Әв ә рʼәԛәма рʼькʼьнйата Иса Мәсиһ, рʼькʼьнйата Даԝьд, рʼькʼьнйата Бьраһим: Бьраһимрʼа Исһаԛ бу, Исһаԛрʼа Аԛуб бу, Аԛубрʼа Щьһуда у бьрава бун, Щьһударʼа Перес у Зәра бун, (наве дийа ԝан Тʼамар бу), Пересрʼа Һәсрун бу, Һәсрунрʼа Рʼам бу, Рʼамрʼа Аминадав бу, Аминадаврʼа Нәһшон бу, Нәһшонрʼа Сәлмон бу, Сәлмонрʼа Боԝаз бу, (наве дийа ԝи Рʼәхаб бу), Боԝазрʼа Овед бу, (наве дийа ԝи Рʼутʼ бу), Оведрʼа Йеша бу у Йешарʼа Даԝьд пʼадша бу. Даԝьд пʼадшарʼа Сьлеман бу, (дийа ԝи бәре кʼӧлфәта Урийа бу), Сьлеманрʼа Рʼәһобоԝам бу, Рʼәһобоԝамрʼа Әбийа бу, Әбийарʼа Асаф бу, Асафрʼа Йеһошәфат бу, Йеһошәфатрʼа Йорам бу, Йорамрʼа Узийа бу, Узийарʼа Йотам бу, Йотамрʼа Аһаз бу, Аһазрʼа Һьзԛийа бу, Һьзԛийарʼа Мьнашә бу, Мьнашәрʼа Амос бу, Амосрʼа Йошийа бу у Йошийарʼа Йәхонийа у бьрава бун. Ԝи чахи щьмәʼт сьргун чу Бабилоне. Ле пәй сьргунчуйина Бабилонеда, жь Йәхонийарʼа Шалтийел бу, Шалтийелрʼа Зәрубабәл бу, Зәрубабәлрʼа Абийуд бу, Абийудрʼа Елйаԛим бу, Елйаԛимрʼа Азур бу, Азуррʼа Садоԛ бу, Садоԛрʼа Ахин бу, Ахинрʼа Елйуд бу, Елйудрʼа Елазар бу, Елазаррʼа Мәтан бу, Мәтанрʼа Аԛуб бу, Аԛубрʼа Усьв бу, мере Мәрйәме, йа кӧ Иса жь ԝе ԝәльди, кӧ Мәсиһ те готьне. Аԝа жь Бьраһим һʼәта Даԝьд чардәһ ньсьл дәрбаз бьбун, жь Даԝьд һʼәта сьргунчуйина Бабилонеда чардәһ ньсьл у жь сьргунчуйина Бабилонеда һʼәта Мәсиһ диса чардәһ ньсьл бун. Буйина Иса Мәсиһ бь ви тьһәри бу. Мәрйәма дийа Ԝи Усьврʼа нишанкьри бу, ле дәргистийа хԝәда Мәрйәм бь һʼӧкӧме Рʼӧһʼе Пироз һʼәмлә кʼьфш бу. Ле Усьве дәргистийе ԝе кӧ мәрьвәки рʼаст бу, нәхԝәст ԝе рʼурʼәш кә, фькьри кӧ дьзива ԝе бәрʼдә. Чахе Усьв һе сәр ве йәке дьфькьри, ва мьлйакʼәтәки Хӧдан хәԝнеда ԝива хӧйа бу у готе: «Усьве кӧрʼе Даԝьд! Нәтьрсә, кӧ дәргистийа хԝә Мәрйәме бьстини. Әԝи кӧ ԝе жь ԝе бьбә, әԝ жь Рʼӧһʼе Пироз ә. Әԝе кӧрʼәки бинә у те наве Ԝи Иса дайни, чьмки Әԝе щьмәʼта Хԝә жь гӧнед ԝан хьлаз кә». Әв һәр тьшт аһа ԛәԝьми, ԝәки әԝ готьна Хӧданә бь заре пʼехәмбәр бе сери кӧ дьбежә: «Ва ԛиза бькʼьр ԝе һʼәмлә бә, кӧрʼәке жерʼа бьбә у наве Ԝи Иммануйел ԝе дайньн», кӧ те фәʼмкьрьне: «Хԝәде тʼәви мә йә». Гава Усьв жь хәԝе һʼьшйар бу, әԝи ль гора готьна мьлйакʼәте Хӧдан кьр, дәргистийа хԝә станд. Ле сәре хԝә ԝерʼа данәни, һʼәта кӧ әԝ кӧрʼ жерʼа бу. У наве Ԝи Иса дани. Гава Иса Бәйтләһʼма Щьһустанеда, рʼожед пʼадшатийа Һеродәсда бу, һьнге чәнд стәйрнас жь рʼоһьлате һатьнә Оршәлиме у готьн: «Кʼане Пʼадше щьһуйайи кӧ гәрәке бьбуйа? Мә стәйрка Ԝи ль рʼоһьлате дит у әм һатьнә, кӧ сәре хԝә ль бәр Ԝи дайньн». Гава Һеродәс пʼадша әв йәк бьһист, тʼәвиһәв бу у тʼәмамийа Оршәлиме жи перʼа. Һьнге әԝи һʼәму ԛанунзанед щьмәʼте у сәрәкед кʼаһина щьвандьн у жь ԝан пьрси: «Кʼидәре гәрәке Мәсиһ бьбә?» Ԝана жерʼа гот: «Бәйтләһʼма Щьһустанеда, чьмки бь дәсте пʼехәмбәра аһа ньвисар ә: ‹Йа Бәйтләһʼма ԝәлате Щьһуда, тӧ ль нав сәрԝеред Щьһудайеда нә йе һәри бьчʼук и, чьмки Сәрԝерәке жь тә рʼабә, кӧ шьвантийе щьмәʼта Мьн Исраеле бькә› ». Һьнге Һеродәс дьзива гази стәйрнаса кьр у ԝәхте хӧйабуна стәйрке жь ԝан пе һʼәсийа. Паше әԝ шандьнә Бәйтләһʼме у гот: «Һәрʼьн бона Кӧрʼьк әʼсәйи пе бьһʼәсьн. Чахе кӧ һун Ԝи бьбиньн, мьнрʼа бежьн, кӧ әз жи бем сәре хԝә ль бәр дайньм». Гава ԝана әв тьшт жь пʼадше бьһист, чун. У ва йә әԝ стәйрка кӧ ль рʼоһьлате дитьбун пешийа ԝан чу, һʼәта сәр ԝи щийе кʼӧ Кӧрʼьк ле бу сәкьни. Гава ԝана әԝ стәйрк дит, гәләки әшԛ у ша бун, чунә һьндӧрʼ, Кӧрʼьк тʼәви дийа Ԝи Мәрйәме дитьн, ль бәр Ԝи дәвәрʼу чун, сәре хԝә ль бәр данин у хьзнед хԝә вәкьрьн, пʼешкʼешед зерʼ, бьхуре әʼрәби у зьмьр данә Ԝи. Ле ԝан хәԝнеда әʼмьр станд, кӧ вәнәгәрʼьнә щәм Һеродәс, әԝ иди рʼекә дьнва чунә ԝәлате хԝә. Гава кӧ әԝ жь ԝьр чун, ва мьлйакʼәтәки Хӧдан хәԝнеда Усьвва хӧйа бу у готе: «Рʼабә Кӧрʼьк у дийа Ԝи һьлдә бьрʼәвә Мьсьре. Ль ԝьр бьминә һʼәта кӧ әз тәрʼа бежьм, чьмки Һеродәсе Кӧрʼьк бьгәрʼә, кӧ Ԝи бькӧжә». Усьв жи рʼабу Кӧрʼьк у дийа Ԝи һьлдан, шәв чунә Мьсьре у һʼәта мьрьна Һеродәс әԝана ль ԝьр ман. Әв йәк аһа бу, кӧ әԝ готьна Хӧданә бь заре пʼехәмбәр һатьбу готьне бе сери: «Мьн жь Мьсьре гази Кӧрʼе Хԝә кьр». Гава Һеродәс дит кӧ әԝ жь стәйрнаса һатә хапандьне, гәләки һерс кʼәт. Әԝи әʼмьр кьр кӧ һʼәму зарʼокед кӧрʼинә ль Бәйтләһʼме у дор-бәре ԝе, йед дӧ сали у жь ԝан бьчʼуктьр һәбун, кӧ бенә кӧштьне, ль гора ԝи ԝәхте кӧ жь стәйрнаса пе һʼәсийа бу. Һьнге әԝ готьна бь заре Йерәмийа пʼехәмбәр һатә сери: «Жь Рʼамайе дәнгәк һат, дәнге гьри у шина гьран, Рʼаһел бона зарʼокед хԝә дьгьрийа у нәдьхԝәст кӧ бәр дьлада бен, чьмки иди зарʼок нәмабун». Гава Һеродәс мьр, ва мьлйакʼәтәки Хӧдан ль Мьсьре хәԝнеда Усьвва хӧйа бу у готе: «Рʼабә, Кӧрʼьк у дийа Ԝи һьлдә у һәрʼә ԝәлате Исраеле, чьмки әԝед пәй Кӧрʼьк кʼәтьбун кӧ бькӧштана мьрьнә». Усьв жи рʼабу, Кӧрʼьк у дийа Ԝи һьлдан, вәгәрʼийанә ԝәлате Исраеле. Ле гава Усьв бьһист ԝәки Архелайо дәԝса баве хԝә, Һеродәс сәр Щьһустане буйә пʼадша, тьрсийа кӧ һәрʼә ԝьр. Һьнге хәԝнеда әʼмьр станд, кӧ һәрʼә алийе ԛәза Щәлиле. Әԝ жи чунә бажаре кӧ жерʼа Ньсрәт дьготьн ле һеԝьрин. Әв йәк аһа бу, кӧ әԝ готьна бь заре пʼехәмбәра бе сери кӧ дьбежә: «Әԝе ньсрәти бе готьне». Ԝан рʼожада Йуһʼәннайе ньхӧмдар рʼабу нава бәрʼийа Щьһустане даннасин кьр у гот: «Жь гӧнәкьрьне вәгәрʼьн, чьмки Пʼадшатийа Әʼзмана незик буйә». Йуһʼәнна әԝ бу, бона кʼижани Ишайа пʼехәмбәр готьбу: «Дәнгәк бәрʼийеда дькә гази: ‹Рʼийа Хӧдан һазьр бькьн у шьвәрʼийед Ԝи рʼаст бькьн›». Кʼьнще Йуһʼәнна жь пьрʼчʼа дәве бу у ԛайишәкә чʼәрм ль пьште бу. Хԝарьна ԝи жи кӧли у һьнгьве чоле бу. Һьнге щьмәʼта Оршәлиме у тʼәмамийа Щьһустане у һʼәму алийед чʼәме Урдӧне дьһатьнә щәм ԝи, гӧнед хԝә дьданә рʼуйе хԝә у жь ԝи чʼәме Урдӧнеда дьһатьнә ньхӧмандьне. Гава Йуһʼәнна дит кӧ жь ферьси у садуԛийа жи гәләк һатьнә ԝәки бенә ньхӧмандьне, әԝи готә ԝан: «Чʼежькед мәʼра! Кʼе ԝәрʼа гот, кӧ һун жь хәзәба те бьрʼәвьн? Дә бь кьред ԛәнщ бьдьнә кʼьфше, кӧ һун жь гӧнәкьрьне вәгәрʼийанә. У нав хԝәда нәфькьрьн нәбежьн: ‹Бьраһим баве мә йә›. Әз ԝәрʼа дьбежьм, кӧ Хԝәде жь ван кәвьра жи дькарә зарʼа Бьраһимрʼа дәрхә. Ва йә бьвьр ль сәр рʼаԝе даре йә. Һәр дара кӧ бәре ԛәнщ нәйнә, ԝе бе бьрʼине у авитьне нава егьр. Әз ԝә бона гӧнәвәгәрʼандьне бь аве дьньхӧминьм, ле Йәки жь мьн ԛәԝаттьр ԝе бе. Әз нә һежа мә чарьхе Ԝи жи бьгьрьмә дәсте хԝә. Әԝе ԝә пе Рʼӧһʼе Пироз у егьр бьньхӧминә. Мәлһʼәба Ԝи дәсте Ԝида йә. Әԝе бедәра Хԝә паԛьж кә, гәньме Хԝә бькә әʼмбаре, ле кайе ԝе бь агьре кӧ натәмьрә бьшәԝьтинә». Һьнге Иса жь Щәлиле һатә Урдӧне, щәм Йуһʼәнна, кӧ жь ԝи бе ньхӧмандьне. Ле Йуһʼәнна бона ве йәке Ԝирʼа ԛайл нәдьбу у готә Ԝи: «Әз һʼәԝщә мә кӧ бь дәсте Тә бемә ньхӧмандьне у Тӧ тейи щәм мьн?» Иса ле вәгәрʼанд у готе: «Ньһа бьһелә, чьмки ль мә дькʼәвә кӧ әм һʼәму рʼастийе аһа биньнә сери». Паше Йуһʼәнна ԛайл бу. Һәма чаԝа Иса һатә ньхӧмандьне у жь аве дәркʼәт, ньшкева әʼзман вәбун у әԝи дит кӧ Рʼӧһʼе Хԝәде мина кәвоткәке һатә хԝаре у сәр Ԝи дани. У ва дәнгәк жь әʼзмана һат: «Әв ә Кӧрʼе Мьни дәлал, кӧ әз жь Ԝи рʼази мә». Һьнге Рʼӧһʼ Иса бьрә бәрʼийе, кӧ жь Мирещьн бе щерʼьбандьне. Әԝи чьл рʼож у чьл шәви рʼожи гьрт, пәйрʼа бьрʼчи бу. Йе кӧ дьщерʼьбинә незики Ԝи бу у готе: «Һәгәр Тӧ Кӧрʼе Хԝәде йи, дә бежә ван кәвьра кӧ бьбьнә нан». Ле Иса ле вәгәрʼанд у готе: «Ньвисар ә: ‹Инсан тʼәне бь нен нажи, ле бь һәр хәбәра кӧ жь дәве Хԝәде дәрдькʼәвә› ». Һьнге мирещьн Әԝ бьрә Бажаре Пироз, сәр бьльндщийа бане пʼарьстгәһе да сәкьнандьне у готә Ԝи: «Һәгәр Тӧ Кӧрʼе Хԝәде йи, дә Хԝә бавежә хԝаре, чьмки ньвисар ә: ‹Хԝәде ԝе тʼәмийа Тә бьдә мьлйакʼәтед Хԝә у ԝе Тә сәр дәсте Хԝә бьгьрьн, ԝәки ньге Тә кәвьр нәкʼәвә› ». Иса готе: «Әв жи ньвисар ә: ‹Хӧдан Хԝәдейе хԝә нәщерʼьбинә› ». Һьнге мирещьн Әԝ бьр рʼакьрә сәр чʼийаки гәләки бьльнд у һʼәму пʼадшатийед дьнйайе, рʼәԝша ԝанва нишани Ԝи дан у готә Ԝи: «Һәгәр Тӧ дәвәрʼуйа бейи, сәре Хԝә ль бәр мьн дайни, әзе ван һʼәмуйа бьдьмә Тә». Һьнге Иса готе: «Дури Мьн һәрʼә, щьно! Чьмки ньвисар ә: ‹Сәре хԝә ль бәр Хӧдан Хԝәдейе хԝә дайнә у тʼәне Ԝирʼа хӧламтийе бькә!› » Ԝи чахи мирещьн Әԝ һьшт чу у ва мьлйакʼәт һатьн жерʼа бәрдәсти кьрьн. Гава Иса бьһист, ԝәки Йуһʼәнна һатә гьртьне, Әԝ рʼабу чу Щәлиле. Әԝи Ньсрәт һьшт, чу Кәфәрнаһума дәве гола Щәлиле, ль нав синоре Зәбулоне у Нәфтәлийе щи-ԝар бу. Әв йәк аһа бу, кӧ әԝ готьна бь заре Ишайа пʼехәмбәр бе сери: «Ԝәлате Зәбулоне у ԝәлате Нәфтәлийе, ль сәр рʼийа бәрбь голе, ԝи алийе Урдӧне, Щәлила нәщьһуйа, әԝ щьмәʼта кӧ нав тәʼристанийеда рʼуньштьбу, рʼонайикә мәзьн дит у әԝед кӧ ль ԝәлат у сийа мьрьнеда рʼуньштьбун, рʼонайи жь ԝанарʼа дәркʼәт». Жь һьнгева Иса дәст бь даннасинийе кьр у гот: «Жь гӧнәкьрьне вәгәрʼьн, чьмки Пʼадшатийа Әʼзмана незик буйә». Чахе Иса ль дәве гола Щәлиле дьгәрʼийа, рʼасти дӧ бьра һат, Шьмһʼуне кӧ жерʼа Пәтрус дьһатә готьне у Әндраԝьсе бьре ԝи. Ԝана тʼорʼ давитә голе, чьмки мәʼсигьр бун. Иса ԝанарʼа гот: «Пәй Мьн ԝәрьн, Әзе ԝә бькьмә нечʼирванед мәрьва». Ԝана жи һәма ԝе дәме тʼорʼед хԝә һьштьн у пәй Ԝи чун. Гава Иса жь ԝи щийи һьнәки пешда чу, рʼасти дӧ бьред дьн жи һат, Аԛубе Зәбәди у Йуһʼәннайе бьре ԝи. Ԝана тʼәви баве хԝә, Зәбәди ԛәйькеда тʼорʼед хԝә һивез дькьрьн. Иса гази ԝан жи кьр. Ԝана жи һәма ԝе дәме ԛәйьк у баве хԝә һьштьн у пәй Ԝи чун. Иса ль тʼәмамийа Щәлиле дьгәрʼийа, кʼьништед ԝанда һин дькьр у Мьзгинийа Пʼадшатийе дьда у һәр щурʼә еш у нәхԝәши жи кӧ нав щьмәʼтеда һәбун ԛәнщ дькьрьн. Нав-дәнге Ԝи ль тʼәмамийа Сурйайе бәла бу, щьмәʼте һәр щурʼә мәрьвед нәхԝәш анинә щәм Ԝи, йед кӧ щурʼә-щурʼә еш у щәфада бун: Йед щьнакʼәти, һивкʼәти, шьлушәʼт у Әԝи әԝ һʼәму жи ԛәнщ кьрьн. Гәләк әʼлаләт жи жь Щәлиле, жь ԛәза Декаполисе, жь Оршәлиме, жь Щьһустане у жь ԝи алийе Урдӧнейи рʼоһьлате пәй Ԝи дьчун. Чахе Иса әʼлаләт дит, һьлкʼьшийа чʼийе, рʼуньшт у шагьртед Ԝи һатьнә щәм Ԝи. Әԝи дәст бь һинкьрьна Хԝә кьр у ԝанрʼа гот: «Хԝәзи ль рʼӧһʼфәԛира, чьмки Пʼадшатийа Әʼзмана йа ԝан ә. Хԝәзи ль һʼәзнийа, чьмки бәр дьлед ԝанда ԝе бе һатьне. Хԝәзи ль шкәстийа, чьмки әʼрде пʼара ԝан бә. Хԝәзи ль ԝан, кӧ тʼи у бьрʼчийе рʼастиԛәдандьне нә, чьмки әԝе тʼер бьн. Хԝәзи ль дьлрʼәʼма, чьмки әԝе рʼәʼме бьбиньн. Хԝәзи ль дьлпаԛьжа, чьмки әԝе Хԝәде бьбиньн. Хԝәзи ль ԝан, кӧ әʼдьлайийе дькьн, чьмки әԝе зарʼед Хԝәде бенә һʼәсабе. Хԝәзи ль ԝан, кӧ бона рʼастиԛәдандьне тенә зерандьне, чьмки Пʼадшатийа Әʼзмана йа ԝан ә. Хԝәзи ль ԝә, гава бона наве Мьн ԝә беһӧрмәт кьн, бьзериньн у һәр щурʼә бӧхдан ль ԝә бькьн. Әшԛ у ша бьн, чьмки һәԛе ԝә ль әʼзмана гәләк ә. Бь ви щурʼәйи пʼехәмбәред кӧ бәри ԝә һәбун, зерандьн. Һун хԝейа әʼрде нә. Ле һәгәр хԝе тәʼма хԝә ӧнда кә, паше әԝе бь чь тәʼме бьстинә? Иди ԝе кери тьштәки нәйе. Ԝе бьгьрьн бавежьнә нав дәст-пʼийа. Һун рʼонайа дьнйайе нә. Һәгәр бажарәк сәре чʼийе йә, найе вәшартьне. Кәсәк жи чʼьре венахә у накә бьне фьраԛе, ле датинә сәр пʼечʼьре, кӧ рʼонайе бьдә һʼәмуйед кӧ маледа нә. Ӧса жи бьра рʼонайа ԝә бәр мәрьва шәԝԛ бьдә, кӧ әԝана кьрьнед ԝәйә ԛәнщ бьбиньн у пәсьне Баве ԝәйи әʼзмана бьдьн. Нәфькьрьн кӧ Әз һатьмә ньвисаред пʼехәмбәра у Ԛануне хьраб кьм. Әз нәһатьм кӧ хьраб кьм, ле ԝан һʼәмуйа биньмә сери. Әз рʼаст ԝәрʼа дьбежьм, бәри дәрбазбуна әʼрд у әʼзман, дәԛәк йан жи һʼәрфәкә бьчʼук жь Ԛануне ԝе тʼӧ щар ӧнда нәбә, һʼәта кӧ һʼәму бенә сери. Аԝа кʼи жь ван тʼәмийа йәкә һәрә бьчʼук хьраб кә у мәрьва ӧса һин кә, әԝе Пʼадшатийа Әʼзманада жь һʼәмуйа бьчʼуктьр бе һʼәсабе. Ле кʼи кӧ ԝана пек бинә у һин бькә, әԝе Пʼадшатийа Әʼзманада мәзьн бе һʼәсабе. Ләма Әз ԝәрʼа дьбежьм, һәгәр рʼастийа ԝә жь рʼастийа ԛанунзан у ферьсийа зедәтьр нибә, һун тʼӧ щар накʼәвьнә Пʼадшатийа Әʼзмана. Ԝә бьһистийә кӧ пешийарʼа һатийә готьне: ‹Нәкӧжә! Кʼи кӧ бькӧжә, диԝана ԝи ԝе бе кьрьне›. Ле Әз ԝәрʼа дьбежьм, кʼи сәр бьре хԝә һерс кʼәвә, ԝе бьбә дәйндаре диԝане у кʼи бежә бьре хԝә: ‹Бе аԛьл›, әԝе бьбә дәйндаре диԝана щьвина гьрәгьра у кʼи кӧ бежә: ‹Ахмах›, ԝе бьбә дәйндаре агьре доже. Аԝа һәгәр тӧ һʼәдийа хԝә бини сәр горигәһе у ль ԝьр бе бира тә, кӧ дьле бьре тә жь тә майә, һʼәдийа хԝә ԝе дәре ль бәр горигәһе бьһелә у пешийе һәрʼә бьре хԝәрʼа ль һәв ԝәрә у паше ԝәрә һʼәдийа хԝә бьдә. Чахе нәйаре тә тә кʼаши щәм һʼакьм дькә, рʼеда тʼәви ԝи зу ль һәв ԝәрә. Һәгәр на, әԝе тә бьдә дәсте һʼакьм, һʼакьме жи тә бьдә дәсте бәрдәстийе хԝә у тә бавежә кәле. Әз рʼаст тәрʼа дьбежьм, тӧ жь ԝьр тʼӧ щар дәрнакʼәви һʼәта поле пашьн нәди. Ԝә бьһистийә кӧ һатийә готьне: ‹Зьнийе нәкә›. Ле Әз ԝәрʼа дьбежьм, кʼи бь тәме хьраб жьнәке бьньһерʼә, әԝи дьле хԝәда иди тʼәви ԝе зьнекʼари кьр. Аԝа һәгәр чʼәʼве тәйи рʼасте тә жь рʼе дәрдьхә, ԝи дәрхә у жь хԝә бавежә. Бона тә һе ԛәнщ ә кӧ әндәмәки тә ӧнда бә, ле бәдәна тә пева нәкʼәвә щәʼньме. У һәгәр дәсте тәйи рʼасте тә жь рʼе дәрдьхә, ԝи жекә у бавежә. Тәрʼа һе ԛәнщ ә кӧ әндәмәки тә ӧнда бә, ле бәдәна тә пева нәкʼәвә щәʼньме. Әв жи һатийә готьне: ‹Кʼи кʼӧлфәта хԝә бәрʼдә, бьра кʼахаза жьнбәрʼдане бьдә ԝе›. Ле Әз ԝәрʼа дьбежьм, кʼи кӧ бе сәбәбийа ԛавийе жьна хԝә бәрʼдә, әԝ дьбә сәбәбе зьнекьрьна ԝе, һәгәр диса әԝ мер кә у кʼи кӧ йәкә мербәрʼдайи бьстинә, әԝ зьнийе дькә. Ԝә әв жи бьһистийә кӧ пешийарʼа һатийә готьне: ‹Дәрәԝ сонд нәхԝә у сонде хԝә ль бәр Хӧдан бинә сери›. Ле Әз ԝәрʼа дьбежьм, тʼӧ щар сонд нәхԝьн, нә бь әʼзмен, чьмки әԝ тʼәхте Хԝәде йә, нә жи бь әʼрде, чьмки әԝ щийе бьн пʼийед Ԝи йә, нә жи бь Оршәлиме, чьмки әԝ бажаре Пʼадше мәзьн ә у нә жи бь сәре хԝә сонд бьхԝә, чьмки тӧ нькари муки сьпи ки йан рʼәш ки. Ле бьра готьна ԝә бьбә ‹бәле-бәле› йан жи ‹на-на›. Жь ве зедәтьр жь мирещьн ә. Ԝә бьһистийә кӧ һатийә готьне: ‹Чʼәʼв жь бәр чʼәʼвва, дьран жь бәр дьранва›. Ле Әз ԝәрʼа дьбежьм, мьԛабьли хьраба нәсәкьньн. Һәгәр йәк шәмаԛәке ль рʼуйе тәйи рʼасте хә, йе дьн жи бьдә бәр. У һәгәр йәк тә кʼаши бәр диԝане кә у бьхԝазә кьрасе тә жь тә бьстинә, пʼоте хԝә жи жерʼа бьһелә. У һәгәр йәки ԛӧльхеда зоре ль тә бькә, ԝәки километьрәке тә бьбә, тʼәви ԝи дӧда һәрʼә. Бьдә ԝи, кʼи жь тә дьхԝазә у бәре хԝә жь ԝи нәгӧһезә, йе кӧ дьхԝазә жь тә дәйн бькә. Ԝә бьһистийә кӧ һатийә готьне: ‹Һәвале хԝә һʼьз бькә у бьжәнә дьжмьне хԝә›. Ле Әз ԝәрʼа дьбежьм, дьжмьнед хԝә һʼьз бькьн у бона ԝан дӧа бькьн, йед кӧ ԝә дьзериньн, ԝәки һун бьбьнә зарʼед Баве хԝәйи Әʼзмана. Чьмки Әԝ тәʼва Хԝә дәрдьхә һьн сәр ԛәнща, һьн жи сәр хьраба у баране дьбаринә һьн сәр рʼаста, һьн жи сәр нәрʼаста. Һәгәр һун ԝан һʼьз бькьн, кʼижан кӧ ԝә һʼьз дькьн, һуне чь һәԛ бьстиньн? Нә хәрщгьр жи ӧса дькьн? У һәгәр һун тʼәне сьлаве бьдьнә бьред хԝә, иди һун чь тьшти жь әԝед дьн зедәтьр дькьн? Нә пʼутпʼарьст жи ӧса дькьн? Аԝа кʼамьл бьн, чаԝа кӧ Баве ԝәйи Әʼзмана кʼамьл ә. Һаш жь хԝә һәбьн, кӧ һун ԛәнщийед хԝә бәр мәрьва нәкьн, ԝәки жь ԝан бенә кʼьфше. Йан на, һун жь Баве хԝәйи Әʼзмана һәԛ настиньн. Аԝа чахе тӧ хера дьки, пешийа хԝә борʼийе нәхә, чаԝа дӧрʼу кʼьништ у кʼучада дькьн, ԝәки мәрьв пәсьне ԝан бьдьн. Әз рʼаст ԝәрʼа дьбежьм, кӧ ԝана һәԛе хԝә иди стандийә. Ле чахе тӧ хера дьки, бьра дәсте чʼәпе ньзаньбә дәсте рʼасте чь хер кьр, кӧ херед тә дьзива бьн. У Баве тәйи тьштед кӧ тӧ дьзива дьки дьбинә, ԝе һәԛе тә бьдә тә. Гава һун дӧа дькьн, мина дӧрʼуйа нәбьн. Әԝ һʼьз дькьн кʼьништ у мәйданада бьсәкьньн дӧа бькьн, кӧ бәр мәрьва бенә кʼьфше. Әз рʼаст ԝәрʼа дьбежьм, иди ԝана һәԛе хԝә стандийә. Ле чахе тӧ дӧа дьки, бькʼәвә ода хԝә, дәри ль хԝә бьгьрә у Баве хԝәрʼа кӧ найе дитьне дӧайе хԝә бькә. У Баве тәйи тьштед кӧ тӧ дьзива дьки дьбинә, ԝе һәԛе тә бьдә тә. Гава кӧ һун дӧа дькьн, мина пʼутпʼарьста пʼьрʼхәбәр нәбьн. Ԝана тʼьре бона пʼьрʼ хәбәрдана ԝан дӧайед ԝане бенә бьһистьне. Һун мина ԝан нәбьн, чьмки бәри хԝәстьна ԝә, Баве ԝә занә чь ԝәрʼа лазьм ә. Ле һун аһа дӧа бькьн: ‹Баве мәйи Әʼзмана! Наве Тә пироз бә, Пʼадшатийа Тә бе, әʼмьре Тә бә, чаԝа ль әʼзмен, ӧса жи ль сәр әʼрде. Нане мәйи рʼоже рʼож бь рʼож бьдә мә. Дәйнед мә бьбахшинә, чаԝа кӧ әм дьбахшиньнә дәйндаред хԝә. У мә нәбә щерʼьбандьне, ле мә жь йе хьраб хьлаз кә, чьмки пʼадшати, ԛәԝат у рʼумәт йед Тә нә, һʼәта-һʼәтайе. Амин ›. Һәгәр һун нәһәԛийед мәрьвайә һьндава ԝәда кӧ дькьн бьбахшиньн, Баве ԝәйи Әʼзмана жи ԝе ԝә бьбахшинә. Ле һәгәр һун нәһәԛийед мәрьва нәбахшиньн, Баве ԝә жи нәһәԛийед ԝә набахшинә. Гава кӧ һун рʼожи дьгьрьн, мина дӧрʼуйа мәʼдәкьри нибьн. Әԝ мәʼде хԝә дькьн, ԝәки мәрьв бьзаньбьн кӧ әԝ рʼожи нә. Әз рʼаст ԝәрʼа дьбежьм, кӧ ԝана һәԛе хԝә стандийә. Ле чахе тӧ рʼожи дьгьри, сәрчʼәʼве хԝә бьшо, сәре хԝә шә кә, ԝәки мәрьв ньзаньбьн кӧ тӧ рʼожи йи, ле тʼәне Баве тәйи кӧ найе дитьне заньбә. У Баве тәйи тьштед кӧ тӧ дьзива дьки дьбинә, ԝе һәԛе тә бьдә тә. Ль сәр дьне хьзне хԝәрʼа нәщьвиньн. Ль ве дәре зәнг у бьзуз хьраб дькьн у дьз дәрәвәдькьн дьдьзьн. Ле хьзне хԝәрʼа ль әʼзмен бьщьвиньн. Ль ԝе дәре зәнг у бьзуз хьраб накьн у дьз жи дәрәвәнакьн надьзьн. Чьмки хьзна тә кʼидәре бә, дьле тә жи ԝе ль ԝе дәре бә. Чʼьра бәдәне чʼәʼв ә. Һәгәр чʼәʼве тә пʼак ә, тʼәмамийа бәдәна тәйе рʼонайи бә. Ле һәгәр чʼәʼве тә хьраб ә, тʼәмамийа бәдәна тәйе тәʼри бә. Аԝа һәгәр әԝ рʼонайа кӧ нав тәда йә тәʼри йә, тәʼри ԝе чьԛас зедә бә! Тʼӧ кәс нькарә дӧ ахарʼа хӧламтийе бькә, чьмки йан ԝе һʼиле ԝи жь йәки һәрʼә у йе дьне һʼьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʼа, һьн жи һәбукерʼа хӧламтийе бькьн. Ләма әз ԝәрʼа дьбежьм, бона әʼмьре хԝә хәма нәкьн, кӧ һуне чь бьхԝьн у чь вәхԝьн, нә жи бона бәдәна хԝә, кӧ һуне чь ль хԝә кьн. Нә әʼмьр жь хԝарьне ԛимәттьр ә у бәдән жи жь кʼьнща? Дина хԝә бьдьнә тәйрәдед әʼзмен. Әԝана нә дьрʼәшиньн, нә дьдьрун у нә жи әʼмбарада дьщьвиньн, ле Баве ԝәйи Әʼзмана рʼьсԛе ԝан дьгьһинә. Нә һун жь ԝан ԛимәттьр ьн? Иди жь ԝә кʼи дькарә бь хәмед хԝә дәԛәке сәр әʼмьре хԝәда зедә кә? У бона кʼьнща һун чьма хәм дькьн? Дина хԝә бьдьнә сосьнед чоле, чаԝа шин дьбьн, нә дьхәбьтьн у нә жи дьрʼесьн. Ле әз ԝәрʼа дьбежьм, кӧ Сьлеман жи ль нава тʼәмамийа ԝе хер-хьзна хԝәда мина жь ԝан йәке хԝә нәкьр. Һәгәр гиһайе чоле, кӧ иро һәйә у сьбе давежьнә нава егьр, Хԝәде ӧса дьхәмьлинә, ле чьԛас зедә ԝе ль ԝә кә, кембаԝәрно? Иди хәм нәкьн у нәбежьн: ‹Әме чь бьхԝьн?› йан: ‹Чь вәхԝьн?› йан жи: ‹Чь ль хԝә кьн?› Пʼутпʼарьст ль пәй ԝан һʼәму тьшта дькʼәвьн, ле Баве ԝәйи Әʼзмана занә кӧ һун һʼәԝще ԝан һʼәму тьшта нә. Ле бәре пешьн ль Пʼадшатийа Хԝәде бьгәрʼьн у бькьн кӧ рʼастийа Ԝи бьԛәдиньн у әԝ һʼәмуйе ԝәрʼа бенә дайине. Иди бона рʼожа сьбе хәма нәкьн, чьмки рʼожа сьбе ԝе бона хԝә хәма бькә. Хәмед рʼоже бәси ԝе нә. Лома нәкьн, кӧ ломә ль ԝә нәбьн. Һун чь лома бькьн, әԝ ломә жи ԝе ль ԝә бьбьн у һун бь чь чапе бьпивьн, бь ԝе чапе жи ԝәрʼа ԝе бе пиване. Тӧ чьма ԛьршьке чʼәʼве бьре хԝәда дьбини, ле кʼеране чʼәʼве хԝәда набини? Йан жи чаԝа тӧ дькари бежи бьре хԝә: ‹Бьһелә кӧ әз ԛьршьк жь чʼәʼве тә дәрхьм›, ле ва йә кʼеран чʼәʼве тәда һәйә? Дӧрʼу! Пешийе кʼеране чʼәʼве хԝә дәрхә. Паше те ԛәнщ бьбини кӧ чаԝа ԛьршьк жь чʼәʼве бьре хԝә дәрхи. Тьште бӧһӧрти нәдьнә са у нә жи дӧрʼед хԝә бавежьнә бәр бәраза. Һәгәр на, бәразе ԝан бьн ньгед хԝәда пʼепәс кьн у сәйе жи вәгәрʼьн ԝә бьдьрʼиньн. Бьхԝазьн һуне бьстиньн, бьгәрʼьн һуне бьбиньн, дәри хьн ԝе бәр ԝә вәбә. Чьмки кʼи кӧ дьхԝазә дьстинә, кʼи кӧ дьгәрʼә дьбинә у кʼи кӧ дәри дьхә бәр вәдьбә. Жь ԝә кʼижан ә әԝ мәрьв, кӧ кӧрʼе ԝи нан же бьхԝазә, әԝ кәвьр бьде? Йан жи мәʼси бьхԝазә, әԝ мәʼр бьде? Һун кӧ хьраб ьн, заньн тьштед ԛәнщ бьдьнә зарʼед хԝә, ле Баве ԝәйи Әʼзмана ԝе чьԛас тьштед ԛәнщ бьдә әԝед кӧ жь Ԝи дьхԝазьн. Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʼа бькьн. Әв ә мәʼна һинкьрьна Ԛануне у пʼехәмбәра. Дәре тәнгрʼа бькʼәвьнә һьндӧрʼ, чьмки фьрә йә әԝ дәри у бәр ә әԝ рʼийа кӧ дьбә бәрбь ӧндабуне у гәләк ьн әԝед кӧ ԝеда дьчьн. Ле гәләки тәнг ә әԝ дәри у зәʼмәт ә әԝ рʼийа кӧ дьбә бәрбь жийине у һьндьк ьн әԝед кӧ ԝе рʼейе дьбиньн. Һʼәвза хԝә жь пʼехәмбәред дәрәԝ бькьн. Әԝе бь пʼосте пез бенә щәм ԝә, ле һьндӧрʼва гӧред пʼәрʼани нә. Һуне ԝана жь бәред ԝан нас бькьн. Гәло кәсәк жь стьрийа тьрийа дьчьнә, йан жи жь дьрʼийа һежира? Дара ԛәнщ бәре ԛәнщ дьдә, ле дара хьраб бәре хьраб дьдә. Дара ԛәнщ нькарә бәре хьраб бьдә, нә жи дара хьраб дькарә бәре ԛәнщ бьдә. Һәр дара кӧ бәре ԛәнщ надә те бьрʼин у авитьне нава агьр. Аԝа һуне ԝана жь кьред ԝан нас бькьн. Нә кӧ әԝе Мьнрʼа дьбежә: ‹Хӧдан! Хӧдан!› ԝе бькʼәвә Пʼадшатийа Әʼзмана, ле әԝе бькʼәве, йе кӧ әʼмьре Баве Мьни Әʼзмана дьԛәдинә. Ԝе Рʼоже гәләке Мьнрʼа бежьн: ‹Хӧдан! Хӧдан! Нә мә бь наве Тә пʼехәмбәрти кьрьн у бь наве Тә щьн дәрхьстьн у бь наве Тә гәләк кʼәрәмәт кьрьн?› Һьнге Әзе ашкәрә ԝанрʼа бежьм: ‹Жь Мьн дур кʼәвьн, нәһәԛно! Мьн һун тʼӧ щар нас нәкьрьнә›. Аԝа кʼи кӧ ван готьнед Мьн дьбьһе у ԝан дьԛәдинә, әԝ мина мәрьвәки сәрԝахт ә, кӧ мала хԝә сәр кевьр чекьр. Баран бари, ба у лейи рʼабун, ԝе мале хьстьн, ле әԝ мал һьлнәшийа, чьмки һʼиме ԝе сәр кевьр бу. Ле кʼи кӧ ван готьнед Мьн дьбьһе у наԛәдинә, әԝ мина мәрьвәки бефәʼм ә, кӧ мала хԝә сәр ԛуме чекьр. Баран бари, ба у лейи рʼабун, ԝе мале хьстьн у әԝ мал һьлшийа, лап ԝеран бу чу». Гава Иса әв готьнед Хԝә сәр һәвда ани, әʼлаләт сәр һинкьрьна Ԝи зәндәгьрти ман, чьмки Әԝи мина йәки хԝәйиһʼӧкӧм әԝ һин дькьрьн, нә кӧ мина ԛанунзанед ԝан. Паше Иса жь чʼийе һатә хԝаре, әʼлаләтәкә гьран да пәй Ԝи чу. Һьнге йәки кʼоти һат хԝә авитә бәр Ԝи у готе: «Хӧдан! Һәгәр бьхԝази, Тӧ дькари мьн паԛьж ки ». Иса дәсте Хԝә дьреж кьре ле кʼәт у готе: «Әз дьхԝазьм. Паԛьж бә!» У дәстхԝәда әԝ жь кʼотибуне паԛьж бу. Һьнге Иса жерʼа гот: «Бьньһерʼә, тʼӧ кәсирʼа тьштәки нәбежи, ле һәрʼә хԝә нишани кʼаһин кә у һʼәдийа кӧ Муса тʼәми дайә бьдә, ԝәки һʼәмуйарʼа бьбә шәʼдәти». Гава Иса кʼәтә Кәфәрнаһуме, сәрсәдәк һатә щәм Ԝи, һиви же кьр у готе: «Хӧдан, хӧламе мьн шьлушәʼт малда пʼалдайә, гәләки щәфе дьбинә». Иса готә ԝи: «Әзе бем ԝи ԛәнщ кьм». Сәрсәд ле вәгәрʼанд у готе: «Хӧдан, әз нә һежа мә кӧ Тӧ бейи мала мьн. Ле тʼәне хәбәрәке бежә у хӧламе мьне бь ԝе хәбәре ԛәнщ бә. Әз хԝәха жи мәрьвәки бьн һʼӧкӧмда мә у бьн дәсте мьнда жи әскәр һәнә. Әз йәкирʼа дьбежьм: ‹Һәрʼә›, дьчә, йәки дьнрʼа дьбежьм: ‹Ԝәрә›, те у хӧламе хԝәрʼа дьбежьм: ‹Ви тьшти бькә›, дькә». Гава Иса әв йәк бьһист, зәндәгьрти ма у готә әԝед кӧ пәй ԝи дьчун: «Әз рʼаст ԝәрʼа дьбежьм, Исраеледа жи Мьн баԝәрикә аһа йәкида нәдитийә. Әз ԝәрʼа дьбежьм, кӧ гәләке жь рʼоһьлате у жь рʼоавайе бен у шайийа Пʼадшатийа Әʼзманада тʼәви Бьраһим, Исһаԛ у Аԛуб рʼунен, ле зарʼед Пʼадшатийе ԝе бенә авитьне тәʼрийа дәрва. Ль ԝьр ԝе бьбә гьри у чʼьркә-чʼьрка дьрана». Паше Иса сәрсәдрʼа гот: «Һәрʼә! Бьра ль гора баԝәрийа тә тәрʼа бә». У ԝе дәме хӧламе ԝи ԛәнщ бу. Гава Иса һатә мала Пәтрус, хԝәсийа ԝи тʼайеда пʼалдайи дит. Әԝи дәсте Хԝә да дәсте ԝе у тʼайе же бәрʼда, рʼабу бәрдәсти Ԝирʼа кьр. Гава рʼо чу ава, гәләк щьнакʼәти анинә щәм Ԝи. Әԝи бь хәбәре рʼӧһʼед һʼәрам дәрхьстьн у һʼәму нәхԝәш ԛәнщ кьрьн. Әв аһа бу, кӧ әԝ готьна бь заре Ишайа пʼехәмбәр бе сери, кӧ ньвисар ә: «Әԝи нәхԝәшийед мә һьлдан у ешед мә бьрьн». Чахе Иса әʼлаләт дора Хԝә дит, әʼмьр ль шагьрта кьр кӧ һәрʼьнә ԝи бәри голе. Һьнге ԛанунзанәк незики Ԝи бу у готе: «Дәрсдар! Тӧ кʼӧда жи һәрʼи, әзе пәй Тә бем». Иса готә ԝи: «Рʼувийарʼа ԛӧл һәнә, тәйрәдед әʼзменрʼа жи һелин, ле бона Кӧрʼе Мерьв щик тʼӧнә кӧ сәре Хԝә ле дайнә». Шагьртәки Ԝи готе: «Хӧдан! Изьне бьдә мьн кӧ әз пешийе һәрʼьм баве хԝә дәфьн кьм». Ле Иса жерʼа гот: «Тӧ пәй Мьн ԝәрә. Бьра мьри мьрийе хԝә дәфьн кьн». Гава Иса кʼәтә ԛәйьке, шагьртед Ԝи тʼәви Ԝи чун. Ньшкева фьртонәкә мәзьн ль голе рʼабу, ӧса кӧ ԛәйьк пелада ӧнда дьбу. Ле Әԝ рʼазайи бу. Һьнге шагьрт незики Ԝи бун, әԝ һʼьшйар кьрьн у готьне: «Хӧдан! Мә хьлаз кә! Әм ӧнда дьбьн!» Иса готә ԝан: «Чьма һун ӧса тьрсонәк ьн кембаԝәрно?» Ԝе дәме рʼабу ль байе у голе һьлат у һʼәму тьшт сәԛьрʼин. Мәрьвед тʼәви Ԝи әʼщебмайи ман у готьн: «Әв кʼи йә, кӧ ба у гол жи ельми Ԝи дьбьн?» Гава Иса дәрбази ԝи алийе тʼопрахед Гәрдарине бу, дӧ щьнакʼәти жь нав горʼьстана дәркʼәтьн у рʼасти Ԝи һатьн. Әԝ ӧса һар бун, кӧ кәсәк нькарьбу ԝе рʼерʼа дәрбаз буйа. Ԝана кьрә ԛирʼин у готьн: «Тӧ чь жь мә дьхԝази, Кӧрʼе Хԝәде? Жь ԝәхт зутьр һати щәфе бьди мә?» Жь ԝана ԝедатьр сурики бәразайи мәзьн дьчʼерийа. Щьна рʼәща жь Ԝи кьр у готьне: «Һәгәр Тӧ мә дәрдьхи, бьһелә әм һәрʼьн бькʼәвьнә нава сурийе бәраза». Әԝи готә ԝан: «Һәрʼьн!» Әԝ жи дәркʼәтьн чун кʼәтьнә нава бәраза у әԝ сури пева жорда рʼәви, хԝә жь кәнделда авитьнә голе у хәньԛин. Бәразван рʼәвин чунә бажер, чь кӧ һатьбу сәре щьнакʼәтийа готьн. Һьнге һʼәму мәрьвед бажер дәркʼәтьнә пешийа Иса у гава Әԝ дитьн, рʼәща жь Ԝи кьрьн кӧ жь әʼрде ԝан һәрʼә. Иса кʼәтә ԛәйьке пашда вәгәрʼийа һатә бажаре Хԝә. Ԝе дәре шьлушәʼтәк ньвинеда пʼалдайи анинә щәм. Гава Иса баԝәрийа ԝан дит, готә йе шьлушәʼт: «Лаԝо, сәр хԝә бә! Гӧнед тә һатьнә бахшандьне». Һьнге жь ԛанунзана һьнәк нав хԝәда фькьрин: «Әва ньге Хԝә Хԝәдерʼа давежә». Фькьред ԝан Исава әʼйан бун у гот: «Һун чьма дьле хԝәда тьште хьраб дьфькьрьн? Кʼижан рʼьһʼәт те готьне: ‹Гӧнед тә һатьнә бахшандьне›, йан ‹Рʼабә у бьгәрʼә›? Ле ԝәки һун бьзаньбьн кӧ һʼӧкӧме Кӧрʼе Мерьв һәйә ль сәр дьне гӧна бьбахшинә», һьнге готә йе шьлушәʼт: «Рʼабә ньвина хԝә һьлдә, һәрʼә мала хԝә!» Әԝ жи рʼабу чу мала хԝә. Гава әʼлаләте әв йәк дит, хофе әԝ гьртьн у шькьри данә Хԝәде, кӧ әв һʼӧкӧм дайә мәрьва. Иса жь ԝьр пешда чу, йәки кӧ наве ԝи Мәтта бу ль щийе хәрщһьлдане рʼуньшти дит у готе: «Пәй Мьн ԝәрә». Әԝ жи рʼабу пәй Иса чу. Гава Иса мала Мәттада сәр сьфре рʼуньштьбу, гәләк хәрщгьр у гӧнәкʼаред дьн һатьн тʼәви Иса у шагьртед Ԝи рʼуньштьн. Чахе ферьсийа әв йәк дит, шагьртед Ԝирʼа готьн: «Чьма Дәрсдаре ԝә тʼәви хәрщгьр у гӧнәкʼара дьхԝә у вәдьхԝә?» Ле гава Иса әв йәк бьһист ԝанарʼа гот: «Сахләм нә һʼәԝще һʼәким ьн, ле нәхԝәш. Һәрʼьн мәʼна ван хәбәра һин бьн: ‹Әз рʼәʼме дьхԝазьм, нә кӧ ԛӧрбане›. Әз нәһатьмә гази йед рʼаст кьм, ле гази гӧнәкʼара». Һьнге шагьртед Йуһʼәнна һатьнә щәм Ԝи у готьне: «Чьма әм у ферьси гәләк щара рʼожи дьгьрьн, ле шагьртед Тә рʼожи нагьрьн?» Иса готә ԝан: «Ԛәт дьбә кӧ хԝәндийед дәʼԝате шине бькьн, һʼәта кӧ зәʼва тʼәви ԝан ә? Ле рʼоже бен, гава зәʼва жь ԝан бе һьлдане, һьнге ԝе рʼожи бьгьрьн. Кәсәк пе пʼарчʼе ну кʼьнща кәвьн пʼинә накә, чьмки пʼарчʼе кʼьнща кәвьнва дьрути ԝе зоре ль кʼьнща кәвьн бькә у щийе ԛәльши ԝе һе ль бәр һәв һәрʼә. Нә жи шәрава ну дькьнә мәшкед кәвьн. Һәгәр ӧса бә, мәшке бьтʼәԛьн, шәраве бьрʼьжә у мәшке жи хьраб бьн. Ле шәрава ну дькьнә мәшке ну у һәр дӧ жи тенә хԝәйикьрьне». Гава Иса һе әв йәка ԝанарʼа дьгот, һәма һьнге сәрԝерәк һат хԝә авитә бәр ньге Ԝи у готе: «Ԛиза мьн һежа мьрийә. Ле ԝәрә дәсте хԝә дайнә сәр ԝе у әԝе бьжи». Иса рʼабу тʼәви шагьртед Хԝә да пәй ԝи чу. У ва кʼӧлфәтәкә нәхԝәш, кӧ донздәһ салед ԝе бун сәр хуне вәбьбу, пьштева һат у рʼишийед кʼьнще Иса кʼәт. Әԝе нета хԝәда данибу: «Һәгәр әз тʼәне кʼьнще Ԝи кʼәвьм, әзе ԛәнщ бьм». Иса сәр мьле Хԝәва вәгәрʼийа әԝ дит у готе: «Әʼвде! Сәр хԝә бә! Баԝәрийа тә тӧ ԛәнщ кьри». У ԝе дәме әԝ кʼӧлфәт ԛәнщ бу. Гава Иса гьһиштә мала сәрԝер, дина Хԝә дайе, ԝе ԛарʼә-ԛарʼа әʼлаләте йә у бьлурван жи зәлули ле дьхьн у готә ԝан: «Дәркʼәвьн! Ԛизьк нәмьрийә, ле һеньжийә». Ԝана ԛәрфе хԝә Пе дькьрьн. Ле гава щьмәʼт дәрхьстьнә дәрва, Иса чу һьндӧрʼ дәсте ԝе гьрт у ԛизьк рʼабу сәр хԝә. Әва дәнг-бәʼса тʼәмамийа ԝи ԝәлатида бәла бу. Гава Иса жь ԝьр дәркʼәт чу, дӧ мәрьвед кор данә пәй Ԝи кьрьнә ԛирʼин у готьн: «Кӧрʼе Даԝьд! Мә ԝәрә рʼәʼме!» Гава кӧ гьһиштьнә мале, әԝ һәр дӧ кор һатьнә щәм Ԝи. Иса жь ԝан пьрси у гот: «Һун баԝәр дькьн, кӧ Әз дькарьм али ԝә бькьм?» Ԝана гот: «Бәле Хӧдан». Һьнге Иса дәсте Хԝә да чʼәʼвед ԝан у гот: «Ль гора баԝәрийа ԝә ԝәрʼа бә». Ԝе дәме чʼәʼвед ԝан вәбун. Иса һʼьшк тʼәми ль ԝан кьр у гот: «Һаш жь хԝә һәбьн, кӧ тʼӧ кәс ве йәке нәһʼәсә». Ле әԝ дәркʼәтьн, тʼәмамийа ԝи ԝәлатида нав у дәнге Ԝи бәла кьрьн. Чахе әԝана дәркʼәтьн чун, һьнәка щьнакʼәтики лал ани щәм Иса. Гава Әԝи щьн дәрхьст, йе лал хәбәр да. Әʼлаләт әʼщебмайи ма у гот: «Ль Исраеле жи тьштәки аһа тʼӧ щар нәԛәԝьмийә». Ле ферьсийа гот: «Әԝ бь һʼӧкӧме сәрԝере щьна щьна дәрдьхә». Иса һʼәму гӧнд у бажара дьгәрʼийа, кʼьништед ԝанда һин дькьр, Мьзгинийа Пʼадшатийе даннасин дькьр у ль нав щьмәʼте һʼәму щурʼә нәхԝәши ԛәнщ дькьрьн. Гава Әԝи әʼлаләт дит, гӧне Ԝи ль ԝан һат, чьмки әԝана мина пәзе бе шьван, бәрʼәдайи у бәлабуйи бун. Һьнге Әԝи шагьртед Хԝәрʼа гот: «Нандьрун гәләк ә, ле пʼалә һьндьк ьн. Аԝа һиви жь Хԝәйе дьруне бькьн, ԝәки пʼала нандьруна Хԝәрʼа бьшинә». Иса һәр донздәһ шагьрт гази щәм Хԝә кьрьн у һʼӧкӧм да ԝан кӧ рʼӧһʼед һʼәрам дәрхьн, һʼәму еш у нәхԝәшийа жи ԛәнщ кьн. Наве һәр донздәһ шандийа әв ьн: Йе пешьн Шьмһʼун, кӧ Пәтрус те готьне у бьре ԝи Әндраԝьс, Аԛубе Зәбәди у бьре ԝи Йуһʼәнна, Филипо у Бәртоломәйо, Тʼума у Мәттайе хәрщгьр, Аԛубе Һалфаԝо у Тәдайо Шьмһʼуне ԝәлатпʼарьст у Щьһудайе Исхәрйоти, әԝе кӧ нәмамийа Иса кьр. Иса әв һәр донздәһ шандьн, тʼәми ль ԝан кьр у гот: «Нәчьнә нава нәщьһуйа у нәкʼәвьнә бажаред Самәрйайе. Ле пешийе һәрʼьнә нав пәзед мала Исраелейә ӧндабуйи. Гава һун һәрʼьн, даннасин кьн у бежьн: ‹Пʼадшатийа Әʼзмана незик буйә›. Нәхԝәша ԛәнщ кьн, мьрийа сах кьн, кʼотийа паԛьж кьн, щьна дәрхьн. Ԝә беһәԛ стандийә, беһәԛ жи бьдьн. Ль бәр пьшта хԝәда тʼӧ тьшти һьлнәдьн: Нә зерʼ, нә зив, нә сьфьр, нә турьк бона рʼе, нә дӧ дәст кьрас, нә чарьх, нә шьвдар, чьмки пʼалә һежайи рʼьсԛе хԝә йә. Чь бажар йан гӧнде кӧ һун бькʼәвьне, маләкә һежа бьбиньн у ль ԝьр бьминьн, һʼәта кӧ һун жь ԝьр дьчьн. Гава һун һәрʼьнә мале, сьлаве бьдьнә ԝе у бежьн: ‹Әʼдьлайи ве малерʼа›. У һәгәр әԝ мал һежа йә, бьра сьлава ԝә ль сәр ԝе бә, ле һәгәр нә һежа йә, бьра сьлава ԝә ль ԝә вәгәрʼә. Ле кʼи кӧ ԝә ԛәбул нәкә у гӧһдарийа хәбәред ԝә нәкә, гава кӧ һун жь ԝе мале, йан жи жь ԝи бажари дәрдькʼәвьн, тʼоза ньгед хԝә даԝшиньн. Әз рʼаст ԝәрʼа дьбежьм, Рʼожа Ахрәте һʼале ԝәлате Содом у Гоморайе ԝе жь йа ԝи бажари четьр бә. Ва Әз ԝә дьшиньм чаԝа пәз нава гӧра. Иди мина мәʼра сәрԝахт бьн у мина кәвотка дьлсах. Ле һʼәвза хԝә жь мәрьва бькьн, әԝе ԝә бьбьнә бәр диԝана у кʼьништед хԝәда ԝә бьдьнә бәр ԛамчийа. Рʼуйе Мьнда ԝе ԝә бьбьнә бәр ԝәлийа у пʼадша, кӧ һун бәр ԝан у нәщьһуйа шәʼдәтийе бьдьн. Ле чахе ԝә бьбьнә бәр диԝана, хәм нәкьн кӧ һуне чаԝа йан чь хәбәр дьн. Тьштед кӧ һуне хәбәр дьн, ԝе дәме ԝәрʼа ԝе бе дайине. Чьмки нә кӧ һуне хәбәр дьн, ле Рʼӧһʼе Баве ԝәйи кӧ нава ԝәда йә ԝе хәбәр дә. Бьра ԝе бьре хԝә бьдә кӧштьне, баве жи кӧрʼе хԝә у зарʼ жи ԝе һьмбәри де у баве хԝә рʼабьн у ԝан бьдьнә кӧштьне. Бона наве Мьн һуне бәр чʼәʼве һʼәмуйа рʼәш бьн. Ле кʼи кӧ һʼәта хьлазийе тәйах кә әԝе хьлаз бә. У гава нав ви бажарида ԝә бьзериньн, бьрʼәвьнә бажарәки дьн. Әз рʼаст ԝәрʼа дьбежьм, һʼәта һатьна Кӧрʼе Мерьв, һун һʼәму бажаред Исраеле перʼа нагьһиньн бьгәрʼьн. Шагьрт жь дәрсдаре хԝә нә мәстьр ә у нә жи хӧлам жь ахайе хԝә. Бәси шагьрт ә, ԝәки мина дәрсдаре хԝә бә у хӧлам жи мина ахайе хԝә бә. Һәгәр малхе малерʼа ‹Бәлзәбул› готьн, һьнге нәфәред ԝирʼа ԝе чь бежьн? Аԝа иди тʼӧ щар жь мәрьва нәтьрсьн. Тьштәки дьзива тʼӧнә кӧ дәрнәйе у нә жи вәшарти кӧ кʼьфш нәбә. Чь кӧ Әз тәʼрийеда ԝәрʼа дьбежьм, әԝи нав рʼонайеда бежьн у чь кӧ һун гӧһада дьбьһен, сәр бана бькьнә дәнги. У жь ԝан нәтьрсьн йед кӧ бәдәне дькӧжьн, ле нькарьн рʼӧһʼ бькӧжьн. Ле һун жь Ԝи бьтьрсьн, Йе кӧ дькарә рʼӧһʼ у бәдәне щәʼньмеда ӧнда кә. Нә дӧ чʼьвик бь дьравәки чарԛӧрʼуше тенә фьротане? Ле йәк жи жь ԝан бейи әʼмьре Баве ԝә накʼәвә әʼрде. Ле чь ль ԝә дькʼәвә, һәр тʼеләки пʼорʼед сәре ԝә жьмарти нә. Иди нәтьрсьн. Һун жь гәләк чʼьвика ԛимәттьр ьн. Кʼи кӧ Мьн бәр мәрьва иԛрар кә, Әзе жи ԝи бәр Баве Хԝәйи Әʼзмана иԛрар кьм. Ле кʼи кӧ Мьн бәр мәрьва инкʼар кә, Әзе жи ԝи бәр Баве Хԝәйи Әʼзмана инкʼар кьм. Нәфькьрьн кӧ Әз һатьмә дьне әʼдьлайийе биньм. Әз нәһатьм әʼдьлайийе биньм, ле шур. Чьмки Әз һатьм кӧрʼ жь баве, ԛизе жь де у буке жь хԝәсийе бьԛәтиньм у дьжмьнед мерьв ԝе жь мала ԝи бьн. Әԝе кӧ баве хԝә йан дийа хԝә жь Мьн зәʼфтьр һʼьз дькә, нә һежайи Мьн ә. Әԝе кӧ кӧрʼе хԝә йан ԛиза хԝә жь Мьн зәʼфтьр һʼьз дькә, нә һежайи Мьн ә. Әԝе кӧ хаче хԝә һьлнадә пәй Мьн найе, әԝ нә һежайи Мьн ә. Кʼи әʼмьре хԝә бьгәрʼә, әԝе ӧнда кә, ле кʼи әʼмьре хԝә бона Мьн ӧнда кә, әԝе бьбинә. Әԝе кӧ ԝә ԛәбул дькә, Мьн ԛәбул дькә у әԝе кӧ Мьн ԛәбул дькә, Йе кӧ Әз шандьмә ԛәбул дькә. Әԝе кӧ пʼехәмбәр ԛәбул дькә чаԝа пʼехәмбәр, ԝе һәԛе пʼехәмбәр бьстинә у әԝе кӧ мәрьвәки рʼаст ԛәбул дькә чаԝа мәрьве рʼаст, ԝе һәԛе йед рʼаст бьстинә. У әԝе кӧ тʼасә ава сар жи дьдә йәки жь ван бьчʼука, бона хатьре ԝе йәке кӧ әԝ шагьрте Мьн ә, Әз рʼаст ԝәрʼа дьбежьм, әԝе тʼӧ щар һәԛе хԝә ӧнда нәкә». Чахе Иса тʼәмийед кӧ данә һәр донздәһ шагьртед Хԝә хьлаз кьрьн, жь ԝи щийи чу нав бажаред ԝан, кӧ һин кә у даннасин кә. Гава Йуһʼәнна кәледа бона шьхӧлед Мәсиһ бьһист, чәнд шагьртед хԝә шандьнә щәм Ԝи у же пьрсин: «Тӧ Әԝ и, Йе кӧ гәрәке бьһата, йан әм һивийа йәки дьн бьн?» Иса щаба ԝан да у гот: «Һәрʼьн, чь кӧ һун дьбиньн у дьбьһен Йуһʼәннарʼа бежьн. Кор дьбиньн, сәԛәт дьгәрʼьн, кʼоти паԛьж дьбьн, кәрʼ дьбьһен, мьри рʼадьбьн у фәԛирарʼа жи Мьзгини те дайине. У хԝәзи ль ԝи, кӧ жь Мьн пʼьшк набә». Гава әԝана чун, Иса бона Йуһʼәнна әʼлаләтерʼа дәстпекьр гот: «Һун дәркʼәтьнә бәрʼийе чь бьбиньн? Ԛамишәки кӧ жь байе дьһʼәжә? Йан һун дәркʼәтьн чь бьбиньн? Мәрьвәки кʼьнще назьк ль хԝә кьри? Нә әԝед кӧ кʼьнще назьк ль хԝә дькьн, әԝ малед пʼадшада нә? Йан һун дәркʼәтьн чь бьбиньн? Пʼехәмбәрәки? Бәле әз ԝәрʼа дьбежьм, жь пʼехәмбәрәки жи мәстьр ә. Әва әԝ ә, бона кʼижани ньвисар ә: ‹Ва йә Әзе ԛасьде Хԝә пешийа Тәва бьшиньм. Әԝе рʼийа Тә пешийа Тәва һазьр кә›. Әз рʼаст ԝәрʼа дьбежьм, жь нава әԝед кӧ жь кʼӧлфәта дьне кʼәтьнә, тʼӧ кәс жь Йуһʼәннайе ньхӧмдар мәстьр нәбуйә. Ле Пʼадшатийа Әʼзманада йе һәри бьчʼук жь ԝи мәстьр ә. Жь рʼожед Йуһʼәннайе ньхӧмдар һʼәта ньһа Пʼадшатийа Әʼзмана бь зорбәтийе те һʼьщумкьрьне у йед зорбә дькьн кӧ зәфти хԝә кьн. Чьмки һʼәму пʼехәмбәра у Ԛануне һʼәта Йуһʼәнна бона Пʼадшатийа Әʼзмана шәʼдәти дан. У һәгәр һун дьхԝазьн ве йәке ԛәбул кьн, әԝ ә Елйасе кӧ гәрәке бьһата. Гӧһе кʼе һәйә бьра бьбьһе. Ньһа Әз ви ньсьли мина чь бьшьбиньм? Әԝ мина ԝан зарʼа нә, йед кӧ базарада рʼуньшти нә, гази һәвалед хԝә дькьн у дьбежьн: ‹Мә бона ԝә зӧрʼне хьст, һун нәрʼәԛьсин у бона ԝә бәйтʼ готьн, ԝә шин нәкьр›. Йуһʼәнна һат, нә дьхԝар, нә вәдьхԝар у дьготьн: ‹Щьн ԝида һәйә›. Кӧрʼе Мерьв һат, дьхԝә у вәдьхԝә, бона Ԝи дьбежьн: ‹Ва Әԝ йәки пәй хԝарьн у вәхԝарьне кʼәти йә, досте хәрщгьр у гӧнәкʼара йә›. Ле сәрԝахти бь әʼмәлед хԝә кʼьфш дьбә кӧ әԝ рʼаст ә». Һьнге Иса дәстпекьр ль ԝан бажара һьлат, кʼижанада гәләк кʼәрәмәтед Ԝи ԛәԝьмибун, чьмки әԝ жь гӧнәкьрьне вәнәгәрʼийан. «Ԝәй ль тә Хоразин! Ԝәй ль тә Бәйтсайда! Һәгәр әԝ кʼәрәмәтед кӧ нава ԝәда бун, Сур у Сайдеда бьбуна, әԝанайе зува бь кʼӧрх у кʼозийе тʼобә бькьрана. Ле Әз ԝәрʼа дьбежьм, Рʼожа Ахрәте, һʼале Суре у Сайде ԝе жь һʼале ԝә четьр бә. У тӧ Кәфәрнаһум, тә тʼьре те һʼәта әʼзман бьльнд би? Ле те һʼәта дийаре мьрийа һәрʼи хԝаре! Һәгәр әԝ кʼәрәмәтед кӧ нав тәда ԛәԝьмин Содомеда бьԛәԝьмийана, әԝе һʼәта рʼожа иройин бьма. Ле Әз ԝәрʼа дьбежьм, Рʼожа Ахрәте һʼале ԝәлате Содоме ԝе жь һʼале тә четьр бә». Һьнге Иса гот: «Шькьр наве Тә бә Баво, Хӧдане әʼрд у әʼзман, кӧ Тә әв тьшт жь зана у билана вәшартьн у ль бәр зарʼа вәкьрьн. Бәле Баво, чьмки аһа ль Тә хԝәш һат. Һәр тьшт жь Баве Мьн Мьнрʼа һатийә дайине. Кәсәк Кӧрʼ нас накә пештьри Баве у кәсәк Баве нас накә пештьри Кӧрʼ у кʼижанарʼа кӧ Кӧрʼ бьхԝазә ԝанва Баве бьдә наскьрьне. Ԝәрьнә щәм Мьн һʼәмуйед ԝәстийайи у баргьран у Әзе рʼьһʼәтийе бьдьмә ԝә. Нире Мьн һьлдьнә сәр хԝә у жь Мьн һин бьн, чьмки Әз шкәсти мә у дьлмьлаһим ьм у һуне хԝәрʼа рʼьһʼәтийе бьбиньн. Чьмки нире Мьн рʼьһʼәт ә у баре Мьн сьвьк ә». Һьнге Иса рʼожәкә шәмийе нава зәвийарʼа дәрбаз бу, шагьртед Ԝи бьрʼчи бун у дәстпекьрьн сьмбьлед гәньм чьнин у хԝарьн. Гава ферьсийа әв йәк дит, Ԝирʼа готьн: «Һәла бьньһерʼә, шагьртед Тә тьште нәщайизи рʼожа шәмийе дькьн». Иса ԝанарʼа гот: «Ԝә нәхԝәндийә кӧ Даԝьд чь кьр, гава әԝ у йед перʼа бьрʼчи бун? Нә әԝ кʼәтә Хана Хԝәде у нане Хԝәдерʼа дайи хԝар, әԝ нан нә ԝирʼа щайиз бу бьхԝара, нә жи әԝед тʼәви ԝирʼа, ле тʼәне кʼаһинарʼа? Йан жи ԝә Ԛанунеда нәхԝәндийә, кӧ кʼаһин рʼожед шәмийе пʼарьстгәһеда шәмийе дьһʼәрʼьминьн у диса бе сущ ьн? Ле Әз ԝәрʼа дьбежьм, кӧ ль вьр Йәки жь пʼарьстгәһе мәстьр һәйә. Һәгәр ԝә заньбуйа мәʼна ве хәбәре чь йә кӧ те готьне: ‹Әз рʼәʼме дьхԝазьм, нә кӧ ԛӧрбане›, һьнге ԝәйе йед бесущ гӧнәкʼар нәкьрана. Чьмки Кӧрʼе Мерьв Хӧдане рʼожа шәмийе йә». Иса жь ԝьр рʼабу чу, һатә кʼьништа ԝан. Мәрьвәк ль ԝьр һәбу, кӧ дәсте ԝи кʼьшийабу. Һьнәка дьхԝәст кӧ хәйба Иса бькьрана, жь Ԝи пьрсин у готьне: «Щайиз ә кӧ мәрьв рʼожа шәмийе нәхԝәша ԛәнщ бькьн?» Әԝи жи ԝанарʼа гот: «Әԝ жь ԝә кʼи йә, кӧ пәзәкә ԝи һәбә у рʼожа шәмийе бькʼәвә чʼәʼле, ԝе нәгьрә у дәрнәхә? Ле инсан чьԛас жь пез ԛимәттьр ә! Аԝа рʼожа шәмийе ԛәнщикьрьн щайиз ә». Һьнге ԝи мәрьвирʼа гот: «Дәсте хԝә дьреж кә». Әԝи жи дьреж кьр у мина дәсте дьн ԛәнщ бу. Ле ферьси дәркʼәтьнә дәрва бона Иса ль һәв шеԝьрин кӧ чаԝа Ԝи бьдьнә кӧштьне. У гава Иса пе һʼәсийа, жь ԝе дәре чу, гәләк әʼлаләт жи пәй Ԝи чу. Әԝи һʼәму жи ԛәнщ кьрьн у тʼәми да ԝан кӧ бона Ԝи нәкьнә дәнги. Әва аһа бу кӧ әԝ готьна бь заре Ишайа пʼехәмбәр бе сери: «Ва йә хӧламе Мьн, йе кӧ Мьн бьжартийә у һʼьзкьрийе Мьни кӧ Мьн бәгәм кьрийә. Әзе Рʼӧһʼе Хԝә дайньмә сәр Ԝи у Әԝе мьләтарʼа һәԛийе әʼлам кә. Әԝе нә бькʼәвә һʼӧщәте, нә бькә ԛарʼә-ԛарʼ у нә жи йәке дәнге Ԝи мәйданада бьбьһе. Әԝ ԛамише пʼәрчʼьԛи һур накә, пʼьлта дьчʼьрусә венасинә, һʼәта кӧ һәԛийе бьгьһинә сери. У һʼәму мьләт ԝе гӧмана хԝә дайньнә сәр наве Ԝи». Һьнге щьнакʼәтики кори лал анинә щәм Ԝи у Әԝи әԝ ԛәнщ кьр, ӧса кӧ әԝи һьн дит у һьн жи хәбәр да. У тʼәмамийа әʼлаләте зәндәгьрти ма у гот: «Гәло Әв ә кӧрʼе Даԝьд?» Ле гава ферьсийа бьһист готьн: «Әва бь һʼӧкӧме сәрԝере щьна Бәлзәбул щьна дәрдьхә». Ле нетед дьле ԝан Исава әʼйан бун у ԝанарʼа гот: «Һәр пʼадшатийа кӧ нав ԝеда тʼьфаԛ тʼӧнәбә ԝе ԝеран бә у һәр бажар йан мала кӧ ль нава ԝеда тʼьфаԛ тʼӧнәбә әԝ наминә. Һәгәр мирещьн хԝәха хԝә дәрдьхә, кӧ ӧса йә нава пʼадшатийа ԝида бетʼьфаԛи һәйә, иди пʼадшатийа ԝи ԝе чаԝа бьминә? Һәгәр Әз бь һʼӧкӧме Бәлзәбул щьна дәрдьхьм, ле йед кӧ пәй ԝә тен бь чь дәрдьхьн? Ԝәки ӧса йә әԝе бьбьнә һʼакьмед ԝә. Ле һәгәр Әз бь һʼӧкӧме Рʼӧһʼе Хԝәде щьна дәрдьхьм, иди Пʼадшатийа Хԝәде гьһиштийә ԝә. Йан чаԝа йәк дькарә бькʼәвә мала мерхасәки у һәбука ԝи тʼалан кә, һәгәр пешийе ԝи мерхаси гьренәдә? Гава гьреда, һьнге ԝе бькарьбә мала ԝи тʼалан кә. Кʼи кӧ нә тʼәви Мьн ә, мьԛабьли Мьн ә у кʼи кӧ тʼәви Мьн тʼоп накә, бәла дькә. Бона ве йәке Әз ԝәрʼа дьбежьм, һәр гӧнә у готьнед хьраб ԝе ль мәрьва бенә бахшандьне, ле әԝе кӧ готьнәкә хьраб мьԛабьли Рʼӧһʼ бежә, ль ԝи найе бахшандьне. Кʼи тьштәки мьԛабьли Кӧрʼе Мерьв бежә, ԝе бе бахшандьне, ле һәгәр йәк һьндава Рʼӧһʼе Пирозда бежә, ль ԝи найе бахшандьне, нә ве дьне нә жи ԝе дьне. Һәгәр дар ԛәнщ ә, бәре ԝе жи ԛәнщ ә, һәгәр дар хьраб ә, бәре ԝе жи хьраб ә, чьмки дар жь бәре хԝә те наскьрьне. Чʼежькед мәʼра! Һун чаԝа дькарьн ԛәнщ хәбәр дьн, һәгәр һун хьраб ьн? Чьмки дьл чьва тʼьжи йә зар жи әԝе дьбежә. Мәрьве ԛәнщ, жь хьзна хԝәйә ԛәнщ ԛәнщийе дәрдьхә, ле мәрьве хьраб, жь хьзна хԝәйә хьраб хьрабийе дәрдьхә. Әз ԝәрʼа дьбежьм, Рʼожа Ахрәте мәрьв бона һәр хәбәрәкә пʼучʼ кӧ хәбәр дьдьн ԝе щабдар бьн. Чьмки һуне бь хәбәред хԝә бесущ бьн у бь хәбәред хԝә гӧнәкʼар бьн». Һьнге һьнәка жь ԛанунзан у ферьсийа Ԝирʼа готьн: «Дәрсдар! Әм дьхԝазьн кӧ нишанәке жь Тә бьбиньн». Әԝи ль ԝан вәгәрʼанд у гот: «Ньсьле хьраб у хальфи нишанәке дьхԝазә, ле жерʼа нишанәкә дьн найе дайине пештьри нишана Уньс пʼехәмбәр. Чаԝа кӧ Уньс се рʼож у се шәва зьке һʼутда ма, Кӧрʼе Мерьв жи ӧса ԝе се рʼож у се шәва нава кʼурайийа әʼрдеда бьминә. Мәрьвед Нинәԝайе ԝе Рʼожа Ахрәте рʼабьн у ви ньсьли нәһәԛ кьн, чьмки әԝана бь даннасинийа Уньс жь гӧнәкьрьне вәгәрʼийан у ва Йәки жь Уньс мәстьр ль вьр һәйә. Пʼадша Башуре Рʼожа Ахрәте ԝе рʼабә ви ньсьли нәһәԛ кә, чьмки әԝа жь сәре дьне һат, кӧ сәрԝахтийа Сьлеман бьбьһе у ва йә Йәки жь Сьлеман мәстьр ль вьр һәйә. Чахе рʼӧһʼе һʼәрам жь мерьв дәрте, щийе бе ав дьгәрʼә кӧ рʼьһʼәтийе бьбинә. Ле гава набинә, һьнге әԝ дьбежә: ‹Әз вәгәрʼьмә ԝе мала хԝәйә кӧ же дәркʼәтьмә›. Гава әԝ те, дьбинә ԝе мал вала, паԛьжкьри у һәвдайи йә. Һьнге дьчә һʼәфт щьнед дьнә жь хԝә хьрабтьр жи тинә, дькʼәвьнә ԝьр дьжин. У ахьрийа ԝи мәрьви жь пешийе хьрабтьр дьбә. Ӧса жи ԝе бе сәре ви ньсьле хьраб». Һе Әԝи әʼлаләтерʼа хәбәр дьда, ва дийа Ԝи у бьрайед Ԝи ль дәрва сәкьнин, дьхԝәстьн тʼәви Ԝи хәбәр дана. Йәки жерʼа гот: «Ва дийа Тә у бьрайед Тә дәрва нә у дьхԝазьн тʼәви Тә хәбәр дьн». Әԝи жи ль ԝи вәгәрʼанд у готе: «Кʼи йә дийа Мьн у кʼи нә бьрайед Мьн?» Һьнге дәсте Хԝә дьрежи шагьртед Хԝә кьр у гот: «Ва нә де у бьрайед Мьн! Чьмки кʼи кӧ хԝәстьна Баве Мьни әʼзмана бинә сери, әԝ ә бьре Мьн, хушка Мьн у дийа Мьн». Ԝе рʼоже Иса жь мале дәркʼәт, ль дәве голе рʼуньшт. У һаԛас әʼлаләт һатә щәм Ԝи, кӧ Әԝ кʼәрба кʼәтә ԛәйьке рʼуньшт у тʼәмамийа әʼлаләте дәве голе сәкьни. Әԝи гәләк тьшт бь мәсәла әԝ һин кьрьн у гот: «Тʼохьмрʼәш рʼабу чу кӧ тʼохьм бьрʼәшинә. Гава дьрʼәшанд, һьнәк жь ԝан кʼәтьнә дәве рʼе, тәйрәдә һатьн у әԝ хԝарьн. Һьнәкед дьн кʼәтьнә сәр әʼрде кәвьри, кӧ ль ԝьр хԝәли кем бу. Әԝ зу шин бун, чьмки тәлаше хԝәлийе нә кʼур бу. Ле чахе тәʼв дәркʼәт, әԝ чʼьлмьсин у чьмки рʼаԝед ԝан тʼӧнәбун, һʼьшк бун. Һьнәкед дьн кʼәтьнә нава стьрийа, стьри рʼабун у әԝ хәньԛандьн. Ле һьнәкед дьн жи кʼәтьнә нава әʼрде ԛәнщ у бәр дан, йе сәд, йе шест у йе си. Гӧһе кʼе һәйә бьра бьбьһе!» Ԝе гаве шагьртед Ԝи незик буне у готьне: «Чьма бь мәсәла Тӧ ԝанарʼа хәбәр дьди?» Әԝи ль ԝан вәгәрʼанд у гот: «Ԝәрʼа һатийә дайине кӧ һун сӧрʼед Пʼадшатийа Әʼзмана бьзаньбьн, ле ԝанарʼа нәһатийә дайине. Чьмки кʼерʼа кӧ һәйә, ԝе һе ле зедә бә у сәрда бьрʼьжә у кʼерʼа кӧ тʼӧнә, чь һәйә жи ԝе же бе стандьне. Әз бона ԝе йәке бь мәсәла ԝанрʼа хәбәр дьдьм, кӧ әԝана дьньһерʼьн у набиньн, дьбьһен, ле гӧһе хԝә надьнә сәр у фәʼм накьн. Ль сәр ԝан пʼехәмбәртийа Ишайа те сери кӧ дьбежә: ‹Һуне бьбьһен у гӧһ бьдьне, ле фәʼм нәкьн, һуне бьньһерʼьн у дина хԝә бьдьне, ле нәбиньн. Чьмки әва щьмәʼта сәрһʼьшк ә, бь гӧһа гьран дьбьһен у чʼәʼвед хԝә гьртьнә, ԝәки бь чʼәʼва нәбиньн, бь гӧһа нәбьһен у бь һʼьш фәʼм нәкьн, вәнәгәрʼьн, кӧ Әз ԝан ԛәнщ кьм›. Ле хԝәзи ль чʼәʼвед ԝә, кӧ дьбиньн у гӧһед ԝә, кӧ дьбьһен. Әз рʼаст ԝәрʼа дьбежьм, гәләк пʼехәмбәр у мәрьвед рʼаст һʼьзрәта дитьна ван тьшта бун чь кӧ һун дьбиньн, ле нәдитьн у бьбьһистана чь кӧ һун дьбьһен, ле нәбьһистьн. Ньһа һун шьровәкьрьна мәсәла тʼохьмрʼәш бьбьһен. Һәр кәсе кӧ хәбәра Пʼадшатийе дьбьһе у фәʼм накә, йе Хьраб те тʼохьме дьле ԝида чанди дьрʼәвинә. Әва әԝ ьн кӧ дәве рʼе һатьнә чандьне. Әԝед ль әʼрде кәвьри һатьнә чандьне әԝ ьн, кӧ чахе хәбәре дьбьһен, әԝ зу бь әшԛ у ша ԛәбул дькьн. Ле рʼаԝ кӧ нава ԝанда тʼӧнәнә, дьреж тʼаԝ накьн. Гава бона хәбәре рʼасти тәнгасийа йан зерандьне тен, әԝ зу жь рʼе дькʼәвьн. Әԝед ль нава стьрийада һатьнә чандьне әԝ ьн, кӧ хәбәре дьбьһен у хәмед ве дьнйайе у дәрәԝед дәԝләтийе хәбәре дьхәньԛиньн, әԝ бе бәр дьминьн. Ле әԝед ль нава әʼрде ԛәнщда һатьнә чандьне әԝ ьн, кӧ хәбәре дьбьһен, фәʼм дькьн у бәр дьдьн, һьнәк сәд, һьнәк шест у һьнәк си». Иса мәсәләкә дьн жи ԝанарʼа пешда ани у гот: «Пʼадшатийа Әʼзмана мина ве йәке йә: Мәрьвәки нав әʼрде хԝәда тʼохьме ԛәнщ чанд. Гава һʼәму рʼазайи бун, дьжмьне ԝи һат у ль нав гәньмда зиԝан жи чанд у чу. Гава гәньм гьһишт бәре хԝә да, һьнге зиԝан жи перʼа кʼьфш бун. Хӧламед хԝәйе әʼрде незики ԝи бун у готьне: ‹Ахайе мә! Тә нава әʼрде хԝәда тʼохьме ԛәнщ нәчанд? Ле әв зиԝан жь кʼӧ һатьн?› Әԝи ль ԝан вәгәрʼанд у гот: ‹Дьжмьнәки әв тьшт кьрийә›. Хӧлама жи готә ԝи: ‹Ньһа тӧ ԛайл и кӧ әм һәрʼьн ԝан рʼакьн?› Әԝи гот: ‹На, нәбә чахе һун зиԝане рʼакьн, геньм жи перʼа дәрхьн. Бьһельн бьра һәр дӧ жи һәврʼа бьгьһижьн һʼәта рʼожа нандьруне. Рʼожа нандьруне әзе пʼаларʼа бежьм, пешийе зиԝане бьчьньн, гӧрʼз-гӧрʼз гьредьн бона шәԝате, ле геньм бькьнә әʼмбара мьн›». Мәсәләкә дьн жи ԝанарʼа пешда ани у гот: «Пʼадшатийа Әʼзмана мина ве йәке йә: Мәрьвәки һʼәбәкә тʼохьме хәрдале һьлда, нав әʼрде хԝәда чанд. Әԝ жь һʼәму тʼохьма һуртьр ә, ле гава дьгьһижә, жь һʼәму пʼьнщарʼа мәстьр дьбә у дьбә дар, ӧса кӧ тәйрәдед әʼзмен тен һелинед хԝә сәр чʼьԛьлед ԝе чедькьн». Иса мәсәләкә дьн жи ԝанарʼа гот: «Пʼадшатийа Әʼзмана мина һәвиртьрʼшк ә, кӧ кʼӧлфәтәке һьлда, нава се код арда стьра, һʼәта кӧ һʼәму һьлат». Иса әв һʼәму тьшт бь мәсәла әʼлаләтерʼа готьн у бе мәсәлә тʼӧ тьшт ԝанарʼа нәдьгот. Әв йәк аһа бу, кӧ әԝ готьна бь заре пʼехәмбәр бе сери: «Әзе бь мәсәла ԝанрʼа хәбәр дьм, тьштед жь ԝәхте әʼфьрандьна дьнйайеда вәшарти гьли кьм». Һьнге Иса әʼлаләт һьшт, һатә мал. Шагьртед Ԝи һатьнә щәм Ԝи у готьне: «Мәсәла гәньм у зиԝане мәрʼа шьровәкә». Әԝи ль ԝан вәгәрʼанд у гот: «Әԝе кӧ тʼохьме ԛәнщ чанд, Кӧрʼе Мерьв ә. Әʼрд дьнйа йә, тʼохьме ԛәнщ жи мәрьвед пʼара Пʼадшатийе нә, ле зиԝан мәрьвед пʼара йе Хьраб ьн. Дьжмьне кӧ әԝ чанд, мирещьн ә. Нандьрун ахьрийа дьнйайе йә, пʼалә жи мьлйакʼәт ьн. У чаԝа кӧ зиԝане тʼоп дькьн дьшәԝьтиньн, ахьрийа ве дьнйайе жи ԝе ӧса бә. Кӧрʼе Мерьв ԝе мьлйакʼәтед Хԝә бьшинә у әԝе жь Пʼадшатийа Ԝи һʼәмуйед кӧ мәрийа жь рʼе дәрдьхьн у нәһәԛийе дькьн бьбьжерьн у бавежьнә кʼура агьр. Ль ԝьр ԝе бьбә гьри у чʼьркә-чʼьрка дьрана. Һьнге мәрьвед рʼаст ԝе Пʼадшатийа Баве хԝәда мина тәʼве шәԝԛ бьдьн. Гӧһе кʼе һәйә бьра бьбьһе! Пʼадшатийа Әʼзмана мина ве йәке йә: Әʼрдәкида хьзнәкә вәшарти һәбу. Мәрьвәк ԝе дьбинә, вәдьшерә, шабуна дьчә һʼәму һәбука хԝә дьфьрошә у ԝи әʼрди дькʼьрʼә. Диса Пʼадшатийа Әʼзмана мина ве йәке йә: Мәрьвәки базьргани дӧрʼед рʼьнд дьгәрʼә. Гава дӧрʼәки пʼьрʼ ԛимәт дьбинә, дьчә һʼәму һәбука хԝә дьфьрошә у ԝи дӧрʼи дькʼьрʼә. Диса Пʼадшатийа Әʼзмана мина ве йәке йә: Тʼорʼәк те авитьне нава бәʼре у һʼәму щурʼә мәʼси дькʼәвьне. Гава тʼорʼ тʼьжи дьбә, дькʼьшиньнә дәве бәʼре у рʼудьнин мәʼсийед кер дьбьжерьн дькьнә дәрдана, ле йед бекер ԝеда давежьн. Ахьрийа дьнйайе жи ԝе ӧса бә. Мьлйакʼәте дәркʼәвьн хьраба жь нав ԛәнща бьбьжерьн у бавежьнә кʼура агьр. Ль ԝьр ԝе бьбә гьри у чʼьркә-чʼьрка дьрана». Иса жь ԝан пьрси: «Ԝә әв һʼәму тьшт фәʼм кьрьн?» Ԝана жерʼа гот: «Бәле». Әԝи жи ԝанарʼа гот: «Бона ве йәке һәр ԛанунзанәк кӧ Пʼадшатийа Әʼзмана һин буйә, мина мәрьвәки хԝәйимьлкʼ ә, кӧ жь хьзна хԝә тьштед кәвьн у ну дәрдьхә». Гава Иса әв мәсәлә хьлаз кьрьн, жь ԝьр чу һатә щи-мьскʼәне Хԝә, кʼьништа ԝанда әԝ һин дькьрьн. Әԝ жи зәндәгьрти дьман у дьготьн: «Әв сәрԝахти у ԛәԝата кʼәрәмәта жь кʼӧ гьһиштийе? Нә Әв кӧрʼе нәщар ә? Нә наве дийа Ԝи Мәрйәм ә? Нә Аԛуб, Усьв, Шьмһʼун у Щьһуда бьред Ԝи нә? Нә һʼәму хушкед Ԝи щәм мә нә? Әв һʼәму тьшт жь кʼӧ гьһиштьнә Ԝи?» Бь ви аԝайи әԝ жь Ԝи чун, ле Иса ԝанарʼа гот: «Пʼехәмбәр тʼӧ щийи нә беԛәдьр ә, пештьри мала хԝә у щи-мьскʼәне хԝәда». Әԝи ль ԝе дәре гәләк кʼәрәмәт нәкьрьн, чьмки баԝәрийа ԝан тʼӧнәбу. Һьнге Һеродәсе сәрԝере Щәлиле бона Иса бьһист, хӧламед хԝәрʼа гот: «Әва Йуһʼәннайе ньхӧмдар ә жь нав мьрийа рʼабуйә. Ләма жи пе ԝи кʼәрәмәт тенә кьрьне». Чьмки Һеродәс Йуһʼәнна гьртьбу гьредабу у авитьбу кәле, рʼуйе Һеродийа жьна Филипойе бьре хԝәда. Чьмки Йуһʼәнна Һеродәсрʼа чәнд щара готьбу: «Нә рʼаст ә кӧ тӧ Һеродийайе бьстини». У Һеродәс жи дьхԝәст әԝ бькӧшта, ле жь щьмәʼте дьтьрсийа, чьмки щьмәʼте Йуһʼәнна чаԝа пʼехәмбәр ԛәбул дькьр. Гава рʼожа буйина Һеродәс һат, ԛиза Һеродийайе шайийеда бона ԝан рʼәԛьси у дьле Һеродәс гәләки хԝәш һат. Әԝи сонд хԝар у готә ԛизьке: «Тӧ чь бьхԝази әзе бьдьмә тә». Ԛизьк жи жь дийа хԝә һатьбу ширәткьрьне у готе: «Кʼа ль вьр, сәр сьнийе сәре Йуһʼәннайе ньхӧмдар бьдә мьн». Пʼадша бәр хԝә кʼәт, ле чьмки ль бәр тʼәглифкьрийа сонд хԝарьбу, әʼмьр кьр кӧ хԝәстьна ԝе бе дайине. Әԝи шанд кәледа сәре Йуһʼәнна да лехьстьне у сәре ԝи ль сәр сьнийе анин данә кәчʼьке. Кәчʼьке жи дийа хԝәрʼа бьр. Һьнге шагьртед ԝи һатьн щьнйазе ԝи һьлдан у әԝ дәфьн кьрьн. Паше чун Исарʼа готьн. Гава Иса әв йәк бьһист, жь ԝе дәре бь ԛәйьке тʼәне чу щики хәԝлә. Ле гава әʼлаләте бьһист, жь бажара пәйа пәй Ԝи чун. Чахе Иса жь ԛәйьке дәркʼәт у әʼлаләтәкә гьран дит, һьнге гӧне Ԝи ль ԝан һат у нәхԝәшед ԝан ԛәнщ кьрьн. Бәре еваре шагьртед Ԝи һатьнә щәм у готьне: «Әв дәр щики хьки-хԝәли йә, иди дәрәнг ә. Изьна әʼлаләте бьдә кӧ һәрʼьнә гӧнда хԝәрʼа хӧрәк бькʼьрʼьн». Ле Иса ԝанарʼа гот: «Нә һʼәԝщә йә кӧ әԝ һәрʼьн. Һун хӧрәк бьдьнә ԝан». Ԝана ле вәгәрʼанд у готьне: «Ль вьр пештьри пенщ нан у дӧ мәʼсийа тьштәки мәйи майин тʼӧнә». Әԝи ԝанарʼа гот: «Ԝан нан у мәʼсийа биньнә щәм Мьн». Иса әʼмьр кьр кӧ әʼлаләт ль сәр шинайийе рʼунен. Әԝи һәр пенщ нан у һәр дӧ мәʼси һьлдан, бәре Хԝә әʼзменда кьр шькьри да у әԝ нан кәркьрьн. Паше да шагьрта, шагьрта жи да әʼлаләте. Һʼәмуйа жи хԝар тʼер бун у донздәһ сәлә жи тʼьжи һурькед бәрмайи бәрәв кьрьн. Әԝед кӧ хԝарьн, пештьри жьн у зарʼа ԝәкә пенщ һʼәзар мери бун. Перʼа-перʼа Иса пʼейи сәр шагьрта кьр, кӧ бькʼәвьнә ԛәйьке у пешийа Ԝи дәрбази ԝи бәри голе бьн, һʼәта кӧ Хԝәха әʼлаләте вәрʼекә. Чахе Әԝи әʼлаләт вәрʼекьр, тʼәне рʼабу чу сәре чʼийе, кӧ дӧа бькә. Гава рʼо чу ава, Әԝ ль ԝьра тʼәне бу, ле ԛәйьк иди жь дәве голе дур кʼәтьбу у нава пелада бу, чьмки ба мьԛабьли ԝе бу. Ԛәрәбәрбанге Иса сәр голерʼа пәйа дьчу незики ԝан дьбу. Ле гава шагьрта дит кӧ Әԝ сәр голерʼа пәйа дьчә, бьздийан у готьнә һәв: «Әв хәйал ә!» У ԝана жь тьрса кьрә ԛирʼин. Ле Иса ԝе дәме дәнг да ԝан у гот: «Сәр хԝә бьн! Әз ьм! Нәтьрсьн!» Пәтрус ле вәгәрʼанд у готе: «Хӧдан, һәгәр Тӧ йи, әʼмьр кә кӧ әз сәр аверʼа бемә щәм Тә». Иса готе: «Ԝәрә!» Пәтрус жь ԛәйьке пәйа бу, сәр аверʼа чу, кӧ һәрʼә щәм Иса. Ле чахе әԝи байе ԛайим дит тьрсийа у иди ԝе нӧԛ буйа, кьрә ԛирʼин: «Хӧдан, мьн хьлаз кә!» Ԝе дәме Иса дәсте Хԝә дьрежи ԝи кьр, әԝ гьрт у жерʼа гот: «Кембаԝәро! Чьма тӧ дӧдьли буйи?» Чахе кʼәтьнә ԛәйьке, ба сәкьни. У әԝед ԛәйькеда сәре хԝә ль бәр Ԝи данин у готьне: «Рʼасти Тӧ Кӧрʼе Хԝәде йи». Гава әԝ дәрбази ԝи бәри голе бун, ль алийе Щенисартева гьһиштьнә бәже. Бьнәлийед ԝьр Әԝ нас кьрьн, шандьн тʼәмамийа дор-бәра, һʼәму нәхԝәш анинә щәм Ԝи. Ԝана һиви же дькьр кӧ тʼәне рʼишийед кʼьнще Ԝи кʼәвьн. У һʼәмуйед кӧ ле дькʼәтьн жь нәхԝәшийед хԝә ԛәнщ дьбун. Һьнге ферьси у ԛанунзанед Оршәлиме һатьнә щәм Иса у готьне: «Чьма шагьртед Тә пәй рʼаԝ-рʼьзьмед кал у бава начьн? Дәстнәшушти нан дьхԝьн». Әԝи ль ԝан вәгәрʼанд у гот: «Ле һун чьма бона рʼаԝ-рʼьзьмед хԝә пәй тʼәмийе Хԝәде начьн? Чьмки Хԝәде гот: ‹Ԛәдьре де у баве хԝә бьгьрә› у ‹Әԝе кӧ гьлики ԛолайи де у баве хԝәрʼа бежә гәрәке бе кӧштьне›. Ле һун дьбежьн: ‹Әԝе кӧ дийа хԝәрʼа йан баве хԝәрʼа бежә: Әԝ аликʼарийа кӧ гәрәке жь мьн бьгьһижә тә әԝ Хԝәдерʼа те дайине, иди жь ԝи накʼәвә кӧ әԝ ԛәдьре де у баве хԝә бьгьрә›. Бь ви аԝайи бона хатьре рʼаԝ-рʼьзьмед хԝә һун хәбәра Хԝәде дькьнә хԝәли. Дӧрʼуно! Ишайа бона ԝә рʼаст пʼехәмбәрти кьрийә у готийә: ‹Әва щьмәʼта бь заре хԝә ԛәдьре Мьн дьгьрә, ле дьле ԝан жь Мьн дур ә. Бадиһәԝа Мьн дьһʼәбиньн, тʼәмийед мәрьва чаԝа ԛанунед Мьн щьмәʼте һин дькьн› ». Һьнге Иса әʼлаләт гази щәм Хԝә кьр у готә ԝан: «Бьбьһен у фәʼм бькьн! Нә кӧ тьште дьчә дев, әԝ мәрьва дьһʼәрʼьминә, ле чь кӧ жь дев дәрте, әԝ мәрьва дьһʼәрʼьминә». Һьнге шагьртед Ԝи һатьн у готьнә Ԝи: «Тӧ зани гава ферьсийа әв хәбәр бьһист, дьле ԝан ма?» Әԝи ль ԝан вәгәрʼанд у гот: «Һәр дара кӧ Баве Мьни Әʼзмана данәчʼькандийә, ԝе жь кʼокева бе рʼакьрьне. Жь ԝан вәгәрʼьн! Әԝә кор ьн у рʼебәре кора нә. Һәгәр кор рʼебәрийе кора бькә, һәр дӧйе жи бькʼәвьнә чʼәʼле». Пәтрус ле вәгәрʼанд у готе: «Ве мәсәле мәрʼа шьровәкә». Иса гот: «Һун жи һәла һе фәʼм накьн? Чьма һун фәʼм накьн, чь кӧ дьчә дев, дәрбази нав-дьл дьбә у дәрдькʼәвә дәрва? Ле әԝ тьштед кӧ жь дев дәртен, әԝ жь дьл дәртен у һәма әв ьн кӧ мерьв дьһʼәрʼьминьн. Чьмки жь дьл фькьред хьраб, кӧштьн, зьнекʼари, ԛави, дьзи, дәрәԝи, бӧхдан дәртен. Әв ьн кӧ мәрьва дьһʼәрʼьминьн, ле дәстнәшушти нанхԝарьн мәрьва наһʼәрʼьминә». Иса рʼабу жь ԝе дәре чу алийе Сур у Сайде. У ва кʼӧлфәтәкә кәнани жь ԝан дәра һат, кьрә гази у готә Ԝи: «Хӧдан, Кӧрʼе Даԝьд, мьн ԝәрә рʼәʼме. Ԛиза мьн щьна дькʼәвә, гәләки щәфе дьбинә». Ле Әԝи щаба ԝе нәда. Шагьртед Ԝи незики Ԝи бун һиви же кьрьн у готьн: «Тьштәки бежә ве, бьра дури мә кʼәвә, чьмки пәй мә кʼәтийә дькә ԛарʼә-ԛарʼ». Әԝи щаб да у гот: «Әз тʼәне бона пәзед мала Исраелейә ӧндабуйи һатьмә шандьне». Ле әԝ кʼӧлфәта һат хԝә авитә ньге Ԝи у готе: «Хӧдан, али мьн бькә!» Әԝи ль ԝе вәгәрʼанд у готе: «Әв нә рʼаст ә, ԝәки нане бәр зарʼа һьлдьн у бавежьнә бәр са». Әԝе жи гот: «Бәле Хӧдан, нә сә жи ԝан һурькед кӧ жь сьфра хԝәйе ԝан дькʼәвьнә әʼрде дьхԝьн?» Ԝи чахи Иса ле вәгәрʼанд у готе: «Әʼвде, баԝәрийа тә мәзьн ә. Бьра анәгори хԝәстьна тә тәрʼа бә». Һәма жь ԝе дәме ԛиза ԝе ԛәнщ бу. Иса жь ԝьр чу бәр гола Щәлиле, рʼабу сәре чʼийе рʼуньшт. Әʼлаләтәкә гьран һатә щәм Ԝи, кӧ тʼәви хԝә гәләк сәԛәт, кор, лал, шьлушәʼт у нәхԝәшед майин анибун у авитьнә бәр пʼийед Иса. Әԝи жи әԝ ԛәнщ кьрьн. Гава әʼлаләте дит кӧ лала хәбәр дан, шьлушәʼт ԛәнщ бун, сәԛәт гәрʼийан у чʼәʼве кора вәбун, зәндәгьрти ман у пәсьне наве Хԝәдейе Исраеле дан. Иса гази шагьртед Хԝә кьр у гот: «Гӧне Мьн ве әʼлаләте те. Әва се рʼож ә тʼәви Мьн ә у тьштәки ԝани хԝарьне тʼӧнә. Әз нахԝазьм ԝан бьрʼчи вәрʼекьм кӧ рʼева дьле ԝан хԝәва һәрʼә». Шагьртед Ԝи жерʼа готьн: «Ль ве бәрʼийе әме жь кʼӧ һаԛас нан биньн, ԝәки әве әʼлаләта гьран тʼер кьн?» Иса ԝанарʼа гот: «Чәнд нане ԝә һәнә?» Ԝана гот: «Һʼәфт нан у чәнд мәʼсийед һур». Иса әʼмьр кьр кӧ әʼлаләт сәр әʼрде рʼуне. Әԝи һәр һʼәфт нан у әԝ мәʼси һьлдан шькьри да у кәркьрьн. Паше данә шагьрта, шагьрта жи данә әʼлаләте. Һʼәмуйа жи тʼер хԝар у һʼәфт зәмбил жи тʼьжи һурькед бәрмайи бәрәв кьрьн. Әԝед кӧ хԝарьн, пештьри жьн у зарʼа, ԝәкә чар һʼәзар мери бун. Паше Әԝи әʼлаләт вәрʼекьр, кʼәтә ԛәйькәке у һатә синоре Мәгәдане. Ферьси у садуԛи һатьнә щәм Ԝи кӧ Ԝи бьщерʼьбиньн у же хԝәстьн кӧ жь әʼзмана нишанәке нишани ԝана кә. Әԝи ль ԝан вәгәрʼанд у гот: «Гава дьбә евар, һун дьбежьн: ‹Һәԝа ԝе хԝәш бә, чьмки әʼзман сор буйә›. Ле сәре сьбәһе дьбежьн: ‹Иро һәԝа ԝе хԝәш нибә, чьмки әʼзман хӧмам у сор ә›. Һун рʼуйе әʼзмен әʼнәнә дькьн кӧ һәԝайе чаԝа бә, ле нишанед зәмана әʼнәнә накьн. Ньсьле хьраб у хальфи нишанәке дьхԝазә, ле жерʼа нишанәкә дьн найе дайине, пештьри нишана Уньс пʼехәмбәр». У Әԝи әԝ һьштьн у чу. Гава шагьртед ԝи дәрбази ԝи али бун, бир кьрьн хԝәрʼа нан һьлдана. Иса ԝанарʼа гот: «Мьԛати хԝә бьн, һʼәвза хԝә жь һәвиртьрʼшке ферьси у садуԛийа бькьн». Ле әԝана нав һәвда хәбәр дьдан у дьготьн: «Нане мә тʼӧнә, ләма аһа дьбежә». Ле әв йәк Исава әʼйан бу у гот: «Кембаԝәрно! Һун чьма нав һәвда хәбәр дьдьн, кӧ нане ԝә тʼӧнә? Һун һе фәʼм накьн? Найе бира ԝә, чаԝа пенщ нана тʼера пенщ һʼәзар мәрьва кьр у ԝә чәнд сәлә бәрмайи һьлдан? У һʼәфт нана жи тʼера чар һʼәзар мәрьва кьр у ԝә чәнд зәмбил бәрмайи һьлдан? Һун чаԝа фәʼм накьн, ԝәки Мьн бона нан ԝәрʼа нәгот? Ле бона ԝе йәке, кӧ һун һʼәвза хԝә жь һәвиртьрʼшке ферьси у садуԛийа бькьн». Шагьрта һьнге фәʼм кьр, ԝәки Әԝи бона һәвиртьрʼшке нан ԝанрʼа нәгот, кӧ һʼәвза хԝә бькьн, ле жь һинкьрьна ферьси у садуԛийа. Иса чу алийе Ԛәйсәрийа Филипойе у жь шагьртед Хԝә пьрси: «Бь тʼәхмина мәрьва Кӧрʼе Мерьв кʼи йә?» Ԝана гот: «Һьнәк дьбежьн ‹Йуһʼәннайе ньхӧмдар ә›, һьнәкед дьн дьбежьн ‹Елйас ә›, ле һьнәкед майин жи дьбежьн ‹Йерәмийа йә, йан жи йәк жь пʼехәмбәра йә›». Әԝи жь ԝан пьрси: «Ле һун чь дьбежьн? Бь тʼәхмина ԝә Әз кʼи мә?» Шьмһʼун-Пәтрус ле вәгәрʼанд у готе: «Тӧ Мәсиһ и, Кӧрʼе Хԝәдейе сах». Иса ле вәгәрʼанд у готе: «Хԝәзи ль тә, Шьмһʼуне кӧрʼе Йуһʼәнна, чьмки хун у гошт әв йәк әʼйани тә нәкьрьн, ле Баве Мьни әʼзмана. Әз тәрʼа дьбежьм, кӧ тӧ Пәтрус и, аԝа готи ԛәйак и у ль сәр ви ԛәйайи Әзе щьвина Хԝә чекьм у ԛәԝата мьрьне ԝе пе нькарьбә. У Әзе кʼьлитед Пʼадшатийа Әʼзмана бьдьмә дәсте тә у чь кӧ тӧ ль сәр әʼрде гьреди, әʼзманада жи ԝе гьредайи бә у чь кӧ тӧ ль сәр әʼрде вәки, әʼзманада жи ԝе вәкьри бә». Һьнге Иса тʼәми шагьртед Хԝә кьр, ԝәки кәсирʼа нәбежьн, кӧ Әԝ Мәсиһ ә. Пәй ԝе йәкерʼа Иса дәстпекьр шагьртед Хԝәрʼа әʼйан кьр кӧ гәрәке Әԝ һәрʼә Оршәлиме, жь алийе рʼуспийа, сәрәкед кʼаһина у ԛанунзанада гәләк щәфа бькʼьшинә у бе кӧштьне, ле рʼожа сьсийа жь мьрьне рʼабә. Ле Пәтрус Әԝ да алики, ле һьлат у готе: «Дури һьндава Тә, Хӧдан! Әԝ тьшт тʼӧ щар ль Тә нәԛәԝьмә!» Иса сәр Пәтрусда вәгәрʼийа у готе: «Жь бәр чʼәʼве Мьн бәтавәбә, Щьно! Тӧ бона Мьн пʼьшкбун и, чьмки әԝ нет-фькьра тә нә жь Хԝәде йә, ле жь мәрьвайе йә». Һьнге Иса шагьртед Хԝәрʼа гот: «Һәгәр йәк дьхԝазә ль пәй Мьн бе, бьра хԝә инкʼар кә, хаче хԝә һьлдә у ль пәй Мьн бе. Чьмки кʼи кӧ дьхԝазә әʼмьре хԝә хьлаз кә, әԝе ӧнда кә у кʼи кӧ әʼмьре хԝә бона Мьн ӧнда кә, әԝе бьбинә. Чь фәйдә һәгәр мәрьв тʼәмамийа дьнйайе ԛазьнщ кә, ле әʼмьре хԝә ӧнда кә? Йан жи мәрьв чь дькарә бәр әʼмьре хԝәва бьдә? Чьмки Кӧрʼе Мерьв ԝе бь рʼумәта Баве Хԝә тʼәви мьлйакʼәтед Хԝә бе. Һьнге ԝе анәгори әʼмәлед һәр кәси бьдә ԝан. Әз рʼаст ԝәрʼа дьбежьм, һьнәкед ль вьр сәкьни һәнә ԝе мьрьне нәбиньн, һʼәта кӧ Кӧрʼе Мерьв бь Пʼадшатийа Хԝәва те нәбиньн». Пәй шәш рʼожарʼа Иса тʼәви Хԝә Пәтрус, Аԛуб у бьре ԝи Йуһʼәнна һьлдан у рʼакьрьнә чʼийаки бьльнд, ль ԝьр әԝ тʼәне бун. Һьнге рʼәнге Ԝи ль бәр чʼәʼве ԝан һатә гӧһастьне. Рʼуйе Ԝи мина тәʼве бьрьԛи у кʼьнщед Ԝи жи мина нуре чил-ԛәрԛаш бун. Ньшкева Муса у Елйас ԝанва хӧйа бун у тʼәви Ԝи хәбәр дан. Һьнге Пәтрус Исарʼа гот: «Хӧдан! Чаԝа рʼьнд ә кӧ әм вьр ьн! Һәгәр Тӧ бьхԝази, әзе се һʼолька ль ве дәре чекьм, йәке Тәрʼа, йәке Мусарʼа, йәке жи Елйасрʼа». Әԝи һе хәбәр дьда, ньшкева әʼԝрәки рʼонайи һат у сәр ԝан кьрә си, дәнгәк жь әʼԝр һат у гот: «Әв ә Кӧрʼе Мьни дәлал, кӧ Әз же рʼази мә. Гӧһдарийа Ԝи бькьн!» Гава шагьрта әԝ дәнг бьһист, дәвәрʼуйа чун у рʼьсасе әԝ гьртьн. Ле Иса незики ԝан бу, дәст да ԝан у гот: «Рʼабьн, нәтьрсьн». Ԝана жи сәре хԝә бьльнд кьр у пештьри Иса кәсәк нәдитьн. Чахе жь чʼийе дьһатьнә хԝаре, Иса тʼәми да ԝан у гот: «Әԝ дитьна кӧ ԝә дит кәсирʼа нәбежьн, һʼәта кӧ Кӧрʼе Мерьв жь нав мьрийа рʼанәбә». Шагьртед Ԝи же пьрсин: «Ле чьма ԛанунзан дьбежьн пешийе гәрәке Елйас бе?» Иса ль ԝан вәгәрʼанд у гот: «Рʼаст ә, пешийе Елйасе бе у һәр тьшти ԝе диса бинә щи. Ле Әз ԝәрʼа дьбежьм, кӧ Елйас һатийә жи, ле әԝ нас нәкьрьн у чаԝа кӧ хԝәстьн, ӧса сәре ԝи кьрьн. Ԝе ӧса жи сәре Кӧрʼе Мерьв бькьн». Һьнге шагьрта фәʼм кьр, кӧ бона Йуһʼәннайе ньхӧмдар ԝанарʼа гот. Чахе һатьнә щәм әʼлаләте, мәрьвәк незики Иса бу, бәр чок да у готе: «Хӧдан, ль кӧрʼе мьн ԝәрә рʼәʼме! Әԝ һиве дькʼәвә у гәләки щәфа дьбинә. Щарна дькʼәвә нава агьр у щарна жи нава аве. Мьн әԝ ани щәм шагьртед Тә, ле ԝана нькарьбу әԝ ԛәнщ кьра». Иса гот: «Ньсьле нәбаԝәр у хальфи! Һʼәта кʼәнге Әзе тʼәви ԝә бьм? Һʼәта кʼәнге Әзе ԝә сәбьр кьм? Әԝи биньнә вьр щәм Мьн». Иса ле һьлат, щьн же дәркʼәт, кӧрʼьк перʼа-перʼа ԛәнщ бу. Һьнге шагьрт тʼәне һатьнә щәм Иса у же пьрсин: «Мә чьма нькарьбу әԝ щьн дәрхьста?» Иса готә ԝан: «Бона кембаԝәрийа ԝә. Әз рʼаст ԝәрʼа дьбежьм, һәгәр баԝәрийа ԝә ԝәкә һʼәбәкә тʼохьме хәрдале һәбә, һуне ви чʼийайирʼа бежьн: ‹Жь вьр дәрбази ԝи али бә!› у ԝе дәрбаз бә. У бона ԝә тьштәки нәбуйине ԝе тʼӧнәбә. Ле әв щьсьне һа пе тьштәки дьн дәрнайе, пештьри бь дӧа у бь рʼожийа». Гава шагьрт Щәлиледа щьвийан, Иса ԝанарʼа гот: «Кӧрʼе Мерьв ԝе бькʼәвә дәсте мәрьва, әԝе Ԝи бькӧжьн, ле рʼожа сьсийа ԝе рʼабә». У әԝана гәләки бәр хԝә кʼәтьн. Чахе әԝ һатьнә Кәфәрнаһуме, хәрщгьред дӧзиве бона пʼарьстгәһе һатьнә щәм Пәтрус у готьне: «Дәрсдаре ԝә хәрще дӧзиве надә?» Әԝи гот: «Бәле». Чахе Пәтрус һатә мале, пешийе Иса жь ԝи пьрси: «Шьмһʼун! Тӧ чаԝа тʼәхмин дьки? Пʼадшед дьнйайе хәрщ йан бащ жь кʼе дьстиньн, жь бажарванед хԝә, йан жь хәриба?» Пәтрус готе: «Жь хәриба». Иса готә ԝи: «Кӧ ӧса йә бажарван аза нә. Ле ԝәки әм ван пʼьшк нәкьн, һәрʼә голе шәԝке бавеже у мәʼсийе пешьн кӧ дәрдькʼәвә, бьгьрә дәве ԝи вәкә у те наләки чарзиве бьбини. Әԝи һьлдә, дәԝса Мьн у хԝә бьдә ԝан». Ԝи чахи шагьрт һатьнә щәм Иса у готьне: «Ль нав Пʼадшатийа Әʼзманада кʼи йә йе һәри мәзьн?» Иса зарʼокәк гази щәм Хԝә кьр, әԝ нав ԝанда да сәкьнандьне у гот: «Әз рʼаст ԝәрʼа дьбежьм, һәгәр һун вәнәгәрʼьн у нәбьнә мина зарʼока, һун тʼӧ щар накʼәвьнә Пʼадшатийа Әʼзмана. Аԝа кʼи кӧ мина ве зарʼоке хԝә бьчʼук кә, әԝ ә йе һәри мәзьн Пʼадшатийа Әʼзманада. У кʼи кӧ зарʼокәкә аһа бь наве Мьн ԛәбул кә, әԝ Мьн ԛәбул дькә. Ле кʼи кӧ жь ван бьчʼука йәки, йе кӧ баԝәрийа хԝә Мьн тинә жь рʼе дәрхә, ԝирʼа һе ԛәнщ ә, ԝәки бәрашәк стуйе ԝива бе гьредане у бьне бәʼреда бьхәньԛә. Ԝәй ль дьнйайе, бона әԝед кӧ мәрьва жь рʼе дәрдьхьн. Набә кӧ әԝ тьшт нәбьн, ле ԝәй ль ԝи кӧ мәрьв бь ԝи жь рʼе дькʼәвьн. Һәгәр дәсте тә йан ньге тә, тә жь рʼе дәрхә, ԝи жекә у жь хԝә бавежә. Бона тә һе ԛәнщ ә кӧ тӧ ԛоп йан сәԛәт бькʼәви жийине, нә кӧ дӧ дәст йан дӧ ньгед тә һәбьн у бейи авитьне нава агьре һʼәта-һʼәтайе. У һәгәр чʼәʼве тә, тә жь рʼе дәрдьхә, ԝи дәрхә у бавежә. Бона тә һе ԛәнщ ә кӧ тӧ бь чʼәʼвәки бькʼәви жийине, нә кӧ бь дӧ чʼәʼва бейи авитьне нава агьре доже. Һаш жь хԝә һәбьн кӧ һун жь ван бьчʼука йәки беһӧрмәт нәкьн, чьмки Әз ԝәрʼа дьбежьм, кӧ мьлйакʼәтед ԝан ль әʼзмана тʼьме рʼуйе Баве Мьни әʼзмана дьбиньн. Кӧрʼе Мерьв һат кӧ йе ӧндабуйи бьгәрʼә у хьлаз кә. Һун чаԝа тʼәхмин дькьн? Һәгәр сәд пәзед мәрьвәки һәбьн у йәк жь ԝан ӧнда бә, әԝе нод нәһа нәһелә чʼийа-банийа у нәчә кӧ йа ӧндабуйи бьгәрʼә? Ле гава бьбинә, әз рʼаст ԝәрʼа дьбежьм, әԝе бона ԝе һе гәләки ша бә, нә кӧ бона нод нәһед дьнә кӧ ӧнда нәбунә. Ӧса жи Баве ԝәйи әʼзмана нахԝазә кӧ жь ван бьчʼука йәк ӧнда бә. Һәгәр бьре тә нәһәԛийе ль тә бькә, гава тӧ у әԝ тʼәне нә, ԝи ширәт кә. Һәгәр әԝи гӧһдарийа тә кьр, иди тә бьре хԝә ԛазьнщ кьр. Ле һәгәр гӧһдарийа тә нәкьр, йәки йан дӧдӧйед дьн жи тʼәви хԝә һьлдә, ԝәки: ‹Бь дәве дӧ йан се шәʼда һәр тьшт избат бә›. Ле һәгәр әԝи гӧһдарийа ԝан жи нәкьр, щьвинерʼа бежә. У һәгәр гӧһдарийа щьвине жи нәкьр, бьра әԝ бона тә бьбә мина пʼутпʼарьст у хәрщгьра. Әз рʼаст ԝәрʼа дьбежьм, чь кӧ һун сәр әʼрде гьредьн, ль әʼзмен жи ԝе гьредайи бә у чь кӧ һун ль сәр әʼрде вәкьн, ль әʼзмен жи ԝе вәкьри бә. Диса Әз рʼаст ԝәрʼа дьбежьм, һәгәр дӧдӧ жь ԝә ль сәр әʼрде бь тʼьфаԛ бона тьштәки дӧа бькьн у бьхԝазьн, Баве Мьни әʼзмана ԝе бьдә ԝә. Чьмки кʼидәре дӧ йан се мәрьв бь наве Мьн бьщьвьн, Әз ль ԝьр нава ԝанда мә». Һьнге Пәтрус незики Ԝи бу у готе: «Хӧдан. Гава бьре мьн нәһәԛийе ль мьн бькә, гәрәке әз чәнд щара бьбахшиньме, һʼәта һʼәфт щара?» Иса готә ԝи: «Әз набежьмә тә һʼәта һʼәфт щара, ле һʼәта һʼәфте щара һʼәфт. Чьмки Пʼадшатийа Әʼзмана мина ве йәке йә: Пʼадшаки хԝәст тʼәви хӧламед хԝә һәԛ-һʼәсабе хԝә рʼаст кә. Гава дәст бь һʼәсаба кьр, йәк анинә щәм ԝи, кӧ дәһә һʼәзар тәланти дәйндаре ԝи бу. Ле чьмки нькарьбу дәйне хԝә бьда, хԝәйе ԝи әʼмьр кьр, кӧ әԝ, жьна ԝи, зарʼед ԝи у һʼәму һәбука ԝи бенә фьротане, кӧ дәйне ԝи бе дайине. Һьнге хӧлам дәвәрʼуйа чу ньге ԝи, лава же кьр у гот: ‹Ль мьн сәбьр кә. Әзе һʼәму жи ль тә вәгәрʼиньм›. Гӧне хԝәйе ԝи ль ԝи һат, әԝ бәрʼда у дәйне ԝи жи бахшанде. Ле чахе әԝ хӧлам дәркʼәт, рʼасти хӧлам-һәваләки хԝә һат кӧ сәд зиви дәйндаре ԝи бу, дәст кьрә хәнәԛе у готе: ‹Тӧ чьԛаси дәйндаре мьн и бьдә!› Һьнге һәвале хӧлам хԝә авитә ньге ԝи, же лава кьр у готе: ‹Ль мьн сәбьр кә. Әзе ль тә вәгәрʼиньм›. Ле әԝи гӧһ нәда ԝи, чу әԝ авитә кәле, һʼәта кӧ әԝ дәйне хԝә бьдә. Чахе хӧлам-һәвалед ԝийә дьн әв йәк дитьн, гәләки бәр хԝә кʼәтьн у чун хԝәйе хԝәрʼа тьштед кӧ ԛәԝьмибу гьли кьрьн. Һьнге ахайе ԝи гази ԝи кьр у готе: ‹Хӧламе хьраб! Мьн һʼәму дәйне тә бахшандә тә, бона ԝе йәке кӧ тә лава жь мьн кьр. Ле жь тә нәдькʼәт кӧ тӧ жи ль хӧлам-һәвале хԝә бьһатайи рʼәʼме чаԝа кӧ әз тә һатьмә рʼәʼме?› У ахайе ԝи һерс кʼәт, әԝ да дәсте зӧлмдаред кәле, һʼәта кӧ һʼәму дәйне хԝә вәгәрʼинә. Ӧса жи Баве Мьни Әʼзмана ԝе ль сәре ԝә һәр йәки бькә, һәгәр һун бь дьл нәбахшиньнә бьре хԝә». Чахе кӧ Иса әԝ хәбәр сәр һәвда анин, жь Щәлиле дәркʼәт һатә синоре Щьһустане, ԝи али чʼәме Урдӧне. Гәләк әʼлаләт ль пәй Ԝи чун у Әԝи ль ԝе дәре әԝ ԛәнщ кьрьн. Жь ферьсийа һьнәк незики Ԝи бун у бона щерʼьбандьне же пьрсин: «Гәло ль гора Ԛануне рʼаст ә, кӧ бона һәр мәʼнике мер жьна хԝә бәрʼдә?» Әԝи щаба ԝан да у гот: «Ԝә нә хԝәндийә, сәре серида Әʼфьрандар әԝ ‹ԛьсьме мер у жьнеда хӧльԛандьн?› у гот: ‹Бона ве йәке мер ԝе де у баве хԝә бьһелә, хԝә ль жьне бьгьрә у һәр дӧ ԝе бьбьнә бәдәнәк›. Аԝа иди әԝ нә дӧдӧ нә, ле бәдәнәк ьн. Бона ве йәке әԝед кӧ Хԝәде кьрьнә йәк, бьра мәрьв жь һәвдӧ нәԛәтинә». Ԝана жерʼа гот: «Ле чьма Муса тʼәми кьр, кӧ мер кʼахаза жьнбәрʼдане бьдә жьне у ԝе бәрʼдә?» Әԝи ль ԝан вәгәрʼанд у гот: «Муса жь дәст сәрһʼьшкийа ԝә изьн да ԝә кӧ һун жьнед хԝә бәрʼдьн. Ле сәрида нә ӧса бу. Әз ԝәрʼа дьбежьм, кʼи кӧ бе сәбәбийа ԛавийе жьна хԝә бәрʼдә у йәкә дьн бьстинә, әԝ зьнекʼарийе дькә ». Шагьртед Ԝи жерʼа готьн: «Һәгәр нав жьн у мерда тьштәки аһа һәйә, һе ԛәнщ ә ԝәки ԛәт нәзәԝьщьн». Иса ԝанрʼа гот: «Һәр кәсирʼа әв йәк дәст надә, ле тʼәне ԝанрʼа кʼижанарʼа һатийә дайине. Чьмки нәмер һәнә, кӧ жь зькмакийеда ӧса бунә у нәмер жи һәнә, кӧ жь дәсте мәрьва бунә нәмер у нәмер жи һәнә, кӧ бона Пʼадшатийа Әʼзмана ԝана хԝә нәмер кьрьн. Кʼерʼа әв йәк дәст дьдә, бьра ӧса жи бькә». Һьнге зарʼок анинә щәм Иса, кӧ дәстед Хԝә дайнә сәр ԝан у дӧа ль ԝан бькә. Ле шагьртед Ԝи ль йед данин һьлатьн. Иса гот: «Бьра әԝ зарʼок бенә щәм Мьн, пешийа ԝан нәгьрьн, чьмки Пʼадшатийа Әʼзмана пʼара йед ӧса йә». У Иса дәстед Хԝә данинә сәр ԝан у жь ԝьр чу. Һьнге йәк незики Ԝи бу у готе: «Дәрсдар! Әз чь ԛәнщийе бькьм, ԝәки жийина һʼәта-һʼәтайе ԝар бьм?» Әԝи жерʼа гот: «Тӧ чьма бона ԛәнщийе жь Мьн дьпьрси? Тʼәне Йәки ԛәнщ һәйә. Ле һәгәр тӧ дьхԝази, бькʼәви жийина һʼәта-һʼәтайе, тʼәмийед Хԝәде хԝәй кә». Әԝи жь Иса пьрси: «Кʼижан ьн?» Иса готе: «Нәкӧжә, зьнекʼарийе нәкә, нәдьзә, шәʼдәтийа дәрәԝ нәдә, ԛәдьре де у баве хԝә бьгьрә у һәвале хԝә ԝәкә хԝә һʼьз бькә ». Хорт жерʼа гот: «Мьн әв һʼәму хԝәйи кьрьнә. Иди чь кемасийа мьн һәйә?» Иса готе: «Һәгәр тӧ дьхԝази кʼамьл би, һәрʼә һәбука хԝә бьфьрошә бьдә фәԛира, һьнге хьзна тә ԝе ль әʼзмана һәбә. У пәй мьн ԝәрә». Гава хорт әв хәбәр бьһистьн, бәр хԝә кʼәт у чу, чьмки гәләк һәбука ԝи һәбу. Һьнге Иса готә шагьртед Хԝә: «Әз рʼаст ԝәрʼа дьбежьм, дәԝләтийарʼа зәʼмәт ә кӧ бькʼәвьнә Пʼадшатийа Әʼзмана. Әз диса ԝәрʼа дьбежьм, дәвә ԝе ԛӧла дәрзийерʼа һе рʼьһʼәт дәрбаз бә, нә кӧ дәԝләти бькʼәвә Пʼадшатийа Хԝәде». Гава шагьрта әв йәк бьһист, гәләки әʼщебмайи ман у готьн: «Иди кʼи дькарә хьлаз бә?» Иса ль ԝан ньһерʼи у гот: «Әԝ тьшт жь дәсте мерьв найе, ле Хԝәде һәр тьшти дькарә бькә». Ԝе гаве Пәтрус ле вәгәрʼанд у готе: «Аԝа мә һʼәму тьшт һьштийә у пәй тә һатьнә, ле ахьрийа мә ԝе чаԝа бә?» Иса готә ԝан: «Әз рʼаст ԝәрʼа дьбежьм, гава Кӧрʼе Мерьв Дьнйа Нуда ль сәр тʼәхте Хԝәйи рʼумәт рʼуне, һунед кӧ ль пәй Мьн тен, сәр донздәһ кʼӧрсийа рʼунен у диԝана донздәһ ԛәбилед Исраеле бькьн. У һʼәмуйед кӧ мала хԝә, йан бьред хԝә, йан хушкед хԝә, йан баве хԝә, йан дийа хԝә, йан жьна хԝә, йан зарʼед хԝә, йан әʼрдед хԝә бона наве Мьн һьштьнә, әԝе сәд ԛат бьстинә у ԝе жийина һʼәта-һʼәтайе жи ԝар бә. Ле гәләкед пеш ԝе бьбьнә паш у йед паш ԝе бьбьнә пеш». «Пʼадшатийа Әʼзмана мина ве йәке йә: Мәрьвәки хԝәйимьлкʼ сьбәһе зу рʼабу, ԝәки бона рʼәзе тьрийед хԝә пʼала бьгьрә. Әԝи пʼаларʼа рʼоже зивәк ԛьрар кьр у әԝ шандьнә нава рʼәзе хԝә. Незики сьһʼәта нәһа дәркʼәт, һьнәкед дьнә кӧ базареда бәтал сәкьнибун дитьн у готә ԝан: ‹Һун жи һәрʼьнә нава рʼәзе мьн у чь һәԛе ԝә йә, әзе бьдьмә ԝә›. Әԝ жи чун. Диса сьһʼәта донздәһа у сьһʼәта сьсийа дәркʼәт у ӧса кьр. У незики сьһʼәта пенща дәркʼәт, һьнәкед дьн жи кӧ бәтал сәкьнибун дитьн у готә ԝан: ‹Чьма тʼәмамийа рʼоже һун ль вьр бәтал сәкьнинә?› Ԝана жерʼа гот: ‹Кәсәки әм пʼалә нәгьртьн›. Әԝи ԝанарʼа гот: ‹Һун жи һәрʼьнә нава рʼәзе мьн›. Гава рʼо чу ава, хԝәйе рʼәз ԝәкʼиле мала хԝәрʼа гот: ‹Гази пʼала кә, һәԛе ԝан бьде, жь йед пашьн дәстпебькә һʼәта йед пешьн›. Әԝ пʼалед кӧ сьһʼәта пенща гьртьбун, һатьн у һәр йәки зивәк станд. Гава йед пешьн жи һатьн, ԝана тʼьре әԝе зедә бьстиньн. Ле ԝана жи һәр йәки зивәк станд. Гава һәԛе хԝә стандьн, һьндава хԝәйе рʼәзда бина хԝә тәнг кьрьн у готьн: ‹Мә тʼәмамийа гьранийа рʼоже у гәрма ԝе кʼьшанд, ле әвед пашԝәхтийе кӧ һатьн сьһʼәтәке жи нәхәбьтин, тә әԝ һьмбәри мә кьрьн›. Малхе жь ԝан йәкирʼа гот: ‹Һәвал! Әз нәһәԛийе ль тә накьм. Тӧ мьнрʼа зивәки ԛайл нәбуйи? Һәԛе хԝә бьстинә у һәрʼә. Әз дьхԝазьм чаԝа кӧ мьн да тә, ӧса жи бьдьмә әве пашьн. Йан изьна мьн ль сәр мале мьн тʼӧнә, чь кӧ әз бьхԝазьм ԝе жи бькьм? Йан тӧ һʼәвсудийе дьки, кӧ әз мәрʼд ьм?› Бь ви аԝайи йед паш ԝе бьбьнә пеш у йед пеш ԝе бьбьнә паш ». Чахе Иса һьлдькʼьшийа Оршәлиме, тʼәне һәр донздәһ шагьртед Хԝә тʼәви Хԝә бьрьн у рʼеда готә ԝан: «Бьбьһен! Әм һәвраз дьчьнә Оршәлиме. Кӧрʼе Мерьв ԝе бькʼәвә дәсте сәрәкед кʼаһина у ԛанунзана. Әԝе жерʼа кӧштьне дәрхьн у Ԝи бьдьнә дәсте нәщьһуйа, ԝәки ԛәрфе хԝә ль Ԝи бькьн, бьдьн бәр ԛамчийа у хач кьн. Ле рʼожа сьсийа Әԝе жь мьрьне рʼабә». Һьнге дийа кӧрʼед Зәбәди тʼәви һәр дӧ кӧрʼед хԝә һатә щәм Иса, хԝә авитә ньге Ԝи тьштәк же дьхԝәст. Иса же пьрси: «Тӧ чь дьхԝази?» Әԝе готә Ԝи: «Бежә, кӧ әв һәр дӧ кӧрʼед мьн ль нав Пʼадшатийа Тәда, йәк ль мьле Тәйи рʼасте, йе дьн жи ль мьле Тәйи чʼәпе рʼуне». Ле Иса ль ԝан вәгәрʼанд у гот: «Һун ньзаньн чь дьхԝазьн. Гәло һун дькарьн жь ԝе кʼасе вәхԝьн, йа кӧ Әзе вәхԝьм? » Ԝана готә Ԝи: «Бәле, әм дькарьн». Әԝи ԝанарʼа гот: «Рʼаст ә һуне ԝе кʼаса Мьн вәхԝьн, ле изьна ль мьле Мьни чʼәп у рʼасте рʼуньштьне нә дәсте Мьнда йә. Әԝ щи бона ԝан ьн, кʼижанарʼа алийе Баве Мьнда һатьнә һазьркьрьне». Гава һәр дәһә шагьртед дьн әв йәк бьһист, дьле ԝан жь һәр дӧ бьра ма. Ле Иса әԝ гази щәм хԝә кьрьн у гот: «Һун заньн кӧ миред мьләта сәрдәстийе ԝан дькьн у гьрәгьред ԝан һʼӧкӧми сәр ԝан дькьн. Ле нава ԝәда гәрәке ӧса нибә. Кʼи кӧ нава ԝәда дьхԝазә бьбә йе мәзьн, гәрәке бьбә бәрдәстийе ԝә. У кʼи кӧ нава ԝәда дьхԝазә бьбә пеш, гәрәке бьбә хӧламе ԝә, чаԝа кӧ Кӧрʼе Мерьв нәһатийә кӧ жерʼа бәрдәстийе бькьн, ле ԝәки Әԝ Хԝәха бәрдәстийе бькә у әʼмьре Хԝә бьдә, кӧ гәләка бькʼьрʼә». Гава әԝана жь Әриһайе дәркʼәтьн, әʼлаләтәкә гьран да пәй Ԝи чу. Ва дӧ кор сәр ԝе рʼе рʼуньштьбун. Гава бьһистьн кӧ Иса дәрбаз дьбә, кьрьнә ԛирʼин у готьне: «Хӧдан, Кӧрʼе Даԝьд, ль мә ԝәрә рʼәʼме». Әʼлаләте ль ԝан һьлат, кӧ дәнге хԝә бьбьрʼьн, ле ԝана һе кьрә ԛирʼин у готьне: «Хӧдан, Кӧрʼе Даԝьд, мә ԝәрә рʼәʼме!» Иса сәкьни, гази ԝан кьр у гот: «Һун чь жь Мьн дьхԝазьн кӧ Әз бона ԝә бькьм?» Ԝана жерʼа гот: «Хӧдан, бьра чʼәʼвед мә вәбьн». Гӧне Иса ль ԝан һат у дәст дани сәр чʼәʼвед ԝан. Дәстхԝәда чʼәʼвед ԝан дитьн, данә пәй Иса чун. Гава әԝ незики Оршәлиме бун, һатьнә гӧнде Бәйтфаще, чʼийайе Зәйтʼуне. Һьнге Иса дӧ шагьртед Хԝә шандьн у ԝанарʼа гот: «Һәрʼьнә ԝи гӧнде пешбәри хԝә у һуне кʼәрәкә гьредайи щәʼшьк бәр бьбиньн. Ԝан кʼәра вәкьн биньнә щәм Мьн. Һәгәр йәк ԝәрʼа тьштәки бежә, һун бежьн: ‹Хӧданрʼа лазьм ьн› у әԝе зу ԝан бьшинә». Әва ӧса ԛәԝьми, кӧ әԝ готьна бь заре пʼехәмбәр бе сери: «Бежьнә бажаре Сийоне: ‹Ва Пʼадше тә те щәм тә, бәрбьһер, ль кʼәре у щәʼшька кʼәре сийарбуйи› ». Шагьрт чун у чаԝа кӧ Иса тʼәми дабу ԝан ӧса кьрьн. Кʼәр у щәʼшьк анин, кʼьнщед хԝә авитьнә сәр ԝан у Әԝ ль ԝан сийар бу. Әʼлаләтәкә гьран кʼьнщед хԝә сәр рʼе рʼадьхьстьн, һьнәка жи чʼьԛьле дара дьбьрʼин у сәр рʼе рʼадьхьстьн. Әʼлаләта кӧ ль пешийа Ԝи у ль пәй Ԝи дьчу, дькьрә ԛирʼин у дьгот: «Һосанна Кӧрʼе Даԝьдрʼа! Бьмбарәк ә Әԝе кӧ бь наве Хӧдан те! Һосанна Йе Һәри Жорьнрʼа! » Гава Иса кʼәтә Оршәлиме, тʼәмамийа бажер һʼәжийа у пьрсин: «Әв кʼи йә?» Әʼлаләте гот: «Әва Исайе Пʼехәмбәр ә, жь Ньсрәта Щәлиле». Иса кʼәтә пʼарьстгәһе у һʼәмуйед кӧ пʼарьстгәһеда тʼӧщарәти дькьрьн дәрхьстьн. Тʼәхтед пʼәрәгӧһерʼа у кʼӧрсийед кәвоткфьроша ԝәлгәрʼандьн у готә ԝан: «Ньвисар ә: ‹Мала Мьн мала дӧа ԝе бе һʼәсабе›, ле ԝә әԝ кьрийә ‹шкәфта ԛачаха›! » Ль ԝьр пʼарьстгәһеда кор у сәԛәт һатьнә щәм Ԝи у Әԝи әԝ ԛәнщ кьрьн. Ле гава кӧ сәрәкед кʼаһина у ԛанунзана әԝ кʼәрәмәтед кӧ Иса кьрьн дитьн у ӧса жи әԝ зарʼед кӧ пʼарьстгәһеда дькьрьнә ԛирʼин у дьготьн: «Һосанна Кӧрʼе Даԝьдрʼа!» һерс кʼәтьн у готьнә Ԝи: «Тӧ дьбьһейи әв чь дьбежьн?» Иса ԝанарʼа гот: «Бәле. Ԝә ԛәт нәхԝәндийә кӧ: ‹Тә бь заред тʼьфал у дәргуша пәсьндайин ани сери›? » У Әԝи әԝ ль ԝьр һьштьн, жь бажер дәркʼәт, чу Бәйтанйайе у шәв ль ԝьр ма. Сьбәһе зу, чахе Әԝ вәгәрʼийа бажер, бьрʼчи бу. Сәр рʼе дарәкә һежире дит, незики ԝе бу, ле пештьри бәлга тьштәки дьн пева нәдит у дарерʼа гот: «Жь вьр шунда тӧ һʼәта-һʼәтайе бәр нәди!» У дар перʼа-перʼа һʼьшк бу. Гава шагьрта әв йәк дит, зәндәгьрти ман у готьн: «Чаԝа әв дара һежире перʼа-перʼа һʼьшк бу?» Иса щаба ԝан да у гот: «Әз рʼаст ԝәрʼа дьбежьм, һәгәр баԝәрийа ԝә һәбә у дӧдьли нәбьн, һуне нә тʼәне чь кӧ һатә сәре ве дара һежире бькьн, ле һәгәр һун ви чʼийайирʼа жи бежьн: ‹Рʼабә хԝә бавежә бәʼре›, ԝе бьбә. Һәгәр баԝәрийа ԝә һәбә, һун чь кӧ нава дӧада бьхԝазьн, һуне бьстиньн». Гава Әԝ һатә пʼарьстгәһе у щьмәʼт һин кьр, сәрәкед кʼаһина у рʼуспийед щьмәʼте һатьнә щәм Ԝи у готьне: «Тӧ бь чь һʼӧкӧми ван кьра дьки? У кʼе әв һʼӧкӧм дайә Тә?» Иса ль ԝан вәгәрʼанд у гот: «Әзе жи тьштәки жь ԝә бьпьрсьм. Һәгәр ԝә щаба Мьн да, Әзе жи ԝәрʼа бежьм Әз бь чь һʼӧкӧми ван кьра дькьм. Һʼӧкӧме ньхӧмандьна Йуһʼәнна жь кʼӧ бу, жь әʼзмен бу, йан жь мәрьва бу?» Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе мәрʼа бежә: ‹Ле ԝә чьма әԝ баԝәр нәкьр?› Ле һәгәр әм бежьн: ‹Жь мәрьва бу›, әм жь әʼлаләте дьтьрсьн, чьмки һʼәмуйа ԛәбул дькьр кӧ Йуһʼәнна пʼехәмбәр бу». Ԝана щаба Иса да у готьн: «Әм ньзаньн». Әԝи ԝанрʼа гот: «Әз жи ԝәрʼа набежьм кӧ Әз бь чь һʼӧкӧми ван кьра дькьм. Һун чаԝа тʼәхмин дькьн? Дӧ кӧрʼед мәрьвәки һәбун. Әԝи кӧрʼе хԝәйи мәзьнрʼа гот: ‹Лаԝо! Иро һәрʼә нав рʼәз, шьхӧл бькә›. Әԝи ле вәгәрʼанд у гот: ‹Әз начьм›, ле паше пʼошман бу у чу. Һьнге бав чу щәм йе дьн әԝи жи аһа гот: ‹Бәле, әзе һәрʼьм баво›, ле нәчу. Ньһа жь ван һәр дӧ кӧрʼа кʼижани гӧрʼа баве хԝә кьр?» Ԝана готә Ԝи: «Йе мәзьн». Иса жи готә ԝан: «Әз рʼаст ԝәрʼа дьбежьм, кӧ хәрщгьр у чʼәʼвдәр ԝе бәри ԝә бькʼәвьнә Пʼадшатийа Хԝәде. Чьмки Йуһʼәнна һат кӧ рʼийа рʼастийе нишани ԝә кә, ԝә әԝ баԝәр нәкьр, ле хәрщгьр у чʼәʼвдәра әԝ баԝәр кьрьн. Ԝә әв тьшт дит жи, ле диса һун ль хԝә мӧкӧрʼ нәһатьн, кӧ ԝә әԝ баԝәр бькьра. Мәсәләкә дьн жи бьбьһен. Мәрьвәки хԝәйимьлкʼ һәбу, рʼәзе тьрийа дани, дора ԝе сур кьр һʼәԝзәки тьриһʼьнщьрʼандьне теда кʼола, һеланәкә нобәдара чекьр у әԝ бь кʼьре да рʼәзвана, чу ԝәлатәки дьн. Гава ԝәхте бәрдайине незик бу, әԝи хӧламед хԝә шандьнә щәм рʼәзвана, ԝәки жь бәре рʼәзе ԝи жерʼа биньн. Рʼәзвана хӧламед ԝи гьртьн, йәк кʼӧтан, йе дьн кӧштьн у йәки дьн жи данә бәр кәвьра. Әԝи хӧламнә дьн шандьн, жь йед пешьн гәләктьр у ԝана ӧса жи анинә сәре ԝан. Ахьрийе, кӧрʼе хԝә шандә щәм ԝан у гот: ‹Һьлбәт ԝе жь кӧрʼе мьн шәрм бькьн›. Ле гава рʼәзван чʼәʼв кӧрʼе ԝи кʼәтьн, һәврʼа готьн: ‹Әв ԝаре ԝи йә. Ԝәрьн әм ви бькӧжьн у бьбьнә хԝәйе миратʼа ԝи›. У әԝ гьртьн жь рʼәз дәрхьстьнә дәр у кӧштьн. Ле гава хԝәйе рʼәз бе, ԝе чь сәре ԝан рʼәзвана бькә?» Готьнә Ԝи: «Ԝе ԛьрʼа ԝан нәһәԛа бинә у рʼәз бьдә рʼәзванед ӧса, йед кӧ ԝе ԝәхтда бәре рʼәзе ԝи бьдьне». Иса готә ԝан: «Ԝә ньвисареда ԛәт нәхԝәндийә? ‹Әԝ кәвьре кӧ һоста тʼәхсир кьр, әԝ бу сәре әʼнишке. Әв йәк жь алийе Хӧданда ԛәԝьми у ль бәр чʼәʼве мә һʼәйр-һʼӧжмәкʼар ә!› Бона ве йәке Әз ԝәрʼа дьбежьм, кӧ Пʼадшатийа Хԝәде ԝе жь ԝә бе стандьне у мьләтәки ӧсарʼа бе дайине, ԝәки бона Ԝи бәр бинә. Кʼи кӧ бькʼәвә сәр ви кәвьри, ԝе һурдәхԝәши бә у әԝ кәвьр бькʼәвә сәр кʼе, ԝе ԝи бьһʼьнщьрʼинә». Гава сәрәкед кʼаһина у ферьсийа мәсәлед Ԝи бьһистьн, фәʼм кьрьн кӧ Әԝ бона ԝан дьбежә. Кьрьн кӧ Ԝи бьгьрьн, ле жь әʼлаләте тьрсийан, чьмки Әԝ ԝәкә пʼехәмбәрәки ԛәбул дькьрьн. Диса Иса бь мәсәла ԝанарʼа хәбәр да у гот: «Пʼадшатийа Әʼзмана мина ве йәке йә: Пʼадшаки дәʼԝата кӧрʼе хԝә кьр. Әԝи хӧламед хԝә шандьн кӧ гази хԝәндийед дәʼԝате кьн, ле ԝана нәхԝәстьн бен. Хӧламнә дьн шандьн у гот: ‹Хԝәндийарʼа бежьн: Мьн щанәга у һʼәйԝанед хԝәйә дәрмаликьри сәржекьрьнә у нане хԝә һазьр кьрийә, һәр тьшт һазьр ә. Ԝәрьнә дәʼԝате!› Ле ԝана пьшт гӧһе хԝәва авит, йәк чу әʼрде хԝә у йе дьн тʼӧщарәтийа хԝә. Йед майин жи хӧламед ԝи гьртьн, кʼӧтан у кӧштьн. Чахе пʼадше бьһист, һерс кʼәт, ордийа хԝә шанд ԛьрʼа әԝед кӧ хӧлам кӧштьн ани у бажаре ԝан шәԝьтанд. Һьнге готә хӧламед хԝә: ‹Дәʼԝат һазьр ә, ле хԝәнди нә һежа бун. Рʼабьн һәрʼьнә сәре рʼийа у һун кʼе кӧ бьбиньн, тʼәглифи дәʼԝате кьн›. У әԝ хӧлам дәркʼәтьнә сәре рʼийа, кʼи кӧ дитьн, ԛәнщ у хьраб, тʼәв щьвандьн у мала дәʼԝате бь хԝәндийава тʼьжи бу. Ле гава пʼадша чу һьндӧрʼ кӧ хԝәндийа бьбинә, мәрьвәк ль ԝьр дит кӧ кʼьнще дәʼԝате ле тʼӧнәбу у готә ԝи: ‹Һәвал! Тӧ чаԝа бе кʼьнще дәʼԝате кʼәти вьр?› Әԝи дәнг нәкьр. Ԝе гаве пʼадше бәрдәстийарʼа гот: ‹Дәст у пʼийе ԝи гьредьн, бьгьрьн бавежьнә тәʼрийа дәрва. Ль ԝьр ԝе бьбә ԛирʼин у чʼьркә-чʼьрка дьрана›. Аԝа газикьри гәләк ьн, ле бьжарти һьндьк ьн». Һьнге ферьси чун шеԝьрин, кӧ Ԝи чаԝа бь хәбәра бьгьрьн. Ԝана шагьртед хԝә тʼәви пьштгьред Һеродәс шандьнә щәм Ԝи у готьне: «Дәрсдар! Әм заньн кӧ Тӧ йәки рʼаст и у рʼийа Хԝәде рʼаст һин дьки. Мьнәте жь кәси нагьри, чьмки нав мәрьвада фьрԛийе данайни. Ньһа бежә мә, Тӧ чаԝа тʼәхмин дьки? Гәло рʼаст ә кӧ әм хәрщ бьдьнә Ԛәйсәр йан на?» Иса ԛәлпийа ԝан заньбу у гот: «Чьма һун Мьн дьщерʼьбиньн, дӧрʼуно? Пʼәре хәрщдайине нишани Мьн кьн». У ԝана зивәк Ԝирʼа ани. Иса жь ԝан пьрси: «Әв наве ньвисар у сьфәт йе кʼе йә?» Ԝана гот: «Йед Ԛәйсәр ьн». Һьнге готә ԝан: «Аԝа чь кӧ йед Ԛәйсәр ьн бьдьнә Ԛәйсәр у чь йед Хԝәде нә бьдьнә Хԝәде». Гава ԝан бьһист зәндәгьрти ман, Әԝ һьштьн у чун. Садуԛи, кӧ дьбежьн рʼабуна мьрийа тʼӧнә, ԝе рʼоже һьнәкә жь ԝан һатьнә щәм Иса же пьрсин у готьне: «Дәрсдар! Муса гот: ‹Һәгәр йәк безӧрʼәт бьмьрә, бьра бьре ԝи жьна ԝи бьстинә у ԝаре бьре хԝә шин кә›. Аԝа һʼәфт бьра ль щәм мә һәбун. Бьре мәзьн зәԝьщи, безӧрʼәт мьр, жьна ԝи бьре ԝирʼа ма. Ӧса жи һатә сәре бьре дӧда у йе сьсийа, хӧләсә һатә сәре һәр һʼәфта жи. Ль пәй һʼәмуйарʼа әԝ жьна жи мьр. Дә ижар ԝе Рʼожа Рʼабуна мьрийа әԝ кʼӧлфәте бьбә жьна кʼижани жь ԝан һәр һʼәфта? Чьмки һʼәмуйа жи әԝ стандьбу». Иса ль ԝан вәгәрʼанд у гот: «Һун хальфи нә, чьмки нә ньвисара заньн, нә жи ԛәԝата Хԝәде. Рʼожа Рʼабуна мьрийа нә ԝе бьзәԝьщьн, нә жи мер кьн, ле әԝе мина мьлйакʼәтед әʼзмен бьн. Ле дәрһәԛа рʼабуна мьрийада, чьма ԝә әԝ хәбәра кӧ Хԝәде ԝәрʼа готьбу нәхԝәндийә? ‹Әз Хԝәдейе Бьраһим, Хԝәдейе Исһаԛ у Хԝәдейе Аԛуб ьм›. Хԝәде нә Хԝәдейе мьрийа йә, ле Хԝәдейе зендийа йә». Гава әʼлаләте әв тьшт бьһистьн, сәр һинкьрьна Ԝи зәндәгьрти ман. Ле гава ферьсийа бьһист кӧ Иса садуԛи дәнгбьрʼи кьрьн, һʼәму ль щики щьвийан. Һьнге жь ԝан ԛанунзана йәки пьрс да Иса кӧ Ԝи бьщерʼьбинә у готе: «Дәрсдар. Ԛанунеда кʼижан ә тʼәмийа һәрә мәзьн?» Иса готә ԝи: «‹Хӧдан Хԝәдейе хԝә һʼьз бькә бь тʼәмамийа дьле хԝә, бь тʼәмамийа щанийа хԝә у бь тʼәмамийа һʼьше хԝә›. Әв ә тʼәмийа пешьн у һәрә мәзьн. У йа дӧда жи мина ве йә: ‹Һәвале хԝә ԝәкә хԝә һʼьз бькә›. Жь ван һәр дӧ тʼәмийава һʼәму ньвисаред пʼехәмбәра у Ԛануне гьредайи нә». Гава ферьси щьвийан, Иса жь ԝан пьрси у гот: «Һун бона Мәсиһ чь дьфькьрьн, тʼәхмина ԝә Әԝ кӧрʼе кʼе йә?» Жерʼа готьн: «Кӧрʼе Даԝьд ә». Иса готә ԝан: «Ле чаԝа Даԝьд Ԝи пе Рʼӧһʼ Хӧдане хԝә һʼәсаб дькә? Чьмки ԝи гот: ‹Хӧдан готә Хӧдане мьн: Ль мьле Мьни рʼасте рʼуне, һʼәта кӧ Әз дьжмьнед Тә бькьмә бьне пʼийед Тә›. Һәгәр Даԝьд Ԝи ‹Хӧдан› һʼәсаб дькә, Әԝ чаԝа дьбә кӧрʼе ԝи?» У кәсәки нькарьбу щаба Ԝи бьда у ль пәй ԝе рʼожерʼа кәсәки нәԝерьбу пьрсәк же бькьра. Һьнге Иса әʼлаләт у шагьртед Хԝәрʼа хәбәр да у гот: «Ԛанунзан у ферьси ль сәр кʼӧрсийа Муса рʼуньштьнә. Иди әԝана чь ԝәрʼа бежьн хԝәй кьн у бьԛәдиньн, ле мина ԝан нәкьн, чьмки әԝана дьбежьн, ле накьн. Баред гьран у зәʼмәт гьредьдьн, датиньнә сәр мьлед мәрьва, ле әԝ хԝәха нахԝазьн тʼьлийа хԝә жи бьдьне. Әԝ һәр тьшти дькьн, кӧ бәр мәрьва бенә кʼьфше. Кʼиськед мәзьн ль мьл у әʼнийед хԝәва гьредьдьн у рʼишийед кʼьнщед хԝә дьреж дькьн. Шайийада һәрәма жорьн һʼьз дькьн, кʼьништада жи кʼӧрсийед пешьн, базарада сьлаве бьдьнә ԝан у мәрьв жи ԝанрʼа ‹мамоста › бежьн. Ле бьра ԝәрʼа нәбежьн: ‹Мамоста›, чьмки дәрсдаре ԝә йәк ә у һун һʼәму жи бьра нә. Ль сәр дьне һун тʼӧ кәсирʼа нәбежьн: ‹Баво›, чьмки Баве ԝә йәк ә, кӧ әʼзмана йә. Нә жи ԝәрʼа бежьн: ‹Рʼебәр›, чьмки Рʼебәре ԝә йәк ә, әԝ Мәсиһ ә. Бьра нава ԝәда йе һәри мәзьн бьбә бәрдәстийе ԝә. Кʼи кӧ хԝә бьльнд кә, әԝе ньмьз бә, ле кʼи кӧ хԝә ньмьз кә, әԝе бьльнд бә. Ле ԝәй ль ԝә ԛанунзан у ферьсийа! Дӧрʼуно! Һун дәре Пʼадшатийа Әʼзмана ль бәр мәрьва дадьдьн. Нә һун дькʼәвьне у нә жи дьһельн әԝед кӧ дьхԝазьн бькʼәвьне. Ԝәй ль ԝә ԛанунзан у ферьсийа! Дӧрʼуно! Аликива һун малед жьнәбийа һʼуфи хԝә дькьн, алийе дьнва жи бь дӧрʼути дӧайе хԝә дьреж дькьн. Бона ве йәке диԝана ԝә ԝе һе гьран бә. Ԝәй ль ԝә ԛанунзан у ферьсийа! Дӧрʼуно! Һун бәʼр у бәже ль һәв дьдьн, кӧ йәки нәбаԝәр биньн сәр рʼийа хԝә. Гава мәрәме ԝә дьбә, һун әԝи жь хԝә дӧ щара зедәтьр дькьнә пʼара щәʼньме. Ԝәй ль ԝә рʼебәред кор, һун дьбежьн: ‹Кʼи кӧ бь пʼарьстгәһе сонд дьхԝә, нә тьштәк ә. Ле кʼи кӧ бь зерʼе ль нав пʼарьстгәһе сонд дьхԝә, дьбә дәйндар›. Һәй беһʼьш у корно! Кʼижан мәзьн ә, зерʼ йан пʼарьстгәһ, кӧ зерʼ һʼәлал дькә? Ӧса жи һун дьбежьн: ‹Кʼи кӧ бь горигәһе сонд дьхԝә нә тьштәк ә, ле кʼи кӧ бь һʼәдийа ль сәр горигәһе сонд дьхԝә, дьбә дәйндар›. Һәй корно! Кʼижан ә мәзьн? Һʼәди йан горигәһ, кӧ һʼәдийе һʼәлал дькә? Аԝа кʼи кӧ бь горигәһе сонд дьхԝә, әԝ һьн бь ԝе сонд дьхԝә, һьн жи бь һʼәму тьштед кӧ сәр ԝе һәнә сонд дьхԝә. Кʼи кӧ бь пʼарьстгәһе сонд дьхԝә, әԝ һьн бь ԝе сонд дьхԝә, һьн жи бь Йе кӧ ԝеда дьжи сонд дьхԝә. У кʼи кӧ бь әʼзмен сонд дьхԝә, әԝ һьн бь тʼәхте Хԝәде сонд дьхԝә, һьн жи бь Йе кӧ ль сәр Рʼуньштийә сонд дьхԝә. Ԝәй ль ԝә ԛанунзан у ферьсийа! Дӧрʼуно! Һун дәһәке пунге, анисойе у кʼемуне дьдьн, ле тьштед Ԛанунейә пеш, аԝа готи һәԛийе, рʼәʼме у баԝәрийе давежьнә пьшт гӧһе хԝә. Ԝә гәрәке әв йәк бькьрана у дәст жь йед майин нәкʼьшанда. Рʼебәред кор! Һун кʼәрмеша дьпарзьньн, ле дәва дадьԛӧртиньн! Ԝәй ль ԝә ԛанунзан у ферьсийа! Дӧрʼуно! Һун тʼас у финщана рʼуйе дәрвава паԛьж дькьн, ле һьндӧрʼва тʼьжи тьмайи у чʼәʼвбьрʼчийи нә. Ферьсийе кор! Пешийе һьндӧрʼе финщан у тʼасе паԛьж кә, ԝәки ль дәрва жи паԛьж бә. Ԝәй ль ԝә ԛанунзан у ферьсийа! Дӧрʼуно! Һун мина тʼьрбед сьпикьри нә, кӧ дәрвава бәдәԝ хӧйа дьбьн, ле һьндӧрʼва бь һәстуйе мьрийа у бь һʼәму һʼәрамийева тʼьжи нә. Ӧса жи һун дәрва мәрьвава рʼаст кʼьфш дьбьн, ле һьндӧрʼва һун дӧрʼу нә у нәһәԛ ьн. Ԝәй ль ԝә ԛанунзан у ферьсийа! Дӧрʼуно! Һун мәхбәред пʼехәмбәра чедькьн у тʼьрбе йед рʼаст дьхәмьлиньн у дьбежьн: ‹Һәгәр әм рʼожед бавед хԝәда буна, мә тʼәви ԝан хуна пʼехәмбәра нәдьрʼет›. Иди һун ньһа хԝәха дьдьнә избаткьрьне, кӧ һун зарʼед ԝан бава нә, йед кӧ пʼехәмбәр кӧштьнә. Дә кемасийа хьрабийед бавед хԝә тʼәмам кьн. Мәʼрно! Чʼежькед мәʼра! Һуне чаԝа жь диԝана доже бьрʼәвьн? Бона ве йәке ва Әзе пʼехәмбәра, сәрԝахта у ԛанунзана бьшиньмә щәм ԝә у һуне жь ԝан һьнәка бькӧжьн, хач кьн, һьнәка жи нав кʼьништед хԝәда бьдьнә бәр ԛамчийа у бажар-бажар бьзериньн. Һʼәму хуна бесущә кӧ сәр рʼуйе әʼрде һатийә рʼетьне ԝе бе сәр ԝә, жь хуна Һабиле бесущ һʼәта хуна Зәкәрийайе кӧрʼе Бәрәхийа, әԝе кӧ ԝә нав пʼарьстгәһ у горигәһеда кӧшт. Әз рʼаст ԝәрʼа дьбежьм, әв һʼәму хуне бе сәре ви ньсьли. Оршәлим! Оршәлим! Тә пʼехәмбәр дькӧштьн у шандийед щәм хԝә дьданә бәр кәвьра! Чәнд щара Мьн хԝәст кӧ зарʼед тә ӧса бьщьванда, чаԝа мьришк щущукед хԝә бьн баске хԝәда дьщьвинә, ле ԝә нәхԝәст! Ва мала ԝә ԝе хьрабә у дәстжекʼьшанди бьминә. Әз ԝәрʼа дьбежьм, иди жь вьр шунда һун Мьн тʼӧ щар набиньн, һʼәта кӧ бежьн: ‹Бьмбарәк ә Әԝе кӧ бь наве Хӧдан те› ». Гава Иса жь пʼарьстгәһе дәркʼәт чу, шагьрт чунә щәм Ԝи, кӧ авайийед пʼарьстгәһе нишани Ԝи кьн. Иса ԝанрʼа гот: «Һун ван һʼәмуйа дьбиньн? Әз рʼаст ԝәрʼа дьбежьм, әв һʼәмуйе жи ԝеран бьн, ль вьр кәвьре ль сәр кәвьр ԛәт нәминә!» Чахе Әԝ сәр чʼийайе Зәйтʼуне рʼуньштьбу, шагьртед Ԝи тʼәне һатьнә щәм Ԝи у же пьрсин: «Бежә мә, әв тьшт ԝе кʼәнге бьԛәԝьмьн? У нишана һатьна Тә у ахьрийа ве дьнйайе ԝе чаԝа бә?» Иса щаба ԝан да у гот: «Һаш жь хԝә һәбьн, кӧ тʼӧ кәс ԝә нәхапинә, чьмки гәләк ԝе пе наве Мьн бен у бежьн: ‹Әз ьм Мәсиһ› у ԝе гәләка бьхальфиньн. Һуне дәнге шәрʼа у бәʼса шәрʼа бьбьһен, ле һаш жь хԝә һәбьн кӧ һун хԝә ӧнда нәкьн. Гәрәке әв тьшт бьԛәԝьмьн, ле әԝ һе нә ахьри йә. Мьләте рʼабә ль сәр мьләт, пʼадшати ль сәр пʼадшатийе, щи-щийа ԝе хәлайи-щәлайе у әʼрдһʼәже бьбьн. Ле әв һʼәму мина еша кʼӧлфәте йә, кӧ дәстпедькә пе дьгьрә. Һьнге ԝе ԝә бьдьнә щәфе, ԝә бькӧжьн у бона наве Мьн бәр чʼәʼве һʼәму мьләта рʼәш бьн. Һьнге гәләке жь рʼе бькʼәвьн, нәмамийа һәвдӧ бькьн у бәр чʼәʼве һәв бькʼәвьн. Гәләк пʼехәмбәред дәрәԝ ԝе дәркʼәвьн у гәләка бьхальфиньн. Жь дәст зедәбуна нәһәԛийе һʼьзкьрьна гәләка ԝе сар бә. Ле кʼи кӧ һʼәта хьлазийе тәйах кә, әԝе хьлаз бә. У әв Мьзгинийа Пʼадшатийе ԝе ль нав тʼәмамийа дьнйайе бе даннасинкьрьне, кӧ һʼәму мьләтарʼа бьбә шәʼдәти у һьнге хьлази ԝе бе. Чахе һун ‹һʼәрамийа ԝеранкьрьне› щийе пирозда сәкьни бьбиньн, чаԝа кӧ Данийел пʼехәмбәр гот», (әԝе кӧ дьхунә бьра фәʼм бькә), «һьнге әԝед кӧ Щьһустанеда нә бьра бьрʼәвьнә чʼийа. Әԝе кӧ сәр хани йә бьра жорда нәйе хԝаре кӧ жь мала хԝә тьштәки һьлдә. У әԝе кӧ кʼәԝшенда йә бьра вәнәгәрʼә кӧ пʼоте хԝә һьлдә. Ле ԝәй ль һʼәмла у дәстдәргуша ԝан рʼожада! Дӧа бькьн, кӧ рʼәва ԝә нәкʼәвә зьвьстане, йан жи рʼожа шәмийе. Чьмки һьнге тәнгасикә ӧса мәзьн ԝе бьбә, кӧ жь дәстпебуна дьнйайе һʼәта ньһа мина ԝе нәбуйә у нә жи ԝе бьбә. Һәгәр әԝ рʼож кьн нәбуна, тʼӧ кәс хьлаз нәдьбу, ле бона хатьре бьжартийа әԝ рʼоже кьн бьн. Һьнге, һәгәр йәк ԝәрʼа бежә: ‹Ва йә Мәсиһ›, йан жи ‹Ԝа йә›, баԝәр нәкьн. Чьмки мәсиһ у пʼехәмбәред дәрәԝ ԝе дәрен, нишан у кʼәрәмәтед мәзьн бькьн, кӧ бькарьбьн бьжартийед Хԝәде жи бьхальфиньн. Ва йә Мьн пешда ԝәрʼа гот. Һәгәр әԝана ԝәрʼа бежьн: ‹Ԝа йә Мәсиһ бәрʼийеда йә›, дәрнәкʼәвьн, йан: ‹Ва йә Әԝ фьлан одеда йә›, баԝәр нәкьн. Чьмки чаԝа бьруск жь рʼоһьлате бьрԛ дьдә у һʼәта рʼоавайе хӧйа дьбә, ԝе һатьна Кӧрʼе Мерьв жи ӧса бә. Бәрәтʼә кʼидәре һәбә, тәйре жи ль ԝьр бьщьвьн. Ль пәй тәнгасийа ԝан рʼожарʼа, рʼуйе рʼойе ԝе бе гьртьне у һиве жи рʼонайа хԝә нәдә, стәйрке жь әʼзмен бькʼәвьн у тʼопед әʼзмана ԝе жь рʼийед хԝә дәрен. Һьнге нишана Кӧрʼе Мерьв ԝе ль әʼзмен хӧйа бә у һʼәму мьләтед дьнйайе ԝе шине бькьн, гава бьбиньн Кӧрʼе Мерьв ль сәр әʼԝред әʼзмен бь ԛәԝат у рʼумәта мәзьн те. Әԝе мьлйакʼәтед Хԝә бь борʼийа дәнге бьльнд бьшинә у ԝе бьжартийед Ԝи жь һәр чар ԛӧлба бәрәв кьн, жь пʼәрʼәки әʼзмана һʼәта пʼәрʼе дьн. Жь дара һежире дәрсәке һин бьн. Чахе чʼьԛьлед ԝе тәрʼ дьбьн у бәлгед ԝе дьбьшкьвьн, иди һун заньн кӧ һавин незик ә. Ӧса жи гава һун ван һʼәму тьшта бьбиньн, бьзаньбьн кӧ әв тьшт незик ә, ль бәр шемике йә. Әз рʼаст ԝәрʼа дьбежьм, әва ньсьла дәрбаз набә, һʼәта кӧ әв һʼәму тьшт нәԛәԝьмьн. Әʼрд у әʼзмане дәрбаз бьн, ле готьнед Мьн тʼӧ щар дәрбаз набьн. Ле бона ԝе рʼоже у ԝе сьһʼәте тʼӧ кәс ньзанә, нә мьлйакʼәтед әʼзмана, нә жи Кӧрʼ, ле тʼәне Бав. Чаԝа кӧ рʼожед Нӧһда ԛәԝьми, һатьна Кӧрʼе Мерьв жи ԝе ӧса бьԛәԝьмә. Чаԝа кӧ ԝан рʼожед бәри лейийе мәрьва дьхԝарьн, вәдьхԝарьн, дьзәԝьщин у мер дькьрьн, һʼәта ԝе рʼожа кӧ Нӧһ кʼәтә гәмийе у мәрьв пе нәһʼәсийан, һʼәта кӧ лейи рʼабу у һʼәму жи хәньԛандьн. Һатьна Кӧрʼе Мерьв жи ԝе ӧса бә. Һьнге дӧ мәрьв ԝе нав әʼрде хԝәда бьн, йәке бе һьлдане у йе дьне бе һьштьне. У дӧ кʼӧлфәте сәр дәстарʼәки бьн, йәке бе һьлдане, йа дьн бе һьштьне. Аԝа һʼьшйар бьминьн, чьмки һун ньзаньн Хӧдане ԝәйе кʼижан рʼоже бе. Ле ве йәке бьзаньбьн. Һәгәр хԝәйе мале бьзаньбуйа кӧ дьзе кʼижан дәма шәве бьһата, ԝе һʼьшйар бьма у нәһьшта кӧ мала ԝи дәрәвәкьра. Бона ве йәке һун жи һазьр бьн, чьмки Кӧрʼе Мерьв ԝе сьһʼәтәкә ӧсада бе, кӧ һун нә чʼәʼвньһерʼи нә. Аԝа кʼи йә әԝ хӧламе амьн у сәрԝахт, кӧ ахайе ԝи әԝ сәр хӧламед хԝә сәрԝер кʼьфш кьр, кӧ ԝәхтда хԝарьна ԝан бьдә ԝан? Хԝәзи ль ԝи хӧлами, кӧ чахе ахайе ԝи бе, әԝи ӧса бьбинә. Әз рʼаст ԝәрʼа дьбежьм, әԝе ԝи бькә сәрԝере тʼәмамийа һәбука хԝә. Ле һәгәр хӧламе хьраб дьле хԝәда бежә: ‹Ахайе мьн һатьна хԝә дәрәнги ехьст› у дәстпекә ль хӧлам-һәвалед хԝә хә у тʼәви йед сәрхԝәш бьхԝә у вәхԝә, ахайе ԝи хӧлами ԝе рʼожәкә ӧса бе, кӧ әԝ нә һивийе йә у сьһʼәтәкә ӧса, кӧ әԝ ньзанә. Әԝе ԝи ԛәт-ԛәти кә у пʼара ԝи ԝе тʼәви дӧрʼуйа кә. Ль ԝьр ԝе бьбә гьри у чʼьркә-чʼьрка дьрана. Һьнге Пʼадшатийа Әʼзмана ԝе мина ве йәке бә: Дәһә ԛизед бькʼьр чʼьред хԝә һьлдан пешийа зәʼведа чун. Жь ԝан пенщ сәрԝахт бун, ле пенщ бефәʼм. Бефәʼма чʼьред хԝә һьлдан, ле рʼун хԝәрʼа һьлнәдан, ле сәрԝахта тʼәви чʼьра рʼун жи дәрданада хԝәрʼа һьлдан. Гава зәʼва дәрәнги кʼәт, һʼәму жи һеньжин у хәԝрʼа чун. Ниве шәве дәнгәк һат: ‹Ва йә зәʼва те! Пешийа ԝида һәрʼьн!› Һьнге һʼәму бькʼьр рʼабун чʼьред хԝә саз кьрьн. Бефәʼма готә сәрԝахта: ‹Жь ԝи рʼуне хԝә бьдьнә мә жи, чьмки чʼьред мә ведьсьн›. Ле сәрԝахта щаба ԝан да у готьн: ‹На хер, әв рʼун ԝе тʼера мә у ԝә нәкә. Ԛәнщ ә кӧ һун һәрʼьнә щәм йед кӧ дьфьрошьн хԝәрʼа бькʼьрʼьн›. Гава әԝ чун бькʼьрʼьн, зәʼва һат у әԝед һазьр тʼәв ԝи кʼәтьнә дәʼԝате у дәри һатә гьртьне. Паше бькʼьред дьн һатьн у готьн: ‹Әм хӧлам, Әм хӧлам! Дәри ль мә вәкә!› Ле әԝи щаба ԝан да гот: ‹Әз рʼаст ԝәрʼа дьбежьм, әз ԝә нас накьм›. Аԝа һʼьшйар бьминьн, чьмки һун нә рʼожа һатьна Кӧрʼе Мерьв заньн, нә жи сьһʼәте. Ԝи чахи Пʼадшатийа Әʼзмана ԝе мина ве йәке бә: Мәрьвәк кӧ ԝе дәркʼәта рʼеԝитийе, гази хӧламед хԝә кьр у һәбука хԝә спартә ԝан. Пенщ тәлант данә йәки, дӧ тәлант данә йәки у тәлантәк жи да йәки, һәр кәсирʼа ԝәкә ԛәԝата ԝи у рʼекʼәт чу. Әԝе кӧ пенщ тәлант стандьбун, перʼа-перʼа чу бь ԝан кʼьрʼи у фьрот, пенщед дьн жи ԛазьнщ кьрьн. Ӧса жи әԝе кӧ дӧ тәлант стандьбун, дӧдӧйед дьн жи ԛазьнщ кьрьн. Ле әԝе кӧ тәлантәк стандьбу, чу әʼрд кʼола у зиве ахайе хԝә теда вәшарт. Пәй гәләк ԝәхтрʼа ахайе ԝан хӧлама һат у хԝәст һәԛ-һʼәсабе хԝә тʼәви ԝан рʼаст кә. Әԝе кӧ пенщ тәлант стандьбун пешда һат, пенщ тәлантед майин жи анин у гот: ‹Ахайе мьн, тә пенщ тәлант дабунә мьн. Ва мьн сәр ԝанда пенщед дьн жи ԛазьнщ кьрьнә›. Ахайе ԝи готеда: ‹Әʼфәрьм, хӧламе ԛәнщ у амьн! Тӧ нав тьштед һьндькида амьн майи, әзе тә дайньмә сәр гәләк тьшта. Бькʼәвә шайийа ахайе хԝә!› Әԝе кӧ дӧ тәлант стандьбун жи һат у гот: ‹Әз хӧлам! Тә дӧ тәлант дабунә мьн. Ва мьн дӧдӧйед дьн жи ль сәр ԝанда ԛазьнщ кьрьнә›. Ахайе ԝи готе: ‹Әʼфәрьм, хӧламе ԛәнщ у амьн! Тӧ нав тьштед һьндькида амьн майи, әзе тә дайньмә сәр гәләк тьшта. Бькʼәвә шайийа ахайе хԝә!› Ле әԝе кӧ тәлантәк стандьбу һат у гот: ‹Ахайе мьн, мьн заньбу кӧ тӧ мәрьвәки һʼьшк и. Жь ԝи щийе тә нәчандийә дьдьруйи у щийе кӧ тә нә рʼәшандийә бәрәв дьки. Әз жи тьрсийам у чум тәланте тә әʼрдеда вәшарт. Һане мале тә тәрʼа бә›. Ахайе ԝи ле вәгәрʼанд у готе: ‹Хӧламе хьраб у хԝәрʼанәдити! Тә заньбу әз жь ԝи щийе кӧ мьн нәчандийә дьдьрум у жь ԝи щийе кӧ мьн нәрʼәшандийә бәрәв дькьм, тә чьма зиве мьн нәда кʼаркьра у әз бьһатама мьн мале хԝә бь сәләф бьстанда? Ньһа тәлант жь ԝи бьстиньн у бьдьнә әԝе кӧ дәһә тәлантед ԝи һәнә. Чьмки йе кʼе кӧ һәйә, ԝирʼа ԝе бе дайине у сәрда зедә бә, ле йе кʼе кӧ тʼӧнә, чь һәйә жи ԝе же бе стандьне. Ле әԝ хӧламе бекер бавежьнә тәʼрийа дәрва. Ль ԝьр ԝе бьбә гьри у чʼьркә-чʼьрка дьрана›. Гава Кӧрʼе Мерьв тʼәви һʼәму мьлйакʼәта у рʼумәта Хԝәва бе, һьнге ԝе сәр тʼәхте Хԝәйи рʼумәте рʼуне һʼәму мьләт ԝе ль бәр Ԝи бьщьвьн. Әԝе ԝана жь һәв башԛә кә, чаԝа шьван пез жь бьзьна вәдьԛәтинә. Әԝе пез ль мьле Хԝәйи рʼасте бьдә сәкьнандьне, ле бьзьна ль мьле Хԝәйи чʼәпе. Һьнге Пʼадша ԝе йед ль мьле Хԝәйи рʼастерʼа бежә: ‹Ԝәрьн бьмбарәкбуйийед алийе Баве Мьнда! Әԝ Пʼадшатийа кӧ бона ԝә жь ԝәхте әʼфьрандьна дьнйайеда һазьр буйә ԝар бьн. Чьмки Әз бьрʼчи бум ԝә хԝарьн да Мьн, Әз тʼи бум ԝә ав да Мьн, Әз хәриб бум ԝә Әз ԛәбул кьрьм, Әз тәʼзи бум ԝә Әз кʼьнщ кьрьм, Әз нәхԝәш бум һун сәр Мьнда һатьн, Әз кәледа бум һун һатьнә щәм Мьн›. Һьнге йед рʼаст ԝе Ԝирʼа бежьн: ‹Хӧдан, мә кʼәнге Тӧ бьрʼчи дити у хԝарьн дайә Тә? Йан мә Тӧ тʼи дити у ав дайә Тә? Мә кʼәнге Тӧ хәриб дити у Тӧ ԛәбул кьри, йан жи Тӧ тәʼзи дити у Тӧ кʼьнщ кьри? Кʼәнге мә Тӧ нәхԝәш йан кәледа дити у әм һатьнә щәм Тә?› Пʼадшайе жи ԝанрʼа бежә: ‹Әз рʼаст ԝәрʼа дьбежьм, һәгәр ԝә ԛәнщи жь ван хушк-бьред Мьнә йе һәри бьчʼук йәкирʼа кьр, ԝә Мьнрʼа кьр›. Һьнге Әԝе йед мьле Хԝәйи чʼәперʼа бежә: ‹Ньфьрʼлебуйино! Дури Мьн һәрʼьн нава агьре һʼәта-һʼәтайе, кӧ бона мирещьн у мьлйакʼәтед ԝи һазьр буйә. Чьмки Әз бьрʼчи бум ԝә хԝарьн нәда Мьн, Әз тʼи бум ԝә ав нәда Мьн, Әз хәриб бум ԝә Әз ԛәбул нәкьрьм, Әз тәʼзи бум ԝә Әз кʼьнщ нәкьрьм, Әз нәхԝәш у кәледа бум һун сәр Мьнда нәһатьн›. Һьнге әԝе Ԝирʼа бежьн: ‹Хӧдан! Мә кʼәнге Тӧ бьрʼчи йан тʼи, йан хәриб, йан бе сьтʼар, йан нәхԝәш, йан кәледа дити у мә аликʼари нәда Тә?› Ԝи чахи Әԝе щаба ԝан бьдә у бежә: ‹Әз рʼаст ԝәрʼа дьбежьм, һәгәр ԝә ԛәнщи жь әвед һәри бьчʼук йәкирʼа нәкьр, ԝә Мьнрʼа жи нәкьр›. У әве һәрʼьнә щәфе һʼәта-һʼәтайе, ле йед рʼаст ԝе һәрʼьнә жийина һʼәта-һʼәтайе». Гава Иса әв һʼәму хәбәр хьлаз кьрьн, шагьртед Хԝәрʼа гот: «Һун заньн кӧ ԝе дӧ рʼожа шунда Щәжьна Дәрбазбуне бә. У Кӧрʼе Мерьв ԝе бе дайине кӧ бе хачкьрьне». Һьнге сәрәкед кʼаһина у рʼуспийед щьмәʼте сәрайа сәрәккʼаһинда кӧ наве ԝи Ԛәйафа бу щьвийан у ль һәв шеԝьрин кӧ Иса дьзива бь фелбазийе бьгьрьн, бькӧжьн. Ле ԝана дьгот: «Бьра әв йәк щәжьнеда нибә, ԝәки щьмәʼт рʼанәбә сәр ньга». Чахе Иса ль Бәйтанйайе мала Шьмһʼуне кʼотида бу, кʼӧлфәтәкә кӧ дәрданәкә ԝейә алабастьрейи рʼуне бинхԝәш һәбу, һатә щәм Ԝи у чахе Әԝ ль сәр сьфре рʼуньшти бу, әԝе әԝ рʼун рʼетә сәр сәре Ԝи. Гава шагьрта әв йәк дит, ль ԝан хԝәш нәһат у готьне: «Чьма әва зийана бу? Әва рʼуна ԝе ԛимәтәки бьһа бьһата фьротане у фәԛирарʼа бьһата бәлакьрьне». Ле әԝ йәк Исава әʼйан бу у ԝанарʼа гот: «Чьма һун хатьре ԝе кʼӧлфәте дькʼәвьн? Әԝе тьштәки ԛәнщ бона Мьн кьр. Фәԛире һәр гав тʼәви ԝә бьн, ле Әзе һәр гав тʼәви ԝә нибьм. Әԝе бона дәфьнкьрьна Мьн әԝ рʼун рʼетә сәр бәдәна Мьн. Әз рʼаст ԝәрʼа дьбежьм, дьнйайеда кʼидәре әва Мьзгинийа бе даннасинкьрьне, ԝе кьрьна ве кʼӧлфәте жи бона биранина ԝе бе готьне». Һьнге йәк жь һәр донздәһа кӧ Щьһудайе Исхәрйоти дьһатә готьне, чу щәм сәрәкед кʼаһина у гот: «Һуне чь бьдьнә мьн, ԝәки әз Ԝи бьдьмә дәсте ԝә?» У ԝана си зив жьмьрин дане. Жь ԝьр шунда әԝ мәщаләке дьгәрʼийа кӧ чаԝа Иса бьдә дәсте ԝан. Ль рʼожа пешьнә Щәжьна Нане Шкәва, шагьрт һатьнә щәм Иса у жерʼа готьн: «Тӧ ль кʼӧ дьхԝази Шива Щәжьна Дәрбазбуне бьхԝи, ԝәки әм Тәрʼа һазьр кьн?» Әԝи жи гот: «Һәрʼьнә бажер, щәм фьлан мәрьви у бежьнә ԝи: ‹Дәрсдар дьбежә: Рʼожа Мьн незик ә. Әзе тʼәви шагьртед Хԝә мала тәда Щәжьна Дәрбазбуне дәрбаз кьм›». У шагьрта ӧса кьр, чаԝа кӧ Иса ԝанарʼа әʼмьр кьрьбу у шива Щәжьна Дәрбазбуне һазьр кьрьн. Еваре тʼәв һәр донздәһа сәр сьфре рʼуньшт. Гава ԝана һе дьхԝар, Иса гот: «Әз рʼаст ԝәрʼа дьбежьм, йәки жь ԝә ԝе нәмамийа Мьн бькә». Шагьрт гәләки бәр хԝә кʼәтьн у һәр йәки жь ԝан готә Ԝи: «Хӧдан, дьбә кӧ әз ьм?» Әԝи ль ԝан вәгәрʼанд у гот: «Әԝе кӧ пәʼрийе Хԝә тʼәви Мьн тʼаседа кьр, әԝе нәмамийа Мьн бькә. Рʼаст Кӧрʼе Мерьв ԝе ӧса һәрʼә чаԝа кӧ бона Ԝи һатийә ньвисаре, ле ԝәй ль ԝи мәрьве кӧ нәмамийа Кӧрʼе Мерьв бькә! Ԝирʼа һе ԛәнщ бу кӧ әԝ ԛәт дьне нәкʼәта». Щьһудайе кӧ ԝе нәмамийа Ԝи бькьра, ле вәгәрʼанд у готе: «Дәрсдар, дьбә кӧ әз ьм?» Иса ԝирʼа гот: «Тә бь дәве хԝә гот». Аԝа гава ԝана һе нан дьхԝар, Иса нан һьлда шькьри да, кәркьр да шагьрта у гот: «Һан һьлдьн бьхԝьн. Әва бәдәна Мьн ә». Пәйрʼа кʼас һьлда шькьри да, да ԝан у ԝанарʼа гот: «Һун һʼәму жи жь ве вәхԝьн, әва хуна Мьн ә бона пәймане, кӧ бона бахшандьна гӧнед гәләка те рʼетьне. Ле Әз ԝәрʼа дьбежьм, иди Әз жь вьр шунда тʼӧ щар жь ве мәйа тьрийе вәнахԝьм, һʼәта ԝе рʼожа кӧ Әзе тʼәви ԝә Пʼадшатийа Баве Хԝәда жь йа ну вәхԝьм». Паше ԝана зәбурәк стьра, дәркʼәтьн чунә чʼийайе Зәйтʼуне. Һьнге Иса ԝанарʼа гот: «Ишәв һун һʼәмуйе жи жь Мьн пʼьшк бьн һәрʼьн, чьмки ньвисар ә: ‹Әзе ль шьвен хьм у пәзе жи бәла-бәлайи бә›. Ле гава кӧ Әз жь мьрьне рʼабьм, Әзе бәри ԝә һәрʼьмә Щәлиле». Пәтрус ле вәгәрʼанд у готе: «Һәгәр һʼәму жи жь Тә пʼьшк бьн һәрʼьн, ле әз тʼӧ щар жь Тә начьм». Иса ԝирʼа гот: «Әз рʼаст тәрʼа дьбежьм, һәма ишәв һе бәри бангдана дик, те се щара Мьн инкʼар ки». Пәтрус Ԝирʼа гот: «Һәгәр щи бе, әзе тʼәви Тә бьмьрьм жи, ле тʼӧ щар Тә инкʼар накьм». Һʼәму шагьрта жи ӧса гот. Һьнге Иса тʼәви ԝан чу ԝи щийе кӧ жерʼа Гетшәмани дьбежьн у шагьртарʼа гот: «Вьра рʼунен, һʼәта Әз һәрʼьм дәра һан дӧа бькьм». Әԝи тʼәви Хԝә Пәтрус у һәр дӧ кӧрʼед Зәбәди һьлдан, кʼәсәр һате у бәр Хԝә кʼәт. Һьнге Иса ԝанарʼа гот: «Дьле Мьн һаԛас дәрд у кʼәдәр ә, мина бәр мьрьне. Вьра бьминьн у тʼәви Мьн һʼьшйар бьн». Һьнәки пешда чу Хԝә дәвәрʼуйа авит дӧа кьр у гот: «Баве Мьн! Һәгәр дьбә, бьра әв кʼаса щәфе сәр Мьнрʼа дәрбаз бә. Ле нә кӧ чаԝа Әз дьхԝазьм, ле бьра хԝәстьна Тә бә». Паше һатә щәм шагьрта, әԝ рʼазайи дитьн у готә Пәтрус: «Ԝә нькарьбу кӧ сьһʼәтәке һун тʼәви Мьн һʼьшйар бьмана? Һʼьшйар бьминьн у дӧа бькьн, ԝәки һун нәкʼәвьнә нава щерʼьбандьне. Бәле рʼӧһʼ рʼази йә, ле бәдән сьст ә». Щарәкә дьн жи Иса чу дӧа кьр у гот: «Баве Мьн! Һәгәр набә кӧ әв кʼаса щәфе жь Мьн дәрбаз бә һʼәта кӧ Әз ԝе вәнәхԝьм, бьра хԝәстьна Тә бә». Иса һат, әԝ диса хәԝеда дитьн, чʼәʼвед ԝан жь хәԝе вәнәдьбун. У әԝ һьштьн чу, щара сьсийа дӧа кьр, диса әԝ хәбәр готьн. Һьнге һатә щәм шагьрта у ԝанарʼа гот: «Һун һәла һе рʼазайи нә у рʼьһʼәт дьбьн? Ва ԝәхт перʼа гьһишт кӧ Кӧрʼе Мерьв бькʼәвә дәсте гӧнәкʼара. Рʼабьн әм һәрʼьн. Ва йә әԝе кӧ нәмамийа Мьн дькә незик бу». Әԝи һе хәбәр дьда, ньшкева Щьһудайе кӧ йәк жь ԝан донздәһа бу һат. Әԝи тʼәви хԝә жь алийе сәрәкед кʼаһина у рʼуспийед щьмәʼтеда әʼлаләтәкә гьран анибу, бь дара у шура. Аԝа нәмаме Ԝи әʼшәрәт дабу ԝан у готьбу: «Әз кʼижани кӧ рʼамусьм, Әԝ ә, Ԝи бьгьрьн». Һьнге Щьһуда незики Иса бу у готе: «Сьлав ль Тә, дәрсдар!» у рʼамуса. Иса ԝирʼа гот: «Һәвал, те чь бьки зу бькә!» Ԝе гаве әԝ пешда һатьн, дәст авитьнә Иса у Әԝ гьртьн. Ньшкева йәки жь әԝед кӧ тʼәви Иса бу, рʼабу шуре хԝә кʼьшанд ль хӧламе сәрәккʼаһин хьст у гӧһе ԝи пәканд. Ԝе гаве Иса ԝирʼа гот: «Шуре хԝә бькә щи. Кʼи кӧ шур һьлтинә, әԝе бь шур һәрʼә. Тә тʼьре Әз нькарьм жь Баве Хԝә бьхԝазьм ԝәки перʼа-перʼа донздәһ ордийа зедәтьр мьлйакʼәт бьгьһинә Мьн? Ле ньвисар ԝе чаԝа бенә сери кӧ дьбежьн, гәрәке һʼәму аһа бьн?» Ԝе гаве Иса әʼлаләтерʼа гот: «Те бежи ԝә сәр ԛачахәкида гьртийә, кӧ һун бь дара у шура һатьнә Мьн бьгьрьн? Нә Әз һәр рʼож тʼәви ԝә пʼарьстгәһеда рʼудьньштьм Мьн һун һин дькьрьн, ле ԝә Әз нәдьгьртьм. Ле әв һʼәму тьшт ԛәԝьмин, кӧ ньвисаред пʼехәмбәра бенә сери». Ԝе дәме һʼәму шагьрта Әԝ һьштьн у рʼәвин. Йед кӧ Иса гьртьн, Әԝ бьрьнә щәм Ԛәйафайе сәрәккʼаһин, ль ԝи щийе кӧ ԛанунзан у рʼуспи щьвийабун. Пәтрус жи дурва һʼәта һʼәԝша сәрәккʼаһин пʼе-пʼе пәй Ԝи чу кʼәтә һьндӧрʼ у ль нав нобәдара рʼуньшт, кӧ бьзаньбә ахьри ԝе чаԝа бә. Сәрәкед кʼаһина у тʼәмамийа щьвина гьрәгьра жи мьԛабьли Иса шәʼдәтикә дәрәԝ дьгәрʼийан кӧ Ԝи бькӧжьн, ле нәдитьн. Гәләк шәʼдед дәрәԝ жи һатьн, диса нәдитьн. Паше дӧ шәʼдед дәрәԝ пешда һатьн у готьн: «Әви гот: ‹Әз дькарьм пʼарьстгәһа Хԝәде һьлшиньм у нава се рʼожада диса ԝе чекьм›». Сәрәккʼаһин рʼабу сәр пʼийа у Ԝирʼа гот: «Бона ван шәʼдәтийа кӧ әвана мьԛабьли Тә дьдьн Тӧ чьма щабәке нади?» Ле Иса дәнге Хԝә нәкьр. Сәрәккʼаһин диса Ԝирʼа гот: «Әз Тә бь Хԝәдейе сах дьдьмә сонде. Мәрʼа бежә, Тӧ йи Мәсиһ, Кӧрʼе Хԝәде?» Иса готә ԝи: «Тә бь дәве хԝә гот. Ле Әз ԝәрʼа дьбежьм, жь вьр шунда һуне Кӧрʼе Мерьв ль кʼеләка Йе Һәри Зор, ль мьле Ԝийи рʼасте рʼуньшти у ль сәр әʼԝред әʼзмен те бьбиньн». Һьнге сәрәккʼаһин кʼьнщед хԝә ԛәлаштьн у гот: «Әва Хԝәде беһӧрмәт дькә! Иди шәʼдә чи мәрʼа нә? Ва ԝә бьһист Әԝи чаԝа Хԝәде беһӧрмәт кьр! Ԝәва чаԝа хӧйа дькә?» Ԝана жи ле вәгәрʼанд у готьн: «Ԝирʼа кӧштьн дькʼәвә». Ԝе гаве тʼуйи рʼуйе Ԝи кьрьн, бь кʼӧлма лехьстьн, һьнәка жи шәмаԛ ле дьдан у дьготьне: «Мәсиһ, пʼехәмбәртийе мәрʼа бькә, кʼа кʼи бу кӧ Тә хьст?» Ԝи чахи Пәтрус дәрва ль һʼәԝшеда рʼуньштьбу. Щарик һатә щәм ԝи у готе: «Тӧ жи тʼәви Исайе Щәлиле буйи». Ле әԝи ль бәр һʼәмуйа инкʼар кьр у гот: «Әз ньзаньм тӧ чь дьбежи». Чахе әԝ чу бәр дәргәһ, йәкә дьн әԝ дит у готә әԝед кӧ ль ԝьр бун: «Әве һан жи тʼәви Исайе Ньсрәте бу». Әԝи диса бь сонд инкʼар кьр гот: «Әз ԝи мәрьви нас накьм». Хеләке шунда әԝед кӧ ль ԝьр бун чунә щәм Пәтрус у готьне: «Һәбә-тʼӧнәбә тӧ жи жь ԝан и, чьмки хәбәрдана тә тә дьфьрошә». Һьнге әԝи ньфьрʼ хԝә кьр, сонд хԝар у гот: «Әз ԝи мәрьви нас накьм». Ԝе гаве дик банг да у Пәтрус әԝ готьна Иса ани бира хԝә кӧ ԝирʼа готьбу: «Бәри бангдана дик, те се щара Мьн инкʼар ки». Дәркʼәтә дәрва у кʼәлә-кʼәл гьрийа. Гава сьбәһ сафи бу, тʼәмамийа сәрәкед кʼаһина у рʼуспийед щьмәʼте ль һәв шеԝьрин кӧ Иса чаԝа бьдьнә кӧштьне. Әԝ гьредан, бьрьн данә дәсте Пилатойе ԝәли. Һьнге Щьһудайе кӧ нәмамийа Ԝи кьр, дит кӧ Иса һатә нәһәԛкьрьне, пʼошман бу, әԝ си зив вәгәрʼандә сәрәкед кʼаһина у рʼуспийа у гот: «Мьн гӧнә кьр. Әз бумә сәбәбе хуна бесущ». Ԝана жи готә ԝи: «Чи мәрʼа нә? Тӧ зани». Әԝи жи әԝ зив авитьнә нав пʼарьстгәһе, дәркʼәт чу хԝә хәньԛанд. Сәрәкед кʼаһина зив һьлдан у готьн: «Нә рʼаст ә кӧ әм ван бькьнә нав хьзна пʼарьстгәһе, чьмки әԝ һәԛе хуне йә». Һьнге әԝ ль һәв шеԝьрин у бь ԝан зива Әʼрде Ахинкәр кʼьрʼин, бона тʼьрбед хәриба. Ләма әԝ әʼрд һʼәта иро жи «Әʼрде Хуне» те готьне. Һьнге әԝ готьна бь заре Йерәмийа пʼехәмбәр һатә сери: «Си зив ԛимәт дан, ԝәкә ԝи ԛимәте кӧ һьнәкә жь зарʼед Исраеле ԛайл бун у әԝ данә Әʼрде Ахинкәр, чаԝа кӧ Хӧдан мьнрʼа әʼмьр кьр». Иса бәр ԝәли сәкьни, ԝәли жь Ԝи пьрси у гот: «Тӧ йи пʼадше щьһуйа?» Иса ԝирʼа гот: «Тә бь дәве хԝә гот». Ле чахе сәрәкед кʼаһина у рʼуспийа давитьнә Ԝи, Әԝи ԛәт щаба кәсәки нәда. Һьнге Пилато Ԝирʼа гот: «Тӧ набьһейи чьԛас шькийате Тә дькьн?» Әԝи диса щаба кәсәки нәда, һʼәта ԝәли жи шаш ма. Әʼдәте ԝәли бу кӧ ль щәжьнеда бь хԝәстьна әʼлаләте гьртик ԝанрʼа бәрʼда. Һьнге гьртики ԝани кʼьфш һәбу, кӧ наве ԝи Барабас бу. Гава кӧ әԝана щьвийан, Пилато ԝанарʼа гот: «Һун кʼижани дьхԝазьн кӧ әз бона ԝә бәрʼдьм, Барабас йан Исайе кӧ Мәсиһ те готьне?» Әԝи заньбу кӧ жь дәст һʼәвсудийе Иса дабунә дәсте ԝи. Гава әԝ ль һәрәма диԝане рʼуньштьбу, кʼӧлфәта ԝи щаб шанд у гот: «Кʼаре тә әԝи Бесущ нәкʼәтийә, чьмки ве шәва дәрбазбуйи хәԝнеда бона Ԝи гәләк тьшт сәр мьнрʼа дәрбаз бун». Ле сәрәкед кʼаһина у рʼуспийа әʼлаләт рʼази кьр, кӧ Барабас бьхԝазьн у Иса ӧнда кьн. Ԝәли диса ԝанарʼа гот: «Һун жь ван һәр дӧйа кʼижани дьхԝазьн кӧ әз ԝәрʼа бәрʼдьм?» Ԝана жи гот: «Барабас!» Пилато ԝанарʼа гот: «Ле әз Исайе кӧ Мәсиһ жерʼа дьбежьн чаԝа бькьм?» Һʼәмуйа жи гот: «Бьра бе хачкьрьне!» Ԝәли гот: «Ле Әви чь хьраби кьрийә?» Һьнге ԝана һе кьрә ԛирʼин у готьн: «Бьра бе хачкьрьне!» Пилато жи дит, ԝәки тьштәк кʼаре надә, ле һе шәрʼ у дәʼԝ дәстпедьбә, ав һьлда ль бәр әʼлаләте дәстед хԝә шуштьн у гот: «Әз жь хуна Ви бесущ ьм. Һун хԝәха бьньһерʼьн». У тʼәмамийа щьмәʼте щаба ԝи да у гот: «Бьра хуна Ԝи ль сәр мә у ль сәр зарʼед мә бә!» Һьнге Пилато Барабас ԝанарʼа бәрʼда, ле Иса да бәр ԛамчийа у да дәсте ԝан кӧ бе хачкьрьне. Һьнге әскәред ԝәли Иса бьрьнә һьндӧрʼе ԛәсьре у тʼәмамийа рʼәфа әскәра сәр Ԝи щьвийа. Кʼьнще Ԝи же ехьстьн у чӧхәки соре гәвәз ле кьрьн. Паше тʼащәк жь стьрийа вәгьртьн данә сәре Ԝи у ԛамишәк жи данә дәсте Ԝийи рʼасте. Һьнге бәр Ԝи чок дан, ԛәрфе хԝә пе кьрьн у готьн: «Хԝәш бә, Пʼадше Щьһуда!» Тʼуйи Ԝи кьрьн, ԛамиш һьлдан сәре Ԝи хьстьн. Пәй ԛәрфкьрьнерʼа чӧхе сор жь Ԝи ехьстьн у кʼьнще Ԝи лекьрьн у данә пешийа хԝә бьрьн кӧ Ԝи хач кьн. Чахе әԝ дәркʼәтьнә дәрва, әскәра йәки курени дит кӧ наве ԝи Шьмһʼун бу, пʼейи сәр ԝи кьрьн кӧ хаче Ԝи һьлдә. Әԝана гьһиштьнә ԝи щийе кӧ жерʼа Голгота дьготьн, кӧ те фәʼмкьрьне: «Щийе Ԛафа». Шәрава зьрав тʼәвкьри дане кӧ вәхԝә. Ле чахе Әԝи тәʼм кьр, нәхԝәст вәхԝә. Әԝ хач кьрьн, сәр кʼьнще Ԝи пʼәшк авитьн у ль нав хԝәда бәла кьрьн. Паше ԝе дәре рʼуньштьн у нобәдари ль Ԝи кьрьн. Нәһәԛийа Ԝи ньвисин данин феза сәре Ԝи: «ӘВ ИСА, ПʼАДШЕ ЩЬҺУЙА ЙӘ». Һьнге дӧ ԛачах жи тʼәви Ԝи һатьнә хачкьрьне, йәк мьле рʼасте у йе дьн мьле чʼәпе. Әԝед кӧ ԝьррʼа дьчун-дьһатьн Әԝ беһӧрмәт дькьрьн, сәре хԝә дьһʼәжандьн у дьготьне: «Нә Тәйе пʼарьстгәһ һьлшанда у се рʼожада чекьра? Дә Хԝә хьлаз кә, һәгәр Тӧ Кӧрʼе Хԝәде йи! Жь хач ԝәрә хԝаре!» Ӧса жи сәрәкед кʼаһина, ԛанунзана у рʼуспийа тʼәвайи ԛәрфе хԝә Ԝи дькьрьн у дьготьн: «Хәлԛ хьлаз кьр, ле Хԝә нькарә хьлаз кә! Әв нинә Пʼадше Исраеле? Дә бьра ньһа жь хач бе хԝаре у әме баԝәрийа хԝә Ԝи биньн. Гӧмана Хԝә дани сәр Хԝәде, дә бьра ньһа Ԝи хьлаз кә, һәгәр Хԝәде жь Ԝи рʼази йә, чьмки гот: ‹Әз Кӧрʼе Хԝәде мә›». Ԛачахед кӧ тʼәви Ԝи һатьнә хачкьрьне, ԝана жи ӧса тәʼн ль Ԝи дьхьстьн. Нивро жь сьһʼәта донздәһа һʼәта сьһʼәта сьсийа тʼәмамийа әʼрде бу тәʼри. Незики сьһʼәта сьсийа Иса бь дәнгәки бьльнд кьрә ԛирʼин у гот: «Ели, Ели, лама сабахтани?» кӧ те фәʼмкьрьне: «Хԝәдейе Мьн, Хԝәдейе Мьн, Тә чьма Әз һьштьм?» Әԝе кӧ незик сәкьнибун, гава әв хәбәр бьһистьн, готьн: «Әԝ гази Елйас дькә». Йәк жь ԝан бь ләз бәзи, луфька бәʼре һьлда сьркеда кьр, ль сәр ԛамишәкива дани у да Ԝи кӧ вәхԝә. Ле һьнәкед дьн готьн: «Бьсәкьнә. Әм бьбиньн, кʼа Елйасе бе Ԝи хьлаз кә?» Иса диса бь дәнгәки бьльнд кьрә гази у рʼӧһʼе Хԝә да. Һәма һьнге пʼәрʼда пʼарьстгәһе жь сери һʼәта бьни ԛәльши, бу дӧ тиша. Әʼрд һʼәжийа, кәвьр ԛәльшин, тʼьрб вәбун у гәләк мьрийед бӧһӧрти рʼабун. Әԝ жь тʼьрба дәркʼәтьн пәй рʼабуна Исарʼа, чунә Бажаре Пироз у гәләка әԝ дитьн. Чахе сәрсәд у әԝед кӧ тʼәви ԝи нобәдарийа Иса дькьрьн, әʼрдһʼәж у әԝ һʼәму тьште ԛәԝьми дитьн, рʼьсасе әԝ гьртьн у готьн: «Рʼасти жи Әва Кӧрʼе Хԝәде бу!» Ль ԝе дәре гәләк кʼӧлфәт жи һәбун, кӧ дурва дьньһерʼин. Әԝ жь Щәлиле ль пәй Иса һатьбун, бәрдәсти Ԝирʼа кьрьбун. Мәрйәма Мәждәлани, Мәрйәма дийа Аԛуб у Усьв у дийа һәр дӧ кӧрʼед Зәбәди ль нав ԝанда бун. Бәре еваре мәрьвәки дәԝләти жь Аримәтйайе һат, кӧ наве ԝи Усьв бу. Әԝ жи йәк жь шагьртед Иса бу. Әԝ чу щәм Пилато у щьнйазе Иса жь ԝи хԝәст. Ԝе гаве Пилато әʼмьр кьр кӧ щьнйаз бе дайине. Усьв щьнйаз һьлда, ԛәдәке кʼьтанийи паԛьжда кʼәфән кьр у дани нав тʼьрба хԝәйә ну кӧ ԛәйеда кʼолабу. Паше әԝи кәвьрәки мәзьн һоли бәр дәре тʼьрбе кьр у чу. Мәрйәма Мәждәлани у Мәрйәма дьн ль ԝе дәре бун у пешбәри тʼьрбе рʼуньштьбун. Рʼожа дьн кӧ пәй рʼожа тʼьвдарәккьрьне бу, сәрәкед кʼаһина у ферьсийа ль щәм Пилато щьвийан у готьн: «Әм хӧлам, те бира мә, кӧ әԝи дәрәԝин сахтийа Хԝәда готьбу: ‹Әзе рʼожа сьсийа жь мьрьне рʼабьм›. Ньһа әʼмьр кә кӧ һʼәта рʼожа сьсийа мьԛати тʼьрбе бьн, нәбә кӧ шагьртед Ԝи бен Ԝи бьдьзьн у щьмәʼтерʼа бежьн: ‹Әԝ жь мьрьне рʼабуйә›. Иди хальфандьна пашийе жь йа пешийе хьрабтьр бә». Пилато ԝанрʼа гот: «Ва нә ԝәрʼа әскәред нобәдар. Һәрʼьн чаԝа кӧ һун заньн ӧса жи мьԛати тʼьрбе бьн». Әԝ жи чун мьԛати тʼьрбе бун, кәвьр мор кьрьн у әскәред нобәдар ль бәр данин. Пәй шәмийерʼа, рʼожа йәкшәме сәре сьбәһе зу Мәрйәма Мәждәлани у Мәрйәма дьн һатьн кӧ тʼьрбе бьбиньн. Ньшкева әʼрд ԛайим һʼәжийа, чьмки мьлйакʼәтәки Хӧдан жь әʼзмен һатә хԝаре, кәвьр жь бәр тʼьрбе ԝеда кьр у сәр рʼуньшт. Диндара ԝи мина бьруске бу у кʼьнще ԝи мина бәрфе сьпи бун. Нобәдар жь тьрса ԝи тʼәвиһәв бун у бунә мина мьрийа. Мьлйакʼәт ԝан кʼӧлфәтарʼа гот: «Нәтьрсьн! Әз заньм һун ль Ԝи Исайи дьгәрʼьн, Йе кӧ һатә хачкьрьне. Әԝ нә ль вьр ә, чьмки Әԝ жь мьрьне рʼабуйә, чаԝа кӧ Әԝи готьбу. Ԝәрьн ԝи щийе кӧ Әԝ пʼалдайи бу бьбиньн. Зу һәрʼьн бежьнә шагьртед Ԝи: ‹Әԝ жь мьрьне рʼабуйә у Әԝе бәри ԝә һәрʼә Щәлиле. Ль ԝьр һуне Ԝи бьбиньн›. Ва йә мьн ԝәрʼа гот». Әԝ бь хоф у әшԛәкә мәзьн ләз жь тʼьрбе дәркʼәтьн у ләзандьн кӧ шагьртарʼа бежьн. Ньшкева Иса рʼасти ԝан һат у гот: «Сьлав ль ԝә!» Әԝана незики Ԝи бун, хԝә авитьнә ньгед Ԝи гьртьн у сәре хԝә бәр данин. Һьнге Иса ԝанарʼа гот: «Нәтьрсьн! Һәрʼьн бежьнә бьред Мьн, кӧ әԝ һәрʼьнә Щәлиле у ль ԝьр ԝе Мьн бьбиньн». Чахе кӧ кʼӧлфәт чун, һьнәк жь нобәдара һатьнә бажер у тьштед кӧ ԛәԝьмибун сәрәкед кʼаһинарʼа готьн. Сәрәкед кʼаһина тʼәви рʼуспийа щьвийан у шеԝьрин. Паше ԝана гәләк пʼәрә данә нобәдара у готьн: «Бежьн: ‹Чахе әм хәԝеда бун, шагьртед Ԝи һатьн Әԝ дьзин›. У һәгәр әв тьшт бьгьһижә гӧһе ԝәли, әме ԝи рʼази кьн у ԝә бехәм кьн». Ԝана жи пʼәрә һьлдан у ӧса кьрьн, чаԝа кӧ һатьбунә һинкьрьне. У әв готьн ль нав щьһуйада һʼәта рʼожа иро бәла буйә. Һәр йанздәһ шагьрт жи чунә Щәлиле ԝи чʼийайе кӧ Иса ԝанрʼа готьбу. Гава кӧ дитьн, сәре хԝә бәр Ԝи данин, ле һьнәк жи дӧдьли бун. Иса незики ԝан бу, ԝанрʼа хәбәр да у гот: «Һʼәму һʼӧкӧме әʼрд у әʼзмен Мьнрʼа һатә дайине. Ньһа һәрʼьн һʼәму мьләта һин кьн у ԝана бь наве Бав, Кӧрʼ у Рʼӧһʼе Пироз бьньхӧминьн у ԝан һʼәму тʼәмийед кӧ Мьн данә ԝә мьләта һин кьн, ԝәки әԝ хԝәй кьн. Әз ва ирода һәр тʼьм һʼәта ахьрийа дьнйайе тʼәви ԝә мә!» Мьзгинийа Иса Мәсиһе Кӧрʼе Хԝәде бь ви тьһәри дәстпебу: Чаԝа кӧ кʼьтеба Ишайа Пʼехәмбәрда һатийә ньвисаре: «Ва йә Әзе ԛасьде Хԝә пешийа Тәва бьшиньм. Әԝе бона Тә рʼе һазьр кә». «Дәнгәк бәрʼийеда дькә гази: ‹Рʼийа Хӧдан һазьр бькьн у шьвәрʼийед Ԝи рʼаст бькьн› ». Аԝа Йуһʼәнна бәрʼийеда хӧйа бу, щьмәʼт дьньхӧманд у даннасин дькьр, кӧ жь гӧнәкьрьне вәгәрʼьн у бенә ньхӧмандьне, ԝәки гӧнед ԝан бенә бахшандьне. Жь һʼәму ԝәлате Щьһустане у тʼәмамийа щьмәʼта Оршәлиме дьһатә щәм ԝи, гӧнед хԝә дьданә рʼуйе хԝә у чʼәме Урдӧнеда бь дәсте ԝи дьньхӧмин. Йуһʼәнна кʼьнщәкә жь пьрʼчʼа дәве ль хԝә кьрьбу у ль пьшта хԝә жи ԛайишәкә чʼәрм гьредабу. Хԝарьна ԝи кӧли у һьнгьве чоле бу. Әԝи даннасин дькьр у дьгот: «Йәки жь мьн ԛәԝаттьр ԝе бе. Әз нә һежа мә, кӧ та бьм у бәне чарьхе Ԝи жи вәкьм. Мьн һун бь аве ньхӧмандьн, ле Әԝе ԝә бь Рʼӧһʼе Пироз бьньхӧминә». У ԝан рʼожада Иса жь бажаре Ньсрәта Щәлиле һат у бь дәсте Йуһʼәнна чʼәме Урдӧнеда һатә ньхӧмандьне. Һәма чаԝа Иса жь аве дәркʼәт, дит кӧ әʼзман вәбун у Рʼӧһʼ мина кәвоткәке ль сәр Ԝи дани. У дәнгәк жь әʼзмана һат у гот: «Тӧ Кӧрʼе Мьни дәлал и Әз жь Тә рʼази мә». Ԝе гаве Рʼӧһʼ бәре Иса да бәрʼийе. Әԝ чьл рʼожи ль бәрʼийе ма у жь мирещьн һатә щерʼьбандьне. Әԝ тʼәви рʼәʼԝьра бу у мьлйакʼәта жерʼа бәрдәсти кьрьн. Пәй гьртьна Йуһʼәннарʼа Иса чу ԛәза Щәлиле у дәст бь даннасинийа Мьзгинийа Хԝәде кьр у дьгот: «Ԝәхт перʼа гьһиштийә, Пʼадшатийа Хԝәде незик буйә, жь гӧнәкьрьне вәгәрʼьн у баԝәрийа хԝә Мьзгинийе биньн!» Гава Иса ль дәве гола Щәлиле дьгәрʼийа, рʼасти Шьмһʼун у Әндраԝьсе бьре ԝи һат. Ԝана тʼорʼ давитә голе, чьмки мәʼсигьр бун. Иса готә ԝан: «Пәй Мьн ԝәрьн, Әзе ԝә бькьмә нечʼирванед мәрьва». Ԝана жи һәма ԝе дәме тʼорʼед хԝә һьштьн у пәй Ԝи чун. Дәма кӧ Иса жь ԝи щийи һьнәки пешда чу, рʼасти кӧрʼед Зәбәди, Аԛуб у Йуһʼәннайе бьре ԝи һат. Ԝана ԛәйькеда тʼорʼед хԝә һивез дькьрьн. Һьнге Иса гази ԝан кьр, ԝана жи баве хԝә Зәбәди тʼәви пʼала ԛәйькеда һьшт у пәй Ԝи чун. Әԝ гьһиштьнә Кәфәрнаһуме. Иса ԝе рʼожа шәмийе рʼаст кʼәтә кʼьниште у дәст бь һинкьрьне кьр. Әԝана ль сәр һинкьрьна Ԝи зәндәгьрти мабун, чьмки Әԝи мина йәки хԝәйиһʼӧкӧм әԝ һин дькьрьн, нә кӧ мина ԛанунзана. Һьнге кʼьништа ԝанда мәрьвәк һәбу, кӧ рʼӧһʼе һʼәрамва гьрти бу. Ԝи кьрә ԛирʼин у гот: «Тӧ чь жь мә дьхԝази, йа Исайе Ньсрәте? Тӧ һатийи ԛьрʼа мә бини? Әз заньм Тӧ кʼи йи. Тӧ Пирозе Хԝәде йи!» Иса ле һьлат у гот: «Кәрʼ бә у же дәркʼәвә!» Һьнге рʼӧһʼе һʼәрам әԝ вәчʼьрʼьканд у бь дәнгәки бьльнд кьрә ԛирʼин у же дәркʼәт. Һʼәму зәндәгьрти ман, һәврʼа кʼәтьнә пьрс-пьрсийара у дьготьн: «Әв чь йәк ә? Чь һинкьрьнәкә ну йә! Бь һʼӧкӧм Әԝ әʼмьри ль рʼӧһʼед һʼәрам дькә у әԝ жи ельми Ԝи дьбьн». У нав у дәнге Иса перʼа-перʼа һʼәму дор-бәред Щәлиле бәла бу. Гава кӧ Иса жь кʼьниште дәркʼәт, тʼәви Аԛуб у Йуһʼәнна рʼаст чунә мала Шьмһʼун у Әндраԝьс. Хԝәсийа Шьмһʼун тʼайеда пʼалдайи бу. Һьнге бона ԝе Исарʼа готьн. Иса жи чу незик, дәсте ԝе гьрт рʼакьр у тʼайе же бәрʼда, рʼабу бәрдәсти ԝанрʼа кьр. Еваре, гава рʼо чу ава, һʼәму нәхԝәш у йед щьнакʼәти анинә щәм Ԝи. Тʼәмамийа щьмәʼта бажер ль бәр дери щьвийа. Иса гәләк мәрьвед бь нәхԝәшийед щурʼә-щурʼә ԛәнщ кьрьн. Гәләк щьн жи дәрхьстьн у нәдьһьшт кӧ щьн хәбәр дьн, чьмки щьна заньбу кӧ Әԝ Кʼи йә. Ԛәрәбәрбанга сьбәһе рʼабу, дәркʼәт чу щики хәԝлә у ԝьр дӧа кьр. Шьмһʼун у йед тʼәви Ԝи ль Иса гәрʼийан у гава кӧ ԝан Әԝ дит, готьне: «Һʼәму ль Тә дьгәрʼьн». Иса ԝанрʼа гот: «Әм һәрʼьнә гӧнд-бажаред незик, ԝәки Әз ль ԝан дәра жи даннасин кьм, чьмки Әз бона ве йәке һатьмә». У ль тʼәмамийа Щәлиле дьгәрʼийа, кʼьништед ԝанда даннасин дькьр у щьн дәрдьхьстьн. У йәки кʼоти һат, ль бәр Иса чок да, рʼәща же кьр у готе: «Һәгәр Тӧ бьхԝази, дькари мьн паԛьж ки». Гӧне Иса пе һат, дәсте Хԝә дьреж кьр ле кʼәт у готе: «Әз дьхԝазьм. Паԛьж бә!» У пәй ве готьнерʼа дәстхԝәда кʼотибун же чу у әԝ паԛьж бу. Иса перʼа-перʼа әԝ дәрхьстә дәр, һʼьшк тʼәми ль ԝи кьр у ԝирʼа гот: «Бьньһерʼә тʼӧ кәсирʼа тьштәки нәбежи, ле һәрʼә хԝә нишани кʼаһин кә у чаԝа кӧ Муса тʼәми дайә, һʼәдийа хԝә бьдә, ԝәки һʼәмуйарʼа бьбә шәʼдәти, кӧ тӧ паԛьж буйи». Ле әԝ мәрьв дәркʼәт дәстпекьр ашкәрә гот у әва йәка бәла кьр, ӧса кӧ Иса иди нькарьбу ашкәрә бьчуйа бажарәки, ле жь бажер дәр ль щийед хәԝлә дьма. У щьмәʼт жь һәр алийава дьһатьнә щәм Ԝи. Пәй чәнд рʼожарʼа Иса вәгәрʼийа Кәфәрнаһуме. Һьнге һатә бьһистьне, кӧ Әԝ малда йә. Маледа һаԛас мәрьв щьвийан, һʼәта кӧ ль бәр дери жи щи-сьтʼар тʼӧнәбу. Иса хәбәра мьзгинийе әԝ һин дькьрьн. У мәрьв һатьн, жь нав ԝанда чар мәрьва шьлушәʼтәк һьлдабун данинә щәм Иса. Ле жь дәст әʼлаләте рʼе нәдитьн кӧ незики Иса буна, ԝана бане ханийе кӧ Иса теда бу ԛӧл кьр у мәрьве шьлушәʼт бәрʼева дахьстьнә жере. Гава кӧ Иса баԝәрийа ԝан дит, готә йе шьлушәʼт: «Лаԝо, гӧнед тә һатьнә бахшандьне». Жь ԛанунзана һьнәк ԝьра рʼуньштьбун у дьле хԝәда дьготьн: «Әви һан чьма ӧса хәбәр дьдә? Әва ньге хԝә Хԝәдерʼа давежә! Пештьри Хԝәде кʼи дькарә гӧна бьбахшинә?» Дәстхԝәда рʼӧһʼе Исава әʼйан бу кӧ әвана аһа дьфькьрьн, Әԝи гот: «Һун чьма тьштед аһа дьле хԝәда дьфькьрьн? Кʼижан рʼьһʼәт ә, шьлушәʼтрʼа бежьн: ‹Гӧнед тә һатьнә бахшандьне?› йан бежьне: ‹Рʼабә бәрʼа хԝә һьлдә у бьгәрʼә?› Ле ԝәки һун бьзаньбьн кӧ һʼӧкӧме Кӧрʼе Мерьв һәйә ль сәр әʼрде гӧна бьбахшинә…» готә йе шьлушәʼт: «Әз тәрʼа дьбежьм, рʼабә бәрʼа хԝә һьлдә, һәрʼә мала хԝә». Әԝ жи перʼа-перʼа ль бәр чʼәʼве һәр кәси рʼабу, бәрʼа хԝә һьлда, дәркʼәт у чу. Һʼәму жи һʼәйири ман, шькьри данә Хԝәде у готьн: «Мә тьштәки ӧса тʼӧ щар нәдитийә!» Иса диса чу дәве голе. Тʼәмамийа әʼлаләт дьһатә щәм Ԝи у Әԝи жи әԝ һин дькьрьн. Чахе Иса рʼеда чу, Леԝийе кӧрʼе Һалфаԝо ль щийе хәрщһьлдане рʼуньшти дит у готе: «Пәй Мьн ԝәрә». Әԝ жи рʼабу пәй Иса чу. Гава Иса мала Леԝида сәр сьфре бу, гәләк хәрщгьр у гӧнәкʼар тʼәви Ԝи у шагьртед Ԝи ль сәр сьфре рʼуньштьбун, чьмки йед пәй Ԝи дьчун гәләк бун. Гава ԛанунзанед жь нава ферьсийа дитьн кӧ Иса тʼәви хәрщгьр у гӧнәкʼара ль сәр сьфре рʼуньшти йә, жь шагьртед Ԝи пьрсин: «Чьма Әԝ тʼәви хәрщгьр у гӧнәкʼара дьхԝә у вәдьхԝә?» Чахе Иса бьһист, ԝанрʼа гот: «Сахләм нә һʼәԝще һʼәким ьн, ле нәхԝәш. Әз нә һатьмә гази йед рʼаст кьм, ле гази гӧнәкʼара». Щарәке шагьртед Йуһʼәнна у ферьсийа рʼожи дьгьртьн. Чәнд мәрьв һатьнә щәм Иса у же пьрсин: «Чьма шагьртед Йуһʼәнна у йед ферьсийа рʼожийа дьгьрьн, ле шагьртед Тә рʼожи нагьрьн?» Иса готә ԝан: «Һʼәта зәʼва тʼәви ԝан ә, гәло дьбә кӧ хԝәндийед дәʼԝате рʼожи бьгьрьн? Һʼәта зәʼва тʼәви ԝан ә, әԝ нькарьн рʼожи бьгьрьн! Ле рʼож ԝе бен, гава зәʼва жь ԝан бе һьлдане, һьнге ԝе рʼоже ԝе рʼожи бьгьрьн. Тʼӧ кәс пе пʼарчʼе ну кʼьнща кәвьн пʼинә накә. Һәгәр ӧса бькә, пʼарчʼе кʼьнща кәвьнва дьрути ԝе зоре ль кʼьнща кәвьн бькә у щийе ԛәльши ԝе һе ль бәр һәвва һәрʼә. У нә жи кәсәк шәрава ну дькә мәшкед кәвьн. Һәгәр ӧса бькә, шәрава ну ԝе мәшка бьтʼәԛинә, һьн шәраве ӧнда бә, һьн жи мәшк. Ле шәрава ну дькьнә мәшкед ну». Иса рʼожәкә шәмийе нава зәвийарʼа дәрбаз дьбу у шагьртед Ԝи рʼева дәстпекьрьн сьмбьлед геньм чьнин. Ферьсийа Исарʼа гот: «Бьньһерʼә! Чьма шагьртед Тә тьште нәщайизи рʼожа шәмийе дькьн?» Иса ль ԝан вәгәрʼанд у гот: «Ԝә ԛәт нәхԝәндийә кӧ Даԝьд жь һʼәԝщәтийе чь кьр, гава әԝ у йед перʼа бьрʼчи бун? Әԝ ԝәхте Әвйатаре сәрәккʼаһинда кʼәтә Хана Хԝәде у нане Хԝәдерʼа дайи хԝар, кӧ әԝ нан пештьри кʼаһина нә щайиз бу йәки дьн бьхԝара. Сәрда жи әԝ нан да йед тʼәви хԝә». Паше сәр готьна Хԝәда зедә кьр готә ԝан: «Рʼожа шәмийе бона инсен һатә данине, нә кӧ инсан бона рʼожа шәмийе! Аԝа готи Кӧрʼе Мерьв Хӧдане рʼожа шәмийе йә жи». У Иса диса кʼәтә кʼьниште. Ль ԝе дәре мәрьвәк һәбу, кӧ дәсте ԝи кʼьшийабу. У чʼәʼве һьнәка сәр Ԝи бу, гәло рʼожа шәмийе Әԝе ԝи ԛәнщ кә йан на, ԝәки хәйба Ԝи бькьн. Иса мәрьве дәсткʼьшийайирʼа гот: «Рʼабә ве говәке бьсәкьнә!» Паше ԝанрʼа гот: «Рʼожа шәмийе ԛәнщикьрьн щайиз ә, йан хьрабикьрьн? Рʼӧһʼәки хьлаз кьн, йан ӧнда кьн?» Ле ԝан дәнг нәкьр. Иса бь һерс ль дора Хԝә ньһерʼи, бона сәрһʼьшкийа ԝан бәр Хԝә кʼәт у ԝи мәрьвирʼа гот: «Дәсте хԝә дьреж кә». Әԝи жи дьреж кьр у дәсте ԝи диса ԛәнщ бу. Ферьси дәркʼәтьнә дәрва у перʼа-перʼа тʼәви Һеродәсийа шеԝьрин, кӧ чаԝа Ԝи бьдьнә кӧштьне. Иса тʼәви шагьртед Хԝә чу дәве голе. Жь Щәлиле әʼлаләтәкә гьран пәй Ԝи чу. Гава кӧ ԝана кьрьнед Ԝи бьһистьн, жь Щьһустане, Оршәлиме, Идумәйайе, ԝи алийе Урдӧнейи рʼоһьлате, ӧса жи жь ԛәза Сур у Сайде гәләк мәрьв һатьнә щәм Ԝи. У Иса жь дәст әʼлаләте шагьртед Хԝәрʼа гот, кӧ Ԝирʼа ԛәйькәке һазьр кьн, ԝәки нәкʼәвә ль бәр дәʼфа. Чьмки Иса гәләк мәрьв ԛәнщ кьрьн, ӧса кӧ йед нәхԝәш тʼопи сәр дьбун, ԝәки дәсте хԝә бьдана Ԝи. Дәма кӧ рʼӧһʼед һʼәрам Әԝ дьдитьн, ль бәр Ԝи дәвәрʼуйа хԝә давитьнә әʼрде, дькьрьнә ԛирʼин у дьготьн: «Тӧ Кӧрʼе Хԝәде йи!» Ле Иса һʼьшк тʼәми ль ԝан дькьр, кӧ бона Ԝи нәкьнә дәнги. Иса һьлкʼьшийа чʼийе у мәрьвед кӧ Ԝи дьхԝәстьн гази щәм Хԝә кьрьн. Әԝ жи чунә щәм Ԝи. Әԝи донздәһ мәрьв бьжартьн, навед ԝан «шанди» дани, кӧ тʼәви Ԝи бьминьн у ԝан бьшинә, ԝәки даннасин кьн. У һʼӧкӧм да ԝан кӧ щьна дәрхьн. Һәр донздәһед бьжарти әв ьн: Шьмһʼун (кӧ наве ԝи кьрә Пәтрус), Аԛубе Зәбәди у Йуһʼәннайе бьре ԝи, (әԝи наве Боанәрщәс ль ԝан кьр, кӧ те фәʼмкьрьне: «Кӧрʼед Гӧрʼинийа Әʼзмен») Әндраԝьс, Филипо, Бәртоломәйо, Мәтта, Тʼума, Аԛубе кӧрʼе Һалфаԝо, Тәдайо, Шьмһʼуне ԝәлатпʼарьст у Щьһудайе Исхәрйоти йе кӧ бу нәмаме Иса. Паше Иса чу маләке. Диса һаԛас әʼлаләт щьвийа, һʼәта кӧ нькарьбун нане хԝә жи бьхԝарана. Гава йед жь хун у ԛьнета Ԝи бьһистьн, дәркʼәтьн Ԝи бьгьрьн, чьмки ԝана дьгот: «Әԝи һʼьше Хԝә ӧнда кьрийә!» У әԝ ԛанунзанед кӧ жь Оршәлиме бәржер бьбун, дьготьн: «Бәлзәбул Ԝида һәйә! Әԝ бь һʼӧкӧме сәрԝере щьна щьна дәрдьхә!» Иса жи әԝ гази щәм Хԝә кьрьн у бь мәсәла ԝанрʼа гот: «Мирещьн чаԝа дькарә хԝәха хԝә дәрхә? Һәгәр нав пʼадшатикеда тʼьфаԛ тʼӧнәбә, әԝ нькарә бьминә. Мала кӧ бетʼьфаԛи бькʼәве, әԝ мал нькарә бьминә. Һәгәр мирещьн рʼабә һьмбәри хԝә у бьбә дӧтирәти, әԝ нькарә бьминә, ле бәле ԝе хьлазийа ԝи бе. Ле бәле тʼӧ кәс нькарә бькʼәвә мала мерхасәки у һәбука ԝи тʼалан кә, һәгәр пешийе ԝи мерхаси гьренәдә. Гава гьреда, һьнге ԝе бькарьбә мала ԝи тʼалан кә. Әз рʼаст ԝәрʼа дьбежьм, һәр гӧнә у һәр готьна хьраб кӧ бежьн ԝе ль бәндед дьне бенә бахшандьне, ле кʼи кӧ готьнәкә хьраб мьԛабьли Рʼӧһʼе Пироз бежә, тʼӧ щар ль ԝи найе бахшандьне. Әԝе бь ԝи гӧнәйи һʼәта-һʼәтайе сущдар бә». Иса әв йәк гот, чьмки ԝан дьгот: «Рʼӧһʼе һʼәрам Ԝида һәйә». Һьнге де у бьрайед Иса һатьн, ль дәрва сәкьнин, йәк шандьнә пәй Ԝи у гази Ԝи кьрьн. Әʼлаләта кӧ ль дора Ԝи рʼуньштьбу готә Ԝи: «Ва дийа Тә у бьрайед Тә дәрва пьрса Тә дькьн». Иса щаба ԝан да у гот: «Дийа Мьн у бьрайед Мьн кʼи нә?» Һьнге ль йед дора Хԝә рʼуньшти ньһерʼи у гот: «Ва нә де у бьрайед Мьн! Һәр кәсе кӧ хԝәстьна Хԝәде бинә сери, әԝ ә бьре Мьн, хушка Мьн у дийа Мьн». Иса диса ль дәве голе дәст бь һинкьрьне кьр. Әʼлаләтәкә ӧса мәзьн ль дора Ԝи щьвийа, кʼәрба Әԝ кʼәтә ԛәйька ль сәр голе у рʼуньшт. Тʼәмамийа әʼлаләте ль дәве голе бу у Ԝи бь мәсәла әԝ һини гәләк тьшта дькьрьн. Һинкьрьна Хԝәда гот: «Гӧһдари! Тʼохьмрʼәш рʼабу чу кӧ тʼохьм бьрʼәшинә. Чахе әԝи тʼохьме хԝә дьрʼәшанд, һьнәк же кʼәтьнә дәве рʼе, тәйрәдә һатьн у әԝ хԝарьн. У һьнәк кʼәтьнә сәр әʼрде кәвьри, ль ԝьр кӧ хԝәли кем бу. Әԝ зу шин бун, чьмки тәлаше хԝәлийе нә кʼур бу. Чахе тәʼв дәркʼәт, әԝ чʼьлмьсин у чьмки рʼаԝед ԝан тʼӧнәбун, һʼьшк бун. У һьнәкед дьн кʼәтьнә нава стьрийа, стьри рʼабун әԝ хәньԛандьн у бәр нәдан. У һьнәкед дьн жи кʼәтьнә нава әʼрде ԛәнщ у шин бун, мәзьн бун у һьнәка си, һьнәка шест, һьнәка сәд щар бәр дан». У Иса ԝанрʼа гот: «Гӧһе кʼейи бьһистьне һәйә бьра бьбьһе». Гава Иса тʼәне ма, йед дора Ԝи гьртьбун тʼәви һәр донздәһа, бона ван мәсәла же пьрсин. Әԝи щаба ԝан да у гот: «Ԝәрʼа һатийә дайине кӧ һун сӧрʼед Пʼадшатийа Хԝәде бьзаньбьн, ле бона ԝан, йед кӧ дәрва нә, һәр тьшт бь мәсәла те готьне, ԝәки: ‹Чьԛаси бьньһерʼьн жи, нәбиньн, чьԛаси бьбьһен жи, фәʼм нәкьн, ԝәки нәбә кӧ вәгәрʼьн у ль ԝан бе афукьрьне› ». Һьнге Иса ԝанрʼа гот: «Һун ве мәсәле фәʼм накьн? Ле иди һуне һʼәму мәсәла чаԝа фәʼм бькьн? Тʼохьмрʼәш хәбәре дьрʼәшинә. Әԝед ль дәве рʼе кӧ хәбәр ле те чандьне, әԝ ьн, кӧ гава дьбьһен, перʼа-перʼа мирещьн те у хәбәра дьле ԝанда чанди дәрдьхә. Әԝед ль сәр әʼрде кәвьри әԝ ьн, кӧ гава хәбәре дьбьһен, әԝ зу бь әшԛ у ша ԝе ԛәбул дькьн, ле чьмки рʼаԝед ԝан тʼӧнәнә, әԝ дьреж тʼаԝ накьн. У гава бона хәбәре рʼасти тәнгасийа йан зерандьне тен, зу жь рʼе дькʼәвьн. У әԝед нава стьрийада һатьнә чандьне әԝ ьн, кӧ хәбәре дьбьһен, хәмед ве дьнйайе, дәрәԝед дәԝләтийе у хԝәстьна тьштед дьн дькʼәвьнә наве у хәбәре дьхәньԛиньн, әԝ бе бәр дьминьн. У әԝед әʼрде ԛәнщда һатьнә чандьне әԝ ьн, кӧ хәбәре дьбьһен, ԛәбул дькьн, һьнәк си, һьнәк шест у һьнәк жи сәд щар бәр дьдьн». У Иса ԝанрʼа гот: «Гава чʼьре тиньнә һьндӧрʼ, бона чь тиньн? Бона бьн сәльке, йан бона бьн ньвине? Нә тиньн кӧ дайньнә сәр пʼечʼьре? Тʼӧ тьште вәшарти тʼӧнәйә кӧ нәйе ашкәрәкьрьне у нә жи тьштәки дьзива һәйә кӧ нәкʼәвә бәр рʼонайе. Гӧһе кʼейи бьһистьне һәйә бьра бьбьһе». Иса ԝанрʼа гот: «Дина хԝә бьдьнә тьштед кӧ һун дьбьһен. Һун бь чь чапе бьпивьн, бь ԝе пиване жи ԝе ԝәрʼа бе пиване у сәрда жи ԝе һе зедә бә. Чьмки кʼерʼа кӧ һәйә, ԝе һе ле зедә бә у кʼерʼа кӧ тʼӧнә, чь һәйә жи ԝе же бе стандьне». У Иса гот: «Пʼадшатийа Хԝәде мина ве йәке йә: Мәрьвәк тʼохьм дьрʼәшинә нав әʼрде. У шәв у рʼож рʼадьзе, рʼадьбә, тʼохьм шин дьбә, бьльнд дьбә у хԝәха пе наһʼәсә кӧ әв чаԝа дьбә. Әʼрд жь хԝә бәр дьдә, пешийе зил, паше сьмбьл, пәйрʼа жи гәньме гьһишти сьмбьлда. Гава кӧ бәр дьгьһижә, мәрьв иди дәʼсе давеже, чьмки дәма нандьруне перʼа гьһиштийә». У Иса гот: «Әм Пʼадшатийа Хԝәде мина чь бьшьбиньн? Йан жи әм ԝе бь кʼижан мәсәле шьровәкьн? Әԝ мина һʼәбәкә тʼохьме хәрдале йә кӧ жь һʼәму тʼохьмед кӧ сәр әʼрде тенә чандьне һуртьр ә. Ле гава әԝ те чандьне дьгьһижә, жь һʼәму пʼьнщарʼа мәстьр дьбә у чʼьԛьлед мәзьн дьдә, ӧса кӧ тәйрәдед әʼзмен дькарьн хԝә бьдьнә бьн сийа ԝе». Бь гәләк мәсәлед бь ви аԝайи ԝанрʼа һаԛас хәбәр дьда, чьԛас кӧ ԝана дькарьбу фәʼм бькьра. Бе мәсәлә ԝанрʼа тьштәк нәдьгот, ле шагьртед Хԝәрʼа башԛә һәр тьшт шьровәдькьр. Ԝе рʼоже, гава рʼо чу ава, Иса шагьртед Хԝәрʼа гот: «Әм дәрбази ԝи бәри голе бьн». Шагьрт жь әʼлаләте ԛәтийан, кʼәтьнә ԝе ԛәйька кӧ Иса теда бу у ԝана Әԝ тʼәви хԝә бьр. Ԛәйькед дьн жи тʼәви Ԝи бун. Дә ижар фьртонәкә мәзьн ль ԝан рʼабу, пела ӧса ль ԛәйьке дьхьст, кӧ иди әԝ бу бь аве тʼьжи бьбуйа. Ле Иса пашийа ԛәйькеда сәре Хԝә данибу сәр бәʼлги у рʼазабу. Ԝана Әԝ һʼьшйар кьр у готьне: «Дәрсдар, нә хәма Тәйә кӧ әм ӧнда дьбьн?» Иса рʼабу, ль байе һьлат у әʼмьри сәр голе кьр гот: «Бьсәкьнә, кәрʼ бә!» Фьртоне дани у һʼәму тьшт сәԛьрʼин. Иса ԝанрʼа гот: «Һун чьма дьтьрсьн? Һе чаԝа баԝәрийа ԝә тʼӧнә?» Саԝәкә гьран ль ԝана гьрт у һәвдӧрʼа готьн: «Гәло әв кʼи йә, кӧ ба у гол жи ельми Ԝи дьбьн?» Әԝана дәрбази ԝи бәри гола Щәлиле бун у гьһиштьнә тʼопрахед Гьрасине. Гава кӧ Иса жь ԛәйьке дәркʼәт, һьнге жь нав горʼьстана мәрьвәк рʼасти Ԝи һат, кӧ рʼӧһʼе һʼәрам перʼа бу. Әԝ нав горʼьстанада дьма у тʼӧ кәси иди нькарьбу бь зьнщира жи әԝ гьреда. Чьмки гәләк щара әԝ бь ԛәйд у зьнщира гьредабун, ле ԝи зьнщир ԛәтандьбун у ԛәйд шкенандьбун. Тʼӧ кәси нькарьбу әԝ зәфт бькьра. Тʼьме шәв у рʼож горʼьстанада у сәре чʼийа дькьрә ԛирʼин, пе кәвьра хԝә бьриндар дькьр. Гава әԝи дурва Иса дит, бәзи, хԝә авитә бәр ньга у бь дәнгәки бьльнд кьрә ԛирʼин у готе: «Тӧ чь жь мьн дьхԝази, Исайе Кӧрʼе Хԝәдейе Һәри Жорьн? Тӧ хатьре Хԝәде ки, мьн нәдә щәфе!» Әԝи әв йәк дьгот, чьмки Иса дьготе: «Һәй рʼӧһʼе һʼәрам! Жь ви мәрьви дәркʼәвә!» Иса же пьрси у гот: «Наве тә чь йә?» Әԝи жи гот: «Наве мьн Кʼомәскәр ә, чьмки әм гәләк ьн». У гәләки рʼәща жь Иса дькьр, кӧ ԝан жь ԝе тʼопрахе дәрнәхә. Ԝьр ль синге чʼийе сурики бәразайи мәзьн дьчʼерийа. Рʼӧһʼед һʼәрам рʼәща жь Иса кьрьн у готьн: «Мә бьшинә нава бәраза, әм бькʼәвьнә нава ԝан». Әԝи жи изьн да ԝан, рʼӧһʼед һʼәрам дәркʼәтьн у кʼәтьнә нава бәраза. Әԝ сури незики дӧ һʼәзар бәраза бу, әԝ жорда рʼәви, хԝә жь кәнделда авитьнә голе у хәньԛин. Бәразван рʼәвин чунә бажар у гӧнда, әв йәк гьли кьрьн. У бьнәли һатьн кӧ тьштед буйи бьбиньн. У һатьнә щәм Иса, дина хԝә дане, ԝе әԝ мәрьве щьнакʼәтийи кӧ кʼомәскәрәкә щьна перʼа бу, кʼьнще ԝи ле, сәр һʼьше хԝәда һати рʼуньшти йә. Һьнге әԝ тьрсийан. Әԝед кӧ әв йәк дитьбун щьмәʼтерʼа гьли кьрьн, кӧ чь һатә сәре ԝи щьнакʼәти у бәраза. Һьнге ԝана рʼәща жь Иса кьр, кӧ Әԝ жь әʼрде ԝан һәрʼә. Гава Иса кʼәтә ԛәйьке, әԝи кӧ щьнакʼәти бу, рʼәща же кьр, кӧ тʼәви Ԝи һәрʼә. Ле Иса нәһьшт у жерʼа гот: «Вәгәрʼә мала хԝә у нәфәред мала хԝәрʼа бежә, кӧ Хӧдан бона тә чь кьр у чаԝа ль тә һатә рʼәʼме». Әԝ жи чу у дәстпекьр чь кӧ Иса бона ԝи кьрьбу ԛәза Декаполиседа бәла кьр у һәр кәс әʼщебмайи дьма. Гава Иса диса бь ԛәйьке дәрбази ԝи бәре дьн бу, әʼлаләтәкә гьран ль дора Ԝи щьвийа. Гава Әԝ ль дәве голе бу, йәки жь сәрԝеред кʼьниште кӧ наве ԝи Йайиро бу һатә щәм Ԝи, гава ԝи Иса дит, хԝә авитә ньгед Ԝи, гәләк рʼәща же кьр у гот: «Ԛизька мьн ль бәр мьрьне йә. Ԝәрә у дәстед Хԝә дайнә сәр ԝе, кӧ ԛәнщ бә у бьжи». Иса рʼабу тʼәви ԝи чу. Әʼлаләтәкә гьран пәй Ԝи дьчу у тәнгаси дьданә Ԝи. Ԝьр кʼӧлфәтәк жи һәбу, кӧ донздәһ сале ԝе бун, сәр хуне вәбьбу. Әԝе гәләки дәсте һʼәкимада кʼьшандьбу у һʼәму һәбука хԝә хәрщ кьрьбу, ле тʼӧ чʼарә ле нәбьбу у сәрда һе хьраб бьбу. Әԝе дәрһәԛа Исада бьһист, пьштева һатә нава әʼлаләте у ль кʼьнще Ԝи кʼәт. Чьмки әԝе дьле хԝәда дьгот: «Һәгәр әз тʼәне кʼьнще Ԝи жи кʼәвьм, әзе ԛәнщ бьм». У перʼа-перʼа хун же чʼькийа у бәдәна хԝәда тʼәхмин кьр, кӧ жь еша хԝә ԛәнщ бу. Иса дәстхԝәда пе һʼәсийа кӧ ԛәԝатәк же чу, нав әʼлаләтеда зьвьрʼи у пьрси: «Кʼе ль кʼьнщед Мьн кʼәт?» Шагьртед Ԝи готьн: «Тӧ дьбини кӧ әʼлаләт тәнгасийе дьдә Тә, ле Тӧ дьбежи: ‹Кʼе ль Мьн кʼәт?›» Ле Иса дор-бәре Хԝә дьньһерʼи кӧ бьбинә, кʼе әв йәк кьр. Һьнге кʼӧлфәт ль хԝә һʼәсийа кӧ чь ль ԝе ԛәԝьми, бь тьрсе у ләрьзәке һат хԝә авитә бәр Ԝи у һәр тьшт рʼаст гот. Иса ԝерʼа гот: «Әʼвде! Баԝәрийа тә тӧ ԛәнщ кьри. Бь хер у сьламәт һәрʼә у жь еша хԝә ԛәнщ бә». Иса һе хәбәр дьда, жь мала сәрԝере кʼьниште мәрьв һатьн у готьн: «Ԛиза тә мьр, иди зәʼмәте нәдә Дәрсдар». Ле Иса гӧһ нәда готьна ԝан, ԝи сәрәке кʼьништерʼа гот: «Нәтьрсә, тʼәне баԝәр бькә!» Әԝи нәһьшт кӧ кәс пәй Ԝи һәрʼә, пештьри Пәтрус, Аԛуб у Йуһʼәннайе бьре ԝи. Чахе гьһиштьнә мала сәрәке кʼьниште, Иса дит ԝе һеԝәрза ԝан ә, дьгьрин у дькьнә ԛарʼә-ԛарʼ. Гава Әԝ кʼәтә һьндӧрʼ, ԝанрʼа гот: «Чьма һун дькьн ԛалмә-ԛалм у дьгьрин? Зарʼ нәмьрийә, ле һеньжийә». Ԝана ԛәрфе хԝә пе дькьр. Ле Иса һʼәму дәрхьстьнә дәрва, де у баве ԛизьке тʼәви һәр се шагьртед Хԝә һьлдан у кʼәтә щийе кӧ ԛизьк ле бу. Дәсте ԛизьке гьрт у готә ԝе: «Талита ԛум!» кӧ те фәʼмкьрьне: «Ԛизьк, әз тәрʼа дьбежьм, рʼабә!» Ԛизьк перʼа-перʼа рʼабу у гәрʼийа. Әԝ донздәһ сали бу. Әԝед кӧ дитьн һʼьше сәре ԝан чу. Иса һʼьшк тʼәми ль ԝан кьр, кӧ ве йәке кәсирʼа нәбежьн у ԝанрʼа гот, кӧ хԝарьне бьдьнә ԝе. Иса жь ԝьра дәркʼәт у чу щи-мьскʼәне Хԝә. Шагьртед Ԝи жи пәй Ԝи чун. Чахе рʼожа шәмийе һат, Ԝи кʼьништеда дәст бь һинкьрьне кьр у гәләка кӧ бьһист зәндәгьрти мабун у дьготьн: «Әви мәрьви әв тьшт жь кʼӧ анинә? Әв чь сәрԝахти йә кӧ жерʼа һатийә дайине? У әв чь кʼәрәмәт ьн кӧ бь дәсте Ԝи дьԛәԝьмьн? Нә Әв нәщар ә? Нә Әв кӧрʼе Мәрйәме у бьре Аԛуб, Йусес, Щьһуда у Шьмһʼун ә? Нә хушкед Ԝи ль вьр нав мәда нә?» Бь ви аԝайи әԝ жь Ԝи чун. Иса ԝанрʼа гот: «Пʼехәмбәр тʼӧ щийи нә беԛәдьр ә, пештьри нава щи-мьскʼәне хԝә, мәрьвед хԝә у мала хԝәда». Әԝи ль ԝе дәре нькарьбу тʼӧ кʼәрәмәт бькьра, тʼәне дәсте Хԝә дани сәр чәнд нәхԝәша у әԝ ԛәнщ кьрьн. Әԝ сәр нәбаԝәрийа ԝан әʼщебмайи ма. Иса ль гӧндед дор-бәра дьгәрʼийа у һин дькьр. Ԝи һәр донздәһ гази щәм Хԝә кьрьн, дәстпекьр әԝ щот-щот шандьн у һʼӧкӧме ль сәр рʼӧһʼед һʼәрамрʼа да ԝан. Тʼәми да ԝан у гот: «Бона рʼе, пештьри шьвдара дәсте хԝә тʼӧ тьшти хԝәрʼа һьлнәдьн: Нә нан, нә турьк у нә жи пʼәра бәр пьшта хԝәда. Чарьхед хԝә бькьнә пʼийе хԝә, ле дӧ дәст кьрас хԝәрʼа һьлнәдьн». Сәрда зедә кьр готә ԝан: «Әԝ мала кӧ һун бькʼәвьне, ԝе маледа жи бьминьн, һʼәта һун жь ԝи щийи дәркʼәвьн. Әԝ щийед кӧ ԝә ԛәбул нәкьн у гӧһдарийа готьна ԝә нәкьн, жь ԝьр дәркʼәвьн у тʼоза ньгед хԝә даԝшиньн, ԝәки ԝанарʼа бьбә шәʼдәти». Әԝ жи рʼе кʼәтьн чун у даннасин дькьрьн кӧ мәрьв жь гӧнәкьрьне вәгәрʼьн. Ԝана гәләк щьн дәрдьхьстьн у рʼун ль гәләк нәхԝәша дьдан у әԝ ԛәнщ дькьрьн. Һеродәс пʼадша әв йәк бьһист, чьмки нав у дәнге Иса дәркʼәтьбу. Һьнәка дьгот: «Әва Йуһʼәннайе ньхӧмдар ә жь нав мьрийа рʼабуйә. Ләма жи пе ԝи кʼәрәмәт тенә кьрьне». Ле һьнәка жи дьгот: «Әва Елйас ә». Һьнәкед дьн жи дьготьн: «Әва пʼехәмбәрәки мина пʼехәмбәред бәре йә». Ле гава Һеродәс әв йәк бьһист, гот: «Әва әԝ Йуһʼәнна йә, йе кӧ мьн сәре ԝи лехьстийә, жь нав мьрийа рʼабуйә!» Чьмки Һеродәс хԝәха Һеродийа жьна Филипойе бьре хԝә стандьбу, ле Йуһʼәнна жерʼа чәнд щара готьбу: «Нә рʼаст ә кӧ тӧ жьна бьре хԝә бьстини». Һеродәс жи кʼәрби Һеродийайе Йуһʼәнна дабу гьртьне, гьредабу у авитьбу кәле. Ләма Һеродийайе кʼин Йуһʼәннарʼа дажот, дьхԝәст ԝи бьдә кӧштьне, ле нькарьбу, чьмки Һеродәс жь Йуһʼәнна дьтьрсийа у әԝ хԝәй дькьр. Әԝи заньбу кӧ Йуһʼәнна мәрьвәки рʼаст у бӧһӧрти йә. Гава кӧ гӧһдарийа готьна ԝи дькьр, сәре ԝи тʼәвиһәв дьбу, ле диса бь һʼәԝас гӧһ дьда готьна ԝи. Аԝа щарәке мәщал вәбу. Һеродәс бона рʼожа буйина хԝә, әʼсьлзада, сәрһʼәзаред әскәра у гьрәгьред Щәлилерʼа мәсрәф дани. Гава ԛиза Һеродийайе кʼәтә һьндӧрʼ у рʼәԛьси, әв йәк ль дьле Һеродәс у тʼәглифкьрийед ль сәр сьфре рʼуньшти хԝәш һат. Һьнге пʼадше готә ԛизьке: «Тӧ жь мьн чь бьхԝази, әзе бьдьмә тә». У ԝи жерʼа сонд хԝар гот: «Тӧ жь мьн чь бьхԝази, әзе бьдьмә тә, һʼәта ниве пʼадшатийа хԝә жи!» Ԛизьк дәркʼәтә дәрва у чу жь дийа хԝә пьрси: «Әз чь бьхԝазьм?» Дийа ԝе жи гот: «Сәре Йуһʼәннайе ньхӧмдар». Ԛизьке ләзанд чу щәм пʼадше у хԝәстьна хԝә жерʼа гот: «Әз дьхԝазьм кӧ тӧ ньһа сәре Йуһʼәннайе ньхӧмдар ль сәр сьнийе бьди мьн». Пʼадша гәләки бәр хԝә кʼәт, ле чьмки ль бәр тʼәглифкьрийа сонд хԝарьбу, нәхԝәст созе хԝә бәтал кьра. Пʼадше перʼа-перʼа әʼмьри сәр щәлат кьр, кӧ һәрʼә сәре Йуһʼәнна бинә. Щәлат жи чу кәледа, сәре ԝи лехьст у ль сәр сьнийе ани у да кәчʼьке. Әԝе жи әԝ һьлда бьр да дийа хԝә. Гава шагьртед Йуһʼәнна әв йәк бьһистьн, һатьн щьнйазе ԝи бьрьн кьрьнә тʼьрбе. У шанди вәгәрʼийанә щәм Иса, һʼәму тьштед кӧ кьрьбун у һин кьрьбун жерʼа готьн. Иса ԝанрʼа гот: «Дә ԝәрьн әм тʼәне һәрʼьнә щики хәԝлә у һьнәки рʼьһʼәт бьн». Чьмки гәләк дьһатьн у дьчун, ԝана мәщал нәдьдит кӧ нане хԝә жи бьхԝарана. У әԝ тʼәне бь ԛәйьке чунә щики хәԝлә. Ле гәләка кӧ чуйина ԝан дит, әԝ нас кьрьн, жь һʼәму бажара пәйа бәзин у бәри ԝан гьһиштьнә ԝи щийи. Чахе Иса жь ԛәйьке дәркʼәт у Ԝи әʼлаләтәкә гьран дит, һьнге гӧне Ԝи ль ԝан һат, чьмки әԝ мина пәзед бе шьван бун. Дәстпекьр гәләк тьшт әԝ һин кьрьн. Иди чьмки дәрәнг бу, шагьртед Иса һатьн у готьне: «Әв дәр щики хьки-хԝәли йә, ԝәхт жи иди дәрәнг ә. Щьмәʼте бәрʼдә кӧ әԝ һәрʼьнә гӧнд у бәргед дәр-дора у хԝәрʼа тьштед хԝарьне бькʼьрʼьн». Ле Иса ль ԝан вәгәрʼанд у гот: «Һун хӧрәк бьдьнә ԝан!» Жерʼа готьн: «Әм һәрʼьн баһе дӧсьд зиви нан бькʼьрʼьн у ԝан бьдьнә хԝарьне?» Иса ԝанрʼа гот: «Һәрʼьн бьньһерʼьн, кʼа чәнд нанед ԝә һәнә». Гава кӧ пе һʼәсийан, готьн: «Пенщ нан у дӧ мәʼси һәнә». Ԝи әʼмьр кьр кӧ һʼәму жи кʼом-кʼом ль сәр гиһайе шин рʼунен. Әԝ жи кʼом-кʼом, сәд-сәд, пенщи-пенщи ль әʼрде рʼуньштьн. Иса һәр пенщ нан у һәр дӧ мәʼси һьлдан, бәре Хԝә әʼзменда кьр шькьри да, әԝ нан кәркьрьн у да шагьртед Хԝә, ԝәки әԝ дайньнә бәр әʼлаләте. У һәр дӧ мәʼси жи ль һʼәмуйа бәла кьр. Һʼәмуйа хԝар у тʼер бун. Жь ԝан нан у мәʼсийа донздәһ сәләйед тʼьжи һурьк бәрәв кьрьн. Йед кӧ жь ԝи нани хԝарьн ԝәкә пенщ һʼәзар мери бун. Дәстхԝәда Әԝи пʼейи сәр шагьртед Хԝә кьр, кӧ бькʼәвьнә ԛәйьке у пешийа Ԝи дәрбази ԝи бәри голе, Бәйтсайдайе бьн, һʼәта кӧ Хԝәха щьмәʼте вәрʼекә. Пәй вәрʼекьрьнерʼа рʼабу чу сәре чʼийе, кӧ дӧа бькә. Гава кӧ рʼо чу ава, ԛәйьк нава голеда бу у Иса тʼәне дәве голе бу. Иса дит кӧ шагьрт беркʼьшандьнеда гәләки зәʼмәте дькʼьшиньн, чьмки ба мьԛабьли ԝан бу. Незики ԛәрәбәрбанге Иса сәр голерʼа пәйа дьчу незики ԝан дьбу. Ԝи хԝәст кӧ бәр ԝанрʼа дәрбаз буйа, ле чахе ԝана дит кӧ Иса сәр голерʼа пәйа дьчә, ԝан тʼьре хәйаләкә кӧ дьбиньн у кьрьнә ԛирʼин. Чьмки һʼәмуйа жи Әԝ дит у тьрсийан. Ле Иса ԝе дәме дәнг да ԝан у гот: «Сәр хԝә бьн! Әз ьм. Нәтьрсьн!» Һьнге Әԝ кʼәтә ԛәйьке щәм ԝан у ба сәкьни. Шагьрт әʼщебмайи ман, һʼьше сәре ԝан чу, чьмки әԝ ԛәԝьмандьна ль сәр нен һе сәре ԝанда рʼунәньштьбу, фәʼме ԝан дадайи бу. Әԝ дәрбази ԝи бәри голе бун у ль алийе Щенисартева гьһиштьнә бәже, ԛәйик щи кьрьн. Гава жь ԛәйьке пәйа бун, щьмәʼте перʼа-перʼа Иса нас кьр. Әԝ тʼәмамийа ԝе ԛәзайе вьрда-ԝеда бәзин у дәстпекьрьн нәхԝәш ньвинава данинә ԝи щийе кӧ дьбьһистьн Иса ле бу. Һәр щийед кӧ Иса дьчуйе, һәгәр бажар буна, гӧнд буна, бәргә буна, нәхԝәш базарада даданин у һиви же дькьрьн кӧ тʼәне ль рʼишийед кʼьнщед Ԝи кʼәвьн. У һʼәмуйед кӧ ле дькʼәтьн, жь нәхԝәшийед хԝә ԛәнщ дьбун. Ферьсийа у һьнәк ԛанунзанед кӧ жь Оршәлиме һатьбун, дора Иса гьртьн. Ԝана дит кӧ һьнәкә жь шагьртед Ԝи бь дәстед һʼәрам, аԝа готи дәстнәшушти нан дьхԝьн. Ферьси у һʼәму щьһу пәй рʼаԝ-рʼьзьмед кал у бавед хԝә дьчьн, һʼәта кӧ дәстед хԝә рʼьнд нәшон, нане хԝә нахԝьн у жь базаре жи чь тиньн, һʼәта аве нәхьн, нахԝьн. Гәләк әʼдәтед дьн жи һәнә, кӧ жь кал у бава һьлданә у дьԛәдиньн: Мәсәлә, мина шуштьна тʼаса, шәрбька у фьраԛед сьфьрә майин. Һьнге ферьси у ԛанунзана жь Иса пьрсин: «Чьма шагьртед Тә пәй рʼаԝ-рʼьзьмед кал у бава начьн у бь дәстед һʼәрам нан дьхԝьн?» Әԝи ль ԝан вәгәрʼанд у гот: «Ишайа бона ԝә дӧрʼуйа рʼаст пʼехәмбәрти кьрийә! Чаԝа кӧ һатийә ньвисаре: ‹Әва щьмәʼта бь заре хԝә ԛәдьре Мьн дьгьрә, ле дьле ԝан жь Мьн дур ә. Бадиһәԝа Мьн дьһʼәбиньн, тʼәмийед мәрьва чаԝа ԛанунед Мьн щьмәʼте һин дькьн›. Һун тʼәмийед Хԝәде дьһельн у пәй рʼаԝ-рʼьзьмед мәрьвайийе дькʼәвьн». У гот: «Һун тʼәмийед Хԝәде рʼьнд дьдьнә алики, ԝәки рʼаԝ-рʼьзьмед хԝә хԝәй кьн. Мәсәлә, Муса готийә: ‹Ԛәдьре де у баве хԝә бьгьрә› у ‹Әԝе кӧ гьлики ԛолайи де у баве хԝәрʼа бежә, гәрәке бе кӧштьне›. Ле һун дьбежьн: ‹Кʼи кӧ дийа хԝә йан баве хԝәрʼа бежә: Әԝ аликʼарийа кӧ гәрәке жь мьн бьгьһижә тә, әԝ «ԛӧрбан» ә›, (аԝа готи дийарик ә кӧ Хԝәдерʼа те дайине) һун иди наһельн кӧ әԝ тьштәки де у баве хԝәрʼа бькә! Бь ви аԝайи, һун бь ԝан рʼаԝ-рʼьзьмед хԝәйә кӧ дәрбази ньсьлед ну дькьн, хәбәра Хԝәде дькьнә хԝәли. У һун гәләк тьштед аһа дькьн». Һьнге Иса әʼлаләт диса гази щәм Хԝә кьр у готә ԝан: «Һун һʼәму гӧһдарийа Мьн бькьн у фәʼм кьн. Тьштәки ӧса тʼӧнә, кӧ жь дәрва бькʼәвә нав-дьле мерьв у ԝи бьһʼәрʼьминә, ле әԝ тьштед кӧ жь дьл дәртен, әԝ мерьв дьһʼәрʼьминьн. Гӧһе кʼейи бьһистьне һәйә бьра бьбьһе». Гава жь әʼлаләте ԛәтийа һатә мал, шагьртед Ԝи мәʼна ԝе мәсәле же пьрсин. Иса ль ԝан вәгәрʼанд у гот: «Һун һе нагьһижьнә гьлийа? Чьма һун фәʼм накьн, чь кӧ жь дәрва дькʼәвә нав-дьле мерьв, нькарә ԝи бьһʼәрʼьминә. Чьмки әԝ нә кӧ дькʼәвьнә дьле ԝи, ле дьчьнә зьке ԝи у жь ԝьр жи дәртен дәрва». (Бь ви аԝайи Иса да кʼьфше, кӧ һʼәму хԝарьн жи һʼәлал ьн.) У гот: «Әԝ тьштед кӧ жь дьле мерьв дәрдькʼәвьн, әԝ ԝи дьһʼәрʼьминьн. Чьмки жь һьндӧрʼ, жь дьле мәрьв фькьред хьраб дәрдькʼәвьн: Ԛави, дьзи, кӧштьн, зьнекʼари, тьмайи, хьраби, фелбази, толти, чʼәʼве хьраб, бӧхданбежи, кʼӧбари у беаԛьли. Әв һʼәму тьштед хьраб жь дьл дәрдькʼәвьн у мерьв дьһʼәрʼьминьн». Иса жь ԝе дәре рʼабу чу синоре Суре. Чу маләке у нәдьхԝәст кӧ кәсәк пе бьһʼәсийа, ле нькарьбу Хԝә вәшарта. Кʼӧлфәтәкә кӧ ԛизька ԝе рʼӧһʼе һʼәрамва гьрти бу, бона Иса пе һʼәсийа, ләз һат у хԝә авитә бәр ньгед Ԝи. Әԝ кʼӧлфәт йунан бу, әʼсьле хԝәда жи жь Финикйа Сурйайе бу. Ԝе лава жь Иса кьр, кӧ щьн жь ԛиза ԝе дәрхә. Иса ԝерʼа гот: «Бьһелә бьра пешийе зарʼ тʼер бьн, чьмки нә рʼаст ә кӧ нан бәр зарʼа һьлдьн у бавежьнә бәр са». Әԝе ль Ԝи вәгәрʼанд у гот: «Бәле Хӧдан, нә сә жи ԝан һурькед бәр зарʼайә бьне сьфреда майи дьхԝьн?» Һьнге Әԝи кʼӧлфәтерʼа гот: «Бона хатьре ве готьна тә, тӧ дькари һәрʼи. Щьн жь ԛизька тә дәркʼәт». Кʼӧлфәт жи чу мала хԝә, дина хԝә дайе, ԝе ԛизьк нав ньвинеда пʼалда йә у щьн жи же дәркʼәтийә. Пәй ԝе йәкерʼа Иса жь синоре Суре дәркʼәт, нава Сайдерʼа дәрбаз бу, ԛәза Декаполисерʼа һатә гола Щәлиле. Мәрьвәки кәрʼ у лал анинә щәм Ԝи у лава же кьрьн кӧ дәсте Хԝә дайнә сәр ԝи. Иса әԝ мәрьв жь әʼлаләте ԛәтанд, тʼьлийед Хԝә кьрьнә гӧһед ԝи, дәсте Хԝәда тʼукьр, ль зьмане ԝи да. У бәре Хԝә әʼзменда кьр, кʼәсәр һате у гот: «Әффата!» кӧ те фәʼмкьрьне: «Вәбә!» У дәст хԝәда гӧһед ԝи бьһистьн, зьмане ԝи вәбу у зәлал дәст бь хәбәрдане кьр. Иса тʼәми ль ԝан кьр, кӧ кәсирʼа нәбежьн. Ле Әԝи чьԛас тʼәми ль ԝан дькьр, ԝана һаԛас зедә бәла дькьр. Мәрьв гәләки әʼщебмайи мабун у дьготьн: «Әви һʼәму тьшт ԛәнщ кьр: Һьн кәрʼа дьдә бьһистьне, һьн жи лала дьдә хәбәрдане». Ԝан рʼожада диса әʼлаләтәкә гьран щьвийа. Тьштәки ԝани хԝарьне тʼӧнәбу кӧ бьхԝарана, Иса гази шагьртед Хԝә кьр у гот: «Гӧне Мьн ль ве әʼлаләте те. Әв се рʼож ә тʼәви Мьн ә у тьштәки ԝани хԝарьне тʼӧнә. Һәгәр Әз ԝан бьрʼчи вәрʼекьмә малед ԝан, дьле ԝане рʼева хԝәва һәрʼә у жь ван һьнәк жи жь щийед дур һатьнә». Шагьртед Ԝи ле вәгәрʼандьн у готьн: «Ль ве бәрʼийе әме жь кʼӧ һаԛас нан дәст хьн, кӧ ве щьмәʼте тʼер кьн?» Иса жь ԝан пьрси: «Чәнд нанед ԝә һәнә?» Ԝана гот: «Һʼәфт». Һьнге әʼмьр кьр кӧ әʼлаләт сәр әʼрде рʼуне. Әԝи әԝ һʼәфт нан һьлдан шькьри да, әԝ кәркьрьн у паше данә шагьртед Хԝә, кӧ дайньнә бәр әʼлаләте. Ԝана әԝ данинә бәр ԝан. У чәнд мәʼсийед ԝанә һур жи һәбун. Иса бона ԝан жи шькьри да у гот: «Ван жи дайньнә бәр әʼлаләте». Ԝана хԝар у тʼер бун. Паше һʼәфт зәмбил жь һурькед бәрмайи бәрәв кьрьн. Әԝед кӧ хԝарьн, ԝәкә чар һʼәзар мәрьва бун. Гава кӧ Иса әԝ вәрʼекьрьн, перʼа-перʼа тʼәви шагьртед Хԝә кʼәтә ԛәйьке у чунә ԛәза Далманутайе. Ферьси һатьн у дәстпекьрьн Исарʼа кʼәтьнә дәʼԝе. Әԝ дьщерʼьбандьн у жь Ԝи нишанәк жь әʼзмен дьхԝәстьн. Кʼур кʼәсәр һате у гот: «Чьма әва ньсьла ль нишанәке дьгәрʼә? Әз рʼаст ԝәрʼа дьбежьм кӧ ви ньсьлирʼа нишанәк найе дайине». Ԝи әԝ һьштьн, диса кʼәтә ԛәйьке у дәрбази ԝи бәри голе бу. Ижар шагьрта бир кьрьбу кӧ хԝәрʼа нан һьлдана. Ль щәм ԝан, ԛәйькеда пештьри нанәки тьштәки ԝани хԝарьне тʼӧнәбу. Иса тʼәми да ԝан у гот: «Мьԛати хԝә бьн, һʼәвза хԝә жь һәвиртьрʼшке ферьсийа у ӧса жи йе Һеродәс бькьн». Ле әԝана нав һәвда хәбәр дьдан у дьготьн: «Нане мә тʼӧнә, ләма аһа дьбежә». Исава әʼйан бу кӧ әԝ чь дьбежьн у ԝанрʼа гот: «Һун чьма нав һәвда хәбәр дьдьн, кӧ нане ԝә тʼӧнә? Һәла һе һун фәʼм накьн? У сәре ԝәда рʼунани, һәла һе һун нагьһижьнә гьлийа? Чʼәʼве ԝә һәнә, һун набиньн? Гӧһе ԝә һәнә, һун набьһен? Чаԝа найе бира ԝә, чахе Мьн пенщ нан бона пенщ һʼәзар мәрьва кәркьрьн? Ԝә жь һурькед бәрмайи чәнд сәләйед тʼьжи бәрәв кьрьн?» Ԝан ле вәгәрʼанд у готьн: «Донздәһ». «У гава Мьн һʼәфт нан бона чар һʼәзар мәрьва кәркьрьн, ԝә чәнд зәмбилед тʼьжи бәрмайи бәрәв кьрьн?» Ԝан гот: «Һʼәфт». Иса ԝанрʼа гот: «Ле чьма һун һе фәʼм накьн?» У әԝ һатьнә Бәйтсайдайе. Һьнәка мәрьвәки кор ани щәм Иса у лава же кьрьн, кӧ дәсте Хԝә дайнә сәр ԝи. Әԝи жи дәсте мәрьве кор гьрт, жь гӧнд дәрхьстә дәр, тʼуйи чʼәʼвед ԝи кьрьн у дәстед Хԝә данинә сәр ԝи, пьрси: «Тӧ тьштәки дьбини?» Әԝи жи ль жоре ньһерʼи у гот: «Әз мәрьва дьбиньм, ле мина дара нә, кӧ дьгәрʼьн». Диса Иса дәстед Хԝә данинә сәр чʼәʼвед ԝи, кор зурʼ бу ньһерʼи у чʼәʼвед ԝи вәбун, һәр тьшт зәлал дит. Иса әԝ шандә мала ԝи у жерʼа гот: «Нәкʼәвә нава гӧнд». Иса тʼәви шагьртед Хԝә чу гӧндед Ԛәйсәрийа Филипойе у рʼеда жь шагьртед Хԝә пьрси: «Бь тʼәхмина мәрьва Әз кʼи мә?» Ԝан ле вәгәрʼанд у готьн: «Һьнәк дьбежьн ‹Йуһʼәннайе ньхӧмдар ә›, һьнәкед дьн дьбежьн ‹Елйас ә›, һьнәкед майин жи дьбежьн ‹йәк жь пʼехәмбәра йә›». Иса жь ԝан пьрси: «Ле һун чь дьбежьн? Бь тʼәхмина ԝә Әз кʼи мә?» Пәтрус ле вәгәрʼанд у готе: «Тʼӧ Мәсиһ и». Әԝи тʼәми ль ԝан кьр, кӧ дәрһәԛа Ԝида кәсирʼа тьштәки нәбежьн. Пәй ве йәкерʼа Иса дәстпекьр шагьртед Хԝә һин кьр, кӧ гәрәке Кӧрʼе Мерьв гәләки щәфе бькʼьшинә, жь алийе рʼуспийа, сәрәкед кʼаһина у ԛанунзанада бе тʼәхсиркьрьне у кӧштьне, ле рʼожа сьсийа жь мьрьне рʼабә. Әԝи әв йәк зәлал гот. Һьнге Пәтрус Әԝ да алики у ле һьлат. Ле Иса сәр мьле Хԝәва зьвьрʼи у ль шагьртед Хԝә ньһерʼи, ль Пәтрус һьлат у гот: «Жь бәр чʼәʼве Мьн бәтавәбә, щьно! Чьмки нет-фькьра тә нә жь Хԝәде йә, ле жь мәрьвайе йә». Паше Иса гази әʼлаләте у шагьртед Хԝә кьрьн, ԝанрʼа гот: «Һәгәр йәк дьхԝазә ль пәй Мьн бе, бьра хԝә инкʼар кә, хаче хԝә һьлдә у пәй Мьн бе. Чьмки кʼи кӧ дьхԝазә әʼмьре хԝә хьлаз кә, әԝе ԝи ӧнда кә у кʼи кӧ әʼмьре хԝә бона Мьн у Мьзгинийе ӧнда кә, әԝе ԝи хьлаз кә. Чь фәйдә һәгәр мәрьв тʼәмамийа дьнйайе ԛазьнщ кә, ле әʼмьре хԝә ӧнда кә? Йан жи мәрьв чь дькарә бәр әʼмьре хԝәва бьдә? Әԝе кӧ Мьн у хәбәред Мьн нав ви ньсьле хальфи у гӧнәкʼарда шәрм һʼәсаб кә, Кӧрʼе Мерьв жи ԝе ԝи шәрм һʼәсаб кә, гава рʼумәта Баве Хԝәва тʼәви мьлйакʼәтед пироз бе». У Әԝи ԝанрʼа гот: «Әз рʼаст ԝәрʼа дьбежьм, кӧ һьнәкед ль вьр сәкьни һәнә ԝе мьрьне нәбиньн, һʼәта кӧ нәбиньн Пʼадшатийа Хԝәде бь ԛәԝат те». Пәй шәш рʼожарʼа Иса тʼәви Хԝә Пәтрус, Аԛуб у Йуһʼәнна һьлдан у рʼакьрьнә чʼийаки бьльнд, ль ԝьр әԝ тʼәне бун. Һьнге рʼәнге Ԝи ль бәр чʼәʼве ԝан һатә гӧһастьне. Кʼьнщед Ԝи ӧса чил-ԛәрԛаш бун у һаԛаси бьрьԛин, кӧ ль сәр рʼуйе әʼрде тʼӧ тьштәки кʼьнщсьпикьрьне нькарьбу әԝ һаԛаси сьпи бькьра. Һьнге Елйас у Муса ԝанва хӧйа бун у тʼәви Иса хәбәр дан. Пәтрус Исарʼа гот: «Дәрсдар, чаԝа рʼьнд ә кӧ әм вьр ьн! Дә әме се һʼолька чекьн, йәке Тәрʼа, йәке Мусарʼа у йәке жи Елйасрʼа». Әԝ ӧса тьрсийа бун, кӧ Пәтрус ньзаньбу чь бежә. Ԝе гаве әʼԝрәк дәркʼәт ль сәр ԝан кьрә си у дәнгәк жь әʼԝр һат: «Әв ә Кӧрʼе Мьни дәлал! Гӧһдарийа Ԝи бькьн!» Ньшкева шагьрта ль дора хԝә ньһерʼи, пештьри Иса кәсәк нәдитьн. Чахе жь чʼийе дьһатьнә хԝаре, Иса тʼәми ль ԝан кьр гот: «Чь кӧ ԝә дит тʼӧ кәсирʼа нәбежьн, һʼәта кӧ Кӧрʼе Мерьв жь мьрьне рʼанәбә». Шагьрта әв тʼәми хԝәй кьр у жь һәвдӧ пьрсин, кʼа мәʼна ве рʼабуна жь мьрьне чь йә. У ԝана же пьрси: «Гәло чьма ԛанунзан дьбежьн пешийе гәрәке Елйас бе?» Әԝи жи ԝанрʼа гот: «Рʼаст ә, пешийе Елйасе бе у һәр тьшти ԝе диса бинә щи. Ле чьма һатийә ньвисаре, кӧ Кӧрʼе Мерьв ԝе гәләки щәфе бькʼьшинә у бе беһӧрмәткьрьне? Ле Әз ԝәрʼа дьбежьм, Елйас һатийә жи у чаԝа кӧ бона ԝи һатьбу ньвисаре, ӧса жи сәре ԝи кьрьн, чаԝа кӧ дьле ԝан хԝәст». Гава вәгәрʼийанә щәм шагьртед дьн, дитьн ль дора ԝан әʼлаләтәкә гьран гьртийә у ԛанунзан жи ԝанрʼа кʼәтьбунә дәʼԝе. Һьнге тʼәмамийа әʼлаләте кӧ Иса дит, гәләки әʼщебмайи ма, бәрбь Ԝи бәзин у сьлав дане. Иса жь шагьрта пьрси: «Һун бона чь ԝанрʼа кʼәтьнә дәʼԝе?» Жь нав әʼлаләте мәрьвәки ле вәгәрʼанд у гот: «Дәрсдар! Мьн кӧрʼе хԝәйи рʼӧһʼе лалва гьрти ани щәм Тә. Кʼидәре кӧ пе дьгьрә ԝи әʼрде дьхә, кʼәф дев дькʼәвә, дьран ле дькьнә чʼьркә-чʼьрк у рʼәԛ дьбә. Мьн һиви жь шагьртед Тә кьр, кӧ ви рʼӧһʼи дәрхьн, ле нькарьбун». Иса ль ԝан вәгәрʼанд у гот: «Һәй ньсьле нәбаԝәр! Һʼәта кʼәнге Әзе тʼәви ԝә бьм? Һʼәта кʼәнге Әзе ль ԝә сәбьр кьм? Ԝи биньнә щәм Мьн». Ԝана кӧрʼьк анинә щәм Иса. Гава кӧ рʼӧһʼе һʼәрам Иса дит, перʼа-перʼа кӧрʼьк вәчʼьрʼьканд. Әԝ кʼәтә әʼрде, кʼәф дев кʼәт у пʼьрпьти. Иса жь баве ԝи пьрси: «Жь кʼәнгева әв йәка тʼәви ԝи дьԛәԝьмә?» Әԝи гот: «Жь зарʼотийеда. У ви рʼӧһʼи гәләк щара әва авитийә нава егьр у аве, кӧ ԝи бькӧжә. Ле һәгәр жь дәсте Тә те, тьштәки бькә бьра гӧне Тә ль мә бе, аликʼарийа мә бькә!» Иса ԝирʼа гот: «Тә гот чь? ‹Һәгәр жь дәсте тә те?› Бона йе баԝәр дькә һәр тьшт дьбә». Ԝе гаве баве кӧрʼьк кьрә ԛирʼин у гот: «Әз баԝәр дькьм. Аликʼарийа нәбаԝәрийа мьн бькә!» Гава Иса дит кӧ әʼлаләт дьбәзә, тʼопи сәр Ԝи дьбә, ль рʼӧһʼе һʼәрам һьлат у гот: «Һәй рʼӧһʼе кәрʼ у лал, Әз әʼмьри сәр тә дькьм: Жь кӧрʼьк дәркʼәвә у щарәкә дьн нәкʼәви нава ԝи!» Рʼӧһʼ кьрә ԛирʼин, кӧрʼьк ԛайим вәчʼьрʼьканд же дәркʼәт. У кӧрʼьк бу мина мьрийа, ӧса кӧ гәләка дьгот: «Әԝ мьр!» Ле Иса дәсте ԝи гьрт, әԝ рʼакьр. Кӧрʼьк жи рʼабу сәкьни. Чахе Иса кʼәтә мале, шагьртед Ԝи башԛә же пьрсин: «Мә чьма нькарьбу әԝ щьн дәрхьста?» Иса ль ԝан вәгәрʼанд у гот: «Щьне ви щурʼәйи бь тʼӧ тьшти дәрнайе, пештьри бь дӧа ». Жь ԝьр чун у нав Щәлилерʼа дәрбаз бун. Иса нәдьхԝәст кӧ кәс ве йәке бьһʼәсә, чьмки Әԝи шагьртед Хԝә һин дькьр у ԝанрʼа дьгот: «Кӧрʼе Мерьв ԝе бькʼәвә дәсте мәрьва, әԝе Ԝи бькӧжьн, ле пәй кӧштьнерʼа рʼожа сьсийа ԝе рʼабә». Ле ԝана әв готьн фәʼм нәдькьр, дьтьрсийан жи кӧ жь Ԝи бьпьрсьн. У әԝ һатьнә Кәфәрнаһуме. Гава Иса малда бу, жь шагьрта пьрси: «Һун рʼеда бона чь һәврʼа кʼәтьбунә дәʼԝе?» Ԝана дәнге хԝә нәкьр, чьмки рʼеда нав һәвда хәбәр дабун, кʼа жь ԝан кʼи йә йе һәри мәзьн. Иса рʼуньшт, гази һәр донздәһа кьр у ԝанрʼа гот: «Һәгәр йәк дьхԝазә бьбә йе пеш, гәрәке әԝ бьбә йе һәри паш у хӧламе һʼәмуйа». У дәсте зарʼокәке гьрт, нав ԝанда да сәкьнандьне, паше әԝ зарʼок да һʼәмеза Хԝә у ԝанрʼа гот: «Кʼи зарʼокәкә аһа бь наве Мьн ԛәбул кә, әԝ Мьн ԛәбул дькә. У кʼи кӧ Мьн ԛәбул кә, әԝ нә кӧ Мьн, ле Йе кӧ Әз шандьмә ԛәбул дькә». Йуһʼәнна Исарʼа гот: «Дәрсдар! Мә мәрьвәк дит кӧ бь наве Тә щьн дәрдьхьстьн, ле мә кьр кӧ әм нәһельн, чьмки әԝ пәй мә найе». Ле Иса гот: «Пешийе ль ԝи нәгьрьн. Кәсәк тʼӧнә кӧ бь наве Мьн кʼәрәмәтәке бькә у перʼа-перʼа бькарьбә һьндава Мьнда хьраб хәбәр дә. Чьмки әԝе кӧ нә мьԛабьли мә йә, әԝ пьшта мә йә. Әз рʼаст ԝәрʼа дьбежьм, әԝе кӧ тʼасә ав бьдә ԝә бона хатьре ԝе йәке, кӧ һун пʼара Мәсиһ ьн, әԝе һәԛе хԝә ԛәт ӧнда нәкә. Кʼи кӧ жь ван бьчʼука йәки, йе кӧ баԝәрийа хԝә Мьн тинә жь рʼе дәрхә, ԝирʼа һе ԛәнщ ә, кӧ бәрашәк стуйе ԝива бе гьредане у бе авитьне нава бәʼре. Һәгәр дәсте тә, тә жь рʼе дәрдьхә, ԝи жекә! Бона тә һе ԛәнщ ә, кӧ тӧ ԛоп бькʼәви жийине, нә кӧ дӧ дәстед тә һәбьн у һәрʼи щәʼньме, нава агьре кӧ ԛәт натәмьрә. Һәгәр ньге тә, тә жь рʼе дәрдьхә, ԝи жекә! Бона тә һе ԛәнщ ә, кӧ тӧ бе ньг бькʼәви жийине, нә кӧ дӧ ньгед тә һәбьн у бейи авитьне щәʼньме. Һәгәр чʼәʼве тә, тә жь рʼе дәрдьхә, ԝи дәрхә! Бона тә һе ԛәнщ ә, кӧ тӧ бь чʼәʼвәки бькʼәви Пʼадшатийа Хԝәде, нә кӧ дӧ чʼәʼве тә һәбьн у бейи авитьне щәʼньме. Ԝе дәре ‹әԝе жь кӧрме нәмьри бенә котьне у агьре жи нәтәмьрә›. Чьмки һәр мәрьвәке бь егьр бе хԝекьрьне. Хԝе тьштәки ԛәнщ ә. Ле һәгәр хԝе шорʼайийа хԝә ӧнда кә, һуне чаԝа диса шорʼайийа ԝе биньнә щи? Бьра тәʼма хԝе нава ԝәда бә у бь һәврʼа әʼдьлайийеда бьжин». Иса жь ԝьр рʼабу чу синоре Щьһустане у дәрбази ԝи алийе чʼәме Урдӧне бу. Диса әʼлаләте ль дора Ԝи гьрт у чаԝа әʼдәте Ԝи бу, Әԝи диса әԝ һин кьрьн. Жь ферьсийа һьнәк незики Ԝи бун у же пьрсин, ԝәки Ԝи бьщерʼьбиньн: «Гәло ль гора Ԛануне рʼаст ә, кӧ мер жьна хԝә бәрʼдә?» Иса щаба ԝан да у гот: «Муса чь тʼәми да ԝә?» Ԝана гот: «Муса изьн да, кӧ мер кʼахаза жьнбәрʼдане бьньвисә у жьне бәрʼдә». Ле Иса ԝанрʼа гот: «Жь дәст сәрһʼьшкийа ԝә Муса әв тʼәми ԝәрʼа ньвиси. Ле сәре серида, ԝәхте әʼфьрандьне Хԝәде әԝ ‹ԛьсьме мер у жьнеда хӧльԛандьн›. ‹Бона ве йәке мере де у баве хԝә бьһелә, хԝә ль жьна хԝә бьгьрә у һәр дӧ ԝе бьбьнә бәдәнәк›. Аԝа иди әԝ нә дӧдӧ нә, ле бәдәнәк ьн. Бона ве йәке әԝед кӧ Хԝәде әԝ кьрьнә йәк, бьра мәрьв ԝан жь һәвдӧ нәԛәтинә». Гава әԝ диса малда бун, шагьрта бона ве мәсәле жь Ԝи пьрсин. Иса ԝанрʼа гот: «Кʼи кӧ жьна хԝә бәрʼдә у йәкә дьн бьстинә, һьндава ԝеда зьнекʼарийе дькә у һәгәр жьн жи мере хԝә бәрʼдә у йәки дьн бьстинә, зьнекʼарийе дькә». Аԝа зарʼок данинә щәм Иса, кӧ дәсте Хԝә дайнә сәр ԝан, ле шагьрт ль йед данин һьлатьн. Гава кӧ Иса әв йәк дит, һерс кʼәт у ԝанрʼа гот: «Бьра әԝ зарʼок бенә щәм Мьн, пешийа ԝан нәгьрьн, чьмки Пʼадшатийа Хԝәде пʼара йед аһа йә. Әз рʼаст ԝәрʼа дьбежьм, кʼи Пʼадшатийа Хԝәде мина зарʼокәке ԛәбул нәкә, әԝ тʼӧ щар накʼәвә нава ԝе». Паше әԝ зарʼ данә һʼәмеза Хԝә, дәсте Хԝә дани сәр ԝан у дӧа ль ԝан кьр. Гава Иса рʼийа Хԝәда дьчу, йәк бәрбь Ԝи бәзи, чу ль бәр Ԝи чок да у же пьрси: «Дәрсдаре ԛәнщ, әз чь бькьм, ԝәки жийина һʼәта-һʼәтайе ԝар бьм?» Иса ԝирʼа гот: «Тӧ чьма Мьнрʼа дьбежи ԛәнщ? Ԛәнщ тʼәне Хԝәде йә, пештьри Ԝи кәсәки дьн тʼӧнә. Тӧ тʼәмийа зани: ‹Нәкӧжә, зьнекʼарийе нәкә, нәдьзә, шәʼдәтийа дәрәԝ нәдә, худана хәлԛе нәхԝә, ԛәдьре де у баве хԝә бьгьрә› ». Әԝи гот: «Дәрсдар, әв һʼәму жи мьн жь щаһьлтийа хԝәда хԝәй кьрьнә». Иса ле ньһерʼи, әԝ һʼьз кьр у готе: «Һе кемасикә тә һәйә. Һәрʼә чи тә һәйә бьфьрошә, бәлайи фәԛира кә, һьнге хьзна тә ԝе ль әʼзмен һәбә. У пәй Мьн ԝәрә ». Ль сәр ве готьне әԝи рʼәнг авит, мәʼдәкьри чу, чьмки гәләк һәбука ԝи һәбу. Иса ль дора Хԝә ньһерʼи у шагьртед Хԝәрʼа гот: «Дәԝләтийарʼа чьԛас зәʼмәт ә, кӧ бькʼәвьнә Пʼадшатийа Хԝәде!» Шагьрт сәр ван готьнед Ԝи әʼщебмайи ман, ле Иса диса думайи кьр у гот: «Лаԝно! Ԝанрʼа чьԛас зәʼмәт ә, бькʼәвьнә Пʼадшатийа Хԝәде, йед кӧ гӧмана хԝә датиньнә сәр дәԝләта хԝә! Дәвә ԝе ԛӧла дәрзийерʼа һе рʼьһʼәт дәрбаз бә, нә кӧ дәԝләти бькʼәвә Пʼадшатийа Хԝәде». Шагьрт гәләки әʼщебмайи ман у һәврʼа готьн: «Иди кʼи дькарә хьлаз бә?» Иса ль ԝан ньһерʼи у гот: «Әԝ тьшт жь дәсте мерьв найе, ле жь дәсте Хԝәде те, чьмки Хԝәде дькарә һәр тьшти бькә». Һьнге Пәтрус дәстпекьр жерʼа гот: «Аԝа мә һʼәму тьшт һьштийә у пәй Тә һатьнә». Иса ԝанрʼа гот: «Әз рʼаст ԝәрʼа дьбежьм, тʼӧ кәс тʼӧнә кӧ бона Мьн у Мьзгинийе мал, йан бьра, йан хушк, йан де, йан бав, йан зарʼ, йан әʼрдед хԝә һьштьбьн, у ль ве дьне сәд ԛат мала, бьра, хушка, дийа, зарʼа у әʼрда тʼәви зерандьна нәстинә у дьнйа дьнда жи жийина һʼәта-һʼәтайе. Ле гәләкед пеш ԝе бьбьнә йед паш у йед паш ԝе бьбьнә йед пеш». Аԝа әԝ ль сәр рʼе бун у һәвраз дьчунә Оршәлиме, Иса ль пешийа ԝан дьчу, шагьрт әʼщебмайи дьман у әԝед ль пәй дьһатьн дьтьрсийан. Әԝи диса һәр донздәһ данә алики у дәстпекьр әԝ тьштед кӧ ԝе сәре Ԝи бьԛәԝьмийана ԝанрʼа гот: «Бьбьһен! Әм һәвраз дьчьнә Оршәлиме. Кӧрʼе Мерьв ԝе бькʼәвә дәсте сәрәкед кʼаһина у ԛанунзана. Әԝе жерʼа кӧштьне дәрхьн у Ԝи бьдьнә дәсте нәщьһуйа у әԝе ԛәрфе хԝә ль Ԝи бькьн, тʼукьне, бьдьнә бәр ԛамчийа, Ԝи бькӧжьн. У рʼожа сьсийа ԝе жь мьрьне рʼабә». Һьнге кӧрʼед Зәбәди, Аԛуб у Йуһʼәнна незики Иса бун у готьне: «Дәрсдар, әм дьхԝазьн ԝәки әм жь Тә чь һиви кьн, Тӧ бона мә бьки». Әԝи жи жь ԝан пьрси: «Һун чь дьхԝазьн кӧ Әз бона ԝә бькьм?» Ԝан жерʼа гот: «Изьне бьдә кӧ рʼумәта Тәда жь мә йәк ль мьле Тәйи рʼасте, йе дьн жи ль мьле Тәйи чʼәпе рʼуне». Иса ԝанрʼа гот: «Һун ньзаньн чь дьхԝазьн. Гәло һун дькарьн жь ԝе кʼасе вәхԝьн, йа кӧ Әзе вәхԝьм? Йан жи бь ԝе ньхӧмандьне бенә ньхӧмандьне бь кʼижане Әзе бемә ньхӧмандьне?» Ԝана жерʼа гот: «Әм дькарьн». Иса ԝанрʼа гот: «Бәле һуне вәхԝьн жь ԝе кʼаса кӧ Әзе вәхԝьм у бенә ньхӧмандьне бь ԝе ньхӧмандьна кӧ Әзе пе бемә ньхӧмандьне, ле изьна ль мьле Мьни чʼәп у рʼасте рʼуньштьне нә дәсте Мьнда йә. Әԝ щи бона ԝан ьн, кʼижанарʼа һатьнә һазьркьрьне». Гава һәр дәһә шагьртед дьн әв йәк бьһист, дьле ԝан жь Аԛуб у Йуһʼәнна ма. Ле Иса әԝ гази щәм Хԝә кьрьн у гот: «Һун заньн йед кӧ нав мьләтада сәрԝер тенә һʼәсабе, сәрдәстийе ль ԝан дькьн у гьрәгьред ԝан жи һʼӧкӧми сәр ԝан дькьн. Ле нава ԝәда бьра ӧса нибә. Кʼи кӧ нава ԝәда дьхԝазә бьбә йе мәзьн, гәрәке бьбә бәрдәстийе ԝә. У кʼи кӧ нава ԝәда дьхԝазә бьбә пеш, гәрәке бьбә хӧламе һʼәмуйа. Чьмки Кӧрʼе Мерьв жи нәһатийә кӧ жерʼа бәрдәстийе бькьн, ле ԝәки Әԝ Хԝәха бәрдәстийе бькә у әʼмьре Хԝә бьдә кӧ гәләка бькʼьрʼә». Паше әԝ һатьнә Әриһайе. Гава Иса тʼәви шагьртед Хԝә у әʼлаләтәкә гьранва жь бажер дәркʼәт, Кӧрʼе Тимәйо, Бартимәйойе кор ль сәр рʼе рʼуньштьбу пʼарс дькьр. Гава бьһист кӧ Исайе Ньсрәте дәрбаз дьбә, дәстпекьр кьрә ԛирʼин у гот: «Исайе Кӧрʼе Даԝьд, ль мьн ԝәрә рʼәʼме!» Гәләка ль ԝи һьлат, ԝәки дәнге хԝә бьбьрʼә, ле әԝи һе дькьрә ԛирʼин у дьгот: «Кӧрʼе Даԝьд, ль мьн ԝәрә рʼәʼме!» Иса сәкьни у гот: «Гази ԝи кьн». Гази йе кор кьрьн у ԝирʼа готьн: «Чʼәʼве тә рʼоньк! Рʼабә сәр хԝә, гази тә дькә». Әԝи жи пʼоте хԝә авит, банзда сәр хԝә у һатә щәм Иса. Иса же пьрси: «Тӧ чь жь Мьн дьхԝази кӧ Әз бона тә бькьм?» Йе кор жерʼа гот: «Дәрсдар, дьхԝазьм чʼәʼвед мьн бьбиньн». У Иса жерʼа гот: «Һәрʼә, баԝәрийа тә тӧ ԛәнщ кьри». У ԝи чахи чʼәʼвед ԝи дитьн, да пәй Иса чу. Гава әԝ незики Оршәлиме бун у гьһиштьнә чʼийайе Зәйтʼуне у гӧндед Бәйтфаще у Бәйтанйайе, һьнге Иса дӧ шагьртед Хԝә шандьн у ԝанрʼа гот: «Һәрʼьнә ԝи гӧнде пешбәри хԝә. Һәма чаԝа кӧ һун бькʼәвьне, һуне щәʼшькәкә гьредайи бьбиньн кӧ һе кәсәк ле сийар нәбуйә. Әԝе вәкьн у биньн. У һәгәр йәк жь ԝә бьпьрсә у бежә: ‹Һун чьма ве йәке дькьн?› бежьне: ‹Хӧданрʼа лазьм ә у ԝе дәстхԝәда бьшинә вьр›». Әԝ шагьрт чун у ль бәр дәри ль кʼуче, щәʼшькәкә гьредайи дитьн. Гава вәдькьрьн, һьнәкед ԝьр сәкьни пьрсин: «Һун чь дькьн? Чьма ԝе щәʼшьке вәдькьн?» Шагьрта щаба ԝан ӧса да, чаԝа кӧ Иса ԝанрʼа готьбу. У әԝ һьштьн. Щәʼшьк Исарʼа анин, кʼьнщед хԝә авитьнә сәр ԝе у Әԝ ль ԝе сийар бу. Гәләка кʼьнщед хԝә сәр рʼе рʼадьхьстьн, һьнәка жи жь кʼәԝшен чʼьԛьлед дара дьбьрʼин, сәр рʼе рʼадьхьстьн. Йед ль пешийа Ԝи у пәй Ԝи кӧ дьчун дькьрьнә ԛирʼин: «Һосанна! Бьмбарәк ә Әԝе кӧ бь наве Хӧдан те! Бьмбарәк ә әԝ Пʼадшатийа баве мә Даԝьдә кӧ те. Һосанна Йе Һәри Жорьнрʼа! » Иса кʼәтә Оршәлиме, чу пʼарьстгәһе. Чʼәʼве Хԝә ль һәр тьшти гәрʼанд, ле чьмки иди евар бу, тʼәви һәр донздәһа чу Бәйтанйайе. Рʼожа дьне, гава әԝ жь Бәйтанйайе дәрдькʼәтьн, Иса бьрʼчи бу. Дурва дарәкә һежирейә бәлгдайи дит, бәрбь ԝе чу, кʼа тьштәке сәр һәбә. Гава гьһиштә даре, пештьри бәлга тьштәк нәдит, чьмки һе нә ԝәхте һежира бу. Һьнге Әԝи ԝе дарерʼа гот: «Бьра иди тʼӧ кәс тʼӧ щар бәре тә нәхԝә». Шагьртед Ԝи әв готьн бьһистьн. У әԝ һатьнә Оршәлиме. Иса кʼәтә пʼарьстгәһе у дәстпекьр әԝед кӧ пʼарьстгәһеда дькʼьрʼин у дьфьротьн дәрхьстьнә дәрва. Тʼәхтед пʼәрәгӧһерʼа у кʼӧрсийед кәвоткфьроша ԝәлгәрʼандьн у нәһьшт, кӧ тʼӧ кәс тьштәки пʼарьстгәһерʼа дәрбаз кә. Әԝ һин кьрьн у гот: «Чьма нә ньвисар ә: ‹Мала Мьн ԝе бона һʼәму мьләта мала дӧа бе һʼәсабе›? Ле ԝә әԝ кьрийә ‹шкәфта ԛачаха› ». Сәрәкед кʼаһина у ԛанунзана әв йәк кӧ бьһистьн, дәстпекьрьн кӧ чаԝа бькьн Ԝи бькьнә фәсале бькӧжьн. Әԝана жь Ԝи дьтьрсийан, чьмки тʼәмамийа әʼлаләте сәр һинкьрьна Ԝи зәндәгьрти мабу. Гава кӧ рʼо чу ава, Әԝ жь бажер дәркʼәтьн. Сәре сьбәһе, гава әԝана бәр дарерʼа дәрбаз бун, дитьн кӧ әԝ дара һежире рʼаԝе хԝәва һʼьшк буйә. Кʼәтә бира Пәтрус у әԝи Исарʼа гот: «Дәрсдар, дина Хԝә бьде, әԝ дара һежирейә кӧ Тә ньфьрʼ ле кьр һʼьшк буйә». Иса ԝанрʼа гот: «Баԝәрийа ԝә бьра сәр Хԝәде һәбә. Әз рʼаст ԝәрʼа дьбежьм, кʼи кӧ ви чʼийайирʼа бежә: ‹Рʼабә хԝә бавежә бәʼре› у дӧдьли нәбә, ле баԝәр бькә кӧ готьна ԝи ԝе бьԛәԝьмә, ӧса жи ԝе бьбә. Бона ве йәке Әз ԝәрʼа дьбежьм, һун чь кӧ нава дӧада бьхԝазьн, баԝәр бькьн кӧ ԝә иди стандийә у хԝәстьна ԝә ԝе бе сери. У гава кӧ һун дьсәкьньн у дӧа дькьн, бьбахшиньн, һәгәр тьштәки ԝә һьндава кәсәкида һәбә, ԝәки Баве ԝәйи әʼзмана жи нәһәԛийед ԝә бьбахшинә ԝә. Ле һәгәр һун нәбахшиньн, Баве ԝәйи әʼзмана жи нәһәԛийед ԝә набахшинә ԝә». У әԝ диса һатьнә Оршәлиме. Дәма кӧ Иса пʼарьстгәһеда дьгәрʼийа, сәрәкед кʼаһина, ԛанунзан у рʼуспи һатьнә щәм Ԝи у же пьрсин: «Тӧ бь чь һʼӧкӧми ван кьра дьки? Кʼе әв һʼӧкӧм дайә Тә, кӧ Тӧ ван кьра бьки?» Иса ԝанрʼа гот: «Әзе жи тьштәки жь ԝә бьпьрсьм. Һәгәр ԝә щаба Мьн да, Әзе жи ԝәрʼа бежьм, кӧ Әз бь чь һʼӧкӧми ван кьра дькьм: Һʼӧкӧме ньхӧмандьна Йуһʼәнна жь әʼзмен бу йан жь мәрьва? Щаба Мьн бьдьн!» Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе бежә: ‹Ле ԝә чьма әԝ баԝәр нәкьр?› Ле һәгәр әм бежьн: ‹Жь мәрьва бу?..›» Әԝ жь әʼлаләте дьтьрсийан, чьмки һʼәмуйа ԛәбул кьрьбу кӧ Йуһʼәнна рʼаст пʼехәмбәр бу. Щаба Иса дан у готьн: «Әм ньзаньн». Иса ԝанрʼа гот: «Әз жи ԝәрʼа набежьм кӧ Әз бь чь һʼӧкӧми ван кьра дькьм». У бь мәсәла дәст бь хәбәрдане кьр, ԝанрʼа гот: «Мәрьвәки рʼәзе тьрийа дани, дора ԝе сур кьр, һʼәԝзәки тьриһʼьнщьрʼандьне теда кʼола, һеланәкә нобәдара чекьр у әԝ бь кʼьре да рʼәзвана, чу ԝәлатәки дьн. Ԝәхтда хӧламәк шандә щәм рʼәзвана, ԝәки жь ԝи рʼәзи бәре пʼара хԝә жь ԝан бьстинә. Ле ԝана әԝ гьрт, кʼӧтан у дәствала вәрʼекьрьн. У ԝи диса хӧламәки дьн шандә щәм ԝан, ле ԝана сәри ле шкенанд у әԝ рʼобәт кьрьн. Әԝи йәки дьн шанд, ԝана әԝ жи кӧшт. Ԝи гәләкед дьн шандьн, ԝана һьнәк жь ԝан кʼӧтан у һьнәк жи кӧштьн. Бона ԝи тʼәне йәк мабу кӧ бьшанда, кӧрʼе хԝәйи дәлал. Хӧләсә рʼабу әԝ жи шанд у гот: ‹Һьлбәт ԝе жь кӧрʼе мьн шәрм бькьн›. Ле әв рʼәзванед һан ль һәв шеԝьрин у готьн: ‹Әв ԝаре ԝи йә! Ԝәрьн әм ви бькӧжьн, миратʼе мәрʼа бьминә›. Һьнге әԝ гьртьн кӧштьн у щьнйазе ԝи жь рʼәз дәрхьстьнә дәр. Дә ижар хԝәйе рʼәз ԝе чь бькә? Нә әԝе бе ԛьрʼа рʼәзвана бинә у рʼәз бьдә һьнәкед дьн? Чьма ԝә әԝ ньвисар нәхԝәндийә? ‹Әԝ кәвьре кӧ һоста тʼәхсир кьр, әԝ бу сәре әʼнишке. Әв йәк жь алийе Хӧданда ԛәԝьми у ль бәр чʼәʼве мә һʼәйр-һʼӧжмәкʼар ә!› » Сәрԝеред щьһуйа фәʼм кьрьн, кӧ Иса әв мәсәлә ани сәр ԝан, кьрьн кӧ Ԝи бьгьрьн, ле жь әʼлаләте тьрсийан, кʼәрба Әԝ һьштьн у чун. Паше ԝана һьнәкә жь ферьсийа у пьштгьред Һеродәс шандьнә щәм Ԝи, ԝәки Ԝи бь хәбәред дәве Ԝи бьгьрьн. Әԝана һатьн у жерʼа готьн: «Дәрсдар! Әм заньн кӧ Тӧ йәки рʼаст и. Мьнәте жь кәси наки, чьмки нав мәрьвада фьрԛийе данайни, ле рʼийа Хԝәде рʼаст һин дьки. Гәло рʼаст ә кӧ әм хәрщ бьдьнә Ԛәйсәр йан на? Әм бьдьн, йан нәдьн?» Ле дӧрʼутийа ԝан кӧ Исава әʼйан бу гот: «Чьма һун Мьн дьщерʼьбиньн? Мьнрʼа зивәки биньн кӧ Әз бьбиньм». Ԝана жерʼа зивәк ани. Әԝи жь ԝан пьрси: «Әв наве ньвисар у сьфәт йе кʼе йә?» Ԝана гот: «Йед Ԛәйсәр ьн». Иса ԝанрʼа гот: «Ԝәки ӧса йә, чь кӧ йед Ԛәйсәр ьн бьдьнә Ԛәйсәр у чь кӧ йед Хԝәде нә бьдьнә Хԝәде». У сәр Ԝи әʼщебмайи ман. Садуԛи, кӧ дьбежьн рʼабуна мьрийа тʼӧнә, һьнәкә жь ԝан һатьнә щәм Иса у же пьрсин: «Дәрсдар! Муса мәрʼа ньвисийә: ‹Һәгәр бьре йәки безӧрʼәт бьмьрә у жьне стухар бьһелә, бьра бьре ԝи жьна ԝи бьстинә у ԝаре бьре хԝә шин кә›. Аԝа һʼәфт бьра һәбун. Бьре мәзьн жьнәк станд, безӧрʼәт мьр. Бьчʼуке ԝи әԝ жьн станд, әԝ жи безӧрʼәт мьр, ӧса жи һатә сәре йе сьсийа. Хӧләсә ван һәр һʼәфт бьра жи әԝ жьн станд у безӧрʼәт мьрьн, пәй ԝанрʼа жи әԝ жьн мьр. Дә ижар ԝе Рʼожа Рʼабуне, гава мьри рʼабьн, әва жьна ԝе кʼижан бьрайирʼа бькʼәвә? Чьмки һәр һʼәфта жи әԝа стандьбу». Иса ль ԝан вәгәрʼанд у гот: «Нә һун жь дәст ве йәке хальфи нә, кӧ нә ньвисара заньн, нә жи ԛәԝата Хԝәде? Гава йед мьри жь мьрьне рʼабьн, ԝе нә бьзәԝьщьн у нә жи мер кьн, чьмки әԝе мина мьлйакʼәтед әʼзмана бьн. Ле дәрһәԛа рʼабуна мьрийада, чьма ԝә Кʼьтеба Мусада нәхԝәндийә сәрһатийа дара дьрʼийеда кӧ чаԝа Хԝәде Мусарʼа дьбежә: ‹Әз Хԝәдейе Бьраһим, Хԝәдейе Исһаԛ у Хԝәдейе Аԛуб ьм›? Әԝ нә Хԝәдейе мьрийа йә, ле Хԝәдейе зендийа йә. Һун лап хальфи нә!» Ԛанунзанәки кӧ шәрʼ-дәʼԝе ԝан бьһист у дина хԝә жи дайе, кӧ Иса чаԝа ԛәнщ щаба ԝан да, незики Иса бу у же пьрси: «Кʼижан тʼәми сәр һʼәму тʼәмийарʼа йә?» Иса ле вәгәрʼанд: «Әв ә тʼәмийа сәр тʼәмийарʼа: ‹Бьбьһе, Исраел! Хӧдан Хԝәдейе мә Хӧданәк ә. Хӧдан Хԝәдейе хԝә һʼьз бькә, бь тʼәмамийа дьле хԝә, бь тʼәмамийа щанийа хԝә, бь тʼәмамийа һʼьше хԝә у бь тʼәмамийа ԛәԝата хԝә›. Йа дӧда жи әв ә: ‹Һәвале хԝә ԝәкә хԝә һʼьз бькә›. Жь ван мәстьр тʼӧ тʼәми тʼӧнә». Ижар ԛанунзан Ԝирʼа гот: «Рʼаст ә, Дәрсдар! Тә рʼаст гот, кӧ ‹Хӧдан йәк ә у жь Ԝи пештьр йәки майин тʼӧнә›. У ‹бь тʼәмамийа дьл, бь тʼәмамийа аԛьл, бь тʼәмамийа ԛәԝате Хԝәде һʼьзкьрьн› у ‹һәвале хԝә жи ԝәкә хԝә һʼьзкьрьн› сәр һәр дийарийед тʼәвайишәԝате у ԛӧрбанед майинрʼа йә». Иса дина Хԝә дайе, кӧ ԝи бь аԛьли щаба хԝә да, жерʼа гот: «Тӧ жь Пʼадшатийа Хԝәде нә дур и». Пәй ве йәкерʼа, иди тʼӧ кәси нәԝерьбу тьштәк жь Ԝи бьпьрсийа. Гава кӧ Иса пʼарьстгәһеда һин дькьр, гот: «Ԛанунзан чаԝа дьбежьн кӧ Мәсиһ кӧрʼе Даԝьд ә? Нә Даԝьд хԝәха пе Рʼӧһʼе Пироз дьбежә? ‹Хӧдан готә Хӧдане мьн: Ль мьле Мьни рʼасте рʼуне, һʼәта кӧ Әз дьжмьнед Тә бькьмә бьне пʼийед Тә›. Аԝа Даԝьд хԝәха кӧ Ԝи ‹Хӧдан› һʼәсаб дькә, иди Әԝ чаԝа дьбә кӧрʼе Даԝьд?» Ԝе әʼлаләта гьран бь дьл у әшԛ гӧһдарийа Иса дькьр. Һинкьрьна Хԝәда Әԝи гот: «Һʼәвза хԝә жь ԝан ԛанунзана бькьн, йед кӧ һʼьз дькьн бь чӧхед дьреж бьгәрʼьн, базарада сьлаве бьдьнә ԝан, кʼьништада кʼӧрсийед пешьн бьгьрьн у шайийада жи һәрәма жорьн рʼунен. Әвана аликива малед жьнәбийа һʼуфи хԝә дькьн, алийе дьнва жи бона хԝәкʼьфшкьрьне дӧайе хԝә дьреж дькьн. Диԝана ԝане һе гьран бә». Иса ль пешбәри пʼәрәданга пʼарьстгәһе рʼуньшт у дина Хԝә дайе, кӧ әʼлаләте чаԝа пʼәрә давитьнә пʼәрәданге. Гәләк дәԝләтийа гәләк авитьне. Жьнәбикә бәләнгаз жи һат у дӧ пол, кӧ дькьрә ԛӧрʼушәк, авите. Иса шагьртед Хԝә гази щәм Хԝә кьрьн у ԝанрʼа гот: «Әз рʼаст ԝәрʼа дьбежьм, кӧ әве жьнәбийа бәләнгаз жь ван һʼәмуйа зәʼфтьр авитә пʼәрәданге, Ван һʼәмуйа жь зедәйа һәбука хԝә авитьне. Ле әве ве бәләнгазийа хԝәда чи ԝе һәбу кӧ пе әʼбуре хԝә бькьра һʼәму авите». Гава Иса жь пʼарьстгәһе дәркʼәт, жь шагьртед Ԝи йәки Ԝирʼа гот: «Дәрсдар! Һәла дина Хԝә бьде әв чь кәвьр ьн у чь авайи нә!» Иса ль ԝи вәгәрʼанд у готе: «Тӧ ван авайийед мәзьн дьбини? Әв һʼәмуйе жи ԝеран бьн, ль вьр кәвьре ль сәр кәвьр ԛәт нәминә!» Гава Иса ль чʼийайе Зәйтʼуне, ль пешбәри пʼарьстгәһе рʼуньштьбу, Пәтрус, Аԛуб, Йуһʼәнна у Әндраԝьс башԛә же пьрсин: «Бежә мә, әԝ тьшт ԝе кʼәнге бьԛәԝьмьн? У бәри ԛәԝьмандьна ԝан һʼәмуйа, чь нишане бьбьн?» Һьнге Иса дәстпекьр у ԝанрʼа гот: «Һаш жь хԝә һәбьн, кӧ тʼӧ кәс ԝә нәхапинә. Гәләк ԝе пе наве Мьн бен у бежьн: ‹Әз ьм Мәсиһ› у ԝе гәләка бьхальфиньн. Гава һун дәнге шәрʼа у бәʼса шәрʼа бьбьһен, һун хԝә ӧнда нәкьн. Гәрәке әв тьшт бьԛәԝьмьн, ле әԝ һе нә ахьри йә. Мьләте рʼабә сәр мьләт, пʼадшатийе рʼабә сәр пʼадшатийе, щи-щийа ԝе әʼрдһʼәж у хәлайи-щәлайе бьбьн. Ле әв һʼәму мина еша кʼӧлфәте йә, кӧ дәстпедькә пе дьгьрә. Ле һун һаш жь хԝә һәбьн! Ԝе ԝә бьбьнә бәр диԝана у кʼьништада ԝә бькʼӧтьн. Бона Мьн ԝе ԝә бәр ԝәли у пʼадша бьдьнә сәкьнандьне, ԝәки һун бәр ԝан шәʼдәтийе бьдьн. Гәрәке пешийе Мьзгини һʼәму мьләтарʼа бе дайине. Гава кӧ ԝә бьгьрьн бьбьнә бәр диԝане, пешда хәм нәкьн кӧ һуне чь бежьн. Ле ԝе дәме чь ԝәрʼа бе дайине, ԝе жи бежьн, чьмки нә кӧ һуне хәбәр дьн, ле Рʼӧһʼе Пироз. Бьра ԝе бьре хԝә бьдә кӧштьне у бав кӧрʼе хԝә. Зарʼе рʼабьнә сәр де у баве хԝә у ԝан бьдьнә кӧштьне. У бона наве Мьн һуне бәр чʼәʼве һʼәмуйа рʼәш бьн. Ле әԝе кӧ һʼәта хьлазийе тәйах кә, әԝе хьлаз бә. Аԝа чахе һун ԝе ‹һʼәрамийа ԝеранкьрьне› бьбиньн, ль ԝи щийе нәщайиз сәкьни», (әԝе кӧ дьхунә бьра фәʼм бькә) «һьнге әԝед кӧ Щьһустанеда нә бьра бьрʼәвьнә чʼийа. У әԝе кӧ сәр хани йә бьра жорда нәйе хԝаре у нәкʼәвә һьндӧрʼ, ԝәки тьштәки һьлдә. У әԝе кӧ кʼәԝшенда йә бьра вәнәгәрʼә кӧ пʼоте хԝә һьлдә. Ле ԝәй ль һʼәмла у дәстдәргуша ԝан рʼожада! Дӧа бькьн кӧ әв йәк зьвьстанеда нәԛәԝьмә. Чьмки ԝан рʼожада ԝе тәнгасикә ӧса бьбә, ԝәки жь рʼожа кӧ Хԝәде дьнйа әʼфьрандийә һʼәта ньһа нәбуйә у нә жи ԝе бьбә. Һәгәр Хӧдан әԝ рʼож кьн нәкьрьна, тʼӧ кәс хьлаз нәдьбу, ле бона хатьре ԝан бьжартийед кӧ Ԝи бьжартьнә, әԝ рʼож кьн кьрьнә. Һьнге, һәгәр йәк ԝәрʼа бежә: ‹Мәсиһ ва йә ль вьр ә›, йан жи: ‹Ԝа йә дәра һан ә›, баԝәр нәкьн. Чьмки мәсиһ у пʼехәмбәред дәрәԝ ԝе дәрен. Ԝе нишан у кʼәрәмәта бькьн, һәгәр дәст ԝанва бе, ԝе бьжартийа жи бьхальфиньн. Ле һун һаш жь хԝә һәбьн! Мьн һәр тьшт пешда ԝәрʼа гот. Ле ԝан рʼожада, пәй ԝе тәнгасийерʼа, ‹рʼуйе рʼойе ԝе бе гьртьне у һиве рʼонайа хԝә нәдә, стәйрке жь әʼзмен бькʼәвьн, у тʼопед әʼзмана ԝе жь рʼийед хԝә дәрен ›. У һьнге ԝе бьбиньн, Кӧрʼе Мерьв бь ԛәԝата мәзьн у рʼумәт әʼԝрава те. Ԝи чахи Әԝе мьлйакʼәтед Хԝә бьшинә у бьжартийед Хԝә жь һәр чар ԛӧлба бәрәв кә, жь пʼәрʼед әʼрде гьрти һʼәта пʼәрʼед әʼзмен. Жь дара һежире дәрсәке һин бьн: Чахе кӧ чʼьԛьлед ԝе тәрʼ дьбьн у бәлгед ԝе дьбьшкьвьн, иди һун заньн кӧ һавин незик ә. Ӧса жи гава һун бьбиньн кӧ әв йәк дьԛәԝьмьн, бьзаньбьн кӧ Әԝ незик ә, ль бәр шемике йә. Әз рʼаст ԝәрʼа дьбежьм, әва ньсьла дәрбаз набә, һʼәта кӧ әв һʼәму тьшт нәԛәԝьмьн. Әʼрд у әʼзмане дәрбаз бьн, ле готьнед Мьн тʼӧ щар дәрбаз набьн. Ле бона ԝе рʼоже у ԝе сьһʼәте тʼӧ кәс ньзанә, нә мьлйакʼәтед әʼзмен у нә жи Кӧрʼ, ле тʼәне Бав. Һаш жь хԝә һәбьн! Һʼьшйар бьминьн! Чьмки һун ньзаньн кʼәнге ԝәхте перʼа бьгьһижә. Әв йәк мина мәрьвәки йә, кӧ мала хԝә дьһелә у дәрдькʼәвә рʼеԝитийе. Бәри чуйине тʼәмийа мала хԝә дьдә хӧламед хԝә, шьхӧле ԝан һәр кәси дьде у әʼмьри сәр дәргәһван дькә, кӧ һʼьшйар бьминә. Бона ве йәке һʼьшйар бьминьн, чьмки һун ньзаньн малхе мале ԝе кʼәнге бе, еваре йан ниве шәве, йан ԝәхте бангдана дика, йан сәре сьбәһе. Нәбә кӧ ньшкева Әԝ бе у ԝә хәԝеда бьгьрә. Әз чь ԝәрʼа дьбежьм, һʼәмуйарʼа дьбежьм: Һʼьшйар бьминьн!» Аԝа дӧ рʼож шунда ԝе Щәжьна Дәрбазбуне у Щәжьна Нане Шкәва бьбуйа. Сәрәкед кʼаһина у ԛанунзана мәщаләке дьгәрʼийан, кӧ чаԝа Иса дьзива бь фелбазийе бьгьрьн, бькӧжьн у дьготьн: «Бьра әв йәк щәжьнеда нибә, ԝәки щьмәʼт рʼанәбә сәр ньга». Гава Иса ль Бәйтанйайе мала Шьмһʼуне кʼотида, ль сәр сьфре рʼуньшти бу, кʼӧлфәтәк һат, дәрданәкә ԝейә алабастьрейи рʼуне нардейи сафи у гәләки бьһа һәбу. Ԝе әԝ шушә шкенанд у әԝ рʼун рʼетә сәр сәре Иса. Һьнәкә ԝьр һерс кʼәтьн у һәврʼа дьготьн: «Һʼәйфа ви рʼуни! Чьма әва зийана бу? Мә дькарьбу әв рʼуна сесьд зиви зедәтьр бьфьрота у бәлайи фәԛира кьра». Бь ви аԝайи әԝ кʼӧлфәта рʼәзил кьрьн. Ле Иса гот: «Жь ԝе кʼӧлфәте вәгәрʼьн! Чьма һун хатьре ԝе дькʼәвьн? Әԝе тьштәки ԛәнщ бона Мьн кьр. Фәԛире һәр гав тʼәви ԝә бьн. Кʼәнге һун бьхԝазьн, һун дькарьн ԛәнщийе ԝанрʼа бькьн. Ле Әзе һәр гав нав ԝәда нибьм. Чь жь дәсте ԝе дьһат әԝе кьр. Әԝе пешда бәдәна Мьн дәфьнкьрьнерʼа рʼун кьр. Әз рʼаст ԝәрʼа дьбежьм, дьнйайеда кʼидәре әва Мьзгинийа бе даннасинкьрьне, ԝе кьрьна ве кʼӧлфәте жи бона биранина ԝе бе готьне». Һьнге Щьһудайе Исхәрйоти, йәки жь һәр донздәһа, чу щәм сәрәкед кʼаһина, ԝәки Иса бьдә дәсте ԝан. Ԝан жи гава әв йәк бьһист, ша бун у пʼәрә ԝирʼа соз дан. У Щьһуда жь һьнгева мәщаләке дьгәрʼийа кӧ чаԝа Иса бьдә дәсте ԝан. Рʼожа пешьнә Щәжьна Нане Шкәвада кӧ бәрхе ԛӧрбана Щәжьна Дәрбазбуне дьһатә сәржекьрьне, шагьрта жь Иса пьрси: «Тӧ ль кʼӧ дьхԝази Шива Щәжьна Дәрбазбуне бьхԝи, ԝәки әм һәрʼьн тәрʼа һазьр кьн?» Иса дӧ шагьртед Хԝә шандьн у ԝанрʼа гот: «Һәрʼьнә бажер. Мәрьвәке рʼасти ԝә бе, щерʼе аве ль сәр мьла. Пәй ԝи һәрʼьнә ԝе мала кӧ әԝ дьче у бежьнә хԝәйе мале: ‹Дәрсдар дьбежә: Кʼане әԝ ода мевана, йа кӧ Әзе теда тʼәви шагьртед Хԝә шива Щәжьна Дәрбазбуне бьхԝьм?› Һьнге әԝе ль ԛате жорьн одәкә мәзьнә һәвдайи у һазьр нишани ԝә кә, ль ԝе дәре шиве бона мә һазьр кьн». Шагьрта да сәр рʼе чунә бажер у чаԝа кӧ ԝанарʼа готьбу ӧса жи дитьн у шива Щәжьна Дәрбазбуне һазьр кьрьн. Гава рʼо чу ава, Иса тʼәви һәр донздәһа чу ԝе дәре. Чахе ль сәр сьфре рʼуньштьн у нане хԝә дьхԝарьн, Иса гот: «Әз рʼаст ԝәрʼа дьбежьм, йәки жь ԝә ԝе нәмамийа Мьн бькә, йе кӧ тʼәви Мьн нен дьхԝә». Әԝ бәр хԝә кʼәтьн у дәстпекьрьн йәк-йәк жь Ԝи пьрсин: «Дьбә кӧ әз ьм?» Әԝи ԝанрʼа гот: «Әԝ йәк нава ԝә һәр донздәһада йә, йе кӧ пәʼрийе хԝә тʼәви Мьн тʼаседа дькә. Рʼаст Кӧрʼе Мерьв ԝе ӧса һәрʼә чаԝа кӧ бона Ԝи һатийә ньвисаре. Ле ԝәй ль ԝи мәрьве кӧ нәмамийа Кӧрʼе Мерьв бькә! Ԝирʼа һе ԛәнщ бу кӧ әԝ ԛәт дьне нәкʼәта». Гава ԝана һе нан дьхԝар, Иса нан һьлда шькьри да, кәркьр да шагьрта у гот: «Һан һьлдьн! Әва бәдәна Мьн ә». Пәйрʼа кʼас һьлда шькьри да у да ԝан. Һʼәмуйа жи жь ԝе вәхԝар. У ԝанрʼа гот: «Әва хуна Мьн ә бона пәймане, кӧ бона гәләка те рʼетьне. Әз рʼаст ԝәрʼа дьбежьм, иди Әз жь вьр шунда тʼӧ щар жь мәйа тьрийе вәнахԝьм, һʼәта ԝе рʼожа кӧ Әзе Пʼадшатийа Хԝәдеда жь йа ну вәхԝьм». Паше ԝана зәбурәк стьра, дәркʼәтьн чунә чʼийайе Зәйтʼуне. У Иса ԝанрʼа гот: «Һун һʼәмуйе жи жь Мьн пʼьшк бьн һәрʼьн, чьмки ньвисар ә: ‹Әзе ль шьвен хьм у пәзе жи бәла-бәлайи бә›. Ле гава кӧ Әз жь мьрьне рʼабьм, Әзе бәри ԝә һәрʼьмә Щәлиле». Пәтрус жерʼа гот: «Һәгәр һʼәму жи жь Тә пʼьшк бьн һәрʼьн, ле әз на». Иса ԝирʼа гот: «Әз рʼаст тәрʼа дьбежьм, һәма ишәв һе бәри кӧ дик дӧ щара банг дә, те се щара Мьн инкʼар ки». Ле Пәтрус сәр йа хԝә дьма у дьгот: «Һәгәр щи бе, әзе тʼәви Тә бьмьрьм жи, ле тʼӧ щар Тә инкʼар накьм!» Һʼәмуйа жи аһа дьгот. Пәй ԝе йәкерʼа әԝ чунә ԝи щийе кӧ жерʼа Гетшәмани дьбежьн у Әԝи шагьртед Хԝәрʼа гот: «Вьра рʼунен, һʼәта кӧ Әз дӧа бькьм». Ԝи Пәтрус, Аԛуб у Йуһʼәнна тʼәви Хԝә бьрьн у дәстпекьр кʼәсәр кʼьшанд у Хԝәда шәԝьти. Ԝи ԝанрʼа гот: «Дьле Мьн һаԛас дәрд у кʼәдәр ә, мина бәр мьрьне. Вьра бьминьн у һʼьшйар бьн». Һьнәки пешда чу, Хԝә дәвәрʼу авитә әʼрде у дӧа кьр, кӧ һәгәр мәщал һәбә, әва сьһʼәта сәр Ԝирʼа дәрбаз бә. У гот: «Абба, Баво! Һәр мәщал жь дәсте Тә те. Әве кʼасе жь Мьн дур хә. Ле бьра хԝәстьна Мьн нибә, ле йа Тә бә». Паше һатә щәм шагьрта, әԝ рʼазайи дитьн у готә Пәтрус: «Шьмһʼун, тӧ рʼазайи? Тә нькарьбу кӧ сьһʼәтәке тӧ һʼьшйар бьмайи? Һʼьшйар бьминьн у дӧа бькьн, ԝәки һун нәкʼәвьнә нава щерʼьбандьне. Бәле рʼӧһʼ рʼази йә, ле бәдән сьст ә». Диса чу дӧа кьр, хут әԝ хәбәр готьн. У һат диса әԝ хәԝеда дитьн, чьмки чʼәʼвед ԝан жь хәԝе вәнәдьбун. У ньзаньбун чь щаба Ԝи бьдана. Щара сьсийа жи һат у ԝанрʼа гот: «Һун һәла һе рʼазайи нә у рʼьһʼәт дьбьн? Бәс ә! Ԝәхт перʼа гьһишт. Ва йә Кӧрʼе Мерьв дькʼәвә дәсте гӧнәкʼара. Рʼабьн әм һәрʼьн. Ва йә әԝе кӧ нәмамийа Мьн дькә незик бу». Һәма һьнге гава Ԝи һе хәбәр дьда, Щьһудайе кӧ йәк жь һәр донздәһа бу, һат. Әԝи тʼәви хԝә жь алийе сәрәкед кʼаһина, ԛанунзана у рʼуспийада әʼлаләтәкә гьран анибу, бь дара у шура. Аԝа нәмаме Ԝи әʼшәрәт дабу ԝан у готьбу: «Әз кʼижани кӧ рʼамусьм, Әԝ ә, Ԝи бьгьрьн у бь фәсал бьбьн». Һәма һьнге жи Щьһуда һатә щәм Иса у гот: «Дәрсдар! » у рʼамуса. Ԝана дәст авитә Иса у Әԝ гьртьн. Ле йәки жь йед кӧ тʼәви Ԝи сәкьни бун, шуре хԝә кʼьшанд ль хӧламе сәрәккʼаһин хьст у гӧһе ԝи пәканд. Һьнге Иса ԝанрʼа гот: «Те бежи ԝә сәр ԛачахәкида гьртийә, кӧ һун бь дара у шура һатьнә Мьн бьгьрьн? Нә Әз һәр рʼож тʼәви ԝә пʼарьстгәһеда бум Мьн һун һин дькьрьн, ле ԝә Әз нәдьгьртьм. Ле бона кӧ ньвисар бенә сери, әв йәк ԛәԝьми». Һьнге һʼәму шагьрта Әԝ һьшт у рʼәвин. Хортәк пәй Ԝи дьчу, пʼарчʼәки кʼьтане ль бәдәна ԝийә тәʼзи пʼечʼайи бу. Әʼлаләте әԝ гьрт, ле ԝи әԝ кʼьтан һьшт у рʼут-тәʼзи жь дәсте ԝан рʼәви. Иса бьрьнә щәм сәрәккʼаһин. Һʼәму сәрәкед кʼаһина, рʼуспи у ԛанунзан ԝьр щьвийан. Пәтрус дурва пʼе-пʼе пәй Ԝи чу, һʼәта кʼәтә һʼәԝша сәрәккʼаһин. Ԝьр тʼәви нобәдара ль бәр егьр рʼуньшт у хԝә гәрм дькьр. Сәрәкед кʼаһина у тʼәмамийа щьвина гьрәгьра жи ль шәʼдәтикә мьԛабьли Иса дьгәрʼийан, ԝәки Ԝи бькӧжьн, ле нә дьдитьн. Гәләка мьԛабьли Ԝи шәʼдәтийа дәрәԝ дьда, ле шәʼдәтийа ԝан һәвдӧ нәдьгьрт. Һьнге һьнәк рʼабун у мьԛабьли Ԝи шәʼдәтийа дәрәԝ дан у готьн: «Мә бьһист кӧ Ви мәрьви гот: ‹Әзе ве пʼарьстгәһа кӧ бь дәста һатийә чекьрьне һьлшиньм у се рʼожада пʼарьстгәһәкә дьнә бе дәстлекʼәтьн чекьм›». Ле шәʼдәтийа ԝан жи һәвдӧ нәдьгьрт. Һьнге сәрәккʼаһин рʼабу нава ԝанда сәкьни у жь Иса пьрси: «Бона ван шәʼдәтийа кӧ әвана мьԛабьли Тә дьдьн Тӧ чьма щабәке нади?» Ле Әԝи дәнге Хԝә нәкьр у тʼӧ щаб нәда. Сәрәккʼаһин диса жь Ԝи пьрси у готе: «Тӧ йи Мәсиһ, Кӧрʼе Йе һежайи шькьрийе?» Иса готе: «Әз ьм. У һуне Кӧрʼе Мерьв ль кʼеләка Йе Һәри Зор, ль мьле ԝийи рʼасте рʼуньшти у ль сәр әʼԝред әʼзмен те бьбиньн». Һьнге сәрәккʼаһин кʼьнщед хԝә ԛәлаштьн у гот: «Иди шәʼдә чи мәрʼа нә? Ԝә бьһист Әԝи чаԝа Хԝәде беһӧрмәт кьр! Ԝәва чаԝа хӧйа дьбә?» Һʼәмуйа жи Әԝ нәһәԛ кьрьн готьн, кӧ Әԝ йе кӧштьне йә. Һьнге һьнәка дәстпекьр тʼуйи Ԝи кьрьн, рʼуйе Ԝи ньхамтьн, данә бәр кʼӧлма у жерʼа готьн: «Дә пʼехәмбәртийе бькә!» Нобәдара жи Әԝ бьр у данә бәр шәмаԛа. Гава Пәтрус ль жере һʼәԝшеда бу, жь щарийед сәрәккʼаһин йәк һатә ԝьр. Әԝе кӧ дит Пәтрус хԝә ль бәр егьр гәрм дькә, ль ԝи ньһерʼи у гот: «Тӧ жи тʼәви әԝи ньсрәти буйи, тʼәви Иса». Ле әԝи инкʼар кьр у гот: «Әз ньзаньм у фәʼм накьм кӧ тӧ чь дьбежи». Әԝ жь һʼәԝше дәркʼәт чу сьвдәра ль бәр дәргәһ, дик банг да. Гава кӧ щарийе әԝ ль ԝе дәре дит, диса готә йед дор-бәра сәкьни бун: «Әва жи йәки жь ԝан ә». Ле әԝи диса инкʼар кьр. У хеләке шунда, йед кӧ ԝьр сәкьни бун, диса Пәтрусрʼа готьн: «Һәбә-тʼӧнәбә тӧ жи жь ԝан и, чьмки тӧ жь Щәлиле йи у хәбәрдана тә жи тә дьфьрошә ». Ле Пәтрус дәст бь ньфьрʼа кьр, сонд хԝар у гот: «Әз Ԝи мәрьви нас накьм, бона кʼижани һун дьбежьн». Перʼа-перʼа дик щара дӧда банг да. У Пәтрус әԝ готьна Иса кӧ ԝирʼа готьбу ани бира хԝә: «Бәри кӧ дик дӧ щара банг дә, те се щара Мьн инкʼар ки». Ль сәр ве йәке дәстпекьр гьрийа. Сәре сьбәһе зу сәрәкед кʼаһина тʼәви рʼуспийа, ԛанунзана у тʼәмамийа щьвина гьрәгьрарʼа шеԝьрин. Иса гьредан у бьрьн данә дәсте Пилато. Пилато жь Ԝи пьрси у гот: «Тӧ йи Пʼадше щьһуйа?» Әԝи щаб да у гот: «Тә бь дәве хԝә гот». Һьнге сәрәкед кʼаһина гәләк тьштада авитьнә Ԝи. Пилато диса жь Ԝи пьрси у гот: «Тӧ ԛәт щабәке нади? Дина Хԝә бьде, кӧ чьԛаси давежьнә Тә!» Ле Иса иди тʼӧ щаб нәда ԝи, һʼәта кӧ Пилато шаш ма. Аԝа һәр Щәжьна Дәрбазбунеда әʼдәте ԝәли бу, кӧ гьртики щьмәʼтерʼа бәрʼдә, кʼижан кӧ ԝан бьхԝәста. Гьртик кәледа һәбу наве ԝи Барабас, кӧ тʼәви рʼабәрикʼаред һәвалед хԝә сәрһьлданеда мер кӧштьбун. Әʼлаләт щьвийа у жь ԝәли хԝәст кӧ әԝ ль анәгори ԝи әʼдәте хԝә хԝәстьна ԝан бькә. Пилато жи ԝанрʼа гот: «Һун дьхԝазьн ԝәки әз бона ԝә Пʼадше щьһуйа бәрʼдьм?» Әԝи заньбу кӧ сәрәкед кʼаһина жь дәст һʼәвсудийе Иса дабунә дәсте ԝи. Ле сәрәкед кʼаһина һе нав әʼлаләте дан, кӧ бьхԝазьн ԝәки Барабас бона ԝан бе бәрʼдане. Пилато диса жь ԝан пьрси у гот: «Ле әз иди Әԝи чаԝа бькьм, йе кӧ һун жерʼа Пʼадше щьһуйа дьбежьн?» Ԝана кьрә ԛирʼин у готьн: «Ԝи хач кә!» Пилато ԝанрʼа гот: «Чьма? Әви чь хьраби кьрийә?» Ле ԝана һе дькьрә ԛирʼин: «Ԝи хач кә!» Пилато хԝәст кӧ әʼлаләт рʼази кьра, Барабас бона ԝан бәрʼда. У Иса да бәр ԛамчийа у да дәсте ԝан, ԝәки бе хачкьрьне. Һьнге әскәра Әԝ бьрә һьндӧрʼе сәрайе, аԝа готи һʼәԝша ԛәсьра ԝәли у һʼәму рʼәфа әскәра ль сәр щьвандьн. Чӧхәки ширк ле кьрьн у тʼащәк жь стьрийа вәгьрти данә сери. Дәстпекьрьн сьлав дане у готьн: «Хԝәш бә Пʼадше щьһуйа!» Пе ԛамиш ль сәре Ԝи дьхьстьн, тʼуйи Ԝи дькьрьн у ль сәр чока ль бәр Ԝи та дьбун. Ле пәй ԛәрфкьрьнерʼа, әԝ чӧхе ширк же ехьстьн, кʼьнщед Ԝи ле кьрьн у бьрьнә дәрва кӧ Ԝи хач кьн. Шьмһʼуне жь Курене, баве Скәндәр у Рʼуфо ԝьррʼа дәрбаз дьбу, кӧ жь кʼәԝшен дьһат. Әскәра пʼейи сәр ԝи кьрьн кӧ хаче Иса һьлдә. Иса бьрьнә ԝи щийе кӧ жерʼа Голгота дьготьн, кӧ те фәʼмкьрьне: «Щийе Ԛафа». Шәрава зьмьр тʼәвкьри дане кӧ вәхԝә, ле Ԝи вәнәхԝар. Әԝ хач кьрьн, сәр кʼьнщед Ԝи пʼәшк авитьн, кʼа кʼерʼа ԝе чь бькʼәвә, нава хԝәда бәла кьрьн. У сьбәһе сьһʼәт нәһә бу, гава Әԝ хач кьрьн. Ньвисара нәһәԛийа Ԝи аһа ньвисар бу: «ПʼАДШЕ ЩЬҺУЙА». Тʼәви Ԝи дӧ ԛачах жи хач кьрьн, йәк ль мьле Ԝийи рʼасте, йе дьн ль мьле Ԝийи чʼәпе. Бь ви аԝайи әԝ ньвисар һатә сери, йа кӧ дьбежә: «Әԝ тʼәви зӧлмкʼара һатә һʼәсабе». У әԝед кӧ ԝьррʼа дьчун-дьһатьн, әԝ беһӧрмәт дькьрьн, сәре хԝә дьһʼәжандьн у дьготьне: «Һейи! Нә Тәйе пʼарьстгәһ һьлшанда у се рʼожада чекьра, дә Хԝә хьлаз кә, жь хач ԝәрә хԝаре!» Ӧса жи сәрәкед кʼаһина тʼәви ԛанунзана нав хԝәда ԛәрфе хԝә ле дькьрьн у дьготьн: «Хәлԛ хьлаз кьр, ле Хԝә нькарә хьлаз кә! Дә бьра ньһа Мәсиһ, Пʼадше Исраеле жь хаче бе хԝаре, ԝәки әм бьбиньн у баԝәр бькьн». Йед тʼәви Ԝи һатьбунә хачкьрьне жи тәʼн ль Ԝи дьхьстьн. Нивро жь сьһʼәта донздәһа һʼәта сьһʼәта сьсийа, тʼәмамийа әʼрде бу тәʼри. У сьһʼәта сьсийа Иса бь дәнгәки бьльнд кьрә ԛирʼин у гот: «Елойи, Елойи, лама сабахтани?» кӧ те фәʼмкьрьне: «Хԝәдейе Мьн, Хԝәдейе Мьн, Тә чьма Әз һьштьм?» Әԝе кӧ незик сәкьнибун, гава әв хәбәр бьһистьн, готьн: «Бьньһерʼьн, Әԝ гази Елйас дькә». Жь ԝан йәк бәзи, луфька бәʼре һьлда сьркеда кьр, ԛамишәкива дани у дьрежи Ԝи кьр, кӧ вәхԝә у гот: «Бьсәкьньн. Әм бьбиньн кʼа Елйасе бе Ԝи бинә хԝаре». Иса бь дәнгәки бьльнд кьрә ԛирʼин у рʼӧһʼе Хԝә да. Ԝи чахи пʼәрʼда пʼарьстгәһе жь сери һʼәта бьни ԛәльши, бу дӧ тиша. Сәрсәде кӧ ль пешбәри Иса сәкьни бу, гава дит кӧ Иса чаԝа рʼӧһʼе Хԝә да, гот: «Рʼасти жи әва Мәрьва Кӧрʼе Хԝәде бу!» Ль ԝе дәре кʼӧлфәт жи һәбун, кӧ дурва ль ве йәке дьньһерʼин. Мәрйәма Мәждәлани, Мәрйәма дийа һәр дӧ бьра, Аԛубе бьчʼук у Йусес у ӧса жи Сәлома нав ԝанда бун. Әвана һьнге, гава Иса ль Щәлиле бу, пәй Ԝи дьчун у жерʼа хьзмәткʼари дькьрьн. Пештьри ван, гәләк кʼӧлфәтед дьн жи ԝьр һәбун, кӧ тʼәви Иса һатьбунә Оршәлиме. Әв йәк рʼожа тʼьвдарәккьрьне бу, аԝа готи рʼожа бәри шәмийе. Бәре еваре Усьве Аримәтйайи һат, әԝ йәки хԝәйиԛәдьр у әндәме щьвина гьрәгьра бу. Әԝ хԝәха жи ль һивийа Пʼадшатийа Хԝәде бу. Ԝи тӧрӧш кьр, чу щәм Пилато, щьнйазе Иса же хԝәст. Пилато бьһист кӧ Иса иди мьрийә, әʼщебмайи ма. Гази сәрсәд кьр у же пьрси: «Рʼаст ә кӧ Әԝ ӧса зу мьрийә?» Гава әԝ жь сәрсәд әʼсәйи пе һʼәсийа, щьнйаз да Усьв. Ԝи ԛәдәке кʼьтани кʼьрʼи, щьнйаз ани хԝаре, пе кʼәфән кьр, тʼьрбәкеда дани, йа кӧ ԛәйеда кʼолайи бу. Кәвьрәк һол кьрә бәр дәре тʼьрбе. Мәрйәма Мәждәлани у Мәрйәма дийа Йусес дитьн кӧ әԝ ль кʼӧ дәре һатә дәфьнкьрьне. Пәй рʼожа шәмийерʼа Мәрйәма Мәждәлани, Мәрйәма дийа Аԛуб у Сәлома чун бьһарәт кʼьрʼин, ԝәки һәрʼьн ль щьнйазе Иса дьн. Рʼожа һʼәфтийейә пешьн сәре сьбәһе зу, ԝәхте рʼо дәркʼәт, әԝ чунә сәр тʼьрбе. Ԝана рʼева һәврʼа дьгот: «Кʼи ԝе бона мә кәвьр жь бәр дәре тʼьрбе һол кә?» Чьмки кәвьр гәләки мәзьн бу. У гава кӧ ль жоре ньһерʼин, дина хԝә дане, кӧ кәвьр жь бәр һол кьри йә. У чахе чунә һьндӧрʼе тʼьрбе, дина хԝә дане, хортәки чӧхе сьпи ԝәргьрти ԝе ль алийе рʼасте рʼуньшти йә. Кʼӧлфәт гәләк зәндәгьрти ман. Ле әԝи ԝанрʼа гот: «Зәндәгьрти нәминьн! Һун ль ԝи Исайе Ньсрәте дьгәрʼьн, Йе кӧ һатә хачкьрьне. Әԝ жь мьрьне рʼабуйә! Әԝ нә ль вьр ә. Ва йә әԝ щийе кӧ Әԝ ле данибу. Дә ньһа һәрʼьн бежьнә шагьртед Ԝи у Пәтрус, кӧ Әԝе бәри ԝә һәрʼә Щәлиле. Ль ԝьр һуне Ԝи бьбиньн, чаԝа кӧ Әԝи ԝәрʼа готийә». Әԝ кʼӧлфәт жь тʼьрбе дәркʼәтьн рʼәвин, чьмки рʼьсасе әԝ гьртьбун у дьләрьзин. Кәсирʼа жи тьштәк нәготьн, чьмки саԝе ль ԝан гьртьбу. Гава Иса рʼожа һʼәфтийейә пешьн сьбәһе зу жь мьрьне рʼабу, Ԝи пешийе Хԝә нишани Мәрйәма Мәждәлани кьр, йа кӧ һʼәфт щьн же дәрхьстьбу. Әԝе жи чу әԝ йәк гиһандә әԝед кӧ тʼәви Иса гәрʼийабун, кӧ шин дькьрьн у дьгьрийан. Ле гава ԝана бьһист кӧ Иса сах ә у Хԝә нишани Мәрйәме кьрийә, баԝәр нәкьрьн. Пәй ван йәкарʼа Әԝи Хԝә дьлԛәки дьнда нишани жь ԝан дӧда кьр, йед кӧ дьчунә кʼәԝшен. Әԝана жи чун әԝ хәбәр гиһандьнә йед майин. Ле готьна ԝан жи баԝәр нәкьрьн. Пәй ве йәкерʼа Иса Хԝә нишани йанздәһа кьр, гава әԝ ль сәр сьфре рʼуньштьбун. Әԝи ль ԝан һьлат бона нәбаԝәри у сәрһʼьшкийа ԝан, чьмки ԝана йед кӧ Әԝ жь мьрьне рʼабуйи дитьбун баԝәр нәкьрьн. У ԝанрʼа гот: «Һәрʼьнә һәр чар алийед дьнйайе у Мьзгинийе бьдьнә һәр мәрьви. Әԝе кӧ баԝәр бькә у бе ньхӧмандьне ԝе хьлаз бә, ле әԝе кӧ баԝәр нәкә диԝана ԝи ԝе бьбә. Әԝе кӧ баԝәр дькьн, әв нишане ԝанрʼа дийар бьн: Бь наве Мьн ԝе щьна дәрхьн, бь зьманед ну ԝе хәбәр дьн, ԝе мәʼра бь дәсте хԝә бьгьрьн у һәгәр әԝ тьштәки жәʼр жи вәхԝьн, тʼӧ зьраре ль ԝан нәбә. Әԝе дәстед хԝә дайньнә сәр нәхԝәша у нәхԝәше ԛәнщ бьн». Аԝа Хӧдан Иса пәй ԝе хәбәрдана тʼәви ԝанрʼа һьлкʼьшийа әʼзмен у ль мьле Хԝәдейи рʼасте рʼуньшт. Шагьрт жи чун, ль һәр щийи даннасин кьрьн. Хӧдан пьштоване ԝан бу у бь ван нишана хәбәра Хԝә дьда избаткьрьне, кʼижанед кӧ бь дәсте ԝан дьбун. Тʼейофилойе хԝәйиԛәдьр, ньһа гәләка дәстпекьрийә сәрһатийа ԝан тьштед нава мәда буйи ӧса рʼез кьн, чаԝа әԝед кӧ пешийе бь чʼәʼве хԝә дитьбун у әв Мьзгини бәла дькьрьн, мәрʼа готьн. Әз жи чаԝа йәки һе зува рʼаст пәй ԝан һʼәму тьшта дьчум, мьн рʼе терʼа дит кӧ бь һур-гьли тәрʼа бьньвисьм, ԝәки тӧ рʼастийа ԝан тьштед кӧ һин буйи, бьзаньби. Чахе Һеродәс пʼадшайе Щьһустане бу, кʼаһинәк жь бәрәка Әбийа һәбу, наве ԝи Зәкәрийа бу. Жьна ԝи жи жь әʼсьле Һарун бу, наве ԝе Елизабет. Әвана һәр дӧ жи ль бәр Хԝәде рʼаст бун у нав һʼәму тʼәми у ԛанунед Хӧданда беԛӧсур дьчун. Ле зарʼед ԝан тʼӧнәбун, чьмки Елизабете зарʼ нәданин у һәр дӧйа жи әʼмьре хԝә дәрбаз кьрьбун. Аԝа чахе Зәкәрийа дора бәрәка хԝәда хьзмәткʼарийа кʼаһинтийе ль бәр Хԝәде дькьр, бь әʼдәте кʼаһинтийеда пʼәшк ԝирʼа кʼәт, кӧ һәрʼә пʼарьстгәһа Хӧдан, бьхуре бьшәԝьтинә. У дәма шәԝьтандьна бьхуре, тʼәмамийа щьмәʼте дәрва дӧа дькьр. Һьнге мьлйакʼәте Хӧдан ԝива хӧйа бу у алийе рʼастева кʼеләка горигәһа бьхуре сәкьни. Чахе Зәкәрийа дит, тʼәвиһәв бу у саԝ кʼәтә сәр ԝи. Ле мьлйакʼәт ԝирʼа гот: «Зәкәрийа, нәтьрсә! Дӧа тә һатә бьһистьне, кʼӧлфәта тә Елизабете тәрʼа кӧрʼәки бинә у те наве ԝи Йуһʼәнна дайни. Әԝе тәрʼа бьбә әшԛ у шайи у гәләке бь буйина ԝи ша бьн. Чьмки әԝе ль бәр Хӧдан мәзьн бә. Тʼӧ щар гәрәке шәрав-араԛе вәнәхԝә. У һе зьке дийа хԝәда, ԝе бь Рʼӧһʼе Пироз тʼьжи бә. Ԝе жь зарʼед Исраеле гәләка бәрбь Хӧдан Хԝәдейе ԝан вәгәрʼинә. Әԝе бь рʼӧһʼ у ԛәԝата Елйас пʼехәмбәр пешийа Хӧданва һәрʼә, ԝе дьле бава сәр зарʼада у нәельма бәрбь фәʼмдарийа рʼаста вәгәрʼинә, ԝәки щьмәʼтәке бона Хӧдан һазьр кә». Зәкәрийа мьлйакʼәтрʼа гот: «Әзе ве йәке чаԝа бьзаньбьм? Әз кал ьм у кʼӧлфәта мьн жи әʼмьре хԝә иди дәрбаз кьрийә». Мьлйакʼәт ле вәгәрʼанд у готе: «Әз Щьбрайил ьм, кӧ ль бәр Хԝәде дьсәкьньм. У әз һатьмә шандьне, кӧ тәрʼа бежьм у ве мьзгинийе бьдьмә тә. Ва те лал би у нькарьби хәбәр ди, һʼәта ԝе рʼожа кӧ әв тьшт бенә сери, чьмки тә әԝ готьнед мьн баԝәр нәкьрьн, кӧ ԝе ԝәхте хԝәда бенә сери». Һʼәта һьнге щьмәʼт һивийа Зәкәрийа бу у әʼщебмайи дьман, кӧ әԝ пʼарьстгәһеда дәрәнги дькʼәт. У чахе әԝ дәркʼәтә дәрва, иди нькарьбу ԝанарʼа хәбәр да. Ԝана шьк бьр, кӧ пʼарьстгәһеда тьшт һатийә ль бәр чʼәʼва. У әԝи бь нишана ԝанарʼа хәбәр дьда у лал ма. Гава рʼожед хьзмәткьрьна ԝи хьлаз бун, чу мала хԝә. Пәй ԝан рʼожарʼа, кʼӧлфәта ԝи, Елизабет һʼәмлә дәркʼәт, пенщ мәһа әԝе хԝә вәдьшарт у дьгот: «Әв чь йәк бу ван рʼожада Хӧдан бона мьн кьр, һʼале мьнда ньһерʼи у ԛара мьн жь нав мәрьва да һьлдане». Мәһа шәшада Хԝәде мьлйакʼәт Щьбрайил шандә бажарәки Щәлиле кӧ наве ԝи Ньсрәт бу, щәм ԛизәкә бькʼьр, йа кӧ мәрьвәки бь наве Усьве мала Даԝьдрʼа нишанкьри бу. Наве ԛизьке Мәрйәм бу. Мьлйакʼәт ԝева хӧйа бу у готе: «Сьлав ль тә ԛизька кʼәрәм ле буйийе, Хӧдан тʼәви тә йә ». Әԝа сәр готьна ԝи тʼәвиһәв бу у фькьри: «Гәло әв чь сьлав ә?» У мьлйакʼәт жерʼа гот: «Мәрйәм, нәтьрсә! Чьмки тә кʼәрәм жь Хԝәде станд. Ва те һʼәмлә дәрейи Кӧрʼәки бини у наве Ԝи Иса дайни. Әԝе мәзьн бә у Кӧрʼе Йе Һәри Жорьн ԝе бе готьне. У Хӧдан Хԝәде ԝе тʼәхте баве Ԝи Даԝьд бьдә Ԝи. Әԝе һʼәта-һʼәтайе пʼадшатийе сәр мала Аԛуб бькә у хьлазийа Пʼадшатийа Ԝи ԝе тʼӧнәбә». Мәрйәме мьлйакʼәтрʼа гот: «Әв йәке чаԝа бьбә, чьмки әз һәла һе ԛиз ьм?» Мьлйакʼәт ле вәгәрʼанд у гот: «Рʼӧһʼе Пироз ԝе бе сәр тә у ԛәԝата Йе Һәри Жорьн ԝе сәр тә бькә си. Бона ве йәке әԝ Пирозе кӧ ԝе жь тә бьбә, әԝ Кӧрʼе Хԝәде ԝе бе готьне. Ва йә омьда тә Елизабет жи, йа кӧ безӧрʼәт дьһатә готьне, ԝе мәзьнайийа хԝәда әва мәһа шәша йә кӧрʼәкида һʼәмлә йә. Чьмки щәм Хԝәде тьштәки нәбуйине тʼӧнә». Ԝи чахи Мәрйәме гот: «Әз щарийа Хӧдан ьм. Бьра анәгори готьна тә бона мьн бьбә». У мьлйакʼәт жь щәм ԝе чу. Ԝан рʼожада Мәрйәм рʼабу ләз чу алийе чʼийа, бажарәки Щьһуда. Әԝ кʼәтә мала Зәкәрийа у сьлав да Елизабете. Гава Елизабете сьлава Мәрйәме бьһист, зарʼок зьке ԝеда львийа. Елизабет Рʼӧһʼе Пирозва тʼьжи бу у бь дәнгәки бьльнд кьрә гази гот: «Тӧ нав кʼӧлфәтада бьмбарәк и у бәре зьке тәда жи бьмбарәк ә. Әв чь бәхтәԝарик ә кӧ дийа Хӧдане мьн сәр мьнда һат? Гава дәнге сьлава тә кʼәтә гӧһе мьн, зарʼок зьке мьнда жь шабуна лист. Хԝәзи ль ԝе, кӧ готьна Хӧдан баԝәр дькә, кӧ чь жерʼа һатийә готьне, ԝе бе сери». Мәрйәме гот: «Нәфса мьн пәсьне Хӧдан дьдә у рʼӧһʼе мьн бь Хԝәде Хьлазкьре мьн ша дьбә, чьмки Әԝи бәре Хԝә мьлуктийа щарийа Хԝәда кьр. Ва жь вьр шунда һʼәму ньсьле хԝәзийа хԝә ль мьн биньн, чьмки Хԝәдейе Зор бона мьн тьштед пʼьрʼ мәзьн кьрьн. Наве Ԝи пироз ә. Рʼәʼма Ԝи ԛьрʼнә-ԛьрʼнә ль сәр ԝан ә, йед кӧ жь Ԝи дьтьрсьн. Ԛәԝата дәсте Хԝә Әԝи да кʼьфше у йед кӧ дьле хԝәда кʼӧбар-бабах ьн бәла-бәлайи кьрьн. Йед ԛәԝат жь кʼӧрсийа анин хԝаре у йед мьлук бьльнд кьрьн. Йед бьрʼчи бь тьштед ԛәнщ тʼер кьрьн у йед дәԝләти дәствала вәрʼекьрьн. Рʼәʼма Хԝә ани бира Хԝә, али хӧламе Хԝә, Исраел кьр, чаԝа кал-бавед мә, Бьраһим у зӧрʼәта ԝирʼа бона һʼәта-һʼәтайе созе Хԝә дабу». Мәрйәм ԝәкә се мәһа щәм Елизабете ма, паше вәгәрʼийа мала хԝә. Аԝа дәма ԝәльдандьна Елизабете перʼа гьһишт, кӧрʼәк жерʼа бу. Һәвал-һогьред ԝе бьһистьн кӧ Хӧдан рʼәʼма хԝәйә мәзьн бона ԝе кьрийә, тʼәви ԝе ша дьбун. Рʼожа һʼәйштада һатьн кӧ кӧрʼьк сьнәт кьн у наве баве ԝи Зәкәрийа ле кьн. Ле дийа ԝи гот: «На, наве ԝи гәрәке Йуһʼәнна бә». Ԝерʼа готьн: «Нава мәрьвед тәда бь ԝи нави кәсәк тʼӧнә». Һьнге ԝана бь нишана жь баве ԝи пьрсин кӧ чь нави дьхԝазә ԝи кә. Әԝи жи тʼәхтәк хԝәст у ль сәр ньвиси: «Наве ԝи Йуһʼәнна йә». Һʼәму әʼщебмайи ман. Дәстхԝәда зар-зьмане ԝи вәбу, хәбәр да, шькьри да Хԝәде. Тьрсе һʼәму щинаред ԝан гьрт у тʼәмамийа чʼийайед Щьһустанеда бона ве йәке дьһатә готьне. Һʼәмуйед кӧ дьбьһистьн, бира хԝәда хԝәй дькьрьн, дьготьн: «Гәло әв кӧрʼьке бьбә чь?» Чьмки дәсте Хӧдан перʼа бу. Баве ԝи Зәкәрийа бь Рʼӧһʼе Пироз тʼьжи бу, пʼехәмбәрти кьр у гот: «Шькьр жь Хӧдан Хԝәдейе Исраелерʼа кӧ сәрик да щьмәʼта Хԝә у азайи жерʼа ани. Жь мала хӧламе Хԝә Даԝьд бона мә Хьлазкьрәки зор рʼакьр, чаԝа Әԝи һе бәреда бь дәве пʼехәмбәред Хԝәйә пироз готийә, кӧ әм жь дьжмьнед хԝә у дәсте һʼәму хернәхԝаза хьлаз бьн, рʼәʼме кал-бавед мә бькә, пәймана Хԝәйә пироз у ԝе сонда кӧ баве мә Бьраһимрʼа хԝар бир бинә, ԝәки жь дәсте дьжмьна азабуйи, әм бькарьбьн бе тьрс у хоф, һʼәму рʼожед әʼмьре хԝәда, рʼаст у һʼәлал Ԝи бьһʼәбиньн. Тӧ, ло кӧрʼько, те пʼехәмбәре Йе Һәри Жорьн бейи готьне, те пешийа Хӧданва һәрʼи, ԝәки рʼийа Ԝи һазьр ки у занәбуна азайийе бьди щьмәʼта Ԝи бь бахшандьна гӧнед ԝан. Жь рʼәʼм у һʼӧба Хԝәдейе мә чаԝа жорда рʼо кӧ дәрте, ӧса ԝе сәрики бьдә мә, ԝәки йед кӧ тәʼристанийе у бьн сийа мьрьнеда дьминьн рʼонайи кә у ньгед мә дайнә сәр рʼийа әʼдьлайийе». Кӧрʼьк мәзьн дьбу у бь рʼӧһʼ ԛәԝат дьгьрт у һʼәта рʼожа Исраелева хӧйа бу жи ль бәрʼийе дьма. Ԝан рʼожада жь Аԝгустойе Ԛәйсәр әʼмьр дәркʼәт, кӧ һʼәму мәрьвед Императорийа Рʼомайе бенә навньвисаре. Әв навньвисара пешьн һена Куренйойе ԝәлийе Сурйайеда һатә кьрьне. Һʼәму дьчунә бажаре хԝә, кӧ һәр кәс наве хԝә бьдә ньвисаре. Усьв жи жь бажаре Ньсрәта Щәлиле рʼабу һәвраз чу Щьһустане, бажаре буйина Даԝьд, кӧ жерʼа Бәйтләһʼм дьготьн, чьмки әԝ жь мал у ԛәбила Даԝьд бу. Әԝ чу кӧ тʼәви Мәрйәма дәргистийа хԝә бькʼәвә навньвисаре. Мәрйәм жи һʼәмлә бу. Чахе әԝана ль Бәйтләһʼме бун, рʼожа ԝәльдандьна ԝе перʼа гьһишт у кӧрʼе хԝәйи Ньхӧри ани, Әԝ пʼечʼәкеда пʼечʼа у афьрʼда дани, чьмки меванханеда бона ԝан щи тʼӧнәбу. Ль ԝьр чоле шьван һәбун, кӧ ԝе шәве хԝәйитийа кәрийе пәзед хԝә дькьрьн. Мьлйакʼәте Хӧдан ԝанва хӧйа бу у рʼумәта Хӧдан дора ԝан шәԝԛ да, әԝ гәләки тьрсийан. Ле мьлйакʼәт ԝанарʼа гот: «Нәтьрсьн! Ва йә әз Мьзгинийа шабунәкә мәзьн дьдьмә ԝә, кӧ ԝе бона тʼәмамийа мьләт бә. Иро ԝәрʼа бажаре Даԝьдда Хьлазкьрәк бу, әԝ Мәсиһ Хӧдан ә. Әва ԝәрʼа бьбә нишан: Һуне зарʼокәке пʼечʼәкеда пʼечʼайи афьрʼда бьбиньн». Ньшкева тʼәви ԝи ордикә мьлйакʼәтед әʼзманайә мәзьн кʼьфш бу, пәсьне Хԝәде дьдан у дьготьн: «Шькьр Хԝәдейе Һәри Жорьнрʼа, әʼдьлайи сәр дьне ԝан мәрьварʼа, жь кʼижана Хԝәде рʼази йә ». Гава мьлйакʼәт жь ԝан дур кʼәтьн һьлатьнә әʼзмен, шьвана һәврʼа гот: «Дә ԝәрьн әм һәрʼьнә Бәйтләһʼме, әв тьште буйи, кӧ Хӧдан әм пе һʼәсандьн, бьбиньн». У бь ләз һатьн, Мәрйәм, Усьв у Зарʼа афьрʼда рʼазайи дитьн. Гава Әԝ дитьн, чь кӧ бона Кӧрʼьк ԝанрʼа һатьбу әʼламкьрьне, готьн. Һәр кәсе кӧ жь шьвана әв тьшт дьбьһистьн, зәндәгьрти дьман. Ле Мәрйәме әв һʼәму тьшт дьле хԝәда хԝәй дькьрьн у ль сәр ԝан дьфькьри. Шьван вәгәрʼийан, бона тьштед бьһисти у дити пәсьн у шькьри дьданә Хԝәде. Әв һʼәму ӧса бун чаԝа ԝанарʼа һатьбу готьне. Рʼожа һʼәйшта гава кӧрʼьк сьнәт кьрьн, наве Ԝи Иса данин, чаԝа кӧ һе бәри һʼәмләбуна де, мьлйакʼәт бона ве йәке готьбу. Чахе анәгори Ԛануна Муса рʼожед паԛьжбуна ԝан тʼәмам бун, кӧрʼьк бьрьнә Оршәлиме, кӧ Ԝи пʼешкʼеши Хӧдан кьн, чаԝа кӧ Ԛануна Хӧданда ньвисар ә: «Һәр ньхӧрики нерин кӧ бәтʼьне вәдькә, нәдьре Хӧдан бә» у ль гора готьна Ԛануна Хӧдан: «Щотәк фатьмок йан жи дӧ щущукед кәвотка» һʼәди бе дайине. Һьнге мәрьвәк Оршәлимеда һәбу, наве ԝи Шьмһʼун бу. Әԝ мәрьвәки рʼаст, хԝәдехоф у ль һивийа бәрдьлийа Исраеле бу. Рʼӧһʼе Пироз жи ль сәр ԝи бу у ԝирʼа готьбу: «Һʼәта кӧ тӧ Мәсиһе Хӧдан нәбини, намьри». Һьнге әԝ бь рʼебәрийа Рʼӧһʼ һатә пʼарьстгәһе. Чахе де у бавева Исайе бьчʼук анин кӧ ль гора әʼдәте Ԛануне бона Ԝи бькьн, Шьмһʼун Кӧрʼьк һьлда да һʼәмеза хԝә, шькьри да Хԝәде у гот: «Йа Хԝәйи, ньһа ль гора созе Хԝә бь хер у сьламәт бәрдәстийе Хԝә бәрʼдә. Чьмки чʼәʼве мьн азакьрьна Тә дит, йа кӧ Тә бәр чʼәʼве һʼәму мьләта һазьр кьрийә, кӧ бьбә рʼонайийа бәр чʼәʼве нәщьһуйа у ԛәдьр-һӧрмәт щьмәʼта Тә Исраелрʼа». Де у баве Ԝи сәр тьштед кӧ Шьмһʼун бона Ԝи дьготьн, зәндәгьрти мабун. Шьмһʼун дӧа ԝан кьр у дийа Ԝи Мәрйәмерʼа гот: «Бьбьһен, Әва әԝи кʼьфшкьри йә, Йе кӧ ԝе Исраеледа бьбә сәбәбе кʼәтьн-рʼабуна гәләка, ӧса жи бьбә нишанәк, кӧ гәләке мьԛабьли Ԝи рʼабьн у бь ви аԝайи фькьред гәләк дьла ԝе әʼйан бьн. У дьле тәрʼа жи мина тирәке ԝе дәрбаз бә». Ль ԝьр жь рʼькʼьнйата Ашер, ԛизәкә Фаноԝелә пʼехәмбәр һәбу, наве ԝе Һана. Әԝе гәләк әʼмьр дәрбаз кьрьбу, пәй ԛизтийа хԝәрʼа һʼәфт сала щәм мере хԝә мабу. Әԝ жьнәбикә һʼәйште чар сали бу у жь пʼарьстгәһе дур нәдькʼәт, шәв у рʼож бь дӧа у рʼожийа Хԝәде дьһʼәбанд. Әва жи ԝе дәме һат, шькьри да Хԝәде у тʼәви һʼәмуйед кӧ чʼәʼвньһерʼийа азабуна Оршәлиме бун, дәрһәԛа кӧрʼькда хәбәр да. Гава Усьв у Мәрйәме һәр тьшт ль гора Ԛануна Хӧдан кьрьн, вәгәрʼийанә Щәлиле, бажаре хԝә Ньсрәте Кӧрʼьк мәзьн у ԛәԝат дьбу, бь сәрԝахтийе тʼьжи дьбу, кʼәрәма Хԝәде жи бь Ԝирʼа бу. Де у баве Ԝи һәр сал Щәжьна Дәрбазбунеда дьчунә Оршәлиме. Чахе Әԝ бу донздәһ сали, ль гора әʼдәт әԝана һәвраз чунә щәжьне. Гава рʼожед щәжьне хьлаз бун у пашда вәдьгәрʼийанә мала хԝә, Исайе хьшим ль Оршәлиме ма. Ле де у баве Ԝи һаш жь Ԝи тʼӧнәбун, ԝана тʼьре тʼәви рʼеԝийа йә. Рʼийа рʼожәке һатьн, нав һәвал-һогьред хԝәда ль Ԝи гәрʼийан. Гава Әԝ нәдитьн, пашда вәгәрʼийанә Оршәлиме, ль Ԝи гәрʼийан. Рʼожа сьсийа ԝана Әԝ пʼарьстгәһеда дит. Әԝ тʼәви дәрсдара рʼуньштьбу, гӧһдарийа ԝан дькьр у пьрс дьданә ԝан. Һʼәмуйед кӧ хәбәрдана Ԝи дьбьһистьн, сәр занәбун у щабед Ԝи зәндәгьрти дьман. Гава де у баве Ԝи әԝ дитьн, һʼәйирин у дийа Ԝи жерʼа гот: «Лаԝо! Тә чьма ӧса сәре мә кьр? Әз у баве тә кʼәл-бин ль Тә дьгәрʼийан». Әԝи ԝанрʼа гот: «Һун чьма ль Мьн дьгәрʼийан? Ԝә ньзаньбу гәрәке Әз мала Баве Хԝәда бьм?» Ле ԝана фәʼм нәкьр Әԝи чь гот. Әԝ тʼәви ԝан вәгәрʼийа һатә Ньсрәте у гӧрʼа ԝанда бу. Ле дийа Ԝи әв һʼәму тьшт дьле хԝәда хԝәй дькьрьн. У Иса бь сәрԝахтийе у бәжьнеда пешда дьчу у ль Хԝәде у мәрьва хԝәш дьһат. Панздәһ салийа пʼадшатийа Тибәрйойе Ԛәйсәрда, Пилатойе Понтийо ԝәлийе Щьһустане бу, Һеродәс сәрԝере Щәлиле бу, Филипойе бьре ԝи сәрԝере ԛәза Итурйайе у Трахонидайе бу у Лусанйас сәрԝере Авелинйайе бу, Һәнан у Ԛәйафа жи сәрәккʼаһин бун. Һьнге хәбәра Хԝәде бәрʼийеда Йуһʼәннайе кӧрʼе Зәкәрийарʼа һат у Йуһʼәнна һатә һʼәму дор-бәред чʼәме Урдӧне даннасин дькьр, кӧ щьмәʼт жь гӧнәкьрьне вәгәрʼә у бь аве бе ньхӧмандьне, ԝәки Хԝәде ԝан бьбахшинә. Чаԝа кʼьтеба Ишайа пʼехәмбәрда ньвисар ә кӧ дьбежә: «Дәнге бәрʼийеда дькә гази: ‹Рʼийа Хӧдан һазьр бькьн у шьвәрʼийед Ԝи рʼаст бькьн. Һʼәму гәли бьра тʼьжи бьн, чʼийа-бани ньмьз бьн, рʼийед харо-маро рʼаст бьн у чʼәʼл-чʼул дуз бьн. У һәр кәсе азайийа Хԝәде бьбинә›». Гәләк дьһатьнә щәм Йуһʼәнна, кӧ жь ԝи бенә ньхӧмандьне. Әԝи ԝанрʼа дьгот: «Чʼежькед мәʼра! Кʼе ԝәрʼа гот, кӧ һун жь хәзәба те бьрʼәвьн? Дә бь кьред ԛәнщ бьдьнә кʼьфше, кӧ һун жь гӧнәкьрьне вәгәрʼийанә. У рʼанәбьн нәбежьн: ‹Бьраһим баве мә йә›. Әз ԝәрʼа дьбежьм, кӧ Хԝәде жь ван кәвьра жи дькарә зарʼа Бьраһимрʼа дәрхә. Ва йә бьвьр ль сәр рʼаԝе даре йә. Һәр дара кӧ бәре ԛәнщ нәйнә, ԝе бе бьрʼине у авитьне нава егьр». Әʼлаләте жь ԝи пьрси у гот: «Ле әм чь бькьн?» Әԝи ль ԝан вәгәрʼанд у гот: «Дӧ дәст кʼьнще кʼе һәнә, бьра йәки бьдә ԝи, йе кʼе кӧ тʼӧнә у хӧрәке кʼе һәйә, бьра диса ӧса бькә». Хәрщгьр жи һатьн кӧ бенә ньхӧмандьне у ԝирʼа готьн: «Дәрсдар, әм чь бькьн?» Әԝи ԝанрʼа гот: «Чьԛас жь ԝә те хԝәстьне жь ԝи зедәтьр нәстиньн». Әскәра жи жь ԝи пьрси: «Ле әм чь бькьн?» Әԝи ԝанрʼа гот: «Кәсәки нәшелиньн, бебәхтийе ль хәлԛе нәкьн у бь һәԛе хԝә рʼази бьн». Һʼәму һивийе бун у бона Йуһʼәнна дьле хԝәда дьготьн: «Гәло әв ә Мәсиһ?» Йуһʼәнна ль һʼәмуйа вәгәрʼанд у гот: «Әз ԝә бь аве дьньхӧминьм, ле Йәки жь мьн ԛәԝаттьр ԝе бе. Әз нә һежа мә бәне чарьхед Ԝи жи вәкьм. Әԝе ԝә пе Рʼӧһʼе Пироз у егьр бьньхӧминә. Мәлһʼәба Ԝи дәсте Ԝида йә. Әԝе бедәра Хԝә паԛьж кә, гәньм бькә әʼмбара Хԝә, ле кайе ԝе бь агьре кӧ натәмьрә бьшәԝьтинә». Аԝа Йуһʼәнна бь гәләк тьштед дьн жи хәлԛ ширәт дькьр у Мьзгини дьда. Ле гава Йуһʼәнна ль Һеродәсе сәрԝер жи һьлат бона Һеродийа жьна бьре ԝи у һʼәму хьрабийед кӧ ԝи дькьрьн, һьнге Һеродәс сәр ван кьрьнада әв нәһәԛи жи кьр, кӧ Йуһʼәнна авитә кәле. Гава һʼәму щьмәʼт дьһатә ньхӧмандьне, Иса жи һатә ньхӧмандьне. Ԝе дәме кӧ дӧа дькьр, әʼзман вәбу у Рʼӧһʼе Пироз бь бәдәни мина кәвоткәке сәр Ԝи дани у дәнгәк жь әʼзмен һат у гот: «Тӧ кӧрʼе Мьни дәлал и, кӧ Әз жь Тә рʼази мә». Иса незики си сали бу, гава Әԝи дәст бь кʼаре Хԝә кьр у ԝан тʼьре Әԝ кӧрʼе Усьв бу, Усьве Әли, Әлийе Мәтат, Мәтате Леԝи, Леԝийе Мәлкʼе, Мәлкʼейе Йаннай, Йаннайе Усьв, Усьве Мәтитийа, Мәтитийайе Амос, Амосе Нәһум, Нәһуме Һәсли, Һәслийе Нәщай, Нәщайе Мәһат, Мәһате Мәтитийа, Мәтитийайе Шемәйин, Шемәйине Йусех, Йусехе Йода, Йодайе Йуһәнан, Йуһәнане Рʼеша, Рʼешайе Зәрубабәл, Зәрубабәле Шалтийел, Шалтийеле Нәри, Нәрийе Мәлкʼе, Мәлкʼейе Еди, Едийе Ԛосам, Ԛосаме Елмәдам, Елмәдаме Әр, Әре Йешу, Йешуйе Елийазер, Елийазере Йорим, Йориме Мәтат, Мәтате Леԝи, Леԝийе Шьмһʼун, Шьмһʼуне Щьһуда, Щьһудайе Усьв, Усьве Йонам, Йонаме Елйаԛим, Елйаԛиме Мәлйо, Мәлйойе Мәна, Мәнайе Мәтитийа, Мәтитийайе Натʼан, Натʼане Даԝьд, Даԝьде Йеша, Йешайе Овед, Оведе Боԝаз, Боԝазе Сәлмон, Сәлмоне Нәһшон, Нәһшоне Аминадав, Аминадаве Админ, Админе Арам, Араме Һәсрун, Һәсруне Перес, Пересе Щьһуда, Щьһудайе Аԛуб, Аԛубе Исһаԛ, Исһаԛе Бьраһим, Бьраһиме Тераһ, Тераһе Нәһор, Нәһоре Сәрух, Сәрухе Рʼеԝо, Рʼеԝойе Пелег, Пелеге Әбәр, Әбәре Шәлаһ, Шәлаһе Ԛенан, Ԛенане Арпәхшад, Арпәхшаде Сам, Саме Нӧһ, Нӧһе Ламәх, Ламәхе Мәтушәла, Мәтушәлайе Һәнох, Һәнохе Йаред, Йареде Маһалалел, Маһалалеле Ԛенан, Ԛенане Әнош, Әноше Сетʼ, Сетʼе Адәм у Адәме Хԝәде. Иса бь Рʼӧһʼе Пирозва тʼьжи жь Урдӧне вәгәрʼийа, Рʼӧһʼ бәрʼийеда рʼебәрийа Ԝи дькьр, чьл рʼожи жь мирещьн һатә щерʼьбандьне. Әԝи ԝан рʼожада тьштәк нәхԝар у гава әԝ рʼож дәрбаз бун, бьрʼчи бу. Һьнге мирещьн Ԝирʼа гот: «Һәгәр Тӧ Кӧрʼе Хԝәде йи, ви кәвьрирʼа бежә кӧ бьбә нан». Иса ле вәгәрʼанд у гот: «Ньвисар ә: ‹Инсан тʼәне бь нен нажи› ». Һьнге мирещьн Әԝ рʼакьрә сәр щики бьльнд, дәԛеда һʼәму пʼадшатийед дьнйайе нишани Ԝи дан у готә Ԝи: «Әзе рʼәԝш у сәрԝертийа ван һʼәмуйа бьдьмә дәсте Тә, чьмки мьнрʼа һатийә дайине у кʼерʼа кӧ бьхԝазьм әзе бьдьме. Һәгәр ньһа Тӧ сәре хԝә ль бәр мьн дайни, әв һʼәму ԝе пʼара Тә бьн». Иса ле вәгәрʼанд у гот: «Ньвисар ә: ‹Сәре хԝә ль бәр Хӧдан Хԝәдейе хԝә дайнә у тʼәне Ԝи бьһʼәбинә!› » Паше мирещьн Иса бьрә Оршәлиме, Әԝ сәр бьльндщийа бане пʼарьстгәһе да сәкьнандьне у готә Ԝи: «Һәгәр Тӧ Кӧрʼе Хԝәде йи, дә Хԝә жь вьр бавежә хԝаре. Чьмки ньвисар ә: ‹Хԝәде ԝе тʼәмийа Тә бьдә мьлйакʼәтед Хԝә, кӧ Тә хԝәй кьн› у: ‹Әԝе Тә сәр дәсте хԝә бьгьрьн, ԝәки ньге Тә кәвьр нәкʼәвә› ». Иса ле вәгәрʼанд у гот: «Һатийә готьне кӧ: ‹Хӧдан Хԝәдейе хԝә нәщерʼьбинә!› » У гава мирещьн һʼәму щерʼьбандьн хьлаз кьрьн, дәмәке жь Ԝи дур кʼәт. Иса бь ԛәԝата Рʼӧһʼ вәгәрʼийа Щәлиле у нав-дәнге Ԝи һʼәму алийед ԝи ԝәлатида бәла бу. Әԝи кʼьништед ԝанда һин дькьр у һʼәмуйа пәсьне Ԝи дьдан. Әԝ һатә Ньсрәте, ԝи щийе кӧ Әԝ ле мәзьн бьбу, мина әʼдәте Хԝә рʼожа шәмийе Әԝ кʼәтә кʼьниште у рʼабу кӧ бьхунә. Кʼьтеба Ишайа пʼехәмбәр данә Ԝи у гава кʼьтеба гӧломатккьри вәкьр, әԝ щи дит кӧ аһа ньвисар бу: «Рʼӧһʼе Хӧдан ль сәр Мьн ә, чьмки Әԝи Әз бь рʼункьрьне кʼьфш кьрьм, ԝәки Мьзгинийе бьдьмә фәԛира, у Әз шандьмә һесирарʼа бой сәрбәстийе у корарʼа бой дитьне даннасин кьм, азайийе бьдьмә бьндәста у сала Хӧданә рʼәʼме жи бьдьмә наскьрьне». У кʼьтеб гӧломатк кьр да бәрдәсти рʼуньшт у кʼьништеда һʼәму зурʼ бьбун ль Ԝи дьньһерʼин. Әԝи дәстпекьр ԝанарʼа гот: «Әва ньвисара иро һатә сери, гава ԝә бьһист». Һʼәмуйа жи бона Ԝи ԛәнщ хәбәр дьдан у сәр хәбәрдана Ԝийә мәʼрифәт зәндәгьрти мабун у дьготьн: «Әва нә кӧрʼе Усьв ә?» Әԝи ԝанрʼа гот: «Һуне рʼаст ве готьне сәр Мьн бежьн: ‹Һʼәкимо! Дә һʼәкимтийе ль хԝә бькә. У әԝ тьштед мә бьһистьн кӧ Тә Кәфәрнаһумеда кьрьн, ль вьр щи-мьскʼәне хԝәда жи бькә›». У гот: «Әз рʼаст ԝәрʼа дьбежьм, пʼехәмбәр щи-мьскʼәне хԝәда беԛәдьр ә. Әз рʼастийе ԝәрʼа дьбежьм, гәләк жьнәби Исраеледа һена Елйасда һәбун, чахе се сал у шәш мәһа әʼзман һатә гьртьне у тʼәмамийа ԝәлетда бу хәлайикә гьран. Ле Елйас кәсәкирʼа нәһатә шандьне, пештьри жьнәбийа жь бажаре Сәрәпта Сайдерʼа. У гәләк кʼоти жи Исраеледа һена Елиша пʼехәмбәрда һәбун у жь ԝан тʼӧ кәс паԛьж нәбу, пештьри Нәʼмане жь Сурйайе». Гава һʼәмуйед кʼьништеда әв йәк бьһистьн, һерс кʼәтьн. Рʼабун Әԝ жь бажер дәрхьстьн, бьрьн сәр ԝи чʼийайе ль кʼӧ бажаре ԝан һатьбу чекьрьне, ԝәки Ԝи жь кәнделда бавежьн. Ле Әԝ нав ԝанрʼа дәрбаз бу чу. Иса бәржер бу һатә бажаре Кәфәрнаһума Щәлиле у рʼожа шәмийе әԝ һин дькьрьн. Әԝ ль сәр һинкьрьна Ԝи зәндәгьрти мабун, чьмки хәбәрдана Ԝи бь һʼӧкӧм бу. У кʼьништеда мәрьвәк һәбу, кӧ рʼӧһʼе щьнайи һʼәрам перʼа һәбу. Әԝи бь дәнгәки бьльнд кьрә ԛирʼин: «Ԝәйе! Тӧ чь жь мә дьхԝази Исайе Ньсрәте? Тӧ һатийи ԛьрʼа мә бини? Әз заньм Тӧ кʼи йи. Тӧ Пирозе Хԝәде йи!» Иса ле һьлат у гот: «Кәрʼ бә у же дәркʼәвә!» Щьн әԝ бәр ԝан ль әʼрде хьст у бе зьрардайин жь ԝи дәркʼәт. Һʼәму зәндәгьрти ман, һәврʼа дьготьн: «Әв чь готьн ә? Әԝ бь һʼӧкӧм у ԛәԝате әʼмьри ль рʼӧһʼед һʼәрам дькә у дәрдькʼәвьн?» У бәʼса Ԝи һʼәму дор-бәра бәла дьбу. Әԝ жь кʼьниште дәркʼәт чу мала Шьмһʼун. Хԝәсийа Шьмһʼун тәʼл тʼайеда дьнәʼлийа у бона ԝе жь Ԝи һиви кьрьн. Иса сәр ԝерʼа сәкьни, ль тʼайе һьлат у тʼайе же бәрʼда. Дәстхԝәда рʼабу сәр хԝә, бәрдәсти ԝанрʼа кьр. Гава рʼо дьчу ава, һʼәмуйед кӧ щурʼә-щурʼә нәхԝәшийед ԝан һәбун анинә щәм Ԝи. Әԝи дәсте Хԝә дани сәр ԝан һәр йәки у әԝ ԛәнщ кьрьн. Жь гәләка жи щьн дәрдькʼәтьн, дькьрьнә ԛирʼин у дьготьн: «Тӧ Кӧрʼе Хԝәде йи!» Ле Иса ль ԝан һьлат у нәдьһьшт әԝ хәбәр дьн, чьмки заньбун кӧ Әԝ Мәсиһ ә. Сьбәһ кӧ зәлал бу, Иса рʼабу чу щики хәԝлә. Әʼлаләт ль Ԝи дьгәрʼийан у һʼәта щәм Ԝи һатьн, нәдьһьштьн кӧ Әԝ дәст жь ԝан бькʼьшинә. Ле Әԝи ԝанрʼа гот: «Гәрәке Әз бажаред дьнда жи Мьзгинийа Пʼадшатийа Хԝәде бьдьм, чьмки Әз бона ԝе йәке һатьмә шандьне». У кʼьништед Щьһустанеда даннасин дькьр. Щарәке Иса ль бәр гола Щенисарте сәкьнибу у әʼлаләте дора Ԝи гьрт, кӧ хәбәра Хԝәде бьбьһе. У Әԝи дӧ ԛәйьк дәве голе дитьн, мәʼсигьр жь ԝан дәркʼәтьбун у тʼорʼед хԝә дьшуштьн. Иса кʼәтә ԛәйькәкә жь ԝан, кӧ йа Шьмһʼун бу, һиви жь ԝи кьр, кӧ ԛәйьке һьнәки жь бәже дур хә. У Әԝ рʼуньшт, жь ԛәйьке әʼлаләт һин кьр. Чахе Әԝи хәбәрдана Хԝә хьлаз кьр, Шьмһʼунрʼа гот: «Ԛәйьке бьбә щийе кʼур у тʼорʼед хԝә бавежьнә нечʼире». Шьмһʼун ле вәгәрʼанд у гот: «Мамоста, мә тʼәмамийа шәве кьр-нәкьр тьштәк нәгьрт, ле бона хатьре Тә әзе тʼорʼа бавежьме». У гава ӧса кьрьн, һаԛас мәʼси кʼәтьне, кӧ тʼорʼед ԝан дьԛәтийан. У бь нишана гази һәвалед хԝәйә ԛәйька дьнда дькьрьн, кӧ бен али ԝан бькьн. У әԝана һатьн һәр дӧ ԛәйьк жи тʼьжи кьрьн, һьндьк мабу нӧԛ буна. Гава Шьмһʼун-Пәтрус әв йәк дит, хԝә авитә чоке Иса у гот: «Хӧдан, дури мьн һәрʼә, әз йәки гӧнәкʼар ьм». Чьмки бона ԝан мәʼсийед гьрти хофе ԝи у һʼәмуйед перʼа гьртьбу, ӧса жи Аԛуб у Йуһʼәннайе кӧрʼед Зәбәди, кӧ һәвалед Шьмһʼун бун. У Иса Шьмһʼунрʼа гот: «Нәтьрсә! Жь вьр шунда те мәрьва мина мәʼсийа бьгьри». У ԛәйьк дәрхьстьнә бәже, һәр тьшт һьштьн пәй Ԝи чун. Гава Иса бажарәкида бу, ль ԝьр мәрьвәки сәрдапеда кʼоти һәбу. Чахе әԝи Иса дит, хԝә дәвәрʼуйа авит же лава кьр у гот: «Хӧдан! Һәгәр бьхԝази, Тӧ дькари мьн паԛьж ки». У Иса дәсте Хԝә дьреж кьре, ле кʼәт у гот: «Әз дьхԝазьм. Паԛьж бә!» У дәстхԝәда кʼотибун же чу. Иса тʼәми да ԝи, кӧ ве йәке кәсирʼа нәбежә, ле гот: «Һәрʼә хԝә нишани кʼаһин кә у чаԝа Муса тʼәми дайә, һʼәдийа паԛьжбуна хԝә бьдә, ԝәки һʼәмуйарʼа бьбә шәʼдәти, кӧ тӧ паԛьж буйи». Нав у дәнге Иса һе бәла дьбу у пʼьрʼ әʼлаләт дьщьвийа кӧ гӧһдарийа Ԝи бькьн у жь нәхԝәшийед хԝә ԛәнщ бьн. Ле Әԝи Хԝә ль щийе хәԝлә дьгьрт у дӧа дькьр. Рʼожәке чахе Әԝи һин дькьр, ферьси у дәрсдаред Ԛануне жи рʼуньштьбун, кӧ жь һʼәму гӧндед Щәлиле, Щьһустане у жь Оршәлиме һатьбун. Ԛәԝата Хӧдан һазьр бу, ԝәки Иса нәхԝәшед ԝан ԛәнщ бькә. Ԝе дәме чәнд мәрийа йәки шьлушәʼт ньвинева анин у дьхԝәстьн әԝ бьбьрана һьндӧрʼ у ль бәр Иса данина. У гава ԝана жь дәст әʼлаләта гьран тʼӧ рʼе нәдитьн кӧ ԝи биньнә һьндӧрʼ, рʼабунә сәр хени, кʼәрмид вәкьрьн, ньвинева дахьстьнә нава мале, ль бәр Иса. Гава Әԝи баԝәрийа ԝан дит, готә йе шьлушәʼт: «Әʼвдо, гӧнед тә һатьнә бахшандьне». Ԛанунзан у ферьсийа дәстпекьр фькьрин у һәврʼа готьн: «Әв кʼи йә аһа Хԝәде беһӧрмәт дькә? Пештьри Хԝәде кʼи дькарә гӧна бьбахшинә?» Фькьред ԝан Исава әʼйан бун у ль ԝан вәгәрʼанд гот: «Һун чь дьле хԝәда дьфькьрьн? Кʼижан рʼьһʼәт те готьне: ‹Гӧнед тә һатьнә бахшандьне›, йан: ‹Рʼабә у бьгәрʼә?› Ле ԝәки һун бьзаньбьн кӧ һʼӧкӧме Кӧрʼе Мерьв һәйә ль сәр дьне гӧна бьбахшинә», готә йе шьлушәʼт: «Әз тәрʼа дьбежьм, рʼабә ньвина хԝә һьлдә һәрʼә мала хԝә». Әԝ жи бәр чʼәʼве ԝан перʼа-перʼа рʼабу у ньвина кӧ ль сәр пʼалдайи бу һьлда чу мала хԝә у шькьри дьда Хԝәде. Һʼәму һʼәйр-һʼӧжмәкʼар ман у шькьри дьданә Хԝәде, бь хофа мәзьн дьготьн: «Иро мә тьштед нәбуйи дитьн». Пәй ԝе йәкерʼа Иса дәркʼәт, ль щийе хәрщһьлдане хәрщгьрәки рʼуньшти дит кӧ наве ԝи Леԝи бу у готе: «Пәй Мьн ԝәрә». Әԝи жи һәр тьшт һьшт, рʼабу пәй Ԝи чу. Леԝи мала хԝәда һӧрмәтәкә мәзьн жерʼа кьр. Тʼәви ԝан гәләк хәрщгьр у һьнәкед майин жи ль сәр сьфре рʼуньштьбун. Ферьсийа у ԛанунзанед ԝан бина хԝә тәнг кьрьн у шагьртед Ԝирʼа готьн: «Чьма һун тʼәви хәрщгьр у гӧнәкʼара дьхԝьн у вәдьхԝьн?» Иса ль ԝан вәгәрʼанд у гот: «Сахләм нә һʼәԝще һʼәким ьн, ле нәхԝәш. Әз нәһатьмә гази йед рʼаст кьм, ле гази гӧнәкʼара бона тʼобәйийе». Ԝана жь Иса пьрси: «Чьма шагьртед Йуһʼәнна у ӧса жи йед ферьсийа тʼьме рʼожи дьгьрьн у дӧа дькьн, ле шагьртед Тә дьхԝьн у вәдьхԝьн?» Әԝи жи готә ԝан: «Һун дькарьн бежьнә хԝәндийед дәʼԝате: ‹Рʼожи бьгьрьн›, һʼәта кӧ зәʼва тʼәви ԝан ә? Ле рʼоже бен, гава зәʼва жь ԝан бе һьлдане, һьнге ԝан рʼожада ԝе рʼожи бьгьрьн». Әԝи мәсәләк жи ԝанрʼа гот: «Кәсәк жь пʼарчʼе ну набьрʼә у кʼьнща кәвьн пʼинә накә. Һәгәр ӧса бькә, һьн пʼарчʼе ну дьԛәлешә, һьн жи кәвьн у ну ль һәв накьн. У нә жи кәсәк шәрава ну дькә мәшкед кәвьн. Һәгәр ӧса бькә, шәрава ну ԝе мәшка бьтʼәԛинә у бьрʼьжә, мәшке жи хьраб бьн. Ле гәрәке шәрава ну бькьнә мәшкед ну. У кәсәк пәй шәрава кәвьнрʼа нахԝазә йа ну вәхԝә, чьмки йа кәвьн һе ле хԝәш те». Рʼожәкә шәмийе Иса нава зәвийарʼа дәрбаз дьбу, шагьртед Ԝи сьмбьлед гәньм дьчьнин, дәстед хԝәда дьфьрькандьн у дьхԝарьн. Ле жь ферьсийа һьнәка гот: «Чьма һун тьште нәщайизи рʼожа шәмийе дькьн?» Иса ль ԝан вәгәрʼанд у гот: «Ԝә нәхԝәндийә кӧ Даԝьд чь кьр, гава әԝ у йед перʼа бьрʼчи бун? Нә әԝ кʼәтә Хана Хԝәде у нане Хԝәдерʼа дайи һьлда, һьн хԝәха хԝар, һьн жи да йед тʼәви хԝә, ԝәки тʼӧ кәсирʼа нә щайиз бу бьхԝара, пештьри кʼаһина?» У вәгәрʼийа ԝанрʼа гот: «Кӧрʼе Мерьв Хӧдане шәмийе йә жи». У рʼожа шәмикә дьн Иса чу кʼьниште, кӧ һин бькә. Мәрьвәк ль ԝьр һәбу, кӧ дәсте ԝийи рʼасте кʼьшийабу. Чʼәʼве ԛанунзан у ферьсийа ль сәр Ԝи бун, гәло ԝе рʼожа шәмийе нәхԝәша ԛәнщ кә йан на, ԝәки мәʼникә ԝан һәбә, кӧ хәйба Ԝи бькьн. Ле фькьред ԝан Исава әʼйан бун у ԝи мәрьве дәсткʼьшийайирʼа гот: «Рʼабә ве говәке бьсәкьнә». Әԝ жи рʼабу сәкьни. Һьнге Иса ԝанрʼа гот: «Әзе пьрсәке жь ԝә бькьм. Рʼожа шәмийе чь щайиз ә бькьн: Ԛәнщи йан хьраби, рʼӧһʼәки хьлаз кьн йан ӧнда кьн?» У Иса ль һʼәмуйед дора Хԝә ньһерʼи, ԝи мәрьвирʼа гот: «Дәсте хԝә дьреж кә». Әԝи жи ӧса кьр у дәсте ԝи диса ԛәнщ бу. Һьнге ԝана жь һерса хԝә дьхԝар, нав һәвда дьшеԝьрин, кӧ чь биньнә сәре Иса. Ԝан рʼожада Иса чу сәре чʼийе, кӧ дӧа бькә у тʼәмамийа шәве бәр Хԝәде бь дӧа дәрбаз кьр. Чахе сьбәһ зәлал бу, Әԝи гази шагьртед Хԝә кьрьн у донздәһ мәрьв жь нав ԝан бьжартьн, кӧ навед ԝан жи «шанди» дани: Шьмһʼуне кӧ наве ԝи дани Пәтрус у бьре ԝи Әндраԝьс, Аԛуб у Йуһʼәнна, Филипо у Бәртоломәйо, Мәтта у Тʼума, Аԛубе Һалфаԝо у Шьмһʼуне кӧ ԝәлатпʼарьст дьһатә готьне. Щьһудайе Аԛуб у Щьһудайе Исхәрйоти, кӧ нәмамийа Ԝи кьр. Әԝ бь тʼәви ԝан бәржер бу һат, рʼастәке сәкьни. Ль ԝе дәре кʼомәкә шагьртайә мәзьн у щьмәʼтәкә гьран жь тʼәмамийа Щьһустане, Оршәлиме у жь дәве бәʼра Суре у Сайде щьвийайи бун. Әԝана һатьбун, ԝәки гӧһдарийа Ԝи бькьн у жь нәхԝәшийед хԝә ԛәнщ бьн. У йед жь рʼӧһʼед һʼәрам щәфа дькʼьшандьн жи ԛәнщ дьбун. У тʼәмамийа әʼлаләте жи дьщәʼданд, ԝәки дәсте хԝә бьдана Ԝи, чьмки ԛәԝат жь Ԝи дәрдькʼәт у һәр кәс жь ԝан ԛәнщ дьбу. Иса бәре Хԝә да шагьртед Хԝә у гот: «Хԝәзи ль ԝә фәԛира, чьмки Пʼадшатийа Хԝәде йа ԝә йә. Хԝәзи ль ԝә, кӧ һун ньһа бьрʼчи нә, чьмки һуне тʼер бьн. Хԝәзи ль ԝә, кӧ һун ньһа дьгьрин, чьмки һуне бькʼәньн. Хԝәзи ль ԝә, гава һун бона Кӧрʼе Мерьв бәр чʼәʼве мәрийа рʼәш бьн, гава ԝә ԛәбул нәкьн, ԝә беһӧрмәт кьн у наве хьраб сәр ԝә дәрхьн. Ԝе рʼоже әшԛ бьн у жь шабуна бьра ньгед ԝә әʼрд нәгьрә, чьмки ва һәԛе ԝә ль әʼзмен гәләк ә, чьмки кал-бавед ԝан жи сәре пʼехәмбәра ӧса дькьрьн. Ле ԝәй ль ԝә дәԝләтийа, чьмки һун гьһиштьнә мәрәме хԝә. Ԝәй ль ԝә, кӧ һун ньһа тʼер ьн, чьмки һуне бьрʼчи бьн. Ԝәй ль ԝә, кӧ һун ньһа дькʼәньн, чьмки һуне бьгьрин у шине бькьн. Ԝәй ль ԝә, кӧ һʼәму мәрьв бона ԝә ԛәнщ хәбәр дьдьн, чьмки кал-бавед ԝан жи пʼехәмбәред дәрәԝрʼа ӧса дькьрьн. Ле Әз ԝәрʼа, йед кӧ дьбьһен дьбежьм, дьжмьнед хԝә һʼьз бькьн, хернәхԝазед хԝәрʼа ԛәнщийе бькьн. Ньфьрʼкьред хԝә бьмбарәк кьн у бона йед хьрабийе ԝә дькьн, дӧа бькьн. Һәгәр йәк рʼуйе тә хә, йе дьн жи бьдә бәр у йе кӧ пʼоте тә жь тә бьстинә, кьрасе хԝә жи жерʼа бьһелә. Бьдә ԝи, кʼи жь тә дьхԝазә у кʼи жь тә дьстинә пашда нәхԝазә. У чаԝа һун дьхԝазьн мәрьв бона ԝә бькьн, һун жи ӧса ԝанрʼа бькьн. Һәгәр һун ԝан һʼьз бькьн, кʼижан кӧ ԝә һʼьз дькьн, чь фәйдә? Нә гӧнәкʼар жи ԝан һʼьз дькьн, кʼижан кӧ ԝан һʼьз дькьн? У һәгәр һун ԛәнщикьред хԝәрʼа ԛәнщийе бькьн, чь фәйдә? Нә гӧнәкʼар жи ӧса дькьн? У һәгәр һун дәйн дьдьнә йед ӧса, жь кʼижана гӧмана ԝә һәйә пашда бьстиньн, чь фәйдә? Нә гӧнәкʼар жи дәйн дьдьнә гӧнәкʼара, кӧ диса һаԛаси пашда бьстиньн? Ле һун дьжмьнед хԝә һʼьз бькьн, ԛәнщийе бькьн, дәйн бьдьн у һивийа вәгәрʼандьне нәминьн. Һәԛе ԝәйе гәләк бә у һуне бьбьнә зарʼед Йе Һәри Жорьн. Чьмки Әԝ бона бешекьра жи, нәрʼаста жи ԛәнщ ә. Дьлрʼәʼм бьн, чаԝа Баве ԝә дьлрʼәʼм ә. Лома нәкьн у ломәйе ль ԝә нәбьн, нәһәԛийе нәкьн, нәһәԛи ԝе ль ԝә нәбә, бьбахшиньн ԝәрʼа ԝе бе бахшандьне. Бьдьн, ԝәрʼа ԝе бе дайине, бь пиванәкә тʼьжи һʼәжанди, дәԝьсанди, сәри ԛучʼ ԝе бькьнә пʼеша ԝә. Чьмки бь чь чапе һун бьпивьн, бь ԝе жи ԝәрʼа ԝе бе пиване». Әԝи мәсәләк жи ԝанрʼа гот: «Гәло кор дькарә рʼебәрийе кора бькә? Нә һәр дӧйе жи бькʼәвьнә чʼәʼле? Шагьрт жь дәрсдаре хԝә нә мәстьр ә, ле әԝе кӧ хԝәндьна хԝә рʼьнд пек тинә, дькарә мина дәрсдаре хԝә бә. Тӧ чьма ԛьршьке чʼәʼве бьре хԝәда дьбини, ле кʼеране чʼәʼве хԝәда набини? Йан жи чаԝа тӧ дькари бежи бьре хԝә: ‹Бьра, бьһелә кӧ әз ԛьршьк жь чʼәʼве тә дәрхьм›, ле тӧ кʼеране чʼәʼве хԝәда набини? Дӧрʼу! Пешийе кʼеране чʼәʼве хԝә дәрхә. Паше те ԛәнщ бьбини кӧ чаԝа ԛьршьк жь чʼәʼве бьре хԝә дәрхи. Дара ԛәнщ бәре хьраб надә, нә жи дара хьраб бәре ԛәнщ. Һәр дар жь бәре хԝә те наскьрьне, кәсәк жь стьрийа һежира начьнә у нә жи жь дьрʼийе тьрийа. Мәрьве ԛәнщ, жь хьзна дьле хԝәйи ԛәнщ, ԛәнщийе дәртинә, ле мәрьве хьраб, жь хьзна дьле хԝәйи хьраб хьрабийе дәртинә. Чьмки дьле ԝи чьва тʼьжи йә зар жи әԝе дьбежә. Һун чьма Мьнрʼа ‹Хӧдан! Хӧдан!› дьбежьн у ԝан тьштед кӧ Әз ԝәрʼа дьбежьм накьн? Һәр кәсе кӧ те щәм Мьн готьнед Мьн дьбьһе у дьԛәдинә, Әз ԝәрʼа бежьм мина кʼе йә. Әԝ мина мәрьвәки йә, йе кӧ мале чедькә, әʼрде дькʼолә кʼур дькә, һʼиме ԝе ль сәр кевьр датинә. У гава лейи рʼадьбә, чʼәм ль ԝе мале дьхә, әԝ наһʼәжә, чьмки рʼьнд һатьбу чекьрьне. Ле әԝе хәбәред Мьн дьбьһе у наԛәдинә, мина мәрьвәки йә, йе кӧ сәр хԝәлийе бе һʼим мале хԝәрʼа чедькә. Гава чʼәм ле дьхә, дәстхԝәда һьлдьше, ԝеран дьбә, ль бәр миратʼе дьчә». Гава Иса әԝ готьнед кӧ ԝе гӧһдарарʼа бьгота хьлаз кьрьн, чу Кәфәрнаһуме. У хӧламе сәрсәдәки, кӧ бона ԝи йәки һежа бу, нәхԝәш бәр мьрьне бу. Гава әԝи бона Иса бьһист, рʼуспийед щьһуйа шандьнә щәм Ԝи у же һиви кьр, кӧ бе хӧламе ԝи хьлаз кә. Әԝана һатьнә щәм Иса, гәләки һиви же кьрьн у готьн: «Әԝ һежа йә кӧ Тӧ әве ԛәнщийе жерʼа бьки, чьмки әԝ мьләте мә һʼьз дькә у кʼьништ жи бона мә чекьрийә». Һьнге Иса тʼәви ԝан чу. Гава незики мале бу, сәрсәд чәнд достед хԝә шандьнә пешийа Ԝи, Ԝирʼа гот: «Хӧдан, зәʼмәте нәбинә, чьмки әз нә һежа мә кӧ Тӧ бейи мала мьн. Бона ве йәке мьн хԝә лайиԛи Тә нәгьрт, кӧ бьһатама пәй Тә жи. Тʼәне хәбәрәке бежә у хӧламе мьне ԛәнщ бә. Чьмки әз хԝәха жи мәрьвәки бьн һʼӧкӧмда мә у бьн дәсте мьнда жи әскәр һәнә. Әз йәкирʼа дьбежьм: ‹Һәрʼә›, дьчә, йәки дьнрʼа дьбежьм: ‹Ԝәрә›, те у жь хӧламе хԝәрʼа дьбежьм: ‹Әви тьшти бькә›, дькә». Гава Иса әв йәк бьһист, сәр ԝи зәндәгьрти ма у вәгәрʼийа сәр ԝе щьмәʼта кӧ пәй Ԝи дьчу, гот: «Әз ԝәрʼа дьбежьм, Мьн Исраеледа жи баԝәрикә аһа йәкида нәдитийә». У әԝед шанди вәгәрʼийанә мал, дитьн кӧ ԝе әԝ хӧлам ԛәнщ буйә. Рʼожәкә дьн Иса чу бажарәки, кӧ наве ԝи Найин бу у шагьртед Ԝи жи тʼәви әʼлаләтәкә гьран Ԝирʼа дьчун. Гава незики дәргәһе бажер бу, ва мьрик дәрдьхьстьн. Әԝ кӧрʼе жьнәбикә тайе тʼәне бу у гәләк һәԝари жи жь бажер перʼа дьчун. Гава Хӧдан де дит, гӧне Ԝи ле һат у ԝерʼа гот: «Нәгьри». Әԝ незики дарбәсте бу гьрт у әԝед кӧ дьбьрьн сәкьнин, Иса гот: «Хорто! Әз тәрʼа дьбежьм, рʼабә!» Мьри рʼабу рʼуньшт, дәстпекьр хәбәр да у Иса әԝ да дийа ԝи. У саԝ кʼәтә сәр һʼәмуйа, шькьри дьданә Хԝәде у дьготьн: «Пʼехәмбәрәки мәзьн нава мәда дәркʼәтийә!» у: «Хԝәде сәрик дайә мьләте Хԝә!» Нав у дәнге Ԝи тʼәмамийа Щьһустане у дор-бәре ԝе бәла бу. Шагьртед Йуһʼәнна Йуһʼәннарʼа бона ван һʼәму тьшта готьн. Йуһʼәнна жи гази дӧ шагьртед хԝә кьр у әԝ шандьнә щәм Хӧдан, ԝәки же бьпьрсьн: «Тӧ Әԝ и, Йе кӧ гәрәке бьһата, йан әм һивийа йәки дьн бьн?» Әԝ мәри һатьнә щәм Иса у готьн: «Йуһʼәннайе ньхӧмдар әм шандьнә щәм Тә, кӧ жь Тә бьпьрсьн, Тӧ Әԝ и, Йе кӧ гәрәке бьһата, йан әм һивийа йәки дьн бьн?» У ԝе дәме Иса гәләк жь нәхԝәшийа, дәрба, жь рʼӧһʼед хьраб ԛәнщ кьрьн у чʼәʼвед гәләк кора вәкьрьн. Иса ль ԝан вәгәрʼанд у гот: «Һәрʼьн, чь кӧ ԝә дит у бьһист Йуһʼәннарʼа бежьн: Кор дьбиньн, сәԛәт дьгәрʼьн, кʼоти паԛьж дьбьн, кәрʼ дьбьһен, мьри рʼадьбьн у фәԛирарʼа жи Мьзгини те дайине. У хԝәзи ль ԝи, кӧ жь Мьн пʼьшк набә». Гава әԝед кӧ Йуһʼәнна шандьбун чун, Иса бона Йуһʼәнна әʼлаләтерʼа дәстпекьр гот: «Һун дәркʼәтьнә бәрʼийе чь бьбиньн? Ԛамишәки кӧ жь байе дьһʼәжә? Йан дәркʼәтьн чь бьбиньн? Мәрьвәки кʼьнще назьк ль хԝә кьри? Нә әԝед кӧ кʼьнще назьк хԝә дькьн у әʼмьре рʼьнд дәрбаз дькьн, әԝ малед пʼадшада нә? Йан һун дәркʼәтьн чь бьбиньн? Пʼехәмбәрәки? Бәле, Әз ԝәрʼа дьбежьм, жь пʼехәмбәрәки жи мәстьр ә. Әва әԝ ә, бона кʼижани ньвисар ә: ‹Ва йә Әзе ԛасьде Хԝә пешийа Тәва бьшиньм. Әԝе рʼийа Тә пешийа Тәва һазьр кә›. Әз ԝәрʼа дьбежьм, жь нава әԝед кӧ жь кʼӧлфәта дьне кʼәтьнә, тʼӧ кәс жь Йуһʼәнна мәстьр нәбуйә, ле Пʼадшатийа Хԝәдеда йе һәри бьчʼук жь ԝи мәстьр ә». Гава тʼәмамийа щьмәʼте, ӧса жи хәрщгьра әв йәк бьһист, тʼьвдира Хԝәде рʼаст һʼәсаб кьрьн, чьмки бь ньхӧмандьна Йуһʼәнна һатьбунә ньхӧмандьне. Ле ферьси у ԛанунзана бона хԝә тʼьвдира Хԝәде тʼәхсир кьрьн, чьмки ԝана нәхԝәст кӧ жь Йуһʼәнна бенә ньхӧмандьне. Иса сәрда зедә кьр гот: «Әз мәрьвед ви ньсьли мина чь бьшьбиньм? Йан әԝ мина чь нә? Әԝ мина ԝан зарʼа нә, йед кӧ базареда рʼуньшти нә, гази һәвдӧ дькьн у дьбежьн: ‹Мә бона ԝә зӧрʼне хьст, һун нәрʼәԛьсин у бона ԝә бәйтʼ гот, һун нәгьрийан›. Йуһʼәннайе ньхӧмдар һат, нә нан дьхԝар, нә жи шәрав вәдьхԝар, ԝә дьгот: ‹Щьн ԝида һәйә›. Кӧрʼе Мерьв һат, дьхԝә у вәдьхԝә, һун бона Ԝи дьбежьн: ‹Ва Әԝ йәки пәй хԝарьн у вәхԝарьне кʼәти йә, досте хәрщгьр у гӧнәкʼара йә›. Ле һʼәмуйед кӧ пәй сәрԝахтийе дьчьн әԝ кʼьфш дькьн кӧ сәрԝахти рʼаст ә ». Йәки ферьси һиви жь Иса кьр, кӧ тʼәви ԝи хԝарьне бьхԝә. Әԝ жи чу мала ԝи ферьсийи, сәр сьфре рʼуньшт. У ԝи бажарида кʼӧлфәтәкә чʼәʼвдәр һәбу. Гава ԝе бьһист кӧ Әԝ мала ферьсида сәр сьфре рʼуньштийә, дәрданәкә алабастьрейи рʼуне бинхԝәш ани, пьштева бәр ньгед Ԝи сәкьни гьрийа, бь һесьред хԝә ньгед Ԝи шьл кьрьн у бь пʼорʼе сәре хԝә жи зьһа кьрьн. Паше ньгед Ԝи рʼамусан, бь рʼуне бинхԝәш жи рʼун кьрьн. Гава ԝи ферьсийе кӧ әԝ тʼәглиф кьрьбу әв йәк дит, дьле хԝәда гот: «Һәгәр Әва пʼехәмбәр буйа, ԝе бьзаньбуйа кӧ кʼи йә у йәкә чаԝа йә дәсте хԝә дайә Ԝи», чьмки йәкә чʼәʼвдәр бу. Иса ԝирʼа гот: «Шьмһʼун, Әз дьхԝазьм тьштәки тәрʼа бежьм». Әԝи жи гот: «Кʼәрәм кә бежә, дәрсдар». Иса гот: «Дӧ дәйндаред йәки һәбун, йәк пенсьд зиви дәйндаре ԝи бу, йәк жи пенщи. Ле чьмки тьштәки ԝан тʼӧнәбу кӧ дәйне хԝә бьдана, әԝи бахшандә һәр дӧйа жи. Ньһа жь ԝан һәр дӧйа кʼижане гәләки ԝи һʼьз бькә?» Шьмһʼун ле вәгәрʼанд у готе: «Тʼәхмина мьн әԝе кӧ гәләк жерʼа һатә бахшандьне». Иса ԝирʼа гот: «Тә рʼаст те дәрхьст». У сәр кʼӧлфәтеда вәгәрʼийа, Шьмһʼунрʼа гот: «Ве кʼӧлфәте тӧ дьбини? Әз һатьмә мала тә, бона ньгед Мьн тә ав нәда, ле әве бь һесьред хԝә ньгед Мьн шьл кьрьн у бь пʼорʼе сәре хԝә жи зьһа кьрьн. Тә рʼамусанәк нәда Мьн, ле жь һьнгева кӧ Әз һатьмә вьр, әве дәст жь рʼамусана ньгед Мьн нәкʼьшандийә. Тә сәре Мьн рʼун нәкьр, ле әве бь рʼуне бинхԝәш ньгед Мьн рʼун кьрьн. Бона ве йәке Әз тәрʼа дьбежьм, гӧнед ве кӧ гәләк бун һатьнә бахшандьне, ләма әве гәләк һʼьз кьр. Чьмки кʼерʼа гәләк тенә бахшандьне, гәләк жи һʼьз дькә. Ле кʼерʼа һьндьк тенә бахшандьне, әԝ һьндьки һʼьз дькә». У ԝерʼа гот: «Гӧнед тә һатьнә бахшандьне». Һьнге әԝед кӧ тʼәви Ԝи сәр сьфре рʼуньштьбун нав хԝәда дьготьн: «Әва кʼи йә, һʼәта кӧ гӧна жи дьбахшинә?» У Иса ԝе кʼӧлфәтерʼа гот: «Баԝәрийа тә тӧ хьлаз кьри. Бь хер у сьламәт һәрʼә». Пәй ве йәкерʼа Иса гӧнд у бажара дьгәрʼийа, даннасин дькьр, Мьзгинийа Пʼадшатийа Хԝәде дьда у һәр донздәһ шагьрт жи Перʼа бун, ӧса жи чәнд кʼӧлфәтед кӧ жь рʼӧһʼед хьраб у нәхԝәшийа ԛәнщ бьбун: Мәрйәма кӧ жерʼа Мәждәлани дьготьн, йа кӧ һʼәфт щьн же дәркʼәтьбун у Йоһана, жьна Хузайе ԝәкʼилхәрще мала Һеродәс, Сосьн у гәләкед майин, кӧ ԝана бь һәбука хԝәва ԝанрʼа бәрдәсти дькьрьн. У гава әʼлаләтәкә гьран жь гәләк бажара щәм Иса щьвийа, Әԝи мәсәләк гот: «Тʼохьмрʼәш рʼабу чу кӧ тʼохьм бьрʼәшинә. Гава дьрʼәшанд, һьнәк кʼәтьнә дәве рʼе һатьнә пʼепәскьрьне у тәйрәдед әʼзмен һатьн әԝ хԝарьн. У һьнәк жи кʼәтьнә щийе кәвьри, гава шин бун, жь дәст кемасийа шьлайе һʼьшк бун. У һьнәк жи кʼәтьнә нава стьрийа, стьри жи перʼа шин бун у әԝ хәньԛандьн. Һьнәкед дьн жи кʼәтьнә нава әʼрде ԛәнщ у шин бун, сәд щар бәр дан». Гава әв йәк гот, кьрә гази: «Гӧһе кʼейи бьһистьне һәйә бьра бьбьһе!» Шагьртед Ԝи же пьрсин: «Мәʼна әве мәсәле чь йә?» Әԝи гот: «Ԝәрʼа һатийә дайине, кӧ һун сӧрʼед Пʼадшатийа Хԝәде бьзаньбьн, ле йед майинрʼа бь мәсәла те хәбәрдане кӧ: ‹Бьньһерʼьн у нәбиньн, бьбьһен у фәʼм нәкьн›. Әв ә мәʼна ве мәсәле: Тʼохьм хәбәра Хԝәде йә. Тʼохьмед кӧ кʼәтьнә дәве рʼе әԝ ьн, йед кӧ хәбәре дьбьһен, ле мирещьн те хәбәре жь дьле ԝан дәрдьхә, кӧ нәбә баԝәр бькьн у хьлаз бьн. Тʼохьмед кӧ кʼәтьнә щийе кәвьри әԝ ьн, йед кӧ гава хәбәре дьбьһен, бь әшԛ у ша ԛәбул дькьн. Ле чьмки рʼаԝед ԝан тʼӧнәнә, дәмәкә кьн баԝәр дькьн у ԝәхте щерʼьбандьне дькʼәвьн. Тʼохьмед кӧ кʼәтьнә нава стьрийа әԝ ьн, йед кӧ хәбәре дьбьһен, хәмед дьнева, дәԝләт у шабуна ви әʼмьрива мьжул дьбьн, дьхәньԛьн у бәред ԝан нагьһижьн. У тʼохьмед кʼәтьнә нав әʼрде ԛәнщ әԝ ьн, йед кӧ бь дьле сах у ԛәнщ хәбәре дьбьһен, дьле хԝәда хԝәй дькьн у бь сәбьр бәре хԝә дьдьн. Тʼӧ кәс чʼьра вехьсти накә бьн фьраԛе, нә жи дькә бьн щи-ньвине, ле датинә сәр пʼечʼьре, ԝәки әԝед кӧ дькʼәвьнә һьндӧрʼ, рʼонайе бьбиньн. Чьмки тьштәки вәшарти тʼӧнә кӧ дәрнәйе у нә жи тьштәки дьзива, кӧ хӧйа нәбә у нәйе бәр рʼонайе. Аԝа дина хԝә бьдьне кӧ һун чаԝа дьбьһен, чьмки кʼерʼа кӧ һәйә, ԝе һе ле зедә бә у кʼерʼа кӧ тʼӧнә, әԝе кӧ ԝи тʼьре һәйә жи, ԝе же бе стандьне». Һьнге де у бьрайед Ԝи һатьнә щәм Ԝи, ле жь дәст зәʼфбуна әʼлаләте нькарьбун незики Ԝи буна. Щаб данә Ԝи кӧ: «Дийа Тә у бьрайед Тә дәрва сәкьни нә у дьхԝазьн Тә бьбиньн». Әԝи жи ль ԝан вәгәрʼанд у гот: «Де у бьрайед Мьн әԝ ьн, йед кӧ хәбәра Хԝәде дьбьһен у дьԛәдиньн». Рʼожәке Иса шагьртед Хԝәва кʼәтә ԛәйьке у готә ԝан: «Әм дәрбази ԝи бәри голе бьн». У рʼекʼәтьн. Гава ԛәйькеда дьчун, Әԝ хәԝрʼа чу. У фьртонәк ль голе рʼабу, ԛәйьк тʼьжи ав дьбу, әԝ ԛәзийеда бун. Һьнге шагьрт незики Ԝи бун, Әԝ һʼьшйар кьрьн у готьне: «Мамоста, Мамоста! Әм ӧнда дьбьн!» Әԝ рʼабу, ль байе у пелед аве һьлат, әԝ сәкьнин у сәԛьрʼин. Һьнге Әԝи ԝанрʼа гот: «Баԝәрийа ԝә кʼане йә?» У ԝана бь хоф, әʼщебмайи һәврʼа готьн: «Гәло әв кʼи йә, кӧ әʼмьри сәр бе у аве жи дькә у ельми Ԝи дьбьн?» Әԝана бь ԛәйьке чунә тʼопрахед Гьрасине, пешбәри Щәлиле. Гава Әԝ дәркʼәтә бәже, жь ԝи бажари мәрьвәк дәркʼәтә пешийа Ԝи, кӧ щьн нав ԝида бун. Әԝи зува нә кʼьнщ ль хԝә дькьрьн у нә жи малда дьсәкьни, нава горʼьстанада дьма. Гава әԝи Иса дит, кьрә ԛирʼин кʼәтә бәр Ԝи у бь дәнгәки бьльнд гот: «Тӧ чь жь мьн дьхԝази Исайе Кӧрʼе Хԝәдейе Һәри Жорьн? Әз рʼәща жь Тә дькьм, мьн нәдә щәфе!» Чьмки Иса әʼмьри сәр рʼӧһʼе һʼәрам кьрьбу, кӧ жь ԝи мәрьви дәркʼәвә. Әԝ гәләк щара щьна дькʼәт, гава бь ԛәйд у зьнщира жи гьредьдан, әԝи диса ԛәйд дьԛәтандьн у щьна әԝ чола дьхьст. Һьнге Иса жь ԝи пьрси у готе: «Наве тә чь йә?» Әԝи гот: «Кʼомәскәр », чьмки гәләк щьн кʼәтьбунә нава ԝи. У щьна лава Ԝи дькьр, кӧ әʼмьр нәкә әԝ һәрʼьнә гәлийе һәй-ԝайе. Ль ԝи щийи сурики бәразайи мәзьн һәбу, кӧ сәре чʼийе дьчʼерийа. Щьна рʼәща же дькьр, кӧ изьне бьдә ԝан, әԝ һәрʼьн бькʼәвьнә нава бәраза. Әԝи изьн да. У щьн жь нав ԝи мәрьви дәркʼәтьн, чун кʼәтьнә нава бәраза у әԝ сури жорда рʼәви, хԝә жь кәнделда авитьнә голе хәньԛин. Гава бәразвана әв йәк дит, рʼәвин чунә бажар у гӧнда, әв йәк гьли кьрьн. Мәрьв рʼабун чун, кӧ тьште буйи бьбиньн. Гава һатьнә щәм Иса, дина хԝә дане, ԝе әԝ мәрьве кӧ щьн же дәркʼәтьбун, кʼьнще ԝи ле, сәр һʼьше хԝәда һати, ль бәр ньгед Иса рʼуньшти йә. Һьнге әԝ тьрсийан. Әԝед кӧ әв йәк дитьбун, йед майинрʼа готьн, кӧ чаԝа әԝи щьнакʼәти ԛәнщ бу. Һьнге һʼәму бьнәлийед дор-бәред Гьрасине һиви жь Иса кьрьн, кӧ жь ԝан дур кʼәвә, чьмки саԝәкә мәзьн әԝ гьртьбун. Әԝ жи кʼәтә ԛәйьке у пашда вәгәрʼийа. Ле әԝ мәрьве кӧ щьн же дәркʼәтьбун лава Ԝи кьр, кӧ әԝ жи тʼәви Ԝи һәрʼә. Ле Иса әԝ вәрʼекьр у гот: «Вәгәрʼә мала хԝә у чь кӧ Хԝәде бона тә кьр гьли кә». У әԝ чу, чь кӧ Иса бона ԝи кьрьбу тʼәмамийа бажерда дьгот у дькьрә дәнги. У чахе Иса вәгәрʼийа, әʼлаләте Әԝ ԛәбул кьр, чьмки һʼәму жи һивийа Ԝи бун. Һьнге мәрьвәки наве ԝи Йайиро, сәрԝере кʼьниште, һат хԝә авитә ньгед Иса у һиви же кьр, кӧ һәрʼә мала ԝи. Чьмки тʼәне ԛизәкә ԝийә донздәһ сали һәбу у әԝ жи бәр мьрьне бу. Гава Иса дьчу, әʼлаләте зәʼмәт дьда Ԝи. Ԝьр кʼӧлфәтәк жи һәбу, кӧ донздәһ сале ԝе бун, сәр хуне вәбьбу. Әԝе һʼәму һәбука хԝә дабу һʼәкима, ле тʼӧ кәси чʼарә ле нәкьрьбу. Әва пьштева һат ль рʼишийед кʼьнще Ԝи кʼәт у дәстхԝәда хун же чʼькийа. Иса гот: «Әԝ кʼи бу кӧ ль Мьн кʼәт?» Гава һʼәмуйа инкʼар кьр, Пәтрус гот: «Мамоста, әʼлаләт Тә дәʼф дьдә, тәнгасийе дьдә Тә ». Ле Иса гот: «Йәк ль Мьн кʼәт, чьмки Әз пе һʼәсийам кӧ жь Мьн ԛәԝат дәркʼәт». У гава кʼӧлфәте дит кӧ нәһатә вәшартьне, ләрьзи, һат хԝә авитә бәр Ԝи у ль бәр тʼәмамийа щьмәʼте Ԝирʼа гот, кӧ бона чь ль Ԝи кʼәт у чаԝа перʼа-перʼа ԛәнщ бу. Әԝи ԝерʼа гот: «Әʼвде! Баԝәрийа тә тӧ ԛәнщ кьри. Бь хер у сьламәт һәрʼә». Әԝи һе хәбәр дьда, жь мала сәрԝере кʼьниште йәки һат у гот: «Ԛиза тә мьр, иди зәʼмәте нәдә дәрсдар». Гава Иса әв йәк бьһист, ԝирʼа гот: «Нәтьрсә, тʼәне баԝәр бькә у ԝе ԛәнщ бә». Гава Әԝ чу мал, нәһьшт кәсәк һәрʼә һьндӧрʼ, пештьри Пәтрус, Йуһʼәнна, Аԛуб у де у баве ԛизьке. Һʼәму дьгьрийан у шина ԝе дькьрьн, ле Иса гот: «Нәгьрин. Әԝ нәмьрийә, ле һеньжийә». Ԝана ԛәрфе хԝә Пе дькьр, чьмки заньбун кӧ әԝа мьрийә. У Иса дәсте ԝе гьрт, дәнг да ԝе у гот: «Ԛизьк, рʼабә!» У рʼӧһʼе ԝе ле вәгәрʼийа, перʼа-перʼа рʼабу сәр хԝә. Иса әʼмьр кьр, кӧ хӧрәк бьдьнә ԝе. Де у баве ԝе зәндәгьрти ман. Ле Әԝи тʼәми ль ԝан кьр, кӧ ве йәке кәсирʼа нәбежьн. Иса гази һәр донздәһ шагьртед Хԝә кьр, ԛәԝат у һʼӧкӧм да ԝан, кӧ һʼәму щьна дәрхьн у жь нәхԝәшийа ԛәнщ кьн. Әԝ шандьн, кӧ Пʼадшатийа Хԝәде даннасин кьн у нәхԝәша ԛәнщ кьн у ԝанарʼа гот: «Бона рʼе тьштәки һьлнәдьн, нә шьвдар, нә турьк, нә нан, нә пʼәрә, нә жи дӧ дәст кьрас. Чь мала кӧ һун һәрʼьне, ԝьр бьминьн у жь ԝьр рʼекʼәвьн. У әԝ дәра кӧ ԝә ԛәбул нәкьн, гава жь ԝи бажари дәртен, тʼоза ньгед хԝә даԝшиньн, ԝәки ԝанарʼа бьбә шәʼдәти». У шагьрт рʼабун, гӧнд-гӧнд гәрʼийан у һәр дәра Мьзгини дан, нәхԝәш ԛәнщ кьрьн. Аԝа Һеродәсе сәрԝер бона һʼәму кьрьнед Иса бьһист у тʼәвиһәв бу, чьмки һьнәка дьгот: «Әва Йуһʼәнна йә, жь нав мьрийа рʼабуйә» у һьнәка жи дьгот: «Елйас ә кʼьфш буйә» у һьнәкед майин жи дьготьн: «Әва йәк жь пʼехәмбәред бәре йә сах буйә». Һеродәс гот: «Мьн сәре Йуһʼәнна да лехьстьне, ле Әва кʼи йә кӧ әз дәрһәԛа Ԝида ван тьшта дьбьһем?» У ԝи дьхԝәст Иса бьдита. Гава шанди вәгәрʼийан, чь кӧ ԝан кьрьбу Исарʼа гьли кьрьн. Әԝи тʼәне шандийед Хԝә тʼәви Хԝә һьлдан у чунә бәрбь бажаре Бәйтсайдайе. Гава әʼлаләт пе һʼәсийа, пәй Ԝи чу. Иса әԝ ԛәбул кьрьн у тʼәви ԝан бона Пʼадшатийа Хԝәде хәбәр дьда у әԝед кӧ һʼәԝще ԛәнщбуне бун ԛәнщ кьрьн. Бәре еваре һәр донздәһ һатьнә щәм Ԝи у жерʼа готьн: «Әʼлаләте бәрʼдә, кӧ һәрʼьн гӧнд у бәргед дор-бәра щи-ԝар бьн у хԝәрʼа хӧрәк дәст хьн, чьмки әм ль щики хьки-хԝәли нә». Ле Иса ԝанрʼа гот: «Һун хӧрәк бьдьнә ԝан». Ԝана жи ле вәгәрʼанд у готьн: «Пештьри пенщ нан у дӧ мәʼсийа ԝәки майин тьштәки мә тʼӧнә, һәгәр әм нәчьн тʼәмамийа щьмәʼтерʼа хӧрәк нәкʼьрʼьн?» Чьмки ԝәкә пенщ һʼәзар мери бун. Әԝи шагьртед Хԝәрʼа гот: «Щьмәʼте пенщи-пенщи бьдьнә рʼуньштандьне». У ӧса кьрьн, һʼәму жи данә рʼуньштандьне. Әԝи әԝ пенщ нан у һәр дӧ мәʼси һьлдан, бәре Хԝә әʼзменда кьр шькьри да, кәркьр у да шагьрта, кӧ бәлайи әʼлаләте кьн. Һʼәмуйа жи хԝар тʼер бун у донздәһ сәлә жи һурькед бәрмайи бәрәв кьрьн. Щарәке Иса бь тʼәне тʼәви шагьртед Хԝә дӧа дькьр, жь ԝан пьрси: «Бь тʼәхмина щьмәʼте Әз кʼи мә?» Ԝана ле вәгәрʼанд у готьн: «Һьнәк дьбежьн ‹Йуһʼәннайе ньхӧмдар ә›, һьнәкед дьн дьбежьн ‹Елйас ә›, һьнәкед майин жи дьбежьн ‹йәк жь пʼехәмбәред бәре йә сах буйә›». Әԝи жь ԝан пьрси: «Ле һун чь дьбежьн? Бь тʼәхмина ԝә Әз кʼи мә?» Пәтрус ле вәгәрʼанд у гот: «Тӧ Мәсиһе Хԝәде йи». Һьнге Иса һʼьшк тʼәми да ԝан, кӧ ԝе йәке кәсирʼа нәбежьн. У әԝи гот: «Кӧрʼе Мерьв гәрәке гәләки щәфа бькʼьшинә, жь алийе рʼуспийа, сәрәкед кʼаһина у ԛанунзанада бе тʼәхсиркьрьн у кӧштьне, ле рʼожа сьсийа ԝе жь мьрьне рʼабә». У Иса һʼәмуйарʼа гот: «Һәгәр йәк дьхԝазә ль пәй Мьн бе, бьра хԝә инкʼар кә у һәр рʼож хаче хԝә һьлдә у ль пәй Мьн бе. Чьмки кʼи кӧ дьхԝазә әʼмьре хԝә хьлаз кә, әԝе ӧнда кә у кʼи кӧ әʼмьре хԝә бона Мьн ӧнда кә, әԝе хьлаз кә. Чь фәйдә, һәгәр мәрьв тʼәмамийа дьнйайе ԛазьнщ кә, ле әʼмьре хԝә ӧнда кә йан зьраре хә? У кʼи Мьн у хәбәред Мьн шәрм һʼәсаб кә, Кӧрʼе Мерьв жи ԝе ԝи шәрм һʼәсаб кә, гава Әԝ бь рʼумәта Хԝә, рʼумәта Баве у мьлйакʼәтед пирозва бе. Әз рʼаст ԝәрʼа дьбежьм, һьнәкед ль вьр сәкьни ԝе мьрьне нәбиньн, һʼәта кӧ Пʼадшатийа Хԝәде бьбиньн». Пәй ве хәбәрданерʼа ԝәкә һʼәфтеке шунда, Иса Пәтрус, Йуһʼәнна у Аԛуб һьлдан чунә сәре чʼийе кӧ дӧа бькьн. Гава Иса дӧа дькьр, рʼәнге рʼуйе Ԝи һатә гӧһастьне, кʼьнщед Ԝи чил-ԛәрԛаш бун, бьрьԛин. У ва дӧ мәрьва тʼәви Ԝи хәбәр дьдан, йәк Муса бу, йәк жи Елйас. Әԝана бь рʼумәт кʼьфш бун у бона мьрьна Ԝи хәбәр дьдан, кӧ Оршәлимеда ԝе бьбуйа. Чʼәʼвед Пәтрус у әԝед тʼәви ԝи жь хәԝе гьран бьбун, ле гава һʼьшйар бун, рʼумәта Ԝи у һәр дӧ мәрьвед щәм Ԝи сәкьни дитьн. Чахе әԝана жь Ԝи дур кʼәтьн, Пәтрус Исарʼа гот: «Мамоста, чаԝа рʼьнд ә кӧ әм вьр ьн! Дә әме се һʼолька чекьн, йәке Тәрʼа, йәке Мусарʼа у йәке жи Елйасрʼа». Чьмки әԝи ньзаньбу әԝ чь дьбежә. Гава әԝи һе хәбәр дьда, әʼԝрәк һат у сәр ԝан кьрә си. У чахе кʼәтьнә бьн ԝи әʼԝри, әԝана тьрсийан. У жь ԝи әʼԝри дәнгәк һат у гот: «Әв ә Кӧрʼе Мьн, Бьжартийе Мьн! Гӧһдарийа Ԝи бькьн!» Гава әԝ дәнг һат, Иса тʼәне ма. У ԝана дәнге хԝә бьрʼи, ԝан рʼожада чь кӧ дитьбун кәсирʼа нәготьн. Рʼожа дьне, гава әԝана жь чʼийе һатьнә хԝаре, әʼлаләтәкә гьран пешийа Ԝида һат. Һьнге жь нав әʼлаләте мәрьвәки гази кьр у гот: «Дәрсдар, әз һиви жь Тә дькьм, бь чʼәʼве рʼәʼме ль кӧрʼе мьн бьньһерʼә. Әԝ тайе мьни тʼәне йә. Рʼӧһʼәки хьраб ԝи дьгьрә у ньшкева дькә ԛирʼин вәдьчʼьрʼькә, кʼәф сәр дькʼәвә һурдәхԝәши дьбә у бь зорәке жь ԝи дур дькʼәвә. Мьн лава жь шагьртед Тә кьр, кӧ щьн же дәрхьн, ле ԝана нькарьбу». Иса гот: «Ньсьле нәбаԝәр у хальфи! Һʼәта кʼәнге Әзе тʼәви ԝә бьм у ль ԝә сәбьр кьм? Кӧрʼе хԝә бинә вьр». Гава һе дьһат, щьн әԝ әʼрде хьст у вәчʼьрʼьки. Иса ль рʼӧһʼе һʼәрам һьлат, кӧрʼьк ԛәнщ кьр у да баве ԝи. Тʼәмамийа щьмәʼте сәр мәзьнайийа Хԝәде зәндәгьрти мабу. У чахе һʼәму сәр һәр тьштед кӧ Иса дькьрьн әʼщебмайи мабун, Әԝи шагьртед Хԝәрʼа гот: «Һун ван хәбәра бира хԝәда хԝәй кьн: Кӧрʼе Мерьв ԝе бькʼәвә дәсте мәрьва». Ле ԝана әв йәк фәʼм нәкьр, чьмки әв жь ԝан вәшарти бу кӧ фәʼм нәкьн у тӧрӧш нәдькьрьн жи бона ԝе йәке жь Ԝи бьпьрсийана. Нав шагьртада пьрс пешда һат, кӧ нава ԝанда кʼи йә йе һәри мәзьн. Ле нетед дьле ԝан Исава әʼйан бун, зарʼокәк ани щәм Хԝә да сәкьнандьне у ԝанрʼа гот: «Кʼи кӧ әве зарʼоке бь наве Мьн ԛәбул кә, әԝ Мьн ԛәбул дькә. У кʼи кӧ Мьн ԛәбул кә, Йе кӧ Әз шандьмә ԛәбул дькә. Аԝа әԝи нава ԝә һʼәмуйада йе һәри бьчʼук ә, әԝ ә йе һәри мәзьн». Йуһʼәнна рʼабу у гот: «Мамоста, мә мәрьвәк дит кӧ бь наве Тә щьн дәрдьхьстьн, ле мә кьр кӧ әм нәһельн, чьмки әԝ пәй мә найе». Ле Иса ԝирʼа гот: «Пешийе ль ԝи нәгьрьн, чьмки әԝе кӧ нә мьԛабьли ԝә йә, әԝ пьшта ԝә йә». У чахе әԝ рʼожед кӧ Исайе бьһата һьлдане незик бун, Әԝи бәре Хԝә да Оршәлиме, кӧ һәрʼә ԝьр. У пешийа Хԝә мәри шандьн, әԝана чунә гӧндәки Самәрйайе кӧ бона Ԝи һазьрийе бьбиньн. Ле самәрийа Әԝ ль ԝьр ԛәбул нәкьр, чьмки бәре Ԝи кʼәтьбу Оршәлиме. Гава шагьртед Ԝи Аԛуб у Йуһʼәнна әв йәк дит, готьн: «Хӧдан, Тӧ дьхԝази әм жь әʼзмен агьр бьхԝазьн кӧ бьбарә у ԛьрʼа ван бинә? » Ле Әԝ вәгәрʼийа, ль ԝан һьлат. У чунә гӧндәки дьн. У чахе әԝана рʼеда бун, йәки Ԝирʼа гот: «Тӧ кʼӧда жи һәрʼи әзе пәй Тә бем». Иса готә ԝи: «Рʼувийарʼа ԛӧл һәнә, тәйрәдед әʼзменрʼа жи һелин, ле бона Кӧрʼе Мерьв щик тʼӧнә кӧ сәре Хԝә ле дайнә». Иса йәки дьнрʼа гот: «Пәй мьн ԝәрә». Әԝи жи гот: «Хӧдан! Изьне бьдә мьн, кӧ әз пешийе һәрʼьм баве хԝә дәфьн кьм». Ле Иса ԝирʼа гот: «Бьра мьри мьрийе хԝә дәфьн кьн. Тӧ һәрʼә Пʼадшатийа Хԝәде даннасин кә». Йәки дьн жи гот: «Әзе пәй тә бем Хӧдан, ле тʼәне изьне бьдә мьн, кӧ әз пешийе хатьре хԝә жь нәфәред мала хԝә бьхԝазьм». Иса гот: «Кʼи кӧ дәсте хԝә датинә сәр кʼотане у ль пьшт хԝәва дьньһерʼә, әԝ нә һежайи Пʼадшатийа Хԝәде йә». Пәй ве йәкерʼа Хӧдан һʼәфте дӧ шагьртед дьн жи кʼьфш кьрьн у әԝана дӧдӧ-дӧдӧ пешийа Хԝәва шандьнә ԝан щи у бажара, кʼидәре Хԝәха ԝе бьчуйайе у ԝанарʼа гот: «Нандьрун гәләк ә, ле пʼалә һьндьк ьн. Аԝа һиви жь Хԝәйе нандьруне бькьн, ԝәки пʼала нандьруна Хԝәрʼа бьшинә. Һәрʼьн, Әз ва ԝә мина бәрха дьшиньмә нава гӧра. Хԝәрʼа нә кʼиськ һьлдьн, нә турьк, нә жи чарьха. У рʼева сьлаве нәдьнә тʼӧ кәси, чь мала кӧ һун һәрʼьне, пешийе бежьн: ‹Әʼдьлайи ве малерʼа›. У һәгәр ль ԝьр мәрьвәки һежайи әʼдьлайийе һәбә, әʼдьлайийа ԝәйе ль сәр ԝи бьминә. Ле һәгәр тʼӧнәбә, ԝе ль ԝә вәгәрʼә. У ԝе маледа бьминьн, чь хԝарьне жи бьдьнә ԝә, әԝе жи бьхԝьн у вәхԝьн, чьмки пʼалә һежайи һәԛе хԝә йә. У мал бь мал нәгәрʼьн. Кʼижан бажаре кӧ һун һәрʼьне у ԝә ԛәбул кьн, чь дайньнә бәр ԝә, бьхԝьн. Нәхԝәшед навда ԛәнщ кьн у ԝанрʼа бежьн: ‹Пʼадшатийа Хԝәде незики ԝә буйә›. Ле әԝ бажаре кӧ һун һәрʼьне у ԝә ԛәбул нәкьн, дәренә мәйдана у бежьн: ‹Әм ԝе тʼоза кӧ жь бажаре ԝә ньгед мәва гьртийә жи ль сәр ԝәда даԝдьшиньн. Ле ве йәке бьзаньбьн кӧ Пʼадшатийа Хԝәде незики ԝә буйә›. Әз жь ԝәрʼа дьбежьм, Рʼожа Ахрәте һʼале Содоме ԝе жь йа ԝи бажари четьр бә. Ԝәй ль тә Хоразин! Ԝәй ль тә Бәйтсайда! Һәгәр әԝ кʼәрәмәтед кӧ нава ԝәда бун, Сур у Сайдайеда бьбуна, әԝанайе зува бь кʼӧрх нав кʼозийеда рʼуньшти тʼобә бькьрана. Ле Рʼожа Ахрәте һʼале Сур у Сайдайе ԝе жь һʼале ԝә четьр бә. У тӧ Кәфәрнаһум, тә тʼьре те һʼәта әʼзмен бьльнд би? Ле те һʼәта дийаре мьрийа һәрʼи хԝаре! Әԝе гӧһдарийа ԝә дькә, гӧһдарийа Мьн дькә у әԝе ԝә тʼәхсир дькә, Мьн тʼәхсир дькә, ле әԝе Мьн тʼәхсир дькә, йе кӧ Әз шандьмә тʼәхсир дькә». Әԝ һʼәфте дӧ шагьрт бь әшԛ у ша вәгәрʼийан у готьн: «Хӧдан, щьн жи сайа наве Тә ельми мә дьбун». Әԝи ԝанарʼа гот: «Мьн мирещьн дит, чаԝа бьруска жь әʼзмен жорда кʼәти. Аԝа Мьн һʼӧкӧм дайә ԝә, кӧ һун мәʼр у дупʼьшка у тʼәмамийа ԛәԝата дьжмьн пʼепәскьн у ԛәт тʼӧ тьште зьраре нәдә ԝә. Ле бь ԝе йәке ша нәбьн кӧ щьн ельми ԝә дьбьн, ле ша бьн, кӧ навед ԝә ль әʼзмана ньвисар ә». Ԝи чахи Әԝ бь Рʼӧһʼе Пироз ша бу у гот: «Шькьр наве Тә бә Баво, Хӧдане әʼрд у әʼзман, кӧ Тә әв тьшт жь зана у билана вәшартьн у ль бәр зарʼа вәкьр. Бәле Баво, чьмки аһа ль Тә хԝәш һат. Һәр тьшт жь Баве Мьн Мьнрʼа һатийә дайине. Кәсәк ньзанә Кӧрʼ кʼи йә, пештьри Баве у кәсәк ньзанә Бав кʼи йә, пештьри Кӧрʼ у йед кӧ Кӧрʼ бьхԝазә ԝанва Баве бьдә наскьрьне». У ԝе гаве сәр шагьртед Хԝәда вәгәрʼийа у ԝанарʼа башԛә гот: «Хԝәзи ль ԝан чʼәʼва, чь кӧ һун дьбиньн әԝ жи дьбиньн. Чьмки Әз ԝәрʼа дьбежьм, кӧ гәләк пʼехәмбәр у пʼадша хԝәстьн әԝ тьштед кӧ һун дьбиньн бьдитана, ле нәдитьн у әԝ тьштед кӧ һун дьбьһен бьбьһистана, ле нәбьһистьн». Һьнге ԛанунзанәк рʼабу Әԝ щерʼьбанд у гот: «Дәрсдар, әз чь бькьм, ԝәки жийина һʼәта-һʼәтайе бьстиньм?» Әԝи жи ԝирʼа гот: «Ԛанунеда чь ньвисар ә? Тӧ чаԝа дьхуни?» Әԝи ле вәгәрʼанд у гот: «‹Хӧдан Хԝәдейе хԝә һʼьз бькә, бь тʼәмамийа дьле хԝә, бь тʼәмамийа щанийа хԝә, бь тʼәмамийа ԛәԝата хԝә у бь тʼәмамийа һʼьше хԝә›, ‹һәвале хԝә жи ԝәкә хԝә һʼьз бькә› ». У Иса ԝирʼа гот: «Тә рʼаст гот. Ӧса бькә у те бьжийи». Ле әԝи хԝәст хԝә рʼаст дәрхә, Исарʼа гот: «Һәвале мьн кʼи йә?» Иса ле вәгәрʼанд у гот: «Мәрьвәк һәбу, әԝ жь Оршәлиме бәржери Әриһайе дьбу. Әԝ кʼәтә дәсте ԛачаха у ԝана әԝ тәʼзи кьр, кʼӧтан у нивкӧшти һьштьн чун. Ӧса ԛәԝьми кӧ кʼаһинәк ԝе рʼеда дьһат. Гава әԝ дит, бәррʼа дәрбаз бу чу. Ӧса жи йәки леԝи һат, гьһиштә ԝи щийи, ль ԝи ньһерʼи, бәррʼа дәрбаз бу чу. Паше рʼеԝики самәри һат. Гава әԝ дит, гӧне ԝи ле һат. Әԝ незики ԝи бу, бьзьр у шәрав ль бьринед ԝи хьстьн, пʼечʼа у әԝ дани сәр кʼәркʼәдане хԝә бьрә меванхане у бона ԝи хәм кьр. Рʼожа дьне дӧ зив дәрхьстьн данә хԝәйе меванхане у гот: ‹Хԝәйитийе ль ви бькә, тӧ чь жи сәр ԝи зедә хәрщ ки, гава әз вәгәрʼийам, әзе ль тә вәгәрʼиньм›. Ньһа тʼәхмина тә, жь ԝан һәрсека кʼижан бу һәвале ԝи мәрьве кӧ кʼәтә дәсте ԛачаха?» Әԝи жи гот: «Әԝе кӧ гӧнә ле ани». Иса ԝирʼа гот: «Һәрʼә тӧ жи ӧса бькә». Чахе рʼекʼәтьн чун, Иса кʼәтә гӧндәки. Кʼӧлфәтәк кӧ наве ԝе Мәртʼа бу Әԝ бьрә мала хԝә. Хушкәкә ԝе жи һәбу, наве ԝе Мәрйәм. Әԝа бәр ньгед Хӧдан рʼуньштьбу у гӧһдарийа хәбәред Ԝи дькьр. Мәртʼа жи кӧ гәләк тʼьвдарәкдитьнева гиро бу, һат сәкьни у Исарʼа гот: «Хӧдан, ԛәт хәма Тә нинә кӧ хушка мьн нава ве тʼьвдарәкдитьнеда әз тʼәне һьштьмә? Бежә ԝе кӧ али мьн бькә». Хӧдан ле вәгәрʼанд у готе: «Мәртʼа, Мәртʼа, тӧ бона гәләк тьшта хәма дьки у тʼәвиһәв дьби. Ле тʼәне тьштәк лазьм ә, әԝ пʼара ԛәнщ жи Мәрйәме хԝәрʼа бьжарт у жь ԝе найе стандьне». Щарәке Иса щики дӧа дькьр, гава хьлаз кьр, жь шагьртед Ԝи йәки жерʼа гот: «Хӧдан, мә һини дӧакьрьне кә, чаԝа Йуһʼәнна шагьртед хԝә һин кьрьн». Әԝи ԝанарʼа гот: «Гава һун дӧа дькьн, аһа бежьн: Баво, Наве Тә пироз бә. Пʼадшатийа Тә бе. Нане мәйи рʼоже рʼож бь рʼож бьдә мә. У гӧнед мә бьбахшинә, чьмки әм жи дьбахшиньнә һʼәму дәйндаред хԝә у мә нәбә щерʼьбандьне ». У ԝанарʼа гот: «Жь ԝә кʼижан ә кӧ достәки ԝи һәбә у ниве шәве һәрʼә мала ԝи жерʼа бежә: ‹Досто, се нана дәйни бьдә мьн. Чьмки пьсмамәки мьн жь рʼе дагәрʼийайә һатийә мала мьн, тьштәки мьни хԝарьне тʼӧнә, кӧ дайньмә бәр ԝи›. У әԝ жи һьндӧрʼда ле вәгәрʼинә у бежә: ‹Дәри иди дада йә, әз у зарʼед хԝәва жи нава щи-ньвинада нә, зәʼмәте нәдә мьн, әз нькарьм рʼабьм бьдьмә тә›. Әз ԝәрʼа дьбежьм, һәгәр әԝ бона достийе жи рʼанәбә нен нәдә ԝи, ле бона беарзийа ԝи ԝе рʼабә чьԛас жерʼа лазьм бә бьдә ԝи. Әз ԝәрʼа дьбежьм, бьхԝазьн һуне бьстиньн, бьгәрʼьн һуне бьбиньн, дәри хьн ԝе бәр ԝә вәбә. Чьмки кʼи кӧ дьхԝазә дьстинә, кʼи кӧ дьгәрʼә дьбинә у кʼи кӧ дәри дьхә бәр ԝи вәдьбә. Жь ԝә кʼижан ә әԝ бав, кӧ кӧрʼе ԝи мәʼси бьхԝазә, дәԝса мәʼси мәʼр бьде, йан жи һеке бьхԝазә, дупʼьшке бьде? Һун кӧ хьраб ьн, заньн тьштед ԛәнщ бьдьнә зарʼед хԝә, ле Баве әʼзмана ԝе чьԛас зедә Рʼӧһʼе Пироз бьдә әԝед кӧ жь Ԝи дьхԝазьн». Щарәке Иса щьне лал жь йәки дәрдьхьст, чахе кӧ щьн дәркʼәт, әԝи лал хәбәр да у әʼлаләт зәндәгьрти ма. Ле жь ԝан һьнәка гот: «Әԝ бь һʼӧкӧме Бәлзәбуле сәрԝере щьна щьна дәрдьхә». Һьнәка жи Әԝ дьщерʼьбанд, нишанед әʼзмен жь Ԝи дьхԝәстьн. Ле нетед дьле ԝан Исава әʼйан бун у ԝанарʼа гот: «Һәр пʼадшатийа кӧ нава ԝеда тʼьфаԛ тʼӧнәбә ԝе ԝеран бә у мала кӧ бетʼьфаԛи бькʼәве, әԝ мал наминә. Һун дьбежьн, кӧ Әз бь һʼӧкӧме Бәлзәбул щьна дәрдьхьм. Ле һәгәр мирещьн нава хԝәда бетʼьфаԛ бә, пʼадшатийа ԝи ԝе чаԝа бьминә? У һәгәр Әз бь Бәлзәбул щьна дәрдьхьм, ле йед кӧ пәй ԝә тен бь чь дәрдьхьн? Һәгәр ӧса бә, әԝе ԝә ломәкʼар кьн. Ле һәгәр Әз бь тʼьлийа Хԝәде щьна дәрдьхьм, ԝәки ӧса йә Пʼадшатийа Хԝәде гьһиштийә ԝә. Чахе йәки ԛәԝат бь чʼәк хԝәйитийе мала хԝә дькә, тʼӧ тьште ԝи зьрар ле набә. Ле гава йәки жь ԝи ԛәԝаттьр бе у ԝи бьгьрә, ԝе әԝ чʼәке кӧ ԝи гӧмана хԝә дабу сәр же бьстинә, һәбука ԝи жи бәла кә. Кʼи кӧ нә тʼәви Мьн ә, мьԛабьли Мьн ә у кʼи кӧ тʼәви Мьн тʼоп накә, бәла дькә. Чахе рʼӧһʼе һʼәрам жь мерьв дәрте, щийе бе ав дьгәрʼә, кӧ рʼьһʼәтийе бьбинә у гава набинә, дьбежә: ‹Әз вәгәрʼьмә ԝе мала хԝәйә кӧ же дәркʼәтьмә›. У гава те, паԛьжкьри у һәвдайи дьбинә. Һьнге дьчә һʼәфт щьнед дьнә жь хԝә хьрабтьр жи тинә, дькʼәвьнә ԝьр дьжин. У ахьрийа ԝи мәрьви жь пешийе хьрабтьр дьбә». Чахе Иса һе хәбәр дьда, жь нава әʼлаләте кʼӧлфәтәке дәнге хԝә бьльнд кьр у Ԝирʼа гот: «Хԝәзи ль ԝи бәтʼьни, кӧ Тӧ хԝәда хԝәйкьри у ԝан бьстана, кӧ шир данә Тә». Ле Әԝи гот: «Һе хԝәзи ль ԝан, йед кӧ хәбәра Хԝәде дьбьһен у пек тиньн». Чахе әʼлаләт сәр Ԝи дьщьвийа, Иса дәстпекьр у гот: «Әва ньсьла хьраб ә, нишанәке дьхԝазә, ле жерʼа нишанәкә дьн найе дайине пештьри нишана Уньс пʼехәмбәр. Чаԝа Уньс бона Нинәԝайа бу нишан, ӧса жи Кӧрʼе Мерьв ԝе ви ньсьлирʼа бьбә нишан. Пʼадша Башуре ԝе Рʼожа Ахрәте тʼәви мәрьвед ви ньсьли рʼабә у ԝан нәһәԛ кә, чьмки әԝа жь сәре дьне һат, кӧ сәрԝахтийа Сьлеман бьбьһе у ва йә Йәки жь Сьлеман мәстьр ль вьр һәйә. Мәрьвед Нинәԝайе Рʼожа Ахрәте ԝе тʼәви ви ньсьли рʼабьн у ԝан нәһәԛ кьн, чьмки әԝана бь даннасинийа Уньс жь гӧнәкьрьне вәгәрʼийан. Ва йә Йәки жь Уньс мәстьр ль вьр һәйә. Кәсәк чʼьре венахә у данайнә щийе хәԝлә, нә жи дькә бьне фьраԛе, ле датинә сәр пʼечʼьре, ԝәки әԝе кӧ дькʼәвьнә һьндӧрʼ, рʼонайе бьбиньн. Чʼьра бәдәна тә чʼәʼве тә йә. Һәгәр чʼәʼве тә пʼак ә, тʼәмамийа бәдәна тәйе рʼонайи бә. Ле һәгәр чʼәʼве тә хьраб ә, бәдәна тәйе жи тәʼри бә. Аԝа һаш жь хԝә һәбә, дьбә кӧ әԝ рʼонайа нава тәда тәʼри йә. Һәгәр тʼәмамийа бәдәна тә рʼонайи йә у пʼарәкә тәʼри тʼӧнә, һʼәмуйе жи рʼонайи бә, чаԝа чʼьра бь шәԝԛа хԝә тә рʼонайи дькә». Гава хәбәрдана Хԝә хьлаз кьр, йәки ферьси һиви же кьр кӧ һәрʼә тʼәви ԝи нан бьхԝә. Әԝ жи чу, ль сәр сьфре рʼуньшт. Гава ферьси дит кӧ Әԝи пешийа нанхԝарьне ль гора әʼдәте дин дәстед Хԝә нәшуштьн, зәндәгьрти ма. Ле Хӧдан ԝирʼа гот: «Аԝа һун ферьсийа тʼас у финщана рʼуйе дәрвава паԛьж дькьн, ле дьле ԝә һьндӧрʼва бь тьмайе у хьрабийава тʼьжи йә. Бефәʼмно! Әԝе кӧ дәрва чекьр, һьндӧрʼ ченәкьр? Аԝа бь чьва тʼас у финщанед ԝә тʼьжи нә, бь ԝан хԝәрʼа хера бькьн у һәр тьште ԝәрʼа һʼәлал бә. Ле ԝәй ль ԝә ферьсийа! Һун дәһәке пунге, щәʼтʼрийе у һʼәму пʼьнщарʼа дьдьн, ле һәԛийе у һʼьзкьрьна Хԝәде давежьнә пьшт гӧһе хԝә. Ԝә гәрәке әв йәк бькьрана у дәст жь йед майин нәкʼьшанда. Ԝәй ль ԝә ферьсийа, кӧ һун кʼьништада кʼӧрсийед пешьн һʼьз дькьн, базарада жи сьлава. Ԝәй ль ԝә! Һун мина тʼьрбед бе нав-нишан ьн, кӧ мәрьв сәр ԝан дьгәрʼьн у ньзаньн». Жь ԛанунзана йәки ле вәгәрʼанд у гот: «Дәрсдар, Тӧ бь ван хәбәра мә жи беһӧрмәт дьки». Әԝи гот: «Ԝәй ль ԝә ԛанунзана жи, чьмки һун баред гьран дьдьнә сәр мьле мәрьва, ле тʼьликә хԝә жи надьнә ԝан бара. Ԝәй ль ԝә, кӧ һун тʼьрбед ԝан пʼехәмбәра чедькьн, йед кӧ кал-бавед ԝә әԝ кӧштьнә. Бь ԝе йәке һун шәʼдәтийа хԝә дьдьн, кӧ һун һавьжийа хԝә кьрьнед кал-бавед хԝә тиньн. Әԝана пʼехәмбәр дькӧштьн у һун тʼьрбед ԝан чедькьн. Ләма жи сәрԝахтийа Хԝәде гот: ‹Әзе пʼехәмбәр у шандийа бьшиньмә щәм ԝан, жь ԝан һьнәка ԝе бькӧжьн, һьнәка жи бьзериньн›. Бона ве йәке хуна һʼәму пʼехәмбәра, кӧ жь ԝәхте әʼфьрандьна дьнйайеда һатийә рʼетьне, жь ви ньсьли ԝе бе хԝәстьне, жь хуна Һабил һʼәта хуна Зәкәрийа, йа кӧ нав горигәһе у пʼарьстгәһеда һатә рʼетьне. Әз рʼаст ԝәрʼа дьбежьм, жь ви ньсьли ԝе бе хԝәстьне. Ԝәй ль ԝә ԛанунзана, кӧ ԝә кʼьлита занәбуне һьлдайә. Нә һун кʼәтьне у нә жи ԝә һьштийә йед кӧ дьхԝазьн бькʼәвьне». У гава Әԝ рʼабу кӧ һәрʼә, ԛанунзан у ферьси ԛьлԛьлин, бона гәләк тьшта Ԝирʼа кʼәтьнә дәʼԝе. У бәр дәве Ԝи сәкьни бун, ԝәки бь хәбәрәке бькарьбьн Ԝи бьгьрьн у гӧнәкʼар кьн. Ԝи чахи, гава бь һʼәзара мәри щьвийан, ӧса кӧ сәр һәврʼа дәрбаз дьбун, Әԝи пешийе дәстпекьр шагьртед Хԝәрʼа гот: «Һʼәвза хԝә жь һәвиртьрʼшке ферьсийа бькьн, Әз тиньмә сәр дӧрʼутийа ԝан. Тьштәки дьзива тʼӧнә кӧ дәрнәйе у нә жи вәшарти кӧ кʼьфш нәбә. Ԝә чь тәʼрийеда готийә, әԝе рʼонайеда бе бьһистьне у ԝә чь ль мале гӧһада хәбәр дайә, әԝе сәр бана бьбә дәнги. Әз ԝә пьсмамед Хԝәрʼа дьбежьм, жь ԝана нәтьрсьн, йед кӧ бәдәне дькӧжьн, жь ԝе пештьр тьштәки дьн нькарьн бькьн. Ле Әзе ԝәрʼа бежьм, кӧ һун жь кʼе бьтьрсьн. Жь Ԝи бьтьрсьн, Йе кӧ пәй кӧштьнерʼа жи һʼӧкӧме Ԝи һәйә бавежә щәʼньме. Бәле, Әз ԝәрʼа дьбежьм жь Ԝи бьтьрсьн! Нә пенщ чʼьвик бь дӧ дьравед чарԛӧрʼуше тенә фьротане? Ле Хԝәде жь ԝан йәки жи бир накә. Ӧса жи һәр тʼеләки пʼорʼед сәре ԝә жьмарти йә. Нәтьрсьн, һун жь гәләк чʼьвика ԛимәттьр ьн. Әз ԝәрʼа дьбежьм, кʼи кӧ бәр мәрьва Мьн иԛрар кә, Кӧрʼе Мерьв жи ԝе ԝи бәр мьлйакʼәтед Хԝәде иԛрар кә. У кʼи кӧ Мьн бәр мәрьва инкʼар кә, әԝе жи бәр мьлйакʼәтед Хԝәде бе инкʼаркьрьне. У кʼи кӧ тьштәки мьԛабьли Кӧрʼе Мерьв бежә, ԝе бе бахшандьне. Ле кʼи кӧ готьнәкә хьраб мьԛабьли Рʼӧһʼе Пироз бежә, ль ԝи найе бахшандьне. У гава ԝә бьбьнә кʼьништа йан бәр һʼакьм йан сәрԝеред һʼӧкӧмәте, һун хәм нәкьн кӧ һуне чаԝа щаба хԝә бьдьн йан чь бежьн. Чьмки Рʼӧһʼе Пироз әԝе дәме ԝе ԝә һин кә, чь лазьм ә кӧ һун бежьн». Жь нава әʼлаләте йәки Ԝирʼа гот: «Дәрсдар, бежә бьре мьн, бьра миратʼа баве мьн мьнрʼа пʼарәвәкә». Әԝи ԝирʼа гот: «Һәвал, кʼе Әз сәр ԝә һʼакьм йан жи пʼаркьр кʼьфш кьрьмә?» У готә ԝан: «Һаш жь хԝә һәбьн у һʼәвза хԝә жь һәр щурʼә тьмайе бькьн, чьмки әʼмьре инсен зедәбуна һәбука ԝива гьредайи нинә». Әԝи мәсәләк жи ԝанрʼа гот: «Зәвийа мәрьвәки дәԝләти гәләк бәр да. У әԝи дьле хԝәда гот: ‹Әз чаԝа бькьм? Щи жи тʼӧнә кӧ дәрәмәта хԝә текьме›. У гот: ‹Әзе аһа бькьм, әʼмбаред хԝә һьлшиньм у һе йед мәзьн чекьм, һʼәму дәрәмәт у һәбука хԝә жи бькьмә ԝьр. У хԝәха хԝәрʼа бежьм: Әʼвдо! Тә бона хԝә тʼера гәләк сала, гәләк һәбук дайә сәр һәв, рʼуне бьхԝә, вәхԝә у ша бә›. Ле Хԝәде готә ԝи: ‹Бефәʼмо! Ишәв рʼӧһʼе тәйе жь тә бе стандьне. Әв һәбука тә бәрәв кьрийә ԝе кʼерʼа бьминә?› Ӧса жи ԝе бе сәре һәр кәси, йе кӧ бона хԝә хьзне тʼоп дькә у пе Хԝәде дәԝләти набә». Һьнге Әԝи шагьртед Хԝәрʼа гот: «Ләма Әз ԝәрʼа дьбежьм, бона әʼмьре хԝә хәма нәкьн, кӧ һуне чь бьхԝьн, нә жи бона бәдәна хԝә, кӧ һуне чь ль хԝә кьн. Чьмки әʼмьр жь хԝарьне ԛимәттьр ә у бәдән жи жь кʼьнща. Дина хԝә бьдьнә ԛарʼԛарʼа, нә дьрʼәшиньн, нә дьдьрун у нә жи әʼмбар йан кʼиләред ԝан һәнә, ле Хԝәде рʼьсԛе ԝан дьгьһинә. Һун чьԛаси жь тәйрәда ԛимәттьр ьн! Иди жь ԝә кʼи дькарә бь хәмед хԝә дәԛәке сәр әʼмьре хԝәда зедә кә? Һәгәр һун ԝи тьште һәри бьчʼук нькарьн бькьн, иди чьма бона тьштед майин хәм дькьн? Дина хԝә бьдьнә сосьна, чаԝа шин дьбьн, нә дьхәбьтьн у нә дьрʼесьн. Әз ԝәрʼа дьбежьм, кӧ Сьлеман жи нава тʼәмамийа ԝе хер-хьзна хԝәда мина жь ԝан йәке хԝә нәкьр. Һәгәр гиһайе чоле, кӧ иро һәйә у сьбе давежьнә нава егьр, Хԝәде ӧса дьхәмьлинә, ле чьԛас зедә ԝе ль ԝә кә, кембаԝәрно? Ль ван тьшта нәгәрʼьн, кӧ һуне чь бьхԝьн йан чь вәхԝьн. Бәр хԝә нәкʼәвьн. Чьмки пʼутпʼарьстед дьнйайе ль пәй ԝан һʼәму тьшта дькʼәвьн, ле Баве ԝә занә кӧ һун һʼәԝще ԝан тьшта нә. Ле бәр ԝева һун ль Пʼадшатийа Ԝи бьгәрʼьн у әԝе ԝәрʼа бенә дайине. Нәтьрсә, кәрийе пези бьчʼук! Чьмки ль Баве ԝә хԝәш һат, кӧ пʼадшатийе бьдә ԝә. Һәбука хԝә бьфьрошьн у хԝәрʼа хера бькьн. Хԝәрʼа кʼиське кӧ нарʼьзә у хьзна әʼзманайә кӧ кем набә ԛазьнщ кьн. Ль ԝе дәре нә дьзе незик бе у нә жи ԝе бьзузе бьхԝә. Чьмки хьзна ԝә кʼидәре бә, дьле ԝәйе жи ль ԝе дәре бә. Бьра пьшта ԝә гьредайи у чʼьред ԝә вехьсти бьн. Һун мина ԝан мәрьва бьн, йед кӧ һивийа ахайе хԝә нә, кӧ әԝе кʼәнге жь дәʼԝате вәгәрʼә, кӧ чахе бе дери хә, перʼа-перʼа рʼабьн дери вәкьн. Хԝәзи ль ԝан хӧлама, кӧ чахе ахайе ԝан бе, ԝан һʼьшйар бьбинә. Әз рʼаст ԝәрʼа дьбежьм, әԝе пьшта хԝә гьредә, ԝан сәр сьфре бьдә рʼуньштандьне у бәрдәстийе ԝанрʼа бькә. У һәгәр ахайе ԝан ниве шәве йан жи бәрбанга сьбәһе бе у ԝан ӧса бьбинә, әԝ хӧламана хԝәзьли нә. Ле һун ве йәке бьзаньбьн, һәгәр хԝәйе мале бьзаньбуйа кӧ дьзе кʼижан сьһʼәте бьһата, ԝе нәһьшта кӧ мала ԝи дәрәвәкьра. Аԝа һун жи һазьр бьн, чьмки әԝ сьһʼәта кӧ дьле ԝәрʼа дәрбаз набә, Кӧрʼе Мерьв ԝе бе». Пәтрус гот: «Хӧдан, әва мәсәла тә тʼәне бона мә гот йан бона һʼәмуйа?» Хӧдан гот: «Кʼи йә әԝ ԝәкʼилхәрще амьн у сәрԝахт, кӧ ахайе ԝи, ԝе ԝи сәр хӧламед хԝә сәрԝер кʼьфш кә, кӧ ԝәхтда хԝарьна ԝан бьдә ԝан. Хԝәзи ль ԝи хӧлами, кӧ чахе ахайе ԝи бе, әԝи ӧса бьбинә. Әз рʼаст ԝәрʼа дьбежьм, әԝе ԝи бькә сәрԝере тʼәмамийа һәбука хԝә. Ле һәгәр әԝ хӧлам дьле хԝәда бежә: ‹Ахайе мьн һатьна хԝә дәрәнги дехә› у дәстпекә ль хӧлам у щарийа хә, бьхԝә, вәхԝә у сәрхԝәш бә, ахайе ԝи хӧлами ԝе рʼожәкә ӧса бе, кӧ әԝ нә һивийе йә у сьһʼәтәкә ӧса, кӧ әԝ ньзанә. Ԝе ԝи ԛәт-ԛәти кә у пʼара ԝи тʼәви пʼара беамьна кә. У әԝ хӧламе кӧ хԝәстьна ахайе хԝә занә у кʼаре хԝә накә, нә жи ль гора хԝәстьна ԝи дькә, ԝе гәләки бе кʼӧтане. Ле әԝе кӧ жь нәзанийа хԝә тьштәки һежайи кʼӧтане дькә, ԝе һьндьки бе кʼӧтане. Кʼерʼа гәләк һатийә дайине, гәләк жи ԝе же бе хԝәстьне у кʼерʼа гәләк һатийә спартьне, щабдарийа ԝи жи ԝе гәләк бә. Әз һатьм, ԝәки егьр бавежьмә сәр дьне у Мьн чаԝа дьхԝәст ԝәки иди алав бьда. Ле ньхӧмандьнәкә Мьн һәйә, кӧ Әз гәрәке пе бемә ньхӧмандьне у дьле Мьн ԛәт нә рʼьһʼәт ә һʼәта кӧ әԝ бе сери. Ԝә тʼьре Әз һатьм әʼдьлайийе бьдьмә дьне? Әз ԝәрʼа дьбежьм на, ле бона щӧдәбуне. Жь вьр шунда маләкеда пенщ мәрьве жь һәв щӧдә бьн, сьсе ԝе мьԛабьли дӧда бьн, дӧдӧ мьԛабьли сьсийа. Баве рʼабә мьԛабьли кӧрʼ, кӧрʼ жи баве, де ԛизе, ԛиз жи де, хԝәси буке у бук жи хԝәсийе». У Әԝи әʼлаләтерʼа жи гот: «Чахе жь рʼоавайе әʼԝр дәрте, һун дәстхԝәда дьбежьн: ‹Баране бьбарә› у ӧса жи дьбә. У гава байе башуре те, һун дьбежьн: ‹Һәԝайе гәрм бә› у ӧса дьбә. Дӧрʼуно! Һун рʼуйе әʼзмен әʼнәнә дькьн һәԝайе чаԝа бә, ле чаԝа ви зәмани әʼнәнә накьн? Һун чьма хԝәха надьнә ль бәр һʼәсаба, кӧ кʼижан ә рʼаст? Чахе нәйаре тә тә кʼаши щәм һʼакьм дькә, ӧса бькә, кӧ рʼева тʼәви ԝи ль һәв бейи. Нәбә әԝ тә бьдә дәсте һʼакьм, һʼакьм жи тә бьдә дәсте сәрәскәр у әԝ жи тә бавежә кәле. Әз тәрʼа дьбежьм, тӧ жь ԝьр тʼӧ щар дәрнакʼәви һʼәта поле пашьн нәди». Ԝи чахи һьнәк һатьн бона ԝан щәлилийа Исарʼа готьн, хуна кʼижана Пилато тʼәви хуна ԛӧрбанед ԝан кьрьбу. Иса ль ԝан вәгәрʼанд у гот: «Ԝә тʼьре әԝ щәлилийед кӧ әв йәк һатә сәре ԝан, жь һʼәму щәлилийед майин гӧнәкʼартьр бун? Әз ԝәрʼа дьбежьм, на! Ле бәле һәгәр һун жь гӧнәкьрьне вәнәгәрʼьн, һун һʼәмуйе жи рʼожа ԝанда һәрʼьн. Йан жи әԝ һʼиждәһ мәрьвед кӧ кәла Силԝаме сәр ԝанда кʼәт мьрьн, ԝә тʼьре әԝана жь һʼәму бьнәлийед Оршәлиме гӧнәкʼартьр бун? На! Әз ԝәрʼа дьбежьм, һәгәр һун жь гӧнәкьрьне вәнәгәрʼьн, һун һʼәмуйе жи рʼожа ԝанда һәрʼьн». Әԝи әва мәсәла жи гот: «Мәрьвәк һәбу, нава рʼәзе тьрийе ԝида дарәкә һежирейә ньканди һәбу. Рʼожәке әԝ һат, кӧ сәр ԝе бәр бьгәрʼә, ле нәдит. Ԝи чахи рʼәзванрʼа гот: ‹Әва мӧхдаре се сала йә әз тем, бәре ве дара һежире дьгәрʼьм, ле набиньм. Әве бьбьрʼә! Бадиһәԝа чьма щи гьртийә?› Рʼәзван ле вәгәрʼанд у гот: ‹Аха, исал жи ԝе сәбьр кә. Әзе дора ԝе вәдьм у пʼәйн бькьме. Һәгәр саләкә дьн бәр бьдә, ԛәнщ ә, ле һәгәр нәдә, паше бьбьрʼә›». Рʼожәкә шәмийе Иса кʼьништәкеда һин дькьр. Ль ԝьр кʼӧлфәтәкә ԛонщьки һәбу, кӧ һʼиждәһ салед ԝе бу, рʼӧһʼе нәхԝәшийе перʼа бу. Әԝе ԛәт нькарьбу хԝә рʼаст кьра. Гава Иса әԝ дит, гази ԝе кьр у готе: «Әʼвде! Тӧ жь нәхԝәшийа хԝә аза йи!» У Әԝи дәстед Хԝә данин сәр ԝе, әԝ перʼа-перʼа рʼаст бу у шькьри дьда Хԝәде. Ле сәрԝере кʼьниште һерс кʼәт, кӧ Иса рʼожа шәмийе нәхԝәш ԛәнщ кьр у әʼлаләтерʼа гот: «Шәш рʼож бона шьхӧлкьрьне һәнә, һун нава ԝан рʼожада дькарьн бен ԛәнщ бьн, нә кӧ рʼожа шәмийе». Хӧдан ле вәгәрʼанд у готе: «Дӧрʼуно! Жь ԝә кʼижан рʼожа шәмийе гайе хԝә йан кʼәра хԝә жь афьрʼ вәнакә у набә сәр аве? Нә әва жи ԛиза Бьраһим ә, кӧ әва мӧхдаре һʼиждәһ салед ԝе бун, мирещьн әԝ гьредабу. Нә лазьм бу кӧ әԝ рʼожа шәмийе жь ԝе ԛәйде вәбуйа?» У гава әв йәк гот, һʼәмуйед кӧ мьԛабьли Ԝи бун шәрми ман. У тʼәмамийа әʼлаләте бона ԝан кʼәрәмәтед Ԝийә рʼумәти кӧ Ԝи дькьрьн ша дьбу. Пәйрʼа Иса гот: «Пʼадшатийа Хԝәде мина чь йә? У Әз ԝе һьмбәри чь кьм? Әԝ мина һʼәбәкә тʼохьме хәрдале йә, кӧ мәрьвәки һьлда бахче хԝәда чанд. У гава әԝ мәзьн бу, бу дар, тәйрәдед әʼзмен һелинед хԝә сәр чʼьԛьлед ԝе чекьрьн». Әԝи диса гот: «Әз Пʼадшатийа Хԝәде һьмбәри чь кьм? Әԝ мина һәвиртьрʼшк ә, кӧ кʼӧлфәтәке һьлда нава се код арда стьра, һʼәта кӧ һʼәму һьлат». Иса гӧнд у бажарарʼа дәрбаз дьбу, һин дькьр у бәрбь Оршәлиме дьчу. Йәки Ԝирʼа гот: «Хӧдан, гәло һьндьк ьн, әԝед кӧ ԝе хьлаз бьн?» Әԝи ԝанрʼа гот: «Бьщәʼдиньн, кӧ һун дәре тәнгрʼа бькʼәвьнә һьндӧрʼ, чьмки Әз ԝәрʼа дьбежьм, гәләке бьхԝазьн бькʼәвьне у ԝе нькарьбьн. У пәйрʼа, кӧ хԝәйе мале рʼабә дәри бьгьрә, һьнге һуне дәрва бьминьн у дәри хьн бежьн: ‹Әм хӧлам, дәри ль мә вәкә›. Әԝе ль ԝә вәгәрʼинә у бежә: ‹Әз ньзаньм һун жь кʼӧ нә›. Һьнге һуне бежьн: ‹Мә тʼәви Тә хԝар, вәхԝар у Тә кʼучед мәда һин дькьр›. Ле Әԝе бежә: ‹Әз ԝәрʼа дьбежьм, Әз ньзаньм кӧ һун жь кʼӧ нә. Жь Мьн дур кʼәвьн, һун һʼәмуйед кӧ нәһәԛийе дькьн!› Ль ԝьр ԝе бьбә гьри у чʼьркә-чʼьрка дьрана, гава һун Бьраһим, Исһаԛ, Аԛуб у һʼәму пʼехәмбәра Пʼадшатийа Хԝәдеда бьбиньн, хԝә жи дәрва авити. У ԝе жь рʼоһьлат-рʼоавайе у бакӧр-башуре бен, Пʼадшатийа Хԝәдеда сәр сьфре рʼунен. Аԝа бьзаньбьн кӧ һьнәкед паш ԝе бьбьнә пеш у һьнәкед пеш ԝе бьбьнә паш». Ԝе дәме чәнд ферьси һатьн у Ԝирʼа готьн: «Рʼабә жь вьр һәрʼә, чьмки Һеродәс дьхԝазә Тә бькӧжә». У Әԝи ԝанрʼа гот: «Һәрʼьн ԝи рʼувийирʼа бежьн: ‹Ва Әз иро, сьбе щьна дәрдьхьм, нәхԝәша ԛәнщ дькьм у рʼожа сьсийа Әзе бьгьһижьмә мәрәме Хԝә›. Ле гәрәке Әз иро, сьбе, дӧсьбә рʼийа Хԝәда һәрʼьм, чьмки набә кӧ пʼехәмбәрәк жь Оршәлиме дәр ӧнда бә. Оршәлим! Оршәлим! Тӧ кӧ пʼехәмбәра дькӧжи у шандийед щәм хԝә дьди бәр кәвьра. Чәнд щара Мьн хԝәст кӧ зарʼед тә ӧса бьщьванда, чаԝа мьришк щущукед хԝә бьн баскед хԝәда дьщьвинә, ле тә нәхԝәст! Ва мала тә ԝе хьрабә бьминә. Әз ԝәрʼа дьбежьм, иди һун Мьн тʼӧ щар набиньн, һʼәта кӧ һун бежьн: ‹Бьмбарәк ә Әԝе кӧ бь наве Хӧдан те› ». Рʼожәкә шәмийе Иса бона нанхԝарьне чу мала сәрԝерәки ферьсийа. Ԝана чʼәʼве хԝә жь сәр Ԝи нәдьбьрʼи. Ль ԝьр пешбәри Ԝи мәрьвәки бь нәхԝәшийа авзе һәбу. Иса жь ԛанунзан у ферьсийа пьрси у гот: «Рʼожа шәмийе ԛәнщкьрьн щайиз ә йан на?» Ԝана дәнге хԝә нәкьр. Һьнге Әԝи нәхԝәш гьрт, ԛәнщ кьр у вәрʼекьр. Паше Әԝи ԝанрʼа гот: «Жь ԝә кʼижан ә, һәгәр кӧрʼе ԝи йан гайе ԝи бькʼәвә бире, рʼожа шәмийе перʼа-перʼа дәст нәвеже дәрнәхә?» Нькарьбун щаба ве пьрса Ԝи бьдана. У гава Әԝи дит, ԝәки мәрьвед тʼәглифкьри чаԝа хԝә щийе жорьн дьгьртьн, мәсәләк ԝанрʼа гот: «Гава йәк тә гази дәʼԝате дькә, щийе жорьн рʼунәни, нәбә кӧ йәки жь тә ԛәдьртьр жи алийе ԝида тʼәглифкьри бә, у хԝәйе дәʼԝате, аԝа готи тʼәглифкьрийе ԝә һәр дӧйа, бе тәрʼа бежә: ‹Кʼәрәма хԝә щи бьдә фьлан кәсе›. Һьнге те жь шәрма хԝә рʼаби щийе жерьн рʼунейи. Ле чахе тә тʼәглиф дькьн, һәрʼә щийе жерьн рʼуне, кӧ чахе хԝәйе дәʼԝате бе тәрʼа бежә: ‹Пьсмам, кʼәрәм кә, дәрбази жоре бә!› Һьнге ԛәдьре тәйе бәр чʼәʼве һʼәму рʼуньштийа бьльнд бә. Аԝа һәр кәсе кӧ хԝә бьльнд кә, ԝе ньмьз бә у кʼи кӧ хԝә ньмьз кә, ԝе бьльнд бә». У Иса тʼәглифкьрийе Хԝәрʼа гот: «Чахе тӧ фьравине йан шиве датини, гази һәвал-һогьр, бьра-пьсмам йан жи дәр-щинаред хԝәйә дәԝләти нәкә, нәбә әԝ жи тә тʼәглиф кьн у ԛәнщийа тә ль тә вәгәрʼиньн. Ле гава тӧ хԝарьнәке датини, гази фәԛир, сәԛәт, йед дькӧльн у кора кә. Һьнге те хԝәзьли би, чьмки әԝана нькарьн ԛәнщийа тә ль тә вәгәрʼиньн, ле бәле Рʼожа Рʼабуна рʼастайә жь мьрьне ԝе ль тә бе вәгәрʼандьне». Гава жь һазьра йәки әв йәк бьһист, Ԝирʼа гот: «Хԝәзи ль ԝи, кӧ Пʼадшатийа Хԝәдеда нен бьхԝә». Ле Иса ԝирʼа гот: «Мәрьвәки шайикә гьран һазьр кьр у гәләк мәри тʼәглиф кьрьн. Гава ԝәхте шайийе перʼа гьһишт, әԝи хӧламе хԝә шанд, кӧ һʼәму тʼәглифкьрийарʼа бежә: ‹Һәр тьшт иди һазьр ә, кʼәрәм кьн ԝәрьн›. Ле һәр йәки дәстпекьр мәʼни гьрт. Йе пешьн ԝирʼа гот: ‹Мьн хԝәрʼа әʼрд кʼьрʼийә, әз әʼсәйи гәрәке һәрʼьм бьбиньм. Әз һиви жь тә дькьм, мьн бьбахшинә›. У йе дьн гот: ‹Мьн пенщ щот га кʼьрʼинә, әз дьчьм кӧ ԝан бьщерʼьбиньм. Әз һиви жь тә дькьм, мьн бьбахшинә›. Йе сьсийа жи гот: ‹Әз зәԝьщимә, ләма нькарьм бем›. У әԝ хӧлам вәгәрʼийа һат, әв һʼәму ахайе хԝәрʼа гьли кьрьн. Һьнге аха һерс кʼәт, хӧламе хԝәрʼа гот: ‹Зу һәрʼә мәйдан у кʼучед бажер, фәԛира, ԛопа, сәԛәта у кора тʼоп кә бинә вьр›. Пәйрʼа хӧлем готе: ‹Ахайе мьн, тә чаԝа әʼмьр кьр, мьн ӧса жи кьр, ле диса щи һәйә›. У ахе хӧлемрʼа гот: ‹Дәркʼәвә сәре рʼе у дьрба, зоре ль һәр кәси бькә бинә вьр, кӧ мала мьн тʼьжи бә. Әз ԝәрʼа дьбежьм, кӧ жь ԝан мәрьвед тʼәглифкьри тʼӧ кәс жь шайийа мьн ԝе тьштәки тәʼм нәкә›». Пәй ве йәкерʼа әʼлаләтәкә гьран тʼәви Иса дьчу у Әԝ сәр ԝанда вәгәрʼийа у гот: «Һәгәр йәк пәй Мьн бе у Мьн жь де у баве хԝә, жь жьн у зарʼед хԝә, жь хушк у бьрайед хԝә у ӧса жи жь хԝә зәʼфтьр һʼьз нәкә, нькарә бьбә шагьрте Мьн. У кʼи кӧ хаче хԝә һьлнәдә пәй Мьн нәйе, әԝ нькарә бьбә шагьрте Мьн. Жь ԝә кʼижан ә, кӧ бьхԝазә бьльндщикә нобәдара чекә, пешийе рʼунәни нәдә бәр һʼәсеб, гәло ԛәԝата ԝийе бьгьһиже бинә сери йан на? Нәбә кӧ һʼиме ԝе дайнә у нькарьбә бинә сери, йед кӧ бьбиньн ле бькʼәньн у бежьн: ‹Әви мәрьви дәстпекьр чекә у нькарьбу банийа сери›. Йан жи кʼижан пʼадша пʼадшакирʼа дәре шерʼ, пешийе рʼунәни нәшеԝьрә, гәло ԝе бькарьбә бь дәһә һʼәзара бәр йәки кӧ бь бист һʼәзари те сәр ԝи бькә шәрʼ? Һәгәр әԝ пе нькарә, гава һе дур ә ԝе ԛасьде хԝә бьшинә, бона льһәвһатьне һиви же бькә. Аԝа жь ԝә һәр кәс, кʼи кӧ дәсте хԝә жь тʼәмамийа һәбуна хԝә нәкʼьшинә, әԝ нькарә бьбә шагьрте Мьн. Хԝе тьштәки ԛәнщ ә. Ле һәгәр әԝ тәʼма хԝә ӧнда кә, паше әԝе бь чь тәʼме бьстинә? Нә ԝе дәԝса хԝәлийе бьгьрә у нә жи дәԝса пʼәйн. Ԝе бавежьнә ԝеда. Гӧһе кʼейи бьһистьне һәйә бьра бьбьһе». Аԝа һʼәму хәрщгьр у гӧнәкʼар незики Ԝи дьбун, кӧ гӧһе хԝә бьдана сәр готьнед Ԝи. Ле ферьси у ԛанунзана бина хԝә тәнг дькьр у дьготьн: «Әва гӧнәкʼара ԛәбул дькә у тʼәви ԝан нан дьхԝә». У Иса әва мәсәла ԝанрʼа гот: «Жь ԝә кʼи йә әԝ мәри, кӧ сәд пәзед ԝи һәбьн у гава йәки жь ԝан ӧнда кә, нод нәһа чол у бәста нәһелә у пәй йа ӧндабуйи нәкʼәвә, һʼәта кӧ ԝе бьбинә? У гава бьбинә, ԝе жь шабуна дайнә сәр мьле хԝә, вәгәрʼә мале, гази дәр у щинара кә у ԝанрʼа бежә: ‹Тʼәви мьн ша бьн! Мьн пәза хԝәйә ӧндабуйи дит›. Әз ԝәрʼа дьбежьм, ӧса жи ль әʼзмен бона гӧнәкʼарәки кӧ тʼобә дькә, һе ԝе бьбә шабунәкә мәзьн, нә кӧ бона нод нәһед рʼаст, кʼижанарʼа тʼобәкьрьн нә һʼәԝщә йә. Йан кʼижан ә әԝ кʼӧлфәта кӧ дәһә зивед ԝе һәбьн у гава йәки жь ԝан ӧнда кә, ԝе чʼьре венәхә, мале гези нәкә у ԛәнщ ле нагәрʼә, һʼәта кӧ зиве хԝә бьбинә? У чахе әԝ бьбинә, ԝе гази дәр у щинара кә у ԝанрʼа бежә: ‹Тʼәви мьн ша бьн! Мьн зиве хԝәйи ӧндакьри дит›. Әз ԝәрʼа дьбежьм, ӧса жи мьлйакʼәтед Хԝәде бона гӧнәкʼарәки кӧ тʼобә дькә, ша дьбьн». У Иса гот: «Дӧ кӧрʼед мәрьвәки һәбун. Йе бьчʼук готә баве хԝә: ‹Баво, жь һәбука хԝә чь кӧ пʼара мьн дькʼәвә, бьдә мьн›. У әԝи ԝанарʼа һәбук пʼарәвәкьр. Пәй чәнд рʼожарʼа кӧрʼе бьчʼук һәр тьште хԝә тʼоп кьр чу ԝәлатәки дур. Ль ԝьр әԝи әʼмьре толтийе дәрбаз кьр, һʼәму һәбука хԝә пʼучʼ кьр. У гава тьштәк дестда нәма, ԝи ԝәлатида жи бу хәлайикә мәзьн у әԝ кʼәтә һʼаләки гьран. Чу хԝә ль бажарванәки ԝи ԝәлати гьрт у әԝи әԝ шандә кʼәԝшен бәр бәраза. Әԝ һʼәԝщә бу кӧ зьке хԝә бь ԝан хьрнуфед кӧ бәраза дьхԝар тʼер бькьра, ле кәсәки әԝ жи нәдьда ԝи. Ле гава әԝ сәр һʼьше хԝәда һат, гот: ‹Чьԛас пʼалә мала баве мьнда һәнә, кӧ нан дьхԝьн у бәр ԝан дьминә, ле әз вьра бьрʼчина дьмьрьм. Әз рʼабьм һәрʼьмә щәм баве хԝә у ԝирʼа бежьм: Баво, мьн бәр тә у әʼзмен гӧнә кьр. Әз иди нә һежайи кӧрʼтийа тә мә. Тʼәне мина пʼаләки хԝә мьн ԛәбул кә›. У рʼабу һатә щәм баве хԝә. Ле гава һе дурва баве әԝ дит, дьле ԝи сәр шәԝьти, бәрбь ԝи бәзи, әԝ һʼәмез кьр у рʼамуса. Кӧрʼ жерʼа гот: ‹Баво, мьн бәр тә у әʼзмен гӧнә кьр. Әз иди нә һежайи кӧрʼтийа тә мә›. Ле баве хӧламед хԝәрʼа гот: ‹Зу бькьн, чӧхе лапи рʼьнд биньн ле кьн, гӧстиле текьнә тʼьлийе у сола жи бькьнә ньга. Щанәгайе дәрмаликьри биньн, сәржекьн, әм бьхԝьн у ша бьн. Чьмки әв кӧрʼе мьн мьри бу, сах бу, ӧндабуйи бу, һатә дитьне›. У дәст бь шайийе кьрьн. Ԝи чахи кӧрʼе ԝийи мәзьн ль кʼәԝшен бу. Гава һат незики мале бу, дәнге стьран у рʼәԛасе бьһист. Әԝи гази жь хӧлама йәки кьр у же пьрси: ‹Әв чь һʼәԝал ә?› Хӧлем ԝирʼа гот: ‹Бьре тә һатийә, баве тә щанәгайе дәрмаликьри сәржекьрийә, чьмки әԝ сах у сьламәт вәгәрʼийайә›. Бьра һерс кʼәт у нәхԝәст кӧ һәрʼә һьндӧрʼ. Бав дәркʼәтә дәрва, лава ԝи кьр. Әԝи ль баве хԝә вәгәрʼанд у гот: ‹Әва мӧхдаре чәнд сала нә кӧ әз тәрʼа хӧламтийе дькьм у жь гӧрʼа тә ԛәт дәрнәкʼәтьмә, тә ԛәт карәк жи нәдайә мьн кӧ мьн тʼәви һәвал-һогьред хԝә кʼеф бькьра. Ле гава әԝ кӧрʼе тәйи кӧ һәбука тә бьр, тʼәви ԛава пʼучʼ кьр һат, тә бона ԝи щанәгайе дәрмаликьри сәржекьр›. Баве жерʼа гот: ‹Лаԝо, тӧ һәр гав тʼәви мьн и у һʼәму һәбука мьн йа тә йә. Гәрәке әм әшԛ у ша буна, чьмки әв бьре тә мьри бу, сах бу у ӧндабуйи бу, һатә дитьне›». Иса шагьртед Хԝәрʼа гот: «Мәрьвәки дәԝләти һәбу, ԝәкʼилхәрщәки ԝи һәбу. Рʼожәке гьли гьһиштә ԝи, йанчийә ԝәкʼилхәрще ԝи һәбука ԝи пʼучʼ дькә. Әԝи жи гази ԝи кьр у готе: ‹Әв чь йәк ә кӧ әз бона тә дьбьһем? Һәԛ-һʼәсабе ԝәкʼилхәрщтийа хԝә бьдә, чьмки иди тӧ нькари ԝәкʼилхәрщтийе бьки›. Ԝәкʼилхәрщ дьле хԝәда гот: ‹Әз чь бькьм? Ахайе мьн жь ԝәкʼилхәрщтийе мьн дәрдьхә, әʼрдкʼолан ль мьн набә, жь пʼарскьрьне жи шәрм дькьм. Әз заньм әзе ньһа чь бькьм, кӧ малед хԝәда мьн ԛәбул кьн, гава әз жь ԝәкʼилхәрщтийе дәркʼәвьм›. Әԝи йәк-йәк гази дәйндаред ахайе хԝә кьр у йе пешьнрʼа гот: ‹Тӧ чьԛаси дәйндаре ахайе мьн и?› Әԝи гот: ‹Сәд кʼуп бьзьре зәйтʼуне› у ԝирʼа гот: ‹Һан ньвисара хԝә һьлдә у зу рʼуне бьньвисә пенщи›. Паше йе дьнрʼа гот: ‹Тӧ чьԛаси дәйндар и?› Әԝи жи гот: ‹Сәд чʼәʼл гәньм› у ԝирʼа гот: ‹Һан ньвисара хԝә һьлдә у бьньвисә һʼәйште›. У аха пәсьне ԝәкʼилхәрще беамьн да, ԝәки әԝи бь аԛьли кьр. Аԝа мәрьвед ве дьне һьндава хԝәда жь мәрьвед рʼонайе сәрԝахттьр ьн. Әз ԝәрʼа дьбежьм, һун бь һәбука ве дьне һәвала хԝәрʼа дәст хьн у гава һәбук кем бә, ԝә бьн конед һʼәта-һʼәтайеда ԛәбул кьн. Әԝе кӧ нава тьштед һьндькида амьн ә, нава тьштед гәләкида жи амьн ә, ле әԝе кӧ нава тьштед һьндькида беамьн ә, нава тьштед гәләкида жи беамьн ә. Һәгәр һун нава һәбука ве дьнеда беамьн бун, кʼе ԝе һәбука рʼаст бьдә ԝә? Һәгәр һун нав тьште йе хәрибда амьн нибьн, йа ԝә кʼе ԝе бьдә ԝә? Хӧламәк нькарә дӧ ахарʼа хӧламтийе бькә, чьмки йан ԝе һʼиле ԝи жь йәки һәрʼә у йе дьне һʼьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʼа, һьн жи һәбукерʼа хӧламтийе бькьн». Гава ферьсийа әв һʼәму тьшт бьһистьн, ԛәрфе хԝә ль Иса дькьрьн, чьмки пʼәрәһʼьз бун. Иса ԝанрʼа гот: «Һун әԝ ьн йед кӧ хԝә бәр мәрьва рʼаст дьдьнә кʼьфше, ле Хԝәде дьле ԝә занә. Бьзаньбьн кӧ әԝ тьште нав мәрьвада хԝәйиԛәдьр ә, әԝ ль бәр Хԝәде һʼәрам ә. Зәмане Ԛанун у пʼехәмбәра һʼәта Йуһʼәнна кʼьшанд, жь ԝьр шунда Пʼадшатийа Хԝәде те даннасинкьрьне у һәр кәс дьщәʼдинә бь ԛәԝате бькʼәвә ԝьр. Ле әʼрд у әʼзмане һе рʼьһʼәт дәрбаз бьн, нә кӧ жь Ԛануне ноктәк ӧнда бә. Кʼи кӧ жьна хԝә бәрʼдә у йәкә дьн бьстинә, зьнекʼарийе дькә. У кʼи кӧ йа мербәрʼдайи дьстинә, зьнекʼарийе дькә. Мәрьвәки дәԝләти һәбу, кӧ кʼьнще рʼәԝш у назьк ль хԝә дькьр у һәр рʼож бь әшԛ-ша кʼеф дькьр. Мәрьвәки фәԛир жи һәбу, наве ԝи Лазар. Әԝ нава пʼьзькед пʼисда бәр дәре йе дәԝләти кʼәти бу. У чʼәʼве ԝи бәрмайийе сьфра дәԝләтида дьма, кӧ дьхԝәст кӧрме хԝә пе бьшкенанда. Сә жи дьһатьн, бьринед ԝи даластьн. Рʼож һат фәԛир мьр, мьлйакʼәта әԝ бьрьнә щәм Бьраһим. Йе дәԝләти жи мьр, дәфьн кьрьн. Гава йе дәԝләти дийаре мьрийада щәфа дькʼьшанд, сәре хԝә бьльнд кьр, жь дурва Бьраһим дит у Лазар һʼәмезеда. Әԝи дәнг дайе у готе: ‹Баве Бьраһим, ль мьн ԝәрә рʼәʼме. Лазар бьшинә, кӧ сәре тʼьлийа хԝә аведа кә бинә заре мьн шьл кә, чьмки әз кʼура ви агьрида дьшәԝьтьм›. Ле Бьраһим готе: ‹Лаԝо! Бинә бира хԝә, кӧ тә ԛәнщийед пʼара хԝә нав зәмане әʼмьре хԝәда стандьнә, ле Лазар зәлули кʼьшандийә. Ньһа жи дьле ԝи ль вьр рʼьһʼәт ә, ле тӧ нава щәфада йи. У пештьри ве йәке жи, гәлики бебьни нава мә у ԝәда һәйә. Нә йе вьр дькарьн дәрбази щәм ԝә бьн, нә жи йе ԝьр дькарьн дәрбази щәм мә бьн›. Һьнге әԝи готе: ‹Баво, ԝәки ӧса йә, әз һиви жь тә дькьм, тӧ әԝи бьшинә мала баве мьн, чьмки пенщ бьрайед мьн жи һәнә, бьра һәрʼә тʼәмийе бьдә ԝан, ԝәки әԝ жи нәйенә ви щийе щәфа›. Ле Бьраһим готе: ‹Муса у пʼехәмбәред ԝан һәнә. Бьра гӧһдарийа ԝан бькьн›. Әԝи жи гот: ‹На, баве Бьраһим, һәгәр жь мьрийа йәк һәрʼә щәм ԝан, ԝе жь гӧнәкьрьне вәгәрʼьн›. Һьнге Бьраһим ԝирʼа гот: ‹Һәгәр гӧһдарийа Муса у пʼехәмбәра накьн, йәк жь мьрийа рʼабә жи, диса әԝана баԝәр накьн›». Иса шагьртед Хԝәрʼа гот: «Набә кӧ сәбәбийа жьрʼекʼәтьне тʼӧнәбә, ле ԝәй ль ԝи, кӧ бьбә сәбәбе ве йәке. Ԝирʼа һе ԛәнщ ә, кӧ бәрашәк стуйе ԝива бе гьредан у авитьне нава бәʼре, нә кӧ жь ванед бьчʼук йәки жь рʼе дәрхә. Һаш жь хԝә һәбьн! Һәгәр бьре тә гӧна бькә, ле һьле, һәгәр сәр кьрьна хԝә пʼошман бә, ԝи бьбахшинә. У һәгәр нава рʼожеда һʼәфт щара нәһәԛийе ль тә бькә у вәгәрʼә, тәрʼа бежә: ‹Әз тʼобә дькьм›, ԝи бьбахшинә». Шандийа Хӧданрʼа гот: «Баԝәрийа мә зедә кә». Хӧдан гот: «Һәгәр баԝәрийа ԝә ԝәкә һʼәбәкә тʼохьме хәрдале һәбә у ве дара тʼутерʼа бежьн: ‹Жь вьр рʼабә у бәʼреда дачʼькә›, әԝе йа ԝә бькә. Жь ԝә кʼижан ә, әԝе кӧ хӧламәки ԝийи щоткʼар йан шьван һәбә, гава әԝ жь кʼәԝшен бе, ԝирʼа бежә: ‹Бьләзинә кʼәрәм кә сәр сьфре›? Ԝе пешийе жерʼа нәбежә: ‹Шива мьн һазьр кә, пьшта хԝә гьредә у бәрдәстийе мьнрʼа бькә. Әз бьхԝьм у вәхԝьм, паше жи тӧ бьхԝә у вәхԝә›? Гәло бона әԝ тьштед кӧ хӧлемрʼа һатьнә әʼмьркьрьне у ԝи кьрьнә, ахайе ԝи ԝе жерʼа бежә: ‹Зәʼф рʼази мә›? Ӧса жи һун, гава әԝ һʼәму тьштед кӧ ԝәрʼа һатьнә әʼмьркьрьне бькьн, бежьн: ‹Әм хӧламед бекер ьн. Чь кӧ ль мә дькʼәт, мә әԝ кьр›». Гава Иса бәрбь Оршәлиме дьчу, нава Самәрйайе у Щәлилерʼа дәрбаз дьбу. Чахе Әԝ дькʼәтә гӧндәки, дәһә мәрьвед кʼоти рʼасти Ԝи һатьн дур сәкьнин у бь дәнге бьльнд готьне: «Исайе мамоста, ль мә ԝәрә рʼәʼме». У гава Иса әԝ дитьн, ԝанрʼа гот: «Һәрʼьн хԝә нишани кʼаһина кьн». У чахе әԝ һе дьчун, паԛьж бун. Ле гава жь ԝан йәки дит кӧ әԝ паԛьж буйә, пашда вәгәрʼийа, бь дәнгәки бьльнд шькьри дьда Хԝәде. Әԝи хԝә дәвәрʼу авитә бәр ньгед Иса у рʼазибун дьда Ԝи. Әԝ самәри бу. Һьнге Иса гот: «Нә һәр дәһә жи паԛьж бун, ле кʼане нә һәр нәһед дьн? Чьма пештьри әви мәрьве хәриб кәсәк жь ԝан вәнәгәрʼийа, кӧ бьһата шькьри бьда Хԝәде?» У ԝирʼа гот: «Рʼабә һәрʼә. Баԝәрийа тә тӧ ԛәнщ кьри». Гава ферьсийа жь Иса пьрси, Пʼадшатийа Хԝәде ԝе кʼәнге бе, Әԝи ль ԝан вәгәрʼанд у гот: «Пʼадшатийа Хԝәде ашкәрә найе. Нә жи ԝе бежьн: ‹Ва йә вьр ә!› йан жи: ‹Ԝе дәра һан ә!› Чьмки Пʼадшатийа Хԝәде нава ԝәда йә». У шагьртед Хԝәрʼа гот: «Ԝе рʼоже бен, кӧ һуне һʼьзрәта рʼожәкә Кӧрʼе Мерьв бьн, ле набиньн. У һәгәр ԝәрʼа бежьн: ‹Ва йә вьр ә!› йан: ‹Дәра һан ә!› пәй нәкʼәвьн нәчьн. Чьмки чаԝа бьруск жь алики әʼзмен бьрԛ дьдә у тʼәмамийа әʼзмен рʼонайи дькә, Кӧрʼе Мерьв жи ԝе рʼожа хԝәда ӧса бә. Ле пешийе гәрәке Әԝ гәләки щәфа бькʼьшинә у жь ви мьләти бе тʼәхсиркьрьне. Чаԝа рʼожед Нӧһда дьԛәԝьмин, ӧса жи ԝе рʼожед Кӧрʼе Мерьвда бьԛәԝьмьн. Һьнге дьхԝарьн, вәдьхԝарьн, дьзәԝьщин у мер дькьрьн, һʼәта ԝе рʼожа кӧ Нӧһ кʼәтә гәмийе, лейи рʼабу ԛьрʼа һʼәмуйа ани. У ӧса жи чаԝа рʼожед Лутда бун, дьхԝарьн, вәдьхԝарьн, дькʼьрʼин, дьфьротьн, дьрʼәшандьн у чедькьрьн. Ле әԝ рʼожа кӧ Лут жь Содоме дәркʼәт, агьр у кʼьркʼут жь әʼзмен бари, ԛьрʼа һʼәмуйа ани. Әԝ рʼоже жи ԝе ӧса бә, гава Кӧрʼе Мерьв кʼьфш бә. Ԝе рʼоже кʼи сәр хени йә у һәбука ԝи жи малда йә, бьра жорда нәйе, кӧ тьштәки һьлдә у әԝе ль кʼәԝшен ә, бьра пашда вәнәгәрʼә. Жьна Лут биньнә бира хԝә. Кʼи кӧ дьхԝазә әʼмьре хԝә хьлаз кә, ԝе ӧнда кә, ле кʼи кӧ әʼмьре хԝә ӧнда кә, ԝе хьлаз кә. Әз ԝәрʼа дьбежьм, ԝе шәве һәгәр дӧ мәри ньвинәкеда бьн, йәке бе һьлдане, йәке бе һьштьне. У һәгәр дӧ кʼӧлфәт сәр дәстарʼәки бьн, йәке бе һьлдане у йа дьн бе һьштьне». Ԝана ле вәгәрʼанд у готьн: «Хӧдан, әве ль кʼидәре бьбә?» Әԝи жь ԝанрʼа гот: «Бәрәтʼә ль кʼӧ һәбә, тәйре жи ль ԝьр бьщьвьн». Иса мәсәләк бона ԝе йәке шагьртарʼа гот, ԝәки һәр гав дӧа бькьн у ащьз нәбьн у гот: «Бажарәкида һʼакьмәк һәбу, әԝ нә жь Хԝәде дьтьрсийа у нә жи мьнәт жь мерьв дькьр. Ԝи бажарида жьнәбик жи һәбу, һәр гав дьһатә щәм ԝи у дьгот: ‹Һәԛийе бькә, мьн жь дәсте нәйаре мьн хьлаз кә›. Һʼакьм гәләк ԝәхт гӧһ нәдьда ԝе, ле паше хԝәха хԝәрʼа гот: ‹Әз жь Хԝәде натьрсьм у жь мерьв жи мьнәте накьм, ле бона хатьре ԝе йәке, кӧ әва жьнәбийа те зәʼмәте дьдә мьн, әзе һәԛийе жерʼа бькьм, кӧ һәр гав нәйе мьн ащьз нәкә›». У Хӧдан гот: «Бьбьһен кӧ һʼакьме нәрʼаст чь гот. Гәло Хԝәде жи бьжартийед Хԝәрʼа ԝе һәԛийе нәкә, йед кӧ шәв у рʼож һәԝара хԝә Ԝи датиньн? Йан Әԝе щаба ԝан дәрәнги бехә? Әз ԝәрʼа дьбежьм, ԝе дәстхԝәда һәԛийе бькә. Ле гава Кӧрʼе Мерьв бе, гәло сәр дьне ԝе баԝәрийе бьбинә?» Әв мәсәлә жи ԝанрʼа гот, йед кӧ хԝәха хԝәда гӧман бун, йанчийә әԝә рʼаст ьн у һʼәмуйед майин бәр тьштәки һʼәсаб нәдькьрьн. «Дӧ мәри һьлкʼьшийанә пʼарьстгәһе, кӧ дӧа бькьн. Йәк ферьси бу, йәк жи хәрщгьр. Әԝе ферьси тʼәне сәкьнибу хԝәда гӧман бь ви щурʼәйи дӧа дькьр: ‹Хԝәдейе мьн, шькьрдар ьм, кӧ әз нә мина ԝан мәрьва мә, йед кӧ тʼаланийе, нәһәԛийе, зьнекʼарийе дькьн у нә жи мина ви хәрщгьри мә. Ле әз һʼәфтийе дӧ щара рʼожи дьгьрьм у дәһәке жь һʼәму кʼара хԝә жи дьдьм›. Ле әԝи хәрщгьр дур сәкьнибу, рʼуйе ԝи нәдьгьрт ль әʼзмен жи бьньһерʼийа, синге хԝә дьхьст у дьгот: ‹Хԝәде, ль мьн гӧнәкʼари ԝәрә рʼәʼме›. Әз ԝәрʼа дьбежьм, кӧ әв хәрщгьра рʼастһʼәсаббуйи чу мала хԝә, нә кӧ йе дьн. Аԝа һәр кәсе кӧ хԝә бьльнд кә, ԝе ньмьз бә, ле кʼи кӧ хԝә ньмьз кә, ԝе бьльнд бә». Тʼьфал жи анинә щәм Иса, кӧ дәсте Хԝә дайнә сәр ԝан. Гава шагьрта әв йәк дит, ль йед данин һьлатьн. Ле Иса гази зарʼока кьр у гот: «Бьра әԝ зарʼок бенә щәм Мьн, пешийа ԝан нәгьрьн, чьмки Пʼадшатийа Хԝәде пʼара йед аһа йә. Әз ԝәрʼа рʼаст дьбежьм, кʼи Пʼадшатийа Хԝәде мина зарʼокәке ԛәбул нәкә, әԝ тʼӧ щар накʼәвә нава ԝе». Сәрԝерәки жь Ԝи пьрси у гот: «Дәрсдаре ԛәнщ, әз чь бькьм, ԝәки жийина һʼәта-һʼәтайе ԝар бьм?» Иса ԝирʼа гот: «Тӧ чьма Мьнрʼа дьбежи ԛәнщ? Ԛәнщ тʼәне Хԝәде йә, пештьри Ԝи кәсәки дьн тʼӧнә. Тӧ тʼәмийа зани: ‹Зьнекʼарийе нәкә, нәкӧжә, нәдьзә, шәʼдәтийа дәрәԝ нәдә, ԛәдьре де у баве хԝә бьгьрә› ». Әԝи жи гот: «Әв һʼәму жи мьн жь щаһьлтийа хԝәда хԝәй кьрьнә». Гава Иса әв йәк бьһист, ԝирʼа гот: «Тьштәки тә һе кем ә, һәр тьште хԝә бьфьрошә, бәлайи фәԛира кә, һьнге хьзна тә ԝе ль әʼзмана һәбә. У пәй Мьн ԝәрә». Гава әԝи әв йәк бьһист, әшԛа ԝи шкәст, чьмки гәләки дәԝләти бу. Иса дит кӧ бәшәра ԝи нәхԝәш ә, гот: «Чьԛаси зәʼмәт ә бона йед хԝәйиһәбук кӧ бькʼәвьнә Пʼадшатийа Хԝәде. Дәвә ԝе ԛӧла дәрзийерʼа һе рʼьһʼәт дәрбаз бә, нә кӧ дәԝләти бькʼәвә Пʼадшатийа Хԝәде». Әԝед кӧ дьбьһистьн, готьн: «Иди кʼи дькарә хьлаз бә?» У Иса гот: «Әԝ тьште кӧ жь дәсте мерьв найе, Хԝәде дькарә бькә». Пәтрус гот: «Аԝа мә һәр тьштед хԝә һьштьнә у пәй Тә һатьнә». Әԝи ԝанрʼа гот: «Әз рʼаст ԝәрʼа дьбежьм, һәр кәсе кӧ бона Пʼадшатийа Хԝәде мал, йан жьн у зарʼ, йан хушк у бьра, йан де у бав һьштьбә, ԝе ве дьне һе зедә бьстинә у дьнйа дьнда жи жийина һʼәта-һʼәтайе». Әԝи һәр донздәһ данә алики у ԝанрʼа гот: «Бьбьһен! Әм һәвраз дьчьнә Оршәлиме у һʼәму тьштед кӧ бь дәсте пʼехәмбәра бона Кӧрʼе Мерьв һатьнә ньвисаре, ԝе бенә сери. Әԝе бькʼәвә дәсте нәщьһуйа, ԝе ԛәрфе хԝә ле бькьн, беһӧрмәт кьн, тʼукьне, бьдьнә бәр ԛамчийа, Ԝи бькӧжьн. У рʼожа сьсийа ԝе жь мьрьне рʼабә». Шагьрта тʼӧ тьшт жь ван хәбәра фәʼм нәкьрьн. Әв йәк жь ԝан вәшарти бу у әв готьн сәре ԝанда рʼунәдьньшт. Гава Әԝ незики Әриһайе бу, йәки кор ль сәр рʼе рʼуньшти пʼарс дькьр. У гава бьһист кӧ әʼлаләт бәр ԝирʼа дәрбаз дьбә, пьрси: «Әв чь һʼәԝал ә?» Ԝирʼа готьн: «Исайе Ньсрәте дәрбаз дьбә». Һьнге әԝи кьрә ԛирʼин у гот: «Иса, Кӧрʼе Даԝьд, ль мьн ԝәрә рʼәʼме!» У йе кӧ пешийе дьчун, ль ԝи һьлатьн, кӧ дәнге хԝә бьбьрʼә, ле әԝи һе дькьрә ԛирʼин: «Кӧрʼе Даԝьд, ль мьн ԝәрә рʼәʼме!» Иса щида сәкьни у әʼмьр кьр, кӧ әԝи биньнә щәм Ԝи. У гава кор незики Ԝи бу, жь ԝи пьрси у гот: «Тӧ чь жь Мьн дьхԝази кӧ Әз бона тә бькьм?» Әԝи гот: «Хӧдан, дьхԝазьм чʼәʼвед мьн бьбиньн». У Иса ԝирʼа гот: «Бьра бьбиньн, баԝәрийа тә тӧ ԛәнщ кьри!» У дәстхԝәда чʼәʼвед ԝи дитьн, да пәй Иса чу у шькьри дьда Хԝәде. Тʼәмамийа ԝе щьмәʼте кӧ әв йәк дит, пәсьне Хԝәде дьдан. Иса кʼәтә Әриһайе у ԝерʼа дәрбаз дьбу. Ль ԝьр мәрьвәки дәԝләти һәбу, сәрԝере хәрщгьра, наве ԝи Зәхайо. Әԝи дькьр кӧ Иса бьдита кʼа Әԝ кʼи йә, ле дәст әʼлаләте нькарьбу бьдита, чьмки бәжьнеда кьн бу. Әԝ пешда бәзи рʼабу сәр дарәкә һежирейә стьрин, ԝәки Иса бьбинә, чьмки Әԝе һәма ль ԝьррʼа дәрбаз бьбуйа. У чахе Иса һатә ԝи щийи, ль жор ньһерʼи у готә ԝи: «Зәхайо! Зу бькә жь ԝьр ԝәрә хԝаре, чьмки Әз гәрәке иро мала тәда бьминьм». Зәхайо ләзанд жорда һатә хԝаре у бь әшԛ-ша Әԝ ԛәбул кьр. Һʼәмуйед кӧ әв йәк дитьн, бина хԝә тәнг дькьрьн у дьготьн: «Әԝ бу меване мәрьвәки гӧнәкʼар». Ле Зәхайо пеш һʼәмуйава сәкьни у готә Хӧдан: «Хӧдан, әз ва ниве һәбука хԝә дьдьмә фәԛира у мьн нәһәԛи кʼе жи кьрьбә, әзе чар щар ле вәгәрʼиньм». Иса ԝирʼа гот: «Иро әв мал хьлаз бу, чьмки әва жи зарʼа Бьраһим ә. Бона ве йәке Кӧрʼе Мерьв һат, ԝәки ль йед ӧндабуйи бьгәрʼә у хьлаз кә». У ԝана һе әв тьшт дьбьһистьн, Иса мәсәләкә дьн жи ани сәр ԝе йәке, кӧ Әԝ незики Оршәлиме дьбу у ԝана тʼьре Пʼадшатийа Хԝәде ԝе зутьрәке кʼьфш бә. Әԝи гот: «Мәрьвәки әʼсьлзадә чу ԝәлатәки дур, кӧ пʼадшатийа хԝә бьстинә у вәгәрʼә. Гази дәһә хӧламед хԝә кьр, дәһә зерʼ данә ԝан у гот: ‹Ван бьдьнә хәбате, һʼәта кӧ әз вәгәрʼьм›. Ле бажарвана кʼина ԝи гьртьбу, ԛасьд ль пәй ԝи шандьн у готьн: ‹Әм нахԝазьн әԝ пʼадшатийе ль сәр мә бькә›. У гава әԝи пʼадшатийа хԝә станд вәгәрʼийа, гази ԝан хӧлама кьр, кʼижанед кӧ әԝи пʼәрә дабунә ԝан, ԝәки бьзаньбә кʼа һәр йәки чьԛас кьрийә кʼар. Йе пешьн һат у готе: ‹Әз хӧлам, зерʼәки тә дәһә зерʼ кьрә кʼар›. Ахайе ԝи жерʼа гот: ‹Әʼфәрьм, хӧламе ԛәнщ! Тӧ нава ԝи тьште һьндькида амьн майи, сәрԝертийе дәһә бажара бькә›. Йе дӧда жи һат у гот: ‹Әз хӧлам, зерʼәки тә пенщ зерʼ кьрә кʼар›. Ахайе ԝи жерʼа гот: ‹Тӧ жи сәр пенщ бажара бә›. Паше йәки дьн һат у гот: ‹Әз хӧлам, ва йә зерʼе тә, мьн дәстмаледа пʼечʼайи һьлдабу. Чьмки әз жь тә дьтьрсийам, мьн заньбу тӧ мәрьвәки һʼьшк и, чь кӧ тә данәнийә, һьлдьди у чь кӧ тә нәчандийә, дьдьруйи›. У ԝи жерʼа гот: ‹Әзе һәма бь дәве тә диԝана тә бькьм, хӧламе хьраб! Һәгәр тә заньбу кӧ әз мәрьвәки һʼьшк ьм, чь кӧ мьн данәнийә, һьлдьдьм у чь кӧ нәчандийә, дьдьрум, тә чьма пʼәре мьн нәда кʼаркьра, кӧ әз бьһатама мьн бь сәләф бьстанда?› У һазьрарʼа гот: ‹Ԝи зерʼи жь ԝи бьстиньн у бьдьнә әԝе кӧ дәһә зерʼед ԝи һәнә›. Ԝирʼа готьн: ‹Хӧдан, дәһә зерʼед ԝи һәнә›. Әԝи гот: ‹Әз ԝәрʼа дьбежьм, йе кʼе кӧ һәйә, ԝирʼа ԝе бе дайине, ле йе кʼе кӧ тʼӧнә, чь һәйә жи ԝе же бе стандьне. Ле бәле ԝан нәйаред мьн жи, кʼижана нәдьхԝәст әз пʼадшатийе ль сәр ԝан бькьм, биньнә вьр, бәр чʼәʼве мьн ԝан бькӧжьн›». Иса пәй ве хәбәрданерʼа пешда чу, ԝәки һәвраз һәрʼә Оршәлиме. У гава незики гӧндед Бәйтфаще у Бәйтанйайе бу, ԝи щийе кӧ жерʼа дьготьн чʼийайе Зәйтʼуне, һьнге дӧ шагьртед Хԝә шандьн у гот: «Һәрʼьнә ԝи гӧнде пешбәри хԝә, гава һун бькʼәвьне, һуне щәʼшькәкә гьредайи бьбиньн кӧ һе кәсәк ле сийар нәбуйә. Әԝе вәкьн у биньн. Һәгәр йәк жь ԝә бьпьрсә: ‹Һун чьма ԝе вәдькьн?› бежьн, кӧ Хӧданрʼа лазьм ә». Әԝед шанди чун, чаԝа кӧ ԝанрʼа һатьбу готьне, ӧса жи дитьн. У ԝана һе щәʼшьк вәдькьр, хԝәйед ԝе ԝанрʼа готьн: «Һун чьма ве щәʼшьке вәдькьн?» Шагьрта гот: «Хӧданрʼа лазьм ә». У әԝ анинә щәм Иса, кʼьнщед хԝә авитьнә сәр ԝе у Иса ле сийар кьрьн. Гава дьчу, щьмәʼте кʼьнщед хԝә сәр рʼе рʼадьхьстьн. У гава Әԝ незики пʼебәржере чʼийайе Зәйтʼуне бу, тʼәмамийа кʼома шагьрта дәстпекьрьн ша дьбун у бь дәнге бьльнд бона һʼәму кʼәрәмәтед кӧ дитьбун шькьри дьданә Хԝәде у дьготьн: «Бьмбарәк ә әԝ Пʼадшайе кӧ бь наве Хӧдан те! Әʼдьлайи ль әʼзмен у шькьри ль Йе Һәри Жорьн!» Ле жь нав әʼлаләте чәнд ферьсийа Исарʼа гот: «Дәрсдар, ль шагьртед Хԝә һьле». Әԝи ль ԝан вәгәрʼанд у гот: «Әз ԝәрʼа дьбежьм, һәгәр әвана дәнге хԝә бьбьрʼьн, кәвьре бькьнә ԛирʼин». У гава незики Оршәлиме бу, ль бажер ньһерʼи, сәрда гьрийа у гот: «Хԝәзи тә һәма иро бьзаньбуйа әʼдьлайийа тә чьва гьредайи йә! Ле ньһа жь бәр чʼәʼве тә һатә вәшартьне. Ԝе рʼож сәр тәда бен, кӧ дьжмьнед тәйе дора тә чәпәрʼе гьредьн у жь һәр алийава һʼьщуми сәр тә кьн. Ԝе тә у зарʼед тә нава тәда бькьн ах-хԝәли у кәвьр ль сәр кәвьр наһельн. Чьмки ԝәхте кӧ Хԝәде сәрик да тә, тӧ хԝә нәһʼәсийайи». У кʼәтә пʼарьстгәһе, дәстпекьр йед кӧ дьфьротьн дәрхьстьн у ԝанрʼа гот: «Ньвисар ә: ‹Мала Мьн ԝе мала дӧа бә›. Ле ԝә әԝ кьрийә ‹шкәфта ԛачаха› ». У һәр рʼож пʼарьстгәһеда һин дькьр, ле сәрәкед кʼаһина, ԛанунзан у гьрәгьред щьмәʼте пәй кʼәтьбун, кӧ чаԝа Ԝи бькӧжьн. Ле нькарьбун тьштәк бькьрана, чьмки тʼәмамийа щьмәʼте Ԝива гьредайи бу у гӧһдарийа Ԝи дькьр. У рʼожәкә жь ԝан рʼожада, гава Әԝи пʼарьстгәһеда хәлԛ һин дькьр у Мьзгини дьда, сәрәкед кʼаһина у ԛанунзан тʼәви рʼуспийа һатьнә щәм Ԝи у готьн: «Бежә мә, Тӧ бь чь һʼӧкӧми ван кьра дьки? Кʼе әв һʼӧкӧм дайә Тә?» Әԝи ль ԝан вәгәрʼанд у гот: «Әз жи тьштәки жь ԝә бьпьрсьм у һун Мьнрʼа бежьн: Һʼӧкӧме ньхӧмандьна Йуһʼәнна жь әʼзмен бу йан жь мәрьва?» Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе бежә: ‹Ле ԝә чьма әԝ баԝәр нәкьр?› Ле һәгәр әм бежьн: ‹Жь мәрьва бу›, тʼәмамийа щьмәʼте ԝе мә бьдә бәр кәвьра, чьмки әԝ әʼсәйи баԝәр дькьн, кӧ Йуһʼәнна пʼехәмбәр бу». Ԝана щаба Ԝи да у готьн: «Әм ньзаньн жь кʼӧ бу». Иса ԝанрʼа гот: «Әз жи ԝәрʼа набежьм, кӧ бь чь һʼӧкӧми ван кьра дькьм». У Иса дәстпекьр әв мәсәлә щьмәʼтерʼа гот: «Мәрьвәки рʼәзе тьрийа дани у әԝ бь кʼьре да рʼәзвана, ԝәхтәки дьреж чу ԝәлатәки дьн. У ԝәхтда хӧламәк шандә щәм рʼәзвана, ԝәки жь ԝи рʼәзи бәре пʼара ԝи ԝирʼа бьшиньн, ле рʼәзвана хӧламе ԝи кʼӧта у дәствала вәрʼекьрьн. Ахе хӧламәки дьн жи шанд, ԝана әԝ жи кʼӧта, әԝ рʼобәт кьрьн у дәствала вәрʼекьрьн. Йе сьсийа жи шанд, вана әва жи бьриндар кьр у жь рʼәз дәрхьстьн. Хԝәйе рʼәз гот: ‹Әз чь бькьм? Кӧрʼе хԝәйи дәлал бьшиньм, һьлбәт ԝе жь ԝи шәрм бькьн›. Ле гава рʼәзван чʼәʼв ԝи кʼәтьн, ль һәв шеԝьрин у готьн: ‹Әв ԝаре ԝи йә! Ԝәрьн әм ԝи бькӧжьн, кӧ миратʼа ԝи мәрʼа бьминә›. У әԝ жь рʼәз дәрхьстьнә дәр у кӧштьн. Аԝа хԝәйе рʼәз ԝе чь бинә сәре ԝан? Нә әԝе бе ԛьрʼа ԝан рʼәзвана бинә у рʼәз бьдә һьнәкед дьн». Гава әв йәк бьһистьн, готьн: «Хԝәде нәкә». У Иса ль ԝан ньһерʼи у гот: «Ле әԝ чь йә, кӧ ньвисар ә? ‹Әԝ кәвьре кӧ һоста тʼәхсир кьр, әԝ бу сәре әʼнишке›. Һәр кәсе кӧ бькʼәвә сәр ԝи кәвьри, ԝе һурдәхԝәши бә у әԝ кәвьр бькʼәвә сәр кʼе, ԝе ԝи бьһʼьнщьрʼинә». Сәрәкед кʼаһина у ԛанунзана ԝе дәме кьрьн кӧ Ԝи бьгьрьн, чьмки фәʼм кьрьн, кӧ Әԝи әв мәсәлә ани сәр ԝан, ле жь щьмәʼте тьрсийан. У чʼәʼвед ԝан ль Иса бун, чәнд мәрьвед щәʼсус шандьн, кӧ бь дӧрʼути хԝә дәԝса рʼаста данибун, ԝәки Ԝи бь хәбәра бьгьрьн у бьдьнә дәсте һʼӧкӧмәте у диԝана ԝәли. Ԝана жь Ԝи пьрси у готьне: «Дәрсдар, әм заньн кӧ Тӧ рʼаст хәбәр дьди у һин дьки, нав мәрьвада фьрԛийе жи данайни, ле рʼийа Хԝәде рʼаст һин дьки. Гәло рʼаст ә кӧ әм хәрщ бьдьнә Ԛәйсәр йан на?» Әԝи кӧ фелбазийа ԝан заньбу ԝанарʼа гот: «Зивәки нишани Мьн кьн. Әв наве ньвисар у сьфәт йе кʼе йә сәр?» Ԝана гот: «Йед Ԛәйсәр ьн». Әԝи ԝанрʼа гот: «Ԝәки ӧса йә, чь кӧ йед Ԛәйсәр ьн, бьдьнә Ԛәйсәр у чь йед Хԝәде нә бьдьнә Хԝәде». У нькарьбун бәр щьмәʼте нава хәбәра Ԝида Әԝ бьгьртана, сәр щабдайина Ԝи зәндәгьрти дәнге хԝә бьрʼин. Садуԛи, кӧ дьбежьн рʼабуна мьрийа тʼӧнә, һьнәкә жь ԝан һатьнә щәм Ԝи жь Ԝи пьрсин у готьн: «Дәрсдар, Муса мәрʼа ньвисийә: ‹Һәгәр бьре йәки бьзәԝьщә у безӧрʼәт бьмьрә, бьра бьре ԝи жьна ԝи бьстинә у ԝаре бьре хԝә шин кә›. Аԝа һʼәфт бьра һәбун. Бьре мәзьн жьнәк станд, безӧрʼәт мьр. Пәйрʼа йе дӧда у паше йе сьсийа әԝ жьн станд, һәйнәсәр ԝан һәр һʼәфта жи әԝ жьн станд у зарʼ пәй ԝан нәкʼәтьн, мьрьн. Пәй гьшкарʼа әԝ кʼӧлфәта жи мьр. Дә ижар ԝе Рʼожа Рʼабуна мьрийа әԝ кʼӧлфәте бьбә жьна кʼижани? Чьмки һәр һʼәфта жи әԝ стандьбу». Иса ль ԝан вәгәрʼанд у гот: «Мәрьве ве дьне дьзәԝьщьн у мер дькьн. Ле әԝед кӧ һежайи ԝе дьне бьн у бьгьһижьнә рʼабуна мьрийа, нә ԝе бьзәԝьщьн у нә жи мер кьн. Әԝе иди нькарьбьн бьмьрьн, әԝ ԝәкә мьлйакʼәта нә. Әԝ зарʼед Хԝәде нә, чьмки пʼара рʼабуна мьрийа нә. Ле бона рʼабуна мьрийа, Муса жи дайә кʼьфше. Әԝ сәрһатийа дара дьрʼийеда бона Хӧдан дьбежә: ‹Хԝәдейе Бьраһим, Хԝәдейе Исһаԛ, Хԝәдейе Аԛуб›. Аԝа Хԝәде нә Хԝәдейе мьрийа йә, ле йе зендийа йә, чьмки бона Ԝи һʼәму жи сах ьн». Жь ԛанунзана һьнәка ле вәгәрʼанд у готьне: «Дәрсдар, Тә ԛәнщ гот». У иди кәсәки нәԝерьбу кӧ тьштәки жи жь Ԝи бьпьрсә. У Иса ԝанарʼа гот: «Чаԝа дьбежьн кӧ Мәсиһ кӧрʼе Даԝьд ә? Даԝьд хԝәха кʼьтеба Зәбурада дьбежә: ‹Хӧдан готә Хӧдане мьн: Ль мьле Мьни рʼасте рʼуне, һʼәта кӧ дьжмьнед Тә бькьмә бьне пʼийед Тә›. Аԝа һәгәр Даԝьд Ԝи ‹Хӧдан› һʼәсаб дькә, иди Әԝ чаԝа дьбә кӧрʼе Даԝьд?» Һе тʼәмамийа щьмәʼте гӧһдари дькьр, Әԝи шагьртед Хԝәрʼа гот: «Һʼәвза хԝә жь ԝан ԛанунзана бькьн, йед кӧ һʼьз дькьн бь чӧхед дьреж бьгәрʼьн, базарада сьлаве бьдьнә ԝан, кʼьништада кʼӧрсийед пешьн бьгьрьн у шайийада жи һәрәма жорьн рʼунен. Әвана аликива малед жьнәбийа һʼуфи хԝә дькьн, алийе дьнва жи бона хԝәкʼьфшкьрьне дӧайе хԝә дьреж дькьн. Диԝана ԝане һе гьран бә». Иса дина Хԝә дайе у дит кӧ дәԝләтийа һʼәдийед хԝә давитьнә пʼәрәданга пʼарьстгәһе. Әԝи бәләнгазәкә жьнәби жи дит кӧ дӧ пол авитә ԝьр у Иса гот: «Әз рʼаст ԝәрʼа дьбежьм, кӧ әве жьнәбийа бәләнгаз жь ван һʼәмуйа зәʼфтьр авите. Чьмки ԝан һʼәмуйа жь бәрмайийед хԝә авитьнә нава һʼәдийа, ле әве ве бәләнгазийа хԝәда һʼәму тьште кӧ ԝе пе әʼбуре хԝә бькьра авите». У чахе һьнәка бона пʼарьстгәһе дьготьн, кӧ бь кәвьре бәдәԝ у пʼешкʼеша һатийә хәмьландьне, Әԝи гот: «Ван һʼәму тьштед кӧ һун дьбиньн, рʼоже бен кәвьре ль сәр кәвьр нәминә, һʼәмуйе жи ԝеран бьн!» У жь Ԝи пьрсин готьне: «Дәрсдар, әв тьшт ԝе кʼәнге бьԛәԝьмьн? У чь нишане бьбә, гава әв йәк бьԛәԝьмьн?» Әԝи гот: «Һаш жь хԝә һәбьн, кӧ һун нәйенә хапандьне, чьмки гәләк ԝе пе наве Мьн бен у бежьн: ‹Әз ьм Мәсиһ› у: ‹Әԝ ԝәхт незик ә›, пәй ԝан нәчьн. Гава һун бона шәрʼ у дәʼԝа бьбьһен, нәтьрсьн, чьмки гәрәке пешийе әв тьшт бьԛәԝьмьн, ле ахьрийа дьне нә һьнге йә». Һьнге ԝанрʼа гот: «Мьләте рʼабә ль сәр мьләт, пʼадшати ль сәр пʼадшатийа, щи-щийа әʼрдһʼәжед мәзьн, хәлайи-щәлайе у мина нәхԝәшийа һʼал ԝе бьбьн, ль әʼзмен жи тьштед хоф у тьрс у нишанед мәзьн ԝе бьԛәԝьмьн. Ле бәри ван һʼәму тьшта, ԝе дәст бавежьнә ԝә, ԝә бьзериньн, бьбьнә бәр диԝана кʼьништа у бькьнә кәла. Бона наве Мьн ԝе ԝә бьбьнә бәр пʼадша у ԝәлийа. Әве ԝәрʼа бьбә мәʼни, кӧ һун бона Мьн шәʼдәтийе бьдьн. У аԝа ве йәке бькьнә бира хԝә, кӧ пешда хәм нәкьн һуне чь щаба хԝә бьдьн. Чьмки Әзе зар-зьман у сәрԝахтийе бьдьмә ԝә, кӧ дьжмьнед ԝәйе нькарьбьн ль бәр ԝә хәбәр дьн йан бьсәкьньн. Де у бавед ԝә, бьра-пьсмам у достед ԝә ԝе ԝә бьдьнә гьртьне у жь ԝә һьнәка жи ԝе бькӧжьн. Бона наве Мьн һуне бәр чʼәʼве һʼәмуйа рʼәш бьн. Ле тʼӧ муке жь сәре ԝә кем нәбә. Бь сәбьра хԝә һуне рʼӧһʼе хԝә хьлаз кьн. Ле гава һун бьбиньн кӧ ордийа дора Оршәлиме гьртийә, һьнге бьзаньбьн кӧ ԝеранбуна ԝе незик ә. Һьнге әԝед кӧ Щьһустанеда нә, бьра бьрʼәвьнә чʼийа у әԝед кӧ Оршәлимеда нә, бьра дәрен, әԝед кʼәԝшенда нә, бьра нәкʼәвьнә бажер. Чьмки әԝ рʼож, рʼожед һʼәйфһьлдане нә, ԝәки һәр чь кӧ һатийә ньвисаре бе сери. Ле ԝәй ль һʼәмла у дәстдәргуша ԝан рʼожада, чьмки тәнгасикә мәзьн ԝе бе сәре дьне у хәзәб әве щьмәʼтерʼа. Әԝе бь дәве шур бькʼәвьн у нав һʼәму мьләтада һесир бенә бьрьне. Оршәлиме жи бәр пʼийед мьләтед пʼутпʼарьст һәрʼә, һʼәта кӧ ԝәхте ԝан мьләта хьлаз бә. У сәр рʼойе, һиве у стәйрка нишане бьбьн. Ль сәр дьне жи мьләте жь дәст дәнге хӧшинийа пелед бәʼре бьбьздьн у хԝә ӧнда кьн. Дьле мәрьва жи жь тьрса ԝе бьсәкьнә, бона әԝ тьштед кӧ ԝе бенә сәре тʼәмамийа дьне, чьмки тʼопед әʼзмана ԝе жь рʼийед хԝә дәрен. У һьнге ԝе бьбиньн кӧ ‹Кӧрʼе Мерьв әʼԝрава бь ԛәԝат у рʼумәта мәзьн те›. Гава әв тьшт дәстпебьбьн, һун рʼабьн сәре хԝә бьльнд кьн, чьмки азабуна ԝә иди незик ә». У мәсәләк ԝанрʼа гот: «Һун дина хԝә бьдьнә дара һежире у һʼәму дара. Гава дьбьшкьвьн, һун бь ԝе йәке заньн кӧ һавин незик ә. Ӧса жи гава һун бьбиньн кӧ әв йәк дьԛәԝьмьн, бьзаньбьн кӧ Пʼадшатийа Хԝәде незик ә. Әз рʼаст ԝәрʼа дьбежьм, кӧ әва ньсьла дәрбаз набә, һʼәта кӧ әв һʼәму тьшт нәԛәԝьмьн. Әʼрд у әʼзмане дәрбаз бьн, ле готьнед Мьн тʼӧ щар дәрбаз набьн. Мьԛати хԝә бьн, нәбә кӧ дьле ԝә пʼьрʼхӧрийе, сәрхԝәшийе у хәмед ве дьнйайева гьредайи бә, ньшкева әԝ Рʼож сәр ԝәда бе. Чьмки әԝ рʼоже мина тʼәле бе сәре һʼәму мәрьвед ль сәр дьне. Һʼьшйар бьминьн у һәр гав дӧа бькьн, ԝәки һун бькарьбьн жь ԝан һʼәму тьштед кӧ ԝе бьԛәԝьмьн бьрʼәвьн-хьлаз бьн у ль бәр Кӧрʼе Мерьв рʼуспи бьсәкьньн». Иса рʼоже пʼарьстгәһеда һин дькьр, ле шәве дьчу сәре ԝи чʼийайи дьма, кӧ жерʼа дьготьн чʼийайе Зәйтʼуне. У тʼәмамийа щьмәʼте сьбәһе зу дьчу пʼарьстгәһе щәм Ԝи, кӧ хәбәред Ԝи бьбьһен. Щәжьна Нане Шкәва незик бу, йа кӧ жерʼа Щәжьна Дәрбазбуне дьбежьн. Сәрәкед кʼаһина у ԛанунзана мәщаләке дьгәрʼийан кӧ Ԝи бькӧжьн, чьмки жь щьмәʼте дьтьрсийан. Һьнге мирещьн кʼәтә ԛәлпе дьле Щьһудайе кӧ Исхәрйоти дьһатә готьне, әԝ йәк жь ԝан һәр донздәһа бу. Әва рʼабу чу тʼәви сәрәкед кʼаһина у сәрԝеред нобәдаред пʼарьстгәһе, ԝанрʼа хәбәр да, ԝәки Иса бьдә дәсте ԝан. Әвана ша бун у ԝирʼа ԛайл бун, кӧ пʼәра бьдьнә ԝи. Щьһуда рʼази бу у һьлда сәр хԝә, кӧ мәщале бьбинә Әԝи бь дьзи щьмәʼтева бьдә дәсте ԝан. Рʼожа Щәжьна Нане Шкәва һат, кӧ әʼдәт бу бәрхе ԛӧрбана Щәжьна Дәрбазбуне бьһата сәржекьрьне. Иса Пәтрус у Йуһʼәнна шандьн у гот: «Һәрʼьн Шива Щәжьна Дәрбазбуне мәрʼа һазьр кьн, ԝәки әм бьхԝьн». Ԝана же пьрси: «Тӧ ль кʼӧ дьхԝази кӧ әм һазьр кьн?» Әԝи жи ԝанарʼа гот: «Гава кӧ һун бькʼәвьнә бажер, ва мәрьвәке рʼасти ԝә бе, щерʼе аве ль сәр мьла. Пәй ԝи һәрʼьнә ԝе мала кӧ әԝ дьче, у хԝәйе малерʼа бежьн: ‹Дәрсдар тәрʼа дьбежә: Кʼане әԝ ода мевана, йа кӧ Әзе теда тʼәви шагьртед Хԝә шива Щәжьна Дәрбазбуне бьхԝьм?› Һьнге әԝе ль ԛате жорьн одәкә мәзьнә һәвдайи нишани ԝә кә у ԝьр жи һун һазьр кьн». Әԝана чун, чаԝа кӧ ԝанарʼа готьбу ӧса жи дитьн у шива Щәжьна Дәрбазбуне һазьр кьрьн. У гава ԝәхт перʼа гьһишт, Әԝ бь тʼәви шандийа ль сәр сьфре рʼуньшт у ԝанрʼа гот: «Әз гәләки һʼьзрәта ве Шива Щәжьна Дәрбазбуне бум, кӧ Мьн тʼәви ԝә бәри щәфе Хԝә бьхԝара. Чьмки Әз ԝәрʼа дьбежьм, Әз иди жь ве тʼӧ щар нахԝьм, һʼәта кӧ Пʼадшатийа Хԝәдеда бьбә». У кʼас һьлда, шькьрийа Хԝә жь Хԝәде ани у гот: «Һьлдьн әве у нав хԝәда бәла кьн. Әз ԝәрʼа дьбежьм, ԝәки Әз иди тʼӧ щар жь мәйа тьрийе вәнахԝьм, һʼәта кӧ Пʼадшатийа Хԝәде бе». У нан һьлда шькьри да, кәркьр да ԝан у гот: «Әва бәдәна Мьн ә, кӧ бона ԝә те дайине. Ве йәке бона биранина Мьн бькьн». Ӧса жи кʼас пәй шиверʼа һьлда у гот: «Әва кʼаса пәймана ну йә, пе хуна Мьн гьредайи, кӧ бона ԝә те рʼетьне. Ле ва дәсте йе кӧ нәмамийа Мьн бькә, ль сәр ве сьфре тʼәви Мьн ә. Рʼаст Кӧрʼе Мерьв ԝе ӧса һәрʼә, чаԝа кӧ бона Ԝи ньвисар ә, ле ԝәй ль ԝи мәрьви, кӧ ԝе нәмамийа Кӧрʼе Мерьв бькә». У ԝана дәстпекьр нав һәвда жь һәв пьрсин: «Гәло кʼи йә әԝи нав мәда, кӧ ве йәке ԝе бькә?» У нав ԝанда дәʼԝ пешда һат, кӧ жь нав ԝанда кʼижан ԝе йе һәри мәзьн бе һʼәсабе. Иса ԝанрʼа гот: «Пʼадшайед мьләта щьмәʼта хԝә бьндәст дькьн у әԝед сәр ԝан һʼӧкӧм дькьн херхԝазед ԝан тенә готьне. Ле һун ӧса нәбьн, йе нав ԝәдайи һәри мәзьн, бьра бьбә мина йе һәри бьчʼук у бьра йе сәрԝертийе дькә жи бьбә мина йе хӧламтийе дькә. Ньһа кʼи йә мәзьн, йе ль сьфре рʼуньшти йан бәрдәсти? Нә йе ль сьфре рʼуньшти? У Әз нава ԝәда мина бәрдәстики мә. Һун ьн, йед кӧ нава щерʼьбандьнед Мьнда һʼәта ньһа тʼәви Мьн манә. У Әзе Пʼадшатийе бьдьмә ԝә, чаԝа Баве Мьн әԝ да Мьн, ԝәки һун Пʼадшатийа Мьнда жь сьфра Мьн бьхԝьн у вәхԝьн у сәр кʼӧрсийа рʼунен, диԝана донздәһ ԛәбилед Исраеле бькьн. Шьмһʼун! Шьмһʼун! Ва йә мирещьн хԝәст ԝәки ԝә мина гәньм бежьнге хә. Ле Мьн бона тә дӧа кьр, ԝәки баԝәрийа тә кем нәбә у гава тӧ вәгәрʼи, дьл бьди бәр бьрайед хԝә». У Пәтрус Ԝирʼа гот: «Хӧдан, әз һазьр ьм тʼәви Тә бемә гьртьне у кӧштьне жи». Иса ԝирʼа гот: «Пәтрус! Әз тәрʼа дьбежьм, иро һе бәри бангдана дик, те се щара бежи, ԝәки тӧ Мьн нас наки». У Иса ԝанрʼа гот: «Гава Мьн һун бе кʼиськ, турьк у чарьх шандьн, һун һʼәԝще тьштәки бун?» Ԝана гот: «На». Һьнге гот: «Ле ньһа кʼиське кʼе һәйә бьра һьлдә у ӧса жи турьк. У йе кӧ бе шур ә, бьра кʼьнще хԝә бьфьрошә у хԝәрʼа шурәки бькʼьрʼә. Ле Әз ԝәрʼа дьбежьм, кӧ гәрәке әва ньвисара сәр Мьн бе сери, кӧ: ‹Әԝ тʼәви нәрʼаста һатә һʼәсабе›. У чь кӧ бона Мьн ньвисар ә, сәр ԛәԝьмандьне йә». Шагьрта Ԝирʼа гот: «Хӧдан, ва нә вьра дӧ шур һәнә». Әԝи ԝанрʼа гот: «Бәс ә». У Иса ль гора әʼдәте Хԝә рʼабу чу чʼийайе Зәйтʼуне, шагьртед Ԝи жи ль пәй чун. У гава гьһиштә щи, ԝанрʼа гот: «Дӧа бькьн, кӧ һун нәкʼәвьнә нава щерʼьбандьне». У Хԝәха ԛаси кәвьравитьнәке жь ԝан дур кʼәт, чок да дӧа кьр у гот: «Баво, һәгәр әʼмьре Тә йә, әве кʼасе жь Мьн дур хә. Ле бьра хԝәстьна Тә бә, нә кӧ йа Мьн». У жь әʼзмен мьлйакʼәтәк Ԝива хӧйа бу у Әԝ ԛәԝат кьр. Әԝи нава щәфе гьранда, һе бь дьле кʼәл дӧа дькьр. Худана Ԝи мина дьлопед хунейә гьр дьрʼьжийанә әʼрде. У жь дӧа рʼабу, һатә щәм шагьртед Хԝә, әԝана кʼәрба кʼәдәре рʼазайи дитьн. У ԝанрʼа гот: «Һун чьма рʼадьзен? Рʼабьн дӧа бькьн, кӧ нәкʼәвьнә нава щерʼьбандьне». Әԝи һе хәбәр дьда, ньшкева әʼлаләтәке сәр Ԝида гьрт у йәки жь һәр донздәһа, наве ԝи Щьһуда, пешийа ԝан кʼәтьбу у незики Ԝи бу кӧ Ԝи рʼамусә. Иса ԝирʼа гот: «Щьһуда! Тӧ бь рʼамусане Кӧрʼе Мерьв дьди дәсте ԝан?» Гава әԝед тʼәви Ԝи дитьн кӧ ԝе чь бьԛәԝьмә, Ԝирʼа готьн: «Хӧдан, әм бь шур ль ԝан хьн?» У жь ԝан йәки бь шур ль хӧламе сәрәккʼаһин хьст у гӧһе ԝийи рʼасте пәканд. Һьнге Иса гот: «Бәс ә, бьһельн». У дәст да гӧһе ԝи, ԛәнщ кьр. Паше Иса готә сәрәкед кʼаһина, сәрԝеред нобәдаред пʼарьстгәһе у рʼуспийед кӧ һатьбунә сәр Ԝи: «Те бежи һун бь шур у дара һатьнә пешийа ԛачахәки? Нә Әз һәр гав тʼәви ԝә пʼарьстгәһеда бум, ԝә дәсте хԝә нә дьда Мьн. Ле ньһа ԝәхте ԝә йә у һʼӧкӧме тәʼристанийе йә». У Әԝ гьртьн, бьрьн кьрьнә мала сәрәккʼаһин. Пәтрус жи дурва пʼе-пʼе ль пәй Ԝи дьчу. Гава ԝана говәка һʼәԝшеда агьр вехьст у доре рʼуньштьн, Пәтрус жи ль ԝьр тʼәви ԝан рʼуньшт. У щарике әԝ ль бәр агьр рʼуньшти дит, ль ԝи ньһерʼи у гот: «Әва жи тʼәви Ԝи бу». Ле Пәтрус инкʼар кьр у готе: «Әз Ԝи нас накьм, әʼвде!» Хеләке шунда йәки дьн әԝ дит у гот: «Тӧ жи жь ԝан и». Пәтрус ԝирʼа гот: «Пьсмам, әз нә жь ԝан ьм». У ԝәкә сьһʼәтәке жи дәрбаз бу, йәки дьн жи дьда зора хԝә у дьготе: «Һәбә-тʼӧнәбә әва мәрьва тʼәви Ԝи бу, чьмки жь Щәлиле йә». Ле Пәтрус гот: «Фьлан кәс! Әз ньзаньм тӧ чь дьбежи». У хәбәр һе девда бу, дәстхԝәда дик банг да. Хӧдан сәр Пәтрусда вәгәрʼийа ль ԝи ньһерʼи, һьнге Пәтрус готьна Хӧдан ани бира хԝә, кӧ ԝирʼа готьбу: «Иро һе бәри бангдана дик, те се щара Мьн инкʼар ки». У Пәтрус дәркʼәтә дәрва кʼәлә-кʼәл гьрийа. У әԝед кӧ нобәдари ль Иса дькьрьн, ԛәрфе хԝә ль Ԝи дькьрьн, дькʼӧтан. Чʼәʼвед Ԝи гьредан у жь Ԝи дьпьрсин, дьготьн: «Дә пʼехәмбәртийе бькә, кʼа кʼи бу кӧ Тә хьст?» У бь гәләк готьнед майин жи Әԝ беһӧрмәт дькьрьн. У гава сьбәһ зәлал бу, кʼома рʼуспийед щьмәʼте, сәрәкед кʼаһина у ԛанунзана щьвийан. Иса кʼаши диԝанхана хԝә кьрьн у готьне: «Һәгәр Тӧ йи Мәсиһ, мәрʼа бежә?» Иса ԝанрʼа гот: «Һәгәр Әз ԝәрʼа бежьм жи, йәк ә һун диса баԝәр накьн. У һәгәр пьрсәке жи бьдьмә ԝә, һуне диса щаба Мьн надьн. Жь вьр шунда Кӧрʼе Мерьв ԝе ль кʼеләка Хԝәдейе Һәри Зор, ль мьле Ԝийи рʼасте рʼуне». У һʼәмуйа бь һәврʼа гот: «Ԝәки ӧса йә Тӧ Кӧрʼе Хԝәде йи?» Әԝи ԝанрʼа гот: «Һун хԝәха дьбежьн кӧ Әз Әԝ ьм». У ԝана гот: «Иди шәʼдә чи мәрʼа нә? Мә хԝәха жь дәве Ԝи бьһист». У тʼәмамийа әʼлаләта ԝан рʼабу, Иса бьрьнә щәм Пилато. У дәст бь хәйбе кьрьн готьн: «Мә Әв мәрьва дит кӧ мьләте мә дьхальфинә у нә жи дьһелә кӧ хәрщ бьдьнә Ԛәйсәр. Бона Хԝә жи дьбежә: ‹Әз Мәсиһ Пʼадша мә›». Пилато жь Ԝи пьрси у готе: «Тӧ йи пʼадше щьһуйа?» Әԝи ле вәгәрʼанд у готе: «Тә бь дәве хԝә гот». Пилато сәрәкед кʼаһина у әʼлаләтерʼа гот: «Әз тʼӧ нәһәԛийе Ви мәрьвида набиньм». Ле әԝана сәр йа хԝә ман у готьн: «Әви мәрьви нава тʼәмамийа Щьһустане, жь Щәлиле дәстпекьри һʼәта вьра, щьмәʼт бь һинкьрьна Хԝәва тʼәвиһәв кьрийә». Гава Пилато бона Щәлиле бьһист, пьрси: «Әв мәрьва жь Щәлиле йә?» Гава пе һʼәсийа, кӧ Әԝ бьн һʼӧкӧме Һеродәсда йә, Әԝ шандә щәм Һеродәс, кӧ әԝ жи ԝан рʼожада һатьбу Оршәлиме. Гава Һеродәс чʼәʼв Иса кʼәт, гәләки ша бу. Әԝи һе зува дьхԝәст кӧ Әԝ бьдита, чьмки әԝи гәләк тьшт бона Ԝи бьһистьбун у һʼьзрәта Ԝи бу, кӧ кʼәрәмәтәке бь дәсте Ԝи бьбинә. Һеродәс гәләк пьрс данә Ԝи, ле Иса щаба тʼӧ пьрсе нәда. Сәрәкед кʼаһина у ԛанунзана жи сәкьнибун у гәләки давитьнә Ԝи. Һеродәс жи бь әскәред хԝәва Әԝ беԛәдьр кьр, пе кʼәнийан, паше кʼьнще рʼәԝш да ле кьрьне, диса пашда шандә щәм Пилато. Ԝе рʼоже Пилато у Һеродәс ль һәв һатьн, чьмки пешийе нава ԝанда дьжмьнати һәбу. Пилато гази сәрәкед кʼаһина, сәрԝера у щьмәʼте кьр, ԝанрʼа гот: «Ԝә Әв мәрьва ани щәм мьн, чаԝа Йәки щьмәʼте дьхальфинә. Аԝа мьн ль бәр ԝә һәр тьшт жь Ԝи пьрси, ле жь ԝан хьрабийед кӧ һун гьли дькьн, мьн тʼӧ тьшт ль сәр Ви мәрьви нәдит. У нә жи Һеродәс дит, ләма жи ԝи Әԝ ль сәр мәда вәгәрʼанд. Әви тьштәки ӧса нәкьрийә кӧ бе кӧштьне. Әзе Ԝи бьдьмә бәр ԛамчийа у бәрʼдьм». Ле тʼәмамийа әʼлаләте бь һәврʼа кьрә ԛирʼин у гот: «Ԝи ль рʼубари дьне нәһелә! Барабас бона мә бәрʼдә!» Барабас йәки бона сәрһьлдане у меркӧштьна бажерда буйи һатьбу гьртьне. Пилато диса дәстпекьр хәбәр да, чьмки ԝи дьхԝәст кӧ Иса бьда бәрʼдане. Ле ԝана һе дькьрә ԛирʼин у дьгот: «Хач кә! Әԝи хач кә!» Әԝи щара сьсийа ԝанрʼа гот: «Әви чь хьраби кьрийә? Мьн ль сәр Ви нәһәԛи нәдит кӧ Әԝ бе кӧштьне. Әз Ԝи бьдьмә бәр ԛамчийа у бәрʼдьм». Ле әԝана бь дәнге бьльнд сәр йа хԝә бун у дьхԝәстьн кӧ Әԝ бе хачкьрьне. Сәԝта ԝан сәркʼәт. Пилато ԛьрара хԝә да, кӧ бь хԝәстьна ԝан бә. Анәгори хԝәстьна ԝан, йе кӧ бона сәрһьлдане у меркӧштьне кәледа бу, бәрʼда. Ле Иса һьштә сәр хԝәстьна дьле ԝан. У гава әскәра Әԝ данә пешийа хԝә бьрьн, йәки курени наве ԝи Шьмһʼун, кӧ жь кʼәԝшен дьһат, әԝ гьртьн у хач данинә сәр мьле ԝи, кӧ ль пәй Иса бьбә. У әʼлаләтәкә щьмәʼтейә гьран ль пәй Ԝи дьчу, ӧса жи кʼӧлфәтед кӧ шина Ԝи дькьрьн у дьгьрийан. Иса ль сәр ԝанда вәгәрʼийа у гот: «Ԛизед Оршәлиме! Сәр Мьнда нәгьрин, ле сәр хԝә у зарʼед хԝәда бьгьрин. Чьмки ва ԝе рʼоже бен кӧ ԝе бежьн: ‹Хԝәзи ль ԝан кʼӧлфәтед безӧрʼәт, кӧ зарʼ нәанинә у нәмежандьнә›. Һьнге мәрьве дәстпекьн бежьн: ‹Чʼийано! Ль сәр мәда бькʼәвьн. Гьрно! Мә вәшерьн›. Һәгәр сәре дара Тәрʼ аһа дькьн, ле һʼале дара һʼьшк ԝе чаԝа бә?» Дӧ мәрьвед нәһәԛ жи анин, кӧ Перʼа бенә кӧштьне. У гава гьһиштьнә ԝи щийе кӧ Ԛаф те готьн, ль ԝьр Әԝ хач кьрьн. У әԝед нәһәԛ жи йәк ль мьле рʼасте хач кьрьн у йәк жи ль мьле чʼәпе. Һьнге Иса гот: «Баво, бьбахшинә ван, чьмки ньзаньн чь дькьн». Сәр кʼьнщед Ԝи пʼәшк авитьн ԝәки нава хԝәда бәла кьн. У щьмәʼт сәкьнибу дьньһерʼи. Сәрԝера жи ԛәрфе хԝә ль Ԝи дькьрьн у дьготьн: «Хәлԛ хьлаз кьрьн, дә бьра Хԝә жи хьлаз кә, һәгәр Әԝ ә Мәсиһ, бьжартийе Хԝәде». Әскәр жи ль Ԝи дькʼәнийан, пешда дьһатьн, сьркә дьдане у дьготьн: «Һәгәр Тӧ йи пʼадшайе щьһуйа, дә Хԝәха Хԝә хьлаз кә». У феза сәре Ԝи жи ньвисар бу, кӧ: «ӘВА ПʼАДШАЙЕ ЩЬҺУЙА ЙӘ». Жь ԝан нәһәԛед дардакьри, йәки Иса беһӧрмәт дькьр у дьготе: «Тӧ нә Мәсиһ и? Дә мә хьлаз кә, Хԝә жи перʼа». Ле һәвале ԝи ле һьлат у гот: «Тӧ жь Хԝәде натьрси? Нә тӧ жи хут ԝи щәзайида йи? Әв һәԛе мә йә, кӧ әз у тӧ анәгори әʼмәлед хԝә дькʼьшиньн, ле Әви тʼӧ хьраби нәкьрийә». У Исарʼа гот: «Иса, мьн бир бини, гава Пʼадшатийа Хԝәва бейи ». Иса ԝирʼа гот: «Әз рʼаст тәрʼа дьбежьм, иро те тʼәви Мьн бӧһьштеда би». Гава нивро сьһʼәт незики донздәһа бу, тʼәмамийа әʼрде һʼәта сьһʼәта сьсийа бу тәʼри у рʼуйе рʼойе һатә гьртьне. Пʼәрʼда пʼарьстгәһе нивида бу дӧ тиша. У Иса бь дәнге бьльнд кьрә гази у гот: «Баво, рʼӧһʼе Хԝә дьдьмә дәсте Тә». У гава әв йәк гот, рʼӧһʼе Хԝә да. Сәрсәд әв тьште буйи кӧ дит, шькьри да Хԝәде у гот: «Рʼасти Әва мәрьвәки рʼаст бу». У тʼәмамийа әʼлаләте, кӧ ль ԝьр бона тʼәмаше щьвийайи бу, әв йәка дит, сингед хԝә дьхьстьн, пашда вәдьгәрʼийанә малед хԝә. Һʼәму насед Ԝи жи у әԝ кʼӧлфәтед кӧ жь Щәлиле һатьбун, дур сәкьни бун у әв тьшт дьдитьн. Мәрьвәки ԛәнщи ширһʼәлал у әндәме щьвина гьрәгьра щьһуйа һәбу, наве ԝи Усьв. Әва жь бажаре Аримәтйа Щьһустане бу у хԝәха жи һивийа Пʼадшатийа Хԝәде бу. Әԝ тʼәви шеԝьр у кьрьна щьвина ԝан нәбьбу. Әԝ рʼабу чу щәм Пилато у щьнйазе Иса жь ԝи хԝәст. Щьнйаз жь хаче ани хԝаре, ԛәдәке кʼьтанида кʼәфән кьр у дани нав тʼьрба ԛәйеда кʼолайи, кӧ тʼӧ щар ԝеда кәсәк нәһатьбу данине. У әԝ рʼожа тʼьвдарәккьрьнеда бу у евара шәмийе дәстпедькьр. У әԝ кʼӧлфәтед кӧ жь Щәлиле тʼәви Иса һатьбун, әԝ жи пәй ԝи чун у әԝ тʼьрба кӧ чаԝа щьнйазе Ԝи теда һатә данине, дитьн. У пашда вәгәрʼийан, бьһарәт у рʼуне бинхԝәш һазьр кьрьн у анәгори тʼәмийа Ԛануне рʼожа шәмийе рʼьһʼәт бун. Рʼожа йәкшәме сьбәһе зу, ԝан кʼӧлфәта бьһарәтед һазьркьри һьлдан чунә сәр тʼьрбе. Ле ԝана кәвьр жь бәр тʼьрбе һолкьри дит. Гава кʼәтьнә һьндӧрʼ, щьнйазе Хӧдан Иса нәдитьн. Гава әԝана һе бона ве йәке мәтʼәлмайи мабун, ньшкева дӧ мәри бь кʼьнще нурани ль бәр ԝан сәкьнин. У гава кʼӧлфәт жь тьрса кʼәтьнә сәр рʼуйе хԝә, ԝан мәрьва ԝанрʼа гот: «Һун чьма ль Йе сах нава мьрийада дьгәрʼьн? Әԝ нә ль вьр ә, Әԝ жь мьрьне рʼабуйә. Биньнә бира хԝә, кӧ чахе һе Щәлиледа бу, чь ԝәрʼа гот: ‹Гәрәке Кӧрʼе Мерьв бькʼәвә дәсте мәрьвед нәрʼаст, бе хачкьрьне у рʼожа сьсийа жь мьрьне рʼабә›». У ԝана готьна Иса бир анин у жь тʼьрбе вәгәрʼийан, әва йәка һәр йанздәһа у һʼәмуйед майинрʼа готьн. Йед кӧ шандийарʼа готьн, әвана бун: Мәрйәма Мәждәлани, Йоһана у Мәрйәма дийа Аԛуб, бь тʼәви һьнәкед майин. Шандийава чаԝа готьнәкә пʼучʼ хӧйа бу у ԝана кʼӧлфәт баԝәр нәкьрьн. Ле Пәтрус рʼабу бәрбь тʼьрбе бәзи, ԛуз бу ньһерʼи, тʼәне кʼәфәне Ԝи ԝьр бу у мәтʼәлмайи чу, дьфькьри гәло чаԝа бу. Ԝе рʼоже дӧ шагьрт дьчунә гӧндәки, кӧ жь Оршәлиме донздәһ километьри дур бу, наве ԝи Әмԝас бу. Ԝана бь һәврʼа бона һәр тьште ԛәԝьми хәбәр дьдан. У гава әԝана нав һәвда хәбәр дьдан у дьшеԝьрин, Иса Хԝәха жи незики ԝан бу, тʼәви ԝан чу. Ле чʼәʼвед ԝан гьрти бун, кӧ Ԝи нас нәкьн. Иса ԝанрʼа гот: «Һун ве рʼейеда чь һәврʼа хәбәр дьдьн?» Әԝана мәʼдәкьри сәкьнин. Йәки жь ԝан, кӧ наве ԝи Клепас бу, ле вәгәрʼанд у гот: «Әԝ чаԝа жь Оршәлиме тʼәне Тә нәбьһистийә кӧ ван рʼожед пашьнда ԝьр чь ԛәԝьмийә?» Әԝи жь ԝан пьрси у гот: «Чь буйә?» Ԝана ле вәгәрʼанд готе: «Бона Исайе Ньсрәте, кӧ Әԝ бь әʼмәл у хәбәред Хԝә ль бәр Хԝәде у тʼәмамийа мьләт пʼехәмбәрәки зор бу у чаԝа сәрәкед кʼаһина у сәрԝеред мә нәмамийа кӧштьна Ԝи кьрьн, хач кьрьн. Әм ԝе гӧмане бун кӧ Әԝи ԝе Исраеле аза бькьра. Ԝәки дьн жи әва рʼожа сьсийа йә, кӧ әв тьшт бунә. Ле чәнд кʼӧлфәтед нав мәда жи әм әʼщебмайи кьрьн. Әԝана сьбәһе зу чубунә сәр тʼьрбе у щьнйазе Ԝи ль ԝьр нәдитьбун, вәгәрʼийан һатьн мәрʼа готьн, кӧ: ‹Мә мьлйакʼәт дитьн, мәрʼа готьн, кӧ Әԝ сах ә›. У жь мә һьнәк жи чунә сәр тʼьрбе, чаԝа кӧ ԝан кʼӧлфәта готьбу, ӧса бу, ле Әԝ нәдитьн». Һьнге Әԝи ԝанрʼа гот: «Һәй инсанед бе фькьр, һун чьԛаси гьран һʼәму готьнед пʼехәмбәра баԝәр дькьн? Нә гәрәке Мәсиһ щәфа бькʼьшанда у бькʼәта рʼумәта Хԝә?» У Ԝи дәстпекьр жь Муса у һʼәму пʼехәмбәра, чь кӧ ԝан кʼьтебада бона Ԝи ньвисар бун, ԝанарʼа шьровәкьрьн. Гава незики ԝи гӧнде кӧ дьчуне бун, Әԝи ӧса да кʼьфше, йанчийә Әԝ дьчә щики дур. Ле ԝана зор ль Ԝи кьр у гот: «Ишәв ль щәм мә бьминә, чьмки евар ә, рʼо чуйә ава». У Әԝ чу һьндӧрʼ, кӧ ль щәм ԝан бьминә. Ле гава Әԝ тʼәви ԝан сәр сьфре рʼуньшт, нан һьлда, шькьрийа Хԝә жь Хԝәде ани, кәркьр да ԝан. Һьнге чʼәʼвед ԝан вәбун, Әԝ нас кьрьн у Әԝ бәр чʼәʼве ԝан бәтавәбу. Ԝана һәврʼа гот: «Ләма, гава Әԝи рʼеда мәрʼа хәбәр дьда у ньвисар мәрʼа шьровәдькьрьн, агьр дьле мә дькʼәт». Әԝ ԝе гаве рʼабун вәгәрʼийанә Оршәлиме у һәр йанздәһ тʼәви йед майин щьвийайи дитьн, готьн: «Рʼасти Хӧдан сах буйә у Шьмһʼунва хӧйа буйә!» Паше ԝан һәр дӧйа гьли кьр, кӧ чаԝа рʼеда рʼасти Ԝи һатьн у чахе Ԝи нан кәркьр, Әԝ нас кьрьн. Ԝана һе бона ве йәке хәбәр дьда, Иса нава ԝанда сәкьни у ԝанрʼа гот: «Әʼдьлайи ԝәрʼа». Әԝана жь тьрса бьздийан у ԝан тʼьре хәйаләки дьбиньн. Ле Әԝи ԝанрʼа гот: «Һун чьма шашмайи манә у дӧдьли нә? Аԝа ль дәст у пʼийед Мьн бьньһерʼьн, кӧ Әз Хԝәха мә. У дәсте хԝә бьдьнә Мьн у бьбиньн, чьмки гошт у һәстуйед рʼӧһʼ тʼӧнәнә, чаԝа кӧ һун дьбиньн йед Мьн һәнә». Гава әв йәк гот, дәст у пʼийед Хԝә нишани ԝан кьрьн. У һе жь шабуна баԝәр нәдькьрьн, һʼәйр-һʼӧжмәкʼар мабун, Әԝи ԝанрʼа гот: «Ԛәт тьштәки хԝарьне ль щәм ԝә һәйә?» Ԝана чити мәʼсийе пьжанди да Ԝи. Әԝи һьлда ль бәр чʼәʼве ԝан хԝар у ԝанарʼа гот: «Әв бун әԝ готьнед кӧ гава Әз тʼәви ԝә бум, Мьн ԝәрʼа готьбун: ‹Гәрәке һәр тьштед кӧ бона Мьн Ԛануна Муса, ньвисаред пʼехәмбәра у Зәбурада ньвисар бун бьһатана сери›». Һьнге фәʼме ԝан вәкьр, кӧ ньвисара фәʼм бькьн. У ԝанрʼа гот: «Аԝа ньвисар ә, кӧ Мәсиһ гәрәке щәфа бькʼьшинә у рʼожа сьсийа жь мьрьне рʼабә у жь Оршәлиме гьрти бь наве Ԝи тʼобәйи у бахшандьна гӧна нав һʼәму мьләтада ԝе бе даннасинкьрьне. У һун ьн шәʼдед ван һʼәму тьшта. У ва Әзе созе Баве Хԝә ԝәрʼа бьшиньм. Оршәлимеда бьминьн, һʼәта һун ԛәԝате жь жор бьстиньн». У әԝ һʼәта Бәйтанйайе бьрьн, дәсте Хԝә бьльнд кьр, дӧа ԝан кьр. У һе дӧа дькьр, жь ԝан ԛәтийа, бәрбь әʼзмен һатә һьлатьне. Шагьрта жи сәре хԝә бәр Ԝи дани, бь әшԛ у ша вәгәрʼийанә Оршәлиме. У һәр гав пʼарьстгәһеда бун, пәсьне Хԝәде дьдан. Дәстпебунеда Хәбәр һәбу. Хәбәр тʼәви Хԝәде бу у Хәбәр Хԝәха Хԝәде бу. Әԝ дәстпебунеда тʼәви Хԝәде бу. Һәр тьшт бь Ԝи әʼфьрин у бейи Ԝи тʼӧ тьшт нәԛәԝьми, чь кӧ ԛәԝьми. Канийа жийине Әԝ бу у жийин жи рʼонайа мәрьва бу. Рʼонайи тәʼристанийеда шәԝԛ дьдә у тәʼристанийе Пе нькарьбуйә. Мәрьвәки жь алийе Хԝәдеда шанди һәбу, кӧ наве ԝи Йуһʼәнна бу. Әԝ бона шәʼдәтийе һат, ԝәки бона Рʼонайе шәʼдәтийе бьдә, кӧ һʼәму пе ԝи баԝәр бькьн. Әԝ хԝәха нә әԝ Рʼонайи бу, ле әԝ һат кӧ шәʼдәтийа Рʼонайе бьдә. Рʼонайа рʼаст Әԝ ә, кʼижан кӧ те дьнйайе у һʼәму мәрьва рʼонайи дькә. Әԝ дьнйайеда бу у дьнйа пе Ԝи әʼфьри, ле дьнйайе Әԝ нас нәкьр. Әԝ һатә сәр ԝаре Хԝә, ле щьмәʼта Ԝи Әԝ ԛәбул нәкьр. Ле әԝед кӧ Әԝ ԛәбул кьрьн у баԝәрийа хԝә наве Ԝи анин, Әԝи да, кӧ һәԛийа ԝан һәбә бьбьнә зарʼед Хԝәде. Әвана нә жь хуне, нә жь хԝәстьна бәдәне у нә жи жь хԝәстьна мәрьвайе бунә, ле әԝ жь Хԝәде бунә. У Хәбәр бу хун у гошт, бь кʼәрәм у рʼастийева тʼьжи нав мәда коне Хԝә дани. Мә рʼумәта Ԝи дит, әԝ рʼумәта Кӧрʼе Бавейи тайе тʼәне. Йуһʼәнна бона Ԝи шәʼдәти да у бь дәнгәки бьльнд гот: «Әва йә, бона Кʼижани мьн готьбу: ‹Әԝе кӧ пәй мьн те Әԝ сәр мьнрʼа йә, чьмки Әԝ бәри мьн һәбу›». Мә һʼәмуйа жь тʼер-тʼьжийа Ԝи кʼәрәм сәр кʼәрәмеда станд. Чьмки Ԛанун бь дәсте Муса һатә дайине, кʼәрәм у рʼасти бь дәсте Иса Мәсиһ. Тʼӧ кәси тʼӧ щар Хԝәде нәдитийә, ле Йе Тайе Тʼәнейи кӧ хут Хԝәде йә у һʼәмеза Баведа йә, Әԝи Әԝ да әʼйанкьрьне. Әв бу Шәʼдәтийа Йуһʼәнна: Гава щьһуйа жь Оршәлиме кʼаһин у леԝи шандьн, ԝәки жь Йуһʼәнна бьпьрсьн, кӧ әԝ кʼи йә, Йуһʼәнна һьлда сәр хԝә, инкʼар нәкьр у ашкәрә гот: «Әз нә Мәсиһ мә». Ԝана же пьрси: «Ле тӧ кʼи йи? Елйас и?» Әԝи гот: «На». «Әԝ пʼехәмбәре создайи йи?» Щаб да: «На». Һьнге жерʼа готьн: «Дә бежә, тӧ кʼи йи, ԝәки әм щабәке ԝанрʼа бьбьн, йед кӧ әм шандьнә. Тӧ бона хԝә чь дьбежи?» Әԝи гот: «Әз әԝ дәнг ьм кӧ бәрʼийеда дькә гази: ‹Рʼийа Хӧдан рʼаст бькьн!› чаԝа кӧ Ишайа пʼехәмбәр готийә». Әԝед кӧ һатьбунә шандьне жь ферьсийа бун. Ԝана же пьрси: «Ле иди чьма дьньхӧмини, һәгәр тӧ нә Мәсиһ и, нә Елйас у нә жи пʼехәмбәр?» Йуһʼәнна ль ԝан вәгәрʼанд у гот: «Әз бь аве дьньхӧминьм, ле Йәк нав ԝәда һәйә, кӧ һун Ԝи нас накьн. Әԝ ә, Йе кӧ пәй мьн те, кӧ әз нә һежа мә, ԝәки бәне чарьхед Ԝи жи вәкьм». Әв һʼәму ль ԝи бәри Урдӧне, ль Бәйтанйайе, ԝи щийе кӧ Йуһʼәнна ль ԝьр дьньхӧманд ԛәԝьмин. Рʼожа дьне Йуһʼәнна дит кӧ Иса бәрбь ԝи те, әԝи гот: «Ва йә! Бәрхе Хԝәде, Йе кӧ гӧнед дьнйайе һьлдьдә! Әв ә бона Кʼижани мьн готьбу: ‹Пәй мьнрʼа Йәке бе, кӧ сәр мьнрʼа йә, чьмки Әԝ бәри мьн һәбу›. Мьн ньзаньбу Әԝ кʼи йә, ле әз һатьмә бь аве дьньхӧминьм, ԝәки Ԝи Исраелева бьдьмә әʼйанкьрьне». Йуһʼәнна әва шәʼдәтийа да у гот: «Мьн дит кӧ Рʼӧһʼ жь әʼзмен мина кәвоткәке һат сәр Ԝи дани у ма. Мьн ньзаньбу Әԝ кʼи йә, ле Әԝе кӧ әз шандьм, кӧ бь аве бьньхӧминьм, мьнрʼа гот: ‹Тӧ кʼижани бьбини кӧ рʼӧһʼ те сәр датинә у дьминә, Әԝ ә кӧ бь Рʼӧһʼе Пироз дьньхӧминә›. Мьн жи дит у шәʼдәти да кӧ Әв ә Кӧрʼе Хԝәде». Рʼожа дьне Йуһʼәнна диса тʼәви дӧ шагьртед хԝә сәкьни бу. Дит кӧ Иса ԝьрарʼа дәрбаз дьбә, гот: «Ва йә Бәрхе Хԝәде!» Әв йәк кӧ бьһистьн, һәр дӧ шагьрт пәй Иса чун. Иса ль пьшт Хԝәва вәгәрʼийа у дит кӧ ԝана дайә пәй Ԝи тен, ԝанрʼа гот: «Һун чь дьхԝазьн?» Ԝана жерʼа гот: «Рʼабби», кӧ те фәʼмкьрьне: «Дәрсдар», «Тӧ ль кʼӧ дәре дьмини?» Әԝи ԝанрʼа гот: «Ԝәрьн һуне бьбиньн». Ԝана чу у дит кӧ Әԝ ль кʼӧ дьминә. Иди сьһʼәт незики чара бу у ԝе рʼоже әԝ ль щәм Ԝи ман. Жь ԝан һәр дӧйа, йед кӧ жь Йуһʼәнна бьһистьн у пәй Иса чун, йәк Әндраԝьсе бьре Шьмһʼун-Пәтрус бу. Әԝи перʼа-перʼа бьре хԝә Шьмһʼун дит у жерʼа гот: «Мә Мәсиһ дит», кӧ те фәʼмкьрьне: «Йе Кʼьфшкьри». Ԝи әԝ ани щәм Иса. Иса ль Шьмһʼун ньһерʼи у готе: «Тӧ, Шьмһʼуне кӧрʼе Йуһʼәнна, те Кифас бейи готьне» (аԝа готи «Пәтрус», кӧ те фәʼмкьрьне: «Ԛәйа»). Рʼожа дьне Иса ԛьрар кьр кӧ һәрʼә Щәлиле. Ԝи Филипо дит у жерʼа гот: «Пәй мьн ԝәрә!» Филипо жь Бәйтсайдайе бу, жь бажаре Әндраԝьс у Пәтрус. Филипо чу Натанйел дит у жерʼа гот: «Мә Әԝ дит, бона кʼижани Муса Ԛанунеда у пʼехәмбәра жи ньвисаред хԝәда сальхе Ԝи дабун, Исайе Кӧрʼе Усьве жь Ньсрәте». Натанйел же пьрси: «Ԛәт дьбә кӧ тьштәки пʼак жь Ньсрәте дәркʼәвә?» Филипо жерʼа гот: «Ԝәрә у бьбинә!» Гава Иса дит кӧ Натанйел бәрбь Ԝи те, дәрһәԛа ԝида гот: «Ва йә исраелики һәԛи-һʼәлал кӧ дьле ԝида мьхәнәти тʼӧнә». Натанйел же пьрси: «Чаԝа мьн нас дьки?» Иса ле вәгәрʼанд у готе: «Һе Филипо гази тә нәкьрьбу, гава кӧ тӧ ль бьне дара һежире рʼуньшти буйи, Мьн тӧ дити». Натанйел жерʼа гот: «Дәрсдар, Тӧ Кӧрʼе Хԝәде йи! Тӧ Пʼадше Исраеле йи!» Иса ле вәгәрʼанд у готе: «Тӧ бона ве йәке баԝәр дьки, ԝәки Мьн тәрʼа гот: ‹Мьн тӧ ль бьне дара һежире дити?› Те тьштед жь ве мәстьр бьбини». У жерʼа гот: «Әз рʼаст бе хельф ԝәрʼа дьбежьм, һуне бьбиньн әʼзман вәбуйә у мьлйакʼәтед Хԝәде чаԝа жь сәр Кӧрʼе Мерьв һьлдькʼьшьн, пәйа дьбьн». Дӧ рʼожа шунда бажаре Ԛанайа Щәлиледа дәʼԝатәк һәбу. Дийа Иса жи ль ԝе дәре бу, Иса у шагьртед Ԝи жи бона дәʼԝате һатьбунә тʼәглифкьрьне. Гава кемаси кʼәтә шәраве, дийа Иса жерʼа гот: «Шәрава ԝан нәма». Иса ле вәгәрʼанд у готе: «Әʼвде, чи тә Мьн кʼәтийә? Һе нә ԝәхте Мьн ә». Дийа Ԝи бәрдәстийарʼа гот: «Чь кӧ ԝәрʼа бежә, бькьн». У шәш кʼупед кәвьри һәбун, кӧ ль гора әʼдәтед щьһуйа бона шуштьн-вәшуштьна ԝана ль ԝьр данибун. Жь ԝана һәр йәки жь һʼәйште һʼәта сәд бист литьр ав һьлдьда. Иса ԝанрʼа гот: «Ван кʼупа тʼьжи ав кьн». У ԝана жи леварʼа дагьрт. Паше ԝанарʼа гот: «Ньһа һьнәки дагьрьн, бьбьн бьдьнә сәрдәʼԝати». Әԝана жи әԝ бьр. Гава сәрдәʼԝати жь ԝе ава кӧ бьбу шәрав тәʼм кьр, ԝи те дәрнәхьст кӧ әԝ жь кʼӧ һат, ле бәрдәстийед кӧ ав кʼьшандьбун заньбун. Сәрдәʼԝати гази зәʼве кьр у жерʼа гот: «Һәр кәс пешийе шәрава хԝәйә рʼьнд датинә сәр тʼәхтә у паше гава вәхԝари нә, әԝ йа нәрʼьнд дәрдьхә. Ле тә шәрава рʼьнд һʼәта ньһа хԝәй кьрийә». Әва нишана Исайә пешьн бу, кӧ Ԝи Ԛанайа Щәлиледа кьр. Бь ви аԝайи Әԝи рʼумәта Хԝә да хӧйакьрьне у шагьртед Ԝи баԝәрийа хԝә Ԝи анин. Пәй ве йәкерʼа, Иса тʼәви дийа Хԝә, бьред Хԝә у шагьртед Хԝә чу Кәфәрнаһуме, ле гәләк рʼожа Әԝ ль ԝе дәре нәман. Щәжьна щьһуйайә Дәрбазбуне незик бу, Иса һәвраз чу Оршәлиме. Пʼарьстгәһеда Әԝи йед кӧ дәԝар, пәз у кәвотк дьфьротьн, ӧса жи йед пʼәрәгӧһерʼ рʼуньшти дитьн. Дә ижар Ԝи жь бәна ԛамчик чекьр, һʼәму жь пʼарьстгәһе пәз у дәԝаред ԝанва дәрхьстьн, пʼәред пʼәрәгӧһерʼа рʼетьн у тʼәхтед ԝан ԝәлгәрʼандьн. Кәвоткфьрошарʼа гот: «Вана жь ве дәре һьлдьн! Иди мала Баве Мьн нәкьнә базаргәһ!» Һатә бира шагьртед Ԝи кӧ аһа һатийә ньвисаре: «Хирәта һьндава мала Тәда агьр Мьн дьхә». Һьнге щьһуйа же пьрси: «Те чь нишане нишани мә ки, кӧ һʼӧкӧме Тә һәйә ван тьшта бьки?» Иса ль ԝан вәгәрʼанд у гот: «Ве пʼарьстгәһе һьлшиньн, Әзе нава се рʼожада рʼакьм». Һьнге щьһуйа жерʼа гот: «Нава чьл шәш салада әва пʼарьстгәһа һатийә чекьрьне. Чаԝа Те ԝе нава се рʼожада рʼаки?» Ле Иса дәрһәԛа пʼарьстгәһа бәдәна Хԝәда хәбәр дьда. Пәйрʼа гава Әԝ жь мьрьне рʼабу, шагьрта әԝ готьна Ԝи ани бира хԝә у ԝана әԝ ньвисар у готьна Иса баԝәр кьрьн. Аԝа гава кӧ Иса Щәжьна Дәрбазбунеда ль Оршәлиме бу, гәләка әԝ нишанед кӧ Ԝи дькьрьн дитьн, баԝәрийа хԝә наве Ԝи анин. Ле Иса баԝәрийа Хԝә ль ԝан нәдани, чьмки дьле һʼәму мәрьва Ԝива әʼйан бу. Нә һʼәԝщә бу, кӧ йәки һьндава мәрьвәкида шәʼдәти бьда, чьмки Ԝи дьле мәрьва заньбу. Жь ферьсийа мәрьвәк һәбу, наве ԝи Никодемо, кӧ сәрәкәки щьһуйа бу. Әва шәв һатә щәм Иса у жерʼа гот: «Мамоста, әм заньн кӧ Тӧ жь Хԝәдеда чаԝа дәрсдар һатийи, чьмки әԝ нишанед кӧ Тӧ дьки, һәгәр Хԝәде нә перʼа бә, тʼӧ кәс нькарә бькә». Иса ле вәгәрʼанд у готе: «Әз рʼаст бе хельф тәрʼа дьбежьм, һәгәр мәрьвәк диса ну нәбә, әԝ нькарә Пʼадшатийа Хԝәде бьбинә». Никодемо же пьрси: «Мәрьв кӧ иди мәзьн буйә, әԝ чаԝа дькарә диса ну бьбә? Ԛәт дьбә кӧ әԝ щарәкә дьн бькʼәвә зьке дийа хԝә у жь дийа хԝә диса бьбә?» Иса ле вәгәрʼанд у готе: «Әз рʼаст бе хельф тәрʼа дьбежьм, һʼәта кӧ мәрьв жь аве у Рʼӧһʼ нәбә, әԝ нькарә бькʼәвә Пʼадшатийа Хԝәде. Йе кӧ жь бәдәне дьбә бәдән ә, йе кӧ жь Рʼӧһʼ дьбә рʼӧһʼ ә. Тӧ әʼщебмайи нәминә кӧ Мьн тәрʼа гот: Гәрәке һун диса ну бьбьн. Ба ль кʼӧ дәре дьхԝазә рʼадьбә. Тӧ дәнге ԝи дьбьһейи, ле ньзани әԝ жь кʼӧ те у кʼӧда дьчә. Һәр кәсе кӧ жь Рʼӧһʼ* дьбә жи ӧса йә». Никодемо же пьрси: «Әԝ чаԝа дьбә?» Иса ле вәгәрʼанд у готе: «Тӧ дәрсдаре Исраеле йи у һе ван йәка ньзани? Әз рʼаст бе хельф тәрʼа дьбежьм, тьште кӧ әм заньн ԝе дьбежьн, тьште кӧ мә дитийә шәʼдәтийа ԝе дьдьн. Ле бәле һун шәʼдәтийа мә ԛәбул накьн. Һәгәр Әз дәрһәԛа тьштед ль ве дьнеда ԝәрʼа дьбежьм һун баԝәр накьн, ле ԝәки дәрһәԛа тьштед ль әʼзмана бежьм, һуне чаԝа баԝәр бькьн? Кәсәк һьлнәкʼьшийайә әʼзмен, пештьри Әԝи кӧ жь әʼзмен пәйа бу, Кӧрʼе Мерьв. Чаԝа кӧ Муса бәрʼийеда мәʼр бьльнд кьр, ӧса жи гәрәке Кӧрʼе Мерьв бе бьльндкьрьне, ԝәки һәр кәсе кӧ баԝәрийа хԝә Ԝи бинә, жийина ԝийә һʼәта-һʼәтайе һәбә. Чьмки Хԝәде ӧса дьнйа һʼьз кьр, кӧ Кӧрʼе Хԝәйи тайе тʼәне бәрва да, ԝәки һәр кәсе кӧ баԝәрийа хԝә Ԝи бинә ӧнда нәбә, ле жийина ԝийә һʼәта-һʼәтайе һәбә. Чьмки Хԝәде Кӧрʼе Хԝә нәшандә дьнйайе, кӧ диԝана дьне бькә, ле ԝәки дьнйа пе Ԝи хьлаз бә. Йе кӧ баԝәрийа хԝә Ԝи бинә, диԝана ԝи набә, ле әԝе кӧ баԝәрайи хԝә Ԝи найнә, иди диԝана ԝи буйә жи, чьмки әԝи баԝәрийа хԝә наве Кӧрʼе Хԝәдейи тайе тʼәне нәани. Диԝан бь ви аԝайи дьбә: Рʼонайи һатә дьнйайе, ле мәрьва тәʼристани жь рʼонайе зедәтьр һʼьз кьр, чьмки кьред ԝан хьраби бун. Һәр кәсе кӧ хьрабийе дькә, рʼонайи бәр чʼәʼва рʼәш ә. Әԝ хԝә ль рʼонайе нагьрә, ԝәки кьрьнед ԝи хӧйа нәбьн. Ле әԝе кӧ рʼастийе дькә, әԝ хԝә ль рʼонайе дьгьрә, ԝәки әʼйан бә, кӧ кьред ԝи Хԝәдеда һатьнә кьрьне». Пәй ве йәкерʼа Иса у шагьртед Ԝи чунә ԛәза Щьһустане. Иса ль ԝе дәре тʼәви ԝан дьма у дьньхӧманд. Йуһʼәнна жи ль Әʼйнона незики Салиме дьньхӧманд, чьмки ав ль ԝьр гәләк бу. Мәрьв дьһатьнә ԝе дәре у дьньхӧмин. Йуһʼәнна һе нәавитьбунә кәле. Һьнге нав шагьртед Йуһʼәнна у щьһукида ль сәр пьрса әʼдәтед шуштьн-вәшуштьне дәʼԝ пешда һат. Әԝ шагьрт чунә щәм Йуһʼәнна у жерʼа готьн: «Дәрсдар, Әԝи кӧ ль ԝи бәри чʼәме Урдӧне тʼәви тә бу у тә бона Ԝи шәʼдәти да, ва Әԝ Хԝәха дьньхӧминә у һʼәму дьчьнә щәм Ԝи». Йуһʼәнна щаб да у гот: «Мәрьвәк нькарә тьштәки һьлдә сәр хԝә, һәгәр әԝ жь әʼзмен жерʼа нәһатьбә дайине. Һун хԝәха шәʼдед мьн ьн, кӧ мьн готийә: ‹Әз нә Мәсиһ ьм, ле йе ль пешийа Ԝи шанди мә›. Бук бона кʼе бә зәʼва әԝ хԝәха йә. Ле чаԝа дәстәбьраке зәʼве сәкьни бона ԝи дьбьһе у бь дәнге ԝи ша дьбә, ӧса жи ньһа дьле мьн шабунева тʼьжи бу. Әԝ гәрәке мәзьн бә, ле әз бьчʼук бьм. Әԝе кӧ жь жор һатийә, Әԝ сәр һʼәмуйарʼа йә. Әԝе кӧ жь ве дьне йә, әԝ йе ве дьне йә у әԝ жь ве дьне хәбәр дьдә. Ле Әԝе кӧ жь әʼзмен һатийә, Әԝ сәр һʼәмуйарʼа йә. Ԝи чь дит у чь бьһист бона ԝе йәке шәʼдәтийе дьдә, ле тʼӧ кәс шәʼдәтийа Ԝи ԛәбул накә. Йе кӧ шәʼдәтийа Ԝи ԛәбул дькә, әԝ мак дькә кӧ Хԝәде рʼаст ә. Әԝе кӧ Хԝәде шандийә Әԝ готьнед Хԝәде дьбежә, чьмки Хԝәде Рʼӧһʼ бе чап дьдә Ԝи. Бав Кӧрʼ һʼьз дькә у һәр тьшт дайә дәсте Ԝи. Әԝе кӧ баԝәрийа хԝә Кӧрʼ тинә, жийина ԝийә һʼәта-һʼәтайе һәйә. Әԝе кӧ гӧрʼа Кӧрʼ накә, әԝ жийине набинә, ле хәзәба Хԝәде ль сәр ԝи дьминә». Ферьсийа бьһист кӧ Иса жь Йуһʼәнна зедәтьр шагьрта дьщьвинә у бь аве дьньхӧминә, ле рʼаст Иса Хԝәха нәдьньхӧманд, ле шагьртед Ԝи дьньхӧмандьн. Һьнге Иса кӧ ве йәке пе һʼәсийа, Әԝи Щьһустан һьшт у диса чу Щәлиле. Ӧса ԛәԝьми кӧ гәрәке Әԝ Самәрйайерʼа дәрбаз бьбуйа. Әԝ һатә бажарәки Самәрйайе кӧ наве ԝи Сухар бу. Әԝ дәр незики ԝи әʼрди бу, кӧ Аԛуб дабу кӧрʼе хԝә Усьв. Бира Аԛуб ль ԝе дәре бу. Иса ӧса жь рʼеԝитийе ԝәстийайи, ль кʼеләка бире рʼуньшт. Иди рʼож нивро бу. Кʼӧлфәтәкә самәри һат кӧ аве бькʼьшинә. Иса ԝерʼа гот: «Авәке бьдә Мьн, Әз вәхԝьм». Шагьртед Ԝи жи чубунә бажер, кӧ хӧрәк бькʼьрʼьн. Ԝе кʼӧлфәта самәри жерʼа гот: «Тӧ щьһу йи у әз жи кʼӧлфәтәкә самәри мә. Тӧ чаԝа жь мьн аве дьхԝази?» Чьмки тʼӧ һәләԛәтийа щьһуйа тʼәви самәрийа тʼӧнәбу. Иса ле вәгәрʼанд у готе: «Һәгәр тә дайина Хԝәде бьзаньбуйа у бьзаньби Кʼи йә кӧ тәрʼа дьбежә: ‹Авәке бьдә Мьн Әз вәхԝьм›, тәйе жь Ԝи ав бьхԝәста у Әԝи ԝе ава жийине бьда тә». Кʼӧлфәте жерʼа гот: «Әз хӧлам, тьштәки Тәйи кӧ Тӧ пе аве бькʼьшини тʼӧнә у бир жи кʼур ә! Дә ижар Те ава жийине жь кʼӧ дәре бини? Чьма Тӧ жь баве мә Аԛуб мәстьр и, йе кӧ әва бира дайә мә у жь ве әԝи, зарʼед ԝи, пәз у дәԝаред ԝи же вәхԝарьнә?» Иса щаба ԝе да у готе: «Һәр кәсе кӧ жь ве аве вәхԝә, әԝе диса тʼи бә. Ле әԝе кӧ жь ԝе аве вәхԝә, йа кӧ Әз бьдьме, әԝе тʼӧ щар тʼи нәбә. Бәле әԝ ава кӧ Әзе бьдьмә ԝи, ԝе дьле ԝида бьбә каникә аве, кӧ ԝе бона жийина һʼәта-һʼәтайе бьлԛ бьдә». Кʼӧлфәте жерʼа гот: «Әз хӧлам, дә бьдә мьн ԝе аве, кӧ әз иди тʼи нәбьм у нәйем жь вьр аве нәкʼьшиньм». Иса ле вәгәрʼанд у готе: «Һәрʼә гази мере хԝә кә у ԝәрә вьра». Кʼӧлфәте щаба Ԝи да у гот: «Мере мьн тʼӧнә». Иса жерʼа гот: «Тә рʼаст гот: ‹Мере мьн тʼӧнә›, чьмки пенщ меред тә һәбунә у йе кӧ ньһа жи тӧ перʼа йи нә мере тә йә. Тә әв йәка рʼаст гот». Кʼӧлфәте жерʼа гот: «Әз хӧлам, әз дьбиньм Тӧ пʼехәмбәр и. Кал у бавед мә ль сәре ви чʼийайи Хԝәде һʼәбандьнә, ле һун дьбежьн щийе Хԝәде һʼәбандьне гәрәке ль Оршәлиме бә». Иса жерʼа гот: «Әʼвде, Мьн баԝәр бькә, ԝәхте бе, кӧ һуне нә ль ви чʼийайи у нә жи ль Оршәлиме Баве бьһʼәбиньн. Һун самәри Ԝи дьһʼәбиньн, Кʼижани кӧ һун нас накьн, ле әм щьһу Ԝи дьһʼәбиньн, Кʼижани әм нас дькьн, чьмки хьлазбун жь щьһуйа те. Ле бәле ԝәхте бе, иди перʼа гьһиштийә жи, кӧ йед рʼаст дьһʼәбиньн ԝе бь Рʼӧһʼ у Рʼастийе Баве бьһʼәбиньн, чьмки Бав йед аһа дьһʼәбиньн дьгәрʼә. Хԝәде Рʼӧһʼ ә у йед кӧ Ԝи дьһʼәбиньн жи гәрәке бь Рʼӧһʼ у Рʼастийе Ԝи бьһʼәбиньн». Кʼӧлфәте жерʼа гот: «Әз заньм кӧ Мәсиһе бе», (аԝа готи «Йе Кʼьфшкьри»). «Гава Әԝ бе, Әԝе дәрһәԛа һәр тьштида мәрʼа гьли кә». Иса жерʼа гот: «ӘЗ ӘԜ ЬМ, кӧ тʼәви тә хәбәр дьдьм». Сәр хәбәрдана ԝанда шагьртед Иса һатьн. Әԝ гәләки әʼщебмайи ман, кӧ Ԝи тʼәви кʼӧлфәте хәбәр дьда, ле кәси нәготе: «Тӧ чь дьхԝази?» йан «бона чь тʼәви ԝе хәбәр дьди?» Һьнге кʼӧлфәте щерʼе хԝә һьшт, чу бажер у щьмәʼтерʼа гот: «Ԝәрьн Ԝи мәрьви бьбиньн, Йе кӧ һʼәму тьштед кӧ мьн бәре кьрьбун мьнрʼа готьн. Гәло Әв ә Мәсиһ?» Әԝ жь бажер дәркʼәтьн у һатьнә щәм Ԝи. Ԝи ԝәхтида шагьртед Ԝи лава же дькьрьн у дьготьне: «Дәрсдар, тьштәки бьхԝә!» Ле Әԝи ԝанрʼа гот: «Хӧрәке Мьни хԝарьне һәйә, һун ньзаньн». Шагьрта жь һәвдӧ пьрси: «Гәло кәсәки жерʼа хԝарьн анийә?» Иса ԝанрʼа гот: «Хԝарьна Мьн әԝ ә, кӧ Әз хԝәстьна Йе кӧ Әз шандьмә бькьм у шьхӧлед Ԝи биньмә сери. Чьма һун хԝәха набежьн: ‹Һʼәта нандьруне һе чар мәһ һәнә›? Ва йә Әз ԝәрʼа дьбежьм, чʼәʼвед хԝә вәкьн у дина хԝә бьдьнә зәвийа, әԝ чаԝа зәр бунә, дьрутьнерʼа һазьр ьн! Йе кӧ дьдьру һәԛе хԝә дьстинә у бона жийина һʼәта-һʼәтайе бәр тʼоп дькә, ԝәки йе дьчинә у йе дьдьру бь һәврʼа ша бьн. Вьра әв готьн рʼаст ә, кӧ: ‹Йәк дьчинә у йәки дьн дьдьру›. Мьн һун шандьн кӧ һун ԝе бьдьрун, сәр кʼижане һун нәхәбьтинә, һьнәкед дьн хәбьтин у һун ль сәр хәбата ԝан рʼуньштьн». Гәләк самәрийед жь ԝи бажари баԝәрийа хԝә ль Ԝи анин, бона готьна ԝе кʼӧлфәте кӧ дьгот: «Һʼәму тьштед кӧ мьн кьрьбун, Әԝи мьнрʼа готьн». У гава самәри һатьнә щәм Ԝи, лава же кьрьн, кӧ Әԝ ль щәм ԝан бьминә. Әԝ жи дӧ рʼожа ль ԝе дәре ма. Гәләка бона ԝе хәбәрдана Ԝи баԝәрийа хԝә ль Ԝи анин у ԝе кʼӧлфәтерʼа готьн: «Әм иди нә кӧ пе готьна тә баԝәр дькьн, ле мә хԝәха бьһист у әм заньн кӧ әв ә рʼаст Хьлазкьре дьнйайе». Пәй ван һәр дӧ рʼожарʼа Иса жь ԝьр рʼабу чу Щәлиле. Иса хԝәха шәʼдәти дабу, кӧ рʼумәта пʼехәмбәр щи-мьскʼәне ԝида тʼӧнә. Гава кӧ Әԝ һатә Щәлиле, щәлилийа Әԝ ԛәбул кьр, чьмки әԝана хԝәха жи бона Щәжьна Дәрбазбуне чубунә Оршәлиме у тьштед кӧ Ԝи кьрьбун дитьбун. Иса диса чу Ԛанайа Щәлиле, кʼидәре ав кьрьбу шәрав. Ԝе дәре ԛӧльхкʼарәки ԛәсьре һәбу, кӧ кӧрʼе ԝи ль Кәфәрнаһуме нәхԝәш бу. Гава әԝи бьһист кӧ Иса жь Щьһустане һатийә Щәлиле, һатә щәм Ԝи у лава же кьр, кӧ һәрʼә Кәфәрнаһуме кӧрʼе ԝийи бәртәләф ԛәнщ кә. Иса ԝирʼа гот: «Һʼәта кӧ һун нишан у кʼәрәмәта нәбиньн, һун тʼӧ щар баԝәр накьн». Ԛӧльхкʼаре ԛәсьре жерʼа гот: «Әз хӧлам, ԝәрә әм һәрʼьн, һәла һе кӧрʼе мьн нәмьрийә». Иса ле вәгәрʼанд у готе: «Һәрʼә, кӧрʼе тә сах-сьламәт ә». Ԝи мәрьви жи әԝ готьна Иса баԝәр кьр у чу. Әԝ һе нәгьһиштьбуйе, хӧламед ԝи пешийа ԝида һатьн у жерʼа готьн: «Кӧрʼе тә сах-сьламәт ә». Әԝи жь хӧламед хԝә пьрси: «Кʼижан сьһʼәтеда әԝ бәрбь ԛәнщбуне чу?» Ԝана готә ԝи: «Дӧһӧ пәй ниврорʼа сьһʼәта йәке тʼайе же бәрʼда». Һьнге баве кӧрʼьк те дәрхьст, кӧ әԝ ԝе сьһʼәтеда бу, гава Иса жерʼа гот: «Кӧрʼе тә сах-сьламәт ә». Бь ви аԝайи ԝи у тʼәмамийа нәфәред мала ԝи баԝәр кьрьн. Әва нишана дӧда бу кӧ Иса кьр, гава Әԝ жь Щьһустане һатә Щәлиле. Пәй ве йәкерʼа щәжьнәкә щьһуйа һат у Иса һәвраз чу Оршәлиме. Ль Оршәлиме, ль бәр дәргәһе Пез һʼәԝзәк һәбу, кӧ бь ибрани жерʼа дьбежьн Бәйтзатʼа, пенщ һеԝангәһед ԝе һәбун. Ԝан һеԝангәһада гәләк нәхԝәш пʼалдайи бун: Йед кор, шьлушәʼт у кʼут. Әвана һивийа льһәвкʼәтьна аве бун, чьмки щар-щара мьлйакʼәтәки Хӧдан дькʼәтә аве у ль һәв дьхьст. У пәй льһәвкʼәтьна аверʼа, кʼе бәри һʼәмуйа бькʼәта аве, әԝ жь нәхԝәшийа хԝә ԛәнщ дьбу. Мәрьвәк ль ԝе дәре һәбу, кӧ нәхԝәше си һʼәйшт сала бу. Иса гава әԝ ль ԝьр пʼалдайи дит у заньбу жи кӧ әԝ зува нәхԝәш ә, ԝирʼа гот: «Тӧ дьхԝази ԛәнщ би?» Йе нәхԝәш ле вәгәрʼанд у готе: «Әз хӧлам, кәсәки мьн тʼӧнә, ԝәки гава ав ль һәв дькʼәвә, мьн бавежә һʼәԝз. Һʼәта әз һʼьзи дьдьмә хԝә хԝә бавежьме, йәки дьн бәри мьн хԝә давеже». Иса жерʼа гот: «Рʼабә бәрʼа хԝә һьлдә у бьгәрʼә». Перʼа-перʼа әԝ мәрьв ԛәнщ бу, бәрʼа хԝә һьлда у гәрʼийа. Әԝ рʼожа шәмийе бу. Һьнге щьһуйа ԝи мәрьве ԛәнщбуйирʼа гот: «Иро шәми йә! Ԛанун изьне надә кӧ тӧ бәрʼа хԝә һьлди». Әԝи ль ԝан вәгәрʼанд у гот: «Кʼе әз ԛәнщ кьрьм Әԝи мьнрʼа гот: ‹Бәрʼа хԝә һьлдә у бьгәрʼә›». Ԝана же пьрси: «Әԝ кʼи бу кӧ тәрʼа гот: ‹Бәрʼа хԝә һьлдә у бьгәрʼә?›» Ле йе ԛәнщбуйи ньзаньбу Әԝ кʼи бу, чьмки Иса Хԝә нава әʼлаләта ԝьрда бәтавәкьр. Пәй ве йәкерʼа Иса әԝ пʼарьстгәһеда дит у жерʼа гот: «Бьньһерʼә, тӧ ԛәнщ буйи! Иди гӧна нәкә, ԝәки тьштәки һе хьраб нәйе сәре тә». Ԝи мәрьви чу щьһуйарʼа гьли кьр, Йе кӧ әԝ ԛәнщ кьрийә Иса йә. Бона ве йәке иди щьһу пәй Иса кʼәтьн, чьмки Ԝи әв йәкана рʼожа шәмийеда дькьрьн. Һьнге Иса ль ԝан вәгәрʼанд у гот: «Баве Мьн һʼәта ньһа шьхӧле Хԝә дькә, Әз жи дькьм». Бона ве йәке щьһуйа һе дькьр кӧ Ԝи бькӧжьн, чьмки Ԝи нә тʼәне рʼожа шәмийе тʼәрʼьбандьбу, ле Хԝәде кьрьбу Баве Хԝә у Хԝә һьмбәри Хԝәде кьрьбу. Ләма Иса ԝанрʼа гот: «Әз рʼаст бе хельф ԝәрʼа дьбежьм, кӧ Кӧрʼ нькарә хԝәсәрихԝә тьштәки бькә, әԝ тʼәне ԝан тьштед кӧ дьбинә Бав дькә, Әԝ жи дькә. Бав чь дькә Кӧрʼ жи ӧса дькә. Чьмки Бав Кӧрʼ һʼьз дькә у һәр тьштед кӧ Хԝәха дькә нишани Ԝи дькә. Әԝе һе тьштед мәзьн нишани Ԝи бькә у һуне әʼщебмайи бьминьн. Чаԝа кӧ Бав дькарә мьрийа сах кә у жийине бьдә ԝан, ӧса жи Кӧрʼ дькарә кʼижана Әԝ дьхԝазә, жийине бьдә ԝан. Сәрда жи Бав диԝана тʼӧ кәси накә, ле һʼәму һʼӧкӧме диԝанкьрьне дайә Кӧрʼ, ԝәки һʼәму ԛәдьре Кӧрʼ бьзаньбьн, чаԝа ԛәдьре Баве заньн. Йе кӧ ԛәдьре Кӧрʼ ньзанә, әԝ ԛәдьре Баве кӧ Әԝ шандийә жи ньзанә. Әз рʼаст бе хельф ԝәрʼа дьбежьм: Һәр кәсе кӧ гӧһ бьдә готьнед Мьн у Ԝи баԝәр бькә, Йе кӧ Әз шандьмә, жийина ԝийә һʼәта-һʼәтайе һәйә. Диԝана ԝи найе кьрьне, ле әԝ жь мьрьне дәрбази жийине буйә. Әз рʼаст бе хельф ԝәрʼа дьбежьм, ԝәхт те у перʼа гьһиштийә жи, кӧ мьрийе дәнге Кӧрʼе Хԝәде бьбьһен у әԝед кӧ бьбьһен ԝе бьжин. Чьмки чаԝа Бав канийа жийине йә, ӧса жи кьр ԝәки Кӧрʼ Хԝәха канийа жийине бә. Әԝи һʼӧкӧме диԝанкьрьне жи да Ԝи, чьмки Әԝ Кӧрʼе Мерьв ә. Ль ве йәке әʼщебмайи нәминьн, чьмки ԝәхт незик дьбә, кӧ һʼәмуйед тʼьрбада ԝе дәнге Ԝи бьбьһен у дәркʼәвьн. Йед кӧ ԛәнщи кьрьнә ԝе бона жийине рʼабьн, йед кӧ хьраби кьрьнә бона диԝане. Әз Хԝәха нькарьм тьштәки бькьм. Чаԝа кӧ Әз дьбьһем, ӧса жи диԝане дькьм. Диԝанкьрьна Мьн рʼаст ә, чьмки Әз нә кӧ ль хԝәстьна Хԝә дьгәрʼьм, ле хԝәстьна Йе кӧ Әз шандьмә. Һәгәр Әз бона Хԝә шәʼдәтийе бьдьм, шәʼдәтийа Мьн нә рʼаст ә. Ле йәки дьн һәйә кӧ бона Мьн шәʼдәтийе дьдә у Әз заньм әԝ шәʼдәтийа кӧ Әԝ бона Мьн дьдә рʼаст ә. Ԝә мәрьв шандьнә щәм Йуһʼәнна у ԝи шәʼдәтийа рʼастийе да. Ле Әз нә һʼәԝще шәʼдәтийа мәрьва мә, Әз тʼәне ван тьшта дьбежьм, ԝәки һун хьлаз бьн. Йуһʼәнна чʼьрак бу кӧ дьшьхӧли у рʼонайи дьда. Ԝә хԝәст кӧ һьнәк ԝәхт бь рʼонайа ԝи ша бьн. Ле әԝ шәʼдәтийа бона Мьн сәр шәʼдәтийа Йуһʼәннарʼа йә. Чьмки әԝ шьхӧлед кӧ Баве спартьнә Мьн, ԝәки Әз ԝан биньмә сери, һәма әԝ шьхӧл ьн, йед кӧ Әз дькьм, шәʼдәтийе бона Мьн дьдьн, кӧ Баве Әз шандьмә. У Бав кӧ Әз шандьмә, Ԝи Хԝәха бона Мьн шәʼдәти дайә. Ԝә тʼӧ щар нә дәнге Ԝи бьһистийә, нә рʼуйе Ԝи дитийә у нә жи готьна Ԝи дьле ԝәда дьминә, чьмки һун Әԝи кӧ Ԝи шандийә баԝәр накьн. Һун ньвисарада кʼур дьбьн, чьмки һун дьбежьн, жийина ԝәйә һʼәта-һʼәтайе ԝанда йә у һәма әԝ хԝәха шәʼдәтийа Мьн дьдьн. Ле һун нахԝазьн бенә щәм Мьн, ԝәки жийина ԝә һәбә. Әз нә һʼәԝще шькьрдайина мәрьвайе мә, ле Әз ԝә нас дькьм у заньм кӧ дьле ԝәда һʼьзкьрьна Хԝәде тʼӧнә. Әз бь наве Баве Хԝә һатьм у һун Мьн ԛәбул накьн. Ле һәгәр йәки дьн бь наве хԝә бе, һуне ԝи ԛәбул кьн. Һуне чаԝа бькарьбьн Мьн баԝәр бькьн, һәгәр һун нав һәвда рʼумәта наве хԝә дьгәрʼьн, ле әԝ рʼумәта кӧ жь Хԝәдейе бешьрики-беһәвалә нагәрʼьн? Нәфькьрьн кӧ Әзе ԝә ль бәр Баве нәһәԛ кьм. Йәк һәйә, кӧ ԝә нәһәԛ дькә, һәма әԝ Муса йә кӧ ԝә гӧмана хԝә данийә сәр ԝи. Һәгәр ԝә Муса баԝәр бькьра, ԝәйе Әз жи баԝәр бькьрама, чьмки әԝи дәрһәԛа Мьнда ньвисийә. Ле һәгәр һун ньвисаред ԝи баԝәр накьн, һуне чаԝа готьнед Мьн баԝәр бькьн?» Пәй ве йәкерʼа Иса дәрбази ԝи бәри гола Щәлиле бу, кӧ жерʼа Тәбәрийа дьбежьн. Әʼлаләтәкә гьран пәй Ԝи дьчу, чьмки ԝан әԝ нишанед кʼәрәмәт дитьбун, йед кӧ Ԝи ль сәр нәхԝәша кьрьбун. Иса рʼабу сәре чʼийе у ль ԝе дәре тʼәви шагьртед Хԝә рʼуньшт. Щәжьна щьһуйайә Дәрбазбуне незик бу. Гава Иса ль дора Хԝә ньһерʼи, дит кӧ әʼлаләтәкә гьран бәрбь Ԝи те, готә Филипо: «Әме нен жь кʼӧ дәре бькʼьрʼьн, ԝәки әв мәрьвана бьхԝьн?» Әԝи әв йәк гот, кӧ ԝи бьщерʼьбинә, чьмки Хԝәха заньбу кӧ ԝе чь бькьра. Филипо ле вәгәрʼанд у готе: «Баһе дӧсьд зиви нан жи тʼера ван накә, һәма ԝәки һәр йәкирʼа пәʼрик жи бькʼәвә!» Жь шагьрта йәки, Әндраԝьсе бьре Шьмһʼун-Пәтрус готә Ԝи: «Вьр хортәк һәйә, кӧ пенщ нанед щәһ у дӧ мәʼсийед ԝи һәнә. Ле бона һаԛас мәрьва әв чь йә?» Иса гот: «Мәрьва ль әʼрде бьдьнә рʼуньштандьне». Шинайийа ԝьр гәләк бу, әԝ меред кӧ рʼуньштьн, ԝәкә пенщ һʼәзара бун. Һьнге Иса әԝ нан һьлдан шькьри да у бәлайи рʼуньштийа кьр. Бь ви аԝайи жи мәʼси бәла кьрьн, чьԛас кӧ хԝәстьн. У гава тʼер хԝарьн, Әԝи шагьртед Хԝәрʼа гот: «Ԝан һурькед бәрмайи бьдьнә һәв, ԝәки тьштәк пʼучʼ нәбә». Шагьрта жи жь бәр әԝед кӧ пенщ нанед щәһ хԝарьбун, донздәһ сәлә жь һурькед бәрмайи тʼьжи бәрәв кьрьн. Гава ван мәрьва дит кӧ Иса әв нишан кьр, готьн: «Рʼаст Әв ә әԝ пʼехәмбәре кӧ ԝе бьһата дьнйайе!» Һьнге Иса пе һʼәсийа кӧ әԝе бен у Ԝи бь зоре бьбьн бькьнә пʼадша, диса Әԝ тʼәне һьлкʼьшийа чʼийе. Гава рʼо чу ава, шагьртед Ԝи бәржери дәве голе бун. Әԝ кʼәтьнә ԛәйькәке у рʼе кʼәтьн, ԝәки дәрбази Кәфәрнаһуме, ԝи бәри голе бьн. Иди тәʼри кʼәтьбу әʼрде, ле Иса һе Хԝә ԝанрʼа нәгиһандьбу. Фьртонәкә ԛайим рʼабу, голе да бәр пела. Гава ԝан бер кʼьшандьн ԛаси пенщ-шәш километьра пешда чун, ԝан дит кӧ Иса пәйа сәр голерʼа те незики ԛәйьке дьбә. Рʼьсасе әԝ гьртьн, ле Иса ԝанрʼа гот: «Нәтьрсьн, Әз ьм!» Һьнге ԝан хԝәст кӧ Әԝ һьлдана ԛәйьке. Ԛәйьк перʼа-перʼа гьһиштә ԝи алийе кӧ ԝан дьхԝәст бьчунайе. Рʼожа дьне әԝ әʼлаләта кӧ ль ԝи бәри голе мабу, заньбу кӧ ль ԝьр алийе ԝан тʼәне ԛәйькәк һәбу, әԝ жи шагьртед Ԝи тʼәне кʼәтьбуне дәрбаз бьбун, ле Иса нәкʼәтьбу ԝе ԛәйьке. Жь алийе Тәбәрийайе һьнәк ԛәйькед дьн һатьн незики ԝи щийи бун, кʼидәре пәй шькьрдайина Хӧданрʼа нан хԝарьбун. Гава мәрьва дит кӧ нә Иса ль ԝьр ә у нә жи шагьртед Ԝи, һьнге әԝ хԝәха жи кʼәтьнә ԛәйька у чунә Кәфәрнаһуме, ԝәки ль Иса бьгәрʼьн. Гава ԝан Иса ль ԝи бәри голе дит, жерʼа готьн: «Дәрсдар, Тӧ кʼәнге һати ве дәре?» Иса ль ԝан вәгәрʼанд у гот: «Әз рʼаст бе хельф ԝәрʼа дьбежьм, һун ль Мьн дьгәрʼьн, нә кӧ бона ԝе йәке, кӧ ԝә нишан дитьнә, ле бона ԝе йәке, кӧ ԝә жь ԝи нани хԝар у тʼер бун. Бона хԝарьна пʼучʼ нәхәбьтьн, ле бона ԝе хԝарьне бьхәбьтьн, йа кӧ жийина һʼәта-һʼәтайеда дьминә, кʼижане Кӧрʼе Мерьв ԝе бьдә ԝә, чьмки Бав Хԝәде мора Хԝә ль Ԝи хьстийә». У ԝан же пьрси: «Гәрәке әм чь бькьн, ԝәки ԝан шьхӧлед Хԝәде биньнә сери?» Иса ль ԝан вәгәрʼанд у гот: «Шьхӧле Хԝәде әв ә, кӧ һун баԝәрийа хԝә Ԝи биньн, Йе кӧ Әԝи шандийә». Ԝана сәр ве йәке жерʼа гот: «Кӧ ӧса йә Те чь нишане бьки, ԝәки әм бьбиньн у Тә баԝәр бькьн? Те чь шьхӧли бьки? Кал у бавед мә бәрʼийеда мана хԝарьн, чаԝа кӧ һатийә ньвисаре: ‹Ԝи жь әʼзмен бона хԝарьна ԝан нан да› ». Иса ԝанрʼа гот: «Әз рʼаст бе хельф ԝәрʼа дьбежьм, әԝ нә кӧ Муса бу кӧ жь әʼзмен нан да ԝә, ле Баве Мьн бу. Бәле Әԝ Баве Мьн ә, кӧ ԝи нане рʼаст жь әʼзмен дьдә ԝә! Чьмки әԝ нане Хԝәде дьдә әԝ ә, кӧ жь әʼзмен те хԝаре у жийине дьдә дьнйайе». Ԝан ле вәгәрʼанд у готьне: «Әм хӧлам, дә һәр гав ви нани бьдә мә». Иса ԝанрʼа гот: «Әз ьм нане жийине. Һәр кәсе кӧ бе щәм Мьн, әԝ ԛәт бьрʼчи набә у һәр кәсе кӧ баԝәрийа хԝә Мьн бинә, тʼӧ щар тʼи набә. Ле чаԝа кӧ Мьн ԝәрʼа гот, ԝә Әз дитьм жи, ле һун һе баԝәр накьн. Әԝ һʼәмуйед кӧ Бав дьдә Мьн, ԝе бенә щәм Мьн у һәр кәсе кӧ бе щәм Мьн, Әз тʼӧ щар бәри ԝи надьм. Чьмки Әз жь әʼзмен һатьмә хԝаре, нә кӧ хԝәстьна Хԝә бькьм, ле хԝәстьна Ԝи, Йе кӧ Әз шандьмә. Хԝәстьна Йе кӧ Әз шандьмә әв ә, ԝәки Әз жь һʼәмуйед кӧ Ԝи данә Мьн тʼӧ кәси ӧнда нәкьм, ле Рʼожа Ахрәтеда жь мьрьне рʼакьм. Чьмки хԝәстьна Баве Мьн әв ә, ԝәки һәр кәсе кӧ Кӧрʼ бьбинә у баԝәрийа хԝә Ԝи бинә, жийина Ԝийә һʼәта-һʼәтайе һәбә. У Рʼожа Ахрәтеда жи Әзе ԝи жь мьрьне рʼакьм». Щьһуйа һьндава Ԝида бина хԝә тәнг кьр, чьмки Ԝи гот: «Нане кӧ жь әʼзмен һатә хԝаре Әз ьм». У дьготьн: «Нә әва Исайе кӧрʼе Усьв ә, кӧ әм де у баве Ԝи нас дькьн? Иди әва чаԝа дьбежә: ‹Әз жь әʼзмен һатьмә хԝаре›?» Иса щаб да у ԝанрʼа гот: «Нав һәвда нәкьнә пʼьстә-пʼьст. Тʼӧ кәс нькарә бе щәм Мьн, һʼәта Баве кӧ Әз шандьмә, ԝи бәрбь Мьн нәкʼьшинә. У Рʼожа Ахрәте Әзе ԝи жь мьрьне рʼакьм. Ль алийе ньвисаред пʼехәмбәрада һатийә ньвисаре: ‹Һʼәмуйе жь алийе Хԝәдеда бенә һинкьрьне›. Һәр кәсе кӧ жь Бав бьбьһе у һин бә ԝе бе щәм Мьн. Бь ве йәке Әз набежьм, кӧ кәсәки Бав дитийә. Әԝе кӧ жь Хԝәде йә, тʼәне Әԝи Бав дитийә. Әз рʼаст бе хельф ԝәрʼа дьбежьм, әԝе кӧ баԝәр дькә жийина ԝийә һʼәта-һʼәтайе һәйә. Әз ьм нане жийине. Кал у бавед ԝә бәрʼийеда мана хԝарьн у мьрьн. Ле әв ә әԝ нане кӧ жь әʼзмен һатийә хԝаре, ԝәки һәр кәсе кӧ же бьхԝә нәмьрә. Әз ьм нане жийине кӧ жь әʼзмен һатьмә хԝаре. Кʼи кӧ жь Ви нани бьхԝә, ԝе һʼәта-һʼәтайе бьжи. Әԝ нане кӧ Әзе бона жийина дьнйайе бьдьм, әԝ бәдәна Мьн ә». Ль сәр ве йәке щьһу һәврʼа кʼәтьнә дәʼԝе у готьн: «Әва чаԝа дькарә бәдәна Хԝә бьдә мә кӧ әм бьхԝьн?» Һьнге Иса ԝанрʼа гот: «Әз рʼаст бе хельф ԝәрʼа дьбежьм, һʼәта кӧ һун бәдәна Кӧрʼе Мерьв нәхԝьн у хуна Ԝи вәнәхԝьн, жийине нава ԝәда тʼӧнәбә. Йе кӧ бәдәна Мьн бьхԝә у хуна Мьн вәхԝә, ԝе жийина ԝийә һʼәта-һʼәтайе һәбә у Әзе ԝи Рʼожа Ахрәте жь мьрьне рʼакьм. Чьмки бәдәна Мьн хԝарьна рʼаст ә у Хуна Мьн жи вәхԝарьна рʼаст ә. Әԝе кӧ бәдәна Мьн дьхԝә у хуна Мьн вәдьхԝә, әԝ нава Мьнда дьминә, Әз жи нава ԝида. Чаԝа Бав, канийа жийине Әз шандьм у бь дәсте Баве Әз сах ьм, бь ви аԝайи жи йе кӧ Мьн бьхԝә, ԝе бь дәсте Мьн сах бьминә. Әв ә Әԝ нане кӧ жь әʼзмен һатийә хԝаре. Әв нә мина ԝи манайи йә, кӧ кал у бавед ԝә хԝарьн, ле мьрьн. Әԝе кӧ Ви нани бьхԝә, ԝе һʼәта-һʼәтайе бьжи». Иса әв хәбәр кʼьништеда готьн, гава Ԝи Кәфәрнаһумеда һин дькьр. Жь шагьртед Ԝи гәләка гава әв хәбәр бьһистьн, готьн: «Әв чь хәбәрнә гьран ьн! Кʼи дькарә гӧһдарийа готьнед Ԝи бькә?» Ле Исава әʼйан бу кӧ шагьрт ль сәр ве йәке нава һәвда дькьнә пʼьстә-пʼьст, ԝанрʼа гот: «Әв йәк ԝә пʼьшк дькә? Ле һьнге һуне чь бежьн, һәгәр бьбиньн Кӧрʼе Мерьв рʼадьбә ԝи щийе кӧ бәре ле бу? Рʼӧһʼ жийине дьдә, бәдән бәрга тьштәки нагьрә. Әԝ хәбәред кӧ Мьн ԝәрʼа готьн, Рʼӧһʼ у жийин ьн. Ле нава ԝәда һьнәк һәнә баԝәр накьн». Иса һе сәре серида заньбу кӧ кʼи баԝәр накә у кʼи йә әԝи кӧ ԝе нәмамийа Ԝи бькә. У Ԝи гот: «Бона ве йәке Мьн ԝәрʼа гот: Кәсәк нькарә бе щәм Мьн һʼәта кӧ әԝ жь алийе Баведа жерʼа нәһатьбә дайине». Бона ве йәке жь шагьртед Ԝи гәләк пашда чун у иди тʼәви Ԝи нәдьгәрʼийан. Һьнге Иса жь һәр донздәһа пьрси: «Дьбә кӧ һун жи дьхԝазьн һәрʼьн?» Шьмһʼун-Пәтрус ле вәгәрʼанд у готе: «Хӧдан, әме һәрʼьнә щәм кʼе? Готьнед жийина һʼәта-һʼәтайе щәм Тә нә. У мә баԝәр кьрийә у әм заньн кӧ Тӧ йи Пирозе Хԝәде». Иса ль ԝан вәгәрʼанд у гот: «Чьма Мьн һун һәр донздәһ нәбьжартьн? Ле бәле йәк жь ԝә щьн ә». Ԝи әв йәк бона Щьһудайе кӧрʼе Шьмһʼуне Исхәрйоти дьгот, чьмки рʼаст ә әԝ йәк жь һәр донздәһа бу, ле диса ԝе нәмамийа Иса бькьра. Пәй ве йәкерʼа Иса Щәлиледа дьгәрʼийа. Ԝи нәдьхԝәст кӧ Щьһустанеда бьгәрʼийа, чьмки щьһу пәй кʼәтьбун кӧ бькӧштана. Гава Щәжьна щьһуйайә Һʼолькчекьрьне незик бу, бьред Ԝи жерʼа готьн: «Жь вьр рʼабә һәрʼә Щьһустане, ԝәки шагьртед Тә әԝ кьред кӧ Тӧ дьки бьбиньн. Чьмки мәрьве кӧ дьхԝазә ашкәрә хԝә бьдә наскьрьне, кьрьнед хԝә вәнашерә. Һәгәр Тӧ хԝәйе ван кьра йи, хԝә дьнйайева әʼйан кә». Бьред Ԝи жи баԝәрийа хԝә же нәданин. Иса ԝанрʼа гот: «Ԝәхте Мьн һе нәһатийә, ле һәр тʼьм ԝәхт дәсте ԝәда йә. Дьнйа нькарә бьжәнә ԝә, ле дьжәнә Мьн, чьмки Әз шәʼдәтийе дьдьм, кӧ кьред ԝе хьраб ьн. Һун хԝәха һәвраз һәрʼьнә ве щәжьне, ле Әз һәла һе найеме, чьмки ԝәхте Мьн һе тʼам нәһатийә». Әԝ йәк ԝанрʼа гот у ль Щәлиле ма. Ле чахе бьред Ԝи һәвраз чунә щәжьне, Әԝ жи рʼабу чу ԝьр, нә кӧ ашкәрә, ле бь дьзива. Ԝи чахи щьһу щәжьнеда ле дьгәрʼийан у дьготьн: «Әԝ кʼане йә?» Нав әʼлаләтеда бона Ԝи гәләк хәбәрдан дьчу. Һьнәка дьгот: «Әԝ мәрьвәки ԛәнщ ә», һьнәка жи дьгот: «На, Әԝ щьмәʼте жь рʼе дәрдьхә». Ле жь тьрса щьһуйа, кәси нәԝерьбу ашкәрә бона Ԝи тьштәк бьгота. Ле ниве щәжьнеда Иса һәвраз чу кʼәтә пʼарьстгәһе у дәст бь һинкьрьне кьр. Щьһу әʼщебмайи дьман у дьготьн: «Әви нәхԝәндийә, әԝ чаԝа һаԛас ньвисар занә?» Иса ль ԝан вәгәрʼанд у гот: «Һинкьрьна Мьн нә жь Мьн ә, ле жь Ԝи йә, Йе кӧ Әз шандьмә. Һәгәр мәрьвәк бьхԝазә әʼмьре Ԝи бьԛәдинә, ԝе һьнге бьзаньбә әв һинкьрьна Мьн гәло жь Хԝәде йә, йан Әз хԝәсәрихԝә хәбәр дьдьм. Йе кӧ хԝәсәрихԝә хәбәр дьдә, әԝ ль наве хԝә дьгәрʼә, ле Әԝе кӧ ль наве Йе кӧ Әԝ шандийә дьгәрʼә, Әԝ йәки рʼаст ә у ль щәм Ԝи ԛәлпи тʼӧнә. Нә Муса Ԛанун да ԝә? У жь ԝә тʼӧ кәс жи Ԛануне наԛәдинә. Һун чьма дьхԝазьн Мьн бькӧжьн?» Щьмәʼте ле вәгәрʼанд у готе: «Тӧ щьнакʼәти йи! Кʼи дьхԝазә Тә бькӧжә?» Иса ль ԝан вәгәрʼанд у гот: «Мьн кʼәрәмәтәк кьр, һун һʼәму жи әʼщебмайи манә. Муса сьнәткьрьн да ԝә, (әԝ жи нә кӧ жь Муса һат, ле жь кал у бава) у һун рʼожа шәмийе мерьв сьнәт дькьн. Һәгәр һун рʼожа шәмийе зарʼа сьнәт дькьн ԝәки Ԛануна Муса нәтʼәрʼьбә, иди чьма һун һерса хԝә ль сәр Мьн рʼадькьн, ԝәки Мьн рʼожа шәмийеда мәрьвәк сәрда-педа ԛәнщ кьр? Ль анәгори дитьна чʼәʼвед хԝә диԝане нәкьн, ле ль анәгори рʼастийе диԝане бькьн». Һьнге һьнәкә жь Оршәлиме готьн: «Әва нә әԝ ә, йе кӧ дьхԝәстьн бькӧштана? У ва йә Әԝ ашкәрә хәбәр дьдә у тʼӧ кәс жи жерʼа тьштәки набежә. Дьбә кӧ сәрԝер пе һʼәсийанә, кӧ Әва Мәсиһ ә? Ле рʼаст әм заньн кӧ әва жь кʼӧ йә. Ле гава кӧ Мәсиһ бе, кәсе ньзаньбә кӧ әԝ жь кʼӧ йә». Һьнге Иса пʼарьстгәһеда ԝәхте һинкьрьне дәнге Хԝә бьльнд кьр у гот: «Һун Мьн нас дькьн у заньн кӧ Әз жь кʼӧ мә? Әз хԝәсәрихԝә нәһатьмә. Ле Йе кӧ Әз шандьмә, Әԝ сәр рʼастийе йә, һун Ԝи нас накьн. Әз Ԝи нас дькьм, чьмки Әз жь Ԝи мә у Әԝи Әз шандьмә». Һьнге кьрьн кӧ Ԝи бьгьрьн, ле кәсәки нькарьбу Әԝ бьгьрта, чьмки һе ԝәхте Ԝи нәһатьбу. Ле жь әʼлаләте гәләка баԝәрийа хԝә Ԝи ани у готьн: «Гава кӧ Мәсиһ бе, Әԝе жь кьрьнед ви зедәтьр нишана бькә?» Ферьсийа әԝ готә-гота дәрһәԛа Ԝида жь нава щьмәʼте бьһист у сәрәкед кʼаһина нобәдар шандьн, ԝәки Ԝи бьгьрьн. Иса гот: «Әзе һьнәк ԝәхт жи тʼәви ԝә бьминьм, паше Әзе һәрʼьмә щәм Ԝи, Йе кӧ Әз шандьмә. Һуне ль Мьн бьгәрʼьн, ле Мьн набиньн. Щийе кӧ Әзе ле бьминьм, һун нькарьн бен». Һьнге щьһуйа һәвдӧрʼа готьн: «Әв мәрьве кʼӧда һәрʼә, кӧ әме Ԝи нәбиньн? Ԛәй нета Ԝи һәйә һәрʼә щәм щьмәʼта мәйә кӧ ль нав йунанада бәла буйә у йунана һин кә? Әв чь хәбәрдан ә әԝ дькә: ‹Һуне ль Мьн бьгәрʼьн у Мьн нәбиньн, щийе кӧ Әзе ле бьминьм, һуне нькарьбьн бен›?» Рʼожа хьлазийе, рʼожа щәжьнейә һәрә әʼзиз, Иса сәкьни у бь дәнгәки бьльнд гот: «Һәгәр йәк тʼи йә, бьра бе щәм Мьн у вәхԝә. Әԝе кӧ баԝәрийа хԝә Мьн бинә, чаԝа кӧ ньвисар дьбежә: ‹Ԝе жь нав-дьле ԝи чʼәмед ава жийине бькʼьшьн›». Иса әв готьн бона ԝи Рʼӧһʼе Пироз гот, кʼижан кӧ баԝәрмәндед Ԝи ԝе бьстандана. Рʼӧһʼе Пироз һе нәһатьбу дайине, чьмки Иса һе нәһатьбу рʼумәткьрьне. Гава ԝана әв готьн бьһист, һьнәкед жь әʼлаләте готьн: «Рʼасти жи әва әԝ пʼехәмбәр ә». Һьнәка жи гот: «Әва Мәсиһ ә», ле һьнәкед дьн жи готьн: «Чьма Мәсиһе жь Щәлиле бе? Нә ньвисар дьбежә, кӧ Мәсиһе жь зӧрʼәта Даԝьд у жь гӧнде Даԝьд ԝе бе, аԝа готи жь Бәйтләһʼме?» Бь ви аԝайи нав әʼлаләтеда, ль сәр Ԝи дӧтирәти пешда һат. Һьнәкед жь ԝан хԝәстьн Әԝ бьгьртана, ле тʼӧ кәси дәст нәда Ԝи. Һьнге нобәдар вәгәрʼийанә щәм ферьси у сәрәкед кʼаһина. Ԝана жь нобәдара пьрси: «Ԝә чьма Әԝ нәани?» Нобәдара ль ԝан вәгәрʼанд у готьн: «Тʼӧ кәси тʼӧ щара мина ԝи мәрьви хәбәр нәдайә!» Һьнге ферьсийа ль ԝан вәгәрʼанд у готьн: «Иди әԝи һун жи жь рʼе дәрхьстьнә? Тʼӧ жь сәрԝер у ферьсийа кәсәки баԝәрийа хԝә же анийә, пештьри ве щьмәʼта мәʼрьм, кӧ Ԛануне ньзанә у ньфьрʼ ле йә?» Никодемо, йе кӧ бәре чубу щәм Иса у жь ферьсийа бу, ԝанрʼа гот: «Гәло Ԛануна мә диԝана мерьв дькә, һʼәта кӧ гӧһдарийа ԝи нәкә у ньзаньбә кӧ әԝ чь дькә?» Ль ԝи вәгәрʼандьн у готьн: «Дьбә кӧ тӧ жи жь Щәлиле йи? Кʼур әʼнәнә кә, те бьбини кӧ жь Щәлиле тʼӧ пʼехәмбәр дәрнакʼәвьн». У һәр кәс чу мала хԝә, ле Иса чу чʼийайе Зәйтʼуне. Сәре сьбәһе зу Әԝ диса вәгәрʼийа пʼарьстгәһе, тʼәмамийа щьмәʼте һатә щәм Ԝи. Әԝ рʼуньшт у дәстпекьр әԝ һин кьрьн. Ԛанунзан у ферьсийа жьнәкә кӧ зьнекʼарийеда һатьбу гьртьне анин у ль бәр һʼәмуйа данә сәкьнандьне. Ԝана жерʼа гот: «Дәрсдар, әва жьна зьнекʼарийеда һатә гьртьне. Ԛанунеда Муса тʼәми дайә мә, кӧ әм йед аһа бьдьнә бәр кәвьра. Аԝа Тӧ чь дьбежи?» Бь ве готьне Әԝ дьщерʼьбандьн, ԝәки ньге ԝан щи бьгьрә, Ԝи нәһәԛ дәрхьн. Ле Иса Хԝә ԛуз кьр у бь тʼьлийа Хԝә ль сәр әʼрде ньвиси. Ле гава ԝан сәрһәв-сәрһәв дьпьрсин, Әԝи сәре Хԝә бьльнд кьр у ԝанрʼа гот: «Нава ԝәда кʼи бегӧнә йә, бьра кәвьре пешьн әԝ бавежә ԝе». У диса Ԝи Хԝә ԛуз кьр у бь тʼьлийа Хԝә сәр әʼрде ньвиси. Ԝана кӧ әв йәк бьһист, жь мәзьна гьрти йәк-йәк дәркʼәтьн. Иса тʼәне ма у кʼӧлфәт жи ль ԝьр сәкьни мабу. Иса сәре Хԝә бьльнд кьр у ԝерʼа гот: «Әʼвде, кʼане нә? Кәсәки тӧ нәһәԛ нәкьри?» Әԝе готә Ԝи: «Тʼӧ кәс нәма, әз хӧлам!» У Иса готе: «Әз жи тә нәһәԛ накьм. Һәрʼә у иди жь вьр шунда гӧна нәкә». Иса диса тʼәви ԝан хәбәр да у гот: «Әз ьм рʼонайа дьнйайе. Әԝе кӧ пәй Мьн бе, ԝе тʼӧ щар тәʼрийеда нәгәрʼә, ле ԝе рʼонайа ԝийә жийине һәбә». Ферьсийа ле вәгәрʼанд у готьне: «Тӧ шәʼдәтийе бона Хԝә дьди, шәʼдәтийа Тә нә рʼаст ә». Иса щаба ԝана да у гот: «Һәгәр Әз Хԝәха бона Хԝә шәʼдәтийе дьдьм, шәʼдәтийа Мьн рʼаст ә, чьмки Әз заньм Әз жь кʼӧ һатьмә у кʼӧда дьчьм. Ле һун ньзаньн кӧ Әз жь кʼӧ тем, йан кʼӧда дьчьм. Һун ль анәгори дитьна чʼәʼва диԝане дькьн, ле Әз диԝана тʼӧ кәси накьм. Ле һәгәр Әз диԝане бькьм жи, диԝанкьрьна Мьн рʼаст ә, чьмки Әз нә тʼәне мә, Әз у Бав әм һәврʼа нә, йе кӧ Әз шандьмә. Ԛануна ԝәда жи ньвисар ә, кӧ шәʼдәтийа дӧ мәрьва рʼаст ә. Әз бона Хԝә шәʼдәтийе дьдьм у Баве кӧ Әз шандьмә жи бона Мьн шәʼдәтийе дьдә». Һьнге ԝан же пьрси: «Кʼане йә Баве Тә?» Иса ль ԝан вәгәрʼанд у гот: «Һун нә Мьн нас дькьн, нә жи Баве Мьн. Һәгәр ԝә Әз нас бькьрама, ԝәйе Баве Мьн жи нас бькьра». Иса әв хәбәр пʼарьстгәһеда ԝәхте һинкьрьна Хԝә готьн, ль ԝе ода кӧ дийари теда дьһатә тʼопкьрьне, ле кәси Әԝ нәгьрт, чьмки һе ԝәхте Ԝи нәһатьбу. Ԝи диса ԝанрʼа гот: «Әз дьчьм, һуне ль Мьн бьгәрʼьн у һуне нав гӧнед хԝәда бьмьрьн. Һун нькарьн бенә ԝи щийе кӧ Әзе һәрʼьме». Сәр ве йәке щьһуйа гот: «Дьбә кӧ әве Хԝә бькӧжә кӧ дьбежә: ‹Һун нькарьн бенә ԝи щийе кӧ Әзе һәрʼьме›?» Иса ԝанрʼа гот: «Һун жь жере нә, Әз жь жоре мә, һун жь ве дьнйайе нә, ле Әз нә жь ве дьнйайе мә. Бона ве йәке Мьн ԝәрʼа гот, кӧ һуне нав гӧнед хԝәда бьмьрьн. Һәгәр һун баԝәр нәкьн кӧ ӘЗ ӘԜ ЬМ, һуне нав гӧнед хԝәда бьмьрьн». Һьнге же пьрсин: «Тӧ кʼи йи?» Иса ԝанрʼа гот: «Әз Әԝ ьм, Йе кӧ сәре серида ԝәрʼа дьбежьм. Гәләк тьшт һәнә, кӧ Әз дәрһәԛа ԝәда бежьм у диԝана ԝә бькьм. Ле Йе кӧ Әз шандьмә сәр рʼастийе йә у чь кӧ Мьн жь Ԝи бьһистийә, Әз дьнйайерʼа ԝе дьбежьм». Ԝана хәбәрдана Ԝи фәʼм нәкьр, кӧ Ԝи ани сәр Баве. Һьнге Иса ԝанрʼа гот: «Кʼәнге һун Кӧрʼе Мерьв бьльнд кьн, һуне һьнге бьзаньбьн кӧ ӘЗ ӘԜ ЬМ у Мьн ԛәт тʼӧ тьшт хԝәсәрихԝә нәкьрийә, ле Баве чаԝа Әз һин кьрьмә, Әз ӧса хәбәр дьдьм. У Йе кӧ Әз шандьмә тʼәви Мьн ә у Ԝи Әз тʼәне нәһьштьмә, чьмки Әз һәр гав кьрьнед кӧ Ԝи хԝәш тен, дькьм». Гава Иса аһа хәбәр да, гәләк мәрьва баԝәрийа хԝә Ԝи ани. Һьнге Иса готә ԝан щьһуйа, йед кӧ баԝәрийа хԝә Ԝи анин: «Һәгәр һун сәр һинкьрьна Мьн бьминьн, һуне рʼаст шагьртед Мьн бьн. Һуне рʼастийе нас кьн у рʼастийе ԝә аза кә». Ԝана ле вәгәрʼанд у готьне: «Әм жь зӧрʼәта Бьраһим ьн у тʼӧ щар мә хӧламти кәсирʼа нәкьрийә. Тӧ чаԝа дьбежи: ‹Һуне аза бьн›?» Иса ль ԝан вәгәрʼанд у гот: «Әз рʼаст бе хельф ԝәрʼа дьбежьм, һәр кәсе кӧ гӧна дькә, әԝ хӧламе гӧна йә. Хӧлам һʼәта-һʼәтайе маледа наминә, ле кӧрʼ һʼәта-һʼәтайе дьминә. Аԝа һәгәр Кӧрʼе Хԝәде ԝә аза кә, һуне рʼасти аза бьн. Әз заньм кӧ һун жь зӧрʼәта Бьраһим ьн, ле һун дькьн кӧ Мьн бькӧжьн, чьмки хәбәред Мьн дьле ԝәда щи набьн. Мьн чь кӧ щәм Баве Хԝә дитийә, Әз ԝе дьбежьм, ԝә жи чь кӧ щәм баве хԝә бьһистьнә ԝе йәке дькьн». Ԝана ле вәгәрʼанд у готьне: «Баве мә Бьраһим ә». Иса ԝанрʼа гот: «Һәгәр һун зарʼед Бьраһим буна, ԝәйе кьред Бьраһим бькьрана. Ле ньһа һун дькьн кӧ Мьн бькӧжьн, йәки ӧса кӧ рʼасти жь Хԝәде бьһистийә, ԝәрʼа дьбежә. Бьраһим тьштәки аһа нәкьр. Һун кьред баве хԝә дькьн». Һьнге Ԝирʼа готьн: «Әм рʼийа зьнекʼарийеда дьне нәкʼәтьнә! Бавәки мә һәйә, Әԝ жи Хԝәде йә». Иса ԝанрʼа гот: «Һәгәр Хԝәде Баве ԝә буйа, ԝәйе Әз һʼьз бькьрама, чьмки Әз жь щәм Хԝәде рʼабум һатьмә вьр. Әз нә кӧ хԝәсәрихԝә һатьмә, ле Әԝи Әз шандьмә. Чьма һун тьштед кӧ Әз дьбежьм фәʼм накьн? Чьмки һун нькарьн готьнед Мьн бьбьн. Һун баве хԝәда жь мирещьн ьн у дьхԝазьн хԝәстьнед баве хԝә биньнә сери. Әԝ жь сәре серида ԛәтʼьл бу у ԝи тʼӧ щар хԝә рʼастийе нәгьртийә, чьмки нава ԝида рʼасти тʼӧнә. Гава әԝ дәрәԝа дькә, әԝ гора бьнйатʼа хԝә дькә, чьмки әԝ дәрәԝин ә у баве дәрәԝа йә. Ле чьмки Әз рʼастийе дьбежьм, һун Мьн баԝәр накьн. Жь ԝә кʼи дькарә избат кә, кӧ гӧне Мьн һәйә? Аԝа һәгәр рʼастийе дьбежьм, чьма һун Мьн баԝәр накьн? Әԝе кӧ жь Хԝәде йә, готьнед Хԝәде дьбьһе. Бона ԝе йәке һун готьнед Хԝәде набьһен, чьмки һун нә жь Хԝәде нә». Щьһуйа ле вәгәрʼанд у готьне: «Чьма әм рʼаст набежьн, кӧ Тӧ самәри йи у щьна дькʼәви?» Иса ԝанрʼа гот: «Әз щьна накʼәвьм. Әз ԛәдьре Баве Хԝә дьгьрьм, ле һун Мьн беһӧрмәт дькьн. Әз рʼумәта наве Хԝә нагәрʼьм, ле йәк һәйә кӧ ле дьгәрʼә у сәрда дьньһерʼә. Әз рʼаст бе хельф ԝәрʼа дьбежьм, һәгәр йәк готьна Мьн хԝәй кә, әԝ тʼӧ щар мьрьне набинә». Һьнге щьһуйа жерʼа гот: «Иди әм заньн кӧ Тӧ щьна дькʼәви! Бьраһим жи мьр, пʼехәмбәр жи мьрьн у ньһа Тӧ дьбежи: ‹Һәгәр йәк готьна Мьн хԝәй кә, тʼӧ щар намьрә›. Чьма Тӧ жь баве мә Бьраһим четьр и? Әԝ мьр, пʼехәмбәр жи мьрьн. Тӧ Хԝә дәԝса кʼе датини?» Иса щаб да: «Һәгәр Әз хԝәха рʼумәта наве Хԝә бьльнд кьм, рʼумәта наве Мьн нә тьштәк ә. Әԝ, Баве Мьн ә, Йе кӧ рʼумәта наве Мьн бьльнд дькә, кʼижанирʼа һун дьбежьн: ‹Хԝәдейе мә йә›. Һун Ԝи ԛәт нас накьн, ле Әз Ԝи нас дькьм. Һәгәр Әз бежьм, Әз Ԝи нас накьм, Әзе жи мина ԝә дәрәԝ дәрем, ле Әз Ԝи нас дькьм у готьна Ԝи хԝәй дькьм. Баве ԝә Бьраһим һʼәйра ԝе рʼожа Мьнда бу, ԝи дит у ша бу». Бона ве йәке щьһуйа жерʼа гот: «Тӧ һе пенщи сали тʼӧнә йи! Тә Бьраһим жи дитийә?» Иса ԝанрʼа гот: «Әз рʼаст бе хельф ԝәрʼа дьбежьм, һе бәри Бьраһим ӘЗ ҺӘМӘ». Һьнге ԝан кәвьр һьлдан кӧ бавежьнә Ԝи, ле Иса Хԝә жь ԝан вәдьзи у жь пʼарьстгәһе дәркʼәтә дәрва чу. Гава кӧ Иса дәрбаз дьбу, Әԝи мәрьвәки жь зькмакийеда кор дит. Шагьртед Ԝи же пьрсин: «Дәрсдар, гӧне кʼе йә кӧ әв мәрьва кор жь дийа хԝә буйә? Гӧне ԝи йә, йан йе де у баве ԝи йә?» Иса ль ԝан вәгәрʼанд у гот: «Нә гӧне ԝи йә, нә жи йе де у баве ԝи йә, ле әв йәк аһа буйә, ԝәки кьред Хԝәде ль сәр ԝи бенә әʼйанкьрьне. Һʼәта кӧ рʼож һәйә, гәрәке әм кьред Ԝи бькьн, Йе кӧ Әз шандьмә. Шәв те, һьнге тʼӧ кәсе нькарьбә тьштәки бькә. Һʼәта кӧ Әз дьнйайеда мә, рʼонайа дьнйайе мә». Әԝи әв йәк кӧ гот, тʼуйи әʼрде кьр, жь тʼуке һʼәрʼи чекьр, әԝ һʼәрʼи чʼәʼве ԝи мәрьви да у жерʼа гот: «Һәрʼә сәрчʼәʼве хԝә һʼәԝзе Силԝамеда бьшо», (кӧ әв нав те фәʼмкьрьн «Шанди»). Әԝи жи чу сәрчʼәʼве хԝә шушт у бь чʼәʼвед вәбуйи вәгәрʼийа. Щинаред Ԝи у әԝед кӧ бәре әԝ дитьбун кӧ ԝи пʼарс дькьр, дьготьн: «Әва әԝи кор нинә, кӧ рʼудьньшт у пʼарс дькьр?» Һьнәка дьгот: «Әва әԝ ә», һьнәка жи дьгот: «На, нә әԝ ә, ле мина ԝи йә». Ле ԝи хԝәха дьгот: «Әз әԝ ьм». Һьнге же пьрсин: «Кӧ ӧса йә чʼәʼвед тә чаԝа вәбунә?» Әԝи ль ԝан вәгәрʼанд у гот: «Әԝ мәрьве кӧ жерʼа дьбежьн Иса, Әԝи һʼәрʼи чекьр у ль чʼәʼвед мьн дан у мьнрʼа гот: ‹Һәрʼә һʼәԝзе Силԝаме у сәрчʼәʼве хԝә бьшо›. Әз жи чум, мьн сәрчʼәʼве хԝә шушт у чʼәʼвед мьн вәбун». Ԝана же пьрси: «Кʼа Әԝ кʼӧ йә?» Әԝи гот: «Әз ньзаньм». Ԝана әԝ мәрьве кӧ бәре кор бу, бьрьнә щәм ферьсийа. Әԝ рʼожа кӧ Иса һʼәрʼи чекьр у чʼәʼвед ԝи вәкьрьн, шәми бу. Ферьсийа жи же пьрси, кʼа чаԝа чʼәʼвед ԝи вәбунә? Әԝи ԝанрʼа гот: «Һʼәрʼи ль чʼәʼвед мьн да, мьн сәрчʼәʼве хԝә шушт у ньһа әз дьбиньм». Һьнге һьнәкә жь ферьсийа гот: «Әв мәрьва нә жь Хԝәде йә, чьмки Әԝ рʼожа шәмийе хԝәй накә». Ле һьнәка жи дьгот: «Мәрьвәки гӧнәкʼар чаԝа дькарә ван кʼәрәмәта бькә?» Бь ви аԝайи нав ԝанда бу дӧтирәти. Һьнге, диса готьнә йе кӧ кор бу: «Тӧ чь дьбежи бона Әԝи кӧ чʼәʼвед тә вәкьрьн?» Әԝи жи гот: «Әԝ пʼехәмбәр ә». Ле щьһуйа баԝәр нәдькьр кӧ әԝ кор буйә у чʼәʼвед ԝи вәбунә, һʼәта гази де у баве ԝи нәкьрьн у жь де у баве ԝи нәпьрсин: «Әв ә әԝ кӧрʼе ԝәйи кӧ һун дьбежьн, жь зькмакийеда кор ә? Әва чаԝа ньһа дьбинә?» Де у баве ԝи ль ԝан вәгәрʼандьн у готьн: «Әм заньн кӧ әва кӧрʼе мә йә у жь зькмакийеда кор ә. Ле ньһа әԝ чаԝа дьбинә, әм ньзаньн, йан кʼе чʼәʼвед ԝи вәкьрьнә, әм ԝе жи ньзаньн. Әԝ иди мәзьн ә, жь ԝи бьпьрсьн, бьра әԝ щаба хԝә бьдә». Де у баве ԝи жь тьрса щьһуйа аһа готьн, чьмки щьһуйа пешда йа хԝә кьрьбунә йәк: «Һәгәр кʼи бежә Иса Мәсиһ ә, әԝе жь кʼьниште бе дәрхьстьне». Ләма де у баве ԝи готьн: «Әԝ иди мәзьн ә, жь ԝи бьпьрсьн». Аԝа щара дӧда ԝана гази ԝи мәрьве кӧ кор бу кьрьн у готьне: «Бәр Хԝәде рʼаст бежә! Әм заньн кӧ Әԝ Мәрьва гӧнәкʼар ә». Әԝи ль ԝан вәгәрʼанд у гот: «Әз ньзаньм Әԝ гӧнәкʼар ә, йан на, ле әз тʼәне тьштәки заньм кӧ әз кор бум у ньһа дьбиньм». Диса жь ԝи пьрсин: «Әԝи чь тә кьр? Чʼәʼвед тә чаԝа вәкьрьн?» Әԝи ль ԝан вәгәрʼанд у гот: «Мьн һежа ԝәрʼа гот, ле ԝә гӧһдари нәкьр. Чьма һун дьхԝазьн диса бьбьһен? Дьбә кӧ һун жи дьхԝазьн бьбьнә шагьртед Ԝи?» Ԝана әԝ беһӧрмәт кьр у готьн: «Тӧ йи шагьрте Ԝи, ле әм шагьртед Муса нә! Әм заньн кӧ Хԝәде тʼәви Муса хәбәр дайә, ле бона Ви әм ньзаньн кӧ Әԝ жь кʼӧ йә!» Әви мәрьви ль ԝан вәгәрʼанд у гот: «Һәма әв ә әʼщеба гьран, кӧ һун ньзаньн Әԝ жь кʼӧ йә, ле Ԝи чʼәʼвед мьн вәкьрьн. Әм заньн кӧ Хԝәде дәнге гӧнәкʼара набьһе. Ле һәгәр мәрьвәк хԝәденас ә у хԝәстьна Ԝи дькә, Хԝәде дәнге ԝи дьбьһе. Һе бәреда тʼӧ щара ԛәт нәһатийә бьһистьне, кӧ йәки чʼәʼвед мәрьвәки зькмакийеда кор вәкьрьбьн. Һәгәр Әва Мәрьва жь Хԝәдеда нибуйа Ԝи нькарьбу тʼӧ тьшт бькьра». Щаба ԝи дан у готьн: «Тӧ сәрда-педа нав гӧнада дьне кʼәти йи у мә һин дьки?» У әԝ жь кʼьниште дәрхьстьнә дәр. Гава Иса бьһист кӧ әԝ дәрхьстьнә дәр, әԝ дит у жерʼа гот: «Тӧ баԝәрийа хԝә Кӧрʼе Мерьв тини?» Әԝи пьрси у готе: «Әз хӧлам, Әԝ Кʼи йә, ԝәки әз баԝәрийа хԝә Ԝи биньм?» Иса жерʼа гот: «Тә Әԝ дит у Әԝ ә Йе кӧ ньһа тʼәви тә хәбәр дьдә». Әԝи гот: «Хӧдан, әз баԝәр дькьм!» у бәр Ԝи та бу. Иса гот: «Әз бона диԝанкьрьне һатьмә ве дьнйайе, ԝәки йед кӧ набиньн бьбиньн у йед кӧ дьбиньн кор бьн». Һьнәкә жь ферьсийа ль ԝьр һазьр бун, гава әв йәк бьһистьн, жерʼа готьн: «Чьма әм жи кор ьн?» Иса готә ԝан: «Һәгәр һун кор буна, гӧнед ԝәйе тʼӧнәбуна. Ле ньһа һун кӧ дьбежьн: ‹Әм дьбиньн›, дьдьнә кʼьфше кӧ һун нава гӧнед хԝәда дьминьн. Әз рʼаст бе хельф ԝәрʼа дьбежьм, әԝе кӧ дерирʼа накʼәвә ахьле пез, ле щики дьнрʼа дькʼәве, әԝ дьз у ԛачах ә. Ле әԝе кӧ дерирʼа дькʼәве, әԝ шьване пез ә. Дәргәһван дәри ль бәр вәдькә, пәз дәнге ԝи дьбьһе у әԝ бь нава гази пәзед хԝә дькә у ԝан дәрдьхә дәрва. Гава әԝ пәзед хԝә гьшки дәрдьхә, пешийе дькʼәвә у пәз жи пәй ԝи дьчә, чьмки дәнге ԝи нас дькьн. Әԝ тʼӧ щар пәй йәки хәриб начьн, ле жь ԝи дьрʼәвьн, чьмки дәнге йе хәриб нас накьн». Иса әв мәсәлә ԝанрʼа гот, ле ԝан фәʼм нәкьр, кӧ Әԝ чь ԝанрʼа дьбежә. Аԝа Иса диса ԝанрʼа гот: «Әз рʼаст бе хельф ԝәрʼа дьбежьм, Әз ьм дәре пез. Әԝ һʼәмуйед кӧ бәри Мьн һатьнә дьз у ԛачах ьн, ле пез гӧһдарийа ԝан нәкьрийә. Әз ьм дәри. Йе кӧ бь дәсте Мьн бькʼәвә һьндӧрʼ, ԝе хьлаз бә. Әԝе бькʼәвә һьндӧрʼ, дәркʼәвә у чʼере бьбинә. Дьз тʼәне бона дьзийе, кӧштьне у ԛьрʼкьрьне те. Ле Әз һатьмә кӧ жийина ԝан һәбә, жийина сәр жийине. Әз ьм шьване ԛәнщ. Шьване ԛәнщ әʼмьре Хԝә бона пәзе Хԝә дьдә. Ле йе пʼигар, кӧ нә шьван ә у пәз жи нә йе ԝи йә, гава дьбинә гӧр те, әԝ пез дьһелә у дьрʼәвә. Гӧр жи дькʼәвә нава пез тʼурʼ-тʼурʼи дькә. Пʼигар дьрʼәвә, чьмки әԝ пʼигар ә у ль бәр пез накʼәвә. Әз ьм шьване ԛәнщ. Әз йед Хԝә нас дькьм у йед Мьн жи Мьн нас дькьн, чаԝа кӧ Бав Мьн нас дькә, Әз жи ӧса Ԝи нас дькьм у әʼмьре Хԝә бона пәзед Хԝә дьдьм. Пәзед Мьнә дьн жи һәнә, йед кӧ нә ви ахлида нә. Гәрәке Әз ԝана жи биньм у әԝе дәнге Мьн бьбьһен у бьбьнә кәрик бәр шьванәки. Бона ве йәке Бав Мьн һʼьз дькә, чьмки Әз әʼмьре Хԝә дьдьм, ԝәки Әз ԝе диса бьстиньм. Тʼӧ кәс ԝи әʼмьри жь Мьн настинә, ле Әз Хԝәха ԝи дьдьм. Һʼӧкӧме Мьн һәйә, Әз ԝи бьдьм у һʼӧкӧме Мьн һәйә диса ԝи бьстиньм. Мьн әв тʼәми жь Баве Хԝә стандийә». Бона ве хәбәрдане диса нава щьһуйада бу дӧтирәти. Жь ԝан гәләка дьгот: «Әва щьнакʼәти йә у дин ә. Чьма һун гӧһдарийа Ԝи дькьн?» Һьнәкед дьн жи дьготьн: «Әва хәбәрдана нә йа щьнакʼәтийа йә. Ԛәт щьн дькарьн чʼәʼвед кора вәкьн?» Һьнге ль Оршәлиме Щәжьна Пирозкьрьна Пʼарьстгәһе һат у зьвьстан бу. Иса ль пʼарьстгәһе һеԝангәһа Сьлеманда дьгәрʼийа. Щьһуйа ль дора Ԝи гьрт у же пьрсин: «Һʼәта кʼәнге Те мә шькеда бьһели? Һәгәр Тӧ йи Мәсиһ, мәрʼа ашкәрә бежә!» Иса ль ԝан вәгәрʼанд у гот: «Мьн ԝәрʼа гот, ле ԝә баԝәр нәкьр. Әԝ кьред кӧ Әз бь наве Баве Хԝә дькьм, әԝ бона Мьн шәʼдәтийе дьдьн, ле һун баԝәр накьн, чьмки һун нә жь пәзед Мьн ьн. Пәзед Мьн дәнге Мьн дьбьһен, Әз жи ԝан нас дькьм у әԝ пәй Мьн тен. Әз жийина һʼәта-һʼәтайе дьдьмә ԝан у әԝ тʼӧ щар ӧнда набьн у тʼӧ кәсе ԝан жь дәсте Мьн дәрнәхә. Әԝед кӧ Баве Мьн данә Мьн, сәр һәр тьштирʼа нә у тʼӧ кәс нькарә ԝан жь дәсте Баве Мьн дәрхә. Әз у Бав йәк ьн». Ль ԝьр щьһуйа диса кәвьр һьлдан, кӧ Ԝи бьдьнә бәр кәвьра. Иса ԝанрʼа гот: «Мьн жь Баве гәләк кьред ԛәнщ нишани ԝә кьрьн. Һун бона кʼижан кьри Мьн дьдьнә бәр кәвьра?» Щьһуйа ле вәгәрʼанд у готьне: «Әм бона кьред ԛәнщ Тә надьнә бәр кәвьра, ле чьмки Тӧ Хԝәде беһӧрмәт дьки! Тӧ мәрьв и, ле Хԝә дьки Хԝәде». Иса ль ԝан вәгәрʼанд у гот: «Нә Ԛануна ԝәда ньвисар ә, кӧ Хԝәде гот: ‹Һун Хԝәде нә›? Һәгәр Әԝ ԝан ‹Хԝәде› һʼәсаб дькә, кʼижанарʼа хәбәра Хԝәде һатийә дайине (у набә жи кӧ әԝ ньвисар бәтал бә), дә ижар һун Ԝирʼа чаԝа дьбежьн: ‹Тӧ Хԝәде беһӧрмәт дьки›, Йе кӧ Баве пироз кьр у шандә дьнйайе, чьмки Мьн гот: ‹Әз Кӧрʼе Хԝәде мә›. Һәгәр Әз кьред Баве Хԝә накьм, Мьн баԝәр нәкьн. Ле ԝәки дькьм, һәгәр һун Мьн баԝәр накьн жи, һәма ԝан кьред кӧ Әз дькьм баԝәр бькьн, ԝәки һун бьзаньбьн у фәʼм кьн, кӧ Бав нава Мьнда йә у Әз нава Ԝида мә». Һьнге диса хԝәстьн кӧ Ԝи бьгьрьн, ле Иса жь дәсте ԝан дәркʼәт. Иса диса дәрбази ԝи алийе чʼәме Урдӧне бу у ль ԝе дәре ма, ԝи щийе кӧ Йуһʼәнна пешда дьньхӧманд. Гәләк мәрьв дьһатьнә щәм Ԝи у нав хԝәда дьготьн: «Йуһʼәнна тʼӧ нишан нәкьр, ле чь тьштед кӧ Йуһʼәнна дәрһәԛа Ви мәрьвида готьнә, һʼәму рʼаст дәркʼәтьн». У ль ԝе дәре гәләка баԝәрийа хԝә Ԝи ани. Мәрьвәк һәбу наве ԝи Лазар, әԝ нәхԝәш кʼәт. Әԝ жь Бәйтанйайе бу, жь ԝи гӧнде Мәрйәме у хушка ԝе Мәртʼайе. Әва әԝ Мәрйәма бу, йа кӧ рʼуне бинхԝәш ль Хӧдан дабу у бь пʼорʼе хԝә ньгед Ԝи паԛьж кьрьбун, әԝ Лазаре бьре ԝе бу нәхԝәш. Аԝа һәр дӧ хушка Исарʼа щаб шандьн у готьн: «Хӧдан, ва әԝи кӧ Тӧ же һʼьз дьки нәхԝәш ә». Иса гава әв йәк бьһист, гот: «Әв нә нәхԝәшийа мьрьне йә, ле бона рʼумәта Хԝәде йә, ԝәки бь ԝе йәке рʼумәта Кӧрʼе Хԝәде бьльнд бә». Иса Мәртʼа, хушка ԝе у Лазаре бьре ԝан һʼьз дькьрьн. Ле гава Ԝи бьһист кӧ Лазар нәхԝәш ә, Әԝ дӧ рʼожед дьн жи ль ԝи щийи дәрәнги бу. Пәйрʼа Ԝи шагьртед Хԝәрʼа гот: «Ԝәрьн әм диса һәрʼьнә Щьһустане». Шагьрта жерʼа гот: «Дәрсдар, чәндәк пешда щьһуйа дькьр кӧ Тә бьдьнә бәр кәвьра, Тӧ диса дьчи ԝе дәре?» Иса ль ԝан вәгәрʼанд у гот: «Нә рʼож донздәһ сьһʼәт ә? Һәгәр йәк рʼоже бьгәрʼә әԝ налькʼӧмә, чьмки рʼонайа ве дьнйайе дьбинә. Ле һәгәр йәк шәве бьгәрʼә, әԝ дьлькʼӧмә, чьмки тʼәви ԝи рʼонайи тʼӧнә». Пәй ве хәбәрданерʼа Әԝи ԝанрʼа гот: «Пьсмаме мә Лазар хәԝрʼа чуйә, ле Әзе һәрʼьм кӧ ԝи һʼьшйар кьм». Шагьрта жерʼа гот: «Хӧдан, һәгәр әԝ рʼазайә, ԝе рʼабә сәр хԝә». Иса дәрһәԛа мьрьна ԝида дьгот, ле ԝан тʼьре кӧ Әԝ бона рʼазана ԝи дьбежә. Һьнге Иса ашкәрә ԝанрʼа гот: «Лазар мьр. У Әз ша мә кӧ нә ль ԝьра бум, чьмки әва йәка ԝе бона кʼара баԝәрийа ԝә бә. Ле диса ԝәрьн әм һәрʼьнә щәм ԝи». Һьнге Тʼумайе кӧ дьготьне «Һәвал-щеԝи», шагьртед һәвалед хԝәрʼа гот: «Әм жи һәрʼьн, кӧ тʼәви Ԝи бьмьрьн». Гава Иса чу, Ԝи дит кӧ иди әԝ чар рʼоже Лазар бу дәфьн кьрьбун. Бәйтанйа незики Оршәлиме бу, ԝәкә се километьра же дур бу. Гәләк щьһу һатьбунә сәрхԝәшийа Мәртʼа у Мәрйәме, бона мьрьна бьре ԝан. Гава Мәртʼайе бьһист кӧ Иса те, әԝ пешийа Ԝида чу, ле Мәрйәм малда ма. Мәртʼайе готә Иса: «Хӧдан, һәгәр Тӧ вьр буйайи, бьре мьн нәдьмьр. Ле ньһа жи әз заньм Тӧ чь жь Хԝәде бьхԝази, Әԝе бьдә Тә». Иса готә ԝе: «Бьре тәйе жь мьрьне рʼабә». Мәртʼайе ле вәгәрʼанд: «Әз заньм Рʼожа Ахрәте, Рʼожа Рʼабуне әԝе рʼабә». Иса готә ԝе: «Әз ьм рʼабун у жийин! Әԝе кӧ баԝәрийа хԝә Мьн бинә, һәгәр бьмьрә жи ԝе бьжи. У әԝе кӧ дьжи у баԝәрийа хԝә Мьн тинә, әԝ ԛәт намьрә. Тӧ ве йәке баԝәр дьки?» Мәртʼайе Ԝирʼа гот: «Бәле Хӧдан, әз баԝәр дькьм, кӧ Тӧ Мәсиһ и, Кӧрʼе Хԝәде, Йе кӧ ԝе бьһата дьнйайе». Пәй ве готьнерʼа, чу гази хушка хԝә Мәрйәме кьр у дьзива готе: «Дәрсдар һатийә у гази тә дькә». Гава кӧ ԝе бьһист, зу рʼабу чу. Иса һе нәкʼәтьбу гӧнд, ле ль ԝи щийи мабу, кʼидәре Мәртʼа рʼасти Ԝи һатьбу. Щьһуйед кӧ маледа тʼәви ԝе бун у ль бәр дьле ԝеда дьһатьн, гава дитьн кӧ Мәрйәм зу рʼабу дәркʼәтә дәрва, данә пәй ԝе чун. Ԝан тʼьре кӧ әԝ дьчә сәр тʼьрбе бьгьри. Гава Мәрйәм гьһиштә ԝи щийи кӧ Иса ле бу, Әԝ дит, хԝә авитә бәр ньга у готе: «Хӧдан, һәгәр Тӧ ль ве дәре буйайи, бьре мьн нәдьмьр». Гава кӧ Иса чʼәʼв гьрийе ԝе у гьрийе щьһуйед кӧ перʼа һатьбун кʼәт, кʼәсәра кʼур һате у дьле Ԝи ешийа. У жь ԝан пьрси: «Ԝә әԝ ль кʼӧ дәфьн кьрийә?» Ԝирʼа готьн: «Хӧдан, ԝәрә у бьбинә». Иса гьрийа. Һьнге щьһуйа гот: «Дина хԝә бьдьне, чьԛас же һʼьз дькьр!» Жь ԝан һьнәка жи гот: «Әви кӧ чʼәʼвед йе кор вәкьрьн, нькарьбу ӧса бькьра, кӧ әв мәрьва жи нәмьра?» Ль сәр ве йәке Иса диса кʼур кʼәсәр кʼьшанд у чу сәр тʼьрбе. Әԝ тʼьрб шкәфтәк бу у кәвьрәк бәр дәве ԝе бу. Иса гот: «Ви кәвьри ԝеда кьн». Хушка йе мьри, Мәртʼайе Ԝирʼа гот: «Хӧдан, иди ньһа бин кʼәтийе, иро чаре ԝи йә мьрийә». Иса готә ԝе: «Мьн тәрʼа нәгот, һәгәр тӧ баԝәр бьки, те рʼумәта Хԝәде бьбини?» Һьнге кәвьр ԝеда кьрьн. Иса сәре Хԝә бьльнд кьр у гот: «Баво, Әз зәʼф рʼази мә кӧ Тә дәнге Мьн бьһист. Әз заньм кӧ Тӧ һәр гав дәнге Мьн дьбьһейи, ле Мьн бона хатьре ве щьмәʼта сәкьни гот, ԝәки баԝәр бькьн кӧ Тә Әз шандьмә». Пәй ве готьнерʼа бь дәнгәки бьльнд кьрә гази: «Лазар, дәркʼәвә!» Йе мьри жи дәст у пʼийед ԝи бь кʼьтан кʼәфәнкьри у сәрчʼәʼве ԝи бь дәстмаләке ньхамти дәркʼәтә дәрва. Иса ԝанрʼа гот: «Ԝи вәкьн у бьһельн бьра һәрʼә». Һьнге гәләк щьһуйед кӧ һатьбунә щәм Мәрйәме, әв кьрьна Иса кӧ дитьн, баԝәрийа хԝә Ԝи анин. Ле жь ԝан һьнәк жи чунә щәм ферьсийа у әв кьрьна Иса ԝанрʼа готьн. У һьнге ферьси у сәрәкед кʼаһина щьвина гьрәгьра гиһандьнә һәв у готьн: «Әме чь бькьн? Әва мәрьва гәләк нишана дькә. Һәгәр әм Ԝи аһа бьһельн, һʼәму ԝе баԝәрийа хԝә Ԝи биньн у рʼомайи жи ԝе бен, щийе мәйи пироз ԝеран кьн у кʼока мьләте мә жи биньн». Йәки жь ԝан, Ԛәйафайе кӧ ԝе сале сәрәккʼаһин бу, ԝанрʼа гот: «Һун ԛәт тьштәки фәʼм накьн! Нә жи дьгьһижьнә гьлийа кӧ мәрʼа һе дәст дьдә мәрьвәк бьмьрә бона щьмәʼте, нә кӧ тʼәмамийа мьләт ӧнда бә». Әв йәка әԝи һʼәмде хԝә нәгот, ле чьмки әԝ сәрәккʼаһине ԝе сале бу, пʼехәмбәрти кьр, кӧ Исайе бәр мьләтва бьмьрә. У нә кӧ тʼәне бона мьләт, ле бона зарʼед Хԝәдейә бәлабуйи жи, кӧ ԝан бьщьвинә у бькә йәк. Аԝа иди пәй ԝе рʼожерʼа шеԝьра кӧштьна Иса кьрьн. Бона ве йәке Иса иди ашкәрә нава щьһуйада нәдьгәрʼийа, ле жь ԝьр чу бәрʼийе щики незики бажаре кӧ жерʼа Әфрайим дьготьн у тʼәви шагьртед Хԝә ль ԝе дәре ма. Щәжьна щьһуйайә Дәрбазбуне незик бу, гәләк мәрьвед жь дор-бәра бәри щәжьне һәвраз чунә Оршәлиме, ԝәки ль гора әʼдәт хԝә бьшон-вәшон. Һьнге әԝана ль ԝе дәре Иса дьгәрʼийан у пʼарьстгәһеда дьсәкьнин, жь һәвдӧ дьпьрсин: «Һун чь дьбежьн? Әԝе әʼсә нәйе ве щәжьне?» Ферьси у сәрәкед кʼаһина жи әʼмьр дәрхьстьбун, һәгәр кәсәк бьзаньбә Әԝ ль кʼӧ дәре йә, гәрәке гӧһе ԝан пе хьн, ԝәки әԝ Ԝи бьгьрьн. Шәш рʼож бәри Щәжьна Дәрбазбуне, Иса һатә Бәйтанйайе, ԝи щийе кӧ Лазар ле дьма, йе кӧ Иса әԝ жь нав мьрийа рʼакьрьбу. Ль ԝе дәре ԝана ԛәдьрәк жерʼа кьрьн. Мәртʼайе хьзмәткʼари дькьр, Лазар жи тʼәви Иса нава ԝанда ль сәр сьфре рʼуньшти бу. Һьнге Мәрйәме литьрәки рʼомайи бь рʼуне нардейи сафи у бьһа һьлда, сәр ньгед Исада кьр у пе пʼорʼе хԝә ньгед Ԝи зьһа кьрьн. Бина рʼуне нарде мал һьлда. Ле жь шагьртед Ԝи йәки, Щьһудайе Исхәрйоти, йе кӧ ԝе паше нәмамийа Ԝи бькьра гот: «Чьма әв рʼуне нарде сесьд зиви нәһатә фьротане, кӧ ль бәләнгаза бьһата бәлакьрьне?» Әԝи әв йәк дьгот, нә кӧ хәма ԝи бәләнгаз бун, ле чьмки әԝ дьз бу, кʼиське пʼәра щәм ԝи бу у чь кӧ дькʼәте, әԝи же дьчʼопанд. Һьнге Иса готә ԝи: «Жь ԝе кʼӧлфәте вәгәрʼә. Иди чьма ви рʼуни һʼәта рʼожа дәфьнкьрьна Мьн хԝәй кә? Фәԛире һәр гав тʼәви ԝә бьн, ле Әзе һәр гав тʼәви ԝә нибьм». Жь щьһуйа гәләка бьһист кӧ Иса ль ԝе дәре йә һатьн. Әԝ нә кӧ тʼәне бона Иса һатьн, ле ԝәки Лазаре кӧ жь нав мьрийа рʼакьрийә жи бьбиньн. Һьнге сәрәкед кʼаһина шеԝьрин кӧ Лазар жи бькӧжьн, чьмки рʼуйе ԝида гәләк щьһу дьчун баԝәрийа хԝә Иса данин. Рʼожа дьне әʼлаләтәкә гьран кӧ һатьбу щәжьне, гава бьһист кӧ Иса те Оршәлиме, ԝана чʼьԛьлед хӧрме һьлдан чунә пешийа Ԝи у кьрьнә ԛирʼин: «Һосанна! Бьмбарәк ә Әԝе кӧ бь наве Хӧдан те, Пʼадше Исраеле!» Иса щәʼшькәк дит у ле сийар бу, чаԝа ньвисар ә: «Нәтьрсә бажаре Сийоне. Ва йә Пʼадше тә те, ль щәʼшька кʼәре сийар буйи». Шагьртед Ԝи пешийе әва йәка фәʼм нәкьрьн, ле гава Иса кʼәтә рʼумәта Хԝә, һьнге һатә бира ԝан, кӧ әв йәк бона Ԝи һатьбу ньвисаре у бона Ԝи әва йәка кьрьн. Әԝ щьмәʼта кӧ һьнге тʼәви Ԝи бу, гава Ԝи Лазар жь мьрьне рʼакьр у әʼмьр кьр кӧ жь горʼе дәре, шәʼдәтийа ԝе йәке дьда. Бона ве йәке щьмәʼт пешийа Ԝида чу, чьмки ԝана бьһистьбу кӧ Әԝи әва нишана кьрийә. Ферьсийа жи һәврʼа гот: «Һун дьбиньн әва йәка жь ԛәԝата мә дәр ә. Ва тʼәмамийа дьнйайе пәй Ԝи чу!» Нав ԝанда чәнд йунан жи һәбун, кӧ бона һʼәбандьне щәжьнеда һәвраз чубунә Оршәлиме. Әвана һатьнә щәм Филипойе жь бажаре Бәйтсайда Щәлиле һиви же кьрьн у готьне: «Әм хӧлам, әм дьхԝазьн Иса бьбиньн». Филипо чу әва йәка Әндраԝьсрʼа гот, Әндраԝьс у Филипо жи чун Исарʼа готьн. Иса ль ԝан вәгәрʼанд у гот: «Әԝ сьһʼәта кӧ Кӧрʼе Мерьв ԝе бе рʼумәткьрьне перʼа гьһишт. Әз рʼаст бе хельф ԝәрʼа дьбежьм, һәгәр һʼәба геньм нәкʼәвә әʼрде у нәмьрә, әԝе тʼәне бьминә, ле һәгәр әԝ бьмьрә, ԝе гәләк бәр бьдә. Йе кӧ әʼмьре хԝә һʼьз дькә, әԝе ӧнда кә, ле әԝе кӧ ль ве дьнйайе дьжәнә әʼмьре хԝә, әԝ ԝи бона жийина һʼәта-һʼәтайе хԝәй дькә. Әԝе кӧ бьхԝазә Мьнрʼа хьзмәткʼарийе бькә, бьра пәй Мьн бе. Әз ль кʼӧ дәре бьм, хьзмәткʼаре Мьн жи ԝе ль ԝе дәре бә. Һәгәр йәк Мьнрʼа хьзмәткʼарийе дькә, Бав жи ԝе ԛәдьре ԝи бьгьрә. Ньһа агьр дьле Мьн кʼәтийә. Әз чь бежьм? Бежьм: ‹Баво, Мьн жь ве сьһʼәте хьлаз кә›? Нә Әз бона ве сьһʼәте һатьмә? Баво, наве Хԝә бьльнд кә». Һьнге дәнгәк жь әʼзмен һат: «Мьн бьльнд кьр у Әзе диса бьльнд кьм!» Әԝ әʼлаләта кӧ ль ԝьр сәкьнибу дьбьһист гот: «Гӧрʼинийа әʼзмен бу». Һьнәка жи дьгот: «Мьлйакʼәтәки тʼәви Ԝи хәбәр да». Иса щаб да у гот: «Әва дәнга бона Мьн нәһат, ле бона ԝә. Ньһа йә ԝәхте диԝана ве дьнйайе, ньһа сәрԝере ве дьнйайе ԝе бе авитьне дәрва. Гава Әз жь әʼрде бәрбь жор бемә һьлдане, Әзе һʼәмуйа бәрбь Хԝә бькʼьшиньм». Әԝи бь ве готьне дьда фәʼмкьрьне, кӧ Әԝе бь чь щурʼәйи бьмьрә. Һьнге әʼлаләте ле вәгәрʼанд у готе: «Мә жь Ԛануне бьһистийә кӧ Мәсиһе һʼәта-һʼәтайе бьминә. Иди Тӧ чаԝа дьбежи: ‹Гәрәке Кӧрʼе Мерьв бәрбь жор бе һьлдане›? Кʼи йә әԝ ‹Кӧрʼе Мерьв›?» Иса ԝанрʼа гот: «Һьнәк ԝәхт жи рʼонайи ԝе тʼәви ԝә бә. Һʼәта кӧ рʼонайи тʼәви ԝә йә, бьмәшьн, нәбә кӧ тәʼри сәр ԝәда бе. Әԝе кӧ тәʼрийеда дьмәшә, әԝ ньзанә кʼӧда дьчә. Һʼәта кӧ рʼонайи тʼәви ԝә йә, баԝәрийа хԝә рʼонайе биньн, ԝәки һун бьбьнә зарʼед рʼонайе». Гава Иса әв йәкана готьн чу у Хԝә жь бәр ԝан вәшарт. Сәр һаԛас нишанарʼа кӧ Ԝи ль бәр ԝан кьрьн, ле ԝана диса баԝәрийа хԝә ль Ԝи нәданин. Әв йәк аһа бу, ԝәки әԝ готьна Ишайа пʼехәмбәр бе сери: «Хӧдан, кʼе әԝ готьна кӧ мә гот баԝәр кьр? У зәнда Хӧдан кʼева әʼйан бу?» Бона ԝе йәке ԝана нькарьбу баԝәр бькьрана, чьмки Ишайа аһа жи готийә: «Хԝәде чʼәʼвед ԝан кор кьрьн у ава рʼәш ани сәр һʼьше ԝан, ԝәки бь чʼәʼва нәбиньн, бь һʼьша фәʼм нәкьн у вәнәгәрʼьн кӧ Әз ԝан ԛәнщ кьм». Ишайа аһа гот, чьмки ԝи рʼумәта Иса дит у ль сәр Ԝи хәбәр да. Ле бәле диса жи жь сәрԝера гәләка баԝәрийа хԝә Ԝи ани. Ле жь тьрса ферьсийа, ль хԝә мӧкӧрʼ нәдьһатьн, кӧ жь кʼьниште нәйенә дәрхьстьне. Ль ԝан һе хԝәш дьһат кӧ мәрьв пәсьне ԝан бьдьн, нә кӧ Хԝәде. Һьнге Иса бь дәнгәки бьльнд гот: «Әԝе кӧ баԝәрийа хԝә Мьн тинә, әԝ баԝәрийа хԝә Мьн найнә, ле Йе кӧ Әз шандьмә. У әԝе кӧ Мьн дьбинә, йе кӧ Әз шандьмә дьбинә. Әз чаԝа рʼонайидар һатьмә дьнйайе, ԝәки һәр кәсе кӧ баԝәрийа хԝә Мьн бинә, тәʼрийеда нәминә. Һәгәр йәк готьна Мьн бьбьһе у нәԛәдинә, Әз диԝана ԝи накьм. Әз нәһатьмә кӧ диԝана дьнйайе бькьм, ле ԝәки дьнйайе хьлаз кьм. Әԝе кӧ Мьн тʼәхсир дькә у готьнед Мьн ԛәбул накә, йәк һәйә кӧ ԝе диԝана ԝи бькә, аԝа готи әԝ готьна кӧ Мьн готийә, әԝе Рʼожа Ахрәте диԝана ԝи бькә. Чьмки Мьн хԝәсәрихԝә нәготьн, ле Баве кӧ Әз шандьмә, Әԝи тʼәми дайә Мьн кӧ Әз чь бежьм у чь хәбәр дьм. У Әз заньм кӧ тʼәмийа Ԝи жийина һʼәта-һʼәтайе йә. Аԝа чь кӧ Әз дьбежьм, чаԝа Баве готийә Мьн Әз ӧса дьбежьм». Бәри Щәжьна Дәрбазбуне, Иса заньбу кӧ сьһʼәта Ԝи перʼа гьһиштийә кӧ жь ве дьнйайе дәре у һәрʼә щәм Баве. Әԝи һʼәмуйед Хԝәйә кӧ ве дьнйайеда һʼьз кьрьбун, һʼәта дәрәща һәрә бьльнд жи әԝ һʼьз кьрьн. Ԝәхте шивхԝарьне, мирещьн ԛәлпе хьраб авитә дьле Щьһудайе кӧрʼе Шьмһʼуне Исхәрйоти, кӧ нәмамийа Иса бькә. Иса заньбу кӧ Баве һәр тьшт дайә дәсте Ԝи, Әԝ жь щәм Хԝәде һатийә у ԝе диса вәгәрʼә щәм Хԝәде. Һьнге Әԝ жь сәр шиве рʼабу, пʼоте Хԝә дани алики у пʼешгирәк һьлда ль пьшта Хԝә гьреда. Паше ав кьрә тʼәште у дәстпекьр ньгед шагьртед Хԝә шуштьн у бь пʼешгира гьредайи зьһа кьрьн. Гава дор гьһиштә Шьмһʼун-Пәтрус, әԝи готе: «Хӧдан, Те ньгед мьн бьшойи?» Иса ле вәгәрʼанд у готе: «Әз ньһа чь дькьм тӧ фәʼм наки, ле паше те фәʼм бьки». Пәтрус жерʼа гот: «Тʼӧ щар Те ньгед мьн нәшойи!» Иса ле вәгәрʼанд у готе: «Һәгәр Әз ньгед тә нәшом, пʼара тә ԝе тʼәви Мьн тʼӧнәбә». Шьмһʼун-Пәтрус Ԝирʼа гот: «Хӧдан, кӧ ӧса йә нә тʼәне ньгед мьн, ле дәст у сәре мьн жи бьшо!» Иса готе: «Әԝе кӧ һатийә шуштьне, пештьри ньга, ԝәки майин нә һʼәԝщә йә дәрәкә дьн бе шуштьне. Әԝ хԝәха тʼәмам-пева паԛьж ә. Һун паԛьж ьн, ле нә кӧ һʼәму». Чьмки Иса заньбу кʼи ԝе нәмамийа Ԝи бькә, бона ԝе йәке гот: «Һун һʼәму нә паԛьж ьн». Гава ньгед ԝан шуштьн, пʼоте Хԝә авитә сәр Хԝә у диса ль сәр сьфре рʼуньшт. Жь ԝан пьрси: «Гәло һун заньн кӧ Мьн бона ԝә чь кьр? Һун Мьн Дәрсдар у Хӧдан һʼәсаб дькьн, һун рʼаст дькьн, Әз һәма ӧса жи һәмә. Аԝа һәгәр Мьн бь ве Хӧдан у Дәрсдарийа Хԝәва ньгед ԝә шуштьн, гәрәке һун жи ньгед һәвдӧ бьшон. Мьн нәхшәк нишани ԝә кьр, ԝәки чаԝа Мьн бона ԝә кьр, һун жи ӧса бькьн. Әз рʼаст бе хельф ԝәрʼа дьбежьм, хӧлам жь ахайе хԝә нә мәстьр ә, нә жи йе кӧ һатийә шандьне жь йе кӧ әԝ шандийә мәстьр ә. Һәгәр һун ве йәке заньн, һуне хԝәзьли бьн һәгәр бьԛәдиньн. Әз бона ԝә һʼәмуйа набежьм, чьмки Әз заньм Мьн кʼижан бьжартьнә. Ле гәрәке ньвисар бе сери: ‹Йе кӧ нане Мьн хԝар пʼәһʼин авитә Мьн›. Әз ньһава, һе бәри ԛәԝьмандьне ван тьшта ԝәрʼа дьбежьм, ԝәки, гава бьԛәԝьмьн һун баԝәр бькьн, кӧ ӘЗ ӘԜ ЬМ. Әз рʼаст бе хельф ԝәрʼа дьбежьм, әԝе кӧ ԝи ԛәбул кә, кʼижани кӧ Әз дьшиньм, әԝ Мьн ԛәбул дькә у әԝе кӧ Мьн ԛәбул дькә, Йе кӧ Әз шандьмә ԛәбул дькә». Иса гава әва йәка гот, рʼӧһʼда гәләки ԛьлԛьли, Ԝи ашкәрә шәʼдәти да у гот: «Әз рʼаст бе хельф ԝәрʼа дьбежьм, йәки жь ԝә ԝе нәмамийа Мьн бькә». Шагьрта шашмайи ль һәвдӧ ньһерʼи, гәло әԝ бона кʼе дьбежә. Йәки жь шагьртед Ԝи, йе кӧ Иса же һʼьз дькьр, хԝә авитьбу һʼәмеза Иса. Шьмһʼун-Пәтрус ԝирʼа бь чʼәʼва дькьр кӧ бьпьрсә: «Кʼа Әԝ бона кʼе дьбежә». Әԝи жи хԝә да бәр синге Иса пьрси: «Хӧдан, әԝ кʼи йә?» Иса щаб да у гот: «Әԝ ә, йе кӧ Әз ви пәʼрийе нан хԝарьнеда кьм бьдьме». У пәʼрийе нан хԝарьнеда кьр, да Щьһудайе кӧрʼе Шьмһʼуне Исхәрйоти. Әԝи һәма чаԝа пәʼри жь дест гьрт, мирещьн кʼәтә нава ԝи. Иса ԝирʼа гот: «Те чь бьки зу бькә». Ле йед кӧ ль сәр сьфре рʼуньштьбун, тʼӧ кәси фәʼм нәкьр, кӧ Әԝи чьма ԝирʼа аһа гот. Кʼиське пʼәра кӧ щәм Щьһуда бу, ләма һьнәка тʼьре, кӧ Иса ԝирʼа дьбежә: «Тьштед кӧ щәжьнеда мәрʼа лазьм ьн бькʼьрʼә», йан жи «тьштәки бьдә бәләнгаза». Әԝи жи гава әԝ пәʼри һьлда, перʼа-перʼа дәркʼәтә дәрва. Иди шәв бу. Гава әԝ дәркʼәтә дәрва, Иса гот: «Ньһа Кӧрʼе Мерьв һатә рʼумәткьрьне у Хԝәде жи бь Ԝи һатә рʼумәткьрьне. Һәгәр Хԝәде пе Ԝи һатә рʼумәткьрьне, Хԝәде жи ԝе пе Хԝә Ԝи рʼумәт кә у зутьре ԝе Ԝи рʼумәт кә. Лаԝно! Әз гәләк ԝәхт тʼәви ԝә наминьм. Һуне ль Мьн бьгәрʼьн, ле ньһа Әз ԝәрʼа дьбежьм, чаԝа кӧ Мьн щьһуйарʼа жи гот, һун нькарьн бенә ԝи щийе кӧ Әз дьчьме. Әз тʼәмикә ну дьдьмә ԝә: Һәвдӧ һʼьз бькьн. Чаԝа кӧ Мьн һун һʼьз кьрьн, һун жи ӧса һәвдӧ һʼьз бькьн. Бь ве йәке һʼәмуйе заньбьн һун шагьртед Мьн ьн, һәгәр һун һәвдӧ һʼьз бькьн». Шьмһʼун-Пәтрус готә Ԝи: «Хӧдан, Те кʼӧда һәрʼи?» Иса ле вәгәрʼанд у готе: «Ԝи щийе кӧ Әз дьчьме, тӧ ньһа нькари пәй Мьн бейи, ле паше те пәй Мьн бейи». Пәтрус готә Ԝи: «Хӧдан, чьма әз ньһа нькарьм пәй Тә бем? Әзе әʼмьре хԝә жи бона Тә бьдьм». Иса ле вәгәрʼанд у готе: «Те әʼмьре хԝә бона Мьн бьди? Әз рʼаст бе хельф тәрʼа дьбежьм, һе бәри бангдана дик те се щара Мьн инкʼар ки. Бьра дьле ԝә нәԛьлԛьлә. Баԝәрийа хԝә Хԝәде биньн у баԝәрийа хԝә Мьн жи биньн. Мала Баве Мьнда гәләк щийед майине һәнә, Әз ньһа дьчьм ԝәрʼа щи һазьр кьм. Һәгәр ӧса нибуйа, Мьн ԝәрʼа нәдьгот? Гава Әз һәрʼьм у ԝәрʼа щи һазьр кьм, Әзе диса бем у ԝә бьбьмә щәм Хԝә, ԝәки Әз ль кʼӧ бьм, һун жи ль ԝе дәре бьн. Һун рʼийа ԝи щийе кӧ Әз дьчьме заньн». Тʼума жерʼа гот: «Хӧдан, әм ньзаньн Тӧ кʼӧда дьчи, әме чаԝа рʼе бьзаньбьн?» Иса ԝирʼа гот: «Әз ьм, рʼе, рʼасти у жийин. Тʼәне пе Мьн йәк дькарә бе щәм Баве. Һәгәр ԝә Әз нас кьрьмә, һуне Баве Мьн жи нас бькьн. Аԝа жь вьр шунда һун Ԝи нас дькьн у ԝә Әԝ дитийә». Филипо жерʼа гот: «Хӧдан, кʼа Баве нишани мә кә, бәси мә йә!» Иса жерʼа гот: «Филипо! Һаԛас ԝәхт Әз тʼәви ԝә мә у һе тӧ Мьн нас наки? Йе кӧ Әз дитьмә, Бав дитийә. Тӧ чаԝа дьбежи: ‹Баве нишани мә кә›? Тӧ баԝәр наки кӧ Әз нава Баведа мә у Бав нава Мьнда йә? Әв хәбәред кӧ Әз ԝәрʼа дьбежьм, нә кӧ хԝәсәрихԝә дьбежьм, ле әԝ Баве кӧ нава Мьнда дьминә, Әԝ ә кӧ йа Хԝә дькә. Мьн баԝәр бькьн, кӧ Әз нава Баведа мә у Бав жи нава Мьнда йә. Ле һәгәр на, һәма пе ван кьред Мьн баԝәр бькьн. Әз рʼаст бе хельф ԝәрʼа дьбежьм, әԝе кӧ баԝәрийа хԝә Мьн бинә, әԝ кьред кӧ Әз дькьм, әԝе хԝәха жи бькә. У жь ван кьра мәстьр жи ԝе бькә, чьмки Әз дьчьмә щәм Баве Хԝә. Пе наве Мьн һун чь бьхԝазьн, Әзе бькьм, ԝәки Бав пе Кӧрʼ бе рʼумәткьрьне. Һәгәр һун пе наве Мьн тьштәки бьхԝазьн Әзе бькьм. Һәгәр һун Мьн һʼьз дькьн, һуне тʼәмийед Мьн хԝәй кьн. Әзе жи жь Баве һиви кьм у Әԝе Пьштованәки дьн бьдә ԝә, ԝәки һʼәта-һʼәтайе тʼәви ԝә бьминә. Әԝ ә әԝ Рʼӧһʼе кӧ рʼастийе әʼлам дькә у дьнйа нькарә Ԝи ԛәбул кә, чьмки нә Ԝи дьбинә у нә жи Ԝи нас дькә. Ле һун Ԝи нас дькьн, чьмки Әԝ тʼәви ԝә дьминә у ԝе нава ԝәда бә. Әз ԝә сеԝи наһельм, Әзе диса сәр ԝәда бем. Һьнәки шунда иди дьнйайе Мьн нәбинә, ле һуне Мьн бьбиньн. Чьмки Әз дьжим, һуне жи бьжин. Ԝе рʼоже һуне бьзаньбьн кӧ Әз нава Баве Хԝәда мә, һун нава Мьнда нә у Әз жи нава ԝәда мә. Әԝе кӧ тʼәмийед Мьн ԛәбул дькә у ԝан хԝәй дькә, әԝ ә йе кӧ Мьн һʼьз дькә. У әԝе кӧ Мьн һʼьз дькә, әԝе жь алийе Баве Мьнда бе һʼьзкьрьне. Әзе жи ԝи һʼьз бькьм у Хԝә ԝива әʼйан кьм». Щьһуда, нә йе Исхәрйоти готә Ԝи: «Хӧдан, әԝе чаԝа бә, кӧ Те Хԝә мәва әʼйан ки, ле дьнйайева на?» Иса ле вәгәрʼанд у готе: «Һәр кәсе кӧ Мьн һʼьз бькә, ԝе готьна Мьн хԝәй кә, Баве Мьне жи ԝи һʼьз бькә у Әме бенә щәм ԝи, тʼәви ԝи бьминьн. Әԝе кӧ Мьн һʼьз накә, әԝ готьнед Мьн хԝәй накә. Әве готьна кӧ һун дьбьһен нә йа Мьн ә, ле йа Баве Мьн ә, кӧ Әз шандьмә. Һәла һе кӧ Әз ль щәм ԝә мә, Мьн әв йәкана ԝәрʼа готьн. Ле Пьштован, аԝа готи Рʼӧһʼе Пироз, кӧ Бав ԝе бь наве Мьн бьшинә, Әԝе ԝә һини һʼәму тьшти кә у һәр тьштед кӧ Мьн ԝәрʼа готьнә, ԝе бинә бира ԝә. Әз әʼдьлайийе ԝәрʼа дьһельм, ԝе әʼдьлайийа Хԝә дьдьмә ԝә. Әз ӧса надьм чаԝа кӧ дьнйа дьдә ԝә. Бьра дьле ԝә нәԛьлԛьлә у нәтьрсьн! Ԝә бьһист кӧ Мьн ԝәрʼа гот: ‹Әзе һәрʼьм, ле диса сәр ԝәда бем!› Һәгәр ԝә Әз һʼьз бькьрама, һуне ша бьбуна кӧ Әз дьчьмә щәм Баве, чьмки Бав сәр Мьнрʼа йә. У ньһа әв йәкана Мьн бәри ԛәԝьмандьне ԝәрʼа готьн, ԝәки гава әԝ йәк бьԛәԝьмьн, һун баԝәр бькьн. Иди Әзе тʼәви ԝә гәләки хәбәр нәдьм, чьмки ва йә сәрԝере ве дьнйайе те. Һʼӧкӧме ԝи ԛәт сәр Мьн тʼӧнә, ле бьра дьнйа бьзаньбә ԝәки Әз Баве һʼьз дькьм у Баве чаԝа тʼәми ль Мьн кьрийә Әз ӧса дькьм. Рʼабьн, әм жь вьр һәрʼьн. Әз ьм кʼола тьрийейә рʼаст, Баве Мьн жи рʼәзван ә. Һәр чʼьԛьле Мьнва кӧ бәр надә әԝ дьбьрʼә. Ле әԝ чʼьԛьле кӧ бәр дьдә жь чьрпийа паԛьж дькә, ԝәки һе гәләки бәр бьдә. Һун иди паԛьж ьн бь ԝе готьне йа кӧ Мьн ԝәрʼа готийә. Нав Мьнда бьминьн, Әз жи нав ԝәда. Чаԝа чʼьԛьл хԝәха нькарә бәр бьдә, һәгәр кʼолева нәминә, ӧса жи һун нькарьн, һәгәр Мьнва нәминьн. Әз ьм кʼола тьрийе, һун жи чʼьԛьл ьн. Әԝе кӧ Мьнва дьминә у Әз жи ԝива дьминьм, әԝе гәләки бәр бьдә. Чьмки бейи Мьн һун нькарьн тʼӧ тьшти бькьн. Һәгәр йәк Мьнва нәминә, әԝ мина чʼьԛьләки ԝеда авити йә, кӧ һʼьшк дьбә. У тʼоп дькьн давежьнә нава егьр дьшәԝьтиньн. Һәгәр һун нава Мьнда бьминьн у готьнед Мьн жи нава ԝәда бьминьн, һун чь дьхԝазьн бьхԝазьн, ԝе ԝәрʼа бе дайине. Бь ве йәке Баве Мьне бе рʼумәткьрьне, гава һун пе гәләк бәрдайине бьдьнә кʼьфше, кӧ һун бунә шагьртед Мьн. Бав чаԝа Мьн һʼьз дькә, Әз жи ӧса ԝә һʼьз дькьм. Һʼьзкьрьна Мьнда бьминьн. Һәгәр һун тʼәмийед Мьн хԝәй кьн, һуне һʼьзкьрьна Мьнда бьминьн, чаԝа кӧ Мьн тʼәмийед Баве Хԝә хԝәй кьрьн у һʼьзкьрьна Ԝида дьминьм. Мьн әв йәкана ԝәрʼа готьн, ԝәки шабуна Мьн нава ԝәда бьминә у шабуна ԝә тʼәмам бә. Әв ә тʼәмийа Мьн: Һәвдӧ һʼьз бькьн, чаԝа кӧ Мьн һун һʼьз кьрьн. Тʼӧ һʼьзкьрьн сәр ԝе һʼьзкьрьнерʼа тʼӧнә, кӧ йәк әʼмьре хԝә бәр достед хԝәва бьдә. Һун достед Мьн ьн, һәгәр һун ԝан тʼәмийед кӧ Әз дьдьмә ԝә хԝәй дькьн. Жь вьр шунда Әз ԝә ‹хӧлам› һʼәсаб накьм, чьмки хӧлам һаш пе тʼӧнә кӧ ахайе ԝи чь дькә. Мьн һун дост һʼәсаб кьрьн, чьмки һәр тьштед кӧ Мьн жь Баве Хԝә бьһистьн ԝәва данә әʼйанкьрьне. Нә кӧ ԝә Әз бьжартьм, ле Мьн һун бьжартьн у кʼьфш кьрьн, ԝәки һун һәрʼьн бәр бьдьн у бәре ԝә бьминә. Һьнге һун чь кӧ пе наве Мьн жь Баве бьхԝазьн, Әԝе бьдә ԝә. Әз тʼәмийа ве йәке дьдьм, кӧ һун һәвдӧ һʼьз бькьн. Һәгәр дьнйа бьжәнә ԝә, бьзаньбьн кӧ бәри ԝә жәнийайә Мьн. Һәгәр һун пʼара дьнйайе буна, дьнйайе йед хԝә һʼьз бькьра. Ле Мьн һун жь дьнйайе бьжартьнә, һун нә пʼара дьнйайе нә, ләма дьнйа дьжәнә ԝә. Ԝе хәбәра кӧ Мьн ԝәрʼа готийә биньнә бира хԝә, кӧ: ‹Хӧлам нә сәр ахайе хԝәрʼа йә›. Һәгәр Әз зерандьмә, ԝе ԝә жи бьзериньн. Һәгәр готьна Мьн хԝәй кьрьнә, ԝе готьна ԝә жи хԝәй кьн. Ле ван һʼәму тьшта бона наве Мьн ԝе биньнә сәре ԝә, чьмки Ԝи нас накьн, Йе кӧ Әз шандьмә. Һәгәр Әз нәһатама у Мьн ԝанрʼа хәбәр нәда, гӧнед ԝане тʼӧнәбуна. Ле әԝ ньһа нькарьн щаба гӧнед хԝә бьдьн. Әԝе кӧ дьжәнә Мьн, әԝ дьжәнә Баве Мьн жи. Һәгәр Мьн нав ԝанда нәкьрана, әԝ кьред кӧ тʼӧ кәси нәкьрьнә, гӧнед ԝане тʼӧнәбуна. Ле ньһа дитьн, һьн жәнийанә Мьн, һьн жи Баве Мьн. Ле бәле әв йәк бу, ԝәки әԝ готьна кӧ Ԛануна ԝанда һатийә ньвисаре бе сери: ‹Щики бадиһәԝа жәнийанә Мьн›. Гава әԝ Пьштован бе, кʼижани Әзе жь Баве ԝәрʼа бьшиньм, әԝ Рʼӧһʼе кӧ ԝе рʼастийе ԝәрʼа гьли кә, Йе кӧ жь Баве дәрте, һьнге Әԝе бона Мьн шәʼдәтийе бьдә. Һуне жи шәʼдәтийе бьдьн, чьмки сәре серида һун тʼәви Мьн бунә. Мьн әв йәкана ԝәрʼа готьн, ԝәки һун пʼьшк нәбьн. Әԝе ԝә жь кʼьништа дәрхьнә дәрва. Ԝәхте жи бе, ԝәки кʼи кӧ ԝә бькӧжә жи, ԝе бьфькьрә йанчийә әԝ Хԝәдерʼа ԛӧльх дькә. Ԝе ван тьшта бькьн, чьмки ԝана нә Бав нас кьр у нә жи Әз нас кьрьм. Ле бәле Мьн әв йәкана ԝәрʼа готьн, ԝәки гава әԝ ԝәхт бе, һун биньнә бира хԝә кӧ Мьн әв йәкана ԝәрʼа готьнә. Мьн сәре серида әв тьшт ԝәрʼа нәготьн, чьмки Әз тʼәви ԝә бум. Ле ньһа Әз дьчьмә щәм Йе кӧ Әз шандьмә у жь ԝә тʼӧ кәс жь Мьн напьрсә: ‹Те кʼӧда һәрʼи?› Мьн кӧ әв йәкана ԝәрʼа готьн, ләма дьле ԝә кʼәсәрева тʼьжи буйә. Ле бәле Әз рʼастийе ԝәрʼа дьбежьм, бона ԝә һе рʼьнд ә кӧ Әз һәрʼьм. Һәгәр Әз нәчьм, Пьштован ԝе нәйе щәм ԝә, ле һәгәр Әз һәрʼьм, Әзе Ԝи бьшиньмә щәм ԝә. Гава Әԝ бе, Әԝе гӧнед мәрьвед дьне бьдә рʼуйе ԝан, һәԛи-нәһәԛийе ль бәр ԝан вәкә у диԝана Хԝәде ԝанва әʼйан кә. Бона гӧна ԝе әʼйан кә, чьмки әԝана баԝәрийа хԝә Мьн найньн. Бона һәԛи-нәһәԛийе ԝе әʼйан кә, чьмки Әз дьчьмә щәм Баве Хԝә у иди һуне Мьн нәбиньн. Бона диԝана Хԝәде ԝе әʼйан кә, чьмки диԝана сәрԝере ве дьнйайе буйә. Һе гәләк тьшт һәнә кӧ Әз ԝәрʼа бежьм, ле ньһа һун нькарьн ԝан бьбьн. Ле гава әԝ Рʼӧһʼе Рʼастийе бе, Әԝе ԝә бәрбь тʼәмамийа рʼастийе бьбә. Чьмки Әԝе нә кӧ хԝәсәрихԝә хәбәр дә, ле чь кӧ бьбьһе, Әԝе ԝе йәке бежә у тьштед кӧ һе нәԛәԝьминә ԝе ԝәрʼа гьли кә. Әԝе рʼумәта наве Мьн бьльнд кә, чьмки Әԝе жь Мьн бьстинә у ԝәрʼа гьли кә. Һәр тьштед Баве кӧ һәнә әԝ йед Мьн ьн. Ләма Мьн гот, кӧ Рʼӧһʼе жь Мьн бьстинә у ԝәрʼа гьли кә. Һьнәки шунда һуне Мьн нәбиньн у диса һьнәки шунда һуне Мьн бьбиньн». Һьнге шагьртед Ԝи һьнәка һәвдӧрʼа готьн: «Әва чь готьн ә кӧ Әԝ мәрʼа дьбежә? ‹Һьнәки шунда һуне Мьн нәбиньн› у диса ‹һьнәки шунда һуне Мьн бьбиньн›. Дьбежә жи: ‹Чьмки Әз дьчьмә щәм Баве Хԝә›?» У ԝана дьгот: «Әв ‹һьнәк ԝәхт› кӧ дьбежә, әԝ чь йә? Әм фәʼм накьн кӧ Әԝ чь дьхԝазә бежә». Иса заньбу кӧ әԝ дьхԝазьн же бьпьрсьн, һьнге ԝанрʼа гот: «Һун бона ве готьна Мьн жь һәв дьпьрсьн, кӧ Мьн гот: ‹Һьнәки шунда һуне Мьн нәбиньн› у диса ‹һьнәки шунда һуне Мьн бьбиньн›? Әз рʼаст бе хельф ԝәрʼа дьбежьм, һуне шин у гьри бьн, ле дьнйайе ша бә, һуне бәр хԝә кʼәвьн, ле бәрхԝәкʼәтьна ԝәйе бьбә шабун. Гава жьнәк дькʼәвә бәр зарʼе, щәфе дькʼьшинә, чьмки сьһʼәта ԝе перʼа гьһиштийә. Ле гава зарʼ жерʼа дьбә, иди щәфа найе бире жь дәст ԝе шабуне, кӧ мәрик һатә дьне. Рʼаст ә һун жи ньһа бәр хԝә дькʼәвьн, ле Әзе ԝә диса бьбиньм у дьле ԝәйе бь әшԛ у шабунева тʼьжи бә у тʼӧ кәсе ԝе шабуне жь ԝә нәстинә. Әԝе рʼоже һуне жь Мьн тʼӧ тьшти нәпьрсьн. Әз рʼаст бе хельф ԝәрʼа дьбежьм, кӧ һун пе наве Мьн чь жь Баве бьхԝазьн, Әԝе бьдә ԝә. Һʼәта ньһа ԝә пе наве Мьн тʼӧ тьшт нәхԝәстийә. Бьхԝазьн, һуне бьстиньн, ӧса ԝәки шабуна ԝә тʼәмам бә. Мьн әв йәкана ԝәрʼа бь мәсәла готьн. Ԝәхте бе Әзе иди бь мәсәла ԝәрʼа хәбәр нәдьм, ле ашкәрә дәрһәԛа Баведа ԝәрʼа бежьм. Ԝе рʼоже һуне пе наве Мьн бьхԝазьн. Әз ԝәрʼа набежьм кӧ Әзе бона ԝә һиви жь Баве бькьм. Бав Хԝәха ԝә һʼьз дькә, чьмки ԝә Әз һʼьз кьрьмә у баԝәр кьрийә кӧ Әз жь щәм Хԝәде һатьмә. Әз жь Баве ԛәтийам у һатьмә дьнйайе. Диса Әз дьнйайе дьһельм у дьчьмә щәм Баве». Шагьртед Ԝи готьне: «Ва йә Тӧ ньһа ашкәрә хәбәр дьди, нә кӧ пе мәсәла. Ньһа әм фәʼм дькьн, кӧ Тӧ һәр тьшти зани у нә һʼәԝщә йә кӧ жь Тә бьпьрсьн, Тӧ пешда щабе дьди. Бона ве йәке әм баԝәр дькьн, кӧ Тӧ жь щәм Хԝәде һатийи». Иса ԝанрʼа гот: «Ньһа һун баԝәр дькьн? Ва ԝәхте бе у һатийә жи, кӧ һуне бәла-бәлайи бьн, һәр кәсе һәрʼә щийе хԝә у Мьн тʼәне бьһелә. Ле Әз нә тʼәне мә, чьмки Бав тʼәви Мьн ә. Мьн әв йәкана ԝәрʼа готьн, ԝәки пе Мьн һун хԝәйе әʼдьлайийе бьн. Һуне дьнйайеда тәнгасийе бьбиньн, ле мерхас бьн! Мьн дьнйа кьрә бьндәсте Хԝә». Чахе Иса әв йәкана готьн, бәре Хԝә әʼзменда кьр у гот: «Баво, ԝәхт перʼа гьһиштийә. Кӧрʼе Хԝә рʼумәт кә, ԝәки Кӧрʼ жи Тә рʼумәт кә. Тә һʼӧкӧме ль сәр тʼәмамийа мәрьвайе да Ԝи, ԝәки жийина һʼәта-һʼәтайе бьдә һʼәмуйед кӧ Тә данә Ԝи. Әв ә жийина һʼәта-һʼәтайе, ԝәки әԝ Тә нас кьн, чаԝа Хԝәдейе рʼасти бешьрики-беһәвал у ӧса жи Иса Мәсиһе кӧ Тә шандийә. Мьн Тӧ ль сәр рʼуйе әʼрде рʼумәт кьри, әԝ шьхӧле Тә дабу Мьн кӧ Әз бькьм Мьн ани сери. Баво, бь ԝе рʼумәта Мьнә кӧ һе бәри әʼфьрандьна дьнйайе ль щәм Тә һәбу ньһа Мьн рʼумәт кә ль бәр Хԝә. Мьн Тӧ ԝан мәрьвава әʼйан кьри, йед кӧ Тә жь дьнйайе данә Мьн. Әԝ йед Тә бун, Тә әԝ данә Мьн у ԝана готьна Тә хԝәй кьр. Ньһа әԝ иди заньн һәр тьштед кӧ Тә данә Мьн әԝ жь Тә нә. Әԝ хәбәред кӧ Тә данә Мьн, Мьн жи данә ԝан у ԝана әԝ ԛәбул кьр, әԝе рʼастийе пе һʼәсийан, кӧ Әз жь Тә һатьмә у баԝәр кьрьн кӧ Тә Әз шандьмә. Әз бона ԝан һиви дькьм. Нә кӧ бона дьнйайе һиви дькьм, ле бона йед кӧ Тә данә Мьн, чьмки әԝ йед Тә нә. Чь кӧ йед Мьн ьн, әԝ йед Тә нә, чь кӧ йед Тә нә, әԝ йед Мьн ьн. У Әз бь ԝан рʼумәткьри мә. Ньһа Әз темә щәм Тә, Әз иди нә дьнйайеда мә, ле әԝана дьнйайеда нә. Йа Баве Пироз! Пе ԝи наве Хԝәйи кӧ Тә дайә Мьн ван хԝәй кә, ԝәки бьбьн йәк, чаԝа Әз у Тӧ йәк ьн. Гава Әз тʼәви ԝан бум, Мьн әԝ пе наве Тә хԝәй дькьрьн, пе ԝи наве кӧ Тә дайә Мьн, Мьн хԝәйити ль ԝан кьр. Жь ԝана тʼӧ кәс ӧнда нәбу, пештьри йе мьрьнерʼа дайи, ԝәки ньвисар бе сери. Ле ньһа Әз темә щәм Тә у ван йәка дьнйайеда дьбежьм, ԝәки шабуна Мьн дьле ԝанда тʼәмам бә. Мьн хәбәра Тә гиһандә ԝан у дьнйа жәнийа ԝан, чьмки әԝ нә жь дьнйайе нә, чаԝа кӧ Әз нә жь дьнйайе мә. Әз һиви накьм кӧ Тӧ ԝана жь дьнйайе һьлди, ле ԝәки Тӧ ԝан жь йе Хьраб хԝәй ки. Әԝ нә жь дьнйайе нә, чаԝа кӧ Әз нә жь дьнйайе мә. Ԝан бь рʼастийа Хԝә бӧһӧрти-жьбарә кә. Хәбәра Тә рʼасти йә. Чаԝа кӧ Тә Әз шандьмә дьнйайе, Мьн жи әԝ шандьнә дьнйайе. Бона ԝан Әз Хԝә бӧһӧрти-жьбарә дькьм, ԝәки әԝ жи бь рʼастийе бӧһӧрти-жьбарә бьн. Әз нә тʼәне бона ԝан һиви дькьм, ле бона ԝан жи, йед кӧ бь готьна ԝан ԝе баԝәрийа хԝә Мьн биньн, ԝәки һʼәму жи бьбьнә йәк. Баво, чаԝа Тӧ нава Мьнда йи у Әз нава Тәда мә, ӧса жи бьра әԝ нава Мәда бьн, бь ви аԝайи дьнйайе баԝәр бькә, кӧ Тә Әз шандьмә. Әԝ рʼумәта кӧ Тә да Мьн, Мьн да ԝан, ԝәки әԝ бьбьн йәк, чаԝа Әз у Тӧ йәк ьн: Әз нава ԝанда, Тӧ жи нава Мьнда, ԝәки әԝ тʼьфаԛеда лап гьһишти бьн у дьнйа бьзаньбә кӧ Тә Әз шандьм у ӧса ԝан һʼьз дьки, чаԝа Мьн һʼьз дьки. Йа Баво, Әз дьхԝазьм ԝәки йед кӧ Тә данә Мьн, Әз ль кʼӧ бьм, әԝ жи тʼәви Мьн бьн, ԝәки әԝ рʼумәта кӧ Тә дайә Мьн бьбиньн, чьмки һе бәри әʼфьрандьна дьнйайе Тә Әз һʼьз кьрьмә. Йа Баве рʼаст! Дьнйа Тә нас накә, ле Әз Тә нас дькьм у әвана жи заньн ԝәки Тә Әз шандьмә. Мьн Тӧ ԝанва дайи әʼйанкьрьне у Әзе һе бьдьмә әʼйанкьрьне, ԝәки әԝ һʼьзкьрьна кӧ Тә Әз пе һʼьз кьрьмә нава ԝанда бә у Әз жи нава ԝанда бьм». Пәй ве хәбәрданерʼа Иса тʼәви шагьртед Хԝә дәрбази ԝи алийе нәԝала Ԛьдроне бу. Ль ԝе дәре бахчәк һәбу, Иса шагьртед Хԝәва кʼәтьне. Щьһуда жи йе кӧ ԝе нәмамийа Ԝи бькьра әԝ щи заньбу, чьмки Иса у шагьртед Хԝәва гәләк щара ль ԝе дәре дьщьвийан. Аԝа Щьһуда кʼомәкә әскәра у нобәдара хԝәрʼа жь алийе ферьси у сәрәкед кʼаһинада һьлдабу, бь фәнәра, агьр у чʼәка һатә ԝи щийи. Иса һәр тьшт заньбу кӧ ԝе чь бе сәре Ԝи, пешда чу у ԝанрʼа гот: «Һун ль кʼе дьгәрʼьн?» Ԝана ле вәгәрʼанд у готьне: «Ль Исайе Ньсрәте!» Иса готә ԝан: «ӘЗ ЬМ». Щьһудайе кӧ нәмамийа Ԝи кьрьбу жи тʼәви ԝан бу. Гава гот кӧ: «ӘЗ ЬМ!» сәр пьште чун у кʼәтьнә әʼрде. Һьнге Иса диса жь ԝан пьрси: «Һун ль кʼе дьгәрʼьн?» Ԝан гот: «Исайе Ньсрәте». Иса ль ԝан вәгәрʼанд у гот: «Мьн ԝәрʼа гот, кӧ Әз ьм. Аԝа һәгәр һун ль Мьн дьгәрʼьн, бьһельн бьра әвана һәрʼьн». Әв йәк бу ԝәки әԝ хәбәра ԝийә кӧ бәре готьбу рʼаст дәре: «Әԝед кӧ Тә данә Мьн, Мьн жь ԝан тʼӧ кәс ӧнда нәкьр». Һьнге Шьмһʼун-Пәтрус әԝ шуре кӧ перʼа бу кʼьшанд у авитә хӧламе сәрәккʼаһин у гӧһе ԝийи рʼасте пәканд. Наве ԝи хӧлами Малхо бу. Иса Пәтрусрʼа гот: «Шур текә ԛаве! Әзе чаԝа ԝе кʼаса кӧ Баве дайә Мьн вәнәхԝьм?» Пәй ве йәкерʼа кʼома әскәра у сәрдаре ԝан у нобәдаред щьһуйа Иса гьртьн у гьредан. Пешийе Әԝ бьрьнә щәм Һәнане хәзуре Ԛәйафа. Ԛәйафа сәрәккʼаһине ԝе сале бу. Әва әԝ Ԛәйафа бу, йе кӧ щьһу ширәт кьрьбун у готьбу: «Һе рʼьнд ә, бьра йәк бона щьмәʼте бьмьрә». Шьмһʼун-Пәтрус у шагьртәки дьн пәй Иса дьчун. Әԝ шагьрт кӧ насе сәрәккʼаһин бу, тʼәви Иса кʼәтә һʼәԝша сәрәккʼаһин, ле Пәтрус дәрва ль бәр дери сәкьни. Паше әԝ шагьрте насе сәрәккʼаһин дәркʼәт у тʼәви дәргәһване хәбәр да, Пәтрус бьрә һьндӧрʼ. Һьнге ԝе щарийа дәргәһван жь Пәтрус пьрси: «Дьбә кӧ тӧ жи жь шагьртед Ви мәрьви йи?» Пәтрус готе: «На, әз ниньм». Ԝи чахи, һәԝа кӧ сар бу, хӧлам у нобәдара пе кʼомьре агьр вехьстьбун, сәкьнибун у хԝә гәрм дькьрьн. Пәтрус жи ль щәм ԝан сәкьнибу, хԝә гәрм дькьр. Һьнге сәрәккʼаһин жь Иса дәрһәԛа шагьртед Ԝи у һинкьрьна Ԝида пьрси. Иса щаб да у гот: «Мьн дьнйайерʼа ашкәрә хәбәр дайә, һәр гав кʼьништада ӧса жи пʼарьстгәһеда, кʼидәре кӧ һʼәму щьһу дьщьвийан һин дькьрьн. Мьн тʼӧ тьшт дьзива нәготийә. Тӧ чьма жь Мьн дьпьрси? Жь йед кӧ бьһистьнә бьпьрсә, кʼа Мьн ԝанрʼа чь готийә. Әԝ заньн Мьн чь готийә». Гава Иса әв йәк гот, нобәдарәки ль ԝьр сәкьни шәмаԛәк ль Ԝи хьст у гот: «Тӧ чаԝа щаба сәрәккʼаһин дьди?» Иса ле вәгәрʼанд у готе: «Һәгәр Мьн хьраб хәбәр да, хьрабийа Мьн бежә. Ле һәгәр Әз рʼаст дьбежьм, тӧ чьма Мьн дьхи?» Һьнге Һәнан Әԝ гьредайи шандә щәм Ԛәйафайе сәрәккʼаһин. Шьмһʼун-Пәтрус һе ль ԝьр сәкьни хԝә гәрм дькьр. Жь ԝи пьрсин: «Дьбә кӧ тӧ жи жь шагьртед Ԝи йи?» Әԝи инкʼар кьр у гот: «На, әз ниньм». Хӧламәки сәрәккʼаһин, жь хԝәхатийа ԝи, йе кӧ Пәтрус гӧһе ԝи пәкандьбу, же пьрси: «Нә бахчәда мьн тӧ тʼәви Ԝи дити?» Һьнге Пәтрус диса инкʼар кьр у ԝе дәме дик банг да. Ԝи чахи Иса жь щәм Ԛәйафа бьрьнә ԛәсьра ԝәли. Сәре сьбәһе зу бу у щьһу нәкʼәтьнә ԛәсьре, ԝәки хԝә ль гора әʼдәтед шуштьн-вәшуштьне нәһʼәрʼьминьн, кӧ бькарьбьн хԝарьна Щәжьна Дәрбазбуне бьхԝьн. Һьнге Пилато дәркʼәтә дәрва, һатә щәм ԝан у пьрси: «Һун Ви мәрьви чьда нәһәԛ дькьн?» Ԝана ле вәгәрʼанд у готьне: «Һәгәр Әԝ нә йәки зӧлмкʼар буйа, мә Әԝ нәдьда дәсте тә». Һьнге Пилато ԝанрʼа гот: «Һане һун хԝәха Ви бьбьн у ль анәгори ԛануна хԝә диԝана Ԝи бькьн». Щьһуйа ле вәгәрʼанд у готьне: «Изьна мә тʼӧнә кӧ әм тʼӧ кәси бькӧжьн». Әв йәка бу, кӧ әԝ готьна Иса бе сери, кӧ дабу фәʼмкьрьне, Әԝе чаԝа бьмьрә. Һьнге Пилато диса кʼәтә ԛәсьра ԝәли, гази Иса кьр у же пьрси: «Тӧ йи Пʼадше щьһуйа?» Иса ле вәгәрʼанд у готе: «Тӧ ве йәке хԝәха дьбежи, йан һьнәкед дьн бона Мьн тәрʼа готьнә?» Пилато гот: «Чьма әз щьһу мә? Мьләте Тә у сәрәкед кʼаһина Тӧ данә дәсте мьн. Тә чь кьрийә?» Иса щаб да у гот: «Пʼадшатийа Мьн нә жь ве дьнйайе йә. Һәгәр пʼадшатийа Мьн жь ве дьнйайе буйа, бәрдәстийед Мьне шәрʼ кьрана кӧ Әз нәкʼәтама дәсте щьһуйа. Ле пʼадшатийа Мьн нә жь ве дьнйайе йә». Һьнге Пилато жерʼа гот: «Ԝәки ӧса йә Тӧ пʼадша йи?» Иса щаб да у гот: «Тӧ хԝәха дьбежи Мьн кӧ: ‹Тӧ пʼадша йи›. Әз бона ве йәке бумә у бона ве йәке һатьмә дьнйайе, ԝәки бона рʼастийе шәʼдәтийе бьдьм. Һәр кәсе кӧ жь алийе рʼастийе йә, гӧһ дьдә дәнге Мьн». Пилато же пьрси: «Рʼасти чь йә?» Пәй ве пьрсерʼа, Пилато диса дәркʼәтә дәрва щәм щьһуйа у ԝанрʼа гот: «Әз тʼӧ нәһәԛийе Вида набиньм. Ле әв әʼдәте ԝә йә кӧ әз Щәжьна Дәрбазбунеда йәки гьрти бона ԝә бәрʼдьм. Һун дьхԝазьн кӧ әз бона ԝә Пʼадше щьһуйа бәрʼдьм?» Һьнге ԝан һе кьрә ԛирʼин, готьн: «Нә кӧ Ви мәрьви, ле Барабас бәрʼдә!» Барабас жи ԛачахәк бу. Һьнге Пилато Иса бьр у да бәр ԛамчийа. Әскәра жи тʼащәк жь стьрийа вәгьртьн у данә сәре Ԝи у чӧхәки ширк ль Ԝи кьрьн. Ль бәр Ԝи дьсәкьнин у дьготьн: «Хԝәш бә, Пʼадше щьһуйа!» У шәмаԛ ль Ԝи дьхьстьн. Пилато диса дәркʼәтә дәрва у ԝанрʼа гот: «Ва йә ньһа әз Ԝи тиньмә дәрва щәм ԝә, ԝәки һун бьзаньбьн кӧ мьн тʼӧ сущ Ԝида нәдитийә». Һьнге Иса тʼаще стьри ль сери у чӧхе ширк ле дәркʼәтә дәрва. Пилато ԝанрʼа гот: «Ва йә Әԝ мәрьва!» Гава сәрәкед кʼаһина у нобәдара Әԝ дит, кьрьнә ԛирʼин у готьн: «Ԝи хач кә, Ԝи хач кә!» Пилато ԝанрʼа гот: «Һун Ԝи бьбьн хач кьн. Әз хԝәха тʼӧ сущи Ԝида набиньм». Щьһуйа ле вәгәрʼанд у готьне: «Ԛанунәкә мә һәйә у анәгори ԝе ԛануне гәрәке Әԝ бе кӧштьне, чьмки Ԝи Хԝә Кӧрʼе Хԝәде һʼәсаб кьр». Гава Пилато әв йәк бьһист, һе тьрс кʼәтә сәр. Әԝ диса чу һьндӧрʼе ԛәсьра ԝәли у Исарʼа гот: «Тӧ жь кʼӧ йи?» Ле Иса щаба ԝи нәда. Пилато готә Ԝи: «Тӧ тʼәви мьн хәбәр нади? Тӧ ньзани кӧ һʼӧкӧме мьн һәйә әз Тә бәрʼдьм у һʼӧкӧме мьн һәйә Тә бьдьмә хачкьрьне?» Иса ле вәгәрʼанд у готе: «Һәгәр жь жор тәрʼа нәһата дайине, тʼӧ һʼӧкӧме тә ԝе ль сәр Мьн тʼӧнәбуйа. Ләма гӧне ԝи, йе кӧ Әз дамә дәсте тә һе мәзьн ә». Пәй ԝе йәкерʼа Пилато дькьр кӧ Иса бәрʼда, ле щьһуйа кьрә ԛирʼин у готьн: «Һәгәр тӧ Ви мәрьви бәрʼди, тӧ нә досте Ԛәйсәр и! Һәр кәсе кӧ хԝә пʼадша һʼәсаб дькә, әԝ нәйаре Ԛәйсәр ә!» Гава Пилато әв йәк бьһист, Иса дәрхьстә дәрва у әԝ ль һәрәма диԝане рʼуньшт, ԝи щийе кӧ жерʼа дьготьн «Сәле Кәвьри», бь ибрани Габата. Рʼожа тʼьвдарәккьрьна Щәжьна Дәрбазбуне бу, нивро незики сьһʼәта донздәһа Пилато щьһуйарʼа гот: «Ва йә Пʼадше ԝә!» Ле ԝана кьрә ԛирʼин: «Ԝи бьбә, Ԝи бьбә! Ԝи хач кә!» Пилато ԝанрʼа гот: «Пʼадше ԝә хач кьм?» Сәрәкед кʼаһина ле вәгәрʼандьн: «Пештьри Ԛәйсәр пʼадшаки дьн бона мә тʼӧнә!» Һьнге әԝи Иса да дәсте ԝан, ԝәки бе хачкьрьне. Ԝан Иса һьлда бьрьн. Иса Хԝәха хаче Хԝә һьлда у дәркʼәтә ԝи щийе кӧ жерʼа дьбежьн «Щийе Ԛаф», бь ибрани «Голгота». Ль ԝе дәре Әԝ тʼәви дӧ мәрьвед дьн хач кьрьн, һәр йәк ль кʼеләкәке, Иса нава ԝанда бу. Пилато тʼәхтәк жи ньвиси у феза хаче хьст, кӧ аһа ньвисар бу: «ИСАЙЕ НЬСРӘТЕ, ПʼАДШЕ ЩЬҺУЙА». Гәләк щьһуйа әв ньвисара сәр тʼәхтә хԝәндьн, чьмки әԝ щийе кӧ Иса ле һатьбу хачкьрьне незики бажер бу у бь ибрани, латини у йунани һатьбу ньвисаре. Сәрәкед кʼаһинед щьһуйа Пилаторʼа готьн: «Нәньвисә ‹Пʼадше щьһуйа›! Ле бьньвисә кӧ ‹Ԝи гот: Әз Пʼадше щьһуйа мә›». Пилато гот: «Мьн чь ньвиси, ньвиси». Гава әскәра Иса хач кьрьн, кʼьнщед Ԝи һьлдан, кьрьнә чар пʼара, һәр йәкирʼа пʼарәк. Ле кʼьнща Ԝийә сәр жи һәбу, кӧ жь сери һʼәта бьни һунанди у бедьрун бу. Һьнге һәвдӧрʼа готьн: «Ԝәрьн әм ви нәԛәлешьн, әм пʼәшк бавежьн, кʼа ԝе кʼерʼа бькʼәвә». Әв йәк бу, ԝәки ньвисар бе сери: «Кʼьнщед Мьн нав хԝәда пʼарәвәкьрьн у сәр пʼоте Мьн пʼәшк авитьн». Әскәра жи һәма әв йәк кьр. Ль бәр хаче Иса дийа Ԝи, хатийа Ԝи, Мәрйәма жьна Клопас у Мәрйәма Мәждәлани сәкьни бун. Иса кӧ дийа Хԝә у әԝ шагьрте кӧ Ԝи же һʼьз дькьр ль ԝе дәре сәкьни дитьн, дийа Хԝәрʼа гот: «Әʼвде! Ва йә кӧрʼе тә!» Паше готә шагьрт: «Ва йә дийа тә!» Жь һьнгева әви шагьрти әԝ бьрә мала хԝә. Пәй ве йәкерʼа Иса заньбу һәр тьштед кӧ ԝе бьбуна иди ԛәԝьмин, һьнге Ԝи гот: «Әз тʼи мә», ԝәки ньвисар бе сери. Ль ԝьр фьраԛәкә сьркева дагьрти һәбу. Ԝана луфька бәʼре сьркеда кьр, сәре дарька зохева данин у дьрежи бәр дәве Ԝи кьрьн. Гава кӧ Иса сьркә вәхԝар, гот: «Тʼәмам ԛәԝьми!» Сәре Хԝә бәржер кьр у рʼӧһʼе Хԝә да. Әв йәк кӧ рʼожа тʼьвдарәккьрьнеда ԛәԝьми, щьһуйа нәдьхԝәст ԝәки щьнйаз ль сәр хаче бьмана, чьмки әԝ шәми бона ԝана рʼожәкә гәләк әʼзиз бу. Ԝана жь Пилато һиви кьр, ԝәки һәстуйед рʼәʼнед хачбуйийа бенә шкенандьне у жь ԝьр бенә һьлдане. Һьнге әскәр һатьн, пешийе һәстуйед рʼәʼнед йәки шкенандьн у пәйрʼа рʼәʼнед йе дьн, кӧ тʼәви ԝи һатьбу хачкьрьне. Ле гава кӧ әԝ незики Иса бун у дитьн кӧ Әԝ иди мьрийә, ԝана һәстуйед рʼәʼнед Ԝи нәшкенандьн. Ле диса жь әскәра йәки рʼьм нәкʼса Ԝирʼа кьр у перʼа-перʼа ав у хуне авит. Йе кӧ әв йәк дит шәʼдәти да, ԝәки һун жи баԝәр бькьн. Шәʼдәтийа ԝи рʼаст ә у әԝ занә кӧ рʼастийе дьбежә. Әв йәка ԛәԝьми, ԝәки әԝ ньвисар бе сери: «Тʼӧ һәстуйе Ԝи ԝе нәйе шкенандьне». Ньвисарәкә дьн жи аһа дьбежә: «Әԝе ль Ԝи бьньһерʼьн, нәкʼса кʼижани ԛӧл кьрьн». Пәй ве йәкерʼа, Усьве жь Аримәтйайе кӧ шагьрте Иса бу, ле жь тьрса щьһуйа хԝә әʼйан нәдькьр, һиви жь Пилато кьр кӧ щьнйазе Иса жь хаче пәйа кә у Пилато изьн дайе. Һьнге әԝ чу щьнйазе Иса жь хаче пәйа кьр. Никодемо жи тʼәви ԝи һат, йе кӧ пешда шәв һатьбу щәм Иса, незики си килограм уд у зьмьр тʼәвһәвкьри ани. Щьнйазе Иса һьлдан, ль анәгори әʼдәте дәфьнкьрьна щьһуйа, бьһарәт ле дан у Әԝ ԛәдәке кʼьтанида кʼәфән кьрьн. Ль ԝи щийе кӧ Иса ле һатьбу хачкьрьне бахчәк һәбу у ԝи бахчәйида жи тʼьрбәкә ну һәбу кӧ һе тʼӧ кәс теда нәһатьбу данине. Иса кьрьнә ԝе тʼьрбе, чьмки рʼожа тʼьвдарәккьрьна щьһуйа бу, тʼьрб жи незик бу. Рʼожа йәкшәме, ԛәрәбәрбанга сьбәһе зу, Мәрйәма Мәждәлани чу сәр тʼьрбе. Дина хԝә дайе, ԝе кәвьр жь бәр дәре тʼьрбе ԝеда кьри йә. Дәстхԝәда рʼәви чу щәм Шьмһʼун-Пәтрус у ԝи шагьрте дьн, йе кӧ Иса же һʼьз дькьр у ԝанрʼа гот: «Хӧдан жь тʼьрбе дәрхьстьнә у әм ньзаньн кӧ Әԝ данинә кʼӧ дәре!» Һәма һьнге Пәтрус у шагьрте дьн дәркʼәтьнә дәрва у бәрбь тʼьрбе чун. Һәр дӧ жи һәврʼа дьрʼәвийан, ле шагьрте дьн жь Пәтрус зутьр дьрʼәвийа у әԝ пешийа ԝи гьһиштә сәр тʼьрбе. Ԝи хԝә ԛуз кьр у дина хԝә дайе, ԝе кʼәфән ль ԝьр ә, ле хԝәха нәкʼәтә һьндӧрʼ. Һьнге Шьмһʼун-Пәтрус кӧ пәй ԝи дьһат гьһиште, кʼәтә һьндӧрʼе тʼьрбе, дина хԝә дайе, ԝе кʼәфән ль ԝьр ә у дәстмала сери нә тʼәви кʼәфән бу, ле ԛаткьри алики дани бу. Паше шагьрте дьн жи кʼәтә һьндӧрʼ, йе кӧ пешийе гьһиштьбу сәр тʼьрбе. Әԝи дит у баԝәр кьр. Ԝан һе ньвисар фәʼм нәкьрьбу, кӧ гәрәке Иса жь мьрьне рʼабуйа. Пәй ве йәкерʼа шагьрт вәгәрʼийанә щийед хԝә. Ле Мәрйәм жь тʼьрбе дәр сәкьнибу у дьгьрийа. Ԝе бь гьри хԝә ԛуз кьр у ль һьндӧрʼе тʼьрбе ньһерʼи, һьнге дина хԝә дайе, ԝе дӧ мьлйакʼәтед кʼьнщсьпи, ль ԝи щийе кӧ щьнйазе Иса ле данибу рʼуньштьнә, йәк бәрсәрийе у йе дьн бьнпʼийе. Мьлйакʼәта ԝерʼа гот: «Әʼвде! Тӧ чьма дьгьрийи?» Мәрйәме гот: «Хӧдане мьн һьлданә у әз ньзаньм Әԝ данинә кʼӧ дәре». Гава әԝе әв йәк гот, ль пьшт хԝәва вәгәрʼийа у дит кӧ Иса ль ԝе дәре сәкьнийә, ле ԝе ньзаньбу кӧ әԝ Иса йә. Иса готә ԝе: «Әʼвде, тӧ чьма дьгьрийи? Тӧ ль кʼе дьгәрʼи?» Мәрйәме тʼьре ԛәй әԝ рʼәзван ә, әԝе готе: «Әз хӧлам, һәгәр тә Әԝ һьлдайә, мьнрʼа бежә тә Әԝ данийә кʼӧ дәре, ԝәки әз Ԝи жь ԝе дәре һьлдьм». Иса готе: «Мәрйәм!» Мәрйәме бәре хԝә да Ԝи у бь ибрани готе: «Рʼаббони!» кӧ те фәʼмкьрьне: «Дәрсдар». Иса готә ԝе: «Мьн нәгьрә, чьмки Әз һе рʼанәбумә щәм Баве. Ле һәрʼә щәм бьред Мьн у ԝанрʼа бежә. ‹Әзе рʼабьмә щәм Баве Хԝә у щәм Баве ԝә, щәм Хԝәдейе Хԝә у щәм Хԝәдейе ԝә›». Мәрйәма Мәждәлани чу щәм шагьрта у ԝанрʼа гот: «Мьн Хӧдан дит» у тьштед кӧ Иса ԝерʼа готьбу ԝанрʼа гьли кьр. Хут ԝе еваре, рʼожа йәкшәме, гава шагьрт щьвийайи бун, жь тьрса щьһуйа жи дәри ль сәр ԝан дадайи бун, һьнге Иса һат нава ԝанда сәкьни у ԝанрʼа гот: «Әʼдьлайи ԝәрʼа». Әв тьшт гот, дәст у нәкʼса Хԝә нишани ԝан кьрьн. Һьнге шагьрт гәләки ша бун, гава кӧ Хӧдан дитьн. Паше Иса диса ԝанрʼа гот: «Әʼдьлайи ԝәрʼа. Чаԝа кӧ Баве Әз шандьм, ӧса жи Әз ԝә дьшиньм». Әв йәк кӧ гот, пʼьфи сәр ԝан кьр у ԝанрʼа гот: «Һане Рʼӧһʼе Пироз бьстиньн. Һун гӧнед кʼе бьбахшиньн, әԝе бенә бахшандьне, гӧнед кʼе нәбахшиньн, әԝе нәйнә бахшандьне». Тʼумайе йәки жь һәр донздәһа, кӧ жерʼа «Һәвал-щеԝи» дьготьн, нә тʼәви ԝан бу гава кӧ Иса һат. Һьнге шагьртед майин ԝирʼа готьн: «Мә Хӧдан дит». Әԝи ԝанрʼа гот: «Һʼәта кӧ әз дәԝса мьха дәстед Ԝида нәбиньм, тʼьлийа хԝә нәдьмә сәр дәԝса мьха у дәсте хԝә жи нәкьмә нәкʼса Ԝи, әз тʼӧ щар баԝәр накьм». Пәй һʼәйшт рʼожарʼа, шагьртед Иса диса малда бун у Тʼума жи тʼәви ԝан бу. Дәри дадайи бун, ле Иса һат, нава ԝанда сәкьни у гот: «Әʼдьлайи ԝәрʼа». Паше Тʼумарʼа гот: «Тʼьлийа хԝә бинә вьр у дәстед Мьн бьньһерʼә, дәсте хԝә жи бинә у бькә нәкʼса Мьн. Нәбаԝәрийе нәкә, ле баԝәр бькә!» Тʼума ле вәгәрʼанд у готе: «Хӧдане мьн у Хԝәдейе мьн!» Иса готә ԝи: «Тә Әз дитьм ләма баԝәр кьр? Хԝәзи ль ԝан, йед кӧ нәдитьнә, ле баԝәр дькьн!» Иса ль бәр шагьртед Хԝә һе гәләк нишанед дьн жи кьрьн, кӧ ве кʼьтебеда нәһатьнә ньвисаре. Ле бәле әв һатьнә ньвисаре, ԝәки һун баԝәр бькьн, кӧ Иса йә Мәсиһ, Кӧрʼе Хԝәде у бь ве баԝәрийа пе наве Ԝи жийина ԝә һәбә. Пәй ве йәкерʼа Иса диса Хԝә ль дәве гола Тәбәрийайе нишани шагьртед Хԝә кьр. Әԝ бь ви аԝайи ԛәԝьми: Шьмһʼун-Пәтрус, Тʼумайе кӧ жерʼа дьготьн «Һәвал-щеԝи», Натанйеле жь Ԛанайа Щәлиле, кӧрʼед Зәбәди у дӧ шагьртед Исайә дьн һәврʼа бун. Шьмһʼун-Пәтрус ԝанрʼа гот: «Әз дьчьм кӧ мәʼсийа бьгьрьм». Ԝана ԝирʼа гот: «Әм жи тʼәви тә тен». Һьнге әԝ рʼабун чун кʼәтьнә ԛәйькәке, ле ԝе шәве тʼӧ тьшт нәгьртьн. Сьбәһ сафи бу, Иса ль дәве голе сәкьни, ле шагьрта ньзаньбу кӧ Әԝ Иса йә. Һьнге Иса готә ԝан: «Лаԝькно! Ԝә тьшт нәгьртийә?» Ԝана ле вәгәрʼанд у готьне: «На». Әԝи готә ԝан: «Тʼорʼе бавежьнә алийе ԛәйькейи рʼасте һуне бьгьрьн». Ԝана жи тʼорʼ авите у жь дәст гәләкбуна мәʼсийа нькарьбун кӧ тʼорʼ бькʼьшандана. Һьнге ԝи шагьрте кӧ Иса же һʼьз дькьр Пәтрусрʼа гот: «Әԝ Хӧдан ә!» Гава Шьмһʼун-Пәтрус бьһист кӧ әԝ Хӧдан ә, кʼьнща хԝә авитә сәр хԝә, чьмки әԝ тәʼзи бу у хԝә авитә голе. Ле шагьртед майин тʼорʼ мәʼсийава кʼьшандьн у пе ԛәйьке гьһиштьнә бәже, чьмки әԝ нә дур бун, ле ԛаси сәд метьри дури бәже бун. Гава әԝ дәркʼәтьнә бәже, ԝьр агьре жь кʼомьре вехьсти дитьн, мәʼси ль сәр у нан жи ль бәр. Иса ԝанрʼа гот: «Һьнәк жь ԝан мәʼсийед кӧ ԝә һежа гьртьнә биньн». Шьмһʼун-Пәтрус жи кʼәтә ԛәйьке у тʼорʼ кʼьшандә бәже, йа кӧ сәд пенщи се мәʼсийед гьр теда бун. Һаԛас гәләк бун жи, ле диса тʼорʼ нәԛәльши. Иса ԝанрʼа гот: «Ԝәрьн тәʼште бьхԝьн». Жь шагьрта тʼӧ кәси жи тӧрӧш нәкьр кӧ же бьпьрсийа: «Тӧ кʼи йи?» Чьмки ԝана заньбу кӧ Әԝ Хӧдан ә. Һьнге Иса незик бу, әԝ нан һьлда да ԝан у ӧса жи мәʼси. Әва иди щара сьсийа бу кӧ Иса пәй мьрьн-рʼабуна Хԝәрʼа шагьртед Хԝәва хӧйа бу. Гава ԝан тәʼште хԝар, Иса жь Шьмһʼун-Пәтрус пьрси: «Шьмһʼуне кӧрʼе Йуһʼәнна, тӧ Мьн гәләки һʼьз дьки, йан әԝ Мьн гәләки һʼьз дькьн? » Пәтрус жерʼа гот: «Бәле Хӧдан, Тӧ зани кӧ әз Тә һʼьз дькьм». Иса ԝирʼа гот: «Бәрхед Мьн бьчʼеринә». Иса щара дӧда ԝирʼа гот: «Шьмһʼуне кӧрʼе Йуһʼәнна, тӧ Мьн һʼьз дьки?» Әԝи гот: «Бәле Хӧдан, Тӧ зани әз Тә һʼьз дькьм». Иса жерʼа гот: «Шьвантийе пәзед Мьн бькә». Иса щара сьсейа жь Пәтрус пьрси: «Шьмһʼуне кӧрʼе Йуһʼәнна, тӧ Мьн һʼьз дьки?» Һьнге дьле Пәтрус ешийа кӧ Ԝи се щара ԝирʼа гот: «Тӧ Мьн һʼьз дьки?» у гот: «Хӧдан, Тӧ һәр тьшти зани, Тӧ зани кӧ әз Тә һʼьз дькьм». Иса ԝирʼа гот: «Пәзед Мьн бьчʼеринә. Әз рʼаст бе хельф тәрʼа дьбежьм, гава кӧ тӧ хорт буйи, тә хԝәха ԛайиша хԝә гьредьда у кʼӧда тә дьхԝәст дьчуйи. Ле гава кӧ тӧ кал би, те дәстед хԝә бьльнд ки у йәки дьне пьшта тә гьредә у тә бьбә ԝи щийе кӧ тӧ нахԝази һәрʼейи». Ԝи әв йәк гот, да әʼйанкьрьне кӧ әԝе бь чь щурʼә мьрьне рʼумәте бьдә Хԝәде. Пәй ве йәкерʼа Ԝи Пәтрусрʼа гот: «Пәй Мьн ԝәрә». Пәтрус пьшт хԝәва зьвьрʼи, дит әԝ шагьрте кӧ Иса же һʼьз дькә пәй ԝан те. Әва әԝ шагьрт бу, йе кӧ шива евареда хԝә авитьбу һʼәмеза Иса у готьбу: «Хӧдан әԝ кʼи йә, кӧ ԝе нәмамийа Тә бькә?» Пәтрус гава әԝ дит, жь Иса пьрси: «Хӧдан, ле ижар әве чаԝа бә?» Иса ԝирʼа гот: «Һәгәр Әз бьхԝазьм кӧ әԝ бьминә һʼәта Әз бем, чи тәрʼа йә? Тӧ пәй Мьн ԝәрә!» Әва готьна нава хушк-бьрада бәла бу, йане әԝ шагьрте нәмьрә. Ле бәле Иса бона ԝи нәготьбу, кӧ әԝ намьрә, ле готьбу: «Һәгәр Әз бьхԝазьм кӧ әԝ бьминә һʼәта Әз бем, чи тәрʼа йә?» Әва әԝ шагьрт ә, йе кӧ бона ван йәка шәʼдәтийе дьдә, ӧса жи әв йәк ньвисин. Әм заньн кӧ шәʼдәтийа ԝи рʼаст ә. Һе гәләк кьред дьн жи һәнә, йед кӧ Иса кьрьнә. Һәгәр әԝ бь һур-гьли бьһатана ньвисаре, бь тʼәхмина мьн, әԝ кʼьтебед ньвисар ԝе дьнйайеда щи нәбуна. Тʼейофилойе хԝәйиԛәдьр, мьн кʼьтеба хԝәйә пешьнда дәрһәԛа ԝан һʼәму тьштада ньвиси, чь кӧ Иса кьр у һин кьр, жь серида һʼәта ԝе рʼожа кӧ бәрбь әʼзмен һатә һьлатьне. Ле һе бәри әʼзмен һьлатьне Әԝи бь Рʼӧһʼе Пироз тʼәми ль шандийед Хԝәйә бьжарти кьр. Пәй ԝан щәфайед Хԝәрʼа Әԝи гәләк щара Хԝә нишани ԝан дьда, рʼаст дьда избаткьрьне кӧ Әԝ сах ә. Навбәра чьл рʼожида ԝанва хӧйа дьбу у дәрһәԛа Пʼадшатийа Хԝәдеда ԝанарʼа хәбәр дьда. Щарәке гава Әԝи тʼәви ԝан нан дьхԝар, тʼәми да ԝан у гот: «Жь Оршәлиме дәрнәкʼәвьн, ле бәле һивийа созе Баве бьсәкьньн, бона кʼижани ԝә жь Мьн бьһист. Йуһʼәнна бь аве ньхӧманд, ле һуне чәнд рʼожа шунда бь Рʼӧһʼе Пироз бенә ньхӧмандьне». Гава шагьрт һәврʼа щики бун, жь Иса пьрсин у готьне: «Хӧдан, ви зәманида Те Пʼадшатийа Исраеле ль ԝан вәгәрʼини?» Әԝи ль ԝан вәгәрʼанд у гот: «Әԝ нә ише ԝә йә кӧ һун ԝан ԝәхт у зәмана бьзаньбьн йед кӧ Баве бь һʼӧкӧме Хԝә кʼьфш кьрьнә. Ле гава Рʼӧһʼе Пироз бе сәр ԝә, һуне ԛәԝате бьстиньн у жь Оршәлимеда гьрти тʼәмамийа Щьһустане, Самәрйайе у һʼәта сәре дьне жи бьбьнә шәʼдед Мьн». Гава әв йәк гот, бәр чʼәʼве ԝан бәрбь әʼзмен һатә һьлатьне у әʼԝрәки жь бәр чʼәʼве ԝан Әԝ вәшарт. Әԝ һе зурʼ бьбун ль чуйина Ԝийә әʼзмен дьньһерʼин, ва дӧ мәрьвед кʼьнщсьпи щәм ԝан сәкьнин у готьн: «Гәли щәлилийа! Һун чьма ӧса сәкьни нә у ль әʼзмен дьньһерʼьн? Әԝ Исайе кӧ жь нав ԝә һатә һьлатьне, ԝе ӧса жи бе, чаԝа ԝә дит Әԝ чу әʼзмен». Һьнге әԝана жь чʼийайе Зәйтʼуне вәгәрʼийанә Оршәлиме, кӧ рʼийа рʼожәкә шәмийе дури Оршәлиме бу. Гава һатьнә бажер, чунә ода мәзьнә жорьн, әԝ щийе кӧ Пәтрус у Йуһʼәнна, Аԛуб, Әндраԝьс, Филипо, Тʼума, Бәртоломәйо, Мәтта, Аԛубе Һалфаԝо, Шьмһʼуне ԝәлатпʼарьст у Щьһудайе Аԛуб теда дьман. Ван һʼәмуйа һәр гав һәврʼа тʼәви кʼӧлфәта у Мәрйәма дийа Иса у бьрайед Ԝи дӧа дькьрьн. Ԝан рʼожада Пәтрус нава баԝәрмәндада рʼабу, (кӧ ль ԝьр ԛаси сәд бист мәрьви бун) у гот: «Гәли бьра! Гәрәке әв ньвисара бьһата сери, чаԝа кӧ бәри ве йәке Рʼӧһʼе Пироз бь дәве Даԝьд бона Щьһуда готьбу, кӧ әԝ бу рʼебәре ԝан, йед кӧ Иса гьртьн. Әԝ тʼәви мә нав һʼәсабе мәда бу у пʼара ԝи жи нава ви ԛӧльхида бу». (Әԝи бь һәԛе кьре хԝәйи нәһәԛ әʼрдәк станд у ль ԝьр сәр сери кʼәт, зьк ле ԛәльши дьл-һʼьнаве ԝи һʼәму рʼьжийан. Әва йәка һʼәму бьнәлийед Оршәлимева әʼйан бу, һʼәта бь зьмане хԝә жи ԝи әʼрдирʼа Һәԛьлдьма готьн, аԝа готи «Әʼрде хуне».) Пәтрус думайи кьр гот: «Чаԝа кʼьтеба Зәбурада жи ньвисар ә: ‹Дә бьра мала ԝи хьрабә бә, кәсәк теда нәминә› у: ‹Дә бьра ԛӧльхе ԝийи сәрԝертийе йәки дьн бьстинә›. Аԝа гәрәке йәк жь ԝан мера бә, кʼижан кӧ тʼәмамийа ԝи ԝәхти тʼәви мә бунә гава Хӧдан Иса тʼәви мә дьчу дьһат, жь ньхӧмандьна Йуһʼәннада гьрти һʼәта ԝе рʼожа кӧ Әԝ жь нав мә бәрбь әʼзмен һатә һьлатьне. Әԝ гәрәке тʼәви мә бьбә шәʼде рʼабуна Ԝийә жь мьрьне». Дӧ мәри данә сәкьнандьне, йәк Усьве кӧ жерʼа Барсабо дьготьн (кӧ наве ԝи данибун Йусто) у йе дьн Матийо. Дӧа кьрьн у готьн: «Хӧдан, Тӧ кӧ дьле һәр кәси зани, жь ван һәр дӧйа кʼижани кӧ Тӧ дьбьжери бьдә кʼьфше, ԝәки әви ԛӧльхе шандитийе бьстинә, жь кʼижани Щьһуда же кʼәт кӧ һәрʼә щийе хԝә». Пʼәшк сәр ԝан авитьн, пʼара Матийо кʼәт у әԝ сәр һʼәсабе йанздәһ шандийада зедә бу. Гава Рʼожа Пенщийә һʼәсаб һат, һʼәму жи һәврʼа щики бун. Ньшкева жь әʼзмен мина дәнге байе ԛайим дәнгәк һат у тʼәмамийа ԝе мала кӧ теда рʼуньштьбун тʼьжи кьр. Һьнге зьманед мина алава егьр ԝанва хӧйа бун у ль сәр һәр йәки жь ԝан данин. Һʼәму бь Рʼӧһʼе Пироз тʼьжи бун у дәстпекьрьн зьманед майин хәбәр дан, чаԝа кӧ Рʼӧһʼе Пироз әԝ дьданә хәбәрдане. Ԝи чахи Оршәлимеда щьһуйед хԝәдехоф дьман, әԝ жь нав һʼәму мьләтед бьн пʼәрʼе әʼзменда һатьбун. Гава әԝ дәнг һат, щьмәʼтәкә гьран щьвийа у тʼәвиһәв бу, чьмки дьбьһистьн кӧ әԝана бь зьманед ԝан һәр йәки хәбәр дьдан у һʼәйр-һʼӧжмәкʼар, зәндәгьрти майи дьготьн: «Әв һʼәмуйед кӧ хәбәр дьдьн нә жь Щәлиле нә? Ле чаԝа жь мә һәр йәк ԝи зьмани дьбьһе, йе кӧ әм навда дьне кʼәтьнә? Партойи, мәди, әʼлами, бьнәлийед Мәсопотамйайе, Щьһустане, Кәпәдокйайе, Понтосе, Асйайе, Фьригйайе, Памфилйайе, Мьсьре у йед ль алийе Либйайа незики Курене у ӧса жи йед хәрибә жь Рʼоме һати, щьһу у нәщьһуйед кӧ һатьнә сәр баԝәрийа щьһуйа, ӧса жи кьрети у әʼрәб. Әм дьбьһен кӧ әвана бь зьмане мә кьред Хԝәдейә мәзьн дьбежьн». Һʼәмуйа һʼәйр-һʼӧжмәкʼар шашмайи һәвдӧрʼа дьготьн: «Әв чь һʼәԝал ә?» Ле һьнәка жи ԛәрфе хԝә дькьрьн у дьготьн: «Пе шәрава ну сәрхԝәш бунә». Һьнге Пәтрус тʼәви һәр йанздәһа рʼабу дәнге хԝә һьлда у щьмәʼтерʼа гот: «Гәли щьһуйа у һʼәмуйед кӧ Оршәлимеда дьминьн! Бьра әв йәка ԝәва әʼйан бә у гӧһ бьдьнә хәбәред мьн. Әвана нә сәрхԝәш ьн, чаԝа кӧ һун дьфькьрьн, һе сьбәһ зу сьһʼәт нәһә йә. Ле әва әԝ йәк ә, чь кӧ Йоел пʼехәмбәр готийә: ‹Рʼожед ахьрийеда Хԝәде дьбежә ԝе аһа бә: Әзе жь Рʼӧһʼе Хԝә сәр һʼәму мәрьвада бьбариньм, кӧрʼ у ԛизед ԝәйе пʼехәмбәртийе бькьн, щаһьлед ԝәйе дитьнока бьбиньн у кал-пиред ԝәйе жи хәԝна. Бәле, Әзе ԝан рʼожада Рʼӧһʼе Хԝә сәр хӧлам у щарийед Хԝәда жи бьбариньм у ԝе пʼехәмбәртийе бькьн. Жор ль әʼзмен тьштед әʼщебмайи бьдьмә кʼьфше у жер сәр әʼрде жи нишана, хун у агьр, ду у духан. Рʼойе бьԛарә у һиве жи сор бә мина хуне, һе бәри һатьна Рʼожа Хӧданә мәзьн у навә нишан. У ԝе ӧса бә, һәр кәсе кӧ гази наве Хӧдан кә ԝе хьлаз бә›. Гәли исраелийа, ван хәбәра бьбьһен! Исайе Ньсрәте, мәрьвәки кӧ жь алийе Хԝәдеда кʼьфшкьри бу, Хԝәде пе Ԝи нава ԝәда нишан, кʼәрәмәт у кьред ԛәԝат кьрьн, чаԝа кӧ һун хԝәха жи заньн. Бона Ԝи Хԝәде һе пешда ԛьрар кьрьбу у бь занәбуна Ԝи Әԝ кʼәтә дәсте ԝә, ԝә жи бь дәсте нәрʼаста дармьхе хьст кӧшт. Ле Хԝәде ԛәйдед мьрьнейә щәфе вәкьрьн, Әԝ жь мьрьне рʼакьр, чьмки мьрьне нькарьбу һʼӧкӧми сәр Ԝи бькьра. Даԝьд бона Ԝи дьбежә: ‹Мьн тʼьме Хӧдан пешийа хԝә дьдит, чьмки Әԝ ль алийе мьни рʼасте йә, кӧ әз нәлькʼӧмьм. Бона ԝе йәке дьле мьн ша бу, зьмане мьн жи жь әшԛа нәсәкьни, бәдәна мьнә мьри жи ԝе бь гӧман бьжи, чьмки Тӧ мьн дийаре мьрийада наһели, нә жи Те бьһели кӧ Пирозе Тә бьрʼьзә. Тә рʼийед әʼмьр мьнва әʼйан кьрьн у Те шабуна диндара Хԝәва мьн тʼьжи ки›. Гәли бьра! Һʼәԝщә йә кӧ әз ашкәрә бона Даԝьде бавәʼшир ԝәрʼа бежьм, кӧ әԝ мьр дәфьн кьрьн, тʼьрба ԝи һʼәта рʼожа иро жи нава мәда йә. Ле әԝ кӧ пʼехәмбәр бу, ԝи заньбу кӧ Хԝәде бь сонд ԝирʼа соз дайә, ԝе жь бәдәна ԝи Йәки дайнә сәр тʼәхте ԝи. Әԝи әв йәк һе пешда дит у бона рʼабуна Мәсиһ гот, кӧ Әԝе дийаре мьрийада нәминә, нә жи бәдәна Ԝийе бьрʼьзә. Әва әԝ Иса бу, йе кӧ Хԝәде Әԝ жь мьрьне рʼакьр, кӧ әм һʼәму жи шәʼдә нә. Хԝәде Әԝ һьлкʼьшанд да кʼеләка Хԝәйә рʼасте, Әԝи жи Рʼӧһʼе Пирози создайи жь Баве станд у жорда баранд, чаԝа кӧ һун ньһа дьбиньн у дьбьһен. Рʼаст ә Даԝьд нәчубу әʼзмана, ле ԝи хԝәха әв йәк гот: ‹Хӧдан готә Хӧдане мьн, кʼеләка Мьнә рʼасте рʼуне, һʼәта кӧ Әз дьжмьнед Тә бькьмә бьне пʼийед Тә›. Ньһа бьра тʼәмамийа мала Исраел рʼьнд заньбә әԝ Исайе кӧ ԝә хач кьр, Хԝәде Әԝ һьн кьрә Хӧдан, һьн жи Мәсиһ». Щьмәʼте әв йәк кӧ бьһист, мина тирәке дьле ԝан кʼәт, Пәтрус у шандийед майинрʼа готьн: «Әм чь бькьн, гәли бьра?» Пәтрус ԝанрʼа гот: «Тʼобә кьн у бьра жь ԝә һәр йәк бь наве Иса Мәсиһ бона бахшандьна гӧна бе ньхӧмандьне у һуне Рʼӧһʼе Пироз пʼешкʼеш бьстиньн. Әв соз бона ԝә у зарʼед ԝә йә, ӧса жи бона һʼәмуйед дур ә кӧ Хӧдан Хԝәде мәйе гази ԝан кә». Пәтрус бь гәләк хәбәред майин бь мәʼрифәти тʼәми да у һиви жь ԝан кьр у гот: «Хԝә жь ви ньсьле нәһәԛ хьлаз кьн». Әԝед кӧ хәбәред ԝи ԛәбул кьрьн, пе аве һатьнә ньхӧмандьне у ԝе рʼоже ԝәкә се һʼәзара ль һәв зедә бун. Ԝан тʼьме хԝә ль һинкьрьна шандийа дьгьрт, ль һәв дьщьвийан, нан кәрдькьрьн у дӧа дькьрьн. Хоф у тьрс дькʼәтә сәр һәр кәси у бь дәсте шандийа гәләк кʼәрәмәт у нишан дьбун. Һʼәму баԝәрмәнд һәврʼа бун у һәр тьштед ԝан йәк бу. Һәбук у мьлкʼе хԝә жи дьфьротьн у бәлайи һʼәмуйед һʼәԝщә дькьрьн. Һәр рʼож бь тʼьфаԛ дьчунә пʼарьстгәһе, малада нан кәрдькьрьн у әшԛ-ша бь дьле сах хԝарьн дьхԝарьн, шькьрийа хԝә Хԝәде данин у тʼәмамийа щьмәʼте ль ԝан хԝәш бу. Хӧдан жи рʼож бь рʼож һʼәсабе хьлазбуйийа зедә дькьр. Щарәке Пәтрус у Йуһʼәнна ԝәхте дӧайе сьһʼәта сьсийа һьлдькʼьшийанә пʼарьстгәһе. Мәрьвәки жь зькмакийеда ньгада сәԛәт һәбу, кӧ һәр рʼож данин бәр дәргәһе пʼарьстгәһейи кӧ Бәдәԝ дьһатә готьне даданин, кӧ жь йед дьһатьнә пʼарьстгәһе пʼарс кьра. Әви кӧ дит Пәтрус у Йуһʼәнна дькʼәвьнә пʼарьстгәһе, лава ԝан кьр кӧ пʼарсе бьдьне. Пәтрус тʼәви Йуһʼәнна ль ԝи ньһерʼи у готе: «Ль мә бьньһерʼә!» Әԝи жи ль ԝан ньһерʼи у чʼәʼве ԝи ле бу, кӧ ԝе тьштәки жь ԝан бьстинә. Һьнге Пәтрус готе: «Зерʼ у зиве мьн тʼӧнә, ле чи мьн һәйә әзе Ԝи бьдьмә тә. Бь наве Иса Мәсиһе Ньсрәте рʼабә бьгәрʼә». Дәсте ԝийи рʼасте гьрт рʼакьр, перʼа-перʼа ԛӧдуме чока у гузәкед ԝи шьдийан. Әԝи банзда сәр хԝә сәкьни, дәстпекьр гәрʼийа у тʼәви ԝан кʼәтә пʼарьстгәһе дьгәрʼийа, банздьда у шькьри дьда Хԝәде. Гава тʼәмамийа щьмәʼте дит кӧ әԝ дьгәрʼә у шькьрийе дьдә Хԝәде, нас кьрьн кӧ әԝ ә, йе кӧ бона пʼарсе бәр дәргәһе пʼарьстгәһейи Бәдәԝ рʼудьньшт у бона тьште кӧ тʼәви ԝи ԛәԝьми зәндәгьрти мабун у дьһʼәйирин. Әви кӧ Пәтрус у Йуһʼәнна бәрʼнәдьдан, тʼәмамийа щьмәʼте әʼщебмайи бәрбьрʼи ԝан бәзи, һʼәта ԝи щийе кӧ жерʼа дьготьн һеԝангәһа Сьлеман. Пәтрус кӧ әв йәк дит, щьмәʼтерʼа гот: «Гәли исраелийа! Һун чьма бона ве йәке әʼщебмайи манә? Чьма тьһәрәки ль мә дьньһерʼьн? Те бежи ԛәй мә бь ԛәԝат йан хԝәдепʼарьстийа хԝә әԝ да гәрʼе? Хԝәдейе Бьраһим, Исһаԛ, Аԛуб у Хԝәдейе кал-бавед мә, Бәрдәстийе Хԝә Иса рʼумәт кьр. Ԝә нәмамийа Ԝи кьр у бәр Пилато тʼәхсир кьр, гава әԝи ԛьрар кьрьбу кӧ Ԝи бәрʼдә. Ԝә йе Пироз у рʼаст тʼәхсир кьр у йе меркӧж хԝәст кӧ ԝәрʼа бе бәрʼдане. Ԝә Чʼәʼвканийе жийине кӧшт, ле Хԝәде Әԝ жь мьрьне рʼакьр у әм хԝәха шәʼдә нә. У ԛәԝата наве Ԝи әва мәрьва ԛәнщ кьр, кʼижани кӧ һун дьбиньн у нас дькьн. Бәле ԝе баԝәрийа бь наве Ԝи әва бәр чʼәʼве ԝә һʼәмуйа сах-сьламәт кьр. Ньһа гәли бьра, әз заньм кӧ ԝә жи мина сәрԝеред хԝә бь нәзанийа хԝә кьрийә. Ле Хԝәде чаԝа бәри ве йәке бь дәве һʼәму пʼехәмбәра бона щәфе Мәсиһе Хԝә готьбу, ӧса жи кьр. Аԝа тʼобә кьн у бәрбь Хԝәде вәгәрʼьн, кӧ гӧнед ԝә бенә рʼәситкьрьне. Һьнге ԝәхтед жийиндарийе жь һʼьзурийа Хӧдан ԝе бен у Әԝе Иса бьшинә, ԝи Мәсиһе кӧ бәреда бона ԝә кʼьфш кьрийә. Лазьм ә Әԝ ль әʼзмен бьминә, һʼәта кӧ Хԝәде һәр тьшти ну чекә, чаԝа кӧ һе бәре пешда Хԝәде бь дәве пʼехәмбәред Хԝәйә пироз готьбу. Бәле Муса гот: ‹Хӧдан Хԝәдейе ԝә ԝе жь нав бьрайед ԝәда Пʼехәмбәрәки мина мьн ԝәрʼа дәрхә. Һәр чь кӧ ԝәрʼа бежә, гәрәке һун гӧһдарийа Ԝи бькьн. Һәр кʼи кӧ гӧһдарийа Ԝи пʼехәмбәри нәкә, жь нав щьмәʼте ԝе бе ԛәтандьн у ӧндакьрьне›. У һʼәму пʼехәмбәра жи, жь Самуел гьрти у йед пәйрʼа чь кӧ готьнә, бона ван рʼожа хәбәр данә. Һун миратʼхӧред пʼехәмбәра у ԝе пәймане нә, йа кӧ Хԝәде тʼәви кал-бавед ԝә гьреда. Әԝи готә Бьраһим: ‹Бь зӧрʼәта тә әзе дӧа һʼәму мьләтед дьнйайе бькьм›. Хԝәде Бәрдәстийе Хԝә Иса мьләтрʼа дәрхьст у пешийе шандә щәм ԝә, кӧ дӧа ԝә бькә у бь ви аԝайи ԝә һәр кәси жь хьрабийед ԝә вәгәрʼинә». Пәтрус у Йуһʼәнна һе щьмәʼтерʼа хәбәр дьдан, кʼаһина у сәрԝере нобәдаред пʼарьстгәһе тʼәви садуԛийа сәр ԝанда гьртьн. Әԝана ащьз бьбун, чьмки ԝана щьмәʼт һин дькьр, кӧ Иса жь мьрьне рʼабуйә, избат дькьрьн кӧ мьрийе рʼабьн. Әԝ гьртьн кьрьнә кәле һʼәта рʼожа дьне, чьмки иди евар бу. Ле гәләкед кӧ хәбәр дьбьһистьн баԝәр кьрьн, һʼәсабе ԝан гьһиштә пенщ һʼәзара. Рʼожа дьне сәрԝер, рʼуспи у ԛанунзан щьвийанә Оршәлиме. Һәнане сәрәккʼаһин, Ԛәйафа, Йуһʼәнна, Скәндәр у һʼәмуйед майинә жь хун-ԛьнета сәрәккʼаһин жи ль ԝьр бун, Пәтрус у Йуһʼәнна нава хԝәда данә сәкьнандьне у пьрсин: «Ԝә бь чь ԛәԝате йан бь чь нави әв йәка кьр?» Ԝе дәме Пәтрус бь Рʼӧһʼе Пироз тʼьжи ԝанарʼа гот: «Гәли сәрԝеред щьмәʼте у рʼуспийа! Һәгәр һун иро бона ве ԛәнщийа кӧ ви сәԛәтирʼа бу жь мә дьпьрсьн, кӧ әԝ чаԝа ԛәнщ буйә, бьра ԝә у тʼәмамийа мьләте Исраелева әʼйан бә, кӧ әва бь сайа наве Иса Мәсиһе Ньсрәте ль бәр ԝә ԛәнщбуйи сәкьни йә, Әԝе кӧ ԝә хач кьр у Хԝәде жь мьрьне рʼакьр. Әԝ ә ‹Әԝ кәвьре кӧ жь ԝә һоста һатә берʼумәткьрьне у бу сәре әʼнишке›. Бь кәсәки майин хьлазбун тʼӧнә, чьмки бьн пʼәрʼе әʼзменда навәки дьн мәрьварʼа нәһатийә дайине, кӧ әм бькарьбьн бь ԝи хьлаз бьн». Гава ԝана меркʼимийа Пәтрус у Йуһʼәнна дит у пе һʼәсийан кӧ әвана мәрьвнә нәхԝәнди у нәзан ьн, әʼщебмайи ман у нас кьрьн, кӧ әвана тʼәви Иса бунә. Ле әԝ мәрьве ԛәнщбуйи кӧ тʼәви ԝан сәкьни дитьн у нькарьбун тьштәк бьготана. Һьнге әʼмьри ль ԝан кьрьн, кӧ әԝ жь щьвина гьрәгьра дәрен у һәврʼа шеԝьрин, готьн: «Әм ван мәрьва чаԝа бькьн? Чьмки һʼәму бьнәлийед Оршәлимева әʼйан ә кӧ бь дәсте ван кʼәрәмәтәкә бәрбьчʼәʼв бу у әм нькарьн инкʼар кьн. Ле ԝәки нава щьмәʼтеда һе бәла нәбә, әм гәфе ль ԝан бьхԝьн, кӧ тʼӧ щар бь Ԝи Нави кәсирʼа хәбәр нәдьн». Диса гази ԝан кьрьн, тʼәми данә ԝан, кӧ тʼӧ щар бь наве Иса хәбәр нәдьн у һин нәкьн. Ле Пәтрус у Йуһʼәнна ль ԝан вәгәрʼандьн у готьн: «Кʼа һун хԝәха бьфькьрьн, гәло әв йәк бәр Хԝәде рʼаст ә кӧ әм гӧрʼа ԝә бькьн, нә йа Хԝәде? Әм нькарьн бона ԝан тьштед кӧ мә хԝәха дитьн у бьһистьн нәкьнә дәнги». Ԝана диса гәф ль ԝан хԝар у бәрʼдан. Бәр щьмәʼте мәʼник сәр ԝан нәдитьн кӧ щәза бьдана ԝан, чьмки һʼәмуйа жи бона әԝ тьште ԛәԝьми шькьри дьданә Хԝәде. Әʼмьре ԝи мәрьве кӧ әв кʼәрәмәта ԛәнщбуне жерʼа бу чьл сали жортьр бу. Гава Пәтрус у Йуһʼәнна һатьнә бәрʼдане, әԝ чунә щәм кʼома хԝә у ԝанрʼа һәр тьшт гьли кьрьн, чь кӧ сәрәкед кʼаһин у рʼуспийа ԝанарʼа готьбун. Ԝана жи гава бьһист, һәврʼа дәнге хԝә һьлдан гази Хԝәде кьрьн у готьн: «Йа Хԝәйи, Әʼфьрандаре әʼрд у әʼзмен, бәʼре у һʼәмуйед нав ԝанда, Тә бь Рʼӧһʼе Пироз пе дәве баве мә, бәрдәстийе Хԝә Даԝьд гот: ‹Чьма нәщьһу ԛьлԛьлин у мьләт жи бона тьштед пʼучʼ фькьрин? Пʼадшед дьнйайе һазьр сәкьнин у сәрԝер һәврʼа мьԛабьли Хӧдан у Мәсиһе Ԝи щьвийан›. Бәле рʼаст ви бажарида сәр бәрдәстийе Тә Исайе пироз, Йе кӧ Тә бь рʼункьрьне кʼьфш кьр, Һеродәс у Пилатойе Понтийо тʼәви нәщьһуйа у мьләте Исраеле щьвийан, ԝәки ԝан тьшта бькьн, чь кӧ Тә һе бәреда анәгори ԛәԝат у әʼмьре Хԝә кʼьфш кьрьбу бьбьн. Ньһа йа Хӧдан, сәр гәф у гӧрʼийа ԝанда бьньһерʼә, кʼәрәме хӧламед Хԝәрʼа бькә, ԝәки әм меркʼими хәбәра Тә хәбәр дьн, дәсте Хԝә дьреж кә, ԝәки бь наве бәрдәстийе Тә Исайе пироз жь нәхԝәшийа ԛәнщ бьн, нишан у кʼәрәмәт бьԛәԝьмьн». Һәма чаԝа ԝана дӧа хьлаз кьр, әԝ щийе кӧ әԝ щьвийайи бун һʼәжийа у һʼәму бь Рʼӧһʼе Пироз тʼьжи бун, хәбәра Хԝәде меркʼими хәбәр дьдан. Дьл у рʼӧһʼе тʼәмамийа щьмәʼта баԝәрмәнда йәк бу. Жь ԝана тʼӧ кәси һәбука хԝәрʼа нәдьгот кӧ: «Йа мьн ә», ле һәр тьштед ԝан йәк бу. Шандийа бь ԛәԝата зор шәʼдәтийа мьрьн-рʼабуна Хӧдан Иса дьдан у кʼәрәмәкә мәзьн сәр ԝан һʼәмуйа бу. Нава ԝанда тʼӧ кәс һʼәԝще тьштәки нибу. Әԝед кӧ хԝәйе әʼрда йан мала бун, дьфьротьн у ԛимәте ԝан тьштед фьроти данин бәр пʼийед шандийа даданин у ԝана жи кʼерʼа чь лазьм буйа бәла дькьрьн. Аԝа йәки леԝи жь Ԛӧбрьсе, наве ԝи Усьв, кӧ шандийа жерʼа дьгот Барнабас, кӧ те фәʼмкьрьне: «Йе Дьлдайине », әʼрдәки ԝи һәбу фьрот, ԛимәте ԝи ани бәр пʼийед шандийа дани. Ле мәрьвәки наве ԝи Һананийа тʼәви жьна хԝә Саферийайе мьлкʼәк фьрот, жь ԛимәте ԝе һьнәк вәшарт, кӧ жьн жи һаш пе һәбу, һьнәк жи ани ль бәр пʼийед шандийа дани. Һьнге Пәтрус ԝирʼа гот: «Һананийа! Әв чаԝа бу кӧ мирещьн ԛәлпе хьраб кьрә дьле тә, кӧ тӧ Рʼӧһʼе Пирозрʼа дәрәԝа бьки у жь ԛимәте әʼрде һьнәки вәшери? Бәри фьротане нә әԝ йа тә бу? У пәй фьротанерʼа жи ԛимәте ԝе дәсте тәда нибу? Тә чьма әв йәк кьрә дьле хԝә? Тә нә кӧ мәрьварʼа дәрәԝ кьр, ле Хԝәдерʼа». Гава Һананийа әв хәбәр бьһистьн, кʼәт рʼӧһʼе хԝә да у тьрсәкә мәзьн һʼәмуйед кӧ бьһистьн гьрт. Хорт жи рʼабун әԝ кʼәфән кьрьн у бьрьнә дәрва дәфьн кьрьн. Ԝәкә се сьһʼәта дәрбаз бу, жьна ԝи кӧ ньзаньбу чь ԛәԝьмийә, кʼәтә һьндӧрʼ. Пәтрус же пьрси гот: «Мьнрʼа бежә, ԝә һәбука хԝә һәма һаԛаси фьрот?» Әԝе гот: «Бәле, һәма һаԛаси». Һьнге Пәтрус ԝерʼа гот: «Һун чьма бунә йәк кӧ Рʼӧһʼе Хӧдан бьщерʼьбиньн? Ва нә дәнге ньгед ԝан мәрьвед кӧ мере тә дәфьн кьрьнә жь пьшт дери тен, ԝе тә жи дәрхьнә дәрва». Перʼа-перʼа әԝ кʼӧлфәт кʼәтә бәр ньгед ԝи у рʼӧһʼе хԝә да. Һьнге хорт кʼәтьнә һьндӧрʼ, әԝа мьрити дитьн, һьлдан бьрьн кʼеләка мере ԝе дәфьн кьрьн. Тьрсәкә мәзьн кʼәтә сәр тʼәмамийа щьвине у һʼәмуйед кӧ әв йәк бьһистьн. Бь дәсте шандийа гәләк нишан у кʼәрәмәт нав щьмәʼтеда дьбун. (Һʼәму баԝәрмәнд һәврʼа һеԝангәһа Сьлеманда дьщьвийан. Тʼӧ кәси жь йед майин нәԝерьбу незики ԝан буйа, ле бәле щьмәʼте жи ԛәдьре ԝан дьгьрт. Ле диса әʼлаләта жьна у мера һе-һе зедә дьбун, йед кӧ баԝәрийа хԝә Хӧдан данин.) Бона ве йәке хәлԛе нәхԝәш дәрдьхьстьнә сәре рʼийа, даданинә сәр дарбәста у бәрʼа, ԝәки гава Пәтрус дәрбаз бә, тʼәне сийа ԝи бькʼәвә сәр жь ԝан һьнәка. Әʼлаләт жи жь бажаред дор-бәра дьһатьнә Оршәлиме, тʼәви хԝә нәхԝәш у йед кӧ жь рʼӧһʼед һʼәрам щәфа дькʼьшандьн данин у һʼәму жи ԛәнщ дьбун. Сәрәккʼаһин у һʼәмуйед тʼәви ԝи, кӧ жь кʼомәла садуԛийа бун, һʼәвсудийева дагьрти рʼабун дәст авитьнә шандийа, авитьнә кәла щьмәʼтийе. Ле мьлйакʼәтәки Хӧдан ԝе шәве дәргәһед кәле вәкьрьн, әԝ дәрхьстьнә дәрва у готә ԝан: «Һәрʼьн пʼарьстгәһеда бьсәкьньн у щьмәʼтерʼа ван һʼәму готьнед ве жийине бежьн». Ԝана жи гӧһдари кьр, сьбәһе зу кʼәтьнә пʼарьстгәһе, дәстпекьрьн һин кьрьн. Һьнге сәрәккʼаһин кʼома хԝәва һат, тʼәви тʼәмамийа кʼома рʼуспийед Исраеле, щьвина гьрәгьра щьванд у шандьнә кәле кӧ шандийа биньн. Ле гава бәрдәсти чун, әԝ кәледа нәдитьн, вәгәрʼийан һатьн у готьн: «Кәла жь һәр алийава дадайи бу у нобәдар жи ль бәр дәргәһа бун, ле гава мә вәкьр, мә һьндӧрʼда тʼӧ кәс нәдит». Гава сәрԝере нобәдаред пʼарьстгәһе у сәрәкед кʼаһина әв хәбәр бьһистьн, сәр ԝан әʼщебмайи ман дьготьн: «Гәло чь ԛәԝьмийә?» Ԝе дәме йәки һат ԝанрʼа гот: «Ва әԝ мәрьвед ԝә авитьбунә кәле, пʼарьстгәһеда сәкьни нә у щьмәʼте һин дькьн!» Ԝи чахи сәрԝере нобәдара бәрдәстийава тʼәвайи чун әԝ анин, ле нә бь зорбәтийе, чьмки жь щьмәʼте дьтьрсийан, кӧ ԝан нәдьнә бәр кәвьра. Әԝ бьрьн бәр щьвина гьрәгьра данә сәкьнандьне, сәрәккʼаһин жь ԝан пьрси у гот: «Мә һʼьшк тʼәми ль ԝә нәкьр, кӧ бь Ԝи Нави һин нәкьн? Ле ва ԝә Оршәлим бь һинкьрьна хԝәва тʼьжи кьрийә, һун дьхԝазьн щабдарийа хуна Ԝи Мәрьви бькьнә стуйе мә». Пәтрус у шандийед майинва щаб дан у готьн: «Әм гәрәке гӧрʼа Хԝәде бькьн, нә кӧ йа мәрьва. Хԝәдейе кал-бавед мә Иса жь мьрьне рʼакьр, Әԝе кӧ ԝә дарва дардакьр кӧшт. Хԝәде Әԝ бьльнд кьр дани ль мьле Хԝәйи рʼасте, кӧ бьбә Рʼебәр у Хьлазкьр, ԝәки мәщала тʼобәйе у бахшандьна гӧна бьдә Исраеле. Әм шәʼде ван тьшта нә, ӧса жи Рʼӧһʼе Пироз, кʼижан Хԝәде да ԝан, йед кӧ гӧрʼа Ԝида нә». Гава ԝана әв йәк бьһист, гәләки һерс кʼәтьн у дьхԝәстьн ԝан бькӧжьн. Ле ферьсики дәрсдаре Ԛануне һәбу, наве ԝи Гамалйел у нава тʼәмамийа щьмәʼтеда жи хԝәйиԛәдьр бу. Әва щьвина гьрәгьрада рʼабу сәкьни әʼмьр кьр кӧ шандийа хеләке дәрхьнә дәрва у ԝанрʼа гот: «Гәли исраелийа! Һьндава ванда һаш жь хԝә һәбьн кӧ һуне чь бькьн. Ԝәхтәке Тʼәԝдас пешда һат, кӧ хԝә данибу дәԝса йәки мәзьн у ԝәкә чарсьд мәрьви жи хԝә ле гьртьбун, әԝ һатә кӧштьне, һʼәму пәйчуйед ԝи жи тʼурʼ-тʼурʼи бун у кәс нәма. Пәй ԝирʼа Щьһудайе Щәлиле жи рʼожед навньвисареда рʼабу әʼлаләтәкә гьран ль пәй хԝә бьр, ле әԝ һатә кӧштьне у һʼәмуйед пәй ԝи дьчун жи бәла-бәлайи бун. У ньһа әз ви һʼалида ԝәрʼа дьбежьм, жь ван мәрьва вәгәрʼьн у ԝан бәрʼдьн. Һәгәр әԝ шеԝьр йан шьхӧл мәрьвати бә, ԝе бәтал бә, ле һәгәр жь Хԝәдеда йә, һун нькарьн бәтал кьн. Мьԛати хԝә бьн нәбә кӧ һун рʼабьнә бәр Хԝәде». Щьвина гьрәгьра гӧрʼа ԝи кьр, гази шандийа кьрьн, әԝ данә бәр ԛамчийа, әʼмьри сәр ԝан кьрьн, кӧ иди бь наве Иса хәбәр нәдьн у бәрʼдан. Әвана жи жь щьвина гьрәгьра чун, ша дьбун кӧ бона наве Иса һежайи рʼәзилкьрьне бунә. Һәр рʼож ль пʼарьстгәһе у малада тʼьме Мьзгини дьдан у һин дькьрьн кӧ Мәсиһ, Иса йә. Ԝан рʼожада гава шагьрт зедә дьбун, щьһуйед кӧ йунани хәбәр дьдан һьндава щьһуйед ибранида бина хԝә тәнг дькьрьн, чьмки хӧрәке кӧ һәр рʼож дьһатә бәлакьрьне нәдьгьһиштә жьнәбийед ԝан. Ԝи чахи һәр донздәһа гази кʼома шагьрта кьр у готьн: «Әв йәк нә рʼаст ә кӧ әм даннасинийа хәбәра Хԝәде бьһельн, хӧрәк бәлакьрьнева мьжул бьн. Ньһа гәли бьра, жь нава хԝәда һʼәфт мәрьвед бь шәʼдәтийа наве ԛәнщ бьбьжерьн, кӧ бь избати Рʼӧһʼе Пироз у сәрԝахтийева тʼьжи нә, ԝәки әм ԝан дайньнә сәр ви шьхӧли. Ле әме хԝә бьдьнә дӧа у даннасинийа хәбәре». Әва йәка һʼәму баԝәрмәнда хԝәш һат у әв мәрьвана бьжартьн: Стәйфан, мәрьвәки бь баԝәри у Рʼӧһʼе Пирозва тʼьжи, Филипо, Прокоро, Никанор, Тимон, Парменас у Николойе жь Әнтакйайе, кӧ жь пʼутпʼарьстийе һатьбу сәр баԝәрийа щьһуйа. Әвана бәр шандийа данә сәкьнандьне, шандийа жи дӧа кьрьн у дәстед хԝә данә сәр ԝан. У хәбәра Хԝәде пешда дьчу, әʼлаләта шагьрта Оршәлимеда гәләки зедә дьбу у жь кʼаһина жи гәләка баԝәри ԛәбул дькьрьн. Стәйфан, әԝ мәрьвәки бь кʼәрәм у ԛәԝата Хԝәдева тʼьжи бу, нав щьмәʼтеда кʼәрәмәт у нишанед мәзьн дькьрьн. Ле һьнәкед жь кʼьништа кӧ Азайи дьһатә готьне, щьһуйед жь Курене у Скәндәрйайе у ӧса жи щьһуйед жь ԛәзайед Киликйайе у Асйайе рʼабун тʼәви Стәйфан кʼәтьнә дәʼԝе. Ле нькарьбун ль бәр ԝе сәрԝахтийе у ԝи Рʼӧһʼе кӧ пе хәбәр дьда бьсәкьнийана. Ԝи чахи дьзива сәре чәнд мәрийа тʼьжи кьрьн кӧ бежьн: «Мә бьһист кӧ әва тьштед мьԛабьли Муса у Хԝәде дьбежә». Бь ви аԝайи щьмәʼт, рʼуспи у ԛанунзан тʼәвиһәв кьрьн, рʼаһьштьнә Стәйфан, әԝ гьртьн у кʼаши щьвина гьрәгьра кьрьн. Шәʼдед дәрәԝ анин данә сәкьнандьне у ԝан гот: «Әва тʼәрка хәбәрдана мьԛабьли ви щийе пироз у Ԛануна Муса накә. Мә жь дәве ԝи бьһист кӧ гот: ‹Исайе Ньсрәте ԝе ве Пʼарьстгәһе һьлшинә у әʼдәтед кӧ Муса данә мә бьгӧһезә›». Һʼәмуйед щьвина гьрәгьрада рʼуньшти гава ль ԝи ньһерʼин, дина хԝә дане рʼәнг-рʼуйе ԝи мина рʼәнг-рʼуйе мьлйакʼәта бу. Һьнге сәрәккʼаһин Стәйфанрʼа гот: «Әв йәк рʼаст ьн?» Әԝи гот: «Гәли бав у бьра, бьбьһен! Гава баве мә Бьраһим һе Мәсопотамйайеда дьма, кӧ һе нәчубу бажаре Һʼаране, Хԝәдейе рʼумәте ԝива хӧйа бу у жерʼа гот: ‹Жь ԝәлат у пьсмамед хԝә бьԛәтә у һәрʼә ԝи ԝәлате кӧ әзе нишани тә кьм›. Һьнге Бьраһим жь ԝәлате кʼьлданийа дәркʼәт ль Һʼаране ма. Пәй мьрьна баве ԝирʼа Хԝәде әԝ ԝаргӧһастә ви ԝәлате кӧ һун ньһа теда дьминьн. Ль ве дәре ԝаргәһ нәда ԝи, нә жи дәԝса ньгәки, ле соз да кӧ ви ԝәлати чаԝа мьлкʼ бьдә ԝи у пәй ԝирʼа жи бьдә зӧрʼәта ԝи, гава кӧ һе зарʼед ԝи тʼӧнәбун. Хԝәде ԝирʼа аһа гот: ‹Зӧрʼәта тәйе ԝәлате хәлԛеда хәрибийеда бә, ԝе ԝан бькьнә хӧлам у чарсьд сали бьдьнә щәфе. Ле диԝана ԝи мьләте кӧ ԝе жерʼа бьбьнә хӧлам› Хԝәде гот, ‹Әзе бькьм, пәй ԝе йәкерʼа әԝе дәрен, ль ви щийи Мьн бьһʼәбиньн›. Паше сьнәт чаԝа нишана пәймане да Бьраһим. Аԝа гава Исһаԛ жерʼа бу, рʼожа һʼәйшта әԝ сьнәт кьр у Исһаԛ жи Аԛуб ӧса кьр, Аԛуб жи һәр донздәһ кӧрʼед хԝәйә бавәʼширед мә ӧса кьрьн. Бавәʼшира жи жь һʼәвсудийе Усьв чаԝа хӧлам фьротьн, кӧ ԝи бьбьнә Мьсьре, ле Хԝәде тʼәви ԝи бу, әԝ жь һʼәму тәнгасийед ԝи хьлаз кьр. Гава әԝ бәр Фьрәԝьне пʼадше Мьсьре сәкьни, Хԝәде кʼәрәм у сәрԝахти дайе, пʼадше жи Усьв сәр Мьсьре у тʼәмамийа мала хԝә кьрә сәрԝер. Һьнге тʼәмамийа ԝәлате Мьсьре у Кәнанеда бу хәлайи у кʼәтьнә охьрме гьран, кал-бавед мә нькарьбун хӧрәк дәстхьстана. Аԛуб кӧ бьһист ль Мьсьре гәньм дәст дькʼәвә, щара пешьн кал-бавед мә шандьн. Щара дӧда Усьв хԝә бьрайед хԝәва да наскьрьне у әʼсьле ԝи Фьрәԝьнва әʼйан бу. Һьнге Усьв шанд гази баве хԝә Аԛуб у тʼәмамийа мала ԝи кьр, кӧ сәрһәв һʼәфте пенщ нәфс бун. Аԛуб бәржери Мьсьре бу, әԝ у кал-бавед мә ԝьр мьрьн. Щьнйазед ԝан бьрьнә Шәхәме кьрьнә ԝи мәзәле кӧ Бьраһим бь ԛимәтәки зива жь кӧрʼед Һаморе Шәхәме кʼьрʼибу. Гава әԝ ԝәхте кӧ Хԝәде бь сонд Бьраһимрʼа соз дабу незик дьбу, щьмәʼт Мьсьреда гәләки зедә бьбу. Ԝи чахи пʼадшаки дьн Мьсьреда рʼабу, кӧ дәрһәԛа Усьвда тьштәк ньзаньбу. Әԝи һʼьләкʼари ль мьләте мә кьр у кал-бавед мә данә щәфе, пʼейи сәр ԝан кьр, кӧ әԝ зарʼокед хԝә бавежьнә дәрва, кӧ нәжин. Ԝи чахи Муса жь дийа хԝә бу, әԝ йәки гәләки бәдәԝ бу у се мәһа мала баве хԝәда мәзьн бу. Гава әԝ һатә авитьне, ԛиза Фьрәԝьн әԝ һьлда бьр, чаԝа кӧрʼ хԝәрʼа мәзьн кьр. Муса тʼәмамийа сәрԝахтийа мьсьрийа һин бу, хәбәрдан у шьхӧле хԝәда жи зор бу. Гава чьл салийа ԝи тʼәмам бу, дьле ԝирʼа дәрбаз бу кӧ сәрики бьдә хушк-бьрайед хԝә зарʼед Исраел. Әԝи йәки исраели дит кӧ йәки мьсьри нәһәԛи ле дькьр, чу пьшта ԝи, һʼәйф һьлда йе мьсьри кӧшт. Муса тʼьре хушк-бьрайед ԝийе фәʼм бькьн, кӧ Хԝәде ԝе бь дәсте ԝи хьлазбуне бьдә ԝан, ле фәʼм нәкьрьн. Рʼожа дьне рʼасти дӧ исраелийа һат кӧ шәрʼ дькьрьн, хԝәст кӧ ԝан ль һәв бинә у гот: ‹Әʼвдно! Һун бьра нә, чьма нәһәԛийе ль һәвдӧ дькьн?› Ле әԝе кӧ нәһәԛи ль һәвале хԝә дькьр, әԝ дәʼф да у готе: ‹Кʼе тӧ сәр мә сәрԝер у һʼакьм кʼьфш кьри? Йан тӧ дьхԝази мьн жи мина ԝи мьсьрийе дӧһӧ бькӧжи?› Гава Муса әв йәк бьһист, рʼәви ԝәлате Мьдйане хәрибийеда ма у ль ԝьр дӧ кӧрʼ жерʼа бун. Пәй чьл салирʼа бәрʼийеда ль чʼийайе Синайе мьлйакʼәтәк нава алава агьре дьрʼийеда ԝива хӧйа бу. Муса кӧ дит, ль сәр ԝе йәке әʼщебмайи ма. Гава незик дьбуйе кӧ бьбинә, дәнге Хӧдан бьһист: ‹Әз Хԝәдейе кал-бавед тә, Хԝәдейе Бьраһим, Исһаԛ у Аԛуб ьм›. Муса дьләрьзи у нәԝерьбу бьньһерʼийа. Һьнге Хӧдан готе: ‹Чарьхед ньгед хԝә бехә, чьмки әԝ щийе кӧ тӧ ле сәкьни йи әʼрде пироз ә. Бәле Мьн щәфе щьмәʼта Хԝә Мьсьреда дит у заринийа ԝан бьһист, пәйа бум кӧ ԝан хьлаз кьм. Дә ньһа ԝәрә Әз тә бьшиньмә Мьсьре›. Әԝ Мусайе кӧ тʼәхсир кьрьн у готьне: ‹Кʼе тӧ сәр мә сәрԝер у һʼакьм кʼьфш кьри?› Хԝәде бь дәсте ԝи мьлйакʼәте кӧ нав дьрʼийеда ԝива хӧйа бу, әԝ чаԝа сәрԝер у хьлазкьр шанд. Әԝи әԝ жь Мьсьре дәрхьстьн, Мьсьре, бәʼра Сор у бәрʼийеда чьл сали нишан у кʼәрәмәт кьрьн. Муса һәма әԝ бу, йе кӧ зарʼед Исраелрʼа гот: ‹Хԝәде ԝе жь нав бьрайед ԝәда пʼехәмбәрәки мина мьн бона ԝә рʼакә›. Муса әԝ бу, йе кӧ бәрʼийеда нава щьмәʼте бу, ль сәре чʼийайе Синайе жи тʼәви ԝи мьлйакʼәти бу, кʼижани тʼәви ԝи кал-бавед мәрʼа хәбәр дьда. Әва әԝ бу, йе кӧ әԝ хәбәред жийине һьлдьдан кӧ бьдә мә. Ле кал-бавед мә нәхԝәстьн гӧрʼа ԝи бькьн, әԝ тʼәхсир кьрьн, дьлед хԝәда вәгәрʼийанә Мьсьре у Һарунрʼа готьн: ‹Мәрʼа хԝәдейа чекә, кӧ пешийа мә кʼәвьн, чьмки әԝ Мусайе кӧ әм жь ԝәлате Мьсьре дәрхьстьн, әм ньзаньн чь һатә сәре ԝи›. Һәма ԝан рʼожада пʼутәки мина голька чекьрьн, ԛӧрбан ԝи пʼутирʼа дан у бона шьхӧле дәсте хԝә кʼеф кьрьн. Һьнге Хԝәде бәре Хԝә жь ԝан гӧһаст у һьшт кӧ әԝ стәйркед әʼзмен бьһʼәбиньн, чаԝа кʼьтеба пʼехәмбәрада ньвисар ә: ‹Гәло чьл сали ԛӧрбан у һʼәди ԝә бәрʼийеда Мьнрʼа дан, Мала Исраел? На, ле ԝә коне Молох хԝәде у стәйрка Рʼәмфан хԝәдейе хԝә һьлдьдан, әв сурәт ьн, йед кӧ ԝә чекьрьн, ԝәки һун ԝан бьһʼәбиньн. Бона ве йәке Әзе ԝә бьгӧһезьмә ԝи алийе ԝәлате Бабилоне›. Коне Шәʼдәтийе бәрʼийеда тʼәви кал-бавед мә бу. Әԝ ӧса һатә чекьрьне, чаԝа Әԝе кӧ Мусарʼа хәбәр да, әʼмьр кьр кӧ мина ԝи шькьле кӧ дитьбу чекә. Паше кал-бавед мә жи әԝ коне кӧ жь пешийа ԝанрʼа мабу, һьлдан анинә ви ԝәлати, ԝи ԝәхте кӧ ԝан тʼәви Йешу жь ԝан мьләта зәфт кьрьбун у Хԝәде жь бәр кал-бавед мәва бәри ԝан мьләта дабу. Әԝ кон ль ԝьр ма һʼәта ԝәхте Даԝьд. Даԝьд жи кʼәрәм жь Хԝәде станд, хԝәст кӧ ханәке бона Хԝәдейе Аԛуб чекә. Ле Сьлеман бона Ԝи ханәк чекьр. Ле бәле Йе Һәри Жорьн малед бь дәста чекьрида наминә, чаԝа пʼехәмбәр дьбежә: ‹Әʼзман кʼӧрсийа Мьн ә, әʼрд жи бьне пʼийед Мьн ә. Һуне чь мале Мьнрʼа чекьн? Хӧдан дьбежә. Йан жи чь щийи бона рʼьһʼәтийа Мьн? Нә дәстед Мьн әв һәр тьшт чекьрьнә? › Сәрһʼьшкно! Кʼафьр у гӧһада кәрʼно! Һун тʼьме мьԛабьли Рʼӧһʼе Пироз дьсәкьньн, кал-бавед ԝә чаԝа бунә, һун жи ӧса нә. Кал-бавед ԝә жь пʼехәмбәра кʼижан нәзерандьн? Әԝед кӧ һе бәреда бона һатьна Йе Рʼаст дьготьн, дькӧштьн. У ва ньһа жи ԝә нәмамийа Ԝи кьр у кӧшт. Ԝәрʼа Ԛанун бь дәсте мьлйакʼәта һатә дайине, ле ԝә хԝәй нәкьр!» Гава әв тьшт дьбьһистьн, һәԝа ԝан дькʼәт у дьранед хԝә сәр ԝи дьчʼьрʼькандьн. Ле Стәйфан бь Рʼӧһʼе Пироз тʼьжи бәре хԝә әʼзменда кьр, рʼумәта Хԝәде у Иса ль мьле Хԝәдейи рʼасте сәкьни дит у гот: «Ва йә әз әʼзмана вәбуйи дьбиньм у Кӧрʼе Мерьв ль мьле Хԝәдейи рʼасте сәкьни!» Ԝи чахи ԝана кьрә ԛирʼин у гӧһед хԝә гьртьн, һʼәму һәврʼа рʼаһьштьнә ԝи, әԝ жь бажер дәрхьстьн, данә бәр кәвьра. Шәʼда жи кʼьнщед хԝә данинә бәр ньгед хортәки наве ԝи Шаԝул. Гава кәвьр давитьне, Стәйфан дӧа кьр у гот: «Хӧдан Иса, рʼӧһʼе мьн бьстинә». Һьнге ԝи чок да, бь дәнге бьльнд кьрә гази: «Хӧдан, ве йәке ванарʼа гӧнә һʼәсаб нәкә». Аһа кӧ гот, һеньжи. Шаԝул жи ԛайл бу, кӧ әԝ бе кӧштьне. Әԝе рʼоже мьԛабьли щьвина Оршәлимеда зерандьнәкә гьран дәстпебу. Пештьри шандийа һʼәмуйед баԝәрмәнд бәлайи тʼопрахед Щьһустане у Самәрйайе бун. Мәрьвед хԝәдехоф Стәйфан дәфьн кьрьн у шинәкә гьран сәр кьрьн. Ле Шаԝул гәләк зьрар дьда щьвине, мал-мал дьгәрʼийа жьн у мер кʼаши дәрва дькьрьн давитьнә кәле. Әԝед бәла-бәлайи бьбун дьгәрʼийан, Мьзгинийа хәбәре дьдан. Филипо жи бәржери бажарәки Самәрйайе бу, ԝанрʼа бона Мәсиһ даннасин дькьр. Әʼлаләте бь дьл гӧһдарийа готьнед Филипо дькьр, гава дьбьһистьн у дьдитьн әԝ кʼәрәмәтед кӧ ԝи дькьрьн. Жь гәләк щьнакʼәтийа рʼӧһʼед һʼәрам бь дәнге бьльнд дькьрьнә ԛирʼин дәрдькʼәтьн у гәләк шьлушәʼт, ньгада сәԛәт ԛәнщ дьбун. Һьнге шабунәкә мәзьн кʼәтә ԝи бажари. Мәрьвәк ԝи бажарида һәбу наве ԝи Шьмһʼун, әԝи һе зува сербази дькьр у самәри әʼщебмайи дькьрьн у хԝә жи данибу дәԝса йәки мәзьн. Тʼәмамийа щьмәʼте жь бьчʼука һʼәта мәзьна бь дьл гӧһ дьданә ԝи у дьготьн: «Әв ә әԝ ‹Ԛәԝата Хԝәдейә мәзьн› кӧ дьбежьн». Бь дьл гӧһ дьданә ԝи, чьмки әԝи зува бь сербазийед хԝә әԝ әʼщебмайи кьрьбун. Ле гава әԝи әԝ мьзгинийа Филипо баԝәр кьр, йа кӧ бона Пʼадшатийа Хԝәде у наве Иса Мәсиһ дьда, һьн мер һьн жьн, һʼәму жи пе аве һатьнә ньхӧмандьне. Шьмһʼун хԝәха жи баԝәр кьр һатә ньхӧмандьне у тʼьме тʼәви Филипо бу. У гава әԝ нишан у кʼәрәмәтед зор кӧ дьбун дьдит, әʼщебмайи дьма. Шандийед Оршәлимеда гава бьһистьн, ԝәки Самәрйайе хәбәра Хԝәде ԛәбул кьрийә, Пәтрус у Йуһʼәнна шандьнә щәм ԝан. Әԝ кӧ бәржер бун, бона ԝан дӧа кьрьн кӧ Рʼӧһʼе Пироз бьстиньн, чьмки һʼәта һьнге һе Рʼӧһʼе Пироз нәһатьбу сәр жь ԝан тʼӧ кәси, тʼәне бь наве Хӧдан Иса һатьбунә ньхӧмандьне. Һьнге Пәтрус у Йуһʼәнна дәстед хԝә данинә сәр ԝан у ԝана Рʼӧһʼе Пироз станд. Гава Шьмһʼун дит, ԝәки бь дәст данина шандийа Рʼӧһʼе Пироз дьстиньн, пʼәрә дьрежи ԝан кьр у гот: «Әви һʼӧкӧми бьдьнә мьн жи, кӧ әз дәсте хԝә дайньмә сәр кʼе, Рʼӧһʼе Пироз бьстинә». Ле Пәтрус ԝирʼа гот: «Зиве тә бьра тʼәви тә бьтʼәрʼьбә! Тә тʼьре пʼешкʼеша Хԝәде пʼәрәти те стандьне! Пʼара тә ве йәкеда тьштәк тʼӧнә, чьмки дьле тә ль бәр Хԝәде нә рʼаст ә. Ньһа жь ԝе хьрабийа хԝә вәгәрʼә, рʼәща жь Хӧдан бькә, бәлки әв нета тәйә хьраб бе бахшандьне, чьмки әз тә нава тәʼлайийа зьрав у ԛәйдед нәһәԛийеда дьбиньм». Шьмһʼун ле вәгәрʼанд у гот: «Һун бона мьн һиви жь Хӧдан бькьн, ԝәки жь әԝ готьнед ԝә тʼӧ тьшт нәйе сәре мьн». Гава ԝана шәʼдәти да у хәбәра Хӧдан хәбәр дан, пашда вәгәрʼийанә Оршәлиме у ль сәр рʼийа хԝә гәләк гӧндед Самәрйайеда жи Мьзгини дьдан. Һьнге мьлйакʼәтәки Хӧдан Филипорʼа гот: «Рʼабә һәрʼә алийе башуре, сәр ԝе рʼийа кӧ жь Оршәлиме бәржери Газзайе дьбә», кӧ чол-бәстәк бу. Әԝ жи рʼабу чу у дина хԝә дайе, ва йә нәмерәки жь Әтйупийе ԝәзире Кәндаке, аԝа готи пʼадша Әтйупийе, кӧ ԝәкʼиле тʼәмамийа хьзна ԝе бу, бона һʼәбандьне һатьбу Оршәлиме. Әԝ жь ԝьр вәдьгәрʼийа у әʼрәба хԝәда кʼьтеба Ишайа пʼехәмбәр дьхԝәнд. Рʼӧһʼ Филипорʼа гот: «Пешда һәрʼә у рʼәх әʼрәбева һәрә». Филипо жи бәзи незик буйе, бьһист кӧ әԝ кʼьтеба Ишайа пʼехәмбәр дьхунә у же пьрси: «Чь кӧ тӧ дьхуни фәʼм дьки?» Әԝи готе: «Әзе чаԝа бькарьбьм фәʼм бькьм, һәгәр йәк мьнрʼа шьровәнәкә?» У һиви жь Филипо кьр кӧ рʼабә рʼәх ԝи рʼуне. Әԝ щийе кӧ ԝи ньвисареда дьхԝәнд әв бу: «Мина пәза бона сәржекьрьне һатә бьрьне у чаԝа бәрха ль бәр ԛӧсесе хԝә накә кʼалин, дәве Хԝә вәнакә. Әԝ ньмьз кьрьн у һәԛе Ԝи же стандьн. Дәрһәԛа зӧрʼәта Ԝида кʼе ԝе гьли кә? Чьмки әʼмьре Ԝи жь рʼубаре дьне һатә һьлдане». Нәмер жь Филипо пьрси у готе: «Әз һиви дькьм мьнрʼа бежә, пʼехәмбәр ван тьшта бона кʼе дьбежә? Бона хԝә йан бона йәки майин?» Филипо рʼабу ԝе ньвисареда дәстпекьр дәрһәԛа Мьзгинийа Исада ԝирʼа шьровәкьр. Гава рʼийа хԝәда дьчун, әԝ гьһиштьнә авәке у нәмер гот: «Ва йә ав, иди чь наһелә кӧ әз бемә ньхӧмандьне?» У нәмер әʼмьр кьр, кӧ әʼрәбе бьдьнә сәкьнандьне, һәр дӧ жи кʼәтьнә аве у Филипо нәмер ньхӧманд. Гава әԝана жь аве дәркʼәтьн, Рʼӧһʼе Хӧдан Филипо һьлда, иди нәмер Филипо нәдит, әԝ әшԛ у ша рʼийа хԝәда чу. Ле Филипо Ашдодеда хӧйа бу у дьгәрʼийа, Мьзгини дьда һәр бажари, һʼәта Ԛәйсәрийе жи һат. Шаԝул жи һʼәта һьнге һе гәф ль шагьртед Хӧдан дьхԝар кӧ ԝан бьдә кӧштьне. Әԝ чу щәм сәрәккʼаһин, дәстурнәʼмә сәр кʼьништед Шаме жь ԝи хԝәстьн, ԝәки һʼӧкӧме ԝи һәбә жьн у меред кӧ ль пәй ве Рʼе дьчьн һәгәр бьбинә, ԝан бьгьрә гьредайи бинә Оршәлиме. Гава дьчу незики Шаме бу, ньшкева жь әʼзмен рʼонайике дора ԝи шәԝԛ да. Әԝ кʼәтә әʼрде у дәнгәк бьһист кӧ ԝирʼа дьгот: «Шаԝул, Шаԝул! Тӧ чьма Мьн дьзерини?» Әԝи жи гот: «Тӧ кʼи йи, Хӧдан?» Ԝи дәнги готе: «Әз әԝ Иса мә, Йе кӧ тӧ дьзерини. Дә ньһа рʼабә һәрʼә бажер, ԝе тәрʼа бе готьне те чь бьки». Әԝ мәрьвед кӧ тʼәви ԝи дьчун сар бун сәкьнин у зар-зьман кʼәтьн. Ԝан әԝ дәнг дьбьһист, ле кәсәк нәдьдитьн. Шаԝул жь әʼрде рʼабу, чʼәʼвед ԝи вәкьри бун, ле тьшт нәдьдит. Һьнге дәсте ԝи гьртьн бьрьнә Шаме. Әԝ се рʼожа кор ма, нә хԝар у нә жи вәхԝар. Шамеда шагьртәки наве ԝи Һананийа һәбу, Хӧдан дитьнокеда һатә бәр чʼәʼва у ԝирʼа гот: «Һананийа!» Әԝи гот: «Әз вьра мә, Хӧдан». Хӧдан ԝирʼа гот: «Рʼабә һәрʼә ԝе кʼуча кӧ жерʼа Рʼаст дьбежьн, мала Щьһудада бона йәки жь Тарсусе наве ԝи Шаԝул бьпьрсә, чьмки ва йә әԝ дӧа дькә, дина хԝә дайе, ва мәрик дитьнокеда һатә бәр чʼәʼва, наве ԝи Һананийа, әԝ һат дәстед хԝә данинә сәр ԝи, кӧ әԝ диса бьбинә». Һананийа ле вәгәрʼанд у гот: «Хӧдан, бона ви мәрьви мьн жь гәләка бьһистийә, ԝәки Оршәлимеда ԝи чьԛас хьраби ль щьмәʼта Тә кьрийә. Вьр жи алийе сәрәкед кʼаһинада һʼӧкӧме ԝи һәйә, һʼәмуйед кӧ гази наве Тә дькьн бьгьрә». Ле Хӧдан жерʼа гот: «Тӧ һәрʼә, чьмки Мьн әԝ чаԝа һащәтәк бьжартийә, ԝәки наве Мьн нәщьһуйа, пʼадша у зарʼед Исраелева бьдә наскьрьне. Әзе Хԝәха нишани ԝи кьм, кӧ чьԛаси гәрәке бона наве Мьн щәфе бькʼьшинә». Һананийа жи чу кʼәтә ԝе мале, дәсте хԝә дани сәр ԝи у готе: «Шаԝул бьра! Хӧдан әз шандьмә, әԝ Исайе рʼева рʼасти тә һат, ԝәки тӧ диса бьбини у бь Рʼӧһʼе Пироз тʼьжи би». Дәстхԝәда жь чʼәʼвед ԝи мина капәке тьшт же ԝарийан, дит, рʼабу пе аве һатә ньхӧмандьне, хԝарьн хԝар у ԛәԝата ԝи һатә щи. Чәнд рʼожа Шаԝул щәм шагьртед Шамеда ма. Дәстхԝәда Шаԝул дәстпекьр кʼьништада бона Иса даннасин кьр у гот кӧ: «Әԝ Кӧрʼе Хԝәде йә». Һʼәмуйед кӧ дьбьһистьн, әʼщебмайи дьман у дьготьн: «Әва әԝ нинә, кӧ Оршәлимеда йед кӧ гази Ви Нави дькьрьн дькӧштьн? У бона ԝе йәке һатийә вьр жи, ԝәки ԝан бьгьрә у бьбә бьдә дәсте сәрәкед кʼаһина?» Ле Шаԝул һинкьрьнеда һе ԛәԝат дьбу, избат дькьр кӧ Мәсиһ һәма Иса йә у дәнге һʼәму щьһуйед Шамеда дьда бьрʼине. Гава гәләк рʼож дәрбаз бун, щьһу шеԝьрин кӧ ԝи бькӧжьн, ле Шаԝул нета ԝанә хьраб һʼәсийа. Әԝ шәв у рʼож бәр дәргәһед бажер бун кӧ ԝи бькӧжьн, ле шагьртед ԝи жи шәв әԝ бь зәмбиле диԝерва дахьстьн. Гава Шаԝул һатә Оршәлиме, ԝи дькьр кӧ тʼәви шагьрта бә, ле һʼәму жь ԝи дьтьрсийан, ԝан баԝәр нәдькьрьн кӧ әԝ жи буйә шагьрт. Һьнге Барнабас әԝ һьлда бьрә щәм шандийа у ԝанрʼа гьли кьр, кӧ әԝи рʼеда чаԝа Хӧдан дитийә у тʼәви ԝи хәбәр дайә, Шамеда жи чаԝа меркʼими наве Иса даннасин кьрийә. Шаԝул Оршәлимеда тʼәви ԝан рʼадьбу-рʼудьньшт у бь наве Иса Хӧдан меркʼими даннасин дькьр. Ӧса жи тʼәви щьһуйед кӧ бь йунани хәбәр дьдан бь хәбәрдане дькʼәтә дәʼԝе, ԝана жи дькьр кӧ әԝ бькӧшта. Гава бьра ве йәке һʼәсийан, әԝ бәржер бьрьнә Ԛәйсәрийе у дәрбази Тарсусе кьрьн. Аԝа щьвин ль тʼәмамийа Щьһустане, Щәлиле у Самәрйайе дәмәке әʼдьлайийеда бу, рʼӧһʼанийеда ава дьбу, бь хофа Хӧдан у бь дьлдайина Рʼӧһʼе Пироз пешда дьчу, баԝәрмәнд зедә дьбун. Пәтрус жи һʼәму щийа дьгәрʼийа у бәржери щәм щьмәʼта Хԝәдейә Лидайе жи бу. Ԝьр мәрьвәк дит наве ԝи Әйнейас, кӧ һʼәйшт салед ԝи бун, шьлушәʼт щи-ньвинада пʼалдайи бу. Пәтрус ԝирʼа гот: «Әйнейас! Иса Мәсиһ тә ԛәнщ дькә. Рʼабә у ньвина хԝә бьдә һәв». Әԝ перʼа-перʼа рʼабу сәр хԝә. Һʼәму бьнәлийед Лидайе у дәшта Шароне әԝ дитьн у бәрбь Хӧдан вәгәрʼийан. Йафайеда кʼӧлфәтәкә шагьрт һәбу, наве ԝе Табитʼа, кӧ «Хәзал» те ԝәлгәрʼандьне. Әва нава һʼәму ԛәнщи у херкьрьнада мабу. Ԝан рʼожада әԝа нәхԝәш кʼәт мьр у әԝ шуштьн ода жорьнда данин. Йафа незики Лидайе бу. Гава шагьрта бьһист кӧ Пәтрус ль ԝьр ә, дӧ мәри шандьн һиви кьрьн у готьн: «Дәрәнги нәбә зу ԝәрә щәм мә». Пәтрус жи рʼабу тʼәви ԝан һат. Гава гьһиштә ԝьр, әԝ бьрьнә ода жорьн, һʼәму жьнәбийа дора ԝи гьрт у бь гьри әԝ кʼьнщ у кьрасед кӧ сахийа хԝәда Хәзале бона ԝан дьрутьбун, нишани ԝи дьдан. Һьнге Пәтрус һʼәму дәрхьстьнә дәрва, чок да дӧа кьр у сәр щьнйазда вәгәрʼийа гот: «Табитʼа! Рʼабә сәр хԝә». Әԝе чʼәʼвед хԝә вәкьрьн, ль Пәтрус ньһерʼи, рʼабу рʼуньшт. Әԝи дәсте хԝә да ԝе рʼакьрә пʼийа, паше гази щьмәʼта Хԝәде у жьнәбийа кьр, әԝ сах бәр ԝан да сәкьнандьне. Әва йәка тʼәмамийа Йафайеда бәла бу у гәләка баԝәрийа хԝә Хӧдан анин. Пәтрус гәләк рʼожа ль Йафайе мала Шьмһʼуне чʼәрмкәрда ма. Ԛәйсәрийеда мәрьвәки наве ԝи Корʼнелйо һәбу, рʼәфа «Ордийа Италйайеда» сәрсәд бу. Әԝ мала хԝәва йәки хԝәйиман у хԝәдехоф бу, щьмәʼта щьһуйарʼа жи гәләк хер дькьрьн у һәр гав бәр Хԝәде дӧа дькьр. Әԝи нивро незики сьһʼәта сьсийа дитьнокеда бәр чʼәʼве хԝә ашкәрә мьлйакʼәтәки Хԝәде дит кӧ һатә щәм ԝи у ԝирʼа гот: «Корʼнелйо!» Әԝи кӧ ль ԝи ньһерʼи, саԝ кʼәтә сәр у гот: «Чь йә Хӧдан?» Мьлйакʼәт готе: «Хԝәде дӧа у херед тә ԛәбул кьрьн у әԝ бир накә. Дә ньһа мәрийа бьшинә Йафайе, гази Шьмһʼун кә, йе кӧ жерʼа Пәтрус дьбежьн. Әԝ чаԝа меван мала Шьмһʼуне чʼәрмкәрда бәр бәʼре дьминә». Гава әԝ мьлйакʼәте кӧ ԝирʼа хәбәр дьда чу, әԝи гази дӧ хӧламед мале у әскәрәки бәрдәстийи хԝәйиман кьр у һәр тьшт ԝанрʼа гьли кьр шандьнә Йафайе. Рʼожа дьне әԝана һе дьчун у незики бажер дьбун, Пәтрус незики сьһʼәта донздәһа рʼабу сәр хени кӧ дӧа бькә. Әԝ бьрʼчи бу хԝәст кӧ нан бьхԝә. Һе гава нан һазьр дькьрьн, мина сьһʼәтәке сәр ԝирʼа дәрбаз бу. У ԝи дина хԝә дайе, ва әʼзман вәбу, тьштәки мина дәстәхана мәзьн һәр чар гошава дардабу, дьһатә хԝаре сәр әʼрде. Сәр ԝе һәр щурʼә һʼәйԝанед чарпʼе, шулькийед әʼрде у тәйрәдед әʼзмен һәбун. Дәнг һатә ԝи: «Рʼабә Пәтрус, сәржекә у бьхԝә». Ле Пәтрус гот: «Һʼаша жь мьн Хӧдан, мьн тʼӧ щар тьштәки һʼәрам йан пʼис нәхԝарийә». Щара дӧда әԝ дәнг һатә ԝи: «Әԝ тьште кӧ Хԝәде һʼәлал кьрийә тӧ һʼәрам һʼәсаб нәкә». Әва йәка се щара ԛәԝьми у һьнге әԝ дәстәхан әʼзменва һатә һьлатьне. Пәтрус һе әʼщебмайи нав хԝәда дьфькьри: «Әв чь дитьнок бу мьн дит?» ва әԝ мәрьвед кӧ Корʼнелйо шандьбун ль бәр дәргәһ сәкьнин у мала Шьмһʼун пьрсин. Дәнг дан готьн: «Шьмһʼуне кӧ жерʼа Пәтрус дьбежьн ль вьр меван ә?» Пәтрус һе сәр ԝе дитьноке дьфькьри, Рʼӧһʼ жерʼа гот: «Ва нә се мәри ль тә дьгәрʼьн. Дә иди рʼабә һәрʼә хԝаре у дӧдьли нәбә тʼәви ԝан һәрʼә, чьмки Мьн әԝана шандьнә». Пәтрус жи пәйа бу, чу щәм ԝан мәрьва у гот: «Әз ьм әԝе кӧ һун ле дьгәрʼьн. Һун бона чь һатьнә?» Ԝан гот: «Корʼнелйойе сәрсәд әм шандьнә. Әԝ мәрьвәки рʼаст, хԝәдехоф у алийе тʼәмамийа мьләте щьһуйада жи хԝәйийе шәʼдәтийа ԛәнщ ә. Әԝи әʼмьр жь мьлйакʼәтәки пироз станд, кӧ тә гази мала хԝә кә у хәбәрдана тә бьбьһе». Һьнге Пәтрус әԝ тʼәглифи мале кьрьн, щийе шәве да ԝан. Рʼожа дьне Пәтрус рʼабу тʼәви ԝан чу, чәнд баԝәрмәндед Йафайе жи тʼәви ԝи чун. Рʼожа дьн гьһиштьнә Ԛәйсәрийе, Корʼнелйо жи гази хԝәхати у достед хԝә кьрьбу у һивийа ԝан бу. Гава Пәтрус дькʼәтә һьндӧрʼ, Корʼнелйо пешийа ԝида чу у кʼәтә бәр ньга у бәр та бу. Ле Пәтрус әԝ рʼакьрә пʼийа у готе: «Рʼабә бьсәкьнә, әз хԝәха жи мәри мә». Ԝирʼа бь хәбәрдане кʼәтә һьндӧрʼ у ль ԝьр гәләк щьвийайи дитьн. Әԝи ԝанарʼа гот: «Һун хԝәха заньн кӧ нә әʼдәте мере щьһу йә, кӧ тʼәви нәщьһуйа рʼабә-рʼуни, йан һәвва һәрʼьн-бен. Ле Хԝәде бәр мьн вәкьр, ԝәки әз тʼӧ кәси пʼис йан һʼәрам һʼәсаб нәкьм. Бона ԝе йәке жи гава гази мьн кьрьн, мьн на-на нәкьр рʼабум һатьм. У әз ньһа дьпьрсьм, ԝә бона чь гази мьн кьрийә?» Корʼнелйо гот: «Бәри чар рʼожа, незики ви чахи мьн дӧайе сьһʼәта сьсийа мала хԝәда дькьр, ньшкева мәрьвәк бь кʼьнще чил-ԛәрԛаш ль бәр мьн сәкьни у гот: ‹Корʼнелйо! Хԝәде дӧайед тә бьһистьн у херед тәйә кьри жи бир анин. Ньһа мәрийа бьшинә Йафайе гази Шьмһʼун кә, йе кӧ жерʼа Пәтрус дьбежьн, әԝ чаԝа меван ль мала Шьмһʼуне чʼәрмкәрда бәр бәʼре дьминә›. Мьн жи перʼа-перʼа шандьнә щәм тә у тә жи ԛәнщ кьр кӧ тӧ һати. Ньһа әм һʼәму жи ль бәр Хԝәде сәкьни нә, кӧ чь жь Хӧдан тәрʼа һатийә әʼмьркьрьне бежи, әм жи бьбьһен». Пәтрус дәст бь хәбәрдане кьр у гот: «Әз ньһа фәʼм дькьм, ԝәки Хԝәде рʼасти жи фьрԛийе накә нава мьләта. Ле жь нав һәр мьләтида, йе кӧ жь Ԝи хоф дькә у рʼастийе дькә ль Ԝи ԛәбул ә. Һун иди рʼьнд заньн кӧ Хԝәде әва хәбәра зарʼед Исраелрʼа шанд, бь Иса Мәсиһ Мьзгинийа әʼдьлайийе да, Йе кӧ Хӧдане һʼәмуйа йә. Ӧса жи заньн жь Щәлиле гьрти тʼәмамийа Щьһустанеда чь ԛәԝьми, пәй ԝе ньхӧмандьнерʼа, йа кӧ Йуһʼәнна даннасин кьр, чаԝа Хԝәде Исайе Ньсрәте бь Рʼӧһʼе Пироз у ԛәԝате кʼьфш кьр, кӧ бь ԛәнщикьрьне гәрʼийа у һʼәмуйед кӧ бьн бьндәстийа мирещьнда бун ԛәнщ кьрьн, чьмки Хԝәде тʼәви Ԝи бу. Әм хԝәха шәʼдед ԝан һʼәму тьшта нә, йед кӧ Әԝи тʼопрахед Щьһустане у Оршәлимеда кьрьн. Паше Әԝ дарва дардакьрьн у кӧштьн, ле Хԝәде Әԝ рʼожа сьсийа жь мьрьне рʼакьр, да әʼйанкьрьне, нә кӧ һʼәму щьмәʼтерʼа, ле ԝан шәʼдарʼа, йед кӧ пешийе жь алийе Хԝәдеда һатьбунә бьжартьне, аԝа готи мәрʼа, йед кӧ пәй мьрьн-рʼабуна Ԝирʼа тʼәви Ԝи хԝарьн у вәхԝарьн. У Әԝи тʼәми ль мә кьр, ԝәки әм щьмәʼтерʼа даннасин кьн у шәʼдәтийе бьдьн кӧ Әԝ ә һʼакьме мьрийа у зендийа жь Хԝәдеда кʼьфшкьри. Һʼәму пʼехәмбәр шәʼдәтийа Ԝи дьдьн, кӧ һʼәмуйед баԝәрийа хԝә Ԝи биньн, ԝе бь сайа наве Ԝи бахшандьна гӧна бьстиньн». Пәтрус һе әв тьшт дьготьн, Рʼӧһʼе Пироз һатә сәр һʼәмуйед кӧ әв готьн дьбьһистьн. Баԝәрмәндед әʼсьле хԝәда щьһу, йед кӧ тʼәви Пәтрус һатьбун, зәндәгьрти ман, кӧ Рʼӧһʼе Пироз чаԝа пʼешкʼеш сәр нәщьһуйада жи бари, чьмки бьһистьн кӧ ԝана бь зьмана хәбәр дьдан у шькьри дьданә Хԝәде. Һьнге Пәтрус гот: «Иди кʼи дькарә нәһелә кӧ әвана пе аве бенә ньхӧмандьне, йед кӧ мина мә Рʼӧһʼе Пироз жи стандьн?» Ԝи чахи әʼмьр кьр кӧ бь наве Иса Мәсиһ бенә ньхӧмандьне. Паше ԝана һиви жь ԝи кьр кӧ чәнд рʼожа ль ԝьр бьминә. Шандийа у баԝәрмәндед алийе Щьһустанеда дьман, бьһистьн кӧ нәщьһуйа жи хәбәра Хԝәде ԛәбул кьрьнә. Гава Пәтрус һәвраз чу Оршәлиме, баԝәрмәндед әʼсьле хԝәда щьһу әԝ нәһәԛ дькьрьн у дьготьн: «Тӧ чуйи щәм мәрьвед нәсьнәткьри у тә тʼәви ԝан нан хԝарийә!» Һьнге Пәтрус дәстпекьр бь һур-гьли ԝанрʼа шьровәкьр у гот: «Мьн бажаре Йафайеда дӧа дькьр, мина сьһʼәтәке сәр мьнрʼа дәрбаз бу. У мьн дитьнокеда ль бәр чʼәʼве хԝә дит, дәрданәкә мина дәстәхана мәзьн һәр чар гошава жь әʼзмен дардабу һатә хԝаре, ль бәр мьн сәкьни. Әз һе зурʼ бьбум мьн ле дьньһерʼи, мьн дина хԝә дайе, ва нә һʼәйԝанед чарпʼе, рʼәʼԝьр, шулькийед әʼрде у тәйрәдед әʼзмен. Һьнге мьн дәнгәк бьһист кӧ мьнрʼа гот: ‹Рʼабә Пәтрус, сәржекә у бьхԝә›. Ле мьн гот: ‹Һʼаша жь мьн, Хӧдан, тʼӧ щар тьштәки һʼәрам йан пʼис нәкʼәтийә дәве мьн›. Щара дӧда әԝи дәнги жь әʼзмен ль мьн вәгәрʼанд у гот: ‹Әԝ тьштед кӧ Хԝәде һʼәлал кьрийә, тӧ һʼәрам һʼәсаб нәкә›. Әва йәка се щара ԛәԝьми у һәр тьшт пашда әʼзменва һатә кʼьшандьне. Һәма ԝи чахи се мәрийед кӧ жь Ԛәйсәрийе шандьбунә пәй мьн бәр мала кӧ әм теда дьман сәкьнин. Рʼӧһʼ мьнрʼа гот: ‹Тʼәви ԝан һәрʼә, дӧдьли нәбә›. Әв һәр шәш бьра жи тʼәви мьн һатьн у әм чунә мала ԝи мәрьви. Әԝи мәрʼа гот, кӧ чаԝа мала хԝәда мьлйакʼәт дитийә, кӧ сәкьни йә ԝирʼа готийә: ‹Мәрийа бьшинә Йафайе у гази Шьмһʼун кә, йе кӧ жерʼа Пәтрус дьбежьн. Әԝе тәрʼа ԝан готьна бежә, бь кʼижана те у тʼәмамийа нәфәред мала хԝәва хьлаз би›. У мьн һәма дәст бь хәбәрдане кьр, Рʼӧһʼе Пироз һатә сәр ԝан, чаԝа пешийе һатә сәр мә. Ԝи чахи һатә бира мьн әԝ хәбәра кӧ Хӧдан готьбу: ‹Йуһʼәнна бь аве ньхӧманд, ле һуне бь Рʼӧһʼе Пироз бенә ньхӧмандьне›. Аԝа һәгәр Хԝәде хут әԝ пʼешкʼеш да ԝан, кʼижан да мә, гава мә баԝәрийа хԝә Хӧдан Иса Мәсиһ ани, әз кʼи бум кӧ мьԛабьли Хԝәде бьсәкьнийама?» Гава кӧ әв йәка бьһистьн, дәнге хԝә бьрʼин, шькьри данә Хԝәде у готьн: «Ԝәки ӧса йә Хԝәде әва мәщала да нәщьһуйа жи, кӧ жь гӧнәкьрьне вәгәрʼьн у бьжин». Әԝед кӧ жь дәст ԝе зерандьна пәй кӧштьна Стәйфанрʼа бәла-бәлайи бьбун, гьһиштьнә һʼәта Финикйайе, Ԛӧбрьсе у Әнтакйайе у тʼәне щьһуйарʼа хәбәр даннасин дькьрьн. Ле нава ԝанда һьнәк жь мәрьвед Ԛӧбрьсе у Курене һәбун, кӧ гава чун кʼәтьнә Әнтакйайе, йунанарʼа жи хәбәр дьдан, Мьзгинийа Хӧдан Иса дьдан. Дәсте Хӧдан ԝанрʼа бу, гәләка баԝәр кьр, бәрбь Хӧдан вәгәрʼийан. Бона ԝан әв дәнг-бәʼса гьһиштә щьвина Оршәлиме, Барнабас шандьнә Әнтакйайе. Гава гьһиште у кʼәрәма Хԝәде дит, ша бу у дьл дьда ԝан һʼәмуйа кӧ бь тʼәмамийа дьле хԝәва Хӧданрʼа амьн бьминьн. Барнабас мәрьвәки ԛәнщ, Рʼӧһʼе Пироз у баԝәрийева тʼьжи бу. Гәләк щьмәʼт сәр баԝәрмәндед Хӧданда зедә бу. Һьнге Барнабас дәрбази Тарсусе бу, кӧ ль Шаԝул бьгәрʼә, әԝ дит ани Әнтакйайе. Әԝана һәврʼа тʼәмамийа саләке тʼәви щьвине дьщьвийан у гәләк щьмәʼт һин дькьрьн. Пешийе Әнтакйайеда шагьрт «мәсиһи» һатьнә навкьрьне. Ԝан рʼожа жь Оршәлиме пʼехәмбәр бәржери Әнтакйайе бун. Жь ԝан йәк, кӧ наве ԝи Һагабо бу, рʼабу бь Рʼӧһʼ әʼлам кьр, кӧ ԝе тʼәмамийа дьнйайеда бьбә хәлайикә гьран. У ӧса жи әва хәлайа һена Клаԝдйо Ԛәйсәрда бу. Һьнге шагьртед Әнтакйайе ԛьрар кьрьн кӧ жь дәсте кʼева чьԛас те аликʼарийе бона баԝәрмәндед Щьһустане бьшиньн. Ӧса жи кьрьн, бь дәсте Барнабас у Шаԝул бәрпьрсийаред щьвинерʼа шандьн. Ԝан чахада Һеродәс пʼадша дәсте хԝә һьлда сәр һьнәкед жь щьвине кӧ ԝан бьдә щәфе, Аԛубе бьре Йуһʼәнна бь шур да кӧштьне. Әԝи дина хԝә дайе, кӧ кьрьна ԝи ль щьһуйа хԝәш һат, рʼабу Пәтрус жи да гьртьне. Әв йәк рʼожед Щәжьна Нане Шкәвада ԛәԝьмин. Гава Пәтрус гьрт, авитә кәле спартә чар тʼахьма, кӧ һәр тʼахьмәк чар-чар әскәр бун, ԝәки мьԛати ԝи бьн. Нета ԝи әԝ бу кӧ пәй Щәжьна Дәрбазбунерʼа ԝи дәрхә бәр щьмәʼте, диԝана ԝи бькә. Иди Пәтрус кәледа гьрти бу, ле щьвине бона ԝи бь дьл у щан, бь дӧа һиви жь Хԝәде дькьр. Ԝе шәве, кӧ сьбәтьре Һеродәс дьхԝәст әԝ дәрхьста бәр щьмәʼте, бона диԝанкьрьне, Пәтрус бь дӧ зьнщира гьредайи нава дӧ әскәрада рʼазайи бу, нобәдара жи бәр дери нобәдарийа кәле дькьр. Ньшкева мьлйакʼәтәки Хӧдан бәр сәкьни, рʼонайе ԝи щийи шәԝԛ да у ньчʼандә кʼеләка Пәтрус, әԝ һʼьшйар кьр у готе: «Зу рʼабә». Зьнщир жь дәстед ԝи кʼәтьн. Һьнге мьлйакʼәт ԝирʼа гот: «Пьшта хԝә гьредә у чарьхед хԝә сәр ньгед хԝәва кә». Әԝи жи ӧса кьр. Паше ԝирʼа гот: «Ԛапʼуте хԝә бавежә сәр хԝә у пәй мьн ԝәрә». Пәтрус жи дәркʼәт да пәй ԝи чу, ле ньзаньбу әԝ кьрьна мьлйакʼәт рʼаст ә, ԝи тʼьре хәԝне дьбинә. Әԝана жь нобәдаред пешьн у дӧда дәрбаз бун, һʼәта дәргәһе һʼәсьни һатьн, кʼижани дәрдьхьстә нав бажер. Дәргәһ хԝәха ль бәр ԝан вәбу, жь ԝьр дәркʼәтьн кʼучәке дәрбаз бун, ньшкева мьлйакʼәт жь ԝи ԛәтийа. Һьнге Пәтрус сәр һʼьше хԝәда һат, гот: «Әз ньһа рʼаст заньм кӧ Хӧдан мьлйакʼәте Хԝә шанд, әз жь дәсте Һеродәс у жь ԝан һʼәму тьштед кӧ щьһу һивийе бун хьлаз кьрьм». Гава әв йәк фәʼм кьр, чу мала Мәрйәма дийа Йуһʼәннайе кӧ жерʼа Марԛос дьготьн, кӧ ль ԝьр гәләк щьвийабун дӧа дькьрьн. Пәтрус дәргәһ хьст, щарикә наве ԝе Рʼода чу гӧһе хԝә да сәр. Дәнге Пәтрус нас кьр, жь шабуна дәргәһ вәнәкьр, ле рʼәви чу һьндӧрʼ гот: «Пәтрус ль бәр дәргәһ сәкьни йә!» Ԝана ԝерʼа гот: «Тә һʼьше хԝә ӧнда кьрийә?» Ле әԝа сәр йа хԝә бу, кӧ рʼаст ә. Ԝана гот: «Ԛәй мьлйакʼәте ԝи йә?» Пәтрус жи сәрһәв-сәрһәв дәргәһ дьхьст. Гава вәкьрьн әԝ дитьн, һʼьше сәре ԝан чу. Әԝи дәсте хԝә һʼәжанд кӧ кәрʼ бьн у гьли кьр чаԝа Хӧдан әԝ жь кәле дәрхьстийә, ӧса жи гот: «Ве йәке Аԛуб у хушк-бьрайед дьнрʼа жи бежьн». Хԝәха жи рʼабу чу щики дьн. Сьбәһ кӧ сафи бу, әскәр гәләки тʼәвиһәв бун, гәло чь һатә сәре Пәтрус? Гава Һеродәс ль ԝи гәрʼийа у әԝ нәдит, жь әскәра һәр тьшт пьрси у әʼмьр кьр кӧ бенә кӧштьне. Паше Һеродәс жь Щьһустане бәржери Ԛәйсәрийе бу у ԝьр ма. Һеродәс ль мьләтед Сур у Сайдайе рʼабьбу хәзәбе. Әвана жи һәврʼа рʼабун һатьн, Бьласто ԝәкʼиле мала Һеродәс анинә рʼайе у һиви кьрьн кӧ ль һәв бен, чьмки бажаред ԝан жь ԝәлате ԝи пʼадшайи хӧрәк дьстандьн. Рʼожәкә кʼьфшкьри Һеродәс кʼьнще пʼадшатийе ле, ль һәрәма диԝане рʼуньшт у бь щьмәʼти ԝанарʼа хәбәр дьда. Әʼлаләте жи дькьрә ԛирʼин у дьгот: «Әва дәнге хԝәдеки йә, нә йе мәрийа йә!» Дәстхԝәда мьлйакʼәтәки Хӧдан ԝи хьст, бона кӧ ԝи шькьри нәда Хԝәде, кӧрми бу мьр. Ле хәбәра Хԝәде бәрфьрә у зедә дьбу. Барнабас у Шаԝул гава ԛӧльхе хԝә ԛәдандьн, жь Оршәлиме вәгәрʼийан, Йуһʼәннайе кӧ жерʼа Марԛос дьготьн жи тʼәви хԝә анин. Щьвина Әнтакйайеда чәнд пʼехәмбәр у дәрсдар һәбун, Барнабас, Шьмһʼуне кӧ жерʼа Нигер дьготьн, Лукйойе жь Курене, Мәнайине кӧ тʼәви Һеродәсе сәрԝер мәзьн бьбу у Шаԝул. Әвана кӧ нава һʼәбандьна Хӧданда бун у рʼожи дьгьртьн, Рʼӧһʼе Пироз ԝанрʼа гот: «Барнабас у Шаԝул Мьнрʼа бона ԝи шьхӧле кӧ Мьн гази ԝан кьрийә щӧдә кьн». Ԝи чахи рʼожи гьртьн, дӧа кьрьн, дәстед хԝә данинә сәр ԝан у әԝ шандьн. Аԝа әвана кӧ жь Рʼӧһʼе Пироз һатьнә шандьне, бәржери Селукйайе бун у жь ԝьр бь гәмийе дәрбази Ԛӧбрьсе бун. Гава гьһиштьнә Сәламисе, кʼьништед щьһуйада хәбәра Хԝәде даннасин дькьрьн у Йуһʼәнна жи кʼомәкдаре ԝан бу. Әԝ тʼәмамийа ԝе гьраве гәрʼийан, гьһиштьнә һʼәта Пафосе. Ль ԝьр пʼехәмбәрәки щьһуйайи дәрәԝ у сербаз дитьн кӧ наве ԝи Барйешу бу. Әва йәки жь бәрдәстийед Сәргийо Паԝлосе ԝәли бу. Сәргийо Паԝлос жи мәрьвәки аԛьл бу, әви гази Барнабас у Шаԝул кьр, кӧ хәбәра Хԝәде бьбьһе. Ле Барйешуйе сербаз, аԝа готи бь йунани Елумас, мьԛабьли ԝан рʼабу у дькьр кӧ ԝәли жь баԝәрийе бьхальфинә. Һьнге Шаԝуле кӧ жерʼа Паԝлос жи дьбежьн, бь Рʼӧһʼе Пироз тʼьжи ль ԝи сербази ньһерʼи у готе: «Һәй мьхәнәто у һʼәму фелбазийава тʼьжийо! Щәԝрьке мирещьн! Дьжмьне тʼәмамийа рʼастийе! Те һʼәта кʼәнге тʼәрка хальфандьна рʼийед Хӧданә рʼаст нәки? Ва дәсте Хӧдан ньһа ԝе сәр тә гьран бә, те кор би у дәмәке тәʼве нәбини». У дәстхԝәда мьж у думан һатә сәр ԝи, вьрда-ԝеда дькʼәт рʼебәр дьхԝәстьн. Ԝи чахи ԝәли кӧ әв йәк дит, баԝәр кьр, сәр ԝе һинкьрьна бона Хӧдан әʼщебмайи ма. Һьнге Паԝлос һәвалед хԝәва бь гәмийе жь Пафосе рʼекʼәтьн һатьнә Пәргейа Памфилйайе. Йуһʼәнна ль ԝьр жь ԝан ԛәтийа, вәгәрʼийа Оршәлиме. Әԝана жи жь Пәрге чунә Әнтакйа Пьсидйайе, рʼожа шәмийе кʼәтьнә кʼьниште рʼуньштьн. Пәй хԝәндьна Ԛанун у ньвисаред пʼехәмбәрарʼа сәрԝеред кʼьниште йәк шандьнә щәм ԝан у готьн: «Гәли бьра, һәгәр готьнәкә ԝә һәйә кӧ дьл бьдьнә щьмәʼте, кʼәрәм кьн бежьн». Паԝлос рʼабу, дәсте хԝә һʼәжанд у гот: «Гәли щьмәʼта Исраеле у нәщьһуйед кӧ жь Хԝәде дьтьрсьн гӧһдар бьн! Хԝәдейе ви мьләте Исраеле кал-бавед мә бьжартьн у мьләт ль ԝәлате Мьсьре хәрибийеда зедә кьр. Бь дәсте зор әԝ жь ԝьр дәрхьстьн, чьл сали бәрʼийеда ль ԝан сәбьр кьр. Ԝәлате Кәнанеда кʼока һʼәфт мьләта ани, әʼрде ԝан чаԝа щи-ԝар да щьмәʼта Хԝә. Һʼәта һьнге чарсьд пенщи сал дәрбаз бу. Жь ԝьр шунда һʼакьм данә ԝан һʼәта һена Самуел пʼехәмбәр. Паше пʼадша хԝәстьн, Хԝәде чьл сали йәки жь әʼшира Бьнйамин, Шаԝуле кӧрʼе Кис да ԝан. Гава әԝ авит, Даԝьд сәр ԝан кьрә пʼадша, кӧ бона ԝи шәʼдәти да у гот: ‹Мьн Даԝьде Йеша мәрик дьле Хԝәрʼа дит, ԝе хԝәстьна Мьн гьшки бинә сери›. Жь зӧрʼәта ԝи Хԝәде анәгори созе Хԝә Исраелрʼа Хьлазкьрәк рʼакьр, һәма хут Иса. Бәри һатьна Ԝи, пешийе Йуһʼәнна тʼәмамийа мьләте Исраелерʼа даннасин кьр, кӧ жь гӧнәкьрьне вәгәрʼьн у бенә ньхӧмандьне. Гава Йуһʼәнна шьхӧле хԝә сәр һәвда ани, гот: ‹Һун бона мьн чаԝа дьфькьрьн, әз кʼи мә? Әз нә Әԝ ьм, бона кʼижани һун дьфькьрьн. Ле ва йә Әԝ пәй мьн те, кӧ әз нә һежа мә бәне чарьхед ньгед Ԝи вәкьм›. Гәли бьра, зарʼед хун-ԛьнета Бьраһим у нәщьһуйед нава ԝәдайә кӧ жь Хԝәде дьтьрсьн, мәрʼа әв хәбәра кӧ пе хьлаз дьбьн һатә шандьне. Бьнәлийед Оршәлиме у сәрԝеред ԝан Иса чаԝа Хьлазкьр нас нәкьрьн, ле гава диԝана Ԝи кьрьн, готьнед пʼехәмбәрайә кӧ һәр шәми дьхуньн анинә сери. Нәһәԛийа бона кӧштьне жи сәр Ԝи нәдитьн, ле диса һиви жь Пилато кьрьн кӧ Ԝи бьдә кӧштьне. Гава һәр тьштед кӧ бона Ԝи ньвисар бун анинә сери, жь дар анинә хԝаре кьрьнә тʼьрбе. Ле Хԝәде Әԝ жь мьрьне рʼакьр у гәләк рʼожа Хԝә ԝанва да хӧйакьрьне, кʼижан жь Щәлиле тʼәви Ԝи һатьбунә Оршәлиме. Ньһа жи әԝ ль бәр щьмәʼте шәʼдед Ԝи нә. У әм ве Мьзгинийе дьдьнә ԝә: Чь кӧ Хԝәде кал-бавед мәрʼа соз дабу, Әԝи бона мә кьр, аԝа готи зарʼед ԝанрʼа, гава Иса жь мьрьне рʼакьр. Чаԝа Зәбура дӧдада жи ньвисар ә: ‹Тӧ Кӧрʼе Мьн и, Тӧ иро Мьнрʼа буйи›. Бона ве йәке кӧ Әԝ жь мьрьне рʼакьр у иди Әԝ тʼӧ щар нарʼьзә, Хԝәде аһа готийә: ‹Әзе ԝан дӧа-дьрозгед пирозә амьн у Даԝьдрʼа создайи сәр ԝәда бьбариньм›. Зәбурәкә дьнда жи дьбежә: ‹Тӧ наһели Пирозе Тә бьрʼьзә›. Бәле Даԝьд зәмане хԝәда ԛьрара Хԝәдерʼа хӧламти кьр мьр у гьһиштә пешийед хԝә, бәдәна ԝи рʼьзи. Ле Әԝе кӧ Хԝәде жь мьрьне рʼакьр нәрʼьзи. Ньһа бьра әв йәк ԝәва әʼйан бә, гәли бьра, кӧ бь сайа Иса ԝәрʼа бона бахшандьна гӧна те даннасинкьрьне. У жь ԝан һәр тьштед кӧ һун бь Ԛануна Муса нькарьбун бесущ буна, ньһа кʼи кӧ баԝәрийа хԝә Иса бинә ԝе бесущ бә. Һаш жь хԝә һәбьн, нәбә әв тьште кӧ пʼехәмбәра готийә бе сәре ԝә: ‹Бьньһерʼьн кʼӧбар-бабахно, әʼщебмайи бьн у бәтавәбьн, чьмки Әзе рʼожед ԝәда кьрәки бькьм, кьрәки ӧса, кӧ йәк ԝәрʼа бежә жи һуне баԝәр нәкьн› ». Гава Барнабас у Паԝлос жь ԝьр дәркʼәтьн, һиви жь ԝан кьрьн, кӧ шәмийа дьн жи бона ԝе йәке ԝанрʼа хәбәр дьн. Гава щьвина кʼьниште бәла бу, гәләк щьһу у жь нәщьһуйед кӧ һатьбунә сәр баԝәрийа щьһуйа пәй Паԝлос у Барнабас дьчун. Ԝанарʼа хәбәр дьдан у дьл дьданә ԝан, ԝәки тʼьме нава кʼәрәма Хԝәдеда бьминьн. Рʼожа шәмийа дьн незики тʼәмамийа бажер щьвийа, кӧ хәбәра Хӧдан бьбьһе. Гава щьһуйа әԝ әʼлаләт дит, жь һʼәвсудийе мьԛабьли готьнед Паԝлос сәкьнин у әԝ беһӧрмәт кьрьн. Һьнге Паԝлос у Барнабас меркʼими готьн: «Гәрәке пешийе хәбәра Хԝәде ԝәрʼа бьһата хәбәрдане, ле һун кӧ хәбәра Хԝәде тʼәхсир дькьн у хԝә лайиԛи жийина һʼәта-һʼәтайе накьн, ва әм вәдьгәрʼьнә бәрбь нәщьһуйа. Чьмки Хӧдан аһа әʼмьри мә кьр: ‹Мьн Тӧ кьри рʼонайа нәщьһуйа, ԝәки һʼәта сәре дьнйайе бьби мәщала хьлазбуне› ». Гава йед нәщьһу әв йәк бьһистьн, ша бун шькьри дьданә готьна Хӧдан. У әԝед кӧ бона жийина һʼәта-һʼәтайе кʼьфшкьри бун, баԝәр кьрьн. Хәбәра Хӧдан тʼәмамийа ԝәлетда бәла бу. Ле щьһуйа һелан данә кʼӧлфәтед хԝәдебаԝәрә хԝәйиԛәдьр, тʼәви гьрәгьред бажер, мьԛабьли Паԝлос у Барнабас рʼакьрьн у жь синоред хԝә дәрхьстьн. Ԝана жи тʼоза ньгед хԝә сәр ԝанда даԝшанд, чунә Ԛонйайе у шагьрт бь шабуне у Рʼӧһʼе Пирозва тʼьжи бун. Ԛонйайеда жи әв йәк мина һәр щар ԛәԝьми: Паԝлос у Барнабас кʼәтьнә кʼьништа щьһуйа, ӧса хәбәр дан, ԝәки әʼлаләтәкә гьран жь щьһу у нәщьһуйа баԝәр кьрьн. Ле щьһуйед кӧ баԝәр нәкьрьн дьле нәщьһуйа ԛьлԛьландьн у рʼакьрьнә мьԛабьли бьра. Аԝа әԝана гәләк ԝәхт ль ԝьр ман, меркʼими сәр Хӧдан хәбәр дьдан, Хӧдан жи хәбәра кʼәрәма Хԝә избат дькьр, бь дәстед ԝан нишан у кʼәрәмәт дьданә кьрьне. Ле дӧтирәти кʼәтә бажер, һьнәк ль алийе щьһуйа бун, һьнәк жи ль алийе шандийа. Һьнге һьнәкә жь нәщьһуйа у щьһуйа тʼәви сәрԝеред хԝә ԛьрар кьрьн кӧ ԝан беһӧрмәт кьн у бьдьнә бәр кәвьра, ле әԝ пе һʼәсийан рʼәвинә Листрайе у Дербе, бажаред Лукайонйа, ӧса жи дор-бәред ԝан. У ль ԝан дәра Мьзгини дьдан. Листрайеда йәки жь зькмакийеда ньгада шьлушәʼт рʼуньшти бу, кӧ тʼӧ щара нәгәрʼийабу. Әԝи жи гӧһдарийа Паԝлос дькьр, Паԝлос ль ԝи ньһерʼи у гава дит баԝәрийа ԝи бона ԛәнщбуне һәйә, бь дәнге бьльнд готе: «Рʼабә сәр ньгед хԝә рʼаст бьсәкьнә!» Әԝи жи банзда сәр хԝә, дәстпекьр гәрʼийа. Әʼлаләте гава кьрьна Паԝлос дит, дәнге хԝә һьлдан бь лукайони готьн: «Хԝәде дьлԛе инсенда һатьнә хԝаре щәм мә!» Барнабасрʼа Зәԝс готьн, Паԝлосрʼа жи Һәрмес, чьмки хәбәрданеда йе пеш әԝ бу. Кʼаһине Зәԝсе кӧ пʼарьстгәһа ԝи ль пешбәри бажер бу, га бь кʼофийава анинә бәр дәргәһ, хԝәст кӧ тʼәви әʼлаләте шандийарʼа бькә ԛӧрбан. Ле гава шандийа, Барнабас у Паԝлосва әв йәк бьһист, кʼьнщед хԝә ԛәлаштьн у рʼәвинә нава әʼлаләте, кьрьнә гази у готьн: «Әʼвдно! Һун чьма ве йәке дькьн? Әм жи бьнйатʼа хԝәда мәринә мина ԝә нә, Мьзгинийе дьдьнә ԝә, кӧ һун жь ԝан тьштед пʼучʼ вәгәрʼьн бәрбь Хԝәдейе сах бен, Йе кӧ әʼрд у әʼзман, бәʼр у һʼәмуйед нава ԝанда әʼфьрандийә. Әԝи зәмане бьһӧрида һьшт кӧ һәр мьләт рʼийа хԝәда һәрʼә. Ле Хԝәха Хԝә бе шәʼдәти нәһьшт, ԛәнщи ԝәрʼа кьр, жь әʼзмен баран баранд, рʼәз жи дәмсалада данә ԝә, бь хӧрәква һун тʼер кьрьн у шабун жи кьрә дьле ԝә». Бь ван готьна ԝана бь зорәке әʼлаләт зәфт кьр, кӧ ԛӧрбана бона ԝан нәдьн. Һьнге жь Әнтакйайе у Ԛонйайе щьһу һатьн, әʼлаләт данә алийе хԝә, Паԝлос данә бәр кәвьра, жь бажер кʼаши дәр кьрьн, ԝан тʼьре мьрийә. Ле гава шагьрта дора ԝи гьрт, әԝ рʼабу кʼәтә бажер у рʼожа дьне тʼәви Барнабас рʼабу чу Дербе. Ԝана кӧ ԝи бажарида Мьзгини дан у гәләк кьрьнә шагьрт, вәгәрʼийанә Листрайе, Ԛонйайе у Әнтакйайе. Дьле шагьрта дьшьдандьн у дьл дьданә ԝан, кӧ баԝәрийеда бьминьн у дьготьн: «Гәрәке әм бь гәләк щәфакʼьшандьне бькʼәвьнә Пʼадшатийа Хԝәде». Ԝана бона һәр щьвинәке бәрпьрсийар кʼьфш кьрьн, бь рʼожи дӧа кьрьн у әԝ спартьнә ԝи Хӧдане кӧ баԝәрийа хԝә же анибун. Әԝ нава Пьсидйайерʼа дәрбаз бун, паше һатьнә Памфилйайе. Пәргеда жи хәбәра Хԝәде даннасин кьрьн, бәржер чунә Әнталйайе. Жь ԝьр жи бь гәмийе чунә Әнтакйайе, ԝи щийе кӧ спарти кʼәрәма Хԝәде бьбун бона ԝи шьхӧле кӧ сәр һәвда анин. Гава һатьн, щьвин ль һәв щьвандьн у ԝанрʼа гьли кьрьн, кӧ Хԝәде тʼәви ԝан чь тьшт кьрьнә у чаԝа дәргәһе баԝәрийе бәр нәщьһуйа жи вәкьр. Ль ԝьр гәләк ԝәхт тʼәви шагьрта ман. Һьнәк жь Щьһустане бәржери Әнтакйайе бьбун у бьра һин дькьрьн дьготьн: «Һәгәр һун ль гора әʼдәте Муса нәйенә сьнәткьрьне, һун хьлаз набьн». Нава ԝан у Паԝлос, Барнабасда гәләк дәʼԝ-доз пешда һат, һьнге бьра ԛьрар кьр кӧ бона ве пьрсе Паԝлос у Барнабас, ӧса жи жь ԝан чәнд кәс һәвраз һәрʼьнә Оршәлиме, щәм шанди у бәрпьрсийара. Щьвине кӧ әԝ вәрʼекьрьн, әԝана Финикйе у Самәрйайева дәрбаз бун у һʼәму баԝәрмәндарʼа бона вәгәрʼандьна нәщьһуйа гьли дькьрьн, бь ве йәке әԝ гәләки ша кьрьн. Гава гьһиштьнә Оршәлиме, щьвине, шандийа у бәрпьрсийара әԝ ԛәбул кьрьн у чь кӧ Хԝәде тʼәви ԝан кьрьбу ԝанрʼа гьли кьрьн. Ле һьнәк баԝәрмәндед жь кʼомәла ферьсийа рʼабун готьн: «Гәрәке ван сьнәт кьн у ԝанарʼа бежьн, кӧ Ԛануна Муса хԝәй кьн». Шанди у бәрпьрсийар щьвийан, кӧ бона ве йәке бьшеԝьрьн. Пәй гәләк дәʼԝ-дозерʼа Пәтрус рʼабу сәр пʼийа у ԝанрʼа гот: «Гәли бьра! Һун хԝәха заньн кӧ Хԝәде рʼожед пешьнда әз нав ԝәда бьжартьм, кӧ нәщьһу хәбәра Мьзгинийе жь дәве мьн бьбьһен у баԝәр бькьн. Хԝәдейе кӧ дьла занә да избаткьрьне, кӧ нәщьһу жи Ԝива ԛәбул ьн, гава Рʼӧһʼе Пироз да ԝан жи, чаԝа да мә. Нава мә у ԝанда тʼӧ фьрԛи данәни, бь баԝәрийе дьле ԝан паԛьж кьр. Иди чьма һун Хԝәде дьщерʼьбиньн, нирәки ӧса датиньнә сәр стуйе шагьрта, кӧ нә кал-бавед мә карьбунә бьбьн, нә жи мә? Әв йәк аһа набә, ле әм баԝәр дькьн, кӧ чаԝа әм бь кʼәрәма Хӧдан Иса хьлаз дьбьн, ӧса жи әԝ». Һьнге тʼәмамийа щьвате дәнге хԝә бьрʼи у гӧһе хԝә данә сәр готьнед Барнабас у Паԝлос кӧ Хԝәде бь дәстед ԝан чьԛас нишан у кʼәрәмәт нава нәщьһуйада кьрьбун. Гава әԝана кәрʼ бун, Аԛуб дәнг һьлда у гот: «Гәли бьра! Гӧһ бьдьнә мьн. Шьмһʼун гьли кьр, кӧ чаԝа пешийе Хԝәде рʼәʼма Хԝә ль нәщьһуйа кьрьбу, кӧ жь нава ԝан щьмәʼтәке дәрхә, ԝәки наве Ԝи һьлдьнә сәр хԝә. Ве йәкерʼа готьнед пʼехәмбәра жи ль һәв дьгьрьн, чаԝа ньвисар ә: ‹Жь вьр шунда Әзе вәгәрʼьм, коне Даԝьди кʼәти диса вәгьрьм, чи ԝи жи кӧ хьраб буйә Әзе чекьм у ԝи диса бьдьмә рʼагьртьне, ԝәки һʼәрче мәрьвед майин у һʼәму нәщьһуйед кӧ наве Мьн сәр ԝан ә, ль Хӧдан бьгәрʼьн. Әԝ Хӧдане кӧ ван тьшта һе жь дәԝред бәреда әʼйан кьрийә дьбежә›. Бона ве йәке жи әз аһа рʼе терʼа дьбиньм кӧ әм зәʼмәте нәдьнә әԝед кӧ жь нәщьһуйа бәрбь Хԝәде тен, ле әм нәʼмәке ԝанрʼа бьньвисьн, кӧ һʼәвза хԝә жь ԝан ԛӧрбанед кӧ пʼутарʼа тенә дайине бькьн, ӧса жи жь бенамусийе, гоште мьрар у хуне. Фәʼмдари йә кӧ һе ԛӧрʼнед дәрбазбуйида Ԛануна Муса һәр бажарида те һинкьрьне у һʼәму рʼожед шәмийа кʼьништада ԝе дьхуньн». Һьнге ль шандийа, бәрпьрсийара у тʼәмамийа щьвине хԝәш һат, кӧ жь нава хԝәда чәнд мәрьва бьбьжерьн у тʼәви Паԝлос у Барнабас бьшиньнә Әнтакйайе. Әв бун йед кӧ һатьнә шандьне: Щьһудайе кӧ жерʼа дьготьн Барсабо у Силас. Нава баԝәрмәндада әвана әʼйан бун. Бь дәсте ԝан әв нәʼмә шандьн аһа ньвисар: «Әм бьрайед ԝәйә шанди у бәрпьрсийар сьлава ль ԝә бьрайед жь нәщьһуйайә Әнтакйайе, Сурйайе у Киликйайе дькьн. Мә бьһистийә кӧ жь нава мә һьнәк дәркʼәтьнә, кӧ мә хԝәха тʼәми нәданә ԝан, ле ԝан бь хәбәред хԝә зәʼмәт данә ԝә у фькьред ԝә тʼәвиһәв кьрьнә. Бона ве йәке ль тʼәмамийа шеԝьра щьвина мә хԝәш һат, кӧ әм мәрьва бьбьжерьн тʼәви бьрайед мәйә дәлал Барнабас у Паԝлос бьшиньнә щәм ԝә, йед кӧ әʼмьре хԝә данә наве Хӧдане мә Иса Мәсиһ. Аԝа әм Щьһуда у Силас дьшиньн, ԝәки әԝ жи ван тьшта бь дәве хԝә ԝәрʼа бежьн. Ль Рʼӧһʼе Пироз хԝәш һат, ӧса жи ль мә, кӧ тʼӧ бари нәдьнә сәр мьле ԝә, пештьри ван тьштед һʼәԝщә: Дури ԛӧрбанед пʼута, хуне, мьрарийе у бенамусийе бьн. Һәгәр һун хԝә жь ван тьшта хԝәй кьн, ԛәнщ ә. Һун хԝәш бьн, дә ма хатьре ԝә». Һьнге әԝ вәрʼекьрьн, бәржер чунә Әнтакйайе щьмәʼт щьвандьн, нәʼмә данә ԝан. Гава хԝәндьн, бона ԝе дьлдайине пʼьрʼ ша бун. Щьһуда у Силас жи кӧ пʼехәмбәр бун, бь гәләк хәбәра дьл данә баԝәрмәнда у әԝ шьдандьн. Гәләк ԝәхт ль ԝьр ман, паше баԝәрмәнда әԝ бь хер у сьламәт пашда шандьнә щәм ԝан, йед кӧ әԝ шандьбун. Паԝлос у Барнабас жи Әнтакйайеда дьман, тʼәви гәләкед майин хәбәра Хӧдан һин дькьрьн у даннасин дькьрьн. Чәнд рʼожа шунда Паԝлос готә Барнабас: «Ԝәрә әм вәгәрʼьн сәрики бьдьнә ԝан хушк-бьра, кʼижанарʼа мә һʼәму бажарада хәбәра Хӧдан даннасин кьрийә, дина хԝә бьдьне кʼа һʼале ԝан чаԝа йә». Барнабас дьхԝәст Йуһʼәннайе кӧ жерʼа Марԛос дьготьн жи тʼәви хԝә бьбьрана, ле Паԝлос рʼе терʼа нәдьдит, йе Памфилйайеда жь ԝан ԛәтийа у тʼәви ԝан шьхӧл нәкьр тʼәви хԝә бьбьрана. Һьнге йа ԝан ль һәв нәгьрт, әв бу мәʼни жь һәв ԛәтийан. Барнабас Марԛос һьлда бь гәмийе чу Ԛӧбрьсе, Паԝлос жи Силас бьжарт у жь бьра спарти кʼәрәма Хӧдан бун, рʼекʼәтьн чун. Ль Сурйайе у Киликйайе дьгәрʼийан, щьвин дьшьдандьн. Һьнге Паԝлос һатә Дербе у Листрайе. Ль ԝьр шагьртәк һәбу наве ԝи Тимотʼейо, кӧрʼе кʼӧлфәтәкә щьһуйә баԝәрмәнд бу, ле баве ԝи йунан бу. Баԝәрмәндед Листрайе у Ԛонйайе һьндава ԝида ԛәнщ хәбәр дьдан. Паԝлос хԝәст ԝи тʼәви хԝә бьбә у бона ԝан щьһуйед ԝан дәра гьрт әԝ сьнәт кьр, чьмки һʼәмуйа жи заньбу кӧ баве ԝи йунан ә. Гава бажарарʼа дәрбаз дьбун, әԝ тʼәмийед кӧ шандийа у бәрпьрсийаред Оршәлиме ԛьрар кьрьбун, дьданә баԝәрмәнда кӧ хԝәй кьн. Аԝа щьвин жи баԝәрийеда дьшьдийан у рʼож бь рʼож һʼәсабе ԝан зедә дьбу. Нава синоред Фьригйа у Галатйайеда гәрʼийан, чьмки Рʼӧһʼе Пироз нәһьшт кӧ ԛәза Асйайеда хәбәра Хԝәде бежьн. Гава незики Мисйайе бун, кьрьн кӧ һәрʼьнә Битенйайе, ле Рʼӧһʼе Иса изьн нәда ԝан у бәр Мисйайева дәрбаз бун бәржер чунә Тройайе. Шәв Паԝлос дитьнокеда бәр чʼәʼве хԝә дит, йәки мәкәдони сәкьни бу һиви жь ԝи дькьр у дьгот: «Ԝәрә Мәкәдонйайе али мә бькә». Гава ԝи әԝ дитьнок дит, мә дәстхԝәда хԝәст кӧ һәрʼьнә Мәкәдонйайе. Мә фәʼм кьр, кӧ Хԝәде мә дьшинә ԝьр, ԝәки Мьзгинийе бьдьнә ԝан. Әм жь Тройайе бь гәмийе дәркʼәтьн рʼаст чунә Самотрахе, рʼожа дьне Нейаполисе. Жь ԝьр жи чунә Филипйайе, бажарәки нәʼйийа Мәкәдонйайейи әʼйан, ӧса жи кӧ бажарәки Рʼомайе йә. Ԝи бажарида әм чәнд рʼожа ман. Рʼожа шәмийе әм жь дәргәһе бажер дәркʼәтьн чунә дәве чʼем, әԝ дәр чаԝа әм дьфькьрин, щийе дӧа бу. Мә рʼуньшти тʼәви кʼӧлфәтед щьвийайи хәбәр дьда, кʼӧлфәтәкә хԝәдебаԝәр жь бажаре Тийатирайе, наве ԝе Лидйа кӧ кʼьнщед ширк дьфьротьн, гӧһдари дькьр. Хӧдан дьле ԝе вәкьр кӧ гӧһ бьдә готьнед Паԝлос. Гава әԝ нәфәред хԝәва пе аве һатьнә ньхӧмандьне, һиви жь мә кьр у гот: «Һәгәр һун мьн баԝәрмәнда Хӧдан һʼәсаб дькьн, кʼәрәм кьнә мала мьн, ль ԝьр бьминьн». У зор ль мә кьр әм бьрьн. Щарәке әм дьчунә щийе дӧакьрьне, щарик рʼасти мә һат, кӧ рʼӧһʼе кʼочʼәктийе перʼа бу, әве бь ԝе кʼочʼәктийе хԝәйед хԝәрʼа пʼьрʼ кʼар дани. Әва пәй Паԝлос у мә кʼәтьбу, дькьрә ԛирʼин у дьгот: «Әв мәрьвана хӧламед Хԝәдейе Һәри Жорьн ьн, кӧ ԝәрʼа бона рʼийа хьлазбуне даннасин дькьн!» Әв йәка әԝе гәләк рʼожа дькьр, һʼәта кӧ Паԝлос ащьз бу, вәгәрʼийа у ԝи рʼӧһʼирʼа гот: «Бь наве Иса Мәсиһ әʼмьри тә дькьм жь ԝе дәре!» У перʼа-перʼа әԝ жь ԝе дәркʼәт. Гава хԝәйед ԝе дитьн кӧ гӧмана кʼара ԝан һатә бьрʼине, Паԝлос у Силас гьртьн, кʼаши мәйдана бажер щәм сәрԝера кьрьн, әԝ бьрьнә бәр сәрдаред Рʼомайе у готьн: «Әв мәрьвана щьһу нә у бажаре мә тʼәвиһәв дькьн. Әʼдәте ӧса мә бажарванед Рʼомайе һин дькьн, кӧ нә мәрʼа щайиз ә ԛәбул кьн, нә жи бькьн». Әʼлаләте һʼьщуми сәр ԝан кьр, сәрдара жи кʼьнщед сәр ԝан ԛәлаштьн у әʼмьр кьрьн кӧ ԝан бьдьнә бәр шьва. Пәй гәләк леданерʼа авитьнә кәле у әʼмьри сәрԝере кәле кьрьн, кӧ рʼьнд мьԛатийе ԝан бькә. Әԝи кӧ әв әʼмьр станд, әԝ авитьнә зьндане у ньгед ԝан ԛәйдада шьдандьн. Незики ниве шәве Паԝлос у Силас дӧа дькьрьн у әшԛи Хԝәде дьстьран, гьртийа жи гӧһе хԝә данибунә сәр ԝан. Ньшкева әʼрд ԛайим һʼәжийа, һʼәта кӧ һʼимед кәле жи чун-һатьн, дәстхԝәда һʼәму дәри вәбун, ԛәйд-зьнщиред һʼәмуйа һатьнә вәкьрьне. Гава сәрԝере кәле һʼьшйар бу у дәред кәле вәкьри дитьн, шур кʼьшанд кӧ хԝә бькӧжә, чьмки ԝи тʼьре гьрти рʼәвинә. Ле Паԝлос бь дәнге бьльнд кьрә гази у гот: «Тʼӧ зийане нәдә әʼмьре хԝә, әм һʼәму жи вьра нә!» Әԝи чʼьра хԝәст, рʼәви һьндӧрʼ, ләрьзи хԝә авитә бәр Паԝлос у Силас. Әԝ дәрхьстьн у гот: «Әз хӧлам! Әз чь гәрәке бькьм кӧ хьлаз бьм?» Ԝана жи гот: «Баԝәрийа хԝә Хӧдан Иса бинә, те нәфәред хԝәва хьлаз би». Һьнге хәбәра Хӧдан ԝи у ԝан һʼәмуйарʼа готьн, йед кӧ мала ԝида бун. Һәма ԝе шәве сәрԝере кәле әԝ бьрьн, бьринед ԝан шуштьн у перʼа-перʼа әԝ нәфәред хԝәва пе аве һатьнә ньхӧмандьне. Әԝ анинә мала хԝә, сьфрә ль бәр ԝан дани у тʼәмамийа нәфәред хԝәва ша бун, кӧ баԝәрийа хԝә Хԝәде анин. Гава сьбәһ сафи бу, сәрдара запьдед хԝә шандьн у готьн: «Ԝан мәрьва бәрʼдә». Сәрԝере кәле әв йәк Паԝлосрʼа гот: «Сәрдар мәри шандьнә ԝәки һун бенә бәрʼдане. Ньһа рʼабьн бь хер у сьламәт һәрʼьн». Ле Паԝлос ԝанрʼа гот: «Әм, бажарванед Рʼомайе, бе диԝан бь щьмәʼти данә бәр шьва авитьнә кәле! У ньһа дьхԝазьн бь дьзива мә дәрхьн? На, әв йәк набә, бьра хԝәха бен мә дәрхьн». Запьда әв хәбәрана гиһандьнә сәрдара. Гава кӧ бьһистьн әԝ бажарванед Рʼомайе нә, тьрсийан һатьн хԝә авитьнә ԝан, паше әԝ дәрхьстьн у һиви кьрьн кӧ жь бажаре ԝан һәрʼьн. Әԝ жи жь кәле дәркʼәтьн чунә мала Лидйайе, ль ԝьр хушк-бьра дитьн, дьл данә ԝан у паше рʼекʼәтьн чун. Әԝана Әмфиполис у Аполонйайева дәрбаз бун һатьнә Тʼесалонике, ԝи щийе кӧ кʼьништа щьһуйа һәбу. Паԝлос жи мина әʼдәте хԝә чу нава ԝан у се рʼожед шәмийе ԝанарʼа дькʼәтә хәбәрдане, жь ньвисара шьровәдькьр у ԝанрʼа избат дькьр, кӧ гәрәке Мәсиһ щәфа бькʼьшанда у жь мьрьне рʼабуйа у дьгот: «Әв Исайе кӧ әз ԝәрʼа даннасин дькьм, әԝ Мәсиһ ә». Һьнәкед жь ԝан баԝәр кьрьн хԝә ль Паԝлос у Силас гьртьн, ӧса жи әʼлаләтәкә хԝәдебаԝәред йунан у гәләк кʼӧлфәтед хԝәйиԛәдьр. Ле жь щьһуйа һьнәка жь һʼәвсудийе чәнд мәрьвед бекерә нәрʼаст щьвандьн, кьрьнә ԛалмә-ԛалм, бажар тʼәвиһәв кьрьн у һʼьщуми сәр мала Йасон кьрьн, дьхԝәстьн Паԝлос у Силас банина бәр щьмәʼте. Гава әԝ нәдитьн, Йасон тʼәви чәнд бьрава кʼаши щәм сәрԝеред бажер кьрьн, дькьрьнә ԛирʼин дьготьн: «Әԝед дьнйа тʼәвиһәв кьрьнә гьһиштьнә вьра жи у Йасон әԝ ԛәбул кьрьнә мала хԝә! Әвана һʼәму жи мьԛабьли әʼмьред Ԛәйсәр дьчьн у дьбежьн: ‹Пʼадшаки дьн һәйә, наве ԝи Иса йә›». Бь ван готьна әʼлаләт у сәрԝеред бажер тʼәвиһәв кьрьн. Һьнге жь Йасон у йед майин кʼәфил стандьн, әԝ бәрʼдан. Һәма чаԝа тәʼри кʼәтә әʼрде, бьра Паԝлос у Силас шандьнә Бәройайе. Әԝ кӧ гьһиштьнә ԝьр, чунә кʼьништа щьһуйа. Әв щьһу жь йед Тʼесалонике сәрԝахттьр бун, хәбәра Хԝәде бь дьл у щан ԛәбул кьрьн у һәр рʼож ньвисарада кʼур дьбун, кʼа әв тьшт ӧса нә. Жь ԝана гәләка баԝәр кьр, ӧса жи гәләк кʼӧлфәтед йунанә хԝәйиԛәдьр у мер жи нә кем бун. Гава щьһуйед Тʼесалонике бьһистьн кӧ Паԝлос хәбәра Хԝәде Бәройайеда жи даннасин дькә, һатьн ԝьр жи һелан данә әʼлаләте у әԝ тʼәвиһәв кьрьн. Ԝи чахи бьра Паԝлос дәстхԝәда шандьнә бәр бәʼре, ле Силас у Тимотʼейо Бәройайеда ман. Әԝед кӧ Паԝлос вәрʼедькьрьн, әԝ һʼәта Атʼинайе бьрьн, паше жь Паԝлос тʼәми стандьн кӧ Силас у Тимотʼейо зу һәрʼьн бьгьһижьнә ԝи, хԝәха жи пашда вәгәрʼийан. Гава Атʼинайеда Паԝлос һивийа ԝан бу, дьле ԝи нә рʼьһʼәт бу, чьмки дит бажар нава пʼутпʼарьстийеда бу. Аԝа әԝи кʼьништеда щьһу у йунанед хԝәдебаԝәррʼа у ль мәйдане бажерда жи һәр рʼож рʼасти кʼе дьһат ԝанрʼа дькʼәтә хәбәрдане. Чәнд философед епикури у стойхи ԝирʼа кʼәтьнә һʼӧщәте у һьнәка дьгот: «Әви дәвбәлайи бетʼәԝшә чь дьхԝазә бежә?» Һьнәка жи дьгот: «Ӧса те кʼьфше, кӧ әва дәрһәԛа хԝәдейед хәрибда даннасин дькә». Аһа дьготьн, чьмки әԝи бона Иса у рʼабуна мьрийа даннасин дькьр. Ԝи чахи әԝ һьлдан бьрьнә бәр щьвина Арйопагойе у готьн: «Әм дькарьн бона ԝе һинкьрьна нуйә кӧ тӧ даннасин дьки бьзаньбьн? Тӧ тьштед хәриб мә дьди бьһистьне, ләма жи әм дьхԝазьн мәʼна ԝан бьзаньбьн». Һʼәму атʼини у хәрибед кӧ ԝьр дьман, тьштәки майинва мьжул нәдьбун, пештьри тьштед ну готьне йан бьһистьне. Һьнге Паԝлос бәр щьвина Арйопагойеда сәкьни у гот: «Гәли атʼинийа! Әз дина хԝә дьдьме, кӧ һун жь һʼәму алийава гәләки һʼәбандьнева мьжул ьн. Чьмки гава әз гәрʼийам, мьн дина хԝә да һʼәбандьнед ԝә, мьн горигәһәк дит кӧ сәр ԝе ньвисар бу ‹ХԜӘДЕЙЕ НӘНАСРʼА›. Аԝа Әԝе кӧ һун нас накьн дьһʼәбиньн, әз бона Ԝи ԝәрʼа даннасин дькьм. Хԝәдейе кӧ әв дьнйа у һʼәмуйед нава ԝеда әʼфьрандийә, Әԝ Хӧдане әʼрд у әʼзмен ә у пʼарьстгәһед бь дәста чекьрида наминә, нә жи чʼәʼве Ԝи дәсте мәрьва йә кӧ хьзмәткʼарийа Ԝи бькьн, чаԝа Йәки һʼәԝще тьштәки, ле Әԝ хԝәха әʼмьр, бине у һәр тьшти дьдә һʼәмуйа. Һʼәму мьләтед дьнйайе жь хунәки хӧльԛанд, кӧ сәр рʼуйе тʼәмамийа дьнйайе бьжин. Әԝи зәман у синоред щи-мьскʼәна ԝанрʼа кʼьфш кьрьн. Әԝи әв йәкана кьрьн, ԝәки мәрьв ль Ԝи бьгәрʼьн, бәлки бьпʼәлиньн бьбиньн. Ле Әԝ Хԝәде жь мә һәр кәси нә дур ә жи, чьмки ‹әм бь Ԝи дьжин, дьмәшьн у һәнә›. Чаԝа чәнд шайиред ԝә жи готьнә: ‹Әм рʼаст зарʼед Ԝи нә›. Аԝа кӧ әм жь Хԝәде бунә, гәрәке әм Хԝәде аһа нәшьбиньн мина зерʼ, зив, йан кәвьре кӧ бь һʼьш у һостатийа мәрьва һатьнә кʼоландьне. Хԝәде дина Хԝә нәдайә һʼәму зәманед кӧ мәрьвайийе Әԝ нас нәкьрийә, ле ньһа һәр дәра тʼәми ль һʼәму мәрьва дькә, кӧ жь гӧнәкьрьне вәгәрʼьн. Чьмки Әԝи рʼожәк кʼьфш кьрийә, кʼижанеда ԝе диԝана дьне рʼаст бь дәсте Мәрьвәки бькә, Йе кӧ Әԝи кʼьфш кьрийә. Хԝәде әв йәкана һʼәмуйарʼа данә избаткьрьне, гава Әԝ мәрьв жь мьрьне рʼакьр». Гава бона рʼабуна мьрийа бьһистьн, һьнәк пе кʼәнийан, ле һьнәка жи гот: «Бона ԝе йәке әме щарәкә дьн жь тә бьбьһен». У Паԝлос жь нав щьвина ԝан дәркʼәт чу. Ле һьнәка хԝә ль ԝи гьрт, баԝәр кьрьн. Нава ԝанда бун Дийонисйойе әндәме Арйопагойе у кʼӧлфәтәкә наве ԝе Дамәрис, тʼәви һьнәкед майин. Жь ԝьр шунда Паԝлос жь Атʼине рʼекʼәт һатә Корьнтʼе. Ль ԝьр йәки щьһу наве ԝи Акила дит, буйина хԝәда жь Понтосе. Әва тʼәви кʼӧлфәта хԝә Прьскилайе ну жь Италйайе һатьбу, чьмки Ԛәйсәр Клаԝдйо әʼмьр кьрьбу, кӧ һʼәму щьһу жь Рʼоме дәркʼәвьн. Паԝлос чу щәм ԝан, щәм ԝан ма у тʼәви ԝан хәбьти, чьмки пʼеше ԝан йәк бу, кон чедькьрьн. Әԝ һʼәму рʼожед шәмийа кʼьништада щьһу у йунанарʼа дькʼәтә хәбәрдане, әԝ дьданә баԝәркьрьне. Гава Силас у Тимотʼейо жь Мәкәдонйайе һатьн, Паԝлос бь хирәт тʼәмамийа ԝәхте хԝә да һинкьрьна Хәбәре у щьһуйарʼа шәʼдәти дьда кӧ Мәсиһ, Иса йә. Гава әԝ мьԛабьли ԝи рʼабун у әԝ беһӧрмәт кьрьн, әԝи кʼьнще хԝә даԝшанд у готә ԝан: «Хуна ԝә сәре ԝә бә, әз бесущ ьм. Жь вьр шунда әзе һәрʼьмә щәм нәщьһуйа». Әԝ һьнге жь ԝьр чу кʼәтә мала йәки наве ԝи Тито Йусто. Әԝ мәрьвәки нәщьһу бу, ле хԝәдебаԝәр бу, мала ԝи кʼеләка кʼьниште бу. Кьриспойе сәрԝере кʼьниште жи нәфәред хԝәва баԝәрийа хԝә Хӧдан ани у жь корьнтʼийа гәләка кӧ бьһистьн, баԝәр кьрьн у пе аве һатьнә ньхӧмандьне. Шәвәке Хӧдан дитьнокеда һатә бәр чʼәʼве Паԝлос у готе: «Нәтьрсә, хәбәр дә у хԝә кәрʼ нәкә. Чьмки Әз тʼәви тә мә у кәсәке бәр тә рʼанәбә зийане нәдә тә, чьмки гәләк щьмәʼта Мьн ви бажарида һәйә». Әԝ ль ԝе дәре саләке у шәш мәһа ма, әԝ һини хәбәра Хԝәде дькьрьн. Һена ԝәлийе Галийойе Ахайайеда щьһу бунә йәк, һʼьщуми сәр Паԝлос кьрьн у бьрьнә бәр диԝане готьн: «Әва щьмәʼте һин дькә, кӧ нә ль гора ԛануне Хԝәде бьһʼәбиньн». Гава Паԝлос ԝе дәстпекьра хәбәр да, Галийо щьһуйарʼа гот: «Һәгәр гьли бона нәһәԛийе у хьрабийе буйа, щьһуно, дьбу кӧ мьн гӧһдарийа ԝә бькьра, ле һәгәр пьрс сәр хәбәра, нава у ԛануна ԝә йә, һун хԝәха бьньһерʼьн. Әз нахԝазьм бьбьмә һʼакьме ван тьшта». У әԝ жь диԝанхане дәрхьстьн. Һьнге һʼәмуйа Состенисе сәрԝере кʼьниште гьртьн, ль бәр диԝанхане кʼӧтан, ле ԛәт хәма Галийо жи нибу. Паԝлос гәләк рʼожа диса ль ԝьр ма, паше хатьре хԝә жь баԝәрмәнда хԝәст, бь гәмийе чу алийе Сурйайе. Прьскила у Акила жи тʼәви ԝи бун. Әԝи Кәнхерйайеда пʼорʼе хԝә кӧрʼ кьрьбу, чьмки ад-ԛьраркьри бу. Әԝ гьһиштьнә Әфәсе, Прьскила у Акила ль ԝьр һьштьн, хԝәха кʼәтә кʼьниште щьһуйарʼа кʼәтә хәбәрдане. Ԝана һиви жь ԝи кьр, кӧ һьнәки дьреж ль ԝьр бьминә, әԝ ԛайл нәбу. Ле гава хатьре хԝә жь ԝан хԝәст, гот: «Әзе диса сәр ԝәда бем, һәгәр Хԝәде һʼьз бькә». Бь гәмийе жь Әфәсе чу. Гава гьһиштә Ԛәйсәрийе, һәвраз чу Оршәлиме сьлав да щьвине, паше бәржер чу Әнтакйайе. Гава һьнәк ԝәхт ль ԝьр ма, рʼабу бәрева кʼәтә ԝәлате Галатйа у Фьригйа, һʼәму шагьрт баԝәрийеда дьшьдандьн. Щьһуки наве ԝи Аполо, буйина хԝәда жь Скәндәрйайе, һатә Әфәсе. Әва готьнбежәки сәрхԝә у ньвисаред пирозда занәки зор бу. Әԝ Рʼийа Хӧданда һинбуйи бу, агьре хирәте сери кʼәтьбу бона Иса рʼаст хәбәр дьда у һин дькьр, ле тʼәне ньхӧмандьна Йуһʼәнна заньбу. Әви дәстпекьр кʼьништеда меркʼими хәбәр да. Ле гава Прьскилайе у Акила хәбәрдана ԝи бьһистьн, әԝ бьрьнә щәм хԝә, һе рʼаст Рʼийа Хԝәде ԝирʼа шьровәкьрьн. Аполо кӧ хԝәст һәрʼә Ахайайе, бьра дьл данә бәр у шагьртарʼа жи нәʼмәк ньвисин кӧ ԝи ԛәбул кьн. Гава гьһиштә ԝьр, әԝ гәләки кери ԝан һат, йед кӧ бь кʼәрәма Хԝәде бьбунә баԝәрмәнд. Чьмки бь щьмәʼти хәбәрданеда йа ԝи ль сәр йа щьһуйа дькʼәт, бь ньвисаред пироз дьда избаткьрьне, кӧ Мәсиһ, Иса йә. Гава Аполо һе Корьнтʼеда бу, Паԝлос щийе жорьнрʼа дәрбаз бу бәржери Әфәсе бу у ль ԝьр чәнд шагьрт дитьн у жь ԝан пьрси: «Гава ԝә баԝәр кьр, ԝә Рʼӧһʼе Пироз станд?» Ԝана гот: «Мә ԛәт нәбьһистийә жи кӧ Рʼӧһʼе Пироз һәйә». Әԝи ԝанрʼа гот: «Ле һун бь чь һатьнә ньхӧмандьне?» Ԝана гот: «Бь ньхӧмандьна Йуһʼәнна». Паԝлос гот: «Йуһʼәнна бона гӧнәвәгәрʼандьне ньхӧманд у щьмәʼтерʼа гот: ‹Йе кӧ пәй мьнрʼа те баԝәрийа хԝә Ԝи биньн›, аԝа готи Иса». Гава әв йәк бьһистьн, бь наве Хӧдан Иса һатьнә ньхӧмандьне. У гава Паԝлос дәстед хԝә данинә сәр ԝан, Рʼӧһʼе Пироз һатә сәр ԝан, бь зьмана хәбәр дан у пʼехәмбәрти кьрьн. Әвана ԝәкә донздәһ мәрийа бун. Паԝлос кʼәтә кʼьниште, се мәһа меркʼими хәбәр дьда, бона Пʼадшатийа Хԝәде ԝанрʼа дькʼәтә хәбәрдане у әԝ дьданә баԝәркьрьне. Ле гава һьнәкә сәрһʼьшк мьԛабьл дәркʼәтьн у ль бәр щьмәʼте Рʼийа Хӧдан беһӧрмәт дькьрьн, Паԝлос жь ԝан ԛәтийа, шагьрт башԛә кьрьн у һәр рʼож дәрсхана Тиранода ԝанрʼа дькʼәтә хәбәрдане. Әве йәке дӧ сала кʼьшанд, һʼәта кӧ һʼәму щьһу у йунанед кӧ ԛәза Асйайеда дьман, Хәбәра Хӧдан бьһистьн. Хԝәде бь дәсте Паԝлос гәләк кʼәрәмәтед зор дькьрьн, һʼәта кӧ әԝ дәстмал у шалькед кӧ Паԝлос ле дькʼәтьн нәхԝәшарʼа дьбьрьн, әԝ ԛәнщ дьбун у рʼӧһʼед хьраб дәрдькʼәтьн. Чәнд щьһуйед гәрʼок һәбун кӧ хԝә дабунә щьндәрхьстьне, ԝан дькьр кӧ сәр йед кӧ рʼӧһʼед хьраб нава ԝанда һәбун, пе наве Хӧдан Иса бәри ԝан дьн у дьготьн: «Әм пе ԝи Исайе кӧ Паԝлос даннасин дькә бәри ԝә дьдьн». Әва йәка һәр һʼәфт кӧрʼед Скеԝайе сәрәккʼаһинәки щьһуйа дькьрьн. Щарәке рʼӧһʼе хьраб ль ԝан вәгәрʼанд у гот: «Әз Иса нас дькьм, бона Паԝлос жи заньм, ле һун кʼи нә?» Һьнге әԝ мәрьве кӧ рʼӧһʼе хьраб теда бу, банзда сәр ԝан, ԛәԝата ԝи ԝан һʼәмуйада чу әԝ ӧса кʼӧтан, ԝәки әԝ жь ԝе мале тәʼзи у бьриндар рʼәвин. Бона ве йәке һʼәму щьһу у йунанед кӧ Әфәседа дьман пе һʼәсийан. Тьрс кʼәтә сәр ԝан һʼәмуйа у наве Хӧдан Иса бьльнд дьбу. Гәләк баԝәрмәнд жи дьһатьн гӧнед хԝә дьданә рʼуйе хԝә у кьред хԝә дьготьн. Йед сербазийева жи кӧ мьжул дьбун, гәләка кʼьтебед хԝә тʼоп дькьрьнә щики у ль бәр һʼәмуйа дьшәԝьтандьн. Ԛимәте ԝан һʼәсаб кьрьн, пенщи һʼәзар зив дәркʼәт. Бь ви аԝайи Хәбәра Хӧдан бь зорайи һе пешда дьчу у ԛәԝат дьбу. Гава әв тьшт бун, Паԝлос ԛьрар кьр кӧ Мәкәдонйайе у Ахайайева дәрбаз бә һәрʼә Оршәлиме у гот: «Пәй чуйина ԝьрарʼа гәрәке әз һәрʼьм Рʼоме жи бьбиньм». Әԝи дӧ кʼомәкдаред хԝә Тимотʼейо у Ерасто шандьнә Мәкәдонйайе у әԝ һьнәки жи ль ԛәза Асйайе ма. Ԝан чахада бона Рʼийа Хӧдан гәләки шәрʼ-дәʼԝ пешда һат. Йәки зивкәр һәбу наве ԝи Димитрийо. Әви пʼарьстгәһед хԝәдейа наве ԝе Артәмис щурʼе йа әʼдәтида бь зив бьчʼук чедькьрьн у гәләк кʼар һостарʼа дани. Әԝи гази ԝан һʼәму һоста, ӧса жи йед мина хԝәйийе ви пʼешәйи кьрьн у гот: «Гәли һәвала! Һун заньн кӧ кʼара мә ви шьхӧлида йә. Һун жи дьбьһен у дьбиньн кӧ әви Паԝлоси нә кӧ тʼәне Әфәседа, ле баԝәрийа ԝә һәбә тʼәмамийа ԛәза Асйайеда жи сәре гәләк щьмәʼта тʼьжи кьрийә жь рʼе дәрхьстийә у дьбежә: ‹Әԝ хԝәдейед кӧ бь дәста чекьри нә, әԝ нә хԝәде нә›. Зийана ԝе нә тʼәне әԝ ә кӧ пʼеше мә те беһӧрмәткьрьне, ле пʼарьстгәһа Артәмис хԝәдейа мәзьн ԝе бәр тьштәки нәйе һʼәсабе у ԝе ԛәдьре мәзьнайийа ԝе бькʼәвә, йа кӧ һʼәму ԛәза Асйа у дьнйа дьһʼәбинә». Гава әв йәк бьһистьн, бь кʼин-бох тʼьжи бун, дькьрьнә ԛирʼин у дьготьн: «Артәмиса әфәсийа мәзьн ә!» Тʼәмамийа бажер ԛьлԛьли, рʼаһьштә Гайос у Әристархойе мәкәдони, кӧ һәвал-рʼейед Паԝлос бун, һәврʼа рʼәвинә дитьндаре. Паԝлос жи хԝәст кӧ бькʼәвә нава ԝе әʼлаләте, ле шагьрта нәһьшт. Жь һьнәк сәрԝеред ԛәза Асйайе жи кӧ достед ԝи бун, мәри шандьнә щәм ԝи у һиви же кьрьн, кӧ нәчә дитьндаре. Һәма ԝи ԝәхтида һьнәка щурʼәки, һьнәка жи щурʼәки дьн дькьрьнә ԛирʼин, чьмки кʼомбуна ԝан тʼәвиһәвбуйи бу, гәләка жи ньзаньбу әԝ бона чь жи щьвийанә. Һьнәка жь әʼлаләте Скәндәр пешда бьрьн, чьмки щьһуйа әԝ пешда дәʼф дан. Скәндәр дәсте хԝә бьльнд кьр, хԝәст щаба хԝә бьдә. Ле гава пе һʼәсийан кӧ әԝ щьһу йә, һʼәмуйа бь дәнгәки ԝәкә дӧ сьһʼәта кьрьнә ԛирʼин: «Артәмиса әфәсийа мәзьн ә!» Паше кʼатьбе бажер әʼлаләт сәԛьрʼанд у гот: «Гәли әфәсийа! Кʼи ньзанә кӧ бажаре Әфәсе хԝәйитийе пʼарьстгәһа Артәмиса мәзьн дькә, йа кӧ кәвьре ԝейи пироз жь әʼзмен һатийә хԝаре? Чаԝа ве йәкеда кӧ тьштәки хельф тʼӧнә, ләма жи гәрәке һун хԝә рʼьһʼәт хԝәй кьн у тьштәки бь бәрзәԛийе нәкьн. Ԝә әв мәрьвана анинә вьра, әвана нә тʼаланкьред пʼарьстгәһе нә у нә жи хԝәдейа мә беһӧрмәт кьрьнә. Аԝа һәгәр шькийате Димитрийо у һостайед тʼәви ԝи сәр йәки һәйә, бьра һәрʼьнә диԝанхане, һʼакьм һәнә. Ль ԝьр әԝ дькарьн шькийате хԝә һәвдӧ бькьн. Ле һәгәр хԝәстьна ԝә бона тьштәки дьн ә, бьра щьватәкә әʼдәтида бе леньһерʼандьне. Чьмки зийана мә жи ве йәкеда һәйә у бона шәрʼе иройин әме бенә нәһәԛкьрьне у мәʼник тʼӧнә, кӧ әм пе бькарьбьн бона ве кʼомбуне щаба хԝә бьдьн». Гава әв йәк гот, щьват бәла кьр. Гава ԛалмә-ԛалм сәԛьрʼи, Паԝлос гази шагьрта кьр, дьл да ԝан у хатьре хԝә жь ԝан хԝәст, рʼабу чу Мәкәдонйайе. Ль ԝан алийа гәрʼийа, бь гәләк готьна дьл данә ԝан. Паше чу Йунаньстане, ԝәкә се мәһа ль ԝьр дәрбаз кьр. Гава кʼаре хԝә дькьр кӧ бьчуйа Сурйайе, щьһуйа бона ԝи шеԝьрәкә мьхәнәтийе кьр, әԝ жи фькьри Мәкәдонйайева вәгәрʼә. Тʼәви ԝи жь Бәройайе Сопатройе кӧрʼе Пиро, жь Тʼесалонике Әристархо у Секундо, Гайосе жь Дербе у Тимотʼейо, жь ԛәза Асйайе Тьхико у Трофимо чун. Әвана пешийа мә чунә Тройайе, ль ԝьр һивийа мә бун. Әм жи пәй рʼожед Щәжьна Нане Шкәварʼа бь гәмийе жь Филипйайе чун, пенщ рʼожада гьһиштьнә Тройайе, щәм ԝан. Әм ԝьр һʼәфт рʼожа ман. Рʼожа һʼәфтийейә пешьн әм бона нанкәркьрьне щьвийайи бун, Паԝлос кӧ ԝе рʼожа дьн бьчуйа, ԝанарʼа хәбәр дьда у һʼәта ниве шәве хәбәрдана хԝә дьреж кьр. Әԝ ода әм теда щьвийайи бун, гәләк чʼьра теда һәбун. Хортәк жи наве ԝи Әйтухо, сәр пʼәнщәре рʼуньшти дьһеньжи у кʼәтә хәԝа кʼур. У гава Паԝлос хәбәрдана хԝә дьреж дькьр, әԝ хәԝа кʼурда жь ԛате сьсийа жорда кʼәт у мьрити әԝ һьлдан. Паԝлос пәйайи жере бу, хԝә авитә сәр ԝи, да һʼәмеза хԝә у гот: «Хԝә ӧнда нәкьн, чьмки рʼӧһʼе ԝи ԝида йә». Паше һьлкʼьшийа һат, нан кәркьр хԝар у һʼәта сьбәһе дьреж хәбәр да у рʼабу чу. Хорт жи сах-сьламәт анинә мал, беһʼәсаб дьл һатә бәр ԝан. Әм чун кʼәтьнә гәмийе рʼекʼәтьн у бәрбь Асосе чун, кӧ жь ԝе дәре мә гәрәке Паԝлос һьлда, чьмки әԝи мәрʼа готьбу: «Әзе пәйа бем». Гава ль Асосе рʼасти мә һат, мә әԝ һьлда чунә Мьтулане. Жь ԝьр жи әм чун, рʼожа дьне гьһиштьнә пешбәри Хийайе, рʼожтьра дьн гьһиштьнә Самосе, сьбәһтьра дьн жи гьһиштьнә Миләтосе. Паԝлос нета хԝә данибу бь гәмийе бәр Әфәсерʼа дәрбаз буйа, кӧ нәбә ԝәхте хԝә ԛәза Асйайеда ӧнда кә, чьмки дьләзанд кӧ һәгәр жерʼа ль һәв бе, Рʼожа Пенщийә һʼәсаб әԝ ль Оршәлиме бә. Жь Миләтосе мәри шандә Әфәсе у гази бәрпьрсийаред щьвине кьрьн. Гава әԝ һатьнә щәм ԝи, ԝанрʼа гот: «Һун хԝәха заньн ԝе рʼожа пешьнда гава мьн ньге хԝә авитә ԛәза Асйайе, һʼәта ньһа ԝәрʼа чаԝа бумә. Мьн Хӧданрʼа тʼам шкәсти бь гәләк һесьра, нава ԝан щерʼьбандьнада ԛӧльх кьрийә, кʼижан кӧ жь шеԝьред щьһуйа дьһатьнә сәре мьн, Һун заньн кӧ мьн тʼӧ щар хԝә жь тьштед керһатийә бона ԝә нәдайә паш, ле һʼәму ԝәрʼа готьнә у ашкәрә мал бь мал һун һин кьрьнә. Мьн бь мәʼрифәти һьн һиви жь щьһуйа, һьн жи жь нәщьһуйа кьр, кӧ вәгәрʼьнә бәрбь Хԝәде у баԝәрийа хԝә Хӧдане мә Иса биньн. У ва әз бьн дәсте Рʼӧһʼе Пирозда дьчьмә Оршәлиме, ԝьр ԝе чь бе сәре мьн, әз ньзаньм. Тʼәне Рʼӧһʼе Пироз һʼәму бажарида тʼәмийе дьдә мьн у дьбежә кӧ: ‹Ԛәйд у тәнгаси пешийа тә нә›. Ле әз әʼмьре хԝә лайиԛи тʼӧ тьшти накьм, тʼәне дькьм бьгьһижьмә мәрәме хԝә у ԝе ԛӧльха кӧ мьн жь Хӧдан Иса стандийә биньмә сери, аԝа готи Мьзгинийа кʼәрәма Хԝәде бь мәʼрифәти даннасин кьм. Ньһа әз заньм иди һун һʼәмуйед кӧ әз нав ԝәда гәрʼийамә у Пʼадшатийа Хԝәде даннасин кьрийә рʼуйе мьн набиньн. Бона ве йәке әз рʼожа иройин ль бәр ԝә шәʼдәтийе дьдьм, кӧ щабдаре хуна ԝә тʼӧ кәси ниньм, чьмки мьн хԝә нәда паш, тʼәмамийа ԛьрара Хԝәде ԝәрʼа гот. Ньһа мьԛати хԝә у тʼәмамийа ԝи кәре пез бьн, кӧ Рʼӧһʼе Пироз һун сәр бәрпьрсийар кʼьфш кьрьнә. Шьвантийе щьвина Хԝәде бькьн, йа кӧ Ԝи бь хуна Хԝә ԛазьнщ кьр. Әз заньм пәй чуйина мьнрʼа гӧред дәвхун ԝе бькʼәвьнә нава ԝә у һʼәйфа ԝан ԝе кери нәйе. Жь нава ԝәда жи мәрьве дәрен у тьштед хельф ԝе хәбәр дьн, кӧ шагьрта пәй хԝә бьбьн. Бона ве йәке һʼьшйар бьминьн у бир нәкьн, кӧ мьн һун һәр кәс, се сала шәв у рʼож бе рʼьһʼәти бь һесьра ширәт кьрьнә. Ньһа әз ԝә дьсперьмә Хԝәде у Хәбәра кʼәрәма Ԝи, кӧ дькарә ԝә рʼӧһʼанийеда ава кә у пʼара ԝә тʼәви тʼәмамийа щьмәʼта Хԝә кә. Мьн һавьжийа хԝә зерʼ, зив у кʼьнще тʼӧ кәси нәанийә. Һун хԝәха заньн әз у йед тʼәви мьн әм һʼәԝще чь жи бунә, әв дәстед мьн хәбьтинә. Мьн пе һʼәму шьхӧлед хԝә нишани ԝә кьрийә, кӧ чаԝа гәрәке бьхәбьтьн кʼомәке бьдьнә кʼәтийа у хәбәра Хӧдан Иса бир биньн кӧ гот: ‹Хԝәзи ль дайийа, нә кӧ ль стандийа›». Гава әв йәк гот, тʼәви һʼәмуйа чок да дӧа кьр. Һʼәму жи гәләки гьрийан, хԝә авитьнә стуйе Паԝлос у рʼамусан. Дьлед ԝан һе зедә бона ԝе хәбәра ԝи дьшәԝьти кӧ гот: «Һун иди рʼуйе мьн набиньн». Паше әԝ һʼәта гәмийе вәрʼекьрьн. Гава әм жь ԝан ԛәтийан, бь гәмийе рʼекʼәтьн, рʼаст чун гьһиштьнә Косе, рʼожа дьне Рʼодосе у жь ԝьр Патарайе. Мә гәмик дит кӧ дьчу Финикйайе, әм кʼәтьнә ԝе рʼекʼәтьн. Гава Ԛӧбрьсе хӧйа кьр, мә әԝ мьле чʼәпева һьшт. Әм бәрбь ԛәза Сурйайе чун гьһиштьнә бажаре Суре, чьмки баре гәмийе ԝьр гәрәке бьһата валакьрьне. Мә шагьрт дитьн, әм һʼәфт рʼожа ль ԝьр ман. Ԝана бь Рʼӧһʼе Пироз дьготә Паԝлос кӧ нәчә Оршәлиме. Ле гава мә әԝ рʼож дәрбаз кьрьн, әм рʼабун чун у һʼәмуйа жьна у зарʼава һʼәта бажер дәр әм вәрʼекьрьн у дәве бәʼре мә чок да дӧа кьр. Паше мә хатьре хԝә жь һәв хԝәст кʼәтьнә гәмийе, әԝана жи вәгәрʼийанә малед хԝә. Мә рʼеԝити бь гәмийе жь Суре думайи кьр, әм гьһиштьнә Пьтолемайе, мә ԝьр хушк-бьра сьлав кьрьн, әм рʼожәке манә щәм ԝан. Рʼожа дьн әм жь ԝьр рʼекʼәтьн чунә Ԛәйсәрийе мала Филипойе мьзгиндар, әԝ йәк жь ԝан һәр һʼәфт кʼомәкдаред кʼьфшкьри бу. Әм ль щәм ԝи ман. Чар ԛизед ԝийә бькʼьр һәбун, кӧ пʼехәмбәрти дькьрьн. Гава әм гәләк рʼожа ль ԝьр ман, жь Щьһустане пʼехәмбәрәки наве ԝи Һагабо бәржер бу. Гава һатә щәм мә, ԛайиша пьшта Паԝлос һьлда, дәст у пʼийед хԝә гьреда у гот: «Рʼӧһʼе Пироз аһа дьбежә: ‹Әԝ мәрьве хԝәйе ве ԛайише щьһуйе Оршәлимеда аһа ԝи гьредьн у бьдьнә дәсте нәщьһуйа›». Гава әв йәк мә бьһист, тʼәви йед ԝьр мә лава кьр, кӧ әԝ һьлнәкʼьшә нәчә Оршәлиме. Ле Паԝлос щаб да у гот: «Һун чь дькьн? Чьма һун дьгьрин у дьле мьн дьшкеньн? Әз Оршәлимеда бона наве Хӧдан Иса нә кӧ тʼәне бона гьредане, ле бона кӧштьне жи һазьр ьм». Гава мә нькарьбу әԝ банийа сәр йа хԝә, мә дәнге хԝә бьрʼи у гот: «Бьра әʼмьре Хӧдан бә». Чәнд рʼожа шунда мә кʼаре хԝә кьр, әм һьлкʼьшийан чунә Оршәлиме. Тʼәви мә чәнд шагьртед Ԛәйсәрийе жи һатьн, әм бьрьнә мала шагьртәки зува, кӧ наве ԝи Мьнасо бу, жь Ԛӧбрьсе, ԝәки әм ль ԝьр бьминьн, Гава әм гьһиштьнә Оршәлиме, баԝәрмәнда әм әшԛ у ша ԛәбул кьрьн. Рʼожа дьне Паԝлос тʼәви мә чу щәм Аԛуб, һʼәму бәрпьрсийар жи һазьр бун. Паԝлос сьлав да ԝан, йәк-йәк чь кӧ Хԝәде бь ԛӧльхе ԝи нава нәщьһуйада кьрьбу, ԝанарʼа гьли кьр. Ԝана кӧ әв йәк бьһист, шькьри данә Хԝәде у ӧса жи Паԝлосрʼа готьн: «Дина хԝә бьде, чьԛас һʼәзара щьһуйед баԝәрмәнд һәнә у һʼәму жи хирәткʼешед Ԛануне нә. Аԝа ԝана бона тә бьһистийә кӧ тӧ һʼәму щьһуйед нава нәщьһуйада һин дьки, кӧ дәст жь Ԛануна Муса бькʼьшиньн у дьбежи кӧ әԝ кӧрʼед хԝә сьнәт нәкьн у пәй әʼдәт жи нәчьн. Ньһа әм чь бькьн? Ԝе әʼсә бьбьһен кӧ тӧ һатийи. Дә рʼабә әм чь тәрʼа дьбежьн бькә. Вьр щәм мә чар мәрьв һәнә кӧ ад-ԛьрар кьрьнә. Ԝан хԝәрʼа һьлдә, тʼәви ԝан ль гора әʼдәт паԛьж бә у хәрще ԝан һьлдә сәр хԝә, кӧ пʼорʼе сәре хԝә кӧрʼ кьн. Һьнге һәр кәсе заньбә әԝ тьштед кӧ бона тә бьһистьнә дәрәԝ ьн у тӧ хԝәха жи пәй Ԛануна Муса дьчи. Ле бона ԝан нәщьһуйед кӧ һатьнә сәр баԝәрийе, мә ԝанрʼа ԛьрара хԝә ньвисийә шандийә, ԝәки әԝ һʼәвза хԝә жь ԝан ԛӧрбанед пʼутпʼарьстийе, хуне, гоште мьрар у бенамусийе бькьн». Һьнге Паԝлос әԝ мәри рʼожа дьне һьлдан, тʼәви ԝан паԛьж бу, кʼәтә пʼарьстгәһе у хьлазийа рʼожед паԛьжбуне да әʼламкьрьне, кӧ ԝе кʼәнге бона ԝан һәр кәси һʼәди бе дайине. Гава һәр һʼәфт рʼож сәр һәвда һатьн, жь щьһуйед ԛәза Асйайе Паԝлос пʼарьстгәһеда дитьн, тʼәмамийа әʼлаләте тʼәврʼакьрьн, дәст авитьне у кьрьнә ԛирʼин готьн: «Һәԝар, исраелино! Аликʼарийе бькьн! Әва әԝ мәрьв ә, йе кӧ ль һәр дәра һʼәмуйа мьԛабьли щьмәʼта мә, Ԛануна Муса у ви щийи һин дькә, һе сәрда жи йунан кьрьнә пʼарьстгәһе, әв щийе пироз һʼәрʼьманд». Әв йәка готьн, чьмки пешийе бажерда Трофимойе жь Әфәсе тʼәви ԝи дитьбун у ԝан тʼьре Паԝлос әԝ кьрийә пʼарьстгәһе. Тʼәмамийа бажер һʼәжийа, әʼлаләт бь ләз кʼом бу, Паԝлос гьртьн жь пʼарьстгәһе кʼаши дәрва кьрьн у дәред ԝе перʼа-перʼа һатьнә гьртьне. Гава ԝан дькьр кӧ ԝи бькӧжьн, щаб гьһиштә сәрһʼәзаре рʼәфа әскәра, ԝәки тʼәмамийа Оршәлиме тʼәвиһәв буйә. Әԝи перʼа-перʼа әскәр у сәрсәд һьлдан, бь ләз чу сәр ԝан. Гава ԝана сәрһʼәзар әскәрава дитьн, дәст жь Паԝлос кʼӧтане кʼьшандьн. Ԝи чахи сәрһʼәзар һатә незик, әԝ гьрт, әʼмьр кьр кӧ бь дӧ зьнщира ԝи гьредьн. Һьнге пьрси: «Әв кʼи йә у чь кьрийә?» Нава әʼлаләтеда бона ԝи һәр йәки щурʼәки дькьрә ԛарʼә-ԛарʼ. Әԝи гава жь дәст ԛалмә-ԛалма щьмәʼте нькарьбу әʼсәйи бьзаньбуйа, әʼмьр кьр ԝи бьбьнә әскәрхане. Гава Паԝлос гьһиштә пʼепәлинга, әскәра әԝ бьльндкьри бьрьн, чьмки әʼлаләте зор дьда ԝи, ль пәй ԝи дьчун, дькьрьнә ԛирʼин у дьготьн: «Ԝи бькӧжьн!» Иди Паԝлос ԝе бьбьрана һьндӧрʼе әскәрхане, әԝи сәрһʼәзаррʼа гот: «Изьна мьн һәйә тʼәви тә хәбәр дьм?» Әԝи гот: «Тӧ йунани жи зани? Кӧ ӧса йә тӧ нә әԝи мьсьри йи, йе кӧ чәндәк пешда кьрә шәрʼ-дәʼԝ, чар һʼәзар ԛачахед меркӧж дәрхьстьнә бәрʼийе». Паԝлос гот: «Әз мәрьвәки щьһу мә, жь Тарсуса Киликйайе, нә бажарванәки бе нав-нишан ьм. Әз һиви жь тә дькьм, изьне бьдә кӧ әз ве щьмәʼтерʼа хәбәр дьм». Гава әԝи изьн да, Паԝлос сәр пʼепәлинга сәкьни, дәсте хԝә бьльнд кьр, щьмәʼте кӧ дәнге хԝә бьрʼи, әԝи бь зьмане ибрани хәбәр да у гот: «Гәли бав у бьра! Ньһа гӧһдарийа мьн бькьн, кӧ әз щаба хԝә бьдьм». Гава бьһистьн кӧ әԝ ԝанарʼа бь зьмане ибрани кʼәтә хәбәрдане, кәрʼ бун һе дәнге хԝә бьрʼин. У ԝи гот: «Әз мәрьвәки щьһу мә, бажаре Тарсуса Киликйайеда жь дийа хԝә бумә, ле ви бажарида бьн дәсте Гамалйелда чаԝа шагьрт мәзьн бумә у һʼәму Ԛануна кал-бава жи бь фәсал-рʼаст һин бумә, һьндава Хԝәдеда жи хԝәйихирәт бум, чаԝа кӧ һун һʼәму иро. Мьн һʼәта кӧштьне жи йед кӧ пәй ве Рʼе дьчун, дьзерандьн у ԛьсьме жьн у мера гьредьдан давитьнә кәле, чаԝа сәрәккʼаһин у тʼәмамийа щьвина рʼуспийа жи шәʼде мьн ьн. Мьн сәр бьрайед щьһутийедайә Шаме нәʼмә жь ԝан һьлдабун дьчум ԝәки йед ԝьр жи гьредайи биньмә Оршәлиме кӧ бьдьнә щәзайе. Гава әз һе рʼе дьчум, незики Шаме бум, рʼо нава рʼоже ньшкева жь әʼзмен дора мьн рʼонайикә ԛайим шәԝԛ да. Әз кʼәтьмә әʼрде у мьн дәнгәк бьһист кӧ мьнрʼа гот: ‹Шаԝул! Шаԝул! Тӧ чьма Мьн дьзерини?› Мьн ле вәгәрʼанд: ‹Тӧ кʼи йи, Хӧдан?› Әԝи мьнрʼа гот: ‹Әз Исайе Ньсрәте мә, Йе кӧ тӧ дьзерини›. Әԝед тʼәви мьн жи рʼонайи дитьн, ле дәнге кӧ мьнрʼа хәбәр дьда нәдьбьһистьн. Һьнге мьн гот: ‹Әз чь бькьм, Хӧдан?› Хӧдан мьнрʼа гот: ‹Рʼабә һәрʼә Шаме у ль ԝьр һәр тьште кӧ бона тә кʼьфшкьри йә бьки, ԝе тәрʼа бе готьне›. Мьн кӧ жь дәст шәԝԛа ԝе рʼонайе нәдьдит, һьнге йед тʼәви мьн дәсте мьн гьртьн, әз бьрьмә Шаме. Йәки наве ԝи Һананийа, анәгори Ԛануне хԝәдехоф, нав щьһуйед Шамеда жи әԝ хԝәйийе шәʼдәтийа ԛәнщ бу, әва һат щәм мьн сәкьни у гот: ‹Шаԝул бьра, бьбинә!› Мьн дәстхԝәда дит у ль ԝи ньһерʼи. Әԝи мьнрʼа гот: ‹Хԝәдейе кал-бавед мә тӧ кʼьфш кьри кӧ әʼмьре Ԝи бьзаньби у Йе Рʼаст бьбини, хәбәра дәве Ԝи бьбьһейи, чьмки те бәр һʼәму мәрьва бона ԝан тьштед тә дитьн у бьһистьн бьби шәʼде Ԝи. Иди чьма дәрәнги дехи? Рʼабә ԝәрә ньхӧмандьне, гази наве Ԝи кә жь гӧнед хԝә ԝәрә шуштьне›. Гава әз вәгәрʼийамә Оршәлиме у пʼарьстгәһеда дӧа дькьр, мина сьһʼәте сәр мьнрʼа дәрбаз бу, мьн Әԝ дит у Ԝи мьнрʼа гот: ‹Бькә бьләзинә жь Оршәлиме дәре, чьмки әԝ шәʼдәтийа кӧ те бона Мьн бьди әԝе ԛәбул нәкьн›. Мьн гот: ‹Хӧдан, әԝ ԛәнщ заньн кӧ әз бум, әԝи һʼәму кʼьништада йед баԝәрийа хԝә Тә данин, давитьнә кәле у әԝ дькʼӧтан. Гава хуна Стәйфане шәʼде Тә дьрʼьжийа, әз хԝәха жи ԝьр һазьр у рʼази бум, мьн нобәдари кʼьнщед йед әԝ кӧштьн дькьр›. Һьнге Әԝи мьнрʼа гот: ‹Һәрʼә, Әзе тә бьшиньмә дур щәм нәщьһуйа›». Һʼәта ван хәбәра әʼлаләте гӧһдарийа ԝи кьр, паше бь дәнге бьльнд готьн: «Рʼубари дьне ԝи нәһелә! Йед мина ԝи гәрәке нәжин!» Ԝана дькьрьнә ԛирʼин, кʼьнще хԝә дьԛәлаштьн давитьн у хԝәли дьрʼәшандьнә һәԝа. Сәрһʼәзар әʼмьр кьр, кӧ ԝи бьбьнә әскәрхане у гот: «Бьдьн бәр ԛамчийа же бьпьрсьн, бьзаньбьн кʼа суще ԝи чь йә, ԝәки ӧса сәр ԝи дькьнә ԛарʼә-ԛарʼ». Гава бь ԛайишед чʼәрм гьредан, Паԝлос сәрсәде сәкьнирʼа гот: «Гәло әва щайиз ә кӧ һун ль бажарванәки Рʼомайе хьн, йе кӧ һе диԝана ԝи нәбуйә?» Сәрсәд гава әв йәк бьһист, чу щәм сәрһʼәзар у гот: «Тӧ чь дьки? Әва мәрьва бажарване Рʼомайе йә». Сәрһʼәзар незики Паԝлос бу у ԝирʼа гот: «Мьнрʼа бежә, тӧ бажарване Рʼомайе йи?» Әԝи гот: «Бәле». Сәрһʼәзар ле вәгәрʼанд у гот: «Мьн бь гәләк пʼәра әԝ бажарванти стандийә». Паԝлос гот: «Ле әз йәкрʼожийа хԝәда бажарване ԝьр ьм». У дәстхԝәда әԝед кӧ ԝе лехьстана у гьли же бькʼьшандана жь ԝи дур кʼәтьн. Сәрһʼәзар хԝәха жи тьрсийа, гава бьһист кӧ бажарване Рʼомайе йә, чьмки әԝи әԝ дабу гьредане. Сьбәтьра дьн сәрһʼәзар хԝәст рʼаст бьзаньбә кʼа щьһу чьма шькийате Паԝлос дькьн. Әԝ бәрʼда у әʼмьр кьр, кӧ сәрәкед кʼаһина щьвина гьрәгьрава бе. Һьнге Паԝлос ани ль бәр ԝан да сәкьнандьне. Паԝлос дина хԝә да щьвина гьрәгьра у гот: «Гәли бьра! Мьн бь исафа рʼьһʼәт ль бәр Хԝәде әʼмьре хԝә һʼәта иро дәрбаз кьрийә». Һананийайе сәрәккʼаһин әʼмьри бәрдәстийед незики Паԝлос кьрьн кӧ девда бьдьне. Һьнге Паԝлос ԝирʼа гот: «Хԝәдейе жи ль тә хә, диԝаре сиԝахкьри! Тӧ рʼуньшти йи анәгори Ԛануне диԝана мьн дьки у жь Ԛануне дәр әʼмьр дьки кӧ әԝ мьн хьн». Йед щәм Паԝлос сәкьни готьн: «Тӧ сәрәккʼаһине Хԝәде беһӧрмәт дьки?» Паԝлос гот: «Бьрано, мьн ньзаньбу кӧ әԝ сәрәккʼаһин ә. Чаԝа ньвисар ә: ‹Һьндава сәрԝере мьләте хԝәда хьраб хәбәр нәдә› ». Һьнге Паԝлос пе һʼәсийа кӧ алики садуԛи нә, алики жи ферьси, ԝе щьвинеда кьрә гази у гот: «Гәли бьра! Әз ферьси мә, кӧрʼе ферьсийа! Бона гӧмана рʼабуна мьрийа диԝана мьн дькьн». Гава әв йәк гот, ферьси у садуԛи һәврʼа кʼәтьнә һʼӧщәте у дӧтирәти кʼәтә нава кʼоме, (чьмки садуԛи дьбежьн нә рʼабуна мьрийа һәйә, нә мьлйакʼәт, нә жи рʼӧһʼ, ле ферьси һәрсека жи ԛәбул дькьн). Һьнге ԛалмә-ԛалма мәзьн һе пешда һат, жь ԛанунзанед алийе ферьсийа һьнәк рʼабунә пʼийа у дәнг һьлдан меркʼими готьн: «Әм ви мәрьвида тʼӧ хьрабийе набиньн. Бәлки рʼӧһʼәки йан мьлйакʼәтәки вирʼа хәбәр дайә?» Гава шәрʼ-дәʼԝ зедә бу, сәрһʼәзар тьрсийа кӧ әԝ Паԝлос ԛәт-ԛәти кьн, әʼмьри әскәра кьр кӧ һәрʼьнә жере әԝи жь нав ԝан бьгьрьн бьбьнә әскәрхане. Шәвтьра дьн Хӧдан ль бәр ԝи сәкьни у готе: «Сәрхԝә бә, тә чаԝа шәʼдәтийа Мьн Оршәлимеда да, ӧса жи гәрәке Рʼомеда шәʼдәтийе бьди». Сьбәһ кӧ зәлал бу, һьнәк щьһу бунә йәк у сонд хԝарьн, кӧ һʼәта Паԝлос нәкӧжьн, нә бьхԝьн, нә жи вәхԝьн. Әԝед кӧ әԝ сонд хԝарьн жь чьли зедәтьр бун. Әвана чунә щәм сәрәкед кʼаһин у рʼуспийа готьн: «Мә сонд хԝарийә, һʼәта кӧ әм Паԝлос нәкӧжьн, тьштәки тәʼм нәкьн. Аԝа һун тʼәви щьвина гьрәгьра бежьнә сәрһʼәзар кӧ әԝи сьбе бинә щәм ԝә, йанчийә һун дьхԝазьн дәрһәԛа ԝида һәр тьшти һе рʼаст пе бьһʼәсьн, әме жи һе бәри һатьна ԝи һазьр бьн кӧ ԝи бькӧжьн». Ле харзийе Паԝлос бона ве тʼәләке бьһист, һат кʼәтә әскәрхане Паԝлосрʼа гот. Паԝлос жи гази сәрсәдәки кьр у готе: «Әви хорти бьбә щәм сәрһʼәзар, дьхԝазә тьштәки ԝирʼа бежә». Әԝи жи хорт бьрә щәм сәрһʼәзар у готе: «Паԝлосе гьрти гази мьн кьр, һиви кьр кӧ ви хорти биньмә щәм тә, тьштәки ԝийи готьне тәрʼа һәйә». Сәрһʼәзар дәсте ԝи гьрт, бьрә алики у пьрси: «Тӧ чь дьхԝази әʼлами мьн ки?» Әԝи гот: «Щьһуйа ԛьрар кьрийә кӧ һиви жь тә бькьн, ԝәки сьбе Паԝлос бьби щьвина гьрәгьра, йанчийә дьхԝазьн дәрһәԛа ԝида һәр тьшти һе рʼаст бьзаньбьн. Ле ԝан баԝәр нәкә, чьмки жь ԝан чьл мәрийа зедәтьр хԝә вәшартьнә, һивийа ԝи нә. Ԝана сонд хԝарийә, кӧ нә бьхԝьн, нә жи вәхԝьн һʼәта ԝи нәкӧжьн. Ԝана ньһа кʼаре хԝә кьрийә, һивийа ԛьрара тә нә». Ԝи чахи сәрһʼәзар хорт вәрʼекьр у тʼәми да ԝи: «Кәсирʼа нәбежә, кӧ тә әв йәк мьнрʼа готийә». Сәрһʼәзар гази дӧ сәрсәда кьр у гот: «Дӧсьд әскәри һазьр кьн, һʼәфте сийари, дӧсьд жи рʼьмдар, ԝәки шәв сьһʼәта нәһа һʼәта Ԛәйсәрийе һәрʼьн. Ӧса жи чәнд һәспа һазьр кьн, ԝәки Паԝлос ле сийар кьн, кӧ бе ԛәдә бе бәла бьбьнә щәм Фәликсе ԝәли». Нәʼмәк жи бь ве фькьре ньвиси: «Жь Клаԝдйо Лусйо, Сьлав Фәликсе ԝәлийе хԝәйиԛәдьррʼа! Әва мәрьва жь щьһуйа һатьбу гьртьне, ԝе бь дәсте ԝан бьһата кӧштьне, әз пе һʼәсийам кӧ рʼомайи йә, бь әскәрава гьһиштьме у мьн әԝ хьлаз кьр. Мьн хԝәст кӧ бьзаньбьм кʼа бона чь шькийате ԝи дькьн, мьн әԝ бьрә бәр щьвина гьрәгьред ԝан у кʼьфш кьр, кӧ шькийате ԝан сәр пьрсед ԛануна ԝан ә, ле бона кӧштьне йан гьртьне хьрабийа ԝи тʼӧнәйә. Гава щаб гьһиштә мьн, кӧ щьһуйа бона ԝи мәрьви тʼәләкәк һазьр кьрийә, мьн дәстхԝәда әԝ шандә щәм тә у әʼмьри ль шькийаткьра кьр, кӧ чи ԝани мьԛабьли ԝи һәбә, ль бәр тә бежьн ». Әскәра жи анәгори ԝи әʼмьре кӧ стандьн, Паԝлос шәв һьлдан бьрьнә Әнтипәтрисе. Рʼожа дьне йед сийари Паԝлосрʼа данин кӧ тʼәви ԝи һәрʼьн, ле йед пәйа хԝәха вәгәрʼийанә әскәрхане. Әԝед сийари гьһиштьнә Ԛәйсәрийе, нәʼмә данә ԝәли, Паԝлос жи данә дәсте ԝи. Әԝи әԝ нәʼмә хԝәнд, пьрси жь кʼижан ԛәзайе йә, кӧ пе һʼәсийа жь Киликйайе йә, гот: «Әзе һьнге гӧһдарийа тә бькьм, кʼәнге шькийаткьред тә бен». У әʼмьр кьр, кӧ әԝ ԛәсьра Һеродәсда бе хԝәйкьрьне. Пенщ рʼожа шунда Һананийайе сәрәккʼаһин тʼәви һьнәкә жь рʼуспийа у Тәртулойе занәбеж бәржер бу һатә Ԛәйсәрийе. Вана бона Паԝлос гьли-газьне хԝә ԝәлирʼа кьрьн. Гава гази Паԝлос кьрьн, Тәртуло дәст бь шькийата кьр у гот: «Әм тʼьме у һәр дәра ԝан кьрьнед тә дьшекьриньн, Фәликсе хԝәйиԛәдьр, кӧ сайа сәре тә әви мьләте мә гәләк әʼдьлайи дитийә у гәләки пешда чуйә. Ле ԝәки гәләки сәре тә нәешиньм, һиви дькьм жь кʼәрәма хԝә кьн гӧһдарийа мә бькә. Мә әв мәрьва дит, чаԝа мина бәлаке кʼәтийә нава һʼәму щьһуйед сәр дьне тʼәвиһәв дькә у рʼебәре кʼомәла ньсрәтийа йә. Әви кьр кӧ пʼарьстгәһе жи бьһʼәрʼьминә, ле мә әԝ гьрт. Һәгәр тӧ жь ԝи бьпьрси, те хԝәха бькарьби жь ԝи һәр тьшти бьзаньби кʼа бона чь әм шькийате ԝи дькьн». Щьһуйа жи готьна ԝи әʼсәйи кьрьн, готьн: «Бәле, әв йәк ӧса йә». Гава ԝәли пе сәрийа кьр кӧ әԝ хәбәр дә, Паԝлос ле вәгәрʼанд у готе: «Әз заньм кӧ гәләк сал ьн тӧ һʼакьме ви мьләти йи, әзе жи бь рʼәзәдьли бона хԝә щаба хԝә бьдьм. Чаԝа кӧ тӧ дькари бьзаньби, әва донздәһ рʼож тʼӧнә, кӧ әз бона һʼәбандьне һәвраз чубумә Оршәлиме. Әвана әз нәдитьмә кӧ пʼарьстгәһеда тʼәви йәки текʼәвьмә дәʼԝе, йан жи кʼьништада ӧса жи щики дьн бажерда әʼлаләте дора хԝә тʼоп кьм. У нә жи ньһа дькарьн готьнед хԝә избат кьн, кӧ бона чь шькийате мьн дькьн. Ле әзе ашкәрә тәрʼа бежьм, ԝәки ль гора ԝе Рʼийа кӧ әԝана жерʼа кʼомәла шьһʼьти дьбежьн, әз һәма ӧса Хԝәдейе кал-бавед хԝә дьһʼәбиньм. У чь кӧ Ԛанун у ньвисаред пʼехәмбәрада жи ньвисар ә, баԝәр дькьм. Әз Хԝәдеда жи гӧман ьм, чаԝа кӧ әԝ жи ԝе гӧмане нә, кӧ һʼәму һәԛ у нәһәԛе жь мьрьне рʼабьн. Бона ве йәке чьԛас жь мьн те, әз дьщәʼдиньм һʼәму ԝәхти бь исафа рʼьһʼәт ль бәр Хԝәде у мәрьва бьм. Аԝа пәй гәләк саларʼа әз вәгәрʼийам һатьмә Оршәлиме, кӧ кʼомәке бьдьмә мьләте хԝә у һʼәдийа бьдьм. Һьнге ԝи шьхӧлида әз пʼарьстгәһеда паԛьжбуйи дитьм ль гора әʼдәте мә. Әз нә тʼәви әʼлаләте бум, нә жи шәрʼуда. Ле жь ԝан чәнд щьһуйед ԛәза Асйайе ль ԝьр бун. Һәгәр һьндава мьнда тьштәки ԝани готьне һәбуйа, әԝ гәрәке бьһатана бәр тә бьсәкьнийана шькийате мьн бькьрана. Йан жи бьра әвана бежьн, гава әз бәр щьвина гьрәгьра сәкьни бум, чь хьраби сәр мьн дитьн, пештьри ве йәке, кӧ мьн бь дәнге бьльнд нава ԝанда готийә: ‹Бона баԝәрийа рʼабуна мьрийа һун иро диԝана мьн дькьн›». Фәликсва әԝ Рʼе кӧ рʼьнд әʼйан бу, һьнге әԝи шьхӧле ԝан пашда авит у гот: «Кʼәнге Лусйойе сәрһʼәзар бәржер бе, әзе һьнге бона шьхӧле ԝә ԛьрара хԝә бьдьм». Әԝи әʼмьри сәрсәд кьр, кӧ Паԝлос пʼьрʼи-һьндьки аза хԝәй кьн у изьна һәвал-һогьред ԝи жи бьдьн, йе кӧ ԝе кʼомәкдарийа ԝи бькьн. Чәнд рʼожа шунда Фәликс тʼәви Дьрусила кʼӧлфәта хԝәйә щьһу һат, гази Паԝлос кьр у бона ԝе баԝәрийа сәр Мәсиһ Иса жь ԝи бьһист. Паԝлос һе бона рʼастийе, хԝәгьртьне у диԝана Хԝәдейә кӧ ԝе бе хәбәр дьда, Фәликс саԝ кʼьшанд у гот: «Тӧ ньһа һәрʼә. Гава ԝәхте мьн һәбә, әзе гази тә кьм». Ӧса жи әԝ ԝе гӧмане бу, кӧ жь Паԝлос пʼәрә бьстанда, бона ԝе йәке жи гәләк щара гази ԝи дькьр у тʼәви ԝи хәбәр дьда. Гава дӧ сал дәрбаз бун, дәԝса Фәликс Поркийо Фесто бу ԝәли. Фәликс жи кӧ дьхԝәст ԛәнщи щьһуйарʼа бькьра, Паԝлос гьрти һьшт. Пәй се рʼожарʼа, гава Фесто дәрбази сәр ԛӧльха хԝә бу, әԝ жь Ԛәйсәрийе һәвраз чу Оршәлиме. Сәрәкед кʼаһина у гьрәгьред щьһуйа бона Паԝлос шькийате хԝә ль ԝи кьрьн у һиви кьрьн кӧ бькә ԛәнщи ԝи бинә Оршәлиме, чьмки ԝана тʼәләк чекьрьбу кӧ рʼева ԝи бькӧжьн. Ле Фесто ль ԝан вәгәрʼанд у гот: «Паԝлос ԝе ль Ԛәйсәрийе гьрти бьминә у әзе хԝәха жи зутьре һәрʼьмә ԝьр. Аԝа бьра сәрԝеред ԝә тʼәви мьн бәржер бьн у һәгәр нәһәԛикә ԝи мәрьви жи һәбә, бьра гӧнәкʼарийа ԝи бежә». Ԝьр нәһә-дәһә рʼожа нав ԝанда ма, паше бәржер чу Ԛәйсәрийе, рʼожа дьн ль һәрәма диԝане рʼуньшт, әʼмьр кьр кӧ Паԝлос биньн. Гава Паԝлос һат, щьһуйед кӧ жь Оршәлиме бәржер һатьбун дора ԝи гьртьн у гәләк бӧхданед гьран ль ԝи дькьрьн, ле нькарьбун избат кьрьна. Паԝлос щаба хԝә да у гот: «Мьн һьндава Ԛануна щьһуйа йан пʼарьстгәһе йан жи Ԛәйсәрда тʼӧ нәһәԛи нәкьрийә». Фесто жи хԝәст кӧ щьһуйарʼа ԛәнщийе бькә, ль Паԝлос вәгәрʼанд у гот: «Тӧ дьхԝази һәвраз һәрʼи Оршәлиме, кӧ бона ван тьшта диԝана тә бәр мьн ԝьр бе кьрьне?» Паԝлос гот: «Әз ль бәр диԝана Ԛәйсәр сәкьни мә, ль кʼӧ жи диԝана мьн гәрәке бьбә. Мьн хьрабик ль щьһуйа нәкьрийә, чаԝа тӧ хԝәха жи ԛәнщ зани. Аԝа һәгәр әз нәһәԛ ьм у мьн тьштәки ӧса кьрийә кӧ гәрәке бемә кӧштьне, әз жь мьрьне вәнакʼьшьм, ле һәгәр нәһәԛийа мьн ве йәкеда тʼӧнә, чаԝа кӧ әԝана шәрʼа давежьнә мьн, кәс нькарә мьн бьдә дәсте ԝан. Әз дәʼԝа диԝана Ԛәйсәр дькьм». Һьнге Фесто тʼәви ширәткʼара хәбәр да, паше ль ԝи вәгәрʼанд у готе: «Тӧ дәʼԝа Ԛәйсәр дьки, гәрәке тӧ һәрʼи щәм Ԛәйсәр». Чәнд рʼож дәрбаз бун, Әгрипа пʼадша у Бәрньке һатьнә Ԛәйсәрийе, кӧ Фесто сьлав кьн. Гава гәләк рʼож ль ԝьр дәрбаз кьрьн, Фесто бона Паԝлос әʼлами пʼадше кьр у гот: «Вьр мәрьвәк һәйә кӧ жь һена Фәликсда әԝ гьрти майә. Гава әз чумә Оршәлиме, сәрәкед кʼаһина у рʼуспийед щьһуйа шькийате ԝи бәр мьн кьрьн у һиви кьрьн кӧ әз диԝана ԝи бькьм. Мьн ль ԝан вәгәрʼанд у гот, ԝәки нә әʼдәте рʼомайийа йә кӧ мәрьвәки бехәда бьдьнә дәр, һʼәта мәщале нәдьнә йе гӧнәкʼар, кӧ ль бәр шькийаткьред хԝә бьсәкьнә у рʼу бь рʼу бәр ԝан щаба хԝә бьдә. Гава әԝана һатьнә вьра, мьн дәрәнги нәехьст, рʼожа дьне әз ль һәрәма диԝане рʼуньштьм у мьн әʼмьр кьр, кӧ ԝи мәрьви биньн. Гава йед кӧ әԝ гӧнәкʼар дькьрьн рʼабун кӧ хәбәр дьн, мьн бона чь хьрабийед кӧ шьк дьбьрә ԝи, тʼӧ кәси бона ԝан йәка тьштәк нәгот. Ле дәʼԝа ԝан тʼәви ԝи бона пьрса һʼәбандьна ԝан бу у сәр Исаки мьри, кӧ Паԝлос дьбежә Әԝ сах ә. Һьнге мьн ньзаньбу кӧ чаԝа әв пьрсана әʼсәйи бькьрана, мьн жь ԝи пьрси: ‹Тӧ дьхԝази һәрʼи Оршәлиме, кӧ бона ван тьшта бәр диԝане бьсәкьни?› Ле чахе Паԝлос хԝәст кӧ шьхӧле ԝи һәрʼә бәр Ԛәйсәр у бе леньһерʼандьне, мьн әʼмьр кьр кӧ әԝ гьрти бьминә, һʼәта кӧ әз ԝи бьшиньмә щәм Ԛәйсәр». Әгрипа Фесторʼа гот: «Мьн жи дьхԝәст хәбәрдана ԝи мәрьви бьбьһиста». Әԝи жи гот: «Те сьбе ԝи бьбьһейи». Рʼожа дьне Әгрипа у Бәрньке бь рʼәԝша мәзьн тʼәви сәрһʼәзар у гьрәгьред бажер һатьнә кʼочʼьксәре, Фесто әʼмьр кьр у Паԝлос анин. Фесто гот: «Әгрипа пʼадша у һʼәмуйед һазьр! Һун ви дьбиньн, тʼәмамийа щьмәʼта щьһуйа һьн Оршәлимеда, һьн жи вьра шькийате ви бәр мьн дькьрьн у дькьрьнә ԛирʼин дьготьн: ‹Әԝ гәрәке сах нәминә!› Ле мьн кʼьфш кьр кӧ әви тьштәки ӧса нәкьрийә кӧ бе кӧштьне у хԝәха жи дәʼԝа диԝана Ԛәйсәр дькә, мьн ԛьрар кьр кӧ ԝи бьшиньм. Ле бона ви тьштәки әʼсәйи тʼӧнә хԝәйе хԝәрʼа бьньвисьм, бона ве йәке мьн әв ани бәр ԝә, илаһи бәр тә Әгрипа пʼадша, ԝәки әв йәк диса бе леньһерʼандьне, һьнге тьштәки мьни ньвисаре ԝе һәбә. Чьмки тьштәки бе аԛьли йә, һәгәр әз гьртики бьшиньм у бона суще ԝи тьштәки нәньвисьм». Һьнге Әгрипа Паԝлосрʼа гот: «Изьна тә һәйә кӧ тӧ бона хԝә хәбәр ди». Ԝе дәме Паԝлос дәсте хԝә бьльнд кьр, щаба хԝә да. «Әгрипа пʼадша, бона һʼәму шькийатед кӧ щьһу ль мьн дькьн, әз иро хԝә бәхтәԝар һʼәсаб дькьм кӧ бәр тә сәкьни мә щаба хԝә дьдьм, илаһи ве пьрседа кӧ тӧ һаш жь һʼәму әʼдәт у пьрсед щьһуйа һәйи. Бона ве йәке әз жь тә һиви дькьм, бь сәбьр гӧһдарийа мьн бьки. Һʼәму щьһу заньн кӧ мьн чаԝа әʼмьре хԝә жь зарʼотийа хԝәда гьрти нава мьләте хԝә у ль Оршәлимеда дәрбаз кьрийә. Әԝана зува мьн нас дькьн, һәгәр бьхԝазьн, дькарьн шәʼдәтийе бьдьн, ԝәки әз анәгори әʼдәте кʼомәла дине мәйи һʼьшк жи ферьси бумә. У ньһа жи бона гӧмана ԝи созе кӧ Хԝәде дайә кал-бавед мә диԝана мьн те кьрьне, хут бона ԝи созе кӧ һәр донздәһ әʼширед мә бь дьл у щан, шәв у рʼож Хԝәде һʼәбандьнә, ԝәки бьгьһижьнә әԝе йәке. Бәле бона ве гӧмане йә, кӧ щьһу шькийате мьн дькьн, пʼадшайи хԝәш бә. Һун чьма нькарьн баԝәр бькьн, кӧ Хԝәде ԝе мьрийа жь мьрьне рʼакә? Мьн хԝәха жи кьрьбу дәйне стуйе хԝә, кӧ мьԛабьли наве Исайе Ньсрәте гәләк тьшт бькьра у мьн Оршәлимеда кьр жи. Мьн жь сәрәкед кʼаһина һʼӧкӧм станд у гәләкед жь щьмәʼта Хԝәде давитьнә кәле у гава дьһатьнә кӧштьне, мьн жи дәнге хԝә дьда. Һʼәму кʼьништада гәләк щара мьн әԝ дьданә щәзайе у дькьр кӧ зоре бьдьмә ԝан кӧ ԝе баԝәрийа хԝә инкʼар кьн. Мьн кʼина ԝан гьртьбу, һʼәта бажаред хәрибда жи әԝ дьзерандьн. Аԝа әз щарәке бь һʼӧкӧм у әʼмьре сәрәкед кʼаһина дьчумә Шаме. Рʼож нивро бу, пʼадшайи хԝәш бә, рʼева мьн дит жь әʼзмен рʼонайикә жь рʼонайийа тәʼве зортьр дора мьн у йед тʼәви мьн дьһатьн шәԝԛ да. Әм һʼәму кʼәтьнә әʼрде, мьн дәнгәк бьһист кӧ бь зьмане ибрани мьнрʼа гот: ‹Шаԝул! Шаԝул! Тӧ чьма Мьн дьзерини? Тӧ бь кʼӧлме нькари һәрʼи дьреше ›. Мьн гот: ‹Тӧ кʼи йи, Хӧдан?› Хӧдан гот: ‹Әз әԝ Иса мә, Йе кӧ тӧ дьзерини. Ньһа рʼабә сәр ньгед хԝә, Әз бона ԝе йәке тәва хӧйа бум, кӧ тә бькьмә бәрдәстийе Хԝә у шәʼде ԝи тьште кӧ тә дит у ԝан тьштед кӧ Әзе паше бәр тә вәкьм. Әзе тә жь дәсте щьмәʼта Исраеле у нәщьһуйа хьлаз кьм. Ва Әз тә дьшиньмә нава ԝан, ԝәки чʼәʼвед ԝан вәки, жь тәʼристанийе бәрбь рʼонайе у жь һʼӧкӧме мирещьн бәрбь Хԝәде вәгәрʼини, ԝәки бь сайа ԝе баԝәрийа сәр мьн, гӧнед ԝан бенә бахшандьне у тʼәви пʼара щьмәʼта Мьн бьн›. Аԝа Әгрипа пʼадша, әз мьԛабьли ԝе дитьна ль бәрчʼәʼвайә жь әʼзмен нәсәкьним. Ле мьн пешийе йед Шаме, Оршәлиме у тʼәмамийа тʼопрахед Щьһустанерʼа даннасин кьр, ӧса жи нәщьһуйарʼа, кӧ тʼобә кьн бәрбь Хԝәде вәгәрʼьн у кьред ԛәнщ бькьн, ԝәки бе кʼьфше әԝ жь гӧнәкьрьне вәгәрʼийанә. Бона ве йәке щьһуйа әз пʼарьстгәһеда гьртьм, хԝәстьн мьн бькӧжьн. Ле мьн жь Хԝәде кʼомәк станд у һʼәта иро әз мамә, шәʼдәтийе дьдьмә бьчʼук у мәзьна. Тьштәки зедә жи жь ԝан тьштед кӧ пʼехәмбәра у Муса готьбун ԝе бьбьн, мьн нәготийә: Гәрәке Мәсиһ щәфа бькʼьшанда, бьбуйа йе пешьн жь нава мьрийа рʼабуйи у рʼонайа хьлазбуне мьләтед щьһу у нәщьһуйарʼа даннасин кьра». Гава Паԝлос аһа щаба хԝә да, Фесто бь дәнге бьльнд гот: «Тӧ хԝә ӧнда дьки, Паԝлос! Пʼьрʼхԝәндьна тә тә ӧнда дькә». Паԝлос готе: «Әз хԝә ӧнда накьм Фестойе хԝәйиԛәдьр, ле хәбәред рʼаст у че дьбежьм. Пʼадша һаш жь ван тьшта һәйә, ләма жи әз аза хәбәр дьдьм у баԝәр накьм кӧ тьштәк жь ԝи вәшарти мабә, чьмки әв йәка ԛӧлчʼәкида нәбуйә. Әгрипа пʼадша, тӧ пʼехәмбәра баԝәр дьки? Заньм кӧ тӧ баԝәр дьки». Әгрипа Паԝлосрʼа гот: «Тә тʼьре тӧ ӧса зу дькари мьн бьки мәсиһи?» Паԝлос гот: «Әз һиви жь Хԝәде дькьм, зу-дәрәнг нә кӧ тʼәне тӧ, ле һʼәмуйед кӧ иро гӧһдарийа мьн дькьн, ӧса бьн чаԝа әз ьм, пештьри ван ԛәйда». Һьнге пʼадша рʼабу пʼийа, ԝәли, Бәрньке у һʼәмуйед тʼәви ԝи рʼуньшти жи перʼа. Әԝ дәркʼәтьнә дәрва, һәврʼа хәбәр дан у готьн: «Әва мәрьва тьштәки ӧса накә кӧ бе кӧштьне йан гьртьне». Ле Әгрипа Фесторʼа гот: «Мә дькарьбу әва мәрьва бәрʼда, һәгәр әви дәʼԝа диԝана Ԛәйсәр нәкьра». Гава ԛьрар кьрьн кӧ әм бь гәмийе һәрʼьнә Италйайе, Паԝлос у чәнд гьртийед дьн данә дәсте сәрсәдәки жь рʼәфа әскәред Ԛәйсәр, наве ԝи Йулйо. Әм кʼәтьнә гәмикә жь Әдрәмите, кӧ ԝе гәмиԝаргәһед ԛәза Асйайева бьчуйа у рʼекʼәтьн. Әристархойе мәкәдони жи жь Тʼесалонике мәрʼа бу. Рʼожа дьне әм Сайдайе пәйа бун, Йулйо ԛәнщи Паԝлосрʼа кьр, изьн да кӧ һәрʼә щәм достед хԝә, ԝәки бона ԝи хәм бькьн. Жь ԝьр рʼекʼәтьн, дәст байе пешийа мә, әм тәʼлде Ԛӧбрьсерʼа дәрбаз бун. Гава әм нава бәʼра пешбәри Киликйайе у Памфилйайева дәрбаз бун, гьһиштьнә Ликйайе, бажаре Мирайе. Ԝьр сәрсәд гәмикә Скәндәрйайе дит кӧ дьчу Италйайе, әм кьрьнә ԝе гәмийе. Һеди-һеди гәләк рʼожада әм бь зорәке незики Кьнидйайе бун. Бе кӧ рʼе нәдьда мә, әм бьнатʼара Кьретайе бәр Салмонерʼа дәрбаз бун. Әм бь зорәке ԝьррʼа дәрбаз бун гьһиштьнә щики, кӧ жерʼа дьбежьн Гәмиԝаргәһед Бәдәԝ, кӧ незики бажаре Ласәйайе бу. Гәләк ԝәхт кӧ ль ԝьр дәрбаз бу, рʼеԝитийа гәмийе жи бь ԛәзийава гьредайи бу, Рʼожа Рʼожийа жи иди дәрбаз бьбу. Паԝлос ширәт ль ԝан кьр у гот: «Гәли мәрьва! Әз дьбиньм кӧ әв рʼеԝитийа бь гәмийе гәләк зийане у щәфава гьредайи йә, нә кӧ тʼәне бона бар у гәмийе, ле бона әʼмьре мә жи». Ле сәрсәд һе гӧрʼа гәмиван у хԝәйе гәмийе дькьр, нә кӧ хәбәред Паԝлос. Әԝ гәмиԝаргәһ бона дәрбазкьрьна зьвьстане нә ԛәнщ бу, ләма жи гәләка жь ԝан ԛьрара хԝә да кӧ жь ԝьр һәрʼьн, бәлки бькарьбьн бьгьһижьнә бажаре Финиксе у ль ԝьр зьвьстане дәрбаз кьн. Әва бажара гәмиԝаргәһәкә гьрава Кьретайе йә, кӧ ль башур-рʼоавайе у бакӧр-рʼоавайе дьньһерʼә. Гава байе башурейи нәрм һат, ԝана тʼьре иди гьһиштьнә мәрәме хԝә, ләнгәрә кʼьшандьн рʼекʼәтьн у хԝә ль һешийа Кьретайе гьрти чун. Ле хеләке шунда фьртонәкә ԛайим ль мә рʼабу, кӧ жерʼа дьбежьн Еврикьлон. Фьртоне ль гәмийе хьст у гәми нькарьбу мьԛабьли ԝе бьчуйа, дәст же кʼьшанди әм жь бе һатьнә ажотьне. Мә хԝә да бәр тәʼлде гьравәкә бьчʼук, наве ԝе Каԝда, ль ԝьр бь зорәке ԛәйьк гьрт кʼьшандә жор у бь ԝәрьса гәми бьнива шьдандьн. Әԝана тьрсийан кӧ нәбә гәми лила Суртьседа рʼуне, бапʼеш анинә хԝаре у аһа жь бе дьһатьнә ажотьне. Жь дәст ԛайимийа фьртоне, баре гәмийе рʼожа дьн рʼетьнә бәʼре. Рʼожа сьсийа ԝана бь дәсте хԝә һащәтед гәмийе авитьнә бәʼре. Әԝ чәнд рʼож бун тәʼв у стәйрк нәдьһатьнә хӧйане, фьртонә жи нәдьсәкьни. Һәйнәсәр бона хьлазбуне гӧмана мә һʼәму һатә бьрʼине. Әԝ чәнд рʼож бун жи бьрʼчи мабун, Паԝлос нава ԝанда сәкьни у гот: «Гәрәке ԝә гӧрʼа мьн бькьра әʼвдно, жь Кьретайе дәрнәкʼәтана, һьнге ԝәйе әв зийан у щәфа нәкʼьшанда. Ньһа жи әз һиви дькьм, кӧ һун дьл бьдьнә бәр хԝә, чьмки пештьри гәмийе зийане ль мә тʼӧ кәси нәбә. Чьмки һәма ве шәва дәрбазбуйи мьлйакʼәтәки ԝи Хԝәдейе кӧ әз пʼара Ԝи мә у Ԝи дьһʼәбиньм, мьнва хӧйа бу у гот: ‹Нәтьрсә, Паԝлос! Гәрәке тӧ ль бәр Ԛәйсәр бьсәкьни. Ва Хԝәде һʼәмуйед тʼәви тә гәмийеда данә хатьре тә›. Ньһа дьл бьдьнә бәр хԝә әʼвдно, чьмки әз Хԝәдеда баԝәр ьм, кӧ чаԝа мьнрʼа һатә готьне, ԝе ӧса жи бьбә. Ле тʼәне әме бенә ажотьне у бәжа гьравәке хьн». Шәва чардәһа бу кӧ әм бәʼра Адрийатикеда жь бе дьһатьнә ажотьне. Ниве шәве гәмивана кʼьфш кьр, кӧ дьгьһиштьнә бәжәке, кʼурпив авитьне, дитьн кӧ ԛаси чьл метьри бу, һьнәки жи пешда чун, диса авитьне дитьн кӧ ԛаси си метьри бу. Һьнге әм тьрсийан кӧ нәбә әм щики кәвьри хьн, пашийа гәмийева чар ләнгәрә авитьн у бь дӧа чʼәʼвньһерʼийа сьбәһе бун. Ле гәмивана хԝәст кӧ жь гәмийе бьрʼәвьн, ԛәйьк жь гәмийе пәйа кьрьн, бь ԝе мәʼнийе йанчийә дьхԝазьн пешийа гәмийева жи ләнгәра бавежьн, Паԝлос сәрсәд у әскәрарʼа гот: «Һәгәр әвана гәмийеда нәминьн, һун нькарьн хьлаз бьн». Һьнге әскәра капед ԛәйьке ԛәтандьн, бәрʼдан кӧ ԝеда һәрʼә. Бәрбанга сьбәһе Паԝлос һиви жь ԝан һʼәмуйа кьр кӧ нен бьхԝьн у гот: «Әва чардәһ рʼож ә кӧ һун чʼәʼвньһерʼи бьрʼчи манә у ԝә тʼӧ тьшт нәхԝарийә. Аԝа әз һиви жь ԝә дькьм, нане хԝә бьхԝьн, кӧ әв жи бона хьлазбуна ԝә йә, тʼеләки пʼорʼе сәре ԝәйе ӧнда нәбә». У гава әв йәк гот, нан һьлда ль бәр һʼәмуйа шькьрийа хԝә Хԝәде ани, кәркьр у дәстпекьр хԝар. Ԝи чахи бин һатә бәр һʼәмуйа, ԝан жи нан хԝар. Әм һʼәму һәврʼа гәмийеда дӧсьд һʼәфте шәш мәри бун. Гава нан хԝарьн, тʼер бун, гәньм рʼетьнә бәʼре гәми сьвьк кьрьн. Сьбәһ кӧ зәлал бу, әʼрд нас нәдькьрьн, ле дәлавәкә бәʼре рʼачʼәʼв кьрьн, кӧ һешийа ԝе һәбу у дьхԝәстьн бәлки бькарьбьн бьне гәмийе ԝьр әʼрде хьн. Ләнгәрә жь бьни ԛәтандьн, бәʼреда һьштьн, һьнге жи ԝәрьсед фьтьлокед зьвьрʼандьне кӧ дьгьртьн сьст кьрьн у бапʼеша пеш данә бе, хԝә ль ԝе һешийа бәʼре гьртьн. Ле ль гьрәки бьне аве хьстьн, лиледа рʼуньшт, позе гәмийе теда ма у иди нәһʼәжийа, пьшта ԝе жи жь дәст ԛайимийа пела һурдәхԝәши дьбу. Һьнге әскәра ԛьрар кьрьн кӧ гьртийа бькӧжьн, ԝәки собәкʼарийе нәдьн нәрʼәвьн. Ле сәрсәд кӧ дьхԝәст Паԝлос хьлаз кьра, нәһьшт кӧ әԝ шеԝьра хԝә биньнә сери. Һьнге әʼмьр кьр кӧ йед собәкʼарийе заньн, пешийе хԝә бавежьнә аве дәренә бәже, ле йед майин, һьнәк сәр тʼәхта, һьнәк жи сәр пʼарчʼед гәмийе дәрен. У бь ви аԝайи аһа һʼәму хьлаз бун, дәркʼәтьнә бәже. Гава әм хьлаз бун, һьнге әм пе һʼәсийан, кӧ наве ԝе гьраве Малта йә. Бьнәлийед ԝьр гәләк ԛәдьр-һӧрмәт мәрʼа кьрьн, агьр вехьстьн, жь бәр ԝе сәрмайе у барана кӧ дәстпекьр әм ԛәбул кьрьн. Һьнге Паԝлос бәрмьлә ԛьрш бәрәв кьр дани сәр егьр, мәʼрәк жь дәст гәрме дәркʼәт, дәв авитә дәсте ԝи гьрт. Бьнәлийа гава рʼәʼԝьре дәсте ԝива дардабуйи дит, һәврʼа готьн: «Әва рʼасти меркӧж ә, жь бәʼре хьлаз бу, ле хӧдане Һәԛийе нәһьшт кӧ әԝ бьжи». Ле Паԝлос рʼәʼԝьре дәсте хԝәва даԝшандә нава егьр у зийан ль ԝи нәбу. Әԝана жи һивийа ԝе йәке бун кӧ ԝе бьԝәрьмә йан ньшкева бькʼәвә бьмьрә, гава гәләки һивийе ман у дитьн кӧ тʼӧ тьшт ль ԝи нәһат, фькьре хԝә гӧһастьн у готьн: «Әва хԝәдек ә». Ль ԝи щийе дор-бәред ԝан бәргед сәрԝере ԝе гьраве һәбун, кӧ наве ԝи Поплийо бу. Әԝи һӧрмәт мәрʼа кьр, се рʼожа әм щәм хԝә хԝәй кьрьн. Баве Поплийо тʼайеда бь зькешийе нәхԝәш пʼалдайи бу. Паԝлос чу щәм ԝи, дӧа кьр, дәстед хԝә данинә сәр ԝи у әԝ ԛәнщ кьр. Гава әв йәка ԛәԝьми, нәхԝәшед майинә ԝе гьраведа жи дьһатьн ԛәнщ дьбун. Ԝана гәләк ԛәдьр-һӧрмәт мәрʼа кьрьн у гава әм рʼекʼәтьн, әԝ тьштед кӧ бона рʼе ԝе кери мә бьһатана мәрʼа дагьртьн. Се мәһа шунда әм бь гәмийа Скәндәрйайе рʼекʼәтьн, кӧ ԝе жи зьвьстан ль ԝе гьраведа дәрбаз кьрьбу, шькьле һәр дӧ хӧданед Һәвал-щеԝи жи сәр бу. Әм гьһиштьнә Сирәкусе, се рʼожа ԝьр ман. Жь ԝьр жи әм чун гьһиштьнә Рʼегийоме. Рʼожәке шунда байе башуре һат, әм дӧ рʼожада гьһиштьнә Потийоле. Ԝьр мә хушк-бьра дитьн у һиви жь мә кьрьн, кӧ әм һʼәфтеке ԝьр бьминьн. У бь ви аԝайи әм гьһиштьнә Рʼоме. Хушк-бьрайед ԝьр жи бона мә бьһистьбун, пешийа мәда һатьн һʼәта Мәйдана Әпийу у Се Меванхана. Паԝлос кӧ әԝ дитьн, шькьри да Хԝәде у дьле ԝи шьдийа. Гава әм гьһиштьнә Рʼоме, изьн данә Паԝлос кӧ тʼәне тʼәви ԝи әскәре кӧ нобәдарийе ԝи дькә бьминә. Се рʼожа шунда Паԝлос гази гьрәгьред щьһуйа кьр, гава әԝ һатьн, ԝанрʼа гот: «Гәли бьра! Мьн тьштәки мьԛабьли щьмәʼте йан кал у бава нәкьрийә, ле Оршәлимеда әз гьртьм дамә дәсте рʼомайийа. Гава әз анимә бәр диԝане, хԝәстьн мьн бәрʼдьн, чьмки сәр мьн бона кӧштьне тʼӧ хьраби нәдитьн. Ле гава щьһуйа мьԛабьли ԝе йәке хәбәр дан, мьн иди бечʼарийа хԝә дәʼԝа Ԛәйсәр кьр, ле нә бона ԝе йәке, кӧ шькийате мьләте хԝә бькьра. Ләма жи мьн һиви кьр, кӧ ԝә бьбиньм у тʼәви ԝә хәбәр дьм. Бәле әз бона гӧмана Исраеле ван ԛәйд-зьнщирада мә». Ԝана жи ԝирʼа гот: «Мә бона тә жь Щьһустане нә нәʼмә стандийә, нә жи жь бьрайед мә кәс һатийә бона хьрабийа тә гьли кьрийә йан хәбәр дайә. Ле әм дьхԝазьн жь тә бьбьһен, кʼа бир у баԝәрийа тә чь йә, чьмки бона ԝе кʼомәле мәва иди әʼйан ә кӧ һʼәму щийа мьԛабьли ԝе хәбәр дьдьн». Аԝа рʼожәк кʼьфшкьрьн у ԝе рʼожеда гәләк һатьнә ԝи щийе кӧ Паԝлос теда дьма. Әԝи сьбе һʼәта еваре ԝанарʼа бона Пʼадшатийа Хԝәде шьровәдькьр у бь мәʼрифәти даннасин дькьр, дәрһәԛа Исада жи бь Ԛануна Муса у ньвисаред пʼехәмбәра әԝ дьданә баԝәркьрьне. Һьнәка хԝә ль готьнед ԝи гьртьн, һьнәка жи баԝәр нәкьр. Аԝа бәри чуйина ԝан нава ԝанда бу дӧтирәти гава Паԝлос әв йәк гот: «Чаԝа рʼаст Рʼӧһʼе Пироз бь Ишайа пʼехәмбәр тʼәви кал-бавед мә хәбәр да у гот: ‹Һәрʼә щәм ве щьмәʼте у бежә: Һуне бьбьһен у гӧһ бьдьне, ле фәʼм нәкьн, һуне бьньһерʼьн у дина хԝә бьдьне, ле нәбиньн. Чьмки әва щьмәʼта сәрһʼьшк ә, бь гӧһа гьран дьбьһен у чʼәʼвед хԝә гьртьнә, ԝәки бь чʼәʼва нәбиньн, бь гӧһа нәбьһен у бь һʼьш фәʼм нәкьн, вәнәгәрʼьн, кӧ Әз ԝан ԛәнщ кьм›. Аԝа бьра ԝәва әʼйан бә, ԝәки хьлазкьрьна Хԝәде нәщьһуйарʼа һатә шандьне у әԝе гӧһдарийа Ԝи бькьн». Паԝлос тʼам дӧ сала мала хԝәйә кʼьрекьрида ма, кʼи жи дьһатә щәм ԝи, һʼәму ԛәбул дькьрьн. Әԝи Пʼадшатийа Хԝәде бь меркʼими бе пешигьртьн даннасин дькьр у дәрһәԛа Хӧдан Иса Мәсиһда һин дькьр. Жь Паԝлос, хӧламе Мәсиһ Иса, шандитийерʼа газикьри, бона бәлакьрьна ԝе Мьзгинийа Хԝәдейә кʼьфшкьри, йа кӧ Ԝи һе пешда ньвисаред пирозда бь заре пʼехәмбәред Хԝә соз дабу. Әва Мьзгинийа бона Кӧрʼе Ԝи, Хӧдане мә Иса Мәсиһ ә, кӧ бь бәдәни жь зӧрʼәта Даԝьд бу у бь Рʼӧһʼе Пирозийе, гава жь мьрьне рʼабу, ԛӧдрәтеда чаԝа Кӧрʼе Хԝәде хӧйа бу. Бь Ԝи мә кʼәрәма шандитийе станд, ԝәки бона наве Ԝи һʼәму мьләта һин кьн, кӧ баԝәр бькьн у гӧһдар бьн. Һун жи нава ԝанда һатьнә газикьрьне, кӧ бьбьнә пʼара Иса Мәсиһ. Жь ԝә һʼәмуйарʼа, һʼьзкьрийед Хԝәдейә пирозбунерʼа газикьри, кӧ Рʼомайеда дьминьн, кʼәрәм у әʼдьлайи бә, жь Хԝәдейе Баве мә у Хӧдан Иса Мәсиһ. Бәре пешьн әз бь дәсте Иса Мәсиһ бона ԝә һʼәмуйа рʼазибуне дьдьмә Хԝәдейе хԝә, чьмки баԝәрийа ԝә тʼәмамийа дьнйайеда те готьне. Хԝәде шәʼде мьн ә, әԝ Хԝәдейе кӧ әз нава Мьзгинийа Кӧрʼе Ԝида бь дьл у щан хӧламтийе дькьм, әз һәр гав ԝә бир тиньм у тʼьме нава дӧайед хԝәда һиви дькьм, кӧ бь әʼмьре Хԝәде щарәке рʼе бькʼәвә мьн, сәр ԝәда бем. Чьмки әз гәләки һʼәйра дитьна ԝәда мә, ԝәки пʼешкʼешәкә рʼӧһʼани бьгьһиньмә ԝә, кӧ һун баԝәрийеда бьшьдьн. Аԝа готи әз жи тʼәви ԝә, әм дьл бьдьнә бәр һәв, бь ԝе баԝәрийа мьн у ԝәйә һәр дӧ алийава. Әз дьхԝазьм кӧ һун заньбьн хушк-бьрано, ԝәки гәләк щара мьн хԝәстийә бемә щәм ԝә, кӧ кʼәда мьн нава ԝәда жи һәбә, чаԝа нава нәщьһуйед майинда, ле һʼәта ньһа рʼе нәкʼәтийә мьн. Әз борщдаре һʼәму мьләта мә, һьн йе йунанед пешдачуйи у һьн жи йе мьләтед пашдамайи, дәйндаре сәрԝахта у бефәʼма мә. Аԝа әз бь дьл у щан дьхԝазьм Мьзгинийе бьдьмә ԝә жи, йед кӧ Рʼомайеда дьминьн. Бәле әз Мьзгинийе шәрм һʼәсаб накьм, чьмки әԝ ԛәԝата Хԝәде йә, бона хьлазбуна һʼәму баԝәрмәнда, пешийе бона щьһуйа, паше нәщьһуйа. Чьмки Мьзгини дьдә кʼьфше, кӧ Хԝәде чаԝа мәрьва рʼаст һʼәсаб дькә, дькә кьрасе хԝә, әв йәк жь сери һʼәта бьни бь баԝәрийе йә, чаԝа ньвисар ә: «Йе рʼаст ԝе бьжи, чьмки баԝәр дькә». Хәзәба Хԝәде жь әʼзмен сәр һʼәму бехԝәдети у нәһәԛийа ԝан мәрьва хӧйа дьбә, кʼижан кӧ бь нәһәԛийед хԝә наһельн кӧ рʼасти хӧйа бә. Чьмки чь кӧ гәрәке бона Хԝәде бьзаньбьн ԝанва әʼйан ә, чьмки Хԝәде ԝанва әʼйан кьрийә. Рʼаст жь әʼфьрандьна дьнйайеда һʼӧнӧред Ԝийә нәхӧйа, аԝа готи ԛӧдрәта Ԝийә һʼәта-һʼәтайе у Хԝәдетийа Ԝи бь әʼфьрина хӧйа дьбьн, зәлал тенә дитьне. Бь ви аԝайи кәс нькарә щабе бьдә. Бәле ԝан Хԝәде нас дькьр, ле пәсьне Ԝи нәдан чаԝа Хԝәде, нә жи жь Ԝи рʼази бун, ле бәле әԝ нава фькьред хԝәда пʼучʼ бун у жь дәст бефәʼмийе шуна рʼәшва чун. Ԝана гот: «Әмә сәрԝахт ьн», ле бефәʼм дәркʼәтьн у рʼумәта Хԝәдейе нәмьри шькьле мәрьве пʼучʼи-мьри, тәйрәда, чарпʼе у шулькийарʼа гӧһерʼин. Ләма жи Хԝәде әԝ бь хԝәстьна дьле ԝан данә дәсте һʼәрамийе, кӧ бәдәна хԝә нава һәвда бьһʼәрʼьминьн. Ԝана рʼастийа һьндава Хԝәдеда дәрәԝийерʼа гӧһерʼин у сәре хԝә ль бәр әʼфьрина данин, әԝ һʼәбандьн, нә кӧ Әʼфьрандаре һʼәта-һʼәтайе кӧ һежайи шькьрийе йә. Амин. Бона ве йәке Хԝәде әԝ данә бенамусийе, һʼәта жьнед ԝан жи һʼәԝщәтийа хԝәйә әʼдәте дьне һʼәԝщәтийа әкʼсиәʼдәтийерʼа гӧһерʼин. Ӧса жи мера һʼәԝщәтийа жьнайә әʼдәти һьштьн, пе тәмед хԝәйә хьраб бь һәврʼа шәԝьтин, мера тʼәви мера рʼобәти дькьр у һәԛе жьрʼекʼәтьна хԝәйә ԛазьнщкьри һьлдьданә сәр хԝә. У чаԝа ԝана нәхԝәст Хԝәде занәбуна хԝәда хԝәйкьрана, Хԝәде жи әԝ данә фькьред бетʼәԝшә, кӧ әԝана тьштед нәщайиз бькьн. Әвана һәр нәһәԛийе, нәԛәнщийе, тьмайийе, хьрабийава тʼьжи нә: Бь һʼәвсудийе, меркӧжийе, бәрзәԛийе, мьхәнәтийе, хернәхԝазийева дагьрти, гьлигәрʼо, бӧхданбеж, нәхԝәдеһʼьз, бешәрм, позбьльнд, кʼӧбар-бабах, йе хьрабийе чедькә, нә гӧрʼа де-бавада, бефәʼм, беамьн, беисаф, берʼәʼм. Бәле әвана һаш жь ԛануна Хԝәде һәнә, кӧ йед ван тьшта дькьн һежайи мьрьне нә, ле бәле нә кӧ тʼәне ван тьшта дькьн, ле һавьжийа хԝә жь кьрийа жи тиньн. Аԝа әʼвдо, дьхԝази кʼи би, гава лома дьки, тӧ нькари хԝә бесущ ки. Чаԝа лома хәлԛе дьки, ӧса жи тӧ хԝә ломәкʼар дьки, чьмки тӧ кӧ лома дьки, хут ԝан тьшта дьки. Ле әм заньн кӧ диԝана Хԝәде ԝе бь рʼастийе сәр ԝанда бе, йед кӧ тьштед ӧса дькьн. Аԝа әʼвдо, тӧ кӧ лома хԝәйе ван кьра дьки у тӧ хԝәха жи ԝан тьшта дьки, тә тʼьре те жь диԝана Хԝәде бьрʼәви? Йан жи тӧ кӧ дәԝләмәндтийа ширьнайи, бәрбьһери у сәбьра Ԝи беһӧрмәт дьки, тӧ ньзани кӧ ширьнайийа Хԝәде тә дьбә бәрбь тʼобәкьрьне? Ле тӧ бь сәрһʼьшки у дьлкәвьрийа хԝә хәзәбе сәр хԝәда дьщьвини, бона Рʼожа Хәзәбе, гава диԝана Хԝәдейә һәԛ хӧйа бә. Әԝе ԝәкә әʼмәле һәр кәси бинә пешийа ԝан. Жийина һʼәта-һʼәтайе ԝе бьдә ԝан, йед кӧ тʼьме бь думька дьреж нава кьрьнед ԛәнщда нә, кӧ һӧрмәте, рʼумәте у нәмьрийе дьхԝазьн. Ле һерс у хәзәбе сәр ԝанда бә, йед кӧ кʼара хԝә дьгәрʼьн, дәст жь рʼастийе кьрьнә у хԝә данә хьрабийе. Тәнгаси у зӧлме сәр ԝан һʼәмуйада бе, йед хьрабийе дькьн, пешийе сәр щьһуйа, паше сәр нәщьһуйа. Ле һӧрмәт, рʼумәт у әʼдьлайи ԝе ԝан һʼәмуйарʼа бә, йед кӧ ԛәнщийе дькьн, пешийе щьһурʼа у паше нәщьһурʼа. Чьмки ль щәм Хԝәде фьрԛи тʼӧнә. Әԝед бейи Ԛануна Муса кӧ гӧнә дькьн, бейи Ԛанун жи ԝе ӧнда бьн, ле әԝед хԝәйиԛанун кӧ гӧнә дькьн, бь Ԛануне жи ԝе диԝана ԝан бьбә. Чьмки нә кӧ әԝед Ԛануне дьбьһен ль бәр Хԝәде рʼаст ьн, ле әԝед кӧ Ԛануне дьԛәдиньн ԝе рʼаст бенә һʼәсабе. Нәщьһуйед кӧ Ԛануна ԝан тʼӧнә, гава бе һʼәмде хԝә хԝәстьнед Ԛануне дьԛәдиньн, бәле әԝә бе Ԛанун ьн, хԝәха бона хԝә дьбьнә ԛанун. Чьмки әвана дьдьнә кʼьфше, кӧ хԝәстьна Ԛануне дьле ԝанда ньвисар ә. Исафа ԝан жи шәʼдәтийа ве йәке дьдә у фькьред ԝан щарна ль ԝан нәһәԛ дькьн, щарна бесущ дькьн. Ԝе Рʼоже ԝе ӧса бә, гава Хԝәде бь дәсте Мәсиһ Иса диԝана тьштед мәрьвайә дьзива бькә, анәгори Мьзгинийа кӧ әз даннасин дькьм. Аԝа тӧ щьһу тейи һʼәсабе, тә хԝә спартийә Ԛануне у бь Хԝәдейе хԝә дьфьрʼи, хԝәстьна Ԝи зани у жь Ԛануне һин буйи, ԛәнщи-хьрабийе жь һәв дәрдьхи. У тӧ сәр хԝә гӧман и, кӧ рʼебәре кора йи, рʼонайийа бәр йед тәʼрийеда, ширәткʼаре бефәʼма, дәрсдаре хьшима. Тӧ хԝәда жи гӧман и, кӧ бь Ԛануне хут тӧ хԝәйе тʼәрзе занәбуне у рʼастийе йи. Ле бәле аԝа тӧ кӧ һәвале хԝә һин дьки, хԝәха хԝә һин наки? Даннасин дьки, кӧ нәдьзьн, ле тӧ дьдьзи? Дьбежи: «Зьнийе нәкә», ле зьнийе дьки? Жь пʼута зьвер и, ле пʼарьстгәһед ԝан тʼалан дьки? Бь Ԛануне дьфьрʼи, ле Ԛануне дьтʼәрʼьбини, Хԝәде беһӧрмәт дьки? Чаԝа ньвисар ә: «Рʼуйе ԝә щьһуйада наве Хԝәде нава нәщьһуйада те беһӧрмәткьрьне». Бәле кʼара сьнәтийе ԝе һәбә, һәгәр Ԛануне бьԛәдини. Ле һәгәр тӧ Ԛануне дьтʼәрʼьбини, сьнәтбуна тә дьбә бесьнәти. Ӧса жи, һәгәр йе нәсьнәткьри тʼәмийед Ԛануне бьԛәдинә, нәсьнәтийа ԝи ԝе сьнәти нәйе һʼәсабе? У йе бьнйатʼа хԝәда нәсьнәткьри кӧ Ԛануне дьԛәдинә, ԝе диԝана тә бькә, кӧ тӧ хԝәйе ньвисар у сьнәтийе йи, ле Ԛануне дьтʼәрʼьбини. Чьмки щьһу нә әԝ ә, кӧ дәрвава йә у сьнәти нә әԝ ә, кӧ дәрвава сәр бәдәне йә. Ле щьһу әԝ ә, йе кӧ дьле хԝәда щьһу йә у сьнәтийа рʼаст дьле сьнәтбуйи йә, бь Рʼӧһʼ, нә бь Ԛануна ньвисар. Йе һа, нә кӧ мәрьв пʼәйе ԝи дьдьн, ле Хԝәде. Иди щьһу чьва зедә йә? Йан жи чь фәйда сьнәтийе һәйә? Гәләки, бь һәр алийава. Бәре пешьн ԝе йәкева, кӧ готьнед Хԝәде ль ԝан һатьнә спартьне. Аԝа һәгәр жь ԝан һьнәк амьн нәман, дьбә кӧ жь дәст беамьнийа ԝан Хԝәде ԝе беамьн дәре? Тʼӧ щар! Дә бьра Хԝәде рʼаст бә у һʼәму мәрьв дәрәԝ, чаԝа ньвисар ә: «Ԝәки готьнед Хԝәда Тӧ бесущ дәрейи у диԝана Хԝәда Тӧ сәркʼәви». Ле һәгәр нәһәԛийа мә һәԛийа Хԝәде дьдә кʼьфше, әм чь бежьн? Ԝәки ӧса йә Хԝәде нәһәԛ ә, кӧ хәзәбе тинә сәре мә? (Бь мәрьвайи хәбәр дьдьм). Тʼӧ щар! Һәгәр нә ӧса бә, Хԝәде ԝе чаԝа диԝана дьне бькә? Ле һәгәр рʼастийа Хԝәде, бона рʼумәта Ԝи, бь дәрәԝийа мьн һе кʼьфш дьбә, ле иди чьма ԝе диԝана мьн мина гӧнәкʼарәки бе кьрьне? У гәло һәԛ ә кӧ әм аһа бежьн: «Хьрабийе бькьн, кӧ бьбә ԛәнщи», чаԝа һьнәк шәрʼа ль мә гьли дькьн, йане әм ӧса дьбежьн? Әԝ мәрьв ԝе рʼаст сәр бәла хԝә вәбьн. Аԝа әм иди чь бежьн? Әм щьһу тьштәкива жь нәщьһуйа четьр ьн? На хер! Чьмки мә иди жор да кʼьфше, чаԝа щьһу, ӧса жи нәщьһу, һʼәму жи бьн һʼӧкӧме гӧнәда нә. Чаԝа ньвисар ә: «Йәки рʼаст тʼӧнә, тʼӧ кәс тʼӧнә, кәсәк тʼӧнә, кӧ фәʼм бькә, кәсәк тʼӧнә, ль Хԝәде бьгәрʼә. Һʼәму бәндә хальфи нә, бь һәврʼа тʼәвайи бекер бунә, йәки ԛәнщийе бькә тʼӧнә, тʼӧ кәс тʼӧнә. Гәԝрийа ԝанә тʼьрба вәкьри йә, зьмане ԝанә дәрәԝин ә, жәʼра мәʼра бьн заре ԝан ә. Дәве ԝана тʼьжи ньфьрʼ у тәʼли йә, ньге ԝанә хунрʼетьнерʼа дьләзинә. Рʼийа ԝанә ԛәдә у бәла нә. Рʼийа әʼдьлайийе наснәкьри нә, тьрса Хԝәде ль бәр чʼәʼва ԛәт тʼӧни нә ». Аԝа әм заньн Ԛанун чь кӧ дьбежә, ԝанарʼа дьбежә, йед кӧ бьн һʼӧкӧме Ԛанунеда нә, ԝәки һʼәму дәв бенә гьредане у тʼәмамийа дьнйайе ль бәр диԝана Хԝәде щабдар бә. Чьмки бь кьред Ԛануне тʼӧ ԛул-бәндә ԝе ль бәр Хԝәде рʼаст дәрнәйе, ле бь Ԛануне гӧнә те наскьрьне. Ле ньһа бейи Ԛануне, рʼастһʼәсабкьрьна Хԝәде хӧйа буйә, бона кʼижане Ԛанун у пʼехәмбәр жи шәʼдәтийе дьдьн. Әв ә рʼастһʼәсабкьрьна Хԝәде: Кʼи баԝәрийа хԝә Иса Мәсиһ тинә, Хԝәде ԝан һʼәмуйа ль бәр Хԝә рʼаст һʼәсаб дькә. Фьрԛи тʼӧнә, чьмки һʼәмуйа гӧнә кьр у нәгьһиштьнә рʼумәта Хԝәде. Ле жь кʼәрәма Ԝи, бь азакьрьна Мәсиһ Иса рʼастһʼәсаббуне пʼешкʼеш дьстиньн. Хԝәде Әԝ кʼьфш кьрьбу, кӧ Әԝ бь хуна Хԝә ль бәр гӧнед ԝан кʼәвә, йед кӧ ве йәке баԝәр бькьн. Хԝәде әв йәка кьр, кӧ рʼастһʼәсабкьрьна Хԝә бьдә кʼьфше, чьмки Ԝи бь сәбьра Хԝә гӧһ нәда ԝан гӧнед кӧ пешда һатьбунә кьрьне. Аԝа готи Хԝәде бь Иса әв йәк кьр, ԝәки рʼастһʼәсабкьрьна Хԝә ви зәманида бьдә кʼьфше, кӧ Хԝәха рʼаст ә у һәр кәсе кӧ баԝәрийа хԝә Иса тинә, ԝан рʼаст һʼәсаб дькә. Аԝа иди чь майә кӧ әм пе бьфьрʼьн? Һʼәму пʼучʼ бу чу. Чьма пʼучʼ бу? Чьмки әм Ԛануне дьԛәдиньн? На хер, ле чьмки әм баԝәр дькьн. Чьмки мәва фәʼмдари йә, кӧ мәрьв бь баԝәрийе рʼаст һʼәсаб дьбә, бейи кьред Ԛануне. Йан Хԝәде тʼәне Хԝәде щьһуйа йә? Нә йе нәщьһуйа йә? Бәле, йе нәщьһуйа йә жи, чьмки Хԝәде йәк ә у әԝ йед сьнәтбуйи бь баԝәрийе рʼаст һʼәсаб дькә у нәсьнәтбуйийа жи диса бь ԝе баԝәрийе. Ԝәки ӧса йә әм бь баԝәрийе Ԛануне бәтал дькьн? Тʼӧ щар, ле әм Ԛануне мак дькьн. Әм иди чь бежьн бона Бьраһиме бавәʼшире хԝә, алийе бәдәнеда? Әԝи чь дит? Һәгәр Бьраһим бь кьред хԝә рʼаст һʼәсаб бьбуйа, һьнге дькарьбу бь кьред хԝә бьфьрʼийа, ле нә ль бәр Хԝәде. Ле кʼа ньвисар чь дьбежә? «Бьраһим Хԝәде баԝәр кьр у әԝ йәк жерʼа рʼасти һатә һʼәсабе». Аԝа һәгәр йәк шьхӧләки дькә, маше ԝи жерʼа найе дайин чаԝа пʼешкʼеш, ле чаԝа дәйн. Ле һәгәр гӧмана йәки нә сәр шьхӧле ԝи йә, ле баԝәрийа хԝә Ԝи тинә, Йе кӧ нәпʼака бесущ дькә, бь ве баԝәрийе әԝ рʼаст һʼәсаб дьбә. Даԝьд жи аһа хԝәзийа хԝә ль ԝи мәрьви тинә, йе кӧ Хԝәде бейи кьра ԝи рʼаст һʼәсаб дькә. «Хԝәзи ль ԝан, кӧ нәһәԛийед ԝан һатьнә бахшандьне у гӧнед ԝан һатьнә ньхамтьне. Хԝәзи ль ԝи бәндәйи, кӧ Хӧдан ԝирʼа гӧнә һʼәсаб накә». Гәло әва хԝәзийа ль сьнәтбуйийа те дайине, йан нәсьнәтбуйийа? Чаԝа мә гот, кӧ баԝәрийа Бьраһим жерʼа рʼасти һатә һʼәсабе. Ле бәле кʼәнге һатә һʼәсабе? Пәй сьнәтбунерʼа, йан бәри сьнәтбуне? Нә кӧ пәй сьнәтбунерʼа, ле бәри сьнәтбуне. У паше әԝи сьнәтбун нишан станд, чаԝа мора рʼастһʼәсаббуне, бь ԝе баԝәрийа хԝәйә бәри сьнәтбуне. Бь ви аԝайи Бьраһим бу баве һʼәму баԝәрмәндед нәсьнәтбуйи, ԝәки әԝ жи рʼаст бенә һʼәсабе у ӧса жи бу баве сьнәтбуйийа, нә кӧ тʼәне йе сьнәтбуйийа, ле йе ԝан жи, кʼижан пʼега ԝе баԝәрийеда дьчьн, йа кӧ Бьраһиме баве мә һе бәри сьнәтбуне баԝәр кьр. Әԝ созе Бьраһим у зӧрʼәта ԝирʼа һатә дайине кӧ дьнйайе ԝар бьн, нә кӧ бь кьред Ԛануне бу, ле бь ԝе йәке бу, кӧ ԝи баԝәр кьр у рʼаст һатә һʼәсабе. Һәгәр тʼәне әԝед жь кьред Ԛануне бьбуна хԝәйе ԝар, һьнге баԝәри ԝе пʼучʼ буйа у созе жи бәтал буйа. Чьмки Ԛанун һерсе рʼадькә. Дәра кӧ ԛанун тʼӧнә, ԛанунтʼәрʼьбандьн жи тʼӧнә. Бь ви аԝайи соз бь баԝәрийе те стандьне, ԝәки соз бона һʼәму зӧрʼәтед Бьраһим пʼешкʼешәкә әрекьри бә, нә кӧ тʼәне бона ԝанә йед кӧ ԛануне дьԛәдиньн, ле бона ԝан жи, йед кӧ мина Бьраһим баԝәр дькьн. Чьмки Бьраһим баве мә һʼәмуйа йә, чаԝа ньвисар ә: «Мьн тӧ кьри баве гәләк мьләта». Әԝ баве мә йә, ль бәр ԝи Хԝәдейе кӧ әԝи баԝәр кьр, ԝәки Әԝ мьрийа сах дькә у гази тьштед тʼӧнәнә дькә, чаԝа кӧ һәнә. Ԝи щийе кӧ гӧман нәмабу, Бьраһим бь гӧман баԝәр кьр, кӧ әԝе бьбә баве гәләк мьләта, чаԝа һатьбу готьне: «Зӧрʼәта тәйе жи ԝе һаԛаса бә». У әԝ баԝәрийеда сьст нәбу, нә һʼале ԛальбе хԝәда ньһерʼи, ԝәки иди мина мьрийа бу, (чьмки әԝ незики сәд сали бу) у нә жи бәтʼьна Сәрайейә мьри ньһерʼи. Ле баԝәрийа хԝә ль созе Хԝәде ани у дӧдьли нәбу, бь баԝәрийе сәр ԛәԝата хԝәда һат, шькьрийа хԝә Хԝәде ани у ԝе йәкеда баԝәр бу, кӧ Йе соз дайә ԝе бинә сери жи. Бона ве баԝәрийе «жерʼа рʼасти һатә һʼәсабе». Ле әв готьн нә тʼәне бона Бьраһим һатә ньвисаре, кӧ Хԝәде әԝ рʼаст һʼәсаб кьр, ле бәле әԝ бона мә жи ньвисар ә. Рʼастбуне мәрʼа жи бе һʼәсабе, кʼижанед кӧ баԝәрийа хԝә Ԝи тиньн, Йе кӧ Хӧдане мә Иса жь мьрьне рʼакьр. Иса бона нәһәԛийед мә һатә кӧштьне у жь мьрьне рʼабу, кӧ әм рʼаст бенә һʼәсабе. Аԝа кӧ әм бь баԝәрийе рʼаст һатьнә һʼәсабе, әʼдьлайийа мә тʼәви Хԝәде һәйә бь сайа Хӧдане мә Иса Мәсиһ. Пе Ԝи мә бь баԝәрийе мәщал дит тʼәви ԝе кʼәрәме бьн, кʼижанеда әм сәкьнинә. У бь ԝе гӧмана кӧ әме тʼәви рʼумәта Хԝәде бьн дьфьрʼьн. У нә тʼәне бь ве йәке, ле әм бь тәнгасийед хԝә жи дьфьрʼьн, чьмки әм заньн кӧ тәнгаси сәбьре тинә, сәбьр жи кʼәтьн-рʼабуне, кʼәтьн-рʼабун жи гӧмане. У гӧман жи мә рʼурʼәш накә, чьмки һʼьзкьрьна Хԝәде сәр мәда бь ԝи Рʼӧһʼе Пироз барийә, Йе кӧ мәрʼа һатийә дайине. Чьмки гава әмә һе бечʼарә бун, Мәсиһ бона мә нәпʼака ԝәхтда мьр. Дәгмә бона мәрьвәки рʼаст йәк бьмьрә, бәлки бона мәрьвәки ԛәнщ йәке бьԝерә бьмьрә, ле бәле Хԝәде һʼьзкьрьна Хԝә һьндава мәда һьнге да кʼьфше, гава әмә һе гӧнәкʼар бун, Мәсиһ бона мә мьр. Ньһа әм кӧ бь хуна Ԝи ль бәр Хԝәде рʼаст һʼәсаб бунә, һе чьԛас зедә әме бь Ԝи жь хәзәбе хьлаз бьн. Һәгәр әм тʼәви Хԝәде бь мьрьна Кӧрʼе Ԝи ль һәв һатьн, гава әмә нәйар бун, ле һе чьԛас зедә пе ԝе льһәвһатьне әме бь жийина Ԝи хьлаз бьн. У нә тʼәне һаԛас, ле бь Хԝәде жи әм дьфьрʼьн, сайа Хӧдане хԝә Иса Мәсиһ, бь Кʼижани әм тʼәви Хԝәде ль һәв һатьнә. Аԝа бь мәрьвәки гӧнә кʼәтә дьне у жь гӧнә жи мьрьн һат. Бь ви аԝайи мьрьн сәр һʼәму мәрьва бәла бу, чьмки һʼәмуйа жи гӧнә кьр. Бәри Ԛануне, дьнйайеда гӧнә һәбу, ле дәра кӧ ԛанун тʼӧнә, гӧнә найе һʼәсабе. Ле бәле мьрьне жь Адәм гьрти һʼәта Муса һʼӧкӧм кьр, һʼәта сәр ԝан жи, йед кӧ мина Адәм гӧрʼа Хԝәде дәрнәкʼәтьн. Адәм мина тʼәрзәки Ԝи бу, Йе кӧ ԝе пәйрʼа бьһата. Ле пʼешкʼеша Хԝәде мина нәһәԛийа Адәм нинә. Чьмки һәгәр бь нәһәԛийа мәрьвәки гәләк мьрьн, һе чьԛас зедә кʼәрәма Хԝәде у дайина кӧ бь кʼәрәма Мәрьвәки, йане йа Иса Мәсиһ сәр гәләка зедә бу. У пʼешкʼеш нә ӧса йә, чаԝа һәԛе гӧне йәки, чьмки диԝане бь гӧнәки сущдари ани, ле пʼешкʼеше жь гәләк нәһәԛийа бесущ кьр. Чьмки һәгәр бь нәһәԛийа мәрьвәки у рʼуйе ԝида мьрьне һʼӧкӧм кьр, чьԛас зедә әԝед кӧ кʼәрәма Хԝәдейә дәԝләмәнд у рʼастһʼәсаббуне пʼешкʼеш дьстиньн ԝе жийинеда бь сайа Йәки, аԝа готи Иса Мәсиһ пʼадшатийе бькьн. Аԝа бь ви аԝайи пе нәһәԛике диԝана тʼәмамийа мәрьвайе бу, ӧса жи бь кьрьнәкә рʼаст һʼәму мәрьв ԝе рʼаст бенә һʼәсабе у жийине бьстиньн. Чаԝа бь нәгӧһдарийа йәки гәләк бунә гӧнәкʼар, ӧса жи бь гӧһдарийа Йәки гәләк ԝе рʼаст бенә һʼәсабе. Ле бәле Ԛанун кʼәтә наве, кӧ нәһәԛи зедә бә, ле ль кʼидәре гӧнә зедә бу, кʼәрәм жи ль ԝьр һе зедә бу, ԝәки чаԝа гӧнә бь мьрьне һʼӧкӧм кьр, ӧса жи кʼәрәма Хԝәде бь рʼастһʼәсабкьрьне һʼӧкӧм бькә, мә бьбә бәрбь жийина һʼәта-һʼәтайе бь сайа Хӧдане мә Иса Мәсиһ. Ле әм ньһа чь бежьн? Әм нава гӧнада бьминьн, кӧ кʼәрәма Хԝәде сәр мәда зедә бә? Тʼӧ щар! Әм кӧ һьндава гӧнада мьрьн, чаԝа дькарьн һе нава ԝанда бьжин? Һун ньзаньн әм кӧ йәктийа Мәсиһ Исада һатьнә ньхӧмандьне, мьрьна Ԝида һатьнә ньхӧмандьне? Бь ньхӧмандьне әм иди тʼәви мьрьна Ԝи бунә у тʼәви Ԝи һатьнә дәфьнкьрьне, ԝәки чаԝа Мәсиһ бь рʼумәта Баве жь мьрьне рʼабу, ӧса жи әме бькарьбьн жийина нуда бьжин. Чьмки һәгәр әм мина мьрьна Ԝи мьрьн тʼәви Ԝи бун, әме ӧса жи мина рʼабуна Ԝи жь мьрьне рʼабьн. Әм ве йәке заньн кӧ бьнйатʼа мәйә кәвьн тʼәви Ԝи хач бу, ԝәки ԛальбе гӧнәкʼар сәри һьлнәдә, кӧ жь вьр шунда әм нәбьнә хӧламед гӧнә. Чьмки әԝе кӧ мьрийә, әԝ жь гӧнә азабуйи йә. Аԝа һәгәр әм тʼәви Мәсиһ мьрьнә, әм баԝәр дькьн, кӧ әме тʼәви Ԝи бьжин жи. Чьмки әм заньн Мәсиһ кӧ жь мьрьне рʼабуйә, иди намьрә, мьрьн сәр Ԝи иди һʼӧкӧм накә. Мьрьна Әԝ мьр, һьндава гӧнәда щарәке бона һәр тʼьм мьр, ле жийина кӧ ньһа дьжи, һьндава Хԝәдеда дьжи. Ӧса жи һун хԝә һьндава гӧнәда мьри һʼәсаб кьн, ле һьндава Хԝәдеда сах, бь сайа Мәсиһ Иса. Аԝа бьра иди гӧнә һʼӧкӧми сәр ԛальбе ԝәйи пʼучʼи-мьри нәкә, кӧ һун гӧрʼа хԝәстьнед ԝи бькьн. У әндәмед ԛальбе хԝә нәдьнә гӧнә кӧ бьбьнә һащәтед нәһәԛийе, ле бәле хԝә бьдьнә дәсте Хԝәде, чаԝа йәки жь мьрьне рʼабуйи, бьра әндәмед ԝә бьбьнә һащәтед һәԛийе, бона Хԝәде. У гӧнә ԝе сәрԝертийе ль ԝә нәкә, чьмки һун нә бьн ԛанунеда нә, ле бьн кʼәрәмеда. Иди чь? Әм гӧна бькьн, чьмки нә бьн ԛанунеда нә, ле бьн кʼәрәме? Тʼӧ щар! Һун һаԛас тьшт ньзаньн кӧ һун бона хӧламтийе дәсте кʼева дьчьн у гӧрʼа кʼе дькьн, дьбьнә хӧламед ԝи? Һәгәр һун хӧламед гӧнә бьн, дьчьнә бәрбь мьрьне, ле һәгәр һун хӧламед Хԝәде бьн, гӧрʼа Ԝида бьн, дьчьнә бәрбь рʼастһʼәсаббуне. Ле шькьр жь Хԝәде, һун кӧ ԝәхтәке хӧламед гӧнә бун, ле ԝә бь дьл у щан гӧра тʼәрзе ԝе һинкьрьне кьр, йа кӧ ԝә хԝә спарте. Һун жь гӧнә аза бун у бунә хӧламед һәԛийе. (Әз мина әʼдәте мәрьвайе дьбежьм, бона бьнйатʼа ԝәйә мәрьвайийә бетʼаԛәт.) Ԝә чаԝа ԝәхтәке әндәмед хԝә данә нәһәԛийе кӧ бьбьнә хӧламед һʼәрамийе у нәһәԛийе, ӧса жи ньһа әндәмед хԝә бьдьнә һʼәлалийе кӧ бьбьнә хӧламед һәԛийе. Гава һун хӧламед гӧнә бун, жь һәԛийе аза бун. Һьнге ԝә жь кьрьнед хԝә чь бәр чьнин, бона кʼижана ньһа һун шәрм дькьн? Әԝ ахьрийе мерьв дьбьнә бәрбь мьрьне. Ле ньһа һун жь гӧнә кӧ аза бун у бунә хӧламед Хԝәде, бәре һʼәлалийе дьчьньн у ахьрийа ԝан жи жийина һʼәта-һʼәтайе йә. Чьмки маше гӧнә мьрьн ә, ле пʼешкʼеша Хԝәде жийина һʼәта-һʼәтайе йә, бь сайа Хӧдане мә Мәсиһ Иса. Һун рʼьнд фәʼм дькьн хушк-бьрано, әзе ньһа дәрһәԛа чьда ԝәрʼа хәбәр дьм, чьмки әз тʼәви ԝан хәбәр дьдьм, йед кӧ һаш жь ԛануне һәнә: Ԛанун сәр мерьв һаԛас ԝәхт һʼӧкӧм дькә, һʼәта кӧ мәрьв сах ә. Мәсәлә, жьна меркьри бь ԛануне мере хԝәйи сахва гьредайи йә, ле һәгәр мер ле дьмьрә, әԝ һьнге жь ԝе ԛануна кӧ мерва гьредайи бу аза дьбә. Аԝа һәгәр мере ԝе һе сах бә әԝ бьбә жьна мерәки дьн, ԝе зьнекʼар бе һʼәсабе, ле һәгәр мер ле бьмьрә, әԝ жь ԝе ԛануне аза дьбә у зьнекʼар набә, һәгәр бьбә жьна мерәки дьн. Ӧса жи һун хушк-бьрайед мьн, бь бәдәна Мәсиһ һьндава Ԛанунеда мьрьн, кӧ бьбьнә пʼара йәки дьн, Йе кӧ жь мьрьне рʼабуйә, ԝәки һун Хԝәдерʼа бәр биньн. Чьмки гава мә һе бь бьнйатʼа мәрьвайе дьжит, тәме гӧна, кӧ жь Ԛануне сәри һьлдьдан, нава ԛальбед мәда йа хԝә дькьрьн, кӧ әм бәре мьрьне бьдьн. Ле ньһа әм һьндава Ԛанунеда мьрьн, жь ԝе хьлаз бун, бь кʼижане әм гьрти бун, кӧ әм бь жийина нуйә рʼӧһʼани хӧламтийе Хԝәдерʼа бькьн, нә кӧ бь рʼийа Ԛануна ньвисар. Аԝа әм чь бежьн? Гәло Ԛанун гӧнә йә? На хер! Ле бәле мьне гӧнә нас нәкьра, һәгәр Ԛануне нибуйа. Мәсәлә, дьлһавьжи жи мьне ньзаньбуйа гӧнә йә, һәгәр Ԛануне нәготьбуйа: «Дьлһавьжийе нәкә». Ле гӧнә жь тʼәмийе мәщал станд, нава мьнда һәр щурʼә дьлһавьжи пешда анин. Чьмки бе ԛанун гӧнә мьри йә. Әз хԝәха ԝәхтәке бейи ԛанун сах бум, ле гава тʼәми гьһиштә мьн, гӧнә сах бу у әз мьрьм. Әԝ тʼәмийа кӧ ԝе жийин бьда мьн, һәма әԝ жи бу сәбәбе мьрьна мьн. Чьмки гӧнә жь тʼәмийе мәщал станд әз хапандьм у бь ԝе кӧштьм. Аԝа Ԛанун пироз ә у тʼәмийа ԝе пироз, рʼаст у ԛәнщ ә. Ԝәки ӧса йә йа ԛәнщ мьнрʼа бу мьрьн? На хер! Ле әв кьре гӧнә бу, кӧ бь йа ԛәнщ мьрьн сәр мьнда ани. Әв йәк аһа бу, ԝәки һʼӧнӧре гӧнә кʼьфш бә у бь тʼәмийе һе гӧнәкʼарийа гӧнә кʼьфш бә. Бәле әм заньн кӧ Ԛанун рʼӧһʼани йә, ле әз хун у гошт ьм, хӧламәки гӧнәрʼа фьроти. Чьмки әз фәʼм накьм чь дькьм. Нә кӧ ԝи тьшти дькьм, чь кӧ дьхԝазьм, ле ԝи тьшти дькьм, чь кӧ бәр чʼәʼве мьн рʼәш ә. Ле һәгәр әз тьште нә бь дьле хԝә дькьм, Ԛанунерʼа ԛайл ьм, кӧ әԝ ԛәнщ ә. Ле аԝа нә кӧ әз ԝе йәке дькьм, ле бәле гӧне кӧ нава мьнда дьминә дькә. Әз заньм кӧ нава мьнда, аԝа готи бьнйатʼа мьнда, тʼӧ тьште ԛәнщ наминә, чьмки хирәта мьн ԛәбул накә, ле әԝ йәк мьнрʼа ль һәв найе. Бәле ԝе ԛәнщийа кӧ дьхԝазьм бькьм накьм, ле хьрабийа кӧ нахԝазьм ԝе дькьм. Һәгәр әз ԝи тьште нә бь дьле хԝә дькьм, иди нә кӧ әз дькьм, ле әԝ гӧне кӧ нава мьнда дьминә, әԝ дькә. Аԝа әз ԛанунәке дьбиньм: Гава дьхԝазьм кӧ ԛәнщийе бькьм, бе һʼәмде мьн дьбә хьраби. Әз бь кʼурайийа дьле хԝә ԛануна Хԝәде бәгәм дькьм, ле ԛанунәкә дьн нава хԝәда дьбиньм кӧ мьԛабьли ԝе ԛануна һʼьше мьн бәгәм кьрийә дькә шәрʼ у мьн дькә һесире ԛануна гӧна, йа кӧ нава мьнда йә. Әз чь мәрьвәки һесир-бәләнгаз ьм! Кʼи ԝе мьн жь дәсте ви ԛальбе пʼучʼи-мьри хьлаз кә? (Шькьр жь Хԝәдерʼа, бь сайа Хӧдане мә Иса Мәсиһ!) Бь ви аԝайи әз хԝәха бь һʼьш-аԛьле хԝә хӧламтийе ԛануна Хԝәдерʼа дькьм у бь ԛальбе хԝә хӧламтийе ԛануна гӧнарʼа дькьм. Ньһа иди диԝана ԝан набә, йед кӧ тʼәви Мәсиһ Иса бунә йәк. Чьмки ԛануна Рʼӧһʼе кӧ жийине дьдә, бь сайа Мәсиһ Иса әз жь ԛануна гӧна у мьрьне хьлаз кьрьм. Бәле чь кӧ Ԛануне жь дәст бетʼаԛәтийа бьнйатʼа мәрьвайе нькарьбу бькьра, Хԝәде әԝ йәк кьр, Кӧрʼе Хԝә дьлԛе бьнйатʼа мәрьвайийә гӧнәкʼарда бона гӧна шанд. У аһа Әԝи ԝе бьнйатʼеда диԝана гӧнә кьр, ԝәки рʼастбуна тʼәмийед Ԛануне нава мәда бе ԛәдандьне, әм кӧ бь бьнйатʼа мәрьвайи нажин, ле бь Рʼӧһʼ. Йед кӧ ль гора бьнйатʼа мәрьвайе дьжин, әԝ сәр тьштед бьнйатʼа мәрьвайе дьфькьрьн, ле йед ль гора Рʼӧһʼ дьжин, әԝ сәр тьштед Рʼӧһʼ дьфькьрьн. Ахьрийа фькьра бьнйатʼа мәрьвайе мьрьн ә, ле ахьрийа фькьра Рʼӧһʼ жийин у әʼдьлайи йә. Чьмки фькьра бьнйатʼа мәрьвайе дьжмьне Хԝәде йә, әԝ бәр ԛануна Хԝәде хԝә нашкенә, нә жи дькарә. Әԝед бь бьнйатʼа мәрьвайе дьжин, нькарьн ль Хԝәде хԝәш бен. Ле һун бь бьнйатʼа мәрьвайи нажин, ле бь Рʼӧһʼ дьжин, һәгәр рʼаст Рʼӧһʼе Хԝәде нава ԝәда дьминә. Ле һәгәр Рʼӧһʼе Мәсиһ дьле йәкида тʼӧнә, әԝ нә пʼара Ԝи йә. У һәгәр Мәсиһ дьле ԝәда йә, ԛальб мьри йә, чьмки ԝә гӧнә кьр, ле Рʼӧһʼ жийин ә бона ԝә, чьмки һун рʼаст һатьнә һʼәсабе. У һәгәр әԝ Рʼӧһʼе кӧ Иса жь мьрьне рʼакьр нава ԝәда дьжи, кӧ ӧса йә Әԝе Мәсиһ жь мьрьне рʼакьр, ԝе бь ԝи Рʼӧһʼе Хԝәйи нава ԝәда, жийине бьдә ԛальбе ԝәйи пʼучʼи-мьри жи. Бона ве йәке хушк-бьрано, әм дәйндар ьн, ле нә дәйндаред бьнйатʼа мәрьвайе, кӧ ль гора ԝе бьжин. Чьмки һәгәр һун ль гора бьнйатʼа мәрьвайе бьжин, һуне бьмьрьн, ле һәгәр һун бь Рʼӧһʼ кьред бьнйатʼа мәрьвайе бькӧжьн, һуне бьжин. Әԝед кӧ бь Рʼӧһʼе Хԝәде тенә рʼебәрикьрьне, әԝ ьн лаԝед Хԝәде. Чьмки ԝә рʼӧһʼәки ӧса нәстандийә, кӧ ԝә диса бькә хӧлам бьтьрсьн, ле ԝә әԝ Рʼӧһʼ стандийә, Йе кӧ ԝә дькә лаԝед Хԝәде, бь Кʼижани гази Ԝи дькьн: «Абба!» аԝа готи «Баво!» Һәма әԝ Рʼӧһʼ Хԝәха тʼәви рʼӧһʼе мә шәʼдәтийе дьдә, кӧ әм зарʼед Хԝәде нә. У һәгәр зарʼ ьн, ӧса жи хԝәйиԝар ьн, ԝаре Хԝәде нә у тʼәви ԝартийа Мәсиһ ьн. Бәле һәгәр әм тʼәви щәфайе Мәсиһ бунә, әме тʼәви рʼумәта Ԝи бьн жи. Әз аһа тʼәхмин дькьм, кӧ щәфе мәйи ви зәмани, ль бәр рʼумәта ԝе мәва әʼйан бә, нә тʼӧ тьшт ә. Һʼәму әʼфьрин жи бе сәбьр чʼәʼвньһерʼи хӧйабуна лаԝед Хԝәде нә. Бәле әʼфьрин жи бәр байе бәталийе кʼәтьн, нә кӧ бь һʼәмде хԝә, ле Хԝәде әԝ данә ве йәке. Ле бәле әԝ гӧман һәбу, кӧ әʼфьрине хԝәха жи жь ԝе хӧламтийа пʼучʼ аза бьн у тʼәви азайи у рʼумәта зарʼед Хԝәде бьн. Чьмки әм заньн кӧ һʼәму әʼфьрин һʼәта ньһа бь һәврʼа дькьнә зарә-зар у мина еша кʼӧлфәте дькʼьшиньн. У нә тʼәне әʼфьрин, ле әм хԝәха жи, кӧ мә чаԝа бәре дәрәмәта пешьн Рʼӧһʼе Пироз станд, нава хԝәда зарә-зар ьн у ԝе һивийе нә, һʼәта әм һәԛе лаԝтийа Хԝәде бьстиньн, аԝа готи әм бьгьһижьнә азайийа ԛальбе хԝә. Бәле ве гӧманеда әм хьлаз бун. Ле әԝ гӧмана кӧ те дитьне, әԝ нә гӧман ә, чьмки йәк чаԝа дькарә гӧмана ԝи тьшти бә, кʼижан ль бәр чʼәʼва йә? Ле һәгәр гӧмана мә ль тьште нәдити йә, әм бь сәбьре һивийе бьминьн. Ӧса жи Рʼӧһʼе Пироз те һәԝара бетʼаԛәтийа мә, чьмки әм ньзаньн гәрәке чаԝа дӧа бькьн, ле Рʼӧһʼе Пироз Хԝәха бь готьнед кʼәсәрә найенә сәр зар-зьмана, бона мә лава-навчетийе дькә. У Йе дьла әʼнәнә дькә занә фькьра Рʼӧһʼе Пироз чь йә, чьмки Әԝ ԝәкә ԛьрара Хԝәде бона мәрьвед Хԝәде лава-навчетийе дькә. Әм заньн кӧ һәр тьштида Хԝәде дькә кӧ ԝанрʼа бьбә ԛәнщи, йед кӧ Ԝи һʼьз дькьн у ль гора ԛаз-ԛӧдрәта Ԝи газикьри нә. Чьмки Хԝәде кʼижан пешда бьжартьн, әԝ жи пешда кʼьфш кьрьн, кӧ бьбьнә мина Кӧрʼе Ԝи, ԝәки Иса нава гәләк хушк-бьрада ньхӧри бә. Кʼижан пешда кʼьфш кьрьн, гази ԝан жи кьр у гази кʼижана кьр, әԝ жи бесущ кьрьн у кʼижан бесущ кьрьн, әԝ жи хԝәйирʼумәт кьрьн. Аԝа әм чь бежьн бона ван тьшта? Һәгәр Хԝәде пьшта мә йә, кʼи дькарә мьԛабьли мә бә? Әԝе кӧ һʼәйфа Ԝи Кӧрʼе Ԝи нәһат, ле бона мә һʼәмуйа да дәр, иди ԝе чаԝа һәр тьшти тʼәви Ԝи пʼешкʼеши мә нәкә? Кʼи дькарә бьжартийед Хԝәде гӧнәкʼар кә? Хԝәде йә, кӧ ԝан бесущ дькә. Кʼи дькарә ԝан нәһәԛ кә? Мәсиһ Иса йә кӧ бона ԝан мьр, ле бәле жь мьрьне рʼабу жи у кʼеләка Хԝәдейә рʼасте йә, бона мә лава-навчетийе дькә. Чь ԝе бькарьбә мә жь ԝе һʼьзкьрьна Мәсиһ бьԛәтинә? Дәрд-кӧл, тәʼли-тәнги, зерандьн, хәлайи-щәлайи, бесьтʼари, ԛәдә-бәла йан шур? Чаԝа ньвисар ә: «Бона Тә әм һәр рʼож бәр мьрьне нә, мина пәза сәржекьрьне һʼәсаб дьбьн». Ле әм нава ван һʼәму тьштада һе зедә сәрдькʼәвьн, бь сайа Әԝи кӧ әм һʼьз кьрьн. Чьмки әз әʼсәйи заньм кӧ нә мьрьн, нә жийин, нә мьлйакʼәт, нә шәхсәк, нә тьштед һазьр, нә тьштед ԝе бен, нә тʼӧ ԛәԝат, нә йед жорьн, нә йед жерьн у нә жи әʼфьринәки майин дькарә мә жь һʼьзкьрьна Хԝәде бьԛәтинә, йа кӧ бь дәсте Хӧдан Мәсиһ Иса пʼара мә кʼәтийә. Әз бь Мәсиһ бе хельф рʼаст дьбежьм у исафа мьн жи бь сайа Рʼӧһʼе Пироз мьнрʼа шәʼдәтийе дьдә, кӧ әз гәләки бәр хԝә дькʼәвьм у кӧла дьле мьн жи кʼур ә. Чьмки мьн хԝәха дьхԝәст ньфьрʼ ль мьн бьбуйа, тʼела мьн жь Мәсиһ бьԛәтийа, бона мьләте мьни жь хун-гоште мьн, кӧ исраели нә. Ль ԝан дькʼәвә бьбьнә лаԝед Хԝәде, Хԝәде рʼумәта Хԝә нишани ԝан да, пәйман тʼәви ԝан гьредан, ԛанунед Хԝә данә ԝан у кьрьнә хԝәйед һʼәбандьн у созед дайи. Кал-бав жи жь ԝан ьн у Мәсиһ жи алийе хун у гоштда жь нав ԝан һат, кӧ сәр һʼәмуйарʼа Хԝәдейе һʼәта-һʼәтайейи һежайи шькьрийе йә. Амин. Ле бәле наԛәԝьмә кӧ созе Хԝәде хельф дәре, чьмки нә кӧ әԝ һʼәму нә исраели, йед кӧ жь Исраел дьне кʼәтьнә у нә жи һʼәмуйед жь бәдәна Бьраһим бунә зарʼед ԝийә һәԛ-һʼәлал ьн, ле һатийә готьне: «Зӧрʼәта тәйе Исһаԛда бе навкьрьне». Аԝа готи зарʼед Хԝәде нә әԝ ьн, йед кӧ жь бәдәна тʼәбийәти нә, ле зарʼед создайи ԝе зӧрʼәт бенә һʼәсабе. Чьмки созе готи әв бу: «Саләкә дьн ви чахи әзе ль сәр тәда бем у кӧрʼәке Сәрайерʼа бьбә». Ле нә тʼәне әв бу, Рʼевека жи бь дӧ кӧрʼа жь бавәки һʼәмлә дәркʼәт, аԝа готи жь баве мә Исһаԛ. Гава кӧрʼьк һе нәбьбун, һе ԛәнщи-хьраби нәкьрьбун, Рʼевекайерʼа һатә готьне: «Йе мәзьн ԝе хӧламтийе ль йе бьчʼук бькә». Әв йәк бу, ԝәки ԛьрара Хԝәде ԝәкә бьжартьна Ԝи дәре, нә кӧ кьрава гьредайи бә, ле ль гора газийа Хԝәде бә. Чаԝа ньвисар ә: «Мьн Аԛуб һʼьз кьр, ле жь Әсаԝ чум». Әм иди чь бежьн? Гәло нәһәԛийа Хԝәде һәйә? На хер! Чьмки Мусарʼа дьбежә: «Әз кʼижани бемә рʼәʼме, Әзе бемә рʼәʼме у дьле Мьн сәр кʼе бьшәԝьтә, ԝе бьшәԝьтә». Әв йәк иди нә жь хԝәстьн йан хирәта мерьв ә, ле жь рʼәʼма Хԝәде йә. Чьмки ньвисара пироз Фьрәԝьнрʼа дьбежә: «Бона ԝе йәке Мьн тӧ кьри пʼадша, ԝәки ԛәԝата Хԝә бь тә бьдьмә кʼьфше у наве Мьн тʼәмамийа дьнйайеда бе готьне». Аԝа Хԝәде кʼижана дьхԝазә те рʼәʼме у кʼижана дьхԝазә ԝан сәрһʼьшк дькә. Кӧ ӧса йә те мьнрʼа бежи: «Ле иди чьма Хԝәде мә нәһәԛ дькә? Кʼи дькарә ль бәр ԛьрара Ԝи рʼабә?» Ле тӧ кʼи йи, әʼвдо, кӧ ль бәр готьна Хԝәде рʼадьби? Гәло щерʼ дькарә щерʼкәррʼа бежә: «Тә чьма әз аһа чекьрьмә?» Чьма һʼӧкӧме щерʼкәр сәр ахе тʼӧнә кӧ жь ԝе һʼәрʼийа стьрайи һьн дәрданед бона рʼумәте чекә, һьн жи бона берʼумәте? Ле чь ве йәкерʼа һәйә, һәгәр Хԝәде хԝәст бәри кʼьфшкьрьна һерс у ԛәԝата Хԝә, бь думька дьреж гәләки сәбьра Хԝә ль ԝан дәрданед һежайи һерсе бинә, йед кӧ ӧндабунерʼа һазьр сәкьни нә? Ԝи әв йәк кьр, ԝәки дәԝләмәндтийа рʼумәта Хԝә ԝан дәрданарʼа бьдә кʼьфше, йед кӧ бунә хԝәйе ве рʼәʼме, кʼижан кӧ Ԝи пешда һазьр кьрьбун, ԝәки әԝ тʼәви рʼумәта Ԝи бьбуна. У әԝ дәрданед газикьри әм ьн, нә кӧ тʼәне жь щьһуйа, ле жь нәщьһуйа жи, чаԝа кʼьтеба Һосейада Әԝ дьбежә: «Щьмәʼта кӧ нә щьмәʼта Мьн ә, Әзе бежьме: ‹Щьмәʼта Мьн› у йа нә дәлал Әзе бежьме: ‹Дәлал›». У «ԝе дәра кӧ ԝанрʼа һатә готьне: ‹Һун нә щьмәʼта Мьн ьн›, һәма ль ԝьр жи әԝе лаԝед Хԝәдейе сах бенә готьне». Ишайа жи бона Исраел дькә гази дьбежә: «Һәгәр һʼәсабе зарʼед Исраел ԝәкә ԛума бәʼре бә, тʼәне һьнәк ԝе же хьлаз бә. Чьмки Хӧдан ԝе кьн у кӧрт зутьре диԝана дьне бькә». У чаԝа Ишайа бәри ве йәке гот: «Һәгәр Хӧдане Зор мәрʼа зӧрʼәт нәһьшта, әме бькʼәтана рʼожа Содоме у бьбуна мина Гоморайе». Әм иди чь бежьн? Нәщьһуйед кӧ пәй рʼастһʼәсаббуне нәдьчун, гьһиштьнә рʼастһʼәсаббуне, ԝе рʼастһʼәсаббуна жь баԝәрийе, ле Исраел кӧ пәй Ԛануне дьчу кӧ рʼаст бе һʼәсабе, нәгьһиштә ԝе йәке. Чьма? Чьмки әԝ нә кӧ бь баԝәрийе бу, ле бь кьред хԝә. У әԝ сәр кәвьре лькʼӧмандьнеда кʼәт һол бу, чаԝа ньвисар ә: «Ва Әз кәвьрәки лькʼӧмандьне Сийонеда датиньм, зьнарәки же һолбуне ле һәр кәсе кӧ баԝәрийа хԝә Ԝи бинә, ԝе шәрми нәбә». Хушк-бьрано! Дӧа у хԝәстьна дьле мьн жь Хԝәде бона хьлазбуна Исраеле йә. Әз шәʼде ԝана мә, кӧ әԝ һьндава Хԝәдеда хԝәйихирәт ьн, ле әв йәк бе занәбун ә. Ԝана фәʼм нәкьр, кӧ Хԝәде чаԝа мерьв рʼаст һʼәсаб дькә, хԝәстьн бь щурʼе хԝә һʼиме һәԛийе дайньн у ль бәр һәԛийа Хԝәде та нәбун. Чьмки бь Мәсиһ Ԛанун сәр һәвда һат, кӧ һәр баԝәрмәнд бь ԝи рʼаст бе һʼәсабе. Бона ԝе рʼастһʼәсаббуна жь Ԛануне Муса аһа дьньвисә: «Мәрьве кӧ Ԛануне бьԛәдинә, бь ԝе жи әԝе бьжи». Ле рʼастһʼәсаббуна кӧ жь баԝәрийе йә, аһа дьбежә: «Дьле хԝәда нәбежә: Кʼе ԝе рʼабә әʼзмен?» (аԝа готи Мәсиһ жорда бинә), йан: «Кʼе ԝе һәрʼә дийаре мьрийа?» (аԝа готи Мәсиһ жь нава мьрийа дәрхә). Ле бәле ньвисар чь дьбежә? «Хәбәра Хԝәде ль щәм тә йә, ль сәр заре тә йә у дьле тәда йә», (аԝа готи әԝ хәбәра баԝәрийе, йа кӧ әм даннасин дькьн). Һәгәр тӧ бь дәве хԝә иԛрар бьки, кӧ Иса Хӧдан ә у дьле хԝәда баԝәр бьки, кӧ Хԝәде Әԝ жь нава мьрийа рʼакьрийә, те хьлаз би. Чьмки бь дьл йәк баԝәр дькә, рʼаст те һʼәсабе у бь дәв иԛрар дькә, хьлаз дьбә. Чаԝа ньвисар дьбежә: «Һәр кәсе кӧ баԝәрийа хԝә Ԝи бинә, ԝе шәрми нәбә». Ль вьр фьрԛи тʼӧнә нава щьһу у нәщьһуйада, чьмки Хӧдане һʼәмуйа йәк ә, һьндава ԝан һʼәмуйада жи мәрʼд ә, кʼижанед гази Ԝи дькьн. Чьмки ньвисар дьбежә: «Кʼи гази наве Хӧдан кә, ԝе хьлаз бә». Ле ԝе чаԝа гази Ԝи кьн, һәгәр баԝәрийа хԝә Ԝи нәанинә? Йан ԝе чаԝа баԝәрийа хԝә Ԝи биньн, һәгәр бона Ԝи нәбьһистьнә? Йан ԝе чаԝа бьбьһен, һәгәр хәбәр даннасин нәбә? Йан ԝе чаԝа хәбәре даннасин кьн, һәгәр нәйенә шандьне? Чаԝа ньвисар ә: «Чьԛаси һʼәԝас ьн гавед йед мьзгинийа хере дьдьн!» Ле һʼәмуйа гӧрʼа Мьзгинийе нәкьр, чьмки Ишайа дьбежә: «Хӧдан, кʼе әԝ готьна кӧ мә гот баԝәр кьр?» Аԝа баԝәри жь бьһистьне те у бьһистьн жи жь готьнед бона Мәсиһ. Ле бәле әз дьпьрсьм: Гәло ԝана нә бьһист? Наԛәԝьмә. Чьмки ньвисар ә: «Дәнге ԝан тʼәмамийа әʼрде һьлда у хәбәра ԝан ль ԛӧлбед дьнйайе бәла бу». Әз диса дьпьрсьм: Гәло Исраел пе нәһʼәсийа? Пешийе Муса дьбежә: «Әзе бь мьләте нә мьләт һелана бьдьмә ԝә у бь мьләтәки бефәʼм һерса ԝә рʼакьм». У Ишайа меркʼими дьбежә: «Әз ԝанва дәркʼәтьм, кʼижан ль Мьн нәдьгәрʼийан у Әз ԝанва әʼйан бум, кʼижана бона Мьн нәдьпьрсин». Ле бәле бона Исраеле дьбежә: «Тʼәмамийа рʼоже Мьн дәсте Хԝә дьрежи мьләтәки сәрһʼьшк у хԝәсәрихԝә кьр». Аԝа әз дьпьрсьм: Гәло Хԝәде дәст жь щьмәʼта Хԝә кьр? На хер! Әз хԝәха жи исраели мә, жь зӧрʼәта Бьраһим ьм, жь ԛәбила Бьнйамин. Хԝәде дәст жь щьмәʼта Хԝә нәкьр, кʼижан пешда бьжартьбу. Йан һун ньзаньн сәрһатийа Елйасда ньвисар чь дьбежә чаԝа, ԝи шькийате Исраеле ль Хԝәде дькьр дьгот? «Хӧдан, пʼехәмбәред Тә кӧштьн, горигәһед Тә хьраб кьрьн, тʼәне әз мамә у пәй мьн жи кʼәтьнә кӧ бькӧжьн». Ле щаба Хԝәде чь бу? «Мьн Хԝәрʼа һʼәфт һʼәзар мәри хԝәй кьрьнә, йед кӧ ль бәр Баәʼл чок нәданә». Ӧса жи ньһа ви зәманида һьнәкә бь кʼәрәма Хԝәде бьжарти манә. У һәгәр бь кʼәрәме йә, иди нә жь кьра йә, һәгәр ӧса буйа, кʼәрәм иди нәдьбу кʼәрәм. Иди чь? Исраел нәгьһиштә ԝе чь кӧ дьгәрʼийа, ле йед бьжарти гьһиштьне у йед майин кор бун, чаԝа ньвисар ә: «Хԝәде шәвәрʼәша кора ани сәр ԝан, кӧ бь чʼәʼва нәбиньн у бь гӧһа нәбьһен, һʼәта рʼожа иройин». У Даԝьд дьбежә: «Дә бьра тʼәхт-сьфьред ԝан ль ԝан бьбьнә тʼорʼ у тʼәләк, ԛәдә-бәла жи һәԛе ԝан бә. Бьра ава рʼәш бе сәр чʼәʼвед ԝан, нәбиньн у пьшта ԝан тʼьме тәԝийайи бә». Аԝа әз дьпьрсьм: Гәло әԝ жь рʼе дәркʼәтьн, кӧ ӧнда бьн? На хер! Ле нәһәԛийа ԝан бу сәбәбе хьлазбуна нәщьһуйа, кӧ позе ԝан жи бьшәԝьтә. Һәгәр нәһәԛийа ԝан бу сәбәб кӧ дьнйа дәԝләти бә у кʼәтьна ԝан бу сәбәб кӧ нәщьһу дәԝләти бьн, ле ԝе һе чьԛас кʼар бә гава тʼәмамийа ԝан хьлаз бә! Ньһа әз ԝә нәщьһуйарʼа дьбежьм: Бәле әз шандийе нәщьһуйа мә, ԛӧльхе хԝә бьльнд дькьм, бәлки бькарьбьм позе йед жь хун у гоште хԝә бьдьмә шәԝате у жь ԝан һьнәка жи хьлаз кьм. Чьмки һәгәр тʼәхсирбуна ԝан бу сәбәбе льһәвһатьна дьнйайе тʼәви Хԝәде, иди ле ԛәбулбуна ԝане бьбә чь, һәгәр нә сахбуна мьрийа? Һәгәр гьрька һәвир, чаԝа бәре дәрәмәта пешьн Хԝәдерʼа дайи һʼәлал ә, кӧ ӧса йә тʼәмамийа шкәве пева һʼәлал ә. У һәгәр рʼаԝ пироз ьн, чʼьԛьл жи перʼа пироз ьн. Һәгәр жь ԝан чʼьԛьла һьнәк шкәстьн, ле тӧ, нәщьһу дара зәйтʼунейә бәйани буйи, дәԝса ԝан һати сәрвакьрьне у тʼәви ԛьнйата рʼаԝед зәйтʼуне буйи, тӧ дьле хԝә ль ԝан чʼьԛьлед шкәсти ша нәкә. Ле һәгәр дьле хԝә ша ки, бир бинә, ԝәки нә кӧ тә рʼаԝ жор гьртьнә, ле рʼаԝа тӧ гьртийи. Иди те бежи: «Чʼьԛьл шкәстьн, ԝәки әз бемә сәрвакьрьне». Рʼаст ә. Әԝана жь дәст нәбаԝәрийе шкәстьн у тә бь баԝәрийе һʼим гьрт. Кʼӧбар нәбә, ле бьтьрсә. Чьмки һәгәр һʼәйфа Хԝәде чʼьԛьлед бьнйатʼи нәһат, һʼәйфа Ԝи ԝе тә жи нәйе. Аԝа дина хԝә бьдә ширьнайи у һʼьшкийа Хԝәде, Әԝ һʼьшк ә һьндава жь рʼекʼәтийада у ширьн ә һьндава тәда, һәгәр нава ширьнайийеда бьмини. Ле һәгәр на, те жи бейи бьрʼине. Ле һәгәр щьһу нава нәбаԝәрийеда нәминьн, ԝе бенә сәрвакьрьне, чьмки Хԝәде диса дькарә ԝан сәрвакә. Чьмки һәгәр тӧ, нәщьһу ԝәки бьнйатʼа хԝәда чʼьԛьле зәйтʼуна бәйани буйи у һати бьрʼин, сәр ԝе зәйтʼуна ԛәнщә нә жь бьнйатʼа хԝә һати сәрвакьрьне, ле һе чьԛас рʼьһʼәт әԝе кӧ чʼьԛьлед бьнйатʼи нә, ԝе сәр зәйтʼуна хԝә бенә сәрвакьрьне. Әз нахԝазьм хушк-бьрано, кӧ һун һаш жь ве сӧрʼе тʼӧнәбьн, кӧ һун хԝә дәԝса зана данәйньн. Пʼарәкә мьләте Исраеле ԝе сәрһʼьшк бьминә, һʼәта һʼәсабе ԝан нәщьһуйед кӧ ԝе хьлаз бьн тʼәмам бә. Бь ви аԝайи тʼәмамийа Исраеле ԝе хьлаз бә, чаԝа ньвисар ә: «Азакьр ԝе жь Сийоне бе у бехԝәдетийе жь Аԛуб дур хә. У әв ә пәймана Мьнә тʼәви ԝан, гава Әз гӧнед ԝан һьлдьм». Мьзгинийе кӧ дьньһерʼи, әԝана дьжмьн ьн бона хатьре ԝә, ле бьжартьне кӧ дьньһерʼи, әԝана һʼьзкьри нә, бона хатьре кал-бавед ԝан. Чьмки Хԝәде кʼижана дьбьжерә у пʼешкʼеша дьдә кʼе, ԝе йәкеда нә пʼошман ә. Чаԝа ԝә жи ԝәхтәке гӧһдарийа Хԝәде нәдькьр, ле ньһа бь нәгӧһдарийа ԝана ԝә рʼәʼм дит, ӧса жи әԝана ньһа бунә нәгӧһдар, ԝәки бь рʼәʼмдитьна ԝә әԝ жи рʼәʼме бьбиньн. Чьмки Хԝәде һʼәму кьрьнә гьртийед нәгӧһдарийе, ԝәки һʼәмуйа жи бе рʼәʼме. Чьԛаси кʼур ьн дәԝләмәндти, сәрԝахти у занәбуна Хԝәде! Ԛьраред Ԝи чьԛаси жь һʼьш-аԛьла дур ьн у кәс сәрәдәрийе жь рʼийед Ԝи накә! Чаԝа ньвисар ә: «Кʼе нета Хӧдан пе һʼәсийа? Йан кʼе бу ширәткʼаре Ԝи? Йан кʼе пешда тьштәк дайә Ԝи, ԝәки Әԝ диса ль ԝан вәгәрʼинә?» Чьмки һәр тьшт жь Ԝи, бь Ԝи у бона Ԝи нә. Шькьр жь Ԝирʼа һʼәта-һʼәтайе. Амин. Аԝа әз һиви жь ԝә дькьм хушк-бьрано, бона ԝе дьлшәԝатийа Хԝәде, ԛальбе хԝә дийари Хԝәде кьн, чаԝа ԛӧрбанәкә сахә дӧрӧфкьри, ль Ԝи ԛәбул, йа кӧ һʼәбандьна ԝәйә рʼӧһʼани йә. У нәкʼәвьнә кьрасе бәнде ве дьнйайе, ле бь нубуйина һʼьше хԝә ԝәрьнә гӧһастьне, ԝәки бьзаньбьн чь йә ԛьрара Хԝәде, кӧ ԛәнщи, хԝәши у кʼамьли йә. Әз бь ԝе кʼәрәма кӧ Хԝәде да мьн, ԝә һәр кәсирʼа дьбежьм: Чьԛас жь ԝә дькʼәвә, жь ԝе зедәтьр нәфькьрьн, ле сәр хԝә бьн, бьра һәр кәс ԝәкә ԝе баԝәрийа кӧ Хԝәде пʼарәвәкьр, бьфькьрә. Чаԝа ԛальбе мәда гәләк әндәм һәнә у һʼәму әндәм кьрәки накьн, ӧса жи әм гәләк ьн, ле йәктийа Мәсиһда әм бәдәнәк ьн у һәр кәс жь мә әндәмед һәв ьн. Аԝа анәгори ԝе кʼәрәма мәрʼа һатийә дайине, пʼешкʼешед хԝәйә щурʼә-щурʼә бьдьнә хәбате. Һәгәр пʼешкʼеша пʼехәмбәртийе йә, бьра ԝәкә ԝе чапа баԝәрийе бьдьнә хәбате, һәгәр хьзмәткʼари йә, бьра нава хьзмәткʼарийеда бьн, һәгәр һинкьрьн ә, бьра пәй һинкьрьне бьн, йе дьл дьдә мерьв, бьра ль пәй ԝе йәке бә, әԝе пʼарәвәдькә, бьра бь мәрʼдани бькә, әԝе сәрԝер ә, бьра хирәт бә, әԝе ԛәнщийе дькә, бьра бь әшԛ у ша бькә. Һʼьзкьрьна ԝә һʼьләкʼари нибә, жь хьрабийе зьвер бьн, хԝә ль ԛәнщийе бьгьрьн. Һʼьзкьрьнеда чаԝа хушк-бьра сәр һәв шәԝат бьн, ԛәдьркьрьнеда жь һәвдӧ дәрбазтьр бьн, хирәтеда хԝәрʼанәдити нибьн, рʼӧһʼе хԝәда алав дьн, хьзмәткʼарийа Хӧдан бькьн, бь гӧмане ша бьн, тәнгасийада сәбьр кьн, һәр гав дӧа бькьн, дәсте хԝә дьрежи щьмәʼта Хԝәдейә дәсттәнг кьн, пәй меванһʼьзийе бьн. Йе ԝә дьзериньн һун дӧа ԝан бькьн, бәле дӧа бькьн у ньфьрʼа ль ԝан нәкьн. Тʼәви йед ша дьбьн ша бьн у тʼәви йед дьгьрин бьгьрин. Фькьра ԝә һәр кәси һьндава һәвда йәк бә, кʼӧбар-бабах нибьн, ле тʼәви пʼәришана ньмьз бьн, хԝә дәԝса зана данәйньн. Жь бәр хьрабийева хьрабийе ль тʼӧ кәси нәкьн. Чь ль бәр чʼәʼве һʼәму мәрьва ԛәнщ ә, ԝе бькьн. Чьԛас жь дәст ԝә те, тʼәви һʼәму мәрьва әʼдьлайийеда бьн. Һʼәйфе һьлнәдьн, дәлално, ле щи бьдьнә һерса Хԝәде, чьмки ньвисар ә: «Һʼәйфһьлдан дәсте Мьн ә, Әзе һʼәйфе һьлиньм, Хӧдан дьбежә». Ле бәле әв жи һәйә: «Һәгәр дьжмьне тә бьрʼчи йә, нен бьде у һәгәр тʼи йә, аве бьде, чьмки тӧ бь ве йәке пьриске егьр сәр сәре ԝи тʼоп дьки». Нәһелә хьраби сәр тә кʼәвә, ле бь ԛәнщийе тӧ сәр хьрабийе кʼәвә. Һәр мәрьвәк бьра гӧрʼа ԝан һʼӧкӧмәтийада бә, кӧ сәр ԝирʼа нә, чьмки тʼӧ һʼӧкӧмәти бейи дәстура Хԝәде тʼӧнә у әԝе кӧ һәнә жи, жь Хԝәдеда нә. Аԝа кʼи кӧ бәр һʼӧкӧмәтийе рʼадьбә, әԝ бәр әʼмьре Хԝәде рʼадьбә у әԝе кӧ рʼадьбьн, диԝана Хԝәде сәр хԝәда тиньн. Чьмки сәрдар йед ԛәнщийе дькьн натьрсиньн, ле йед хьрабийе. Тӧ дьхԝази жь һʼӧкӧмәте нәтьрси? Хԝә ль ԛәнщийе бьгьрә, те бьби ширьне ԝе. Чьмки әԝ хьзмәткʼаре Хԝәде йә бона ԛәнщийед тә. Ле һәгәр хԝә ль хьрабийе бьгьри, же бьтьрсә, чьмки ԝи бадиһәԝа шур гьренәдайә. Әԝ хьзмәткʼаре Хԝәде йә, кӧ һерса Ԝи сәр ԝанда бьрʼежә, кʼижанед кӧ хьрабийе дькьн. Ләма әм гәрәке гӧра һʼӧкӧмәтада бьн, нә тʼәне ԝәки әм ль бәр һерсе нәкʼәвьн, ле бәле ԝәки исафа мә жи дьле мә рʼьһʼәт бьһелә. Бона ве йәке жи һун хәрщ жи дьдьн, чьмки әԝ хӧламед Хԝәде нә, борщдаред хәрщстандьне нә. Аԝа кʼерʼа чь дькʼәвә, ль ԝан вәгәрʼиньн, кʼерʼа хәрщ дькʼәвә, хәрщ бьдьне, кʼерʼа сәләф дькʼәвьн, сәләфа бьдьне, жь кʼе гәрәке бьтьрсьн, бьтьрсьн, кʼерʼа ԛәдьр дькʼәвә, ԛәдьре ԝи бьгьрьн. Тʼӧ тьштида дәйндаре тʼӧ кәси нәминьн, пештьри ль һәв һʼьзкьрьне, чьмки кʼи кӧ һәвале хԝә һʼьз дькә, тʼәмамийа Ԛануне дьԛәдинә. Әв тʼәмийед кӧ һәнә: «Зьнийе нәкә, нәкӧжә, нәдьзә, дьлһавьжийе нәкә» у һәр чь тʼәмийед кӧ һәнә, дькʼәвьнә нава ве готьне: «Һәвале хԝә ԝәкә хԝә һʼьз бькә». Һʼьзкьрьн хьрабийе ль һәвале хԝә накә. Аԝа һʼьзкьрьн сәре Ԛануне дьгьрә. Ве йәке бькьн, чьмки һун заньн әв чь зәман ә. Ньһа иди ԝәхт ә һун жь хәԝе һʼьшйар бьн, чьмки ньһа хьлазбун һе незики мә йә, нә кӧ һьнге гава мә баԝәр кьр. Шәв гәләк чуйә, сьбәһ незик буйә, аԝа кьред тәʼристанийе әм жь хԝә дур хьн у чʼәкед рʼонайийе сәр хԝәва кьн. Ӧса бьжин чаԝа рʼонайа рʼоже, бе кучʼьксантийе, сәрхԝәшийе, бенамусийе, һʼәрамийе, шәрʼудийе у һʼәвсудийе. Ле Хӧдан Иса Мәсиһ ль хԝә бькьн мәртʼал у гӧһ нәдьнә ԝан хԝәстьнед бьнйатʼа хԝәйә мәрьвайи. Әԝе кӧ баԝәрийеда сьст ә, ԛәбул кьн, ле нә кӧ бона бир-баԝәрийа ԝи жерʼа бькʼәвьнә дәʼԝе. Йәк баԝәр дькә, кӧ һәр тьшти дькарә бьхԝә, ле йе сьст ә, тʼәне пʼьнщарʼе дьхԝә. Әԝе кӧ дьхԝә, бьра йе нахԝә беһӧрмәт нәкә у әԝе кӧ нахԝә, бьра лома йе дьхԝә нәкә, чьмки Хԝәде әԝ ԛәбул кьрийә. Тӧ кʼи йи кӧ лома хӧламе хәлԛе дьки? Һәгәр сәкьни бә йан кʼәти бә, әԝ ише Хԝәйе ԝи йә. Ле ԝе бьсәкьнә, чьмки Хӧдан дькарә ԝи бьдә сәкьнандьне. Йәк рʼожәке сәр рʼоже дьнрʼа дьгьрә, йәк жи һʼәму рʼожа ԝәкә һәв дьгьрә. Бьра һәр кәс фәʼмина хԝәда баԝәр бә. Кʼе рʼожәке хԝәрʼа әʼзиз һʼәсаб дькә, бона Хӧдан әʼзиз һʼәсаб дькә, ӧса жи әԝе дьхԝә бона Хӧдан дьхԝә, чьмки шькьрийе дьдә Хԝәде. У йе нахԝә жи бона Хӧдан нахԝә у шькьрийе дьдә Хԝәде. Жь мә тӧ кәс бона хԝә нажи у тʼӧ кәс жи бона хԝә намьрә. Һәгәр әм дьжин, бона Хӧдан дьжин у һәгәр әм дьмьрьн бона Хӧдан дьмьрьн. Аԝа һәгәр әм бьжин йан бьмьрьн, пʼара Хӧдан ьн. Бона ве йәке жи Мәсиһ мьр у сах бу, ԝәки һьн һʼӧкӧми сәр мьрийа бькә, һьн жи сәр зендийа. Иди тӧ чьма лома бьре хԝә дьки? Йан тӧ чьма бьре хԝә беһӧрмәт дьки? Әм һʼәмуйе жи ль бәр диԝана Хԝәде бьсәкьньн. Чьмки ньвисар ә: «Әз сахийа Хԝә кьм, Хӧдан дьбежә, кӧ һәр чок ԝе ль бәр Мьн бьтәԝә у һәр кәсе бежә: ‹Тӧ йи Хԝәде›». Аԝа жь мә һәр кәсе бона хԝә щабе ль бәр Хԝәде бьдә. Дә иди әм лома һәвдӧ нәкьн, ле һун хԝәрʼа бьдьнә бәр һʼәсаба, чаԝа бькьн кӧ ньг нәдьнә ль бәр бьра, кӧ нәлькʼӧмьн йан пʼьшк нәбьн. Әз ве йәке заньм у Хӧдан Исада гӧман ьм, кӧ тьштәки жь хԝә һʼәрам тʼӧнә, ле бона ԝи һʼәрам ә, йе кӧ һʼәрам һʼәсаб дькә. Һәгәр бь хԝарьна хԝә тӧ дьле бьре хԝә жь хԝә дьһели, иди жийина тә нә бь һʼьзкьрьне йә. Бь хԝарьна хԝә ԝи ӧнда нәкә, бона кʼижани Мәсиһ мьр. Бьра әԝ тьштед кӧ тӧ бона хԝә ԛәнщ дьбини, нәбә мәʼни кӧ хьраби бе готьне. Чьмки Пʼадшатийа Хԝәде хԝарьн у вәхԝарьнеда нинә, ле һәԛи, әʼдьлайи у шабунеда йә, кӧ дайина Рʼӧһʼе Пироз ьн. Кʼе бь ван хӧламтийе Мәсиһрʼа дькә, әԝ ль Хԝәде хԝәш те у дьбә ширьне мәрьва. Аԝа әм һьндава һәвда сәр нета әʼдьлайийе у баԝәри авакьрьне бьн. Рʼуйе хԝарьнеда шьхӧле Хԝәде хьраб нәкьн. Һәр тьшт һʼәлал ә, тʼәне бона ԝи мәрьви нә рʼаст ә, йе кӧ бь хԝарьна хԝә дьбә байисе кʼәтьна хәлԛе. Ԛәнщ ә нә гошт бьхԝи, нә шәраве вәхԝи у нә жи тьштәки ӧса бьки, кӧ бьре тә бькʼәвә. Тӧ чаԝа баԝәр дьки, бьра нава тә у Хԝәдеда бьминә. Хԝәзи ль ԝи, йе кӧ бь ван тьштед кӧ фәʼм дькә кӧ рʼаст ьн, хԝә гӧнәкʼар накә. Ле һәгәр йәк дьхԝә дӧдьлийе дькә, диԝане сәр хԝәда тинә, чьмки бь баԝәрийе нахԝә. У һәр тьште кӧ нә бь баԝәрийе йә, гӧнә йә. Әм кӧ баԝәрийеда ԛәԝат ьн, гәрәке бькʼәвьнә бьн баре сьста, нә кӧ әм ль хԝә хԝәш бен. Бьра жь мә һәр кәс алийе ԛәнщийеда ль һәвале хԝә хԝәш бе, кӧ баԝәрийеда бьшьдә. Чьмки Мәсиһ жи нә кӧ ль Хԝә хԝәш һат, ле чаԝа ньвисар ә: «Әԝ ԛаред кӧ ль Тә дькьн, ль Мьн дькьн». Ле чь кӧ пешда кʼьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн. Дә бьра Хԝәдейе сәбьре у бина ль бәр һәр кәси бьдә ԝә, кӧ һун һьндава һәвда сәр нетәке бьн, ԝәкә нәхш-тʼәрзе Мәсиһ Иса, кӧ һун һʼәму бь дьл у зарәки шькьрийе бьдьнә Хԝәдейе Баве Хӧдане мә Иса Мәсиһ. Бона ве йәке бона шькьрийа Хԝәде һәвдӧ ԛәбул кьн, чаԝа Мәсиһ әм ԛәбул кьрьн. Чьмки әз ԝәрʼа дьбежьм, кӧ Мәсиһ бу хьзмәткʼаре щьһуйа, бона амьнийа Хԝәде әʼйан кә, ԝәки әԝ созе кал-баварʼа һатийә дайине, мак кә у нәщьһу бона рʼәʼма Ԝи шькьрийе бьдьнә Хԝәде. Чаԝа ньвисар ә: «Бона ве йәке Әзе нав нәщьһуйада пәсьне Тә бьдьм у әшԛи наве Тә бьстьрем». У диса дьбежә: «Гәли нәщьһуйа, ша бьн тʼәви мьләте Ԝи!» У диса дьбежә: «Шькьрийе бьдьнә Хӧдан гәли нәщьһуйа у пәсьне Ԝи бьдьн, һʼәму щьмәʼтно». Ишайа жи дьбежә: «Тамарәкә Йеша ԝе дәре, бьбә мире нәщьһуйа у нәщьһу ԝе гӧмана хԝә бьдьнә сәр Ԝи». Бьра Хԝәдейе гӧмане дьле ԝә бь шабуне у әʼдьлайийева бькʼьмкʼьминә, бона ԝе баԝәрийа ԝә, ԝәки гӧмана ԝә бь ԛәԝата Рʼӧһʼе Пироз зедә бә. Әз хԝәха ԝәда гӧман ьм хушк-бьрайед мьн, кӧ һун ԛәнщийада манә у занәбунева жи дагьрти нә, дькарьн һәвдӧ ширәт кьн. Ле аликива мьн тӧрӧш кьр ԝәрʼа ньвиси, кӧ ԝан тьшта бькьмә бира ԝә, бона ԝе кʼәрәма кӧ жь Хԝәдеда мьнрʼа һатийә дайине, ԝәки әз нава нәщьһуйада бьбьмә бәрдәстийе Мәсиһ Иса. Әз нава Мьзгинидайина Хԝәдеда мина кʼаһинәки хьзмәткʼарийе дькьм, кӧ һʼәдибуна нәщьһуйа ԛәбул бә, бь Рʼӧһʼе Пироз бӧһӧрти-жьбарә бә. Аԝа әз дькарьм бь сайа Мәсиһ Иса пе хьзмәткʼарийа хԝәйә бона Хԝәде бьфьрʼьм. Әз тӧрӧш накьм бона тьштәки ӧса хәбәр дьм, пештьри ԝан тьштед кӧ Мәсиһ бь дәсте мьн кьрьнә, бона гӧһдарийа нәщьһуйа, һәгәр бь хәбәра бә йан кьра бә, бь ԛәԝата нишана у кʼәрәмәта, бь ԛәԝата Рʼӧһʼе Хԝәде. У бь ви аԝайи әз жь Оршәлиме гьрти һʼәта Илиркуме гәрʼийам, Мьзгинийа Мәсиһва тʼьжи кьр. Мьн дьщәʼданд кӧ ԝан дәра Мьзгинийе даннасин кьм, кʼидәред бона наве Мәсиһ нәһатьбу бьһистьне, ԝәки нәбә кӧ әз сәр һʼиме һьнәкед дьн чекьм. Ле бәле чаԝа ньвисар ә: «Кʼижанарʼа бона Ԝи нәһатийә готьне, ԝе бьбиньн у кʼижана бона Ԝи нә бьһистийә, ԝе бьзаньбьн». Ләма гәләк щара рʼе нәдькʼәтә мьн сәр ԝәда бьһатама. Ле ньһа иди ван алийа щийе ӧса тʼӧнә пʼегәһ ле нәкʼәтьбә у әв чәнд сал ә әз дькьм бемә щәм ԝә, гава һәрʼьмә Спанйайе. Аԝа гӧмана мьн һәйә, кӧ әзе сәр рʼийа хԝә сәрики ль ԝә хьм у жь ԝьр һун мьн вәрʼекьн әз һәрʼьмә Спанйайе, гава бина мьн һьнәки пе ԝә дәре. Ле ньһа әз дьчьмә Оршәлиме, кӧ бь кʼомәкдайине хьзмәткʼарийа щьмәʼта Хԝәде бькьм. Чьмки хушк-бьрайед Мәкәдонйайе у Ахайайе бь һәврʼа ԛайл бун, кӧ аликʼарике бьдьнә щьмәʼта Хԝәдейә бәләнгаз, йед кӧ Оршәлимеда дьминьн. Әԝ ԛайл бун у дәйндаре ԝан ьн жи. Чьмки нәщьһуйа алийе рʼӧһʼанида кʼомәк жь щьһуйа стандьн, гәрәке әԝ жи алийе һәбука дьнеда кʼомәке бьдьнә ԝан. Аԝа пәй ве кьрьнерʼа, гава кʼомәка тʼопкьри бьгьһиньмә щи, әзе бем щәм ԝә, жь ԝьр дәрбази Спанйайе бьм. Әз заньм гава бемә щәм ԝә, әзе бь дәԝләмәндтийа дӧа-дьрозгед Мәсиһ бем. Әз һиви жь ԝә дькьм хушк-бьрано, бь сайа Хӧдане мә Иса Мәсиһ у ԝе һʼьзкьрьна жь Рʼӧһʼ, ԝәки һун бь дӧайед хԝәйә ль бәр Хԝәде тʼәви шәрʼкʼарийа мьн бьн. Дӧа бькьн, ԝәки әз жь дәсте ԝан хьлаз бьм, йед кӧ Щьһустанеда нәбаԝәр ьн у ԝәки хьзмәткʼарийа мьнә бона кʼомәкдайине Оршәлимеда ль щьмәʼта Хԝәде хԝәш бе. У бь ви аԝайи әзе бь әʼмьре Хԝәде, бь дьләки ша бемә щәм ԝә у һьнәки тʼәви ԝә һеса бьм. Дә бьра Хԝәдейе әʼдьлайийе тʼәви ԝә һʼәмуйа бә. Амин. Әз тʼәмийа хушка Фойбе дьдьмә ԝә, йа кӧ бәрдәстийа щьвина Кәнхерйайе дькә. Һун ԝе бь наве Хӧдан ԛәбул кьн, чаԝа ль щьмәʼта Хԝәде дькʼәвә у гава дьбә һʼәԝще тьштәки, дәсте хԝә дьрежи ԝе кьн, чьмки әԝе жи хԝәйити гәләка кьрийә у ӧса жи мьн. Сьлаве бьдьнә Прьскилайе у Акила, һәвал-хәбатед мьнә шьхӧле Мәсиһ Исада. Ԝана бона мьн дәст жь әʼмьре хԝә кʼьшанд, нә кӧ тʼәне әз жь ԝан рʼази мә, ле тʼәмамийа щьвинед жь нәщьһуйа жи. У ль щьвина мала ԝанда жи сьлав кьн. Апенәтойе дәлале мьн жи сьлав кьн, кӧ Асйайеда баԝәрмәнде Мәсиһи пешьн ә. Сьлаве бьдьнә Мәрйәме, кӧ бона ԝә гәләк худан рʼетийә. Сьлаве бьдьнә Әндронико у Йунйасе пьсмам у һәвалед мьнә кәледа. Әԝ нава шандийада әʼйан ьн у бәри мьн баԝәрийа хԝә Мәсиһ анинә. Сьлаве бьдьнә Әмплийато, дәлале мьни жь Хӧдан. Сьлаве бьдьнә Урбано һәвал-хәбате мәйи шьхӧле Мәсиһда у Стахойе дәлале мьн. Сьлаве бьдьнә Апелис, кӧ бона Мәсиһ йәки кʼәти-рʼабуйи йә. Сьлаве бьдьнә мала Аристополо. Сьлаве бьдьнә Һеродийоне пьсмаме мьн. Сьлаве бьдьнә ԝан, йед кӧ жь мала Нәркисо нә, нав баԝәрийа Хӧданда нә. Сьлаве бьдьнә Тьрифенайе у Тьрифосайе, кʼижан бона наве Хӧдан дьхәбьтьн. Сьлаве бьдьнә Пәрсисейа дәлал, кӧ гәләки худан рʼетийә бона Хӧдан. Сьлаве бьдьнә Рʼуфойе бьжартийе Хӧдан у дийа ԝи у ӧса жи чаԝа дийа мьн. Сьлаве бьдьнә Асинкрито, Флегон, Һәрмес, Патробас, Һәрмас у хушк-бьрайед майинә тʼәви ԝан. Сьлаве бьдьнә Филолого у Йулийа, Неройис у хушка ԝи, ӧса жи Олимпас у тʼәмамийа щьмәʼта Хԝәдейә тʼәви ԝан. Сьлаве бьдьнә һәв бь рʼамусана шире һʼәлал. Һʼәму щьвинед Мәсиһ ль ԝә сьлав дькьн. Ньһа әз һиви жь ԝә дькьм хушк-бьрано, кӧ һун һʼәвза хԝә жь ԝан бькьн, йед кӧ жь ԝе һинбуне дәр, йа кӧ һун һин бунә, щӧдәбуне пешда тиньн у хәлԛе пʼьшк дькьн. Жь ԝан дур бьн. Чьмки йед ӧса хӧламтийе ль Хӧдане мә, Мәсиһ накьн, ле зьке хԝә дьчʼериньн. Бь заре хԝәш у һʼьләкʼарийе, йед сахьке дьле хԝә дьхапиньн. Гӧһдарийа ԝә нав һʼәмуйада бь нав у дәнг ә у әз бона ԝә ша мә, ле дьхԝазьм кӧ һун сәрԝахт бьн һьндава ԛәнщийеда у дьлсах бьн һьндава хьрабийеда. У Хԝәдейе әʼдьлайийе зутьрәке ԝе сәре мирещьн бьне ньгед ԝәда бьпʼәлехә. Кʼәрәма Хӧдане мә Иса Мәсиһ тʼәви ԝә бә. Тимотʼейойе һәвал-хәбате мьн ль ԝә сьлав дькә, ӧса жи Лукйо, Йасон у Соспатройе пьсмамед мьн. Әз Тәртийо жи бь наве Хӧдан ль ԝә сьлав дькьм, йе кӧ әв нәʼмә ньвиси. Гайос ль ԝә сьлав дькә, ԛонахе мьн у йе тʼәмамийа щьвине. Ерастойе сәр хьзна бажер ль ԝә сьлав дькә у ӧса жи бьрайе Кьԝарто. Кʼәрәма Хӧдане мә Иса Мәсиһ тʼәви ԝә һʼәмуйа бә. Амин. Ньһа шькьр жь Ԝирʼа, Йе кӧ дькарә ԝә баԝәрийеда бьшьдинә, ԝәкә ԝе Мьзгинийа кӧ әз бона Иса Мәсиһ даннасин дькьм, ԝәкә ашкәрәбуна ԝе сӧрʼа кӧ һе дәԝред бәрейә бьһӧрида вәшарти мабу, ле ньһа бь ньвисаред пʼехәмбәра әʼйан бу у бь әʼмьре Хԝәдейе һʼәта-һʼәтайе һатә наскьрьне, ԝәки һʼәму мьләт баԝәр бькьн у гӧһдар бьн. Шькьр жь Хԝәдейе тʼәнейи сәрԝахтрʼа, бь сайа Иса Мәсиһ, һʼәта-һʼәтайе. Амин. Жь Паԝлосе кӧ бь әʼмьре Хԝәде шандитийа Мәсиһ Исарʼа газикьри, тʼәви Состенисе бьра, щьвина Хԝәдейә Корьнтʼерʼа, бӧһӧрти-жьбарәбуйийед йәктийа Мәсиһ Исада, йед пирозбунерʼа газикьри, тʼәви ԝан һʼәмуйед кӧ һәр дәра гази наве Хӧдане мә Иса Мәсиһ дькьн, Әԝ Хӧдане ԝан у мә йә: Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә. Әз һәр гав бона ԝә шькьрийе дьдьмә Хԝәдейе хԝә, бона ԝе кʼәрәма Ԝи, йа кӧ бь сайа Мәсиһ Иса ԝәрʼа һатийә дайине. Бәле һун бь йәктийа Ԝи һәр тьштида дәԝләти бун, һәр хәбәрдане у һәр занәбунеда. Һинкьрьна дәрһәԛа Мәсиһда нава ԝәда һʼиме хԝә ӧса гьртийә, кӧ һун кемасийа тʼӧ пʼешкʼеше накʼьшиньн, гава һивийа хӧйабуна Хӧдане мә Иса Мәсиһ ьн. Әԝе ԝә һʼәта хьлазийе һʼимгьрти хԝәй кә, кӧ һун Рʼожа һатьна Хӧдане мә Иса Мәсиһ беләкʼә бьн. Амьн ә әԝ Хԝәдейе кӧ гази ԝә кьр, ԝәки һун тʼәви Кӧрʼе Ԝи Иса Мәсиһе Хӧдане мә бьн. Дә әз иди һиви жь ԝә дькьм хушк-бьрано, бь наве Хӧдане мә Иса Мәсиһ, бьра готьна ԝә һʼәмуйа йәк бә у дӧтирәти нава ԝәда тʼӧнәбьн, ле һʼәму жи бь һәврʼа бьн у сәр нет-мәрәмәки бьн. Чьмки мьн сальхе ԝә жь мала Хьлойе һьлда хушк-бьрано, кӧ нава ԝәда дәʼԝ-доз һәнә. Аԝа готи дьхԝазьм бежьм, ԝәки нава ԝәда йәк дьбежә: «Әз Паԝлоси мә», йәк дьбежә: «Әз Аполойи мә», йәк жи дьбежә: «Әз Пәтруси мә» у йәки дьн жи дьбежә: «Әз Мәсиһи мә». Чьма Мәсиһ пʼарәвәбуйи йә? Чьма Паԝлос бона ԝә хач буйә? Йан бь наве Паԝлос һун пе аве һатьнә ньхӧмандьне? Әз жь Хԝәде рʼази мә, кӧ мьн жь ԝә тʼӧ кәс нәньхӧманд, пештьри Кьриспо у Гайос. Ньһа тʼӧ кәс нькарә бежә, кӧ һун бь наве мьн һатьнә ньхӧмандьне. (Рʼаст ә мьн мала Стәйфан жи ньхӧманд. Ле ԝәки майин найе бира мьн, кӧ мьн йәки дьн ньхӧмандьбә.) Чьмки Мәсиһ әз ньхӧмандьнерʼа нәшандьм, ле Мьзгинидайинерʼа у әз ве йәке надьмә зора хәбәрдана зьмен, кӧ нәбә ԛәԝата хаче Мәсиһ бәр тьштәки нәйе һʼәсабе. Рʼаст ә һинкьрьна дәрһәԛа хачда ӧндабуйийарʼа беһʼьши йә, ле мә хьлазбуйийарʼа, ԛәԝата Хԝәде йә. Чаԝа ньвисар ә: «Әзе сәрԝахтийа сәрԝахта ӧнда кьм у билантийа билана бәтал кьм». Кʼанен сәрԝахт? Кʼанен занә? Кʼанен аԛьлмәндед ве дьнйайе? Нә сәрԝахтийа ве дьнйайе Хԝәде кьрә беһʼьши? Чьмки сәрԝахтийа Хԝәде нәһьшт кӧ дьнйа бь сәрԝахтийа хԝә Ԝи нас кә, ле ль Хԝәде хԝәш һат, бь ԝе һинкьрьна «беһʼьши» йед кӧ баԝәр дькьн хьлаз кә. Щьһу кʼәрәмәта дьхԝазьн у йунан жи сәрԝахтийе дьгәрʼьн. Ле әм, Мәсиһе хачбуйи даннасин дькьн, щьһуйарʼа пʼьшкбун ә, нәщьһуйарʼа жи беһʼьши, ле бона йед кӧ Хԝәде гази ԝан дькә, һәгәр щьһу бьн, һәгәр нәщьһу, әԝ хәбәр Мәсиһ ә, ԛәԝата Хԝәде у сәрԝахтийа Хԝәде. Чьмки әԝ кьред Хԝәдейә кӧ бәр чʼәʼве мәрьва беһʼьши хӧйа дьбьн, әԝ жь сәрԝахтийа мәрьвайе сәрԝахттьр ьн у бәр чʼәʼве мәрьва чьԛас сьстийа Хԝәде хӧйа дьбә, әԝ жь ԛәԝата мәрьвайе ԛәԝаттьр ә. Дина хԝә бьдьне хушк-бьрано, һун кʼи бунә кӧ Хԝәдеда һатьнә газикьрьне: Алийе дьнеда жь ԝә гәләк нә сәрԝахт бунә, жь ԝә гәләк дьнеда нә зор бунә у нә жи жь ԝә гәләк малед рʼәнгинда бунә. Ле Хԝәде беһʼьшед дьне бьжартьн, ԝәки сәрԝахта бьдә шәрме у сьстед дьне бьжартьн, ԝәки йед ԛәԝат бьдә шәрме у Хԝәде йед дьнебехәбәрә берʼумәт у йед нә тʼӧ тьшт бьжартьн, кӧ һәйинед бәрбьчʼәʼв рʼәт кә һәрʼә, ԝәки тʼӧ ԛул-бәндә ль бәр Хԝәде пе хԝә нәфьрʼә. Әԝи һун тʼәви Мәсиһ Иса кьрьн у Мәсиһ бона мә кьрә сәрԝахти. Әм бь Ԝи рʼаст тенә һʼәсабе, пироз у аза дьбьн. Аԝа чаԝа ньвисар ә: «Йе кӧ дьфьрʼә, бьра бь Хӧдан бьфьрʼә». Әз жи гава һатьмә щәм ԝә хушк-бьрано, әз бь хәбәр йан сәрԝахтийа кʼәмалә гьран нәһатьм сӧрʼа Хԝәде ԝәва әʼйан кьм. Чьмки гава әз нава ԝәда бум, мьн нета хԝәда данәни кӧ тьштәки дьн һин кьм, пештьри Иса Мәсиһ у Әԝ жи Йе хачбуйи. Әз хԝәха һʼаләки сьстда, бь хоф у тьрс нава ԝәда бум. У готьн у һинкьрьна мьн, нә кӧ бь хәбәред сәрԝахтийа мәрьвайийә зархԝәшийе бу, ле бь избатийа ԛәԝата Рʼӧһʼе Пироз бу. Әв йәк аһа бу, ԝәки баԝәрийа ԝә бь сәрԝахтийа мәрьвайе нибә, ле бь ԛәԝата Хԝәде бә. Ле бәле дәрһәԛа сәрԝахтийеда әм йед рʼӧһʼанийә гьһиштирʼа хәбәр дьдьн, ле нә сәрԝахтийа ве дьне у нә жи йа сәрԝеред ве дьне, кӧ һʼӧкӧме ԝан бәтал дьбә. Ле әм дәрһәԛа сәрԝахтийа Хԝәдейә сӧрʼә вәшартида хәбәр дьдьн, йа кӧ Хԝәде һе бәри әʼфьрандьна дьнйайе, бона рʼумәта мә ԛьрар кьр. Жь сәрԝеред ве дьнйайе тʼӧ кәси әв сәрԝахтийа фәʼм нәкьр, чьмки һәгәр фәʼм бькьрана, ԝе Хӧдане рʼумәте хач нәкьрана. Ле чаԝа ньвисар ә: «Әԝ тьштед кӧ чʼәʼва нәдитьнә у гӧһа нәбьһистьнә, дьле мерьврʼа дәрбаз нәбунә, Хԝәде бона ԝан һазьр кьрьнә, йед кӧ Ԝи һʼьз дькьн». Ле бәле Хԝәде бь Рʼӧһʼе Хԝә әв йәк ль бәр мә вәкьр. Чьмки Рʼӧһʼ һәр тьшти әʼнәнә дькә, һʼәта нет-мәрәмед Хԝәдейә кʼур жи. Кʼи һаш жь кел-мәʼнийед мерьв һәйә, пештьри ԝи рʼӧһʼе нава ԝида? Ӧса жи кәс һаш жь йа Хԝәде тʼӧнә, пештьри Рʼӧһʼе Хԝәде. Мә нә кӧ рʼӧһʼе ве дьнйайе стандийә, ле әԝ Рʼӧһʼе жь Хԝәде, ԝәки әм ԝан тьштед жь Хԝәдеда мәрʼа дайи фәʼм бькьн. Әм бона ван тьшта бь готьнед жь сәрԝахтийа мәрьвайе һинбуйи хәбәр надьн, ле бь готьнед һинкьрьна жь Рʼӧһʼе Хԝәде хәбәр дьдьн, тьштед рʼӧһʼани ԝанрʼа шьровәдькьн, йед кӧ хԝәйи-Рʼӧһʼе Хԝәде нә. Ле мәрьве нәхԝәйи-Рʼӧһʼ ԝан тьштед Рʼӧһʼе Хԝәде ԛәбул накә, бь йа ԝи әв йәкана беһʼьши нә у нькарә жи фәʼм бькә, чьмки һʼале ԝан тьшта бь рʼӧһʼани тенә әʼнәнәкьрьне. Ле йе хԝәйи-Рʼӧһʼе Хԝәде һәр тьшти әʼнәнә дькә, ле бәле хԝәха жь кәсәки найе әʼнәнәкьрьне. Чаԝа ньвисар ә: «Кʼе нет-фькьра Хӧдан пе һʼәсийа, кӧ ширәтәке бьдә Ԝи?» Ле нет-фькьра Мәсиһ сәре мәда йә. Ле мьн хушк-бьрано, нькарьбу тʼәви ԝә хәбәр да чаԝа тʼәви йед хԝәйи-Рʼӧһʼе Хԝәде, ле чаԝа тʼәви бәндед ве дьне, чаԝа тʼәви хьшимед баԝәрийа Мәсиһда. Мьн шир да ԝә, ле нә кӧ хԝарьна гьран, чьмки ԝә һе нькарьбу бьхԝара. У һун ньһа жи нькарьн бьхԝьн, чьмки һун һәла һе мина бәндед ве дьне нә. Һʼәта кӧ нава ԝәда һʼәвсуди у һәврʼькʼи һәнә, гәло әв йәкана нә мәрьвайи нә? У һун мина бәндед ве дьне нажин? Мәсәлә кӧ гава йәк дьбежә: «Әз Паԝлоси мә» у йе дьн: «Әз Аполойи мә», һун нә мина бәндед ве дьне нә? Иди кʼи йә Аполо? Кʼи йә Паԝлос? Әԝ ԛӧльхкʼаред Хԝәде нә, бь кʼижана ԝә баԝәр кьр. Хӧдан чьԛас шьхӧл дайә ԝан һәр кәси, һаԛаси жи дькьн. Мьн дачʼьканд, Аполо авда, ле Хԝәде гиһанд. Аԝа нә йе дачʼьканд тьштәк ә, нә жи йе авда, ле йе гиһанд, кӧ Хԝәде йә. Йе дачʼьканд у йе авда йәк ьн у һәр кәсе һәԛе хԝә бьстинә, ԝәкә хәбата хԝә. Чьмки әм тʼәвайи бона Хԝәде дьхәбьтьн, һун жи зәвийа Хԝәде нә, авайийе Хԝәде нә. Мьн жи ԝәкә ԝе кʼәрәма кӧ Хԝәде да мьн, мина чирәдәстәки сәрԝахт һʼим авит, ле йәки дьн сәр чедькә. Ле бәле тʼәне бьра һәр кәс һаш жь хԝә һәбә, чаԝа чедькә. Чьмки һʼимәки дьн кәсәк нькарә бавежә, пештьри йе авити, кӧ Иса Мәсиһ ә. Ль сәр ви һʼими йәк дькарә бь зерʼ, зив, кәвьред ԛимәт, дар, гиһе, йан кайе чекә, ле бь чь тьшти жи чекә, шьхӧле һәр кәси ԝе әʼйан бә, чьмки әԝ Рʼож ԝе бьдә кʼьфше, әԝе бь егьр әʼйан бә у кьре һәр кәси чь һʼалида бә, агьре бьщерʼьбинә. Һәгәр шьхӧле йәки сәр ви һʼиме чекьри бьминә, әԝе һәԛ бьстинә, ле һәгәр шьхӧле йәки бьшәԝьтә, әԝе зийане бькʼьшинә, ле хԝәха ԝе хьлаз бә, чаԝа йәки нава егьррʼа дәрбазбуйи. Чьма һун ньзаньн кӧ һун пʼарьстгәһа Хԝәде нә у Рʼӧһʼе Хԝәде нава ԝәда дьминә? Һәгәр йәк пʼарьстгәһа Хԝәде ԝеран кә, Хԝәде жи ԝе ԝи ԝеран кә, чьмки пʼарьстгәһа Хԝәде пироз ә у һун ьн әԝ пʼарьстгәһ. Бьра тʼӧ кәс хԝә нәхапинә. Һәгәр йәк жь ԝә ль гора ԛәйдед ве дьнйайе хԝә сәрԝахт дьбинә, бьра бьбә беһʼьш, ԝәки бьбә сәрԝахт. Чьмки сәрԝахтийа ве дьнйайе ль бәр Хԝәде беһʼьши йә. Чаԝа ньвисар ә: «Әԝ сәрԝахта нава һʼьләкʼарийа ԝанда дьгьрә» у диса: «Хӧдан занә кӧ шеԝьред сәрԝахта пʼучʼ ьн». Дә бьра иди тʼӧ кәс пе мәрьва нәфьрʼә! Бәле һәр тьшт жи пʼара ԝә нә. Паԝлос, Аполо, Пәтрус, дьнйа, жийин, мьрьн, тьштед кӧ ньһа һәнә, йан йед ԝе бен, һәр тьшт пʼара ԝә нә, һун жи пʼара Мәсиһ ьн у Мәсиһ жи пʼара Хԝәде йә! Аԝа гәрәке мәрьв мә ӧса һʼәсаб кьн, чаԝа бәрдәстийед Мәсиһ у ԝәкʼилед сӧрʼед Хԝәде. Жь ԝәкʼил жи дькʼәвә кӧ әԝ амьн бә. Ле бона мьн әв йәк нә тʼӧ тьшт ә, кӧ фькьред ԝә йан йед диԝана мәрьвайе сәр мьн чь нә, әз хԝәха жи лома ль хԝә накьм. Исафа мьн рʼьһʼәт ә, нә кӧ бь ве йәке әз хԝә софи дькьм, ле һʼакьме мьн Хӧдан ә. Аԝа жь ԝәхт зутьр лома нәкьн, һʼәта һатьна Хӧдан. Әԝе тьштед тәʼрийеда вәшарти дәрхә рʼонайе у шеԝьред дьла бьдә әʼйанкьрьне. У һьнге һәр кәсе ԛимәте хԝә жь Хԝәде бьстинә. Әв йәкана хушк-бьрано, мьн бона ԝә анинә сәр хԝә у Аполо, ԝәки һун ве йәке жь мә һин бьн: «Жь ньвисаре дәрнәйен». Һьнге жь ԝә тʼӧ кәс ԝе йәк пе йәки нәфьрʼә. Кʼи тә жь хәлԛе фьрԛи дькә? Чи тә һәйә, кӧ тә пʼешкʼеш нәстандийә? Ле ԝәки тә стандийә, чьма пʼәйе хԝә дьди чаԝа тә нәстандьбә? Һун иди тʼер бунә, иди һʼьрʼ бунә! Бейи мә иди бунә пʼадша! Ах хԝәзи һун бьбуна пʼадша, әме жи тʼәви ԝә бьбуна пʼадша! Чьмки әз тʼәхмин дькьм, кӧ Хԝәде әм шанди авитьнә пашийа кʼочʼа, чаԝа жь мьрьнерʼа дайи. Әм дьнеда бунә итойин, һьн ль бәр мьлйакʼәта, һьн жи бәр мәрьва. Әм беһʼьш ьн бона Мәсиһ, ле һун сәрԝахт ьн йәктийа Мәсиһда! Әмә сьст ьн, ле һунә ԛәԝат! Һунә хԝәйирʼумәт ьн, ле әмә берʼумәт! Һʼәта ньһа жи әм бьрʼчи дьминьн, тʼи дьминьн, бе сьтʼар дьбьн, тенә кʼӧтане у дәро-дәр дьбьн. Әм бь дәсте хԝә дьхәбьтьн, бь худана хԝә дьжин. Гава мә рʼәзил дькьн, әм дӧа ль ԝан дькьн, гава мә дьзериньн, әм сәбьр дькьн, гава наве мәрʼа дьлизьн, әм ль бәр ԝан дадьхьн. Әм бунә гәмара ве дьнйайе, һʼәта ньһа жи һәр тьштида бунә хԝәли! Әз ве йәке ԝәрʼа дьньвисьм, нә кӧ ԝә бьдьмә шәрме, ле ԝәки ԝә мина зарʼед хԝәйә дәлал ширәт кьм. Һәгәр ԝе жийина ԝәйә тʼәви Мәсиһда бь һʼәзара тʼәрбәтдаред ԝә һәбьн, ле тʼәне бавәки ԝә һәйә, чьмки ԝе жийина ԝәйә тʼәви Мәсиһ Исада һун жь мьн бь Мьзгинидайине дьне кʼәтьн. Аԝа һиви жь ԝә дькьм, чʼәʼв бьдьнә мьн. Бона ве йәке мьн Тимотʼейо сәр ԝәда шанд, лаԝе хԝәйи дәлал у һьндава Хӧданда амьн. Әԝе ԝан рʼе-дьрбед мьнә Мәсиһ Исада гьрти бькә бира ԝә, кӧ әз чаԝа ль һәр дәра, һʼәму щьвина һин дькьм. Һьнәк жь ԝә бабах бунә, ԝан тʼьре әзе нәйемә щәм ԝә. Ле әзе зутьрәке сәр ԝәда бем, һәгәр Хӧдан һʼьз бькә у әзе нә кӧ ль готьнед бабаха бьньһерʼьм, ле һʼӧнӧред ԝан. Чьмки Пʼадшатийа Хԝәде нә кӧ хәбәрданеда йә, ле һʼӧнӧрда йә. Һун чаԝа дьхԝазьн? Әз бь кʼӧлме сәр ԝәда бем, йан бь һʼьзкьрьне у бәрбьһерийе? Дәнг һәйә кӧ нава ԝәда бенамуси жи һәйә у әԝ жи бенамусикә ӧса, ԝәки нава пʼутпʼарьстада жи тʼӧнә, кӧ йәк дәст давежә демарʼийа хԝә. У һун жь кʼӧбарийе һʼьрʼ бунә! Нә гәрәке ԝә шин бькьра у йе хԝәйе ви кьри жь нава хԝә дәрхьста? Ле бәле чаԝа әз бәдәни нә нава ԝәда мә, ле рʼӧһʼе хԝәда һазьр ьм у чаԝа йәки һазьр, мьн иди бона йе ви тьшти дькә ԛьрара хԝә бь наве Хӧдане мә Иса дайә. Гава һун щики дьщьвьн, рʼӧһʼе мьн жи тʼәви ԝә, бь ԛәԝата Хӧдане мә Иса ԝи мәрьви бьдьнә дәсте мирещьн, кӧ ԛальбе ԝи ӧнда бә у рʼӧһʼе ԝи хьлаз бә Рʼожа Хӧданда. Нә ԛәнщ ә кӧ һун фьрʼнаԛ дьбьн! Гәло һун ньзаньн кӧ һьнәк һәвиртьрʼшк тʼәмамийа шкәве һьлтинә? Ви һәвиртьрʼшке кәвьн жь хԝә дур хьн, кӧ һун бьбьнә һәвире нуйи бе һәвиртьрʼшк, чаԝа һун ӧса нә жи. Чьмки Бәрхе мәйи Щәжьна Дәрбазбуне, аԝа готи Мәсиһ бона мә һатә сәржекьрьне. Дә әм ве щәжьне дәрбаз кьн, нә кӧ бь һәвиртьрʼшке кәвьни нәһәԛийе у хьрабийе, ле бь нане бе һәвиртьрʼшк, бь нане һʼәлалийе у рʼастийе. Мьн ԝәрʼа нәʼмеда ньвисибу, кӧ тʼәви ԛава нәбьн. Нә кӧ готьна мьн дәрһәԛа ԛава, тьмакʼара, тʼаланкьр йан пʼутпʼарьстед ве дьнеда бу. Һәгәр ӧса буйа, гәрәке һун лап жь дьне дәркʼәтана. Ле бәле мьн ԝәрʼа ньвиси, кӧ һун тʼәви ԝи нәбьн, йе кӧ наве хԝәденасийе сәр ә, ле ԛав ә, тьма йә, пʼутпʼарьст ә, бӧхданбеж ә, сәрхԝәш ә, йан жи тʼаланкьр ә. Тʼәви йе ӧса һʼәта нен жи нәхԝьн! Чи мьнрʼа йә әз диԝана йед жь щьвине дәр бькьм? Хԝәде ԝе диԝана ԝан бькә. Ле диԝана йед щьвинеда дәстед ԝәда йә. Аԝа чаԝа ньвисар ә: «Мәрьве хьраб жь нава хԝә дәрхьн». Гәло әва кʼаре кьрьне йә, гава йәк жь ԝә, нава ԝи у бьре ԝида дәʼԝ-доз пешда те, тӧрӧш дькә ль бәр нәпʼака ԝе йәке дьдә сафикьрьне, нә кӧ ль бәр щьмәʼта Хԝәде? Чьма һун ньзаньн кӧ щьмәʼта Хԝәде ԝе диԝана дьне бькә? У һәгәр бь дәсте ԝә ԝе диԝана дьнйайе бе кьрьне, гәло һун нькарьн ван пьрсед сьвьк жи сафи кьн? Чьма һун ньзаньн кӧ әме диԝана мьлйакʼәта жи бькьн? Иди кʼӧ дьминә диԝана пьрсед ве дьнйайе нәкьн? Аԝа һәгәр нава ԝәда пьрсед ве дьнейә сафикьрьне һәбьн, һун чаԝа дькарьн һʼакьмтийе бьдьнә дәсте йед ӧса, кӧ жь алийе щьвинеда нә тʼӧ тьшт ьн? Әз аһа дьбежьм, кӧ һун шәрм бькьн! Гәло нава ԝәда йәки сәрԝахт тʼӧнә, кӧ бькарьбә нава бьрада сәрәдәрийе бькә? Ле бьра бьрерʼа дькʼәвә дәʼԝ-дозе, әԝ жи ль бәр нәбаԝәра! Ԝә рʼасти ве йәкеда лап дайә дәр, кӧ һун һәврʼа дькʼәвьнә дәргәһ-диԝана. Гәло һе ԛәнщ нинә, кӧ һун бенә нәһәԛкьрьне? Гәло һе ԛәнщ нинә, кӧ һун бенә шеландьне? Ле һун нәһәԛийе дькьн у дьшелиньн, әԝ жи хушк-бьра! Чьма һун ньзаньн кӧ йед нәһәԛ ԝе Пʼадшатийа Хԝәде ԝар нәбьн? Нәхапьн! Нә бенамус, нә пʼутпʼарьст, нә зьнекʼар, нә жьнед һәврʼа дьбьн рʼобәт, нә меред һәврʼа дьбьн рʼобәт, нә дьз, нә тьмакʼар, нә сәрхԝәш, нә бӧхданбеж, нә жи тʼаланкьр Пʼадшатийа Хԝәде ԝе ԝар нәбә. У жь ԝә һьнәк ӧса бун. Ле һун жь гӧна һатьнә шуштьне, һун һатьнә бӧһӧрти-жьбарәкьрьне, һун рʼаст һатьнә һʼәсабе бь наве Хӧдан Иса Мәсиһ у бь Рʼӧһʼе Хԝәдейе мә. Дьбежьн: «Һәр тьшт мьнрʼа әʼдәт ә», бәле, ле һәр тьшт нә кʼар ә. «Һәр тьшт мьнрʼа әʼдәт ә», ле тʼӧ тьшт гәрәке һʼӧкӧми сәр мьн нәкә. Дьбежьн: «Хԝарьн бона зьк ә, зьк жи бона хԝарьне йә», ле Хԝәде һәр дӧйа жи ԝе ӧнда кә. Ле бәдән нә бона ԛавийе йә, ле бона хьзмәткʼарийа Хӧдан ә у Хӧдан жи бона бәдәне хәм дькә. У Хԝәдейе кӧ Хӧдан жь мьрьне рʼакьр, ԝе мә жи жь мьрьне рʼакә бь ԛәԝата Хԝә. Чьма һун ньзаньн кӧ бәдәнед ԝә әндәмед Мәсиһ ьн? Әз әндәмед Мәсиһ һьлдьм тʼәви ԛава кьм? Тʼӧ щар! Йан һун ньзаньн йе кӧ тʼәви ԛава дьбә, тʼәви ԝе дьбә бәдәнәк? Чаԝа ньвисар дьбежә: «Һәр дӧ ԝе бьбьнә бәдәнәк». Ле әԝе кӧ тʼәви Хӧдан дьбә, дьбә рʼӧһʼәк. Жь ԛавийе бьрʼәвьн! Һʼәму гӧнед майинә кӧ мәрьв дькә, жь бәдәне дәр ә, ле әԝе кӧ ԛавийе дькә, мьԛабьли бәдәна хԝә гӧна дькә. Чьма һун ньзаньн кӧ бәдәнед ԝә пʼарьстгәһа Рʼӧһʼе Пироз ьн, кӧ нава ԝәда йә, Кʼижан ԝә жь Хԝәде станд? Һун нә хԝәйийе сәре хԝә нә. Һун бь ԛимәтәки бьһа һатьнә кʼьрʼине. Бона ве йәке бькьн кӧ пе бәдәна ԝә шькьри Хԝәдерʼа бе дайине. Ле ньһа дәрһәԛа ԝан пьрсед кӧ ԝә мьнрʼа ньвисин: «Ԛәнщ ә ԝәки мер незики жьне нәбә?» Ле бона кӧ пешийа һәр щурʼә ԛавийе бе гьртьне, бьра мер бе жьн нәбә у жьн жи бе мер. Мер бьра дәйне жьне бьде, жьн жи дәйне мер. Жьн нә хԝәйа ԛальбе хԝә йә, ле мер, ӧса жи мер нә хԝәйе ԛальбе хԝә йә, ле жьн. Жь һәвдӧ на-на нәкьн, пештьри ԝе дәме, гава һун бь һәврʼа бона ԝәхтәке тʼьфаԛ ԛьрар дькьн ԝәки хԝә бьдьнә дӧакьрьне, ле паше диса ль һәв вәгәрʼьн, кӧ мирещьн ԝә нәщерʼьбинә жь дәст бетʼаԝийа ԝә. Әз ве йәке дьһельмә сәр әхтәрийа ԝә, нә кӧ әʼмьр дькьм. Рʼаст ә, мьн дьхԝәст кӧ һʼәму мәрьв мина мьн буна, ле һәр мәрьвәкирʼа дайинәкә жь Хԝәде һәйә, йәк һа йә, йәк жи аһа йә. Ле йед бе жьн у жьнәбийарʼа әз дьбежьм: Ԛәнщ ә кӧ әԝ мина мьн бьминьн. Ле һәгәр хԝә зәфт накьн, бьра бьзәԝьщьн-мер кьн, чьмки ԛәнщ ә кӧ әԝ бьзәԝьщьн-мер кьн, нә кӧ хԝәда бьшәԝьтьн. Ле йед зәԝьщи-меркьрирʼа, нә кӧ әз әʼмьр дькьм, ле бәле Хӧдан: Бьра жьн жь мер нәԛәтә, һәгәр бьԛәтә жи, бьра мер нәкә йан жи мере хԝәрʼа ль һәв бе. У мер жи бьра жьна хԝә бәрʼнәдә. Ле йед майинрʼа әз дьбежьм, нә кӧ Хӧдан: Һәгәр жьна бьраки нәбаԝәр бә у бьхԝазә тʼәви ԝи бьминә, бьра ԝе бәрʼнәдә. У жьнәкә кӧ мере ԝе нәбаԝәр бә у әԝ бьхԝазә тʼәви ԝе бьминә, бьра жь ԝи нәԛәтә. Чьмки мере нәбаԝәр бь жьна баԝәрмәнд һʼәлал дьбә у жьна нәбаԝәр жи бь мере баԝәрмәнд һʼәлал дьбә. Һәгәр ӧса нибуйа, зарʼед ԝәйе һʼәрам буна, ле ньһа һʼәлал ьн. Ле һәгәр нәбаԝәр бьԛәтә, бьра бьԛәтә. Хушк йан бьра ве дәрәщеда аза йә. Бәле Хԝәде гази ԝә әʼдьлайийе кьр. Тӧ чь зани кʼӧлфәте, бәлки те мере хԝә хьлаз ки? Йан жи тӧ чь зани меро, бәлки те кʼӧлфәта хԝә хьлаз ки? Ԝәки дьн әз дьбежьм: Хӧдан чаԝа пʼара һәр кәси да у чаԝа Хԝәде гази һәр кәси кьр, бьра ԝәкә ԝе йәке жи бьжи. Әв ә тʼәмийа кӧ әз дьдьмә һʼәму щьвина. Һәгәр йәк сьнәткьри бу гава һатә газикьрьне, бьра сьнәтбуна хԝә иди нәгӧһезә. Һәгәр йәк нәсьнәткьри бу гава һатә газикьрьне, бьра иди сьнәт нәбә. Нә сьнәтбун тьштәк ә у нә жи нәсьнәтбун, ле сәри тʼәмийед Хԝәде ԛәдандьн ә. Кʼи чь һʼалида бу гава Хԝәде гази кьре, бьра нава ԝеда жи бьминә. Хӧлам буйи гава һати газикьрьне? Хәм нәкә. Ле һәгәр дькари аза би, ԝе мәщале жь дәсте хԝә нәкә. Чьмки әԝ хӧламе кӧ һатә газикьрьне, ԝәки бьбә пʼара Хӧдан, әԝ азайе Хӧдан ә, ӧса жи әԝе кӧ аза бу гава һатә газикьрьне, әԝ хӧламе Мәсиһ ә. Һун бь ԛимәтәки бьһа һатьнә кʼьрʼине, нәбьнә хӧламед мәрьва. Хушк-бьрано, кʼи чь һʼалида һатә газикьрьне, бьра нава ԝеда жи ль бәр Хԝәде бьминә. Ле ньһа чь жь ԛиз у хорта дькʼәвә, мьн дәрһәԛа ԝанда әʼмьр жь Хӧдан нәстандийә, ле тʼәне әз фькьра хԝә дьбежьм, чаԝа йәки жь Хӧдан рʼәʼм станди кӧ һьндава Ԝида амьн ә. Әз бона тәнгасийа ньһа аһа рʼе терʼа дьбиньм кӧ мәрьв чь дәрәщеда йә, бьра ӧса жи бьминә. Жьнева гьредайи йи? Нәкә кӧ же бьԛәти. Бе жьн и? Жьне нәгәрʼә. Ле һәгәр бьзәԝьщи, гӧнә наки у һәгәр ԛиз мер кә, гӧнә накә. Ле йед ӧса ԝе рʼасти охьрмед гьран бен, әз дьхԝазьм ԝә жь ԝе йәке хԝәй кьм. Әз ԝәрʼа дьбежьм бьрано: Ԝәхт һьндьк майә. Жь вьр шунда әԝе кӧ жьна ԝи һәйә бьра ӧса бә чаԝа йе бе жьн, әԝе кӧ дьгьри чаԝа йе нагьри, әԝе кӧ ша дьбә чаԝа йе ша набә, әԝе кӧ дькʼьрʼә чаԝа нә хԝәйе ԝан тьшта бә, у әԝе кӧ шьхӧле дьнева мьжул дьбә чаԝа йе пева мьжул набә, чьмки әв дьнйа әʼйан дәрбаз дьбә. Ле әз дьхԝазьм кӧ һун жь хәма дур бьн. Йе нәзәԝьщи шьхӧлед Хӧданва гиро йә, кӧ чаԝа бькә ль Хӧдан хԝәш бе. Ле йе зәԝьщи хәмед дьнева гиро йә, кӧ чаԝа бькә ль жьна хԝә хԝәш бе у сәр дӧ рʼийа сәкьни йә. Жьна бемер йан ԛиз шьхӧлед Хӧданва гиро йә. Мәрәме ԝе әԝ ә, кӧ әԝ рʼӧһʼ у ԛальбе хԝәда бӧһӧрти-жьбарә бә, ле йа меркьри хәмед дьнева гиро йә, кӧ чаԝа бькә ль мере хԝә хԝәш бе. Әз ван тьшта бона кʼара ԝә дьбежьм, нә кӧ бар дьдьмә сәр мьле ԝә, ле дьхԝазьм ԝәки һун бь тʼәрбәт у бь дьл у щан шьхӧлед Хӧданва гиро бьн. Ле һәгәр йәк фәʼм дькә, ԝәки һьндава дәргистийа хԝәда рʼастийе накә, тәме ԝи жи хьраб буйә кӧ гәрәке бьзәԝьщә, бьра ӧса бькә чаԝа дьхԝазә, гӧнә накә, бьра һәвдӧ бьстиньн. Ле әԝе кӧ гьрани сәр ԝи тʼӧнә, ле ль тәме хԝә дькарә у дьле хԝәда ԛьрар кьрийә кӧ дәргистийа хԝә ӧса хԝәй кә чаԝа бәре, әԝ тьштәки ԛәнщ дькә. Аԝа йе дәргистийа хԝә дьстинә, ԛәнщ дькә, ле йе кӧ ԝе бькʼьр дьһелә, һе ԛәнщ дькә. Жьн нә хԝәсәрихԝә йә һʼәта кӧ мере ԝе сах ә, ле һәгәр мер ле бьмьрә, әԝ аза йә, тʼәви кʼе бьхԝазә дькарә мер кә, тʼәне баԝәрмәнде Хӧдан бә. Ле әԝе һе хԝәзьли бә, кӧ ӧса бьминә. Әв ә фькьра мьн у тʼәхмина мьн Рʼӧһʼе Хԝәде нава мьнда һәйә. Ле ньһа чь кӧ жь пьрса ԛӧрбанед пʼута дькʼәвә: Фәʼмдари йә кӧ занәбуна мә һәр кәси жи һәйә. Занәбун пʼьшька мерьв дьԝәрьминә, ле һʼьзкьрьн ава дькә. Һәгәр йәк тʼәхмин дькә, кӧ әԝ тьштәки занә, әԝ рʼаст һе тьштәки ӧса ньзанә чаԝа кӧ лазьм ә бьзаньбә. Ле һәгәр йәк Хԝәде һʼьз дькә, әԝ жь алийе Ԝива наскьри йә. Аԝа дәрһәԛа ԝан ԛӧрбанед пʼутайә кӧ мәри дьхԝьн: Әм заньн кӧ пʼут һәйина хԝәва пʼучʼ ьн у Хԝәдеки дьн тʼӧнә, пештьри йәки. Һәгәр бь навед дьн жи хԝәде һәбьн, йан ль әʼрде йан ль әʼзмен, чаԝа беһʼәсаб хԝәде у беһʼәсаб хӧдан һәнә жи, ле бона мә тʼәне Хԝәдек һәйә, Бав, Әʼфьрандаре һәр тьшти, әм жи бона Ԝи һәнә у тʼәне Хӧданәк һәйә, Иса Мәсиһ, бь Кʼижани һәр тьшт хӧльԛи нә у бь сайа Ԝи әм һәнә. Ле әв занәбун щәм һәр кәси тʼӧнә. Һʼәта ньһа һе дьле һьнәка пәй пʼутпʼарьстийе йә, кӧ гава ԝи гошти дьхԝьн, һʼәсаб дькьн чаԝа ԛӧрбанед пʼута у хԝә дьһʼәрʼьминьн, чьмки исафа хԝәйә сьстда фькара дькә. Ле бәле хԝарьн мә ль бәр Хԝәде надә сәкьнандьне. Һәгәр әм бьхԝьн, тьштәки зедә накьн у һәгәр нәхԝьн, тьштәки жи кем накьн. Ле һаш жь хԝә һәбьн, нәбә кӧ әԝ азайа ԝә бьбә кәвьрәк ль бәр ньге сьста. Әм бежьн, һәгәр мәрьвәки кӧ исафа хԝәйә сьстда фькара дькә тә бьбинә, ԝәки тӧ «хԝәйизанәбун» и у ль сьфра пʼарьстгәһа пʼутда рʼуньшти йи, нә әԝ кьре тә ԝе дьл бьдә ԝи, кӧ әԝ жи ԛӧрбанед пʼутпʼарьстийе бьхԝә? У жь дәст ԝе «занәбуна» тә, бьре тәйи сьст, бона кʼижани Мәсиһ мьр, ԝе ӧнда бә. Бь ви аԝайи, гава тӧ нәһәԛийе ль хушк-бьред хԝә дьки у исафа ԝанә сьст бьриндар дьки, ль бәр Мәсиһ нәһәԛийе дьки. Аԝа һәгәр хԝарьн дьбә кәвьре ль бәр пʼийе бьре мьн, гәрәке иди тʼӧ щар әз гошт нәхԝьм, ԝәки бьре хԝә пʼьшк нәкьм. Нә әз аза мә? Нә әз шанди мә? Нә мьн Хӧдане мә Иса бь чʼәʼва дит? Нә һун пе худана мьн пʼара Хӧдан кʼәтьн? Һәгәр әз шандийе һьнәкед майин нибьм, ле бәле бе шьк шандийе ԝә мә! Чьмки мора шандитийа мьн һун ьн, кӧ пʼара Хӧдан кʼәтьн. Щаба мьн бона йед кӧ дькьн жь мьн гьлийа бькʼьшиньн әв ә: Гәло изьна мә тʼӧнә әм жь бәр хәбата хԝәва бьхԝьн у вәхԝьн? Гәло изьна мә тʼӧнә әм кʼӧлфәтәкә баԝәрийеда тʼәви хԝә бьгәрʼиньн, чаԝа шандийед дьн, бьрайед Хӧдан у Пәтрус дькьн. Йан гәрәке әз у Барнабас тʼәне бьхәбьтьн сәре хԝә хԝәй кьн? Кʼижан әскәр жь кʼисе хԝә әскәрийе дькә? Кʼи рʼәз датинә у бәре ԝе нахԝә йан йе ль бәр пез ә шире пез вәнахԝә? Әз ван тьшта бь мәрьвайи набежьм. Нә Ԛанун жи ԝе йәке дьбежә? Чаԝа Ԛануна Мусада ньвисар ә: «Дәве гайе бедәреда дьхәбьтә гьренәдә». Гәло хәма Хԝәде бона га йә? Йан ԝе йәке бона мә дьбежә? Бәле, әв йәк бона мә һатә ньвисаре, ԝәки әԝе кӧ щоте хԝә дькә, гәрәке бь гӧман щот кә у йе кам дькә, гәрәке гӧман бә, кӧ ԝе кʼәда хԝә бьхԝә жи. Һәгәр мә нава ԝәда тьштед рʼӧһʼани чандьн, гәло тьштәки мәзьн ә, кӧ жь ԝә тьштед ве дьне бьдьрун? Һәгәр изьна һьнәкед дьн һәйә кʼаре жь ԝә бьбиньн, нә йа мә һе зедә һәйә? Ле мә әв изьн пек нәани. Сәрда жи ль һәр тьшти сәбьр кьр, кӧ нәбьнә пешибьрʼе Мьзгинийа Мәсиһ. Һун ньзаньн әԝед кӧ пʼарьстгәһеда дьхәбьтьн жь пʼарьстгәһе жи дьхԝьн? У әԝед хьзмәткʼарийа горигәһе дькьн, жь горигәһе жи пʼара хԝә дьстиньн. Ӧса жи Хӧдан әʼмьр кьр, кӧ йед Мьзгинийе даннасин дькьн, жь Мьзгинийе бьжин. Ле мьн жь ван изьна ԛәт йәк пек нәани, нә жи ньһа дьньвисьм кӧ ван изьна пек биньм. Дә бьра әз бьмьрьм, нә кӧ йәк рʼуспитийа мьн бәтал кә. Бәле әз нькарьм пʼәйа бьдьмә хԝә һәгәр әз Мьзгинийе даннасин кьм, чьмки әв дәйне стуйе мьн ә. Ԝәй ль мьн һәгәр әз Мьзгинийе даннасин нәкьм! У һәгәр мьн әв йәка бь һʼәмде хԝә бькьра, һьнге хәлата мьне һәбуйа, ле әз ве йәке нә бь һʼәмде хԝә дькьм, чьмки әва ԛӧльхәк ә ль мьн һатийә спартьне. Аԝа иди чь йә хәлата мьн? Әв ә, кӧ әз даннасинийа хԝәда Мьзгинийе бе һәԛ бьдьм, изьна хԝә Мьзгинидайинеда бь зора хԝә пек нәйньм. Рʼаст ә әз жь һәр кәси аза мә, ле әз диса хԝә дькьмә хӧламе һʼәмуйа, ԝәки һе гәләка ԛазьнщ кьм. Бона щьһуйа, дьбьмә мина щьһуйа, ԝәки щьһуйа ԛазьнщ кьм. Аԝа готи бона йед бьн Ԛануна Мусада, дьбьмә мина йед бьн Ԛануне, ԝәки йед бьн Ԛанунеда ԛазьнщ кьм, (ле нә кӧ әз бьн Ԛанунеда мә). Бона йед бе Ԛанун, дьбьмә мина йед бе Ԛанун, ԝәки йед бе Ԛанун жи ԛазьнщ кьм, (нә кӧ әз бе ԛануна Хԝәде мә, ле әз бьн ԛануна Мәсиһда мә). Бона сьста дьбьмә мина сьста, ԝәки йед сьст ԛазьнщ кьм. Бона һʼәмуйа әз дькʼәвьмә һʼале һәр кәси, ԝәки һәр дәрәщада бькарьбьм һьнәка хьлаз кьм. Ван һʼәму тьшта әз иди бона Мьзгинийе дькьм, ԝәки әз бьбьмә һәвал-пʼаре дӧа-дьрозгед сәр ԝе. Һун ньзаньн йед ләщмәйданеда нә, һʼәму жи дьрʼәвьн, ле тʼәне йәк хәлате дьстинә? Ӧса бьрʼәвьн, кӧ һун бьстиньн. Әԝед кӧ дькʼәвьнә ләще, хԝә һини гәләк тьшти дькьн, ԝәки ԝе кʼофийа кӧ дьчʼьлмьсә бьстиньн, ле кьрьна мә бона кʼофийа һʼәта-һʼәтайе йә. Бона ԝе йәке әз ӧса нарʼәвьм чаԝа йед бемәрәм, йан жи бь кʼӧлма һәрʼьмә бе. Ле әз зордарийе ԛальбе хԝә дькьм у ԝе зәфт дькьм, кӧ нәбә хәлԛе гази ләще кьм, ле әԝ хԝәха жь дәст мьн һәрʼә. Нахԝазьм хушк-бьрано, кӧ һун ньзаньбьн ԝәки кал-бавед мә һʼәму жи бьн сийа әʼԝрда бун у һʼәму жи Бәʼра Соррʼа дәрбаз бун. Һʼәму жи тʼәви Муса бунә йәк, әʼԝр у бәʼреда һатьнә ньхӧмандьне. Һʼәмуйа жи хут әԝ хԝарьна рʼӧһʼани хԝар у һʼәмуйа жи хут әԝ вәхԝарьна рʼӧһʼани вәхԝар, чьмки жь ԝи Ԛәйайе рʼӧһʼани вәдьхԝарьн, Йе кӧ тʼәви ԝан дьчу у әԝ Ԛәйа Мәсиһ бу. Ле Хԝәде гәләкед жь ԝан бәгәм нәкьрьн, ләма щьнйазед ԝан бәрʼийеда һәр дәра кʼәти ман. Иди әԝ тьшт бона мә бунә мәсәлед готи, ԝәки әм һавьжийа хԝә жь тьштед хьраб нәйньн, чаԝа ԝан дьлһавьжи кьр. Нә жи бьбьн пʼутпʼарьст, чаԝа жь ԝан һьнәк бун, бона кʼижана ньвисар ә: «Щьмәʼте рʼуньшт хԝар, вәхԝар у рʼабун намуса һәврʼа листьн». Әм ԛавийе нәкьн, чаԝа жь ԝан һьнәка ԛави кьр у рʼожәкеда бист се һʼәзар мәри кʼәтьн ԛьрʼ бун. Мәсиһ нәщерʼьбиньн, чаԝа жь ԝан һьнәка щерʼьбанд у бь мәʼра һатьнә ледане мьрьн. У бина хԝә тәнг нәкьн, чаԝа жь ԝан һьнәка бинтәнги кьрьн у бь дәсте мьлйакʼәте мьрьне кʼока ԝан һат. Әв һʼәму тьшт чаԝа мәсәлед готи дьһатьнә сәре ԝан, ле бона мә кӧ әм ахьрийа ван дәԝрада дьжин, чаԝа ширәт һатьнә ньвисаре. Аԝа кʼи дьфькьрә кӧ әԝ мьԛәрʼм сәкьни йә, бьра һаш жь хԝә һәбә кӧ нәкʼәвә. Щерʼьбандьнед ӧса найенә сәре ԝә, пештьри ԝан щерʼьбандьнед кӧ тенә сәре мәрьвед майин. Ле Хԝәде амьн ә, Әԝ наһелә кӧ һун жь ԛәԝата хԝә дәр бенә щерʼьбандьне. Әԝе щерʼьбандьнеда дәлиләке жи бькә, кӧ һун бькарьбьн тәйах кьн. Аԝа дәлалед мьн, жь пʼутпʼарьстийе бьрʼәвьн. Әз чаԝа тʼәви сәрԝахта хәбәр дьдьм. Һун хԝәха бьдьнә бәр һʼәсаба, әз чь дьбежьм. Әԝ кʼаса Шива Хӧдан, йа кӧ әм пе шькьрийе дьдьн, нә һәләԛәтийа хуна Мәсиһ ә? Әԝ нане кӧ әм кәрдькьн, нә һәләԛәтийа бәдәна Мәсиһ ә? Нанәк һәйә, ләма әм һʼәму жи бәдәнәк ьн, чьмки әм һʼәму жи жь ԝи нани кәрдькьн. Дина хԝә бьдьнә щьмәʼта Исраеле: Әԝед кӧ ԛӧрбана дьхԝьн, тʼәви ԝе пʼара горигәһе набьн? Бәле әз чь бежьм? Гәло пʼут жь хԝә тьштәк ә, йан ԛӧрбанед пʼутарʼа тенә дайине бәрга тьштәки дьгьрьн? На хер! Ле готьна мьн әв ә, кӧ әԝ тьштед пʼутпʼарьст дькьнә ԛӧрбан, щьнарʼа дькьн, нә кӧ Хԝәдерʼа. У әз нахԝазьм кӧ һәләԛәтийа ԝә тʼәви щьна һәбә. Һун нькарьн һьн кʼаса Хӧдан вәхԝьн, һьн жи кʼаса щьна. Һун нькарьн һьн жь сьфра Хӧдан бьхԝьн, һьн жи жь сьфра щьна. Йан әм бькьн кӧ хирәта Хӧдан ԛәбул нәкә? Чьма әм жь Ԝи ԛәԝаттьр ьн? Дьбежьн: «Һәр тьшт әʼдәт ә», бәле, ле һәр тьшт нә кʼар ә. «Һәр тьшт әʼдәт ә», ле һәр тьшт ава накә. Нәбә кӧ йәк кʼара хԝә бьгәрʼә, ле йа һәвале хԝә. Чь кӧ ԛәсабханада те фьротане бьхԝьн, пәй пьрс-пьрсийара нәкʼәвьн, бона фькаркьрьна исафе. Чаԝа ньвисар ә: «Дьнйа бь хер-хьзна хԝәва йа Хӧдан ә». Һәгәр жь нәбаԝәра йәк ԝә тʼәглиф кә у һун бьхԝазьн һәрʼьн, чь бьдьнә бәр ԝә бьхԝьн, пәй пьрс-пьрсийара нәкʼәвьн, бона фькаркьрьна исафе. (Ле һәгәр йәк ԝәрʼа бежә: «Әва ԛӧрбан ә», иди нәхԝьн бона йе кӧ һун пе һʼәсандьн у бона фькаркьрьна исафе. Готьна мьн нә бона фькара исафа ԝә йә, ле йа һәвале ԝә.) Чьма гәрәке азайийа мьн бона фькара исафа йәки майин бе ломәкʼаркьрьне? Һәгәр әз шькьрийе дьдьмә Хԝәде дьхԝьм, чьма бона ԝе йәке хәйба мьн дькьн, ԝәки әз шькьрийа хԝә Хԝәде тиньм? Аԝа һәгәр һун бьхԝьн, вәхԝьн, йан чь шьхӧли кӧ һун бькьн, һәр тьшти бона шькьрдайина Хԝәде бькьн. Нә ньг бавежьнә бәр щьһуйа, нә бәр нәщьһуйа, нә жи бәр щьвина Хԝәде, чаԝа әз жи һәр алийава ль һʼәмуйа хԝәш тем у кʼара хԝә нагәрʼьм, ле йа гәләка, ԝәки хьлаз бьн. Чʼәʼв бьдьнә мьн, чаԝа әз жи чʼәʼв дьдьмә Мәсиһ. Әз пʼәйе ԝә дьдьм, ԝәки һун һʼәму дәрәщада мьн бир тиньн у әԝ рʼаԝ-рʼьзьмед кӧ мьн данә ԝә пек тиньн. Ле әз дьхԝазьм кӧ һун заньбьн ԝәки сәре һәр мери Мәсиһ ә, сәре жьне мер ә у сәре Мәсиһ Хԝәде йә. Һәр мере кӧ сәрньхамти дӧа йан пʼехәмбәртийе дькә, әԝ сәре хԝә беһӧрмәт дькә. У һәр кʼӧлфәта кӧ сәрԛот дӧа йан пʼехәмбәртийе дькә, әԝ сәре хԝә беһӧрмәт дькә. Әԝ дьбә мина йәкә пʼорʼкӧрʼкьри. Аԝа готи, һәгәр кʼӧлфәт сәре хԝә нәньхемә, бьра пʼорʼе хԝә жи бьбьрʼә. Ле һәгәр кʼӧлфәтерʼа әʼйб ә, кӧ пʼорʼе хԝә бьбьрʼә йан бьдә бәр дузан, кӧ ӧса йә бьра сәре хԝә бьньхемә. Нә щайиз ә мер сәре хԝә бьньхемә, чьмки әԝ сурәт у рʼумәта Хԝәде йә, ле жьн рʼумәта мер ә. (Чьмки нә кӧ мер жь жьне йә, ле жьн жь мер ә у мер бона жьне нәхӧльԛи, ле жьн бона мер.) Бона ве йәке гәрәке кʼӧлфәт сәре хԝә бьньхемә, чаԝа нишана бьн һʼӧкӧмда, бона мьлйакʼәтед кӧ дьбиньн. Ле бәле йәктийа Хӧданда нә жьн бе мер дьбә, нә жи мер бе жьн. Чьмки чаԝа жьн жь мер ә, ӧса жи мер жь жьне йә, ле һʼәму жи жь Хԝәде нә. Һун хԝәха бьдьнә бәр һʼьша, гәло жь кʼӧлфәте дькʼәвә, ԝәки сәрԛот бәр Хԝәде дӧа бькә? Нә тʼәбийәт жи ԝә һин дькә, кӧ пʼорʼе дьреж рʼәԝша мер давежә? Ле рʼәԝша жьне пʼорʼе дьреж ә, чьмки әԝ пʼорʼ жерʼа бона ньхамтьне һатийә дайине. Ле һәгәр йәк бьхԝазә ве йәкерʼа бькʼәвә дәʼԝе, әʼдәтәки мәйи дьн тʼӧнә у нә жи йе щьвинед Хԝәде. Ле ве тʼәмийеда әз пʼәйе ԝә надьм, чьмки гава һун дьщьвьн, әԝ набә кʼара ԝә, ле зийана ԝә. Бәри һәр тьшти, әз дьбьһем, гава кӧ һун дьщьвьнә щьвине, нава ԝәда дьбә дӧтирәти у кем-зедә әз баԝәр дькьм. Бәле, әʼсәйи дӧтирәти ԝе бькʼәвә нава ԝә, ԝәки йед нава ԝәдайә жьбарә кʼьфш бьн. Аԝа һун кӧ дьщьвьнә щики, әва набә шива Хӧдан кӧ һун дьхԝьн, чьмки гава һәр йәк жь ԝә дьхԝә, һʼәщә-һʼәща ԝи йә сәр шиве дькʼәвә. Йәк бьрʼчи дьминә у йе дьн кʼефхԝәш дьбә. Чьма малед ԝә тʼӧнәнә, кӧ һун ԝанда бьхԝьн у вәхԝьн? Йан чьма щьвина Хԝәде беһӧрмәт дькьн у дәсттәнга дьдьнә шәрме? Әз чь ԝәрʼа бежьм? Пʼәйе ԝә бьдьм бона ве йәке? Әз ве йәке нькарьм! Мьн әв йәк жь Хӧдан станд у да ԝә, кӧ Хӧдан Иса ԝе шәва кӧ һатә нәмамкьрьне, нан һьлда шькьри да, кәркьр у гот: «Әва бәдәна Мьн ә бона ԝә. Ве йәке бона биранина Мьн бькьн». Ӧса жи кʼас пәй шиверʼа һьлда у гот: «Әва кʼаса пәймана ну йә, пе хуна Мьн гьредайи. Ве йәке бона биранина Мьн бькьн, чь щар гава һун же вәхԝьн». Һәр щар, гава һун ви нани бьхԝьн у жь ве кʼасе вәхԝьн, мьрьна Хӧдан бькьнә дәнги, һʼәта һатьна Ԝи. Аԝа кʼи бь нәлайиԛи нане Хӧдан бьхԝә йан кʼаса Ԝи вәхԝә, ԝе дәйндаре бәдән у хуна Ԝи бә. Ләма бьра мәрьв пешийе дьле хԝә бьньһерʼә у паше жь ԝи нани бьхԝә у жь ԝе кʼасе вәхԝә. Чьмки кʼи бьхԝә у вәхԝә у фәʼмина бәдәна Хӧдан ньзаньбә, әԝ диԝана хԝә дьхԝә у вәдьхԝә. Ләма жи нава ԝәда гәләк нәхԝәш у хԝәйизәдә һәнә у һьнәк жи мьрьнә. Ле һәгәр мә диԝана хԝә бькьра, диԝана мәйе нәһата кьрьне, ле гава диԝана мә бьбә, әм жь Хӧдан тенә ширәткьрьне, ԝәки диԝана мә тʼәви дьнйайе нәбә. Аԝа хушк-бьрайед мьн, гава бона шива Хӧдан бьщьвьн, һивийа һәвдӧ бьсәкьньн. Ле һәгәр йәк бьрʼчи йә, бьра мала хԝәда бьхԝә, кӧ нәбә, гава һун бьщьвьн, диԝане сәр хԝәда биньн. Бона пьрсед майин, гава бем әзе һьнге сафи кьм. Ле ньһа чь жь пʼешкʼешед Рʼӧһʼани дькʼәвә хушк-бьрано, әз нахԝазьм кӧ һун нәзан бьн. Ԝәва әʼйан ә гава һун пʼутпʼарьст бун, һун ӧса пәй пʼутед кәрʼә лал кʼәтьбун, һәр алийава кʼәтьбунә бьн ԛолед ԝан. Бона ве йәке жи әз ԝәрʼа дьбежьм, тʼӧ кәс тʼӧнә кӧ бь рʼебәрийа Рʼӧһʼе Хԝәде хәбәр дә у бежә: «Бьра ньфьрʼ ль Иса бә». У кәсәк жи нькарә бежә: «Иса Хӧдан ә», һәгәр нә бь рʼебәрийа Рʼӧһʼе Пироз. Аԝа щурʼә-щурʼә пʼешкʼешед Рʼӧһʼани һәнә, ле хут дайина ԝи Рʼӧһʼи нә, щурʼә-щурʼә ԛӧльх жи һәнә, ле һәма ԝи Хӧданирʼа ԛӧльх дькьн, ӧса жи щурʼә-щурʼә карин һәнә, ле хут әԝ Хԝәде йә, кӧ ван дайинада карине дьдә һәр кәси. Ле һәр кәсирʼа Рʼӧһʼ бона кʼара һʼәмуйа хӧйа дьбә. Йәкирʼа жь Рʼӧһʼ хәбәра сәрԝахтийе те дайине, йәкирʼа хәбәра занәбуне хут жь ԝи Рʼӧһʼи, йәки дьнрʼа баԝәри хут жь ԝи Рʼӧһʼи, йәки дьнрʼа пʼешкʼешед нәхԝәшԛәнщкьрьне хут жь ԝи Рʼӧһʼи, йәки дьнрʼа ԛәԝат, ԝәки кʼәрәмәта бькә, йәки дьнрʼа пʼехәмбәрти, йәки дьнрʼа фәʼмина кӧ рʼӧһʼа жь һәв дәрхә, йәки дьнрʼа зьманед хәриб, йәкирʼа жи шьровәкьрьна ԝан зьмана. Әв һʼәму жи хут Хԝәха әԝ Рʼӧһʼ дькә у һәр кәсирʼа башԛә-башԛә пʼарәвәдькә, чаԝа кӧ дьхԝазә. Чаԝа бәдән йәк ә у гәләк әндәмед ԝе һәнә, ле диса әԝ һʼәму һәврʼа бәдәнәк ьн, ӧса жи Мәсиһ ә. Рʼаст ӧса жи йәктийа Рʼӧһʼәкида әм һʼәму һатьнә ньхӧмандьне, кӧ бьбьнә бәдәнәк, һьн щьһу һьн нәщьһу, һьн хӧлам һьн аза у әм һʼәму жи жь ԝи Рʼӧһʼи данә вәхԝарьне. Бәле бәдән нә тʼәне әндәмәк ә, ле жь гәләка йә. Һәгәр ньг бежә: «Әз нә жь бәдәне мә, чьмки әз нә дәст ьм», гәло әва мәʼни йә, кӧ әԝ нә жь бәдәне йә? У һәгәр гӧһ бежә: «Әз нә жь бәдәне мә, чьмки әз нә чʼәʼв ьм», гәло әва мәʼни йә, кӧ әԝ нә жь бәдәне йә? Һәгәр тʼәмамийа бәдәне чʼәʼв буйа, ле бьһистьне ль кʼӧ буйа? Һәгәр һʼәму бәдән гӧһ буйа, бинһьлдане ль кӧ буйа? Ле рʼаст Хԝәде әԝ әндәм йәко-йәко бәдәнәкеда щи кьрьн, чаԝа Ԝи хԝәст. Һәгәр һʼәму әндәмәк буна, бәдәне ль кӧ буйа? Ле рʼаст ньһа әндәм гәләк ьн, ле бәдән йәк ә. Чʼәʼв нькарә бежә дәст: «Тӧ кери мьн найейи!» У нә жи сәри ньгарʼа дькарә бежә: «Һун кери мьн найен!» Ле сәрда әԝ әндәмед бәдәнейә кӧ сьст кʼьфш дьбьн, әԝ һе фәрз ьн у әԝ әндәмед бәдәнейә беԛәдьр тенә һʼәсабе, әм һе ԛәдьре ԝан заньн у йед әʼйбә нава ԝеда, әм һе бь тʼәрбәт дьньхемьн, ле әндәмед мәйә беәʼйб нә һʼәԝще ԝе йәке нә. Ле Хԝәде бәдән һәвва кьр, кӧ йе беԛәдьр һе ԛәдьр бьстинә, ԝәки дӧтирәти нәкʼәвә нава бәдәне, ле һʼәму әндәм жь һәвдӧрʼа шәԝат бьн. Ләма, гава әндәмәк еше дькʼьшинә, һʼәму әндәм һәврʼа дешьн, ле гава әндәмәк те пәсьндайине, һʼәму әндәм тʼәви ԝе ша дьбьн. Аԝа һун бәдәна Мәсиһ ьн у һәр йәк жь ԝә әндәмәки бәдәна Ԝи йә. У Хԝәде пешийе һьнәк щьвинеда кьрьнә шанди, йа дӧда пʼехәмбәр, йа сьсийа дәрсдар, паше йед кʼәрәмәткьр, пәйрʼа йед хԝәйийе пʼешкʼешед нәхԝәшԛәнщкьрьне, кʼомәкдарийе, сәʼвитийе у йед зьманед хәриб. Чьма һʼәму шанди нә? Чьма һʼәму пʼехәмбәр ьн? Чьма һʼәму дәрсдар ьн? Чьма һʼәму кʼәрәмәта дькьн? Чьма һʼәму хԝәйийе пʼешкʼешед нәхԝәшԛәнщкьрьне нә? Чьма һʼәму бь зьманед хәриб хәбәр дьдьн? Чьма һʼәму зьмана шьровәдькьн? Дә һун һʼәйра пʼешкʼешед һе мәзьнда бьн. Ле әзе рʼекә һәрә ԛәнщ жи нишани ԝә кьм. Һәгәр әз бь зьманед мәрьва йан мьлйакʼәта хәбәр дьм, ле дьле мьнда һʼьзкьрьн тʼӧнәбә, әзе бьбьмә мина ԝи зәнгьле кӧ дькә зьнгин йан жи болмед сьфрә кӧ дькьнә шьнгин. Һәгәр пʼешкʼеша пʼехәмбәртийе мьнрʼа һәбә у сәр һʼәму сӧрʼа вәбьм, һʼәму занәбуне фәʼм бькьм у һәгәр баԝәрийа мьн жи һаԛас һәбә, һʼәта чʼийа жи жь щи бьгӧһезьм, ле һʼьзкьрьн дьле мьнда тʼӧнәбә, әз нә тʼӧ тьшт ьм. У һәгәр һәбука хԝә пева бәлайи бәләнгаза кьм у бәдәна хԝә жи бьдьмә дәр бона шәԝьтандьне, ле һʼьзкьрьн дьле мьнда тʼӧнәбә, тʼӧ кʼар нагьһижә мьн. Һʼьзкьрьн думькдьреж у ширьн ә, һʼьзкьрьн һʼәвсудийе накә, һʼьзкьрьн кʼӧбар набә, пʼьшька хԝәда наԝәрьмә, бепʼәргал нинә, йа хԝә нагәрʼә, зу һерс накʼәвә, кʼине нажо, дьле хԝә ль нәһәԛийе ша накә, ле рʼастийерʼа ша дьбә. Һʼьзкьрьн һәр гав дадьхә, һәр гав баԝәр дькә, һәр гав хԝәйигӧман ә, һәр гав сәбьр дькә. Һʼьзкьрьн тʼӧ щар кʼӧта набә. Һәгәр пʼехәмбәрти һәбьн, ԝе бәтал бьн, һәгәр зьманед хәриб һәбьн, ԝе дәнгед ԝан бенә бьрʼине, һәгәр занәбун һәбә, ԝе дәрбаз бә һәрʼә. Бәле әм жь пʼьрʼи-һьндьки заньн у жь пʼьрʼи-һьндьки пʼехәмбәртийе дькьн. Ле гава кʼамьлти бе, һьнге нәкʼамьлти ԝе дәрбаз бә һәрʼә. Гава әз зарʼ бум, мьн мина зарʼа хәбәр дьда, мина зарʼа дьфькьрим, мина зарʼа дьда бәр һʼәсеб. Гава әз мәзьн бум, әԝ тьштед зарʼотийе мьн жь хԝә дур хьстьн. Ньһа әм чаԝа ԛәрәтʼуки нәйнькеда дьбиньн, ле һьнге әме рʼу бь рʼу бьбиньн. Ньһа әз жь пʼьрʼи-һьндьки заньм, ле һьнге әзе тʼам нас бькьм, чаԝа әз һатьмә наскьрьне. Аԝа ньһа әв һәрсек дьминьн: Баԝәри, гӧман у һʼьзкьрьн. Ле һʼьзкьрьн сәр ԝанрʼа йә. Дәмана һʼьзкьрьнеда бьн у һʼәйра пʼешкʼешед рʼӧһʼанида бьн, илаһи пʼехәмбәртикьрьне. Әԝе кӧ бь зьмане хәриб хәбәр дьдә, әԝ нә кӧ мерьврʼа хәбәр дьдә, ле Хԝәдерʼа, чьмки кәсәк Ԝи фәʼм накә. Әԝ бь ԛәԝата Рʼӧһʼ сӧрʼа дьбежә. Ле бәле йе кӧ пʼехәмбәртийе дькә, әԝ мерьврʼа хәбәр дьдә, баԝәрийа ԝан ава дькә, дьл дьдә бәр ԝан у бәр дьле ԝанда те. Әԝе кӧ бь зьманед хәриб хәбәр дьдә, тʼәне баԝәрийа хԝә ава дькә, ле әԝе кӧ пʼехәмбәртийе дькә, щьвине пева ава дькә. Әз дьхԝазьм кӧ һун һʼәму жи бь зьманед хәриб хәбәр дьн, ле әз һе дьхԝазьм кӧ һун пʼехәмбәртийе бькьн, чьмки йе пʼехәмбәртийе дькә, жь йед бь зьманед хәриб хәбәр дьдә четьр ә, пештьри ԝи ԝәхте кӧ те шьровәкьрьне, ԝәки щьвин бе авакьрьне. Аԝа хушк-бьрано, һәгәр әз бемә щәм ԝә бь зьманед хәриб хәбәр дьм, әзе чь кʼаре бьдьмә ԝә? Тʼӧ кʼаре надьм һәгәр әз әʼйантийе, йан занәбуне, йан пʼехәмбәртийе, йан һинкьрьне ԝәрʼа нәйньм? Һащәтед нәбинбәрә кӧ дәнг дәрдьхьн, әм бежьн бьлур бә, йан чәнг, һәгәр дәнге ԝан нәзәлал бә, ԝе чаԝа заньбьн чь мьԛам те лехьстьне? Йан жи, һәгәр борʼи дәнгәки нәнас дәрхә, кʼе ԝе кʼаре хԝә ль шерʼ бькә? Ӧса жи һун, һәгәр бь зьмен хәбәрәкә фәʼмдари нәбежьн, ԝе чаԝа бьзаньбьн һун чь дьбежьн? Хәбәрдана ԝәйе мина байе сар бә. Кʼьфш ә кӧ дьнйайеда чьԛас щурʼә-щурʼә зьман һәнә, ле жь ԝан йәк жи бе фәʼмин нинә. Ле, һәгәр әз зьманәки фәʼм накьм, әз бона йе ԝи зьмани хәбәр дьдә хәриб ьм у йе хәбәр дьдә жи бона мьн хәриб ә. Ӧса жи һун кӧ һʼәйра пʼешкʼешед рʼӧһʼанида нә, нава ԝан пʼешкʼешада һе пешда һәрʼьн, кʼижан щьвине ава дькьн. Бона ве йәке әԝе кӧ бь зьманед хәриб хәбәр дьдә, бьра дӧа бькә кӧ шьровәкә жи. Чьмки гава әз бь зьманед хәриб дӧа дькьм, әԝ рʼӧһʼе мьн дӧа дькә, ле һʼьше мьнда тьшт рʼунани. Әз чь бькьм? Әзе һьн бь рʼӧһʼе хԝә дӧа бькьм, һьн жи бь һʼьше хԝә, һьн бь рʼӧһʼе хԝә бьстьрем, һьн жи бь һʼьше хԝә. Һәгәр тӧ бь рʼӧһʼе хԝә шькьрийе бьди, әԝе кӧ мина нәзана сәкьни йә, ԝе чаԝа рʼазидарийа тәрʼа ԛайл бә бежә: «Амин»? Әԝ ԛәт фәʼм накә жи, тӧ чь дьбежи. Бәле тӧ рʼьнд рʼазибуне дьди, ле баԝәрийа йе дьн найе авакьрьне. Әз жь Хԝәдейе хԝә рʼази мә, кӧ жь ԝә һʼәмуйа зәʼфтьр бь зьманед хәриб хәбәр дьдьм. Ле бәле щьвинеда әз һе дьхԝазьм пенщ хәбәред фәʼмдари бежьм, ԝәки һьнәкед дьн жи һин бькьм, нә кӧ бь һʼәзара хәбәред хәриб. Хушк-бьрано, һʼьше хԝәда зарʼ нибьн! Һьндава хьрабийеда мина зарʼа бьн, ле һʼьше хԝәда гьһишти бьн. Ԛанунеда ньвисар ә: «Әзе бь мәрьвед хԝәйе зьманед хәриб у заред хәриба ве щьмәʼтерʼа хәбәр дьм, ле бәле ԝе һьнге жи гӧһдарийа Мьн нәкьн, Хӧдан дьбежә». Аԝа пʼешкʼеша зьманед хәриб нишанәк ә, нә кӧ бона баԝәрмәнда, ле бона нәбаԝәра у пʼехәмбәрти жи нә кӧ бона нәбаԝәра йә, ле бона баԝәрмәнда. Һәгәр тʼәмамийа щьвине пева бьщьвә у һʼәму жи зьманед хәриб хәбәр дьн, һьнге һьнәкә нәзан йан нәбаԝәр бькʼәвьнә һьндӧрʼ, ԝе нәбежьн: «Әвана дин бунә»? Ле һәгәр һʼәму жи пʼехәмбәртийе бькьн, һьнге йәки нәбаԝәр йан нәзан бькʼәвә һьндӧрʼ, ԝе жь һʼәму готьнед ԝан хԝә мӧкӧрʼ бе у бе гӧнәкʼаркьрьне, сӧрʼед дьле ԝида жи ԝе бенә әʼйанкьрьне у дәвәрʼу ль бәр Хԝәде бькʼәвә, ԝи бьһʼәбинә у дәнг һьлдә бежә: «Рʼасти жи Хԝәде нав ԝәда йә!» Әм иди чаԝа бькьн гәли хушк-бьра? Гава һун дьщьвьнә щики, һәр кәсе жь ԝә чи ԝи һәбә, һәгәр кʼӧлам бә, һинкьрьн бә, әʼйанти бә, хәбәрдана зьманед хәриб бә, шьровәкьрьна зьманед хәриб бә, бьра һʼәму жи бона авабуна щьвине бьн. Һәгәр йәк бь зьмане хәриб хәбәр дьдә, бьра дӧдӧ бьн, йан йа лапә зәʼф сьсе, ле бьра йәк пәй йәкирʼа хәбәр дә у йәк жи шьровәкә. Ле һәгәр кәсәк тʼӧнә кӧ шьровәкә, бьра әԝ щьвинеда дәнге хԝә нәкә, тʼәне бәр хԝәда Хԝәдерʼа хәбәр дә. У жь пʼехәмбәра жи бьра дӧдӧ бьн, йан йа лапә зәʼф сьсе хәбәр дьн у йед дьн бьра әʼнәнә кьн. Ле һәгәр ль бәр йәки жь нава рʼуньштийа жи тьштәк вәбә, иди бьра йе пешьн дәнге хԝә бьбьрʼә. Чьмки һун һʼәму жи, йәк пәй йәкирʼа дькарьн пʼехәмбәртийе бькьн, ԝәки һʼәму жи һин бьн у һʼәму жи дьл бьстиньн. У рʼӧһʼед пʼехәмбәра бьн сәʼвитийа пʼехәмбәрада нә, чьмки Хԝәде нә Хԝәдейе бепʼәргалийе йә, ле Йе әʼдьлайийе йә. Чаԝа нава һʼәму щьвинед щьмәʼта Хԝәдеда, бьра жьнед ԝә щьвинеда хԝә кәрʼ кьн, чьмки изьна ԝан тʼӧнә хәбәр дьн, ле бьра гӧһдар бьн, чаԝа Ԛанун жи дьбежә. Ле һәгәр әԝ тьштәки дьхԝазьн бьзаньбьн, бьра ль мале жь меред хԝә бьпьрсьн, чьмки нә щайиз ә кӧ жьн щьвинеда хәбәр дә. Тʼӧ хәбәра Хԝәде жь ԝә дәркʼәт? Йан тʼәне гьһиштә ԝә? Һәгәр йәк дьфькьрә, кӧ хԝәха пʼехәмбәр ә йан рʼӧһʼани йә, бьра заньбә чь кӧ мьн ԝәрʼа ньвисин, тʼәмийа Хӧдан ә. Ле һәгәр йәк гӧһ надә ван тьшта, һун жи гӧһ нәдьнә ԝи. Аԝа хушк-бьрано, һʼәйра пʼехәмбәртикьрьнеда бьн у дәнге йед бь зьманед хәриб хәбәр дьдьн нәдьнә бьрʼине. Тʼәне һәр тьшт бьра бь тʼәрбәт, щи бь щи у маԛули бә. Әз ԝе Мьзгинийе дьхԝазьм биньмә бира ԝә хушк-бьрано, йа кӧ мьн ԝәрʼа даннасин кьр у ԝә ԛәбул кьр, сәр ԝе жи сәкьнинә. Бь ԝе жи һун хьлаз дьбьн, һәгәр ԝе хәбәре, йа кӧ мьн ԝәрʼа даннасин кьр, ԛәԝин бьгьрьн. Һәгәр на, баԝәрийа ԝәйе бадиһәԝа бә. Мьн әв йәка сәр һәр тьштирʼа, чаԝа станд, ӧса жи да ԝә, кӧ Мәсиһ бона гӧнед мә мьр, ль гора ньвисара у һатә дәфьнкьрьне, рʼожа сьсийа Әԝ Хԝәдеда жь мьрьне рʼабу ль гора ньвисара, Пәтрусва хӧйа бу, пәйрʼа һәр донздәһ шандийава. Паше щарәкерʼа пенсьд хушк-бьрайи зедәтьрва хӧйа бу, жь ԝан гәләк һʼәта ньһа сах ьн, ле һьнәк жи мьрьнә. Паше Аԛубва хӧйа бу, пәйрʼа һʼәму шандийава. Ахьрийе, пәй һʼәмуйарʼа мьнва хӧйа бу, чаԝа йәки нә сәре хԝә жь дийа хԝә буйи. Чьмки әз жь шандийа йе һәри паш ьм, кӧ нә лайиԛ ьм шанди жи бемә готьне, чьмки мьн щьвина Хԝәде зеранд. Ле әз бь кʼәрәма Хԝәде мә чь жи һәмә у кʼәрәма Ԝи кӧ бь мьнрʼа йә, бош-бәтал нибу. Ле сәрда әз жь ԝан һʼәму шандийа зәʼфтьр хәбьтим у нә кӧ әз бум, ле кʼәрәма Хԝәдейә кӧ бь мьнрʼа йә. Аԝа һәгәр әз бьм, йан әԝ бьн, әм һʼәму жи аһа даннасин дькьн у ԝә аһа жи баԝәр кьрийә. Аԝа һәгәр әм даннасин дькьн, кӧ Мәсиһ жь мьрьне рʼабуйә, чаԝа жь ԝә һьнәк дьбежьн, кӧ рʼабуна мьрийа тʼӧнә? Һәгәр рʼабуна мьрийа тʼӧнә, кӧ ӧса йә Мәсиһ жи жь мьрьне рʼанәбуйә. У һәгәр Мәсиһ жь мьрьне рʼанәбуйә, кӧ ӧса йә даннасинийа мә жи бош-бәтал ә у баԝәрийа ԝә жи бош-бәтал ә. У әме жи бьбьнә шәʼдед Хԝәдейә дәрәԝ, чьмки мә бона Хԝәде шәʼдәти да, кӧ Әԝи Мәсиһ жь мьрьне рʼакьр, ле һәгәр мьрийе рʼанәбьн, кӧ ӧса йә Әԝ жи жь мьрьне рʼанәкьрийә. Чьмки һәгәр мьрийе рʼанәбьн, кӧ ӧса йә Мәсиһ жи жь мьрьне рʼанәбуйә. У һәгәр Мәсиһ жь мьрьне рʼанәбуйә, ԝәки ӧса йә баԝәрийа ԝә бадиһәԝа йә, һәла һе һунә нава гӧнед хԝәда нә у әԝед баԝәрийа Мәсиһда жи мьрьнә ӧнда бунә. Һәгәр тʼәне әм бона ве жийине гӧмана хԝә Мәсиһ тиньн, кӧ ӧса йә әм жь һʼәму мәрьва мәʼрьмтьр ьн. Ле рʼаст Мәсиһ жь мьрьне рʼабуйә, чаԝа бәре дәрәмәта пешьн жь нава мьрийа рʼабуйи. Мьрьн рʼуйе мәрьвәкида бу, бь мәрьвәки жи ԝе рʼабуна мьрийа бьбә. Чаԝа һʼәмуйед жь Адәм буйи дьмьрьн, ӧса жи һʼәмуйед жь Мәсиһ буйи ԝе сах бьн. Ле һәр кәс дора хԝәда: Пешийе Мәсиһ чаԝа бәре дәрәмәта пешьн, паше йед пʼара Мәсиһ, ԝәхте һатьна Ԝида. Һьнге ахьри ԝе бе, гава кʼока һәр сәрԝертийе, һʼӧкӧмәтийе у ԛәԝате бинә у пʼадшатийе бьдә дәсте Бав Хԝәде. Чьмки Әԝ гәрәке пʼадшатийе бькә, һʼәта кӧ Хԝәде һʼәму дьжмьна бькә бьне пʼийед Ԝи. Дьжмьне хьлазийе кӧ ԝе кʼоке ле бинә, мьрьн хԝәха йә, чьмки ньвисар дьбежә: «Хԝәде һәр тьшт бьне пʼийада ельми Ԝи кьр». Ле гава те готьне «һәр тьшт» ельми Ԝи кьр, фәʼмдари йә, пештьри Ԝи Хԝәдейи, Йе кӧ һәр тьшт ельми Ԝи кьр. У гава һәр тьшт ельми Ԝи бьн, һьнге Кӧрʼ Хԝәха жи ԝе ельми Ԝи Хԝәдейи бә, Йе кӧ һәр тьшт ельми Ԝи кьр, ԝәки һәр тьштида Әԝ бьбә Хԝәдейе һәр тьшти. Ԝәки дьн готи, әԝед кӧ бона мьрийа тенә ньхӧмандьне ԝе чь бькьн? Һәгәр мьрийе тʼӧ щар рʼанәбьн, иди чьма бона мьрийа тенә ньхӧмандьне? Чьма әм жи һәр гав хԝә давежьнә сәр села сор? Әԝ фьрʼнаԛбуна мьн шәʼдә йә, хушк-бьрано, йа кӧ әз пе ԝә фьрʼнаԛ дьбьм йәктийа Мәсиһ Исайе Хӧдане мәда, әз һәр рʼож дәст жь әʼмьре хԝә дькʼьшиньм. Һәгәр мьн Әфәседа шәрʼе хԝә дәрәща мәрьвайеда тʼәви «сәʼва» кьр, чь кʼәтә кʼисе мьн? Һәгәр рʼабуна мьрийа ԝе тʼӧнәбә, дә иди «әм бьхԝьн-вәхԝьн, чьмки әме сьбе бьмьрьн», чаԝа һьнәк дьбежьн. Нәхапьн! «Һәвалтийа хьраб мәрьве хԝәйипʼәргал хьраб дькә». Рʼаст бьфькьрьн, сәр һʼьше хԝәда ԝәрьн, иди гӧна нәкьн, чьмки һьнәк жь ԝә һе Хԝәде нас накьн, әз ве йәке дьбежьм, кӧ һун шәрм бькьн. Ле бәле йәке бежә: «Мьри чаԝа дькарьн рʼабьн у ԛальбе ԝане чаԝа бә?» Сәре аԛьл! Әԝ тʼохьме кӧ тӧ дьчини, һʼәта «нәмьрә» жийинерʼа шин набә. У әԝ тьште кӧ тӧ дьчини, нә кӧ ԝи ԛальби дьчини, кʼижан кӧ ԝе бьгьһижә, ле һʼәбәкә садә йә, мәсәлә гәньм, йан жи жь тʼохьмед майин. У Хԝәде ԛальб дьдә ԝи тʼохьми, чаԝа кӧ дьхԝазә у һәр тʼохьмәк ԛальбе хԝә дьстинә. Һʼәму ԛальб хун-гоштәк ниньн, ԛальбе мерьв башԛә йә у ԛальбе һʼәйԝен башԛә, йе тәйрәда башԛә йә, йе мәʼсийа жи башԛә. Ԛальбед ль әʼзмен жи һәнә, ԛальбед ль дьне жи һәнә, ле рʼәԝша йед әʼзмен башԛә йә у йед дьне башԛә. Рʼәԝша тәʼве башԛә йә, рʼәԝша һиве башԛә у рʼәԝша стәйрка жи башԛә йә у һәр стәйркәк бь рʼәԝша хԝә жь һәв тенә фьрԛикьрьне. Бь ви аԝайи жи рʼабуна мьрийа йә: Ԛальбе дерьс те чандьне, йе нәдерьс ԝе рʼабә. Әԝ берʼәԝш те чандьне, бь рʼәԝше ԝе рʼабә, әԝ бетʼаԛәтийе те чандьне, бь ԛәԝате ԝе рʼабә. Ԛальбе бинбәр те чандьне у ԛальбе рʼӧһʼани ԝе рʼабә. Чаԝа кӧ ԛальбе бинбәр һәйә, ӧса жи ԛальбе рʼӧһʼани һәйә. Аһа жи ньвисар ә: «Мәрьве пешьн Адәм, бу бинбәрәки сах», ле Адәме пашьн бу рʼӧһʼәки жийиндайине. Ле бәле пешийе йе рʼӧһʼани нәбу, ле йе бинбәр, паше йе рʼӧһʼани. Мәрьве пешьн жь хԝәлийа әʼрде бу, мәрьве дӧда жь әʼзмен бу. Чаԝа йе жь хԝәлийе бу, ӧса жи йед жь хԝәлийе нә, чаԝа йе жь әʼзмен ә, ӧса жи йед жь әʼзмен ьн. У мә чаԝа кьрасе йе жь хԝәлийе ль хԝә кьрийә, әме ӧса жи кьрасе йе жь әʼзмен ль хԝә кьн. Готьна мьн әв ә хушк-бьрано, ԝәки хун у гошт ль Пʼадшатийа Хԝәде нькарьн ԝар бьн, нә жи дерьсбун ԝе ль нәдерьсбуне ԝар бә. Кʼа бьбьһен, әз сӧрʼәке ԝәрʼа бежьм: Әм һʼәмуйе нәмьрьн, ле әм һʼәмуйе жи бенә гӧһастьне, ньшкева, чаԝа чʼәʼве хԝә бьгьри-вәки, дәма борʼийа ахьрийе бе ледане. Чьмки гава борʼи бе ледане, мьри ԝе нәдерьсбуйи рʼабьн, әме жи бенә гӧһастьне. Чьмки гәрәке әви дерьс нәдерьсийе ль хԝә ԝәргьрә у әви мьри нәмьрийе ль хԝә ԝәргьрә. Ле гава әви дерьс нәдерьсийе ль хԝә ԝәргьрә у әви мьри нәмьрийе ль хԝә ԝәргьрә, һьнге әԝ готьне бе сери, кӧ ньвисар ә: «Сәркʼәтьне мьрьн һʼуфи хԝә кьр». «Мьрьн, кʼане ԛиле жәʼра тә? Мьрьн, кʼане сәркʼәтьна тә?» Ԛиле мьрьне гӧнә йә у ԛәԝата гӧна жь Ԛануне йә. Ле шькьр жь Хԝәде, кӧ әм бь дәсте Хӧдане мә Иса Мәсиһ сәр хьстьн. Аԝа хушк-бьрайед мьнә дәлал, ԛәԝин бьминьн, жь щийе хԝә нәһʼәжьн, һәр гав шьхӧле Хӧданда пешда һәрʼьн, бьзаньбьн хәбата ԝә бош-бәтал нинә ль бәр Хӧдан. Ле ньһа дәрһәԛа кʼомәктʼопкьрьна бона щьмәʼта Хԝәде, мьн чаԝа тʼәми да щьвинед Галатйайе, һун жи ӧса бькьн: Һәр йәкшәм, дәсте жь ԝә һәр кәсива чьԛас те, бьра тьштәки дәсте хԝәрʼа паш хә, нәбә кӧ гава әз бем, һьнге бе тʼопкьрьне. У гава әз бем, һун жи рʼе кʼижанарʼа дьбиньн, әзе пе дәсте ԝан, бь ньвисар пʼешкʼешед ԝә бьшиньмә Оршәлиме. У һәгәр мьнрʼа жи бькʼәвә, кӧ әз һәрʼьм, иди әԝе тʼәви мьн бен. Пәй чуйина ԛәза Мәкәдонйайерʼа, әзе сәрики ль ԝә хьм, чьмки әзе Мәкәдонйайерʼа дәрбаз бьм. Дьбә кӧ ль щәм ԝә бьминьм, йан жи зьвьстана хԝә ԝьр дәрбаз кьм у һьнге һун дькарьн мьн вәрʼекьн, әз кʼӧда кӧ һәрʼьм. Чьмки әз ньһа нахԝазьм кӧ ԝә сәр рʼийа хԝә бьбиньм һәрʼьм, ле әз гӧман ьм кӧ хеләке щәм ԝә бьминьм, һәгәр Хӧдан һʼьз бькә. Ле ньһа әзе һʼәта Рʼожа Пенщийә һʼәсаб, ль Әфәсе бьминьм, чьмки дәргәһәки херейи мәзьн ль бәр мьн вәбуйә у пәйкʼәтийед мьн гәләк ьн. Һәгәр Тимотʼейо бе щәм ԝә, ӧса бькьн кӧ әԝ жь ԝә вәнәкʼьшә, чьмки әԝ жи бона Хӧдан дьхәбьтә, чаԝа әз. Ӧса бьра тӧ кәс ԝи беԛәдьр нәкә. Ԝи бь хер-сьламәт вәрʼекьн, ԝәки бе щәм мьн, чьмки әз һивийа ԝи у бьрайед тʼәви ԝи мә. Ле дәрһәԛа Аполойе бьрада, мьн гәләки лава же кьр, кӧ тʼәви бьра сәр ԝәда бьһата, ле нета ԝи һатьне ньһа ԛәт тʼӧнәбу, ле ԝе бе, гава мәщал бькʼәве. Һʼьшйар бьминьн, баԝәрийеда һʼимгьрти бьн, әʼгит бьн, бьшьдьн, бьра һәр кьрьнед ԝә бь һʼьзкьрьне бьн. Ньһа һун заньн кӧ Стефанас мала хԝәва баԝәрмәндед ԛәза Ахайайейә пешьн ә у ԝан хԝә данә хьзмәткʼарийа щьмәʼта Хԝәде. Иди әз һиви жь ԝә дькьм хушк-бьрано, кӧ һун гӧрʼа йед ӧсада бьн, ӧса жи гӧрʼа ԝан һʼәмуйада, йед кӧ тʼәви шьхӧле ве хәбате дьбьн. Әз бона һатьна Стефанас, Фортунато у Ахайико ша мә, баре дьле мьнда ԝана дәԝса ԝә гьрт, бь ԝе йәке дьле мьн у ԝә жи рʼьһʼәт кьрьн. Ԛәдьре йед ӧса бьгьрьн. Щьвинед ԛәза Асйайеда ль ԝә сьлав дькьн. Акила у Прьскила тʼәви щьвина мала хԝәда гәләки йәктийа Хӧданда ль ԝә сьлав дькьн. Һʼәму хушк-бьрайед вьр ль ԝә сьлав дькьн. Бь рʼамусана шире һʼәлал ль һәвдӧ сьлав кьн. Әв сьлав, бь дәстньвисара мьн Паԝлос ә. Һәгәр йәк Хӧдан һʼьз накә, бьра ньфьрʼ ль ԝи бә. «Маранатʼа ». Кʼәрәма Хӧдан Иса ль ԝә бә. Әз ԝә пʼара Мәсиһ Иса кʼәтийа һʼьз дькьм. Жь Паԝлосе бь әʼмьре Хԝәде шандийе Мәсиһ Иса у Тимотʼейойе бьрайе мә, щьвина Хԝәдейә Корьнтʼерʼа у ԝе тʼәмамийа щьмәʼта Хԝәдерʼа, йа кӧ тʼәвайийа ԛәза Ахайайеда йә: Дә бьра кʼәрәм у әʼдьлайийа Баве мә Хԝәде у Хӧдан Иса Мәсиһ ль ԝә бә. Шькьр Хԝәдейе Баве Хӧдане мә Иса Мәсиһрʼа, Баве дьлшәԝатийе у Хԝәдейе һʼәму бәрдьлийе. Әԝ нава һʼәму тәʼли-тәнгийада дьл дьдә бәр мә, ԝәки әм жи бькарьбьн дьл бьдьнә бәр ԝан, йед кӧ нава һәр щурʼә тәʼли-тәнгийада нә, бь ԝе бәрдьлийе, пе кʼижане әм хԝәха жь Хԝәде тенә бәрдьликьрьне. Бәле чаԝа әм тʼәви ԝан щәфайед Мәсиһә гәләк дьбьн, ӧса жи гәләки бь дәсте Мәсиһ бәр дьле мәда те һатьне. Һәгәр әм тәʼли-тәнгийада нә, әԝ бона бәрдьли у хьлазбуна ԝә йә у һәгәр әм бәрдьликьри нә, әԝ бона ԝе бәрдьлийа ԝә йә, кӧ һун бькарьбьн бь сәбьре ԝан тәʼли-тәнгийа бькʼьшиньн, кʼижана әм жи дькʼьшиньн. У әм ԝәда әʼсәйи гӧман ьн, чьмки әм заньн кӧ һун чаԝа тʼәви щәфайед мә нә, ӧса жи тʼәви бәрдьлийа мә нә. Әм нахԝазьн кӧ һун һаш жь ԝан тәʼли-тәнгийа тʼӧнәбьн хушк-бьрано, йед кӧ мә ԛәза Асйайеда кʼьшандьн. Әм жь ԛәԝата хԝә дәр һаԛаси кʼәтьнә бьн баред гьран, һʼәта кӧ мә дәсте хԝә жь әʼмьре хԝә жи кʼьшанд. Бәле мә хԝәрʼа ԛьрара мьрьне һʼәсаб кьр, ле әв йәк бу ԝәки әм гӧмана хԝә нәдьнә сәр хԝә, ле сәр Хԝәде, Йе кӧ мьрийа жь горʼа рʼадькә. Жь дәсте ԝе мьрьна тьрс у хоф Әԝи әм хьлаз кьрьн у ԝе хьлаз кә жи. У гӧмана мә һәйә кӧ ԝе диса мә хьлаз кә, бь аликʼарийа ԝан дӧайед кӧ һун бона мә дькьн. Бь ви аԝайи бь сайа дӧайед гәләка кʼәрәм ԝе мәрʼа бе дайине у гәләке бона мә шькьрийе бьдьнә Хԝәде. Рʼуспитийа мә әв ә: Исафа мә шәʼдәтийе дьдә, ԝәки мә бь дьле сах у вәкьри жь Хԝәдеда ль ве дьне әʼмьре хԝә дәрбаз кьр, илаһи һьндава ԝәда, нә кӧ бь сәрԝахтийа мәрьвайийе, ле бь кʼәрәма Хԝәде. Әм тьштәки дьн ԝәрʼа наньвисьн, пештьри ԝан тьштед кӧ һун дькарьн бьхуньн у фәʼм бькьн у әз гӧман ьм кӧ һуне тʼам фәʼм бькьн, чаԝа жь пʼьрʼи-һьндьки ԝә әм фәʼм кьрьнә, ԝәки һун бьгьһижьнә ԝе фәʼмине кӧ әм рʼуспитийа ԝә нә, чаԝа һун жи йа мә нә, Рʼожа һатьна Хӧдан Иса. Мьн бь ве гӧмане шеԝьра хԝә кьр, пешийе бьһатама щәм ԝә, кӧ ԝә дӧ щара кʼәрәм бьстанда, аԝа готи сәрик бьда ԝә, жь щәм ԝә бьчума Мәкәдонйайе у жь Мәкәдонйайе жи диса сәр ԝәда вәгәрʼийама, кӧ ԝә жи әз ль алийе Щьһустанеда вәрʼекьрама. Гава әз аһа дьшеԝьрим, гәло мьн сьвькайи кьр? Йан шеԝьра хԝәда мина бәнде ве дьнйайе шеԝьрим, кӧ «Бәле» у «На»-йа мьн сьбәһ-евар нәбә йәк? Ле Хԝәде шәʼдә йә, кӧ созе мә ԝәрʼа нәбуйә «Бәле» у паше «На». Чьмки Кӧрʼе Хԝәде, Иса Мәсиһ кӧ пе мә ԝәрʼа һатә даннасинкьрьне, (бь мьн, Силас у Тимотʼейо), «Бәле» у «На» нәбу, ле нава Ԝида тʼьме «Бәле» йә. Чьмки һʼәму созед Хԝәде бь Иса Мәсиһ «Бәле» нә, ләма жи әм бь Ԝи «Амин» дьбежьн, бона рʼумәта Хԝәде. У Хԝәде йә, йе кӧ әм ԝәва тʼәвайи йәктийа Мәсиһда һʼимгьрти кьрьн. Хут Ԝи әм кʼьфш кьрьн у мора Хԝә дани сәр мә, Рʼӧһʼе Пироз кьрә дьле мә чаԝа бьһе жь бәр созе Хԝәва. Ле сәр мьнрʼа Хԝәде шәʼдә йә, кӧ мьн ԛемиши ԝә нәкьр, кӧ нәһатьмә Корьнтʼе. Әм һʼӧкӧми сәр баԝәрийа ԝә накьн, чьмки һун баԝәрийеда шьдийайи нә, ле әм тʼәви ԝә дьхәбьтьн бона шабуна ԝә. Аԝа мьн хԝәха хԝәрʼа ԛьрар кьр кӧ диса нәйем дьле ԝә бешиньм. Чьмки һәгәр әз дьле ԝә бешиньм, иди кʼе ԝе дьле мьн ша кә, пештьри әԝед кӧ мьн дьле ԝан ешандьнә? Мьн әԝ йәк нәʼма хԝәда ньвисибу, кӧ нәбә гава әз бем, йед кӧ гәрәке мьн ша кьн, әԝ дьле мьн бешиньн. Чьмки әз ԝә һʼәмуйада гӧман ьм, кӧ шабуна мьн шабуна ԝә һʼәмуйа йә. Мьн бь гәләк һесьра, бь гәләк кʼәдәр у кʼәсәра дьле хԝә ԝәрʼа ньвиси, ԝәки һун нә кӧ ль бәр хԝә кʼәвьн, ле ԝәки ԝе кʼурайийа һʼьзкьрьна мьнә һьндава хԝәда фәʼм бькьн. Аԝа һәгәр йәки дьлеши кьр, нә кӧ тʼәне дьле мьн ешанд, ле йе һьнәка жи, ԝәки гәләки зедә нәкьм, нәбежьм йе ԝә һʼәмуйа жи. Әԝ щәза бәси ԝи мәрьви йә, кӧ жь ԝә гәләка ԝирʼа һатийә дайине. Ле ньһа һун гәрәке бьбахшиньнә ԝи у ль бәр дьле ԝида бен, ԝәки кʼәрби бәрхԝәкʼәтьне хԝә ӧнда нәкә. Аԝа әз һиви жь ԝә дькьм, һʼьзкьрьна хԝә һьндава ԝида мак кьн. Һәма бона ԝе йәке жи мьн ньвисийә, ԝәки ԝә бьщерʼьбиньм бьзаньбьм кʼа һун һәр тьштида гӧһдар ьн. Һәгәр һун тьштәки дьбахшиньнә йәки, әз жи тʼәви ԝә мә. У һәгәр тьштәки бахшандьне һәбә, бона ԝә ль бәр диндара Мәсиһ дьбахшиньм, ԝәки мирещьн пьште ль мә нәшкенә, чьмки әм һаш жь һʼӧнӧред ԝи һәнә. Гава әз бона Мьзгинидайина Мәсиһ гьһиштьмә Тройайе, мьн дит кӧ Хӧдан дәрик ль бәр мьн вәкьрийә. Ле дьле мьн нә рʼьһʼәт бу, чьмки мьн бьре хԝә Тито ль ԝьр нәдит. Һьнге мьн хатьре хԝә жь ԝан хԝәст, чумә ԛәза Мәкәдонйайе. Ле шькьр жь Хԝәде, кӧ тʼьме мә пʼега кʼома Мәсиһә сәркʼәтьнеда пешда дьбә у бина наскьрьна хԝә бь мә һәр дәра бәла дькә. Чьмки әм бина Мәсиһә хԝәш ьн ль бәр Хԝәде, һьн нава хьлазбуйийада, һьн нава ӧндабуйийада. Бона һьнәка әм бина мьрьне нә, кӧ ԝан бәрбь мьрьне дьбә у бона һьнәка жи бина жийине, кӧ ԝан бәрбь жийине дьбә. У кʼи дькарә ви бари һьлдә? Әм нә мина һьнәка нә, йед кӧ хәбәра Хԝәде кʼара хԝәва гьредьдьн, ле бәле әм чаԝа мәрьвнә жь Хԝәдеда шанди, ль бәр Хԝәде бь һәләԛәтийа Мәсиһ пе сьтԛе дьле рʼаст хәбәр дьдьн. Гәло әм диса вәдьгәрʼьн, хԝәха пәсьне хԝә бьдьн? Йан мина һьнәка мәрʼа лазьм ә әм шәʼдәнәʼма сәр ԝәда бьшиньн, йан жь ԝә бьстиньн? Нә һун ьн шәʼдәнәʼмед мә дьле мәда ньвисар, алийе һәр мәрьвида наскьри у хԝәнди? Кʼьфш ә кӧ һун нәʼма Мәсиһ ьн бь хьзмәткʼарийа мә ньвисар, нә кӧ бь һʼӧбьре, ле бь Рʼӧһʼе Хԝәдейе сах, нә кӧ сәр сәлед кәвьри, ле сәр тʼәхтед дьле хун у гошт. Әм ве йәке Хԝәдеда гӧман ьн бь сайа Мәсиһ. Нә кӧ әм жь хԝә һʼәсаб дькьн кӧ әм лайиԛи ве кьрьне нә, ле карина мә жь Хԝәде йә. Әԝи әԝ карин да мә, ԝәки әм бьбьнә ԛӧльхкʼаред пәймана ну, нә кӧ йе ньвисаре, ле йе Рʼӧһʼ, чьмки ԛануна ньвисар дькӧжә, ле Рʼӧһʼ дьдә жийине. Аԝа һәгәр әԝ ԛӧльхе кӧ сәр кәвьра бь һʼәрфа кʼолайи бу у ахьрийе мьрьне пешда тинә һаԛас хԝәйирʼумәт бу, ԝәки зарʼед Исраел нькарьбун рʼуйе Муса бьньһерʼийана, жь дәст ԝе шәԝԛа рʼуйе ԝийи кӧ диса ԝе дәрбаз буйа бьчуйа, ле бәле ԛӧльхе Рʼӧһʼ ԝе һе чьԛас хԝәйирʼумәт бә? Чьмки һәгәр әԝ ԛӧльхе кӧ ахьрийе диԝан сәр мәрьвада дани, һаԛас хԝәйирʼумәт бу, һе чьԛас зедә ԝе хԝәйирʼумәт бә әԝ ԛӧльхе кӧ мәрьв пе бесущ дьбьн. Бәле йе кӧ хԝәйирʼумәт бу, әԝ берʼумәт дәркʼәт жь бәр ԝе рʼумәта кӧ сәр ԝерʼа бу. Һәгәр ԛӧльхе кӧ ԝе дәрбаз бьбуйа бьчуйа хԝәйирʼумәт бу, иди йе кӧ ԝе бьминә, һе чьԛас хԝәйирʼумәт ә! Аԝа әм хԝәйе ве гӧмане нә, ләма хәбәрдана хԝәда меркʼими нә. Әм нә мина Муса нә, чаԝа ԝи хели авитьбу сәр рʼуйе хԝә, ԝәки зарʼед Исраел һʼәта хьлазийе әԝ рʼумәта ԝе дәрбаз буйа нәдитана. Бәле әԝ сәԝдайе хԝәда фәʼмәкори бун у һʼәта иро жи гава пәймана кәвьн дьхуньн, хут әԝ хели сәр фәʼме ԝан дьминә. Әԝ һьнге те һьлдане, гава әԝ дьбьнә пʼара Мәсиһ. Бәле һʼәта иро жи, гава Ԛануна Муса дьхуньн, хели сәр фәʼме ԝан дьминә, ле гава йәк ль Хӧдан вәгәрʼә, һьнге «әԝ хели те һьлдане». У әԝ Хӧдан Рʼӧһʼ ә у Рʼӧһʼе Хӧдан ль кʼӧ дәре бә, ль ԝе дәре жи азайи һәйә. Аԝа әм һʼәму жи рʼуки бехеликьри мина нәйньке шәԝԛа рʼумәта Хӧдан вәдьгәрʼиньн у әм бь дәрәщед рʼумәт бь рʼумәте тенә гӧһастьне, дьбьнә хут әԝ сурәте Ԝи, әв йәк бь аликʼарийа Хӧдан ә, кӧ хԝәха Рʼӧһʼ ә. Бона ве йәке әм жь ви ԛӧльхи вәнакʼьшьн, йа кӧ мә бь рʼәʼма Хԝәде стандийә. Ле бәле әм жь тьштед әʼйбә дьзива дур ьн у фелбазийа накьн, хәбәра Хԝәдеда ԛәлпийе накьн. Ле сәрда әм рʼастийе әʼйан дькьн у бь ви аԝайи хԝә дийари исафа һәр мәрьви дькьн ль бәр Хԝәде. Ле һәгәр әв Мьзгинийа кӧ әм дьдьн вәшарти йә жи, әԝ ль бәр ӧндабуйийа вәшарти йә. Мире ве дьнйайейи нәһәԛ шәвәрʼәша кора анийә сәр фәʼме нәбаԝәра, ԝәки рʼонайа Мьзгинийа рʼумәта Мәсиһ нәдә сәр ԝан, Йе кӧ сурәте Хԝәде йә. Әм нә кӧ хԝә даннасин дькьн, ле Иса Мәсиһ чаԝа Хӧдан у хԝә жи чаԝа хӧламед ԝә, бона Иса. Ԝи Хԝәдейе кӧ гот: «Бьра жь тәʼрийе рʼонайи дәре», Ԝи хԝәха дьле мәда шәԝԛ да, ԝәки әм рʼумәта Хԝәде нас кьн, бь ԝе шәԝԛа кӧ жь рʼуйе Мәсиһ дәрте. Ле әв хьзнә нава мә дәрданед һʼәрʼида һәйә, ԝәки бе кʼьфше кӧ зорайийа ԛәԝате жь Хԝәде йә, нә кӧ жь мә. Әм һәр алийава тәʼли-тәнгийада нә, ле нав дәст-пʼийе тәнгасийада начьн, дәрәще бегӧманда нә, ле бегӧман ниньн, хԝәйинәйар ьн, ле нә бейар ьн, ледайи-кʼәти нә, ле нә ӧндабуйи нә. Һәр гав әм мьрьна Иса бәдәнед хԝәда дьбьн, ԝәки жийина Иса жи бәдәна мәда кʼьфш бә. Чьмки әмә кӧ сах ьн, бона Иса мьрьнерʼа тенә дайине, ԝәки жийина Иса жи ԛальбе мәйи мьрида кʼьфш бә. Аԝа мьрьн нава мәда йа хԝә дькә, ле жийин нава ԝәда. Чаԝа ньвисар ә: «Мьн баԝәр кьр, ләма хәбәр да». Хут бь ԝи рʼӧһʼе баԝәрийе әм жи баԝәр дькьн у ләма хәбәр дьдьн. Әм заньн Әԝе кӧ Хӧдан Иса жь мьрьне рʼакьр, ԝе мә жи тʼәви Иса жь мьрьне рʼакә у мә тʼәви ԝә бәр хԝә бьдә сәкьнандьне. Бәле әв һʼәму бона ԝә йә, кӧ гава кʼәрәм һе сәр гәләкада бьрʼьжә, шькьрдарийа рʼумәта Хԝәде жи һе зедә бә. Ләма әм жь ве йәке вәнакʼьшьн. Бәле әм жь дәрвава дерьс дьбьн дьчьн, ле дьлда рʼож бь рʼож нуйәжийин дьбьн. Чьмки щәфед мәйә дәм-дәмә сьвьк мә дькьнә хԝәйийе рʼумәта гьранә һʼәта-һʼәтайейә бе һьмбәр. Аԝа әм дина хԝә надьнә тьштед хӧйа дьбьн, ле йед нәхӧйа, чьмки тьштед хӧйа бона ԝәхтәки нә, ле йед нәхӧйа һʼәта-һʼәтайи нә. Чьмки әм заньн, һәгәр ԛальбе мәйи ахин мина коне фьрари хьраб бә, маләкә мәйә һʼәта-һʼәтайе ль әʼзмана һәйә, йа кӧ бе дәст жь Хԝәдеда чекьри йә. У бәле әм ви конида дьнәʼльн, һʼәйра ԝе йәкеда нә, кӧ мала хԝәйә әʼзмани ль хԝә ԝәргьрьн, ԝәки, гава әм ԝе хԝә ԝәргьрьн, бе сьтʼар кʼьфш нәбьн. Бәле һʼәта кӧ әм ви конида дьминьн, бьн баре гьранда дьнәʼльн, нә кӧ әм дьхԝазьн ви жь хԝә бехьн, ле йа әʼзмани сәр хԝә ԝәргьрьн, ԝәки йе хԝәйимьрьн ԝе жийинеда бәтавәбә һәрә. Хԝәде Хԝәха әм ве йәкерʼа һазьр кьрьнә у Рʼӧһʼе Хԝә чаԝа бьһе жь бәр созе Хԝәва да мә. Аԝа әм һәр гав ве йәкеда әʼсәйи гӧман ьн. Әм заньн һʼәта әм ви ԛальбида дьминьн жь Хӧдан дур ьн, чьмки әм бь баԝәрийе дьжин, нә кӧ бь дитьна чʼәʼва. У гӧмана мәйә әʼсәйи һәйә у һе дьхԝазьн жь ви ԛальби дәрен ль щәм Хӧдан бьһеԝьрьн. Бона ве йәке әм дьщәʼдиньн, кӧ һәгәр әм бьминьн йан дәрен, тʼәне ль Ԝи хԝәш бен. Чьмки гәрәке әм һʼәму жи ль бәр диԝана Мәсиһ бьсәкьньн, ԝәки һәр кәс ԝәкә ԝан әʼмәлед ԛальбе хԝәда кьри бьстинә, чь кӧ кьрьбә, ԛәнщи йан хьраби. Аԝа әм кӧ һаш жь хофа Хӧдан һәнә, дькьн кӧ мәрьва биньнә рʼайе. У әм Хԝәдева жи әʼйан ьн, гӧман һәйә, кӧ әм исафа ԝәва жи әʼйан ьн. Нә кӧ әм бәр ԝә диса пәсьне хԝә дьдьн, ле мәщале дьдьнә ԝә, кӧ һун бь мә бьфьрʼьн, ԝәки тьштәки ԝәйи готьне ԝанрʼа һәбә, йед кӧ бь дитьна чʼәʼва дьфьрʼьн, нә кӧ бь йа дьлада. Һәгәр мә һʼьше хԝә ӧнда кьрийә, әԝ бона Хԝәде йә, ле һәгәр әм сәр һʼьше хԝә нә, әԝ бона ԝә йә. Һʼьзкьрьна Мәсиһә һьндава мәда пʼейи сәр мә дькә, чьмки әм фәʼм дькьн, кӧ йәк бона һʼәмуйа мьрийә, кӧ ӧса йә һʼәму жи мьрьнә. Мәсиһ бона һʼәмуйа мьр, ԝәки әԝед сах бона хԝә сах нибьн, ле бона Ԝи, Йе кӧ бона ԝан мьр у жь мьрьне рʼабу. Чь ль мә дькʼәвә, әм иди ньһа кәсәки бь тьһәре мәрьвайи наньһерʼьн. Рʼаст ә ԝәхтәке мә бь тьһәре мәрьвайи Мәсиһ ньһерʼи, ле ньһа иди әм ӧса наньһерʼьн. Аԝа һәгәр йәк йәктийа Мәсиһда йә, әԝ әʼфьринәки ну йә, тьштед кәвьн дәрбаз бун чун у ва йед ну һатьн. Әв һәр тьшт жь Хԝәдеда нә, кӧ әм бь Мәсиһ тʼәви Хԝә ль һәв анин у ԛӧльхе льһәванине да мә. Аԝа готи Хԝәде бь Мәсиһ дьнйа тʼәви Хԝә ль һәв ани, нәһәԛийед ԝан ԝанрʼа нәһәԛи һʼәсаб нәкьрьн у готьна льһәванине спартә мә. Аԝа әм жь алийе Мәсиһда ԛасьдийе дькьн, чаԝа кӧ Хԝәде бь мә һиви жь ԝә дькә: Әм алийе Мәсиһда рʼәща жь ԝә дькьн, тʼәви Хԝәде ль һәв ԝәрьн! Әԝи кӧ һәләԛәтийа Ԝи тʼәви гӧна тʼӧнәбу, Хԝәде Әԝ бона мә кьрә һәвал-пʼаре гӧна, ԝәки әм йәктийа Ԝида бьбьнә һәвал-пʼаред рʼастийа Хԝәде. Әм жи чаԝа һәвал-хәбатед Хԝәде иди һиви жь ԝә дькьн, йед кӧ кʼәрәма Хԝәде стандьнә, нәһельн кӧ әԝ кʼәрәм бефәйдә бә. Чьмки Хԝәде дьбежә: «Дәма рʼәʼм-кʼәрәме Мьн дәнге тә бьһист у рʼожа хьлазбунеда һатьмә һәԝара тә». Ва ньһа йә дәма рʼәʼм-кʼәрәме! Ва ньһа йә рʼожа хьлазбуне! Әм дькьн тʼӧ тьштида нәбьнә байисе кʼәтьна тʼӧ кәси, ԝәки ԛӧльхе мә нәйе ломәкʼаркьрьне. Ле һәр тьштида әм хԝә бь сәбьра хԝәйә мәзьн дьдьнә кʼьфше, чаԝа ԛӧльхкʼаред Хԝәде: Тәʼли-тәнгийада, һесири-бәләнгазийа у дәрд-кӧлада, леданада, кәлада у һәр алийава һʼьщумкьри, кʼәсьри, бехәԝ, бьрʼчи, бь ньхта һʼәлал, бь занәбуне, бь дьле фьрә, бь ширьнайийе, бь Рʼӧһʼе Пироз у бь һʼьзкьрьна беһʼьләкʼари, бь готьна рʼастийе у ԛәԝата Хԝәде. Әм бь дәсте чʼәп у рʼасте жи рʼастһʼәсабунева сильһʼкьри нә, һӧрмәте у беһӧрмәтийеда, ԛәдьр у рʼәзилийеда. Мә һʼәсаб дькьн чаԝа йед дәрәԝин, ле әм сәр рʼастийе нә, мә һʼәсаб дькьн чаԝа йед нәнас, ле йед бь нав у дәнг ьн, чаԝа йед мьри, ле ва йә әмә сах ьн, чаԝа щәза станди, ле нәкӧшти нә, әм чаԝа йед зәлулийеда нә, ле әм һәр тʼьм ша нә, чаԝа йед бәләнгаз, ле әм гәләка дәԝләти дькьн, чаԝа кʼьфш дьбә йане тьштәки мә тʼӧнә, ле һәр тьштед мә һәнә. Мә вәкьри ԝәрʼа хәбәр дайә гәли корьнтʼийа, дьле мә жи һьндава ԝәда фьрә йә. Һун жь алийе мәда бинтәнг набьн, ле һун бина хԝә ль хԝә тәнг дькьн. Әз чаԝа тʼәви зарʼед хԝә хәбәр дьдьм, һун жи ԝәкә ԝе йәке ль мә вәгәрʼиньн у дьле хԝә мәрʼа вәкьн. Тʼәви нәбаԝәра нәкʼәвьнә бьне нирәки. Чь кʼаре һәԛийе тʼәви нәһәԛийе һәйә? Йан чь һәләԛәтийа рʼонайе тʼәви тәʼрийе? У чь тʼьфаԛийа Мәсиһ тʼәви щьн һәйә? Йан чь пʼар нава баԝәрмәнда у нәбаԝәрада һәйә? Йан жи чь һәвалтийа пʼарьстгәһа Хԝәде тʼәви йа пʼута һәйә? Чьмки әм пʼарьстгәһа Хԝәдейе сах ьн! Чаԝа Хԝәде гот: «Әзе нава ԝанда бьминьм, нава ԝанда бьмәшьм, Хԝәдейе ԝан бьм у әԝе жи щьмәʼта Мьн бьн». Бона ве йәке «Хӧдан дьбежә: Дә рʼабьн жь нава ԝан дәрен, щӧдә бьн. Ль тьштед һʼәрам нәкʼәвьн, у Әзе ԝә ԛәбул кьм, Баве ԝә бьм, һуне жи кӧрʼ у ԛизед Мьн бьн, Хӧдане Һʼәму Зорайийе дьбежә ». Әм кӧ хԝәйе ван соза нә дәлално, дә әм хԝә жь һʼәму кʼьретийа ԛальб у рʼӧһʼе хԝә паԛьж кьн у бь хофа Хԝәде лап бӧһӧрти-жьбарә бьн. Мә дьле хԝәда щи кьн! Мә нәһәԛи тʼӧ кәси нәкьрийә, зийан нәдайә тʼӧ кәси у кәсәк кʼара хԝәрʼа нәдайә хәбате. Әз ве йәке набежьм кӧ ԝә нәһәԛ кьм, ле чаԝа мьн пешда готийә, һун дьле мәда нә, һәгәр әм бьмьрьн йан бьжин әм тʼәви ԝә нә. Әз гәләки ԝәда гӧман ьм, гәләки пе ԝә фьрʼнаԛ дьбьм! Нава һʼәму тәʼли-тәнгийед мәда бәрдьлийа ԝә жь сәре мьн зедәтьр ә у шабунеда кʼьм-кʼьми мә. Бәле гава әм гьһиштьнә Мәкәдонйайе, мә ԛәт рʼьһʼәти нәдит, ле мә һʼәму алийава тәʼли-тәнги кʼьшандьн, дор-бәра шәрʼ-дәʼԝ бун, дьлада жи хәм у дәрд бун. Ле Хԝәдейе кӧ бәр дьле шкәстийада те, бь һатьна Тито дьл да бәр мә у нә кӧ тʼәне пе һатьна ԝи, ле бь ԝе йәке жи, кӧ чаԝа ԝә дьл дабу бәр ԝи. Әԝи мәрʼа гьли кьр, кӧ һун чьԛаси дәмана мьнда нә, шин у гьри нә у хирәта мьн дькʼьшиньн. Бь ве йәке дьле мьн һе шабун кʼәте. Бәле һәгәр мьн пе ԝе нәʼме дьле ԝә ешанд, әз нә пʼошман ьм. Рʼаст ә әз пʼошман бум, гава мьн дит кӧ ԝе нәʼме һьнәк ԝәхт дьле ԝә ешанд. Ле ньһа әз ша мә, нә кӧ бона ԝе йәке кӧ һун бәр хԝә кʼәтьнә, ле чьмки һун бона тʼобәкьрьне бәр хԝә кʼәтьн. Һун ль гора хԝәстьна Хԝәде бәр хԝә кʼәтьн, ӧса кӧ ԝә тʼӧ зийан жь мә нәдит. Бәрхԝәкʼәтьна ль гора хԝәстьна Хԝәде мерьв бәрбь тʼобәйийе дьбә кӧ хьлаз кә у пʼошмани теда тʼӧнә, ле бәрхԝәкʼәтьна жь ве дьнйайе бәрбь мьрьне дьбә. Дә дина хԝә бьдьнә ԝе бәрхԝәкʼәтьна ль гора хԝәстьна Хԝәде кӧ чьԛас кʼар да ԝә: Ԝә чаԝа щәʼданд бь рʼуспити щаба хԝә да! Чь һерс, чь хоф, чь һʼьзрәт, чь хирәт, чь щәзадайина бона нәһәԛийе! Ԝә һʼәму алийава хԝә да кʼьфше, кӧ һун ван йәкада сәр ньхта һʼәлал ьн. Аԝа әԝ нәʼма кӧ мьн ԝәрʼа ньвиси, нә бона ԝи бу, йе кӧ нәһәԛи кьр у нә бона йе һатә нәһәԛкьрьне, ле бәле ԝәки әԝ дәмана ԝәйә һьндава мәда ль бәр Хԝәде әʼйан бә. Бона ве йәке дьл һатә бәр мә. Пештьри ԝе бәрдьлһатьнеда, һе гәләки дьл һатә бәр мә бона шабуна Тито, чьмки ԝә һʼәмуйа дьле ԝи рʼьһʼәт кьрьбу. Ль бәр ԝи әз пе ԝә фьрʼнаԛ бум у әз рʼурʼәш дәрнәкʼәтьм. Ле чаԝа һәр тьште кӧ мә ԝәрʼа гот рʼаст бу, ӧса жи әԝ фьрʼнаԛийа мәйә бәр Тито рʼаст дәркʼәт. У дьле ԝи һе сәр ԝә гәрм буйә, гава бона гӧһдарийа ԝә һʼәмуйа бир тинә, кӧ ԝә чаԝа бь хоф у тьрс әԝ ԛәбул кьрийә. Әз ша мә, кӧ һәр тьштида ԝәда гӧман ьм. Ижар хушк-бьрано, әм ԝе кʼәрәма Хԝәде ԝәва дьдьнә һʼәсандьне, йа кӧ щьвинед Мәкәдонйайерʼа һатийә дайине. Нава ԝе һесири-бәләнгазийа кӧ пе һатьнә щерʼьбандьне у нава кʼәсибийа хԝәйә гьранда жи, шабуна ԝан һе зедә бу у һе хԝә данә мәрʼданийе. Әз шәʼдә мә, кӧ ԝана ԝәкә ԛәԝата хԝә у жь ԛәԝата хԝә зедәтьр жи бь рʼәзәдьли дьдан, гәләки һиви жи дькьрьн, кӧ әм ԛәдьре ԝан бьгьрьн, бьһельн кӧ әԝ тʼәви ве кʼомәкдайина бона щьмәʼта Хԝәде бьн. У нә һаԛас чьԛас кӧ гӧмана мә һәбу, ле щанийа хԝә пева пешийе данә Хӧдан у паше мә, бь әʼмьре Хԝәде. Иди һьнге мә жь Тито һиви кьр, кӧ әԝ ԝи шьхӧле ԛәнщи кӧ нава ԝәда дәстпекьр, хьлаз кә жи. Чаԝа һун һәр тьштида тʼерә-тʼьжи нә, баԝәрийе, хәбәрдане, занәбуне, тʼәмамийа хирәтеда у ԝе һʼьзкьрьна хԝәйә һьндава мәда, ӧса жи ви шьхӧле ԛәнщда тʼер-тʼьжи бьн. Әз ве хәбәрданеда әʼмьри сәр ԝә накьм, ле ԝәки һун чʼәʼв бьдьнә хирәта һьнәкед дьн бона кʼомәкдайине, дьхԝазьм ԝә бьщерʼьбиньм, кʼа һун һʼьзкьрьнеда чьԛас ширһʼәлал ьн. Чьмки һун кʼәрәма Хӧдане мә Иса Мәсиһ заньн: Рʼаст ә Әԝ йәки дәԝләти бу, ле бона ԝә кʼәсиб бу, ԝәки һун бь кʼәсиббуна Ԝи дәԝләти бьн. Әз ве йәкеда фькьра хԝә ԝәрʼа дьбежьм: Әв йәк бона кʼара ԝә йә, чьмки һе сала парва нә кӧ тʼәне ԝә пешийе дәстпекьр ԝе йәке бькьн, ле ӧса жи һун пешийе ԝе йәкерʼа рʼази бун. Дә ижар ве кьрьна хԝә биньнә сери, ԝәки рʼәзәдьлийа хԝәда чьԛас хирәт дькьн, һаԛас жи биньнә сери, ԝәкә ԛәԝата хԝә. Чьмки һәгәр һун бь рʼәзәдьли кʼомәке бьдьн, әԝ ԝәкә ԝе йәке ԛәбул ә, чьԛас дәсте кʼева те, ле нә ԝәкә ԝе йәке, кӧ дестда тʼӧнә. Әз нә кӧ фьреԛәтийа һьнәка дьхԝазьм у тәнгасийа ԝә, ле ԝәки һәр тьшт ԝәкә һәв бә. Ньһа зедәйа ԝә дькарә кемасийа ԝан тʼьжи кә у рʼожәке жи зедәйа ԝане кемасийа ԝә тʼьжи кә. Бь ви аԝайи ԝе ԝәкә һәв дәре, чаԝа ньвисар ә: «Кʼе гәләк тʼоп кьр, зедә нәбу у кʼе һьндьк тʼоп кьр, кем нәбу». Шькьр жь Хԝәде кӧ әԝ хирәт да Тито жи, кӧ али ԝә бькә. Әԝ нә кӧ тʼәне һивикьрьна мәрʼа рʼази бу, ле хирәта ԝи жи ԛәбул нәкьр, хԝәст бь рʼәзәдьли бе щәм ԝә. Тʼәви ԝи әм ԝи бьрайи дьшиньн, йе кӧ һʼәму щьвинада бона Мьзгинидайине пәсьне ԝи дьдьн у нә кӧ тʼәне һаԛас, ле ӧса жи жь алийе щьвинада һатә бьжартьне, кӧ бьбә һәвале ԝе рʼеԝитийа кӧ әм кʼомәкдайинерʼа ԛӧльх дькьн, бона рʼумәта Хӧдан у ԝәки әм дьлхԝәстьна хԝә жи ве йәкеда бьдьнә кʼьфше. Әм һʼәвза хԝә жь ве йәке жи дькьн, кӧ нәбә йәк ви ԛӧльхе мәйи мәрʼддайинеда мә ломәкʼар кә. Чьмки әм дькьн рʼаст дәрен, нә кӧ тʼәне ль бәр Хӧдан, ле ль бәр мәрьва жи. Әм тʼәви ԝан һәр дӧ бьра, бьраки хԝәйи дьн жи дьшиньн, йе кӧ мә гәләк тьштида әԝ щерʼьбандийә у тʼьме жи хирәткʼеш дитийә у ньһа жи һе хирәткʼеш ә һьндава ԝәда, чьмки әԝ гәләки ԝәда гӧман ә. Һәгәр пьрс бе сәр Тито, әԝ һәвал у хәбаткʼаре тʼәви мьн ә бона ԝә. Ле һәгәр бе сәр ԝан һәр дӧ бьрайед мә, әԝана жь алийе щьвинеда шанди нә, бона рʼумәта Мәсиһ дьхәбьтьн. Аԝа һʼьзкьрьна хԝә у әԝ пәсьне кӧ мә бона ԝә дайә, ԝанрʼа бьдьнә избаткьрьне, ԝәки һʼәму щьвин ԝе йәке бьбиньн. Дәрһәԛа кʼомәкдайина щьмәʼта Хԝәдеда әв тьштәки зедә йә, кӧ әз ԝәрʼа бьньвисьм. Чьмки әз ԝе рʼәзәдьлийа ԝә заньм у нава мәкәдонийада пе ԝә фьрʼнаԛ дьбьм дьбежьм, кӧ ԝә баԝәрмәндед ԛәза Ахайайе һе сала парва кʼаре хԝә кʼомәкдайине кьрийә у әв хирәткʼешийа ԝә, гәләк жь нав ԝанда ләԛандьнә. У әз жи ԝан бьрайед хԝә дьшиньм, ԝәки фьрʼнаԛийа мьнә һьндава ԝәда, ԝе йәкеда бәтал дәрнәйе, ле һун ӧса һазьр бьн, чаԝа мьн ԝанрʼа готийә, кӧ нәбә һәгәр мәкәдони тʼәви мьн бен у бьбиньн һун нә һазьр ьн, әм шәрми бьн (нахԝазьм бежьм һун жи) ԝе гӧманеда, йа кӧ әм ԝәда гӧман бун. Ләма жи мьн рʼе терʼа дит, һиви жь бьра кьр, кӧ бәри мьн бенә щәм ԝә у тʼьвдарәке ԝе пʼешкʼеша гӧмрә, йа кӧ ԝә соз дабу бьбиньн. Һьнге әԝе бь рʼәзәдьлийе һазьр бә, нә кӧ бь дәсте зоре. Ве йәке бир нәкьн: Йе дәст дьдә бәр чандьне, ԝе һьндьки жи бьдьру, ле йе дәст надә бәр чандьне, ԝе гӧмрә жи бьдьру. Дьле һәр кәсирʼа чьԛас дәрбаз дьбә, бьра һаԛаси жи бьдә, нә кӧ бьдә ле дьле ԝи пәй бә йан бь борщдарийе бә, чьмки Хԝәде йе бь дьл у әшԛ дьдә һʼьз дькә. Хԝәде дькарә һʼәму алийава сәр ԝәда бьбаринә, ԝәки һәр алийада һәр гав һʼәму тьштед ԝәйә керһати һәбьн у зедә бә жи бона һәр кьрьнед ԛәнщ. Чаԝа ньвисар ә: «Ԝи гӧмрә да бәләнгаза, ԛәнщикьрьна Ԝи һʼәта-һʼәтайе дьминә». Әԝе кӧ тʼохьм дьдә тʼохьмрʼәш у нан жи бона хԝарьне, ԝе тʼохьм пʼешкʼеши ԝә кә у зедә кә, бәред ԛәнщикьрьна ԝә жи бьгьһинә. Һуне һәр тьштива дәԝләти бьн, ԝәки һәр алийава мәрʼд бьн у әԝ ԛәнщийед һун бь дәсте мә дькьн, бьбьнә мәʼни кӧ шькьрийе бьдьнә Хԝәде. У гава һун ви ԛӧльхи дькьн, нә кӧ тʼәне кемасийа щьмәʼта Хԝәде тʼьжи дькьн, ле әв йәк дькә кӧ Хԝәдерʼа һе шькьрдайин зедә бә. Әв кьрьна ԝә рʼастийа баԝәрийа ԝә избат дькә, бь ви аԝайи шькьрийа хԝә Хԝәде тиньн бона гӧһдарикьрьна Мьзгинийа Мәсиһә кӧ һун иԛрар дькьн у бона ԝе мәрʼданийа ԝә, кӧ һун аликʼарийа ԝан у һʼәмуйа дькьн. У әԝе бона ԝә дӧа бькьн, һʼәйра ԝәда бьн, бона ԝе кʼәрәма Хԝәдейә сәр кʼәрәма, йа кӧ ԝәрʼа һатийә дайине. Шькьр жь Хԝәде бона ԝе дайина ԝийә кӧ найе готьн! Әз, Паԝлос хԝәха һиви жь ԝә дькьм, бь мьлукти у ширьнайийа Мәсиһ, чаԝа те готьне кӧ әз рʼу бь рʼу нава ԝәда мина бәрхәки мә, ле дурва һьндава ԝәда мина шерәки мә. Әз рʼәща дькьм, ӧса нәкьн кӧ гава бем жи бьбьмә шер, чьмки әз әʼсәйи заньм кӧ әз дькарьм тӧрӧш кьм һьндава ԝанда жи һʼьшк бьм, йед кӧ бона мә ӧса дьфькьрьн, йанчийә әм бь мәрьвайи дькьн. Бәле рʼаст ә әм мәрьв ьн, ле бь мәрьвайи әскәрийе накьн. Чʼәкед әскәрийа мә, нә йе мәрьвайи нә, ле йед ԛәԝатә жь Хԝәде нә, бона ԝеранкьрьна тʼәʼбийа. Әм ԝан шеԝьра у һʼәму бьльндщийед кʼӧбарийейә мьԛабьли занәбуна Хԝәде бәтал дькьн у һʼәму фькьра дькьнә һесир, ельми Мәсиһ дькьн. Әм һазьр ьн щәза бьдьнә һʼәму нәгӧһдара, гава гӧһдарийа ԝә тʼам бә. Һун рʼәнг-рʼуйа дьньһерʼьн. Кʼи хԝәда гӧман ә, кӧ әԝ пʼара Мәсиһ ә? Бьра ве жи бьфькьрә, кӧ чаԝа әԝ пʼара Мәсиһ ә, ӧса жи әм ьн. Чьмки һәгәр әз һьнәки жи зедә дьфьрʼьм, бона ԝе һʼӧкӧмдарийа кӧ Хӧдан да мә, тьштәки шәрмийе теда тʼӧнә, әԝ бона авабуна баԝәрийа ԝә йә, нә кӧ хьраббуне. Аԝа әз дькьм кӧ ӧса кʼьфш нәбә, йане әз бь нәʼмәйед хԝә ԝә дьтьрсиньм. Чаԝа һьнәк дьбежьн: «Нәʼмәйед ԝи һʼьшк ьн у бь ԛәԝат ьн, ле әԝ диндара хԝәва бәләнгазәк ә у хәбәрданеда жи йәки пенәбуйи йә». Йед ӧса бьра фәʼм бькьн, әм дурва бь хәбәр у нәʼмәйед хԝәва чаԝа нә, незик кьред хԝәда жи ӧса нә. Рʼаст әм нәԝерьн, хԝә сәр мезине бькʼьшиньн у һьмбәри ԝан кьн, йед кӧ хԝәха пәсьне хԝә дьдьн. Әԝана надьнә бәр һʼьше хԝә, гава нава хԝәда хԝә пе һәв чап дькьн у хԝә дьдьнә бәр һәв. Ле чь жь пʼәйдайина мә дькʼәвә, әм ньге хԝә жь бәрʼа хԝә дьрежтьр накьн, ле ԝәкә ԝи синоре дайи, чьԛас Хԝәде кьрә пʼара мә, кӧ дьгьһижә һʼәта щәм ԝә. Әм жь синор дәр гавәкә хԝә навежьн, чаԝа һе нәгьһиштьбьнә щәм ԝә, чьмки гава рʼастийе кʼәвә әм бь Мьзгинидайина Мәсиһ иди гьһиштьнә һʼәта щәм ԝә. Әм жь синор дәрнайен у пе хәбата һьнәкед дьн нафьрʼьн. Ле әм ԝе гӧмане нә, кӧ баԝәрийа ԝә бьгьһижә, ԝәкә ԝе дайина кӧ мә стандийә, хәбата мә жи нава ԝәда һе зедә бәрфьрә бә. Әм дьхԝазьн кӧ жь ԝә ԝедатьр дәрбаз бьн, Мьзгинийе щийед дьн жи даннасин кьн, нә кӧ әм бь кьре йәки дьн бьфьрʼьн, йе кӧ синоре хԝәда кьрийә. Ле чаԝа ньвисар ә: «Йе кӧ дьфьрʼә, бьра пе Хӧдан бьфьрʼә». Чьмки нә кӧ әԝе пʼәйе хԝә дьдә, ль Хӧдан ԛәбул ә, ле йе кӧ Хӧдан пʼәйе ԝи дьдә. Әз дьхԝазьм кӧ һун бькарьбьн һьнәки беһʼьшийа мьн бьбьһерьн! Ле бькьн кӧ бьбьһерьн жи! Әз кʼӧмрʼәшийе ԝә дькьм, бь ԝе кʼӧмрʼәшийа Хԝәде. Чьмки мьн һун йәкирʼа, аԝа готи Мәсиһрʼа нишан кьрьн, ԝәки ԝә мина ԛизәкә бькʼьр ль бәр Ԝи бьдьмә сәкьнандьне. Ле тʼәне әз дьтьрсьм, тӧԝәрә чаԝа мәʼр бь фелбазийа хԝә Һеԝа хапанд, ӧса жи әԝ һʼьше ԝә бьчәлԛинә у һун дәсте хԝә жь ширһʼәлали у дьлсахийа хԝәйә һьндава Мәсиһда бькьн. Гава йәк те у Исаки дьн даннасин дькә, кʼижан мә даннасин нәкьрийә, йан рʼӧһʼәки дьн һун дьстиньн, кʼижан ԝә жь мә нәстандийә, йан мьзгиникә дьн дьдә, кӧ мә нәдайә ԝә, һун ван тьшта рʼьнд дьбьн. Ле бь тʼәхмина мьн әз тʼӧ тьштива жь ԝан шандийед әʼйанә һа кемтьр ниньм! Дьбә әз хәбәрданеда нә сәр хԝә мә, ле нә алийе занәбунеда. Мә әв йәк һʼәму алийава һәр тьштида нишани ԝә дайә. Гәло мьн гӧнә кьр, кӧ Мьзгинийа Хԝәде бе һәԛ да ԝә, хԝә жи бәр ԝә шкенанд, кӧ һун бьльнд бьн? Мьн щьвинед майин тʼалан кьрьн жь бәр һәԛе хԝәва, ԝәки хьзмәткʼарийе ԝәрʼа бькьм. У гава әз ль щәм ԝә бумә һʼәԝще тьштәки, мьн гьрани нәда жь ԝә тʼӧ кәси, чьмки әԝ баԝәрмәндед кӧ жь Мәкәдонйайе һатьбун, чь кемасийед мьн һәбун, ԝана дәсте хԝә дьрежи мьн кьр. Бәле мьн һәр алийава кьрийә кӧ гьранийе нәдьмә ԝә у дькьм кӧ нәдьм жи. Бь ԝе рʼастийа Мәсиһ, йа кӧ нава мьнда йә, рʼуспитийа мьн ԝе дор-бәред ԛәза Ахайайеда жи бәтал дәрнәйе. Чьма әз аһа дькьм? Әз ԝә һʼьз накьм? Ԝе йәке Хԝәде занә! У әз чаԝа дькьм, әзе ӧса жи бькьм, ԝәки рʼе нәкʼәвә ԝан, йед кӧ мәʼнийа дьгәрʼьн, ԝәки пʼәйе хԝә бьдьн, йанчийә әԝ жи мина мә дьхәбьтьн. Ле на, йед ӧса шандийед дәрәԝ ьн, пʼалед ԛәлп ьн, хԝә дькьнә дьлԛе шандийед Мәсиһә рʼаст. У әв йәк нә тьштәки әʼщебмайине йә! Мирещьн хԝәха жи хԝә дькә дьлԛе мьлйакʼәте рʼонайийе. Һьлбәт нә тьштәки мәзьн ә, кӧ хьзмәткʼаред ԝи жи бькʼәвьнә дьлԛе хьзмәткʼаред һәԛийе. Ахьрийа ԝане ԝәкә әʼмәлед ԝан бә. Диса дьбежьм, бьра тʼӧ кәс мьн беһʼьш һʼәсаб нәкә. Ле һәгәр һун дькьн жи, иди бьра мьн мина йәки беһʼьш ԛәбул кьн, кӧ әз жи һьнәки пʼәйа бемә хԝә. Чь кӧ дьбежьм, рʼаст ә ль Хӧдан хԝәш найе, ле чаԝа йәки бе һʼәмди хԝә, бәр байе наве хԝә кʼәти. Гәләк бь мәрьвайи пʼәйе хԝә дьдьн, әзе жи пʼәйа бемә хԝә. Һун мәрьвнә сәрԝахт ьн, ләма бь дьләки ша ль беһʼьша сәбьр дькьн! Бәле, һун сәбьр дькьн, гава йәк ԝә дькә хӧлам, йан һәбука ԝә дьхԝә, йан ԝә кʼара хԝәрʼа дьдә хәбате, йан сәр ԝәрʼа кʼӧбар дьбә, йан рʼуйе ԝә дьхә. Әз бь шәрмийе дьбежьм, кӧ әм ԝе йәкеда пенәбуйи бун! Һәгәр йәк рʼуйе ԝи дьгьрә бь тьштәки бьфьрʼә, рʼуйе мьн жи дьгьрә, (әз ве йәке жь бефәʼмийа хԝә дьбежьм). Әԝана ибрани нә? Әз жи. Исраели нә? Әз жи. Жь рʼькʼьнйата Бьраһим ьн? Әз жи. Ԛӧльхкʼаред Мәсиһ ьн? (Беһʼьши хәбәр дьдьм), әз һе жь ԝан зедәтьр ьм! Жь ԝан зәʼфтьр хәбьтимә, жь ԝан зәʼфтьр кʼәтьмә кәла, жь ԝан зәʼфтьр ледан хԝарийә, гәләк щара һʼәта бәр дәре мьрьне жи чумә. Бь дәсте щьһуйа пенщ щара, жь чьли йәк кем, бь ԛамчийа һатьмә ледане, се щара бь дәсте рʼомийа бь шьва һатьмә ледане, щарәке әз дамә бәр кәвьра, се щара рʼасти гәмиԝәлгәрʼандьне һатьмә, шәв у рʼожәке бәʼреда мамә. Гәләк рʼеԝитийед хԝәда нава щурʼә-щурʼә ԛәдә-бәлада бумә: Жь чʼәма, жь рʼебьрʼа, жь мьләте хԝә, жь нәщьһуйа, бажерда, чол-бәстада, сәр бәʼре, жь бьрайед дәрәԝ. Дьхәбьтим, дьчәрчьрим, гәләк щара хәԝе шәва нәдькьр, тʼи-бьрʼчи, гәләк щара бе нан, сәрме у бесьтʼарийеда бум. Пештьри тьштед майин, хәмед һʼәму щьвинайә һәр рʼож жи сәр мьн тʼоп дьбьн. Гава йәк сәр һʼале хԝәда дьгьри, әз жи тʼәви ԝи дьгьрим! Гава йәк жь рʼе те дәрхьстьне, дьле мьн жи дьԛьлԛьлә! Һәгәр лазьм бә әз пʼәйе хԝә бьдьм, әзе сәр һʼалед хԝәйә сьст пʼәйа бемә хԝә. Хԝәдейе Баве Хӧдан Иса, кӧ һʼәта-һʼәтайе һежайи шькьрийе йә, занә кӧ әз дәрәԝа накьм. Бажаре Шамеда ԝәлийе бәрдәстийе Аретас пʼадша, бона кӧ мьн бьгьрә, нобәдар дабунә бәр дәргәһед бажер, әз пе сәпәте пʼәнщәрәкерʼа сурева дахьстьмә хԝаре у жь дәсте ԝи рʼәвим. Мьн дькʼәвә әз пʼәйа бьдьмә хԝә, ле рʼасти кʼара ԝе тʼӧнә. Ле бәле әзе ньһа дәрбази сәр ԝан дитьн у әʼйантийа бьм, йед кӧ Хӧдан нишани мьн данә. Әз баԝәрмәндәки Мәсиһ нас дькьм, чардәһ сал пешда, (ньзаньм ԛальбда бу, ньзаньм бе ԛальб бу, әԝ Хԝәде занә), һʼәта әʼзмане сьсийа һатә һьлатьне. У әз заньм кӧ әв мәрьва, (ԛальбда бу, бе ԛальб бу, әз ньзаньм, ԝе йәке Хԝәде занә), һʼәта бӧһьште һатә һьлатьне у тьштед найенә готьне бьһистьн кӧ жь мерьв накʼәвә бона ԝан тьшта хәбәр дә жи. Әзе бона йе һа пʼәйа бемә хԝә, ле бона хԝә пʼәйа надьмә хԝә, пештьри сәр һʼале сьстийед хԝә. Ле һәгәр әз бьхԝазьм жи пʼәйе хԝә бьдьм, әв нә беһʼьши йә, чьмки әз рʼастийе дьбежьм. Ле әз хԝә дьгьрьм, кӧ нәбә йәк сәр мьн тьштәки зедә бьфькьрә, пештьри тьште кӧ жь мьн дьбьһе йан дьбинә. У ԝәки нәбә әз бона гәләк әʼйантийед нәбәрһʼьша кʼӧбар бьм, бәлакә мина дәрзике ԛальбе мьнда мьнрʼа һатә дайине, мьлйакʼәтәки жь мирещьн, кӧ тʼәпа бе мьн, ԝәки әз кʼӧбар нәбьм. Бона ве йәке мьн се щара һиви жь Хӧдан кьр, кӧ ве йәке жь мьн дур хә, ле Әԝи мьнрʼа гот: «Кʼәрәма Мьн бәси тә йә, чьмки ԛәԝата Мьн сьстийада мийасәр дьбә». Аԝа әзе бь дьләки ша һʼале сьстийед хԝәда бьфьрʼьм, ԝәки ԛәԝата Мәсиһ нава мьнда бә. Ләма жи әз бона наве Мәсиһ сьстийа, ԛара, һесири-бәләнгазийа, зерандьна у тәʼли-тәнгийа бәгәм дькьм, чьмки гава әз сьст дьбьм, һьнге ԛәԝат дьбьм. Рʼасти мьн беһʼьши кьр кӧ пʼәйе хԝә да, ле ԝә пʼейи сәр мьн кьр! Гәрәке ԝә пʼәйе мьн бьда. Әз тʼӧ тьштива жь ԝан шандийед ԝәйә әʼйан кемтьр нимә, ле әз хԝәха жи нә тʼӧ тьшт ьм. Нишанед шандитийа рʼаст, аԝа готи нишан, кʼәрәмәт у кьред ԛәԝат, нава ԝәда бь тʼәмамийа сәбьре һатьнә кьрьне. Мьн чь тьштива ԛәдьре ԝә жь ԛәдьре щьвинед майин кемтьр гьртийә, пештьри ԝе йәке кӧ мьн гьрани нәда ԝә? Бьбахшиньнә мьн ве нәһәԛийе! Әва се щар ә әз кʼаре хԝә дькьм, кӧ сәр ԝәда бем. У әз гьранийе надьмә ԝә. Чʼәʼве мьн нә ль һәбука ԝә йә, ле ль ԝә йә! Чьмки нә кӧ гәрәке зарʼ бона де-бава бькьн, ле де-бав бона зарʼа. Әзе бь дьләки ша, хԝә жи у мал-һʼале хԝә жи бона ԝә бьдьм. Һәгәр әз һе гәләки ԝә һʼьз бькьм, гәло һуне мьн һьндьки һʼьз бькьн? Әм һа һьлдьн, кӧ мьн гьрани нәдайә ԝә, ле бь йа һьнәка әзи һʼьләкʼар бумә у бь фелбазийа хԝә һун авитьнә тʼәләка хԝә. Гәло мьн бь дәсте әԝед кӧ мьн сәр ԝәда шандьн, һун кʼара хԝәрʼа данә хәбате? Мьн һиви жь Тито кьр у әԝ бьра тʼәви ԝи шанд. Гәло Тито һун кʼара хԝәрʼа данә хәбате? Мә бь рʼӧһʼәки нәдькьр? Әм рʼекеда нәдьчун? Дьбә кӧ һун тʼәмамийа ви ԝәхтида дьфькьрьн, кӧ әм дьхԝазьн хԝә ль бәр ԝә рʼуспи кьн? На! Ле ль бәр Хԝәде әм йәктийа Мәсиһда хәбәр дьдьн у һәр тьшти дәлално, бона кʼара ԝә дьбежьн. Әз дьтьрсьм, гава әз бем, тӧԝәрә ԝә ӧса нәбиньм, чаԝа әз дьхԝазьм у һун жи мьн ӧса нәбиньн, чаԝа һун дьхԝазьн. Дьтьрсьм кӧ һе нава ԝәда шәрʼ-дәʼԝ һәбьн, һʼәвсуди, һерскʼәтьн, һәврʼькʼи, хәйб, бӧхдан, кʼӧбар-бабахи у бетʼәрбәти. Дьтьрсьм, кӧ гава әз диса сәр ԝәда бем, Хԝәдейе мьн сәре мьн ль бәр ԝә бәржер кә у бона гәләка шине бькьм, кʼижана пешда гӧнә кьрьнә у жь кьред һʼәрамийе, бенамусийе у толтийе тʼобә нәкьрьбьн. Әва щара сьсийа йә әзе сәр ԝәда бем. Чаԝа ньвисар ә: «Гәрәке бь дәве дӧ йан се шәʼда һәр тьшт бе әʼсәйикьрьне». Мьн бәре готийә у ньһа жи дьбежьм, чаԝа щара дӧда нава ԝәда һазьр бум, ньһа жи диса дурва ԝанрʼа дьньвисьм, йед кӧ пешда гӧнә кьрьнә у ӧса жи һʼәмуйарʼа: Гава диса бем, иди әз надьмә хатьре тʼӧ кәси, чьмки һун кʼәтьнә бьн әʼнәна, кӧ бьзаньбьн, гәло Мәсиһ пе мьн хәбәр дьдә. Әԝ һьндава ԝәда нә сьст ә, ле нава ԝәда ԛәԝат ә. Рʼаст ә Әԝ бь сьстийе һатә хачкьрьне, ле бь ԛәԝата Хԝәде сах ә. Әм йәктийа Ԝида сьст дьбьн, ле бь ԛәԝата Хԝәде һьндава ԝәда әме бьжин тʼәви Ԝи. Һун дьле хԝә бьщерʼьбиньн, кʼа һун нава баԝәрийеда нә? Хԝә әʼнәнә кьн. Һун фәʼм накьн, кӧ Иса Мәсиһ нава ԝәда йә, тʼәне щерʼьбандьнеда һун пенәбуйи нибьн? Ле гӧман һәйә, кӧ һуне фәʼм бькьн, кӧ әм нә пенәбуйи нә. Ле әм дӧа жь Хԝәде дькьн, кӧ һун хьрабийе нәкьн, нә кӧ ԝәки әм щерʼьбандьнеда ԛәнщ кʼьфш бьн, ле ԝәки һун ԛәнщийе бькьн, һәгәр әм пенәбуйи жи кʼьфш бьн. Чьмки әм нькарьн тьштәки ль рʼастийе бькьн, ле тʼәне бона кʼара ԝе. Әм ша дьбьн, гава әм сьст дьбьн у һун ԛәԝат дьбьн. У әм жи бона ԝә дӧа дькьн, ԝәки һун тʼам бьгьһижьн. Бона ван йәка әз дурва ԝәрʼа дьньвисьм, кӧ нәбә гава әз бем, һьндава ԝәда һʼьшкийе бькьм бь ԝи һʼӧкӧме кӧ Хӧдан дайә мьн, йа кӧ бона авакьрьне йә, нә бона хьрабкьрьне. Һәйнәсәр хушк-бьрано, хԝәш бьн! Сәр хԝәда ԝәрьн, дьл бьдьнә һәвдӧ, сәр нетәке бьн, ль пәй әʼдьлайийе бьн у Хԝәдейе һʼьзкьрьне у әʼдьлайийе ԝе тʼәви ԝә бә. Сьлаве бьдьнә һәв бь рʼамусана шире һʼәлал. Тʼәмамийа щьмәʼта Хԝәде ль ԝә сьлав дькә. Кʼәрәма Хӧдан Иса Мәсиһ, һʼьзкьрьна Хԝәде у һәләԛәтийа Рʼӧһʼе Пироз тʼәви ԝә һʼәмуйа бә. Әз Паԝлосе шанди, нә кӧ жь алийе мәрьвада йан бь дәсте мәрьва кʼьфшбуйи мә, ле бь дәсте Иса Мәсиһ у Бав Хԝәде, Йе кӧ Әԝ жь мьрьне рʼакьр, әз бь һʼәму баԝәрмәндава тʼәвайи бәрбьрʼи ԝә щьвинед Галатйайеда дьбьм. Дә бьра кʼәрәм у әʼдьлайийа Хԝәде Баве мә у Хӧдан Иса Мәсиһ ль ԝә бә, Йе кӧ щанийа Хԝә анәгори әʼмьре Баве мә Хԝәде жь бәр гӧнед мәва да, ԝәки мә жь ви зәмане ньһайи хьраб хьлаз кә. Шькьр жь Хԝәдерʼа һʼәта-һʼәтайе! Амин. Әз әʼщебмайи дьминьм, кӧ һун ӧса зу пьшта хԝә дьдьнә Хԝәдейе кӧ бь сайа кʼәрәма Мәсиһ гази ԝә кьр у бәре хԝә дьдьнә мьзгиникә дьн. Рʼаст мьзгиникә дьн тʼӧнә, ле һьнәк һәнә ԝә тʼәви һәв дькьн у дьхԝазьн Мьзгинийа Мәсиһ бьгӧһезьн. Ле һәгәр әм йан мьлйакʼәтәк жи жь әʼзмен бе, мьзгиникә ӧса бьдә ԝә, кʼижан кӧ нә мина ԝе Мьзгинийе йә, йа кӧ мә дайә ԝә, бьра ньфьрʼ ль ԝи бә! Чаԝа мә пешда гот, ньһа жи диса дьбежьм: Һәгәр йәк мьзгиникә нә мина ԝе Мьзгинийа кӧ ԝә ԛәбул кьр дьдә ԝә, бьра ньфьрʼ ль ԝи бә! Чьма әз ньһа дькьм мәрьв жь мьн рʼази бьн, йан Хԝәде? Йан гәло әз дькьм кӧ ль мәрьва хԝәш бем? Һәгәр мьн һе бьхԝәста әз ль мәрьва хԝәш бьһатама, мьн нькарьбу әз бьбума хӧламе Мәсиһ. Әз ве йәке ль ԝә дьдьмә һʼәсандьне хушк-бьрано, кӧ әԝ Мьзгинийа мьн даннасин кьр, нә йа мәрьвайи йә. Мьн әԝ жь мәрьва нәстанд, нә жи жь кәсәки һин бум, ле Иса Мәсиһ мьнва әʼйан кьр. Ԝә бона бепʼәргалийа мьнә бәрейә нава щьһутийеда бьһистийә. Мьн беһʼәсаб щьвина Хԝәде дьзеранд у дькьр кӧ ԝе хьраб кьм. Әз нава щьһутийеда жь гәләк һәвалед хԝәйә щьһу пешдатьр чубум, алийе рʼаԝ-рʼьзьма кал-бавада жи гәләки хԝәйихирәт бум. Ле гава Хԝәде хԝәст, (Йе кӧ әз бьжартьм, чахе әз һе зьке дийа хԝәда бум у бь кʼәрәма Хԝә әз кʼьфш кьрьм), Кӧрʼе Хԝә мьнва әʼйан кьр, кӧ нава нәщьһуйада Ԝи даннасин кьм, һьнге мьн шеԝьра хԝә тʼӧ кәси нәкьр, нә жи рʼабумә Оршәлиме, щәм әԝед кӧ бәри мьн бьбунә шанди, ле әз перʼа-перʼа чумә Әʼрәбьстане у диса вәгәрʼийамә Шаме. Паше се сала шунда рʼабумә Оршәлиме, кӧ Пәтрус бьбиньм у панздәһ рʼожа щәм ԝи мам. Ле бәле жь шандийед майин мьн тʼӧ кәс нәдит, пештьри Аԛубе бьре Хӧдан. Чь кӧ ԝәрʼа дьньвисьм, әз бәр Хԝәде бехельф дьбежьм. Паше чумә алийед Сурйайе у Киликйайе. Ле щьвинед Мәсиһә Щьһустанеда әз рʼу бь рʼу нас нәдькьрьм. Ԝана тʼәне бьһистьбу кӧ: «Әԝе ԝәхтәке әм дьзерандьн, ньһа хԝәха ԝе баԝәрийе даннасин дькә, кʼижан ԝи ԝәхтәке дькьр кӧ хьраб кә». У бона мьн шькьри дьданә Хԝәде. Паше чардәһ сала шунда тʼәви Барнабас диса рʼабумә Оршәлиме, Тито жи мьн тʼәви хԝә бьр. Әз чум, чьмки Хԝәде бәр мьн вәкьр, кӧ һәрʼьм. У мьн әԝ Мьзгини ль ԝан да һʼәсандьне, йа кӧ әз нава нәщьһуйада даннасин дькьм, ле әв йәк мьн йед сәрәкәрʼа башԛә дьгот. Мьн нәхԝәст кӧ әз бадиһәԝа бьбәзьм йан бәзибьм. Ле һʼәта Титойе тʼәви мьн кӧ йунан бу, пʼейи сәр ԝи жи нәкьрьнә, кӧ бе сьнәткьрьне. Әв пьрс пешда һат, чьмки чәнд бьрайед дәрәԝ шулькинә нава мә, ԝәки щәʼсусийе азайийа мә бькьн, йа кӧ бь сайа Мәсиһ Иса мә дәст анийә. Ԝана дьхԝәст әм бькьрана бьндәст. Ле мә ԛәт дәԛәке жи гӧрʼа ԝан нәкьр, кӧ рʼастийа Мьзгинийе нава ԝәда һʼимгьрти бьминә. Ле бона ԝан жи, йед кӧ сәрәкә кʼьфш дьбун, (ԛәт хәма мьн нинә, кӧ әԝ бәре чь бунә, Хԝәде фьрԛийе накә нава мәрьва), ԝан сәрәка жи тʼӧ тьште ну мьнрʼа нәготьн. Ле сәрбара-сәрда дитьн кӧ ль мьн һатийә спартьне, ԝәки әз Мьзгинийе бьдьмә нәщьһуйа, чаԝа кӧ ль Пәтрус жи һатийә спартьне, ԝәки Мьзгинийе бьдә щьһуйа. Чьмки Хԝәдейе кӧ Пәтрус кьрә шандийе щьһуйа, һәма Ԝи жи әз кьрьмә шандийе нәщьһуйа. Гава Аԛуб, Пәтрус у Йуһʼәннайе кӧ «Стун» дьһатьнә һʼәсабе, бона ԝе кʼәрәма кӧ мьнрʼа һатьбу дайине пе һʼәсийан, дәстед хԝәйә рʼасте чаԝа нишана тʼьфаԛийе данә мьн у Барнабас. Әԝ ԛайл бун, кӧ әм һәрʼьнә нава нәщьһуйа у әԝ жи һәрʼьнә нава щьһуйа. Тʼәне ԝан һиви кьр, кӧ әм бәләнгаза бир нәкьн, йа кӧ әз хԝәха жи дәмана ԝе йәкеда мә. Ле гава Пәтрус һатә Әнтакйайе, әз ашкәрә мьԛабьли ԝи рʼабум, чьмки әԝи шаш бу. Бәри һатьна чәнд мәрьвед кӧ Аԛуб шандьбун, әԝи тʼәви нәщьһуйед баԝәрмәнд нан дьхԝар. Ле гава әԝана һатьн, әԝи хԝә дьда алики у вәдькʼьшийа, жь тьрса әԝед кӧ дьготьн, гәрәке нәщьһу бенә сьнәткьрьне. У щьһуйед баԝәрмәндә майин жи тʼәви ԝи дӧрʼути кьрьн, һʼәта кӧ Барнабас жи хальфи, кʼәтә нава ԝе дӧрʼутийа ԝан. Ле гава мьн дит кӧ әԝана нава рʼастийа Мьзгинийеда наминьн, һьнге ль бәр һʼәмуйа мьн готә Пәтрус: «Һәгәр тӧ щьһу йи, мина йәки нәщьһу дьжийи у нә мина щьһуйа, тӧ чаԝа дьки сәр нәщьһуйа, кӧ бьбьнә мина щьһуйа?» Әмә кӧ әʼсьле хԝәда щьһу нә у нә жь «нәщьһуйед гӧнәкʼар» ьн, заньн кӧ мәрьв бь кьред Ԛануне нькарә рʼаст бе һʼәсабе, ле тʼәне бь Иса Мәсиһ баԝәркьрьне. Мә жи Мәсиһ Иса баԝәр кьр, ԝәки бь Мәсиһ баԝәркьрьне әм рʼаст бенә һʼәсабе, нә кӧ бь кьред Ԛануне, чьмки тʼӧ ԛул-бәндә бь кьред Ԛануне нькарә рʼаст бе һʼәсабе. Аԝа һәгәр әм дькьн бь Мәсиһ рʼаст бенә һʼәсабе у ԝе гаве хӧйа бә, кӧ әм хԝәха жи мина ԝан гӧнәкʼар ьн, һьнге Мәсиһ бу ԝәкʼиле гӧна? Тʼӧ щар! Һәгәр әԝ тьштед мьн хьраб кьрьнә, диса дәстпедькьм чедькьм, әз нәһәԛийа хԝә дьдьмә избаткьрьне. Чьмки әз бь Ԛануни бона Ԛануне мьрьм, ԝәки бона Хԝәде бьжим. Әз тʼәви Мәсиһ хач бум, жь вьр шунда нә кӧ әз дьжим, ле Мәсиһ ә кӧ нава мьнда дьжи. У ньһа кӧ әз ви ԛальбида дьжим, бь Кӧрʼе Хԝәде баԝәркьрьне дьжим, Йе кӧ әз һʼьз кьрьм у щанийа Хԝә бона мьн да дәр. Әз кʼәрәма Хԝәде тʼәхсир накьм, чьмки һәгәр рʼастһʼәсаббун бь Ԛануне буйа, кӧ ӧса йә Мәсиһ бадиһәԝа мьр. Гәли галатийед беһʼьш! Кʼе сәре ԝә тʼьжи кьр? Нә ахьр Иса Мәсиһ ль бәр чʼәʼве ԝә хачбуйи һатә дийаркьрьне? Әз тʼәне ве йәке дьхԝазьм жь ԝә бьзаньбьм: Ԝә Рʼӧһʼе Хԝәде бь Ԛанун ԛәдандьне станд, йан бь Мьзгини бьһистьне у баԝәрийа хԝә же анине? Чьма һун һаԛас беһʼьш ьн, кӧ ԝә бь Рʼӧһʼе Хԝәде дәстпекьр у ньһа бь мәрьвайи хьлаз дькьн? Һаԛас тьшт бадиһәԝа һатьнә сәре ԝә? Наԛәԝьмә кӧ бадиһәԝа бьн! Чьма әԝ Хԝәдейе кӧ Рʼӧһʼе Хԝә пʼешкʼеши ԝә дькә у нава ԝәда кʼәрәмәта дькә, бона Ԛанун ԛәдандьна ԝә дькә, йан бона кӧ ԝә Мьзгини бьһист у баԝәрийа хԝә же ани? Мәсәлә, бона Бьраһим аһа ньвисар ә: «Бьраһим Хԝәде баԝәр кьр у әԝ йәк жерʼа рʼасти һатә һʼәсабе». Аԝа заньбьн, йед кӧ баԝәр дькьн әԝ ьн зарʼед Бьраһим. Ньвисаре һе пешда дабу кʼьфше, кӧ Хԝәде нәщьһу бь баԝәрийе ԝе рʼаст һʼәсаб бькьрана у зува Мьзгини дабу Бьраһим кӧ: «Бь тә дӧайе һʼәму мьләта бьбә». Аԝа әԝед кӧ баԝәр дькьн, тʼәви Бьраһиме баԝәрмәнд дӧа ль ԝан те кьрьне. Әԝед кӧ хԝә спартьнә кьред Ԛануне, әԝ бьне ньфьрʼеда нә, чьмки ньвисар ә: «Ньфьрʼ ль һәр кәси йә, йе кӧ нава һʼәму ньвисаред кʼьтеба Ԛанунеда наминә у наԛәдинә». Әʼйан ә тʼӧ кәс бь Ԛануне нькарә ль бәр Хԝәде рʼаст бе һʼәсабе, чьмки ньвисар ә: «Йе рʼаст ԝе бьжи, чьмки баԝәр дькә». Ле Ԛанун бь баԝәрийе нинә, ле бәле чаԝа ньвисар дьбежә: «Кʼи кӧ тʼәмийед Ԛануне бьԛәдинә бь ԝан ԝе бьжи». Мәсиһ әм жь ԝе ньфьрʼа Ԛануне кʼьрʼин, әԝ дәԝса мә кʼәтә бьн ԝе ньфьрʼе, чьмки ньвисар ә: «Ньфьрʼ сәр йе дарва дардакьри йә». Әв йәк бу, ԝәки бь Мәсиһ Иса дӧайе Бьраһим бе сәр нәщьһуйа, кӧ бь баԝәрийе әм Рʼӧһʼе создайи бьстиньн. Хушк-бьрано! Әз тиньмә сәр әʼдәте дьне. Һәгәр йәки ԝәсийәтәк тʼәстиԛ кьрьбә, тʼӧ кәс нькарә ԝе бәтал кә, йан жи тьштәки дьн сәрда зедә кә. Аԝа әԝ соз Бьраһим у зӧрʼәта ԝирʼа һатьнә дайине. Ньвисареда найе готьне: «Зӧрʼәтед тә» чаԝа бона гәләка, ле бона йәки: «Зӧрʼәта тә» у әԝ зӧрʼәт Мәсиһ ә. Аԝа готи әз ве йәке дьбежьм, әԝ ԝәсийәта кӧ пешда жь Хԝәдеда һатьбу тʼәстиԛкьрьне, Ԛануна кӧ чарсьд си сали шунда дәркʼәт, нькарә ӧса бькә, ԝәки ԝәсийәта создайи ԛәԝата хԝә ӧнда кә. Чьмки һәгәр ԝарти Ԛанунева гьредайи буйа, ԝе создайинева гьредайи нибуйа, ле Хԝәде бь соз пʼешкʼеши Бьраһим кьр. Иди мәрәме Ԛануне чь бу? Ԛанун сәрда зедә бу кӧ нәһәԛи бе наскьрьне у гәрәке әԝ бьма һʼәта һатьна Зӧрʼәта ԝи, кʼижанирʼа соз дабу. Ԛанун жь алийе мьлйакʼәтада, бь дәсте навчетийа йәки һатә дайине. Бона ԝәсийәткьрьне навчети нә лазьм ә гава ԝәсийәт бь дәсте йәки те кьрьне у ль вьр әԝ йәк тʼәне Хԝәде йә. Аԝа Ԛанун мьԛабьли созед Хԝәде йә? Тʼӧ щар! Бәле һәгәр ԛанунәк һәбуйа, кӧ бькарьбуйа жийин бьда, һьнге әʼсәйи рʼастһʼәсаббун ԝе бь ԛануне бьбуйа. Ле ньвисар һʼәмуйа бьн һесиртийа гӧнәда дьдә кʼьфше, ԝәки чь кӧ бь Иса Мәсиһ баԝәркьрьне һатьбунә создайине, баԝәрмәндарʼа бенә дайине. Бәри һатьна баԝәрийе, әм бьн дәсте Ԛанунеда чаԝа гьрти дьһатьнә хԝәйикьрьне, һʼәта хӧйабуна ԝе баԝәрийе кӧ ԝе бьһата. Бь ви аԝайи Ԛанун бу тʼәрбәтдаре мә у әм бәрбьрʼи Мәсиһ анин, кӧ әм бь баԝәрийе рʼаст бенә һʼәсабе. Ле ньһа кӧ баԝәри һат, әм иди нә бьн дәсте тʼәрбәтдаре Ԛанунеда нә. Бь баԝәрийе һун һʼәму йәктийа Мәсиһ Исада лаԝед Хԝәде нә. Һун һʼәму кӧ йәктийа Мәсиһда һатьнә ньхӧмандьне, ԝә Мәсиһ сәр хԝә ԝәргьртийә. Иди фьрԛи нә нава щьһу у нәщьһуйада һәйә, нә нава хӧлам у азайада, нә жи нава мера у жьнада, чьмки һун һʼәму жи йәк ьн йәктийа Мәсиһ Исада. У һәгәр һун пʼара Мәсиһ ьн, ԝәки ӧса йә зӧрʼәта Бьраһим ьн у ԝаред ԝи сози нә. Аԝа әз дьбежьм, ԝаре кӧ хԝәйе һәр тьшти йә, ле һʼәта кӧ хьшим ә жь хӧлем найе фьрԛикьрьне. Әԝ бьн дәсте хԝәйкьрийа у хәмкʼешада йә, һʼәта ԝи ԝәхте кӧ баве кʼьфш кьрийә. Ӧса жи әм гава һе рʼӧһʼанида «хьшим» бун, мә хӧламти сьхьред ве дьнйайерʼа дькьрьн. Ле гава ԝәхт перʼа гьһишт, Хԝәде Кӧрʼе Хԝә шанд, кӧ жь кʼӧлфәте бу у кʼәтә бьн Ԛануне, ԝәки йед бьн Ԛануне аза кә у әм жи һәԛе лаԝтийа Хԝәде бьстиньн. Аԝа һун кӧ лаԝед Ԝи нә, Хԝәде Рʼӧһʼе Кӧрʼе Хԝә шандә нава дьле мә, кӧ гази Хԝәде дькә: «Абба!» аԝа готи «Баво!» Бь ви аԝайи иди тӧ нә хӧлам и, ле лаԝ и у һәгәр лаԝ и, ӧса жи Хԝәде тӧ кьри ԝаре Хԝә. Бәре, гава ԝә Хԝәде нас нәдькьр, ԝә хӧламти йед ӧсарʼа дькьрьн, кӧ рʼаст нә хԝәде бун. Ле ньһа кӧ ԝә Хԝәде нас кьрийә, ле бәле Хԝәде жи һун нас кьрьнә, һун чаԝа диса вәдьгәрʼьнә сәр ԝан сьхьред ве дьнейә беԛәԝатә нә тʼӧ тьшт у диса дьхԝазьн хӧламтийе ԝанрʼа бькьн? Һун гӧһ дьдьнә рʼожед һʼәсаб, мәһа, рʼожгар у сала. Әз бона ԝә дьтьрсьм, кӧ әԝ шьхӧле мьн бона ԝә кьрийә дәйа һәрʼә. Әз һиви жь ԝә дькьм хушк-бьрано, бьбьнә мина мьн, чьмки әз жи мина ԝә бумә. Ԝә тʼӧ зийан нәдайә мьн. Һун заньн кӧ щара пешьн бесьһʼәтийа ԛальбе мьн бу мәʼни, мьн Мьзгини да ԝә. У чь кӧ һатә сәре ԛальбе мьн, әԝ йәк бу щерʼьбандьнәк бона ԝә, ле диса ԝә әз беһӧрмәт нәкьрьм йан пьшта хԝә нәда мьн, ле ԝәкә мьлйакʼәтәки Хԝәде әз ԛәбул кьрьм у ԝәкә Мәсиһ Иса. Әԝ шабуна ԝә чаԝа бу? Әз ԝәкә шире хԝә, һәгәр жь дәст ԝәва бьһата, ԝәйе чʼәʼве хԝә жи дәрхьста бьда мьн. Иди әз бумә дьжмьне ԝә, ԝәки мьн ԝәрʼа рʼаст хәбәр дайә? Әԝед майинә кӧ кʼәтьнә дәмана ԝә, әԝ хера ԝә нахԝазьн, ле бәле әԝана дьхԝазьн ԝә жь мьн бьԛәтиньн, ԝәки һун бькʼәвьнә дәмана ԝан. Ԛәнщ ә кӧ мәри дәмана ԛәнщийеда бә у нә кӧ тʼәне гава әз нава ԝәда бьм, ле һәр гав. Лаԝед мьн, әз ньһа диса бона ԝә мина еша кʼӧлфәта дькʼьшиньм, һʼәта кӧ Мәсиһ нава ԝәда бьгьһижә. Хԝәзи әз ньһа ль щәм ԝә бума у мьн тьһәре хәбәрдана хԝә бьгӧһаста, чьмки әз бона ԝә нава мьталада мә! Жь мьнрʼа бежьн, һун кӧ дьхԝазьн бьн Ԛанунеда бьн, ԝә нәбьһистийә Ԛанун чь дьбежә? Ньвисар ә кӧ: «Дӧ кӧрʼед Бьраһим һәбун, йәк жь щарийе бу, йәк жи жь жьна аза». Әԝе жь щарийе бу, әԝ бь бьнйатʼа мәрьвайе бьбу, ле әԝе жь жьна аза бу, әԝ ль гора созе Хԝәде бу. Әва йәка щурʼәки майин те фәʼмкьрьне, әв һәр дӧ жьн дӧ пәйман ьн: Йәк жь чʼийайе Синайе, бона хӧламтийе тинә, әԝ Һащәр бу. Һащәр Әʼрәбьстанеда те һʼәсабе чʼийайе Синайе у һьмбәри Оршәлима ньһа дьбә, кӧ зарʼед хԝәва хӧламтийе дькә. Ле йа аза, әԝ Оршәлима жорьн те һʼәсабе, кӧ әԝ дийа мә һʼәмуйа йә. Чьмки ньвисар ә: «Ша бә, безӧрʼәта кӧ тә зарʼ нәданин. Бь әшԛ бьстьре, дәнг бьльнд кә, кӧ еша зарʼанине тә нәкʼьшанд. Чьмки зарʼед тә мербәрʼдайийе ԝе жь зарʼед йа хԝәйимер гәләктьр бьн». Аԝа һун хушк-бьрано, мина Исһаԛ зарʼед ԝи сози нә. Ле чаԝа һьнге әԝе жь мәрьвайе бьбу, йе жь алийе Рʼӧһʼда дьзеранд, ӧса жи ньһа. Ле ньвисар чь дьбежә? «Әԝе щарийе кӧрʼе ԝева бәрде дәрхә, чьмки кӧрʼе щарийе гәрәке тʼәви кӧрʼе жьна аза ԝар нәбә». Аԝа хушк-бьрано, әм нә зарʼед щарийе нә, ле зарʼед йа аза нә. Бона азайийе Мәсиһ әм аза кьрьнә! Ԝе азайийе ԛәԝин бьгьрьн у диса нәкʼәвьнә бьн ԝи нире хӧламтийе. Бьбьһен, әз Паԝлос ԝәрʼа дьбежьм: Һәгәр һун бьһельн кӧ һун бенә сьнәткьрьне, Мәсиһ тʼӧ кʼаре надә ԝә. Әз һәр мәрьвәкирʼа диса меркʼими дьбежьм, йе кӧ изьне дьдә хԝә кӧ әԝ бе сьнәткьрьне, әԝ дәйндар ә кӧ тʼәмамийа Ԛануне бьԛәдинә. У һәгәр һун бь Ԛанун ԛәдандьне дьхԝазьн рʼаст һʼәсаб бьн, ԝәки ӧса йә һун жь Мәсиһ ԛәтийайи нә у жь кʼәрәме кʼәти нә. Ле чь жь мә дькʼәвә, әм бь сайа Рʼӧһʼе Пироз у пе баԝәрийе һʼәйра ԝе рʼастһʼәсаббунеда нә, йа кӧ әм теда гӧман ьн. Чьмки йәктийа Мәсиһ Исада, нә сьнәткьрьн тьштәк ә, нә жи нәсьнәткьрьн, ле сәри баԝәри йә кӧ бь һʼьзкьрьне йа хԝә дькә. Һун рʼьнд пешда дьчун! Кʼе һун данә сәкьнандьне, кӧ ельми рʼастийе нәбьн? Әва һелана нә жь Ԝи йә, Йе кӧ гази ԝә кьрийә. «Һьнәк һәвиртьрʼшк тʼәмамийа һәвир һьлтинә». Ле әз бь йәктийа мәйә Хӧданда ԝәда гӧман ьм, кӧ һуне тьштәки майин нәфькьрьн, ле әԝе фькьред ԝә тʼәви һәв дькә ԝе сәр бәла хԝә вәбә, кʼи жи һәбә. Ле әз хушк-бьрано, һәгәр һәла һе сьнәткьрьне даннасин дькьм, иди чьма темә зерандьне? Ԝәки ӧса йә гәрәке тʼӧ кәсе жь хаче Мәсиһ пʼьшк нәбуйа. Хԝәзи йед кӧ фькьред ԝә тʼәви һәв дькьн, хԝәха хԝә кʼокеда жи бьбьрʼийана! Һун азайийерʼа һатьнә газикьрьне хушк-бьрано, ле тʼәне әԝ азайийа ԝә бьра нәбә мәщала хԝәстьна бьнйатʼа инсен. Дәԝса ԝе бь һʼьзкьрьне һәвдӧрʼа хӧламтийе бькьн. Чьмки тʼәмамийа Ԛануне бь ве готьне те сери: «Һәвале хԝә ԝәкә хԝә һʼьз бькә». Ле һәгәр һун дәв бавежьнә һәвдӧ, һәвдӧ бьхԝьн, мьԛати хԝә бьн, кӧ кʼока һәвдӧ нәйньн. Аԝа әз дьбежьм, бь сайа Рʼӧһʼе Пироз бьмәшьн у һуне хԝәстьнед бьнйатʼа инсен нәкьн. Чьмки хԝәстьна бьнйатʼа инсен мьԛабьли Рʼӧһʼ ә, Рʼӧһʼ мьԛабьли бьнйатʼа инсен ә. Әв һәр дӧ ль һәв накьн, ләма һун нькарьн хԝәстьнед хԝә бькьн. Ле һәгәр һун бь Рʼӧһʼ тенә рʼебәрикьрьне, һун накʼәвьнә бьн дәсте Ԛануне. Аԝа кьред бьнйатʼа инсен әʼйан ьн: Бенамуси, һʼәрами, толти, пʼутпʼарьсти, пирәсерти, нәйарти, шәрʼ-дәʼԝ, һʼәвсуди, һерскʼәтьн, һәврʼькʼи, дӧтирәти, щӧдәти, чʼәʼве хьраб, меркӧжи, сәрхԝәш, кучʼьксанти у чь кӧ мина ван ьн. Әз ньһа ԝәрʼа дьбежьм, чаԝа кӧ мьн пешда жи ԝәрʼа готьбу, кӧ йед ван тьшта дькьн, Пʼадшатийа Хԝәде ԝар набьн. Ле бәред Рʼӧһʼ әв ьн: Һʼьзкьрьн, шабун, әʼдьлайи, сәбьркьрьн, ширьнайи, ԛәнщи, амьни, мьлукти, хԝәгьртьн. Һьндава ван тьштада ԛанун тʼӧнә. У әԝед кӧ пʼара Мәсиһ Иса нә, бьнйатʼа хԝә бь тʼәви тәмед хьраб у һавьжийава сәр хач кӧштьнә. Әм кӧ бь сайа Рʼӧһʼ дьжин, бь рʼебәрийа Рʼӧһʼ бьмәшьн. Әм кʼӧбар нәбьн, агьре һәв гӧрʼ нәкьн у һʼәвсудийе ль һәвдӧ нәкьн. Хушк-бьрано, һәгәр йәк нәһәԛикеда бе гьртьне, һун кӧ рʼӧһʼани нә, ԝи биньнә сәр рʼийа рʼастийе, ле бь рʼӧһʼе мьлуктийе. Ле һаш жь хԝә жи һәбьн, кӧ һун нәкʼәвьнә щерʼьбандьне. Баред һәвдӧ һьлдьн у бь ви аԝайи һуне ԛануна Мәсиһ бьԛәдиньн. Һәгәр йәк хԝә дәԝса тьштәки датинә у хԝәха нә тʼӧ тьшт ә, әԝ хԝәха хԝә дьхапинә. Бьра һәр кәс кьрьнед хԝә бьдә сәр мезине у паши һьнге жь хԝә рʼази бә, нә кӧ хԝә һьмбәри һәвале хԝә кә. Чьмки һәр кәсе хӧрща хԝә һьлгьрә. Әԝе һини хәбәра Хԝәде дьбә, гәрәке һәр тьштед ԛәнщ тʼәви дәрсдаре хԝә пʼар кә. Нәхапьн, Хԝәде набә пекʼәни. Чьмки мәрьв чь дьчинә, ԝе жи дьчьнә. Кʼи кӧ бона бьнйатʼа хԝә дьчинә, әԝе жь ԝе бьнйатʼе мьрьне бьчьнә, ле кʼи кӧ бона Рʼӧһʼ бьчинә, ԝе жь Рʼӧһʼ жийина һʼәта-һʼәтайе бьчьнә. Жь ԛәнщикьрьне жи ащьз нәбьн, чьмки әме ԝәхтда бьчьньн һәгәр әм нәдьнә дәр. Аԝа һʼәта кӧ ԝәхт дәстед мәда йә, һʼәмуйарʼа ԛәнщийе бькьн, илаһи нәфәред мала Хԝәдерʼа. Дина хԝә бьдьне, әз бь чь һʼәрфед гьр ньһа ԝәрʼа дьньвисьм. Әԝед кӧ дьхԝазьн жь дәрвава хԝә бьдьнә кʼьфше, әԝ пʼейи сәр ԝә дькьн, кӧ һун бенә сьнәткьрьне. Ле әвана ве йәке дькьн, кӧ тʼәне бона хаче Мәсиһ әԝ нәйенә зерандьне. Әԝед хԝәйисьнәт хԝәха Ԛануне хԝәй накьн, ле дьхԝазьн кӧ һун бенә сьнәткьрьне, ԝәки әԝ бь нишана ԛальбе ԝәйи мәрьвайи бьфьрʼьн. Ле жь мьн накʼәвә кӧ әз бь тьштәки дьн бьфьрʼьм, пештьри бь хаче Хӧдане мә Иса Мәсиһ, бь кʼижани дьнйа бона мьн хачбуйи йә, әз жи бона дьнйайе. Бәле нә сьнәткьрьн тьштәк ә, нә жи нәсьнәткьрьн, ле сәри әԝ ә, кӧ бьбьн әʼфьринәки ну. Дә бьра әʼдьлайи у рʼәʼм сәр ԝан һʼәмуйа бә, кʼижанед кӧ анәгори ве йәке дьжин у ӧса жи сәр Исраела Хԝәде бә. Жь вьр шунда бьра тʼӧ кәс зәʼмәте нәдә мьн, чьмки мьн даха бьринед Иса һьлдайә сәр бәдәна хԝә. Дә бьра кʼәрәма Хӧдане мә Иса Мәсиһ тʼәви рʼӧһʼе ԝә бә хушк-бьрано. Амин. Жь Паԝлосе бь әʼмьре Хԝәде шандийе Мәсиһ Иса, ԝан мәрьвед Хԝәдерʼа, йед кӧ Әфәседа дьминьн у йәктийа Мәсиһ Исада амьн ьн: Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә. Шькьр жь Хԝәдерʼа, Баве Хӧдане мә Иса Мәсиһ, кӧ пе һʼәму дӧа-дьрозгед рʼӧһʼанийә ль дийаре әʼзмана йәктийа Мәсиһда дӧа ль мә кьрьн. Бәри әʼфьрандьна дьнйайе Хԝәде йәктийа Ԝида әм бьжартьн, ԝәки әм пироз у беԛӧсур бьн, ль бәр Ԝи һʼьзкьрьнеда бьжин. Әԝи әм пешда кʼьфш кьрьбун, чаԝа ль ԛьрара Ԝи хԝәш һат, кӧ мә бь дәсте Иса Мәсиһ бькә лаԝед Хԝә. Дә ԝәрьн әм пәсьне Ԝи бьдьн, бона ԝе кʼәрәма Ԝийә хԝәйирʼумәт, пе кʼижане йәктийа Һʼьзкьрийе Хԝәда ԛәнщи ль мә кьр. Йәктийа Ԝида әм аза бунә бь хуна Ԝи, аԝа готи афубуна гӧна стандийә. Әва йәка жь дәԝләмәндтийа кʼәрәма Ԝи йә, йа кӧ Ԝи бь мәрʼдани сәр мәда баранд, пе һʼәму сәрԝахти у фәʼмдарийе. Әԝи сӧрʼа хԝәстьна Хԝә мәва әʼйан кьр, чаԝа ль Ԝи хԝәш һат, йа кӧ һе пешда ԛьрар кьрьбу, ԝәки йәктийа Мәсиһда бинә сери, кӧ гава ԝәхт перʼа бьгьһижә, әԝ тʼьвдир мийасәр бә, һʼәму тьшт бьн сәрԝертийа Мәсиһда гьредайи бьн, һьн һәр тьштед ль әʼрде, һьн жи ль әʼзмана. Чаԝа Хԝәде ԛьрара Хԝәда пешда кʼьфш кьрьбу, кӧ һәр тьшт ль гора хԝәстьн у әʼмьре Ԝи бә, әм щьһу йәктийа Мәсиһда пʼара Хԝәде кʼәтьнә, ԝәки әм пәсьне рʼумәта Ԝи бьдьн кӧ мә пешда гӧмана хԝә данийә сәр Мәсиһ. Йәктийа Ԝида һун нәщьһу жи бунә пʼара Хԝәде, гава ԝә хәбәра рʼастийе, аԝа готи Мьзгинийа хьлазбуна хԝә бьһист. Ԝә баԝәрийа хԝә Ԝи ани у бь Рʼӧһʼе Пирози создайи һатьнә моркьрьне. Рʼӧһʼе Пироз чаԝа бьһе һатийә дайине һʼәта әм созе Хԝәде ԝар бьн, чахе Хԝәде щьмәʼта Хԝә лап аза кә, бона пәсьндайина рʼумәта Хԝә. Бона ве йәке мьн жь һьнгева кӧ бона баԝәрийа ԝәйә сәр Хӧдан Иса у әԝ һʼьзкьрьна ԝәйә һьндава тʼәмамийа щьмәʼта Хԝәдеда бьһистийә, бона ԝә мьн дәст жь шькьрдайине нәкʼьшандийә. Әз тʼьме нава дӧайед хԝәда ԝә бир тиньм, ԝәки Хԝәдейе Хӧдане мә Иса Мәсиһ, Баве хԝәйирʼумәт, Рʼӧһʼе сәрԝахтийе у әʼйантийе бьдә ԝә, кӧ һун Ԝи тʼам нас бькьн. Бьра чʼәʼвед рʼӧһʼе ԝә вәбьн, ԝәки һун фәʼм бькьн, чь йә әԝ гӧмана кӧ Ԝи гази ԝә кьрийә у чь йә әԝ дәԝләмәндтийа рʼумәта Ԝи, йа кӧ щьмәʼта Ԝи ԝе ԝар бә у чь йә әԝ ԛәԝата Ԝийә мәзьнә беһьмбәр, йа кӧ нав мә баԝәрмәндада дьхәбьтә. Әв ә әԝ ԛәԝата Ԝийә зор, йа кӧ Хԝәде сәр Мәсиһ да хәбате, гава Әԝ жь нава мьрийа рʼакьр у ль дийаре әʼзмана кʼеләка Хԝәйә рʼасте да рʼуньштандьне, Әԝ дани сәр һʼәму сәрԝертийа, һʼӧкӧмәтийа, ԛәԝата, хӧдантийа у ӧса жи сәр һʼәму навед кӧ тенә һьлдане, нә кӧ тʼәне ль ве дьне, ле ԝе дьне жи. У Хԝәде һәр тьшт кьрә бьн пʼийед Ԝи у Әԝ бона щьвине кʼьфш кьр чаԝа сәрԝере һәр тьшти. Щьвин жи бәдәна Мәсиһ ә, тʼәмамбуна Ԝи йә, кӧ Хԝәха һәр тьшт ә, һәр тьшти тʼәмам дькә. Һун жь дәст нәһәԛи у гӧнед хԝә мьри бун, гава һун пәй әʼдәтед ве дьне дьчун, ль гора хԝәстьна мире сәрԝертийа ве һәԝе, ԝи рʼӧһʼе кӧ ньһа жи нава ԝан мәрьвада йа хԝә дькә, йед кӧ нә гӧрʼа Хԝәдеда нә. Әм һʼәму жи ԝәхтәке пәй ԝан тьшта дьчун, бь дьлһавьжийед бьнйатʼа мәрьвайе дьжит у дьл у фькьред мәрʼа чь дәрбаз дьбун мә әԝ дькьрьн у бьнйатʼа хԝәда жи һежайи хәзәба Хԝәде бун, чаԝа йед майин. Ле Хԝәдейе кӧ хԝәйе рʼәʼма дәԝләмәнд ә, бь һʼьзкьрьна Хԝәйә мәзьн, бь кʼижане әм һʼьзкьрьн, гава әм һе жь дәст нәһәԛийед хԝә мьри бун, Әԝи тʼәви Мәсиһ әм сах кьрьн. Бь кʼәрәме һун хьлазбуйи нә! Йәктийа Ԝида әм жь мьрьне рʼакьрьн у тʼәви Ԝи әм ль дийаре әʼзмана данә рʼуньштандьне, бь сайа Мәсиһ Иса. Ԝи әв йәк кьр, ԝәки ль нава ԝан зәманед кӧ ԝе бен, дәԝләмәндтийа кʼәрәма Хԝәйә беһьмбәр, һьндава мәда бь сайа Мәсиһ Иса, бь ширьнайи бьдә кʼьфше. Чьмки бь кʼәрәме һун хьлазбуйи нә, пе баԝәрийе у әв йәк нә жь ԝә йә, ле дайина Хԝәде йә. Әв йәк нә жь кьрьна йә, ԝәки йәк пʼәйе хԝә бьдә. Бәле әм чекьрийед Ԝи нә, йәктийа Мәсиһ Исада хӧльԛи, бона кьрьнед ԛәнщ, йа кӧ Хԝәде пешда һазьр кьр, кӧ әм ԝанда бьминьн. Һун кӧ әʼсьле хԝәда нәщьһу нә у жь алийе щьһуйада «бе сьнәт» дьһатьнә һʼәсабе, йед кӧ хԝәха хԝә «сьнәткьри» һʼәсаб дькьрьн, бь сьнәтийа ԛальбә бь дәста кьри, аԝа бир биньн кӧ һун һьнге чь бун. Һьнге һун бе Мәсиһ у хәриб бун һьндава бажарвантийа Исраелда у жь пәймана у созед ԝан дур бун у ве дьнеда жи бе гӧман у бе Хԝәде бун. Ле һун кӧ ԝәхтәке дури ван йәка бун, ньһа тʼәви Мәсиһ Иса бунә, бь хуна Мәсиһ һун незик бунә. Чьмки Әԝ ә әʼдьлайийа мә, кӧ һәр дӧ, щьһу у нәщьһу кьрьнә йәк. Әԝи диԝаре навбьрʼийе, аԝа готи дьжмьнати бь бәдәна Хԝә хьраб кьр у тʼәми у әʼмьред Ԛануна Мусада бәтал кьрьн, ԝәки йәктийа Хԝәда, жь һәр дӧйа щьһу у нәщьһу мәрьвәки ну бьхӧльԛинә у бь ви аԝайи бькә әʼдьлайи. У Мәсиһ бәдәнәкеда һәр дӧ тʼәви Хԝәде бь хаче Хԝә ль һәв анин, чьмки бь ԝе кьрьне дьжмьнати кʼокева рʼакьр. У һат Мьзгинийа әʼдьлайийе да ԝә нәщьһуйед дури Хԝәде у щьһуйед незики Ԝи. Чьмки бь сайа Ԝи, изьна мә һәр дӧйа жи һәйә, бь Рʼӧһʼәки незики Баве бьн. Аԝа һун иди нә хәлԛ у хәриб ьн, ле бажарвантийа ԝә тʼәви щьмәʼта Хԝәде йә у нәфәред мала Хԝәде нә. Һун сәр ԝи рʼькʼьне шандийа у пʼехәмбәра авакьри нә, кәвьре әʼнишка кʼижани Мәсиһ Иса Хԝәха йә. Бь Ԝи тʼәмамийа авайи пева щи бь щи бона Хӧдан пʼарьстгәһәкә пироз бьльнд дьбә. Бь Ԝи һун жи бь һәврʼа тенә авакьрьне, чаԝа хана Хԝәде бь Рʼӧһʼе Пироз. Бона ве йәке әз Паԝлос бона Мәсиһ Иса гьрти мә, бона ԝә нәщьһуйа… Гәрәке ԝә бьһистьбә, кӧ әв ԝәкʼилтийа кʼәрәма Хԝәде бона ԝә мьнрʼа һатийә дайине. Әв сӧрʼа бь дайинәке ль бәр мьн һатә вәкьрьне. Мьн ль жоре кьн ԝәрʼа ньвиси у гава һун бьхуньн, һуне бькарьбьн бьзаньбьн кӧ әз чаԝа сӧрʼа Мәсиһ фәʼм дькьм. Әва сӧрʼа дәԝред бьһӧрида ль бәр бәндед дьне вәнәбуйә, чаԝа ньһа бь Рʼӧһʼе Пироз ль бәр шанди у пʼехәмбәред Ԝийә пироз вәбуйә. Әва сӧрʼа вәбу, ԝәки нәщьһу пе Мьзгинийе тʼәви Исраеле ԝар бьн, бьбьнә бәдәнәк у хԝәйипʼаред созе Ԝи бьн, бь сайа Мәсиһ Иса. Әз бумә бәрдәстийе ве Мьзгинийе, анәгори дайина жь кʼәрәма Хԝәде, йа кӧ бь кьрьна ԛәԝата Ԝи мьнрʼа һатийә дайине. Бәле әз кӧ жь нава щьмәʼта Хԝәдеда жь йе һәри бьчʼук кемтьр ьм, ле әв кʼәрәм мьнрʼа һатийә дайине, кӧ нава нәщьһуйада дәԝләмәндтийа Мәсиһә нә ль бәр һʼьша даннасин кьм у ль бәр һʼәмуйа вәкьм, кӧ чаԝа тʼьвдира сӧрʼа Хԝәде те хәбате, йа кӧ һе дәԝред бәреда щәм Хԝәдейе кӧ һәр тьшт әʼфьрандийә, вәшарти мабу. Мәрәме Хԝәде әв бу, ԝәки ньһа сәрԝахтийа Хԝәйә щурʼә-щурʼә, бь дәсте щьвине ль сәрԝерти у һʼӧкӧмәтед дийаред әʼзманава әʼйан бькә, анәгори ԛьрара Ԝийә һе дәԝред бәреда, йа кӧ Ԝи бь дәсте Мәсиһ Иса, Хӧдане мә кьр. Йәктийа Мәсиһда у пе ԝе баԝәрийа мәйә сәр Ԝи әм дькарьн бь меркʼими у рʼувәкьри незики Хԝәде бьн. Аԝа әз жь ԝә һиви дькьм, кӧ һун бәр хԝә нәкʼәвьн, бона ԝан щәфайед кӧ әз бона ԝә дькʼьшиньм. Әвана бона рʼумәта ԝә нә. Бона ве йәке әз ль бәр Бав чок дьдьм, жь кʼижани һәр ԛәбиләкә әʼрд у әʼзмана наве хԝә дьстинә. Дә бьра Әԝ ԝәкә дәԝләмәндтийа рʼумәта Хԝә ԛәԝате бь сайа Рʼӧһʼе Хԝә бьдә ԝә, кӧ һун кʼурайийа дьле хԝәда бьшьдьн, бь баԝәрийе Мәсиһ дьле ԝәда бьжи у һун һʼьзкьрьнеда рʼаԝ у рʼькʼьне хԝә бавежьн, кӧ тʼәви тʼәмамийа щьмәʼта Хԝәде бькарьбьн фәʼм бькьн, кӧ бәрайи, дьрежайи, бьльндайи у кʼурайийа һʼьзкьрьна Мәсиһ чь йә. Бәле бьра һун һʼьзкьрьна Мәсиһ нас кьн, йа кӧ жь һәр һʼьш-аԛьли зедәтьр ә, ԝәки һун тʼәмамийа Хԝәдева тʼьжи бьн. Аԝа шькьр жь Ԝирʼа бә, Йе кӧ дькарә һәр тьшти һе зедә кә, нә чаԝа әм дьхԝазьн йан дьфькьрьн, бь ԝе ԛәԝата кӧ нава мәда дьхәбьтә, шькьр жь Ԝирʼа нава щьвинеда, бь сайа Мәсиһ Иса, һʼәму зәманида, һʼәта-һʼәтайе! Амин. Аԝа әзи гьртийе бона наве Хӧдан, һиви жь ԝә дькьм, кӧ һун ӧса бьжин, чаԝа лайиԛи ԝе газийе йә, кʼижанерʼа һун һатьнә газикьрьне. Һун бь тʼәмамийа мьлуктийе у шкәсти, бь сәбьре һʼьзкьрьнеда ль бәр һәв дахьн. Бьщәʼдиньн, кӧ йәктийа Рʼӧһʼ пе һәвгьредана әʼдьлайийе хԝәй кьн. Чаԝа бәдән йәк ә у Рʼӧһʼ йәк ә, һун жи гӧманәкерʼа һатьнә газикьрьне. Хӧдан йәк ә, баԝәри йәк ә, ньхӧмандьн йәк ә, Хԝәде йәк ә, Әԝ Баве һʼәмуйа йә, кӧ сәр һʼәмуйарʼа йә, бь һʼәмуйа йа Хԝә дькә у нава һʼәмуйада йә. Бәле жь мә һәр кәсирʼа жи кʼәрәм һатийә дайине, чаԝа Мәсиһ пʼарәвәкьр. Бона ве йәке те готьне: «Гава һьлкʼьшийа чу жоре, һесир тʼәви Хԝә бьрьн у пʼешкʼеш данә мәрьва». Әв «һьлкʼьшийа» чь те һʼәсабе? Дьхԝазә бежә, кӧ Әԝ пешда бәржери ԝе дьнйа жерьн бу. Әԝе кӧ бәржер бу, һәма Әԝ ә, Йе кӧ Хԝә да феза һʼәму әʼзмана, ԝәки һәр тьшти һʼьзурийа Хԝәва тʼьжи кә. Әва Әԝ бу, Йе кӧ пʼешкʼеш данә мәрьва, кӧ һьнәк бьбьнә шанди, һьнәк пʼехәмбәр, һьнәк мьзгиндар, һьнәк жи сәʼви у дәрсдар. Әԝи әв йәк кьр, ԝәки щьмәʼта Хԝәде шьхӧлед хьзмәткʼарийерʼа һазьр бә, бона авабуна бәдәна Мәсиһ, һʼәта кӧ әм һʼәму жи бьгьһижьнә ԝе йәке, кӧ баԝәрийе у Кӧрʼе Хԝәде наскьрьнеда тʼьфаԛ бьн, бьбьнә мәрьвед гьһишти, тʼам ԝәкә бәжьн-бала Мәсиһ. Ԝәки ӧса йә жь вьр шунда әм нәбьнә мина зарʼока кӧ жь пела вьрда-ԝеда дькʼәвьн у бь дәрәԝед мәрьва бәр байе һәр һинкьрьнәке дькʼәвьн, йед кӧ бь фелбазийа дьхапиньн у дьхальфиньн. Ле рʼастийе пе һʼьзкьрьне бежьн, һәр алийада бьгьһижьнә сери, кӧ Мәсиһ ә. Жь Ԝи тʼәмамийа бәдәне һәвва нә у һʼәму жи бь аликʼарийа һәр севькәке һәвва гьредайи йә. У гава һәр пʼарәкә бәдәне шьхӧле хԝә дькә, һʼьзкьрьнеда хԝәха дьгьһижә у мәзьн дьбә. Аԝа әз ве йәке меркʼими дьбежьм у бь наве Хӧдан тʼәми ль ԝә дькьм, кӧ һун иди тʼӧ щара ԝе рʼеда нәчьн, чаԝа пʼутпʼарьст бь фькьред хԝәйә пʼучʼ дьчьн. Әԝана фәʼмед хԝәда шуна рʼәшва чун у жь жийина Хԝәде дур кʼәтьнә, жь дәст нәзанийа нава хԝә у сәрһʼьшкийа хԝә. Шәрма рʼуйе хԝә ӧнда кьрьнә у ӧса хԝә данә дохине, һʼәта кӧ һәр щурʼә кьрьнед һʼәрам дькьн у тʼер набьн. Ле ԝә Мәсиһ ӧса нас нәкьр! Бәле ԝә бона Ԝи бьһистийә жи у чаԝа йед пʼара Иса, һун ԝе рʼастийа нава Ԝида һин бунә. Дә һун хәйсәте хԝәйи бәре жь хԝә дур хьн, ԝи мәрьве кәвьни кӧ бь һавьжийед һʼьләкʼарва дерьсбуйи йә у бь рʼӧһʼ у фькьред хԝәда нуйәжийин бьн, мәрьве ну ль сәр хԝә ԝәргьрьн, кӧ кьрасе Хԝәдеда бь һәԛи у һʼәлалийа бе ԛәлпи хӧльԛи йә. Аԝа дәрәԝа жь хԝә дур хьн, жь ԝә һәр йәк һәвале хԝәрʼа рʼаст хәбәр дә, чьмки әм бь һәврʼа әндәмед Бәдәна Мәсиһ нә. Һәгәр һун һерс кʼәвьн, гӧна нәкьн, бьра рʼо сәр һерса ԝәрʼа нәчә ава у щи нәдьнә мирещьн. Әԝе кӧ дьзийе дькә, бьра иди нәдьзә, ле бь худана хԝәйә һʼәлал бь дәстед хԝә бьхәбьтә, кӧ бькарьбә дәст бавежә кʼәтийа жи. Бьра жь дәве ԝә ԛәт хәбәрәкә хьраб дәрнәйе, пештьри тьштед кӧ кери гӧһдара тен у кʼаре дьдьнә ԝан. У Рʼӧһʼе Хԝәдейи Пироз нәешиньн, бь Кʼижани һун бона Рʼожа Азайийе һатьнә моркьрьне. Дә бьра һәр тәʼлайи, һерс, бәрзәԛи, ԛарʼә-ԛарʼ у готьнед нәрʼеда жь ԝә дур бьн тʼәви һәр щурʼә кʼин-бохийева. У һәврʼа ширьн у дьлшәԝат бьн, ль һәв бьбахшиньн, чаԝа Хԝәде бь Мәсиһ бахшандә ԝә. Аԝа чʼәʼв бьдьнә Хԝәде, чаԝа зарʼед һʼьзкьри у хԝә ль һʼьзкьрьне бьгьрьн, чаԝа Мәсиһ жи әм һʼьз кьрьн у жийина Хԝә бона мә да, Хԝәдерʼа бу һʼәди у ԛӧрбана бинхԝәш. Ле һʼәта наве ԛавийе у һәр һʼәрамийе, йан тьмайе жи гәрәке нава ԝәда нәйе һьлдане, чаԝа ль щьмәʼта Хԝәде накʼәвә. Ӧса жи готьнед бемәʼрифәти, йан бефәʼми, йан һʼәнәкед ԛәлпе хьраб, кӧ ль ԝә накʼәвьн, бьра жь дәве ԝә дәрнәйен, ле дәԝсе шькьрдари. Һун ве йәке заньбьн кӧ тʼӧ ԛав, йан һʼәрам, йан тьмакʼар (кӧ пʼутпʼарьст ә) Пʼадшатийа Мәсиһ у Хԝәдеда ԝар набә. Бьра тʼӧ кәс бь хәбәред пʼучʼ ԝә нәхапинә, чьмки бона ван тьшта һерса Хԝәде ль ԝан мәрьвед нәгӧһдар рʼадьбә. Аԝа һун тʼәви йед ӧса нәбьн! Һун жи ԝәхтәке тәʼри бун, ле ньһа һун кӧ пʼара Хӧдан ьн, рʼонайи нә. Аԝа мина зарʼед рʼонайе бьжин, (чьмки бәре рʼонайийе жь һәр ԛәнщийе, һәԛийе у рʼастийе дьбә) у бьзаньбьн кӧ чь ль Хӧдан хԝәш те. Тʼәви ԝан кьред бебәрә тәʼрийе нәбьн, ле ԝан сәр аве хьн, чьмки бона ԝан тьштед кӧ әԝана бь дьзива дькьн шәрм ә жи кӧ бе хәбәрдане. Ле гава һәр тьшт те бәр рʼонайе, ашкәрә дьбә, чьмки һәр тьште кӧ ашкәрә дьбә, дьбә рʼонайи. Бона ве йәке һатийә готьне: «Хәԝьхийо, һʼьшйар бә! Жь нав мьрийа рʼабә у Мәсиһ ԝе тә рʼонайи кә». Аԝа бьньһерʼьн кӧ һун ньге хԝә фәсал бавежьн, нәбьнә мина бефәʼма, ле мина сәрԝахта. Дәст бьдьнә бәр ԝәхт, чьмки зәмани хьраб ә. Бона ве йәке бефәʼм нибьн, ле бәле бьзаньбьн чь йә ԛьрара Хӧдан. У бь шәраве сәрхԝәш нәбьн, кӧ әʼмьре мерьв пʼучʼ дькә, ле бь Рʼӧһʼе Пирозва тʼьжи бьн. Зәбур у дьрозга, стьранед рʼӧһʼани һәвдӧрʼа бежьн, бьстьрен у дьле хԝәда Хӧданрʼа бьловиньн. Һәр гав бона һәр тьшти рʼазибуне бьдьнә Бав Хԝәде, бь наве Хӧдане мә Иса Мәсиһ. Бь хофа Мәсиһә нава хԝәда ль бәр һәвдӧ хԝә бьшкеньн. Кʼӧлфәтно, ӧса хԝә ль бәр меред хԝә бьшкеньн, чаԝа ль бәр Хӧдан, чьмки мер сәре жьне йә, чаԝа Мәсиһ жи сәре щьвине йә у Хԝәха Хьлазкьре бәдәна Хԝә йә. У чаԝа щьвин ль бәр Мәсиһ хԝә дьшкенә, бьра ӧса жи жьн һәр тьштида бәр мере хԝә шкәсти бә. Мерно, жьнед хԝә һʼьз бькьн, чаԝа кӧ Мәсиһ щьвин һʼьз кьр у жийина Хԝә бәр ԝева да, ԝәки ԝе бь хәбәре бӧһӧрти-жьбарә кә, пе аве бьшо, кӧ щьвине ль бәр Хԝә ԛәшәнг бьдә сәкьнандьне, кӧ тʼӧ ләкʼә йан ԛәрчʼьмок, йан тьштәки мина ван сәр тʼӧнәбә, ле паԛьж у беԛӧсур бә. Ӧса жи гәрәке мер жьна хԝә һʼьз бькә, чаԝа бәдәна хԝә. Йе кӧ жьна хԝә һʼьз дькә, әԝ хԝә һʼьз дькә. Чьмки бәдәна тʼӧ кәси бәр чʼәʼве ԝи нә рʼәш ә, ле ԝе тʼер дькә у хԝәй дькә, чаԝа Мәсиһ жи щьвине, чьмки әм әндәмед бәдәна Ԝи нә. Чаԝа ньвисар ә: «Бона ве йәке мер ԝе де у баве хԝә бьһелә, хԝә ль жьне бьгьрә у һәр дӧ ԝе бьбьнә бәдәнәк». Әва сӧрʼа кʼур ә, ле әз готьна хԝә тиньмә сәр Мәсиһ у щьвине. Бәле жь ԝә һәр кәс жи бьра жьна хԝә һʼьз бькә чаԝа хԝә у жьн жь мере хԝә хоф бькә. Зарʼно, чаԝа баԝәрмәндед Хӧдан гӧрʼа де у баве хԝәда бьн, чьмки әв йәк рʼаст ә. «Ԛәдьре де у баве хԝә бьгьрә» кӧ әв ә тʼәмийа пешьн тʼәви создайине, «ԝәки чәрха тә рʼаст бә у сәр әʼрде әʼмьре тә дьреж бә». У һун бавно, зарʼед хԝә һерс нәехьн, ле ԝан бь ширәт у һинкьрьна Хӧдан мәзьн кьн. Хӧламно, бь хоф у тьрс, дьле сах гӧрʼа хԝәйийед хԝәйә ве дьнеда бьн, чаԝа гӧрʼа Мәсиһда, нә кӧ бь хӧламтийа ль бәр чʼәʼва, кӧ ль мәрьва хԝәш бен, ле чаԝа хӧламед Мәсиһ бь дьл ԛьрара Хԝәде бьԛәдиньн. Бь рʼәзәдьли хӧламтийе бькьн, чаԝа Хӧданрʼа, нә кӧ мәрьварʼа. Һун заньн кӧ һәр кәс, һәгәр хӧлам бә, һәгәр аза, чь ԛәнщийе кӧ бькә, ԝәкә ԝе жи ԝе жь Хӧдан бьстинә. Һун жи хԝәйино, һьндава ԝанда ӧса бьн. Дәст жь гәф-гӧрʼийе бькьн. Һун заньн кӧ Хԝәйе ԝан жи, Йе ԝә жи ль әʼзмана йә у щәм Ԝи тʼӧ фьрԛи тʼӧнә. Һәйнәсәр, йәктийа Хӧданда ԛәԝат бьн, бь зорайийа ԛәԝата Ԝи. Һәр чʼәке Хԝәде ль хԝә кьн, кӧ һун бькарьбьн мьԛабьли һʼӧнӧред мирещьн бьсәкьньн. Чьмки шәрʼе мә нә мьԛабьли хун у гошт ә, ле мьԛабьли сәрԝерти у һʼӧкӧмәтийа йә, мьԛабьли миред ве дьнйа тәʼри йә у мьԛабьли ордийед рʼӧһʼанийә хьрабә ль дийаре әʼзмана нә. Бона ве йәке чʼәкед Хԝәде һьлдьн, кӧ һун бькарьбьн ль бәр рʼожа охьрме гьран бьсәкьньн у пьшти кьрьна һәр тьштирʼа, щийе хԝәда ԛәԝин бьсәкьньн. Аԝа щийе хԝәда бьсәкьньн, рʼастийе мина кʼәмбәре ль пьшта хԝә бьшьдиньн, һәԛийе мина зьрьһʼе ль синге хԝә ԝәргьрьн у сол ньгед ԝәда, бона Мьзгинийа әʼдьлайийе һазьр сәкьни бьн. Ль сәр һәр тьштирʼа жи баԝәрийе мина мәртʼале бьгьрьнә хԝә, бь кʼижане һуне бькарьбьн һʼәму тиред агьрийә кӧ йе Хьраб давежә, бьтәмьриньн. У хьлазбуне мина кʼӧмзьрьһʼе һьлдьн, мина шур жи хәбәра Хԝәде, кӧ жь Рʼӧһʼе Пироз ә. Бь һʼәму дӧа у рʼәща һәр гав дӧа бькьн пе Рʼӧһʼе Пироз. Сәр ве йәке һʼьшйар бьминьн у бона тʼәмамийа щьмәʼта Хԝәде тʼьме дӧа бькьн. У бона мьн жи дӧа бькьн, кӧ гава әз хәбәр дьм, готьнәк мьнрʼа бе дайине, ԝәки меркʼими сӧрʼа Мьзгинийе әʼйан кьм, бона Кʼижане әз бь ван ԛәйде хԝә ԛасьдийе дькьм. Дӧа бькьн, ԝәки әз бона Ԝе тӧрӧш кьм хәбәр дьм, чаԝа лазьм ә. Ԝәки һун жи бона мьн бьзаньбьн, һаш жь һʼал-һʼәԝале мьн һәбьн, Тьхикойе бьрайе дәлал у ԛӧльхкʼаре амьн йәктийа Хӧданда ԝе һәр тьшти ԝәрʼа бежә. Әз бона ԝе йәке ԝи сәр ԝәда дьшиньм, ԝәки һун һаш жь мә һәбьн у әԝ бь ве йәке дьл бьдә ԝә. Дә бьра әʼдьлайи у һʼьзкьрьн баԝәрийева тʼәвайи жь Бав Хԝәде у Хӧдан Иса Мәсиһ ль хушк-бьра бә. Бьра кʼәрәм тʼәви ԝан һʼәмуйа бә, йед кӧ бь һʼьзкьрьна бе хьлази Хӧдане мә Иса Мәсиһ һʼьз дькьн. Жь Паԝлос у Тимотʼейойе хӧламед Мәсиһ Иса, тʼәмамийа щьмәʼта Хԝәдерʼа, йед кӧ пʼара Мәсиһ Иса нә у ль алийед Филипйайе дьминьн, тʼәвайийа бәрпьрсийар у бәрдәстийед щьвинева: Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә. Әз шькьрийа хԝә Хԝәдейе хԝә тиньм гава һәр гав ԝә бир тиньм, тʼьме нава һʼәму дӧайед хԝәда, бона ԝә һʼәмуйа бь дьле ша дӧа дькьм, чьмки һун рʼожа пешьнда һʼәта иро тʼәви шьхӧле Мьзгинидайине бунә. У әз ве йәкеда гӧман ьм, Әԝе кӧ дьле ԝәда дәст бь шьхӧле Хԝәйи ԛәнщ кьрийә, ԝе һʼәта Рʼожа һатьна Мәсиһ Иса жи бьгьһинә сери. Һун дьле мьнда нә у һәԛ ә жи кӧ әз бона ԝә һʼәмуйа аһа бьфькьрьм. Чьмки һун һʼәму жи тʼәви ԝе кʼәрәме бунә, йа кӧ жь Хԝәдеда мьнрʼа һатийә дайине, чаԝа әз ньһа ԛәйдада мә, ӧса жи бона Мьзгинийе сәкьни бум у мьн әԝ дьда маккьрьне. Хԝәде шәʼде мьн ә, кӧ әз бь һʼӧба Мәсиһ Иса чьԛаси һʼәйра ԝә һʼәмуйада мә. У әз ве дӧайе дькьм, кӧ һʼьзкьрьна ԝә һе-һе бь занәбун у сәрԝахтийа гьһиштива зедә бә, ԝәки кʼижан һәрә ԛәнщ ә, һун ԝе бьбьжерьн. Һьнге һуне Рʼожа һатьна Мәсиһда ширһʼәлал у беләкʼә бьн у бь сайа Иса Мәсиһ бь бәред һәԛийева тʼьжибуйи бьн, бона рʼумәт у пәсьне Хԝәде. Әз дьхԝазьм кӧ һун бьзаньбьн хушк-бьрано, ԝәки чь кӧ һатә сәре мьн, әԝе һе кʼар да пешдачуйина Мьзгинийе. Аԝа тʼәвайийа кʼома кʼочʼьксәрева, ӧса жи һʼәмуйед майинва әʼйан ә кӧ әз бона наве Мәсиһ нава ван ԛәйдада мә. У дьле пʼьрʼанийа баԝәрмәнда жи бь ван ԛәйдед мьн йәктийа Хӧданда шьдийан, кӧ һе бь меркʼими хәбәра Хԝәде бе хоф у тьрс бежьн. Рʼаст ә һьнәк жь һʼәвсудийе у мьхәнәтийе Мәсиһ даннасин дькьн, ле һьнәк жи жь нета ԛәнщийе. Әвана жь һʼьзкьрьне даннасин дькьн, чьмки әԝ заньн кӧ әз сәр ви ԛӧльхи һатьмә данине, кӧ пьштгьрийе Мьзгинийе бькьм. Ле йед майин бона һәврʼькʼийе Мәсиһ даннасин дькьн, нә бь дьле рʼаст. Әԝ дьфькьрьн, кӧ тәнгасийе сәр ԛәйдед мьнда зедә кьн. Ле фьрԛи тʼӧнә! Чаԝа жи бьбә, һәгәр әԝана бь ԛәлпийе йан бь рʼастийе Мәсиһ даннасин дькьн, әз бь ве йәке ша мә. Бәле әзе ша бьм жи, чьмки әз заньм кӧ әв йәк ԝе ахьрийе ль бәр азабуна мьн кʼәвә, бь дӧайед ԝә у аликʼарийа Рʼӧһʼе Иса Мәсиһ. Әз гӧман у чʼәʼвньһерʼийа ве йәке мә, кӧ тʼӧ тьштива әзе шәрми нәминьм, ле бәле һе меркʼими бьм, чаԝа һәр гав ӧса жи ньһа пәсьне Мәсиһ бь ԛальбе мьн бе дайине, һәгәр бь мьрьна мьн бә, йан жи бь жийина мьн бә. Чьмки бона мьн жийин Мәсиһ ә у мьрьн жи кʼар ә. Һәгәр жийина ви ԛальбида һе кʼаре дьдә шьхӧле мьн, әз ньзаньм кʼижани бьбьжерьм. Кʼәтьмә нава дӧ кәвьра: Әз һʼьзрәт ьм кӧ жь ви ԛальби дәрем, һәрʼьмә щәм Мәсиһ, мьнрʼа әва һе гәләки ԛәнщ ә, ле майина мьнә ви ԛальбида һе бона кʼара ԝә йә. Әз ве йәке кӧ бе шьк баԝәр дькьм, ләма жи заньм кӧ әзе бьминьм, тʼәви ԝә һʼәмуйа бьм, ԝәки һун һе пешда һәрʼьн у баԝәрийеда ша бьн. Аԝа гава әз диса бемә щәм ԝә, һун пе мьн бь сайа Мәсиһ Иса һе фьрʼнаԛ бьн. Ле тʼәне чаԝа лайиԛи Мьзгинийа Мәсиһ ә, һун хԝә ӧса хԝәй кьн, кӧ һәгәр сәр ԝәда бем у ԝә бьбиньм йан дурва бьбьһем бьзаньбьм кӧ ԝә бь рʼӧһʼ у дьләки пьшт дайә пьшта һәв, бона шәрʼкʼарийа баԝәрийа Мьзгинийе сәкьни нә. Тʼӧ алийава жь пәйкʼәтийед хԝә вәнәкʼьшьн. Әв йәк нишанәкә ӧндабуна ԝан у хьлазбуна ԝә йә у әв жи жь Хԝәде йә. Әва кʼәрәма Хԝәде бона хатьре Мәсиһ дайә ԝә, ԝәки нә кӧ тʼәне һун баԝәрийа хԝә Ԝи биньн, ле бона Ԝи щәфе жи бькʼьшиньн. Ньһа жи һун нава ԝи шәрʼида нә, кʼижан кӧ ԝә сәр мьн дит у ньһа бона мьн дьбьһен. Аԝа һәгәр тʼәвбуна ԝәйә тʼәви Мәсиһ бина бәр ԝә йә, һәгәр һʼьзкьрьна Ԝи дьл дьдә бәр ԝә, һәгәр Рʼӧһʼе Пироз ԝә дькә йәк, һәгәр дьлшәԝати у рʼәʼма ԝә һәйә, әшԛа дьле мьн бь тʼьфаԛа хԝә һун бьгьһиньнә сери: Бьра әԝ һʼьзкьрьна нава ԝәда бә у сәр нет у фькьрәке бьн. Тьштәки бь һәврʼькʼийе нәкьн у ль наве хԝә нәгәрʼьн, ле жь ԝә һәр йәк бь мьлуктийе һәвале хԝә сәр хԝәрʼа бьгьрә. Тʼәне ль кʼара хԝә нәгәрʼьн, ле бьра һәр кәс ль кʼара һәвале хԝә жи бьгәрʼә. Мәсиһ Иса сәр чь нет-фькьре бу, жь ԝә һәр кәс жи ӧса бьфькьрә: Әԝ кӧ бьнйатʼа Хԝәда Хԝәде бу, пәй ԝе йәке нәкʼәт, кӧ бьма ԝәкә Хԝәде, ле Хԝәха Хԝә шкенанд, кʼәтә бьнйатʼа хӧламәки у бу мина мәрьва, кʼәтә дьлԛе инсен. Әԝи Хԝә ньмьз кьр, һʼәта мьрьнерʼа жи ԛайл бу, әԝ жи мьрьна сәр хаче. Бона ве йәке Хԝәде Әԝ һе бьльнд кьр у навәки ӧса пʼешкʼеши Ԝи кьр, кӧ жь һʼәму нава бьльндтьр ә, ԝәки һәр чок ль бәр наве Иса бьтәԝә, һәгәр ль әʼзмен бә, һәгәр сәр дьне бә, һәгәр ль дийаре мьрийа бә у һәр зар-зьман иԛрар кә, кӧ Иса Мәсиһ Хӧдан ә, бона рʼумәта Бав Хԝәде. Аԝа дәлалийед мьнно, чаԝа әз нава ԝәда бум һун тʼьме гӧһдар бун, ньһа һе гәләки гӧһдар бьн, гава нә нава ԝәда мә. Бона хьлазбуна хԝә бь хоф у тьрс бьхәбьтьн, кӧ ԝе йәке бьгьһиньнә сери, чьмки Хԝәде Хԝәха ве йәке дькә дьле ԝә, кӧ һун дьхԝазьн у дькьн, чаԝа ль Ԝи хԝәш те. Һәр тьшти бе бинтәнги у бе шәрʼ у дәʼԝ бькьн, ԝәки һун нава ви ньсьле нәһәԛ у хальфида беләкʼә у беԛӧсур, зарʼед Хԝәдейә бесущ бьн. Нава ванда шәԝԛ бьдьн мина рʼонайед әʼзмана, чаԝа йед хәбәра жийине һьлгьрти. Әзе һьнге Рʼожа һатьна Мәсиһ рʼуспи бьм, кӧ бадиһәԝа нәбәзимә у бадиһәԝа нәхәбьтимә. Бәле һәгәр щи бе кӧ хуна мьн сәр ԝе баԝәрийа ԝәда бе рʼетьне, йа кӧ хьзмәткʼарийа ԝәда чаԝа ԛӧрбан Хԝәдерʼа те дайине, әзе ша бьм у тʼәви әшԛа ԝә бьм. Ӧса жи һун ша бьн, тʼәви әшԛа мьн бьн. Гӧмана мьн сәр Иса Хӧдан һәйә, кӧ әзе зутьрәке Тимотʼейо сәр ԝәда бьшиньм, кӧ дьле мьн рʼьһʼәт бә, гава әз һʼале ԝә пе бьһʼәсьм. Әз дьле хԝәрʼа йәки мина ԝи набиньм, кӧ бона һʼале ԝә мина пешәԝьтики хәм бьхԝә. Чьмки йед майин һәр кәс ль пәй кʼара хԝә кʼәтийә, нә кӧ йа Иса Мәсиһ. Ле һун хԝәха заньн кӧ әԝ йәки чаԝайи щерʼьбанди йә у хԝәха тʼәви мьн Мьзгинидайинерʼа ӧса хьзмәти кьр, чаԝа кӧрʼ баверʼа. Аԝа нета мьн һәйә, кӧ әз әԝи зу бьшиньмә щәм ԝә, гава әз һаш жь һʼал-һʼәԝале хԝә һәбьм. У әз Хӧданда гӧман ьм, кӧ әзе хԝәха жи зутьрәке сәр ԝәда бем. Ле мьн ӧса рʼе терʼа дит, ԝәки әз ԝи бьрайе мә Епафродито бьшиньмә щәм ԝә, йе кӧ тʼәви мьн хәбьти у шәрʼе хԝә кьр, кʼижан ԝә шандьбу кӧ кʼомәк бьда мьн. Әԝи жи гәләки бира ԝә кьрийә у бәр хԝә дькʼәвә, ԝәки ԝә бона нәхԝәшийа ԝи бьһистийә. Рʼасти жи әԝ нәхԝәш кʼәт, чу бәр дәре мьрьне. Ле Хԝәде ль ԝи һатә рʼәʼме, нә кӧ тʼәне ль ԝи, ле ӧса жи ль мьн, ԝәки сәр кʼәдәре кʼәдәр сәр мьнда нәйе. Бона ве йәке әз ԝи бь дьл дьшиньм, ԝәки һун ԝи бьбиньн, диса ша бьн у әз бәр хԝә нәкʼәвьм. Аԝа бона хатьре наве Хӧдан әԝи бь тʼәмамийа әшԛа дьле хԝә ԛәбул кьн. Ԛәдьре йед мина ԝи гьран бьгьрьн, чьмки әԝ бона шьхӧле Мәсиһ һʼәта бәр дәре мьрьне жи чу у дәсте хԝә жь әʼмьре хԝә жи кʼьшанд, ԝәки дәԝса ԝе хьзмәткʼарийа кӧ ԝәйе мьнрʼа бькьра әԝи хԝәха бькьра. Һәйнәсәр хушк-бьрайед мьн, бь Хӧдан ша бьн! Әз ащьз набьм кӧ диса ԝан тьшта ԝәрʼа дьньвисьм, ле әԝ бона бехофийа ԝә йә. Һʼәвза хԝә жь «сә-кучʼька» бькьн, һʼәвза хԝә жь пʼалед хьраб бькьн, һʼәвза хԝә жь ԝан бькьн, йед кӧ ԛальб дьбьрʼьн, сьнәт дькьн. Чьмки сьнәтийа рʼаст йа мә йә, кӧ бь Рʼӧһʼе Хԝәде әм дьһʼәбиньн у бь Мәсиһ Иса дьфьрʼьн. Гӧмана мә нә сәр нав-нишанед ԛальб ә, ле рʼаст бежьм әз дькарьм гӧмана хԝә бьдьмә сәр ԝан нав-нишанед ԛальб. Һәгәр йәк дьфькьрә, кӧ гӧмана ԝи сәр ԛальб һәйә, йа мьн һе зедә һәйә. Рʼожа һʼәйшта сьнәт бумә, жь рʼькʼьнйата Исраел ьм, жь ԛәбила Бьнйамин, ибрани мә у кӧрʼе ибранийа, алийе Ԛанунеда ферьси, мьн кʼәрби хирәте щьвина Хԝәде дьзеранд, һьндава ԝе рʼастбуна кӧ жь Ԛануне те әз беләкʼә бум. Ле чь кӧ кʼара мьн бу, мьн бона Мәсиһ зийан һʼәсаб кьрийә. У сәрда жи әз һәр тьшти зийан һʼәсаб дькьм у һьмбәри ве йәке накьм, кӧ Хӧдане хԝә Мәсиһ Иса нас бькьм, кӧ кʼара сәр кʼара йә! Бона хатьре Ԝи әз жь һәр тьшти ԛәтийам у чаԝа гәмар һʼәсаб дькьм, ԝәки Мәсиһ ԛазьнщ кьм у тʼәви Ԝи бьбьмә йәк. Иди әв рʼастийа мьн, нә кӧ жь ԛанунԛәдандьна мьн те, ле жь Хԝәде йә, йа кӧ һʼиме ԝе жь баԝәрийа сәр Мәсиһ ә. Әз дьхԝазьм Ԝи у ԛәԝата рʼабуна Ԝийә жь мьрьне нас кьм у тʼәви щәфайед Ԝи бьм, бькʼәвьмә һʼале мьрьна Ԝи, кӧ бь аԝайики бькарьбьм бьгьһижьмә рʼабуна мьрийа. Әз набежьм кӧ әз иди гьһиштьмә мәрәме хԝә йан жи иди кʼамьл бумә, ле әз пәй кʼәтьмә, кӧ ԝе хәлате ԛазьнщ кьм, бона кʼижане Мәсиһ Иса әз ԛазьнщ кьрьмә. Хушк-бьрано, әз хԝә һʼәсаб накьм, кӧ мьн әԝ йәк ԛазьнщ кьрийә, ле сәри әԝ ә, кӧ әз тьштед пьшт хԝәва һьшти бир бькьм, хԝә бавежьмә йед пешийа хԝә, дьщәʼдиньм бьгьһижьмә мәрәме хԝә, ԝе ләщхәлата жорчуйине, аԝа готи газийа Хԝәдейә бь сайа Мәсиһ Иса бьстиньм. Аԝа жь мә һʼәмуйа, иди кʼи «гьһишти» йә, гәрәке аһа бьфькьрә. Ле һәгәр тьштәки дьн жи дьле ԝәда һәбә, әԝе йәке жи Хԝәде ԝе бәр ԝә вәкә. Ле тʼәне әм гьһиштьнә чь дәрәще, анәгори ԝе йәке бьжин. Чʼәʼв бьдьнә мьн хушк-бьрано у дина хԝә бьдьнә ԝан, йед кӧ ӧса хԝә хԝәй дькьн, чаԝа кӧ мә бь рʼабун-рʼуньштьна хԝә нишани ԝә кьрийә. Чьмки гәләк жийина хԝәда дьжмьнед хаче Мәсиһ ьн, бона кʼижана мьн гәләк щара ԝәрʼа готийә, ньһа жи бь гьри дьбежьм. Ахьрийа ԝан ӧндабун ә, хԝәдейе ԝан зьке ԝан ә у кьред ԝанә шәрми жи рʼумәта ԝан ә. Әԝана тʼәне сәр тьштед ве дьне дьфькьрьн. Ле ԝәлате мә ль әʼзмана йә, жь кʼӧ әм чʼәʼвньһерʼийа Хьлазкьр, Хӧдан Иса Мәсиһ ьн. Әԝе ԛальбе мәйә тʼәнгәзар бьгӧһезә у бькә мина ԛальбе Хԝәйи хԝәйирʼумәт, бь ԝе ԛәԝата кӧ дькарә һәр тьшти бькә бьндәсте Хԝә. Ньһа хушк-бьрайед мьнә ширьн у һʼәйран, һун ьн шабун у кʼофийа сәре мьн дәлално, йәктийа Хӧданда аһа ԛәԝин бьминьн. Әз һиви жь Әйодийайе дькьм у һиви жь Сьнтихайе дькьм, чаԝа тʼәви Хӧдан йәкбуйи бьра ль һәв бен. Бәле әз һиви жь тә жи дькьм һәвалбаре мьни амьн, тӧ жи али ԝан кʼӧлфәта бькә. Әвана тʼәви мьн хәбата Мьзгинидайинеда худан рʼетьнә, ӧса жи тʼәви Клемес у һәвал-хәбатед мьнә майин, кӧ навед кʼижана кʼьтеба жийинеда ньвисар ьн. Тʼьме пе Хӧдан ша бьн, диса дьбежьм тʼьме ша бьн! Бьра бәрбьһерийа ԝә һʼәму мәрьвава әʼйан бә. Хӧдан незик ә. Бона тʼӧ тьшти хәм нәкьн, ле хԝәстьна ԝә бьра бь дӧа-дьрозга, рʼазибунева тʼәвайи, Хԝәдева әʼйан бә. У әʼдьлайийа Хԝәде кӧ жь һәр һʼьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә. Һәйнәсәр хушк-бьрано, чь кӧ бь рʼастийе йә, чь кӧ бь маԛултийе йә, чь кӧ бь һәԛийе йә, чь кӧ бь һʼәлалийе йә, чь кӧ бь хԝәшийе йә, чь кӧ бь фьрасәтийе йә у һәр тьштед кӧ әʼсьли у лайиԛи ԛәнщготьне нә, сәр ван тьшта бьфькьрьн. Һун жь мьн чь һин бун, ԝә чь станд, чь бьһист у чь дит ԝе йәке бькьн у Хԝәдейе әʼдьлайийе ԝе тʼәви ԝә бә. Әз бь сайа Хӧдан гәләки ша мә, кӧ ԝә пәй һаԛас ԝәхтрʼа әз бир аним, бона мьн хәм хԝар. Бәле ԝә дькьр жи, ле мәщал нәдькʼәтә ԝә. Нә кӧ әз һʼәԝще тьштәки мә кӧ ве йәке ԝәрʼа дьбежьм. Әз һин бумә, кӧ һʼәму һʼалида рʼази бьм. Тʼӧнәбуне заньм, һәбуне заньм, әз һәр алийида у һәр һʼалида сәр ве сӧрʼе вәбумә у һин бумә кӧ рʼази бьм, һәгәр тʼер бьм, һәгәр бьрʼчи, йан һәбунеда бьм йан жи тʼӧнәбунеда. Әз һәр тьшти бь сайа Ԝи дькарьм, Йе кӧ ԛәԝате дьдә мьн. Ле ԝә ԛәнщ кьр, кӧ тәнгасийа мьнда кʼомәк да мьн. У бәле һун жи заньн гәли филипийа, кӧ жь сәре даннасинийа Мьзгинийеда гава әз жь Мәкәдонйайе дәркʼәтьм, тʼӧ щьвине тʼәвкʼарийеда дәсте хԝә дьрежи мьн нәкьр, пештьри ԝә. Чьмки щарәке-дӧда әԝ тьштед мьнрʼа керһати ԝә һʼәта Тʼесалоникийе жи шандьн. Әз нә кӧ тьштәки пʼешкʼеш дьхԝазьм, ле дьхԝазьм кӧ кʼар сәр һʼәсабе ԝәда зедә бә. Мьн һәр тьшт стандийә у нава һәбунеда мә. Әԝ тьштед кӧ ԝә бь дәсте Епафродито мьнрʼа шандьнә әԝ бәси мьн ьн. Әԝ дайина ԝә бинәкә хԝәш ә, һʼәдийа ԛәбул у ль Хԝәде хԝәш ә. У Хԝәдейе мьн ԝе һʼәму кемасийед ԝә пе ԝе хьзна Хԝәйә рʼумәтә жь Мәсиһ Иса тʼьжи кә. Аԝа шькьр жь Хԝәде у Баве мә, һʼәта-һʼәтайе! Амин. Тʼәмамийа щьмәʼта Хԝәдейә пʼара Мәсиһ Иса сьлав кьн. Әԝ бьрайед кӧ тʼәви мьн ьн ль ԝә сьлав дькьн. Тʼәмамийа щьмәʼта Хԝәде ль ԝә сьлав дькә, илаһи әԝед кӧ жь мала Ԛәйсәр ьн. Кʼәрәма Хӧдан Иса Мәсиһ тʼәви рʼӧһʼе ԝә бә. Жь Паԝлосе бь әʼмьре Хԝәде шандийе Мәсиһ Иса у жь Тимотʼейойе бьра, щьмәʼта Хԝәдерʼа, ԝан хушк-бьрайед амьнә йәктийа Мәсиһда кӧ Колосйайеда дьминьн: Дә бьра кʼәрәм у әʼдьлайийа Хԝәдейе Баве мә ль ԝә бә. Әм тʼьме гава бона ԝә дӧа дькьн, шькьрийа хԝә ль Хԝәдейе Баве Хӧдане хԝә Иса Мәсиһ тиньн, чьмки мә бона ԝе баԝәрийа ԝәйә сәр Мәсиһ Иса у ԝе һʼьзкьрьна ԝәйә һьндава тʼәмамийа щьмәʼта Хԝәдеда бьһистийә. Әв йәк жь ве гӧмане те, йа кӧ әʼзманада ԝәрʼа те хԝәйикьрьне, бона кʼижане ԝә бьһистийә, гава пешда хәбәра Мьзгинийейә рʼаст гьһиштә ԝә. У әԝ Мьзгини тʼәмамийа дьнйайеда дьгьһижә у бәр дьдә, чаԝа нава ԝәда жи жь ԝе рʼожеда, гава ԝә бьһист у кʼәрәма Хԝәде тʼәмамийа рʼастийа ԝева нас кьр. Һун ве йәке жь һәвалхӧламе мәйи һʼьзкьри Епафрас һин бунә, кӧ һьндава мәда бәрдәстики Мәсиһи амьн ә. Әԝи бона ԝе һʼьзкьрьна кӧ Рʼӧһʼ дайә ԝә мәрʼа гот. Бона ԝе йәке жи жь ԝе рʼожеда гьрти, гава мә бона ԝә бьһист, мә дәст жь дӧа у һивикьрьне нәкʼьшандийә, ԝәки һун занәбуна әʼмьре Хԝәдеда гьһишти бьн, бь һʼәму сәрԝахти у занәбуна рʼӧһʼанива тʼьжи бьн, ԝәки һун бькарьбьн хԝә ӧса хԝәй кьн, чаԝа лайиԛи Хӧдан ә, һәр алийава ль Ԝи хԝәш бен, һәр ԛәнщикьрьнеда хԝәйибәр бьн, бь занәбуна Хԝәде бьгьһижьн. Бьра һун анәгори тʼәмамийа ԝе ԛәԝата Ԝийә кӧ жь зорайийа Ԝийә хԝәйирʼумәт те ԛәԝат бьн, кӧ һун һәр тьштида бь думька дьреж сәбьр бькьн. Бь әшԛ шькьрийа хԝә бьдьнә Баве, кӧ һун лайиԛи ве йәке кьрьнә, ԝәки һун Пʼадшатийа рʼонайеда тʼәви щьмәʼта Ԝи бьбьнә хԝәйипʼар. Әԝи әм жь һʼӧкӧмәтийа тәʼристанийе хьлаз кьрьн у щи-гӧһасти Пʼадшатийа Кӧрʼе Хԝәйи һʼьзкьри кьрьн, пе кʼижани әм аза бун, аԝа готи мә бахшандьна гӧна станд. Әԝ ә сурәте Хԝәдейе кӧ хӧйа набә, Әԝ Ньхӧрийе сәр һʼәму әʼфьринарʼа. Чьмки бь дәсте Ԝи һәр тьштед ль әʼрд у әʼзмана әʼфьринә, чь кӧ хӧйа дьбьн, чь кӧ хӧйа набьн, һәгәр кʼӧрси йан хӧданти бьн, һәгәр сәрԝерти йан һʼӧкӧмәти бьн, һәр тьшт бь дәсте Ԝи у бона Ԝи әʼфьринә. Әԝ бәри һәр тьшти һәбу у һәр тьшт бь сайа сәре Ԝи щийе хԝәда дьминьн. Әԝ ә сәре Бәдәне, аԝа готи сәре щьвине, дәстпебуна ԝе у ньхӧрийе жь нава мьрийа, ԝәки һәр тьштида Әԝ бьбә Йе пеш. Чьмки ль Хԝәде хԝәш һат, кӧ тʼәмамийа бьнйатʼа хԝәдетийе нава Ԝида бә у бь Ԝи һәр тьшти тʼәви Хԝә ль һәв бинә, һәгәр ль сәр әʼрде бә, йан жи ль әʼзмана бә, бь ԝе хуна Ԝийә сәр хаче рʼьжийайи әʼдьлайийе бькә. Һун жи кӧ ԝәхтәке жь дәст фькьр у кьрьнед хԝәйә хьраб, хәриб у нәйаред Хԝәде бун, ле ньһа Әԝи бь мьрьна Мәсиһә бәдәни һун тʼәви Хԝә ль һәв анин, ԝәки ԝә ль бәр Хԝә пироз, беләкʼә у бесущ бьдә сәкьнандьне. Ле тʼәне гәрәке һун баԝәрийеда һʼимгьрти ԛәԝин бьминьн у жь ԝе гӧмана Мьзгинийе нәкʼәвьн, йа кӧ ԝә бьһист у ԝан һʼәмуйарʼа, йед кӧ бьн пʼәрʼе әʼзменда дьминьн һатә даннасинкьрьне. У әз, Паԝлос бумә бәрдәстийе ԝе. Әз ньһа ван щәфайед хԝәда, кʼижана кӧ бона ԝә дькʼьшиньм, ша мә у ԝан тәнгасийед Мәсиһә майин бь щанийа хԝә бона Бәдәна Ԝи, йа кӧ щьвин ә, тʼәмам дькьм. Әз ԝе щьвинерʼа бумә бәрдәсти, әв йәк алийе Хԝәдеда чаԝа дәйн кʼәтә стуйе мьн, ԝәки готьна Хԝәде тʼәмамийе пева бьгьһиньмә ԝә, әԝ сӧрʼа кӧ жь дәԝр у ԛӧрʼнада вәшарти бу, ле ньһа щьмәʼта Ԝива әʼйан бу. Хԝәде хԝәст ль бәр щьмәʼта Хԝә вәкә, кӧ чь дәԝләмәндтикә хԝәйирʼумәт ве сӧрʼеда бона һʼәму мьләта һәйә. У әԝ сӧрʼ әв ә, кӧ Мәсиһ нава ԝәда йә, аԝа готи һун гӧмана ԝе йәке нә, кӧ пʼара рʼумәте бьн. Әм Ԝи даннасин дькьн, һәр кәси ширәт дькьн, һәр кәси бь һʼәму сәрԝахтийе һин дькьн, ԝәки һәр кәси йәктийа Мәсиһда гьһишти ль бәр Хԝәде бьдьнә сәкьнандьне. Бона ԝе йәке жи әз дьхәбьтьм у анәгори ԝе ԛәԝата Ԝи шәрʼе хԝә дькьм, Йа кӧ нава мьнда бь зорайи йа Хԝә дькә. Әз дьхԝазьм һун заньбьн кӧ әз чь шәрʼи дькьм бона ԝә, йед Лаԝдькйайе у һʼәмуйед кӧ рʼу бь рʼу әз нәдитьмә. Әз аһа дькьм, ԝәки дьлшьдийайи бьн, һʼьзкьрьнеда бьбьн йәк у бьгьһижьнә тʼәмамийа дәԝләмәндтийа фәʼмдарийе. Һьнге әԝе сӧрʼа Хԝәде нас кьн, кӧ Мәсиһ ә. Әԝ ә кʼьлита һʼәму хьзна занәбуне у сәрԝахтийа вәшарти. Әз ве йәке дьбежьм, ԝәки тʼӧ кәс ԝә бь заре ширьн нәхальфинә. Рʼаст ә әз бәдәна хԝәда жь ԝә дур ьм, ле рʼӧһʼе хԝәда тʼәви ԝә мә у әз ша мә кӧ пʼәргалийа ԝәйә тʼьфаԛ у әԝ баԝәрийа ԝәйә сәр Мәсиһ шьдийайи дьбиньм. Аԝа ԝә чаԝа Хӧдан Мәсиһ Иса ԛәбул кьр, ӧса жи йәктийа Ԝида бьжин, рʼаԝ авити, сәр Ԝи чекьри у баԝәрийеда шьдийайи һʼимгьрти бьн, чаԝа һун һатьнә һинкьрьне. У һәр гав бь дьле рʼази шькьрийе бьдьнә Ԝи. Һаш жь хԝә һәбьн, нәбә кӧ йәк бь сәрԝахтийа дәрәԝә пʼучʼ дьле ԝә бькә һесир. Әԝ жь әʼдәтед мәрьва у сьхьред ве дьнйайе тен, нә жь Мәсиһ. Чьмки тʼәмамийа бьнйатʼа Хԝәдетийе нава Мәсиһе бәдәнида йә у һун жи йәктийа Ԝида гьһишти нә, кӧ сәре һʼәму сәрԝертийа у һʼӧкӧмәтийа йә. Йәктийа Ԝида һун бь сьнәта бе дәст жь алийе Мәсиһда дьле хԝәда һатьнә сьнәткьрьне, жь бьнйатʼа хԝәйә гӧнәкʼар һатьнә бьрʼине. Гава һун пе аве һатьнә ньхӧмандьне, тʼәви Ԝи һатьнә дәфьнкьрьне у бь ԝе ньхӧмандьне жи һун тʼәви Ԝи жь мьрьне рʼабун, чьмки ԝә баԝәрийа хԝә бь ԛәԝата Ԝи Хԝәдейи ани, Йе кӧ Мәсиһ жь мьрьне рʼакьр. У һун ԝәхтәке бь рʼӧһʼани нава нәһәԛийа у бьнйатʼа хԝәйә гӧнәкʼарә нәсьнәткьрида мьри бун, ле Хԝәде һун тʼәви Мәсиһ сах кьрьн. Әԝи һʼәму нәһәԛийед мә бахшандьнә мә у әԝ кʼахаза дәйнед мәйә кӧ бь ԛәйдә-ԛануни мьԛабьли мә һатьбу ньвисаре рʼәсит кьр, жь наве һьлда хачва мьх кьр. Бь ԝи хачи Мәсиһ чʼәкед сәрԝер у һʼӧкӧмәтед тәʼристанийе да данине, әԝ чаԝа һесир пәй Хԝә бьрьн, нава кʼома Хԝәйә сәркʼәтида кьрьнә сосрәт. Аԝа гӧһ нәдьнә тʼӧ кәси, йед кӧ бона пьрса хԝарьн, вәхԝарьне йан жи бона пьрса щәжьна у щәжьнед һива ну ӧса жи рʼожед шәмийа, ԝә ломәкʼар дькьн. Әв һʼәму сийа ԝан тьшта нә, йед кӧ ԝе бен, ле рʼасти Мәсиһ ә. Нәбә кӧ йәк дәсте ԝә жь ләщхәлате бькә, йе кӧ бь хԝәньмьзкьрьна һʼьләкʼари, мьлйакʼәт-һʼәбандьне у бь гиробуна дитьнед бәр чʼәʼва мьжул ә. Йед ӧса бь фькьред пʼучʼә мәрьвайи пʼьшька хԝәда дьԝәрьмьн у хԝә иди ль Сери нагьрьн, кӧ Мәсиһ ә. Бь Ԝи тʼәмамийа бәдәне бь пʼәвгьрек у севькава һәвва гьредайи те хԝәйикьрьне у бь гиһандьна Хԝәде дьгьһижә, ль гора хԝәстьна Ԝи. Аԝа һәгәр һун тʼәви Мәсиһ мьрьнә у жь сьхьред ве дьнйайе аза бунә, иди һун чьма мина бәре пәй әʼрф-әʼдәтед ве дьнйайе дьчьн? Һун чьма гӧһ дьдьнә тʼәмийед аһа? Мәсәлә: «Незик нәбә, тәʼм нәкә, ле нәкʼәвә». Әв һʼәму мьжули жи ԝе пʼучʼ бьн һәрʼьн, әвана жь тʼәми у һинкьрьнед мәрьва нә. Фәʼмдари йә кӧ әв әʼрф-әʼдәт чаԝа сәрԝахти хӧйа дьбьн, гава дькьнә стуйе хԝә кӧ мьлйакʼәта бьһʼәбиньн, хԝә ньмьз кьн у бәдәна хԝә бьдьнә щәфе, ле әв һʼәму мьԛабьли бьнйатʼа гӧнәкʼар тʼӧ тьшти накьн. Аԝа кӧ һун тʼәви Мәсиһ жь мьрьне рʼабунә, кӧ ӧса йә ль тьштед жорьн бьгәрʼьн, ԝе дәра кʼӧ Мәсиһ ль мьле Хԝәдейи рʼасте рʼуньшти йә. Сәр тьштед жорьн бьфькьрьн, нә кӧ сәр тьштед ве дьнйайе. Чьмки һун мьрьнә у әʼмьре ԝә тʼәви Мәсиһ щәм Хԝәде вәшарти йә. Гава Мәсиһ, кӧ әʼмьре ԝә йә хӧйа бә, һуне жи һьнге тʼәви Ԝи бь рʼумәта Ԝи хӧйа бьн. Аԝа хԝәстьнед дьле хԝәйә ве дьне бькӧжьн: Бенамусийе, һʼәрамийе, тәме хьраб, дьлһавьжийа хьраб у тьмайе, кӧ пʼутпʼарьсти йә. Әв ьн сәбәб кӧ хәзәба Хԝәде ԝе сәр ԝан мәрьвед кӧ нә гӧрʼа Ԝида нә бе. Ԝә жи ԝәхтәке әԝ тьшт дькьрьн, гава ԝә нава ԝан кьред хьрабда дьжит. Ле ньһа һун ван һʼәмуйа жь хԝә дур хьн: Һерсе, бәрзәԛийе, хьрабийе, тьштед нәбуйи у хәбәред нәщайиз жь дәве хԝә. Һәвдӧрʼа дәрәԝа нәкьн, чьмки ԝә мәрьве кәвьн кьред ԝива жь сәр хԝә ехьстийә у әԝи ну ль хԝә кьрийә. Әԝ мәрьве ну рʼож бь рʼож анәгори сурәте Әʼфьрандаре хԝә те нукьрьне, ԝәки Хԝәде тʼам нас кә. Иди фьрԛи нә нава щьһу у нәщьһуйада һәйә, нә нава сьнәткьри у нәсьнәткьрийада, нә барбар у бәйанийада у нә жи хӧлам у азайада, ле сәри Мәсиһ ә у Мәсиһ ә нава һәр баԝәрмәндида. Аԝа чаԝа щьмәʼта Хԝәдейә бьжартийә пироз у һʼьзкьри, дьлшәԝатийе, ԛәнщийе, мьлуктийе, бәрбьһерийе у сәбьре ль хԝә ԝәргьрьн. Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаԝа Хӧдан бахшандә ԝә, һун жи ӧса бьбахшиньнә һәв. У сәр ван һʼәмуйада һʼьзкьрьне ль хԝә кьн, йа кӧ ван һʼәмуйа бь йәктийа тʼам һәвва гьредьдә. Бьра әʼдьлайийа Мәсиһ сәрԝертийе нет-фькьред ԝә бькә. Бона ԝе әʼдьлайийе һун һатьнә газикьрьне, кӧ бьбьнә мина бәдәнәке. У шекьрдар бьн. Бьра хәбәра Мәсиһ бь дәԝләмәндтийа хԝәва нава ԝәда бьминә. Бь һʼәму сәрԝахтийе ль һәв һин кьн у ширәт кьн, зәбура у һәр щурʼә стьранед рʼӧһʼани бь шькьрдари дьле хԝәда бона Хԝәде бьстьрен. У чь жи кӧ һун бь хәбәра йан кьра бькьн, һәр тьшти бь сайа наве Хӧдан Иса бькьн, бь дәсте Ԝи шькьрийе бьдьнә Бав Хԝәде. Кʼӧлфәтно, гӧрʼа меред хԝәда бьн, чаԝа кӧ ль йәктийа Хӧдан дькʼәвә. Мерно, кʼӧлфәтед хԝә һʼьз бькьн, дьле ԝан нәешиньн. Зарʼно, һәр тьштида гӧрʼа де у баве хԝәда бьн, чьмки әԝ йәк ль Хӧдан хԝәш те. Бавно, һерса зарʼед хԝә рʼанәкьн, ԝәки әԝ бәр хԝә нәкʼәвьн. Хӧламно, һәр тьштида гӧрʼа хԝәйийед хԝәйә ве дьнеда бьн, нә кӧ бь һʼьләкʼарийе хԝә бькьнә дьле мәрьва кӧ бенә кʼьфше, ле бь дьле сах у хофа Хӧдан хӧламтийе бькьн. У чь жи бькьн, бь дьл у щан бькьн, чаԝа бона Хӧдан, нә кӧ бона мәрьва. Заньбьн кӧ һуне жь Хӧдан бенә хәлаткьрьне, ԝаре жорьн бьстиньн. Чьмки Хӧдан Мәсиһрʼа һун хӧламтийе дькьн. Ле йе нәһәԛ ԝе ԝәкә нәһәԛийа хԝә бьстинә, чьмки ль щәм Хԝәде тʼӧ фьрԛи тʼӧнә. Хԝәйино, хӧламед хԝәрʼа һәԛийе у рʼастийе бькьн. Бьзаньбьн кӧ Хԝәйе ԝә жи ль әʼзмен һәйә. Һәр гав хԝә бьдьнә дӧа, дӧакьрьнеда һʼьшйар бьминьн, шькьрийа хԝә ль Хԝәде биньн. Бона мә жи дӧа бькьн, ԝәки Хԝәде дәри бона хәбәрдане ль бәр мә вәкә, кӧ әм сӧрʼа Мәсиһ әʼлам кьн, бона кʼижане жи әз ван ԛәйдада мә. Дӧа бькьн, кӧ әз ԝе ӧса зәлал бьдьмә әʼйанкьрьне, чаԝа борще мьн әԝ гәрәке бе готьне. Һьндава нәбаԝәрада сәрԝахт бьн у дәст бьдьнә бәр ԝәхт. Бьра хәбәрдана ԝә тʼьме мәʼрифәти у хԝекьри бә у бьзаньбьн кӧ чаԝа щайиз ә щаба һәр кәси бьдьн. Бона мьн Тьхико ԝе һәр тьшти ԝәрʼа бежә. Әԝ бьраки дәлал ә, бәрдәстики амьн у һәвал-хӧламәки йәктийа Хӧданда йә. Әз бона ԝе йәке ԝи сәр ԝәда дьшиньм, ԝәки һун һаш жь мә һәбьн у әԝ бь ве йәке дьл бьдә ԝә. Әз ԝи тʼәви бьрайе мәйи амьни дәлал Онисимо дьшиньм, кӧ әԝ жь ԝә йә жи. Әԝана ԝәрʼа ԝе бона һәр тьштед кӧ ль вьр дьԛәԝьмьн бежьн. Әристархойе һәвале мьни кәледа ль ԝә сьлав дькә, ӧса жи Марԛосе пьсмаме Барнабас. (Бона ԝи ԝә тʼәми стандийә. Гава бе щәм ԝә, ԝи ԛәбул кьн.) У Исайе кӧ жерʼа Йусто жи дьбежьн ль ԝә сьлав дькә. Әвана тʼәне жь алийе баԝәрмәндед щьһуйада бона Пʼадшатийа Хԝәде тʼәви шьхӧле мьн ьн у бина мьн бь ԝан дәркʼәтийә. Сьлаве Епафрасе хӧламе Мәсиһ Иса жи ль ԝә һәнә, кӧ әԝ йәк жь ԝә йә. Әԝ һәр гав бь дьл у щан бона ԝә дӧа дькә, ԝәки һун гьһишти мьԛәрʼм сәкьни бьн, тʼәмамийа әʼмьре Хԝәдеда баԝәр бьн. Әз шәʼдә мә, кӧ әԝ гәләки бона ԝә, ӧса жи бона йед Лаԝдькйайе у Һираполиседа хирәт дькә. Луԛайе дохторе дәлал ль ԝә сьлав дькә, ӧса жи Димас. Сьлаве бьдьнә хушк-бьрайед Лаԝдькйайе, Нимфаса хушк у щьвина мала ԝеда. Гава әва нәʼма нава ԝәда бе хԝәндьне, ӧса бькьн кӧ щьвина Лаԝдькйайеда жи бе хԝәндьне у нәʼма лаԝдькийарʼа шанди жи һун бьхуньн. У бежьнә Архипо: «Бона ԝи ԛӧльхе кӧ тә жь Хӧдан стандийә, мьԛати хԝә би, кӧ бини сери». Әва сьлава мьн Паԝлос ә, мьн бь дәсте хԝә ньвиси. Ԛәйдед мьн бир нәкьн! Кʼәрәма Хԝәде ԝәрʼа бә. Жь Паԝлос, Силас у Тимотʼейо, щьвина Тʼесалоникийарʼа, йа кӧ пʼара Бав Хԝәде у Хӧдан Иса Мәсиһ ә: Дә бьра кʼәрәм у әʼдьлайи ль ԝә бә. Әм һәр гав бона ԝә һʼәмуйа рʼазибуна хԝә дьдьнә Хԝәде, нава дӧайед хԝәда тʼьме ԝә бир тиньн. Әм кьред баԝәрийа ԝә, хәбата ԝәйә жь һʼьзкьрьне у сәбьра ԝе гӧмана ԝәйә сәр Хӧдане мә Иса Мәсиһ тиньнә бира хԝә ль бәр Хԝәде, Баве мә. Әм заньн хушк-бьрано, кӧ һун Хԝәдеда һʼьзкьри у бьжарти нә, чьмки Мьзгинидайина мә нә кӧ тʼәне бь хәбәре ԝәрʼа һатә дайине, ле ӧса жи бь ԛәԝате, бь Рʼӧһʼе Пироз у бе шькийе. Һун заньн әм бона ԝә нава ԝәда чаԝа бунә. У ԝә жи чʼәʼв да мә у Хӧдан, нава гәләк тәнгасийада хәбәр ԛәбул кьр, бь әшԛа Рʼӧһʼе Пироз ша бун. Бь ви аԝайи һун бона һʼәму баԝәрмәндед Мәкәдонйайе у Ахайайе бунә нәхшәк. Чьмки әԝ хәбәра дәрһәԛа Хӧданда жь ԝә дәркʼәт бәла бу, нә кӧ тʼәне нава Мәкәдонйайе у Ахайайеда, ле бәле бона ԝе баԝәрийа ԝәйә сәр Хԝәде, һәр дәра бәла буйә, ӧса кӧ иди нә һʼәԝщә йә кӧ әм тьштәки сәрда зедә кьн. Чьмки әԝана бона мә дьбежьн, кӧ ԝә чаԝа әм ԛәбул кьрьнә у чаԝа һун жь пʼута ль Хԝәде вәгәрʼийанә, кӧ хӧламтийе Хԝәдейе сах у рʼастрʼа бькьн у жь әʼзмана һивийа һатьна Кӧрʼе Ԝи бьн, кʼижан кӧ Ԝи жь нава мьрийа рʼакьр, Исайе кӧ мә жь хәзәба те хьлаз дькә. Һун хԝәха жи заньн хушк-бьрано, кӧ әм бадиһәԝа нәһатьнә щәм ԝә. Мә пешийе Филипйайеда щәфа кʼьшандьбу у һатьбунә рʼәзилкьрьне, чаԝа һун заньн, паше мә бь ԛәԝата Хԝәдейе хԝә диса тӧрӧш кьр, нава ԝе мьԛабьлийа гьранда Мьзгинийа Хԝәде ԝәрʼа бежьн. Ве һивикьрьна мәда нә тьштәки хельф һәйә, нә һʼәрами у нә жи фелбази. Ле чаԝа Хԝәде әм лайиԛи ве йәке кьрьн у Мьзгинидайин спартә мә, әм ӧса хәбәр дьдьн. Әм ӧса накьн кӧ ль мәрьва хԝәш бен, ле ль Хԝәде, Йе кӧ дьле мә әʼнәнә дькә. Мә готьнед хԝәда һʼьләкʼари нәкьрьн, чаԝа һун заньн, нә жи пәй тьмайа тʼәркәльпаскьри кʼәтьн. Хԝәде шәʼдә йә! Нә жи әм наве хԝә гәрʼийан, нә нава ԝәда, нә нава йед майинда, бәле мә дькарьбу чаԝа шандийед Мәсиһ сәр ԝә бьбуна баргьрани. Ле бәле әм нава ԝәда рʼунәрм бунә, чаԝа кәваник кӧ зарʼед хԝәрʼа дьрʼьщьфә. Ӧса жи дьле мә сәр ԝә дьшәԝьти, һʼәта кӧ мә дьхԝәст нә кӧ тʼәне Мьзгинийа Хԝәде бьда ԝә, ле әʼмьре хԝә жи, чьмки һун бьбунә дәлалийед мә. Әԝ хәбат у щәфе мә те бира ԝә хушк-бьрано? Әм шәв у рʼож дьхәбьтин, кӧ сәр ԝә тʼӧ кәси нәбьнә баргьрани, гава мә Мьзгинийа Хԝәде ԝәрʼа даннасин кьр. Һун хԝәха шәʼдә нә, ӧса жи Хԝәде, кӧ әм тʼәви ԝә баԝәрмәнда чаԝа һʼәлал, рʼаст у беԛӧсур рʼабун-рʼуньштьн. Һун пʼак заньн әм һьндава ԝә һәр кәсида ӧса бунә, чаԝа бав һьндава зарʼед хԝәда. Мә дьл дьда ԝә, ль бәр дьле ԝәда дьһатьн у лава жь ԝә дькьр, кӧ һун лайиԛи Ԝи Хԝәдейи бьмәшьн, Йе кӧ һун гази Пʼадшати у рʼумәта Хԝә кьрьнә. У бона ве йәке жи әм һәр гав рʼазибуне дьдьнә Хԝәде: Гава ԝә жь мә хәбәра Хԝәде бьһист, ԝә нә кӧ чаԝа хәбәра мәрьвайе, ле чаԝа хәбәра Хԝәде ԛәбул кьр, рʼаст жи ӧса йә, кӧ нава ԝә баԝәрмәндада Йа хԝә дькә. Чьмки һун жи хушк-бьрано, кʼәтьнә һʼале ԝан щьвинед Хԝәдейә пʼара Мәсиһ Иса, кӧ ль Щьһустане нә, ԝә жи хут әԝ щәфа дәсте мьләте хԝәда кʼьшандьн, чаԝа ԝан жи дәсте ԝан щьһуйада, йед кӧ һьн Хӧдан Иса, һьн жи пʼехәмбәр кӧштьн у әм жи зерандьн. Әвана ль Хԝәде хԝәш найен у мьԛабьли дьне-әʼламе нә! Вана дькьр, ԝәки әм нәщьһуйарʼа хәбәр нәдьн, кӧ әԝ хьлаз бьн. Бь ве йәке һәр гав кʼаса хԝәйә гӧна дадьгьртьн у һәйнәсәр хәзәб анинә сәре хԝә. Ле әм хушк-бьрано, рʼаст ә дәмәкә кьн рʼу бь рʼу жь һәв хәриб кʼәтьн, (ле нә бь дьла), әм һе кʼәтьнә дәмана дитьна рʼуйе ԝә. Мә хԝәст әм бьһатана щәм ԝә, мьн Паԝлос хԝәха жи хԝәст чәнд щара бем, ле мирещьн рʼе нәда мә. Бәле кʼи йә гӧмана мә, йан жи шабун, йан әԝ кʼофийа әм пе дьфьрʼьн, бәр Хӧдане мә Иса, ԝи зәмане һатьна Ԝида, һәгәр нә һун? Рʼаст һун ьн әԝ рʼуспити у шабуна мә. Һәйнәсәр, мә иди нькарьбу сәбьр бькьра. Әм шеԝьрин, кӧ әм тʼәне бьминьнә Атʼинайе у Тимотʼейойе бьрайе мә, йе кӧ тʼәви мә бона Хԝәде, Мьзгинийа Мәсиһда дьхәбьтә, сәр ԝәда бьшиньн, кӧ баԝәрийа ԝә ԛәԝин кә у дьл бьдә ԝә, ԝәки ван тәнгасийада тʼӧ кәс жь ԝә нәлькʼӧмә. Чьмки һун хԝәха заньн кӧ әв йәкана бона мә нә. Бәле гава әм щәм ԝә бун, мә һе һьнгеда ԝәрʼа дьгот, кӧ әме рʼасти тәнгасийа бен у ӧса жи бу, чаԝа һун заньн. Бона ве йәке мьн иди сәбьр нәкьр, Тимотʼейо шанд, ԝәки әз һаш жь баԝәрийа ԝә һәбьм, кӧ нәбә Щерʼьбандкьр һун щерʼьбандьбьн у щәфе мә дәйа һәрʼә. Ле ньһа Тимотʼейо жь щәм ԝә сәр мәда вәгәрʼийа у мьзгинийа баԝәри у һʼьзкьрьна ԝә да мә. Ԝи гот, кӧ ԝә әм хԝәш бира хԝәда хԝәй кьрьнә у һʼәйра мәда нә, чаԝа әм жи йа ԝәда. Аԝа хушк-бьрано, нава һʼәму тәʼли у тәнгийед мәда бь әшԛи ԝе баԝәрийа ԝә бин һатә бәр мә, чьмки гава һун рʼийа Хӧданда мьԛәрʼм дьминьн, бин жи те бәр мә. Әм чь рʼазибуне дькарьн бьдьнә Хԝәде бона ԝә у ԝан һʼәму шабуна, кӧ әм бона ԝә ль бәр Хԝәдейе хԝә ша дьбьн? Әм шәв у рʼож бь дьл у щан рʼәща дькьн, кӧ рʼуйе ԝә бьбиньн у кемасийа баԝәрийа ԝә тʼьжи кьн. Дә бьра Хԝәде, Баве мә хԝәха у Хӧдане мә Иса рʼийа мә рʼаст кә, әм бенә щәм ԝә. Бьра Хӧдан һʼьзкьрьна ԝә һьндава һәв у һʼәмуйед майинда бьгьһинә у зедә кә, чаԝа йа мә жи һьндава ԝәда һәйә. Дә бьра Әԝ дьле ԝә бьшьдинә, ԝәки һун пирозийеда беԛӧсур бьн, ль бәр Хԝәде Баве мә, ԝәхте һатьна Хӧдане мә Иса, һʼәму пирозед Хԝәва тʼәвайи. Һәйнәсәр хушк-бьрано, әм бь наве Хӧдан Иса һиви у рʼәща жь ԝә дькьн, кӧ һун чаԝа жь мә һин бун ӧса бьмәшьн, кӧ ль Хԝәде хԝәш бен, чаԝа дьчьн жи у ԝе йәкеда һе пешда һәрʼьн. Чьмки һун заньн мә бь сайа Хӧдан Иса чь тʼәми данә ԝә. Хԝәстьна Хԝәде әԝ ә, кӧ һун һʼәлал бьн, жь ԛавийе дур бьн. Бьра жь ԝә һәр кәс жи заньбә ԛальбе хԝә һʼәлал у бь намуси хԝәй кә, нә бь хԝәстьна тәме хьраб, мина пʼутпʼарьста, йед кӧ Хԝәде нас накьн. Бьра нәбә кӧ йәк ԝе йәкеда жь әʼсьлтийе дәре у намуса хушк-бьрарʼа бьлизә. Хӧдане бона ван һʼәму тьшта һʼәйфе жь мәрьва һьлдә, чаԝа мә әв йәк пешда ԝәрʼа гот у бь мәʼрифәти тʼәми ль ԝә кьр. Чьмки Хԝәде гази мә ль һʼәрамийе нәкьрийә, ле ль һʼәлалийе. Аԝа кʼи ве тʼәмийа һʼәлалийе тʼәхсир дькә әԝ мерьв тʼәхсир накә, ле Хԝәде, Йе кӧ Рʼӧһʼе Хԝәйи Пироз жи дьдә ԝә. Ле бона һʼьзкьрьна һьндава хушк-бьрада, тьштәки мә тʼӧнә ԝәрʼа бьньвисьн, чьмки һун хԝәха жь Хԝәде һин бунә, кӧ һәв һʼьз бькьн. У һун иди ԝе һʼьзкьрьне һьндава һʼәму хушк-бьрайед тʼәмамийа Мәкәдонйайеда дьдьнә кʼьфше. Ле әм һиви жь ԝә дькьн хушк-бьрано, кӧ һун ԝе йәкеда һе пешда һәрʼьн. Бькьн кӧ һун гьран-сәԛьрʼи бьжин у жь ԝә һәр кәс шьхӧле хԝәва мьжул бә у бь дәсте хԝә бьхәбьтә, чаԝа мә тʼәми ль ԝә кьр, ԝәки пʼәргалийа ԝә тʼәви йед дәрва мәʼрифәти бә у һун һʼәԝще тьштәки нәбьн. Хушк-бьрано, әм дьхԝазьн кӧ һун дәрһәԛа мьрийада заньбьн, ԝәки бәр хԝә нәкʼәвьн, мина әԝед бе гӧман. Аԝа һәгәр әм баԝәр дькьн, кӧ Иса мьр у жь мьрьне рʼабу, ӧса жи Хԝәде ԝе мьрийед сәр баԝәрийа Иса тʼәви Ԝи вәгәрʼинә. Әм ве йәке бь готьна Хӧдан ԝәрʼа дьбежьн: Әм кӧ һʼәта һатьна Хӧдан бьжин сах бьминьн, тʼӧ щар пешийа мьрийа накʼәвьн. Хӧдане хԝәха бь әʼламәтикә фәрмани, бь дәнге сәрәкмьлйакʼәт у лехьстьна борʼийа Хԝәде жь әʼзмен бе хԝаре у әԝ мьрийед кӧ баԝәрийа хԝә Мәсиһ анибун, ԝе пешийе жь мьрьне рʼабьн, паше, әм кӧ сах манә, тʼәви ԝан әʼԝрава бенә рʼаһьштьне, һәԝеда рʼасти Хӧдан бен у бь ви аԝайи әме һʼәта-һʼәтайе тʼәви Хӧдан бьн. Аԝа бь ван хәбәра бәр дьле һәвда ԝәрьн. Ле бона ԝәхт у зәмана хушк-бьрано, нә һʼәԝщә йә әм тьштәки ԝәрʼа бьньвисьн, чьмки һун хԝәха пʼак заньн кӧ Рʼожа Хӧдан ԝе мина дьзе шәве бе. Гава бежьн: «Дьне сәԛьрʼи у бехофи йә», һьнге хәзәбе ньшкева сәр ԝанда бе, мина еша кʼӧлфәта һʼәмлә у ԝе нькарьбьн ԛәт же хьлаз бьн. Ле һун хушк-бьрано, тәʼрийеда ниньн кӧ әԝ Рʼож мина дьзәки сәр ԝәда бьгьрә. Һун һʼәму жи зарʼед рʼонайийе нә у зарʼед рʼоже нә. Әм нә йед шәве нә, нә жи йед тәʼрийе нә. Аԝа әм хәԝеда нәминьн мина йед майин, ле һʼьшйар у сәрхԝә бьн. Чьмки әԝед кӧ рʼадьзен, шәве рʼадьзен у әԝед кӧ сәрхԝәш дьбьн, шәве сәрхԝәш дьбьн. Ле әм кӧ йед рʼоже нә, гәрәке сәрхԝә бьн: Зьрьһʼа баԝәрийе у һʼьзкьрьне ль хԝә ԝәргьрьн, кʼӧмзьрьһʼе гӧмана хьлазбуне жи бьдьнә сәре хԝә. Хԝәде әм бона хәзәбе кʼьфш нәкьрьнә, ле ԝәки хьлазбуне бьстиньн, бь дәсте Хӧдане мә Иса Мәсиһ. Әԝ бона мә мьр, ԝәки әм һәгәр сах бьн йан мьри бьн, тʼәви Ԝи бьжин. Бона ве йәке дьл бьдьнә һәв у аликʼарийа һәвдӧ бькьн, чаԝа һун дькьн жи. Әм һиви жь ԝә дькьн хушк-бьрано, ԛәдьре ԝан бьгьрьн, йед кӧ нава ԝәда дьхәбьтьн, жийина хԝәденасийеда сәʼвитийе ль ԝә дькьн у ԝә ширәт дькьн. Ԛәдьре ԝана бь һʼьзкьрьне һе бьльнд бьгьрьн бона шьхӧле ԝан. Һәврʼа тʼьфаԛ бьн. Әм һиви жь ԝә дькьн хушк-бьрано, йед бепʼәргалә бехирәт ширәт кьн, дьл бьдьнә бәр тьрсонәка, кери кʼәтийа ԝәрьн, һьндава һʼәмуйада сәбьра ԝә һәбә. Һаш жь хԝә һәбьн, нәбә кӧ йәк жь бәр хьрабийева хьрабийе бькә, ле һәр гав сәр нета ԛәнщийе бьн, һьн бона һәв, һьн жи бона һʼәмуйа. Һәр тʼьм ша бьн, һәр гав дӧа бькьн, һәр тьштида рʼазибуне бьдьн, чьмки әв ә хԝәстьна Хԝәде бь сайа Мәсиһ Иса бона ԝә. Рʼӧһʼе Пироз нәтәмьриньн. Пʼехәмбәртийа берʼумәт нәкьн. Һәр тьшти бьщерʼьбиньн, тьштед ԛәнщ ԛәԝин бьгьрьн. Жь һәр щурʼә хьрабийе дур кʼәвьн. Дә бьра Хԝәдейе кӧ әʼдьлайийе дьдә, Хԝәха ԝә лап бӧһӧрти-жьбарә кә, тʼәмамийа рʼӧһʼ, ньфус у ԛальбе ԝә беԛӧсур хԝәй кә, һʼәта һатьна Хӧдане мә Иса Мәсиһ. Амьн ә Әԝи кӧ гази ԝә дькә, ԝе мийасәр кә жи. Хушк-бьрано, бона мә жи дӧа бькьн. Сьлаве бьдьнә һʼәму хушк-бьра, бь рʼамусана шире һʼәлал. Әз ль бәр Хӧдан дькьмә дәйне стуйе ԝә, кӧ һун ве нәʼме бәр һʼәму хушк-бьра бьхуньн. Кʼәрәма Хӧдане мә Иса Мәсиһ ԝәрʼа бә. Жь Паԝлос, Силас у Тимотʼейо, щьвина Тʼесалоникийарʼа, йа кӧ пʼара Баве мә Хԝәде у Хӧдан Иса Мәсиһ ә: Дә бьра кʼәрәм у әʼдьлайийа Хԝәде, Баве мә у Хӧдан Иса Мәсиһ ль ԝә бә. Әм дәйндар ьн, кӧ һәр гав бона ԝә рʼазибуне бьдьнә Хԝәде хушк-бьрано у әв йәк һәԛ ә жи, чьмки баԝәрийа ԝә рʼьнд дьгьһижә у һʼьзкьрьна ԝә һьндава һәвда зедә дьбә. Ләма әм хԝәха жи нава щьвинед Хԝәдеда пе ԝә дьфьрʼьн, бона сәбьр у баԝәрийа ԝә, чьмки һун ԝан һʼәму зерандьн у тәнгасийа дькʼьшиньн, йед кӧ тенә сәре ԝә. Әв йәк избат дькә, кӧ диԝана Хԝәде рʼаст ә. У бь ви аԝайи һуне һежайи Пʼадшатийа Хԝәде бьн, бона кʼижане жи һун ԝан тәʼли-тәнгийа дьбиньн. Бәле әв ә һәԛийа Хԝәде: Йед тәнгасийе дьдьнә ԝә, Хԝәде жи ԝе ԝан бьдә тәнгасийе у йед жь ԝә тәнгасийеда нә, тʼәви мә бьдә һесакьрьне. Әве аһа бә, гава Хӧдан Иса тʼәви мьлйакʼәтед Хԝәйә зор жь әʼзменва бь кʼура егьр хӧйа бә, ԝәки һʼәйфе жь ԝан һьлдә, йед кӧ нахԝазьн Хԝәде нас кьн у гӧрʼа Мьзгинийа Хӧдане мә Иса накьн. Әԝе бәла хԝә жь ԝеранбуна һʼәта-һʼәтайе бьбиньн, жь һʼьзура Хӧдан у рʼумәта ԛәԝата Ԝи бенә авитьне, гава ԝе Рʼоже Әԝ бе, ԝәки нава щьмәʼта Хԝәда бе пәсьндайине у һʼәму баԝәрмәнд ԝе һʼәйр-һʼӧжмәкʼар бьн. Һуне жи нава ԝанда бьн, чьмки ԝә баԝәрийа хԝә шәʼдәтийа мә ани. Бона ве йәке әм һәр гав бона ԝә дӧа дькьн, кӧ Хԝәдейе мә, ԝә һежайи ԝе газийе кә у һʼәму нет-мәрәмед ԝәйә ԛәнщ у кьрьнед ԝәйә жь баԝәрийе бь ԛәԝате бинә сери. Бь ви аԝайи ԝе пәсьне наве Хӧдане мә Иса ль нава ԝәда бе дайине у һуне жи нава Ԝида бенә пәсьндайине, ль гора кʼәрәма Хԝәдейе мә у Хӧдан Иса Мәсиһ. Әм һиви жь ԝә дькьн хушк-бьрано, бона һатьна Хӧдане мә Иса Мәсиһ у тʼопбуна мәйә щәм Ԝи, һун фькьре хԝәда зу шаш нәбьн у хԝә ӧнда нәкьн, нә пе пʼехәмбәртийе, нә пе готьне, нә жи пе нәʼма йанчийә мә ньвисибә: «Ва йә Рʼожа Хӧдан иди һатийә». Бьра тʼӧ кәс ԝә тʼӧ тьштива нәхапинә, чьмки әԝ Рʼож найе, һʼәта кӧ рʼабәрибун пешда нәйе у әԝ Мәрьве Нәһәԛийейи пʼара щәʼньме кʼьфш нәбә. Әԝе мьԛабьли һәр тьштед кӧ хԝәде тенә һʼәсабе йан тенә һʼәбандьне бьсәкьнә у хԝә сәр һәр тьштирʼа бьгьрә, һʼәта кӧ пʼарьстгәһа Хԝәдеда жи ԝе рʼуне у әʼлам кә, кӧ хԝәха Хԝәде йә. Гәло найе бира ԝә, гава әзи һе щәм ԝә бум, мьн әв тьштана ԝәрʼа дьготьн? У һун заньн кӧ ньһа чь наһелә әԝ хӧйа бә, ԝәки әԝ ԝәхте кʼьфшкьрида хӧйа бә. Чьмки Сӧрʼа Нәһәԛийе иди йа хԝә дькә, ле әԝе кӧ ньһа наһелә, ԝе нәһелә һʼәта кӧ хԝәха жь наве бе һьлдане. У паше Әԝе Нәһәԛийе ԝе кʼьфш бә, кӧ Хӧдан Исайе бь һӧлма дәве Хԝә ԝи ӧнда кә у бь хӧйабуна шәԝԛа Хԝәва ԝи кʼӧта кә. Һатьна Йе Нәһәԛийе ԝе бь ԛәԝата мирещьн бә, һʼәта һʼӧнӧре ԝи һәбә ԝе нишан у кʼәрәмәтед дәрәԝ бькә у йед кӧ ӧнда дьбьн бь һәр щурʼә нәһәԛийа бьхапинә. Әԝана ӧнда дьбьн, чьмки ԝана рʼасти һʼьз нәкьр у ԛәбул нәкьр кӧ хьлаз бьн. Ләма жи Хԝәде хальфандьнәкә зор сәр ԝанда дьшинә, кӧ әԝ дәрәԝийе баԝәр бькьн, ԝәки диԝана ԝан һәр кәси бьбә, йед кӧ рʼасти баԝәр нәкьрьнә, ле кʼефа ԝан нәһәԛийерʼа һат. Ле әм гәрәке һәр тʼьм бона ԝә жь Хԝәде рʼази бьн, хушк-бьрайед жь алийе Хӧданда һʼьзкьри. Чьмки Хԝәде сәре-серида һун бьжартьн, ԝәки бь Рʼӧһʼ бенә бӧһӧрти-жьбарәкьрьне, рʼастийе баԝәр бькьн у хьлаз бьн. Ԝе йәкерʼа Әԝи бь Мьзгинидайина мә гази ԝә кьр, кӧ бь ви аԝайи һун рʼумәта Хӧдане мә Иса Мәсиһ бьстиньн. Аԝа хушк-бьрано, ньг бьдьн әʼрде у ԝан рʼаԝ-рʼьзьма ԛәԝин бьгьрьн, йед кӧ һун һин бунә, һәгәр бь готьнед мә бә, йан бь нәʼмед мә бә. Дә Хӧдане мә Иса Мәсиһ Хԝәха у Баве мә Хԝәде, Йе кӧ әм һʼьз кьрьн у бь кʼәрәме дьлдайинәкә һʼәта-һʼәтайе у гӧманәкә ԛәнщ да мә, бьра дьл бьдә ԝә у ԝә нава һʼәму кьра у готьнед ԛәнщда бьшьдинә. Һәйнәсәр хушк-бьрано, бона мә дӧа бькьн, ԝәки хәбәра Хӧдан зу пешда һәрʼә у бе пәсьндайине, чаԝа нава ԝәда бу. Дӧа бькьн, ԝәки әм жь мәрьвед нәһәԛ у хьраб хьлаз бьн, чьмки һәр кәс Мьзгинийеда амьн нинә. Ле Хӧдан Хԝәха амьн ә, ԝе ԝә бьшьдинә у жь йе Хьраб хԝәй кә. Әм бь сайа Хӧдан ԝәда гӧман ьн, кӧ мә чь тʼәми данә ԝә, һун дьԛәдиньн у һуне бьԛәдиньн жи. Дә бьра Хӧдан мела ԝә бьдә сәр һʼьзкьрьна Хԝәде у сәбьра Мәсиһ. Әм тʼәми ль ԝә дькьн хушк-бьрано, бь наве Хӧдане хԝә Иса Мәсиһ, кӧ һун хԝә жь һәр хушк-бьрайе бепʼәргалә бехирәт дур бьгьрьн, йед кӧ ԝан рʼаԝ-рʼьзьмед мә данә ԝә наԛәдиньн. Һун хԝәха заньн кӧ гәрәке һун чʼәʼв бьдьнә мә, чьмки әм нава ԝәда бепʼәргал-бехирәт нибунә, нә жи нане тʼӧ кәси бе һәԛ хԝарийә, ле бь худана әʼнийа хԝә шәв у рʼож дьхәбьтин, дьчәрчьрин, ԝәки сәр ԝә тʼӧ кәси нәбьнә баргьрани. Нә кӧ изьна мә тʼӧнәбу, ле мә нәхше хԝә нишани ԝә кьр, кӧ һун чʼәʼв бьдьнә мә. Чьмки гава әм һе щәм ԝә бун жи, мә әв йәк ԝәрʼа дьгот: «Кʼи нахԝазә бьхәбьтә, бьра нәхԝә жи». Бәле әм дьбьһен кӧ нава ԝәда һьнәк бепʼәргал-бехирәт дьжин, нә шьхӧлкʼаре хԝә нә, ле тʼәви шьхӧле хәлԛе дьбьн. Әм бь наве Хӧдан Иса Мәсиһ тʼәми у һиви жь йед ӧса дькьн, кӧ бь мәʼрифәти бьхәбьтьн у нане хԝә бьхԝьн. Ле һун хушк-бьрано, жь ԛәнщикьрьне нәԝәстьн. Һәгәр йәк гӧһдарийа готьнед мәйә ве нәʼмеда нәкә, ԝи рʼачʼәʼв кьн у һәвалтийе ԝирʼа нәкьн, кӧ шәрм бькә. Ле нәбә кӧ бь чʼәʼве хьраб ль ԝи бьньһерʼьн, ле мина бьра ширәт кьн. Дә бьра Хӧдане әʼдьлайийе хԝәха, һәр гав, һәр алийива әʼдьлайийе бьдә ԝә. Хӧдан тʼәви ԝә һʼәмуйа бә. Әва сьлава бь дәсте мьн Паԝлос ә, чаԝа нишана һʼәму нәʼмед мьн. Әз аһа дьньвисьм. Кʼәрәма Хӧдане мә Иса Мәсиһ тʼәви ԝә һʼәмуйа бә. Жь Паԝлос, шандийе Мәсиһ Иса, бь әʼмьре Хԝәдейе Хьлазкьре мә у Мәсиһ Исайе гӧмана мә, Тимотʼейойе лаԝе хԝәйи баԝәрийедайи һәԛ-һʼәлалрʼа: Дә бьра рʼәʼм, кʼәрәм у әʼдьлайи жь Бав Хԝәде у Мәсиһ Исайе Хӧдане мә ль тә бә. Гава әз дьчумә Мәкәдонйайе, мьн һиви жь тә кьр, кӧ ль Әфәсе бьмини, ԝәки тʼәмийе бьди чәнд кәса, кӧ һинкьрьна нәрʼаст һин нәкьн у гӧһ нәдьнә чʼьловискийа у рʼәԛәма сьлсьләта кӧ хьлазийа ԝан тʼӧнә. Әв йәк һе шәрʼ-дәʼԝа тʼәврʼадькә, нә кӧ тʼьвдира Хԝәдейә кӧ бь баԝәрийе те наскьрьне мийасәр дькә. Сәре тʼәмийе һʼьзкьрьн ә, кӧ жь дьле сах, бь исафа рʼьһʼәт у жь баԝәрийа бедӧрʼути йә. Һьнәк же дагәрʼийан у пәй готьнед пʼучʼ кʼәтьн. Дьхԝазьн бьбьнә дәрсдаред Ԛануне, ле әԝ хԝәха жи ньзаньн чь дьбежьн, нә жи ԝан тьштед кӧ дьдьнә зора хԝә фәʼм дькьн. Әм заньн кӧ Ԛанун ԛәнщ ә, һәгәр йәк бь ԛануни ԝе бьԛәдинә. Бәле фәʼмдари йә, кӧ ԛанун бона рʼаста найе дайине, ле бона нәһәԛ у сәрһʼьшка, бона нәпʼак у гӧнәкʼара, бона мьрʼдарʼ у һʼәрама, бона бавкӧж у декӧжа, бона меркӧжа, бенамуса, кʼона, дьзед мәрийа, дәрәԝин у шәʼдәдәрәԝа йә у бона һәр кәсед дьнә кӧ тьштед мьԛабьли һинкьрьна сахләм дькьн. Әв һинкьрьн ль Мьзгинийа хԝәйирʼумәтә Хԝәдейе һежайи шькьрийе дьгьрә, кʼижан ль мьн һатийә спартьне. Әз жь Мәсиһ Исайе Хӧдане мә рʼази мә, Йе кӧ ԛәԝат да мьн, әз амьн һʼәсаб кьрьм, данимә сәр ве хьзмәткʼарийе. Мьн жи бәре Әԝ беһӧрмәт дькьр, дьзеранд у нәйарти ль Ԝи дькьр, ле рʼәʼм ль мьн бу, чьмки мьн нәбаԝәрийеда бь нәзанийа хԝә кьрьн. Кʼәрәма Хӧдане мә пʼьрʼ сәр мьнда рʼьжийа, тʼәви баԝәри у һʼьзкьрьна Мәсиһ Иса. Ве готьнеда хельф тʼӧнә у лап һежайи ԛәбулкьрьне йә, кӧ: «Мәсиһ Иса һатә дьне, гӧнәкʼара хьлаз бькә», сәре кʼижана әз ьм. Ле бона ԝе йәке рʼәʼм ль мьн бу, ԝәки Мәсиһ Иса сәр мьн, чаԝа сәре гӧнәкʼара тʼәмамийа сәбьра Хԝә бьдә кʼьфше, чаԝа нәхшәк бона ԝан, йед кӧ ԝе баԝәрийа хԝә Ԝи биньн, жийина һʼәта-һʼәтайе бьстиньн. Аԝа бьра ԝи Пʼадшайе һʼәта-һʼәтайейи нәмьри у нәхӧйа, Хԝәдейе бешьрики-беһәвалрʼа һӧрмәт у рʼумәт бә һʼәта-һʼәтайе! Амин. Ве тʼәмийе әз дьдьмә тә, лаԝе мьн Тимотʼейо, ль гора ԝан пʼехәмбәртийед кӧ пешда бона тә бун, ԝәки тӧ бь ԝан шәрʼе хԝәйи ԛәнщ бьки, дәст жь баԝәрийе нәкә у исафа хԝә рʼьһʼәт хԝәй кә. Һьнәка әв йәк жь хԝә дур хьстьнә, дәԝра баԝәрийа хԝә ԝәлгәрʼандьн. Жь ԝан бун, Һумәнайо у Скәндәр, йед кӧ мьн данә дәсте мирещьн, ԝәки әԝ һин бьн рʼастийа Хԝәде беһӧрмәт нәкьн. Аԝа әз һиви дькьм, бәри һәр тьшти бона һʼәму мәрьва дӧа бькьн, рʼәща кьн, лава кьн, рʼазибуне бьдьн, ӧса жи бона пʼадша у һʼәму сәрԝера, ԝәки әм жийинәкә әʼдьл у сәԛьрʼи дәрбаз кьн, бь тʼәмамийа хԝәденасийе у маԛулийе. Ль бәр Хԝәдейе Хьлазкьре мә әв ә ԛәнщ у ль Ԝи хԝәш, кӧ дьхԝазә һʼәму мәрьв хьлаз бьн у рʼастийе нас кьн. Чьмки Хԝәдек һәйә у нава Хԝәде у мәрьвада жи навчетик, Мәсиһ Исайе Мәрьв, кӧ Хԝә жь бәр кʼьрʼина гьшкава да. Әв йәк рʼаст ԝәхтда бу избати, кӧ Хԝәде дьхԝазә һʼәму хьлаз бьн. У бона ве йәке әз даннасинкьр у шанди һатьмә кʼьфшкьрьне, (әз рʼаст дьбежьм, дәрәԝа накьм), нәщьһуйарʼа бумә дәрсдаре баԝәрийе у рʼастийе. Аԝа әз дьхԝазьм кӧ мер һәр дәра дәстед хԝәйә һʼәлал бьльнд кьн, бе һерс у бе шәрʼ-дәʼԝ дӧа бькьн. Ӧса жи бьра кʼӧлфәт бь кʼьнщед лайиԛ, шәрме у бәрбьһерийе хԝә бьхәмьлиньн, нә кӧ бь гӧли-гӧжанга, йан зерʼ, йан бь дӧрʼа, йан жи бь кʼьнщед бьһа, ле бь кьред ԛәнщ, чаԝа ль ԝан кʼӧлфәта дькʼәвә, йед кӧ наве хԝәденасийе һьлданә сәр хԝә. Бьра кʼӧлфәт кәрʼ һин бә, бь тʼәмамийа гӧһдарийе. Әз изьне надьмә кʼӧлфәт, кӧ һин бькә, нә жи һʼӧкӧми сәр мер бькә, ле бьра дәнг нәкә. Чьмки пешийе Адәм хӧльԛи, паше Һеԝа у Адәм нәхапийа, ле жьн хапийа у нәһәԛи кьр. Ле жьн һʼале зарʼанинеда жи ԝе хьлаз бә, һәгәр бь бәрбьһерийе нава баԝәрийе, һʼьзкьрьне у паԛьжайийеда бьминьн. Ве готьнеда хельф тʼӧнә: Һәгәр тәме йәки ль сәрԝертийе һәйә, әԝ шьхӧләки ԛәнщ дьхԝазә. Аԝа сәрԝер гәрәке беԛӧсур бә, мере жьнәке бә, хԝәгьрти, аԛьлда гьран, маԛул, меванһʼьз, һинкьрьнеда сәрхԝә бә, нә сәрхԝәш, нә сьрʼтук, ле бәрбьһер, нә шәрʼуд, нә пʼәрәһʼьз. Бьра малхетийе рʼьнд ль мала хԝә бькә, зарʼед хԝә гӧрʼа хԝәда һәр алийава маԛулийеда мәзьн кә. (Чьмки һәгәр йәк ньзанә малхетийе ль мала хԝә бькә, ԝе чаԝа бькарьбә щьвина Хԝәде хԝәй кә?) Бьра нә жи баԝәрмәнде ну бә, кӧ нәбә кʼӧбар бә, диԝана ԝи жи мина йа мирещьн бе кьрьне. Ԝәки дьн жи гәрәке ԛәдьре ԝи щәм йед жь щьвине дәр жи һәбә, кӧ нәбә бе рʼәзилкьрьне у бькʼәвә тʼәләка мирещьн. Ӧса жи бьра бәрдәсти гьран бьн, хәбәрданеда дӧрʼутийе нәкьн, хԝә нәдьнә шәраве, пәй кʼәда һʼәрам нәкʼәвьн. Рʼастийа баԝәрийейә әʼйанбуйи бь исафа рʼьһʼәт хԝәй кьн. У әвана жи бьра пешда бенә щерʼьбандьне, һәгәр тьштәк сәр ԝан тʼӧнәбә, һьнге бьра бәрдәстийе бькьн. Ӧса жи бьра жьнед ԝан гьран, нә бӧхданбеж, ле хԝәгьрти, һәр тьштида амьн бьн. Бәрдәсти гәрәке мере жьнәке бә, ԛәнщ малхетийе ль зарʼ у мала хԝә бькә. Әԝед кӧ рʼьнд бәрдәстийе дькьн, хԝәрʼа дәрәщәкә бьльнд ԛазьнщ дькьн у сәрбәстикә мәзьн дәст тиньн бона баԝәрийа Мәсиһ Иса. Әз кӧ ван тьшта тәрʼа дьньвисьм, гӧман һәйә әзе зутьрәке сәр тәда бем. Ле һәгәр әз дәрәнги жи бькʼәвьм, те заньби гәрәке чаԝа мала Хԝәдеда рʼабьн-рʼунен, йа кӧ щьвина Хԝәдейе сах ә, стун у һʼиме рʼастийе йә. Бе хәбәрдан, гәләки кʼур ә сӧрʼа хԝәдепʼарьстийа мә: Әԝ бь бәдәни хӧйа бу, бь Рʼӧһʼ рʼастийа Ԝи һатә избаткьрьне, мьлйакʼәтава һатә дитьне, нав мьләта һатә даннасинкьрьне, дьнйайеда һатә баԝәркьрьне у рʼумәтерʼа һатә һьлатьне. Рʼӧһʼ ашкәрә дьбежә, кӧ рʼожед ахьрийеда һьнәк ԝе жь баԝәрийе бькʼәвьн, гӧһ бьдьнә рʼӧһʼед дәрәԝин у һинкьрьнед щьна. Әԝ һинкьрьн бь дӧрʼутийа дәрәԝина дьбьн, исафа кʼижана кʼьзьри йә. Әԝ мәрьв һʼал-зәԝаще дьдьнә һьлдане, жь ԝан хԝарьна пашда дьдьнә гьртьне, кʼижан Хԝәде әԝ бона баԝәрмәнд у рʼастинаскьрийа әʼфьрандьнә, кӧ бь рʼазибуне бьхԝьн. Һәр тьште кӧ Хԝәде әʼфьрандийә ԛәнщ ә у тьштәки һʼәрам теда тʼӧнә, һәгәр бь рʼазибун те ԛәбулкьрьне, чьмки бь хәбәра Хԝәде у дӧа ԛәбул дьбә. Һәгәр тӧ ван ширәта бьди хушк-бьра, те бьби ԛӧльхкʼаре Мәсиһ Исайи ԛәнщ, чаԝа тӧ хԝәха жи бь ԝан готьнед баԝәрийе у һинбуна ԛәнщә кӧ тӧ пәй чуйи, ԛьнйат дьби. Хԝә жь чʼьловискийед пирайә һʼәрам дур хԝәй кә. Хԝә хԝәденасийеда һиндар кә. Һиндарийа ԛальб кери һьндьк тьшти те, ле йа хԝәденасийе кери һәр тьшти те, созе ԝе һьн ль ве дьне һәйә, һьн жи ль ԝе дьне. Ве готьнеда хельф тʼӧнә у лап һежайи ԛәбулкьрьне йә. Бона ве йәке әм дьхәбьтьн у дьчәрчьрьн, чьмки әм гӧмана хԝә ль Хԝәдейе сах тиньн, кӧ Хьлазкьре һʼәму мәрьва йә, илаһи Йе баԝәрмәнда. Тʼәмийа ван тьшта бьдә у һин кә. Нәбә кӧ йәк щаһьлтийа тә беһӧрмәт кә, ле тӧ баԝәрмәндарʼа бьбә нәхшәк, хәбәрданеда, рʼабун-рʼуньштьнеда, һʼьзкьрьнеда, баԝәрийе у һʼәлалийеда. Һʼәта һатьна мьн хԝә бьдә ԝе йәке, кӧ щьмәʼтерʼа ньвисаред пироз бьхуни, ширәт ки, һин ки. Һьндава ԝе пʼешкʼеша хԝәйә рʼӧһʼанида бе хәм нибә, йа кӧ бь пʼехәмбәртийе тәрʼа һатийә дайине, гава бәрпьрсийара дәсте хԝә данинә сәр тә. Гӧһе тә сәр ԝан тьшта бә у нава ԝанда бьминә, ԝәки пешдачуйина тә һʼәмуйава әʼйан бә. Һаш жь хԝә у һинкьрьна хԝә һәбә. Һәр гав нава ԝанда бьминә, чьмки бь ви тьһәри те хԝә жи хьлаз ки у ԝан жи, кʼижанед гӧһдарийа тә дькьн. Дьле каләмера нәешинә, ле дьл бьдә ԝан, чаԝа баве хԝә. Щаһьла чаԝа бьрайед хԝә һʼәсаб кә, пира чаԝа дийа хԝә, кʼӧлфәтед щаһьл чаԝа хушкед хԝә, ԝәкә шире һʼәлал. Ԛәдьре жьнәбийа бьгьрә, йед кӧ бь әʼдәти жьнәби нә. Ле һәгәр зарʼ йан нәвийед жьнәбике һәбьн, бьра әԝ зарʼ пешийе мала хԝәда һин бьн чаԝа хԝәденасийа хԝә бьдьнә кʼьфше у бь ви тьһәри дәйне де у баве хԝә вәгәрʼиньн, чьмки әв йәк ль Хԝәде хԝәш те. Жьнәбийа әʼдәти әԝ ә, йа кӧ тʼәне майә у гӧмана хԝә данийә сәр Хԝәде, шәв у рʼожед хԝә бь дӧа у рʼәща дәрбаз дькә. Ле йа кӧ кʼефа дьле хԝәрʼа йә, мьрийа нәчʼәʼлкьри йә. Ван тьшта тʼәми кә, ԝәки беләкʼә бьн. Ле һәгәр мәрьвәк бона хԝәхатийа хԝә, илаһи бона мала хԝә хәм накә, әԝи баԝәри инкʼар кьрийә у жь нәбаԝәра жи хьрабтьр ә. Бьра наве ԝе дәфтʼәра жьнәбийада бе ньвисаре, кʼижан жь шест сали кемтьр нинә, щарәке жи меркьри буйә, бь кьрьнед ԛәнщва жи бәрбьчʼәʼв ә: Мәсәлә, зарʼ мәзьн кьрьбьн, меван ԛәбул кьрьбьн, ньгед баԝәрмәнда шуштьбьн, дәст авитьбә кʼәтийа у бона һәр шьхӧле ԛәнщ жи һазьр сәкьни йә. Ле жьнәбийед щаһьл ԛәбул нәкә, чьмки гава әвана тәме хԝә хьраб дькьн, бәре хԝә жь Мәсиһ дьгӧһезьн, дьхԝазьн мер кьн у бь ви аԝайи әви сущи һьлтиньнә сәр хԝә, чьмки созе бәре данә алики. Сәрда жи мал бь мал дьгәрʼьн, хԝәрʼанәдити һин дьбьн, нә тʼәне хԝәрʼанәдити нә, ӧса жи гьлигәрʼо, тʼәви шьхӧле хәлԛе дьбьн у тьштед нәщайиз хәбәр дьдьн. Аԝа әз дьхԝазьм кӧ жьнәбийед щаһьл мер кьн, зарʼа биньн у малкьр бьн, ԝәки зьмен нәкьнә дәве нәйара. Чьмки иди һьнәк жьнәбийед щаһьл хальфин, пәй мирещьн чун. Һәгәр жьнәбийед баԝәрмәндәке һәбьн, бьра әԝ аликʼарийа ԝан бькә у щьвине баргьран нәкә, ԝәки щьвин бькарьбә аликʼарийа жьнәбийед әʼдәти бькә. Әԝ бәрпьрсийаред кӧ сәрԝертийе рʼьнд дькьн, бьра дӧбарә һежайи ԛәдьр бьн, илаһи әԝед кӧ хәбәрдан у һинкьрьнеда дьхәбьтьн. Чьмки ньвисар дьбежә: «Дәве гайе бедәреда дьхәбьтә гьренәдә» у «Пʼалә һежайи һәԛе хԝә йә». Хәйба һьндава бәрпьрсийарда баԝәр нәкә, һәгәр дӧ йан се шәʼдә тʼӧнәбьн. Бәрпьрсийаред кӧ нава гӧнада дьминьн, ль бәр һʼәмуйа ле һьле, ԝәки йед майин жи бьтьрсьн. Әз ль бәр Хԝәде, Мәсиһ Иса у мьлйакʼәтед бьжарти дькьмә дәйне стуйе тә, кӧ тӧ ван ширәта бе тʼагери хԝәй ки, тьштәки бь фьрԛийе нәки. Дәсте хԝә зу данәйнә сәр йәки бона хьзмәткʼарийа Хӧдан, нә жи тʼәви гӧнед йед майин би. Хԝә паԛьж хԝәй кә. Жь вьр шунда тʼәне аве вәнәхԝә, ле һьнәки жи шәраве тʼәв кә, бона щийе мәһʼандьна хԝарьне, кӧ зу-зу нәхԝәш дькʼәви. Һьнәк һәнә, кӧ гӧнед ԝан кʼьфш ьн у рʼаст ԝан дьбьнә бәр диԝане, ле гӧнед һьнәка жи паше ԝе кʼьфш бьн. Ӧса жи кьрьнед ԛәнщ кʼьфш ьн у әԝ кьрьнед кӧ нә кʼьфш ьн, әԝ жи вәшарти наминьн. Әԝед кӧ бьн нире хӧламтийеда нә, бьра ахайед хԝә һʼәсаб кьн чаԝа һежайи ԛәдьре бьльнд, ԝәки наве Хԝәде у һинкьрьна мә нәйе беһӧрмәткьрьне. Ахайед кʼейә баԝәрмәнд һәнә, бьра ԝан беһӧрмәт нәкьн, чьмки әԝ бьрайед һәв ьн. Ле бьра хӧлам һе рʼьнд хӧламтийе бькьн, чьмки йед кӧ кʼаре жь хьзмәткʼарийа хӧлама дьстиньн, баԝәрмәнд ьн у дәлал ьн. Ван тьшта һин кә у ширәт кә. Һәгәр йәк тьштәки дьн һин бькә у готьнед Хӧдане мә Иса Мәсиһә сахләм у һинкьрьна хԝәдепʼарьстийа мә нә ԛайл ә, әԝ йәки кʼӧбар ә у тьштәки ньзанә. Әԝ нәхԝәшийа шәрʼ у дәʼԝава гьрти йә, жь ԝе жи пешда тен: Һʼәвсуди, нәйарти, готьнед нәрʼеда, шькед хьраб у шәрʼуди. Әв һʼәму тьшт жь нава мәрьвед ԛафсәԛәт у жь рʼастийе шуна рʼәшва чуйи пешда тен. Әвана хԝәденасийе һʼәсаб дькьн, чаԝа канийа кʼаре. Бәле хԝәденаси кʼара сәр кʼаре йә, һәгәр бь рʼазибуне бә. Мә тʼӧ тьшт нәанийә дьне у әме нькарьбьн тʼӧ тьшти жи бьбьн. Ле кʼьнщ у хӧрәке мә һәбьн, бь ԝан әм рʼази бьн. Ле әԝед кӧ дьхԝазьн дәԝләти бьн, тенә щерʼьбандьне, дькʼәвьнә тʼәләка у гәләк тәмед ахмах у зийанкʼар, кʼижан мерьв нӧԛи миратʼийе у ԝеранбуне дькьн. Чьмки пʼәрәһʼьзи каникә һәр щурʼә хьрабийе йә. Һьнәка хԝә данә ԝе, жь баԝәрийе хальфин у хԝә кьрьнә хԝәйе кӧл у дәрда. Ле тӧ, мәрьве Хԝәде жь ван тьшта бьрʼәвә у пәй һәԛийе, хԝәденасийе, баԝәрийе, һʼьзкьрьне, сәбьре у мьлуктийе һәрʼә. Ләща баԝәрийеда ԛәнщ бьрʼәвә, жийина һʼәта-һʼәтайе ԛазьнщ кә, кʼижанерʼа тӧ һати газикьрьне у ль бәр гәләк шәʼда тә әԝ иԛрара ԛәнщ иԛрар кьр. Ль бәр Хԝәдейе кӧ әʼмьр дьдә һʼәму әʼфьрина у ль бәр Мәсиһ Исайе кӧ ль бәр Пилатойе Понтийо шәʼдәтийа иԛрара ԛәнщ да, әз тʼәмийе дьдьм тә, кӧ тӧ ве тʼәмийе беләкʼә у беԛӧсур хԝәй ки, һʼәта хӧйабуна Хӧдане мә Иса Мәсиһ. Хӧйабуна Ԝи ԝе ԝәхте хԝәда жь алийе Йе һежайи шькьрийе у Тʼәнейи ԛәԝат, Пʼадшайе пʼадшайа у Хӧдане хӧданада әʼйан бә. Тʼәне Әԝи нәмьри йә, нава рʼонайийеда йә, кӧ тʼӧ кәс нькарә незик бе. Тʼӧ ԛул-бәнда Әԝ нәдитийә у нә жи дькарә бьбинә. Ԛәдьр у ԛӧдрәта һʼәта-һʼәтайе Ԝирʼа бә! Амин. Тʼәмийе бьдә дәԝләтийед ве дьне, бьра бабах нәбьн у гӧмана хԝә нәдьнә сәр һәбука пʼучʼә дәрәԝ, ле ль сәр Хԝәдейе кӧ һәр тьшти бь мәрʼдани дьдә мә, ԝәки әм мьраз пе бькьн. Бьра ԛәнщийа бькьн, бь кьрьнед ԛәнщ дәԝләти бьн, мәрʼд бьн у пʼарәвәкьрьнерʼа жи һазьр. Бь ви тьһәри әԝе хԝәрʼа хьзнәке тʼоп кьн, һʼимәки ԛәнщ бона ахрәте, ԝәки ԝе жийина кӧ рʼасти жийин ә ԛазьнщ кьн. Тимотʼейо! Чь кӧ ль тә һатә спартьне хԝәй кә. Жь готьнед пʼучʼә һʼәрам у шәрʼ-дәʼԝа дур бә, кӧ бь дәрәԝ наве «занәбун» данә сәр. Һьнәка хԝә данә ве йәке у бь ви аԝайи жь баԝәрийе хальфин. Кʼәрәма Хԝәде ԝәрʼа бә. Жь Паԝлосе бь әʼмьре Хԝәде шандийе Мәсиһ Иса бона ԝи созе жийине, йа кӧ бь сайа Мәсиһ Иса йә, Тимотʼейойе лаԝе хԝәйи дәлалрʼа: Дә бьра рʼәʼм, кʼәрәм у әʼдьлайи жь Бав Хԝәде у Мәсиһ Исайе Хӧдане мә ль тә бә. Әз жь Хԝәде рʼази мә, кӧ мина пешийед хԝә бь исафа рʼьһʼәт Ԝирʼа хӧламтийе дькьм, һәр гав шәв у рʼож нава дӧайед хԝәда тә бир тиньм. Гава әз һесьред тә тиньмә бира хԝә, дькʼәвьмә дәмана дитьна тә, ԝәки шабун бькʼәвә дьле мьн. Әз ԝе баԝәрийа тәйә дьле сах тиньмә бира хԝә, йа кӧ бәре щәм пирька тә Лойисе у дийа тә Әйньке һәбу у әз баԝәр ьм, кӧ йа тә жи һәйә. Бона ԝе йәке әз дькьмә бира тә, кӧ тӧ агьре пʼешкʼеша Хԝәде һе гӧрʼ ки, йа кӧ бь дәстданина мьн тәрʼа һатә дайине. Чьмки Хԝәде рʼӧһʼәки тьрсе нәда мә, ле Йе ԛәԝате, һʼьзкьрьне у хԝәгьртьне. Аԝа шәрм нәкә, кӧ бона Хӧдане мә шәʼдәтийе бьди, нә жи бона мьн шәрм бькә, кӧ әз бона наве Ԝи гьрти мә. Ле тʼәви щәфайе Мьзгинийе бә, анәгори ԛәԝата Хԝәде. Хԝәде әм хьлаз кьрьн, пирозийерʼа гази кьрьн, нә кӧ бона кьрьнед мә, ле ль гора ԛьрар у кʼәрәма Хԝә. Әва кʼәрәма бь сайа Мәсиһ Иса, әԝ һе дәԝред бәреда мәрʼа һатә дайине. Ле ньһа бь хӧйабуна Хьлазкьре мә Мәсиһ Иса әʼйан бу, кӧ мьрьн бәтал кьр у жийина бе мьрьн, бь Мьзгинийе рʼонайи кьр. Ве Мьзгинийерʼа әз даннасинкьр, шанди у дәрсдар һатьмә кʼьфшкьрьне у ләма әз ви щәфайи дькʼьшиньм. Ле әз шәрм накьм, чьмки заньм мьн баԝәрийа хԝә Кʼе анийә у гӧман ьм жи, кӧ Әԝи чь кӧ спартийә мьн, ԝе һʼәта ԝе Рʼоже жи хԝәй кә. Тӧ хԝә ль ԝи нәхше һинкьрьна сахләм бьгьрә, йа кӧ тә жь мьн бьһист у нава ԝе баԝәри у һʼьзкьрьнеда бьминә, кʼижан жь Мәсиһ Иса пʼара мә кʼәт. Әԝ тьштед ԛәнщә кӧ ль тә һатьнә спартьне бь ԝи Рʼӧһʼе Пирози нава мәда хԝәй кә. Тӧ зани әԝед кӧ ԛәза Асйайеда бун пьшта хԝә данә мьн, Фугәло у Һермохенис жи тʼәви ԝан. Бьра Хӧдан рʼәʼма хԝә ль мала Онисифоро бькә, чьмки әԝи гәләк щара дьле мьн рʼьһʼәт кьр, жь гьртьна мьн шәрм нәдькьр, ле гава һатә Рʼомайе, гәләки ль мьн гәрʼийа, һʼәта әз дитьм, (дә бьра Хӧдан бьде, кӧ әԝ ԝе Рʼоже рʼәʼме жь Хӧдан бьбинә) у Әфәседа жи әԝи чьԛас мьнрʼа хьзмәткʼари кьр, тӧ рʼьнд зани. Аԝа лаԝе мьн, бь ԝе кʼәрәма мәйә кӧ йәктийа Мәсиһ Исада йә ԛәԝат бә. У әԝ тьштед кӧ тә ль бәр гәләк шәʼда жь мьн бьһист, бьсперә ԝан мәрьвед амьн, йед кӧ ԝе бькарьбьн һьнәкед дьн һин кьн. Аԝа тʼәви щәфе мә бә, мина әскәре Мәсиһ Исайи ԛәнщ. Тʼӧ әскәр шьхӧле бьнәлитийева мьжул набә, ԝәки ль сәрәскәр хԝәш бе. Ләщкʼарәк жи кʼофийе настинә, һәгәр ль гора ԛәйдә нәкʼәвә ләще. У щоткʼар, кӧ щәфе дькʼьшинә, гәрәке әԝ пешьн жь бәред әʼрде тәʼм кә. Бьзаньбә әз чь дьбежьм, чьмки Хӧдан һәр тьштида һʼьш-аԛьл ԝе бьдә тә. Бир бинә ԝи Иса Мәсиһе жь мьрьне рʼакьри, жь зӧрʼәта Даԝьд, ль гора ԝе Мьзгинийа әз даннасин дькьм. Бона ве Мьзгинийе әз дьчәрчьрьм, һʼәта мина зӧлмкʼарәки жи ԛәйдкьри мә, ле хәбәра Хԝәде ԛәйдкьри нинә. Ләма әз һәр тьшти тәйах дькьм, бона хатьре бьжартийа, кӧ әԝ жи ԝе хьлазбуна кӧ бь сайа Мәсиһ Иса йә, бьстиньн, бь рʼумәта һʼәта-һʼәтайева тʼәвайи. Ве готьнеда хельф тʼӧнә: Һәгәр әм тʼәви Ԝи мьрьн, әме тʼәви Ԝи бьжин жи. Һәгәр әм тәйах кьн, әме пʼадшатийе жи тʼәви Ԝи бькьн. Һәгәр әм Ԝи инкʼар кьн, Әԝе жи мә инкʼар кә. Һәгәр әм амьн нәминьн, Әԝе амьн бьминә, чьмки Әԝ нькарә Хԝә инкʼар кә. Ван тьшта бинә бира щьмәʼте, ль бәр Хԝәде бькә дәйне стуйе ԝан, кӧ сәр хәбәра һәврʼа нәкʼәвьнә дәʼԝе. Әԝ кери тʼӧ кәси найе, тʼәне мала гӧһдара хьраб дькә. Бькә кӧ тӧ ль Хԝәде хԝәш бейи, пʼаләки ӧса кӧ шәрм нәки, хәбәра рʼастийе рʼаст шьровәки. Ле жь хәбәрданед һʼәрамә пʼучʼ хԝә дур бьгьрә, чьмки әвед кӧ хԝә данә ве йәке, ԝе һе нәпʼакийеда пешда һәрʼьн у хәбәред ԝан мина хьш-хьше пʼәнщ дьдә. Һумәнайо у Фьлито жи жь ԝан ьн, йед кӧ жь рʼастийе хальфинә у дьбежьн, кӧ рʼабуна мьрийа иди буйә у баԝәрийа һьнәка дәвәрʼу дькьн. Ле бәле һʼиме кӧ Хԝәде дани ԛәдим дьминә у әв мор сәр ә: «Хӧдан йед пʼара Хԝә нас дькә» у «Һәр кәсед кӧ наве Хӧдан һьлданә сәр хԝә, бьра әԝ жь нәһәԛийе дур бьн». Маләкә мәзьнда нә кӧ тʼәне дәрданед зерʼ у зив һәнә, ле йед жь дар у һʼәрʼийе жи һәнә, һьнәк бона дәрәщед бьльнд ьн, һьнәк жи бона дәрәщед ньмьз. Аԝа һәгәр йәк хԝә жь ԝан тьштед нәщайиз паԛьж кә, әԝе бьбә дәрданәкә дәрәща бьльнд, бӧһӧрти-жьбарә, кери хԝәйе хԝә һати, бона һәр дәрәщед ԛәнщда һазьр. Жь дьлхԝәстьнед щаһьлтийе бьрʼәвә, хԝә ль һәԛийе, баԝәрийе, һʼьзкьрьне, әʼдьлайийе бьгьрә, тʼәви ԝан бә, йед кӧ бь дьле сах гази наве Хӧдан дькьн. Тӧ хԝә жь дәʼԝ-дозед ахмахә бефәʼм дур бьгьрә, чьмки тӧ зани кӧ шәрʼ жь ԝан пешда тен. Ль хӧламе Хӧдан накʼәвә, кӧ шәрʼ бькә, ле һьндава һʼәмуйада бәрбьһер бә, бькарьбә һин кә у бинфьрә бә, бь ширьнайи йед мьԛабьл ширәт кә, бәлки Хԝәде мәщале бьдә ԝан, кӧ жь гӧнәкьрьне вәгәрʼьн у рʼастийе нас кьн. Һьнге әԝе сәр һʼьше хԝәда бен, жь тʼәләка ԝи мирещьн хьлаз бьн, кʼижани әԝ гьртьнә, кӧ әʼмьре ԝи бьԛәдиньн. Ле ве йәке заньбә кӧ рʼожед ахьрийеда зәманед хьраб ԝе бен. Мәрьве бьбьнә хԝәһʼьз, пʼәрәһʼьз, кʼӧбар, бабах, бӧхданбеж, нә гӧрʼа де-бавада, бешекьр, һʼәрам, дьлсар, берʼәʼм, бӧхданбеж, тәмсьст, зӧлмкʼар, нәйаред ԛәнщийе, нәмам, бәрзәԛ, хԝәрʼази, рʼьһʼәтиһʼьз, нә кӧ Хԝәдеһʼьз. Пʼьшке хԝәденасийе ԝе ль ԝан кʼәвә, ле ԝе ԛәԝата ԝе инкʼар кьн. Тӧ хԝә жь йед аһа дур бьгьрә. Жь нава ванда йед ӧса һәнә, кӧ хԝә вәдьдьзьнә мала, кʼӧлфәтед сәрʼайә бьн баред гӧнада шәԝьти дькьнә һесир, йед кӧ бь щурʼә-щурʼә тәмед хьрабва тенә бьрьне. Әв кʼӧлфәтана һәр гав һин дьбьн, ле тʼӧ щар нькарьн рʼастийе нас кьн. Чаԝа Йанис у Йамбрис мьԛабьли Муса бун, ӧса жи әв мәрьвана мьԛабьли рʼастийе дьсәкьньн, мәрьвнә бь фькьред хԝәда шуна рʼәшва чуйи, баԝәрийеда жи бекер ьн. Ле гәләки ԝе пешда нәчьн, чьмки бефәʼмийа ԝан ԝе һʼәмуйава әʼйан бә, чаԝа йа ԝан һәр дӧйа бу. Ле тә насийа хԝә дайә һинкьрьн, рʼабун-рʼуньштьн у нет-мәрәме мьн, баԝәри, сәбьр у һʼьзкьрьна мьн, бинфьрәйи, зерандьн у щәфайед мьн. Тӧ зани ль Әнтакйайе, Ԛонйайе, Листрайе чь һатьнә сәре мьн: Мьн чь зерандьн кʼьшандьн! Ле Хӧдан әз жь һʼәмуйа хьлаз кьрьм. Бәле һәр кәсе кӧ дьхԝазә йәктийа Мәсиһ Исада бь хԝәденаси бьжи ԝе бе зерандьне у мәрьвед хьрабә хԝәйифел ԝе хьрабийеда пешда һәрʼьн, бьхальфиньн у бьхальфьн. Ле тӧ, нава ԝан тьштада бьминә, чь кӧ һин буйи у ԝе баԝәрийеда жи гӧман буйи. Тӧ зани жь кʼижана һин буйи, ӧса жи тӧ жь зарʼотийа хԝәда ньвисаред пироз зани, йед кӧ дькарьн тә сәрԝахт кьн, ԝәки бь баԝәрийа сәр Мәсиһ Иса хьлаз би. Тʼәмамийа ньвисаре жь бина бәр Хԝәде йә у керһати йә бона һинкьрьне, леһьлатьне, рʼасткьрьне у ширәткьрьна жийина һәԛийеда, ԝәки мәрьве Хԝәде бекемаси бә, бона һʼәму кьрьнед ԛәнщ һазьр сәкьни бә. Аԝа ль бәр Хԝәде у ԝи Мәсиһ Исайе кӧ ԝе диԝана мьри у зендийа бькә, әз бь щамери дьбежьм, тӧ ль ԝе һатьн у Пʼадшатийа Ԝи ки: Хәбәре даннасин кә, сәр ԝе нет-фькьре бә, һәгәр ԝәхтда бә, йан бе ԝәхт бә, ль шашийа һьле, пешийа нәһәԛийе бьгьрә, дьл бьдә мәрьва, бь тʼәмамийа сәбьре һин кә. Чьмки зәмане бе, кӧ мәрьв ԝе гӧһ нәдьнә һинкьрьна сахләм, ле ԝе хԝәстьнед дьле хԝәрʼа ԝан дәрсдара сәрһәв тʼоп кьн, йед кӧ тьштед ль гӧһе ԝан хԝәш те ԝе һин бькьн. Ԝе гӧһе хԝә жь рʼастийе дагәрʼиньн у пәй чʼьловискийа кʼәвьн. Ле тӧ һәр тьштида сәрхԝә бьминә, ль тәнгасийа сәбьр кә, кьре мьзгиндар бькә, ԛӧльхе хԝә бьԛәдинә. Чьмки әз хԝәха ԛӧрбанбунерʼа иди сәр рʼож-рʼожа мә у ԝәхте чуйина мьн перʼа гьһиштийә. Ләщеда әз ԛәнщ рʼәвим, мьн рʼийа хԝә ԛәданд, баԝәри хԝәй кьр. У ньһа мьнрʼа дьминә кʼофийа һәԛийейә сәркʼәтьне, йа кӧ Хӧдан, Һʼакьме рʼаст ԝе бьдә мьн ԝе рʼоже у нә тʼәне мьн, ле ԝан һʼәмуйа жи, йед кӧ бь һʼьзкьрьне һʼәйра хӧйабуна Ԝида нә. Бькә кӧ зу бейи щәм мьн. Димас кӧ дьнйа һʼьз кьр әз һьштьм у чу Тʼесалонике. Кьрәскис чу Галатйайе, Тито жи Далмәтйайе. Тʼәне Луԛа щәм мьн майә. Марԛос һьлдә тʼәви хԝә бинә, чьмки ви ԛӧльхида әԝ кери мьн те. Тьхико, мьн шандә Әфәсе. Тӧ гава бейи, ԝи ԛапʼуте кӧ мьн Тройайеда щәм Карпос һьшт, тʼәви хԝә бинә, ӧса жи кʼьтебед гӧломатк, илаһи йед чʼәрм. Скәндәре һʼәдад гәләк хьраби ль мьн кьр. Хӧдан ԝе ԝәкә кьрьнед ԝи бинә пешийа ԝи. Тӧ жи һʼәвза хԝә жь ԝи бькә, чьмки гәләки ль бәр готьна мә рʼабу. Щара пешьн, гава әз ль бәр диԝане сәкьним, кәсәки пьшта мьн нәгьрт, һʼәмуйа әз һьштьм чун. Бьра әв йәк ԝанрʼа гӧнә нәйе һʼәсабе! Ле Хӧдан тʼәви мьн сәкьни у ԛәԝат да мьн, ԝәки пе мьн Мьзгинидайин мийасәр бә у һʼәму нәщьһу бьбьһен у әз жь дәве шер хьлаз бум. Хӧдан ԝе мьн жь һәр кьред хьраб хьлаз кә у сах-сьламәт бьгьһинә Пʼадшатийа Хԝәйә әʼзмана. Шькьр жь Ԝирʼа һʼәта-һʼәтайе. Амин. Сьлаве бьдә Прьскилайе у Акила, ӧса жи мала Онисифоро, Ерасто ль Корьнтʼе ма, Трофимо жи, мьн ль Миләтосе нәхԝәш һьшт. Бькә кӧ бәри зьвьстане бейи. Әйбуло, Пудес, Линос, Клаԝдийа у һʼәму хушк-бьра ль тә сьлав дькьн. Хӧдан тʼәви рʼӧһʼе тә бә. Кʼәрәма Хԝәде ԝәрʼа бә. Жь Паԝлосе хӧламе Хԝәде у шандийе Иса Мәсиһ, бона пешдачуйина баԝәрийа бьжартийед Хԝәде у занәбуна сәр рʼастийе, анәгори хԝәденасийе, ӧса жи бона ԝе гӧмана жийина һʼәта-һʼәтайе газикьри. Бона ԝе жийине, Хԝәдейе хԝәйе готьна Хԝә, һе дәԝред бәреда соз дайә у ԝәхте хԝәда готьна Хԝә бь даннасинийе да әʼйанкьрьне, йа кӧ ль мьн һатә спартьне, бь әʼмьре Хԝәдейе Хьлазкьре мә. Титорʼа, лаԝе хԝәйи һәԛ-һʼәлали баԝәрийа мәйә тʼомәрида: Дә бьра кʼәрәм у әʼдьлайийа Хԝәдейе Бав у Мәсиһ Иса Хьлазкьре мә ль тә бә. Бона ԝе йәке мьн тӧ ль Кьретайе һьшти, ԝәки чь кемаси һәбьн бини сери у һәр бажарәкида бәрпьрсийара кʼьфш ки, чаԝа мьн әв тʼәми ль тә кьр: Гәрәке бәрпьрсийар беләкʼә бә, мере жьнәке бә, зарʼед ԝи баԝәрмәнд бьн, йед кӧ бона авитийе йан жи бона нәгӧһдарийе нәкʼәтьнә нава дәв-дьрана. Бәле сәрԝер чаԝа малкьре Хԝәде, гәрәке беләкʼә бә: Нә сәрһʼьшк, нә һерс, нә пәй шәраве кʼәти, нә сьрʼтук, нә пәй кʼәда һʼәрам, ле меванһʼьз, херхԝаз, аԛьлда гьран, сәр һәԛийе, Хԝәдерʼа дайи, хԝәгьрти. Гәрәке ԝе готьна амьн ԛәԝин бьгьрә, чаԝа кӧ һин буйә, ԝәки бькарьбә бь һинкьрьна сахләм дьл бьдә йед майин у шашийед мьԛабьла бьдә рʼуйе ԝан. Йед хԝәсәрихԝә гәләк ьн, йед хәбәрпʼучʼ у дәрәԝин, илаһи әԝед кӧ жь нава щьһуйада нә. Гәрәке дәнге йед ӧса бьдьнә бьрʼине, чьмки әԝ мала лап хьраб дькьн, тьштед нәщайиз һин дькьн у ве йәке бона кʼара хԝәйә һʼәрам дькьн. Жь кьретийа һәма хут занәки ԝан жи готийә: «Кьрети тʼьме дәрәԝин ьн, әԝ рʼәʼԝьред хьраб ьн, у пʼьрʼхӧред бехирәт ьн». Әв шәʼдәтикә рʼаст ә, ләма һʼьшк ль ԝан һьле, кӧ сахләм бьн баԝәрийеда у гӧһ нәдьнә чʼьловискийед щьһуйа у тʼәмийед ԝан мәрьвед кӧ жь рʼастийе дагәрʼийанә. Һәр тьшт һʼәлал ә бона һʼәлала, ле һʼәрам у нәбаԝәрарʼа тьштәки һʼәлал тʼӧнә, һʼәта аԛьл у исафа ԝан жи һʼәрʼьминә. Әԝ дьбежьн, кӧ Хԝәде нас дькьн, ле бь кьред хԝә Ԝи инкʼар дькьн, һʼәрам у хԝәсәрихԝә нә у һәр кьрьнәкә ԛәнщрʼа бекер ьн. Ле тӧ, чь ль һинкьрьна сахләм дькʼәвә, һин кә. Каләмер бьра хԝәгьрти, гьран у маԛул бьн, баԝәрийе, һʼьзкьрьне у сәбьреда сәрхԝә бьн. Пирәжьн жи бьра ӧса пʼәргал бьн, чаԝа ль мәрьвед Хԝәде дькʼәвә, нә бӧхданбеж, мела ԝан нә сәр вәхԝарьне бә. Ле бьра хԝәйед ширәтед ԛәнщ бьн, ԝәки жьнед щаһьл һин кьн, кӧ мер у зарʼед хԝә һʼьз бькьн, аԛьлда гьран бьн, нав-намус, малкьр, һʼәйф, гӧрʼа мере хԝәда бьн, ԝәки хәбәра Хԝәде нәйе беһӧрмәткьрьне. Ӧса жи дьл бьдә хорта, кӧ аԛьлда гьран бьн. Һәр тьштида жи, тӧ хԝәха бьбә тʼәрзе кьрьнед ԛәнщ, нава һинкьрьнеда бедӧрʼути у маԛул бә, бь хәбәред сахләмә бе кемаси, ԝәки йе мьԛабьл шәрми бьминә у һьндава мәда тьштәки ԝийи готьне тʼӧнәбә. Хӧлама ширәт кә, кӧ гӧрʼа ахайед хԝәда бьн у һәр тьштида ль ԝан хԝәш бен, щаб-сабе ԝан нәдьн, дәстдьрежайийе нәкьн, ле амьнийа ԛәнщә тʼам нишани ԝан кьн, ԝәки һинкьрьна бона Хьлазкьре мә Хԝәде, һәр алийава бьхәмьлиньн. Чьмки кʼәрәма Хԝәде бона хьлазбуна һʼәму мәрьва хӧйа бу, Әԝ мә һин дькә, кӧ әм нәпʼакийе у дьлһавьжийед дьнйайе инкʼар кьн у аԛьлда гьран, бь һәԛийе у хԝәденасийе бьжин ль ве дьне, һивийа ԝе гӧмана хԝәзьли, хӧйабуна рʼумәта Хԝәдейе мәзьн, Хьлазкьре мә Иса Мәсиһ бьн. Әԝи Хԝә бона мә да дәр, кӧ мә жь һʼәму нәһәԛийа хьлаз кә у паԛьж кә, бькә щьмәʼта Хԝәйә хирәткʼешед кьрьнед ԛәнщ. Ван тьшта һин кә, бь тʼәмамийа һʼӧкӧме хԝә дьл бьдә ԝан у ль ԝан һьле. Бьра тʼӧ кәс тә беһӧрмәт нәкә. Бькә бира щьмәʼте, кӧ гӧрʼа сәрԝер у һʼӧкӧмәта бькьн, гӧһдар бьн у бона һʼәму кьрьнед ԛәнщ һазьр сәкьни бьн. Һьндава тʼӧ кәсәкида хьраб хәбәр нәдьн, шәрʼуд нибьн, ле мьлук бьн у ширьнайийа хԝә һьндава һʼәму мәрьвада бьдьнә кʼьфше. Чьмки әм жи ԝәхтәке бефәʼм бун, хԝәсәрихԝә, хальфи у хӧламед щурʼә-щурʼә тәмед хьраб у кʼефа дьле хԝә бун, мә нава хьрабийе у һʼәвсудийеда дьжит, әм мина мәʼре рʼәш, ль бәр чʼәʼве һәв рʼәш бун. Ле гава ширьнайи у һʼьзкьрьна Хԝәде, Хьлазкьре мә хӧйа бу, Ԝи әм хьлаз кьрьн. Нә кӧ бона ԝан кьрьнед рʼастә кӧ мә кьрьн, ле ль гора рʼәʼма Хԝә әм хьлаз кьрьн, бь шуштьне әм ну дьне кʼәтьн у бь Рʼӧһʼе Пироз нуйәжийин бун. Ԝи Хԝәдейи әԝ Рʼӧһʼ бь мәрʼдани сәр мәда баранд, бь дәсте Иса Мәсиһе Хьлазкьре мә, ԝәки бь кʼәрәма Ԝи әм рʼаст бенә һʼәсабе у бь ԝе гӧмане жийина һʼәта-һʼәтайе ԝар бьн. Ве готьнеда хельф тʼӧнә. У әз дьхԝазьм кӧ тӧ ван тьшта әʼсәйи ки, ԝәки йед кӧ баԝәрийа хԝә Хԝәде тиньн, хирәт кьн, тьштед ԛәнщ бькьн. Әвана мәрьварʼа ԛәнщ у кʼар ьн. Ле тӧ хԝә жь дәʼԝ-дозед ахмахти, рʼәԛәма сьлсьләта, һәврʼькʼийе у шәрʼ-дәʼԝед ль сәр Ԛануне дур бьгьрә, чьмки әԝ бекер у бекʼар ьн. Жь йе кӧ бетʼьфаԛийе дькә, щарәке-дӧда ширәт кә дур кʼәвә. Тӧ зани кӧ йе ӧса хальфи у гӧнәкʼар ә, әԝ хԝәха диԝане сәр хԝәда тинә. Гава Артәмас йан Тьхико әз бьшиньмә щәм тә, бькә кӧ бейи Никополисе, щәм мьн, чьмки мьн ԛьрар да зьвьстана хԝә ль ԝьр дәрбаз кьм. Зенасе ԛанунзан у Аполо зу вәрʼекә, ӧса бә кӧ әԝ рʼева кемасийа тьштәки нәбиньн. Йед жь мә жи бьра һин бьн, пәй кьрьнед ԛәнщ бьн, ԝәки кери һʼәԝщәтийа мәрьвайе бен у бе бәр нәбьн. Һʼәмуйед тʼәви мьн ль тә сьлав дькьн. Сьлаве бьдә ԝан, йед кӧ баԝәрийеда мә һʼьз дькьн. Кʼәрәма Хԝәде ԝә һʼәмуйарʼа бә. Жь Паԝлос, бона Мәсиһ Иса гьрти у Тимотʼейойе бьра, Фьлимоне һәвал-хәбат у дәлале хԝәрʼа, Афийа хушкрʼа у Архипойе һәваләскәре хԝәрʼа у ӧса жи ԝе щьвинерʼа кӧ мала тәда дьщьвә: Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә. Әз һәр гав жь Хԝәдейе хԝә рʼази мә, гава нава дӧайед хԝәда тә бир тиньм бьрайе Фьлимон, чьмки бона ԝе һʼьзкьрьна тәйә һьндава тʼәмамийа щьмәʼта Хԝәдеда у баԝәрийа тәйә һьндава Хӧдан Исада дьбьһем. Әз дӧа дькьм, ԝәки һәләԛәтийа тәйә тʼәви мә, нава баԝәрийеда мә бьгьһинә ԝе занәбуна кʼур, йа кӧ һьндава һәр тьштед мәйә ԛәнщә тʼәви Мәсиһ ә. Бона ԝе һʼьзкьрьна дьле тәда бьрайо, әз гәләки ша бум у бина мьн фьрә бу, кӧ дьле щьмәʼта Хԝәде пе тә рʼьһʼәт буйә. Бона ве йәке бь Мәсиһ чаԝа бьра, мьн дькарьбу тӧрӧш кьра, әʼмьри сәр тә бькьра, чь кӧ щайиз бу, ле жь дәст һʼьзкьрьне, һиви дькьм. Әз чаԝа Паԝлосәки кал у ньһа жи бона Мәсиһ Иса гьрти, бона лаԝе хԝә Онисимо һиви жь тә дькьм, йе кӧ ԛәйде мьнда чаԝа кӧрʼәк мьнрʼа дьне кʼәт. Әԝ ԝәхтәке кери тә нәдьһат, ле ньһа һьн кери тә те, һьн жи кери мьн. Әз ԝи пашда дьшиньмә щәм тә, әԝ щәгәра мьн ә. Мьн дьхԝәст әԝ щәм хԝә бьһьшта, кӧ дәԝса тә бәр дәсте мьн буйа, һʼәта кӧ әз бона Мьзгинийе ԛәйдада мә. Ле бейи тә мьн нәхԝәст тьштәки бькьм, кӧ ԛәнщийа тә ӧса нәбә, чаԝа борщәк кьрьбьнә стуйе тә, ле бь рʼәзәдьлийа тә бә. Бәлки бона ве йәке әԝ ԝәхтәке жь тә дур кʼәт, кӧ әԝ һәр тʼьм бьбә пʼара тә, нә кӧ чаԝа хӧлам, ле жь хӧламәки зедәтьр ә, чаԝа бьраки дәлал! Бона мьн әԝ чьԛаси дәлал ә, ле бона тә әԝе һе зедә бә, һьн алийе хӧламтийеда, һьн жи алийе Хӧданда. Аԝа һәгәр тӧ мьн чаԝа һәвале хԝә һʼәсаб дьки, ԝи ӧса ԛәбул кә, чаԝа мьн. Һәгәр әԝи нәһәԛик жи ль тә кьрьбә, йан тьштәки дәйндаре тә бә, сәр мьн һʼәсаб кә. Әз Паԝлос бь дәсте хԝә дьньвисьм: Әзе ль тә вәгәрʼиньм (ле әз бь ве йәке нахԝазьм бежьмә тә, кӧ тӧ жийина хԝәва дәйндаре мьн и.) Ньһа, бьрайе мьни жь Хӧданда, ве ԛәнщийе бона мьн бькә, бона хатьре Мәсиһ дьле мьн рʼьһʼәт кә. Әз гӧһдарийа тәда гӧман бум, ләма жи мьн әв йәк тәрʼа ньвиси, чьмки әз заньм те жь готьна мьн зедәтьр бьки. Пештьри ве йәке жи, мьнрʼа щики майине һазьр кә, чьмки гӧмана мьн һәйә, кӧ Хԝәдейе щаба дӧайед ԝә бьдә, мьн пашда бьдә ԝә. Епафрасе бона наве Мәсиһ Исайи тʼәви мьн гьрти, тә сьлав дькә, ӧса жи Марԛос, Әристархо, Димас у Луԛа, һәвал-хәбатед мьн. Кʼәрәма Хӧдан Иса Мәсиһ тʼәви рʼӧһʼед ԝә бә. Гәләк щара у бь гәләк щурʼа Хԝәде пешда пе пʼехәмбәра кал-бавед мәрʼа хәбәр дайә, ле ван рʼожед ахьрийеда пе Кӧрʼе Хԝә мәрʼа хәбәр да, Кʼижан кӧ кʼьфш кьр, ԝәки ахьрийе бьбә хԝәйиԝаре һәр тьшти у бь Ԝи жи әʼрд у әʼзман әʼфьранд. Әԝ нура рʼумәта Хԝәде йә, хут мина һәйинтийа Ԝи йә, Әԝ бь ԛәԝата хәбәра Хԝә һәр тьшти хԝәй дькә. Гава Әԝи мәщала шуштьна гӧнед мәрьва һазьр кьр, ль жор һәрәма мәзьнайийа Хԝәдейә рʼасте рʼуньшт. Кӧрʼ һаԛаси жь мьлйакʼәта жортьр кʼәт, чьԛаси әԝ наве кӧ Ԝи станд жь навед ԝан мәстьр ә. Чьмки Хԝәде тʼӧ мьлйакʼәтирʼа аһа нәготийә: «Тӧ Кӧрʼе Мьн и, Тӧ иро Мьнрʼа буйи» у диса: «Әзе баве Ԝи бьм, Әԝе жи Кӧрʼе мьн бә». У гава Хԝәде ньхӧрийе Хԝә дьшинә дьнйайе, аһа жи дьбежә: «Бьра һʼәму мьлйакʼәтед Хԝәде сәре хԝә бәр Ԝи дайньн». Ле бона мьлйакʼәта аһа дьбежә: «Әԝ мьлйакʼәтед Хԝә дькә ба у бәрдәстийед Хԝә алава егьр». Ле бәле бона Кӧрʼ Хԝәде дьбежә: «Тʼәхте Тә Хԝәдейо, тʼәхте һʼәта-һʼәтайе йә, шьва пʼадшатийа Тә шьва һәԛийе йә. Тӧ һәԛийе һʼьз дьки у дьжәни нәһәԛийе, ләма жи Хԝәдейо, Хԝәдейе Тә Тӧ бь рʼуне шабуне рʼункьри, жь һәвалед Тә зедәтьр». У аһа жи дьбежә: «Йа Хӧдан, Тә пешийе һʼиме дьнйайе дани у әʼзман кьред дәстед Тә нә. Әԝе ԝеран бьн һәрʼьн, ле Те бьмини, һʼәмуйе мина щьла бьпʼьзьньн. Те ԝан һәв бьпʼечʼи мина ԛапʼут, мина кʼьнща ԝе бенә гӧһастьне. Ле Тӧ диса Әԝ и у салед Тә ԝе кем нәбьн». Кʼижан мьлйакʼәтирʼа Хԝәде готийә: «Кʼеләка Мьнә рʼасте рʼуне, һʼәта Әз нәйаред Тә бькьмә бьне пʼийед Тә»? Иди мьлйакʼәт чь нә? Әԝ һʼәму жи рʼӧһʼед бәрдәсти нә, кӧ бона хьзмәткʼарийа ԝан тенә шандьне, йед кӧ хьлазбуне ԝе ԝар бьн. Бона ве йәке гәрәке әм һе гәләки гӧһ бьдьнә ԝан тьштед мә бьһистьнә, ԝәки әм жь ԝан нәхальфьн. Чьмки һәгәр әԝ хәбәра пе мьлйакʼәта һатә готьне һʼимгьрти ма у һʼәму нәһәԛийе у беельмийе һәԛе хԝә рʼаст стандьн, ле әме чаԝа хԝә хьлаз кьн һәгәр әм гӧһ нәдьнә ԝе хьлазбуна мәзьн? Бона ве хьлазбуне Хӧдан пешда даннасин кьр у йед кӧ дәнге Ԝи бьһистьн мәва әʼсәйи кьрьн. Сәрда жи Хԝәде бь нишана, кʼәрәмәта, щурʼә-щурʼә кьред ԛәԝат у пʼешкʼешед Рʼӧһʼе Пирозә бәлакьри шәʼдәти да, чаԝа кӧ әʼмьре Ԝи бу. Хԝәде нә кӧ мьлйакʼәт кьрьнә сәрԝеред ԝе дьнйа кӧ ԝе бе, сәр кʼижане әм хәбәр дьдьн. Ле ньвисар щики шәʼдәтийе дьдә у дьбежә: «Йа Хԝәде, инсан чь йә кӧ ԝи бир тини, йан бәнде ве дьне кӧ бона ԝи хәм дьки? Тә һьнәк ԝәхт әԝ жь мьлйакʼәта ньмьзтьр кьр, бь рʼумәт у һӧрмәте әԝ тʼащ кьр, һʼәму тьшт кьрьнә бьне ньгед ԝи». Аԝа Йе кӧ һәр тьшт кьрьнә бьне ньгед ԝи, тьштәк нәһьшт кӧ нәкьрьбә бьне ньга. Ле ньһа әм һе һәр тьшти бьне ньгед инсенда набиньн. Ле әм ньһа Иса бь рʼумәт у һӧрмәт кʼофи ль сери дьбиньн, Йе кӧ һьнәк ԝәхт бона щәфе мьрьне жь мьлйакʼәта һатьбу ньмьзкьрьне, ԝәки бь кʼәрәма Хԝәде бона һʼәмуйа мьрьн бьдита. Бәле һежа бу кӧ Хԝәде, Йе кӧ һәр тьшт бона Хԝә әʼфьрандийә у бь дәсте Хԝә хԝәй дькә Рʼебәре хьлазбуна ԝан бь щәфа кʼамьл бькьра, ԝәки гәләк лаԝ тʼәви рʼумәта Иса бькьрана. Әԝе кӧ пироз дькә у әԝед кӧ пироз дьбьн, әв һʼәму жи жь Бавәки нә. Ләма Әԝ ве йәкеда шәрмийе набинә, кӧ ԝан хушк-бьрайед Хԝә һʼәсаб кә у дьбежә: «Дәрһәԛа наве Тәда Әзе хушк-бьрайед Хԝәрʼа бежьм, щьвинеда Әзе әшԛи Тә бьстрем». У аһа жи дьбежә: «Әзе гӧмана Хԝә бьдьмә сәр Хԝәде». У аһа жи: «Ва мә Әз у әԝ зарʼед кӧ Хԝәде данә Мьн». Чаԝа кӧ зарʼ хун у гошт ьн, Иса Хԝәха жи бу мина ԝан, кʼәтә бьнйатʼа мәрьвайе, ԝәки бь ви аԝайи пе мьрьна Хԝә, йе кӧ һʼӧкӧме ԝи сәр мьрьне һәйә ӧнда кә, аԝа готи мирещьн у йед кӧ тʼәмамийа әʼмьре хԝәда һесиред тьрса мьрьне бунә хьлаз кә. Бәле фәʼмдари йә, кӧ Әԝ аликʼарийа мьлйакʼәта накә, ле аликʼарийа зӧрʼәта Бьраһим дькә. Ләма жи Иса гәрәке бь һәр алийава бьбуйа мина хушк-бьра, кӧ бьбуйа сәрәккʼаһинәки рʼәʼм у амьн ль хьзмәткʼарийа бәр Хԝәдеда, ԝәки гӧнед щьмәʼте бьда кʼәԝандьне. Чаԝа Әԝи щәфа кʼьшанд, һатә щерʼьбандьне, ӧса жи дькарә аликʼарийа ԝан бькә, йед кӧ дькʼәвьнә нава щерʼьбандьне. Аԝа хушк-бьрайед пироз, һун кӧ һәвал-пʼаред ԝе газийа әʼзмен ьн, ль Иса бьньһерʼьн, Ԝи шандийи у Сәрәккʼаһине кӧ әм иԛрар дькьн. Әԝ һьндава Хԝәдеда амьн бу, Йе кӧ Әԝ бона ве йәке кʼьфш кьр, чаԝа Муса жи тʼәмамийа мала Ԝида амьн бу. Бәле Иса һаԛаси жь Муса зедәтьр һежайи рʼумәте бу, чьԛаси ԛәдьре йе кӧ мале чедькә, жь ԛәдьре мале зедәтьр ә. (Фәʼмдари йә, һәр маләк бь дәсте йәки те чекьрьне, ле йе һәр тьшт әʼфьрандийә, Хԝәде йә.) Рʼаст ә Муса тʼәмамийа мала Ԝида хӧламәки амьн бу, бона шәʼдәтийа ԝан тьштед кӧ Хԝәде ԝе бьгота. Ле Мәсиһ чаԝа кӧрʼ һьндава мала Хԝәдеда амьн бу. У әԝ мала Ԝи әм ьн, һәгәр әм ԝе әʼгитийе у гӧмана кӧ әм пе дьфьрʼьн ԛәԝин бьгьрьн. Бона ве йәке чаԝа Рʼӧһʼе Пироз дьбежә: «Иро һәгәр һун дәнге Ԝи бьбьһен, мина кал-бавед хԝә сәрһʼьшк нибьн, чаԝа кӧ ԝана сәри һьлда, гава бәрʼийеда һатьнә щерʼьбандьне, ԝе дәра кӧ кал-бавед ԝә бь ԛәлпе хьраб Әз щерʼьбандьм у тʼәмамийа чьл сали жи кьред Мьн дитьн. Ләма жи һʼиле Мьн жь ԝи ньсьли чу у Мьн гот: ‹Дьлада тʼьме әԝ хальфи нә у рʼийа Мьн нас нәкьрьнә›. Аԝа Мьн жи жь һерса сонд хԝар гот: ‹Тʼӧ щар әԝе нәкʼәвьнә рʼьһʼәтийа Мьн!›» Һаш жь хԝә һәбьн хушк-бьрано, нәбә кӧ нава ԝә йәкида дьләки хьраб у нәбаԝәр һәбә, кӧ пьшта хԝә бьдә Хԝәдейе сах. Ле һәр рʼож дьл бьдьнә һәв, һʼәта кӧ ньвисареда бона мә «иро» һәйә, ԝәки жь ԝә тʼӧ кәс бь гӧна нәхапә, нәбә сәрһʼьшк. Чьмки әм тʼәви Мәсиһ бунә хԝәйипʼар, һәгәр тʼәне әм ԝе баԝәрийе жь сәрида һʼәта хьлазийе ԛәԝин бьгьрьн. Аԝа чаԝа жор һатә готьне: «Иро һәгәр һун дәнге Ԝи бьбьһен, сәрһʼьшк нибьн, чаԝа ԝәхте сәрһьлданеда». Әԝ кʼи бун, йед кӧ бьһистьн у сәри һьлдан? Әԝ һʼәму нибун, йед кӧ бь дәсте Муса жь Мьсьре дәркʼәтьбун? Чьл сали һʼиле Хԝәде жь кʼе чу? Нә жь ԝан чу, йед кӧ гӧнә кьрьн, щьнйазед ԝан бәрʼийеда ман? У Хԝәде бона кʼе сонд хԝар кӧ нәкʼәвьнә рʼьһʼәтийа Ԝи, һәгәр нә бона нәельма? Иди әм дьбиньн кӧ әвана жь дәст нәбаԝәрийа хԝә нькарьбун бькʼәтанайе. Аԝа әԝ созе кӧ бона кʼәтьна нава рʼьһʼәтийа Ԝи һе дьминә, ләма гәрәке әм һаш жь хԝә һәбьн, кӧ жь ԝә тʼӧ кәс жь ԝе рʼьһʼәтийе нәминә. Чьмки мәрʼа жи әԝ Мьзгини һатә дайине, чаԝа ԝанрʼа. Ле бәле әԝ Мьзгинийа кӧ ԝан бьһист кʼар нәда ԝан, чьмки әԝ йәк баԝәрийева гьре нәдан. Ле әм кӧ баԝәр дькьн, әме бькʼәвьнә ԝе рʼьһʼәтийе. Әв йәк аһа йә, чаԝа кӧ Хԝәде гот: «Аԝа Мьн жь һерса сонд хԝар гот: ‹Тʼӧ щар әԝе нәкʼәвьнә рʼьһʼәтийа Мьн!›» Ле Әԝе кӧ әв йәк гот, шьхӧлед Ԝи жь ԝәхте әʼфьрандьна дьнйайеда хьлаз бьбун. Щики бона рʼожа һʼәфта аһа һатийә готьне: «У Хԝәде рʼожа һʼәфта жь һʼәму шьхӧлед Хԝә рʼьһʼәт бу». У ль вьр диса дьбежә: «Тʼӧ щар әԝе нәкʼәвьнә рʼьһʼәтийа Мьн». Аԝа һьнәке бькʼәвьнә ԝе рʼьһʼәтийе, ле әԝе кӧ пешда мьзгини бьһистьбун жь дәст нәбаԝәрийе нәкʼәтьне. Бона ве йәке Хԝәде рʼожәкә дьн кʼьфш дькә у дьбежә «иро», пәй гәләк ԝәхтарʼа, чаԝа бь заре Даԝьд жор һатә готьне: «Иро һәгәр һун дәнге Ԝи бьбьһен, сәрһʼьшк нибьн». Һәгәр Йешу рʼьһʼәти дабуйа ԝан, иди Хԝәде ԝе пәй ԝе йәкерʼа бона рʼожәкә дьн хәбәр нәда. Аԝа бона щьмәʼта Хԝәде һе рʼожәкә рʼьһʼәтийе мина рʼожа шәмийе һәйә. Бәле әԝе кӧ дькʼәвә рʼьһʼәтийа Хԝәде, әԝ иди жь шьхӧлед хԝә рʼьһʼәт дьбә, чаԝа Хԝәде жи жь шьхӧлед Хԝә. Аԝа әм бькьн кӧ бькʼәвьнә ԝе рʼьһʼәтийе, ԝәки тʼӧ кәс мина нәбаԝәрийа ԝан нәкʼәвә рʼожа ԝан. Хәбәра Хԝәде сах у зор ә у жь һәр шуре дӧдәви бьрʼатьр ә, кӧ дәрбази һʼәта навбәра рʼӧһʼ у щан, һәсту у мәжу дьбә, нет у фькьред дьла жи әʼнәнә дькә. У тʼӧ әʼфьрин жь Ԝи вәшарти нинә, ле һәр тьшт ль бәр чʼәʼве Ԝи вәкьри у ашкәрә йә, кӧ ль бәр Кʼижани әме һʼәсабе хԝә бьдьн. Аԝа кӧ Сәрәккʼаһинәки мәйи мәзьн һәйә, кӧ әʼзманарʼа дәрбаз буйә, Исайе Кӧрʼе Хԝәде, дә ԝәрьн әм ԝе баԝәрийа кӧ иԛрар дькьн ԛәԝин бьгьрьн. Сәрәккʼаһинәки мәйи ӧса тʼӧнә, кӧ бетʼаԛәтийед мәда дьле Ԝи сәр мә нәшәԝьтә, ле Әԝ жь һʼәму алийада щерʼьбанди йә мина мә, ле тʼәне бегӧнә. Дә иди әм меркʼими незики тʼәхте Хԝәдейи кʼәрәме бьн, ԝәки рʼәʼме бьстиньн у кʼәрәме бьбиньн кӧ гава әм һʼәԝщә бьн, аликʼарийа мә бькә. Һәр сәрәккʼаһинәк жь нав мәрьва те бьжартьне у кʼьфшкьрьне, кӧ бона мәрьва ль бәр Хԝәде бьсәкьнә, ԝәки һʼәди у ԛӧрбана бәр гӧна бьдә. Әԝ чаԝа инсан дькарә бь дьле шәԝат кʼомәка ԝанрʼа бә, йед кӧ нәзан у хальфи нә, чьмки әԝ хԝәха жи нава бетʼаԛәтийада йә. Ләма гәрәке әԝ чаԝа бона щьмәʼте, ӧса жи бона хԝә ԛӧрбана бона гӧна бьдә. Кәсәк хԝәсәрихԝә ви ԛәдьри настинә, ле тʼәне әԝе кӧ жь Хԝәдеда те газикьрьне, чаԝа Һарун бу. Ӧса жи Мәсиһ, нә кӧ Хԝәха Хԝә бьльнд кьр кӧ бьбә сәрәккʼаһин, ле Хԝәде Әԝ бьльнд кьр у Ԝирʼа гот: «Тӧ Кӧрʼе Мьн и, Тӧ иро Мьнрʼа буйи». Чаԝа щики дьн жи дьбежә: «Тӧ һʼәта-һʼәтайе Кʼаһин и, мина Мәлкʼи-Садьԛ». Иса жийина Хԝәйә ве дьнйайеда гәләки кʼәсәр у бь һесьра лава у рʼәща жь Ԝи дькьрьн, Йе кӧ дькарьбу Әԝ жь мьрьне хьлаз бькьра у бона мьлукти у ельмийа Ԝи һатә бьһистьне. Рʼаст ә Әԝ Кӧрʼе Хԝәде бу, ле диса бь ԝан щәфайед Хԝә гӧһдарийе һин бу. Гава ԝе йәкеда һатә кʼамьлкьрьне, бона һʼәмуйед кӧ гӧһдарийа Ԝи дькьн, Әԝ бу канийа хьлазбуна һʼәта-һʼәтайе у жь Хԝәде һатә навкьрьне «Сәрәккʼаһине мина Мәлкʼи-Садьԛ». Бона ве йәке гәләк тьштед мәйә готьне һәнә, ле шьровәкьрьна ван зәʼмәт ә, чьмки гӧһада һун гьран бунә. Рʼастийе кʼәвә һʼәта ньһа гәрәке һун дәрсдар буна, ле һун һе һʼәԝщә нә кӧ жь готьнед Хԝәде дәрсед пешьнә садә һин бьн. Һун һәла һе һʼәԝще шир ьн, нә кӧ хԝарьна гьран. Әԝе кӧ ширхӧр ә, әԝ нькарә һинкьрьна һәԛийе бьмәһʼинә, чьмки дәргуш ә. Ле хԝарьна гьран бона мәрьвед гьһишти йә, йед кӧ сәԝдайе хԝәда кʼәти-рʼабуйи нә, ԛәнщи у хьрабийе жь һәв дәрдьхьн. Аԝа әм һинбунед пешьнә сәр Мәсиһ алики бьһельн, бенә сәр һинбуна гьһишти. Әм диса һʼим нәвежьн нәйенә сәр вәгәрʼандьна жь ԝан кьрьнед кӧ дьбьнә бәрбь мьрьне, Хԝәдебаԝәркьрьне, һинбуна сәр ньхӧмандьна, дәстданине, рʼабуна мьрийа у диԝана һʼәта-һʼәтайе. Әме бь дәстура Хԝәде һинбуна гьһиштида пешда һәрʼьн! Чьмки йед кӧ щарәке һатьнә рʼонайикьрьне, пʼешкʼеша әʼзмен тәʼм кьрьнә у Рʼӧһʼе Пироз пʼар стандьн, ӧса жи хәбәра Хԝәдейә ԛәнщ у ԛәԝатед дьнйа ԝе бе тәʼм кьрьнә, һәгәр әԝ жь ԝе баԝәрийе бькʼәвьн, иди набә кӧ әԝана диса вәгәрʼьн сәр хԝәда бен, чьмки әԝана щарәкә дьн Кӧрʼе Хԝәде нав хԝәда хач дькьн у дькьнә сосрәт. Әԝ әʼрде кӧ гәләк щара баран сәрда дьбарә, ава хԝә дьстинә у дәрәмәта кʼар дьдә ԝан, бона кʼижана те бещәркьрьне, дӧайе Хԝәде те сәр ԝе. Ле әԝе кӧ дьрʼи у стьрийа дьгьһинә, бекер ә у һежайи ньфьрʼе йә, ахьрийа ԝе жи шәԝат ә. Рʼаст ә әм аһа хәбәр дьдьн дәлално, ле әм ԝәда гӧман ьн, ԝәки һун сәр рʼекә һе ԛәнщ ьн, кӧ ԝә дьбә бәрбь хьлазбуне. Хԝәде сәр нәһәԛийе нинә, ԝәки кьред ԝә у әԝ һʼьзкьрьна кӧ ԝә бона наве Ԝи да кʼьфше бир бькә, йа кӧ ԝә щьмәʼта Хԝәдерʼа хьзмәткʼари кьр у дькьн жи. Ле әм мӧһʼтащ ьн ԝәки жь ԝә һәр йәк һʼәта хьлазийе ԝе хирәте бьдә кʼьфше, кӧ гӧмана ԝә һʼимгьрти бьминә. Әм нахԝазьн кӧ һун хԝәрʼанәдити бьн, ле чʼәʼв бьдьнә ԝан, йед кӧ бь баԝәрийе у сәбьре созед Хԝәде ԝар дьбун. Гава Хԝәде соз да Бьраһим, Әԝи бь сәре Хԝә сонд хԝар, чьмки кәсәки жь Ԝи мәстьр тʼӧнәбу кӧ бь ԝи сонд бьхԝара. Һьнге гот: «Рʼаст Әзе зӧрʼәта тә гәләки бәрәкʼәт кьм, Әзе тә пʼьрʼ зедә кьм». У бь ви аԝайи Бьраһим бь думька дьреж гьһиштә созе Хԝәде. Рʼаст ә мәрьв пе сәре йе жь хԝә мәстьр сонд дьхԝьн у сонд һʼәму шәрʼ-дәʼԝе нава ԝанда сафи дькә. Бь ве йәке Хԝәде хԝәст ԝанарʼа, йед кӧ ԝе соз же бьстандана һе бьда кʼьфше, кӧ әԝ ԛьрара Хԝә нагӧһезә, иди созе Хԝә бь сондхԝарьне шьданд. Аԝа иди дӧ тьшт һәнә, соз у сонде Хԝәдейә кӧ найенә гӧһастьне, кʼижанада набә кӧ әԝ дәрәԝ дәре. Ван һәр дӧ тьштада дьлдайинәкә мәйә әʼсәйи һәйә, кӧ әм ле сьтʼар бунә, ләма жи әм дькарьн хԝә бавежьнә ԝе гӧмана пешийа хԝә. Әва гӧмана бона жийина мә дьбә ләнгәрәкә һʼимгьрти у амьн, кӧ пʼәрʼда пирозгәһа әʼзменрʼа дәрбази һьндӧрʼе Щийе Һәри Пироз дьбә, ԝе дәра кӧ Иса чаԝа пешикʼеш бона мә кʼәтийе. Әԝ буйә сәрәккʼаһине һʼәта-һʼәтайе мина Мәлкʼи-Садьԛ. Мәлкʼи-Садьԛ пʼадшайе Шәлиме бу, кʼаһине Хԝәдейе Һәри Жорьн. Гава Бьраһим жь пʼадша ԛьрʼкьрьне вәдьгәрʼийа, Мәлкʼи-Садьԛ пешийа ԝида чу у дӧа ль ԝи кьр. Бьраһим жи жь һʼәму тʼалане хԝә дәһәк да ԝи. (Пешийе наве Мәлкʼи-Садьԛ шьровәдьбә: «Пʼадше Һәԛийе» у алики дьнва жи әԝ «Пʼадше Шәлиме » бу, аԝа готи наве ԝи те фәʼмкьрьне «Пʼадше Әʼдьлайийе».) Әԝ бе бав, бе де у бе рʼькʼьнйат бу, нә рʼожа буйина ԝи әʼйан бу, нә жи хьлазийа әʼмьре ԝи. Әԝ мина Кӧрʼе Хԝәде бу у тʼьме кʼаһин дьминә. Аԝа дина хԝә бьдьне, кӧ әԝ йәки чаԝайи мәзьн бу, кӧ Бьраһиме бавәʼшир жи жь тʼален дәһәк дайе. У зӧрʼәта Леԝийә кӧ дьбьнә кʼаһин, бона ԝан тʼәми Ԛанунеда һәйә кӧ жь щьмәʼте дәһәке бьстиньн, аԝа готи жь мьләте хԝә, һәгәр әԝ бәдәна Бьраһим ьн жи. Ле Мәлкʼи-Садьԛ нә жь рʼькʼьнйата Леԝи бу, әԝи жь Бьраһим жи дәһәк станд у дӧа ль ԝи кьр, йе кӧ жь Хԝәде соз стандьбу. Әва йәка фәʼмдари йә, кӧ йе бьчʼук жь йе мәзьн дӧа-дьрозга дьстинә. Ви алийе кʼаһинтийеда, мәрьвед кӧ дьмьрьн дәһәке дьстиньн, ле алийе Мәлкʼи-Садьԛ, йе кӧ дәһәке дьстинә бона ԝи ньвисар дьбежә, кӧ әԝ сах ә. У һʼәта әм дькарьн ве йәке жи бежьн, Леԝийе кӧ зӧрʼәта ԝи дәһәке һьлдьдә, ԝи хԝәха жи бь дәсте Бьраһим дәһәк да Мәлкʼи-Садьԛ. Чьмки әԝ һе бәдәна баве хԝәда бу, гава Мәлкʼи-Садьԛ пешийа ԝида чу. Аԝа һәгәр кʼамьлбун бь дәсте кʼаһинтийа леԝийа бьбуйа, (чаԝа щьмәʼта Исраеле сәр ԝи һʼими Ԛанун стандьбу), иди чь лазьм бу кӧ кʼаһинәки дьн мина Мәлкʼи-Садьԛ рʼабуйа у нә кӧ мина Һарун? Чьмки гава кʼаһинти те гӧһастьне, гәрәке ԛанун жи бе гӧһастьне. У бона кʼижани кӧ әв йәк те готьне, әԝ жь ԛәбиләкә дьн бу, жь кʼижане тʼӧ кәси горигәһерʼа хьзмәткʼари нәкьрийә. У чаԝа әʼйан ә Хӧдане мә жь ԛәбила Щьһуда бу у Муса дәрһәԛа кʼаһинтийа ԝе ԛәбиледа тʼӧ тьшт нәготийә. У әва һәла һе әʼйан ә, гава кʼаһинәки дьн мина Мәлкʼи-Садьԛ рʼадьбә, йе кӧ нә алийе ԛәйдә-ԛануна пьрса зӧрʼәтийеда бу кʼаһин, ле алийе ԛәԝата жийина кӧ хьлазийа ԝе тʼӧнә. Чьмки ньвисар шәʼде ве готьне йә кӧ: «Тӧ һʼәта-һʼәтайе Кʼаһин и, мина Мәлкʼи-Садьԛ». Аԝа тʼәмийа пешьн жь дәст сьсти у бекерийа ԝе һатә бәталкьрьне, чьмки Ԛануна Муса тʼӧ тьшт кʼамьл нәкьр, ле дәԝса ԝе гӧманәкә һе ԛәнщ кʼәтә наве, бь кʼижане әм незики Хԝәде дьбьн. Сәрда жи Иса бе сонд нәбу кʼаһин! Әԝед дьн бе сонд бунә кʼаһин, ле әва бь сонд, бь дәсте Хԝәде бу кʼаһин гава Ԝирʼа гот: «Хӧдан сонд хԝар у иди жь готьна Хԝә вәнагәрʼә: Тӧ һʼәта-һʼәтайе Кʼаһин и». Дәст ве сонде жи Иса ԝәкʼилтийе пәйманәкә һе ԛәнщ дькә. Ӧса жи гәләк кʼаһин һәбунә, чьмки мьрьне нәһьштийә кӧ әԝана тʼьме бьмана. Ле кʼаһинтийа Әви хьлаз набә, чьмки Әԝ һʼәта-һʼәтайе дьминә. Бона ве йәке Әԝ һәр гав дькарә ԝан хьлаз кә, йед кӧ бь дәсте Ԝи незики Хԝәде дьбьн, чьмки Әԝ тʼьме сах ә, кӧ бона ԝан лава-навчетийе бькә. Аԝа һәма мәрʼа рʼаст сәрәккʼаһинәки аһа лазьм бу, пироз, бесущ, беԛӧсур, жь гӧнәкʼара щӧдәбуйи у жь әʼзмана жортьр чуйи. Исарʼа нә лазьм ә кӧ Әԝ һәр рʼож мина сәрәккʼаһинед майин пешийе бона гӧнед хԝә у паше бона гӧнед щьмәʼте ԛӧрбана бьдә. Әԝи әв йәк щарәке бона һәр тʼьм кьр, чахе Хԝә кьрә ԛӧрбан. Ԛануна Муса мәрьве бетʼаԛәт дькә сәрәккʼаһин, ле сонда Хԝәдейә кӧ пәй Ԛанунерʼа һат Кӧрʼ дькә сәрәккʼаһин, Йе кӧ һʼәта-һʼәтайе һатә кʼамьлкьрьне. Фькьра ԝан тьштед мә пешда готьн әв ә: Сәрәккʼаһинәки мәйи ӧса һәйә кӧ ль әʼзмана сәр тʼәхте мәзьнайийа Хԝәдейә рʼасте рʼуньштийә. Әԝ чаԝа сәрәккʼаһин пирозгәһеда бәрдәстийе дькә, аԝа готи ԝи коне рʼастда, кʼижан кӧ Хӧдан вәгьрт, нә кӧ мәрьва. Һәр сәрәккʼаһинәк бона ԛӧрбан у һʼәдидайине кʼьфшкьри йә, аԝа гәрәке тьштәки ви жи һәбуйа кӧ бьда. Һәгәр әва ль сәр дьне буйа, ԝе нәбуйа кʼаһин жи, чьмки һәнә кʼаһин кӧ анәгори Ԛануне һʼәдийа дьдьн. Әвана хьзмәткʼарийа хԝә пирозгәһеда дькьн, йа кӧ мина си у сурәте ԝан тьштед ль әʼзмен ә. Чаԝа Мусарʼа һатә әʼмьркьрьне, гава әԝи ԝе Коне Шәʼдәтийе вәгьрта, ԝирʼа һатә готьне: «Дина хԝә бьде, кӧ һәр тьшти ԝи щурʼәйи бьки, чаԝа сәре чʼийе мьн нишани тә кьр». Ле рʼаст хьзмәткʼарикә һе бьльнд Исарʼа һатә дайине, чаԝа кӧ Әԝ навчетийе пәйманәкә һе ԛәнщ дькә, чьмки әв пәймана ль сәр созед һе ԛәнщ һʼимгьрти йә. Һәгәр пәймана пешьн бе кемаси буйа, иди йа дӧда ԝе һʼәԝщә нибуйа. Ле Хԝәде щьмәʼте нәһәԛ дькә у дьбежә: «Ва рʼоже бен, Хӧдан дьбежә, Әзе тʼәви мала Исраел у тʼәви мала Щьһуда пәйманәкә ну гьредьм, ле нә мина ԝе пәймана кӧ Мьн тʼәви кал-бавед ԝан гьреда, ԝе рʼожа кӧ Мьн дәсте ԝан гьрт, ԝәки жь Мьсьре дәрхьм. Әԝана нава пәймана Мьнда нәман, Мьн жи дәсте Хԝә жь ԝан кʼьшанд, Хӧдан дьбежә. Ле әв ә әԝ пәйман, йа кӧ Әзе тʼәви мала Исраел гьредьм, пәй ԝан рʼожарʼа, Хӧдан дьбежә: Әзе ԛанунед Хԝә бькьмә һʼьше ԝан у дьле ԝанда жи ԝан бьньвисьм у Әзе Хԝәдейе ԝан бьм, әԝе жи щьмәʼта Мьн бә. Һьнге тʼӧ кәс ԝе һәвале хԝә йан бьрайе хԝә һин нәкә у нәбежә: ‹Хӧдан нас бькә›, чьмки һʼәму жи ԝе Мьн нас бькьн, жь бьчʼукед ԝан һʼәта мәзьна. Әзе нәһәԛийед ԝан бьбахшиньм у гӧнед ԝан жи иди бир нәйньм». Гава Хԝәде бона пәйманәкә «ну» гот, йа пешьн кәвьн кьр у чь кӧ кәвьн у пир дьбә, бәр ӧндабуне йә. Рʼаст ә ԛәйдә-ԛанунед һʼәбандьна пәймана пешьн жи һәбун у пирозгәһа ве дьнйайе жи. Кон бь дӧ гоза вәгьрти бу: Йа дәррʼа «пирозгәһ» дьготьн, теда һәбун шәмдан, сьфрә у нане Хԝәдерʼа дайи. Йа һьндӧрʼда пьшта пʼәрʼде, жерʼа «Щийе Һәри Пироз» дьготьн. Теда бун горигәһа зерʼин бона шәԝьтандьна бьхуре, Сьндоԛа Пәймане, йа кӧ дәр у һьндӧрʼва зерʼкьри бу. Ԝе сьндоԛеда һәбун щерʼе зерʼин бь манава тʼьжи, шьвдара Һарунә кӧ гӧл да у сәлед кәвьрийә пәймане. Сәр сьндоԛе, херубед рʼумәта Хӧдан һәбун у сәр щийе кӧ гӧнә дьһатьнә бахшандьне, дькьрьнә си. Ньһа нә ԝәхт ә кӧ әм бона ԝан бь һур-гьли хәбәр дьн. Әв тьшт аһа щикьри бун. Кʼаһин һәр гав дькʼәвьнә гоза дәр, хьзмәткʼарийа хԝә дькьн. Ле гоза һьндӧрʼ сале щарәке тʼәне сәрәккʼаһин дькʼәве, ле нә бе хун, йа кӧ жь бәр гӧнед хԝә у щьмәʼтева дьдә, кʼижан кӧ жь бефәʼмийа хԝә дькьрьн. Бь ве йәке Рʼӧһʼе Пироз дьдә кʼьфше, кӧ рʼийа Щийе Һәри Пироз нәвәкьрийә, һʼәта кӧ гоза дәр һәйә. Әв йәк сурәтәк ә бона зәмане ньһа. Әва дьдә кʼьфше, кӧ гава һʼәди у ԛӧрбан тенә дайине, әвана нькарьн исафа йед кӧ дьһʼәбиньн паԛьж кьн, ле әв йәк тʼәне хԝарьн-вәхԝарьне у щурʼә-щурʼә шуштьн-вәшуштьнед ԛәйдә-ԛанунева гьредайи нә. Әв ԛәйдә-ԛанунед дәрвайи нә, кʼижан кӧ һʼәта ԝи ԝәхте кӧ ԛануна ну те данине дьминьн. Ле гава Мәсиһ һат, чаԝа Сәрәккʼаһине тьштед ԛәнщә һати, коне һе мәзьн у кʼамьлрʼа дәрбаз бу, йе кӧ нә бь дәста һатийә чекьрьне, аԝа готи нә жь ве дьнйайе. Әԝ нә кӧ пе хуна щанәга у нерийа, ле бь хуна Хԝә щарәке бона һәр тʼьм кʼәтә Щийе Һәри Пироз у азабуна һʼәта-һʼәтайе дәст ани. Һәгәр хуна щанәга, нерийа у кʼозийа ногьна кӧ дьрʼәшандьн, йед кӧ ль гора әʼдәт һʼәрʼьми бун, дәрвава әԝ паԛьж дькьрьн, ле чьԛас зедә хуна Мәсиһ, кӧ бь дәсте Рʼӧһʼе һʼәта-һʼәтайе Хԝә чаԝа ԛӧрбана беԛӧсур да Хԝәде, ԝе исафа мә жь кьред кӧ әм дьбьрьнә бәрбь мьрьне паԛьж бькә, ԝәки әм хьзмәткʼарийе Хԝәдейе Сахрʼа бькьн? Бона ве йәке Мәсиһ навчетийа пәймана ну дькә, ԝәки йед газикьри ԝи ԝаре һʼәта-һʼәтайе бьстиньн, кʼижан кӧ Хԝәде соз дайә, чьмки мьрьна Ԝи бона азайийа жь нәһәԛийед ԝан бу, йед кӧ дәма пәймана пешьнда кьрьбун. Аԝа кʼидәре ԝәсийат пәйманкьри йә, гәрәке ль ԝьр әʼсәйи ԝәсийатдар мьри бә. Чьмки ԝәсийат пәй мьрьна ԝәсийатдаррʼа ԛәԝат дькә. Һʼӧкӧме ԝе тʼӧнә һʼәта кӧ ԝәсийатдар сах ә. Ләма пәймана пешьн жи бе хун нәһатә тʼәстиԛкьрьне. Гава Муса һʼәму тʼәмийед Ԛануне готьнә щьмәʼте, һьнге хуна щанәга у нерийа һьлда тʼәви аве кьр, рʼисе соре гәвәз чʼьԛьле зохева кьр, пе ԝе рʼәшандә сәр кʼьтеба Ԛануне у щьмәʼте, гот: «Әв ә хуна ԝе пәймане, йа кӧ Хԝәде тʼәми да ԝә». Ӧса жи әԝ хун рʼәшандә сәр кон у һʼәму дәрданед бона һʼәбандьне. Бәле анәгори Ԛануне пʼьрʼанийа һәр тьшти пе хуне паԛьж дьбу у бейи хунрʼетьн бахшандьн нәдьбу. Аԝа гәрәке сурәтед тьштед әʼзмана бь ван кьрьна паԛьж буна, ле һәма хут йед әʼзмана жи гәрәке бь ԛӧрбанед жь ван ԛәнщтьр паԛьж буна. Чьмки Мәсиһ нә кӧ кʼәтә пирозгәһа пе дәста чекьри мина сурәте йа рʼаст, ле һәма хут кʼәтә әʼзмен, ԝәки ньһа бона мә ль бәр Хԝәде бьсәкьнә. Нә жи бона кӧ гәләк щара Хԝә бькьра ԛӧрбан дькʼәтә пирозгәһе, чаԝа кӧ сәрәккʼаһин һәр сал нә бь хуна хԝә дькʼәве. Һәгәр аһа буйа, Әԝи гәрәке гәләк щара пәй әʼфьрандьна дьнйайерʼа щәфа бькʼьшанда. Ле ньһа ахьрийа дәԝрада Әԝи Хԝә да кʼьфше у щарәке бона һәр тʼьм пе хԝәԛӧрбанкьрьне гӧнә һьлдан. У чаԝа бона мәрьва ԛьраркьри йә, щарәке бьмьрьн у паше бәр диԝане бьсәкьньн, ӧса жи Мәсиһ щарәке бона гӧнәһьлдана гәләка ԛӧрбан һатә дайине. У Әԝе щара дӧда нә кӧ бона гӧнәһьлдане кʼьфш бә, ле бона хьлазбуна ԝан, йед кӧ һивийа Ԝи нә. Ԛанун сийа ԝан тьштед ԛәнщ ә, кʼижанә кӧ тен, ле нә хут мина ԝан йәка йә. Бона ве йәке Ԛанун пе ԝан ԛӧрбанед кӧ һәр сал пәйһәв-пәйһәв тенә дайине нькарә ԝан кʼамьл бькә, йед кӧ бь ԛӧрбандайине незики Хԝәде дьбьн. Һәгәр паԛьж буна, ԝана ԝе дәст жь ԛӧрбандайине бькʼьшанда, чьмки бь щарәке йед хԝәйиԛӧрбан ԝе бьһатана паԛьжкьрьне, жь ԝьр шунда бона гӧна исафа ԝан ԝе ль ԝан һьлнәһата. Ле әԝ ԛӧрбан һәр сал гӧнед ԝан тиньнә бира ԝан. Чьмки хуна щанәга у нерийа тʼӧ щар нькарә гӧна рʼәсит кә. Ләма жи, гава Мәсиһ ԝе бьһата ве дьне, гот: «Тә ԛӧрбан у һʼәди нәхԝәстьн, ле Тә бона Мьн ԛальбәк һазьр кьр. Дийарийед тʼәвайишәԝате у ԛӧрбанед жь бәр гӧнава Тә хԝәш нәһатьн. Һьнге Мьн гот: ‹Ва мә йа Хԝәде, Әз һатьм әʼмьре Тә биньмә сери, чаԝа бона Мьн кʼьтебеда ньвисар ә›». Пешийе дьбежә: «Ԛӧрбан у һʼәди, дийарийед тʼәвайишәԝате у ԛӧрбанед жь бәр гӧнава Тә нәхԝәстьн у әԝ ль Тә хԝәш нәһатьн» (ле әԝ анәгори Ԛануне тенә дайине). Паше дьбежә: «Ва мә йа Хԝәде, Әз һатьм кӧ әʼмьре Тә биньмә сери». Йа пешьн, Мәсиһ ԝеда давежә, кӧ йа дӧда тʼәстиԛ кә. Бь ви аԝайи Иса Мәсиһ әʼмьре Хԝәде ани сери, щарәке бона һәр тʼьм бәдәна Хԝә кьрә ԛӧрбан, бь ве йәке әм паԛьж кьрьн. Һәр кʼаһинәк, һәр рʼож нава хьзмәткʼарийа хԝәда йә у гәләк щара хут ԝан ԛӧрбана дьдә, кʼижанед кӧ тʼӧ щар нькарьн гӧна рʼәсит кьн. Ле Әви кʼаһини тʼәне щарәке бона гӧна ԛӧрбан да у пәйрʼа һʼәта-һʼәтайе кʼеләка Хԝәдейә рʼасте рʼуньшт у жь ԝьр шунда һивийе йә, һʼәта кӧ дьжмьнед Ԝи бьн пʼийед Ԝида бенә данине. Бь ԛӧрбанәке Әԝи йед кӧ паԛьж дьбьн һʼәта-һʼәтайе кʼамьл кьрьн. Рʼӧһʼе Пироз жи шәʼдәтийе дьдә мә. Пешийе дьбежә: «Әв ә әԝ пәйман, йа кӧ Әзе тʼәви ԝан гьредьм, пәй ԝан рʼожарʼа, Хӧдан дьбежә. Әзе ԛанунед Хԝә бькьмә дьле ԝан у һʼьшед ԝанда ԝан бьньвисьм». Паше дьбежә: «Әзе гӧнә у нәһәԛийед ԝан иди бир нәйньм». У әԝ дәра кӧ бахшандьн һәйә, иди бона гӧна һʼәди кер найе. Аԝа хушк-бьрано, бь сайа хуна Иса әм дькарьн меркʼими бькʼәвьнә Щийе Һәри Пироз, ԝе рʼийа нуйә сахрʼа, йа кӧ Әԝи бона мә нава ԝе пʼәрʼдерʼа вәкьр, аԝа готи бь бәдәна Хԝә. Аԝа кӧ Кʼаһинәки мәйи мәзьн һәйә сәр мала Хԝәде, әм дькарьн бь дьле рʼаст незики Хԝәде бьн, баԝәрийева тʼьжи, исафа хԝәда бь хунрʼәшандьне жь хьрабийе паԛьжбуйи у ԛальбе хԝә жи пе ава зәлал шушти. Дә әм ԝе гӧмана кӧ әм иԛрар дькьн ԛәԝин бьгьрьн у жь щи нәһʼәжьн, чьмки амьн ә, Әԝе кӧ соз дайә. У бьра әм бона һәвдӧ хәм бькьн, ԝәки һʼьзкьрьне у ԛәнщикьрьнеда һелана бьдьнә һәв. Бьра әм дәст жь льһәвщьвине нәкʼьшиньн, чаԝа кӧ һьнәка хԝәрʼа кьрийә хәйсәт, ле әм дьл бьдьнә һәв у һе зедә, чьмки һун дьбиньн кӧ Рʼожа Ахрәте незик дьбә. Чьмки һәгәр мә рʼасти нас кьрийә ԛәбул кьрийә у пәйрʼа бь һʼәмде хԝә нава гӧнада бьминьн, иди жь вьр шунда бона бахшандьна гӧна ԛӧрбан бәрга тʼӧ тьшти нагьрә, ле тʼәне бь ләрьзәке дьминә һивийа диԝане у кʼура агьр, кӧ ԝе йед мьԛабьли Хԝәде һʼуфи хԝә кә. Йәки һәгәр Ԛануна Муса бьтʼәрʼьбанда, гава дӧ йан се шәʼдә һәбуна, бе рʼәʼм дьһатә кӧштьне. Ле тʼәхмина ԝә, әԝе һе чьԛаси һежайи щәзайе гьран бә, йе кӧ Кӧрʼе Хԝәде дайә бьн пʼийед хԝә у Хуна пәймане һʼәрам һʼәсаб кьрийә, бь Кʼижане әԝ паԛьж бу у Рʼӧһʼе кʼәрәмдайине беһӧрмәт кьрийә? Бәле әм Ԝи нас дькьн, Йе кӧ гот: «Һʼәйфһьлдан йа Мьн ә, Әзе һьлиньм». У диса: «Хӧдан ԝе диԝана щьмәʼта Хԝә бькә». Тьштәки тьрс у хоф ә, кӧ бькʼәвьнә дәсте Хԝәдейе сах! Ԝан рʼожед пешьн бир биньн, гава һун һатьнә рʼонайикьрьне, ԝә шәрʼәки чаԝайи гьран бь щәфава дькʼьшанд. Щарна бь ԛара у зерандьна һун ашкәрә дьһатьнә рʼәзилкьрьне, щарна жи тʼәви һʼале ԝан дьбун, йед кӧ әԝ тьшт дькʼьшандьн. Һун дькʼәтьнә һʼале гьртийа жи у гава һәбука ԝә жи тʼалан кьрьн, һун бь ԝе йәке әшԛ у ша бун, чьмки ԝә хԝәха заньбу кӧ һәбука ԝәйә һе ԛәнщ у һәр тʼьм һәйә. Аԝа ԝе гӧмана хԝә ӧнда нәкьн, йа кӧ һежайи һәԛе мәзьн ә. Ԝәрʼа сәбьр лазьм ә кӧ һун әʼмьре Хԝәде биньнә сери у бьгьһижьнә созе Ԝи. Чаԝа ньвисар ә: «Пәй ԝәхтәки кьнрʼа, Әԝе кӧ ԝе бе, ԝе бе у дәрәнги нәбә. Ле йе бәр Мьн рʼаст, ԝе бь баԝәрийе бьжи у һәгәр әԝ пашда вәкʼьшә, Әз ԝи бәгәм накьм». Ле әм нә жь ԝан ьн, кӧ пашда вәкʼьшьн у ӧнда бьн, ле әм әԝ ьн, кӧ баԝәр дькьн, ԝәки рʼӧһʼед мә хьлаз бьн. Баԝәри әʼсәйийа ԝан тьшта йә, кӧ әм теда гӧман ьн у избатийа ԝан тьшта йә, кӧ мәва нә хӧйа нә. Бь баԝәрийе пешийед мә ль Хԝәде хԝәш һатьн. Бь баԝәрийе мәва әʼйан ә кӧ дьнйа бь хәбәра Хԝәде әʼфьрийә у әԝ тьштед кӧ тенә дитьне жь ԝан тьштед кӧ найенә дитьне чебунә. Бь баԝәрийе Һабил һʼәдикә жь һʼәдийа Ԛайин четьр да Хԝәде. Бь ԝе баԝәрийе әԝ һатә бәгәмкьрьне чаԝа йәки рʼаст, чьмки һʼәдийед ԝи ль Хԝәде хԝәш һатьн. Рʼаст ә Һабил мьр, ле бь баԝәрийа хԝә һе хәбәр дьдә. Бь баԝәрийе Һәнох жь дьне һатә һьлатьне, кӧ мьрьне нәбинә. Әԝ тʼӧ щийи кʼьфш нәбу, чьмки Хԝәде әԝ һьлдабу. Ньвисареда һатийә готьне, кӧ бәри һьлатьна ԝи, әԝ ль Хԝәде хԝәш һатьбу. У бе баԝәри тʼӧ щар набә кӧ инсан ль Хԝәде хԝәш бе, чьмки әԝе кӧ незики Хԝәде дьбә, гәрәке баԝәр бькә, кӧ Хԝәде һәйә у ԝе ԝан хәлат кә, кʼижан кӧ ль Ԝи дьгәрʼьн. Бь баԝәрийе Нӧһ бона тьштед кӧ һе нәдьһатьнә кʼьфше фәрман жь Хԝәде станд у бь хофа Хԝәде рʼабу бона хьлазбуна мала хԝә гәми чекьр. Нӧһ бь ԝе баԝәрийе диԝана дьне кьр у бу хԝәйиԝаре ԝе рʼастһʼәсаббуне, йа кӧ жь баԝәрийе те. Бь баԝәрийе, гава Бьраһим һатә газикьрьне, гӧһдари кьр, кӧ һәрʼә ԝи щийе кӧ ԝе чаԝа ԝар бьстанда. У рʼабу чу, ле ньзаньбу жи кʼӧда дьчә. Бь баԝәрийе чаԝа фьрари ԝи ԝәлате хәрибда ма, йе кӧ Хԝәде жерʼа соз дабу. У чадьрада тʼәви Исһаԛ у Аԛуб ма, кӧ әԝ жи хԝәйийед ԝи ԝаре создайи бун. Чьмки әԝ һивийа ԝи бажаре хԝәйирʼькʼьне мьԛәрʼм бу, әʼфьрандар у авакьре кʼижани Хԝәде йә. Бь баԝәрийе Бьраһим, кӧ заньбу Сәрайе зарʼ нәдани, әԝе ԛәԝата бәре зька станд у ԝе мәзьнайийа ԝида зарʼәк ԝирʼа бу. Чьмки баԝәр кьр, кӧ Йе ԝирʼа соз дайә амьн ә. У жь ԝи йәки, йе кӧ иди бәр мьрьне бу, ԝәкә стәйркед әʼзмен у ԛума дәве бәʼре беһʼәсаб мәри дьне кʼәтьн. Әв һʼәму жи кӧ баԝәрийеда мьрьн, ле созед Хԝәде нәстандьн. Әԝана тʼәне әԝ соз дурва дитьн, ша бун у хԝә мӧкӧрʼ һатьн, кӧ әԝ мәринә хәриб у фьрари нә ль сәр дьне. Әԝед кӧ тьштед аһа дьбежьн, дьдьнә кʼьфше кӧ әԝ ль ԝәлатәки бона хԝә дьгәрʼьн. У һәгәр бона ԝи ԝәлати бир банина жь кʼидәре кӧ әԝ дәркʼәтьбун, мәщала ԝан ԝе һәбуйа вәгәрʼийана ԝьр. Ле жь бәр ԝева дәмана ԝәлатәки һе ԛәнщда бун, аԝа готи йе әʼзмани. Ләма Хԝәде ве йәкеда шәрмийе набинә, кӧ әԝ жерʼа бежьн: «Хԝәдейе мә», чьмки Әԝи бона ԝан бажарәк һазьр кьрийә. Бь баԝәрийе Бьраһим кӧ жь Хԝәде һатә щерʼьбандьне, Исһаԛ кьрә ԛӧрбан. Әԝи соз стандьбун, ле диса кӧрʼе хԝәйи тайе тʼәне дькьрә ԛӧрбан, бона кʼижани Хԝәде готьбуйе: «Зӧрʼәта тәйе Исһаԛда бе навкьрьне». Чьмки Бьраһим дьле хԝәда дьгот, кӧ Хԝәде дькарә Исһаԛ жь мьрьне жи рʼакә у әԝи бь сурәти чаԝа жь мьрьне рʼабуйи кӧрʼе хԝә пашда станд. Бь баԝәрийе Исһаԛ бона ԝан тьштед кӧ ԝе бьԛәԝьмийана, дӧа ль Аԛуб у Әсаԝ кьр. Бь баԝәрийе Аԛуб бәр мьрьне дӧа ль һәр кӧрʼәки Усьв кьр у хԝә авитә сәр шьва дәсте хԝә, сәре хԝә бәр Хԝәде дани. Бь баԝәрийе Усьв бәр мьрьне бона дәркʼәтьна жь Мьсьре кьрә бира зарʼед Исраел у бона һәстуйед хԝә тʼәми да ԝан. Бь баԝәрийе гава Муса жь дийа хԝә бу, бь дәстед де у баве хԝә се мәһа һатә вәшартьне. Ԝан дит кӧ кӧрʼьк бәдәԝ ә, жь фәрмана пʼадше нәтьрсийан. Бь баԝәрийе Муса гава мәзьн бу, нәхԝәст кӧ «кӧрʼе ԛиза Фьрәԝьн» бе һʼәсабе. Әԝ фькьри, кӧ һе ԛәнщ ә тʼәви щьмәʼта Хԝәде бьчәрчьрә, нә кӧ ԝәхтәки кьн нава кʼефа гӧнада дәрбаз кә. Әԝи ԛара Мәсиһ һе һәбунәкә мәзьн һʼәсаб кьр, нә кӧ хьзнед Мьсьре, чьмки чʼәʼвньһерʼи бу, кӧ һәԛе хԝә бьстанда. Бь баԝәрийе Муса Мьсьр һьшт у жь һерса пʼадше нәтьрсийа, чьмки Муса әԝе кӧ нәдьһатә кʼьфше дьдит у сәр йа хԝә ма. Бь баԝәрийе Муса щара пешьн Щәжьна Дәрбазбуне тʼәстиԛ кьр у хун шемика да рʼәшандьне, ԝәки Мьлйакʼәте Мьрьне ль ньхӧрийед ԝан нәкʼәта. Бь баԝәрийе щьмәʼта Исраеле бәʼра Соррʼа чаԝа бәжерʼа дәрбаз бу. Гава мьсьрийа жи кьр кӧ дәрбаз бьн, хәньԛин. Бь баԝәрийе суред бажаре Әриһайе кʼәтьн, гава һʼәфт рʼожа дора ԝан зьвьрʼин. Бь баԝәрийе Рʼәхаба чʼәʼвдәр кӧ щәʼсус бь әʼдьлайи ԛәбулкьрьн, тʼәви нәбаԝәра ӧнда нәбу. Әз иди чь бежьм? Ԝәхт тʼере накә, кӧ бона Гидәйон, Бараԛ, Шьмшон, Йефта, Даԝьд, Самуел у пʼехәмбәра гьли кьм, йед кӧ бь баԝәрийе пʼадшати бьндәст кьрьн, һәԛи кьрьн, соз стандьн, дәве шера данә гьртьне, кʼура агьр тәмьрандьн, жь дәве шур хьлаз бун, жь бетʼаԛәтийе ԛәԝат гьртьн, нава шәрʼда бунә мерхас, бәри ордийед хәриб дан. Кʼӧлфәта мьрийед хԝә сахбуйи стандьн. Һьнәка жи азайи нәхԝәстьн у нава щәфада мьрьн, ԝәки жь мьрьне рʼабьн бьгьһижьнә жийинәкә һе ԛәнщ. Һьнәкед майин жи бәр ԛамчийа, нава ԛара, ӧса жи бь ԛәйд-зьнщира у кәлада һатьнә зерандьне. Әԝ данә бәр кәвьра, бь бьрʼәка һатьнә бьрʼине, бь шура һатьнә кӧштьне, пʼостед пез у бьзьнада гәрʼийан, хәлайи-щәлайи, тәнгаси у щәфа кʼьшандьн. Дьнйа нә лайиԛи ԝан бу! Әԝ ль бәрʼи у чʼийа дьгәрʼийан, шкәфт у нәʼлада дьман. Әв һʼәму баԝәрийа хԝәда бәрбьчʼәʼв бун, ле созе Хԝәде нәстандьн, чьмки Хԝәде бона мә һе тьштәки ԛәнщ һазьр кьрийә, ԝәки әԝана бейи мә нәгьһижьнә кʼамьлтийе. Аԝа кӧ һаԛас әʼлаләта шәʼдайә гьран дора мә гьртийә, дә ԝәрьн әм һʼәму гьранийе у ԝи гӧне кӧ рʼьһʼәт ль мә дьԝәлә жь хԝә дур хьн у бь тәйах ләщмәйдана пешийа хԝәда бьрʼәвьн. Дә иди әм дина хԝә бьдьнә Иса, ԝи Пешикʼеши у Кʼамьлкьре баԝәрийа мә, Йе кӧ бона ԝе шабуна пешийа Хԝә хач һьлани, шәрм бәр тьштәки һʼәсаб нәкьр, паше кʼеләка Хԝәдейә рʼасте сәр тʼәхт рʼуньшт. Аԝа сәр Ԝи бьфькьрьн, Йе кӧ ль бәр ԝан гӧнәкʼаред мьԛабьли Хԝә тәйах кьр. Һьнге һуне нәԝәстьн у жь илаще нәкʼәвьн. Ԝә һе һʼәта хунрʼетьне мьԛабьли гӧнә шәрʼ нәкьрийә. Гәло ԝә әԝ дьлдайина бир кьрийә, йа кӧ Хԝәде ԝәрʼа чаԝа тʼәви зарʼед Хԝә хәбәр да? «Лаԝе Мьн, ширәта Хӧдан пьшт гӧһе хԝәва нәвежә у нә жи гава әԝ ль тә һьлте, ль бәр хԝә кʼәвә. Чьмки Хӧдан кʼе һʼьз дькә, ԝи ширәт дькә у кʼижани чаԝа лаԝ ԛәбул дькә, щәза дькә». Һун ширәте тәйах кьн, чьмки Хԝәде тʼәви ԝә рʼадьбә-рʼудьни чаԝа тʼәви зарʼед Хԝә. Әԝ кʼижан зарʼ ә, кӧ бав ԝи ширәт накә? Ле һәгәр һун нәйенә ширәткьрьне чаԝа һʼәму зарʼ тенә ширәткьрьне, кӧ ӧса йә һун нә зарʼед һʼәлал ьн, ле йед жь зьнекʼарийе нә. Һәгәр әм кӧ жь бавед хԝәйә хун-гошт тенә ширәткьрьне вәдькʼьшьн, һе чьԛас зедә гәрәке әм гӧрʼа Баве рʼӧһʼе хԝәда бьн, ԝәки әм бьжин? Бавед мәйә хун-гошт ԝәхтәки кьн ль гора дьле хԝә мә ширәт дькьн, ле Хԝәде бона кʼара мә, ԝәки әм жи мина Ԝи бьбьн пироз. Рʼаст ә һәр ширәтәк ԝе дәме дьле мәрийа ша накә, ле дешинә, ле бәле паше йед кӧ бь ԝе һинбуйи нә, бәре әʼдьлайийе жь жийина рʼаст дьчьньн. Аԝа ԛолане мьлед хԝәйә сьстбуйи у ԛӧдуме чокед хԝәйә бе тʼаԛәт бьшьдиньн у ньгед хԝә рʼийа рʼастда бавежьн, кӧ йе дькӧлә һол нәбә, ле сәрда ԛәнщ бә. Бькьн кӧ тʼәви һʼәмуйа әʼдьл бьн у жийина пироз дәрбаз кьн. Бейи пирозийе тʼӧ кәс ԝе Хӧдан нәбинә. Һаш жь хԝә һәбьн, нәбә кӧ жь ԝә йәк дәсте хԝә жь кʼәрәма Хԝәде бькә у нәбә кӧ йәк нава ԝәда бьбә рʼаԝәки тәʼл тәнгасийе бьдә у гәләка жәʼрдадайи кә. Һаш жь хԝә һәбьн, нәбә кӧ йәк чʼәʼвдәр йан дьнеһʼьз бә мина Әсаԝ, кӧ бона зькә нан ньхӧртийа хԝә фьрот. Аԝа ԝәва әʼйан ә жи, паше гава әԝи бь һесьра хԝәст кӧ әԝ дӧайе ньхӧртийе ль ԝи жи бьбә, һатә тʼәхсиркьрьне. Чʼарә дест нәкʼәт, ԝәки әԝ тьште жь дәсте хԝә кьрьбу пашда бьстанда. Һун мина щьмәʼта Исраеле незики ԝи чʼийайе бәр чʼәʼва нәбунә, йе кӧ агьр пекʼәтьбу, бь тәʼристанийе, мьж-думане у бобәлискева гьрти бу, кӧ ль ԝьр борʼи ле дькʼәт у дәнге готьне дьһат. Гава йед кӧ әв дәнг дьбьһистьн, һиви дькьрьн, кӧ иди хәбәрәкә дьн ԝанрʼа нәйе готьне, чьмки ль ԝе фәрмане тʼаԝ нәдькьрьн кӧ дьгот: «Һәгәр һʼәйԝанәк жи незики чʼийе бә, гәрәке бьдьнә бәр кәвьра». Әв дитьна бәр чʼәʼва ӧса саԝ бу, һʼәта кӧ Муса жи гот: «Әз дьтьрсьм у дьләрьзьм». Ле һун незики чʼийайе Сийоне бунә, ԝи бажаре Хԝәдейе сах, Оршәлима әʼзмана у незики ԝе кʼомбуна рʼәнгинә мьлйакʼәтед беһʼәсаб бунә, ԝе щьвина ньхӧрийайә кӧ навед ԝан ль әʼзмана ньвисар ә. Һун незики Хԝәде бунә, кӧ һʼакьме һʼәмуйа йә у незики рʼӧһʼед рʼаста бунә, йед кӧ гьһиштьнә кʼамьлтийе у незики Исайе кӧ навчетийе пәймана ну дькә у хуна Ԝийә рʼәшанди бунә, кӧ жь хуна Һабил ԛәнщтьр хәбәр дьдә. Иди һаш жь хԝә һәбьн, нәбә кӧ һун Әԝи ԝәрʼа хәбәр дьдә тʼәхсир кьн. Һәгәр әԝед кӧ ль сәр дьне Муса тʼәхсир кьрьн, кʼижани кӧ тʼәмийед Хԝәде дьдан хьлаз нәбун, иди әме чаԝа бькарьбьн хьлаз бьн һәгәр әм пьшта хԝә бьдьнә Йе кӧ жь әʼзмана мәрʼа хәбәр дьдә? Дәнге Ԝи һьнге әʼрд һʼәжанд, ле ньһа соз дайә у дьбежә: «Әзе щарәкә дьн жи бьһʼәжиньм, нә кӧ тʼәне әʼрде, ле әʼзмана жи». Хәбәра «щарәкә дьн» дьдә кʼьфше, кӧ тьштед әʼфьри ԝе бьһʼәжьн у бенә һьлдане, ԝәки йед наһʼәжьн щида бьминьн. Аԝа әм ве йәке бьшекьриньн, кӧ әм пʼадшатикә нәһʼәжийайи дьстиньн у бь ви аԝайи бь хоф у тьрс Хԝәде бьһʼәбиньн, чаԝа кӧ ль Ԝи хԝәш те, чьмки Хԝәдейе мә агьре пʼәрʼьтандьне йә. Бьра һун тʼьме чаԝа хушк-бьра һәвдӧ һʼьз бькьн. Меванһʼьзийе бир нәкьн, чьмки һьнәка бь ԝе йәке мьлйакʼәт ԛәбул кьрьн, ле пе нәһʼәсийан. Гьртийа бир биньн, һʼәсаб кьн кӧ чаԝа һун жи тʼәви ԝан гьрти нә, ӧса жи щәфакʼеша бир биньн, чаԝа кӧ һун жи мина ԝан хун у гошт ьн. Һʼал-зәԝащ һʼәмуйарʼа нав-намуси бә у щи-ньвин һʼәлал бә, чьмки Хԝәде ԝе диԝана чʼәʼвдәр у зьнекʼара бькә. Пʼәрәһʼьзи бьра нава жийина ԝәда щи нәгьрә у дәстед ԝәда чьԛас һәйә, рʼази бьн, чьмки Хԝәде гот: «Әзе тʼӧ щар жь тә нәчьм у тʼӧ щар тә бәрʼнадьм». Ләма жи рʼуйе мә дьгьрә кӧ әм бежьн: «Хӧдан пьштоване мьн ә у әз натьрсьм. Инсане чь ль мьн бькә?» Рʼебәред хԝә бир биньн, йед кӧ ԝәрʼа хәбәра Хԝәде готьнә. Дина хԝә бьдьнә ахьрийа әʼмьре ԝан у чʼәʼв бьдьнә баԝәрийа ԝан. Иса Мәсиһ дӧһӧ, иро у һʼәта-һʼәтайе йәк ә. Бәр байе щурʼә-щурʼә һинкьрьнед хәриб нәкʼәвьн. Ԛәнщ ә кӧ дьл бь кʼәрәма Хԝәде бьшьдә, нә кӧ бь ԛәйдә-ԛанунед хԝарьн-нәхԝарьне. Әԝед кӧ пәй тьштед аһа кʼәтьн, тʼӧ кәси кʼар нәстанд. Горигәһәкә мә һәйә, кӧ изьна тʼӧ кәси жь ԝан тʼӧнә жь ԝе бьхԝьн, йед кӧ пʼарьстгәһеда хьзмәткʼарийе дькьн. Чаԝа әԝ һʼәйԝанед кӧ хуна ԝан бь дәсте сәрәккʼаһин бона бахшандьна гӧна дьһатә пирозгәһе у щәндәкед ԝан жь зоме дәр дьһатьнә шәԝьтандьне, ӧса жи Иса, кӧ щьмәʼт бь хуна Хԝә паԛьж бькьра, жь дәргәһе бажер дәр щәфа кʼьшанд. Аԝа ԝәрьн, әм жь зоме дәрен һәрʼьнә щәм Ԝи у ԛара Ԝи һьлдьнә сәр хԝә, чьмки мәрʼа ль вьр бажарәки һʼими тʼӧнә, ле әм һʼьзрәта ԝи бажари нә, йе кӧ ԝе бе. Дә ԝәрьн әм бь сайа Ԝи тʼьме ԛӧрбана пәсьндайине бьдьнә Хԝәде, аԝа готи бәре зар-зьмане хԝә, йед кӧ наве Ԝи иԛрар дькьн. Ӧса жи ԛәнщи у алиһәвкьрьне бир нәкьн, чьмки ԛӧрбанед ӧса ль Хԝәде хԝәш тен. Гӧһдарийа рʼебәред хԝә бькьн у гӧрʼа ԝанда бьн. Әԝана бона рʼӧһʼе ԝә хәԝе жь чʼәʼве хԝә дькьн, чьмки ԝе бона ԝә щабдар бьн. Бьра әԝ ԝи шьхӧле хԝә әшԛ у ша бькьн, нә кӧ бь офә-офе, чьмки әԝ йәк кʼаре надә ԝә. Бона мә дӧа бькьн. Әм әʼсәйи заньн кӧ исафа мә рʼьһʼәт ә у дьхԝазьн кӧ һәр тьшти рʼаст бькьн. Ле илаһи әз һиви дькьм кӧ дӧа бькьн, ԝәки әз зутьрәке вәгәрʼьмә щәм ԝә. Аԝа Хԝәдейе әʼдьлайийе, кӧ Хӧдане мә Иса жь мьрьне рʼакьр, Йе кӧ бь хуна пәймана һʼәта-һʼәтайе Сәрәкшьване пез ә, бьра Әԝ ԝә һәр тьштед ԛәнщва һазьр кә, кӧ һун әʼмьре Ԝи бькьн у Әԝ нава мәда бь дәсте Иса Мәсиһ тьштед кӧ ль Ԝи хԝәш тен бькә. Шькьр жь Ԝирʼа бә, һʼәта-һʼәтайе! Амин. Әз һиви жь ԝә дькьм хушк-бьрано, һун бь сәбьре гӧһ бьдьнә ван готьнед мьнә дьлдайини, чьмки мьн ԝәрʼа кьн ньвиси. Заньбьн кӧ Тимотʼейойе бьре мә жь кәле дәркʼәтийә. Һәгәр әԝ зу бе, әзе тʼәви ԝи бем ԝә бьбиньм. Сьлаве бьдьнә һʼәму рʼебәред хԝә у щьмәʼта Хԝәде. Әԝед кӧ жь Италйайе нә, ԝә сьлав дькьн. Кʼәрәма Хԝәде тʼәви ԝә һʼәмуйа бә. Жь Аԛубе хӧламе Хԝәде у Хӧдан Иса Мәсиһ: Сьлав ль ԝә һәр донздәһ әʼширед дьнйайеда бәлабуйи бә. Хушк-бьрайед мьн, шабунәкә мәзьн һʼәсаб кьн, гава һун бькʼәвьнә нава щурʼә-щурʼә щерʼьбандьна. Фәʼмдари йә, кӧ щерʼьбандьна баԝәрийа ԝә сәбьре пешда тинә. У сәбьр жи, бьра бь думька дьреж бә, ԝәки һун кʼамьл у гьһишти бьн, тʼӧ кемасикә ԝә тʼӧнәбә. Һәгәр сәрԝахтийа йәки жь ԝә тʼера ԝи накә, бьра һиви жь Хԝәде бькә у ԝе жь ԝирʼа бе дайине. Әԝ бь мәрʼдани дьдә һʼәмуйа у тʼӧ кәси беԛәдьр накә. Ле тʼәне бьра бь баԝәрийе бьхԝазә у дӧдьли нәбә, чьмки йе дӧдьли мина пелед бәʼре йә кӧ жь байе бьльнд дьбьн у датиньн. Мәрьве ӧса бьра нәфькьрә, кӧ ԝе тьштәки жь Хӧдан бьстинә. Әԝ мәрьве кӧ сәр дӧ ньга дькӧлә, һʼәму гавед хԝәда нә сәр йа хԝә йә. Бьрайе бәләнгаз бьра сәр бьльндбуна хԝә бьфьрʼә, ле йе дәԝләти сәр ньмьзбуна хԝә, чьмки әԝе мина гӧлед гиһе һʼьшк бә һәрʼә. Чаԝа тәʼв бь гәрмайийа хԝәва дәрте гиһе һʼьшк дькә, гӧл же дьԝарьн у бәдәԝәтийа диндара ԝе жи ӧнда дьбә, ӧса жи йе дәԝләти ԝе ише хԝәда бьчʼьлмьсә һәрʼә. Хԝәзи ль ԝи мәрьви, кӧ щерʼьбандьнада тәйах дькә, чьмки гава бь щерʼьбандьне рʼуспи дәре, әԝе тʼаще жийине бьстинә, кʼижан кӧ Хԝәде ԝанрʼа соз дайә, йед кӧ Ԝи һʼьз дькьн. Бьра тʼӧ кәс, йе кӧ нава щерʼьбандьнеда йә, нәбежә: «Хԝәде мьн бь хьрабийе дьщерʼьбинә», чьмки Хԝәде хьрабийада найе щерʼьбандьне у нә жи йәки дьщерʼьбинә. Ле һәр кәс дьбә машоԛе дьлһавьжийед хԝә, дьхапә у те щерʼьбандьне. Һьнге дьлһавьжи кәле хԝә дьстинә, гӧнә же дьфьрькә у гӧнә жи кӧ мәзьн дьбә, мьрьн же дьбә. Нәхапьн хушк-бьрайед мьнә дәлал! Һәр дайина ԛәнщ у һәр пʼешкʼеша кʼамьл жь жор ә, жь Бав, жь Әʼфьрандаре рʼонайа те хԝаре, Йе кӧ нә Хԝәха те гӧһастьне, нә жи си бәр Ԝи дадьгәрʼә. Әԝи ль гора ԛьрара Хԝә әм бь хәбәра рʼастийе жь Хԝә дьне хьстьн, ԝәки әм бьбьнә аԝазәки бәред дәрәмәта пешьнә әʼфьринед Ԝи. Заньбьн, хушк-бьрайед мьнә дәлал, бьра һәр мәрьв бьһистьнеда сәрхԝә бә, ле хәбәрдан у һерскʼәтьнеда гьран бә, чьмки һерса мерьв һәԛийа Хԝәде найнә сери. Ләма һʼәму мьрʼдарʼийе у һәр хьрабийе жь хԝә дур хьн, бь мьлуктийе ԝе хәбәра нава ԝәда чанди ԛәбул кьн, йа кӧ дькарә рʼӧһʼе ԝә хьлаз кә. Хәбәре бьԛәдиньн, нә кӧ тʼәне бьбьһен у ӧса хԝә бьхапиньн. Һәгәр йәк хәбәре тʼәне дьбьһе у наԛәдинә, әԝ мина ԝи мәрьви йә, йе кӧ нәйнькеда рʼәнг-рʼуйе хԝә дьньһерʼә. Хԝә дьбинә, дәрбаз дьбә дьчә у зу бир дькә, кӧ әԝ йәки чаԝа бу. Ле әԝе кӧ чʼәʼве хԝә жь ԛануна кʼамьлә кӧ аза дькә набьрʼә у нава ԝеда дьминә, дьбьһе бир накә, ле дьԛәдинә, әԝ ԝан кьрьнед хԝәда хԝәзьли йә. Һәгәр йәк хԝә хԝәденас һʼәсаб дькә у зьмане хԝә нькарә, әԝ хԝәха хԝә дьхапинә, хԝәденасийа ԝи пʼучʼ ә. Ль бәр Бав Хԝәдейе мә хԝәденасийа рʼаст у беԛӧсур әв ә: Тәʼли-тәнгийада дәст бавежьнә сеԝийа у жьнәбийа у һʼәвза хԝә жи жь ләкʼед дьне бькә. Хушк-бьрайед мьн! Һун кӧ баԝәрмәндед Хӧдане мә Иса Мәсиһе хԝәйирʼумәт ьн, фьрԛийе нәкьнә нава мәрьва. Мәсәлә, гава йәки гӧстила зерʼ тʼьлийеда у кʼьнщед рʼәԝш ԝәргьрти бе щьвина ԝә, ӧса жи йәки бәләнгаз бь кʼьнщед пʼьзьнива бе у һун дина хԝә бьдьнә йе хԝәйе кʼьнщед рʼәԝш у бежьне: «Кʼәрәм кә ве жоре рʼуне», ле йе бәләнгазрʼа бежьн: «Сәр пʼийа бьсәкьнә» йан жи «ве жере рʼуне», гәло һун нава хԝәда фьрԛийе данайньн у набьнә һʼакьмед фькьред хьраб? Бьбьһен хушк-бьрайед мьнә дәлал! Нә Хԝәде бәләнгазед ве дьне бьжартьн, ԝәки бь баԝәрийе дәԝләти бьн у ԝаред ԝе Пʼадшатийе бьн, кʼижан кӧ Хԝәде ԝанрʼа соз дайә, йед кӧ Ԝи һʼьз дькьн? Ле һун бәләнгаза беһӧрмәт дькьн! Чьма әԝ йед дәԝләти ниньн, кӧ зоре ль ԝә дькьн у ԝә кʼаши бәр диԝане дькьн? Чьма әԝ ниньн, йед кӧ ԝи наве ԛәнщ беһӧрмәт дькьн, кʼижан сәр ԝә йә? Һәгәр һун ԛануна Пʼадшатийе бьԛәдиньн, ль гора ньвисара кӧ дьбежә: «Һәвале хԝә ԝәкә хԝә һʼьз бькә», һун ԛәнщ дькьн. Ле һәгәр һун фьрԛийе дькьн, гӧна дькьн у һьндава Ԛанунеда дьбьнә йәки гӧнәкʼар. Әԝе кӧ тʼәмамийа Ԛануне хԝәй дькә, ле тьштәки же бәрʼдьдә, әԝ дьбә дәйндаре тʼәмамийа Ԛануне. Чьмки Әԝе кӧ гот: «Зьнийе нәкә» ӧса жи гот: «Нәкӧжә». Аԝа һәгәр зьнийе нәки, ле бькӧжи, диса Ԛануне дьтʼәрʼьбини. Хәбәрдан у кьрьнед хԝәда ӧса бьн, чаԝа йед диԝана ԝане бь ԝе ԛануне бьбә, йа кӧ азайийе дьдә. Чьмки бе рʼәʼм ԝе диԝана берʼәʼма бьбә, ле рʼәʼм ль бәр диԝане рʼуспи дькә. Чь фәйдә хушк-бьрайед мьн, һәгәр йәк бежә кӧ баԝәрийа ԝи һәйә, ле кьред ԝи тʼӧнәбьн? Гәло әва баԝәрийа дькарә ԝи хьлаз кә? Мәсәлә, һәгәр бьрак йан хушкәк сьтʼар ле тʼӧнәбә йан һʼәԝще нане рʼоже бә, жь ԝә йәк ԝанрʼа бежә: «Бь хер у сьламәт һәрʼьн, гәрм у тʼер бьн», ле тьштед кӧ әԝ һʼәԝщә бьн нәдә ԝан, чь фәйдә? Ӧса жи баԝәри, һәгәр кьред ԝе тʼӧнәбьн, бь тʼәне мьри йә. Ле йәке бежә: «Баԝәрийа тә һәйә, кьред мьн һәнә». Ле әзе бежьм: Кʼа баԝәрийа хԝә бе кьрьна нишани мьн кә, әзе жи баԝәрийе бь кьрьнед хԝәва нишани тә кьм. Тӧ баԝәр дьки, кӧ Хԝәде йәк ә. Ԛәнщ ә! щьн жи баԝәр дькьн у дьбьздьн. Ле тӧ дьхԝази әв йәк бе избаткьрьне, мәрьве беһʼьш, ԝәки баԝәри бейи кьра мьри йә? Нә Бьраһиме баве мә бь кьра рʼаст һатә һʼәсабе, гава кӧрʼе хԝә Исһаԛ дани сәр горигәһе, кӧ бькә ԛӧрбан? Тӧ дьбини кӧ баԝәрийе тʼәви кьред ԝи йа хԝә кьр у бь ԝан кьра баԝәри кʼамьл бу? У готьна ньвисаре һатә сери, кӧ дьбежә: «Бьраһим Хԝәде баԝәр кьр у әԝ жерʼа рʼасти һатә һʼәсабе» у досте Хԝәде һатә готьне. Һун дьбиньн кӧ мәрьв бь кьра рʼаст те һʼәсабе, нә кӧ тʼәне бь баԝәрийе? Нә ӧса жи Рʼәхаба чʼәʼвдәр бь кьра рʼаст һатә һʼәсабе, гава щәʼсус ԛәбул кьрьн у әԝ рʼекә дьнва вәрʼекьрьн? Аԝа чаԝа ԛальб бе рʼӧһʼ мьри йә, ӧса жи баԝәри бейи кьра мьри йә. Бьра гәләк жь ԝә, бьрайед мьн нәбьнә дәрсдар, чьмки һун заньн диԝане сәр мә дәрсдара һе гьран бә. Бәле әм һʼәму жи гәләки шашийа дькьн. Һәгәр йәк хәбәрданеда тʼӧ шашийе накә, әԝ йәки кʼамьл ә, кӧ дькарә тʼәмамийа ԛальбе хԝә зәфт кә. Әм гәме давежьнә дәве һәспе, ԝәки әԝ бе зәфте, кӧ әм сәрԝертийе тʼәмамийа һәспе пева бькьн. Әм биньн сәр гәмийе жи. Әԝ чьԛаси мәзьн ьн у жь бәр байе ԛайим тенә ажотьне, ле бь чәрхәкә гәләки бьчʼук тенә сәрԝертикьрьне, дьле гәмиван кʼийалида кӧ бьхԝазә. Ӧса жи зьман әндәмәки бьчʼук ә, ле тьштед жь хԝә мәстьр дьбежә. Дина хԝә бьдьнә пьрискә агьр, чь дарьстанәкә мәзьн дькарә бьшәԝьтинә! Зьман жи агьрәк ә, дьнйакә зӧлмкʼар ә нава әндәмед мәда. Әԝ тʼәмамийа ԛальбе мә дьһʼәрʼьминә, агьр дәԝра жийина мерьв дьхә у әԝ хԝәха жь алава агьре доже пегьрти йә. Һәр щурʼә рʼәʼԝьр, тәйрәдә, шульки у һʼәйԝанед бәʼре тенә зәфте у зәфти мерьв дьбьн, ле тʼӧ ԛул-бәндә зьмен нькарә. Әԝ зӧлмкʼарәки беар ә, жәʼра мәʼрава дагьрти йә. Әм бь ԝи шькьрийе дьдьнә Хӧдан у Бав, бь ԝи жи ньфьрʼа мерьв дькьн, йед кӧ дьлԛе Хԝәдеда һатьнә хӧльԛандьне. Һәма жь ԝи дәви жи дӧа у ньфьрʼ дәртен. Хушк-бьрайед мьн, әв йәк нә щайиз ә кӧ аһа бә. Гәло жь чʼәʼвканике ава хԝәш у тәʼл дьдә дәр? Гәло дьбә хушк-бьрайед мьн, ԝәки дара һежире бәре зәйтʼуне бьдә, йан жи кʼола тьрийе һежире? Нә жи жь шорʼайийе ава хԝәш дәрте? Нава ԝәда кʼи сәрԝахт у аԛьл ә? Бьра әԝ бь пʼәргалийа хԝәйә ԛәнщ, кьред хԝә бь мьлуктийа сәрԝахтийе бьдә кʼьфше. Ле һәгәр дьле ԝәда һʼәвсудийа хьраб у чʼәʼвнәбари һәнә, кʼӧбар нәбьн у рʼастийе дәрәԝ дәрнәхьн. Әва «сәрԝахтийа» нә дайина жорьн ә, ле жь дьне йә, йа мәрьвайи йә у жь щьна йә. Чьмки ль кʼидәре һʼәвсуди у чʼәʼвнәбари һәнә, ль ԝьр бетʼәрбәти у һәр кьрьнед хьраб жи һәнә. Ле сәрԝахтийа жорьн, бәре пешьн паԛьж ә, паше әʼдьл ә, мьлук у бәрбьһер ә, бь рʼәʼме у бәред ԛәнщийева тʼьжи йә, бе тʼагер у бе һʼьләкʼари йә. У бәре һәԛийе жь алийе йе кӧ бь әʼдьлайийе дьчинә те чьнине. Жь кʼӧ нә әԝ шәрʼ у дәʼԝе нава ԝәда? Нә жь тәмед ԝә нә, кӧ нава дьле ԝәда шәрʼе хԝә дькьн? Чʼәʼве ԝә ль тьшта йә, ле накʼәвә дәсте ԝә, дькӧжьн у чʼәʼвнәбарийе дькьн, ле нькарьн бьгьһижьнә мәрәме хԝә, һьнге һун һәврʼа дькʼәвьнә һʼӧщәте у шәрʼ дькьн. Һун дәст нахьн, чьмки һун һиви жь Хԝәде накьн. У гава һиви дькьн, настиньн, чьмки сәр нета хьрабийе һиви дькьн, ԝәки кʼефед дьле хԝә дәрбаз кьн. Беәʼсьлно! Һун ньзаньн кʼе ве дьне һʼьз дькә, әԝ нәйартийе ль Хԝәде дькә? Аԝа кʼи дьхԝазә бьбә йаре дьне, әԝ хԝә дькә нәйаре Хԝәде. Йан тʼәхмина ԝә бадиһәԝа ньвисар дьбежә, кӧ Хԝәде дәмана ԝи рʼӧһʼе бәр мәда йә? Ле бәле әԝ һе кʼәрәме дьдә мә. Ләма ньвисар дьбежә: «Хԝәде мьԛабьли кʼӧбар-бабаха йә, ле кʼәрәме дьдә шкәстийа». Аԝа бәр Хԝәде шкәсти бьн. Мьԛабьли мирещьн бьсәкьньн у әԝе жь ԝә бьрʼәвә. Хԝә ль Хԝәде бьгьрьн, Хԝәде жи ԝе Хԝә ль ԝә бьгьрә. Дәстед хԝә бьшон, гӧнәкʼарно, дьле хԝә паԛьж кьн, дӧдьлино. Бьнәʼльн, шин у гьри бьн, бьра кʼәне ԝә бьбә шин у әшԛа ԝә жи кʼәдәр. Ль бәр Хӧдан хԝә бьшкеньн у Әԝе ԝә бьльнд кә. Хәйба һәвдӧ нәкьн хушк-бьрано. Кʼи хәйба бьре хԝә дькә, йан лома бьре хԝә дькә, әԝ хәйба Ԛануне дькә у лома Ԛануне дькә. Ле һәгәр тӧ лома Ԛануне дьки, иди тӧ Ԛануне наԛәдини, ле һʼакьме ԝе йи. Тʼәне Ԛанундарәк у Һʼакьмәк һәйә, кӧ дькарә һьн хьлаз кә у һьн жи ӧнда кә. Ле тӧ кʼи йи кӧ лома һәвале хԝә дьки? Ньһа һун гӧһдар бьн, йед кӧ дьбежьн: «Иро йан сьбе әме һәрʼьнә фьлан бажари у ль ԝе дәре саләке бьминьн, тʼӧщарәтийе бькьн у ԛазьнщ кьн». Һун ньзаньн ԝе сьбе чь бе сәре ԝә. Әʼмьре ԝә чь йә? Һун мина мьже нә, һәԝ дьньһерʼи һәйә, һәԝ дьньһерʼи тʼӧнә. Гәрәке һун аһа бежьн: «Һәгәр Хӧдан бьхԝазә, әме бьжин у фьлан йан беван тьшти бькьн». Ле һун бь кʼӧбар-бабахийа хԝә дьфьрʼьн. Һәр пʼәйдайинәкә аһа хьраби йә. Аԝа әԝе кӧ занә ԛәнщийе бькә у накә, әԝ жерʼа гӧнә йә. Ньһа һун бьбьһен, дәԝләтино! Бьгьрин у шине бькьн бона ԝе бәләнгазийа кӧ ԝе бе сәре ԝә. Һәбука ԝә рʼьзи йә, кʼьнщед ԝә жи бунә хӧре бьзузе. Зерʼ у зиве ԝә зәнг гьртьн ә у зәнга ԝане бьбә шәʼде мьԛабьли ԝә у мина алава егьр гоште ԝә һʼуфи хԝә кә. Ԝә бона рʼожед ахьрийе хьзнә хԝәрʼа тʼоп кьр! Ԝә әԝ һәԛед пʼалед кӧ әʼрде ԝә дьдьрутьн нәдане. Ва йә әԝ һәԛ дькьнә зарин. Шькийате ԝан пʼала гьһиштийә гӧһе Хӧдане Зор. Ԝә ль сәр дьне чʼәʼве хԝә тьштәкида нәһьштийә, ль гора дьле хԝә хԝарийә-вәхԝарийә, чаԝа кʼозикьри, бона рʼожа сәржекьрьне. Ԝә әԝ мәрьвед рʼаст ломәкʼар кьрьн у кӧштьн, кʼижан кӧ мьԛабьли ԝә рʼанәбун. Аԝа хушк-бьрано, сәбьр кьн һʼәта һатьна Хӧдан. Дина хԝә бьдьне, щоткʼар һивийа бәре әʼрдейи бь ԛимәт ә, бона ԝе йәке сәбьр дькә һʼәта барана пешьн у пашьн ледә. Һун жи сәбьр кьн, гӧмана хԝә ӧнда нәкьн, чьмки һатьна Хӧдан незик ә. Бина хԝә жь һәвдӧ тәнг нәкьн хушк-бьрано, кӧ диԝана ԝә нәбә. Ва йә һʼакьм пьшт дери сәкьни йә. Хушк-бьрано, алийе тәʼли-тәнгийа у сәбьреда чʼәʼв бьдьнә ԝан пʼехәмбәра, йед кӧ бь наве Хӧдан хәбәр данә. Бәле әм хԝәзийа хԝә ль йед сәбьр дькьн тиньн. Ԝә бона сәбьра Ибо бьһистийә у ԝә дит, Хӧдан ахьрийа ԝи чаԝа хер кьр, чьмки Хӧдан гәләки исаф у рʼәʼм ә! Бәри һәр тьшти хушк-бьрайед мьн, сонд нәхԝьн, нә бь әʼзмен, нә бь әʼрде, нә жи сондәкә майин. Бьра «Бәле»-йа ԝә бәле бә, «На»-йа ԝә на бә, ԝәки һун диԝане сәр хԝәда нәйньн. Һәгәр йәк жь ԝә тәʼли-тәнгийеда йә, бьра дӧа бькә. Һәгәр йәк ша йә, бьра әшԛи Хԝәде бьстьре. Һәгәр йәк жь ԝә нәхԝәш ә, бьра гази бәрпьрсийаред щьвине кә, сәр ԝида бьра дӧа бькьн, бь наве Хӧдан бь рʼун рʼун кьн. У дӧайе бь баԝәрийе ԝе йе нәхԝәш ԛәнщ кә у Хӧдан ԝе ԝи рʼакә сәр пʼийа. У һәгәр гӧнәк жи кьрьбә, ԝе ԝи бе бахшандьне. Ләма бәр һәв гӧнед хԝә бьдьнә рʼуйе хԝә у бона һәв дӧа бькьн, ԝәки һун ԛәнщ бьн. Дӧайе йе рʼаст гәләки ԛәԝат ә у һʼӧкӧм дькә. Елйас хут мәрьвәки мина мә бу, бь дьл у щан дӧа кьр, кӧ баран нәбарә у се сал у нива сәр әʼрде баран нәбари. У паше диса дӧа кьр, жь әʼзмен баран бари у әʼрде бәре хԝә да. Гәли хушк-бьрайед мьн! Һәгәр йәк жь ԝә жь рʼийа рʼастийе бькʼәвә у йәки дьн ԝи вәгәрʼинә, бьра әԝ заньбә йе кӧ гӧнәкʼар жь рʼийа ԝийә хальфи вәдьгәрʼинә, әԝ рʼӧһʼәки жь мьрьне хьлаз дькә у гәләк гӧна рʼәсит дькә. Жь Пәтрус, Шандийе Иса Мәсиһ, щьмәʼта Хԝәдейә бьжартирʼа, йа кӧ ль ԝәлатед Понтосе, Галатйайе, Кәпәдокйайе, Асйайе у Битенйайеда хәриб бәлабуйи йә. Һун ль гора ԝе ԛьрара Бав Хԝәдейә пешда һатьнә бьжартьне у бь Рʼӧһʼе Пироз бӧһӧрти-жьбарә дьбьн, ԝәки гӧһдарийа Иса Мәсиһ бькьн у бь хуна Ԝийә рʼети бенә паԛьжкьрьне: Дә бьра кʼәрәм у әʼдьлайи һе ль ԝә зедә бә. Шькьр жь Хԝәдерʼа, Баве Хӧдане мә Иса Мәсиһ, кӧ жь рʼәʼма Хԝәйә пʼьрʼ, щарәкә дьн әм дьне хьстьн, бь рʼабуна Иса Мәсиһә жь мьрийа, ԝәки бьбьнә хԝәйе гӧмана сах у ԝан соз-ԛьраред нәбәталә нәрʼьзи у нәчʼьлмьси ԝар бьн. Әвана ль әʼзмана ԝәрʼа хԝәйкьри нә. У ԛәԝата Хԝәде пе баԝәрийа ԝә, ԝә хԝәй дькә, бона ԝе хьлазбуна һазьркьри, йа кӧ ахьрийа зәменда ԝе хӧйа бә. Һун бь ԝе ша дьбьн, рʼаст ә ньһа жи ӧса дьԛәԝьмә кӧ һун һьнәки мәʼдәкьри нә, жь дәст щурʼә-щурʼә щерʼьбандьна. Әв йәк дьбә сәбәб, ԝәки хальсийа баԝәрийа ԝә һе бь ԛимәт кʼьфш бә, нә кӧ әԝ зерʼе кӧ нава егьрда те щерʼьбандьне ле диса ӧнда дьбә у бь ви аԝайи әԝ баԝәрийа ԝә ԝе һежайи пәсьн, рʼумәт у ԛәдьр бә, ԝәхте хӧйабуна Иса Мәсиһ. Ԝә Әԝ нәдитийә, ле һун Ԝи һʼьз дькьн, ньһа жи набиньн, ле баԝәрийа хԝә Ԝи тиньн у ша нә бь ԝе әшԛа мәзьнә хԝәйирʼумәт, кӧ бь зара найе готьне. Чьмки һун хьлазкьрьна рʼӧһʼе хԝә дьстиньн, кӧ мәрәме баԝәрийа ԝә йә. Бона ве хьлазбуне пʼехәмбәр ле гәрʼийан у кʼәтьбунә бьн әʼнәна у бона ԝе кʼәрәма кӧ ԝе ԝәрʼа бьбуйа пʼехәмбәрти кьрьн. Рʼӧһʼе Мәсиһи нава ԝанда һе пешда ль бәр ԝан вәдькьр, кӧ Мәсиһе щәфе бькʼьшинә у пәйрʼа бькʼәвә рʼумәта Хԝә. У ԝан дькьр кӧ бьзаньбьн кʼа бона кʼәнге у зәманәки чаԝада әв йәке бьԛәԝьмьн. Ль бәр ԝан вәбу, ԝәки әԝ нә кӧ бона хԝә, ле бона ԝә хәбьтин, гава әԝ тьштед ньһа ԝәрʼа бь дәсте ԝан һатьнә готьне, йед кӧ Мьзгини ԝәрʼа даннасин кьрьн, бь Рʼӧһʼе Пирози кӧ жь әʼзмен һатә шандьне. Мьлйакʼәт жи дәмана ԝан тьштада нә, кӧ һәма бьбиньн. Бона ԝе йәке һун фькьред хԝәда пьштгьредайи у һʼьшйар бьн, тʼам гӧмана хԝә бьдьнә сәр ԝе кʼәрәме, йа кӧ ԝе ԝәрʼа бе дайине, ԝәхте хӧйабуна Иса Мәсиһ. Мина зарʼед гӧһдар бьн, нәбьнә мина ԝи ԝәхте дьлхԝәстьнед хԝәйә нәзанийа хԝәда. Ле мина ԝи Пирозе кӧ гази ԝә кьр, һун жи пироз бьн нава һʼәму рʼабун-рʼуньштьна хԝәда. Чаԝа ньвисар ә: «Пироз бьн, чьмки Әзи пироз ьм». Һәгәр һун Ԝирʼа Баво дьбежьн, Йе кӧ бе фьрԛи диԝана һәр кәси ԝәкә әʼмәлед ԝи дькә, кӧ ӧса йә ви ԝәхте хәриб-фьрарийа хԝәйә ве дьне бь хофа Хԝәде дәрбаз кьн. Чьмки һун заньн ԝәки һун жь рʼаԝ-рʼьзьмед кал-бавайә бекер, пе ԝан тьштед кӧ ӧнда дьбьн, аԝа готи зерʼа йан зива нәһатьнә кʼьрʼине, ле пе хуна Мәсиһә ԛимәт-гьран, кӧ әԝ чаԝа бәрхәки беԛӧсур у беләкʼә бу. Әԝ һе бәри дәстпебуна дьнйайе кʼьфшкьри бу, ле ван ахьрийада бона ԝә әʼйан бу. Бь Ԝи ԝә баԝәрийа хԝә Ԝи Хԝәдейи ани, Йе кӧ Әԝ жь нава мьрийа рʼакьр у рʼумәт да Ԝи, ләма баԝәри у гӧмана ԝә сәр Хԝәде йә. Аԝа ԝә гӧһдарийа рʼастийе кьр у бь ви аԝайи хԝә паԛьж кьр, кӧ һʼьзкьрьна ԝә һьндава хушк-бьрада бе һʼьләкʼари бә, ньһа бь дьле сах һәвдӧ ԛайим һʼьз бькьн. Һун нә кӧ жь һавене пʼучʼ диса дьне кʼәтьнә, ле жь йе нәпʼучʼ, жь хәбәра Хԝәдейә хԝәйиәʼмьрә һʼәта-һʼәтайе. Чьмки «Һʼәму мәрьв мина гиһе нә у тʼәмамийа рʼәԝша ԝан мина гӧле гиһе. Гиһа һʼьшк дьбә у гӧлед ԝе же дьԝарьн, ле хәбәра Хӧдан һʼәта-һʼәтайе дьминә». Әв әԝ хәбәр ә, кӧ бь Мьзгинийе ԝәрʼа һатә дайине. Дә һәр щурʼә хьрабийе, һʼьләкʼарийе, дӧрʼутийе, һʼәвсудийе у бӧхданбежийе жь пʼеша хԝә даԝшиньн. Мина дәргушед ль бәр бьстен, һʼәйра шире сьпийи рʼӧһʼанида бьн, кӧ һун бь ԝи хьлазбунерʼа мәзьн бьн. Чьмки ньвисар ә: Ԝә «тәʼма ширьнайийа Хӧдан һьлдайә». Хԝә ль Ԝи бьгьрьн, Ԝи кәвьре сахи кӧ жь мәрьва тʼәхсиркьри йә, ле жь Хԝәдеда бьжарти у хԝәйиԛәдьр ә. Һун жи мина кәвьред сах, пʼарьстгәһәкә рʼӧһʼани ԝәрьнә чекьрьне, чаԝа кʼаһинед пироз ԛӧрбанед рʼӧһʼанийә ль Хԝәде хԝәш бь Иса Мәсиһ бьдьн. Чьмки кʼьтебеда ньвисар ә: «Ва Әз Сийонеда кәвьрәки жьбарәйи у хԝәйиԛәдьр чаԝа кәвьре әʼнишке датиньм у кʼи баԝәрийа хԝә Ԝи бинә, тʼӧ щар ԝе шәрми нәминә». Аԝа әԝ кәвьр бона ԝә баԝәрмәнда хԝәйирʼумәт ә, ле бона нәбаԝәра: «Әԝ кәвьре кӧ һоста тʼәхсир кьр, Әԝ бу сәре әʼнишке», «Кәвьре кӧ мәрьв сәрда дьлькʼӧмьн у зьнаре кӧ же һол дьбьн». Әԝ дьлькʼӧмьн, чьмки гӧһдарийа хәбәре накьн у чаԝа ԝе йәкерʼа жи кʼьфшкьри нә. Ле һун ԛәбиләкә жьбарә нә, кʼаһинед пʼадшатийе, мьләте бӧһӧрти, щьмәʼта Хԝәде, ԝәки кʼәрәмәтед Ԝи бькьнә дәнги, Йе кӧ һун жь тәʼристанийе гази рʼонайа хԝәйә һʼӧжмәкʼар кьрьнә. Ԝәхтәке һун нә тʼӧ щьмәʼт бун, ле ньһа бунә щьмәʼта Хԝәде, һунә бе рʼәʼма Хԝәде бун, ле ньһа ԝә рʼәʼм дитийә. Дәлално! Әз һиви жь ԝә дькьм, чаԝа мәрьвед фьрари у хәрибә ве дьне, һʼәвза хԝә жь дьлһавьжийед бәдәне бькьн, кӧ мьԛабьли рʼӧһʼе ԝә шәрʼ дькьн. Нава пʼутпʼарьстада һун хԝә ӧса пʼәргал хԝәй кьн, ԝәки чь тьштида жи ԝә рʼәзил бькьн чаԝа хьраб, кьред ԝәйә ԛәнщ бьбиньн у шькьрийе бьдьнә Хԝәде, ԝе Рʼожа кӧ сәрики бьдә дьне. Гӧрʼа һәр сәрԝертийед мәрьвайеда бьн, бона хатьре Хӧдан, гӧрʼа пʼадшеда бьн, чаԝа сәрԝере һәри бьльнд, ӧса жи гӧрʼа ԝәлийада бьн, кӧ жь алийе пʼадшеда шанди нә, ԝәки щәзайе бьдьнә нәһәԛа у пәсьн жи бьдьнә ԛәнща. Чьмки әв ә ԛьрара Хԝәде, кӧ һун бь ԛәнщикьрьне дәнге мәрьвед беһʼьшә нәзан бьдьнә бьрʼине. Мина мәрьвед аза бьжин. Бьра азайийа ԝә нәбә хелийа хьрабикьрьне, ле бьжин чаԝа хӧламед Хԝәде. Ԛәдьре һʼәмуйа бьгьрьн хушк-бьра һʼьз бькьн, жь Хԝәде бьтьрсьн, ԛәдьре пʼадше бьгьрьн. Хӧламно, бь хофкʼешикә мәзьн гӧрʼа ахайед хԝәда бьн, нә кӧ тʼәне гӧрʼа йед ԛәнщ у бәрбьһерада бьн, ле гӧрʼа зӧлмкʼарада жи. Чьмки әва бәхтәԝарик ә, һәгәр йәк бона хатьре Хԝәде щики һәԛи-нәһәԛ зәлулийе дькʼьшинә у сәбьр дькә. Ле чь фәйдә һәгәр һун бона гӧнәкьрьне бенә ледане у тәйах кьн? Ле һәгәр һун бона ԛәнщикьрьне щәфе бьбиньн у тәйах кьн, һун ль бәр Хԝәде бәхтәԝар ьн. Бәле һун ве йәкерʼа һатьнә газикьрьне, чьмки Мәсиһ хԝәха жи бона ԝә щәфа кʼьшанд у нәхшәк ԝәрʼа һьшт, ԝәки һун пʼегәһа Ԝида һәрʼьн. Әԝи гӧнә нәкьр у заре Ԝида һʼьләкʼари тʼӧнәбу. Гава дьһатә рʼәзилкьрьне, жь бәрва кәс рʼәзил нәдькьр, гава щәфа дькʼьшанд, гәф ль кәсәки нәдьхԝар, ле Хԝә спартьбу һʼакьме сәр рʼастийе. Әԝи гӧнед мә бәдәна Хԝәда рʼакьрьнә сәр дар, ԝәки әм һьндава гӧнада мьри бьн у бона һәԛийе бьжин: Бь дәхмед Ԝи һун ԛәнщ бун. Чьмки һун мина пәзед хальфи бун, ле ньһа һун ль Шьван у Сәʼвийе рʼӧһʼе хԝә вәгәрʼийанә. Ӧса жи кʼӧлфәтно, гӧрʼа мере хԝәда бьн, ԝәки жь ԝан һьнәк жи, һәгәр гӧһдарийа хәбәре накьн, бь пʼәргалийа жьнед хԝә, бе готьн жи бенә сәр баԝәрийе гава пʼәргалийа ԝәйә хофә у навә-намус бьбиньн. Бьра хәмьла ԝә дәрвава бь гӧливәгьртьне у тʼорʼед зерʼа, йан жи бь кʼьнща нибә, ле йа мәрьве һьндӧрʼе дьлда, рʼӧһʼәки мьлук у гьранә бәдәԝәтийа нәбәтал ә, кӧ ль бәр Хԝәде пʼьрʼ бь ԛимәт ә. Чьмки бәре бь ви тьһәри кʼӧлфәтед пирозә кӧ гӧмана хԝә данибунә сәр Хԝәде, хԝә дьхәмьландьн, хәмьла ԝан әԝ бу кӧ гӧрʼа мере хԝә бькьрана, мина Сәрайе кӧ гӧрʼа Бьраһимда бу у дьготә ԝи: «Хԝәйе мьн». Иди һун ԛизед ԝе дейе нә, һәгәр һун хԝә ль ԛәнщийе дьгьрьн у жь тʼӧ тьшти натьрсьн. Ӧса жи мерно, бь фәʼмдарийе әʼмьре хԝә тʼәви жьнед хԝә дәрбаз кьн, чаԝа ԛьсьме сьст ԛәдьре ԝан бьгьрьн, ӧса жи чаԝа һәвалԝаре ԝе жийина кӧ һуне пʼешкʼеш бьстиньн, ԝәки тʼӧ тьшт нәбьнә байисе дӧайед ԝә. Һәйнәсәр һʼәму жи сәр нетәке бьн, сәр һәв шәԝат бьн, һәв һʼьз бькьн, рʼәʼм у шкәсти бьн. Жь бәр хьрабийева хьрабийе нәкьн, йан жь бәр беһӧрмәткьрьнева беһӧрмәткьрьне, ле жь бәр ванва дӧа-дьрозга ль ԝан бькьн, чьмки һун ве йәкерʼа һатьнә газикьрьне, ԝәки дӧа-дьрозге создайи сәр ԝәда бе. Чьмки ньвисар ә: «Кʼи жийине бәгәм дькә у дьхԝазә рʼожед хԝәш бьбинә, бьра зьмане хԝә жь хьрабийе хԝәй кә у заре хԝә жи жь һʼьләкʼарийе. Бьра жь хьрабийе вәгәрʼә, ԛәнщийе бькә у әʼдьлайийе бьгәрʼә, ль пәй ԝе һәрʼә. Чьмки чʼәʼве Хӧдан ль сәр рʼаста йә у гӧһе Ԝи сәр дӧайе ԝан ә, ле Хӧдан мьԛабьли ԝан ә, йед кӧ хьрабийе дькьн». Кʼи ԝе хьрабийе ль ԝә бькә, һәгәр һун дәмана ԛәнщикьрьнеда бьн? Ле һәгәр һун бона рʼастикьрьне щәфе жи бьбиньн, һунә хԝәзьли нә! Иди жь мәрьва нәтьрсьн у хԝә ӧнда нәкьн. Ле бәле Мәсиһ чаԝа Хӧдане пироз дьле хԝәда бьльнд бьгьрьн. Һәр гав һазьр бьн, щаба ԝан һʼәмуйа бьдьн, йед кӧ бона ԝе гӧмана нава ԝәда дьпьрсьн. Ле ԝе йәке бь хоф у мьлуктийе бькьн, хԝәйе исафа рʼьһʼәт бьн, ԝәки, гава һун бенә рʼәзилкьрьне, йед кӧ пʼәргалийа ԝәйә ԛәнщә тʼәви Мәсиһ беһӧрмәт дькьн, шәрми бьн. Һе ԛәнщ ә, һәгәр ԛьрара Хԝәде йә, әм бона ԛәнщийе щәфе бькʼьшиньн, нә кӧ бона хьрабийе. Чьмки Мәсиһ щарәке бона һәр тʼьм бона гӧна щәфа кʼьшанд, Йе һәԛ бона нәһәԛа, ԝәки мә незики Хԝәде кә. Әԝ алийе бәдәнида һатә кӧштьне, ле алийе рʼӧһʼанида жийинерʼа һатә вәгәрʼандьне. Бь рʼӧһʼани чу нава ԝан рʼӧһʼед кәледа даннасин кьр, йед кӧ ԝәхтәке нә гӧһдар бун, гава Хԝәде бь думька дьреж сәбьр дькьр, ԝи зәмане Нӧһда, гава гәми дьһатә чекьрьне. Ԝеда һьндьк, аԝа готи һʼәйшт нәфс «нава аведа» хьлаз бун. Әԝ ав сурәте ньхӧмандьне бу, кʼижан ньһа ԝә хьлаз дькә. Әԝ ньхӧмандьн нә кӧ ԝә жь ԛьлера бәдәне дьшо, ле жь исафа рʼьһʼәт шәʼдәтик ә ль бәр Хԝәде. Әԝ йәк бь рʼабуна Иса Мәсиһә жь мьрийа ԝә хьлаз дькә, Йе кӧ чуйә әʼзмен, ль мьле Хԝәдейи рʼасте йә у мьлйакʼәт, һʼӧкӧмәт у ԛӧдрәтед рʼӧһʼани бьн гӧрʼа Ԝида нә. Аԝа Мәсиһ кӧ бона мә бәдәни щәфа кʼьшанд, һун жи бь ԝе нет-фькьре сильһʼкьри бьн. Чьмки йе бь бәдәни щәфа кʼьшанд, ԝи дәст жь гӧна кʼьшандийә, ԝәки иди һʼәта мьрьна хԝә, нә кӧ ль гора дьлһавьжийед хԝәйә мәрьвайи бьжин, ле ль гора ԛьрара Хԝәде. Бәси ԝә йә, кӧ ԝә ԝәхте жийина хԝәйә бьһӧрида ль гора хԝәстьна пʼутпʼарьста дәрбаз кьрийә, һун пәй һʼәрамийе, тәмхԝәстьнед хьраб, пәй-вәхԝарьне, кучʼьксантийе, сәрхԝәшийе у пʼутпʼарьстийа кʼьрет кʼәтьбун. Әԝ пʼутпʼарьст әʼщебмайи жи дьминьн, ԝәки һун тʼәви авитийа ԝанә бенамуси набьн у наве хьраб ль пәй ԝә дьхьн. Ле әԝе ль бәр Ԝи щабдар бьн, Йе кӧ һазьр ә диԝана мьри у зендийа бькә. Бона ве йәке жи ԝан мьрийарʼа Мьзгини һатә дайине, йед кӧ бь бәдәни мина мәрьва диԝана ԝан һатә кьрьне, ԝәки бь рʼӧһʼани бьжин мина Хԝәде. Ахьрийа һәр тьшти незик буйә. Аԝа сәрԝахт у сәр хԝә бьн, кӧ бькарьбьн дӧа бькьн. Бәри һәр тьшти, һʼьзкьрьна ԝә һьндава һәвда бь дьл у щан бә, чьмки һʼьзкьрьн гәләк гӧна дьньхемә. Һьндава һәвда меванһʼьз бьн, бина хԝә тәнг нәкьн. Жь ԝә кʼе чь пʼешкʼеш стандийә, бь ԝе жи һәврʼа хьзмәткʼарийе бькьн, чаԝа ԝәкʼилед ԛәнщә кʼәрәма Хԝәде. Һәгәр йәк хәбәр дьдә, бьра готьнед Хԝәде хәбәр дә, һәгәр йәк хьзмәткʼарийе дькә, бьра бь ԝе ԛәԝате бькә, кӧ Хԝәде дайе, ԝәки һәр тьштида наве Хԝәде бе бьльндкьрьне бь Иса Мәсиһ, рʼумәт у ԛӧдрәт жь Ԝирʼа һʼәта-һʼәтайе. Амин. Дәлално! Жь ԝе алава тәнгасийе әʼщебмайи нәминьн, кӧ бона щерʼьбандьне те сәре ԝә у нәфькьрьн кӧ әв чь бәла бу ль ԝә ԛәԝьми. Ле ша бьн, кӧ һун тʼәви щәфед Мәсиһ дьбьн, ԝәки ԝи ԝәхте хӧйабуна рʼумәта Ԝи һуне жь шабуне гәш бьн. Һәгәр һун бона наве Мәсиһ бенә рʼәзилкьрьне, һунә хԝәзьли нә, кӧ ӧса йә Рʼӧһʼе хԝәйирʼумәт, Рʼӧһʼе Хԝәде сәр ԝә данийә. Бьра жь ԝә тʼӧ кәс щәфе нәкʼьшинә, чаԝа меркӧж, йан дьз, йан зӧлмкʼар, йан жи тʼәви шьхӧле хәлԛе буйи. Ле һәгәр щәфе бькʼьшинә чаԝа мәсиһи, бьра шәрм нәкә, ле шькьрийе бьдә Хԝәде бона ви нави, кӧ сәр ԝи йә. Иди ԝәхт перʼа гьһиштийә, ԝәки диԝан жь мала Хԝәдеда дәстпебә у һәгәр пешда жь мәда дәстпедьбә, ле ахьрийа ԝане чаԝа бә, йед кӧ гӧрʼа ԝе Мьзгинийа жь Хԝәде накьн? Ньвисар ә: «Һәгәр йе рʼаст ԝе бь зорәке хьлаз бә, иди һʼале нәпʼак у гӧнәкʼара ԝе чаԝа бә?» Аԝа йед кӧ ль гора ԛьрара Хԝәде щәфе дькʼьшиньн, бьра хԝә ль ԛәнщийе бьгьрьн, рʼӧһʼе хԝә бьсперьнә Әʼфьрандаре хԝәйи амьн. Әз һиви жь бәрпьрсийаред нава ԝәда дькьм, әз хԝәха жи чаԝа бәрпьрсийар у шәʼде щәфед Мәсиһ у һәвал-пʼаре ԝе рʼумәте мә, йа кӧ ԝе хӧйа бә. Шьвантийе ԝи кәрийе пәзе Хԝәдейи ль бәр хԝә бькьн, нә кӧ бе дьл, ле бь дьл у щан ӧса хԝәй кьн, чаԝа Хԝәде дьхԝазә, нә кӧ бона кʼара хԝә, ле бь рʼәзәдьли, нә кӧ ль сәр йед кӧ пʼара ԝә кʼәтьнә һʼӧкӧм кьн, ле нәхше ԛәнщ нишани кери кьн. У гава Сәрәкшьван әʼйан бә, һуне ԝе тʼаще рʼумәте бьстиньн, кӧ чʼьрусийа ԝе ӧнда набә. Ӧса жи щаһьлно, гӧрʼа мәзьнада бьн. У һун һʼәму жи, ль бәр һәв шкәсти бьн, хӧламтийе һәвдӧрʼа бькьн, чьмки ньвисар ә: «Хԝәде мьԛабьли кʼӧбар-бабаха йә, ле кʼәрәме дьдә шкәстийа». Бьн дәсте Хԝәдейи зор та бьн, кӧ Әԝ ԝәхтда ԝә бьльнд кә у һʼәму хәмед хԝә бавежьнә сәр Ԝи, чьмки Әԝ бона ԝә хәм дькә. Сәрԝахт бьн, һʼьшйар бьминьн! Мирещьне нәйаре ԝә мина шер мьрʼә-мьрʼа ԝи йә, дьгәрʼә кʼа кʼе һʼуфи хԝә кә. Баԝәрийеда һʼимгьрти мьԛабьли ԝи бьсәкьньн, чьмки һун заньн кӧ хушк-бьред ԝә жи тʼәмамийа дьнйайеда хут ԝан щәфа дькʼьшиньн. Ле Хԝәдейе тʼәмамийа кʼәрәме, Йе кӧ пе Мәсиһ һун гази рʼумәта хԝәйә һʼәта-һʼәтайе кьрьнә, пәй һьнәк щәфа дитьнерʼа, ԝе Хԝәха ԝә кʼамьл кә, бьшьдинә, ԛәԝат кә, хԝәйибьнгәһ кә. Ԛӧдрәт жь ԝирʼа һʼәта-һʼәтайе. Амин. Мьн бь дәсте Силас, чаԝа бьраки амьн әз ԝи һʼәсаб дькьм, кьн ԝәрʼа ньвиси, дьл дьдьмә ԝә у шәʼдәтийе дьдьм, кӧ әв ә кʼәрәма Хԝәдейә рʼаст. Веда һун ԛәԝин бьсәкьньн. Щьвина Бабилонеда ль ԝә сьлав дькә, йа кӧ тʼәви ԝә һатийә бьжартьне, ӧса жи лаԝе мьн Марԛос. Бь рʼамусана һʼьзкьрьнейә дьле сах һәвдӧ сьлав кьн. Дә бьра әʼдьлайи ль ԝә һʼәмуйед пʼара Мәсиһ бә. Амин. Жь Шьмһʼун Пәтрусе хӧлам у шандийе Иса Мәсиһ, ԝанрʼа, йед кӧ бь һәԛийа Хԝәде Хьлазкьре мә Иса Мәсиһ әԝ баԝәрийа хԝәйиԛимәт стандьн, чаԝа мә станд: Дә бьра кʼәрәм у әʼдьлайи бь ԝе занәбуна Хԝәде у Хӧдане мә Иса ль сәр ԝә зедә бә. Ԛәԝата хԝәдетийа Ԝи һәр тьште кӧ ль жийина хԝәденасийе дькʼәвә пʼешкʼеши мә кьр, бь ԝе занәбуна мәйә һьндава Ԝида, Йе кӧ бь сайа рʼумәт у ԛәнщийа Хԝә гази мә кьр. Бь ви аԝайи Әԝи созед һәрә мәзьнә ԛимәт данә мә, ԝәки әм бь ԝан тʼәви бьнйатʼа хԝәдетийе бьн у жь ԝе бош-бәталийа кӧ жь дьлһавьжийед дьне пешда те бьрʼәвьн. Һәма бона ве йәке һәр алийава хирәт кьн, сәр баԝәрийа хԝәда ԛәнщийе зедә кьн, сәр ԛәнщийеда занәбуне, сәр занәбуне хԝәгьртьне, сәр хԝәгьртьне сәбьре, сәр сәбьре хԝәденасийе, сәр хԝәденасийе һʼӧба хушк-бьра у сәр һʼӧба хушк-бьра һʼьзкьрьне. Чьмки һәгәр әв шӧрәтана нава ԝәда һәнә у зедә дьбьн, һун бекер у бебәр наминьн нава ԝе занәбуна ԝәйә һьндава Хӧдане мә Иса Мәсиһда. Ле ль щәм кʼе әв шӧрәтана тʼӧнәнә, әԝ чʼәʼвада һаԛас мәʼрьм ә, ԝәки ԛәт набинә у бир кьрийә кӧ жь гӧнед хԝәйә бәре паԛьж буйә. Бона ве йәке хушк-бьрано, һе бькьн кӧ ԝе гази у жьбарәбуна хԝә тʼәстиԛ кьн. Һун кӧ ве йәке бькьн, тʼӧ щар накʼәвьн. Бь ви аԝайи дәргәһе ль бәр ԝә бь мәрʼдани вәбә, кӧ бькʼәвьнә Пʼадшатийа һʼәта-һʼәтайейә Хӧдан у Хьлазкьре мә Иса Мәсиһ. Бона ве йәке әз һәр гав дьхԝазьм кӧ ван тьшта бькьмә бира ԝә, чаԝа һун заньн у сәр ԝе рʼастийа кӧ гьһиштийә ԝә жи һʼимгьрти нә. Әз ве йәке жи рʼаст дьбиньм, ԝәки һʼәта ви ԛальбида мә биньмә бира ԝә. Чьмки заньм кӧ әзе зутьрәке ви ԛальби жь хԝә бехьм, чаԝа кӧ Хӧдане мә Иса Мәсиһ әʼлами мьн кьрийә. Аԝа әзе бькьм, кӧ пәй чуйина мьнрʼа жи, һун һәр гав бькарьбьн ван тьшта биньнә бира хԝә. Әм нә кӧ пәй чʼьловискийед һостатийә бәрхԝәдәрхьсти кʼәтьбун гава мә дәрһәԛа ԛәԝат у һатьна Хӧдане мә Иса Мәсиһда ԝәрʼа гот, ле мә бь чʼәʼвед хԝә мәзьнайийа диндара Ԝи дит. Әԝи жь Бав Хԝәде рʼумәт у һӧрмәт станд, гава жь ԝе Рʼумәта Ԛәшәнг дәнг һат у гот: «Әԝ ә Кӧрʼе Мьни дәлал, жь кʼижани Әз рʼази мә». Мә хԝәха әв дәнг бьһист, гава жь әʼзмен һат, һьнге әм тʼәви Ԝи сәре чʼийайе бӧһӧрти бун. Аԝа готьнед пʼехәмбәртийе жи бона мә һе мак дьбьн. Ԛәнщ ә ԝәки һун дина хԝә бьдьнә ԝан, чьмки әԝ мина чʼьраке нә, кӧ тәʼрийеда рʼонайе дьдә, һʼәта сьбәһ зәлал бә у стәйрка бәрбьрʼо дьле ԝәда дәре. Ле пешийе ве йәке заньбьн кӧ тʼӧ кәс хԝәсәрихԝә нькарә пʼехәмбәртийед ньвисаре шьровәкә. Чьмки тʼӧ пʼехәмбәрти бь хԝәстьна дьле мәрьва нәһатийә дайине, ле мәрьва бь рʼебәрийа Рʼӧһʼе Пироз жь Хԝәдеда хәбәр данә. Пʼехәмбәред дәрәԝ жи нава щьмәʼта Исраеледа дәркʼәтьнә, чаԝа ль нава ԝәда жи ԝе дәрсдаред дәрәԝ дәрен. Әԝе һинкьрьнед зәԝал вәдьзьнә нава ԝә, ԝи Хԝәйийе кӧ әԝ кʼьрʼин жи инкʼар кьн у зутьрәке бәлайе биньнә сәре хԝә. Гәләк ԝе бәр байе бенамусийа ԝан кʼәвьн, рʼуйе ԝанда ԝе рʼийа рʼастийе бе беһӧрмәткьрьне. Ԝе жь дәст тьмакʼарийе бь заре хԝәш ԝә бьхапиньн бона кʼара хԝә. Диԝана ԝане дәрәнги нәбә, бәла ԝан бәр шемике йә. Чьмки һʼәйфа Хԝәде ль ԝан мьлйакʼәтед кӧ гӧнә кьрьн нәһат, ле әԝ ԛәйдкьри авитьнә зьндана тәʼристанийе, Рʼожа Диԝанерʼа данә хԝәйкьрьне. У һʼәйфа Ԝи дьнйа пешьн жи нәһат, тʼәне һʼәйшт нәфс, Нӧһе кӧ һәԛи даннасин дькьр, мала ԝива хьлаз кьр гава лейи ани сәр дьнйа нәпʼака. Диԝана бажаред Содом у Гоморайе жи кьр, әԝ кьрьн ах-хԝәли, ԝеран кьр, бона нәпʼакед пәй ԝанрʼа дәрсәк һьшт. Луте рʼаст жи, кӧ жь бепʼәргалийа нәпʼакайә бенамуси ащьз бьбу, хьлаз кьр. Чьмки әԝи рʼаст, кӧ нава ԝанда дьма, кьред беолитийа ԝан дьдитьн у дьбьһистьн, һәр рʼож рʼӧһʼе ԝийи рʼаст хԝәда дьшәԝьти. Хӧдан кӧ бь ви аԝайи кьр, әԝ занә чаԝа хԝәденаса жи жь щерʼьбандьна хьлаз кә у нәһәԛа Рʼожа Диԝанерʼа хԝәй кә, ԝәки щәзайе хԝә бьстиньн, илаһи ԝан, йед кӧ пәй һʼәрамийа хԝәстьна ԛальб кʼәтьнә, дьжәньнә сәрԝертийе. Әԝә бәрзәԛ у хԝәрʼази нә, хоф жи накьн, йед хԝәйирʼумәтә жорьн беһӧрмәт дькьн, ле мьлйакʼәт чьԛаси пе ԛәԝат у зорайийа хԝә жь ван зедәтьр ьн, диса ль бәр Хӧдан бь беһӧрмәткьрьне шькийате ԝан накьн. Әв мәрьвана мина һʼәйԝанед безарә-безьман ьн, бь ԛафе хԝәйә вала тенә рʼебәрикьрьне, кӧ бона нечʼир у кӧштьне дьне кʼәтьнә, ԝан тьшта беһӧрмәт дькьн кӧ ньзаньн әԝ чь нә, әве жи мина ԝан һʼәйԝана ӧнда бьн һәрʼьн. Хьрабийа ԝане ль ԝан вәгәрʼә. Кʼефа дьле хԝәрʼа хьрабийа кӧ рʼо-нава-рʼоже дькьн хԝәрʼа шабун һʼәсаб дькьн. Әвана ләкʼә у һʼәрам ьн, тʼәви ԝә дьхԝьн-вәдьхԝьн у һьнге нава рʼийед хԝәйә дәрәԝда кʼеф дькьн. Чʼәʼвед ԝан ль зьнекʼарийе йә, жь гӧнәкьрьне тʼер набьн, баԝәрмәндед нәшьдийайи пәй хԝә дьбьн, дьле ԝан тʼәне һини тьмакʼарийе буйә. Ньфьрʼ сәр ԝан ә! Дәсте хԝә жь рʼийа рʼаст кьрьн, хальфин, рʼийа Бьламе Бәурда чун, йе кӧ маше нәһәԛийе һʼьз кьр. Ле ль нәһәԛийа ԝи һатә һьлатьне гава кʼәра безарә-безьман бь зьмане мәрьвайе хәбәр да у пешийа беаԛьлийа пʼехәмбәр гьрт. Әв мәрьвед һа канийед чʼькийайи нә у әʼԝред жь бәр бе ажоти нә. Шәвәрʼәша тәʼристанийе бона ԝан хԝәйкьри йә. Йед һа готьнед пʼучʼә жь хԝә мәстьр дьбежьн, бь тәмед мәрьвайейә хьраб ԝан дьхапиньн, йед кӧ чәндәк пешда жь әԝед рʼийа хальфида дьчьн, рʼәвибун. Әвана йед аһарʼа азайийе соз дьдьн, ле хԝәха хӧламед пʼучʼбуне нә, чьмки мәрьв чь тьштида кӧ дьдә дәр, дьбә хӧламе ԝе йәке. Һәгәр әԝед кӧ пе занәбуна һьндава Хӧдан у Хьлазкьре мә Иса Мәсиһ щарәкерʼа дәсте хԝә жь һʼәрамийед дьне кьрьн, паше диса бькʼәвьнә нава ԝан һʼәрамийа, бьдьнә дәр, ахьрийа ԝане жь йа пешьн хьрабтьр бә. Ԝанрʼа һе ԛәнщ бу, кӧ ԛәт әв рʼийа һәԛийе нас нәкьрана, нә кӧ пәй наскьрьнерʼа жь ԝе тʼәмийа пироз дагәрʼийана, йа кӧ ԝанрʼа һатә дайине. Әв готьн рʼаст те сәре ԝан: «Сә вәдьгәрʼә сәр вәрʼәшандьна хԝә» у «Бәразе шушти диса хԝә һʼәрʼийе вәдьдә». Дәлално, әва иди нәʼма дӧда йә әз ԝәрʼа дьньвисьм. Әз бь ван нәʼма дькьм кӧ фькьра ԝәйә сафи һʼьшйар кьм, биньмә бира ԝә. Дьхԝазьм ԝәки һун готьнед пʼехәмбәред пироз, кӧ пешда готьбун у ԝе тʼәмийа Хӧдан у Хьлазкьр, кӧ бь шандийа һатьнә готьне бир биньн. Бәри һәр тьшти ве йәке заньбьн кӧ рʼожед ахьрийеда мәрьве дәрен, ԛәрфе хԝә хԝәденаса бькьн, әԝе бь хԝәстьна дьле хԝә бьмәшьн у ԝе бежьн: «Кʼа әԝ созе һатьна Ԝи? Бавед мә әʼмьре Хԝәде щи анин чун, ле һәр тьшт һе жь ԝәхте әʼфьрандьна дьнйайеда ӧса манә». Йед аһа кӧ дьфькьрьн, ве йәке давежьнә пьшт гӧһе хԝә, кӧ һе пешда бь хәбәра Хԝәде әʼзман һәбун у әʼрд жь нава аве у бь аве пʼәйда бу. У бь аве жи дьнйа бәре нӧԛ бу, ӧнда бу. Ле әʼрд у әʼзманед ньһа жи хут бь ԝе хәбәре тенә хԝәйкьрьне, кӧ бь агьр ӧнда бьн. Әԝ бона Рʼожа Ахрәте тенә һьштьне, кʼижанеда мәрьвед нәпʼак ԝе ӧнда бьн һәрʼьн. Ле бьра әв йәк ԝәва тәʼри нәминә, дәлално: Щәм Хӧдан рʼожәк мина һʼәзар сали йә у һʼәзар сал жи мина рʼожәке йә. Хӧдан созе Хԝә дәрәнги найехә, чаԝа һьнәк дьфькьрьн. Әԝ бь думька дьреж ль ԝә сәбьр дькә, нахԝазә тʼӧ кәс ӧнда бә, ле дьхԝазә ԝәки һʼәму жь гӧнәкьрьне вәгәрʼьн. Ле Рʼожа һатьна Хӧдан ԝе мина дьзәки бе. Һьнге әʼзмане бь ԛужинийа мәзьн бәтавәбьн у тьштед бьн пʼәрʼе ԝанда жи ԝе бьшәԝьтьн ԝеран бьн, дьнйа у һәр тьштед ԝеда жи ԝе ӧнда бьн һәрʼьн. Һәгәр әв һәр тьшт ԝе бь ви аԝайи ԝеран бьн һәрʼьн, һун гәрәке мәрьвнә чаԝа бьн? Гәрәке һун жийина һʼәлал у хԝәденасийеда бьмәшьн, һивийа Рʼожа Хԝәде бьн у һатьна Ԝи ләз хьн. Ԝе рʼоже әʼзмане бьшәԝьтьн, ԝеран бьн, агьре жи тьштед бьн пʼәрʼе ԝеда бьһʼәлинә. Ле әм һивийа әʼрдәки ну у әʼзманед ну нә, ль гора созе Ԝи, кʼижанада һәԛийе бьминә. Аԝа дәлално, һун кӧ һивийа ван йәка нә, бькьн кӧ Әԝ ԝә беләкʼә у беԛӧсур әʼдьлайийеда тʼәви Хԝә бьбинә. Сәбьра Хӧдане мә хьлазбун һʼәсаб кьн, чаԝа Паԝлосе бьре мәйи дәлал жи бь ԝе сәрԝахтийа кӧ жь Хԝәдеда жерʼа һатийә дайине, ԝәрʼа ньвиси. Һʼәму нәʼмед хԝәда жи әԝ бона ван тьшта хәбәр дьдә. Ԝанда чәнд тьшт һәнә кӧ зәʼмәт тенә фәʼмкьрьне, кӧ йед нәзанә бебьнгәһ шаш шьровәдькьн, ӧса жи ньвисаред пирозә майин у хԝәха дьбьнә байисе сәре хԝә. Аԝа дәлално, һе бәреда һун кӧ ве йәке заньн, һаш жь хԝә һәбьн, кӧ нәбә һун бь хальфандьна мәрьвед беолитийе жь рʼе дәркʼәвьн у жь щийе хԝәйи шьдийайи бькʼәвьн. Ле кʼәрәм у занәбуна Хӧдан у Хьлазкьре мә Иса Мәсиһда бьгьһижьн. Шькьр жь Ԝирʼа, ньһа у һʼәта һʼәтайе! Амин. Әм сәр ԝе йәке ԝәрʼа дьбежьн, чь кӧ сәре серида һәбу, мә әԝ йәк бьһист, бь чʼәʼве хԝә дит, ль Ԝи ньһерʼи у дәст данә Ԝи: Әԝ Хәбәра жийине йә. Жийин әʼйан бу, мә әԝ дит, әм шәʼдәтийе дьдьн у бона ԝе жийина һʼәта-һʼәтайе ԝәрʼа дьбежьн, йа кӧ щәм Баве бу у мәва әʼйан бу. Әԝ тьште кӧ мә дит у бьһист әм ԝәрʼа жи дьбежьн, ԝәки һун жи мәва тʼәвгьредайи бьн у әв тʼәвгьредана мә жи тʼәви Бав у Кӧрʼе Ԝи Иса Мәсиһ ә. Әм ван тьшта ԝәрʼа дьньвисьн, ԝәки шабуна мә тʼәмам бә. Әв ә әԝ готьна кӧ мә жь Ԝи бьһист у әʼлами ԝә дькьн, кӧ Хԝәде рʼонайи йә у тʼӧ тәʼри Ԝида тʼӧнә. Һәгәр әм бежьн: «Әм Хԝәдева тʼәвгьредайи нә», ле тәʼрийеда бьгәрʼьн, әм дәрәԝа дькьн у рʼастийе накьн. Ле һәгәр әм рʼонайеда бьгәрʼьн, чаԝа кӧ Әԝ рʼонайеда йә, әме һәвва тʼәвгьредайи бьн у хуна Исайе Кӧрʼе Ԝи ԝе мә жь һʼәму гӧна паԛьж кә. Һәгәр әм бежьн: «Гӧне мә тʼӧнә», әм хԝәха хԝә дьхапиньн у рʼасти нава мәда тʼӧнә. Ле һәгәр әм гӧнед хԝә бьдьнә рʼуйе хԝә, Әԝ хԝәйе созе Хԝә йә у һәԛийе дькә, ԝе гӧнед мә бьбахшинә у мә жь һʼәму нәһәԛийа паԛьж кә. Һәгәр әм бежьн: «Мә гӧнә нәкьрийә», әм Ԝи дәрәԝин дәрдьхьн у хәбәра Ԝи нава мәда тʼӧнә. Зарʼокед мьн, әз ве йәке ԝәрʼа дьньвисьм, ԝәки һун гӧна нәкьн, ле һәгәр йәк гӧнә бькә, ль щәм Баве пьштгьре мә, Иса Мәсиһ, Йе Һәԛ һәйә. Әԝ ә мәщала бахшандьна гӧнед мә у нә кӧ тʼәне гӧнед мә, ле гӧнед тʼәмамийа дьнйайе жи. Бь ԝе йәке әм заньн кӧ әм Ԝи нас дькьн, һәгәр әм тʼәмийед Ԝи хԝәй кьн. Йе кӧ дьбежә: «Әз Ԝи нас дькьм», ле тʼәмийед Ԝи наԛәдинә, әԝ дәрәԝин ә у рʼасти нава ԝида тʼӧнәйә. Ле йе кӧ готьна Ԝи дьԛәдинә, һʼьзкьрьна Хԝәде рʼаст нава ԝида тʼәмам ә. Бь ве йәке әм заньн кӧ әм нава Ԝида нә: Әԝе кӧ дьбежә: «Әз нава Ԝида мә», гәрәке ӧса бьжи, чаԝа Иса жит. Дәлално, нә кӧ тʼәмикә ну әз ԝәрʼа дьньвисьм, ле ԝе тʼәмийа кәвьнә кӧ һун бәре пешда заньн. Тʼәмийа кәвьн әԝ хәбәр ә, йа кӧ ԝә пешда бьһистийә. Ле бәле тʼәмикә ну әз ԝәрʼа дьньвисьм, кӧ рʼастийа ԝе йәке чаԝа нава Ԝида хӧйа дьбә, ӧса жи нава ԝәда. Чьмки тәʼри дәрбаз дьбә у рʼонайа рʼаст иди рʼонайе дьдә. Әԝе кӧ дьбежә: «Әз нава рʼонайеда мә», ле бьре ԝи бәр чʼәʼва рʼәш ә, әԝ һәла һе нава тәʼрийеда йә. Әԝе кӧ бьре хԝә һʼьз дькә, нава рʼонайеда дьминә у набә сәбәб, кӧ һьнәк жь рʼе бькʼәвьн. Ле әԝе, кӧ бьре ԝи бәр чʼәʼва рʼәш ә, әԝ нава тәʼрийеда йә, нава тәʼрийеда дьгәрʼә у ньзанә кʼӧда дьчә, чьмки тәʼрийе чʼәʼвед ԝи кор кьрьнә. Әз ԝәрʼа дьньвисьм, зарʼокно, чьмки бь сайа наве Ԝи гӧнед ԝә афу бунә. Әз ԝәрʼа дьньвисьм, бавно, чьмки һун Ԝи нас дькьн, Йе кӧ бәре пешда һәйә. Әз ԝәрʼа дьньвисьм, щаһьлно, чьмки һун сәр йе Хьраб кʼәтьн. Әз ԝәрʼа дьньвисьм хьшимно, чьмки һун Баве нас дькьн. Әз ԝәрʼа дьньвисьм, бавно, чьмки һун Ԝи нас дькьн, Йе кӧ бәре пешда һәбу. Әз ԝәрʼа дьньвисьм, щаһьлно, чьмки һун ԛәԝат ьн у хәбәра Хԝәде нава ԝәда дьминә у сәр йе Хьраб кʼәтьнә. Дьнйайе һʼьз нәкьн, нә жи ԝан тьштед кӧ дьнйайеда нә. Һәгәр йәк дьнйайе һʼьз дькә, һʼьзкьрьна Баве нава ԝида тʼӧнә. Чьмки һәр тьштед кӧ дьнйайеда нә, дьлһавьжи, чʼәʼвһавьжи у кʼӧбар-бабахийа ви әʼмьри йә, әԝ нә жь Баве нә, ле жь ве дьнйайе нә. Дьнйайе жи дәрбаз бә, һавьжийа ԝе жи, ле әԝе кӧ әʼмьре Хԝәде дьԛәдинә ԝе һʼәта-һʼәтайе бьминә. Зарʼно, ва ԝәхте ахьрийе йә. У чаԝа ԝә бьһистийә кӧ әкʼсимәсиһ ԝе бе, иди гәләк әкʼсимәсиһ һатьнә. Жь ԝе йәке жи әм заньн кӧ ԝәхте ахьрийе йә. Һьнәк жь нава мә дәркʼәтьн, ле әԝ нә жь мә бун. Һәгәр әԝ жь мә буна, ԝе тʼәви мә бьмана. Ле әԝ жь нава мә дәркʼәтьн, кӧ әʼйан бә, әԝ һʼәму нә жь мә бун. Ле ԝә жь Мәсиһе Пироз Рʼӧһʼ пʼешкʼеш стандийә у һун һʼәму жи рʼастийе заньн. Әз ԝәрʼа наньвисьм, чаԝа кӧ һун рʼастийе ньзаньн, ле чаԝа кӧ һун ԝе йәке заньн, ӧса жи заньн кӧ һәр дәрәԝ нә жь рʼастийе йә. Кʼи йә дәрәԝин? Һәма әԝ ә, йе кӧ дьбежә: «Иса нә Мәсиһ ә». Әԝ ә әкʼсимәсиһ, йе кӧ Бав у Кӧрʼ инкʼар дькә. Әԝе кӧ Кӧрʼ инкʼар дькә, һәләԛәтийа ԝи тʼәви Баве тʼӧнә. Ле йе кӧ Кӧрʼ иԛрар дькә, һәләԛәтийа ԝи тʼәви Баве һәйә. Аԝа чь кӧ ԝә пешда бьһистийә, бьра әԝ нава ԝәда бьминә. Һәгәр әԝ тьште ԝә пешда бьһистийә нава ԝәда бьминә, һуне жи нава Кӧрʼ у Баведа бьминьн. У әв ә әԝ созе кӧ Ԝи да мә, әԝ жийина һʼәта-һʼәтайе йә. Әз ви тьшти дәрһәԛа ԝанда ԝәрʼа дьньвисьм, йед кӧ дьхԝазьн ԝә бьхапиньн. Ле чь дәрһәԛа ԝәда йә, әԝ Рʼӧһʼе кӧ ԝә жь Мәсиһ стандийә, нава ԝәда дьминә. Иди нә һʼәԝщә йә, кӧ йәк ԝә һин кә, чьмки Рʼӧһʼ бона һәр тьшти ԝә һин дькә у чь кӧ һин дькә рʼаст ә, нә дәрәԝ ә. Чаԝа Әԝи һун һинкьрьн, нав Мәсиһда ӧса бьминьн. Бәле зарʼокно, нава Ԝида бьминьн, ԝәки чахе Әԝ әʼйан бә, әм жь һатьна Ԝи вәнәкʼьшьн, ль бәр Ԝи шәрми нәминьн. Һәгәр һун заньн кӧ Әԝ рʼаст ә, ӧса жи заньбьн һәр кәсе кӧ рʼастийе дькә, әԝ жь Ԝи буйә. Бьньһерʼьн, Баве әм чаԝа һʼьз кьрьн, ԝәки әм зарʼед Хԝәде бенә готьне у рʼаст жи әм әԝ ьн. Ләма дьнйа мә нас накә, чьмки әԝ жи нас нәкьр. Дәлално, ньһа әм зарʼед Хԝәде нә у һәла һе нә әʼйан ә әме бьбьнә чь. Ле әм ве йәке заньн кӧ чахе Иса әʼйан бә, әме бьбьнә мина Ԝи, чьмки әме Ԝи ӧса бьбиньн, чаԝа һәйә. Һәр кәсе кӧ бона ве йәке гӧмана хԝә данийә сәр Ԝи, әԝ хԝә ӧса паԛьж дькә, чаԝа кӧ Мәсиһ паԛьж ә. Һәр кәсе кӧ гӧнә дькә, әԝ Ԛануна Хԝәде дьтʼәрʼьбинә у гӧнә хут ԛанунтʼәрʼьбандьн ә. У һун заньн кӧ Мәсиһ бона ԝе йәке әʼйан бу, ԝәки гӧна һьлдә у нава Ԝида гӧнә тʼӧнә. Һәр кәсе кӧ нава Ԝида дьминә, әԝ нава гӧнада наминә, ле һәр кәсе кӧ нава гӧнада дьминә, әԝи нә Әԝ дитийә, нә жи нас кьрийә. Зарʼокно, бьра тʼӧ кәс ԝә нәхапинә. Йе кӧ рʼастийе дькә, әԝ йәки рʼаст ә, чаԝа Иса рʼаст ә. Йе нава гӧнада дьминә, әԝ жь мирещьн ә, чьмки мирещьн жь бәре пешда гӧнә дькә. Бона ве йәке Кӧрʼе Хԝәде әʼйан бу, ԝәки кьред мирещьн хьраб кә. Һәр кәсе кӧ жь Хԝәде буйә, нава гӧнада наминә, чьмки бьнйатʼа Хԝәде нава ԝида дьминә у әԝ нькарә нава гӧнада бьминә, чьмки жь Хԝәде буйә. Зарʼед Хԝәде у зарʼед мирещьн бь ве йәке жь һәв тенә фьрԛикьрьне: Әԝе кӧ рʼастийе накә, әԝ нә жь Хԝәде йә у ӧса жи әԝе кӧ бьре хԝә һʼьз накә. Әв ә әԝ готьн, йа кӧ ԝә бәре пешда бьһистийә: Гәрәке әм һәвдӧ һʼьз бькьн. Мина Ԛайин нибьн, кӧ жь йе Хьраб бу у бьре хԝә кӧшт. У бона чь әԝ кӧшт? Чьмки кьред ԝи хьраб бун, ле йед бьре ԝи ԛәнщ. Әʼщебмайи нәминьн гәли хушк-бьра, һәгәр һун бәр чʼәʼве дьнйайе рʼәш бьн. Әм заньн кӧ әм жь мьрьне дәрбази жийине бунә, чьмки әм хушк-бьрайед хԝә һʼьз дькьн. Әԝе кӧ һʼьз накә, әԝ нава мьрьнеда дьминә. Һәр кәсе кӧ бьре ԝи бәр чʼәʼва рʼәш ә, әԝ меркӧж ә у һун заньн кӧ нава тʼӧ меркӧжида жийина һʼәта-һʼәтайе тʼӧнә. Әм бь ве йәке һʼьзкьрьне һʼәсийан: Иса жийина Хԝә бона мә да. Әм жи гәрәке жийина хԝә бона хушк-бьрайед хԝә бьдьн. Ле һәгәр һәбука йәки ве дьне һәбә у бьре хԝә һʼәԝще тьштәки дьбинә, дьле ԝи сәр нашәԝьтә, һʼьзкьрьна Хԝәде чаԝа дькарә дьле ԝида бьминә? Зарʼокно, нә кӧ әм бь хәбәр йан заре хԝә һʼьз бькьн, ле бь кьра у рʼастийе. Бь ве йәке әме заньбьн кӧ әм жь рʼастийе нә у бькарьбьн бь дьләки рʼьһʼәт бәр Хԝәде бьсәкьньн. Ле һәгәр дьле мә диса мә нәһәԛ кә, Хԝәде жь дьле мә мәстьр ә у һәр тьшти занә. Дәлално, һәгәр дьле мә мә нәһәԛ нәкә, әм дькарьн рʼусьпи бәр Хԝәде бьсәкьньн. У чь кӧ бьхԝазьн, әме жь Ԝи бьстиньн, чьмки әм тʼәмийед Ԝи дьԛәдиньн у әԝ тьштед кӧ ль Ԝи хԝәш тен, әм ԝан дькьн. У әв ә тʼәмийа Ԝи, кӧ әм баԝәрийа хԝә наве Кӧрʼе Ԝи Иса Мәсиһ биньн у әм һәвдӧ һʼьз бькьн, чаԝа кӧ Әԝи тʼәми ль мә кьр. У әԝе кӧ тʼәмийед Ԝи хԝәй дькә, нава Хԝәдеда дьминә у Хԝәде жи нава ԝида. У әм жь ве йәке заньн кӧ Әԝ нава мәда дьминә, бь ԝи Рʼӧһʼе кӧ Әԝи дайә мә. Дәлално, баԝәрийа хԝә һәр рʼӧһʼи нәйньн, ле ԝан рʼӧһʼа бьщерʼьбиньн, гәло әԝ жь Хԝәде нә? Чьмки гәләк пʼехәмбәред дәрәԝ дәркʼәтьнә дьне. Һун бь ве йәке дькарьн Рʼӧһʼе Хԝәде нас бькьн: Һәр рʼӧһʼе кӧ Иса Мәсиһ бь хун у гошт һати иԛрар дькә, әԝ жь Хԝәде йә. Ле һәр рʼӧһʼе кӧ Иса бь хун у гошт һати иԛрар накә, әԝ нә жь Хԝәде йә. Әв жь әкʼсимәсиһ ә, бона кʼижани ԝә бьһистьбу кӧ ԝе бе у иди әԝ ль дьнйайеда йә. Һун жь Хԝәде нә, зарʼокно у һун сәр пʼехәмбәред дәрәԝ кʼәтьнә, чьмки Әԝ Рʼӧһʼе нава ԝәда жь ԝи рʼӧһʼе кӧ нава дьнйайеда йә мәстьр ә. Әԝ жь дьнйайе нә, ләма әԝ жь дьнйайе хәбәр дьдьн у дьнйа гӧһдарийа ԝан дькә. Әм жь Хԝәде нә. Йе кӧ Хԝәде нас дькә, әԝ гӧһдарийа мә дькә. Йе кӧ нә жь Хԝәде йә, әԝ гӧһдарийа мә накә. Бь ве йәке әм Рʼӧһʼе рʼастийе у рʼӧһʼе нәрʼастийе жь һәв дәрдьхьн. Дәлално, дә әм һәвдӧ һʼьз бькьн, чьмки һʼьзкьрьн жь Хԝәде йә у һәр кәсе кӧ һʼьз дькә әԝ жь Хԝәде буйә у Хԝәде нас дькә. Йе кӧ һʼьз накә әԝ Хԝәде нас накә, чьмки Хԝәде һʼьзкьрьн ә. Бь ве йәке һʼьзкьрьна Хԝәде һьндава мәда хӧйа бу, гава кӧ Әԝи Кӧрʼе Хԝәйи Тайе Тʼәне шандә дьнйайе, ԝәки әм бь Ԝи бьжин. Һʼьзкьрьн әв ә, нә кӧ мә Хԝәде һʼьз кьр, ле Әԝи әм һʼьз кьрьн у Кӧрʼе Хԝә шанд чаԝа мәщала бахшандьна гӧнед мә. Дәлално, һәгәр Хԝәде аһа әм һʼьз кьрьн, ԝәки ӧса йә гәрәке әм жи һәвдӧ һʼьз бькьн. Тʼӧ кәси Хԝәде тʼӧ щара нә дитийә. Һәгәр әм һәвдӧ һʼьз дькьн, Хԝәде нава мәда дьминә у һʼьзкьрьна Ԝи дьле мәда гьһиштийә. Бь ве йәке әм заньн кӧ әм нава Ԝида дьминьн у Әԝ жи нава мәда, чьмки Әԝи жь ԝи Рʼӧһʼе Хԝә дайә мә. Мә дит у әм шәʼдәтийе дьдьн, кӧ Баве Кӧрʼе Хԝә шанд, ԝәки бьбә Хьлазкьре дьнйайе. Һәгәр йәк иԛрар дькә кӧ Иса Кӧрʼе Хԝәде йә, Хԝәде нава ԝида дьминә у әԝ жи нава Хԝәдеда. Аԝа әм ԝе һʼьзкьрьна Хԝәдейә һьндава хԝәда нас дькьн у баԝәр дькьн. Хԝәде һʼьзкьрьн ә у йе кӧ нава һʼьзкьрьнеда дьминә, әԝ нава Хԝәдеда дьминә у Хԝәде жи нава ԝида. Һʼьзкьрьн аһа дьле мәда гьһиштийә, ԝәки Рʼожа Ахрәте әм рʼусьпи бьн, чьмки Мәсиһ ве дьнйайеда чаԝа дәрбаз кьр, ӧса жи әм дәрбаз дькьн. Һʼьзкьрьнеда тьрс тʼӧнә, ле һʼьзкьрьна гьһишти тьрсе дур дьхә, чьмки тьрс хԝәйищәфа йә у әԝе кӧ дьтьрсә, әԝ һʼьзкьрьнеда һе нәгьһиштийә. Әм һʼьз дькьн, чьмки Әԝи пешда әм һʼьзкьрьн. Һәгәр йәк бежә: «Әз Хԝәде һʼьз дькьм», ле бьре ԝи бәр чʼәʼва рʼәш ә, әԝ дәрәԝа дькә. Һәгәр әԝе бьре хԝә кӧ дьбинә һʼьз накә, әԝ нькарә Хԝәде һʼьз бькә кӧ набинә. У Әԝи әв тʼәми дайә мә: Әԝе кӧ Хԝәде һʼьз дькә, әԝ гәрәке бьре хԝә жи һʼьз бькә. Һәр кәсе кӧ баԝәр дькә, Иса, Мәсиһ ә, әԝ жь Хԝәде буйә у һәр кәсе кӧ Баве һʼьз дькә, әԝ зарʼа Ԝи жи һʼьз дькә. Бь ве йәке әм заньн кӧ әм зарʼед Хԝәде һʼьз дькьн, гава әм Хԝәде һʼьз дькьн у тʼәмийед Ԝи дьԛәдиньн. Чьмки бь ве йәке әм һʼьзкьрьна хԝә һьндава Хԝәдеда дьдьнә кʼьфше, гава әм тʼәмийед Ԝи хԝәй дькьн. У тʼәмийед Ԝи нә гьран ьн, чьмки һәр кәсе кӧ жь Хԝәде буйә, дьнйайе бьндәст дькә. У бь ви аԝайи әм дьнйайе бьндәст дькьн, аԝа готи бь баԝәрийа хԝә. У әԝ кʼи йә, йе дьнйайе бьндәст дькә, пештьри әԝе кӧ баԝәр дькә, кӧ Иса Кӧрʼе Хԝәде йә. Әва йә, йе кӧ бь хун у аве һат, Иса Мәсиһ, нә кӧ тʼәне бь аве, ле бь хун у аве. У Рʼӧһʼ ә, йе кӧ шәʼдәтийе дьдә, чьмки Рʼӧһʼ рʼасти йә. Чьмки әв һәрсек ьн, кӧ шәʼдәтийе дьдьн: Рʼӧһʼ, ав у хун. У шәʼдәтийа ван һәрсека йәк ә. Һәгәр әм шәʼдәтийа мәрьва ԛәбул дькьн, шәʼдәтийа Хԝәде һе зедә йә, чьмки әва шәʼдәтийа Хԝәде йә, кӧ бона Кӧрʼе Хԝә шәʼдәти да. Йе кӧ баԝәрийа хԝә Кӧрʼе Хԝәде тинә, нава ԝида әв шәʼдәти һәйә. Йе кӧ баԝәрийа хԝә Хԝәде найнә, әԝ Хԝәде дәрәԝ дәрдьхә, чьмки баԝәрийа хԝә ԝе шәʼдәтийе найнә, йа кӧ Хԝәде бона Кӧрʼе Хԝә шәʼдәти да. У әв ә шәʼдәти, кӧ Хԝәде жийина һʼәта-һʼәтайе да мә у әв жийин нава Кӧрʼе Ԝида йә. Кӧрʼ дьле кʼеда йә, жийина ԝи һәйә, ле Кӧрʼе Хԝәде дьле кʼеда тʼӧнә, жийина ԝи тʼӧнә. Әз ван тьшта ԝәрʼа дьньвисьм, йед кӧ баԝәрийа хԝә наве Кӧрʼе Хԝәде тиньн, ԝәки һун бьзаньбьн жийина ԝәйә һʼәта-һʼәтайе һәйә. Әм ль бәр Хԝәде рʼусьпи нә, чьмки әм заньн, һәгәр әм тьштәки ль гора хԝәстьна Ԝи же бьхԝазьн, Әԝ дәнге мә дьбьһе. У һәгәр әм заньн кӧ әԝ һәр тьштед кӧ әм же дьхԝазьн дьбьһе, ӧса жи әм заньн чь кӧ әм же дьхԝазьн, әме бьстиньн. Һәгәр йәк бьбинә кӧ бьре ԝи гӧнәк кьрийә, ле набә бәрбь мьрьне, бьра бона ԝи дӧа бькә у Хԝәде ԝе жийине бьдә ԝи. Әз ве йәке һьндава ԝанда дьбежьм, кʼижанед кӧ гӧне бәрбь мьрьне накьн. Гӧнә һәйә кӧ дьбә бәрбь мьрьне. Әз набежьм, кӧ бона ве йәке дӧа бькьн. Һʼәму нәһәԛи гӧнә йә, ле гӧнә һәйә кӧ набә бәрбь мьрьне. Әм заньн һәр зарʼәкә Хԝәде нав гӧнада наминә, ле Ньхӧрийе Хԝәде ԝи хԝәй дькә у йе Хьраб незики ԝи набә. Әм заньн кӧ әм жь Хԝәде нә у тʼәмамийа дьнйайе бьн һʼӧкӧме йе Хьрабда йә. Ле әм ӧса жи заньн кӧ Кӧрʼе Хԝәде һат у фәʼм да мә, ԝәки әм Йе Рʼаст нас бькьн. Бәле әм нава Йе Рʼастда нә, чьмки әм нава Кӧрʼе Ԝи Иса Мәсиһда нә. Әв ә Хԝәдейе рʼаст у жийина һʼәта-һʼәтайе. Зарʼокно, хԝә жь пʼутпʼарьстийе хԝәй кьн. Жь бәрпьрсийаре щьвине, Ханьма бьжарти у зарʼед ԝерʼа, кʼижана кӧ әз бь рʼастийе һʼьз дькьм, нә кӧ тʼәне әз, ле әԝ һʼәму жи, йед кӧ рʼастийе нас дькьн, чьмки әԝ рʼасти нава мәда дьминә у һʼәта-һʼәтайе ԝе тʼәви мә бә. Дә бьра рʼәʼм, кʼәрәм у әʼдьлайи жь Бав Хԝәде у Иса Мәсиһе Кӧрʼе Баве, бь рʼастийе у һʼьзкьрьн мәрʼа бә. Әз пʼьрʼ ша бум, кӧ мьн жь зарʼед тә һьнәк дитьн, йед кӧ нава рʼастийеда дьжин, ль гора ԝе тʼәмийа кӧ мә жь Баве стандийә. Ньһа әз һиви жь тә дькьм, Ханьме, әз тʼәмикә ну тәрʼа наньвисьм, ле йа кӧ бәре пешда ль мә һәбу, кӧ әм һʼәму һәвдӧ һʼьз бькьн. Һʼьзкьрьн әв ә, кӧ әм ль гора тʼәмийед Ԝи бьжин. Тʼәми әԝ ә, йа кӧ ԝә һе бәре пешда бьһистийә, ԝәки һун һʼьзкьрьнеда бьжин. Гәләкед кӧ хәлԛе жь рʼе дәрдьхьн һатьнә дьне, әԝ Иса Мәсиһ бь хун у гошт һати иԛрар накьн. Йед аһа хәлԛе жь рʼе дәрдьхьн у әкʼсимәсиһ ьн. Һун һаш жь хԝә һәбьн, ԝәки һун кʼәда хԝә ӧнда нәкьн, ле һәԛе хԝә тʼәмам бьстиньн. Һәр кәсе кӧ хԝә пешда давежә у нава һинкьрьна Мәсиһда наминә, Хԝәдейе ԝи тʼӧнә. Йе кӧ нава һинкьрьна Мәсиһда дьминә, бона ԝи Бав жи һәйә, Кӧрʼ жи һәйә. Һәгәр йәк бе щәм ԝә у ве һинкьрьне нәйнә, һун ԝи ԛәбул нәкьнә малед хԝә у сьлаве нәдьнә ԝи. Чьмки кʼи сьлаве бьдә ԝи, әԝ тʼәви кьред ԝийә хьраб дьбә. Гәләк тьштед мьнә ньвисаре ԝәрʼа һәнә, ле мьн нәхԝәст сәр кʼахазе бь һʼӧбьре бьньвисьм, чьмки гӧмана мьн һәйә әзе хԝәха бемә щәм ԝә у рʼу бь рʼу тʼәви ԝә хәбәр дьм, ԝәки әшԛа мә тʼәмам бә. Зарʼед хушка тәйә бьжарти ль тә сьлав дькьн. Жь бәрпьрсийаре щьвине, Гайосе дәлалрʼа, кʼижани кӧ әз бь рʼастийе һʼьз дькьм. Дәлало, әз дӧа дькьм, кӧ һʼәму алийава чәрха тә ӧса рʼаст бә у сьһʼәт-ԛәԝат би, чаԝа мьнва әʼйан ә кӧ рʼӧһʼе тә сьламәтийеда йә. Әз гәләки ша бум, чахе чәнд бьра һатьн у шәʼдәти дан, кӧ тӧ нава рʼастийеда амьн и, чаԝа тә пешда рʼастийеда дьжит жи. Шабуна мьнә жь ве мәстьр тʼӧнә, чахе дьбьһем кӧ зарʼед мьн нава рʼастийеда дьжин. Дәлало, тӧ шьхӧле хԝәда амьн и, чь кӧ бона бьра дьки, һʼәта кӧ йед нәнасрʼа жи. Ԝана шәʼдәтийа һʼьзкьрьна тә бәр щьвина вьр да. Те тьштәки ԛәнщ бьки, һәгәр тӧ ԝан ӧса вәрʼеки чаԝа кӧ ль Хԝәде хԝәш те. Чьмки әԝана бона наве Мәсиһ кʼәтьнә рʼе у тʼӧ тьшт жь нәбаԝәра нәстандьнә. Аԝа әм гәрәке йед ӧса ԛәбул кьн, кӧ әм тʼәви шьхӧле рʼастийе бьн. Мьн щьвинерʼа ньвиси, ле Дийотрәфис кӧ һʼьз дькә сәр һʼәмуйарʼа бә, гӧһ надә мә. Бона ве йәке гава әз бем, әзе кьред ԝи гьли кьм, кӧ чаԝа давежә мә, хәйба мә дькә. Бь ве йәке жи рʼази набә, нә кӧ тʼәне бьра ԛәбул накә, ле йед кӧ дьхԝазьн бьра ԛәбул кьн, бәр ԝан рʼадьбә у ԝан жь щьвине жи дәрдьхә! Дәлало, чʼәʼв нәдә хьрабийе, ле ԛәнщийе. Әԝе кӧ ԛәнщийе дькә, жь Хԝәде йә, ле әԝе кӧ хьрабийе дькә, әԝи Хԝәде нәдитийә. Бона Димитрийо һʼәму жи шәʼдәтийа ԛәнщ дьдьн, һʼәта кӧ рʼасти жи. Әм жи шәʼдәтийе дьдьн у тӧ зани кӧ шәʼдәтийа мә рʼаст ә. Гәләк тьштед мьнә ньвисаре тәрʼа һәбун, ле мьн нәхԝәст сәр кʼахазе бь һʼӧбьре бьньвисьм. Чьмки әз бь ԝе гӧмане мә, кӧ әзе зутьрәке тә бьбиньм у әме рʼу бь рʼу хәбәр дьн. Әʼдьлайи ль тә бә. Һәвал-һогьр сьлава ль тә дькьн. Сьлава йәк-йәк һʼәму һәвал-һогьра бькә. Жь Щьһудайе хӧламе Иса Мәсиһ, бьрайе Аԛуб, ԝәрʼа, йед кӧ газикьри нә, жь Бав Хԝәдеда һʼьзкьри у хԝәйкьрийед Иса Мәсиһ ьн: Дә бьра рʼәʼм, әʼдьлайи у һʼьзкьрьн һе ль ԝә зедә бә. Дәлално! Гава мьн дьл кьр, кӧ әз бона ве хьлазбуна мәйә тʼомәри ԝәрʼа бьньвисьм, һьнге мьн рʼе терʼа дит бона ве йәке ԝәрʼа бьньвисьм у дьл бьдьмә ԝә, ԝәки һун бона ԝе баԝәрийа кӧ щарәке бона һәр тʼьм щьмәʼта Хԝәдерʼа һатийә дайине, шәрʼе хԝә бькьн. Чьмки чәнд мәрьв дьзива кʼәтьнә нава ԝә, кӧ дәрһәԛа диԝана ԝанда һе пешда ньвисар бу. Әԝед нәпʼак бьн наве кʼәрәма Хԝәдейе мә хԝә данә бенамусийе у Хӧдане мә Иса Мәсиһ Хԝәйики бешьрики-беһәвал инкʼар кьрьнә. Ле әз дьхԝазьм биньмә бира ԝә, чаԝа һун ван һʼәму тьшта заньн жи, кӧ Хӧдан щьмәʼта Хԝә жь ԝәлате Мьсьре хьлаз кьр, паше ԛьрʼа йед кӧ баԝәр нәкьрьн ани. У әԝ мьлйакʼәтед кӧ һʼӧкӧме хԝә хԝәй нәкьрьн, ле щийе хԝә шьһʼьтандьн, Хԝәде ԝан бь ԛәйдед һʼәта-һʼәтайейә тәʼристанийеда хԝәй дькә, бона ԝе Рʼожа һʼәсабә Диԝане. Ве жи бир нәкьн чаԝа Содом, Гомора у бажаред дор-бәред ԝан, мина ԝан жь гӧрʼа Хԝәде дәркʼәтьн ԛави кьрьн, чʼәʼв авитьнә бәдәна башԛә у диԝана агьрийә һʼәта-һʼәтайе сәр хԝәда анин. Әвана иди бона мә тʼәрз у дәрс ьн. Ӧса жи әԝ мәрьв пәй хәԝна дькʼәвьн, ԛальбе хԝә дьһʼәрʼьминьн, дьжәньнә сәрԝертийа у һәйинед хԝәйирʼумәтә жорьн беһӧрмәт дькьн. Ле Мьхайиле сәрәке мьлйакʼәта әв йәк нәкьр. Гава бона щьнйазе Муса рʼабу мирещьнрʼа кʼәтә һʼӧщәте, тӧрӧш нәкьр кӧ бь готьнед беһӧрмәткьрьне диԝана ԝи бькьра, ле гот: «Бьра Хӧдан ль тә һьле!» Ле әв мәрьвана сәрәдәрийе ԝан тьшта накьн, кʼижана кӧ беһӧрмәт дькьн, ле чь жи мина һʼәйԝанед безарә-безьман бь бьнйатʼи фәʼм дькьн, бь ԝан жи ӧнда дьбьн. Ԝәй ль ԝан, кӧ рʼийа Ԛайинда чун, мина Бьлам хальфин, пәй кʼара хԝә кʼәтьнә у мина рʼабәрибуна Ԛорах ԝе бәла хԝә бьбиньн. Әвана мәсрәфед һʼьзкьрьна ԝәда ләкʼә нә, тʼәви ԝә бе хоф дьхԝьн-вәдьхԝьн, тʼәне зьке хԝә дьчʼериньн. Йед һа, әʼԝред беавә жь бәр бе чуйи нә, даред пайизейә бебәр ьн, рʼаԝава рʼакьри, дӧ щар һʼьшк буйи, пелед бәʼрейә рʼабуйи нә, кӧ чаԝа әʼйба кьред ԝе мина кʼәфе сәр дькʼәвә. Әԝ стәйркед хальфи нә, бона кʼижана духана тәʼристанийе һʼәта-һʼәтайе хԝәйкьри йә. Һәнох жи кӧ пәй Адәмрʼа баве һʼәфта бу, бона ван мәрьва пʼехәмбәрти кьр у гот: «Ва йә Хӧдан тʼәви пирозед Хԝәйә беһʼәсаб те, ԝәки диԝана һʼәмуйа бькә у һʼәму нәпʼака нәһәԛ кә, бона һʼәму кьред ԝанә нәпʼак у бона ԝан һʼәму готьнед хьраб, кӧ нәпʼакед гӧнәкʼар һьндава Ԝида хәбәр дан». Әвана мәрьвнә бинтәнгә фьш-фьшко нә, пәй хԝәстьнед дьле хԝә дьчьн, жь хԝә мәстьр хәбәр дьдьн у бона кʼара хԝә һʼьләкʼарийа дькьн. Ле һун дәлално, ԝан готьнед кӧ шандийед Хӧдане мә Иса Мәсиһ пешда готьнә бир биньн, кӧ ԝәрʼа дьготьн: «Рʼожед ахьрийеда мәрьвед ԛәрфкьр ԝе дәрен, пәй хԝәстьнед дьле хԝәйә нәпʼак һәрʼьн». Әв әԝ мәрьв ьн, йед кӧ дӧтирәтийе дькьн, йед кӧ бь мәрьвайи тенә рʼебәрикьрьне, нә кӧ бь Рʼӧһʼе Пироз. Ле һун дәлално, хԝә бьдьнә сәр авакьрьна баԝәрийа хԝәйә пироз, бь Рʼӧһʼе Пироз дӧа бькьн, хԝә нава ԝе һʼьзкьрьна Хԝәдейә һьндава хԝәда хԝәй кьн, һивийа рʼәʼма Хӧдане мә Иса Мәсиһ бьн, кӧ жийина һʼәта-һʼәтайе бьдә ԝә. У һьндава дӧдьлийада рʼәʼм бьн. Һьнәка жи жь агьр бьрʼәвиньн хьлаз кьн, дьле ԝә сәр йед майин жи бь тьрс бьшәԝьтә, ле жийина ԝанә гӧнәкʼарә мина кʼьнща ләԝьтʼи бәр чʼәʼве ԝә рʼәш бә. Ԝирʼа, Йе кӧ дькарә ԝә жь кʼәтьне хԝәй кә у ль бәр рʼумәта Хԝә беԛӧсур әшԛ бьдә сәкьнандьне, Хԝәдейе бешьрики-беһәвал, Хьлазкьре мәрʼа, бь дәсте Иса Мәсиһе Хӧдане мә, шькьр у мәзьнайи, ԛӧдрәт у һʼӧкӧмәт бә, бәри һәр-һәйе у ньһа жи у һʼәта-һʼәтайе! Амин. Әва әʼйантийа Иса Мәсиһ ә, кʼижан Хԝәде да Ԝи, ԝәки әԝ ԝан тьштед кӧ гәрәке зутьрәке бьԛәԝьмьн, нишани хӧламед Ԝи кә. Иса пе дәсте мьлйакʼәте Хԝә шанд у әʼлами хӧламе Хԝә Йуһʼәнна кьр. Йуһʼәнна жи шәʼдәтийа һәр тьштед кӧ ԝи дитьбун да, аԝа готи шәʼдәтийа готьна Хԝәде, ӧса жи шәʼдәтийа әʼламәтийа Иса Мәсиһә рʼаст. Хԝәзи ль ԝи, кӧ ве йәке бьхунә у хԝәзи ль ԝан, йед кӧ ван хәбәред пʼехәмбәртийе бьбьһен у тьштед кӧ веда һатьнә ньвисаре дьле хԝәда хԝәй кьн, чьмки ԝәхт незик ә. Жь Йуһʼәнна, һәр һʼәфт щьвинарʼа, йед кӧ ԛәза Асйайеда нә: Кʼәрәм у әʼдьлайийа Ԝи ль ԝә бә, Йе кӧ һәйә, Йе кӧ һәбу, Йе кӧ ԝе бе у жь һәр һʼәфт рʼӧһʼед кӧ ль бәр тʼәхте Ԝи нә, ӧса жи жь Иса Мәсиһе шәʼде амьн, Ньхӧрийе жь нава мьрийа у сәрԝере пʼадшед әʼрде. Дә бьра рʼумәт у ԛӧдрәт Ԝирʼа бә һʼәта-һʼәтайе, Йе кӧ мә һʼьз дькә у әм пе хуна Хԝә жь гӧнед мә аза кьрьн у әм кьрьн кʼаһинед пʼадшатийе, ԝәки Баве Ԝи Хԝәдерʼа әм хьзмәткʼарийе бькьн. Амин! Ва йә әʼԝрава Әԝ те. Һәр чʼәʼве Ԝи бьбинә, һʼәта әԝед кӧ нәкʼса Ԝи ԛӧл кьрьн жи. Һʼәму мьләтед дьнйайе ԝе ль сәр Ԝи шин у кʼәдәр бьн. Бәле. Амин! «Әз Алфа у Омега мә», Хӧдан Хԝәдейе Һʼәму Зорайийе дьбежә, Йе кӧ һәйә, Йе кӧ һәбу у Йе кӧ ԝе бе. Әз, Йуһʼәннайе бьре ԝә мә, йәктийа Исада һәвал-пʼаре ԝе тәнгасийе, пʼадшатийа Ԝи у сәбьра ԝә мә. Әз бона хәбәра Хԝәде у шәʼдәтийа бона Иса ԝе гьраведа бум, кӧ жерʼа Патмос дьбежьн. Рʼожа Хӧданда Рʼӧһʼе Пироз һатә сәр мьн у мьн ль пьшт хԝә дәнгәки бьльнди мина дәнге борʼийе бьһист, кӧ гот: «Чь тьште кӧ тӧ дьбини, кʼьтебеда бьньвисә у һәр һʼәфт щьвинарʼа бьшинә, йед кӧ бажаред Әфәсе, Сьмирнайе, Пәргамайе, Тийатирайе, Сардәйсе, Фьладәлфйайе у Лаԝдькйайеда нә». Әз сәр ԝи дәнгида вәгәрʼийам кӧ бьбиньм, кʼа кʼи йә мьнрʼа хәбәр дьдә у чахе кӧ әз вәгәрʼийам, мьн һʼәфт шәмданед зерʼин дитьн. Нава ԝан шәмданада «йәки мина Кӧрʼе Мерьв» һәбу, кʼьнщәкә дьрежә һʼәта ньга ле бу у мәлахтәки зерʼин ль синге Ԝи бу. Пʼорʼе сәре Ԝи мина һьрийа ԛәрԛаш у мина бәрфе сьпи бу, чʼәʼвед Ԝи жи мина алава егьр. Ньгед Ԝи мина сьфьре хаси жь кʼура агьр дәрхьсти, кӧ дьбьрьԛә у дәнге Ԝи мина дәнге хӧлә-хӧла гәләк ава бу. Дәсте Ԝийи рʼастеда һʼәфт стәйрк һәбун у жь дәве Ԝи шурәки дӧдәвийи туж дәрдькʼәт. Рʼуйе Ԝи мина рʼойе бу кӧ тʼәмамийа ԛәԝата хԝәва шәԝԛ дьдә. Чахе кӧ мьн Әԝ дит, мина йәки мьри кʼәтьмә бәр ньгед Ԝи. Әԝи дәсте Хԝәйи рʼасте дани сәр мьн у готә мьн: «Нәтьрсә, Әз ьм Йе Пешьн у Пашьн. Әз Йе сах ьм. Әз Йе мьри бум, ле ва йә әз сах ьм һʼәта-һʼәтайе. У Әз ьм хԝәйе кʼьлитед Мьрьне у Дийаре Мьрийа. Аԝа бьньвисә чь кӧ тӧ дьбини, чь кӧ ньһа һәнә у чь ԝе паше бьбьн. Сӧрʼа ван стәйрка, йед кӧ тә дәсте Мьни рʼастеда дитьн, ӧса жи һәр һʼәфт шәмданед зерʼин әв ә: Әԝ һәр һʼәфт стәйрк, мьлйакʼәтед һәр һʼәфт щьвина нә у әԝ һәр һʼәфт шәмдан, һәр һʼәфт щьвин ьн. Мьлйакʼәте щьвина Әфәсерʼа бьньвисә беже: Әԝи кӧ һʼәфт стәйрк дәсте Ԝийи рʼастеда у нава һʼәфт шәмданед зерʼинда дьгәрʼә, аһа дьбежә: Әз һаш жь кьред тә, хәбата тә у сәбьра тә һәмә. Әз заньм кӧ тӧ нькари ль хьраба тʼәʼмул ки. Тә әԝ жи щерʼьбандьн, йед кӧ хԝә шанди һʼәсаб дькьн, ле рʼаст нә ӧса нә, тә дит кӧ әԝ дәрәԝин ьн. Сәбьра тә һәйә, бона наве Мьн тә щәфа кʼьшанд у нәԝәстийайи. Ле газьнәкә Мьн ль тә һәйә, кӧ тӧ мина бәре Мьн һʼьз наки. Аԝа ньһа бинә бира хԝә, кӧ тӧ жь кʼӧ дәре кʼәтийи у жь гӧнәкьрьне вәгәрʼә, кьред хԝәйә пешийе бькә. Һәгәр на, Әзе бемә щәм тә у шәмдана тә жь щийе ԝе һьлдьм. Ле тьштәки рʼьнд ль щәм тә һәйә, кӧ дьжәни ԝан кьред николойийа, чаԝа кӧ Әз жи дьжәньме. Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Әԝе кӧ сәркʼәвә, Әзе изьне бьдьмә ԝи, ԝәки жь ԝе дара жийине бьхԝә, йа кӧ бӧһьшта Хԝәдеда йә. Мьлйакʼәте щьвина Сьмирнайерʼа бьньвисә беже: Әԝи Пешьн у Пашьн, Йе кӧ мьр у жь нава мьрийа рʼабу аһа дьбежә: Әз һаш жь тәнгаси у бәләнгазийа тә һәмә, ле бәле тӧ дәԝләти йи! Ӧса жи һаш жь бӧхданед ԝан һәмә, йед кӧ хԝәрʼа дьбежьн: ‹Әмә щьһу нә›. Әԝ нә щьһу нә, ле әԝ жь кʼьништа мирещьн ьн. Жь ԝан тәнгасийа нәтьрсә, кʼижане бенә сәре тә. Ва мирещьн ԝе жь ԝә һьнәка бавежә кәле, ԝәки һун бенә щерʼьбандьне у һуне дәһә рʼожа щәфе бькʼьшиньн. Һʼәта мьрьне амьн бьминә, Әзе тʼаще жийине бьдьмә тә. Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Әԝе кӧ сәркʼәвә жь мьрьна дӧда ԝе ԛәт зьраре нәбинә. Мьлйакʼәте щьвина Пәргамайерʼа бьньвисә беже: Әԝе кӧ шуре Ԝийи дӧдәвийи туж һәйә аһа дьбежә: Әз һаш жь тә һәмә кӧ тӧ ль кʼӧ дәре дьмини, аԝа готи ль ԝи щийе кӧ тʼәхте мирещьн ле йә. Тӧ наве Мьн ԛәԝин дьгьри у тә баԝәрийа хԝәйә һьндава Мьнда ԝан рʼожа жи инкʼар нәкьр, гава шәʼде Мьни амьн Антипас нава ԝәда һатә кӧштьне, ԝи щийе кӧ мирещьн ле дьминә. Ле газьнәкә Мьн ль тә һәйә, кӧ ль ԝе дәре һьнәк мәрьвед тә һәнә, кӧ пәй һинкьрьна ԝи Бьлами дьчьн, йе кӧ Балаԛ һин кьр, кӧ зарʼед Исраел жь рʼе дәрхә, ԝәки әԝ ԛӧрбанед пʼута бьхԝьн у бенамусийе бькьн. Ӧса жи һьнәк мәрьвед тә жи һәнә кӧ пәй һинкьрьна николойийа дьчьн. Аԝа жь гӧнәкьрьне вәгәрʼә, һәгәр на, Әзе зутьре бемә щәм тә у пе шуре дәве Хԝә тʼәви ԝан мәрьва шәрʼ кьм. Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Әԝе кӧ сәркʼәвә Әзе жь ԝи манайе вәшарти бьдьмә ԝи у ӧса жи кәвьрәки сьпи бьдьме, кӧ ԝе навәки ну ль сәр кевьр ньвисар бә у тʼӧ кәсе ԝи нави ньзаньбә, пештьри йе кӧ ԝи кәвьри бьстинә. Мьлйакʼәте щьвина Тийатирайерʼа бьньвисә беже: Кӧрʼе Хԝәде аһа дьбежә, Йе кӧ чʼәʼвед Ԝи мина алава егьр ьн у ньгед Ԝи мина ԝи сьфьре хаси кӧ дьбьрьԛә: Әз һаш жь кьред тә, һʼьзкьрьна тә, баԝәрийа тә, хьзмәткʼари у сәбьра тә һәмә. Әз заньм кӧ кьред тәйә пашԝәхтийе жь йед пешийе зедәтьр ьн. Ле газьнәкә Мьн ль тә һәйә, кӧ тӧ ԝе жьне, Изабеле сәбьр дьки, кӧ хԝә пʼехәмбәр һʼәсаб дькә. Әԝа пе һинкьрьна хԝә хӧламед Мьн жь рʼе дәрдьхә, ԝәки бенамусийе бькьн у ԛӧрбанед пʼута бьхԝьн. Мьн ԝәхт да ԝе, ԝәки әԝ жь гӧнәкьрьне вәгәрʼә, ле әԝ нахԝазә дәсте хԝә жь бенамусийа хԝә бькә. Ва Әзе ԝе бавежьмә нава щи-ньвине у йед кӧ тʼәви ԝе бенамусийе жи дькьн, бькьмә һʼаләки гьран, һәгәр жь кьред хԝә вәнәгәрʼьн. Әзе зарʼед ԝе хьм, бькӧжьм у һʼәму щьвине бьзаньбьн кӧ Әз ьм, Йе дьл у нета әʼнәнә дькә. Әзе ль анәгори кьрьнед ԝә һәр йәки бьдьмә ԝә. Ле бәле Әз ԝә, йед майинрʼа дьбежьм кӧ Тийатирайеда нә, ле пәй ве һинкьрьне нәкʼәтьнә, әԝ ‹Сӧрʼед мирещьнә кʼур› ньзаньн чаԝа кӧ әԝ дьбежьн. Әз барәки дьн надьмә сәр мьле ԝә, ле тʼәне чи ԝә һәйә ԛәԝин бьгьрьн, һʼәта кӧ Әз бем. Әԝе кӧ сәркʼәвә у һʼәта хьлазийе кьред ль гора дьле Мьн бькә, Әзе ԝи һʼӧкӧме сәр мьләта бьдьмә ԝи, кʼижан Мьн жь Баве Хԝә һьлдайә у әԝе пе шьвдара һʼәсьни шьвантийе ль ԝан бькә, мина фьраԛед чʼьни ԝе бьпʼьшьринә. У Әзе стәйрка сьбейә зу бьдьмә ԝи. Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Мьлйакʼәте щьвина Сардәйсерʼа бьньвисә беже: Әԝи кӧ һʼәфт рʼӧһʼед Хԝәде у һʼәфт стәйркед Ԝи һәнә, аһа дьбежә: Әз һаш жь кьред тә һәмә, наве тә һәйә йане тӧ сах и, ле рʼаст тӧ мьри йи. Һʼьшйар бә у әԝед кӧ манә ле ль бәр мьрьне нә, бькә бьра сәр хԝәда бен, чьмки Мьн кьред тә ль бәр Хԝәдейе Хԝә гьһишти нәдитьн. Дә бинә бира хԝә кӧ тә чь стандийә у бьһистийә, гӧрʼа ԝан тьшта бькә у тʼобә кә. Ле һәгәр тӧ һʼьшйар нәби, Әзе мина дьзәки сәр тәда бьгьрьм у те ԛәт ньзаньби кӧ Әзе кʼижан сьһʼәтеда сәр тәда бьгьрьм. Ле Сардәйседа чәнд кәсед тә һәнә кӧ ԝан кʼьнщед хԝә нәләԝьтʼандьнә. Әԝе бь кʼьнщед чилә-ԛәрԛаш тʼәви Мьн бьгәрʼьн, чьмки әԝә һежа нә. Әԝе кӧ сәркʼәвә, әԝе аһа кʼьнщед чилә-ԛәрԛаш ль хԝә ԝәргьрә. Әзе наве ԝи жь кʼьтеба жийине тʼӧ щар рʼәсит нәкьм у наве ԝи ль бәр Баве Хԝә у ль бәр мьлйакʼәтед Ԝи ашкәрә кьм. Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Мьлйакʼәте щьвина Фьладәлфйайерʼа бьньвисә беже: Әԝи пироз, Әԝи рʼаст, аһа дьбежә, Йе кӧ хԝәйе кʼьлита Даԝьд ә, кӧ вәдькә у тʼӧ кәс нькарә дадә у дадьдә тʼӧ кәс нькарә вәкә: Әз һаш жь кьред тә һәмә. Ва Мьн дәрики вәкьри данийә бәр тә, кӧ тʼӧ кәс нькарә дадә. Әз заньм кӧ ԛәԝата тә һьнәки һәйә у тә готьна Мьн хԝәй кьр у наве Мьн инкʼар нәкьр. Бьньһерʼә, һьнәкә жь кʼьништа мирещьн һәнә, йед кӧ дьбежьн: ‹Әмә щьһу нә›, ле рʼаст нә щьһу нә, әԝ дәрәԝа дькьн. Ва Әзе пʼейи сәр ԝан кьм, кӧ әԝ бен у ль бәр ньгед тә та бьн у бьзаньбьн Әз тә һʼьз дькьм. Тә кӧ тʼәмийа Мьн хԝәй кьр у сәбьр кьр, Әзе жи тә жь ԝи ԝәхте щерʼьбандьне хԝәй кьм, йа кӧ ԝе бе сәр тʼәмамийа дьнйайе, кӧ бьнәлийед ль рʼубари дьне бьщерʼьбинә. Әзе зутьрәке бем, чи тә һәйә ԛәԝин бьгьрә, ԝәки тʼӧ кәс тʼаще тә нәстинә. Әԝе кӧ сәркʼәвә Әзе ԝи пʼарьстгәһа Хԝәдейе Хԝәда бькьмә стун у әԝе иди дәрнәкʼәвә дәрва. Әзе ль сәр ԝи наве Хԝәдейе Хԝә, ӧса жи наве бажаре Хԝәдейе Хԝә, аԝа готи наве Оршәлима ну бьньвисьм, йа кӧ жь Хԝәдейе Мьн жь әʼзмен ԝе бе хԝаре у Әзе наве Хԝәйи ну жи бьньвисьм. Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Мьлйакʼәте щьвина Лаԝдькйайерʼа бьньвисә беже: ‹Йе Амин› аһа дьбежә, Әԝ шәʼде рʼаст у амьн, чʼәʼвканийа әʼфьрин у хӧльԛийед Хԝәде: Әз һаш жь кьред тә һәмә, тӧ нә сар и у нә жи гәрм и. Хԝәзи тӧ йан сар буйайи йан жи гәрм. Ле чьмки тӧ голи йи, нә сар и у нә жи гәрм, Әзе тә жь дәве хԝә бьрʼежьм. Тӧ дьбежи: ‹Әз дәԝләти мә, ԝе йәкеда гәләк пешда чумә, ԛәт һʼәԝще тʼӧ тьшти нимә›. Ле тӧ ньзани кӧ тӧ мәʼрьм, рʼәбән, бәләнгаз, кор у тәʼзи йи. Әз ве тʼәмийе дьдьмә тә: Зерʼе кӧ бь егьр һатийә сафикьрьне жь Мьн бькʼьрʼә, ԝәки тӧ дәԝләти би у кʼьнщед чилә-ԛәрԛаш жь Мьн бькʼьрʼә, кӧ ль хԝә ки, ԝәки шәрма тәʼзибуна тә бе ньхамтьне, ӧса жи дәрмане чʼәʼва, кӧ ль чʼәʼвед хԝә ди, ԝәки бьбини. Әз кʼижана һʼьз дькьм ль ԝан һьлтем у ԝан ширәт дькьм. Бона ве йәке хирәт кә у жь гӧнәкьрьне вәгәрʼә! Ва Әз ль бәр дәри сәкьни мә у ль дери дьхьм. Һәгәр йәк дәнге Мьн бьбьһе у дери ль Мьн вәкә, Әзе һәрʼьмә һьндӧрʼ, тʼәви ԝи нан бьхԝьм у әԝе жи тʼәви Мьн. Әԝе кӧ сәркʼәвә, Әзе дәстуре бьдьме кӧ тʼәви Мьн сәр тʼәхте Мьн рʼуне, чаԝа кӧ Әз сәркʼәтьм у тʼәви Баве Хԝә сәр тʼәхте Ԝи рʼуньштьм. Гӧһе кʼе һәйә бьра бьбьһе, кӧ Рʼӧһʼ чь дьбежә щьвина». Пәй ван тьштарʼа мьн дина хԝә дайе, ва әʼзменда дәрик вәкьри йә. У әԝ дәнге кӧ мьн бәре мина дәнге борʼийе бьһистьбу мьнрʼа гот: «Рʼабә ԝәрә ве жоре, Әзе ԝан тьштед кӧ гәрәке жь вьр шунда бьԛәԝьмьн, нишани тә кьм». Һәма һьнге Рʼӧһʼе Пироз һатә сәр мьн, мьн дина хԝә дайе, ԝе тʼәхтәк ль әʼзмен һәбу у йәк ль сәр тʼәхт рʼуньшти бу. У шәԝԛа диндара Йе рʼуньшти мина йа кәвьре йаспис у сардийон бу. У кʼәскәсоре жи дора тʼәхт гьртьбу, мина ишьԛа зьмруде. Ль дора ԝи тʼәхти бист чар кʼӧрси һәбун у ль сәр ԝан кʼӧрсийа бист чар рʼуспи рʼуньштьбун. Кʼьнщед чилә-ԛәрԛаш ль ԝан бун у тʼащед зерʼин жи ль сәре ԝан бун. Жь тʼәхт бьруск у дәнгед гӧрʼинийа әʼԝр-әʼзмана дәрдькʼәтьн. Ль бәр тʼәхт һʼәфт агьред алавпекʼәти һәбун, кӧ әԝ һәр һʼәфт рʼӧһʼед Хԝәде нә. Ль бәр тʼәхт тьштәки мина бәʼрәкә шушә һәбу, кӧ мина хьрустале зәлал бу. Ль дора тʼәхт, һәр алики чар рʼӧһʼбәр һәбун, кӧ пешийе у пашийева чʼәʼвава тʼьжи бун. Рʼӧһʼбәре пешьн мина шер бу, рʼӧһʼбәре дӧда мина щанәга бу, рʼӧһʼбәре сьсийа рʼуйе ԝи мина рʼуйе мәрьва бу у рʼӧһʼбәре чара жи мина тәйре симьрʼи кӧ дьфьрʼә. Һәр чар рʼӧһʼбәр жи шәш баски бун, сәр у бьнва чʼәʼвава хьт-хьти бун. У шәв у рʼож дәнге хԝә нәдьбьрʼин дьготьн: «Пироз, пироз, пироз, Хӧдан Хԝәдейе Һʼәму Зорайийе, Йе кӧ һәбу, Йе кӧ һәйә у Йе кӧ ԝе бе». Гава ԝан һәр чар рʼӧһʼбәра, рʼумәт, һӧрмәт у шькьри дьданә Йе кӧ ль сәр тʼәхт рʼуньштийә у һʼәта-һʼәтайе Сах ә, әԝ һәр бист чар рʼуспи бәр Йе кӧ ль сәр тʼәхт рʼуньшти дәвәрʼуйа дьчун, сәре хԝә бәр Ԝи даданин, Йе кӧ һʼәта-һʼәтайе Сах ә у тʼащед хԝә давитьнә бәр тʼәхт у дьготьн: «Йа Хӧдан Хԝәдейе мә, Тӧ һежа йи кӧ рʼумәт, һӧрмәте у ԛәԝате бьстини. Чьмки Тә һәр тьшт әʼфьрандьн у бь хԝәстьна Тә әԝ әʼфьрин у һәнә». Һьнге мьн дәсте Ԝийи рʼастеда, Йе кӧ ль сәр тʼәхт рʼуньштьбу, кʼьтебәкә гӧломатккьри дит кӧ һәр дӧ алийава һатьбу ньвисаре у бь һʼәфт мора һатьбу моркьрьне. Мьн дина хԝә дайе, ԝе мьлйакʼәтәки ԛәԝат бь дәнгәки бьльнд дьгот: «Кʼи һежа йә кӧ моред ве кʼьтебе же рʼакә у кʼьтебе вәкә?» Ле тʼӧ кәс тʼӧнәбу, нә ль әʼзмен, нә ль сәр әʼрде у нә жи жь бьне әʼрде, кӧ бькарьбуйа әва кʼьтеба вәкьра ле бьньһерʼийа. Әз жи кʼәлә-кʼәл дьгьрийам, кӧ йәки һежа нәһатә дитьне, ԝәки әԝ кʼьтеба вәкьра ле бьньһерʼийа. Һьнге жь рʼуспийа йәки мьнрʼа гот: «Нәгьри! Ва Шере жь ԛәбила Щьһуда, тамара Даԝьд сәркʼәт у дькарә һәр һʼәфт моред ԝе кʼьтебе же рʼакә у вәкә». Һьнге мьн дина хԝә дайе, ԝе говәка ԝи тʼәхтида, кʼижан һәр чар рʼӧһʼбәр у рʼуспийа доре гьртьбун, Бәрхәк сәкьни бу, чаԝа кӧ сәржекьри бә. Һʼәфт стьруйед Ԝи у һʼәфт чʼәʼвед Ԝи һәбун, Әԝ һәр һʼәфт рʼӧһʼед Хԝәде нә, кӧ ль тʼәмамийа дьнйайе һатьнә шандьне. Әԝ һат у кʼьтеб жь дәсте Ԝийи рʼасте, Йе кӧ ль сәр тʼәхт рʼуньштьбу һьлда. Чахе Ԝи әԝ һьлда, әԝ һәр чар рʼӧһʼбәр у һәр бист чар рʼуспи ль бәр ԝи Бәрхи дәвәрʼуйа чун. Дәсте һәр йәкида чәнг у тʼасед зерʼинә тʼьжи бьхур һәбун. Әԝ бьхур дӧайед щьмәʼта Хԝәде нә. У стьранәкә ну дьстьран дьготьн: «Тӧ һежа йи, кӧ ԝе кʼьтебе һьлди у моред ԝе же рʼаки. Чьмки Тӧ һати сәржекьрьне у пе хуна хԝә Тә мәрьв жь һәр бәрәке, жь һәр зьмани, жь һәр щьмәʼте у жь һәр мьләти кʼьрʼин бона Хԝәде, Тә әԝ кьрьн пʼадшатийа кʼаһина бона хьзмәткʼарийа Хԝәде у әԝе ль сәр дьнйайе пʼадшатийе бькьн». Һьнге мьн дина хԝә дайе, мьн дәнге гәләк мьлйакʼәта бьһист кӧ дора тʼәхт, ԝан рʼӧһʼбәра у рʼуспийа гьртьбун. Рʼәԛәма ԝан дьгьһиштә бь һʼәзара у милийона. Бь дәнгәки бьльнд дьстьран дьготьн: «Әԝ Бәрхе сәржекьри һежа йә кӧ ԛәԝате, дәԝләмәндтийе, сәрԝахтийе, карине, һӧрмәте, рʼумәте у пәсьне бьстинә». Мьн бьһист кӧ һәр әʼфьринед ль әʼзмен, ль сәр әʼрде, йед бьн әʼрде, йед бәʼреда у һʼәмуйед нава ԝанда, дьстьран: «Бьра һʼәта-һʼәтайе пәсьн, һӧрмәт, рʼумәт у ԛӧдрәт ль Йе сәр тʼәхт рʼуньшти, ӧса жи ль ԝи Бәрхи бә!» У ԝан һәр чар рʼӧһʼбәра дьготьн: «Амин!» у рʼуспи дәвәрʼуйа чун, сәре хԝә бәр Ԝи данин. Һьнге мьн дина хԝә дайе, ԝи Бәрхи морәкә жь ԝан һәр һʼәфт мора вәкьр у мьн жь ԝан һәр чар рʼӧһʼбәра дәнгәки мина дәнге гӧрʼинийа әʼԝра бьһист кӧ гот: «Ԝәрә». Мьн дина хԝә дайе, ва һәспәки боз хӧйа бу, дәсте йе лесийарбуйида тиркәванәк һәбу, тʼащәк ԝирʼа һатә дайине у әԝ чаԝа әʼгит чу, ԝәки сәркʼәвә. Чахе Бәрх мора дӧда вәкьр, мьн бьһист кӧ рʼӧһʼбәре дӧда гот: «Ԝәрә». Һьнге һәспәки дьнейи рʼәнге зәрда дәркʼәт у сийаре ԝирʼа изьн һатә дайине, кӧ әʼдьлайийе жь дьнйайе һьлдә, ԝәки мәрьв һәвдӧ бькӧжьн. Шурәки мәзьн ԝирʼа һатә дайине. Чахе Ԝи мора сьсийа вәкьр, мьн бьһист кӧ рʼӧһʼбәре сьсийа гот: «Ԝәрә». Мьн дина хԝә дайе, ва һәспәки рʼәш у дәсте сийаре ԝида мезинәк һәбу. Һьнге те бежи мьн дәнгәк бьһист, жь нава һәр чар рʼӧһʼбәра һат у гот: «Чапәкә гәньмә бьчʼук пе зивәки у се чапед бьчʼук щәһ пе зивәки. Ле зьраре нәдә зәйтʼе у шәраве». Чахе Ԝи мора чара вәкьр, мьн дәнге рʼӧһʼбәре чара бьһист кӧ гот: «Ԝәрә». Мьн дина хԝә дайе, ва һәспәки шиноԛи, кӧ наве сийаре ԝи Мьрьн бу, Дийаре Мьрийа пәй ԝи дьһат. Һʼӧкӧм ԝирʼа һатә дайине сәр пʼарәкә жь чар пʼаред дьнйайе, ԝәки пе шур, хәлайийе, нәхԝәшийа һʼал у рʼәʼԝьред дьнйайе ԝан бькӧжә. Чахе Ԝи мора пенща вәкьр, мьн бьн горигәһеда рʼӧһʼед ԝан мәрьва дитьн, йед кӧ бона Хәбәра Хԝәде у бона шәʼдәтийа кӧ дабун һатьбунә кӧштьне. Ԝан бь дәнгәки бьльнд кьрьнә гази у готьн: «Йа Хԝәйи-Хӧдане пироз у рʼаст! Те һʼәта кʼәнге диԝане нәки у һʼәйфа хуна мә жь бьнәлийед рʼубари дьне һьлнәди?» Һьнге жь ԝан һәр йәкирʼа чӧхед чилә-ԛәрԛаш һатьнә дайине у ԝанрʼа һатә готьне, кӧ һьнәк ԝәхт жи һеса бьн, һʼәта кӧ һʼәсабе һәвал-хӧламед ԝан у хушк-бьред ԝанә кӧ ԝе мина ԝан бенә кӧштьне, тʼәмам бә. Чахе Ԝи мора шәша вәкьр, мьн дина хԝә дайе, әʼрд ԛайим һʼәжийа. Рʼо мина кʼӧрхе жь пьрʼчʼе чекьри рʼәш бу у һив сәрда-педа бу мина хуне. Стәйркед әʼзмен ӧса жорда кʼәтьнә әʼрде, чаԝа кӧ дара һежире жь бәр байе ԛайим дьһʼәжә у бәред ԝе же дьԝарьн. Һьнге әʼзман бу мина кʼьтеба гӧломатккьри ль һәв һатә пʼечʼане, һьлкʼьшийа у һʼәму чʼийа у гьрав жь щийед хԝә һʼәжийан. Ԝи чахи пʼадшед дьнйайе, мәзьнед ԝе, сәрәскәред ԝе, дәԝләтийед ԝе, әʼгитед ԝе у һʼәму мәрьвед хӧлам у аза хԝә шкәфт у ԛәйед чʼийада вәшартьн, чʼийа у ԛәйарʼа дьготьн: «Сәр мәда бькʼәвьн у мә жь рʼуйе Ԝи вәшерьн, Йе кӧ ль сәр тʼәхт рʼуньшти йә, ӧса жи жь хәзәба Бәрх. Чьмки рʼожа хәзәба ԝанә мәзьн һат у кʼи дькарә тәйах кә?» Пәй ве йәкерʼа мьн дина хԝә дайе, ԝе чар мьлйакʼәт ль һәр чар ԛӧлбед дьнйайе сәкьни нә у байед һәр чар ԛӧлбед дьнйайе һʼьшк гьртьнә, ԝәки ль әʼрде, бәʼре у тʼӧ даре нәхьн. Һьнге мьн мьлйакʼәтәки дьн жи дит кӧ жь рʼоһьлате дьһат у мора ԝийә жь Хԝәдейе Сах һәбу. Әԝи бь дәнгәки бьльнд ль ԝан һәр чар мьлйакʼәта кьрә гази, йед кӧ ԝанрʼа һатьбу дайине, кӧ зьраре бьдьнә әʼрде у бәʼре, ԝанрʼа гот: «Зьраре нәдьнә әʼрде, бәʼре у дара, һʼәта кӧ әм море ль әʼнийа хӧламед Хԝәдейе хԝә нәхьн». Һьнге рʼәԛәма йед кӧ һатьбунә моркьрьне мьн бьһист: Жь һʼәму ԛәбилед зарʼед Исраел сәд чьл чар һʼәзар һатьбунә моркьрьне. Жь ԛәбила Щьһуда донздәһ һʼәзар, жь ԛәбила Рʼубен донздәһ һʼәзар, жь ԛәбила Гад донздәһ һʼәзар, жь ԛәбила Ашер донздәһ һʼәзар, жь ԛәбила Нәфтәли донздәһ һʼәзар, жь ԛәбила Мьнашә донздәһ һʼәзар, жь ԛәбила Шьмһʼун донздәһ һʼәзар, жь ԛәбила Леԝи донздәһ һʼәзар, жь ԛәбила Исахар донздәһ һʼәзар, жь ԛәбила Зәбулон донздәһ һʼәзар, жь ԛәбила Усьв донздәһ һʼәзар у жь ԛәбила Бьнйамин донздәһ һʼәзар һатьбунә моркьрьне. Пәй ве йәкерʼа мьн дина хԝә дайе, ва әʼлаләтәкә ӧса мәзьн, кӧ тʼӧ кәси нькарьбу бьжьмарта жь һәр мьләти, жь һәр бәрәке, жь һәр щьмәʼте у жь һәр зьмани ль бәр тʼәхт у ԝи Бәрхи сәкьни бун. Чӧхед чилә-ԛәрԛаш ль ԝан бун у чʼьԛьлед хӧрма жи дәстед ԝанда бун, бь дәнгәки бьльнд дькьрьнә гази дьготьн: «Хьлазбун жь дәсте Хԝәдейе мә йә, Йе кӧ ль сәр тʼәхт рʼуньшти йә у жь дәсте ԝи Бәрхи йә». Һьнге әԝ һʼәму мьлйакʼәтед кӧ ль дора тʼәхт, рʼуспийа у ԝан һәр чар рʼӧһʼбәра гьртьбун, бәр тʼәхт дәвәрʼуйа чунә әʼрде, сәре хԝә бәр Хԝәде данин у готьн: «Амин! Пәсьн, рʼумәт, сәрԝахти, шькьри, һӧрмәт, ԛәԝат у зорайи бьра һʼәта-һʼәтайе Хԝәдейе мәрʼа бә. Амин!» Һьнге жь ԝан рʼуспийа йәки мьнрʼа гот: «Әвед кӧ чӧхед чилә-ԛәрԛаш ԝәргьрти нә, әԝ кʼи нә у жь кʼӧ дәре һатьнә?» Мьн ԝирʼа гот: «Әз хӧлам, әз ньзаньм, тӧ зани». Һьнге әԝи мьнрʼа гот: «Әвана әԝ ьн, йед кӧ жь ԝе тәнгасийа мәзьн һатьнә, чӧхед хԝә пе хуна ԝи Бәрхи шуштьнә, чил-ԛәрԛаш кьрьнә. Ләма әԝә ль бәр тʼәхте Хԝәде нә, пʼарьстгәһа Ԝида шәв у рʼож Ԝи дьһʼәбиньн. Йе ль сәр тʼәхт рʼуньшти, ԝе коне Хԝә ль сәр ԝан вәгьрә. Әԝе иди нә тʼи бьн, нә бьрʼчи бьн у нә жи тәʼв у гәрмайийе ль ԝан хә. Чьмки әԝ Бәрхе кӧ говәка тʼәхтда йә, ԝе шьвантийе ль ԝан бькә, ԝан бьбә сәр канийед ава жийине. У Хԝәде жи ԝе һʼәму һесьред чʼәʼвед ԝан паԛьж кә». Чахе Әԝи мора һʼәфта вәкьр, әʼзменда ԝәкә нив сьһʼәти һәр тьшт сәԛьрʼи. Һьнге мьн әԝ һәр һʼәфт мьлйакʼәтед кӧ ль бәр Хԝәде сәкьнибун дитьн, ԝанрʼа һʼәфт борʼи һатьнә дайине. Мьлйакʼәтәки дьн бьхурданга зерʼин дестда һат, ль бәр горигәһа зерʼин сәкьни. Ԝирʼа гәләк бьхур һатә дайине, ԝәки бь тʼәви дӧайед щьмәʼта Хԝәде дайнә сәр горигәһа зерʼинә ль бәр тʼәхте Хԝәде. Дуйе ԝе бьхуре тʼәви дӧайед щьмәʼта Хԝәде жь дәсте ԝи мьлйакʼәти бәрбь Хԝәде бьльнд бу. Паше мьлйакʼәт әԝ бьхурданг һьлда, жь агьре горигәһева дагьрт авитә сәр әʼрде. Бу гӧрʼинийа дәнгед әʼԝра бьруске бьрԛ вәда у әʼрд һʼәжийа. Һьнге ԝан һәр һʼәфт мьлйакʼәтед кӧ һʼәфт борʼийед ԝан һәбун кʼаре хԝә кьрьн, кӧ ль борʼийа хьн. Йе пешьн ль борʼийе хьст, тәйрок у агьр хунева тʼәвайи сәр әʼрдеда бари. У жь се пʼара пʼарәкә әʼрде шәԝьти, жь се пʼара пʼарәкә дара шәԝьти у һʼәму гиһайе шин шәԝьти. Мьлйакʼәте дӧда ль борʼийе хьст, тьштәки мәзьни мина чʼийаки агьр пекʼәти һатә авитьне нава бәʼре. У жь се пʼара пʼарәкә бәʼре бу хун, жь се пʼара пʼарәкә һʼәйԝанед бәʼреда ԛьрʼ бу у жь се пʼара пʼарәкә гәмийа ԝеран бу. Мьлйакʼәте сьсийа ль борʼийе хьст у стәйркәкә мәзьнә мина ԛәндила алав пекʼәти жь әʼзмен кʼәтә сәр пʼарәкә жь се пʼаред чʼәма у авед канийа. Наве ԝе стәйрке Зьричʼк бу. Жь се пʼара пʼарәкә ава бу зьричʼк у жь ԝе аве гәләк мәрьв мьрьн, чьмки әԝ ав тәʼл бу. Мьлйакʼәте чара ль борʼийе хьст, жь се пʼара пʼарәкә рʼойе, жь се пʼара пʼарәкә һиве у жь се пʼара пʼарәкә стәйрка дәрб стандьн, ӧса кӧ жь се пʼара пʼарәкә ԝан ԛарийа у жь се пʼара пʼарәкә рʼоже рʼонайи нәда, ӧса жи жь се пʼара пʼарәкә шәве. Һьнге мьн дина хԝә дайе, ԝе тәйрәки симьрʼ жор әʼзменда дьфьрʼи у мьн бьһист кӧ ԝи бь дәнгәки бьльнд гот: «Ԝәй, ԝәй, ԝәй ль сәре бьнәлийед ль рʼубари дьне, кӧ ԝе бәр дәнге ԝан борʼийед һәр се мьлйакʼәтед майин кʼәвьн, йед кӧ ԝе ль борʼийа хьн». Мьлйакʼәте пенща ль борʼийе хьст у мьн дина хԝә дайе, ва стәйркәк жь әʼзмен кʼәтә сәр рʼуйе әʼрде у кʼьлита дәре гәлийе һәй-ԝайе ԝе стәйркерʼа һатә дайине. Әԝе дәре гәлийе һәй-ԝайе вәкьр, жь гәли ду-духан дәркʼәт мина дуйе кʼура мәзьн у рʼуйе рʼойе у һәԝе гьрт. Жь ԝе ду-духане кӧли дәркʼәтьнә сәр рʼуйе әʼрде, ԝанрʼа ԛәԝата мина ԛәԝата дупʼьшкед әʼрде һатә дайине. Ԝанрʼа һатә готьне, кӧ зьраре нәдьнә гиһе әʼрде, нә жи тʼӧ шинайийе у даре, ле бьдьнә ԝан мәрьвед кӧ мора Хԝәде ль сәр әʼнийа ԝан тʼӧнәйә. Ԝанрʼа һатә дайине, кӧ ԝан нәкӧжьн, ле пенщ мәһа бьдьнә щәфе. Еша ԝан мина еша лехьстьна дупьшка бу. Ԝан рʼожада мәрьве ль мьрьне бьгәрʼьн, ле ԝе ԛәт нәбиньн, әԝе һʼәйра мьрьнеда бьн, ле мьрьне жь ԝан бьрʼәвә. Ԛьлхе ԝан кӧлийа мина ԝан һәспа бун, йе кӧ бона шерʼ тенә һазьркьрьне. Ль сәр сәре ԝан тьштед мина тʼащед зерʼин һәбун у рʼуйе ԝан мина рʼуйе мәрьва бун. Пʼорʼе сәре ԝан мина пʼорʼе жьна бун у дьранед ԝан мина дьранед шера бун. Еләкзьрьһʼед ԝан һәбун, мина йед һʼәсьни, дәнге баскед ԝан мина дәнге ԝан әʼрәба бун, кӧ чаԝа гәләк һәсп ԝан дькʼьшиньн у дажонә нава шерʼ. Мина дупʼьшка жи почʼед ԝан һәбун у сәр почʼа жи дәрзи, кʼижанада ԛәԝата ԝан һәбу кӧ пенщ мәһа мерьв бьдьнә щәфе. Мьлйакʼәте гәлийе һәй-ԝайе ль сәр ԝан пʼадша бу, кӧ наве ԝи бь ибрани «Абадун» бу, бь йунани «Аполийон», кӧ те фәʼмкьрьне: «Ԝеранкьр». Ԝәйа пешьн дәрбаз бу. Жь вьр шунда ва дӧ ԝәйе жи бен. Мьлйакʼәте шәша ль борʼийе хьст у мьн дәнгәк жь һәр чар стьруйед горигәһа зерʼинә ль бәр Хԝәде бьһист, кӧ готә ԝи мьлйакʼәте шәша, йе кӧ борʼи дестда бу: «Ԝан һәр чар мьлйакʼәтед кӧ ль бәр чʼәме Фьратейи мәзьн гьредайи нә вәкә». Һьнге әԝ һәр чар мьлйакʼәт һатьнә бәрʼдане, йед кӧ бона ԝе сьһʼәте, ԝе рʼоже, ԝе мәһе у ԝе сале һатьбунә һазьркьрьне, ԝәки жь се пʼара пʼарәкә мәрьвайе бькӧжьн. Мьн рʼәԛәма ордийед сийари бьһист кӧ дӧсьд милийон бу. Ԝе дитьнокеда һәсп у сийаред ԝан мьнва аһа хӧйа бун: Рʼәнгед еләкзьрьһʼед ԝан рʼәнге сори мина егьр, ширки мина ԛалчʼичʼәке, ԛичʼьки мина кʼьркʼутеда бун. Сәре һәспед ԝан мина сәре шера бун у жь дәве ԝан агьр, ду у кʼьркʼут дәрдькʼәт. Пе ван һәр се бәла, жь се пʼара пʼарәкә мәрьвайе, пе агьр, ду у кʼьркʼута кӧ жь дәве ван дәрдькʼәт һатьнә кӧштьне. Чьмки ԛәԝата һәспа дәв у делед ԝанда бун. Делед ԝан мина мәʼра бун у сәре ԝан һәбун, кӧ пе ԝан зьрар дьдан. Әԝ мәрьвед майинә кӧ пе ван бәла нәһатьнә кӧштьне, жь ԝан пʼутед кӧ бь дәстед хԝә чекьрьбун вәнәгәрʼийан. Ԝана дәсте хԝә жь щьнһʼәбандьне, жь ԝан пʼутед зерʼә, зивә, сьфьрә, кәвьрә, дарә кӧ набиньн, набьһен у нагәрʼьн нәкʼьшандьн. Ӧса жи жь кӧштьне, сербазийе, бенамусийе у дьзийа хԝә вәнәгәрʼийан. Һьнге мьн мьлйакʼәтәки дьнейи зор дит кӧ жь әʼзмен дьһатә хԝаре. Әʼԝр ле ԝәргьрти бу у кʼәскәсор ль сери бу, рʼуйе ԝи мина рʼойе бу, ньгед ԝи жи мина стунед егьр бун. Дәсте ԝида кʼьтебәкә бьчʼукә вәкьри һәбу, ньге хԝәйи рʼасте дани сәр бәʼре, ньге хԝәйи чʼәпе жи дани сәр бәже у бь дәнге бьльнд мина мьрʼинийа шер кьрә ԛарʼин. Чахе кӧ ԝи кьрә ԛарʼин, һәр һʼәфт гӧрʼинийед әʼԝра пе дәнгед хԝә хәбәр дан. Гава ԝан һәр һʼәфт гӧрʼинийед әʼԝра хәбәр дан, мьн кьр кӧ бьньвисьм, ле жь әʼзмен дәнгәк һат у гот: «Әԝ тьштед кӧ һәр һʼәфт гӧрʼинийед әʼԝра готьн, ԝан әʼйан нәкә, нәньвисә». Һьнге әԝ мьлйакʼәте кӧ мьн дитьбу, ԝәки ԝи ньгәк данибу сәр бәʼре у йәк жи сәр бәже, дәсте хԝәйи рʼасте бәрбь әʼзмен бьльнд кьр у пе Әԝи сонд хԝар кӧ һʼәта-һʼәтайе Сах ә, аԝа готи пе Ԝи Йе кӧ әʼзман, һʼәмуйед ԝеда, әʼрд, һʼәмуйед ԝеда у бәʼр, һʼәмуйед ԝеда әʼфьрандьнә у гот: «Иди ԝәхте дәрәнги нәкʼәвә. Ле гава мьлйакʼәте һʼәфта дәнг ль борʼийе хә, һьнге ԝе әԝ сӧрʼа тʼьвдира Хԝәде бе сери, йа кӧ Ԝи әʼлами хӧламед Хԝә пʼехәмбәра кьрьбу». Пәй ве йәкерʼа ԝи дәнге кӧ мьн жь әʼзмен бьһистьбу, диса тʼәви мьн хәбәр да у гот: «Һәрʼә, ԝе кʼьтеба вәкьри жь дәсте ԝи мьлйакʼәти һьлдә, йе кӧ ль сәр бәʼре у бәже сәкьни йә». Әз жи чумә щәм ԝи мьлйакʼәти у мьн жерʼа гот: «Кʼа ԝе кʼьтеба бьчʼук бьдә мьн». Әԝи мьнрʼа гот: «Һан ве һьлдә у бьхԝә. Әве нав-дьле тәда тәʼл бә, ле дәве тәда ԝе мина һьнгьв ширьн бә». Һьнге мьн кʼьтеба бьчʼук жь дәсте мьлйакʼәт һьлда у хԝар. Дәве мьнда мина һьнгьв ширьн бу, ле чахе мьн әԝ хԝар, мьн нав-дьле хԝәда тәʼлайи кʼьфш кьр. Ԝи чахи мьнрʼа һатә готьне: «Гәрәке тӧ диса ль сәр гәләк щьмәʼта, мьләта, зьмана у пʼадша пʼехәмбәртийе бьки». Һьнге ԛамишәки мина шьва мьнрʼа һатә дайине у һатә готьне: «Рʼабә, пʼарьстгәһа Хԝәде у горигәһе чап кә у йед кӧ теда дьһʼәбиньн жи бьжмьрә. Ле һʼәԝша пʼарьстгәһейә дәрва бьһелә у ԝе чап нәкә, чьмки әԝ пʼутпʼарьстарʼа һатә дайине. Әԝе Бажаре Пироз чьл дӧ мәһа бьн пʼийада пʼепәс кьн. У Әзе тʼәмийе бьдьмә дӧ шәʼдед Хԝә, әԝе кʼӧрх хԝәкьри һʼәзар дӧсьд шест рʼожи пʼехәмбәртийе бькьн». Әвана әԝ һәр дӧ даред зәйтʼуне у һәр дӧ шәмдан ьн, йед кӧ ль бәр Хӧдане дьнйайе дьсәкьньн. Һәгәр мәрьвәк кӧ бьхԝазә зьраре бьдә ԝан, агьр жь дәве ԝан дәрдькʼәвә, дьжмьнед ԝан һʼуфи хԝә дькә. У һәгәр мәрьвәк бьхԝазә зьраре бьдә ԝан, гәрәке әԝ хԝәха ӧса бе кӧштьне. Һʼӧкӧме ван һәйә, кӧ рʼожед пʼехәмбәртийа хԝәда әʼзмен дадьн, ԝәки баран нәбарә. Ӧса жи һʼӧкӧме ԝан ль сәр ава һәйә, кӧ ԝан бькьнә хун у кʼәнге жи бьхԝазьн, дькарьн һәр щурʼә бәла биньнә сәре дьне. Гава әԝана шәʼдәтийа хԝә сәр һәвда биньн, һьнге әԝ щәʼнәԝьре кӧ жь гәлийе һәй-ԝайе дәрдькʼәвә, ԝе тʼәви ԝан шәрʼ кә, ԝан бьндәст кә у бькӧжә. Щьнйазед ԝан ԝе ль сәр мәйдана ԝи бажаре мәзьн авити бьн, ль ԝи щийе кӧ Хӧдане ԝан һәр дӧйа һатә хачкьрьне, кӧ бь мәʼна рʼӧһʼани жерʼа «Содом» у «Мьсьр» те готьне. Жь һʼәму щьмәʼта, бәрәка, зьмана у мьләта ԝе се рʼож у нива ль щьнйазед ԝан бьньһерʼьн у нәһельн кӧ щьнйазед ԝан бькьнә тʼьрба. Бьнәлийед ль рʼубари дьне ԝе дьле хԝә ль ԝан ша кьн у ша бьн, хәлата жи һәвдӧрʼа бьшиньн, чьмки ван һәр дӧ пʼехәмбәра щәфа дьданә йед кӧ ль сәр рʼуйе әʼрде дьман. Пәй се рʼож у ниварʼа Хԝәде рʼӧһʼе жийине бәр ԝанда ани, әԝ рʼабунә сәр пʼийа у хофәкә мәзьн кʼәтә сәр йед кӧ әԝ дитьн. Һьнге ԝан һәр дӧйа дәнгәки бьльнд жь әʼзмен бьһист кӧ ԝанрʼа гот: «Ԝәрьнә ве жоре». У әԝана бәр чʼәʼвед дьжмьнед хԝә әʼԝрава һьлкʼьшийанә әʼзмен. Ԝе сьһʼәте әʼрд ԛайим һʼәжийа, жь дәһә пʼара пʼарәкә бажер һьлшийа у ԝе әʼрдһʼәжеда һʼәфт һʼәзар мәрьв мьрьн, йед майин жи чʼәʼвтьрсийайи бун, шькьри дьданә Хԝәдейе әʼзмен. Ԝәйа дӧда дәрбаз бу. Ва йә, йа сьсийа ԝе зутьре бе. Мьлйакʼәте һʼәфта ль борʼийе хьст у әʼзменда дәнгед бьльнд һатьн кӧ дьготьн: «Пʼадшатийа дьнйайе бу йа Хӧдане мә у Мәсиһе Ԝи, Әԝе һʼәта-һʼәтайе пʼадшатийе бькә». Әԝ һәр бист чар рʼуспийед кӧ ль бәр Хԝәде сәр кʼӧрсийед хԝә рʼуньштьбун, хԝә дәвәрʼуйа авитьн, сәре хԝә бәр Хԝәде данин у готьн: «Йа Хӧдан Хԝәдейе Һʼәму Зорайийе, Йе һәйи у Йе һәбуйи, әм шькьрийе дьдьнә Тә, кӧ Тә ԛәԝата Хԝәйә мәзьн станд у дәст бь һʼӧкӧме Хԝә кьр. Пʼутпʼарьст ԛьлԛьлин, ле хәзәба Тә һат. Ԝәхт перʼа гьһиштийә, кӧ диԝана мьрийа бьки, хәлата бьди хӧламед Хԝә, пʼехәмбәра у щьмәʼта Хԝә ӧса жи йед кӧ жь Тә дьтьрсьн, жь бьчʼука һʼәта мәзьна. Ԝәхт һат, кӧ ԛьрʼа ԝан бини, йед кӧ дьне хьраб дькьн». Пәй ве йәкерʼа пʼарьстгәһа Хԝәдейә әʼзмен вәбу у ԝеда Сьндоԛа Пәймана Ԝи хӧйа бу. Бьруске бьрԛ дан, гӧрʼинийа дәнгед әʼԝра һатә бьһистьне, әʼрд һʼәжийа у тәйрок бари. Һьнге нишанәкә мәзьн әʼзменда хӧйа бу: Кʼӧлфәтәке рʼо ль хԝә ԝәргьртьбу, һив бьне пʼийада у тʼащәки жь донздәһ стәйрка жи ль сери бу. Әԝ һʼәмлә бу у кʼәтьбу бәр зарʼе, еша хԝә дькʼьшанд у дькьрә ԛирʼин. Пәй ве йәкерʼа нишанәкә дьн жи әʼзменда хӧйа бу. Мьн дина хԝә дайе, ва зийаки зәри мәзьн кӧ һʼәфт сәри у дәһә стьруйед ԝи һәбун у һʼәфт тʼащ жи ль сәред ԝи бун. Почʼа ԝи жь се пʼара пʼарәкә стәйркед әʼзмен кʼьшанд у авитә сәр әʼрде. Әԝ зийа ль бәр ԝе кʼӧлфәта кӧ кʼәтьбу бәр зарʼе сәкьни, кӧ һәма чаԝа зарʼ бьбә ԝе зарʼе һʼуфи хԝә кә. Ԝе кʼӧлфәте зарʼәкә кӧрʼин ани, кӧ ԝе бь шьвдара һʼәсьни шьвантийе ль һʼәму мьләта бькә. Ле зарʼа ԝе һатә рʼаһьштьне, ль щәм Хԝәде у бәр тʼәхте Ԝи. Кʼӧлфәт жи рʼәви бәрʼийе, ль ԝи щийе кӧ жь алийе Хԝәдеда жерʼа һатьбу һазьркьрьне, ԝәки әԝ ль ԝьр һʼәзар дӧсьд шест рʼожи бе хԝәйкьрьне. Һьнге ль әʼзмен шәрʼ дәст пе бу. Мьхайил мьлйакʼәтед хԝәва тʼәви зийе шәрʼ кьр, зийе жи мьлйакʼәтед хԝәва тʼәви ԝан шәрʼ кьр. Ле зийе да дәр, әʼзменда жи иди щи дәст ԝан нәкʼәт, әԝ зийайе мәзьн жорда һатә авитьне. Әва әԝ мәʼре бәре бу, кӧ жерʼа мирещьн у шәйтʼан дьбежьн, йе кӧ тʼәмамийа дьне хальфандийә. Әԝ мьлйакʼәтед хԝәва жорда һатьнә авитьне сәр рʼуйе әʼрде. Һьнге мьн ль әʼзмен дәнгәки бьльнд бьһист кӧ гот: «Ньһа йә ԝәхте хьлазкьрьн, ԛәԝат у пʼадшатийа Хԝәдейе мә, ӧса жи һʼӧкӧме Мәсиһе Ԝи. Чьмки Әԝ хәйбкьре хушк-бьред мә жорда һатә авитьне, йе кӧ шәв у рʼож бәр Хԝәдейе мә хәйба ԝан дькьр. Әԝана пе хуна Бәрх у хәбәра шәʼдәтийа хԝә сәр ԝи кʼәтьн, әʼмьре хԝә һʼәта мьрьне һʼьз нәкьрьн. Аԝа ша бьн, әʼзманно у йед кӧ ԝанда дьминьн. Ле ԝәй ль әʼрде у ль бәʼре, чьмки мирещьн жорда сәр ԝәда һатә авитьне у әԝ жь һерсе хԝә дьхԝә, кӧ занә ԝе һьндьки бьминә». Гава зийе дит кӧ әԝ жорда һатә авитьне сәр әʼрде, пәй ԝе кʼӧлфәте кʼәт, йа кӧ зарʼа кӧрʼин анибу. Дӧ баскед тәйре симьрʼийә мәзьн ԝе кʼӧлфәтерʼа һатьнә дайине, ԝәки бьфьрʼә һәрʼә бәрʼийе, ԝи щийе хԝә, кʼидәре жь зийе дур ԝе се сал у нива бьһата хԝәйкьрьне. Һьнге зийе жь дәве хԝә мина чʼем ав бәрʼда пәй ԝе кʼӧлфәте, ԝәки ԝе пе лейе бьхәньԛинә. Ле әʼрде аликʼарийа ԝе кʼӧлфәте кьр, дәве хԝә вәкьр у әԝ чʼәме кӧ зийе жь дәве хԝә бәрʼдабу даԛӧртанд. Һьнге ԝи зийайи һерса хԝә ль ԝе кʼӧлфәте рʼакьр у чу, ԝәки шәрʼе хԝә тʼәви ԝан зарʼед ԝейә майин бькә, йед кӧ тʼәмийед Хԝәде хԝәй дькьн у шәʼдәтийа бона Иса дьдьн. Зийа ль дәве бәʼре сәкьни. Һьнге мьн дина хԝә дайе, ва щәʼнәԝьрәк жь бәʼре дәрдькʼәт. Һʼәфт сәред ԝи у дәһә стьруйед ԝи һәбун, ль сәр стьруйед ԝи дәһә тʼащ бун у ль сәр һәр һʼәфт сәред ԝи жи навед кʼьфьри-зьфьрийа бун. Әԝ щәʼнәԝьре кӧ мьн дит, мина пьльнг бу, ньгед ԝи мина ләпе һʼьрʼчʼа бун у дәве ԝи жи мина дәве шера бу. Ви зийайи ԛәԝата хԝә, тʼәхте хԝә у һʼӧкӧме хԝәйи мәзьн да ԝи щәʼнәԝьри. Сәрики ви щәʼнәԝьри те бежи бьриндар ль бәр мьрьне бу, ле бьрина ԝи һатә ԛәнщкьрьне. У тʼәмамийа дьнйайе сәр ԝи щәʼнәԝьри әʼщебмайи ма. Ԝан сәре хԝә ль бәр зийе данин, кӧ ԝи һʼӧкӧме хԝә да ԝи щәʼнәԝьри. Ӧса жи сәре хԝә ль бәр щәʼнәԝьр данин у готьн: «Гәло кʼи мина ви щәʼнәԝьри йә? У кʼи дькарә тʼәви ви шәрʼ кә?» Әви щәʼнәԝьрирʼа изьн һатә дайине кӧ дәве хԝә бемәʼрифәт вәкә у кʼьфьрийа бькә, ӧса жи ԝирʼа һатә дайине, кӧ чьл дӧ мәһа бь һʼӧкӧме хԝә бькә. Әԝи һьндава Хԝәдеда дәве хԝә хьраб вәкьр у наве Ԝи, коне Ԝи у йед кӧ әʼзменда дьминьн беһӧрмәт кьр. Изьн ԝирʼа һатә дайине, кӧ тʼәви щьмәʼта Хԝәде шәрʼ кә у сәркʼәвә. Ӧса жи һʼӧкӧме ль сәр һәр бәрәке, щьмәʼте, зьмани у мьләти ԝирʼа һатә дайине. Һʼәму бьнәлийед ль рʼубари дьне ԝе сәре хԝә ль бәр ԝи дайньн, навед кʼижана жь ԝәхте әʼфьрандьна дьнйайеда кʼьтеба жийинейә Бәрхе сәржекьрида нәһатьнә ньвисаре. Гӧһе кʼе һәйә бьра бьбьһе: Әԝед кӧ йе дил кʼәтьне нә, ԝе дил бькʼәвьн, әԝед кӧ йед бәр шур кʼәтьне нә, әԝе бәр шур кʼәвьн. Ль вьр ԝе сәбьр у баԝәрийа щьмәʼта Хԝәде кер бе. Һьнге мьн дина хԝә дайе, ва щәʼнәԝьрәки дьн жь әʼрде дәрдькʼәт, дӧ стьруйе ԝийә мина йе бәрха һәбун у мина зийе хәбәр дьда. Әви тʼәмамийа һʼӧкӧме щәʼнәԝьре пешьн ль бәр ԝи хԝәха дьда хәбате у пʼейи сәр әʼрде у бьнәлийед ԝе дькьр, ԝәки сәре хԝә ль бәр ԝи щәʼнәԝьре пешьн дайньн, йе кӧ бьрина ԝийә кӧ бәрбь мьрьне дьбьр һатьбу ԛәнщкьрьне. Ви щәʼнәԝьри нишанед ӧса әʼщебә мәзьн дькьрьн, һʼәта кӧ агьр жи жь әʼзмен ль бәр чʼәʼве мәрьва давитә сәр әʼрде. Әԝи пе ԝан нишанед кӧ ԝирʼа һатьбунә дайине, ԝәки ль бәр щәʼнәԝьре пешьн бькә, бьнәлийед ль рʼубари дьне дьхальфандьн. Әԝи ԝанрʼа гот, кӧ һʼәйкәләки ԝи щәʼнәԝьри чекьн, йе кӧ бь шур һатьбу бьриндаркьрьне у диса сах бу. Һʼӧкӧм ԝирʼа һатә дайине, ԝәки рʼӧһʼ бәр һʼәйкәле щәʼнәԝьрда бинә, кӧ һʼәйкәле щәʼнәԝьр хәбәр дә у бькарьбә әԝед кӧ щәʼнәԝьр нәһʼәбиньн бьдә кӧштьне. Әԝи пʼейи сәр һʼәмуйа кьр, аԝа готи бьчʼук у мәзьна, дәԝләти у бәләнгаза, аза у хӧлама кӧ нишане бьдьнә сәр дәсте хԝәйи рʼасте йан әʼнийа хԝә, ԝәки тʼӧ кәс нькарьбә нә бькʼьрʼә, нә жи бьфьрошә, пештьри ԝи, йе кӧ нишана щәʼнәԝьр, аԝа готи наве ԝи йан һʼәсабе наве ԝи сәр ә. Ль вьр сәрԝахти кер те: Һʼьш-аԛьле кʼе һәйә, бьра һʼәсабе щәʼнәԝьр бьжмьрә, чьмки һʼәсабе мәрьвәки йә у һʼәсабе ԝи шәшсьд шест шәш ә. Паше мьн дина хԝә дайе, ва Бәрх ль сәре чʼийайе Сийоне сәкьни бу у сәд чьл чар һʼәзар мәрьв тʼәви Ԝи бун, кӧ ль сәр әʼнийа ԝан наве Ԝи у наве Баве Ԝи ньвисар бун. Мьн жь әʼзмен дәнгәк бьһист, мина дәнге гәләк ава у мина дәнге гӧрʼинийа әʼԝрайә ԛайим. Әԝ дәнге кӧ һатә мьн, мина дәнге мьԛаме чәнгвана бу, кӧ ль чәнгед хԝә дьхьн. Ԝана ль бәр тʼәхт у ль бәр ԝан һәр чар рʼӧһʼбәра у рʼуспийа стьранәкә ну дьстьра. Тʼӧ кәс нькарьбу ԝе стьране һин буйа, пештьри ԝан сәд чьл чар һʼәзаред кӧ жь дьнйайе һатьбунә кʼьрʼине. Әвана әԝ ьн, йед кӧ сәре хԝә жьнарʼа данәнинә, әԝ йед бькʼьр ьн. Әвана пәй Бәрх дьчьн, кʼӧда кӧ әԝ дьчә. Әвана жь нава мәрьва һатьнә кʼьрʼине, чаԝа бәре дәрәмәта пешьн кӧ Хԝәде у Бәрхрʼа бенә дайине. Дәрәԝ жь дәве ԝан дәрнәкʼәтийә, әԝ беԛӧсур ьн. Һьнге мьн дина хԝә дайе, ва мьлйакʼәтәки дьн кӧ әʼзменда дьфьрʼи у Мьзгинийа ԝийә һʼәта-һʼәтайе һәбу, ԝәки ԝе Мьзгинийе бьдә йед рʼубари дьне, аԝа готи һʼәму мьләта, бәрәка, зьмана у щьмәʼта. Ԝи бь дәнгәки бьльнд дьгот: «Жь Хԝәде бьтьрсьн у шькьрийе бьдьнә Ԝи, чьмки сьһʼәта диԝанкьрьна Ԝи перʼа гьһишт. Сәре хԝә бәр Ԝи дайньн, Йе кӧ әʼрд у әʼзман, бәʼр у авед канийа әʼфьрандьнә». Һьнге мьлйакʼәтәки дьн пәй ԝи һат у гот: «Һьлшийа, ԝеран бу! Әԝ Бабилона мәзьн, йа кӧ әԝ шәрава ԛавийа хԝәйә һар һʼәму мьләт данә вәхԝарьне». Пәй ве йәкерʼа мьлйакʼәтәки дьн жи пәй ԝан һат у бь дәнгәки бьльнд гот: «Әԝе кӧ сәре хԝә ль бәр щәʼнәԝьр у һʼәйкәле ԝи дайнә у нишана ԝи сәр әʼнийа хԝә йан сәр дәсте хԝә ԛәбул кә, әԝе жь ԝе шәрава һерса Хԝәде вәхԝә, йа кӧ ав тʼәвнәкьри йә, кʼаса Ԝийә хәзәбеда дагьрти йә. Әԝе ль бәр мьлйакʼәтед пироз у ль бәр Бәрх агьр у кʼьркʼутеда щәфе бькʼьшинә. Дуйе щәфе ԝан ԝе һʼәта-һʼәтайе бькʼьшә у шәв у рʼож ԝе рʼьһʼәтийа ԝан тʼӧнәбә, йед кӧ сәре хԝә бәр щәʼнәԝьр у һʼәйкәле ԝи датиньн у нишана ԝи ль сәр ԝан ә». Аԝа ль вьр ԝе сәбьра щьмәʼта Хԝәде кер бе, йед кӧ тʼәмийед Хԝәде хԝәй дькьн у һьндава Исада амьн ьн. Һьнге мьн жь әʼзмен дәнгәк бьһист кӧ гот: «Бьньвисә: Жь вьр шунда хԝәзьли нә әԝ мәрьв, йед кӧ бона баԝәрийа сәр Хӧдан ԝе бьмьрьн». Рʼӧһʼ дьбежә: «Бәле! Әԝе жь хәбата хԝә рʼьһʼәт бьн, чьмки кьред ԝан тʼәви ԝан дьчьн». У мьн дина хԝә дайе, ва әʼԝрәки сьпи у «йәки мина кӧрʼе мерьв» ль сәр ԝи әʼԝри рʼуньшти бу. Тʼащәки зерʼин ль сәре Ԝи бу у дәʼсәкә туж жи дестда бу. Һьнге мьлйакʼәтәки дьн жь пʼарьстгәһе дәркʼәт, бь дәнгәки бьльнд ль Әԝи кӧ ль сәр әʼԝр рʼуньшти бу кьрә гази у готе: «Дәʼса Хԝә бавеже бьдьру, чьмки әԝ сьһʼәта нандьруне һат, бәре әʼрде иди гьһиштийә». Әԝи кӧ ль сәр әʼԝр рʼуньшти бу дәʼса Хԝә авитә рʼуйе әʼрде у әʼрд һатә дьруне. Һьнге жь ԝе пʼарьстгәһа әʼзмен мьлйакʼәтәки дьн дәркʼәт у дәсте ԝида жи дәʼсәкә туж һәбу. Ԝе һьнге жь горигәһе мьлйакʼәтәки дьн дәркʼәт, кӧ һʼӧкӧме ԝи ль сәр егьр һәбу, әԝи бь дәнгәки бьльнд ль йе хԝәйе дәʼса туж кьрә гази у готе: «Дәʼса хԝәйә туж бавежә гушийед тьрийед әʼрде у бьчьнә, чьмки тьрийед ԝе иди гьһиштьнә». Ԝи мьлйакʼәти жи дәʼса хԝә авитә әʼрде, тьрийед әʼрде чьнин у бона һʼьнщьрʼандьне авитә ԝи һʼәԝзе мәзьни хәзәба Хԝәде. Әԝ тьри ԝи һʼәԝзида һатьнә һʼьнщьрʼандьне, кӧ жь бажер дәр бу у жь һʼәԝз хун кʼьшийа, хуне авитә гәме һәспа, ԛаси һʼәзар шәшсьд мәйдани гьрт. Һьнге мьн ль әʼзмен нишанәкә дьнә мәзьн у әщеб дит, һʼәфт мьлйакʼәтед хԝәйе һʼәфт бәлайед ахьрийе пе кʼижана ԝе хәзәба Хԝәде бьһата сери. Ԝи чахи мьн тьштәки мина бәʼрәкә шушә егьрва тʼәвайи дит, ӧса жи әԝед кӧ щәʼнәԝьр, һʼәйкәле ԝи у һʼәсабе наве ԝи бьндәст кьрьбун. Әвана сәр бәʼра шушә сәкьни бун, чәнгед кӧ Хԝәде дабунә ԝан дәстед ԝанда бун у стьрана Мусайе хӧламе Хԝәде у стьрана Бәрх дьстьран: «Кьред Тә мәзьн у әʼщеб ьн Хӧдан Хԝәдейе Һʼәму Зорайийе! Рʼийед Тә рʼаст у сәр һәԛийе нә, йа Пʼадшайе мьләта. Хӧдан, кʼи жь Тә ԝе нәтьрсә у рʼумәте нәдә ԝи наве Тә? Чьмки Тӧ тʼәне Йе пироз и. Һʼәму мьләте бәрбь Тә бен у сәре хԝә бәр Тә дайньн, чьмки кьред Тәйә рʼаст хӧйа бун». Пәй ван тьштарʼа мьн дина хԝә дайе, ва пʼарьстгәһа әʼзмен вәбу, аԝа готи Коне Шәʼдәтийе. Әԝ һәр һʼәфт мьлйакʼәтед хԝәйе һәр һʼәфт бәла жь пʼарьстгәһе дәркʼәтьн. Кʼьтанед паԛьжә бьрԛок ль ԝан бун у мәлахтед зерʼин ль сингед ԝан бун. Һьнге жь һәр чар рʼӧһʼбәра йәки һʼәфт тʼасед зерʼинә хәзәба ԝи Хԝәдейива тʼьжи, Йе кӧ һʼәта-һʼәтайе Сах ә, данә ԝан һәр һʼәфт мьлйакʼәта. Пʼарьстгәһ дуйе рʼумәта Хԝәде у ԛәԝата Ԝива тʼьжи бу у тʼӧ кәс нькарьбу бькʼәта пʼарьстгәһе, һʼәта кӧ һәр һʼәфт мьлйакʼәта, һәр һʼәфт бәла нәанина сери. Һьнге мьн дәнгәки бьльнд жь пʼарьстгәһе бьһист кӧ готә һәр һʼәфт мьлйакʼәта: «Һәрʼьн, һәр һʼәфт тʼасед хәзәба Хԝәде бьрʼежьнә сәр әʼрде». Мьлйакʼәте пешьн чу тʼаса хԝә рʼетә сәр әʼрде, пʼьзькед пʼисә хьраб ль сәр ԝан мәрьва дәркʼәтьн, йед кӧ нишана щәʼнәԝьр ль сәр ԝан бу у сәре хԝә ль бәр һʼәйкәле ԝи данибун. Йе дӧда тʼаса хԝә рʼетә сәр бәʼре, бәʼр бу мина хуна мьрийа у һʼәму һʼәйԝанед бәʼреда ԛьрʼ бун. Йе сьсийа тʼаса хԝә рʼетә сәр чʼәма у авед канийа, әԝ бунә хун. Ԝи чахи мьн дәнге мьлйакʼәте ава бьһист кӧ гот: «Тӧ сәр рʼастийе йи, Йе һәйи, Йе һәбуйи у Йе пироз и, кӧ Тә диԝанед бь ви аԝайи кьрьн. Чьмки ԝан хуна щьмәʼта Хԝәде у пʼехәмбәра рʼет у Тә хун ль ԝан да вәхԝарьне. Рʼаст әԝ хӧре ве йәке нә». Һьнге мьн дәнге горигәһе бьһист, кӧ аһа гот: «Бәле, йа Хӧдан Хԝәдейе Һʼәму Зорайийе, диԝанед Тә рʼаст у һәԛ ьн». Мьлйакʼәте чара тʼаса хԝә рʼетә сәр рʼойе у ԝерʼа һатә дайине, кӧ мәрьвайе бь егьр бьԛәлинә. Һьнге мәрьв жь дәст шәԝата гәрмайийе һатьнә ԛәландьне у кʼьфьри наве Хԝәде кьрьн, кӧ һʼӧкӧме Ԝи ль сәр ван бәла һәйә. Ле әԝ жь кьред хԝәйә хьраб вәнәгәрʼийан, ԝәки шькьри бьдана Ԝи. Мьлйакʼәте пенща тʼаса хԝә рʼетә сәр тʼәхте щәʼнәԝьр у тәʼристани һатә сәр пʼадшатийа ԝи, жь еше мәрьва зьмане хԝә дьгәстьн у жь дәст еша у пʼьзька кʼьфьри ль Хԝәдейе әʼзмен кьрьн, ле жь кьред хԝәйә хьраб вәнәгәрʼийан. Мьлйакʼәте шәша тʼаса хԝә рʼетә сәр чʼәме Фьратейи мәзьн, ава чʼем чʼькийа, ԝәки рʼе бона пʼадшед рʼоһьлате бе һазьркьрьне. Һьнге мьн дина хԝә дайе, ва се рʼӧһʼед һʼәрамә мина бәԛа, жь дәве ԝи зийайи, жь дәве щәʼнәԝьр у жь дәве пʼехәмбәре дәрәԝ дәрдькʼәтьн. Әвана әԝ рʼӧһʼед щьна бун, йед кӧ нишанед әʼщеб дькьн. Әԝ дьчьнә щәм һʼәму пʼадшед дьнйайе, ԝәки ԝан бьщьвиньн, бона шәрʼе ԝе Рʼожа Мәзьнә Хԝәдейе Һʼәму Зорайийе. «Ва йә Әзе мина дьза бем! Хԝәзи ль ԝи, йе кӧ һʼьшйар дьминә у кʼьнщед хԝә хԝәй дькә, ԝәки тәʼзи нәгәрʼә у әʼйба ԝи хӧйа нәбә!» Һьнге ԝан рʼӧһʼа әԝ пʼадша щьвандьнә ԝи щийи кӧ бь ибрани жерʼа «Һармәгәдон» те готьне. Мьлйакʼәте һʼәфта тʼаса хԝә рʼетә сәр һәԝе у жь тʼәхте пʼарьстгәһе дәнгәки бьльнд дәркʼәт у гот: «Һатә сери!» Һьнге бьруске ле да, бу гӧрʼинийа дәнге әʼԝра у әʼрд ӧса ԛайим һʼәжийа, кӧ жь ԝе рʼожа инсан дьне кʼәтийә һʼәта ньһа әʼрд аһа нәһʼәжийайә. Әʼрдһʼәж һаԛас ԛайим бу! Бажаре мәзьн бу се пʼара у бажаред мьләта ԝеран бун. Бабилона мәзьн һатә бира Хԝәде, ԝәки ԝе кʼаса хԝәйә шәрава хәзәба гьранва бьдә ԝе. Һʼәму гьрав бәтавәбун у чʼийа иди нәһатьнә хӧйане. Жь әʼзмен тәйрока гьрә ԝәкә пенщи килограме сәр мәрьвада бари. Мәрьва жь дәст ледана тәйроке кʼьфьри ль Хԝәде кьрьн, чьмки әва бәла гәләки гьран бу. Жь ԝан һәр һʼәфт мьлйакʼәтед кӧ хԝәйе һәр һʼәфт тʼаса бун, йәки һат тʼәви мьн хәбәр да у гот: «Ԝәрә ве дәре, әз диԝана ԝе ԛава бь нав у дәнг нишани тә кьм, йа кӧ ль сәр гәләк ава рʼуньшти йә. Пʼадшед дьнйайе тʼәви ве ԛави кьрьн у бьнәлийед рʼубари дьне пе шәрава ԛавийа ԝе сәрхԝәш бун». Һьнге Рʼӧһʼе Пироз һатә сәр мьн, ԝи мьлйакʼәти әз бьрьмә бәрʼике. Мьн дина хԝә дайе, ва жьнәк ль сәр щәʼнәԝьрәки соре гәвәз сийар, кӧ сәрда-педа жь һәр алийава бь навед кʼьфьрийед һьндава Хԝәдеда тʼьжи бун у һʼәфт сәред ԝи у дәһә стьруйед ԝи һәбун. Әԝ кʼӧлфәта кʼьнща ширк у соре гәвәзва ԝәргьрти бу, пе зерʼ, кәвьред ԛимәт, лал у дӧрʼва хәмьли бу. Кʼасәкә зерʼин дәсте ԝеда бу, әԝ кʼас жи кʼьрети у мьрʼдарʼийа ԛавийа ԝева дагьрти бу. Ль сәр әʼнийа ԝе навәки сӧрʼ ньвисар бу: БАБИЛОНА МӘЗЬН, МАКА ԚАВА У КʼЬРЕТИЙЕД ДЬНЙАЙЕ. Мьн дина хԝә дайе, ԝе әԝ кʼӧлфәта пе хуна щьмәʼта Хԝәде у пе хуна шәʼдед Иса сәрхԝәш буйә. Гава кӧ мьн әԝ дит, әз гәләки әʼщебмайи мам. Һьнге ԝи мьлйакʼәти мьнрʼа гот: «Тӧ чьма әʼщебмайи майи? Әзе сӧрʼа ԝе кʼӧлфәте у сӧрʼа ԝи щәʼнәԝьре кӧ әԝа ле сийар ә, кʼижан кӧ һʼәфт сәред ԝи у дәһә стьруйед ԝи һәнә, тәрʼа бежьм. Әԝ щәʼнәԝьре кӧ тә дит, ԝәхтәке һәбу, ле ньһа тʼӧнә. Әԝе зутьре жь гәлийе һәй-ԝайе дәркʼәвә у һәрʼә ӧнда бә. Бьнәлийед рʼубари дьнейә кӧ навед ԝан жь ԝәхте әʼфьрандьна дьнйайеда кʼьтеба жийинеда нәһатьнә ньвисаре, ԝе әʼщебмайи бьминьн, гава ԝи щәʼнәԝьри бьбиньн, йе кӧ һәбу у ньһа тʼӧнә, ле ԝе һәбә. Ль вьр һʼьш-аԛьл кер те. Әԝ һәр һʼәфт сәри, һʼәфт чʼийа нә, сәр кʼижана әԝ кʼӧлфәт рʼуньшти йә, ӧса жи һʼәфт пʼадша нә. Жь ԝан пенщ кʼәтьнә, йәк һәйә, йе дьн һе нәһатийә у гава бе, гәрәке һьнәк ԝәхт бьминә. Әԝ щәʼнәԝьре кӧ ԝәхтәке һәбу у ньһа тʼӧнә, әԝ хԝәха жи пʼадше һʼәйшта йә. Әԝ йәки жь ԝан һәр һʼәфта йә у ԝе һәрʼә ӧнда бә. Әԝ һәр дәһә стьруйед кӧ тә дитьнә, дәһә пʼадша нә, кӧ һе пʼадшати нәстандьнә, ле бәле ԝе һʼӧкӧм бьстиньн, кӧ тʼәви щәʼнәԝьр бона сьһʼәтәке пʼадшатийе бькьн. Мәрәме ван һәр дәһа йәк ә, әԝе ԛәԝат у һʼӧкӧме хԝә бьдьнә щәʼнәԝьр. Әвана ԝе тʼәви Бәрх шәрʼ бькьн, ле Бәрх тʼәви йед газикьри, бьжарти у амьна ԝе ль сәр ԝан бькарьбә, чьмки әԝ Бәрх Хӧдане хӧдана у Пʼадше пʼадша йә». Һьнге мьлйакʼәт мьнрʼа гот: «Әԝ авед тә дитьн кӧ әԝа ԛав ль сәр ԝан рʼуньштийә, әԝ щьмәʼт ьн, әʼлаләт ьн, мьләт у зьман ьн. Әԝ һәр дәһә стьруйед кӧ тә дитьн, ӧса жи щәʼнәԝьр ԝе һәврʼа бьжәньнә йа ԛав. Әԝе дәсте ԝе жь һәр тьшти бькьн, ԝе тәʼзи кьн у гоште ԝе бьхԝьн, егьрда бьшәԝьтиньн. Чьмки Хԝәде әв йәк кьрә дьле ԝан, кӧ хԝәстьна Ԝи бькьн у сәр нетәке бьн, пʼадшатийа хԝә бьдьнә щәʼнәԝьр, һʼәта кӧ хәбәред Хԝәде бенә сери. Әԝ жьна кӧ тә дит, әԝ бажаре мәзьн ә, йе кӧ пʼадшатийе ль сәр пʼадшед дьнйайе дькә». Пәй ван тьштарʼа мьн дина хԝә дайе, ԝе мьлйакʼәтәки дьн жь әʼзмен дьһатә хԝаре. Әԝ хԝәйе һʼӧкӧме мәзьн бу у жь диндара ԝи рʼуйе әʼрде рʼонайи бу. Әԝи бь дәнгәки бьльнд кьрә гази у гот: «Һьлшийа, ԝеран бу, Бабилона мәзьн! Әԝ бу щи-ԝар, мьскʼәне щьна у сьтʼара һʼәму рʼӧһʼед һʼәрам, ԛәлетка һʼәму тәйрәдед нәпʼакә мьрʼдарʼ. Чьмки жь ԝе шәрава ԛавийа ԝейә һар һʼәму мьләта һьлда вәхԝар, пʼадшед дьнйайе тʼәви ԝе ԛави кьрьн, базьрганед дьнйайе жь агьре дьле ԝе дәԝләти бун». Ль вьр мьн жь әʼзмен дәнгәки дьн бьһист кӧ гот: «Жь нава ԝе дәркʼәвьн, щьмәʼта Мьн, ԝәки һун нәбьнә һәвал-пʼаред гӧнед ԝе у жь бәлайед ԝе пʼаре нәстиньн. Чьмки гӧнед ԝе сәр һәв щи бунә гьһиштьнә һʼәта әʼзмен у Хԝәде нәрʼастийед ԝе анинә бира Хԝә. Ԝе чь кьрьбә ӧса жи һун биньнә сәре ԝе у ль анәгори кьред ԝе, дӧ щар һаԛаси ле вәгәрʼиньн, әԝ кʼаса кӧ ԝе бона ԝә дагьрт, һун дӧ щар тәʼл ль ԝе бьдьнә вәхԝарьне. Чьԛас рʼумәта хԝә бьльнд кьрийә у кʼефа дьле хԝә дәрбаз кьрийә, һаԛаси щәфа-шине сәрда биньн. Чьмки дьле хԝәда аһа дьбежә: ‹Әз чаԝа пʼадша рʼуньшти мә, у нә жьнәби мә, тʼӧ щар әзе шине нәбиньм›. Ләма жи нава рʼожәкеда ԝе бәлайед ԝе сәр ԝеда бен: Нәхԝәшийа һʼал, шин у хәлайи у ԝе бьбә хӧре егьр. Чьмки әԝ Хӧдан Хԝәде ԛәԝат ә, йе кӧ диԝана ԝе дькә». Пʼадшед дьнйайе, йед кӧ перʼа ԛави у кʼеф кьрьнә, гава дуйе шәԝата ԝе бьбиньн, ԝе бьгьрин у сәр ԝе шине бькьн. Жь тьрса щәфе ԝе, әԝе ль дур бьсәкьньн у бежьн: «Ах, ах бажаре мәзьн, бажаре зор, Бабилон! Диԝана тә сьһʼәтәкеда сәр тәда һат». Базьрганед дьнйайе ԝе ль сәр ԝе бьгьрин у шине бькьн, чьмки иди тʼӧ кәсе тьштед ԝанә фьротане нәкʼьрʼә: Һур-муред зерʼ, зив, кәвьред ԛимәт, лал-дӧрʼ, кʼьтане ԛимәт, пʼарчʼед ширк, һәвьрмьш, пʼарчʼед соре гәвәз, һәр дара бинхԝәш у һәр тьштед жь ԛилед фила, тьштед жь даред һәрә ԛимәт, жь сьфьр, һʼәсьн у мәрмәр, ӧса жи дарчин, бьһарәта бинхԝәш, бьхур, рʼуне бинхԝәш, бьхуре әʼрәби, шәрав, бьзьре зәйтʼуне, аре хас, гәньм, дәԝар, пәз, һәсп, әʼрәбә, хӧлам у рʼӧһʼед инсен жи. Базьргане бежьн: «Әԝ тьштед дьле тәдайә ширьн жь дәсте тә чун у һʼәму тьштед рʼәԝшә бьрԛок жь тә бьрийан, иди тʼӧ щар әԝ дәст тә накʼәвьн». Әԝ базьрганед ван тьшта, йед кӧ пе Бабилоне дәԝләти бьбун, ԝе жь тьрса щәфе ԝе дур бьсәкьньн бьгьрин, бавежьнә сәр ԝе у бежьн: «Ах, ах бажаре мәзьн, кӧ тә кʼьтане ԛимәт, пʼарчʼе ширк у соре гәвәз ль хԝә ԝәргьртьбу у бь зерʼ, кәвьре ԛимәт, лал-дӧрʼва хәмьли буйи! Һаԛас һәбук сьһʼәтәкеда пʼучʼ бу чу». Һʼәму сәрдаред гәмийа у сийаред гәмийа, гәмивана у һʼәмуйед кӧ пе хәбата сәр бәʼре әʼбуре хԝә дькьрьн, дур сәкьнин у чахе дуйе шәԝата ԝи дитьн, кьрьнә ԛирʼин у готьн: «Гәло бажарәки дьн мина ви бажаре мәзьн һәбу?» Хԝәли ль сәре хԝә кьрьн, бь шин у гьри кьрьнә ԛирʼин у готьн: «Ах, ах бажаре мәзьн, ԝәки һʼәмуйед бәʼредайә хԝәйигәми пе һәбука ԝийә хьнебуйи дәԝләти бьбун, чаԝа сьһʼәтәкеда ԝеран бу чу!» Әʼзмано, щьмәʼта Хԝәде, шанди у пʼехәмбәрно! Дьле хԝә ша кьн ль ԝи бажари, кӧ Хԝәде һʼәйфа ԝә жь ԝи һьлда. Һьнге мьлйакʼәтәки ԛәԝат, кәвьрәк мина бәрашәки мәзьн һьлда, авитә бәʼре у гот: «Бь ви аԝайи жи бажаре мәзьн Бабилон ԝе ԛайим жорда бе авитьне у иди тʼӧ щар ԝе хӧйа нәбә. Ԝе иди дәнге чәнг, сазбәнд, бьлурван у борʼиван нав тәда тʼӧ щар нәйе бьһистьне. Ԝе иди һостаки тʼӧ пʼешәйи тʼӧ щар нав тәда хӧйа нәбә. Ԝе иди дәнге бәраша жи тʼӧ щар нав тәда нәйе бьһистьне. Ԝе иди чʼьрусийа чʼьре жи тʼӧ щар нав тәда хӧйа нәбә Ԝе иди дәнге бук-зәʼве жи тʼӧ щар нав тәда нәйе бьһистьне. Базьрганед тә гьрәгьред дьнйайе бун у һʼәму мьләт бь сербазийа тә жь рʼе хальфин. У хуна пʼехәмбәр у щьмәʼта Хԝәде кʼәтә стуйе ԝи бажари, бәле хуна ԝан һʼәмуйа кӧ ль сәр рʼуйе әʼрде һатьнә рʼетьне». Пәй ван йәкарʼа, мьн ль әʼзмен дәнгәки бьльнд бьһист, мина дәнге әʼлаләтәкә гьран кӧ дьгот: «Һалелуйа! Хьлазбун, рʼумәт у ԛәԝат йед Хԝәдейе мә нә! Диԝанед Ԝи рʼаст у һәԛ ьн. Әԝи диԝана ԝе ԛаве кьр йа кӧ пе ԛавийа хԝә дьне һʼәрʼьманд у һʼәйфа хуна хӧламед Хԝәде жь ԝе һьлда». Щара дӧда готьн: «Һалелуйа! Һʼәта-һʼәтайе дуйе жь ԝе бькʼьшә». Һәр бист чар рʼуспи у һәр чар рʼӧһʼбәр дәвәрʼуйа чун у сәре хԝә ль бәр ԝи Хԝәдейе ль сәр тʼәхт рʼуньшти данин у готьн: «Амин, Һалелуйа!» Һьнге дәнгәк жь тʼәхт һат у гот: «Һʼәму хӧламед Ԝийә кӧ жь Ԝи хоф дькьн, бьчʼук у мәзьн пәсьне Хԝәдейе мә бьдьн». Һьнге мьн дәнг бьһист, чаԝа дәнге әʼлаләтәкә гьран, мина дәнге хӧлә-хӧла гәләк ава у мина дәнге гӧрʼинийа әʼԝрайә ԛайим кӧ дьготьн: «Һалелуйа! Чьмки Хӧдан Хԝәдейе мәйи Һʼәму Зорайийе дәст бь пʼадшатийе кьр. Әм Ԝирʼа гӧл дьн у ша бьн у шькьрийе бьдьнә Ԝи, чьмки дәʼԝата Бәрх перʼа гьһишт у дәргистийа Ԝи кʼаре хԝә кьрийә. Бона ль хԝәкьрьне кʼьтане бьрԛоки паԛьж жерʼа һатә дайине». (Әԝ кʼьтан нишана кьрьнед щьмәʼта Хԝәдейә рʼаст ьн.) Һьнге ԝи мьлйакʼәти мьнрʼа гот: «Бьньвисә: Хԝәзи ль ԝан, кӧ бона шайийа дәʼԝата Бәрх һатьнә тʼәглифкьрьне!» Сәрда зедә кьр гот: «Ай әв ьн хәбәред Хԝәдейә рʼаст». Ԝи чахи әз дәвәрʼу чумә ньга, кӧ сәре хԝә ль бәр ԝи дайньм, ле әԝи мьнрʼа гот: «Ве йәке нәкә! Әз жи һәвал-хӧламәки мина тә у ԝан хушк-бьред тә мә, кʼижан әʼламәтийа Исайә рʼаст хԝәй дькьн. Сәре хԝә ль бәр Хԝәде дайнә. Чьмки әԝ рʼастийа кӧ Иса әʼлам кьр әԝ пʼехәмбәра дьдә хәбәрдане ». Һьнге мьн дина хԝә дайе, әʼзман вәбу, ва йә һәспәки боз, кӧ сийаре Ԝирʼа Амьн у Рʼаст дьготьн. Әԝ диԝанкьрьне у шәрʼе Хԝәда сәр рʼастийе йә. Чʼәʼвед Ԝи мина алава егьр бун у гәләк тʼащ ль сәре Ԝи бун. Навәк сәр Ԝи ньвисар бу, кӧ пештьри Ԝи тʼӧ кәси ньзаньбу. Кʼьнщәкә хунеда кьри ле бу у наве Ԝи Хәбәра Хԝәде бу. Ордийед әʼзмен жи ль һәспед бозә сийар кʼьтанед чил-ԛәрԛашә паԛьж ль ԝан пәй Ԝи дьчун. Жь дәве Ԝи шурәки туж дәрдькʼәт, ԝәки ль мьләта хә. Әԝе пе шьвдара һʼәсьни шьвантийе ль ԝан бькә, ԝи һʼәԝзе шәрава хәзәба Хԝәдейе Һʼәму Зорайийеда ԝан бьһʼьнщьрʼинә. Ль сәр кʼьнща Ԝи, сәр һета Ԝи навәк ньвисар бу: ПʼАДШЕ ПʼАДША У ХӦДАНЕ ХӦДАНА. Һьнге мьн мьлйакʼәтәк дит, әԝ ль сәр рʼойе сәкьни бу, бь дәнгәки бьльнд кьрә гази у готә һʼәму тәйрәдед кӧ һәԝеда дьфьрʼьн: «Ԝәрьн бьщьвьнә шайийа Хԝәдейә мәзьн, ԝәки һун щьнйазед пʼадша, сәрдара, мерхаса у бәрәтʼед һәспа, ӧса жи щьнйазед сийаред ԝан у һʼәму мәрьва, аза у хӧлама, бьчʼук у мәзьна бьхԝьн». Һьнге мьн әԝ щәʼнәԝьр у пʼадшед дьнйайе ордийед ԝанва ль щики щьвийайи дитьн, ԝәки шәрʼе хԝә тʼәви Ԝи сийаре һәспе боз у ордийа Ԝива бькьн. Һьнге әԝ щәʼнәԝьр тʼәви ԝи пʼехәмбәре дәрәԝ дил һатьнә гьртьне, йе кӧ ль бәр ԝи щәʼнәԝьри нишанед әʼщеб дькьрьн. Әԝи бь ԝан кьра әԝ хальфандьн, йед кӧ нишана щәʼнәԝьр ԛәбул кьрьн у сәре хԝә ль бәр һʼәйкәле ԝи данин. Щәʼнәԝьр у пʼехәмбәре дәрәԝ жи сахә-сах һатьнә авитьне нав гола агьре кʼьркʼутейи дьшьхӧлә. Әԝед майин жи пе ԝи шуре кӧ жь дәве Сийаре һәспе боз дәрдькʼәт, һатьнә кӧштьне у һʼәму тәйрәдә жь щьнйазед ԝан тʼер бун. Һьнге мьн дина хԝә дайе, ва мьлйакʼәтәк жь әʼзмен дьһатә хԝаре, кʼьлита гәлийе һәй-ԝайе у зьнщирәкә мәзьн дәсте ԝида бу. Әԝи әԝ зийа гьрт, аԝа готи әԝ мәʼре бәре, кӧ хԝәха мирещьн у шәйтʼан ә у һʼәзар сали гьреда. Әԝи әԝ авитә гәлийе һәй-ԝайе, сәр ԝи кʼьлит кьр у мор лехьст, ԝәки иди мьләта нәхальфинә, һʼәта һʼәзар сал тʼәмам бә. Пәй ԝе йәкерʼа әԝ гәрәке бона ԝәхтәки кьн бе бәрʼдане. Һьнге мьн кʼӧрси дитьн кӧ әԝ ль сәр ԝан рʼуньштьн, кʼижанарʼа һатә дайине, ԝәки диԝане бькьн. Ӧса жи мьн рʼӧһʼед ԝан дитьн, сәре кʼижана бона шәʼдәтийа Иса у бона хәбәра Хԝәде һатьбунә лехьстьне, кʼижана сәре хԝә ль бәр щәʼнәԝьр у һʼәйкәле ԝи данәнибун у нә жи нишана ԝи һьлдабунә сәр әʼни йан дәсте хԝә. Әвана диса сах бун у тʼәви Мәсиһ һʼәзар сали пʼадшати кьрьн. (Ле әԝ мьрийед майин сах нәбун, һʼәта һʼәзар сал тʼәмам бу.) Әв ә рʼабуна мьрийайә пешьн. Хԝәзьли у бӧһӧрти-жьбарә йә, әԝе кӧ пʼара ԝи тʼәви рʼабуна мьрийайә пешьн һәйә. Мьрьна дӧда ль сәр ԝан һʼӧкӧм накә, ле әԝе бьбьнә кʼаһинед Хԝәде у Мәсиһ у ԝе тʼәви Ԝи һʼәзар сали пʼадшатийе бькьн. Гава һʼәзар сал тʼәмам бә, мирещьн ԝе жь зьндана хԝә бе бәрʼдане, әԝе дәркʼәвә, ԝәки ԝан мьләтед һәр чар ԛӧлбед дьнеда, аԝа готи Гог у Магоге бьхальфинә у ԝан бона шәрʼ ль щики бьщьвинә. Рʼәԛәма ԝан ԝе мина ԛума дәве бәʼре бә. Әвана ԝе тʼәмамийа әʼрде бәла бьн у дора ԝаргәһе ордийа щьмәʼта Хԝәде у бажаре һʼьзкьри бьгьрьн. Ле жь әʼзмен агьре бьбарә, ԝан һʼуфи хԝә кә. Әԝ мирещьне кӧ әԝ хальфандьн, ԝе бе авитьне нава гола агьре кʼьркʼуте, ԝи щийе кӧ щәʼнәԝьр у пʼехәмбәре дәрәԝ теда нә. Ль ԝьр ԝе шәв у рʼож, һʼәта-һʼәтайе бьчәрчьрьн. Һьнге мьн тʼәхтәки мәзьни чили-ԛәрԛаш дит у Йәк ль сәр рʼуньштьбу. Әʼрд у әʼзман жь бәр Ԝи бәтавәбун у дәԝса ԝан кʼьфш нәбу. Ԝе һьнге мьн мьрийед бьчʼук у мәзьн дитьн кӧ ль бәр тʼәхт сәкьни бун. Кʼьтеб вәбун у кʼьтебәкә дьн жи вәбу, аԝа готи кʼьтеба жийине. Диԝана мьрийа анәгори ԝан кьред ԝанә кʼьтебада ньвисар һатә кьрьне. Бәʼре мьрийед хԝә дан, Мьрьне у Дийаре Мьрийа жи мьрийед хԝә дан. Диԝана һәр мәрьвәки жь ԝан анәгори кьрьнед ԝан һатә кьрьне. Һьнге Мьрьн у Дийаре Мьрийа һатьнә авитьне нава гола егьр. Әв гола егьр мьрьна дӧда йә. У наве кʼе ве кʼьтеба жийинеда ньвисар тʼӧнәбу, әԝ һатә авитьне нава гола егьр. Һьнге мьн әʼрд у әʼзманәки ну дитьн, чьмки әʼрд у әʼзмане бәре дәрбаз бун у иди бәʼр тʼӧнәбу. Мьн дина хԝә дайе, ва жь әʼзмен Бажаре Пироз, Оршәлима ну мина букәкә хеликьри бона дәргистийе хԝә хәмьли жь Хԝәдеда дьһатә хԝаре. Мьн жь тʼәхт дәнгәки бьльнд бьһист кӧ гот: «Ва йә коне Хԝәде нава мәрьвада! Әԝе Хԝәха нав ԝанда бьжи, әԝана ԝе бьбьнә щьмәʼта Ԝи у Хԝәде Хԝәха жи ԝе тʼәви ԝан бьминә, чаԝа Хԝәдейе ԝан. Әԝе жь чʼәʼвед ԝан һʼәму һесьред ԝан паԛьж кә у иди мьрьне тʼӧнәбә, нә шин, нә гьри, нә еш-ешук, чьмки тьштед бәре дәрбаз бун». Һьнге Әԝи ль сәр тʼәхт рʼуньшти гот: «Ва Әз һәр тьшти ну чедькьм». У мьнрʼа гот: «Бьньвисә, чьмки әв хәбәрнә амьн у рʼаст ьн». Ӧса жи готә мьн: «Һәр тьшт һатә сери. Әз ьм Алфа у Омега, Дәстпебун у Ахьри. Әзе йед тʼи, жь канийа ава жийине беһәԛ бьдьмә вәхԝарьне. Әԝе кӧ сәркʼәвә, һәр тьште пʼара ԝи бькʼәвьн, Әзе Хԝәдейе ԝи бьм, әԝе жи лаԝе Мьн бә. Ле пʼара тьрсонәка, беамьна, кʼьрет-һʼәрама, меркӧжа, бенамуса, сербаза, пʼутпʼарьста у һʼәму дәрәԝина ԝе гола агьре кӧ кʼьркʼутева дьшәԝьтә бькʼәвә. Әв ә мьрьна дӧда». Мьлйакʼәтәки жь ԝан һәр һʼәфт мьлйакʼәта, йед кӧ һʼәфт тʼасед ԝанә һʼәфт бәлайед хьлазийева тʼьжи һәбун, һат тʼәви мьн хәбәр да у гот: «Ԝәрә ве дәре, әзе буке нишани тә кьм, дәргистийа Бәрх». Һьнге Рʼӧһʼе Пироз һатә сәр мьн, ԝи әз бьрьмә сәр чʼийаки мәзьни бьльнд у Бажаре Пироз, Оршәлим нишани мьн да, кӧ жь әʼзмен Хԝәдеда дьһатә хԝаре. Рʼумәта Хԝәде нав ԝида шәԝԛ дьда, әԝ рʼонайи мина кәвьре ԛимәт бу, мина кәвьре йаспис, мина хьрустал бу. Сура ԝи мәзьн у бьльнд бу, донздәһ дәргәһи бу у ль бәр дәргәһа донздәһ мьлйакʼәт һәбун. Ль сәр дәргәһа навед һәр донздәһ ԛәбилед зарʼед Исраел ньвисар бун. Жь алийе рʼоһьлатева се дәргәһ, жь алийе бакӧрева се дәргәһ, жь алийе башурева се дәргәһ у жь алийе рʼоавайева се дәргәһ һәбун. Донздәһ һʼимед сура бажер һәбун, ль сәр ԝан һәр донздәһа навед һәр донздәһ шандийед Бәрх ньвисар бун. Дәсте ԝи мьлйакʼәтида, йе кӧ тʼәви мьн хәбәр дьда бона чапкьрьне ԛамишәки зерʼин һәбу, ԝәки бажер, дәргәһед ԝи у сура ԝи чап кә. Бажар чар гошә бу, дьрежайийа бажер ԝәкә бәрайийе бу. Әԝи бажар бь ԝи ԛамиши чап кьр, донздәһ һʼәзар мәйдан дәркʼәт. Дьрежайи, бәрайи у бьльндайи ԝәкә һәв бун. Мьлйакʼәт сура бажер пе чапкьрьна мәрьвайе чап кьр, бьльндайийа ԝе бу сәд чьл чар зәнд. Әԝ сур жь кәвьре йаспис һатьбу чекьрьне у бажар хԝәха жь зерʼе хаси мина шушә зәлал бу. Һʼимед сура бажер бь һәр щурʼә кәвьред хасә ԛимәт һатьбунә хәмьландьне. Һʼиме пешьн йасписе сьпи бу, йе дӧда сафире шин, йе сьсийа халкедоне кʼәске вәкьри, йе чара зьмруде кʼәск, йе пенща сардонуксе сор, йе шәша сардийоне соре тәʼри, йе һʼәфта кәвьре зерʼин, йе һʼәйшта зьмруде шин, йе нәһа топазе ԛичʼьк, йе дәһа хьрисопрасе кʼәск, йе йанздәһа йаԛуте ширк, йе донздәһа аместисе ширке вәкьри. Һәр донздәһ дәргәһ донздәһ дӧрʼ бун, һәр дәрик жь дӧрʼәки бу у мәйдана бажер жь зерʼе хаси мина шуше зәлал бу. Мьн бажерда пʼарьстгәһ нәдит, чьмки Хӧдан Хԝәдейе Һʼәму Зорайийе у Бәрх пʼарьстгәһа ԝи нә. Бажар нә һʼәԝще тәʼве у һиве бу кӧ рʼонайи бьдане, чьмки рʼумәта Хԝәде ԝи рʼонайи дькә у Бәрх чʼьра ԝи йә. Мьләт ԝе рʼонайа ԝида бьгәрʼьн у пʼадшед дьнйайе ԝе рʼәԝш-рʼумәта хԝә биньнә нава ԝи. Дәргәһед ԝи ԝе тʼӧ щар нәйенә гьртьне, чьмки ль ԝьр тʼьме ԝе рʼож бә, шәве тʼӧнәбә. Ԝе рʼумәт у һӧрмәта мьләта биньнә нава ԝи. Ԛәт тьштәки һʼәрам ԝе нәкʼәвә бажер, нә жи йед кӧ кʼьретийе у дәрәԝа дькьн ԝе бькʼәвьне, тʼәне әԝед кӧ кʼьтеба Бәрхейә жийинеда һатьнә ньвисаре. Паше ԝи мьлйакʼәти чʼәмәки ава жийине, мина хьрустале зәлал нишани мьн кьр, кӧ жь тʼәхте Хԝәде у Бәрх дәрдькʼәт у нава мәйдана бажерва дькʼьшийа. Ль һәр дӧ алийед чʼем дара жийине һәбу, кӧ донздәһ щурʼә бәр дани у һәр мәһ бәре хԝә дьда. Бәлгед ԝе даре бона ԛәнщбуна мьләта бун. Иди тьште ньфьрʼлебуйи ль ԝьр ԝе тʼӧнәбә. Тʼәхте Хԝәде у йе Бәрх ԝе нав бажерда бә у хӧламед Ԝи ԝе жерʼа хьзмәткʼарийе бькьн. Әԝе рʼуйе Ԝи бьбиньн у наве Ԝи ԝе ль сәр әʼнийа ԝан һәбә. Иди шәве ль ԝьр тʼӧнәбә, ԝе рʼонайа чʼьре у рʼойе кер нәйен, чьмки Хӧдан Хԝәде ԝе ль ԝан рʼонайи кә у һʼәта-һʼәтайе пʼадшатийе бькьн. Ԝи мьлйакʼәти мьнрʼа гот: «Әв хәбәрнә амьн у рʼаст ьн. Хӧдан Хԝәдейе кӧ Рʼӧһʼе Хԝә дьдә пʼехәмбәра, мьлйакʼәте Хԝә шанд, ԝәки тьштед кӧ ԝе зутьре бьԛәԝьмьн нишани хӧламед Хԝә кә». Иса дьбежә: «Ва йә Әзе зутьре бем. Хԝәзи ль ԝи, йе кӧ хәбәред пʼехәмбәртийед ве кʼьтебеда хԝәй дькә!» Мьн Йуһʼәнна әв йәкана бьһистьн у дитьн. У чахе мьн әԝ бьһистьн у дитьн, дәвәрʼу чумә ньге ԝи мьлйакʼәти, йе кӧ әв тьшт нишани мьн кьрьн, ԝәки сәре хԝә ль бәр ԝи дайньм. Ле әԝи мьнрʼа гот: «Ве йәке нәкә! Әз жи һәвал-хӧламәки мина тә у ԝан бьред тә пʼехәмбәра у ԝан һʼәмуйа мә, йед кӧ хәбәред ве кʼьтебе хԝәй дькьн. Сәре хԝә ль бәр Хԝәде дайнә». Сәрда жи мьнрʼа гот: «Хәбәред пʼехәмбәртийейә ве кʼьтебеда вәнәшерә, чьмки ԝәхт незик ә. Әԝе кӧ нәһәԛийе дькә, бьра һе нәһәԛийе бькә, әԝе кӧ кʼьрет ә, бьра һе кʼьретийе бькә, әԝе кӧ рʼаст ә, бьра һе рʼастийе бькә у әԝе кӧ пироз ә, бьра һе пироз бә». Иса дьбежә: «Ва йә Әзе зутьре бем у хәлата Мьн дәсте Мьнда йә, ԝәки анәгори кьрьнед һәр йәки бьдьмә ԝи. Әз ьм Алфа у Омега, Йе Пешьн у Йе Пашьн, Дәстпебун у Ахьри». Хԝәзи ль ԝан, йед кӧ чӧхед хԝә шуштьнә, ԝәки изьна ԝан һәбә, жь бәре дара жийине бьхԝьн у дәргәһед бажеррʼа бькʼәвьнә һьндӧрʼ! Ле сә-кучʼьк, сербаз, бенамус, меркӧж, пʼутпʼарьст у һәр кәсе кӧ дәрәԝа һʼьз дькә у дәрәԝа дькә, әԝе дәрва бьминә. «Мьн, Иса, мьлйакʼәте Хԝә шанд, ԝәки шәʼдәтийа ван тьшта нава щьвинада бьдә. Әз Тамар у Рʼькʼьнйата Даԝьд ьм у Әз Стәйрка Шәԝԛә Сьбәһе Зу мә». Рʼӧһʼ у бук дьбежьн: «Ԝәрә!» Әԝе кӧ дьбьһе бьра бежә: «Ԝәрә!» Әԝе кӧ тʼи йә бьра бе, әԝе кӧ ава жийине дьхԝазә бьра беһәԛ бьстинә. Әз шәʼдәтийе дьдьмә һәр кәсе кӧ хәбәред пʼехәмбәртийейә ве кʼьтебеда дьбьһе: Һәгәр йәк тьштәки сәр ванда зедә кә, Хԝәде жи ван бәлайед кӧ ве кʼьтебеда ньвисар ьн ԝе сәр ԝида зедә кә. У һәгәр йәк жь хәбәред пʼехәмбәртийейә ве кʼьтебеда тьштәки кем кә, Хԝәде жи ԝе пʼара ԝи жь дара жийине у жь Бажаре Пироз кем кә, бона кʼижана ве кʼьтебеда ньвисар ьн. Әԝи кӧ шәʼдәтийа ван тьшта дьдә, дьбежә: «Бәле, Әзе зутьре бем». Амин! Ԝәрә, йа Хӧдан Иса. Кʼәрәма Хӧдан Иса һʼәмуйарʼа бә.