छै। सबून जरूरी है पैलि त यो की यहूदी लोगून मूसा और परमेश्वरा का संदेश दिनवाला लोगून को लेख दी ग्योछ।</verse>
				<verse number="3">अगर कुछ यहूदी लोगून ले परमेश्वर में विश्वास नै कर्यो त की भ्यो, त क्या येको मतलब यो छी की परमेश्वर उनार दगाड़ करिनाको अपूनो वादान पुरो करून में अविश्वासयोग्य होला?</verse>
				<verse number="4">नै! बिल्कुल ले नै। लेकिन परमेश्वर हमेशा सच्ची कुंछूँ, और हरेक आदिमी झूठ्ठो साबित हो, जसो पवित्रशास्त्र में लिखीना को छै; “जेलै तैं अपून बातुन में धर्मी ठहरलै और न्याय करून बखत तैं जीत पालै।”</verse>
				<verse number="5">अगर हमार बुर काम परमेश्वर की धार्मिकता ठैरा दीछी, तो हम कि कुंनू? क्या उ जो परमेश्वर क्रोध करछो और हमून सजा दीनो गलत छी? यो त मैं आदिमी का नजरिया ले कुनमर्यू।</verse>
				<verse number="6">कभै नै, अगर परमेश्वर यहूदी लोगूनको न्याय सही तरीका ले नै करना त उन दुसारा लोगूनको न्याय कसकै कर सकनान?</verse>
				<verse number="7">कोई के सकछो, कि परमेश्वर म्योरो न्याय कसकै कर सकछो और मैंस पापी ठैहरा सकछो जब कि म्योरो झूठ उकी सच्चाई स बढ़ावा दीछो और ऊस ज्यादा महिमा मिलछी।</verse>
				<verse number="8">“हिटा, हम बुर काम करा कि येले थ्वाड़ा भल हो जौ।” जसिकै थ्वाड़ा लोग हमरि निन्दा करभेरन हमून में यो दोष लगूनान, और कुछ लोग कुंनान की हमून योई सिखूनान। लेकिन जो म्यारा बारिमें इसी बात कुंनान उन सजा का हकदार छन।</verse>
				<verse number="9">त, कि हम यहूदी लोग दुसरान है निकी हालत में छाई? नै! बिलकुल नै। क्याखिनकि हम यहूदी और गैर-यहूदी लोग द्वीवैन में दोष लगा चुक गया कि सब लोग पाप का बश में छन।</verse>
				<verse number="10">जसो पवित्रशास्त्र में लिखीनाको छै, “परमेश्वरा का सामुनि कोई ले धर्मी नाहातिन, एक ले नै।</verse>
				<verse number="11">एक ले इन्सान नै जो सच्ची में समझ सको सही कि छै, और कोई परमेश्वरा का बारिमें जाणून नै चांनो।</verse>
				<verse number="12">सब परमेश्वर भटे दूर हो ग्यान और सबा का सब परमेश्वरा का कामून खिन निकम्मा बन ग्यान; और भलाई करून वालो कोई ले नाहातिन, एक ले नाहातिन।</verse>
				<verse number="13">उनोरो मुँख खुलीना की कबर की जसी छै, जैमें भटे वास उछी और उनेरि बातचीत गंदा छन। और उनोरो जिबोड़ो झूठ ले भरिना को छै। उनार बात स्यापाक जहरा का नियाती छन।</verse>
				<verse number="14">उनार बातुन में श्राप और कड़वाहट भरिना की छै।</verse>
				<verse number="15">और चोट पुजून में और मारून खिन भौत फुर्तीला छन।</verse>
				<verse number="16">उन जाँ ले जानान वाँ विनाश छै और मुसीबत लीभेरन उनान।</verse>
				<verse number="17">उन दुसरा लोगून का दगाड़ शान्ति ले रून खिन नै जाना।</verse>
				<verse number="18">उनूनमें परमेश्वरोको डर छैई नै।”</verse>
				<verse number="19">हम जाणनू कि नियम-कानून जै केले कूछो उनूनथैं कुंछो, जो नियम-कानून का अधीन छन; ताकि लोगून बाहान बनूना को मौक नै मिलो, और संसाराक सब लोग परमेश्वरा का सामुनि दोषी छन।</verse>
				<verse number="20">किलैंकी मूसा नियम-कानून मानना का द्वारा कोई ले आदिमी परमेश्वरा का सामुनि धर्मी नी ठैहरोलो, किलैंकी नियम-कानून हमून साफ-साफ बता दीनान की हम पापी छा।</verse>
				<verse number="21">लेकिन अब सब नियम-कानून को पालन करिनाका बिना परमेश्वरे ले हमून धर्मी ठैहराछ, जैका बारिमें मूसा का नियम-कानून और परमेश्वरो को संदेश दिनवालान की किताबून में भौत पैलि लिखीनाको छै, कि हम परमेश्वरा का दगाड़ धर्मी कसकै बन सकनू।</verse>
				<verse number="22">हम परमेश्वरा का दगाड़ तब धर्मी बन सकनू जब हम यीशु मसीह में विश्वास करनू। किलैंकी परमेश्वर सबून का दगाड़ एक जसो बर्ताव करनान।</verse>
				<verse number="23">येक कारण सबून ले पाप करछ्य और उ महिमा तक नै पुजी सक्या जो परमेश्वर दीछो।</verse>
				<verse number="24">लेकिन परमेश्वरा का अनुग्रह ले यीशु मसीहा का द्वारा हमार पापून की सजा भटे बचिया, और हमार के करि बिना परमेश्वर घोषित करछो की हम धर्मी छै।</verse>
				<verse number="25">परमेश्वरे ले यीशु मसीह स हमून खिन सूली में बलिदान हुन खिन भेजछै, और मसीह ले अपूनो बलिदान येक कारण दीछ ताकि उमें विश्वास करभेरन हम परमेश्वरा नजिक आ सकां। भौत पैलि परमेश्वरे ले यो बतून खिन करछै की उ धीरज राखून में और पापिन माफ करून में सही छ्यो। येले यो ले पत्तो हुछो की परमेश्वर सही छै, जब मसीह में विश्वास करून वालान धर्मी ग्रहण करछो।</verse>
				<verse number="26"></verse>
				<verse number="27">त क्या कोई इसी चीज छी जैक बारिमें हम घमण्ड कर सकनू? उ खिन कोई मौका न्हैतिन। को नियमून का कारण ले? यो येक कारण छै किलैंकी हम नियम-कानून को पालन करनू? नै, लेकिन यीशु मसीह में विश्वास करना का कारण ले।</verse>
				<verse number="28">येक कारण हम जाणनू की हम मसीह में विश्वास करना का द्वारा धर्मी ठैहरनू नै की मूसा का नियम-कानून मानना का द्वारा।</verse>
				<verse number="29">क्या परमेश्वर केवल यहूदीन को परमेश्वर छी? क्या उ गैर-यहूदीन को परमेश्वर नाहतिनी? उ जरूर गैर-यहूदीन को ले परमेश्वर छै।</verse>
				<verse number="30">क्याखिनकि एक्कै परमेश्वर छै, जो खतना करिना वालान और बिना खतना करिना वालान विश्वासा का द्वारा धर्मी ठैहरालो।</verse>
				<verse number="31">त क्या हम नियम-कानून विश्वासा का द्वारा बेकार समझनू? नै! बिलकुल नै। किलैंकी विश्वासा का द्वारा हम मूसा का नियम-कानून स पुरो करनू।</verse>
			</chapter>
			<chapter number="4">
				<verse number="1">अब हम यहूदी हुना का नाते अपून पुरखा अब्राहम का बारिमें कि कुंनू? उ कसकै धर्मी गिनी ग्यो?</verse>
				<verse number="2">किलैंकी अगर अब्राहम निका कामून ले धर्मी गिनी जानो, त ऊस घमण्ड करना को कारण हुनो। लेकिन उ परमेश्वरा का सामुनि अपून निका कामून को उ घमण्ड नै कर सकनो,</verse>
				<verse number="3">पवित्रशास्त्र कि कुंछो? यो कि “परमेश्वर ले जो क्योछ अब्राहम ले उमें विश्वास करछ्य, और उ परमेश्वरा का नजरून में धर्मी गिनी ग्यो।”</verse>
				<verse number="4">और काम करूनवाला की मजूरी दीनो दान नै हुनो, लेकिन उ मजूरी उको हक्क समझी जाछो।</verse>
				<verse number="5">और जो परमेश्वर की दया स हासिल करून खिन काम नै करूनो,</verse>
				<verse number="6">इसीकैं दाऊद उ आदिमी स धन्य कुंछो, जैस परमेश्वर कामून का बिना धर्मी ठैहरूछो, लेकिन जो पापी लोगून धर्मी ठैहरून वाला परमेश्वर में विश्वास करनान, उक विश्वास उ खिन धार्मिकता गिनी जाछो।</verse>
				<verse number="7">धन्य उन छन, जिनारा बुर काम परमेश्वरे ले माफ कर्यान, और जिनारा पाप उले माफ कर दीयान।</verse>
				<verse number="8">धन्य छन उन आदिमी जिनोरो पापून को हिसाब परमेश्वर नी लीन।</verse>
				<verse number="9">तो क्या यो भलि बात, खतना वालान खिन छै, या बिना खतना वालान खिन लै छै? हम यो कुंनू, जो पवित्रशास्त्र में लिख रैछ, “अब्राहम खिन उको विश्वास परमेश्वरा का नजर में धर्मी गिनी ग्यो।”</verse>
				<verse number="10">तो यो कब भ्योछ? खतना की हालत में या बिना खतना की हालत में? खतना की हालत में नै पर खतना होईन भटे पैलि होईना को छ्यो।</verse>
				<verse number="11">परमेश्वरे ले ऊस विश्वासा का द्वारा धर्मी ठहराछ जब उको खतना नी होईना को छ्यो। खतना को चिन एक मुहर की छापे की नियाती छै। येक कारण, उ उन लोगून को आत्मिक बाब छै जिनारा पास विश्वास छै और उनोरो खतना नै होरियो। उनून उनार विश्वासा का कारण धर्मी ठहराला।</verse>
				<verse number="12">और अब्राहम खतना करीन वालान को पुरखा छै, जो नै केवल खतना मेंई भरोस राखनान, लेकिन जिनारा पास ऊसो विश्वास छै, जसो हमार पुरखा अब्राहमो को छ्यो, जो उले खतना करून है पैलि करिनाको छ्यो।</verse>
				<verse number="13">परमेश्वरे ले अब्राहम और उक बंश थैं वादा करछ्य कि उ पुर संसारो को हक्कदार होलो। यो येक कारण नै भ्यो कि अब्राहम ले नियम-कानून को पालन करछ्य, लेकिन उले विश्वास करछ्य, और उ परमेश्वरा का नजर में धर्मी गिनी ग्यो।</verse>
				<verse number="14">अगर अब्राहम और उक बंश स यो वादा यो कारण दी ग्योछ किलैंकी नियम-कानून को पालन करछ्य, त विश्वास बेकार और वादा बेअसर साबित हो ग्यो।</verse>
				<verse number="15">परमेश्वर उन सबून में क्रोध करछो जो नियम-कानून स पुर रीतिले नै मानना, और जाँ नियम-कानून नै हुना वाँ उको तिरीसकार ले नै हुनो।</verse>
				<verse number="16">येक कारण लोगून ले विश्वासा का द्वारा परमेश्वरो को वादा हासिल करछ्य। इसो येक कारण हुछो ताकि वादा अनुग्रह ले हासिल हो। तब अब्राहम की सब संतानून को उ वादा पुरो हो सकछो। यो केवल उनून खिन नाहातिन जो मूसा का नियम-कानून का अधीन रूनान, बल्कि हरेक उ आदिमी खिन छै जो अब्राहमाक नियाती विश्वास में जीछो, जो हम सबून को पुरखा छन।</verse>
				<verse number="17">जसो पवित्रशास्त्र कुंछो कि “मैंले तैंस भौत जातिन को पूर्वज ठैहरा रैछ, उले उ परमेश्वर में विश्वास करछय।” और जो मरीनाक लोगून ज्यून करछो, और जो बात छन ले नै, उनोरो नाम इसकैं लीछो, की माना उन छन।</verse>
				<verse number="18">अब्राहम निराशा में ले आश राखभेरन विश्वास करछ्य, येक कारण कि उ वचना का अनुसार कि “तेरो बंश इसो होलो,” कि भौत जातिन को बाब हो।</verse>
				<verse number="19">अब्राहम ले देखछै की उ नान्तिनो पैद करून खिन भौत बुढ़ हो ग्यो छ्यो, किलैंकी उ लगभग सौ सालो को छ्यो। और सारा है ले अब नान्तिनो पैद नी हो सकछी। लेकिन अब्राहम यो जाणभेरन ले विश्वास मजबूत बनिनाको र्योछ,</verse>
				<verse number="20">और नै अविश्वासी होभेरन परमेश्वरा का वादा में शक करछ्य, लेकिन विश्वास में मजबूत हो भेरन परमेश्वर की महिमा करछ्य।</verse>
				<verse number="21">और यो बात में ले भरोसा करछ्य की जो वादा परमेश्वरे ले कर रैछ ऊस पुरो करून में उ सामर्थी छै।</verse>
				<verse number="22">और उक विश्वास कारण उ परमेश्वर की नजर में धर्मी गिनी ग्यो।</verse>
				<verse number="23">और “यो विश्वास उ खिन धर्मी गिनी ग्योछ,” नै केवल उ खिन लिख रैछ,</verse>
				<verse number="24">लेकिन हमून खिन ले छै, अगर हम ले परमेश्वर में विश्वास करला, जेले हमार प्रभु यीशु स मरिन में भटे ज्यून करछय, त हम ले विश्वास का कारण धर्मी गिनी जूला।</verse>
				<verse number="25">यीशु मसीह हमार पापून खिन मारी ग्यान, और परमेश्वरे ले दुबारा मरिन में भटे ऊस ज्यून कर दीछ ताकि हम धर्मी ठैहराई जाँ।</verse>
			</chapter>
			<chapter number="5">
				<verse number="1">येक कारण जब हम अपून विश्वास का द्वारा धर्मी बन्याँ, त परमेश्वर थैं हमोरो मेल-मिलाप हमार प्रभु यीशु मसीह ले हमून खिन करछै, उक द्वारा हम परमेश्वरा का दगाड़ शान्ति में रौ।</verse>
				<verse number="2">किलैंकी मसीह ले हमून खिन उ अनुग्रह तक पुजना को द्वार ले खोल छै, जो हमून विश्वास ले प्राप्त हुछो और जेमें हम बनिनाका छा। हम यो बात में गर्व करनू की हमून परमेश्वर की महिमा का भागी बनना की आश छै।</verse>
				<verse number="3">केवल योई नै, लेकिन हम दुख तखलीफ में ले खुशी मनूनू, किलैकी हम जाणनू की हम दुख उठुनू, त बेहतर तरीका ले धैर्य राखून सिखनू,</verse>
				<verse number="4">और धैर्य ले निको चाल-चलन और निका चाल-चलन ले परमेश्वर हमून स्वीकार करछो, येक कारण हमून आश छै।</verse>
				<verse number="5">और आश ले शर्म नै हुनी, क्याखिनकि पवित्र आत्मा जो परमेश्वर ले हमून दी रैछ, उक दवारा परमेश्वरो को प्रेम हमार मन में भरिना को छै।</verse>
				<verse number="6">क्याखिनकि जब हम कमजोर छ्या, त मसीह उ बखत हम पापी लोगून खिन मरछै, जै बखत स परमेश्वरे ले चुनिनाको छ्यो।</verse>
				<verse number="7">यो कठिन छै की कोई धर्मी जन खिन अपूनो प्राण द्यो; लेकिन इसो हो सकछो कि कोई सच्ची में कोई निका आदिमी खिन मरन खिन तैय्यार होज्यौ।</verse>
				<verse number="8">लेकिन परमेश्वर हमून में अपून प्रेम की भलाई यो तरीका ले प्रकट करछो, की जब हम पापी छ्या तभै यीशु मसीह हमून खिन मरछै।</verse>
				<verse number="9">येक कारण हम परमेश्वरा का दगाड़ सही छा किलैंकी मसीह हमून खिन मरछै और हमार पापून खिन अपूनो खून बगाछ, त उ जरूर हमून परमेश्वरा का क्रोध भटे ले बचालो।</verse>
				<verse number="10">किलैंकी जब हम परमेश्वरा का दुश्मन छ्या, त परमेश्वरा का दगाड़ हमोरो मेल-मिलाप उक च्याला यीशु मसीहक मरना का द्वारा भ्योछ, अब परमेश्वरा का दगाड़ मेल-मिलाप हो जानाक बाद उक द्वारा जरूर हमोरो उद्धार होलो किलैकी मसीह ज्यूनो छै।</verse>
				<verse number="11">और केवल योई नै, लेकिन अब त हमार प्रभु यीशु मसीह का द्वारा परमेश्वरा का दगाड़ हमोरो मेल-मिलाप है ग्योछ, येक कारण हम परमेश्वर में मगन रूनू।</verse>
				<verse number="12">येक कारण जसकैं एक आदिमी का द्वारा पाप यो संसार में आछ, और आदम पैलो आदिमी छै जेस परमेश्वरे ले बनाईना को छ्यो और उक पाप करना का द्वारा मौत सब लोगून में आछ, सब लोगून ले पाप करछय, और सब लोग पापी बन ग्या।</verse>
				<verse number="13">परमेश्वरा का द्वारा मूसा का नियम-कानून दी जान है पैलि ले पाप संसार में छ्यो, लेकिन यैस पाप का रूप में नै गिनी जाछ्यो किलैंकी ऐल तक इसो कोई नियम-कानून नी छ्या जैस तोड़ी जा सकों।</verse>
				<verse number="14">तब ले आदम भटे लीभेरन मूसा तक सबै लोगून ले पाप करछय और मर ग्या, जिनूनले आदम की नियाती कोई ले हुकुम तोड़भेरन पाप नै कर्यो। जो उनवालो छ्यो आदम उको एक चिन छ्यो।</verse>
				<verse number="15">लेकिन आदमो को पाप उ बरदानाक नियाती नाहातिन जो परमेश्वर हमून अपून अनुग्रह दीछो। किलैंकी एक आदिमी को पाप भौत लोगून खिन मौत लीभेरन आछ। लेकिन परमेश्वरे की दया और धार्मिकता को बरदान जो उले हमून दीछ, उकी कीमत भौत लोगून खिन उहै कई ज्यादा छै। और यीशु मसीह ले एक आदिमी का रूप में अपून दया ले जो करछय, उले येस पुर करछ्य।</verse>
				<verse number="16">परमेश्वरे ले जो बरदान हमून दी रैछ उ आदमाक पाप का नियाती नाहातिन। क्याखिनकि एक पाप ले मौत की सजा आछ, लेकिन हमून ले भौत पाप कर्यान। फिरले परमेश्वरे ले हमून एक इसो बरदान दी रैछ, जेले हमून उकी नजर में धर्मी बना रैछ।</verse>
				<verse number="17">क्याखिनकि जब एक आदिमी का पाप का कारण मौत सब लोगूनका मलि में आछ, त जो लोग परमेश्वरा का अनुग्रह और धार्मिकता का बरदान भरपूरी ले पानान, उन एक आदिमी का, मतलब यीशु मसीह का द्वारा जरूर पाप और मौत में जीत हासिल कराला।</verse>
				<verse number="18">येक कारण जसकैं कि एक अपराध सब लोगून खिन सजा को कारण बनछ्य, उसीकैं एक धार्मिकता को काम ले सब लोगून खिन धर्मी बनना को और अनन्त जीवन पाना को कारण बनछै।</verse>
				<verse number="19">जसीकैं एक आदिमीक हुकुम नै मानना ले भौत पापी बन्याँ, उसकैं एक आदिमीक हुकुम मानना ले भौत लोग धर्मी बनाला।</verse>
				<verse number="20">परमेश्वरे ले मूसा का नियम-कानून येक कारण दीयान ताकि लोग समझ सकून की उन कतुक पापी छन। लेकिन जब लोगून ले भौत ज्यादा पाप करछय, वाँ परमेश्वरे ले जो अनुग्रह दिखाछ उ ज्यादा है ज्यादा हो ग्यो।</verse>
				<verse number="21">जसो कि पापक द्वारा मौत सब लोगून में आछ, उसीकैं हमार प्रभु यीशु मसीह द्वारा परमेश्वरा का अनुग्रह उनून धर्मी बनालो और उनून अनन्त जीवन द्योलो।</verse>
			</chapter>
			<chapter number="6">
				<verse number="1">क्या येको मतलब यो छै परमेश्वरे ले अपूना अनुग्रह ले हमार पापून माफ करछै। लेकिन हम इसो नै सोचां, कि हम पाप करनै रूनू, कि दया बढ़नै रौ।</verse>
				<verse number="2">नै! बिलकुल ले नै। अब जब हम पाप खिन मर ग्या, अब हम कसकैं पाप में जीन्दगी बिता सकनू?</verse>
				<verse number="3">हम जाणनू की जब यीशु मसीह का दगाड़ एक हुन खिन बपतिस्मा लीछ, त हम उक दगाड़ मर ग्या।</verse>
				<verse number="4">जब हमून ले बपतिस्मा लीछ त यो इसो छ्यो जसकैं हम मसीह दगाड़ दफनाई ग्यो। ताकि जसीकैं मसीह परमेश्वरे की महिमा का द्वारा मरिन में भटे ज्यून भ्योछ, उसीकैं अब हमले एक नय्या जीन्दगी जी सकला।</verse>
				<verse number="5">अगर हम बपतिस्मा का द्वारा उक मौत में उक दगाड़ एक हो ग्याँ, त सच्ची में हम उक समान मरिन में भटे ज्यून होभेरन उक दगाड़ एक हो ग्या।</verse>
				<verse number="6">किलैंकी हम जाणनू की हमार पापी स्वभाव मसीह का दगाड़ सूली में चढ़ाई ग्यो, ताकि हमार शरीर में पापी स्वभाव नाश हो जौ, और हम अघिलकैं पाप का बश में नै रौ।</verse>
				<verse number="7">जब हम मसीहक दगाड़ मर ग्या, त हम पाप का गुलामी भटे मुक्त हो ग्या।</verse>
				<verse number="8">येक कारण अगर हम मसीहक दगाड़ मर ग्या, त हमोरो यो विश्वास छै कि हम उक दगाड़ जीन्दगी ले बितुला।</verse>
				<verse number="9">क्याखिनकि हम यो जाणनू की मसीह मरिन में भटे ज्यून हो ग्यो और फिर कभै नी मरोलो। और उमें मौत को कोई अधिकार नाहातिन।</verse>
				<verse number="10">क्याखिनकि मसीह जो मर ग्यो त पाप खिन एकबार मर ग्यो; लेकिन जो जीन्दगी उ जीछो उ परमेश्वरे की सेवा करून खिन जीछो।</verse>
				<verse number="11">इसोई तुम लोग ले अपून आपस पापे की शक्ति खिन मरिना को समझा, लेकिन मसीह यीशु में परमेश्वरे की सेवा खिन ज्यून समझा।</verse>
				<verse number="12">येक कारण पापी स्वभाव स अपून मलि में राज जन करून दी, ताकि अपून पापी स्वभाव का इच्छान का अधीन नै रौ।</verse>
				<verse number="13">और नै अपून शरीराक अंगून बुर कामून में सौंपा, लेकिन अपनास मरिन में भटे ज्यून जाणभेरन अपून जीन्दगी स परमेश्वरे स सौंप दी, और अपून शरीरा का अंगून ले धार्मिकता का कामून खिन सौंप दी।</verse>
				<verse number="14">तब तुम लोगून का मलि में पापो को कोई अधिकार नाहातिन, किलैंकी तुम मूसा का नियम-कानून का अधीन नाहातिन लेकिन परमेश्वरा का अनुग्रह का अधीन जीवन जीछा।</verse>
				<verse number="15">त कि भ्यो? क्या हम येक कारण पाप करा की हम नियम-कानून का अधीन नाहातिना, लेकिन अनुग्रह का अधीन छा? नै! बिलकुल नै।</verse>
				<verse number="16">तुम जाणछा की जब तुम अपनास कैको गुलाम हुन खिन दी दीछा त उ आदिमी तुमोरो मालिक हो जाछो और तुमून उई करून चैछो जो उ कुंछो, चाहे पापक गुलाम हौ, जैको अन्त मौत छै, चाहे परमेश्वरो को गुलाम हौ, जैको हुकुम पालन करना को फल धार्मिकता छै।</verse>
				<verse number="17">तुम जो पापक गुलाम हुछ्या, लेकिन अब तुमूनले उन शिक्षान को पालन करछय, जो तुमून सिखाई गैछी। यो कारण परमेश्वरो को धन्यवाद करछूँ।</verse>
				<verse number="18">परमेश्वरे ले तुमून पाप का बश भटे छुड़ाछ और तुम परमेश्वरा का दास बन ग्या ताकि उ करा जो सही छै।</verse>
				<verse number="19">मैंले गुलामी को यो उदारण येक कारण दीछ ताकि तुम येस आसानी ले समझ सका की मैं सिखूनमर्यू। जसकैं तुमूनले शरीराक अंगून अशुद्ध और बुर कामून का दास करभेरन सौंपीना को छ्यो, उसीकैं अब अपून शरीरा अंगून पवित्रता खिन धर्मी जीन्दगी जीन खिन दास का रूप में सौंप दी।</verse>
				<verse number="20">जब तुम पाप का दास छ्या त तुमार भितर धार्मिकता का काम करना की कोई इच्छा नी छी।</verse>
				<verse number="21">अपूनी पुरानी जीन्दगी ले तुमून कि फैदा भ्योछ? तुम उक कारण केवल शर्मिदगी हुछी। क्याखिनकि इन कामून को फल मौत छै।</verse>
				<verse number="22">लेकिन अब पाप भटे मुक्त हो भेरन और परमेश्वरा का दास बन बनभेरन और अब उन कामून करून मरेयछा जो पवित्रता स लीभेरन उछी और जैको फल जीन्दगी छै।</verse>
				<verse number="23">पाप को फल त मौत छै, लेकिन परमेश्वरो को बरदान अनन्त जीन्दगी छै जो हमार प्रभु यीशु मसीहक द्वारा हमून मिलछो।</verse>
			</chapter>
			<chapter number="7">
				<verse number="1">हे म्यारा विश्वासी भाईयों, तुम जाणछा कि मैं नियम-कानून स जाणून वालान थैं कुछूँ, कि जब तक आदिमी ज्यून रूछो, तब तक उमें नियम-कानून को अधिकार रूछो।</verse>
				<verse number="2">एक ब्याह करीनाकि स्यैनि नियम-कानून का अनुसार अपून घरवाला का ज्यून हुन तक उ दगाड़ जुड़ीना की रूछी, लेकिन अगर उको घरवालो मर जौ, त उ नियय-कानून भटे छुट जाँछी।</verse>
				<verse number="3">येक कारण अगर उ अपून घरवाला का ज्यून छना कोई दुसरा आदिमी का दगाड़ जांछी, त उ कुकर्मी कहलाली, लेकिन अगर उको घरवालो मर जौ, त उ नियम-कानून भटे छुटी गै, याँ तक की अगर कोई दुसारा आदिमी का दगाड़ ब्या कर लिछी त उ कुकर्मी नी होलि।</verse>
				<verse number="4">त हे म्यारा विश्वासी भाईयों, जब तुम मसीह का दगाड़ मर गया, त तुम नियम-कानून का अधिकार खिन ले मर गया। अब तुम मसीहक छा जो मरिना भटे ज्यून हो ग्यो ताकि तुम परमेश्वर खिन फलदाई जीन्दगी जी सकां।</verse>
				<verse number="5">किलैंकी जब हम पापी स्वभाव का बश में छ्या, त जो पापून की इच्छा नियम-कानून का द्वारा हमार भितर काम करनै रूछी, और मौतो को फल पैद करून खिन हमार शरीरा का अंगून में काम करछी।</verse>
				<verse number="6">अब हम नियम-कानून खिन मर ग्या, जेले हमून एक बखत गुलाम बनाईना को छ्यो, येक कारण हम नियम-कानून भटे आजाद हो ग्या और अब हम पुराना तरीका ले लिखीनाक नियम-कानून को पालन नै करना, लेकिन पवित्र आत्मा को हुकुम मानभेरन, नय्या तरीका ले परमेश्वरे सेवा कर सकनू।</verse>
				<verse number="7">त हम कि करनू? त क्या नियम-कानून पाप छी? नै! बिलकुल नै। लेकिन यो नियम-कानून का द्वारा मैं पाप का बारिमें जाण सका। मैंले जाण छै कि, लालच करून पाप छै, किलैंकी मूसा का नियम-कानून में यो लिखीनाको छै कि “लालच जन कर।”</verse>
				<verse number="8">लेकिन पाप ले मौका पाभेरन यो हुकुमा का द्वारा मैंमें सब प्रकारो को लालच पैद कर दीछ। योई कारण छै की नियम-कानून बिना पाप मरिना को छै।</verse>
				<verse number="9">एक बखत छ्यो जब मैं नियम-कानून स जाणे बिना जीन्दगी जी छ्यू, लेकिन जब मैंले नियम-कानून स जाण छै, तब म्यारा भितर पाप करनाकि इच्छा काम करून लागछै, और मैं परमेश्वर भटे दूर हो गयूँ।</verse>
				<verse number="10">और उई हुकुम जो म्येरो ज्यून रून को कारण बनूनवालो छ्यो, मैंखिन मेरि मौत को कारण बनछै।</verse>
				<verse number="11">क्याखिनकि पाप ले मौका पाभेरन यो हुकुम का द्वारा मैंस ध्वाक दीछ, और उक द्वारा मैंस परमेश्वर भटे अलग कर दीछ।</verse>
				<verse number="12">त फिर हम कै सकून की नियम-कानून पवित्र छै, और हुकुम पवित्र, धर्मी, निका छन।</verse>
				<verse number="13">तो क्या नियम-कानून जो निका छ्या, मैंखिन मौत लीभेरन आछ? नै! बिलकुल नै। लेकिन यो पाप छ्यो जेले इसो करछै। पाप ले उन नियम-कानून को इस्तमाल करछ्य, जो निका छ्या और मैंखिन मौत लीभेरन आछ। इसिकै पाप ले दिखाछ की उ सच्ची में कि छै, और हुकुमले दिखाछ की पाप बुर तरीका ले बुरो छै।</verse>
				<verse number="14">किलैंकी हम जाणनू कि नियम-कानून त आत्मिक छै, लेकिन मैं आदिमी छूँ पापक बश में छूँ।</verse>
				<verse number="15">और जो मैं करछूँ ऊस नै जाणनू; क्याखिनकि जो मैं चाछूँ उई मैं नै कर सकनू, लेकिन जै भटे मैं घीन लागछी उई करछूँ।</verse>
				<verse number="16">और अगर मैं नै करून चाँनू और उई बुर काम मैं करछूँ, तो मैं मान लीछूँ की नियम-कानून निका छन।</verse>
				<verse number="17">त इसी हालत में बुरो करनवालो आदिमी मैं नाहातिनू, लेकिन पाप छै जो मैंमें बसिना को छै।</verse>
				<verse number="18">क्याखिनकि मैं जाणछूँ, कि मैंमें मतलब म्यारा पापी स्वभाव में कोई ले निकी चीज वास नै करनी, निका काम करून खिन इच्छा त मैंमें छै लेकिन उ मैंमें नै हो पानि।</verse>
				<verse number="19">क्याखिनकि जो भल काम मैं करना की इच्छा करछूँ, ऊस नै कर पानू, लेकिन जो बुराई इच्छा नै करनू, उई करछूँ।</verse>
				<verse number="20">अगर मैं उई करछूँ जैका इच्छा नै करनू, त मैं उको करनवालो नै भ्यू, लेकिन पाप जो मैंमें बसिनाको छै।</verse>
				<verse number="21">इसीकैं मेरो अनुभव यो छै की जब मैं भलाई करना की इच्छा करछूँ, तब मैं बुराई करछूँ</verse>
				<verse number="22">क्याखिनकि मैं अपून पुर मनेले परमेश्वरा का नियम-कानून ले भौत खुश रूछूँ।</verse>
				<verse number="23">लेकिन मैंस अपून शरीरा का अंगून में दुसरी प्रकारा का नियम-कानून महैसूस हुनान, जो म्यारा मनाका नियम-कानून भटे लड़नान और यो शक्ति मैंस उ पाप में गुलाम बना दीछी जो येले ले म्यारा शरीरा का अंगून में काम करछी।</verse>
				<verse number="24">मैं कतुक अभागो आदिमी छूँ! मैंस यो शरीर भटे को छुड़ालो जो मैंस परमेश्वर है अलग करछो?</verse>
				<verse number="25">मैं परमेश्वरो को धन्यवाद करछूँ जेले यीशु मसीहक द्वारा मैंस बचाछ, येक कारण मैं अपून मन में परमेश्वरा का नियम-कानून पालन करछूँ, लेकिन शरीर भटे पापक नियम-कानून को पालन करछूँ</verse>
			</chapter>
			<chapter number="8">
				<verse number="1">यो कारण ले अब जो यीशु मसीह में छन, किलैंकी उनूनमें सजा को हुकुम नाहातिन।</verse>
				<verse number="2">पवित्र आत्मा जो मसीह यीशुक तरफ भटे उछो और तुमून जीवन द्योलो और तुमून पाप और मौत भटे मुक्त करोलो।</verse>
				<verse number="3">क्याखिनकि जो काम मूसा का नियम-कानून हमार पापी स्वभाव का कारण कमजोर होभेरन नै कर सक्याँ, ऊस परमेश्वर ले करछ्य, मतलब जेले हमार पापून का माफी खिन अपून च्याला यीशु मसीह स बलिदान हुनखिन भेज दीछ, और जेले हम पापी आदिमीन का नियाती शरीर में रैभेरन करछ्य, इसिकै परमेश्वरे ले यीशु मसीहक शरीर में पापै की सामर्थ स तोड़भेरन सजा दीछ।</verse>
				<verse number="4">जेले हम लोगून में, जो की पापी स्वभाव का अनुसार नै, बल्कि आत्मा का अनुसार स्वभाव राखनू, नियम-कानून की माँग पुरो हो जौ।</verse>
				<verse number="5">जो लोग पापी स्वभाव का अनुसार जीन्दगी जीनान उन बुरी बातुन का बारिमें सोचनान, जेको नतीजा मौत छै। लेकिन जो पवित्र आत्मा का अनुसार जीन्दगी जीनान उन उ बातुन का बारिमें सोचनान जो आत्मा स खुश करछी, जेको नतीजा जीन्दगी और शान्ति छै।</verse>
				<verse number="6"></verse>
				<verse number="7">क्याखिनकि पापी स्वभावाक अनुसार जीन्दगी जिन वालो आदिमी परमेश्वर भटे बैर राखछो, क्याखिनकि नै त पापी स्वभाव परमेश्वरा का नियम-कानून का अधीन छै और नै नियम-कानून को पालन कर सकछो;</verse>
				<verse number="8">और जो पापी स्वभाव अनुसार जीन्दगी जीनान, उन परमेश्वरे स खुश नै कर सकना।</verse>
				<verse number="9">लेकिन जब कि पवित्र आत्मा तुमून में बसछो, त पापी स्वभावाक अनुसार जीन्दगी नै जीना, लेकिन पवित्र आत्माक अनुसार जीन्दगी जीछा। अगर कैमें मसीह आत्मा नाहातिन त उको रिश्ता मसीहक दगाड़ नाहातिन।</verse>
				<verse number="10">अगर मसीह तुमूनमें छै, त पापक कारण शरीराक मरिनाका बाद ले धार्मिकता का कारण, तुमेरि आत्मा ज्यून छै।</verse>
				<verse number="11">और अगर परमेश्वरो को आत्मा जेले यीशु स मरिनान में भटे ज्यून करछ्य, जो तुमून में बसिनाको छै, त जेलै यीशु मसीह स मरिनान में भटे ज्यून करछ्य, जो तुमून बसिनाको छै, उ अपूनी आत्मा द्वारा नाश हुन वाला शरीरून ले ज्यून करोलो।</verse>
				<verse number="12">त हे विश्वासी भाईयों, हमून हुकमो को पालन करून चैछो, लेकिन हमार पापी स्वभाव नै चांनो की इसी जीन्दगी जीयाँ।</verse>
				<verse number="13">किलैंकी अगर तुम पापी स्वभाव का कारण जीन्दगी जिला त परमेश्वर भटे दूर हो जाला, अगर पवित्र आत्मा की सामर्थ का द्वारा पापी स्वभाव स मारला त ज्यून रौला।</verse>
				<verse number="14">येक कारण जतुक ले लोग परमेश्वरे की आत्मा का अनुसार जीवन जीनान, उनी परमेश्वरा का नान्तिना छन।</verse>
				<verse number="15">क्याखिनकि तुमून गुलामी की आत्मा नै मिल रै, जेले फिर तुम डरला, लेकिन पवित्र आत्मा हमून परमेश्वर की सन्तान बनूछो, जैस हम “हे अब्बा, पिता कैभेरन पुकारनू।”</verse>
				<verse number="16">पवित्र आत्मा खुदै हमरि आत्मा का दगाड़ गवाही दीछो, की हम परमेश्वरे की सन्तान छा।</verse>
				<verse number="17">और अगर हम उको संतान छा, त हम उक वारिस छा, और परमेश्वरा का वारिस यीशु मसीहक दगाड़ वारिस छा। अगर हम यीशु का नियाती दुख सहला, त हम उकी महिमा में ले हिस्सादार हूँला।</verse>
				<verse number="18">मैंखिन यो बात साफ छै की जो महिमा हमून बाद में परमेश्वर दिनवालो छै, उ यो दुख भटे भौत ठुल छै जो हम अब सैहन करूनमर्यान।</verse>
				<verse number="19">क्याखिनकि पुर संसार ठूली आश लगाभेरन उ बखतो को इन्तजार करूनमर्योछ कि कब परमेश्वर अपूनो सन्तानून प्रगट करोलो।</verse>
				<verse number="20">क्याखिनकि संसार अपूनी इच्छा ले नै पर अधीन करूनवाला का तरफ भटे, व्यर्थता का अधीन यो आश ले करि गैछ,</verse>
				<verse number="21">कि संसार उ दिनाको इन्तजार करूनमर्योछ जब यो मौत और विनाश ले छुट भेरन परमेश्वर की सन्तानून का दगाड़ महिमामय आजादी में भागीदार हो जालि।</verse>
				<verse number="22">क्याखिनकि हम जाणनू कि जब भटे आदम ले पाप करछय, तब भटे लीभेरन अब तक परमेश्वर द्वारा करिनाको सारो संसार एक स्यैनि का नियाती पीड़ सैहन करूनमरे जसकैं ऊस नान्तिना स जन्मदिन में हुछी।</verse>
				<verse number="23">और यो केवल संसारै नै हम ले मने-मन रूनू। हमूले पवित्र आत्मा स हमून खिन परमेश्वरो वादा को चिना का रूप में पाछ। लेकिन अब हम परमेश्वरो को इन्तजार करनू की हमून अपून सच्चा नान्तिना का रूप में ली जून, उ तब होलो जब उ हमार शरीरे स मुक्त कर द्योलो।</verse>
				<verse number="24">अब जब हमून परमेश्वरे ले बचाछ, त हमारा पास यो आश छै। लेकिन अब के पानै की इच्छा करूनमर्या जो तुमारा पास पैलि भटे छै, त उ आश नाहातिन। कोई ले चीज पानै कि इच्छा नै करनू जो उक पास पैलि भटे छै। हमोरो उद्धार भ्योछ त परमेश्वर ले हमून यो आश दी रैछ। हमून ऐल तक उ सब नै मिल र्यो जो परमेश्वर ले हमून थैं वादा कर रैछ, योई कारण छै कि हम ऐल लै यैस प्राप्त कोई ले करना की आश राखनू। और येक कारण यो बखत हम धीरजाक दगाड़ इन्तजार करनू जब तक हम यैस प्राप्त नै कर ल्याँ।</verse>
				<verse number="25"></verse>
				<verse number="26">इसीकैं पवित्र आत्मा ले हमरि मद्दत करछो जब परमेश्वर में हमोरो विश्वास कमजोर छै। किलैंकी हम नै जाणना, की प्रार्थना कसकै करून चैंछी; लेकिन पवित्र आत्मा खुदै आहें भरभेरन, जेका बारिमें हम बात नै कर सकना, हमून खिन बिनती करछो।</verse>
				<verse number="27">और हमार मनून को जांचूनवालो परमेश्वर जाणछो कि पवित्र आत्मा कि कुनमर्यो? क्याखिनकि उ पवित्र लोगून खिन परमेश्वर की इच्छा का अनुसार बिनती करछो।</verse>
				<verse number="28">हम जाणनू कि जो लोग परमेश्वरा का दगाड़ प्रेम राखनान, उन लोगून खिन सब बात मिलभेरन निको अंत ल्यूछो। और उकी इच्छा का अनुसार चुनी ग्यान, परमेश्वर उनेरि भलाई खिन सबै बातुन में उनेरि मद्दत करछो।</verse>
				<verse number="29">क्याखिनकि उले जिनून पैलि भटे चुन रैछ, उनार बारिमें पैलि भटे तय करिनाको छै, कि उन उक च्याला यीशु मसीहक नियाती हो जाला ताकि यीशु मसीह इसिकै सब भाईन में ज्योठो।</verse>
				<verse number="30">उले जिनून पैलि भटे तय करि ग्योछ, उनून चुन लीछ, और जिनून परमेश्वर ले बुलाछ, और जिनून परमेश्वर ले धर्मी ले ठैहराछ, उनार दगाड़ अपूनी महिमा स बांणी छै।</verse>
				<verse number="31">इन सब बातुन ध्यान में राखभेरन, हम यो नतिज में पुजनू, अगर परमेश्वर हमार तरफ छै, तो कोई ले हमून हरा नै सकनो।</verse>
				<verse number="32">परमेश्वर ले अपून एकलौता च्याला स ले नै बचायो, लेकिन उले हमून में अनुग्रह करभेरन ऊस हमार पापून खिन अपून दुश्मनून सौंप दीछ, त उ हमून सब चीज द्योलो जेको उले वादा कर रैछ।</verse>
				<verse number="33">परमेश्वरा का चुनिना का लोगून में को दोष लगालो? परमेश्वर उ छै जो उनून धर्मी ठहरून वालो छै।</verse>
				<verse number="34">कोई ले हमरि निन्दा नै कर सकनो किलैंकी यो यीशु मसीह छै, जो हमून खिन मर ग्यो और मरिन में भटे ज्यून हो ग्योछ, और जो हमार तरफ भटे परमेश्वर थैं हमून खिन ले बिनती करछो।</verse>
				<verse number="35">कोई ले हमून मसीहक प्रेम भटे अलग नै कर सकनो। नै मुसीबत, नै खतरा, नै दंगा, नै अकाल, नै कंगाली, नै जोखिम, नै तलवार।</verse>
				<verse number="36">जसो पवित्रशास्त्र में लिखीना को छै, “हम हरेक दिन तैंखिन मौता का खतरा में रूनू। हमून बलि हुन वाली भेड़ जसो समझी ग्योछ।”</verse>
				<verse number="37">लेकिन इन सब बुरी बातुन में हमून उक द्वारा जेले हमूथैं प्रेम करछै, जीत पुरी तरीका ले हमरि छै।</verse>
				<verse number="38">क्याखिनकि मैंस पुरो भरोस छै, कि कोई ले हमून प्रेम करूनवाला मसीहा है दूर नै लिजा सकनो; येले के फर्क नै पड़नो की हम मरा नै जीया; नै स्वर्गदूत, और नै शासक, नै स्वर्ग की शक्ति, नै उच्चो और नै गैरो हमून परमेश्वरा का प्रेम भटे अलग कर सकनी, जो हमारा प्रभु यीशु मसीह में छै और भविष्य में कि होलो, संसार में जेले छै उ हमून उक प्रेम भटे अलग नै कर पालो।</verse>
				<verse number="39"></verse>
			</chapter>
			<chapter number="9">
				<verse number="1">मैं मसीह में सच्ची कुछूँ, कि मैं झूठ नै बोलनू और म्योरो जमीर ले पवित्र आत्मा में गवाही दीछो।</verse>
				<verse number="2">मैंस भौत शोक छै, म्योरो मन म्यारा लोगून खिन हर बखत दुखी रूछ्यो।</verse>
				<verse number="3">क्याखिनकि मैं याँ तक चाछूँ, कि अपून यहूदी भाईन का उद्धार खिन जो म्यारा अपून जाति का लोग छन, परमेश्वर मैंस श्राप दे, और खुदै मसीह भटे अलग हो जूँ।</verse>
				<verse number="4">उन इस्राएल देशा का लोग छन, और उनून परमेश्वरे ले गोद लिइनाका नान्तिना का रूप में चुन रैछ, और अधिकार, महिमा, वादा, नियम-कानून, और वादा, और उन सच्चा तरीकाले परमेश्वर की अराधना करनान।</verse>
				<verse number="5">अब्राहम, इसहाक और याकूब उनार पुरखा छन, और जाँ तक उनोरो इंसानी स्वभाव को रिश्ता छै, त मसीह खुद एक इस्राएली छ्यो, और परमेश्वरे छै, जो सबून में राज्य करछो, उकी हमेशा खिन तारीफ हुनी रौ। आमीन।</verse>
				<verse number="6">लेकिन इसो नाहातिन कि परमेश्वर अपूनो वादा पुरो करून में नाकाम हो ग्यान, किलैकी इस्राएल देशा का बंश सच्ची-मुच्ची सब इस्राएली नाहातिन।</verse>
				<verse number="7">अब्राहमा का बंश में जन्म लिनाले सबै उनेरि सच्ची सन्तान नै हो जानान, किलैंकी, परमेश्वरेले अब्राहम थैं कईनाको छ्यो,“जो इसहाक का बंश भटे जन्म लीनान, उन त्यारा बंश का मानी जाला।”</verse>
				<verse number="8">येको मतलब यो छै जो संसारिक तौरा का अनुसार जन्म लीनान उ परमेश्वर सन्तान नाहातिन, केवल वादा कि सन्तानै अब्राहम की सन्तान मानी जाँछी।</verse>
				<verse number="9">क्याखिनकि वादा को वचन यो छै, कि “अघिल साल मैं योई बखत दुबारा ऊंलो, और तब सारा को एक च्योलो पैद होलो।</verse>
				<verse number="10">और केवल योई नै, लेकिन जब रिबका हमार पुरखा इसहाक भटे गर्भवती भैछ, और उक गर्भ में जुड़वा नान्तिन छ्या।</verse>
				<verse number="11">और अब तक उन द्वीवै नान्तिना को जन्म ले नी हो र्योछ, और उनूनले उ बखत तक कोई बुरौ या भल काम नी करिनाको छ्यो, जब रिबका थैं यो कईग्यो, की तेरो ज्योठो च्योलो तेरो नान च्याला को दास बनलो।” यो येक कारण भ्योछ की परमेश्वरे की योजना ऊस चुन लिनाका अनुसार बनिना की रैछ। जो आदिमी का कामून नै; लेकिन बुलून वाला का फैसला का कारण छै।</verse>
				<verse number="12"></verse>
				<verse number="13">जसो पवित्रशास्त्र में लिख रैछ, “मैंले याकूबैस प्रेम करछ्य, लेकिन एसाव स नै कर्यो।”</verse>
				<verse number="14">येक कारण हम येका बारिमें कि कुनू? क्या पिता परमेश्वर कभै के खिन ले गलत करछोई? नै! बिलकुल नै।</verse>
				<verse number="15">क्याखिनकि परमेश्वरले मूसा थैं क्योछ, “मैं जैमें ले दया करून चाछूँ उमें दया करोलो, और जैमें मैं चाछूँ उमें किरपा करोलो।”</verse>
				<verse number="16">त परमेश्वर उ आदिमी स चुनोलो जैमें उ दया दिखूना को फैसला लीछो उकी पसन्द यो बात में निर्भर नै करनी की लोग की चानान या की करनाकि कोशिश करनान।</verse>
				<verse number="17">क्याखिनकि पवित्रशास्त्र में मिस्र देशा का राजा फिरौन थैं कई ग्योछ, “मैले तैंस येक कारण राजा बनाछ, कि तैंमें अपूनी सामर्थ दिखूलो, और म्योरो नामोको प्रचार यो संसारा का सार लोगून में हो।”</verse>
				<verse number="18">त फिर, उन जैमें चाँनान, उमें दया करनान, और जैस चाँनान ऊस जिद्दी बना दीनान।</verse>
				<verse number="19">तब थ्वाड़ा लोग मैथैं कौला; “अगर इसो छै, त परमेश्वर कैथैं कै सकछो की हम गलत छा? किलैंकी उ जो चाछो ऊस करून है कोई नै रोक सकनो।”</verse>
				<verse number="20">हे दगड़ियो, तैं को छै, जो परमेश्वरथैं सवाल करछै? क्या बनाईना की चीज अपून बनू वाला थैं पुछ सकछी, कि “तैले मैंस इसो किलैं बनाछ?”</verse>
				<verse number="21">क्या कुम्हारस माट्टा में अधिकार न्हैतिनी, कि उई माट्टा ले एक भाँणा खास इस्तमाल करून खिन, और दुसोरो भाणो रोज इस्तमाल खिन बनो?</verse>
				<verse number="22">(परमेश्वरस अधिकार छै कि जिन लोगून उले बनाछ और उनार दगाड़ अपूनी इच्छा अनुसार जैस चाछ कर सकछो) परमेश्वर अपूनी रीस देखून चाँछ्या और हरेका खिलाफ अपूनी शक्ति प्रगट करून चाँछ्या जो नाश हुना का हकदार छन। लेकिन येका बजाय, उले धैर्य ले उनून सहछ।</verse>
				<verse number="23">उले इसो येक कारण करछय किलैंकी उ देखून चाँछ्या, की उ कतुक महान छै जब उले उन लोगून में दया करछ्य जिनून उले अपूनी महिमा में भागीदार हुनखिन पैलिक चुन रैछ।</verse>
				<verse number="24">चाहे यहूदी हो या गैर-यहूदी, हमी उन चुनिना का लोग छा।</verse>
				<verse number="25">गैर-यहूदी लोगून का बारिमें परमेश्वरा का संदेश दिनवालो होशे की किताब में ले कुंनान, जो “लोग मेरि प्रजा नी छी, ऊस मैं अपूनी प्रजा कुलो, और जो प्रिय नी छ्या, उनून प्रिय कुलो।</verse>
				<verse number="26">और जो जाग परमेश्वर ले यो कईनाको छ्यो कि तुम मेरि प्रजा नाहातिना, उलेई ज्यून परमेश्वर की उनून अपूनी सन्तान कलो।”</verse>
				<verse number="27">और परमेश्वरो को संदेश दिनवालो यशायाह इस्राएल देशा का लोगून का बारिमें धध्याभेरन कुंछो, “चाहे इस्राएल लोगून संख्या समुदर रेत का नियाती भौत हो, तब ले उनून भटे थ्वाड़ा बचाला।</verse>
				<verse number="28">क्याखिनकि प्रभु जल्दी, और एक्कै बारिमें हमेशा खिन, संसारा का सबै लोगून को न्याय कराला।”</verse>
				<verse number="29">जसकैं परमेश्वर संदेश दिनवालो यशायाह, “अगर सर्वशाक्तिमान प्रभु ले हमून बंशज हुनखिन अनुमति नै दिना। त हम सदोम और अमोरा शैहर में उन लोगूनकी नियाती बन जानान, जिनून परमेश्वर ले पुरी तरीका ले नाश कर दी छ्यो।”</verse>
				<verse number="30">हमोरो कुनाको यो मतलब छै, गैर-यहूदीन ले खुद परमेश्वरा दगाड़ धर्मी ठैहराना की कोशिश नै करि, लेकिन परमेश्वर ले उनून विश्वास का द्वारा धर्मी ठैहराछ।</verse>
				<verse number="31">लेकिन इस्राएल देश लोग, जो परमेश्वरा का दगाड़ धर्मी बनून खिन मूसा का नियम-कानून को पालन करना की कोशिश करछ्या, लेकिन उन धर्मी बनून में कामयाब नै भ्या।</verse>
				<verse number="32">यो कसकै हो सकछो? येक कारण उन विश्वास भटे नै, लेकिन भल कामून ले धर्मी बनून चांनान। इस्राएल का लोग उ ढूंगो में खितीभेरन लोगून ठोकर दिलूनान।</verse>
				<verse number="33">जसो परमेश्वर ले पवित्रशास्त्र में क्योछ, “देख मैं यरूशलम शैहर में एक इसो ढूंगो राखछूँ जो लोगून खिन ठोकर दीभेरन खितना कारण बनूछो, और लोगून खितूनवाली चट्टान राखूनमर्यू और जो उमें विश्वास करोलो, उ लज्जित नी होलो।”</verse>
			</chapter>
			<chapter number="10">
				<verse number="1">हे म्यारा विश्वासी भाईयों, म्यारा मनेकी इच्छा और म्यारा अपून यहूदी लोगून खिन परमेश्वरथैं मेरि प्रार्थना छै, कि उन परमेश्वरथैं उद्धार पान।</verse>
				<verse number="2">किलैंकी मैं उनेरि गवाही दीछूँ, कि उनार भितर परमेश्वर खिन भौत उत्सुक छै, लेकिन परमेश्वरे की सेवा कसकै करि जो, येकी उनून समझ ठीक नाहातिन।</verse>
				<verse number="3">क्याखिनकि उन परमेश्वरे की उ धार्मिकता भटे अनजान होभेरन अपून तरीका ले धर्मी बनाकी कोशिश करनान, येक कारण उनून अपून आपस परमेश्वरे की धार्मिकताक अधीन नै कर्यो।</verse>
				<verse number="4">किलैंकी मसीह पैलिकैं उ मक्शद स पुर करछय जैखिन मूसा का नियम-कानून दीईनाका छ्या। येक कारण, जो कोई ले उमें विश्वास करछो परमेश्वर की नजर में धर्मी बन जानान।</verse>
				<verse number="5">क्याखिनकि मूसा का नियम-कानून भटे मिलीना की धार्मिकता का बारिमें परमेश्वरो को वचन में यो लिख रैछ कि, “हरेक आदिमी परमेश्वर की नजर में धर्मी बनून खिन उई धार्मिकता का द्वारा ज्यून हरेक पालन करून होलो।”</verse>
				<verse number="6">लेकिन परमेश्वर नजर धर्मी बनून खिन विश्वास को तरीका छै कि, “अपून थैं यो जन कौ की मसीह स तलि धरती में ल्यूनखिन को स्वर्ग तक जालो?”</verse>
				<verse number="7">और यो ले नै कये कि, “अधलोक में को जालो?” मसीह स मरिन में भटे ज्यून करभेरन मलि ल्यूनखिन!</verse>
				<verse number="8">यो कि कूछो उ यो छै की, “परमेश्वरो को बचन तुमार पास छै, जो तुमार मुख में और तुमार मन में छै।” यो उई विश्वासो को बचन छै, जैको हम प्रचार करनू।</verse>
				<verse number="9">उद्धार खिन, अगर तैं अपून मुँख ले यीशुस प्रभु जाणिभेरन लोगून का सामुनि मान ले और अपून मन में यो विश्वास करा, कि परमेश्वरे ले यीशुस मरिन में भटे ज्यून करछ्य, तो परमेश्वर त्येरो जरूर उद्धार करोलो।</verse>
				<verse number="10">परमेश्वरा का नजर में धर्मी बनून खिन मन में विश्वास करि जाछो, और उद्धार पान खिन सबून का सामुनि मुखे ले अंगीकार करि जाछो।</verse>
				<verse number="11">क्याखिनकि परमेश्वरो को संदेश दिनवालो यशायाह ले मसीहा का बारिमें पवित्रशास्त्र में लिखना छ्यो, “जो कोई उमें विश्वास करोलो, उ लज्जित नै हो।”</verse>
				<verse number="12">यहूदीन लोगून में और गैर-यहूदी लोगून के फर्क नाहातिन, येक कारण की परमेश्वर सबुनको प्रभु छै; और उ उन सबुनको उद्धार करोलो, जो ऊस मद्दत खिन ध्दयूनान।</verse>
				<verse number="13">क्याखिनकि पवित्रशास्त्र में यो लिखीना को छै, “प्रभु उन सबुनका उद्धार करोलो, जो उको नामेस लीनान।”</verse>
				<verse number="14">लेकिन येहै पैलि कि लोग परमेश्वर थैं मद्दत माँग सकून, उनून मसीह में विश्वास करनू चांछो, और येहै पैलि की उन उमें विश्वास कर सकून, उनूनले उक बारिमें सुणून चैछो; और लोगून प्रभु का बारिमें सुणून खिन, कैले उनून बतून चैछो।</verse>
				<verse number="15">और येहै पैलि की कोई जाभेरन उनून बता सकां, उ आदिमी स भेजि जानो चैछो, जसो पवित्रशास्त्र में लिख रैछ की, “उनार खुट कतुक निका छन, जो निको बातुन को सुसमाचार सुणूनान।”</verse>
				<verse number="16">लेकिन सब लोगून ले उ सुसमाचार में विश्वास नै कर्यो। परमेश्वरो को संदेश दिनवालो यशायाह कुंछो, “हे प्रभु, भौत थ्वाड़ा लोगून ले हमार सुसमाचार में विश्वास कर करछ्य?”</verse>
				<verse number="17">येक कारण विश्वास तब उछो जब तुम सुसमाचार सुणूनान, और यो मसीह को बचन छै।</verse>
				<verse number="18">लेकिन मैं यो पुछ छूँ, “क्या यहूदी लोगून ले मसीह को सुसमाचार नै सुणियो?” क्या उनूनले सच्ची में कभै नै सुणियो? उनूनले सुणछै त जरूर। किलैकी पवित्रशास्त्र में लिख रैछ, “उनेरि आवाज पूरा संसार में, और उनोरो प्रचार पुरो संसारा में पुजी ग्योछ।”</verse>
				<verse number="19">फिर मैं पुछ छूँ, “कि इस्राएली लोग मसीह को सुसमाचार जाण छ्या? होई उन जाण छ्या! पैलि त परमेश्वर ले संदेश दिनवाला मूसा का द्वारा यो क्योछ की, मैं तुम यहूदी लोगून का मनून में जलन पैद करोलो, जब तुम उन लोगून का प्रति म्यारा प्रेम देखला जो यहूदी नाहातिन मैं एक मूर्ख जातिका द्वारा तुमून रीस दिलूलो।”</verse>
				<verse number="20">फिर परमेश्वरो को संदेश दिनवालो यशायाह भौत हिम्मता का दगाड़ प्रभु को बचन सुणाछ की, “जो मैंस नै खोजछ्या, उनूनले मैंस पा लीछ; और जो मैंस पुछछ्या ले नी छ्या, उनूनमें मैं प्रगट हो गयूँ।”</verse>
				<verse number="21">लेकिन इस्राएल देशाक लोगून का बारिमें परमेश्वरा का संदेश दिनवाला यशायाह का द्वारा क्योछ “मैं पुरो दिन अपून हात हुकुम नै मानून वाली और बहस करून वाली प्रजाक तरफ फैलूनै रयूँ और उन म्यारा पास फिरून।”</verse>
			</chapter>
			<chapter number="11">
				<verse number="1">येक कारण मैं पुछ छूँ, कि परमेश्वरे ले अपूनी प्रजा स छोड़ी दीछी? नै! बिलकुल नै। मैंले त इस्राएली छूँ, अब्राहम को वंश और बिन्यामीनो को गोत्र में भटे छूँ।</verse>
				<verse number="2">परमेश्वरे ले अपूनी उ प्रजा स नै छोड़ियो, जैस उले पैलि भटे चुन लीछ। तुम नै जाणना कि पवित्रशास्त्र में परमेश्वरो को संदेश दिनवालो उत्साहले एलिय्याह कि कूछो, इस्राएला का लोगून का खिलाफ परमेश्वरथैं शिकायत करछो।</verse>
				<verse number="3">उले क्योछ, “हे प्रभु, उनूनले त्यारा संदेश दिनवाला लोगून मार डालियान, और त्यारा वेदीन नाश कर दीयान; मैंई एकोलो बच रयूँ जो येले तुमारा पछिल हिटून मर्यान, और उन म्येरो ले प्राण लीन चांछा।”</verse>
				<verse number="4">लेकिन परमेश्वरे ले एल्लियाह थैं क्योछ, “मैले अपून खिन सात हजार आदिमीन राख रैछ, जिनूनले झूठ्ठा बाल देवता की अराधना करून खिन अपून घुण नै टैकिया।”</verse>
				<verse number="5">ठीक इसकैं उ बखत ले, परमेश्वरा का अनुग्रह का कारण, इन यहूदी लोगून में भटे थ्वाड़ा लोगून ले परमेश्वरे ले अपून सच्चा लोग हुन खिन चुन रैछ।</verse>
				<verse number="6">अगर यो परमेश्वरे की कृपा ले चुनिना का छन, त उनार भल कामून करना का द्वारा नाहातिन, अगर यो कामून का द्वारा छन, त अनुग्रह फिर अनुग्रह नै र्यो।</verse>
				<verse number="7">येको नतीजा यो भ्यो; की इस्राएल देशा का लोग परमेश्वरे की दया की खोज में छ्या, फिरले उन उनून नै मिलियो, लेकिन उक चुनिनाका लोगून मिलछ्य और बचिना का लोगूनको मन कठोर कर दी ग्यो।</verse>
				<verse number="8">जसो पवित्रशास्त्र में लिख रैछ, “ परमेश्वरे ले उनून आजाका दिन तक उनेरि बुद्धि स बंद कर रैछ, और उनार आँखा त छन, लेकिन सच्चाई स नै देख सकनान, और कानून ले सुणनान लेकिन समझ नै सकनान।”</verse>
				<verse number="9">तब राजा दाऊद कूछो की, “उन लोगून को सबै आशिर्बाद केवल उनून गिरूना को कारण बनछै, यो बात खिन उनून मुसीबत और सजा मिलो।</verse>
				<verse number="10">और उनार आँखा अन्धा हो जून ताकि नै देख सकून, और हर बखत अपूनी मसीबूतन का ताल उनून दबा दीन।”</verse>
				<verse number="11">त मैं पुछ छूँ, क्या इस्राएला लोगून इसी ठोकर लागछै की उन कभे नै उठ पाया? नै! बिलकुल नै। लेकिन उनार अविश्वास का कारण गैर-यहूदी लोगून को उद्धार मिलछ्य, ताकि इस्राएला का लोगून जलन पैद भैछ।</verse>
				<verse number="12">येक कारण अगर इस्राएल देशा का लोगून को अविश्वास गैर-यहूदी लोगून खिन भौत आशीष बन रैछ, त जब पुरो इस्राएल देशा का लोग परमेश्वर में विश्वास कराला, तब गैर-यहूदी लोग भौत आशीष पाला।</verse>
				<verse number="13">मैं तुम गैर-यहूदी लोग थैं यो बात कुछूँ। जब कि मैं गैर-यहूदी लोगून खिन प्रेरित छूँ, तो मैं अपूनी सेवा में घमंड करछूँ।</verse>
				<verse number="14">ताकि यो तरीका ले मैं अपूनी जातिक लोगून भटे जलन करवाभेरन उनूनमें भटे कैको त उद्धार करूँ।</verse>
				<verse number="15">किलैंकी जब इस्राएल देशा का लोगून त्यागा का कारण परमेश्वर दगाड़ संसारा का लोगून को मेल-मिलाप है ग्योछ, त की उनोरो मसीहा स ग्रहण करून, यो एक मरिना का आदिमी का नियाती होलो जो दुबार ज्यून है ग्योछ।</verse>
				<verse number="16">यो हम यहूदीन को रिवाज छै, की जब हम रोटो बनून खिन धुलो बनूनु, त हम परमेश्वर स दिन खिन मुठ्ठी भर धुलो ल्यूनू। अगर उ एक मुठ्ठी भर धुलो परमेश्वरो को छै, त उको की मतलब छै कि पुरो धुलो ले उको छै। और जब रूखे की जड़ परमेश्वरे की छै त येको मतलब छै की रूखा का पुर हांगा ले परमेश्वरा छन।</verse>
				<verse number="17">इस्राएली देशाक लोग फलवन्त जैतूना का रूखा का हांगाका नियाती छन, और हमार पुरखा अब्राहम, इसहाक और याकूब उ रूखा का जड़ा का नियाती छै, और गैर-यहूदी लोग जंगली जैतूना का रूखा का हांगा नियाती छन, जिनून जंगली जैतून का रूख भटे काटिभेरन, फलवन्त जैतूना रूख में कलम लगाई ग्यान, तुम यहूदीन में उई तरीका ले फैद प्राप्त करनान, जसकै अब उन जंगली हांगान फलवन्त जैतून की जड़ भटे खुराक मिलछी।</verse>
				<verse number="18">त उन हांगाका बारिमें जो काटि गैछ्या, घमंड जन कर्या, और अगर तैं घमण्ड करले, त याद राँखे कि तैं जड़ न्हैतिने, लेकिन जड़ तैंस सभालछी।</verse>
				<verse number="19">फिर तैं अपून मन में यो जन सोचै की, परमेश्वर ले यहूदीन उन हांगा की नियाती मानून है इनकार कर दीछ जो एक रूख भटे तोड़ दी जाछो ताकि उ गैर-यहूदी लोगून स्वीकार कर सको, जो उन हांगा की नियाती छन जिनूनमें कलम करि ग्यान।</verse>
				<verse number="20">यो सच्ची छै, उन त अविश्वास का कारण तोड़ी ग्यान, लेकिन तुम अपून विश्वास कारण परमेश्वरा का दगाड़ बनिनाका रूछा, येक कारण घमंडी जन बना, लेकिन डर राखा।</verse>
				<verse number="21">क्याखिनकि जब परमेश्वरे ले फलवन्त जैतूना का रूखा का निका हांगा में दया नै करि, त उ तुमून में ले दया नी कराला।</verse>
				<verse number="22">येक कारण परमेश्वरे की दया और कठोरता में ध्यान दे, उकी कठोरता उनून खिन छै जो अविश्वास का कारण गिर ग्यान, लेकिन उनेरि दया तैंखिन छै, येक कारण तुम उकी दया में बनिनाका रौ, नै त रूख भटे तैंस ले काट दी जाले।</verse>
				<verse number="23">और अगर इस्राएली लोग ले मसीह में विश्वास करून लागला, त उनेरि फलवन्त जैतूना का रूख में कलम कर दी जालि, क्याखिनकि परमेश्वर उनेरि दुबारकैं कलम लगा सकनान।</verse>
				<verse number="24">कोई जंगली रूख में हांगान को कोई फलवन्त रूखा को हिस्सा बनून कुदरती नाहातिन। और तुम जो यहूदी नाहातिना एक जंगली जैतूना रूख भटे काटिनाका हांगा नियाती छा, और एक फलवन्त जैतूना का रूख में शामिल हो गैछा। लेकिन उन यहूदी एक हांगाका नियाती छन जो फलवन्त जैतूना का रूख में ठुला होईना का छन, उनून जरूर फिर भटे अपून रूखा का दगाड़ मिलाई जो सकछो।</verse>
				<verse number="25">हे म्यारा विश्वासी भाईयों, मैं नै चांनू की तुम यो भेद भटे अनजान रौ, इसो नै हो की तुम अपून मलि में घमंड करून लागा, यो सच्ची छै की इस्राएला का लोग विश्वास करून खिन तैय्यार नाहातिन, लेकिन जब परमेश्वर में विश्वास करूनवाला गैर-यहूदी लोगून की संख्या पुर है जालि, त इस्राएला का लोग विश्वास कराला और परमेश्वरा का पास वापस आ जाला।</verse>
				<verse number="26">इसीकैं सब इस्राएली लोग उद्धार पाला, जसो पवित्रशास्त्र में लिख रैछ, कि “छुड़ूनवालो यरूशलम शैहर भटे आलो, अभक्ति स याकूबा का वंश भटे दूर करोलो।</verse>
				<verse number="27">जब मैं उनार पापून माफ करलो, तब उनार दगाड़ म्येरो योई वादा होलो।”</verse>
				<verse number="28">यहूदी लोग परमेश्वरा का बैरी छन, किलैकी उन सुसमाचार में विश्वास नै करून चांन, और यो तुमून खिन फैद बन ग्योछ, लेकिन परमेश्वर उनून प्रेम करछो किलैंकी यो उई वादा छै जो परमेश्वर ले उनार पुरखान का दगाड़ करिनाको छ्यो।</verse>
				<verse number="29">क्याखिनकि परमेश्वर अपून बरदानून वापस नै लीना, और नै बुलाहट कभै अपूनो मन बदलनो।</verse>
				<verse number="30">क्याखिनकि जसो गैर-यहूदी लोगून ले पैलि परमेश्वरा का हुकमो को पालन नै कर्यो, लेकिन इस्राएली लोगून को हुकमो को पालन नै करना ले, अब गैर-यहूदी लोगून में दया भैछ।</verse>
				<verse number="31">उसकैं उनूनले ले अब हुकमो को पालन नै कर्यो, किलैकी तुमून में जो दया हुछी, येले उनूनमें ले दया हो,</verse>
				<verse number="32">किलैंकी परमेश्वर बतुनान की सब लोग हुकमो को पालन नै करना का कारण पापून में फसनान, ताकि उन सबै लोगून अपूनी में दया देखा सकून।</verse>
				<verse number="33">ओहो! परमेश्वरो को दया को धन और बुद्धि और ज्ञान कतुक गंभीर छन, कोई ले उक फैसला को बखान नै कर सकना; और नै कोई उक बाटा स समझ सकना।</verse>
				<verse number="34">प्रभु का बिचारे स कोई ले नै जाण सकनो, और नै उको कोई सलाकार बन सकछो,</verse>
				<verse number="35">और केले परमेश्वर कै दी रै, जो उ बदाला में के पाना को दावा कर सकों।</verse>
				<verse number="36">किलैंकी सब कुछ परमेश्वर भटे उछो। उले सब कुछ बनाछ, और सब कुछ उकोई छै। उकी महिमा हमेशा हुनै रौ। आमीन</verse>
			</chapter>
			<chapter number="12">
				<verse number="1">येक कारण हे विश्वासी भाईयों, मैं तुमून परमेश्वरे की दया याद दिलाभेरन बिनती करछूँ, कि अपून जीन्दगी स ज्यून और पवित्र, और परमेश्वर स निको लागून वालो बलिदान चढ़ा। परमेश्वरे की सेवा करना को योई सच्चा तरीका छै।</verse>
				<verse number="2">और यो संसाराक लोगून का नियाती जन बना, लेकिन तुमार मनाका पुर बदल जाना ले तुमोरो चाल-चलन ले बदलतनै जौ, कि जेलै तुम परमेश्वर की निकी और ग्रहणयोग्य, और सिद्ध इच्छाकी खोज करनै रौ।</verse>
				<verse number="3">क्याखिनकि मैं उ दयाक कारण जो परमेश्वर भटे मैंस मिलछ्य, तुमून में भटे हरेक थैं कुछूँ, कि जस समझून चैंछ, उ भटे बढ़भेरन कोई ले अपूनास जन समझा, लेकिन जतुक विश्वास परमेश्वर ले तुमून दीछ, उक अनुसार समझा।</verse>
				<verse number="4">क्याखिनकि जस हमार शरीर में भौत अंग छन, और शरीरा का सब अंगून को एक काम जस नै हुनो।</verse>
				<verse number="5">उसीकैं, हम ले जो मसीह में विश्वासी छा, हम सब मसीहक शरीराक अंग छा, और हम सब एक दुसारा भटे जुड़िनाक छै।</verse>
				<verse number="6">और जब की उ दया का अनुसार जो परमेश्वरे ले हमून दी रैछ, हमून अलग-अलग बरदान मिल र्यान। त जैस भविष्यबाणी को दान मिलीना को छै; ऊस उन बातुन बोलून चैछो, जेमें उ विश्वास करछो की परमेश्वर ले ऊस बताछ।</verse>
				<verse number="7">अगर दुसरान की सेवा करनाको बरदान मिलर्योछ, त सेवा में लाग रौ, अगर कोई सिखून वाला छन, त उ सिखून में लाग रौ।</verse>
				<verse number="8">जो उपदेश दीन वालो हो उ उपदेश दीन में लाग रौ; अगर दुसरान की जरूरत स पुर करना को वरदान मिलीनाको छै, त दिल खोल भेरन दान दयो; अगर यो अगुवाई करना को बरदान छै त ऊस लगन लगाभेरन करो, जो दया करो, उ खुशिले करो।</verse>
				<verse number="9">दुसरान प्रेम करना को दिखावा जन करा; बुराई भटे नफरत करा, और जो भलाई का कामून में लगातार लाग रौ।</verse>
				<verse number="10">एक दुसरा स परिवार की नियाती प्रेम करा; हरेक और हरेक जन स अपून है बढ़भेरन माना।</verse>
				<verse number="11">भौत मेहनत करा और आलीस जन बना; और अपून पुर मनेले प्रभु की सेवा करनै रौ।</verse>
				<verse number="12">जो आश हमार दगाड़ छै उक कारण खुश रौ; मुसीबत में धैर्य राखा, और हर बखत प्रार्थना करनै रौ।</verse>
				<verse number="13">और परमेश्वरा का लोगून की जेले जरूरत छै, उमें उनेरि मद्दत कर्या; और घर में आईना का लोगून की आदर-खातिदारी करा।</verse>
				<verse number="14">अपून सतून वालान आशीष दी, लेकिन श्राप जन दीया।</verse>
				<verse number="15">खुश रून वालान का दगाड़ खुश रया, और रूनवालान का दगाड़ रोईया।</verse>
				<verse number="16">तुम जसकै अपूनी परवाह करछा, उसकैं एक दुसरा की परवाह करनै रौ। घमंडी जन बँन्या, लेकिन जो गरीब छन, उनार दगाड़ संगति राखून खिन हमेशा तैय्यार रौ। अपूनास बुद्धिमान जन समझा।</verse>
				<verse number="17">बुराईक बदाला बुराई जन कर्या, जो बात सब लोगून खिन निकी छन उनेरि चिन्ता करा।</verse>
				<verse number="18">जाँ तक हो सकों, तुम लोगूनका दगाड़ मेल-मिलाप राखिया।</verse>
				<verse number="19">हे म्यारा विश्वासी भाईयों, अपून बदला जन ली, लेकिन परमेश्वरे स तुमून खिन बदला लीन दी, क्याखिनकि पवित्रशास्त्र में प्रभु कुंनान, “बदला लीन म्येरो काम छै, प्रभु कुंनान मैं बदला द्यूलो।”</verse>
				<verse number="20">लेकिन पवित्रशास्त्र में यो ले लिख रैछ, “अगर तेरो बैरी भुखो होलो त ऊस खानो खिलो अगर प्यासो होलो त ऊस पानि पिलाये। क्याखिनकि इस करनाले उको खोरो शर्मले झुक जालो।”</verse>
				<verse number="21">बुराईस अपून मलि में जितून जन दी, लेकिन भलाई करभेरन बुराईस जीत ली।</verse>
			</chapter>
			<chapter number="13">
				<verse number="1">हरेक आदिमी प्रधान अधिकारीन का अधीन रया, क्याखिनकि सब अधिकार परमेश्वरा का तरफ भटे उनान, और जो अधिकार छै, उन परमेश्वरा का द्वारा ठैराईनाको छै।</verse>
				<verse number="2">येक कारण जो कोई इसा लोगून को बिरोध करछो, जिनारा पास शासन करना को अधिकार छै, त परमेश्वर की विधि को बिरोध करछो, और विरोध करूनवाला सजा पाला।</verse>
				<verse number="3">क्याखिनकि अगर कोई अधिकारी निका काम करूँ मर्योछ, त उक शासकून भटे डरना की जरूरत नाहातिन। लेकिन अगर बुर काम करून मर्यान, त उले डरना की ले जरूरत नाहातिन। अगर तुम शासकून भटे निडर रून चाँछा? त उई करा जो निका छै, जेलै तुमेरि तारीफ हो।</verse>
				<verse number="4">क्याखिनकि उ तुमेरि मद्दत खिन काम करून में परमेश्वरा का तरफ भटे सेवक छै। लेकिन अगर तुम बुराई करछा, त डरा, क्याखिनकि उनार पास तुमून सजा दिना को अधिकार छै और उन परमेश्वरो को सेवक छै, जिनून योई कारण भेजि ग्योछ की उन लोगून सजा दीयो, जो गलत काम करून मर्यान।</verse>
				<verse number="5">येक कारण यो ठीक छै की केवल सजा का डरा का कारण नै, लेकिन जमीर स साफ राखना मक्शद ले तुमून उनार अधीन रून चैछो।</verse>
				<verse number="6">येक कारण राजकर ले दी, क्याखिनकि शासन करूनवाला परमेश्वराका सेवक छन, और जो हमेशा अपूनी जिमेदारी पुर करना का काम लाग रूनान।</verse>
				<verse number="7">येक कारण हरेक स दी जो उनून दीनो ठीक छै, जैस राजकर चैछो, ऊस राजकर दी; जैस चुंगी चैछो, ऊस चुंगी दी, और जो अधिकारी का सम्मान करून चैछो, उको सम्मान करा, और जैको आदर करून चैछो, उको आदर करा।</verse>
				<verse number="8">तुम सबून केवल एक बातोको कर्जदार हुन चैछो, और उ यो छै की तुम सब एक दुसरा थैं प्रेम करा किलैकी जो दुसरान प्रेम राखनान, उले नियम-कानून पुरी करिनाका छन।</verse>
				<verse number="9">किलैकी मूसा का नियम-कानून में भौत आज्ञा छन, जसकै की “ब्यभिचार जन करिये, खून जन करिये, चोरी जन करिये, लालच जन करिये,” और इनून छोड़ी और कोई ले आज्ञा हो त सबुनको निचोड़ यो इन आज्ञान में मिलछो, “अपून पड़ोसीस अपून समान प्रेम राख।”</verse>
				<verse number="10">प्रेम पड़ोसी की बुराई नै करूनो, जो प्रेम करछो, उ नियम-कानून स पुर करछो।</verse>
				<verse number="11">तुमूनमें भटे हरेक स एक-दुसरा प्रेम करनै रून चैछो किलैकी उ बखत जब परमेश्वर हमून यो बुर संसार भटे छुड़ाला नजिक आग्योछ। जब हम पैल बार मसीहा में विश्वास करछ्या, त समझभेरन अब उक नजिक आग्योछ। यैस समझभेरन तुमून अपूनी नीन भटे जागून चैछो, और सतर्क रून चैछो।</verse>
				<verse number="12">यो इसो छै जसकै रात लगभग खतम हो गै, और दिन शुरू हुनवालो छै, हमून उन बुर कामून करून छोड़ दिन चैछ जो लोग अन्यारा में करनान। हमून उन हथियारून इस्तमाल करून चैछो जिनून उज्यालो में इस्तमाल करि जाछो।</verse>
				<verse number="13">आ हम लोगून का नियाती जिन शुरू कर दीया, जो उज्याला में रूनान लेकिन अन्यारा में नै। हमून नै रंगरलियों में, और पियक्कड़पन में, नै ब्यविचार में, और नै लुचपन में, और नै झगड़ा और डाह में जीन्दगी जिन चैछी।</verse>
				<verse number="14">लेकिन प्रभु यीशु मसीह तुमोरो कवच बन जौ, और पापी स्वभाव की इच्छान पुर करना की कोशिश जन करा।</verse>
			</chapter>
			<chapter number="14">
				<verse number="1">जो विश्वासी भाई विश्वास में कमजोर छन, ऊस अपूनी संगति में ली, ली, लेकिन उक दगाड़ यो बारिमें बहस जन करा की ऊस कि करून चैछो या कि नै।</verse>
				<verse number="2">क्याखिनकि एक्कै विश्वास छै, कि सब कुछ खानो उचित छै, लेकिन जो विश्वास में कमजोर छै, उ साग पाते खाछ्यो।</verse>
				<verse number="3">जो शिकार खाछो, उ जो शिकार नै खानो ऊस तुच्छ नै समझो, और जो शिकार खाछो, उ शिकार खान वाला में दोष नै लगो, किलैकी परमेश्वर द्वीवैन ग्रहण करछो।</verse>
				<verse number="4">येक कारण तुमून केका दास को फैसला नै करून चैनो। चाहे उ भल करो या बुर करो, यो उक मालिक की जिमेदारी छै। किलैंकी प्रभु भल करून में उकी मद्दत करछो।</verse>
				<verse number="5">यो तरीका ले कोई त एक दिनेस दुसारा भटे बढ़भेरन मानछो, और कोई सब दिनून एक समान मानछो। हरेक अपून मन में यकीन हुन चैछो की जो उ सोचछो क्याखिन उ ठीक छी।</verse>
				<verse number="6">जो कोई ले दिनेस मानछो, इसो येक कारण हुछो किलैकी उ प्रभु स सम्मान करून चांछो। जो शिकार खाछो, उ प्रभु खिन खाछो, किलैकी उ परमेश्वर स धन्यबाद करछो, और कोई शिकार नै खानो उ प्रभु खिन नै खानो, क्याखिनकि उ परमेश्वरोको धन्यबाद करछो।</verse>
				<verse number="7">हम सब प्रभु का छा। येक कारण, हमोरो जीवन में और हमरि मौत में, हमून ऊस खुश करून चैंछो खुद स नै।</verse>
				<verse number="8">अगर हम ज्यून छै; ते प्रभु खिन ज्यून छै, और अगर मरनू, त प्रभु खिन मरनू, फिर हम जीयाँ या मरा हम प्रभु का छै।</verse>
				<verse number="9">क्याखिनकि यीशु मसीह येक कारण मर्यान और फिर ज्यून ले भ्यान, उ उई छै जैस ज्यून और मरिनाका द्वीवै लोग प्रभु स्वीकार करनान।</verse>
				<verse number="10">फिर तैं किलैं अपून विश्वासी भाई में दोष लगूछै? या तैं फिर किलैं अपून विश्वासी भाई स तुच्छ समझछै? हम सबून को न्याय करूनवालो परमेश्वर छै।</verse>
				<verse number="11">क्याखिनकि पवित्रशास्त्र में लिख रैछ, “प्रभु कुंनान, म्यारा जीवनैकि कसम खाछूँ की, हरेक आदिमी म्यारा सामुनि अपुना घुणान टेकाला, और हरेक आदिमी अपून पापून को परमेश्वरा का सामुनि अंगीकार कराला।”</verse>
				<verse number="12">येक कारण हमून में भटे हरेक अपून-अपून कामून को लेखा जोखा परमेश्वरे स द्याला।</verse>
				<verse number="13">येक कारण अघिलकैं हम एक दुसारा में दोष जन लगाया, लेकिन तुम यो ठान ली, कि कोई अपून विश्वासी भाई पाप फंदा में जन फंस जौ।</verse>
				<verse number="14">मैं जाणछूँ, और प्रभु यीशु का द्वारा मैंस भरोस भ्योछ, कि कोई चीज अशुद्ध नै हुनी, लेकिन जो ऊस अशुद्ध समझछो उ खिन अशुद्ध छै।</verse>
				<verse number="15">अगर तेरो विश्वासी भाई त्यारा खाना का कारण उदास हुछो, त फिर तैं प्रेमा का रीतिले नै हिटने, अगर तेरो खानो त्यारा विश्वासी भाई परमेश्वरोको हुकमो को पालन करून छोड़ दीछ त उ खाना स जन खा। किलैकी मसीह उ विश्वासी भाई खिन ले मरछै।</verse>
				<verse number="16">येक कारण तुम जो करूनमर्याछा उ निको छै, लेकिन अगर कोई और ऊस बुर मानछो त ऊस जन करा।</verse>
				<verse number="17">परमेश्वरा का राज्य में खान पिनो जरूरी नाहातिन, लेकिन जरूरी बात इन छन की परमेश्वरा का दगाड़ सही जीन्दगी जीनो, पवित्र आत्मा में शान्ति और आनन्द छै जो पवित्र आत्मा भटे मिलछो।</verse>
				<verse number="18">जो कोई यो तरीका ले मसीह की सेवा करछो, त परमेश्वर उ है खुश हुनान, और लोग उक बारिमें ले निको कुंनान।</verse>
				<verse number="19">येक कारण हमून उन बातुन की कोशिश करून चैछी, जो शान्ति का कारण बनछी, और एक दुसरा स विश्वास में मजबूत करा।</verse>
				<verse number="20">जो तुम खाछा उक कारण परमेश्वरोको काम जन बिगाड़ा; याद राखा खाना की सब चीज शुद्ध छै, अगर कोई आदिमी तुमार खाना ले पाप में पड़छो, त यो गलत छै।</verse>
				<verse number="21">निको त यो छै, कि त नै तैं शिकार खायें, और नै अंगूर को रस पीयें, और कोई काम इसो जन करें, जेलै तेरो विश्वासी भाई भटक भेरन पाप में पड़ जौ।</verse>
				<verse number="22">तुम इन बातुन का बारिमें जो ले मानछा, उ तुमार और परमेश्वरा का बीचे की बात छै। धन्य छै उ, जो उ बात में जेस उ ठीक समझछो, अपूनास दोषी नै ठैरून।</verse>
				<verse number="23">लेकिन अगर तुमून यो बात स लीभेरन सकछै की हमून कि खानो चैछ या नै, अगर तुम येस खा लीछा त तुम पाप करूनमर्याछा। किलैकी तुम अपून विश्वास को पालन नै करूनमर्या। हम जो ले करनू, अगर यो प्रभु में विश्वास का दगाड़ नाहातिन, त उ हमून खिन पाप छै।</verse>
			</chapter>
			<chapter number="15">
				<verse number="1">हम जो विश्वास में मजबूत छै, तो जाणनू कि इन बातुन ले के फर्क नै पड़नो, लेकिन हम उनून केवल खुदै खुश करून खिन नै कर सकना। हमून उन लोगून का शक और डरून में बिचार करून चैछो जो इन बातुन गलत मान्नान</verse>
				<verse number="2">हमून में भटे हरेक अपून दगड़िया विश्वासी खिन उ करून चैंछो, जो उ खिन निको छै और जो ऊस खुश करोलो और जो उक विश्वास स मजबूत बनालो।</verse>
				<verse number="3">क्याखिनकि मसीह ले अपनास खुश नै कर्यो, लेकिन जसो पवित्रशास्त्र में लिख रैछ, “तेरि बुराई करून वालान ले मेरि बुराई ले करछ्य।”</verse>
				<verse number="4">जतुक बात पैलिक पवित्रशास्त्र में लिखी ग्यान, उन हमरि शिक्षा खिन लिखीनाका छन, ताकि हम उ शिक्षा ले धीरज और हिम्मत मिलनै रौ, यो तरीका ले हम अपूनी आश बनाईना की राखा, कि परमेश्वरे ले जो वादा करिनाको छ्यो, उ करोलो।</verse>
				<verse number="5">मैं प्रार्थना करछूँ की, परमेश्वर तुमूनमें और धीरज और शान्ति दे ताकि तुम यीशु मसीह की शिक्षा का अनुसार एक-दुसरा का दगाड़ शान्ति ले रून में मद्दत करा।</verse>
				<verse number="6">ताकि तुम सब एक दगाड़ मिलभेरन हमार प्रभु यीशु मसीह का पिताकी महिमा करा।</verse>
				<verse number="7">येक कारण, तुम एक दुसरा स ग्रहण करा, जसीकैं मसीह ले तुमून ग्रहण कर रैछ; ताकि लोग परमेश्वरे की तारीफ करून।</verse>
				<verse number="8">येक कारण मैं कुछूँ जो खतना करिना का यहूदीन मसीह को सेवक यो बतून खिन बनछै, की परमेश्वर वादा स पुर करून में सच्चो छै, जो उले उनार पुरखानथैं करिनाको छ्यो,</verse>
				<verse number="9">और गैर-यहूदी लोग ले परमेश्वरे की दया का कारण उकी महिमा करून; जसो पवित्रशास्त्र में लिख रैछ, येक कारण मैं गैर-यहूदी लोगून में तेरि महिमा करलो में त्यारा नामाका भजन गाँलो।</verse>
				<verse number="10">एक और जाग पवित्रशास्त्र में लिख रैछ, “हे सब गैर-यहूदी लोगों, परमेश्वर की प्रजा का दगाड़ खुशी मना।”</verse>
				<verse number="11">फिर भटे पवित्रशास्त्र में लिख रैछ, “हे सब गैर-यहूदी लोगों, प्रभु की तारीफ करा; और हे राज्य-राज्य का सब लोगों उकी तारीफ करा।”</verse>
				<verse number="12">और फिर परमेश्वरो को संदेश दिनवालो यशायाह ले पवित्रशास्त्र में लिख रैछ, यिशै को बंश भटे एक आलो, और गैर-यहूदी लोगून में राजा करोलो, उमें गैर-यहूदी लोग आश राखाँला की उ उनून बचालो।</verse>
				<verse number="13">मैं प्रार्थना करछूँ की, परमेश्वर जो आशो को दाता छै, तुमून विश्वास करून में पुर रीतिले खुशी और शान्ति ले भरौ की पवित्र आत्मा की सामर्थ ले तुमेरि आश बढ़नै जौ।</verse>
				<verse number="14">हे म्यारा विश्वासी भाईयों, मैं खुद ले तुमार बारिमें जाणछूँ, कि तुम ले खुदै भलाई ले भरिनाका छै; और तुम पुर रीतिले जाणछा की तुमून कि करून चैछो। एक दुसरा स सिखूनै रौ।</verse>
				<verse number="15">तब ले मैले काँई-काँई याद दिलून खिन तुमून जो भौत हिम्मत करभेरन लिख रैछ, यो उ दयाका कारण भ्योछ, जो परमेश्वरे ले मैंस दीछ।</verse>
				<verse number="16">कि मैं गैर-यहूदी लोगून खिन मसीह यीशु को सेवक होभेरन एक याजक की नियाती परमेश्वरे की सुसमाचार की सेवा करूँ। इसीकैं मैं उनून एक भेंटा का रूप में परमेश्वरा का पास ल्या सकछूँ जैले उ खुश छन, किलैंकी पवित्र आत्मा ले उनून शुद्ध कर रैछ।</verse>
				<verse number="17">येक कारण मैं यीशु मसीह कारण परमेश्वरे में सेवा की तारीफ कर सकछूँ।</verse>
				<verse number="18">मैं यो कुन खिन निडर छूँ, किलैंकी मसीह ले म्यारा द्वारा जो कर रैछ, उमें मैं दुसरा लोगून परमेश्वराका पछिल चलून में सक्षम छूँ। गैर-यहूदीन यीशु मसीह में भरोस करछय जब उनूनले म्यारा बचन स सुणछ्य और म्यारा कामून देखछ्य।</verse>
				<verse number="19">मैं पवित्र आत्मा द्वारा दी गै सामर्थ ले चकित काम और चमत्कार करछूँ। येक कारण जाँ ले मैं यरूशलम शैहर भटे इलिरिकम शैहर गयूँ, मैंले वाँ सबे लोगून, यीशु मसीह का बारिमें सुसमाचार सुणूछूँ।</verse>
				<verse number="20">लेकिन म्यारा मनेकी इच्छा छै, की यीशु मसीहा को सुसमाचारो को प्रचार उनी जागान में करलो, जाँ मसीह का बारिमें येले तक सुणि नै ग्यो; ताकि मैं दुसारा का कामून में अपून अधिकार नै राखूँ।</verse>
				<verse number="21">मैं उ बात स पुर करून चांछूँ जो पवित्रशास्त्र में लिख रैछ, “जिनून मसीहा का बारिमें नै बताई ग्योछ, उन देखाला और जिनूनले उक बारिमें नै सुणि उनी समझाला।”</verse>
				<verse number="22">किलैकी मैं उन जागान में मसीहा को सुसमाचारो को प्रचार करनमर्यू छूँ, जाँ लोगून ले उक बारिमें नै सुणिना को छ्यो, येक कारण मैं अपून आपस तुमार पास उन है रोकूनमर्यू।</verse>
				<verse number="23">लेकिन अब इन प्रदेशून में जिन लोगून ले मसीहा का बारिमें नै सुण रैछ, उन प्रदेशून में सुसमाचारो को काम पुर कर हैछ, मैंस भौत सालून भटे इन्तजारा का बाद तुमार पास उनाकी इच्छा छै।</verse>
				<verse number="24">येक कारण जब मैं स्पेन देश खिन जूलो त तुमार पास हुनै जूलो, किलैंकी मैंस आश छै, की मैं सफर करून बखत तुमूनथैं भेंट करूँ, और मैं तुमूनथैं संगति करभेरन खुश हो जूँ, और मैं चाछूँ की तुम मैंस म्यारा स्पेन देशा का सफर खिन मद्दत करा।</verse>
				<verse number="25">लेकिन ऐल त यरूशलम शैहरा का विश्वासीन भेंट दिन खिन जान छै।</verse>
				<verse number="26">क्याखिनकि मकिदुनिया और अखया प्रदेशा का लोगून ले इसो करून निकी बात समझछ्य, कि यरूशलम शैहरा में गरीब विश्वासी लोग छन उनून के दान दी।</verse>
				<verse number="27">उनूनले खुशी ले गरीब लोगून दान दीछ, उन यरूशलम शैहरा का रूनवाला लोगून का कर्जदार छै, किलैंकी गैर-यहूदी लोगून ले यरूशलम शैहर में रूनवाला विश्वासीन ले सुसमाचार की आत्मिक आशीष प्राप्त करछै, येक कारण उनून लागछो की येका बदला में उन कम है कम उनेरि आर्थिक मद्दत कर सकनान।</verse>
				<verse number="28">येक कारण, मैं सबून है पैलि यरूशलम शैहर खिन जानमरयू, ताकि उनून जो जामा करीना का दान दी सकूँ। उक बाद फिर मैं रोम देश में आभेरन तुमारा दगाड़ मिलना का बाद स्पेन देश खिन जूलो।</verse>
				<verse number="29">और मैं जाणछूँ कि जब मैं तुमार पास उलो, त उक कारण मसीह पुरी रीतिले आशीष द्योलो।</verse>
				<verse number="30">हे विश्वासी भाईयों, हमार प्रभु यीशु मसीह में हमार आत्मा ले हमून जो प्रेम दीछ, उक कारण, मैं तुमूनथैं बिनती करछूँ की मैं खिन परमेश्वरथैं भौत ईमानदारी ले प्रार्थना करा।</verse>
				<verse number="31">जेले मैं यहूदिया प्रदेशा का अविश्वासीन भटे बच रूँ, और यो बात खिन ले प्रार्थना कर्या की वाँ का विश्वासी मेरि भेंट स ग्रहण करून जो मैं अपून दगाड़ यरूशलम शैहर भटे लीभेरन जानमर्यू।</verse>
				<verse number="32">और मैं परमेश्वरे की इच्छाले तुमार पास आनन्द का दगाड़ आभेरन तुमेरि संगति में आराम करूँ।</verse>
				<verse number="33">मैं प्रार्थना करछूँ की परमेश्वर, जो शान्ति दीछो, तुम सबून का दगाड़ रौ। आमीन।</verse>
			</chapter>
			<chapter number="16">
				<verse number="1">मैं चांछूँ की, तुम फीबे को आदर करा, जो हमरि विश्वासी बैनि और जो किंख्रिया शैहर की विश्वासी मण्डली की सेविका छै।</verse>
				<verse number="2">और तुम लोगून चैछो की उको प्रभु में स्वागत करा, और जसकैं कोई काम में ऊस तुमेरि जरूरत हो, त उकी मदद कर्या क्याखिनकि उले भौतून की और मेरि ले मद्दत करछै।</verse>
				<verse number="3">बैनि प्रिस्किल्ला और उको घरवालो अक्विला स जो मसीह यीशु में म्यारा सहकर्मी छन, उनुस म्येरो नमस्कार।</verse>
				<verse number="4">उनूनले म्यारा प्राण बचुन खिन खुद अपूनी जीन्दगी ले खतरा में डाल दीछ। केवल मैं नै, लेकिन गैर-यहूदी लोगून की पुरी विश्वासीन की मण्डली ले उनोरो धन्यवाद करनान।</verse>
				<verse number="5">और उ विश्वासीन की विश्वासी मण्डलीस ले नमस्कार जो उनार घर में जामा हुछी; म्योरो प्रिय इपैनितुस ऊस ले म्येरो नमस्कार जो आसिया प्रदेश को मसीह में विश्वास करूनवालो पैल आदिमी छै।</verse>
				<verse number="6">मरियम स जेलै तुमून खिन भौत मेहनत करछ्य, ऊस ले म्येरो नमस्कार।</verse>
				<verse number="7">भाई अन्द्रोनीकुस और बैनि यूनियास जो म्यारा जाति का लोग छन और म्यारा दगाड़ जेल में छ्या, और प्रेरित उनून निकी कै जाणनान, और मैं है पैलिक मसीह का शिष्य बनिनाका छ्या उनुस ले म्येरो नमस्कार।</verse>
				<verse number="8">अम्पलियातुसस, जो प्रभु में म्येरो प्रिय दगड़िया छै, ऊस ले म्येरो नमस्कार।</verse>
				<verse number="9">उरबानुस स, जो मसीह में हमार सहकर्मी छन, और म्यारा प्रिय इस्तखुस स ले म्येरो नमस्कार।</verse>
				<verse number="10">अपिल्लेसस परखी जाना का बाद ले जेको विश्वास मसीह में लगातार बढ़नै ग्यो, ऊस म्येरो नमस्कार। अरिस्तुबुलुस और उक घराना स ले म्येरो नमस्कार।</verse>
				<verse number="11">म्यारा रिश्तेदार हेरोदियोन स म्येरो नमस्कार। नरकियुस्सका घराना स जो लोग प्रभु में छन उनूनले म्येरो नमस्कार।</verse>
				<verse number="12">त्रफैना और त्रफोसास बैनिन जो प्रभु में मेहनत करनान, उनून म्येरो नमस्कार। प्रिया पिरसिसस बैनि स जेले प्रभु में भौत मेहनत करछै, ऊस ले म्येरो नमस्कार।</verse>
				<verse number="13">रूफुसस जेले प्रभु ले खास काम खिन चुनिनाको छै, और उकी ईजा स, जो मेरि ले ईजा का नियाती छै, द्वीवै म्येरो नमस्कार।</verse>
				<verse number="14">असुंक्रितुस और फिलगोन और हिर्मेस, पत्रुबास, हर्मास और उनार दगाड़िया विश्वासी भाईन म्येरो नमस्कार।</verse>
				<verse number="15">फिलुलुगुस और यूलिया, नेर्युस और उकी बैनि, और उलुम्पास और उनार दगाड़िया सब परमेश्वरा का लोगून म्येरो नमस्कार।</verse>
				<verse number="16">एक दुसरा का दगाड़ प्रेमे ले गाल मिलभेरन नमस्कार करा। तुमून मसीह की पुरी विश्वासी मण्डली का तरफ भटे म्येरो नमस्कार।</verse>
				<verse number="17">अब हे विश्वासी भाईयों, मैं तुमूनथैं बिनती करछूँ, की तुम लोगून भटे सतर्क और दूर रया, और उन उ शिक्षा का खिलाफ छन, जो तुमून मिल रैछ, और जो दुसारा लोगून का विश्वास में कमजोर हुनो और झगड़ा को कारण बनछो।</verse>
				<verse number="18">क्याखिनकि इस लोग हमार प्रभु यीशु मसीह का नाहातिन, लेकिन अपून फैदा खिन सेवा करनान, और इन लोग चिकनी-चुपड़ी बात करभेरन सीधा-सादा मनाका लोगून बहका दीनान।</verse>
				<verse number="19">हर कोई जाणनान की तुम कतुक निकीकैं प्रभु हुकुम पालन करछा। येक कारण में तुमार बारिमें सोचभेरन खुश छूँ, लेकिन मैं यो चाछूँ कि, तुम भलाई खिन बुद्धिमान, और बुराई खिन सीधा बनिनाक रौ।</verse>
				<verse number="20">परमेश्वर जो शान्ति को दाता छै, उ शैतान स नाश कर द्योलो और तुमार अधीन कर द्योलो। हमार प्रभु यीशु मसीह को अनुग्रह तुमून में हुनै रौ।</verse>
				<verse number="21">म्यारा दगाड़ प्रभु की सेवा करूनवाला तीमुथियुस, और म्यारा जातिक लोग लूकियुस और यासोन और सोसिपत्रुस को तुमून नमस्कार।</verse>
				<verse number="22">मैं तिरतियुस जो पौलुस खिन यो चिठ्ठी लिखूनमरयूँ, मैं अपून नमस्कार स भेजूनमरयूँ। मैंले प्रभु को एक शिष्य छूँ।</verse>
				<verse number="23">गयुस जैका दगाड़ में रून मरयूँ उले तुमून नमस्कार कुनमर्योछ। पुर विश्वासीन की मण्डली याँ उनार घर में मिलछी। इरास्तुस जो यो शैहरो को भंडारी छै तुमून नमस्कार दीछो।</verse>
				<verse number="24">मैं प्रार्थना करछूँ की, हमार प्रभु यीशु मसीह की दया तुमून में हुनै रौ।</verse>
				<verse number="25">अब तुमून म्येरो सुसमाचार जो यीशु मसीह का बारिमें छै, तुमून प्रचार करभेरन विश्वास में मजबूत कर सकछो। किलैकी यो सुसमाचार सदियून भटे लुका भेरन राखिनाको छ्यो।</verse>
				<verse number="26">लेकिन अब परमेश्वरो को हुकुमा का अनुसार परमेश्वरा का संदेश दिन वालान की किताबाक द्वारा सब जातिन का लोगून बताछ, की विश्वास भटे हुकमो को पालन करूनवाला हो जाँ।</verse>
				<verse number="27">यीशु मसीह का द्वारा, उ एकमात्र प्रजापति बुद्धिमान परमेश्वर की महिमा हमेशा-हमेशा हुनी रौ। आमीन।</verse>
			</chapter>
		</book>
		<book number="46">
			<chapter number="1">
				<verse number="1">मैं, पौलुस यो चिठ्ठी स जो प्रभु यीशु मसीह को प्रेरित हुन खिन परमेश्वरे की इच्छा ले चुन रैछ और मैं याँ हमार विश्वासी भाई सोस्थिनेस का दगाड़ छूँ जो मेरि मद्दत करछो।</verse>
				<verse number="2">मैं यो चिठ्ठी परमेश्वरा का विश्वासीन की मण्डली खिन भेजूनमरयूँ, जो कुरिन्थुस शैहर में छै, मतलब की उन लोगून जिनून परमेश्वरेले अपून लोग हुन खिन यीशु मसीहक दगाड़ एक करभेरन अलग करिना को छै और पवित्र लोग हुन खिन बुलाछ; और उन सबून का नाम ले जो हर जाग हमार और अपून प्रभु यीशु मसीहक नामले प्रार्थना करनान।</verse>
				<verse number="3">मैं प्रार्थना करछूँ, कि हमार पिता परमेश्वर और प्रभु यीशु मसीहक तरफ भटे तुमून अनुग्रह और शान्ति मिलनै रौ।</verse>
				<verse number="4">मैं तुमार बारिमें अपून परमेश्वरो को धन्यबाद हमेशा करछूँ, क्‍याखिनकि तुमोरो यीशु मसीहक दगाड़ रिशता हुना का कारण परमेश्वर ले अपून अनुग्रहक द्वारा तुमून भौत सारा आशीष दीयान।</verse>
				<verse number="5">क्याखिनकि तुमोरो यीशु मसीह का दगाड़ गैरो रिशता छै, उक कारण परमेश्वर ले तुमून भौत सारी काबिलियत दी रैछ, जैमें बचनो को प्रचार करून और आत्मा का द्वारा हरेक काम करना की समझ दी रैछ।</verse>
				<verse number="6">यो बात स साबित करछो, जो मैंले तुमून मसीहक बारिमें बातछ उ सच्ची छै।</verse>
				<verse number="7">यो कारण छै, कि जब तुम हमार प्रभु यीशु मसीह का वापस उनाको इन्तजार करनै रूछा, और अब तुमार पास उ आत्मिक बरदान छन जिनेरी तुमून जरूरत छै।</verse>
				<verse number="8">परमेश्वर तुमून अन्त तक विश्वास में मजबूत करोलो, कि प्रभु यीशु मसीह दुबारा वापस आलो, त तुम निर्दोष पाई जा।</verse>
				<verse number="9">परमेश्वर इसो करोलो, क्याखिनकि उ जो कुंछो ऊस उ करून में विश्वायोग्य छै, और उले तुमून अपून च्याला, हमार प्रभु यीशु मसीह का दगाड़ एक संगति में बुला रैछ।</verse>
				<verse number="10">हे म्यारा विश्वासी भाईयो, मैं तुमूनथैं हमार प्रभु यीशु मसीह नामले बिनती करछूँ कि तुम सबून एक-दुसरा का दगाड़ सहमत हुन चैछो, ताकि तुमून में मन-मोटाव नै हो, लेकिन एक्कै हो भेरन एक-दुसारा का दगाड़ मेल-मिलाप ले रौ।</verse>
				<verse number="11">क्याखिनकि हे म्यारा विश्वासी भाईयो, खलोए का परिवारा का लोगून ले मैंस तुमार बारिमें बताछ, कि तुमून में झगाड़-फिसाद हुन मर्यान।</verse>
				<verse number="12">म्येरो कुंना को मतलब यो छै, कि तुमून में भटे कोई त अपूनास कुंछो, “मैं पौलुसो को शिष्य छूँ,” कोई “मैं अपुल्लोसो को,” कोई “मैं कैफा को,” या “मैं मसीह को शिष्य छूँ।”</verse>
				<verse number="13">यो बात ठीक नाहातिनी, क्याखिनकि मसीह स द्वी हिस्सा में नै बाणि ग्यो, शायद तुम गलती ले यो सोचछा कि मैं, पौलुस तुमून आजाद करून खिन सूली में चढ़ाई ग्यो? शायद तुम गलती ले यो सोचून मरैछा कि तुमून येक कारण बपतिस्मा दीई ग्योछ ताकि तुम म्यारा शिष्य बना।</verse>
				<verse number="14">मैं परमेश्वरो को धन्यबाद करछूँ कि क्रिस्पुस और गयुस स छोड़िभेरन मैंले तुमूनमें भटे कैस ले बपतिस्मा नै दीयो।</verse>
				<verse number="15">कोई इसो नै के सकूनो, कि तुमून म्यारा शिष्यून का रूप में बपतिस्मा मिल रियोछ।</verse>
				<verse number="16">और हाँ, मैंस याद छै कि मैंले स्तिफनास का परिवार का लोगून ले बपतिस्मा दीछ; इनून छोड़, मैंले कैसे बपतिस्मा नै दीनो।</verse>
				<verse number="17">क्याखिनकि मसीह ले मैंस बपतिस्मा दीन खिन नै, पर सुसमाचार सुणून खिन भेज रैछ, और जब मैं लोगून परमेश्वरो को सुसमाचार सुणूछूँ, त मैं अपूनी काबिलियत ले नै सुणूनू, नै त लोग सिर्फ मेरि काबिलियत मेंई विश्वास करना, और उन सूली में मसीह की मौत की सामर्थ स नी जाणना।</verse>
				<verse number="18">क्याखिनकि जब लोग परमेश्वरो को यो सुसमाचार सुणूनान, कि यीशु मसीह सूली में हमार पापून खिन बलिदान हो ग्यो, त उनूनमें भटे कुछ लोग कुंनान कि यो सुसमाचार मूर्खतापूर्ण छै। इसो तरीका ले सोचून वाला लोग परमेश्वरा का सजा का हक्कदार छन, लेकिन हमून खिन जो यो सुसमाचार में विश्वास और उद्धार पा रैछ उनून खिन परमेश्वरै सामर्थ छै।</verse>
				<verse number="19">क्याखिनकि पवित्रशास्त्र में लिखीनाको छै, “मैं ज्ञानिन को ज्ञान नाश करूँलो, और समझदारून की समझस बेकार कर द्यूलो।”</verse>
				<verse number="20">और हम यो बातले समझनू कि जो बुद्धिमान छन उनोरो ज्ञान की कोई कीमत नाहातिन; मूसा का नियम-कानून का सिखून वालान की ले कोई कीमत नाहातिन, और यो संसार में इसा लोगून की ले कीमत नाहातिन जो बोलून में चालाक छन। क्याखिनकि परमेश्वरा सामुनि यो ज्ञान की कोई कीमत नाहातिन।</verse>
				<verse number="21">मैं इसो येक कारण कुछूँ, क्याखिनकि परमेश्वरेले समझदारी ले फैसला लीछ कि यो संसार लोगून अपून काबलियत का द्वारा ऊस नी जाण सकछ्या। येक कारण परमेश्वर उन लोगून बचूना को फैसला करछ्य जो सुसमाचार में विश्वास करनान जैको प्रचार हमूले करछ्य, हालाकि लोग यो प्रचार मूर्खता की बात समझनान।</verse>
				<verse number="22">यो यहूदी लोगून खिन मूर्खतापूर्ण लागछो, क्याखिनकि उ यो सच्चाई स साबित करून खिन स्वर्ग भटे चिन चाँनान, और गैर-यहूदी लोग ले लोगून का ज्ञान का खोज में छन।</verse>
				<verse number="23">लेकिन हम यो प्रचार करनू कि मसीह हमून हमार पापून है छुड़ून खिन सूली में मर ग्यो, यो यहूदी लोगून का विश्वास खिन ठोकर को कारण छै और गैर-यहूदीन लोगून खिन मूर्खता खिन छै।</verse>
				<verse number="24">लेकिन परमेश्वरा का चुनिना का लोगून खिन, चाहे यहूदी हुन या गैर-यहूदी, योई मसीह परमेश्वर की सामर्थ, और परमेश्वरो को ज्ञान छै।</verse>
				<verse number="25">क्याखिनकि जो परमेश्वरै की मूर्खताको जसो लागछो उ लोगून का ज्ञान भटे ज्यादा बुद्धिमान छै, और परमेश्वरे की कमजोरी लोगून का शक्ति भटे ज्यादा मजबूत छै।</verse>
				<verse number="26">हे म्यारा विश्वासी भाईयो, यो बारिमें सोचा, कि तुम कि छ्या, जब परमेश्वर ले तुमून बुलाछ, लोगून का नजरून में तुम भौत बुद्धिमान नी छ्या, और नै भौत ताकतवर छ्या और नै त समाज में तुमोरो भौत रूतबा छ्यो।</verse>
				<verse number="27">लेकिन परमेश्वरे ले संसाराक मूर्खून चुन लीछै, कि ज्ञानवानून लज्जित करो; और संसाराक कमजोरून चुन लीछै, कि ताकतवर लज्जित करो।</verse>
				<verse number="28">और भौत रूतबा वाला लोगून को घमण्ड चूर करून खिन परमेश्वर ले उन लोगून चुन हालछै, जो संसारा का नजर में तुच्छ और नीच और जिनेरी कोई गिनती नाहातिन।</verse>
				<verse number="29">परमेश्वरेले यो येक कारण क्योछ कि कोई ले आदिमी उक सामुनि घमण्ड नै कर सकौ।</verse>
				<verse number="30">लेकिन परमेश्वर ले तुमून यीशु मसीह का दगाड़ एकजुट करिना को छै, और मसीह का द्वारा हमून अपूनो ज्ञान दीछो। परमेश्वरेले हमून उक नजरून में धर्मी बनूछो। मसीह का द्वारा हमून पवित्र बनाई जानू, और उ हमून पापून भटे छुटकारा दीछो।</verse>
				<verse number="31">क्याखिनकि मसीह हमोरो सब कुछ छै, जो पवित्रशास्त्र में लिखीना को छै, “जो घमण्ड करौ उमें घमण्ड करौ जो परमेश्वर ले करिना छै।”</verse>
			</chapter>
			<chapter number="2">
				<verse number="1">हे म्यारा विश्वासी भाईयो, जब मैं तुमार पास परमेश्वरा का बारिमें सुसमाचार सुणूनै आयूं त मैंले ठूला-ठूला अकक्षरून को इस्तमाल नै कर्यो और नै समझदार लागना को दिखावा करछ्य।</verse>
				<verse number="2">क्याखिनकि तुमार बीच मैं यो ठान भेरन आईना को छ्यूँ, कि मैं यीशु मसीह और उकी सूली में मौत का अलावा कोई ले और चीजक बारिमें नै जाणू।</verse>
				<verse number="3">जब तुम लोगून का बीच छ्यूँ, मैं खुद कमजोर, और भौत थरथराईना को और भौत डरीना को छ्यूँ।</verse>
				<verse number="4">और मेरि शिक्षा और म्येरो प्रचार आदिमीन का ज्ञान ले भरिना का अकक्षरून का अनुसार नी छ्यो, लेकिन पवित्र आत्मा ले तुमून एक शक्तिशाली तरीका ले दिखाछ कि जो सुसमाचार मैंले तुमून बताछ उ सच्ची छ्यो।</verse>
				<verse number="5">येक कारण कि तुमोरो विश्वास लोगून का ज्ञान में नै, लेकिन परमेश्वरा का सामर्थ में निर्भर हो।</verse>
				<verse number="6">फिरले मैं उन लोगून का बीच ज्ञान को सुसमाचार सुणूछूँ जो आत्मिक रूप ले मजबूत छै। लेकिन यो संसारिक और संसार का नाश हुनवाला अधिकारीन को ज्ञान नाहातिन।</verse>
				<verse number="7">लेकिन जो ज्ञान की हम बात करनू, उ ज्ञान परमेश्वरो को ज्ञान छै जो लुकीना को छ्यो। अब तक कोई ले येस नी जाण छ्यो। लेकिन संसाराक बनून है पैलि उले अपून ज्ञान ले फैसला करिना को छ्यो कि हम उकी महिमा में भागीदार हूला।</verse>
				<verse number="8">परमेश्वरे की योजना यो संसाराक अधिकारीन में भटे कैले ले नै समझयो, क्याखिनकि अगर उन जाण लीना, त महिमाक प्रभु स सूली में नी चढ़ूना।</verse>
				<verse number="9">लेकिन जसो पवित्रशास्त्र में लिखीना को छै, जो कभै आँखान ले दिखाई नै दीयो, जो कभै कानून ले नै सुणि ग्यो और जो लोगून का दिल में नै आयो, उ सब परमेश्वरेले उनून खिन तैयार करिना को छै, जो उनूथैं प्रेम करछो।</verse>
				<verse number="10">परमेश्वर ले इन बातुन हमून में मतलब प्रेरितून में इन चीजून अपूनो पवित्र आत्मा का द्वारा प्रकट करछ्य। क्याखिनकि पवित्र आत्मा भटे कैले लुकीना को नाहातिन, उ हर बात स जाँच करछो, या तक कि परमेश्वरो को मक्शद स ले जो अब तक लोगून मालूम नी छ्यो।</verse>
				<verse number="11">आदिमीन में भटे को कोई आदिमी की बातुन जाण सकछो, केवल आदिमी कि आत्मा जो उमें छै? उसीकैं परमेश्वरे की बातुन ले कोई नै जाण सकनो, केवल परमेश्वरो को आत्मा ही जाण सकछो।</verse>
				<verse number="12">हम उसकैं नै सोचना जसकैं संसारा का लोग सोचनान; किलैकी हमूनले उ आत्मा पा रैछ, जो परमेश्वरा का तरफ भटे छै, कि हम उन सब बातुन जाण सका, जो परमेश्वरेले हमून दी रैछ।</verse>
				<verse number="13">और येक कारण हम इन बातुन दुसारा लोगून बतूनू, त हम इन बातुन को इस्तमाल नै करना, जो लोगून का ज्ञान ले मिलछो, लेकिन हम उन बातुन को इस्तमाल करनू जो परमेश्वरा का आत्मा का द्वारा मिलछो, जो आत्मिक ज्ञान का द्वारा आत्मिक बाततून समझूछो।</verse>
				<verse number="14">येक कारण जैका पास परमेश्वरो को आत्मा छै, केवल उई यो आत्मिक सच्चाई की बातुन समझ सकछो, लेकिन जैका पास परमेश्वरो को आत्मा नाहातिन, उई इन आत्मिक बातुन मूर्खता की बात समझछो।</verse>
				<verse number="15">जिन लोगून ले पवित्र आत्मा पाछ उई उन सब बातुन समझ सकनान जो पवित्र आत्मा सिखूछो। लेकिन जिन लोगून का पास पवित्र आत्मा नाहातिन उन, उन लोगून का बिचारून नै समझ सकना जिनारा पास पवित्र आत्मा छै।</verse>
				<verse number="16">यो सच्ची छै क्याखिनकि पवित्रशास्त्र में कै रैछ, “कोई ले यो नै जाण सकनो कि प्रभुक मन में कि छै। कोई ऊस नै सिखा सकनो।” लेकिन हम विश्वासी समझनू कि मसीह का मन में कि छै।</verse>
			</chapter>
			<chapter number="3">
				<verse number="1">हे म्यारा विश्वासी भाईयो, तुम यो संसाराक लोगून नियाती दिखावा करून मरेछा, येक कारण मैं तुमूनथैं आत्मिक लोगून का नियाती बात नै कर सकयू, क्याखिनकि मसीहक विश्वास में तुम बच्चान का जस छा।</verse>
				<verse number="2">उ बखत मैंले तुमून परमेश्वरा का बचन भटे केवल बुनयादि शिक्षा का बारिमें सिखाछ, जो यो नानतिनान दूध पिलूनो जसो छै। मैंले परमेश्वरा का वचने की गैरी सच्चाई स नै सिखायो, जो एक ठोस खाना को जसो छै क्याखिनकि तुम येस लीन खिन तैयार नाहातिना।</verse>
				<verse number="3">क्याखिनकि तुम ऐल तक अपून पापी स्वभावाक अनुसार जीवन जीन मरैछा, येक कारण तुमून में जलन और लड़ाई-झगाड़ा हुनान, त क्या यो साबित नै हुनोई तुम अपून पापी स्वभावाक बश में छा? क्या तुम यो संसाराक लोगून की नियाती जीवन नै जीन मरेछा?</verse>
				<verse number="4">येक कारण कि जब एक कुंछो, “मैं पौलुस को शिष्य छूँ,” और दुसोरो, “मैं अपुल्लोस को शिष्य छूँ,” त क्या तुम यो संसाराक लोगून का नियाती जीवन नै जीन मरेछा?</verse>
				<verse number="5">आखिर में केवल मैं पौलुस और अपुल्लोस द्वीवै सेवक छा, जिनारा द्वारा तुम लोगून ले मसीह में विश्वास करछ्य, हमून में भटे हरेक ले उई काम करछ्य जो परमेश्वरे ले हमून करून खिन दीछ।</verse>
				<verse number="6">मैं तुमून परमेश्वरो को बचन बतून वालो पैलो आदिमी छ्यूँ, येक कारण मैं एक इस आदिमीक नियाती छूँ जैले बी बोछ। उक बाद, अपुल्लोस ले तुमून विश्वास में मजबूत बनून खिन तुमेरि मद्दत करछ्य, ठीक उसीकैं जसीकैं कि कोई दुसोरो आदिमी उन बोटून में पानि दीछो जो बढ़ून लाग्यान। लेकिन परमेश्वरे ले तुमून नय्या जीवन दी रैछ और जैले तुम आत्मिक रूप में बढ़ून मरैछा जसीकैं परमेश्वर बोटून बढ़ूछो।</verse>
				<verse number="7">येक कारण नै त बी बून वालो कै छै, और नै बोटून में पानि दीन वालो कै छै, लेकिन परमेश्वर सब कुछ छै, जो बढ़ूछो।</verse>
				<verse number="8">मैंले तुमून सुसमाचार सुणाछ और परमेश्वरा का बचन स सिखून शुरू करछ्य और अपुल्लोस ले तुमून सिखूनो जारी राखछ्य लेकिन हम द्वीवै को एक मक्शद छै, और हरेक आदिमी अपूनी मेहनताक अनुसार परमेश्वर भटे ईनाम पालो।</verse>
				<verse number="9">क्याखिनकि हम परमेश्वरा का काम करूनवाला दगड़िया छा, और कुरिन्थक विश्वासीयो तुम एक बगीचाक नियाती छा, जो परमेश्वरो को छै, और मैं तुमेरि इस घराक नियाती तुलना करून मरयूँ जैस परमेश्वर बनूछो।</verse>
				<verse number="10">परमेश्वरा का उ बरदानाक अनुसार, जो मैंस दीई ग्योछ, मैंले बुद्धिमान मिस्त्री का नियाती नींव डालछ्य, और अब कोई दुसोरो उ घर स बनून मर्योछ। लेकिन हरेक आदिमी सतर्क रौ, कि उ, उ नींव में उ घर स कसीकैं बनून मर्योछ।</verse>
				<verse number="11">जो यो घर बनाई जानमर्योछ, यीशु मसीह उ घर की नींव की नियाती छै। उ एकमात्र आधार छै। येको मतलब छै, यीशु मसीह एकमात्र जरिया छै जैले लोग परमेश्वरे स जाण सकनान।</verse>
				<verse number="12">अगर मसीह को सेवक परमेश्वर की सही शिक्षा सिखून, जो उनून परमेश्वरा का तरफ भटे मिलीना की छै, त उन उ घर बनूनवाला मिस्त्री का नियाती छन, जो नीव में घर बनून बखत सुन-चाँदी और कीमती ढूंगा और निका चीजून को इस्तमाल करनान। लेकिन अगर उन झूठ्ठी शिक्षा सिखूनान, त उन उ घर मिस्त्री का नियाती छन जैले घर बनून बखत लकाड़ा-पाताड़ा और घास जसी खराब चीजून को इस्तमाल करनान।</verse>
				<verse number="13">लेकिन जब न्याय को दिन आलो, त आगो में हरेक आदिमी को काम प्रगट होलो। और उ हरेक को काम परखोलो की कसो छै।</verse>
				<verse number="14">जैको काम उ नींव में जो उले करिना को छै, अगर उ नै जलनो, त उ ईनाम पालो।</verse>
				<verse number="15">अगर कैको काम जल जालो, तो उ आदिमी स उ ईनाम नी मिलोलो। हालाकि उ, उ अनन्त जीवन स नी हरालो जो परमेश्वरे ले ऊस दी रैछ।</verse>
				<verse number="16">सच्ची में तुम जाणछा, कि तुम परमेश्वरा का मन्दिर छा, और परमेश्वरो को आत्मा तुमून में वास करछो।</verse>
				<verse number="17">अगर कोई आदिमी तुमून, जो परमेश्वरा का मन्दिरा का नियाती मिलजुल भेरन नै रून दीनो। परमेश्वर ऊस कठोर सजा देलो। किलैकी परमेश्वरो को मन्दिर पवित्र छै, और उ मन्दिर तुम छा।</verse>
				<verse number="18">अगर तुमूनमें भटे कोई सोचछो कि तुम यो संसाराक लोगून में भौत ज्ञानी छा, त तुमून यो संसाराक लोगून में मूर्ख बन जानो चैछो, येक कारण तुम परमेश्वरा का नजरून में अपून आपस ज्ञानी बना सका।</verse>
				<verse number="19">क्याखिनकि यो सच्ची छै, कि संसारो को ज्ञान परमेश्वरा का नजरून में मूर्खता छै, जसो पवित्रशास्त्र में लिखीना को छै, “परमेश्वरई छै, जो बुद्धिमानून उनेरि चतुराई में फँसा दीछो।”</verse>
				<verse number="20">और फिर पवित्रशास्त्र में यो ले लिखीना को छै, “प्रभु बुद्धिमानून का बिचारून जाणछो, कि उ बेकार छै।”</verse>
				<verse number="21">येक कारण एक खास आदिमीनक बारिमें घमण्ड करून और उक पछिल हिटून छोड़ दी, क्याखिनकि परमेश्वरे ले तुमून सब कुछ तुमार भलाई खिन दी रैछ।</verse>
				<verse number="22">खास करभेरन चाहे मैं पौलुस, अपुल्लोस, पतरस (कैफा), या यो संसारे की चीज, चाहे तुम ज्यून रौ या मर जा, चाहे ऐल या भविष्य, तुमून यो सब चीज परमेश्वर ले तुमारा भलाई खिन दी रैछ,</verse>
				<verse number="23">और तुमून मसीहक बारिमें घमण्ड करून चैछो, नै कि अपूनो अगुवान का बारिमें, क्याखिनकि तुम मसीहक अधीन छा, और मसीह परमेश्वरा का अधीन छै।</verse>
			</chapter>
			<chapter number="4">
				<verse number="1">येक कारण लोग हमून मसीहक सेवक समझनान, जिनून परमेश्वरा का बचुन का गुप्त भेदून समझून खिन जिमेदारी सौंप रैछ।</verse>
				<verse number="2">एक आदिमी जैस अपून मालिक द्वारा काम करून खिन दीई ग्योछ, ऊस सच्ची में भरोसमंद हुन चैछो जो काम ऊस करून खिन दी रैछ ऊस उ पुर करौ।</verse>
				<verse number="3">मैं अपून बारिमें चिनतित नाहातिनू कि तुम या और कोई लोग की कुंनान कि मैं विश्वासयोग्य छूँ या न्हैतिनू। याँ तक कि मैंले नै कुंनू कि मैं विश्वासयोग्य छूँ या नाहातिनू।</verse>
				<verse number="4">क्याखिनकि म्योरो जमीर मैंस कोई ले बात में दोषी नै ठैरूनो, फिरले येको यो मतलब नाहातिन कि मैं निर्दोष छूँ, क्याखिनकि म्योरो परखून वालो प्रभु छै।</verse>
				<verse number="5">येक कारण प्रभुक वापस उन तक कोई कैको न्याय जन करा, उ स्पष्ट रूप ले उन सबून का बिचारून बतालो जो लोग सोचनान जिनारा बारिमें कोई नै जाणनो, तब परमेश्वरा का तरफ भटे हरेक की तारीफ होलि।</verse>
				<verse number="6">हे म्यारा विश्वासी भाईयों, मैंले तुमार फैद खिन अपूनो और अपुल्लोस को उदारण दीछ, ताकि तुम हमारा द्वारा यो सिखा कि पवित्रशास्त्र में की लिखीना को छै उ है अघिल जन बढ़ा। यो निको नाहातिन की एक अगुवा को आदर करा और दुसरा को निरादर करा।</verse>
				<verse number="7">को कुंछो तुम दुसारान है महान छा? जो कुछ ले तुमार पास छै उ परमेश्वरा का तरफ भटे दीईना को छै त तुमोरो उमें कैले घमण्ड करना को अधिकार नै बननो।</verse>
				<verse number="8">तुमून लागछो जो आत्मिक रूप में जरूरी छै उ सब कुछ तुमार पास छै। तुमून लागछो कि तुमार पास बरदान छन जो पवित्र आत्मा लोगून दीछो। अगर तुम सोचछा कि हमार बिना तुम राजान की नियाती राज करून मरेछा। तैं मैंस भौत खुशी होलि तुम सच्ची में राजान की नियाती राज‌ करन शुरू कर हालछ्य ताकि हमले तुमार दगाड़ राजकर सकां।</verse>
				<verse number="9">मैंस इसो लागून मर्योछ कि परमेश्वर ले हम प्रेरितून विजय-यात्रा में मौते की सजा मिलीनाक कैदीन का सामन सबून है आखरी जाग में राखिना को छै। हम पुर संसार, स्वर्गदूतून और लोगून का सामुनि तमाशा बनग्या।</verse>
				<verse number="10">लोग हमून मूर्ख समझनान किलैकी हम मसीहक बारिमें उपदेश दीनू, लेकिन तुम लोग गलत सोचछा की तुम इतुक बुद्धिमान मसीह छा! भौत लोग यो समझनान कि हमार पास कोई अधिकार नाहातिन। लेकिन तुम घमण्ड ले कुँछा कि तुमार पास परमेश्वरे की शक्ति छै। लोग हमोरो आदर नै करना लेकिन उन तुमोरो सम्मान करनान।</verse>
				<verse number="11">हम आज तक भुखा प्यासा और फाट पुराना कपड़ान में छा, और हमार दगाड़ बुरो बर्ताव करि जानमर्योछ, और हमून खिन रून घर नाहातिन।</verse>
				<verse number="12">और अपून हातून ले काम करभेरन मेहनत करनू। लोग बुरो कुंनान, हम उनून आशीष दीनू उन सतूनान, हम सहनू।</verse>
				<verse number="13">उन लोग हमून बदनाम करनान, और हम उनून खिन प्रार्थना करनू, याँ तक की ऐल ले उन लोग हमोरो आदर नै करना; उन कुंनान कि हमरि कोई कीमत नाहातिन।</verse>
				<verse number="14">मैं तुमून शर्मिनदा करून खिन यो नै लिखूनमरयूँ, लेकिन म्येरो यो मक्शद छै, कि तुमून शिक्षा द्यू, क्याखिनकि तुम म्यारा नान्तिनानक नियाती छा, जिनून मैं प्रेम राखछूँ और उनून चेतावनी ले दीछूँ।</verse>
				<verse number="15">भले मसीह में तुमून बाटो दिखून वाला हजारू अगुवा हुन, केवल मैंई बबा नियाती छूँ क्याखिनकि मैं पैलो आदिमी छूँ, जो तुमार पास सुसमाचार लीभेरन आयू, जैक द्वारा तुमूले मसीह यीशु में विश्वास करछ्य।</verse>
				<verse number="16">येक कारण मैं तुमूनथैं बिनती करछूँ, कि म्यारा नियाती मसीह में अपूनो जीवन जीया।</verse>
				<verse number="17">येक कारण मैंले तीमुथियुस स जो प्रभु में म्येरो प्रिय और भरोसामंद च्यालाक नियाती छै, तुमार पास भेज रैछ। उ तुमून याद करालो कि, यीशु मसीहक शिष्य हुना का नाता मैं जो काम करछूँ और जसीकैं जीवन जीछूँ। जसकैं कि मैं हरेक जाग हरेक विश्वासीन की मण्डली में शिक्षा दीछूँ।</verse>
				<verse number="18">तुमून में भटे कुछ लोग घमंडी बन ग्यान, और उन सोचनान, कि मैं तुमार पास नी ऊँलो।</verse>
				<verse number="19">लेकिन प्रभु चालो त मैं तुमार पास जल्दी ऊँलो, उन घमंडी की सिर्फ शिक्षा स नै, लेकिन उनेरि सामर्थ स ले जाण लीयूलो।</verse>
				<verse number="20">क्याखिनकि परमेश्वरा का राज्य खिन भौत सी बात नाहातिन, लेकिन परमेश्वरे की सामर्थक द्वारा जीन छै</verse>
				<verse number="21">तुम कि चाछा कि मैं आभेरन तुमार दगाड़ कि करूँ? अगर तुमूले ऐल ले अपून बुर कामून नै छोड़ियो, त मैं तुमून भौत फटकार लगूलो। अगर तुमूले अपून बुर कामून करून छोड हैछ, त मैं तुमार प्रति नरम स्वभाव ले और प्रेम ले काम करूँलो।</verse>
			</chapter>
			<chapter number="5">
				<verse number="1">मैंले लोगून तुमार बारिमें यो कुंनो सुण रैछ कि तुम लोगून में ब्यभिचार हुछो, लेकिन इसो ब्यभिचार त जो लोग परमेश्वरे स नै जाणना उन लोगून में ले नै हुनो, उ यो छै कि, एक आदिमी अपूनी सौतेली ईजाक दगाड़ ब्यभिचार करनान।</verse>
				<verse number="2">और तुम अपून आप में भौत घमण्ड करछा, बल्कि तुमून दुख ले भरि जान चैछो, और तुमून इस लोगून अपूनी विश्वासी मण्डली भटे भ्यार निकाल दीनो चैछो।</verse>
				<verse number="3">हलाकि मैं वाँ तुमार दगाड़ नाहातिनू, लेकिन म्यारा बिचार तुमार दगाड़ छन, मैं वाँ तुमार दगाड़ नाहातिनू, लेकिन म्यारा मन में इसो छै कि मैंले सच्ची में इस काम करून वालानक खिलाफ अपूनो फैसला सुणा हालछ्य जो उन करून मर्यान।</verse>
				<verse number="4">जब तुम प्रभु मसीह यीशुक नाम ले इकट्ठा हुछा, तो म्यारा बिचार तुमार दगाड़ हुनान और प्रभु यीशु मसीह की सामर्थ ले तुमारा दगाड़ छै। त इसो आदिमी हमार प्रभु यीशु मसीहक अधिकार ले,</verse>
				<verse number="5">त उ आदिमी जो पापपूर्ण ब्यवहार करूनमर्योछ, ऊस अपूनी मण्डली है भ्यार निकाला और उ आदिमी स शैताना का हवाला कर दी, ताकि यो आश करि जा सकछी की उ अपून पापून है पश्चाताप करो। किलैकी अगर उ पश्चाताप करो, तब उ सच्ची में उ दिन बचाया जालो जब प्रभु न्याय करोलो।</verse>
				<verse number="6">तुमोरो घमण्ड करूनो बिल्कुल ले ठीक नाहातिन; कि थ्वाड़ा खमीर पुर ओलीना को धुलास खमीर कर दीछो? उसीकैं, अगर एक आदिमी स पाप करना की इजाजत दी जाछी, त जल्दी सब उई करून खिन प्रभावित होला।</verse>
				<verse number="7">इस काम करूनवाला लोगून थैं कौ कि उ तुमार मण्डली को हिस्सा नै हो सकनो। तब तुम विश्वासीन की मण्डली को हिस्सा होलो जो एक नय्या और शुद्ध रिशता में एक-दुसराक दगाड़ जुड़ला जैमें कोई पाप को कोई असर नै हो, क्याखिनकि परमेश्वरे ले पैलि भटेई तुमून माफ करिना को छै और तुमून पवित्र करिना को छै। तुमून पवित्रताक दगाड़ जीवन जीनो जरूरी छै। क्याखिनकि हमून हमार पापून भटे छुटकारा दीन खिन मसीह बलिदान हो ग्योछ। यो हमून उन भेड़ा का पाठान की याद दिलूछो जो इस्राएलियून ले फसहक दिन मिस्र में भौत पैलि बलिदान कर्यान।</verse>
				<verse number="8">येक कारण मैं कुंछूँ कि हमून हमेशा परमेश्वरा का पवित्र लोगून को जसो ब्यवहार करूनो चैछो। हमून बुर कामून में जीवन नै जीनो चैछो जसो कि हम मसीह में विश्वास करून है पैलि करछ्या, मतलब उन बुर और दुष्ट कामून करूनो बन्द कर दीनो चैछो जो हम करछ्या। येक बजाय, हमून परमेश्वरा का हुकमून को पालन करून छै और कोई ले बुरो काम करून नाहातिन, बल्कि हमून हमेशा ईमानदार और भरोसमंद हुन चैछो।</verse>
				<verse number="9">मैंले अपूनी चिठ्ठी में तुमून लिखीना को छै, कि ब्यभिचारीन की संगति जन करा।</verse>
				<verse number="10">यो नै, कि तुम बिलकुल यो संसाराक ब्यभिचारीन, या लोभीन, या ध्वाका दीन वालान, या मूर्तिपूजकून की संगति जन करा; क्याखिनकि यो दशा में त तुमून संसार में भटे निकल जानो पड़ूनो।</verse>
				<verse number="11">म्येरो यो कुंनो छै; कि अगर कोई अपून-आपस विश्वासी कुंनवालो, जो ब्यभिचारी, या लोभी, या मूर्तिपूजक, या गाली दिनवालो, या पियक्कड़, या अंधेर करूनवाला हो, त उकी संगति जन करा; बल्कि इसा आदिमी का दगाड़ खानो ले नै खान चैनो।</verse>
				<verse number="12">क्याखिनकि जो लोग विश्वासी नाहातिन उनोरो न्याय करून हमरि जिमेदारी नाहातिनी, लेकिन तुम उन लोगून डाँठून चैछो, जो तुमार विश्वासीन की मण्डलीक छन।</verse>
				<verse number="13">लेकिन जो लोग विश्वासी नाहातिन, उनोरो न्याय परमेश्वर करछो। लेकिन पवित्रशास्त्र में लिखीना को छै, कि उ दुष्ट आदिमी तुमार मण्डलीक हिस्सा नै हो सकनो।</verse>
			</chapter>
			<chapter number="6">
				<verse number="1">अगर तुमूनमें भटे एक विश्वासी को दुसारा विश्वासीक दगाड़ झगड़ा हो जाछो, त फैसला खिन अदालताक पास नै जान चैनो; लेकिन तुमून अपून विश्वासीन की मण्डलीक दगाड़ फैसला करून चैछो कि तुम द्वीवै में भटे को सही छै।</verse>
				<verse number="2">तुमून जरूर मालूम हुन चैछो, कि हम विश्वासी लोग एक दिन संसारो को न्याय करला। और जब हमून यो संसारा लोगून को न्याय करून छै, त क्या तुम नाना-नान झगड़ान को ले फैसला करून योग्य नाहातिना?</verse>
				<verse number="3">तुमून यो ले मालूम हुन चैछो, कि हम दुष्ट दूतून को ले न्याय करला। त हम जरूर यो जीन्दगी में हुनवाला नानि-नानि बातुन को फैसला कर सकनू।</verse>
				<verse number="4">अगर तुमारा बीच सांसारिक झगड़ाई हुनान त क्या तुमार बीच कोई ले इसो बुद्धिमान नहातिनी, जो अपून दगाड़ विश्वासी का झगड़ा स शान्ति ले सुलझा सकौ?</verse>
				<verse number="5">तुमून शर्म ऊँनी चैछी, कि तुमार मण्डली में कम से कम एक बुद्धिमान आदिमी हुन चैछो जो विश्वासीन का बीच में झगड़ा को फैसला कर सकौ।</verse>
				<verse number="6">लेकिन यो मामला स एक विश्वासी दुसारा विश्वासीक खिलाफ अदालत में ली जाछो, उले अविश्वासीन का सामुनि।</verse>
				<verse number="7">जब तुमून में भटे कोई एक-दुसरा स अदालत में ली जाछो, त येक मतलब छै, कि तुम बिल्कुल ले मसीह का नियमून को पालन नै करना मर्या। अगर तुमार दगाड़ दुसरा विश्वासी भाई ले गलत करिना को छै, और ध्वाका ले तुमूनथैं थ्वाड़ा छीन लीछ, त कै जन करा।</verse>
				<verse number="8">लेकिन तुम त गलत करून मरेछा और ध्वाका दीन मरैछा, और तुम यो अपून विश्वासी भाई का दगाड़ करून मरेछा।</verse>
				<verse number="9">तुमून यो जरूर मालूम हुन चैछो, कि बुर करूनवाला लोग परमेश्वरा का राज्य का वारिस नी होला। कोई तुमून ध्वाका ले यो सोचून में मजबूर जन करा कि तुम बुर काम कर सकछा और फिर परमेश्वरा का लोगून का दगाड़ रै सकछा, नै बेश्याक दगाड़ संगति, नै मूर्ति पूजा, नै कोई स्यैनिक दगाड़ नजायज रिश्ता, नै लुचपन, नै आदिमी को आदिमीक दगाड़ नजायज रिशता,</verse>
				<verse number="10">नै चोरी करूनवाला, नै लालच करूनवाला, नै पियक्कड़, नै गाली दीन वालो, नै ठगबाजी करून वालो परमेश्वरा का राज्य का वारिस नी होला।</verse>
				<verse number="11">तुमूनमें भटे ले पैलि कुछ लोग इसो जीवन जी छ्या, क्याखिनकि तुम प्रभु यीशु मसीहक नाम ले और हमार परमेश्वरा का आत्मा ले तुमार पापून धो दीछ, और तुमून पवित्र और धर्मी बनाछ।</verse>
				<verse number="12">तुमूनमें भटे कुछ लोग यो कौला, कि सब चीज करून खिन मैंस इजाजत छै, क्याखिनकि मैं एक विश्वासी छूँ, येक कारण सब चीज फैदाक नाहातिन; कि सब चीज करून खिन मैंस इजाजत छै लेकिन मैं कोई बातुन को गुलाम नी बनूलो।</verse>
				<verse number="13">तुमूनमें भटे कुछ लोग यो कौल, कि खानो हमार शरीर खिन, और शरीर हमार खान खिन छै, यो सच्ची छै लेकिन परमेश्वर हमार शरीर स ले और खान स ले नाश कर द्योलो। शरीर ब्यभिचार खिन नै, बल्कि हमार शरीर प्रभुक छन और उकी सेवा करून खिन बनिनाक छन।</verse>
				<verse number="14">येक अलावा, हमार शरीर भौत खास छै, क्याखिनकि जसीकैं परमेश्वरे ले प्रभु यीशु स मरिन में भटे ज्यून करून खिन अपूनी सामर्थ को इस्तमाल करछ्य, उसीकैं हमून ले मरिना में भटे ज्यूनो करोलो।</verse>
				<verse number="15">तुमून जरूर मालूम हुन चैछो, कि तुमार शरीर मसीहक अंग छन? त क्या एक आदिमी स अपून शरीर स लीभेरन, जो मसीह को छै। और येस बेश्याक दगाड़ जोड़ून चैछो? नै बिलकुल नै</verse>
				<verse number="16">पवित्रशास्त्र में लिखीना को छै, “उन द्वीवै एक तन होला।” त तुमून यो ले मालूम हुन चैछो, कि जो कोई बेश्याक दगाड़ सम्बन्ध बनूछो, उ बेश्याक दगाड़ एक तन हो जाछो।</verse>
				<verse number="17">और जो प्रभुक दगाड़ बनिना को रूछो त उकी आत्मा और प्रभु की आत्मा एक हो ग्यान।</verse>
				<verse number="18">ब्यभिचार भटे दूर रया, आदिमीक द्वारा करिनाको पाप उक शरीर उतुक प्रभावित नै करनो जतुक यो करछो, लेकिन ब्यभिचार करूनवाला अपून शरीराक खिलाफ पाप करछो।</verse>
				<verse number="19">तुमून जरूर मालूम हुनो चैछो, तुमोरो शरीर एक मन्दिर छै जैमें पवित्र आत्मा रूछो, और जो तुमून परमेश्वरा का तरफ भटे मिलीना को छै, और अब तुम अपून नाहातिना, लेकिन परमेश्वरा का छा।</verse>
				<verse number="20">क्याखिनकि परमेश्वरे ले यीशु मसीहक बलिदानाक द्वारा तुमून मोल ली हैछ, येक कारण अपून शरीराक द्वारा परमेश्वरे की महिमा करा।</verse>
			</chapter>
			<chapter number="7">
				<verse number="1">अब मैं उन सवालून का बारिमें जबाब द्यूलो, जो तुमूले अपून चिठ्ठी में पुछिनाक छ्या, हमून खिन क्या यो ठीक होलो कि ब्या नै करा?</verse>
				<verse number="2">लेकिन मैं यो सला दीछूँ, कि ब्यभिचार भटे बचुन खिन हरेक आदिमी ब्या करौ, और अपूनी घरवालीक दगाड़ वफदार रौ।</verse>
				<verse number="3">यो जरूरी छै घरवालो अपूनी घरवाली खिन अपूनो कर्तव्य पुरो करौ; और उसीकैं घरवाली ले अपून घरवाला खिन अपूनो कर्तव्य पुरो करौ।</verse>
				<verse number="4">घरवाली स अपून शरीर में अधिकार नाहातिन लेकिन उमें उक घरवाला को अधिकार छै; उसीकैं घरवाला स ले अपून शरीर में अधिकार नाहातिना, लेकिन घरवाली को अधिकार छै।</verse>
				<verse number="5">तुम एक दुसारा भटे अलग जन रया; लेकिन तुम द्वीवै पैलि थ्वाड़ा बखत खिन अलग होभेरन एक-दुसारा भटे सहमत हो जा, कि तुम प्रार्थना कर सका, और येक बाद दुबारा फिर तुम दगाड़ मिलभेरन रौ, काँई इसो नै हो कि शैतान पापी स्वभाव में जीवन जीन खिन तुमेरि परीक्षा करौ और तुम अपूनी इच्छान काबू में नी कर पाला।</verse>
				<verse number="6">लेकिन मैं जो यो कुंछूँ उ केवल मेरि सला छै नै कि हुकुम।</verse>
				<verse number="7">मैं यो चाछूँ, कि जसो मैं कुवाँरा छूँ, उसीकैं सब आदिमी ले हुना; लेकिन हरेक परमेश्वरा का तरफ भटे खास बरदान मिलीनाक छन; कैसे ब्या करना को कैसे कुवाँरा रूना को।</verse>
				<verse number="8">लेकिन कुवाँरान और विध्वानक बारिमें मेरि यो सला छै, कि मेरि नियाती कुवाँरा रूना त ठीक हुनो।</verse>
				<verse number="9">लेकिन अगर उन अपूनास काबू नै कर सकना, त ब्या कर सकनान; क्याखिनकि शरीर की इच्छान में जलून है निको ब्या करूनो ठीक छै।</verse>
				<verse number="10">जिनोरो ब्या हो ग्योछ। उनून मैं नै, बल्कि प्रभु यीशु हुकुम दीछो कि घरवालो अपूनी घरवाली स तलाक नै दे।</verse>
				<verse number="11">अगर उनूनमें तलाक हो ले ज्यौ, त दुसोरो ब्या करिना बिना रौ; या अपून घरवालाक दगाड़ फिर मिलभेरन रौ, और नै घरवालो अपूनी घरवाली स तलाक दे।</verse>
				<verse number="12">लेकिन अब यो प्रभु को हुकुम नाहातिन पर मैं विश्वास करूनवाला लोगून थैं कुंन चाछूँ, जिनोरो ब्या विश्वास नै करूनवाला लोगून का दगाड़ हो ग्यो; अगर कोई मसीह भाई की घरवाली विश्वास नै करनी, और उक दगाड़ रून चांनी, त उको घरवालो ऊस तलाक नै दे।</verse>
				<verse number="13">और मैं विश्वासी बैनिनथैं बात करछूँ जिन लोगून ले इसा आदिमीनक दगाड़ ब्या कर रैछ जो विश्वासी नाहातिन, लेकिन उन उनार दगाड़ रून खिन खुश छै, त उन उनून तलाक नै दी।</verse>
				<verse number="14">जैको घरवालो विश्वासी नाहातिनो परमेश्वर ऊस ले अपूनो समझछो, क्याखिनकि उकी घरवाली विश्वासी छै। और उसीकैं जैकी घरवाली विश्वासी नाहातिनी, परमेश्वर ऊस ले अपूनो समझछो, क्याखिनकि उको घरवालो विश्वासी छै। अगर यो सच्ची नी हुनो, त परमेश्वर तुमार नान्तिना अपूनो नी समझनो, लेकिन अब तुमार नान्तिन ले परमेश्वरा का अपून छन।</verse>
				<verse number="15">लेकिन जो घरवालो या घरवाली विश्वासी नाहातिन, अगर उन आपस में तलाक लीन चानान त उनून तलाक लीन दी, जब इसो हुछो, त विश्वासी ऊस ब्याक रिशता भटे आजाद छै क्याखिनकि परमेश्वरे ले हमून शान्ति ले जीवन जीन खिन बुलाईना को छै।</verse>
				<verse number="16">हे घरवालीयो तुमून याद रून चैछो, कि तुमार कारण तुमार घरवाला अपून पापून भटे उद्धार पान, और हे घरवालो तुमून ले याद रून चैछो, कि तुमार कारण तुमेरि घरवालीन ले अपून पापून भटे उद्धार पान।</verse>
				<verse number="17">हरेक मण्डली का विश्वासीन थैं मैं यो कुंछूँ, जैस परमेश्वर ले जो हाल में तुमून चुन रैछ और तुमून अपून लोग हुन खिन बुला रैछ, उसीकैं विश्वासीन की मण्डली में बनिना का रौ। सब विश्वासीन की मण्डली खिन म्येरो योई संदेश छै।</verse>
				<verse number="18">एक उदारण खिन, अगर कोई यहूदी प्रभु यीशु में विश्वास करछो, त ऊस अपून यहूदी हुना की पछ्याण त्यागना की जरूरत नाहातिना। और उसीकैं अगर कोई आदिमी जो गैर-यहूदी छै, और प्रभु में विश्वास करछो, त ऊस यहूदी बनून खिन खतना करूना की जरूरत नाहातिन।</verse>
				<verse number="19">कैको खतना होईना हो या नै होईना को हो, येले कै फर्क नै पड़नो, लेकिन परमेश्वरा का हुकमून को पालन करून भौत जरूरी छै।</verse>
				<verse number="20">हरेक आदिमी स परमेश्वर ले जस हालत में चुन रैछ और अपूनो लोग हुन खिन बुला रैछ, उसीकैं विश्वासीन की मण्डली में बनिना का रौ।</verse>
				<verse number="21">अगर कोई आदिमी दास छै, और प्रभु में विश्वास करछो, त तुमून यो बात को बुर नै लगूनो चैछो, हालाकि, अगर तुमोरो मालिक तुमून बतूछो कि तुम आजादी ले जा सकछा, त जा सकछा।</verse>
				<verse number="22">क्याखिनकि जो दास की हालत में परमेश्वर ले चुन रैछ और बुला रैछ, त उ एक आजाद आदिमी का नियाती छै क्याखिनकि प्रभु यीशु ले ऊस उक पापून भटे मुक्त करिना को छै, और उसीकैं जो आजादी का हालत में बुलाईना को छै, उन मसीहक दास बनून।</verse>
				<verse number="23">परमेश्वरेले तुमून खिन एक भौत ज्यादा कीमत चुकाईना की छै, आदिमीन का दास जन बना, बल्कि परमेश्वरा का दास बना।</verse>
				<verse number="24">हे म्यारा विश्वासी भाईयों, जो जस हालत में चुनी और बुलाई ग्योछ, उ उई में परमेश्वरा का दगाड़ रौ।</verse>
				<verse number="25">कुँवारीन का बारिमें प्रभु की कोई आज्ञा मैंस नै मिली, लेकिन परमेश्वरे ले अपून दयाक अनुसार मैंस ज्ञान दीछ जैमें भरोसा करि जा सकछो और मैं उक अनुसारै अपूनी सला दीछूँ।</verse>
				<verse number="26">क्याखिनकि इन दिनून में हरेक जाग में विश्वासीन खिन मुशकिलुन को बखत छै येक कारण मैंस लागछो कि तुमून यो करून चैछो, जो लोग कुँवारा छन, उन कुँवारा रून।</verse>
				<verse number="27">अगर तैं शादीशुदा छै, त अपूनी घरवाली है अलग हुना की कोशिश जन कर; और अगर कुँवारो छै, त ब्या करूना की कोशिश जन कर।</verse>
				<verse number="28">अगर तेरो ब्या हो जाछो त कै पाप नाहातिन; और अगर कुँवारी को ब्या करि जौ त कै पाप नाहातिन; हलाकि, शादीशुदा लोग यो संसार में अपूनो जीवन में भौत मुसीबतून को अनुभव कराला, और मैं चाछूँ कि तुम उसीकैं मुसीबतून भटे बचिनाक रौ।</verse>
				<verse number="29">हे म्यारा विश्वासी भाईयों, मैं यो कुंछूँ कि, मसीह को वापस उन में अब ज्यादा बखत नै बच र्यो, येक कारण यो बात ले परेशान जन हो, कि तुमेरि घरवाली छी या नाहातिन, लेकिन प्रभु यीशु की सेवा करना का बारिमें सोचनै रौ।</verse>
				<verse number="30">जो लोग रूनान, माना की उन रूना नै; और जो लोग खुश छन माना उन खुश नै हुना, जो लोग अपून खिन चीज खरीदनान उनून इन सब चीजून का बारिमें ज्यादा परेशान नै हुनो चैनो, किलैकी इसो करभेरन तुम प्रभु सेवा भटे दूर हो सकछा।</verse>
				<verse number="31">और यो संसार में हमार पास जो कैले छै, हमून यो सोचून चैछो कि सब कुछ हमून खिन भौत कीमती नाहातिन, क्याखिनकि यो संसार में सब चीज नाश हो जालो।</verse>
				<verse number="32">मेरि यो इच्छा छै कि तुम सांसारै की इच्छान भटे दूर रौ। कुँवारो आदिमी प्रभु की बातुन की चिन्ता में रूछो कि प्रभु खुश राखूँ।</verse>
				<verse number="33">लेकिन शादीशुदा आदिमी संसारे की बातुन की चिन्ता में रूछो, कि अपूनी घरवाली कसकैं खुश राखू।</verse>
				<verse number="34">शादीशुदा और कुँवारी में फरक छै, कुँवारी चेलि परमेश्वरे की सेवा करना का बारिमें में चिन्ता करनै रूछी कि उ अपून मन और शरीर स प्रभु खिन अलग करून चाछी लेकिन शादीशुदा स्यैनि संसारे की चीजून की चिन्ता करनै रूछी कि कसकैं अपून घरवाला स खुश राखू।</verse>
				<verse number="35">मैं यो बात तुमेरि भलाई खिन कुंछूँ, नै कि तुमून फसून खिन, बल्कि येक कारण कि जसो ठीक छै, ऊसोई करि जौ; ताकि तुम सब एक मन होभेरन प्रभु की सेवा करनै रौ।</verse>
				<verse number="36">अगर तुमून में कोई आदिमी अपूनी चेलि स कुँवारी राखौ, और अब उ यो सोचछो कि यो एक निकी बात नाहातिन, क्याखिनकि ब्या करून खिन उकी उमर ढलून मरैछ, और अब बबा सोचछो कि उकी चेलि स सच्ची में ब्या करून चैछो, त ऊस उको ब्या कर दीन चैछो, इसो करूनो कैले गलत बात नाहातिन।</verse>
				<verse number="37">लेकिन अगर उ बबा ले अपून मन में यो फैसला कर हैछ, कि उकी चेलि को ब्या करून ठीक नाहातिन, और केले ले ऊस इसो करून खिन मजबूर करिना को नाहातिन, त उक पास ऊसो करना को अधिकार छै। येक कारण अगर उ अपूनी चेलि को ब्या नै करना को फैसला करछो त उ परमेश्वरा का नजरून में निकी बात छै।</verse>
				<verse number="38">त जो अपूनी कुँवारी चेलि को ब्या कर दीछो, उ निको करछो और जो ब्या नै करून दीनो, उ और ले निको करछो।</verse>
				<verse number="39">जब तक कोई स्यैनि को घरवालो ज्यून छै, त ऊस उक दगाड़ रूनो चैछो, लेकिन जब उको घरवालो मर जाछो, त उ जैका दगाड़ चौ ब्या कर सकछी, लेकिन जरूरी यो छै कि उ आदिमी ले प्रभु में विश्वास करूनो वालो हुन चैछो।</verse>
				<verse number="40">लेकिन अगर उ दुबारा ब्या नै करनी त म्यारा बिचार में और ले धन्य छै, और मैं समझछूँ, कि जब मैं तुमूनथैं इसो कुंछूँ त परमेश्वरे की आत्मा का तरफ भटे कुंछूँ।</verse>
			</chapter>
			<chapter number="8">
				<verse number="1">अब मूर्तिन का सामुनि बलि चढ़ाईना चीजून का बारिमें हम जाणनू कि हम सब ज्ञानी छा। सच्ची में ज्ञान हमून घमंडी बनूछो जब की प्रेम हमून एक-दुसारा खिन मददगार बनूछो।</verse>
				<verse number="2">अगर कोई समझछो कि उ कै जाणछो, त उ ऐल तक यो कैले नै जाणनो जसो जाणू चैछो।</verse>
				<verse number="3">लेकिन अगर कोई परमेश्वर थैं प्रेम राखछो, त परमेश्वर उ आदिमी स जाणछो।</verse>
				<verse number="4">येक कारण अब मैं मूर्तिन का सामुनि बलि चढ़ाईना का चीजूनक बारिमें तुमोरो सवालो को जबाब दीन चाछूँ। हम जाणनू कि केवल एक्कै जीवित परमेश्वर छै और यो संसार में मूर्ति बेजान छन।</verse>
				<verse number="5">लेकिन फिरले, आकाश में और धरती में कई लोगून परमेश्वर और प्रभु कयी जाछो। लेकिन हमून खिन एक्कै परमेश्वर छै और उई हमोरो पिता छै। उले सब कुछ बनाछ, और हम उक द्वारा ज्यूना छा। उसीकैं हमोरो एक्कै प्रभु छै और उ यीशु मसीह छै। उक द्वारा सब कुछ बनाई ग्यो छ्यो और उक द्वारा हम ज्यूना छा।</verse>
				<verse number="6"></verse>
				<verse number="7">लेकिन हमार थ्वाड़ा विश्वासी ऐल तक नै जाणना कि मूर्तिन का पास कैले शक्ति नाहातिन, क्याखिनकि उन पैलि उन मूर्तिन की पुज करछ्या। अब जब उन, उन मूर्तिन का सामुनि बलि चढ़ाईना को खाना स खानान, जो गलत सोचनान कि उन ऐल ले उन मूर्तिन की पूजा में शामिल छन। और उन यो सोचभेरन परेशान हुनान कि अगर उन मूर्तिन को चढ़ाईना को खानो खानान त उन पाप कर चुक ग्यान।</verse>
				<verse number="8">लेकिन खानो हमून परमेश्वरा का नजदीक नै ल्या सकनो। अगर हम ऊस नै खाना त उले कैले नुकशान नाहातिन और ऊस अगर हम खानू, त उले कै फैद ले नाहातिन।</verse>
				<verse number="9">लेकिन सतर्क रया, इसो नै हो, कि तुमेरि यो आजादी विश्वास में कमजोर लोगून खिन पाप को कारण नै बनौ।</verse>
				<verse number="10">तुम जाणछा कि यो मूर्ति सच्ची में परमेश्वर नाहातिन, अगर कोई विश्वास में कमजोर छै, और उले तुमून वाँ खानो खान देख लीछो, त क्या ऊस मूर्तिन का सामुनि बलि चढ़ाईना की चीजून खाना की हिम्मत नी होलि, पर यो सोचून की इसो करून पाप छै।</verse>
				<verse number="11">इसीकैं तुमार ज्ञाना का कारण जो विश्वासी भाई विश्वास में कमजोर छन उ मसीह में विश्वास करूनो बन्द कर द्योलो, जैखिन यीशु मसीह ले अपूनास बलिदान करछ्य।</verse>
				<verse number="12">अगर हमार इसा काम करना ले हमार विश्वासी भाई अपराधी महसूस करनान, त हमुले उक खिलाफ और मसीहक खिलाफ ले पाप करछा।</verse>
				<verse number="13">येक कारण, अगर मूर्तिन को चढ़ाईनाक खान खाना ले दुसारा विश्वासी भाई विश्वास में कमजोर हुना को कारण बनछो, त मैं इसो खाना स कभै नी खूँ ताकि मैं दुसरा विश्वासीन का विश्वास स कमजोर हुना को कारण नै बनूँ।</verse>
			</chapter>
			<chapter number="9">
				<verse number="1">जो कैले मैं करून चाछूँ, ऊस करून खिन मैं आजाद छूँ, मैं एक प्रेरित छूँ, मैंले प्रभु यीशु मसीह स देखछ्य, तुम प्रभु में करिना की मेरि सेवा का नतीजा छा।</verse>
				<verse number="2">अगर दुसारा लोग यो नै मानना की मैं प्रभु यीशु को प्रेरित छूँ, त तुम विश्वासी भाईन मानून चैछो। क्याखिनकि मैंई छूँ जो तुमार पास सुसमाचार लीभेरन आयूँ। प्रभु यीशु में तुमोरो विश्वास यो बतूछो कि मैं सच्ची में उको एक प्रेरित छूँ।</verse>
				<verse number="3">यो म्योरो उन लोगून खिन जबाब छै, जो म्यारा प्रेरित हुना में सवाल उठूनान।</verse>
				<verse number="4">मैं और बरनबास स, प्रेरित हुना को कारण अधिकार छै कि हम तुमूनथैं अपून काम खिन आर्थिक मद्दत ल्या।</verse>
				<verse number="5">क्याखिनकि दुसारा प्रेरित और प्रभुक भाई याकूब और यहूदा और पतरस (कैफा) जब यात्रा करनान त अपूनी घरवालीन अपून दगाड़ ली जानान, त मैंस ले योई अधिकार छै।</verse>
				<verse number="6">मैंस और बरनबास स ले दुसारा प्रेरितों की नियाती आर्थिक मद्दत पाना को अधिकार छै और हमून अपून जीवन जीन खिन काम करूना की जरूरत नाहातिन।</verse>
				<verse number="7">कोई ले सिपाई सेना में काम करछो त अपून खर्च ले सेना में सेवा नै करनो। जब कभै कोई अंगूरो को बगीच लगूछो त उ अंगूर खान खिन लगूछो। कोई ले आदिमी भेडून की झुंड की देखभाल येक कारण करछो कि उ दूध पी सकौ।</verse>
				<verse number="8">मैं साधारण जीवनाक उदारणाक आधार में नै कुंन मरयू, बल्कि मूसा नियम-कानून ले योई कुंनान।</verse>
				<verse number="9">क्याखिनकि मूसा का नियम-कानून में यो ले लिख रैछ, कि “जब बलद जोती जाना तब उनोरो मुँख जन बांदिया।” क्या तुमून लागछो की परमेश्वरेस केवल बलदून की फिकर छै? नै! बिल्कुल नै।</verse>
				<verse number="10">उ खास करभेरन हमार बारिमें कुंछो। होई, यो हमून खिन पवित्रशास्त्र में लिखी ग्योछ,“क्याखिनकि गड़ो जोतून वाला के आश ले गड़ो जोतछो और खलिहान में भूसा भटे अनाज अलग करून वालो फसल भटे अपूनो हिस्सा पाना की आश करोलो।”</verse>
				<verse number="11">हमूले तुमून परमेश्वरो को सुसमाचारो को प्रचार करिना को छै। उन लोगून का नियाती जो बोट लगूनान, हमूले परमेश्वरो को सुसमाचारो को बी बोछ। येक कारण तुमून खिन यो ठीक छै कि तुम हमरि आर्थिक जरूरतून खिन दी।</verse>
				<verse number="12">क्याखिनकि दुसारा लोगून की आर्थिक मद्दत करछा, जो तुमार बीच में प्रचार करनान, त बरनबास और मैंस येक ले अधिकार छै, क्याखिनकि हम तुमून खिन प्रेरित छ्या। हालाकि, हमून में भटे कैले ले यो बात में जोर नै दीनो कि तुम हमून यो चीज दी जो तुमूनथैं भटे चैछी। येक बजाय, हम केले सहन करून खिन तैयार छ्या ताकि हम मसीहक बारिमें सुसमाचार में विश्वास करून है कैमें ले रूकावट नै डाला।</verse>
				<verse number="13">क्या तुम नै जाणना कि जो मन्दिर में सेवा करूनवाला को गुजारो मन्दिर भटे हुछो? होई, जो वेदी में बलि चढ़ूनान, उनून बलि में भटे अपूनो हिस्सा मिलछो।</verse>
				<verse number="14">इसीकैं प्रभु ले हुकुम दी रैछ कि जो लोग सुसमाचारो को प्रचार करनान, उनेरि रोजी रोटी उन लोगून भटे मिलून चैछो जो सुसमाचार सुणनान।</verse>
				<verse number="15">लेकिन मैंले इनून में भटे कैको ले इस्तमाल नै कर्यो, मैं यो बात येक कारण नै लिखूनमरयूँ ताकि अब तुम मैं खिन कुछ करा। मैं तुमूनथैं पुछनाक बजाय मर ज्यूलो क्याखिनकि अगर मैंस तुमूनथैं मजूरी मिलेली त मैं यो दावा नै कर पालो कि मैंले बिना मजूरी लिये तुमून खिन काम करछ्य।</verse>
				<verse number="16">मैं येमें घमण्ड नै करनू कि मैं सुसमाचारो को प्रचार करछूँ। किलैकी यो त मैंस सौंपीना की जिम्मेदारी छै। मैं सुसमाचारो को प्रचार नै करूँ मैंखिन धिक्कार छै।</verse>
				<verse number="17">अगर मैं अपूनी इच्छा ले सुसमाचार प्रचार करछूँ त फिर मैंस उको ईनाम जरूर मिलोलो। लेकिन अगर परमेश्वर ले मैंस यो जिम्मेदारी दी रैछ, त मैं ईनाम में कि उमीद कर सकछूँ? मैं कोई ले ईनाम की उमीद नै कर सकनू।</verse>
				<verse number="18">तब कि छै म्योरो ईनाम? यो कि मैं यीशु मसीहक सुसमाचारो को प्रचार मुफ्त मैं करनै रू, यो मेरि तनखा छै, मैं खिन यो संभव छै कि मैं बिना तनखाक सुसमाचार सुणू, भले मैं अपून खर्च खिन माँगना को अधिकार छै।</verse>
				<verse number="19">येको मतलब यो छै कि मैं लोगून की बातुन मानून खिन मजबूर नाहातिनू येक कारण कि उन मेरि आर्थिक मद्दत करनान, फिरले मैं सबून को दास बनग्यू ताकि मैं उनून मसीह में ल्या सकूँ।</verse>
				<verse number="20">जब मैं यहूदीन का दगाड़ छूँ, त मैं उनून मसीह में ल्यूनखिन मैं यहूदीन की नियाती रयूँ। जब मैं लोगून का दगाड़ छ्यू जो यहूदीन नियमून को पालन करनान, त मैंले उन नियमून का तहत रयुँ हालाकि मैंस नियम-कानून को पालन करना की जरूरत नाहातिन, मैंले यो येक कारण करछ्य ताकि मैं उन लोगून मसीहक विश्वास में ल्या सकूँ जो नियम-कानूनक अधीन छन।</verse>
				<verse number="21">उसीकैं, जब गैर-यहुदीन का दगाड़ काम करछूँ, मैं एक गैर-यहुदी जो यहूदी नियम-कानून को पालन नै करनू उसीकैं रूछूँ, ताकि उनून जीत सकूँ। लेकिन मैं जाणछूँ कि परमेश्वरा का नियम-कानूनक बगैर ज्यूनो नी छ्यू, किलैकी मैं मसीहक नियम-कानूनक अधीन छूँ, फिरले मैं उन लोगून जो नियम-कानूनक अधीन नाहातिन यीशु मसीहक विश्वास में ल्या सकूँ।</verse>
				<verse number="22">जब मैं उन लोगून का दगाड़ रूछूँ जिनोरो विश्वास में कमजोर छन, त मैं उनार नियाती ब्यवहार करछूँ, ताकि मैं उनून मसीहक विश्वास में ल्यूनखिन मद्दत कर सकूँ। मैं हरेक आदिमी खिन सब कुछ बनिना को छूँ, कि कै नै कै तरीका ले थ्वाड़ा लोगून को उद्धार करा सकूँ।</verse>
				<verse number="23">और मैं यो सब कुछ मसीहक बारिमें सुसमाचारो को प्रचार करछूँ, ताकि उन आशीषून को हिस्सा मैंस मिलज्यौ, जैको वादा सुसमाचार में कर रैछ।</verse>
				<verse number="24">जसकैं दौड़ में त सबै दौड़नान, लेकिन ईनाम एक्कै ली जाछो। तुम इसीकैं दौड़ा, कि तुम ले जीता। उसीकैं हमून उ सब करूनो चैछो जैले हम परमेश्वरेस खुश कर सका। ताकि हम उ ईनाम स पा सका जो परमेश्वर भविष्य में हमून द्योलो।</verse>
				<verse number="25">जो पहलवान कुश्ती में हिस्सा लीन चानान, उन अभ्यास पैलि करनान और अपून आप में काबू राखनान। उन इसो येक कारण की जीत सका और आदर पा सका। उनोरो आदर करून खिन फुलून ले बनिना की माला दीनान जो लम्बा बखत तक नै रुनि। लेकिन जो हम यीशु मसीह में विश्वास करनू। आदर पाला, और जो आशीष हमून द्याला हमेशा तक बनिना की रौली। येक कारण हमून अपूनी इच्छान में लिप्त नै हुनो चैछो।</verse>
				<verse number="26">उसीकैं, जसो एक दौड़ में दौड़ून वालो अपूनी दिशा में दौड़छो उसीकैं मैंले अपूनी मसीह जीन्दगी स मसीहा की दिशा में जीन मरयूँ। जसकैं एक मुक्काबाज अपून मुक्का में काबू राखछो, उसीकैं मैंले अपून मसीह जीन्दगी स मसीह में काबू राखछूँ।</verse>
				<verse number="27">मैं अपून शरीर में काबू राखछूँ ताकि मैं इन बुरी इच्छान को पालन नै करूँ, काँई इसो नै हो मैं दुसरा लोगून सुसमाचारो को प्रचार करछूँ, लेकिन मैं खुद ईनाम नै पानू।</verse>
			</chapter>
			<chapter number="10">
				<verse number="1">हे म्यारा विश्वासी भाईयो, मैं चाछूँ कि तुम याद राखा, बिरान जागा में हमार पूर्वजून का दगाड़ भौत पैलि कि भ्योछ। परमेश्वरेले उन सबून की अगुवाई एक बादल भेजभेरन करछ्य, जो उनार अघिल-अघिल हिटून मरेछ्यू, और उले उन सबून सुखी जमीन मैं लाल सागरा का पानिक बीच भटे सुरक्षित पुजाछ।</verse>
				<verse number="2">जसीकैं हम प्रभु यीशु का शिष्य बनून खिन बपतिस्मा लीनू, उसीकैं उन सबै बादला का छाया में छ्या और मूसा का शिष्य बनून खिन लाल सागर भटे ग्यान।</verse>
				<verse number="3">उन सबून ले उई रोटो खाछ जैस परमेश्वरेले उनून खिन स्वर्ग भटे दीईना को छ्यो।</verse>
				<verse number="4">उन सबून ले उई पानि पीछ जो परमेश्वर ले उनून दीछ। उनूनले एक चट्टान भटे निकलून वाला पानि स पीछ, और उ चट्टान की तुलना मसीह खिन करि जा सकछी जैले उनार दगाड़ रैभेरन उनून जीवन दीछ।</verse>
				<verse number="5">लेकिन परमेश्वर उनूनमें भटे भौतून भटे खुश नी छ्यो, येक कारण उन बिरान जागा मेंई उनार प्राण निकलग्या।</verse>
				<verse number="6">भौत पैलि हमार पूर्वजून का दगाड़ होईना की यो बात हमून खिन चेतावनी छन कि अगर हम उनार नियाती बुराई करना की इच्छा राखनू त कि होलो।</verse>
				<verse number="7">और नै तुम मूर्ति पूजा करा; जसो कि उनूनमें भटे कतुक करछ्या, जसो पवित्रशास्त्र में लिखीना को छै, “लोग खान-पिन खिन दावत में बैठग्या और आनन्‍द मनून खिन उठ ग्या।”</verse>
				<verse number="8">और हमोरो कैका दगाड़ ले नाजायज रिशता नै हुनो चैनो जसो उनूनमें भटे कतुक कुंन ले करछ्य और एक दिन में तेईस हजार मर ग्या।</verse>
				<verse number="9">और नै हम प्रभु स परखा; जसो उनूनमें भटे कत कुंन ले करछ्य, और स्याँपून का डसना का द्वारा मर ग्या।</verse>
				<verse number="10">और नै तुम कुड़कुड़ा, जसा तरीका ले उनूनमें भटे कतुक कुढ़-कुड़ायान, और एक स्वर्गदूत का द्वारा मारी ग्यान, जैस परमेश्वरेले भेजिना को छयो।</verse>
				<verse number="11">लेकिन यो सब बात, जो उनूनमें भ्यान, एक चेतावनी का नियाती छी; और उ हमून चेतावनी दीन खिन लिखीना का छन, जो यो संसार का अंत बखत में रून मर्यान।</verse>
				<verse number="12">येक कारण अगर वाँ कोई इसो आदिमी छै जो कुंछो कि परमेश्वर में उको भरोसा मजबूत छै, त ऊस सतर्क रूनो चैछो कि इसो नै हो कि उ अचानक विश्वास भटे भटक जौ और उ पाप करौ।</verse>
				<verse number="13">पाप करूना की इच्छा हम सबून का पास जरूर ऊँछी, मगर परमेश्वर सच्चो छै। उ तुमून कोई इसी परीक्षा में नी पड़ून द्योलो, जो तुमेरि ताकत है भ्यार हो लेकिन उ परीक्षा का दगाड़ उपाय ले करोलो कि तुम विश्वास में मजबूत रै सका।</verse>
				<verse number="14">यो कारण, हे म्यारा विश्वासी भाईयो, तुमोरो मूर्ति पूजा भटे कै लीन दीन नाहातिन।</verse>
				<verse number="15">मैं तुमून मसीह में समझदार समझभेरन कुंछूँ, जो मैं कुंछूँ, उक बारिमें ध्यान ले सोचा, जो मैं कुंन जान मरयूँ उ ठीक छी या नाहातिन।</verse>
				<verse number="16">जब हम प्रभु भोज में इस्तमाल करि जानवाला कटोर में भटे अंगूरो का रस पीनू, जै खिन हम परमेश्वरो को धन्यबाद दीनू, त हम सच्ची में मसीह का खून स साझा करून मर्यान। और जब हम रोटा स तोड़नू और येस खानू, त हम सच्ची में मसीह का शरीरै स साझा करूनमर्यान।</verse>
				<verse number="17">क्याखिनकि एक रोटो यो बात को चिन छै कि हम जो भौत छा मसीह में एक शरीर छा, क्याखिनकि हम सब एक्कै रोटा में भटे खानू।</verse>
				<verse number="18">जरा इस्राएल का लोगून का बारिमें सोचा, जब सबै लोग परमेश्वरा का चढ़ाई जानवाला खाना स खानान त परमेश्वरै की पूजा में भाग लीनू। इसीकैं जो लोग मूर्तिन को चढ़ाई जानवाला खाना स खानान उले उन मूर्तिन की पूजा में भाग लीनान।</verse>
				<verse number="19">मैं यो नै कुंनू कि मूर्तिन को चढ़ाईना की चीजून की कै कीमत छै या मूर्तिन को कै महत्व छै।</verse>
				<verse number="20">नै! बिल्कुल नै। बश यो, कि जो चीज स लोग मूर्तिन का अघिल बलिदान करनान, उ परमेश्वर खिन नै, लेकिन शैतान खिन बलिदान करनान और मैं नै चानू, कि तुम शैतान का भागीदार बना।</verse>
				<verse number="21">यो नै हो सकनो कि तुम प्रभु का कटोर में भटे और शैतान का कटोर में भटे नै पी सकना। इसीकैं तुम प्रभु की मेज और शैतान का मेज द्वीवैन का भागीदार नै हो सकना।</verse>
				<verse number="22">अगर तुम इसो करछा, त तुम प्रभु स भौत क्रोधित करछा। याद राखा कि तुम उ है ज्यादा शक्तिशाली नाहातिन।</verse>
				<verse number="23">तुमून में भटे थ्वाड़ा कुंनान, कि हम कैले करून खिन आजाद छा। होई, लेकिन हमून खिन सब कुछ ठीक नाहातिन। हम कैले करून खिन आजाद नाहातिना, लेकिन सब कुछ परमेश्वर में हमार विश्वास स मजबूत नै करनो।</verse>
				<verse number="24">तुमूनमें हरेक अपूनी भलाई का बारिमें जन सोचा, लेकिन दुसरान का भलाई का बारिमें ले सोचा।</verse>
				<verse number="25">लेकिन जब तुम बाजार भटे शिकार खरीद छा त ऊस खा ली। लेकिन यो जन पुछा कि यो मूर्तिन को चढ़ाईना छी या नाहातिन, और इसो करना ले तुमोरो जमीर परेशान नी होलो।</verse>
				<verse number="26">तुम खा सकछा, क्याखिनकि पवित्रशास्त्र में लिख रैछ, कि “धरती और उमें जो कैले छै, उ प्रभु को छै।”</verse>
				<verse number="27">जो लोग विश्वासी नाहातिन, अगर उन तुमून दावत में बुलून और तुम जाना चाछा, त जो कैले तुमार सामुनि राखि जौ उई खाया। हालाकि यो जन पुछा कि यह मूर्तिन को चढ़ाईना को छै या नाहातिन, और इसो करना ले तुमोरो जमीर परेशान नी होलो।</verse>
				<verse number="28">लेकिन अगर कोई अपून आप थैं यो कुंछो, “यो उ खानखिन छै, जैस एक मूर्ति में चढ़ाईना को छ्यो,” येस जन खा, उ आदिमी खिन जेले तुमून बताछ, और यो ले क्याखिनकि कोई यो सोच सकछो कि इसो खाखिन खानो गलत छै।</verse>
				<verse number="29">म्येरो मतलब, त्यारा जमीर भटे नै, लेकिन उ दुसारा आदिमी का जमीर भटे छै, मेरि आजादी भला कै दुसारा का जमीर का द्वारा परखी जौ?</verse>
				<verse number="30">अगर मैं खाना स धन्यबाद करभेरन खाछूँ त जो खानास मैं धन्यबाद करछूँ, उक कारण मैंमें दोष क्याखिन लगूछै?</verse>
				<verse number="31">म्येरो कुंना को मतलब यो छै, तुम चाहे खा, चाहे पिया, चाहे जै कैले करा, लेकिन परमेश्वरे की महिमा खिन करि जानो चैछो।</verse>
				<verse number="32">मैं सबून खुश करना की कोशिश करछूँ, मैं अपून भलाई का बारिमें नै सोचून मरयूँ, बल्कि सबून की भलाई का बारिमें सोचून मरयूँ, ताकि उन उद्धार पा सकूँन। उसीकैं तुम ले रौ कि यहूदीन या गैर-यहूदीन या परमेश्वरै की विश्वासीन की मण्डली खिन कैले परेशानी या कैले ठोकर पैद नै करा।</verse>
				<verse number="33"></verse>
			</chapter>
			<chapter number="11">
				<verse number="1">जसकैं मैं मसीह की जसी चाल चलछूँ, तुम ले मेरि जसी चाल चला।</verse>
				<verse number="2">हे म्यारा विश्वासी भाईयो, मैं तुमेरि तारीफ करछूँ, क्याखिनकि तुम मैंस हर बखत याद करछा; और जो मैंले तुमून सिखाछ, ऊस बड़ा ध्यान ले मानछा।</verse>
				<verse number="3">लेकिन मैं चाछूँ कि तुम एक बात जाण ली कि हरेक आदिमी को खोरो मसीह छै, और एक स्यैनि को खोरो उको घरवालो छै, और मसीह को खोरो परमेश्वर छै।</verse>
				<verse number="4">येक कारण कोई आदिमी विश्वासीन की मण्डली में प्रार्थना करून बखत या परमेश्वरो सुसमाचार सुणून बखत अपूनो खोरो ढकछो, त उ मसीह को अपमान करछो जो उको खोरो छै।</verse>
				<verse number="5">लेकिन जो स्यैनि विश्वासीन की मण्डली में बिना खोरो ढकीनाक प्रार्थना या परमेश्वरो सुसमाचारा का बारिमें बतूछी, येको मतलब छै कि उ अपून घरवाला को जो उको खोरो छै अपमान करछी, उ एक इसी स्यैनि नियाती छै जैले अपूना खारास ऊस शर्मिनदा करून खिन मुंडवा रैछ।</verse>
				<verse number="6">अगर स्यैनि खोरो नै ढको त उ अपून बालून ले काटवाले। अगर स्यैनि खिन बाल काटून या खोरो मुंडून शर्मे की बात छै, त उ अपूनो खोरो ढक राखौ।</verse>
				<verse number="7">आदिमी स अपूनो खोरो ढकना की जरूरत नाहातिन, क्याखिनकि परमेश्वरेले ऊस अपूनो जसो बनाछ और ऊस अपूनो स्वभाव दीछ; लेकिन स्यैनि आदिमी की शोभा छै।</verse>
				<verse number="8">क्याखिनकि शुरूवाद में जब परमेश्वरेले पैला आदिमी और स्यैनि स बनाछ तब स्यैनिस का शरीर में भटे आदिमीस नै बनायो, बल्कि आदिमी का शरीर में भटे स्यैनिस बनाछ।</verse>
				<verse number="9">और परमेश्वरेले आदिमी स स्यैनि फैदा खिन बनाई ग्योछ, लेकिन स्यैनि स आदिमी का मद्दत खिन बनाछ।</verse>
				<verse number="10">यो कारण ले, और किलैकी स्वर्गदूत देखून मर्यान, एक स्यैनि स अपूनो खोरो ढकूनो चैछो यो दिखून खिन कि उ अधिकार का अधीन छै।</verse>
				<verse number="11">त, अगर हम विश्वासी करूनवाला लोगून की बात करनू, त नै स्यैनि आदिमी भटे अलग छै, और नै आदिमी स्यैनि भटे अलग छै।</verse>
				<verse number="12">हालाकि परमेश्वरेले पैलि स्यैनि स आदिमी में भटे बनाछ, लेकिन स्यैनि आदिमी स जन्म दीछी, और उन द्वीवै परमेश्वरा का तरफ भटे जैले सब कुछ बनाछ।</verse>
				<verse number="13">मैं चाछूँ कि तुम खुद फैसला करा, अगर एक स्यैनि स विश्वासीन की मण्डली में बिना खोरो ढकीनाक परमेश्वर थैं प्रार्थना करछी, त क्या उ एक शर्मनाक तरीका ले ब्यवहार नाहातिनी?</verse>
				<verse number="14">क्या कुदरत खुद तुमून येका बारिमें नै बतूनी, कि लम्बा बाल राखून आदिमी खिन अपमान की बात छै?</verse>
				<verse number="15">लेकिन अगर स्यैनि लम्बा बाल राखौ; त यो उ खिन शोभा की बात छै, जसा तरीका ले स्यैनिन कुदरती रूप में लम्बा बाल दीई ग्यान, उसीकैं उनून सबून का बीच अराधना में अपूनो खोरो ढकभेरन राखून चैछो।</verse>
				<verse number="16">लेकिन कोई मेरि यो बात में सहमत नाहातिन त उ यो जाण ले कि नै हमेरि और नै परमेश्वरे मण्डली में हमार पास येस छोड़भेरन और कोई रिवाज नाहातिन।</verse>
				<verse number="17">उन बातुन का बारिमें जो मैं अब कुंन खिन जान मरयूँ, मैं तुमेरि तारीफ नै कर सकनू, क्याखिनकि तुमार इकट्ठा हुना ले भलाई नै लेकिन बुराई हुछी।</verse>
				<verse number="18">किलैकी सबून है पैलि बात त यो छै, मैंले यो सुणछ्य, कि जब तुम मण्डली में अराधना करून खिन जामा हुछा, त तुमेरि आपस में नै बननी, और मैंस विश्वास छै की उनेरि बात में कुछ त सच्चाई छै।</verse>
				<verse number="19">लेकिन होई यो सच्ची छै, तुम में गुटबाजी हुनो जरूर छै, ताकि जो लोग परमेश्वरा का द्वारा चुनिना का छन, उन प्रगट हो जून।</verse>
				<verse number="20">येक कारण जब तुम एक जाग में जाम हुछा, तुम यो बात स लीभेरन चिन्ता नै करना, कि तुमून हमार प्रभु यीशु मसीह की मौतस याद करून खिन प्रभु भोज कसीकैं खान चैछो।</verse>
				<verse number="21">क्याखिनकि यो प्रभु भोज में जब खाना का बखत उछो, त तुम जल्दी अपूनो खानो दुसरा को इंतजार करे बिना खा लीछा, येको नतीजा यो छै कोई त भुखा रै जानान, और कोई जरूरत है ज्यादा पिनान।</verse>
				<verse number="22">तुम अपून घरून में खा पी सकछा। तुमून लागछो कि परमेश्वरा का विश्वासी लोग महत्वपूर्ण नाहातिनी, और तुम उन लोगून शर्मिदा करछा जो गरीब छन। मैंस तुमून कि बतूनो चैछो? क्या मैंस तुमेरि तारीफ करूनी चैछी? मैं इसो करून खिन तुमेरि तारीफ नै करनू।</verse>
				<verse number="23">जो बात मैंले प्रभु थैं सिखछ्य, उई बात तुमून सिखून मरयूँ, कि जै रात यीशु पकड़वाई ग्योछ, उनूनले रोटो लीछ,</verse>
				<verse number="24">और परमेश्वरो को धन्यबाद करभरेन रोटो तोड़छ्य और क्योछ, “यो म्येरो शरीर छै, जस तुमार उद्धार खिन बलिदान करि जाछो, मेरि याद खिन येस हमेशा करनै रया।”</verse>
				<verse number="25">इसीकैं यीशु ले खान का बाद अंगूरो को रस को कटोर लीछ और क्योछ, “यो रसो को कटोरो म्यारा खूनो नय्या वादा छै, जब कभै ले पीछा, त मेरि याद खिन येस हमेशा करनै रया।”</verse>
				<verse number="26">जब-जब तुम यो रोटो खाछा और यो कटोर भटे अंगूरो को रस पीछा, त प्रभु का उन तक उकी मौत का बारिमें प्रचार करनै रौ।</verse>
				<verse number="27">येक कारण जो कोई गलत तरीका ले प्रभु को रोटो खाछो और उ कटोर भटे अंगूरो को रस पीछो, त उ प्रभु को शरीरो को और खून का बिरोध करछो।</verse>
				<verse number="28">येक कारण आदिमी पैलि अपून ब्यहार स जाँच ले, योई तरीका ले यो रोटो में भटे खाछ, और यो कटोर में भटे अंगूरो को रस पियो।</verse>
				<verse number="29">क्याखिनकि अगर कोई प्रभु का शरीर का दगाड़ अपूनो रिशता पछ्याणे बिना कटोर में भटे पीछो और रोटो खाछो, त उ यो खान और पीना ले अपून मलि में सजा ल्यूछो।</verse>
				<verse number="30">येक कारण तुमून में भौत सारा लोग बिमार और कमजोर ले छन, और भौत मर ले चुक ग्यान, क्याखिनकि यो परमेश्वरै की सजा छै।</verse>
				<verse number="31">येक कारण हम पैलि अपून ब्यवहारै की जाँच कर ल्या, त परमेश्वर हमून सजा नी द्योलो।</verse>
				<verse number="32">अगर हमून इसीकैं सजा दीछो, त उ हमून सुधारून मर्योछ, ताकि न्याय का दिन हमून दुसारा लोगून का दगाड़ सजा का भागी नै हो।</verse>
				<verse number="33">येक कारण हे म्यारा विश्वासी भाईयो, जब तुम प्रभु भोज खान खिन जाम हुछो, त एक दुसारा खिन इन्तजार करा ताकि दगाड़ में खा सका।</verse>
				<verse number="34">अगर कोई भुख स बरदास नै कर सकनो, त उ अपून घर में खा लियो, ताकि जब तुम जामा हुछा और तुम ठीक ढंगले बर्ताव नै करना, और दुसरी बात जब मैं ऊँलो तब सिखूलो।</verse>
			</chapter>
			<chapter number="12">
				<verse number="1">हे म्यारा विश्वासी भाईयों, मैं नै चाँछूँ कि उ सवाला का बारिमें जो तुमूले आत्मिक बरदानून का बारिमें मैंथैं पुजछ्य, तुम निकीकैं समझा।</verse>
				<verse number="2">तुम जाणछा कि तुम विश्वासी बनून है पैलि कसीकैं जीवन जी छ्या, त कोई तुमोरो मार्गदर्शन करून मरैछ्यो ताकि तुम गूँगी मूर्तिन की अराधना करा।</verse>
				<verse number="3">येक कारण मैं चाछूँ कि तुम जाण ली, जो कोई परमेश्वरै का आत्मा का अगुवाई ले बोलछो उ नै कुंनो कि यीशु श्रापित छै; और नै कोई पवित्र आत्मा का बिना कै सकनो कि “यीशु प्रभु छै।”</verse>
				<verse number="4">पवित्र आत्मा का द्वारा मिलीना का बरदान त अलग-अलग छै, लेकिन पवित्र आत्मा एक्कै छै।</verse>
				<verse number="5">और अलग-अलग सेवा करून खिन लोगून का पास बरदान छन, लेकिन हम लोग एक्कै प्रभु की सेवा करनू।</verse>
				<verse number="6">परमेश्वरा का काम करून खिन अलग-अलग तरीका छन, लेकिन परमेश्वर एक्कै छै, जो हम सबून का द्वारा काम करछो।</verse>
				<verse number="7">हमून में भटे हरेक स एक इसी काबिलियत दी जांछी जो पवित्र आत्मा की मौजूदगी स बतूछी ताकि हम अपून दगड़िया विश्वासीन की मद्दत करा।</verse>
				<verse number="8">किलैंकी परमेश्वरो को आत्मा एक आदिमी स बुद्धि की बात सुणना को वरदान दीछो, और उई आत्मा दुसरा स ज्ञान की बात सुणूना को वरदान दीछो।</verse>
				<verse number="9">और कैसे उ आत्मा का द्वारा मसीह में विश्वास मजबूत करना को वरदान दीछो और कैसे उ आत्मा का द्वारा बिमारून चंगो करना को वरदान दी जाछो।</verse>
				<verse number="10">कैसे सामर्थ का काम करना को वरदान; और कैसे भविष्यवाणी को; और कैसे आत्मान परखनान वरदान, और कैसे अनेक प्रकारे की भाषा बोलना को वरदान; और कैसे भाषान को अर्थ बतूना को वरदान दीछो।</verse>
				<verse number="11">सबै वरदान एक्कै आत्मा का काम छन। उ हरेक विश्वासी स वरदान दीछो जसो पवित्र आत्मा चांछो।</verse>
				<verse number="12">किलैंकी आदिमी को शरीर एक्कै छै और उक अंग भौत छन, और उ एक शरीर का सब अंग भौत हुन में ले सब मिलभेरन एक्कै शरीर छै उसीकैं मसीह ले और उमें विश्वास करूनवाला विश्वासी ले एक्कै छन।</verse>
				<verse number="13">किलैकी हम सबून ले क्या यहूदी छन, क्या गैर-यहूदी, क्या दास, क्या स्वतंत्र एक्कै आत्मा का द्वारा एक शरीर हुन खिन बपतिस्मा लीछ, और हम सबून एक्कै आत्मा मिलछ्य, जसीकैं हम सब एक्कै कटोरा भटे अंगूरो को रस पीनू।</verse>
				<verse number="14">हमार शरीर में एक्कै अंग नाहातिन, लेकिन भौत छन।</verse>
				<verse number="15">मान ली, अगर खुटो कौ, कि मैं हात नाहातिनू येक कारण मैं शरीरो को अंग नाहातिनू, त क्या उक इसो कुंना ले उ शरीरो को अंग नाहातिनी?</verse>
				<verse number="16">और अगर कान कौ, “मैं आँख नाहातिनू येक कारण मैं शरीरो को अंग नाहातिनू,” त क्या उक इसो कुंना ले उ शरीरो को अंग नाहातिनी?</verse>
				<verse number="17">अगर पुरो शरीर आँखाई हुनो त सुणूना क्याले? अगर पुरो शरीर कानै हुनो त सुंगूनो क्याले हुनो?</verse>
				<verse number="18">लेकिन सच्ची में परमेश्वरेले हमार शरीर का अंगून अपूनी इच्छा का अनुसार हर अंग स शरीर में ऊसोई जाग दी रैछ।</verse>
				<verse number="19">अगर पुर एक्कै अंग हुनो, त शरीर नी हुनो।</verse>
				<verse number="20">येक कारण, भले शरीर का कई अंग छन, फिरले शरीर एक्कै छै।</verse>
				<verse number="21">आँख हात थैं नै कै सकनो, “मैंस तेरि जरूरत नाहातिन,” और नै खोरो खुटान थैं कै सकनो, “मैंस तेरि जरूरत नाहातिन।”</verse>
				<verse number="22">लेकिन शरीरा का उन अंग जो औरून है कमजोर लागनान, उन भौतई जरूरी छन।</verse>
				<verse number="23">और शरीरा का जिन अंगून को हम कम आदर योग्य समझनू उनूनले हम ज्यादा आदर दीनू; और हमार बतशुरत अंग और ले भौत खुबशुरत हो जानान, और जिन अंगून हम कम आदर का योग्य माननू उनून सबून है ज्यादा ध्यान ले कपाड़ा पैनुनू। येक कारण हम ध्यान ले उन हिस्सा की रक्षा करनू जिनून नै देखी जानो चैछो, जब की ज्यादा आदरा का योग्य हिस्सान की इतुक बिशेष देखभाल की जरूरत नै हुनी। येक कारण परमेश्वरेले शरीरै स इसीकैं बना रैछ कि उन हिस्सान को ज्यादा सम्मान और देखभाल दी जौ जिनोरो महत्व कम छै।</verse>
				<verse number="24"></verse>
				<verse number="25">परमेश्वरेले इसो येक कारण करछ्य ताकि शरीरा का अंग एक दुसरा का दगाड़ नी लड़ाला, उनून एक दुसारा खिन एक जसी देखभाल हुन चैछी।</verse>
				<verse number="26">अगर शरीरै को कोई एक अंग दुख पाछो त उक दगाड़ शरीर का और ले सबै अंग दुखी हुनान। अगर कोई एक अंग को मान बढ़छो त उक दगाड़ सबै अंग उकी खुशी में भागी हुनान।</verse>
				<verse number="27">इसीकैं तुम सब ले मिलभेरन मसीह का शरीर छा, और तुमूनमें भटे हरेक उक शरीर का अंग छा।</verse>
				<verse number="28">मसीह का यो शरीर में, जो विश्वासीन की मण्डली छन, परमेश्वरेले हमून अलग प्रकारै की सेवा खिन चुन रैछ। सबून है पैलि, उनून प्रेरित, दुसारा परमेश्वरो को संदेश दिनवाला, तीसारा सिखून वाला, फिर चमत्काराक काम करूनवाला, फिर चंगो करूनवाला, और उपकार करूनवाला, और प्रधान, और हर प्रकार की भाषा बोलूनवालो।</verse>
				<verse number="29">हर कोई प्रेरित नाहातिन। हर कोई परमेश्वरो को संदेश दिनवाला नै हुनो। हर कोई सिखूनवालो नै हुनो। हर कोई चमत्कारा का काम करून वालो नै हो सकनो।</verse>
				<verse number="30">सबून चंगाई करूना को बरदान नै मिल रियोछ, सब हर प्रकार की भाषा नै बोल सकना।</verse>
				<verse number="31">सब भाषान का अनुवाद करूनवाला नै हुना, येक कारण तुमून ईमानदारी ले सबून है उपयोगी बरदानू की इच्छा करूनी चैछी। लेकिन अब मैं तुमून सबून है निको बाटो देखुछूँ।</verse>
			</chapter>
			<chapter number="13">
				<verse number="1">अगर मैं आदिमीन और स्वर्गदूतून की भाषा में बोलू, और दुसरा थैं प्रेम नै राखू, त म्येरो बोलूनो ठनठनून वाला पीतल, और झनझनून वाली झाँझ की जसी छै।</verse>
				<verse number="2">और अगर में भविष्यवाणी कर सकूँ, और सब भेदून और सब प्रकारा ज्ञान समझछूँ, याँ तक कि मैंस परमेश्वर में पुरो विश्वास छै, कि मैं पहाड़ून हटा सकछूँ, लेकिन दुसरान प्रेम नै करनू त मेरि कोई कीमत नाहातिन।</verse>
				<verse number="3">अगर मैं अपूनी पुरी जैजाद कंगालून बाणि द्यू, या तक कि अगर मैं उनून अपूनो शरीर स जलून खिन दी द्यू, और दुसरा खिन प्रेम नै राखू, त मैंस यैले कोई फैदा नाहातिन।</verse>
				<verse number="4">जो लोग दुसरा थैं प्रेम राखनान, उ धैर्य ले और दया दगाड़ काम करनान, उनून जलन नै हुनी, उन अपूनी बड़ाई नै करना और नै अपून बारिमें घमण्ड करना।</verse>
				<verse number="5">उन दुसरा का दगाड़ बुरो बर्ताव नै करना, उन स्वार्थी नै हुना उन जल्दी गुस्सा नै हुना और उन भौत आसानी ले उन लोगून माफ कर दीना जो पाप करनान।</verse>
				<verse number="6">जब लोग बुरा कामून करनान त उन खुश नै हुना लेकिन जब लोग भल काम करनान जो ठीक और सच्चाई का हुनान त उन खुश हुनान।</verse>
				<verse number="7">उन सब कुछ सह लीनान, प्रेम हमून हर हाल में विश्वास राखून खिन काबिल बनूछो, हमून परमेश्वर में अपूनी आश बनाये राखून खिन काबिल बनूछो, यो मुशकिलुन और तखलीफून में ले धैर्य राखूनो सिखूछो।</verse>
				<verse number="8">उ बखत आलो जब लोग परमेश्वरा का संदेशो को प्रचार अन्य भाषान में नी कराला, और परमेश्वरा का बारिमें गैरा ज्ञान की तब जरूरत नी होलि, बल्कि प्रेम हमेशा खिन बनिना को रौलो।</verse>
				<verse number="9">हमोरो ज्ञान को वरदान और परमेश्वरो को सुसमाचार को प्रचार करना की काबिलियत अधूरी छै।</verse>
				<verse number="10">लेकिन जब उ सर्वसिद्ध आलो, त उ जो अधूरो छै, उकी जरूरत नी पड़ली।</verse>
				<verse number="11">जब मैं नानू छ्यू, त एक नान्तिना का नियाती बोल छ्यू, सोच छ्यू और तर्क करछ्यू। लेकिन जब हम ठूला हो ग्या त हमूनले नान्तिनान की जसी बात करून छोड़ दीछ।</verse>
				<verse number="12">यो जीवन में हम सब पुर तरीका ले नै समझना। यो कोई चीज स ऐनो में धुधलो दिखाई दीनो जसो छै। लेकिन जब हम स्वर्ग में जूला, त हम सब कुछ साफ तरीका ले समझला। यो कैथैं आमुनि-सामुनि बात करूनो जसो होलो। अब हम सब कुछ जाणनू जो परमेश्वर हमून सिखूनो चाछो। तब हम सब कुछ पुर तरीका ले जाण जियूला, जसकैं परमेश्वर हमून पुर तरीका ले जाणछो।</verse>
				<verse number="13">येक कारण, अब, इन तीन प्रकार का कामून हमून करूनो चैछो: परमेश्वर में विश्वास करा, परमेश्वरा का वादान में आश राखा, और दुसरा थैं प्रेम करूनो। लेकिन इन तीन में भटे, एक्कै सबून ठूलो छै कि दुसरान थैं परमेश्वर स प्रेम करूनो।</verse>
			</chapter>
			<chapter number="14">
				<verse number="1">एक-दुसारा थैं प्रेम करना की कोशिश करा, और आत्मिक बरदानून की इच्छा करनै रौ, खास करभेरन यो कि तुम भविष्यवाणी करा।</verse>
				<verse number="2">क्याखिनकि जो अन्य-अन्य भाषा में बात करछो उ आदिमीन थैं नै बल्कि परमेश्वर थैं बात करछो; येक कारण कि उकी बात कोई नै समझूनो; लेकिन उ पवित्र आत्मा का सामर्थ का द्वारा गुप्त बात कुंछो।</verse>
				<verse number="3">लेकिन जो भविष्यवाणी करछो उ विश्वासीन का विश्वास में मजबूत करून और उनार मन में हौंसला और तसली दीन खिन मद्दत करछो।</verse>
				<verse number="4">जो अन्य भाषा में बात करछो, उ सिर्फ अपूनो विश्वास स मजबूत करछो; लेकिन जो भविष्वाणी करछो, उ विश्वासीन की मण्डली स मजबूत करछो।</verse>
				<verse number="5">मैं चाछूँ कि तुम सब अन्य भाषा में बात करा, लेकिन मैं ये है बढ़भेरन यो चाछूँ कि तुम भविष्यवाणी करा, किलैकी उ, जो भविष्वाणी करछो, उ अन्य भाषा बोलुन वाला है जो अनुवाद करिनाका बिना अन्य भाष में बात करछो, बढ़िया छै किलैकी अनुवाद करीजान में विश्वासीन की मण्डली की उन्नति सम्भव हो सकछी।</verse>
				<verse number="6">येक कारण हे म्यारा विश्वासी भाईयों, अगर मैं तुमार पास आभेरन अन्य भाषा में बात करूँ, त तुमून मैं भटे की फैदा होलो? लेकिन अगर मैं तुमून खिन उ बचन द्यू जो परमेश्वरेले मैंस दीछ छै, य सच्चा ज्ञान, या भविष्वाणी या शिक्षा दी सकूँ, त म्यारा बोलना ले तुमून फैदा होलो।</verse>
				<verse number="7">इसीकैं जब तुम मुरूली और वीणा जसी चीजून बजूछा, अगर तुम धुन ठीक ले नै बजूना त फिर दुसोरो कसीकैं पछ्याणो कि यो मुरूली या वीणा की धुन छै?</verse>
				<verse number="8">लड़ाई में, अगर तुरी की आवाज साफ नी सुणूनी, त सिपाई लड़ाई खिन तैय्यार नै हो सकूनो?</verse>
				<verse number="9">उसीकैं ले, जब तुम इसा शब्द बोलछा जिनून लोग नै समझना, तुम हवा थैं बात करूनवाला ठैहरला, जो तुम कुंन मरैछा उकी कोई कीमत नी होलि।</verse>
				<verse number="10">यो संसार में भौत सारी अलग-अलग भाषा छन लेकिन सब भाषान को अर्थ हुछो।</verse>
				<verse number="11">लेकिन अगर हम उ भाषा स नै समझना जो दुसोरो बोलून मर्योछ, त यो इसो होलो माना की उन हमून खिन विदेशी छन और हम उनून खिन विदेशी हूला।</verse>
				<verse number="12">येक कारण तुम ले, जब आत्मिक बरदानून पाना की इच्छा राखछा, जो पवित्र आत्मा तुमून दीछो, त उन बरदानून को इस्तमाल करूना की कोशिश करनै रौ कि उन बरदानून का द्वारा विश्वासीन की मण्डली पुरी रीति ले विश्वास में मजबूत होज्यौ।</verse>
				<verse number="13">येक कारण जो अन्य भाषा में बोलछो, त उ प्रार्थना करौ, कि उ बातोको अर्थ ले बता सको।</verse>
				<verse number="14">अगर मैं अन्य भाषा में प्रार्थना करून मरयूँ, त म्येरो आत्मा प्रार्थना करछो, लेकिन मेरि बुद्धि काम नै करनी, क्याखिन मैं येस समझ नी पालो।</verse>
				<verse number="15">यो कारण ले, मैं पवित्र आत्मा की अगुवाई ले प्रार्थना करून चाछूँ; लेकिन मैं यो ले चाछूँ कि मैं जो करून मरयूँ, ऊस दुसारा समझ सकून। और जब मैं गाछूँ त मैं चाछूँ की म्येरो गान पवित्र आत्मा का द्वारा हो, लेकिन यो ले जरूरी छै कि मैं जो गान मरयूँ उ दुसरान का द्वारा समझी जौ।</verse>
				<verse number="16">मान ली आम आदिमी तुमेरि अराधना में छै, जब तुम अपूनी आत्मा ले परमेश्वरै की स्तुति करून मरेछा, अगर उ तुमेरि बातुन नै समझनो, त तुमोरो परमेश्वर स धन्यबाद दीना का बाद, ऊस कसीकैं पत्तो चलोलो कि आमीन कब कौलो जैक बारिमें तैले क्योछ? जाणला कि “आमीन” कब कुंन छै?</verse>
				<verse number="17">बेशक तुमूनले त बड़िया तरीका ले परमेश्वरो को धन्यवाद करछ्य, लेकिन उले दुसरान अपून विश्वास में मजबूती नी मिलेली।</verse>
				<verse number="18">मैं अपून परमेश्वरो को धन्यवाद करछूँ कि मैं तुम सबून है ज्यादा अन्य भाषा बोलछूँ।</verse>
				<verse number="19">लेकिन अगर मैं विश्वासीन की एक सभा में छूँ, मैं यो इस्तमाल नै करनू क्याखिनकि यो मैंखिन बड़िया होलो कि वाँ पाँच शब्द बोलू जो समझी जा सकनान और सिखूना का बजाय म्यारा शब्द हजारून में हुन त उन समझी नी जा सकाला।</verse>
				<verse number="20">हे म्यारा विश्वासी भाईयों, इन बातुन समझून में नान्तिना की नियाती जन बना। बुराई में निर्दोष नान्तिना का नियाती बना, लेकिन इसा तरीका मामलान समझून में काबिल बना।</verse>
				<verse number="21">“पवित्रशास्त्र में प्रभु कुंछो, मैं विदेशीन या अजनबीन का द्वारा, अपून लोगून थैं बात करूँलो, जो अलग भाषा बोलनान; तब ले उन मेरि नी सुणाला।”</verse>
				<verse number="22">येक कारण, हम जो विश्वासी अन्य भाषान में बोलनू, परमेश्वर हमून येक कारण दीछो ताकि अविश्वासीन एहसास हो सको कि यो परमेश्वरा का तरफ भटे ऊँछो, और भविष्वाणी अविश्वासीन खिन नाहातिन, लेकिन विश्वासीन को विश्वास मजबूत करून खिन छै।</verse>
				<verse number="23">त अगर विश्वासी की मण्डली एक जागा इठ्ठा हुन, और सबा का सब अन्य भाषा बोला, जो यो भाषा नै समझना या अविश्वासी छन, उन जरूर सोचाला की तुम पागल छा।</verse>
				<verse number="24">लेकिन अगर सब भविष्यवाणी करून लागून, और कोई अविश्वासी या जो यो भाषा नै समझनो, त उनून एहसास होलो कि उन पापी छन, और तुम जो कुंन मरैछा, उकी वजह ले उन अपूनो तरीका बदलूनो चाला।</verse>
				<verse number="25">परमेश्वरा का सुसमाचार का कारण ऊस अपूनी बुरी, गुप्त सोच को एहसास होलो। और ऊस एहसास होलो कि उ पापी छै और उ पश्चाताप करोलो। और फिर उ घुणा टेकभेरन परमेश्वरै की अराधना करोलो और मान ल्योलो, कि सच्ची में परमेश्वर तुमार बीच में छै।</verse>
				<verse number="26">हे म्यारा विश्वासी भाईयो, मैं तुमून बतुलो कि तुमून कि करूनो चैछो, जब तुम अराधना करून खिन इकट्ठा हुछा, त तुमून में भटे कोई भजन गाछो, कोई उपदेश दीछो, कोई प्रभु का द्वारा दीईना का बचना का बारिमें बतूछो, कोई अन्य भाषा में बात करछो, और कोई उको मतलब बतूछो। इन सब बातुन को मक्शद यो हुनो चैछो की विश्वासीन की मण्डलीस विश्वास में मजबूत हुन खिन मद्दत करनान।</verse>
				<verse number="27">अगर कोई अन्य भाषा में बात करून हो, त ज्यादा है ज्यादा द्वी या तीन लोगून बोलूनो चैछो, लेकिन एक दगाड़ नै एक-एक करभेरन बोलून, और वाँ कोई ना कोई जरूर हुनो चैछो कि उन भाषान को मतलब बता सको।</verse>
				<verse number="28">लेकिन अगर अनुवाद करूनवाला नै हो, त अन्य भाषा बोलून वाला मण्डली में चुप रौ, और परमेश्वरा दगाड़ मन मेंई बात करो।</verse>
				<verse number="29">परमेश्वरो को संदेश दिनवालान में भटे द्वी या तीन बोलून, और यो जरूरी छै कि हर कोई सुणो और सोचो और समझो कि, कि जो उ कुंन मर्यान उ पवित्रशास्त्रा का अनुसार सही छी या नाहातिन।</verse>
				<verse number="30">लेकिन अगर मण्डली में बैठिना का कैसे परमेश्वरै भटे कोई बचन मिलछो त जो बोलून मर्योछ ऊस रोकूनो चैछो और दुसारा आदिमी स बोलून दीन चैछो।</verse>
				<verse number="31">तुम सब परमेश्वरा का सुसमाचार को प्रचार कर सकछा, लेकिन एकेक करभेरन, ताकि हरेक सिखोलो और उको हौंसला बढोलो।</verse>
				<verse number="32">और एक परमेश्वरा को संदेश दीन वालो जो परमेश्वरा का बचनून में भटे बोलछो, उ अपून आप में काबू राखछो उ अपूनी इच्छा का अनुसार बोलून या नै बोलून में सक्षम छै।</verse>
				<verse number="33">क्याखिनकि परमेश्वर गड़बड़ी नै करनो, लेकिन शान्ति को परमेश्वर छै। यो उ नियम छै जो परमेश्वरा का विश्वासी लोगून में पालन करि जाछो।</verse>
				<verse number="34">स्यैनिन विश्वासीन की मण्डली में चुप रून, क्याखिनकि उनून बात करना को हुकुम नाहातिन, लेकिन अधीन रूना को हुकुम छै: जसो मूसा का नियम-कानून में ले लिखीना को छै।</verse>
				<verse number="35">अगर उन के और सिखून चानान उनून मण्डली में नै पुछून चैनो, लेकिन उनून घर में अपून घरवाला थैं पुछून चैछो, क्याखिनकि विश्वासीन की मण्डली में स्यैनिन को के कुंन ठीक नाहातिन।</verse>
				<verse number="36">इसो किलै छै कि तुमून में भटे कुछ पैलि बताईना का इन कानून को पालन नै करूना चाना? क्या तुमून लागछो कि परमेश्वरा का बचन केवल तुमूनै दीई ग्योछी?</verse>
				<verse number="37">अगर कोई आदिमी अपूनास परमेश्वरो को संदेश दिनवाला या इसो आदिमी समझछो जैस पवित्र आत्मा ले बरदान दीईना को हो, त यो जाण ले, कि जो बातुन मैं तुमून खिन लिखछूँ, उन प्रभु का हुकुम छन।</verse>
				<verse number="38">लेकिन अगर उन म्यारा इन बातुन में विश्वास नै करूनो चानो, त उ विश्वास नै करो।</verse>
				<verse number="39">येक कारण हे म्यारा विश्वासी भाईयो, भविष्यवाणी करूना का बरदानून की इच्छा करनै रौ, और अन्य भाषा बोलून है मना जन करा।</verse>
				<verse number="40">जो केले तुम अराधना का बखत करछा, त ऊस ठीक ढंगले और एक-एक करभेरन करि जौ।</verse>
			</chapter>
			<chapter number="15">
				<verse number="1">हे म्यारा विश्वासी भाईयो, मैं तुमून उई सुसमाचार याद दिलून चाछूँ जो तुमून पैलि सुणा चुक गयूँ, जो सुसमाचार में तुमूनले विश्वास ले करछ्य और जैमें तुम मजबूत ले छा।</verse>
				<verse number="2">परमेश्वर तुमोरो उ सुसमाचाराक द्वारा उद्धार करछो अगर तुम उ सुसमाचार में विश्वास करून नै छोड़ना जैको मैंले तुमार बीच में प्रचार करछ्य, वरना तुम बेकार में विश्वास में आईनाक छ्या।</verse>
				<verse number="3">योई कारण मैंले तुमून उई सबून है जरूरी सुसमाचार बताछ जो मैंस प्रभु यीशु भटे मिलीनाको छ्यो। उ सुसमाचार यो छै कि पवित्रशास्त्राक बचनाक अनुसार यीशु मसीह हमार पापून खिन मर ग्यो।</verse>
				<verse number="4">और गाड़ी ग्यो; और पवित्रशास्त्राक अनुसार तीसारा दिन परमेश्वरे ले ऊस मरिन में भटे ज्यूनो कर दीछ।</verse>
				<verse number="5">और तब पतरस (कैफा) स और बारा शिष्यून दिखाई दीछ।</verse>
				<verse number="6">फिर पाँच सौ भटे ज्यादा शिष्यून एक दगाड़ दिखाई दीछ, जिनूनमें भटे भौत सारा ऐल तक ज्यूना छन लेकिन थ्वाड़ा मर ग्यान।</verse>
				<verse number="7">बाद याकूब स और सब प्रेरितून ले दिखाई दीछ।</verse>
				<verse number="8">और सबून का बाद मैंस ले दिखाई दीछ, और जो कि उ बच्चाक जस छै, जो बखत है पैलि पैद भ्योछ।</verse>
				<verse number="9">क्याखिनकि मैं प्रेरितून में सबून है नानो छूँ, सच्ची पुछा, त मैं प्रेरित कहलून लकारी को ले नाहातिन, किलैकी मैंले परमेश्वर में विश्वास करूनवाला लोगून सताईना को छ्यो।</verse>
				<verse number="10">लेकिन आज मैं प्रेरित छूँ त उ परमेश्वरो को अनुग्रह छै। और उको अनुग्रह जो मैंमें भ्योछ, उ बेकार नै भ्यो लेकिन मैंले और प्रेरित है ज्यादा मेहनत ले करछ्य यो ले म्यारा तरफ भटे नै भ्यो लेकिन परमेश्वर अनुग्रह ले म्यारा द्वारा काम करून मरैछ्यो।</verse>
				<verse number="11">येक कारण चाहे मैं छूँ, चाहे उन दुसारा प्रेरित हुन, हम सबून ले मसीहक बारिमें एक्कै सुसमाचारो को प्रचार करनू, और येमें तुम विश्वास ले करछा।</verse>
				<verse number="12">येक कारण अब मैं तुमूनथैं यो पुछून चाछूँ: क्याखिनकि हम सबून ले तुमार बीच योई प्रचार करछ्य कि जब मसीह मर ग्यो त ऊस फिर ज्यूनो करि ग्योछ त तुमून में भटे कोई ले यो नै कौ कि परमेश्वर विश्वासीन का मरना का बाद दुबारा ज्यून नी करोलो।</verse>
				<verse number="13">अगर मरिनान को ज्यूनो हुनो नाहातिन, त मसीह ले ज्यूनो नै भ्यो।</verse>
				<verse number="14">और अगर मसीह मरिनान में भटे ज्यूनो नै भ्यो, त जो सुसमाचारो को हम प्रचार करनू उले बेकार छै और मसीह में तुमोरो विश्वास ले बेकार छै।</verse>
				<verse number="15">येक अलावा, हम पक्का तरीका ले उ गवाह छा जिनूनले परमेश्वरा का बारिमें झूठ बोलछ्य, क्याखिनकि हमूले गवाई दीछ कि उले मसीह स मरिनान में भटे ज्यूनो करछ्य। लेकिन अगर यो सच्ची छै कि मरीनाक ज्यून नै हुना, त परमेश्वरे ले मसीह स मरिन में भटे ज्यूनो नै कर्यो।</verse>
				<verse number="16">अगर मरीनाक लोगून मौताक बाद ज्यून नै हुना, त मसीह ले मौताक बाद ज्यूनो नै भ्यो।</verse>
				<verse number="17">और अगर मसीह ज्यूनो नै भ्यो, त तुमोरो मसीह में विश्वास करूनो बेकार छै; और तुम अब ले अपून पापून में जीन मरैछा।</verse>
				<verse number="18">अगर मसीह मरिनान में भटे ज्यूनो नै भ्यो, त जो विश्वासी मर ग्यान, उन बचाई नी ग्या, बल्कि उन ले नाश हो ग्यान, मतलब यो कि हमेशा खिन परमेश्वर भटे अलग हो ग्यान।</verse>
				<verse number="19">अगर मसीह में हमेरि आश केवल यो जीवन खिन छै, त हमून में संसार में औरून की तुलना में सबून है ज्यादा हमरि हालत खराब छै।</verse>
				<verse number="20">लेकिन सच्चाई यो छै कि परमेश्वरे ले मसीह स, जो पैल आदिमी छै जैस मरिन में भटे ज्यूनो करछ्य, और उ यो बात को सबूत छै उ उन लोगून ले ज्यूनो करोलो जो मर चुक ग्यान।</verse>
				<verse number="21">त तुम देखछा, कि यो संसार में मौत पैल आदिमी आदमाक द्वारा आछ, और उसीकैं मरिनान में भटे ज्यूनो हुन में ले एक आदिमी मसीहक द्वारा शुरू हो ग्योछ।</verse>
				<verse number="22">सब मरनान क्याखिनकि हम सबै पैल आदिमी आदमाक वंशज छा। लेकिन उन सब जो दुसरा आदिमी मसीह में जुड़िनाक छन, उनून नय्या जीवन दीई जालो।</verse>
				<verse number="23">लेकिन हरेक आदिमी स अपून-अपून बारीक अनुसार मरिनान में भटे ज्यूनो करि जालो; मसीह जो पैल आदिमी छ्यो जैस मरिन में भटे ज्यूनो करि ग्योछ, फिर जब मसीह वापस आलो त जो उक दगाड़ मजबूत रिशता राखनान उनून दुबारा मरिन में भटे ज्यूनो करि जाला।</verse>
				<verse number="24">फिर, जब मसीह परमेश्वरो को बिरोध करून वाली सबै बुरी ताकतून नाश कर द्योलो, उक बाद संसारो को अन्त हो जालो। तब मसीह अपून पिता परमेश्वरो को राज्य सौंप द्योलो कि उ उमें पुर तरीका ले राज्य करौ।</verse>
				<verse number="25">मसीह स उ राज्य में राज करूनो चैछो जब तक कि परमेश्वर उक सब दुश्मनून पुरी तरीका ले हरा नै द्यो।</verse>
				<verse number="26">जो दुशमनश सबून है आखरी में नाश करि जालो उ मौत छै।</verse>
				<verse number="27">क्याखिनकि पवित्रशास्त्र कुंछो कि “परमेश्वर सब कुछ मसीहक अधिकार में कर द्योलो,” त यो पक्का छै कि येमें परमेश्वर शामिल नाहातिन क्याखिनकि उई छै जैले मसीह स अधिकार दीईना को छ्यो।</verse>
				<verse number="28">जब सब कुछ परमेश्वरा का च्यालाक अधिकार में हो जालो, त उ खुद स पुर तरीका ले परमेश्वरा का अधिकार में कर द्योलो, जैले ऊस यो अधिकार दीछ। ताकि परमेश्वरै सबून खिन सब कुछ हो।</verse>
				<verse number="29">अगर मरीनाक ज्यून नै करि जाना, त लोग की कराला जो उनून खिन बपतिस्मा लीन मर्यान? त उन मरीनाक लोगून का तरफ भटे उनून बपतिस्मा किलै दी जानमर्योछ?</verse>
				<verse number="30">जाँ तक हमरि बात छै, अगर मरीनाक ज्यून नै करि जाना त हमोरो खुद स खतरा में डालून मूर्खता छै।</verse>
				<verse number="31">हे म्यारा विश्वासी भाईयो, मैं हर दिन मौत को सामना करछूँ। मैं जो कुंछूँ उ बिल्कुल सच्ची छै जसकैं कि यो ले सच्ची छै कि मैं भौत खुश छूँ किलैकी तुम हमार प्रभु यीशु मसीह में विश्वास करछा।</verse>
				<verse number="32">या इफिसुस में, म्यारा दुशमन एक खतरनाक जानवर की नियाती छन जो मैंस नुकशान पुजून चानान। अगर म्योरो ईनाम केवल यो संसार मेंई छै, त मैंस यो सब सहन करना कि जरूरत छै। अगर यो सच्ची हुनो कि मैंस आखरी दिन में दुबारा ज्यूनो नी करि जालो, त बड़िया हुनो कि मैं मौज करनू, जसकैं यो कहावत छै, “आ हम खानू-पीनू किलैकी शायद भोल हम मर जूला और उ हमोरो अन्त होलो।”</verse>
				<verse number="33">जो लोग इसकैं त बात करनान उनार द्वारा बेकुफ जन बना, “बुरी संगति निको चरित्र स ले बिगाड़ दीछी।”</verse>
				<verse number="34">तुम सतर्क होज्या, और पाप करून छोड़ दी; किलैकी तुमूनमें भटे थ्वाड़ा लोगून को परमेश्वरा का दगाड़ ठीक रिशता नाहातिन, मैं तुमून शर्मिन्दा करून खिन यो कुंछूँ।</verse>
				<verse number="35">अगर उदारण खिन कोई पूछछो, कि परमेश्वर मरिन में भटे कसकैं ज्यूनो करोलो, और उनोरो शरीर कसो होलो।</verse>
				<verse number="36">म्योरो जबाब यो छै कि मूर्ख जन बना, जो केले तुम बूछा, जब तक अंकुर नै निकलनो तब तक उ नै बढ़नो।</verse>
				<verse number="37">जो केले तुम बूछा, चाहे ग्यूँ हो या के और, यो केवल एक बीज छै। उको उ रूप नाहातिन जो बोटो को होलो।</verse>
				<verse number="38">लेकिन परमेश्वर अपूनी इच्छाक अनुसार उ बोट स उ रूप दीछो जो उ खिन चाछो। हरेक प्रकारो को बी अपून रूप में बढ़छो।</verse>
				<verse number="39">अगर हम धरती में रून वाला सबै जानवरून का बारिमें ले सोचा त उन सब ले एक जसा नी देखीना। आदिमीन को अलग रूप हुछो। पक्षीनको अलग रूप हुछो। माँछान को अलग रूप हुछो। हर प्रकाराक जानवरून अलग रूप हुछो।</verse>
				<verse number="40">और जसकैं धरती में अलग प्रकाराक शरीर छन, उसीकैं आकाश में ले छन जसीकैं सूरज, चाँद और तारा छन, आकाश की चीजून में एक तरीका की खुबशुरती हुछी, और धरती की चीजून में एक दुसरी तरीका की खुबशुरती हुछी।</verse>
				<verse number="41">सूरज की खुबशुरती अलग छै और चाँद की खुबशुरती अलग छै, और तारान की खुबशुरती अलग छै, क्याखिनकि एक तारा है दुसारा तारा की खुबशुरती में फरक छै।</verse>
				<verse number="42">त इसोई मरीनाक लोगून को दुबारा ज्यूनो हुन में ले होलो। जो शरीर स उ उन दफनूनान उ इसा शरीर छन जो सड़ जानान, लेकिन जब यो दुबारा है ज्यूनो होलो त यो एक इसो शरीर होलो जो सड़ नै सकूनो।</verse>
				<verse number="43">जब हमार शरीर स दफनाई जाछो तब हमोरो शरीर बदसूरत और कमजोर हुछो। लेकिन जब उ दुबारा है ज्यूनो होलो, त उन खुबशुरत और शक्तिशाली होलो।</verse>
				<verse number="44">एक आदिमी को शरीरै स जसीकैं दफनाई जाछो, उ केवल यो संसार में कोई ले आदिमीक जीवन खिन लायक छै। लेकिन जब परमेश्वर ऊस दुबारा है ज्यूनो करछो, त उको नय्या शरीर स्वर्ग में जीवन जिनाका योग्य होलो। अगर एक इसो शरीर छै जो केवल संसार में रून लायक छै, त एक इसो शरीर ले होलो जो स्वर्ग में रूनो लायक छै।</verse>
				<verse number="45">पवित्रशास्त्र में यो ले लिख रैछ कि, “यो धरती को पैल आदिमी, मतलब आदम, जीवित प्राणी बनछ्य,” और आखरी आदम, जो कि मसीह छै, यो उई छै जो अनन्त जीवन दीछो।</verse>
				<verse number="46">उ जीवन जो स्वर्ग में हमेशा खिन छै, पैलि नै ऊँनो; बल्कि जो जीवन पैलि ऊँछो, उ यो धरती को जीवन छै। और उक बाद, स्वर्ग को जीवन आलो।</verse>
				<verse number="47">पैल आदिमी जो आदम छ्यो धरतिक माटा ले बनिना को छ्यो। मसीह जो कि दुसोरो आदिमी छै, जो स्वर्ग भटे आछ।</verse>
				<verse number="48">आदमाक वंशज ले उसीकैं धरतिक माटा ले बनिनाक छन, जसो उ छै। लेकिन उन लोग जो स्वर्गाक आदिमी छन जो यीशु मसीह की सुणनान, उन ले उका जस छन।</verse>
				<verse number="49">और जसकैं परमेश्वरे ले हमून ऊसो शरीर दीछ जसो धरतिक पैल आदिमी को छ्यो, उसीकैं हम विश्वासीन को मसीह को जसो शरीर होलो, जो अब स्वर्ग में छै।</verse>
				<verse number="50">हे म्यारा विश्वासी भाईयो, मैं यो कुंछूँ, यो धरती में हमोरो शरीरो मास और खून ले बनिना को छै; हम स्वर्ग में परमेश्वरा का राज्य में अपून यो शरीराक दगाड़ प्रवेश नी कर पाला। हम स्वर्ग में अपून इस शरीराक दगाड़ नै रै सकना जो मर सकछो, क्याखिनकि वाँ कोई मौत नाहातिन।</verse>
				<verse number="51">सुणो, मैं तुमूनथैं भेद की बात करछूँ, कि हम सब विश्वासी नी मरला, लेकिन हम सबून को रूप बदल जालो।</verse>
				<verse number="52">यो अचानक होलो, इतुक जल्दी ले जतुक देर कोई अपूनो आँख की पलक झपकून में करछो। जब आखरी तुरी बजाई जालि, त जो लोग मर चुक ग्यान उन हमेशा खिन जीवन जीन खिन दुबारा ज्यून करि जाला और हम जो ज्यूना छा, हमार शरीर बदल जाला।</verse>
				<verse number="53">क्याखिनकि हमोरो यो शरीर जो आसानी ले मर जाछो और सड़ जाछो, ऊस एक इस शरीर में बदली जानो चैछो जो नै कभै मरूनो और नै कभै सड़नो।</verse>
				<verse number="54">जब इसो होलो, त उ पुर हो जालो जो पवित्रशास्त्र में लिखीना को छै, “मौतस पुर तरीका ले हरा दी जालो और मौतो को नामो निशान नी रोलो।”</verse>
				<verse number="55">उसीकैं यो ले पुर होलो, जो पवित्रशास्त्र में लिखीना को छै, “हे मौत काँ छै तेरि जय? हे काँ र्यो तेरो डंक? इसीकैं पवित्रशास्त्र में जो लिखीना को छै उ पुरो होलो।”</verse>
				<verse number="56">क्याखिनकि पाप इसो डंक छै जैको नतीजा मौत हुछी, और नियम-कानून पाप स अपूनी शक्ति दीनान।</verse>
				<verse number="57">लेकिन परमेश्वरो को धन्यबाद हो, जो हमार प्रभु यीशु मसीह ले हमून खिन करिना को छै उक द्वारा परमेश्वरे ले हमून पाप और मौत में जीत दीछ।</verse>
				<verse number="58">येक कारण हे म्यारा विश्वासी भाईयों, अपून विश्वास में मजबूत रौ और गलत शिक्षान का द्वारा जन भटका, प्रभु खिन जो काम तुम करछा उमें हमेशा बढ़नै जा। क्याखिनकि यो जाणछा, कि जो केले तुम प्रभु खिन करला उको ईनाम तुमून जरूर मिलोलो</verse>
			</chapter>
			<chapter number="16">
				<verse number="1">अब तुम यो सवाल जो यरूशलम शैहर में परमेश्वरा का लोगून खिन रूपाया जाम करना का बारिमें पुछछा, उको यो जबाब छै कि जो मैंले गलातिया प्रदेशा का विश्वासीन की मण्डली स बताछ, ऊसोई तुम ले करा।</verse>
				<verse number="2">हर इतवाराक दिन तुमूनमें भटे हरेक अपूनी कमाईक अनुसार थ्वाड़ा अपून पास राखा, कि म्यारा उन में रूपाया जाम नै करून पड़ो।</verse>
				<verse number="3">फिर जब मैं वाँ ऊँलो, त मैं भरोसमंद लोगून जिनून तुमूले चुनिना को छै कि उन जाम करिना का रूपायान यरूशलम शैहर लीभेरन जून। मैं उनार हात एक चिठ्ठी ले भेजूलो कि वाँक विश्वासीन का दगाड़ उनेरि पछ्याण होज्यौ।</verse>
				<verse number="4">अगर तुमून लागछो कि मैंस जानो चैछो, त उन म्यारा दगाड़ जाला।</verse>
				<verse number="5">मैं मकिदुनिया प्रदेश की यात्रा का बाद तुमार पास ऊंलो, किलैकी मैं मकिदुनिया प्रदेश जाना की योजना बनून मरयूँ।</verse>
				<verse number="6">शायद हो सकछो, कि मैं तुमार दगाड़ ज्यादा बखत या पुर जाड़ा को मौसम में रूँ और फिर जाँ ले मैं जूंलो, तुम मैंस मेरि यात्रा में भेज सकछा।</verse>
				<verse number="7">मैं नै उनो चांनू कि जब मैं वाँ ऊंलो त केवल थ्वाड़ा बखत खिन ऊँलो। अगर यो परमेश्वरा का इच्छाक अनुसार हो त मैं वाँ लम्बा बखत खिन रून चाछूँ।</verse>
				<verse number="8">लेकिन मैं पिन्तेकुस्त का त्यार तक इफिसुस शैहर में रूलो।</verse>
				<verse number="9">क्याखिनकि अब याँ ले भौत लोग छन जो परमेश्वरो को बचन सुणून चानान, और म्योरो याँ रून भौत फैदमंद छै। हालाकि भौत लोग म्योरो बिरोध करनान।</verse>
				<verse number="10">अगर तीमुथियुस तुमार पास कुरिन्थुस शैहर में आलो, त उको बड़िया आदर-खातिर कर्या। क्याखिनकि उ म्योरो जसो प्रभु में काम करछो।</verse>
				<verse number="11">येक कारण कोई उको अनादर जन करो, लेकिन तुम उनून सब कुछ दीया जो उनून अपूनी यात्रा खिन जरूरी छै। किलैकी मैं उको इन्तजार करून मरयूँ, कि उ विश्वासी भाईन का दगाड़ अ।</verse>
				<verse number="12">और विश्वासी भाई अपुल्लोस थैं मैंले भौत बिनती कर रैछ, कि दुसारा विश्वासी भाई का दगाड़ तुमूनथैं मिलून खिन आये, लेकिन उले उ बखत जाना की केले इच्छा नै करि, लेकिन जब सही बखत होलो, तब आ ज्यालो।</verse>
				<verse number="13">सतर्क रौ; विश्वास में मजबूत बनिनाक रौ, हिमती बना, और परमेश्वरा का दगाड़ मजबूत रिशता राखा।</verse>
				<verse number="14">तुम जेले करछा प्रेम ले करा।</verse>
				<verse number="15">हे म्यारा विश्वासी भाईयों, तुम स्तिफनास और उक परिवार स जाणछा कि उन अखया प्रदेशा का पैल मसीह में विश्वासी बन्यान उनूनले अपूनास परमेश्वरा का लोगून की सेवा खिन समर्पित करिना को छै।</verse>
				<verse number="16">येक कारण मैं तुमूनथैं बिनती करछूँ, कि इसा अगुवान को हुकुम माना बल्कि हरेक को जो इसकैं सच्ची भक्ति का दगाड़ सेवा करनान।</verse>
				<verse number="17">और मैं स्तिफनास और फूरतूनातुस और अखइकुसा का उना ले खुश छूँ, क्याखिनकि उन उ मद्दत स दीन मर्यान जो मैंस दीन खिन तुम याँ नाहातिन।</verse>
				<verse number="18">और उनूनले म्यारा मन स मजबूत करछ्य ठीक उसीकैं उन तुमून खिन ले कराला जब उन तुमार पास आला, येक कारण तुमून इसा लोगून को आदर करून चैछो।</verse>
				<verse number="19">आसिया प्रदेशा का विश्वासीन की मण्डली का तरफ भटे तुमून नमस्कार; अक्विला और उकी घरवाली प्रिस्किल्ला और उन विश्वासीन की मण्डली जो उनार घर में जाम हुछी, उनुस ले तुमून प्रभु में भौत-भौत नमस्कार।</verse>
				<verse number="20">याँक सबै विश्वासी भाईन को तुमून नमस्कार करनान; एक दुसराक दगाड़ प्रेम ले गला मिलभेरन नमस्कार करा।</verse>
				<verse number="21">मैं पौलुस यो नमस्कार अपून हात ले लिखूनमरयूँ। अगर कोई प्रभु स प्रेम नै करनो त उ शापित छै।</verse>
				<verse number="22">हे हमार प्रभु, अ।</verse>
				<verse number="23">मैं प्रार्थना करछूँ कि प्रभु यीशु मसीह को अनुग्रह तुमून में हुनै रौ।</verse>
				<verse number="24">मैं तुम सबून प्रेम करछूँ जिनोरो मसीह यीशु का दगाड़ गैरो रिशता छै। आमीन।</verse>
			</chapter>
		</book>
		<book number="47">
			<chapter number="1">
				<verse number="1">प्रभु यीशु को प्रेरित हुन खिन परमेश्वरा का इच्छा ले मैंस चुनिना को छै और मैं याँ हमारा विश्वासी भाई तीमुथियुस का दगाड़ छूँ जो मेरि मद्दत करछो। मैं पौलुस यो चिठ्ठी कुरिन्थुस शैहरा का विश्वासीन की मण्डली, और अखया प्रदेशा का सब परमेश्वरा का लोगून खिन लिखूनमरयूँ।</verse>
				<verse number="2">मैं प्रार्थना करछूँ कि, हमारा पिता परमेश्वर और प्रभु यीशु मसीह का तरफ भटे तुमून अनुग्रह और शान्ति मिलनै रौ।</verse>
				<verse number="3">हमारा प्रभु यीशु मसीहक पिता परमेश्वरो को धन्यबाद हो, जो हमून में दया दिखूछो, और हमून हमेशा तसल्ली दीछो।</verse>
				<verse number="4">परमेश्वर हमरि सब मुसीबतून में हमून तसल्ली दीछो; ताकि हम उ तसल्ली का कारण जो परमेश्वर हमून दीछो, उनूनले तसल्ली दी सका, जो हर तरह का मुसीबत में पड़ीना का छन।</verse>
				<verse number="5">किलैकी जसकैं हम दुख सहनू उसीकैं मसीह ले दुख उठायान, और मसीहक द्वारा हमून भौत तसल्ली ले मिलछी।</verse>
				<verse number="6">अगर हमून में मुसीबत ऊँछी, त यो तुमेरि शान्ति और उद्धार खिन छै और अगर हम शान्ति पानू, त यो तुमेरि शान्ति खिन छै; जैक द्वारा तुम धैर्य ले उन मुसीबतून सहन कर लीछा, जिनून हम ले सहन करनू।</verse>
				<verse number="7">और हमेरि आश तुमार बारिमें पक्की छै; हम जाणनू कि जसा तरीका ले तुम हमारा दुख में दगाड़ छा, उसीकैं तुम हमार शान्ति में ले दगाड़ होला, जो हमून परमेश्वर है मिल रैछ।</verse>
				<verse number="8">हे म्यारा विश्वासी भाईयो, मैं चाछूँ कि तुम उन मुसीबतून का बारिमें जाणा जो हमून में आसिया प्रदेश में आईना की छी कि, हम पुर तरीका ले बैचैन छ्या, यह बोझ उहै कई ज्यादा छ्यो जतुक हम सहन कर सकछ्या, या तक कि हमूनले जीना की पुरी उम्मीद छोड़ दीछ।</verse>
				<verse number="9">और हमूले अपून मन में समझ लीछ, कि हम मार डाली जूला, यो येक कारण भ्योछ कि हम अपून में नै, बल्‍कि परमेश्वर में भरोस राखा, जो मरिनान ज्यूनो कर सकछो।</verse>
				<verse number="10">उले हमून इतुक ठूला खतरा है बचाछ, और बचालो; और उमें हमून पुरो भरोसा छै कि वह हमून अघिल के बचूनै रौलो।</verse>
				<verse number="11">और तुम लोग ले हमून खिन प्रार्थना करभेरन हमेरि मद्दत करा। इसीकैं भौत सी प्रार्थनान का कारण हमून आशीष मिलीना की छै और उ खिन भौतसा लोग हमार तरफ भटे परमेश्वरो को धन्यवाद ले द्याला।</verse>
				<verse number="12">किलैकी हमून एक बात को गर्व छै, हमोरो जमीर हमून विश्वास दिलूछो कि हमूले लोगून का दगाड़ और खास कर तुम लोगून का दगाड़ जो बरताव करछ्य, उ संसारा बुद्धिमानी का अनुसार नै, बल्‍कि उ पवित्रता और सच्‍चाई का अनुसार छ्यो जो परमेश्वरे की कृपा को वरदान छै।</verse>
				<verse number="13">हम तुमून केवल उई लिखनू जैस तुम पढ़ सका। हालाकि अब तुम हमून पुरी तरीका ले नै समझना, मैंस आश छै कि तुम पुरी तरीका ले समझ पाला, ताकि हमार प्रभु यीशु का दुबारा उन में तुमून हमून में ऊसोई गर्व करला जसो हम तुमून में गर्व करनू।</verse>
				<verse number="14"></verse>
				<verse number="15">मैंस यकीन छ्यो कि तुम हमून समझछा मैं चाछूँ कि मैं सबून है पैलि तुमारा पास मिलना की योजना बनाछ। इसीकैं तुमून म्यारा द्वारा द्वी यात्रान की आशीष मिलनी।</verse>
				<verse number="16">मेरि योजना छी कि मैं मकिदुनिया प्रदेश जान बखत तुमार पास ऊँ; और मकिदुनिया प्रदेश भटे वापस उन बखत ले तुमार पास ऊँ ताकि मैं तुमूनथैं यहूदिया प्रदेश की यात्रा खिन मद्दत पा।</verse>
				<verse number="17">येक कारण जब मैंले यो योजना बनाईना की छी त क्या मैंले लापरवाही करछी? या जो करून चाछ्यूँ क्या दुनिया का लोगून की नियाती करून चाछ्यूँ, कि जो अब तक बात में “हाँ की हाँ” कुंनान; और बाद में “नै की नै” ले कर दीनान?</verse>
				<verse number="18">जसो परमेश्वर सच्चो छै, और उसीकैं हम जो बात तुमूनथैं कुंनू, “हाँ” को मतलब “हाँ” और “ना” का मतलब “ना” हुछो।</verse>
				<verse number="19">किलैकी परमेश्वरो को च्योलो यीशु मसीह जैले हमार द्वारा, मतलब म्यारा और सिलवानुस और तीमुथियुस का द्वारा तुमार बीच में प्रचार भ्योछ; उमें “हाँ” और “ना” द्वीवै नै छी; लेकिन उमें “हाँ” की “हाँ” भैछ।</verse>
				<verse number="20">किलैकी परमेश्वरा का जतुक ले वादा छन उन सब वादा मसीह में “हाँक” दगाड़ छन। और येक कारण हम “आमीन” कुंनू कि, हमार द्वारा परमेश्वरे की महिमा हो।</verse>
				<verse number="21">परमेश्वरै छै, जो तुमार दगाड़ हमून मसीह में मजबूत करछो। परमेश्वरे ले हमून में अपूनी मोहर लगाभेरन बयाना का रूप में अपूनो आत्मा हमार दिल में राखभेरन हमोरो अभिषेक करिना को छै।</verse>
				<verse number="22"></verse>
				<verse number="23">परमेश्वर मेरि यो सच्चाई को गवाह छै कि मैं दुबारा कुरिन्थुस शैहर में येक कारण नै आयू कि मैं तुमून दुख दीन नी चाछ्यू।</verse>
				<verse number="24">येको मतलब यो नाहातिन कि हम तुमार विश्वास में अपूनो अधिकार जतुनू, किलैकी तुम अपून विश्वास में मजबूत बनिना का रूछा। लेकिन हम त तुमेरि खुशी में शामिल हो।</verse>
			</chapter>
			<chapter number="2">
				<verse number="1">मैंले अपून मन में यो ठानिना को छ्यो कि फिर तुमार पास आभेरन तुमून दुख नी द्यूलो।</verse>
				<verse number="2">किलैकी अगर मैं तुमून दुखी करूँलो, त तुमार अलावा मैंस खुशी दीन वाला कोई नाहातिन, सिर्फ तुमी छा जिनून मैंले दुखी करिना को छै।</verse>
				<verse number="3">मैंले तुमून योई मक्शद ले चिठ्ठी लिखीना की छै ताकि जब मैं तुमार पास ऊँलो त जिनून है मैंस खुशी मिलून चैछी, उनून है मैंस दुख जन मिलो। किलैकी मैंस तुम सबून में यो बात में भरोस छै, कि जो मेरि खुशी छै, उई तुम सबून की ले छै।</verse>
				<verse number="4">मैंले भौत दुख में, मन में तखलीफ सह भेरन और आँसू बगा-बगा भेरन तुमून यो चिठ्ठी लिखीना की छी मैंले तुम लोगून दुख दीन खिन नै लिखीना की छी, बल्‍कि येक कारण कि तुम यो जाण जा कि मैं तुम लोगून कतुक ज्यादा प्‍यार करछूँ।</verse>
				<verse number="5">और अगर केले मैंस दुखी करिना को छै, त उले मैंस नै, बल्कि एक तरीका ले तुम सबून दुखी करिना को छै, मैं येहै ज्यादा के नै कुंन चानूँ।</verse>
				<verse number="6">इस आदिमी स तुमून में भटे भौत विश्वासीन ले जो सजा दीछ, उ भौत छै।</verse>
				<verse number="7">येक कारण येहै निको यो छै कि उको अपराध माफ करा; और ऊस तसल्ली दी, अगर तुम ऊस माफ नी करना त शायद उ इतुक दुखी हो ज्यालो कि निराश हो भेरन हार मान ल्यो।</verse>
				<verse number="8">येक कारण मैं तुमूथैं बिनती करछूँ, कि ऊस विश्वास दिला कि तुम सच्ची में ऊस प्रेम करछा।</verse>
				<verse number="9">किलैकी मैंले तुमून येक कारण ले लिखीना को छ्यो, कि तुमून परख लीयू, कि तुम म्यारा हुकमून मानून खिन तैयार छा, या नाहातिन।</verse>
				<verse number="10">लेकिन जैस तुम माफ करछा, ऊस मैंले माफ करछूँ, किलैकी जब मैंस माफ करना की जरूरत हुछी, त मैं तुमार फैदा खिन मसीह का अधिकार ले इसो करछूँ।</verse>
				<verse number="11">ताकि शैतान हमून ध्वाका नै दी सको; किलैकी हम उक बुर योजना स जाणनू।</verse>
				<verse number="12">जब मैं त्रोआस शैहर में मसीह को सुसमाचारो को प्रचार करून खिन आयू, त वाँ परमेश्वरे ले मैंस सुसमाचार प्रचार करना को भौत ठूलो मौका दीछ।</verse>
				<verse number="13">मैंले अपून विश्वासी भाई तीतुस स तुमार तरफ भटे समाचार लियून नै देख्यो, येक कारण त्रोआस शैहरा का विश्वासीन भटे विदा होभेरन मैं अपून विश्वासी भाई तीतुस स खोजून खिन मकिदुनिया प्रदेश में वापस आयू।</verse>
				<verse number="14">परमेश्वरो को धन्यवाद हो, जो मसीह का दगाड़ हमार सम्बन्ध का कारण, उ हमून हमेशा अपून दगाड़ हिटूछो और हमून जीत दिलूछो। येको मतलब छै कि हम जाँ ले जानू, हम सुसमाचारे स सुणूनै जानू ताकि सब लोग परमेश्वरस जाणू और सुणून।</verse>
				<verse number="15">किलैकी हम परमेश्वर खिन मसीह द्वारा ज्यून करि ग्या, उ धूपै कि नियाती। हमार द्वारा प्रचार करि ग्योछ सब लोगून में फैलीना की मीठी खुशबू की नियाती छै, जो उद्धार पान वाला और नाश हुन वाला लोगून का बीच फैलछी।</verse>
				<verse number="16">लेकिन उनून खिन जो विनाशाक बाट में छन, उ मौत की इसी गन्दी वास छै जो उनून मौत क तरफ ली जाछी; लेकिन उनून खिन जो उद्धाराक बाट में बढ़नै जानान, यो जीवन की इसी मीठी खुशबू छै जो जीवनाक तरफ ली जाछी। सच्ची में, कोई ले खुद इस योग्य नै हो सकूनो जो मसीहक ज्ञान की खुशबू स फैला सको।</verse>
				<verse number="17">किलैकी हम उन भौतून का नियाती नाहातिन, जो परमेश्वरा का बचन स अपून फैद खिन प्रचार करनान; लेकिन हम परमेश्वरा का बचन को प्रचार सच्चाई और मसीहक अधिकाराक दगाड़ करनू, यो जाणभेरन कि परमेश्वर हमून देखून मर्योछ।</verse>
			</chapter>
			<chapter number="3">
				<verse number="1">क्या हमूले दुबारा अपूनी तारीफ करून शुरू कर दीछी? या कुछ आदिमीन की नियाती हमून ले तुमूनथैं या तुमून खिन सिफारिश की चिठ्ठीन की जरूरत छी? बिल्कुल नाहातिन।</verse>
				<verse number="2">तुम खुद एक चिठ्ठी की नियाती छा जो सबून का सामुनि परमेश्वर खिन म्यारा काम की सिफारिश करछी, जो हमार मनून में लिखीना की छै, और तुमोरो बदलीना को जीवन तुमार बीच में हमार कामून का वजह ले छै, जो एक चिठ्ठी की नियाती छै जैस हर कोई पढ़ और पछ्याण सकछो।</verse>
				<verse number="3">यो साफ छै, कि तुमोरो बदलीना को जीवन एक चिठ्‌ठी की नियाती छै जो मसीह ले लिखीना की छै, उले यो चिठ्‌ठी हमरि सेवकाई का द्वारा लिखीना की छै; और जो स्याही ले या ढुगाँन की पाठ्ठी में नै, लेकिन जीवित परमेश्वरा का आत्मा का द्वारा आदिमीन का मनून की पाठ्ठी में लिखी ग्यान।</verse>
				<verse number="4">हम इसो येक कारण कुंनू किलैकी हमून मसीह का द्वारा परमेश्वर में भरोसा छै।</verse>
				<verse number="5">हम यो नै कुंना कि हमार पास खुद केले करना की काबलियत छै; लेकिन परमेश्वर हमून यो काबलियत दीछो।</verse>
				<verse number="6">जैले हमून नय्या वाचा को सेवक हुना का काबिल बनाछ। यो कोई मूसा का लिखीना का नियम-कानून नाहातिन बल्कि पवित्र आत्मा की वाचा छै, किलैकी मूसा का लिखीना का नियम-कानून नै मानना को परिणाम मौत छै, लेकिन पवित्र आत्मा अनन्त जीवन दीछो।</verse>
				<verse number="7">जब मूसा का नियम-कानून जो ढूंगा का पाठ्ठी में लिखीना का छ्या, उ बखत परमेश्वरो तेज दिखाई दीछ। इस्राएली लोग लम्बा बखत तक मूसा का मुँखा का तरफ नी देख सकछ्या किलैकी उ चमकून मर्योछ्यो, हालाकि उ चमक भौत बखत तक नै रै। येक कारण अगर मूसा का दीईना का नियम-कानून में आधारित सेवकाई मौत ल्यूछी, जैको इसो तेज छ्यो। तो पवित्र आत्मा को मार्गदर्शन में नय्या वाचा का अधीन सेवा का काम और ले तेज ले भरिना को होलो।</verse>
				<verse number="8"></verse>
				<verse number="9">किलैकी जब दोषी बनून वाली वाचा में इतुक तेज छ्यो, त पक्का तरीका ले नय्या वाचा जो अपून लोगून परमेश्वरा का दगाड़ धर्मी बनछो और ले ज्यादा तेजोमय छै।</verse>
				<verse number="10">उ तेज जो पुरानी वाचा मतलब मूसा का नियम-कानून का द्वारा आईना की छी, उ अब बिना तेज ले प्रगट हुछी, किलैकी नय्या वाचा का मुकाबला में ज्यादा तेजोमय नाहातिनी।</verse>
				<verse number="11">किलैकी अगर मूसा का नियम-कानून में इसो तेज छ्यो, जो बिल्कुल थ्वाड़ा बखत खिन बनिना को रियोछ, त नय्या वाचा में कतुक ज्यादा तेज होलो जो हमेशा खिन बनिना को रूछो।</verse>
				<verse number="12">येक कारण यो आश का कारण हम हिम्मतले बोलनू।</verse>
				<verse number="13">हम मूसा का नियाती नाहातिन, जैले अपून मुँख में परदा डाल छ्ये ताकि इस्राएली लोग उ चमक स कम और गायब हुन तक नै देख लीन।</verse>
				<verse number="14">लेकिन इस्राएली लोगून का मन कठोर हो गैछ्या, किलैकी आज तक पुराना नियमाक पढ़ून बखत उनार मनून में उई परदा पड़ीनाको रूछो। पर सिर्फ मसीह में विश्वास करन का द्वारा परदा हटाई जाछो।</verse>
				<verse number="15">और आज तक जब कभै मूसा की किताब पढ़ी जाछी, त उनार मनून में परदा पड़ीनाको रूछो, और येक कारण उन येस पुर तरीका ले नै समझना।</verse>
				<verse number="16">लेकिन जब कभै कोई प्रभु यीशु में विश्वास करछो, त प्रभु उनार मन में पड़ीना का परदान हटा दीछो।</verse>
				<verse number="17">प्रभु त आत्मा छै: और जा काँई प्रभु को आत्मा छै वाँ नियम-कानून ले आजादी छै।</verse>
				<verse number="18">हम सब एक ऐना का नियाती छा, जो परमेश्वरा का तेज स इसा चेहरा ले देखनान जिनून में परदा पड़ीना नाहातिन, त परमेश्वर हमून लगातार बड़ीना का तेज में ज्यादा है ज्यादा अपूनी नियाती बनून मर्योछ। यो तेजोमय प्रभु थैं मिलछो, जो पवित्र आत्मा छै।</verse>
			</chapter>
			<chapter number="4">
				<verse number="1">परमेश्वरै की दया ले हमून सुसमाचार सुणूना की सेवा मिलछ्य, येक कारण हम कभै हार नै मानना।</verse>
				<verse number="2">लेकिन हमूले शर्मनाक और गुप्त कामून छोड़ दी है छै, और नै हम छल-कपट करनू, और नै परमेश्वरै का बचन स अपून फैदा खिन सुणूनू लेकिन हम परमेश्ररा का सामुनि सिर्फ सत्य बतूनू, ताकि हर आदिमी यो गवाही दे, कि हम सच्ची कुंन मर्या।</verse>
				<verse number="3">चाहे लोग उ सुसमाचारै स नै समझ सकून जो हम प्रचार करनू, त यो सिर्फ उन लोग नै समझ सकना, जो नाश हुन वाला बाटा में हिटनान।</verse>
				<verse number="4">यो संसारो को ईश्वर शैतान ले उन अविश्वासीन की बुद्धि स अंधो कर दी है छै, जैका कारण उन मसीह का सुसमाचार और उकी महिमा का बारिमें नै समझ सकना कि मसीह परमेश्वरो को स्वरूप छै।</verse>
				<verse number="5">किलैकी हम अपूनास नै, लेकिन यीशु मसीह को सुसमाचारो को प्रचार करनू, कि यीशु मसीह प्रभु छै, और अपून बारिमें यो कुंनान कि हम यीशु का कारण तुमार सेवक छा।</verse>
				<verse number="6">येक कारण कि परमेश्‍वरै ले क्योछ, “अन्यारा में भटे उज्यालो चमकछो,” और परमेश्वरेले उज्याला का नियाती हमार मनून में समझ दीछ, ताकि हम परमेश्वरै की महिमा स पछ्याण सकाँ जो यीशु मसीह में दिखाई दीछी।</verse>
				<verse number="7">अब हमार मनून में यो उज्यालो चमकून मर्योछ, लेकिन हम खुद माटाका नाजुक भाड़ान की नियाती छा जैमें यो खजाना जमा करि ग्योछ, ताकि यो बात स जाण सका कि यो अद्धभुत सामर्थ हमरि तरफ भटे नै, बल्कि परमेश्वरा का तरफ भटे छै।</verse>
				<verse number="8">हम सब तरफ भटे मुसीबतून में घेरिना का रूनू, लेकिन कभै हार नै मानना। हम परेशान त हुनू, लेकिन कभै निराश नै हुना।</verse>
				<verse number="9">हम सताई त जानू; लेकिन छोड़ी नै जाना; खिती त जानू, लेकिन नाश नै हुना।</verse>
				<verse number="10">हम यीशु की नियाती हर बखत लगातार मार डाली जान खिन खतरा में रूनू, ताकि लोग यीशु का जीवन स उन चीजून में देखाला जो हम करनू।</verse>
				<verse number="11">येक कारण जब तक हम ज्यूना छा यीशु मसीह का कारण लगातार मार डाली जाना का खतरा में रूनू, जैले यीशु मसीह का जीवन हमार नाश हुन वाला शरीर में प्रगट हो जाछो।</verse>
				<verse number="12">त येको मतलब यो छै कि हम लगातार मौत को सामना करूनमर्यान लेकिन येको नतीजा यो छै कि तुमून अनन्त जीवन मिलीना को छै।</verse>
				<verse number="13">लेकिन हम प्रचार करून जारी राखनू किलैकी हमून में ऊसोई विश्वास छै, जसो भजन में कुंछो, जो पवित्रशास्त्र में लिखीना को छै, “मैंले विश्वास करछ्य, येक कारण मैं चुप नै रयूँ? हम ले यो सब येक कारण कुंनू कि हमुनले विश्वास करिना को छै।”</verse>
				<verse number="14">किलैकी हम जाणनू, जैले प्रभु यीशु स मरिनान में भटे ज्यूनो करछ्य, उई हमून ले यीशु का दगाड़ ज्यूनो करोलो, और परमेश्वरा का सामुनि ठाड़ हुन खिन हमून तुम लोगून का दगाड़ ऊँला।</verse>
				<verse number="15">किलैकी सब दुख जो हमूनले तुमून खिन सहन कर्यान, ताकि परमेश्वरा का अनुग्रह का द्वारा ज्यादा है ज्यादा लोग मसीह में विश्वास करून, और परमेश्वर की महिमा खिन धन्यवाद और स्तुति करून।</verse>
				<verse number="16">येक कारण हम हिम्मत नै हारना; हमोरो भ्यारो को इन्सानी रूप त कमजोर हुनै जा मर्योछ लेकिन हमार भितर आत्मा हर-रोज नय्या हुनै जानमरैछ।</verse>
				<verse number="17">हमोरो यो नानो और पल भर को दुख हमून खिन इसी अनन्त और ज्यादा है महिमा स उत्पन्न करूनमर्योछ, जैका बारिमें हम सोच ले नै सकना।</verse>
				<verse number="18">किलैकी हमूनले अपूनो ध्यान उमें नै लगायो, जो दिखाई दीछो लेकिन उमें लगाछ, जो दिखाई नै दीनो, जो केले दिखाई दीछो, उ पल भरो को छै लेकिन जो दिखाई नै दीनो उ अनन्तकाल तक रूछो।</verse>
			</chapter>
			<chapter number="5">
				<verse number="1">किलैकी हम जाणनू, कि या धरती में हमोरो शरीर एक तम्बू का नियाती छै जैमें हम रूनू। अगर उ नाश हो जाछो त हमून परमेश्वरा का तरफ भटे स्वर्ग में एक इसो शरीर मिलोलो, जो आदिमीक हातून ले बनाईना को नै लेकिन हमेशा तक बनिना को रूछो।</verse>
				<verse number="2">यो एक सच्चाई छै कि जब हम या यो धरती में छा, तब हम यो शरीर में कराहनू और भौत इच्छा राखनू कि, हमून एक इसो शरीर मिलो जो हमार स्वर्गीय घर जसो होलो।</verse>
				<verse number="3">जब हम उ स्वर्गीय शरीरो को पा लीनू, त हम कोई नंगड़ा आदिमी का नियाती नी हूला।</verse>
				<verse number="4">सच्ची यो छै कि यो तम्बू में रून बखत हम बोझ ले दबीना ले कुणाट करनै रूनू, किलैकी हम इन संसारिक शरीरून छोड़ून नै चाना लेकिन हम चानू कि परमेश्वर हमून स्वर्गीय शरीर दे, ताकि हमार नय्या शरीर जो हमेशा खिन रौला, यो शरीर का बदल द्याला जो मर जालो।</verse>
				<verse number="5">परमेश्वरेले हमून नय्या शरीर खिन तैयार करिना को छै, उले हमून बयाना में पवित्र आत्मा ले दीईना को छै। यो बयाना उ वादा छै, जैस परमेश्वर बाद में हमून खिन पुरो ले करोलो।</verse>
				<verse number="6">येक कारण हम परमेश्वर में भरोसा राखनू, और यो जाणनू; कि जब तक हम यो शरीर में रूनू, तब तक हम परमेश्वर है दूर छा।</verse>
				<verse number="7">किलैकी जब हम ऐल यो संसार में रूनू, त हम अपून विश्वास का दगाड़ प्रभु का पीछल हिटनू, नै कि ऊस देखभेरन हिटनू।</verse>
				<verse number="8">येक कारण हम परमेश्वर में भरोसा राखनू, और जब हम मरला त यो शरीर स छोड़ द्यूला, और हम प्रभुक दगाड़ रून और उत्तम समझनू।</verse>
				<verse number="9">यो कारण हमार मने की मनसा यो छै, कि चाहे हम उक दगाड़ स्वर्ग में रूँ चाहे हम यो धरती में रूँ, लेकिन हम प्रभु स खुश करून चानू।</verse>
				<verse number="10">किलैकी जरूरी छै, कि हम सबून को मसीह का द्वारा न्याय करि जालो, कि हर आदिमी अपून-अपून भल बुरा कामून को जो उले शरीर का द्वारा करिना छन, उनोरो फल पालो।</verse>
				<verse number="11">येक कारण प्रभु को डर मानभेरन हम लोगून थैं सच्चाई में विश्वास करना को बिनती करनू। परमेश्वर हमून पुरी तरीका ले जाणछो और मैंस आश छै, कि तुमार जमीर हमून निकीकैं जाणछो।</verse>
				<verse number="12">हम फिरले अपूनी बड़ाई तुमार सामुनि नै करना बल्कि हम तुमून मौका दीन मर्या कि तुम हमून में गर्व करा ताकि तुम उनून येको जबाब दी सकला, जो अपून मन का बजाय दिखावटी बातुन में घमण्ड करना।</verse>
				<verse number="13">कोई कुंछो कि हम पागल छा त परमेश्‍वर खिन; और अगर होश में छा, त तुमार भलाई खिन छै।</verse>
				<verse number="14">किलैकी मसीह को प्रेम हमून मजबूर कर दीछो; किलैकी हमून यो भरोस छै कि एक आदिमी सब लोगून खिन मर ग्यो, येक कारण सब लोग मर ग्या।</verse>
				<verse number="15">और येक कारण मसीह सब खिन मरछ्य, उन अघिलकैं खुद स खुश करून खिन नै जीन पर उनून मसीह खिन जीन चैछो। मसीह उनून खिन मरछ्य और पिता परमेश्वरेले ऊस ज्यूनो करछ्य।</verse>
				<verse number="16">येक कारण अब भटे हम आदिमीन का नजरून ले केको न्याय नै करना। होई एक बखत छ्यो, जब हमूनले मसीह स आदिमी का नजरून ले देखछ्य, लेकिन अब हम इसो नै करना।</verse>
				<verse number="17">येक कारण, अगर कोई मसीह में विश्वास करछो त उले एक नय्या स्वभाव पाईना को छै, पुरानी बात खत्म हो ग्यान और अब नय्या बात आ ग्यान।</verse>
				<verse number="18">यो सब बात परमेश्वरा का तरफ भटे छन, जैले मसीहक द्वारा हमून अपून पास बुलाछ, और लोगून को परमेश्वरा का दगाड़ मेल-मिलाप करनाकि सेवा हमून दी रैछ।</verse>
				<verse number="19">येको मतलब यो छै कि परमेश्वर सब लोगून खिन एक बाटो बनून मर्योछ जो केले मसीह ले करिना को छै उक द्वारा परमेश्वरा का दगाड़ मेल-मिलाप कर सका, और लोगून का पापून को दोष उनूनमें नै लगायो, और परमेश्वरेले शान्ति का बारिमें उको संदेश स सुणूना को काम हमून दीईना को छै।</verse>
				<verse number="20">येक कारण हम मसीहक राजदूत छा; परमेश्वर उक संदेश स ग्रहण करून खिन हमार द्वारा लोगून थैं बिनती करछो। हम मसीहक तरफ भटे बिनती करनू, कि परमेश्वरा का पास आ जा।</verse>
				<verse number="21">मसीह, जो पाप भटे अनजान छ्यो, परमेश्वरेले ऊस हमून खिन पापी ठैहराछ, ताकि हम परमेश्वरा का नजर में धर्मी बन ज्या किलैकी मसीह ले हमार पापून को दण्ड अपून मलिमें ली लीछ।</verse>
			</chapter>
			<chapter number="6">
				<verse number="1">परमेश्वरा का सहकर्मी हुना का नाता हम तुम लोगून थैं यो बिनती करनू कि परमेश्वरो को जो अनुग्रह तुमूनमें होईना को छै, ऊस बेकार नै हुन दी;</verse>
				<verse number="2">किलैकी पवित्रशास्त्र में परमेश्वरेले क्योछ, “ठीक बखत में मैंले तेरि प्रार्थना सुणलीछ, और उद्धार का दिन मैंले तेरि मद्दत करछ्य।” सुणा; ऐल योई उ ठीक बखत छै। देखा, ऐल उद्धार को दिन छै।</verse>
				<verse number="3">परमेश्वरा सहकर्मी हुना का नाता हम कैसे ले के बात में ठोकर खाना को कोई ले मौका नै दीनो, ताकि हमरि सेवा में कोई ले दोष नै अ।</verse>
				<verse number="4">लेकिन हर बात में हम यो साबित करनू कि हम परमेश्वरा का सच्चा सेवक छा। हम अपून निका गुणून दिखाभेरन, दुखून, क्लेशून, गरीबी और संकटून बड़ी हिम्मत का दगाड़ सहन करनू।</verse>
				<verse number="5">हमून कोड़ा ले मारी ग्योछ, जेल में डाली ग्योछ, हम में भीड़ ले उपद्रव करछ्य। हमूले भौत मेहनत करछ्य, हम रात-रात भर जाग और भुखा रया।</verse>
				<verse number="6">हमूनले अपून निर्दोष स्वभाव ले, ज्ञान ले, शहनशीलता ले, दयालु हो भेरन, पवित्र आत्मा का हुकुम मानना का द्वारा,</verse>
				<verse number="7">सच्चा प्रेम ले, सच्चाई का बचन ले, परमेश्वरै की सामर्थ ले; हम दैना हात में धार्मिकता का हथियार स हमला खिन और बौं हात में रक्षा खिन इस्तमाल करनू।</verse>
				<verse number="8">जब लोग हमून तुच्छ जाणनान, और दुसरान बतुनान कि हम बुरा लोग छा या निका लोग छा या हम कपटी समझी ग्या, लेकिन हम सच्ची बोलनू।</verse>
				<verse number="9">कुछ लोग हमून प्रसिद्ध समझनान, लेकिन कुछ लोग हमून अनजान और मरिनाका नियाती समझनान और फिरले देखा, हम ज्यूना छा; हमून दण्ड त दीई जाछो लेकिन हमून जानै ले नै मार सकना।</verse>
				<verse number="10">हमार पास दुख को बखत छ्यो, लेकिन हमेशा खुश रूनू, हम खुद त कंगाल छा, लेकिन भौत लोगून आत्मिक रूप ले धनवान बना दीनू। हम इसा छा जसीकैं हमार पास के नाहातिन, फिरले हमार पास सब कुछ छै।</verse>
				<verse number="11">हे कुरिन्थियूस का विश्वासीयो, हमूले खुलभेरन तुमूनथैं बात करिना की छै, हम तुमून अपून पुर दिल ले प्रेम करनू।</verse>
				<verse number="12">तुमून खिन हमोरो प्रेम कभै कम नै भ्यो, लेकिन तुमोरो प्रेम हमून खिन कम हो ग्योछ।</verse>
				<verse number="13">लेकिन मैं अपून बच्चा समझभेरन तुमूनथैं कुछूँ, कि तुम ले उक बदला में तुम ले हमूनथैं अपून पुर दिल ले प्रेम करनै रौ।</verse>
				<verse number="14">तुम अविश्वासी लोगून का दगाड़ संगति जन राखा। किलैकी धार्मिकता और अधर्म को की मेल जोल? या उज्याला और अन्यारो को की दगोड़ो?</verse>
				<verse number="15">और मसीह को दुष्ट शैताना का दगाड़ की लगाव? या विश्वासी का दगाड़ अविश्वासी को की नाता?</verse>
				<verse number="16">परमेश्वरा का मन्दिर में मूर्तिन की कोई जाग नाहातिन। किलैकी हम त जिन्दा परमेश्वरा का मन्दिर छा; जसो परमेश्वरेले पवित्रशास्त्र में कईना को छै, “मैं इन लोगून का दगाड़ रूलो और उनूनमें हिटूलो फिरूलो; और मैं उनोरो परमेश्वर हूँलो, और उन म्यारा लोग होलो।”</verse>
				<verse number="17">येक कारण प्रभु हमूनथैं पवित्रशास्त्र का द्वारा कुंछो, “उन लोगून भटे अलग हो जा जो परमेश्वरा पछिल नै हिटना। और अपवित्र चीजून है दूर रौ, त मैं तुमून अपनूलो;</verse>
				<verse number="18">और मैं तुमोरो पिता हूँलो, और तुम म्यारा च्याला और चेलि होला; यो सर्वशक्तिमान प्रभु परमेश्वरो को बचन छै।”</verse>
			</chapter>
			<chapter number="7">
				<verse number="1">हे प्रिय विश्वासी भाईयो, जब परमेश्वरेले हमूनथैं यो वादा करछ्य, त आ हम अपून शरीर और मनस हर प्रकारा का बुराई भटे अपूनास दूर राखा, और परमेश्वरो को डर मानभेरन हमून पुर तरीका ले पवित्र जीवन जीना की कोशिश करून चैछी।</verse>
				<verse number="2">हमून अपून पुर दिल ले प्रेम करा। हमूनले नै केको के बुरो करिना को छै, नै कैसे आर्थिक नुकशान करछ्य, और नै कैसे अपून फैदा खिन ठग छै।</verse>
				<verse number="3">मैं तुमून दोषी ठहरून खिन यो नै कुंनू किलैकी मैं पैलि कै चुक ग्यूँ, कि हम तुमूनथैं अपून पुर दिल ले प्रेम करनू कि हम तुमून है अलग नी रून चाना चाहे हम ज्यूना रू या मरा।</verse>
				<verse number="4">मैं तुमूनथैं पुर विश्वास का दगाड़ बोलून मरयूँ, मैं तुम लोगून में भौत गर्व करछूँ; येले मैंस भौत तसल्ली मिलछी; और अपून सारा दुखून में ले मैं आनन्द ले भरपूर रूछूँ।</verse>
				<verse number="5">जब मैं त्रोआस शैहर छोड़छ्य और मकिदुनिया शैहर में पुज्यू, त वाँ ले हमून शारीरिक रूप में आराम नै मिल्यो, लेकिन हर तरफ भटे परेशानी में पड़ीना का छ्या। हर जाग में लड़ाई छी, हमार मन में डरछ्यो।</verse>
				<verse number="6">लेकिन दुखी लोगून शान्ति दीन वालो परमेश्वरेले तीतुस स हमार या भेजभेरन हमून शान्ति दीछ।</verse>
				<verse number="7">और नै केवल उक उना ले लेकिन उकी उ शान्ति ले, जो तीतुस स तुमेरि तरफ भटे मिलीना की छी; और उले तुमेरि इच्छा, और तुमार दुख और मैंखिन तुमेरि मेहनतो को समाचार हमून सुणाछ, जैले मैंस और ले खुशी भैछ।</verse>
				<verse number="8">मैंस यो बातोको अफसोज नी छ्यो कि मैंले तुमून चिठ्ठी लिखीछ्य, भले ही येले तुमून दुखी करिना को हो। मैंस पैलि बार में पछतावा भ्योछ जब मैंले देखछ्य कि यो चिठ्ठी स पढ़भेरन तुमून थ्वाड़ा बखत खिन दुख त भ्योछ लेकिन यो थ्वाड़ा देर खिन छ्यो।</verse>
				<verse number="9">लेकिन अब मैं खुश छूँ में येक कारण नै कि तुमून दुखी करिना छै, बल्कि येक कारण कि तुमूनले उ दुख का कारण अपून पापून भटे पश्चाताप करछ्य, किलैकी यो इसा तरीका को दुख छ्यो जसीकैं परमेश्वर अपून लोगून थैं चाछो कि तुमार और हमार कारण कोई ले बात में तखलीफ नै हो।</verse>
				<verse number="10">किलैकी उ दुख, जो परमेश्वर हमून महसूस करून चाछो, और जैको परिनाम उद्धार छै। इसीकैं दुख को कोई अफसोज नाहातिन। लेकिन संसारिक दुख लोगून को हमेशा खिन मौत तरफ ली जाछो।</verse>
				<verse number="11">फिरले सुणा, योई बात ले कि उ दुख, जो परमेश्वर तुमून महसूस करून चाछो। ऊस तुमूनमें कतुक हौंसला, और सच्चाई बतून खिन तैयार, डर, मैं देखना की इच्छा, मेहनत, और न्‍याय चुकूना की कतुक इच्‍छा; इसीकैं तुमूनले यो मामला में हर तरीका ले निर्दोष हुना को सबूत दीछ।</verse>
				<verse number="12">हालाकि मैंले यो चिठ्ठी नै त तुमून येक कारण लिखछ्य कि मैंस उकी चिन्ता छी, जैले अन्याय करछ्य, और नै उक कारण जैमें अन्याय करि ग्योछ, लेकिन येक कारण कि परमेश्वरा का सामुनि खुद तुम यो जाण ली कि तुम हमून खिन कतुक सच्चा छा।</verse>
				<verse number="13">येक कारण हमून हौंसला मिलछ्य। और हमार यो हौंसला का दगाड़ तीतुस की खुशी को कारण और ले खुशी भैछ किलैकी उको जी तुम सबून का कारण हरिया-भरिया हो ग्योछ।</verse>
				<verse number="14">किलैकी अगर मैंले उक सामुनि तुम लोगून में जो गर्व करिना को छ्यो, त उ खिन मैंस शर्मिदा नै हुनो पड़ो। मैंले तुम लोगून थैं जो ले क्योछ, उ सब सच्ची छी। इसीकैं तीतुसाक सामुनि हमूले तुम में गर्व करभेरन जो कईना को छ्यो, उ सच्ची निकलछ्य।</verse>
				<verse number="15">तीतुस जब यो याद करछो कि कसीकैं तुमूले उको हुकुमून मानछ्य, जब तुमूले डरनै और बड़ा सम्मान का दगाड़ उको स्वागत करछ्य, त उ तुमूनथैं और ले ज्यादा प्रेम करछो।</verse>
				<verse number="16">मैं भौत खुश छूँ, कि तुमेरि तरफ भटे मैंस हर बात में भरोस हुछो।</verse>
			</chapter>
			<chapter number="8">
				<verse number="1">अब हे म्यारा विश्वासी भाईयो, मैं तुम लोगून उ अनुग्रह का बारिमें बतूनो चाछूँ, जैस परमेश्वरेले मकिदुनिया प्रदेशा का विश्वासीन की मण्डली में दीछ।</verse>
				<verse number="2">जब उनून भौत सी परेशानीन ले उनून परखी ग्यो, त उन भौत खुश भ्यान उन भौत गरीब छ्या और उनूनले दुसारा विश्वासीन की मद्दत करून खिन खुशी ले दान दीयान।</verse>
				<verse number="3">और उनार बारिमें मेरि यो गवाई छै, कि उनूनले नै केवल उतुकै दीछ, जो उनूथैं हो सकछ्यो लेकिन उहै कई ज्यादा, यो उनूनले अपूनी इच्छा ले दीछ।</verse>
				<verse number="4">उनूनले त हमूनथैं भौत बिनती करभेरन मैंथैं अनुमति माँगछ्य कि उनूनले यरूशलम शैहरा का विश्वासीन की मद्दत खिन सेवा-काम में भाग लीना को मौक मिलो।</verse>
				<verse number="5">हमूले नी सोचीना को छ्यो उन इस तरीका ले दान दी सकनान, सबून है पैलि उनूनले खुद स प्रभु की सेवा खिन समर्पित कर दीछ। उक बाद उनूनले खुद स परमेश्वरा का इच्छा ले हमार बाताईना का अनुसार चलून खिन समर्पित कर दीछ।</verse>
				<verse number="6">येक कारण हमूले तीतुस स समझाछ, कि जसो उले पैलि शुरू करिना को छ्यो, ऊसोई तुमार बीच में यो दान का काम स पुर ले कर ली।</verse>
				<verse number="7">लेकिन जसो तुम हर बात में विश्वास, बचन में ज्ञान और हर तरीका को प्रयास, और उ प्रेम में, जो हमून खिन राखछा, बढ़नै जानू, उसीकैं अब गरीब विश्वासीन की आर्थिक मद्दत खिन ले बढ़नै जा।</verse>
				<verse number="8">मैं तुमून कोई हुकुम नै दीनू, बल्‍कि दुसरा लोगून का हौंसला को उदारण दीभेरन मैं तुमार प्रेम की सच्‍चाई की परीक्षा लीन चानू।</verse>
				<verse number="9">तुम हमार प्रभु यीशु मसीह को अनुग्रह जाणछा, कि उ अमीर होभेरन ले तुमून खिन कंगाल बनग्यो ताकि उक कंगाल हुना तुम अमीर हो ज्या।</verse>
				<verse number="10">पोरा साल तुम दान दीन वालान में भटे पैला छ्या बल्कि इसो करना की इच्छा ले राख छ्या। यो बात में मेरि सलाह यो छै; और यो मामला में तुमून खिन सबून है निको यो छै कि जो काम तुमूले पोरा साला शुरू करिना को छ्यो ऊस पुर ले करा, जैकी योजना तुमूले खुद बनाई की छी। यो काम स पुर करून खिन अपूनी उ कमाई और ताकतले करा, और यो शुरू करून खिन तुमार पास बखत छै।</verse>
				<verse number="11"></verse>
				<verse number="12">अगर तुम दान दीन खिन तैयार छा त जो केले तुमार पास छै, उक अनुसार केले दीई जौ, उ परमेश्वरेस ग्रहण हुछो। कैंथैं यो आश नै करि जा सकूनो कि उ अपूनी समता है ज्यादा दान दे।</verse>
				<verse number="13">इसो नाहातिन कि तुमून दुसारा लोगून की जरूरतून में मद्दत करून चैछो और अपूनास मुसीबत में डालूनो चैछो। म्येरो मक्शद छै कि तुमोरो जीवन एक समान हो।</verse>
				<verse number="14">यो बखत त तुमेरि बढ़ोतरी उनेरि जरूरत पुरी करून खिन भौत छै, कभै यो ले सम्भव छै कि तुमून खुद स कैकी मद्दत की जरूरत छै और उ अपूनी बढ़ोतरी में ले तुमेरि मद्दत करा। तब द्वीवै पक्ष एक जसो हो जाला।</verse>
				<verse number="15">जसो पवित्रशास्त्र में लिखीना को छै, “जैले भौत ज्यादा जाम कर लीछ उले केले ज्यादा नै पायो। और जैले कम जामा करछ्य, उले केले कमी स महसूस नै कर्यो।”</verse>
				<verse number="16">परमेश्वरोको धन्यबाद हो, जैले तुमार बारिमें उई चिन्ता तीतुस का मन डालछ्य, जो मैंमें छी।</verse>
				<verse number="17">जब हमूले उथैं तुमूनथैं मिलून खिन क्योछ, त उले नै केवल हमरि यो बिनती स्वीकार करछ्य, बल्कि उ बड़ा जोश ले अपूनी इच्छा ले तुमार पास आछ।</verse>
				<verse number="18">और हमूले उक दगाड़ दुसरा विश्वासी भाईन ले भेज रैछ, जैको नाम सुसमाचार प्रचार करून खिन विश्वासीन की मण्डली में फैलीना को छै।</verse>
				<verse number="19">और इतुकै नै, लेकिन उ विश्वासीन की मण्डली का द्वारा चुनी ग्योछ कि यो दाने स काम खिन हमार दगाड़ जौ और हम यो सेवा येक कारण करनू, कि प्रभु की महिमा और यो देखून खिन कि हम यरूशलम में विश्वासीन की मद्दत करून खिन उत्सुक छा।</verse>
				<verse number="20">हम यो बात में सतर्क रूनू कि तीतुस का दगाड़ उ विश्वासी स भेजना ले यो मद्दत की धन को इंतजाम करूना की सेवा में कैसे हम में आँगूलो उठूना को मौका नै मिलो।</verse>
				<verse number="21">हमोरो मक्शद उई करना छै जो नै केवल प्रभु का नजरून में, बल्कि लोगून का नजरून में ले सही हो।</verse>
				<verse number="22">इन द्वीवैन का दगाड़ हम अपून एक और विश्वासी भाई स भेजून मर्या। जैस हमूले बार-बार परख रैछ उ हमेशा मद्दत करून खिन भौत उत्सुक छै; लेकिन अब तुमूनमें ऊस भौत भरोसा छै, त उ मद्दत करून खिन और ले ज्यादा उत्सुक छै।</verse>
				<verse number="23">अगर कोई तीतुस का बारिमें पुछो, त उ म्येरो दगड़िया, और तुमून खिन म्येरो सहकर्मी छै, और अगर हमार विश्वासी भाईन का बारिमें पुछून, त उन विश्वासी की मण्डली खिन भेजिना का और मसीह को सम्मान करनान।</verse>
				<verse number="24">येक कारण उनून अपूनो प्रेम दिखाया, और विश्वासीन की मण्डलीन में साबित करा कि तुमार बारिमें हमोरो घमण्ड सच्ची छै।</verse>
			</chapter>
			<chapter number="9">
				<verse number="1">अब यरूशलम शैहरा का विश्वासीन की मण्डली स दान दीना की सेवा का बारिमें तुमून लिखूनो जरूरी नाहातिन।</verse>
				<verse number="2">किलैकी मैं येका बारिमें तुमेरि निकी नीयत स जाणछूँ। मैं मकिदुनिया प्रदेशा का रूनवालान थैं यो कुंन में गर्व करछूँ कि तुम अखया प्रदेशा का लोग पोरा साल भटे तैयार भ्यान। तुमार हौंसला ले भौतून प्रेरणा मिलछ्य।</verse>
				<verse number="3">मैं इन तीन विश्वासी भाईन येक कारण भेजूनमरयूँ कि हमूले जो गर्व तुमार बारिमें करछ्य, उ यो बात में खोखला नै ठहरून; लेकिन जैसो मैंले क्योछ, कि तुम यरूशलम शैहर में विश्वासीन खिन दान दीन खिन तैयार रौ।</verse>
				<verse number="4">काँई इसो नै हो कि कुछ मकिदुनिया प्रदेशा का निवासी म्यारा दगाड़ आभेरन यो देखून कि तुम दान दीन खिन तैयार नाहातिन, त हो सकछो, कि यो भरोसा का कारण हमोरो अपमान हो, लेकिन तुमोरो येहै ले ज्यादा अपमान होलो।</verse>
				<verse number="5">येक कारण मैंले यो जरूरी समझछ्य कि मैं विश्वासी भाईन थैं यो बिनती करूँ कि उन पैलि तुमार पास न्हैजून और इसो इंतजाम करून कि तुमूले दान दीना को जो वादा करिना को छै, उ म्यारा पुजून है पैलि जामा हो और उ दान तुमेरि जोर-जबरदस्ती ले नै, बल्कि तुमेरि निकी नीयत ले हो।</verse>
				<verse number="6">यो बात को ध्‍यान राखा कि जो थ्वाड़ बूछो, उ थ्वाड़ काटोलो; और जो भौत बूछो, उ भौत काटछो।</verse>
				<verse number="7">हरेक ले अपून मन में जतुक ठान ले, उतुकै दान दे। उ नै कुण-कुणा भेरन, और नै दबाव ले, किलैकी “परमेश्वर खुशी ले दान दीन वालान प्रेम करछो।”</verse>
				<verse number="8">परमेश्वर सब प्रकार को अनुग्रह तुमून जरूरत है ज्यादा दी सकछो। जैले हर बात में और हर बखत, सब कुछ, जो तुमून जरूरत होलि, तुमार पास रौ, ताकि तुमार पास उहै निको काम करून खिन ले तुमार पास भौत कुछ बच जालो।</verse>
				<verse number="9">जसो पवित्रशास्त्र में लिखीना को छै, “परमेश्वर जरूरतमंद लोगून जरूरत है ज्यादा दीछो, उकी धार्मिकता हमेशा बनिना की रोलि।”</verse>
				<verse number="10">परमेश्वरै छै जो किसान खिन बी और फिर खान खिन रोटो दीछो। उसीकैं, तुमार पास जो छै ऊस परमेश्वर बढ़ालो, ताकि तुम जरूरतमंद लोगून की और ले मद्दत कर सका।</verse>
				<verse number="11">तुमून हर तरीका ले आशीष मिलेली, ताकि तुम हमेशा खुला दिल ले दान दी सका। जब हम तुमार दीईना का दान ले गरीब लोगून की मद्दत करला, त उन लोग परमेश्वरो को धन्यवाद कराला।</verse>
				<verse number="12">किलैकी यो सेवा स पुरो करूना ले, नै केवल परमेश्वरा लोगून की जरूरत पुरी होलि, लेकिन लोगून का तरफ भटे परमेश्वरो को भौत धन्यबाद हुछो।</verse>
				<verse number="13">किलैंकी यो दान दीना की सेवकाई ले साबित होलो कि तुम सच्चा छा और भौत सारा लोग परमेश्वरै की महिमा कराला, किलैंकी तुमूनले यो मानिना को छै कि मसीह को सुसमाचार सत्य छै और अब उको पालन ले करछा और निका तरीकाले सब गरीब विश्वासीन की और सब विश्वासीन की दिलेरी मद्दत ले करनै रूछा।</verse>
				<verse number="14">उन तुमून खिन परमेश्वर थैं प्रार्थना कराला। उन तुमून प्रेम करनान, किलैकी उन जाणनान कि परमेश्वरेले तुम लोगून में कतुक अनुग्रह करिना को छै।</verse>
				<verse number="15">आखरी में, हम सबून परमेश्वरो को धन्यवाद करून चैछो किलैकी उले हमून सबून है ठूलो ईनाम दीछ, जब उले अपून च्याला स हमार पापून खिन दण्ड दीछ। जैको शब्दून में बयान नै करि जा सकूनो।</verse>
			</chapter>
			<chapter number="10">
				<verse number="1">मैं पौलुस, मसीह की नम्रता और दया का कारण तुम लोगून थैं यो बिनती करून मरयूँ। मैंथैं कुछ लोग कुंनान कि जब मैं तुमार दगाड़ हुछूँ त डरफोक लागछूँ, लेकिन जब मैं दूर हुछूँ त तुमार दगाड़ सख्ती ले पेश ऊँछूँ।</verse>
				<verse number="2">मैं यो बिनती करछूँ कि कुछ लोगून ले कईना को छै कि हम यो संसार का लोगून की नियाती काम करनू। येक कारण जब मैं वाँ ऊँछूँ, त मैंस उम्मीद छै कि मैंस उनून खिन सख्ती ले पेश ऊँन पड़ोलो। मैं बिनती करछूँ कि जब मैं वाँ ऊँलो त मैंस तुमार दगाड़ इसो बरताव नै करूनो पड़ो।</verse>
				<verse number="3">किलैकी हम यो संसार में रूनू, हम अपून दुश्मनून थैं इसीकैं नै लड़ना जसो कि यो संसारा लोग करनान।</verse>
				<verse number="4">हम अपूनी लड़ाई में जिन हथियारून को इस्तमाल करनू, उन यो संसार का बनिना का हथियार नाहातिन बल्कि हमार पास इसा शक्तिशाली हथियार छन, जो परमेश्वरेले हमून दीयान, जिनोरो इस्तमाल हम गढ़ून नाश करून खिन करनू।</verse>
				<verse number="5">येक द्वारा हम उ हरेक बिरोध स, और उ हरेक घमण्ड करून वालान, जो परमेश्वरा का ज्ञान का बिरोध में खोरो उठूछो, ऊस झुका दीनू और हरेक इच्छा स काबू करभेरन मसीह का हुकुमून मान्या वाला बना दीछो।</verse>
				<verse number="6">और तैयार रूनू कि जब तुम पुर तरीका ले मसीह का हुकमून मान्या वाला हो जा, त हर तरीका ले हुकुम नै मान्या वाला उ आदिमीस सजा दे।</verse>
				<verse number="7">तुम सिर्फ जो सामुनि छै, उको भ्यारी रूप स देखछा। अगर कैसे अपून में तो भरोस हो, कि मैं मसीह को छूँ, त उ यो ले जाण ले, कि जसो उ मसीह को छै, उसीकैं हम ले मसीह का छा।</verse>
				<verse number="8">किलैकी अगर मैं उ अधिकार का बारिमें और ले घमण्ड दिखू, जो प्रभु ले तुमार विश्वास स नष्ट करून खिन नै, लेकिन मजबूत विश्वासी बनून में तुमेरि मद्दत करून खिन हमून दीईना को छै, त मैंस यो बात की कोई शर्म नाहातिन।</verse>
				<verse number="9">मैं नै चानू कि तुमून यो अहसास हो कि मैं तुमून डरूना का मक्शद ले यो चिठ्ठी लिखूनमरयूँ।</verse>
				<verse number="10">किलैकी तुमून में भटे कुछ लोग कुंनान, “उकी चिठ्ठी त गम्भीर और असरदार छन; लेकिन जब सामुनि हुछूँ, त कुंनान उ त कमजोर आदिमी छै, और उकी बातुन में के दम नाहातिन।”</verse>
				<verse number="11">जो लोग यो कुंनान, उन येमें विचार करून कि हम दूर रैभेरन ले चिठ्ठीन में जो बात लिखनू उसीकैं तुमार सामुनि हमार काम ले होलो।</verse>
				<verse number="12">जो लोग अपूनी तारीफ करनान, हम उनार बराबर हुना की या उनून है अपूनी तुलना करना की हिम्मत नै करना। उन अपूनाई नाप-तोल ले अपूनो मूल्‍याँकन करनान और अपून थैं अपूनी तुलना करनान। इसीकैं उन अपूनी मूर्खता का बारिमें बतुनान।</verse>
				<verse number="13">परमेश्वरेले हमून जो काम दीईना को छै उकी सरद है भ्यार हम घमण्ड कभै नै करूँला, लेकिन उई सरद तक जो परमेश्वरेले हमून खिन ठहराईना की छै, और उमें तुम ले आ गैछा और उक अनुसार घमण्ड ले करला।</verse>
				<verse number="14">किलैकी हम अपूनी सरद है भ्यारा अपूनास बढ़ून नै चाना, जसो कि तुम तक नै पुजना का हालत में हुछो, लेकिन हम तुमून कुरिन्थ शैहर की यात्रा करूनवाला पैला लोग छ्या जिनूनले तुमून मसीह को सुसमाचार सुणाछ।</verse>
				<verse number="15">हम अपूनी सीमा है भ्यार दुसरा की मेहनत में गर्व नै करना, बल्‍कि हम आश करनू कि जसो-जसो तुम लोगून को विश्वास बढ़नै जालो, ऊसो-ऊसो हम अपूनी हदक अनुसार तुमार कारण और हम तुमार आश-पास और भौत लोगून तक पुजून में सक्षम छा।</verse>
				<verse number="16">ताकि फिर हम तुमार अलावा दुसारा देशून में सुसमाचार को प्रचार कर सकनू और तुमून कोई दुसारा इलाका में पैलि है करिना का कामून का बारिमें घमंड नै करूनो चैछो।</verse>
				<verse number="17">लेकिन जसो पवित्रशास्त्र में लिखीना को छै, “जो कोई घमण्ड करो, उ प्रभु में घमण्ड करो।”</verse>
				<verse number="18">किलैकी जो अपूनी तारीफ करछो, उ नै, लेकिन जैकी तारीफ प्रभु करछो, उई प्रभु का नजरून निको छै।</verse>
			</chapter>
			<chapter number="11">
				<verse number="1">तुम दुसरान अपनूछा जो खुदै की तारीफ करनै रूनान और येक कारण मैंस उम्मीद छै कि अगर मैं थ्वाड़ा बेकूफी करछूँ त ऊस तुम बरदास कर लेला।</verse>
				<verse number="2">किलैकी मैं तुमूनथैं प्रेम करछूँ और तुमेरि परवाह करछूँ जैस परमेश्वर करछो। येक कारण कि मैंले तुमून मसीह स दीना को वादा करिना को छै, और एकलो ऊसोई। यो एक बबा का नियाती छै जैले अपूनी चेलि को ब्याक बखत उक घरवालास एक शुद्ध कुँवारी का रूप में दीछो।</verse>
				<verse number="3">लेकिन मैं डरछूँ कि जसीकैं शैतान ले, एक स्याँपा का रूप में चालाकी ले पैलि स्यैनि हव्वा स बहकाछ, उसीकैं तुम लोगून का मनून ले बहका दी जौ और तुम मसीह का प्रति अपूनी निष्‍कपट और सच्‍ची भक्‍ति स खत्म नै कर दी।</verse>
				<verse number="4">जब कोई तुमार पास ऊँछो और हमार द्वारा सुणाईना को यीशु का प्रचारा का अलावा कोई दुसारा यीशु को प्रचार करछो, या कोई और आत्मा तुमून मिलीना की छै, जो पैलि नी मिलीना की छी; या और कोई सुसमाचार सुणो जैस तुम ले पैलि नी मानिना को छ्यो, त तुम येस खुशी ले अपनूछा।</verse>
				<verse number="5">मैंस लागछो कि मैं उन लोगून की नियाती निको छूँ जो सोचनान की उन सबै प्रेरितों में भटे सबून है महान छै।</verse>
				<verse number="6">माना कि मैं बोलून में निपूण नाहातिनू, लेकिन म्यारा पास मसीह और सुसमाचार का बारिमें ज्ञान छै। बल्कि येको प्रमाण हम सब तरीका ले और हर प्रकारै की बातुन में तुमून लोगून दी चुक ग्या।</verse>
				<verse number="7">तुम लोगून मलि उठून खिन मैंले अपूनास दीन बनाछ और बिना के लिये तुम लोगून का बीच में परमेश्वरो को सुसमाचारो को प्रचार करछ्य। क्या मैंले इसो करभेरन पाप करछी?</verse>
				<verse number="8">मैंस तुमेरि सेवा करून खिन दुसरी विश्वासीन की मण्डली को सयोग मिलछ्य। तुमून यो नै कुंन चैनो कि इसो करूनो गलत छै।</verse>
				<verse number="9">और जब मैं तुमार दगाड़ छ्यू, और जब मैंस पैसान की जरूरत छी, तब ले मैंले तुमून परेशान नै कर्यो। किलैकी मकिदुनिया प्रदेशा का विश्वासी भाईन ले आभेरन पैसा दीभेरन मेरि जरूरत पुरी करछ्य। मैंले हर बात में तुमून परेशान नै कर्यो, और मैं ऊँन वाला दिनून में ले तुमून परेशान नी करूँलो।</verse>
				<verse number="10">और जसो कि तुम जाणछा कि मसीह जो कुंछो उ सब सच्ची छै, तुम यो पक्को कर सकछा कि अब मैं तुमूनथैं जो कुछूँ उ सच्ची छै। येक कारण पुर अखया प्रदेशा का सारा इलाकान में भटे केथैं ले रूपाया नै लिया।</verse>
				<verse number="11">मैंले तुमूनथैं पैसा क्याखिन नै लीनू? कि मैंले इसो येक कारण करछ्य किलैकी मैं तुमून प्रेम नै करनू? परमेश्वर जाणछो कि मैं तुमून प्रेम करछूँ।</verse>
				<verse number="12">लेकिन मैं जो करनै ऊँन मरयूँ, उई करनै रछूँ, ताकि मैं उन लोगून हमार दगाड़ बराबर समझी जाना को मौका दीन है रोक सकूँ। उन सच्ची में मौक चानान कि यो साबित करून खिन उन ले हमार बराबर छन और उनूनले गर्व करना को अधिकार छै।</verse>
				<verse number="13">किलैकी इसा लोग झूठ्ठा प्रेरित, और छल ले काम करूनवाला, और मसीह को प्रेरित हुना को ढोग करनान।</verse>
				<verse number="14">मैंस ताजुब नै हुनो कि उन इसो काम करनान, किलैकी शैतान खुद लोगून ध्वाका दी सकछो कि उ परमेश्वरै की महिमा वाला स्वर्गदूत बनभेरन आईना का छन।</verse>
				<verse number="15">येक कारण यो कोई ठुली बात नाहातिन कि अगर शैताना का सेवक धार्मिकता का सेवकून की नियाती दिखून खिन खुद स बदल दीन। लेकिन अन्त में उनून उई मिलोलो जो उनारा कामून का अनुसार छै।</verse>
				<verse number="16">मैं फिर कुछूँ, कोई मैंस मूर्ख नै समझो; नै त मूर्ख समझभेरन मेरि सह ली, ताकि थ्वाड़ा मैंले घमण्ड कर सकूँ।</verse>
				<verse number="17">येक बारिमें मैं जो कुन वाला छूँ, उ प्रभु का अधिकार ले नै, लेकिन माना मूर्खता ले कुछूँ।</verse>
				<verse number="18">जब भौत लोग उन बातुन की डींग मारनान, जो संसारा का नजर में महत्व राखनान, त मैंले उई करूँलो।</verse>
				<verse number="19">तुम समझदार होभेरन मूर्ख लोगून का ब्यवहार स खुशी ले सह लीछा।</verse>
				<verse number="20">किलैकी जब तुमून कोई दास बना लीछो, या तुमार पास जो केले छै, ऊस ले ली लीछो, या ध्वाका दीभेरन फैदा उठा लीछो, या अपूनास ठूलो बनूछो, या तुमार मुँख में थप्पड़ मारछो, त तुम सह लीछा।</verse>
				<verse number="21">त तुमून कि लागछो कि मैंस शर्म ऊँन चैछी किलैकी मैंले इसो नै कर्यो? बल्कि जिन बातुन का बारिमें उन लोग डींग मारनान, मैंले उन बातुन का बारिमें उई कर सकछूँ।</verse>
				<verse number="22">क्या उनी यहूदी छनी? मैंले छूँ। क्या उनी इस्राएली छनी? मैंले छूँ; क्या उनी अब्राहम का वंश का छनी? मैंले छूँ।</verse>
				<verse number="23">क्या उनी मसीह का सेवक छनी? मैं पागल आदिमी का नियाती कुछूँ, मैं उनून है कई बढ़भेरन सेवक छूँ। मैंले उनून कई ज्यादा मेहनत करिना को छै, उनून है कई ज्यादा जेल में जाईना को छूँ, भौत बार मारी गयूँ, और हमेशा मैंस मौतो को सामना करून पड़छ्य।</verse>
				<verse number="24">पाँच बार मैंले यहूदी अगुवान का हातून है उनतालीस कोड़ा खाया।</verse>
				<verse number="25">तीन बार मैं डंडा ले पीटी गयूँ, और एक बार ढुगाँन ले मारी गयूँ। तीन बार इसो भ्योछ कि जो समुंद्री जहाज में मैं यात्रा करून मरैछयूँ, उ टुट ग्यो; एक दिन और एक रात मैंले समुद्र में काटछ्य।</verse>
				<verse number="26">मैं बार-बार यात्रान में; नदीन का जोखिम में; डाकूनका जोखिम; अपून जातिवालान है जोखिम में; गैर-यहूदी है जोखिम में; नगरून में का जोखिमून में; जंगल का जोखिमून में; समुद्रा का जोखिमून में; झूठ्ठा विश्वासी भाईन का बीच जोखिमून में रयूँ।</verse>
				<verse number="27">मैंले भौत रातून जाग भेरन, भुखो-प्यासो रैभेरन, मैंस भौत बार खान खिन नै मिल्यो, सर्दी और थ्वाड़ा कपड़ान में रैभेरन कड़ी मेहनत करछ्य और भौत मुसीबतून झेलीना को छै।</verse>
				<verse number="28">और इन सब बातुन का अलावा हर दिन सबै विश्वासीन की मण्डली की चिन्ता मैं खाई जाछी।</verse>
				<verse number="29">जब कोई कमजोर हो जाँछो, त मैंले कमजोरी महसूस करछूँ। जब कोई पाप करछो, त म्येरो दिल जलि जाछो।</verse>
				<verse number="30">अगर के बात में घमण्ड करून छै, त मैं अपूनी कमजोरीन में घमण्ड करूँलो।</verse>
				<verse number="31">प्रभु यीशु मसीह को पिता परमेश्वर हमेशा धन्‍य छै। उ जाणछो कि मैं झूठ नै बोलून मरयूँ।</verse>
				<verse number="32">जब मैं दमिश्‍क शैहर में छ्यू, त अरितास राजा का राज्यपाल ले मैंस गिरफ्‍तार करून खिन शैहर में पहरा बैठा दीछ।</verse>
				<verse number="33">लेकिन म्यारा दगड़ियान ले मैंस चार दिवारी का खिड़की भटे डाला में बैठाभेरन तलि उतार दीछ, और इसीकैं मैं राज्यपाल का हातून भटे बच निकल ग्यू।</verse>
			</chapter>
			<chapter number="12">
				<verse number="1">जब कि घमण्ड करना ले कोई फैदा नाहातिन, फिरले मैंस इसो करूनो पड़ र्योछ। येक कारण मैं प्रभु का द्वारा दीईना का दर्शनून और प्रकाशनून की चर्चा करून मरयूँ।</verse>
				<verse number="2">मैं मसीह में चौदा साल पैलि तीसारा स्वर्ग तक उठाई ली गयूँ। मैं अपून शरीर का दगाड़ छ्यू या आत्मा में छयू, मैंस मालूम नाहातिन, यो सिर्फ परमेश्वरै जाणछो।</verse>
				<verse number="3">होई सिर्फ परमेश्वरै जाणछो, कि मैं अपून शरीर का दगाड़ या बिना शरीरा का छ्यू, लेकिन मैं जाणछूँ,</verse>
				<verse number="4">कि मैं स्वर्गलोक में उठा ली ग्योछ, और इसी बातुन सुणछ्य जो कुंना की नाहातिन; जैका बारिमें बतूनो कोई ले आदिमी खिन मुशकील छै।</verse>
				<verse number="5">इसा आदिमी में त मैं घमण्ड करूँलो, लेकिन अपूनी कमजोरीन छोड़, अपून बारिमें घमण्ड नी करूँलो।</verse>
				<verse number="6">किलैकी अगर मैं घमण्ड करून चाछूँ ले त मूर्ख नी हूँलो, किलैकी सच्ची बोलूलो। लेकिन मैं अपूनास घमण्ड करना ले रोकछूँ, लोग जसो म्येरो जीवन में देखछा, मैंथैं सुसमाचार सुणछा, उहै बढ़भेरन मैंस केले जन समझा।</verse>
				<verse number="7">लेकिन मैंस उन अद्धभुत चीजून में गर्व नै करून चैनो जो परमेश्वरेले मैंस दिखाछ। येहै निपटून खिन एक भौतै कठिन समष्या मैंस दी गैछ, जो म्यारा शरीर में एक काँणा का नियाती छै। शैतान का एक दूत ले मैंस मारना को इरादा करछ्य, ताकि मैं घमंडी नै हो ज्यू।</verse>
				<verse number="8">येक बारिमें मैंले प्रभु थैं तीन बार बिनती करछ्य, कि मैंहै यो दूर होज्यौ।</verse>
				<verse number="9">और उले मैंथैं क्योछ, “म्योरो अनुग्रह तैखिन भौत छै; किलैकी मेरि सामर्थ कमजोरी में सिद्ध हुछी।” येक कारण मैं भौत खुशी ले अपूनी कमजोरीन में घमण्ड करूँलो, कि मसीह की सामर्थ मैंमें छाया करछी।</verse>
				<verse number="10">यो कारण मैं मसीह खिन कमजोरीन में, और निन्दान में, और दरिद्रता में, और सताव में, और संकटून में खुश छूँ; किलैकी जब मैं कमजोर हुछूँ, तभै मैं मसीह की सामर्थ में मजबूत छूँ।</verse>
				<verse number="11">मैं मूर्ख त बन्यू, लेकिन तुम लोगून ले मैंस ऊस तरीका ले मजबूर करछ्य, तुमून त मेरि तारीफ करूनी चैछी, जब कि मैं तुच्छ छूँ फिरले मैं उन ठूला-ठूला प्रेरितून कोई बात में कम नाहातिनू।</verse>
				<verse number="12">जब मैं तुमार दगाड़ छयूँ, त यो साबित करछय, कि मैं एक सच्चा प्रेरित छूँ, और मैं धीरज धरभेरन तुमार बीच भौत सारा चमत्काराक काम, और सामर्थ का काम करभेरन दिखाया।</verse>
				<verse number="13">दुसारा विश्वासीन की मण्डली का मुकाबला में तुम लोगून में कि बात की कमी रै गै? हाँ, मैं कभै ले तुमून खिन बोझ नै बन्यू, माफ कर दी, मैंहै भूल हो गै।</verse>
				<verse number="14">अब, मैं तीसारा बार तुमार पास ऊँन खिन तैयार छूँ, और मैं तुमूनमें कोई बोझ नी बनूँलो। किलैकी मैं तुम लोगून चाछूँ, लेकिन तुमेरि सम्‍पत्ति स नै। बच्‍चान अपून ईजा-बबान खिन धन जामा नै करूनो चैनो, बल्‍कि ईजा-बबान अपून बच्‍चान खिन जामा करून चैछो।</verse>
				<verse number="15">मैं तुम लोगून का खुशी खिन सब कुछ खर्च कर द्यूलो, और अपूनास ले दी द्यूलो। मैं तुमून भौत प्रेम करछूँ, लेकिन इसो लागछो कि तुम मैंस थ्वाड़ा प्रेम करछा।</verse>
				<verse number="16">केले हो, मैं तुमूनमें बोझ नै बन्यू, फिरले कोई नै कोई मैंमें यो दोष जरूर लगा सकछो, “उ भौत धूर्त छै और उले तुमून छल-कपट में फसा हैछ।”</verse>
				<verse number="17">तुमी बता, जिन लोगून मैंले तुमार पास भेजछ्य, क्‍या मैंले उनूनमें भटे केका द्वारा तुमूनथैं गलत फैदा उठाछी?</verse>
				<verse number="18">तीतुस स तुमार पास भेजना की बिनती मैंले करछ्य, उक दगाड़ अपून यो विश्वासी भाईस ले मैंले भेजिना को छ्यो, क्या तीतुस ले तुमोरो गलत फैदा उठाछी? क्या हम एक्कै मक्शद ले काम नै करनाई और एकसोई ब्यवहार नै करना?</verse>
				<verse number="19">तुम लोग यो समझना होला कि अब तक हम तुमार सामुनि अपूनी सफाई दीन मर्या। बात इसी छै कि हम यो सब परमेश्वरेस सामुनि समझभेरन मसीह में कुंनू। हे म्यारा विश्वासी भाईयो, यो सब बात तुमून विश्वास में मजबूत करून खिन करूनमर्यान।</verse>
				<verse number="20">किलैकी मैंस डर छै, काँई इसो नै हो, कि मैं आभेरन जसो चाछूँ, ऊसो तुमून नै पा; और मैंस ले जसो तुम नै चाना ऊसोई ही पा। काँई इसो नै हो कि मैं तुमार या झगड़ा, डाह, क्रोध, स्वार्थ, नफरत, चुगली, घमण्ड, और बखेड़ा हुन।</verse>
				<verse number="21">काँई इसो नै कि जब मैं वापस ऊँलो, त म्येरो परमेश्वर मैंस अपमानित करो और मैंस भौत खिन फिर शोक करून पड़ो, जिनूनले पैलि पाप करिना को छ्यो, और उ गंदा काम, और व्यभिचार, और लुचपन ले, जो उनूनले कर्यान, उनून है पश्चाताप नै कर्यो।</verse>
			</chapter>
			<chapter number="13">
				<verse number="1">पवित्रशास्त्र में यो लिखीना को छै, कि “हरेक मामला को द्वी या तीन जनून की गवाही का द्वारा सुलझाई जानो चैछो।” मैं पैलि उन लोगून चेतावनी दी चुक गयूँ जो मेरि दुसरी यात्रा में वाँ छ्या और पाप करून मरैछ्या, अब मैं फिर उनून और सबून चेतावनी दीछूँ, जसो कि मैंले पैलि चिठ्‌ठी में दीईना को छ्यो। अब मैं तुमार पास तिसरी बार ऊँन वाला छूँ और अगर उनूनले अब ले पाप करूनो बंद नै करिना को छै, त कोई ले सजा है बच नी पालो।</verse>
				<verse number="2"></verse>
				<verse number="3">मैं येक कारण कुछूँ, किलैकी तुम सबूत माँगून मरैछा की मसीह म्यारा द्वारा कुंछो, और मसीह तुमून सुधारछो, त यो साबित हुछो की उ कमजोर नाहातिन; लेकिन तुमार बीच में शक्तिशाली छै।</verse>
				<verse number="4">उ कमजोरीन का कारण सूली में चढ़ाई त गयोछ, फिरले परमेश्वरै की सामर्थ ले ज्यूनो छै, हम ले त मसीह का नियाती शाररीक रूप ले कमजोर छा; लेकिन तुम अनुभव करला कि हम परमेश्वरै की सामर्थ का द्वारा मसीह का दगाड़ ज्यूना छा।</verse>
				<verse number="5">अपूनास परखा, कि विश्वास सच्चो छी या नाहातिन। अपूनास जाँचा, क्या तुम अपून बारिमें यो नै जाणना, कि यीशु मसीह तुमून में छै? नै त तुम निकम्मा निकलछ्या।</verse>
				<verse number="6">लेकिन मेरि आश छै, कि तुम जाण लेला, कि हम निकम्मा नै निकल्या।</verse>
				<verse number="7">हम अपून परमेश्वर थैं प्रार्थना करनू, कि तुम कोई बुराई नै करा; या तक कि अगर तुमून यो विश्वास हुनो कि हम सच्चा प्रेरित नाहातिन, त हम तुमून खिन प्रार्थना करूनमर्यान कि, कोई गलत काम करे बिना, तुम केवल निका काम करा।</verse>
				<verse number="8">किलैकी हम सत्य को बिरोध में के नै कर सकना, पर सत्य खिन कर सकनू।</verse>
				<verse number="9">जब हम कमजोर छा, और तुम विश्वास में मजबूत बना, त हम खुश हुनू, और यो प्रार्थना ले करनू, कि तुम विश्वास में मजबूत हो जा।</verse>
				<verse number="10">येक कारण मैं तुमार सामुनि ऊँन है पैलि तुमून यो बात लिखूनमरयूँ, ताकि मैंस अपूनो अधिकार का इस्तमाल करना की जरूरत नै हो जो कि प्रभु ले मैं तुमून दंड दीन खिन दीईना को छै। किलैकी मैं अपूनो अधिकार को इस्तमाल तुमार विश्वास स मजबूत करून खिन करून चाछूँ नै कि ऊस नष्ट करून चाछूँ।</verse>
				<verse number="11">येक कारण हे म्यारा विश्वासी भाईयो, मैं इन बातुन का दगाड़ चिठ्‌ठी बन्द करछूँ, खुश रौ; सिद्ध बननै जा; एक दुसरा को हौंसला दीनै रौ; एक्कै मन रखा; मेल-मिलाप ले रौ; तब प्रेम और शान्ति को दाता परमेश्वर तुमार दगाड़ होलो।</verse>
				<verse number="12">एक-दुसारा स दगाड़ प्रेम ले गला मिलभेरन नमस्कार करा।</verse>
				<verse number="13">सब परमेश्वरा का लोग तुमून नमस्कार कुंनान।</verse>
				<verse number="14">मैं प्रार्थना करछूँ कि प्रभु यीशु मसीह को अनुग्रह और परमेश्वरो को प्रेम और पवित्र आत्मा की संगति तुम सब का दगाड़ हुनै रौ।</verse>
			</chapter>
		</book>
		<book number="48">
			<chapter number="1">
				<verse number="1">मैं पौलुस, एक प्रेरित छूँ, मैंस प्रेरित हुन खिन कोई आदमीन ले या कोई खास समूह ले नै चुन्यो, बल्‍कि यीशु मसीह और पिता परमेश्वरा का द्वारा चुनिना को छै, जेले ऊस मरिन में भटे ज्यूनो करछ्य।</verse>
				<verse number="2">मैं यो चिठ्ठी गलातिया प्रदेश की पुर विश्वासी मण्डली का उन विश्वासी भाईन का तरफ भटे लिखूनमरयूँ जो म्यारा दगाड़ छन।</verse>
				<verse number="3">मैं प्रार्थना करछूँ कि हमार पिता परमेश्वर और प्रभु यीशु मसीह का तरफ भटे तुमून अनुग्रह और शान्ति मिलनै रौ।</verse>
				<verse number="4">हमार पिता परमेश्वरा का इच्छा का अनुसार मसीह यीशु ले अपूनास हमार पापून का कारण बलिदान कर दीछ, ताकि उ हमून उन बुरी ताकतून भटे आजाद करौ जो आज संसार में काम करनान।</verse>
				<verse number="5">मैं प्रार्थना करछूँ कि लोग हमेशा-हमेशा तक परमेश्वर की महिमा करून। आमीन।</verse>
				<verse number="6">मैंस यो बात ले हैरानी हुछी, कि परमेश्वरेले तुमून मसीहक अनुग्रहा का द्वारा बुलाछ, उ भटे तुम इतुक जल्दी फिरभेरन नय्या शिक्षा स मानून लाग गैछा।</verse>
				<verse number="7">केवल एक्कैई सच्चो सुसमाचार छै, लेकिन थ्वाड़ा लोग मसीह का बारिमें सुसमाचार को नाश करून चानान और उन लोगून ले तुमून ध्वाका दी रैछ।</verse>
				<verse number="8">लेकिन हमून में भटे कोई, या स्वर्ग भटे कोई स्वर्गदूत ले उ सुसमाचार स छोड़भेरन, जो हमूले तुमून सुणा रैछ, दुसोरो सुसमाचारो को प्रचार करछो, त परमेश्वर ऊस सजा द्योलो।</verse>
				<verse number="9">जसो हम पैलि कै चुक ग्या, उसीकैं अब दुबारा कुंछूँ, कि उ सुसमाचार स छोड़भेरन जैस तुम मानून मरैछा, अगर कोई दुसोरो सुसमाचारो को प्रचार करछो, त परमेश्वर ऊस सजा द्योलो।</verse>
				<verse number="10">अब मैं लोगून खुश करना की कोशिश नै करून मरयूँ, लेकिन मैं परमेश्वरे स खुश करून चाछूँ। मैं लोगून खुश करना की कोशिश नै करून मरयूँ, अगर मैं ऐल तक लोगून खुश करना की कोशिश करनै रूनू, त मसीह को सेवक नी हुनू।</verse>
				<verse number="11">हे म्यारा विश्वासी भाईयों, मैं तुमून बता दीछूँ, कि जो सुसमाचार मैंले सुणा रैछ, उ कोई आदिमी का द्वारा दीईना को नाहातिन।</verse>
				<verse number="12">क्याखिनकि मैंस यो अपून पूर्वजून भटे नै मिल्यो और कोई मूसा का नियम-कानून सिखून वाला ले मैंस नै सिखायो, बल्कि खुद यीशु मसीह ले ऊस मैंमें प्रकट करछ्य।</verse>
				<verse number="13">भाईयों, तुम जाणछा कि जब मैं यहूदी नियम-कानून का अनुसार जीवन जी छ्यो, त म्यारा भौत सारा दगड़िया जो म्यारा उमरा का छ्या, उन ले यहूदी नियम-कानून मानछ्या, लेकिन मैंले उन सबून को पछिल छोड़ दीछ, क्याखिनकि मैं अपून पूर्वजून का रीति-रिवाजून पुर दिल ले मानछ्यूँ। उ बखत मैं यीशु का पछिल जानवाला लोगून जो परमेश्वरे की अराधना करछ्या, उनून सतून खिन निकल चुक गैछ्यूँ, मैंले उन सबून खतम करना की कोशिश करछ्य।</verse>
				<verse number="14"></verse>
				<verse number="15">लेकिन तब परमेश्वरेले फैसला करछ्य कि अपून च्याला स मैंमें प्रकट करौ, ताकि मैं गैर-यहूदी लोगून का बीच यीशु मसीहक बारिमें प्रचार कर सकूँ। परमेश्वर छै जैले मैंस जन्मा का पैलि भटे चुन लीछ, और उक अनुग्रह का द्वारा उले अपूनी सेवा करून खिन मैंस बुलाछ। जब परमेश्वरले अपून च्याला स मैंमें प्रगट करछय, तब मैं सलाह लीन खिन केका पास नै गयूँ।</verse>
				<verse number="16"></verse>
				<verse number="17">और जो मैं है पैलि प्रेरित चुनिना का छ्या, उथैं मिलून खिन मैं यरूशलम शैहर नै गयूँ; बल्‍कि मैं तुरन्‍त अरब देश खिन गयूँ और वाँ भटे दुबारा दमिश्क नगर खिन को वापस आ गयूँ।</verse>
				<verse number="18">फिर तीन साला का बाद मैं प्रेरित पतरस (कैफा) थैं मिलून खिन यरूशलम शैहर गयूँ, और उक पास पन्द्रह दिनून तक वाँ रयूँ।</verse>
				<verse number="19">उ बखत मैं जो दुसारा प्रेरित थैं मिल्यूँ, उ याकूब छ्यो, जो प्रभु यीशु को भाई छ्यो।</verse>
				<verse number="20">देखा, जिन बातुन मैं तुमून लिखछूँ, परमेश्वर जाणछो कि जो मैं तुमून लिखूनमरयूँ, उ पुर तरीका ले सच्ची छै।</verse>
				<verse number="21">यरूशलम शैहर में उन प्रेरितून मिलना का बाद मैं सीरिया देश और किलिकिया प्रदेश खिन गयूँ।</verse>
				<verse number="22">लेकिन मसीह में विश्वास करूनवाला जो यहूदिया प्रदेश में रूनान, उन विश्वासीन ले मैंस कभै नै देखीना को छ्यो।</verse>
				<verse number="23">लेकिन उन विश्वासीन ले बार-बार योई सुणछै कि उ जो हमून पैलि सतूछ्यो, अब यीशु मसीह में उई विश्वास को प्रचार करछो, जब की येहै पैलि उन लोगून मसीह में विश्वास करून है रोकना की कोशिश करून मरैयछूँ।</verse>
				<verse number="24">येक कारण परमेश्वर ले म्यारा दगाड़ जो करछ्य उ खिन उनूनले लगातार परमेश्वरे की महिमा करछ्य।</verse>
			</chapter>
			<chapter number="2">
				<verse number="1">चौदा सालून का बाद मैं बरनबास का दगाड़ यरूशलम शैहर खिन गयूँ और तीतुस स ले दगाड़ ली गयूँ।</verse>
				<verse number="2">मैं वाँ गयूँ क्याखिनकि परमेश्वरे ले मैंस वाँ जान खिन क्योछ; और जब मैं वाँ जाईना को छ्यूँ त मैं वाँ अगुवान थैं ऐकला में मिल्यूँ, और उनून उ सुसमाचारा का बारिमें बताछ जो मैं गैर-यहूदीन का बीच में प्रचार कर छयूँ, ताकि इसो नै हो, कि जो मैं करूनो जारी राख छ्यूँ, उको कै परिनाम नी होलो।</verse>
				<verse number="3">म्योरो दगड़िया तीतुस, जो एक यूनानी छै, उको कभै खतना नी होईना को छ्यो। लेकिन यरूशलम शैहरा का विश्वासीन की मण्डली का अगुवान ले ऊस स्वीकार कर लीछ। उनूनले ऊस खतना करून खिन मजबूर नै कर्यो।</verse>
				<verse number="4">तीतुस को खतना नै हुनो को यो मामूलो थ्वाड़ा झूठ्ठा भाईन खिन एक मुद्दा बन ग्यो, जो हमरि मण्डली में चुप-चाप ले आग्या और उ आजादी स खतम करना की कोशिश करून मरैछ्या जो हमार मुक्तिदाता यीशु में हमून मिलछी, ताकि उन हमून दुबारा यहूदी नियम-कानून का गुलाम बना सकूँन।</verse>
				<verse number="5">हम उन लोगून का दगाड़ एक पल खिन ले सहमत नै भ्यान, ताकि तुम उ सच्चा सुसमाचार में विश्वास करनै रौ जो हमूले तुमून सिखा रैछ।</verse>
				<verse number="6">यरूशलम शैहर में विश्वासीन की मण्डली के अगुवान ले मैंस उ संदेश स बदलून खिन मजबूर नै कर्यो, जो मैं सिखूछूँ। येले मैंस कोई फरक नै पड़नो कि उन अगुवा को छन; क्याखिनकि परमेश्वर भ्यारो को रूप देखभेरन न्याय नै करनो।</verse>
				<verse number="7">लेकिन जब उन लोगून ले देखछ्य कि परमेश्वरेले मैंस अधिकार दीछ कि जसिकै खतना करिना का यहूदी लोगून खिन सुसमाचार प्रचार करनाको काम पतरस स दी ग्यो, उसीकैं बिन खतना करिना गैर-यहूदी खिन सुसमाचारो को प्रचार करनाको काम मैंस दी ग्योछ।</verse>
				<verse number="8">क्याखिनकि जो परमेश्वर ले पतरस स खतना करिना का यहूदीन को प्रेरित बनाभेरन उक द्वारा सेवा काम करवायान, उसीकैं उलेई मैंस ले गैर-यहूदीन को प्रेरित बनाभेरन म्यारा द्वारा सेवा काम करवायान।</verse>
				<verse number="9">जो आदिमी विश्वासीन की मण्डली का खम्बा समझी जाछ्या, याकूब, कैफा और यहूना, उनूनले अनुग्रह को उ बरदान पछ्याण छै जो मैंस मिलीना को छै। उनूनले मैंस और बरनबास स अपूनो सहयोगी समझभेरन हमून अपून दगाड़ संगति करना को मौका दीछ। उन यो बात खिन सहमत भ्यान कि हम गैर-यहूदीन का पास जाँ और उन खतना करिना का यहूदीन का पास जाला।</verse>
				<verse number="10">उनूनले हमून थैं सिर्फ योई बिनती करछ्य, कि हम यरूशलम शैहर में गरीब विश्वासीन की मद्दत करा, और यो उई काम छ्यो जैस मैं करून चाछ्यूँ।</verse>
				<verse number="11">एक दिन जब अन्ताकिया शैहर में पतरस (कैफा) आछ, त मैंस दुसारा विश्वासीन का सामुनि ऊस फटकार लगून पड़छ्य, क्याखिनकि उ सही काम नी करू मरैछ्यो।</verse>
				<verse number="12">उ पैलि गैर-यहूदीन का दगाड़ खानो खाछ्यो; पर जब याकूब का याँ भटे थ्वाड़ा लोग आयान, त उ खतना की प्रथा मानून वाला यहूदी भाई-बैनिन का डरले गैर-यहूदीन भटे किनारा करून खिन और उन भटे अलग रून लाग्यान।</verse>
				<verse number="13">और उक दगाड़ अन्ताकिया शैहर में थ्वाड़ा यहूदी विश्वासी लोगून ले कपट करछ्य, याँ तक कि बरनबासले उनून देखभेरन डरछ्यो और गैर-यहूदी लोगून का दगाड़ मेल-जोल राखून बंद कर दीछ।</verse>
				<verse number="14">लेकिन जब मैंले देखछ्य, कि उन उ सच्चाई को पालन नै करूनमर्या जो सुसमाचार बतूछो, त मैंले सबून सामुनि पतरस (कैफा) थैं क्योछ, “जब तैं एक यहूदी हो भेरन ले, गैर-यहूदी लोगून का रीति-रिवाजून को पालन करछै और यहूदीन का रीति-रिवाजून को पालन नै करनै। अगर तैं जो कि एक यहूदी छै, इसो करछ्य, त फिर तैं गैर-यहूदी लोगून हम यहूदीन का रीति-रिवाजून को पालन करून खिन दबाब किलैं डालछै?”</verse>
				<verse number="15">हम जो जन्म भटे यहूदी छा और गैर-यहूदीन नाहातिन जिनून यहूदी का पापी कुंनान।</verse>
				<verse number="16">फिरले हम यहूदी विश्वासी जाणनू कि मूसा का नियम-कानून को पालन करभेरन कोई ले आदिमी परमेश्वरा का नजरून में धर्मी नै ठैहरनो, लेकिन पर केवल यीशु मसीह में विश्वास करना का द्वारा धर्मी ठैहरछो, येक कारण हमूले खुद ले यीशु मसीह में विश्वास करछ्य कि हम मूसा का नियम-कानून का पालन करना ले नै, बल्कि यीशु मसीह में विश्वास करना ले धर्मी ठैहरिया; क्याखिनकि मूसा का नियम-कानून को पालन करना ले कोई ले आदिमी धर्मी नै ठैहरोलो।</verse>
				<verse number="17">थ्वाड़ा यहूदी लोग सोचनान कि हमूले पाप करछ्य, क्याखिनकि हम मूसा का नियम-कानून का पालन करना का बजाय, धर्मी ठैहरून खिन मसीह में विश्वास करनू। येको यो मतलब नाहातिन कि मसीह हमून पापी बनूछो। नै! बिल्कुल नै।</verse>
				<verse number="18">जो कुछ मैंले छोड़ हैछ अगर मैं उ बात स फिर स्वीकार करछूँ कि एक आदिमी मूसा का नियम-कानून स बनाई राखनाक द्वारा परमेश्वरा का दगाड़ सही ठैहराई जा सकछो।</verse>
				<verse number="19">मैं समझछूँ कि मूसा का नियम-कानून का पालन करूना का द्वारा मैंस धर्मी ठैहराई नै जा सकनू। येक कारण मैं इसो मानछूँ कि मैं मूसा का नियम-कानून का बारिमें मर गयूँ ताकि मैं परमेश्वर खिन ज्यूनो रै सकूँ।</verse>
				<verse number="20">यो इसी छ्यो जसो जब मसीह सूली पर मर ग्यो, मैंले उक दगाड़ सूली में मर गयूँ। अब मैं ज्यून नाहातिनू बल्कि मसीह मैंमें में ज्यूनो छै; और जसीकैं मैं अब जीन मरयूँ त केवल ऊस विश्वास का द्वारा जो परमेश्वरा का च्याला में छै, जेले मैंस प्रेम करछ्य और म्यारा पापून खिन अपूनास बलिदान कर दीछ।</verse>
				<verse number="21">मैं यो बात का इन्कार नै कर सकनू कि परमेश्वर अपून अनुग्रह का कारण हमून बचूछो। क्याखिनकि अगर मूसा का नियम-कानून का पालन करून का द्वारा आदिमी धर्मी ठैहरनो, त फिर मसीह को मरना की कोई जरूरत नी छी।</verse>
			</chapter>
			<chapter number="3">
				<verse number="1">हे गलातिया शैहरा का विश्वासी लोगों, क्या तुम ना समझछाई, केले तुमून भरमा दीछ? मैंले तुमून बड़िया तरीका ले समझाछ कि जब यीशु मसीह स सूली में चढ़ाई ग्यो, त उले की पुरो करछ्य।</verse>
				<verse number="2">मैं तुमूनथैं केवल यो जाणून चाछूँ, कि तुमून पवित्र आत्मा कसीकैं मिलछै? क्या मूसा का नियम-कानून स मानना का द्वारा तुमून पवित्र आत्मा मिलछी? नै, तुमून पवित्र आत्मा येक कारण नै मिल रियो क्याखिनकि तुमूले यीशु मसीह का बारिमें सुसमाचार स सुणछ और उमें विश्वास करछ्य।</verse>
				<verse number="3">क्या तुम इतुक ना समझछा, कि तुमूले पवित्र आत्मा का काम का द्वारा अपून मसीह जीवन की शुरूवाद करछ्य, क्या तुम अब येस अपून संसारिक कामून का द्वारा खतम करून चाछाई?</verse>
				<verse number="4">विश्वासी बनना का बाद तुमूले भौत दुख उठाछ। मैं सच्ची में यो उमीद करछूँ कि यो दुख बेकार में नी छ्यो।</verse>
				<verse number="5">परमेश्वर जो तुमून पवित्र आत्मा बहुताईले दीछो, और तुमून में चमत्कारा काम करछो, क्या उ यो कारण छनी कि तुमूले मूसा का नियम-कानून को पालन करछ्य? यो येक कारण छी कि तुमूले मसीह का बारिमें सुसमाचारै स सुणछ्य और उमें विश्वास करछ्य?</verse>
				<verse number="6">“अब्राहम का बारिमें सोचा, जैले परमेश्वर में विश्वास करछ्य, और उक विश्वास का कारण परमेश्वर ले ऊस एक धर्मी आदिमी का रूप में अपनाछ।”</verse>
				<verse number="7">येक कारण, तुमून यो जाणून जरूरी छै कि जो लोग अब्राहम का नियाती परमेश्वर में विश्वास करनान, उनी अब्राहम का सच्चा वंशज छन।</verse>
				<verse number="8">पवित्रशास्त्र में भौत बखत पैलि यो लिखी कि ग्योछ, परमेश्वर गैर-यहूदी लोगून विश्वास का द्वारा धर्मी ठैहरालो, योई कारण छै कि पवित्रशास्त्र में, जब परमेश्वरे ले पैलि अब्राहम स सुसमाचार बताछ त उले उथैं क्योछ, कि “त्यारा द्वारा, मैं यो संसारा का सब लोगून आशीष द्यूलो।”</verse>
				<verse number="9">परमेश्वर ले अब्राहम स उक विश्वास का कारण आशीष दीछ, उसीकैं जो कोई ले यीशु मसीह में विश्वास करछो उ पक्का अब्राहम का दगाड़ परमेश्वर भटे आशीष पालो।</verse>
				<verse number="10">येक कारण जतुक लोग मूसा का नियम-कानून का कामून में भरोसा राखनान, उन परमेश्वरा का श्राप का अधीन छन, क्याखिनकि पवित्रशास्त्र में लिखीना को छै, “जो मूसा का नियम-कानून की किताब में लिखीना की छै सब बातुन को पालन नै करनो, उ परमेश्वरा श्राप का अधीन छन।”</verse>
				<verse number="11">लेकिन यो बात सच्ची छै, कि मूसा का नियम-कानून का द्वारा परमेश्वरा का सामुनि कोई धर्मी नै ठैहरनो; क्याखिनकि पवित्रशास्त्र में लिखीना को छै, कि उ जो धर्मी छै, उ विश्वास का द्वारा ज्यूनो रौलो।</verse>
				<verse number="12">लेकिन मूसा का नियम-कानून को पालन करभेरन जीया और परमेश्वर में भरोस करभेरन ज्यून एक समान नाहातिन। जसिकै कि पवित्रशास्त्र में लिख रैछ, “जो इन सब बातुन को पालन करोलो, ऊस इनारा द्वारा जीन्दगी मिलेलि।”</verse>
				<verse number="13">मसीह जो सूली में मरना का कारण हमून खिन श्रापित बनछ्य, और उले हमून मोल लीभेरन मूसा का नियम-कानून का श्राप भटे बचाछ, क्याखिनकि पवित्रशास्त्र में लिखीना को छै, “जो कोई सूली पर चढ़ाई भेरन मारी जाछो उ श्रापित छै।”</verse>
				<verse number="14">मसीह ले इसो येक कारण करछय, कि अब्राहम की आशीष जैस दीना को वादा परमेश्वरे ले करिना को छ्यो, यीशु मसीह में गैर-यहूदी लोगून तक पुजौ, और हम यीशु मसीह में विश्वास करना का द्वारा उ पवित्र आत्मा स पाभेरन, ऊस हमून दीना को वादा परमेश्वरले करिना को छै।</verse>
				<verse number="15">हे म्यारा विश्वासी भाईयों, मैं तुम लोगून साधारण जीवन को उदारण दीभेरन कुंछूँ। जब द्वी लोग आपस में समझौता करनान, नै त कोई ऊस टाल सकछो और नै त उमें कै जोड़ सकछो।</verse>
				<verse number="16">उसीकैं परमेश्वरे ले अपून वादा अब्राहम स और उक वंश स दीछ। पवित्रशास्त्र यो नै कुंनो कि, “त्यारा वंश को,” जैस भौत का बारिमें क्योछ, लेकिन यो एक आदिमी का के बारिमें बात करछो कि, “त्यारा वंश को,” और उ आदिमी मसीह छै।</verse>
				<verse number="17">लेकिन मैं जो तुमून समझून चाछूँ उ यो छै, कि जो वादा परमेश्वर ले अब्राहमा का दगाड़ पैलि भटे पक्को करिना को छ्यो, ऊस मूसा का नियम-कानून का चार सौ तीस साल बाद ले आभेरन रद्द नै कर सकूँना कि उको वादा बेकार छै।</verse>
				<verse number="18">परमेश्वर ले हमून आशीष येक कारण नै दी रै कि हमूले मूसा का नियम-कानून को पालन करिना को छ्यो, लेकिन उ येक कारण दीछो, क्याखिनकि उले दीना को वादा करिना को छ्यो, उसीकैं, परमेश्वर ले यैस अब्राहम स दीछ क्याखिनकि उले उथैं येको वादा करिनाको छ्यो।</verse>
				<verse number="19">त फिर परमेश्वर ले को मक्शद ले इस्राएल लोगून मूसा का नियम-कानून दीयान? परमेश्वर ले नियम-कानून येक कारण दीयान, ताकि लोग जाण सकूँन कि पाप की छै? मूसा का नियम-कानून अब्राहम का उ वंश तक बनिना को रून चैछ्यो, जैका बारिमें परमेश्वर ले वादा करछ्य। परमेश्वर ले नियम-कानून मूसास स्वर्गदूतून का द्वारा दीयान, जो परमेश्वर और लोगून का बीच मध्यस्थ छयो।</verse>
				<verse number="20">जब द्वी लोगून का बीच समझौता हुछो, तब मध्यस्थ की जरूत हुछी। लेकिन परमेश्वर एक्कै छै, और जब उले अब्राहम थैं वादा करछ्य त उनार बीच कोई मध्यस्थ नी छ्यो।</verse>
				<verse number="21">त क्या येक मतलब यो छै कि मूसा का नियम-कानून परमेश्वरा का वादान का खिलाफ छनी? नै! बिल्कुल नै। क्याखिनकि अगर मूसा का नियम-कानून हमून अनन्त जीवन दी सकनान, त हम येको पालन करभेरन परमेश्वरा का दगाड़ सही ठैहराई जा सकछ्या।</verse>
				<verse number="22">लेकिन पवित्रशास्त्र हमून यो देखूछो, कि हम सब पापी छा, ताकि परमेश्वर ले जो वादा करिना को छै, उ उन लोगून दी सकों जो यीशु मसीह में विश्वास करनान।</verse>
				<verse number="23">लेकिन मसीह का उना और उमें विश्वास करूना है पैलि हम यहूदी लोग जेल में बन्द छ्या, और मूसा का नियम-कानून हमरि रखवाली करछ्या, और मूसा का नियम-कानून ले हमून कैदीन की नियाती राखिना को छ्यो जब तक परमेश्वर ले हमून में मसीह स प्रकट नै कर्यो।</verse>
				<verse number="24">येक कारण मूसा का नियम-कानून मसीह का ऊँन तक हमून बाटो दिखून खिन और हमरि रखवाली करून खिन दी ग्यान, ताकि हम यीशु मसीह में विश्वास करूना का द्वारा परमेश्वरा का सामुनि धर्मी बन सकनूँ।</verse>
				<verse number="25">लेकिन अब जब हमूले मसीह में विश्वास करनू, त हमरि मद्दत करून खिन और हमून बाटो दिखून खिन मूसा का नियम-कानून की जरूत नाहातिन।</verse>
				<verse number="26">जब तुमून मसीह का नाम ले बपतिस्मा दीई ग्योछ, त तुमूले मसीह का नय्या जीवन स पैन हालछ्य जसीकैं एक आदिमी नय्या कपड़ान पैन लीछो। येक कारण, तुम सब परमेश्वर की संतान बन गैछा जब तुमूनले यीशु मसीह में विश्वास करछ्य।</verse>
				<verse number="27"></verse>
				<verse number="28">मसीह में, अब नै तो कोई यहूदी छै और नै गैर-यहूदी, नै त कोई दास छै और नै स्‍वतन्‍त्र, नै तो कोई आदिमी छै और नै स्‍यैनि छै, क्याखिनकि तुम सब यीशु मसीह में एक छा।</verse>
				<verse number="29">क्याखिनकि अगर तुम मसीह में एक छा, त अब तुम अब्राहम का परिवार का हिस्सा छा, और तुमून उ सब कुछ मिलोलो, जैको परमेश्वर ले अब्राहम थैं वादा करिना को छ्यो।</verse>
			</chapter>
			<chapter number="4">
				<verse number="1">मैं उदारण दीभेरन यो समझूछूँ, कि च्योलो अपून बबा की जैजाद को मालिक हुछो, लेकिन जब तक उ नानो बच्चाई छै, तब तक उमें और एक दास के फरक नै हुनो। उको ऐल तक येमें अधिकार नाहातिन हालाँकि उ, उ सब चीजून को मालिक बनोलो जो उक बबा को छै।</verse>
				<verse number="2">जब तक बबा का द्वारा तय करिना को बखत नै ऊँनो, तब तक उ च्योलो ईजा-बबा और देखभाल करूनवाला का अधिकार का अधीन रूछो।</verse>
				<verse number="3">उसीकैं, जब मसीह का द्वारा हमून छुड़ून है पैलि हम नानतिनान का नियाती छ्या, तब हम यो संसार का कुछ रीति-रिवाजून को पालन गुलामून की नियाती करछ्या।</verse>
				<verse number="4">लेकिन जब सही बखत आछ जैकी योजना परमेश्वर ले बनाईना छी, त परमेश्वर ले खुद अपून च्याला का यो संसार में भेजछ्य, और उले आदिमी रूप में जन्म लीछ। उ एक यहूदी परिवार में पैद भ्योछ और मूसा का नियम-कानून का पालन करछ्यो।</verse>
				<verse number="5">ताकि उ हमून आजाद कर सकौ, जो मूसा का नियम-कानून का अधीन जीवन जीनै रूछ्या, और उले हमून अपून नान्तिनान का रूप में गोद ली लीछ।</verse>
				<verse number="6">क्याखिनकि हम उक बच्चा छा येक कारण परमेश्वर ले अपून च्याला का आत्मा स हमार दिलून में भेजभेरन, जो परमेश्वर स “हे अब्बा! हे बबा!” कैभेरन ध्द्यूनू।</verse>
				<verse number="7">येक कारण अब तुम गुलाम नाहातिन, लेकिन परमेश्वर के नान्तिना छा। और अगर तुम परमेश्वरा का नान्तिना छा, त तुमून उ सब कुछ मिलोलो जो परमेश्वर ले अपून नान्तिनान दीना को वादा करिना को छै।</verse>
				<verse number="8">जब तुम परमेश्वरे स नी जाण छ्या, उ बखत तुम उन चीजून का गुलाम छ्या, जो परमेश्वर नाहातिन।</verse>
				<verse number="9">लेकिन अब त तुमोरो रिश्ता परमेश्वरा का दगाड़ बन ग्योछ, मैंस यो कुंन चैछो कि परमेश्वर ले यो रिश्ता की शुरूवाद तुमार दगाड़ कर हालछ्य, त तुम उन कमजोर और बेकार शिक्षान का गुलाम बनून खिन क्याखिन वापस जान मरैछा? क्या तुम दुबारा फिर उनार गुलाम बनून चाछा?</verse>
				<verse number="10">मैं यो सुणून मरयूँ कि, तुम जो गैर-यहूदी विश्वासी छा, यहूदी लोगून का खास दिनून में, मैंनान का, मौसमून का और सालून का त्यारून यो सोचभेरन मनूछा कि परमेश्वर इनूनले खुश हुछो।</verse>
				<verse number="11">जो कुछ तुम करून मरेछा उक कारण मैंस डर छै, काँई इसो नै हो कि जो-जो मेहनत मैंले तुमून खिन करिना की छै उ बेकार नै होज्यौ।</verse>
				<verse number="12">हे म्यारा विश्वासी भाईयों, मैं तुमूनथैं बिनती करछूँ, कि अपूनास नियम-कानून भटे आजाद करा, जसीकैं मैंले करछ्य। क्याखिनकि मैं नियम-कानून भटे उसीकैं आजाद हो गयूँ जसीकैं तुम गैर-यहूदी आजाद भैछा, तुमूनले निकी देखभाल करछय।</verse>
				<verse number="13">लेकिन तुमून याद होलो, यो एक बिमारी का कारण छ्यो कि मैं पैलि बार तुमार पास सुसमाचारो को प्रचार करून खिन आयू।</verse>
				<verse number="14">क्याखिनकि मैं बिमार छ्यूँ, और मेरि बिमारी को कारण तुम भौत परेशानी में छ्या। लेकिन फिरले तुमूले मैंखिन नफरत नै करि और नै मैंस दूर करछ्य। लेकिन तुमूले म्योरो आदर और निकी देखभाल करछ्य, यो इसो छ्यो जसीकैं कि तुम परमेश्वरा का स्वर्गदूत को या यीशु मसीह का आदर करछा।</verse>
				<verse number="15">तो तुमेरि उ खुशी अब काँ गै? मैं सच्ची में यो कै सकछूँ कि तुम मैंखिन कैले कर सकछ्या; अगर हो सकनो त तुम अपून आँखान ले निकालभेरन मैं दी दीना।</verse>
				<verse number="16">त क्या तुम थैं सच बोलना का कारण मैं तुमोरो दुशमन हो गयूँ?</verse>
				<verse number="17">उन लोग जो यहूदी नियम-कानून में जोर दीनान, उन तुमून अपून दल में शामिल करून खिन पुरी कोशिश करनै रूनान, लेकिन भल मक्शद खिन नै; उनोरो मक्शद त तुमून मैं भटे अलग करना को छै ताकि तुम उनार शिष्य बन जा।</verse>
				<verse number="18">हमेशा निका मक्शद खिन जल्दी बाजी करून ठीक नै हुनो, केवल उ बखत तक नै जब तक मैं तुमार दगाड़ रूछूँ।</verse>
				<verse number="19">हे म्यारा विश्वासी भाईयो, जसा तरीका एक स्यैनि नानतिना स जन्म दीन बखत तखलीफ महसूस करछी, उसीकैं मैं एक बार फिर तुमून खिन तखलीफ महसूस करून मरयूँ। मैं यो तखलीफ तब तक रूलो जब तक तुम मसीह का विश्वास में मजबूत नै हो जाना।</verse>
				<verse number="20">मैं चाछूँ, कि अब तुमार दगाड़ रू, ताकि मैं तुमूनथैं नम्र तरीका ले बात कर सकूँ। क्‍याखिनकि मेरि समझ में नै ऊँनो कि मैं तुमूनथैं कि कुँ।</verse>
				<verse number="21">और तुम, जो मूसा का नियम-कानून का अधीन हुना चाछा, मेरि बात सुणा। मैं तुमून बतुलो कि मूसा का नियम-कानून की किताब में कि लिखीना को छै।</verse>
				<verse number="22">पवित्रशास्त्र में यो लिखीना को छै कि, अब्राहम का द्वी च्याला छ्या। उको एक बच्चा को जन्म हाजिरा भटे भ्योछ, जो एक दासी छी। और दुसारा बच्चा को जन्म सारा भटे भ्योछ, जो उकी घरवाली छी।</verse>
				<verse number="23">दासी को च्योलो, आदिमी का इच्छा का अनुसार एक साधारण बच्चा का नियाती पैद भ्योछ। लेकिन उ बच्चा जो उकी घरवाली भटे पैद भ्योछ, उ अब्राहम का दगाड़ परमेश्वरो को वादा का अनुसार भ्योछ।</verse>
				<verse number="24">इन द्वीवै स्यैनि की तुलना द्वी वादान भटे करि जा सकछी। उ वादा जो परमेश्वर ले इस्राएल का लोगून का दगाड़ सीनै पहाड़ में करिना को छ्यो, उ दासी हाजिरा की नियाती छी। उ उन बच्चान जन्म दीछी जो गुलाम बननान।</verse>
				<verse number="25">हाजिरा सीनै पहाड़ स देखूछी जो अरब देश में छै। उ आज क यरूशलम शैहरा का नियाती छै जो अपूना बच्चान सहित गुलाम छन।</verse>
				<verse number="26">लेकिन सारा की तुलना उ यरूशलम शैहर भटे करि जा सकछी जो स्वर्ग में छै। साराई छै जो अब हमून खिन एक ईजा की नियाती छै क्याखिनकि उ एक दासी नी छी, और हम मूसा का नियम-कानून को पालन करून भटे आजाद छा।</verse>
				<verse number="27">क्याखिनकि पवित्रशास्त्र में लिखीना को छै, “हे स्यैनियों तुम जिनारा कभै नान्तिना भ्याई नै और जिनुले नान्तिना जन्म दीना की पीड़ स कभै महसूस नै कर्यो, खुश हो, और जोर-जोरले जय-जैकार करा, क्याखिनकि त्यागीना की स्यैनि की सन्तान सुहागन स्यैनि की सन्तान भटे ले ज्यादा छन।”</verse>
				<verse number="28">हे म्यारा विश्वासी भाईयों, हम इसहाक का नियाती छा, क्याखिनकि हम परमेश्वरा का वादा का अनुसार पैद भ्या, और परमेश्वरा का सन्तान बन ग्यान।</verse>
				<verse number="29">लेकिन अब तुमून उन लोगून का द्वारा सताई जान मरछा जो चानान कि तुम मूसा का नियम-कानून को पालन करा, उसीकैं जसीकैं इश्माएल उ नान्तिनो जो आदिमी का योजना का अनुसार पैद भ्योछ उले इसहाक स सताछ।</verse>
				<verse number="30">लेकिन येक बारिमें पवित्रशास्त्र कि कुंछो? “दासी और उको च्याला स दूर भेज दी, क्याखिनकि दासी को च्योलो बबा की जायजात को हक्कदार नै हुन चैनो, बबा का जायजात को हक्कदार उई च्याला स हुन चैछो, जो उई घरवाली भटे पैद भ्योछ।”</verse>
				<verse number="31">येक कारण हे म्यारा विश्वासी भाईयों, हम दासी स्यैनि का नन्तिना नाहातिन, जिनून मूसा का नियम-कानून को पालन करना की जरूरत छै। लेकिन हम उ स्यैनि का नन्तिना छा, जो बबा की घरवाली छै और अपून विश्वास का कारण परमेश्वर स ग्रहणयोग्य छन।</verse>
			</chapter>
			<chapter number="5">
				<verse number="1">मसीह ले हमून आजाद करिना को छै ताकि हमून मूसा का नियम-कानून को पालन करून खिन गुलामून की नियाती जीना की जरूरत नाहातिन। येक कारण अपूनी आजादी में बनिना की रौ, और मूसा का नियम-कानून को पालन करून खिन अपूनास दुबारा गुलाम जन बनून दी।</verse>
				<verse number="2">मैं पौलुस तुमूनथैं कुंनमर्यू, ऊस ध्यान ले सुणा, कि परमेश्वरे की नजरून में धर्मी बनून खिन खतना कराला, त मसीह ले जो करिना को छै, उले तुमून कैले फैदा नी होलो।</verse>
				<verse number="3">मैं फिर तुमून चेतावनी दीछूँ कि जो लोगो यो उम्मीद ले खतना करूछो कि परमेश्वरा नजरून में धर्मी बन सकौ, ऊस उ सब कुछ करून चैछो जो मूसा का नियम-कानून कुंनान।</verse>
				<verse number="4">तुम जो मूसा का नियम-कानून को पालन करभेरन धर्मी बनून चाछा, त तुम अपूनास मसीह भटे अलग करून मरेछा, उले अपूनास उ अनुग्रह भटे अलग कर ली हैछ जैले परमेश्वर ऊस बचा सकछो।</verse>
				<verse number="5">मैं इसो कै सकछूँ क्याखिनकि हमून पवित्र आत्मा का तरफ भटे पुरो भरोसा छै कि परमेश्वरे ले हमून धर्मीका रूप में स्वीकार करोलो क्याखिनकि हम यीशु मसीह में विश्वास करनू।</verse>
				<verse number="6">अगर तुम मसीह यीशु का शिष्य छा त यो बात ले कोई फरक नै पड़नो कि तुमोरो खतना होईना को छी या नाहातिन। लेकिन जरूरी बात यो छै, कि हम मसीह में विश्वास करनू, और हम परमेश्वर और दुसारा लोगून का प्रति प्रेम राखनू।</verse>
				<verse number="7">तुम मसीह दगाड़ अपून रिशता में इतुक बड़िया तरीका ले बढून मरैछया। अब तुमून मसीह की सच्चाई स मानून है अपूनास कैसे नै रोकून दीन चैंछो।</verse>
				<verse number="8">यो शिक्षा परमेश्वरा का तरफ भटे नै ऊँनी, जैले तुमून अपूनी सन्तान हुन खिन बुला रैछ।</verse>
				<verse number="9">एक कहावत छै जो इसीकैं छै, थ्वाड़ा खमीर पुर ओलीना को धुलास खमीर बना दीछो।</verse>
				<verse number="10">मैं परमेश्वर में विश्वास करछूँ कि तुम दुसारा लोगून की झूठ्ठी शिक्षान को पालन नी करला, लेकिन मेरि शिक्षान को पालन करला। क्याखिनकि जो तुमून खिन परेशानी ठाड़ करछो उ कोई ले क्याखिन नै हो, परमेश्वरा का द्वारा सजा पालो।</verse>
				<verse number="11">लेकिन हे म्यारा विश्वासी भाईयों, मैं प्रचार करछूँ कि खतना करून जरूरी नाहातिन, और येक कारण मैंस यहूदी लोग बार-बार सतूनान। अगर मैं मसीह का मौत का बारिमें प्रचार करना का बजाय यो प्रचार करनू कि लोगून को खतना हुनो जरूरी छै, तो मैं यहूदीन खिन अपमान को कारण नी हुनू।</verse>
				<verse number="12">भल हुनो, कि जो तुमून झूठ्ठी शिक्षा दीनान, उन अपूनास नपुंसक बना दिना।</verse>
				<verse number="13">हे म्यारा विश्वासी भाईयों, तुमून परमेश्वर ले आजाद हुन खिन बुलाईना को छ्यो, अब तुमून मूसा नियम-कानून को पालन करना की जरूरत नहातिन। अपूनी यो आजादी स अपूनी शारीरिक इच्छान पुरो करून खिन मौका जन बना, बल्कि, एक-दुसरा स प्रेम करा और एक-दुसरा की सेवा करा।</verse>
				<verse number="14">क्याखिनकि पुर मूसा का नियम-कानून यो हुकुम में पुर हो जानान कि, “तैं अपून पड़ोसीस अपून जसो प्रेम राखा।”</verse>
				<verse number="15">लेकिन अगर तुम जानवरून की नियाती एक-दुसरा स काटछा और फाड़छा, त तुमून सतर्क रून चैछो कि काँई तुम एक-दुसरा स नाश नै करा।</verse>
				<verse number="16">लेकिन मैं तुमूनथैं कुंछूँ कि तुम पवित्र आत्मा का अनुसार जीवन जीना की कोशिश करला, त तुम अपून पापी स्वभाव का इच्छान को पालन कसा ले तरीका ले नी करला।</verse>
				<verse number="17">क्याखिनकि हमार पापी स्वभाव की इच्छान पवित्र आत्मा का बिरोध में छन, और पवित्र आत्मा हमार पापी स्वभाव की इच्छान बिरोध में छन, क्याखिनकि इन द्वीवै एक-दुसरा का बैरी छन। येक कारण तुम हमेशा निका कामून नै कर सकना जो तुम करून चाछा।</verse>
				<verse number="18">अगर तुम पवित्र आत्मा का अनुसार जीवन जीछा त तुम मूसा का नियम-कानून का अधीन नी होला।</verse>
				<verse number="19">पापी स्वभाव कि-कि करछा, ऊस हरेक देख सकछो, ब्यभिचार, गंदा काम, लुचपन,</verse>
				<verse number="20">मूर्ति पूजा, टोना, बैर, झगाड़ा, घमण्ड, क्रोध, मतभेद, मनमुटाव, दलबन्दी,</verse>
				<verse number="21">कपट, नशा में मतवाला हुन, रंगरलियाँ मनून, और येका जसा और ले काम छै, जिनारा बारिमें में तुमून चेतावनी दी मरयूँ, जसो पैलि कैले चुक गयूँ कि इन कामून का करूनवाला परमेश्वरा का राज्य का वारिस नी होला।</verse>
				<verse number="22">उ गुण जो परमेश्वरा का आत्मा का द्वारा उत्पन्न हुनान, उन यो छन, प्रेम, आनन्द, शान्ति, धीरज, और दया, भलाई, और भरोसामंद, नम्रता और अपून आप में काबू राखून।</verse>
				<verse number="23">इसा तरीका का निका स्वभाव का गुणून में पाबन्दी लगून खिन नियम-कानून नाहातिन।</verse>
				<verse number="24">जो लोग यीशु मसीह का दगाड़ रिशता राखनान त उन अपून पापी स्वभाव का अनुसार जीवन नै जीना। यो इसो छै जसीकैं उनूनले अपून पापी स्वभाव स माना सूली में चढ़ा दी हो।</verse>
				<verse number="25">हमून नय्या जीवन पवित्र आत्मा का तरफ भटे मिलछो, और येक कारण हमून पवित्र आत्मा का अनुसार अपूनो जीवन जीनो चैंछो।</verse>
				<verse number="26">हमून घमण्ड नै करून चैछो, और नै हमून एक-दुसरा में गुस्सा हुन चैछो।</verse>
			</chapter>
			<chapter number="6">
				<verse number="1">हे म्यारा विश्वासी भाईयों, अगर कोई विश्वासी कसा ले पाप का बश में आ जाछो, त तुमून में भटे उन जिन मार्गदर्शन पवित्र आत्मा करछो, नम्रता का दगाड़ ऊस सच्चाई का बाटा में वापस ल्यूनखिन उकी मद्दत करा, और सतर्क रौ, ताकि तुम खुद ले ऊसी परीक्षा में जन पड़ा।</verse>
				<verse number="2">जब हमून में भटे कोई मुसीबत में हो, त हमून एक-दुसरा की मद्दत करून चैंछी, और इसीकैं हम मसीह का नियम-कानून को पालन करनू।</verse>
				<verse number="3">अगर तुमून लागछो कि कैकी मद्दत करून खिन तुम भौत खास छा त तुम सिर्फ अपूनास ध्वाका दीन मरैछा। तुम इतुक ले खास नाहातिन।</verse>
				<verse number="4">लेकिन हरेक आदिमी अपून कामून की खुद जाँच कर ले उ निका छनी या नाहातिन। अगर उले निको काम करिना को छै, त उ अपून काम में घमण्ड कर सकछो लेकिन ऊस अपून कामून की तुलना दुसारा लोगून काम भटे नै करूनी चैंनी।</verse>
				<verse number="5">हमून में भटे हरेक स अपून कामून की खुद जिमेदारी लीन चैंछी।</verse>
				<verse number="6">जिन लोगून परमेश्वरा का वचने की शिक्षा दी जांछी, त उनोरो फर्ज बनछो, कि जो केले उनार पास छै, उनूनले लोगून का दगाड़ बाणून चैंछो जो उनून सिखीना को छै।</verse>
				<verse number="7">अगर हम इसो कुंनू कि हम परमेश्वरे स ध्वाका दी सकनू, त हम अपूनास ध्वाका दीन मर्या। क्याखिनकि आदिमी जो कुछ बूछो, उई काटोलो।</verse>
				<verse number="8">अगर कोई आदिमी अपून पापी स्वभाव की इच्छान का अनुसार जीवन जीनान त उ हमेशा की मौत की सजा मिलेलि। अगर कोई पवित्र आत्मा का इच्छा का अनुसार अपूनो जीवन जीछो त ऊस अनन्त जीवन दी जालो।</verse>
				<verse number="9">हमून भल काम करनू बखत निराश नै हुन चैनो, क्याखिनकि अगर हम मजबूत बनिना का रूला, त परमेश्वरा का बखता का अनुसार ईनाम पाला।</verse>
				<verse number="10">येक कारण जाँ तक मौक मिलछो त हमून सब लोगून का दगाड़ भलाई करून चैंछी; खास करभेरन विश्वासी भाई-बैनिन का दगाड़, जो मसीह में छन।</verse>
				<verse number="11">मैंले तुमून खुद अपून हात ले कतुक ठूला-ठूला शब्दून में लिख रैछ।</verse>
				<verse number="12">येक कारण कि यहूदी तुमून स्वीकार करून, उन तुमूनथैं खतना करून खिन कौला। उन केवल इसो करनान ताकि लोग उनून यो प्रचार करना का कारण सतून नै कि परमेश्वर लोगून केवल सूली में मसीह का मौत का द्वाराई बचूछो।</verse>
				<verse number="13">याँ तक कि खतना करिना का यहूदी विश्वासी मूसा का सबै नियम-कानून को पालन नै करना, लेकिन उन चानान कि तुम खतना करवा ताकि उन दुसारा यहूदीन में घमण्ड कर सकून, जिनारा कारण ले तुमोरो खतना भ्योछ।</verse>
				<verse number="14">मैं खिन, मैं सूली में हमार प्रभु यीशु मसीह की मौत का अलावा कै और चीज को घमण्ड नै करून चानू। उले जो कुछ ले करछय, उई कारण ले संसारा का चीजून को मैंमें कोई अधिकार नाहातिन, और मैंस अब संसारिक चीजून करना की कोई इच्छा नाहातिन।</verse>
				<verse number="15">क्याखिनकि नै खतना वाला, और नै बिना खतना वाला के मायना नै राखना, लेकिन इन सब बातुन को मतलब यो छै कि परमेश्वर ले पवित्र आत्मा का काम का द्वारा तुमून एक नय्या आदिमी बनाछ।</verse>
				<verse number="16">परमेश्वर उन सबून अपूनी शान्ति द्योलो और उमें दया करोलो जो यो नियम-कानून का पालन करनान और उनून आशीष द्योलो, क्याखिनकि उन परमेश्वरा का लोग छन।</verse>
				<verse number="17">अघिलकैं कोई मैंस दुख जन दी, क्याखिनकि म्यारा शरीर में जो दाग छन उन देखूनान कि मैं यीशु को एक प्रेरित छूँ।</verse>
				<verse number="18">हे म्यारा विश्वासी भाईयों, मैं प्रार्थना करछूँ कि हमार प्रभु यीशु मसीह को अनुग्रह तुम सबून का दगाड़ हो।</verse>
			</chapter>
		</book>
		<book number="49">
			<chapter number="1">
				<verse number="1">मैं पौलुस, परमेश्वरे की इच्छाक अनुसार यीशु मसीहक प्रेरित छूँ। मैं यो चिठ्ठी इफिसुस शैहर में यीशु में विश्वास करूनवाला परमेश्वरा का लोगून खिन लिखूनमर्यू।</verse>
				<verse number="2">मैं तुमून खिन प्रार्थना करछूँ कि, हमार पिता परमेश्वर और प्रभु यीशु मसीहक तरफ भटे तुमून अनुग्रह और शान्ति मिलनै रौ।</verse>
				<verse number="3">हमार परमेश्वर और प्रभु यीशु मसीहक पिता की महिमा हो, किलैंकी जब हम मसीह दगाड़ एकता में छा, त परमेश्वर ले हमून स्वर्ग भटे हरेक प्रकारे की आत्मिक आशीष दीयान।</verse>
				<verse number="4">खाशकर मसीहाक दगाड़ हमरि एकता का कारण परमेश्वर ले हमून यो संसारे स बनून है पैलिक चुन लीछ। ताकि हम उक सामुनि पवित्र और निर्दोष हो।</verse>
				<verse number="5">किलैंकी परमेश्वरे ले हमून थैं प्रेम करछ्य, और उले भौत पैलि फैसला लीईना को छ्यो कि उन यीशु मसीहाक द्वारा हमून अपूनी सन्तान हुन खिन गोद ल्याला, परमेश्वर ले इसो अपूनी इच्छा और खुशी का अनुसार कर रैछ।</verse>
				<verse number="6">येक कारण हम उक अद्धभुत अनुग्रह खिन उकी महिमा करा, जो उले हमून मुफ्त में दी दीछ। किलैंकी हम उक प्रिय च्यालाका दगाड़ जुड़िनाका छै।</verse>
				<verse number="7">यीशु ले अपूनो खून बगा भेरन बलिदान दीछ, ताकि हम छुटकार पा सकां, जैको मतलब यो छै, की अब हमार पाप माफ हो ग्यान। परमेश्वरा का अनुग्रह भौते महान छै जो उले हमून में दिखाछ।</verse>
				<verse number="8">जो दया स परमेश्वरे ले पुरो ज्ञान और समझा का दगाड़ हमून में दिखाछ।</verse>
				<verse number="9">परमेश्वरे ले उई करछ्य, जो उले गुप्त राखिना को छ्यो, और हमून उ गुप्त योजना का बारिमें बातछ जैस उले पैलि मसीहक द्वारा पुरो करना को फैसला लीछ।</verse>
				<verse number="10">जब यो योजना स पुर करना को बखत आलो, त परमेश्वर स्वर्ग और धरतीका सबै चीज मसीहाक अधीन कर द्योलो, ताकि मसीहा उनूनमें राजा करोलो।</verse>
				<verse number="11">येक अलावा, किलैंकी हम मसीहाक दगाड़ एकता में छा, हमून परमेश्वर भटे बिरासत मिल रैछ, किलैंकी उले हमून पैलिक भटे चुनिनाको छ्यो, और उकी योजना का अनुसार सब चीज काम करनान।</verse>
				<verse number="12">हम, यहूदी पैलि का लोग छा जिनूनले मसीहा में आश राखछै, और हमून येक कारण चुनी ग्योछ ताकि हम परमेश्वरे की महिमा और तारीफ करा।</verse>
				<verse number="13">तुमूनले, सच्चो सुसमाचार सुणछ, जो यो बारिमें बतूछो कि परमेश्वर ले कसीकैं तुमोरो उद्धार करछ्य जब तुमूले मसीह में विश्वास करछ्य, त परमेश्वर ले अपूनो करिना को वादा अनुसार तुमून पवित्र आत्मा दीछ, यो दिखून खिन कि तुम परमेश्वरा का छा।</verse>
				<verse number="14">पवित्र आत्मा एक बयाना का नियाती छै जो हमून पुरो भरोसा दिलूछो, कि परमेश्वर हमून उ बिरासत द्योलो जैको उले वादा कर रैछ और यो ले कि उले हमून अपून लोग हुन खिन खरीद ली हैछ ताकि हम उकी महिमा और तारीफ करा।</verse>
				<verse number="15">येक कारण, जब भटे मैंले प्रभु यीशु में तुमार विश्वास और परमेश्वरा का लोगून खिन तुमार प्रेम बारिमें सुणभेरन,</verse>
				<verse number="16">मैं हमेशा तुमून खिन परमेश्वरो को धन्यवाद करछूँ और अपूनी प्रार्थनान में तुमून याद करछूँ।</verse>
				<verse number="17">मैं प्रार्थना करछूँ कि परमेश्वर हमार प्रभु यीशु मसीह का जो महिमामय पिता, तुमून पवित्र आत्मा दे, जो तुमून बुद्धिमान बना द्योलो और परमेश्वरे स तुमून में प्रगट करोलो, ताकि तुम ऊस निकीकैं जाण सका।</verse>
				<verse number="18">मैं यो ले प्रार्थना करछूँ कि उ सच्चाई समझून में तुमेरि मद्दत करोलो, और उ आशा जो तुमून दी गैछ, जब परमेश्वर ले तुमून चुन छ्ये। ताकि तुम जाण सका कि उ आशीष कतुक महान और महिमामय छन जिनोरो वादा परमेश्वर ले अपूनो लोगून थैं करिना को छै।</verse>
				<verse number="19">मैं चाछूँ कि तुम उ महान सामर्थ का बारिमें जाणा जो परमेश्वरा का पास हमून खिन छै, जो मसीह में विश्वास करनान, यो उई महान सामर्थ छै जैका इस्तमाल परमेश्वर ले तब करछ्य जब उले मसीह स दुबारा ज्यून करछ्य, और जब उले मसीह स स्वर्ग में अपून दैंन तरफ सम्मान का जाग में बैठाछ।</verse>
				<verse number="20"></verse>
				<verse number="21">वाँ परमेश्वर ले ऊस पुरी हकुमत, अधिकार, और प्रभुता और हरेक का मलिमें राजा करूना को अधिकार दी रैछ, और उकी पदवी हरेक अधिकारी की पदवी है मलि छै जो नै केवल यो लोक में, बल्कि उनवाला लोक में ले रौली,</verse>
				<verse number="22">और परमेश्वर ले सब चीजून मसीह का अधिकार में कर दीयान; और ऊस विश्वास करून वालान की भलाई खिन हरेक चीजून में मुखिया ठैहरा दीछ।</verse>
				<verse number="23">त येक कारण मसीह ख्वारा का नियाती छै और विश्वासीन की मण्डली उको शरीर की नियाती छै। विश्वासीन की मण्डली मसीह का द्वारा भरिना छै, जो सब जगा हरेक चीजून अपूनी मजूदगी ले भर दीछो।</verse>
			</chapter>
			<chapter number="2">
				<verse number="1">पैलि जब तुमूले परमेश्वरा का तरफ भटे नय्या जीन्दगी नी पाईना को छ्यो; त तुम अपून बुरा काम और पापून का कारण तुम मरिना का लोगून का नियाती छ्या।</verse>
				<verse number="2">उ बखत तुम यो संसारा का लोगून की नियाती जीन्दगी जी छ्या, जो परमेश्वर स नी जाण छ्या, और तुमूले उ शैतानो कि हुकमून को पालन करछ्य जो आकाश में भूतून में राजा करूनवाला प्रधान छै। जो अब उन लोगून का मनून में काम करूनमर्योछ।</verse>
				<verse number="3">हम ले उनेरि नियाती जीन्दगी जी छ्या, और अपून पापी आदतून की इच्छान पुरो करछ्या, और जो ले हमरि बुरी इच्छा और बिचार हमून थैं करून चाँछ्या हम उक अनुसार जीन्दगी जी छ्या और दुसारा लोगून की नियाती आदतून ले बुरा छ्या, और परमेश्वरा को क्रोधा का बश में छ्या।</verse>
				<verse number="4">लेकिन परमेश्वर भौत दयालु छै; अपून उ महान प्रेमा का कारण जैले उले हमूनथैं प्रेम करछ्य,</verse>
				<verse number="5">जब हम पापून का कारण मरिनाका लोगून का नियाती छ्या, त उले मसीह का दगाड़ हमार रिशता का कारण हमून आत्मिक जीन्दगी पान योग्य बनाछ। परमेश्वरा का अनुग्रह ले तुमोरो उद्धार भ्योछ।</verse>
				<verse number="6">क्याखिनकि उले हमून मसीह यीशु का दगाड़ हमरि एकता कारण, उले हमून मरिनान में भटे ज्यूनो करछ्य, और हमून स्वर्गीय जागान में उक दगाड़ बैठाछ।</verse>
				<verse number="7">परमेश्वर ले इसो येक कारण करछ्य ताकि उनवाला दिनून में उ संसारा का लोगून दिखा सको कि उको अनुग्रह कतुक महान छै। जो कुछ ले उले हमून खिन करछ्य हमून यो अनुग्रह दिखाई ग्योछ जो मसीह यीशु का दगाड़ एक छै।</verse>
				<verse number="8">क्याखिनकि जब तुमूनले विश्वास करछ्य त परमेश्वरले अपून अनुग्रह ले तुमोरो उद्धार करछ्य, और यो तुमेरि तरफ भटे नाहातिन, बल्कि परमेश्वरो को दान छै।</verse>
				<verse number="9">यो तुमार द्वारा करिना का कोई ले भल कामून का कारण नाहातिन। येक कारण तुमार पास घमण्ड करना को कैले कारण नाहातिन।</verse>
				<verse number="10">क्याखिनकि परमेश्वर ले हमून बनाछ, और यीशु मसीह में हमून भल कामून खिन बनाछ, जिनून परमेश्वर ले पैलि भटे हमार करून खिन तैयार कर रैछ।</verse>
				<verse number="11">येक कारण याद करा कि, तुम जन्म भटे गैर-यहूदी छा, यहूदी लोगून ले तुमार यो कैभेरन मजाक उड़ाछ कि तुम खतना नै करूना लेकिन उनार यो रीति केवल उनार शरीरून में कर जाँछी।</verse>
				<verse number="12">तुम लोग उ बखत मसीह स नी जाण छ्या, और तुम इस्राएल दल है भ्यार छ्या। तुम उन भलि चीजून का ले भागीदार नी छ्या जिनोरो वादा परमेश्वर ले यहूदीनथैं करिना को छ्यो, और बिना आश का और बिना परमेश्वरा का यो संसार में रूछया।</verse>
				<verse number="13">एक बखत छ्यो जब तुम परमेश्वर से भौत दूर छ्या, पर अब परमेश्वर तुमून यीशु मसीह का खून का द्वारा अपून पास लीभेरन आछ।</verse>
				<verse number="14">मसीह खुद हमार बीच शान्ति ल्याछ। बितीना का बखत में, यो इसो छ्यो जसीकैं एक दीवार ले यहूदी और गैर-यहूदी लोगून अलग कर दीछ। उन एक-दुसरा भटे नफरत करछ्या। लेकिन अब मसीह ले अलग करून वाली उ दीवार स उधारी है छै, और यहूदीन और गैर-यहूदीन एक कर दी हैछ।</verse>
				<verse number="15">मसीह ले अपूनी मौत का द्वारा मूसा नियम-कानून की सब विधिन खतम कर दीछ। ताकि उ यहूदी और गैर-यहूदी लोगून का बीच शान्ति लिया सको और इसीकैं तरह एक नय्या समूह बना सको।</verse>
				<verse number="16">सूली में अपूनी मौत का द्वारा मसीह ले द्वी समूह एक कर दीछ और उनोरो मेल-मिलाप परमेश्वर थैं करवा दीछ, इसीकैं यहूदी और गैर-यहूदी लोगून का बीच दुश्मनी स खतम कर दीछ।</verse>
				<verse number="17">और मसीह ले आभेरन तुम गैर-यहूदी लोगून, जो परमेश्वर भटे दूर छ्या, और यहूदी लोगून जो उक नजदीक छ्या, द्वीयान मेल-मिलाप को सुसमाचार सुणाछ।</verse>
				<verse number="18">मसीह ले हमून खिन जो कर रैछ उक कारण अब हम सब उ एक पवित्र आत्मा का द्वारा पिता परमेश्वरा का पास आ सकनू।</verse>
				<verse number="19">येक कारण अब तुम गैर-यहूदी लोग परदेशी और मुसाफिर नाहातिन, लेकिन परमेश्वरा का लोगून का दगाड़ रूनवाला और तुम उक परिवार का लोग छा।</verse>
				<verse number="20">एक दगाड़, हम उको घर छा, जो कि प्रेरितों और परमेश्वरो को संदेश दिनवाला लोगून की नींव में बनिना को छै। और येको कुना को ढूंगो खुद यीशु मसीह छै।</verse>
				<verse number="21">मसीह उ छै जो पुर घर स एक दगाड़ जोड़ राखना को कारण छै। उ परमेश्वर खिन एक पवित्र मन्दिर बनून खिन अपून सब लोगून ढूंगान की नियाती एक दगाड़ जोड़ भेरन राखछो।</verse>
				<verse number="22">हे गैर-यहूदी विश्वासीयों, किलैंकी तुम मसीह में एक छा, येक कारण तुम ले परमेश्वरा का दुसारा लोगून का दगाड़ एक हो भेरन रौ। ताकि तुम एक इसो घर बन जा, जाँ परमेश्वरो को आत्मा रूछो।</verse>
			</chapter>
			<chapter number="3">
				<verse number="1">येक कारण, मैं पौलुस तुमून खिन प्रार्थना करछूँ। मैं जेल में छूँ क्याखिनकि मैं तुम गैर-यहूदी लोगून सुसमाचार सुणभेरन यीशु मसीह खिन सेवा करछूँ।</verse>
				<verse number="2">तुम लोगून ले जरूर सुण होलो, कि परमेश्वर ले अपून अनुग्रह का द्वारा तुमून सुसमाचार सुणूना की मैंस जिमेदारी दी रैछ।</verse>
				<verse number="3">जैस मैंले यो बारिमें पैलि भटे कुछ शब्द लिखीना का छ्या, कि परमेश्वर ले खुद ऊस गुप्त योजना स मैंस दिखाछ।</verse>
				<verse number="4">जसो तुम उ चिठ्ठी स पढ़ला, त तुमून यो ले पत्तो चलोलो कि मैं सच्ची में मसीह का गुप्त भेदून का बारिमें कतुक निकी कै समझछूँ।</verse>
				<verse number="5">यह गुप्त भेद पैलि पीढ़ीन का लोगून नै बताई ग्योछ, अब पवित्र आत्मा ले अपून पवित्र प्रेरितून और परमेश्वरा का संदेश दिनवाला लोगून में प्रगट करछ्य।</verse>
				<verse number="6">यो परमेश्वर की योजना छै कि यीशु मसीह का दगाड़ हमार रिश्ताका द्वारा यहूदीन का नियाती गैर-यहूदी लोग उई आशीषून पाला, और उन एक्कै शरीरो को हिस्सा छन, और उ वादा का हिस्सेदार छन, जो परमेश्वर ले यहूदी लोगून का दगाड़ करिना को छ्यो।</verse>
				<verse number="7">परमेश्वरेले मैंस अपून अनुग्रह और सामर्था ले यो सौभाग्य दीछ, कि मैं सुसमाचार सुणून खिन उको सेवक बनाछ।</verse>
				<verse number="8">मैं परमेश्वरा का सब लोगून में सबून है नानो छूँ। लेकिन परमेश्वरो को अनुग्रह मैंमें भ्योछ, और मैं गैर-यहूदी लोगून सुसमाचार सुणू, कि मसीह भटे हमून जो आशीष मिलछी, उ हमार समझ है भ्यार छै।</verse>
				<verse number="9">क्याखिनकि परमेश्वर ले यो सब चीजून संसारा बनून है गुप्त राखिना का छ्या, ताकि उनून अब मैं तुम सबून में प्रगट कर सकूँ।</verse>
				<verse number="10">इसीकैं, परमेश्वरो को मक्शद छ्यो कि अब विश्वासी की मण्डली का द्वारा, परमेश्वरो को ज्ञान उन प्रधानून में और अधिकारीन में जो आकाश में छन, उनूनमें प्रगट करि जौ।</verse>
				<verse number="11">परमेश्वर ले अपून योजना का अनुसार इसो करछ्य, जैले उले हमार प्रभु यीशु मसीह यीशु का द्वारा पुरो करछ्य।</verse>
				<verse number="12">मसीह का दगाड़ हमोरो रिश्ताका कारण और उमें हमोरो विश्वास का कारण ले, अब हम परमेश्वरे की हजूरी में निडर हो भेरन और हिम्मतले आ सकनू।</verse>
				<verse number="13">येक कारण मैं विनती करछूँ कि जो दुख तुमून खिन मैंस होर्यान, उक कारण निराश नै हुन चैछो, क्याखिनकि यो सब तुमार फैदा खिन छै।</verse>
				<verse number="14">येक कारण मैं पौलुस घुणा टेकभेरन तुमून खिन पिता परमेश्वर थैं प्रार्थना करछूँ।</verse>
				<verse number="15">वह एक छै जो विश्वासीन का पुर परिवार को पिता छै जो स्वर्ग में छै और धरती में छै।</verse>
				<verse number="16">मैं प्रार्थना करछूँ कि, उ अपूनी महिमा का उन खजाना भटे तुमून यो दान दे जैकी कोई सीमा नाहातिन। उकी आत्मा तुमून शक्ति दे, ताकि तुम भितर भटे मजबूत होज्या।</verse>
				<verse number="17">येक कारण विश्वास का द्वारा मसीह तुमार भितर रौ। मैं प्रार्थना करछूँ कि परमेश्वर और एक दुसरा खिन तुमोरो प्रेम तुमून मजबूत बनालो और तुमून खितीन भटे बचालो।</verse>
				<verse number="18">और परमेश्वरा का सब लोगून का दगाड़, तुम यो जाण पाला कि मसीह हमून कतुक प्रेम करछो। उ हमून भौत प्रेम करछो, जैकी कोई सीमा नाहातिनी।</verse>
				<verse number="19">मैं प्रार्थना करछूँ कि, तुम मसीह का उ प्रेम स जाण सका, जो आदिमी की समझ है भ्यार छै, जेले तुमेरि आदत परमेश्वरे की आदत की नियाती बन जौ।</verse>
				<verse number="20">जतुक हम परमेश्वर थैं माँगनू और सोचनू, ये है ले ज्यादा कर सकछो, क्याखिनकि उकी सामर्थ हमून में काम करछी।</verse>
				<verse number="21">उकी महिमा विश्वासीन की मण्डली में और यीशु मसीह में पीढ़ी भटे पीढ़ी तक हमेशा-हमेशा हुनै रौ। आमीन।</verse>
			</chapter>
			<chapter number="4">
				<verse number="1">येक कारण मैं जो प्रभु यीशु मसीह की सेवा करना का कारण जेल में छूँ तुमूनथैं विनती करछूँ कि जो बुलाहटाक दगाड़ परमेश्वर ले तुमून अपूनी सन्तान हुन खिन बुला रैछ, उक अनुसार अपूनी जीन्दगी जीया,</verse>
				<verse number="2">और पुरी दीनता और नम्रता, और धीरज राखभेरन प्रेम ले एक दुसरा का ब्यवहार स सहन करा।</verse>
				<verse number="3">इसो करना की कोशिश करा ताकि तुम लगातार कि मेल-मिलाप का दगाड़ बनिना का रौ, क्याखिनकि तुम परमेश्वरा का आत्मा एक करि गैछा।</verse>
				<verse number="4">हम सब विश्वासी एक्कै शरीरा का हिस्सा का नियाती छा, और हम सबून एक्कैई पवित्र आत्मा मिलीना को छै। जसा तरीका ले तुमून एक आश दी राखछी, जब तुमून परमेश्वरा का लोग हुन खिन बुलाई गैछा।</verse>
				<verse number="5">हम सबून को एक्कै प्रभु छै, जैमें हम सब विश्वास करनू और केवल मसीह का नाम में हमून बपतिस्मा दीई ग्योछ।</verse>
				<verse number="6">हम सब एक्कै परमेश्वर की अराधना करनू जो हम सबून को पिता छै, उ हम सबून का मलिमें राज्य करछो, उ हम सबून का द्वारा काम करछो, और उ हम सबून में रूछो।</verse>
				<verse number="7">लेकिन मसीह ले अपूना अनुग्रहाक द्वारा हमून में भटे हरेक स उक काम करून खिन अलग-अलग खास गुण दी राख्यान।</verse>
				<verse number="8">येक कारण मसीह का बारिमें पवित्रशास्त्र कुंछो, “जब उ ऊँचा जाग में चढ़ाई ग्योछ, त उ अपून दगाड़ कई कैदीन ली ग्योछ, और लोगून आशीष दीछ।”</verse>
				<verse number="9">जब पवित्रशास्त्र कुंछो कि, “उ ऊँचा जाग में चढ़छै,” केवल यो कि मसीह पैलि अधलोक तलि उतर ग्योछ।</verse>
				<verse number="10">मसीह जो तलि आछ, उ उई आदिमी छै जो आकाश भटे ले मलि ग्यो, ताकि उ हर जाग हो सको।</verse>
				<verse number="11">यो मसीह छ्यो जेले इन जिमेदारी विश्वासीन कि मण्डली को दी, उले कुछ लोगून प्रेरित हुन खिन चुन रैछ, कुछ लोगून परमेश्वरो को संदेश दीन खिन चुन रैछ, कुछ लोगून सुसमाचार सुणून खिन चुन रैछ, कुछ लोगून रखवाली करून खिन, और कुछ लोगून सिखून खिन चुन रैछ।</verse>
				<verse number="12">उनेरि जिमेदारी यो छै कि उन परमेश्वरा का लोगून उको काम करून खिन तैयार करून, जसीकैं कि मसीह को शरीर जो विश्वासीन की मण्डली छै उ मजबूती ले बढ़ूनै जौ।</verse>
				<verse number="13">यो तब तक जारी रौलो जब तक कि हम अपून विश्वास और परमेश्वरा का च्याला का बारिमें अपून समझ में एक नै हो जाना। तब हम सिद्ध बन जूला, जसीकैं मसीह बनछै, और हम पुरी तरीका ले उक नियाती हो जूला।</verse>
				<verse number="14">अब भटे हमून बच्चान का नियाती ब्यवहार नै करून चैछो। येक कारण हमून कभै ले ध्वाकाबाज लोगून की झूठ्ठी शिक्षा में नै फसून चैछो, जो सच्ची लागनान। क्याखिनकि अब हम उन नावून की नियाती नाहातिन जिनून लहर अघिल-पछिल धक्का दीनान और हवा इथकैं-उथकैं घुमूछी।</verse>
				<verse number="15">बल्कि, प्रेम में सच्ची बोलभेरन हमून हर बात में मसीह का नियाती सिद्ध बनूनो चैछो, जो विश्वासीन की मण्डली का ख्वोरो छै।</verse>
				<verse number="16">हम सब जो मसीह में विश्वास करनू, उको शरीर का हिस्सा का नियाती छा। जसा तरीका ले एक आदिमी को शरीर उक पुर जोड़ून का द्वारा एक दगाड़ जुड़ीना को रूछो, और जब शरीरो को हर एक हिस्सा ठीक तरीका ले काम करछो त शरीर बढ़छो और मजबूत हुछो; उसीकैं, जब हमून में भटे हर एक उ काम स करछो जो मसीह ले हमून दी रैछ त हम ले सिद्ध और मजबूत होभेरन बढ़नै जूला, और एक-दुसरा स और ज्यादा प्रेम कराला।</verse>
				<verse number="17">येक कारण उ अधिकार का दगाड़ जो प्रभु ले मैंस दी रैछ, मैं तुमून यो बतूछूँ कि, तुम अविश्वासी लोगून का नियाती बेकारा का बिचारून का दगाड़ अपूनी जीन्दगी जन जीया।</verse>
				<verse number="18">क्याखिनकि उनार पास समझ नाहातिन, और उन जिद्दी और हुकुम नै मानून वाला छन, येक कारण उनूनले फैसला करिना को छै कि उन परमेश्वरा बारिमें नै जाणू चाना और उन उक संदेश स सुणून है इनकार करनान, उनार पास उ नय्या जीन्दगी नाहातिन जो परमेश्वर हमून दी रैछ।</verse>
				<verse number="19">उन अब बुरा कामून करून खिन अपूनास दोषी नै मानना, येक कारण उनूनले खुद स बुरा काम करून खिन दी रैछ। उन लगातार हर तरीका ब्यवहार करनान, और उन कभै ले इन चीजून छोड़ू नै चाना।</verse>
				<verse number="20">लेकिन यो उन नै जाणना जो तुमूले मसीह की शिक्षान भटे सिखीना को छै।</verse>
				<verse number="21">जो कुछ तुमूले यीशु मसीह का बारिमें सुण रैछ और जो कुछ तुमार शिक्षकून ले तुमून सिखाछ, उ पक्का में उको सच्चो संदेश छै।</verse>
				<verse number="22">अपून पुराना पापी आदतून और अपून पुराना जीन्दगी जीना का तरीका स छोड़ दी, जो वासना और ध्वाका ले भ्रष्ट छन।</verse>
				<verse number="23">ताकि पवित्र आत्मा तुमार बिचारून और ब्यवहार स नय्या बनूनै जौ।</verse>
				<verse number="24">क्याखिनकि परमेश्वर ले तुमून एक नय्या आदत दी रैछ जो बिल्कुल उक खुद की आदत की नियाती छै। येक कारण यो नय्या आदत का अनुसार जीन्दगी जीया। सच्ची में धर्मी और पवित्र बना।</verse>
				<verse number="25">येक कारण झूठ बोलून छोड़भेरन, हरेक दगड़िया विश्वासी थैं सच्ची बोलो, क्याखिनकि हम सबै एक्कै शरीरा का हिस्सा।</verse>
				<verse number="26">अगर तुमून गुस्सा अ, त ध्यान राखा कि तुम पाप जन करा। त येक कारण ब्याल हुन तक तुमोरो गुस्सा शान्त होज्यौ।</verse>
				<verse number="27">और इसो करभेरन शैतान स मौका जन दी, कि उ तुमूनथैं बुरा काम करवौ।</verse>
				<verse number="28">चोरी करून वालो फिर चोरी जन करौ; लेकिन ऊस ईमानदारी ले मेहनत करूनी चैछी, ताकि गरीब लोगून की मद्दत करून खिन उक पास के हो।</verse>
				<verse number="29">कोई गन्दी बात तुमार मुँह भटे नै निकलून, बल्कि उन बातुन कौ जो लोगून खिन जरूरी छन, जो कि उनून विश्वास में मजबूत बनून में मद्दत करून। तब जो केले तुम कौला वह तुमार सुणून वालान को भलो करोलो।</verse>
				<verse number="30">अपून कामून का द्वारा परमेश्वरा का पवित्र आत्मा स दुखी जन करा, जो तुमार छुटकारा खिन बयाना का रूप में दीईना को छै।</verse>
				<verse number="31">सब प्रकार की कड़वाहट और प्रकोप और गुस्सा, और लड़ाई-झगाड़ा, और निन्दा सब नफरत तुमून भटे दूर करि जौ।</verse>
				<verse number="32">एक दुसरा में दया, और दयालु हो, और जसीकैं परमेश्वर ले मसीह में तुमार अपराध माफ करि ग्यान, उसीकैं तुमले एक दुसरा का अपराध माफ करा।</verse>
			</chapter>
			<chapter number="5">
				<verse number="1">तुम परमेश्वरा का नानतिना छा जैस उ प्रेम करछो, येक कारण उक जसा बनना की कोशिश करा।</verse>
				<verse number="2">मसीह का उदारण में हिटभेरन, तुम एक दुसरा से प्रेम करा, जसीकैं मसीह ले तुमून प्रेम करछो, और हमार पापून दूर करून खिन अपूनास बलिदान कर दीछ। और परमेश्वर येले खुश छ्यो, क्याखिनकि उ बलिदान उ खिन खुशबुदार इत्र का नियाती छ्यो।</verse>
				<verse number="3">तुम परमेश्वरा का लोग छा, येक कारण तुमार बीच ब्यभिचार, और कोई ले बुरा काम, या लालच की बात तक जन करा।</verse>
				<verse number="4">और नै बुरी, नै मूर्खता की, और नै मजाक की घटिया बात हुनी चैछी; क्याखिनकि इसी बातचीत तुमून खिन ठीक नाहातिन, लेकिन इसा जाग तुम परमेश्वरो को धन्यबाद दीन चैछो।</verse>
				<verse number="5">क्याखिनकि तुम यो निकीकैं जाणछा कि कोई ले व्यभिचारी, बुरा काम करून वालो, या लालची आदिमी, जो मूर्ति पूजा का बराबर छै, इसा काम करूनवाला लोग कभै ले मसीह का राज्य कि हिस्सा नी बनाला।</verse>
				<verse number="6">उन लोगून का द्वारा मूर्ख जन बना जो इन पापून खिन बहाना बनूना की कोशिश करनान। क्याखिनकि इनी कामून का कारण परमेश्वरो को क्रोध हुकुम नै मानूनवालान में भड़कछो।</verse>
				<verse number="7">येक कारण तुम इसा बुरा काम करभेरन उनार भागीदार जन बना।</verse>
				<verse number="8">क्याखिनकि तुम उन लोगून की नियाती छ्या, जो अन्धकार में रूनान, लेकिन अब प्रभु में उज्यालो छा, येक कारण उज्याला का सन्तान का नियाती जीन्दगी जीआ।</verse>
				<verse number="9">क्याखिनकि अगर कोई आदिमी उज्याला में छै, त उको चाल-चलन निको और धार्मिक हुछो और उमें भरोस करि जा सकछो।</verse>
				<verse number="10">यो सिखून की कोशिश करा, कि प्रभु स खुश करछो।</verse>
				<verse number="11">जो लोग गन्दा काम अन्यारा में करनान, उनार दगाड़ भागीदार जन बना, लेकिन लोगून सिखा, कि यो काम गलत छै।</verse>
				<verse number="12">किलैंकी उन अविश्वासी लोगून का गुप्त कामून की चर्चा करून ले शर्म की बात छै।</verse>
				<verse number="13">जब कोई चीज में उज्याल चमकछो त हर कोई देख सकछो कि उ चीज कसी छै, क्याखिनकि जब उज्यालो कोई चीज स प्रकट करछो तो उ चीज खुद उज्यालो बन जाछो।</verse>
				<verse number="14">येक कारण एक कहावत छै, जो यो बतूछी, “हे पड़ून वालों, जाग! और मुर्दान में भटे ज्यून हो जा; त मसीह अपूनो उज्यालो तुम में चमकालो।”</verse>
				<verse number="15">येक कारण ध्यान ले देखा, कि तुम कसीकैं जीन्दगी जी मरछा, मूर्खून का नियाती नै पर बुद्धिमानून नियाती जीन्दगी जीया।</verse>
				<verse number="16">अपून हरेक मौका को इस्तमाल बुद्धि ले भलाई करून खिन करा, क्याखिनकि दिन बुरा छन।</verse>
				<verse number="17">येक कारण मूर्ख जन बना, लेकिन यो जाणनान की कोशिश करभेरन बुद्धिमान बना कि प्रभु तुमूनथैं कि करून चाछो।</verse>
				<verse number="18">मदिरा का नशा में मतवाला होभेरन अपूनास नाश जन करा, क्याखिनकि येले लोग अपून आपे भ्यार हो जानान, पवित्र आत्मा स तुमून अपूनी सामर्थ ले भरून दी।</verse>
				<verse number="19">और जब तुम एक जाग जामा हुछा, त भजन और स्तुति और आत्मिक गीत गाया करा, और अपून-अपून मन में प्रभु का सामुनि गानै और स्तुति करनै रौ।</verse>
				<verse number="20">जो कुछ हमार प्रभु यीशु मसीह ले करिना को छै उक कारण हमेशा हमार परमेश्वर पिता का हरेक बात खिन धन्यबाद करा।</verse>
				<verse number="21">हम मसीह में आदर का कारण एक-दुसरा का अधीन रौ।</verse>
				<verse number="22">हे घरवालीयो, अपून घरवालान का इसा अधीन रौ जसीकैं तुम प्रभु का अधीन रूछा।</verse>
				<verse number="23">क्याखिनकि घरवाला त घरवाली को ख्वोरो छै जसीकैं कि मसीह विश्वासीन की मण्डली को ख्वोरो छै; और मसीह विश्वासीन की मण्डली को मुक्तिदाता छै, जो उको अपूनो शरीर छै।</verse>
				<verse number="24">जसीकैं विश्वासी लोग मसीह का अधीन छन, उसीकैं घरवालीन ले हरेक बात में अपून-अपून घरवालान का अधीन रून।</verse>
				<verse number="25">हे घरवालो, अपूनी-अपूनी घरवालीन थैं प्रेम राखा, जसो मसीह ले विश्वासीन की मण्डली थैं प्रेम करभेरन उनून खिन अपूनास बलिदान कर दीछ।</verse>
				<verse number="26">ताकि उक बचन स विश्वासीन की मण्डली में प्रकट करभेरन उनार पापून भटे शुद्ध कर सको, ठीक उसीकैं जसीकैं लोग कोई चीज स धोभेरन साफ करनान।</verse>
				<verse number="27">उ अपूनी विश्वासी मण्डली खिन मर ग्यो ताकि उ अपून सब लोगून सिद्ध बना सको और हम सबून अपनी हजूरी में ल्या सको, जैमें कोई दोष या पाप या कोई और बुरी बात नै हो; बल्कि, उ पवित्र और सिद्ध हो।</verse>
				<verse number="28">इसीकैं घरवाला अपूनी-अपूनी घरवालीन अपून शरीर का नियाती प्रेम राखून, जो अपूनी घरवाली स प्रेम करछो, उ अपून आप स प्रेम करछो।</verse>
				<verse number="29">क्याखिनकि कैले ले कभै अपून शरीर है बैर नै राखूनो, लेकिन उकी देखभाल करछो, जस तरीका ले मसीह विश्वासीन की मण्डली की देखभाल करछो।</verse>
				<verse number="30">येक कारण कि हम सब मसीह शरीरा का अंगून का समान छा।</verse>
				<verse number="31">जसो पवित्रशास्त्र कुंछो, “आदिमी अपून ईजा-बबा स छोड़भेरन अपूनी घरवाली का दगाड़ मिलभेरन रौलो, और उन द्वीवै एक्कै शरीर होला।”</verse>
				<verse number="32">यो एक भौत गैर भेद छै, लेकिन मैं यो समझू छू कि यो मसीह और उकी विश्वासीन कि मण्डली का तरफ इशारा करछो।</verse>
				<verse number="33">लेकिन यो तुमूनमें ले लागू हुछो कि, तुमून में भटे हरेक अपूनी घरवाली से अपून नियाती प्रेम करा, और घरवाली ले अपून घरवाला का आदर करा।</verse>
			</chapter>
			<chapter number="6">
				<verse number="1">हे नानतिनो, तुम जो प्रभु में विश्वास करछा, अपून ईजा-बबा को हुकमो को पालन करा, क्याखिनकि इसो करूनो तुमून खिन सही छै।</verse>
				<verse number="2">परमेश्वर ले पवित्रशास्त्र में हुकुम दी रैछ, कि अपून ईजा-बबा को आदर करा, त तुमार जीन्दगी लम्बी और खुशहाल होलि।</verse>
				<verse number="3"></verse>
				<verse number="4">तुमून में जो बबा छन, अपून नानतिनान गुस्सा जन दिला, लेकिन उनून प्रभु की शिक्षा और तम्मीज सिखा, और उनोरो पालन-पोषण करा।</verse>
				<verse number="5">दासूनथैं मेरि बिनती छै कि जो लोग यो संसार में तुमार मालिक छन, तुम सच्चाई का दगाड़ उनोरो हुकुम माना, माना कि तुम मसीह की सेवा करून मरेछा।</verse>
				<verse number="6">तुमून हर बखत अपून मालिकून को हुकुम मानूनो चैछो, उई बखत नै जब उ तुमून देखछो। बल्कि, मसीह का दासून का नियाती बना, जो अपून पुर मन ले उई करछो जो परमेश्वर चाछो कि उन करून।</verse>
				<verse number="7">तुम खुशी ले अपून सेवा का काम करनै रौ, इसो समझभेरन तुम आदिमीन की नै, बल्‍कि प्रभु की सेवा करछा;</verse>
				<verse number="8">क्याखिनकि तुम जाणछा, कि जो कोई जसो निको काम करोलो, चाहे दास हो, या दास नै हो, उ काम को फल उ प्रभु थैं भटे पालो।</verse>
				<verse number="9">इसीकैं जो मालिक छन, उन ले अपून दासून का दगाड़ इसो बर्ताव करून चैछो और उनून डरूनो-धमकूनो छोड़ दी, उनार दगाड़ निको बर्ताव करून क्याखिनकि तुम जाणछा, कि उनोरो और तुमोरो द्वीवैन को मालिक स्वर्ग में छै, और उ कैको पक्ष नै लीनो।</verse>
				<verse number="10">आखरी में प्रभु की सामर्थ का द्वारा आत्मिक रूप में मजबूत बन रौ।</verse>
				<verse number="11">हम आदमीन का खिलाफ लड़ाई नै लड़ून मरिया। लेकिन हम प्रधानून और अधिकारीन का खिलाफ और अन्धकार की ताकतून और आत्मिक संसारे की सामर्थ का खिलाफ लड़ून मरिया। येक कारण सबै हथियार पैन ली जो परमेश्वर दीछो। ताकि जब फिर उ बुरा दिन आला, त तुम शैतान का चालून भटे बच सका। और जब यो लड़ाई खतम हो जालि, तब तुम मजबूती ले ठाड़ रै सकला।</verse>
				<verse number="12"></verse>
				<verse number="13"></verse>
				<verse number="14">येक कारण परमेश्वर की सच्चाई स अपून कमर में बैल्टा का नियाती बाँद ली, और अपून निका ब्यवहार स कवच नियाती पैन ली।</verse>
				<verse number="15">और परमेश्वर की शान्ति को सुसमाचार सुणून खिन तुमेरि इच्छा ठीक ऊसी हुनी चैछी, जसीकैं एक सिपाई लड़ाई खिन अपून जूता पैन भेरन तैयार हुछो।</verse>
				<verse number="16">याँ एक और बात छै, जस तरीका एक सिपाई ढाल लीभेरन अपून मलि में उनवाला दुशमन का तीरून भटे अपूनास बचूछो, उसीकैं मसीह में मजबूत विश्वास राखा कि मसीह तुमून शैतान का द्वारा नुकशान पुजून वाला जलता तीरून भटे बचाभेरन राखौ।</verse>
				<verse number="17">जसीकैं लड़ाई में एक सिपाई अपून ख्वारा स बचुन खिन लूवा की टोप पैन राखछो, उसीकैं परमेश्वर तुमून शैतान भटे बचालो। जसीकैं एक सिपाई खुदो को बचाव करून खिन एक तलवार लीछो, उसीकैं अपून बचाव खिन परमेश्वरो को बचन का उपयोग करा, जो पवित्र आत्मा तुमून दीछो।</verse>
				<verse number="18">हमून ऊसी प्रार्थना और बिनती करूनी चैछी जसो हमून पवित्र आत्मा सिखूछो। येक कारण जागनै रौ कि सबै परमेश्वरा का लोगून खिन हमेशा बिनती करनै रौ।</verse>
				<verse number="19">और तुम मैं खिन ले प्रार्थना कर्या, ताकि बोलून बखत मैंस इसो बचन दी जून कि, ताकि मैं हिम्मतले सुसमाचार को भेद बता सकूँ।</verse>
				<verse number="20">येक कारण मैं जंजीरून में जकड़ीना को राजदूत का नियाती सेवा करछूँ। प्रार्थना करा कि, जसा तरीका ले मैंस बोलून चैछो, उसीकैं मैं हिम्मत का दगाड़ सुसमाचार को प्रचार कर सकूँ।</verse>
				<verse number="21">प्रभु में प्रिय भाई और विश्वासयोग्य सेवक तुखिकुस तुम लोगून यो सब बता द्योलो, ताकि तुम ले जाण ली कि मैं कसो छूँ और कि करून मरयूँ।</verse>
				<verse number="22">ऊस मैंले तुमार पास येक कारण भेज छै, कि तुम हमरि हालत स जाणा, और उ तुमार मनून हौंसला दे।</verse>
				<verse number="23">मैं प्रार्थना करछूँ, कि परमेश्वर पिता और प्रभु यीशु मसीह का तरफ भटे विश्वासी भाईन शान्ति और विश्वास प्रेम मिलौ।</verse>
				<verse number="24">और मैं यो ले प्रार्थना करछूँ, कि परमेश्वर उन सब में अपूनो अनुग्रह करौ जो हमार प्रभु यीशु थैं प्रेम करनान। उ प्रेम जो कभै खतम नै हुनो।</verse>
			</chapter>
		</book>
		<book number="50">
			<chapter number="1">
				<verse number="1">मैं पौलुस और तीमुथियुस जो यीशु मसीह का सेवक छा। हम यो चिठ्ठी परमेश्वरा का उन लोगून और अगुवान और सेवकून का नाम लिखूनमर्या जो यीशु मसीहा में होभेरन फिलिप्पी शैहर में रूनान।</verse>
				<verse number="2">मैं प्रार्थना करछूँ, कि हमार पिता परमेश्वर और प्रभु यीशु मसीह का तरफ भटे तुमून अनुग्रह और शान्ति मिलनै रौ।</verse>
				<verse number="3">जब-जब मैं तुमून याद करछूँ, तब-तब अपून परमेश्वरो को धन्यवाद करछूँ।</verse>
				<verse number="4">और खुशी का दगाड़ अपूनी हर प्रार्थना में तुम सबून खिन बिनती करछूँ।</verse>
				<verse number="5">पैला दिन भटे तुमूले यीशु मसीह का बारिमें यो सुसमाचार में विश्वास करछ्य, और सुसमाचार फैलून में तुम म्यारा दगाड़ रैछा।</verse>
				<verse number="6">मैंस यो बात को भरोसा छै, कि परमेश्वर जेले तुमून में कुछ निको काम शुरू कर रैछ, उई उ दिन तक पुरो करोलो, जब यीशु मसीह दुबारा वापस आलो।</verse>
				<verse number="7">तुम सबून का बारिमें मेरि यो राई ठीक छै, क्याखिनकि मैं तुमून भौत प्रेम करछूँ, और मैं या जेल में छूँ, और सुसमाचार की सच्चाई ले जबाब दीन खिन और सच्च साबित करून खिन तुम सब म्यारा दगाड़ परमेश्वरा का अनुग्रह में सहभागी छा।</verse>
				<verse number="8">येमें परमेश्वर म्योरो गवाह छै कि मैं मसीह यीशु का नियाती प्रेम करभेरन तुम सबूनथैं मिलना की उमीद करछूँ।</verse>
				<verse number="9">और मैं यो प्रार्थना करछूँ, कि एक-दुसारा खिन तुमोरो प्रेम ज्ञाना का दगाड़ पुरी समझ ले बढ़नै जौ।</verse>
				<verse number="10">येक कारण तुम सब निकी बातुन की परख कर सका और उनून मान सकाला, और यीशु मसीह का दुबारा वापस उन तलक पवित्र और निर्दोष बनभेरन रया।</verse>
				<verse number="11">यीशु मसीह का जरियाले पैद हुनवला धर्म का कामून ले अपून आप भर ली, जेले परमेश्वर की तारीफ और महिमा हुनै रौ।</verse>
				<verse number="12">हे प्रिय दगड़ियो, मैं चाँछू कि तुम जाण ली कि मैंमें जो बितीना को छै, जैका कारण ले भौत लोगून ले सुसमाचार में विश्वास करछ्य।</verse>
				<verse number="13">या तक कि कैसर क राजमहला की पुरी सेना और सब लोगून में यो बात खुल गैछ, कि यीशु मसीह को सेवक हुना का कारण मैं जेल कैद छूँ।</verse>
				<verse number="14">भौतसा भाईन-बैनिन म्यारा जेल में हुना कारण बल मिलछै। उन प्रभु में मजबूत विश्वास और हिम्मत का दगाड़ बिना डरे परमेश्वरो को बचन सुणनान।</verse>
				<verse number="15">यो सच्ची छै कि थ्वाड़ा लोग जलन और झगड़ा का कारण मसीह को सुसमाचार को प्रचार निका इरादा ले करनान।</verse>
				<verse number="16">उन यो लोग छन जो मैंस प्रेम करनान क्याखिनकि उ जाणनान, कि मैं यीशु मसीह का सुसमाचारो को जबाब दीन खिन ठैहराई ग्यू और उखिन जेल में कैद छूँ।</verse>
				<verse number="17">उन लोग जो जलन करनान उन यीशु मसीह को सुसमाचार को प्रचार सच्चाई ले नै, लेकिन अपून फैदा खिन मसीह को सुसमाचार सुणूनान, यो समझभेरन कि उ याँ जेल में मेरि परेशानीन बढून चानान।</verse>
				<verse number="18">तो कि भ्यो? केवल यो, कि हर तरीका ले मसीह को सुसमाचार सुणाई जाछो चाहे उ गलत इरादान ले या सच्चाई ले, येले मैं खुश छूँ, और खुश रूलो ले।</verse>
				<verse number="19">क्याखिनकि मैं यो जाणछूँ कि तुमार बिनतीन का जरियाले, और यीशु मसीह का तरफ भटे भेजि ग्योछ पवित्र आत्मा का मद्दत का जरियाले, येको फल मैं खिन भलाई खिन काम करोलो।</verse>
				<verse number="20">मैं त भौत इच्छा और उमीद राँख छूँ, कि मैं कोई ले बात में शर्मिन्दा नी हुलो, लेकिन मैंमें मसीह का बारिमें बोलना की हिम्मत हो, जसो मैंले पैलि ले करिना को छ्यो। चाहे मैं ज्यून रून या मरि जू मैं अपून पुर जीवन का जरियाले मसीह की महिमा हमेशा करनै रूलो।</verse>
				<verse number="21">अगर मैं ज्यून रूछूँ त यो मसीह खिन महिमा खिन होलो, जब मैं मर ज्यूलो तब मैं मसीह का दगाड़ रूलो।</verse>
				<verse number="22">लेकिन अगर म्योरो शरीर में ज्यूनो रूनो मसीह का काम खिन फैदामन्द छै त मैं नै जाणनू कि कैस चुनू।</verse>
				<verse number="23">मैं नै जाणनू कि इन द्वीवैन में भटे कैस चुनू। मन त करछो कि मैं मरज्यू और मसीह का पास जाभेरन रू, क्याखिनकि यो मैं खिन भौत ठूली बात छै।</verse>
				<verse number="24">लेकिन म्योरो ज्यून रून ले जरूरी छै, क्याखिनकि तुमून मेरि मद्दत की जरूरत ले छै।</verse>
				<verse number="25">येक कारण मैंस येको भरोसा छै, और मैं जाणछूँ कि मैं ज्यून रूलो, बल्कि तुम सबून का दगाड़ रूँलो, जेले मैं तुमून विश्वास में मजबूत करून और उमें खुश रून में तुमेरि मद्दत ले करूलो।</verse>
				<verse number="26">ताकि जब मैं दुबारा तुमार पास उलो त तुम म्यारा कारण मसीह यीशु का बारिमें और ले ज्यादा घमण्ड कर सकला।</verse>
				<verse number="27">केवल इतुक करा कि तुमोरो चाल-चलन मसीह का सुसमाचार का अनुसार हो, चाहे मैं तुमून आभेरन देखू या नै देखू, तुमार बारिमें बश यो सुणू कि तुम एक इरादा में मजबूत हो भेरन, और एक मन होभेरन सुसमाचार का विश्वास खिन मेहनत करनै रूछो।</verse>
				<verse number="28">और कोई बात में तुम बिरोध करून वालान है नै डरना। तुमेरि हिम्मत उनून खिन बिनाश की साफ निशानी छै, लेकिन तुमून खिन परमेश्वरा का तरफ भटे मुक्ति को इशारा छै।</verse>
				<verse number="29">क्याखिनकि तुम लोगून नै केवल मसीह में विश्वास करून खिन, बल्कि उक कारण दुख सहन करून खिन बरदान मिलीना को छै।</verse>
				<verse number="30">और तुमून ऊसोई दुख उठून ले छै जसो तुमूले मैंस उठून ले देख रैछ, जब मैं तुमार दगाड़ फिलिप्पी शैहर में छ्यूँ, और जिन दुखून का बारिमें तुम सुणछा जो मैंस जेल में ऐल ले छन।</verse>
			</chapter>
			<chapter number="2">
				<verse number="1">अगर तुम लोगून मसीह में थ्वाड़ा ले भरोस और प्रेम में तसल्ली और पवित्र आत्मा को दगाड़ छै, और किलैकी मसीह तुमून खिन करूणामय और दयालु छै,</verse>
				<verse number="2">त एक दगाड़ रैभेरन और एक्कै प्रेम, एक्कै मन, और एक इरादा राँख भेरन मेरि यो खुशी पुर करा।</verse>
				<verse number="3">अपून फैदा खिन और घमण्ड में केले जन करा, लेकिन जतुक समान तुम अपूनो आप स दीछा उ है ज्यादा सम्मान दुसरान दी।</verse>
				<verse number="4">हरेक अपूनी भलाई खिन नै, ले दुसरा की भलाई की ले फिकर करा।</verse>
				<verse number="5">जसो यीशु मसीह को स्वभाव छ्यो ऊसोई तुमोरो ले स्वभाव हो;</verse>
				<verse number="6">हालाकि मसीह परमेश्वर छ्यो, फिरले उले परमेश्वरा का बराबर हुना को अपून अधिकार बनायी राखून ठीक नै समझयो।</verse>
				<verse number="7">लेकिन उले अपून आप स इसो शून्य कर दीछ और एक आदिमी बन ग्यो।</verse>
				<verse number="8">और आदिमी का रूप में आभेरन अपून आप स दीन करछ्य, और परमेश्वरा का हुकमून मानून खिन उ मरून खिन ले तैयार छ्यो, या तक कि सूली की मौत एक अपराधी की नियाति सह लीछ।</verse>
				<verse number="9">येक कारण परमेश्वर ले ऊस सबून है ऊची पदवी दीछ, और ऊस उ नाम दीछ जो सब नामून में महान छै,</verse>
				<verse number="10">जो स्वर्ग में और धरती में और जो धरतीका तलि छन; उन सब यीशु का नामोको सम्मान करून खिन घुणा टेकाला,</verse>
				<verse number="11">और पिता परमेश्वर की महिमा खिन हरेक अपून मुँख ले यो मान ले कि यीशु मसीह प्रभु छै।</verse>
				<verse number="12">येक कारण हे प्रिय दगड़ियो, तुमून ले हमेशा म्यारा हुकुमून को पाल करछ्य, जब मैं तुमार दगाड़ छ्यू। अब जब मैं दूर छूँ, त यो और ले जरूरी छै, कि तुम परमेश्वरो को डर मानून और काँपूनै अपूना उद्धारा कामून करून चैछो, जो उन लोगून खिन ठीक छन, जिनून परमेश्वर ले बचा लीछ।</verse>
				<verse number="13">क्याखिनकि परमेश्वरई छै, जो तुमूनै में काम करूनमर्योछ, तुमून उ करना की इच्छा और ताकत दीनै रियोछ जो ऊस खुश करछो।</verse>
				<verse number="14">सब काम बिना कुड़कुड़ाई और बिना बहस करा;</verse>
				<verse number="15">ट्याड़ा और बेईमान लोगून ले भरिना का संसारा में तुम परमेश्वरा का निकी सन्तान नियाती निर्दोष और साफ सुथरो जीवन जीया, और जिनारा बीच तुम जीवनो को बचन लीभेरन यो संसारा में जलीना का दीया नियाती दिखाई दीछा</verse>
				<verse number="16">जब मसीह दुबारा वापस आलो तब यो बात में घमण्ड कर सकूँलो कि मेरि कोशिश और मेरि मेहनत बेकार नै गै।</verse>
				<verse number="17">प्रभु में तुमोरो विश्वास और तुमेरि सेवा परमेश्वर स चढ़ाईना को बलिदान की नियाती छै। अगर उन मैंस मार ले दीयून, त ले मैं खुश छूँ, और तुम सबून का दगाड़ खुशी मनू छूँ।</verse>
				<verse number="18">उसीकैं तुम ले खुश हो, और म्यारा दगाड़ खुशी मना।</verse>
				<verse number="19">मैंस प्रभु यीशु में उमीद छै, कि मैं तीमुथियुस तुमार पास जल्दी भेजूलो, ताकि तुमार बारिमें सुणिभेरन म्योरो हौंसला बढ़ौ।</verse>
				<verse number="20">येक कारण म्यारा नजरून में तीमुथियुस को जसो दुसोरो कोई आदिमी नाहातिन, जो सच्ची में मेरि जसी तुमेरि चिन्ता कर सकौ।</verse>
				<verse number="21">क्याखिनकि सब अपून फैदा की खोज में रूनान, लेकिन उन यीशु मसीह का कईना का बातुन का बारिमें चिन्ता नै करना।</verse>
				<verse number="22">लेकिन तुम जाणछा कि तीमुथियुस ले खुद कसीकैं साबित करिना को छै। जस तरीका ले एक च्योलो अपून बबा का दगाड़ रूछो, उसीकैं सुसमाचार सुणून में फैलून में म्योरो दगड़ो दीछ।</verse>
				<verse number="23">येक कारण मैंस उमीद छै कि जसीकैं मैंस पत्तो लाग जालो कि मेरि की दशा होलि, उसीकैं मैं ऊस जल्दी तुमार पास भेज द्यूलो।</verse>
				<verse number="24">और प्रभु में मैंस उमीद छै कि मैंले जल्दी तुमार पास उलो।</verse>
				<verse number="25">लेकिन मैंले इपफ्रुदीतुस स तुमार पास भेजून जरूरी समझछ्य। जो म्योरो विश्वासी भाई छै, और प्रभु में म्यारा दगाड़ सेवा करून वालो और दगड़िया योद्धा और तुमार संदेश पुजून वालो, और जरूरी बातुन में म्योरो सेवा टहल करून वालो।</verse>
				<verse number="26">उ मन तुम सब में लागिना को छ्यो, उ येक कारण बैचेन रूछ्यो। क्याखिनकि तुम लोगून उकी बिमारी को पत्तो चल ग्यो छ्यो।</verse>
				<verse number="27">सच्ची मैं उ भौत बिमार छ्यो और याँ तक कि मरून वालो छ्यो; लेकिन परमेश्वर ले उमें दया करभेरन ऊस चंगो करछय। परमेश्वर ले केवल उमें नै लेकिन मैंमें ले दया करछय, ताकि मैं उहै ले ज्यादा दुख सहन नै करूँ जतुक मैंले पैल सहन करिना को छ्यो।</verse>
				<verse number="28">येक कारण मैं ऊस तुमार पास भेजना की भौत कोशिश करछ्य, तुम ऊस फिर मिलभेरन खुशी हो जा, और मेरि चिन्ता ले कम है ज्यौ।</verse>
				<verse number="29">येक कारण तुम प्रभु में उको दगाड़ भौत खुशी का दगाड़ मिल्या, तुमून उको और उक जसा लोगून को सम्मान करून चैछो।</verse>
				<verse number="30">क्याखिनकि उ मसीह का काम खिन अपून प्राणस खतरा में डालभेरन मौता का नजिक आ गैछ्यो। ताकि उ उन तरिकान ले मेरि मद्दत कर सकौ जो तुम नै कर पान मरैछा क्याखिनकि तुम भौत दूर छा।</verse>
			</chapter>
			<chapter number="3">
				<verse number="1">येक कारण हे म्यारा प्रिय दगड़ियो, प्रभु में खुश रौ। उई बातुन बार-बार तुमून लिखून में मैंस केले परेशानी नाहातिन, लेकिन यो बात तुमून झूठ्ठी शिक्षान भटे बचुछी।</verse>
				<verse number="2">उन बुरा लोगून है सतर्क रौ, जो जंगली कूकुरुन की नियाती खतरनाक छन, और उन लोगून है सतर्क रौ, जो कुंनान, उद्धार पान खिन खतना करून जरूरी छै।</verse>
				<verse number="3">क्याखिनकि परमेश्वरा का सच्चा लोग त हम छा जो परमेश्वर की अराधना उक आत्मा द्वारा करनू, और अपून जीवन में यीशु मसीह का दगाड़ एकता में खुश हुनू और हम अपून शरीरा का द्वारा करिना का कामून में विश्वास नै राखना।</verse>
				<verse number="4">लेकिन मैं त अपूनी कोशिशून में भरोसा राँख सकछूँ। अगर कोई और स अपून कोशिशून में भरोसा राँखना को बिचार हो त मैं उ है बढ़भेरन राँख सकछूँ।</verse>
				<verse number="5">जब आठ दिना को छ्यू त म्योरो खतना भ्योछ, जसो परमेश्वर ले हुकुम दीईना को छ्यो, इस्राएल को वंश और बिन्यामीन गोत्र को छूँ। और म्यारा सब पूर्वज यहूदी छ्या, येक कारण मैंले एक यहूदी छूँ। जाँ तक मूसा नियम-कानून को पालन करना की बात छै त मैं एक फरीसी आदिमी छूँ।</verse>
				<verse number="6">और जोश का बारिमें क, त विश्वासीन सतूनवाला; और यहूदीन को नियम-कानून को पाल करून की बात छै, त मैं एक धर्मी आदिमी छ्यू क्याखिनकि मैंले उन सबून को पालन करछ्य।</verse>
				<verse number="7">लेकिन जो-जो बात म्यारा फैदाक छ्या, उनून मैंले मसीह स जाणून खिन बेकार समझ लीछ।</verse>
				<verse number="8">क्याखिनकि यीशु मसीह स जाणून बाकि सब चीजून है कई बढ़भेरन छै, मैं सब चीजून बेकार समझछूँ। जैका कारण मैंले सब चीजून छोड़ दीयान, और उनून कूड़ो समझछूँ, ताकि मैं मसीह जाण सकूँ।</verse>
				<verse number="9">ताकि मैं उक दगाड़ मिलभेरन रै सकूँ। मैंस अपूनी धार्मिकता ले नै, जो मूसा का नियम-कानून भटे मिलछी, लेकिन उ धार्मिकता ले जो मसीह में विश्वास करना का जरियाले परमेश्वर भटे मिलछी।</verse>
				<verse number="10">मैं यो चाछूँ कि मसीह स जाणू लीयू। और उक मरिना में भटे ज्यून हुना की सामर्थ स महसूस कर सकूँ, और उक दुख में शामिल भेरन उकी मौत में उको जसो बनज्यू।</verse>
				<verse number="11">ताकि मैंले मरिना का बाद दुबारा ज्यून करि जूलो।</verse>
				<verse number="12">मैं यो दावा नै करनू कि मैंले यो सब पैलि भटे पा लियान, मैं उ सिद्धता स पान खिन भौत कोशिश करून मरयूँ। लेकिन मैं उन चीजून पान खिन अघिल कै बढ़नै जान मरयूँ, ताकि मैं सिद्ध होज्यू, जैक खिन यीशु मसीह ले मैंस चुन रैछ।</verse>
				<verse number="13">हे म्यारा विश्वासी भाईयों, म्योरो कुंना को मतलब यो नाहातिन कि मैं उन लक्ष्य स पा चुक ग्यू, लेकिन सिर्फ यो काम करछूँ, कि जो पैलि हो चुक ग्योछ, मैं ऊस भुलभेरन अघिल कैं बढ़भेरन, भविष्य में लक्ष्य खिन कड़ी मेहनत करून जारी राखछूँ।</verse>
				<verse number="14">लक्ष्य का तरफ दौड़नै जाछूँ, ताकि उ ईनाम पा सकूँ, जैखिन परमेश्वर ले मैंस यीशु मसीह का जरियाले स्वर्ग खिन बुला रैछ।</verse>
				<verse number="15">हमून में जतुक आत्मिक रूप ले मजबूत छा, उई बिचार राँखो, और अगर कोई बात में तुमार और बिचार हुन त परमेश्वर ऊस ले तुमून में प्रगट कर द्योलो।</verse>
				<verse number="16">येक कारण हमून उ सच्चाई का अनुसार जीन चैछो, जैस परमेश्वर ले पैलि भटे हमून में प्रगट ले करछ्य।</verse>
				<verse number="17">हे प्रिय दगड़ियो, तुम सब मिलभेरन म्योरो जसो ब्यवहार करा, और उनून पछ्याण, जो इसा प्रकारो को ब्यवहार करनान जको उदारण हमून में पाछा।</verse>
				<verse number="18">क्याखिनकि भौत लोग इसो ब्यवहार करनान, जिनेरि चर्चा मैंले तुमूनथैं बार-बार कर रैछ और अब ले रो-रो भेरन करछूँ, कि उन अपून ब्यवहार ले मसीह का बलिदान का बैरी बन जानान।</verse>
				<verse number="19">उनोरो अन्त विनाश छै, और उनार शरीरा का इच्छाई उनोरो ईश्वर छै, उन अपून बुरा कामून में घमण्ड करनान और उन हमेशा संसारा की चीजून का बारिमें सोचनै रूनान।</verse>
				<verse number="20">लेकिन हमोरो स्वदेश त स्वर्ग में छै; और हम अपूना मुक्तिदाता प्रभु यीशु मसीह का स्वर्ग भटे वापस उनाक इन्तजार करूनमर्या।</verse>
				<verse number="21">प्रभु यीशु मसीह अपूनी उ सामर्थ का अनुसार, जैका जरिया उ हर एक चीज स अपून बश में कर सकछो। हमार कमजोर शरीरो को रूप बदलभेरन, अपूनी महिमा का शरीरा का अनुसार बदल द्योलो।</verse>
			</chapter>
			<chapter number="4">
				<verse number="1">हे म्यारा प्यारा दगड़ियो, मैं तुमून भौत प्रेम करछूँ और तुमूनथैं मिलून चांछूँ, जो मेरि खुशी और ईनाम छै। येक कारण हे म्यारा प्यारा दगड़ियो, प्रभु में मजबूत विश्वास राँखा।</verse>
				<verse number="2">मैं यूओदिया और सुन्तुखे, द्वीवै बैनिनथैं बिनती करछूँ, कि प्रभु में एक दुसारा थैं मिलभेरन रौ।</verse>
				<verse number="3">हे सच्चा दगड़ियो सुन्तुखे, मैं तैथैं ले बिनती करछूँ, कि तैं इन स्यैनिन का मेल मिलाप करून में मद्दत कर। किलैकी उनूनले म्यारा दगाड़ सुसमाचार फैलून में, क्लेमेंस और म्यारा दगड़ियान ले म्यारा दगाड़ हिम्मत करछ्य, जिनारा-जिनारा नाम जीवन की किताब में लिखीना का छन।</verse>
				<verse number="4">प्रभु में हमेशा खुश रौ। मैं फिर कुछूँ, खुश रौ!</verse>
				<verse number="5">सब लोग तुमोरो दीन स्वभाव स जाण जून। प्रभु को वापस उनो नजिक छै।</verse>
				<verse number="6">केले बात की चिन्ता जन करा, लेकिन हरेक बात में प्रार्थना और बिनती करा, परमेश्वर स बता की तुमून कि चैंछो, और उक द्वारा करिना का सब कामून खिन उको धन्यवाद करा।</verse>
				<verse number="7">तब परमेश्वरकि शान्ति, जो आदिमी समझ है बिलकुल भ्यार छै, तुमार मन ओर बिचारून यीशु मसीह में रक्षा करली।</verse>
				<verse number="8">येक कारण हे प्रिय दगड़ियो, तुम अपूनो ध्यान उन बातुन में लगा, जो-जो बात सच्ची, आदरणीय, भलि पवित्र, निकी, और मन स भान वाली, जो बड़िया और तारीफ की बात छन और तुमारा उन बातुन में लाग रून।</verse>
				<verse number="9">तुम लोगून ले मैंथैं सिखछै, ग्रहण करछ्य, सुणछै और मैंमें देखछै, उनार अनुसार चला, तब शान्ति को परमेश्वर तुमार दगाड़ रलो।</verse>
				<verse number="10">मैं प्रभु में भौत खुश छूँ कि अब इतुक दिनून का बाद तुमार मन म्यारा बारिमें रूपाया भेजना को फिर बिचार भ्योछ। सच्ची में तुमून शुरू भटे ले येको बिचार छ्यो, लेकिन तुमून मौक नै मिलौ।</verse>
				<verse number="11">इसो नाहातिन कि मैंस कभै जरूरत छी, क्याखिनकि मैंले सिखीना को छै कि म्यारा पास जो कुछ ले छै उमें खुश रून छै।</verse>
				<verse number="12">मैंस पत्तो छै कि थ्वाड़ा हुन में और जरूरत है ज्यादा हुन में कसीकैं जीन चैछो। मैंले हर हाल में खुश छूँ, जब म्यारा पास खान खिन भौत कुछ हुछो, और जब म्यारा पास खान खिन भौत थ्वाड़ा हुछो द्वीवै हाल में रून सिख हैछ।</verse>
				<verse number="13">मसीह का जरियाले जो सामर्थ मैंस दीछो, उमें मैं सब कुछ कर सकछूँ।</verse>
				<verse number="14">तब ले तुमूले निको करछ्य, कि मैंस रूपाया भेजभेरन म्यारा तखलीफ में मेरि मद्दत करछ्य।</verse>
				<verse number="15">हे फिलिप्पी शैहरा का रूनवाला लोगो, तुम खुद जाणछा, कि जै बखत मैंले मसीह को सुसमाचार तुमून सुणाछ, और मैं मकिदुनिया प्रदेश खिन वाँ भटे गयूँ, त सिर्फ तुम विश्वासी लोग छ्या जिनूनले लेन-देन में मेरि मद्दत करछ्य।</verse>
				<verse number="16">इसीकैं जब मैं थिस्सलुनीके नगर में छ्यूँ; तब ले तुमूनले मेरि जरूरत पुरी करून खिन कई बार मैंखिन रूपाया भेजियान।</verse>
				<verse number="17">मैं यो येक कारण नै कुंनू कि मेरि मद्दत रूपयान ले करा, लेकिन मैं चाँछू की येस उन चीजून की सूची में शामिल करि जो तुमून पैलि कर चुक गैछा और जै खिन परमेश्वर तुमून ईनाम द्याला।</verse>
				<verse number="18">म्यारा पास सब कुछ छै, बल्कि जरूरत है ले ज्यादा छै; जो चीज तुमूले इपफ्रुदीतुस हात भटे भेज छ्ये उनून पाभेरन मैं संतुष्ट छूँ, मैंखिन तुमोरो दान मीठा खुशबुदार बलिदान की नियाती छै, जो याजक परमेश्वर खिन चढ़ूछो, जैस परमेश्वर ग्रहण करछो और उले खुशी ले हुछो।</verse>
				<verse number="19">और म्योरो परमेश्वर ले अपूनो उ धन का अनुसार जो महिमा सहित मसीह यीशु में छै तुमेरि हरेक कमी पुरो करोलो।</verse>
				<verse number="20">हमार पिता परमेश्वर की महिमा हमेशा तलक हुनै रौ। आमीन।</verse>
				<verse number="21">यीशु मसीह में परमेश्वरा का सब लोगून म्योरो नमस्कार कया। जो विश्वासी भाई म्यारा दगाड़ छन उन ले तुमून नमस्कार कुंनान।</verse>
				<verse number="22">परमेश्वरा का सब लोग जो या छन, खास करभेरन जो महाराजा का घराना का विश्वासी छन तुमून नमस्कार करनान।</verse>
				<verse number="23">मैं प्रार्थना करछूँ, कि हमार प्रभु यीशु मसीह का अनुग्रह तुम सबून का दगाड़ हुनै रौ।</verse>
			</chapter>
		</book>
		<book number="51">
			<chapter number="1">
				<verse number="1">मैं पौलुस, जो परमेश्वर की इच्छा का द्वारा यीशु मसीह को प्रेरित छूँ, और विश्वासी भाई तीमुथियुस का तरफ भटे,</verse>
				<verse number="2">मसीह में उन पवित्र और विश्वासयोग्य विश्वासी भाईन का नाम चिठ्ठी लिखूनमरयूँ जो कुलुस्से नगर में रूनान। मैं प्रार्थना करछूँ कि हमार पिता परमेश्वरा का तरफ भटे तुमून अनुग्रह और शान्ति मिलनै रौ।</verse>
				<verse number="3">जब हम तुमून खिन रोज प्रार्थना करनू त हम अपून प्रभु यीशु मसीह और परमेश्वरो को धन्यवाद करनू।</verse>
				<verse number="4">क्याखिनकि हमून ले तुमार बारिमें सुण रैछ, कि यीशु मसीह में तुमोरो विश्वास छै, और तुम सब परमेश्वरा का लोगून का दगाड़ प्रेम राखछा।</verse>
				<verse number="5">तुम यो येक कारण करछा, क्याखिनकि विश्वास और प्रेम की बुनियाद में छै, जो तुमून खिन स्वर्ग में राखिना की छै, जैका बारिमें तुम पैलि भटे सुण चुक गैछा,</verse>
				<verse number="6">यो सुसमाचार पुरी दुनिया में फैलून मर्योछ और कई लोग विश्वासी बनून मर्यान। हर जाग जीन्दगी बदलून मरैछ, ठीक उसीकैं जसकैं कि तुमूले पैलि बार सुसमाचार सुणछ्य और अनुग्रह स समझछ्य कि परमेश्वर उन लोगून का पापून माफ करछो जो मसीह में भरोसा राँखनान।</verse>
				<verse number="7">उकी शिक्षा तुमूले हमार प्रिय दगड़िया इपफ्रास भटे सिखछै, जो हमून खिन मसीह को सच्चो सेवक छै।</verse>
				<verse number="8">उले हमून दुसारा लोगून का प्रति तुमार उ प्रेम का बारिमें जो पवित्र आत्मा ले तुमून दीछ।</verse>
				<verse number="9">येक कारण जे दिन भटे हमून ले सुण रैछ, त हम उ दिन भटे हमेशा तुमून खिन प्रार्थना और बिनती करनै रूनू, कि परमेश्वरो को आत्मा तुमून ज्ञान और समझ दे ताकि तुम परमेश्वर की इच्छा पुरी तरीका ले समझ सका।</verse>
				<verse number="10">हम यो प्रार्थना करनू ताकि तुम इसीकैं जीवन जीया जसो प्रभु का लोगून जीन चैछो, और तुम हर तरीका ले प्रभु स खुश करला। और हर तरीका भल काम करनै रौला, और परमेश्वरा का ज्ञान में बढ़नै जाला।</verse>
				<verse number="11">और हम यो ले प्रार्थना करनू कि परमेश्वर अपूनी महिमा की शक्ति का द्वारा तुमून मजबूत करौ, ताकि तुम हौंसला और खुशी ले अपून दुखून सहन कर सका।</verse>
				<verse number="12">और तुम लोग पिता परमेश्वरो को धन्यवाद करनै रौ, जेले हमून उ मिसरास में शामिल हुन लायक बनाछ, जैस उले स्वर्ग राज्य में परमेश्वरा का लोग खिन तैय्यार कर रैछ।</verse>
				<verse number="13">क्याखिनकि परमेश्वर के हमून शैतान की शक्ति है छुड़ाभेरन अपून प्रिय च्याला का राज्य में ल्याछ।</verse>
				<verse number="14">अपूनो च्याला का बलिदान का द्वारा परमेश्वर ले हमून शैतान की शक्ति भटे आजाद करछ्य और हमार पापून माफ करछ्य।</verse>
				<verse number="15">कोई ले परमेश्वर स नै देख सकूनो, लेकिन जब उको च्योलो एक मनुष्य शरीर में आछ, त उले परमेश्वर स लोगून का सामुनि प्रगट कर दीछ, यो दुनिया का बनून है पैलि उ छ्यो और परमेश्वरे ले जो कुछ ले बनाछ, उमें उको सर्वोच्च छै।</verse>
				<verse number="16">क्याखिनकि यो उई मसीह छै, जेले पुर संसारा का चीजून बुन खिन परमेश्वरा का दगाड़ काम करछ्य, चाहे उ स्वर्ग की हो या धरती की, देखीना का या अनदेखीना का, क्या सिंहासन, क्या प्रभुता, क्या प्रधानता, क्या अधिकार, और सब चीज उक द्वारा उ खिन बनाई ग्यान।</verse>
				<verse number="17">और मसीह सब चीजून का बनून है पैलि छ्यो, और सब चीज उकी इच्छा का अनुसार काम करनान।</verse>
				<verse number="18">मसीह विश्वासी की मण्डली खोरो छै और उ उको आंग छै। मसीह विश्वासी की अगुवाई उसीकैं करछो, जैसे एक आदिमी को खोरो उक आंग स काबू करछो। उ पैलि छै, और मरिनान में भटे ज्यूनो हुन वालो पैल उई छै, कि सब बातुन में उको अधिकार हो।</verse>
				<verse number="19">क्याखिनकि पिता परमेश्वर की खुशी येमें छै कि परमेश्वरो को पुर स्वभाव मसीह में हो।</verse>
				<verse number="20">मसीह ले सूली में खून बगाछ और अपूनो प्राण दीयान, उक द्वारा परमेश्वर ले अपून और सब चीजून का बीच में मेल-मिलाप की शुरूवाद करछ्य, कि मसीह का द्वारा सब चीजून को चाहे धरती में हो या चाहे स्वर्ग में हो अपून दगाड़ मेल कर लीछ।</verse>
				<verse number="21">ये है पैलि तुम लोग परमेश्वर भटे दूर छ्या। तुम परमेश्वरा का दुश्मन छ्या क्याखिनकि तुमारा बिचार और तुमारा काम बुरा छ्या।</verse>
				<verse number="22">लेकिन अब पिता परमेश्वर ले अपून च्याला स आदिमी बनाभेरन और ऊस सूली में मरना का द्वारा तुमार दगाड़ मेल कर लीछ, ताकि तुमून अपून सामुनि पवित्र और निष्कलंक, और निर्दोष बनाभेरन पेश करौ।</verse>
				<verse number="23">अगर तुम मसीह में विश्वास करछा, त तुमोरो विश्वास उमें मजबूत रून चैछो, ठीक उ घरा का नियाती जो मजबूत बुनियाद में बनिना को छै। और हमून उ सुसमाचार में विश्वास करभेरन जो उमीद हमून मिलछी उ जन छोड़ा। जैको प्रचार पुर संसार का लोगून में करि ग्योछ, और सुसमाचार को प्रचार करून खिन, मैं पौलुस सेवक बन्यूँ।</verse>
				<verse number="24">अब मैं उन दुखून का कारण जो तुमार खिन सहन करूमरयूँ, आनन्द मानछूँ। मैं उनार शरीर, मतलब विश्वासीन की मण्डली खिन अपून शरीर में दुखून सहन करछूँ जसो मसीह ले सहन करछ्य।</verse>
				<verse number="25">इन विश्वासीन की मण्डली खिन मैं तुमून खिन परमेश्वरा का द्वारा सौपी गै सेवा खिन सेवक चुनी ग्यू, कि परमेश्वरा का बचनो को पुरी तरीका ले प्रचार कर सकूँ।</verse>
				<verse number="26">मतलब उ गुप्त बाते स जो सदियून भटे और पीढ़ीन भटे गुप्त रैछ, लेकिन अब परमेश्वरा का लोगून में प्रगट भ्योछ।</verse>
				<verse number="27">परमेश्वर ले यो फैसला लीछ कि उक लोग कीमती और महिमा वाली गुप्त रहस्य स जाण सकूँन, जो सब लोगून खिन उक पास छै। यह गुप्त रहस्य मसीह खुद छै जो तुमून में रूछो, केवल उई महिमा खिन हमरि एकमात्र उमीद छै।</verse>
				<verse number="28">हम मसीह को प्रचार करभेरन हरेक आदिमी स परमेश्वरा का उ ज्ञान का द्वारा चेतावनी और शिक्षा दीभेरन समझुनू, ताकि हम यो देख ल्या कि हरेक विश्वासी परमेश्वर के सामुनि ठाड़ हुन खिन मसीह में मजबूत हो ज्यून।</verse>
				<verse number="29">येक कारण मैं उकी उ सामर्थ का अनुसार मन लगाभेरन जो मैंस मसीह का द्वारा मिलछी, और म्यारा भितर काम करछी।</verse>
			</chapter>
			<chapter number="2">
				<verse number="1">मै चाछूँ कि तुम जाणि ली कि तुमार और उनून खिन जो लौदीकिया नगर में छन, और उन सबून खिन जिनूनले मैंस नै देख रै, मैं कतुक मेहनत करछूँ,</verse>
				<verse number="2">मैं इसो येक कारण करछूँ, ताकि तुमोरो विश्वास मजबूत हो जौ, और मैं चाछूँ कि उनून पुरो भरोसा हो क्याखिनकि उनून परमेश्वरो को गुप्त रहस्य की पुरी समझ छै, जो खुद मसीह छै।</verse>
				<verse number="3">योई उई छै जो बुद्धि और ज्ञान को पछयाण करूछो जो कि उ खजाना कि नियाती छै जो लुकीना को छ्यो।</verse>
				<verse number="4">यो मैं येक कारण कुछूँ, कि कोई आदिमी तुमून झूठ्ठी बातुन में विश्वास करून खिन राजी करभेरन ध्वाका जन दी</verse>
				<verse number="5">अगर मैं तुमून हैं दूर छूँ, तो ले मैं तुमार बारिमें सोच छूँ, और खुश हुछूँ, कि तुम उसीकैं जीन मरेछा जसो तुमून जीनो चैछो, और तुमोरो विश्वास मसीह में मजबूत छै।</verse>
				<verse number="6">येक कारण, जैस तुम ले मसीह यीशु स प्रभु करभेरन ग्रहण कर हालछ्य, उसीकैं उमें बनिना का रौ।</verse>
				<verse number="7">जसकैं एक रूख जमीन में जड़ पकड़छो और एक घर नींव में मजबूत रूछो उसीकैं तुम अपून विश्वास में मजबूत हुनै जा, और लगातार उमें बढ़नै जा, जसो तुमून सिखा रैछ और ज्याद है ज्यादा धन्यवाद करनै रौ।</verse>
				<verse number="8">ध्यान राँखा कि कोई तुम लोगून उन बेकार शिक्षान ले मूर्ख नै बनौ। यो बेकार शिक्षा सुणून में त ज्ञान की लागनान, क्याखिनकि यो शिक्षा संसारा लोगून का तरफ भटे छै, पर मसीह का तरफ भटे नाहातिन।</verse>
				<verse number="9">येक कारण इन लोगून भटे ध्वाका जन खा, क्याखिनकि जब मसीह आदिमी बनछ्य तब ले उ पूर्ण रूप ले परमेश्वर छ्यो।</verse>
				<verse number="10">मसीह हरेक शक्ति और अधिकार में हकुमत राँखछो। येक कारण अगर तुम मसीह भटे जुड़ीना का छा, त तुम पुर मसीह में छा।</verse>
				<verse number="11">जब तुमूले मसीह में विश्वास करछ्य, त तुमोरो खतना लोगून का द्वारा नै करि ग्योछ, लेकिन उ खतना होईना को छै जो मसीह का द्वारा करि ग्योछ, जो कि तुमार पापी स्वभाव स काट भेरन दूर करछो।</verse>
				<verse number="12">जब तुमूले बपतिस्मा लीछ, त तुमोरो पापी स्वभाव मसीह का नियाती दफना दीई ग्योछ, और जैस मसीह मरिन में भटे ज्यून भ्योछ उसीकैं तुम ले एक नय्या स्वभाव का दगाड़ ज्यून भैछा। यो येक कारण भ्योछ क्याखिनकि तुमूले विश्वास करछ्य कि परमेश्वर ले अपून सामर्थ का द्वारा मसीह स मरिनान में भटे कर दीछ।</verse>
				<verse number="13">और उले तुमून ले, जो अपून अपराधून, और खतना का नियाती तुमार बुरा स्वभाव काटि नै ग्योछ, परमेश्वर ले हमार सब पापून माफ करभेरन मसीह का दगाड़ ज्यून करछ्य।</verse>
				<verse number="14">यो इसो छ्यो जसो परमेश्वर ले हमार पापून को चिट्ठा मिटा दीछ, जेमें हमार खिलाफ अपराध लिखी ग्यान। जब मसीह सूली पर चढ़ाई ग्योछ तब उले ऊस दस्तावेज स पुरी तरीका ले हटा दीछ।</verse>
				<verse number="15">और परमेश्वर ले मसीह का सूली में मरना का द्वारा संसार का अधिकारीन की शक्ति स हराभेरन उनोरो सबून का सामुनि तमाशा बना दीछ, और उमें जीत हासिल करभेरन भौत खुशी मनाछ।</verse>
				<verse number="16">ध्यान राँख्या कि कोई तुमोरो खान-पिन या पर्व या नय्या चाँद, या सबता का दिनून का बारिमें तुम कोई फैसला जन करा।</verse>
				<verse number="17">क्याखिनकि उन सब नियम-कानून सिर्फ एक छाया की नियाती छै। लेकिन हकीक्त में सब कुछ मसीह छै</verse>
				<verse number="18">कोई ले आदिमी, जो झूठ्ठी दया और स्वर्गदूतून की अराधना में लीन छन, उ तुमून तुमार ईनाम भटे दूर नी कर पाला। इसो आदिमी देखीना का बातुन में लाग रूनान और उको पापी स्वभाव ऊस बिना कोई कारण का घमंडी बना दीछो।</verse>
				<verse number="19">उन यीशु मसीह का दगाड़ बनभेरन नै रै सकना, जो पुर शरीरो को खोरो छै। जसीकैं शरीर सारा जोड़ और नस शरीर का दगाड़ बनभेरन रूनान, उसीकैं तुम ले मसीह का दगाड़ मिल-जुल भेरन रया, क्याखिनकि शरीरो को अंग परमेश्वरा का तरफ भटे बढ़नै जानान।</verse>
				<verse number="20">जब भटे तुमोरो पापी स्वभाव मसीह का दगाड़ मरग्योछ, त यो संसार का शिक्षान मानना की जरूरत नाहातिन। येक कारण तुम आजि ले इन शिक्षान पालन करछा, जेले लागछो कि तुम आजि ले यो संसारा का बश में छा?</verse>
				<verse number="21">उन इसो सिखूना कि “इसा तरीका की चीजून में हात जन लगाया, और नै इसा खाना स खाया, या तक इसी चीजून छूया ले जन।”</verse>
				<verse number="22">क्याखिनकि यो सब नियम-कानून बेकार और के कामा का नाहातिन, क्याखिनकि यो आदिमीन का हुकुम और शिक्षा का अनुसार छन।</verse>
				<verse number="23">इसो लागछो यो नियम-कानून त सच्चाई बाट में ली जानवाला लागनान मतलब अपून आप स जबरदस्ती परमेश्वरो को भक्त बनूना का द्वारा, झूठ्ठी दया का द्वारा और अपून शरीर का दगाड़ बुरा ब्यवहार का द्वारा। लेकिन जब लोग इन नियम-कानून को पालन करनान, तब ले उ अपूनो पापी स्वभाव स नै रोक सकूँना।</verse>
			</chapter>
			<chapter number="3">
				<verse number="1">येक कारण जब तुम मसीहक दगाड़ मरिनान में भटे ज्यून चीजून की इच्छा करनै रौ, जो परमेश्वर ले तुमून खिन स्वर्ग में राखिना की छै, जा मसीह यो बखत परमेश्वरा का दैन तरफ विराजमान छै।</verse>
				<verse number="2">संसार का चीजून में नै पर स्वर्गीय चीजून की इच्छा करनै रौ, जो परमेश्वर ले तुमून खिन स्वर्ग में राखिना की छै।</verse>
				<verse number="3">क्याखिनकि तुम त अपून पापी स्वभाव में मर गैछ्या, और तुमोरो नय्या जीवन मसीह का दगाड़ परमेश्वर में लुकीना को छै।</verse>
				<verse number="4">जब मसीह, जो तुमून नय्या जीवन दीछो, जब उ यो संसार में वापस आलो, तब तुमूले उक दगाड़ आला और तुम उकी महिमा में भागीदार होला।</verse>
				<verse number="5">येक कारण अपून उन कामून छोड़ दी जो तुमार पापी स्वभाव भटे जुड़िनाक छन, जो संसार में छन, मतलब व्यभिचार, अशुद्धता, दुष्कामना, बुरी इच्छा और लोभी जन बना जो मूर्ति पूजा का बराबर छन।</verse>
				<verse number="6">क्याखिनकि लोग इन बुरा कामून करनान, येक कारण परमेश्वर जरूर इन लोगून कड़ी सजा द्योलो।</verse>
				<verse number="7">और तुम ले जब इन बुराईन में जीवन बितूछ्या, त तुम ले योई बुरा काम करछ्या।</verse>
				<verse number="8">लेकिन अब तुम ले इन सबून मतबल गुस्सा, गुस्सा वाला ब्यहार, बैर-भाव, निन्दा और मुँख भटे गाली बकूनो, यो सारा बुरा काम छोड़ दी।</verse>
				<verse number="9">एक दुसारा थैं झूठ जन बोला, क्याखिनकि तुमून ले अपूनो पुरानो पापी स्वभाव और सारा बुरा कामून छोड़ हैछ।</verse>
				<verse number="10">और अब तुमले नय्या स्वभाव पा हैछ, यो नय्या स्वभाव ज्यादा है ज्यादा अपून बनून वाला परमेश्वर नियाती हो जाछो और येक कारण उ निकीकैं समझोलो।</verse>
				<verse number="11">उमें नै त यूनानी और यहूदी का बीच फरक रियो, नै यहूदी का बीच, नै खतना, नै खतना रहित, नै परदेशी, नै जंगली, नै दास और नै गुलाम रियो, केवल मसीह सबून है महान छै, जो हम सबून में रूछो।</verse>
				<verse number="12">येक कारण परमेश्वर ले तुमून अपून पवित्र लोग हुन खिन चुनिना को छै और तुमून प्रेम करछो, भौत करूणा, और भलाई, और दीनता, और भौत नम्र स्वभाव और खुद में सहन करना की ताकत राँखा।</verse>
				<verse number="13">और अगर कैसे कैमें दोष लगूना को केले कारण हो, त एक दुसरा की सह ली, और एक दुसरा का अपराध माफ करा; जसा प्रभु ले तुमार अपराध माफ कर्यान, उसीकैं तुमूले करा।</verse>
				<verse number="14">लेकिन सबून है ठूली बात यो छै, कि आपस में एक दुसरा थैं प्रेम भाव राँखा। इसो करभेरन तुम पुर तरीका ले एकजुट हो जाला।</verse>
				<verse number="15">उ शान्ति जो मसीह दीछो ऊस अपून दिल में राजा करून दी। क्याखिनकि तुम सबै एक्कै शरीरा का अंग छा और येक कारण तुमून एक दुसरा का दगाड़ शान्ति रून खिन बुलाई ग्योछ और हमेशा परमेश्वरो को धन्यवाद करनै रौ।</verse>
				<verse number="16">हर बखत तुम मसीह का बचनून का बारिमें सोचनै रौ, ताकि जो कुछ ले करछै और सोचछै, ऊस काबू में राँखा। और भौत समझदारी ले एक दुसरा स सिखा, और सलाह दी, और अपून-अपून मन में धन्यवाद करभेरन परमेश्वर खिन भजन किरतन और आत्मिक गीत गानै रौ।</verse>
				<verse number="17">तुम बोलून में, या काम में जेके ले करछा सब प्रभु यीशु का नाम ले करा, और उक द्वारा पिता परमेश्वरो को धन्यवाद करा।</verse>
				<verse number="18">हे घरवालीयो, तुमून अपून घरवाला का अधिकार में रून चैछो क्याखिनकि प्रभु यीशु में विश्वास करून वालान इसो करून ठीक ले छी।</verse>
				<verse number="19">हे घरवालो तुम अपून घरवाली का दगाड़ प्रेम राँखा, और उनार दगाड़ निको ब्यवहार करा।</verse>
				<verse number="20">हे नान्तिनो, तुम सब बातुन में अपून-अपून ईजा-बबा हुकमून को पालन करा, क्याखिनकि प्रभु इनी बातुन ले खुश हुछो।</verse>
				<verse number="21">और हे ईज-बाबो, अपून नान्तिनान बार-बार तंग जन करा, काँई इसो नै हो कि उनोरो दिल टुटी जौ।</verse>
				<verse number="22">हे दासो, मेरि सलाह यो छै कि तुम सारी बातुन में उन लोगून को हुकमो को पालन करा, जो यो संसार में तुमार अधिकारी छन। उनार नियाती नै, जो आदिमीन खुश करनू खिन इसो करनान, लेकिन परमेश्वरा का डर में और सच्चाई में करा,</verse>
				<verse number="23">और जेके ले तुम करछा, ऊस पुर दिल ले करा, यो समझभेरन कि लोगून खिन नै लेकिन प्रभु खिन करछा।</verse>
				<verse number="24">याद राँखा कि प्रभु यीशु मसीह तुमून ईनाम द्योलो, जो यो छै कि उ तुमून आशीषून में हिस्सा द्योलो जिनून उले अपून सब लोगून खिन तैयार करछय। तुम जो मालिक सेवा करून मरेछा उ मसीह छै।</verse>
				<verse number="25">क्याखिनकि जो बुराई करछो, परमेश्वर ऊस सजा द्याला, परमेश्वर वाँ केको ले पक्षपात नी करोलो।</verse>
			</chapter>
			<chapter number="4">
				<verse number="1">हे मालिकों, स्वर्ग में तुमोरो ले एक मालिक छै, यो समझभेरन, अपून-अपून दासून का दगाड़ न्याय और एक जसो ब्यवहार करा।</verse>
				<verse number="2">तुम सतर्क हो भेरन प्रार्थना में लगातार लाग रौ, और हमेशा परमेश्वरो को धन्यवाद करनै रौ।</verse>
				<verse number="3">और येक दगाड़ हमून खिन ले प्रार्थना करनै रया, कि परमेश्वर हमून खिन वचन सुणना को इसो द्वार खोलि द्यो, कि हम मसीह का उ भेद बता सकाँ जैका कारण में जेल में छूँ,</verse>
				<verse number="4">येक कारण तुम प्रार्थना करा, कि मसीह का उ भेद स साफ तरीका ले और खुला तौर में समझ सकूँ, जैस मैंस करून ठीक छै।</verse>
				<verse number="5">अपून हर मौकास जो तुमून मिलछो कीमती जाणिभेरन संसार का लोगून का दगाड़ बुद्धिमानी ले ब्यवहार करा।</verse>
				<verse number="6">तुमार बोल हमेशा निका और मीठा हुन चैछो, ताकि तुमून अपून विश्वासा का बारिमें हर आदिमी स सही तरीका ले जबाब दीन आ जौ।</verse>
				<verse number="7">प्रिय विश्वासी भाई और विश्वासयोग्य सेवक, तुखिकुस, जो प्रभु में म्यारा दगाड़ काम करून वालो छै, मेरि सब बात तुमून बता द्योलो।</verse>
				<verse number="8">ऊस मैंले येक कारण तुमार पास भेज रैछै, कि तुमून उथैं भटे जाण पाला कि हमार दगाड़ कि हुन मर्योछ, और उ तुमून विश्वास में मजबूत करौ।</verse>
				<verse number="9">और उक दगाड़ मैंले उनेसिमुस ले भेज रैछै; जो विश्वासयोग्य और प्रिय भाई तुमार याई भटे छै। यो तुमून याँ कि सारी बात बता द्याला।</verse>
				<verse number="10">अरिस्तर्खुस, जो म्यारा दगाड़ जेल में बन्द छै, और यहूना मरकुस जो बरनबास को भांजो मरकुस तुम लोगून नमस्कार कुंछो। (मैं जाणछूँ कि तुमून पैलि मरकुस का बारिमें बताईना को छ्यो, त उक दगाड़ बड़िया ब्यवहार कर्या।)</verse>
				<verse number="11">यीशु, जैस लोग यूस्तुस ले कुंनान, तुमूनथैं नमस्कार कुंछो। यहूदी विश्वासी लोगून में भटे बश योई तीन लोग परमेश्वरा का राज्य खिन म्यारा दगाड़िया छन जो हिम्मत दीनान।</verse>
				<verse number="12">इपफ्रास, जो तुमार या को छै, और यीशु मसीह को दास छै, तुमून नमस्कार करछो। और हमेशा तुमून खिन लगातार प्रार्थना करछो, जेले तुम लोग सब बातुन में सिद्ध होभेरन पुर विश्वास का दगाड़ परमेश्वर की इच्छा में मजबूत रौ।</verse>
				<verse number="13">मैं उको गवाह छूँ, कि उ तुमून खिन और लौदीकिया और हियरापुलिस शैहरा का लोगून खिन लगातार प्रार्थना करछूँ।</verse>
				<verse number="14">और प्रिय डाक्टर लूका और देमास ले तुमून नमस्कार कुंछो।</verse>
				<verse number="15">लौदीकिया नगरा का विश्वासी भाईन-बैनिन और नुमफास और उनार घरा का विश्वासी भाई-बैनिन नमस्कार कया।</verse>
				<verse number="16">और जब यो चिठ्ठी तुमार या पढ़ी जालि, त इसो कर्या कि उक बाद लौदीकिया नगरा का विश्वासीन की मण्डली में ले पढ़ी जौ, और जो चट्ठी लौदीकिया नगर भटे आलि ऊस तुम ले पढ़िया।</verse>
				<verse number="17">फिर अरखिप्पुस थैं कया “कि जो सेवा तैंस प्रभु का तरफ भटे मिल रैछ, ऊस ईमानदारी ले पुरी करे।”</verse>
				<verse number="18">मैं पौलुस अपून हात ले चिठ्ठी में तुमून नमस्कार लिखछूँ। याद राँख्या मैं जेल में छूँ, और मैं खिन प्रार्थना कर्या। मैं प्रार्थना करछूँ कि परमेश्वरो को अनुग्रह तुमून में हुनै रौ। आमीन।</verse>
			</chapter>
		</book>
		<book number="52">
			<chapter number="1">
				<verse number="1">यो चिठ्ठी पौलुस, सिलवानुस और तीमुथियुस का तरफ भटे छै। थिस्सलुनीके शैहरा का विश्वासीन की मण्डली खिन हम लिखूनमर्या, जो पिता परमेश्वर और प्रभु यीशु मसीह का छन। मैं प्रार्थना करछूँ कि परमेश्वर तुमून में अनुग्रह करौ और तुमून शान्ति दे।</verse>
				<verse number="2">हम अपून प्रार्थना में तुमून याद करनै रूनू और हमेशा तुम सबून का बारिमें परमेश्वरो को धन्यवाद करनू।</verse>
				<verse number="3">जब हम पिता परमेश्वर थैं प्रार्थना करनू, त हम उन कामून याद करनू जो तुम विश्वास का कारण करछा, और विश्वासीन की मद्दत करून खिन भौत मेहनत करछा, क्याखिनकि तुम उनून प्रेम करछा, और तुम धीरज का दगाड़ सताव सहछा, क्याखिनकि तुम प्रभु यीशु मसीह का वापस उनाकी आश राँख छा।</verse>
				<verse number="4">हे म्यारा विश्वासी भाईयो, परमेश्वर तुम लोगून का दगाड़ प्रेम करछो, हम जाणनू कि तुमून परमेश्वर ले अपून लोग हुन खिन चुन रैछ।</verse>
				<verse number="5">क्याखिनकि जब हमूनले यीशु मसीह का बारिमें सुसमाचार तुमून बाताछ, त तुमार पास केवल शब्दून मेंई नै बल्कि पवित्र आत्मा का सामर्थ द्वारा पुजछ्य, और तुमूले पुर भरोसा का दगाड़ विश्वास करछ्य। और तुम जाणछा कि जब हम तुमार दगाड़ रूछ्या त हमूनले कसीकैं अपूनो जीवन बिताछ जो तुमार भलाई खिन छ्यो।</verse>
				<verse number="6">तुमूनमें भौत दुख छ्यो लेकिन पवित्र आत्मा का द्वारा दीईना की खुशी दगाड़ तुमूले सुसमाचार स ग्रहण करछ्य। इसीकैं तुमूले हमोरो और प्रभु यीशु मसीह का नियाती जीवन जीन लाग गैछा।</verse>
				<verse number="7">और जैको परिनाम यो भ्योछ, कि तुम मकिदुनिया और अखया प्रदेशून का सब विश्वासीन खिन तुम एक उदारण बन गैछा।</verse>
				<verse number="8">क्याखिनकि तुमार याँ भटे नै केवल मकिदुनिया और अखया प्रदेशून में प्रभु को वचन सुणायी ग्यो, पर तुमोरो विश्वास जो परमेश्वर में छै, हरेक जाग में जाँ हम जानू, वाँका लोगून ले परमेश्वर में तुमार विश्वास का बारिमें हमून बताछ, येक कारण हमून दुसरान तुमार बारिमें केले बतूना की जरूरत नाहतिन।</verse>
				<verse number="9">क्याखिनकि उन लोग दुसरान बतुनान कि जब हम तुमार पास आया तुमूले कसीकैं हमोरो स्वागत करछ्य, और तुम कसीकैं मूर्तिन भटे दूर हो भेरन परमेश्वरा का तरफ आछा ताकि ज्यून और सच्चा परमेश्वर की सेवा करा सका।</verse>
				<verse number="10">और तुम स्वर्ग भटे परमेश्वरा का च्याला स वापस उनाकी उमीद करून मरेछा, जैस परमेश्वर ले मुर्दान में भटे ज्यून करछ्य, मतलब यीशु मसीह स, जो हमून परमेश्वरा का उनवाला क्रोध है बचूछो।</verse>
			</chapter>
			<chapter number="2">
				<verse number="1">हे म्यारा विश्वासी भाईयों, तुम खुद जाणछा कि हमोरो तुमार पास उनो बेकार नै भ्यो।</verse>
				<verse number="2">तुम खुदै जाणछा कि तुमार पास उन है पैलि हमूले फिलिप्पी शैहर में कतुक दुख उठाछ। फिरले परमेश्वर ले हमून इतुक हिम्मत दीछ, कि तुमार शैहरा लोगून का द्वारा हमोरो भौत बिरोध हुना का बाद ले हमूले परमेश्वरो को सुसमाचार तुमून सुणाछ।</verse>
				<verse number="3">क्याखिनकि हमोरो उपदेश नै त ध्वाका को छै और नै कोई गलत इरादा ले और नै छल का दगाड़ छै।</verse>
				<verse number="4">पर जसो परमेश्वरे ले हमून योग्य समझभेरन सुसमाचार सौप रैछ। येक कारण हम लोगून नै बल्कि हमार मन परखून वाला परमेश्वर स खुश करनू खिन उपदेश दीनू।</verse>
				<verse number="5">तुम जाणछा, कि हम नै त कभै चापलूसी बात करछ्या, और नै हमूले कभै रूपयान खिन इसो करछ्य, यो बात को परमेश्वर गवा छै, कि हम इसा लोग नाहातिन।</verse>
				<verse number="6">हम यीशु मसीहक प्रेरित हुना का कारण तुमूनथैं मद्दत पाना को हम हकदार छ्या, फिरले हम लोगूनथैं आदर नै चाँना, और नै तुमूनथैं, और नै कैथैंई।</verse>
				<verse number="7">पर जसीकैं ईजा अपूनी नन्तिना को पालन-पोषण करछी, उसीकैं हमूले तुमार बीच में रैभेरन ऊसोई प्रेम दिखाछ।</verse>
				<verse number="8">हम तुमून इतुक प्रेम करनू कि केवल परमेश्वरो को निको सुसमाचार सुणून खिन नै बल्कि तुमून खिन अपूनो प्राण दिन खिन तैय्यार छ्या, येक कारण कि हम तुमून भौत प्रेम करनू।</verse>
				<verse number="9">हे म्यारा विश्वासी भाईयो, तुम हमार काम और मेहनत स याद राखछा; येक कारण हमूले रात-दिन काम धन्धा करभेरन तुमार बीच में परमेश्वरो को सुसमाचार को प्रचार करछ्य, कि हमून तुमूनथैं भटे के लीना की जरूरत नै पड़ौ।</verse>
				<verse number="10">तुम खुद यो बात का गवाह छा, और परमेश्वर ले गवाह छै, कि तुम सब विश्वासी का दगाड़ हमोरो ब्यवहार कतुक सच्चो और धार्मी और निर्दोष छ्यो।</verse>
				<verse number="11">तुम जाणछा कि जसीकैं एक पिता अपून नान्तिनान का दगाड़ ब्यवहार करछो, ऊसोई हमूले तुम में भटे हरेक स शिक्षा, और तसल्ली दीछ्या, और समझूछ्या।</verse>
				<verse number="12">तुम इसो जीवन जीया जैस देखभेरन परमेश्वर खुश हुछो, जो तुमून अपून राज्य और महिमा में भागीदार हुन खिन बुलूछो।</verse>
				<verse number="13">येक कारण हम ले परमेश्वरो को हमेशा धन्यवाद करनू; कि जब हमार द्वारा परमेश्वरो को सुसमाचार को वचन तुमार बीच में प्रचार करछ्य, त तुमून ले ऊस आदिमीन को नै पर परमेश्वरो को वचन समझभेरन ग्रहण करछ्य, और अब परमेश्वरो को यो वचन तुमार जीवन में काम करूनमर्योछ जो मसीह में विश्वास रखनान।</verse>
				<verse number="14">हे विश्वासी भाईयों, तुम यहूदिया प्रदेशा का विश्वासीन का नियाती बन गैछा, जो यीशु मसीह में विश्वास करनान, क्याखिनकि तुमूले अपून लोगून में ऊसोई सताव सह रैछ, जसो उनूनले यहूदी लोगून का द्वारा सताव सह राख छ्यो।</verse>
				<verse number="15">उन यहूदीन ले प्रभु यीशु स और परमेश्वरो को संदेश दिनवालान लोगून ले मार डालछ्य और हमून ले सताछ, और परमेश्वर उनूहै खुश नाहतिन, और उन सब लोगून को विरोध करनान,</verse>
				<verse number="16">उन हमून गैर-यहूदीन यो बतून है रोकना की कोशिश करून मरैछ्या कि परमेश्वर उनून कसीकैं बचा सकछो और उन पाप में पाप करनै जानान, और अन्त में परमेश्वर उनून सजा द्योलो।</verse>
				<verse number="17">हे म्यारा विश्वासी भाईयों, जब हम तुमून है थ्वाड़ा देर खिन दूर हो गैछ्या, शरीर में त हम दूर छ्या लेकिन हमोरो मन तुमार पास छ्यो, तो हमूले तुमून मिलून खिन और ले ज्यादा कोशिश करछ्य।</verse>
				<verse number="18">येक कारण हम, खास करभेरन मैं पौलुस एक बार नै बल्कि कई बार तुमार पास उन चाछ्यू, लेकिन शैतान ले तुमार पास उन है हमून रोक छै।</verse>
				<verse number="19">हमरि आश, या आनन्द या बड़ाई को मुकुट को छै? उ तुमी होला जब हमोरो प्रभु यीशु दुबारा वापस आला।</verse>
				<verse number="20">हमरि बड़ाई और आनन्द तुमी छा।</verse>
			</chapter>
			<chapter number="3">
				<verse number="1">आखरी में जब हम तुमून देखीना का बिना रै नै सकना। मैं पौलुस और सिलास ले एथेंस शैहर में एकोलो रूना को फैसला करछ्य,</verse>
				<verse number="2">और हमूले तीमुथियुस तुमार पास भेजछ्य, जो मसीह को सुसमाचार में हमोरो भाई और परमेश्वरो को सेवक छै, कि उ तुमार विश्वास स मजबूत करौ, ताकि तुमोरो विश्वास यीशु मसीह में लगातार बनिना को रौ।</verse>
				<verse number="3">कि कोई इन दुखून का द्वारा डगमगा नै जौ। क्याखिनकि तुम पैलि भटे जाणछा कि हमून यो सताव सहन करनै छै।</verse>
				<verse number="4">क्याखिनकि पैलि ले, जब हम तुमार याँ छ्या, त तुमूनथैं कुन भ्या, कि हमून दुख उठून पड़ाला, और इसो भ्योछ, और तुम जाणछा ले।</verse>
				<verse number="5">येक कारण जब मैं और सहन नै कर सकयू, कि यो नै जाणभेरन कि हालात कसा छन, मैंले तीमुथियुस स तुमार पास भेजछ कि तुमोरो विश्वास मजबूत छी या नाहातिनी। मैंस यो बात को डरछ्यो, कि परीक्षा करून वालान शैतान ले तुमेरि परीक्षा करि होलि, और हमरि मेहनत बेकार होगै होलि।</verse>
				<verse number="6">लेकिन अब जब कि तीमुथियुस ले जो तुमार पास भटे हमार पास याँ वापस आभेरन तुमार विश्वास और प्रेम को सुसमाचार सुणाछ, और यो बात स बाताछ कि तुम हमेशा प्रेम ले हमून याद करछा, और हमून देखना की इच्छा करछा जसीकैं हम ले करनू।</verse>
				<verse number="7">येक कारण हे म्यारा विश्वासी भाईयों, हमून अपून सारा दुख और क्लेश में तुमार बारिमें तीमुथियुस थैं सुणभेरन हमून हौंसला मिलछ्य, कि तुम अब तक यीशु मसीह में विश्वास करछा।</verse>
				<verse number="8">क्याखिनकि अब तुम प्रभु का विश्वास में मजबूत बनिना का रौला त यो हमून खिन एक नय्या जीन्दगी छै।</verse>
				<verse number="9">और जसो आनन्द हमून तुमार कारण अपून परमेश्वरा का सामुनि छै, उक बारिमें हम तुमून खिन कसा तरीका ले परमेश्वर धन्यवाद करा?</verse>
				<verse number="10">हम लगातार भौत प्रार्थना करनै रूनू, कि तुमूनथैं दुबारा मिल सका और जो जरूरी छै तुमून सिखा सका, ताकि तुम पुर तरीका ले प्रभु यीशु मसीह में विश्वास कर सका।</verse>
				<verse number="11">हम प्रार्थना करनू कि हमार पिता परमेश्वर और प्रभु यीशु मसीह तुमार पास उन खिन हमून खिन बाटो तैयार करून।</verse>
				<verse number="12">और हम यो ले प्रार्थना करनू कि प्रभु इसो करौ कि, जसो हम तुमून प्रेम करनू, ऊसोई तुम ले एक-दुसारा स प्रेम करा, और सब लोगून में तुमार प्रेम बढ़नै जौ।</verse>
				<verse number="13">और हम प्रार्थना करनू कि हमोरो प्रभु यीशु मसीह तुमार मनून स्थिर करौ कि जब हमोरो प्रभु यीशु अपून सब पवित्र लोगून का दगाड़ दुबारा आलो, त उन हमार पिता परमेश्वरा का सामुनि पवित्रता में निर्दोष ठहरून।</verse>
			</chapter>
			<chapter number="4">
				<verse number="1">आखरी में हे म्यारा विश्वासी भाईयों, हम प्रभु यीशु का नामले तुमूनथैं बिनती करनू और तुमून समझुनू, कि तुम इसीकैं जीवन जीया, जो परमेश्वर स खुश करछो, जसो हमूले तुमून सिखाछ। कि तुम पैलि भटे इसा तरीका जीन्दगी जीछा, और हम तुमून इसो करनै रून खिन और उत्साहित करनू।</verse>
				<verse number="2">तुम जाणछा कि प्रभु यीशु ले हमून जो अधिकार दीईना को छै, उक द्वारा हमूनले तुमून निर्देश दीयान।</verse>
				<verse number="3">पिता परमेश्वरे की इच्छा यो छै कि तुम पवित्र बना और व्यभिचार भटे बचभेरन रया।</verse>
				<verse number="4">और तुमून में भटे हरेक अपून शरीर की इच्छान काबू में राखू सिखा, और ऊस पवित्र और आदर का योग्य बना।</verse>
				<verse number="5">और तुम उन गैर-यहूदीन की नियाती भोग-बिलासका इच्छाले नै करून चैछी, जो परमेश्वर स नै जाणना।</verse>
				<verse number="6">और इसो करूना द्वारा कोई अपून विश्वासी भाई का विरोध में पाप जन करौ, नै उमें कोई चाल चलौ, क्याखिनकि प्रभु उन सजा द्योलो जो इसा काम करनान, जसो हमूले पैलि ले तुमून बताछ और समझाछ।</verse>
				<verse number="7">क्याखिनकि परमेश्वर ले हमून अशुद्ध जीवन जीन खिन नै बल्कि पवित्र जीवन जीन खिन बुला रैछ।</verse>
				<verse number="8">येक कारण जो इन हुकुम नै माननो, उ आदिमीन का नै, बल्कि परमेश्वरो को हुकमून नै माननो, जैले अपूनो पवित्र आत्मा तुमून दीछो।</verse>
				<verse number="9">लेकिन विश्वासी भाई-चारा का प्रेम का बारिमें जो जरूरी नाहातिन कि मैं तुमून लिखू, क्याखिनकि आपस में प्रेम करून तुमून परमेश्वर ले सिखा रैछ।</verse>
				<verse number="10">इसीकैं तुम मकिदुनिया प्रदेशा का सब विश्वासी भाईन का दगाड़ इसो प्रेम हुनो चैछो। लेकिन हे म्यारा विश्वासी भाईयों, हम तुमूनथैं बिनती करनू कि तुम मसीह का प्रेम में और ले बढ़नै रौ।</verse>
				<verse number="11">जसीकैं हमूले तुमून हुकुम दी रैछ, उसीकैं तुमून शान्तिपूर्वक ले जीवन जीनो चैछो, और अपून-अपून काम-काज में लाग रौ, और मेहनत करभेरन कमूना की कोशिश करा।</verse>
				<verse number="12">ताकि उन लोग जो विश्वास नै करना, देखून कि तुम हर दिन कसो ब्यवहार करछा, और तुमोरो आदर करूनो, और तुमून अपून जरूरतून खिन केमें निर्भर नै हुन पड़ौ।</verse>
				<verse number="13">हे म्यारा विश्वासी भाईयों, हम यो चाँनू कि तुम उन मरिना का विश्वासी का बारिमें जाणा कि उनार दगाड़ की होलो, और काँई इसो नै हो कि तुम दुसरान की नियाती शोक करा जिनून यो आश नाहातिन मरना का बाद ले जीवन छै।</verse>
				<verse number="14">अगर हम विश्वास करनू कि यीशु मरिभेरन फिर ज्यून भ्यान, तो उसीकैं परमेश्वर उनून जो यीशु में मरि ग्यान परमेश्वर उनून फिर ज्यून करोलो, और यीशु का दगाड़ स्वर्ग में वापस ली जालो।</verse>
				<verse number="15">हम प्रभु यीशु का वचनून का अनुसार तुमूनथैं यो कुनू कि हम जो ज्यून छा, और प्रभु यीशु का दुबारा उन तक बचिना का रूला, लेकिन जो विश्वासी लोग पैलि मर ग्यान उन हमार है पैलि प्रभु यीशु थैं मिलाला।</verse>
				<verse number="16">क्याखिनकि प्रभु यीशु खुद स्वर्ग भटे तलि उतरोलो; उ बखत जोरले आवाज दीभेरन हुकुम द्योलो और एक प्रधान स्वर्गदूत जोरले आवाज दीभेरन बोलोलो और परमेश्वर की तुरी फूँकी जालि; और उ बखत जो मसीह में विश्वास करभेरन मर ग्यान उन पैलि ज्यून होला।</verse>
				<verse number="17">उक बाद हम जो उ दिन तलक ज्यून रूला, उक दगाड़ बादलून में उठाई ली जूला, कि हम प्रभु यीशु का दगाड़ आकाश में मिलला और तब भटे हमेशा खिन प्रभु का दगाड़ रूला।</verse>
				<verse number="18">येक कारण इन बातूनले एक-दुसरास तसल्ली दीया करा।</verse>
			</chapter>
			<chapter number="5">
				<verse number="1">हे म्यारा विश्वासी भाईयों, तुमून यो बतूना की जरूरत नाहातिन कि प्रभु यीशु कब दुबारा आलो।</verse>
				<verse number="2">क्याखिन तुम खुद निकीकैं जाणछा, कि जसीकैं रात में चोर अचानक उछो, उसीकैं प्रभु यीशु ले दुबारा उनाको दिन होलो।</verse>
				<verse number="3">जब सब लोग कौला, “अब त के डर बात नाहातिन, सब ठीक छै,” तब अचानक उनूनमें मुसीबत आ पड़ोलो, जसीकैं एक गर्भवती स्यैनिस नान्तिन हुना की पीड़ अचानक शुरू हुछी, उसीकैं उन उ ठूली मुसीबत भटे कसा तरीका ले नी बच सकाला।</verse>
				<verse number="4">पर हे म्यारा विश्वासी भाईयों, तुम अन्यारो में नाहतिना कि प्रभु यीशु को दुबारा उनाको दिन तुमून में चोर का नियाती अचानक आ पड़ौ।</verse>
				<verse number="5">क्याखिनकि तुम सब उज्याला की और दिनेकी सन्तान छा, और हम नै त राता का छा नै अन्यारा का सन्तान छा।</verse>
				<verse number="6">येक कारण प्रभु यीशु में विश्वास नै करन्यावाला लोगून की नियाती पड़ीना का नै रूँन, बल्कि जागनै और सर्तक रया।</verse>
				<verse number="7">क्याखिनकि जो पड़नान, उन रात कै पड़नान, और जो नशा करनान, उन रात मेंई करनान।</verse>
				<verse number="8">पर हम जो दिना सन्तान छा, येक कारण हमून अपूना में काबू राँखून चैछो। विश्वास और प्रेम हमरि रक्षा करनान, जसीकैं कवच एक सिपाई रक्षा करछो। और मुक्ति एक इसी आश की उ टोप छै जो उनवाला अनन्त दण्ड भटे बचूछो।</verse>
				<verse number="9">क्याखिनकि परमेश्वरले हमून येक कारण नै चुन रैछ अपून क्रोध ले हमून सजा दे, बल्कि हमून येक कारण चुन रैछ कि हम अपून प्रभु यीशु मसीह की जरियाले मुक्ति पा सका।</verse>
				<verse number="10">उ हमून खिन येक कारण मरछ्य कि चाहे हम ज्यून रूँ या मरज्यू, जब प्रभु यीशु मसीह वापस आलो तब हम सब मिलभेरन उनार दगाड़ हमेशा ज्यून रै सका।</verse>
				<verse number="11">येक कारण एक-दुसरा स हौंसला दी और एक-दुसरा स विश्वास में मजबूत हुन खिन मद्दत करा, जसीकैं तुम यो बखत करछा ले।</verse>
				<verse number="12">हे म्यारा विश्वासी भाईयों, हम तुमूनथैं बिनती करनू, कि जो तुमून खिन कड़ी मेहनत करनान, प्रभु में तुमार अगुवा छन, और तुमून शिक्षा दीनान, उनोरो आदर करा।</verse>
				<verse number="13">और जो काम तुमून खिन करनान येक कारण उनेरि इज्जत करा, और एक दुसरा का दगाड़ मेल-मिलाप ले रौ।</verse>
				<verse number="14">हे म्यारा विश्वासी भाईयों, हम तुमून समझुनू कि जो आलसी छन उनून चेतावनी दी, और जो लोग डरफोक छन उनून हिम्मत दीया, और जो विश्वास में कमजोर छन उनेरि मद्दत करा, और सबून का दगाड़ धीरज ले बर्ताव करा।</verse>
				<verse number="15">ध्यान राँखा, कि तुम बुराईन का बदला बुराई जन करा; पर हरेक विश्वासीन और सब लोगून खिन हमेशा भलाई काम करून तैयार रौ।</verse>
				<verse number="16">हमेशा खुश रौ,</verse>
				<verse number="17">और लगातार प्रार्थना में लाग रौ।</verse>
				<verse number="18">हरेक हालात में परमेश्वरो को धन्यवाद करा, क्याखिनकि मसीह यीशु में तुमून खिन परमेश्वर की यो इच्छा छै।</verse>
				<verse number="19">तुम अपून जीवन में पवित्र आत्मा स काम करून है जन रोका।</verse>
				<verse number="20">परमेश्वरा का लोगून का द्वारा होईना की भविष्यवाणीन सुणभेरन अनादर जन करा।</verse>
				<verse number="21">लेकिन हरेक बात की परख करा यो जाणून खिन कि उ परमेश्वरा का तरफ भटे छी या नाहातिन, जो निका बात छन उन बातुन ग्रहण करा।</verse>
				<verse number="22">हर प्रकारा बुराई भटे दूर रया।</verse>
				<verse number="23">परमेश्वर जो शान्ति दीछो, खुद तुमून पुर तरीका ले पवित्र करोलो; और तुमेरि आत्मा, प्राण और शरीर स हमार प्रभु यीशु मसीह का वापस उन तलक पुर तरीका ले निर्दोष और सभाल भेरन राँखोलो।</verse>
				<verse number="24">तुमोरो बुलून वालो विश्वासयोग्य छै, क्याखिनकि उ तुमून पवित्र हुन खिन बुलूछो, और उ तुमून पवित्र हुन खिन योग्य ले बनालो।</verse>
				<verse number="25">हे म्यारा विश्वासी भाईयों, हमून खिन ले प्रार्थना करा</verse>
				<verse number="26">और सब विश्वासी साफ मन ले गला लगाभेरन नमस्कार करा।</verse>
				<verse number="27">मैं प्रभु का नामले हुकुम दीछूँ, कि यो चिठ्ठी सब विश्वासी भाईन पढ़भेरन सुणाई जौ।</verse>
				<verse number="28">मैं प्रार्थना करछूँ, कि हमार प्रभु यीशु मसीह को अनुग्रह हमेशा तुमून में हुनै रौ।</verse>
			</chapter>
		</book>
		<book number="53">
			<chapter number="1">
				<verse number="1">यो चिठ्ठी पौलुस, सिलवानुस और तीमुथियुस का तरफ भटे छै। थिस्सलुनीके का शैहरा का विश्वासीन की मण्डली खिन हम लिखूनमर्या, जो पिता परमेश्वर और प्रभु यीशु मसीह का छन।</verse>
				<verse number="2">हम प्रार्थना करनू कि हमार पिता परमेश्वर और यीशु मसीह तुमून में अनुग्रह करौ और तुमून शान्ति दे।</verse>
				<verse number="3">हे म्यारा विश्वासी भाईयों, तुमार बारिमें हमून हमेशा परमेश्वरो को धन्यवाद करून चैछो। इसो करूनो ठीक ले छै, क्याखिनकि तुमोरो विश्वास यीशु मसीह में बढ़नै जानमर्योछ, और एक-दुसारा खिन ले तुमोरो प्रेम बढ़नै जानमर्योछ।</verse>
				<verse number="4">येक कारण हम परमेश्वरा का विश्वासीन की मण्डली में तुम लोगून का बारिमें गर्व करनू, हलाकि, तुम परीक्षान में होभेरन जाछा, फिरले तुम धैर्यपूर्वक सहनै रूछा और तुम अब ले यीशु मसीह में विश्वास करछा।</verse>
				<verse number="5">तुम दुख उठून मरैछा और योई तुमून परमेश्वरा का राज्य में प्रवेश करून योग्य बनूछो, यो बात को सबूत छै कि परमेश्वर धार्मिकता ले न्याय करोलो।</verse>
				<verse number="6">क्याखिनकि परमेश्वर हमेशा न्यायपूर्वक न्याय करछो, उ उन लोगून दुख द्योलो जिनुले तुमून दुख दीछ।</verse>
				<verse number="7">उ तुमून चैन द्योलो जो अब दुख उठूनै रूनान, और हमून ले, यो तब होलो जब प्रभु यीशु अपून सामर्थी स्वर्गदूतून का दगाड़ स्वर्ग भटे धधकतो आग में प्रकट होलो।</verse>
				<verse number="8">और जो परमेश्वर स नै जाणना, और हमार प्रभु यीशु का सुसमाचार स नै मानना उ उनून सजा द्योलो।</verse>
				<verse number="9">और प्रभु उनून अपूना पास भटे भ्यार कर द्योलो और उनून अपूनी महानता में अपूनी शक्ति को अनुभव करून को हुकुम नी द्योलो, और उ उनून अनन्त विनाश का द्वारा सजा पाला।</verse>
				<verse number="10">यो उ दिना होलो जब प्रभु यीशु विश्वासी लोगून का द्वारा महिमा पान खिन स्वर्ग भटे वापस आलो। त तुम ले उ झुण्ड में शामिल होला क्याखिनकि तुमूले उ संदेश में विश्वास करछ्य जो हमूले तुमून उक बारिमें बताछ।</verse>
				<verse number="11">येक कारण हम हमेशा तुमून खिन प्रार्थना ले करनू, ताकि परमेश्वर तुमून उ जीवन का योग्य बना दे जैस जीन खिन उले तुमून बुला गैछ। और उ अपून सामर्थ का द्वारा तुमेरि हरेक भलि इच्छान और जो कुछ तुम विश्वास ले करून मरेछा उ पुरो हो।</verse>
				<verse number="12">हम यो प्रार्थना करनू कि लोग तुमार कारण हमार प्रभु यीशु का नाम की महिमा करून और तुम ले आदर पाला क्याखिनकि तुम उक छा। यो जरूर होलो क्याखिनकि हमोरो परमेश्वर और प्रभु यीशु मसीह तुमून में भौत अनुग्रहकारी छै।</verse>
			</chapter>
			<chapter number="2">
				<verse number="1">हे म्यारा विश्वासी भाईयों, हमून तुमूनथैं कुछ कुन छै हमार प्रभु यीशु मसीह का दुबारा उना का बारिमें और उ बखत का बारिमें जब हम सब एक दगाड़ ऊस मिलला।</verse>
				<verse number="2">तुम अचानक अपून जमीर स कोई भविष्यवाणी, कोई उपदेश, या कोई चिठ्ठी स जन घबराया, जो लागछी कि हमार द्वारा लिखीना की छै। जैमें बाताईना को छै कि प्रभु का दिन आ चुक ग्योछ, तुम अपून मन में डरिया जन।</verse>
				<verse number="3">प्रभु यीशु का वापस उना बारिमें केका ध्वाका में जन आया। क्‍याखिनकि प्रभु यीशु का वापस उन है पैलि लोग परमेश्वरा का विरोध कराला और उ दुष्ट आदिमी स जैस परमेश्वर नरक में नाश करोलो उ जरूर प्रगट होलो।</verse>
				<verse number="4">और उ परमेश्वरो को विरोध करोलो और अन्य सब चीजून को जेकी लोग अराधना करनान और परमेश्वरा का रूप में माननान, और वह दावा करोलो कि उ उन सब है ज्यादा ठूलो छै। याँ तक कि उ दुष्ट परमेश्वरा का मन्दिर में जाभेरन बैठ जालो और अपून आप सबून का सामुनि परमेश्वर हुन को दावा करोलो।</verse>
				<verse number="5">तुमून जरूर याद होलो कि जब मैं तुमार दगाड़ छ्यू, तब मैं इन बातुन का बारिमें कई बार बता चुक गयूँ।</verse>
				<verse number="6">उ दुष्ट ऐल तक प्रगट नै होर्योछ क्याखिनकि कोई छै जैले ऊस ऐल तक रोक भेरन राख रैछ। तुमून जरूर याद होलो उ कि छै जेले ऊस रोक रैछ, फिर जब परमेश्वरा का द्वारा ठहराईना को सही बखत आलो, तब उ दुष्ट प्रगट होलो।</verse>
				<verse number="7">उ दुष्ट को सामर्थ ऐल ले यो संसार में गुप्त तरीका ले काम करूनमर्योछ, मगर कोई छै जो ऊस रोक भेरन राखछो। और उ लगातार ऊस रोक भेरन राखोलो जब तक ऊस बाटा भटे नै हटा दे।</verse>
				<verse number="8">तब उ दुष्ट प्रगट होलो, जैस प्रभु यीशु अपून मुँखा का फूँके ले मार डालोल, और अपूना उना का तेज ले भस्म कर द्योलो।</verse>
				<verse number="9">उ दुष्ट शैतान सामर्थ का दगाड़ आलो और कई प्रकारा का झूठ्ठा चमत्कार, और चिन और अद्धभुत कामून करोलो जेले लोगून यो लागोलो कि परमेश्वर इन कामून करूनमर्योछ।</verse>
				<verse number="10">और उ दुष्ट हर प्रकार बुरा कामून करोलो, और उन लोगून ध्वाका द्योलो जो अनन्त काला का विनाश का तरफ जान मर्यान। क्याखिनकि उनूनले सच्चाई मानून है इनकार करछ्य जो उनोरो उद्धार कर सकछ्यो।</verse>
				<verse number="11">और योई कारण परमेश्वर उनूनमें एक भटका दीनवाली सामर्थ स भेजोलो ताकि उन दुष्ट का बातुन में विश्वास करून।</verse>
				<verse number="12">और परमेश्वर उन सब लोगून को न्याय करोलो, जिनूनले यीशु मसीह का सच्चा उपदेशून में विश्वास नै कर्यो बल्कि बुरी बातुन में मन लगाछ।</verse>
				<verse number="13">हे म्यारा विश्वासी भाईयों, हमोरो तुमून खिन परमेश्वरा का सामुनि हमेशा धन्यवाद दीनो सही छै। तुम प्रभु का प्रिय छा क्याखिनकि परमेश्वर ले दुनिया का बनून है पैलि भटे पवित्र आत्मा का द्वारा पाप भटे अलग करभेरन और सच्ची में तुमार विश्वास का कारण उद्धार खिन तुमून चुन लीछ।</verse>
				<verse number="14">परमेश्वर ले उ सुसमाचारो को इस्तमाल करछ्य, जेस हमूले तुमून उद्धार दीन खिन तुमार बीच में प्रचार करछ्य, ताकि तुम हमार प्रभु यीशु मसीह का महिमा में भागीदार बन सका।</verse>
				<verse number="15">येक कारण हे म्यारा विश्वासी भाईयों, मजबूत रौ, और उन बातुन में विश्वास करनै रौ जो हमूले तुमून सिखाईना छ्या जब हम तुमार दगाड़ छ्या या जो चिठ्ठी हमूले भेजछ्य।</verse>
				<verse number="16">हम प्रार्थना करनू हमार प्रभु यीशु मसीह थैं और हमार पिता परमेश्वर थैं जेले हमूनथैं प्रेम करछ्य, और जेले अपून अनुग्रह का द्वारा हमून अनन्तकाल खिन तसल्ली और उत्तम आश दी रैछ।</verse>
				<verse number="17">मैं प्रार्थना करछूँ कि पिता परमेश्वर और प्रभु यीशु मसीह तुमार मनून में साहस भरून और जो निको छै ऊस हमेशा करनै रून खिन तुमून मजबूत करून।</verse>
			</chapter>
			<chapter number="3">
				<verse number="1">आखरी में हे म्यारा विश्वासी भाईयों, हमून खिन प्रार्थना करा, कि प्रभु यीशु को वचन दुसारा जागान में ले जल्दी सुणाई जौ और लोग विश्वास करून जसीकैं तुमूले करछ्य।</verse>
				<verse number="2">यो ले प्रार्थना कर्या कि परमेश्वर हमून दुष्ट और बुरा लोगून है बचाभेरन राखौ जो हमून नुकशान पुजून चानान, क्याखिनकि भौत लोग सुसमाचार सुणनान पर उमें विश्वास नै करना।</verse>
				<verse number="3">लेकिन प्रभु में पुर तरीका ले भरोसा करा, उ तुमून आत्मिक रूप में मजबूत करोलो, और तुमून उ दुष्ट शैतान भटे ले बचालो।</verse>
				<verse number="4">और हमून प्रभु में तुमार मलि में भरोसा छै, हमूले तुमूनथैं जो कुछ ले करून खिन क्योछ, तुम ऊसोई करून मरेछा और करनै ले रोला।</verse>
				<verse number="5">हम प्रार्थना करनू कि प्रभु यीशु तुमून यो समझ दे कि परमेश्वर तुमून कतुक प्रेम करछो, और जब लोग तुमून सतूनान कसीकैं मजबूत रून छै, ठीक उसकैं जसीकैं मसीह मजबूत‌ छ्यो।</verse>
				<verse number="6">हे म्यारा विश्वासी भाईयों, हम तुमून अपून प्रभु यीशु मसीह का अधिकार ले हुकुम दीनू, कि हरेक इसा विश्वासी भाईन है दूर रौ, जो आलसी छन और जो बात हमूले तुमून सिखायान ऊस नै माननो।</verse>
				<verse number="7">क्याखिनकि तुम खुद जाणछा, कि तुमूनले उस्सा रीतिले जीन चैछो जसीकैं हम जीनू, जब हम तुमार बीच में रूछ्या, त हम आलसी नी छ्या पर काम करछ्या।</verse>
				<verse number="8">और हमूले केको रोटो मुफ्त में नै खायो पर मेहनत और कष्ट ले रात दिन काम धन्धा करछ्या, ताकि हमून अपून जरूरतून खिन तुमून में निर्भर नै हुन पड़ौ।</verse>
				<verse number="9">हमूले कड़ी मेहनत करछ्य, येक कारण नै कि हमार पास अधिकार नी छ्यो कि तुमूनथैं अपूनी मद्दत करून खिन कै सका। येक कारण कि अपून आपस तुमून खिन आदर्श ठैराछ, कि तुम हमार जसा बना।</verse>
				<verse number="10">और जब हम तुमार दगाड़ रूछ्या तब हमूले तुमून कई बार हुकुम दीईना को छ्यो, अगर कोई केले काम करून है मना करछो त उ खानखिन नै दीई जौ।</verse>
				<verse number="11">हम सुणूनू, कि कतुक लोग तुमार बीच में आलसी छन और के काम नै करनान, पर दुसरान का कामून में दखल डालनान, और उनून काम करून है रोकनान।</verse>
				<verse number="12">इसान हम प्रभु यीशु मसीह का अधिकार ले हमून दीनू और समझुनू, कि शान्ति ले काम करभेरन अपून जीन्दगी का जरूरतून पुर करा।</verse>
				<verse number="13">और तुम, हे म्यारा विश्वासी भाईयों, तुमून कभै ले भलाई काम करून खिन हिम्मत नै छोड़ून चैछो।</verse>
				<verse number="14">अगर कोई हमार यो चिठ्ठी का हुकमून नै मनो, त सबून पत्तो चलो, और उक दगाड़ संगति जन करा, जेले उ शर्मिदगी मैंहसुश करौ।</verse>
				<verse number="15">तब ले उक दगाड़ इसो ब्यवहार जन कर्या कि उ तुमोरो दुशमन छै, पर ऊस अपूनो विश्वासी भाई समझभेरन ऊस समझूना की कोशिश करा।</verse>
				<verse number="16">मैं प्रार्थना करछूँ कि प्रभु जो शान्ति को स्रोत छै, उ हर तरीका ले तुमून हमेशा शान्ति दीनै रौ, प्रभु तुम सबुनक दगाड़ रौ।</verse>
				<verse number="17">देखा मैं पौलुस कसो ठुल-ठुल शब्दून में अपून हातले तुमून खिन लिखून मरयू, इसीकैं में हर चिठ्ठी आखरी में लिखछूँ ताकि सबून पत्तो चलौ की यो चिठ्ठी म्यारा तरफ भटे छै।</verse>
				<verse number="18">मैं प्रार्थना करछूँ हमार प्रभु यीशु मसीह को अनुग्रह तुम सबून में हमेशा बनिना को रौ।</verse>
			</chapter>
		</book>
		<book number="54">
			<chapter number="1">
				<verse number="1">यो चिठ्ठी पौलुसा का तरफ भटे छै, मैंस मुक्तिदाता परमेश्वरा का अधिकारा का द्वारा और मसीह यीशु जैमें हम आश राखनू प्रेरित बनून खिन नियुक्त कर रैछ।</verse>
				<verse number="2">तीमुथियुस मैं यो चिठ्ठी तैंस लिखूनमरयूँ। तैं म्यारा अपून च्याला नियाती छै क्याखिनकि तैले मसीह में विश्वास करछै जसीकैं मैं करछूँ। मैं प्रार्थना करछूँ कि पिता परमेश्वर और हमोरो प्रभु यीशु मसीह तैंस अनुग्रह और दया, और शान्ति दीनै रून।</verse>
				<verse number="3">मैंले इफिसुस शैहर है मकिदुनिया प्रदेश खिन जान है पैलि तैंस हुकुम दीछ, कि तैं याँ रैभेरन उनून जो झूठ्ठी शिक्षा दीनान उनून बतौ की उन झूठ्ठी शिक्षा दीन बन्द करून।</verse>
				<verse number="4">झूठ्ठी कहानीन और पूर्वजून का वंशावलीन की सूची में अपूनो बखत बरबाद जन करा, जिनूनले बाद-बिवाद हुछो। इसा तरीका बाद-बिवाद परमेश्वरा का काम करून में मद्दत नै कर सकूनो। इसा तरीका काम तब करि जाना जब कोई परमेश्वर में विश्वास करना।</verse>
				<verse number="5">तुमून हुकुम दीना को म्योरो यो मक्शद छै, कि तुम एक-दुसरा स सच्चा मन ले प्रेम करा, और साफ जमीर और सच्चा विश्वास ले उत्पन्न हो।</verse>
				<verse number="6">झूठ्ठा शिक्षकून ले इन बातुन करून बन्द कर हालछै और सिर्फ बेकारा बातुन में चर्चा करनान।</verse>
				<verse number="7">यो झूठ्ठा शिक्षक उन मूसा का नियम सिखून वाला की नियाती बनून चानान, लेकिन सच्ची में उन केले नै जाणना कि उन कि सिखूना की कोशिश करनान और फिरले इतुक आत्मविश्वास ले उमें अड़िना का रूनान।</verse>
				<verse number="8">हम जाणनू कि मूसा का नियम-कानून सिखून ठीक छै, लेकिन तब जब लोग येस सही तरीका ले सिखूना।</verse>
				<verse number="9">हम जाणनू की मूसा नियम-कानून धर्मी जन खिन नै, पर अधर्मीन, निरकुशून, भक्तिहीन, पापिन, अपवित्रून और अशुद्ध, और जो ईजा-बबान मारून वाला हत्यारा,</verse>
				<verse number="10">व्यभिचारी, पुरुषगामीयो, लोगून बेचून वाला, झूठ्ठा, और झूठ्ठी कसम खान वाला और इनून छोड़ सच्चा उपदेशा का सब बिरोधीन खिन ठैहराई गैछ।</verse>
				<verse number="11">यो सही शिक्षा हमार परमधन्य परमेश्वरे की महिमा का बारिमें सुसमाचार का अनुसार छै, जो मैंस प्रचार करना की जिमेदारी दी रैछ।</verse>
				<verse number="12">मैं अपून प्रभु यीशु मसीह स धन्यवाद दीछूँ, जिनुले मैंस सामर्थ दीछ, क्याखिनकि उले मैंस विश्वासयोग्य समझभेरन अपूनी सेवा खिन ठैहरा रैछ।</verse>
				<verse number="13">मैं त पैलि मसीह की निन्दा करून वालो, और विश्वासीन सतून वालो और नुकशान करून वालो छ्यूँ; क्याखिनकि मैं उ बखत तक मसीह में विश्वास नी करछ्यू, येक कारण मैं नै समझ सकयूँ कि जो मैं करून मरयू उ गलत छ्यो। योई कारण ले मसीह ले मैंमें दया करछै।</verse>
				<verse number="14">और हमार प्रभु यीशु मसीह को भौत अनुग्रह, विश्वास और प्रेम का दगाड़ हमेशा मैंमें भ्योछ।</verse>
				<verse number="15">यो बात सच्ची और हरेक प्रकारे ले मानून लायक छै, कि मसीह यीशु हम पापिन बचुन खिन संसार में आयान, जिनून में सबून है ठूलो पापी मैं छूँ।</verse>
				<verse number="16">फिरले मैंमें यो कारण दया भैछ, कि मैं सबून है ठुल पापी में यीशु मसीह ले अपूनी पुरी शहनशीलता दिखाछ, कि जो लोग उमें अनन्त जीवन खिन विश्वास कराला, उनून खिन मैं एक आदर्श बनू।</verse>
				<verse number="17">उ राजा जो हमेशा राज्य करछो, जो हमेशा खिन ज्यूनो रूछो, और जैस कोई नै देख सकूनो, और उई एकमात्र सच्चो परमेश्वर छै, उको आदर और महिमा हमेशा-हमेशा हुनै रौ। आमीन।</verse>
				<verse number="18">हे म्यारा च्याला तीमुथियुस, मैं तैंस जो यो हुकुम दीन मरयू, मैं तैंस उन बातुन याद दिलून खिन कुछूँ, जो पैलि दिनून में त्यारा बारिमें जो भविष्यवाणी करिना की छी। तैंस उन झूठ्ठा शिक्षकून का खिलाफ सुसमाचार की सच्चाई खिन बड़िया तरीका ले लड़ून खिन बचन को प्रयोग एक हथियार का नियाती करून चैछो।</verse>
				<verse number="19">तैंस मसीह में विश्वास में बनिना को रून चैछो और साफ जमीर हुन चैछो। कुछ लोगून ले अपून जमीर स खराब कर हालछ्य और उनूले मसीह में विश्वास करना की अपूनी योग्यता स नाश कर हालछ्य, ठीक उसीकैं जसीकैं एक जहाज टकराभेरन नाश हो जाछो।</verse>
				<verse number="20">उनूनमें भटे हुमिनयुस और सिकन्दर स मैंले विश्वासीन की मण्डली भटे भ्यार कर दीछ, और उनून शैतान का हवाला कर दीछ ताकि उन सिखून की परमेश्वर की निन्दा नै करून चैनी।</verse>
			</chapter>
			<chapter number="2">
				<verse number="1">येक कारण सबून है जरूरी बात यो छै, कि तैं प्रभु थैं सब लोगून खिन बिनती, प्रार्थना, और निवेदन, और धन्यवाद कर।</verse>
				<verse number="2">राजान खिन और उन सब अधिकारी लोगून खिन प्रार्थना करा, ताकि उन हमून शान्ति और सुरक्षा ले रून में हमरि मद्दत करून, ताकि हम परमेश्वर की अराधना कर सका और दुसरा का दगाड़ बड़िया ब्यवहार राख सका।</verse>
				<verse number="3">सब लोगून खिन इसीकैं प्रार्थना करून सही ले छै, और हमार मुक्तिदाता परमेश्वर ऊस ग्रहण ले करनान।</verse>
				<verse number="4">उ चाँछो कि सब लोगून मसीह का शिक्षान को ज्ञान हो और उद्धार प्राप्त करून।</verse>
				<verse number="5">केवल एक्कै परमेश्वर छै, और जो परमेश्वर और लोगून का बीच में मेल-मिलाप करा सकछो केवल एक्कै आदिमी छै, उ प्रभु यीशु मसीह छै।</verse>
				<verse number="6">मसीह ले पाप और मौत की शक्ति भटे सब लोगून छुड़ून खिन दाम दीभेरन अपून आपस बलिदान कर दीछ, उक बलिदानले ठीक बखत में यो बात को सबूत छ्यो कि परमेश्वर सब लोगून पाप भटे बचुन चांछ्यो।</verse>
				<verse number="7">यो कारण ले, परमेश्वर ले मैंस सुसमाचार को प्रचारक और एक प्रेरित हुन खिन चुन रैछ। उले मैंस गैर-यहूदीन खिन विश्वास और सच्चाई को संदेश सिखून खिन चुन रैछ, मैं झूठ नै बोलून मरयू; मैं सच्ची कुन मरयू।</verse>
				<verse number="8">मैं चाछूँ, जब ले तुम परमेश्वर की अराधना करून खिन जमा हुछा, उन आदिमी जो पवित्र जीवन जीनान, बिना क्रोध और बिना बिवाद का अपून हातून उठाभेरन प्रार्थना करून।</verse>
				<verse number="9">उसीकैं मैं चाछूँ कि विश्वासी स्यैनिन ले सही ढंग का कपाड़ा पैनून जैले पुर शरीर ढकीना रौ और नै कि सुन और मोती का मैंहगा-मैंहगा जैवर पैनून या पैसन करून।</verse>
				<verse number="10">येका बजाय, उनून दुसारा लोगून खिन भलाई काम करभेरन खुद स सुन्दर बनून चैछो, क्याखिनकि विश्वासी स्यैनिन इसो करूनो शोभा ले दीछो।</verse>
				<verse number="11">जब आदिमी विश्वासी लोगून सिखूना, तब सब स्यैनिन चुपचाप ले और भौत आदर ले सुणन और सिखून चैछो।</verse>
				<verse number="12">मैं हुकुम नै दीनू कि स्यैनिन आदिमीन शिक्षा दीन या उनूनमें अधिकार करून। पर जब तुम अराधना करून खिन जामा हुछा, त स्यैनिन चुप रून चैछो।</verse>
				<verse number="13">मैं इसो यो कारण ले कुछूँ, क्याखिनकि परमेश्वर ले पैलि आदम स बनाछ और उक बाद उले हव्वा स बनाछ।</verse>
				<verse number="14">दुसोरो कारण यो छै, की आदम शैतान का बहकावा में नै आयो, बल्कि हव्वा शैताना का बहकावा में आभेरन परमेश्वरो को हुकुम स तोड़छ्य।</verse>
				<verse number="15">फिरले स्यैनिन मसीह में विश्वास बनाभेरन राखनान, और लोगून का दगाड़ प्रेम ले, पवित्रता और धीरज का दगाड़ ब्यवहार करून त नान्तिन जन्म दीना का द्वारा परमेश्वर उनोरो उद्धार करोलो।</verse>
			</chapter>
			<chapter number="3">
				<verse number="1">यो बात सच्ची और हरेक प्रकारे ले मानून लायक छै, जो विश्वासीन को मुख्य अगुवा बनून चाछो उ निको काम करना की इच्छा राखछो।</verse>
				<verse number="2">येक कारण यो जरूरी छै, कि विश्वासीन को मुख्य अगुवान निर्दोष, और अपून घरवाली का प्रति वफादार, हर हालात में अपून आप में काबू करून वालो, शान्त स्वभाव वालो, इज्जतदार, धीरजवंत, मेहमानून की इज्जत करून वालो, और परमेश्वरा का बचनून निकीकैं सिखूनवालो हो।</verse>
				<verse number="3">उ शराबी और मारपीट करूनवाला नै हो, नै झगड़ालू हो, और नै धनो को लालची हो, लेकिन उ शान्त स्वभाव हो।</verse>
				<verse number="4">ऊस अपून परिवार को बड़िया प्रबन्ध करून वालो, और ऊस अपून बाल-बच्चान सिखून चैछो कि उन हर बात में आदर करभेरन उको हुकमून को पालन करून।</verse>
				<verse number="5">अगर जो आदिमी अपूनी परिवार की सही तरीका ले देखभाल नै कर सकूनो, त उ परमेश्वरा का विश्वासी मण्डली की देखभाल कर सकूनो।</verse>
				<verse number="6">उ इसो आदिमी नै हुन चैछो जो हाल मेंई विश्वासी बनिना को हो। काँई इसो नै हो कि उ घमंडी होज्यौ और ऊस ले उई सजा मिलेलि जो शैतान स मिलछ्य।</verse>
				<verse number="7">और विश्वासी मण्डली का अलावा भ्यारा लोगून में ले उको मान-समान हुन चैछो। ताकि उकी बदनामी नै हो और उ शैताना का फंदा में नै फसौ।</verse>
				<verse number="8">विश्वासी अगुवान का नियाती सेवकून ले आदर का योग्य और ईमानदार हुन चैछो, और उ शराब पिन वाला और लालची नै हो।</verse>
				<verse number="9">उनार पास साफ जमीर हुन चैछो, जब उन यो बात में विश्वास करनै रूनान कि परमेश्वर दीईना का शिक्षा सत्य छन।</verse>
				<verse number="10">जब सेवकून चुनी जाछो, त पैलि उनून साबित करून दी की उनार पास यो योग्यता छै, अगर उनूनमें कोई ले गलती नै हो तैं उन सेवक को काम करून।</verse>
				<verse number="11">और उनेरि घरवालीन ले आदर का योग्य हुन चैना, दोष लगून वाली नै हो, और शान्त आदत ले अपून आप में काबू करून वाली, और सब बातुन में विश्वासयोग्य हो।</verse>
				<verse number="12">सेवक एक्कै स्यैनि को घरवालो हो, और अपून बाल-बच्चान और परिवार को निकी देखभाल करनवालो हो।</verse>
				<verse number="13">क्याखिनकि जो सेवा का को काम निकीकैं करनान, उन लोगून थैं सम्मान पाना और उन यीशु मसीह में अपून विश्वास का बारिमें भौत हिम्मतले बोल सकनान।</verse>
				<verse number="14">मैंस आश छै कि मैं जल्दी तुमार पास उलो, लेकिन यो चिठ्ठी येक कारण लिखून मरयू,</verse>
				<verse number="15">अगर म्यार उन में देर हो जौ, त मैं चाछूँ कि तुम जाण ली, कि परमेश्वरा का परिवार लोगून को कसो ब्यवहार हुन चैछो। यो परिवार उन सबून मिलभेरन बनिना को छै जो मसीह में विश्वास करनान और जीवित परमेश्वर भटे समबन्ध राखनान, और जो सच्चाई को खम्बो; और बुनियाद छै।</verse>
				<verse number="16">और येमें कोई शक नाहातिन की जो शिक्षा परमेश्वर दी राख्यान उन पुर तरीका ले सही छन, मतलब मसीह आदिमी का रूप में प्रगट भ्योछ, यो उक बारिमें पवित्र आत्मा का द्वारा साबित भ्योछ कि उ परमेश्वरो को च्योलो छै, स्वर्गदूतून ले ऊस देखछ्य, और प्रेरितून ले उक बारिमें सुसमाचार सब जातिन में सुणाछ, और संसारा का सब जातिका लोगून ले उमें विशवास करछ्य, और परमेश्वर ले ऊस स्वर्ग में उठा लीछ।</verse>
			</chapter>
			<chapter number="4">
				<verse number="1">पवित्र आत्मा साफ कुंछो कि आखरी दिनून में कुछ लोग मसीह की शिक्षान छोड़भेरन शैतान कि शिक्षान में मन लगाभेरन विश्वास भटे बहक जाला।</verse>
				<verse number="2">यो झूठ्ठा कपटी उई छन, जो इन झूठ्ठी शिक्षान सिखूनान। क्याखिनकि जो उनोरो जमीर सही और गलतो को फरक करछो उ मर चुक ग्योछ, जसीकैं कि कोई गरम लूवा ले उनून दागी ग्यो हो।</verse>
				<verse number="3">इसा झूठ्ठा लोग सिखूनान, कि ब्या करून और कुछ खाना की चीज गलत छन। लेकिन परमेश्वर ले यो सब खानो विश्वासीन खिन बना रैछ, कि येक कारण बनाछ, जो सही शिक्षा स जाणनान, कि परमेश्वरो को धन्यवाद करभेरन खाई जौ।</verse>
				<verse number="4">क्याखिनकि परमेश्वर की बनाईना की हरेक चीज निकी छै, और परमेश्वरा का तरफ भटे सब प्रकार को खान खाना को हुकुम छै, मगर ऊस परमेश्वरो को धन्यवाद दीभेरन खाई जौ।</verse>
				<verse number="5">क्याखिनकि परमेश्वरा का वचन और प्रार्थना द्वारा हर प्रकारो खानो शुद्ध हो जाछो।</verse>
				<verse number="6">अगर तैं विश्वासी भाई-बैनिन लगातार याद दिलूनै रौ, कि जेको मैंले तैंस अल्ले-अल्ले हुकुम दी रैछ, और तैं विश्वास और सही शिक्षा का द्वारा मजबूत करि गैछै, जेको तैं पालन ले करछै, त तैं यीशु मसीह को निको सेवक बनले।</verse>
				<verse number="7">लेकिन उन बेकार और पूर्वजून का झूठ्ठी कहानीन में अपूनो बखत बर्बाद जन करा, जेले परमेश्वरो को आदर नै मिलनो। बल्कि तुमून परमेश्वर स आदर दीन वाला जीवन खिन अपून आपस हमेशा सच्ची शिक्षा में बनिना को रून चैछो।</verse>
				<verse number="8">शरीरो को ब्यायाम ले सिर्फ थ्वाड़ा फैदा हुछो, जब कि परमेश्वर की भक्ति को फैदा सब बातुन में छै। क्याखिनकि यो आदिमी स ईनाम दीना को वादा करछो जो हम ऐल दुनिया में छा और मरना का बाद ले।</verse>
				<verse number="9">यो बात सच्ची और हरेक प्रकारे ले मानून लायक छै।</verse>
				<verse number="10">हम यो जीवन स पान खिन भौत मेहनत और संघर्ष करनू, क्याखिनकि हमोरो भरोसा जीवित परमेश्वर में छै, जो सब लोगून को मुक्तिदाता छै खास करभेरन उनोरो जो उमें विश्वास करनान।</verse>
				<verse number="11">विश्वासीन इन बातुन की शिक्षा दे, और उनून इन बातुन मानून सिखौ।</verse>
				<verse number="12">इसीकैं ब्यवहार कर की कोई तेरो अनादर नै करौ, लेकिन तैंस अपून बोल-चाल में, निका ब्यवहार का दगाड़, प्रेम ले, मसीह का विश्वासा का दगाड़, पवित्रता को जीवन जीना का द्वारा विश्वासी लोगून खिन आदर्श बनूनो चैछो।</verse>
				<verse number="13">जब तक मैं नै उलो, तब तक विश्वासीन खिन पवित्रशास्त्र बचन पढ़ून उत्साहित करून खिन, और सिखून और समझून में लगातार लाग रौ।</verse>
				<verse number="14">उ वरदान स याद राख जो तैंस भविष्यवाणी का द्वारा विश्वासीन को अगुवान का हात राखून बखत तैंस मिछ्य, ऊस नजर अंदाज जन कर।</verse>
				<verse number="15">इन बातुन में ध्यान राख और वफादार बनिना का रौ, ताकि हरेक देख सकौ की तैं विश्वास में बढ़ून मरैछै।</verse>
				<verse number="16">त यो बारिमें सतर्क रये, कि तैं कसीकैं जीवन जी छै, और विश्वासीन की सिखूछै, त्यारा इसो करना का द्वारा तैं अपून खिन और सब जो तेरि सुणनान उनून खिन उद्धार को कारण बनले।</verse>
			</chapter>
			<chapter number="5">
				<verse number="1">कोई ले स्याना आदिमीस अपमान का इरादा ले जन डाँटा, लेकिन उक दगाड़ आदर ले बर्ताव कर जसीकैं की उ तेरो बबा हो। और जो त्यारा है नाना उमरा का छन उनार दगाड़ अपून भाई का नियाती बर्ताव कर।</verse>
				<verse number="2">और तैंस स्याना‍ स्यैनिन अपूनी ईजा की नियाती समझभेरन बर्ताव कर। और अपूनी है नाना उमर का स्यैनिन अपूनी बैनि समझभेरन साफ मन ले बर्ताव कर।</verse>
				<verse number="3">और उन विध्वान का प्रति आदर दिखा, जिनारा पास उनेरि जरूरत पुरी करून खिन और उनेरि देखभाल करून खिन कोई नाहातिन।</verse>
				<verse number="4">अगर कोई विध्वाक बच्चा या नाती-पोता हुन, त उन सबून है पैलि अपून परिवार का प्रति जिमेदारी निभून सिखून, जसो एक विश्वासी करून ले चैंछो, और यो करभेरन उ अपून ईजा-बबा का उपकारून चुका सकछी, क्याखिनकि येलेई परमेश्वर खुश हुनान।</verse>
				<verse number="5">जिन विध्वान का पास उनेरि जरूरत पुरी करून खिन और उनेरि देखभाल करून खिन कोई नाहातिन, और उ परमेश्वर मेंई भरोस राखभेरन रात-दिन प्रार्थना और बिनती में लागिना की रूनान।</verse>
				<verse number="6">जो विध्वा अपूनो पुरो बखत सुख-सुविधा में बितूनान, उन शाररीक रूप में ज्यूना छन, लेकिन आत्मिक रूप में मरिनाका छन।</verse>
				<verse number="7">विश्वासीन यो चेतावनी दे, ताकि उनोरो चाल-चलन निर्दोष बनिना को रौ।</verse>
				<verse number="8">अगर कोई अपून रिश्तेदारून की और खास करभेरन अपून परिवार की देख-भाल नै करूनो, त उ अपून विश्वास में मुकर ग्योछ, और एक अविश्वासी है ले बुर बन ग्योछ।</verse>
				<verse number="9">उई विध्वाको नाम सूची में लिखी जौ, जिनरी उमर साठी साल भटे ज्यादा हो, और अपून घरवाला का प्रति वफादार हो।</verse>
				<verse number="10">और निका कामून का कारण उको नाम हो, जेलै अपून नन्तिना को निकीकैं पालन-पोषण करिना को हो, मेहमानून की सेवा करिना की हो, परमेश्वरा का लोगून सेवा एक दासी का नियाती हो, दीन-दुखी लोगून की मद्दत करिना की हो, और हरेक निका काम में मन लागिना को हो।</verse>
				<verse number="11">लेकिन जवान विध्वान को नाम सूची में जन लिखा, क्याखिनकि जब उनून शरीरे की इच्छा परमेश्वरे की सेवा करना की इच्छा है ज्यादा बढ़ जाछी, त उ दुसारा बार ब्या करून चाँछी।</verse>
				<verse number="12">और दुबारा ब्या करभेरन उन अपून पास दोषी बनूछी, क्याखिनकि उनूनले दुसोरो ब्या नै करना को वादा करिना को छ्यो।</verse>
				<verse number="13">और येक दगाड़-दगाड़ उन घर-घर घुम भेरन आलसी बन ग्यान, और नै केवल आलसी रूनान लेकिन और दुसारा लोगून का बारिमें चुगली करछी और बकबक करनै रूनान और औरून का काम में दखल दीछी, और इस बात बोलनान जो नै बोलून चैछी।</verse>
				<verse number="14">येक कारण मैं यो सलाह दीछूँ, कि जवान विध्वान ब्या करून और नान्तिना पैद करून, और घर की देख-भाल करून और कोई बिरोधीन बदनामी करनाको मौक जन दी।</verse>
				<verse number="15">क्याखिनकि कुछ जवान विध्वान पैलि भटे परमेश्वर है दूर हो ग्यान, और उक बजाय शैतान का पछिल चलून शुरू कर हालछ्य।</verse>
				<verse number="16">अगर कोई विश्वासी स्यैनिका घर में इसी विध्वा हो जैको को देखभाल करून वालो नै हो, त उ उनेरि मद्दत करो, ताकि उन विश्वासीन की मण्डली में बोझ नै बनौ, और विश्वासी की मण्डली उनेरि मद्दत करौ जिनून सुच्ची में मद्दत की जरूरत छै।</verse>
				<verse number="17">कोई ले विश्वासीन को अगुवा जो अपून काम स सही तरीका ले करछो, ऊस आदर और ठीक तनखा का योग्य समझी जान चैछो, खास करभेरन उन लोग जो परमेश्वरा का बचन स सुणून और सिखून खिन कड़ी मेहनत करनान।</verse>
				<verse number="18">एक जाग में पवित्रशास्त्र में यो लिखीना को छै, कि “जब बल्दून जोती जाछो तब उनार मुँख में मुवाल जन बाँधिया,” और एक जाग में पवित्रशास्त्र में यो ले लिखीना को छै, “मजदूर अपूनी मजूरी को हक्कदार छै।”</verse>
				<verse number="19">एक विश्वासी अगुवा का बिरोध में दोष लगून खिन कोई आरोपस स्वीकार जन कर, जब तलक द्वी या द्वी है ज्यादा लोग यो नै कुंन उनूनले ऊस गलत काम करून देखछ्य।</verse>
				<verse number="20">जो लोग पाप करनै रूनान, तैंस उन लोगून सब विश्वासीन का सामुनि डाँठ लगूनी चैछी, ताकि और विश्वासी ले पाप करूँ भटे डरून।</verse>
				<verse number="21">परमेश्वर, और यीशु मसीह, और चुनिना का स्वर्गदूतून का सामुनि जाणिभेरन मैं तैंस हुकुम दीछूँ, कि तैं बिना भेद-भाव इन बातुन माना कर, और कोई काम भेद-भाव ले जन कर।</verse>
				<verse number="22">कैमें ले जल्दी हात राखभेरन ऊस अगुवा का रूप में नियुक्त जन कर, अगर तैं इसो करछै, त तैं उक पापून खिन जिम्मेदार होलै, और अपूनास बुरी बातुन है दूर राख।</verse>
				<verse number="23">भविष्य में केवल पानि पिनवालो जन रौ, पर अपून पेट और बार-बार बिमार हुन वाला रोगून का कारण थ्वाड़ा अंगूर को रस स को ले इस्तमाल कर लिया कर।</verse>
				<verse number="24">क्याखिनकि थ्वाड़ा लोग खुलेआम पाप करनान। याँ तक कि न्याय हुना है पैलि ही उन विश्वासीन का सामुनि साफ तरीका ले दोषी छन। लेकिन थ्वाड़ा लोगून को पाप त बाद में दिखाई दीनान।</verse>
				<verse number="25">उसीकैं, जब लोग भल काम करनान, त उनार भल काम साफ तरीका ले दिख जानान। और अगर नाहातिन, त उ देर तक लुक ले नै सकना।</verse>
			</chapter>
			<chapter number="6">
				<verse number="1">सब विश्वासी जो दास छन, उनून हर तरीका ले अपून-अपून मालिकून को आदर करून चैछो, ताकि लोग परमेश्वर और हमरि शिक्षान को अपमान नै करून।</verse>
				<verse number="2">जिनारा मालिक विश्वासी छन, इनून उन मसीह में भाई समझून और उनोरो सम्मान करून चैछो, बल्कि और बड़िया तरीका ले उनेरि सेवा करून चैछो, क्याखिनकि उनार काम ले फैदा उठून वालान विश्वासी छन जिनून उन मसीह में भाई का नियाती प्रेम करनान, तैं इन बातुन की शिक्षा और उपदेश दीया करा।</verse>
				<verse number="3">अगर कोई झूठ्ठी शिक्षा दीछो, और उ सच्ची शिक्षा ले सहमत नै हुनो जो हमार प्रभु यीशु मसीह ले दी रैछ और उ हुकमून का दगाड़ जो परमेश्वर स आदर दीछो।</verse>
				<verse number="4">त मैं समझछूँ कि घमण्ड ले ऊस अन्धो कर हालछ्य; और उ केले नै समझनो। इसो आदिमी बेकारा का बातुन में और शब्दून का बारिमें तर्क-बितर्क और झगाड़ा करूना की इच्छा राखछो, जेले डाह, फुट और निन्दा और बुरा-बुरा सन्देह।</verse>
				<verse number="5">इसा लोगून का बीच में हमेशा झगाड़ा पैद हुछो, जिनेरि बुद्धि भ्रष्ट हो गै, और उन सच्चाई नै समझ पान, और उन सोचनान कि परमेश्वर की सेवा करून धनवान हुना को तरीका छै।</verse>
				<verse number="6">लेकिन हमून खिन यो निको छै कि हम उ करा जो परमेश्वर स खुश करछो, और उमें संतोष करा जो उ हमून दीछो।</verse>
				<verse number="7">क्याखिनकि जब हम पैद भ्याँ तब हम यो संसार में के लीभेरन नै आया, और नै के यो संसार भटे मरना का बाद ली जा सकना।</verse>
				<verse number="8">और अगर हमार पास खान खिन और पैनून खिन छै त उई में सन्तुष्ट रून चैछो</verse>
				<verse number="9">लेकिन जो धनवान बनूँ चाछो, उन सब तरीका का बुराई करून खिन आसानी ले ध्वाका खा जानान, और एक जानवर की नियाती फन्दा में फस जानान। उन उ चीजून करून चानान जो उनून खिन बेकार और खतरनाक छै और यो इच्छा उनून बर्बादी की तरफ ली जालि और नाश कर देली।</verse>
				<verse number="10">क्याखिनकि धन को लोभ सब प्रकार कि बुराईन को जड़ छै, जैस हासिल करून खिन कुछ लोग विश्वास भटे भटक भेरन अपून आपस कई प्रकारा का दुखून में डाल दीनान।</verse>
				<verse number="11">लेकिन हे तीमुथियुस, तैं परमेश्वर की सेवा करून वालो आदिमी छै, तैं इन बातुन भटे दूर रौ, और सच्चाई ले जीवन जी जो परमेश्वर स आदर दीछो। मसीह में विश्वास कर और लोगून प्रेम कर। मुशकील हालातून में धीरज राख, और दुसारा लोगून का दयालु बनभेरन रौ।</verse>
				<verse number="12">जसीकैं एक बड़िया सिपाई लड़ाई में लड़ूनो नै छोड़नो, उसीकैं तैंस ले परमेश्वर में विश्वास करून और उक हुकमून को पालन करून कभै नै छोड़ूनो चैछो। ताकि तैं अपून ईनाम का रूप में अनन्त जीवन पा सका, जै खिन तैं बुलाई ले गैछै। जब भौत लोगून का सामुनि तैंले कईना को ले छ्यो कि तैं मसीह में विश्वास कर छै।</verse>
				<verse number="13">परमेश्वर और यीशु मसीह स गवाह मानभेरन, जो हरेक स जीवन दीछो, मैं तैंस बतूनमरयूँ कि जैले पुन्तियुस पिलातुस का सामुनि अपून बारिमें सच्ची क्योछ,</verse>
				<verse number="14">कि तैं हमार प्रभु यीशु मसीह का दुबारा उन तक यो सब कुछ कर, जैस पुरो करून खिन परमेश्वर हुकुम दी रैछ, ताकि कोई निन्दा नै कर सको कि तैं गलत करून मरेछै।</verse>
				<verse number="15">परमेश्वर जो परमधन्य छै, जो बड़ाई का योग्य छै, और अद्वैत अधिपति और उ राजान को राजा, और प्रभुन को प्रभु और सबून है महान छै उई मसीह स सही बखत में प्रगट करोलो।</verse>
				<verse number="16">और केवल उई एकमात्र छै, जो हमेशा खिन जियुनो छै, और उ इतुक चमकदार उज्याला में रूछो कि कोई ले उक नजिक नै आ सकूनो, और नै ऊस कोई आदिमी ले देखछ्य, और नै कभै देख सकूनो, उकी महिमा और सामर्थ हमेशा खिन रौली। आमीन।</verse>
				<verse number="17">यो संसारा का धनवानून हुकुम दे कि उन घमंडी नै बनून और अपून धन में भरोसा नै राखून, जो हमार सुख खिन सब कुछ ईमानदारी ले हमून दीछो।</verse>
				<verse number="18">और भल काम करून खिन हुकुम दे ताकि भल कामून में अमीर बना, और दुसरा की मद्दत करून खिन हमेशा तैयार रया।</verse>
				<verse number="19">अगर उन इसा भल काम करनान, त यो इसो छै जसो की उन स्वर्ग में खिन धन जामा करून मर्यान जो स्वर्ग में उनार भविष्य खिन मजबूत बुनियाद की नियाती होलि, और उनून सच्ची जीन्दगी मिलली जो हमेशा खिन होलि।</verse>
				<verse number="20">हे तीमुथियुस, तैं पक्को कर जो परमेश्वर ले तैंस दी रैछ तैं उई करनै रौ। और उन लोगून की जन सुण जो हमेशा बेकार की बात करनै रूनान, जेले परमेश्वर स आदर नै मिलनो, और बेकार में बिरोध करनान और कुंनान, कि यो ज्ञान छै, लेकिन सच्ची में यो नाहातिनी।</verse>
				<verse number="21">क्याखिनकि कुछ लोगून ले यो झूठ्ठा ज्ञान स मान हालछ्य, और मसीह की सच्ची शिक्षा नै मानभेरन विश्वास भटे भटक ग्यान। मैं प्रार्थना करछूँ कि परमेश्वरो को अनुग्रह तुम सबून में बनिना को रौ।</verse>
			</chapter>
		</book>
		<book number="55">
			<chapter number="1">
				<verse number="1">यो चिठ्ठी पौलुसाक तरफ भटे छै, परमेश्वर ले मैंस येक कारण चुन रैछ कि मैं यीशु मसीह यीशु में प्रेरित बनू ताकि मैं यो संदेश को प्रचार कर सकूँ, कि परमेश्वर ले अनन्त जीवन दीना को वादा करिना को छै जो यीशु मसीह में विश्वास करना ले मिलछो।</verse>
				<verse number="2">मैं यो चिठ्ठी तीमुथियुस स लिखूनमरयूँ, तैं म्यारा च्याला नियाती छै। मैं प्रार्थना करछूँ कि पिता परमेश्वर और हमोरो प्रभु यीशु मसीह तैंस अनुग्रह और दया, और शान्ति दीनै रून।</verse>
				<verse number="3">जब ले मैं परमेश्वर थैं प्रार्थना करछूँ, मैं हमेशा तेरो नाम याद करछूँ और परमेश्वरो को धन्यवाद करछूँ। जैकी मैं और म्यारा पूर्वज ले साफ मन ले सेवा करछ्य।</verse>
				<verse number="4">मैंस याद छै कि तैं कतुक रोछ्य जब हम अलग भ्या, त्यारा दगाड़ मिलना की इच्छा हुछी कि मेरि खुशी पुरी होज्यौ।</verse>
				<verse number="5">मैं तेरि नानी लोईसा को उ सच्चा विश्वास याद करछूँ, और तेरि ईजा यूनीके को ले ऊसोई विश्वास छ्यो। मैं यो बात में विश्वास करछूँ कि ऊसोई विश्वास तैमें ले छै।</verse>
				<verse number="6">येक कारण में तैंस याद दिलु छूँ कि उन वरदानून फिर इस्तमाल कर, जो परमेश्वरा का द्वारा तब मिल्यान जब मैंले त्यारा ख्वारा में हात राखछै।</verse>
				<verse number="7">क्याखिनकि परमेश्वर ले हमून डरफोक नै बनायो। बल्कि उको आत्मा हमार दिलून मजबूत बनूछो, और हमून एक दुसरा स प्रेम करून में, और हर हालात में अपून में काबू राखून में मद्दत करछो।</verse>
				<verse number="8">येक कारण तैं हमार प्रभु यीशु मसीह का बारिमें बतून में शर्मिन्दा जन हो, और नै तैंस यो बात में शर्म उनी चैछी मैं उकी सेवा करून में कैद में छूँ, बल्कि तैंस उ सामर्थ को इस्तमाल करून चैछो, जो परमेश्वर तैंस दीछो, और तैंस म्यारा दगाड़ उन दुखून में शामिल ले हुन चैछो, जो मैं सुसमाचार कारण सहन करून मरयू।</verse>
				<verse number="9">परमेश्वरे ले हमोरो उद्धार करछ्य, और हमून पवित्र जीवन जीन खिन बुलाछ। उले हमून येक कारण नै चुनियो की हमूले भल काम कर्यान, लेकिन अपून मक्शद और उ अनुग्रह का कारण बुलाछ, जैकी योजना परमेश्वरे ले पैलि भटे यीशु मसीह स यो संसार में भेजना का द्वारा बनाईना की छी।</verse>
				<verse number="10">लेकिन अब हमार मुक्तिदाता यीशु मसीह आ ग्यान, और उले हमून में अपूनो अनुग्रह करछ्य, जैले मौत की ताकत स नाश कर दीछ और सुसमाचारा का द्वारा हमून अनन्त जीवन को बाट दिखाछ।</verse>
				<verse number="11">परमेश्वर ले मैंस यो सुसमाचार को प्रचार करून और प्रेरित बनून खिन और लोगून उपदेश दीन खिन चुन रैछ।</verse>
				<verse number="12">मैं येक कारण जेल में ले इन दुखून सहन करून मरयू कि मैं लोगून यीशु मसीह का बारिमें सुसमाचार को प्रचार करछूँ। लेकिन मैं शरमानू नै, क्याखिनकि मैं मसीह स जाणछूँ; जैमें मैं विश्वास करछ्य, और मैंस पक्को विश्वास छै कि मसीह उ दिन तक जब तक उ वापस नी आलो, मसीह उ दिन तक मेरि धरोहर की रक्षा करून में पुर तरीका ले सामर्थी छै।</verse>
				<verse number="13">विश्वास राख कि जो सच्ची शिक्षा तैले मैंथैं भटे सुणछै, उ तैखिन उदारण नियाती छै। और उनून उ विश्वास और प्रेम का दगाड़ जो यीशु मसीह में छै।</verse>
				<verse number="14">यीशु मसीह का बारिमें सुसमाचार की रखवाली कर जो परमेश्वरे ले तैंस दीईना को छ्यो, पवित्र आत्मा का मद्दत ले जो हमून में रूछो।</verse>
				<verse number="15">तैं जाण छै, कि आसिया प्रदेशा का सब विश्वासी लोगून ले मैंस छोड़ दी है छै, जिनून में फुगिलुस और हिरमुगिनेस ले छन।</verse>
				<verse number="16">उनेसिफुरूस का घराना में प्रभु दया करो, क्याखिनकि उले म्यारा पास आभेरन मेरि भौत मद्दत करछ्य, और याँ जेल में मैंथैं मिलभेरन शर्मिन्दा नै भ्यो।</verse>
				<verse number="17">लेकिन जब उ रोम शैहर में आछ, त उले भौत कोशिश करभेरन मैंस खोजछ्य, और मैंथैं मिलछ्य।</verse>
				<verse number="18">मैं बिनती करछूँ, कि न्याय का दिन प्रभु उनेसिफुरूस में अपूनी महान दया करौ और तैं खुद निकीकैं जाण छै कि इफिसुस शैहर में मेरि कतुक मद्दत करछ्य।</verse>
			</chapter>
			<chapter number="2">
				<verse number="1">येक कारण, हे म्यारा च्याला तीमुथियुस, तैं अपून आपस मजबूत कर यो जाणभेरन कि परमेश्वर ले तैंस उ अनुग्रह दी रैछ, जो सिर्फ यीशु मसीह का तरफ भटे मिलछो।</verse>
				<verse number="2">तैले मैंस भौत लोगून का सामुनि जो यो गवाह छन मसीह का बारिमें उपदेश सिखून सुण रैछ, येक कारण मैं चाछूँ, कि तैले विश्वासीन योई संदेश सिखौ जो विश्वासयोग्य छै, ताकि उन दुसरान यो सिखा सकून।</verse>
				<verse number="3">यीशु मसीह का एक बड़िया सिपाई नियाति म्यारा दगाड़ दुखून सहन कर।</verse>
				<verse number="4">जब एक सिपाई सेना में भरती हो जाछो, और कोई दुसोरो काम नै करूनो, क्याखिनकि उ अपून अधिकारीस खुश करून चाछो।</verse>
				<verse number="5">यो एक और उदारण छै, जब कोई खिलाड़ी खेल-कूद में भाग लीछो, जब तक खेल का नियमून को पालन नै करूनो, उ तब तक ईनाम नै जीत सकूनो।</verse>
				<verse number="6">मेहनत करूनवाला किसान स सबून है पैलि फसलो को हिस्सा मिलून चैछो।</verse>
				<verse number="7">तैं मेरि बातुन में ध्यान दे, क्याखिनकि प्रभु सब बातुन समझून में तेरि मद्दत करोलो।</verse>
				<verse number="8">हमेशा याद राख कि यीशु मसीह को छै, उ राजा दाऊद को वंशज छै, परमेश्वर ले ऊस मरिनान में भटे ज्यून करछ्य, और यो उई सुसमाचार छै जो मैं लोगून का बीच में प्रचार करछूँ।</verse>
				<verse number="9">मैं जेल में एक अपराधी का नियाती दुख सहन मरयू क्याखिनकि मैं सुसमाचार को प्रचार करछूँ। कोई ले आदिमी परमेश्वरा का बचन को प्रचार करून है नै रोक सकूनो।</verse>
				<verse number="10">येक कारण मैं उन लोगून का फैदा खिन सब दुखून सहन करछूँ, जिनून परमेश्वर ले चुन रैछ, ताकि उन ले यीशु मसीह में विश्वास करून और बचाई जा सकून, और उ महिमा स पा लीन जो हमेशा खिन बनिना की रूछी।</verse>
				<verse number="11">यो बात सच्ची और हरेक प्रकारे ले मानून लायक छै, अगर हम मसीह का दगाड़ मर ग्या, तैं उक दगाड़ ज्यून ले हुंला,</verse>
				<verse number="12">अगर हम उक कारण दुख सहनू, त उक दगाड़ राजा ले कराला, अगर हम उको इन्कार कराला, त उले हमोरो इन्कार करोलो।</verse>
				<verse number="13">अगर हम मसीह का प्रति वफादार नाहातिन, तब ले उ हमार प्रति वफादार रौलो, क्याखिनकि उ अपून आदत का खिलाफ नै जा सकनो।</verse>
				<verse number="14">जो बात मैंले तैंस बाता राख्यान इन उनून विश्वासी लोगून बार-बार बतूनै रौ, और परमेश्वर स एक गवाह का रूप में राखभेरन, तैंस उनून चेतावनी दीनी चैछी कि उन शब्दून का मतलब स लीभेरन बाद-बिबाद जन करून, इसा तरीका को बिबाद करना ले कोई ले फैदा नै हुनो, लेकिन सुणन वाला लोगून को भौत नुकशान हुछो।</verse>
				<verse number="15">तैं जतुक कड़ी मेहनत कर सकछै उतुक तैंस करून चैछो, ताकि परमेश्वर तैंस कारीगर का नियाती पुर तरीका ले ग्रहण कर सको, जैले तुमून अपून काम कारण शर्मिन्दा नै हुनो और सच्चाई का बचन स सही तरीका ले सिखूछो।</verse>
				<verse number="16">संसारा का और बेकार का बातुन भटे दूर रौ, क्याखिनकि जो लोग इन बातुन में शामिल हुनान, उ परमेश्वर है दूर हो जानान।</verse>
				<verse number="17">और इसा बात सड़ीना का घौ का नियाती फैल जाछी, और आखरी में उन लोगून का विश्वास स नाश कर द्याला जो उनेरि सुणनान। उनूनमें भटे हुमिनयुस और फिलेतुस छन।</verse>
				<verse number="18">उनूनले सच्चाई में विश्वास करून छोड़ दी है छै, उन कुंनान कि परमेश्वर ले पैलि भटे मरिना का विश्वासीन हमेशा को जीवन जीन खिन ज्यून कर दी है छै। और जैको नतीजा यो छै कि उन थ्वाड़ विश्वासीन मसीह में विश्वास करून है रोकून मर्यान।</verse>
				<verse number="19">परमेश्वरा का लोग एक पक्की बुनियाद नियाती छै जो हिलनी नै, और उ बुनियाद में यो शब्द लिखीना का रूनान; “प्रभु जाणछो की उक लोग को छन,” और यो ले “और जो कोई ले परमेश्वर की अराधना करछो ऊस बुराई करून छोड़ दीन चैछी।”</verse>
				<verse number="20">कोई ले ठूला घर में नै केवल सुना और चाँदी का, बल्कि लाकड़ा का और माटाका ले भांणा हुनान। कोई-कोई भांणा खास मक्शद खिन और कोई-कोई भांणा हर रोज आम काम खिन इस्तमाल हुनान।</verse>
				<verse number="21">उसीकैं अगर कोई विश्वासी अपून आपस इन बुरा कामून भटे अलग करोलो, और जैको जीवन पवित्र होलो, त उ भांणाका नियाती होलो जैस खास काम खिन इस्तमाल करि जाछो, येक कारण उको मालिका ऊस निका काम खिन इस्तमाल करोलो।</verse>
				<verse number="22">उन बुरा चीजून है अपूनास दूर राख जिनून जवान लोग करून चानान और जो साफ मन ले प्रभु की अराधना करनान, उनार दगाड़ धार्मिकता, विश्वास, प्रेम और शान्ति ले मेल-जोल बनाभेरन राँख।</verse>
				<verse number="23">लेकिन मूर्खता और उटपटांग बहस भटे दूर रौ, क्याखिनकि तैं जाण छै कि येले झगाड़ा पैद हुनान।</verse>
				<verse number="24">और प्रभु का सेवक स झगड़ालू नै हुन चैनो, बल्कि सबून का दगाड़ मिलनसार और परमेश्वरा का बचन स निकीकैं सिखूनवालो और लोगून का दगाड़ धीरज धरून वालो हुन चैछो।</verse>
				<verse number="25">और जो लोग बिरोध करनान, उनुस उले भौत प्रेम ले समझून चैछो, हो सकछो शायद परमेश्वर उनून पापून भटे मन फिरूना को और मसीह का बारिमें सच्चाईस जाणना को मौका दे।</verse>
				<verse number="26">ताकि उन लोग होश में आ जून और शैताना की शक्ति ले बच सकून, जैले उनूनथैं अपूनी इच्छा पुरी करून खिन ध्वाका ले बन्दी बना राख रैछ।</verse>
			</chapter>
			<chapter number="3">
				<verse number="1">तीमुथियुस जो बात मैं अब तैथैं कुछूँ, ऊस ध्यान ले सुण कि आखरी दिनून में यीशु मसीह का वापस उना है पैलि भौत बुरो बखत आलो।</verse>
				<verse number="2">क्याखिनकि लोग अपून बारिमें सोचाला, और धना क लोभी, डीगमार, घमंडी, और दुसरान को बुराई करूनवाला और ईजा-बाबको हुकुम नै मानून वाला, एसान नै मानूनवाला और अपवित्र,</verse>
				<verse number="3">निर्दयी, माफ नै करनवालो, दोष लगूनवाला, अपून आप में काबू नै राखून वाला, जालिम, भलाई भटे बैर राखून वाला,</verse>
				<verse number="4">विश्वासघात करून वला, ढीठ, अभिमानी, और परमेश्वरा का नै बल्कि सुख-विलास का चानवाला होलो।</verse>
				<verse number="5">उन इसो दिखावा कराला, जसीकैं उन परमेश्वरा का भक्त करनान, लेकिन उन परमेश्वर की सामर्थ स नी मानाला, इसा लोगून है बचभेरन रया।</verse>
				<verse number="6">इनून में भटे कुछ लोग उन छन, जो पुर परिवारून ध्वाका दीनान, और मूर्ख स्यैनिन अपून वश में कर लीनान जो अपून पापून का बोझ ले दब भेरन हर प्रकार का बुरी इच्छान वश में छन।</verse>
				<verse number="7">उन हमेशा नय्या चीज सिखनै रूनान, लेकिन मसीह का बारिमें सच्ची शिक्षान कभै नै समझ सकना।</verse>
				<verse number="8">इन झूठ्ठा शिक्षक छन, जो मसीह का बारिमें सच्ची बात बतून है रोकना की कोशिश करनान, जसीकैं यन्नेस और यम्ब्रेस ले मूसा को विरोध करछ्य, उसीकैं उनेरि बुद्धि ले भ्रष्ट हो गैछ। और उन सच्ची में मसीह में विश्वास नै करना।</verse>
				<verse number="9">उन ज्यादा लम्बा बखत तक लोगून ध्वाका नी दी पान। क्याखिनकि, जसीकैं लोगून ले जाण लीछ की यन्नेस और यम्ब्रेस मूर्ख छ्या, उसीकैं हरेक लोग जाण ल्याला कि उन मूर्ख छन।</verse>
				<verse number="10">लेकिन हे तीमुथियुस, तैं निकीकैं जाण छै कि मैं कि सिखूछूँ, और कसा तरीका ले जीछूँ, जीवन में म्योरो की मक्शद छै और म्योरो कसो विश्वास छै। और तैं जाण छै कि मैं धीरज राखछूँ, और सब लोगून प्रेम करछूँ, मैंले दुखून सहन करछ्य।</verse>
				<verse number="11">तैं उन भयानक मुसीबतून का बारिमें जाण छै जो लोगून ले म्यारा दगाड़ अन्ताकिया, इकुनियुम, और लुस्त्रा शैहरून करछ्य, और मैंले वाँ कसीकैं सताव सहन करछ्य। मैंले इसा अत्याचार सहन करछ्य, लेकिन प्रभु ले सब बातुन में मेरि रक्षा करनै रयान।</verse>
				<verse number="12">यो बात सच्ची छै कि जो यीशु मसीह में सच्चाई जीन्दगी जीनो को फैसला करनान, उन सब में जुल्म होला।</verse>
				<verse number="13">लेकिन दुष्ट लोग और उन ध्वाकाबाज लोग और ले ज्यादा बुरा काम कराला। उन लोगून ध्वाका द्याला और खुद ले दुसरान थैं है ध्वाका खाला।</verse>
				<verse number="14">पर हे तीमुथियुस, इन बातुन में हमूले तैंस सिखायान और जिनूनमें तैं विश्वास ले करछ्य, और तैं लगातार इन बातुन में विश्वास ले अमल करूनै रौ; क्याखिनकि तैं जाण छै कि तैंस यो सच्चाई कैले बताछ।</verse>
				<verse number="15">और नानछना भटे तैं पवित्रशास्त्र जाण छै, और यो तैंस मुक्ति को ज्ञान दी सकछो, जो तैंस मसीह यीशु में विश्वास करूना का द्वारा मिलछो।</verse>
				<verse number="16">पुरो पवित्रशास्त्र परमेश्वरा का प्रेरणा द्वारा लिखीना को छै। यो लोगून सिखून खिन, डाट-फटकार लगून खिन, गलतिन सुधारून खिन और उनून सिखून खिन हमून खिन फैदामन्द छै।</verse>
				<verse number="17">ताकि परमेश्वर की सेवा करूनवाला आदिमी सिद्ध बनून और हर प्रकारा भल कामून करून खिन तैयार होज्यौ।</verse>
			</chapter>
			<chapter number="4">
				<verse number="1">जब यीशु मसीह राजा की नियाती राज्य करून खिन आलो, उ ज्यून और मरिन द्वीवै लोगून को न्याय करोलो। येक कारण मैं मसीह और परमेश्वर स गवाह मानभेरन तैस भौत प्रेम ले हुकुम दीछूँ,</verse>
				<verse number="2">बखत बुरो या भलो हो तैं हर बखत परमेश्वरा का बचन को प्रचार कर खिन तैयार रौ। तैंस लोगून समझून चैछो कि उनूनले कि गलत करछ्य और उनार पापून खिन उनून डाँठ लागून चैछी। मगर धैर्याक दगाड़ सिखून चैछो और उत्साहित करून चैछो।</verse>
				<verse number="3">क्याखिनकि इसो बखत आलो जब लोग सच्चो वचन स सुणून नी चाला, मगर अपूनी इच्छाक अनुसार उन इसा उपदेश दीन वालान खोजाला जो उन बातुन सिखाला जो उन सुणून चानान।</verse>
				<verse number="4">और जो परमेश्वरो को सच्चो बचन सिखूनान, उन, उन लोगून की सुणून नी चाला, पर पुरानी झूठ्ठी कथा कहानीन सुणून चाला।</verse>
				<verse number="5">लेकिन तैं हर बखत अपून पास शान्त राख, और हर प्रकारा का दुखून सहन करनै रौ। तैंस कड़ी मेहनत करभेरन सुसमाचार को प्रचार करून छै और परमेश्वरो को दास हुना का नाता तैंस उन सब कामून करून छै, जो प्रभु ले तैंस सौंप रैछ।</verse>
				<verse number="6">मैं तैंस यो हुकुम येका कारण दीन मरयूँ म्योरो जीवन और परमेश्वर ले जो काम मैंस सौंपिना को छै उ पुरो हुन वालो छै। क्याखिनकि मैं जाणछूँ कि मैं अब जल्दी ही मरून वालो छूँ।</verse>
				<verse number="7">जसीकैं एक निको सिपाई लड़ाई में लगातार लड़ाई लड़नै रूछो, उसीकैं मैंले उ काम पुरो करछ्य जो मसीह यीशु ले मैंस करून खिन दी रैछ्यो। और मसीह में म्योरो विश्वास हमेशा मजबूत रियोछ।</verse>
				<verse number="8">अब प्रभु ले मैं खिन ईनाम राखिना को छै, क्याखिनकि मैं इसो जीवन जी छै जो ऊस खुश करछो। हमोरो प्रभु यीशु मसीह जो सच्चाई ले न्याय करछो, उ मैंस उ दिना ईनाम द्योलो जब उ न्याय करून खिन वापस आलो। मगर यो ईनाम सिर्फ मैंस नी द्योलो बल्कि उनून सबून ले जो वफादारी का दगाड़ प्रभु उनाको इंतजार करून मर्यान।</verse>
				<verse number="9">तैं म्यारा पास जल्दी उनाकी कोशिश कर।</verse>
				<verse number="10">क्याखिनकि देमास ले यो संसार का चीजून है प्रेम करछ्य, और मैंस छोड़भेरन थिस्सलुनीके शैहरा का तरफ खिन न्हैग्यो। और विश्वासी भाई क्रेसकेंस ले गलातिया प्रदेशा का तरफ खिन न्हैग्यो, और तीतुस दलमतिया प्रदेश तरफ खिन न्हैग्यो।</verse>
				<verse number="11">केवल लूका म्यारा दगाड़ छै। जब तैं आले, त मरकुस स ले अपून दगाड़ लीभेरन आये; क्याखिनकि उ याँ म्यारा काम में मेरि मद्दत करोलो।</verse>
				<verse number="12">तुखिकुस स मैंले इफिसुस शैहरा खिन भेज रैछ।</verse>
				<verse number="13">जब तैं आले म्योरो उ कोट जैस मैं त्रोआस शैहर में करपूसाक घर में छोड़ आरयूँ, ऊस लीभेरन आये और दगाड़ में किताब और खास करभेरन बाकारा की खाल स लीभेरन आये जैमें भौत खास बात लिखीनाक छन।</verse>
				<verse number="14">ताँमाको भांणा बनूनवालो सिकन्दर ले मैंस कई तरीका ले दुख पुजाछ, प्रभु उक बुरा कामून का न्याय करोलो।</verse>
				<verse number="15">तैले अपून आपस उ है बचा राखै, क्याखिनकि उले हमरि मसीह शिक्षा का बातुन को भौत विरोध करछ्य।</verse>
				<verse number="16">पैल बार जब रोम शैहरा का कचैरी में अपूनी सफाई दीन खिन गयूँ, तब म्यारा तरफ भटे बोलूनवालो कोई ले नी छ्यो, और सबून ले म्योरो दगोड़ो छोड़ दीछ। प्रार्थना करछूँ कि परमेश्वर यो बात खिन उनून माफ करौ।</verse>
				<verse number="17">पर प्रभु म्योरो मद्दतगार र्योछ, और मैंस सामर्थ दीछ ताकि मैं उ कचैरी में मजुद सब गैर-यहूदीन पुर तरीका ले यीशु मसीहक बारिमें सुसमाचार स सुणा सकयू, और मैंस मौत है ले बचाछ।</verse>
				<verse number="18">और प्रभु मैंस हरेक बुर कामून भटे छुड़ालो। उ मैंस सुरक्षित अपून स्वर्ग राज्य में पुजालो। उकी महिमा हमेशा-हमेशा हुनै रौ। आमीन।</verse>
				<verse number="19">प्रिस्का और उको घरवालो अक्विला स और उनेसिफुरूसा का परिवार स म्योरो नमस्कार।</verse>
				<verse number="20">विश्वासी भाई इरास्तुस कुरिन्थुस शैहर में रैग्यो, और मैंले त्रुफिमुस स मीलेतुस शैहर में छोड़ दीछ क्याखिनकि उ बिमार छ्यो।</verse>
				<verse number="21">जाड़ा दिनून है पैलि म्यारा पास उना कोशिश कर। युबुलुस, और पुदेंस, लीनुस, क्लौदिया, और दुसारा विश्वासी भाई ले तैंस नमस्कार कुंनान।</verse>
				<verse number="22">मैं प्रार्थना करछूँ, कि प्रभु और उको अनुग्रह त्यारा दगाड़ रौ।</verse>
			</chapter>
		</book>
		<book number="56">
			<chapter number="1">
				<verse number="1">यो चिठ्ठी पौलुसाक तरफ भटे छै। मैं परमेश्वरो को दास और यीशु मसीह को प्रेरित छूँ। मैंस परमेश्वरा का चुनिना का लोगून को विश्वास मजबूत करून और उनेरि मद्दत करून खिन चुन रैछ, ताकि उन उ सच्चाई जाणभेरन इसो जीवन जियून, जैले परमेश्वर स आदर मिलछो।</verse>
				<verse number="2">येक कारण उन परमेश्वरा का दगाड़ हमेशा खिन रून की आश करनान, क्याखिनकि परमेश्वर जो कभै झूठ नै बोलूनो, उले संसारा बनून है पैलि वादा करिना को छ्यो कि उक लोग हमेशा खिन ज्यूना रौला।</verse>
				<verse number="3">और अब बिल्कुल ठीक बखत में परमेश्वर ले यो सुसमाचार स हमार सामुनि प्रगट करछ्य, और हम येको प्रचार सबून का बीच करनू। हमार मुक्तिदाता परमेश्वर ले यो हुकुम दीभेरन मैंस जिमेदारी दी रैछ, कि उखिन यो काम करू।</verse>
				<verse number="4">मैं यो चिठ्ठी तीतुस खिन लिखूनमरयूँ। तैं म्यारा च्याला नियाती छै क्याखिनकि तैले मसीह में विश्वास करछै जसीकैं मैं करछूँ। मैं प्रार्थना करछूँ कि पिता परमेश्वर और हमोरो मुक्तिदाता यीशु मसीह तैंस अनुग्रह और दया, और शान्ति दीनै रून।</verse>
				<verse number="5">मैं तुमून क्रेते टापू येक कारण छोड़ आईना को छूँ, कि तुम वाँ का कामून की पुरी ब्यवस्था करा ताकि हर नगर में म्यारा हुकुम का अनुसार इसा अगुवान चुना,</verse>
				<verse number="6">जो निर्दोष, और अपून घरवाली का प्रति वफादार, और जिनारा बच्चाले विश्वासी हुन, और उन शरीराक इच्छान में चलूनवाला नै हुन, और ईजा-बबा को आदर करूनवाला हुन।</verse>
				<verse number="7">क्याखिनकि अगुवान परमेश्वरा का मुन्सी हुना का कारण निर्दोष हुन चैछो; नै जिद्दी, नै क्रोधी, नै पियक्कड़, नै मारपीट करनवालो, और नै नीच कमाईको लालची हो।</verse>
				<verse number="8">और घर में आईना का मेहमानून की इज्जत करून वालो, दुसारा लोगून खिन भलाई करून वालो, हर हालात में अपून में काबू राखून वालो, सच्चो न्याय करून वालो, धर्मी, और पवित्र जीवन जीन वालो, अपूनी इच्छान में काबू करून वालो हुन चैछो।</verse>
				<verse number="9">ऊस यीशु मसीह का बचनून में मजबूती ले विश्वास करून चैछो जो हमूले ऊस सिखाईना को छ्यो। ताकि उ दुसरान सही शिक्षा मानून खिन हिम्मत दी सकून, और दुसरान का गलतिन ठीक कर सकून।</verse>
				<verse number="10">मैं यो येक कारण कुछूँ, क्याखिनकि भौत लोग सही शिक्षा को बिरोध करनान, उन जो बक-बक करनान और दुसरान ध्वाका दीन सिखूनान। खास करभेरन उन यहूदीन का बारिमें जो सच्ची में विश्वासी बन ग्यान।</verse>
				<verse number="11">इसा लोगून विश्वासीन सिखूना को हुकुम जन दीये, क्याखिनकि जब उन इन बातुन सिखूनान जो उनून सिखूनी चैछी, त उन पुर परिवारो को विश्वास नाश कर द्याल। उन इसो येक कारण करनान ताकि धन कमा सकून।</verse>
				<verse number="12">क्रेते टापू में एक आदिमी ले जैस उन बुद्धिमान आदिमी माननान, उ कुंछो कि क्रेते का लोग हमेशा झूठ बोलनान और जानवरून की नियाती ब्‍यवहार करनान। उन आलसी और हमेशा भौत ज्यादा खानो खानान।</verse>
				<verse number="13">और क्रेते का लोगून का बारिमें यो बात अब ले सच्ची छै। येक कारण उनून कड़ी चेतावनी दीनै रौ, ताकि उ यीशु मसीह की सच्ची शिक्षा में विश्वास करून।</verse>
				<verse number="14">तुम यहूदीन की झूठ्ठी कथा-कहानीन और उन लोगून का हुकुमन को पालन जन कर्या, जो सच्चाई भटे भटक ग्यान।</verse>
				<verse number="15">उन लोगून खिन जिनारा मन में बुरा बिचार नाहातिन, सब चीज नियम का अनुसार शुद्ध छन, लेकिन उन लोगून खिन जो बुरा छन जो यीशु मसीह में विश्वास नै करना, जो कुछ ले उन करनान उ ठीक नै करूना</verse>
				<verse number="16">उन झूठ्ठी शिक्षा दीन वाला कुंनान कि हम परमेश्वर स जाणनू, लेकिन उन अपून काम ले दिखूनान कि उन जाणना। क्याखिनकि उन नफरत ले भरिना का छन और हुकुम नै मानून वाला छन और उन कोई ले भल काम करून योग्य नाहातिन।</verse>
			</chapter>
			<chapter number="2">
				<verse number="1">लेकिन तीतुस तैखिन यो ठीक छै कि तैंस विश्वासीन सिर्फ उई सिखून चैछो जो यीशु मसीह की सच्ची शिक्षा छै।</verse>
				<verse number="2">बुढ़ा लोगून अपून आप में काबू राखून, और इसो तरीका को ब्यवहार करून ताकि लोग उनोरो आदर करून, और समझदारी ले जीन सिखौ। और उनून विश्वास में मजबूत हुन चैछो और दुसरान का दगाड़ प्रेम करून चैछो और सहन करूना की शक्ति हुन चैछी।</verse>
				<verse number="3">उसीकैं बुढ़ी स्यैनिन को ले इसीकैं ब्यवहार करून चैछो जो हर बात में परमेश्वरो को आदर दीन वाली। और केमें दोष लगून वाली और मदिरा पिन वाली नै हुन चैछी, बल्कि निकी बात सिखून वाली हो</verse>
				<verse number="4">ताकि उन जवान स्यैनिन खिन एक उदारण बन सकून। और यो ले सिखा सकून कि अपून घरवाला का और नान्तिनान का दगाड़ कसो प्रेम करून चैछो।</verse>
				<verse number="5">जवान स्यैनिन अपून आप में काबू राखून वाली, और अपून घरवाला का दगाड़ वफादार रौ और अपूनो घर स सभालून वाली और अपून-अपून घरवालान का अधीन रून वाली हो, ताकि परमेश्वर बचन की निन्दा नै पौ।</verse>
				<verse number="6">इसोई जवान आदिमीन ले समझदारी ले ब्यवहार करून खिन मजबूत करनै रौ कि उन ले अपून आप में काबू करूनवाला हुन।</verse>
				<verse number="7">तैंस हमेशा भल काम करून चैछो, ताकि तैं दुसारा लोगून खिन उदारण बनौ। जब तैं विश्वासीन परमेश्वरा का बारिमें सिखूछै, त तैंस निका इरादा ले सिखून चैछो, जैले लोग तेरो आदर कर सकून।</verse>
				<verse number="8">और तैंस सिखून चैछो जो सही छै, ताकि कोई ले तैमें दोष नै लागा सको, जैले त्यारा बिरोधीन शर्मिन्दा हुन क्याखिनकि उ शिक्षा में कोई बुरी बात नाहातिन, जैले कि उ त्यारा खिलाफ के कै सकून।</verse>
				<verse number="9">अपून विश्वासीन की मण्डली में दासून सिखौ कि उन हमेशा अपून मालिकून को हुकमो को पालन करून। उनून ऊसो करून खिन जेले उनार मालिक खुश रून, और उन उनार काम का बारिमें शिकायत नै करून।</verse>
				<verse number="10">चोरी-चालाकी जन करून; बल्कि उन साबित करून की उन हमेशा ईमानदार छन, ताकि लोग उनार निका ब्यवहार में ध्यान दीन और जो कुछ ले उन करनान उन लोगून का द्वारा हमार मुक्तिदाता परमेश्वरा का बारिमें संदेश सुणून को कारण बना।</verse>
				<verse number="11">उन विश्वासीन इसीकैं सिखौ, किलैंकी परमेश्वर ले सब लोगून को पाप भटे उद्धार को बाटो दिखाभेरन अपूनो अनुग्रह उनूनमें करछ्य।</verse>
				<verse number="12">यो अनुग्रह का कारण परमेश्वर हमून सिखूछो, कि हम उ स्वभाव स छोड़ून सिखा, जो परमेश्वरो को अपमान करछो और उन चीजून की इच्छा स ले छोड़ून चैंछो, जिनरी इच्छा अविश्वासी करनान। और जब कि हम यो संसार में छा त बुद्धिमानी ले और धार्मिकता का दगाड़ इसा तरीका जीवन जीया जैले परमेश्वर खुश हुछो।</verse>
				<verse number="13">हम इसीकैं ब्यवहार करनू जब हम उ दिनो को इन्तजार करूनमर्यान, जैकी हमून आश छै, उ दीन जब यीशु मसीह, जो हमोरो महान परमेश्वर मुक्तिदाता छै, अपूनी पुरी महिमा का दगाड़ संसार में वापस आलो।</verse>
				<verse number="14">यीशु मसीह ले अपून आपस हमून खिन सूली में बलिदान कर दीछ ताकि हमून हर प्रकार का बुराई भटे छुड़ा ले और हमून पापून भटे आजाद करभेरन अपून खिन एक इसी प्रजा बना ले जो भल काम करून खिन पुर जोश दगाड़ तैयार रौ।</verse>
				<verse number="15">येक कारण तीतुस मैं चाछूँ कि तैं क्रेते का विश्वासीन यो बातुन सिखौ जो मैंले तैंस बताईना का छन। अपून लोगून मजबूत कर और जाँ जरूरी हो, वाँ उनूनमें सुधार कर, तैंस इसो करून में म्यारा तरफ भटे पुरो अधिकार छै, कोई ले तेरो निरादर नी कर सकोलो।</verse>
			</chapter>
			<chapter number="3">
				<verse number="1">विश्वासी लोगून याद दिलो, कि शासकून और अधिकारीन को आदर करून, और उनेरि हुकुम माना और दुसारान खिन हरेक भल कामून खिन तैयार रौ।</verse>
				<verse number="2">कैकी बदनामी जन कर, झगड़ालू नै हो, और शान्त आदत को हो, और सब लोगून का दगाड़ भौत दयालु बनभेरन रौ।</verse>
				<verse number="3">क्याखिनकि हम सब विश्वास में उन है पैलि मूर्ख और परमेश्वरा का हुकमून नै मानूनवाला छ्या, और लोगून थैं भटे ध्वाका खान वाला छ्या, और हम बुरी इच्छा और संसारा का चीजून का गुलाम छ्या, जसीकैं बैर-भाव और डाह करून में जीवन जी छ्या, और लोगून थैं नफरत करछ्या, और एक दुसारा भटे बैर राख छ्या।</verse>
				<verse number="4">लेकिन फिरले हमार मुक्तिदाता परमेश्वर ले अपूनी दया और प्रेम हम लोगून में दिखाछ,</verse>
				<verse number="5">उनूनले हमून पापून का सजा भटे छुड़ाछ, यो हमार द्वारा करिना का भल कामून का कारण नै जो हमूले कर्यान, उले अपूनी दया का अनुसार, हमार पापून धोभेरन दूर कर्यान। और पवित्र आत्माक द्वारा हमून नय्या स्वभाव और नय्या जीवन दीछ।</verse>
				<verse number="6">हमोरो मुक्तिदाता यीशु मसीहा ले जो उक द्वारा परमेश्वर ले पवित्र आत्मा दी रैछ, ताकि उ हमूथैं सामर्थ का काम करा सको।</verse>
				<verse number="7">जैले हम उ अनन्त जीवन स पाना की आश राखभेरन जो परमेश्वर ले हमून अपूनी संतान का रूप दीना को वादा करछ्य। और येका बारिमें हम जाण सकनू क्याखिनकि परमेश्वर ले अपून अनुग्रह का द्वारा हमून अपून दगाड़ सही ठैहराछ।</verse>
				<verse number="8">यो बात हर तरीका ले मानून लायक छै, जो मैंले तैंस बतायान और मैं चाछूँ कि तैं विश्वासीन इन बातूना का बारिमें मजबूती ले सिखौ। येक कारण कि जिनूनले परमेश्वर में विश्वास करछ्य, उन भल काम करून खिन अपूनो बखत दीन खिन ध्यान लगून। यो बात सबून खिन निकी और फैदा की छै।</verse>
				<verse number="9">लेकिन बेकारा बहसून है दूर रौ। वंशावालिन की सूची में अपूनो बखत खराब जन करा, बैर-भाव और बिरोध, और उन झगड़ान है जो मूसा का नियम-कानून का बारिमें हुनान, उनून है बचभेरन रौ, क्याखिनकि उन बातुन को कोई फैदा नाहातिन और नै कैकी मद्दत कर सकछी।</verse>
				<verse number="10">तैंस कम है कम द्वी बार उन लोगून चेतावनी दीन चैछी जो विश्वासीन की मण्डली में फुट डालनान, कि उन इसो करून बन्द करून। दुसारा बार चेतावनी दीन का बाद उनून है कोई सम्बन्ध जन राँखा।</verse>
				<verse number="11">तैं यो पक्का जाण ले इसा लोग जो जान बुझ भेरन पाप करनान, उन जाणनान कि उन बुर काम करून मर्यान और उ ऊस लगातार करनै रूनान।</verse>
				<verse number="12">जब मैं त्यारा पास क्रेते टापू में अरतियास और तुखिकुस विश्वासी भाईन भेजूलो, त म्यारा पास निकोपुलिस शैहर में उनाकी कोशिश करे, क्याखिनकि मैंले वाँई जाड़ान का मौसम में रूना को फैसाला करछ्य।</verse>
				<verse number="13">जब जेनास वकील और अपुल्लोसे स अपूनी यात्रा खिन निको रियान, तैं उनेरि मद्दत खिन जैले कर सकछ्य, उनून खिन करे। यो ध्यान राखे उनून के बात की कमी नै हो।</verse>
				<verse number="14">सिर्फ इतुकैं नै तैंस विश्वासीन सिखूनै रून चैंछो कि भल काम करून खिन लगातार मेहनत करनै रून ताकि उन लोगून की जरूरत पुरी हो सकौ। और यो विश्वासीन की मद्दत करोलो कि उन एक मक्शद का दगाड़ जीवन जी सकून।</verse>
				<verse number="15">म्यारा दगाड़ याँ का सब विश्वासी तैंस नमस्कार करनान। वाँ क्रेते में हमार दगाड़ विश्वासीन जो हमून प्रेम करनान, उनूनले म्यारा तरफ भटे नमस्कार कये। मैं प्रार्थना करछूँ कि तुम सबून में प्रभु अनुग्रह करो।</verse>
			</chapter>
		</book>
		<book number="57">
			<chapter number="1">
				<verse number="1">मैं पौलुस यो चिठ्ठी लिखूनमरयूँ। मैं यीशु मसीह की सेवा का कारण जेल में बन्द छूँ। और हमोरो दगड़िया विश्वासी तीमुथियुस तुमून नमस्कार करछो। हे प्रिय भाई फिलेमोन मैं तैंस चिठ्ठी लिखूनमरयूँ।</verse>
				<verse number="2">और मैं हमरि विश्वासी बैनि अफफिया, और हमार दगड़िया अरखिप्पुस, जो एक योद्धा की नियाती परमेश्वर की सेवा करछो, और उन विश्वासीन खिन ले लिखूनमरयूँ जो तुमारा घर में जाम हुनान।</verse>
				<verse number="3">और मैं प्रार्थना करछूँ कि हमार पिता परमेश्वर और प्रभु यीशु मसीहक तरफ भटे तुमून अनुग्रह और शान्ति मिलनै रौ।</verse>
				<verse number="4">मैं तुमून अपूनी प्रार्थना में याद करभेरन परमेश्वर स हमेशा धन्यवाद करछूँ।</verse>
				<verse number="5">लोग मैंस बतुनान कि तैं प्रभु यीशु में विश्वास करून में मजबूत छै और यो कि तैं परमेश्वरा का सब लोगून प्रेम करछै।</verse>
				<verse number="6">मैं परमेश्वर थैं प्रार्थना करछूँ कि विश्वासीन का दगाड़ जो तेरो दगड़िया छै, उ बढ़नै जौ, ताकि तैं उन सब चीजून पुरी तरीका ले समझ सको जो परमेश्वर ले हमून दी रैछ, यो सब मसीह की महिमा खिन हो।</verse>
				<verse number="7">क्याखिनकि हे विश्वासी भाई, दुसारान खिन तेरो यो प्रेम देखभेरन मैंस भौत खुशी और हिम्मत मिलछ्य, येक कारण कि त्यारा द्वारा परमेश्वरा का लोगून को दिल खुशी ले भरग्या।</verse>
				<verse number="8">येक कारण ले मैं तैंस मसीह में एक विश्वासी का नाता में ठीक काम करून खिन कुंछूँ, और मैंस मसीह में भौत हिम्मत छै और तैंस येस करना को हुकुम दी सकछूँ। लेकिन मैं बुजुर्ग पौलुस जो यीशु मसीह की सेवा करछूँ, अब जो एक कैद में छूँ सिर्फ तैथैं बिनती करछूँ, क्याखिनकि तैं मैंस और अपून दगाड़ का विश्वासीन का प्रेम करछै।</verse>
				<verse number="9"></verse>
				<verse number="10">मैं उनेसिमुस खिन बिनती करछूँ, जो म्यारा च्याला की नियाती छै। जब मैं जेल में छ्यो त उ मसीह में म्योरो च्योलो बनग्यो।</verse>
				<verse number="11">उ त पैलि त्यारा के कामो को नी छ्यो, लेकिन अब उ हम द्वीवीन को भौत कामो छै।</verse>
				<verse number="12">चाहे मैं उनेसिमुस स भौत प्रेम करछूँ, फिरले मैं ऊस त्यारा पास भेजूनमरयूँ।</verse>
				<verse number="13">मैं ऊस अपूनी मद्दत खिन याँई राखून चांछूँ, जब की मैं यीशु मसीहा का बारिमें सुसमाचार प्रचार करना का कारण जेल में छूँ, और याँ मेरि अपूनी मद्दत करून खिन तेरि जाग ली शक छया किलैकी मैं जाणछूँ की तुम मेरि मद्दत करून चांछा।</verse>
				<verse number="14">लेकिन तेरि सहमति का बिना के नै करूँ चायो जेले तुम यो उपकार दबाब नै, लेकिन अपूनी खुशी ले करा।</verse>
				<verse number="15">शायद यो कारण छ्यो कि परमेश्वर ले उनेसिमुस स थ्वाड़ा बखत खिन त्यारा पास है भाग जान दीछ ताकि उ मसीह में विश्वास कर सको, और तैं हमेशा खिन ऊस अपून दगाड़ राँख सके।</verse>
				<verse number="16">तैं ऊस केवल अपूनो दास जन समझे, बल्कि उ एक दास है बढ़भेरन छै, और मैंले ऊस भौत प्रेम करछूँ, लेकिन तैंस ऊस और ले ज्यादा प्रेम करून चैछो आदिमी हुना का नाते और मसीह में विश्वासी भाई का नाता ले ऊस प्रेम करून चैछो।</verse>
				<verse number="17">जब उनेसिमुस त्यारा पास वापिस आलो त तैं उक दगाड़ निको ब्यवहार करे जसो तैं म्यारा दगाड़ करिना को छै।</verse>
				<verse number="18">और अगर उले तेरो केले नुकशान करिना को छै, और उमें तेरो केले उधार छै त मैं ऊस चुका द्यूलो।</verse>
				<verse number="19">मैं पौलुस अपून हात ले लिखछूँ, कि मैं ऊस चुका द्यूलो; हालांकि मैं तैंस यो याद दिलून जरूरी नै समझनू कि तुमोरो पुरो जीवन म्योरो कर्जदार छै।</verse>
				<verse number="20">हे प्रिय भाई, यो खुशी मैंस प्रभु में त्यारा तरफ भटे मिलौ, मसीह में म्यारा दिल स हौंसला ले भर दे।</verse>
				<verse number="21">मैंले तैंस यो चिठ्ठी येक कारण लिखछै, क्याखिनकि मैंस भरोसा छै कि तैं उई करले जो मैंले के रैछ। मैं जाणछूँ कि जो मैंले के रैछ तैं उ है ले ज्यादा करले।</verse>
				<verse number="22">एक बात और। तैं म्यारा रूना को इन्तजाम करा, क्याखिनकि मैंस उमीद छै कि परमेश्वर तुमेरि प्रार्थना को जबाब द्योलो और मैंस आभेरन तुमून फिर देखून द्योलो।</verse>
				<verse number="23">इपफ्रास, जो मसीह यीशु में म्यारा दगाड़ जेल में छै,</verse>
				<verse number="24">और मरकुस, अरिस्तर्खुस, देमास और लूका जो म्योरो दगड़िया प्रभु में काम करनान; यो सब तैंस नमस्कार कुंनान।</verse>
				<verse number="25">मैं प्रार्थना करछूँ कि प्रभु यीशु मसीह को अनुग्रह तुमून में हुनै रौ। आमीन।</verse>
			</chapter>
		</book>
		<book number="58">
			<chapter number="1">
				<verse number="1">पैलि युग में परमेश्वरले भौत बार और कई तरीका ले हमार पूर्वजून थैं परमेश्वरो को संदेश दिनवालान का द्वारा बात करछ्य।</verse>
				<verse number="2">लेकिन इन आखरी दिनून में हमूनथैं अपून च्याला का द्वारा बात कर्यान। परमेश्वरेले अपून च्याला द्वारा पुरी संसार बनाछ और ऊस सब चीजून को वारिस ठैहराछ।</verse>
				<verse number="3">च्योलोई परमेश्वरे की महिमाको उज्यालो छै, और उ हर तरीका ले परमेश्वरो को जसो छै। अपून शक्तिशाली बचनून का द्वारा, उ सबै स जो बनाई ग्योछ बनिना को रून खिन मद्दत करछो। उले लोगून उनार पापून भटे शुद्ध करछ्य, और येक बाद स्वर्ग में महिमामय परमेश्वरा का दैन तरफ जाभेरन बैठ छै।</verse>
				<verse number="4">येक कारण परमेश्वरे ले च्याला स एक इसो नाम दीछ, जो स्वर्गदूतून है ले महान छै, जैका द्वारा हम देख पानू कि च्योलो उनून है कई ज्यादा महान छै।</verse>
				<verse number="5">पवित्रशास्त्र में परमेश्वरे ले अपून कोई ले स्वर्गदूत थैं इसो नै क्यो, “तै म्येरो च्योलो छै; और आज मैं यो प्रकट करछूँ, कि तै म्येरो च्योलो छै।” फिर, उले इसो अपून कोई ले स्वर्गदूत थैं नै क्यो, “मैं उको पिता बनूलो, और उ म्येरो च्योलो होलो।”</verse>
				<verse number="6">फिर परमेश्वर अपून प्रिय च्याला स संसार में भेजभेरन कुंछो, “परमेश्वरा का सब स्वर्गदूत उकी अराधना करून।”</verse>
				<verse number="7">और स्वर्गदूतून का बारिमें यो कुंछो, “परमेश्वर अपून स्वर्गदूतून हवाक नियाती बना दीछो, और अपून सेवकून धधकीना का आगा की नियाती बनूछो।”</verse>
				<verse number="8">लेकिन च्याला का बारिमें कुंछो, “हे परमेश्वर, तैं हमेशा-हमेशा खिन राजा का नियाती राज्य करले। उ अपून राज्य का मलिमें न्याय ले राज्य करछो।</verse>
				<verse number="9">तै भल कामून है प्रेम और बुरा कामून है बैर राखछै; येक कारण मैं, त्यारा परमेश्वर ले, तैंस चुन रैछ और त्यारा सब दगड़ियान है ज्यादा तैंस आदर और आनन्द दी रैछ।”</verse>
				<verse number="10">और पवित्रशास्त्र यो ले कुंछो; “हे प्रभु, शुरू में तैंले धरती स बनाछ, और तैले उ सब कुछ बनाछ जो आकाश में छै।</verse>
				<verse number="11">उन त नाश हो जाला; लेकिन तै हमेशा बनिना को रोले; और उन सब कपड़ान की नियाती पुराना हो जाला।</verse>
				<verse number="12">और तै उनून चादर की नियाती लपेटी लेलै, और उन कपड़ान का नियाती बदल जाला; लेकिन तै नी बदलले, और तै हमेशा ज्यूनो रौले।”</verse>
				<verse number="13">परमेश्वरे ले अपून कोई ले स्वर्गदूत थैं यो कभै नै क्यो: “तै म्यारा दैन तरफ बैठ, जब तक मैं त्यारा दुश्मनून पुरी तरीका ले त्यारा अधीन नै कर दीयू।”</verse>
				<verse number="14">तब, स्वर्गदूतून को हुना को कि मक्शद छै? स्वर्गदूत उन छन जो परमेश्वर की सेवा करनान; और परमेश्वर उनून उन लोगून की देखभाल करून खिन भेजछो जो उद्धार पान वाला छन।</verse>
			</chapter>
			<chapter number="2">
				<verse number="1">येक कारण हमून जो सुसमाचार मिलीना को छै, उमें निकीकैं ध्यान दिन चैछो। काँई इसो नै हो कि हम सच्चाई भटे भटक ज्या।</verse>
				<verse number="2">किलैकी यहूदी लोगून ले उन नियम कानून में विश्वास करछ्य, जो परमेश्वर ले मूसास स्वर्गदूतून का द्वारा दीईनाक छ्या। जब यो साबित भ्योछ, त हरेक अपराध और हुकुम नै मानना का कारण परमेश्वर ले उनून सजा दीछ।</verse>
				<verse number="3">त हम लोग कसीकैं बच सकला, अगर हम यो महान उद्धारो को तिरस्कार करला? यो महान उद्धारा का बारिमें हम प्रभु यीशु मसीह का द्वारा जाण पाया। और जिन शिष्यून ले उथैं सुणिना को छ्यो, उनूले हमून बातछ की यो सच्ची छै।</verse>
				<verse number="4">और दगाड़-दगड़े परमेश्वर ले अपूनी इच्छा का अनुसार चमत्कार, और अद्धभुत कामून, और कई प्रकाराक सामर्था का कामून, और पवित्र आत्मा का बरदानू बाड़ना का द्वारा येस सच्ची में साबित करनै र्योछ।</verse>
				<verse number="5">परमेश्वरले उ उनवाला संसार स, जैक बारिमें हम कुंन मर्या, स्वर्गदूतून का अधीन नै, बल्कि यीशु मसीहक अधीन करिना को छै।</verse>
				<verse number="6">लेकिन पवित्रशास्त्र में केले यो कईना को छै; आदिमी छै कि तुम ऊस याद करा या आदिमी कि छै, कि तै परमेश्वर, उनेरि चिन्ता करो? उ आदिमी है ज्यादा के नाहातिन।</verse>
				<verse number="7">पिता परमेश्वर तैले आदिमी स सिर्फ थ्वाड़ा बखत खिन स्वर्गदूतून है थ्वाड़ा कम शक्ति का दगाड़ बनाछ, तैले ऊस एक राजा नियाती महिमा और सम्मान दीछ, और ऊस अपून हातुन का कामून में अधिकार दीछ।</verse>
				<verse number="8">“तैले सब कुछ उक अधीन में कर हैछ।” येक कारण याँ इसो लागछो कि परमेश्वर ले सब कुछ आदिमी का अधीन कर दी हैछ। इसो केले नाहातिनो, जो उक अधीन नै हो। लेकिन हम देख सकनू कि आज तक ले सब कुछ आदिमी में नाहातिन।</verse>
				<verse number="9">लेकिन हम यीशु स देखनू! ऊस थ्वाड़ा बखत खिन स्वर्गदूतून है थ्वाड़ा कम कर दी ग्योछ, ताकि परमेश्वरा का अनुग्रह ले उ सबून खिन मर ज्यो। और येक कारण उले दुख उठाछ और मरग्यो, संसारा का सब लोगून खिन मरग्यो। परमेश्वर ले ऊस महिमा और आदर दीछ।</verse>
				<verse number="10">किलैकी परमेश्वरेले सब कुछ बनाछ और सब कुछ उको छै, ऊस यो निको लागछ्य, ताकि उ भौत सारा लोगून अपूनी महिमा में भागीदार करो, परमेश्वरेले को फैसला लीछ कि यो सही होलो कि प्रभु यीशु दुख उठाभेरन इसो आदिमी बन ज्यो जो चरित्र में पूर्ण छै। क्याखिनकि यीशुई छै जो उनून उद्धारा का तरफ ली जा सकछो।</verse>
				<verse number="11">क्याखिनकि जो लोगून उनार पापून भटे शुद्ध करछो, और जो लोग पापून भटे शुद्ध करि जानान, उन सबून को एक्कै पिता छै; योई कारण उ उनून भाई-बैनि कुन में नै शरमानू।</verse>
				<verse number="12">येका बारिमें मसीह परमेश्वर थैं इसीकैं कुंछो: “जो भल काम तैले मैंखिन करिना का छन, उ मैं अपून लोगून बतुलो, जब उन तेरि अराधना करून खिन जामा होला, तब मैं उनार बीच तेरि महिमा करूँलो।”</verse>
				<verse number="13">उ फिर कुंछो: “मैं परमेश्वर में भरोस राखूँलो।” और फिर यो ले कुंछो: “या मैं उन लोगून का दगाड़ छूँ जो परमेश्वर ले मैंस दी रैछ।”</verse>
				<verse number="14">किलैकी जिनून परमेश्वरेले नान्तिना कैभेरन बुलाछ, मतलब कि जो मास और खूनाक बनिना का छन, यीशु हर तरीका ले हमार नियाती बन गयो और संसार में आछ ताकि उक मरना का द्वारा, मौत में अधिकार राखून वाला शैतान स नाश कर सकौ।</verse>
				<verse number="15">यो कारण प्रभु यीशु ले उन लोगून को उद्धार करछ्य जो अपूनो पुर जीन्दगी मौताक डर में होभेरन गुलामून की नियाती जीन मरेछ्या।</verse>
				<verse number="16">किलैकी प्रभु यीशु त स्वर्गदूतून नै बल्कि अब्राहम का वंश की मद्दत करछो।</verse>
				<verse number="17">यो कारण ले ऊस हर तरीका ले अपून भाईन की नियाती बनूनो पड़छो। इसीकैं उ परमेश्वरो को महायाजक बनछ्य जो कि दयालु और विश्वासयोग्य छै। और येक कारण उ अपूनास एक बलिदान का रूप में चढ़ा सको जो लोगून का पापून दूर कर द्योलो।</verse>
				<verse number="18">किलैकी जब उले परीक्षान का बखत दुख सहन करछ्य त अब उ उन लोगून की मद्दत कर सकछो जो परीक्षान ले दुखून को सामना करून मर्यान।</verse>
			</chapter>
			<chapter number="3">
				<verse number="1">येक कारण, हे म्यारा विश्वासी भाईयो, तुमून स्वर्ग में उक दगाड़ शामिल हुन खिन बुला रैछ, उ प्रेरित और महायाजक मसीह यीशु में ध्यान दी, जो हमून खिन परमेश्वरो को सुसमाचार लीभेरन उनो वालो छै।</verse>
				<verse number="2">यीशु परमेश्वरा का प्रति विश्वासयोग्य छयो, जैले ऊस यो काम करून खिन चुनिना को छ्यो। उसीकैं, मूसा ले विश्वासयोग्यता ले उ सब कुछ करछ्य जो परमेश्वरे ले ऊस करून खिन कईना को छ्यो।</verse>
				<verse number="3">लेकिन यीशु मूसा है इतुक ज्यादा महिमाक योग्य समझी ग्योछ, जतुक कि घरो को बनूनवालो घर है ज्यादा आदर राखछो।</verse>
				<verse number="4">किलैकी हरेक घरो को कोई नै कोई बनूनवालो हुछो, लेकिन जैले सब कुछ बनाछ उ परमेश्वर छै।</verse>
				<verse number="5">मूसा त परमेश्वरा का सब लोगून खिन विश्वासयोग्य र्योछ, जो केले मूसा ले करछ्य उ, उ तरफ इशारा करूनमर्योछ जो परमेश्वर बाद में कुंनवालो छ्यो।</verse>
				<verse number="6">लेकिन मसीह एक च्याला का नियाती परमेश्वरा का घरो को हक्कदार छै और हम उक घरा का लोग छा। अगर हम अपूनो साहस और उ आश में विश्वास स बनाईना को राखनू त हमी उक घर छा।</verse>
				<verse number="7">येक कारण जसीकैं पवित्र आत्मा पवित्रशास्त्र में कुंछो, “अगर आज तुम परमेश्वरे की आवाज सुणछा,</verse>
				<verse number="8">त अपून मन स कठोर जन करा, जसो तुमार पुरखानले बंजर जाग में परीक्षा का बखत परमेश्वरा का बिरोध में करछ्य।</verse>
				<verse number="9">वाँ तुमार पुरखानले चालीस सालून तक, म्यारा महान कामून देखना का बाद ले चुनौती दीभेरन मैंस परख छ्या।</verse>
				<verse number="10">यो कारण मैं उ बखत का लोगून भटे गुस्सा रयूँ, और उनूनले मैंस स्वीकार नै कर्यो। और मैंले जो करना को हुकुम दीछ, ऊस करून है उन इनकार करनान।</verse>
				<verse number="11">तब मैंले गुस्सा में आभेरन कसम खाछ, ‘उ जमीन जाँ मैं उनून विश्राम दीछूँ, उमें नी पुज पाला’।”</verse>
				<verse number="12">हे म्यारा विश्वासी भाईयो, सतर्क रौ, कि तुमून में इसो बुरो और अविश्वासी मन नै हो, जो, जीवन दीन वाला परमेश्वर है दूर हो ज्या।</verse>
				<verse number="13">जब ले तुम पवित्रशास्त्र स “आज का दिन” कुंन सुणछा, त बड़िया तरीका ले जीन खिन हर दिन एक दुसरा स हौंसला बढूनै रौ, अगर नै, त पाप में फसना का द्वारा तुमार मन कठोर हो जाला।</verse>
				<verse number="14">अगर हम अपून पैला भरोसा स आखरी तक बनाईना को राखनू, त हम मसीह का दगाड़ बनिना का रूनू।</verse>
				<verse number="15">जसो कि पवित्रशास्त्र में लिखीना को छै, “अगर आज तुम परमेश्वरे की आवाज सुणछा, त अपून मनून कठोर जन करा, जसो तुमारा पुरखानले जंगल में परमेश्वरो को बिरोध करिना को छ्यो।”</verse>
				<verse number="16">को छ्या उन, जिनूनले परमेश्वरे की आवाज सुणना का बाद उक खिलाफ भड़काछ? यो सब उई लोग छ्या जिनरी मूसा ले मिस्र देश भटे भ्यार निकालून खिन अगुवाई करिना की छी।</verse>
				<verse number="17">केले परमेश्वरेस चालीस सालून तक गुस्सा दिलाछ? यो इस्राएली लोग छ्या जिनूनले बंजर जाग में पाप करछ्य और मर ग्या।</verse>
				<verse number="18">और जब परमेश्वरेले यो ऐलान करछ्य कि, उन जमीन में कभै ले नी पुज सकूनो जाँ में उनून आराम द्यूलो, त उ सिर्फ उन लोगून का बारिमें कुंन मर्योछ, जिनूनले उको हुकुम नै मान्यो।</verse>
				<verse number="19">येक कारण हम समझनू कि उन अपून अविश्‍वास का कारण आरामा का जाग में नी पुज पाला।</verse>
			</chapter>
			<chapter number="4">
				<verse number="1">परमेश्वरेले हमूनथैं वादा करिना को छै कि हम आराम का जाग में जूला, येक कारण आरामा का जाग में पुजना को वादा आजि ले छै। त हमून भौत सतर्क रूनो चैछो; और तुमून में भटे कैसे ले उ आरामा का जाग में जाना को मौका नै छोड़ून चैछो।</verse>
				<verse number="2">जसीकैं हमून यीशु मसीह का बारिमें सुसमाचार सुणछ्य, उसीकैं इस्राएल का लोगून ले आरामा जाग में पुजना को सुसमाचार सुणछ्य। लेकिन उनूनले उमें विश्वास नै कर्यो। किलैकी, उ सुसमाचार उनून खिन बेकार छ्यो।</verse>
				<verse number="3">येक कारण हम लोग जो उ बात में विश्वास करनू जो परमेश्वरेले कईना की छै, आरामा का जाग में पूजला; और जसो दुसरान का बारिमें परमेश्वरेले क्योछ, “मैंले अपून गुस्सा में कसम खाछ, कि उन म्यारा आरामा का जाग में नी जा पाला।” परमेश्वरे ले यो येक कारण नै कयो किलैकी आरामा की जाग एल तैयार नी छी। यो संसार स बनून बखत भटे ही तैयार हो चुक गैछी।</verse>
				<verse number="4">किलैकी सातवाँ दिन का बारिमें परमेश्वरे ले पवित्रशास्त्र में इसीकैं कईना को छै, “परमेश्वरे ले सातवाँ दिन अपून सब कामून पुरो करभेरन आराम करछ्य।”</verse>
				<verse number="5">हमूनले पवित्रशास्त्र में यो ले पढ़ीना को छै, “उन म्यारा आरामा का जाग में नी जा सकाला।”</verse>
				<verse number="6">इस्राएलाक उन लोग, जिनारा बीच पैलि बार सुसमाचार सुणाई ग्योछ, उन वाँ जान में असफल हो ग्यान किलैकी उनूनले परमेश्वरा का हुकमून नै मान्यो। लेकिन उनून खिन उ आरामा का जाग में जाना को आजि ले मौका छै।</verse>
				<verse number="7">येक कारण परमेश्वरे ले अपून आरामा का जाग में जान खिन एक बखत तय कर रैछ, और उ बखत आज छै। और कई साल बाद, उले दाऊदाका द्वारा इन बातुन कुंछो, जो पैलि भटे कयी गैछ्या। “अगर आज तुम परमेश्वरे की आवाज सुणछा, त अपून मन स कठोर जन करा।”</verse>
				<verse number="8">और इस्राएला का लोगून का बारिमें, अगर यहोशू ले उनेरि अगुवाई करभेरन उनून उ आरामा का पुजाछ जो परमेश्वरे ले तैयार करिना को छ्यो, त फिर यो जरूरी नाहातिन कि परमेश्वर फिर हमून एक बार उ बखत का बारिमें बतूनो जब लोगून उमें भेजि जाला।</verse>
				<verse number="9">येक कारण परमेश्वरा का लोगून खिन आजि ले एक जाग तैयार छै, जाँ उन पुर तरीका ले आराम कर सकनान। उन उई तरीका ले आराम कराला जसीकैं परमेश्वरे ले सातवाँ दिन आराम करछ्य।</verse>
				<verse number="10">परमेश्वरेले अपूनो काम स खतम करना का बाद आराम करछ्य। और यो उन सबून का नियाती छै जो परमेश्वरा का पास आराम करून जानान। उन अपूनो काम खतम करना का बाद आराम कराला।</verse>
				<verse number="11">येक कारण हम उ आरामा का जाग में पुजना की कोशिश करा, किलैकी कोई ले आदिमी स उन लोगून की नकल नै करूनी चैनी जिनूनले परमेश्वरा हुकमून मानून है मना कर दीछ। तब हम उ आरामा का जाग में पूजला।</verse>
				<verse number="12">किलैकी परमेश्‍वर का बचन जीवित और असरदार छै, और उ द्वी धारी तलवार है ले ज्यादा तेज छै, जो हमार भितर आभेरन हमेरि आत्मा, प्राण, जोड़ून और गुदा-गुदा स भेद दीछो, और यो हमार मनै की इच्छान और बिचारून परखछो।</verse>
				<verse number="13">परमेश्वरा का नजरून में यो संसारो को कोई ले आदिमी लुकीना को नाहातिन, हमून सब कामून को हिसाब दीन पड़ोलो उक सामुनि सब चीज खुलीना का और प्रगट छन।</verse>
				<verse number="14">यीशु जो स्वर्ग खिन ग्योछ, उ परमेश्वरो को च्योलो छै। उ हम सबून को महायाजक छै। येक कारण आ हम उ विश्वास स छोड़े बिना मजबूती ले बनिना का रौ, जैस हमूले सबून का सामुनि स्वीकार करिना को छ्यो।</verse>
				<verse number="15">किलैकी यो महायाजक, जो यीशु मसीह छै, हमेरि हरेक कमजोरी स समझछो। शैतान ले हमार नियाती हर बात में यीशु मसीह की परीक्षा लीछ; लेकिन उले कोई ले पाप नै कर्यो।</verse>
				<verse number="16">येक कारण आ हम बिना केका डरले परमेश्वरा सामुनि आ, तब परमेश्वर हमून में दया और अनुग्रह दिखालो, और जब हमून जरूरत होलि तब उ हमरि मद्दत करोलो।</verse>
			</chapter>
			<chapter number="5">
				<verse number="1">परमेश्वर हरेक महायाजक स इस्राएला का लोगून में भटे चुनछो, और उ लोगून की भलाई खिन परमेश्वरो को काम करून खिन नियुक्त करि जाछो। उ येक कारण भेंट और बलि चढ़ूछो ताकि परमेश्वर लोगून का पापून माफ कर दे।</verse>
				<verse number="2">किलैकी उ एक आदिमी हुना का नाता ले उ खुद ले दुर्बलतान का अधीन ले छै। यो कारण उ नासमझ और भटकिना का लोगून का दगाड़ प्रेम ले ब्यवहार कर सकछो।</verse>
				<verse number="3">और एक महायाजक हुना का नाता ले उ खिन यो जरूरी छै कि उ लोगून का पापून दूर करून खिन बलिदान चढ़ौ, और अपून पापून ले दूर करून खिन ले बलिदान चढ़ौ।</verse>
				<verse number="4">कोई ले आदिमी खुद स महायाजक हुना को सम्मान दीना को फैसला नै कर सकनो, एक आदिमी सिर्फ येक कारण महायाजक बनछो किलैकी परमेश्वरेले ऊस नियुक्त करिना को छै जसीकैं पैलो महायाजक हारून नियुक्त करि गैछ्यो।</verse>
				<verse number="5">उसीकैं, मसीह ले अपूनास महायाजक बनून खिन नियुक्त करभेरन खुद अपूनो सम्मान नै कर्यो, बल्कि परमेश्वरेले मसीह थैं यो कैभेरन ऊस नियुक्त करछ्य जो उले कोई दुसारा याजक थैं कभै नै क्यो, जो कि पवित्रशास्त्र में भजनकार ले लिखीना को छै, “तै म्येरो च्योलो छै; आज मैं यो घोषणा करछूँ कि मैं त्येरो बबा छूँ।”</verse>
				<verse number="6">इसा तरीका ले दुसरा जाग में परमेश्वरेले उथैं फिर क्योछ, उसीकैं “तै हमेशा खिन एक याजक छै, जसीकैं मलिकिसिदक एक याजक छ्यो।”</verse>
				<verse number="7">यीशु मसीह ले यो धरती में अपून जीवनकाल में उथैं, जोरले धध्याभेरन और रोभेरन, परमेश्वरथैं प्रार्थना और बिनती करछ्य जो ऊस मौत भटे बचा सकछ्यो, और अपूनास परमेश्वरे स सौपना का कारण उकी प्रार्थना और बिनती सुणि गैछ।</verse>
				<verse number="8">जब की, यीशु परमेश्वरा का च्योलो छै, उले उन दुखून का द्वारा जो उले सहन करछ्य, परमेश्वरो को हुकमून को मानूनो सिखछै।</verse>
				<verse number="9">परमेश्वरेले ऊस एक महायाजक का रूप में स्वीकार करछ्य जो कि हर तरीका ले सिद्ध छ्यो। उ उन सबै लोगून अनन्त जीवन दीन खिन एक बुनियाद का रूप में ठाड़ छै जो उको बचन को पालन करनान।</verse>
				<verse number="10">और ऊस परमेश्वरा का तरफ भटे महायाजक पद मिलछ्य जसीकैं मलिकिसिदक स मिलछ्य।</verse>
				<verse number="11">येक बारिमें बतून खिन भौत कुछ छै लेकिन उनार बारिमें बिस्तार में बतूनो मुश्किल छै। किलैकी तुम परमेश्वरा का बचन स सिखून में आलसी बन गैछा।</verse>
				<verse number="12">सच्च त यो छै, कि यो बखत तक त तुमून शिक्षा दीन वाला बन जानो चैछ्यो। लेकिन तुमून त ऐल कोई इसा आदिमी की जरूरत छै जो तुमून दुबारा है परमेश्वरे की शिक्षा का बातुन शुरू भटे सिखौ। तुम इसा बन गैछा कि तुमून अनाजा का बदला ऐल तक दूध चैछो।</verse>
				<verse number="13">जो लोग दूध पिनान उन उ नान बच्चा का नियाती छन जो सच्ची में परमेश्वरा का नजरून में सही जीवन जीना का बारिमें नै जाणना।</verse>
				<verse number="14">ठोस अनाज सिर्फ उन लोगून खिन छै जो परिपक्व छन और परमेश्वरा का नजरून में ठीक तरीका जीवन जीनान और परमेश्वरा का शिक्षा का द्वारा सिख चुक ग्यान कि निको छै और कि बुरो छै।</verse>
			</chapter>
			<chapter number="6">
				<verse number="1">येक कारण जब हमून सबून है पैलि मसीह का बारिमें सिखाई ग्योछ, उनी बुनियादी शिक्षान दोहराते नै रौ; आ हम मसीह का शिक्षा है अघिल बढ़भेरन शिक्षान का बारिमें बातचीत करा। हम अपून पापी आदतून, जो मौता का तरफ ली जानान, पश्चाताप कसकैं करूनो चैछो, और परमेश्वर में विश्वास करूना का बारिमें,</verse>
				<verse number="2">और तुमून बपतिस्मा का बारिमें, और केका मलि में हात राखभेरन आशीष दीना का बारिमें, और मरिनान में भटे ज्यूना हुना का बारिमें, और आखरी न्याय का शिक्षा की बुनियाद फिर डालना की जरूरत नाहातिन।</verse>
				<verse number="3">अगर परमेश्वर चालो, त मैं तुमून सही शिक्षा द्यूलो।</verse>
				<verse number="4">जो लोग विश्वास स छोड़ दीनान, उनून फिर पश्चाताप करना खिन वापस नै लीयाई जा सकूनो। उनूनले एक बार परमेश्वर की सच्चाई स जाणभेरन, जो परमेश्वरा का तरफ भटे उछी और उनून स्वर्ग भटे बरदान मिलीना को छै और उनून दुसरान का दगाड़ मिलभेरन पवित्र आत्मा ले पाछ।</verse>
				<verse number="5">उनूनले अनुभव करिना को छ्यो कि परमेश्वरा का तरफ भटे उनवाला संदेश निको छै और उनूनले उ उनवाला परमेश्वरा का राज्य की सामर्थस ले अनुभव करिना को छै।</verse>
				<verse number="6">उनून दुबारा वापस ल्यूना का कोई बाटो नाहातिन क्याखिन उन परमेश्वर भटे दूर हो ग्यान, और उन खुद परमेश्वरा का च्याला स दुबारा सूली में चढ़ूनान और ऊस शर्मिदा करनान, जैका कारण दुसारा लोगून का सामुनि मसीह स नीचो दिखूनान।</verse>
				<verse number="7">जिन लोगून निकी शिक्षा मिलीना छै, उन उ जमीनै की नियाती छन जैमें भौत बरखा हुछी। अगर जमीन निकी छै, त उ किसान स निकी फसल दीछी और उमें परमेश्वर की आशीष हुछी।</verse>
				<verse number="8">दुसारा लोग उ जमीनै की नियाती छन जैमें काँणा और झिलझाल पैद हुनान, जिनरी के कीमत नाहातिन। परमेश्वर इसी जमीन स श्रापित करोलो, और इमें पैद हुनान वाली बेकार चीजून आग में जला द्योलो।</verse>
				<verse number="9">लेकिन हे म्यारा विश्वासी भाईयो, तुम निको काम करून में रौ। किलैकी परमेश्वरेले पैलि तुमून बचा लीछ। येक कारण यो सारी बात तुमून खिन नाहातिन।</verse>
				<verse number="10">जसा तुमूले निका काम करिना का छन और ऐल तुम परमेश्वरा का नाम में परमेश्वरा का लोगून खिन प्रेमा दगाड़ सेवा को काम करून मरेछा, येक कारण परमेश्वर तुमार कामून नी भुलोलो। किलैकी उ धर्मी छै।</verse>
				<verse number="11">आलसी जन बना। लेकिन कड़ी मेहनत करून वालान की नियाती तुमून अंत तक धीरज और विश्वास में मजबूत आश राखभेरन इन प्रेम का कामून करून जारी राखून चैछो, ताकि परमेश्वरा का करिना का वादा पा सका।</verse>
				<verse number="12"></verse>
				<verse number="13">परमेश्वरेले जब अब्राहम थैं वादा करछ्य, त उहै ठूलो कोई और नी छ्यो, जैकी कसम खा सकछ्या, येक कारण उले अपूनी कसम खाभेरन क्योछ,</verse>
				<verse number="14">“मैं सच्ची में तैंस भौत आशीष द्यूलो, और त्येरा वंश को बढ़ूनै जूलो।”</verse>
				<verse number="15">अब्राहम ले धीरज राखभेरन लम्बा बखत तक इंतजार करछ्य। तब ऊस उ मिलछ्य जैको वादा परमेश्वरेले करिना को छ्यो।</verse>
				<verse number="16">कसम खान बखत लोग हमेशा अपून है ठूला आदिमी को नाम लीनान। कसम यो साबित करछी कि जो उन कुंन मर्यान उ सच्ची छै, और यो हरेक बिवाद स खतम कर दीछो।</verse>
				<verse number="17">येक कारण परमेश्वरेले एक कसम खाछ। येक द्वारा उ उन लोगून जिनूनथैं वादा करिना को छ्यो यो दिखून चाछो कि उ ऊस पुर करोलो जैको वादा उले करिना को छ्यो।</verse>
				<verse number="18">त फिर याँ द्वी बातुन को जिकर छै, एक परमेश्वरो को वादा और दुसरी उकी कसम, जो कभै नै बदली सकूनो और जिनारा बारिमें परमेश्वर कभै झूठ नै के सकनो। येक कारण हम जो परमेश्वरा का पास सुरक्षा पान खिन आईना का छा और जो आश उले हमून दी रैछ, ऊस थामिना का छा, और हम भौत खुश छा।</verse>
				<verse number="19">जसीकैं एक ठूलो टुकूड़ो स जियोड़ा में बाँदीभेरन नाव स रोकछी और मजबूत राखछी, उसीकैं यो आश हमार जीवन स रोकछी और मजबूत बना राखछी। जैमें हम आश करनू उ यीशु छै; जो स्वर्ग में महापवित्र जाग में परमेश्वरा का पास ग्योछ।</verse>
				<verse number="20">यीशु हमून है अघिल और हमून खिन स्वर्ग में ग्योछ। उ याजक मलिकिसिदक का नियाती हमेशा खिन महायाजक बन ग्योछ।</verse>
			</chapter>
			<chapter number="7">
				<verse number="1">यो मलिकिसिदक शालेम शैहरो को राजा छ्यो और परमप्रधान परमेश्वरो को याजक छ्यो। जब अब्राहम राजान लड़ाई में हराभेरन वापस उन मर्योछ्यो, त मलिकिसिदक थैं मिलछ्य, और ऊस आशीष दीछ।</verse>
				<verse number="2">अब्राहम ले मलिकिसिदक स लड़ाई में जीतभेरन ल्याईना की सारी चीजून को दसवाँ हिस्सा दीछ। मलिकिसिदक को नामोको मतलब छै, “धार्मिकता को राजा” छै, और शालेम शैहरा का मतलब छै, “शान्ति” छै, त उ “शान्ति को राजा” ले छै।</verse>
				<verse number="3">जैका नै त ईजा-बबा छन, नै त खानदान छै, जैको नै दिनून की शुरूवाद छै और नै जीवन को अन्त छै; लेकिन परमेश्वरा का च्याला का नियाती उ हमेशा खिन याजक छै।</verse>
				<verse number="4">अब येमें ध्यान करा कि मलिकिसिदक कतुक महान छ्यो, जैस हमोरो पूर्वज अब्राहम ले लड़ाई में जीतभेरन ल्याईना का सब चीजून को दसवाँ हिस्सा दीछ।</verse>
				<verse number="5">मूसा का नियय-कानून बतूना कि लेवी का वंशज, जो याजक बननान, उनून इस्राएला का लोगून, मतलब उन अपून लोगून का पास जो छन उमें भटे दसवाँ हिस्सा लीनो चैछो। परन्तु उन याजक और दुसारा लोग भाईन की नियाती छन किलैकी उन सब अब्राहम का वंशज छन।</verse>
				<verse number="6">लेकिन यो आदिमी मलिकिसिदक, जो लेवी का वंशो को नी छ्यो, उले अब्राहम थैं दसवाँ हिस्सा लीछ, हालाकि अब्राहम उ छ्यो जैस परमेश्वरोको वादा मिली को छ्यो, फिरले मेलिकिसिदक ले ऊस आशीष दीछ।</verse>
				<verse number="7">हम निकीकैं जाणनू कि जो आशीष दीछो उ आशीष पान वाला है ठूलो हुछो।</verse>
				<verse number="8">याजक दसवाँ हिस्सा लीनान, हालाकि उन सिर्फ आदिमी छन जो ज्यूना रूनान और फिर मर जानान। लेकिन यो याजक मलिकिसिदक जैले दसवाँ हिस्सा लीईना को छ्यो, उक बारिमें पवित्रशास्त्र में गवाही दी गैछ कि उ एल ले ज्यूनो छै।</verse>
				<verse number="9">त हम यो ले के सकनू, जब अब्राहम ले मलिकिसिदक स दसवाँ हिस्सा दीछ, तब तक लेवी अब्राहम का परिवार में पैद नै भ्यो। लेकिन फिरले यो इसो छै कि अब्राहम का वंशज हुना का कारण लेवी ले खुद ऊस उ दसवाँ हिस्सा दीछ।</verse>
				<verse number="10"></verse>
				<verse number="11">लेकिन मूसा का नियम-कानून में यो कुंछो, कि याजक लेवी लोगून का खानदान भटे हुनो चैछो, किलैकी याजक कैसे ले सिद्ध नै बना सकनो। येक कारण एक और याजक की उनाकी जरूरत छी, एक इसो याजक जो हारून की नियाती नै बल्कि मलिकिसिदक का नियाती छ्यो।</verse>
				<verse number="12">किलैकी जब याजक को पद बदल जाछो त नियम-कानून को ले बदलून जरूरी छै।</verse>
				<verse number="13">हम इन बातुन मसीहक बारिमें कुंन मर्या, जो दुसरा गोत्र भटे छ्यो। उ गोत्र में भटे कभै ले केले ले एक याजक का नियाती वेदी में सेवा करिना की नाहातिन।</verse>
				<verse number="14">सबै जाणनान, कि हमोरो प्रभु यीशु यहूदा को वंश को छै, मूसा ले यहूदा का वंशजून में कैसै ले याजक बनना का बारिमें के नै बतायो और नै यहूदा का वंश में भटे कभै कोई याजक बनिना को छ्यो।</verse>
				<verse number="15">अब हम और ले निकीकैं समझ सकनू, कि मूसा का नियम-कानून और याजक स बदल दी ग्योछ, किलैकी हमोरो महायाजक जो एल आर्योछ, उ मलिकिसिदक को जसो एक याजक छै।</verse>
				<verse number="16">यीशु कोई खास आदिमी मतलब लेवी का वंश भटे तालुक राखून वाला नियमून और विदी का कारण याजक नै बन्यो। लेकिन उ अपून जीवन की सामर्थ का अनुसार याजक बन ग्यो जो कभै खत्म नी होलि।</verse>
				<verse number="17">किलैकी परमेश्वरेले उक बारिमें पवित्रशास्त्र में कईना छै, “तै मलिकिसिदक का नियाती हमेशा खिन याजक बन गैछै।”</verse>
				<verse number="18">पैलि मूसा का नियम-कानून उ नै कर पाया जो इनून करून चैछ्यो; और कोई काम का नै हुना का कारण बदल दी ग्यान।</verse>
				<verse number="19">येक कारण मूसा का नियम-कानून कोई ले बात स सिद्ध नै करना, और उकी जाग में हमार पास एक भौत ठूली उमीद छै जो यीशु मसीह में छै, जैक द्वारा हम परमेश्वरा का नजदीक जा सकनू।</verse>
				<verse number="20">येक दगाड़ जब परमेश्वरेले यीशु मसीह स याजक का रूप में नियुक्त करछ्य त उले एक कसम खाछ।</verse>
				<verse number="21">किलैकी लेवी का वंश त बिना कसम खाये याजक बनग्या, लेकिन यीशु मसीह कसम खा भेरन परमेश्वरा का तरफ भटे नियुक्त करि ग्योछ जेले उक बारिमें क्योछ, “मैं परमेश्वर, जो यो कसम खाछूँ, और मैं अपून फैसला ले नै पछतालो कि, ‘तै हमेशा खिन मलिकिसिदका का नियाती एक याजक बन गैछै’।”</verse>
				<verse number="22">येक कारण यीशु उ छै जो एक महान वाचा स पुरो हुना को कारण बनछो।</verse>
				<verse number="23">याँ यीशु मसीह को याजक हुना को एक और फैदा छै, उन त भौतसा याजक बननै आयान, किलैकी उनूमें में भटे सबून की मौत हो गैछ और यो कारण उन अपूनो काम जारी नै राख सकना।</verse>
				<verse number="24">लेकिन यीशु मसीह हमेशा खिन याजक बनिना को रूछो; येक कारण दुसोरो कोई ले ऊसो याजक नै बनोलो जसो उ छै।</verse>
				<verse number="25">येक कारण जो यीशु मसीह का द्वारा परमेश्वरा का पास उनान, उ उनोरो पुरो-पुरो उद्धार कर सकछो, किलैकी उ उनून खिन बिनती करून खिन हमेशा ज्यूनो छै।</verse>
				<verse number="26">इसो महायाजक हमेरि जरूरत स पुरो कर सकछो, जो पवित्र हो, जैमें के दोष नै हो, शुद्ध हो, पापिन भटे अलग रूछो, जैस स्वर्ग भटे ऊचो करि ग्योछ।</verse>
				<verse number="27">और यीशु मसीह उन महायाजकून का नियाती नाहातिन जो हारूना का वंशज छ्या, यीशु मसीह स यो जरूरी नाहातिन कि हर रोज पैलि अपून पापून और फिर लोगून का पापून खिन बलिदान करो; किलैकी यीशु मसीह ले एक्कै बारिमें सब लोगून का पापून खिन अपूनास बलिदान कर दीछ।</verse>
				<verse number="28">किलैकी मूसा का नियम-कानून त कमजोर आदिमी स महायाजक नियुक्त करछी; लेकिन उ कसम जो मूसा का नियम-कानून का बाद आछ उले परमेश्वरा च्याला स महायाजक का रूप में चुन छै। जो हमेशा हमून खिन सिद्ध महायाजक बन ग्योछ।</verse>
			</chapter>
			<chapter number="8">
				<verse number="1">अब जो बात हम कुंन मर्या, उनूनमें भटे सबून है ठूली सच्चाई यो छै, कि हमार पास इसो महायाजक छै, जो ऐल ले स्वर्ग में परमप्रधान परमेश्वरा का सिंहासनाक दैंना तरफ जाभेरन बैठिना को छै।</verse>
				<verse number="2">हमोरो महायाजक स्वर्ग में भौत पवित्र जाग और उ सच्चो तम्बू को सेवक छै, जैस कोई आदिमी ले नै, लेकिन प्रभु ले ठाड़ करिना को छ्यो।</verse>
				<verse number="3">किलैकी हरेक महायाजका का पापून की माफी खिन और बलिदान चढ़ून खिन चुनी जाछो, यो कारण जरूरी छै, कि हमार महायाजक यीशु का पास ले के चढ़ून खिन हो।</verse>
				<verse number="4">और अगर मसीह धरती में हुनो त कभै याजक नी हुनो, येक कारण धरती में मूसा का नियम-कानून का अनुसार, पैलि भटे याजक भेंट चढ़ूनान।</verse>
				<verse number="5">जो यो याजक करनान, उन सिर्फ उनेरि एक नकल और एक परछाई छै जो स्वर्ग में छै, लेकिन यो ऊसो नाहातिन जसो स्वर्ग में छै। किलैकी जब मूसा मिलाप वाला तम्बू स बनून खिन तैयार हो रैछ्यो, तब परमेश्वरेले ऊस यो चेतावनी दी, “देख जो नमूना तैंस पहाड़ में दिखाई ग्योछ, उक अनुसार सब कुछ बनाये।”</verse>
				<verse number="6">लेकिन जो याजक को काम यीशु मसीह मिलछ्य, ऊस उन याजकून है ज्यादा सेवा को काम मिलीना को छै। किलैकी उ उई छै जो महान वादा का अनुसार, परमेश्वरा का सामुनि हमून खिन एक भौत महान वादा का मध्यस्थता करछो।</verse>
				<verse number="7">किलैकी अगर उ पैलि वाचा निर्दोष हुनी, त दुसारा वादा की जरूरत नै हुनी।</verse>
				<verse number="8">लेकिन परमेश्वरा का लोगून में दोष लगाभेरन कुंछो, “प्रभु कुंछो, देखा उ दिन उनान, कि मैं इस्राएला का लोगून का दगाड़, और यहूदा का लोगून का दगाड़, एक नय्या वादा करूँलो।</verse>
				<verse number="9">यो वाचा ऊसी नी होलि जसी मैंले उनार पूर्वजून का दगाड़ उ बखत करिना की छी, जब मैंले उनार हात मिस्र देश भटे निकालून खिन पकड़ छ्ये। किलैकी प्रभु कुंछो, उन म्यारा वाचा का विश्वासी नै र्या। मैंले उनेरि चिन्ता करून छोड़ दीछ,</verse>
				<verse number="10">फिर प्रभु कुंछो कि, जो नय्या वाचा उन दिनून में इस्राएलाक लोगून का दगाड़ करूँलो, उ यो छै कि, मैं उनून म्यारा नियम-कानून का बारिमें सोचून द्यूलो, और उन ऊस अपूनो मनून में राखाला, मैं उनोरो परमेश्वर बनूँलो, जैकी उन अराधना कराला।</verse>
				<verse number="11">और हरेक अपून देशवासीन का और अपून रिश्तेदारून यो शिक्षा दीना की के जरूरत नी पड़ली कि, ‘तै प्रभु स पछ्याण।’ किलैकी नान भटे ठूला लोगून तक, उन सब स्वीकार कर लीयाला कि मैं उनोरो परमेश्वर छूँ।</verse>
				<verse number="12">किलैकी मैं उनार पापून माफ कर द्यूलो, और उनार पापून फिर याद नी करूँलो।”</verse>
				<verse number="13">परमेश्वरेले येस एक नय्या वाचा क्योछ, येक कारण उ पैलि वाचा स पुराना कर दीछो। और जो कुछ ले पुरानो छै और घिसी-पिटीना को छै उ नाश हुन खिन तैयार छै।</verse>
			</chapter>
			<chapter number="9">
				<verse number="1">उ पैलि वाचा, जो भौत बखत पैलि मूसा का द्वारा इस्राएली लोगून दीईना की छी, उमें परमेश्वरे की अराधना करना का पुर नियम-कानून छ्या और यो धरती में अराधना खिन लोगून का द्वारा बनाई को एक मिलाप वालो पवित्र तम्बू ले छ्यो।</verse>
				<verse number="2">यो तम्बू जानवरून का खाल ले बनिना को छ्यो। उ तम्बू का बीच में, उनूनले एक परदा लटका दीछ और उक द्वी कमरा बनायान। पैला कमरा में एक धूपदान छ्यो और एक मेज छी जैमें परमेश्वरे स भेंट में चढ़ाई जानवाला रोटा राखि जाछ्या। यो कमरा स पवित्र जाग कई जाछ्यो।</verse>
				<verse number="3">तम्बू का दुसरा कमरा जो परदा का पीछ छ्यो, ऊस परम पवित्र जाग कुंनान।</verse>
				<verse number="4">यो दुसरा कमरा में, एक सुना की वेदी छी, और वाँ एक सन्दूक ले छ्यो जो भितर और भ्यार भटे सुना ले मढ़िना को छ्यो और उ सन्दूक स वाचा को सन्दूक कई जाँछ्यो। यो सन्दूक का भितर तीन चीज छ्या। सबून है पैलि, एक सुना की मर्तबान छ्यो जैमें एक बिशेष खानो छ्या जैस “मन्ना” कई जाछ्यो, और दुसरी उमें हारून की लठ्ठी ले छी, जैमें पात निकलीना का छ्या। और येमें ढूंगा का पाथरून का द्वी पाठी छ्या, जैमें परमेश्वरेले उ दस हुकुम लिखीना का छया, जो उले मूसास दीईना का छ्या।</verse>
				<verse number="5">येक अलावा सोना का सन्दूक का मलिमें द्वी करूँब छ्या, जिनारा पंख उ सन्दूक का मलिमें फैलीना का छ्या, जो यो बातोको इशारा करछ्यो कि परमेश्वर यो जाग में छ्यो। उक खुलीना का पंख सन्दूक का मलिवाला हिस्सा स ढकछ्या जैमें खून छिड़की जाछ्यो ताकि लोगून का पापू माफ करि जा सकून। लेकिन हम अब इन सब चीजून एक-एक करभेरन नै बता सकना।</verse>
				<verse number="6">इसीकैं उनूनले उन सारी चीजून तम्बू का द्वीवै कमरान में तैयार कर्यान। तब हर बखत जब ले याजक अपून काम करून खिन उछ्या त उन सिर्फ पैला वाला कमरा में उछ्या।</verse>
				<verse number="7">लेकिन केवल महायाजक साल में एक्कै बार जानवरून को खून लीभेरन परम पवित्र जाग में जाछ्यो, और उ येस अपून और लोगून का पापून का माफी खिन परमेश्वरे स चढ़ूछ्यो जो उनूनले अनजाना में करिना का छ्या।</verse>
				<verse number="8">इन नियमून का द्वारा पवित्र आत्मा हमून यो समझूछो कि जब तक यो धरती में मिलाप वाला तम्बू और उक नियमून को पालन करि जाछो, तब तक स्वर्ग में परमेश्वरा का परम पवित्र जाग में जाना को बाटो अब तक खुलीना को नाहातिन।</verse>
				<verse number="9">यो सब चीज सिर्फ इन बातुन को उदारण छ्यो जो कि अब मसीहक कारण पुरी हुन मरैछ। किलैकी उन सब भेंट और बलिदान जो उन लोगून का द्वारा परमेश्वरेस चढ़ाई जाछ्या जो उकी अराधना करछ्या, उन लोगून का मनून और जमीर स शुद्ध करून योग्य नी छी।</verse>
				<verse number="10">किलैकी उन सिर्फ लोगून का खान-पीना का बारिमें और भौतसा नान-धुना का नियमून का बारिमें बतुनान जिनारा द्वारा लोगून को शरीर तै साफ हो जाछो। यो जरूरी छ्यो कि इन नियमून तब तक पुर करि जानो जब तक कि परमेश्वर लोगून का दगाड़ एक नय्या वादा नै करनो।</verse>
				<verse number="11">लेकिन अब मसीह महायाजक होभेरन आछ जो नय्या वाचा की सारी निकी-निकी चीज दीछो। उले स्वर्ग में और ज्यादा महान, ज्यादा सिद्ध मिलाप का तम्बू में प्रवेश करछ्य, जो आदिमीन का हातून का द्वारा बनाईना को नाहातिन, म्येरो कुंना को मतलब, जो यो संसारो को हिस्सा नाहातिन।</verse>
				<verse number="12">यीशु मसीह परम पवित्र स्थान में जानवरून का खून स लीभेरन नै ग्यो, लेकिन उ खुद अपूनो खून लीभेरन ग्योछ। उले यो सिर्फ एक बार करछ्य, और फिर येस कभै करना की जरूरत नी होलि। उक द्वारा हमून उद्धार मिलग्योछ।</verse>
				<verse number="13">पुराना नियम-कानून का अनुसार याजक जानवरून को खून और बलि का छारा स लोगून में छिड़की जाछो जो नियम का अनुसार अशुद्ध हुनान। इसो करभेरन उनोरो शरीर फिर शुद्ध हो जाछो, अगर येमें आदमीन का शरीरून शुद्ध करना की सामर्थ छै,</verse>
				<verse number="14">तो जरा सोचभेरन देखा कि मसीह को खून हमार दिलून उन कामून भटे कतुक शुद्ध करोलो जो मौत का तरफ भटे ली जाछो, ताकि हम जीवित परमेश्वरै की अराधना कर सका। किलैकी अनन्त आत्मा का सामर्थ का द्वारा, मसीह ले हमार पापून खिन अपूनास निर्दोष बलिदानाक रूप में परमेश्वरेस भेंट चढ़ा दीछ।</verse>
				<verse number="15">यो कारण ले मसीह लोगून का दगाड़ एक नय्या वाचा बाँधछो, ताकि उ लोग जो परमेश्वरा का द्वारा बुलाई ग्यान, उन, उन अनन्त आशीषून पा सकून जिनोरो वादा परमेश्वरेले करिना को छ्यो। इसो येक कारण हो सकछो किलैकी मसीह उनून पापून की सजा भटे आजाद करून खिन मर ग्यो जो उनूनले पैलि वाचा का अधीन रैभेरन करछ्य।</verse>
				<verse number="16">हम जाणनू कि अगर कोई आदिमी अपूनी मौता का बाद अपूनी संपत्ति को बँटवारा का बारिमें आखरी फैसला लिखछो, त यो जरूरी छै कि पैलि उकी मौत हो ताकि उक फैसला स पुरो करि जा सको।</verse>
				<verse number="17">तब वारिस उ सब प्राप्त कर सकछो जो वसीयत में ऊस दीई ग्योछ। किलैकी अगर वसीयत करूनवाला एल ज्यूनो छै, त यो जरूरी नाहातिन कि उक द्वारा दीईना को फैसला लागू करौ जौ।</verse>
				<verse number="18">यो कारण छै, कि परमेश्वरै द्वारा दीईना की पैलि वाचा ले पक्की हुना है पैलि एक बलि करि जानो जरूरी छ्यो।</verse>
				<verse number="19">सबून है पैलि, मूसा ले सब लोगून नियम-कानून को हर हुकुमा का बारिमें बताछ। येक बाद उले जानवरून को खून लीछ और ऊस पानि में मिलाछ। फिर उले ऊस नियम-कानून का किताब और सब लोगून में छिड़कून खिन लाल उन और जूफा नामोको रूखा का हांगा को इस्तमाल करछ्य।</verse>
				<verse number="20">और मूसा ले लोगून थैं क्योछ, “यो खून उ वाचा स शुरू करछो जैस मानना को हुकुम परमेश्वरेले तुमून दीईना को छ्यो।”</verse>
				<verse number="21">और इसीकैं मूसा ले तम्बू और अराधना का पुर चीजून में खून छिड़कछ्य।</verse>
				<verse number="22">मूसा का नियम-कानून कुंछो कि लगभग हर चीज स खून छिड़क भेरन साफ करि जान चैछो। खून बगाये बिना, परमेश्वर लोगून उनार पापून खिन माफ नै कर सकनो।</verse>
				<verse number="23">येक कारण सांसारो को तम्बू और उमें मौजूद हर चीज स जानवरून का खून ले शुद्ध करून पड़छ्यो। यो उन चीजून की नकल छै जो स्वर्ग में छै। लेकिन स्वर्ग में की चीजून शुद्ध करून खिन जानवरून का खून है बढ़भेरन महान बलिदान का द्वारा शुद्ध करना की जरूरत छी।</verse>
				<verse number="24">उक कारण, मसीह उ पवित्र जाग में नै ग्यो जैस लोगून ले बनाछ, जो कि परम पवित्र जाग की सिर्फ एक छवि छै। लेकिन उ स्वर्ग में ग्योछ जैले उ हमार फैदा खिन परमेश्वरा का सामुनि हाजिर हो सको।</verse>
				<verse number="25">महायाजक हर साल एक जानवरो को खून लीभेरन परम पवित्र जाग में जाछो। लेकिन मसीह अपूनास बार-बार बलिदान चढ़ून खिन नै ग्यो। अगर ऊस इसोई करून पड़ूनो त फिर ऊस संसारा का बनून बखत भटे कई बार दुख उठूनो पड़ूनो। लेकिन अब तो अंतिम युग में मसीह हमून खिन अपूनो बलिदान का द्वारा पाप की शक्ति स हमेशा खिन मिटून खिन एक बार सब खिन प्रकट भ्योछ।</verse>
				<verse number="26"></verse>
				<verse number="27">हरेक आदिमी को एक बार मरून तय छै। मौता का बाद, परमेश्वर हरेक आदिमी को न्याय करोलो।</verse>
				<verse number="28">उसीकैं, मसीह ले सब लोगून का पापून अपून मलिमें लीभेरन एक बार बलिदान हो ग्यो। जब उ दुबारा आलो तब उ पापून खिन बलिदान हुन खिन नी आलो बल्कि उनून बचुन खिन जो उको इंतजार करून मर्यान।</verse>
			</chapter>
			<chapter number="10">
				<verse number="1">मूसा का द्वारा दीईना का नियम-कानून केवल उन निकी चीजून की एक छाया मात्र छै जो भविष्य में ऊँन वाली छै, यो असली में नाहातिन। येक कारण, जो लोग नियम-कानून का अधीन रूनान उन हर साल एक जसो बलिदान चढ़ूना, लेकिन यो बलिदान उन लोगून कभै ले सिद्ध नै बना सकनो जो परमेश्वरा अराधना करून खिन उक नजदीक उनान।</verse>
				<verse number="2">अगर नियम-कानून उनून सिद्ध बना सकना, त बलिदान चढ़ून पैलि बन्द हो जाना। अराधना करूनवाला पाप भटे सच्ची में शुद्ध कर दी जाना, त उन अपूनास दोषी नी मानना।</verse>
				<verse number="3">लेकिन बलि चढाईना को खून पापून दूर नै कर सकनो। लेकिन हर साल उन लोगून उनार पापून याद दिलूछो जो उनूनले करिना छै।</verse>
				<verse number="4"></verse>
				<verse number="5">येक कारण जब मसीह संसार में आछ, त उले परमेश्वर थैं क्योछ, “तै नै चाँनै कि लोग तैंस बलिदान और भेंट चढ़ून, लेकिन तैले मैंस बलिदान करून खिन एक शरीर दी रैछ।</verse>
				<verse number="6">तै, पुर जानवर स जलाभेरन करिना का बलिदानले और पापून दूर करना का बलिदान भटे खुश नै हुनै।</verse>
				<verse number="7">तब मसीह ले परमेश्वर थैं क्योछ, ‘देख, मैं उई करून खिन आ गयूँ जो तै चाँछै। जसो म्यारा बारिमें यो बात पवित्रशास्त्र में लिखीना की छी’।”</verse>
				<verse number="8">मूसा का नियम कानून सिखूनान कि “पाप का कारण भेंट और बलिदान चढ़ून चैछो। लेकिन मसीह ले इन बातुन क्याखिन क्योछ कि परमेश्वर स इनेरि जरूरत नाहातिन?”</verse>
				<verse number="9">फिर उले क्योछ, “हे परमेश्वर देख, मैं उई करून खिन आरयूँ जो तै चाछै।” परमेश्वर बलिदानून की पैला नियम-कानून खत्म कर दीछो ताकि उ एक नय्या नियम-कानून स स्थापित कर सको। और येक कारण, हम उ बलिदान का द्वारा पवित्र कर दी ग्या जो यीशु मसीह ले अपून शरीराक द्वारा एक बार में हमेशा खिन चढ़ा दी ग्यो।</verse>
				<verse number="10"></verse>
				<verse number="11">हेरक याजक हर रोज वेदी का सामुनि ठाड़ हो भेरन लोगून का पापून दूर करून खिन नियमून पुर करछो। उ लगातार एक्कै जसो बलिदानून चढ़ूनै रूछो जो कभै ले उ आदिमी का पापून दूर नै कर सकनो, जो उनून खिन करि ग्यान।</verse>
				<verse number="12">लेकिन हमार महायाजक यीशु मसीह ले हमार पापून की माफी खिन अपूनास हमेशा खिन सिर्फ एक बलिदान का रूप में चढ़ा दीछ। और अब उ पिता परमेश्वरा का दैन तरफ सिंहासन में सर्वोच्च सम्मान का जाग में हमेशा खिन बैठ ग्योछ।</verse>
				<verse number="13">किलैकी मसीह ले अपूनास सिर्फ एक बार बलिदान का रूप में परमेश्वरेस दी दीछ और यो कारण उक लोगून पवित्र कर दी ग्योछ और उन सच्ची में हमेशा खिन धर्मी बन ग्यान। और वाँ एल उ अपून सब दुश्मनून पुर तरीका ले अपून अधीन करून खिन इंतजार करूनमर्योछ।</verse>
				<verse number="14"></verse>
				<verse number="15">पवित्र आत्मा ले हमून यो बताछ कि यो सच्ची छै। प्रभु परमेश्वरो को उ वादा स याद करा किलैकी उले पैलि कईना को छ्यो,</verse>
				<verse number="16">फिर प्रभु कुंछो कि, जो नय्या वाचा मैं उन दिनून का बाद इस्राएल का लोगून का दगाड़ करूँलो, उ यो छै कि “मैं अपून नियम-कानून उनार दिलून में लिखूलो और मैं उनार जमीर में डाललो।”</verse>
				<verse number="17">परमेश्वर यो ले कुंछो, “मैं उनार पापून, और उनार बुरा कामून फिर कभै याद नी करूँलो।”</verse>
				<verse number="18">और परमेश्वर हमार पापून माफ करछो त अब कोई ले बलिदान दीना की जरूरत नाहातिन।</verse>
				<verse number="19">येक कारण, म्यारा विश्वासी भाईयो, किलैकी यीशु ले हमून खिन अपून जीवन स बलिदान कर दी, अब हम हिम्मत का दगाड़ स्वर्ग में परम पवित्र जाग में पुज सकनू।</verse>
				<verse number="20">जब मसीह मरछ्य त उले हमून खिन एक नय्या बाटो खोल दीछ ताकि हम इसो जीवन जी सकाँ जैको कोई अन्त नाहातिन। उले यो बाटो पर्दा भटे निकभेरन खोलछ्य, येको मतलब यो छै कि उले अपूनास एक बलिदानाक रूप में चढ़ाभेरन</verse>
				<verse number="21">येक कारण हमार पास एक इसो महायाजक छै जो परमेश्वरा का घर में राजा करछो।</verse>
				<verse number="22">त आ हम, मसीह का खून का छिड़क भेरन अपून मनैस शुद्ध करभेरन और साफ पानि ले अपून शरीरून धोभेरन साफ करभेरन और सच्चा मन और मजबूत विश्वास का दगाड़ परमेश्वरा का नजिक जा।</verse>
				<verse number="23">अब हम बिना कोई शक का अपूनी उ आश में अटल रौ, किलैकी हम परमेश्वर में उक वादा स पुर करून खिन भरोस कर सकनू।</verse>
				<verse number="24">आ हम प्रेम ले और भल कामून में एक-दुसरा स हौंसला दीनै रौ।</verse>
				<verse number="25">आ हम कुछ लोगून का नियाती, परमेश्वरै की अराधना करून खिन इकट्ठा हुनो बन्द जन करा। लेकिन हमून एक-दुसरा स हौंसला दीनै रून चैछो और चेतावनी दीनी चैछी, खास कर अब जब कि प्रभु का फिर वापस उनाक दिन नजदीक ऊँन मर्यान।</verse>
				<verse number="26">हमून इन कामून करून चैछो, किलैकी जब हम सुसमाचारै की सच्चाई जाण ग्या, त हम जाणबूझ भेरन किलै पाप करनू, त इसो कोई बलिदान नाहातिन जो हमार पापून दूर कर सको।</verse>
				<verse number="27">बल्कि, उनून सिर्फ परमेश्वरो को न्याय और भयानक आगा की आश करूनी चैछी जो उन लोगून नाश कर देली जो परमेश्वरो को बिरोध करनान।</verse>
				<verse number="28">जब कि मूसा का नियम-कानून को नै मान्या वाला स द्वी या तीन आदिमीन की गवाई में, बिना दया का मार डाली जाछो।</verse>
				<verse number="29">अगर मूसा का नियम-कानून का अनुसार तरीका की सजा छी, त उ आदिमी की सजा भौत ज्यादा होलि जो परमेश्वरा का च्याला को अपमान करछो। उले परमेश्वरा का च्याला स अपून खुटान ले कुचल दीछ किलैकी उले उक आदर-सम्मान नै कर्यो। उले मसीह का उ खून स पवित्र नै मान्यो जैका द्वारा परमेश्वरेले ऊस पवित्र बनून खिन नय्या वाचा शुरू करिना की छी। उले पवित्र आत्मा को अपमान करछ्य जैका द्वारा उस अनुग्रह मिलीना को छ्यो।</verse>
				<verse number="30">ऊस भौत कड़ी सजा दी जालि, किलैकी हम जाणनू कि परमेश्वरेले कईना को छै, “बदला लीनो म्येरो काम छै, मैं ही बदला द्यूलो।” और फिर यो ले कईना को छै, कि “प्रभु अपून लोगून को न्याय करोलो।”</verse>
				<verse number="31">जीवित परमेश्वरा का हातून भटे सजा पाना एक भौतै भयानक बात छै।</verse>
				<verse number="32">लेकिन तुम उन दिनून का बारिमें सोचा जब तुमूले पैलि बार मसीह का बारिमें जाणछ्य। तुमूले भौत दुखून का दगाड़ कठिन मेहनत करछ्य, लेकिन तुम विश्वास में मजबूत बनिना का रैछा।</verse>
				<verse number="33">कभै-कभै त इसो ले भ्योछ, कि तुम अपमान, और अत्याचार सह भेरन सबून का सामुनि तमाशा बनग्या, और कई बार तुम उन लोगून में शामिल हो गया जिनोरो अपमान करि जा छ्यो और जिनारा दगाड़ बुरा बरताव हुछ्यो।</verse>
				<verse number="34">तुम कैदीन का दुख में ले दुखी भैछा, और अपूनी धन-दौलत ले खुशी ले लुटा दीछ; किलैकी तुम जाणछा कि तुमार पास एल ले उन सब चीज छन जिनोरो वादा परमेश्वरै करिना को छ्यो, जो कि भौत खास छै और जो हमेशा खिन बनिना को रूछो।</verse>
				<verse number="35">येक कारण जब लोग तुमून सताला, त अपून विश्वास में मजबूत बनिना का रया ताकि तुमून परमेश्वरा तरफ भटे एक ठूलो फल मिलोलो।</verse>
				<verse number="36">इसा बखत में तुमून धीरज ले सहन करना की जरूरत छै, ताकि तुम परमेश्वरै की इच्छा पुरी कर सका। तब तुमून उ सब मिलोलो जैको परमेश्वरेले वादा करिना को छै।</verse>
				<verse number="37">उक बाद परमेश्वर तुमून उ द्योलो जैको उले वादा करिना को छै। किलैकी, पवित्रशास्त्र में लिखीना को छै, “अब भौतै कम बखत रै ग्योछ, जब कि ऊँनवालो आलो, और देर नी करोलो।</verse>
				<verse number="38">लेकिन म्यारा लोग जो विश्वास ले धर्मी बनिना का छन, उन ज्यूना रौला। अगर जो परमेश्वर में विश्वास करून छोड़ दीनान, त म्येरो मन उनून है खुश नी होलो।”</verse>
				<verse number="39">हम उन लोगून में भटे नाहातिन जो परमेश्वर में विश्वास करून छोड़ दीनान और नाश हो जानान, लेकिन हम उन लोगून में भटे छा जो अपून विश्वास का द्वारा जीवन पा लीनान।</verse>
			</chapter>
			<chapter number="11">
				<verse number="1">विश्वास यो बातो में भरोसा करून छै कि हमून पक्का उई मिलोलो जैकी हम आश करनू और यो विश्वास करून जैस नै देख सकना उन सच्ची में छन।</verse>
				<verse number="2">हमार पूर्वजून इसा तरीका को विश्वास छ्यो। सिर्फ यो कारण ले परमेश्वर उनून है खुश छ्यो।</verse>
				<verse number="3">विश्वास का कारण हम जाणि जानू, कि पुर संसारा स परमेश्वरे ले बचन का द्वारा बनाछ छै। येक कारण हम जो ले देखनू उ उन चीजून ले बनिना छन जिनून देखी नै जा सकनो।</verse>
				<verse number="4">विश्वासा का कारण आदम का च्योलो हाबिल ले अपून ठूला भाई कैन है महान बलिदान चढ़ाछ; और उक बलिदान का द्वारा परमेश्वरेले स्वीकार करछ्य कि हाबिल एक धर्मी आदिमी छ्यो। किलैकी परमेश्वर हाबिल का बलिदान है खुश छ्यो। हालाकि हाबिल मर चुक ग्योछ, फिरले हम परमेश्वर में विश्वास राखना का बारिमें उथैं सिखनू।</verse>
				<verse number="5">विश्वास का कारण हनोक नामोको एक आदिमी स्वर्ग में ज्यूनो उठा ली ग्योछ, और येक कारण उ नै मर्यो, कैसे ले उको लाश नी मिली; किलैकी विश्वासका द्वारा परमेश्वरेले ऊस स्वर्ग में उठा लीछ, और उक स्वर्ग में उठाई जान है पैलि उक बारिमें पवित्रशास्त्र में कईना को छ्यो, कि हनोक ले परमेश्वरेस खुश करछ्य।</verse>
				<verse number="6">केवल परमेश्वर में विश्वास करभेरन हम ऊस खुश कर सकनू। किलैकी परमेश्वरा का पास ऊँनवाला स विश्वास करून चैछो, कि उ छै; और उन जो ऊस सच्चाई ले खोजनान, उ उनून उको प्रतिफल दीछो।</verse>
				<verse number="7">विश्वास का कारण नूह स एक बाढ़ का बारिमें परमेश्वरा का द्वारा चेतावनी दी गैछ जो उले कभै नी देखीना की छी, उले चेतावनी पाभेरन परमेश्वरा का हुकमो को पालन करछ्य, और अपून परिवार का बचाव खिन जहाज बनाछ, और नूह का विश्वास करून है पैलि, बाकि लोग जिनूनले विश्वास नै कर्यो, उन दोषी ठैहराई ग्या और उन डूब भेरन मर ग्या। नूह परमेश्वरा का नजरून में धर्मी बनछ्य, किलैकी उले परमेश्वर में विश्वास करछ्य।</verse>
				<verse number="8">विश्वासा का कारण अब्राहम स जब परमेश्वरेले एक जाग में जान खिन बुलाछ, त उ परमेश्वरा का हुकुम स मानभेरन इसा जाग में निकल ग्यो, जाँ परमेश्वर ऊस उक हिस्सा की जमीन दीन वालो छ्यो, और अब्राहम नी जाण छ्यो, कि काँ जान खिन प्रभु ले उथैं नी कै राखछ्यो; लेकिन फिरले परमेश्वरो को हुकुम मानभेरन अब्राहम उ देश खिन न्हैग्यो।</verse>
				<verse number="9">परमेश्वरेले जो जमीनो को वादा करिना को छ्यो, अब्राहम एक अजनबी की नियाती तम्बून में रूछ्यो। उक दगाड़, उको च्योलो इसहाक और उको नाती याकूब, जिनून परमेश्वरा का तरफ भटे उई वादा मिलीना को छ्यो, उन ले तम्बू में रूछ्या।</verse>
				<verse number="10">किलैकी उ स्वर्ग में एक इसा शैहर में रूना का इंतजार करछ्या जो हमेशा बनिना को रौलो, और जैको रचूनवालो और बनूनवालो परमेश्वर छै।</verse>
				<verse number="11">विश्वासा का कारण अब्राहम की घरवाली सारा ले बुढ़ियाकाल में ले गर्भ धारण करना की सामर्थ पाछ; किलैकी ऊस पुर भरोसा छ्यो कि परमेश्वर उई करोलो जैको उले वादा करिना को छै।</verse>
				<verse number="12">जब अब्राहम भौत बूढ़ो हो गैछ्यो कि उ मौत का करीब छ्यो, फिरले आकाश का तारा और समुन्द्राक रेताक नियाती, अनगिनत वंश पैद भ्यान।</verse>
				<verse number="13">इन सबै लोग जिनूनले परमेश्वर में विश्वास करछ्य, उन चीजून पाईन बिना मर ग्या जैको वादा परमेश्वरेले करिना को छ्यो। लेकिन उन यो बात स समझ ग्या कि परमेश्वर ऊँन वाला बखत में कि करोलो। उनूनले यो बात ले समझ लीछ कि हम यो धरती में अजनबी और परदेशी छा।</verse>
				<verse number="14">यो उन लोगून का बारिमें बतूछो जो कुंना कि उन यो संसार में अजनबी और परदेशी छन। उन दिखनान कि उन एक इसा देश स पाना की उम्मीद करून मर्यान जो उनोरो होलो।</verse>
				<verse number="15">अगर उन उ देशा का बारिमें सोचनान जा भटे उन आईना का छ्या त उन वापस जाँ सकछ्या।</verse>
				<verse number="16">लेकिन सच्चाई यो छै कि उनून एक खास देश की आश छी, जो स्वर्ग में छै। येक कारण परमेश्वर उन लोगून को परमेश्वर कईजान में खुश छ्या, किलैकी उले उनून खिन एक शैहर तैयार करिना को छै।</verse>
				<verse number="17">जब परमेश्वरेले अब्राहम स परखछ्य, त विश्वास ले अब्राहम इसहाक को बलिदान करून खिन तैयार हो ग्यो। इसहाक अब्राहम को एकलौत च्योलो छ्यो। परमेश्वरेले अब्राहम थैं यो च्याला का बारिमें वादा करिना को छ्यो कि, “इसहाक का द्वारा ही त्येरो वंश जाणि जालो।” अब्राहम स यो पुरो विश्वास छ्यो, कि परमेश्वर मरिनान ज्यून कर सकछो। और तरीका ले अब्राहम ले अपून च्याला इसहाक स मरिनान में भटे वापस ज्यूनो पा लीछ।</verse>
				<verse number="18"></verse>
				<verse number="19"></verse>
				<verse number="20">विश्वास का कारण इसहाक ले अपून द्वीवै च्यालान याकूब और एसाव स वादा का बातुन का बारिमें आशीष दीछ।</verse>
				<verse number="21">विश्वास का कारण याकूब ले मरून बखत यूसुफ का द्वीवै च्याला में भटे एक-एक स आशीष दीछ, और अपूनी लठ्ठी का सहारा ले झुकभेरन उले परमेश्वरै की अराधना करछ्य।</verse>
				<verse number="22">विश्वासा का कारण यूसुफ ले, जब उ मरून वालो छ्यो, त उले पुर विश्वास ले क्योछ कि इस्राएल का लोग मिस्र देश भटे निकलाल, या तक कि उले उनून यो हुकुम दीछ कि। “जब तुम मिस्र देश भटे जाला, त म्यारा मरना का बाद मेरि हड्डीन अपून दगाड़ कनान देश ली जाया।”</verse>
				<verse number="23">फिर जब मिस्र देशा का राजा ले यो हुकुम दीछ कि जन्म हुन तक सब इस्राएली का च्यालान मार दी जानो चैछो, तब विश्वासा कारण मूसा का ईजा-बबा ले ऊस पैद हुना का बाद ऊस तीन मैंन तक लुका भेरन राखछ्य; किलैकी उनूनले देखछ्य, कि यो साधरण बच्चा नाहातिन, और उन राजा का हुकुम स तोड़ून है नै घबराया।</verse>
				<verse number="24">मिस्र देशा का फरौन राजा फिरौन की चेलि ले मूसास पालछ्य। जब मूसा ठूलो हो ग्यो, त विश्वास का कारण उ नी चाँछ्यो कि लोग ऊस राजकुमारी को च्योलो कुंन।</verse>
				<verse number="25">यो येक कारण भ्योछ कि मूसा ले थ्वाड़ा बखत खिन पाप को सुख को आनंद लीना का बजाय परमेश्वरा का लोगून का दगाड़ दुख भोगुन निको समझछ्य।</verse>
				<verse number="26">मूसा जाण छ्यो कि मिस्र देशा का खजाना की तुलना में मसीह खिन दुख भोगून निको छै, किलैकी इसो करना ले परमेश्वर ऊस स्वर्ग में ईनाम द्योलो।</verse>
				<verse number="27">विश्वास का कारण राजा का क्रोध ले नै डरभेरन मूसा ले मिस्र देश स छोड़ दीछ, किलैकी उ समझ ग्यो छ्यो कि यो माना इसो छ्यो जसो उले परमेश्वरेस देखछ्य, जो अदृश्य छै।</verse>
				<verse number="28">विश्वास का कारण मूसा ले इस्राएली लोगून हुकुम दीछ, कि उन द्वारून और मोलून में मेम्ना को खून छिड़क भेरन फसह का त्यारे की रस्म पुरी करा, ताकि पैलि सन्तानून नाश करून वालो दूत, इस्राएला का पैलि सन्तानून नै छू सको।</verse>
				<verse number="29">विश्वास का कारण इस्राएली लोग लाल समुद्रा स पार इसकैं कर ग्या, जसकैं सुखी जमीन में हिटून मर्यान हुन। लेकिन जब मिस्र देशा का लोग ऊस पार करून लाग्‍यान त समुन्द्रो को पानि पैलि नियाती हो भेरन उनून बगा भेरन ली ग्योछ।</verse>
				<verse number="30">किलैकी इस्राएली लोगून ले परमेश्वर में विश्वास करछ्य, येक कारण विश्वास का कारण उन सात दिनून तक यरीहो शैहरा का दीवार का चारू तरफ चक्‍कर लगायान, तब दीवार खिती गै।</verse>
				<verse number="31">विश्वास का कारण राहाब वेश्या परमेश्वरा का हुकुम नै मान्या वालान का दगाड़ नाश भैछ; किलैकी उले उन इस्राएली भेदियान शरण दीछ जो यरीहो शैहरो को भेद लीन खिन आईना का छ्या।</verse>
				<verse number="32">मैंस और के कुंना की के जरूरत नाहातिन। अगर मैं इसा लोगून का विश्वास का बारिमें ले चर्चा करून लागू जसकैं गिदोन, बाराक, शिमशोन, और यिफ्ताह, और दाऊद और शमूएल और परमेश्वरा का तरफ भटे संदेश दिनवाला का लोगून का बारिमें बतुन खिन म्यारा पास बखत नाहातिन।</verse>
				<verse number="33">इनूनले विश्वास का द्वारा राज्य जीत्यान; भल काम कर्यान; और वादा करिना का चीजून पायान, बाघ ले उनून नै खा सक्या।</verse>
				<verse number="34">आगा की लपट ले उनून नै जला सकी, और तलवारै की धार ले उनून नै मार सकी। एक बार कमजोर हुना का बाद उनून दुबारा ताकतवर बनाई ग्योछ; लड़ाई में बीर निकल्यान; और उनूनले अपून दुश्मनून की सेनान दूर भगा दीछ।</verse>
				<verse number="35">कुछ स्यैनिन ले अपून मरिनाका लोगून ज्यूनो पाछ; कतुक त मार खानै-खानै मर ग्या; और उन अपूनो विश्वास नी छोड़ून चाँछ्या ताकि उन कैद भटे रिहा हो जियून; येक कारण मरिभेरन दुबारा ज्यून हुना का बाद उन परमेश्वरा दगाड़ हमेशा खिन जीन चाँछ्या।</verse>
				<verse number="36">कुछ लोगून को मजाक उड़ाछ और कोड़ो को सामना करून पड़छ्य जब की कुछून जंजीरों ले जकड़ भेरन जेल में डाल दी ग्यान।</verse>
				<verse number="37">उनूनमें भटे कुछ विश्वासी लोगून ढूंगान ले लोड़ियाई ग्योछ। और कुछ लोगून आरी ले चीरभेरन द्वी हिस्सा कर दी ग्यान, कईन तलवार ले मौत का घाट उतार दीछ ग्योछ। उन गरीब छ्या, और उनार दगाड़ अत्याचार और बुरा बरताव करि ग्योछ। उन भेड़-बाकरान का खालून ओढ़भेरन इथकै-उथकै और जंगलून, और पहाड़ून, और गुफान में, और धरतीका हुडियारून में मारा-मारा फेरीन र्यान।</verse>
				<verse number="38"></verse>
				<verse number="39">यो बुरा संसार इन विश्वासी लोगून का योग्य नी छ्यो। विश्वासा का द्वाराई इन सबून का बारिमें परमेश्वर उनून खिन खुश छै, फिरले उनून उ नै मिल्यो जैस दीना को वादा परमेश्वरेले उनूनथैं करिना को छ्यो।</verse>
				<verse number="40">किलैकी परमेश्वरा का पास सिर्फ उनून खिन नै, बल्कि हमून खिन ले एक बड़िया योजना छै। परमेश्वर उनून सिर्फ हमार दगाड़ मिलाभेरन सिद्ध बनूनो चाछो।</verse>
			</chapter>
			<chapter number="12">
				<verse number="1">हमार आस-पास इसा कई लोग छन जिनरी जीन्दगी हमून बतूछी कि विश्वास को मतलब कि हुछो। येक कारण आ हम हरेक रूकावट और पाप स दूर करभेरन, हमून जै बाटा में जानो चैछो, उमें हमून जरूर चलून चैछो।</verse>
				<verse number="2">हमून यीशु का तरफ देखनै रून चैछो, जो हमून अघिल बढ़ूछो और हमोरो विश्वास पुरो करछो। उले लज्जा की के चिन्ता नै करभेरन सूली को दुख सह लीछ; किलैकी उ जाण छ्यो कि बाद में ऊस खुशी होलि कि उले इसो करछ्य। अब उ परमेश्वरा का सिंहासन का दैन तरफ बैठिना को छै।</verse>
				<verse number="3">यीशुक उदारणा का बारिमें सोचा, कि उले जिन पापिन का द्वारा दीईना का घोर कष्टून येक कारण सह लीछ, जो उहै इतुक नफरत करछ्या, कि तुम निराश होभेरन हिम्मत नै छोड़ दी।</verse>
				<verse number="4">जब तुम बुराईन की ताकतून का खिलाफ संघर्ष करछा त तुमून ले इसी लड़ाई नै लड़ी, कि तुमेरि मौत होज्यौ।</verse>
				<verse number="5">लेकिन तुम उ हिम्मत वाला उपदेश स भूल चुक गैछा, जैस परमेश्वरेले तुमून अपूनो च्योलो समझभेरन दीईना को छ्यो, “हे म्यारा च्याला, जब प्रभु तुमून यो एहसास करूँछो कि तुमूले गलत करिना को छै। और जब उ तुमून डाँटछो त तुम हार जन माना।”</verse>
				<verse number="6">किलैकी प्रभु, जैस प्रेम करछो, ऊस डाँटछो ले; जैस परमेश्वर अपूनो च्योलो मानछो, ऊस सजा ले दीछो</verse>
				<verse number="7">तुम जो दुख सहछा, ऊस परमेश्वरै की डाँठ समझा; परमेश्वर तुमून च्योलो समझभेरन तुमार दगाड़ इसो बर्ताव करछो, उ को च्योलो छै, जैस बबा नै डाँठनो?</verse>
				<verse number="8">अगर उ डाँठ जो सबून पड़छी, अगर तुमून में नै पड़नी, त तुम परमेश्वरा का सच्चा च्याला नाहातिन।</verse>
				<verse number="9">फिर जब कि हमार शारीरिक बबा ले हमून डाँठ छ्या और हमूनले उनोरो आदर करछ्य, त हमून अपून स्वर्गीय पिता को कतुक सम्मान करूनो चैछो और उकी बात सुणूनी चैछी ताकि हम हमेशा खिन ज्यूना रै सका जब उ हमून सुधारो।</verse>
				<verse number="10">हमार संसारिक बबा जसो उनून सबून है निको लागछो, हमून थ्वाड़ा बखत खिन डाँठ छ्या लेकिन परमेश्वर हमेरि भलाई खिन हमून डाँटछो कि हम उकी पवित्रता में भागीदार हो ज्या।</verse>
				<verse number="11">जै बखत डाँठ पड़छी, उ बखत डाँठ निकी नै लागनी, बल्कि उ बुरो लागछो। लेकिन बाद में, जब हम येले सिख लीनू, त हमून शांति मिलछी, किलैकी हम सही ढंगले जीनो शुरू करनू।</verse>
				<verse number="12">येक कारण अपून थकिनाक हातून मलि उठा, और अपून कमजोर घुणान मजबूत करा।</verse>
				<verse number="13">और याँ वाँ देखना का बजाय, यीशु का पास पुजून वाला सीधा बाटा में हिटनै रौ ताकि हमार बीच में जो लोग आत्मिक रूप में कमजोर छन, उन भटक नै जून, बल्कि उनोरो विश्वास मजबूत हो ज्यो।</verse>
				<verse number="14">सबून का दगाड़ मेल मिलाप राखा, और पवित्र जीवन जीन खिन हर तरीका ले कोशिश करनै रौ। जैका बिना कोई प्रभु स कभै ले नै देख सकनो।</verse>
				<verse number="15">सतर्क रौ, कई इसो नै हो, कि कोई ले आदिमी परमेश्वरा का अनुग्रह का बिना नै रै ज्यो। और ध्यान दी कि कोई ले आदिमी स अविश्वास में कड़वा रूखा का जड़ा का नियाती जन बनून दी जो उक जहर का दगाड़ कई परेशानीन का कारण बनछो, जैले उ आदिमी परमेश्वर है दूर हो ज्यो।</verse>
				<verse number="16">तुमूनमें कोई ले आदिमी व्यभिचारी जन हो, और ना तुमून में अब्राहम का नाती एसाव का नियाती बुरा काम हुन, किलैकी उ जियोठौ च्योलो छ्यो, ऊस खास उत्तराधिकारी हुना को अधिकार छ्यो। लेकिन उले जन्मसिद्ध अधिकारो को सम्मान नै कर्यो और येक कारण उले अपून नाना भाई याकूब स खान का कारण बेच दीछ।</verse>
				<verse number="17">तुम जाणछा, कि जब उले बाद में अपून बबा इसहाक थैं आशीष पान चाछ, त ऊस नै दी ग्यो, और आँसू बगा भेरन ले उ, उ आशीष स अपून हिस्सा में नै कर पायो।</verse>
				<verse number="18">तुम सीनै पहाड़ जसा जाग में नै आया, जैस देखी और छुई जा सकछो। कोई भयंकर आग या काला बादल या तूफान नाहातिन, और लोग इसा जाग में छ्या जा परमेश्वरेले अपून नियम-कानून दीयान।</verse>
				<verse number="19">तुम तुरी की आवाज और बोलूनवालान का इसा आवाजा का पास नै आया, जैका सुणून वालान ले बिनती करछ्य, कि अब हमून थैं और बात नै करि जौ।</verse>
				<verse number="20">उनूनले यो येक कारण क्योछ, किलैकी उन यो हुकुम स बरदास नी कर सकछ्या जो परमेश्वरेले उनून दीईना का छ्या, “अगर जानवर ले यो पहाड़ स छू लेलो, त उ ढूंगा ले लोड़ियाई भेरन मारी जालो।”</verse>
				<verse number="21">और उ दर्शन इसो डरावना छ्यो, या तक कि मूसाले ले क्योछ, “मैं भौत डरछूँ और काँपछूँ।”</verse>
				<verse number="22">तुम सिय्योन पहाड़ा का पास आईना का छा, जो स्वर्गीय यरूशलम शैहर छै, और जीवित परमेश्वरो को शैहर छै, जाँ लाखू स्वर्गदूत खुशी को पर्व मनूनान।</verse>
				<verse number="23">तुम परमेश्वरा का पहलौठान का सभा में आईना का छा, जिनारा नाम स्वर्ग में लिखी ग्यान। तुम खुद परमेश्वरा का पास आछा, जो सब चीजून को न्याय करून वालो छै उ स्वर्ग में धर्मी लोगून की आत्मा छन जिनून अब सिद्ध बनाई ग्योछ।</verse>
				<verse number="24">तुम यीशु का पास आ रैछा जो परमेश्वर और लोगून का बीच में नय्या वाचा छै, और छिड़कीना का खून का पास आईना छा, जो हाबिल का खून का नियाती न्याय खिन रूना का बजाय पापून की माफी बात करछो।</verse>
				<verse number="25">सतर्क रया, और परमेश्वर जो तुमूनथैं बोलून मरियोछ उक हुकमून को पालन करा। इस्राएला का लोगून सजा मिलछ्य जब उनूनले सुणून है इन्कार कर दीछ और मूसा ले उनून चेतावनी दीछ। येक कारण यो हमून खिन और ले बुरो होलो अगर हम परमेश्वरा का हुकमून को पालन करून है इन्कार करनू जो हमून स्वर्ग भटे चेतावनी दीछो।</verse>
				<verse number="26">जब परमेश्वरेले सीनै पहाड़ भटे बात करछ्य, त उ बखत उकी आवाज ले धरती हिलगै, लेकिन अब उले यो वादा करिना को छै कि, “ मैं एक बार फिर केवल धरती स नै, बल्कि आकाश स ले हिला द्यूलो।”</verse>
				<verse number="27">और यो बोल “एक बार फिर” यो बात स दिखूनान, कि बनाईना का चीज हिल जाला और हटा दी जाला। जो चीज हिलाई नै जानी, उन हमेशा बनिना का रूनान।</verse>
				<verse number="28">हमून जो राज्य मिलीना को छै, उ हिलाई नै जा सकूनो। येक कारण हम परमेश्वरो को धन्यवाद दीनै रूँ, और उकी इच्छा का अनुसार अराधना करा, जैले उ खुश हुछो।</verse>
				<verse number="29">किलैकी याद राखा कि हम जो परमेश्वरै की सेवा करनू, उ एक आगा जसो छै जो अपवित्र हुन वाली हर चीज स भस्म कर दीछो।</verse>
			</chapter>
			<chapter number="13">
				<verse number="1">आपस में भाई-बैनिन की नियाती एक-दुसरा से प्रेम करनै रौ।</verse>
				<verse number="2">उन लोगून को आदर-सम्मान करा, जो जरूरतमंद मुसाफिर छन, किलैकी येका द्वारा कतकून ले अनजाना में स्वर्गदूतून को आदर-सम्मान करिना को छै।</verse>
				<verse number="3">कैदीन को इसकैं हाल-चाल पुछनै रौ, समझा कि तुम ले उनार दगाड़ कैद में छा। जो लोग दुखी करि जानान, उनोरो ले यो समझभेरन हाल-चाल पुछा करा, जसकैं कि तुम ले उनार दुख में शामिल छा।</verse>
				<verse number="4">ब्या सब लोगून में सम्मान की बात समझी जौ, और यो रिश्ता में घरवाली और घरवालो एक-दुसरा का प्रति वफादार रून। किलैकी परमेश्वर ब्यभिचारीन, और दुसरा स्यैनिन का दगाड़ नाजायज रिश्ता राखूनवालान को का न्याय करोलो।</verse>
				<verse number="5">तुम अपूनास धन-दौलत का लालच है दूर राखा और जो तुमार पास छै, उमेंई खुश रौ। किलैकी परमेश्वरेले खुद के रैछ, “मैं तैंस कभै ले नी छोडूलो, और तैंस कभै ले नी त्यागूँलो।”</verse>
				<verse number="6">येक कारण हम विश्वास ले दगाड़ कुंनू, “प्रभु, मेरि मद्दत करछो; मैं नी डरूँलो; मैंस के डर नी होलो कि कोई ले आदिमी म्यारा दगाड़ कि कर सकछो।”</verse>
				<verse number="7">जो तुमार अगुवा छ्या, और जिनूनले तुमून परमेश्वरो को बचन सुणाछ, उनून याद राखा; और ध्यान ले उनार जीवन स देखा, कि कसीकैं उनूनले अपूनो जीवन जीछ, और मरून तक परमेश्वरा का विश्वास में वफादार बनिना का रियान। येक कारण हमून ले ऊसोई परमेश्वर में विश्वास करूनो चैछो जसो उनूनले करिना को छ्यो।</verse>
				<verse number="8">यीशु मसीह बैलिया और आज और हमेशा एक जसो छै।</verse>
				<verse number="9">किलैकी यीशु मसीह कभै नै बदलनो, तुमून इन सबै नय्या और अलग-अलग शिक्षान को पालन नै करून चैनो जो तुमून गलत बाटान में ली जानान। किलैकी तुमार मनून खिन यो निकोछ कि परमेश्वरा का अनुग्रह का द्वारा मजबूत बना, नै कि उन नियमून का मानना का द्वारा जो खानाका बारिमें छन, खाना-पीना सम्बन्धी प्रार्थनान का द्वारा केको भलो नै भ्यो।</verse>
				<verse number="10">जो याजक यहूदी रीति-रिवाज का अनुसार परमेश्वरै की सेवा करछो, उनून यीशु का बलिदान द्वारा के फैदा नै मिलूनो। लेकिन हमून फैदा मिलछो।</verse>
				<verse number="11">पैलि वादा का अनुसार महायाजक हर साल जानवरून को खून इस्राएली लोगून पापून की माफी खिन महापवित्र जाग में ली जाछो।</verse>
				<verse number="12">योई कारण, यीशु ले लोगून अपून खून का द्वारा पवित्र करून खिन यरूशलम शैहर भ्यार दुख सहन करछ्य और मर ग्यो।</verse>
				<verse number="13">येक कारण, आ हम यहूदीन का नियम-कानून स छोड़ दीनू, और यीशु में विश्वास करा और उक दगाड़ निन्दा सहन करा।</verse>
				<verse number="14">किलैकी यो संसार में हमोरो हमेशा रून खिन घर नाहातिन, लेकिन हम उ स्वर्गीय घरा का खोज में छा, जो हमेशा खिन छै।</verse>
				<verse number="15">येक कारण हम यीशु का द्वारा अपून मुँख ले परमेश्वर की स्तुति और अराधना करनू। जो परमेश्वर खिन हमोरो बलिदान छै।</verse>
				<verse number="16">तुम लोग भलाई करून और एक-दुसरा की मद्दत करून खिन तैयार रौ, किलैकी परमेश्‍वर इसा बलिदानून ले खुश हुछो।</verse>
				<verse number="17">अपून अगुवान की माना; और उनार अधीन रौ, उन तुमून नजर राखिना का छन ताकि तुम भटक नै जा। किलैकी उनून अपूनी सेवा को लेखा परमेश्वरेस दीन पड़ोलो। तुम उनेरि माना, ताकि उन यो काम स खुशी ले करून, किलैकी उदास होभेरन सेवा करून है के फैदा नी होलो</verse>
				<verse number="18">हमून खिन प्रार्थना करनै रौ, किलैकी हमून विश्वास छै, कि हमोरो जमीर साफ छै; हम उन सब चीजून में परमेश्वरो को आदर-सम्मान करून चानू जो हम करनू।</verse>
				<verse number="19">प्रार्थना करून खिन मैं तुमून और ले हौंसला दीछूँ, ताकि मैं जल्दी तुमार पास फिर आ सकूँ।</verse>
				<verse number="20">और अब, शान्ति दीन वाला परमेश्वर, हमार प्रभु यीशु मसीह स हमेशा की वाचा का द्वारा ज्यूनो कर दीछ, तुमून उन सब चीजून है भरपूर करौ जिनरी तुमून उकी इच्छा पुरी करून खिन जरूरत छै। यीशु मसीह का सामर्थ के द्वारा उ तुमूनमें उ सब उत्पन्न करौ जो ऊस खुश करछा। यीशु महान वाचा द्वारा भेड़ून को महान ग्वाला बन ग्योछ, जैमें उक खून का द्वारा दसकत करि ग्यान। उकी महिमा हमेशा-हमेशा हुनै रौ। आमीन।</verse>
				<verse number="21"></verse>
				<verse number="22">हे म्यारा विश्वासी भाईयो, मैं तुम थैं बिनती करछूँ, कि यो चिठ्ठी को संदेश की बातुन धैर्य ले सुणा, जो मैंले तुमून हौंसला दीन खिन लिखीनाक छन। मैंले तुमून यो चिठ्ठी में भौत ज्यादा बात नै लिख राँख्या।</verse>
				<verse number="23">तुमून यो याद छै कि, हमोरो विश्वासी भाई तीमुथियुस जेल भटे छुट ग्योछ, और अगर उ जल्दी आग्यो, त मैं उक दगाड़ तुमूनथैं मिलून ऊँलो।</verse>
				<verse number="24">अपून सब अगुवान और परमेश्वरा का लोगून म्येरो नमस्कार कया। इटली देशा का विश्वासी तुमून नमस्कार कुंन मर्यान।</verse>
				<verse number="25">मैं प्रार्थना करछूँ कि, परमेश्वरो को अनुग्रह तुम सब में होनै रौ। आमीन।</verse>
			</chapter>
		</book>
		<book number="59">
			<chapter number="1">
				<verse number="1">मैं याकूब, यो चिठ्ठी लिखूनमरयूँ, जो परमेश्वर और प्रभु यीशु मसीह को सेवक छूँ। मैं यो चिठ्ठी इस्राएली लोगून जो बार गोत्ररून में भटे छन उनून लिखूनमरयूँ, जो पुर संसार में तितर-बितर होभेरन रूनान उनून मेरो नमस्कार।</verse>
				<verse number="2">हे म्यारा प्यारा दगड़ियो, जब तुमून में हरेक प्रकार की मुसीबत आलि, त इनून भौत खुशी की बात समझा।</verse>
				<verse number="3">क्याखिनकि तुम जाणछा, कि जब तुमोरो विश्वास परखी जाछो, तब तुम भौत धीरजाक दगाड़ परमेश्वर में विश्वास राँख भेरन परीक्षान सहन करछा।</verse>
				<verse number="4">लेकिन धीरज स अपूनो काम करून दी, कि आत्मा में मजबूत और सिद्ध हो जा, और तुमार चाल-चलन में कोई ले कमी नै रौ।</verse>
				<verse number="5">लेकिन अगर तुमून में भटे कैसे ले बुद्धि कि कमी हो, त उ परमेश्वर थैं माँगो, जो बिना गलती ढूनै खुशी ले दीछो; और ऊस दी जालि।</verse>
				<verse number="6">जब तुम परमेश्वरथैं विश्वासा का दगाड़ और बिना शक करिनाक माँगा। क्याखिनकि जो शक करछो, उ समुन्द्रा का लहरून नियाती बदलनै रूनान, जो हवाक बहाव ले उछलनै रूछी।</verse>
				<verse number="7">अगर तुमून में कोई इसो हो त उ यो नै समझौ कि मैंस प्रभु भटे के मिलोलो।</verse>
				<verse number="8">उ आदिमी दुगला छै, और उ अपूनी सब बातुन में चंचन छै।</verse>
				<verse number="9">उ विश्वासी भाई जो गरीब छै, ऊस यो सोचभेरन खुश हुन चैछो किलैकी उ परमेश्वर खिन खास छै।</verse>
				<verse number="10">उ विश्वासी जो अमीर छै, ऊस खुश हुन चैछो कि परमेश्वर ले ऊस नम्र कर रैछ; क्याखिनकि उकी अमीरी नाश हुनवाली जंगली फूलाका नियाती छै।</verse>
				<verse number="11">जब सूरजक निकलून तक तेज घाम पड़छो और घास स सुखा दीछी, और फूल पत्ता झड़ जानान, और उकी खुबशुरती खतम हो जाछी। इसीकैं एक अमीर आदिमी ले अपून जीवनाक कामून में ब्यस्त रूनाक कारण मर जालो।</verse>
				<verse number="12">धन्य छै उ आदिमी, जो परीक्षा में मजबूत बनिना को रूछो; क्याखिनकि जब उ परीक्षा स पार कर लीछो त ऊस अनन्त जीवन को मुकुट मिलोलो, जैस दिना को वादा परमेश्वर ले अपून प्रेम करूनवाला लोगून खिन करिना को छै।</verse>
				<verse number="13">जब कैकी परीक्षा हो, त उ यो नै कौ, कि मेरि परीक्षा परमेश्वरा का तरफ भटे हुछी। बुरी बातुन ले परमेश्वरे स के लीन दीन नाहातिन, और नै उ खुद कैकी परीक्षा करछो।</verse>
				<verse number="14">लेकिन कुछ लोग अपूनी बुरी इच्छाऊंक कारण परीक्षा में पड़नान।</verse>
				<verse number="15">बुरी इच्छा मन में पैद होभेरन पाप स जन्म दीछी, और पाप बढ़ जाछो, उको नतीजा हमेशा की मौत छै।</verse>
				<verse number="16">हे म्यारा भाई-बैनीयों! तुम गलती जन करा।</verse>
				<verse number="17">क्याखिनकि हरेक निको बरदान और हरेक भौत बड़िया दान परमेश्वरा का तरफ भटे मिलछो, जैले आकाश में उज्याला स बानाछ। उन उज्याला की परछाई बदलनै रूछी लेकिन परमेश्वर कभै नै बदलनो।</verse>
				<verse number="18">उले अपूनी इच्छाक अनुसार हमून सच्चाई का बचनाक द्वारा नय्या जीवन दी रैछ, ताकि हम परमेश्वरा का द्वारा बनाईनाक हरेक चीज में सबून है खास हिस्सा छा, जसो कि फसलो को पैलो हिस्सा हुछो।</verse>
				<verse number="19">ये म्यारा प्यारा दगड़ियो, यो बात तुम जाणली, हरेक आदिमी स परमेश्वरो को बचन सुणून खिन तैयार रूनवालो और बोलून में धीरज राँखून वाला और जल्दी गुस्सा करूनवाला नै हो।</verse>
				<verse number="20">क्याखिनकि जब कोई आदिमी गुस्सा करछो, त उ धार्मिकताक काम नै कर सकूनो जो परमेश्वर स खुश करछो।</verse>
				<verse number="21">येक कारण मनोको पुरो मैल और बैर-भाव की बढ़ती स दूर करभेरन, उ परमेश्वरा का बचन स नम्रता ले ग्रहण कर ली, जो तुमार दिल में डाली ग्योछ, उई तुमार प्राणून बचा सकछो।</verse>
				<verse number="22">परमेश्वरा का बचन स केवल सुणन्या वाला नै जो अपून आपस ध्वाका दीनान लेकिन परमेश्वरा का बचन को पालन करूनवाला बना।</verse>
				<verse number="23">क्याखिनकि जो कोई परमेश्वरा का बचन सुणून वालो हो, और उको पालन करून वालो नै हो, त उ उक नियाती छै जो अपूनो मुँख शिश में देखछो।</verse>
				<verse number="24">और उ अपून आपस शिश में देखभेरन न्हैजाछो, और तुरन्त भूल जाछो कि उ कसो छ्यो।</verse>
				<verse number="25">लेकिन जो आदिमी परमेश्वरा का बचन स, जो पापून भटे छुटकारा दीछो ऊस ध्यान ले सिखछो और सुणछो, उ आदिमी अपून कामून में येक कारण आशीष पालो कि सुणिभेरन भुलनो नै, लेकिन ऊसोई काम करछो।</verse>
				<verse number="26">अगर कोई अपून आपस परमेश्वरो को भक्त समझछो, लेकिन बुरी बातुन बोलून में काबू नै राखनो, त उ अपून आपस ध्वाका दीछो, और उकी भक्ति बेकार छै।</verse>
				<verse number="27">हमार पिता परमेश्वरा का सामुनि नजर में साफ और सच्ची भक्ति यो छै कि अनाथून और विध्वाऊन का दुखून में उनोरो ख्याल राँखा, और अपूनास यो संसाराक बुर कामून भटे बचाभेरन राँखा।</verse>
			</chapter>
			<chapter number="2">
				<verse number="1">हे म्यारा प्यारा दगड़ियो, तुम हमार महिमामय प्रभु यीशु मसीहक शिष्य छा, येक कारण तुमूनमें भेदभाव नै हो।</verse>
				<verse number="2">अगर कोई आदिमी सुना की अंगूठी और बड़िया कपाड़ा पैन भेरन तुमारा मण्डली में उछो और एक गरीब ले मैल-कुचाला कपाड़ा पैन भेरन उछो</verse>
				<verse number="3">और तुम उ बड़िया कपाड़ा पैनून वाला स ज्यादा सम्मान दीभेरन कुँछा, “तैं याँ खास जाग में बैठा,” और उ गरीब थैं कुँछा, “तैं वाँ ठाड़ रौ,” या “म्यारा खुटान का पास तलि बैठ जा।”</verse>
				<verse number="4">तो क्या तुमूले याँ भेदभाव नै कर्यो और बुरो बिचार करभेरन न्याय करूनवाला नै भ्या।</verse>
				<verse number="5">हे म्यारा प्यारा दगड़ियो, सुणा। क्या परमेश्वरले संसाराक गरीबून नै चुनियो, कि उन विश्वास में धनी और उ राज्य का वारिस बना, जेको वादा परमेश्वर ले उनूनथैं कर रैछ, जो ऊस प्रेम करनान।</verse>
				<verse number="6">लेकिन तुमूले गरीबून को अपमान करछ्य। तुम यो खुद यो जाणछा, कि धनवान लोग छन जो तुमून में अत्याचार करनान और जबरदस्ती कचेहरीन में घसीट भेरन में लिजानान।</verse>
				<verse number="7">उन उई छन जो यीशुक बारिमें बुरी बात बोलनान, जो नाम ले तुमेरि पछयाण छै।</verse>
				<verse number="8">अगर तुम पवित्रशास्त्र को यो बचनाक अनुसार, कि “तैं अपून पड़ोसीस अपून जसो प्रेम राँख,” सच्ची में उन खास नियम-कानून पुरो करछा, त निको करछा।</verse>
				<verse number="9">लेकिन अगर तुम भेदभाव करछा, त पाप करछा; और नियम-कानून तुमून दोषी ठैहरू छो।</verse>
				<verse number="10">क्याखिनकि जो कोई सब नियम-कानून को पालन करछो लेकिन उमें भटे एक हुकुम स नै माननो त उले पुर नियम-कानून को पालन नै कर्यो और उ सब बातुन में दोषी ठहरछो।</verse>
				<verse number="11">येक कारण परमेश्वरे ले यो क्योछ, “कि तैं ब्यभिचार जन कर,” उले यो ले क्योछ, “खून जन कर” येक कारण अगर तुमूनले ब्यभिचार त नै कर्यो लेकिन खून करछै तब ले तैं नियम-कानून स तोड़ून वालो ठैरछै।</verse>
				<verse number="12">तुम उन लोगून का नियाती बोला और काम ले करा, जिनोरो न्याय पापून भटे आजाद करूनवाला नियम-कानूनक अनुसार होलो।</verse>
				<verse number="13">क्याखिनकि जो कोई दुसरान में दया नै करोलो, त परमेश्वर ले उमें दया नी करोलो जब उ न्याय करोलो। लेकिन जो दुसरान में दया करोलो, त परमेश्वर ले उमें दया करोलो जब उ न्याय करोलो।</verse>
				<verse number="14">हे म्यारा प्यारा दगड़ियो, अगर कोई क कि मैंस प्रभु यीशु में विश्वास छै लेकिन दुसरान खिन भलाई नै करनो, त ये भटे कि फैद? क्या इसो विश्वास उको उद्धार कर सकछोई?</verse>
				<verse number="15">अगर कोई विश्वासी भाई-बैनिन का पास कपाड़ा और खाना की जरूरत हो,</verse>
				<verse number="16">और तुमून में भटे कोई उनूथैं क, “ परमेश्वर तुमून आशीष दे, तुम गरम-गरम कपाड़ा पैना, और पेट भर भेरन खा,” लेकिन जो चीज शरीर खिन जरूरी छै उ तुम उनून नी देला, त उ उनेरि बिल्कुल मद्दत नै करूनमर्योछ।</verse>
				<verse number="17">उसीकैं विश्वास ले, अगर भल कामून का दगाड़ नै हो, इसो विश्वास बेकार छै।</verse>
				<verse number="18">अगर कोई आदिमी कुंछो, मैं यीशु मसीह में विश्वास करछूँ, और दुसोरो आदिमी कुंछो की मैं भल काम करछूँ, “त मैं कुछूँ, कि भल काम करीन बिना तैं यो साबित कर कि यीशु मसीह में विश्वास करछै; और मैं अपून भल कामून का द्वारा यो साबित कर सकछूँ कि मैं यीशु मसीह में विश्वास करछूँ।”</verse>
				<verse number="19">तैंस विश्वास छै कि एक्कै परमेश्वर छै; त तैं ठीक करछै; भूत ले विश्वास करनान, और थरथरानान।</verse>
				<verse number="20">लेकिन हे मूर्ख, क्या तैं यो ले नै जाणनै, कि भल कामून का बिना विश्वास बेकार छै?</verse>
				<verse number="21">जब हमार पूर्वज अब्राहम ले अपून च्योलो इसहाक स वेदी में चढ़ाछ, त उले जो भल काम करछ्य उक द्वारा उ परमेश्वरा का सामुनि धर्मी ठैहराई ग्योछ।</verse>
				<verse number="22">तैंले दिख है छै कि विश्वास ले उक कामून का दगाड़ मिलभेरन प्रभाव डालछै और उक विश्वास उक भल कामून का जरियाले सिद्ध भ्योछ।</verse>
				<verse number="23">और यो पवित्रशास्त्र को बचनाक अनुसार पुरो भ्योछ, “अब्राहम ले परमेश्वर में विश्वास करछय, और उक विश्वासा का कारण परमेश्वर ले ऊस एक धर्मी आदिमीक रूप में ग्रहण करछ्य,” और उ परमेश्वरो को मित्र कहलाछ।</verse>
				<verse number="24">तुमले देख हालछै कि आदिमी केवल विश्वास ले नै बल्कि भल कामून का जरियाले ले धर्मी बनछो।</verse>
				<verse number="25">उसीकैं राहाब वेश्या ले, जब उले भेद लीनवालान अपून घर में रून खिन जाग दीछ, और उनून दुश्मनून भटे बचुन खिन दुसारा बाट भटे भेजछ्य, त क्या उ अपून भल कामून का कारण धर्मी नै बनि?</verse>
				<verse number="26">जसीकैं शरीर आत्मा का बिना मरिना को छै ठीक उसीकैं विश्वास भल कामून का बिना बेकार छै।</verse>
			</chapter>
			<chapter number="3">
				<verse number="1">हे म्यारा प्यारा दगड़ियो, तुमूनमें भटे भौत विश्वासीन की मण्डली में गुरू नै बनून चैछो, क्याखिनकि तुम जाणछा कि परमेश्वरा का बचनून सिखून वालान को न्याय भौत सख्ती ले करि जालो।</verse>
				<verse number="2">हम भौत बार गलती कर जानू। लेकिन जो अपून बोलून में गलती नै करूनो, उई त सिद्ध आदिमी छै; और उ अपूनास पुर तरीका ले काबू कर सकछो।</verse>
				<verse number="3">जब हम अपून बश में करून खिन घोड़ाक मुँख में लगाम लगूनू, त हम उक पुरो शरीर स ले घुमा सकनू।</verse>
				<verse number="4">देखा, समुद्री जहाज ले, हालाकि उन भौत ठूला हुनान, और तेज हवा ले चलाई जानान, तब ले एक नानि पतवारक जरियाले नाव चलूनवाला का इच्छाक अनुसार घुमाई जानान।</verse>
				<verse number="5">उसीकैं जिबोड़ो ले शरीरो को एक नानू हिस्सा छै और ठूली-ठूली डीग मारछो। देखा कसीकैं, एक नानि आगा की चिनगारी भौत ठूला जंगल स जला दीछी।</verse>
				<verse number="6">जिबोड़ो ले एक आगा का नियाती छै; जिबोड़ो हमोरो शरीरो को हिस्सा छै जो एक आदिमीक शरीर में कलंक लगूछी, और हमरि पुरी जीन्दगी स नाश करून वाली आग में बदल जाछी, और खुद नरक की आग में जलनै रूछी।</verse>
				<verse number="7">हरेक जातिक वन पशु-पक्षी, रेगुन वाला जन्तु, और पानि में रून वाला जन्तु आदिमीक बश में हो सकनान और हो ले ग्यान।</verse>
				<verse number="8">लेकिन जिबाड़ा स आदिमीन में भटे कोई ले बश में नै राँख सकनो; उ एक इसी बला छै; उ एक जहरीला स्यापा का जहरा का नियाती प्राण लीन वालो हुछो।</verse>
				<verse number="9">योई जिबाड़ा ले हम प्रभु पिता परमेश्वर की महिमा करनू, और येले जो परमेश्वरा का समानता में बनाई ग्यान उनून श्राप दीनू।</verse>
				<verse number="10">एक्कै मुँख ले स्तुति और श्राप द्वीवै निकलनान। हे म्यारा प्यारा दगड़ियो, इसो नै हुन चैनो।</verse>
				<verse number="11">क्याखिनकि एक्कै कुआँ भटे मिठो और नमकीन पानि द्वीवै एक दगाड़ कभै नै निकल सकनो?</verse>
				<verse number="12">हे म्यारा प्यारा दगड़ियो, क्या तिमूला का रूख में जैतून लागनानी, या अंगूरा का ब्याला में तिमूलो लाग सकनानी? उसीकैं नमकीन कुआँ भटे मिठो पानि नै निकल सकनो।</verse>
				<verse number="13">तुम लोगून में जो बुद्धिमान और समझदार हुना को दावा करछो, उ अपून भल कामून और निको चाल-चलनाक जरिया, और उ नम्रताक दगाड़ जो तुमार ज्ञान भटे उछी, भल काम करभेरन साबित करून चैछो।</verse>
				<verse number="14">अगर तुम अपून-अपून मन में भौत नफरत और स्वार्थ राखछा, त अपून ज्ञान में घमण्ड करभेरन सच्चाईक खिलाफ पाप जन करा।</verse>
				<verse number="15">यो ज्ञान उ नाहातिन, जो परमेश्वर भटे मिलीना को छै बल्कि संसारिक, और आदिमीन को, और शैतानी छै।</verse>
				<verse number="16">येक कारण कि जाँ नफरत और स्वार्थ हुछो, वाँ झगाड़ा और हरेक प्रकाराक बुर काम हुनान।</verse>
				<verse number="17">लेकिन जो ज्ञान परमेश्वर भटे मिलछो, उ पैलि त पवित्र हुछो, फिर मिलनसार, कोमल, निको बिचार वालो, दयालु और निका कामून ले भरिना को और बिना पक्षपात और बिना कपट ले हुछो।</verse>
				<verse number="18">और जो लोग मेल-मिलाप करूनवाला छन, उन शान्तिको बी बोला और धार्मिकता की फसल काटाला।</verse>
			</chapter>
			<chapter number="4">
				<verse number="1">तुमून में हुन वाला लड़ाई और झगाड़ा काँ भटे उनान? यो उन बुरी इच्छान ले उनान जो तुमार भितर लड़नान।</verse>
				<verse number="2">तुम इच्छा राखछा, लेकिन तुमून मिलूनो नै; येक कारण तुम खून करून खिन तैयार रूछा, और दुसरान की चीजून को लालच करछा, लेकिन इसो करना ले तुमून के नै मिलूनो; येक कारण तुम लड़छा और झगड़छा। तुमून येक कारण नै मिलूनो, कि तुम परमेश्वर थैं नै माँगना।</verse>
				<verse number="3">फिरले तुमून नै मिलूनो, क्याखिनकि तुम बुरी इच्छा ले माँगछा, ताकि तुम ऊस अपून शोक स पुरो करून खिन उड़ा दीछा।</verse>
				<verse number="4">हे विश्वासघाती लोगो, क्या तुम नै जाणना, कि संसारे की चीजून भटे मित्रता करून परमेश्वर भटे बैर करून छै? येक कारण जो कोई संसारो को मित्र हुन चाछो, उ अपून परमेश्वरो को बैरी बनछो।</verse>
				<verse number="5">तुम कि समझछा, कि पवित्रशास्त्र में जो लिखीना को छै उ बेकार छै? कि “जेले पवित्र आत्म स हमार भितर दीछ, उ परमेश्वर चाछो कि हम केवल उकी अराधना करा।”</verse>
				<verse number="6">लेकिन परमेश्वर हमून बुरी इच्छानक खिलाफ लड़ून खिन और ज्यादा अनुग्रह दीछो; येक कारण पवित्रशास्त्र में लिखीना को छै, “परमेश्वर घमंडीन भटे विरोध करछो, लेकिन दीन लोगून में दया करछो।”</verse>
				<verse number="7">येक कारण परमेश्वरा का अधीन हो जा; और शैतानो को सामना करा, तो उ तुमार पास भटे भाग जालो।</verse>
				<verse number="8">परमेश्वरा का नजिक आ, त उले तुमारा नजिक आलो। हे पापियों, अपून जीवन स पापून भटे दूर राँखा। और ये दुगला लोगो अपून दिल पवित्र करा।</verse>
				<verse number="9">अपून पापून का कारण दुखी हो, और शोक करा, और रोआ, तुमेरि हसी शोक में और तुमोरो आनन्द उदासी में बदल जौ।</verse>
				<verse number="10">प्रभुक सामुनि दीन बना, त उ तुमोरो आदर करोलो।</verse>
				<verse number="11">हे प्रेमा दगड़ियो, एक दुसरा की बदनामी जन करा। और जो अपून भाई बदनामी करछो, और उमें दोष लगूछो। अगर तैं नियम-कानून की निन्दा करछै, त तैं नियम-कानून को पालन नै करनै, बल्कि तैं उमें दोष लगूछै जसकैं तैं नियम-कानून को न्याय करून वालो ठैहराछ।</verse>
				<verse number="12">नियम-कानूनक दिनवालो और न्याय करून वालो त सिर्फ परमेश्वरै छै, जैमें बचूना की और नाश करून में सामर्थ्यी छै। लेकिन तैं को छै, जो अपून पड़ोसी में दोष लगूछै?</verse>
				<verse number="13">तुम जो यो कुँछा, “आज या भोल हम कोई और नगर में जाभेरन वाँ एक साल बितुला और ब्यापार करभेरन फैदा उठुला।”</verse>
				<verse number="14">लेकिन तुम यो नै जाणना की भोल की होलो। सुण त ली, तुमोरो जीवन छै कि? तुम त माना भापाका नियाती छा, जो थ्वाड़ा देर दिखाई दीछी फिर गायब हो जाछी।</verse>
				<verse number="15">येक कारण तुमून यो करून चैछो, “अगर प्रभु चाछो त हम ज्यून रूला, और यो या उ काम ले करला।”</verse>
				<verse number="16">लेकिन तुम अपूनी बनाईना की योजना में घमण्ड करछा। इसो सब घमण्ड बुरो हुछो।</verse>
				<verse number="17">येक कारण जो कोई भलाई करून जाणछो और नै करूनो, उखिन यो पाप छै।</verse>
			</chapter>
			<chapter number="5">
				<verse number="1">हे धनवान लोगों सुणा। तुम अपून उनवाली मुसीबतून में चिल्ला-चिल्लाभेरन रौ।</verse>
				<verse number="2">तुमोरो धन नाश हो ग्यो और तुमारा कपड़ान कीड़ा खराब कर द्याला।</verse>
				<verse number="3">तुमोरो सुन-चाँदी में जंग लाग ग्योछ; और उनोरो जंग तुमारा खिलाफ में गवाही द्योलो, और यो तुमारा शरीर स आगा की नियाती जाला द्योलो। तुमारा द्वारा जाम करिना को धन न्यायक दिन तुमारा खिलाफ सबूत बनभेरन ठाड़ होलो।</verse>
				<verse number="4">देखा, जिन मजदूरून ले तुमारा गाड़ान में फसल काटछ्य, उनेरि मजूरी जो तुमूनले ध्वाका ले राँख लीछ; उ मजूरी चिल्लाभेरन तुमारा खिलाफ गवाही दीन मरेछ, और गाड़ान में काम करून वालान को रूनो और दुहाई सर्वशाक्तिमान का परमेश्वरे ले सुण हैछ।</verse>
				<verse number="5">तुमून संसार में अपूनो शौक पुरो करून में लाग रौ, और तुमूले भौते सुख पाछ; और तुम सिर्फ अपूनो शौक पुरो करून खिन जीन मरेछा, तुमूले अपून आपस परमेश्वरा का द्वारा करि जानो वालो न्याय खिन तैयार कर लीछ।</verse>
				<verse number="6">तुमूनले धर्मीस दोषी ठैराभेरन मार डालछ्य; और उ तुमोरो सामना नै करूनो।</verse>
				<verse number="7">येक कारण हे म्यारा प्यारा दगड़ियो, प्रभुक दुबारा उन तक धीरज राँखा, तुम जाणा कि किसान धरती की कीमती फसल की उमीद राँख भेरन पैलि और आखिरी बरखा हुन तक धीरज राखछो, ताकि फसल बढ़ौ और काटून खिन तैयार हो।</verse>
				<verse number="8">उसीकैं तुमले धीरज राँखा, और उमीद जन छोड़ा, क्याखिनकि प्रभुको दुबारा उन नजिक छै।</verse>
				<verse number="9">हे म्यारा प्यारा दगड़ियो, एक दुसरा में दोष जन लगा, ताकि तुम दोषी नै ठैरा, देखा, न्याय करून वालो उन खिन तैयार छै।</verse>
				<verse number="10">हे म्यारा प्यारा दगड़ियो, जिन परमेश्वरो को संदेश दिनवाला लोगून ले प्रभुक नाम ले बात कर्यान, उनून दुख झेलून और धीरज राँखून, अपून खिन एक उदारण समझा।</verse>
				<verse number="11">देखा, हम धीरज राँखून वालन थैं धन्य कुनू। तुमूले अय्यूब नामाका एक आदिमीक धीरज का बारिमें त सुणिना को छै, और तुम यो ले जाणछा प्रभु आखरी में उकी कसकैं मद्दत करछ्य, जेमें प्रभु की भौत करूणा और दया प्रगट हुछी।</verse>
				<verse number="12">लेकिन हे म्यारा प्यारा दगड़ियो, सबून है ठूली बात यो छै, तुम कसम जन खाया; नै त स्वर्ग कि और नै धरती की और नै कोई और चीजून की, पर तुमेरि बात हाँ कि हाँ और ना की ना हो, ताकि तुम परमेश्वरा का द्वारा दोषी जन ठैहरा।</verse>
				<verse number="13">अगर तुमून में कोई दुखी हो तो उ प्रार्थना करो; और अगर कोई खुश हो? त उ स्तुतिक भजन गा।</verse>
				<verse number="14">अगर तुमूनमें भटे कोई बिमार हो? त विश्वासीन की मण्डलीक बुज़ुर्गून बुलून, और उन प्रभुक नाम ले उमें तेल लगाभेरन उ खिन प्रार्थना करून।</verse>
				<verse number="15">और विश्वासीन की प्रार्थनाक द्वारा रोगी बच जालो, और प्रभु ऊस चंगो करोलो; अगर उले पाप करिना को होला, त परमेश्वर ऊस माफ करोलो।</verse>
				<verse number="16">येक कारण तुम आपस में एक दुसराक सामुनि अपून-अपून पापून मानी ली; और एक दुसारा खिन प्रार्थना करा, जेले तुम चंगा हो जा; धर्मी जन की प्रार्थनाक प्रभाव ले भौत कुछ हो सकछो।</verse>
				<verse number="17">परमेश्वरो को संदेश दिनवाला एलिय्याह ले हमार नियाती दुख-सुख भोगून वालो आदिमी छ्यो; उले अपून पुर मन ले प्रार्थना करछ्य, कि बरखा जन हो; और साढ़े तीन साल तक धरती में बरखा नै भै।</verse>
				<verse number="18">फिर उले प्रार्थना करछ्य की, त आकाश भटे बरखा भैछ, और धरती में पैदावारा भैछ।</verse>
				<verse number="19">हे म्यारा प्यारा दगड़ियो, अगर तुमून में भटे कोई सच्चाईक बाट भटे भटक जाछो, और कोई ऊस सच्चाईक बाट में फिर वापस लियूछो।</verse>
				<verse number="20">त तुमून यो पत्तो हुन चैछो, कि जो कोई भटकिना का पापी स सच्चाईक बाट में फिर वापस लियूछो, त उ एक आत्मा स नरक की मौत भटे बचूछो, और परमेश्वर उक भौत पापून माफ करोलो।</verse>
			</chapter>
		</book>
		<book number="60">
			<chapter number="1">
				<verse number="1">मैं, पतरस, जो यीशु मसीह को प्रेरित छूँ। मैं यो चिठ्ठी परमेश्वरा का चुनिना का उन लोगून खिन लिखून मरयू जो कि पुन्तुस, गलातिया, कप्पदूकिया, आसिया और बितूनिया प्रदेशून का अलग-अलग शैहरून में परदेशीन की नियाती रूनान।</verse>
				<verse number="2">पिता परमेश्वरेले भौत पैलि तुमून अपून लोग हुन खिन और पवित्र आत्मा का द्वारा तुमून पवित्र करून खिन चुन लीछ। उले इसो येक कारण करछ्य ताकि तुम यीशु मसीह का हुकुमून माना और उक खून का द्वारा शुद्ध हो। मैं प्रार्थना करछूँ कि परमेश्वर तुमून अनुग्रह और शान्ति दीनै रौ।</verse>
				<verse number="3">हम परमेश्वरो को धन्यावाद करनू, जो हमार प्रभु यीशु को पिता छै, जैले अपूनी बड़ी दया ले हमून एक नय्या जीवन दीछ। किलैकी परमेश्वरेले यीशु मसीह स मरिनान में भटे ज्यून करछ्य, उले हमून निडर होभेरन जीना का काबिल बनाछ; यो कि उन चीजून पाना की पुरी उम्मीद कर सकनू जो उले हमून दीना को वादा करिना को छै।</verse>
				<verse number="4">हम उन निकी चीजून पाना को इन्तजार करनू जो परमेश्वरेले हमून खिन बनाईना का छन। कोई ले कभै उन चीजून को नाश नै कर सकनो। थ्वाड़ा ले उनून खराब नै कर सकनो। उ कभै ले पुरानी या उकी खुबशुरती में कमि नी होलि। परमेश्वरेले उन चीजून स्वर्ग में तुमून खिन राखिना को छै।</verse>
				<verse number="5">परमेश्वरै अपूनी सामर्थ का द्वारा तुमून सुरक्षित राखून मर्योछ किलैकी तुम यीशु में विश्वास करछा। उ आखरी दिन जब मसीह वापस आलो, तुमून हर दिन सुरक्षित राखोलो। तब तुम जाण जाला कि परमेश्वरेले तुमून पाप और मौत भटे पुरी तरीका ले बचाछ।</verse>
				<verse number="6">तुमून इन सब चीजून का बारिमें खुश हुन चैछो, बेशक तुम एल थ्वाड़ा बखत खिन अलग-अलग प्रकार की परेशानीन का कारण तुम दुखी छा।</verse>
				<verse number="7">इन परेशानीन को मक्शद यो दिखूनो छै कि क्या तुम सच्ची में परमेश्वर में भरोसा करछा। यीशु मसीह में तुमोरो विश्वास सुनो है ज्यादा कीमती छै। जसीकैं नाश हुन वाला सुना स आग में परखी जाछो और शुद्ध करि जाछो, उसिकैं अगर तुमोरो विश्वास परीक्षान का द्वारा परखी जाना का बाद ले मजबूत रूछो, त यो उ दिन तुमून भौत बड़ाई और महिमा और सम्मान दिलालो जब यीशु मसीह फिर वापस आलो।</verse>
				<verse number="8">तुमूनले यीशु स कभै नै देखीना को छै, लेकिन फिरले तुम ऊस प्रेम करछा। तुम ऊस एल नै देखना, लेकिन तुम उमें विश्वास करछा। येक कारण, तुम आनन्द और महिमा ले भौत खुश छा जैस शब्दून में नै बताई जा सकूनो।</verse>
				<verse number="9">तुम खुश छा। किलैकी परमेश्वर तुमून पाप की सजा है बचुन मर्योछ। यो यीशु मसीह में तुमोरो विश्वास को प्रतिफल छै।</verse>
				<verse number="10">यो उद्धार कुछ इसो छ्यो जैका बारिमें परमेश्वरो को संदेश दिनवाला लोग और ले ज्यादा जाणून चाँछ्या। उनूनले बताछ कि कसीकैं परमेश्वर तुमून बचुन खिन तुमार प्रति दयालु तरीका ले काम करोलो जैखिन तुम योग्य नाहातिन। उनूनले जबाब खोजून खिन भौत सावधानी ले जाँच करछ्य।</verse>
				<verse number="11">मसीह को आत्मा उनूनमें छ्यो और उनून बतून मरैछ्यो कि मसीह कसीकैं दुख उठालो और फिर ऊस भौत ठूलो सम्मान दीई जालो। येक कारण उनूनले यो पतो लगूना की कोशिश करछ्य कि मसीह को होलो और यो सब कब होलो।</verse>
				<verse number="12">लेकिन परमेश्वरेले इन संदेश दीन वाला लोगून बताछ कि उनार संदेश खुद अपून खिन नै बल्कि तुमून खिन छ्या। उ संदेश यीशु मसीह का बारिमें सुसमाचार छै जो तुमूनले अब सुणछ्य। परमेश्वरेले स्वर्ग भटे अपूनो पवित्र आत्मा भेजछ्य कि तुमून सुसमाचार प्रचार करून में लोगून की मद्दत करौ। यो सब इतुक अद्धभुत छै कि याँ तक कि स्वर्गदूत ले उत्सुकता ले इन बातुन हुन देखून मर्यान।</verse>
				<verse number="13">येक कारण, अपून मनून तैयार करा जसीकैं लोग काम करून खिन तैयार हुन खिन अपूनी कमर कसनान। मतलब यो कि, जो कुछ तुम सोचछा उमें तुमून काबू राखून चैछो, और इसो करभेरन अपून जीवन को संचालन पुरी तरीका ले और आत्मविश्वास का दगाड़ करा, उ उद्धार स पाना की आश राखभेरन जो परमेश्वर अनुग्रह ले तुमून देलो जब यीशु मसीह स्वर्ग भटे वापस आलो।</verse>
				<verse number="14">परमेश्वरा का हुकुमून को पालन करा जसीकैं निका नान्तिना अपून बबा का हुकुमून माननान। उन बुरा कामून जन करा जिनून तुम तब करना की इच्छा राखछ्या, जब तुम परमेश्वरा का सत्य स नी जाण छ्या।</verse>
				<verse number="15">लेकिन अब तुमून हर काम में जो तुम करछा पवित्र हुन चछो, जसीकैं कि परमेश्वर पवित्र छै जैले तुमून अपून बच्चा हुन खिन चुन लीछ।</verse>
				<verse number="16">किलैकी पवित्रशास्त्र में परमेश्वरेले कईना को छै, कि “तुमून पवित्र हुन चैछो किलैकी मैं पवित्र छूँ।”</verse>
				<verse number="17">परमेश्वर जाणछो कि हरेक आदिमी ले कि-कि करिना को छै, और उ हरेको को न्याय बिना कोई पक्षपात को करछो। जब तुम परमेश्वर थैं प्रार्थना करछा त उथैं पिता कुँछा। त येक कारण, जब की तुम धरती में परदेशी होभेरन रूछा त उको हमेशा आदर करा।</verse>
				<verse number="18">तुम जाणछा कि परमेश्वरेले तुमून तुमार बेकार का ब्यवहार भटे छुड़ून खिन को चीज को प्रयोग करछ्य, जो तुमूले अपून पूर्वजून भटे सिखीना का छ्या। उले तुमून छुड़ून खिन इसो धन को प्रयोग नै कर्यो जैस सुनो या चाँदी की नियाती नाश करि जा सकछो। लेकिन परमेश्वरेले मसीह का कीमती खून का द्वारा तुमून बचाछ, जो एक शुद्ध और सिद्ध मेम्ना की नियाती छ्यो।</verse>
				<verse number="19"></verse>
				<verse number="20">यो संसारे स बनून है पैलि, परमेश्वरेले पैलि है यो तय करिनाको छ्यो कि यीशु मसीह यो संसारो को मुक्तिदाता होलो। लेकिन उ तुमेरि मद्दत करून खिन इन अंतिम दिनून में यो संसार में आछ।</verse>
				<verse number="21">जो केले मसीह ले करिना को छै उक कारण तुम अब परमेश्वर में विश्वास करछा। और तुमूले अपूनो विश्वास और आश परमेश्वर में राखिना की छै किलैकी उले मसीह स मरिनान में भटे ज्यूनो कर दीछ और ऊस महिमा दीछ।</verse>
				<verse number="22">किलैकी सच्चाई स मानना का द्वारा तुम शुद्ध करि गैछा अब तुमून अपून दगड़िया विश्वासी भाईन का दगाड़ प्रेम करूनो चैछो। येक कारण एक-दूसार स पुर मन ले प्रेम करून जारी राखा।</verse>
				<verse number="23">तुमून एक-दुसरा स प्रेम करूनो चैछो किलैकी तुमून परमेश्वरा का तरफ भटे एक नय्या जीवन मिलीना को छै। तुमून यो जीवन कोई इसा चीज का द्वारा नै मिल र्यो, जो नाश हो जालो लेकिन उ चीज का द्वारा जो हमेशा बनिना की रौली। मतलब, हमून यो नय्या जीवन परमेश्वरा का जीवित और अनन्त वचन ले मिलीना को छै।</verse>
				<verse number="24">पवित्रशास्त्र यो कुंछो, “सब लोग घास का नियाती छन और उनेरि सब खुबशुरती जंगली फुलून की नियाती छन। घास सुख जालो और फूल भिमें झड़ जाला।</verse>
				<verse number="25">लेकिन परमेश्वरो को बचन हमेशा बनिना को रोलो।” यो बचन मसीह का बारिमें सुसमाचार छै जो तुमार बीच में प्रचार करि ग्छ्यो।</verse>
			</chapter>
			<chapter number="2">
				<verse number="1">येक कारण, हर प्रकारा का बुरा ब्यवहार भटे छुटकारा पा। दुसरान ध्वाका जन दी, कपटी जन बना। दुसरान है जलन जन राखा। दुसरा लोगून का खिलाफ बुरी बात जन करा।</verse>
				<verse number="2">जसकैं एक नान-नन्तिनो अपूनो ईजा को शुद्ध दूध की इच्छा करछो, उसीकैं तुमून परमेश्वरा का बचन स सीखना की इच्छा राखून चैछो ताकि तुम आत्मिक रूप ले मजबूत बन सका। तब परमेश्वर तुमून यो संसारै की बुरी चीजून है पुरी तरीका ले बचालो।</verse>
				<verse number="3">किलैकी जसो कि पवित्रशास्त्र कुंछो, “तुमूले यो महसूस करिना को छै कि प्रभु भलो छै।”</verse>
				<verse number="4">तुम प्रभु यीशु का पास आईना का छा। उ एक घरा का नींव में राखिना को एक खास ढूंगा की नियाती छै, लेकिन उ ज्यूनो ढूंगो छै। ऊस कई लोगून ले स्वीकार नै कर्यो, लेकिन परमेश्वरेले ऊस चुनछ्य और ऊस भौत कीमती मानछ्य। और जसीकैं लोग ढूंगान ले घर बनुनान, उसीकैं परमेश्वर तुमून एक समूह में जोड़ून मर्योछ जैमें परमेश्वरो को आत्मा रूछो, ताकि यीशु मसीह ले जो हमून खिन करिना को छै, उक वजह ले तुम उन याजकून का नियाती जो बलिदान चढ़ूनान, तुम इसा काम करा जो परमेश्वरेस खुश करनान।</verse>
				<verse number="5"></verse>
				<verse number="6">यो ऊसोई छै जसो परमेश्वरेले पवित्रशास्त्र में कईना को छै, “देखा! मैंले एक कीमती ढूंगास चुन हैछ, जो यरूशलम शैहर में घर स मजबूत बनून खिन इस्तमाल करि जाछो। और जो कोई ले उमें भरोस करछो, उ लज्जित नी होलो।”</verse>
				<verse number="7">यो ढूंगो तुमून खिन भौत कीमती छै जो यीशु मसीह में विश्वास करनान। लेकिन जो लोग उमें विश्वास नै करना उनार बारिमें पवित्रशास्त्र कुंछो कि, “राजमिस्त्रिन ले जै ढूंगास बेकार समझभेरन निकालीना को छ्यो, उ घरो को नींव को खास ढूंगो बन ग्योछ।”</verse>
				<verse number="8">और फिर पवित्रशास्त्र यो ले कुंछो: “यो ढूंगो लोगून को ठोकर खाना को कारण होलो। यो एक चट्टान छै जो उनार खीतिना को कारण होलो। उन इसीकैं खितीला किलैकी उन परमेश्वरा का संदेश स मानून है इन्कार करनान। किलैकी परमेश्वरेले उनार दगाड़ इसोई हुना की योजना बनाईना की छै।”</verse>
				<verse number="9">लेकिन तुम इसा नाहातिन किलैकी तुम परमेश्वरा का चुनिना का लोग छा तुम परमेश्वरा का याजक छा, जो राजा छै, तुम परमेश्वर की सेवा करून खिन समर्पित छा और तुम परमेश्वरा का खास लोग छा। किलैकी उले तुमून अन्यार में भटे भ्यार अपून अद्धभुत उज्याल में बुलाईना का छा, ताकि तुम परमेश्वरा का अद्धभुत कामून का बारिमें बता सका।</verse>
				<verse number="10">(परमेश्वरा का संदेश दिनवाला होशे ले जो लिखीना को छै तुमारा बारिमें सच्ची छै) “पैलि तुम परमेश्वरा का लोग नी छ्या, लेकिन अब तुम परमेश्वरा का लोग छा। पैलि तुम परमेश्वरै की दया स नी जाण छ्या, लेकिन अब तुम उ जाणछा किलैकी उले अपूनी दया पैलि भटे तुमून में दिखाईना की छै।”</verse>
				<verse number="11">हे म्यारा विश्वासी भाईयो, तुम यो संसार में परदेशीन और मुसाफिरून की नियाती छा। मैं तुमूनथैं बिनती करछूँ कि उन सबै संसारै की बुरी इच्छान भटे बचा, किलैकी उ खुद तुमार बिरोध में हमेशा लड़नै रूछी।</verse>
				<verse number="12">कई बार इसा लोग हुनान जो प्रभु स नै जाणना और उन तुमून में यो कैभेरन गलत आरोप लगा सकनान कि तुमार काम बुरा छन। येक कारण तुमून अपून ब्यवहारा का बारिमें सतर्क रून चैछो, ताकि उन तुमार निका ब्यवहार देख सकून। आखरी में उन मानाला कि तुमोरो ब्यवहार निको छै और जै दिना परमेश्वर संसारो को न्याय करून खिन आलो, उ दिना उन परमेश्वरे की महिमा कराला।</verse>
				<verse number="13">प्रभु यीशु को आदर करून खिन तुमून उन सबून को हुकुम मानून चैछो जो यो संसार में अधिकारी छन: मतलब राजा, जो कि सबून है ठूलो अधिकारी छै।</verse>
				<verse number="14">और राज्यपालून को, जिनून राजा का द्वारा नियुक्त करि जाछो। उनून उन लोगून दण्ड दीन खिन भेजिनान जो गलत करनान और उन लोगून की तारीफ करून खिन जो सही करनान।</verse>
				<verse number="15">किलैकी परमेश्वरै की यो इच्छा छै, कि हमार निका ब्यवहार क द्वारा, जो लोग परमेश्वरेस नै जाणना, उन अब हमून में गलत तरीका ले आरोप लगूना की हिम्मत नी कराला, किलैकी यो बात साफ छै कि उनार झूठ्ठा आरोप सही नाहातिन।</verse>
				<verse number="16">तुमून खिन कोई ले इसो आदिमी नाहातिन जो तुमून उ करून है रोक सकछो जो तुम करून चाँछा। किलैकी तुम पैलि भटे हमारा प्रभु यीशु मसीह का द्वारा आजाद करि जा चुक गैछा। लेकिन येस बुरा काम करना को बहाना जन बना। बल्कि तुमून अपून कामून का द्वारा दिखूनो चैछो कि तुम सच्ची में परमेश्वरा का सेवक छा।</verse>
				<verse number="17">सबून को आदर करा, अपून सबै विश्वासी भाईन थैं प्रेम राखा, परमेश्वर भटे डरा, और ठूला अधिकारीन को आदर करा।</verse>
				<verse number="18">हे सेवकों, तुम जो घरून में काम करछा और विश्वासी छा, तुमून अपून मालिक को हुकुम मानून चैछो और हमेशा उनोरो आदर करूनो चैछो। इसो हर तरीका का मलिका का दगाड़ करा, चाहे उ दयालु और सही हो या बेरहम हो।</verse>
				<verse number="19">किलैकी अगर हम दुख सहनू चाहे हमरि कोई गलती नै हो, लेकिन हम सिर्फ येक कारण सहन करनू किलैकी हम जाणनू कि परमेश्वर सब कुछ जाणछो, त परमेश्वर हमून है खुश हुछो।</verse>
				<verse number="20">अगर तुमून गलत करून खिन पीटी जाछो, तो दण्ड मिलून में धैर्य राखून में तुमेरि प्रशंसा करना की कोई कारण नाहातिन। लेकिन अगर भलाई करना का कारण तुम दुख सहछा और धैर्य राखछा, तो परमेश्वर खुश हुछो।</verse>
				<verse number="21">परमेश्वरा का द्वारा तुमून चुनी जाना को यो कारण छै कि उखिन भल काम करभेरन दुखून सहन करा। किलैकी मसीह ले तुमून खिन दुख सहन करिना का छन, उ तुमून खिन एक उदारण छै। येक कारण तुमले ऊसोई काम करा जसो मसीह ले कर्यान।</verse>
				<verse number="22">पवित्रशास्त्र कुंछो, “उले कभै पाप नै कर्यो। उले कभै कोई झूठ नै बोल्यो।”</verse>
				<verse number="23">जब लोगून ले यीशु को अपमान करछ्य, त उले उनोरो अपमान नै कर्यो। जब लोगून ले ऊस दुख दीछ, त उले कभै ले उले बदला लीना की कोशिश नै करि। बल्कि, उले अपूनी मद्दत खिन परमेश्वर में भरोस करछ्य। उ जाणछ्यो कि परमेश्वर हमेशा लोगून को धार्मिकता ले न्याय करछो।</verse>
				<verse number="24">जब मसीह मरछ्य, त उले हमार पापून अपून मलिमें लीभेरन अपूनास सूली में बलिदान कर दीछ। उले इसो येक कारण करछ्य ताकि हम पाप करून छोड़ द्या और सही तरीका ले जीवन जीनो शुरू करा, और उन घौन का कारण जो उले सहन कर्यान, हम चंगा हो ग्या।</verse>
				<verse number="25">यैहै पैलि, तुम उन भेड़ून की नियाती छ्या जो गलत बाटा में जान मरैछ्या। लेकिन अब तुम मसीह का पास वापस आ गैछा जो तुमेरि देख-भाल करछो और तुमून में नजर राखछो।</verse>
			</chapter>
			<chapter number="3">
				<verse number="1">हे घरवालीयो, तुम ले अपून-अपून घरवालान का अधीन रौ। ताकि अगर उमें भटे कोई ले परमेश्वरा का बचन में विश्वास करून है इन्कार करछो और जसा तरीका ले तुम ब्यवहार करछा, तुमून उनून यो बतूना की जरूरत नी होलि कि उनून विश्वास करूनो चैछो। जब उन तुमार शुद्ध और ईश्वरीय ब्यवहार स देखाला त उन मसीह में विश्वास कराला।</verse>
				<verse number="2"></verse>
				<verse number="3">और अपूनास खुबशुरत बनूना की कोशिश जन करा, जसीकैं कि बालून की अलग-अलग तरीका ले सजावट करूनो, और सोना का मैंहगा-मैंहगा जैवर पैनून, या मैंहगा-मैंहगा कपाड़ा पैनून।</verse>
				<verse number="4">तुमून अपनास इसा ब्यवहार ले सुन्दर बनूनो चैछो जो बदलनो नै, मतलब एक विनम्र और शांत स्‍वभाव, जो कि परमेश्वर खिन भौत अनमोल छै।</verse>
				<verse number="5">पुरान जमाना समय की भक्ति में रूनवाली स्यैनिन जो परमेश्वर में भरोसा करछी, उनूनले अपनास अपून घरवालान का अधीन करछ्य, और इस तरीका ले उन अपनास सुन्दर बनूछ्या।</verse>
				<verse number="6">सारा को उदारण ली, जो अपून घरवाला अब्राहम को हुकुम मानछी, और ऊस स्‍वामी कैभेरन बुलूछी। मतलब यो कि, अगर तुम दुसरान का दगाड़ भलाई करछा, और कोई ले प्रकारा का डरले जन डरा, त तुमले सारा की चेलिन होला।</verse>
				<verse number="7">उसीकैं हे घरवालो, तुम अपूनी घरवालीन का दगाड़ मेल-मिलाप ले रौ, और उनार मद्दत करना का बारिमें बिचार करा, तुमून याद राखून चैछो कि उन तुमून है कमजोर छन, येक कारण तुमून उनोरो आदर करून चैछो। किलैकी तुम द्वीवै उ बरदान स साझा करछा जो परमेश्वरा का अनुग्रह ले तुमून दीईना को छै, मतलब अनन्त जीवन को बरदान। इसो करा ताकि जब तुम परमेश्वर थैं प्रार्थना करा त उ तुमेरि सुणो।</verse>
				<verse number="8">आखिर में, मैं तुमूनथैं यो कुंन चाछूँ, कि तुम सबून को एक मन हुन चैछो, और एक-दुसारा में दया करा, और एक-दुसारा खिन प्रेम राखा, भलाई करा और नम्र बना।</verse>
				<verse number="9">बुराईक बदला बुराई जन करा और नै गाली का बदला गाली दी; लेकिन येका बदला आशीष दी। किलैकी परमेश्वरेले तुमून येक कारण बुला रैछ ताकि तुम दुसरान आशीष दी सका। अगर तुम इसो करछा त परमेश्वर ले तुमून आशीष द्योलो।</verse>
				<verse number="10">किलैकी पवित्रशास्त्र कुंछो, “अगर कोई आदिमी अपून जीवन में आनन्द लीनो चाछो और निका दिन देखून चाछो त ऊस सतर्क रून चैछो कि उ बुरी बातुन जन करौ। और ऊस इसी बातुन करून बन्द कर दीनो चैछो जो सच्ची नाहातिन।</verse>
				<verse number="11">ऊस जरूर उ बुराई करून छोड़ दीन चैछी। येका बजाय, ऊस भलाई करून चैछी। और दुसरान का दगाड़ शान्ति ले रून खिन कोशिश करून चैछी।</verse>
				<verse number="12">किलैकी प्रभु की नजर उन लोगून में रूछी जो लोग धर्मी छन। और उ हमेशा उनेरि प्रार्थनान सुणभेरन उनोरो जबाब दीन खिन तैयार रूछो। लेकिन परमेश्वर उन लोगून का खिलाफ काम करछो जो लोग बुराई करनान।”</verse>
				<verse number="13">अगर तुम हमेशा भल काम करना की कोशिश करछा, त सच्ची में कोई ले तुमेरि बुराई नै कर सकनो।</verse>
				<verse number="14">लेकिन अगर जो सही छै उ करना का कारण तुम दुख सहछा त परमेश्वर तुमून आशीष द्योलो। ऊसो करा जसो यशायाह ले पवित्रशास्त्र में लिखीना को छै, “उन लोगून है जन डरा, जो तुमून डरूनान और यो बात की चिन्ता जन करा लोग कि कर सकनान।”</verse>
				<verse number="15">बल्कि तुमून मसीह स प्रभु जाणभेरन अपून जीवन में उकी अराधना करूनी चैछी। अगर कोई उ आश का बारिमें के पुछो, जो हम सब विश्वासी हुना का नाता आपस में साझा करनान, त हमेशा ऊस समझून खिन तैयार रौ, और इस तरीका ले ब्यवहार करा कि तुम दोषी महसूस जन करा और हमेशा उई करा जो सही छै। फिर अगर लोग तुमार खिलाफ बुरा बोलनान, त उनी शर्मिदा होला जब उन मसीह का दगाड़ तुमार सम्बंध का कारण तुमार निका ब्यवहार स देखाला।</verse>
				<verse number="16"></verse>
				<verse number="17">अगर हम अपून निका कामून का वजह ले दुख पानू त यो निको छै, किलैकी हमून खिन परमेश्वरे की यो इच्छा छै। यो बुरा कामून का कारण दुख पान है हमून खिन कई ज्यादा निको छै।</verse>
				<verse number="18">मैं यो कुछूँ कि मसीहले ले हमार पापून का कारण दुख उठाछ और मर ग्यो। उ सिर्फ एक बार मरछ्य और इसो दुबारा करना की जरूरत नाहातिन। उ एक धर्मी आदिमी छ्यो जो पापी लोगून खिन मर ग्यो ताकि उ हमून परमेश्वरा का पास ल्या सको। उनूनले उक शरीर स त मार डालछ्य लेकिन ऊस पवित्र आत्मा का सामर्थ ले फिर ज्यूनो कर दी ग्योछ।</verse>
				<verse number="19">तब उकी आत्मा ले जाभेरन उन आत्मान सुसमाचार सुणाछ, जो उ जाग में परमेश्वरा का द्वारा कैद करिना का छ्या, जाँ मरिनाका लोगून की आत्मा छन।</verse>
				<verse number="20">यो उन लोगून की आत्मा छ्या जिनून भौत बखत पैलि परमेश्वरा का हुकुमून नि मानिना को छ्यो। जब नूह जहाज स बनून मरैछ्यो, त परमेश्वर भौत धैर्य ले इन्तजार करूनमर्योछ कि देखा क्या उन लोग अपून पापून है पश्चाताप करला। लेकिन जब पानि ले संसारो को विनाश कर दीछ, त जहाज में जानवाला सिर्फ आठ लोग बच गैछ्या।</verse>
				<verse number="21">पुराना जमाना में उनोरो उद्धार अब हमार उद्धार को एक उदारण छै जब हम बपतिस्मा लीनू। जो पानि में हम बपतिस्मा लीनू, उ हमार शरीरो को मैल दूर नै करनो, लेकिन उ यो बात को चिन छै कि हमूले परमेश्वर थैं माफी माँगछै ताकि आघिलकै हमार मन परेशान नै रौ। हमून माफी मिल सकछी किलैकी यीशु मसीह मरिनाका बाद फिर ज्यूनो भ्योछ।</verse>
				<verse number="22">और उ स्वर्ग में न्हैग्यो। अब उ वाँ परमेश्वरा का दैंन तरफ सबून है ऊँचा जाग में छै, और उ सब स्वर्गदूतून और सब अधिकारीन और सब शक्तिन में राज्य करछो।</verse>
			</chapter>
			<chapter number="4">
				<verse number="1">येक कारण जसीकैं मसीह ले अपून शरीर में रैभेरन दुख उठाछ, उसीकैं तुमून ले उई स्वभावा का दगाड़ दुख उठून खिन तैयार रून चैछो जो उक पास छ्यो। किलैकी अगर तुम मसीह खिन दुख उठून खिन तैयार छा त तुमूले पाप नै करना को फैसला कर हालछ्य।</verse>
				<verse number="2">जैको नतीजा यो छै कि उ आदिमी अपून पुर जीवन यो धरती में अपून पापी स्वभाव का अनुसार नी जिलो। लेकिन उ उई करोलो जो परमेश्वर चाछो कि उ करो।</verse>
				<verse number="3">किलैकी पैलि तुमूनले अपूनो बखत गैर-विश्वासी लोगून का दगाड़ बुरा काम करभेरन बर्बाद कर दीछ। जैले लुचपन की बुरी इच्छा, नशा में मतवाला हुनो, रंगरलियाँ, पियक्कड़पन, और मूर्ति पूजा जैले परमेश्वर नफरत करछो।</verse>
				<verse number="4">योई कारण तुमार पुराना दगड़िया हैरान हुनान जब तुम उनार दगाड़ उन बुरा कामून में शामिल नै हुना जो उन करनान। येक कारण उन तुमार बारिमें बुरा बोलनान।</verse>
				<verse number="5">लेकिन एक दिन उन जरूर परमेश्वरा का सामुनि न्याय खिन ठाड़ होला, और परमेश्वर उनूनमें भटे हरेक स उनार द्वारा धरती में करिना का कामून का बारिमें पुछोलो। परमेश्वर ज्यूना और मरिनाका लोगून को न्याय करोलो।</verse>
				<verse number="6">योई कारण छै कि मरिनाका लोगूनले ले मसीह का बारिमें सुसमाचार सुणछ्य। उनार शरीरून ले सब लोगून की नियाती मरून पड़छ्य, लेकिन अब उन आत्मा में हमेशा परमेश्वरा का दगाड़ रूनान।</verse>
				<verse number="7">सब बातुन को अन्त तुरन्त हुनवालो छै; येक कारण अपून-आप में काबू करभेरन और सच्चाई का दगाड़ प्रार्थना में लाग रौ।</verse>
				<verse number="8">सबून है ठूली बात यो छै कि एक-दुसारा से ईमानदारी ले प्रेम करा किलैकी अगर तुम लोगून प्रेम करछा, त तुम हमेशा कोई ले गलत काम स माफ करून खिन तैयार रौला, जो उनूनले कर्यान।</verse>
				<verse number="9">अपून घरून में लोगून को स्वागत करा और इसो करनै रौ।</verse>
				<verse number="10">हरेक आदिमी स परमेश्वरै की तरफ भटे बरदान मिलीना को छै और उनून उ ऊस बरदान को इस्तमाल दुसरान की सेवा करून खिन करून चैंछो अलग-अलग बरदानून को इस्तमाल भौत बड़िया तरीका ले करूनो चैंछो जो परमेश्वरेले उनून अनुग्रह भटे दीईना को छै।</verse>
				<verse number="11">अगर तुमार पास प्रचार करना को बरदान छै, त तुमून परमेश्वरो को बचन को प्रचार करून चैछो। अगर तुमार पास दुसारा लोगून की मद्दत करना को बरदान छै, त यो ऊस सामर्थ का दगाड़ करा जो परमेश्वर तुमून दीछो। त फिर जो केले तुम करछा उ यीशु मसीह का द्वारा परमेश्वरेस महिमा दिलालो। सारी महिमा और सामर्थ हमेशा-हमेशा खिन उकी छै। आमीन।</verse>
				<verse number="12">हे म्यारा विश्वासी भाईयो, जो दर्दनाक दुख तुम सहछा, उनार बारिमें हैरान जन हो, किलैकी तुम मसीह का छा। लेकिन यो बात दिखून खिन हो रैछ कि क्या तुम सच्ची में परमेश्वर में विश्वास करछा। येक कारण, यो जन सोचा कि तुमार दगाड़ कुछ अजीब घटना होर्यान।</verse>
				<verse number="13">बश येक बारिमें खुश रौ, किलैकी तुमून मसीह का दुखून को एक हिस्सा मिलछ्य। यो कारण, जब मसीह सब लोगून खिन अपूनी महिमा प्रकट करून खिन दुबारा आलो त तुम आनन्द ले भर जाला।</verse>
				<verse number="14">अगर मसीह का नामाका कारण तुम लोगून को अपमान करि जाछो, त अपनास धन्‍य समझा; किलैकी परमेश्वरो को महिमामय आत्मा तुमार भितर रूछो।</verse>
				<verse number="15">सतर्क रौ कि तुमून में भटे कोई ले खूनी का नियाती, या चोर का नियाती या बुरा काम करूनवाला का नियाती या दुसारा का कामून में दखल-अन्दाजी करूनवाला आदिमी का नियाती दुख नी भोगाला।</verse>
				<verse number="16">लेकिन अगर कैसे मसीह हुना का नाता ले दुख सहन करून पड़ो, त तुम येस शर्म की बात जन समझा, बल्कि परमेश्वरै की महिमा करा कि तुम येक कारण दुख सहन करून मरेछा किलैकी तुम मसीह का लोग छा।</verse>
				<verse number="17">परमेश्वरो को न्याय शुरू हुना को बखत आग्योछ, जो परमेश्वरा का लोगून भटे शुरू होलो, किलैकी उ पैलि हम विश्वासीन को न्याय करोलो, येक कारण उन भयानक बातुन का बारिमें सोचा जो उन लोगून का दगाड़ होलि जो उ सुसमाचार स नै मानना जो उकी तरफ भटे ऊँछो।</verse>
				<verse number="18">जसो कि पवित्रशास्त्र कुंछो, “अगर एक धर्मी आदिमी को बचाई जानो इतुक कठिन छै, तो दुष्ट और पापी लोगून का दगाड़ कि होलो।”</verse>
				<verse number="19">येक कारण, जो लोग उ दुख स सहन करनान जसी परमेश्वरै की इच्छा हुछी, उनून हमेशा परमेश्वर में भरोस राखून चैछो, जैले उनून बनाछ। परमेश्वर हमेशा उ करछो जैस करना को उले वादा करिना को छ्यो और येक कारण जो भल काम छन उनून हमेशा करनै रौ।</verse>
			</chapter>
			<chapter number="5">
				<verse number="1">कुछ बात इसी छन जो मैं वाँक यहूदी अगुवान थैं कुंन चाछूँ किलैकी मैंले तुमोरो जैसो एक यहूदी अगुवा छूँ। मैंले खुद उन दुखून देखीना को छै जो भौत बखत पैलि मसीह ले सहन कर्यान। त मैंले उकी महिमा में भागीदार हूँलो, जब उ फिर यो संसार में वापस आलो। मैं तुमूनथैं बिनती करछूँ कि,</verse>
				<verse number="2">जसकैं ग्वाला अपूनी भेड़ून की रखवाली करनान, उसीकैं तुमून ले हर विश्वासी की रखवाली करूनी चैछी जिनून परमेश्वरेले तुमेरि देखभाल में राखिना को छै। यो सेवा स अपूनी इच्छा ले करा, किलैकी परमेश्वर योई चाछो कि तुम इसो करा। इसो सिर्फ येक कारण जन करा किलैकी तुमून इसो करून खिन मजबूर करि ग्योछ, और नै यो काम येक कारण करा कि तुम धन कमून चाँछा लेकिन सिर्फ परमेश्वर और लोगून की सेवा करून खिन करा।</verse>
				<verse number="3">जिन लोगून की जिम्मेदारी परमेश्वरेले तुमून दी रैछ, उनूनमें अधिकारीन का नियाती अपूनो अधिकार जन जता, बल्कि उनून खिन एक निको उदारण बना।</verse>
				<verse number="4">जब यीशु मसीह दुबारा वापस आलो, जो कि हमोरो प्रधान ग्वाला का नियाती छै, तब तुमून एक सुन्दर मुकुट दीई जालो जो कभै ले अपूनी चमक नी खोलो।</verse>
				<verse number="5">इसीकैं तुम जवान लोगून पुराना विश्वासीन को हुकुम मानून चैछो। तुम सबून दीन होभेरन एक-दुसरा की सेवा करूनी चैछी। किलैकी पवित्रशास्त्र में लिखीना को छै कि, परमेश्वर घमंडी लोगून को बिरोध करछो लेकिन उ उन लोगून में अनुग्रह करछो जो लोग दीन छन।</verse>
				<verse number="6">येक कारण, अपनास परमेश्वरा का प्रति नम्र करा जो हर बात में सामर्थी छै ताकि उ, उ दिन तुमून एक निका जाग में उठालो जो उले चुन रैछ।</verse>
				<verse number="7">परमेश्वर तुमेरि परवाह करछो और येक कारण अपूनी सारी चिन्ता परमेश्वर में डाल दी।</verse>
				<verse number="8">हमेशा सतर्क रौ और जागनै रौ, किलैकी शैतान, तुमोरो दुश्मन तुमून में हमला करून चाछो ताकि तुम परमेश्वरा का हुकुमून नै माना। उ फाड़ खान वाला बाघका नियाती छै, जो अघिल-पछिल घुमछो और देखनै रूछो कि उ कैस खूँ।</verse>
				<verse number="9">तुमूनले परमेश्वर में पुरी रीतिले विश्वास करून चांछो, और शैतानो को हुकूमो को पालन नै करून चांछो। याद राखा कि विश्वासी भाई-बैनि जो पुर संसार में रून मर्यान, इसा तरीका का दुखून सहन करून मर्यान जसकैं तुम सहन करून मरैयछा।</verse>
				<verse number="10">परमेश्वर जो पुर तरीका ले अनुग्रह ले भरिनाका छन, उले हमून मसीह का दगाड़ हमार रिश्ताका कारण स्वर्ग में उकी अनन्त महिमा में सहभागी हुनखिन हमून बुला रैछ। तुमार थ्वाड़ा बखत खिन दुख सहन करना का बाद, परमेश्वर तुमून मजबूत करोलो, ताकि तुमोरो विश्वास मजबूत हो, और डगमगून वाला नै हो।</verse>
				<verse number="11">उ सम्मान पानो को लायक छै किलैकी उकी सामर्थ को कोई अंत नाहातिन। आमीन।</verse>
				<verse number="12">मैंले यो चिठ्ठी थ्वाड़ा शब्दून में सिलवानुस की मद्दत ले लिखछै और तुमून भे ज छै। मैं ऊस मसीह में एक विश्वासयोग्य भाई का रूप में मानछूँ। मेरो यैसे लिखनाको मक्शद तुमून उत्साहित करून और तुमून विश्वास दिलून छै कि जो कुछ ले तुम महसूस करून मरेछा उ सच्ची में तुमार प्रति परमेश्वरो को अनुग्रह को हिस्सा छै। यो अनुग्रह में मजबूत बनिनाका रौ।</verse>
				<verse number="13">बेबीलोन देशा का विश्वासी तुमून नमस्कार करनै रौ, जिनून परमेश्वर ले चुन छै जसकैं उले तुमून चुन छ्यो। मरकुस, जो मैं खिन एक च्याला का नियाती छै, उले तुमून नमस्कार करछो।</verse>
				<verse number="14">एक-दुसरा का दगाड़ प्रेम ले गाल मिलभेरन नमस्कार करा। मैं प्रार्थना करछूँ कि परमेश्वर हरेक उ आदिमी स शान्ति दे, जो मसीह में छन।</verse>
			</chapter>
		</book>
		<book number="61">
			<chapter number="1">
				<verse number="1">मैं, शमौन पतरस, जो यीशु मसीह को प्रेरित छूँ। मैं यो चिठ्ठी तुम सबून खिन लिखूनमरयूँ जो उ कीमती विश्वास स साझा करछा जो हमून में छै, उ विश्वास जो हमार परमेश्वर और मुक्तिदाता यीशु मसीह का द्वारा हमून दीईना को छै, जो हमून परमेश्वरा का दगाड़ सही ठैहरछो।</verse>
				<verse number="2">मैं प्रार्थना करछूँ कि परमेश्वर में तुमून ज्यादा है ज्यादा अनुग्रह और शान्ति मिलो जसकैं तुम परमेश्वर और हमार प्रभु यीशु का ज्ञान में बढ़छा।</verse>
				<verse number="3">परमेश्वर ले अपून सामर्थ का द्वारा हमून उ सब कुछ दीछ जो हमून एक इसो जीवन जीन खिन चैछो जो परमेश्वरेस खुश करछो। यो हो सकछो किलैकी हम परमेश्वरेस जाणनू और उ उई छै जैले हमून अपूनी महिमा और भलाई का द्वारा अपून लोग हुन खिन बुला रैछ।</verse>
				<verse number="4">और उकी महिमा और भलाई का कारण, उले हमून भौत महान और अनमोल बरदान दीयान, जैको उले वादा करिना को छ्यो, ये इसा वादा छन जो तुमून संसारै की बुरी इच्छान भटे बचुन में ताकतवर बनुनान, इन बुरी इच्छान पुरी करूनवाला उन लोग छन जो मसीह में विश्वास नै करना, और तुम परमेश्वरा का नियाती निका चाल-चलन में भागीदार बन गैछा।</verse>
				<verse number="5">क्याखिनकि तुम परमेश्वरा का स्वभाव में सहभागी हुन खिन छा, येक कारण तुमून केवल मसीह में विश्वास करून चैछो, बल्कि तुमून हमेशा उई करूनो कोशिश करून चैछो जो दुसरान खिन ठीक छै। तुमून नै सिर्फ उई करून चैछो जो ठीक छै पर तुमून इसो हुन चैछो जो जाणनान की कसीकैं समझदारी ले ब्यवहार करूनो चैछो।</verse>
				<verse number="6">तुमून केवल योई नै जाणून चैनो कि कसीकैं दुसरान का दगाड़ समझदारी ले ब्यवहार करून छै, तुमून सिर्फ अपून में काबू नै राखून चैछो बल्कि तुमून मुसीबत में ले धैर्य ले राखून चैछो, तुमून सिर्फ धैर्य नै राखून चैनो, बल्कि तुमून इसीकैं जीवन जीनो ले चैछो जो परमेश्वरेस खुश करछो।</verse>
				<verse number="7">तुमून सिर्फ इसीकैं जीवनई नै जीना चैनो जो परमेश्वरेस खुश करछो, बल्कि तुमून विश्वासीन अपून परिवारा का लोगून की नियाती प्रेम करून चैछो, और तुमून सिर्फ विश्वासीन का दगाड़ अपून परिवारक लोगून का नियाती प्रेम करूनो चैछो, बल्कि तुमून सब लोगून प्रेम करून चैछो।</verse>
				<verse number="8">अगर तुम हमेशा इसीकैं जीवन जीछा त यो तुमार फैदा खिन छै, और इसो जीवन प्रभु यीशु मसीह का ज्ञान में बढ़ून खिन मद्दत करछो।</verse>
				<verse number="9">लेकिन अगर कोई आदिमी इस तरीका ले जीवन नै जीनो त उ एक इसा आदिमी नियाती छै जो निकीकैं नै देख सकनो। वह भूल ग्योछ कि परमेश्वरेले ऊस उन पापून खिन माफ कर दीछ जो उले मसीह में विश्वास करून है पैलि करिना का छ्या।</verse>
				<verse number="10">येक कारण हे म्यारा विश्वासी भाईयो, अपूनास और दुसरा लोगून यो देखून खिन और ले निका ब्यवहार करना की कोशिश करा कि परमेश्वरेले सच्ची में तुमून चुनिना को छै और तुमून अपून लोग हुन खिन बुला रैछ। अगर तुम इसो करला त तुम जरूर परमेश्वर है अलग नी होला।</verse>
				<verse number="11">और यो कि परमेश्वर उ राज्य में बड़ी खुशी ले तुमोरो स्वागत करलो जाँ यीशु मसीह छै, जो हमोरो प्रभु और हमोरो मुक्तिदाता छै, और उ हमेशा खिन राजा का रूप में राज्य करोलो।</verse>
				<verse number="12">हालाकि तुम पैलि भटे इन बातुन जाणछा और जो सच्ची शिक्षा तुमून मसीह का बारिमें मिलीना की छै ऊस मजबूती ले पकड़ भेरन रौ, जो लोगून ले तुमून दीईना की छै, मैं तुमून उनार बारिमें लगातार याद दिलूनै रूलो।</verse>
				<verse number="13">हमार प्रभु यीशु मसीह ले मैंस साफ बाता हैछ कि मैं जल्दी मर जूलो। येक कारण मैंस लागछो कि मैंखिन यो सही छै कि जब की मैं एल ले ज्यूनो छूँ त मैं तुमून इन चीजून की याद दिलूनै रूँ।</verse>
				<verse number="14"></verse>
				<verse number="15">येक कारण मैं इन बातुन एल लिखना का द्वारा तुमून यो बातुन बतून खिन भौत मेहनत करनमर्यू, ताकि मेरि मौता का बाद तुम हर बखत इन बातुन याद राख सका।</verse>
				<verse number="16">किलैकी जब हम प्रेरितून ले तुमून हमार प्रभु यीशु मसीह की सामर्थ और वापस उनाक बारिमें बताछ, त हम तुमून चतुराई ले के बनाईना कहानी नै बतून मरैछ्या। बल्कि, हमूनले मसीह को महिमा अपूनी आँखान ले देखीना को छ्यो।</verse>
				<verse number="17">हम उ पवित्र पहाड़ में उक दगाड़ छ्या जब उले पिता परमेश्वरा का द्वारा सम्मान और महिमा दी गैछी। त हमूले उ बखत परमपिता परमेश्वरै की तरफ भटे यो आवाज सुणछ्य, “यो म्येरो प्रिय च्योलो छै, जै भटे मैं खुश छूँ। हमूले खुद स्वर्ग भटे ऊँन वाली यो आवाज स सुणछ्य।”</verse>
				<verse number="18"></verse>
				<verse number="19">हम यो ले जाणनू कि मसीह का बारिमें परमेश्वरो को संदेश दिनवाला लोगून ले जो बचन लिखीना का छ्या, उन बिल्कुल सच्चा छन, और जो हमूले तुमून उक वापस उनाक बारिमें सिखाईना का छ्या उन उकी पुष्टि करनान। तुमून उन बचनून निकीकैं सुणूनो चैछो, किलैकी जसा तरीका ले अन्यारा में जलूनो वालो दीया लोगून सही बाँट देखून में मद्दत करछो, उसीकैं यो बचन तुमून यो जाणून में मद्दत करोलो कि सत्य कि छै। हमार प्रभु यीशु मसीह का वापस ऊँन तक तुमून उन बचनून निकीकैं सुणून चैछो। उको वापस ऊँनो नय्या दीनो को रातैनि को जसो उज्यालो लागोलो, और उन रात ब्यान को तारा को जसो होलो। उ बखत उको उज्यालो तुमार दिलून में चमकोलो और तुमार सामुनि परमेश्वर साफ तरीका ले प्रकट करोलो।</verse>
				<verse number="20">लेकिन सबून है खास बात यो छै कि तुम समझछा कि कोई ले अपूनी योग्यता ले परमेश्वर की भविष्यद्वाणी स समझूना क योग्य नाहातिन जो पवित्रशास्त्र में दीईना की छै।</verse>
				<verse number="21">किलैकी पवित्रशास्त्र में दीईना कोई ले भविष्यद्वाणी कभै ले आदिमी का द्वारा नै हुनी। लेकिन पवित्र आत्मा ले लोगून का मनून तैयार करछ्य, जब उनूनले परमेश्वरा का तरफ भटे आईना का संदेश स बोलछ्य।</verse>
			</chapter>
			<chapter number="2">
				<verse number="1">जसा तरीका ले तुम भौत पैलि झूठ्ठा संदेश दीन वाला लोग इस्राएली लोगून का बीच में दिखाई दीईयान, उसीकैं तुमार बीच में झूठ्ठा शिक्षा दीन वाला दिखाई द्याला। उन झूठ्ठी शिक्षान चुपचाप ले फैला द्याला, जो लोगून मसीह में विश्वास करून है रोक देली। यो झूठ्ठा शिक्षा दीन वाला मसीह स अपून स्वामी मानून है ले इन्कार कर द्याला जो उनोरो मालिक छै और जैले उनून पाप की शक्ति है आजाद करिना को छै। इसीकैं उन अपनास अचानक नाश करवा द्याला।</verse>
				<verse number="2">भौतसा लोग जो कुंनान कि उ विश्वासी छन, उन इन झूठ्ठा शिक्षकून का बुरा कामून की नकल कराला, और दुसरा लोग जो विश्वासी नाहातिन, उन परमेश्वरा का तरफ जानवाला बाटा का बारिमें बुरा-बुरा बातुन कराला।</verse>
				<verse number="3">इन सिखून वाला लालची होला, और उन बनि-बनाई कहानीन सुणाभेरन तुमून ध्वाका द्याला ताकि तुमूनथैं चीजून प्राप्त कर सकून। परमेश्वरे ले भौत बखत पैलि फैसला कर हलछ्यो कि उ उनून सजा द्याला और उन करून खिन तैयार छन। उन जरूर उनून नाश कर द्याला।</verse>
				<verse number="4">तुम जाणछा कि भौत बखत पैलि जब थ्वाड़ा दुष्ट दूतून ले परमेश्वरोको हुकुम नै मानियो, तो उले उनून उनार करिना की सजा दीछ। उले उनून नरक में खित दीछ, और उनून अन्यारा कैद में उ दिन तक राखि ग्योछ जब की उन न्याय का दिन कि इन्तजार करनान जब उनून उ सजा मिलेलि जैका उन लायक छन।</verse>
				<verse number="5">तुम यो ले जाणछा कि जब भौत बखत पैलि रूनवाला लोगून ले परमेश्वरो को डर नै मानो त परमेश्वरे ले उन लोगून का बुरा कामून नजर अंदाज नै कर्यो जो उन करन मर्यछ्या। बल्कि उले पुरी धरती स भरून खिन पानि भेजभेरन उनून इसी सजा दीछ कि उन सब डूब ग्या और नाश हो ग्या। लेकिन उले नूह समेत उन आठ लोगून बचाछ, जिनूनले परमेश्वरो को दगाड़ सही हुना का बारिमें प्रचार करिनाको छ्यो।</verse>
				<verse number="6">और तुम यो ले जाणछा कि भौत बखत पैलि परमेश्वरे ले सदोम और अमोरा का शैहरून में रूनवाला लोगून दण्डित करछ्य किलैकी उनूनले बुरा काम करिनाको छ्यो। येक कारण उले उनून पुरी तरीकाले आग में भस्म कर दीछ और राख हो ग्या। इसो करभेरन उले दिखाछ कि उन लोगून की होलो जो उको डर नै मानना।</verse>
				<verse number="7">लेकिन यैहै पैलि की उले सदोम शैहर स विनाश करछ्य, त परमेश्वरे ले लूत स जो एक धर्मी आदिमी छ्यो, ऊस शैहर भटे निकाल दीछ और इसीकैं ऊस बचा लीछ। लूत भौत दुखी छ्यो किलैकी सदोम शैहरा का लोग कोई ले नियम स नै मानछ्या और बेशर्मी का काम करछ्या।</verse>
				<verse number="8">उ उन बुरा लोगून का बीच रूछ्यो, और उ हरेक दिन उन बुरा कामून देख छ्यो जो उन करछ्या और उन बुरा बातुन सुणछ्यो जो उन बोल छ्या, और यो सब ऊस भौत परेशान करछ्यो, किलैकी उ एक धर्मी आदिमी छ्यो।</verse>
				<verse number="9">जब की परमेश्वरे ले इन सारी चीजून कर रैछ, त यैले पत्तो चलछो कि उ जाणछो कि अपून लोगून उनार दुखून भटे कसकैं छुड़ून छै, और यो ले जाण छै कि कसा बुरा लोगून न्याय दिन तक लगातार सजा दिन छै।</verse>
				<verse number="10">परमेश्वर सब दुष्ट लोगून सजा द्योलो, लेकिन उ उन झूठ्ठा शिक्षकून जरूर सजा द्योलो जो अपून बुरा इच्छान का अनुसार काम करनान और जो अपून मलि में परमेश्वरो को अधिकार स अस्वीकार करनान। उन ढीठ और घमंडी छन। उन महिमामय स्वर्गदूतून का बारिमें बुरा बोलना ले नै डरनान।</verse>
				<verse number="11">लेकिन याँ तक कि स्वर्गदूत जो इन झूठ्ठा शिक्षकून है कई ज्यादा सामर्थी और शक्तिशाली छन, उन ले उनोरो अपमान नै करना जब उन परमेश्वरा का सामुनि उनूनमें दोष लगूनान।</verse>
				<verse number="12">लेकिन इन झूठ्ठा शिक्षक जानवरून का नियाती छन। इन जानवरून पत्तो नाहातिन कि कसो सोचून छै और इनोरो मक्शद केवल पकड़ून और मार डालून छै। इन लोग केले करनान जो इनारा मन में उछो, और याँ तक कि इन उन चीजून की बुराई करनान जो इनून समझ ले नै उनी। उन जरूर इन जानवरून की नियाती नाश हो जाला।</verse>
				<verse number="13">उनोरो विनाश उ नुकसानो को ईनाम छै जो उनूनले करछ्य। उनून छकाला दिन तक बुरा सुख-विलास में पड़ीनाको रून पसन्द करनान। उन तुमार बीच एक कलंक और दाग छन और तुम लोगून का दगाड़ खान-पिन बखत उनून कपटी बात करून में खुशी हुछी।</verse>
				<verse number="14">उन हरेक स्यैनि का दगाड़ व्यभिचार करून चानान, जैस उन देखनान। उन पाप करनाको मौको खोजनै रूनान उन-उन लोगून ध्वाका दीनान जिनोरो मसीह में विश्वास कमजोर छै, और उन उनून पाप का तरफ लिजानान। उनेरि ज्यादा है ज्यादा चीजून प्राप्त करना को हमेशा बढ़नै रून वाली इच्छा का कारण परमेश्वर उनून दण्ड द्योलो।</verse>
				<verse number="15">उनूनले निका काम करून छोड़ दीयान, और उनूनले उसीकैं बुरा काम करून शुरू कर दीयान, जो कि बओर का च्याला बिलाम ले भौत बखत पैलि करिना को छ्यो। ऊस गलत काम करभेरन पैसा कमून निको लागछ्यो।</verse>
				<verse number="16">लेकिन परमेश्वरेले बिलाम स उक बुरा कामून खिन उकी गधी का द्वारा फटकार लगवाछ। चाहे गदीन बोलना नै लेकिन ऊस गधी ले बिलाम स एक इन्सान की नियाती बात करछ्य, जब उ बिलाम स राजा थैं मिलून खिन लादभेरन ली जानमरेछी, और उले उ बखत परमेश्वरा का संदेश दिनवाला बिलाम स बेवकूफी भरिना को काम करून है रोक छै।</verse>
				<verse number="17">इन झूठ्ठा शिक्षक उन पानि का झरना का नियाती बेकार छन, जो सुख ग्यान। उन निराश करूनवाला बादलून की नियाती छन, जिनून तेज हवा उड़ाभेरन ली जाँछी। परमेश्वरे ले उनून खिन एक इसी जाग तैयार करछ्य जो पुरी तरीकाले अन्यारो छै।</verse>
				<verse number="18">जब झूठ्ठा शिक्षक लोगून शिक्षा दीनान, तो उन बेकार और घमण्ड ले भरिना क शब्दून को इस्तमाल करनान। उन लोगून बतुनान कि उन-उन बेशर्मी का कामून कर सकनान जो उनार शरीर करून चानान और उन लोगून फिर पाप करून खिन भरमा दीनान जो यैले-यैले इसा बुराई का जीवन ले बचभेरन निकलनान।</verse>
				<verse number="19">उन लोगून बतुनान कि उन जो केले करून चानान उ खिन आजाद छन, हालाँकि उन खुद गुलामून की नियाती छन किलैकी उनोरो अपूनो पापी स्वभाव उनूनले बुरा काम करून खिन मजबूर करनान। किलैकी जो केले तुमून अपून वश में करछो, तुम उक दास बन जाछा</verse>
				<verse number="20">जब लोगून ले प्रभु यीशु मसीह स अपून प्रभु और मुक्तिदाता मान हलछ्यो, तब प्रभु ले उनून यो संसारै की बुराई भटे बचा हलछ्यो। लेकिन अब एक बार फिर उन बुरा कामून में फंस ग्यान और उन बुरा काम अब उनून अपून वश में करनान, येक कारण अब मसीह स अस्वीकार कर दिनाका बाद उनेरि दशा उनार विश्वासी बनून है पैलिक दशा है ले बुरी हो गै।</verse>
				<verse number="21">मेरो कुनानको मतलब यो छै, कि परमेश्वर उन लोगून जिनूनले यीशु मसीह स कभै स्वीकार नै कर्यो, उनून सजा त द्योलोई, लेकिन उनून त भौत कड़ी सजा द्योलो जिनूनले यीशु मसीह स्वीकार करभेरन छोड़ दीछ। उनूनखिन निको हुनो अगर उन कभै यो जाणनाई नै कि अपून जीवन स धर्मी तरीकाले चलूना को कि अर्थ हुछो। अब उन जाणना कि सही कि छै लेकिन उनूनले परमेश्वरेकि उन हुकमून को पालन करून छोड़ दीछ, जो हम, प्रेरितूनले उनून दी गैछी।</verse>
				<verse number="22">उनूनले जो करछ्य, बिल्कुल उई बात इन द्वी कहावत कुछी, “कुकुर उलटी करछो, और फिर ऊस खा लीछो।” और “जब कोई आदिमी एक सूअर स नहवा दीछो, त वह सूअर फिर है कीचड़ में पड़ून खिन न्हैजाछो।”</verse>
			</chapter>
			<chapter number="3">
				<verse number="1">हे म्यारा विश्वासी भाईयो, अब मैं तुमून यो दुसरी चिठ्ठी लिखून मरैयू, मैंले तुमून यो द्वी चिठ्ठी येक कारण लिखीना का छन ताकि जो बात तुम पैलि है जाणछा, उनार बारिमें तुमून याद दिलून का द्वारा मैं तुमार मन में साफ विचारून उत्पन्न कर सकूँ।</verse>
				<verse number="2">मैं इसो येक कारण करून मरैयू किलैकी मैं चाछूँ कि तुम उन बचनून याद राखा, जो परमेश्वरो को संदेश दिनवाला लोगून ले भौत पैलि कईना को छ्यो और हमार मुक्तिदाता, हमार मुक्तिदाता, प्रभु यीशु मसीह की शिक्षान याद राखा जो तुमून उन प्रेरितून ले शिक्षा दीयान जो तुमार पास आयान।</verse>
				<verse number="3">सबून है जरूरी बात, तुमून पतो हुन चैछो कि मसीह का वापस उनाक पैलि आखरी अन्तिम दिनून में इसा लोग होला जो तुमोरो मजाक उड़ाला किलैकी तुम विश्वास करछा कि मसीह दुबारा वापस आलो। उन आदत ले मजबूर बुरा काम कराला जो उनून खुश करनान।</verse>
				<verse number="4">और उन कौला, “उको उनाको वादा सच्ची नाहातिन! उ कभै नी आलो। किलैकी जो सबून है पैलि हमार अगुवा छ्या, उन सब मर ग्यान, लेकिन फिरले केले नै बदलीनो। उसीकैं हुन मर्योछ जसीकैं उन तब भटे हुनै आईना का छन जब परमेश्वरेले संसारै बनाछ।”</verse>
				<verse number="5">उन इसो कौला किलैकी उन यो बात भूलन चानान कि भौत बखत पैलि परमेश्वरा का हुकुमले आकाश और धरती बनिना का छ्या। उले धरती स पानि है भ्यार निकालछ्य और ऊस पानि है अलग कर दीछ।</verse>
				<verse number="6">यो पानि का द्वारा उले उ संसारे स नाश कर दीछ जो उ बखत अस्तित्व में छ्यो। परमेश्वरेले जल प्रलय करछ्य और येले धरती में बाढ़ आगै और पुरी दुनिया नाश कर दीछ।</verse>
				<verse number="7">जसा तरीका ले परमेश्वरेले संसार स बनून बखत हुकुम दीछ, कि एल तक ब्रह्मांड तब तक बनिना को रौ जब तक उ उनून आगा ले नै जला द्यो। उ उनून उ दिन तक राख रैछ जब उ सब लोगून को न्याय करोलो और उन लोगून को नाश कर द्योलो जो उको हुकमून नै मानना।</verse>
				<verse number="8">हे म्यारा विश्वासी भाईन, यो एक बात स कभै जन भूल्या कि परमेश्वर खिन एक दिन एक हजार सालाक नियाती छै और एक हजार साल एक दिना का नियाती छै। उखिन एक दिन और एक हजार साल सब एक जसो छै।</verse>
				<verse number="9">कुछ लोग सोचनान कि प्रभु अपून वापस उनाको वादा स पुरो करून में देरी करूनमर्योछ। लेकिन प्रभु ऊस तरीका ले देरी नै करूनमर्योछ। बल्कि, वह तुमार दगाड़ धैर्य धरून मर्योछ। किलैकी उ कैसे ले नाश नै करूनो चानो। लेकिन उ चाछो कि हरेक अपून पापून खिन पश्चाताप करो और गलत काम करून छोड़ द्यो, और उक पास आज्यो।</verse>
				<verse number="10">लेकिन प्रभु को दिन अचानकै आलो जसीकैं कोई चोर अचानकै आ जाछो। उ बखत आकाश में गड़गड़ाट होलि, और आकाश गायब हो जालो। आकाश में सब कुछ, मतलब सूरज, चाँद और तारा पुर तरीका ले आगा ले नाश हो जाला। उ दिना परमेश्वर उन सब कामून प्रकट कर द्योलो जो लोगून ले करिना का छन ताकि उनोरो न्याय कर सकौ।</verse>
				<verse number="11">यो पक्का छै कि परमेश्वर सब चीजून इसीकैं नाश कर द्योलो, त तुम जरूर जाछा कि तुमून कसो ब्यवहार करूनो चैछो। तुमोरो ब्यवहार सच्चो हुन चैछो और जो केले तुम करछा उले परमेश्वरेस खुश करा।</verse>
				<verse number="12">इस तरीका ले ब्यवहार करा जसीकैं तुम उ दिना को इन्तजार करून मरेछा जो परमेश्वरेले चुनिना को छै जब मसीह वापस आलो, और उ दिना का जल्दी ऊँन खिन अपून तरफ भटे पुरी कोशिश करा। ऊस दिना, आग भड़कोलो और आकाश स नाश कर द्योलो, और उकी गर्मी आकाश में सब कुछ पिघला देली।</verse>
				<verse number="13">लेकिन हम विश्वासी लोग परमेश्वरा का वादा का अनुसार एक नय्या स्वर्ग और नय्या धरती की आश राखनू जाँ सिर्फ धर्मी लोग रूनान।</verse>
				<verse number="14">येक कारण हे म्यारा विश्वासी भाईयो, जब तुम इन बातुन को हुना को इन्तजार करून मरेछा, येक कारण इसो जीवन जीना की हर तरीका ले कोशिश करा, जो परमेश्वरेस खुश करछो और शुद्ध और बिना दोष का और एक-दुसरा का दगाड़ शान्ति ले र।</verse>
				<verse number="15">हमार प्रभु का धैर्य स एक मौका का रूप में देखा जो उ तुमून ऊँन वाला न्याय है बचुन खिन दीन मर्योछ। जब हमार प्रेमो दगड़िया पौलुसले, जैस हम प्रेम करनू, तुमून उ ज्ञान को इस्तमाल करभेरन लिखछ्य जो परमेश्वरेले ऊस दीईना को छै, त उले ले तुमून यो बात बतायान, जो मैंले तुमून अपूनी चिठ्ठी में बताईना का छन।</verse>
				<verse number="16">अपूनी सब चिठ्ठीन में जो उले विश्वासीन खिन लिखीना का छन, उ इसा तरीका की बात करछो। लेकिन कुछ बात जो उले अपूनी चिठ्ठीन में लिखीना का छन, उनून समझूनो कठिन छन। जिन लोगून ले निकी शिक्षा नै पाईना की छै और उन इन कठिन बातुन को मतलब गलत तरीका ले बतुनान, उसीकैं ही जैसे उन पवित्रशास्त्र का दुसरा हिस्सा की ले गलत बतुनान। इसो करभेरन उन खुदै परमेश्वरा का द्वारा अपून नाश हुना का कारण बननू।</verse>
				<verse number="17">येक कारण हे म्यारा विश्वासी भाईयो, तुम पैलि भटे जाणछा कि यो बात होलि। येक कारण, सतर्क रौ ताकि जो लोग नियमून नै मानना उन तुमूथैं झूठ बोलभेरन तुमून भटका नै दीन। अगर तुम सच्चाई में विश्वास करून छोड़ देला जैमें तुमूनले एक बखत मजबूतीले विश्वास करिना को छ्यो।</verse>
				<verse number="18">बल्कि तुम इसीकैं जीवन बिता कि तुम हमार मुक्तिदाता यीशु मसीह का अनुग्रह और ज्ञान में बढ़नै जा और ऊस बड़िया तरीका ले जाण सका। उकी महिमा अब ले और हमेशा हुनै रौ। आमीन।</verse>
			</chapter>
		</book>
		<book number="62">
			<chapter number="1">
				<verse number="1">हम एक आदिमी का बारिमें लिखूनमर्या, जो जीवन को बचन छै। उ दुनिया का बनून है पैलि भटे छ्यो जैस हमूले सुणछ्य और अपून आँखान ले देखछ्य, बल्कि जैस हमूले ध्यान ले देखछ्य और हातून ले छूँ रैछ।</verse>
				<verse number="2">यो आदिमी जो जीवन दीछो, उ संसार में आछ, और हमूले ऊस देखछ्य, और उकी गवाही दीनू, और तुमून उ अनन्त जीवन का बारिमें बतूनू जो पिता परमेश्वरा का दगाड़ छ्यो और हमून में प्रगट भ्योछ।</verse>
				<verse number="3">जो कुछ हमूले यीशुक बारिमें देखछ्य और सुणछ्य उकी सुसमाचार तुमूनले दीनू, येक कारण तुम ले हमार दगाड़ संगति राँखा; और हमोरो यो दगोड़ो पिता परमेश्वरा का दगाड़ और उक च्योलो यीशु मसीहक दगाड़ छै।</verse>
				<verse number="4">और यो बात हम येक कारण लिखनू, ताकि हमरि खुशी पुरी हो जौ।</verse>
				<verse number="5">जो सुसमाचार हमूले यीशु मसीह थैं सुण रैछ, और तुमून सुणनू, उ यो छै; कि परमेश्वर उज्याला को जसो निको छै और उमें थ्वाड़ा ले अन्यारो नाहातिन।</verse>
				<verse number="6">अगर हम कुंनू कि परमेश्वरा का दगाड़ हमरि संगति छै, फिरले अन्यारा में हिटूनमर्या, तो हम झूठ बोलनू और सच्चाई का अनुसार नै हिटना।</verse>
				<verse number="7">लेकिन अगर जसिकै परमेश्वर उज्याला में छै, उसीकैं हम ले उज्याला में हिटा, त हम ले एक-दुसारा दगाड़ संगति राखनू; और उको च्योलो यीशु मसीह को खून हमून सब पापून भटे शुद्ध करछो।</verse>
				<verse number="8">अगर हम कुंनू कि हमूले पाप नै कर्यो, त अपून आपस ध्वाका दीनू और हम येमें विश्वास नै करना कि परमेश्वर जो कुंछो उ सच्ची छै।</verse>
				<verse number="9">अगर हम अपून पापून परमेश्वरा का सामुनि मान लीनू, त उ हमार पापून माफ करून, और सब अधर्म भटे शुद्ध करून में विश्वासयोग्य और धर्मी छै।</verse>
				<verse number="10">अगर कुंनू कि हमूले पाप नै कर्यो त हम परमेश्वर स झूठ्ठो ठैहरूनू, और अब तक हमून ले परमेश्वरा का बचनून नै मानियो।</verse>
			</chapter>
			<chapter number="2">
				<verse number="1">म्यारा प्यारा नन्तिनो, मैं इन बातुन तुमून येक कारण लिखछूँ, कि तुम पाप जन करा, और अगर कोई पाप करो त पिता परमेश्वरा का पास हमोरो एक मद्दगार छै, उ यीशु मसीह छै जो हमार पापून की माफी खिन प्रार्थना करछो, उ धर्मी छै।</verse>
				<verse number="2">और उलेई हमार पापून की माफी खिन अपूनो बलिदान दीछ, और केवल हमून खिन नै बल्कि पूरा संसारा का लोगून का पापून खिन ले अपूनो दीछ।</verse>
				<verse number="3">अगर हम परमेश्वरा का हुकमून मानला, त उलेई हमून पत्तो चलोलो कि हम ऊस जाणनू।</verse>
				<verse number="4">जो कोई यो कूछो कि “मैं परमेश्वर स जाण गयूँ लेकिन उक हुकमून नै माननो,” उ झूठ्ठो छै और परमेश्वरा का सच्चाई का अनुसार नै चलनो।</verse>
				<verse number="5">लेकिन जो कोई परमेश्वरा का बचन अनुसार में चलछो, उमें सच्ची में परमेश्वरो को प्रेम प्रगट भ्योछ। येले हम जाणनू कि हम परमेश्वरा का दगाड़ छा।</verse>
				<verse number="6">जो कोई यो कूछो कि मैं उमें बनिनाको रूछूँ, त ऊस चैछो कि उ खुद ले उसीकैं रौ जसीकैं यीशु मसीह र्योछ।</verse>
				<verse number="7">हे म्यारा प्रिय दगड़ियो, मैं तुमून कोई नय्या हुकुम नै लिखनू, लेकिन उई पुरानो हुकुम जो शुरू भटे तुमून मिलीना को छै; यो पुरानो हुकुम उई वचन छै, जैस तुमले सुणि रैछ, जब तुमूनले प्रभु यीशु मसीह में विश्वास करछ्य।</verse>
				<verse number="8">फिरले जो हुकुम मैं तुमून लिखछूँ उ नय्या हुकुम छै; किलैकी येकी सच्चाई मसीह में और तुमून में दिखाई दीछी। क्याखिनकि अन्यारो खतम हुनै जानर्योछ और सच्चाई को उज्यालो ऐल चमकून लाग ग्योछ।</verse>
				<verse number="9">जो कोई यो कुंछो, कि मैं उज्याला में जीनमर्यू; लेकिन अपून विश्वासी भाई का दगाड़ बैर राँखछो, त उ अब तक ले अन्यारा मेंई जीनमर्योछ।</verse>
				<verse number="10">जो कोई अपून विश्वासी भाई स प्रेम करछो, उ उज्याला में जीनमर्योछ, और उमें इसो केले नाहातिन जो कोई औरून को पापून करना को कारण बनौ।</verse>
				<verse number="11">लेकिन जो कोई अपून भाई थैं बैर राँखछो, उ अन्यारा में जीनमर्योछ और हिटून मर्योछ, और यो नै जाणनो कि काँ जानमर्योछ, क्याखिनकि अन्यारा ले उक आँखान अन्धा कर दीयान।</verse>
				<verse number="12">हे नन्तिनो, मैं तुमून येक कारण लिखछूँ, कि यीशु मसीह का नाम ले तुमार पाप माफ भ्यान।</verse>
				<verse number="13">हे म्यारा बुजुर्गो, मैं तुमून येक कारण लिखछूँ, किलैकी तुम मसीह स जाणछा जो पैलि भटे छै। हे जवान नान्तिनो, मैं तुमून येक कारण लिखछूँ, कि तुमले उ शैतान में जीत पाछ, हे नान्तिनो, मैंले तुमून येक कारण लिखछ्य, कि तुम पिता परमेश्वर स जाण गैछा।</verse>
				<verse number="14">हे म्यारा बुजुर्गो, मैं तुमून येक कारण लिखछूँ, किलैकी तुम मसीह जाणछा जो पैलि भटे छै। हे जवान नान्तिनो, मैंले तुमून येक कारण लिखछ्य, कि तुम बलवंत हो और परमेश्वरको बचन तुमून में बनिना को रौ, और तुमूले उ शैतान में जीत पाछ।</verse>
				<verse number="15">तुम नै त संसार भटे और नै संसारा का चीजून भटे प्रेम जन राँखा। अगर कोई संसार खिन प्रेम राँखछो, त उमें पिता परमेश्वरो को प्रेम नाहातिन।</verse>
				<verse number="16">क्याखिनकि जो कुछ संसार में छै, मतलब शरीर की पापी इच्छान पुर करून और चीजून देखून और ऊस पान की इच्छा राखून और जो उक पास छै उमें घमंड करून, पिता परमेश्वरा का तरफ भटे नै, लेकिन संसारा का तरफ भटे छै।</verse>
				<verse number="17">संसार और उकी अभिलाषा द्वीवै खतम हो जाला, लेकिन जो परमेश्वर की इच्छा स पुरी करछो, उ हमेशा उमें बनिना को रौलो।</verse>
				<verse number="18">हे नान्तिनो, यो आखिरी बखत छै; जब मसीह फिर है वापिस आलो और जसो तुमूले सुणिना को छै, कि मसीह विरोधी उनवालो छै, उक अनुसार अब ले भौत मसीहा का विरोधी आ ग्यान; येले हम जाणनू कि यो मसीह वापस उना बखत छै।</verse>
				<verse number="19">उन मसीह विरोधी दल में भटे निकल भेरन आईना का छन, लेकिन उन हमार अपून नी छ्या सच्ची में हमून में भटे नी छ्या, क्याखिनकि उन अपून हुना, त हमार दगाड़ रूना; लेकिन उनूनले हमून येक कारण छोड़ दीछ किलैकी उन हमार दगड़िया नी छ्या।</verse>
				<verse number="20">लेकिन तुमून त यीशु मसीहक द्वारा पवित्र आत्मा मिलछै, और तुम सच्चाई जाणछा।</verse>
				<verse number="21">मैंले तुमून येक कारण नै लिखीयो, कि तुम सच्चाई स नै जाणना, लेकिन येक कारण, कि तुम ऊस जाणछा, कोई ले झूठ को जन्म, सच्चाई भटे नै हुनो।</verse>
				<verse number="22">झूठ्ठो को छै? केवल उ जो यीशु मसीहा हुना को इन्कार करछो; और उई मसीह विरोधी छै, जो पिता परमेश्वर और च्याला को इन्कार करछो।</verse>
				<verse number="23">जो च्याला को इन्कार करछो, उक पास पिता परमेश्वर ले नाहातिन; जो च्याला स मान ल्हीछ, उक पास पिता परमेश्वर ले छै।</verse>
				<verse number="24">उ संदेश जो तुमूले सुणछ्य जब तुमून ले यीशु मसीह में विश्वास करछ्य, अगर उ तुमून में बनिना को रौलो, त तुम ले च्याला में और पिता परमेश्वर में बनिना का रौला।</verse>
				<verse number="25">और जैको परमेश्वर ले हमूनथैं वादा करछ्य उ अनन्त जीवन छै।</verse>
				<verse number="26">मैं तुमून उन लोगून का बारिमें चेतावनी दी छूँ जो तुमून गलत शिक्षा का द्वारा तुमून ध्वाका दिनाकी कोशिश करनान।</verse>
				<verse number="27">लेकिन तुमून पवित्र आत्मा जो यीशु मसीहक द्वारा मिलीना को छै; जो तुमारा भितर रूछो; येक कारण कैसे ले तुमून सच्चाई का बारिमें सिखून की जरूरत नाहातिन। हालांकि जसीकैं तुमून यीशु मसीह का द्वारा मिलीना को छै उसीकैं तुमून सब बात सिखूछो, और पवित्र आत्मा सच्चो छै, और झूठ्ठो नाहाति; और जसो उले तुमून सिखाछ, उसीकैं तुम उमें बनिना का रौ।</verse>
				<verse number="28">येक कारण हे नान्तिनो, मसीह का दगाड़ बनिना रौ; कि जब उ दुबारा आलो त हमून हिम्मत मिलेलि, और हम मसीह उन में उक सामुनि शर्मिदा नी हूँला।</verse>
				<verse number="29">अगर तुम यो जाणछा, कि मसीह धर्मी छै, त यो ले जाणछा, कि जो कोई धर्मोको काम करछो, उन परमेश्वर नान्तिन छन।</verse>
			</chapter>
			<chapter number="3">
				<verse number="1">जरा सोचा, कि पिता परमेश्वर ले हमून कदुक प्रेम करछ्य, ताकि हम परमेश्वरा का सन्तान बना; और सच्ची में हम उक सन्तान छा ले। लेकिन यो संसारा लोग नै जाणना कि हम परमेश्वरा का सन्तान छा, क्याखिनकि उन पिता परमेश्वर नै जाणना।</verse>
				<verse number="2">हे प्रिय दगड़ियो, अब हम परमेश्वरकि सन्तान छा, और अब तक यो प्रगट नै भ्यो कि भविष्य में हम की बनला, बश हम इतुक जाणनू कि जब उ प्रगट होलो त हम ले उक समान हूँला, क्याखिनकि हम ऊस ऊसो देखला जसो उ छै।</verse>
				<verse number="3">और जो कोई मसीह की आश राखछो, उ अपून आपस ऊसो पवित्र करछो, जसो उ पवित्र छै।</verse>
				<verse number="4">जो कोई लगातार पाप करछो, उ परमेश्वरा का नियम-कानून पालन नै करूनो; और पाप त नियम-कानून पालन करून है इनकार करून छो।</verse>
				<verse number="5">और तुम जाणछा, कि यीशु मसीह येक कारण आछ, कि पापून भटे छुटकारा दे, और उमें कोई पाप नाहातिन।</verse>
				<verse number="6">जो कोई मसीह में बनिनाको रूछो, उ लगातार पाप नै करूनो, जो कोई पाप करछो, उले नै त मसीह देखछ्य, और ऊस नै जाणनो।</verse>
				<verse number="7">हे नान्तिनो, केका बेहकून में जन आया; धर्मी उई छै जैको चाल-चलन खरो छै ठीक जसकैं यीशु मसीह धर्मी छै।</verse>
				<verse number="8">जो कोई लगातार पाप करछो, उ शैतान का तरफ भटे छै, क्याखिनकि शैतान शुरू भटे पाप करनै आर्योछ; परमेश्वरो को च्योलो येक कारण आछ, कि शैताना का कामून नाश करो।</verse>
				<verse number="9">जो कोई परमेश्वर की सन्तान छै, उ लगातार पाप नै करूनो; क्याखिनकि परमेश्वरो को स्भाव उमें छै और उ लगातार पाप नै कर सक्नो, क्याखिनकि उ परमेश्वर की सन्तान छै।</verse>
				<verse number="10">येलेई परमेश्वर की सन्तान और शैतान की सन्तान की पछयाण हुछी, कि जो कोई धार्मिकता काम करूछो और अपून भाई स थैं प्रेम राँखछो, उ परमेश्वर सन्तान छै।</verse>
				<verse number="11">जो समाचार तुमूले शुरू भटे सुणछ्य, उ यो छै, कि हम एक दुसारा का दगाड़ प्रेम राँखा;</verse>
				<verse number="12">और आदमो को च्योलो कैना का नियाती जन बना, जैले शैतान की बातुन मानछ्य, और जैले अपून भाई हाबिल को खून करछय। और ऊस कि कारण ले मारछ्य? येक कारण कि उक काम बुरा छ्या, और उक भाई का काम धार्मिकता का छ्या।</verse>
				<verse number="13">हे विश्वासी भाईयों, अगर संसार का लोग तुमून भटे बैर करनान, त ताजुब जन कर्या।</verse>
				<verse number="14">हमून पत्तो छै, की हम मौते की शक्ति भटे आजाद हो ग्या और येल हमार पास परमेश्वरा का तरफ भटे अनन्त जीवन छै, किलैकी हम विश्वासी भाईन का दगाड़ प्रेम राखनू; और जो प्रेम नै राखनो उ मौत बश रूछो।</verse>
				<verse number="15">जो कोई अपून विश्वासी भाई का दगाड़ बैर राँखछो, उ खूनी छै; और तुम जाणछा, कि कोई खूनी में अनन्त जीवन नै रूनो</verse>
				<verse number="16">हमूले प्रेम येले जाण छै, कि यीशु मसीह ले हमून खिन अपून प्राण दी दीयान; येक कारण हमूले ले विश्वासी भाईन खिन प्राण दिन चैछो।</verse>
				<verse number="17">लेकिन जैका पास संसारे की संपत्ति छै, और उ अपून विश्वासी भाई स कंगाल देखिभेरन उमें तरस खान नै चानो, त उमें परमेश्वरो को प्रेम नै हो सकनो।</verse>
				<verse number="18">हे नान्तिनो, हम बचनून और बातुन ले नै, लेकिन काम और सच्चाई का दगाड़ ले प्रेम करा।</verse>
				<verse number="19">जब हम दुसरान का दगाड़ प्रेम करनू, त हम जाणला कि हम सच्चाई का छा। जब कभै ले हमोरो मन हमून दोषी ठैहरछो, तब हम अपून मनून में परमेश्वरा का सामुनि आराम पानू, क्याखिनकि परमेश्वर हमार मनून भटे ठूलो छै; और सब कुछ जाणछो।</verse>
				<verse number="20"></verse>
				<verse number="21">हे दगाड़ियो, अगर हमोरो मन हमून दोष नै दे त हमून परमेश्वराका सामुनि हिम्मत हुछी।</verse>
				<verse number="22">और जेलै हम परमेश्वर थैं माँगून, उ हमून उथैं भटे मिलछो; क्याखिनकि हम उको हुकमून माननू; और उई करनू, जो परमेश्वर स खुश करछो।</verse>
				<verse number="23">और परमेश्वरा का हुकुम यो छै कि हम उक च्योलो यीशु मसीहक नाम में विश्वास करा, और जसो उले हमून हुकुम दी रैछ, उक अनुसार आपस में प्रेम राखा।</verse>
				<verse number="24">और जो परमेश्वरो को हुकमून को पालन करछो, उ परमेश्वर में, और परमेश्वर उमें बनिना को रूछो; और येले उ पवित्र आत्मा जो उले हमून दी रैछ, हम जाणनू कि परमेश्वर हमून में बनिना को रूछो।</verse>
			</chapter>
			<chapter number="4">
				<verse number="1">हे प्रिय दगाड़ियो, हरेक आदिमी में विश्वास जन करा, जो पवित्र आत्मा का द्वारा बोलना को दवा करछो; लेकिन उनून परखा, कि उन परमेश्वराका तरफ भटे छनी या नाहातिन, क्याखिनकि भौत झूठ्ठो संदेश दिनवाला लोग यो संसार में छन।</verse>
				<verse number="2">परमेश्वरो को आत्मा तुम येले जाण सक्छा जो कोई यो मानछो कि यीशु मसीह आदिमी का शरीर में हो भेरन आछ, उ परमेश्वरा का तरफ भटे छै।</verse>
				<verse number="3">और जो कोई यीशु स नै माननो, उ परमेश्वरा का तरफ भटे नाहातिन, और यो उई मसीह विरोधी आत्मा छै, जैक बारिमें तुमले सुण रैछ यो मसीह विरोधी उनवालो छै जो ऐल ले संसार में छै।</verse>
				<verse number="4">हे नान्तिनो, तुमले परमेश्वरा का बारिमें झूठ्ठा संदेश दीन वाला लोगून में जीत पाछ, क्याखिनकि पवित्र आत्मा जो तुमून में छै, उ शैतान है जो यो संसार में राजा करछो उ है महान छै।</verse>
				<verse number="5">परमेश्वरा का बारिमें झूठ्ठो संदेश दीन वाला उन लोग संसारा का छन, येक कारण उन संसारे की बात बोलनान, और यो संसार उनेरि सुणछो।</verse>
				<verse number="6">हम परमेश्वरा का लोग छा। जो परमेश्वर स जाणछो, उ हमरि सुणछो; और जो परमेश्वर नै जाणनो उ हमरि नै सुणनो, इसकैं ल हम सच्चाई की आत्मा स और झूठ्ठी आत्मा स पछ्याणी लीनू।</verse>
				<verse number="7">हे प्रिय दगाड़ियो, हम आपस में प्रेम राँखा, क्याखिनकि प्रेम परमेश्वर भटे छै और जो कोई दुसरान का दगाड़ प्रेम राँखछो उ परमेश्वर की सन्तान छै और परमेश्वर स जाणछो।</verse>
				<verse number="8">जो दुसरान थैं प्रेम नै राँखनो उ परमेश्वर स नै जाणनो, क्याखिनकि परमेश्वर प्रेम छै।</verse>
				<verse number="9">जो प्रेम परमेश्वर हमूनथैं राँखछो, उ येले प्रगट भ्योछ, कि परमेश्वरेले अपूनो एकलौता च्याला स यो संसार में भेजछ्य कि हम उक द्वारा अनन्त जीवन पा।</verse>
				<verse number="10">हमोरो प्रेम परमेश्वर खिन सच्चो नाहातिन, लेकिन परमेश्वरो को प्रेम हमून खिन सच्चो छै। येक कारण परमेश्वर हमार पापून की माफी खिन अपून च्याला स बलिदान हुन खिन भेजछ्य।</verse>
				<verse number="11">हे प्रिय दगड़ियो, जब परमेश्वरले हमून इसो प्रेम करछ्य, त हमून ले आपस एक-दुसरा स प्रेम राँखून चैछो।</verse>
				<verse number="12">परमेश्वर स कभै केले नै देखियो; अगर हम आपस में प्रेम राँखा, त परमेश्वर हमून में बनिना का रूछो; और उको प्रेम हमून में सिद्ध हो ग्योछ।</verse>
				<verse number="13">येले हम जाणनू, कि हम परमेश्वर में बनिना का रूनू, और परमेश्वर हमून में बनिना को रूछो; क्याखिनकि उले अपूनो पवित्र आत्मा हमून दी रैछ।</verse>
				<verse number="14">हमूले च्याला स देख ले हालछ्य, और गवाही ले दीनू, कि पिता परमेश्वर ले च्याला स यो संसारो का लोगून खिन मुक्तिदाता हुन खिन भेज रैछ।</verse>
				<verse number="15">जो कोई यो मान लीछो, कि यीशु ही परमेश्वरो को च्योलो छै परमेश्वर उमें बनिना रूछो, और उ परमेश्वर में बनिना को रूछो।</verse>
				<verse number="16">हम निकी कै जाणनू और विश्वास ले करनू कि परमेश्वर हमूनथैं प्रेम राँखछो। परमेश्वर प्रेम छै; जो प्रेम में बनिना को रूछो, उ परमेश्वर में बनिना को रूछो, और परमेश्वर उमें बनिना को रूछो।</verse>
				<verse number="17">येले प्रेम हमून में पुरो भ्योछ, कि न्याय का दिन हमून हिम्मत मिलौ की उ हमून सजा नै द्योलो, क्याखिनकि हम मसीह का नियाती दुसरान प्रेम करनू और यो संसार में उकी नियाती रूनू।</verse>
				<verse number="18">प्रेम में डर नै हुनो, बल्कि सिद्ध प्रेम डर स दूर कर दीछो, क्याखिनकि जो डरछो उ दण्ड भटे डरछो। और जो डरछो उ प्रेम में सिद्ध नै भ्यो।</verse>
				<verse number="19">हम येक कारण परमेश्वरे स और दुसारान थैं प्रेम करनू, किलैकी परमेश्वरेले पैलि हमूस प्रेम करछ्य।</verse>
				<verse number="20">अगर कोई कुंछो, “मैं परमेश्वर स प्रेम करछूँ,” लेकिन अपून विश्वासी भाई थैं नफरत करो; त उ झूठ्ठो छै। क्याखिनकि जो अपून विश्वासी भाई स जैस उले देख रैछ, प्रेम नै राँखूनो, तो उ परमेश्वर स जैस उले नै देख रैछ, प्रेम नै कर सकनो।</verse>
				<verse number="21">और मसीह थैं हमून यो हुकुम मिलीना को छै कि जो परमेश्वर थैं प्रेम करछो, उ अपून भाई स ले प्रेम करो।</verse>
			</chapter>
			<chapter number="5">
				<verse number="1">जो आदिमी स यो विश्वास छै कि यीशु ही मसीह छै उ परमेश्वर सन्तान छै; और जो कोई पिता परमेश्वर स प्रेम करछो, त उ दुसारा ले प्रेम करछो, जो उकी सन्तान छै।</verse>
				<verse number="2">जब हम परमेश्वर स प्रेम करनू और उक हुकमून को पालन करनू तो येले हम जाणनू कि हम परमेश्वरा का सन्तानून प्रेम करनू।</verse>
				<verse number="3">परमेश्वरथैं प्रेम करून तरीका यो छै कि हम उक हुकमून को पालन करा, और उक हुकुम पालन करून कठिन नाहातिन।</verse>
				<verse number="4">क्याखिनकि जो कोई परमेश्वर की सन्तान छै, उ संसार में जीत हासिल करछो। उ जीत, जो संसार स हरा दीछी, उ हमोरो विश्वास छै।</verse>
				<verse number="5">संसार में जीत पानवालो को छै? केवल उ जेको यो विश्वास छै कि यीशु ही परमेश्वरो को च्योलो छै।</verse>
				<verse number="6">यो उई यीशु मसीह छै, जैस यो संसार में परमेश्वर ले भेजछ्य, और ऊस पानि ले बपतिस्मा दीई ग्योछ, और बाद में जब उ मरग्यो, त उको खून बग ग्यो। उ नै केवल बपतिस्मा लीन खिन आछ; बल्कि अपूनो खून बगा भेरन सूली में मर ग्यो। और पवित्र आत्मा यो गवाही दीछो कि यीशु मसीह परमेश्वरा का तरफ भटे आछ और जो पवित्र आत्मा कुंछो उ हमेशा सच्ची छै।</verse>
				<verse number="7">और गवाही दिनवाला तीन छन;</verse>
				<verse number="8">आत्मा, पानि, और खून; और इन तीनै एक्कै बात में सहमत छन।</verse>
				<verse number="9">जब हम लोगून की गवाही मान लीनू, तो परमेश्वरे की त उ भटे बढ़भेरन छै; और परमेश्वरे की गवाही यो छै, कि उले अपून च्याला का बारिमें गवाही दी रैछ।</verse>
				<verse number="10">जो परमेश्वरो को च्याला में विश्वास करछो, उ अपून दिल में परमेश्वर की गवाही राखछो। जैले परमेश्वर में विश्वास नै कर्यो उले परमेश्वर स झूठ्ठो ठैहरछो; क्याखिनकि उले उकी गवाही में विश्वास नै कर्यो, जो परमेश्वरले अपून च्याला का बारिमें दी रैछ।</verse>
				<verse number="11">और उ गवाही यो छै, कि परमेश्वरले हमून अनन्त जीवन दी रैछ, और यो परमेश्वरा का च्याला का द्वारा हमून मिलीना को छै।</verse>
				<verse number="12">जैक पास परमेश्वरा का च्योलो छै, उक पास अनन्त जीवन छै; और जैक पास परमेश्वरा का च्योलो नाहातिन उक पास अनन्त जीवन ले नाहातिन।</verse>
				<verse number="13">मैं यो चिठ्ठी तुमून येक कारण लिखूनमरयूँ कि जो परमेश्वरा का च्याला का नाम में विश्वास करनान, त तुम जाणा सका कि अनन्त जीवन तुमोरो छै।</verse>
				<verse number="14">और हमून परमेश्वरा का सामुनि जो हिम्मत हुछी, उ यो छै कि अगर हम उकी इच्छा का अनुसार केले माँगून, त उ हमरि सुणछो।</verse>
				<verse number="15">और जब हम जाणनू कि जो कुछ ले हम परमेश्वर थैं माँगून, उन हमरि सुणछो, त यो ले जाणनू कि जो ले हमूले उथैं माँगछ्य उ हमूनले पाछ।</verse>
				<verse number="16">अगर कोई अपून विश्वासी भाई स इसो पाप करून देखो, जेको परिनाम मौत नै हो, तो उ प्रार्थना करो, और परमेश्वर ऊस उनून खिन, जिनूनले इसो पाप करछय जेको परिनाम मौत नै हो, जीवन द्योलो। पाप इसो ले हुछो जेको परिनाम मौत छै, त मैं तुमून येका बारिमें में प्रार्थना करून खिन नै कुंनू।</verse>
				<verse number="17">सब प्रकारो बुरा काम त पाप छन, लेकिन इसो पाप ले छै, जेको परिनाम मौत नाहातिन।</verse>
				<verse number="18">हम जाणनू, कि जो कोई परमेश्वर सन्तान छै, उ पाप नै करूनो; क्याखिनकि जो परमेश्वरे की सन्तान छै, उ उनेरि रक्षा करछो, और उ शैतान ऊस छू नै पानो।</verse>
				<verse number="19">हम जाणनू, कि हम परमेश्वर भटे छा, और पुरो संसार उ शैताना का वश में छै।</verse>
				<verse number="20">और यो ले जाणनू, कि परमेश्वरो को च्योलो यीशु मसीह आग्योछ, और उले हमून समझ ले दी रैछ, कि हम उ सच्चा परमेश्वर स पछयाणा, हम सच्चा परमेश्वरा का दगाड़ करीबी रिशता में छा क्याखिनकि उक च्योलो यीशु मसीह का दगाड़ हमोरो करीबी रिशता छै। सच्चो परमेश्वर और अनन्त जीवन योई छै।</verse>
				<verse number="21">हे नान्तिनो, इस हरेक चीजून भटे दूर रया, जो तुमार दिलून में परमेश्वर की जाग ली सकछो।</verse>
			</chapter>
		</book>
		<book number="63">
			<chapter number="1">
				<verse number="1">मैं यहूना, विश्वासीन को अगुवा यो चिठ्ठी स्यैनिमैंसी स और उक नान्तिना का नाम लिखूनमरयूँ, जैस परमेश्वर ले चुन रैछ। मैं सच्ची में तुमूनथैं प्रेम करछूँ, और मैंई नै; बल्कि उन सब ले तुमूनथैं प्रेम करनान, जो परमेश्वरा का सच्चाई में विश्वास करनान।</verse>
				<verse number="2">हम तुमूनथैं उ सच्चाई का कारण प्रेम करनू, जो हमार भितर रूछो और हमेशा हमार दगाड़ रौलो।</verse>
				<verse number="3">मैं प्रार्थना करछूँ, पिता परमेश्वर, और उनोरो च्योलो यीशु मसीह का अनुग्रह, दया और शान्ति हमार दगाड़ बनिनाकी रौ, जो सच्चाई स मान्नान और एक दुसराथैं प्रेम करनान।</verse>
				<verse number="4">जब मैंले सुणछ्य त मैं भौत खुश भ्यो, कि त्यारा कुछ नान्तिना ऊस हुकुम का अनुसार सच्चाई को पालन करभेरन जीन मर्यान, जैस हमार पिता परमेश्वर हमून करून खिन कै रैछ।</verse>
				<verse number="5">अब ये स्यैनिमैंसी मैं तैथैं बिनती करछूँ, कि हमून एक-दुसरा का दगाड़ प्रेम करून चैछो। यो कोई नय्या हुकुम नाहातिन, बल्कि उई हुकुम छै जैस हम उई बखत भटे जाणनू, जब हमून ले मसीह का हुकमून को पालन करून शुरू करछ्य।</verse>
				<verse number="6">परमेश्वरो को सच्चो प्रेम यो छै कि हम उक हुकुम का अनुसार जीवन जीया; यो उई हुकुम छन, जो तुमूनले शुरू भटे सुणिना को छै और येक पालन करून ले चैछो।</verse>
				<verse number="7">मैं यो येक कारण कुनमर्यू क्याखिनकि भौत सारा झूठ्ठी शिक्षा दिनवाला लोग यो संसार में आ ग्यान, और उन कुंनान यीशु मसीह यो संसार में आदिमी शरीर में नै आयो। हो भेरन आछ, अगर कोई आदिमी इसो कुंछो, उ मसीह विरोधी छै जो लोगून हमेशा ध्वाका दीछो।</verse>
				<verse number="8">येक कारण तुमून ध्यान राँखून चैछो कि काँई यो लोग तुमून ध्वाका नै दीन, ताकि परमेश्वरा का सेवा खिन करिना की कोशिश बेकार जन जौ, और परमेश्वर तुमेरि सेवा को तुमून ईनाम जरूर द्योलो।</verse>
				<verse number="9">उन लोग सच्ची शिक्षा भटे भटक जानान, और मसीह शिक्षा को पालन नै करना, उन परमेश्वरा का दगाड़ में नाहातिन। जो कोई मसीह की शिक्षा पालन करछो, उ पिता परमेश्वरा का दगाड़ और उक च्याला, यीशु मसीह का दगाड़ में संगति में छै।</verse>
				<verse number="10">अगर कोई तुमार पास अ, और यो सच्ची शिक्षा नै दे, ऊस नै त घर में उन दी, और नै नमस्कार करभेरन बढ़ावा दी।</verse>
				<verse number="11">क्याखिनकि जो कोई इसो आदिमी स नमस्कार करछो, उ आदिमी ले उक द्वारा करिना का बुरा कामून को जिम्मेदार हुछो।</verse>
				<verse number="12">और ले कई बात छन, जो मैं तुमून लिखून चाछूँ, लेकिन मैं उनून इसीकैं एक चिठ्ठी में नै लिखून चानू। मैंस आश छै कि मैं तुमार पास आभेरन आमुनि-सामुनि बातचीत करोलो, जेलै हमरि खुशी पुरी हो जौ।</verse>
				<verse number="13">त्यारा बैनिका नान्तिना, जिनून परमेश्वर ले चुनियान, उन या छन, तैथैं नमस्कार कुंनान।</verse>
			</chapter>
		</book>
		<book number="64">
			<chapter number="1">
				<verse number="1">मैं यहूना विश्वासीन को अगुवा यो चिठ्ठी प्रिय मित्र गयुस तैंस लिखूनमरयूँ, मैं तैंस सच्चो प्रेम राखछूँ।</verse>
				<verse number="2">प्रिय मित्र, मेरि यो प्रार्थना छै; कि जसो तेरो आत्मिक जीवन बढून मर्योछ, उसीकैं तैं सब बातुन में बढ़नै रौ, और तैं भलो चंगो रौ।</verse>
				<verse number="3">क्याखिनकि जब कुछ विश्वासी भाईन ले आभेरन, त्यारा बारिमें हमून बताछ कि तैं परमेश्वरा का बाटान में सच्चाई चलछै, तो मैं भौत खुशी भ्यू।</verse>
				<verse number="4">जब ले मैं यो सुण छूँ कि उन लोग जो म्यारा नान्तिनान की नियाती छन, उन उसीकैं जीन मर्यान, जो सच्ची में परमेश्वरे ले हमून दिखाछ कि उन सच्चाईक अनुसार जीन मर्यान, त यो मैंस और ले खुश कर दीछो।</verse>
				<verse number="5">हे प्रेमा दगड़ियो, तैंले पुरी ईमानदारी का दगाड़ हमार विश्वासी भाईन का दगाड़ भलाईक काम कर्यान, याँ तक कि तैं उन लोगून की ले मद्दत करछ्य जो सुसमाचार प्रचार खिन यात्रा करनान जिनून तैं नै जाणछ्य।</verse>
				<verse number="6">उनूनमें भटे थ्वाड़ लोगून ले याँ का विश्वासीन बताछ कि तैं अपून दगाड़ का विश्वासी भाईन कतुक प्रेम करछै। अब मैं तैथैं कुंन चाँछूँ कि जब उन त्यारा पास भटे जाला, त तैंस इन लोगून की मद्दत करनै रून चैछो, क्याखिनकि येले परमेश्वर खुश हुछो।</verse>
				<verse number="7">क्याखिनकि इन चार लोग येक कारण सफर करून मर्यान ताकि मसीह का बारिमें लोगून बता सकूंन, और अविश्वासीन भटे केले मद्दत नै लीना।</verse>
				<verse number="8">येक कारण इसान को अपून घर में स्वागत करा और जो उनेरि जरूरत छै उ दी, जेले हम ले सच्ची सेवा में हिस्सेदार बना।</verse>
				<verse number="9">मैले पैलिक ले येका बारिमें तुमार विश्वासीन की मण्डली एक चिठ्ठी लिखीना की छी, लेकिन दियुत्रिफेस म्यारा हुकमून मानून है मना करछो, क्याखिनकि उ हमेशा भटे खुदै की मण्डली को अगुवा बनून चाँछो।</verse>
				<verse number="10">येक कारण मैं वाँ उलो, त मैं विश्वासीन की मण्डली थैं खुलभेरन बात करलो उन कि-कि करून मर्यान। इतुकैं नै, उन खुद सुसमाचार प्रचार करूनवाला विश्वासी भाईन ग्रहण नै करनो, और जो लोग ग्रहण करून चांनान त उ उनूनले मना करछो और याँ तक कि उ उनून विश्वासीन कि मण्डली में भटे भ्यार निकाल दीछो।</verse>
				<verse number="11">हे प्रेमो दगड़ियो, बुर काम करूनवाला लोगून का दगाड़ नै, जो भलाई का काम करछो उ परमेश्वर की सन्तान छै, लेकिन जो बुराई काम करछो, उनूनले परमेश्वरस नै देख्यो।</verse>
				<verse number="12">विश्वासीन की मण्डली में हरेक कुंनान की देमेत्रियुस एक निको आदिमी छै और हम ले सच्ची कुंनू की उ एक निको आदिमी छै किलैकी उ सच्चाईक अनुसार जीत छै, और तुम यो जाणछा की हमरि गवाही सच्ची छै।</verse>
				<verse number="13">और ले भौत बात छन जो मैं तैंस बतून चाँछूँ, लेकिन मैं उनून यो तरीका ले एक चिठ्ठी मैं नै लिखून चाँनू।</verse>
				<verse number="14">लेकिन मैंस आश छै कि मैं त्यारा पास उलो, और त्यारा आमुनि-सामुनि बातचीत करूँ।</verse>
				<verse number="15">मैं प्रार्थना करछूँ तैंस शान्ति मिलनै रो। याँ का विश्वासी दगड़िया तैंस नमस्कार करनान वाँ का हरेक विश्वासी दगड़ियान नमस्कार कै दीया।</verse>
			</chapter>
		</book>
		<book number="65">
			<chapter number="1">
				<verse number="1">मैं यहूदा, जो यीशु मसीह को एक सेवक और याकूबो को नान भाई छूँ। मैं यो चिठ्ठी तुम लोगून लिखून मरैयू, जिनून परमेश्वरेले अपून में विश्वास करून खिन बुलाछ। हमोरो पिता परमेश्वर तुमून प्रेम करछो और तुम यीशु मसीह का द्वारा सुरक्षित छा।</verse>
				<verse number="2">मैं प्रार्थना करछूँ कि परमेश्वर में तुमून दया, शान्ति और प्रेम मिलनै रौ।</verse>
				<verse number="3">हे म्यारा विश्वासी भाईयो, हालाकि मैं तुमून परमेश्वरा का उद्धार का बारिमें भौत कुछ लिखून चाछ्यू, जैमें हम सब भागीदार छा, लेकिन अब मैंस यो जरूरी लगून मर्योछ कि तुमून प्रोत्साहित करन खिन लिखू कि सच्ची शिक्षा की रक्षा खिन लड़ा। परमेश्वरेले अपून लोगून यो सत्य एक बार हमेशा खिन दी दीछ जो कभै नै बदलनो।</verse>
				<verse number="4">मैं तुमून यो लिखून मरैयू किलैकी कुछ लोग जो यीशु मसीह में विश्वास करना को दिखावा करनान, उन तुमार बीच में शामिल हो ग्यान। उन परमेश्वरो को आदर नै करना और उन गलत शिक्षा दीनान कि परमेश्वर अपून अनुग्रह ले हमार पापून माफ कर दीछो, येक कारण हम गलत कामून में जीवन जी सकनू। उन यीशु मसीह स अस्वीकार करनान, जो हमोरो एकमात्र मालिक और प्रभु छै। भौत बखत पैलि भटे, पवित्रशास्त्र में लिखीना को छै कि परमेश्वर इस लोगून दण्ड द्योलो।</verse>
				<verse number="5">अब मैं तुमून याद दिलून चाछूँ, हलाकि तुमून पैलि है मालूम छै, कि परमेश्वर ले इस्राएली लोगून गुलामी है आजाद करवाछ और उनून मिस्र देश भटे भ्यार ली आछ, लेकिन बाद में उले उन सबून मार डालछ्य, जिनूनले जंगल में उमें विश्वास नै कर्यो।</verse>
				<verse number="6">याद करा कि प्रभु ले उन स्वर्गदूतून कसकैं दण्ड दीछ, जिनूनले अपूनी जिम्मेदारीन नै निभाई, बल्कि उनूनले अपूनी पदविन त्याग दीछ। प्रभु ले इन दुष्ट दूतून अन्यार जाग में राख रैछ, और इसा जंजीरून ले बाँद रैछ जिनून कोई नै तोड़ सकनो ताकि महान दिन में उनोरो न्याय हो सको।</verse>
				<verse number="7">येक कारण इन इस्राएली लोगून और उन स्वर्गदूतून, उन लोगून ले याद राखा जो सदोम और अमोरा शैहरून और उक आश-पासा का शैहरून में रूछ्या कि उनार दगाड़ कि भ्योछ। उन लोग ब्यभिचारी हो गैछ्या और हर प्रकार का कुकर्म में भ्रष्ट हो गैछ्या। येक कारण परमेश्वरेले उनून आग ले नाश कर दीछ। उनार दगाड़ जो भ्योछ उ झूठ्ठा शिक्षकून खिन एक चेतावनी बन गैछ कि उनूनले हमेशा का आग ले दण्ड दीई जालो।</verse>
				<verse number="8">उसीकैं, यो अधर्मी लोग दावा करनान कि परमेश्वरेले उनून दर्शन में दिखाछ कि उन गलत कामून में अपूनो जीवन जी भेरन अपून शरीरून भ्रष्ट कर सकनान, और परमेश्वरा का अधिकार स नै मानना और उन महिमामय स्वर्गदूतून का बारिमें बुरा बोलनान।</verse>
				<verse number="9">लेकिन याँ तक कि प्रधान स्वर्गदूत मीकाईल ले ऊसो नै कर्यो जसो यो अधर्मी लोग करनान। जब शैतान ले मीकाईल थैं यो बात में विवाद करछ्य कि उनूनमें भटे को परमेश्वरो को संदेश दिनवाला स मूसा का शरीर स दफनूना को अधिकार छै, त मीकाईल स्वर्गदूत का पास इन लोगून की तुलना में भौत ज्यादा अधिकार छै, फिरले उले शैतान थैं बुरी बात नै कर्या और उमें दोष नै लगायो। बल्कि उले सिर्फ इतुक क्योछ, “प्रभु तैंस डाँठौ।”</verse>
				<verse number="10">इन लोग जो परमेश्वरै की अराधना नै करना और उन बातुन को बिरोध में बुरा शब्दून को इस्तमाल करनान जो उनून समझ में नै ऊँना; और जब उन जानवरून की नियाती ब्यवहार करनान और जिन कामून उन जाणनान उनून उन बिना सोचे-समझे करनान, त उन परमेश्वरै की तरफ भटे दण्ड भुगताला।</verse>
				<verse number="11">उन लोगून में हाय। किलैकी उनूनले आदमा का पुत्र कैनाक नियाती दुष्टताले ब्यवहार करिना को छै, जैले अपून भाई की खून कर दीछ किलैकी उ उखिन जलछ्यो, किलैकी परमेश्वरेले उक भाई को बलिदान स स्वीकार करछ्य और उक बलिदान स स्वीकार नै कर्यो। उन बिलाम की नियाती छन, जैले परमेश्वरा का लोगून पाप करून खिन उसकूना की कोशिश करछ्य, ताकि उ, उ धन स पा सको। उन कोरह का नियाती नाश हो जाला, जैले उ अधिकार का खिलाफ में बिरोध करछ्य जो परमेश्वरेले मूसास दीईना छ्यो।</verse>
				<verse number="12">जब यो लोग प्रभु का प्रेम स याद करभेरन तुमार दगाड़ खानखिन खानान, त यो उन खतरनाक चट्टानून की नियाती हुनान जो समुद्रा का तलि लुकिनाका हुना जो तुमोरो डूबना क कारण बन सकछो। उ उन ग्वालान का नियाती छन जो सिर्फ अपूनी चिन्ता करनान। उ उन बादलून का नियाती छन जो भूमि में बरखा करिना का बिना बस गरजनान। उन जाड़ा का मौसम का रूखून का नियाती हुनान जिनरी द्वी बार मौत हुछी किलैकी उ कोई फल नै दीना और जड़ है उखड़ जानान।</verse>
				<verse number="13">जसकैं समुन्द्र की प्रचण्ड लहर गन्दो झाग बनूछी, उसकैं इन लोग बेशर्मी का काम करनान। उन थ्वाड़ा तारान की नियाती छन जो एक सिदा बाट में नै हिटना, उन सही बाटो नै देखून। प्रभु उनूनखिन एक जाग राखून मर्योछ जो पुरी रीतिले अन्यारा में छन जाँ उनून हमेशा खिन रून पड़लो।</verse>
				<verse number="14">हनोक ले, जो आदम भटे सतूँ पीढ़ी में पैद भ्योछ, इन लोगून का बारिमें भविष्यद्वाणी करीनाकि छी, जब उले क्योछ, देखा प्रभु जरूर अपून पवित्र लाखू स्वर्गदूतून का दगाड़ वापिस आलो,</verse>
				<verse number="15">कि सब लोगून को न्याय करून खिन और सब अधर्मी लोगून में उनार द्वारा करिनाका बेशर्मी और बुरा कामून का कारण दोष लगून खिन और उन सारी भद्दी बातुन का कारण जो पापी लोगून ले उक खिलाफ कईनाका छन।</verse>
				<verse number="16">इन लोग हमेशा परमेश्वरा का खिलाफ बोलनान और दुसरा लोगून में गलती खोजनान। उन लगातार उन बुरा कामून करनान जो उनार दिल करून चांछो। उन अपून बारिमें घमण्ड ले दावा करनान और अपून फैद खिन दुसरा लोगून की चापलूसी करनान, उन पिता परमेश्वरा का तरफ भटे दण्ड भुगताला।</verse>
				<verse number="17">लेकिन हे म्यारा विश्वासी भाईयों, तुम उन बातुन याद राखा; जो हमार प्रभु यीशु मसीह का प्रेरित भौत पैलिक बता चुकियान।</verse>
				<verse number="18">उन तुमूनथैं कुछ्या, “हमार प्रभु यीशु का लौटून है पैलिक, इसा लोग होला जो प्रभु और उक लोगून की मजाक उड़ाला। योई उन लोग छन जिनोरो जीवन उनेरि अपूनी बुरी इच्छान का वश में छै।”</verse>
				<verse number="19">इन उन लोग छन जो तुमून अलग-अलग दलून में बाँणना को कारण बननान। उन अपूनी इच्छान का अनुसार ब्यवहार करनान, और उनूनमें पवित्र आत्मा नाहातिन।</verse>
				<verse number="20">लेकिन हे म्यारा विश्वासी भाईयो, तुमून एक-दुसरा की मद्दत करनै रून चांछो ताकि उ पवित्र सच्चाई में जिनूनमें तुम विश्वास करछा, एक दुसरा स बढ़ा सकां। तुमून पवित्र आत्मा की सामर्थ ले मार्गदर्शन पाभेरन प्रार्थना करून चांछो।</verse>
				<verse number="21">तुमून यो जाणभेरन अपूनो जीवन जीन चांछो परमेश्वर तुमूनथैं प्रेम करछो। जब की तुम उ दिनेकी आश करछा, जब हमोरो प्रभु, यीशु मसीह वापस आलो ताकि तुमून अनन्त जीवन मिलो किलैकी उले हमूनमें दया करछ्य।</verse>
				<verse number="22">उन लोगून का प्रति दयालु बना जो नै जाणना कि केमें विश्वास करा।</verse>
				<verse number="23">थ्वाड़ा दुसारा लोग जिनून तुम जाणछा, उन नरक का तरफ जानमर्यान। उनून उ अनन्त आग भटे जल्दी खीचभेरन बचा ली। और दुसरान में ले दया दिखा। लेकिन फिरले ऊसो तरीका को पाप करून है बचुन खिन सतर्क रौ। याँ तक कि उन कपड़ान भटे ले नफरत करा जिनूनमें उनूनले अपून पापी कामून ले दाग लगायान।</verse>
				<verse number="24">एकमात्र परमेश्वरै छै जो तुमेरि रक्षा कर सकछो, और तुमून निर्दोष और आनन्दित बना सकछो, जब उ तुमून अपूनी महिमा में अपून सामुनि ठाड़ करछो। उले हमून हमार प्रभु यीशु मसीह का द्वारा बचाछ। महिमा, गौरव, सामर्थ और अधिकार हमारा प्रभु यीशु मसीह का द्वारा जसकैं हमेशा भटे छै, अब हो, और हमेशा-हमेशा तक रौ। आमीन।</verse>
				<verse number="25"></verse>
			</chapter>
		</book>
		<book number="66">
			<chapter number="1">
				<verse number="1">यो किताब उन बातुन का बारिमें बतूछी जो परमेश्वरेले यीशु मसीह स दिखाछ। परमेश्वरेले ऊस दिखाछ ताकि उ अपून सेवकून उन घटनानका बारिमें बता सको जो जल्दी होला। यीशु ले अपून स्वर्गदूत स उ संदेशा का दगाड़ म्यारा पास मतलब अपून दास यहूना का पास भेजछ्य।</verse>
				<verse number="2">येक कारण, मैं यहूना ले उ सब कुछ लिखछ्य जो मैंले देखछ्य। मैंले यो किताब में परमेश्वरा का बचन और उ सच्ची शिक्षा लिखभेरन बताईना की छै जिनरी जानकारी यीशु मसीह ले मैंस दीईना की छी।</verse>
				<verse number="3">परमेश्वर हर उ आदिमीस आशीष द्योलो जो यो भविष्यवाणी स दुसरान पढ़भेरन सुणूछो, और उ हर उ आदिमीस आशीष द्योलो जो येस सुणछो और येस मानछो। किलैकी इन बात जल्दी होला।</verse>
				<verse number="4">मैं, यहूना, यो चिठ्ठी उन सातों विश्वासीन की मण्डलीन खिन लिखून मरैयू जो आसिया प्रदेश में छन। मैं प्रार्थना करछूँ कि तुमून परमेश्वरै की तरफ भटे अनुग्रह और शान्ति मिलो, और उ उई परमेश्वर छै जो छै जो हमेशा छ्यो और जो ऊँनवालो छै। और उन सात आत्मान का तरफ भटे, जो परमेश्वरा का सिंहासन का सामुनि छन।</verse>
				<verse number="5">और यीशु मसीह का तरफ भटे जैका बचन में भरोसा करि जा सकछो उई छै जो मरिना में भटे पैलो छै और उ यो संसाराक सबै राजान में राज करछो। तुमून अनुग्रह और शान्ति मिलनै रो। उ हमून प्रेम करछो और हमून बचाछ, उ अपून खूनाक द्वारा हमून हमार पापून भटे छुड़ूछो। उले हमून इसो बना दीछ, जिनोरो परमेश्वर राजा छै और उले हमून अपून पिता परमेश्वर खिन याजक बना दीछ। ऊस आदर और अधिकार हमेशा और हर बखत मिलनै रौ। आमीन।</verse>
				<verse number="6"></verse>
				<verse number="7">सुणा, उ बादलून का दगाड़ ऊँनवालो छै; और हरेक आदिमी ऊस देखाला, जो लोग उकी मौत खिन जिम्मेदार छ्या, उन ले ऊस ऊँन देखाला। संसारा का सब लोग जोरले रोला जब उन ऊस देखाला। होई, इसो होलो! आमीन।</verse>
				<verse number="8">प्रभु परमेश्वर कुंछो, “मैं अल्फा और ओमेगा छूँ, जैको मतलब छै पैलो और आखरी। मैं उई परमेश्वर छूँ जो छै, जो हमेशा भटे छयो, और जो ऊँनवाला छै, और सर्वशक्तिमान छै।”</verse>
				<verse number="9">मैं, यहूना, जो मसीह में तुमोरो दगड़िया छूँ, तुमार नियाती सताई जाछूँ। मैं परमेश्वर क राज्यो को एक नागरिक छूँ जसकैं तुम छा, और मैंस ले अपूनी परेशानीन उसीकैं धैर्य दगाड़ सहन करूनो चैछो जसकैं तुम करछा। मैं परमेश्वरा का बचन को प्रचार करून और यीशु का बारिमें बतूना का कारण पतमुस टापू में भेज दी गैछ्यू।</verse>
				<verse number="10">मैं प्रभु की अराधना का दिन पवित्र आत्मा मैंमें आछ, मैंले अपून पछिल है कैसे बोलूनो सुणछ्य यो आवाज तुरी आवाज की नियाती ऊची और साफ आवाज में बोलून मरैछ्यो।</verse>
				<verse number="11">उले मैंथैं क्योछ, “जो कुछ तै देखछै, ऊस किताब में लिखभेरन येस उन सातों विश्वासीन की मण्डली स भेज जो इन शैहरून में छन; मतलब इफिसुस, स्मुरना, पिरगमुन, थुआतीरा, सरदीस, फिलदिलफिया और लौदीकिया स।”</verse>
				<verse number="12">मैं यो देखून खिन पछिल कै मुड़ियो कि को मैंथैं बात करून मरैछ्यो। जब मैं मुड़ियू, त मैंले सात सूना का दीपदान देख्यान;</verse>
				<verse number="13">और उन दीपदानून क बीच में एक प्राणी ठाड़ छ्यो, जो एक आदिमी का नियाती दिखाई दीन मरैछ्यो, उले एक लम्बो कपाड़ा पैनिन को छ्यो जो उक खुटान तक पुजिना को छ्यो, और अपूनी छाती में सूना को पट्टा पैनिना को छ्यो।</verse>
				<verse number="14">उक ख्वारा का बाल सफेद ऊना का जसा और हियू जसा चमकून मरैछ्या। और उक आँखा आगा का लपटून की नियाती छ्या।</verse>
				<verse number="15">उक खुटा पीतल का नियाती चमकून मरैछ्या जो तेज गर्म आग में चमकछो। जब उ बोलछ्य त उकी आवाज इसी छी जसकैं एक ठूला पानि झरना की आवाज छै।</verse>
				<verse number="16">उ अपून दैना हात में सात तारा लीईना को छ्यो, और उक मुख भटे तेज द्वी धारी तलवार निकलछी। उको मुख छकाला का सूरज की नियाती चमकून मरैछ्यो।</verse>
				<verse number="17">जब मैंले ऊस देखछ्य त मैं तुरन्त उक खुटान में खिती पड़ियू। मैं एक मरिनाका आदिमी को जसो होग्यू लेकिन उले मैंमें अपूनो दैन हात राखभेरन यो क्योछ, जन डर; मैं आदि और अन्त छूँ, मैं उ छूँ जो हमेशा ज्यूनो छूँ।</verse>
				<verse number="18">मैं एक बार मर गैछ्यू। लेकिन अब मैं ज्यूनो छूँ और मैं हमेशा ज्यूनो रूलो। म्यारा पास उ चाँबी छन जो मैंस उ जाग स खोलना की ताकत दीछी जाँ मरिनाका लोग छन और उनून दुबारा है ज्यूना करना की ताकत छै।</verse>
				<verse number="19">येक कारण जो तैले देखछ्य, उ लिख ले, मतलब उन द्वीवै चीजून जो एल तक होर्यान और जो बाद में होला।</verse>
				<verse number="20">अब मैं बतुलो कि म्यारा दैन हात में सात तारान को कि मतलब छै और उ सात सूना का दीपदान सात को कि मतलब छै जो कि पैलि मालूम नी छ्यो। येको मतलब यो छै सात तारान उन स्वर्गदूतून दिखूछो जो विश्वासीन की मण्डली की रखवाली करछी, और उ सात सूना का दीपदान सात विश्वासीन की मण्डली देखूछी।</verse>
			</chapter>
			<chapter number="2">
				<verse number="1">उले मैंथैं यो ले क्योछ कि, “इफिसुस शैहरा का विश्वासीन की मण्डली का स्वर्गदूत स यो संदेश लिख: मैं उई छूँ जो अपून दैन हात में सात तारा लीभेरन राख छूँ और मैं उई छूँ जो सुना का सात दीपदानू का बीच में चलछूँ। जो मैं कुछूँ ऊस सुण:</verse>
				<verse number="2">मैं जाणछूँ कि तैं कि करछै, तैं कसी मेहनत करछै और कभै हार नै माननै। मैं यो ले जाणछूँ कि तै बुरा लोगून की झूठ्ठी शिक्षान सहन नै करनै। तैंले उन लोगून परख रैछ जो कुंनान कि उन प्रेरित छन लेकिन सच्ची में नाहातिन, और तैंले उनून झूठ्ठो पाछ।</verse>
				<verse number="3">तैंले धैर्य ले दुखून सहन करिना को छन किलैकी तैं मैंमें विश्वास करछै, और तैं कभै हार नै माननै।</verse>
				<verse number="4">लेकिन मैंस तैंथैं शिकायत छै: अब तैं मैंस ऊसो प्रेम नै करनै जसो प्रेम तै मैंस तब करछ्य जब तैंले पैलि बार मैंमें विश्वास करिना को छ्यो।</verse>
				<verse number="5">येक कारण याद कर कि तैले शुरूवाद में मैंस कसो प्रेम करछ्य और अब तै मैंस ऊस प्रेम नै करनै। यो बात ले पश्चाताप कर और तै मैंस ऊसोई त प्रेम करून शुरू कर जसो तैले शुरूवाद में करछ्य। अगर तै पश्चाताप नी करले त मैं त्यारा पास ऊँलो और जाँ तेरो दीपदान राख रैछ ऊस वाँ भटे हटाभेरन तैंस दण्ड द्यूलो।</verse>
				<verse number="6">लेकिन एक निकी बात छै जो तै करछै। उ यो छै कि तै नीकुलइयून का द्वारा सिखाई जानवाला बुरा कामून भटे नफरत करछै, ठीक उसीकैं जसकैं मैं नफरत करछूँ।</verse>
				<verse number="7">जो कोई यो बात स सुण सकछो जो मैं कुन मरयू, उ यो समझना की कोशिश करो कि, पवित्र आत्मा विश्वासीन की मण्डली थैं कि कुंछो: उन लोग जो शैतानी ताकतून हरूनान, उनून मैं जीवन दीन वाला रूख भटे फल खाना को हुकुम द्यूलो, जो परमेश्वरा का स्वर्गलोक में छै।”</verse>
				<verse number="8">स्मुरना शैहरा का विश्वासीन की मण्डली का स्वर्गदूत स यो लिख, मैंई उ छूँ जैले सब चीजून शुरू करिना को छै, और मैंई उ छूँ सब चीजून को अंत करूलो। मैं मर गैछ्यू, लेकिन अब मैं ज्यूनो छूँ और हमेशा ज्यूनो रूलो, जो मैं कुछूँ ऊस सुण।</verse>
				<verse number="9">मैं जाणछूँ कि तैंस सताई ग्योछ और तै गरीब छै। लेकिन आत्मिक मामूल में तै भौत धनी छै। मैं उन लोगून का बारिमें जाणछूँ जो दावा करनान कि उन परमेश्वरा का चुनिना का लोग छै मतलब यहूदी, पर उन छन नै। उन त्यारा बारिमें बुरी बात बोलनान, लेकिन सच्ची में उन उ दल का सदस्य छन जो शैताना का छन।</verse>
				<verse number="10">उन दुखून भटे जन डर जो तैंस मिलाला। शैतान तुम में भटे थ्वाड़ा लोगून जेलखान में डालून वाला छै ताकि उ तुमेरि परीक्षा कर सको। तुम दस दिनून तक भौत मुसीबतून में रौला। पर मैंमें विश्वास करूनो कभै नी छोड़ला, चाहे तुमून मरनोई क्याखिन नै पड़ो, किलैकी मैं तुमून तुमेरि जीत को ईनामा का रूप में अनन्त जीवन द्यूलो।</verse>
				<verse number="11">जो कोई यो बात स सुण सकछो जो मैं कुनमर्यू, उन यो समझना की कोशिश करून कि, पवित्र आत्मा विश्वासीन की मण्डली थैं कि कुंछो: उन लोग जो बुराईस हरा दीनान, उनून उ दण्ड में शामिल नी करि जालो जो कि दुसरी मौत छै।</verse>
				<verse number="12">पिरगमुन शैहर की विश्वासीन की मण्डली का स्वर्गदूत स यो लिख: मैंई छूँ जैका पास तेज दोधारी तलवार छै। मैं जो कुछूँ ऊस सुणा:</verse>
				<verse number="13">मैं जाणछूँ कि तैं उ जाग में रूँ छै जाँ शैतान राज्य करछो। तैं म्यारा प्रति विश्वासयोग्य बनिनाको रैछ और मैं-में विश्वास करून कभै बंद नै कर्यो। तैंले उ बखत ले विश्वास करछै जब उनूनले अन्तिपास स वाँ मार डालछै जाँ शैतान राज्य करछो। अन्तिपास ले लोगून म्यारा बारिमें विश्वासयोग्यता ले बताछ।</verse>
				<verse number="14">लेकिन मैंस त्यारा बारिमें थ्वाड़ा शिकायत छन। किलैकी तैं उन लोगून का विरोध नै करनै जो झूठ्ठी शिक्षा दीनान, जसकैं परमेश्वरो को संदेश दिनवाला बिलाम ले अतीत काल में दीईना की छी। बिलाम ले राजा बालाक स सिखाछ कि इस्राएल का लोगून पाप करून खिन उकसून खिन कि करून चैंछो। उले उनून मूर्तिन चढ़ाईनाको खानो खूँन और व्यभिचार करून।</verse>
				<verse number="15">उसीकैं तुमार बीच में थ्वाड़ा लोग छन जो नीकुलइयून का दल की शिक्षान मान्नान।</verse>
				<verse number="16">येक कारण अपून पापून है पश्चाताप करा, अगर तैं इसो नी करलै त मैं जल्दी ही ऊँलो और उन जो गलत शिक्षा दीनान उन लोगून का विरूद्ध उ तलवारै स लड़ूलो, जो म्यारा मुँख भटे निकलछी जो म्यारा वचन छन।</verse>
				<verse number="17">जो कोई यो बात स सुण सकछो जो मैं कुनमर्यू, उ यो समझना की कोशिश करून कि, पवित्र आत्मा विश्वासीन की मण्डली थैं कि कूछो: उन लोग जो बुराई की शक्ति स हरूनान, मैं उनून उ मन्ना में भटे के द्यूलो जो लुकाईनाको छै। मैं उनूनमें भटे हरेक स एक सफेद ढ़ुगो ले द्यूले, जैमें एक नय्या नाम लिखीनाको होलो। जो आदिमी ऊस प्राप्त करोलो, ऊस छोड़भेरन कोई ले उ नाम स नै जाण सकलो।</verse>
				<verse number="18">थुआतीरा शैहर की विश्वासीन की मण्डली स स्वर्गदूत स यो लिख: मैं, परमेश्वरोको च्योलो, तुमूनथैं यो बात कुनमर्यू, जैका आँख आगा की लपटून की नियाती और खुटा पीतल की नियाती चमकून मर्यान जो तेज गर्म आगा में चमकछो। मैं जो कुनमर्यू ऊस सुणा:</verse>
				<verse number="19">मैं जाणछूँ की तैं कि करछै, तैं कसकैं मेहनत करछै और कभै हार नै माननै। मैं जाणछूँ की तुम एक दुसरा स प्रेम करछा और तुम मैंमें मजबूती ले भरोस करछा। मैं जाणछूँ कि तुमूनले कसकैं एक दुसरा की मद्दत करछ्य, और तुमेरि सहना की क्षमता ले जाणछूँ। मैं यो ले जाणछूँ कि तुम अब इन निका कामून उ बखत है ज्यादा करून मरेयछा जब तुमूनले मैंमें विश्वास करछ्य।</verse>
				<verse number="20">लेकिन मैंस त्यारा बारिमें थ्वाड़ा शिकायत छन। तुम उ स्यैनि इजेबेल स झूठ्ठी शिक्षा फैलून दीछा। उ कुछी कि उ एक भविष्यद्वक्तिन छै, लेकिन अपूनी शिक्षान ले उ म्यारा लोगून व्यभिचार का पापून में शामिल हुन खिन और मूर्तिन चढ़ाई जानवालो खानो खानखिन भरमूनान।</verse>
				<verse number="21">मैंले ऊस उक पापून है पश्चाताप करनाको मौक दीछ, लेकिन उ-उन बुरा कामून करून है बंद करून है इन्कार करछी।</verse>
				<verse number="22">येक कारण सुण, मैं ऊस रोगी कर द्यूलो। और जो उक दगाड़ व्यभिचार करनान, मैं उनार भयानक कष्ट सहना को कारण बनलो, जब तक कि उन उक दगाड़ जो बुरा काम करनान, उहै पश्चाताप करून है तैय्यार नै हो जूँन।</verse>
				<verse number="23">मैं उन लोगून मार डाललो जो उनेरि शिक्षान मान्नान, और पुरी विश्वासीन की मण्डली जाण जालि कि मैंई छूँ जो हरेक आदिमी का मनाका विचारून और मक्सदून की परख करछूँ। मैं तुमूनमें भटे हरेक स उक कामून का अनुसार फल द्यूलो।</verse>
				<verse number="24">लेकिन थुआतीरा शैहर की विश्वासीन की मण्डली में तुम बाकि लोगून ले उ झूठ्ठी शिक्षा स नै मानियो। तुमूनले उमें हिस्सा नै लियो जैस शैतान की गहरी बात कुंनान। मैं तुमूनथैं कुंछो कि मैं तुमूनमें कोई ले खास हुकुम नी थोपूलो, सिवा येक कि जब तक मैं नै ऊँ तब तक मैंमें मजबूती ले विश्वास करनै रौ।</verse>
				<verse number="25"></verse>
				<verse number="26">उन लोग जो बुराई की शक्ति स हरा दीनान और संसारा का अन्त तक मेरो हुकूमो को पालन करनै रूनान, त मैं उनून देशून में राज्य करना को अधिकार द्यूलो।</verse>
				<verse number="27">मैं उनूनले राज्य करना को उई अधिकार द्यूलो जसो म्यारा पिता ले मैंस दी रैछ। उनोरो राज्य लूवा का नियाती मजबूत होलो जो टूटनो नै, और उनार शत्रु टूटिना का माटाका भाणान की नियाती होला।</verse>
				<verse number="28">मैं ऊस अपूनी जीत स दिखून खिन रात्तै को तारो ले द्यूलो।</verse>
				<verse number="29">जो कोई यो बात स सुण सकछो जो मैं कुनमर्यू, उ यो समझना की कोशिश करो, जो पवित्र आत्मा विश्वासीन की मण्डली थैं कि कुंछो।</verse>
			</chapter>
			<chapter number="3">
				<verse number="1">सरदीस शैहरा का विश्वासीन की मण्डली का स्वर्गदूत स लिख “मैं उई छू जैका पास परमेश्वरै की सात आत्मा और सात तारा छन, उ यो कुंछो कि मैं जाणछूँ कि तै कि करछै, तै कसी मेहनत करछै और कभै हार नै माननै, तै विश्वासयोग्य त छै, लेकिन सच्ची में तै मेरि बात नै करनै।”</verse>
				<verse number="2">येक कारण सतरक हो ज्या कि, जो त्यारा भितर मैंखिन थ्वाड़ा विश्वास बचिना को छै ऊस मजबूत कर ताकि यो पुरी तरीका ले खत्म नै जो ज्यो। मैं जाणछूँ कि त्यारा भितर भौत ठूली कमी छै किलैकी जो तै करून मरेछै परमेश्वर उहै खुश नाहातिन।</verse>
				<verse number="3">उ शिक्षा स याद कर जो तैले भौत पैलि सुणिना की छी और उमें विश्वास करछ्य। जो तैंस सिखाईना को छ्यो ऊस मान, अपून गलत कामून है पश्चाताप कर। अगर तै लापरवाही करनै रौले त मैं अचानक आ जियूलो, जसकैं रात में एक चोर ऊँछो, और तै उ बखत जाण ले नी सकले जब मैं तैंस दण्ड दीन खिन ऊँलो।</verse>
				<verse number="4">लेकिन सरदीस शैहरा का विश्वासीन की मण्डली में तुमार बीच थ्वाड़ाई लोग छन, जिनूनले विश्वासी का होभेरन साफ जीवन जीछ। उन साफ सफेद कपाड़ा पैन भेरन म्यारा दगाड़ रोला, किलैकी उन इसा लायक छन।</verse>
				<verse number="5">जो आदिमी शैतानी ताकतून हरा द्योलो, उले इनारा नियाती सफेद कपाड़ा पैनोलो। मैं उ आदिमी को नाम उ किताब में है नी मिटूलो जैमें उन लोगून का नाम लिखीना का छन जिनारा पास सच्चो जीवन छै। जब कि मैं अपून पिता और स्वर्गदूतून का सामुनि ठाड़ हुलो जो उकी सेवा करनान, त मैं घोषणा करूलो कि उन म्यारा छन।</verse>
				<verse number="6">जो कोई यो बात स सुण सकछो जो मैं कुंन मरैयू, उ यो समझना की कोशिश करो कि, पवित्र आत्मा विश्वासीन की मण्डली थैं कि कुंछो।</verse>
				<verse number="7">फिलदिलफिया शैहरा का विश्वासीन की मण्डली का स्वर्गदूत स यो लिख: “मैंई उ छूँ जो पवित्र और सच्चो, जैका पास उ चाबी छन जो राजा दाऊद का छन।” जब मैं उ चाबी स लीभेरन एक द्वार स खोलछूँ त कोई ले ऊस बंद नै कर सकनो, और जब मैं चाबी लीभेरन ऊस बंद कर दीछूँ त कोई ले ऊस खोल नै सकनो, उ योई कुंछो कि,</verse>
				<verse number="8">मैं जाणछूँ कि तै कि करछै, तै कसी मेहनत करछै और कभै हार नै माननै, सुण मैं यो ले जाणछूँ कि तैमें सिर्फ थ्वाड़ा क्षमता छै, लेकिन फिरले तैंले मेरि कईना की बातुन में विश्वास करछ्य और तैले इन बात भटे मना नै कर्यो कि तै मैंमें विश्वास करछै। येक कारण इसो के छै जो एक इसो द्वार जसो छै जैस मैंले तैखिन खोल दीछ, जैस कोई ले बंद नै कर सकूनो।</verse>
				<verse number="9">येक कारण सुण, मैं उन लोगून का बारिमें जाणछूँ जो दावा करनान कि उन परमेश्वरा का चुनिना का लोग छन मतलब यहूदी, लेकिन छन नै। उन त्यारा बारिमें झूठ्ठी बात बोलनान, लेकिन सच्ची में उन उ दल का सदस्य छन जो शैतान का छन मैं इसो करूलो, कि उन आभेरन त्यारा सामुनि दण्डवत् कराला, और यो जाण ल्याला, कि मैं तैंस प्रेम करछूँ।</verse>
				<verse number="10">तैले म्यारा संदेश मानछ्य ताकि जब तै दुख उठालै त ऊस बड़ा धैर्य का दगाड़ सहन कर सके। योई कारण, मैं उ ठूली परीक्षा का बखत तेरि रक्षा करूलो। जो यो संसाराक सब लोगून में आलो।</verse>
				<verse number="11">मैं जल्दी ऊँनवाला छूँ; येक कारण जो विश्वास तेरो मैंमें छै, ऊस कभै जन छोड़े, ताकि कोई ले तेरो मुकुट छड़ा नै ले।</verse>
				<verse number="12">जो आदिमी शैतानी ताकतून हरा द्योलो, उ परमेश्वरा का मन्दिर में एक खम्भाक जसो होलो, जैकी मैं सेवा करछूँ और उनून ऊस कभै ले छोड़ून नी पड़ोलो। मैं उमें अपूनो परमेश्वरो को नाम लिखलो, यो दिखाभेरन कि उन उक छन और परमेश्वरो को शैहरो को नाम लिखूलो, यो उई छै जैस नय्या यरूशलम शैहर कयी जाछो। यो उई शैहर छै जो स्वर्ग भटे, मतलब म्यारा परमेश्वरा का तरफ भटे तलि आलो। मैं उमें अपूनो नय्या नाम ले लिखूलो।</verse>
				<verse number="13">जो कोई यो बात स सुण सकछो जो मैं कुंन मरैयू, उ यो समझना की कोशिश करो कि, पवित्र आत्मा विश्वासीन की मण्डली थैं कि कुंछो।</verse>
				<verse number="14">लौदीकिया शैहरा का विश्वासीन की मण्डली का स्वर्गदूत स यो लिख: कि मैं उ छूँ जो आमीन और विश्वासयोग्य, और सच्चो गवा छै, और परमेश्वरै की सृष्टि को मूल कारण छै, और मैं उ छूँ जैक द्वारा परमेश्वरेले सब चीजून बनाछ, मैं जो कुछूँ ऊस सुण:</verse>
				<verse number="15">मैं तेरा कामून निकीकैं जाणछूँ कि तै नै त मैंमें अपून विश्वास भटे इनकार करून मरेछै और नै मैंस पुर मनले प्रेम करछै मैं चाछूँ कि या त तै मेरो इनकार कर दे या मैंस पुर मनले प्रेम कर।</verse>
				<verse number="16">येक कारण मैंस पतो छै कि तै नै त मैंमें अपून विश्वास को इनकार करून मरेछै और नै अपून पुर मनले मैंस प्रेम करछै, किलैकी तै म्यारा प्रति अपून विश्वास में सिर्फ आधा-अधूरो छै, येक कारण मैं तैंस अपून है दूर करून खिन तैयार छूँ।</verse>
				<verse number="17">तै कुछै कि तै धनवान छै और त्यारा पास उ सब छै जैकी तैंस जरूरत छै, लेकिन तै नै जाणनै कि येको सच यो छै कि, तैमें तरस ऊँछो। किलैकी सच यो छै कि तै गरीब छै, तेरा पास कपाड़ा नाहातिन, और तै अन्धो छै।</verse>
				<verse number="18">येक कारण ले, मैं तैंस आग ले शुद्ध करिना को सुना स मैंथै मोल लीना की सलाह दीछूँ ताकि तै सच्ची में धनवान बन सके। तैंस अपून पैनून खिन सफेद कपाड़ा मैंथै मोल लीन चैंछो ताकि तै लोगून का द्वारा तैंस नंगो देखना की शर्मिदगी भटे बच सके। तैंस अपून आँखान में डालून खिन थ्वाड़ा सुरमा ले मैंथै मोल लीन चैछो, ताकि तै देख सके।</verse>
				<verse number="19">मैं जैस ले प्रेम करछूँ, ऊस मैं सिखूछूँ और सजा ले दीछूँ ताकि उन निका बन जून। येक कारण भलाई करून में लाग रौ, पापक काम करून बंद कर दे।</verse>
				<verse number="20">सुणा, मैं तुमार दिल में ऊँन खिन उ आदिमी की नियाती छूँ जो घरा का भ्यार ठाड़ छै और द्वार स खटखटूछो। अगर तुम मेरि आवाज स सुणछा और मैंखिन अपूनो दिल खोलछा त मैं भितर ऊँलो और हम एक-दुसरा का दगाड़ संगति करला।</verse>
				<verse number="21">जो आदिमी शैतानी ताकतून हरा द्योलो, मैं ऊस अपून दगाड़ सिंहासन में बैठूना को अधिकार द्यूलो। यो बिल्कुल म्येरो जसो होलो, जसकै मैंले शैतानी ताकतून हरा दीछ और अपून पिता का दगाड़ सिंहासन में बैठ गयूँ।</verse>
				<verse number="22">जो कोई यो बात स सुण सकछो जो मैं कुंन मरैयू, उ यो समझना की कोशिश करो कि, पवित्र आत्मा विश्वासीन की मण्डली थैं कि कुंछो।</verse>
			</chapter>
			<chapter number="4">
				<verse number="1">म्यारा इन सब बातुन का देखना का बाद, मैंले स्वर्ग में एक द्वार खुलीना को देखछ्य, और फिर मैंले उई पैलि वाली आवाज सुणछ्य जो कि एक तुरी की आवाज जसी छी। उले मैंथैं क्योछ, “म्यारा पास याँ मलि अ, और मैं उन बातुन तैंस देखूलो, जिनोरो इन बातुन का बाद पुर हुनो जरूरी छै।”</verse>
				<verse number="2">त उई बखत पवित्र आत्मा मैंमें आग्यो, और मैंले स्वर्ग में एक सिंहासन में कैसे बैठिना को देखछ्य।</verse>
				<verse number="3">जो आदिमी वाँ बैठिना को छ्यो उ एक चमकदार यशब माणी का जैवरको को जसो और चमकदार लाल माणिक्य की नियाती चमकून मरैछ्यो। सिंहासन का चारू तरफ एक मेंघधनुष छ्यो जो चमकीला हरिया पन्ना की नियाती चमकून मरैछ्यो</verse>
				<verse number="4">उ सिंहासन का चारू तरफ चौबीस और सिंहासन छन। और इन सिंहासनून में चौबीस प्राचीन सफैद कपाड़ा पैन भेरन बैठिना का छन, और उनार ख्वारान में सुनाक मुकुट छन।</verse>
				<verse number="5">उ सिंहासन में भटे बिजली और गर्जन निकलून मरैछ्या, और सिंहासन का सामुनि सात दीया जलून मरैछ्या जो परमेश्वरा का सात आत्मा छन।</verse>
				<verse number="6">उ सिंहासना का सामुनि एक फर्श छ्यो जो समुन्द्रो को जसो चौड़ो और काँच जसो साफ छयो। और उ ठूलो सिंहासन उन सबून का बिल्कुल बीच में छ्यो, और उक चारू तरफ मैंले चार प्राणी देख्यान, जिनारा आंग पुर तरीका ले आँखान ले ढकीना का छ्या।</verse>
				<verse number="7">इन ज्यूना प्राणिन में भटे पैलो प्राणी बाघ को जसो दिखाई दीन मरैछ्यो और दुसोरो प्राणी गोरूक बच्छा को जसो छै, तीसोरो प्राणी को मुँख आदिमी को जसो छै, और चौथो प्राणी उड़ून वालो गरुड़ को जसो छ्यो।</verse>
				<verse number="8">और चारू प्राणिन का छः-छः पंख छन, और उनार आंग में चारू तरफ आँखा छ्या, याँ तक कि उनार पंखून का भितर ले आँखा छ्या और उन रात-दिन बिना आराम करिना का यो कुनै रूनान, “पवित्र, पवित्र, पवित्र प्रभु सर्वशक्तिमान परमेश्वर! और उ उई परमेश्वर छै जो हमेशा भटे छयो और ऐल तक जो ऊँनवाला छै।”</verse>
				<verse number="9">जो सिंहासन में बैठिना को छै, उई छै जो हमेशा-हमेशा खिन ज्यूना छै। उ ज्यूनो प्राणी ऊस महिमा और आदर और धन्यवाद दीनान। त चौबीस प्राचीन उनार सामुनि खिती जानान और उकी अराधना करनान। उन यो कैभेरन अपूनो-अपूनी मुकुट खोलभेरन सिंहासन का सामुनि डाल दीनान,</verse>
				<verse number="10"></verse>
				<verse number="11">“हे हमार प्रभु परमेश्वर, तैले सब चीजून बनाईना को छै। तेरि इच्छा का अनुसार, उन बनाई ग्यान और उन अस्तित्व में छन। योई कारण तैं महिमा और आदर और सामर्थ का योग्य छै।”</verse>
			</chapter>
			<chapter number="5">
				<verse number="1">जो सिंहासन में बैठिना को छ्यो, मैंले उक दैंन हात में एक किताब देखछ्य जो भितर और भ्यार भटे लिखीना की छी, और उ सात मुहर लगाभेरन बन्द करि गैछी।</verse>
				<verse number="2">फिर मैंले एक ताकतवर स्वर्गदूत स देखछ्य जो ऊची आवाज में यो प्रचार करून मरेछ्यो, “मोहर तोड़ून और किताब स खोलना को योग्य को छै?”</verse>
				<verse number="3">लेकिन नै त स्वर्ग में, नै धरती में, और नै धरती तलि कोई उ किताब खोलून या उमें जो लिखीना को छ्यो ऊस पढ़ून लायक नी छ्यो।</verse>
				<verse number="4">तब मैं जोर-जोरले रून लागयू, किलैकी उ किताब स खोलून, या उमें जो लिखीना को छ्यो ऊस पढून लायक कोई नै मिल्यो।</verse>
				<verse number="5">तब उन प्राचीनून में भटे एक ले मैंथैं क्योछ, “जन रो; देख, उ जो यहूदा का गोत्र को सिंह कहलूछो जो राजा दाऊदो को वंशज छै, यो किताब की सातू मोहर तोड़ून और इनून खोलून खिन ताकतवर छै, उले शैतान स हरा दी हैछ।”</verse>
				<verse number="6">तब मैंले एक मेम्‍ना स देखछ्य जो सिंहासन और चार ज्यून प्राणिन और चौबीस प्राचीनून का बीच में ठाड़ छ्या। मेम्‍ना का शरीर में इसा चिन्न छ्या कि ऊस पैलि मारिना को छ्यो; उक सात सींग और सात आँखा छ्या; इन परमेश्वरे की सात आत्मा छन, जो सारी धरती में भेजिना की छन।</verse>
				<verse number="7">मेम्ना ले अघिल आभेरन जो सिंहासन में बैठिनाको छ्यो, उक दैंन हात भटे, उ किताब स ली लीछ।</verse>
				<verse number="8">जब उले किताब ली लीछ, तो उन चारों प्राणी और चौबीसूं प्राचीन उ मेम्‍ना का सामुनि झुक ग्या; हरेक प्राचीन ले एक वीणा और सुना ले बनिना को कटरो पकड़ीनाको छ्यो। कटरो धूप ले भरिना को छ्यो, और उ धूप की सुगंध उन लोगून की प्रार्थनान को चिन्न छै जो परमेश्वरे की सेवा करनान।</verse>
				<verse number="9">उन यो गीत मेम्ना मतलब यीशु मसीह का बारिमें गान मरेछ्या, “यो किताब की मोहर तोड़ून और यैस खोलना को अधिकार त्यारा पास छै। किलैकी तैंस मार डाली ग्योछ और तैंले अपून खून ले हर गोत्र, भाषा, लोग और राज्य है परमेश्वर खिन लोगून मोल लीछ।”</verse>
				<verse number="10">और उनून हमार परमेश्वर खिन तैंले राज्य और याजक बनाछ जो हमार प्रभु परमेश्वर की सेवा करनान, और उन धरती में राजान की नियाती राज्य कराला।</verse>
				<verse number="11">जब मैंले फिर भटे देखछ्य, त अचानक मैंले लाखू और करोणू स्वर्गदूतून की आवाज सुणछ्य, उनेरि गिनती नै की जा सकनी। उन राजा का उ सिंहासन का, उन चार ज्यून प्राणिन का और उन चौबीस प्राचीनून का चारों-ओर छ्या।</verse>
				<verse number="12">उन जोर-जोर की आवाज ले गाँ छ्या, “धन्य छै उ मेम्‍ना जैस मार दीई ग्यो, उ महिमा का योग्य छै। उको अधिकार महान छै। उको ज्ञान गैरो छै। उ भौत शक्तिशाली छै और उ भौत धनवान छै। आ हम उको आदर और स्तुति करा।”</verse>
				<verse number="13">फिर मैंले स्वर्ग में, और धरती में, और धरतीका तलि, और समुद्र की सब बनाईना की चीजून, और सब कुछ जो उनूनमें छै, यो कुन सुणछ्य, “आ हम उकी महिमा करा जो सिंहासन में बैठिना को छै। आ हम मेम्ना की महिमा करा। आ हम हमेशा खिन उको आदर करा और ऊस सम्मान दी, किलैकी उ सबून है ज्यादा शक्तिशाली छै।”</verse>
				<verse number="14">और चारों प्राणिन ले “आमीन” क्योछ, और उन प्राचीनून ले झुकभेरन उकी अराधना करून लाग्यान।</verse>
			</chapter>
			<chapter number="6">
				<verse number="1">फिर मैंले देखछ्य कि मेम्‍ना ले उन सात मुहरून में भटे एक स खोलछ्य; और मैंले चार ज्यून प्राणिन में भटे एक स ध्यदूनै सुणछै। उकी आवाज गर्जन की नियाती तेज छी। उले क्योछ,“अब जा, अघिल बढ़।”</verse>
				<verse number="2">तभै वाँ मैंस एक सफेद रंग को घोड़ो दिखाई दीछ, और उको सवार धनुष लीईना को छै: और ऊस एक मुकुट दीई ग्यो, और उ स्वर्ग भटे भ्यार धरती में न्हैग्यो, और उ एक विजेताक नियाती जीत खिन निकलछ्य और दुबार उई जीतोलो।</verse>
				<verse number="3">जब मेम्‍ना ले दुसरी मुहर खोलछ्य, तो मैंले दुसारा प्राणी स यो कुन सुणछ्य, “ अब जा, अघिल बढ़।”</verse>
				<verse number="4">और फिर एक और चमकदार लाल घोड़ो उ जाग भटे भ्यार आछ जाँ सिंहासन छ्यो। परमेश्वरे ले उक सवार स धरती में शान्ति उठूना को हुकुम दीछ, ताकि उन युद्ध में एक दुसरा स मार डालून। यो उद्देश्य खिन परमेश्वरे ले यो सवार स एक ठूली तलवार ले दीछ।</verse>
				<verse number="5">जब मेम्‍ना ले तिसरी मुहर खोलछ्य, तो मैंले तीसारा प्राणी स यो कुन सुणछ्य, “आ।” और तब मैंले देखछ्य कि एक कालो घोड़ो भ्यार आ र्योछ और उक सवारा का हात में एक तराजू छै।</verse>
				<verse number="6">मैंले सुणछ्य कि उन चार ज्यून प्राणिन का बीच भटे कोई बोलून मर्यो छ्यो जो एक आदिमी का नियाती छ्यो, “ऊँन वाला बखत में धरती में अकाल होलो और येक कारण एक दिन की मजूरी केवल एक किलो ग्यूँ और तीन किलो जौ मोल खिन काफी होलि। लेकिन तेल और अंगूर को रस की कमी नै होलि।”</verse>
				<verse number="7">और जब मेम्‍ना ले चौथी मुहर खोलछ्य, तो मैंले चौथ ज्यून प्राणी स यो कुन सुणछ्य, “आ।”</verse>
				<verse number="8">तब मैंले वाँ एक फीको पड़ीनाको हरिया रंगो को घोड़ो दिखाई दीछ; जो उमें बैठिनाको छ्यो, उको नाम मौत छ्यो, अधलोक उक पछिल-पछिल ऊँन मर्यो छ्यो, ऊस धरती में रूनवाला हरेक चौथाई लोगून मारना को अधिकार दीछ और उले उनून जैस तलवार ले, अकाल, महामारी और धरतीका जानवरून है ले मार डालून।</verse>
				<verse number="9">जब मेम्‍ना ले पाँचू मुहर खोलछ्य, तो मैंले वेदी का तलि उन लोगून आत्मान देखछ्य जिनून मार डाली ग्योछ किलैकी उनूनले परमेश्वरा का वचन को प्रचार करिना को छ्यो और उन अपून अंगीकार वापस नै मुड़िना का छ्या कि यीशु उनोरो प्रभु छै।</verse>
				<verse number="10">और उनूनले जोरले धधया भेरन परमेश्वर थैं क्योछ, “हे पवित्र और सच्चा प्रभु; तै धरती में रूनवालान उन बुरा लोगून दण्ड दीन में इतुक ज्यादा देर किलै करून मरैछ? हम बिनती करनू कि तै उन लोगून का ब्यवहार को बदला ले जिनूनले हमून मार डालछ्य।”</verse>
				<verse number="11">उनूनमें भटे हरेक स एक सफेद कपाड़ा दीई ग्यो। और परमेश्वरेले उनूनथैं क्योछ, “एल आराम करा, किलैकी आजि ले तुमार कुछ दगड़िया और तुमार विश्वासी भाई छन जिनून तुमार नियाती मार डाली जालो। जब मारी जानवालान की संख्या पुरी हो जालि, तभै मैं बदला ल्यूलो।”</verse>
				<verse number="12">जब मेम्‍ना ले छठवीं मुहर खोलछ्य, त मैंले देखछ्य कि एक भौत ठूलो भूचाल भ्योछ; सूर्य को रंग कालो कामोलो जसो कालो रंग में बदल ग्यो और पुर चंद्रमा को रंग खून को जसो लाल हो ग्यो।</verse>
				<verse number="13">तारा आकाश भटे धरती में इसीकैं खितीनान जसीकैं रूख में भटे कच्चा फल खितीनान, जब तेज हवा उ रूख स हिलूछी।</verse>
				<verse number="14">आकाश इसो गायब हो ग्यो जसकै कागज स मोड़ दी ग्यो हो; और सब पहाड़ और समुन्द्र में सब टापून ले अपून जाग बदल दीयान।</verse>
				<verse number="15">येको नतीजा यो भ्योछ कि धरतीका सब लोग, जिनूनमें राजा, प्रधान, अधिकारी, धनवान, ताकतवर लोग और हर एक आजाद मनुष्य शामिल छन, जो पहाड़ून की गुफान और काठान में जाभेरन लुकियान;</verse>
				<verse number="16">और पहाड़ून, और काठान थैं कुंन लाग्यान, “हमून में खिती जा और हमून उ है लुका ली; ताकि उ जो सिंहासन में बैठिना को छै, हमून देख नै सको और मेम्ना का दण्ड भटे बच सका।”</verse>
				<verse number="17">किलैकी उ भयानक दिन आग्योछ जब परमेश्वर और मेम्ना सबून दण्ड द्योलो, और कोई ले यो दण्ड भटे नी बच पालो।</verse>
			</chapter>
			<chapter number="7">
				<verse number="1">येका बाद, मैंले चार स्वर्गदूतून संसाराक चारू कुंनान में ठाड़ देखछ्य। उन स्वर्गदूतून संसारे स बिपत्तिन ले नुकशान पुजूनाको परमेश्वरा का तरफ भटे अधिकार मिलीना को छ्यो, चाहे समुन्द्र में हो या धरती में। उनून संसारा का चारू कुंनान में हवा स रोक दीछ, ताकि समुन्द्र में, और धरती में और जंगला का रूखून में हवा नै चलो। मैंले एक और स्वर्गदूत स पूरब दिशा में भटे प्रकट हुन देखछ्य। उक पास जीवित परमेश्वरै की मुहर छी। उ स्वर्गदूत ले उन चार स्वर्गदूतून जोरले धध्याभेरन क्योछ,</verse>
				<verse number="2"></verse>
				<verse number="3">“जब तक हम अपून परमेश्वरा का दासून का कपाल में मुहर नै लगा द्या, तब तक धरती और समुद्र और रूखून नुकशान जन पुजाया, ताकि उन उ बिपत्तिन है नुकशान नै पुजो।”</verse>
				<verse number="4">जब स्वर्गदूतून ले मुहर लगूनो पुर कर लीछ, त केले मैंस बताछ कि उन लोग जिनारा कपाल में स्वर्गदूतून ले परमेश्वरै की मुहर ले निशान लगाछ, उनेरि संख्या एक लाख चौवालीस हजार छी। यो लोग इस्राएल का सब बारा कुलून में भटे छ्या।</verse>
				<verse number="5">स्वर्गदूतून ले यहूदा का कुल में भटे बारा हजार लोगून में मुहर लगाछ, रूबेन क कुल में भटे बारा हजार लोगून में मुहर लगाछ, गाद के कुल में भटे बारा हजार लोगून में मुहर लगाछ,</verse>
				<verse number="6">आशेर कुल में भटे बारा हजार लोगून में मुहर लगाछ, नप्तालीक कुल में भटे बारा हजार लोगून में मुहर लगाछ, मनश्शे कुल में भटे बारा हजार लोगून में मुहर लगाछ,</verse>
				<verse number="7">शमौन कुल में भटे बारा हजार लोगून में मुहर लगाछ, लेवी कुल में भटे बारा हजार लोगून में मुहर लगाछ, इस्साकार कुल में भटे बारा हजार लोगून में मुहर लगाछ,</verse>
				<verse number="8">जबूलून कुल में भटे बारा हजार लोगून में मुहर लगाछ, यूसुफ कुल में भटे बारा हजार लोगून में मुहर लगाछ, और बिन्यामीन कुल में भटे बारा हजार लोगून में मुहर लगा दी गै।</verse>
				<verse number="9">येका बाद मैंले देखछ्य कि लोगून की एक इतुक ठूली भीड़ छी कि कोई ले उनून नी गिन सकछ्यो। उन संसारै की हर जाति भटे, हर कुल में भटे, हर राज्य में भटे और भाषा का लोग छ्या। उन सिंहासन और मेम्‍ना का सामुनि ठाड़ छ्या। उनूनले सफेद कपाड़ा पैनिना का छ्या और हरेक आदिमी ले अपून-अपून हात में खजूरा हांगा पकड़िनाक छ्या जो कि एक उनार सम्मान को चिन छ्यो।</verse>
				<verse number="10">और यो भीड़ जोर-जोरले बोलभेरन कुंन मरैछी, “आ हम अपून परमेश्वरै की स्तुति करा, जो सिंहासन में विराजमान छै और आ हम उकी ले स्तुति करा, जैस मेम्ना कयी जाछो किलैकी उनी छन जिनूनले हमून हमार पापून का न्याय भटे बचाईना को छै।”</verse>
				<verse number="11">और सब स्वर्गदूत, उ सिंहासन का, प्राचीनों का, और चार जीवित प्राणिन का चारू तरफ ठाड़ छ्या। फिर उनूनले सिंहासना का तरफ झुकभेरन परमेश्वर की अराधना करछ्य, और उनूनले क्योछ,</verse>
				<verse number="12">“आमीन। हमार परमेश्वर, हम हमेशा तेरि महिमा करनू, तैंस धन्यबाद और आदर दीनू! हम माननू कि तै पुरी रीति ले ज्ञानवान छै, और शक्तिशाली छै, जो हमेशा खिन सब कामून करून में योग्य छै। आमीन।”</verse>
				<verse number="13">तब प्राचीनून में भटे एक ले मैंथैं क्योछ, “यो सफेद कपाड़ा पैनिना का को छन? और काँ भटे आयीना का छन?”</verse>
				<verse number="14">मैंले उथैं क्योछ, “हे मालिक, मैं नै जाणनू लेकिन तै जाण छै।” उले मैंथैं क्योछ, यो सफेद कपाड़ा पैनिना लोग उन छन जिनरी मौत भौत दुख सहन करना का कारण होईना की छी। यो उन लोग छन जिनूनले मेम्ना का बलिदाना का द्वारा परमेश्वर की नजर में अपूनास शुद्ध कर ली हैछ।</verse>
				<verse number="15">येक कारण उन परमेश्वरा का सिंहासना का सामुनि ठाड़ छन और उन हर बखत दिन और रात परमेश्वरा का घर में उकी सेवा करनान। उ जो सिंहासन में बैठिना को छै, उनार बीच रोलो और उनेरि देखभाल करोलो।</verse>
				<verse number="16">“उन फिर भुखा और प्यासा नी होलो; सूर्य उनून फिर कभै नी जलालो, नै कोई गर्मी उनून झुलसाली।</verse>
				<verse number="17">किलैकी मेम्‍ना जो सिंहासन का बीच में छै, उ उनेरि देखभाल करोलो, उसीकैं जसीकैं एक ग्वाला अपूनी भेड़ून की देखभाल करछो। उ उनून उ ताज पानि का झरना का पास ली जालो जो लोगून जीवन दीछो। और परमेश्वर उनार आँखून का आँसून पोछ भेरन उनार सब दुखून दूर कर द्योलो।”</verse>
			</chapter>
			<chapter number="8">
				<verse number="1">जब मेम्ना ले सतूँ मुहर खोलछ्य, त उन सब जो स्वर्ग में छ्या आधा घण्टा तक शान्त हो ग्या।</verse>
				<verse number="2">और मैंले उन सात स्वर्गदूतून जो परमेश्वरा का सामुनि ठाड़ रूनान, देखछ्य, और उनून सात तुरी दीई ग्यान।</verse>
				<verse number="3">फिर वाँ भटे एक और स्वर्गदूत सुना को धूपदान लीभेरन आछ, और वेदी का पास ठाड़ो हो ग्यो; और उ स्वर्गदूत स सब पवित्र लोगून की प्रार्थनान का दगाड़ जलून खिन भौत धूप दीई ग्योछ। उले धूप स और प्रार्थनान उ धूप की वेदी का मलिमें जला दीछ, जो परमेश्वरा का सिंहासना का सामुनि छी।</verse>
				<verse number="4">और उ धूपो को धूँगो पवित्र लोगून की प्रार्थनान का दगाड़ मिलभेरन उ वेदी में भटे जाँ स्वर्गदूत ले उनून डालीना को छ्यो, परमेश्वरा का सामुनि पुजिग्योछ।</verse>
				<verse number="5">तब स्वर्गदूत ले धूपदान लीछ, और ऊस वेदी का मलिमें जलीना का आगाले भर दीछ और धरती में डाल दीछ्य; और बिजली की गर्जना की आवाज और चाल चंमकूल और भूचाल हुन लाग्यान।</verse>
				<verse number="6">और उन सात स्वर्गदूत जिनारा पास सात तुरी छ्या, उनून बजून खिन तैय्यार भ्यान।</verse>
				<verse number="7">पैल स्वर्गदूत ले पैलि तुरी बजाछ, त तुरन्त खून में मिलीना का भौत मारो पड़छ्य और आगो धरती में पड़छ्य। येक कारण धरती को एक तिहाई हिस्सा जल ग्यो, और रूखून को एक तिहाई जल ग्या, और सब हरिया घास ले जल गै।</verse>
				<verse number="8">दुसारा स्वर्गदूत ले दुसरी तुरी बजाछ, त इसो भ्योछ एक ठूलो पहाड़ जसो जलीना की चीज समुद्र में डाली ग्योछ, येक कारण एक तिहाई समुद्रो को पानि खून को जसो बन ग्यो,</verse>
				<verse number="9">समुद्र में रूनवाला का एक तिहाई प्राणी मर ग्या और एक तिहाई जहाजून ले नाश कर दीछ।</verse>
				<verse number="10">तीसारा स्वर्गदूत ले तिसरी तुरी बजाछ, त मशालो को जसो जलीना को एक ठूलो तारो आकाश भटे खितीछ, येक कारण ले नदीन का एक तिहाई हिस्सा में और पानि का स्रोतुन में आ पड़छ्य।</verse>
				<verse number="11">जैका कारण पानि को उ हिस्सा कड़वा और जहरीलो हो ग्यो। और यो पानि स पीभेरन भौत लोग मर ग्या। और उ तारा को नाम कड़वा राखि ग्योछ।</verse>
				<verse number="12">चौथ स्वर्गदूत ले चौथी तुरी बजाछ, और सूरज को एक तिहाई, और चाँद को एक तिहाई और तारान को एक तिहाई में टकराछ, याँ तक कि उनोरो एक तिहाई हिस्सा अन्यारो हो ग्यो और दिन को एक तिहाई में उज्यालो नै र्यो, और उसीकैं रात में ले।</verse>
				<verse number="13">जब मैंले फिर देखछ्य, त मैंले एक बाज स आकाश में ऊँचा में उड़ून और जोरले यो कुंन सुणछ्य, उन दुष्ट लोगून में बिपत्ति आलि जो धरती में रूनान, किलैकी जब आखरी तीन स्वर्गदूतून ले तुरी बजाला, तब तीन बिपत्ति बाकि छन जो उनून मारली, धरती में रूनवालान में हाय, हाय, हाय।</verse>
			</chapter>
			<chapter number="9">
				<verse number="1">जब पाँचवा स्वर्गदूत ले पचूँ तुरी बजाछ, त मैंले स्वर्ग भटे धरती में एक तारो खितीन देखछ्य, त यो तारा स उ चाँबी दीई गैछ जो उ गैरा गड्डा खोल सकछी जैको गैराईक के अन्त नाहातिन।</verse>
				<verse number="2">उले गैरा गड्डा खोलछ्य, और उ गड्डा में भटे एक ठूली भट्ठी को जसो धुआँ उठछै, और सूरज और हवा उ गड्डा का धुआँ ले अन्यारा होग्या।</verse>
				<verse number="3">उ धुआँ में भटे धरती में टिड्डी निकल्यान, और उनून बिच्छून की नियाती लोगून डंक मारना की ताकत दी गैछ।</verse>
				<verse number="4">जसीकैं कैसै बिच्छू का डंक मारना ले दर्द हुछो, उसीकैं इन टिड्डिन पाँच मैना तक उन लोगून तड़पूना को हुकुम दीई ग्योछ, जिनारा कपाल में परमेश्वरै की मुहरो को निशान नी छ्यो। लेकिन उनूनथैं कयी ग्योछ कि नै त उनून धरती की घास स, नै कोई रूखून-डालान नुकशान पुजाया।</verse>
				<verse number="5"></verse>
				<verse number="6">उन पाँच मैना में लोग मरना को तरीका खोजाला, लेकिन उन मर नी सकाला। उन मरना की इच्छा कराला, लेकिन उनूनमें मौत नी आलि।</verse>
				<verse number="7">यो टिड्डी लड़ाई खिन तैय्यार करिना का घोड़ान का जसा दिखाई दीछ्या। उनूनले अपून ख्वारान में के पैनिना को जसो छ्यो जो सुना का मुकुट जसा लाग छ्या। और उनोरो मुँख आदिमी को मुँखो जसो छ्यो।</verse>
				<verse number="8">उनार बाल स्यैनिन का बालून जसा लम्बा छ्या, और उनार दाँत बाघका दाँतून की जसा मजबूत छ्या।</verse>
				<verse number="9">उनूनले छाती में लूवा का बनिना का कवच पैनिना का छ्या; जब उन उड़ून मरैछया, त उन इसी आवाज करछ्या जसीकैं कई घोड़ा लड़ाई का द्वारान रथ खींचभेरन करनान।</verse>
				<verse number="10">उनोरो बिच्छून को जसो पुछौड़ और उनूनमें डंक छ्या, और उनून अपून पुछौड़ा ले लोगून पाँच मैना तक दुख पुजूना की ताकत मिलीनाकि छी, उ उनार पुछौड़ में छी।</verse>
				<verse number="11">अथाह गड्डा का स्वर्गदूत उनून खिन राजा का रूप में छ्यो, उ उई दुष्ट दूत छै जैले गैरा गड्डा स खोलीना को छ्यो। इब्रानी भाषा में उको नाम अबद्दोन छै, और यूनानी भाषा में, अपुल्लयोन छै, जैको मतलब, उ जो नाश करछो।</verse>
				<verse number="12">पाँच मैना का बाद यो बिपत्ति खत्म हो जालि। लेकिन येक बाद द्वी बिपत्ति और उनवाला छन।</verse>
				<verse number="13">जब छयूँ स्वर्गदूत ले तुरी बजाछ, त मैंले परमेश्वरा का सामुनि धूप जलूना की सुना की वेदी का चारू कुंनान भटे एक आवाज सुणछ्य,</verse>
				<verse number="14">और आवाज ले छयूँ स्वर्गदूतथैं क्योछ, जैले तुरी पकड़िना की छी, अब उन चारू दुष्ट दूतून खोल दे जो फरात नामकी ठूली नदी का किनार में बाँधीनाक छन।</verse>
				<verse number="15">येक कारण तब उन चारू दुष्ट दूतून खोल दी ग्यान। उन पैलिक भटे तैय्यार छ्या और उनूनथैं कयीना को छ्यो कि यो बखत, यो दिन, यो मैना और यो साल खिन इन्तजार करा और अब यो बखत आग्योछ। उनून संसारा का एक तिहाई हिस्सा लोगून मारून छ्यो।</verse>
				<verse number="16">उनूनले वाँ घुड़ान में सवार सिपाईन की एक भौत ठूली सेना जमा भैछ, जिनेरी गिनती मैंले बीस करोड़ सुणछ्य।</verse>
				<verse number="17">उन घोड़ान और उनूनमें बैठिना का जिनून मैंले दर्शन में देखछ्य, उन इसा देखीछ्या, उनार छाती की रक्षा करून वालो कवच आगा को जसो लाल, चटको नीला और गन्धक को जसो पिला छ्यो। घोड़ान का ख्वारा बागक ख्वारान का जसा लागून मरैछ्या, उनार मुँख भटे आगो, धुआँ और गंधक निकलून मरैछ्यो।</verse>
				<verse number="18">इन तीनू बिपत्तिन ले जो घोड़ान का मुँख भटे निकलछ्य आगो, और धुआँ और गन्धक छ्यो, त संसारा का एक तिहाई लोग मार डाली ग्या।</verse>
				<verse number="19">लेकिन उन घोड़ान का पास लोगून मारूना खिन द्वी अलग चीज छ्या, पैलि त उ जो उनार मुँख भटे निकलछी, और दुसरी उनार पुछौड़ में छी। किलैकी उनार पुछौड़ स्याँपून का जसा छ्या, और उन पुछौड़ान में लोगून काटून खिन मुँख ले छ्या।</verse>
				<verse number="20">लेकिन बाकि लोग जो उन बिपत्तिन है पैलि नी मारी गैछ्या, उनूनले अब ले अपून बुरा कामून है मन नै फिरायो। उनूनले खून करूनो, जादू-टोना, ब्यभिचार और चोरी करून है मन नै फिरायो। उनूनले भूतून और अपून हातुन ले से बनाईना का चीजून की पूजा करूनो ले नै छोड़यो, जसकैं कि सुन या चाँदी या पीतल या लाकड़ा का बनाईना का मूर्तिन। उन मूर्तिन, नै देख सकना, नै सुण सकना, और नै हिट सकना।</verse>
				<verse number="21"></verse>
			</chapter>
			<chapter number="10">
				<verse number="1">फिर मैंले एक और ताकतवर स्वर्गदूत स एक बादल ले घेरिना को स्वर्ग भटे उतरून देखछ्य। और एक मेंघधनुष उक ख्वारा का चारू तरफ छ्यो। उक मुँख में सूरज की जसी चमक छी और उक खुटा आगा का खंम्बा का जसा छ्या।</verse>
				<verse number="2">उको दैंन खुटो समुन्दर में राखिना को छ्यो, और उको बौं खुटो धरती में राखिना को छ्यो। उक हात में एक नानि किताब छी जो खुलीना की छी।</verse>
				<verse number="3">उ स्वर्गदूत ले जोरले चिल्लाछ, उकी आवाज बाघका समान छी। जब उ चिल्लाछ, त उले सात आवाज सुणयान, जो गर्जन की जसी आवाज छी।</verse>
				<verse number="4">जब सातूँ गर्जन की जोर की आवाज सुणाई दीछ, त जो मैंले सुणछ्य, ऊस मैं लिखून खिन तैय्यार छयूँ, लेकिन मैंले स्वर्ग भटे यो आवाज सुणछ्य, “जो बात गर्जन की आवाज में भटे सुणियान उनून गुप्त राख, और इन बातुन जन लिख।”</verse>
				<verse number="5">जो स्वर्गदूत स मैंले देखछ्य, जो समुन्द्र और धरती में ठाड़ छ्यो, उले अपूनो दैन हात स्वर्गा का तरफ कसम खान खिन उठाछ,</verse>
				<verse number="6">और जो हमेशा-हमेशा खिन ज्यून छन, जेले स्वर्ग, धरती और समुन्द्र और उमें रून वाला सब चीजून बनाछ, उकी नामेकी कसम खाभेरन उले क्योछ, की “अब कोई ले बात खिन और ज्यादा इन्तजार नी करून पड़ोलो। अब उन सब पुरी हो जाला।”</verse>
				<verse number="7">उ बखत, जब सतूँ स्वर्गदूत की आवाज दिना का दिनून में जब उ तुरी बजून में होलो, त परमेश्वरे की उ योजना पुरी हो जालि जो उले सुसमाचार उन परमेश्वरो को संदेश दिनवाला लोगून बताईना को छ्यो जो उकी सेवा करछ्या लेकिन और लोगून नै बताई।</verse>
				<verse number="8">तब मैंले फिर उ आवाज सुणछ्य, जेले स्वर्ग भटे मैंथैं बात करिना की छी। आवाज ले मैंथैं क्योछ,“जा, उ किताब स लीले जो स्वर्गदूता का हात में खुलीना की छै, जो समुन्द्र में ठाड़ छै।”</verse>
				<verse number="9">और मैंले स्वर्गदूतका पास जाभेरन क्योछ, “यो नानि किताब मैंस दे।” और उले मैंथै क्योछ, “ले, येस खा ले; येको स्वाद मौ जसो मिठो छै, लेकिन बाद में येको कड़वाट ले तेरो पेट तखलीफ द्योलो।”</verse>
				<verse number="10">मैंले उ नानि किताब ली लीछ जो स्वर्गदूत ले पकड़िना की छी और ऊस खा लीछ, और सच्ची में उको स्वाद मौ जसो मिठो छ्यो, लेकिन जब मैंले ऊस निगलछ्य, त मेरो पेट कड़वाट ले दुखून लागछै।</verse>
				<verse number="11">तब मैंथै यो कईग्यो, “तैंस अलग-अलग समूह और देशा का लोगून, अलग-अलग भाषा बोलून वाला लोगून और राजान एक बार फिर है बतून होलो, जो परमेश्वर तैंस बतून खिन कुंछो।”</verse>
			</chapter>
			<chapter number="11">
				<verse number="1">फिर मैंस नापूनखिन एक डंडा दीई ग्यो, और परमेश्वरेले क्योछ, “उठ और जा, म्यारा मन्दिरा का वेदी स नाप, और उन लोगून की गिनती कर जो मन्दिर में अराधना करून मर्यान।”</verse>
				<verse number="2">लेकिन भ्यार वाला खाला स छोड़ी दीये, ऊस जन नाप किलैकी उ जो मैंमें विश्वास नै करना, उन बयालीस मैंनान तक म्यारा शैहर यरूशलम में राज्य कराला।</verse>
				<verse number="3">“और उ बखत मैं अपून द्वी गवान यो अधिकार द्यूलो कि उन एक हजार द्वी सौ साठ दिनून तक टाट ओढ़ी भेरन भविष्यवाणी करनै रून।”</verse>
				<verse number="4">इन द्वीवै जैतून का द्वी रूख और द्वी दीपदान छन, जो संसारा का प्रभु का सामुनि ठाड़ छन।</verse>
				<verse number="5">और अगर कोई उनून नुकशान पुजून चाछो, त उनार मुँख भटे आगो निकल भेरन उनार बैरिन भस्म करछी; और अगर कोई उनून नुकशान पुजून चालो त पक्का इसीकैं मार डाली जालो।</verse>
				<verse number="6">परमेश्वरेले उनून भविष्यवाणी दीना का दौरान बरखा स रोकना को अधिकार दीईना को छै, उनून सब पानि में अधिकार छै, कि ऊस खून बनून, और धरती में हर प्रकारै की भयानक बिपत्तिन करना को अधिकार ले मिलीना को छ्यो। उन जतुक बार चाँछ्या उतुक बार इसो कर सकनान।</verse>
				<verse number="7">जब उन द्वीवै गवा परमेश्वरो को संदेशो को प्रचार कर चूकाला, त उ जानवर, जो गैरा गड्डा में भटे निकलोल, उ उन द्वीवैन का दगाड़ लड़ोलो, उनून हरालो और मार डालोलो।</verse>
				<verse number="8">और उनार लाश उ ठूला शैहर यरूशलम का सड़कून में पड़ीना का रौला, जाँ उनोरो प्रभु सूली में चढ़ाई ग्योछ। यो शैहरा स चिना का रूप में सदोम और मिस्र नाम दीई ग्योछ, किलैकी यो शैहरा का लोग भौत बुरा छन, जसकैं सदोम और मिस्र देशाक रूनवाला लोग छ्या।</verse>
				<verse number="9">और सब कुल, और भाषा, और जातिन का सब लोग उन द्वी गवान की लाशून साढ़े तीन दिनून तक देखनै रौला, और उ कैसे ले उनेरि लाशून दफनूना को हुकुम नी दीन।</verse>
				<verse number="10">उनेरि मौत है पैलि, उन द्वी गवान ले बिपत्तिन का द्वारा लोगून परेशान करिना को छ्यो कि जब लोगून ले सुणछ्य कि उन मर ग्यान, त उन भौत खुश होग्या। इतुक की उन खुशी ले जशन मनून लाग्यान, और एक-दुसरा स ईनाम दीन लाग्यान।</verse>
				<verse number="11">लेकिन साढ़े तीन दिना का बाद परमेश्वरेले उनूनमें अपूनी साँस डालछ्य और उन ज्यूना हो ग्या; और अपून खुटान में ठाड़ हो ग्या, और देखूनवाला लोग भौत ज्यादा डर ग्यो।</verse>
				<verse number="12">येक बाद उन द्वीवै लोगून ले स्वर्ग भटे एक बोलून सुणछ्य, जैले उनून जोरले धध्याभेरन क्योछ, “याँ मलि आ!” जब उनार दुशमन देखून मरैछ्या, तब उन बादलून में चढ़भेरन स्वर्ग में न्हैग्या।</verse>
				<verse number="13">उई बखत यरूशलम शैहर में एक भौत ठूलो भूचाल आछ, और शैहर में घरून को दसवाँ हिस्सा खिती ग्यो; और उ भूचाल ले सात हजार लोग मरि ग्या, और जो लोग बच गैछ्या उन डरले रून लाग्यान और उ परमेश्वरै की महिमा करून लाग्यान जो स्वर्ग में छै।</verse>
				<verse number="14">यो दुसरी बिपत्ति को अन्त छ्यो; लेकिन आजि एक और छै जो जल्दी ऊँन वाली छै।</verse>
				<verse number="15">जब सतू स्वर्गदूत ले सतू तुरी बजाछ, त मैंले स्वर्ग में जोरले धध्यून सुणछ्य, संसारो में अब और कोई नाहातिन जो राज करो। केवल हमोरो प्रभु परमेश्वर और उको चुनिना को मसीह राज्य करोलो और उ हमेशा-हमेशा खिन राज्य करोलो।</verse>
				<verse number="16">और तब उन चौबीस प्राचीनून ले जो परमेश्वरा का सामुनि अपून-अपून सिंहासन में बैठिना छ्या, उन झुकभेरन यो कैभेरन परमेश्वरै की अराधना करभेरन,</verse>
				<verse number="17">यो कुंन लाग्यान, “हे सर्वशक्तिमान प्रभु परमेश्वर, उ परमेश्वर छै जो हमेशा छ्यो और जो उनवालो छै, हम तेरो धन्यबाद करनू किलैकी तैले अपूनी महान सामर्थ दिखाईना की छै और तैले संसारा में अपूनो राज्य कर दी हैछ।”</verse>
				<verse number="18">उन लोग जो तैमें विश्वास नै करना भौत गुस्सा में छन। किलैकी अब उ बखत आग्योछ कि तेरो गुस्सा गैर-यहूदीन में अ, और उ बखत ले आग्योछ कि तै मरिना का लोगून को न्याय करो, अब उ बखत ले छै जब उन परमेश्वरो को संदेश दिनवाला लोगून ईनाम द्योलो, जो तेरि सेवा करनान और उन सब लोगून जो तेरो सम्मान करनान। जब कि उई बखत तै उनून नाश कर देले जिनूनले धरती में बिनाश करछ्य।</verse>
				<verse number="19">और परमेश्वरो को जो मन्दिर स्वर्ग में छै, उ खोलि ग्योछ, और उक मन्दिर में वाचा को सन्दूक दिखाई दीछ; और उई बखत चाल चमकछ्य और गर्जन और भूचाल हुन मरैछ्या, और आकाश भटे ठूल-ठूलो मारो पड़छ्य।</verse>
			</chapter>
			<chapter number="12">
				<verse number="1">जब उ खत्म हो ग्यो, तब आकाश में अद्धभुत चिन दिखाई दीछ, एक स्यैनिमैंसी चाँद में ठाड़ हो भेरन प्रगट भैछ जैले इसा कपाड़ा पैनिना छ्या जो सूर्य का जसा चमक छ्या, उले अपून ख्वारा में एक मुकुट पैनिना को छ्यो जैमें बार तारा छ्या।</verse>
				<verse number="2">उ स्यैनि गर्भवती छी, और उको नान्तिनो हुना को बखत आग्यो। और उ बच्चा का जन्म दीना का कारण पीड़ै ले चिल्ला मरैछी।</verse>
				<verse number="3">एक आजि चिन आकाश में दिखाई दीछ; एक लाल रंगोको ठूलो अजगर छ्यो, उक सात ख्वारा छ्या और दस सींग छ्या, और उक सातू ख्वारान में सात मुकुट छ्या।</verse>
				<verse number="4">उले आकाश का एक तिहाई तारान अपून पूछड़ा ले खींचभेरन धरती में खित दीयान। और उ अजगर उ गर्भवती स्यैनि का सामुनि ठाड़ हो ग्यो ताकि उक नन्तिनो हुनै ऊस खा जौ।</verse>
				<verse number="5">तब उ स्यैनि ले एक च्याला स जन्म दीछ लेकिन ऊस अजगर नै खा सक्यो किलैकी ऊस तुरन्त छीन ली ग्यो और परमेश्वर और उक सिंहासना का पास ल्याई ग्योछ। उ लड़का एक लूवाक दण्डा लीभेरन सब लोगून में राज करोलो।</verse>
				<verse number="6">और उ स्यैनि बिरान जागा का तरफ भागी जाछी, जाँ परमेश्वरेले उ खिन एक जाग तैय्यार करिना की छी, कि उ वाँ एक हजार द्वी सौ साठ दिन तक पालि जालि।</verse>
				<verse number="7">फिर स्वर्ग में लड़ाई भैछ, परमेश्वरा का खास स्वर्गदूतून में भटे एक ले जैको नाम मीकाईल छै, अपून अधीन रूनवाला स्वर्गदूतून का दगाड़ अजगर में हमला करछ्य। और अजगर और उक दुष्ट दूतून ले मीकाईल का खिलाफ लड़ाई लड़छ्य,</verse>
				<verse number="8">लेकिन उ अजगर और उक दूतून हरा दीछ और उनून, स्वर्ग भटे भ्यार निकाल दीछ।</verse>
				<verse number="9">येक कारण ऊस और उक दुष्ट दूतून धरती में खित दीछ। यो ठूलो अजगर, उई छै जो भौत पैलि स्याँपा का रूप में दिखाई दीछ, जैस शैतान या दोष लगून वालो ले कुंनान। यो उई छै जो यो संसारा का लोगून ध्वाका दीनै आर्योछ।</verse>
				<verse number="10">फिर मैंले स्वर्ग भटे कैसे जोरले यो कुंन सुणछ्य, “अब हमोरो परमेश्वर अपून लोगून बचाल! और अब उ अपूनी सामर्थ को इस्तमाल करोलो और राजा की नियाती राज्य करोलो! अब उनोरो मसीह संसार में अपूनो अधिकारो को दावा करोलो! अब शैतान हमार परमेश्वरा का सामुनि ठाड़ हो भेरन हमार दगाड़ का भाईन में दिन-रात दोष नी लगालो। क्याखिनकि ऊस स्वर्ग भटे भ्यार खित दी हैछ।”</verse>
				<verse number="11">उनून उ मेम्ना का खून की सामर्थ ले हराछ। जो उनून उनार पापून छुड़ून खिन मर गैछ्यो। उनूनले ऊस हरा दीछ किलैकी उन यो कुंनै रियान कि मेम्‍ना उनोरो परमेश्वर छै। याँ तक कि मार डाली ग्यान, लेकिन उन यो कुंन है पछिल नै हटिया।</verse>
				<verse number="12">येक कारण तुम सबून खुश हुन चैछो जो याँ स्वर्ग में रूनान। लेकिन तुम जो धरती में छा और जो समुद्र में छा, तरस खायी जान चैछो किलैकी शैतान तुमार पास तलि आग्योछ, और उ भौत गुस्सा में छै क्याखिनकि उ जाणछो कि उको पास काम करून खिन ज्यादा बखत नाहातिन।</verse>
				<verse number="13">जब अजगर समझ ग्यो कि मैं धरती में खित दीग्यू, त उले उ स्यैनि स जैको च्योलो पैद हो रेछ्यो, ऊस सतून खिन उक पछिल भागछ्य।</verse>
				<verse number="14">लेकिन उ स्यैनिमैंसी परमेश्वरेले एक ठूला उकाब का द्वी पंख दीई ग्यान, ताकि उ जाग भटे उड़ जौ जो बिरान जागा में उ जाग तैय्यार करिना की छी। वाँ साढ़े तीन साल तक उकी देखभाल करि ग्यो ताकि अजगर उक पास नै पुज सको।</verse>
				<verse number="15">फिर उ स्यैनि स बगून खिन, उ अजगर ले अपून मुँख भटे पानि एक नदी उगल छै।</verse>
				<verse number="16">लेकिन उ स्यैनि स धरती ले मद्दत करछ्य, धरती फाट गै और उको मुँख खुल ग्यो और अजगर का मुँख भटे निकलीना को पानि धरतीका भितर न्हैजाछो।</verse>
				<verse number="17">तब अजगर उ स्यैनि खिन गुस्सा भ्योछ, येक कारण उले स्यैनि का सन्तानून का बिरोध में लड़ाई घोषणा करछ्य। मतलब उन लोगून का खिलाफ जो परमेश्वरा का हुकमून मान्नान और यीशु का द्वारा सिखाईना का बातुन में मजबूतीले बनिना का रूनान।</verse>
				<verse number="18">तब उ अजगर न्हैजाछो और समुद्रा का किनार में ठाड़ हो ग्यो।</verse>
			</chapter>
			<chapter number="13">
				<verse number="1">तब मैंले एक जानवर स समुद्र में भटे निकलून देखछय, जैका दस सींग और सात ख्वारा छ्या। उक सींगून में दस राजमुकुट और उक हरेक ख्वारान में परमेश्वरे की बुराई का नाम लिखीना को छ्यो।</verse>
				<verse number="2">जो जानवर मैंले देखछ्य उ चिताको जसो छ्यो; और उक खुटा भालू का जसा और मुँख बाघो जसो छ्यो। और उ अजगर ले ऊस अपूनी ताकत दीछ और धरती में राज्य करना को अधिकार दीई ग्योछ।</verse>
				<verse number="3">उक ख्वारान में भटे एक ख्वारा में एक भौत ठूलो घ देखछ्य जो उक मौत को कारण बन सकछ्यो, लेकिन उको उ घ ठीक होग्यो, येक कारण संसारा का सब लोग ताजुब हो जाछो और उन उ जानवर पछिल-पछिल हिटून लागनान।</verse>
				<verse number="4">सब लोगून ले उ अजगर की पूजा करछ्य, क्याखिनकि उले उ जानवर स अधिकार दीईना को छ्यो, उनूनले उ जानवरै की ले पूजा करछ्य, और उनूनले क्योछ “कोई ले उ जानवरो को जसो ताकतवर नाहातिन। कोई ले उखिन नै लड़ सकूनो।”</verse>
				<verse number="5">उ जानवरै स डींग मारून और परमेश्वरै की निन्दा करूना को अधिकार छ्यो और ऊस बयालीस मैंनान तक राज करना को अधिकार दी ग्योछ।</verse>
				<verse number="6">जानवर ले परमेश्वरै की निन्दा करून शुरू कर दीछ, उक नामाका बिरोध में और स्वर्ग का बिरोध में बोलछो जाँ परमेश्वर रूछो, और उन सबून का बिरोध में जो स्वर्ग में रूनान।</verse>
				<verse number="7">ऊस यो ले अधिकार दीई ग्योछ कि उ परमेश्वरा का लोगून का दगाड़ लड़ौ, और उनून हारा सको, और ऊस हरेक कुल और लोग, भाषान और जातिन में अधिकार दी ग्योछ।</verse>
				<verse number="8">संसारा का सब लोग उकी पूजा करून लाग्यान। सिर्फ उनी लोगून ले उकी पूजा नै करि जिनारा नाम संसारा बनून है पैलि जीवन की किताब में लिखीना का छ्या। यो जीवन की किताब उ मेम्ना की किताब छै जैस बलिदान का रूप मारिना को छ्यो।</verse>
				<verse number="9">जो कोई यो बात स सुणछो जो मैं कुंन मरैयू, उ समझना की कोशिश करो।</verse>
				<verse number="10">जिन लोगून को कैद में जानो तय छै, उन जरूर कैद में डाली जाला, और जिन लोगून तलवार ले मारी जान छै, उनून तलवारे ले मारी जालो। येक कारण परमेश्वरा का लोगून को दुख सहन में धैर्य राखून चैछो और उमें विश्वास करून जारी राखून चैछो।</verse>
				<verse number="11">फिर मैंले एक और जानवर स धरती में भटे निकलून देखछ्य, येका द्वी सींग छ्या जसा भेड़ा का हुनान। लेकिन जब उ बोलछ्य त उकी आवाज अजगर जसी छ्यी।</verse>
				<verse number="12">यो दुसोरो जानवर उ पैला जानवरो को सब अधिकार इस्तमाल करछो, दुसोरो जानवर संसार और येमें रूनवालान थैं उ पैला जानवरै की पूजा करूछो, जैको मरन वालो घ ठीक होग्यो छ्यो।</verse>
				<verse number="13">यो दुसोरो जानवर चमत्कारा का काम देखूछ्यो, याँ तक कि लोगून का सामुनि आकाश भटे धरती में आगो बरसा दीछ्यो।</verse>
				<verse number="14">भौत लोग उ दुसारा जानवरक चमत्कारा का कामून देखभेरन ध्वाका खा ग्या जो पैला जानवरै की शक्ति ले देखूछ्यो। दुसारा जानवरक द्वारा लोगून थैं कयी ग्यो उन उ पैला जानवरै की पूजा करून खिन एक मूर्ति बना, जो तलवारै घायल करि गेछ्यो, लेकिन उ फिर चंगो हो गेछ्यो।</verse>
				<verse number="15">दुसारा जानवरै स पैला जानवरै की मूर्ति बनाभेरन ऊस ज्यूनो करना को हुकुम दीछ, ताकि पैला जानवरै की मूर्ति बोल सको और उन लोगून मरवा डालोलो जो उ जानवरै की मूर्ति पूजा नै करना।</verse>
				<verse number="16">और दुसारा जानवरै स नाना-ठूला, अमीर गरीब, जो मालिक छन और जो दास छन, सब लोगून मजबूर करछ्य कि उन पैला जानवरै नाम की छाप अपून दैन हात में या अपून कपाल में लगून।</verse>
				<verse number="17">सिर्फ उई लोग जिनूनमें यो छाप छी उन चीजून खरीद और बैच सकछ्या। उ छाप पैलि जानवरै की नामकी छी या उकी नामस बतून वाली संख्या छी।</verse>
				<verse number="18">येस समझून खिन ज्ञाने की जरूरत छै। लेकिन जैस ज्ञान छै, उ यो पतो लगा सकछो जानवरै की संख्या को मतलब की छै। क्याखिनकि यो एक आदिमी को नाम छै। यो संख्या छ: सौ छियासठ छै।</verse>
			</chapter>
			<chapter number="14">
				<verse number="1">येक बाद, मैंले कुछ और देखछ्य, मैंले सिय्योन पहाड़ में मेम्ना स ठाड़ होईना को देखछ्य, और उक दगाड़ एक लाख चौवालीस हजार लोग छ्या, उनार कपाल में मेम्ना को नाम और उक बबा को नाम लिखीना को छ्यो।</verse>
				<verse number="2">और मैंले स्वर्ग में भटे केकी आवाज सुणछ्य जो पानि की झरना नियाती तेज बादल गर्जना आवाज नियाती तेज छी। जो आवाज मैंले सुणछ्य उ आवाज इसी छी, जसकैं लोग वीणा स बजून मर्या होलो।</verse>
				<verse number="3">एक लाख चौवालीस हजार (144,0000) लोग सिंहासना और चारू प्राणी और प्रचीनून का सामुनि ठाड़ छ्या; उन एक नय्या गीत गान मरेछ्या, जैस सिर्फ उनी सिख सकछ्या। सिर्फ उनी छन जिनून परमेश्वर ले संसार में रूनवाला लोगून का बीच में भटे छुड़ाईना को छ्यो।</verse>
				<verse number="4">यो उन छन जो पवित्र जीवन जीनान। यो उन लोगून का जसा छन जिनूनले एक बार ले नाजायज रिश्ता नै बनायो और नै इनूनले कभै कोई चीज की पूजा करछ्य, यो सिर्फ मेम्ना की पूजा करनान जाँ काँई मेम्ना जाछो, इन लोग उक पछिल जानान। यो उन छन जो धरती में सब लोगून है अलग करि ग्यान। जसकैं लोग अपून गाड़ान फसल को निको हिस्सा परमेश्वर स दीनान उसीकैं यो लोग ले अपून जीवन स पुरी पवित्रता का दगाड़ परमेश्वर और मेम्ना स दीनान।</verse>
				<verse number="5">उनूनले कभै झूठ नै बोल्यो। उनूनमें के गलत नाहातिन।</verse>
				<verse number="6">फिर मैंले एक स्वर्गदूत स आकाश का बीच में उड़ून देखछ्य, उ स्वर्गदूता का पास उ सुसमाचार छ्यो जो कभै नै बदलनो, उ संसार में रूनवालान लोगून खिन, हरेक जाति, और हरेक कुल, और सब भाषान में येकी घोषणा करछ्य।</verse>
				<verse number="7">उ जोर-जोरले कुंन मरैछ्यो, “परमेश्वर है डरा, और उकी महिमा करा, क्याखिनकि उको लोगून को न्याय करना को बखत आग्योछ। उकी अराधना करा, किलैकी उई छै जेलै स्वर्ग, और धरती और समुद्र और पानि का सोत बनायान।”</verse>
				<verse number="8">वाँ एक दुसोरो स्वर्गदूत छ्यो जो पैल वाला स्वर्गदूता का पछिल भटे यो कुंनै आछ, “नाश हो ग्योछ, यो बेबीलोन देश बुरी तरीका नाश हो ग्योछ। उले अपून ब्यविचार ले मदहोश करून वाली मदिरा ले धुत कर दीयान। जैको मतलब यो छै कि उले भौत भद्दो ब्यवहार करछ्य की उले सब जातिन मूर्तिन की पूजा करून सिखाछ। किलैकी उले उनून मूर्तिन की पूजा करून सिखाछ।”</verse>
				<verse number="9">फिर उक बाद एक और तीसोरो स्वर्गदूत जोर-जोरले यो कुंनै आछ, “जो कोई उ जानवर और उकी मूर्ति की पूजा करा, और अपून कपाल या हातून में उकी छाप लगा ली।”</verse>
				<verse number="10">तो उ परमेश्वरो को प्रकोप को मदिरा पिलालो, जो बिना मिलावट का उक गुस्सा का कटोरा में डाली ग्योछ, और पवित्र स्वर्गदूतून का सामुनि और मेम्ना का सामुनि आग और गन्धक का पीड़ में पड़ोलो।</verse>
				<verse number="11">आगो को धुआँ जो उनून कष्ट द्योलो हमेशा तक आकाश में उठनै रौलो, और यो लोग जो पैलि जानवर और उकी मूर्ति की पूजा करछ्या, और उ जो उकी नाम की छाप लगूनान, उनून उ तखलीफ ले नै दिन में और नै रात चैन मिलोलो।</verse>
				<verse number="12">किलैकी यो बात हुन वाली छन, परमेश्वरा का लोगून धैर्य राखून चैछो। पवित्र लोगून को धीरज येमें छै, यो उ लोग छन जो परमेश्वरा का हुकमून माननान और यीशु में विश्वास बना राखनान।</verse>
				<verse number="13">फिर मैंले स्वर्ग में कैसे बुलून सुणछ्य, और उले मैंथैं क्योछ, “इन बातुन याँ लिख। आज भटे, उन अब धन्य छन जो परमेश्वर में विश्वास करभेरन मर जानान।” तब पवित्र आत्मा येले सहमत भ्योछ और उले क्योछ। “यो सच्ची छै। उन धन्य छन किलैकी उन अपून सब मेहनत भटे आराम पाला, और जो काम उनूनले करिना का छन उखिन उनून ईनाम दीई जालो।”</verse>
				<verse number="14">फिर मैंले एक सफेद बादल देखछ्य, और मैंले कैसे देखछ्य जो एक आदिमी को जसो छ्यो, जो उ बादल में बैठिना को छ्यो। उक ख्वारा में सुना को मुकुट छ्यो और हात में धारदार हत्यार छ्यो।</verse>
				<verse number="15">तभै मैंले एक आजि चौथ स्वर्गदूत स देखछ्य, जो परमेश्वरो को संदेश लीभेरन मन्दिर में भटे भ्यार आछ। उले बादल में बैठिनाका आदिमी जोर-जोरले धध्याभेरन क्योछ, “संसार में फसल तैय्यार छै, और फसल काटना को बखत आग्योछ। येक कारण अब अपूनी आँसी चलो, और फसल स काट।”</verse>
				<verse number="16">यो कारण उ आदिमी जो बादलून में बैठिनाको छ्यो, उले संसार में अपूनी आँसी ले काटून लागछ्य; और उले पुरी संसारै की फसल काटछ्य।</verse>
				<verse number="17">फिर एक आजि पचूँ स्वर्गदूत उ मन्दिर भटे भ्यार निकलछ्य, जो स्वर्ग में छै। और उक पास ले एक धारदार आँसी छी।</verse>
				<verse number="18">तभै मैंले एक आजि छयूं स्वर्गदूत स देखछ्य जो, जो वेदी में आगा ले धूप जलूना को जिमेदारी निभूछो। उले जोर-जोरले चिल्ला भेरन उ स्वर्गदूत थैं जैका पास धारदार आँसी छी उ क्योछ, “धरती में अंगूरा का गुच्छा पाक ग्यान! उनून अपून आँसी ले काट ले।”</verse>
				<verse number="19">तब स्वर्गदूत ले उन अंगूरो धारदार आँसी ले काट दीयान जो धरती में छ्या और अंगूरून एक जाग में जाम करभेरन उले अंगूरून एक ठूला रसकुण्ड में डाल दीछ। येको मतलब यो छै कि परमेश्वर भयंकर सजा द्योलो। अंगूरून शैहर भटे भ्यार रसकुण्ड में निचोड़छ्य, और रसकुण्ड भटे जो खून निकलछ्य, उ इतुक गैहरो छ्यो, जतुनो कि घोड़ा को ख्वोरो हुछो जब ऊस लगाम ले पकड़ी जाछो। और तीन सौ किलोमीटर तक न्हैग्यो।</verse>
				<verse number="20"></verse>
			</chapter>
			<chapter number="15">
				<verse number="1">येक बाद फिर मैंले स्वर्ग में एक और अलग चिन देखछ्य जो कि भौत अद्धभुत और भौत डरूनो वालो छ्यो। वाँ सात स्वर्गदूत छ्या जो सात अलग-अलग तरीका का बिपत्ति लीईना का छ्या। उन आखिरी बिपत्ति छन, क्याखिनकि जब उन खत्म हो ज्याला तब परमेश्वरोको गुस्सा खत्म हो जालो।</verse>
				<verse number="2">तब मैंले कुछ देखछ्य जो समुद्रो जसो देखीछ्यो जो काँच का नियाती चमकून मरैछ्यो और उमें आगो ले मिलीना को छ्यो मैंले उन लोगून ले देखछ्य जो जानवर भटे हारिना का नी छ्या। उनूनले पैल जानवर और उकी मूर्ति की पूजा नी करिना की छी, और उनूनमें जानवर को नामोको अंको चिन नी लगाई ग्योछ्यो। वाँ उन उ समुद्रा का किनार में ठाड़ छ्या और उन सब एक वीणा पकड़िनाक छ्या जो परमेश्वरै ले उनून दीईना की छी।</verse>
				<verse number="3">उन एक इसो गीत गान मरैछ्या जसो परमेश्वरा का दास मूसा भौत पैलि गाईना को छ्यो। उनूनले यीशु की महिमा करून खिन, जो कि एक मेम्ना को जसो छै, इसा तरीका ले गाछ, “हे सर्वशक्तिमान प्रभु परमेश्वर, जो तैले करिना को छै उ महान और अद्धभुत छन। तै सब देशून को राजा छै, तै जो ले करछै उ सच्चो और धर्मी छै।”</verse>
				<verse number="4">“हे प्रभु, सब लोगून का द्वारा तेरो आदर करि जाछो, और तेरो नामको सम्मान करनान, क्याखिनकि केवल तैंई पवित्र परमेश्वर छै। हरेक जाति का सब लोग त्यारा पास उनान, और उन तेरि अराधना करनान। क्याखिनकि तेरो न्याय का काम सबून निकीकैं याद छै।”</verse>
				<verse number="5">येका बाद जब इन लोगून ले गीत गान बन्द कर दीछ, तब मैंले देखछ्य कि स्वर्ग में मन्दिर खुलीना को छ्यो। जो मिलाप वाला तम्बू जसो छै।</verse>
				<verse number="6">और फिर सात स्वर्गदूत जिनून आखरी सात बिपत्तिन लीभेरन जान छ्यो, उ मन्दिरा भटे भ्यार निकल्यान। उन चमकदार सफेद कपाड़ा पैनिना का छ्या और उनेरि छाती का चारू तरफ सुना को पट्टा ले छ्या। फिर उन चार प्राणिन में भटे एक ले उन स्वर्गदूतून परमेश्वरा का तरफ जो हमेशा ज्यून छन, उक भयानक दण्ड ले भरिना को एक-एक सुना को कटोर दीयान।</verse>
				<verse number="7"></verse>
				<verse number="8">मन्दिर परमेश्वरै की महिमा और उकी सामर्थ ले उनवाला धुआँ भरीग्यो, तब तक कोई ले मन्दिर में नै जा सक्यो जब तक कि उन सात बिपत्ति खत्म नै हो ग्या जिनून सात स्वर्गदूत ल्याईना का छ्या।</verse>
			</chapter>
			<chapter number="16">
				<verse number="1">उक बाद फिर मैंले मन्दिर में भटे एक तेज आवाज में उन सात स्वर्गदूतून थैं यो कुन सुणछ्य, “जा, संसारा का लोगून में परमेश्वरा का तरफ भटे दण्ड स खड़िया दी जो उन सात कटोरान में छै।”</verse>
				<verse number="2">येक कारण पैल स्वर्गदूत ले, जो कुछ ले उ कटोर में छ्यो ऊस धरती में खड़िया दीछ। येको नतीजा यो भ्योछ कि उन लोगून में भयानक और पिड़ान वाला फोड़ा निकल्यान, जिनूनमें पैलि जानवर की छाप लगाईना छी और जिनूनले उकी मूर्ति की पूजा करिना की छी।</verse>
				<verse number="3">दुसारा स्वर्गदूत ले, जो ले उ कटोर में छ्यो ऊस समुद्र में खड़िया दीछ। और तुरन्त समुद्र एक मरिना का आदिमी को खून को जसो हो ग्यो, और येक कारण समुद्र में सबै प्राणी मर ग्या।</verse>
				<verse number="4">तीसारा स्वर्गदूत ले जो ले उ कटोर में छ्यो ऊस नदीन में खड़िया दीछ। और उन खून बन ग्या।</verse>
				<verse number="5">और मैंले उ स्वर्गदूत स जैस पुर पानि का मलिमें अधिकार छै, ऊस परमेश्वर थैं यो कुन सुणछ्य, “हे पवित्र परमेश्वर, उ उई परमेश्वर छै जो हमेशा छ्यो, तैंस इसकैं न्याय करना को अधिकार छै।</verse>
				<verse number="6">किलैकी उनूनले त्यारा लोगून और तेरो संदेश दिनवाला लोगून मार डालछ्य और उनोरो खून बगाछ, येक कारण अब तै उनून खून पिन खिन दीछै। योई उनून खिन ठीक फल छै।”</verse>
				<verse number="7">मैंले फिर कैसे वेदी भटे यो कुंन सुणछ्य, होई हे सर्वशक्तिमान प्रभु परमेश्वर, यो सच्ची छै कि जसकैं तै लोगून सजा दीछै उ सही और सच्ची छै।</verse>
				<verse number="8">चौथ स्वर्गदूत ले जो ले उ कटोर में छ्यो ऊस सूरज में खड़िया दीछ, और सूरज की गर्मी ज्यादा बढ़ गै और येक कारण लोग उ भौत गर्मी ले जल ग्या।</verse>
				<verse number="9">लोग तेज गर्मी ले जल ग्या, उनूनले परमेश्वरै की निन्दा करछ्य किलैकी उई छ्यो जैका पास बिपत्तिन में अधिकार छ्यो। उनूनले आजि ले अपून पापून है मन नै फिरायो, उनूनले आजि ले परमेश्वरै की महिमास स्वीकार नै कर्यो।</verse>
				<verse number="10">पचूँ स्वर्गदूत ले, जो ले उ कटोर में छ्यो ऊस पैल जानवरक सिंहासन में खड़िया दीछ, और येको नतीजा यो भ्योछ कि पुर राज्य में अन्यारो छा ग्यो। लोगून ले उ भौत पीड़ाका कारणले जो उनूनले मसशूस करछ्य अपूनो जिबोड़ो काटून लाग्यान,</verse>
				<verse number="11">और अपून तखलीफून और फोड़ान का कारण स्वर्गक परमेश्वरै की बुराई करून लाग्यान; लेकिन उनूनले अपून बुरा कामून है मन नै फिरायो जो उन करून मरैछ्या।</verse>
				<verse number="12">छयूँ स्वर्गदूत ले, जो ले उ कटोर में छ्यो ऊस भौत ठूली नदी फरात में खड़िया दीछ, येको नतीजा यो भ्योछ कि उ नदी को पानि सुखग्यो और यो कारण पूरब दिशान का राजा अपूनी सेना लीभेरन उ नदी स पार कर सकून।</verse>
				<verse number="13">येक बाद मैंले फिर तीन भूतून देखछ्य जो भेकुनो जसो देखीछ्या। एक भूत अजगरा का मुँख भटे भ्यार आछ, दुसोरो भूत पैला जानवरक मुँख भटे, और तीसोरो भूत दुसारा जानवरक मुँख भटे भ्यार आछ, मतलब उ जैले झूठ्ठो संदेश दीईना को छ्यो।</verse>
				<verse number="14">इन भूतून का पास चमत्कार करना की शक्ति छी और उनूनले जाभेरन उन लोगून जामा करछ्य जो यो संसारा का सारा देशून में राज्य कर छ्या ताकि उन सर्वशक्तिमान प्रभु परमेश्वरा का महान दिन में उक खिलाफ लड़ाई लड़ून खिन जून।</verse>
				<verse number="15">भूतून ले राजान और उनेरि सेनान उ जाग में जामा करछ्य जैस इब्रानी भाषा में हर-मगिदोन कहलाईछो। येक कारण प्रभु यीशु ले क्योछ, “यो बात सुणा। मेरो वापस उनाको दिन चोरो उनाक जसो अचानक होलो। धन्य छन उ आदिमी जो म्यारा उनाक बखत जागिना को हो, और अपून कपाड़ान तैय्यार राखछो तब उन नंगा नी हुन और कोई ले उनून शर्मिदा नी करोलो चाहे उन भ्यार भौत लोगून का बीच में जून।”</verse>
				<verse number="16"></verse>
				<verse number="17">सतूँ स्वर्गदूत ले, जो ले उ कटोर में छ्यो ऊस हवा में खड़िया दीछ। और मैंले, स्वर्ग का मन्दिर का भितर भटे परमेश्वरा का सिंहासन में भटे कैसे जोरले यो कुंन सुणछ्य, “पुरो हो ग्यो!”</verse>
				<verse number="18">फिर उई बखत चाल चमकछ्य, और गड़गड़ाट और बादल गर्जन लाग्यान और एक इसो भयानक भूचाल आछ, जब भटे आदिमी संसार में रून मर्योछ, तब भटे इसो बिनाशकारी तरीका ले भूचाल कभै नै आयो।</verse>
				<verse number="19">येका बाद बेबीलोन को ठूला देश तीन टुकूड़ा में बाँणि ग्यो, और पुर संसारा का सब शैहर नाश हो ग्या। किलैकी परमेश्वर ले उ पुरो करछ्य जैको उले बाबुल का लोगून दण्ड का बारिमें वादा करिना को छ्यो। येस परमेश्वरा का तरफ भटे कठोर दण्ड दीई जालो। यो इसो होलो जसीकैं उनूनले बिन पानि मिलीना की शराब पीईना की हो, जैस परमेश्वरेले खुद उ प्याला में खड़िया रैछ जो उक गुस्सा देखूछो।</verse>
				<verse number="20">उ बखत समुद्रा का सब टापू अपून जाग है गायब हो ग्या, और पहाड़ून को पत्तो नै चल्यो।</verse>
				<verse number="21">ठूला-ठूला ओंला आकाश भटे लोगून में पड़ीयान, जैको हरेक ओंला को वजन लगभग पचास किलो छ्यो। येक कारण कि यो बिपत्ति भौत भारी छी, लोगून ले ओंलान की बिपत्ति का कारण परमेश्वरै की बुराई करछ्य।</verse>
			</chapter>
			<chapter number="17">
				<verse number="1">जिन सात स्वर्गदूत का पास सात कटरा छ्या, उनूनमें भटे एक ले आभेरन मैंथैं यो क्योछ, “याँ अ, मैं तैंस देखूलो कि परमेश्वर कसकैं उ ठूली वेश्या स दण्ड द्योलो, जो एक इसा जाग में बैठिना की छै जो भौत पानि का मलिमें बैठिना की छै।</verse>
				<verse number="2">जैका दगाड़ संसारा का राजान ले ब्यभिचार करछ्य, और संसारा का लोग उक ब्यभिचार की मदहोश करून वाली शराब ले धुत हो गैछ्या।”</verse>
				<verse number="3">तब पवित्र आत्मा की मद्दत ले, स्वर्गदूत मैंस बिरान जागा खिन ली ग्योछ, मैंले वाँ एक स्यैनि स देखछै जो लाल रंगा का जानवर में बैठिनाको छी। उक सात ख्वारा और दस सींग छ्या। उको आंग उन नामेंले ढ़किनाक छ्या जो परमेश्वरो को अपमान करनान।</verse>
				<verse number="4">यो स्यैनि बैंगनी और लाल रंगा का कपाड़ा पैनिना की छी, उले अपूनो आंग सुना का गहना ले, कीमती ढ़ुगा ले और मैंहगा मोतिन ले सजीना कि छी, अपून दैंन हात में उले शराब ले भरिना को एक सुनाको कटरो पकड़ीनाको छ्यो, जो उक बुरा कामून और ब्यभिचार की गन्दगी ले भरिना को छ्यो।</verse>
				<verse number="5">उक कपाल में एक नाम लिखीनाको छ्यो जो गुप्त छ्यो। उमें यो लिखीना को छ्यो, “महान देश बेबीलोन वेश्यान की और संसारे की सब बुरी चीजून की ईजा छूँ।”</verse>
				<verse number="6">और मैंले देखछै कि उ स्यैनि परमेश्वरा का पवित्र लोगून को खून और जो लोग यीशु का गवा छ्या उनोरो खून पीनाले नशा में छी जिनून लोगून ले मार डालछ्य किलैकी उन यीशुका प्रति विश्वासयोग्य छ्या। मैं ऊस देखभेरन हैरान हो गयुं।</verse>
				<verse number="7">उ स्वर्गदूतले मैथैं क्योछ, “तैं हैरान जन हो। मैं यो स्यैनि, और उ जानवरै स, जैमें उ बैठिनाको छै, और जैका सात ख्वारा और दस सींग छन, तैंस उ गुप्त बातों को भेद बतुलो।”</verse>
				<verse number="8">जो जानवर स तैले एल देखछ्य, एक बखत ज्यून छ्यो, लेकिन अब ज्यून नाहातिन; उ गैरा गड्डा भटे भ्यार उनवालो छै और परमेश्वर ऊस पुर तरीका ले नाश कर द्योलो; और संसारा का लोग जिनारा नाम संसार बनून है पैलि जीवनै की किताब में नै लिख रै, उन सब हैरान हो जाला जब उन यो जानवरै स देखाला। जो एक बखत ज्यून छ्यो; अब उ ज्यून नाहातिन; लेकिन उ फिर वापस आ जालो।</verse>
				<verse number="9">येस समझून खिन ज्ञान की जरूरत छै, जानवर का सात ख्वारा उ शैहरा का सात पहाड़ून देखूछो जाँ यो स्यैनि राज करछी। उन सात राजान ले देखूछो।</verse>
				<verse number="10">उनूनमें पाँच त पैलि मर चुक ग्यान, और उनूनमें भटे एक ऐल ले छै, आखरी वालो एल तक नै आर्यो। लेकिन जब आलो, त उ सिर्फ थ्वाड़ा बखत खिन राज्य करोलो।</verse>
				<verse number="11">उ जानवर जो भौत बखत पैलि रूछ्यो, और अब यो बखत नाहातिन, उ आठवाँ राजा छै। लेकिन उ आठवाँ राजा पैलि सात राजान में भटे एक छै, और अन्त में राजा स जरूर हमेशा की दण्ड दीई जालो।</verse>
				<verse number="12">उ दस सींग जो तैंले देखीना का छ्या, उन दस राजा देखूनान जिनूनले ऐल तक राज्य शुरू नै कर रैछ। उन दस राजान उ जानवर का दगाड़ राज्य करना अधिकार पाला, लेकिन उको राज्य थ्वाड़ा बखत खिन होलो।</verse>
				<verse number="13">इन सबै दस राजान को एक्कै मक्शद छै, और उन अपूनी-अपूनी शक्ति और अधिकार उ जानवर स दी द्याला।</verse>
				<verse number="14">जानवर और दस राजान ले मेम्ना का बिरोध में लड़ाई लड़ाला, लेकिन मेम्ना उनून हरा द्योलो, किलैकी उ प्रभुन को प्रभु और राजान को राजा छै, उक लोग उन छन जिनून परमेश्वर ले बुला रैछ और चुन रैछ, और जो उक प्रति वफादार छन।</verse>
				<verse number="15">फिर स्वर्गदूत ले मैंथैं यो ले क्योछ, “जो पानि तैले पैलि देख्यान, जैमें उ ठूली वेश्या बैठिना की छी, उन पुर जाति का लोगून, और देशून और भाषान देखूनान।”</verse>
				<verse number="16">उ बखत आलो जब जंगली जानवर उन दस राजान का दगाड़ जो उक दगाड़ छन, उ वेश्या भटे नफरत कराला जो उमें बैठिना की छै। उन उमें हमला कराला, ऊस नंगो कराला, और उको माँसो को हिस्सा खा जाला, और बाकि स आग में जला द्याला।</verse>
				<verse number="17">उ स्यैनि स जैस तैले देखछ्य, उ यो ठूलो शैहर छै जो संसारा में सबै राजान में राज्य करछो। यो चीज उक दगाड़ भ्यान, किलैकी परमेश्वर ले अपून मक्शद स पुरो करून खिन उनार मन में यो बात डालछ्य। योई कारण छै कि उनूनले अपूनो अधिकार जानवर स दी दीछ कि उ राज्य करो, जब तक कि उ सब पुरो नै हो ज्यो जो परमेश्वरेले कयीना को छ्यो।</verse>
				<verse number="18"></verse>
			</chapter>
			<chapter number="18">
				<verse number="1">येका बाद, फिर मैंले स्वर्ग भटे एक स्वर्गदूत स तलि ऊँन देखछ्य। उक पास भौत अधिकार छ्यो; और उकी भौत चमकदार चमक का कारण पुरी धरती में उज्यालो हो ग्यो।</verse>
				<verse number="2">उले जोरले धध्याभेरन क्योछ, “नाश हो ग्यो, उ बेबीलोन देश बुरा तरीका ले नाश हो ग्यो। और उ भूतून की रूना की जाग, और हरेक बुरी आत्मा को अड्डा, और हरेक अशुद्ध और घृणित चिड़ियान को अड्डा बन ग्यो।”</verse>
				<verse number="3">यो येक कारण होलो किलैकी उ स्यैनि ले जो बेबीलोन देश छै, हरेक जाति का सब लोगून ब्यभिचार की मदहोश करून वाली शराब ले धुत कर दीछ, जो उकी मूर्तिन की पूजा करनान। पुर संसारा का राजान ले उक दगाड़ व्यभिचार करिना को छै। और संसारा का ब्यापारी उ स्यैनि की मैहंगी-मैहंगी चीजून की इच्छा का कारण धनवान बन ग्यान।</verse>
				<verse number="4">फिर मैंले स्वर्ग भटे एक आजि आवाज सुणछ्य, हे म्यारा लोगो, उ शैहर में भटे भ्यार निकल जा। तुम उन लोगून का पापून का भागीदार जन बना, ताकि जो बिपत्तिन उमें आलि उ तुमार मलिमें नै अ।</verse>
				<verse number="5">किलैकी उक पाप भौत छन और उको खता स्वर्ग तक पुज ग्योछ, और परमेश्वर उ बुराईस नै भुलनो जो उले करिना की छै।</verse>
				<verse number="6">येक कारण मैं कुंछूँ, उ शैहरा का दगाड़ ले ऊसोई कर, जसो उले दुसारा लोगून का दगाड़ करछ्य। और जो दुख उले दीयान ऊस दुगुन लौटा दे। उले लोगून अपून बुरा कामून को स्वाद चाखून खिन प्रभावित करछ्य, ऊस परमेश्वरो को गुस्सा ले दुगुन ताकतले सहन पड़ोलो।</verse>
				<verse number="7">जतुक उले अपूनी बड़ाई करछ्य और भोग बिलास करछ्य उतकैं ऊस तखलीफ दीछ, उले अपून मन में क्योछ, “मैं एक रानी की नियाती लोगून में राजा करलो। मैं एक विध्वा नाहातिनू, और मैं शोक कभै नी करूँ।”</verse>
				<verse number="8">येक कारण एक्कै दिन में उमें बिपत्ति आ पड़ाला, और मौत, और शोक, और अकाल; और उ आग में भस्म कर दी जालि, किलैकी उको न्याय करूनवाला प्रभु परमेश्वरा का शक्तिमान छै।</verse>
				<verse number="9">“तब संसारा का राजा, जिनून ले उक दगाड़ ब्यभिचार और भोगबिलास करछ्य, जब राजा ऊस आगा का लपटून में जलून देखाला त उन उनून खिन रोला और छाती पीटाला।”</verse>
				<verse number="10">और उकी तखलीफ का डरा का मारी उन भौत दूर ठाड़ हो भेरन कौला, हे ठूला देश, बेबीलोन! हे मजबूत देश, हाय! हाय! पल भर में परमेश्वरो को न्याय तैमें अचानक आग्योछ।</verse>
				<verse number="11">“संसार का ब्यापारी उ खिन डाड़ मारला और बिलाप कराला, किलैकी अब कोई नाहातिन जो उ सामान स मोल ल्योलो जो ऊस बचुन मर्यान।”</verse>
				<verse number="12">उनोरो माल कई प्रकारो को छ्यो। उमें सुन, चाँदी, रत्न, और मोती छ्या। उमें बेहतरीन कपाड़ा छ्या जो मेहंगा धागा, चमकील लाल और बैंजनी कपाड़ा ले बनिना का छ्या। उमें खुशबुदार लाकाड़ा ले बनिना का चीज, हाथी का दाँत ले बनिना का चीज छ्या, और दुसारा चीज छ्या जो मेहंगा लाकाड़ा या पीतल और लूवा और संगमरमर ले बनिना का छ्या,</verse>
				<verse number="13">और दालचीनी, मसाला, धूप, इत्र, लोबान, मदिरा, तेल, मैदा, ग्यूँ, गोरू-बल्द, भेड़-बाकारा, घोड़ा, रथ, और जो समान मोल लीछ्या और बेचनान, उन अब लोगून दास रूप में नै बेच सकना।</verse>
				<verse number="14">ब्यापारी उथैं कौला, “उन सब चीज जैस तै चाँछी अब नाहातिन। उ खुशबुदार चीज जो तैंस पसन्द छ्या, उन सब चीज जिनून तै अपून शरीर स सुन्दर बनून खिन इस्तमाल करछी, उन सब हरा ग्यान उन अब नी मिलाला।”</verse>
				<verse number="15">इन चीजून का ब्यापारी जो उक द्वारा धनवान हो गैछ्या, उकी तखलीफस देखभेरन दूर ठाड़ होला, और डाड़ मारभेरन बिलाप करभेरन कौला।</verse>
				<verse number="16">हाय! हाय! यो ठूलो नगर जो मलमल, और बैंजनी और लाल रंगा का कपाड़ा पैनिना को छ्यो, और सुन और रत्नूले और मोतिन ले सजीना को छ्यो,</verse>
				<verse number="17">थ्वाड़ा बखत में परमेश्वर उको सब धन नाश कर द्योलो। पानि का जहाज का सब कप्तान, और सब सवारी, और जहाज में काम करूनवाला, और उन सब जो समुद्र में काम करभेरन कमाई करनान, बेबीलोन देश भटे भौत दूर ठाड़ होभेरन,</verse>
				<verse number="18">उ आग भटे निकलून वाला धुआँ देखाला जो शैहर स जलून मरैछ, तब उन चिल्लाल और कौला, “यो महान शैहरो को जसो कोई दुसोरो शैहर नाहातिन।”</verse>
				<verse number="19">उ अपूनो दुख देखून खिन अपून ख्वारान में धुल डालाला, और रोला और बिलाप करभेरन कौल, “हाय! हाय!” यो ठूला नगर जैकी सम्पत्ति का कारण, हरेक जैका पास समुद्री जहाज छ्या, उन धनवान हो ग्या, और थ्वाड़ा बखत में उनोरो सब धन नाश हो ग्यो।</verse>
				<verse number="20">“तुम जो स्वर्ग में रूछा, और हे परमेश्वरा का लोगो, और प्रेरितो, और परमेश्वरो को संदेश दिनवाला लोगून यो बारिमें भौत खुशी मना, किलैकी परमेश्वर उ शैहर में अपूनो न्याय भेजिना को छै, उ बुराईक कारण जो उले तुमार दगाड़ करिना की छै।”</verse>
				<verse number="21">फिर एक ताकतवर स्वर्गदूत ले ठूलो चक्की को पाट जसो एक ढूंगो उठाछ, और यो कैभेरन समुद्र में खित दीछ, “ जसा तरीका ले यो ढूंगास समुद्र में खित जाछो, और उ दुबारा नै मिलनो, उसीकैं ठूलो देश बेबीलोन ले एक्कै बार में नाश हो ज्यालो। यो दुबारा नी बनाई जालो।”</verse>
				<verse number="22">हे बेबीलोन देश, तैमें फिर कभै वीणा बजूनवाला और गीत की आवाज नी सुणाई देली। वाँ मुरूली या तुरी नी बजाई जाला, और कोई ले बड़िया कारीगर तैंस नी मिलाला; और चक्की को चलनाकि आवाज तैंस कभै नी सुणाई देली;</verse>
				<verse number="23">उक रात अन्यारा होला, याँ तक कि एक दीया ले नी जलोलो। और ब्योलो और ब्योलि की खुशी की आवाज नी होलि। इसो येक कारण होलो किलैकी उक ब्यापारीन ले, जो पुर संसार में सबून है ठूला छ्या अपून जादू-टोना ले सब जाति का लोगून ध्वाका दीछ।</verse>
				<verse number="24">परमेश्वरेले बेबीलोन देश स येक कारण दंड दीछ किलैकी यो शैहर ले परमेश्वरो को संदेश दिनवाला लोगून, और दुसारा सब लोगून जो परमेश्वरा का छन और पुर संसारा का लोगून में खूनो को दोष छ्यो।</verse>
			</chapter>
			<chapter number="19">
				<verse number="1">जब उ शक्तिशाली स्वर्गदूत ले बोलून बन्द करछ्य, तब मैंले सुणछ्य, उ इसो जसो छ्यो जसकैं स्वर्ग में भौत लोग गीत गान मर्यान हुन! हालेलूय्याह “अब हमोरो परमेश्वर अपूनी महिमा और सामर्थ को इस्तमाल करभेरन अपून लोगून बचालो।”</verse>
				<verse number="2">उकी अराधना करा किलैकी उक सब फैसला सही और सच्चा छन। येक कारण उले उ ठूली वेश्या को न्याय करछ्य, किलैकी उले संसारा का लोगून पाप करून खिन मजबूर करछ्य। परमेश्वरेले उको न्याय करिना को छै किलैकी उक सेवकून उक द्वारा मारी गैछ्या।</verse>
				<verse number="3">फिर दुसारा बार ले मैंले सुणछ्य, इसो लागून मरैछ्यो जसकैं स्वर्ग में भौत लोग गीत गान मर्यान हो! हालेलूय्याह! बेबीलोन देश स नाश करूनो वालो आगा भटे निकलून वालो धुआँ कभै ले बन्द नी होलो।</verse>
				<verse number="4">तब चौबीस प्राचीन और चारू प्राणी ले झुकभेरन परमेश्वरै की अराधना करछ्य; जो सिंहासन में बैठिना को छ्या, और क्योछ, “आमीन! हालेलूय्याह।”</verse>
				<verse number="5">और फिर मैंले कैसे बोलून सुणछ्य, और इसो लागछ्य जसकैं आवाज परमेश्वरा का सिंहासना भटे आछ, “हे हमार परमेश्वरा का सेवकों और तुम जो उको डर मानछा, तुम चाहे ठूला पद में हो या नाना पद में परमेश्वरे की स्तुति करा।”</verse>
				<verse number="6">येक बाद, मैंले यो ले सुणछय जो भौत ज्यादा लोगून को चिल्लान जसो छ्यो। उनोरो चिल्लानो ठूलो झरना का पानि का गर्जन की नियाती छ्यो, और बादल की ठूली गड़गड़ाट की आवाजे की नियाती छी। मैंले उनून यो कुनै सुणछ्य; “हालेलूय्याह! आ हम हमार प्रभु परमेश्वरे की स्तुति करा। क्याखिनकि उक पास हरेक जाग राज्य करना की सामर्थ छै।</verse>
				<verse number="7">आ, हम खुश और मगन हो, और उकी स्तुति करा, क्याखिनकि मेम्ना को ब्याक बखत आग्योछ, और उकी ब्योलि अपूनो शिंगार करभेरन अपूनास सजाभेरन उ खिन तैय्यार कर हैछ।</verse>
				<verse number="8">परमेश्वरे ले मेम्ना स साफ, चमकदार मलमल का बनिना का कपाड़ा पैनून खिन दीयान।” क्याखिनकि उ चमकदार मलमल को मतलब, परमेश्वरा का लोगून का धर्माका काम छन।</verse>
				<verse number="9">तब स्वर्गदूतले मैंथैं क्योछ, “यो लिख, कि धन्य उन छन, जो मेम्ना का ब्याका दावत में बुलाई ग्यान।” फिर उले मैंथैं क्योछ, “इन वचन जो परमेश्वरे ले कईना का छन, उन बिलकुल सत्य छन।”</verse>
				<verse number="10">जब मैंले सुणछ्य त मैं उ आदिमी का सामुनि झुक गयुं जो मैंथैं बात करूनमर्यो छ्यो, किलैकी मैं उकी अराधना करून खिन जानमरै छ्यूँ। उले मैंथैं क्योछ, “मेरि अराधना जन कर, मैं केवल परमेश्वरो को एक सेवक छूँ जसो तैं छै और त्यारा भाईन का नियाती जो यीशु का गवाह छन सच्ची शिक्षान में विश्वास करनान और मान्नान। केवल परमेश्वरै छै जैकी तैंस अराधना करून चैंछी। क्याखिनकि परमेश्वर आत्मा छै जो परमेश्वरा का लोगून यीशु का द्वारा बताई ग्यान सत्य की घोषणा करना का योग्य बनूछो।”</verse>
				<verse number="11">फिर मैंले स्वर्ग स खुलीना को देखछ्य, और वाँ मैंले एक सफेद घोड़ो ले देखछ्य, जैमें एक सवार बैठिनाको छै, जो परमेश्वरो को विश्वासयोग्य और सच्चो सेवक छै; उ उक अनुसार जो परमेश्वरेकि नजर में ठीक छै, परमेश्वरा का बैरिन का खिलाफ न्याय करछो और लड़ाई करछो।</verse>
				<verse number="12">उक आँखा आगा का लपटून की नियाती चमक छ्या, और उले भौत ज्यादा मुकुट पैनिना का छ्या। उक आंग में एक नाम लिख रैछ, लेकिन केवल उई उ नामोको मतलब जाणछो।</verse>
				<verse number="13">उ खून में लतपत होईना का कपाड़ पैनिनाको छै, और उको नाम परमेश्वरो को वचन छै।</verse>
				<verse number="14">स्वर्ग भटे सिपाईन की ठूली भीड़ उक पछिल-पछिल गैछ, यो सैनिक सफेद घोड़ान में बैठिनाका छ्या और उनूनले सफेद मलमल का कपाड़ा पैनिना का छ्या।</verse>
				<verse number="15">जो घोड़ा में बैठिनाको छ्यो उको मुँख भटे एक तेज तलवार निकलछी जैको इस्तमाल उन देशून हरून खिन करोलो, और उ लूवाको राजदण्ड लीभेरन उनूनमें राजा करोलो, और सर्वशक्तिमान परमेश्वरा का भयानक गुस्सा की मदिरा का कुंण्ड में अंगूर स निचोड़ोलो।</verse>
				<verse number="16">और उक कपाड़ा और दैंन जंगाड़ में यो नाम लिखीना को छै, “उ प्रभुन को प्रभु और राजान को राजा छै।”</verse>
				<verse number="17">फिर मैंले एक स्वर्गदूत स सूरज में ठाड़ होईनाको देखछ्य, उले जोर धध्याभेरन आकाश उड़ून वालान सब चिलून थैं क्योछ, आ, उ ठूली दावत खिन जाम हो जा, जो परमेश्वरेले तुमून खिन तैय्यार कर रैछ।</verse>
				<verse number="18">आ और राजान को, और सब सरदारून को, और ताकतबर सैनिकून को, घोड़ा और जो उनूनमें बैठून वाला जो मर ग्यान उनोरो माँसो खा। तुम हर प्रकारो लोगून को माँसो खा सकछा, क्या दास क्या आजाद हो, क्या नाना क्या ठूला सबून को।</verse>
				<verse number="19">फिर मैंले उ जानवर स देखछ्य जो समुद्र भटे भ्यार आईना को छ्यो, और संसारा का राजान और उनेरि सेनान ले देखछ्य, उन घोड़ान में बैठीनाका और उकी सेना का बिरोध में लड़ून खिन एक दगाड़ आईना का छ्या।</verse>
				<verse number="20">उ पैलो जानवर और उक दगाड़ दुसोरो झूठ्ठो जानवर पकड़ी ग्यो, उले पैला जानवर का तरफ भटे चमत्कार दिखाईना छ्या, जैक द्वारा उले ऊस भरमाछ जिनून में उ जानवर कि छाप छी, और जो उकी मूर्ति कि पूजा करछ्या। इन द्वीवैन ज्यूनाई आगा का कुण्ड में डाल दी ग्यान जो गन्धक ले जलछी।</verse>
				<verse number="21">तब सफेद घोड़ा में बैठीनवालो उ सवार ले जंगली जानवर स और उकी पुरी सेना स मार डालछ्य, उले उनून उ तलवार ले काट डालछ्य जो उक मुँख भटे निकलछी। चील मरिनाका लोगून को माँसो खान खिन आग्या जब तक की उनोरो पेट नै भरीग्यो।</verse>
			</chapter>
			<chapter number="20">
				<verse number="1">फिर मैंले एक स्वर्गदूत स स्वर्ग भटे उतरून देखछ्य, जैका हात में चाँबी दी गैछ जो उ गैरा गड्डा स खोल सकछो और एक ठूली जंजीर छी।</verse>
				<verse number="2">और उले उ अजगरस, मतलब पुरान स्यापस जैस शैतान ले कयी जाछो, झपटभेरन पकड़ लीछ। उले ऊस बाँदि भेरन गैरा गड्डा में खिती दीछ, और द्वार बन्द कर दीछ और उमें मुहर लगा दीछ ताकि ऊस एक हजार साल खोलि नै जौ। येक कारण, उ दौरान, शैतान एक हजार साल तक लोगून ध्वाका नै दी सको। उक बाद, ऊस फिर थ्वाड़ा देर खिन आजाद करि जालो।</verse>
				<verse number="3"></verse>
				<verse number="4">उक बाद मैंले सिंहासन देख्यान, और जो लोग उन सिंहासनून में बैठिना का छ्या उनून राज्य करना को अधिकार दीई ग्योछ। मैंले उन लोगून की आत्मान ले देखछ्य, जिनारा ख्वारा काट दी ग्यान किलैकी उनूनले यो क्योछ कि यीशु उनोरो प्रभु छै, और उन परमेश्वरा का वचन में विश्वास करछ्या। उन लोगून ले जानवर या उकी मूर्ति पूजा नै करि, उनूनले अपून कपाल या हातून में उ जानवरै की छाप ले नै लागायी। इन लोग फिर ज्यून हो ग्या और एक हजार साल तक मसीह का दगाड़ मिलभेरन राज्य करछ्य।</verse>
				<verse number="5">इन लोग ज्यून करि जान में सबून है पैला छन, और इन खास तरीका ले धन्य और पवित्र छन। दुसरी मौत की उनूनमें कोई अधिकार नाहातिन। उन परमेश्वर और मसीह का याजक होलो, और उनार दगाड़ एक हजार साल तक राजा कराला। यो एक हजार साल है पैलि कोई दुसारा मरिनाका लोगून ज्यून नी करि जाला।</verse>
				<verse number="6"></verse>
				<verse number="7">जब हजार साल पुर हो जाला त शैतान स कैद भटे छोड़ दी जालो, और उ उन देशून ध्वाका दीन खिन भ्यार आ जालो जो पुर संसारा फैलीना का छन। इन देशून गोग और मगोग कयी जाछो। शैतान उन सबून एक जाग में जामा करोलो जाँ उन लड़ाई कराला। उन भौत ज्यादा होला इतुक कि कोई उनून समुद्रा का बालू कणून की नियाती नी गिन सकाला।</verse>
				<verse number="8"></verse>
				<verse number="9">शैतान की सेना पुर संसार में फैल गै। और उनूनले उ शैहर स घेर लीछ, जैस परमेश्वर प्रेम करछो, जाँ उक लोग रूछ्या। लेकिन परमेश्वर की तरफ भटे, स्वर्ग भटे आगो भ्यार आछ और पुरी सेना नाश कर दीछ।</verse>
				<verse number="10">येक बाद शैतान पकड़ी जालो, जैले देश-देशा का लोगून भरमाछ और ऊस गन्धक की आग में खित दी जालो, मतलब उ आग में जो झील की नियाती ठूली छै। जानवर और परमेश्वरा का तरफ भटे झूठ्ठा बात बतून वाला स पैलिकैं खित दी ग्योछ। और वाँ उ आग में उनून हमेशा खिन दिन और रात सताई जालो।</verse>
				<verse number="11">फिर मैंले एक सफेद सिंहासन देखछै जैमें परमेश्वर बैठिना को छ्यो। लेकिन वाँ जाँ परमेश्वर बैठिनाको छ्यो, वाँ धरती और स्वर्ग सब गायब हो ग्या, और केले लै उनून फिर नै देख्यो।</verse>
				<verse number="12">और मैंले मरिना का लोगून उ सिंहासन का सामुनि ठाड़ देखछै, मतलब उनून जो खास और आम लोग छन। और समुन्द्र ले अपूना मुर्दान दी द्याला जो उमें छ्या, और सब मरिना का लोग, और अधोलोक और धरती ले अपूना-अपूना मुर्दान दी द्याला। और किताब खोलि ग्यान, जैमें जीवनै की किताब ले शामिल छै। और किताबून में लिखीना का बातुन का अनुसार उनोरो न्याय करि ग्यो, उक अनुसार जो उनूनले करिना को छ्यो। उन सबून को उनार कामून का अनुसार न्याय करि ग्यो।</verse>
				<verse number="13"></verse>
				<verse number="14">उन सब लोग जिनारा नाम जीवनै की किताब में नी लिखीना का छ्या, उनून आगा की झील में खित दी ग्यो। येक बाद, अब मौत नाहातिन, अब मरिना वालान खिन कोई जाग नाहातिन, किलैकी उन सब लोग जिनारा नाम जीवनै की किताब में नी लिखीना का छ्या उनून आगा की झील में खित दी ग्योछ। यैस दुसरी मौत कई जाछो, जो कि आगा की झील में सजा छै।</verse>
				<verse number="15"></verse>
			</chapter>
			<chapter number="21">
				<verse number="1">फिर मैंले एक नय्या स्वर्ग और एक नय्या धरती देखछ्य, क्याखिनकि पुरानो स्वर्ग और धरती अब नी छ्या। और अब समुन्द्र ले नी छ्यो।</verse>
				<verse number="2">येक बाद फिर मैंले पवित्र शैहर स ले देखछ्य, जो कि नय्या यरूशलम शैहर छै, जो स्वर्ग भटे परमेश्वरा का तरफ भटे तलि ऊनमर्योछ। उ शैहर स एक ब्योलक नियाती तैय्यार करि ग्योछ, जैक कपाड़ा पैनाई ग्यान और सजाई-धजाई ग्योछ और जो ब्योलो थैं ब्या करून खिन तैय्यार छै।</verse>
				<verse number="3">फिर मैंले एक आवाज सुणछ्य जो परमेश्वरा का सिंहासन भटे जोरले बोलछ्य, “देख, अब परमेश्वरा का लोगून का बीच में अपूनो घर बनूलो। उन उनार दगाड़ रौल, और उन उनार लोग होला, परमेश्वर खुद, उनून अपून लोगूनका रूप में स्वीकार करोलो और उ उनार दगाड़ रोलो, और उन ले ऊस अपून परमेश्वरा का रूप में स्वीकार कराला।</verse>
				<verse number="4">परमेश्वर उनार आँखान भटे सब आँसून पोछि द्याला; और कोई ले कभै दुख महसूस नी कराला। रौला नै, पिड़ो को अनुभव नी कराला, और नै मौत रोलि, किलैकी पुरान संसारे की सारी चीज गायब हुनै रोलि।”</verse>
				<verse number="5">तब सिंहासन में बैठिना का आदिमी ले क्योछ, “देखा, मैं सब कुछ नय्या करून मर्यू।” फिर उले मैंथैं क्योछ, “इन बातुन लिख लै, क्याखिनकि जो मैं कुछूँ तैं उमें विश्वास कर सकछै, यो बात जरूर पुरी होलि।”</verse>
				<verse number="6">फिर उले मैंथैं क्योछ, सब बात पुरी हो ग्यान। “मैं अल्फा और ओमेगा, पैलो और अन्त छूँ। जो कोई ले पानि तिस्सो छै, मैं ऊस उ पानि का स्त्रोत भटे फिरीमें पानि पिन खिन द्यूलो जो अनन्त जीवन दीछो।”</verse>
				<verse number="7">उन लोग जो दुष्ट ताकतून हरूनान, उई मैंथैं इन सब आशीषून प्राप्त करोलो और मैं उको परमेश्वर हुंलो और उ मेरो च्योलो होलो।</verse>
				<verse number="8">लेकिन उन जो सताव का डरले मैंस त्याग कर दीनान और जो मैंमें भरोस करून छोड़ दीनान, उनून गन्धक का आग में खित दी जाला। इसीकैं उनूनले जो बुरो करनान, और खून करनान, और ब्यभिचार करनान, और अपून दगड़ियान का प्रति जादू-टोना करनान, और मूर्तिन की पुज करनान, और सब झूठ बोलूनवालान, उनूनले गन्धक का आग में डाल दी जाला। यो दुसरी मौत छै।</verse>
				<verse number="9">फिर जिन सात स्वर्गदूतून में भटे एक ले जिनूनले मनुष्य जाति में सात आखरी मुसिबतुनले भरिनाका सात कटोरा खड़ाईनाक छ्या, मैंथैं बात करछ्य, उले क्योछ, याँ अ, मैं तैंस ब्योलि देखूलो जैको जल्दी ही मेम्ना का दगाड़ ब्या हो ज्यालो।</verse>
				<verse number="10">तब पवित्र आत्मा की मद्दत ले, स्वर्गदूत मैंस एक ठूलो पाहाण में ली ग्योछ, और पवित्र शैहर नय्या यरूशलम स स्वर्ग भटे परमेश्वरा का पास भटे उतरून देखछ्य।</verse>
				<verse number="11">परमेश्वरा का तरफ भटे मिलून वालो तेज उज्याला ले नय्या शैहर चमकून मर्यो छ्यो, और को उज्यालो भौत कीमती ढ़ुगो, मतलब यशब नामक कीमती ढ़ुगा की नियाती चमकून मरेछी और काँचाक नियाती साफ छ्यो।</verse>
				<verse number="12">शैहरा चारों तरफ एक भौत ऊँच्ची दिवाल छी, उ दिवाल में बार फाटक छ्या और उनूनमें भटे हरेक फाटकून में एक स्वर्गदूत को पहरा छ्यो; और उन फाटकून में इस्राएला का बार कुलुको नाम लिखीना का छ्या।</verse>
				<verse number="13">शैहरा का हरेक दिशा में तीन-तीन फाटक छ्या, पूरब में, पश्चिम में, उत्तर में और दक्षिण में।</verse>
				<verse number="14">उनूनले शैहरा की दिवाल बार ठूला-ठूला ढ़ुगान का मलि में बनाईनाकि छी। और हरेक ढ़ुगा में मेम्ना क बार प्रेरितून का नाम लिखीनाका छ्या।</verse>
				<verse number="15">उ स्वर्गदूत जो मैंथैं बात करूनमर्योछ छ्यो, उक पास नगर और उक फाटकून और उकी दिवालस नापुन खिन एक सुना की छड़ी छी।</verse>
				<verse number="16">उ शैहरा का चार कुना छ्या और चारों कुना एक समान छ्या। स्वर्गदूतले अपून नापुन वाली छड़ी ले शैहर स नापछ्य; उकी लम्बाई द्वी हजार चार सौ किलोमीटर छी। उकी चौड़ाई और ऊँचाई उकी लम्बाई की जतुक छी।</verse>
				<verse number="17">उले शैहरा का दिवाल ले नापछ्य; उकी ऊँचाई और चौड़ाई लगभग छियासठ मीटर छी। जै नापो को स्वर्गदूत ले इस्तमाल करछ्य, उ आदिमीन का द्वारा इस्तमाल करि जानवाला नापा का समान छै।</verse>
				<verse number="18">शैहर चोखा सुना ले बनाई को छ्यो जो काँचा का नियाती चमक छ्यो, उकी दिवाल, यशब नामक कीमती ढ़ुगा ले बनिनाकी छी।</verse>
				<verse number="19">दिवालकि नींव हरेक तरीका ले कीमती ढ़ुगा ले सजाईना की छी, पैलि नीवं यशब की, दुसरी नीलमणी की, तिसरी लालड़ी की, चौथ मरकत की,</verse>
				<verse number="20">पाँचवी गोमेदक की, छंटु चमकदार लाल माणिक्य की, सतूँ पीतमणि की, अठूँ पेरोज की, नवूं पुखराजा की, दसूँ लहसनिए की, ग्यारू धुम्रकान्त की, बारू याकूत की छी।</verse>
				<verse number="21">शैहरा का बार फाटक बार मोतिक बनिनाकी छ्या, हरेक फाटक एक्कै मोतिले बनिनाकी छ्या। और शैहर की सड़क, उन चोखा सुना ले बनाईनाकि छी जो काँचा की नियाती चमकछी।</verse>
				<verse number="22">मैंले उमें कोई मन्दिर नै देखियो, क्याखिनकि सर्वशक्तिमान परमेश्वर और मेम्ना उ शैहर में छै। येक कारण वाँ मन्दिरे की कोई जरूरत नाहातिन।</verse>
				<verse number="23">उ शैहर स उज्याला खिन सूरज या चाँद की जरूरत नाहातिन। क्याखिनकि उ शैहर में परमेश्वर और मेम्ना का चमके ले उज्यालो छै।</verse>
				<verse number="24">शैहर में चमक, संसार में रूनवाला सब लोगून उज्यालो दीछो और संसार में सब राजा अपून-अपून धन-दौलत स उ शैहर में ल्याला।</verse>
				<verse number="25">उ शैहरा का फाटक दिन भर खुलिनाक रूनान। उन कभै बन्द नै हुना क्याखिनकि वाँ कभै रात नी होलि।</verse>
				<verse number="26">संसारा का लोग संसार सारी खुबशुरत चीजून और संसारा का लोगून की धन-दौलत स उ शैहर में ल्याला।</verse>
				<verse number="27">और कोई ले अशुद्ध चीज उ शैहर में प्रवेश नी करली। कोई ले जो गन्दा काम करनान या झूठ बोलनान वाँ प्रवेश नी कराला। वाँ केवल उनी लोग प्रवेश कर सकनान जिनारा नाम जीवनै की किताब में लिखी ग्यान, यो उ किताब छै जैमें उन लोगून का नाम लिखीनाका छन जिनारा पास अनन्त जीवन छै।</verse>
			</chapter>
			<chapter number="22">
				<verse number="1">तब स्वर्गदूत ले मैंस एक नदी दिखाछ जैमें जीवनो को पानि छ्यो। पानि साफ काँचा का नियाती चमक छ्यो। यो नदी परमेश्वर और मेम्ना का सिंहासन का तलि भटे बगून मरेछी।</verse>
				<verse number="2">और उ शैहर की चौड़ सड़क भटे निकल छी। नदी का हरेक किनार में जीवन दीनो वालो रूख लागिना का छ्या जो की हर साल बारा-बार फल दीछ्या, मतलब हर मैंन में एक बार। संसारा का लोग उनार पात्तून को इस्तमाल अपूनी बिमारी का इलाज खिन करनान।</verse>
				<verse number="3">कोई ले जो परमेश्वरा का श्राप का अधीन में छै उ शैहर में नी होलो, लेकिन परमेश्वर और मेम्ना को सिंहासन उ शैहर में होला, और परमेश्वरा का सेवक उकी सेवा कराला।</verse>
				<verse number="4">उन लोग परमेश्वरेस आमुनि-सामुनि दिखाला, और परमेश्वरो को नाम उनार कपाल में लिखीना को होलो।</verse>
				<verse number="5">और फिर कभै रात नी होलि, और उनून दीया या सूरजो को उज्याला जरूरत नी होलि। क्याखिन प्रभु परमेश्वर उनून उज्यालो द्योलो, और उ हमेशा-हमेशा तलक राज्य कराला।</verse>
				<verse number="6">फिर स्वर्गदूत ले मैंथैं क्योछ, “जो बात तुमूनले सुणछ्य और देखीना का छन, तैं उनूनमें विश्वास कर सकछै, इन बात सत्य छन और जरूर पुरी होलि। और स्वर्गदूत स उ संदेशा का दगाड़ म्यारा पास येक कारण भेजछै कि अपून दासून उन बातुन का बारिमें बता सकां जिनोरो जल्दी पुरो हुनो जरूरी छै।”</verse>
				<verse number="7">“और देख, मैं जल्दी उछूँ, धन्य छै उ जो यो किताब कि भविष्यवाणी बातुन को पालन करछो।”</verse>
				<verse number="8">मेरो नाम यहूना छै, और मैं उई छूँ जैले इन बातुन सुणछ्य और देखछ्य। त मैं उ स्वर्गदूत की अराधना करून खिन उक खुटान में खिती गयुं।</verse>
				<verse number="9">लेकिन उले मैंथैं क्योछ, “देख इसो जन कर; किलैकी मैं तेरो और त्यारा भाई परमेश्वरो को संदेश दिनवाला और यो किताब का बातुन मान्यावालान को दगड़िया दास छूँ परमेश्वरै की अराधना करा।”</verse>
				<verse number="10">फिर उले मैंथैं क्योछ, “यो किताब की भविष्यवाणीन का संदेशून लोगून है जन लुकौ। क्याखिनकि इन बातुन को पुरो हुना को बखत नजिक आग्योछ।”</verse>
				<verse number="11">“जो कोई बुरा और घिनौना काम करछो, उनून उनार बुरा और घिनौना कामून करून दी। और इसीकैं जो कोई ले निका और पवित्र काम करनान, उनून उनार निका और पवित्र कामून करून दी।”</verse>
				<verse number="12">तब प्रभु यीशु मसीह ले क्योछ; मैं जल्दी ऊँलो; और हरेक आदिमी स उक कामून का अनुसार ईनाम दीन खिन ऊँन मरयू।</verse>
				<verse number="13">“मैं अल्फा और ओमेगा छूँ, पैलि और आखिरी छूँ आदि और अन्त मैं छूँ।”</verse>
				<verse number="14">धन्य उन छन, जिनूनले अपूनास परमेश्वरा का नजरून में शुद्ध कर हैछ, किलैकी उनून जीवन का रूखा का पास उनाको अधिकार मिलोलो, और उन फाटकून भटे निकभेरन नगर में प्रवेश कराला।</verse>
				<verse number="15">लेकिन उन जो बुरा काम करनान, जसकैं जादू-टोना करूनवाला, ब्यभिचार करूनवाला, मूर्ति की पूजा करूनवाला, हरेक झूठ्ठो को दगोड़ो दीन वाला, और उन जो झूठ बोलनान उन कभै ले उ शैहर में नी पुज पाला।</verse>
				<verse number="16">“मैं, यीशु ले, अपून स्वर्गदूतून तुमार पास इन बातुन की घोषणा करून खिन भेजछै जो परमेश्वरा का लोगूनका समूह में छा। मैं राजा दाऊद को वंशज छूँ; मैंई छूँ, मैंई उ तारा की नियाती छूँ जो रात्तै निकलछो।”</verse>
				<verse number="17">परमेश्वरो को आत्मा और मेम्ना की ब्योलि यीशु थैं कुछी, “तैंस जरूरी उन चैंछो।” हरेक जो यो सुणछो, ऊस ले यो कुन चैंछो, “आ!” जो कोई ले प्यासो छै, उ याँ अ। उ पानि स पिया जो जीवन दीछो, जो सबून मुफ्त में दीई जाछो जो ऊस पिन चांनान।</verse>
				<verse number="18">मैं, यहूना, हर उ आदिमी स चेतावनी दी छूँ जो यो किताब की भविष्यवाणी की बातुन सुणछो, जो ऐल हुनमरैछी और भविष्य में होलि, जो मैंले यो किताब में लिखीना का छन; अगर कोई ले यो संदेश में केले बढ़ूछो, तो परमेश्वर तुमेरि सजा बढ़ा द्याला। उ तुमून उन बिपत्तिन ले मारोलो जिनारा बारिमें मैंले यो किताब में बता रैछ।</verse>
				<verse number="19">और अगर तुम यो किताब की भविष्यवाणी की संदेशून में भटे केले निकालछा त परमेश्वर तुमूनथैं उन आशीषून ली ल्योलो जिनारा बारिमें यो किताब में बताईना को छै। त परमेश्वर ऊस जीवन का रूखो को फल खाना को और पवित्र शैहर में रूना को तुमोरो अधिकार ले छीन ल्योलो।</verse>
				<verse number="20">यो यीशु मसीह का शब्द छन जो उन सबून की गवाही दीछो, जो यो किताब में प्रगट करि ग्योछ “होई, मैं जल्दी उनवालो छूँ।” मैं यहूना ले जबाब दीछ, “आमीन, हे प्रभु यीशु अ।”</verse>
				<verse number="21">मैं प्रार्थना करछूँ कि प्रभु यीशु परमेश्वरा का लोगून में अनुग्रह करौ। आमीन।</verse>
			</chapter>
		</book>
	</testament>
</bible>