अबराहम रै वंसज, दाऊद रै वंसज, यीसु मसीह री वंसावली इण तरैह ऊं है। अबराहम रौ बेटौ इसहाक, इसहाक रौ बेटौ याकूब, याकूब रौ बेटौ यहूदा अर उणरा दूजा भाई हा। यहूदा अर उणरी लुगाई तामार ऊं फिरिस व जोरह रौ जनम होया, फिरिस रौ बेटौ हिसतरोन, अर हिसतरोन रौ बेटौ एराम, एराम रौ बेटौ अम्मीनादाब, अर अम्मीनादाब रौ बेटौ नहसोन हो अर नहसोन रौ बेटौ सलमोन हो। सलमोन अर उणरी लुगाई राहाब ऊं बोअज रौ जनम होयौ। बोअज अर उणरी लुगाई रूत ऊं ओबेद रौ जनम होयौ। अर ओबेद रौ बेटौ यिसै हो, अर यिसै रौ बेटौ राजा दाऊद हो। अर दाऊद ऊं सुलैमान उण लुगाई ऊं जनमियौ जिकौ पैला उरिय्याह री लुगाई ही। सुलैमान रौ बेटौ रहबाम अर रहबाम रौ बेटौ अबिय्याह हो। अर अबिय्याह रौ बेटौ आसा हो। आसा रौ बेटौ यहोसाफात अर यहोसाफात रौ बेटौ योराम हो। अर योराम रौ बेटौ उज्जियाह हो। उज्जियाह रौ बेटौ योताम हो अर योताम रौ बेटौ आहाज हो। अर आहाज रौ बेटौ हिजकिय्याह हो। हिजकिय्याह रौ बेटौ मनस्सिह हो अर मनस्सिह रौ बेटौ आमोन हो। अर आमोन रौ बेटौ योसिय्याह हो। इजरायल रै लोगां नै बन्दी बणा बेबिलोन ले जावते वेळा में योसिय्याह ऊं यकुन्याह अर उणरै भाइयो रौ जनम होयौ। बेबिलोन पूगनै रै पछै यकुन्याह रौ बेटौ सालतिएल हो अर सालतिएल रौ बेटौ जरुब्बाबिल रौ जनम होयौ। जरुब्बाबिल रौ बेटौ अबीहूंद हो अर अबीहूंद रौ बेटौ इल्याकीम हो। अर इल्याकीम रौ बेटौ अजोर हो। अजोर रौ बेटौ सदोक हो अर सदोक रौ बेटौ अखीम हो। अर अखीम रौ बेटौ इलीहूंद रौ जनम होयौ। इलीहूंद रौ बेटौ इलियाजार हो अर इलियाजार रौ बेटौ मतान हो। अर मतान रौ बेटौ याकूब रौ जनम होयौ। याकूब रौ बेटौ यूसुफ हो, जिकौ मरियम रौ घरधणी हो, अर मरियम ऊं यीसु जिकौ मसीह केहलायो, पैदा होयौ। इण तरैह ऊं अबराहम ऊं दाऊद तांई चौदह पीढ़ियो होई, अर दाऊद ऊं बेबिलोन बन्दी होन पुगाया जावण तांई चौदह पीढ़ियो, अर बन्दी होन बेबिलोन पौछायों जावण रै वगत ऊं मसीह तांई चौदह पीढ़ियो होई। यीसु मसीह रौ जनम इण परकार ऊं होयौ, की जद उणरी मां मरियम री सगाई यूसुफ रै साथै होयुड़ी ही। पण जद वां कुंवारी इज वां पवितर आतमा री करपा ऊं जापायती होईगीं। उणरौ घरधणी यूसुफ धरमी हो वो उणनै बदनाम करणौ नीं चावतौ इण वास्तै छांनै ऊं उण ऊं छोड़नै रौ विचार करयौ। जद वो इण बातां नै सौच ही रियौ हो तो उण वैळा परभु रौ सरगदूत उणरै सपनै मे दरसण देन कैवण लागौ, “हे यूसुफ! दाऊद री औळाद, थूं मरियम नै ब्याव करनै घरै लावण ऊं मत डर। क्यूंकै उणरै पेट में है, वो पवितर आतमा री करपा ऊं है। वां एक बेटा नै जनम देवेला अर उणरौ नाम यीसु राखजौ। क्यूंकै वो आपरै लोगां रा उणौरै पापों ऊं उद्धार करैला।” ऐ सैंग बातां इण वास्तै होई की जिकौ वचन परभु भविसयदाता रै तरफ ऊं कयौ गयो हो, वो पूरौ होवै। “देखौ, एक कुंवारी जापायती होवैला अर एक बेटे नै जनम देवेला, अर उण रौ नाम इम्मानुएल राखियौ जावैला।” जिण रौ मतलब “परमेसर म्हौरै साथै।” जद यूसुफ ऊंग ऊं जागन परमेसर रै दूत री आग्या मानन ब्याव करनै अपणी लुगाई नै अपणै घरै लेन आयौ। अर जठै तांई वां बेटौ कोनीं जनमी वठै तांई वो उणरै खनै कोनीं सूतौ। अर वो उणरौ नाम यीसु राख्यौ। राजा हेरोदेस रै वेळा में यहूदिया परदेस रै बेतलहम सैहर में यीसु रौ जनम होयौ। जद पूरब देस ऊं कई ज्योतिस यरुसलेम आयनै पूछण लाग्या, “यहूदियो रौ राजा जीण रौ जनम होयौ, कठै है? क्यूंकै म्हैं पूरब में उणरौ तारो देखियौ अर उणनै नमण करणै आया हो।” ओ सुणन राजा हेरोदेस अर उणरै साथै यरुसलेम रा घणा लोग घबरा ग्या। तो उणनै लोगां रै सगळां परधान याजकौ अर सास्तरियों नै भेळा करनै पूछयौ, “मसीह रौ जनम कठै होणौ चाईजै?” वे उणनै कयौ, “यहूदिया परदेस रै बेतलहम सैहर में। क्यूंकै भविसयदाता रै तरफ ऊं व्यों लिख्यौ ग्यौ है, ‘हे बेतलहम सैहर, थूं जिकौ यहूदा परदेस में है, थूं कीण हाल में यहूदा रै दूजै सैहरौ ऊं छोटौ कोनीं। क्यूंकै थौरे ऊं एक राजा निकळै ला, जिकौ म्हारी परजा इजरायल री रूखाळी करैला।’ ” पछै हेरोदेस ज्योतिसियो नै छांनै ऊं बोलायनै उणौनै पूछयौ की तारो ठीक कीण वेळा दिखाई दियौ हो, अर वो ओ कैन वाणे बेतलहम भेजिया, “जायनै, उण टाबर रै बारै में सही-सही पतौ करौ, अर जद वो मिळ जाए तो म्हनै समाचार दो ताकी म्हैं भी आयनै उणनै नमण करूं।” वो राजा री बात सुणनै जाता रया, अर जिकौ तारो उणौनै पूरब मे देखियौ हो वो उणौरै आगै-आगै जायनै, अर जठै टाबर हतौ, उण जगा रै ऊपर जायनै ठैर गियौ। उण तारै नै देखनै घणा राजी होया। वे उण घर में पोचेन उण टाबर नै उणरी मां मरियम रै साथै देखियौ, अर माथो टेक नै टाबर नै नमण कियो, अर अपणा-अपणा थैला खोलनै उणनै सोनों, अर लोबान, अर धूंप री भेट चढ़ाई। पछै सपनै में चेताणी पाई की हेरोदेस रै खनै नीं जावणौ, वे दूजै मारग ऊं अपणै देस जाता रिया। ज्योतिसी जांणै रै पछै परभु रौ एक दूत सपनै मे यूसुफ नै दरसण देन कयौ, “उठ, उण टाबर नै अर उणरी मां नै लेन मिसर देस जातौ रैह, अर जठै तांई म्हैं थनै नीं कहूं, वठै तांई थूं उठैज रहीजै। क्यूंकै हेरोदेस इण टाबर नै तलास करनै मारणौ चावै।” पछै वो रात रौ ही उठ परौन टाबर अर उणरी मां नै लेन मिसर देस रवाना होई गियौ, अर हेरोदेस रै मरण तांई वठेईज रियौ। इण वास्तै की वो वचन जिकौ परभु परमेसर नै भविसयदाता रै जरियै कयौ वो पूरौ हो, “म्हैं म्हारै बेटे नै मिसर ऊं बुलायौ।” जद हेरोदेस ओ देखियौ, की ज्योतिसियो उणरै साथै धोखो करयौ, तो वो रीस ऊं भर गियौ, अर मिनखौ नै भेजनै ज्योतिसियो रै द्धारा ठीक-ठीक बताए वेळा रै अनुसार बेतलहम अर उणरै आड़ै-पाड़ै री जगा ऊं जितरा टाबर दो साल अर उण ऊं छोटा हा, मरा दिया। जद जिकौ वचन यिर्मयाह भविसयदाता रै द्धारा कयोड़ो, वो पूरौ होयौ, “रामाह मे एक दु:ख भरियो सबद सुणाई दियौ, रोवण रौ अर घणौ विलाप। राहेल आपरै टाबरौ सारू रोवती ही, अर सान्त होणौ नीं चावती, क्यूंकै वे अबार नीं रिया।” हेरोदेस रै मरण रै पछै, परमेसर रौ दूत मिसर में यूसुफ नै सपनै मे दरसण देन कयौ, “उठ, टाबर अर उणरी मां नै लेयनै इजरायल देस जातौ रै। क्यूंकै जिकौ टाबर नै मारणौ चावतौ हो, वो मर गियौ है।” वो उठयौ, अर टाबर अर उणरी मां नै लेयनै इजरायल देस में आयौ। पण ओ सुणन की अरखिलाउस अपणै पिता हेरोदेस री जगा यहूदिया माथै राज कर रियौ है, उठै जांणै ऊं डरयो, पछै सपनै मे परमेसर री चेताणी पायनै गलील परदेस मे जातौ रियौ, अर नासरत सैहर मे जायनै बसियो, ताकी वो वचन पूरौ हो, जिकौ भविसयदाता द्धारा कयौ गयो हो, “वो नासरी केहलावेला।” उण दिनां में यूहन्‍ना बतिस्मो देणवाळौ आयनै यहूदिया परदेस रै कांकड़ में ओ परचार करणै लागौ, “मन फिराओ, क्यूंकै सरग रौ राज नैड़ौ आई गियौ है।” ओ वोहीज है जिणरी चरचा यसायाह भविसयदाता करी, “रिंदरोही मे एक हेलौ पाड़ण वाळै री आवाज सुणाई दी, ‘परभु रौ मारग तैयार करौ, उणरी सड़को सीधी करौ।’ ” वो यूहन्‍ना जिकौ ऊंट रै बालों रा बण्योड़ा गाभा पेरतो हो, अर अपणी कमर मे चमड़े रौ पटो बांधतौ हो। उणरौ खाणौ टिडियां अर सेहद हो। उण वगत यरुसलेम सैहर अर यहूदिया परदेस, अर यरदन नदी रै पाड़ै रैवण वाळा सैंग जगा रा लोग उणरै खनै आया। वे अपणै-अपणै पापों नै मांन नै यरदन नदी में यूहन्‍ना ऊं बतिस्मो लियौ। जद वो घणै फरीसियों अर सदूकियों नै बतिस्मे रै वास्तै आपरै खनै आवता देखिया, तो उणै कयौ, “हे साप रै बिचियो, थांनै ओ कुण बतायौ की आवणवाळै कोप ऊं नाहजाओ? इण वास्तै अबै ऊं थै कांम ऊं ओ लागणो चाहीजै, की थै पाप नै छोड़ दियौ हो। अर अपणै-अपणै मन मे ओ नीं सोचो की ‘म्हौरौ पिता अबराहम है।’ क्यूंकै म्हैं थांनै कहूं की परमेसर इण भाठै ऊं अबराहम रै लिए औळाद पैदा कर सकै है। अबै कवाड़ियो रुंखड़ौ री जड़ो माथै राख्योड़ौ है, इण वास्तै जे-जे रुंखड़ौ बड़िया फळ नीं लावै, वो काटनै लाय में नोख दियौ जावैला। “म्हैं तो पांणी ऊं थांनै मन फिराव रौ बतिस्मो दूं। पण जे म्हारै पछै आवणवाळौ है, वो म्हारै ऊं बळी है। म्हैं उण री जूती उठावन रै जोग कोनीं। वो थांनै पवितर आतमा अर अग्‍नि ऊं बतिस्मो दैला। उणरौ सूपड़ो तो हाथ मे ही है, आपरै खेत नै हखरौ करसी, अर आपरै गेहूं नै तो खथे मे भेळा करैला। पण जे डुरौ है उणनै ऐड़ी लाय में नोखेला कदैई नीं बुझेला।” उण वगत यीसु गलील ऊं यरदन नदी रै किनारै यूहन्‍ना रै खनै ऊं बतिस्मो लेणे आया। पण यूहन्‍ना ओ कैन रोकण लागौ, “की म्हनै तो थौरे हाथो ऊं बतिस्मो लेणे री जरुत है, अर कांई थै म्हारै खनै आया?” यीसु उणनै ओ जबाब दियौ, “अबार तो यूं ई होणै दे। क्यूंकै अपांनै इण रीत ऊं सगळी धारमिकता पूरी करणी है।” तो यूहन्‍ना यूं ही करयौ। अर यीसु बतिस्मो लेन ज्यौ पांणी में ऊं ऊपर आया, अर देखियौ, तो आभौ खुल गियौ, अर उणनै परमेसर री आतमा नै कबूड़ै रै ज्यूं उतरते अर आपरै माथै आवती देखी। अर देखौ, आ आकासवाणी होई, “ओ म्हारौ लाडलौ बेटौ है, इण ऊं म्हैं घणौ राजी हूं।” जद पवितर आतमा यीसु नै सुनी जगा में लेन ग्या ताकी सैतान उणनै परख सकै। चाळीस दिन, अर चाळीस रात नींरणे काळजै रियौ, तो उणनै भूख लागी। तो परखणवाळै नै खनै आयनै उणनै कयौ, “जे थूं परमेसर रौ बेटौ है, तो कैह दे, ऐ भाठा रोटियो बण जावै।” यीसु जबाब दियौ, “पवितर सास्तर मे लिख्योड़ौ है, ‘मिनख सिरफ रोटी ही ऊं कोनीं, पण हर एक वचन ऊं जिकौ परमेसर रै मूंडै ऊं निकळै है, जीवतौ रैला।’ ” तो सैतान उणनै पवितर नगर यरुसलेम मे ले जायनै मिंदर री चोटी ऊपर ऊभौ करयौ, अर उणनै कयौ, “जे थूं परमेसर रौ बेटौ है, तो अपणै आप इण चोटी ऊं नीचे कूद जा, क्यूंकै लिख्योड़ौ है, ‘वो थांरै बारै में आपरै सरगदूतो नै आग्या देवेला, अर वे थांनै हाथोहाथ उठा दैला, कठैई ऐड़ौ नीं हो की थांरै पगां मे भाठै री लाग जावै।’ ” यीसु उणनै कयौ, “ओ भी लिख्योड़ौ है, ‘थूं परभु अपणै परमेसर री परीकसा मत कर।’ ” पछै सैतान उणनै एक घणौ ऊंचौ भाखर माथै लेन गियो अर सगळै जगत रा राज अर उणरा धन दौलत देखायनै। उणनै कयौ, “जे थूं म्हनै झुकनै परणाम करै, तो म्हैं ओ सगळौ थनै दे दूं।” जद यीसु उणनै कयौ, “हे सैतान आगौ जा परौ, क्यूंकै लिख्योड़ौ है, ‘थूं परभु अपणै परमेसर नै परणाम कर, अर कैवल उणी री उपासना कर।’ ” जद सैतान उण रै खनै ऊं जातौ रियौ, अर सरगदूत आयनै उणरी सेवा करणै लागा। जद यीसु ओ सुणियो की यूहन्‍ना नै बन्दी बणा लियौ गियौ है, तो वो गलील जातौ रियौ। अर वो नासरत नै छोड़नै कफरनहूंम जिकौ झील रै कांठै जबूलून अर नप्ताली परदेस में है, जायनै रैवण लागौ। जिकौ यसायाह भविसयदाता रै कयोड़ो है, वो पूरौ होवै, “जबूलून अर नप्ताली परदेस, झील रै रास्ते ऊं यरदन नदी पार, गैर यहूदी रा गलील, जे लोग अंधारै मे बैठा हा, उणौ मोटो चांदणौ देखियौ अर जिकौ मरण रै देस अर छाया मे बैठा हा, उण माथै चांदणौ चमकियो।” उण वगत ऊं यीसु परचार करणै अर ओ कैवणौ सरू करयौ, “मन फिराओ, क्यूंकै सरग रौ राज नैड़ौ आयौ है।” एक वैळा यीसु गलील री झील रै कांठै फिरता उण दो भाई समौन जिकौ पतरस कहीजै है, अर उणरै भाई अन्‍द्रियास नै झील में जाळ नोखते देख्यां। क्यूंकै वे मछली पकड़न वाळा हा। यीसु उणनै कयौ, “म्हारै लारै चालया आओ, तो म्हैं थांनै परमेसर रै राज मे लोगां नै लावण वाळा बणाऊंला।” वे हाथोहाथ जाळ नै छोड़नै उणरै लारै चाल दिया। उठै ऊं आगै चालनै, यीसु नै अर दो भाइयो मतलब जबदी रै बेटौ याकूब अर उणरै भाई यूहन्‍ना नै देखिया। वे आपरै पिता जबदी रै साथै नाव ऊपर आपरै जाळो नै सावळ कर रिया हा। वो उणौनै भी बोलाया। वे हाथोहाथ नाव अर अपणै पिता नै छोड़नै यीसु रै लारै चाल दिया। यीसु सगळै गलील मे फिरता होया उणौरै पराथना घरो मे उपदेस करता, अर राज्य रा सुभ संदेस परचार करता, अर लोगां री हर तरैह री बीमारी अर रोगो नै दूर करता रिया। अर सगळा सीरिया देस में उणरै अचूम्बे रै कांम री चरचा फैलगी। अर मिनख सगळै बिमारों नै, जे किणी तरैह री बीमारियो अर दु:खो मे बन्धियोड़ा हा, अर जीण में भूत हा, अर मिरगीवाळा अर लकवे रै रोगियो नै उणरै खनै लाया अर वो उणनै ठीक करया। गलील अर दिकापुलिस, यरुसलेम, यहूदिया अर यरदन नदी रै पार ऊं भीड़ री भीड़ उणरै लारै होयगी। यीसु इण भीड़ नै देखनै भाखर ऊपर चढ़ ग्या, अर जद बैठ ग्या तो उणरा चेला उणरै खनै आया। अर यीसु उणौनै ओ उपदेस देवण लागा, “धन्य है वे, जिकौ मन रा दीन है, क्यूंकै सरग रौ राज उणौ रौ इज है। धन्य है वे, जिकौ सौग करै है, क्यूंकै वे सानति पावैला। धन्य है वे, जिकौ नरम है, क्यूंकै वे धरती रा अधिकारी होवैला। धन्य है वे, जिकौ धरमी बणणै री अभिलासा राखै है, क्यूंकै उणौरी इछा पूरी की जावैला। धन्य है वे, जिकौ दयाळु है, क्यूंकै उण ऊपर दया की जावैला। धन्य है वे, जिणरौ मन सुद्ध है, क्यूंकै वे परमेसर नै देखेला। धन्य है वे, जिकौ मेळ करावै है, क्यूंकै वे परमेसर रा टाबरियां केहला वेला। धन्य है वे, जिकौ धरम रै कारण सताया जावै है, क्यूंकै सरग रौ राज उणी रौ है। “धन्य हो थै, जे मिनख म्हारै कारण थांनै भला-भूंडा के, अर सतावै अर झूठ बोलनै थौरे विरोध मे सगळै परकार री बुरी बातां कैवै। जद आणन्दित अर खुस होणौ, क्यूंकै थौरे लिए सरग में मोटो फळ है। इण वास्तै उणौ नै उण भविसयदाताओ नै जिकौ थौरे ऊं पैला हा इण रीत ऊं सताया हा। “थै धरती रा नमक हो। पण जे नमक रौ हवाद बिगड़ जावै, तो वो पाछौ कीण चीज ऊं नमकीन कियो जावैला? पछै वो किणी कांम रौ कोनीं, सिरफ इणनै बारै फेंकयो जावै अर मिनखौ रै पगां में खुन्दियौ जावै। “थै संसार रौ उजाळौ हो। जिकौ नगर भाखर माथै बसयोड़ौ है वो छुप नीं सकै। अर मिनख दीयौ जलान ढ़कणा रै नीचे कोनीं पण भींत माथै राखै है, जद उण ऊं घर रै सगळै मिनखौ नै उजाळौ मिळै। इणी तरैह थौरो उजाळौ मिनखौ रै सांमै चमकै की वे थोरै भलै कांम नै देखन थोरै पिता री, जिकौ सरग मे है, सौभा करै। “ओ नीं समझौ, की म्हैं व्यवस्था या भविसयदाता री किताबो नै लोप करणै आयौ हूं, लोप करणै नीं, पण पूरा करणै आयौ हूं। क्यूंकै म्हैं थांनै साचौ कहूं, की जद तांई आभौ अर धरती टळ जावैला, पण व्यवस्था ऊं एक मातरा या एक बिंदु भी बिना पूरौ होयौ नीं टळैला। इण वास्तै जिकौ कोई इण छोटी ऊं छोटी आग्याओं में ऊं कीण एक नै तोड़े, अर व्यौंही मिनखौ नै सिखावै, वो सरग रै राज मे सबां ऊं छोटौ केहलावेला। पण जिकौ कोई इण आग्याओं रा पालण करैला अर वीनै सिखावेला, वो इज सरग रै राज मे महान कहीजैला। क्यूंकै म्हैं थांनै कहूं, की जे थौरो धारमिक आचरण सास्तरियों अर फरीसियों रै धारमिक आचरण ऊं बढ़कर नीं हो, तो थै सरग रै राज मे कदैई परवेस नीं कर सकौ। “थै सुण चुकया हो, की पूरवकाल रै मिनखौ ऊं कयौ गियौ हो की ‘हत्या नीं करणी’, अर ‘जिकौ कोई हत्या करैला वो कचेड़ी मे डंड रै भागी होवैला।’ पण म्हैं थोरै ऊं ओ कहूं, की जिकौ कोई आपरै भाई माथै रीस करैला, वो पंचायत मे डंड रै भागी होवैला, अर जिकौ कोई आपरै भाई रौ अपमांन करैला वो कचेड़ी मे डंड रौ भागी होवैला। अर जिकौ कोई आपरै भाई नै ‘बदुआ देवेला’ वो नरक री अग्‍नि रै डंड रौ भागी होवैला। इण वास्तै जे थूं अपणी भेट परमेसर रै सारू वेदी माथै लायौ, अर उठै थूं याद करै, की थांरै भाई रै मन मे थांरै लिए कीं विरोध है, तो अपणी भेट उठै वेदी रै सांम्ही छोड़ दे, अर जायनै पैला अपणै भाई ऊं मेल मिलाप कर अर पछै आयनै अपणी भेट चढ़ा। जैड़ी तांई थूं अपणै विरोधी रै साथै कचेड़ी रै मारग में ही है, उण ऊं झटपट समझौतो कर ले कठैई ऐड़ौ नीं होवै की विरोधी थनै न्यायधीस नै सूंपे, अर न्यायधीस थनै सिपाई नै सूंप दे, अर थूं जेळ मे घाल दियौ जावै। म्हैं थनै साचौ कहूं की जैड़ी तांई थूं एक-एक पैसा नीं चुका दे वठ तांई उठै ऊं छूट नीं पावै। “थै सुण चुकया हो की कयौ गियौ हो, ‘व्यभिचार नीं करणौ।’ पण म्हैं थोरै ऊं ओ कहूं, की जिकौ कोई किणी लुगाई नै बुरी निजर ऊं देखे वो अपणै मन मे उण ऊं व्यभिचार कर चुको। जे थारी जीवणी आंख थनै पाप करावै, तो उणनै फोड़ दे। क्यूंकै थारै लिए ओ भलौ है की थारै अंगो मे ऊं एक नास हो जावै अर थारौ हैंग सरीर नरक मे नीं नोख्यौ जावै। जे थारौ जीमणौ हाथ थनै पाप करावै तो उणनै काटनै फेंक दे। क्यूंकै थारै लिए ओ भलौ है की थारै अंगो मे ऊं एक नास हो जावै अर थारौ हैंग सरीर नरक मे नीं नोख्यौ जावै। “ओ भी कयौ गयो हो, ‘जिकौ कोई अपणी लुगाई नै छोड़ दैणौ चावै, तो उणनै त्यागपत्र दैवै।’ पण म्हैं थोरै ऊं ओ कहूं की जिकौ कोई अपणी लुगाई नै व्यभिचार रै सिवा किणी और कारण ऊं त्यागपत्र दे, तो वो उण ऊं व्यभिचार करावै है। अर जिकौ कोई उण छोड़योड़ी लुगाई ऊं ब्याव करै, वो व्यभिचार करै है। “पछै थै सुण चुकया हो की पूरवज रै लोगां ऊं कयौ गयो हो, ‘झूठी सौगन नीं खाणी, पण परभु रै लिए अपणी सौगन नै पूरी करणी।’ पण म्हैं थौरे ऊं ओ कहूं की कदैई सौगन नीं खाणी। ना तो सरग री, क्यूंकै वो परमेसर रौ सिंहासण है। ना धरती री, क्यूंकै वो उणरै चरणौ री चौकी है। ना यरुसलेम री, क्यूंकै वो महाराजा रौ नगर है। आपरै माथै री ई सौगन नीं खाणी, क्यूंकै थै एक बाल नै भी नीं उजळो, अर नीं काळौ कर सकौ हो। पण थांरी बात ‘हां’ री ‘हां,’ या ‘ना’ री ‘ना’ होवै। क्यूंकै जिकौ कई इण ऊं घणौ होवै है वो बुराई ऊं होवै है। “थै सुण चुकया हो की कयौ गयो हो, ‘आंख रै बदळै आंख, अर दांत रै बदळै दांत।’ पण म्हैं थौरे ऊं ओ कहूं की बुरै करणै वाळै रै साथै बुराई नीं करणी। पण जिकौ कोई थांरै जीवणे गाल माथै थप्पड़ मारै, उणरै सांम्ही दूजौ गाल ई फेर दो। जे कोई थांरै ऊं जबरदस्ती करनै थारौ कुड़तौ लेणो चावै, तो उणनै कोट भी लेण दे। जिकौ कोई थनै जबरदस्ती में आपरौ सामान देयनै एक कोस ले जावै, तो उणरै साथै दो कोस जातौ रैणौ। जिकौ कोई थांरै ऊं मांगे, उणनै दे। अर जिकौ थांरै ऊं उधार लेणो चावै, तो उण ऊं मूंडौ मती फेर। “थै सुण चुकया हो की कयौ गियौ हो, ‘आपरै पड़ोसी ऊं परैम राखणौ, अर आपरै बैरी ऊं बैर।’ पण म्हैं थोरै ऊं ओ कहूं की अपणै बैरियो ऊं परैम राखौ अर अपणै सताणेवाळौ रै लिए पराथना करौ, जीण ऊं थै अपणै सरगिए पिता री औळाद ठैरोला। क्यूंकै वो भलै अर भूंडै दोनो माथै आपरौ सूरज उगावै है, अर धरमी अर अधरमी दोनो ऊपर मेंह बरसावे है। क्यूंकै जे थै अपणै परैम राखणवाळौ ऊं परैम राखौ, तो थौरे लिए कांई फळ होवैला? कांई चुंगी लेणवाळा भी ऐड़ौ ई नीं करै? “जे थै कैवल अपणै भाइयो नै नमस्कार करौ, तो कयौ मोटो कांम करौ हो? कांई गैर यहूदी भी ऐड़ौ नीं करै? इण वास्तै चाहीजै की थै सिद्ध बणौ, जैड़ा थोरै सरगिए पिता सिद्ध है। “सावचेत रैवौ! थै मिनखौ नै दिखाणे रै सारू अपणै धरम रा कांम मत करौ, नीं तो अपणै सरगिए पिता ऊं कोई फळ नीं पाओला। “इण वास्तै जद थूं दांन करै, तो इणरौ ढ़िढ़ोरौ नीं बजा, ज्यूं पाखण्डी, पराथना जगा अर गलियों मे करै है, ताकी मिनख उणौरी सौभा करै। म्हैं थांरै ऊं साचौ कहूं की वे आपरौ फळ पा चुकया। पण जद थूं दांन करै, तो जे थांरै जीमणै हाथ ऊं करै है, उणरै थारौ डावौ हाथ नीं जांण पावै। इण तरैह थारौ दांन छानौ रै, अर जद थारौ पिता जिकौ छुपियो दांन देखे है, थनै फळ दैला। “जद थूं पराथना करै, तो पाखण्डियो री तरैह नीं हो। क्यूंकै मिनखौ नै दिखाणे रै सारू पराथना जगा में अर सड़को रै मोड़ौ ऊपर ऊभा होयनै पराथना करणी उणौनै बड़िया लागै है। म्हैं थौरे ऊं साचौ कहूं की वे आपरौ प्रतिफळ पा चुकया। पण जद थूं पराथना करै, तो थौरे कमरे में जायनै, अर दरवाजो बंद करनै अपणै पिता ऊं जे अलोप में है पराथना कर। तो थारौ पिता जिकौ गुपत मे देखे है, थनै प्रतिफल दैला। पराथना करते वैळा गैर यहूदी रै तरैह बक-बक नीं करौ। क्यूंकै वो समझै है की उणरै घणौ बोलणै ऊं उणरी सुणी जावैला। इण वास्तै थै उण रै जैड़ा नीं बणौ। क्यूंकै थौरो पिता थोरै मांगणै ऊं पैला ही जांणै है की थोरै कई-कई जरुत है। “इण वास्तै थै इण रीत ऊं पराथना किया करौ, ‘हे म्हारै पिता, थूं जिकौ सरग में है, थारौ नाम पवितर मान्यौ जावै। थारौ राज आवै, थारी इछा जैड़ी सरग में पूरी होवै है, वैड़ी इज धरती ऊपर ही होवै। म्हांरी दिन भर री रौजी-रोटी आज म्हौ नै दो। अर जीण तरैह म्हौ म्हौरै अपराधियो नै माफ किया, उणी तरैह थूं ही म्हौरै अपराधो नै माफ कर। अर म्हौ नै ऐड़ी ताकत दे की म्हौ हरैक परीकसा रै सांम्ही टिक सकौ, पण बुराई ऊं बचा। क्यूंकै राज अर पराक्रम अर महिमा हमेसां थारीज है। आमीन।’ इण वास्तै जे थों मिनख रौ पाप माफ करौला, तो थौरो सरगिए पिता ई थोरा पाप माफ करैला। अर जे थै मिनखौ रै पाप माफ नीं करौला, तो थौरो पिता ई थौरो पाप माफ नीं करैला। “जद थै उपवास करौ, तो पाखण्डियो रै तरैह मूंडै माथै उदासी नीं लाओ। क्यूंकै वे आपरौ मूंडौ बणाए राखै है, ताकी मिनख उणनै उपवासी जांणै। म्हैं थौरे ऊं साचौ कहूं की वे आपरौ प्रतिफल पा चुकया। पण जद थूं उपवास करै तो अपणै माथै ऊपर तेल मसलेन मूंडौ धोले, ताकी मिनख नीं पण थारौ पिता जिकौ अलोप मे है, थनै उपवासी जांणै। इण दसा मे थारौ पिता जिकौ गुपत मे देखे है, थनै प्रतिफल दैला। “अपणै सारू धरती माथै धन भेळौ मत करौ, जठै कीड़ो अर कांई बिगाड़े है, अर जठै चोर सेंध लगावै अर चुरावे है। पण अपणै सारू सरग मे साचौ धन भेळौ करौ, जठै नीं तो कीड़ो अर ना कांई बिगाड़े है, अर जठै नीं चोर सेंध लगावै अर नीं चुरावे है। क्यूंकै जठै थारौ धन है उठै थारौ मन भी रैला। “सरीर रौ दीयौ आंख है। इण वास्तै जे थारी आंख बड़िया है, तो थांरौ सगळौ सरीर भी उजियाळो होवैला। पण जे थांरी आंख खराब हो, तो थांरौ सरीर भी अंधारौ होवैला। इण कारण वो उजाळौ जिकौ थौरे म्हैं है जे बुझ जावै, तो वो अंधारौ कैड़ौ मोटो होवैला! “कोई मिनख दो मालिको री सेवा नीं कर सकै। क्यूंकै वो एक ऊं नफरत अर दूजै ऊं परैम राखैला, या एक ऊं मिलयोड़ो रैवैला अर दूजै नै छोटौ जांणैला। थै परमेसर अर धन दोनो री साथै सेवा कोनीं कर सकौ। “इण वास्तै म्हैं थौरे ऊं कहूं की अपणै प्रांण रै लिए चिंता नीं करणी की म्हौ कांई खाओ अर कांई पीयो, अर नीं अपणै सरीर रै लिए की कांई पेरोला। कांई प्रांण खाणै ऊं, अर सरीर कपड़ो ऊं बतौ कोनीं? आकास रै पंखैरूओ नै देखौ! वे नीं बोए है, नीं काटे है, अर नीं भोजन भेळौ करनै राखै है, पछै ई थौरो सरगिए पिता उणौनै खिलावै है। कांई थै उणौ ऊं घणा किमती कोनीं हो? थोरै मे कुण है, जिकौ चिंता करनै अपणी उमर मे एक घड़ी भी बढ़ा सकै है? “अर कपड़ो रै लिए क्यूं चिंता करौ हो? जंगळी फूलों ऊपर ध्यांन करौ की वे कीकर मोटा होवै है। वे नीं तो मेनत करै, नीं काते है। तौभी म्हैं थोरै ऊं कहूं की राजा सुलैमान भी, आपरै सगळी महिमा मे उण फूलों री सुंदरता मे ऊं किणी रै तरैह कपड़ा पेरयोड़ा कोनीं हता। इण वास्तै जद परमेसर मैदान री घास नै, जिकौ आज है अर काले लाय मे झोक दी जावैला, ऐड़ौ कपड़ो पेरावै है, तो हे थोड़े विसवास करणैवाळौ, थांनै वो इण ऊं बढ़न क्यूं नीं पैरावैला? “इण वास्तै थै चिंता करनै ओ नीं कैवणौ की म्हैं कांई खाओ, या कांई पीयो, या कांई पेरोला। क्यूंकै गैर यहूदी इण सगळी चीजों री खोज मे रैवै है। पण थौरो सरगिए पिता जांणै है की थांनै इण सगळी चीजों री जरुत है। इण वास्तै पैला थै परमेसर रै राज अर उणरै धरम री खोज करौ तो ऐ सगळी चीजों भी थांनै दे दी जावैला। इण वास्तै काले री चिंता मत करौ, क्यूंकै काले रा दिन आपरी चिंता आप कर दैला। हर दिन रौ दुख उण दिन रै सारू घणी है। “दोस मत लगाओ की परमेसर थांरै ऊपर दोस नीं लगावै। क्यूंकै जीण तरैह थै दोस लगावो हो, उण तरैह थोरै ऊपर भी दोस लगायो जावैला। अर जीण नाप ऊं थै नापो हो, उणी नाप ऊं परमेसर थोरै लिए भी नापेला। “थूं क्यूं अपणै भाई री आंख रै तिणके नै देखे है, अर अपणी आंख री लकड़ी थनै कोनीं दिखे? जद थारी ही आंख मे लकड़ी है, तो थूं अपणै भाई ऊं कीकर कैह सकै है, ‘ला म्हैं थारी आंख ऊं तिणको निकाळ दूं’? हे पाखण्डी, पैला अपणी आंख मे ऊं लकड़ी निकाळ ले, पछै थूं अपणै भाई री आंख रौ तिणको सही तरैह देखनै निकाळ सकै ला। “पवितर चीज कुत्तो नै मत दो, अर अपणै मोती सूअरौ रै आगै मत नाखो। ऐड़ौ नीं होवै की सूअर उणौनै पगां तळै खूंदे अर कुत्ता पलटेन थांनै फाड़ नोखे। “मांगो, तो थांनै दियौ जावैला, ढ़ूंढ़ो तो थै पाओला, खटखटाओ, तो थोरै लिए खोलयो जावैला। क्यूंकै जिकौ कोई मांगे है, उणनै मिळै है, अर जिकौ ढ़ूंढ़े है, वो पावै है। अर जिकौ खटखटावे है, उणरै लियै खोलयो जावैला। “थोरै मे ऊं ऐड़ौ कुण मिनख है, की जे उणरौ बेटौ उण ऊं रोटी मांगे, तो वो उणनै भाटा दे? या मछली मांगे, तो उणनै सांप दे? जद थै बुरा होयनै, थौरे टाबरौ नै बड़िया चीजों देणा जांणौ हो, तो थौरो सरगिए पिता आपरै मांगणवाळौ नै बड़िया चीजों क्यूं नीं दैला? इण कारण जिकौ कई थै चावौ हो की मिनख थोरै साथै चौखौ व्यवहार करै, थै भी उणौरै साथै वैड़ौ ही व्यवहार करौ। क्यूंकै व्यवस्था अर भविसयदाता री सिकसा आहीज है। “साकंड़े फाटक ऊं परवेस करौ। क्यूंकै चौड़ौ फाटक अर चौड़ौ मारग विनास मे पुगावै है, अर घणा है जिकौ उण ऊं परवेस करै है। पण छोटौ फाटक अर सांकड़ो मारग जीवन में पुगावै है। अर थोड़ा मिनख है जिकौ उणनै पावै है। “झूठा भविसयदाता ऊं सावचेत रौ, जिकौ भेड़ो रै वेस मे थोरै खनै आवै है, पण अन्तर मे वे फाड़नै आळा भेड़िया है। उणरै कांमां ऊं थै उणनै पेचाण लौ ला। कांई लोग झाड़ियौ ऊं अंगूर, या थौर ऊं अंजीर तोड़े है? इणी तरैह हर एक बड़िया रुंखड़ौ बड़िया फळ लावै है अर बुरौ रुंखड़ौ बुरौ फळ लावै है। बड़िया रुंखड़ौ बुरौ फळ नीं ला सकै, अर नीं बुरौ रुंखड़ौ बड़िया फळ ला सकै है। जिकौ जिकौ रुंखड़ौ बड़िया फळ नीं लावै, वो काटयो अर अग्‍नि मे नोख दियौ जावैला। इण तरैह उणरै फळौ ऊं थै उणनै पेचाण लौ ला। “जिकौ म्हारै ऊं, ‘हे परभु! हे परभु!’ कैवै है, उणमे ऊं हर एक सरग रै राज मे परवेस नीं करैला। पण वो ई जिकौ म्हारै सरगिए पिता री इछा ऊपर चालै है। उण दिन घणा मिनख म्हनै केहला, ‘हे परभु, हे परभु, कई म्हैं थौरे नाम ऊं भविसयवांणी कोनीं की, अर थौरे नाम ऊं दुस्टआतमाओ नै कोनीं निकाळी, अर थौरे नाम ऊं घणौ रै अचूम्बे रा कांम कोनीं कीना?’ जद म्हैं उण ऊं खुलनै कैह दूंला, ‘म्हैं थनै कदै नीं जाणियो। हे खोटा कांम करण आळो, म्हारै खनै ऊं चालया जाओ।’ “इण वास्तै जिकौ कोई म्हारी ऐ बातां सुणन उणनै मानैला, वो उण बुद्धिमान मिनख रै समान ठैरैला जिकौ अपणौ घर चटान ऊपर बणायौ। अर मेंह बरसियो, अर बाढ़े आई, अर आन्धियों चाली, अर उण घर ऊं टकराई, पछै ई वो नीं पड़ियौ। क्यूंकै उणरी नींव चटान ऊपर नोखयोड़ी ही। पण जिकौ कोई म्हारी ऐ बातां सुणै है अर उण ऊपर नीं चालै, वो उण निर्बुद्धि मिनख रै ज्यूं ठैरैला जिकौ अपणौ घर बालू ऊपर बणायौ। अर मेंह बरसियो, अर बाढ़े आई, अर आन्धियों चाली, अर उण घर ऊं टकराई, अर वो पड़न सतियानास हो ग्यौ।” जद यीसु ऐ बातां कैह सुक्यां, तो ऐड़ौ होयौ की भीड़ उणरै उपदेस ऊं अचूम्बो करण लागी। क्यूंकै वो उणनै सास्तरियों रै ज्यौ नीं पण अधिकारी रै व्यों वांनै उपदेस देतो हो। जद यीसु उण भाखर ऊं उतरियौ, तो एक घणी भीड़ उणरै पाछळ वहीर होयगी। एक कोढ़ी उणरै खनै आयनै उणै झुकनै परणाम कियो अर कयौ, “हे परभु, जे थूं चावै, तो म्हनै कोढ़ ऊं सावळ कर सकै है।” यीसु आगै बढ़नै उणरै हाथ लगायो अर कयौ, “म्हैं चावूं हूं, की थूं कोढ़ ऊं ठीक हो जा।” अर वो हाथो हाथ सावळ हो गियौ। यीसु उणनै कयौ, “देख, कीण ऊं नीं कैणौ, पण जान अपणै आप नै याजक नै देखान अर जिकौ चढ़ावौ मूसा नै ठैरायौ है उणनै चढ़ा, ताकी मिनखौ रै सारू गवाई होवै।” जद यीसु कफरनहूंम मे आया तो एक सूबेदार नै उणरै खनै आयनै उण ऊं विनती की, “हे परभु, म्हारौ सेवक घर मे लकवे रोग ऊं घणौ दु:खी पड़ियौ है।” यीसु उणनै कयौ, “कांई म्हैं आन उणनै सावळ करूं?” सूबेदार जबाब दियौ, “हे परभु म्हैं इण लायक कोनीं की थै म्हारै घर आओ, पण कैवल मूंडै ऊं कैह दो। तो म्हारौ सेवक सावळ हो जावैला। क्यूंकै म्हैं ई सासन रै अधीन हूं, अर सिपाई म्हारै अधीन है। जद म्हैं एक ऊं कहूं, ‘जा’ तो वो जावै है, अर दूजै ऊं कहूं, ‘आ’ तो वो आवै है। अर जद अपणै दास ऊं कहूं, ‘ओ कर’ तो वो करै है।” ओ सुणनै यीसु नै अचूम्बो होयौ, अर जिकौ उणरै लारै आ रिया हा उणौनै कयौ, “म्हैं थौरे ऊं साचौ कहूं की म्हैं इजरायल मे भी ऐड़ौ विसवास कोनीं पायो। अर म्हैं थौरे ऊं कहूं की पूरव अर पच्छिम ऊं घणा मिनख आयनै अबराहम अर इसहाक अर याकूब रै साथै सरग रै राज में जीमवा बैठेला। जीण लोगां नै सरग रौ राज मिलण वाळौ हो उणौनै बाहर अंधारै मे फेंक दिया जावैला। उठै रोणो अर दांत पीसणो होवैला।” तो यीसु सूबेदार नै कयौ, “जा, जैड़ौ थारौ विसवास है, वैड़ौ ही थौरे वास्तै हो।” अर उणरौ सेवक उणी घड़ी सावळ हो गियौ। यीसु जद पतरस रै घर आयौ, तो उणै पतरस री सासु नै ताव छड़योड़ौ माचा मे सुती देखी। यीसु उणरौ हाथ छूयो अर उणरौ ताव उतर ग्यौ, अर वो उठनै यीसु री सेवा करनै लागी। जद सिंझया हुई तो लोग उणरै खनै घणै मिनखौ नै लाया जिणमे दुस्ट आतमाओ ही अर यीसु उण आतमाओ नै अपणै वचन ऊं निकाळ दी। अर सगळै बिमारों नै सावळ करिया। ताकी जिकौ वचन यसायाह भविसयदाता रै कयोड़ो वो पूरौ हो, “उणै आप म्हांरी तकलीफो नै ले ली अर म्हांरी बीमारियो नै उठा ली।” यीसु नै जद आपरै च्यांरूमेर एक घणी भीड़ देखी तो चेलौ नै झील रै उण पार जाणै री आग्या दी। तो एक सास्तरी खनै आन उणनै कयौ, “हे गुरु, जठै कठै थूं जावैला, म्हैं थौरे लारै लारै चालूं ला।” यीसु उणनै कयौ, “लोंकियो रै बील अर आकास रै पंखैरूओ रै आपरा माळा होवै है। पण म्हैं, मिनख रै बेटे रै लिए माथो घालनै री भी जगा कोनीं है।” दूजै चेले यीसु नै कयौ, “हे परभु, म्हनै पैला जाणै दे की म्हैं अपणै पिता नै बूर दूं।” तो यीसु उणनै कयौ, “अबार थूं म्हारै लारै वहीर हो ले जीण लोगां रै खनै अनत जीवन कोनीं है उणनै उणौरा मुड़दा बूरण दे।” जद वो नाव ऊपर चढ़या, तो उणरा चेला उणरै लारै चालया। उण वैळा, झील मे एक ऐड़ौ मोटो तूफान उठयौ की नाव लेहरौ ऊं ढ़कन लागी। पण यीसु वो सोह रियौ हो। तो चेलौ नै खनै आन उणनै जगायो अर कयौ, “हे परभु, म्हौ नै बचा! म्हौ डूब रिया हों।” यीसु उणौनै कयौ, “हे कम विसवास राखणै वाळौ, कियो डरौ हो?” तो वो उठनै आंधी अर पांणी नै डांटया, अर सैंग सान्त हो ग्या। अर वे अचूम्बो करन कैवण लागा, “ओ कैड़ौ मिनख है? की आंधी अर पांणी ई इणरी आग्या मांनै है।” जद वो झील रै उण पार गदरैनियों रै परदेस मे पूगिया, तो दो मिनख यीसु नै मिळया जिणमे दुस्टआतमाओ ही वे कबरौ मे ऊं निकळनै आ रिया हा। वे इतरा भयंकर हा की कोई उण मारग ऊं जा नीं सकै हा। वे चिलायनै कयौ, “हे परमेसर रा बेटा, म्हांरौ ऊं थूं कांई चावै? कई थूं वगत ऊं पैला म्हौ नै दु:ख दैणै एठै आयौ है?” उणौ ऊं थोड़ो आगौ घणाहारा गंडूरौ रौ एक टोळो चर रियौ हो। दुस्ट आतमाओ नै उण ऊं आ विनती किनी, “जे थूं म्हौ नै निकाळै है, तो गंडूरौ रै टोळे मे भेज दे।” यीसु उणौ ऊं कयौ, “जाओ।” अर वे निकळ गंडूरौ मे घुस गी अर देखौ, सगळौ टोळो भाखर री ढ़ाळ में ऊं कूद पांणी मे जा पड़या, अर डूब मरया। उणरै गवाळा दौड़नै नगर मे जायनै ऐ सैंग बातां अर जिणमे दुस्ट आतमाओ ही, उणरा सैंग हाल कैहन सुणाया। तो हैंग नगर रा मिनख यीसु ऊं मिलनै निकळ आया, अर उणनै देखन विणती की, “म्हांरी सीमा ऊं बाहर चालयौ जा।” पछै यीसु नाव ऊपर चढ़न झील रै पार कफरनहूंम नगर मे आयौ, जठै वो रैतौ। उण वैळा, कीं लोग लकवा रै एक रोगी नै खाट माथै उठानै उणरै खनै लाया। यीसु नै उणरौ विसवास देखन, उण लकवे रै रोगी ऊं कयौ, “हे बेटा, हीमत राख थारा पाप माफ होया।” इण ऊपर कईक सास्तरी कयौ, “ओ तो परमेसर रौ अपमांन करै है।” यीसु नै उणौरै मन री बातां जांण नै कयौ, “थै लोग थौरे मन मे बुरौ विचार क्यूं कर रिया हो? आसान कांई है ओ कैवणौ, ‘थारा पाप माफ होया,’ या ओ कैवणौ, ‘उठ अर चाल फिर’? पण इण वास्तै की थै जांण लौ की म्हैं, मिनख रै बेटे नै धरती ऊपर पाप माफ करणै रौ अधिकार है।” तो उणै लकवे रै रोगी ऊं कयौ, “उठ, थारी खाट उठा, अर थारै घर जातौ रैह।” वो उठनै आपरै घरै जातौ रियौ। मिनख ओ देखन डर गिया अर परमेसर री महिमा करणै लागा, जिकौ मिनखौ नै ऐड़ौ अधिकार दियौ है। उठै ऊं आगै बढ़न यीसु नै मती नाम रै एक मिनख नै चुंगी चौकी माथै बैठौ देख्यौ, अर उण ऊं कयौ, “म्हारै लारै हो जा।” वो उठनै उणरै लारै हो लियौ। जद यीसु मती रै घर मे खाणौ खाणै रै लिए बैठा तो घणा चुंगी लेवणवाळा अर पापी आयनै यीसु अर उणरै चेलौ रै साथै खाणै बैठा। ओ देखन फरीसियों नै उणरै चेलौ ऊं कयौ, “थौरो गुरु चुंगी लेणवाळा अर पापियो रै साथै क्यूं खावै है?” ओ सुणन यीसु उणौनै कयौ, “वैद भलै चंगो रै लिए कोनीं पण बिमारों रै लिए जरुरी है। इण वास्तै थै जान सास्तर रै इण वचन रौ अरथ सीख लौ ‘म्हैं बलिदान कोनीं पण दया चावूं।’ क्यूंकै म्हैं धरमियो नै कोनीं, पण पापियो नै बुलाणै आयौ हूं।” जद बतिस्मो देवणवाळा यूहन्‍ना रा चेला यीसु खनै आन कयौ, “कांई कारण है की म्हौ अर फरीसी इता उपवास करौ, पण थारा चेला उपवास कोनीं करै?” यीसु उणौनै कयौ, “कांई बराती, जद तांई बींद उणौरै साथै है, सौग कर सकै है? पण वो दिन आवैला जद बींद उणौ ऊं न्यारौ कियो जावैला, उण वगत वे उपवास करैला। नवा कपड़े री कारी पुराणै कपड़े ऊपर कोई नीं लगावै। क्यूंकै वो नवी कारी भेळी होयनै, उण कपड़े नै घणौ फाड़ दैवै है। अर मिनख नयो अंगूर रस पुराणी मसको मे कोनीं भरे है। क्यूंकै एड़ौ करणै ऊं नयो अंगूर रस फूलनै मसकें फाड़ दैवै है, अर अंगूर रस बह जावै है अर मसकें बरबाद हो जावै है। पण नयो अंगूर रस नई मसको मे भरे है जिकौ वे दोनो बची रैवै है।” वो उण ऊं ऐ बातां कैह ही रिया हा, की देखौ, पराथना घर रौ एक अधिकारी नै आयनै उणनै परणाम कियो अर कयौ, “म्हारी बेटी अबार ही मरी है, पण चालनै अपणौ हाथ उण ऊपर राखै, तो वो जीवती हो जावैला।” यीसु उठनै अपणै चेलौ रै साथै मिळन उणरै साथै चालया। एक लुगाई नै जिकौ बारैह साल ऊं लोई पड़नै रौ रोग हो, पाछळ ऊं आयनै यीसु रै गाभे रै हाथ लगायो। क्यूंकै वो अपणै मन मे कैवती ही, “जे म्हैं उणरै गाभे रै हाथ लगा लेऊं तो सावळ हो जाऊं।” यीसु मुड़ नै उणनै देखी अर कयौ, “बेटी हीमत बांध थांरै विसवास नै थनै सावळ किनी है।” अर वां लुगाई उणी वगत सावळ होगी ही। जद यीसु उण अधिकारी रै घर मे पुगियो अर बांसली बजाण वाळौ नै अर भीड़ नै हुलड़ मचाते देखिया, तो कयौ, “हट जाओ, छोरी मरी कोनीं, पण सोह री है।” इण ऊपर वे यीसु री मजाक उडानै लाग्या। पण जद भीड़ नै निकाळ दी, तो वो मांय जायनै छोरी रै हाथ दियौ, अर वां जी उठी। अर इण बात री चरचा उण पूरै परदेस में फैलगी। जद यीसु उठै ऊं आगै बढ़या, तो दो आंधा उणरै लारै ओ कैवता होया जावै, “हे दाऊद री औळाद, म्हौरै ऊपर दया कर!” जद वो घर मे पूगिया, तो वे आंधा उणरै खनै आया, अर यीसु नै उणौनै कयौ, “कांई थांनै विसवास है की म्हैं ओ कर सकूं हूं?” उणौनै वीण ऊं कयौ, “हां परभु!” तो यीसु उणौ री आंख्यां रै हाथ लगान कयौ, “थोरै विसवास रै ज्यूं ही थोरै वास्तै होवै।” अर उणौ री आंख्यां खुलगी। यीसु उणौनै चेताणी देन कयौ, “सावचेत, कोई इण बात नै नीं जांणै।” पण वे निकळनै पूरै परदेस में उणरी खबर फैला दी। जद वे बाहर जा रिया हा, तो देख्यौ, कीं लोग एक गूंगे नै जिणमे दुस्ट आतमा ही, यीसु खनै लाया। अर जद दुस्ट आतमा निकाळ दी, तो गूंगो बोलणै लागौ। इण भीड़ अचूम्बो करनै कयौ, “इजरायल मे ऐड़ौ कदैई कोनीं देख्यौ हो।” पण फरीसियों कयौ, “ओ तो दुस्टआतमाओ रै सरदार री मदद ऊं दुस्टआतमाओ नै निकाळै है।” यीसु सगळा नगरो अर गांवों मे फिरता रिया अर उणौरै पराथना घरो मे उपदेस करता, अर राज्य रा सुभ संदेस परचार करता, अर लोगां री हरैक परकार री बीमारी अर तकलीफो नै दूर करता रिया। जद उण भीड़ नै देखी तो उणनै मिनखौ ऊपर तरस आयौ। क्यूंकै वे उण लरड़ियां रै ज्यूं जिणरौ कोई रखवाळौ नीं हो, उदास अर भटकयोड़ी ही। तो उणरै आपरै चेलौ ऊं कयौ, “पाका खेत तो घणी है पण मजूर थोड़ा है। इण वास्तै खेत रै मालिक ऊं विणती करौ की वो आपरै खेत काटणे रै लिए मजूर भेज दे।” पछै यीसु आपरै बारैह चेलौ नै खनै बोलायनै, उणौनै दुस्टआतमाओ नै निकालनै रै साथै साथै बिमारियों अर कमजोरियो नै निकाळनै रौ अधिकार दियौ। अर बारैह प्रेरितों रा नाम ऐ है। पैला समौन, जिकौ पतरस कैलायौ है, अर उणरा भाई अन्‍द्रियास। जबदी रौ बेटौ याकूब, अर उणरा भाई यूहन्‍ना। फिलिप्पुस अर बरतुल्मै थोमा अर चुंगी लेवणवाळौ मती, हलफाई रा बेटा याकूब अर तद्दै। देस भगत समौन, अर यहूदा इस्‍करियोती, जीणे यीसु नै विसवासघात करनै पकड़ायौ। इण बारैह चेलौ नै यीसु हुकम देन भेज्या की, “थै गैर यहूदियो रै इलाके मे या, सामरियो रै सैहर मे मती जाईजौ। पण इजरायल रै लोगां रै खनै जावणौ जिकौ गुमयोड़ी लरड़ियां रै ज्यूं है। आवतै जावते मिनखौ नै ओ बता दिजो ‘सरग रौ राज्य नैड़ौ आ गियौ है।’ बिमारों नै सावळ करजौ, मरयोड़ौ नै जीवता करजौ, कोढ़ियो रै ओगण हखरा करजौ, दुस्टआतमाओ नै निकालजो। थांनै फोगट मे मिळयो है, तो थै फोगट मे ही दईजो। अपणै बटवो मे नीं सोनो, नीं चांदी, अर नीं तांबो राखजौ। सफर में नीं झोळी राखजौ, अर पैरयोड़ो रै अलावा नीं कुड़तौ अर नीं जूता राखजौ, अर नीं लाठी राखजौ। क्यूंकै मजूर नै उणरी चाईजती चीजों मिळ जावैला। “जीण कीण सैहर या गांव में जाओ, तो पतौ करजौ की वठै कुण मिनख विसवासलायक है। अर जद तांई बठैज रहीजौ, बीण वढ़ेज रहीजौ। जीण घर मे जाओ उणौ नै आसीस दईजो। उण घर रा मिनख लायक होई तो थोरी आसीस बीण तांई पौंछ जाई। पण उठै लायक नीं होई तो थोरी आसीस थोरै खनै पाछी आ जावैला। जिकौ कोई थौरो आदर नीं करै अर थौरी बात नीं मांनै उण घर ऊं या सैहर ऊं निकळते वैळा अपणै पगां री माटी झाड़ दीजौ। की इण वास्तै चेताणी होवैला की परमेसर डंड देवेला, क्यूंकै उणौ उणरी बात कोनीं मानी। म्हैं थोरै ऊं साचौ कहूं की न्याव रै दिन उण सैहरौ री हालत सदोम अर अमोरा री हालत ऊं घणी बुरी हो जावैला। “देखौ, म्हैं थांनै लरड़ियां रै ज्यूं नयारौ रै बीच मे भेजूं हूं। इण वास्तै सापों री तरैह सावचेत अर कबूड़ौ री तरैह भोळा बणौ। पण मिनखौ ऊं थै सावचेत रईजो। क्यूंकै वे थांनै सभाओं मे सूंप दैला, अर आपरी पराथना जगा मे थोरै कोड़ा ठोकी। थै म्हारै चेला होणै रै सारू राजाओ अर राज्यपालो सांम्ही पेस किया जावोला, ताकी थै उणौरै वास्तै अर गैर यहूदियो रै वास्तै गवाई बणौ। जद वे लोग थांनै पकड़े तो आ चिंता मत करजौ के म्हौ की रीत ऊं अर कांई केवोला। क्यूंकै जो थै बोलणौ चावौ वो उण वगत थांनै बता दियौ जावैला। क्यूंकै बोलणै वाळौ थूं कोनीं है, पण थौरे पिता परमेसर री आतमा है जिकौ वो थौरे मे ऊं बोले। “भाई, अपणै भाई नै धोखे ऊं अर पिता अपणै बेटे नै, मारणै वास्तै सौपेला, अर टाबर अपणै माता-पिता रै विरोध मे उठनै उणौ नै मरवा दैला। म्हारै नाम रै कारण सैंग लोग थोरै ऊं बैर राखैला, पण जिकौ आखरी तांई सेहन करैला उण रौ उद्धार होवैला। जद थांनै एक सैहर मे सतावै, तो दूजै सैहर मे आ जाईजौ। म्हैं थांनै साची बात कहूं की इण ऊं पैला थै इजरायल रै सगळै सैहरौ मे जाओ म्हैं, मिनख रौ बेटौ, आ जावैला। “चेला आपरै गुरु ऊं कदैई मोटो नीं होया करै। अर नीं नौकर आपरै मालिक ऊं। एक चेलौ आपरै गुरु जैड़ौ अर एक नौकर आपरै मालिक जैड़ौ बणणौ मोटी बात है। मिनख घर रा मालिक नै बालजबूल या सैतान कयौ तो वो घरो रै लोगां नै ओर भी तो घणौ बुरौ केही। “इण वास्तै उण मिनखौ ऊं डरजै मती। क्यूंकै कीं ढ़कयोड़ौ कोनीं जिकौ खोलीजै कोनीं, अर ना ही छुपयोड़ो जिकौ जांणीजै कोनीं। जो म्हैं थनै अंधारै म्हैं कैवूं, तो थूं उजाळै मे जान कहीजै। अर जिकौ म्हैं थनै कांन में सुणाऊं, विनै छत माथै जायनै परचार करजै। थै उण ऊं नीं डरौ जिकौ सरीर नै मार सकै, पण आतमा नै कीं नीं कर सकै। इण वास्तै थै उण परमेसर ऊं डरौ जिकौ, सरीर अर आतमा दोनो नै नरक मे नोख दैवै है। कांई एक पईसे मे दो चिड़िया कोनीं बीके? तो ही थौरे पिता री इछा रै बिना उण मे ऊं एक ई धरती माथै नीं पड़ सकै। थोरै माथै रा बाल ई सगळा गिण्योड़ा है। इण वास्तै डरौ नीं, थै परमेसर रै लिए घणा चिड़िया ऊं बढ़न हो। “जिकौ कोई मिनखौ रै सांमै म्हनै मांन ले ला, म्हैं भी उणनै अपणै सरगिए पिता रै सांमै मांन लूं ला। जिकौ कोई मिनख म्हनै मिनखौ रै सांमै मानणै ऊं मना कर दैला, म्हैं भी अपणै सरगिए पिता रै सांमै मानणै ऊं मना कर दूंला। “ओ मती समझौ की म्हैं जगत मे मिलाप कराणै आयौ हूं। म्हैं मेल-मिलाप कराणै कोनीं आयौ, बल्कि अलग कराणै आयौ हूं। म्हारै वजै ऊं ‘बेटौ आपरै पिता ऊं, बेटी आपरी मां ऊं, अर बिनणी आपरै सासु ऊं खिलाफ हो जावैला। मिनख रा दुसमन उणरै घरवाळा इज दुसमन हो जाई।’ “जिकौ म्हारै ऊं घणा आपरै माता-पिता नै चावै वो म्हारै कांम रौ कोनीं। जिकौ म्हारै ऊं घणा आपरै छोरा-छोरी नै चावै वो भी म्हारै कांम रौ कोनीं। जिकौ कोई आप दुखौ री होळी उठान म्हारै जैड़ी जिन्दगी कोनीं जी वो म्हारै कांम रौ कोनीं। जिकौ आपरी जान बचावण रौ जतन करैला, वो आपरी जान ऊं हाथ धो बैठेला। जिकौ म्हारै वास्तै जान देवेला, वो आपरौ जीवन पावैला। “जिकौ थनै अपनावे, वो म्हनै भी अपनावे। जिकौ म्हनै अपनावे, वो म्हनै भेजणे वाळै परमेसर नै भी अपनावे। जिकौ भविसयदाता नै भविसयदाता जांण परौ अपणा ई वो भविसयदाता रौ प्रतिफळ पावैला। अर जिकौ धरमी नै धरमी जांण परौ अपणा ई, वो धरमी रौ प्रतिफळ पावैला। जिकौ कोई इण छोटौ में ऊं एक नै म्हारौ चेलौ जांणनै एक लोटो ठाडो पांणी पिलावै, म्हैं थोरै ऊं साचौ कहूं, वो किणी तरीकै ऊं आपरौ प्रतिफळ नीं खोवैला।” जद यीसु आपरै बारैह चेलौ नै हुकम देवण रै पछै, यीसु गलील परदेस रै सैहरौ मे उपदेस अर परचार करणै उठै ऊं बीर होयो। यूहन्‍ना बतिस्मो देणवाळौ जेळ में मसीह रै कांमां रौ समाचार सुणन आपरै चेलौ नै पूछण मेलिया, “कांई आवणवाळौ हो जिकौ थूं इज है, या म्हौ किणी दूजै री बांट जोवो?” यीसु कयौ, “जिकौ कांई थै सुणौ हो अर देखौ हो, ओ सैंग जायनै यूहन्‍ना नै कैह दो, की आंधा देखे है, अर लंगड़ा चालै फिरै है, कोढ़ी सावळ करै है, अर बोळा सुणै है, मरयोड़ौ नै जीवता करै है, अर गरीबो नै सुभ संदेस सुणावै है। अर धन्य है वो, जिकौ म्हारै माथै विसवास करता रैवै है।” जद यूहन्‍ना रा चेला उठै ऊं जाता रिया, तो यीसु यूहन्‍ना रै बारै मे लोगां ऊं कैवण लागौ, “थै रिंदरोही मे कांई देखण गिया हा? कांई हवा ऊं हिलती सेवण नै? पछै थै कांई देखण गिया हा कांई मूंगा कपड़ा पैरयोड़ा मिनख नै? देखौ, जिकौ मुंगा कपड़ा पैरै है, वे मेहलो में रैवै है। तो पछै क्यूं गिया हा? कांई किणी भविसयदाता नै देखणै? हां, म्हैं थांरै ऊं कहूं की भविसयदाता ऊं मोटे नै। ओ वोहीज है जिणरै बारै में लिख्यौ है, ‘देख, म्हैं म्हारै दूत नै थांरै आगै मेलूं हूं, जिकौ थौरे आगै थारौ मारग तैयार करैला।’ म्हैं थांरै ऊं साचौ कहूं की जिकौ लुगाई ऊं जनमियोड़ा है, उणमे ऊं यूहन्‍ना बतिस्मो देणवाळौ ऊं मोटो कोई नीं होयो। पण जिकौ सरग रै राज मे छोटे ऊं छोटौ है वो यूहन्‍ना ऊं मोटो है। यूहन्‍ना बतिस्मो देणवाळै रै दिनां ऊं लेयनै अजी तांई सरग रै राज रै साथै मारपीट की जावै अर जिकौ मारपीट करणवाळा है वे जबरदस्ती इण राज नै लेण री कोसीस करै है। यूहन्‍ना रै वगत तांई सैंग भविसयदाता अर व्यवस्था नै परमेसर रै राज री भविसयवांणी करता हा की परमेसर लोगां रै जीवन ऊपर राज करैला। अर चावौ तो मानो की एलियाह जिकौ आवणवाळौ हतौ, वो यूहन्‍ना ही है। जीण रा कांन है, वे सुण ले। “म्हैं इण वगत रै लोगां री तुलना कीण ऊं करूं? वे उण छोकरों रै जैड़ा है, जिकौ बजारौ मे बैठोड़ा, एक दूजै नै हेलौ पाड़ेन कैवै है, ‘म्हौ थोरै लिए बांसली बजाई, अर थै नाचिया कोनीं म्हौ विलाप कियो, अर थै छाती कोनीं पीटी।’ क्यूंकै यूहन्‍ना आयौ जे दूजौ री तरैह नीं खातौ अर नीं पीतौ, अर वे कैवै है, ‘इणमे दुस्टआतमा है।’ म्हैं मिनख रौ बेटौ खातौ पीतौ आयौ, अर वे कैवै है ‘देखौ, ओ पेटु अर पियकड़ मिनख, चुंगी लेवणवाळौ रौ अर पापियो रौ दोसत है।’ पण ग्यांन आपरै कांमां ऊं साचौ ठैरायौ ग्यौ है।” तो वो उण सैहरौ नै धिकारण लागौ, जिकौ लोग उणरा घणा चमतकार देखन ई, आपरौ मन नीं फेरियौ हो। उणै कयौ, “हाय, खुराजीन! हाय, बैतसैदा! जिकौ सामरथ रा कांम थोरै मे करया, जे वे सूर अर सैदा मे करया होता, तो उठै रा लोग बोरी ओढ़नै, राख मे बैठनै कदैई मन फेर लेता। पण म्हैं थोरै ऊं कहूं की न्याव रै दिन थोरी दसा ऊं सूर अर सैदा री दसा घणी चैन जोगी होवैला। हे कफरनहूंम, कांई थूं सरग तांई ऊंचौ कियो जावैला? नीं, थूं तो पाताळ तांई नीचो जावैला! क्यूंकै जिकौ सामरथ रा कांम थांरै मे कियोड़ा है, जे सदोम मे किया होता तो वो अजी तांई बचयोड़ो रैवतौ। पण म्हैं थौरे ऊं कहूं की न्याव रै दिन थारी दसा ऊं सदोम रै देस री दसा घणी चैन जोगी होवैला।” उण वगत यीसु कयौ, “हे पिता, सरग अर धरती रा परभु, म्हैं थारौ धन्यवाद करूं हूं, की थै इण बातां नै ग्यांनियों अर समझदारो ऊं लूकाय राखी, अर टाबरां ऊपर परगट किनी है। हां, हे पिता, क्यूंकै थांनै ओहीज बड़िया लागौ। “म्हारै पिता म्हनै सगळौ सूंप दियौ है, पिता नै छोड़नै कोई बेटे नै नीं जांणै, अर बेटे नै छोड़नै कोई पिता परमेसर नै नीं जांणै, अर वो जीण पर बेटौ उणनै परगट करणौ चावै। “हे सैंग थाकयोड़ा अर बोझ ऊं दबयोड़ौ लोगां, म्हारै खनै आओ, म्हैं थांनै आराम दूंला। म्हारौ जूओ अपणै ऊपर राख लो, अर म्हारै ऊं सीखो। क्यूंकै म्हैं स्वभाव ऊं नरम अर विनींत हूं: अर थै अपणै मन मे आराम पावौला। क्यूंकै म्हारौ जूओ जोतनै में आसान अर म्हारौ बोझ उठाणै में हळको है।” उण वेळा यीसु सब्त रै दिन खेतो मांयनै ऊं जा रिया हा, अर उणरै चेलौ नै भूख लागी तो वे खेत मांय ऊं गेहूं री बालै तोड़ नै खावण लाग गा। फरीसियों नै ओ देखनै उण ऊं कयौ, “देख थारा चेला वो कांम करै, जिकौ सब्त रै दिन करणौ व्यवस्था रै खिलाफ है।” यीसु उणौनै कयौ, “कांई थै पढ़ियो कोनीं, की दाऊद नै, जद वो अर वारां साथी भूखा होया तो कांई करयौ? वो कीकर परमेसर रै मिंदर मे गिया अर वो अर उणरा साथी भेट री रोटियां खाई। कायदे ऊं इण रोटियो नै खाणै री इजाजत याजकौ रै अलावा किणी नै कोनीं ही। या थै व्यवस्था मे कोनीं पढ़ियो, की याजक आराम रै दिन मिंदर मे कांम करनै आराम रै दिन रौ नियम नै तोड़े फिर भी उणनै कोई कीं नीं कैवै? पण म्हैं थांनै कहूं, की एठै वो है, जिकौ मिंदर ऊं भी मोटो है। जे थै इणरौ अरथ जांणता, ‘म्हैं दया ऊं खुस होवूं हूं, बलिदान ऊं कोनीं,’ तो थै निरदोस नै दोसी कोनीं ठैराता। क्यूंकै म्हैं मिनख रौ बेटौ तो आराम रै दिन रौ भी परभु हूं।” उठै ऊं चालन वो यहूदी पराथना घर में आया। उठै एक मिनख हो, जिणरौ हाथ सुखोड़ो हो। उणौ यीसु ऊपर दोस लगाणै रै वास्तै कईक लोगां नै पूछयौ, “कांई आराम रै दिन सावळ करणौ ठीक है?” यीसु उणौनै कयौ, “थोरै मांय ऊं ऐड़ौ कुण है, जिणरी एक इज लरड़ी है, अर वा सब्त रै दिन खाडा मांय पड़ जावै, अर वो उणनै बारै नीं काढ़ै? एक मिनख लरड़ी ऊं कितौ मूंगो है। इण वास्तै आराम रै दिन भलाई करणी कायदे रै अनुसार ठीक है।” तो यीसु उण मिनख ऊं कयौ, “थारौ हाथ आगै कर।” वो हाथ आगै कियो, अर उणरौ हाथ दूजोड़ा हाथ ज्यूं सावळ हो गियो। तो फरीसियों नै बारै जायनै उणरै खिलाफ एको करयौ की इणनै कीण तरैह ऊं नास करौ। यीसु उणौरी चाल नै जांणनै उठै ऊं जाता रिया। घणा ई लोग उणरै लारै वहीर हो गिया, अर वो सगळौ नै सावळ करया, अर उणौनै चेताया के म्हारौ कीण ऊं मत कहीजौ, ताकी जिकौ वचन यसायाह भविसयदाता रै कियोड़ौ हो, वो पूरौ होवै: “ओ म्हारौ सेवक है जिणनै म्हैं टाळियो, जिण ऊं म्हैं हेत राखूं, जिण माथै म्हैं भरोसौ करूं, म्हारी आतमा उण माथै उतारूं ला, अर वो सगळौ लोगां नै न्याव रौ संदेस दैला। वो लड़ाई अर हाका नीं करैला, गळी रै मांय उणरी आवाज कोई नीं सुणैला। वो किसरयौड़े सरकंडे नै नीं तोड़ेला, अर धुआं काढ़ती बती नै नीं बुझावैला, जद तांई वो न्याव माथै जीत नीं पावै। अर सगळां लोग उण रै नाम री आस राखैला।” जद लोग उणरै खनै एक दुस्टआतमा लागयोड़ो मिनख नै लेन आया जिकौ आन्धो अर गूंगो हो, अर यीसु उणनै सावळ करयौ, जिण ऊं उणनै दिखण लागौ अर वो बोलणै ई लाग गो। सगळी भीड़ अचूम्बो करयौ अर कैवण लागा, “कठैई ओ दाऊद रौ छोरौ तो नीं है?” पण जद फरीसी आ बात सुणी तो कयौ, “ओ तो दुस्टआतमा रौ राजकुमार बालजबूल री मदद ऊं दुस्ट आतमा नै बारै निकाळै।” यीसु उणौरै मन री बात नै जांणनै उणौनै कयौ, “हरैक राज जिण मांय फूट होवै, वो बिखर जावैला, अर हरैक नगर अर घराणौ जिण मांय फूट होवै, वो कदैई ऊभौ नीं हो सकै। अर सैतान ई सैतान नै बारै काढ़ै, तो वो खुद रौ ई दुसमी हो जावै। पछै उणरौ राज कीकर ऊभौ होवैला? अर जे म्हैं बालजबूल री मदद ऊं दुस्टआतमा नै बारै निकाळूं, तो थौरा लोग कीण री मदद ऊं दुस्ट आतमा बारै निकाळै? इण वास्तै वे इज थौरो न्याव करैला। पण जे म्हैं परमेसर री आतमा ऊं दुस्ट आतमाओ नै बारै निकाळूं, तो परमेसर रौ राज थोरै नैड़ौ आयग्यौ है। “अर कीकर कोई मिनख किणी लांठा मिनख रै घर मांय घुस अर उणरौ माल लूट सकै जद तांई पैली वो उण लांठा मिनख नै बांध नीं ले। तद वो उणरै घर नै लूट सकै। “जिकौ म्हारै साथै नीं है वो म्हारौ दुसमी है, अर जिकौ म्हारै साथै भेळौ नीं करै वो बिखेरे है। इण वास्तै म्हैं थांनै कहूं के मिनखां रौ हैंग तरैह रौ पाप अर अपमांन माफ कियो जावैला, पण पवितर आतमा रौ अपमांन माफ नीं कियो जावैला। जिकौ ई म्हैं मिनख रै बेटा रै विरोध मांय कोई बात कैवैला, उणरौ ओ गुनाह माफ कियो जा सकै, पण जिकौ ई कोई पवितर आतमा रै विरोध मांय कीं कैवैला, उणरौ ओ गुनाह नीं तो इण जुग में अर नीं आणवाळै जुग मांय माफ कियो जावैला। “जे रुंखड़ौ चौखौ है, तो उणरा फळ भी चौखौ है, जे रुंखड़ौ निकमो है, तो उणरा फळ भी निकमो है। क्यूंकै रुंखड़ौ आपरै फळ ऊं इज ओळखिजै। अरै सांप रा बच्चौ, थै कोजा व्‍हेर चौखी बातां कीकर के सकौ? क्यूंकै जिकौ मन मांय है, वो इज मूंडा माथै आवै। भलौ मिनख मन रा भला भंडार ऊं भली बातां काढ़ै, अर कोजो मिनख कोजा भंडार ऊं कोजी बातां काढ़ै। अर म्हैं थांनै कैवूं के जिकौ-जिकौ निकमी बातां मिनख कैवैला, न्याव रै दिन वांनै हरैक बातां रौ लेखो देवणो है। क्यूंकै थूं थांरै मूंडै री बातां रै कारण निरदोस अर थांरै मूंडै री बातां रै कारण इज गुनेगार बणायौ जावैला।” इण वगत कईक सास्तरी, अर फरीसी उणनै कयौ, “हे गुरु, म्हौ थौरे ऊं एक निसाणी देखणी चावौ हो।” यीसु उणौनै जबाब दियौ, “इण जुग रा पापी अर व्यभिचार लोग निसाणी जोवे है, पण योना भविसयदाता रै निसाणी नै छोड़नै कोई दूजी निसाणी उणौनै नीं दी जावैला। योना तीन रात-दिन महामछली रै पेट मे रियौ, यूंही म्हैं, मिनख रा बेटा तीन रात-दिन धरती मांय रैवैला। नीनवे रा लोग न्याव रै दिन इण जुग रै लोगां रै साथै उठनै थांनै दोसी ठैरावैला, क्यूंकै उणौ योना रा परचार सुणन मन फिरायो। पण, एठै वो है जिकौ योना ऊं ई मोटो है। दखण री राणी न्याव रै दिन इण जुग रै लोगां रै साथै उठनै थांनै दोसी ठैरावैला, क्यूंकै वो सुलैमान रा ग्यांन सुणणै रै वास्तै धरती रै आखरी तांई आई। पण, एठै वो है जिकौ सुलैमान ऊं ई मोटो है। “जद दुस्ट आतमा मिनख मे ऊं निकळ जावै है, तो रिंदरोही मे आराम ढ़ूंढ़ती फिरै है, मगर मिळै कोनीं। पछै कैवै, ‘म्हैं अपणै उणीज घर मे जठै ऊं निकळी ही, पाछी जाऊंला।’ अर पाछी जायनै खाली, साफ सुथरो अर सजायोड़ो पावै है। पछै वां जान अपणै ऊं और भूंडी सात आतमाओ नै अपणै साथ ले आवै है, अर वे उणमे रैवास करै है, अर उण मिनख री दसा पैला ऊं ई बुरी हो जावै है। इण जुग रै बुरै लोगां री दसा ई ऐड़ी ही होवैला।” जद वो भीड़ ऊं बातां कर ई रिया हा, तद उणरी मां अर भाई बारै ऊभा हा अर उण ऊं बातां करणा चावै हा। किणी नै उण ऊं कयौ, “देख थांरी मां अर थारौ भाई बारै ऊभा है, अर थांरै ऊं बातां करणी चावै है।” ओ सुणन उणरै कैवनवाळै नै जबाब दियौ, “कुण है म्हारी मां? अर कुण है म्हारौ भाई?” अर अपणै चेलौ री तरफ हाथ बतान कयौ, “देखौ, म्हारी मां अर म्हारा भाई ऐ है। क्यूंकै जिकौ कोई म्हारै सरगिए पिता री इछा ऊपर चालै, वोहीज म्हारौ भाई, अर म्हारी बेन, अर म्हारी मां है।” बीण दिन ही यीसु घर ऊं निकळन झील रै कांठै जान बैठा। अर उणरै खनै ऐड़ी घणी भीड़ भेळी होयगी वे नाव माथै चढ़ ग्या, अर सगळी भीड़ कांठै ऊपर ऊभी रैहगी। अर यीसु उणौनै दिस्टांतो मे ऊं घणी बातां कैवण लागा, “एक किसान बीज बोणे निकळयौ। बोते विळा थोड़ा बीज मारग रै किनारै पड़िया अर पंखेरू आयनै चुग दिया। थोड़ा बीज पथरीली जमीन मे पड़िया, जठै घणी माटी कोनीं मिळी अर घणी माटी नीं मिलणे रै कारण वे वेगा उग आया। पण सूरज निकळनै ऊं वे बळ गिया, अर जड़ नीं पकड़नै ऊं सूख गिया। थोड़ा बीज झाड़ियौ मे पड़िया अर झाड़ियौ मोटी होयनै दबा दिया। पण थोड़ा बीज बड़िया जमीन मे पड़िया, अर फळ लाया, कोई सौ गुणा, कोई साठ गुणा, अर कोई तीस गुणा। जीण रा कांन है, वे सुण ले।” चेलौ उणरै खनै आन कयौ, “थै लोगां ऊं दिस्टांत कथा मे क्यूं बातां करौ हो?” यीसु जबाब दियौ, “थांनै सरग रै राज्य री भेदों री समझ दियोड़ी है, उण लोगां नै कोनीं। क्यूंकै जिणरै खनै है, उणनै भळै दियौ जावैला, अर उणरै खनै घणौ हो जावैला। पण जिणरै खनै किनी है, उण खनै जिकौ कीं है वो भी ले लियौ जावैला। म्हैं उण ऊं दिस्टांत कथा मे इण वास्तै बातां करूं हूं की, ‘वे देखतौ होवै वो देखे कोनीं, अर सुणतौ होवै वो सुणै कोनीं, अर समझै कोनीं।’ उणरै बारै मे यसायाह री आ भविसयवांणी पूरी होवै है, ‘थै कांनो ऊं तो सुणोला, पण समझोला कोनीं। अर आंखों ऊं तो देखोला, पण थांनै सूझेला कोनीं। क्यूंकै इण लोगां रौ मन मोटो हो गियौ है, अर वे कांनो ऊं ऊंचौ सुणै है अर वे आपरी आंखे बंद कर ली है। कठैई ऐड़ौ नीं हो की वे आंखों ऊं देखे, अर कांनो ऊं सुणै अर मन ऊं हमजे, वे पाछा मुड़न परा आवै तो म्हैं उणौनै सावळ कर दूं।’ पण धन्य है थोरी आंखे, की वे देखे है। अर थोरा कांन की वे सुणै है। “क्यूंकै म्हैं थोरै ऊं साचौ कहूं हूं की घणा भविसयदाता अर धरमी चावता हा की जिकौ बातां थै देखौ हो, अर सुणौ हो उणनै वे देखे अर सुणै, पण ऐड़ौ कोनीं होयौ। “अबै थै बीज बोणे वाळै री कहाणी रौ अरथ सुणौ: जिकौ कोई राज्य रा वचन सुणन नीं हमजयो, वीणरै मन मे जे कीं ई बोयो गियौ हो, उणनै वो सैतान आन खोन लेन जावै है। ओ वोहीज बीज है, जिकौ मारग रै किनारै बोयो गियौ हो। अर जिकौ पथरीली धरती ऊपर बोयो गियौ, वो ओ है, जिकौ वचन सुणन तुरत आंणंद ऊं मांन लेवे है। पण अपणै मे जड़ नीं राखनै रै कारण वो थोड़े दिन रौ है, अर वचन रै कारण जे परेसानी अर सताव आवै है, तो तुरत विसवास ऊं हट जावै है। जिकौ झाड़ियौ मे बोयो गियौ, वो ओ है, जिकौ वचन नै सुणै है, पण इण संसार री चिंता अर धन रौ लालच वचन नै दबावे है, अर वो फळ कोनीं लावै। जिकौ बड़िया जमीन मे बोयो गियौ, वो ओ है, जिकौ वचन नै सुणन समझै है, अर फळ लावै है। कोई सौ गुणा, कोई साठ गुणा, अर कोई तीस गुणा।” यीसु उणौ नै एक और कहाणी सुणाई, “सरग रा राज्य उण मिनख रै तरैह है जिणै आपरै खेत मे बड़िया बीज बोयो। पण जद लोग सो रिया हा तो उणौरा दुसमी आन गेहूं रै बीच मे जंगळी बीज बौएन जातौ रियौ। जद उगनै बालै बारै निकळी, तो जंगळी दाणा रा बून्ठा भी दिखाई दिया। इण घरो रै दासो नै आन उणौ नै कयौ, अरै मालिक, कांई थै अपणै खेत मे बड़िया बीज कोनीं बोयो हो? पछै जंगळी दाणे रौ बून्ठो उणमे कठै ऊं आया? मालिक नौकर नै कयौ, ‘ओ किणी दुसमी रौ कांम है।’ नौकरो मालिक नै कयौ, ‘थोरी कांई इछा है, की म्हैं जायनै उणनै भेळौ कर लौ?’ मालिक कयौ, ‘कोनीं, ऐड़ौ नीं होवै की जंगळी दाणा रा बून्ठा उखाड़ते वगत उणरै साथै गेहूंं ई उखाड़ दो। काटनै तांई दोनो नै एक साथै ऊभा रैवण दो, अर काटनै रै विळा म्हैं काटनैवाळौ ऊं कैवूंला की पैलै जंगळी दाणा रा बून्ठा भेळा करन जळाणे रै लिए उणरा पुळा बांध दो, अर गेहूं नै म्हारै गोदाम मे भेळा करौ।’ ” यीसु उणौनै एक और कहाणी सुणाई, “सरग रौ राज राई रै एक दाणे रै ज्यूं है, जीणे किणी मिनख लेन आपरै खेत मे बो दियौ। वो हैंग बीजों ऊं छोटौ तो होवै है पण जद मोटो हो जावै है तो हैंग सागपात ऊं मोटो हो जावै है, अर ऐड़ौ झाड़ बण जावै है की आकास रा पंखेरू आन उणरी डाळियो माथै बसेरौ करै है।” यीसु एक और कहाणी उणौनै सुणाई “सरग रौ राज खमीर रै ज्यूं है जिणरौ किणी लुगाई नै थोड़ो सो खमीर लेन घणै सारे आटे मे मिळान राख दियौ अर वो सगळौ आटो खमीर हो गियो।” ऐ सगळी बातां यीसु नै कहाणियो मे लोगां ऊं कही, अर विना कहाणी वो उणौ ऊं कीं भी नीं कैवता हा, जिकौ वचन भविसयदाता रै दवारा कियोड़ौ हो, वो पूरौ होवै, “म्हैं कहाणी कैवण रै लिए अपणौ मूंडौ खोलुंला। म्हैं उण बातां नै जिकौ जगत री सरूआत ऊं लुकयोड़ी री है परगट करूंला।” तो वो भीड़ नै छोड़नै घर मे आयौ, अर उणरै चेलौ नै उणरै खनै आन कयौ, “खेत रै जंगळी दाणे री कहाणी म्हौ नै हमजा दो।” यीसु उणौनै जबाब दियौ, “हखरा बीज बोणेवाळो म्हैं, मिनख रौ बेटौ है। खेत संसार है, हखरा बीज राज्य री संतान, अर जंगळी बीज सैतान री संतान है। जिण दुसमी नै विनै बोयो वो सैतान है। कटनी दुनिया रौ अंत है, अर काटणवाळौ सरगदूत है। ज्यूं ई जंगळी दाणा भेळा करै अर जळाया जावै है यूं ई जगत रै अंत मे होवैला। म्हैं, मिनख रौ बेटौ आपरै सरगदूतो नै मेले ला, अर वे उणरै राज मे ऊं सगळै ठोकर रै कारण बणणवाळौ नै अर खोटा कांम करणैवाळौ नै भेळा करैला, अर वांनै अग्‍नि री कुंड मे नोखेला, उठै रोवेला अर दांत पीसेला। उण वगत धरमी आपरै पिता रै राज मे सूरज री तरैह चमकैला। जिणरा कांन होवै वो सुण ले। “सरग रौ राज खेत मे छिपयोड़े खजानै रै ज्यौ है, जिणै किणी मिनख नै मिळियौ अर वो मिनख उणनै उठैज खेत में छुपा दियौ, अर राजी होन आपरौ हैंग बेच दियौ अर उण खेत नै ही मोल लियौ। “सरग रौ राज एक व्यापारी ज्यूं है, जिकौ बड़िया मोतियो री खोज मे हा। जद उणनै एक मूंगौ मोती मिळयो तो वो आपरौ सगळौ बेच दियौ अर उणनै मोल लियौ। “सरग रौ राज उण मोटे जाळ रै ज्यौ है जिकौ समंदर मे नोखे, अर हर तरैह री मछलियो फस जावै। अर जद जाळ भरीज जावै, तो मछुआरा उणौनै किनारै ऊपर खींच लावै, अर बैठन बड़िया-बड़िया तो बरतनो मे भेळी की अर निकमी फेंक दी। जगत रै अंत मे ऐड़ौ इज होवैला। सरगदूत आन दुस्टो नै धरमियो ऊं अलग करैला, अर दुस्टो नै अग्‍नि रै कुंड मे फेंकेला, जठै वे रोवेला अर दांत पीसेला।” यीसु आपरै चेलौ नै कयौ, “कांई थै ऐ सगळी बातां समझीं?” उणौनै उण ऊं कयौ, “हां।” यीसु उणनै कयौ, “इण वास्तै हरैक सास्तरी जिकौ सरग रै राज रौ चेलौ बण्यौ है, उण घर रै मालिक ज्यौ है जिकौ आपरै गोदाम ऊं नवी अर पुराणी चीजों निकाळै है।” जद यीसु ऐ हैंग कहाणी कैह चुकया, तो उठै ऊं जाता रिया। अर आपरै हेर नासरत मे आन उणरै पराथना घर मे उणौनै ऐड़ौ उपदेस दैणै लागा की वे अचूम्बो करन कैवण लागा, “इणनै ओ ग्यांन अर सामरथ रा कांम कठै ऊं मिळिया? कांई ओ सुथार रौ बेटौ कोनीं? अर कांई इणरी मां रौ नाम मरियम अर इणरै भाइयो रौ नाम याकूब, यूसुफ, समौन अर यहूदा कोनीं? अर कांई इणरी सैंग बेनां अपांरै बीच मे कोनीं रैवै? पछै इणनै ओ सगळौ ग्यांन कठै ऊं मिळियौ?” इण तरैह उणौ इणरै कारण ठोकर खाई, पण यीसु उणौनै कयौ, “भविसयदाता रौ आपरै देस आपरै घर नै छोड़नै कठैई अपमांन कोनीं होवै।” अर यीसु उठै उणौरै अविसवास रै कारण घणा सामरथ रा कांम कोनीं करया। उण वगत राजा हेरोदेस गलील में राज करतौ उण यीसु री चरचा सुणी, अर आपरै सेवकों नै कयौ, “ओ यूहन्‍ना बतिस्मो देणवाळौ है! वो मरयोड़ौ मे ऊं जी उठयौ है, इण वास्तै उणमे सामरथ रा कांम परगट होवै है।” क्यूंकै हेरोदेस नै आपरै भाई फिलिप्पुस री लुगाई हेरोदियास रै कारण, यूहन्‍ना नै पकड़नै बांधियो अर जेळ मे घाल दियौ हो। क्यूंकै यूहन्‍ना उणनै कयौ तो की अपणै भाई रै जीवते होते हुए उणरी लुगाई नै अपणी लुगाई बणान राखणी व्यवस्था रै खिलाफ है। इण वास्तै वो उणनै मारणौ चावतौ हो, पण लोगां ऊं डरतौ हो क्यूंकै वे यूहन्‍ना नै भविसयदाता मानता हा। पण जद हेरोदेस रौ जनम दिन आयौ, तो हेरोदियास री बेटी नै तैंवार मे नाच देखान हेरोदेस नै खुस कियो। इण वास्तै उणनै सौगन खान वचन दियौ, “जे की थूं मांगी, म्हैं थनै दूंला।” वां आपरी मां रै सिखाणै ऊं बोली, “यूहन्‍ना बतिस्मो देवणवाळा रौ माथो थाळी मे मंगान म्हनै एठै दो।” राजा दु:खी होयौ, पण आपरी सौगन रै, अर साथै बैठणवाळौ रै खातर, हुकम दियौ की दे दियौ जावै। अर उणनै जेळखानै मे लोगां नै भेज नै यूहन्‍ना रौ माथो कटवा दियौ। अर उणरौ माथो थाळ मे लायौ अर उण छोरी नै दे दियौ, जिनै वां आपरी मां हेरोदियास रै खनै लेन गी। जद यूहन्‍ना रा चेला आया अर उणरै लास नै ले जान बूर दी। अर जान यीसु नै समाचार दिया। जद यीसु ओ सुण्यौ, तो वो नाव ऊपर चढ़नै उठै ऊं किणी सुनी जगा मे, एकांत मे जाता रिया। लोगां ओ सुणन हेर-हेर ऊं पाळा ई उणरै लारै चालण लागा। उणनै निकळन एक घणी भीड़ देखी अर उण माथै तरस आयौ, अर उणौरै बिमारों नै सावळ किया। जद दिन ढ़ळ रियौ हो तो उणरा चेला उणरै खनै आन कयौ, “आ सुनी जगा है अर मोड़ौ हो रियौ है। लोगां नै रवाना करौ की वे गांवों मे जान आपरै लिए खाणौ मोल ले ले।” पण यीसु उणौनै कयौ, “उणौरौ जावणौ जरुरी कोनीं! थै इज इणौनै खाणौ दो।” उणौ यीसु नै कयौ, “एठै म्हौरै खनै पांच रोटी अर दो मछलियो नै छोड़नै दूजौ कीं ई नीं है।” यीसु कयौ, “उणौनै म्हारै खनै ले आओ।” तो उण लोगां नै घास माथै बैठण रौ कयौ, अर उण पांच रोटियां अर दो मछलियो नै लेन, सरग रै सांम्ही देखन धन्यवाद कियो अर रोटियां तोड़-तोड़नै चेलौ नै दी, अर चेलौ लोगां नै दी। जद हैंग खान धाप परान, चेलौ बचयोड़ी रोटियां ऊं बारैह छाबड़िया भरनै उठाई। अर खाणै वाळा लुगाईयां अर टाबरौ नै छोड़नै, पांच हजार मिनखौ रै लगोलग हा। तो उणनै तुरत आपरै चेलौ नै नाव ऊपर चढ़नै रै लिए मजबूर किया की वे उण ऊं पैला पार जाता रै, जैड़ी तांई वो लोगां नै वहीर करै। वो लोगां नै वहीर करनै, पराथना करणै अलग भाखर ऊपर जाता रिया। अर सांझ रा वो उठै ऐकला हा। उण वैळा नाव झील रै बीच लेहरौ ऊं डगमग करती ही, क्यूंकै हवा सांमै ऊं ही। अर यीसु रात रै चौथे पेहर झील रै ऊपर चालता होया उणौरै खनै आया। चेला उणौनै झील ऊपर चालता देखन डर गिया। अर कैवण लागा, “ओ तो भूत है!” अर डर रै मारै चिलान लागा। तो यीसु नै तुरत उणौ ऊं बातां कीं अर कयौ, “हीमत राखौ। म्हैं हूं, डरौ मती।” पतरस यीसु नै जबाब दियौ, “हे परभु, जे थूं ई है, तो म्हनै आपरै खनै पांणी ऊपर चलन आवण री आग्या दे।” यीसु कयौ, “आ!” तो पतरस नाव ऊपर ऊं उतरनै यीसु रै खनै जांणै पांणी ऊपर चालन लागौ। पण हवा नै देखन डर गियौ, अर जद डूबण लागौ तो चिलायनै कयौ, “हे परभु, म्हनै बचा!” यीसु नै तुरत हाथ आगै करन उणनै पकड़ लियौ अर उणनै कयौ, “हे मौळाविसवासी, थै क्यूं सक करयौ?” जद वे नाव माथै चढ़या, तो हवा रूक गी। इण वास्तै उणौ जिकौ नाव ऊपर हा, उणौ परणाम करन कयौ, “साचौ, थूं इज परमेसर रौ बेटौ है।” वे पार उतरनै गनैसरत हैर मे पूगिया। उठै रै लोगां नै विनै पिछांण लियौ अर आजू-बाजू रै हैंग देस मे समाचार भेजियां, अर हैंग बिमारों नै यीसु रै खनै लाया, अर बीमार उण ऊं विणती करणै लागा की वो उणौ नै आपरै कपड़े रै पलै नै ई हाथ लगाण दे। अर जितौ नै विनै हाथ लगायो, वे सावळ हो गिया। तो यरुसलेम ऊं कईक फरीसी अर सास्तरी यीसु रै खनै आयनै कैवण लाग्या, “थांरा चेला वडेरा री रीति रिवाज नै क्यूं टाळै अर बिना हाथ धोए रोटी खावै?” यीसु वांनै जबाब दियौ, “थै खुद री रीति रिवाज रै कारण क्यूं परमेसर री आग्या नै टाळौ हो? क्यूंकै परमेसर कयौ, ‘आपरै मां अर पिता रौ कदर करणौ’ अर ‘जिकौ कोई मां या बाप नै बुरौ कैवै, वो मार नोख्यौ जावै।’ पण थै कैवौ हो की जे कोई आपरै मां या बाप ऊं कैवै, जिकौ कही थांनै म्हारै ऊं फायदो मिलनै वाळौ हो, ‘वो म्हैं परमेसर नै भेट चढ़ा दियौ’, अर वो आपरै बाप रौ कदर नीं करै, इण तरैह थै आपरी रीति रिवाज रै कारण परमेसर रौ वचन टाळ दियौ। हे ढ़ोगियो, यसायाह थोरै बारै म्हैं भविसयवांणी ठीक इज किनी है की, ‘ऐ लोग आपरै मूंडा ऊं तो म्हारौ कदर करै, पण उणौरौ मन है जिकौ म्हारै ऊं घणौ अळगो है। अर ऐ बेकार री म्हारी उपासना करै। क्यूंकै मिनखौ री विधियों नै धरम रौ उपदेस करनै सिखावै।’ ” तो यीसु लोगां नै आपरै खनै बोलायनै उणौनै कयौ, “सुणौ, अर समझौ। जे मूंडै में जावै है, वो मिनखौ नै असुद्ध कोनीं करै, पण जिकौ मूंडै ऊं निकळै है, वो इज मिनखौ नै असुद्ध करै है।” तो चेला आयनै उणनै कयौ, “कांई थूं जांणै है की फरीसियों नै ओ वचन सुणनै घणौ बुरौ लाग्यौ?” उणै जबाब दियौ, “हरैक झाड़ जिकौ म्हारै सरगिए पिता कोनीं लगायो, उखेड़ियौ जावैला। उणौनै जांणै दो। वे आंधौ नै मारग दिखाणवाळा है अर आंधौ जे आंधे नै मारग दिखाई तो दोनूं ही उंडै खाडै में पड़ैला।” ओ सुणनै पतरस उणनै कयौ, “आ कहाणी म्हौ नै समझा दे।” उणै कयौ, “कांई थूं भी अबार तांई नासमझ हो? कांई थै जांणौ कोनीं? की जिकौ कीं मूंडै में जावै वो पेट में पड़ै है, अर बारै निकळ जावै है। पण जिकौ कीं मूंडै ऊं निकळै है, वो मन ऊं निकळै है, अर वोहीज मिनख नै असुद्ध करै है। क्यूंकै बुरा विचार, हत्या, पराई लुगाई रै साथै संबंध, व्यभिचार, चोरी, झूठी गवाई अर निंदा मन ऊं इज निकळै है। आहीज है जिकौ मिनख नै असुद्ध करै है, पण हाथ धोए बिना खाणौ जीमणै ऊं मिनख असुद्ध कोनीं होवै।” यीसु उठै ऊं निकळनै सूर अर सैदा रै परदेस रवाना हो गियौ। उण परदेस ऊं एक कनानी लुगाई निकळी, अर चिलायनै कैवणै लागी, “हे परभु! दाऊद री संतान, म्हारै ऊपर दया कर! म्हारी बेटी नै दुस्ट आतमा घणी परेसान करै है।” पण यीसु उणनै कीं जबाब नीं दियौ। तद उणरै चेलौ आयनै उण ऊं विनती की, “इणनै वहीर कर, क्यूंकै वां अपांरै लारै चिलाती आवै है।” यीसु जबाब दियौ, “इजरायल रै घराणै री गुमयोड़ी लरड़ियां नै छोड़नै म्हैं किणी रै खनै कोनीं भेज्यौ गियौ है।” पण वां आई, अर यीसु नै परणाम करन कैवण लागी, “हे परभु, म्हारी मदद कर।” यीसु जबाब दियौ, “छोकरों री रोटी लेयनै कुत्तो रै आगै नोखणी चौखी कोनीं।” उणै कयौ, “साची है परभु, फिर भी मालिक रै बाजोट ऊं नीचे पड़योड़ौ चूरचार तो कुत्ता खावै ही है।” इण ऊपर यीसु उणनै जबाब दियौ, “हे नारी, थारौ विसवास मोटो है। ज्यूं थूं चावै, थारै वास्तै व्यौंही होवै।” अर उणरी बेटी उणी घड़ी सावळ हो गी। यीसु उठै ऊं गलील री झील रै खनै आयौ, अर भाखर ऊपर चढ़न बैठ गियौ। भीड़ री भीड़ उणरै खनै आवण लागी। वे लूला, लंगड़ा आंधा, गूंगा अर दूजा घणा बिमारों नै आपरै साथै लायनै यीसु रै चरणौ में छोड़ता अर यीसु उणौनै सावळ करतौ। जद लोगां देखियौ की गूंगा बोले है, लूला सावळ हो रिया है, लंगड़ा चालै अर आंधा देखे है तो अचूम्बो करन इजरायल रै परमेसर री सौभा किनी। यीसु आपरै चेलौ नै बुलान कयौ, “म्हनै इण भीड़ माथै तरस आवै है क्यूंकै वे तीन दिन ऊं म्हारै साथै है अर उणौरै खनै खाणै रै सारू कीं नीं है। म्हैं उणौनै भूखा रवाना करणा नीं चावूं, कही ऐड़ौ नीं होवै की थाकन मारग में ही रै जावै।” चेलौ यीसु नै कयौ, “म्हौ नै इण सुनी जगा में कठै ऊं इती रोटियो मिळ ही की म्हौ इती मोटी भीड़ नै खिला सकौ?” यीसु उणौनै पूछयौ, “थौरे खनै किती रोटियो है?” उणौ कयौ, “सात, अर थोड़ी सी छोटी मछलियो।” तद लोगां नै जमीन ऊपर बैठण रौ हुकम दियौ। अर उण सात रोटियो अर मछलियो नै लेन, धन्यवाद करनै तोड़ी, अर आपरै चेलौ नै देतो गियौ, अर चेलौ लोगां नै दी। इण तरैह सगळौ खायनै धाप गिया अर चेलौ बचयोड़ा टुकड़ों ऊं सात छाबड़िया भरिया। खाणैवाळा लुगाईयां अर टाबरौ नै छोड़नै च्यार हजार आदमी हा। तो वो भीड़ नै रवाना करन नाव ऊपर चढ़ग्यौ, अर मगदन देस री सीमा में आया। फरीसियों अर सदूकियों यीसु रै खनै आयनै परखणै वास्तै उण ऊं कयौ, “म्हौ नै सरग रै राज री कोई निसाणी दिखा।” यीसु उणौनै जबाब दियौ, “सिंझ्या रौ थै कैवौ हो, ‘मौसम बड़िया रैला, क्यूंकै आभौ लाल है’, अर संवार रौ कैवौ हो, ‘आज आंधी आवैला, क्यूंकै आभौ लाल अर धुंधळौ है।’ थै आभै रा गुण देखनै उणरा भेद बता सकौ हो, पण वगत री निसाणी क्यूं कोनीं बता सकौ? इण जुग रा बुरा अर व्यभिचार लोग निसाणी जोवे है, पण योना री निसाणी नै छोड़ उणौनै भळै कोई निसाणी नीं दी जावैला।” अर वो उणौनै छोड़नै जातौ रियौ। चेला झील रै उण पार पूगिया, पण वे रोटी लेणा भूल गिया हा। यीसु उणौनै कयौ, “देखौ, फरीसियों अर सदूकियों रै खमीर ऊं सावचेत रहीजौ।” वे आपस में विचार करणै लागा, “अपां रोटी कोनीं लाया इण वास्तै वो यूं कैवै है।” ओ जांणनै, यीसु उणौनै कयौ, “हे मौळाविसवासियों, थै आपस में क्यूं विचार करौ हो की म्हौरै खनै रोटी कोनीं है? कांई थै अबै तांई नीं समझया? कांई थांनै उण पांच हजार री पांच रोटियो याद कोनीं, अर नीं वो की थै किती छाबड़िया उठाई ही? अर नीं उण च्यार हजार री सात रोटियो, अर नीं वो की थै किता छाबड़िया उठाया हा? थै क्यूं नीं समझौ की म्हैं थांनै रोटियो रै बारै में कोनीं कियो? पण ओ की थै फरीसियों अर सदूकियों रै खमीर ऊं सावचेत रीजो।” तो उणौरै समझ आयौ की उणै रोटी रै खमीर ऊं कोनीं, पण फरीसियों अर सदूकियों री सिकसा ऊं सावचेत रैणौ कयौ है। यीसु कैसरिया फिलिप्पी रै परदेस में आयौ, अर आपरै चेलौ नै पूछणै लाग्या, “लोग मिनख रै बेटे नै कांई कैवै है?” उणौ कयौ, “कोईक तो यूहन्‍ना बतिस्मो देवणवाळौ कैवै है, अर कोईक एलियाह, अर कोईक यिर्मयाह अर कोई कैवै भविसयदाता में ऊं एक है।” यीसु आपरै चेलौ नै पूछयौ, “पण थै म्हनै कांई कैवौ हो?” समौन पतरस जबाब दियौ, “थूं जीवते परमेसर रौ बेटौ मसीह है।” यीसु जबाब दियौ, “हे समौन, योना रा बेटा थूं धन्य है। थनै बात किणी मिनख नै कोनीं कीं पण म्हारै पिता जिकौ सरग में है, आ बात थांरै माथै परगट किनी है। अर म्हैं ई थनै कैवूं हूं की थूं पतरस है, अर म्हैं इण चटान माथै अपणी कलीसिया बणाऊंला, अर मौत री ताकत भी असर नीं करैला। म्हैं थांनै सरग रै राज री चाबियो दूंला। अर जिकौ कीं थूं धरती माथै बांधैला, वो सरग में बंधैला। अर जिकौ कीं थूं धरती माथै खोले ला, वो सरग में खुलैला।” तद उणै चेलौ नै चेताया की, “किणी नै नीं कैणौ की म्हैं मसीह हूं।” उण वेळा ऊं यीसु आपरै चेलौ नै बताणै लाग्या, जरुरी है की “म्हैं यरुसलेम जाऊं अर नेताओं, अर परधान याजकौ, अर सास्तरियों रै हाथ ऊं घणौ दु:ख उठाऊं, अर मार दियौ जाऊं। अर तीजै दिन पाछौ जी उठूं।” इण कारण पतरस उणनै अळगो ले जायनै हाका करण लागौ, “की परभु परमेसर नीं करै! थांरै साथै ऐड़ौ कदैई नीं होवैला।” उणै मुड़ नै पतरस नै कयौ, “हे सैतान, म्हारै सांमै ऊं आगौ हो जा! थूं म्हारै वास्तै ठोकर रौ कारण है। क्यूंकै थूं परमेसर री बातां ऊपर कोनीं, पण मिनखौ री बातां ऊपर मन लगावै है।” तद यीसु आपरै चेलौ नै कयौ, “जे कोई म्हारै लारै आवणौ चावै, तो अपणै आप नै इन्कार करै अर अपणौ क्रूस उठावै, अर म्हारै लारै वहीर हो जावै! क्यूंकै जे कोई आपरौ प्रांण बचाणौ चावै, वो उणनै खोवैला, अर जे कोई म्हारै वास्तै प्रांण खोवैला, वो उणनै पावैला। जे मिनख सगळै जगत नै पा ले, अर आपरै प्रांण नै खो दे, तो उणनै कांई फायदो होवैला? या मिनख आपरै प्रांण रै बदळै कांई दैला? कीं नीं दे सकै म्हैं, मिनख रौ बेटौ आपरै सरगदूतो रै साथै आपरै पिता री महिमा में आवैला, अर उण वगत ‘वो हरैक नै उणरै कांमां रै अनुसार प्रतिफळ दैला।’ म्हैं थौरे ऊं साचौ कहूं की वे जैड़ी तांई, म्हैं, मिनख रै बेटे नै म्हारै राज्य में आवतौ होयौ नीं देखेला, जैड़ी तांई मौत रौ स्वाद कदैई नीं चाखेला।” छह दिनां रै पछै यीसु नै पतरस अर याकूब अर उणरा भाई यूहन्‍ना नै साथै लिया, अर उणौनै एकांत में किणी ऊंचै भाखर माथै लेयग्यौ। उठै उणौरै सांमै यीसु रूप बदळ गियौ, अर उणरौ मूंडौ सूरज री ज्यूं चमकतौ अर उणरा गाभा दीये रै ज्यूं उजळा होई गिया। फिर अणचेत मूसा अर एलियाह उणरै साथै बातां करते उणौनै देखिया हा। तो पतरस यीसु नै कयौ, “हे परभु अपणौ एठै रैणौ बड़िया है। जे थांरी इछा हो तो म्हैं एठै तीन तम्बू बणाऊं, एक थांरै लियै, एक मूसा रै लियै, अर एक एलियाह रै लियै।” वो बोल ही रियौ हो की एक उजळो बादळ आयनै उणरै ऊपर छायो, अर उण बादळ में ऊं ओ सबद निकळियौ, “ओ म्हारौ लाडलौ बेटौ है, जीण ऊं म्हैं खुस हूं। इणरी सुणौ।” चेलौ ओ सुणनै मूंडै रै तरफ पड़िया अर घणा डर गिया। यीसु उणौरै खनै आयनै हाथ लगायो, अर कयौ, “उठो, डरौ मत।” तद उणौ आपरी आंखों खोली अर यीसु नै छोड़नै अर किणी नै कोनीं देखियौ। जद वे भाखर ऊं उतर रिया हा तो यीसु उणौनै आ आग्या दी, “जद तांई म्हैं मिनख रौ बेटौ मरयोड़ौ में ऊं जी नीं उठूं, तद तांई जे कई थै देख्यौ हो किणी नै नीं कैणौ।” इण कारण यीसु रै चेलौ यीसु नै पूछयौ, “की सास्तरी क्यूं कैवै है एलियाह रौ पैला आवणौ जरुरी है?” यीसु जबाब दियौ, “एलियाह जरुर आवैला, अर सगळौ ठीक करणै आवैला। पण म्हैं थांनै कहूं की एलियाह आ चुकौ है, अर लोगां उणनै नीं पिछांणयौ। पण जैड़ौ चायौ वैड़ौ इज उणरै साथै कियो। इण रीत ऊं म्हैं मिनख रौ बेटौ भी उणरै हाथ ऊं दु:ख उठाऊंला।” तो चेला समझया की यीसु म्हौ नै यूहन्‍ना बतिस्मो देणवाळै रै बारै में कैवै है। जद यीसु भीड़ रै खनै पूगिया, तो एक मिनख उणरै खनै आयौ, अर गोडा टेकनै कैवण लाग्यौ, “हे परभु, म्हारै बेटे ऊपर दया कर! क्यूंकै उणनै मिरगी आवै है, अर वो घणौ दुखी होवै है, अर कदैई अग्‍नि में अर कदैई पांणी में पड़ जावै है। म्हैं उणनै थांरै चेलौ खनै लायौ हो, पण वे उणनै सावळ कोनीं कर सकया।” यीसु जबाब दियौ, “हे अविसवासी अर हठीले लोगां, म्हैं कद तांई थौरे साथै रैवूंला? कद तांई सहूंलां? उणनै म्हारै खनै लाओ।” तो यीसु दुस्ट आतमा नै फटकारी, अर वो उणमे ऊं निकळगी। अर छोरौ उणी घड़ी ठीक होईग्यौ। तद चेलौ नै एकांत में यीसु रै खनै आयनै कयौ, “म्हैं उणनै क्यूं नीं निकाळ सकया?” यीसु उणौनै कयौ, “अपणै विसवास री कमी रै कारण, क्यूंकै म्हैं थांनै साचौ कहूं, जे थौरो विसवास राई रै दाणे रै बराबर भी हो, तो इण भाखर ऊं कैवता, ‘एठै ऊं सरकनै उठै जातौ रै,’ तो वो जातौ रैला। अर कोई बात थौरे वास्तै असम्भव नीं होवैला। पण आ जाति बिना पराथना अर उपवास रै कोनीं निकळै।” जद वे गलील में हा, तो यीसु उणौ ऊं कयौ, “म्हैं, मिनख रौ बेटौ मिनखौ रै हाथ में पकड़ायौ जाऊंला। वे म्हनै मार दैला, अर म्हैं तीजै दिन जी उठूंला।” ओ सुणन चेला घणा दुखी होया। जद वे कफरनहूंम पूगिया, तो मिंदर रा चुंगी लेणवाळा पतरस रै खनै आयनै पूछयौ, “कांई थौरो गुरु मिंदर री चुंगी कोनीं दैवै?” पतरस कयौ, “हां, दैवै है।” जद पतरस घर में आयौ, तो यीसु उणनै पूछणै ऊं पैला ही उणनै कयौ, “हे समौन, थूं कांई सोचे है? धरती रा राजा कीण लोगां ऊं चुंगी या कर लेवे है? आपरै टाबरौ ऊं या परायौ ऊं?” पतरस उणनै कयौ, “परायौ ऊं।” यीसु उणनै कयौ, “तो टाबर बच गिया। तौभी इण वास्तै अपां उणौनै ठोकर नीं खिलावौ, थूं झील रै कांठै जायनै हुक नोख, अर जिकौ मछली पैला निकळै उणै पकड़नै उणरौ मूंडौ खोल दैणौ। उणमे थनै एक सिक्‍को मिळैला उणी नै लैयनै म्हारै अर थांरै बदळै उणनै दे दैणौ।” उण घड़ी चेलौ यीसु रै खनै आयनै पूछण लाग्या, “सरग रै राज में सबां ऊं मोटो कुण है?” इण कारण उणै एक टाबर नै खनै बुलायनै उणौरै बीच में ऊभौ करयौ, अर कयौ, “म्हैं थौरे ऊं साचौ कहूं की जद तांई थै मन नीं फिराओ अर टाबरौ रै ज्यूं नीं बणौ, तो सरग रै राज में परवेस कोनीं कर सकौ। इण वास्तै जे कोई अपणै आप नै इण टाबर रै ज्यूं छोटौ करैला, वो सरग रै राज में मोटो होवैला। अर जिकौ कोई म्हारै नाम ऊं एक ऐड़ै टाबर रै जेड़े लोगां नै स्वीकार करै है वो म्हनै स्वीकार करै है। “पण जे कोई इण छोटौ में ऊं जिकौ म्हारै माथै विसवास करै है एक नै ठोकर खिलावौ, उणरै लियै भलौ हो की मोटी चक्‍की रौ पाट उणरै गळे मे टेर देता अर उणनै समंदर में डूबो दियौ जातौ। ठोकर देणवाळौ माथै हाय! ठोकर रौ लागणो जरुरी है, पण हाय उण मिनख ऊपर जिणरै कारण ठोकर लागै है। “जे थारौ हाथ थनै या थारौ पग थनै ठोकर खिलावै, तो उण नै काटनै फेंक दे, लूलो या लंगड़ो होयनै जीवन में परवेस करणौ थारै लियै इण ऊं भलौ है की दोनूं हाथ या दोनूं पग होते हुए भी थूं अनत री अग्‍नि में नोख्यौ जावै। जे थांरी आंख थनै ठोकर खिलावै, तो उण नै काढ़ै फेंक दे, कांणौ होयनै जीवन में परवेस करणौ थांरै लियै इण ऊं भलौ है की दोनूं आंख्यां रैवतै हुए भी थूं नरक री अग्‍नि में नोख्यौ जावै। “देखौ, थै इण छोटौ में ऊं किणी नै तुच्छ नीं जांणणौ, क्यूंकै म्हैं थौरे ऊं कहूं की सरग में उणरा दूत म्हारै सरगिए पिता रौ मूंडौ हमेसां देखे है। क्यूंकै म्हैं, मिनख रौ बेटौ गुमयोड़ौ नै बचाणै आयौ है। “थै कांई सोचो हो? जे किणी मिनख री सौ लरड़ियां हो अर उणमे ऊं एक गुम जावै तो कांई वो निन्याणवे नै छोड़ नै, अर भाखरो ऊपर जायनै, कई उण गुमयोड़ी नै नीं सौधेला? अर जे ऐड़ौ हो की उणै मिळै, तो म्हैं थौरे ऊं साचौ कहूं की वो उण निन्याणवे लरड़ियां रै लियै जिकौ गुम कोनीं होई, इतरौ आंणंद कोनीं करैला जितौ की इण लरड़ी रै लियै करैला। ऐड़ी ही थौरे पिता री जिकौ सरग में है आ इछा कोनीं की इण छोटौ में ऊं एक भी नास हो। “जे थांरौ विसवासी भाई थांरै विरोध अपराध करै, तो जा अर अकेले में बातचीत करन उण नै समझा, अर वो थांरी सुणै तो थूं थांरै भाई नै पा लियौ। जे वो नीं सुणै, तो एक-दो मिनखौ नै साथै ले जाओ ताकी दो या तीन गवाहो रै सहारे सगळौ पको हो जावै। जे वो उणौरी भी नीं मांनै, तो कलीसिया ऊं कैह दो, पण कलीसिया री भी नीं मांनै तो थूं उण नै गैर यहूदी अर चुंगी लेणवाळै जैड़ौ मांन। “म्हैं थौरे ऊं साचौ कहूं, जे कीं थै धरती माथै बांधोला, वो सरग में बंधैला अर जे कीं थै धरती माथै खोलो ला, वो सरग में खुलैला। भळै म्हैं थौरे ऊं कहूं, जे थौरे में ऊं दो मिनख धरती माथै किणी बात रै लिए एक मन होयनै उण ऊं मांगेला, तो वो म्हारै पिता री तरफ ऊं जिकौ सरग में है, उणौ नै पको मिळैला। क्यूंकै जठै दो या तीन म्हारै नाम ऊं भेळा होवै है, उठै म्हैं उणौरै बीच में हूं।” तद पतरस खनै आयनै उण ऊं कयौ, “हे परभु, जे म्हारौ विसवासी भाई म्हारै विरोध अपराध करतौ रै, तो म्हैं किती बार उण नै माफ करूं? कांई सात बार तांई?” यीसु उणनै कयौ, “म्हैं थांरै ऊं ओ कोनीं कहूं की सात बार तांई वरना सात बार रै सतर गुणा तांई। “इण वास्तै सरग रौ राज उण राजा रै जैड़ौ है, जिकौ आपरै दासो ऊं लेखौ लेणो चाहतौ हो। जद वो लेखौ लेणे लाग्यौ, तो एक मिनख उणरै सांम्ही लायौ गियौ जिकौ दस लाख रौ करजदार हो। जद चुकानै रै लिए उणरै खनै कीं कोनीं हो, तो उणरै मालिक कयौ, ‘ओ अर इणरी लुगाई अर इणरा टाबर अर इणरी सगळी जायदाद नै बेच दी जावै, अर करज चुका दियौ जावै।’ इण कारण उण दास झुकनै उण नै परणाम कियो, अर कयौ, ‘हे मालिक धीरज राख, म्हैं सगळा भर दूंला।’ तो उण दास रै मालिक नै तरस आयौ अर उण नै छोड़ दियौ, अर उणरौ करज भी माफ कर दियौ। “ पण जद वो दास बारै निकळियौ, तो उणरै एक सह-दास ऊं मिळियौ, जिकौ उणरौ सौ चांदी रा सिक्‍को रौ करजदार हो, उणै उणरौ गळौ पकड़नै कयौ, ‘जिकौ कई थांरै माथै करज है भर दे।’ इण वास्तै उणै सह-दास रै पगां पड़नै उणनै विनती करणै लाग्यौ, ‘धीरज राख, म्हैं सगळा भर दूंला।’ उणै कोनीं मान्यौ, अर जायनै उण नै जेळ में नोख दियौ की जद तांई करज भर नीं दे, त्यां सुदी एठीज रै। उणरै दूजा सह-दास ओ देखनै घणा मौळा पड़िया, अर जायनै आपरै मालिक नै पूरा हाल सुणाया। तद उणरै मालिक उणनै बुलायनै उणनै कयौ, ‘हे दुस्ट दास, थै तो म्हारै ऊं विनती की, तो म्हैं थांरौ वो पूरौ करज माफ कर दियौ। इण वास्तै ज्यूं म्हैं थांरै माथै दया की, त्यूं ही कांई थनै भी अपणै सह-दास माथै दया करणी नीं चाईजै?’ अर उणरौ मालिक नै रीस में आयनै उणनै डंड देणवाळौ रै हाथ में सूंप दियौ, की जद तांई वो सगळौ करज भर नीं दे, तद तांई उण रै हाथ में रैवै। “इण तरैह जे थौरे में ऊं हरैक आपरै विसवासी भाई नै मन ऊं माफ नीं करैला, तो म्हारौ पिता जिकौ सरग में है, थौरे साथै ऐड़ौ ही करैला।” जद यीसु ऐ सैंग कैह चुकया, तो गलील ऊं रवाना होया। अर यरदन नदी रै पार यहूदियो रै परदेस में आया। सगळी भीड़ उणौरै लारै वहीर वेगी अर यीसु उणौनै उठैज सगळौ नै सावळ करया। जद फरीसी यीसु नै परखणै वास्तै उणरै खनै आयनै कैवण लागा, “कांई हर एक कारण ऊं मिनख खुद री लुगाई नै छोड़णौ सही है की?” यीसु जबाब दियौ, “कांई थै पढ़ियो कोनीं की परमेसर नै सरूआत ऊं ही मिनख अर लुगाई बणाया? अर परमेसर कयौ, ‘इण कारण मिनख आपरै मां-बाप ऊं न्यारौ होयनै आपरी लुगाई रै साथै रैला अर वे दोनूं एक तन होई।’ अबै वो दो कोनीं पण एक तन है। इण वास्तै जिकौ परमेसर जोड़िया है उणनै मिनख अलग नीं करै।” उणौ यीसु नै कयौ, “पछै मूसा नै क्यूं औ ठैरायौ की त्यागपत्र देयनै उणनै छोड़ दे?” यीसु उणौनै जबाब दियौ, “मूसा थोरै मन री कठोरता नै जांणतौ हो इण कारण ही थोरै लुगाईयां नै छोड़ दैणै रौ हुकम दियौ हो, पण सरूआत में ऐड़ौ कोनीं होवतो। म्हैं थौरे ऊं कहूं की व्यभिचार नै छोड़नै और कोई कारण ऊं आपरी लुगाई नै छोड़नै दूजी ऊं ब्याव करै, तो वो व्यभिचार करै है।” चेलौ परभु यीसु नै कयौ, “जे मिनख रौ लुगाई रै साथै ऐड़ौ संबंध है तो ब्याव करणौ बड़िया कोनीं।” यीसु उणौनै कयौ, “सगळा ऐ वचन हर कोई नीं समझ सकै है ऐ वो ही समझै जिकौ नै समझनै रौ वरदान दियोड़ो है। क्यूंकै कईक मिनख ऐड़ा है जिकौ पैदाईसी हिंजड़ा है अर कईक मिनख ऐड़ा है जिकौ नै मिनखौ हिंजड़ा बणा दिया है अर कईक मिनख ऐड़ा है जिकौ सरग रै राज मे जांणै रै वास्तै ब्याव नीं करणै रौ फैसलो लियौ है, जिकौ समझ सकै वो समझ ले।” उण वेळा लोग यीसु रै खनै टाबरां नै लावता हा, की वे उण माथै ऊपर हाथ राखै अर पराथना करै, पण चेला लोगां नै हाका करता हा। यीसु कयौ, “टाबरां नै म्हारै खनै आवण दो रोको मती क्यूंकै सरग रौ राज ऐड़ौ रौ ही है।” अर यीसु उण टाबरां रै ऊपर हाथ राखनै उठै ऊं जाता रिया। एक मिनख यीसु रै खनै आयौ अर यीसु नै कयौ, “हे गुरु, म्हैं कुण सो भलौ कांम करूं की अनत जीवन पाऊं?” यीसु उणनै कयौ, “थूं म्हारै ऊं भलाई रै बारै में क्यूं पूछै है? भलौ तो परमेसर एक इज है, पण जे थूं अनत जीवन में परवेस करणौ चावै, तो उणरी आग्याओं नै मानया कर।” उणै यीसु नै कयौ, “की कैड़ी आग्या?” तो यीसु कयौ, “आ की हत्या नीं करणी, व्यभिचार नीं करणौ, चोरी नीं करणी, अर झूठी गवाई नीं दैणी। अपणै बाप अर अपणी मां रौ कदर करणौ, अर अपणै पड़ोसी ऊं अपणै जैड़ौ परैम राखणौ।” उण मोटियार यीसु ऊं कयौ, “की इण सैंग बातां नै तो म्हैं मांनतो आयौ हूं अबै म्हारै में कीण बात री कमी है?” यीसु उणनै कयौ, “थूं सिद्ध होवणौ चावै है तो जा, थारी सगळी जायदाद बेचनै गरीबो नै दे दे, अर थनै सरग में साचौ धन मिळैला। अर आयनै म्हारै लारै वहीर हो जा।” आ बात सुण नै मोटियार घणौ मौळौ पड़ियौ अर जातौ रियौ, क्यूंकै वो घणौ धनवान हो। यीसु आपरै चेलौ नै कयौ, “म्हैं थौरे हूं साचौ कहूं की धनवान रौ सरग रै राज में परवेस करणौ मुसकिल है। थौरे ऊं भळै कहूं की परमेसर रै राज में धनवान रै परवेस करणै ऊं तो ऊंट रौ सुई रै नाके में ऊं निकळ जांणौ घणौ सरल है।” ऐ सुण नै चेला अचूम्बे में पड़ग्या अर कैवण लाग्या, “हे परभु तो किणरौ उद्धार हो सकै?” यीसु उणौरै सांमै देखनै कयौ, “मिनखौ ऊं तो ओ कोनीं हो सकै, पण परमेसर ऊं ओ सगळौ हो सकै है।” तो पतरस यीसु नै कयौ, “देख, म्हौ तो सगळौ छोड़नै थारै लारै आ गिया हो। तो म्हौ नै कांई मिळैला?” यीसु उणौनै कयौ, “म्हैं थौरे ऊं साचौ कहूं की नये जगत में, जद म्हैं, मिनख रौ बेटौ अपणी महिमा रै सिंहासण माथै बैठूंला, तो थै ई जिकौ म्हारै लारै हो गिया हो, बारैह सिंहासणौ माथै बैठनै इजरायल रै बारैह गोत्रों रौ न्याव करौला। अर जिकौ कोई नै घरो, या भाइयो, या बहिनों, या बाप, या मां, या बाल-टाबरों, या खेतो नै म्हारै नाम रै वास्तै छोड़ दिया है, उणौनै सौ गुणा मिळैला। अर वो अनत जीवन रा हकदार होवैला। पण घणा लोग, जिकौ आगै है वो लारै हो जावैला। अर घणा लोग जिकौ लारै है वो आगै हो जावैला।” यीसु उणौनै कयौ, “सरग रौ राज उण जमीदार रै जैड़ौ है, जिकौ आपरी अंगूर री बाड़ी में मजूरो नै लगाणै रै सारू संवार में वेगो घर ऊं निकळै। उणै मजूरो रै साथै एक सिक्‍को रोज रौ तैय कीना अर उणौनै आपरी अंगूर री बाड़ी में भेजियां। संवार रा नौ बजे जद वो घर ऊं निकळनै दूजै लोगां नै बजार में बिना कांम करते ऊभा देखियां तो उणौनै कयौ, ‘थै ई म्हारी अंगूर री बाड़ी में जाओ अर कांम करौ म्हैं थांनै वाजिब मजूरी दे दूंला।’ इण वास्तै वे ई गिया भळै उण दोपार अर तीन बजे में ई बारै निकळनै व्यौंही कियो। अर वो जमीदार पांच बजे घर ऊं बारै निकळयौ अर उठै दूजौ नै ऊभा देखनै बोल्यौ, ‘थै एठै दिनभर निकमा क्यूं ऊभा हो?’ उणौ वीनै कयौ, ‘इण वास्तै की किणी म्हौ नै मजूरी ऊपर कोनीं लगाया।’ उणै उणौनै कयौ ‘थै लोग ई म्हारी अंगूर री बाड़ी में जाता रौ।’ “सिंझया री वेळा अंगूर री बाड़ी रौ मालिक आपरै मुनीम नै कयौ, ‘मजूरो नै बुलायनै पछै आवण वाळौ ऊं लेयनै पैला आवण वाळौ तांई सगळौ नै मजूरी दे दो।’ उणनै उण मजूरो नै जिकौ पांच बजे कांम ऊपर आया, उणौनै एक-एक चांदी रौ सिक्‍को दियौ। तो जिकौ सैंगो ऊं पैला आया उणौ सोच्यौ की म्हौ नै घणा मिळेला, पण उणौनै ई एक-एक चांदी रौ सिक्‍को ही मिळियौ। जद रूपिया मिलनै रै पछै वे जमीदार ऊपर छिड़नै कैवण लाग्या, ‘म्हौरै पछै आवण वाळा मजूरो नै कैवल एक घंटे भर ही कांम कियो। तो ई थै उणौनै म्हौरै बराबर कर दिया, जे म्हौ दिनभर कठोर मेनत कीं अर तावड़ो सहन कियो।’ “उणै वीण में ऊं एक नै औ कैवतै जबाब दियौ, ‘हे भाई। म्हैं थौरे साथै अन्याव नीं कर रियौ हूं। कांई थै म्हारै साथै एक चांदी रै सिक्‍कै ऊं तैय कोनीं होया? थौरी मजूरी ले लौ अर जाओ। म्हैं थौरे पछै आवण वाळै मजूर नै भी थौरे जिती देणी चावूं हूं। म्हारै धन रै साथै म्हैं जे मरजी है वो करूं कांई इण बात रौ हक म्हनै कोनीं? म्हैं भलौ मिनख ऊं इण बात ऊं थूं बळण राखै है कांई?’ ” फिर यीसु उणौनै कयौ, “इण रीत ऊं जिकौ लारै है वे आगै हो जावैला अर जिकौ आगै है वे लारै हो जावैला।” यीसु यरुसलेम जातै वैळा बारैह चेलौ नै एकांत में लैय जायनै, अर मारग में उणौ ऊं कैवण लाग्यौ, “सुणौ, अपां यरुसलेम जाओ हो। अर म्हैं, मिनख रौ बेटौ परधान याजकौ अर सास्तरियों रै हाथ विसवास घात ऊं पकड़ायौ जावैला, अर वे म्हनै मौत री सजा सुणावैला। अर म्हनै दूजी जातियो रै हाथ सूंप दैला की वे म्हारी हंसी मजाक उडावै, अर कोड़ा ठोकै, अर सूली ऊपर चढ़ावै, लेकिन तीजै दिन म्हैं पाछौ जी उठूंला।” तो जबदी रै बेटौ री मां नै, आपरै बेटौ रै साथै यीसु रै खनै आयनै परणाम किया, अर उण ऊं कीं मांगणै लागी। यीसु उणनै कयौ, “थूं कांई चावै है?” वो उण ऊं बोली, “ओ वचन दे की म्हारै ऐ दोनूं बेटा थारै राज में एक थारै जीमणा हाथ अर एक थारै डावै हाथ बिठाईजै।” यीसु उणनै जबाब दियौ, “थै जांणौ कोनीं की कांई मांगो हो। जिकौ कटोरो म्हैं पीण वाळौ हूं, कांई थै पी सकौ हो?” उणौ कयौ, “हां पी सकौ हो।” यीसु उणनै कयौ, “थै म्हारौ कटोरो तो पीओला, पण अपणै जीमणै अर डावै किणी नै बैठाणो म्हारौ कांम कोनीं, पण जिणरै सारू म्हारै पिता री तरफ ऊं तैयार कियो जावैला, उणरै सारू है।” ओ सुणन दसों चेलौ नै उण दोनूं भाइयो माथै रीस आयगी। यीसु आपरै चेलौ नै खनै बुलायनै कयौ, “थै जांणौ हो की गैर यहूदियो रै हाकिम अपणै लोगां ऊपर राज करै है। अर जिकौ मोटा लोग है वो छोटे लोगां ऊपर माडे अधिकार जतावै है। पण थौरे में ऐड़ौ नीं होणौ चाईजै। पण जिकौ कोई थौरे में हूं मोटो होणौ चावै, वो थौरो सेवक बणै। अर जिकौ थौरे में परधान होणौ चावै, वो थौरो दास बणै। ज्यूं की मिनख रौ बेटौ, इण वास्तै कोनीं आयौ की उणरी सेवा चाकरी करै, पण इण वास्तै आयौ की खुद सेवा चाकरी करै, अर घणौ नै छुड़ानै रै सारू आपरौ प्रांण दैणै आयौ है।” जद यीसु अर उणरा चेला यरीहो ऊं निकळ रिया हा, तो एक घणी भीड़ उणरै लारै वहीर होयगीं। अर दो आंधा जिकौ सड़क रै कांठै बैठा हा, अर ओ सुण नै की यीसु जा रियौ है, हेलौ करणै लाग्या, “हे परभु दाऊद री औळाद, म्हौरै ऊपर दया कर।” लोगां उणौनै हाका किया की चुप रौ, पण वे भळै ई चिलायनै कैवण लाग्या, “हे परभु दाऊद री औळाद, म्हौरै ऊपर दया कर।” तद यीसु ऊभौ होयनै उणौनै बोलायनै कयौ, “थै कांई चावौ की म्हैं थौरे वास्तै करूं?” उणौ यीसु नै कयौ, “हे परभु ओ की म्हांरी आंखे खुल जावै।” यीसु नै तरस आयग्यौ अर उणौरी आंख्यां रै ऊपर हाथ राखियौ, अर वे तुरत देखणै लाग्या। अर यीसु रै लारै वहीर हो गिया। जद यीसु अर उणरा चेला यरुसलेम रै खनै जैतून भाखर रै नजीक बैतफगै गांव रै खनै आया, तो यीसु दो चेलौ नै ओ कैहन भेज्या, “सांमै वाळै गांव में जाओ। उठै पूगते ही एक गधी बांधियोड़ी है अर उणरै साथै थांनै गधी रौ बचियो मिळेला। उणनै खोलनै म्हारै खनै ले आओ। जे थोरै ऊं कोई पूछै तो कैवणौ की इणरी परभु नै जरुत है, तो वो इणनै थौरे साथै भेज दैला।” ओ इण वास्तै होयौ की जिकौ भविसयदाता री तरफ ऊं कयौ गियौ हो, वो पूरौ होयौ, “सिय्योन री बेटी नै कैवौ, ‘देख, थांरौ राजा थांरै खनै आवै है। वो भला है, अर गधे ऊपर बैठौ है, अर वो गधी रै बचिये ऊपर है।’ ” चेलौ जायनै, ज्यूं यीसु कयौ हो त्यूं ही कियो। अर गधी रै बचिये नै लायनै, उणरै ऊपर आपरा गाभा राख्या, अर वो उण बचिये माथै बैठग्या। तो घणा लोगां आपरा गाभा मारग में बिछाया, अर दूजै लोगां दरखतो ऊं डाळियो वाढ़नै मारग में बिछाई। जिकौ लोग यीसु रै आगै चाल रिया हा अर जे लोग उणरै लारै चाल रिया हा सगळा लोग ओ नारो लगा रिया हा, “दाऊद री औळाद रौ होसना, धन्य है वो जिकौ परभु रै नाम ऊं आवै है! सरग में परमेसर रौ होसना।” जद यीसु यरुसलेम में पूगिया तो सगळै सैहर में हलचल मचगी, अर लोग कैवण लागा, “औ कुण है?” लोगां कयौ, “औ गलील रै नासरत सैहर रौ भविसयदाता यीसु है।” यीसु नै परमेसर रै मिंदर में जायनै उण सगळौ नै, जिकौ मिंदर में लेण-देण कर रिया हा, उणौनै बारै निकाळ दिया, अर विदेसी रूपियौ नै बदलन वाळौ रा पीढ़ा अर कबूड़ा बेचनैवाळौ री चौकियां ऊंधी कर दी। अर यीसु कयौ, “लिख्यौ है, ‘म्हारौ घर पराथना रौ घर कैलावैला’ पण थै उणनै डाकूओ रौ अडो बणा दियौ।” तो आंधा अर लंगड़ा मिंदर में उणरै खनै आया, अर यीसु उणौनै सावळ करया। पण जद परधान याजकौ अर सास्तरियों नै इणरा चमतकार देखियां अर टाबरां मिंदर में “दाऊद री औळाद रौ होसना” बोलता सुणीया, तो वे रीसे बळया। अर यीसु नै कैवण लाग्या, “कांई थूं सुणै है की ऐ कांई कैवै है, यीसु उणौनै कयौ, हां। कांई थै औ कदैई कोनीं पढ़यो, ‘छोरौ अर दूध पीवता टाबरां रै मूंडै ऊं थै आपरौ गुणगान कराओ’?” तो यीसु उणनै छोड़नै सैहर रै बारै बैतनिय्याह गियौ अर रात उठैज रियौ। सवार रै वैळा जद यीसु सैहर जातै वैळा उणनै भूख लागी। सड़क रै किनारै अंजीर रौ एक रुंखड़ौ देखनै यीसु उणरै खनै ग्यौ, अर पतौ नै छोड़ उणमे कीं नीं पायो उण ऊं कयौ, “आज ऊं थांरै में कदैई फळ नीं लागै।” अर अंजीर रौ दरखत तुरत सूख गियौ। औ देखनै चेलौ नै अचूम्बो होयौ अर उणौ कयौ, “औ अंजीर रौ दरखत तुरत कीकर सूख गियौ?” यीसु उणौनै जबाब दियौ, “म्हैं थौरे ऊं साचौ कहूं, जे थै विसवास राखौ अर वैम मत करौ, तो थै नीं कैवल ओ करौला जे म्हैं अंजीर रै दरखत रौ करयौ है, बल्कि इण भाखर नै भी केवोला, ‘उखड़ जा, अर समंदर में जा पड़’, तो वो हो जावैला। अर जे कई थै पराथना में विसवास ऊं मांगोला तो वो सैंग थांनै मिळैला।” यीसु मिंदर में जायनै उपदेस दे रिया हा, तो परधान याजकौ अर लोगां रै नेताओं उणरै खनै आयनै पूछयौ, “थूं ओ कांम किणरै अधिकार ऊं करै है? अर थनै औ अधिकार कीणै दियौ है?” यीसु उणौनै जबाब दियौ, “म्हैं ई थौरे ऊं एक बात पूछूं। जे वो म्हनै बतादोला, तो म्हैं ई थांनै बता दूंला की ओ कांम कीण रै अधिकार ऊं करूं हूं। यूहन्‍ना रौ बतिस्मो कठै ऊं हो? सरग री तरफ ऊं या मिनखौ री तरफ ऊं?” तो वे आपस में बात करणै लाग्या, “जे म्हौ कैवौ ‘सरग री तरफ ऊं’, तो वो अपांनै कैवैला, ‘पछै थै उणरौ विसवास क्यूं कोनीं कियो?’ अर जे कैवै ‘मिनखौ री तरफ ऊं’, तो अपांनै भीड़ रौ डर है, क्यूंकै वे सैंग यूहन्‍ना नै भविसयदाता मांनै है।” इण वास्तै उणौ यीसु नै जबाब दियौ, “म्हौ कोनीं जांणौ।” यीसु ई उणौनै कियो, “तो म्हैं ई थांनै कोनीं बताऊं की ओ कांम कीण अधिकार ऊं करूं हूं। “थै कांई सोचो हो? किणी मिनख रै दो बेटा हा, उणै पैलै रै खनै जायनै कियो, ‘हे बेटा, आज अंगूर री बाड़ी में कांम कर।’ उणै जबाब दियौ, ‘म्हैं कोनीं जाऊंला,’ पण पछै पछतावो करनै जातौ रियौ। पछै पिता नै दूजै बेटे रै खनै जायनै ज्यूं ही कियो। बेटे जबाब दियौ, ‘जी हां जाऊं हूं,’ पण कोनीं गियौ। इण दोनूं में ऊं कीणै पिता री इछा पूरी किनी?” उणौ कियो, “पैलै नै।” यीसु उणौनै कयौ, “म्हैं थौरे ऊं साचौ कहूं की चुंगी लेणवाळा अर वेसयाओ थौरे ऊं पैला परमेसर रै राज में परवेस करै है। क्यूंकै यूहन्‍ना बतिस्मो देणवाळौ धरम रा मारग बतातौ थौरे खनै आयौ तो भी थै उणरौ विसवास कोनीं कियो। पण चुंगी लेणवाळा अर वेसयाओ नै उणरौ विसवास करयौ, अर थै औ देखणै पछै ई कोनीं पछताया की उणरौ विसवास कर लेता। “एक दूजी कहाणी सुणौ। एक जमीदार हो, जीणे अंगूरो री बाड़ी लगाई, उणरै च्यांरूमेर बाड़ किनी, अर अंगूरो रौ रस निकालनै कुंड खोदयौ अर रूखाळी करण वास्तै गुमट बणायां, अर करसा नै उणरौ ठैको देन परदेस जातौ रियौ। जद फळ रौ वगत नैड़ौ आयौ, तो उणै आपरै दासो नै उणरा फळ लेणे रै सारू करसा रै खनै भेजियां। “पण करसा उणरै दासो नै पकड़नै किणी नै ठोकियो, अर किणी नै मार दियौ, अर किणी रै भाठा ठोकिया। पछै उणै पैलौ ऊं करते घणा दासो नै भेजियां अर उणौ उणौरै साथै ई त्योंही कियो। आखरी में उणै आपरै बेटे नै उणौरै खनै ओ सौच नै भेज्यौ की ‘वे म्हारै बेटे रौ आदर करैला।’ “पण करसा बेटे नै देखनै आपस में कयौ, ‘औ तो वारिस है। आओ इणनै मार दो अर इणरी जायदाद ऊपर कब्जो कर लो।’ अर उणौ उणनै पकड़ नै अंगूरो री बाड़ी ऊं बारै निकाळनै मार दियौ। “इण वास्तै जद अंगूरो री बाड़ी रौ मालिक आवैला, तो उण करसा रै साथै कांई करैला?” उणौ उणनै कयौ, “वो उण बुरै लोगां री बुरी रीत ऊं नास करैला, अर अंगूरो री बाड़ी रौ ठैको दूजै करसा नै दैला, जिकौ वगत ऊपर फळ रौ हिस्सो दियौ करैला।” यीसु उणौनै कयौ, “कांई थै कदैई पवितर सास्तर में औ कोनीं पढ़ियो। ‘जीण भाठै नै कारीगरो निकमो ठैरायौ हो, वोहीज खूंणै रौ भाठौ बण गियौ। औ परभु री तरफ ऊं होयौ, अर म्हांरी निजर में अदभुत है’? “इण वास्तै म्हैं थौरे ऊं कहूं की परमेसर रौ राज थौरे ऊं ले लियौ जावैला अर ऐड़ै देसो नै जिकौ उणरौ फळ लावै उणौनै दियौ जावैला। जिकौ इण भाठै माथै पड़ैला, वो चकनाचूर हो जावैला। अर जीण माथै ओ भाठौ पड़ैला, उणनै पीस दैला।” परधान याजक अर फरीसी यीसु री कहाणियो नै सुणनै समझ गिया की वो उणरै बारै में कैवै है। अर उणौ यीसु नै पकड़णौ चाहयौ, पण लोगां ऊं डर रिया हा क्यूंकै वे उणनै भविसयदाता मानता हा। यीसु भळै उणौ नै कहाणियो मे कैवण लाग्या, “सरग रौ राज उण राजा रै जैड़ौ है, जिणै आपरै बेटे रै ब्याव री रैवण री तैयारी की। अर उणरै आपरै दासो नै भेजिया की बुलायोड़ा लोगां नै ब्याव रै रैवण में बुलाओ पण वे आवणौ नीं चाहयौ। “भळै उणरै दासो ऊं कैहन भेजिया, ‘बुलायोड़ा मिनखौ नै कैवौ, देखौ, म्हैं खाणौ तैयार कर लियौ है, म्हारै पाळयोड़ा पसुओ नै मारन सैंग चीज तैयार है, ब्याव रै खाणै में आओ।’ “पण मेमाणो नै इणरी परवा कोनीं किनी। कोई आपरै खेत मे, अर कोई आपरै व्यापार मे जाता रिया। दूजा मेमाणो राजा रै सेवकों नै पकड़नै उणौनै ठोकया अर उणौनै मारै नोख्या। तो राजा नै रीस आई, अर उणै आपरी सेना भेजनै उण हत्यारो रौ नास करयौ, अर उणरै सैहर नै बाळ दियौ। “तो उणरै आपरै दासो ऊं कयौ, ‘ब्याव रौ खाणौ तो तैयार है पण बुलायोड़ा मिनख सही कोनीं हा। इण वास्तै फांटे माथै जान जितरा मिनख थांनै मिळै, सगळौ नै ब्याव रै खाणै में बुलाए लाओ।’ जद उण दासो नै सड़को ऊपर जायनै कांई भूंडा कांई भला, जितरा मिळया, सगळौ नै भेळा किया। अर ब्याव रौ घर भरीज ग्यौ। “जद राजा मेमाणो नै देखण मांय आयौ, तो उणै उठै एक मिनख नै देख्यौ, जिकौ ब्याव रा कपड़ा कोनीं पेरुड़ा हा। राजा वीनैं पूछयौ, ‘हे दोसत, थूं ब्याव रा कपड़ा पेरीए विना एठै क्यूं आ ग्यौ?’ उणरौ मूंडौ बंद हो गियौ। “तो राजा सेवकों नै कयौ, ‘इणरा हाथ-पग बांधनै बारै अंधारै मे नोख दो, उठै रोणो अर दांत पीसणो होवै।’ “क्यूंकै बुलायोड़ा तो घणा हा पण चुणयोड़ा थोड़ा हा।” तो फरीसियों जायनै आपस मे विचार करयौ की यीसु नै कीण तरीकै ऊं उणरी कयोड़ी बातां में ही फंसाऔ। जद उणौ आपरै चेलौ नै हेरोदियो रै साथै उणरै खनै ओ कैवण भेजियां, “हे गुरु, म्हैं जांणौ हो की थूं साचौ है अर परमेसर रौ मारग सचाई ऊं सिखावै है, अर कीण री परवा नीं करै, क्यूंकै थूं मिनखौ रौ मूंडौ देखन बातां कोनीं करै। इण वास्तै म्हौ नै बता थूं कांई सौचे है, रोमियो रौ राजा कैसर नै कर दैणौ सही है या कोनीं?” यीसु नै उणरी चाल जांणन कयौ, “हे ढ़ोगियो, म्हनै कयौ जांसो हो? कर रौ सिक्‍को म्हनै दिखाओ।” तो वे उणरै खनै एक चांदी रौ सिक्‍को लेन आया। यीसु उणौनै पूछयौ, “आ छाप अर नाम किणरौ है?” उणौ यीसु नै कयौ, “कैसर रौ।” तो उणै उण ऊं कयौ, “जिकौ कैसर है, ओ कैसर नै दो। अर जिकौ परमेसर रौ है, वो परमेसर नै दे दो।” ओ सुणन उणौनै अचूम्बो होयौ, अर उणनै छोड़नै जाता रया। उणी दिन सदूकी जिकौ कैवै है की मरयोड़ा रौ पाछौ जी उठणौ है ई कोनीं, उणरै खनै आयनै उणनै पूछयौ, “हे गुरु, मूसा कयौ तो की जे कोई मिनख विना औळाद मर जावै, तो उणरौ भाई उणरी लुगाई ऊं ब्याव करन आपरै भाई रै लिए वंस पैदा करै। अबै म्हौरै एठै सात भाई हता, पैलौ ब्याव करनै मर ग्यौ, अर औळाद नीं होणै रै कारण आपरी लुगाई नै आपरै भाइयो रै लिए छोड़नै ग्यौ। इणी तरैह दूजै अर तीजै बिना औळाद मर गिया अर सातों तांई ओहीज होयो। इण सातों रै पछै वां लुगाई ही मर गी। क्यूंकै वां सातों री लुगाई हो चुकी ही, आखरी जी उठैला जद वां उण सातों मे ऊं कीण री लुगाई होवैला?” यीसु उणनै जबाब दियौ, “थै पवितर सास्तर अर परमेसर री सामरथ कोनीं जांणौ, इण कारण भूल मे पड़ग्या हो। क्यूंकै जी उठनै पर वे नीं ब्याव करैला अर नीं ब्याव मे दियौ जावैला पण सरग में परमेसर रै दूतो रै समान होवैला। पण मरयोड़ौ में ऊं जी उठया रै बारै मे कांई थै ओ वचन कोनीं पढ़यो जिकौ परमेसर थोरै ऊं कयौ, ‘म्हैं अबराहम रौ परमेसर, अर इसहाक रौ परमेसर, अर याकूब रौ परमेसर हूं’? वो मरयोड़ौ रौ कोनीं, पण जीवतौ रौ परमेसर है।” ओ सुणन लोग उणरै उपदेस ऊं अचूम्बे मे पड़ गिया। जद फरीसियों सुण्यौ की यीसु नै सदूकियों रौ मूंडौ बंद कर दियौ, तो वे भेळा होया। उण में ऊं एक सास्तरी यीसु नै परखण सारू उणनै पूछयौ, “हे गुरु, व्यवस्था मे कोण सी आग्या मोटी है?” यीसु उणनै कयौ, “ ‘थूं परमेसर अपणै परभु ऊं सैंग मन अर अपणै सैंग प्रांण अर अपणी सैंग बुद्धि रै साथै परैम राख।’ मोटी अर पैली आग्या तो आहीज है। अर उणी रै जैड़ी आ दूजी भी है की ‘थूं अपणै पड़ोसी ऊं अपणै समान परैम राख।’ ऐ दो आग्या हैंग व्यवस्था अर भविसयदाताओ रौ आधार है।” जद फरीसी भेळा हा, तो यीसु उणौ नै पूछयौ, “मसीह रै बारै मे थै कांई सोचो हो? वो किणरौ बेटौ है?” उणौ उण ऊं कयौ, “दाऊद रौ।” यीसु उणौ नै पूछयौ, “तो दाऊद आतमा मे होयनै उणनै परभु क्यूं कैवै है? ओ लिखयोड़ो है, ‘परभु नै, म्हारै परभु ऊं कयौ, “म्हारै जीमणै बैठ, जद तांई की म्हैं थारै बैरियो नै, थारै पगां रै नीचे नीं कर दूं।” ’ भला, जद दाऊद उणनै परभु कैवै है, तो वो उणरौ बेटौ कीकर हो सकै है?” इणरै जबाब मे कोई एक बात नीं कैह सकयौ। उण दिन ऊं किणरी उण ऊं कीं पूछणै री हीमत कोनीं होई। तो यीसु नै भीड़ ऊं अर आपरै चेलौ ऊं कयौ, “सास्तरी अर फरीसी मूसा रै नियमो नै सिखाणै रा अधिकारी है। इण वास्तै वे थांनै जिकौ कैवै वो करणौ अर मानणौ, पण उणौरै करमो रौ अनुसरण नीं करौ, क्यूंकै वे कैवै तो है पण करै कोनीं। वे एक ऐड़ै भारी बोझ नै जिणनै उठाणौ मुसकिल है, बांधेन वीनै मिनखौ रै कांधै ऊपर राखै है, पण खुद उणनै आपरी आंगळी ऊं भी मदद करणी कोनीं चावै। “वे आपरै हैंग कांम लोगां नै दिखाणै रै वास्तै करै है। वे आपरै हाथ अर माथै ऊपर बांधियो जांणै वाळै ताबीज जेड़े डबै नै जिणमे पवितर सास्तर री किताबो राखी जावै उणौनै चौड़ा करै अर आपरै कपड़ो रै झब्बा लांबा कर दैवै है। रैवणौ मे खास-खास जगा अर सभाओं मे खास-खास आसन पर विराजणो, बजारौ में परणाम-परणाम सुणणौ, अर मिनखां मे गुरु कैवाणो ऐ हैंग उणौनै घणौ पसंद है। “पण थै जिकौ म्हारा चेला हो खुद नै गुरु नीं कैलाणो, क्यूंकै थौरो एक ही गुरु है, अर थै सैंग भाई हो धरती माथै किणी नै अपणौ पिता नीं कैवणौ, क्यूंकै थौरो एक ही पिता है, जिकौ सरग में है। अर अपणै आप नै मालिक भी नीं कैलाणो, क्यूंकै थौरो एक ही मालिक है, वो है मसीह। जिकौ थौरे मे मोटो होणौ चावै, वो थौरो सेवक बणै। जिकौ कोई अपणै आप नै मोटो बणावैला, वो छोटौ कियो जावैला। अर जिकौ कोई अपणै आप नै छोटौ बणावैला, वो मोटो कियो जावैला। “अरै ढ़ोगी सास्तरियों अर फरीसियों, थौरे माथै हाय! थै मिनखौ रै वास्तै सरग रै राज रौ द्वार बंद करौ हो, नीं तो खुद उणमे परवेस करौ हो। अर नीं उण मे करणै वाळौ नै परवेस करणै दैवो हो। अरै ढ़ोगी सास्तरियों अर फरीसियों, थौरे माथै हाय! थै विधवाओं रै घरो नै खा जाओ हो, अर दिखाणे रै वास्तै घणी वैळा तांई पराथना करता रौ हो। इण वास्तै थांनै घणौ डंड मिळेला। “अरै ढ़ोगी सास्तरियों अर फरीसियों, थौरे माथै हाय! थै एक जन नै आपरै मत मे लाणै रै वास्तै सैंग जळ अर धरती मे फिरौ हो, अर जद वो मत मे आ जावै है तो उणनै आपरै ऊं बेवड़ो नरगीए बणा देवो हो। “हे आंधौ नेताओं! थौरे माथै हाय! जिकौ कैवौ हो की जे कोई मिंदर री सौगन खाए तो कांई कोनीं, पण जे कोई मिंदर रै सोने री सौगन खाए तो उण ऊं बंद जावैला। अरै मूरखौ अर आंधौ, कुण मोटो है, सोनो या वो मिंदर जिणमे सोनो पवितर होवै है? पछै कैवौ हो की जे कोई वेदी री सौगन खाए तो कांई कोनीं, पण जिकौ भेट उण ऊपर है, जे कोई उणरी सौगन खाए तो बंद जावैला। अरै आंधौ, कुण मोटो है, भेट या वेदी जिण ऊं भेट पवितर होवै है? इण वास्तै जिकौ वेदी री सौगन खावै है, वो उणरी अर जे कांई उण ऊपर है, उणरी भी सौगन खावै है। जिकौ मिंदर री सौगन खावै है, वो उणरी अर उणमे रैणैवाळौ परमेसर री भी सौगन खावै है। जिकौ सरग री सौगन खावै है, वो परमेसर रै सिंहासण री अर उण ऊपर बैठनवाळा परमेसर री भी सौगन खावै है। “अरै ढ़ोगी सास्तरियों अर फरीसियों, थौरे माथै हाय! थै पोदीनै, अर सौंफ अर जीरै रौ दसमांस तो दो हो, पण थै व्यवस्था री गम्भीर बातां रौ न्याव, अर दया, अर विसवास नै छोड़ दियौ हो। चावै हो की इणनै भी करता रैता अर उणनै भी नीं छोड़ता। अरै आंधौ नेताओं, थै माचर नै तो छांणी नोखो हो, पण ऊंट नै हाजो ई निगळ लौ हो। “अरै ढ़ोगी सास्तरियों अर फरीसियों, थौरे माथै हाय! थै कटोरे अर थाळी नै ऊपर ऊपर ऊं तो मांजो हो पण मांयनै ऊं लालच अर सवारथ ऊं भरयोड़ा हो। ऐ आंधौ फरीसियों, पैला कटोरे अर थाळी नै मांयनै ऊं मांजो की वे बारै ऊं भी साफ हो जावै। “अरै ढ़ोगी सास्तरियों अर फरीसियों, थौरे माथै हाय! थै चूनो फेरियोड़ी कबरौ रै ज्यूं हो। जिकौ ऊपर ऊं तो बड़िया दिखाई दैवै है, पण मांयनै ऊं मुड़दा री हडियों अर हर तरैह री गंदगी ऊं भरयोड़ी है। इण रीत ऊं थै भी ऊपर ऊं मिनखौ नै धरमी दिखो हो, पण मांयनै कपट अर अधरम ऊं भरयोड़ा हो। “अरै ढ़ोगी सास्तरियों अर फरीसियों, थौरे माथै हाय! थै भविसयदाताओ री कबरौ बणाओ हो अर धरमियो री कबरौ सजावो हो, अर कैवौ हो, ‘जे म्हौ म्हौरै बापदादों रै दिनां मे होता तो भविसयदाताओ री हत्या में उण रा भागीदार कोनीं होवता।’ इण ऊं तो थै थोरी आपरी गवाई दो हो की थै भविसयदाताओ रै हत्यारो री संतान हो। तो, थौरे बापदादों री कसर पूरी कर लौ। “अरै सांपो, अर सांपो रै बच्चौ, थै नरक रै डंड ऊं कीकर बचोला? इण वास्तै देखौ, म्हैं थौरे खनै भविसयदाताओ अर हुंस्यारौ अर गुरुओं नै भेजूं हूं, अर थै उणमे ऊं कईको नै मार नोखोला अर कईको नै सूली माथै चढ़ाओला, अर कईको नै थै थौरे पराथना घर में कोड़ा ठोकोला अर एक सैहर ऊं दूजै सैहर में सताता रैवौला। जीण ऊं धरमी हाबिल ऊं लेन बिरिक्याह रै बेटौ जकरयाह तांई, जीणनै थै मिंदर अर वेदी रै बीच में मार नोखियो हो, जितौ धरमियो रौ लोई धरती माथै चालयौ वो सैंग थौरे माथे ऊपर पड़ैला। म्हैं थौरे ऊं साचौ कहूं, ऐ सैंग बातां इण वगत रै लोगां माथै आ पड़ैला। “हे यरुसलेम, हे यरुसलेम! थूं भविसयदाता नै मारै नोखे है, अर जिकौ थौरे खनै भेजिया, उण ऊपर भाटा फेंको हो। किती बार म्हैं चायौ की ज्यूं कुंकड़ी आपरै बच्चौ नै आपरै पांखों रै नीचे भेळा करै है, वियो म्हैं भी थौरे टाबरौ नै भेळा कर दूं, पण थै नीं चायौ। देखौ, थौरो घर थौरे वास्तै उजाड़ छोड़ दियौ जावैला। क्यूंकै म्हैं थौरे ऊं कहूं की अबै ऊं थै म्हनै नीं देखौ ला, जैड़ी तांई थै ओ नीं कैवौ, ‘धन्य है वो, जिकौ परभु रै नाम ऊं आवै है।’ ” जद यीसु मिंदर ऊं निकळन जा रिया हा, तो उणरा चेला उणनै मिंदर री बणावट दिखाणे रै वास्तै उणरै खनै आया। यीसु उणौनै कयौ, “थै ओ सैंग देख रिया हो नीं? म्हैं थौरे ऊं साचौ कहूं, एठै भाटा ऊपर भाटा पड़योड़ौ नीं रैवैला सैंग ढ़ाह दिया जावैला।” जद वो जैतून भाखर ऊपर बैठा हा, तो चेलौ नै एकांत में उणरै खनै आन कयौ, “म्हौ नै बता की ऐ बातां कदै होवैला? थांरै आवण रौ अर जगत रै अंत री कांई निसाणी होवैला?” यीसु उणौनै जबाब दियौ, “सावचेत रैवौ! कोई थांनै वैम मे नीं घाले, क्यूंकै घणा ऐड़ा होवैला जिकौ म्हारै नाम ऊं आन कैवैला, ‘म्हैं मसीह हूं,’ अर घणौ नै भरमावैला। थै लड़ाईयां अर लड़ाईयां री चरचा अर अफवा सुणोला, तो घबरा नीं जाणौ क्यूंकै इण रौ होणौ जरुरी है, पण उण वैळा अंत नीं होवैला। क्यूंकै मिनख ऊपर मिनख अर देस ऊपर देस चढ़ाई करैला, अर जगा जगा अकाळ पड़ैला, अर भूकम्प आवैला। पण ऐ सैंग बातां तकलीफो री सरूआत है। “तो वे सताणे रै वास्तै थांनै पकड़ाई, अर थांनै मार नोखेला, अर म्हारै नाम रै कारण सैंग देस रा लोग थौरे ऊं बैर राखैला। उण दिनां में तो घणा परमेसर ऊपर विसवास करणौ छोड़ दैला, अर एक दूजै नै धोखे ऊं पकड़ाई, अर एक दूजै ऊं बैर राखैला। घणा झूठा भविसयदाता परगट होई, अर घणौ नै भरमावैला। अधरम रै बढ़नै ऊं लोगां में परैम भाव घट जावैला, पण जिकौ अंत तांई धीरज राखैला, उणी रौ उद्धार होवैला। अर राज रौ ओ सुभ संदेस सैंग जगत में परचार कियो जावैला, की सैंग देसो ऊपर गवाई हो, तद अंत आ जावैला। “इण वास्तै जद थै लोग मिंदर में ‘उजाड़ नै वाळी सुगली चीज’ नै देखोला, जिणरी चरचा भविसयदाता दानिय्येल नै की जिकौ पढ़े वो समझै। अर जिकौ यहूदिया में है वो भाखरो ऊपर भाग जावै। जिकौ छत माथै है, वो आपरै घर में सामान लेणे नीं उतरै। अर जिकौ खेत में है, वो आपरै कपड़ा लेणे पाछौ नीं आवै। “उण दिनां में जिकौ जापायती अर दूध पिलाती होई, उणरै वास्तै हाय! पराथना किया करौ की थांनै ठंड में या आराम रै दिन भागणो नीं पड़ै। क्यूंकै उण दिनां ऐड़ौ घोर संकट होवैला, ज्यूं संसार रै सरूआत ऊं अबै तांई कदैई नीं होयौ अर नीं कदैई होवैला। “जे वे दिन घटाया नीं होता तो कोई मांनखौ नीं बचतो, पण परमेसर रै चुणयोड़ौ रै कारण वे दिन घटाया जावैला। उण वगत जे कोई थांनै कैवै, ‘देखौ, मसीह अठै है,’ या ‘उठै है,’ तो विसवास नीं करणौ। “क्यूंकै झूठा मसीह अर झूठा भविसयदाता परगट होई, अर मोटा चिन्ह अर अचूम्बे रा कांम दिखाई की हो सकै तो चुणयोड़ौ नै भी भरमा सकै। देखौ, म्हैं थांनै पैला ऊं सैंग कैह दियौ है। “इण वास्तै जे थांनै कैवै, ‘देखौ, वो औहण में है’, तो उठै नीं जाणौ या ‘देखौ, वो कोठरियो में है’, तो विसवास नीं करणौ। क्यूंकै ज्यूं बिजळी पूरव ऊं निकळनै पच्छिम तांई चमकै है, व्यौंही म्हैं मिनख रै बेटे रौ आवणौ होवैला। थै जांणौ हो की जठै मुड़दा होई, उठै गिरजड़ा भेळा हो जावैला। “उण दिनां रै संकट रै तुरत पछै सूरज अंधारौ हो जावैला, अर चांद रौ उजाळौ जातौ रैला, अर तारा आभै ऊं नीचा पड़ैला अर आभै री सगतियो हिलाई जावैला। जद म्हैं, मिनख रै बेटे री निसाणी आभै में देखोला, अर जद धरती रा सैंग कुळ रा लोग छाती पीटी, अर म्हैं, मिनख रै बेटे नै घणी सामरथ अर मेमा रै साथै आभै रै बादळो ऊपर आवतौ देखोला। म्हैं तुरही रै जोर री आवाज रै साथै म्हारै दूतो नै भेजूंला, अर वे आभै रै इण कांकड़ ऊं उण कांकड़ तांई, च्यांरूमेर उणरा चुणयोड़ौ नै भेळा करैला। “अंजीर रै रुंखड़ै ऊं सिकसा लौ। जद उणरी डाळी कोमल हो जावै अर पता निकळनै लागै है, तो थै जांण लौ हो की उनाळै रौ मौसम नैड़ौ है। इण रीत ऊं जद थै इण सैंग बातां नै देखोला, तो समझ लौ की वो नैड़ौ है, द्वार माथै ही है। म्हैं थौरे ऊं साची कैवूं हूं, की इण पीढ़ी रै लोगां रै जीते जी ऐ सगळी बातां पूरी होवैला। आभौ अर धरती टळ जावैला, पण म्हारी बातां कदैई नीं टळैला। “उण दिन अर उण घड़ी रै बारै में कोई कोनीं जांणै, नीं सरग रा दूत अर नीं बेटौ पण कैवल पिता ही जांणै। ज्यूं नूह रै दिनां में होयौ, व्यौंही म्हैं, मिनख रै बेटे रौ भी आवणौ होवैला। क्यूंकै ज्यूं जळ प्रलय ऊं पैला रै दिनां में, जीण दिन तांई की नूह नाव माथै नीं चढ़यौ उण दिन तांई लोग खा पी रिया हा अर उणौ में ब्याव हो रिया हा। अर जैड़ी तांई जळ प्रलय आन उण सैंगो नै बहा नीं ले गियौ, वटै तांई उणौनै कांई ध्यांन नीं पड़ियौ, व्यौंही म्हैं, मिनख रै बेटे रौ आवणौ होवैला। उण वगत दो जणा खेत में होवैला, एक नै ले जावैला अर दूजै नै छोड़ दियौ जावैला। दो लुगाईयां चक्‍की पीसती होवैला, एक नै ले ली जावैला अर दूजी नै छोड़ दी जावैला। “इण वास्तै जागता रौ, क्यूंकै थै नीं जांणौ की म्हैं थौरो परभु कीण दिन आऊंला। पण ओ जांण लौ की जे घर रा मालिक जांणता की चोर कीण वैळा आवैला तो जागता रैता, अर आपरै घर में सेंध लागण कोनीं देता। इण वास्तै थै भी तैयार रैजो, क्यूंकै जीण घड़ी रै बारै में थै सोच्यौ ई कोनीं हो, उण घड़ी म्हैं, मिनख रौ बेटौ आ जावूंला। “बल्कि वो विसवास लायक सेवक कुण है, जिणनै मालिक आपरै नौकर-चाकरो ऊपर सरदार ठैरायौ की वगत माथै उणौनै खाणौ दे? धन्य है वो सेवक, जीणनै उणरौ मालिक आन ऐड़ौ करतौ मिळै। म्हैं थौरे ऊं साचौ कहूं, वो उणनै आपरी सगळी जायदाद ऊपर अधिकारी ठैरावैला। पण जे वो सेवक दुस्ट होवै तो सोचणै लागै की, ‘म्हारै मालिक रै आवण में वगत है,’ अर आपरै साथी सेवकों नै पीटे, अर पियकड़ों रै साथै खाए-पीए। तो उण सेवक रौ मालिक ऐड़ै दिन आवैला, जद वो उणरी बाट कोनीं जोहता होवैला, अर ऐड़ी घड़ी जीने वो जांणै कोनीं हो। तो मालिक वीनैं कोड़ा लगावैला अर ढ़ोगियो नै डंड दैला। उठै वे लोग रोवेला अर दांत पीसता रैवैला।” उण वेळा यीसु कयौ, “सरग रौ राज उण दस कुंवारियो रै जैड़ौ है जिकौ आपरौ दीयौ लेन बींद ऊं भेट करणै निकळी। उण में पांच गैली अर पांच समझदार ही। गैलयों आपरौ दीयौ तो लियौ, पण आपरै साथै तेल कोनीं लियौ। पण समझदारो आपरै दीये रै साथै आपरी कुप्पियों में तेल भी भर लियौ। जद बींद रै आवण में मोड़ो हो गियौ, तो वे सैंग ऊंघणे लागी अर सो गी। “आधी रात रौ हाकौ होयौ, ‘देखौ, बींद आ रियौ है! उण ऊं भेट करण चालौ!’ “तो वे सैंग कुंवारियो उठनै आपरै दीया सावळ करण लागी। अर गैलयों नै समझदारियों ऊं कयौ, ‘आपरै तेल में ऊं थोड़ो म्हौ नै भी दो, क्यूंकै म्हौरौ दीयौ बूझण वाळौ है।’ “पण समझदारियों जबाब दियौ, ‘कांई ध्यांन, ओ म्हौरै अर थौरे वास्तै पूरौ नीं होवै। भलौ तो ओ है की थै बेचनैवाळै रै खनै जान आपरै वास्तै मोल ले लौ।’ “जद वे मोल लेणे गी, तो बींद आ पूगियो, अर जिकौ तैयार ही, वे उणरै साथै ब्याव रै घर में जाती री अर आडौ बंद कर दियौ। “इणरै पछै वे दूजी कुंवारियो भी आन कैवण लागी, ‘हे मालिक, हे मालिक, म्हौरै वास्तै आडौ खोल दे!’ “उणौनै जबाब दियौ, ‘म्हैं थौरे ऊं साची कहूं, म्हैं थांनै कोनीं जांणूं।’ “इण वास्तै जागता रौ, क्यूंकै थै उण दिन नै कोनीं जांणौ हो, नीं उण घड़ी नै। “क्यूंकै सरग रौ राज उण मिनख रै जैड़ौ है जीणनै परदेस जातै वगत आपरै सेवकों नै बुलायनै आपरौ धन उणौनै सूंप दियौ। उणै एक नै पांच थैला, अर दूजै नै दो थैला, अर तीजै नै एक थैलो। हरैक नै उणरी सामरथ रै अनुसार दियौ, अर परदेस जातौ रियौ। तो जीणनै पांच थैला मिळियां हा, उणै तुरत जान उणरी लेण देण किनी, अर पांच थैला भळै कमाया। इण रीत ऊं जीणनै दो थैला मिळियां हा, उणरै भी दो थैला भळै कमाया। पण जीणनै एक थैलो मिळियौ हो, उणरै जान माटी खोदनै, आपरै मालिक रा रूपिया छुपाय दिया। “घणौ दिनां रै पछै उण सेवकों रौ मालिक आन उणौ ऊं हिसाब लेणे लागौ। जीणनै पांच थैला मिळया हा, उणरै पांच थैला भळै लायनै कयौ, ‘हे मालिक, थै तो म्हनै पांच थैला सूंपया हा, देखौ, म्हैं पांच थैला भळै कमाया हा।’ “उणरै मालिक नै उण ऊं कयौ, ‘धन्य है बड़िया अर विसवास लायक सेवक। थूं थोड़े में विसवास लायक रियौ। म्हैं घणी चीजों रौ अधिकारी बणाऊंला। थांरै मालिक रै आंणंद में सहभागी हो।’ “अर जीणनै दो थैला मिळया हा, वो भी आयनै कयौ, ‘हे मालिक, थै म्हनै दो थैला सूंपया हा, देखौ, म्हैं दो थैला भळै कमा दिया।’ “उणरै मालिक उण ऊं कयौ, ‘धन्य, है बड़िया अर विसवास लायक सेवक, थूं थोड़े में विसवास लायक रियौ। म्हैं थनै घणी चीजों रौ अधिकारी बणाऊंला। थांरै मालिक रै आंणंद में सहभागी हो।’ “जीणनै एक थैली मिळी ही, उण आयनै कयौ, ‘मालिक, म्हैं थनै जांणूं की थूं कठोर मिनख है। थूं जठै बौए कोनीं उठै काटे है, अर जठै बिखेरे कोनीं उठै ऊं भेळा करै है। इण वास्तै म्हैं डर गियौ अर जान थांरौ थैलो माटी में छुपाय दियौ। देखौ, जिकौ थांरौ है वो ओ है।’ “उणरै मालिक उणनै जबाब दियौ, ‘हे दुस्ट अर आळसी सेवक, जद थूं ओ जांणै हो की जठै म्हैं कोनीं बोयो उठै ऊं काटू हूं, अर जठै म्हैं बिखेरिया कोनीं उठै ऊं भेळा करूं हूं। तो थूं चावै है की म्हारा रूपिया साहूकार नै दे देतो, जद म्हैं आवतौ म्हारौ धन ब्याज साथै ले लेतो। “ ‘इण वास्तै वो थोड़ो उण ऊं ले लो, अर जिणरै खनै दस थैला है, उणनै दे दो। क्यूंकै जीण रै खनै है, उणनै भळै दियौ जावैला। अर उणरै खनै घणौ हो जाई। पण जिणरै खनै कोनीं है, उणरै खनै जिकौ है वो भी ले लियौ जावैला। अर इण निकमे सेवक नै बारै अंधारै में नोख दो, जठै रोणो अर दांत पीसणो होवैला।’ “जद म्हैं, मिनख रौ बेटौ अपणी मेमा में आऊंला अर सगळा सरगदूत म्हारै साथै आवैला, तो वो म्हारी मेमा रै सिंहासण ऊपर विराजमान होवैला। अर सगळी दुनिया रा मिनख म्हारै सांम्ही भेळा किया जावैला। अर ज्यूं ग्वाळा लरड़ियां नै बकरियौ ऊं न्यारी कर दैवै है, व्यौंही म्हैं वांनै एक दूजै ऊं न्यारा करूंला। म्हैं, लरड़ियां नै अपणी जीमणै अर बकरियों नै डावै तरफ ऊभी करूंला। “तो म्हैं, राजा आपरै जीमणै वाळौ ऊं कैवैला, ‘हे म्हारै पिता रै धन्य लोगां, आओ, उण राज्य रा अधिकारी हो जाओ, जिकौ जगत रै सरूआत ऊं थौरे वास्तै तैयार कियो ग्यौ है। क्यूंकै म्हैं भूखो हो, अर थै म्हनै खाणौ दियौ। म्हैं पियासों हो अर थै म्हनै पांणी पिलायो। म्हैं परदेसी हो, अर थै म्हनै आपरै घर में ठैरायौ। जद म्हैं उघाड़ो हो, अर थै म्हनै गाभा पैराया। जद म्हैं बिमार हो, अर थै म्हारी सुधि ली, जद म्हैं जेळ में हो, अर थै म्हनै मिलणे आया।’ “तो धरमी उणनै जबाब दैला, ‘हे परभु, म्हैं थांनै कदै भूखा देख्यां अर खिलायो? या पियासा देख्यां अर पांणी पिलायो? म्हौ कदै थांनै परदेसी देख्यां अर अपणै घर में ठैराया? या उघाड़ा देख्यां अर गाभा पैराया? म्हौ कदै थांनै बीमार या जेळ में देख्यां अर थांनै मिलनै आया?’ “तो म्हैं राजा वांनै जबाब दूंला, ‘म्हैं थौरे ऊं साचौ कहूं की थै जिकौ इण भाइयो में ऊं एक रै साथै कियो, वो म्हारै साथै भी कियो।’ “तो वो डावै वाळौ ऊं कैवैला, ‘सरापितौ! म्हारै सांमै ऊं उण अनत री अग्‍नि में जाता रौ, जिकौ सैतान अर उणरै दूतो रै वास्तै तैयार की ही। क्यूंकै म्हैं भूखो हो, अर थै म्हनै खाणौ कोनीं दियौ। म्हैं पियासा हो, अर थै म्हनै पांणी कोनीं पिलायो। म्हैं परदेसी हो, अर थै म्हनै आपरै घर में कोनीं ठैरायौ। म्हैं नंगो हो, अर थै म्हनै कपड़ा कोनीं पैराया। म्हैं बीमार अर जेळ में हो, अर थै म्हारी पूछताछ कोनीं ली।’ “तो वे जबाब दैला, ‘हे परभु म्हौ थांनै कदै भूखा, या पियासा, या परदेसी, या नागा, या बीमार, या जेळ में देख्यां, अर थोरी सेवा कोनीं की?’ तो म्हैं वीनैं जबाब दूंला, ‘म्हैं थांनै साचौ कहूं की थै जे इण छोटे ऊं छोटौ में ऊं किणी एक रै साथै कोनीं कियो, वो म्हारै साथै भी कोनीं कियो।’ अर ऐ अनत डंड भोगेला पण धरमी अनत जीवन में परवेस करैला।” जद यीसु ऐ हैंग बातां कैन रियौ तो आपरै चेलौ ऊं कैवण लागौ, “थै जांणौ हो की दो दिन रै पछै फसह रौ तैंवार है, अर म्हैं, मिनख रौ बेटौ सूली माथै चढ़ायौ जांणै रै वास्तै धोखे ऊं पकड़ावैला।” उण वगत कैफस महायाजक रै मेहल में परधान याजक अर जनता रै नेता भेळा हो गिया, अर आपस में विचार करण लागा की यीसु नै धोखे ऊं पकड़नै मार नोखो। पण वे कैवै हा, “तैंवार रै वगत कोनीं, कांई ऐड़ौ नीं हो की लोगां में हंगामों हो जावै।” जद यीसु बैतनिय्याह में समौन जिकौ कोढ़ ऊं ठीक होयौ उणरै घर हो, तो एक लुगाई संगमरमर रै बरतन में मूंगो अंतर लेन आई, अर जद वो खाणौ खाणै बैठा हा तो उणरै माथे ऊपर ढ़ोळ दियौ। ओ देख नै उणरा चेला रिसियां अर कैवण लाग्या, “ओ क्यूं बिगाड़यो? इनै तो बड़िया मोल में बैच नै गरीबो में बांट सकै हा।” ओ जांण नै यीसु वांनै कयौ, “लुगाई नै क्यूं तंग करौ हो? वां म्हारै साथै भलाई की है। कंगाल तो थौरे साथै हमेसां रैवै है, पण म्हैं थौरे साथै हमेसां कोनीं रहूंला। वां म्हारै सरीर ऊपर जिकौ ओ अंतर ढ़ोळियो है, वो म्हारै गाड़े जाणै रै लिए कियो है। म्हैं थौरे ऊं साचौ कहूं की सगळै संसार में जठै कठै ई सुभ संदेस रौ परचार कियो जावैला, वठै इण लुगाई अर इणरै कांम री चरचा भी उणरी याद में की जावैला।” तो यहूदा इस्‍करियोती, जिकौ बारैह चेलौ में ऊं एक हो, परधान याजकौ रै खनै जान कयौ, “जे म्हैं यीसु नै थौरे हाथ पकड़ा दूं तो थै म्हनै कांई दे हो?” वे उणनै तीस चांदी रा सिक्‍का गिण नै दे दिया। अर वो उणी वेळा उणनै धोखे ऊं पकड़ाणै रौ मौकौ सौध रियौ हो। अखमीरी रोटी रै तैंवार रै पैलै दिन, चेला यीसु रै खनै आयनै पूछण लाग्या, “थूं कठै चावै है की म्हैं थांरै वास्तै फसह खाणै री तैयारी करौ?” यीसु कयौ, “गांव रै उण मिनख रै खनै जायनै उण ऊं कैवौ, ‘गुरु कैवै है की म्हारौ वगत नैड़ौ है। म्हैं अपणै चेलौ रै साथै थांरै उठै तैंवार मनाऊंला।’ ” अर चेलौ नै यीसु री आग्या मानी अर फसह रौ खाणौ तैयार कियो। जद सिंझ्या हुई तो वो बारैह चेलौ रै साथै खाणौ खाणै बैठा। जद वे खा रिया हा तो यीसु कयौ, “म्हैं थौरे ऊं साचौ कहूं की थौरे में ऊं एक म्हनै धोखे ऊं पकड़ावैला।” इण ऊपर वे घणा मौळा पड़ीया, अर हरैक उणनै पूछण लाग्या, “हे परभु, कांई वो म्हैं हूं?” यीसु जबाब दियौ, “जिकौ म्हारै साथै थाळी में हाथ घालियो, वोहीज म्हनै धोखे ऊं पकड़ावैला। म्हैं, मिनख रै बेटे नै तो मरणौ ही है ज्यूं उणरै बारै में लिख्यौ है, पण उण मिनख रै लिए हाय है जिणरै जरियै म्हैं मिनख रौ बेटौ धोखे ऊं पकड़ायौ जावूंला। जे उण मिनख रौ जनम नीं होतो, तो उणरै लिए भलौ होतो।” तो उणनै धोखे ऊं पकड़ानैवाळौ यहूदा कयौ, “हे रब्‍बी, कांई वो म्हैं हूं?” यीसु उणनै कयौ, “थूं कैह रियौ।” जद वे खा रिया हा तो यीसु नै रोटी ली, अर आसीस मांग नै तोड़ी, अर चेलौ नै देन कयौ, “लौ खाओ, आ म्हारी देह है।” पछै उण कटोरो लेन धन्यवाद कियो, अर उणौनै देन कयौ, “थै सैंग इण में ऊं पीयो, क्यूंकै ओ वाचा रौ म्हारौ वो लोई है, जिकौ घणौ रै वास्तै पापों री माफी रै वास्तै बहायौ जावै है। म्हैं थौरे ऊं कहूं की अंगूर रौ रस उण दिन तांई कदैई नीं पीऊंला, जैड़ी तांई थौरे साथै अपणै परम पिता रै राज में नयो नीं पीऊं।” भजन गाणें रै पछै वे जैतून रै भाखर ऊपर जाता रिया। तो यीसु उणौ नै कयौ, “थै सैंग आज री रात म्हारै कारण ठोकर खाओला, क्यूंकै लिख्यौ है, ‘म्हैं गवाळे नै मारूंला, अर टोळे री लरड़ियां तितर बितर हो जावैला।’ पण म्हैं आप जी उठनै रै पछै थौरे ऊं पैला गलील में जाऊंला।” इण वास्तै पतरस वीनैं कयौ, “जे सैंग थांरै बारै में ठोकर खावै तो खावै, पण म्हैं कदैई ठोकर नीं खाऊंला।” यीसु उण नै कयौ, “म्हैं थांरै ऊं साचौ कहूं की आज री रात कुंकड़े रै बांग दैणै ऊं पैला, थूं म्हनै तीन वार ओळखणै ऊं मना करैला।” पतरस उणनै कयौ, “जे म्हनै थांरै साथै मरणौ भी पड़ै, तौभी म्हैं थांनै कदैई अस्वीकार नीं करूंला।” अर ऐड़ौ सैंग चेलौ भी कयौ। तो यीसु आपरै चेलौ रै साथै गतसमने नाम री एक जगा ऊपर आया अर आपरै चेलौ ऊं कैवण लाग्या, “एठैज बैठा रीजो, जैड़ी तांई म्हैं उठै जान पराथना करूं।” वो पतरस अर जबदी रै दोनो बेटौ नै साथै लेन ग्या, अर उदास अर व्याकुल होणै लाग्या। तो यीसु उणौ नै कयौ, “म्हारौ जी घणौ उदास है, एठै तांई की म्हारौ प्रांण निकळ रियौ है। थै एठैज ठैरौ अर म्हारै साथै जागता रौ।” पछै वो थोड़ा आगै चालन गोडा टेक नै आ पराथना की, “हे म्हारा पिता, जे हो सकै तो ओ दुख रौ कटोरो म्हारै ऊं टळ जावै। तौभी ज्यूं म्हैं चावूं व्योह नीं, पण ज्यूं थूं चावै व्यौंही होवै।” पछै वो चेलौ रै खनै आन उणौनै सूतोड़ा देख नै पतरस ऊं कयौ, “कांई थै म्हारै साथै एक घड़ी भी नीं जाग सकया? जागता रौ, अर पराथना करता रौ की थै परीकसा में नीं पड़ो। आतमा तो तैयार है, पण सरीर कमजोर है।” पछै उणरै दूजी वार जान आ पराथना की, “हे म्हारै पिता, जे ओ म्हारै दुख रौ कटोरो पीए बिना कोनीं हट सकै तो थांरी इछा पूरी होवै।” तो यीसु आन उणौनै भळै सोयोड़ा देख्यां, क्यूंकै उणरी आंखे ऊंग ऊं भरयोड़ी ही। उणौनै छोड़ नै वो भळै जातौ रियौ, अर उणी सबदो में भळै तीजी वार पराथना की। तो वो चेलौ रै खनै आन उणौ नै कयौ, “कांई थै अबै तांई सूता हो, अर आराम करौ हो? देखौ, वो घड़ी आयगी है, अर म्हैं, मिनख रौ बेटौ पापियो रै हाथ पकड़ायौ जावूंला। उठो, चालौ। देखौ, म्हारौ पकड़ाणै वाळौ नैड़ौ आ गियौ है।” वो ओ कैह रियौ हो की यहूदा जिकौ बारैह में ऊं एक है आयौ, अर उणरै साथै परधान याजकौ अर लोगां रै बुढ़ियों री घणी भीड़, तरवारो अर लाठियां लेन आई। विसवासघाती उणनै ओ कैन इछारौ दियौ हो, “म्हैं जीणनै चूमूं ला वोहीज यीसु है अर उणनै पकड़ लिजो।” अर तुरत यीसु रै खनै आन कयौ, “हे रब्‍बी, नमस्कार!” अर उणनै घणौ चूमयो। यीसु उणनै कयौ, “हे दोसत, जीण कांम रै वास्तै थूं आयौ है, उणनै कर ले।” तो वे खनै आन यीसु नै पकड़ लियौ। यीसु रै साथियो में ऊं एक नै आपरी तरवार निकाळी अर महायाजक रै दास ऊपर चलान उण रौ कांन उडा दियौ। तो यीसु उणनै कयौ, “अपणी तरवार म्यांन में राख दे, क्यूंकै जिकौ तरवार चलाई वे सैंग तरवार ऊं नास किया जावैला। कांई थूं जांणै कोनीं की म्हैं अपणै पिता ऊं विनती कर सकूं हूं, अर वो सरगदूतो री बारैह पलटन ऊं घणी म्हारै खनै अबार भेज दैला? पण पवितर सास्तर री लिखयोड़ी बातां यूंही कीकर पूरी होवैला? इण बातां रौ पूरौ होणौ जरुरी है।” उण वगत यीसु नै भीड़ ऊं कयौ, “कांई थै तरवारो अर लाठियां लेन म्हनै डाकू रै ज्यूं पकड़नै रै वास्तै निकळिया हो? म्हैं रोज मिंदर में बैठन उपदेस देतो हो, जद तो थै म्हनै कोनीं पकड़यौ। पण ओ सैंग इण वास्तै होयौ है की भविसयदाता रा वचन पूरा होवै।” तो सैंग चेला उणनै छोड़नै नाह गिया। तो यीसु नै पकड़नै वाळा उणनै काइफा नाम रौ महायाजक रै खनै लेन गिया, जठै सास्तरी अर बुढ़ियां भेळा होया हा। पतरस आगौ ई आगौ उणौरै लारै लारै महायाजक रै आंगणै तांई गियौ, अर मांयनै जायनै परिणाम देखणै रै वास्तै नौकरो रै साथै बैठ गियौ। परधान याजकौ अर हैंग महासभा यीसु नै मार नोखणै रै वास्तै उणरै विरोध में झूठी गवाई री सौध में हा, पण घणा झूठा गवाई आया पछै भी नीं पायो। आखरी में दो जणा आया, अर कयौ, “इण कयौ है की, परमेसर रौ मिंदर ढ़ा सकूं हूं अर तीन दिन में बणा सकूं हूं।” तो महायाजक ऊभौ होन यीसु नै कयौ, “कांई थूं कोई जबाब कोनीं दे? ऐ लोग थांरै विरोध में कांई गवाई दैवै है?” पण यीसु कीं नीं बोलियां। तो महायाजक उणनै कयौ, “म्हैं थनै जीवते परमेसर री सौगन देवूं हूं की जे थूं परमेसर रौ बेटौ मसीह है, तो म्हौ नै कैह दे।” यीसु उणनै कयौ, “थै आप ही कैह दियौ। म्हैं थांनै ओ भी कैह रियौ हूं की अबै ऊं थै म्हनै, मिनख रै बेटे नै सर्वसक्तिमान परमेसर रै जीमणै ओर बैठौ, अर आभै रै बादळो ऊपर आवतौ देखोला।” इण कारण महायाजक आपरा गाभा फाड़या अर कयौ, “इण परमेसर रौ अपमांन करयौ है, अबै म्हौ नै गवाई री जरुत कोनीं? देखौ, थै अबार आ निंदा सुणी हो! थै कांई सोचो हो?” उणौ जबाब दियौ, “ओ प्रांण डंड रै लायक है।” तो उणौ उणरै मूंडै माथै थूकयौ अर उणरै मुक्‍का ठोकया, दूजौ भी थप्पड़ों मारी अर कयौ, “हे मसीह, म्हौ नै भविसयवांणी करन बता की थनै कीण ठोकयो?” पतरस बाहर आंगणै में बैठौ हो की एक दासी उणरै खनै आई अर कयौ, “थूं भी यीसु गलीली रै साथै हो।” उण सैंगो रै सांमै मना किनी, “म्हैं कोनीं जांणूं थूं कांई कैह री है।” जद वो बाहर फाटक री तरफ गियौ, तो दूजी दासी उणनै देख लियौ अर उठै रै लोगां नै कयौ, “ओ भी तो यीसु नासरी रै साथै हो।” पतरस सौगन खान भळै मना किनी, “म्हैं उण मिनख नै कोनीं जांणूं।” थोड़ी देर पछै लोगां नै जे उठै ऊभा हा, पतरस रै खनै आन कयौ, “सचमुच थूं भी उणमे ऊं एक है, क्यूंकै थांरी बोली थांरा भेद खोले है।” तो वो कोसनै अर सौगन खाणै लागौ, “म्हैं उण मिनख नै कोनीं जांणूं।” अर तुरत कुंकड़े बांग दीनी। तो पतरस नै यीसु री कयोड़ी बात याद आई। “कुंकड़े रै बांग दैणै ऊं पैला थूं तीन बार म्हारौ इन्कार करैला।” अर वो बाहर जायनै जोर-जोर ऊं रोयो। जद संवार हुई तो सैंग परधान याजकौ अर लोगां रै मुखिया नै यीसु नै मार नोखणै री सलाह किनी। उणौ यीसु नै बांधनै ले जायनै पिलातुस हाकिम रै हाथ में सूंप दियौ। जद यीसु रै विसवासघाती यहूदा देखियौ की वो दोसी ठैरायौ गियौ है तो वो पछतायो अर वे तीस चांदी रा सिक्‍का परधान याजकौ अर नेताओं रै खनै पाछौ लायौ, अर कयौ, “म्हैं निरदोस नै घात रै वास्तै पकड़ान पाप करयौ है!” उणौ कयौ, “म्हौरै कांई? थूं इज जांणै।” तो वो उण सिक्‍को नै मिंदर में फेंकन जातौ रियौ, अर जायनै खुद नै फांसी लगा दी। परधान याजकौ नै उण सिक्‍को नै लेन कयौ, “इणनै मिंदर रै खजानै में जमा करणा ठीक कोनीं है, क्यूंकै आ तो खून रौ मोल है।” आखरी उणौ एको करन उण सिक्‍को ऊं परदेसियां रै गाड़नै सारू कुम्हार रौ खेत मोल ले लियौ इण कारण वो खेत आज तांई खून रौ खेत कैलावै। तो जिकौ वचन यिर्मयाह भविसयदाता रै कयोड़ो हो वो पूरौ होयौ, “उणौ वे तीस सिक्‍का लिया अर वो ऐ सिक्‍का है जिणनै इजरायल रै लोगां उणरी कीमत मे लेणे रै लिए तैय किया हा। अर ज्यूं परभु म्हनै आग्या दी ही व्यौंही उणौनै उण सिक्‍को ऊं कुम्हार रै खेत नै मोल में ले लियौ।” जद यीसु हाकिम रै सांमै ऊभौ हो तो हाकिम उणनै पूछयौ, “कांई थूं यहूदियो रौ राजा है?” यीसु उणनै कयौ, “थूं आप ही कैह रियौ है।” जद परधान याजकौ अर लोगां रा मुखिया उण माथै दोस लगा रिया हा, तो उण कोई जबाब कोनीं दियौ। इण कारण पिलातुस उणनै कयौ, “कांई थूं सुणै कोनीं ऐ थांरै विरोध में कितरी गवाईयों दे रिया है?” पण यीसु उणनै एक बात रौ भी जबाब कोनीं दियौ, इण ऊं हाकिम नै घणौ अचूम्बो होयो। हाकिम री आ रीत ही की उण तैंवार में लोगां रै वास्तै किणी एक बंदी नै जीण नै वे चावै हा, छोड़ देता हा। उण वगत उणरै उठै बरअब्बा नाम रौ एक मांनयोड़ो बंदी हो। जद भीड़ भेळी होई, तो पिलातुस उणौ नै कयौ, “थै किणनै चावौ की म्हैं थौरे वास्तै छोड़ दूं? बरअब्बा नै, या यीसु नै जे मसीह कहीजै है?” क्यूंकै वो जांणतौ हो की उणौनै यीसु नै अपणै जळण रै कारण पकड़ायौ है। पिलातुस न्याव री गधी माथै बैठौ हो तो उणरी लुगाई वीनै संदेस भेज्यौ, “थूं उण धरमी रै मामले में हाथ मती घाते, क्यूंकै म्हैं आज सपनै में उणरै कारण घणौ दु:ख उठायौ है।” परधान याजकौ अर बुढ़ियों लोगां नै समझाया की वे बरअब्बा नै छुड़ावै अर यीसु रौ नास करावै। हाकिम उणौनै पूछयौ, “इण दोनूं में ऊं कीण नै चावौ हो की म्हैं थौरे वास्तै छोड़ दूं?” उणौ कयौ, “बरअब्बा नै।” पिलातुस उणौ नै पूछयौ, “पछै यीसु नै, जिकौ मसीह कहीजै है, इणरौ कांई करूं?” सैंगो उणनै कयौ, “वो सूली ऊपर चढ़ायौ जावै।” पिलातुस कयौ, “कांई, इण कौणसो गुनों कियो?” पण वे भळै भी चिला-चिलायनै कैवण लागा, “वो सूली ऊपर चढ़ायौ जावै।” जद पिलातुस देख्यौ की कांई ठीक होणै वाळौ नीं है, उलटो झगड़ौ वदैह रियौ है, तो उणै पांणी लेन भीड़ रै सांमै आपरा हाथ धोया अर कयौ, “म्हैं इण धरमी रै खून ऊं निरदोस हूं, थै इज जांणौ।” सैंग लोगां जबाब दियौ, “इणरौ खून म्हौ माथै अर म्हांरी औळाद माथै होवै!” इण माथै उणै बरअब्बा नै उणौरै लिए छोड़ दियौ, अर यीसु रै कोड़ा लगान सूंप दियौ, की सूली ऊपर चढ़ायौ जावै। तो पिलातुस रै सिपाईयो यीसु नै किले में ले जान सगळी पलटन उणरै च्यांरूमेर भेळी की, अर उणरै गाभा उतारनै उणनै लाल रंग रौ चोगो पैरायौ, अर कांटो रौ मुगट गूंथनै उणरै माथे ऊपर राखियौ, अर उणरै जीवणे हाथ में डंडों पकड़ा दियौ अर उणरै आगै गोडा टेकन उणरी मजाक उडानै लाग्या अर कयौ, “हे यहूदियो रा राजा, नमस्कार!” अर उणरै माथै थूकण लागा, अर वोहीज डंडों लेन उणरै माथे ऊपर ठोकण लाग्या। जद वे उणरी मजाक करनै रिया तो वो चोगो उण ऊपर ऊं उतारनै पाछा उणरा गाभा उणनै पैराया, अर सूली ऊपर चढ़ानै ले गिया। सैहर ऊं निकळते वेळा कुरैन रौ रैवण वाळौ समौन नाम रौ एक मिनख मिळयो, अर उणौ इणनै यीसु री सूली उठान ले चलनै सारू मजबूर करयौ। वे उण जगा पूगया जिकौ गुलगुता या खोपड़ी री जगा कहीजै है। उणौ पित मिळायोड़ो अंगूररस पीण सारू दियौ, पण उणै चाखनै पीणो नीं चाहयौ। तो उणौ उणनै सूली पर चढ़ायौ, अर परची नोख नै उणरा गाभा बांट लिया, अर उठै बैठनै उणरौ पेहरो देवण लाग्या। अर उणरौ दोसपत्र उणरै माथे रै थोड़ो ऊपर चिपका दियौ, की “ओ यहूदियो रौ राजा यीसु है”। तो उणरै साथै दो डाकू एक जीमणी तरफ अर एक डावी, सूली ऊपर चढ़ाया गिया। उठै आण-जाण वाळा मिनख यीसु री निंदा करता होया अर माथो हिलाता होया ओ कैवता हा, “हे मिंदर ढ़ावण वाळा अर तीन दिनां में पाछौ बणा देण वाळा, अपणै आप नै बचा। जे थूं परमेसर रौ बेटौ है, तो सूली ऊं नीचे उतर आ”। इण तरीकै ऊं परधान याजकौ भी सास्तरी अर बुढ़ियों रै साथै मजाक करनै कैवता हा, “इण दूजौ नै बचाया, अर अपणै आप नै कोनीं बचा सकै। ओ तो ‘इजरायल रौ राजा’ है अबै सूली ऊपर ऊं उतर आवै तो म्हौ विसवास करौ। उणै परमेसर ऊपर विसवास राखियौ है, जे वो इणनै चावै है तो अबै उणनै छोड़ा दे, क्यूंकै उणै कयौ हो, ‘म्हैं परमेसर रौ बेटौ हूं।’ ” इण तरैह डाकू भी जिकौ इणरै साथै सूली पर चढ़ाया गिया हा, उणरी निंदा करता हा। दोपार बारैह बजे ऊं लेन तीन बजे तांई उण सगळै परदेस में अंधारौ हो गियो हो। लगभग तीन बजे में यीसु जोर ऊं पुकारनै कयौ, “एली, एली, लमा सबक्तनी?” अरथ “हे म्हारै परमेसर, हे म्हारै परमेसर, थै क्यूं म्हनै छोड़ दियौ?” जे उठै ऊभा हा, उणमे ऊं कितौ ई ओ सुणन कयौ, “वो तो एलियाह नै पुकारै है।” उणमे ऊं एक तुरत दौड़नै रुई लेन खाटी अंगूरो में डूबोन डंडें में लगान उणै यीसु नै सूंपायो। दूजौ कयौ “रैण दो, देखौ एलियाह उणनै बचाणै आवै है की कोनीं।” तो यीसु नै ऊंची आवाज ऊं पुकार नै अपणौ प्रांण छोड़ दियौ। उणी वेळा मिंदर रौ परदो ऊपर ऊं नीचे तांई फाटनै दो टुकड़ा हो गिया, धरती कांप उठी, चटानों फाट गी, कबरौ खुलगी अर घणा पवितर लोगां रौ सरीर पाछौ जी उठयौ। अर यीसु जी उठनै रै पछै वे कबरौ में ऊं निकळनै पवितर सैहर यरुसलेम में गिया अर घणौ नै दिखाई दिया। तो सूबेदार अर जे उणरै साथै यीसु रौ पेहरो देता हा, भूकम्प अर जिकौ कीं होयौ देखनै डर गिया अर कैवण लागा, “साचौ ओ परमेसर रौ बेटौ हो!” उठै घणी लुगाईयां जिकौ गलील ऊं यीसु री सेवा करती होई उणरै साथै आई ही, आगौ ऊं देख री ही। उणमे मरियम मगदलीनी, अर याकूब अर योसेस री मां मरियम, अर जबदी रै बेटौ री मां ही। जद सांझ हुई तो यूसुफ अरिमतिया रौ एक धनवान मिनख, जिकौ आप ही यीसु रौ चेलौ हो, आयौ। उणै पिलातुस रै खनै जायनै यीसु री लास मांगी। तो पिलातुस दैणै री आग्या दी। यूसुफ नै लास लेयनै उणै नवी उजळी चादर में लपेटी, अर उणनै अपणी नवी कबर में राखी जे उणै चटान में खोदाई ही, अर कबर रै द्वार ऊपर मोटो भाठौ लुढ़कान चाल दियौ। मरियम मगदलीनी अर वो दूजी मरियम उठै कबर रै सांमै बैठी ही। दूजै दिन जिकौ तैयारी रै दिन रै बाद रौ दिन हो, परधान याजकौ अर फरीसी पिलातुस रै खनै भेळा होयनै कयौ, “हे महाराज, म्हौ नै याद है की उण धोखेबाज जद जीवतौ हो, कयौ हो, ‘म्हैं तीन दिन रै पछै जी उठूंला।’ इण वास्तै आग्या दे की तीजै दिन तांई रुखाळी की जावै, ऐड़ौ नीं होवै की उणरा चेला आयनै उणनै छांनै ऊं ले जावै अर लोगां ऊं कैवै, ‘वो मरयोड़ौ में ऊं जी उठयौ है।’ जे ऐड़ौ हो गियौ तो ओ धोखो पैलै वाळै ऊं बूरो होवैला।” पिलातुस उणनै कयौ, “सिपाई नै लेयनै जाओ, अपणी समझ रै अनुसार रूखाळी करौ।” वे सिपाईयो नै साथै लेयनै गियौ, अर भाठै ऊपर मोहर लगान कबर री रूखाळी की। सब्त रै दिन रै पछै हपतै रै पैलै दिन तड़कै मरियम मगदलीनी अर वो दूजी मरियम कबर नै देखणै आई। अर एक बड़ों भूकम्प होयौ, क्यूंकै परभु रौ एक दूत सरग ऊं उतरियौ अर कबर रै खनै आयनै उणै भाठै नै आगौ सिरका दियौ, अर उण ऊपर बैठ गियौ। उणरौ रूप बिजळी सो अर उणरा गाभा हिम रै जैड़ा उजळा हा। उणरै भय ऊं पेरेदार कांपण लाग्या, अर मुड़दो जैड़ा हो गिया। सरगदूत लुगाईयां नै कयौ, “मत डरौ, म्हैं जांणूं की थै यीसु नै सौधौ हो जिकौ सूली माथै चढ़ायौ गियौ हो। वो एठै कोनीं है, पण आपरै वचन रै अनुसार जी उठयौ है। आ जगा देखौ, जठै परभु री लास राखी ही। अर हाथोहाथ जायनै यीसु रै चेलौ नै कैवौ की ‘मरयोड़ौ में ऊं जी उठयौ है, अर वो थोरै ऊं पैला गलील में जावैला, उठै उणरौ दरसण पाओला!’ देखौ, म्हैं थौरे ऊं कैह दियौ।” वे भय अर घणै आंणंद रै साथै कबर रै खनै ऊं जायनै उणरै चेलौ नै समाचार दैणै सारू दौड़ी गी। तद यीसु उणौनै मिळिया, अर कयौ, “नमस्कार”। यीसु रै खनै आन उणनै दण्डवत करन उणरै चरणौ ऊं लिपट गी। तो यीसु उणनै कयौ, “मत डरौ, म्हारै भाइयो ऊं जायनै कैवौ की गलील में जाता रै, उठै म्हारा दरसण करैला।” वे जा ही री ही की कईक पेरेदार सैहर में आयनै सगळा हाल परधान याजकौ नै कैन सुणाया। तो परधान याजकौ नै बुढ़ियों रै साथै भेळा होयनै समति किनी अर सिपाईयो नै घणी चांदी देन कयौ, “ओ कैवणौ की, ‘रात रा म्हौ सो रिया हा, जद उणरा चेला आयनै छांनै ऊं ले गिया।’ अर जे आ बात हाकिम रै कांनै पड़ी तो म्हैं उणनै समझा दे हो अर थांनै जोखम ऊं बचा ले हो।” सिपाईयो रूपिया ले लिया अर ज्यौ ही कियो व्यौंही उणौनै सिखाया हा आहीज बात आज तांई यहूदियो में चालै है। इग्यारैह चेला गलील में उण भाखर ऊपर गिया, जीणनै यीसु उणौनै बतायौ हो। उणौ यीसु रा दरसण करन परणाम करयौ, पण किणी-किणी नै वैम होयौ। यीसु उणौरै खनै आयनै कयौ, “सरग अर धरती रौ सगळौ अधिकार म्हनै दियौ गियौ है। इण वास्तै थै जाओ, सैंग देसो रै लोगां नै चेला बणाओ, अर उणौ नै पिता पुत्र पवितर आतमा रै नाम ऊं बतिस्मो दो। अर उणौ नै सगळी बातां जे म्हैं थांनै आग्या दीनी है, मानणी सिखाओ, अर याद राखौ म्हैं जगत रै अनत तांई हमेसां थौरे साथै हूं।” परमेसर रा बेटा यीसु मसीह रै सुभ संदेस री सरूआत इण तरैह होई, ज्यूं यसायाह भविसयदाता री किताब मे लिख्योड़ौ है के, “देख, म्हैं म्हारै दूत नै थारै आगै मेलूं, जिकौ थारै वास्तै मारग तैयार करैला। रिंदरोही में एक हेलौ करणवाळै री आवाज सुणाई दैय री है, ‘परभु रै वास्तै मारग तैयार करौ, जिण ऊं परभु रौ मारग खुलीयोड़ो रैवै।’ ” यूहन्‍ना आयौ, जिकौ कांकड़ मे बतिस्मो देतो अर पाप री माफी खातर मन फिराओ रौ बतिस्मो लेवणा रौ परचार करतौ। यहूदिया परदेस रा अर यरुसलेम सैहर रा रैवण वाळा घणा ही लोग बारै निकळनै उणरै खनै गिया अर आपरा पापों नै मांन नै यरदन नदी में यूहन्‍ना ऊं बतिस्मो लियौ। यूहन्‍ना ऊंट रै बालों रा बण्योड़ा गाभा पेरतो अर आपरी कमर माथै चमड़े रौ पटो बान्धियोड़ो राखतौ अर वो टिडियां अर सेहद खावतो हो। यूहन्‍ना ओ परचार करतौ के, “म्हारै पछै जिकौ आवण वाळौ है, वो म्हारै ऊं घणौ ताकतवर है। म्हैं तो इण लायक ई कोनीं की उणरै पगरखो री डोरी खोल सकूं। म्हैं तो थांनै पांणी ऊं बतिस्मो देवूं हूं, पण वो थांनै पवितर आतमा ऊं बतिस्मो देवेला।” उण दिनां में यीसु गलील देस रा नासरत हेर ऊं आने, यरदन नदी में यूहन्‍ना ऊं बतिस्मो लियौ। वो पांणी ऊं बारै निकळन आयौ, जद हाथो हाथ आभै नै खुलतो अर परमेसर री आतमा नै कबूड़ै रै ज्यूं खुद रै माथै उतरती देखी, अर आ आकासवाणी होई के, “थूं म्हारौ लाडलौ बेटौ है, म्हैं थारै ऊं घणौ राजी हूं।” पवितर आतमा यीसु नै हाथो हाथ सुनी जगा मे भेजिया। सुनी जगा में चाळीस दिन तांई सैतान यीसु नै पाप करनै वास्तै लालच दियौ अर यीसु सुनी जगा रै जीवो रै बीच में रिया, पण सरगदूत यीसु री सेवा करता रिया। यूहन्‍ना रै जेळ में जावण रै पछै, यीसु गलील में आया अर परमेसर रै सुभ संदेस रौ परचार सरू करयौ। यीसु कयौ, “वगत पूरौ हो गियो है अर परमेसर रौ राज नैड़ौ आयग्यौ है, मन फिराओ अर परमेसर रै सुभ संदेस माथै विसवास राखौ।” यीसु गलील री झील रै कांठै फिरता वगत समौन अर उणरा भाई अन्‍द्रियास नै झील में जाळ नोखते देख्यां क्यूंकै वे मछली पकड़न वाळा हा। यीसु उणौनै कयौ, “म्हारै लारै आओ, म्हैं थांनै परमेसर रै खनै लोगां नै लावण वाळा बणाऊंला।” वे हाथोहाथ जाळ नै छोड़नै उणरै लारै चाल दिया। थोड़ाक आगै जायनै, वे जबदी रा बेटा याकूब अर उणरा भाई यूहन्‍ना नै नाव माथै जाळ नै सावळ करता देखिया। यीसु उणौनै हाथो हाथ बुलाया अर वे आपरै पिता जबदी नै मजूरो रै साथै नाव माथै छोड़नै यीसु रै लारै चाल दिया। पछै यीसु अर उणरा चेला कफरनहूंम मे आया अर यहूदियो रै आराम रा दिन यीसु पराथना घर में जायनै परमेसर रा वचन सिखावण लागा। लोग यीसु ऊं परमेसर रा वचन सुणनै अचूम्बो करयौ, क्यूंकै यीसु सास्तरियों रै ज्यूं कोनीं, पण अधिकारी रै ज्यूं परमेसर रा वचन सिखावता हा। उणीज वगत, पराथना घर में एक आदमी हो, उण में एक दुस्ट आतमा ही, वो चिलायनै कयौ, “ हे नासरत रा यीसु, थूं म्हारै ऊं कांई चावै? कांई थूं म्हारौ नास करणौ चावै? म्हैं थनै जांणूं हूं, थूं कुण है? थूं परमेसर रौ पवितर मिनख है।” यीसु हाका करनै उणनै कयौ, “चुप रैह अर उण मे ऊं निकळ जा।” जद दुस्ट आतमा उणनै मरोड़नै हाका करया अर उणमे ऊं निकळग्यौ। इण माथै सगळा लोग अचूम्बो करयौ अर आपस मे बातां करनै लागा, “आ कांई बात है? आ तो कोई नवी सीख है। यीसु अधिकार रै साथै दुस्ट आतमा नै भी आग्या दैवै है अर वे यीसु री आग्या नै मांनै है।” यीसु री आ बात हाथो हाथ गलील देस रै खनै री सगळी जगा मे पूग गी। इण पछै यीसु पराथना घर मे ऊं निकळनै याकूब अर यूहन्‍ना रै साथै, समौन अर अन्‍द्रियास रै घर आया। समौन री सासु नै ताव छड़योड़ौ हो अर वां माचा में सुती ही। आ बात लोग यीसु नै बताई। तो यीसु उणरै खनै जायनै, उणरौ हाथ पकड़नै ऊभी करी अर उणरौ ताव उतरगो। वा उणरी सेवा करनै लागी। उण इज दिन सांझ रै वगत जणै सूरज डूबगो, तो लोग बिमारों नै अर जिणमे दुस्ट आतमा ही, उणनै भी उणरै खनै लाया। नगर रा घणा जणा घर रा द्धार माथै भेळा होया। यीसु घणा लोगां नै जिकौ तरैह तरैह री बिमारियों ऊं दुखी हा, उणौनै सावळ करिया, घणा जणा नै दुस्ट आतमाओ ऊं छुड़ाया अर दुस्ट आतमाओ नै बोलण तांई नीं दिया। क्यूंकै वे यीसु नै जांणता हा के, यीसु परमेसर रौ पवितर मिनख है। सवार होणै ऊं घणौ पैला, यीसु उठनै एक एकांत जगा माथै गिया अर पराथना करनै लाग्या। जद समौन अर उणरा साथी यीसु नै ढ़ूढ़नै गिया। यीसु मिलया, तो उणौनै कयौ, “हैंग जणा थांनै ढ़ूढ़ रिया है।” यीसु समौन अर उणरा साथियो नै कयौ, “आओ अपां ओर खनै री बस्तियो मे चालौ, म्हैं उठै भी परचार करूं, क्यूंकै म्हैं इण वास्तै आयौ हूं।” यीसु गलील मे पराथना घरो में जायनै परचार करता अर दुस्ट आतमा लागोड़ा लोगां नै सावळ करता रिया। एक कोढ़ी यीसु खनै आयौ अर उणरै सांमै गोडा टेकनै विणती करनै कैवण लागौ, “हे परभु जे थूं चावै तो म्हनै कोढ़ ऊं सावळ कर सकै है।” यीसु उण माथै तरस खाने उणरै हाथ लगान कयौ, “म्हैं चावूं हूं, की थूं कोढ़ ऊं सावळ हो जा।” उणीज वगत उणरौ कोढ़ झड़ग्यौ अर वो सुद्ध होईग्यौ। जद यीसु उणनै चेतायनै हाथोहाथ विदा करयौ, अर उणनै कयौ, “देख किणनै ही मत कहीजै। पण जायनै याजक नै दिखाइजे अर थारै सुद्ध होणा री ऐवज मे मूसा जिकौ ही तैय करयौ है वा भेट चढ़ा। जिण ऊं आ गवाई रैवै के परमेसर थारौ कोढ़ झाड़ियौ।” पण वो बारै जायनै इण बात रौ घणौ परचार करयौ अर इती फैलान लागौ के यीसु पाछौ खुलम खुलो सैहर मे कोनीं जा सकया, पण सैहर रै बारै कांकड़ जैड़ी जगा मे रिया अर उठै ई च्यांरूमेर ऊं मिनख यीसु खनै आवता रिया। थोड़ा दिनां रै पछै यीसु पाछा कफरनहूंम हैर में आया अर आ बात सुणी के वे घर मे है। पछै इता लोग भेळा होया, की किवाड़ रै बारै भी जगा कोनीं री अर यीसु उणौनै उपदेस दे रिया हा। उण वगत कीं लोग एक लकवा होयोड़ो मिनख नै च्यार मिनख खाट माथै उठान उठै लेन आया। पण जद वे भीड़ रै कारण यीसु रै खनै कोनीं पोच सकया, तो वे छपरा नै उधेड़ दियौ अर जिण रै नीचे यीसु हा अर उण माचा नै जिण माथै लकवे रौ बिमार पड़ियौ हो नीचे उतार दियौ। यीसु उणरौ विसवास देखनै उण लकवे रै बिमार नै कयौ, “हे बेटा, थारा पाप माफ होया।” जणै घणा ही सास्तरी जिकौ उठै बैठा हा, आप-आपरा मन मे विचार करण लागा, “ओ मिनख ऐड़ौ क्यूं कैवै? ओ तो परमेसर रौ अपमांन करै है। परमेसर नै छोड़ नै कुण पाप माफ कर सकै?” यीसु हाथोहाथ आपरी आतमा मे जांण लियौ के वे खुद रै मन मे ऐड़ा विचार कर रिया है अर उणौ ऊं कयौ, “थै थौरे मन मे ओ विचार क्यूं कर रिया हो। आसान कांई है? कांई लकवा रै बिमार नै ओ कैवणौ के थारा पाप माफ हो गिया, या ओ कैवणौ के उठ थारौ माचो उठायनै चाल? पण इण ऊं थै जांण लौ के म्हैं, मिनख रौ बेटौ हूं अर म्हनै धरती माथै पाप माफ करणै रौ अधिकार है।” पछै यीसु उण लकवे रै रोगी ऊं कयौ, “म्हैं थारै ऊं कहूं। उठ, थारौ खाट उठायनै थारै घर जा।” वो उठयौ अर खाट उठायनै सगळौ रै सांमै ऊं निकळनै जातौ रियौ। मिनख इण बात माथै अचूम्बो करयौ अर परमेसर री बड़ाई करण कैवण लागौ, “म्हैं ऐड़ौ कदैई नीं देख्यौ।” यीसु पाछौ निकळनै गलील री झील रै नजीक गिया अर घणी भीड़ उणरै खनै आई अर वो उणौनै उपदेस देवण लागा। जावता वगत वो हलफाई रा चुंगी लेवण वाळा बेटा लेवी नै चुंगी चौकी माथै बैठौ देख्यौ, अर यीसु उणनै कयौ, “म्हारै लारै आ जा।” अर वो उठ नै यीसु रै लारै चाल दियौ। जद यीसु चेला रै साथै लेवी रै घर मे खाणौ खाणै बैठिया, उण वगत घणा ही चुंगी लेवण वाळा अर दूजा गळत कांम करण वाळा रै साथै खाणौ जीम रिया हा। क्यूंकै वे यीसु रै लारै हो गिया हा। सास्तरियों जिकौ फरीसी हा ओ देखनै के यीसु तो दूजा गळत कांम करण वाळौ रै अर चुंगी लेवण वाळा रै साथै जीमे है। तो वे यीसु रै चेलौ ऊं कयौ, “वो चुंगी लेवण वाळौ रै अर दूजा गळत कांम करण वाळौ रै साथै क्यूं खावै पीवै? यीसु नै ओ नीं करणौ चाहीजै।” यीसु ओ सुणनै उणौनै कयौ, “भला चंगा नै वैद री जरुरत कोनीं, पण बीमारो नै है। मे धरमियो नै कोनीं पण पापियो नै बुलाणै आयौ हूं।” एक भलौ मिनख यीसु नै ओ पूछयौ, “यूहन्‍ना रा चेला अर फरीसियों रा चेला उपवास करै, पण आपरा चेला उपवास क्यूं कोनीं करै?” क्यूंकै उण वगत यूहन्‍ना रा अर फरीसियों रा चेला उपवास राखता हा। यीसु उणौनै कयौ, “जद तांई बींद जांनियां रै साथै है, कांई वे उपवास कर सकै? ऐड़ौ कदैई नीं होवै। जद तांई बींद उणौ रै साथै है, वे उपवास नीं करैला। पण वो दिन आवैला जद बींद जांनियां ऊं न्यारौ कियो जावैला, उण वगत वे उपवास करैला। “कोई नवा कपड़ा री कारी पुराणा कपड़ा माथै कोनीं लगावै, नीं तो वा कारी धोवणा रै पछै उणनै वळै फाड़ दैवै। क्यूंकै नवो कपड़ो धोया पछै भेळौ होवै है अर पुराणा नै खेंच लेवे। इणीज तरैह नवा अंगूर रस नै पुराणी मसको मांयनै कोई नीं राखै, नीं तो नवो अंगूर रस थोड़ा दिनां में फूल नै मसको नै फाड़ दैला इण ऊं नवा अंगूर रस अर मसको दोनो रौ नास हो जावैला। पण नवो अंगूर रस नवी मसको मे भरेला। क्यूंकै नवी मसको रै फुलिजण रै कारण वा फुटेला कोनीं।” ऐड़ौ होयौ के यीसु अर उणरा चेला यहूदियो रै सब्त रै दिन खेतो मे ऊं जावता हा, उण वगत यीसु रा चेला चालता चालता गेहूंं री बालै तोड़नै लागा। जणै फरीसी यीसु नै कयौ, “देख, थारा चेला ओ कांम क्यूं कर रिया है। जिकौ कांम आज अपांरै कायदे ऊं सब्त रै दिन नीं कर सकौ हो?” यीसु जबाब दियौ, “कांई थै ओ कदैई कोनीं पढ़ियो के जद अपांरा वडेरा दाऊद अर उणरा साथियो नै भूख लागी, वे कांई करयौ? वो कीकर अबियातार महायाजक रै वगत परमेसर रै मिंदर मे जायनै भेट री रोटियां खाई अर आपरा साथियो नै भी दी। जिणनै कायदे ऊं सिरफ याजक ही खा सकै।” इण पछै यीसु उणौनै कयौ, “आराम रौ दिन मिनखौ वास्तै बणायोड़ो है, नीं के मिनख इण दिन रै वास्तै। इण वास्तै म्हैं, मिनख रौ बेटौ आराम रा दिन रौ भी धणी हूं।” यीसु पाछा पराथना घर मे गिया, उठै एक मिनख हो जिणरौ हाथ सुखोड़ो हो। लोग इण मौका मे हा के यीसु आराम रा दिन सुखोड़े हाथ वाळा मिनख नै सावळ करै ताकी, वे यीसु माथै इलजाम लगा सकै। यीसु सुखे हाथ वाळै मिनख ऊं कयौ, “सांमै ऊभौ हो जा।” पछै वे लोगां नै कयौ, “कांई आराम रा दिन भलौ करणौ बड़िया है या खराब करणौ, जीव नै बचावणौ या मारणौ?” पण वे चुप रिया। यीसु उण लोगां री मन री कड़ाई ऊं दुखी होयनै, रीसे बळता च्यांरूमेर देख्यौ अर सुखोड़े हाथ वाळा मिनख ऊं कयौ, “थारौ हाथ सांमै कर।” वो हाथ सांमै करयौ अर उणरौ हाथ पैला जैड़ौ सावळ हो गियो। पछै फरीसी बारै जायनै हाथोहाथ हेरोदियो रा लोगां रै साथै यीसु रै विरोध मे एक रैवण लागा के, यीसु रौ कीण तरैह ऊं नास करौ। यीसु आपरै चेलौ रै साथै गलील री झील खनै गिया तो गलील ऊं एक मोटी भीड़ उणरै लारै होयगी। यहूदिया ऊं, यरुसलेम ऊं, इदूमिया ऊं, यरदन नदी रै पार ऊं, सूर ऊं अर सैदा रै आजू-बाजू ऊं एक घणी भीड़ ओ सुणनै की वे कैड़ा अचूम्बे रा कांम करै, उणरै खनै आया। वो आपरै चेलौ नै कयौ, “भीड़ रै कारण ऊं एक छोटौ नाव म्हारै वास्तै तैयार रैवै ताकी वे सगळा म्हनै दबा नीं सकै।” क्यूंकै यीसु घणौ नै सावळ करिया हा, इण वास्तै जिता लोग बीमार हा वे यीसु रै हाथ लगावण वास्तै उण माथै पड़ता हा। जिण में भी दुस्ट आतमा ही, जद वे यीसु नै देखता, तो उणरै सांमै पड़ जावता अर हाका करनै कैवती के, “थूं परमेसर रौ बेटौ है।” तो यीसु उणौनै चेताणी देता के, “म्हनै परगट मत कर की म्हैं कुण हूं।” पछै यीसु भाखर माथै चढ़गा अर जिणनै वो चावता हा, उणौनै आपरै खनै बुलाया वे यीसु रै खनै आया। यीसु उणौ मे ऊं बारैह चेलौ नै चुणया के वे यीसु रै साथै साथै रैवै। यीसु उणौ नै सुभ संदेस रौ परचार करनै भेजिया। वे यीसु रा प्रेरित चेला कहीजिया। उणौनै दुस्ट आतमाओ नै निकाळनै रौ हक हो। यीसु जिण नै भेजिया वे हा, समौन जिणरौ नाम वे पतरस राख्यौ। जबदी रौ बेटौ याकूब, अर याकूब रौ भाई यूहन्‍ना, जिणरौ नाम उणै बूअनरगिस राख्यौ, जिणरौ अरथ है “गरजन रौ बेटौ,” अर अन्‍द्रियास, फिलिप्पुस, बरतुल्मै, मती, थोमा, हलफाई रौ बेटौ याकूब अर तद्दै अर देस भगत समौन, अर यहूदा इस्‍करियोती जिकौ बाद मे यीसु रै साथै विसवासघात करनै यीसु नै पकड़ायौ। पछै यीसु घर आयौ तो ऐड़ी भीड़ भेळी होई के, यीसु अर उणरा चेला रोटी ई कोनीं जीम सकया। जणै उण रा घर आळा ओ सुण्यौ के यीसु आयोड़ा है। तो वे उणनै आपरै साथै ले जांणै वास्तै निकळया, क्यूंकै लोग कैवता हा के, यीसु रौ मन ठिकाणे कोनीं है। सास्तरी जिकौ यरुसलेम ऊं आया हा, ओ कैवता हा, “उणमे दुस्टआतमा है। वो दुस्टआतमाओ रै सरदार री सगति ऊं दुस्टआतमाओ नै बारै निकाळै है।” इण वास्तै यीसु उणौनै खनै बुलानै बात कैवण लागा, “सैतान कीकर सैतान नै काढ़ सकै? मांनलो किणी राज मे फूट पड़ जावै, तो वो राज कीकर रैह सकै ला? अर मांनलो किणी घर परिवार मे फूट पड़ै, तो वो घर परिवार कीकर एक रैह सकै ला? इण वास्तै सैतान खुद रौ ही विरोधी होने खुद मे ही फूट घाले, तो उणरौ राज पाठ कीकर रैह सकै ला? उणरौ तो नास ही हो जावैला। पण कोई भी मिनख किणी ताकतवर रै घर मे घुसनै जैड़ी तांई उण नै बांध नीं दे, उणरौ माल कोनीं लूट सकै। मे थौरे ऊं साची कहूं हूं के मिनख रा हैंग पाप अर निंदा जिकौ वे करता हा परमेसर माफ कर सकै। पण जिकौ कोई पवितर आतमा रै विरोध मे बोले तो, वो कदै भी माफ नीं करयौ जावैला, वो हमेसां रै वास्तै पाप रौ अपराधी ठैरैला।” क्यूंकै सास्तरी ओ कैवता हा के, “उण में सैतान है।” उण वगत उणरी मां अर उणरा भाई आया अर बारै ऊभा रेन यीसु नै बुलावण वास्तै एक जणा नै भेज्यौ। यीसु रै च्यांरूमेर भीड़ बैठी ही, तो वो उणनै कयौ, “देख, थारी मां अर थारा भाई, थारी बेन थनै बारै बुलावै है।” यीसु उणनै जबाब दियौ, “म्हारी मां अर म्हारा भाई कुण है?” वे जिकौ उणरै आड़ै पाड़ै बैठा हा, देखन कयौ, “देखौ आ म्हारी मां अर ऐ म्हारा भाई अर बेन ऐ है। क्यूंकै जिकौ कोई परमेसर री इछा माथै चालै, वो हीज म्हारौ भाई बेन अर मां है।” यीसु पाछौ गलील री झील रै कांठै खनै उपदेस देवण लागा अर भीड़ उणरै खनै भेळी होईगीं के वे झील रै कांठै माथै एक नाव माथै चढ़नै बैठ गिया अर भीड़ झील रै कांठै ऊभी री। वो उणौनै दिस्टांतो मे घणी हारी बातां सिखाणै लागा अर खुद रा उपदेस दिया, “ध्यांन दे नै सुणौ, एक किसान, बीज बोणै वास्तै निकळियौ। बोते वगत कीं तो मारग रै खनै पड़िया अर पंखेरू आने उणनै चुग लिया। कीं काकरावाळी जमीन मे पड़िया जठै उणनै घणी रेत कोनीं मिळी, हली रेत नीं मिलण री वजै ऊं फटाफट उग गिया। जद तावड़ो तपयो, तो बळगा अर जड़ नीं पकड़नै री वजै ऊं सूख गिया। कीं तो कांटो री झाड़ियौ मे पड़िया अर कांटो री झाड़ियौ भेळी होयनै उणनै दबा दिया, अर फळ कोनीं लागा। पण कीं बड़िया जमीन में पड़िया अर वे उगिया, अर मोटा होयनै फळिया। कोई तीस गुणा, कोई साठ गुणा, अर कोई तो सौ गुणा फळिया।” पछै यीसु कयौ, “जिणरै खनै सुणणै वास्तै कांन है, वो सुण ले।” यीसु जद ऐकला हा। तो कीं सुणणवाळा अर बारैह भेज्यौड़ा चेला यीसु ऊं दिस्टांत कथा रौ मतलब पूछयौ। यीसु कयौ, “थांनै तो परमेसर रै राज री समझ दियोड़ी है, पण दूजा वास्तै सगळी बातां दिस्टांतो मे होवै है। इण वास्तै की, ‘वे देख सकता हा, पण वो देखणौ चावै कोनीं। अर वे सुण सकता हा, पण वे समझता कोनीं। पर वे समझता रैवता तो पाप छोड़ नै मन परमेसर री तरफ फेरता अर परमेसर उणौनै माफ करता।’ ” पछै यीसु उणौ ऊं कयौ, “थै आ बात नीं समझौ तो दूजी बातां नै कीकर समझोला? करसो जिकौ बीज बोवे वो परमेसर रौ वचन है। जिकौ बीज मारग रै खनै पड़िया ऐ वे लोग है जिकौ सुणै तो है, पण सैतान हाथोहाथ आयनै उण वचन नै ले जावै। अर जिकौ बीज काकरा री जमीन मे पड़िया, ऐ वे लोग है, जिकौ वचन नै सुणन हाथोहाथ राजी खुसी ऊं मांन लेवे। पण जड़ नीं पकड़नै री वजै ऊं थोड़े ही वगत पछै, जद वचन री वजै ऊं वाणे माथै तकलीफ या दु:ख आवै, तो वे आपरै विसवास नै भूल जावै। जिकौ झाड़ियौ में पड़िया, ऐ वे लोग है, जिकौ वचन तो सुण्यौ पर संसार री चिंता, धन रौ लालच, घणी चीजों रौ लोभ उण में आन वचन नै दबा दैवै अर वो बेकार रै जावै। पण जिकौ बड़िया जमीन में पड़िया, ऐ वे लोग है, जिकौ वचन सुणन हिरदा में मांन लेवे अर कोई तीस गुणा, कोई साठ गुणा अर कोई सौ गुणा फळिया।” यीसु कयौ, “कांई दीयौ इण वास्तै करै के दीया नै कटोरा रै या खटिया रै नीचे मेले? दीयौ इण वास्तै करै के चोगट माथै मेले, ताकी पूरा घर नै उजाळौ मिळै। क्यूंकै जिकौ भी लुकयोड़ो है, वो सगळौ रै सांमै आवैला, जिकौ ई ढ़कयोड़ौ है, वो सगळौ रै सांमै खोलीजैला। जिणरै खनै सुणणै वास्तै कांन है, वो सुण ले।” पछै वो उणौ ऊं कयौ, “सावचेत रैवौ की जिकौ थै सुणौ, जिण नाप ऊं थै नापो उणीज नाप ऊं परमेसर थांनै नापेला, अर थांनै घणौ दियौ जावैला। क्यूंकै जिणरै खनै है, उणनै भळै देवेला अर जिणरै खनै कीं कोनीं है, उण खनै ऊं जिकौ भी है ले लेवे ला।” पछै यीसु कयौ, “परमेसर रौ राज ऐड़ौ है, ज्यूं कोई करसो जमीन माथै बीज छांटे। वो रात रौ सुतो अर दिन रौ जागियो, पण बीज कदै उगियौ अर मोटो होयौ आ करसा नै ठाह कोनीं पड़ी। धरती अपणै आप फळ लावै, पैला कोंपळौ, पछै हिटिया अर पछै हिटिया में दाणा। पण जद दाणा पाक जावै, तो वो दातरो लेने काटे, क्यूंकै कातीरो आई गियो है।” पछै वो कयौ, “अपां परमेसर रै राज री उपमा कीण ऊं देवो अर कीण बात ऊं उणरौ वरणन करां? वो राई रै दाणे रै जैड़ौ है, जिनै जमीन में छांटो तो वो जमीन रै हैंग बीज ऊं नेनो रैवै। पण जिण वगत उणनै छांटो, तो वो उगनै सागपात मे सबां ऊं मोटो हो जावै अर उणरी ऐड़ी मोटी डाळियो निकळै के आकास रा पंखेरू उणरी छाया में आळो घाल सकै।” वो लोगां नै घणी कहाणियो ऊं वचन सुणाता अर वो उणौनै समझ रै हिसाब ऊं वचन बताता हा। अर बिना कहाणी रै यीसु लोगां नै कीं भी नीं कैवता, पण वे अलग ऊं आपरा चेलौ नै हैंग बातां रौ मतलब बतावता। उण दिन जद सांझ होई, तो यीसु चेलौ नै कयौ, “आओ अपां झील रै उण पार चालौ।” वे भीड़ नै छोड़नै रवाना हो गिया, जिण नाव माथै यीसु हा उण नाव माथै चेला भी हा। उणौरै साथै भळै नाव हा। अणचेत मोटी आंधी आई अर लेहरौ नाव में आवण लागी अर नाव में पांणी भरीजण लागौ। पण यीसु गादी माथै सोह रिया हा। तो वे उणनै जगायनै कयौ, “हे गुरु, कांई थनै चिंता कोनीं की अपां डूबण वाळा हों?” तो यीसु उठनै आंधी नै हाका करनै कयौ, “रूक जा।” अर पांणी ऊं कयौ, “थम जा, सान्त हो जा।” आंधी रूकगी अर घणी सानति होई। पछै यीसु चेलौ ऊं कयौ, “थै क्यूं डरौ हो? कांई थांनै हाल तांई विसवास कोनीं?” पण चेला घणा डरगा अर आपस मे कैवण लागा, “ओ कुण है? आंधी अर पांणी ही इणरौ हुकम मांनै है?” यीसु अर उणरा चेला झील रै दूजा कांठै गिरासेनियो रै देस में पूगा। ज्यूं ही यीसु नाव मे ऊं उतरियौ तो एक मिनख जिणमे दुस्ट आतमाओ ही कबरीसतान मे ऊं निकळनै यीसु ऊं मिळयो। वो कबरौ में ही रैवतौ हो अर कोई भी उणनै हांकळौ ऊं नीं बांध सकतौ हो। क्यूंकै उणनै घणौ ही बेड़ियों अर हांकळौ ऊं बांधयो हो, पण वो हांकळौ नै तोड़ देतो हो अर बेड़ियों रा टुकड़ा-टुकड़ा कर देतो हो। वो किणी रै वस मे नीं आवतौ हो। वो रात दिन कबरौ अर भाखरो में फिरतौ रैवतौ हो अर हाका करतौ रैवतौ अर खुद रौ भाटा ऊं लौहीं काढ़ देतो। वो यीसु नै आगौ ऊं देखनै दौड़ियो अर उणनै दण्डवत करयौ। पछै जोर ऊं हाको करनै कयौ, “हे यीसु, परम परधान परमेसर रा बेटा। म्हनै थारै ऊं कांई कांम? थनै परमेसर री सौगन है के, म्हनै दुख मती दे।” क्यूंकै यीसु उण ऊं कयौ हो, “हे सैतान, इण मिनख मे ऊं निकळ जा।” यीसु उण ऊं पूछयौ, “थारौ कांई नाम है?” तो वो यीसु नै कयौ, “म्हारौ नाम सेना है, क्यूंकै म्हौ घणा हों।” अर वो यीसु ऊं घणी विणती करी, “म्हौ नै इण देस ऊं बारै मती भेज।” भाखर माथै गंडूरौ रौ एक मोटो टोळो चरतौ हो। अर दुस्ट आतमाओ यीसु ऊं विणती करी के, म्हौ नै उण गंडूरौ में भेज दे। तो यीसु उणौनै हुकम दियौ अर दुस्ट आतमाओ उण मिनख मे ऊं निकळनै गंडूरौ मे घुस गिया अर उण टोळे में दो हजार गंडूरा हा। ढ़ाळ में गुड़ता गुड़ता झील में पड़गा अर डूब नै मर गिया। गंडूरौ नै चरावण वाळा दौड़नै नगर अर गांव में ओ समाचार सुणायो अर जिकौ होयौ उणनै लोग देखनै आया। जद वे यीसु रै खनै आया, तो ओ देखनै डर गिया की जिण मिनख मे दुस्ट आतमाओ री सेना ही, वो गाभा पैरयोड़ो अर सानति ऊं यीसु खनै बैठौ है। देखणवाळौ नै उणमे जिणमे दुस्ट आतमाओ ही, अर गंडूरौ रौ सगळौ हाल, कैहन सुणायो। अर वे यीसु नै हाथ जोड़नै कैवण लागा के म्हौरै अठै ऊं जाओ। अर जद यीसु नाव माथै चढ़नै लागा, तो वो जिण में दुस्ट आतमा ही, यीसु ऊं विणती करनै लागौ के, “म्हनै थारै साथै चालण दे।” पण यीसु उणनै मना करनै कयौ, “थारै घर जा अर थारै लोगां नै बता के, परभु थारै माथै दया करनै कितौ मोटा कांम करयौ है।” तो वो मिनख गियौ अर इण बात रौ परचार दस नगरो मे करनै लागौ के, यीसु म्हारै खातर कैड़ौ मोटो कांम करयौ। जिकौ भी ओ सुणता, अचूम्बो करता हा। जद यीसु नाव ऊं इण कांठै माथै पाछा आया, तो एक मोटी भीड़ उणरै खनै भेळी होई। तो याईर नाम रौ पराथना घर रौ परधान आयौ अर यीसु नै देखनै उणरै पगां पड़ियौ। अर यीसु ऊं घणी विणती करनै लागौ, “म्हारी नेनी बेटी मरण माथै है, थूं आयनै उण माथै हाथ राख वां ठीक हो नै जीवती रैह।” तो यीसु उणरै साथै रवाना हो गिया। अर घणी भीड़ यीसु रै लारै होयगी अर लोग यीसु नै हाथ लगाणै वास्तै उण माथै पड़ रिया हा। वठै भीड़ में एक लुगाई ही जिणै बारैह साल ऊं लोई पड़नै री बीमारी ही। वां घणा वेदो ऊं इलाज करायो हो, अर आपरौ सगळौ माल खरच करया पछै भी उणरै की फायदो कोनीं होयौ, पण और भी हालत बिगड़ री ही। वो यीसु रै बारै मे सुणनै भीड़ में यीसु रै लारै आई अर उणरै गाभे रै हाथ लगा दियौ। क्यूंकै उणरै मन मे विसवास हो के, “जे म्हैं उणरै गाभे रै हाथ लगा लूं ला, तो म्हैं सावळ हो जाऊंला।” अर उणीज वगत उणरौ लोई पड़नो बंद हो गियो अर वो अपणै आप जांणगी के म्हैं उण बीमारी ऊं ठीक होई गी हूं। यीसु हाथोहाथ जांण गिया के उणमे ऊं सगति निकळी अर वे भीड़ में मुड़ नै कयौ, “कुण म्हारै गाभे नै हाथ लगायो?” उणरा चेला उणनै कयौ, “थूं देखे है के भीड़ थारै माथै पड़ै है नै थूं कैवै, ‘कुण म्हनै हाथ लगायो?’ ” पण यीसु च्यांरूमेर उण नै देखण लागा जिकौ उणनै हाथ लगायो हो। तो वां लुगाई ओ जांणनै के, म्हारै साथै कांई होयौ है। वां डरती अर कांपती आई अर यीसु रै पगां मे पड़नै सगळी बात हाची-हाची बता दी। यीसु उणनै कयौ, “बेटी, थारै विसवास थनै सावळ करी है। राजी-खुसी ऊं जा अर थारी बीमारी ऊं बचयोड़ी रैह।” यीसु ओ कैह रियौ ही हो की पराथना घर रा परधान रै घर ऊं कीं मिनख आयनै कयौ, “थारी बेटी तो मरगी, अब गुरु नै तकलीफ क्यूं दैवै है?” जिकौ बात मिनख कर रिया हा, उणनै यीसु अनसूणो करण पराथना घर रै सरदार ऊं कयौ, “डर मत, पण विसवास राख।” यीसु पतरस अर याकूब अर याकूब रै भाई यूहन्‍ना नै छोड़नै, बाकी किणनै भी आपरै साथै नीं आवण दिया। पराथना घर रा सरदार रै घर में जायनै, यीसु लोगां नै घणा ही रोवता अर कळपता देखिया। तो वो मांयनै जायनै उणौनै कयौ, “थै सब क्यूं रोवो अर कळपो हो? छोरी मरी कोनीं आ तो सोह री है।” मिनख यीसु रौ मजाक उडावण लागा, पण वो हैंग नै काढ़नै छोरी रै मां-बाप अर वो चेलौ रै साथै ओरा मे गयो, जठै छोरी पड़ी ही। अर छोरी रौ हाथ पकड़नै उण ऊं कयौ, “तलीता कूमी” जिणरौ मतलब है, “ऐ छोरी म्हैं थारै ऊं कैवूं उठ।” अर छोरी हाथोहाथ उठनै चालण लाग गी। वा बारैह साल री ही। जद आ बात होई तो वे इण माथै अचूम्बो करयौ। पण यीसु उणौ नै चेतायनै आग्या दी, “आ बात कोई जांण नीं पावै।” अर पछै कयौ, “इणनै कीं खावण नै दो।” यीसु पराथना घर रा सरदार रै घर ऊं निकळ नै नासरत हेर मे आया जठै वो मोटो होया हा अर उणरा चेला भी उणरै लारै आया। यहूदिया रै आराम रा दिन यीसु पराथना घर में उपदेस देवण लागा अर घणा मिनख सुण नै अचूम्बो करयौ अर कैवण लागा, “इणनै ऐ बातां कठै ऊं आईगी? ओ कोण सो ग्यांन है जिकौ इणनै मिळियौ है? कैड़ा सामरथ रा कांम इण हाथो ऊं परगट होवै? कांई ओ वो सुथार कोनीं जिकौ मरियम रौ बेटौ, अर याकूब, योसेस, यहूदा, अर समौन रौ भाई है? कांई उणरी बेनां अपांरै बीच मे कोनीं रैवै?” इण सगळी बातां रै कारण उठै रा मिनख यीसु अर उणरी सीख नै नीं मांनी। यीसु उणौ ऊं कयौ, “भविसयदाता रौ आपरौ देस, अर आपरौ परिवार, अर आपरौ घर नै छोड़ और सगळी जगा मांन मिळै।” इण वास्तै वे उठै कोई सामरथ रा कांम नीं कर सकया, सिरफ थोड़ाक बिमारो माथै हाथ राखनै उणौनै सावळ करया। यीसु उणौरै विसवास री कमी माथै अचूम्बो करयौ। अर पछै यीसु च्यांरूमेर रा हैंग गांवों में उपदेस करता रिया। यीसु उण बारैह चेलौ नै आपरै खनै बुलाया अर उणौनै दो-दो करनै भेजिया अर उणौनै दुस्ट आतमाओ माथै हक दियौ। वो उणौ नै हुकम दियौ, “मारग रै वास्तै गेडी नै छोड़नै कीं मती लेजो, नीं रोटी, नीं झोळो, नीं बटवे में रूपिया। पण जूता पेरजो अर जिकौ गाभा पैरयोड़ा है उणरै अलावा दूजा गाभा साथै मती लेजाइजो।” यीसु उणौ ऊं ओ भी कयौ, “जिण घर मे थौरो कदर करै बुलावै, तो जद तांई उण जगा ऊं विदा नीं होवो तद तांई उणीज घर मे रुकियोड़ा रौ। जिण जगा रा मिनख थौरी कोनीं मांनै अर थौरी कोनीं सुणै तो उठै ऊं चालता ही आपरै पगां री धूड़ झाड़ लौ ताकी उणौनै आ चेताणी मिळै के, उणौरौ नास रौ कारण वे खुद है।” तो भेज्यौड़ा चेला जायनै लोगां में परचार करयौ के, पाप ऊं मन फेरो। अर भेज्यौड़ा चेला घणा लोगां नै दुस्ट आतमा ऊं छुड़ाया अर घणा हारा बिमारो माथै जैतून रौ तेल लगाने उणौनै सावळ करया। हेरोदेस राजा भी उणरी बातां सुणी, क्यूंकै यीसु रौ नाम फैलगो हो। लोगां कयौ, “यूहन्‍ना बतिस्मो देण वाळौ मरयोड़ौ मे ऊं जी उठयौ है, इण वास्तै वो परचां दैवै है।” दूजा मिनख ओ कैवता हा, “ओ भविसयदाता एलियाह है जिकौ पाछौ आयग्यौ है।” पण कीं दूजा कयौ, “भविसयदाता मे ऊं कोई एक है।” जद हेरोदेस ऐ बातां सुणी वो कयौ, “जिण यूहन्‍ना रौ माथो म्हैं कटवायो हो, वो ही जीवतौ हो गियौ।” क्यूंकै हेरोदेस आपरै भाई फिलिप्पुस री लुगाई हेरोदियास ऊं ब्याव कर लियौ हो अर वो हेरोदियास रै कैणै ऊं मिनखौ नै भेजन यूहन्‍ना नै पकड़नै जेळ मे घाल दियौ हो। क्यूंकै यूहन्‍ना राजा हेरोदेस ऊं केवतो रैवतौ हो के, “थारै भाई रै जीवता रैवता उणरी लुगाई नै आपरी लुगाई बणान राखणौ चौखौ कोनीं।” इण वास्तै हेरोदियास यूहन्‍ना ऊं बैर राखती अर उणनै मरवाणो चावती पण ऐड़ौ नीं हो सकयौ। क्यूंकै राजा हेरोदेस यूहन्‍ना नै धरमी अर पवितर मिनख जांणनै उण ऊं डरतौ हो, अर इण वास्तै उणरी रकसा करतौ हो, अर हमेसां उणरी बातां सुणनै घणौ घबरातो हो, पण तौभी उणनै उणरी बातां सुणणी चौखी लागती। राजा हेरोदेस आपरै जनम दिन माथै आपरै परधानो, अर सेनापतियो, अर गलील रै मोटा लोगां वास्तै जीमण करयौ। ओ दिन हेरोदियास रै वास्तै आप री करणा रौ सही मौकौ हो। तो हेरोदियास री बेटी मांय आई, अर नाचनै राजा हेरोदेस नै अर उणरै साथै बैठण वाळा मेमाणो नै राजी कर दिया। तद राजा छोरी ऊं कयौ, “थूं जिकौ चावै मांग, म्हैं थनै देवूंला।” अर वो उण ऊं वचन दियौ, “म्हैं म्हारौ आधो राज्य तांई जिकौ भी थूं म्हारै ऊं मांगेला म्हैं थनै दूंला।” वां छोरी आपरी मां खनै जायनै उण ऊं पूछयौ, “म्हैं राजा ऊं कांई मांगू?” मां हेरोदियास बोली, “यूहन्‍ना बतिस्मो देवण वाळा रौ माथो मांग।” वा हाथोहाथ राजा रै खनै मांयनै आई अर उण ऊं विणती की, “म्हैं चावूं हूं, की थूं अबार हाथोहाथ यूहन्‍ना बतिस्मो देवण वाळा रौ माथो एक थाळी मे मंगा।” तो राजा घणौ दुखी होयौ, पण खुद रा वचन री वजै ऊं जिकौ वो सगळौ रै सांमै वचन दियौ हो उणनै टाळ नीं सकयौ। आखरी में राजा हाथोहाथ एक सिपाई नै हुकम देने भेज्यौ के, यूहन्‍ना रौ माथो काट नै लावै। वो सिपाई जेळ मे जायनै उणौ माथो काटयो, अर माथो एक थाळी मे रख नै लायौ अर छोरी नै दियौ अर छोरी आपरी मां नै दियौ। ओ सुणनै यूहन्‍ना बतिस्मो देवण वाळा रा चेला आया अर उणरी लास नै लेने उणनै कबर में घाल दी। यीसु रा भेज्यौड़ा चेला यीसु खनै पाछा आया अर जिकौ कीं भी वे करयौ अर सिखाया, हैंग यीसु नै बतायो। वो उणौनै कयौ, “आओ अपां किणी न्यारी जगा चालनै थोड़ो आराम करौ।” क्यूंकै उठै घणा लोग आता-जाता हा अर उणौनै खावणा रौ मौकौ ई नीं मिळतौ हो। इण वास्तै वे नाव माथै चढ़नै, एक न्यारी सुणसाण जगा माथै जाता रिया। घणा ही जणा उणौ नै जाता देखनै पिछांण लियौ, अर हैंग नगरों ऊं भेळा होने उठै पैदल दौड़िया अर उण ऊं पैला जायनै पूगिया। जद यीसु नाव ऊं उतरनै मोटी भीड़ देखी, अर यीसु नै उणौ माथै तरस खायौ। क्यूंकै वे उण लरड़िया ज्यूं है, जिणरौ कोई चराणियो नीं हो। अर वो उणौ नै घणी सारी बातां सिखावण लागौ। जद दिन ढ़ळ रियौ हो, तो उणरा चेला उणरै खनै आयनै कयौ, “आ सुनी जगा है, अर दिन ढ़ळग्यो रात होय री है। लोगां नै आजू बाजू रै गांवों अर बस्तियो मांय जावण दो, ताकी वे आपरै वास्तै कीं खाणै वास्तै मोल ले।” यीसु उणौनै जबाब दियौ, “थै ही उणौनै कीं खाणै वास्तै दो।” चेला उण ऊं कयौ, “तो कांई म्हौ दो सौ चांदी रा सिक्‍को री रोटियां मोल लाओ अर उणौनै जीमाओ? ऐड़ौ नीं हो सकै। इता सिक्‍का अपांरै खनै कोनीं है।” यीसु उणौनै कयौ, “जायनै देखौ, अपांरै खनै किती रोटियां है?” चेला पतौ करनै आया, “पांच रोटिया अर दो मछलिया है।” तो यीसु उणौनै कयौ, “सगळौ नै हरी घास माथै बैठा दो।” चेला उणौनै सौ सौ अर पचास पचास लोगां नै भेळा बैठा दिया। यीसु पांच रोटियां अर दो मछलिया नै हाथ मे ली अर सरग री और देखनै परमेसर नै धन्यवाद दियौ, अर रोटियां तोड़-तोड़नै चेलौ नै देतो गियौ की वे लोगां नै परोसे अर वे दो मछलिया भी उण सगळौ में बांट दी। सगळा खाने धापगा। सगळौ रै धाप नै जिमणा रै पछै बारैह छाबड़िया रोटी अर मछलियो रा टुकड़ा चेलौ खनै बचग्या हा। जिता लोग रोटियां खाई, उण मे पांच हजार सीरप आदमी हा। पछै यीसु हाथोहाथ आपरै चेलौ नै नाव माथै चढ़नै वास्तै मजबूर करिया ताकी वे यीसु ऊं पैला उण पार बैतसैदा हैर पूग जावै, जद तांई यीसु लोगां नै विदा करै। उणौनै विदा करनै यीसु भाखर माथै पराथना करनै गिया। जद सूरज डूबगो, तो जिण नाव मे चेला हा झील रै बीच मांय ही, पण यीसु अबै तांई अकेलो जमीन माथै हो। यीसु देख्यौ के चेला नाव नै चलावता चलावता हाफगा हा, क्यूंकै हवा सांमै ऊं ही। अर रात रै चौथे पेहर रौ वगत हो, यीसु झील रै ऊपर चालता होया उणौरै खनै आया अर उणौ ऊं आगै निकळनै वाळा ही हा के, चेला यीसु नै झील रै पांणी माथै हालता देखनै समझया के, भूत है। जद वे हाका करनै लागा, क्यूंकै हैंग उणनै देखनै डरगा हा। पण वो हाथोहाथ उणौनै कयौ, “हीमत राखौ, म्हैं हूं, डरौ मती।” तद यीसु उणौरै साथै नाव माथै चढ़यौ, अर सांमै री हवा रूक गी, इण ऊं चेला घणौ अचूम्बो करणै लागा। क्यूंकै वे उण रोटियो रै बारै मे नीं समझ रिया हा पण उणौरै मन कठोर हो गिया हो। जद वे झील पार उतरनै गनैसरत हैर मांय पूगिया अर नाव झील रै कांठै माथै लगायो। जद वे नाव माथै ऊं उतरिया, तो लोग हाथोहाथ यीसु नै पेचाणगा। वे खनै रै हैंग जगा दौड़िया अर लोगां नै यीसु उठै आयोड़ा बतायो तो लोग बिमारो नै खाट माथै यीसु खनै लावण लागा। अर जठै कठैई गांव, नगर, या बस्तियो मांय यीसु जावतौ हो, लोग आपरा बिमारों नै बजार रा चौक मे लायनै उण ऊं विनती करता हा की वो उणौ नै आपरै कपड़ा रै पलै रै हाथ लगावण दे, अर जिता उणनै हाथ लगावता सावळ हो जाता हा। एक दिन कीं फरीसी अर कीं सास्तरी जिकौ यरुसलेम ऊं आया हा, यीसु खनै भेळा होया। वे यीसु रा चेलौ नै यहूदियो री रीत ऊं हाथ धोया बिना रोटी खावता देखिया। क्यूंकै फरीसी अर हैंग यहूदी, वडेरा रा रीति रिवाज माथै हालता हा अर जैड़ी तांई आपरै रीति रिवाज ऊं हाथ नीं धो लेवता वे जीमता नीं हा। जद वे बजार ऊं आवता तो जैड़ी तांई वे स्‍नान नीं कर लेवता, वे रोटी नीं खावता अर घणी ही दूजी रीतियां ही, जिनै वे मानता हा, ज्यूं कटोरा नै, लोटो नै अर तांबे रा बरतन नै धोवणा मांजणा। इण वास्तै वे फरीसी अर सास्तरी यीसु ऊं पूछयौ, “थारा चेला वडेरा रा रीति रिवाज माथै क्यूं कोनीं चालै? यहूदियो री रीत हाथ धोया बिना रोटी क्यूं खावै?” वो उणौनै कयौ, “भविसयवांणी मे यसायाह थौरे जैड़ा कपटियो रै बारै में घणौ पैला कैह दियौ हो, जिकौ लिख्योड़ौ है, ‘परमेसर कैवै है, ऐड़ा लोग मूंडा ऊं तो म्हारौ मांन करै, पण उणौरौ मन म्हारै ऊं आगौ रैवै। ऐ बेकार मे म्हारी उपासना करै, क्यूंकै वे मिनखां री आग्याओं नै म्हारै आग्या बणान सिखावे।’ क्यूंकै थै परमेसर री आग्या नै टाळनै मिनखौ री रीति रिवाज नै मांनौ हो।” उणै उणनै कयौ, “थै किता चालाक हो जिकौ आपरा रीति रिवाज नै मांनण वास्तै परमेसर री आग्या नै टाळ देवो। क्यूंकै मूसा कयौ है, ‘आपरै मां बाप रौ आदर कर अर जिकौ कोई आपरा मां बाप नै ऊंधो बोले ला, वो जरुर मरेला।’ पण थै ओ सिखाओ हो के, जद ही थांरा मां बाप थारै ऊं किणी चीज री आस करै, तो थै ओ कैवौ, ‘आ चीज तो म्हैं परमेसर नै चढ़ा दी है।’ अर ओ कैहन थै मां बाप री सेवा ऊं बच जाओ हो। ऐड़ौ सीखान थै उणनै आपरा मा-बाप री की सेवा नीं करनै देवो। इण ज्यूं थै थौरी रीति सीखान, जिकौ थै बणाई हो, परमेसर रौ वचन टाळ देवो हो, अर थै ऐड़ा घणा कांम करौ हो।” पछै यीसु भीड़ नै आपरै खनै बुलानै उणौ ऊं कयौ, “थै सगळा म्हारी सुणौ अर समझौ। ऐड़ी कोई चीज कोनीं जिकौ मिनख नै बारै ऊं आयनै भीस्ट करै, पण जिकौ की मिनख रै मांयनै ऊं निकळै, वोहीज उणनै भीस्ट करै है। जिण रै खनै सुणण वास्तै कांन है, वो सुण ले।” पछै यीसु भीड़ नै छोड़ नै घर में गिया, तो उणरा चेला इण बात रै बारै में उण ऊं पूछयौ। वो उणौनै कयौ, “थै गैला हो? कांई थै नीं समझौ के जिकौ चीज बारै ऊं मिनख मे जावै, वा उणनै भीस्ट नीं कर सकै? क्यूंकै वा उण रा मन में कोनीं जावै, पण वा पेट में जायनै सरीर ऊं बारै निकळ जावै है।” ओ कैहन वो हैंग खाणै री चीजों नै पवितर बताई। पछै वो कयौ, “जिकौ भूंडा विचार मिनख मे ऊं निकळै, वो ही मिनख नै भीस्ट करै। क्यूंकै विचार, यानि जिकौ विचार मिनख रै मन मे ऊं निकळै, बुरा विचार, कुकरम, चोरी, हत्या, व्यभिचार, लोभ, हरैक तरैह रा खोटा कांम, छळ, बुरी निजर, निंदा, गेलाई अर चुगली करणौ। अर ऐ हैंग खोटी बातां जिकौ मे ऊं निकळै ऐ हीज मिनख नै भीस्ट करै।” पछै यीसु उठै ऊं सूर नाम रै हैर में आयगा अर एक घर में गिया। यीसु नीं चावता के लोगां नै ओ ठाह पड़ै के वे उठै है। पण वे खुदनै लूका नीं सकयौ। उणीज वगत एक लुगाई जिणरी नेनी बेटी में दुस्ट आतमा ही, यीसु री बातां सुणनै उठै आई अर उणरै पगां में पड़गी। वा लुगाई यूनानी अर सुरूफिनीकी जाति री ही। वा यीसु ऊं विणती करी के, “म्हारी बेटी नै दुस्ट आतमा ऊं छुड़ा दे।” यीसु उणनै बात केई, “पैला म्हनै म्हारै टाबरां नै धपाण दे, क्यूंकै टाबरां री रोटी लेने कुत्तो रै आगै नोखणी चौखी कोनीं है।” वा यीसु नै जबाब दियौ, “हाची है परभु, पण कुत्ता भी तो टाबरां री रोटी रौ चूरो खावै है।” यीसु उण ऊं कयौ, “थूं घणौ चौखौ जबाब दियौ इण वास्तै थूं थारै घर जा, थारी बेटी मे ऊं दुस्ट आतमा निकळ गी है।” वा आपरै घर में आने देख्यौ के, छोरी माचा माथै सुती है अर दुस्ट आतमा उणमे ऊं निकळग्यौ हो। पछै यीसु सूर अर सैदा रै देसो ऊं निकळनै दिकापुलिस देस ऊं होतो होयौ गलील री झील माथै पूगौ। तो लोग एक गूंगे बेहरे नै उणरै खनै लायनै उण ऊं विनती करी के, “थारौ हाथ इण माथै राख।” उण वगत यीसु उणनै भीड़ ऊं आगौ लेगा अर आपरी आंगळिया उणरै कांनो में घाली अर पछै आपरी आंगळिया माथै थुथकी नोख नै उणरी जीभ माथै हाथ लगायो, अर यीसु सरग री तरफ देखनै गेरो हां लियौ अर कयौ, “इतफत्तह।” इण सबद रौ मतलब है, “खुल जा।” अर उणरा कांन खुलगा अर उणरी जीभ री गांठ भी खुल गी, अर वो साफ साफ बोलण लागौ। पछै यीसु मिनखां नै चेताया, की कीण ऊं भी मती कहीजौ। पण जितौ वो उणौ नै चेताया उतौ ही वे इण बात रौ परचार करन लागा। जिकौ आ बात सुणी वे अचूम्बो करण कैवण लागा, “यीसु जिकौ करै वो बड़िया करै है, अठै तांई बेहरा नै सुणणै री, अर गूंगा नै बोलण री ताकत दैवै।” उण दिनां में एक दिन दूजी मोटी भीड़ भेळी होई। उणौरै खनै खावण वास्तै कीं कोनीं हो, तो यीसु आपरा चेला नै नैड़ा बुलानै उणौनै कयौ, “म्हनै इण भीड़ माथै तरस आवै, क्यूंकै ऐ लारला तीन दिनां ऊं म्हारै साथै है, अर उणौरै खनै कीं भी खावण नै कोनीं है। जे म्हैं उणौ नै भूखो घर भेजूं, तो रासते माई थाक नै बेहोस हो जावैला, क्यूंकै इण मे ऊं कोईक तो आगा ऊं आया है।” चेलौ उणनै जबाब दियौ, “अठै सुनी जगा मे इती रोटियां कोई कठै ऊं लावै की ऐ सगळा धाप जावै?” यीसु उण ऊं पूछयौ, “थौरे खनै किती रोटियां है?” वो कयौ, “सात।” तद यीसु मिनखां नै जमीं माथै बैठनै रौ हुकम दियौ, अर वो वे सात रोटियां ली अर परमेसर रौ धन्यवाद करनै तोड़ी, अर आपरा चेलौ नै देतो गियौ की मिनखां रै आगै राखै, अर चेलौ मिनखां रै आगै परोस दी। उणौरै खनै थोड़ीक नेनी मछलिया भी ही, यीसु परमेसर रौ धन्यवाद देन उणौ नै भी चेलौ नै देन मिनखां नै परोस नै रौ हुकम दियौ। मिनख खाने धाप गा अर चेलौ बाकी बचयोड़ी रोटियां री सात छाबड़िया भरी। जिमणा रै पछै यीसु उणौ नै विदा करिया। ऐ लोग च्यार हजार रै लगोलग हा। पछै वो आपरै चेलौ रै साथै नाव माथै चढ़नै दलमनूता देस मे गिया परा। पछै फरीसी उणरै खनै आयनै उण ऊं वाद-विवाद करण लागा, अर उणनै फसावण वास्तै उण ऊं की सरग री निसाणी मांगी जिणसूं ओ ठाह पड़ै के वो परमेसर री ओर ऊं आयौ है। वो आपरै मन मे गेरी आह भरने कयौ, “इण जुग रा लोग निसाणी क्यूं मांगे है? म्हैं थौरे ऊं हाची हाची कैवूं की इण जुग रा लोगां नै कीं भी निसाणी नीं दी जावैला।” पछै वे भीड़ नै छोड़नै चेलौ साथै पाछौ नाव माथै चढ़ गिया अर झील रै पार रवाना हो गिया। यीसु रा चेला रोटी साथै लेवणा भुलगा हा अर नाव में उणौ खनै एक रोटी नै छोड़नै खावण नै कीं कोनीं हो। यीसु गळत सीख ऊं लोगां नै बचावण वास्तै, उणौनै सावचेत करिया के, “देखौ, फरीसी अर हेरोदेस रै खमीर ऊं सावचेत रहीजौ।” वे एक दूजा ऊं विचार करनै कैवण लागा, “म्हौरै खनै रोटी कोनीं है, इण वास्तै वो यूं कैवै है।” उणौरा विचार जांणनै यीसु कयौ, “थै क्यूं एक दूजा ऊं ओ विचार कर रिया हो की म्हौरै खनै रोटी कोनीं? कांई अबार तांई नीं देखियौ या नीं समझया? कांई थौरो हिरदा कैड़ा हो गिया है? थारै खनै आंख्यां है तो भी दिखे कोनीं, अर कांन है तो भी सुणौ कोनीं? कांई वे बातां याद कोनीं? जद म्हैं पांच हजार वास्तै पांच रोटिया तोड़ी ही तो, किती छाबड़ी खाणौ बचयो हो?” वे यीसु ऊं कयौ, “बारैह छाबड़िया।” “अर जद च्यार हजार मिनखां नै सात रोटिया ऊं जिमाया हा तो किती छाबड़िया खाणौ बचग्यौ हो?” वे यीसु कयौ, “सात छाबड़िया।” वो उणौनै कयौ, “कांई थै हाल तांई कोनीं समझया?” वे बैतसैदा मांय आया, अर लोग एक आंधा नै उणरै खनै लेन आया अर उण ऊं विणती करी की उण माथै हाथ राखै। वो उण आंधा रौ हाथ पकड़नै उणनै गांव ऊं बारै लेन गियौ, अर उणरी आंख्यां मांय थूक नै उण माथै हाथ राखियौ, अर उण ऊं पूछयौ, “थनै कीं दिखे है?” वो आंख्यां उठायनै कयौ, “म्हैं मिनखौ नै देखूं हूं, वे म्हनै हालतोड़ा रुंखड़ा जैड़ा दिखे है।” तद यीसु पाछौ उणरी आंख्यां माथै हाथ राखियौ अर आंधे सावळ ऊं देखियौ। अर हैंग साफ साफ देखन लागौ वो सावळ होई गियौ। यीसु ओ कैहन उणनै घर भेज्यौ, “बैतसैदा मत जाइजै, सीधो थारै घर जाइजै।” यीसु अर उणरा चेला केसरिया फिलिप्पी रै गांव मांय गिया। मारग मे वो आपरै चेलौ ऊं पूछयौ, “लोग म्हनै कांई कैवै की म्हैं कुण हूं?” वे जबाब दियौ, “कीं लोग थनै यूहन्‍ना बतिस्मो देवणवाळौ, कीं एलियाह अर कीं भविसयदाता मे ऊं थूं एक है कैवै।” यीसु उणौ नै पूछयौ, “पण थै म्हनै कांई समझौ?” पतरस जबाब दियौ, “थूं मसीह है।” तो वो उणौ नै चितायनै कयौ, “म्हारै बारै में कीण ऊं मती कहीजौ।” उण वगत ऊं यीसु चेलौ नै समझाण लाग्या, “म्हैं, मिनख रौ बेटौ घणौ दु:ख उठाऊंला अर बुढ़िया, परधान याजक अर सास्तरी म्हनै कीं नीं गिणेला। वे म्हनै मार दैला अर म्हैं तीजै दिन पाछौ जी उठूंला।” यीसु आ बात उणौ ऊं साफ साफ कैह दी। इण माथै पतरस उणनै अलग ले जायनै हाका करनै लागौ। पण वे मुड़नै आपरै चेलौ री तरफ देखनै पतरस नै हाका करनै कयौ, “हे सैतान, म्हारै खनै ऊं आगौ हो जा। क्यूंकै थूं परमेसर री बातां माथै कोनीं पण मिनख री बातां माथै मन लगावै है।” वे भीड़ अर आपरै चेलौ नै आपरै खनै बुलायनै कयौ, “जिकौ कोई म्हारै लारै आवणौ चावै, वो अपणै आप ऊं इन्कार करै अर आपरौ क्रूस उठायनै म्हारै लारै आवै। क्यूंकै जिकौ कोई खुद रा प्रांण बचावणा चावैला वो मरेला। पण जिकौ कोई म्हारै अर सुभ संदेस वास्तै आपरा प्रांण दैला, वो उणनै बचावैला। जे मिनख सगळै जगत नै पा लेवे अर आपरा प्रांण नै खो दे, तो उणनै कांई फायदो होवैला? मिनख आपरा प्रांण नै पाछौ लेवण वास्तै बदळा में कांई दे सकै? जिकौ कोई इण व्यभिचारी अर पापी पीढ़ी रै बीच म्हारौ अर म्हारै वचनो ऊं सरमावैला, म्हैं, मिनख रौ बेटौ भी जद सरगदूतो रै साथै आपरी महिमा समेत आवैला, तद उण ऊं भी सरमावैला।” अर यीसु वळै उणौ ऊं कयौ, “म्हैं थौरे ऊं हाची कहूं के, जिकौ अठै ऊभा है, इणमे ऊं कीं ऐड़ा है, जिकौ जड़ तांई परमेसर रै राज नै सामरथ साथै आवतौ नीं देख ले, वे मरेला कोनीं।” छह दिनां रै पछै यीसु पतरस, याकूब अर यूहन्‍ना नै साथै लेन एकांत में ऊंचा भाखर माथै गिया। वे ऐकला हा। वठै उणौरै सांमै यीसु रौ रूप बदळ गियो। यीसु रा गाभा ऐड़ा चमकण लागा अर एठै तांई की घणा उजळा होया, की धरती माथै कोई धोबी भी वैड़ा उजळा नीं कर सकै। चेलौ नै मूसा अर एलियाह देठाळौ दियौ यीसु ऊं बातां करते देखिया। पतरस यीसु ऊं कयौ, “हे गुरु, म्हौरौ अठै रैवणौ चौखौ है। इण वास्तै म्हौ नै अठै तीन तम्बू बणावण दे। एक थारै वास्तै, एक मूसा रै वास्तै अर एक एलियाह रै वास्तै।” पतरस ओ इण वास्तै कयौ हो क्यूंकै वे घणा डरगा हा अर वो ओ नीं समझ सकयौ की कांई कहूं। इताक मे एक बादळ आयौ अर उणरै माथै छायगो अर बादळो मे ऊं आ वाणी आई, “ओ म्हारौ लाडलौ बेटौ है, इणरी सुणौ।” हाथोहाथ वे च्यांरूमेर देख्यौ अर यीसु नै छोड़नै आपरै साथै दूजा किणी नै नीं देखिया। भाखर ऊं उतरता वगत, यीसु उणौनै हुकम दियौ के, “जद तांई म्हैं, मिनख रौ बेटौ मरयोड़ौ मे ऊं जी नीं उठूं, तद तांई जिकौ कीं थै देख्यौ हो वो किणी ऊं मती कहीजौ।” वे हुकम नै मांन लियौ, पण आपस में विचार करनै लागा के, “मरयोड़ौ मे ऊं जी उठनै रौ कांई मतलब है?” वे यीसु ऊं पूछयौ, “सास्तरी ओ क्यूं कैवै के एलियाह रौ मसीह ऊं पैला आवणौ जरुरी है?” यीसु उणौनै जबाब दियौ के, “ओ सही है के, एलियाह मसीह ऊं पैला आने सगळौ सुधारैला। पण ओ क्यूं लिखयोड़ो है के, मिनख रौ बेटौ घणौ दुख पावैला अर उणनै कोई नीं मांनैला? पण म्हैं थौरे ऊं कहूं, एलियाह तो आइगो अर लोग उणरै साथै चौखौ कोनीं करयौ। ओ इज वचन मे लिख्योड़ौ है।” यीसु अर उणरा तीनो चेला जद बाकी रा चेलौ रै खनै आया, तो देख्यौ के उणरै च्यांरूमेर भीड़ लागोड़ी है अर सास्तरी उणौरै साथै वाद कर रिया हा। अर लोग ज्यूं ही यीसु नै देख्या, वे घणौ ही अचूम्बो करनै लागा अर उणरी तरफ दौड़नै परणाम करनै लागा। यीसु चेलौ ऊं पूछयौ, “थै इण ऊं कीण बात माथै वाद करौ हो?” तो भीड़ मे ऊं एक जण जबाब दियौ, “हे गुरु, म्हैं म्हारै बेटा नै थारै खनै लायौ हूं। जिणनै एक दुस्ट आतमा लागोड़ी है अर वो इणनै बोलण कोनीं दैवै है। जठै कठैई ओ इणनै पकड़े, उठैज पटक दैवै अर इण रा मूंडा मे झाग आ जावै, दांत जुड़ जावै अर तांण आ जावै। म्हैं थांरा चेलौ ऊं विणती करी के, वे दुस्ट आतमा नै उण मे ऊं काढ़ दे, पण वे काढ़ नीं सकया।” ओ सुणनै यीसु उणौनै जबाब दियौ, “हे अविसवासियो, म्हैं कद तांई थौरे साथै रैवूंला? कदै तांई थौरी सहन करूंला? छोरा नै म्हारै खनै लाओ।” तो वे छोरा नै यीसु रै खनै लेन आया, अर जद दुस्ट आतमा यीसु नै देखियौ, तो छोरा नै हाथोहाथ मरोड़ो दियौ। छोरौ धरती माथै पड़गो अर मूंडा मे ऊं झाग आयगा अर तड़पण लागौ। यीसु छोरा रा बाप ऊं पूछयौ, “इणरी आ हालत कदै ऊं है?” बो कयौ, “नेनो हो उण वगत ऊं। दुस्ट आतमा इणनै मारणै वास्तै कदैई अग्‍नि मे अर कदैई पांणी मे पटके है। पण थै की कर सकौ, तो म्हौरै माथै दया करन, म्हौरौ भलौ करौ।” यीसु उण ऊं कयौ, “कर सकौ तो? आ कांई बात है? विसवास करन वाळा रै वास्तै हैंग हो सकै है।” छोरा रौ बाप हाथोहाथ पगां पड़ नै कयौ, “हे परभु, म्हैं विसवास करूं हूं, पण म्हारौ विसवास मजबुत कोनीं। इणनै थै मजबुत करौ।” जद यीसु देखिया के लोगां री भीड़ भेळी होय री है, तो वे दुस्ट आतमा नै ओ केन हाका करिया, “हे दुस्ट थूं जिकौ इण छोरा नै गूंगो नै बेहरो करयौ है, म्हैं थनै हुकम देवूं हूं, इण छोरा मे ऊं निकळ जा अर पाछौ कदैई मती आईजे।” तो वो चिलाटिया करनै छोरा मे ऊं अणूंती तांण खा नै निकळग्यौ। छोरौ मरयोड़े जैड़ौ हो गियौ अर लोग तो कैवण लागा के, “ओ तो मरग्यौ।” पण यीसु उणरौ हाथ पकड़नै उणनै ऊभौ करयौ अर वो ऊभौ हो गियौ। जद यीसु घर मे आया, तो यीसु रा चेलौ ऐकला मे उण ऊं पूछयौ, “म्हौ दुस्ट आतमा नै क्यूं नीं काढ़ सकया?” यीसु चेलौ नै जबाब दियौ, “ऐड़ौ दुस्ट आतमा सिरफ पराथना ऊं इज निकळ सकै।” वे उण जगा नै छोड़ दी अर गलील देस मे ऊं जावता हा। यीसु नीं चावता हा के कोई ओ जांणै के, वे कीण जगा है, क्यूंकै यीसु आपरा चेलौ नै सिकसा दे रिया हा। वे उणौनै कयौ, “म्हैं, मिनख रा बेटा नै विसवासघात करनै पकड़ा देवेला अर पकड़न वाळा उणनै मार देवेला अर वो मरणे रै तीन दिन पछै जी उठैला।” पण आ बात उणौनै समझ मे कोनीं आई अर वे यीसु ऊं आ बात पाछी पूछणै ऊं डरता हा। पछै वे कफरनहूंम मे आया अर घर मे आने यीसु चेला ऊं पूछयौ, “मारग मे थै कीण बात माथै वाद करता हा?” वे चुप रिया, क्यूंकै मारग मे वे आपस मे ओ वाद करता हा के, “अपां मे सबां ऊं मोटो कुण है।” तो यीसु नीचे बैठनै बारैह प्रेरितों नै बुलाया अर कयौ, “कोई सगळा ऊं मोटो बणणौ चावै, तो सगळौ ऊं छोटौ अर सगळौ रौ सेवक बणै।” यीसु एक टाबर नै उणौरै सांमै ऊभौ करनै आपरा खोळा में लियौ अर कयौ, “जो कोई म्हारै नाम ऊं इण टाबरां मे ऊं किनी एक नै भी मांनै, वो म्हनै मांनैला अर वो म्हनै ही नीं, पण म्हनै भेजणवाळा नै भी मांनैला।” यूहन्‍ना यीसु ऊं कयौ, “हे गुरु, मे एक मिनख नै थारै नाम ऊं दुस्ट आतमाओ नै निकाळते देख्यौ अर म्हैं उणनै मना करयौ, थूं यूं मती कर। क्यूंकै वो म्हौरै मे ऊं नीं हो।” यीसु कयौ, “उणनै मना मती करौ। क्यूंकै ऐड़ौ कोई भी जिकौ म्हारै नाम ऊं परचां दैवै, वो इतौ वेगो म्हारी बुराई नीं कर सकै। क्यूंकै जिकौ अपणौ विरोधी कोनीं, वो अपांरै साथै है। जो कोई थांनै एक लोटो पांणी इण वास्तै पावै की, थै मसीह रा चेला हो। तो म्हैं हाची कहूं की वो आपरौ प्रतिफळ किणी रीति ऊं नीं खोवैला। “पण कोई ऐ टाबरियां जिकौ म्हारै माथै विसवास करै अर आने पाप में ले जावै ऐड़ौ करणैवाळै रै वास्तै ओ घणौ बड़िया है के एक मोटी चक्की रौ पाट उणरै गळे मे टेर नै उणनै समंदर मे नोख दैणौ चाहीजै। जे थारौ हाथ थनै पाप में ले जावै तो उणनै काट दे। दो हाथ रैवता थूं नरक री लाय में जावणा ऊं घणौ बड़िया है की टूंटो रेन परमेसर रा राज में जावै, क्यूंकै नरक रा कीड़ा कदैई मरे कोनीं अर जठै री लाय कदैई बुझे कोनीं। पर थारौ पग थनै पाप में ले जावै तो उणनै काट दे। दो पगां रै साथै नरक री लाय में जावणा ऊं घणौ बड़िया है की थूं लंगड़ो होने परमेसर रा राज में जावै। क्यूंकै नरक रा कीड़ा कदैई मरे कोनीं अर जठै री लाय कदैई बुझे कोनीं। जे थारी आंख थनै पाप में ले जावै तो उणनै फोड़ दे। दो आंख्यां रैवता थूं नरक जावणा ऊं बड़िया है के थूं कांणौ होयनै परमेसर रै राज मे जावै। क्यूंकै नरक रा कीड़ा कदैई मरे कोनीं अर जठै री लाय कदैई बुझे कोनीं। “हरैक जण नै लाय माथै नमकीन बणायौ जावैला। “नमक चौखौ है। पण नमक रौ हवाद जातौ रैवै, तो उणनै कीण ऊं पाछौ नमकीन करौला? इण इज तरैह ऊं थै अपणै आपनै नमक ज्यूं राखौ अर एक दूजा ऊं मेळ मिलाप ऊं रैवौ।” यीसु पछै उठै ऊं उठनै यहूदिया देस मे अर यरदन नदी रै पार गिया अर भीड़ उणरै खनै पाछी भेळी होयगी अर वो आपरी रीति ऊं वळै सिखावण लागा। फरीसी उणरै खनै आयनै उणनै फसावण वास्तै उण ऊं पूछयौ, “कांई व्यवस्था आदमी नै आपरी लुगाई नै तलाक देवण री छूट दैवै?” यीसु उणौनै पूछयौ, “मूसा थांनै कांई हुकम दियौ है?” फरीसी कयौ, “मूसा आदमी नै तलाक रौ कागद लिखनै तलाक री छूट दी है।” यीसु कयौ के, “थौरे मन री कठोरता रै कारण मूसा थौरे वास्तै आ आग्या लिखी है। पण दुनिया री सरुआत ऊं परमेसर उणौनै नर अर नारी बणाया। इण वजै ऊं मिनख आपरै मां-बाप ऊं अलग होने आपरी लुगाई रै साथै रैवैला, अर वे दोनूं एक सरीर होवैला। वे दो नीं एक सरीर है। इण वास्तै जिनै परमेसर जोड़िया है उणौनै मिनख अलग नीं करै।” जद यीसु पाछा घर में आया तो चेलौ यीसु ऊं इण बारै में पूछयौ। वे जबाब दियौ, “जिकौ कोई आपरी लुगाई नै तलाक देने दूजी ऊं ब्याव करै तो ओ पैली लुगाई रै सांमै पराई लुगाई रै साथै गळत कांम करनै जैड़ौ पाप है। जिकौ कोई लुगाई आपरा बींद नै तलाक देने दूजा ऊं ब्याव करै तो आपरा पैला बींद रै सांमै पराया मिनख रै साथै गळत कांम करनै जैड़ौ पाप है।” लोग टाबरां नै यीसु खनै लावण लागा के, वो टाबरां रा माथै हाथ राख नै आसीस दे, पण चेला लोगां नै हाका करिया। तो यीसु ओ देखन नाराज होयनै कयौ, “टाबरां नै म्हारै खनै आवण दो, इणौनै मना मती करौ। क्यूंकै परमेसर रौ राज ऐड़ा रौ ही है। म्हैं थौरे ऊं साची कहूं, की जिकौ कोई परमेसर रा राज नै टाबरां रै ज्यूं नीं मांनै, वो उण मे कदैई परवेस नीं कर पावैला।” अर यीसु टाबरां नै खोळा मे लिया अर उण माथै हाथ राखनै उणौनै आसीस दी। जद यीसु उठै ऊं निकळनै मारग मे जावता हा, तो एक मिनख यीसु खनै दौड़तो आयौ अर उणौरै आगै गोडा टेकनै उण ऊं पूछयौ, “हे चौखा गुरु, अनत जीवन पावण वास्तै म्हैं कांई करूं?” यीसु उणनै कयौ, “थूं म्हनै चौखौ क्यूं कैवै? परमेसर नै छोड़ नै कोई चौखौ कोनीं। थूं आग्या तो जांणै है के, ‘हत्या नीं करणी, व्यभिचार नीं करणौ, चोरी नीं करणी, झूठी गवाई नीं देवणी, छळ नीं करणौ, आपरै मां-बाप रौ आदर करणौ।’ ” मिनख यीसु ऊं कयौ, “हे गुरु, इण सगळौ नै तो मे बाळपणाऊ मानतो आयौ हूं।” यीसु उणनै परैम ऊं देखनै कयौ, “थनै एक कांम करणै री जरुत है। थूं जा, जिकौ थारौ है, उणनै बेचनै उण रा पैसा गरीबो नै दे दे। इण रौ फळ थनै सरग मे मिळेला। पछै म्हारै लारै चाल।” इण बात ऊं उण मिनख रौ मूंडा उतरगो अर वो दुखी होयनै जातौ रियौ, क्यूंकै वो घणौ ही धनवान हो। यीसु च्यांरूमेर देखनै आपरै चेलौ नै कयौ, “पैसा वाळौ रौ परमेसर रा राज मे परवेस करणौ घणौ मुसकिल है।” चेला उणरी बात माथै अचूम्बो करयौ। इण वास्तै यीसु पाछौ चेला नै कयौ, “भाई, परमेसर रै राज मे परवेस करणौ घणौ मुसकिल है। ज्यूं ऊंट सूई रै नाका में ऊं नीं निकळ सकै। यूं ही धनवानो रौ परमेसर रै राज मे जावणौ दोरो है।” उणौनै घणौ ही अचूम्बो होयौ अर आपस मे कैवण लागा, “तो पछै किणरौ उद्धार होवैला?” यीसु चेलौ रै सांमै देखनै कयौ, “मिनख खुद रौ उदार नीं कर सकै, पण परमेसर सगळौ कर सकै।” पतरस यीसु ऊं कैवण लागौ, “देख, म्हैं तो सगळौ छोड़नै थारै लारै हो गिया हा।” यीसु कयौ, “म्हैं थौरे ऊं हाची कैवूं के जिकौ कोई, म्हारै वास्तै अर म्हारै सुभ संदेस वास्तै आपरौ घर, भाई बेन, मां बाप, बाल बच्चा अर खेतो नै छोड़ दिया है, तो वो इण जुग मे सौ गुणा पावैला। वो इण जुग मे सौ गुणा आपरौ घर, भाई बेन, मां, बाल बच्चा अर खेतो री आसीस पावैला, पण उणनै इण जुग मे दुनिया ऊं दुख मिळेला। इतौ ही कोनीं पण सरग मे उण वास्तै अनत जीवन है। पण जिकौ पैला हा, लारै होवैला, अर जिकौ लारै है, वे आगै होवैला।” यीसु अर उणरा चेला यरुसलेम जावता। यीसु उणौरै आगै चाल रिया हा। चेला अचूम्बे में अर दूजा लोग डरयोड़ा हा। तो यीसु उण बारैह चेलौ नै न्यारा लेजान पाछी वे बातां बतावण लागा, जिकौ यीसु रै साथै होवणवाळी ही। यीसु उणौनै कयौ, “अपां यरुसलेम नै जाओ अर म्हैं, मिनख रौ बेटौ विसवासघात ऊं परधान याजकौ अर सास्तरियों रै हाथ मे पकड़ा देवेला अर वे म्हनै मौत री सजा देने, जिकौ यहूदी नीं है उणौरै हाथ मे सौंप दैला। वे म्हारी मजाक उडावेला, म्हारै माथै थूकेला, म्हनै कोड़ा ठोकेला अर म्हनै मार दैला, पण म्हैं तीजै दिन पाछौ जीवतौ हो जाऊंला।” तो जबदी रौ बेटौ याकूब अर यूहन्‍ना यीसु खनै आने विनती करी, “हे गुरु, म्हैं चावौ हो के जिकौ कीं म्हौ थांरै ऊं मांगो, वो थै म्हौरै वास्तै करौ।” वो कयौ, “थै कांई चावौ की म्हैं थौरे वास्तै करूं?” वे उण ऊं कयौ, “म्हौ नै ओ हक दे की थारी महिमा रा राज मे थारा सिहासण रै एक थारै जिमणा हाथ अर एक डावै हाथ बिठाईजै।” यीसु उणौ नै कयौ, “थै नीं जांणौ की थै कांई मांग रिया हो? जिकौ दुख भरियो कटोरो म्हैं पीवण माथै हूं कांई थै पी सकौ? अर जिकौ बतिस्मो म्हैं लेवण माथै ऊं, कांई थै ले सकौ?” वे उण ऊं कयौ, “म्हौ वैड़ौ कर सकौ हो।” यीसु उणौ ऊं कयौ, “हा, जिकौ दुख भरियो कटोरो म्हैं पीवण माथै हूं, थै पीओला। अर जिकौ बतिस्मो म्हैं लेवण वाळौ हूं, उणनै लो ला। पण परमेसर जिणरै वास्तै जगा तैयार करी है, उणनै छोड़नै ओर कोई भी म्हारै डावै अर आपरै जीमणै नीं बैठ सकै।” ओ सुणनै बाकी रा दस चेलौ नै याकूब अर यूहन्‍ना माथै रीस बळने लागा। तो यीसु उणौनै खनै बुलानै कयौ, “थै जांणौ की जिकौ यहूदी कोनीं वे राजा, आपरा लोगां माथै डरा धमका नै राज करै अर उणौरा सता-धारी लोगां माथै जोर जमावे। पण थांरै में ऐड़ौ नीं है अर जिकौ कोई थांरै मे ऊं मोटो बणणौ चावै वो पैला थौरो सेवक बणै। अर जिकौ कोई थांरै मे परधान बणणौ चावै वो सगळौ रौ दास बणै। क्यूंकै म्हैं, मिनख रौ बेटौ भी इण वास्तै कोनीं आयौ के म्हारी सेवा होवै, पण इण वास्तै आयौ म्हैं खुद सेवा करूं, घणा नै छुड़ानै वास्तै उणौरी जगा म्हैं म्हारौ प्रांण दे दूं।” यीसु अर उणरा चेला यरीहो मे आया। जद एक मोटी भीड़ रै साथै वे यरीहो ऊं निकळ रिया हा, तो तिमाई रौ बेटौ बरतिमाई जिकौ आंधौ भिखारी हो, सड़क रै कांठै बैठौ हो। वो ओ सुणनै के ऐ नासरत नगर रा यीसु जा रिया है, तो हाका करनै कैवण लागौ, “हे यीसु! दाऊद री औळाद, म्हारै माथै दया कर।” घणा जणा उणनै हाका करिया के चुप रैह, पण वो ओर हाका करन लाग्यो, “हे दाऊद री औळाद म्हारै माथै दया कर।” तो यीसु रुकनै कयौ, “उणनै बुलाओ।” अर मिनख उण आंधा नै बुलायनै उण ऊं कयौ, “हीमत राख! उठ जा! वो थनै बुलावै है।” वो आपरी कांम्बल फेंकनै ऊभौ हो गियौ यीसु रै खनै आयौ। इण माथै यीसु उण ऊं कयौ, “थूं कांई चावै है की म्हैं थारै वास्तै करूं?” आंधौ उण ऊं कयौ, “हे गुरु, ओ के म्हैं पाछौ देखण लागू।” यीसु उण ऊं कयौ, “जा थारै विसवास थनै सावळ करयौ है।” वो हाथोहाथ देखण लागौ अर मारग मे उणरै लारै वहीर हो गियो। जद वे यरुसलेम हैर रै खनै, जैतून भाखर माथै बसयोड़ा बैतफगै अर बैतनिय्याह गांव री नजीक में आया तो वे आपरा दो चेलौ नै ओ कैहन भेज्या, “सांमै वाळै गांव मे जाईजौ, अर उठै पूगते ही एक गधी रौ बचियो, जिण माथै कदैई कोई कोनीं चढ़यौ, बंधयोड़ौ थांनै मिळैला। उणनै खोलनै लाईजो। जे थांरै ऊं कोई पूछै, ‘ओ क्यूं करौ?’ जद कहीजौ, ‘परभु यीसु नै इणरी जरुत है’ अर वो इणनै अठै वेगो भेज दैला।” वे उठै जायनै गधी रै बचिये नै गळी रै बारै चौक मे किवाड़ रै खनै बंधयोड़ौ पायो, अर खोलण लाग्या। अर उणमे ऊं जिकौ उठै ऊभा हा, कैवण लाग्या, “ओ कांई कर रिया हो, गधी रै बचिया नै क्यूं खोलो हो?” जैड़ा यीसु कयौ हो, वैड़ौ ही उणौ ऊं कैह दियौ, तो उणौनै जावण दिया। वे बचिया नै यीसु रै खनै लायनै उण माथै आपरा गाभा बिछाया अर यीसु उण माथै बैठग्या। जद यीसु गधी रा बचिया माथै जावण लागा तो घणा जणा यीसु रा सवागत में आपरा गाभा मारग में बिछाया अर बाकी जणा खेतो मे ऊं डाळियो लायनै मारग में बिछाई ही। जिकौ लोग उणरै आगै हा अर वे भी जिकौ लारै चाल रिया हा, सगळा लोग ओ नारो लगा रिया हा, “होसना! धन्य है, वो जिकौ परभु रै नाम ऊं आवै! धन्य है, म्हारै पिता दाऊद रौ राज जिकौ आ रियौ है! सरग में परमेसर री होसना!” यीसु यरुसलेम पूगनै मिंदर मे आयौ अर च्यांरूमेर सगळी चीजों नै देखनै वे बारैह चेलौ साथै बैतनिय्याह आयगा, क्यूंकै सिझ्या होयगी ही। दूजा दिन जद वे बैतनिय्याह ऊं निकळिया तो, यीसु नै भूख लागी। वो आगाऊं एक अंजीर रा लीला रुंखड़ा नै देखनै उणरै खनै गिया के, कांई ठाह इणमे फळ मिळ जावै। पण पता नै छोड़ नै उणमे कीं नीं मिळयो। क्यूंकै फळ री रूत नीं ही। इण माथै वो रुंखड़ा नै कयौ, “अबै कोई थारौ फळ कदैई नीं खा सकै ला।” अर उणनै ओ चेला कैवता सुण्यौ। पछै वे यरुसलेम में आया अर यीसु मिंदर में गिया अर जिकौ लेण-देण कर रिया हा उणौनै बारै निकाळ दिया अर रूपिया बदळ वाळौ रौ पीढ़ा अर कबूड़ा बेचनैवाळौ री चौकियां ऊंधी कर दी। यीसु मिंदर री जगा मे ऊं किणी नै समान लेन आवण जावण नीं दिया। पछै उणै सिकसा देते उण ऊं कयौ, “कांई ओ सास्तर मे लिख्योड़ौ कोनीं है, ‘म्हारौ घर सगळै देसो रै लोगां, रै वास्तै, पराथना रौ घर कैलावैला।’ पण थै उणनै ‘डाकूओ रौ अडो’ बणा दियौ है।” ओ सुण नै परधान याजक अर सास्तरी उणरै नास करणै रौ मौकौ सौधण लागा। बल्कि लोगां नै यीसु रै उपदेस माथै अचूम्बो करता अर मानता देखनै वे डरण लागा। सिंझ्या रै वगत यीसु अर उण रा चेला हेर रै बारै गिया परा। पछै संवार रा वे उठै ऊं जावता हा तो उणौनै वो अंजीर रौ रुंखड़ौ जड़ तांई सूखयोड़ो देखियौ। पतरस नै वा बात याद आई, अर वो यीसु नै कयौ, “हे गुरु, देख! ओ अंजीर रौ रुंखड़ौ जिणै थै सराप दियौ, सूखग्यौ है!” यीसु उणनै जबाब दियौ, “परमेसर माथै विसवास राखौ। म्हैं थौरे ऊं साचौ कैवूं की अगर कोई भी इण भाखर ऊं कैवै, ‘थूं उखड़ जा, अर समंदर मे जा पड़,’ अर अपणै मन मे भरम नीं करणौ, बल्कि ओ विसवास करौ की जो कैवूंला वो हो जावैला, तो उण वास्तै वो हो जावैला। इण वास्तै म्हैं थौरे ऊं कैवूं की, जो कीं भी थै पराथना करण मांगोला, अर विसवास कर लौ की थांनै मिळ गियौ, अर थौरे वास्तै हो जावैला। अर जद कदैई थै ऊभा होयनै पराथना करौ तो पछै थौरे मन मे किणरै वास्तै कीं विरोध हो, तो माफ करौ। इण वास्तै की थौरा सरगिए पिता भी थौरा पाप माफ करैला। अर थै माफ नीं करौ तो थांरा पिता भी जो सरग मे है, थौरा पाप माफ नीं करैला।” वे भळै पाछा यरुसलेम मे आया जद वो मिंदर रा चौक में फिर रियौ हो तो परधान याजकौ, सास्तरियों अर बुढ़िया उणरै खनै आन, अर पूछण लाग्या, “थूं ओ कांम कीण अधिकार ऊं करै? अर ओ अधिकार थनै कुण दियौ की थूं ओ कांम कर?” यीसु उणौनै कयौ, “म्हैं भी थौरे ऊं एक बात पूछूं, म्हनै जबाब देवो। तो म्हैं थांनै बताऊंला ओ कांम कीण अधिकार ऊं करूं। यूहन्‍ना नै बतिस्मो देवण रौ अधिकार परमेसर दियौ के मिनखौ दियौ? म्हनै जबाब देवो।” तो वे सगळा विचार करण लाग्या की, “जे अपां कैवौ, ‘परमेसर दियौ’, तो वो कैवैला, ‘पछै थै उणरौ विसवास क्यूं नीं कियो?’ अर जे अपां कैवौ, ‘मिनखौ दियौ’ तद मिनखौ रौ डर है, क्यूंकै घणा जणा मांनै हा, यूहन्‍ना हकीगत मे भविसयदाता हो।” तो वे यीसु नै जबाब दियौ, “म्हैं कोनीं जांणौ।” यीसु उणौ ऊं कयौ, “म्हैं भी थांनै नीं बताऊं की ओ कांम कीण अधिकार ऊं करूं।” पछै वे बातां मे कैवण लागा, “एक आदमी अंगूरो री बाड़ी लगाई। उणनै च्यांरूमेर बाड़ो बांधियो। रस रौ कुंड खोदयो अर गुमट बणायौ। पछै वो करसा नै ठेके देने परदेस जातौ रियौ। जद कातिरा री रूत आई तो वो करसा रै खनै एक सेवक नै भेज्यौ की करसा ऊं अंगूरो री बाड़ी रौ हिस्सो लेवे। पण वे उणनै पकड़नै ठोकियो अर खाली हाथ भेज दियौ। पछै वो एक वळै सेवक उणौरै खनै भेज्यौ वे उणरौ माथो फोड़ दियौ अर उणरौ अपमांन करयौ। पछै वो एक और सेवक नै भेज्यौ, वे उणनै मार नोख्यौ। तद वे और घणौ नै भेज्यौ, उण मे ऊं वे थोड़ाक नै ठोकिया, अर थोड़ाक नै मार नोख्या। अबै एक ही रैह गियौ हो जिकौ उणरौ लाडलौ बेटौ हो, हैंगा पछै वो उणनै भी उणौरै खनै ओ समझनै भेज्यौ की, ‘वे म्हारै बेटा रौ आदर करैला।’ पण वे करसा एक दूजै ऊं कयौ, ‘ओ ही तो वारिस है, आओ अपां इणनै मार दो, पछै उणरौ सगळौ अपणै रैह जावैला।’ अर वे उणनै पकड़नै मार दियौ, अर अंगूरो री बाड़ी रै बारै फेंक दियौ। “अंगूरो री बाड़ी रौ धणी कांई करैला? वो आयनै उण करसा नै मार दैला अर अंगूरो री बाड़ी दूजा नै दे दैला। “कांई थै पवितर सास्तर मांय ओ वचन नीं पढ़ियो? ‘जिकौ भाटा नै कारीगर बेकार ठैरायौ हो, वो हीज कोनें रौ सिरो होई गियौ। अर अपांरी निजर अनोखी है, वो परभु री ओर ऊं होयौ!’ ” तो यहूदी नेता समझ गिया हा की यीसु अपांरै विरोध मांय आ बात करी है। वे उणनै पकड़नो चाहयौ पण वे मिनखौ ऊं डरया, अर उणनै छोड़नै जाता रिया। पछै वे उणनै बातां मांय फसावण वास्तै थोड़ाक फरीसियों अर हेरोदियो नै उणरै खनै भेजिया। वे आयनै उण ऊं कयौ, “हे गुरु, म्हौ जांणौ की थूं हाचो है अर लोग कांई कैवैला इणरी भी परवा नीं करै, क्यूंकै थूं मिनखौ रौ मूंडौ देखन बातां नीं करै, पण हाच रै साथै परमेसर रौ रासतो बतावै। इण वास्तै म्हैं थौरे ऊं पूछौ हो के, कई रोमन रा दरबार नै चुंगी देवणी चाहीजै के कोनीं?” यीसु उणौरी चाल जांणन कयौ, “म्हनै क्यूं परखो हो? एक चांदी रौ सिक्‍को म्हारै खनै लावौ।” वे ले आया, अर वो उणौ नै कयौ, “ओ किणरौ फोटु अर नाम है? किनो नाम है?” वे कयौ, “रोमन रै दरबार रौ।” यीसु उणौ नै कयौ, “जिकौ रोम रै दरबार रौ है वो रोम रै दरबार नै दो अर जिकौ परमेसर रौ है वो परमेसर नै दो।” तो वे उण माथै घणौ अचूम्बो करण लाग्या। पछै सदूकी जिकौ यहूदी ही हा, ऐ मानता की मरयोड़ौ रौ जी उठणौ है ही कोनीं, वे यीसु खनै आयनै यीसु नै पूछयौ, “हे गुरु, मूसा अपांरै वास्तै लिख्यौ है की, जे किनो भाई बिना औळाद मर जावै, अर उणरी लुगाई रैह जावै तो उणरौ भाई उणरी लुगाई ऊं ब्याव कर लेवे, अर खुद रै भाई वास्तै वंस पैदा करै। एक भळै सात भाई हा पैलौ भाई ब्याव करन बिना औळाद मर गियौ। तद दूजौ भाई उण लुगाई ऊं ब्याव कर लियौ अर बिना औळाद मर गियौ, अर वैड़ौ ही तीजौ भी करयौ। अर सातों ऊं बिना औळाद मर गियौ। सातों रै लारै वां लुगाई भी मरगी। थै म्हनै बताओ, जद सगळा मरयोड़ौ मे ऊं पाछा जी उठैला, तो वां किणरी लुगाई होवैला? क्यूंकै वां सातों री लुगाई होई गी ही।” यीसु उणौ नै कयौ, “थै भुल में हो। क्यूंकै थै नीं तो पवितर सास्तर नै जांणौ नीं परमेसर री सामरथ नै। क्यूंकै जद मरयोड़ौ मे ऊं जी उठै ला, तो वे ना ब्याव करैला, वे सरग मांय सरगदूतो रै जैड़ा होवैला। मरयोड़ौ रै जी उठनै रै बारै माई कांई थै मूसा री किताब माई झाड़ी री कथा मांय कोनीं पढ़ियो की परमेसर उण ऊं कयौ, ‘म्हैं अबराहम रौ परमेसर, अर इसहाक रौ परमेसर, अर याकूब रौ परमेसर हूं’? परमेसर मरयोड़ौ रौ नीं पण जीवता रौ परमेसर है, बल्कि थै मोटी भुल मांय पड़िया हो।” पछै एक सास्तरी आयौ उणरौ विवाद सुणनै अर ओ जांण के यीसु बड़िया रीति ऊं जबाब दियौ है, वो यीसु ऊं पूछयौ, “हैंगा ऊं मुख्य आग्या कोनसी है?” यीसु उणनै जबाब दियौ, “हैंगा आग्या मे ऊं आ मुख्य है, ‘हे इजरायल सुण! अपणै परमेसर नै छोड़नै, कोई परभु नीं है। अर थूं थारा परभु परमेसर ऊं, खुद रै पुरा हिरदा ऊं, खुद रा पुरा प्रांण ऊं, खुद रा पूरी बुद्धि ऊं, अर पूरी सगति ऊं, परैम करजै।’ अर दूजौ हुकम ओ है के, ‘थूं खुद रै पड़ोसी ऊं, खुद रै समान परैम करजै।’ इण दोनूं ऊं मोटी और कोई आग्या कोनीं।” सास्तरी कयौ, “हे गुरु, आप घणौ चौखौ कयौ! थूं हाची कयौ की वो एक परमेसर है अर उणनै छोड़ नै और कोई परमेसर कोनीं। अर उण ऊं पूरा हिरदा, पूरी बुद्धि, पूरा प्रांण अर पूरी सगति ऊं परैम करजै अर पड़ोसी ऊं खुद रै समान परैम करजै, ऐ हैंग होम बलि अर चढ़ावै ऊं बढ़न है।” जद यीसु देख्यौ की वो समझदारी ऊं जबाब दियौ, तो उण ऊं कयौ, “थूं परमेसर रै राज्य ऊं आगौ कोनीं।” अर किणरी भी पछै उण ऊं की भी पूछनै री हीमत कोनीं होई। पछै यीसु मिंदर रा चौक में उपदेस करता ओ कयौ, “सास्तरी कीकर कैवै मसीह दाऊद री औळाद है? दाऊद आप खुद री ही पवितर आतमा मे ऊं होने कियो है, ‘परभु म्हारै परभु ऊं कयौ, म्हारै जीमणै तरफ बैठ। जद तांई म्हैं थारै बैरियो नै, थारा पगां रै नीचे नीं कर दूं।’ दाऊद तो खुद ही उणनै परभु कैवै, पछै वो उणरौ बेटौ कीकर हो सकै?” भीड़ घणै आंणंद ऊं उणनै सुण री ही। वो आपरै उपदेस मे कयौ, “सास्तरियों ऊं सावचेत रैवौ, जिकौ लम्बा लम्बा कुड़ता पैरयोड़ा फिरै अर बजारौ मे नमस्कार, अर यहूदियो रै पराथना घर मांय मुख्य आसन अर मेमाणो मे खास जगा भी चावै है। वे विधवाओं रै घरा नै खा जावै, अर दिखावण वास्तै घणी देर तांई पराथना करता रैवै। वे घणी सजा पावैला।” यीसु मिंदर रै भंडार रै सांमै बैठनै देख रियौ हो की भीड़ मिंदर रै भंडार मांय कीण तरैह ऊं रूपिया घाले। घणा लोग जिकौ धनवान हा घणौ घालियो। इता मांय एक गरीब विधवा आने दो दमड़िया घाली, जिकौ एक आधा पया रै बराबर होवै। तो वो खुद रा चेलौ नै खनै बुलानै उणौनै कयौ, “म्हैं थौरे ऊं हाची कैवूं की मिंदर रै भंडार मे देवणवाळा मे ऊं आ कंगाल विधवा सगळौ ऊं घणौ दियौ है। क्यूंकै सगळौ आपरै घणै धन मे ऊं कीं हिस्सो दांन दियौ है, पण आ खुद री घटी मे ऊं दियौ, जिकौ कीं भी उणरौ हो वो सगळौ दे दियौ।” जद यीसु मिंदर ऊं निकळ रिया हा, तो उणरै चेलौ मे ऊं एक उण ऊं कयौ, “हे गुरु, देख, कैड़ा मोटा भाटा अर कैड़ा चौखा भवन है!” यीसु उण ऊं कयौ, “जिकौ थै ऐ मोटा मोटा मेहल देखौ हो? अठै एक भाठै ऊपर भाठौ नीं रैला ढ़ाह दिया जावैला।” जद यीसु मिंदर रै सांमै वाळै जैतून भाखर माथै बैठा हा, तो पतरस, याकूब, यूहन्‍ना अर अन्‍द्रियास नै अलग जायनै उण ऊं पूछयौ, “म्हौ नै बता की ऐ बातां कदै होवैला? अर जद ऐ सगळी बातां पूरी होवैला उण वगत री कांई निसाणी होवैला?” यीसु उणौ नै कैवण लाग्या, “सावचेत रैवौ की कोई थांनै धोखे ऊं भरमा नीं दैवै। घणा म्हारै नाम ऊं आने कैवैला, ‘म्हैं मसीह हूं।’ अर घणा मिनखां नै भरमावैला। जद थै लड़ाईयां देखौ अर लड़ाईयां री बातां सुणौ, तो घबराइजो मती। क्यूंकै इणरौ होणौ जरुरी है। पण अजी अंत कोनीं है। क्यूंकै वंस माथै वंस, अर राज्य माथै राज्य चढ़ाई करैला। घणी जगा भूकम्प होवैला, अर काळ पड़ैला। आ तो जापायती रा टाबर होणै ऊं पैला होवण वाळा दरद ही सरूआत ज्यूं है। “पण थै सावचेत रईजो, वे थांनै पंचायत नै सौपेला, अर थांनै यहूदी पराथना घर में ठोकेला, अर म्हारै वजै ऊं हाकिमों अर राजाओ रै सांमै ऊभा किया जावोला। ओ थौरे वास्तै उणौनै सुभ संदेस सुणाणै रौ एक बड़िया मौकौ मिळैला। पण जरुरी है की पैला सुभ संदेस सगळी जातियो मे परचार किया जावै। जद वे थांनै पकड़नै पूछताछ वास्तै सौपेला, तो पैली ऊं चिंता नीं करणी की अपां कांई केवोला। जिकौ कीं भी थांनै उण वगत पवितर आतमा बतावै वो इज कहीजौ। क्यूंकै थै बोलण वाळा नीं हो, पण पवितर आतमा है। “भाई भाई नै विसवासघात करनै मरवा दैला अर पिता बेटे नै। टाबर मां-बाप रै विरोध मे हो जावैला अर उणौनै मरवा देवेला। अर म्हारै नाम रै वास्तै सगळा थौरे ऊं घिरणा करैला, पण जिकौ आखरी तांई विसवास राखैला, उणीज रौ उद्धार होवैला। “जद थै विनास करण वाळी घिरणा री चीजों नै जठै नीं होणी चाहीजै, उण जगा देखौ तो, यहूदिया मे हो वे भाखरो माथै भाग जाईजौ। सुणन वाळा इण बात माथै ध्यांन दीजौ। जिकौ छत माथै है, वे फटाफट नीचा उतर नै, कीं लेणे घर में रुकजो मती। अर जो खेत मांय है वो कपड़ा लेणे पाछौ नीं आवै। उण दिनां मांय जिकौ जापायती अर टाबर नै दूध पावण वाळी है तो, उणनै घणौ दुख देखणौ पड़ैला। अर पराथना करता रहीजौ के ऐड़ौ सियाळा रै दिनां मांय नीं होवै। क्यूंकै वे दिन ऐड़ा कलेस रा होवैला की सिस्टी री सरूआत ऊं, जिकौ परमेसर नै बणाई है, अबै तांई नीं तो होयौ, अर नीं पछै कदैई होवैला। जे परभु उण दिनां नै नीं घटावतो, तो कोई जीवतौ नीं बचतो, पण परमेसर आपरा टाळियोड़ा मिनखौ वास्तै जिकौ वो टाळिया है, उण दिनां नै घटाया। उण वगत जे कोई थौरे मे ऊं कैवै, ‘देखौ, मसीह अठै है,’ या ‘देखौ, उठै है,’ तो उणरौ विसवास मत करजौ। क्यूंकै झूठा मसीह अर झूठा भविसयदाता परगट होवैला, अर निसाणी अर अचूम्बे रा कांम दिखावैला अर टाळियोड़ो नै भरमाणे री कोसीस करैला। देखौ, तौभी थै सावचेत रहीजौ, म्हैं थांनै सगळी बातां पैला ऊं बता दी ही। “उण दिनां मांय, उण कलेस रै पछै, ‘सूरज अंधारौ हो जावैला, अर चांद चांदणौ नीं देवेला। अर आभै री सगतियो हिलाई जावैला। अर तारा आभै ऊं नीचा पड़ैला।’ जद लोग, म्हनै, मिनख रै बेटा नै महान सामरथ अर महिमा रै साथै, बादळो माई आवतौ देखेला। म्हैं, मिनख रौ बेटौ सरगदूतो नै भेजनै, धरती रै इण कांकड़ ऊं आभै रै उण कांकड़ तांई, च्यांरूमेर ऊं म्हारै चुणयोड़ौ लोगां नै भेळा करूंला। “अंजीर रै रुंखड़ै ऊं सिकसा लौ। जद उणरी डाळी कोमल हो जावै, अर पता निकळनै लागै, तो थै जांण लेवो की उनाळौ आवणवाळौ है। इणी तरैह, जद थै इण बातां नै होवता देखौ, तो जांण लौ की वगत वो नैड़ौ है बल्कि द्धार माथै है। म्हैं थौरे ऊं साची कैवूं हूं, की इण पीढ़ी रै लोगां रै जीते जी ऐ सगळी बातां पूरी होवैला। आभौ अर धरती टळ जावैला, पण म्हारौ वचन कदैई नीं टळैला। “उण दिन अर उण घड़ी रै बारै मे कोई कोनीं जांणै, नीं सरग मे दूतो नै अर नीं मिनख रै बेटे नै, कैवल परम पिता परमेसर जांणै है। जागता अर पराथना करता रहीजौ, थै नीं जांणौ के वो वगत कद आ जावैला। ओ ऐड़ौ है ज्यूं, एक मिनख परदेस जावता वगत आपरौ घर छोड़नै जावै, अर आपरा दासो नै सूंप नै जावै, अर हरैक नै उणरौ कांम बता दे, अर द्वारपाल नै जागता सावचेत रैवण रौ हुकम दैवै। “इण वास्तै जागता रौ, क्यूंकै थै नीं जांणौ की घर रौ मालिक कदै आवैला। सिझ्या या आधी रात रा, या कुंकड़े रै बांग देवण रै वगत या सवार नै। ऐड़ौ नीं होवै की वो एकदम ऊं आने थांनै सूता पावै। अर जिकौ म्हैं थौरे ऊं कैवूं हूं, वोहीज सबां ऊं कैवूं हूं, ‘जागता रैवौ।’ ” दो दिन रै पछै फसह अर अखमीरी रोटी रौ तैंवार आवण वाळौ हो। परधान याजक अर सास्तरी इण बात री सौध मे हा, की यीसु नै छळ ऊं पकड़नै मार दो। पण कैवता हा, “तैंवार रा दिनां मे अपां ओ कोनीं कर सकौ, कदैई ऐड़ौ नीं हो की लोगां मे हंगामों हो जावै।” जद वो बैतनिय्याह मे समौन जिनै पैला कोढ़ हो उणरै घर मांय खाणौ खाणै बैठा हा, तद एक लुगाई संगमरमर रै बरतन मे मूंगौ अंतर लेन आई, अर उणरै माथा ऊपर ढ़ोळियो। पण कोई नै रीस आई कैवण लागा, “इण अन्तर रौ क्यूं पापों काटयो? क्यूंकै ओ अन्तर तीनसो चांदी रा सिक्‍का ऊं हली कीमत मांय बेचनै कंगालो मांय बाटियो जा सकतौ हो।” अर वे उण लुगाई नै हाका करनै लागा। यीसु कयौ, “उणनै छोड़ दो, उणनै क्यूं परेसान करौ हो? वां तो म्हारै साथै भलाई करी है। कंगाल थौरे साथै हमेसां रैवै, अर थै जणै चावौ तद उणी भलाई कर सकौ हो, पण म्हैं थौरे साथै हमेसां नीं रैवूंला। जिकौ कीं वां कर सकी, वो करयौ, वां म्हारै गाड़े जावण री तैयारी माई पैला ऊं म्हारै सरीर माथै अन्तर लगायो है। म्हैं थौरे ऊं साचौ कहूं की सगळै संसार में जठै कठै ई सुभ संदेस परचार कियो जावैला वठै इण लुगाई रा कांम री चरचा उणरी याद में की जावैला।” तद यहूदा इस्‍करियोती जिकौ बारैह मे ऊं एक हो, परधान याजकौ रै खनै गयो की यीसु नै पकड़ानै वास्तै उण ऊं बात करनै आयौ। वे उणरी बात सुण नै राजी होया, अर उणरै रूपिया देवण रौ वचन दियौ, अर यहूदा मौकौ ढ़ूंढ़ण लागौ की यीसु नै धोखे ऊं पकड़वा दे। अखमीरी रोटी रै तैंवार रै पैलै दिन, जिणमे ऊं फसह रा दिन मेमने री बलि देता हा, उणरा चेला उण ऊं पूछयौ, “थूं कांई चावै, की म्हौ कठै जायनै थारै वास्तै फसह खावण री तैयारी करौ?” वो आपरै चेला मे ऊं दो नै ओ कैहन भेज्या, “नगर मांय जाओ, अर एक मिनख पांणी रौ घड़ो उठायोड़ो थांनै मिळैला, उणनै लारै उण घर मे जाता रीजो। अर वो जिकौ घर मांय जावै उण घर रा मालिक ऊं कहीजौ, ‘गुरु कैवै, की वो कमरो कठै है जिण मे म्हैं म्हारै चेलौ रै साथै फसह तैंवार रौ भोज कर सकूं?’ वो थांनै एक सजी सजायोड़ी तैयार करयोड़ौ माळियो दिखा दैला, उठै अपणै वास्तै तैयारी करौ।” चेला निकळनै गांव मे आया अर जैड़ौ यीसु उणौ नै कयौ वैड़ौ ही पायो, अर उणौ फसह रौ खाणौ तैयार कियो। जद सिंझ्या होई, तद यीसु बारैह चेलौ रै साथै आयौ। अर जद वे बैठा खाणौ खा रिया हा, तो यीसु कयौ, “म्हैं थौरे ऊं हाची कैवूं, की थांरै मे ऊं एक, जिकौ म्हारै साथै खाणौ खा रियौ है, म्हारै साथै विसवासघात करनै म्हनै पकड़ावैला।” इण ऊं वे दुखी होयनै एक दूजै ऊं कैवण लागा, “पको वो म्हैं कोनीं हूं?” यीसु उणौ नै कयौ, “वो बारैह मे ऊं एक है, जिकौ म्हारै साथै एक ही थाळी मे खावै है। मिनख रौ बेटौ तो, जैड़ौ उणरै बारै मे पवितर सास्तर मे लिख्योड़ौ है, म्हनै तो मरणौ ही है, पण उण मिनख साथै घणौ बूरो होवैला, जिण ऊं मिनख रौ बेटा रै साथै विसवासघात करैला। उण मिनख रौ जनम ही नीं होवतो, तो उण वास्तै भलौ होवतो।” अर जद वे खा ही रिया हा तो वो रोटी ली, अर परमेसर नै धन्यवाद देने तोड़ी, अर उणौ नै दी, अर कयौ, “लौ, आ म्हारी देह है।” पछै वो कटोरो लेने धन्यवाद करयौ अर उणौ नै दियौ, अर वे हैंग उण मे ऊं पीयो। अर वो उणौ नै कयौ, “म्हारौ ओ लोई परमेसर रा नए वाचा री सरूआत है, जिकौ घणा रै पाप माफी वास्तै बहायौ जावै। म्हैं थौरे ऊं हाची कैवूं हूं, की अंगूर रौ रस उण दिन तांई कदैई कोनीं पीऊंला, जद तांई परमेसर रै राज मे नयो नीं पीऊं।” पछै वे भजन गाणें बारै जैतून रै भाखर माथै गिया। तो यीसु चेला नै कयौ, “थै हैंग आपरा विसवास ऊं डिग जावोला, क्यूंकै लिख्योड़ौ है, ‘म्हैं रुखाळा नै मारूंला, अर लरड़ियां बिखर जावैला।’ “पण म्हैं आप जी उठनै रै पछै थौरे ऊं पैला गलील जाऊंला।” पतरस उण ऊं कयौ, “सायद सगळा आपरै विसवास ऊं डिग जावैला। म्हैं नीं डिगुला।” यीसु उण ऊं कयौ, “म्हैं थौरे ऊं साची कैवूं, की आज ही इणी रात रा कुंकड़े रै दो बार बांग दैणै ऊं पैला, थूं तीन बार म्हनै ओळखणै ऊं मना करैला।” पण पतरस और भी जोर देने कयौ, “जे म्हनै थारै साथै मरणौ भी पड़ै तौभी थांनै पिछांणै ऊं मना नीं करूंला।” अर इण तरैह सगळौ चेलौ भी कयौ। पछै वे गतसमने नाम री एक जगा आया, अर वो आपरै चेलौ नै कयौ, “अठै बैठा रैवौ, जद तांई म्हैं पराथना करूं।” अर वो पतरस अर याकूब अर यूहन्‍ना नै आपरै साथै लेन गियौ। वो घणौ दुखी अर व्याकुल होवण लागौ। अर यीसु चेला नै कयौ, “म्हारौ मन घणौ दुखी है, अठै तांई म्हैं मरण माथै हूं, थै अठै रुको, अर जागता रैवौ।” अर वो थोड़ोक आगै चालयौ, अर जमीन माथै पड़नै पराथना करन लागौ, की जे हो सकै तो ओ वगत म्हारै माथै ऊं टळ जावै। अर कयौ, “पिता, हे पिता, थारै ऊं हैंग हो सकै, इण दुख भरयोड़े कटोरा नै म्हारै खनै ऊं आगौ ले लौ, तौभी जैड़ौ में चावूं वो नीं, पण जिकौ थै चावौ वो हीज हो।” पछै यीसु आया अर उणौनै सोयोड़ा देखनै पतरस ऊं कयौ, “हे समौन, थूं सूतौ है? कांई थूं एक घड़ी भी कोनीं जाग सकै? जागता अर पराथना करता रैवौ की, थै परीकसा मे नीं पड़ो। आतमा तो तैयार है, पण सरीर कमजोर है।” अर वो पाछौ गियौ, अर वा हीज बात कैहन पराथना करी। अर पाछौ आयनै उणनै सुतो देखियौ। क्यूंकै उणरी आंख्यां ऊंग ऊं भारी ही, अर चेला नीं जांणता हा की उणनै कांई जबाब दे। पछै तीजी बार आने उणौनै कयौ, “अबै तांई सुता हो? बस। अबै वगत आईगो है, देखौ म्हैं, मिनख रौ बेटौ पापियो रै हाथ ऊं विसवासघात करनै पकड़ायौ जावैला। उठो, चालौ देखौ, म्हारै विसवासघात करनै वाळौ नैड़ौ आई गियौ है।” वो ओ कैह ही रियौ हो, की यहूदा जिकौ बारैह मे ऊं एक हो, आपरै साथै एक मोटी भीड़ तरवारो अर लाठियां लेन आई जिणौनै परधान याजकौ अर सास्तरियों अर बुढ़ियों भेज्या हा। अर उणरा पकड़नवाळा उणनै ओ पतौ दियौ हो की जिणनै म्हैं चूमूं वो ही है, उणनै पकड़ नै सावचेती ऊं ले जाईजौ। अर वो आयौ, अर हाथोहाथ उणरै खनै आयनै कयौ, “हे गुरु!” अर उणनै चूमन लागौ। तद वे यीसु नै तुरत पकड़नै कब्जे मे ले लियौ। उणौ मे ऊं जिकौ खनै ऊभा हा, एक तरवार खींचनै महायाजक रै सेवक माथै चलाई, अर उणरौ कांन उडा दियौ। यीसु उणौनै कयौ, “कांई थै डाकू जांणनै म्हनै पकड़ नै वास्तै तरवारो अर लाठिया लेन आया हो? म्हैं तो हरैक दिन मिंदर मे थौरे साथै रैयनै उपदेस दिया करूं हूं, अर तद थै म्हनै कोनीं पकड़यौ, पण ओ इण वास्तै होयौ है की पवितर सास्तर री बातां पूरी हो।” इण माथै सगळा चेला उणनै छोड़नै नाह गिया। अर एक जवान आपरै उघाड़े सरीर माथै चादर ओढ़नै यीसु रै लारै गियौ, अर लोग उणनै पकड़ना री कोसीस करी। पण वो चादर छोड़नै उघाड़ो नाह गियौ। पछै वे यीसु नै महायाजक रै खनै लेन गिया, अर हैंग परधान याजक अर बुढ़िया अर सास्तरी उठै भेळा होया हा। पतरस आगौ ई आगौ उणौरै लारै लारै महायाजक रै आंगणै तांई गियौ, अर नौकरो रै साथै बैठनै अग्‍नि तपाणै लागौ। सगळा परधान याजक अर सगळी यहूदी पंचायत यीसु रै मार दैणै रै वास्तै उणरै विरोध माई गवाई री खोज माई हा, पण नीं मिळी। क्यूंकै कीं लोग उणरै विरोध मांय झूठी गवाई देता हा, पण उणौरी गवाई एक जैड़ी कोनीं ही। तद किता उठनै उण माथै आ झूठी गवाई दी, “म्हौ उणनै ओ कैवतै सुण्यौ है की, ‘म्हैं इण हाथ रै बनयोड़ा मिंदर नै ढ़ाह दूंला, अर तीन दिनां माई दूजौ बणाऊंला, जिकौ हाथ ऊं कोनीं बनयोड़ो हो।’ ” इणमे भी उणौरी गवाई एक जैड़ी कोनीं निकळी। तद महायाजक बीच मांय ऊभौ होन यीसु ऊं पूछयौ, “थूं कोई जबाब कोनीं दैवै? ऐ लोग थारै बारै मांय कांई गवाई दे रिया है?” पण वो चुप रियौ। अर की जबाब नीं दियौ। महायाजक उण ऊं फेर कियो, “कांई थूं उण परम पिता परमेसर रौ बेटौ, मसीह है?” यीसु कयौ, “हां म्हैं हूं, अर थै मिनख रा बेटा नै सर्वसक्तिमान रै जीमणै ओर बैठौ, अर आभै रै बादळो माथै आवतौ देखोला।” तद महायाजक आपरा कपड़ा फाड़नै कयौ, “अबै म्हौरै गवाई री कठै जरुत है? थै आ परमेसर री निंदा सुणी, थौरी कांई राय है?” वे सगळौ कयौ, “ओ तो मौत रै काबिल है।” तद कोई तो उण माथै थूके, कीं उणरौ मूंडौ ढ़कनै उणरै मुक्‍का ठोके अर कईक मजाक उडानै कैवण लागा, “भविसयवांणी करन बता कुण ठोकियो।” अर नौकरो उणनै पकड़नै लेन गिया अर भळै ठोकयो। जद पतरस नीचे आंगणै मांय हो, तो महायाजक री दासियो मे ऊं एक उणरै खनै आई। अर पतरस नै तापतो देखनै उणनै ध्यांन ऊं देखियौ अर कैवण लागी, “थूं भी तो नासरत रा यीसु रै साथै हो।” पतरस नटगो, “म्हैं तो कोनीं जांणूं अर कोनीं समझूं की थूं कांई कैवै है।” पछै वो बारै दरवाजे खनै गियौ, अर कुंकड़े बांग दी। वा दासी पतरस नै देखनै जिकौ खनै ऊभा हा, पाछौ कैवण लागी, “उण मे ऊं ओ एक है।” पण वो भळै नटगो। थोड़ी देर पछै वे जिकौ खनै ऊभा हा फेर पतरस ऊं कयौ, “पको थूं तो उणौ मे ऊं एक है क्यूंकै थूं गलीली भी है।” तो वो सौगन खाने के म्हैं झूठ बोलूं तो म्हनै परमेसर देखेला अर कैवण लागौ, “म्हैं उण मिनख नै, जिणरी थै बात करौ, कोनीं जांणूं।” अर हाथोहाथ दूजी बार कुंकड़े बांग दी, पतरस नै आ बात जिकौ यीसु उण ऊं कही ही याद आई, “कुंकड़े रै दो बार बांग दैणै ऊं पैला थूं तीन बार म्हारौ इन्कार करैला।” वो इण बात नै सोचनै जोर जोर ऊं रोवण लागौ। अर संवार होते ही हाथोहाथ परधान याजकौ, लोगां रा मुखिया, अर सास्तरियों नै अर यहूदिया री पंचायत यीसु नै बन्धवायो। वे मिळ नै यीसु नै ले जायनै हाकिम पिलातुस रै हाथ मे सूंप दियौ। अर पिलातुस उण ऊं पूछयौ, “कांई थूं यहूदिया रौ राजा है?” यीसु उणनै जबाब दियौ, “थूं खुद ही कैह रियौ है।” अर परधान याजक उण माथै घणी बातां रौ दोस लगा रिया हा। पिलातुस उण ऊं पाछौ पूछयौ, “कांई थूं की जबाब नीं दैवै? देख ऐ थारै माथै किती बातां रौ आरोप लगावै।” यीसु पाछौ उणनै जबाब कोनीं दियौ, पिलातुस नै अणूंतौ ही अचूम्बो होयौ। अर फसह रै तैंवार रै दिन मे किणी एक बंदी नै जिणनै लोग चावै पिलातुस उणौरै वास्तै छोड़ देतो हो। अर बरअब्बा नाम रौ एक मिनख दंगा करणैवाळौ रै साथै जेळ मे हो, जिकौ दंगे मे मिनख मारया हा। अर भीड़ खनै आन उण ऊं विनती करी की, “जैड़ौ थूं म्हौरै वास्तै करतौ आयौ है वैड़ौ ही कर।” पिलातुस उणौ नै ओ जबाब दियौ, “कांई थै चावौ, की म्हैं थौरे वास्तै यहूदिया रै राजा नै छोड़ दूं?” क्यूंकै वो जांणतौ हो की परधान याजकौ उणनै जळण ऊं पकड़ायौ हो। पण परधान याजकौ लोगां नै भड़काया, की वे बरअब्बा नै ही उणौरै वास्तै छोड़ दैवै। पिलातुस उणौ नै वळै पूछयौ, “जिणनै थै यहूदिया रौ राजा कैवौ, उणरौ म्हैं कांई करूं?” वे वळै चिलाया, “उणनै सूली माथै चढ़ा दो।” पिलातुस उणौ नै कयौ, “क्यूं, ओ कांई बूरो करयौ है?” पण वे और भी चिलाया की, “उणनै सूली माथै चढ़ा दो!” तो पिलातुस भीड़ नै राजी करण री इछा ऊं बरअब्बा नै उणौरै वास्तै छोड़ दियौ अर यीसु नै कोड़ा लगाने सूली माथै लटकावण रौ हुकम दे दियौ। सिपाई उणनै किला रै आंगणै माई लेन गिया, अर सगळी पलटन नै बुला लेन आया। अर वे उणनै राजा जैड़ा बैंजनी कपड़ो ओढ़ायो अर कांटो रौ मुगट गूंथनै उणरै माथा ऊपर राख्यौ। अर वे उणरौ मजाक बणाण लागा, “हे यहूदिया रै राजा, थारी जे हो।” अर वे उणनै माथा माथै सरकंडे ऊं ठोकता, अर उण माथै थूकता, अर गोडा टेकन उणनै नमस्कार करता रिया। अर जद वे उणरौ मजाक करणौ बंद कर दियौ तो, उणौ उणरा बैंजनी गाभा उतारनै उणरा ही गाभा उणनै पैराया, अर उणनै सूली ऊपर चढ़ाणै बारै लेन गिया। सिकन्दर अर रूफूस रौ बाप, समौन नाम रौ कुरैन रौ रैवण वाळौ मिनख जिकौ गांव ऊं आवतौ हो उठीनै निकळियौ, वे उणनै जबरदस्ती माई पकड़यौ, की उणरी सूली उठायनै चालै। यीसु नै गुलगुता नाम री जगा माथै जिणरौ मतलब खोपड़ी री जगा है, लेन आया। पछै उणनै लोबान मिळायोड़ो अंगूररस देवण लागा, पण वो कोनीं लियौ। तद वे उणनै सूली माथै चढ़ायौ, अर उणरै गाभौ माथै चिठ्ठिया नोख नै, की किणनै कांई मिळै, उणौनै बांट लिया। नव बजिया हो, जणै वे उणनै क्रूस माथै चढ़ायौ। उणरौ दोसपत्र लिखनै उण माथै लगा दियौ की, “यहूदिया रौ राजा।” अर उणरै साथै दो डाकू, एक उणरै जीमणी तरफ अर एक उणरै डावी तरफ सूली माथै चढ़ाया। तद धरमसास्तर रौ वो वचन की, “वो अपराधियो रै भेळौ गिण्यौ गियौ,” पूरौ होयौ। अर रासते माई जावण वाळा माथो हीला हीलाने अर ओ कैहन उणरी निंदा करता, “वाह! मिंदर रै ढ़ावणवाळा अर तीन दिन मांय बनावण वाळा! सूली माथै ऊं उतरनै खुदनै बचा ले!” इण रीति ऊं परधान याजक भी, सास्तरी समेत, आपस मे मजाक ऊं कैवता हा, “इण दूजौ नै बचाया है, अर खुदनै नीं बचा सकयौ। ऐ इजरायल रा राजा मसीह अबै सूली माथै ऊं उतरनै आवै की, म्हौ देखनै विसवास करौ।” अर जिकौ उण साथै सूली माथै चढ़ाया गिया हा वे भी उणरी बुराई करता हा। अर दोपार होवण माथै, हैंग देस मांय अंधारौ हो गियो, अर तीन बजे तांई रियौ। तीन बजे यीसु जोर ऊं पुकार नै कयौ, “इलोई, इलोई, लमा सबक्तनी?” जिणरौ मतलब है, “हे म्हारै परमेसर, हे म्हारै परमेसर, थूं म्हनै क्यूं छोड़ दियौ?” जिकौ खनै ऊभा हा, उणौ मे ऊं कितौ ओ सुणनै कयौ, “देखौ ओ एलियाह नै पुकार रियौ है।” अर एक दौड़नै रुई लेन खाटी अंगूरो मे डूबोन, डंडा माथै राखनै उणनै सूंपायो, अर कयौ, “रूक जाओ, देखौ की एलियाह उणनै उतारनै वास्तै आवै की कोनीं।” तद यीसु जोर ऊं हाको करनै प्रांण छोड़ दिया। अर मिंदर रौ परदो ऊपर ऊं नीचे तांई फाटनै दो टुकड़ा मे हो गियो। जिकौ सूबेदार उणरै सांमै ऊभौ हो, जद उणनै यूं हाका करन प्रांण छोड़तो देखियौ, तो वो कयौ, “साचौ ओ परमेसर रौ बेटौ है।” घणी लुगाईया आगा ऊं देख री ही, उण मे ऊं मरियम मगदलीनी अर छोटे याकूब री अर योसेस री मां मरियम अर सलोमी ही। जद वो गलील मांय हो, तो आ उणरै लारै हो लेवती ही अर उणरी सेवा चाकरी करती ही, अर जिकौ भी ओर लुगाईया ही, जिकौ उणरै साथै यरूसलेम मांय आई ही। जद सिंझया होई ही, तो इण वास्तै की तैयारी रौ दिन हो, जिकौ सब्त रै एक दिन पैला होवै। अरिमतिया रौ रैवणवाळौ यूसुफ आयौ, वो यहूदी पंचायत रौ खास मिनख हो अर खुद भी परमेसर रै राज्य री बाट जोवतो हो, वो हियाव करनै पिलातुस रै नैड़ौ गियौ अर यीसु री लास मांगी। पिलातुस अचूम्बो करयौ, की वो इतौ वेगो मरग्यौ, अर सूबेदार नै बुलायनै पूछयौ, “कांई उणनै मरया नै वगत होयौ?” जणै सूबेदार रै हाथ ऊं हाल जांण लियौ, तो लास यूसुफ नै देवण रौ आदेस दियौ। तद वो एक मूंगी मलमल री चादर मोल ली, अर लास नै उतारनै चादर मांय लपेटियो, अर एक कबर माई जिकौ चटान मांय खोदी गई ही राखियौ, अर कबर रै द्वार माथै एक भाटो लुढ़का दियौ। अर मरियम मगदलीनी अर योसेस री मां मरियम देखती ही, की वो कठै राख्योड़ौ है। जद सब्त रौ दिन बीत गियौ, तो मरियम मगदलीनी अर याकूब री मां मरियम अर सलोमी खुसबू वाळी चीजों मोल ली, ताकी वे जायनै यीसु री लास माथै लगावै। हपतै रै पैला दिन री संवार, जणै सूरज निकळियौ ही हो, वे कबर माथै आई। अर आपस माई कैवती ही, “अपांरै वास्तै कबर रै द्वार माथै ऊं भाटो कुण हटावेला?” जणै वे आंख उठाई, तो देख्यौ की भाटो सिरकयोड़ो हो! वो अणूंतौ ही मोटो हो। अर कबर रै मांय जायनै, घणी हेरान होई वे एक जवान नै सफेद गाभा पेरयोड़ा जीमणै तरफ बैठा देखिया। वो उणौ नै कयौ, “डरौ मती, थै नासरत मे रैवण वाळा यीसु नै जिकौ सूली माथै चढ़ायौ गियौ हो, सौधौ हो। वो जी उठयौ है, अठै कोनीं है। देखौ आ वोहीज जगा है, जठै वे उणनै राखियौ हो। थै जाओ, यीसु रै चेलौ अर पतरस ऊं कैवौ की, ‘वो थौरे ऊं पैला गलील जावैला, जैड़ौ वो थौरे ऊं कयौ है, थै उठै ही उणनै देखोला।’ ” अर वे निकळनै कबर ऊं भाग गी, क्यूंकै कांपण अर घबराण लाग गी ही अर वे कीण ऊं कीं भी नीं कयौ, क्यूंकै वे डरती ही। हपतै रै पैला दिन संवार होते ही यीसु मसीह जी उठनै, पैला मरियम मगदलीनी नै दिखाई दियौ, जिण मे ऊं वो सात दुस्ट आतमा निकाळी ही। मरीयम मगदलीनी जायनै उणरा साथियो ऊं जिकौ सौग मांय डूबोड़ा हा अर रौ रिया हा, समाचार दियौ। अर उणौ ओ सुणनै की यीसु जीवतौ है, अर मरियम उणनै देख्यौ है, तौभी उणौ विसवास नीं करयौ। इण पछै यीसु दूजा रूप मांय उणौ मे ऊं दो नै जद वे गांव री तरफ जा रिया हा, दिखाई दियौ। वे भी जायनै औरो नै समाचार दिया, पण उणौ भी उणौरौ विसवास नीं करयौ। लारै वो उणौ नै ग्यारहों नै भी जणै वे जीमण कर रिया हा दिखाई दियौ। अर उणौ नै अविसवास अर मन री कठोरता माथै हाका करिया। क्यूंकै जिकौ उणनै जी उठिया रै पछै उणनै देखियौ हो, वे उणरौ विसवास नीं करयौ हो। अर वो उणौ नै कयौ, “थै हैंग संसार मांय जायनै हैंग लोगां नै सुभ संदेस परचार करौ। जिकौ सुभ संदेस माथै विसवास करै अर बतिस्मो लेवे उणरौ ही उद्धार होवैला। पण जिकौ कोई थौरी बातां माथै विसवास नीं करैला वो दोसी ठैरायौ जावैला। अर विसवास करण वाळा मांय ऐ निसाण होवैला की वे म्हारै नाम ऊं दुस्ट आतमा निकाळैला। नई नई भासा बोलेला। अगर सांपो नै उठावैला अर जे वे जैर भी पी जावै तौभी उणौनै हानि नीं होवैला। वे बिमारों माथै हाथ राखेला, अर वे ठीक हो जावैला।” परभु यीसु उणौ नै बातां करिया पछै सरग मे उठा लिया गिया अर परमेसर रै जीमणै तरफ बैठ गिया। चेलौ मिलनै हैंग जगा परचार करयौ, अर परभु उणौरै साथै कांम करतौ रियौ, अर उण निसाण रै साथै जिकौ साथै साथै होवता हा वचन नै हाच करता रिया। लाडला भाई थियुफिलुस, घणा लोग उण बातां रौ इतिहास लिखणै री कोसीस करी, जिकौ कीं बातां अपांरै बीच में होई। ऐ बातां वे लोग अपांरै खनै पोंचाई जिकौ सरूआत ऊं इण बातां नै आंख्यां रै सांम्ही होते देखी अर वे परमेसर रै वचन रा सेवक हा। इण वास्तै, हे महोदय थियुफिलुस, म्हनै भी ओ चौखौ लाग्यो के, म्हैं उण सगळी बातां रौ पूरौ हाल, सरूआत ऊं, सावचेती रै साथै, जांच नै थारै वास्तै लेण ऊं लिखूं। जिण ऊं थूं ओ जांण ले के, ऐ बातां जिकौ थैं सीखी है, कैड़ी पकी है। यहूदिया देस रै राजा हेरोदेस री वेळा अबिय्याह रै लोगां मे जकरयाह नाम रौ एक याजक हो, अर उणरी लुगाई भी हारून वंस री ही। उणरौ नाम इलीसिबा हो। वे दोनूं परमेसर रै सांम्ही धरमी हा, अर परभु री सगळी आग्याओं अर विधियों माथै निरदोस चालनवाळा हा। उणौरै कोई टाबर कोनीं हा, क्यूंकै इलीसिबा बांझड़ी ही, अर वे दोनूं बूढ़ा हा। जद जकरयाह रै समाज रै मिंदर मे याजक रै कांम री बारी ही, अर वो परमेसर रै सांम्ही उपासना रै लियै तैयार हो। तो याजकौ री रीत रै अनुसार उणरै नाम री चिठ्ठी निकळी की, परभु रै मिंदर में जायनै धूप करै। धूप करणै री वगत लोगां री सगळी मंडली बारै पराथना कर री ही। उण वगत परभु रौ एक सरगदूत धूप री वेदी रै जीमणी तरफ ऊभौ जकरयाह नै देठाळौ दियौ। जकरयाह ओ देखनै घबरा गियो अर उण माथै डर छायगो। पण सरगदूत उणनै कयौ, “हे जकरयाह, डर मत। क्यूंकै परमेसर थारी पराथना सुण ली है। अर थारी लुगाई इलीसिबा ऊं थारै खातर एक बेटौ होवैला, अर थूं उणरौ नाम यूहन्‍ना राखजै। थनै आंणंद अर खुसी होवैला। अर घणा लोग उणरै जनम रै खातर खुस होवैला। क्यूंकै वो परभु री निजर में महान होवैला। अर दाखरस अर नसे री चीजों पीवणी मना है। अर आपरी मां रा गरभ ऊं इज पवितर आतमा ऊं भरयोड़ौ होवैला। अर इजरायल रै घणै लोगां नै उणरै परभु परमेसर री तरफ फेरैला। वो एलियाह री आतमा अर सामरथ मे होयनै परभु रै आगै आगै चालै ला। वो पिताओ रौ मन उणरी औळादों री तरफ पाछौ फेर दैला। अर वो आग्या नीं मांनणैवाळौ नै धरमियो री समझ माथै लावै ला, अर परभु रै लिए लायक परजा तैयार करैला।” जकरयाह सरगदूत ऊं पूछयौ, “ओ म्हैं कीकर जांणूं? क्यूंकै म्हैं तो बूढ़ो हूं। अर म्हारी लुगाई भी बूढ़ी होयगीं है।” सरगदूत उणनै जबाब दियौ, “म्हैं जिबराईल हूं, जिकौ परमेसर रै सांम्ही ऊभौ रैवूं हूं। अर म्हैं थारै ऊं बातां करणै अर थांनै ओ सुभ संदेस सुणाणै खातर भेज्यौ गियौ हूं। अर देख जिण दिन तांई ऐ बातां पूरी नीं हो जावै, उण दिन तांई थूं गूंगो रैला, अर बोल नीं पावैला, इण वास्तै की थूं म्हारी बातां जिकौ अपणै वगत माथै पूरी होवैला, विसवास कोनीं कियो।” अर लोग जकरयाह री बाट जोता हा अर अचूम्बो कर रिया हा की वो मिंदर मांय इती जेज क्यूं लगा रियौ है। जद वो बारै आयौ, तो उणौ ऊं बोल नीं सकयौ। तो वे जांण गिया, की उणै मिंदर मांय कोई दरसण होया है। अर वो उणौ ऊं इसारा करतौ रियौ, अर गूंगो इज रैह गियो। जद उणरै सेवा रा दिन पूरा हो गिया, तो वो घरै जातौ रियौ। इण दिनां रै पछै उणरी लुगाई इलीसिबा जापायती होई। अर पांच महीनै तांई अपणै आपनै लूकाय राखी, अर उणै कयौ, “मिनखौ में म्हारी बेजती आगी करणै रै खातर परभु नै इण दिनां मांय म्हारै माथै करपा करी है।” छठै महीनै मांय परमेसर री तरफ ऊं जिबराईल सरगदूत गलील रै नासरत नगरी मांय एक कुंवारी रै खनै भेज्यौ गियौ हो, जिणरी सगाई दाऊद रै घराणै रै यूसुफ नाम रै मिनख रै साथै होयोड़ी ही। उण कुंवारी रौ नाम मरियम हो। अर सरगदूत उणरै खनै आयनै कयौ, “थांनै नमस्कार, थारै माथै परमेसर री करपा होई है, परभु थारै साथै है।” आ बात सुणतै ही मरियम घणी घबराई, अर सौचणै लागी के, “ओ कीण तरैह रौ नमस्कार है?” तो सरगदूत उण ऊं कयौ, “हे मरियम, डर मत! क्यूंकै परमेसर री करपा थारै माथै होई है। सुण, थूं जापायती होवैला, अर थारै एक बेटौ पैदा होवैला। थूं उणरौ नाम यीसु राखजै। वो महान होवैला। अर परम परधान परमेसर रौ बेटौ कैलावैला। अर परभु परमेसर उणरै वडेरा दाऊद रौ सिंहासण उणनै दैला। अर वो याकूब रै वंस माथै हमेसां राज करैला, अर उणरै राज रौ कदैई अंत नीं होवैला।” मरियम सरगदूत नै कयौ, “ओ कीकर होवैला? म्हैं तो अजी तांई कुंवारी हूं।” सरगदूत उणनै जबाब दियौ, “की पवितर आतमा थारै माथै उतरैला, अर परम परधान री सामरथ थारै माथै छाया करैला। इण वास्तै जिकौ पैदा हौणवाळौ है, वो परमेसर रौ बेटौ कैलावैला। अर सुण, थारी रिसतेदार इलीसिबा रै भी बुढ़ापे में बेटौ हौण वाळौ है, ओ उणरौ, छठौ महीनो है जिणनै सगळा बांझड़ी कैवता हा। क्यूंकै परमेसर रै लिए कीं भी असंभव कोनीं है।” मरियम कयौ, “म्हैं परभु री दासी हूं। म्हनै थारै वचन रै अनुसार होवै।” तद सरगदूत उणरै खनै ऊं जातौ रियौ। उण दिनां मांय मरियम उठै ऊं हाथोहाथ इज भाखरो रै देस में यहूदिया रै एक नगरी मांय गी। अर जकरयाह रै घर मांय जायनै इलीसिबा नै नमस्कार करिया। ज्यौ ही इलीसिबा मरियम रौ नमस्कार सुण्यौ, त्यौं ही उणरै पेट मांय टाबर उछळियौ, अर इलीसिबा पवितर आतमा ऊं भरगी। वां जोर ऊं कयौ, “थूं सगळी लुगाईयां में सबां ऊं धन्य है अर थारै पेट मे जिकौ टाबर है वो भी धन्य है। आ करपा म्हारै माथै कीकर होई के, परभु री मां म्हारै खनै आई है? देख, ज्यूं ही थारा नमस्कार रौ सबद म्हारै कांनो में पड़िया, व्यौंही म्हारै पेट में टाबर आंणंद ऊं उछलनै लाग्यौ। धन्य है थूं जिकौ ओ विसवास करयौ के, जिकौ बातां परभु री तरफ ऊं उणनै कही ही वो पूरी होयगीं।” तद मरियम कयौ, “म्हारौ प्रांण परभु री बड़ाई करै है। अर म्हारी आतमा म्हारौ उद्धार करणवाळा परमेसर ऊं आणन्दित है। क्यूंकै वे म्हारै माथै करपा करी है, जिकौ उणौरी दासी हूं, इण वास्तै देखौ, अबै ऊं सब जुग जुग रा लोग म्हनै धन्य कैवैला। क्यूंकै ताकतवर परमेसर म्हारै खातर मोटा मोटा कांम करिया है। अर उणरौ नाम पवितर है। अर उणरी दया उण माथै, जिकौ उण ऊं डरै है, पीढ़ी ऊं पीढ़ी बणी रैवै है। वे आपरी ताकत दिखाई है, अर जिकौ अपणै आप नै मोटा समझता हा, उणौनै तितर-बितर कर दिया। वे राजा महाराजा नै सिंहासण ऊं पटक दिया है अर दीन दुखियों नै ऊंचा उठाया है। वे भूखो नै चौखी चीजों ऊं धपाया, अर धनवानो नै खाली हाथ कर दिया। परमेसर नै वे बातां याद री, जिकौ वे अपांरै वडेरा अबराहम अर उणरै पीढ़ी ऊं करी ही, ‘म्हैं आपरी दया अबराहम अर उणरै वंस माथै हमेसां करूंला।’ इण वास्तै वे आपरा सेवक इजरायल नै संभाळ लियौ है।” मरियम लगोलग तीन महीना इलीसिबा रै साथै रैयनै आपरै घर पाछी गी। तद इलीसिबा रै जापा रौ वगत पूरौ होयौ तो वां एक बेटे नै जनम दियौ। उणरा पड़ोसी अर रिसतेदार ओ सुणनै के, परभु उण माथै मोटी दया करी है तो, वे भी उणरै साथै राजी होया। अर ऐड़ौ होया की आठवे दिन वे टाबर रौ खतनो करणै आया अर उणरौ नाम उणरै पिता रै नाम माथै जकरयाह राखण लाग्या। पण इलीसिबा बोली, “नीं, बल्कि इणरौ नाम यूहन्‍ना राखौ।” अर उठै जिकौ लोग हा वे कयौ, “थारा रिसतेदारो मांय कोई भी इण नाम रौ कोनीं है।” तो वे आपरै पिता ऊं इसारो करनै पूछयौ, “थूं इणरौ नाम कांई राखणौ चावै है?” तो जकरयाह लिखणै वास्तै पाटी मांगी अर लिख्यौ, “इणरौ नाम यूहन्‍ना है।” तो सगळौ नै अचूम्बो होयौ। उणीज वैळा तुरत जकरयाह री जीभ खुलगी अर वो पाछौ बोलण लागौ अर परमेसर री बड़ाई करणै लागौ। अर जठै आ बात फैलगी, उठै आजू बाजू रैवण वाळा में डर छायगो अर ऐ चरचा यहूदिया रै सगळै भाखर वाळा देस में फैलगी। आ बात सुणणै वाळौ इणरै बारै मे मन मे विचार करण लागा के, “ओ टाबर कैड़ौ होवैला?” क्यूंकै परभु रौ हाथ उणरै माथै हो। यूहन्‍ना रा पिता जकरयाह पवितर आतमा ऊं भरिजगा, अर भविसयवांणी करणै लाग्या। “इजरायल रा परभु परमेसर री जय हो, वे आपरा लोगां माथै दिस्टी करी अर उणौ रौ छुटकारो करयौ। आपरै सेवक दाऊद रै वंस मे अपांरै खातर एक ताकतवर उद्धार करणै वाळै नै भेज्यौ है। ज्यूं उणै आपरै पवितर भविसयदाताओ रै दवारा जिकौ जगत रै सरूआत ऊं होता आया है, कयौ हो। अरथावूं म्हौरै दुसमनो ऊं, अर म्हौरै सगळै बैरियो रै हाथ ऊं म्हांरौ उद्धार कियो है। की म्हौरै वडेरा माथै दया करनै अपणी पवितर वाचा नै याद करै। अर वो सौगन जिकौ उणै म्हौरै पिता अबराहम ऊं खाई ही। वो म्हौ नै दुसमनो रै हाथ ऊं छुड़ावैला, ताकी अपां बिना डर ऊं, पूरी जिन्दगी पवितरता अर धरम रै साथै परमेसर रै सांम्ही सेवा कर सकौ। अर हे टाबर थूं परम परधान रौ भविसयदाता कैलावैला, क्यूंकै थूं परभु रै आगै आगै चालै ला अर उणरौ मारग तैयार करैला। परमेसर रा लोगां नै उद्धार रौ ग्यांन दे, जिकौ उणौरै पापों री माफी ऊं मिळैला। ओ म्हौरै परमेसर री उण मोटी करपा ऊं होवैला। जिणरै खातर ऊपर ऊं अपां माथै सवार रौ उजाळौ उगैला। की अंधारै अर मौत री छाया में बैठण वाळै नै उजाळौ दे, अर म्हौरै पगां नै खुसी रै मारग मे सीधा चलाए।” अर वो टाबर मोटो अर आतमा में मजबुत होवतो गियो, अर इजरायल रा लोगां रै सांम्ही आवणा ऊं पैला तांई रिंदरोही में रियौ। उण दिनां मांय औगुस्तुस कैसर री तरफ ऊं आग्या निकाळी, की सगळै जगत रै लोगां रा नाम लिख्या जावै। आ जनगणना पैला उण वेळा होई, जद क्‍वरिनियुस सूरिया रौ हाकिम हो। अर सगळा लोग नाम लिखाणै आपरै आपरै नगरी मांय ग्या। इण वास्तै यूसुफ भी वो दाऊद रै घराणै अर वंस रौ हो, गलील रै नासरत नगरी ऊं यहूदिया में दाऊद रै नगरी बैतलहम गियौ। की आपरी मंगेतर मरियम रै साथै नाम लिखाणै जिकौ वां जापायती ही। उणरै उठै ही हा जद मरियम रै जापा रा दिन पूरा होयग्या हा। वां आपरा पैला बेटा नै जनम दियौ अर उणनै कपड़े में लपेट नै बाड़ै मांय सूला दियौ। वांनै रैवण रै खातर सराह में जगा कोनीं मिळी ही। अर उण देस मांय कीं गवाळा हा, जिकौ रात रा खेत मांय रैयनै आपरै ऐवड़ री रूखाळी करता हा। अर परभु रौ दूत उणौरै खनै आयनै ऊभौ होयौ। अर परभु री महिमा रौ तेज उणौरै च्यांरूमेर चमकियो, गवाळा उणनै देखनै घणा डरग्या। तो सरगदूत वांनै कयौ, “डरौ मत! देखौ म्हैं थांरै वास्तै सुभ संदेस लैयनै आयौ हूं, जिण ऊं सगळै लोगां नै घणौ आंणंद मिळैला। आज दाऊद रै नगरी मांय थौरे वास्तै एक उद्धारकर्ता जनमिया है, अर ओहीज मसीह परभु है। अर उणरी निसाणी आ है के, थै एक टाबर नै कपड़ा में लपेटयोड़ौ अर बाड़ै मांय सूतौड़ो देखोला।” तद एकाएक उण सरगदूत रै साथै सरगदूतो री भीड़ परमेसर री आराधना करता होया अर ओ कैवता होया देठाळौ दियौ। “आभै मे परमेसर री महिमा अर धरती माथै उण मिनखौ नै जिण ऊं वो राजी है सानति मिळै।” जद सरगदूत उणरै खनै ऊं सरग में जाता रिया, तो गवाळा आपस में कैवण लाग्या, “आओ अपां बैतलहम जायनै आ बात जिकौ होई है, जिणरै बारै में परभु अपांनै कयौ है, उणनै देखौ।” अर वे तुरत जायनै मरियम अर यूसुफ नै बाड़ै मांय उण टाबर नै सूतौ देख्यौ। टाबर नै देखनै गवाळौ आ बात इण टाबर रै बारै में जिकौ सरगदूत कयौ हो, वो सगळै लोगां नै बताई। अर जिकौ भी गवाळौ री बातां सुणी वे उण बातां माथै अचूम्बो करणै लाग्या। पण मरियम ऐ सगळी बातां आपरै मन मांय राखनै सोचती रही। अर गवाळौ ज्यौ उणौनै कयौ हो, वैड़ौ इज सगळौ सुणनै अर देखनै परमेसर री महिमा अर आराधना करता होया पाछा ग्या। जद आठ दिन पूरा होया, अर उणरै खतने रौ वगत आयौ, तो उणरौ नाम यीसु राख्यौ, जिकौ बात सरगदूत मरियम रै जापायती होणै ऊं पैला कयौ हो। अर जद मुसा री व्यवस्था रै अनुसार उणरै सुद्ध होणै रा दिन पूरा होया तो वे यीसु नै यरुसलेम में ले ग्या, की परभु रै सांमै ले जावै। ज्यूं परभु री व्यवस्था में लिख्योड़ौ है के, “हरैक पैलौ टाबर परभु परमेसर रै खातर पवितर ठैरैला।” अर परभु री व्यवस्था रै वचन रै अनुसार कमेड़ी रौ एक जोड़ो, या कबूड़ै रा दो बचिया लायनै बलिदान करै। अर यरुसलेम में समौन नाम रौ आदमी रैवतौ हो। वो धरमी अर परमेसर रौ भगत हो। अर इजरायल रै सानति री बाट जोवतो हो, अर पवितर आतमा उणरै साथै ही। अर पवितर आतमा उणनै याद दिलाई ही, की जैड़ी तांई थूं परभु रै मसीह नै देख नीं ले, उठै तांई थूं नीं मरेला। अर वो आतमा री अगुवाई ऊं मिंदर मांय आयौ। अर जद मां बाप यीसु नै मांय लाया, की उणरै लियै व्यवस्था री रीत रै अनुसार करै, तो समौन टाबर नै आपरै खोळे मांय लियौ अर परमेसर रौ धन्यवाद करनै कयौ, “हे परभु थै थौरे वचन नै पूरौ कियो है। अबै अपणै दास नै सानति रै साथै मरण दे। क्यूंकै म्हारी आंख्यां नै थारै उद्धार नै देख लियौ है, जिणनै थै सगळै लोगां रै सांम्ही तैयार करया है, की वो दूजी जातियो नै उजाळौ दैणै रै लियै दीयौ, अर थारै अपणै इजरायल रै लोगां रै लियै आ महिमा है।” यीसु रा मां बाप यीसु रै बारै में ऐ बातां सुणनै अचूम्बो करता हा। तो समौन उणनै आसीस देयनै उणरी मां मरियम नै कयौ, “परमेसर इण टाबर नै इजरायल रा घणा लोगां रै नास अर उद्धार रै वास्तै चुणयौ है। घणा लोग इण रै विरोध में बोले ला आ इण बात री परमेसर री तरफ ऊं निसाणी रैला। इण तरैह ऊं घणौ रै काळजै मांय विचार परगट होवैला। अर एक तरवार आपरै काळजै नै आरपार बिंदैला।” अर असेर रै गोत्र मांय फनूएल री बेटी हन्‍नाह नाम एक भविसयदाती ही। वो घणी बूढ़ी ही, अर ब्याव होणै रै पछै सात बरस आपरै घरधणी रै साथै रैह पाई। वां विधवा ही, अर अबै वां चौरासी बरस री है। अर मिंदर नै कोनीं छोड़ती पण उपवास अर पराथना कर करनै रात-दिन उपासना किया करती ही। अर वां उणीज घड़ी उठै आयनै परमेसर रौ धन्यवाद करणै लागी, अर जिकौ लोग यरुसलेम रै छुटकारै री बाट जोह रिया हा, उण सगळौ नै उण टाबर रै बारै में बातां करणै लागी। अर जद वे परभु री व्यवस्था रै अनुसार सगळौ निपटा लियौ तो गलील में आपरै नगर नासरत पाछा जाता रिया। अर टाबर मोटो होतो गियो, अर ताकतवर अर बुद्धिमान होवतो गियो। अर परमेसर री करपा उण ऊपर ही। उणरा मां बाप हर साल फसह रै तैंवार मे यरुसलेम जाया करता हा। जद यीसु बारैह बरस रौ होयौ, तो वे तैंवार री रीति रै अनुसार यरुसलेम गिया। जद तैंवार पूरौ होयौ अर वे घर पाछा आवण लागा, तो बेटौ यीसु यरुसलेम में रैय गियौ। बल्कि ओ उणरै मां बाप कोनीं जांणता हा। वे ओ समझया हा, की यीसु संग रै लोगां रै साथै होवैला। एक दिन रौ सफर निकळ गियो तो यीसु उणौनै नीं दिख्यौ तो वे यीसु नै जान पिछांणवाळौ अर रिसतेदारो में ढ़ूंढ़नै लागा। जद यीसु नीं मिळया तो वे पाछा यरुसलेम मे गिया। तीन दिनां रै पछै यीसु नै मिंदर मे उपदेस देवण वाळा रै बीच मे बैठौ उणौ ऊं सवाल जबाब करतौ मिळियौ। जिता भी यीसु री बातां सुणता हा, वे सब यीसु री समझ अर जबाब ऊं अचूम्बे मे हा। उणरा मां बाप उणनै देखनै अचूम्बो कियो अर उणरी मां उणनै कयौ, “हे बेटा, थूं म्हौरै साथै ऐड़ौ क्यूं करयौ? देख थारा पिता अर म्हैं किता परेसान होयनै थनै ढ़ूंढ़ता हा।” यीसु बोल्या, “थै म्हनै क्यूं ढ़ूंढ़ता हा? कांई थै जांणौ कोनीं, की म्हनै म्हारै पिता रै घर में रैवणौ चाहीजै?” पण जिकौ बात यीसु उणौनै कही, वे उण बात नै नीं समझया। वे यीसु नै लैयनै नासरत में आया अर यीसु मां बाप रै कैणै में रिया। मरियम ऐ सगळी बातां नै अपणै मन मे राखी। यीसु बुद्धि अर सरीर मे मोटो होतो गियो। परमेसर अर लोगां रौ परैम उणरै साथै हो। आ बात तिबिरियुस महाराजा रै राज रा पनरवा साल री है, जद पुन्तियुस पिलातुस यहूदिया रौ हाकिम हो, हेरोदेस गलील रौ राजा हो, अर उणरौ भाई फिलिप्पुस इतूरैया अर त्रखोनीतिस रौ राजा हो, अर लियानियास अबिलेने रौ राजा हो। जद हन्‍ना अर कैफा महायाजक रा पद माथै हा। उण वगत परमेसर रौ वचन रिंदरोही मे जकरयाह रै बेटे यूहन्‍ना खनै पोचियो। यूहन्‍ना यरदन नदी रै आड़ै पाड़ै रा सगळी जगा माथै पाप री माफी खातर मन फिराओ रौ बतिस्मो लेवणा रौ परचार करतौ हो। ज्यूं परमेसर रै भविसयदाता यसायाह री किताब में लिख्योड़ौ है, “रिंदरोही मे एक हेलौ करणैवाळै रौ हेलौ सुणीजै है, परभु रै वास्तै मारग तैयार करौ अर उणरै मारग सीधौ करौ। हरैक घाटी भर दी जावैला, अर हरैक भाखर अर धौरा नीचा किया जावैला। अर जिकौ टेडा है सीधा, अर जिकौ ऊंचा नीचा है वो चौरस मारग बणैला। तो हरैक प्राणी परमेसर रै उद्धार नै देखेला।” लोगां री भीड़ यूहन्‍ना रै खनै बतिस्मो लेवण आवण लागी, अर वो लोगां नै एक ही बात केवतो हो, “हे साप रै बिचियो, आवणवाळै कोप ऊं बचनै वास्तै थांनै कुण सावचेत कर दिया। इण वास्तै अबै ऊं थै कांम ऊं ओ लागणो चाहीजै, की थै पाप नै छोड़ दियौ हो। अर आपरै मूंडै ऊं मत कैवौ, ‘अबराहम म्हौरौ पिता है।’ म्हैं थौरे ऊं कैवूं हूं, की परमेसर इण भाठै ऊं अबराहम रै वास्तै औळाद पैदा कर सकै है। रुंखड़ै री जड़ो माथै कवाड़ियो तैयार है, अर हरैक उण रूंखड़ै नै जिकौ बड़िया फळ नीं लावै, वो काट दियौ जावैला, अर लाय में नोख दियौ जावैला।” लोग यूहन्‍ना नै पूछयौ, “तो म्हैं कांई करौ?” तो यूहन्‍ना उणौनै जबाब दियौ, “जिणरै खनै दो कुड़ता है, वो एक उणनै दैय दे जिणरै खनै एक ही कोनीं। अर जिणरै खनै खाणौ है, वो भी यूं ही करै।” अर चुंगी लेवणवाळा भी बतिस्मो लेवण यूहन्‍ना रै खनै आयनै पूछयौ, “हे गुरु, म्हौ कांई करौ?” यूहन्‍ना उणौनै जबाब दियौ, “जिती चुंगी तैह है, उण ऊं घणी मत लेजो।” अर कीं सिपाई भी यूहन्‍ना ऊं ओ पूछयौ, “म्हौ कांई करौ?” तो यूहन्‍ना उणौनै कयौ, “किणी ऊं दबाव देयनै रूपिया मत लौ। किणी माथै झूठौ दोस मत लगाओ अर अपणी तनखा ऊं खुस रैवौ।” लोग आवण वाळा मसीह री आस लगायोड़ा हा, अर आपो आपरै मन में सोचता हा, की यूहन्‍ना तो मसीह कोनीं है। तो यूहन्‍ना उणौनै कयौ, “म्हैं तो थांनै पांणी ऊं बतिस्मो देवूं हूं। पण म्हारै पछै जिकौ आवणवाळौ है, वो म्हारै ऊं घणौ ताकतवर है। म्हैं तो इण लायक भी कोनीं, की उणरै पगरखो री डोरी खोल सकूं, वो थांनै परमेसर री पवितर आतमा अर अग्‍नि ऊं बतिस्मो देवेला। उणरौ सूपड़ो उणरै हाथ मे है अर वो आपरै खेत नै साफ करैला। अर धान नै भंडार मे भरेला, पण वो डूरै नै ऐड़ी लाय में नोखेला जिकौ कदैई नीं बुझेला।” दूजी घणी बातां सुणायनै यूहन्‍ना उणौनै सुभ संदेस सुणातौ हो। पण यूहन्‍ना, राजा हेरोदेस नै उणरा भाई फिलिप्पुस री लुगाई नै आपरै घर में घालणै रै कारण अर उणरै दूजै भूंडै कांमां रै कारण फटकार लगाई, तो राजा सगळौ ऊं भूंडौ ओ कांम करयौ, की यूहन्‍ना नै जेळ मे घाल दियौ। यूहन्‍ना नै जेळ मे बंद करणै ऊं पैला जद सगळा लोग बतिस्मो ले रिया हा, तो यीसु भी बतिस्मो लियौ। अर जद यीसु पराथना कर रिया हा, तद आभौ खुल गियो। पवितर आतमा खुद कबूड़ै रै ज्यूं उण माथै उतरी अर आ आकासवाणी होई, “थूं म्हारौ लाडलौ बेटौ है, म्हैं थारै ऊं घणौ राजी हूं।” यीसु जद उपदेस देवण लागा, उण वगत वे लगोलग तीस साल रा हा। अर लोग ओ समझता हा, की वो यूसुफ रौ बेटौ है, अर यूसुफ जिकौ एली रौ बेटौ है, अर एली मतात रौ, अर मतात लेवी रौ, अर लेवी मलकी रौ, अर मलकी यन्‍ना रौ, अर यन्‍ना यूसुफ रौ। अर वो मत्तित्याह रौ, अर वो आमोस रौ, अर वो नहूंम रौ, अर वो असल्याह रौ, अर वो नोगह रौ। अर वो मात रौ, अर वो मत्तित्याह रौ, अर वो सिमी रौ, अर वो योसेख रौ, अर वो योदाह रौ। अर वो योनान रौ, अर वो रैसा रौ, अर वो जरुब्बाबिल रौ, अर वो सलतियेल रौ, अर वो नेरी रौ। अर वो मलकी रौ, अर वो अद्दी रौ, अर वो कोसाम रौ, अर वो इलमोदाम रौ, अर वो ऐर रौ। अर वो यहोसू रौ, अर वो इलाजार रौ, अर वो योरीम रौ, अर वो मतात रौ, अर वो लेवी रौ। अर वो समौन रौ, अर वो यहूदाह रौ, अर वो यूसुफ रौ, अर वो योनान रौ, अर वो इलयाकीम रौ। अर वो मलेआह रौ, अर वो मिन्‍नाह रौ, अर वो मतता रौ, अर वो नातान रौ, अर वो दाऊद रौ। अर वो यिसै रौ, अर वो ओबेद रौ, अर वो बोअज रौ, अर वो सलमोन रौ, अर वो नहसोन रौ। अर वो अम्मीनादाब रौ, अर वो अरनी रौ, अर वो हिसरोन रौ, अर वो फिरिस रौ, अर वो यहूदाह रौ। अर वो याकूब रौ, अर वो इसहाक रौ, अर वो अबराहम रौ, अर वो तिरह रौ, अर वो नाहोर रौ। अर वो सरूग रौ, अर वो रऊ रौ, अर वो फिलिग रौ, अर वो एबिर रौ, अर वो सिलह रौ। अर वो केनान रौ, अर वो अरपसद रौ, अर वो सेम रौ, अर वो नूह रौ, अर वो लिमिक रौ। अर वो मथूसिलह रौ, अर वो हनोक रौ, अर वो यिरिद रौ, अर वो महललेल रौ, अर वो केनान रौ। अर वो इनोस रौ, अर वो सेत रौ, अर वो आदम जिणनै परमेसर बणाया हा। यीसु पवितर आतमा ऊं भरयोड़ा यरदन ऊं पाछा आयगा, अर पवितर आतमा उणनै सुनी जगा मे लैयगी। उठै चाळीस दिन तांई सैतान यीसु री परीकसा लेतो रियौ। उण दिनां मे यीसु कीं नीं खायौ। जद चाळीस दिन निकळगा तो उणनै भूख लागी। तो सैतान उणनै कयौ, “जे थूं परमेसर रौ बेटौ है, तो इण भाठै ऊं कैह, की रोटी बण जाए।” यीसु जबाब दियौ, “पवितर सास्तर मे लिख्योड़ौ है, ‘मिनख सिरफ रोटी ऊं इज जीवतौ कोनीं रैवैला।’ ” तो सैतान उणनै ऊपर एक ऊंची जगा माथै लेन गियो अर उणनै पलभर मे जगत रा सगळा राज दिखाया। अर यीसु ऊं कयौ, “ऐ सगळा राज पाट अर धन दौलत म्हैं थनै दे दूंला, क्यूंकै ऐ म्हनै सूंपयोड़ा है। अर म्हैं जिणनै चावूं उणनै दे सकूं हूं। इण वास्तै, जे थूं म्हनै झुकनै परणाम करै, तो ऐ सगळौ थारौ हो जावैला।” यीसु सैतान नै कयौ, “पवितर सास्तर मे लिख्योड़ौ है, की थूं अपणै परभु परमेसर नै परणाम कर अर सिरफ उणरी सेवा कर।” तो सैतान यीसु नै यरुसलेम मे ले जायनै मिंदर रै ऊंचै कोने माथै ऊभौ करयौ। अर उणनै कयौ, “जे थूं परमेसर रौ बेटौ है तो अठै ऊं नीचे कूद जा। क्यूंकै लिख्योड़ौ है, ‘परमेसर सरगदूतो नै आग्या दैला, की वे थारी रकसा करै। सरगदूत थनै हाथो हाथ उठा दैला, ऐड़ौ नीं होवैला की थारै पगां मे भाठै री लाग जावै।’ ” यीसु जबाब दियौ, “सास्तर मे ओ भी लिख्योड़ौ है, ‘थूं अपणै परभु परमेसर री परीकसा मत लैजै।’ ” जद सैतान सगळी तरैह री परीकसा कर ली, तो कीं घड़ी रै वास्तै उणरै खनै ऊं जातौ रियौ। पछै यीसु पवितर आतमा री सामरथ पायनै पाछा गलील आया, अर उणरी चरचा आजू बाजू सगळै देस मे फैलगी। यीसु उण ही पराथना घरो मे उपदेस देवण लागौ। अर सगळा उणरी सौभा करनै लागा। पछै यीसु नासरत आया जठै उणरौ पालण पोसण होयौ हो। अर आपरी रीत रै अनुसार सब्त रै दिन वो यहूदी पराथना घर मे गिया। जद वो पढ़नै रै वास्तै ऊभौ होयौ। तो यसायाह भविसयदाता री किताब उणनै पढ़ानै वास्तै दी। उणै जद किताब खोलनै, वो जगा निकाळी जठै ओ लिख्योड़ौ हो, “परभु री आतमा म्हारै माथै है, क्यूंकै वे कंगालो नै सुभ संदेस सुणाणै रै वास्तै म्हारौ अभिसेक करयौ है। अर म्हनै इण वास्तै भेज्यौ है, की कैदियो नै छुटकारै रौ, अर आंधौ नै आंख्यां ऊं दिस्टी पावण रौ सुभ संदेस रौ परचार करूं अर दबयोड़ौ नै छुड़ाऊ। अर परभु रै दया रै वगत रौ हेलौ पाड़ू।” पछै उणै किताब बंद करनै सेवक नै पाछी दे दी, अर बैठगा। पराथना घर मे सगळै लोगां री आंख्यां उणनै निहार रही ही। तो यीसु उणौनै कैवण लागौ, “आज थौरे सुणतै होयौ सास्तर रौ ओ वचन पूरौ होयौ।” हरैक उणरी सौभा कर रिया हा। उणरै मूंडै ऊं जिकौ बड़िया वचन निकळ रिया हा, उण माथै सगळा अचूम्बो करता हा। वे कैवण लागा, “कांई ओ यूसुफ रौ बेटौ कोनीं है?” यीसु उणौनै कयौ, “पको ही थै म्हनै आ कावत सुणाओला, ‘अरै वैद, खुद अपणै आप नै सावळ कर। अर थूं जिकौ कफरनहूंम मे करयौ अर जिणरै बारै मे म्हैं सुण्यौ हो, उण करमो नै अठै अपणै खुद रै नगरी मे भी कर।’ ” अर यीसु उणौनै कयौ, “म्हैं थौरे ऊं साची साची कैवूं हूं, कोई भविसयदाता कदैई आपरै नगर मे मांन नीं पावैला। अर म्हैं थौरे ऊं साची कैवूं हूं, एलियाह रै वगत जद साढ़ै तीन साल तांई बरसात नीं होई, अर पूरा देस में घणौ अकाळ पड़ियौ, तो उण वगत इजरायल मे घणी ही विधवाओं ही। पण एलियाह नै उण किणी रै खनै कोनीं भेज्यौ, पर सिरफ सैदा नगरी रै खनै वाळै नगर सारफत मे एक विधवा खनै भेज्यौ। अर इण ज्यूं एलिसा भविसयदाता रै वगत इजरायल मे घणा ही कोढ़ी हा, पर सीरिया देस रा नामान नै छोड़नै उणमे ऊं किणी रौ कोढ़ नीं झाड़ियौ।” ऐ बातां सुणनै पराथना घर मे बैठा सगळा रीस ऊं भरगा। वे यीसु नै नगर ऊं बारै भाखर री चोटी माथै लेन गिया जिण भाखर माथै वो नगर बसयोड़ौ हो, ताकी उणनै उण भाखर माथै ऊं नीचे फेंक दे। बल्कि यीसु उणौरै बीच मे ऊं निकळनै चुपचाप चाल दिया। पछै यीसु गलील देस रै कफरनहूंम नगर मे आया अर यहूदियो रै आराम रै दिन यीसु पराथना घर मे जायनै परमेसर रा वचन सिखावण लागा। लोग उणरा उपदेस सुणनै अचूम्बो करता हा, क्यूंकै उणरा वचन अधिकार रै साथै हा। पराथना घर मे एक आदमी हो, उणमे एक दुस्ट आतमा ही। वो चिलायनै कयौ, “हे नासरत रा यीसु, थूं म्हौरै ऊं कांई चावै? कांई थूं म्हौरौ नास करणौ चावै? म्हैं थनै जांणूं हूं, थूं कुण है? थूं परमेसर रौ पवितर मिनख है।” यीसु हाका करनै उणनै कयौ, “चुप रैह अर उण मे ऊं निकळ जा।” तद दुस्ट आतमा उणनै पटक नै बिना नुकसाण करिया निकळगी। इण माथै सगळा लोग अचूम्बो करयौ, अर आपस मे बातां करनै कैवण लागा, “ओ कैड़ौ वचन है? यीसु अधिकार अर सामरथ रै साथै दुस्ट आतमा नै भी आग्या दैवै है, अर वे बारै निकळ जावै।” यीसु री ऐ बातां आजू बाजू रै सगळै इलाके मे फैलगी। यीसु पराथना घर ऊं उठनै समौन रै घर मे गिया। अर समौन री सासु नै ताव छड़योड़ौ हो, अर समौन उणरै वास्तै यीसु ऊं विणती करी, की उणनै सावळ करौ। यीसु उणरै खनै ऊभौ होयनै ताव नै हाका करिया अर ताव उतरगो। समौन री सासु तुरत उठनै उणरी सेवा करनै लागी। उण इज दिन सांझ रै वगत सूरज डूबगो, तो लोग बिमारों नै जिणौनै अलग अलग बीमारी ही, यीसु रै खनै लाया। अर यीसु एक एक रै माथै हाथ राखनै उणौनै सावळ करिया। उणमे ऊं घणौ मे ऊं दुस्ट आतमा हाका करती अर ओ कैवती निकळी, “थूं परमेसर रौ बेटौ है।” यीसु उणौनै हाका करता अर बोलणै भी नीं देतो हो, क्यूंकै दुस्ट आतमा जांणती ही, की ऐ परमेसर रा मसीह है। जद दिन उगौ तो यीसु निकळनै एक एकांत जगा माथै गिया अर भीड़ उणनै ढ़ूंढ़ती होई उणरै खनै आई, अर उणनै रोकनै लागी के, “म्हौरै खनै ऊं मत जाओ।” पर यीसु भीड़ ऊं कयौ, “म्हनै दूजै नगरो मे भी परमेसर रा राज रौ सुभ संदेस सुणाणौ जरुरी है। क्यूंकै म्हैं इण वास्तै ही भेज्यौड़ौ हूं।” अर यीसु गलील रै पराथना घरो मे उपदेस देता रिया। एक बार यीसु गनैसरत री झील रै किनारै माथै ऊभा हा, तो भीड़ उणनै परमेसर रा वचन सुणणै वास्तै घेर लियौ। उण वगत उणै झील रै किनारै माथै दो नावो लागोड़ी देखी, अर मछुआरा उण नावो माथै ऊं उतरनै जाळ धोवता हा। उणमे ऊं एक नाव जिकौ समौन रौ हो, यीसु उण माथै चढ़नै समौन ऊं कयौ, “नाव नै किनारै ऊं थोड़ोक आगौ ले ले।” पछै वो नाव माथै बैठ नै लोगां नै उपदेस देवण लागौ। उपदेस देवण रै पछै यीसु समौन ऊं कयौ, “नाव नै गेरा पांणी मे ले चाल, अर मछलियो पकड़नै रै वास्तै आपरा जाळ नोखो।” तो समौन यीसु ऊं कयौ, “हे मालिक, म्हैं पूरी रात मेनत करी अर कीं हाथ नीं आयौ, तौभी थौरे कैणै ऊं जाळ नोखो हो।” जद वे जाळ नोख्यौ, तो घणी हारी मछलियो जाळ मे फंसगी अर उणरा भार ऊं जाळ फाटनै लागौ। ओ देखनै वे आपरा दूजा साथवाळौ नै हेलौ करनै बुलाया जिकौ दूजा नाव माथै हा, ताकी वे इणौरी मदद कर सकै। वे आयनै दोनूं नावो नै मछलियो ऊं इती भर दी, की दोनूं नावो डूबणै लागी। ओ देखनै समौन पतरस यीसु रै पगां मे पड़ियौ अर कयौ, “हे परभु, म्हारै खनै ऊं जाता रौ, म्हैं थौरी बातां माथै विसवास कोनीं करयौ। क्यूंकै म्हैं पापी मिनख हूं।” समौन अर उणरै साथवाळा इती मछलिया पकड़नै रै कारण घणा इचरज मे हा। इण तरैह जबदी रा बेटा याकूब अर यूहन्‍ना नै भी अचूम्बो होयौ, जिकौ समौन रौ साथी हो। यीसु समौन ऊं कयौ, “डर मत, अबै ऊं थूं लोगां नै परमेसर रा राज रै वास्तै पकड़ेला।” अर वे नावो नै किनारै माथै ले आया अर सगळी चीजों छोड़नै यीसु रै लारै चाल दिया। एक बार यीसु एक नगर मे हा, उठै कोढ़ होयोड़ो एक मिनख हो, जद उणै यीसु नै देख्यौ तो गोडा टेकनै परणाम करनै उण ऊं पराथना की, “हे परभु, जे थूं चावै तो म्हनै कोढ़ ऊं सावळ कर सकै है।” तो यीसु आगै बढ़नै उणरै हाथ लगायो अर कयौ, “म्हैं चावूं हूं, की थूं कोढ़ ऊं ठीक हो जा।” अर तुरत वो सावळ हो गियो। पछै यीसु उणनै सावचेत करयौ, “किणनै ही मत कहीजै, पण जायनै अपणै आप नै याजक नै दिखा अर कोढ़ झड़नै रै बारै मे जिकौ कीं मूसा चढ़ावौ तैय करयौ है उणनै चढ़ा, ताकी उणरै वास्तै भी एक गवाई बणै।” पण आ बात ओर फैलती गी अर भीड़ री भीड़ यीसु रा उपदेस सुणणै अर बिमारियों ऊं सावळ होणै रै वास्तै भेळी होई। पण यीसु रिंदरोही मे न्यारा जायनै पराथना करता हा। एक दिन यीसु उपदेस देता हा अर फरीसी अर यहूदी धरम सास्तरी भी उठै बैठा हा। जिकौ गलील अर यहूदिया रै हरैक नगर ऊं, अर यरुसलेम ऊं आया हा। परभु री सगति बिमारों नै सावळ करनै यीसु रै साथै ही। उण वगत कीं लोग एक लकवो होयोड़े मिनख नै खाट माथै लाया। अर वे लोग उणनै यीसु रै सांमै राखणै रौ उपाय ढ़ूंढ़ता हा। क्यूंकै भीड़ रै खातर उणनै मांय ले जावणै रौ रासतो नीं मिळयो। तो वे घर रै माथै चढ़गा अर छपरा नै उधेड़ दियौ। लकवा रा बिमार नै खाट समेत सगळौ रै बीच मे यीसु रै सांमै उतार दियौ। यीसु उण लोगां रै विसवास नै देखनै बिमार ऊं कयौ, “हे दोसत, थारा पाप माफ होया।” इतौ कैवता ही सास्तरी अर फरीसी आपस मे कैवण लागा, “ओ कुण है जिकौ परमेसर री निंदा करै है? परमेसर नै छोड़नै कोई भी पाप माफ नीं कर सकै है।” यीसु उणौरै मन री बातां जांण नै उणौ ऊं कयौ, “थै थौरे मन मे ऐड़ौ क्यूं सोचो हो? आसान कांई है? कांई ओ कैवणौ, ‘थारा पाप माफ होया’ या ओ कैवणौ की ‘उठ अर चाल फिर’? म्हैं थांनै बताऊं हूं, थै जांण लौ के, म्हैं, मिनख रा बेटा नै, धरती माथै पाप माफ करणै रौ भी अधिकार है।” पछै यीसु उण लकवा होयोड़े मिनख नै कयौ, “म्हैं थारै ऊं कैवूं हूं, उठ अर थारी खाट उठान थारै घर जातौ रै।” वो तुरत उण सगळौ रै सांमै ऊं उठयौ अर जिण खटिया माथै पड़ियौ हो उणनै उठायनै, परमेसर री सौभा करतौ होयौ आपरै घर जातौ रियौ। तो उठै सगळा अचूम्बे मे पड़गा अर परमेसर री सौभा करनै लागा। वे घणा डर रै साथै कैवण लागा की, “आज म्हैं घणी अनोखी बातां देखी है।” इणरै पछै यीसु बारै गिया अर लेवी नाम रा चुंगी लेवण वाळा नै चुंगी चौकी माथै बैठौ देख्यौ। अर उणनै कयौ, “म्हारै लारै चाल दे।” तो वो ऊभौ होयौ अर सगळौ कीं छोड़नै यीसु रै साथै चाल दियौ। पछै लेवी आपरा घर मे यीसु वास्तै एक मोटो खाणौ राख्यौ जिणमे वो घणा ही चुंगी लेवणवाळा अर दूजै लोगां नै मेमाण बुलाया। तद फरीसी अर उणौरा सास्तरी जिकौ उठै हा वे यीसु रै चेलौ ऊं कैवण लागा की, “थै चुंगी लेवणवाळा अर दूजै पापियो रै साथै क्यूं खाओ-पीओ हो?” यीसु उणौनै जबाब दियौ, “वैद री जरुरत चंगा लोगां नै कोनीं रै, पण बिमारों नै रैवै है। म्हैं धरमियो नै नीं, पण पापियो नै पाप ऊं मन फिराणै वास्तै बुलाणै आयौ हूं।” कीं लोग यीसु ऊं कयौ के, “यूहन्‍ना रा चेला तो बराबर उपवास राखै अर पराथना करै है। अर इण तरैह फरीसियों रा चेला भी करै है। पण थारा चेला तो हर वगत खाता पीता रैवै है।” यीसु जबाब दियौ, “जद तांई बींद जांनियां रै साथै है, कांई वे उपवास कर सकै? ऐड़ौ कदैई नीं होवै। जद तांई बींद उणौरै साथै है, वे उपवास नीं करैला। पण वे दिन आवैला जद बींद जांनियां ऊं न्यारौ कियो जावैला, उण वगत वे उपवास करैला।” अर यीसु उणौनै वळै दिस्टांतो मे कयौ, “कोई भी मिनख नवा कपड़ा नै फाड़नै उणरी कारी पुराणा कपड़ा माथै नीं लगावै। इण ऊं नवो कपड़ो भी फाट जावैला अर वा नवा कपड़ा री कारी पुराणा ऊं मेळ भी नीं खावैला। इण तरैह नवो अंगूर रस पुराणी मसको में नीं भरे, इण ऊं नवो अंगूर रस पुराणी मसको नै फाड़नै ढ़ूळ जावैला, अर मसको भी नास हो जावैला। पण नवो अंगूर रस नवी मसको मे भरणौ चाहीजै। कोई मिनख पुराणौ अंगूर रस पीयनै नवो नीं मांगे क्यूंकै वो कैवै है, ‘पुराणौ ही चौखौ है।’ ” ऐड़ौ होयौ की यीसु अर उणरा चेला यहूदियो रै सब्त रै दिन खेतो मे ऊं जावता हा, उण वगत यीसु रा चेला चालता चालता गेहूंं रै बालों नै तोड़नै मसळ मसळ नै खावणै लागा। जद फरीसियों यीसु नै कयौ, “देख, थारा चेला ओ कांम क्यूं कर रिया है। जिकौ कांम आज अपांरै कायदे ऊं सब्त रै दिन नीं कर सकौ?” यीसु जबाब दियौ, “कांई थै ओ कदैई कोनीं पढ़यो की जद अपांरा वडेरा दाऊद अर उणरा साथियो नै भूख लागी तो दाऊद कांई करयौ? वो परमेसर रै मिंदर मे जायनै भेट री रोटियां खाई अर आपरा साथियो नै भी दी। जिणनै कायदे ऊं सिरफ याजक ही खा सकै।” वळै यीसु उणौनै कयौ, “म्हैं, मिनख रौ बेटौ, आराम रा दिन रौ भी धणी हूं।” अर ऐड़ौ होयौ एक वळै आराम रै दिन यीसु यहूदी पराथना घर मे जायनै उपदेस देवण लागौ। उठै एक ऐड़ौ मिनख हो जिणरौ जीमणौ हाथ सुखोड़ो हो। सास्तरी अर फरीसी ओ देखणै री ताक मे हा, की यीसु आराम रै दिन किणी नै सावळ करै है की कोनीं करै। ताकी वे यीसु माथै दोस लगानै रौ मौकौ पा सकै। पण यीसु उणौरै मन रा विचारो नै जांणता हा, इण वास्तै यीसु सुखे हाथ वाळै मिनख ऊं कयौ, “उठ अर सगळौ रै सांमै ऊभौ हो जा।” वो उठयौ अर ऊभौ हो गियो। यीसु सास्तरियों अर फरीसियों ऊं कयौ, “म्हैं थौरे ऊं पूछूं हूं की आराम रै दिन कायदे ऊं कांई करणौ चौखौ है? भलौ करणौ या बुरौ करणौ? जीव नै बचाणौ या नास करणौ?” अर यीसु नै च्यांरूमेर उण सगळौ री तरफ निजर दी अर पछै उण मिनख ऊं कयौ, “थारौ हाथ आगै कर।” उणै व्यौंही कियो अर उणरौ हाथ सावळ हो गियो। पण सास्तरी अर फरीसी आपे ऊं बारै होयनै आपस में विवाद करनै लागा की, “अपां इण यीसु रै साथै कांई करौ?” उण दिनां में ही यीसु भाखर माथै पराथना करनै निकळिया अर परमेसर ऊं पराथना करणै मे पूरी रात बिताई। जद दिन ऊगो, तो वे आपरा चेलौ नै बुलायनै उण मे ऊं बारैह चेलौ नै चुण लिया अर उणौनै प्रेरित कयौ। वे ऐ है समौन जिणरौ नाम यीसु पतरस राख्यौ अर उणरौ भाई अन्‍द्रियास अर याकूब अर यूहन्‍ना अर फिलिप्पुस अर बरतुल्मै, अर मती अर थोमा अर हलफाई रौ बेटौ याकूब अर समौन जिकौ जेलोतेस जाणिजतो हो। अर याकूब रौ बेटौ यहूदा अर यहूदा इस्‍करियोती, जिकौ यीसु नै विसवासघात करनै पकड़ायौ। जद यीसु उण बारैह चेलौ रै साथै भाखर ऊं उतर नै चौरस जगा में आयनै ऊभा होया, तो उणौनै सांमै उणौरै चेलौ री भीड़ अर पूरा यहूदिया अर यरुसलेम अर सूर अर सैदा रा समंदर रै किनारै घणा लोग आयनै भेळा होया। यीसु रा उपदेस सुणणै अर आपरी बिमारियों ऊं सावळ होणै यीसु खनै उठै आयोड़ा हा। वे लोग ओ सुण नै भी आया हा, की यीसु दुस्ट आतमाओ लागोड़े लोगां नै भी सावळ करै है। वे सगळा यीसु रै हाथ लगावणो चावता हा, क्यूंकै उणमे ऊं सामरथ निकळनै सगळौ नै सावळ करती ही। जद यीसु आपरै चेलौ रै सांमै देखनै कयौ, “धन्य हो थै, जिकौ दीन हो, क्यूंकै परमेसर रौ राज थौरो है। धन्य हो थै, जिकौ अबै भूखा हो, क्यूंकै थांनै धपावेला। धन्य हो थै, जिकौ अबै रोवो हो, क्यूंकै थै आंणंद करौला। धन्य हो थै, जद म्हैं, मिनख रा बेटा, नै मानणा रै खातर लोग थौरे ऊं बैर राखैला, अर थांनै समाज ऊं निकाळ दैला अर थौरी बेजती करैला अर थांनै गळत कैवैला। “उण दिन आंणंद रै साथै उछळजो, क्यूंकै देखौ, थौरे वास्तै सरग मे मोटो फळ है। याद राखौ उणौरै वडेरा भविसयदाताओ रै साथै ऐड़ौ ही कियो हो। पण हाय थौरे माथै, जिकौ धनवान हो, क्यूंकै थांनै पूरौ सुख चैन मिळ रियौ है। पण हाय थौरे माथै, जिकौ अबै धापोड़ा हो, क्यूंकै थै भूखा रैवौला। हाय थौरे माथै, जिकौ अबै आंणंद करौला, क्यूंकै थै सोग करौला अर रोवोला। हाय, थौरे माथै, जद सगळा मिनख अबै थांनै भला कैह, क्यूंकै उणौरा वडेरा झूठै भविसयदाताओ रै साथै भी ऐड़ौ ही किया करता हा। “पण म्हैं थांनै सुणणै वाळौ नै कैवूं हूं, की अपणै बैरियो ऊं भी परैम राखौ। जिकौ थौरे ऊं घिरणा करै है, उणौरौ भलौ करौ। जिकौ थांनै बुराई दे, उणौनै आसीस दो। जिकौ थौरे साथै चौखौ व्यवहार नीं करै, उणरै वास्तै पराथना करौ। जिकौ थौरे एक गाल माथै थप्पड़ मारै तो दूजोड़ौ गाल भी उणरै आगै कर दो। जे कोई थौरो कोट ले लेवे तो उणनै अपणौ कुड़तौ भी ले लेणे दो। जिकौ कोई थौरे ऊं मांगे, उणनै दो। अर जिकौ कोई थौरी चीज जबरदस्ती ले ले, तो उण ऊं पाछी मत मांगो। जैड़ौ थै चावौ हो की लोग थौरे साथै करै, वैड़ौ इज थै भी लोगां रै साथै करौ। “जे थै थौरे ऊं परैम राखणवाळौ ऊं परैम राखौ तो आ कोई मोटी बात कोनीं। क्यूंकै पापी भी अपणै परैम राखणवाळौ रै साथै परैम राखै है। जे थै थांरी भलाई करणैवाळै री भलाई करौ हो, तो इणमे कांई मोटी बात है? क्यूंकै पापी भी ऐड़ौ करै है। जे थै उणनै उधार दो, जिण ऊं थांनै भी पाछी मिलनै री आसा रै, तो इण में भी कांई मोटी बात है? क्यूंकै पापी पापियो नै भी उधार दैवै है, की उतौ ही पाछौ मिळै। अपणै बैरियो ऊं परैम करौ, भलाई करौ। अर पाछा नीं मिलणा री आस ऊं उधार दो। इण ऊं थांनै मोटो फळ मिळैला अर थै परमेसर री औळाद बणौला। क्यूंकै वे जिकौ उणौनै धन्यवाद दैवै उणौ माथै ही नीं पण भूंडै लोगां माथै भी दया करै है। जैड़ा थौरा परम पिता दयाळु है, वैड़ा ही थै भी दयाळु बणौ। “किणी माथै दोस मत लगाओ, तो थौरे माथै भी दोस नीं लगायो जावैला। किणी रौ न्याव मत करौ, तो थौरो भी न्याव नीं करैला। माफ करौ, तो थांनै भी माफी मिळैला। दूजौ नै देवोला, तो थांनै भी दियौ जावैला। इतौ ही नीं पण पूरा नाप ऊं दबा दबायनै अर हिला हिलायनै अर ढ़ूळतोड़ो थांनै दियौ जावैला। क्यूंकै जिण नाप ऊं थै नापो हो, उण नाप ऊं ही थौरे वास्तै नापेला।” पछै यीसु उणौनै एक दिस्टांत कयौ, “कांई आंधौ, आंधा नै मारग बता सकै? जे ऐ ऐड़ौ करै तो कांई दोनूं ही खाडा मे कोनीं पड़ैला? कोई भी चेलौ आपरै गुरु ऊं मोटो कोनीं, पण जिकौ कोई मिनख पूरी तरैह कुसल हो जावै, तो वो आपरै गुरु रै ज्यूं बण जावै है। “थूं थारै भाई री आंख मे तिणके नै क्यूं देखे है, जद खुद री आंख मे लकड़ी थनै कोनीं दिखे? जद थनै थारी मोटी गलतिया नीं दिखे, तो पछै थूं कीकर थारै भाई री नेनी गळती देख सकै। हे चालबाज, पैला खुद री मोटी गलतिया सुधार ले पछै थारै भाई री नेनी गलतिया नै सुधारनै मे मदद कर लेजे। “कोई भी चौखौ रुंखड़ौ ऐड़ौ कोनीं जिणरै खराब फळ लागै अर कोई खराब रुंखड़ौ कोनीं जिणरै चौखा फळ लागै। हर एक रुंखड़ौ आपरै फळ ऊं ओळखिजै, क्यूंकै लोग झाड़ियौ ऊं अंजीर कोनीं तोड़े, अर नीं किणी बोरड़ी ऊं लोग अंगूर उतारे है। भलौ मिनख आपरै मन रा भलै भंडार ऊं भली बातां निकाळै अर नगटो मिनख आपरै मन रा भंडार ऊं नकटी बातां निकाळै। क्यूंकै जिकौ मन मे भरयोड़ौ है वो इज मूंडै माथै आवै। “जद थै म्हारौ कैणौ नीं मांनौ, तो क्यूं म्हनै हे परभु, हे परभु कैवौ हो? जिकौ कोई म्हारै खनै आवै अर म्हारी बातां सुणनै मांनै है, म्हैं थांनै बताऊं की वो किणरै ज्यूं है। वो उण मिनख रै जैड़ौ है, जिकौ घर बणाते वगत ऊंडी नीव खोदनै भाटा ऊं भरी। जद बाढ़ आई तो पांणी उण घर रै लागौ पण उण घर नै हिला नीं सकयौ। क्यूंकै वो पको बणयोड़ो हो। पण जिकौ सुण नै भी नीं मांनै, वो उण मिनख रै जैड़ौ है जिकौ धोरा मे बिना नीव रौ घर बणायौ। जद उण घर रै पांणी लागौ तो वो तुरत पड़गो अर वो पड़नै पूरौ नास हो गियो।” जद यीसु लोगां नै आपरी बातां सुणा दी, अर पछै कफरनहूंम मे गिया। उठै कफरनहूंम मे एक सूबेदार रौ एक सेवक हो जिकौ उणरौ विसवास लायक हो, वो बीमारी ऊं मरण वाळौ हो। सूबेदार यीसु री बातां सुणनै यहूदी मुखिया नै यीसु खनै आ विनती करणै भेज्या की आयनै म्हारै दास नै सावळ करै। मुखिया यीसु रै खनै आयनै उण ऊं विनती करनै कयौ, “सूबेदार इण लायक है की थै उणरै सेवक नै सावळ करौ। क्यूंकै वो अपणै लोगां ऊं परैम करै है। अर उणै ही म्हौरै वास्तै पराथना घर बणायौ है।” यीसु उणौरै साथै गियो, पर जद वे घर ऊं थोड़ाक आगा हा, तो सूबेदार आपरै दोसतो नै यीसु खनै ओ कैह भेज्या, “हे परभु थै तकलीफ मत देखौ। क्यूंकै म्हैं इण लायक कोनीं हूं, की थै म्हारै घर आओ। इण खातर म्हैं अपणै आप नै इण लायक ही कोनीं समझयो, की थौरे खनै आऊं। पण थै इतौ ही कैह दो तो म्हारौ सेवक सावळ हो जावैला। म्हैं भी दूजा साहब रै नीचे कांम करूं हूं अर सिपाई म्हारै हाथ मे है। जद एक नै कैवूं ‘जा’ तो वो जावै है अर जद दूजै नै कैवूं ‘आ’ तो वो आवै। इण तरैह म्हारा सेवक नै कैवूं हूं, ‘ओ कर’ तो वो करै है।” ओ सुणनै यीसु अचूम्बो करयौ, अर वो पाछौ मुड़नै भीड़ ऊं कयौ जिकौ उणरै लारै आई ही, “म्हैं थौरे ऊं कैवूं हूं, की ऐड़ौ विसवास तो म्हैं इजरायल रै लोगां मे भी कोनीं देख्यौ।” यीसु खनै भेज्यौड़ा लोग जद सूबेदार रै घरै पाछा गिया, तो उणरा सेवक नै सावळ देख्यौ। थोड़े दिनां रै पछै यीसु नाईन नाम रा नगर मे गियो उणरा चेला अर घणी भीड़ उणरै साथै ही। जद वे नगर री पोळ खनै पोचिया तो नगर मे ऊं लोग एक लास नै लैय आवतै देख्यां, जिकौ एक विधवा रै एकाएक बेटे री ही। अर नगर रै घणा ही लोग उणरै साथै हा। उणनै देखनै परभु नै विधवा माथै दया आई, अर उणै कयौ, “रौ मत।” यीसु अरथी खनै आयनै अरथी नै हाथ लगायो तो कांधिया रूकगा। यीसु कयौ, “हे मोटियार, म्हैं थारै ऊं कैवूं, उठ जा।” इतौ कैवता ही मुड़दो जीवतौ हो गियो अर बोलण लागौ। यीसु उणनै उणरी मां नै सौंप दियौ। इण बात ऊं उठै डर छायगो अर वे परमेसर री बड़ाई करनै कैवण लागा, “अपांरै बीच मे एक महान भविसयदाता परगट होयौ है। अर परमेसर आपरै लोगां माथै करपा करी है, परमेसर आपरै लोगां नै बचावणै आया है।” यीसु री आ बात पूरै यहूदिया अर आजू बाजू रै सगळै गांवों मे फैलगी। यूहन्‍ना नै उणरा चेला ऐ सगळा समाचार दे दिया। तो यूहन्‍ना आपरा चेलौ मे ऊं दो नै बुलायनै परभु यीसु खनै ओ पुछणै भेज्या, “कांई आवण वाळा मसीह थै इज हो, या पछै म्हौ दूजा री बाट जोवो?” यूहन्‍ना रा चेला यीसु खनै आयनै पूछयौ, “म्हौ नै यूहन्‍ना बतिस्मो देवणवाळौ थौरे खनै ओ पूछणै भेजिया है, ‘कांई आवण वाळा मसीह थै इज हो, या पछै म्हौ दूजै री बाट जोवो?’ ” उण घड़ी यीसु घणै लोगां री बिमारियों सावळ करी, अर दुखौ ऊं छुड़ाया, दुस्ट आतमाओ ऊं छुड़ाया अर आंधौ नै आंख्यां दी। यीसु यूहन्‍ना रै चेलौ नै कयौ, “जिकौ कीं थै देख्यौ अर सुण्यौ है, जायनै यूहन्‍ना नै कैह दो, आंधा देखे, लंगड़ा चालै, कोढ़ियो रौ कोढ़ झड़ै है, बोळा सुणण लागा है, मुड़दा जीवता होवै है अर गरीबो नै सुभ संदेस सुणावै है। अर धन्य है वो, जिकौ म्हारै माथै विसवास करै।” जद यूहन्‍ना रा भेज्यौड़ा चेला गिया परा तो यीसु यूहन्‍ना रै बारै मे लोगां ऊं कैवण लागौ, “थै रिंदरोही मे कांई देखणै गिया हा? कांई हवा ऊं झुलता डोका? नीं, तो पछै थै कांई देखणै गिया हा? कांई चौखा गाभा पैरयोड़ा मिनख नै? देखौ, जिकौ मलमल रा गाभा पैरै अर सुख विलास में रैवै वे रिंदरोही मे नीं पण मेहलो मे रैवै है। तो पछै थै कांई देखणै गिया हा? कांई किणी भविसयदाता नै? इतोई नीं भविसयदाता ऊं मोटे नै देखणै गिया हा। ऐ वे इज है, जिणरै बारै मे लिख्योड़ौ है, ‘देख, म्हैं म्हारै दूत नै थारै आगै आगै भेजूं हूं, जिकौ थारै आगै आगै मारग सीधौ करैला।’ म्हैं थौरे ऊं कैवूं हूं, जिकौ लुगाई रै पेट ऊं जनमियौ है, उण मे ऊं कोई भी यूहन्‍ना ऊं मोटो कोनीं है। पण जिकौ परमेसर रै राज में छोटे ऊं छोटौ है, वो यूहन्‍ना ऊं मोटो है।” सगळा लोग अर चुंगी लेवण वाळा भी यूहन्‍ना ऊं बतिस्मो लेयनै ओ मांन लियौ की परमेसर रौ मारग साचौ है। पण फरीसी अर व्यवस्था रै जांणकारो नै यूहन्‍ना ऊं बतिस्मो नीं लेन जिकौ परमेसर उणौरै बारै में सौच राखियौ हो उणै भी नकार दियौ। यीसु पछै कयौ, “म्हैं इण पीढ़ी रै लोगां नै कीण रै बराबर बताऊं? वे उण टाबरौ रै जैड़ा है, जिकौ बजार में बैठोड़ा एक दूजा नै हाका करनै कैवै है, ‘म्हैं थौरे वास्तै बांसली बजाई, पण थै नीं नाचिया। म्हैं थौरे वास्तै सोग रा गीत गाया, पण थै नीं रोया।’ यूहन्‍ना बतिस्मो देवणवाळौ आयौ, जिकौ नीं तो रोटी खावै, अर नीं ही दाखरस पीवै अर थै कैवौ हो, ‘उणमे दुस्ट आतमा है।’ म्हैं, मिनख रौ बेटौ, आयौ अर थै कैवौ हो, ‘देखौ, पेटु अर पियकड़ मिनख, चुंगी लेवणवाळौ रौ अर पापियो रौ दोसत है।’ पण जिकौ साची मे परमेसर रा टाबर है वे ही जांण सकै है, की म्हैं अर यूहन्‍ना जिकौ करयौ वो समझदारी रौ कांम हो।” पछै कोई फरीसी यीसु ऊं विणती करी के म्हारै साथै खाणौ खाओ, तो वो उण फरीसी रै घर जायनै खाणौ खाणै बैठा। उण नगर मे एक पापी लुगाई ही, उणै ओ जांणनै की यीसु फरीसी के घर में खाणौ खाणै बैठा है तो वां संगमरमर री सीसी में मूगौ अंतर लेन आई। वां यीसु रै पगां खनै, लारै ऊभी रैन, रोवती होई उणरै पगां नै आपरै आसुओ ऊं धोवण लागी अर आपरै माथै रा बालों ऊं बार बार पौछती, अर उणरै चरणौ नै चूमती अर उण माथै अंतर चोपड़ती। ओ देखनै जिकौ फरीसी यीसु नै आपरै घर खाणौ खाणै बुलाया हा, आपरै मन मे सौचणै लागौ, “अगर यीसु भविसयदाता होता तो ओ जांण जाता के, आ लुगाई जिकौ उणौनै हाथ लगावै है, वां कुण है अर कैड़ी है? क्यूंकै आ तो पापी लुगाई है।” यीसु उणरी मन री बात जांणनै उण ऊं कयौ, “हे समौन, म्हैं थारै ऊं कीं कैवणौ चावूं हूं।” तो समौन बोल्यौ, “हे गुरु, कैवौ।” यीसु कैवण लागा, “किणी साहूकार रै दो करजदार हा। एक मे पांच सौ चांदी रा सिक्‍का अर दूजोड़े मे पचास चांदी रा सिक्‍का मांगतो हो। जद उणौरै खनै दैणै वास्तै की नीं हो, तो वो दोनो नै माफ कर दिया। अबै बता, उणौमे ऊं कुण घणौ परैम राखैला?” समौन जबाब दियौ, “म्हारी समझ ऊं, वो जिणौरो घणौ करजौ माफ करयौ।” यीसु कयौ, “थूं सही सोच्यौ।” पछै यीसु उण लुगाई सांमै मुड़नै समौन ऊं कयौ, “कांई थूं इण लुगाई नै देखे है? म्हैं थारै घर मे आयौ अर थूं म्हारा पग धोवण पांणी तांई नीं दियौ। पण आ तो म्हारै पगां नै आसुओ ऊं धोया अर आपरै बालों ऊं पूछिया है। थूं म्हनै मांन ऊं गळे नीं लगायो। पर आ तो जद ऊं म्हैं अठै आयौ हूं म्हारै पगां नै चूमना नीं छोड़या है। थूं म्हारै माथा ऊपर तेल नीं लगायो, पर आ म्हारै पगां माथै अंतर चोपड़ियो है। इण वास्तै म्हैं थारा ऊं कैवूं हूं, इणरा पाप जिकौ घणाई हा, माफ होया है। क्यूंकै आ घणौ परैम करयौ है। पण जिणरा थोड़ा पाप माफ होया है, वो थोड़ो परैम करयौ है।” अर उण लुगाई नै कयौ, “थारा पाप माफ होया।” तो जिकौ लोग उणरै साथै खाणौ खाणै बैठा हा, वे आप आपरै मन में सोचणै लागा के, “ओ कुण है जिकौ पापों नै भी माफ करै है?” पण वे उण लुगाई नै कयौ, “थारै विसवास नै थनै बचाई है। जा राजी खुसी ऊं जा।” इणरै पछै यीसु गांव गांव अर नगर नगर मे परमेसर रै राज रा सुभ संदेस नै सुणावता होया, अर उणरै बारैह प्रेरित भी उणरै साथै हा। कीं लुगाईयां उणरै साथै ही, जिणनै वे दुस्ट आतमाओ ऊं छुड़ाई अर बिमारियों ऊं सावळ करी। मरियम जिकौ मगदल नगर री ही, उण मे ऊं सात दुस्ट आतमाओ निकाळी ही। हेरोदेस रा भंडारी खुजा री लुगाई योअन्‍ना अर साथै सूसन्‍नाह अर घणी ही लुगाईयां तो आपरी सम्पत्ति ऊं यीसु अर उणरै चेलौ री सेवा करती ही। जद घणी भीड़ भेळी होई, अर नगर नगर रा लोग यीसु खनै आया, तो उणै उणौनै एक दिस्टांत कथा कही, “एक बार एक किसान हो जिकौ बीज बोणे गियौ। बीज बोते वगत कीं बीज मारग रै किनारै पड़िया अर पगां ऊं रूंद गिया, अर आकास रै पंखेरू उणौनै चुग लिया। कीं बीज पथरीली जमीन मे पड़िया अर उगिया पर नमी नीं मिलणा रै कारण बळ गिया। कीं बीज कांटीली झाड़ियौ मे पड़िया, अर झाड़ियौ साथै साथै बढ़नै उण बीजों नै दबा दिया। कीं बीज बड़िया जमीन माथै पड़िया अर उगनै सौ गुणा फळिया।” पछै यीसु कयौ, “जिणरै खनै सुणणै वास्तै कांन है, वे सुण ले।” यीसु रा चेलौ यीसु ऊं पूछयौ, “इण दिस्टांत रौ कांई अरथ है?” यीसु कयौ, “थांनै परमेसर रै राज रा भेद जांणणै री समझ मिळयोड़ी है। बल्कि दूजौ नै दिस्टांतो ऊं समझाऊं हूं, क्यूंकै वे, ‘देखता होया भी नीं देखे है, अर सुणता होया भी नीं समझै।’ ” यीसु उणौनै कयौ, “बीज रै दिस्टांत रौ ओ अरथ है, की बीज परमेसर रा वचन है। मारग रै किनारै पड़िया बीज वे लोग है जिकौ वचन सुणै अर सैतान आयनै उणौरै मन मे ऊं वचन निकाळ नै ले जावै, ताकी ऐड़ौ नीं हो की वे विसवास करनै उद्धार पावै। पथरीली जमीन मे पड़िया बीज वे लोग है, जिकौ आंणंद ऊं वचन नै मांनै, पण उणरी जड़ नीं पकड़े है। वे थोड़ी जेज तांई विसवास राखै है, बल्कि परीकसा रै वगत भटक जावै है। झाड़ियौ में पड़िया बीज वे लोग है, जिकौ सुणै तो है, पण आगै जायनै चिंता, धन अर जीवन रै सुखो में फस जावै अर उणौ मे वचन नीं फळै। अर बड़िया जमीन मे पड़िया बीज वे लोग है, जिकौ वचन सुणनै उणनै भलै अर चौखै मन ऊं मांनै अर धीरज ऊं फळ लावै। “कोई दीया नै बरतन ऊं ढ़कणै या उणनै खटिया रै नीचे राखणै वास्तै नीं लगावै, बल्कि उण नै आळा मे राखै, ताकी मांयनै आवण वाळौ नै उजाळौ मिळै। कीं भी लुकयोड़ो कोनीं, जिकौ सांमै नीं आवैला। कीं भी छानौ कोनीं, जिकौ परगट नीं होवैला। इण वास्तै सावचेत रैवौ, की थै कीण रीति ऊं सुणौ हो, क्यूंकै जिणरै खनै है उणनै भळै मिळैला, अर जिणरै खनै नीं है, उण खनै ऊं उणरौ जिकौ है वो भी ले लियौ जावैला।” यीसु री मां अर भाई यीसु रै खनै आया बल्कि भीड़ रै खातर उण ऊं मिळ नीं सकया। तो कोई आयनै यीसु ऊं कयौ, “थारी मां अर थारा भाई बारै ऊभा है अर थारै ऊं मिलना चावै है।” यीसु उणनै जबाब दियौ, “म्हारी मां अर भाई तो ऐ है, जिकौ परमेसर रा वचन सुणै है अर उणौनै मांनै है।” एक दिन यीसु आपरै चेलौ रै साथै एक नाव माथै चढ़या अर उणै उणौ ऊं कयौ, “आओ अपां झील रै पार चालौ।” अर वे नाव नै खोल नै जावण लागा। जद नाव चाल री ही, तो यीसु सोह गियो। उण वगत अणचेत आंधी आई, अर नाव मे पांणी भरीजण लागौ अर वे जोखम मे पड़ग्या। तो चेला डरनै यीसु खनै आया अर उणनै जगायनै कैवण लागा, “हे मालिक, हे मालिक! म्हौ डूबण वाळा हों।” तो यीसु उठनै आंधी नै अर पांणी नै हुकम दियौ तो वे थम गी, अर उठै घणी सानति होई। पछै यीसु चेलौ नै कयौ, “कठै गियौ थौरो विसवास?” पण वे डरगा हा अर अचूम्बे ऊं एक दूजा नै कैवण लागा, “ओ कुण है? जिकौ आंधी अर पांणी नै भी हुकम दैवै अर वे इणरै हुकम नै मांनै भी है।” पछै यीसु अर उणरा चेला नाव ऊं गिरासेनियो रै देस मे पूगा, जिकौ गलील रै झील रै पार हो। जद यीसु किनारै माथै उतरिया तो, उणनै उण नगर रौ एक मिनख मिळियौ। उणमे घणी हारी दुस्टआतमाओ ही। अर वो घणा दिनां ऊं नीं तो गाभा पैरतो अर नीं वो घर मे रैवतौ हो। बल्कि वो कबरौ मे रैवतौ हो। वो यीसु नै देख नै जोर ऊं हाको करयौ अर उणरै पगां में पड़नै जोर ऊं हाका करनै कयौ, “हे परम परधान परमेसर रा बेटा यीसु, थूं म्हारै ऊं कांई चावै है? म्हैं विणती करूं हूं म्हनै दुख मत दे।” वो इण वास्तै बोल्यौ, क्यूंकै यीसु दुस्ट आतमाओ नै उण आदमी मे ऊं निकळनै रौ हुकम दियौ हो। घणी वगत वे उण मिनख माथै मजबुत हो जाती ही, अर उण वगत लोग उणरा हाथो पगां नै हांकळौ ऊं अर बेड़ियों ऊं बांध देता हा, तौभी वो हांकळौ अर बेड़ियों नै तोड़ देतो हो, अर सैतान उणनै रिंदरोही मे लैय जावतौ हो। यीसु उण ऊं पूछयौ, “थारौ नाम कांई है।” तो उणै कयौ, “सेना।” क्यूंकै उण मे घणी हारी दुस्टआतमाओ ही। वे यीसु ऊं विणती करी के, “म्हौ नै पाताळ कुंड मे मती नोखो।” उठै भाखर माथै गंडूरौ रौ एक मोटो टोळो चरतौ हो, इण वास्तै वे यीसु ऊं विनती करनै कयौ, “म्हौ नै इण गंडूरौ मे घुस जावण दो।” तो यीसु उणौनै घुसनै री आग्या दे दी। तद सगळी दुस्ट आतमाओ उण मिनख मे ऊं निकळनै गंडूरौ में घुस गी अर वो गंडूरौ रौ टोळो गुड़कतो गुड़कतो झील मे जा पड़या अर डूबनै मर गिया। गंडूरौ नै चरावण वाळा ओ देखनै भाग गिया अर उणौ इणरा समाचार नगर अर गांव मे जायनै सुणाया। लोग ओ सुणनै उठै जिकौ होयौ उणनै देखणै गिया अर यीसु रै पगां खनै उण मिनख नै पूरा गाभा पैरयोड़ो सावळ बैठौ देख्यौ, उण मे ऊं दुस्ट आतमाओ निकळ गी ही। ओ देख नै लोग डर गिया हा। देखणवाळा कैवण लागा, की दुस्ट आतमाओ ऊं दुखी ओ आदमी कीकर सावळ होयौ। उणरै पछै गिरासेनियो रै आजू बाजू सगळी जगा रा लोग यीसु खनै आयनै उण ऊं विणती करी के, “म्हौरै अठै ऊं जाओ परा।” क्यूंकै उणौमे डर घुस गियो हो। पछै यीसु नाव माथै चढ़नै रवाना हो गिया। जिण आदमी मे ऊं दुस्ट आतमाओ निकाळी ही वो यीसु ऊं विणती करी के, “म्हनै थारै साथै रैवण दे।” पण यीसु उणनै विदा करते कयौ, “घर जा अर लोगां नै बता की, परमेसर थारै वास्तै कैड़ौ मोटो कांम करयौ है।” वो आपरै घर जायनै सगळै नगर मे इण बात रौ परचार करनै लागौ के, “यीसु म्हारै वास्तै कितौ मोटो कांम करयौ है।” जद यीसु पाछा झील री दूजोड़े किनारै माथै आया, तो लोग उणनै घणै आंणंद रै साथै मिळया, क्यूंकै वे सगळा उणरी बाट जोह रिया हा। उण वगत याईर नाम रौ एक मिनख जिकौ पराथना घर रौ मुखियौ हो, आयौ अर यीसु रा पगां मे पड़नै विणती करनै लागौ, “म्हारै घर चाल।” क्यूंकै उणरै बारैह साल री एकाएक बेटी ही, वां मरणवाळी ही। जद यीसु उणरै साथै जा रिया हा, तो उठै च्यांरूमेर ऊं लोगां री भीड़ उणनै दबा री ही। उण भीड़ मे एक लुगाई जिणनै बारैह साल ऊं लोई पड़नै रौ रोग हो, अर वां आपरी पूरी कमाई सावळ होणै मे लगा दी ही। तौभी वां किणी ऊं भी सावळ कोनीं होई ही। वां यीसु रै लारै आयनै उणरै गाभे रै हाथ लगायो अर तुरत उणरौ लोई पड़णौ बंद हो गियो। तो यीसु कयौ, “म्हनै कुण हाथ लगायो है?” जद सगळा मना करणै लागा, तो पतरस कयौ, “हे मालिक, भीड़ थौरे माथै पड़ती ही अर लोग थौरे च्यांरूमेर हा। इण वास्तै कीकर पतौ लागै के, कुण थांनै हाथ लगायो?” पण यीसु कयौ, “कोई म्हारै हाथ लगायो है। क्यूंकै म्हनै ठाह पड़ियौ है की म्हारै मे ऊं सामरथ निकळी है।” जद लुगाई देख्यौ की वां लुक नीं सकै, तो वां कांपती होई आई, अर यीसु रै पगां में पड़नै सगळै लोगां रै सांमै बतायौ, की वां कीण कारण ऊं यीसु रै हाथ लगायो अर कीकर तुरत सावळ होई। यीसु उणनै कयौ, “बेटी थारै विसवास थनै सावळ की है। राजी खुसी ऊं जा।” यीसु ओ कैवता ही हा, की पराथना घर रा मुखिया याईर रै घर ऊं आयनै याईर नै कयौ, “थारी बेटी मर गी है। गुरु नै परेसान मत करौ।” यीसु ओ सुणनै याईर ऊं कयौ, “डर मत, विसवास करैला तो वां पाछी जी जावैला।” यीसु पराथना घर रा मुखिया रै घर में आयनै पतरस अर यूहन्‍ना अर याकूब अर छोरी रा मां बाप नै छोड़ अर किणी नै मांयनै नीं आवण दिया। सगळा लोग जिकौ रोवता अर छाती कूटता हा। पण यीसु उणौनै कयौ, “रोवो मत, वां मरी कोनीं पण सोह री है।” वे ओ जांणनै, की छोरी मर गी है, वे यीसु री बात माथै हसनै लागा। पण यीसु उण छोरी रौ हाथ पकड़नै जोर ऊं कयौ, “हे बेटी, उठ जा।” तो उणरौ जीव पाछौ आयग्यौ अर वा तुरत उठगी। यीसु पछै हुकम दियौ, “इणनै कीं खावण वास्तै दो।” उणरा मां बाप अचूम्बे में पड़ गिया पण यीसु उणौनै चेताया, “ओ जिकौ कीं होयौ है ओ किणी नै मती कहीजौ।” पछै यीसु बारैह चेलौ नै एक साथै बुलाया अर उणौनै सगळी दुस्ट आतमाओ अर बिमारियों नै आगी करणै री सामरथ अर अधिकार दियौ। अर उणौ नै परमेसर रै राज रौ परचार करनै, अर बिमारों नै सावळ करनै रै लियै भेज्या। यीसु उणौ नै कयौ, “आपरी यात्रा रै लियै वे कीं साथै नीं ले। नीं डंडों, नीं झोळो, नीं रोटी, नीं रूपिया अर नीं कोई दूजी जोड़ी कुड़तौ। अर जिण किणी रै घर मे जाओ उठीज रौ, अर उठीज ऊं रवाना होवो। जिकौ कोई लोग थांनै स्वीकार नीं करै तो जद उण नगर नै छोड़ौ तो उणरै विरोध गवाई रै रूप मे अपणै पगां री धूड़ झाड़ दो।” तद वे उठै ऊं चाल नै हरैक गांव गांव सुभ संदेस सुणाता, अर लोगां नै सावळ करता होया यात्रा करनै लागा। अर जद गलीली देस रौ राजा हेरोदेस नै ओ ठाह पड़ियौ तो डर गियो, क्यूंकै किता लोगां कयौ, “यूहन्‍ना मरयोड़ौ मे ऊं जी उठयौ है।” अर कईक लोगां कयौ, “एलियाह देठाळौ दियौ है।” कीं और कैह रिया हा, “भविसयदाता मे ऊं कोई जी उठयौ है।” पण हेरोदेस कयौ, “म्हैं यूहन्‍ना रौ तो माथो कटवा दियौ हो, अबै ओ कुण है, जिणरै बारै मे ऐड़ी बातां सुणूं हूं?” अर उणै उणनै देखणै री इछा करी। पछै जद प्रेरित पाछा आया तो उणौ जिकौ कीं करयौ हो, सगळौ यीसु मसीह नै सुणायो। तद वो उणौ नै उठै ऊं अपणै साथै लैयनै चुपचाप बैतसैदा नाम रै एक नगर मे गिया। ओ जांणनै भीड़ उणरै लारै वहीर होयगी। अर यीसु उणौ ऊं आंणंद ऊं मिळियौ, अर उणौ ऊं परमेसर रै राज री बातां करनै लागौ। अर जिकौ लोग सावळ होणा चावता हा, उणौनै सावळ किया। जद दिन ढ़ळण लागौ, तो बारैह चेलौ आयनै यीसु ऊं कयौ, “भीड़ नै रवाना करौ, ताकी वे आजू बाजू रै गांवों अर बस्तियो मे जायनै आसरो अर खाणौ पा सकै, क्यूंकै म्हौ एठै सुनी जगा मे हो।” यीसु उणौनै कयौ, “थै इज इणौनै खावण नै कीं दो।” उणौ कयौ, “म्हौरै खनै पांच रोटियो अर दो मछली नै छोड़नै कीं कोनीं है। पण हां, जे म्हौ जायनै इण सगळै लोगां रै लियै खाणौ मोल लो, तो हो सकै है।” वे लोग तो पांच हजार मिनखौ रै बराबर हा। यीसु आपरै चेलौ ऊं कयौ, “उणौनै पचास पचास करनै झुंड मे बिठा दो।” उणौ वैड़ौ इज कियो, अर सगळौ नै बिठा दिया। पछै यीसु पांच रोटियो अर दो मछलियो नै लैयनै सरग री तरफ देखतौ होयौ परमेसर रौ धन्यवाद दियौ अर पछै उणरा टुकड़ा करतौ होयौ उणै आपरै चेलौ नै दिया की वे लोगां नै परोसे। तद सगळा लोग खायनै धाप गिया अर बचयोड़े टुकड़ों ऊं उणरै चेलौ बारैह छाबड़िया भरिया। जद वो अकेले मे पराथना कर रियौ हो, अर चेला उणरै साथै हा, तो उणै चेलौ ऊं पूछयौ, “लोग म्हारै बारै मे कांई कैवै है?” चेलौ जबाब दियौ, “कोई यूहन्‍ना बतिस्मो देवणवाळौ, अर कोई कैवै एलियाह, अर कोई ओ भी कैवै है की पुराणै भविसयदाता मे ऊं कोई जी उठयौ है।” यीसु उणौनै कयौ, “पण थै म्हनै कांई कैवौ हो?” पतरस जबाब दियौ, “परमेसर रौ मसीह।” तद यीसु उणौनै चितायनै कयौ, “ओ किणी नै नीं कैवणौ।” अर यीसु कयौ, “म्हैं, मिनख रै बेटे, रै लियै जरुरी है, की वो घणौ दुख उठाए, अर मुखिया अर परधान याजकौ अर सास्तरियों द्धवारा नकार नै मरवा दियौ जाये। अर पाछौ तीजै दिन जीवतौ कर दियौ जावैला।” उणै सगळै चेलौ ऊं कयौ, “जे कोई म्हारै लारै आवणौ चावै है तो उणनै अपणै आप ऊं मना करै अर उणनै हरैक दिन खुद रौ क्रूस उठाणौ होवैला। तो वो म्हारै लारै चालै। क्यूंकै जिकौ कोई अपणौ प्रांण बचाणौ चावैला वो उणनै खोवैला, पण जिकौ कोई म्हारै लियै अपणौ प्रांण खोवैला वोहीज उणनै बचावैला। जे मिनख सगळै जगत नै हासल कर दे बल्कि खुद रौ प्रांण खो दे या भटक जाये, तो उणनै कांई फायदो है? जिकौ कोई म्हारै ऊं अर म्हारी बातां ऊं सरमावैला, म्हैं, मिनख रौ बेटौ, भी जद आपरी, अर आपरै पिता परमेसर री, अर पवितर सरगदूतो री, महिमा समेत आवैला, तो उण ऊं सरमावैला। म्हैं थौरे ऊं साची कैवूं हूं, एठै कईक ऐड़ा ऊभा है, जिकौ तद तांई मौत रौ स्वाद नीं चाखेला, जद तांई परमेसर रै राज नै देख नीं ले।” इण बातां रै कोई आठ दिन पछै वो पतरस, यूहन्‍ना अर याकूब नै साथै लैयनै पराथना करनै रै लियै भाखर माथै गिया। जद वो पराथना कर रियौ हो, तो उणरै मूंडै रौ रूप बदळ गियो। अर उणरा गाभा सफेद होयनै चमकन लागा। उठै उण ऊं बातां करता होया दो मिनख परगट होया। वे मूसा अर एलियाह हा। जिकौ अपणी महिमा रै साथै परगट होया हा, अर यीसु रै मौत रै बारै मे बात कर रिया हा जिणनै वो यरुसलेम मे पूरी करणै वाळौ हो। पतरस अर उणरौ साथी गेहरी ऊंग मे हा, अर जद वे जागा तो उणौ यीसु री महिमा नै देखी अर उणौ उण दो जणौ नै भी देख्यां जिकौ उणरै साथै ऊभा हा। जद वे उणरै खनै ऊं जावण लागा, तो पतरस यीसु ऊं कयौ, “हे मालिक, म्हौरौ एठै रैणौ भलौ है। म्हौ तीन तम्बू बणाओ, एक थारै वास्तै, एक मूसा रै वास्तै, अर एक एलियाह रै वास्तै।” वो कोनीं जांणै हो, की वो कांई कैह रियौ है। वो ऐ बातां कर ही रियौ हो की एक बादळ आयौ अर उणै उणनै आपरी छाया मे घेर लियौ। ज्यौ ही उण माथै बादळ छाया, वे डर गिया। अर उण बादळ मे ऊं ओ सबद निकळियौ, “ओ म्हारौ बेटौ है, इणनै म्हैं चुणयौ है, इणरी सुणौ।” ओ सबद होयौ तो उणौ यीसु नै ऐकलौ पायो। वे इणरै बारै मे चुप रिया। उणौ जिकौ कीं देख्यौ हो, उण रै बारै मे उण वगत किणी ऊं कीं नीं कयौ हो। अर दूजै दिन जद वे भाखर ऊं नीचे उतरिया, तो एक घणी भीड़ उण ऊं आ मिळी। तद भीड़ मे ऊं एक मिनख चिलायनै कयौ, “हे गुरु, म्हैं थारै ऊं विनती करूं हूं, की म्हारै बेटे ऊपर करपा दिस्टी कर, क्यूंकै वो म्हारौ एकाएक बेटौ है। अणचेत एक दुस्ट आतमा उणनै पकड़ लेवे है, अर वो चीख उठै है। उणनै दुस्ट आतमा ऐड़ौ मरोड़े है की उणरै मूंडै ऊं झाग निकळ आवै है। वो उणनै कुचलनै मुसकिल ऊं छोड़ै है। अर म्हैं थारै चेलौ ऊं अरज करी, की उणनै बारै निकाळै, पण वे निकाळ नीं सकया।” तद यीसु जबाब दियौ, “हे अविसवासी अर हठीले लोगां, म्हैं और किता दिन थौरे साथै रैवूंला अर कद तांई थौरी सहन करूंला? अपणै बेटे नै एठै ले आ।” वो छोरौ आ ही रियौ हो की दुस्ट आतमा उणनै पटकनै मरोड़ियो, पण यीसु दुस्ट आतमा नै हाका करिया अर छोरै नै सावळ करनै उणरै पिता नै सौंप दियौ। अर सगळा लोग परमेसर रै सामरथ ऊं अचूम्बो कर रिया। तद यीसु आपरै चेलौ ऊं कयौ, “अबार जिकौ म्हैं थौरे ऊं कैह रियौ हूं, उण बातां ऊपर ध्यांन दो। म्हैं, मिनख रौ बेटौ, मिनख रै हाथौ पकड़ायौ जावण वाळौ है।” बल्कि वे इण बात नै समझ नीं सकया। आ बात उणौ ऊं छुपयोड़ी ही की वे जांण नीं पाया, अर वे उण बात रै बारै मे उण ऊं पूछणै ऊं डरता हा। पछै यीसु रै चेलौ रै बीच मे ओ विवाद होवण लागौ, “म्हौरै मे सबां ऊं मोटो कुण है?” यीसु नै उणौरै मन रौ विचार जांण लियौ। अर एक टाबर नै लेयनै आपरै खनै ऊभौ करयौ। अर उणौ ऊं कयौ, “जिकौ कोई म्हारै नाम ऊं इण टाबर नै स्वीकार करै है, वो म्हनै स्वीकार करै है, वो म्हनै भेजणै वाळै नै स्वीकार करै है। क्यूंकै जिकौ थौरे मे ऊं सगळौ ऊं छोटौ है, वोहीज सगळौ ऊं मोटो है।” तद यूहन्‍ना कयौ, “हे मालिक, म्हौ एक मिनख नै थारै नाम ऊं दुस्ट आतमाओ नै निकाळते देख्यौ, अर म्हौ उणनै मना करी, क्यूंकै वो म्हौरै साथै होयनै थारै लारै नीं चालै।” यीसु उणौ ऊं कयौ, “उणनै मना मती करौ। क्यूंकै जिकौ थौरे विरोध मे नीं, वो थौरे पकस मे ही है।” जद उणनै सरग मे ले जावण रौ वगत आयौ तो वो यरुसलेम जावण रौ पको करनै चाल दियौ। उणै आपरै लोगां नै पैला ही भेज दिया हा। वे जाता रिया अर उणरै वास्तै तैयारी करनै एक सामरी गांव मे पूगा। बल्कि सामरियो उठै उणरौ आदर सत्कार नीं कियो, क्यूंकै वो यरुसलेम जा रियौ हो। जद उणरा चेला याकूब अर यूहन्‍ना ओ देख्यौ तो वे बोल्या, “हे परभु कांई थूं चावै है की म्हौ आग्या दो की आभै ऊं अग्‍नि बरसे अर उणौनै भसम कर दे?” पण उणै पाछौ मुड़नै चेलौ नै हाका करनै कयौ, “थै कोनीं जांणौ की थै कैड़ी आतमा रा हो। क्यूंकै म्हैं, मिनख रौ बेटौ, लोगां रै प्रांणौ रौ नास करनै नीं बल्कि बचाणै रै वास्तै आयौ है।” अर वे किणी दूजै गांव मे जाता रिया। जद वे मारग मे जा रिया हा, तो किणी उण ऊं कयौ, “थूं जठै भी जावैला, म्हैं थारै लारै चालूं ला।” यीसु उणौ ऊं कयौ, “लोंकियो रै खनै बील होवै है। अर आभै रै पंखैरूओ रा आळा होवै है बल्कि मिनख रै बेटे नै माथो घालनै री भी जगा कोनीं है।” उणै किणी दूजै ऊं कयौ, “म्हारै लारै आजा।” बल्कि वो मिनख बोल्यौ, “हे परभु, म्हनै जावण दे ताकी म्हैं पैला म्हारै पिता नै बूर नै आऊं।” तद यीसु उण ऊं कयौ, “मरयोड़ौ नै अपणै मुड़दा बूरण दे, थूं जा अर परमेसर रै राज री घोसणा कर।” पछै किणी और भी कियो, “हे परभु, म्हैं थारै लारै चालूं ला बल्कि पैला म्हनै म्हारै घरवाळौ ऊं विदा ले आवण दे।” इण खातर यीसु उण ऊं कयौ, “ऐड़ौ कोई भी जिकौ हळ माथै हाथ राखणै रै पछै लारै देखे है, परमेसर रै राज रै लायक कोनीं है।” अर इण बातां रै पछै परभु यीसु नै सीतर वळै मिनख चुणया अर जिण जिण नगर अर जगा वो आप जावण वाळौ हो, उठै उणै दो दो करनै खुद रै आगै भेज्या। अर उणै उणौनै कयौ, “पाका खेत घणा है, पण मजूर थोड़ा है। इण वास्तै खेत रै मालिक ऊं विणती करौ, की वो आपरै खेत काटणे रै वास्तै मजूर भेज दे। जाओ अर याद राखजौ, म्हैं थांनै लरड़ियां रै ज्यूं भेड़ियो रै बीच मे भेजूं हूं। इण वास्तै खुद रै साथै नीं बटवो लो, नीं थैलो अर नीं अलग ऊं दूजी जोड़ी जूता लो। अर नीं मारग मे किणी ऊं नमस्कार करौ। “जिण किणी घर मे जाओ, सबां ऊं पैला कैवौ, ‘इण घर नै सानति मिळै।’ जे उठै कोई सानति लायक मिनख होवैला तो थौरी सानति उणनै हासल होवैला। पण वो मिनख सानति लायक नीं होवैला तो थौरी सानति थौरे खनै पाछी आ जावैला। जिकौ कीं वे लोग थांनै दे, उणै खाता पीता उणीज घर मे रैवौ। क्यूंकै मजूरी माथै मजूर रौ हक है। घर घर मती फिरता रैवौ। “अर जद कदैई थै किणी नगर मे जाओ अर उण नगर रा लोग थौरो आदर भाव करै तो जिकौ कीं वे थौरे सांमै परोसे बस वोहीज खाओ। उण नगर रै बिमारों नै सावळ करौ अर उणौ ऊं कैवौ, ‘परमेसर रौ राज थौरे नजीक आ पूगौ है।’ अर जद कदैई थै किणी ऐड़ै नगर मे जाओ जठै रा लोग थौरो आदर नीं करै, तो उठै री गळियो मे जायनै कैवौ, ‘थौरे नगर री धूड़ भी, जिकौ म्हौरै पगां मे लागी है, म्हौ थौरे सांमै झाड़ देवो हो, तौभी ओ जांण लो, की परमेसर रौ राज थौरे नजीक आ पूगौ है।’ म्हैं थौरे ऊं कहूं की उण दिन उण नगर रै लोगां ऊं सदोम रै लोगां री दसा घणी भली होवैला। “हाय खुराजीन, हाय बैतसैदा, जिकौ सामरथ रा कांम थौरे मे किया, जे वे सूर अर सैदा मे किया होता, तो बोरी ओढ़नै अर राख मे बैठनै वे कदैई मन फिरा लेता। पण न्याव रै दिन सूर अर सैदा री हालत थौरे ऊं घणी भली होवैला। अर हे कफरनहूंम, कांई थूं सरग तांई ऊंचौ कियो जावैला? थूं तो नीचे पाताळ मे पड़ैला।” यीसु आपरै चेलौ नै कयौ, “जिकौ थौरी सुणै है, वो म्हारी सुणै है, अर जिकौ थांनै कीं नीं जांणै है, वो म्हनै कीं नीं जांणै है, अर जिकौ म्हनै स्वीकार नीं करै है, वो परमेसर नै स्वीकार नीं करै है जिणै म्हनै भेज्यौ है।” पछै वे सीतर आंणंद रै साथै पाछा आया अर बोल्या, “हे परभु, दुस्ट आतमाओ तांई थारै नाम ऊं म्हौरी आग्या मांनै है।” इण खातर यीसु उणौनै कयौ, “म्हैं सैतान नै आभै ऊं बिजळी रै ज्यूं पड़ते देख्यौ है। सुणौ, म्हैं थांनै सापों अर बिच्छूओ नै पगां ऊं कुचलनै रौ, अर दुसमन री सगळी ताकत ऊपर अधिकार दियौ है। अर किणी चीज ऊं थांनै कीं नुकसाण नीं होवैला। तौभी इण ऊं खुस मत होवो, की आतमाओ थौरे बस मे है, पण इण ऊं खुस होवो की थौरा नाम सरग मे लिख्या है।” उण घड़ी वो पवितर आतमा मे होयनै आंणंद ऊं भरग्या, अर कयौ, “हे पिता, सरग अर धरती रा परभु, म्हैं थारौ धन्यवाद करूं हूं, की थै इण बातां नै ग्यांनियों अर समझदारो ऊं लूकायनै राखी, अर टाबरां माथै परगट किनी। हे परम पिता, पको ही थूं ऐड़ौ इज करणौ चावतौ हो। “म्हारै पिता म्हनै सगळौ कीं सौंप दियौ है अर पिता रै सिवाय कोई कोनीं जांणै की बेटौ कुण है अर बेटे रै सिवाय कोई नीं जांणै की पिता कुण है, या उणरै सिवाय जिणनै बेटौ इणनै परगट करणौ चावै है।” अर चेलौ री तरफ मुड़नै उणै छांनै ऊं कयौ, “धन्य है वे आंख्यां जिकौ थै देख रिया हो, उणनै देखे है। क्यूंकै म्हैं थौरे ऊं कहूं, की उण बातां नै घणा भविसयदाता अर राजा देखणा चावता हा, जिणै थै देख रिया हो, पण वे देख नीं सकया। जिण बातां नै थै सुण रिया हो, वे उण बातां नै सुणणा चावता हा, पण वे सुण नीं सकया।” तद एक न्याव करणैवाळौ सास्तरी ऊभौ होयौ अर यीसु री परीकसा लेणे रै वास्तै उण ऊं पूछयौ, “हे गुरु, अनत जीवन पावण वास्तै म्हैं कांई करूं?” यीसु उणनै कयौ, “कायदे मे कांई लिख्योड़ौ है, उठै थूं कांई पढ़े है?” उणै जबाब दियौ, “थूं परभु अपणै परमेसर ऊं अपणै सगळै मन अर अपणै सगळै प्रांण अर अपणी सगळी बुद्धि रै साथै परैम राख। अर अपणै पड़ोसी ऊं खुद रै ज्यूं परैम कर।” तद यीसु उण ऊं कयौ, “थैं ठीक जबाब दियौ है। तो थूं ऐड़ौ इज कर इण ऊं थूं जीवतौ रैवैला।” पण उणै खुद नै धरमी ठैराणै री इछा ऊं यीसु ऊं पूछयौ, “तो म्हारौ पड़ोसी कुण है?” यीसु जबाब मे कयौ, “सुणौ, एक मिनख यरुसलेम ऊं यरीहो जा रियौ हो, की डाकूओ नै घेरनै सगळौ कीं खो लियौ अर गाभा ले लिया अर उणनै ठोक ठोक अधमरो करनै छोड़ नै जाता रिया। अर ऐड़ौ होयौ की उण मारग ऊं एक याजक जा रियौ हो। जद उणै इणनै देख्यौ तो मूंडौ फेर नै जातौ रियौ। उणीज मारग ऊं यरुसलेम मिंदर मे सेवा करणैवाळौ एक लेवी भी उठीज आयौ। उणै उणनै देख्यौ तो वो भी मूंडौ फेर नै जातौ रियौ। पण एक सामरी मिनख भी जावतौ होयौ उठै आयौ जठै वो पड़ियौ हो। जद उणै उण मिनख नै देख्यौ तो उणरै मन मे दया आई। अर उणरै खनै आयनै उणरै घावो माथै तेल अर अंगूररस लगायनै पटी बांधी। अर अपणी सवारी माथै चढ़ायनै सराह मे ले गियो, अर उणरी देखभाळ करनै लागौ। अगले दिन उणै दो चांदी रा सिक्‍का उण सराह वाळै नै देते होयौ कयौ, ‘इणरौ ध्यांन राखजै अर इण ऊं घणा जिकौ कीं थारौ खरचो होवैला, जद म्हैं पाछौ आऊंला, थनै दे दूंला।’ ” यीसु उण ऊं कयौ, “बता थारै विचार ऊं डाकूओ रै बीच मे घेरयोड़े मिनख रौ पड़ोसी इण तीनो मे ऊं कुण होयौ?” न्याव करनैवाळै सास्तरी कयौ, “वोहीज जिणै उण माथै दया किनी।” इण वास्तै यीसु उणनै कयौ, “जा अर वैड़ौ ही कर जैड़ौ उणै करयौ।” जद यीसु अर उणरा चेला मारग ऊं जा रिया हा, तो यीसु एक गांव मे पूगा। एक लुगाई जिणरौ नाम मारथा हो, वां उणौरौ आपरै घर मे आदर सत्कार कियो। उणरी मरियम नाम री एक बेन ही जिकौ परभु रै चरणौ मे बैठी, जिकौ कीं वो कैह रियौ हो, उणनै सुण री ही। पण तरैह तरैह री तैयारियो मे लागोड़ी मारथा उदास होयनै यीसु रै खनै आयनै कयौ, “हे परभु, कांई थांनै कीं भी सोच कोनीं की म्हारी बेन म्हनै सेवा करणै रै वास्तै ऐकली ही छोड़ दी है? इण वास्तै उण ऊं कैह, की म्हारी मदद करै।” परभु उणनै जबाब दियौ, “मारथा, हे मारथा, थूं घणी सी बातां रै वास्तै चिंता करै अर उदास रैवै है। पण एक बात खास है, अर उण उतम भाग नै मरियम चुण लियौ है, जिकौ उण ऊं खोयो नीं जावैला।” यीसु किणी जगा पराथना कर रियौ हो। अर जद वो पराथना कर चुकौ, तो उणरै चेलौ मे ऊं एक नै उण ऊं कयौ, “हे परभु, ज्यौ यूहन्‍ना आपरै चेलौ नै पराथना करणी सिखाई व्यौंही म्हौ नै भी थूं सिखा दे।” यीसु उणनै कयौ, “जद थै पराथना करौ, तो कैवौ, ‘हे पिता, थारौ नाम पवितर मान्यौ जावै, थारौ राज आवै। म्हांरी दिन भर री रोटी हर दिन दिया कर। म्हौरै गुनाह माफ कर, क्यूंकै म्हौ भी अपणै हरैक अपराधी नै माफ करौ हो, अर म्हौ नै कठिन परीकसा मे मती पड़नै दे।’ ” अर यीसु उणौनै कयौ, “मांनौ, थौरे मे ऊं किणी रौ एक दोसत है, अर थै आधी रात रा उणरै खनै जायनै कैवौ, ‘हे दोसत म्हनै तीन रोटियो दे। क्यूंकै म्हारौ एक दोसत अबार यात्रा ऊं म्हारै खनै आयौ है, अर म्हारै खनै उणरै सांमै परोसनै रै वास्तै कीं कोनीं है।’ अर विचार करौ। उण दोसत नै मांय ऊं जबाब दियौ, ‘म्हनै तंग मत कर, दरवाजो बंद हो चुकौ है, अर म्हारै टाबर म्हारै खनै बिस्तर मे है, इण वास्तै म्हैं उठनै थनै दे नीं सकूं।’ म्हैं थांनै बताऊं हूं, वो जे नीं उठैला अर थांनै कीं नीं दैला, बल्कि वो थौरो दोसत है, थौरे लगातार बिना सरम किए मांगता रैवण ऊं वो ऊभौ होवैला, अर थौरी जरुत हो उतौ उठनै दैला। “इण वास्तै म्हैं थौरे ऊं कैवूं हूं, की मांगो, तो थांनै दियौ जावैला। ढ़ूंढ़ो, तो थै पाओला। खटखटाओ, तो थौरे लियै खोलयो जावैला। क्यूंकै जिकौ कोई मांगे है, उणनै मिळै है। अर जिकौ ढ़ूंढ़े है, वो पावै है। अर जिकौ खटखटावे है, उणरै लियै खोलयो जावैला। “थौरे मे ऊं ऐड़ौ कुण पिता होवैला, की जद उणरौ बेटौ रोटी मांगे, तो उणनै भाठा दे? या मछली मांगे, तो मछली रै बदळै मे सांप दे? अर जे वो इंडा मांगे तो उणनै बिच्छू दे? जद थै भूंडा होयनै थौरे टाबरौ नै बड़िया चीजों देणी जांणौ हो, तो सरगिए पिता अपणै मांगणवाळौ नै पवितर आतमा क्यूं नीं दैला?” जद यीसु एक गूंगा बणाणवाळी दुस्ट आतमा नै निकाळ रियौ हो, ज्यौ ही दुस्ट आतमा बारै निकळी, तो वो गूंगो बोलण लागौ। भीड़ रा लोग इण ऊं घणौ अचूम्बो कियो। पण उणमे ऊं कईक लोगां कयौ, “ओ तो दुस्टआतमाओ रै सरदार री मदद ऊं दुस्टआतमाओ नै निकाळै है।” बल्कि दूजै लोगां उणनै परखणै रै वास्तै किणी सरगिए निसाणी री मांग किनी। पण यीसु, उणौरै मन री बातां नै जांणनै, उणौ ऊं कयौ, “जिण जिण राज मे फूट होवै है, वो राज उजड़ जावै है। अर जिण घर मे फूट होवै है, वो घर नास हो जावै है। जे सैतान अपणै ही विरोधी हो जाए, तो उणरौ राज कीकर बण्यौ रैला? क्यूंकै थै म्हारै बारै मे तो कैवौ हो, की म्हैं सैतान री मदद ऊं दुस्ट आतमाओ नै निकाळूं हूं। भला जे म्हैं बालजबूल री मदद ऊं दुस्ट आतमाओ नै निकाळूं हूं, तो थौरा चेला कीण री मदद ऊं निकाळै है? इण वास्तै वे इज थौरो न्याव चुकावैला। बल्कि जे म्हैं दुस्ट आतमाओ नै परमेसर री ताकत ऊं निकाळूं हूं, तो ओ साफ है की परमेसर रौ राज थौरे तांई आ पूगौ है। “जद एक ताकतवर मिनख पूरी तरैह सस्तर बांधनै आपरै घर री रकसा करै है तो उणरौ माल सुरकसित रैवै है। बल्कि जद कोई उण ऊं बढ़नै ताकतवर उण माथै हमलो करनै उणनै हरा दैवै है तो वो उणरै सगळै सस्तरो नै, जिण माथै उणनै विसवास हो, उण ऊं खो लेवे है अर लूट रै माल रौ वे आपस मे बांट लेवे है। “जिकौ म्हारै साथै नीं है, म्हारै विरोध मे है अर वो जिकौ म्हारै साथै भेळा कोनीं करै, बिखेरे है। “जद दुस्ट आतमा किणी मिनख मे ऊं बारै निकळ जावै है तो रिंदरोही मे आराम खोजती फिरै है, अर जद आराम नीं पावै तो कैवै है, ‘म्हैं अपणै उणीज घर मे पाछी जाऊं जठै ऊं म्हैं निकळी ही।’ अर वो पाछी जायनै उण घर नै साफ सुथरो अर सजायोड़ो पावै है। तद वो आयनै अपणै ऊं और भूंडी सात आतमाओ नै अपणै साथै ले आवै है, अर वे उणमे घुसनै रैवास करनै लागै है। इण तरैह उण मिनख री पैली री हालत ऊं करते दूबारी हालत घणी खराब हो जावै है।” जद यीसु ऐ बातां कैह ही रियौ हो, तो भीड़ मे ऊं एक लुगाई उठी अर ऊंचै सबद मे कयौ, “वो गरभ धन्य है, जिणमे थूं रियौ, वो मां धन्य है, जिणै थनै दूध पिलायो।” इण खातर उणै कयौ, “हां, पण धन्य वो है जिकौ परमेसर रा वचन सुणै है अर उण माथै चालै है।” ज्यौ ज्यौ भीड़ बढ़ री ही, तो यीसु कयौ, “इण जुग रा लोग भूंडा है। ऐ कोई निसाणी देखणी चावै है। बल्कि इणौनै योना रै निसाणी रै सिवाय और कोई निसाणी नीं दी जावैला। ज्यौ योना नीनवे रै लोगां रै लियै निसाणी ठैरयो, व्यौंही मिनख रौ बेटौ भी इण जुग रै लोगां रै लियै निसाणी ठैरैला। दखण री राणी न्याव रै दिन इण जुग रै लोगां रै साथै उठनै, उणौनै दोसी ठैरावैला, क्यूंकै वो राजा सुलैमान रै ग्यांन सुणणै रै वास्तै धरती री आखरी तांई आई। अर देखौ एठै वो है जिकौ सुलैमान ऊं भी मोटो है। नीनवे रा लोग न्याव रै दिन इण जुग रै लोगां रै साथै ऊभा होयनै, उणौनै दोसी ठैरावैला। क्यूंकै उणौ योना रौ परचार सुणनै मन फिरायो। अर देखौ, एठै वो है, जिकौ योना ऊं भी मोटो है। “कोई मिनख दीयौ लगायनै उणनै लूकाय या किणी बरतन रै मांय कोनीं राखै, बल्कि वो उणनै भींत माथै राखै है, ताकी मांय आवणवाळै नै उजाळौ मिळै। थारै सरीर रौ दीयौ थारी आंख है, जद आंख भली है तो थारौ सरीर भी उजाळौ है। पण जद आंख भूंडी है, तो थारौ सरीर भी अंधारौ है। इण वास्तै सावचेत रैणौ, की जिकौ उजाळौ थौरे मे है, वो अंधारौ नीं हो जावै। इण वास्तै जे थारौ सगळौ सरीर उजाळौ हो, अर इणरौ कोई भी भाग मे अंधारौ नीं रैवै, तो सगळौ ऐड़ौ उजाळौ होवैला, ज्यौ उण वगत होवै है, जद दीयौ अपणी चमक ऊं थनै उजाळौ देतो हो।” जद यीसु बातां कर रियौ हो, तो किणी फरीसी नै उण ऊं अरज की, म्हारै एठै खाणौ खा। अर वो मांय जायनै खाणौ खाणै बैठग्या। बल्कि जद उण फरीसी नै ओ देख्यौ की खाणौ खाणै ऊं पैला उणै आपरा हाथ नीं धोया तो उणनै घणौ अचूम्बो होयौ। इण खातर परभु उण ऊं कयौ, “थै फरीसी थाळी अर कटोरी नै ऊपर ऊपर तो मांजो हो, पण थौरे मांय लालच अर दुस्टता भरी है। अर गैलौ लोगां, जिणै बारै रा भाग बणाया, कांई उणै मांय रा भाग कोनीं बणाया? पण हां, जिकौ कीं थारै खनै है, वो गरीबो नै दे दे। पछै थारै लियै सगळौ कीं पवितर हो जावैला। “हे फरीसियों, थांनै हाय, क्यूंकै थै अपणै पोदीनै अर सुदाब बुटी अर हरैक जड़ी बुटी रौ दसवो हिस्सो तो देवो हो, पण न्याव नै अर परमेसर रै परैम नै टाळ देवो हो। जरुरी हो की इणनै भी करता रैवता अर उणनै भी नीं छोड़ता। “हे फरीसियों, थांनै हाय, क्यूंकै थै यहूदी पराथना घरो मे खास आसन चावौ हो, अर बजारौ मे सौभा अर नमस्कार लेणो थांनै भावै है। “थांनै हाय, क्यूंकै थै उण छिपयोड़ी कबरौ रै ज्यूं हो, जिण माथै लोग चालै है, पण जांणै कोनीं की नीचे कबर है।” तद एक न्याव सास्तरी यीसु नै कयौ, “हे गुरु, जद थूं ऐड़ी बातां कैवै है तो म्हौरी बेजती करै है।” यीसु कयौ, “हे न्याव सास्तरियों, थांनै भी हाय, क्यूंकै थै लोगां माथै ऐड़ौ बोझ घालौ हो जिणनै उठाणौ मुसकिल है। अर थै खुद उण बोझ नै एक आंगळी तांई नीं लगाणी चावौ। “थांनै हाय, थै उण भविसयदाताओ री कबरौ बणाओ हो, जिणनै थौरे वडेरा मारया हा। इण ऊं थै ओ दिखाओ हो की थै थौरे वडेरा रै उण कांमां ऊं सहमत हो। क्यूंकै उणौ तो उणौनै मारया अर थै उणौरी कबर बणाई। इण वास्तै परमेसर री बुद्धि नै भी कयौ है, ‘म्हैं उणौरै खनै भविसयदाताओ अर प्रेरितों नै भेजूंला। अर वे उण मे ऊं कईको नै मार दैला अर कईको नै सतावैला।’ ताकी जगत रै सरूआत ऊं जितरा भी भविसयदाताओ रौ लोई बहायौ गियो है, उणरौ हिसाब इण पीढ़ी रै लोगां ऊं लियौ जावैला। हाबिल री मौत ऊं लैयनै जकरयाह री मौत तांई जिकौ परमेसर रै मिंदर अर वेदी रै बीच मे घात किया हा। म्हैं थौरे ऊं साची कैवूं हूं, उणौरौ लेखौ इण वगत रै लोगां ऊं लियौ जावैला। “हे न्याव सास्तरियों, थांनै हाय, क्यूंकै थै ग्यांन री कुंजी ले तो ली है। पण उणमे नीं तो थै खुद परवेस कियो अर परवेस करनैवाळौ नै भी रोक दिया।” अर जद यीसु उठै ऊं चाल दियौ तो वे धरम सास्तरी अर फरीसी लोग उण ऊं घणी दुसमनी राखणै लागा। घणी बातां रै बारै मे वे उण ऊं उलटा सवाल करनै लागा। क्यूंकै वे उणनै उणरी किणी बात ऊं फसाणै री कोसीस मे लागयोड़ा हा। अर जद हजारो री भीड़ होई, एठै तांई की एक दूजै माथै पड़ रिया हा, तो वो सबां ऊं पैला आपरै चेलौ ऊं कैवण लागौ, “फरीसियों रै खमीर ऊं, जिकौ उणौरी चाल है, उण ऊं बचनै रहीजौ। कीं ढ़कयोड़ौ कोनीं, जिकौ खोलयो नीं जावैला। अर नीं कीं छुपयोड़ो है, जिकौ जांण्यौ नीं जावैला। इण वास्तै हरैक वो बात जिकौ थै अंधारै मे कही है, उजाळै मे सुणी जावैला। अर एकांत कमरो मे जिकौ कीं भी थै चुपचाप किणी रै कांन मे कही है, वो मकानो री छतो माथै ऊं परचार कियो जावैला। “बल्कि म्हारै दोसतो, म्हैं थौरे ऊं कैवूं हूं, की थौरे सरीर नै मार सकै है, पण उणरै पछै और कीं नीं कर सकै उणौ ऊं मती डरौ। म्हैं थांनै याद दिलाऊं हूं, की थांनै कीण ऊं डरणौ चाहीजै। उण परमेसर ऊं डरौ जिकौ थांनै मार नै नरक मे नोखणै री ताकत राखै है। हां, म्हैं थांनै बताऊं हूं, उणीज ऊं डरौ। कांई दो पईसो री पांच चिड़िया कोनीं बीके? तौभी परमेसर उणमे ऊं एक नै भी कोनीं भूलता। अर सुणौ, थौरे माथा रा एक एक बाल तांई गिण्योड़ा है। लोगां ऊं डरौ मती, थै घणी चिड़ियो ऊं बढ़नै हो। “म्हैं थौरे ऊं कैवूं हूं, जिकौ कोई मिनखौ रै सांमै म्हनै मांनै है, उणनै म्हैं, मिनख रौ बेटौ, भी परमेसर रै सरगदूतो रै सांमै मांनैला। पण जिकौ मिनखौ रै सांमै म्हनै मना करै है उणरौ परमेसर रै सरगदूतो रै सांमै मना कर दी जावैला। अर हरैक उण मिनख नै तो माफ कर दियौ जावैला जिकौ म्हैं, मिनख रै बेटौ, रै विरोध मे कोई सबद बोले है, बल्कि जिकौ पवितर आतमा री निंदा करै है, उणनै माफ नीं कियो जावैला।” “जद वे थांनै यहूदी पराथना घर, हाकिमों अर अधिकारियों रै सांमै ले जाये तो चिंता नीं करणी की म्हौ कीण रीति ऊं या कांई जबाब दो, या कांई कैवौ। क्यूंकै पवितर आतमा उण घड़ी थांनै सिखा दैला, की कांई कैणौ चाहीजै।” पछै भीड़ मे ऊं उण ऊं किणी कयौ, “हे गुरु, म्हारै भाई ऊं पिता री जायदाद रौ बंटवारौ करनै रौ कैह दो।” यीसु उण ऊं कयौ, “हे भला मिनख, म्हनै थौरो न्याव करणैवाळौ या बंटवारौ करणैवाळौ कीणै बणायौ है?” यीसु उण ऊं कयौ, “सावचेत रैवौ, अर हरैक तरैह रै लोभ ऊं अपणै आप नै आगौ राखौ। क्यूंकै जरुत ऊं घणौ धन होवण ऊं जीवन रौ आधार नीं होवै।” पछै उणै उणनै एक दिस्टांत कथा सुणाई, “किणी धनवान री धरती माथै घणौ धान होयौ। तद वो अपणै मन मे विचार करनै लागौ, ‘म्हैं कांई करूं? म्हारै खनै धान राखणै रै वास्तै जगा तो है कोनीं।’ “अर उणै कयौ, ‘म्हैं ओ करूंला। म्हैं अपणी भखारियो नै तोड़नै उणौ ऊं मोटी बणाऊंला अर अपणै सगळै धान अर सामान नै उणमे राखूंला। अर अपणी आतमा ऊं कैवूंला, अरै म्हारी आतमा अबै घणी चौखी चीजों, घणै बरसो रै लियै थारै खनै राखूं हूं, घबरा मती, खा, पी, अर सुख ऊं रैह।’ “पण परमेसर उण ऊं कयौ, ‘हे गैला, इण रात थारौ प्रांण थारै ऊं ले लियौ जावैला। तद जिकौ कीं थैं भेळौ करयौ है, वो किणरौ होवैला?’ “ऐड़ौ ही वो मिनख भी है जिकौ अपणै वास्तै धन भेळौ करै है, पण परमेसर री निजर मे वो धनवान कोनीं है।” पछै उणै आपरै चेलौ ऊं कयौ, “इण वास्तै म्हैं थौरे ऊं कैवूं हूं, अपणै प्रांण री चिंता मती करौ, की म्हौ कांई खाओला, अर अपणै सरीर री चिंता मती करौ की म्हौ कांई पेरोला। क्यूंकै खाणै ऊं प्रांण, अर कपड़ो ऊं सरीर घणौ बढ़नै है। कौवों नै देखौ, वे नीं बोए है, नीं वे काटे है, नीं उणौरै खनै भंडार है अर नीं धान रा कोठा है। तौभी परमेसर उणौनै खाणौ दैवै है। थै तो कौवों ऊं घणा किमती हो। थौरे मे ऊं ऐड़ौ कुण है, जिकौ चिंता करणै ऊं अपणी उमर मे एक घड़ी भी बढ़ा सकै है? इण वास्तै जे थै इण छोटे कांम नै भी नीं कर सकौ, तो और बातां रै लियै क्यूं चिंता करौ हो? “कमोद नै देखौ, वे कीकर उगै है? नीं वे मेनत करै है, नीं काते है। तौभी म्हैं थौरे ऊं कैवूं हूं की सुलैमान अपणै सगळै वैभव मे, उण मे ऊं किणी एक रै ज्यौ भी नीं सज सकयौ। इण वास्तै जे परमेसर मैदान री घास नै, जिकौ आज एठै है अर जिणनै काले ही लाय मे फूंकी जावैला, परमेसर ऐड़ै गाभौ ऊं सजावै है तो हे थोड़े विसवास करणैवाळौ थांनै तो वो और ही घणा गाभा पैरावैला। अर थै इण बात री खोज मे नीं रैवौ, की कांई खाओला अर कांई पीओला, अर नीं वेम करौ। क्यूंकै संसार रा लोग इण सगळी चीजों री खोज मे रैवै है। अर थौरो पिता जांणै है, की थांनै इण चीजों री जरुत है। पण उणरै राज री खोज मे रैवौ, तो ऐ चीजों भी थांनै मिळ जावैला। “हे छोटे झुंड डरौ मती, क्यूंकै थौरो परम पिता थांनै सरग रौ राज देवण नै तैयार है। अपणी जायदाद बेचनै धन गरीबो मे बांट दो। अपणै खनै ऐड़ी थैलियो राखौ जिकौ पुराणी नीं पड़ै, मतलब सरग माथै ऐड़ौ धन भेळौ करौ जिकौ घटे नीं अर जिणरै नैड़ौ चोर नीं जावै, अर नीं कीड़ा बिगाड़े। क्यूंकै जठै थौरो धन है, उठै थौरो मन भी लागोड़ो रैवैला। “करम करनै हमेसां तैयार रैवौ। अर अपणौ दीयौ लगाए राखौ। अर उण लोगां रै ज्यौ बणौ जिकौ ब्याव रै खाणै ऊं पाछा आते अपणै मालिक रै इन्तजार मे रैवै है ताकी, जद वो आये अर द्धार खटखटाये तो वे तुरत उणरै लियै द्धार खोल सकै। “धन्य है वे सेवक, जिणौनै मालिक आयनै जागता पाए। म्हैं थौरे ऊं साची कैवूं हूं, की वो भी उणौरी सेवा रै वास्तै कमर बांधनै उणौनै खाणै री चौकी माथै खाणै रै वास्तै बिठावैला। वो आवैला अर उणौनै खाणौ जिमावैला। जे वो रात रै दूजै पहर या तीजै पहर मे आयनै उणौनै जागता पाए, तो वे सेवक धन्य है। इण बात रै लियै पका रैवौ, की जे घर रै मालिक नै ओ ध्यांन होवतो की चोर कीण घड़ी आवैला, तो वो उणनै अपणै घर मे चोरी नीं करणै देतो। थै भी तैयार रैवौ क्यूंकै म्हैं, मिनख रौ बेटौ ऐड़ी घड़ी आवैला जिणनै थै सोच भी नीं सकौ।” तद पतरस पूछयौ, “हे परभु, ओ दिस्टांत कथा थूं म्हौरै लियै कैह रियौ है या सगळौ रै लियै?” परभु कयौ, “वो विसवास लायक अर समझदार भंडारी कुण है, जिणरौ मालिक उणनै नौकर चाकरो माथै सरदार ठैराए की उणौनै सही वगत खाणौ दे। वो सेवक धन्य है जिणनै उणरौ मालिक जद आवै तो उणनै वैड़ौ इज करते पावै। म्हैं थौरे ऊं साची कैवूं हूं, की वो उणनै अपणी सगळी जायदाद रौ सरदार ठैरावैला। जे वो सेवक अपणै मन मे सोचे की म्हारौ मालिक तो आवण मे घणौ मोड़ो कर रियौ है, अर वो दूजै दास अर दासियो नै मारणा पीटना सरू कर दे अर खाणै पीणै अर पियकड़ होवण लागै, तो उण सेवक रौ मालिक ऐड़ै दिन आ जावैला, जिणरी वो सौचतो तांई कोनीं। एक ऐड़ी घड़ी जिणरै बारै मे वो अणचेत है। पछै वो उणरा टुकड़ा टुकड़ा कर दैला अर उणनै अविसवासियो रै साथै ठैरावैला। “वो सेवक जिकौ अपणै मालिक री इछा जांणै है, अर उणरै लियै तैयार नीं रैवतौ या ज्यौ उणरौ मालिक चावै है, व्यौंही नीं करै, उण सेवक माथै घणी मार पड़ैला। बल्कि वो जिणनै आपरै मालिक री इछा रौ ग्यांन नीं अर कोई ऐड़ौ कांम कर दे जिकौ मार पड़नै लायक हो तो उण सेवक नै हळकी मार पड़ैला। क्यूंकै हरैक उण मिनख ऊं जिणनै बोहत घणौ दियौ गयो है, उण ऊं घणौ लियौ जावैला। जिण लोगां नै परमेसर घणौ सौपयो है, उण लोगां ऊं परमेसर घणौ ही मांगेला। “म्हैं धरती माथै एक अग्‍नि लगाणै आयौ हूं। म्हारी इती इछा है की वो कदैई आज तांई लाग जाती। म्हारै खनै एक दुख रौ बतिस्मो है जिकौ म्हनै लेणो है। जद तांई ओ पूरौ नीं हो जातौ, म्हैं कितौ उदास हूं। कांई थै समझौ हो की म्हैं धरती माथै मिलाप कराणै आयौ हूं? कोनीं बल्कि अलग कराणै आयौ हूं। क्यूंकै इण ऊं आगै एक घर रै पांच लोग एक दूजै रै विरोध हो जावैला। तीन दो रै विरोध मे अर दो तीन रै विरोध मे हो जावैला। पिता, बेटे रै विरोध मे, अर बेटौ, पिता रै विरोध मे, मां, बेटी रै विरोध मे, अर बेटी, मां रै विरोध मे, सासु, बहूं रै विरोध मे, अर बहूं, सासु रै विरोध मे हो जावैला।” अर उणै भीड़ ऊं कयौ, “जद बादळ नै पच्छिम ऊं उठता देखौ हो, तो तुरत कैवौ हो, की बरसात आवैला अर ऐड़ौ ही होवै है। अर जद दखण हवा चालै है, तो थै कैवौ हो, लूं चालै ला, अर ऐड़ौ ही होवै है। हे पापियो, थै धरती अर आभै रै रूप मे भेद कर सकौ हो, पण इण जुग रै बारै मे क्यूं भेद करणौ नीं जांणता? “अर थै आप ही फैसलो क्यूं नीं कर लेता, की उचित कांई है? जद थै अपणै विरोधी रै साथै अधिकारियों रै खनै जा रिया हो तो मारग मे ही उणरै साथै समझौतो करणै री कोसीस करौ। नीं तो कठैई ऐड़ौ नीं हो की वो थांनै न्यायधीस रै सांमै खींच ले जाए, अर न्यायधीस थांनै अधिकारी नै सौंप दे। अर अधिकारी थांनै जेळ मे बंद कर दे। म्हैं थांनै बताऊं हूं, थै उठै ऊं तद तांई नीं छूट सकौ जद तांई आखरी पाई पाई रौ हिसाब नीं चुका दो।” उण वगत उठै कीं लोगां यीसु नै कयौ, की पिलातुस नै कीं गलीलियो नै मार दिया, जिकौ बलियो चढ़ाता हा। ओ सुणनै यीसु उणौ ऊं कयौ, “थै कांई सौचौ हो की ऐ गलीली दूजै सगळै गलीलियो ऊं भूंडा पापी हा, की उणौनै ऐ बातां भुगतणी पड़ी? कोनीं, म्हैं थांनै बताऊं हूं, जे थै मन कोनीं फिराओला, तो थै सगळा भी वैड़ी ही मौत मरोला जैड़ी वे मरया हा। या कांई थै समझौ हो, की वे अठारैह लोग जिणौ माथै सीलोह रौ गुमट पड़ियौ, अर वे दबनै मरग्या, कांई यरुसलेम रै सगळै रैवणवाळौ ऊं करते घणा गुनेगार हा? कोनीं, म्हैं थांनै बताऊं हूं, की जे थै मन नीं फिराओला तो थै सगळा भी व्यौंही मरोला।” पछै उणै ओ दिस्टांत कथा कही, “किणी मिनख नै आपरी अंगूर री बाड़ी मे एक अंजीर रौ रुंखड़ौ लगायोड़ौ हो। वो उणमे फळ सौधण आयौ, पण उणनै कीं नीं मिळियौ। तद उणै बारी रै रखवाळै ऊं कयौ, ‘देख तीन बरस ऊं म्हैं इण अंजीर रै रूंखड़ै मे फळ सौधण आऊं हूं, पण म्हनै एक भी फळ नीं मिळियौ। इणै काट नोख। ओ धरती नै यूं ही क्यूं रोक रियौ?’ रखवाळै उणनै जबाब दियौ, ‘हे मालिक, इणै इण साल तो और रैवण दे, की म्हैं इणरै च्यांरूमेर खाडो खोदनै इणमे खाद नोखूं। पछै जे ओ अगले साल फळ दे तो बड़िया है, अर नीं दे तो थूं इणै काट सकै है।’ ” किणी पराथना घर मे सब्त रै दिन यीसु जद उपदेस दे रियौ हो। तो उठै एक ऐड़ी लुगाई ही, जिणै अठारैह बरस ऊं एक कमजोर करणै वाळी दुस्ट आतमा लागी ही, अर वो कुबड़ी होयगी ही, अर किणी रीति ऊं सीधी नीं हो सकी। यीसु उणनै जद देखी तो उणनै अपणै खनै बुलाई अर कयौ, “हे बेन, थूं अपणी बीमारी ऊं छूट गी।” ओ कैवतै होयौ, उणरै माथा ऊपर हाथ राख्यौ। अर वो तुरत सीधी ऊभी होयगी। अर वो परमेसर री महिमा करणै लागी। इण वास्तै की यीसु सब्त रै दिन उणनै सावळ की ही, पराथना घर रौ सरदार रीस मे आयनै लोगां ऊं कयौ, “छह दिन है, जिणमे कांम करणौ चाहीजै, तो उण ही दिनां मे आयनै सावळ होवो, पण सब्त रै दिन मे कोनीं।” ओ सुणनै परभु जबाब कयौ, “हे धोखेबाजो, कांई सब्त रै दिन थौरे मे ऊं हरैक अपणै बळद या गधे नै बाड़ै मे ऊं निकाळनै पांणी पिलानै कठैई कोनीं ले जाता? जे आ लुगाई जिकौ अबराहम री बेटी है अर जिणै सैतान नै अठारैह साल ऊं बांध राखी हो, कांई उणनै सब्त रै दिन इणरै बंधन ऊं नीं छुड़ाणी चाहीजै?” जद यीसु ओ कयौ तो उणरै सगळा विरोधी लजित होया, अर सगळी भीड़ उण महिमा रै कांमां ऊं जिकौ वो करतौ हो, खुस होय री ही। पछै यीसु कयौ, “परमेसर रौ राज कैड़ौ है अर म्हैं उणरी तुलना कीण ऊं करूं? वो राई रै एक दाणे रै ज्यौ है, जिणै किणी मिनख लैयनै अपणी बाड़ी मे बो दियौ। अर वो मोटो होयौ अर एक रूंखड़ै जैड़ौ बणग्यौ। अर आकास रै पंखैरूओ नै उणरी डाळियो माथै आळा बणाया।” उणै वळै कयौ, “परमेसर रै राज री तुलना म्हैं कीण ऊं करूं? ओ उण खमीर रै ज्यौ है जिणै एक लुगाई लैयनै तीन पसेरी आटे मे मिळायो अर वो सगळौ आटो खमीर हो गियो।” यीसु जद नगरो अर गांवों ऊं होवतो होयौ उपदेस देतो यरुसलेम जा रियौ हो। तो उण ऊं किणी मिनख पूछयौ, “हे परभु, कांई थोड़े ही मिनखौ रौ उद्धार होवैला?” उणै उणनै कयौ, “साकंड़े द्धार ऊं परवेस करनै री कोसीस करौ, क्यूंकै म्हैं थांनै बताऊं हूं की मांय जावण री कोसीस घणा लोग करैला बल्कि जा नीं पावैला। जद एक बार घर रौ मालिक उठनै द्धार बंद कर दैवै है, तो थै बारै ही ऊभा द्धार खटखटाते केवोला, ‘हे मालिक म्हारै वास्तै द्धार खोल दे,’ बल्कि वो थांनै जबाब दैला, ‘म्हैं कोनीं जांणूं थै कठै ऊं आया हो?’ “तद थै कैवण लागोला, ‘म्हौ थारै साथै खायौ, थारै साथै पीयो, थै म्हौरी गळियो मे म्हौ नै उपदेस दिया।’ “पण वो थौरे ऊं कैवैला, ‘म्हैं कोनीं जांणूं थै कठै ऊं आया हो? हे कुकरम करणैवाळौ, थै सगळा म्हारै ऊं आगा रैवौ।’ “थै अबराहम, इसहाक, याकूब अर सगळा भविसयदाताओ नै परमेसर रै राज मे देखौ ला, बल्कि थांनै बारै धकेल दिया जावैला तो उठै सिरफ रोणो अर दांत पीसणो होवैला। पछै पूरव अर पच्छिम, उतर अर दखण ऊं लोग आयनै परमेसर रै राज रै भोज मे भागी होवैला। ध्यांन राखजौ, की उठै जिकौ आखरी है, वे पैला हो जावैला। अर जिकौ पैला है, वे आखरी हो जावैला।” उण वगत यीसु रै खनै कीं फरीसी आया अर उण ऊं कयौ, “हेरोदेस थनै मार दैणौ चावै है, इण वास्तै एठै ऊं कहीं और जातौ रैह।” तद उणै उण ऊं कयौ, “जाओ अर उण लोमड़ी ऊं कैवौ, सुण म्हैं लोगां मे ऊं दुस्ट आतमाओ नै निकाळूं हूं, म्हैं आज भी सावळ करूंला अर काले भी। पछै तीजै दिन म्हैं अपणौ कांम पूरौ करूंला। तौभी म्हनै आज अर काले अर परसौ चालणौ जरुरी है, क्यूंकै हो नीं सकै की कोई भविसयदाता यरुसलेम रै बारै मारयो जाये। “हे यरुसलेम, हे यरुसलेम, थूं भविसयदाताओ री हत्या करै है अर परमेसर जिणै थारै खनै भेज्या है, उण ऊपर भाठा ठोकौ हो। म्हैं किती ही बार थारै लोगां नै भेळा करणा चाहया, ज्यौ एक कुकड़ी आपरै बच्चौ नै आपरै पांखों रै नीचे भेळा करै है। पण थूं कोनीं चाहयौ। देखौ, थौरो घर थौरे वास्तै उजाड़ छोड़नै जाऊं हूं। अर म्हैं थौरे ऊं कैवूं हूं, जद तांई थै नीं केवोला, ‘धन्य है वो जिकौ परभु रै नाम ऊं आवै है,’ तद तांई थै म्हनै वळै कदैई नीं देखौ ला।” एक बार यीसु सब्त रै दिन फरीसियों रै सरदारो मे ऊं किणी रै घर खाणै माथै गियो। अर वे यीसु नै फसाणै रौ मौकौ सौध रिया हा। उठै एक मिनख उणरै सांमै हो, जिणनै हाथौ पगां मे सूजन री बीमारी ही। यीसु यहूदी धरम सास्तरियों अर फरीसियों ऊं पूछयौ, “सब्त रै दिन किणी नै सावळ करणौ उचित है, की कोनीं?” पण वे कीं नीं बोलया। तद यीसु उणनै हाथ लगायनै सावळ कियो। अर पछै उणनै कहीं भेज दियौ। अर यीसु कयौ, “थौरे मे ऊं ऐड़ौ कुण है, जिणरौ गधो या बळद टांके मे पड़ जावै तो कांई सब्त रै दिन भी थै उणनै तुरत बारै कोनीं निकाळौ ला?” वे इण बातां रौ कीं जबाब नीं दे सकया। क्यूंकै यीसु ओ देख्यौ की मेमाण आपरै वास्तै बैठनै रै वास्तै कोई खास जगा सौध रिया है, तो उणै उणौनै एक दिस्टांत कथा सुणाई। वो बोल्यौ, “जद कोई थनै ब्याव मे बुलाए तो खास जगा मे नीं बैठणौ, कठैई ऐड़ौ नीं हो, की उणै थारै ऊं भी किणी मोटे मिनख नै बुलायौ हो। अर जिणै थनै अर उणनै दोनो नै नेवतो दियौ हो, आयनै थारै ऊं कैह, ‘इणौ नै जगा दे,’ अर तद थनै लजित होयनै सबां ऊं नीची जगा मे बैठणौ पड़ै। जद थनै बुलायौ जाए, तो जायनै सबां ऊं नीचे जगा जा बैठ, जिण ऊं जद थनै नेवतो देवण वाळौ आवैला तो थनै कैवैला, ‘हे दोसत, उठ ऊपर बैठ।’ पछै उण सगळौ रै सांमै, जिकौ थारै साथै मेमाण उठै आयोड़ा है, उणौरै सांमै थारौ मांन बढ़ैला। अर जिकौ कोई अपणै आप नै मोटो बणावैला, वो छोटौ कियो जावैला। अर जिकौ कोई अपणै आप नै छोटौ बणावैला, वो मोटो कियो जावैला।” पछै जिणै उणनै नियोतो दियौ हो, यीसु उण ऊं बोल्यौ, “जद कदैई थूं कोई दिन या रात रौ खाणौ दे तो अपणै दोसतो, भाइयो, कुटुम्बियो या धनवान पड़ोसियो नै मती बुला, क्यूंकै बदळै मे वे थनै बुलावैला, अर इण तरैह थनै उणरौ फळ मिळ जावैला। बल्कि जद थूं कोई खाणौ दे तो कंगालो, अपाहिजो, लंगड़ो अर आंधौ नै बुला। क्यूंकै उणौरै खनै थनै पाछौ देवण नै कीं कोनीं है तो ओ थारै वास्तै धन्य है। इणरौ प्रतिफळ थनै धरमी लोगां रै पुनरूत्थान पर दियौ जावैला।” उणरै साथै खाणौ करनैवाळौ लोगां मे ऊं एक नै ओ सुणनै यीसु ऊं कयौ, “हरैक वो मिनख धन्य है, जिकौ परमेसर रै राज मे खाणौ खावैला।” तद यीसु उण ऊं कयौ, “एक मिनख किणी मोटे खाणै री तैयारी कर रियौ हो, उणै घणै लोगां नै नियोतो दियौ। जद दावत रै वगत जिणनै नेवतो दियौ गियो हो, दास नै भेजनै ओ कयौ, ‘आओ क्यूंकै अब खाणौ तैयार है।’ वे सगळा एक ज्यौ आनाकानी करनै लागा। पैला वाळै उण ऊं कयौ, ‘म्हैं एक खेत मोल लियौ है, म्हनै जायनै उणनै देखणौ है, करपा करनै म्हनै माफ करै।’ दूजै वाळै कयौ, ‘म्हैं पांच जोड़ी बळद मोल लिया है, म्हैं तो बस उणौनै परखणै जा रियौ हूं, करपा म्हनै माफ करै।’ एक वळै भी बोल्यौ, ‘म्हैं ब्याव कियो है, इण वास्तै म्हैं नीं आ सकूं।’ जद वो सेवक पाछौ आयौ तो उणै आपरै मालिक नै ऐ बातां बता दी। इण खातर उण घर रौ मालिक घणौ रीसे बळयौ अर आपरै सेवक ऊं कयौ, ‘फुरती ऊं नगर री गळियो अर बजारौ मे जायनै कंगालो, अपाहिजो, लंगड़ो अर आंधौ नै एठै बुलायनै ला।’ सेवक कयौ, ‘हे मालिक, ज्यौ थै कयौ हो, व्यौंही कियो हो। तौभी जगा है।’ मालिक सेवक ऊं कयौ, ‘सड़को माथै अर खेतो री मेढ़ो तांई जाओ अर उठै ऊं लोगां नै आदर करनै एठै बुलायनै लाओ ताकी म्हारौ घर भर जावै। अर म्हैं थौरे ऊं कैवूं हूं, जिकौ पैला बुलाया गिया हा उणमे ऊं एक भी म्हारै खाणै नै नीं चाखे।’” अर जद घणी भीड़ उणरै साथै जा री ही, तो उणै लारै मुड़नै उण ऊं कयौ, “जिकौ म्हारै खनै कोई भी आवै है, अर आपरै पिता, मां, लुगाई अर टाबरौ आपरै भाइयो अर बैनो अर एठै तांई की आपरै जीवन तांई ऊं म्हारै ऊं घणौ परैम राखै है, तो वो म्हारौ चेलौ नीं हो सकै। अर जिकौ कोई आपरौ क्रूस नीं उठाए, अर म्हारै लारै नीं चालै, वो भी म्हारौ चेलौ नीं हो सकै। “जे थौरे मे ऊं कोई गढ़ बणाणौ चावै तो कांई वो पैला बैठनै उणरै कीमत रौ, ओ देखणै रै लियै की उणै पूरौ करनै रै वास्तै उणरै खनै गुंजाइस है या कोनीं, हिसाब किताब कोनीं लगावैला? नीं तो वो नींव तो भर दैला अर उणै पूरौ नीं कर पाणै ऊं, जिणौ उणनै सरू करते देख्यां, वे सगळा उणरी मसकरी करैला अर कैवैला, ‘अर देखौ इण मिनख बणाणौ तो सरू कियो, पण ओ उणनै पूरौ नीं कर सकयौ।’ “या कोई राजा ऐड़ौ होवैला, जिकौ किणी दूजै राजा रै विरोध मे युध करनै जाये अर पैला बैठनै ओ विचार नीं करै, की अपणै दस हजार सेना रै साथै कांई वो बीस हजार सेनावाळै अपणै विरोधी रौ सांमनौ कर भी सकै ला या कोनीं? अर जे वो सांमनौ करनै री गुंजाइस नीं होवैला, तो उणरौ विरोधी अजी तांई मारग मे ही होवैला, तद वो आपरै दूतो नै भेजनै मेल मिलाप करणौ चावैला। इण रीति ऊं थौरे मे ऊं जिकौ कोई आपरौ सगळौ कीं त्याग नीं दे, तो वो म्हारौ चेलौ नीं हो सकै। “नमक तो चौखौ है, पण जे नमक रौ हवाद बिगड़ जावै, तो उणनै कीणमे नोख्यौ जा सकै है? नीं तो वो माटी रै अर नीं खाद रै कांम आवै है, लोग उणनै बस यूं ही फेंक दैवै है। “जिणरै सुणणै रा कांन होवै, वो सुण ले।” जद चुंगी लेवण वाळा अर घणा पापी उणनै सुणणै उणरै खनै आवण लागा हा। तो फरीसी अर यहूदी धरम सास्तरी कुड़कुड़ाता होया कैवण लागा, “ओ मिनख तो पापियो रौ आदर करै है अर उणौरै साथै खाणौ भी खावै है।” इण खातर यीसु उणौनै आ दिस्टांत कथा सुणाई, “मांनौ, थौरे मे ऊं कुण है जिणरी सौ लरड़ियां हो, अर उण मे ऊं एक गुम जावै तो निन्याणवे नै रिंदरोही मे छोड़नै, उण गुमयोड़ी नै जैड़ी तांई मिळ नीं जावै ढ़ूंढ़तो नीं रैवै? अर जद उणनै लरड़ी मिळ जावै है, तो वो उणनै घणी खुसी रै साथै आपरै कांधै माथै उठा लेवे है। अर जद घर पाछौ आवै तो आपरै दोसतो अर पड़ोसियो नै खनै बुलायनै उणौ ऊं कैवै है, ‘म्हारै साथै आंणंद करौ, क्यूंकै म्हनै म्हारी गुमयोड़ी लरड़ी मिळ गी है।’ म्हैं थौरे ऊं कैवूं हूं, इण तरैह किणी एक मन फिरानैवाळै पापी रै लियै, उण निन्याणवे धरमी मिनखौ ऊं, जिणौनै मन फिरानै री जरुत कोनीं है, सरग मे कहीं घणौ आंणंद मनायौ जावैला। “या सौचौ कोई लुगाई है जिणरै खनै दस चांदी रा सिक्‍का है अर उणरौ एक सिक्‍को गुम जावै, तो कांई दीयौ लगायनै घर नै तद तांई नीं बुहारती रैवैला अर सावचेती ऊं नीं देखती रैवैला जैड़ी तांई की वो उणनै मिळ नीं जाए? अर जद मिळ जावै है, तो वां आपरै सहेलियो अर पड़ोसनियो नै खनै बुलायनै कैवै है, ‘म्हारै साथै आंणंद करौ, क्यूंकै म्हारौ गुमयोड़ौ सिक्‍को मिळग्यौ है।’ म्हैं थौरे ऊं कैवूं हूं, की इण तरैह एक मन फिरानै वाळै पापी रै लियै भी परमेसर रै दूतो रै सांमै आंणंद मनायौ जावैला।” पछै यीसु कयौ, “एक मिनख रै दो बेटा हा। उणमे ऊं छोटे आपरै पिता ऊं कयौ, ‘हे पिता, जायदाद मे ऊं जिकौ हिस्सो म्हारौ आवै है, वो म्हनै दे दो।’ तो पिता नै उण दोनो नै आपरी जायदाद बांट दीनी। “अजी कोई घणा दिन कोनीं बीता हा, की छोटोड़ो बेटौ सगळौ भेळौ करनै, एक आगै देस जातौ रियौ अर उठै भूंडै कांमां मे आपरी जायदाद उडा दीनी। जद वो सगळी जायदाद उडा दी, तो उण देस मे घणौ काळ पड़ियौ, अर वो कंगाल हो गियो। इण वास्तै वो उण देस रै किणी मिनख रै उठै जायनै मजूरी करनै लागौ, उणै आपरै खेतो मे गंडूरा चरानै भेज दियौ। उठै उणै सौच्यौ की उणनै वे फळियो ही पेट भरणै मिळ जाये जिणौनै गंडूरा खाता हा। बल्कि किणी उणनै एक फळी तांई कोनीं दी। “जद उणरै अकल ठिकाणे आई तो कैवण लागौ, ‘म्हारै पिता रै किता ही मजूर है जिणौनै खाणै रै पछै भी बचयो रैवै है, अर म्हैं एठै भूखो मर रियौ हूं। म्हैं अबै एठै ऊं चालनै अपणै पिता रै खनै जाऊंला, अर उणौ ऊं कैवूंला, “पिता जी, म्हैं सरग रै परमेसर अर थौरे विरोध पाप करयौ है। अबै इण लायक कोनीं रियौ की थौरो बेटौ कैलाऊं म्हनै आपरौ एक मजूर जांणनै राख लो।” ’ तद वो उठनै आपरै पिता रै खनै गियो। “वो अजी आगौ ही हो, की उणरै पिता उणनै देखनै तरस आई, अर नाह नै उणनै गळे लगायो, अर घणौ चूमयो। “बेटे पिता नै कयौ, ‘पिता जी, म्हैं थौरी निजर मे अर सरग रा परमेसर रै विरोध पाप कियो है, अर अबै इण लायक कोनीं रियौ, की थौरो बेटौ कैलाऊं।’ “पण पिता आपरै सेवकों ऊं कयौ, ‘फटाफट बड़िया ऊं बड़िया गाभा निकाळनै उणनै पैहराओ, अर उणरै हाथ मे बींटी, अर पगां मे जूतियां पैहराओ। कोई पाळयोड़ौ पसु लायनै काटो ताकी म्हौ खायनै आंणंद मनाओ। क्यूंकै म्हारौ ओ बेटौ जिकौ मरग्यौ हो अबै ज्यूं पाछौ जीवतौ हो गियो है। ओ गुम गियो हो, पर अबै ओ मिळग्यौ है।’ तो वे आंणंद मनाणै लागा। “पण उणरौ मोटो बेटौ खेत मे हो। अर जद वो आवतै वगत घर रै नजीक पूगौ, तो उणै गाणें बजानै अर नाचनै रौ सबद सुण्यौ। उणै आपरै एक सेवक नै बुलायनै पूछयौ, ‘ओ कांई हो रियौ है?’ “सेवक उणनै कयौ, ‘थारौ भाई आ गियो है अर थारै पिता उणनै चंगो भलौ देखनै एक पाळयोड़ौ पसु कटवायो है।’ “ओ सुणनै वो रीस ऊं भर गियो, अर मांय जावणौ नीं चावतौ। पण उणरौ पिता बारै आयनै उणनै मनाणै लागा। उणै पिता नै जबाब दियौ, ‘देखौ, म्हैं बरसो ऊं थौरी सेवा करतौ आयौ हूं। म्हैं थौरी किणी भी आग्या रौ विरोध नीं कियो, तौभी थै म्हनै तो कदैई एक छोटे बकरे तांई नीं दियौ की म्हैं म्हारै दोसतो रै साथै आंणंद मना सकूं। पण जद थौरो ओ बेटौ आयौ जिणै वेसयाओ मे थौरो धन उडायो, उणरै वास्तै थै पाळयोड़ौ पसु कटवायो।’ “पिता उण ऊं कयौ, ‘म्हारा बेटा, थूं हमेसां ही म्हारै खनै है अर जिकौ कीं म्हारै खनै है, वो सगळौ थारौ ही है। बल्कि अपांनै खुस होणौ चाहीजै अर आंणंद मनाणौ चाहीजै क्यूंकै थारौ भाई, जिकौ मरग्यौ हो, अबै पाछौ जीवतौ हो गियो है। ओ गुम गियो हो, जिकौ पाछौ मिळ गियो है।’ ” वळै यीसु आपरै चेलौ ऊं कयौ, “एक धनवान मिनख हो जिणरौ एक भंडारी हो, अर लोगां उणरै सांमै उण माथै ओ दोस लगायो की, ‘ओ थारी सगळी जायदाद उडा रियौ है।’ तो धनवान उणनै बुलायौ अर कयौ, ‘ओ कांई है जिकौ म्हैं थारै बारै मे सुण रियौ हूं? अपणै भंडारीपन रौ लेखो जोखो दे। क्यूंकै थूं आगै ऊं भंडारी नीं रैह सकै।’ “तद भंडारी सोचण लागौ, ‘अबै म्हैं कांई करूं? क्यूंकै म्हारौ मालिक अबै भंडारी रौ कांम म्हारै ऊं खौ रियौ है। अर म्हारै मे अबै इती ताकत भी कोनीं री, की म्हैं खेतो मे खुदाई गुड़ाई रौ कांम कर सकूं। अर भीख मांगणै मे म्हनै लाज आवै है। ठीक, म्हनै समझ मे आ गियौ की म्हनै कांई करणौ चाहीजै, ताकी जद म्हैं भंडारी रै कांम ऊं छुड़ायो जाऊं तो लोग आपरै घरो मे म्हारौ आदर सत्कार करै।’ “अर उणै आपरै मालिक रै लेणदेण वाळौ नै एक एक करनै बुलाया पैलै ऊं पूछयौ, ‘थनै म्हारै मालिक रौ कितौ करज चुकाणौ है?’ उणै कयौ, ‘सौ मण तेल।’ तद भंडारी उणनै कयौ, ‘आ ले थारी खाता बही अर बैठनै तुरत इणनै पचास कर दे।’ पछै दूजै ऊं पूछयौ, ‘थनै कितौ करज चुकाणौ है?’ उणै कयौ, ‘सौ मण गेहूंं।’ तद भंडारी उण ऊं कयौ, ‘आ ले थारी खाता बही अर सौ रा अस्सी कर दे।’ “इण खातर उणरै मालिक उण बेईमान भंडारी री सौभा की, क्यूंकै उणै चतुराई ऊं कांम कियो है। सांसारिक लोग उणरै लोगां ऊं व्यवहार करनै मे परमेसर रै लोगां ऊं करते चतुर है। म्हैं थौरे ऊं कैवूं हूं, सांसारिक धन ऊं अपणै वास्तै दोसत बणाओ। क्यूंकै जद धन जातौ रैला, तो वे थांनै अनत निवासों मे ले ले। “जिकौ थोड़े ऊं थोड़े मे विसवास लायक है, वो घणै मे भी विसवास लायक है। अर जिकौ थोड़े ऊं थोड़े मे बेईमान है, वो घणै मे भी बेईमान है। इण तरैह जे थै अधरम रै धन रै वास्तै विसवास लायक कोनीं रिया, तो साचै धन रै बारै मे थौरे माथै कुण विसवास करैला? जिकौ किणी दूजै रौ धन है, जे थै उणरै लियै विसवास लायक नीं रिया, तो जिकौ थौरो हो सकै है, उणनै थांनै कुण दैला? “कोई भी सेवक दो मालिको री सेवा कोनीं कर सकै। क्यूंकै वो एक ऊं घिरणा करैला अर दूजै ऊं परैम राखैला। या एक ऊं मिळियौ रैला अर दूजै नै कीं नीं जांणैला। थै धन अर परमेसर दोनूं री सेवा एक साथै नीं कर सकौ।” अर जद लोभी फरीसियों ऐ सगळी बातां सुणी तो उणौ यीसु री घणी मजाक उडाई। यीसु उणौनै कयौ, “थै वो हो जिकौ लोगां नै ओ जताणौ चावौ हो की थै घणा धरमी हो, बल्कि परमेसर थौरे मनो नै जांणै है। लोग जिणनै घणौ कीमती समझै है, परमेसर री निजर मे वो नीं रै बराबर है। “व्यवस्था अर भविसयदाता यूहन्‍ना तांई रिया, उण वगत ऊं परमेसर रै राज रौ सुभ संदेस सुणायो जा रियौ है, अर हर कोई घणी मेनत ऊं उणरी और परवेस करै है। सरग अर धरती रौ डिग जावणौ तो आसान है, बल्कि व्यवस्था रै विधि रै एक एक बिंदु री ताकत हमेसां अटल है। “जिकौ कोई आपरी लुगाई नै छोड़नै दूजी ऊं ब्याव करै है, वो व्यभिचार करै है। अर जिकौ कोई ऐड़ी छोड़योड़ी लुगाई ऊं ब्याव करै है, वो भी व्यभिचार करै है। “सुणौ, एक मिनख हो जिकौ घणौ अमीर हो। वो बैंजनी रंग रा उतम मलमल रा गाभा पैरतो हो, अर हरैक दिन सुख विलास अर आंणंद रै साथै रैवतौ हो। उठीज लाजर नाम रौ एक कंगाल उणरै द्धार माथै पड़ियौ रैवतौ हो। उणरौ सरीर घावो ऊं भरयोड़ौ हो। अर वो चावतौ हो, की धनवान री मेज माथै री झूठै खाणै ऊं आपरौ पेट भरे। बल्कि कुत्ता ही आयनै उणरै घावो नै चाटता हा। “अर ऐड़ौ होयौ की वो कंगाल मरग्यौ, अर सरगदूतो उणनै लैयनै अबराहम रै खोळे मे बिठा दियौ। अर वो धनवान भी मरयो, अर बूरयो गियो। अर पाताळ मे तड़पतो होयौ जद उणै आंख्यां उठायनै देख्यौ, तो अबराहम उणनै घणौ आगौ दिखाई दियौ, अर उणै लाजर नै उणरै खोळे मे देख्यौ। अर उणै हेलौ करनै कयौ, ‘हे पिता अबराहम, म्हारै माथै दया करनै लाजर नै भेज, ताकी वो आपरी आंगळी डूबोयनै म्हारी जीभ नै ठाडी करै, क्यूंकै म्हैं इण लाय मे तड़प रियौ हूं।’ “पण अबराहम कयौ, ‘हे बेटा याद कर, की थूं थारै जीवन काल मे बड़िया चीजों ले चुकयो है, जद की लाजर नै खराब चीजों ही मिळी है। बल्कि अबार वो एठै आंणंद ले रियौ है, अर थूं तड़प रियौ है। अर इण सगळी बातां नै छोड़ म्हौरै अर थौरे बीच मे एक गैरी खाई खोदयोड़ी है, जिकौ एठै ऊं उण पार थारै खनै आवणौ चावै, तौभी नीं आ सकै, अर नीं कोई उठै ऊं इण पार म्हौरै खनै आ सकै।’ “उण धनवान कयौ, ‘तो हे पिता, म्हैं थौरे ऊं अरज करूं हूं, की थूं उणनै म्हारै पिता रै घर भेज, क्यूंकै म्हारै पांच भाई है। वो उणौरै सांमै इण बातां री गवाई दे, ऐड़ौ नीं होवै की वे ही इण दुख री जगा मे आए।’ “अबराहम उण ऊं कयौ, ‘उणौरै खनै तो मूसा अर भविसयदाताओ री किताबो है। वे उणरी सुणै।’ “धनवान कयौ, ‘कोनीं हे पिता अबराहम, जे कोई मरयोड़ौ मे ऊं उणरै खनै जाये तो वे मन फिरावैला।’ “अबराहम उण ऊं कयौ, ‘जद वे मूसा अर भविसयदाताओ री कोनीं सुणै, तो जे कोई मरयोड़ौ मे ऊं उठनै उणौरै खनै जाये तौभी वे कोनीं मांनैला।’ ” यीसु आपरै चेलौ ऊं कयौ, “जिण ऊं लोग भटके है, ऐड़ी बातां तो होवैला ही, बल्कि धिकार है उण मिनख नै जिणरै जरियै वे बातां होवै है। जिकौ इण छोटौ मे ऊं किणी एक नै भटकावै, उणरै लियै ओ भलौ होवतो, की चक्‍की रौ पाट उणरै गळे मे लटकायनै उणनै समंदर मे धकेल दियौ जाये। सावचेत रैवौ, जे थारौ भाई गुनाह करै तो उणनै समझा, अर जे वो अपणै कियै माथै पछतावै तो उणनै माफ कर दो। “जे दिनभर मे वो थारै विरोध सात बार पाप करै अर सातों बार पाछौ आयनै थारै ऊं कैवै की ‘म्हनै पछतावो है’ तो थूं उणनै माफ कर दे।” तद चेलौ परभु ऊं कयौ, “म्हौरै विसवास री बढ़ोतरी करौ।” परभु कयौ, “जे थांनै राई रै दाणे रै बराबर भी विसवास होतो, तो थै इण सहतूत रै रूंखड़ै ऊं कैवता, ‘जड़ ऊं उखड़नै समंदर मे लाग जा।’ तो वो थौरी मांन लेतो। “मांन लौ थौरे मे ऊं किणी रै खनै एक सेवक है, जिकौ हळ चलावै या लरड़ियां नै चरावै है। वो जद खेत ऊं पाछौ आवै तो कांई उणरौ मालिक उण ऊं कैवैला, ‘तुरत आ अर खाणौ खायनै बैठ जा’? बल्कि बजाय इणरै कांई वो उण ऊं ओ नीं कैवैला, ‘म्हारौ खाणौ तैयार कर। अर जद तांई म्हैं खाऊं पीऊं तद तांई कमर बांधनै म्हारी सेवा कर, इणरै पछै थूं भी खा पी लेणो।’ अपणी आग्या पूरी करनै ऊं कांई वो उण सेवक रौ धन्यवाद करै है? थौरे साथै भी ऐड़ौ ही है। जिकौ कीं थौरे ऊं करणै रौ कयोड़ो है, उण कांमां नै कर चुकौ पछै थांनै कैवणौ चाहीजै, ‘म्हौ सेवक हों, म्हौ किणी सौभा रा अधिकारी कोनीं हों। म्हौ तो सिरफ अपणौ फरज निभायो है।’ ” जद यीसु यरुसलेम जा रियौ हो तो वो सामरिया अर गलील रै बीच ऊं होयनै जा रियौ हो। अर किणी गांव मे परवेस करते वगत उणनै दस कोढ़ी मिळिया। अर वे आगौ ऊं जोर ऊं हेलौ करनै कयौ, “हे यीसु, हे मालिक, म्हौ माथै दया कर।” जद यीसु उणौनै देख्यां तो कयौ, “जाओ अर अपणै आप नै याजकौ नै दिखाओ।” वे जा ही रिया हा की वे कोढ़ ऊं सावळ हो गिया। तद उण मे ऊं एक ओ देख्यौ की म्हैं सावळ हो गियो हूं, तो वो पाछौ आयौ अर ऊंची आवाज मे परमेसर री सौभा करणै लागौ। अर वो यीसु रै पगां पड़नै उणरौ धन्यवाद करणै लागौ। अर सुणौ, वो एक सामरी हो। यीसु उण ऊं पूछयौ, “कांई सगळा दस रा दस कोढ़ ऊं सावळ नीं हो गिया? पछै वे नौ जणा कठै है? कांई इण परदेसी नै छोड़नै उणमे ऊं कोई भी परमेसर री स्तुति करणै पाछौ कोनीं आयौ?” यीसु उणनै कयौ, “ऊभौ हो अर चालयौ जा, थारै विसवास थनै सावळ करयौ है।” एक बार फरीसियों यीसु ऊं पूछयौ, “परमेसर रौ राज कद आवैला?” तो उणै उणौनै जबाब दियौ, “परमेसर रौ राज परगट रूप मे नीं आवै। अर लोग ओ नीं कैवैला, ‘वो एठै है’, या ‘वो उठै है’, क्यूंकै परमेसर रौ राज तो थौरे बीच मे है।” बल्कि उणै चेलौ ऊं कयौ, “ऐड़ौ दिन आवैला जद थै मिनख रै बेटे रै दिनां मे ऊं एक दिन नै भी देखणै तरसो ला, बल्कि उणनै देख नीं पाओला। लोग थौरे ऊं कैवैला, ‘देखौ, उठै है’, या ‘देखौ एठै है।’ पण थै उठै नीं जावणौ अर नीं उणरै लारै वहीर हो जावणौ। क्यूंकै ज्यौ बिजळी आभै रै एक छोर ऊं दूजै छोर तांई आभै नै चमका दैवै है, व्यौंही म्हैं, मिनख रौ बेटौ, भी आपरै दिन मे परगट होवैला। पण पैला जरुरी है, की वो घणौ दुख उठाए, अर इण जुग रा लोग उणनै नकार दे। “ज्यौ नूह रै दिनां मे होयौ हो, व्यौंही मिनख रै बेटे रै दिनां मे भी होवैला। जिण दिन तांई नूह जहाज माथै नीं चढ़यौ, उण दिन तांई लोग खाता-पिता हा, अर उणमे ब्याव रस्मे होती ही। तद जळ प्रलय आयनै उणै सगळौ नास कर दियौ। “अर ज्यौ पुराणै वगत मे लूत रै दिनां मे होयौ हो, की लोग खावता पीवता, मोल लेता, बेचता खेती करता अर घर बणाता रिया। पण जिण दिन लूत सदोम नगर ऊं निकळियौ, उण दिन लाय अर गंधक आभै ऊं बरसी अर सगळौ नै नास कर दिया। “उण दिन भी जद मिनख रौ बेटौ परगट होवैला, ठीक ऐड़ौ ही होवैला। उण दिन कोई मिनख छत माथै हो, अर उणरौ सामान घर रै मांय हो, तो उणनै लेणे वो नीचे नीं उतरै। इण तरैह जे कोई मिनख खेत मे हो, तो वो पाछौ नीं जावै। लूत री लुगाई नै याद करौ। जिकौ कोई आपरौ जीवन बचानै री कोसीस करैला, वो उणनै खो दैला। अर जिकौ आपरौ जीवन खोवैला, वो उणनै बचा दैला। म्हैं थौरे ऊं कैवूं हूं, उण रात एक खाट माथै जिकौ दो लोग होवैला, उणमे ऊं एक उठा लियौ जावैला अर दूजौ छोड़ दियौ जावैला। दो लुगाईयां जिकौ एक साथै चक्‍की पीसती होवैला, उणमे ऊं एक उठा दी जावैला, अर दूजी नै छोड़ दी जावैला। दो जणा खेत मे होवैला एक नै उठा लियौ जावैला, अर दूजै नै छोड़ दियौ जावैला।” ओ सुणनै यीसु रै चेलौ पूछयौ, “हे परभु, ऐड़ौ कठै होवैला?” यीसु उणौनै कयौ, “जठै लोथ पड़ी होवैला, गिरजड़ा भी वठै ही भेळा होवैला।” पछै यीसु उणौनै ओ बताणै रै वास्तै की वे हमेसां पराथना करता रैवै अर निरास नीं होवै, आ दिस्टांत कथा सुणाई। वो बोल्यौ, “किणी नगर मे एक न्याव करणैवाळौ होयौ करतौ हो। वो नीं तो परमेसर ऊं डरतौ हो अर नीं ही लोगां री परवा करतौ हो। “उणीज नगर मे एक विधवा भी रैवती ही। अर वां उणरै खनै बार बार आवती अर कैवती, ‘म्हारौ न्याव चुकायनै म्हनै दुसमन ऊं बचा।’ उणै घणै दिनां तांई तो कोनीं मान्यौ पण आखरी मे उणै आपरै मन मे सौच्यौ, ‘नीं तो म्हैं परमेसर ऊं डरूं हूं अर नीं लोगां री परवा करूं हूं। तौभी इण विधवा नै म्हारा कांन खा लिया है, इण वास्तै म्हैं देखूंला की उणनै न्याव मिळ जावै ताकी आ म्हारै खनै बार बार आयनै कठैई म्हनै ही थका नीं दैवै।’ ” परभु कयौ, “सुणौ, उण दुस्ट न्याव करणैवाळै कांई कयौ हो? इण वास्तै कांई परमेसर आपरै चुणयोड़े लोगां ऊपर ध्यांन कोनीं दैला की उणनै जिकौ रात दिन याद करता रैवै है, न्याव मिळै? कांई वो उणरी मदद करनै मे जेज लगावैला? म्हैं थौरे ऊं कैवूं हूं, वो तुरत उणरौ न्याव चुकावैला। तौभी म्हैं, मिनख रौ बेटौ, जद आवैला, तो कांई म्हैं धरती माथै विसवास पाऊंला?” यीसु उण लोगां रै वास्तै भी जिकौ अपणै आप नै तो नेक मांनता हा, अर किणी औरो नै कीं नीं समझता हा, आ दिस्टांत कथा सुणाई, “मिंदर मे दो मिनख पराथना करणै गिया, एक फरीसी हो अर दूजौ चुंगी लेवणवाळौ। वो फरीसी न्यारौ ऊभौ होयनै पराथना करणै लागौ, ‘हे परमेसर, म्हैं थौरो धन्यवाद करूं हूं, की म्हैं दूजै लोगां रै ज्यौ डाकू, ठग अर व्यभिचारी कोनीं हूं अर नीं इण चुंगी लेवणवाळै रै ज्यूं हूं। म्हैं हपतै मे दो बार उपवास राखूं हूं, अर अपणी सगळी कमाई रौ दसवो हिस्सो दांन देवूं हूं।’ पण चुंगी लेवणवाळौ आगौ ऊभौ होयनै सरग री तरफ आंख उठाणी भी नीं चाही, बल्कि आपरी छाती ठोक ठोकनै कैवतौ, ‘हे परमेसर, म्हारै पापी ऊपर दया कर।’ “म्हैं थौरे ऊं कैवूं हूं, की वो फरीसी कोनीं पण चुंगी लेवणवाळौ मिनख नेक ठैरायौ अर आपरै घर गियो, क्यूंकै जिकौ कोई अपणै आप नै मोटो बणावैला, वो छोटौ कियो जावैला। अर जिकौ अपणै आप नै छोटौ बणावैला, वो मोटो कियो जावैला।” पछै लोग आपरै टाबरां नै उणरै खनै लावण लागा, की वो उण माथै हाथ राखै। अर चेलौ ओ देख्यौ तो उणौनै हाका करिया। बल्कि यीसु टाबरां नै आपरै खनै बुलाया अर चेलौ ऊं कयौ, “इण टाबरां नै म्हारै खनै आवण दो, इणौनै रोको मती, क्यूंकै परमेसर रौ राज ऐड़ौ रौ ही है। म्हैं थौरे ऊं साची कैवूं हूं, की जिकौ कोई परमेसर रै राज नै टाबर री तरैह स्वीकार नीं करैला, वो उणमे कदैई परवेस नीं कर पावैला।” पछै किणी यहूदी नेता यीसु नै पूछयौ, “हे उतम गुरु, अनत जीवन रौ अधिकार पावण रै वास्तै म्हनै कांई करणौ चाहीजै?” यीसु उण ऊं कयौ, “थूं म्हनै उतम क्यूं कैवै है? कैवल परमेसर नै छोड़नै और कोई भी उतम कोनीं है। थूं आग्याओं नै तो जांणै है, ‘व्यभिचार नीं करणौ, हत्या नीं करणी, चोरी नीं करणी, झूठी गवाई नीं देणी, अपणै माता अर पिता रौ आदर करणौ।’ ” वो यहूदी नेता बोल्यौ, “म्हैं इण सगळी बातां नै अपणै बाळपणाऊ मांनतौ आयौ हूं।” ओ सुणनै, यीसु उण ऊं कयौ, “अजी भी एक बात है जिणरी थारै मे कमी है। थारै खनै जिकौ कीं है, सगळौ बेच दे अर पछै जिकौ मिळै वो कंगालो नै बांट दे, अर थनै सरग मे धन मिळैला। पछै आयनै म्हारै लारै हो जा।” जद उण यहूदी नेता ओ सुण्यौ तो वो घणौ दुखी होयौ, क्यूंकै उणरै खनै घणीहारी जायदाद ही। यीसु जद ओ देख्यौ की वो घणौ दुखी है तो उणै कयौ, “उण लोगां रै वास्तै जिकौ धनवान है, परमेसर रै राज मे परवेस करणौ घणौ मुसकिल है। हां, किणी ऊंट रै लियै सूई रै नाके मे ऊं निकळ जावणौ मुसकिल है, व्यौंही किणी धनवान रौ परमेसर रै राज मे परवेस कर पाणौ मुसकिल है।” वे लोग जिणौनै ओ सुण्यौ, बोल्या, “पछै भला उद्धार किणरौ होवैला?” यीसु कयौ, “ऐ बातां जिकौ मिनखौ ऊं तो नामुमकिन है, परमेसर रै लियै मुमकिन है।” पतरस कयौ, “देख, म्हौरै खनै जिकौ कीं हो, थारै लारै चालनै रै लियै म्हौ वो सगळौ कीं त्याग दियौ है।” तद यीसु उण ऊं कयौ, “म्हैं थौरे ऊं साची कैवूं हूं, ऐड़ौ कोई कोनीं जिणै परमेसर रै राज रै खातर घर या लुगाई या भाइयो या माता पिता या औळाद नै छोड़ दिया हो, अर इण जुग मे कई गुणा घणौ नीं मिळै अर आवणवाळै काल मे वो अनत जीवन नै नीं पा सकै।” पछै यीसु उण बारैह चेलौ नै एक तरफ ले जायनै उणौनै कयौ, “सुणौ, म्हौ यरुसलेम जा रिया हो। अर जिती बातां म्हैं, मिनख रै बेटे, रै बारै मे भविसयदाताओ रै जरियै लिखी है वे सगळी पूरी होवैला। हां, वो दूजी जातियो रै हाथौ सौपयो जावैला, उणरी हंसी उडाई जावैला, अर उणरी बेजती की जावैला, अर उण माथै थूकयौ जावैला। पछै उणरै कोड़ा ठोकेला, अर मार दैला, अर वो तीजै दिन जी उठैला।” अर उणौनै इण बातां मे ऊं कोई बात नीं समझी। अर आ बात उणौ ऊं लुकयोड़ी रही, वे समझ नीं सकया की वो कीण बारै मे बता रियौ हो। जद यीसु यरीहो नगर रै नजीक पूगा, तो एक आंधौ सड़क रै कांठै बैठौ भीख मांग रियौ हो। जद आंधे भीड़ रै चालनै री आवाज सुणी तो उणै पूछयौ, “कांई हो रियौ है?” लोगां उण ऊं कयौ, “यीसु नासरी एठै ऊं जा रियौ है।” तद आंधौ ओ कैवतै होयौ हेलौ करनै कयौ, “हे दाऊद री औळाद यीसु, म्हारै माथै दया कर।” वे जिकौ आगै चाल रिया हा उणौ इणनै चुप रैवण रौ कियो। बल्कि वो और घणौ जोर ऊं हेलौ करनै लागौ, “हे दाऊद री औळाद, म्हारै माथै दया कर।” तद यीसु रुकनै आग्या दी “उणनै म्हारै खनै लाओ।” अर जद उणनै नैड़ौ लाया, तो यीसु उण ऊं पूछयौ, “थूं कांई चावै है? म्हैं थारै लियै कांई करूं?” आंधे कयौ, “हे परभु, म्हैं देखण लागू।” यीसु कयौ, “देखण लाग। थारै विसवास थनै सावळ करयौ है।” अर वो तुरत देखण लागौ। अर परमेसर री महिमा करतौ यीसु रै लारै वहीर हो गियो, अर सगळै लोगां ओ देख्यौ तो परमेसर री स्तुति करनै लागा। यीसु यरीहो मे परवेस करनै नगर मे ऊं होयनै जा रिया हा। उठै जकई नाम रौ एक मिनख हो जिकौ चुंगी लेवण वाळौ रौ मुखियौ हो। वो घणौ धनवान हो। वो यीसु नै देखणौ चावै हो की यीसु कुण है, पण भीड़ रै खातर देख नीं पा रियौ हो, क्यूंकै उणरौ कद नेनो हो। तद वो सबां ऊं आगै न्हातो होयौ एक गूलर रै रूंखड़ै माथै चढ़यौ, क्यूंकै यीसु उण मारग ऊं जावण वाळौ हो। जद यीसु उण जगा पूगौ, तो उणै ऊपर देखते होए जकई ऊं कयौ, “हे जकई, फुरती ऊं नीचे उतर आ, क्यूंकै म्हनै आज थारै ही घर ठैरणौ है।” वो तुरत उतरनै आंणंद ऊं उणनै आपरै घर लेन गियो। ओ देखनै सगळा लोग कुड़कुड़ानै कैवण लागा, “ओ तो पापी रै घर मेमाण बणणै जा रियौ है।” बल्कि जकई ऊभौ होयनै परभु ऊं कयौ, “हे परभु, देख, म्हैं म्हारी सगळी जायदाद री आधी कंगालो नै दे दूंला, और जे म्हैं किणी रौ छळ ऊं कीं भी लियौ है, तो उणरौ च्यार गुणा पाछौ दे दूंला।” तद यीसु उण ऊं कयौ, “आज इण घर मे उद्धार आयौ है, क्यूंकै ओ मिनख भी अबराहम री ही एक साची औळाद है। क्यूंकै म्हैं, मिनख रौ बेटौ, गुमयोड़ौ नै ढ़ूंढ़नै अर उणौरौ उद्धार करणै आयौ है।” वे जद इण बातां नै सुण रिया हा तो यीसु उणौनै एक वळै दिस्टांत कथा सुणाई, क्यूंकै यीसु यरुसलेम रै नजीक हो अर वे सौचता हा की परमेसर रौ राज तुरत ही परगट होणै जा रियौ है। यीसु कयौ, “एक ऊंचै कुळ रौ मिनख राजा रौ पद हासल करनै रै वास्तै किणी आगै देस गियो। अर उणै आपरै दस सेवकों नै बुलाया अर उणमे ऊं हरैक नै दस दस मुहरे दी अर उणौ ऊं कयौ, ‘म्हारै पाछौ आवण तांई इण ऊं कोई व्यापार करजौ।’ “पण उणरै नगर रै रैवण वाळा उण ऊं बैर राखता हा, अर उणरै लारै दूतो रै जरियै कैह नै भेज्या, ‘म्हौ कोनीं चावौ की ओ म्हौ माथै राज करै।’ “जद वो राजा री पदवी पायनै पाछौ घर आयौ, तो जिण सेवकों नै उणै धन दियौ हो उणौनै ओ जांणणै रै वास्तै, की उणौ कांई फायदो कमायो है, उणौनै बुलाणै भेज्या। “तद पैलौ सेवक आयनै कयौ, ‘हे मालिक, थौरे मोहरों ऊं दस और मोहरों कमाई है।’ “इण खातर उणरै मालिक उण ऊं कयौ, ‘उतम सेवक, थैं बड़िया कियो। इण वास्तै थूं इण छोटी सी बात माथै विसवास लायक रियौ, थूं दस नगरो रौ अधिकारी होवैला।’ “दूजै सेवक आयनै कयौ, ‘हे मालिक, थौरी मोहरों ऊं पांच और मोहरें कमाई है।’ “उणै कयौ, ‘थूं भी पांच नगरो माथै हाकिम होवैला।’ “तीजै आयनै कयौ, ‘हे मालिक, आ थौरी मोहर है, जिणनै म्हैं अंगोछे मे बांधनै राखी है। म्हैं थौरे ऊं डरूं हूं, क्यूंकै थूं कठोर मिनख है। थैं जिकौ राख्यौ कोनीं है थूं उणनै भी ले लेवे है अर जिकौ थैं बोयो कोनीं थूं उणनै काटे है।’ “मालिक उण ऊं कयौ, ‘अरै दुस्ट सेवक, म्हैं थारै अपणै ही सबदो रै आधार माथै थारौ न्याव करूंला। थूं तो जांणै है की म्हैं जिकौ राखूं नीं हूं, उणनै भी ले लेणे वाळौ अर जिकौ बोऊं कोनीं हूं, उणनै भी काटनै वाळौ एक कठोर मिनख हूं। तो थैं म्हारौ धन ब्याज माथै क्यूं नीं दियौ, ताकी जद म्हैं पाछौ आवतौ तो ब्याज समेत उण ऊं ले लेतो?’ “अर जिकौ लोग खनै ऊभा हा, उणौनै उण ऊं कयौ, ‘वो मोहर उण ऊं ले लो, अर जिणरै खनै दस मोहरों है उणनै दे दो।’ “उणौनै उण ऊं कयौ, ‘हे मालिक, उणरै खनै दस मोहरों तो है।’ “मालिक कयौ, ‘म्हैं थौरे ऊं कैवूं हूं, हरैक उण मिनख नै जिणरै खनै है और घणौ दियौ जावैला, अर जिणरै खनै कोनीं है, उण ऊं जिकौ उणरै खनै है, वो भी ले लियौ जावैला। बल्कि म्हारा वे दुसमन जिकौ कोनीं चावै की म्हैं उण माथै राज करूं, उणौनै एठै म्हारै सांमै लाओ अर मार नोखो।’ ” ऐ बातां कैवणै रै पछै यीसु आगै चालतो होयौ यरुसलेम री तरफ बढ़ण लागा। अर जद वो बैतफगै अर बैतनिय्याह मे उण भाखर रै नजीक पूगा जिकौ जैतून रौ भाखर कैलावै है, तो उणै आपरा दो चेलौ नै ओ कैहन भेज्या, “ओ जिकौ गांव थौरे सांमै है उठै जाओ। ज्यौ ही थै उठै जाओला, थांनै गधी रौ बचियो उठै बांधयोड़ौ मिळैला जिण माथै किणी कदैई सवारी कोनीं किनी, उणनै खोलनै एठै ले आओ। अर जे कोई थौरे ऊं पूछै, ‘थै इणनै क्यूं खोल रिया हो’, तो थै उण ऊं ओ कैवणौ, ‘परभु नै चाहीजै।’ ” जिकौ नै भेज्या हा, उणौ जायनै ज्यौ यीसु उणौनै कयौ हो, व्यौंही मिळिया। जद वे गधे रै बचिये नै खोल रिया हा, तो उणरै मालिक उणौ ऊं पूछयौ, “थै इण बचिये नै क्यूं खोल रिया हो?” चेलौ कयौ, “ओ परभु नै चाहीजै।” वे उणनै यीसु रै खनै ले आया। चेलौ नै आपरा गाभा उण गधी रै बचिये ऊपर नोख नै यीसु नै उण माथै बिठा दिया। जद यीसु जा रिया हा तो लोग आपरा गाभा सड़क माथै बिछाता जा रिया हा। अर जद वो जैतून रै भाखर री ढ़ळाण खनै पूगा, तो चेलौ री सगळी भीड़ उण सगळै सामरथ रै कांमां रै खातर जिकौ उणौ देख्यां हा, राजी होयनै जोर ऊं परमेसर री स्तुति करनै लागा। “धन्य है वो राजा, जिकौ परभु रै नाम ऊं आवै है। सरग मे सानति हो, अर आसमान मे परम परमेसर री महिमा हो।” तद भीड़ मे ऊं कीं फरीसी उण ऊं कैवण लागा, “हे गुरु, अपणै चेलौ नै मना कर।” यीसु उणौनै जबाब दियौ, “म्हैं थौरे ऊं कैवूं हूं, जे ऐ चुप हो ही जावै, तो ऐ भाठा चिला उठैला।” जद उणै खनै आयनै नगर नै देख्यौ तो वो उण ऊपर रोवण लाग्यौ, अर बोल्यौ, “जे थूं बस आज ओ जांणतौ की सानति थनै कीण ऊं मिळैला, बल्कि वो अजी थारी आंख्यां ऊं अदीठ है। क्यूंकै वो दिन थारै आवैला जद थारा दुसमन च्यांरूमेर घेर दैला, अर च्यांरूमेर ऊं थनै दबाव दैला। वे थनै धूड़ मे मिळा दैला, थांनै अर थारै मांय रैवण वाळा थारै टाबरौ नै। थारी च्यारदीवारी रै मांय वे एक भाठै माथै दूजौ भाठौ कोनीं रैवण दैला। क्यूंकै जद परमेसर थारै खनै आया, थैं उण घड़ी नै नीं पिछांणी।” पछै यीसु मिंदर मे परवेस कियो अर जिकौ उठै दुकानदारी कर रिया हा, उणौनै बारै निकाळनै लागौ। अर यीसु कयौ, “लिख्योड़ौ है, म्हारौ घर पराथना रौ घर होवैला। पण थै उणनै डाकूओ रौ अडो बणा दियौ है।” अर यीसु हरैक दिन मिंदर मे उपदेस देवण लागा। अर परधान याजकौ, यहूदी धरम सास्तरी अर मुखिया लोग उणनै मारणै री फिराक मे रैवण लागा। पण कोई उपाय नीं मिळियौ, की ओ कीण तरैह ऊं करै, क्यूंकै सगळा लोग उणरै वचनो नै घणी चाहत ऊं सुण रिया हा। एक दिन जद यीसु मिंदर मे लोगां नै उपदेस देतो अर सुभ संदेस सुणा रियौ हो, तो परधान याजकौ अर यहूदी धरम सास्तरी, मुखियौ रै साथै खनै आयनै ऊभा होया। अर कैवण लागा, “म्हौ नै बता, थूं इण कांमां नै कीण अधिकार ऊं करै है, अर वो कुण है, जिण थनै ओ अधिकार दियौ है?” यीसु उणौनै जबाब दियौ, “म्हैं भी थौरे ऊं एक सवाल पूछूं हूं, थै म्हनै बताओ। यूहन्‍ना नै बतिस्मो देवण रौ अधिकार सरग ऊं मिळियौ हो या मिनखौ ऊं?” तद वे आपस मे कैवण लागा, “जे म्हौ कैवौ ‘सरग री तरफ ऊं’, तो वो कैवैला, ‘तो थै उण माथै विसवास क्यूं कोनीं कियो?’ अर जे म्हौ कैवौ, ‘मिनखौ री तरफ ऊं’, तो सगळा लोग म्हौरै भाठा ठोकेला। क्यूंकै वे ओ जांणता हा, की यूहन्‍ना एक भविसयदाता हो।” तद उणौ जबाब दियौ, “म्हौ कोनीं जांणौ, की वो कीण री तरफ ऊं हो।” यीसु उणौनै कयौ, “तो म्हैं भी थांनै कोनीं बताऊं की ओ कांम म्हैं कीण अधिकार ऊं करूं हूं।” तद यीसु लोगां ऊं ओ दिस्टांत कथा कैवण लागौ, “किणी मिनख नै अंगूरो री बाड़ी लगायनै उणै करसा नै ठेके माथै दे दी, अर घणै दिनां रै वास्तै परदेस जातौ रियौ। जद फसल उतारनै रौ वगत आयौ, तो मालिक आपरै एक सेवक नै करसा रै खनै भेज्यौ ताकी वे उणनै अंगूरो री बाड़ी ऊं कीं फळ दैवै। बल्कि करसा उणनै ठोकनै खाली हाथ पाछौ भेज्यौ। पछै उणै वळै एक सेवक नै भेज्यौ, अर उणौ उणनै भी ठोकियो अर उणरै साथै घणौ भूंडौ व्यवहार कियो अर उणनै भी खाली हाथ पाछौ भेज्यौ। पछै उणै तीजौ सेवक भेज्यौ, अर उणौ उणनै भी घायल करनै निकाळ दियौ। “तद बगीचें रौ मालिक कैवण लागौ, ‘म्हैं कांई करूं? म्हैं म्हारै लाडले बेटे नै भेजूंला कांई मालूम वे उणरौ आदर करै।’ “जद करसा उणरै बेटे नै देख्यौ तो आपस मे विचार करणै लागा, की ‘ओ तो वारिस है। आओ, अपां इणनै मार दो, ताकी इण जायदाद रा मालिक बण जाओ।’ अर उणौ उणनै बगीचें ऊं बारै निकाळनै मार दियौ। “तो पछै बगीचें रौ मालिक उणौरै साथै कांई करैला? वो आवैला अर उण करसा नै मार दैला, अर अंगूरो री बाड़ी दूजौ नै सौंप दैला।” ओ सुणनै उणौ कयौ, “परमेसर ऐड़ौ नीं करै।” तद यीसु उणौरी तरफ देखनै कयौ, “तो पछै ओ जिकौ लिख्यौ है, उणरौ अरथ कांई है, ‘जिण भाठै नै कारीगरो निकमो समझयो हो, वोहीज कोने रौ खास भाठौ बणग्यौ’? जिकौ कोई उण भाठै माथै पड़ैला वो टुकड़ा टुकड़ा हो जावैला, अर जिण माथै वो पड़ैला, उणनै वो चकनाचूर कर दैला।” उण वगत सास्तरियों अर परधान याजकौ उणनै पकड़नो चाहयौ, क्यूंकै समझ गिया, “उणै म्हौ माथै ओ दिस्टांत कयौ।” पण वे लोगां ऊं डरया। अर वे सावचेती ऊं उण माथै निजर राखणै लागा। उणौ ऐड़ा भेदिया भेज्या जिकौ साहूकार होणै रौ ढ़ोग करता हा। ताकी वे उणनै उणरी कयोड़ी किणी बात मे फसायनै हाकिम रै हाथ अर अधिकार मे सौंप दे। उणौ यीसु ऊं पूछयौ, “हे गुरु, म्हौ जांणौ हो की थूं जिकौ उचित है वोहीज कैवै है, अर उणीज रौ उपदेस दैवै है अर नीं थूं किणी रौ पकस लेवे है। बल्कि थूं तो सचाई ऊं परमेसर रै मारग री सिकसा दैवै है। अर बता कैसर नै म्हौरौ कर चुकाणौ उचित है, या कोनीं?” यीसु उणौरी चाल नै समझ गिया हा। तो उणै उणौनै कयौ, “म्हनै एक सिक्‍को दिखाओ। इण माथै मूरत अर लिखावट किणरी है?” उणौ कयौ, “कैसर री।” यीसु उणौनै कयौ, “तो जिकौ कैसर रौ है, वो कैसर नै दो। अर जिकौ परमेसर रौ है, वो परमेसर नै दो।” वे लोगां रै सांमै उण बात नै पकड़ नीं सकया, बल्कि उणरै जबाब ऊं अचूम्बो करनै चुपचाप रिया। कीं सदूकी यीसु रै खनै आया। ऐ वे सदूकी है जिकौ पुनरूत्थान नै नीं मांनै। उणौ उण ऊं पूछता होया कयौ, “हे गुरु, मूसा म्हौरै वास्तै ओ लिख्यौ है, की जे किणी रौ भाई मर जावै, अर उणरै कोई टाबर नीं हो अर उणरी लुगाई हो, तो उणरौ भाई उण विधवा ऊं ब्याव करनै आपरै भाई रै वास्तै, उण ऊं औळाद पैदा करै। अबै सुणौ, सात भाई हा। पैला भाई किणी लुगाई ऊं ब्याव करयौ अर वो बिना औळाद रै ही मर गियो। पछै दूजै अर तीजै नै भी उण लुगाई ऊं ब्याव कियो। इण रीत ऊं सातों भाइयो उण लुगाई ऊं ब्याव करनै बिना औळाद एक एक करनै मर गिया। आखरी मे वां लुगाई भी मर गी। अबै बताओ, आखरी जी उठैला पछै वां लुगाई किणरी लुगाई होवैला, क्यूंकै उण ऊं तो सातों भाइयो नै ब्याव करयौ हो?” यीसु उणौनै कयौ, “इण जुग रा छोरा छोरी ब्याव करै है। बल्कि आवणवाळै जुग मे, छोरा छोरी जिकौ पाछा जी उठनै रै वास्तै लायक ठैरायोड़ा है, वे ब्याव कोनीं करैला। अर वे पाछा कदैई मरेला भी कोनीं, क्यूंकै वे सरगदूतो रै ज्यौ है। वे परमेसर री औळाद है, क्यूंकै वे मरयोड़ौ मे ऊं जी उठनै रा बेटा है। बल्कि बळण वाळी झाड़ी री कहाणी जद मूसा कैवै है, ‘परभु अबराहम रौ परमेसर है, इसहाक रौ परमेसर है, अर याकूब रौ परमेसर है,’ वो दिखायौ है की मरयोड़ा जिलाया गिया है। परमेसर तो मुड़दो रौ कोनीं, बल्कि जीवतौ रौ परमेसर है। वे सगळा लोग जिकौ उणरा है जीवता है।” तद ओ सुणनै कीं यहूदी धरम सास्तरियों कयौ, “हे गुरु, थै बड़िया कयौ।” क्यूंकै पछै उण ऊं कोई और सवाल पूछनै री हीमत कोनीं कर सकया। यीसु उणौनै कयौ, “वे कैवै है की मसीह दाऊद रौ बेटौ है। ओ कीकर हो सकै है? क्यूंकै भजन संहिता री किताब मे दाऊद खुद कैवै है, ‘परभु परमेसर नै म्हारै परभु ऊं कयौ, म्हारै जीमणै हाथ बैठ, जद तांई म्हैं थारै बैरियो नै, थारै पगां तळै नीं कर दूं।’ “इण तरैह जद दाऊद मसीह नै ‘परभु’ कैवै है, तो मसीह दाऊद रौ बेटौ कीकर हो सकै है?” जद सगळा लोग सुण रिया हा, तो उणै आपरै चेलौ ऊं कयौ, “यहूदी धरम सास्तरियों ऊं सावचेत रैवौ। वे लाम्बा कुड़ता पैहरनै एठै उठै फिरनौ बड़िया लागै है, हाट बजारौ मे वे आंणंद रै साथै आदर सत्कार पावणौ चावै है। अर यहूदी पराथना घरो मे उणौनै खास जगा बैठनै री इछा रैवै है। दावतो मे वे आदर भाव वाळी जगा चावै है। वे विधवाओं रै घर बार लूट लेवे है। दिखावै रै वास्तै वे लम्बी लम्बी पराथनाओं करै है। इण लोगां नै दोरो ऊं दोरो डंड भुगतणौ पड़ैला।” यीसु आंख उठायनै देख्यौ की धनवान लोग दांन पेटी मे अपणी अपणी भेट घाल रिया है। अर उणै एक कंगाल विधवा नै उणमे तांबे रा दो सिक्‍का नोखते देख्यां। तद यीसु कयौ, “म्हैं थौरे ऊं साची कैवूं हूं, की दूजै सगळै लोगां ऊं इण कंगाल विधवा घणौ दांन दियौ है। ओ म्हैं इण वास्तै कैवूं हूं, क्यूंकै इण सगळै लोगां नै आपरै उण धन मे ऊं बढ़ोतरी रौ कीं हिस्सो दांन दियौ हो, बल्कि वां कंगाल होते होए भी जीवती रैवण रै वास्तै जिकौ कीं उणरै खनै हो, वो सगळौ दे दियौ।” कीं लोग मिंदर रै बारै मे चरचा कर रिया हा, की वो कैड़ै बड़िया भाठै अर परमेसर नै भेट कियोड़ी चीजों ऊं सजायो गियो है। तद यीसु कयौ, “ऐड़ौ वगत आवैला जद, ऐ जिकौ कीं थै देख रिया हो, उणमे एक भाठौ दूजै भाठै माथै टिकियोड़ो नीं रैह पावैला। वे सगळा ढ़ाह दिया जावैला।” वे यीसु ऊं पूछयौ, “हे गुरु, ऐ बातां कदै होवैला? अर ऐ बातां जिकौ होवण वाळी है, उणमे कांई निसाणी होवैला?” यीसु कयौ, “सावचेत रैवौ, कठैई कोई थांनै भरमा नीं दे। क्यूंकै म्हारै नाम ऊं घणा लोग आवैला अर कैवैला, वो म्हैं हूं अर वगत आ पूगौ है। थै उणरै लारै मती जाईजौ। पण जद थै युधो अर दंगो री चरचा सुणौ तो डरजौ मती, क्यूंकै ऐ बातां तो पैला होणी जरुरी है। अर उणरौ अंत तुरत नीं होवैला।” उणै उणनै वळै कयौ, “एक देस दूजै देस रै विरोध मे खड़ो होवैला, अर एक राज दूजै राज रै विरोध मे खड़ो होवैला। अर घणा भूकम्प आवैला, अर हरैक जगा काळ पड़ैला अर महामारियो आवैला, आभै मे भयंकर घटनाओ घटेला अर मोटा मोटा चिन्ह होवैला। “पण इण सगळी बातां ऊं पैला वे म्हारै नाम रै खातर थांनै पकड़ेला, अर सतावैला, अर पंचायतों मे सौपेला, अर जेळ मे घालैला, अर राजाओ अर हाकिमों रै सांमै ले जावैला। इण ऊं थांनै म्हारै बारै मे गवाई देवण रौ मौकौ मिळैला। इण वास्तै अपणै अपणै मन मे ठान लौ, की म्हौ पैला ऊं जबाब देवण री चिंता नीं करौला। क्यूंकै म्हैं थांनै ऐड़ी बुद्धि अर ऐड़ा सबद दूंला, की थौरो कोई भी विरोधी थौरो सांमनौ अर थौरी बात नै तोड़ नीं सकै। अर थौरे मां बाप, अर भाई बन्धु, कुटम्बी, अर दोसत ही थांनै धोखे ऊं पकड़ावैला। एठै तांई की थौरे मे ऊं कीं तो मार दिया जावैला। अर म्हारै नाम रै खातर सगळा लोग थौरे ऊं बैर राखैला। पण थौरे माथै रौ एक बाल भी बांकौ नीं होवैला। थौरे विसवास ऊं थै अपणै अनत जीवन नै बचायनै राखोला। “जद थै यरुसलेम नै सेनाओ ऊं घैरयोड़ौ देखौ, तो समझ लेणो, की उणरौ नास होणौ नजीक है। तद जिकौ यहूदिया मे होवै, वो भाखरो माथै भाग जावै, अर जिकौ यरुसलेम रै मांय होवै, वे बारै निकळ जावै। अर जिकौ गांवों मे होवै, उणौनै नगर मे नीं जावणौ। क्यूंकै ऐ पलटो लेणे रा ऐड़ा दिन होवैला, ताकी जिकौ पवितर सास्तर मे लिख्योड़ी है, वो सगळी बातां पूरी हो जावैला। उण लुगाईयां रै वास्तै, जिकौ जापायती होवैला, अर उणरै वास्तै जिकौ दूध पिलाती होवैला, वे दिन किता भयंकर होवैला। क्यूंकै उण दिनां इण धरती माथै घणी मोटी आपति आवैला अर इण लोगां माथै परमेसर रौ डंड होवैला। वे तरवार री धार ऊं पाड़ दिया जावैला। अर बंदी बणायनै सगळै देसो मे पूगा दिया जावोला अर यरुसलेम मे दूजी जातियो रै जरियै सताया जावोला जद तांई दूजी जातियो रौ वगत पूरौ नीं हो जावै। “सूरज, चांद अर तारो मे चिन्ह दिखाई दैला, अर धरती माथै रै सगळै लोगां माथै विपतियां आवैला, अर वे सागर रै उथल पुथल ऊं घबरा जावैला। अर लोग डर रै खातर अर संसार माथै आवणवाळी आपतियो री बांट देखते देखते लोगां रै जी मे जी नीं रैवैला, क्यूंकै सरगिए सगतियो हिलाई जावैला। तद म्हैं, मिनख रै बेटौ, नै वे सामरथ अर घणी महिमा रै साथै बादळ माथै आवतौ देखेला। जद ऐ बातां होवण लागै, तो सीधा होयनै अपणै माथा नै ऊपर उठा लेणो। क्यूंकै थौरो छुटकारो नजीक होवैला।” यीसु उणौनै एक दिस्टांत मे कयौ, “सगळै रुंखड़ौ अर अंजीर रै रूंखड़ै नै देखौ। उणमे ज्यौ ही कोंपळौ फूटे है, थै अपणै आप जांण जाओ हो, की उनाळै रौ मौसम बस आ ही रियौ है। व्यौंही थै जद इण बातां नै होते देखौ, तद जांण लौ, की परमेसर रौ राज नैड़ौ है। “म्हैं थौरे ऊं साची कैवूं हूं, की जद तांई ऐ सगळी बातां नीं हो जावै, तद तांई इण पीढ़ी रौ कदैई अनत नीं होवैला। आभौ अर धरती टळ जावैला, पण म्हारी बातां कदैई नीं टळैला। “इण वास्तै सावचेत रैवौ, ऐड़ौ नीं हो की थौरो मन खुमार अर पीनै पिलानै अर सांसारिक चिंताओ ऊं सुस्त हो जावै, अर वो दिन थां माथै एक फंदे रै ज्यूं अणचेत आ पड़ै। क्यूंकै वो सगळी धरती रै सगळा रैवणवाळौ माथै इणी तरैह आ पड़ैला। इण वास्तै जागता रैवौ अर हरैक वगत पराथना करता रैवौ, की थै इण सगळी आवणवाळी तकलीफो ऊं बचनै, अर म्हैं, मिनख रै बेटौ, रै सांमै ऊभा होणै रै लायक बणौ।” हमेसां वो मिंदर मे उपदेस दिया करतौ हो, अर रात बिताणै रै वास्तै वो हरैक सिझ्या जैतून नाम रै भाखर माथै जाया करतौ हो। अर लोग सवार रा उठता उणरी सुणणै रै वास्तै मिंदर मे उणरै खनै आया करता हा। अखमीरी रोटी रौ तैंवार जिकौ फसह कैलावै है, नजीक हो। अर परधान याजकौ अर यहूदी धरम सास्तरी इण बात री सौध मे हा, की यीसु नै कीकर मार सकौ, पण वे लोगां ऊं डरता हा। अर सैतान यहूदा मे घुसियो, जिकौ इस्‍करियोती कैलावै अर बारैह चेलौ मे गिण्यौ जावै है। उणै जायनै परधान याजकौ अर अधिकारियों रै साथै बातचीत किनी, की यीसु नै कीण तरैह उणौरै हाथ पकड़ाए। वे राजी होया, अर इणरै वास्तै उणनै रूपिया देवण रौ वचन दियौ। उणै मांन लियौ, अर मौकौ ढ़ूंढ़नै लागौ, की जद भीड़ भाड़ नीं हो अर यीसु नै वो उणौरै हाथ धोखे ऊं पकड़ा दे। तद अखमीरी रोटी रै तैंवार रौ दिन आयौ, जद फसह रै दिन मेमने री बलि देणी होवै है। अर यीसु नै पतरस अर यूहन्‍ना नै ओ कैहन भेज्या, “जाओ अर अपांरै वास्तै फसह रौ भोज तैयार करौ, ताकी अपां उणै खा सकौ।” उणौ यीसु नै पूछयौ, “थूं म्हौरै ऊं उणरी तैयारी कठै चावै है?” यीसु उणौनै कयौ, “सुणौ, थै ज्यौ ही नगर मे परवेस करते ही एक मिनख पांणी रौ घड़ो ऊपाड़योड़ौ थांनै मिळैला, जिण घर मे वो जावै, थै भी उणरै लारै जातौ रैणौ। अर उण घर रै मालिक ऊं कैवणौ, ‘गुरु थौरे ऊं कयौ है, की वो मेमाणो रै बैठनै री जगा कठै है जठै म्हैं अपणै चेलौ रै साथै फसह तैंवार रौ भोज कर सकूं।’ वो थांनै एक सजी सजाई मोटी अटारी दिखा दैला, उठै तैयारी करणी।” उणौ जायनै, ज्यौ यीसु उणौनै कयौ हो, वैड़ौ इज पायो, अर उणौ फसह तैयार कियो। जद वो वगत आयौ, तो यीसु आपरै चेलौ रै साथै भोज करनै बैठौ। अर यीसु चेलौ नै कयौ, “म्हारी घणी इछा ही, की दुख भुगतणै ऊं पैला ओ फसह थौरे साथै खाऊं। क्यूंकै म्हैं थौरे ऊं कैवूं हूं, की जद तांई परमेसर रै राज मे ओ पूरौ नीं हो लेवे, तद तांई म्हैं इणनै दुबारो नीं खाऊंला।” अर उणै कटोरो उठायनै धन्यवाद दियौ अर कयौ, “लौ इणनै आपस मे बांट दो। क्यूंकै म्हैं थौरे ऊं कैवूं हूं, आज रै पछै जैड़ी तांई परमेसर रौ राज नीं आ जावै, वैड़ी तांई म्हैं कोई भी अंगूर रौ रस कदैई कोनीं पीऊंला।” पछै उणै रोटी ली अर धन्यवाद दियौ। उणै उण रोटी नै तोड़नै उणौनै देते होयौ कयौ, “आ म्हारी देह है, जिकौ थौरे वास्तै दी जावै है। म्हारी याद मे ऐड़ौ ही करणौ।” यूं ही जद वे खाणौ खा चुकिया तो उणै कटोरो उठायौ अर कयौ, “ओ प्यालो म्हारै उण लोई रै रूप मे एक नई वाचा है, जिणनै थौरे वास्तै उंडेलियो है। बल्कि सुणौ, म्हनै जिकौ धोखे ऊं पकड़ावैला, उणरौ हाथ एठैज मेज माथै म्हारै साथै है। क्यूंकै म्हैं, मिनख रौ बेटौ, तो मारयो ही जाऊंला ज्यौ उणरै लियै ठैरायौ गियो है, बल्कि धिकार है, उण मिनख नै जिणरै जरियै म्हैं पकड़ायौ जाऊंला।” तद वे आपस मे पूछण लागा, “म्हौ मे ऊं कुण है, जिकौ ओ कांम करैला?” उणमे ओ विवाद भी होयौ, “म्हौ मे ऊं कुण सबां ऊं मोटो समझयो जावै है?” यीसु उणौनै कयौ, “दूजी जातियो रा राजा उणौ माथै कठोर राज करै है। पण वे राजा अपणै आप नै लोगां रा दोसत कैवै है। पण थै ऐड़ा नीं होणौ। बल्कि जिकौ थौरे ऊं मोटो है, वो छोटे रै ज्यूं अर जिकौ परधान है, वो सेवक रै ज्यूं बणै। क्यूंकै मोटो कुण है। वो जिकौ खाणै री मेज माथै बैठौ है या वो जिकौ उणनै परोसे है? कांई वो नीं जिकौ खाणै री मेज माथै बैठौ है? पण म्हैं थौरे बीच मे सेवक रै ज्यौ हूं। “पण थै वो हो, जिकौ म्हारी परीकसाओं मे हरैक वगत म्हारै साथै रिया हा। अर म्हैं थांनै व्यौंही एक राज दे रियौ हूं, ज्यौ म्हारै परम पिता नै इणनै म्हनै दियौ हो। व्यौंही म्हैं भी थौरे वास्तै ठैराऊं हूं, ताकी, थै म्हारै राज मे म्हारी मेज माथै खाओ पीयो, बल्कि सिंहासणौ माथै बैठनै इजरायल री बारैह गोत्र रौ न्याव करौ। “समौन, हे समौन, सुण, थां सगळौ नै गेहूं रै ज्यौ पटकनै रै वास्तै सैतान नै ठान लियौ है। बल्कि म्हैं थौरे वास्तै पराथना की है, की थौरो विसवास डगमगाए नीं, अर जद थूं पाछौ आए तो थारै विसवासी भाइयो री हीमत बढ़ै।” बल्कि समौन यीसु ऊं कयौ, “हे परभु, म्हैं थारै साथै जेळ जावण अर मरण वास्तै तैयार हूं।” यीसु कयौ, “हे पतरस, म्हैं थारै ऊं कैवूं हूं, की आज कुंकड़ो बांग नीं दैला जैड़ी तांई थूं तीन बार म्हारौ इन्कार करैला, की थूं म्हनै कोनीं जांणै।” अर यीसु आपरै चेलौ ऊं कयौ, “म्हैं थांनै जद बिना बटुए, बिना थैले या बिना चपलो रै भेज्या हा, तो कांई थांनै किणी चीज री कमी रही ही?” उणौ कयौ, “किणी चीज री कोनीं।” यीसु उणौनै कयौ, “पण अबार जिण किणी रै खनै कोई बटुओ है, वो उणनै ले ले अर वो थैलो भी ले चालै। अर जिणरै खनै तरवार नीं हो, वो आपरौ कुड़तौ तांई बेचनै उणनै मोल ले लेवे। क्यूंकै म्हैं थौरे ऊं कैवूं हूं, की जिकौ पवितर सास्तर मे लिख्योड़ौ है, की ‘वो अपराधियो रै साथै गिण्यौ है’, उणरौ म्हारै मे पूरौ होणौ जरुरी है। क्यूंकै म्हारै बारै मे बातां पूरी होण वाळी है।” उणौ कयौ, “हे परभु, देख, एठै दो तरवारो है।” यीसु उणौनै कयौ, “घणी है।” वो उठै ऊं उठनै हमेसां रै ज्यूं जैतून रै भाखर माथै जावण वास्तै रवाना हो गिया, अर उणरा चेला भी उणरै लारै रवाना हो गिया। यीसु जद उण जगा माथै पूगा तो उणै उणौनै कयौ, “पराथना करौ की थांनै परीकसा मे नीं पड़नो पड़ै।” अर वो किणी भाठै नै जितौ आगौ फेंकयो जा सकै है, लगोलग उणौ ऊं उतरौ आगौ न्यारौ जातौ रियौ। पछै वो गोडा टेकनै पराथना करनै लागौ। “हे परम पिता, जे थारी इछा हो तो इण कटोरे नै म्हारै ऊं आगौ हटा ले, तौभी म्हारी कोनीं, बल्कि थारी इछा पूरी हो।” तद एक सरगदूत उठै परगट होयौ जिकौ उणनै सामरथ देतो हो। उठै यीसु घणै संकट मे व्याकुल होयनै और ही घणै मन ऊं पराथना करनै लागौ। अर उणरौ पसीनो मांनौ लोई री मोटी मोटी बूंदो रै ज्यूं धरती माथै पड़ रियौ हो। अर जद वो पराथना ऊं उठनै अपणै चेलौ रै खनै आयौ, तो उणै उणौनै सौग मे थाकनै सोयोड़ा पाया। तो यीसु उणौनै कयौ, “थै सो क्यूं रिया हो? उठो अर पराथना करौ की थै किणी परीकसा मे नीं पड़ो।” वो ओ बोल ही रियौ हो की एक भीड़ आई, यहूदा जिकौ बारैह चेलौ मे ऊं एक हो, उणरी अगुवाई कर रियौ हो। वो यीसु नै चूमनै रै वास्तै उणरै खनै आयौ। यीसु उणनै कयौ, “हे यहूदा, कांई थूं चूमो लैयनै म्हनै, मिनख रै बेटे, नै धोखे ऊं पकड़ानै जा रियौ है?” यीसु रै साथियो जद देख्यौ की कांई होवणवाळौ है, तो कयौ, “हे परभु, कांई म्हौ तरवार ऊं वार करौ?” अर उणमे ऊं एक नै तो महायाजक रै दास ऊपर वार करनै उणरौ जीमणौ कांन ही उडा दियौ। बल्कि यीसु तुरत कयौ, “अबै बस करौ।” अर यीसु उणरै कांन नै छू नै सावळ कियो। तद यीसु माथै चढ़ाई करनै आया परधान याजकौ, मिंदर रा अधिकारियों अर यहूदी मुखियौ ऊं कयौ, “कांई थै म्हनै डाकू जांणनै तरवारो अर डंडा लैयनै निकळिया हो? मिंदर मे म्हैं हरैक दिन थौरे साथै हो, बल्कि थै म्हारै हाथ नीं लगायो। पण ओ वगत थौरो है। अंधारै रौ राज करनै रौ वगत है।” उणौ यीसु नै बंदी बणा लियौ अर उठै ऊं ले गिया। अर वे महायाजक रै घर ले गिया। अर पतरस थोड़ो छेटी ऊं उणरै लारै लारै आ रियौ हो। अर जद वे आंगणै मे वादी बाळनै भेळा बैठा, तो पतरस भी उणौरै बीच मे बैठ गियो। अर एक दासी उणनै वादी रै उजाळै मे बैठौ देखनै उणरी तरफ ताकनै कैवण लागी, “ओ मिनख भी उणरै साथै हो।” पण पतरस ओ कैहन इन्कार कियो, “हे नारी, म्हैं उणनै कोनीं जांणूं।” थोड़ी जेज पछै एक मिनख उणनै देखनै कयौ, “थूं भी तो उणौ मे ऊं एक है।” बल्कि पतरस बोल्यौ, “भला मिनख, म्हैं वो कोनीं हूं।” कोई घंटे भर पछै एक दूजै मिनख विसवास रै साथै कैवण लागौ, “पको ओ भी तो उणरै साथै हो। क्यूंकै देखौ ओ भी गलील वासी है।” पतरस कयौ, “भला मिनख, म्हैं कोनीं जांणूं थूं किणरै बारै मे बात कर रियौ है।” उण घड़ी वो बातां कर ही रिया हा की तुरत कुंकड़े बांग दी। तद परभु मुड़नै पतरस री तरफ देख्यौ, अर पतरस नै परभु री बात याद आई जिकौ उणै कही ही, “आज कुंकड़े रै बांग दैणै ऊं पैला, थूं तीन बार म्हारौ इन्कार करैला।” अर पतरस उठै ऊं बारै निकळनै जोर जोर ऊं रोवण लागौ। जिण मिनखौ रै यीसु नै पकड़योड़ौ हो, वे उणरी बेजती कर करनै ठोक रिया हा। अर यीसु रै आंख्यां ऊपर पटी बांधनै उण ऊं पूछण लागा, “भविसयवांणी करनै बता की थनै कीणै ठोकियो।” उणौ यीसु री बेजती करनै रै लियै उण ऊं वळै घणी बातां उणरै विरोध मे कही ही। जद दिन उगौ तो लोगां रा मुखिया अर परधान याजकौ अर सास्तरी भेळा होया, अर यीसु नै आपरी महासभा मे लैयनै गिया। उणौ यीसु ऊं पूछयौ, “म्हौ नै बता कांई थूं मसीह है?” यीसु उणौनै कयौ, “जे म्हैं थौरे ऊं कहूं तो थै म्हारौ विसवास कोनीं करौला। अर जे पूछूं तो थै जबाब कोनीं दो ला। बल्कि अबै ऊं म्हैं, मिनख रौ बेटौ, परम पिता परमेसर रै जीमणी तरफ बिठायौ जाऊंला।” वे सगळा बोल्या, “तो कांई थूं परमेसर रौ बेटौ है?” यीसु उणौनै कयौ, “थै आप साचौ कैवौ हो, क्यूंकै म्हैं हूं।” तद उणौ कयौ, “अबै अपांनै किणी रै गवाई री जरुत कोनीं है, क्यूंकै म्हौ आप ही इणरै मूंडै ऊं सुण लियौ है।” तद सगळी सभा उठनै उणनै पिलातुस हाकिम रै खनै लैयगी। अर वे ओ कैहन उण माथै दोस लगान लागा, की “म्हौ इणनै लोगां नै बहकाते अर कैसर नै चुंगी दैणै री मना करते, अर अपणै आप नै मसीह राजा कैवतै सुण्यौ है।” पिलातुस यीसु ऊं पूछयौ, “कांई थूं यहूदियो रौ राजा है?” यीसु उणनै जबाब दियौ, “थूं ही तो कैह रियौ है, म्हैं वोहीज हूं।” तद पिलातुस परधान याजकौ अर लोगां ऊं कयौ, “म्हनै इण मिनख मे किणी तरैह रौ कोई दोस कोनीं दिखाई दैवै।” पण वे और भी जोर ऊं कैवण लागा, “ओ गलील ऊं लैयनै एठै तांई सगळै यहूदिया मे उपदेस दे देयनै लोगां नै भड़कावै है।” ओ सुणनै पिलातुस पूछयौ, “कांई ओ मिनख गलीली है?” अर ओ जांणनै की वो हेरोदेस री रियासत रौ है, उणनै हेरोदेस रै खनै भेज दियौ, क्यूंकै उण दिनां मे वो भी यरुसलेम मे हो। हेरोदेस यीसु नै देखनै घणौ ही राजी होयौ, क्यूंकै वो घणै दिनां ऊं उणनै देखणौ चावतौ हो। इण वास्तै की उणरै बारै मे सुण्यौ हो, अर उणरा कीं अचूम्बे रा कांम देखणै रौ मन हो। उणै यीसु नै घणा सवाल पूछया, बल्कि यीसु उणनै कोई जबाब कोनीं दियौ। अर परधान याजकौ अर यहूदी धरम सास्तरी उठैज ऊभा हा, अर मनचाहे उण माथै दोस लगाता रिया। तद हेरोदेस नै आपरै सिपाईयो रै साथै उणरी बेजती किनी अर उणरी मजाक उडाई। अर उणौ उणनै एक राजा जैड़ौ कुड़तौ पैहरायनै पिलातुस रै खनै पाछौ भेज दियौ। उण दिन हेरोदेस अर पिलातुस एक दूजै रा दोसत बण गिया। इण ऊं पैला तो वे एक दूजै रा दुसमण हा। पिलातुस नै परधान याजकौ, यहूदी मुखिया अर लोगां नै एक साथै बुलाया। पिलातुस उणौनै कयौ, “थै इण मिनख नै लोगां नै भटकानै वाळौ ठैहरायनै म्हारै खनै लाया हो, अर देखौ, म्हैं थौरे सांमै उणरी जांच की, बल्कि जिण बातां रौ थै उण माथै दोस लगाओ हो, उण बातां रै बारै मे म्हैं उणमे कीं भी दोस नीं पायो। अर नीं ही हेरोदेस नै, क्यूंकै उणै इणनै पाछौ म्हारै खनै भेज दियौ है। ज्यौ की थै देख सकौ हो इणै ऐड़ौ कीं भी नीं कियो जिकौ इणनै मौत री सजा दे सकौ। इण वास्तै म्हैं इणनै कोड़ा ठोकायनै छोड़ देवूं हूं।” पिलातुस तैंवार रै वगत उणौरै वास्तै एक बंदी नै छोड़नै पर मजबूर हो। बल्कि वे सगळा एक साथै चिलाया, “इण मिनख नै ले जाओ। म्हौरै वास्तै बरअब्बा नै छोड़ दो।” बरअब्बा नै नगर मे मार धाड़ अर हत्या करनै रै जुरम मे जेळ मे घालयोड़ौ हो। पिलातुस यीसु नै छोड़ दैणौ चावतौ हो, तो उण लोगां नै भळै समझाया। पण वे नारा लगाता रिया, “इणनै सूली माथै चढ़ाओ, इणनै सूली माथै चढ़ाओ।” पिलातुस उणौनै तीजी बार पूछयौ, “इण मिनख नै कांई गुनाह कियो है? म्हनै इणरै विरोध मे कीं कोनीं मिळियौ है, जिकौ इणनै मौत री सजा दी जावै। इण वास्तै म्हैं इणरै कोड़ा ठोकायनै छोड़ देवूं हूं।” पण वे चिला-चिलायनै कैवण लागा, “उणनै सूली माथै चढ़ायौ जाये।” अर उणौरौ चिलाणौ इतौ बढ़ गियो की, पिलातुस नै आग्या दे दी की ज्यौ वे लोग चावै व्यौंही करै। पिलातुस उण बरअब्बा नै छोड़ दियौ जिणनै मार धाड़ अर हत्या करनै रै जुरम मे जेळ मे घालियो हो, ओ वोहीज हो जिणनै छोड़ दैणै री मांग कर रिया हा, अर यीसु नै उणौरै हाथौ मे सौंप दियौ की वे ज्यौ चावै, व्यों करै। जद सिपाई यीसु नै ले जा रिया हा, तो उणौनै कुरैन रौ रैवण वाळौ समौन नाम रै एक मिनख नै, जिकौ आपरै खेत ऊं आ रियौ हो, पकड़नै उण माथै सूली घालनै उणनै यीसु रै लारै लारै चालनै रै लियै मजबूर कियो। लोगां री घणी भीड़ उणरै लारै चाल री ही। इणमे कीं ऐड़ी लुगाईयां भी ही, जिकौ उणरै लियै रो री ही अर विलाप करती ही। यीसु उणरी तरफ मूड़नै कयौ, “हे यरुसलेम री बेटियों, म्हारै वास्तै मती बिलखो, बल्कि थौरे अर थौरी औळाद रै वास्तै विलाप करौ। क्यूंकै ऐड़ा दिन आ रिया है, जद लोग कैवैला, ‘वे लुगाईयां धन्य है, जिकौ बांझड़ी है, अर धन्य है वे कोख जिणौनै किणी नै कदैई जनम ही नीं दियौ। वे धन्य है जिणौनै कदैई दूध नीं पिलायो।’ उण वगत वे भाखरो ऊं कैवैला, ‘म्हौ माथै पड़ो’ अर भाखरी ऊं कैवैला ‘म्हौ नै ढ़क दो।’ क्यूंकै जद लोग लीले रूंखड़ै रै साथै ऐड़ौ करै है, तो सूखे रै साथै कांई नीं कियो जावैला?” वे और दो मिनखौ नै जिकौ दोनूं ही गुनेगार हा, उणरै साथै घात रै वास्तै बारै ले जाय रिया हा। जद वे उण जगा माथै आया जिकौ खोपड़ी री जगा कहीजै है, तो उणौ उण दोनूं गुनेगारो रै साथै उणनै सूली माथै चढ़ा दियौ, एक गुनेगार नै उणरै जीमणी तरफ अलग अर दूजै नै डावी तरफ अलग सूली माथै चढ़ाया। तद यीसु कयौ, “हे पिता, इणौनै माफ करै, क्यूंकै ऐ कोनीं जांणै की ऐ कांई कर रिया है।” पछै उणौ चिठ्ठियो नोख नै उणरै गाभौ नै बांट लिया। लोग ऊभा देख रिया हा, अर यहूदी मुखिया मसकरी करनै कैवता हा, “इणै दूजौ नै बचाया। जे ओ परमेसर रै चुणयोड़ौ मसीह है तो अपणै आप नै बचा ले।” सिपाईयो नै भी आयनै उणरी मसकरी की। उणौ उणनै सिरको पीवण नै दियौ, अर कयौ, “जे थूं यहूदियो रौ राजा है, तो अपणै आप नै बचा ले।” अर उणरै ऊपर एक चिठ्ठी भी लगाई ही, “ओ यहूदियो रौ राजा है।” उठै लटकायोड़ा गुनेगारो मे ऊं एक नै यीसु री बेजती करनै कयौ, “कांई थूं मसीह कोनीं है? तो पछै अपणै आप नै अर म्हौ नै बचा ले।” बल्कि दूजै उणनै हाका करनै कयौ, “कांई थूं परमेसर ऊं कोनीं डरै? थनै भी तो वोहीज डंड मिळ रियौ है। बल्कि अपणौ डंड तो वाजिब है, क्यूंकै अपां जिकौ कीं कियो, उणरै वास्तै जिकौ मिलणो चाहीजै हो, वोहीज मिळै है। पर इण मिनख नै तो कीं भी भूंडौ नीं कियो है।” तद उणै कयौ, “हे यीसु, जद थूं अपणै राज मे आवै तो म्हनै याद करणौ।” यीसु उणनै कयौ, “म्हैं थारै ऊं साची कैवूं हूं, आज ही थूं म्हारै साथै सरगलोक मे होवैला।” उण वगत दिन रा बारैह बजे हा, अर तीन बजे तांई सगळै देस मे घणौ गेहरो अंधारौ हो गियो हो। क्यूंकै सूरज रौ उजाळौ जातौ रियौ, अर उठीनै यरुसलेम रै मिंदर रै पड़दे रा ऊपर ऊं नीचे तांई फाटनै दो टुकड़ा हो गिया हा। यीसु जोर ऊं हेलौ करनै कयौ, “हे परम पिता, म्हैं म्हारी आतमा थारै हाथौ मे दे रियौ हूं।” ओ कैहन उणै प्रांण छोड़ दियौ। जद सूबेदार ओ सगळौ देख्यौ तो वो ओ कैहन परमेसर री सौभा करनै कयौ, “ओ पको ही निरदोस मिनख हो।” तो भीड़ जिकौ देखणै भेळी होई ही, अर जिकौ कीं होयौ उणनै देख लियौ, तो वे आपरी छाती कूटता होया पाछा जावण लागा। यीसु रै सगळा जांण पिछांण वाळा अर वे लुगाईयां भी जिकौ गलील ऊं उणरै साथै आई ही, कीं आगी ऊभी होयनै ओ सगळौ देख री ही। अर यूसुफ नाम रौ एक मिनख जिकौ यहूदिया रै एक नगर अरमतियाह रौ रैवण वाळौ हो, वो सीधौ अर धरमी मिनख हो, अर परमेसर रै राज री बाट देख रियौ हो। वो यहूदी महासभा रौ एक मिनख, पण यहूदियो री योजना अर कांम ऊं खुस कोनीं हो। यूसुफ पिलातुस रै खनै जायनै यीसु री लास मांगी। तो यूसुफ नै यीसु री लास सूली माथै ऊं उतारनै, मलमल रै गाभे मे लपेट दी। अर भाखर खोदनै कबर बणायोड़ी ही, उणमे लास नै राख दी, जिणमे पैला कदैई किणी री लास नै नीं राखी ही। वो यहूदियो री तैयारी रौ सुकरवार दिन हो, अर सब्त रा दिन सरू होवण वाळा हा। वे लुगाईयां जिकौ गलील ऊं यीसु रै साथै आई ही, लारै लारै जायनै उण कबर नै देखी, अर ओ भी देख्यौ की यीसु री लास नै कबर मे कीकर राखी है। तो वे पाछी घर जायनै बड़िया सुगंध वाळी चीजों अर अंतर तैयार करयौ। पछै सब्त रै दिन व्यवस्था री विधि रै अनुसार उणौ आराम कियो। हपतै रै पैलै दिन संवार रा वेगा ही वे लुगाईयां कबर माथै उण सुगंधदार चीजों नै, जिकौ उणौ तैयार कियो हो, लैयनै आई। अर उणौ नै कबर माथै ऊं भाठौ आगौ सिरकयोड़ो देख्यौ। तो वे मांय गी बल्कि उणौ उठै परभु यीसु री लास नीं देखी। जद वे इण बात रै विचार मे ही, की उणौरै खनै चमकता गाभा पैरयोड़ा दो मिनख आयनै ऊभा होया। जद वे डर रै खातर जमीं री तरफ मूंडौ लटकायनै ऊभी ही। उण दोनूं मिनखौ उणौ नै कयौ, “जिकौ जीवतौ है, उणनै थै मुड़दो रै बीच क्यूं सौध री हो? वो एठै कोनीं, पण जी उठया है। याद करौ, जद वो गलील मे ही हा, उणै थौरे ऊं कयौ हो। उणै कयौ हो, ‘म्हैं, मिनख रौ बेटौ, पापियो रै हाथौ मे पकड़ायौ जावैला, अर पछै सूली माथै चढ़ा दियौ जावैला, अर तीजै दिन जी उठैला।’ ” तद उण लुगाईयां नै उणरी बातां याद आई। अर वे कबर ऊं पाछी जायनै उणौनै ऐ सगळी बातां उण इग्यारैह प्रेरितों नै अर सगळौ नै सुणाई। ऐ लुगाईयां ही मरियम मगदलीनी, योअन्‍ना अर याकूब री मां मरियम। वे अर उणौरै साथै री दूजी लुगाईयां इण बातां नै प्रेरितों ऊं कही। पण उणौरी बातां प्रेरितों नै फालतू जैड़ी लागी, अर उणौ नै इणौरौ विसवास कोनीं करयौ। बल्कि पतरस ऊभौ होयौ अर कबर री तरफ नाह नै आयौ। उणै नीचे झुकनै देख्यौ तो गाभा पड़या देख्यां अर जिकौ कीं होयौ हो, उण ऊं अचूम्बो करतौ होयौ, आपरै घर जातौ रियौ। उण दिन उणरै चेलौ मे ऊं दो, यरुसलेम ऊं कोई सात मील आगौ इम्माऊस नाम रै गांव जा रिया हा। अर वे इण सगळी बातां जिकौ होई ही, आपस मे बातचीत करता जा रिया हा। जद वे उण बातां माथै चरचा अर सोच विचार कर रिया हा, तो यीसु खुद उठै आयनै हाजिर होयौ अर उणौरै साथै साथै चालण लागौ। बल्कि यीसु उणौरै पिछांण मे नीं आयौ। यीसु उणौनै पूछयौ, “चालता चालता एक दूजै ऊं थै कीण बातां री चरचा कर रिया हो?” वे चालता रूक गिया, वे घणा दुखी दिखाई दे रिया हा। ओ सुणनै, उणमे ऊं किलयुपास नाम रै एक मिनख कयौ, “यरुसलेम मे रैवण वाळौ थूं ऐकलौ ही ऐड़ौ मिनख होवैला जिकौ लारले दिनां री बातां बीती है, उणनै कोनीं जांणै।” यीसु उण ऊं पूछयौ, “कुण सी बातां?” उणौ उण ऊं कयौ, “यीसु नासरी रै बारै मे जिकौ परमेसर अर सगळै लोगां रै सांमै ओ दिखा दियौ की वो एक महान भविसयदाता है। परधान याजकौ अर म्हौरै सरदारो नै उणनै मौत री सजा दैणै रै लियै सौंप दियौ। अर उणौ उणनै सूली माथै चढ़ा दियौ। पण म्हौ नै आसा ही, की ओहीज इजरायल नै छुड़ावैला। अर इण सगळी बातां होई नै ओ तीजौ दिन है। अर म्हौरै साथै री कीं लुगाईयां भी म्हौ नै अचूम्बे मे घाल दिया, आज संवार री वे कबर माथै गी ही। बल्कि उणौनै यीसु री लास नीं मिळी, तो ओ कैवती होई आई, ‘म्हौ सरगदूतो रा दरसण करया, जिणौ कयौ, की वो जीवतौ है।’ तद म्हौरै साथियो मे ऊं कीं कबर माथै गिया, अर ज्यौ लुगाईयां कयौ हो, वैड़ौ इज पायो, पण उणनै कोनीं देख्यौ।” तद यीसु उणौनै कयौ, “थै किता गैला हो, अर भविसयदाताओ नै जिकौ कीं कयौ, उण माथै विसवास करणै मे किता अकल बायरा हो। कांई मसीह रै लियै ओ जरुरी कोनीं हो, की वो इण दुखौ नै उठायनै आपरी महिमा मे परवेस करै?” तद उणै मूसा ऊं अर सगळै भविसयदाताओ ऊं सरूआत करनै सगळै पवितर सास्तरों मे ऊं, आपरै बारै मे कयोड़ी बातां रौ अरथ, उणौनै समझाया। वे जद उण गांव रै खनै आया, जठै जा रिया हा, यीसु ऐड़ौ व्यवहार कियो, ज्यौ उणनै आगै जावणौ हो। पण उणौ ओ कैहन उणनै रोकयो, “म्हौरै साथै रैह, क्यूंकै सिझ्या होयगी है, अर अबै दिन घणौ ढ़ळ गियो है।” तद वो उणौरै साथै रैवण रै वास्तै मांय आ गियो। जद वो उणौरै साथै खाणौ खाणै बैठौ, तो उणै रोटी लैयनै धन्यवाद कियो, अर उणै तोड़नै उणौनै देवण लागौ। तद उणौरी आंख्यां खुलगी, अर उणौ उणनै पिछांण लियौ, पण वो उणौरी आंख्यां ऊं गायब हो गियो। पछै वे आपस मे कैवण लागा, “जद वो मारग मे अपां ऊं बातां करतौ हो, अर पवितर सास्तरों रौ अरथ अपांनै समझा रियौ हो, तो कांई अपांरै मन मे लाय ज्यूं नीं भड़क उठी ही?” वे उणीज घड़ी उठनै यरुसलेम पाछा जाता रिया, उठै उणौ इग्यारैह प्रेरितों अर दूजा लोग उणरै साथै भेळा मिळिया, जिकौ कैह रिया हा, “परभु, साचांणी मे जी उठया है। उणै समौन नै दिखाई दिया है।” पछै उण दोनूं इम्माऊस मारग मे जिकौ बातां होई ही, वो सगळी बताई, की जद उणै रोटी तोड़ते वगत यीसु नै कीकर पिछांण लियौ। वे ऐ बातां कैह ही रिया हा, की यीसु आप ही उणौरै बीच मे आ ऊभौ होयौ, अर उणौ ऊं कयौ, “थांनै सानति मिळै।” पण वे घबरीज गिया, अर डर गिया, अर समझया, की म्हौ किणी भूत नै देख रिया हो। यीसु उणौ ऊं कयौ, “थै ऐड़ा घबरायोड़ा क्यूं हो? अर थौरे मन मे क्यूं वेम उठै है? म्हारै हाथौ अर पगां नै देखौ, म्हारै हाथ लगाओ। म्हैं वोहीज हूं। क्यूंकै भूत रै हडी मांस कोनीं होवै अर ज्यौ म्हारै मे देख रिया हो, की म्हारै वे है।” ओ कैवतै होयौ उणै हाथ अर पग उणौनै दिखाया। जद आंणंद रै खातर वे अबै भी इण माथै विसवास नीं कर सकै। वे अचूम्बो करता हा, तो यीसु उणौनै कयौ, “कांई थौरे खनै खावण नै कीं है?” उणौ सेकयोड़ी मछली रौ एक टुकड़ों दियौ। अर उणै वो लैयनै उणौनै सांमै खाई। पछै उणै उणौनै कयौ, “ऐ बातां वे है जिकौ म्हैं थौरे ऊं कही ही, जद म्हैं थौरे साथै हो। हरैक बात जिकौ म्हारै बारै मे मूसा री व्यवस्था मे भविसयदाताओ अर भजनो री किताब मे लिख्योड़ौ है, पूरी होणी ही है।” तद उणै पवितर सास्तरों नै समझनै रै लियै उणै उणौरी अकल रा ताळा खोल दिया। अर उणै उणौ ऊं कयौ, “ओ वोहीज है, जिकौ लिख्योड़ौ है की मसीह दुख उठावैला, अर तीजै दिन मरयोड़ौ मे ऊं जी उठैला। अर पापों री माफी रै वास्तै मन फिराव रौ ओ संदेस यरुसलेम ऊं सरू होयनै सगळै देसो मे परचार उणीज रै नाम ऊं कियो जावैला। थै इण सगळी बातां रा गवाई हो। अर अबै म्हारै परम पिता नै म्हारै ऊं जिकौ वायदा किया हा, उणौनै म्हैं थौरे वास्तै भेजूंला। बल्कि थांनै इण नगर मे उण वगत तांई ठैरणौ होवैला, जैड़ी तांई थै सरग री सामरथ नीं पाओ।” यीसु पछै उणौनै बैतनिय्याह तांई बारै लेन गियो। अर उणै आपरौ हाथ उठायनै उणौनै आसीस दी। अर उणौनै आसीस देते ही वो उणौ ऊं न्यारौ हो गियो, अर सरग मे उठा लियौ गियो। अर वे उणनै नमण करनै घणै आंणंद रै साथै यरुसलेम पाछा गिया। अर लगातार मिंदर मे हाजिर होयनै परमेसर री बड़ाई किया करता हा। सरूआत मांय वचन हो, अर वचन परमेसर रै साथै हो, अर वचन खुद परमेसर हो। ओहीज सरूआत मांय परमेसर रै साथै हो। सब चीजों वचन ऊं बणी, उणारै बगैर कोई चीज नीं बणी। वचन सब नै जीवन दियौ, अर वो जीवन लोगां रौ चांदणौ हो। चांदणौ अन्‍धारा मांय चमकै, अर अन्‍धारौ चांदणा नै कदैई हरा नीं सकै। उण वगत परमेसर एक मिनख नै मेलियो, जिणरौ नाम यूहन्‍ना हो। वो चांदणै री गवाई देवण वास्तै आयौ। इण वास्तै के सब मिनख उणरै दवारा विसवास कर सकै। यूहन्‍ना खुद चांदणौ नीं हो, पण वो चांदणा रा सबूत देवण वास्तै आयौ हो। साचौ चांदणौ, जिकौ हरैक मिनख नै उजाळौ दैवै, इण जगत मांय आवणवाळौ हो। वो जगत मांय हां, अर जगत नै वे खुद बणायौ, पण जगत वाळा वांनै नीं ओळखिया। वे आपरा लोगां रै बीच में आया, पण वांरा खुद रा लोग वांनै मांन कोनीं दियौ। पण जिकौ ई इणनै मान्यौ अर इण माथै विसवास करयौ, उणै वांनै परमेसर री संतान होवण रौ हक दियौ। ओ जनम लोई या मिनख री काम-वासना ऊं होवण वाळौ सरीर रौ जनम कोनीं हो, पण परमेसर री इछा ऊं आत्मिक जनम हो। वचन सरीर बणग्यौ, अर अपां रै बीच में रियौ। अपां उणरी महिमा देखी सिरफ वांरी एकला री महिमा, जिकौ परमेसर री भरपूर करपा अर सचाई ऊं आई ही। यूहन्‍ना उणरी गवाई दी, अर ऊंची आवाज में कयौ, “ओ वोहीज है, जिकौ म्हारै पछै आवण वाळौ है, ‘वो म्हारै ऊं घणौ महान है क्यूंकै वो म्हारै ऊं पैली मौजूद हो।’ ” अपां सब उणा री अपार करपा ऊं आसीस माथै आसीस हासल करी। क्यूंकै मूसा अपांनै सिरफ परमेसर रा कायदा बताया पण यीसु मसीह अपांरै सारू करपा अर सचाई लाया। परमेसर नै कदैई कोई नीं देखियौ, पण ऐकला बेटे इज देखियौ जिकौ परमेसर री गोद मे है, अर वो खुद परमेसर है। उणै परमेसर नै अपांरै माथै परगट करयौ। यूहन्‍ना री गवाई आ है, की जद यरुसलेम ऊं यहूदियो नै याजकौ, अर लेवियो नै, यूहन्‍ना खनै ओ पूछण सारू भेज्या की, “थूं कुण है?” तो वो उणौनै साफ-साफ कयौ, “म्हैं मसीह कोनीं हूं।” तद वो लोग यूहन्‍ना नै पूछयौ, “तो पछै थूं कुण है? थूं कांई परमेसर रौ आवण वाळौ दूत एलियाह है?” यूहन्‍ना कयौ, “म्हैं कोनीं हूं।” उणौ पूछयौ, “तो कांई थूं भविसयदाता है जिणारी म्हैं बांट जोवा?” यूहन्‍ना कयौ, “म्हैं कोनीं हूं।” तो “पछै थूं कुण है? म्होनै बता की म्हैं पाछा जायनै भेजणे वाळौ नै साची-साची बात बता सकौ। थूं बताए क्यूं कोनीं आखरी थूं कुण है?” यूहन्‍ना कयौ, ज्यूं भविसयदाता यसायाह कयौ हो, “म्हैं रिंदरोही मांय हेलौ करण वाळा री आवाज हूं, ‘परमेसर आवण वाळा है वांरौ मारग सीधौ करौ।’ ” वे फरीसियों री तरफ ऊं भेज्यौड़ा हा, इण वास्तै वे यूहन्‍ना नै पूछयौ, “जे थूं नीं मसीह है, अर नीं एलियाह, अर नीं थूं भविसयदाता, तो पछै बतिस्मो क्यूं दैवै?” यूहन्‍ना जबाब दियौ, “म्हैं तो पांणी ऊं बतिस्मो देवूं हूं, पण थोरै बीच में एक मिनख आयौ है, जिणनै थै कोनीं जांणौ। जिकौ म्हारै पछै आवण वाळा हा, ऐ वे इज है म्हैं तो जिणरै पगरखा री डोरी खोलण लायक ई नीं हूं।” ऐ सगळी बातां यरदन नदी रै खनै बैतनिय्याह गांव मांय होई, जठै यूहन्‍ना बतिस्मो देतो हो। दूजै दिन यूहन्‍ना यीसु नै आपरै खनै आवतौ देखनै कयौ, “देखौ, ओ परमेसर रौ उनियां है, जिकौ जगत रै पापों रै खातर बलि चढ़ैला। ओ वोहीज है, जिणरै बारै म्हैं केवतो हो, ‘एक मिनख म्हारै लारै आवै है जिकौ म्हारै ऊं घणौ महान है, क्यूंकै वे म्हारै ऊं पैली मौजूद हो।’ पैली म्हनै ठाह कोनीं ही पण अबै म्हैं इणनै ओळखूं हूं। म्हैं अठै इण खातर पांणी ऊं बतिस्मो देवूं ताकी इजरायल देस रा मिनख ई इणनै ओळख सकै।” पछै यूहन्‍ना यीसु रै बारै मे आ गवाई दी, “म्हैं परमेसर री आतमा नै कबूड़ै रै ज्यूं सरग ऊं उतरती अर उण माथै ठमती देखी। म्हैं इणनै ओळखतो कोनीं हो, पण परमेसर म्हनै अठै पांणी ऊं बतिस्मो देवण वास्तै मेलता वेळा कयौ, ‘जिण मिनख माथै पवितर आतमा उतरते अर ठैरते देखे, वो इज परमेसर री आतमा ऊं बतिस्मो देवण वाळौ है।’ म्हैं इण मिनख माथै पवितर आतमा नै उतरती देखी, इण खातर म्हैं गवाई दूं की औ इज परमेसर रौ बेटौ है।” दूजै दिन वळै यूहन्‍ना आपरै दो चेलौ रै साथै ऊभा हा, यीसु उणारै खनै ऊं निकळिया। यूहन्‍ना बतिस्मो देण वाळौ उणानै सावळ देख नै कयौ, “देखौ, ओ इज परमेसर रौ उनियां है।” यूहन्‍ना रा दोनूं चेला जद आ बात सुणी तो वे उणनै छोड़ नै, यीसु रै लारै वहीर व्‍हैगा। दोनूं जणा नै लारै आवता देखनै यीसु पूछयौ, “थै कांई चावौ हो?” वे कयौ, “हे रब्‍बी,” (अरथ हे गुरु) “थूं की ठोड़ रैवै?” यीसु जबाब दियौ, “आओ देख लौ।” वे यीसु रै साथै वठै गिया जठै यीसु रैवता हा अर उण दिन वे यीसु रै साथै रिया। उण वेळा आथण री चारैक बजी ही। वांरै मांय एक समौन पतरस रौ भाई अन्‍द्रियास हो, जिकौ यूहन्‍ना री बात सुणी ही अर यीसु रै लारै वहीर हो गियो। पैली वो आपरै भाई समौन नै समझायौ अर उणनै कयौ, “अपांनै मसीह मिळग्यौ है।” (मसीह अरथ चुणयोड़ौ।) वो उणनै यीसु खनै लेयनै आयौ। यीसु समौन नै सावळ देखनै कयौ, “थूं तो यूहन्‍ना रौ छोरौ समौन है, पण थनै लोग कैफा नाम ऊं जांणैला।” (कैफा का मतलब पतरस अरथ भाखर है।) दूजै दिन यीसु गलील जावण री तेवड़ी। वो फिलिप्पुस ऊं मिळिया अर कयौ, “म्हारै साथै वहीर हो जा।” फिलिप्पुस बैतसैदा गांव रौ रैवण वाळौ हो। अन्‍द्रियास अर पतरस रौ गांव ई वो इज हो। पछै फिलिप्पुस नतनएल रै खनै जायनै कयौ, “जिणरै बाबत मूसा कायदा में अर दूजौ भविसयदाता कयौ, वो अपांनै मिळग्या है। वो यूसुफ रौ बेटौ, यीसु नासरी है।” नतनएल उणनै कयौ, “नासरत जैड़ा गांव ऊं कदैई कोई चौखी चीज निकळ सकै?” फिलिप्पुस कयौ, “अठै आन थै खुद देख लौ।” यीसु नतनएल नै आपरै खनै आवतौ देखनै कयौ। “ओ एक सचमुच इजरायली मिनख है। ओ चाल नीं करैला।” नतनएल पूछयौ, “थूं म्हनै कीकर जांणै है?” यीसु उणनै जबाब दियौ, “इण ऊं पैली के फिलिप्पुस थांनै हेलौ पाड़ियौ, म्हैं थनै अंजीर रा रुंखड़ा हेठै देखियौ हो।” नतनएल कयौ, “हे गुरु, थूं तो साचांणी परमेसर रौ बेटौ, अर इजरायल रौ राजा है।” यीसु उणनै पूछयौ, “कांई थूं इण वास्तै विसवास करै, क्यूंकै म्हैं थांनै कयौ के ‘म्हैं थांनै अंजीर रा रुंखड़ा हेठै देखियौ’? थूं इण ऊं मोटा-मोटा कांम देखेला।” वे वळै कयौ, “म्हैं थांरै ऊं साची-साची बात कैवूं हूं, की थै सरग नै खुलो अर परमेसर रा सरगदूतो नै म्हैं, मिनख रै बेटे खनै आवता-जावता देखोला।” तीजै दिन गलील नगर रै काना गांव मांय किणी रौ ब्याव हो। उण ब्याव मांय यीसु री मां ई आयोड़ी ही। यीसु अर वांरा चेला ई इण ब्याव मांय निंवतयोड़ा हा। ब्याव में जद अंगूर रौ रस निटगौ, तो यीसु री मां उठै आई अर उणनै कयौ, “आंरै खनै तो अंगूर रस निटगौ है।” यीसु कयौ, “हे माताजी, म्हनै कीं करणै रौ क्यूं की? हाल तांई म्हारी वो घड़ी आई कोनीं है।” पण यीसु री मां नौकरो नै कयौ, “ओ थांनै कैवै ज्यूं इज करजौ।” उठै घर रै मांय भाटा री मोटी-मोटी छह मटकियो मेलयोड़ी ही। यहूदी लोग ऐड़ी मटकियो ब्याव अर धारमिक तैंवार मांय सुद्ध करण रै कांम लेवता हा। हरैक मटकी मांय लगैटगै दो या तीन मण पांणी भरीज जावतौ। यीसु नौकरो नै कयौ, “मटकियो नै पांणी ऊं हेंठी भर दो।” नौकरो नै मटकियो मूंडा तांई हेंठी भर दी। पछै यीसु कयौ, “अबै मटकियो ऊं थोड़ोक पांणी काढ़नै खाणै रै मुखये नै देयनै आओ।” वो देन आया। खाणै रै मुखये उण पांणी नै चाखियौ जिकौ अंगूर रस बण गियौ हो। खाणै रै मुखये नै ठाह कोनीं पड़ियौ ओ कठै ऊं आयौ है। (पण जिकौ नौकरो नै मटकियो पांणी ऊं भरी ही, वे सैंग जांणता हा।) पछै खाणै रै मुखये बींद नै बुलाय नै उणनै कयौ, “हरैक मिनख आपरै मेमाणो नै सैंगा ऊं पैली बड़िया अंगूर रस परौसे अर धापिया पछै फोरौ, पण थै इतौ बड़िया अंगूर रस हाल तांई कठै रुखाळ नै राखियौ हो।” गलील रै काना गांव मांय, यीसु रौ ओ पैलौ परचौ हो। इण परचां ऊं यीसु आपरी सरग री महिमा दरसाई अर चेलौ उण माथै विसवास करयौ। इण पछै यीसु आपरी मां, भाई अर चेलौ रै साथै कफरनहूंम गिया अर कीं दिन उठैज रिया। यहूदियो रौ फसह तैंवार नैड़ौ हो इण खातर यीसु यरुसलेम गियौ। वे मिंदर रै आंगणै मांय वैपारियो नै बळद, घेटा अर कबूड़ौ नै बैचता देखिया, अर वे सराफां नै ई विदेसी रूपिया बदळण सारू बैठा देखिया। यीसु रस्सियो रौ कोड़ो बणाय, नै बळद घेटा अर सगळां नै मिंदर रै आंगणै ऊं बारै निकाळिया। अर सराफां रा रूपिया जमीं माथै फेंक दिया, अर उणौ रै पीढ़ो नै ऊंधा कर दीना। पछै वे कबूड़ा बैचण वाळा नै कयौ, “इणानै अठै ऊं ले जाओ। म्हारै पिता रै घर नै वैपारी रौ घर मती बणावौ।” तद उणरै चेलौ नै याद आई की लिख्योड़ौ है, “परमेसर रै घर री लग्‍नि म्हनै खा जावैला।” यहूदी इण कारण यीसु नै पूछयौ, “थूं जिकौ ओ करै है तो म्हौ नै कुण सो चमतकार दिखावै है?” यीसु पाछौ जबाब दियौ, “म्हैं थांरै खातर ओ चमतकार करूंला के इण मिंदर नै तोड़ दो, म्हैं तीन दिन मांय इणनै पाछौ बणाय दूंला।” यहूदी अचूम्बो करता थका कयौ, “इण मिंदर नै बणाणै में छींयाळीस बरस लाग्या, अर कांई थूं इणनै तीन दिन मांय पाछौ बणाय सकै?” पण यीसु आपरै सरीर रूपी मिंदर रै वास्तै कयौ हो। चेलौ नै आ बात उण वेळा याद आई, जद यीसु मरयोड़ौ मांय ऊं जीवता व्‍हैया। इण पछै चेला पवितर सास्तर अर उण बातां माथै विसवास करयौ जिकौ यीसु कही ही। जिण वेळा यीसु फसह रै तैंवार में यरुसलेम हा, घणाकर मिनखां यीसु रा परचां देख नै उण माथै विसवास करयौ। पण यीसु मिनखौ माथै भरोसौ कोनीं करयौ, क्यूंकै वे मिनखौ रौ सभाव जांणतौ हो। अर उणनै जरुत कोनीं ही, की मिनखौ रै बारै में कोई गवाई दे, क्यूंकै वो आप जांणतौ हो के मिनखौ रै मन मांय कीं है। फरीसियों में नीकुदेमुस नाम रौ एक मिनख हो, जिकौ यहूदियो रौ सरदार हो। वो रात रौ यीसु रै खनै आयनै यीसु नै कयौ, “हे गुरु म्हौ जांणौ हो, की थूं परमेसर री तरफ ऊं गुरु होयनै आयौ है। क्यूंकै कोई इण चमतकारो नै जिकौ थूं देखावै है, जे परमेसर थांरै साथै नीं होवतो तो ऐ चमतकार कोनीं दिखा सकतौ।” यीसु उणनै जबाब दियौ, “म्हैं थनै साची साची कहूं, जठै तांई थारौ नवो जनम नीं व्‍है, थूं परमेसर रै राज नै देख ई नीं सकै।” नीकुदेमुस अचूम्बे ऊं पूछयौ, “नवो जनम! कोई बूढ़ो मिनख आपरी मां रै पेट रै मांय पाछौ जायनै कीकर दूजौ जनम लेय सकै?” यीसु जबाब दियौ, “म्हैं थांरै ऊं साची साची कहूं, जठै तांई कोई मिनख पांणी अर परमेसर री आतमा ऊं जनम नीं लेवे, वो परमेसर रै राज मांय नीं जा सकै। क्यूंकै जिकौ सरीर ऊं जनमे है, वो सरीर है। अर जिकौ आतमा ऊं जनमे है, वो आतमा है। इण खातर म्हारी इण बात माथै अचूम्बो मती करौ, के थांनै नवो जनम लेवणो जरुरी है। हवा जठीनै चावै उठीनै जावै है, थै हवा री आवाज नै सुण सकौ पण बता नीं सकौ, के ओ कठीनै ऊं आवै अर कठीनै जावै। इण खातर इणी तरैह औ सबां रै साथै व्‍हैला जिकौ रौ जनम परमेसर री आतमा ऊं है।” नीकुदेमुस पूछयौ, “ऐ बातां कीकर व्‍है सकै?” यीसु जबाब दियौ, “थूं, इजरायल रौ गुरु होयनै ई, कांई इण बातां नै कोनीं समझै? म्हैं थांनै साची साची कहूं जिकौ म्हौ जांणौ अर देख्यौ, उणरी थांनै गवाई दैवो हो, पण थै भरोसौ कोनीं करौ। जद म्हैं इण धरती री बातां बताई तो थै भरोसौ कोनीं करयौ। जे म्हैं सरग री बातां बताऊं तो थै भरोसौ कीकर करौला? कोई सरग ऊपर नीं चढ़यौ, कैवल वोहीज जिकौ सरग ऊं उतरियौ, अरथ मिनख रौ बेटौ जिकौ सरग में है। ज्यूं मूसा बेवड़ मांय पीतळ रा नाग नै थम्‍बा माथै चढ़ायौ हो, उणी रीत म्हैं, मिनख रै बेटे नै ई, ऊंचाई माथै चढ़ायौ जावैला। इण खातर के जिकौ ई म्हारै माथै विसवास करैला, वो अनत जीवन पावैला। “क्यूंकै परमेसर जगत ऊं ऐड़ौ परैम करयौ के उणै आपरौ एकाएक बेटौ दे दियौ, ताकी जिकौ उण माथै विसवास करै, वो नास नीं व्‍है, पण अनत जीवन पावै। परमेसर आपरै बेटा नै जगत मांय डंड रौ हुकम देवण खातर नीं पण जगत रौ उद्धार करण खातर भेज्यौ। जिकौ ई उण माथै विसवास करै, वो डंड रौ भागी नीं होवैला। पण जे उण माथै विसवास नीं राखण वाळौ वो दोसी व्‍हैगौ है। क्यूंकै उणै परमेसर रै एकाएक बेटे माथै विसवास नीं करयौ। डंड री आग्या रौ कारण ओ है के चांदणौ जगत में आयौ, पण घणाकर लोग चांदणा ऊं घणौ अन्धारै ऊं परैम राखियौ, क्यूंकै उणौरा कांम भूंडा हा। क्यूंकै जे कोई बुराई करता हा, वे उजाळै ऊं बैर राखता हां, अर उजाळै रै खनै कोनीं आवता, ऐड़ौ नीं होवै की उणरै कांमां माथै दोस लगावै। पण सचाई ऊं कांम करण वाळा उजाळै रै खनै आवै, ताकी उणरा कांम परगट होवै के वो परमेसर री तरफ ऊं कियोड़ा है।” इण पछै यीसु अर वांरा चेला यरुसलेम ऊं यहूदिया देस रै नीचे रै भागों में आया, अर वो उठैज उणौरै साथै रैन लोगां नै पांणी ऊं बतिस्मो देवण लाग्या। यूहन्‍ना ई सालेम नगर रै खनै ऐनोन में बतिस्मो देवता हा, क्यूंकै उठै पांणी घणौ हो, अर लोग आयनै बतिस्मो लेवता हा। यूहन्‍ना नै उण वेळा तांई जेळ मांय कोनीं घालियो हो। उठै यूहन्‍ना रै चेलौ रौ किणी यहूदी रै साथै सुद्ध करणै री रीत रै बारै में बोल चाल होई। अर उणौ यूहन्‍ना रै खनै आयनै कयौ, “हे गुरु, जिकौ मिनख यरदन रै पार थांरै साथै हो, अर जिणरी थै गवाई दी है, देख, वो बतिस्मो दैवै है, अर सगळा उणरै खनै आवै है।” यूहन्‍ना जबाब दियौ, “जद तांई मिनख नै सरग ऊं नीं दियौ जाय, तद तांई वो कीं नीं पा सकै। थै तो आप ई म्हारा गवाई हो म्हैं कयौ, ‘म्हैं मसीह कोनीं हूं, पण उणरै आगै भेज्यौ गियौ हूं।’ जिणरी बींदणी है, वोहीज बींद है। पण बींद रौ दोसत जे ऊभौ होयौ उणरी सुणै है, बींद रै सबद ऊं घणौ राजी होवै है, अबै म्हारौ ओ आंणंद पूरौ होयौ है। इण खातर ओ जरुरी है की वो बढ़ै अर म्हैं घटूं। “जिकौ सरग ऊं आयोड़ा है वो सैंगा ऊं महान है। जिकौ धरती माथै ऊं आवै है वो धरती रौ है, अर धरती री ही बातां कैवै है। जे सरग ऊं आवै है, वो सबां ऊं ऊपर है। जे कीं उणै देख्यौ, अर सुण्यौ है, उणरी गवाई दैवै है। अर कोई उणरी गवाई स्वीकार नीं करै। जिणै उणरी गवाई स्वीकार कर ली, उणै इण बात माथै छाप लगा दी, के परमेसर साचा है। क्यूंकै जिणनै परमेसर भेज्या है, वो परमेसर रौ ही संदेस दैवै है, क्यूंकै वो आतमा नै नाप नापनै कोनीं दैवै। पिता आपरै बेटे ऊं परैम राखै है, अर पिता नै सगळी चीजों उणरै हाथ में दे दी है। जिकौ बेटा माथै भरोसौ राखै, अनत रौ जीवन उणौ रौ है, पण जे बेटे री नीं मांनै, वो जीवन नै कोनीं देखेला, पण परमेसर री रीस उणरै माथै रैवैला।” जद यीसु नै ठाह पड़ी, के फरीसी पंथ रा लोगां खनै आ बात पूगगी है, की यूहन्‍ना री ठोड़ घणाकर लोग यीसु खनै बतिस्मो लेवण अर चेला बणणै खातर आवै। यीसु खुद नीं पण वांरा चेला बतिस्मो देवता हा। इण खातर यीसु यहूदा री कांकड़ छोड़ नै गलील री कांकड़ मांय आयगा। मारग मांय उणानै सामरिया ऊं होयनै जावणौ हो। इण खातर वे सामरिया रै सुखार नगरी रै खनै उण जमीन माथै पूगिया जिकौ याकूब आपरै बेटे यूसुफ नै दीनी ही। अर याकूब रौ बेरौ ई उठीज हो। अतस यीसु मारग रा थाकयोड़ा हा अर इण खातर वे बेरा खनै ई बैठग्या। आ बात दोपार रै लगोलग होई। उणीज वेळा एक सामरी लुगाई पांणी भरणै आई, “तो यीसु उण खनै ऊं पीवण रौ पांणी मांगियो।” उण वेळा सैंग चेला नगरी मांय खाणौ मोल लेणे गियोड़ा हा। सामरी लुगाई कयौ, “थै तो यहूदी हो, पछै म्हारै सामरी लुगाई खनै ऊं पीवणा रौ पांणी कीकर मांगो हो?” उण वगत यहूदी लोग, सामरी लोगां रै साथै किणी तरैह रौ संबंध कोनीं राखता हा। यीसु जबाब दियौ, “जे थूं परमेसर रै वरदान नै जांणती, अर आ बात ई जांणती के ओ कुण है जिकौ थनै कैवै के ‘म्हनै पीवण रौ पांणी दे,’ तो थूं उण ऊं मांगती, अर ओ थनै जीवन रौ जळ देतो।” सामरी लुगाई कयौ, “हे मालिक, थांरै खनै तो पांणी भरणै तो कीं नीं है अर ओ बेरौ ऊंडो है, पछै ओ जीवन रौ जळ थांरै खनै कीकर आवैला? थूं कांई म्हौरै वडेरा याकूब ऊं बढ़ौ है, जिकौ म्हौ नै ओ बेरौ दियौ, अर वे खुद, वांरा टाबर अर उणौरै जिनावरां ओ पांणी पीनौ?” यीसु जबाब दियौ, “जिकौ ई इण पांणी नै पीवैला, वो पाछौ तिरसां हो जावैला। पण जे कोई उण पांणी में ऊं पीवैला जिकौ म्हैं उणनै देवूंला, वो वळै कदैई तिरसां नीं व्‍हैला, पण वो पांणी म्हैं उणनै देवूंला, वो उणमे एक झरनौ बण जावैला जे अनत जीवन रै सारू उमड़ तो रैवैला।” वां लुगाई कयौ, “हे मालिक, औ पांणी म्हनै ई दे ताकी म्हनै बार बार तिरस नीं लागै अर नीं पांणी भरणै इती आगी आऊं।” यीसु उणनै कयौ, “जा, थांरै घरधणी नै बुलायनै अठै ला।” लुगाई जबाब दियौ, “म्हारौ तो घरधणी है ई कोनीं।” यीसु कयौ, “हां, थूं हाव साची है जणै थूं कैवै के, ‘म्हारौ तो घरधणी है ई कोनीं।’ अबै तांई थूं पांच घरधणी कर लिया अर जिण साथै थूं अबार रैवै वो ई थांरौ घरधणी कोनीं है। आ बात ई थूं साची कैवै है।” वां लुगाई कयौ, “हे मालिक, थै जरुर कोई भविसयदाता हो। पण म्हनै आ बात बताओ की थै यहूदी लोग क्यूं कैवौ हो के वो जगा जठै आराधना करणी चाईजै वो यरुसलेम में है। पण म्हैं सामरी लोग औ कैवौ हो के इण भाखर माथै म्हौरै वडेरा आराधना करता हां।” यीसु जबाब दियौ, “हे नारी, म्हारी बात रौ विसवास कर की अबै वो घड़ी आवण वाळी है की थै नीं तो इण भाखर माथै पिता परमेसर री आराधना करौला, नीं यरुसलेम में। थै सामरी लोग जिणनै नीं जांणौ, उणरी आराधना करौ हो, अर म्हौ यहूदी लोग जिणनै जांणौ हो उणरी आराधना करां हो, क्यूंकै उद्धार यहूदियो में ऊं है। पण तौभी वो वगत नैड़ौ है अर समझ लौ के आयग्यौ है, जिणमे साचा भगत परमेसर पिता री आराधना, आतमा अर सचाई ऊं करैला। क्यूंकै पिता आपरै सारू ऐड़ा इज भगतां नै सौधै है। परमेसर आतमा है, अर जरुरी है की वांरा भगत आतमा अर सचाई ऊं उण री आराधना करै।” लुगाई उणनै कयौ, “इतौ तो म्हैं जांणूं के मसीहा जिकौ चुणयोड़ौ है वो आवण वाळौ है। जद वो आवैला, तो अपांनै सगळी बातां समझा देवेला।” यीसु उणनै कयौ, “म्हैं वोहीज हूं जिकौ थांरै ऊं बात करूं हूं।” उणीज वगत उणरा चेला उठै आयगा, अर यीसु नै एक लुगाई ऊं बातां करता देखनै अचूम्बो करयौ पण कोई उण ऊं औ नीं पूछयौ, की “थूं कांई चावै है?” या “इण लुगाई ऊं कीण वास्तै बातां करौ हो?” पछै वां लुगाई बेरा माथै इज आपरौ मटको छोड़नै पाछी गांव में गी, वां जायनै सगळै लोगां नै कयौ, “आओ, एक मिनख नै देखौ, जिकौ म्हैं कांई कांई कांम करिया म्हनै सैंग बता दियौ। कठैई ओहीज तो मसीह कोनीं है?” इण खातर भीड़ नगरी ऊं निकळनै यीसु रा दरसण करणै उणरै खनै आवण लागी। उणीज वेळा, चेलौ यीसु नै मनवार करी, “हे गुरु, कीं जीमलौ।” यीसु जबाब दियौ, “म्हारै खनै ऐड़ौ खाणौ है जिणरै बारै में थै कोनीं जांणौ हो।” तो चेला एक दूजा नै पूछण लागा के, “कांई कोई उणरै सारू खावण नै कीं लाया?” यीसु चेलौ नै कयौ, “म्हारौ खाणौ ओ है, के म्हैं भेजण वाळा री मरजी रै मुजब चालूं अर उणरौ कांम पूरौ करूं। कांई थै कोनीं कैवौ, ‘हाल तांई कटनी मांय, च्यार महीना आडा पड़िया है’? अपांरै च्यांरूमेर खेतो मे निजर घालो, की वे कटनी रै वास्तै पाकोड़ा है। फसल काटण वाळा नै मजूरी मिळैला। वे अनत जीवन रौ फळ भण्‍डार मांय भेळा करैला, इण ऊं बीज बावण वाळा अर बाढ़ण वाळा दोनूं नै घणौ आंणंद मिळैला। आ बात साची है, ‘बीज बौए कोई और काटे कोई और।’ म्हैं थांनै उण खेत मांय कटनी करणै भेजिया, जठै थै मेनत कोनीं किनी। दूजौ मेनत किनी अर थै उणरै मेनत रै फळ में भागी होया।” उण नगरी रा घणा सामरियो नै उण लुगाई रै कैवण ऊं यीसु माथै विसवास किनो, क्यूंकै उणै आ गवाई दीनी ही, “जिकौ ई कांम म्हैं करिया वो म्हनै सैंग ही बता दियौ।” पछै सामरी मिनख यीसु ऊं मिळिया, अर उणनै आपरै गांव मांय पधारण री अरज करी अर यीसु दो दिन तांई उणारै साथै रिया। यीसु रा वचन सुणनै वळै ई घणा लोग यीसु माथै विसवास करयौ। वे लोग उण लुगाई ऊं कयौ, “अबै म्हौ थांरै कैवण ऊं विसवास नीं करयौ, पण म्हैं खुद इणरा वचन सुणीया, साचांणी यीसु मसीह इज इण जगत रा मुगतिदाता है।” पछै उण दो दिनां रै पछै वो उठै ऊं निकळनै गलील री तरफ ग्या, क्यूंकै यीसु री खुद री आ गवाई है, की भविसयदाता नै आपरै देस में आदर कोनीं मिळै। जद वो गलील में आयौ, तो गलील रा लोग आंणंद रै साथै मिळिया, क्यूंकै फसह रै तैंवार माथै वे लोग यरुसलेम मांय यीसु रा चमतकार देखिया हा, क्यूंकै तैंवार रै वगत वे लोग उठै हा। तद वो वळै गलील रै काना नगरी में आयौ, जठै वो पांणी रौ अंगूर रस बणायौ हो, उठै राजा रौ एक सेवक हो जिणरौ बेटौ कफरनहूंम नगरी में घणौ बीमार हो। जद वो सुण्यौ के यीसु यहूदिया ऊं गलील में आया है, तो वो उणरै खनै गियौ अर उण ऊं अरज करी, “गुरु, कफरनहूंम मांय म्हारै साथै पधारौ अर म्हारै बेटे नै सावळ करौ, क्यूंकै अबै वो मरण वाळौ है।” यीसु उणनै कयौ, “थै म्हारा चिन्ह अर चमतकार देख्यां बिना म्हारै माथै कदैई भरोसौ नीं करौला।” राजा रै सेवक अरज करी, “हे मालिक, म्हारै बेटे रै मरणा ऊं पैली पधारौ।” यीसु उणनै कयौ, “पाछौ घर जा, थांरौ बेटौ सावळ व्‍हैगौ।” वो परभु यीसु री बात माथै भरोसौ करयौ अर घरै वहीर व्‍हैगौ। जद वो मारग मांय हो के उणरा नौकर आया अर उणनै कयौ, “थांरौ बेटौ सावळ व्‍हैगौ।” वो नौकरो नै पूछयौ, “वो कीण वगत सावळ हौण लागौ?” वे कयौ, “काले दिन रा एक बजिया पछै बिल्कुल उणरौ ताव उतर गियौ।” वो सेवक समझ गियौ की ओ वोहीज वगत हो जिण वगत यीसु कयौ, “थांरौ बेटौ सावळ होय गियौ है।” पछै वो सेवक अर उणरौ पूरौ परिवार विसवास कियो। यहूदिया ऊं आया पछै यीसु रौ गलील मांय ओ दूजौ चमतकार हो। इण बातां रै पछै यहूदियो रै तैंवार रै मौकै माथै यीसु यरुसलेम गिया। यरुसलेम नगरी मांय भेड़ फाटक रै खनै एक कुंड है, जिणनै इबरानी भासा मांय बैतहसदा कैवै, उणरै च्यांरूमेर पांच ओसारे ही। उणमे घणा बीमार, आंधा, लंगड़ा अर लकवो व्‍हियोड़ा मिनखां री भीड़ पांणी हिलणा री बाट जोवता रैवता हा। क्यूंकै वगत माथै परमेसर रा सरगदूत आवता अर पांणी नै हिलावता अर पांणी रै हिलता ई जिकौ बीमार सबां ऊं पैली पांणी मांय उतर जावतौ वो सावळ व्‍है जावतौ। चावै उणरी कोई बीमारी क्यूं नीं होवै। उणा मांय एक मिनख अड़तीस बरस ऊं बीमार हो। जद यीसु उणनै देखियौ अर ठाह पड़ी के ओ मिनख कैई बरसो ऊं बीमार है, तो वे उण ऊं पूछयौ, “कांई थूं सावळ होणौ चावै?” वो बीमार जबाब दियौ, “हे मालिक, म्हारै कोई साथै कोनीं, जिकौ पांणी रै हिलता ई म्हनै कुंड मांय उतार दैवै। म्हैं कुंड मांय उतरु जितरैक मांय कोई दूजौ कुंड मांय उतर जावै।” यीसु उणनै कयौ, “उठ, थारी खाट उठान लैयनै जातौ रैह।” वो मिनख हाथोहाथ सावळ व्‍हैगौ अर आपरी खाट उठान लैयनै जावण लागौ। ओ कांम सब्त रै दिन होयौ। इण खातर यहूदी लोग विरोध करयौ अर सावळ व्‍हियोड़ा मिनख नै कयौ, “आज तो सब्त रौ दिन है। थनै खाट उठायनै जावणौ कानुन रै विरोध में है।” उणै वांनै जबाब दियौ, “जिकौ म्हनै सावळ करयौ वो इज म्हनै कयौ, ‘थांरी खाट उठान लैयनै जातौ रै।’ ” वे उणनै पूछयौ, “वो मिनख कुण है जिकौ थनै कयौ ‘थांरी खाट उठान लैयनै जातौ रै’?” वो मिनख यीसु नै कोनीं ओळखतो हो, अर भीड़ घणी ही इण खातर यीसु उठै ऊं गया परा। इण बातां रै पछै यीसु उण मिनख नै मिंदर मांय मिळिया अर कयौ, “देख अबै थूं सावळ व्‍है गियौ है, वळै पाछौ कोई पाप मती करजै, कठैई ऐड़ौ नीं व्‍है के थांरै माथै कोई मोटी विपति आय पड़ै।” वो मिनख यहूदियो रै अधिकारियों नै जायनै कयौ, “जिकौ म्हनै सावळ करयौ, वो यीसु है।” इण वास्तै यहूदी यीसु नै तंग करणै लाग्या क्यूंकै वो ऐड़ा कांम सब्त रै दिन करतौ हो। इण खातर यीसु उणनै कयौ, “म्हारा पिता अजी तांई कांम करै है, अर म्हैं ई कांम करूं हूं।” इण वास्तै यहूदी वांनै मारणै री घणी कोसीस करणै लाग्या, क्यूंकै सब्त रौ नियम तोड़नै रै साथै ई वे अपणै आप नै परमेसर नै आपरौ पिता कैन खुद नै परमेसर रै बराबर बतायौ। यीसु जबाब दियौ, “म्हैं थांनै साची-साची कहूं, बेटौ खुद कीं नीं कर सकै। वो सिरफ वो इज करै जिकौ पिता नै करतौ देखे अर वांरै जैड़ौ कांम करै। क्यूंकै पिता बेटे ऊं परैम राखै अर जे कांम आप करै वो सगळा उणनै देखावै। अर वो इण ऊं ई बढ़नै कैई मोटा चमतकार करैला, जिण ऊं थै अचूम्बो करौला। जिण तरैह पिता मरयोड़ा नै जीवता करै, उणीज तरैह बेटौ ई चावै जिणनै मरयोड़ा ऊं जीवता कर सकै। पिता न्याव नीं करैला, पण वे न्याव करणै रौ सगळौ हक बेटा नै सूंप दियौ है, इण खातर ज्यूं सैंग लोग पिता परमेसर रौ आदर करै व्यौंही सैंग लोग बेटा रौ आदर करै। पण जे कोई बेटा रौ आदर नीं करै, जिणनै वे थोरै खनै मेलियो, तो जरुर थै पिता रौ ई आदर नीं करौ। “म्हैं थांनै साची साची कहूं, जिकौ म्हारौ वचन सुणनै म्हनै भेजणे वाळै माथै विसवास करै है, अनत जीवन उणौरौ है। अर उण ऊपर डंड री आग्या नीं होवैला, पण वो मौत नै पार कर जीवन रै मांय परवेस कर चुकयो है। “म्हैं थांनै साची साची कहूं, के वो घड़ी आय री है, पण औ अबार है, जिकौ परमेसर रै बेटे रौ वचन मुड़दा ई सुणैला, अर जिता सुणैला वे जीवन पावैला। क्यूंकै जिण रीत ऊं पिता अपणै आप मांय जीवन राखै है, उण रीत ऊं उणै बेटे नै खुद मांय जीवन राखण रौ हक दियौ है। उणानै पूरी मानखै जाति रै पाप रौ न्याव करणा रौ हक दियौ है, क्यूंकै वो मिनख रौ बेटौ है। “इण माथै इचरज मती करौ, क्यूंकै वो वगत आय रियौ है जद मुड़दा आपरी कबर मांय ऊं परमेसर रा बेटा रौ सबद सुणनै निकळै ला। जिकौ भलाई किनी है वे जीवन रै पुनरूत्थान रै खातर जी उठैला, अर जिकौ बुराई किनी है वे डंड रै पुनरूत्थान रै खातर जी उठैला। “म्हैं अपणै आप ऊं कीं नीं कर सकूं, ज्यूं सुणू हूं, व्यौंही न्याव करूं हूं, अर म्हारौ न्याव साचौ है, क्यूंकै म्हैं अपणी इछा कोनीं पण अपणै भेजणे वाळै री इछा चावूं हूं। “जे म्हैं म्हारी गवाई खुद दूं तो वो साची कोनीं मानिजै। एक वळै है जिकौ म्हारी गवाई दैवै है, अर म्हैं जांणूं हूं की म्हारी जे गवाई वो दैवै है, वो साची है। थै यूहन्‍ना खनै ऊं पूछायौ अर वो सचाई री गवाई दीनी। पण म्हैं अपणै बारै में मिनख री गवाई कोनीं चावूं, तौभी म्हैं ऐ बातां इण सारू कहूं, की थांनै उद्धार मिळै। यूहन्‍ना जे जळतौ अर चमकतौ होयौ दीयौ हो, अर थांनै कीं वेळा तांई उणरै उजाळै में, आंणंद होणौ बड़िया लागौ। पण म्हारै खनै एक वळै गवाई है जिकौ यूहन्‍ना री गवाई ऊं बढ़नै है, क्यूंकै जिकौ कांम पिता परमेसर नै म्हनै पूरौ करणै सूंपयौ है अरथावूं ओहीज कांम जे म्हैं करूं हूं, वे म्हारै गवाई है, की पिता परमेसर म्हनै भेज्यौ है। अर पिता परमेसर जिणै म्हनै भेज्यौ है, उणीज म्हारी गवाई दीनी है। थै नीं कदैई उणरौ सबद सुणयौ, अर नीं उणरौ रूप देखियौ है। अर उणरै वचन नै मन में मजबुत कोनीं राखौ, क्यूंकै जिणनै उणै भेज्यौ उणरौ थै विसवास कोनीं करौ। “थै पवितर सास्तर मांय सोधौ हो, क्यूंकै समझौ हो की उण में अनत जीवन थांनै मिळै है, अर वो पवितर सास्तर है, जिकौ म्हारी गवाई दैवै है। तो ई थै अनत जीवन पावण खातर म्हारै खनै कोनीं आवणा चावौ। “म्हनै मिनखां ऊं महिमा कोनीं चाईजै। पण म्हैं थांनै जांणूं हूं, की थांरै में परमेसर रौ परैम कोनीं है। म्हैं म्हारै पिता परमेसर रै नाम ऊं थांरै खनै आयौ हूं, अर थै म्हनै स्वीकार कोनीं करौ। जे कोई आपरै ही नाम ऊं आवै, तो उणनै स्वीकार कर देवोला। थै लोग एक-दूजै ऊं आदर चावौ हो, पण परमेसर रै तरफ ऊं आवण वाळौ रौ आदर कोनीं चावौ हो। तो थै लोग म्हारै माथै कीकर विसवास कर सकौ? “ओ नीं समझौ, की म्हैं पिता परमेसर रै सांम्ही थांरै माथै दोसण लगाऊंला। थांरै माथै दोसण लगाण वाळौ तो मूसा है, जिण माथै थै भरोसौ राखियौ हो। क्यूंकै जे थै मूसा माथै भरोसौ राखता, तो म्हारै माथै ई भरोसौ राखता, इण सारू की उणै म्हारै बारै में लिख्यौ है। पण जे थै उणरी लिख्योड़ी बातां माथै भरोसौ कोनीं करौ, तो म्हारी बातां माथै भरोसौ कीकर कर सकौ?” इण बातां रै पछै यीसु गलील री झील मतलब तिबिरीयास री झील रै पार गिया। एक अणूंती भीड़ उणारै लारै वहीर व्‍है जावती, क्यूंकै भीड़ उणरै चमतकार ऊं बीमारों नै सावळ करण रा परचां देख रिया हा। यीसु भाखर माथै चढ़नै आपरै चेलौ रै साथै उठै बैठ ग्या। यहूदियो रौ फसह रौ तैंवार नैड़ौ हो। तद यीसु देखियौ के एक मोटी भीड़ अपणै खनै आवै री है। अर फिलिप्पुस ऊं कयौ, “अपां इतरौ मिनखां रै वास्तै रोटी कठै ऊं मोल लाओ ला?” पण यीसु फिलिप्पुस नै परखणै सारू कही ही, क्यूंकै उणनै तो ठाह हो के उणै कांई करणौ है। फिलिप्पुस उणनै कयौ, “इणानै रोटी जीमाणै वास्तै कम ऊं कम दो सौ चांदी रा सिक्‍का री रोटी उणौरै सारू पूरी नीं होवैला की उण में ऊं हरैक नै थौड़ी-थौड़ी मिळ जावै।” उणरै चेलौ में ऊं दूजै चेले समौन पतरस रै भाई अन्‍द्रियास नै उण ऊं कयौ, “अठै एक छोरौ है जिण खनै ज्‍वार री पांच रोटियां अर दो मछलिया है। पण इण भीड़ रै इण ऊं कांई होय?” यीसु कयौ, “लोगां नै बैठा दो।” उण जगा घणी घास ही, तो वे आदमी जिकौ गिणती में लगोलग पांच हजार हां बैठ गिया। तद यीसु रोटियां ली, अर परमेसर रौ धन्यवाद करनै बैठणवाळौ नै जिती चावता परोसनै वास्तै दे दी। अर इण रीत ऊं मछलिया ई वे चावता उणौनै परोस दी। जद वे जीमनै धाप गिया तो यीसु आपरै चेलौ नै कयौ, “बचयोड़ी रोटी भेळी कर दो, ताकी कई खराब नीं हो।” तो उणौ भेळी किनी, पांच रोटियां मांय ऊं बचयोड़ी जव री रोटियां जिकौ खावण वाळौ ऊं बच री ही, उणरी बारैह छाबड़िया भरी। तद चमतकार उणै कर दैखायौ उणनै लोग देखनै कैवण लागा, “वो भविसयदाता जे जगत में आवणवाळौ हो पको ओहीज है।” यीसु ओ समझयौ की वे उणनै माडे राजा बणाणै रै खातर आयनै पकड़णौ चावै है, तो वो भाखर माथै ऐकलौ जातौ रियौ। जद सांझ होई, तो उणरा चेला झील रै कांठै गिया, पण अन्‍धारौ व्‍हैगौ अर यीसु नीं आयौ, तो वे नाव माथै चढ़नै झील रै उण पार कफरनहूंम री तरफ रवाना होई गिया। अर आंधी रै कारण झील में लेहरौ उठनै लागी। जद वे धीरै-धीरै तीन-स्यार मील रै लगभग निकळिया, तो उणौ यीसु नै झील ऊपर चालतो, अर नाव रै नैड़ौ आवतौ देखियौ, अर डर गिया। पण यीसु उणौनै कयौ, “म्हैं इज हूं, डरौ मती।” तद वे यीसु नै नाव माथै खुसी रै साथै चढ़ाया अर नाव तुरत उण जगा माथै पूग गी जठै वे जावता हा। अगले दिन उण भीड़ नै, जे झील रै पार ऊभी ही, ओ देखियौ, की एठै एक नै छोड़नै वळै कोई छोटी नाव कोनीं ही, अर यीसु आपरै चेलौ रै साथै उण नाव ऊपर नीं चढ़यौ, पण कैवल उणरा चेला इज गिया हा। तौभी छोटी नावां तिबिरीयास नगरी ऊं वळै उण जगा रै नैड़ी आयगी, जठै वे रोटी जीमनै परभु रौ धन्यवाद करयौ हो। इण वास्तै जद लोगां देखियौ, की अठै नीं तो यीसु है अर नीं इणरा चेला, तो वे भी नावो माथै चढ़नै यीसु नै सौधण खातर कफरनहूंम पूगिया। जद वे उठै पूगिया अर यीसु ऊं मिळिया तो कयौ, “हे गुरु, थै अठै कद आया?” यीसु जबाब दियौ, “म्हैं थांनै साची कहूं, की थै म्हनै इण खातर नीं सौधौ हो की थै म्हारा चमतकार देखनै, पण इण खातर की थै धापनै रोटियां खाई। थै नासवान खाणै रै वास्तै मेनत मती करौ, पण उण खाणा रै वास्तै जे अनत जीवन तांई रैवै है, जिणै म्हैं मिनख रौ बेटौ थांनै दूंला, क्यूंकै पिता परमेसर म्हारै माथै मोहर लगा दी है।” उणौ यीसु नै कयौ, “परमेसर री इछा पूरी करण सारू म्हौ नै कांई करणौ चाहीजै?” यीसु उणानै जबाब दियौ, “परमेसर री इछा आ है, की थै उण माथै विसवास करौ जिणनै वो भेज्यौ है।” तद उणौ यीसु नै कयौ, “थै म्हौ नै कौण सा चमतकार दिखा सकौ हो, जिणनै देखनै म्हौ आपरै माथै विसवास करौ? आप कांई कर सकौ हो? म्हौरै बापदादों नै मरूस्थल में मन्‍ना खाया हा, ज्यूं लिख्यौ है, ‘उणै उणानै खावणै रै वास्तै सरग ऊं रोटियां दी।’ ” यीसु उणौनै कयौ, “म्हैं थांनै साची कहूं, की मूसा थांनै जो रोटियां दी, वो सरग री रोटियां कोनीं ही। पण म्हारौ पिता थांनै सरग री साची रोटी दैवै है। क्यूंकै परमेसर री रोटी वोहीज है जिकौ सरग ऊं उतरनै संसार नै जीवन दैवै है।” तद उणौ यीसु नै कयौ, “हे मालिक, आप म्हौ नै हमेसां वोहीज रोटी दिया करौ।” यीसु उणौनै कयौ, “जीवन री रोटी म्हैं हूं। जे म्हारै खनै आवैला वो कदैई भूखो नीं होवैला। अर जे म्हारै माथै विसवास राखण वाळा कदैई तिरसां नीं होवैला। पण म्हैं थांरै ऊं कहूं, की थै म्हनै देखियौ, तौभी थै भरोसौ कोनीं करौ। पिता परमेसर जिणनै म्हनै सूंप दियौ है, वे सगळा म्हारै खनै आवैला, अर जो म्हारै खनै आवैला, म्हैं उणनै कदैई नीं निकाळूंला। क्यूंकै म्हैं अपणी इछा ऊं कोनीं, पण म्हनै भेजणे वाळै री इछा पूरी करणै रै वास्तै सरग ऊं उतरियौ हूं। जिणै म्हनै भेज्यौ, उणरी इछा आ है की जिकौ म्हनै उणै सूंपया है, म्हैं उण में ऊं एक नै ई नास नीं होणै दूं, पण उण सबां नै आखरी दिन पाछा जीवता कर दूं। क्यूंकै म्हारै पिता परमेसर री इछा आ है, की जिकौ कोई बेटे नै देखे अर उण माथै विसवास करै, उणनै अनत जीवन मिळैला, अर आखरी दिन म्हैं उणौ नै पाछा जीवता करूंला।” इण वास्तै यहूदी उणरै खिलाफ कुड़कुड़ावण लाग्या, क्यूंकै उणै कयौ हो, “जिकौ रोटी सरग ऊं उतरी वो म्हैं हूं।” अर उणौ कयौ, “कांई ओ यूसुफ रौ बेटौ यीसु कोनीं, जिणरै मां-बाप नै म्हौ जांणौ हो? तो वो कीकर कैवै है की ‘म्हैं सरग ऊं उतरियौ हूं’?” यीसु उणौनै जबाब दियौ, “आपस मांय मती कुड़कुड़ावों। कोई म्हारै खनै नीं आ सकै जैड़ी तांई पिता, जिणै म्हनै भेज्यौ है, उणनै खींच नीं लावै, अर म्हैं उणनै आखरी दिन पाछौ जीवतौ कर दूंला। भविसयदाता रै लेखौ में ओ लिख्यौ है, ‘वे सगळा परमेसर री तरफ ऊं सिखायोड़ा होवैला।’ जिण किणी नै पिता परमेसर ऊं सुण्यौ अर सीख्यौ है, वो म्हारै खनै आवै है। आ बात कोनीं, की किणी पिता परमेसर नै देखिया है, पण जिकौ परमेसर री तरफ ऊं है, कैवल उणीज पिता परमेसर नै देखिया है। “म्हैं थांनै सचाई कहूं, की जिकौ म्हारै माथै विसवास करै है, अनत जीवन उण रौ है। जीवन री रोटी म्हैं हूं। थांरै बापदादों नै मरूस्थल में मन्‍ना खाया तौभी वो मर ग्या। पण आ वो रोटी है जिकौ सरग ऊं उतरी है, ताकी मिनख उण मांय ऊं खावै अर नीं मरे। म्हैं वा इज जीवन री रोटी हूं जिकौ सरग ऊं उतरी है। जिकौ ई इण रोटी मांय ऊं खावेला वो हमेसां जीवतौ रैवैला, अर जिकौ रोटी म्हैं जगत रै जीवन रै लियै दूंला, वो म्हारौ सरीर है।” इण कारण यहूदी ओ कैन आपस मांय लड़नै लाग्या, “ओ मिनख कीकर म्हौ नै आपरौ सरीर खावण खातर दे सकै है?” यीसु उणौनै कयौ, “म्हैं थांरै ऊं साची कहूं जद तांई थै मिनख रै बेटे रौ सरीर नीं खाओ, अर उणरौ लोई नीं पीयो, थांरै मांय जीवन कोनीं। जिकौ ई म्हारौ सरीर खावै अर लोई पीवै, अनत जीवण उण रौ है, अर म्हैं आखरी दिन पाछौ जीवतौ कर दूंला। क्यूंकै म्हारौ सरीर ई हकीगत में खावणै री चीज है, अर म्हारौ लोई ई हकीगत में पीवण री चीज है। जिकौ ई म्हारौ सरीर खावै अर म्हारौ लोई पीवै है, वो म्हारै मांय अर म्हैं उण मांय बण्यौ रैवूंला। ज्यूं जीवते पिता नै म्हनै भेज्यौ, अर म्हैं पिता रै कारण जीवतौ हूं, त्यूं ही वो ई जिकौ म्हनै खावेला वो म्हारै कारण जीवतौ रैवैला। आ वोहीज रोटी है जिकौ सरग ऊं उतरी। थांरा बापदादों मन्‍ना खाई अर मर ग्या, पण जिकौ कोई आ रोटी खावेला, वो हमेसां जीवतौ रैला।” ऐ बातां उणै कफरनहूंम नगरी रै एक पराथना घर मांय उपदेस देते वेळा कही। यीसु रै चेलौ में ऊं घणौ नै ओ सुणनै कयौ, “आ कठोर बात है। इणनै कुण मांन सकै?” यीसु खुद नै ठाह पड़गी के खुद उणरा चेला ई आपस मांय कुड़कुड़ावे है, उणानै पूछयौ, “कांई थै इण बात ऊं परेसान हो? जे थै मिनख रै बेटे नै जठै वो पैला हो, उठै ऊपर जावतौ देखोला, तो कांई होवैला? परमेसर री आतमा तो जीवन दैवै है, सरीर री ताकत ऊं कीं फायदो नीं होवै। म्हैं थांनै जिकौ बातां केई है, वे आत्मिक जीवन दैवै है। पण थांरै मांय ऊं किता ऐड़ा लोग है जो विसवास कोनीं करै।” क्यूंकै यीसु पैला ऊं जांणतौ हो की जिकौ विसवास कोनीं करै, वे कुण है, अर कुण म्हनै पकड़ावैला। यीसु कयौ, “इण वास्तै म्हैं थांरै ऊं कयौ हो की जद तांई किणी नै पिता परमेसर री तरफ ऊं ओ वरदान नीं दियौ जावै जैड़ी तांई वो म्हारै खनै कोनीं आ सकै।” इण बात माथै वांरा घणा ई चेला नटगा अर उणरै पछै उणरै साथै कोनीं चालया। तद यीसु उण बारैह चेलौ ऊं कयौ, “कांई थै ई जाता रैणा चावौ हो?” समौन पतरस यीसु नै जबाब दियौ, “हे परभु, म्हैं कीण खनै जाओ? अनत जीवन री बातां तो थांरै इज खनै है। म्हौ विसवास करयौ अर जांण गिया की परमेसर रौ पवितर मिनख थूं इज है।” तद यीसु कयौ, “कांई म्हैं थांनै बारैह जणा नै नीं टाळिया? तौभी थांरै मांय ऊं एक मिनख सैतान है।” ओ उण समौन इस्‍करियोती रौ बेटौ यहूदा रै बारै मांय कैवै हा, क्यूंकै वो ही बारैह चेलौ मांय ऊं एक हो, वो यीसु नै धोखे ऊं पकड़ाणौ चावतौ हो। इण बातां रै पछै यीसु गलील मांय घुमता रिया, क्यूंकै यहूदी उणै मारणै रौ यत्‍न कर रिया हा, इण वास्तै वो यहूदियो में फिरणौ नीं चावतौ। यहूदियो रै झोपड़ियों रौ तैंवार नैड़ौ हो। इण वास्तै यीसु रा भाइयो यीसु नै कयौ, “अठै ऊं यहूदिया जा, की जिकौ कांम थूं करै है, वांनै थारा उठै रा चेला भी देख सकै। जिकौ नाम कमाणौ चावै है वो लुकनै कांम नीं करै। जद थै ऐड़ा कांम करौ ही हो, तो खुद नै दुनिया रै सांम्ही परगट कर दो।” क्यूंकै उणरा भाई ई उण माथै विसवास कोनीं करता हा। तो यीसु उणौ ऊं कयौ, “म्हारौ हाल वगत कोनीं आयौ, पण थांरै वास्तै सगळौ वगत है। जगत थांरै ऊं बैर नीं राख सकै, पण वो म्हारै ऊं बैर राखै है, क्यूंकै म्हैं उणारै खिलाफ में आ गवाई देवूं हूं, की उणौरा कांम भूंडा है। थै इण तैंवार में जाओ। म्हैं अबार इण तैंवार में कोनीं जावूं, क्यूंकै अजी तांई म्हारौ वगत पूरौ कोनीं होयौ।” यीसु ऐ बातां करया पछै गलील मांय इज रिया। पण जद उणरा भाई तैंवार में जाता रिया तो यीसु खुद ई, खुले में कोनीं पण छांनै ऊं तैंवार में ग्या। यहूदी नेता तैंवार मांय उणनै ओ कैन सौधण लाग्या, की “वो कठै है?” अर लोगां में उणरै बारै में छांनै-छांनै घणी बातां होय री ही। केई लोग कैवता हा, “वो भलौ मिनख है।” अर केई कैवता हा, “कोनीं, वो लोगां नै भोळा बणावै है।” पण उणरै बारै मांय खुलनै बात करणा रौ गाढ़ कीण मांय ई नीं हो, क्यूंकै वे यहूदी नेताओं ऊं डरता हा। तैंवार रा आधा दिन बीत गिया, पछै यीसु मिंदर रै मांय जायनै उपदेस दैणै लाग्या। यीसु री बातां सुणन यहूदी अचूम्बो करनै कयौ, “ओ कदैई सिख्यौ कोनीं। अर इणनै इतरौ ग्यांन कठै ऊं मिळियौ?” यीसु वांनै जबाब दियौ, “म्हारौ उपदेस म्हारौ कोनीं, पण म्हनै भेजणे वाळै रौ है। जे थांरै मांय ऊं कोई परमेसर री इछा पूरी करण री कोसीस करैला, तो वो जरुर जांण जावैला की वो उपदेस परमेसर री तरफ ऊं है, की म्हैं म्हारी तरफ ऊं कैवूं हूं। जिकौ खुद री तरफ ऊं कीं कैवै है, वो खुद री सौभा चावै है। पण जे भेजणे वाळै री सौभा चावै है वोहीज साचौ है, अर उण में कोई चाल नीं है। कांई मूसा थांनै व्यवस्था कोनीं दी? तौभी थांरै मांय ऊं कोई मूसा रा नियम ऊपर नीं चालै। थै म्हनै क्यूं मारणौ चावौ हो?” लोगां जबाब दियौ, “थांरै मांय तो भूत बड़ियोड़ो है। थनै कुण मारणौ चावै है?” यीसु उणौ नै जबाब दियौ, “म्हैं एक चमतकार रौ कांम करयौ, अर थै सगळा अचूम्बो करौ हो। मूसा थांनै खतने री आग्या दीनी है, इण कारण थै सब्त रै दिन मिनख रौ खतनो करौ हो। पण खतने री आग्या मूसा री तरफ ऊं कोनीं, बापदादों ऊं चाली आवै है। जे सब्त रै दिन मिनख रौ खतनो कियो जावै है ताकी मूसा रा नियम भंग नीं हो, तो थै म्हारै ऊं इण बात माथै क्यूं नाराज हो, की म्हैं सब्त रै दिन एक मिनख नै पूरी तरैह ऊं सावळ करयौ? ज्यूं-त्यूं न्याव मत करौ, पण सचाई ऊं न्याव करौ।” तद कीं मिनख जिकौ यरुसलेम रा रैवण वाळा हा आपस मांय कयौ, “कांई ओ वोहीज कोनीं है जिनै वे लोग मारणै री कोसीस कर रिया है? अजी तांई ओ अठै चोड़े धाड़ै उपदेस दैवै है अर वे लोग इणनै कीं कोनीं कैवै। कांई मुखियां साचांणी मांन लियौ, की ओहीज मसीह है? इणनै तो अपां जांणौ हो, की ओ कठै रौ है, पण मसीह जद आवैला, तो कोई नीं जांणैला की वो कठै रौ है।” तो यीसु मिंदर मांय जायनै उपदेस देते वेळा हेलौ करन कयौ, “थै कैवौ हो की थै म्हनै जांणौ हो, अर ओ भी जांणौ हो की म्हैं कठै रौ हूं। म्हैं म्हारी इछा ऊं कोनीं आयौ हूं पण म्हनै भेजणेवाळौ साचौ है। उणनै थै कोनीं जांणौ। म्हैं उणनै जांणूं हूं क्यूंकै म्हैं उणरी तरफ ऊं हूं अर वो इज म्हनै भेज्यौ है।” इण कारण उणनै पकड़णा री कोसीस करी, पण कोई उण माथै हाथ नीं घालियो, क्यूंकै हाल तांई उणरौ वो वगत कोनीं आयौ हो। तौभी घणाकर मिनख उण माथै विसवास करयौ। वे कैवै हा, “जद मसीह आवैला तो कांई वो इण ऊं घणा चमतकार दिखावैला?” जद फरीसियों नै लोगां ऊं उणरै बारै में ऐ चोरी-छिपे इण तरैह री चरचा सुणी, तो फरीसियों अर परधान याजकौ नै यीसु नै पकड़ण खातर मिंदर रा चोकीदारों नै भेजिया। इण कारण यीसु उणौनै कयौ, “म्हैं कीं घड़ी तांई वळै थांरै साथै हूं, पछै म्हैं भेजणे वाळै खनै जातौ रैवूंला। थै म्हनै सौधौला, पण म्हैं नीं मिळूं ला, अर जठै म्हैं हूं, उठै थै नीं आ सकौ।” यहूदी आपस मांय बातां करण लागा, “ओ कठै जावैला, की जठै अपां इण नै नीं सौध सकौ? कांई वो म्हौरै लोगां खनै जावैला, जिकौ यूनानियो में तितर-बितर होन रैवै है, अर यूनानियो नै ई उपदेस दैला? उणरी इण बात रौ कांई मतलब है, की ‘थै म्हनै सौधौला पण म्हैं नीं मिळूं ला,’ अर ‘जठै म्हैं हूं, उठै थै नीं आ सकौ’?” तैंवार रै आखरी दिन, जिकौ खास दिन है, यीसु ऊभौ होयनै हेलौ करन कयौ, “जे कोई तिरसां होवै तो म्हारै खनै आयनै पी ले। जे कोई म्हारै माथै विसवास करैला, ज्यूं पवितर सास्तर मांय लिख्योड़ौ है, ‘उणरै काळजै मांय ऊं जीवन रै जळ री नदियां चालनै लाग जावैला।’ ” उणै ओ वचन उण पवितर आतमा रै बारै में कयौ, जिकौ उण माथै विसवास करण वाळौ नै मिळैला, क्यूंकै आतमा अजी तांई उण लोगां माथै उतरी कोनीं ही, क्यूंकै यीसु अजी तांई आपरी महिमा में कोनीं पूगियौ हो। तो भीड़ में ऊं किणी किणी नै ऐ बातां सुणन कयौ, “साचांणी ओहीज वो भविसयदाता है।” दूजौ कयौ, “ओ मसीह है।” पण केई कयौ, “क्यूं? कांई मसीह गलील ऊं आवैला? कांई पवितर सास्तर मांय ओ कोनीं कयौ की मसीह दाऊद राजा रै वंस ऊं अर बेतलहम गांव ऊं आवैला, जठै दाऊद रैवतौ हो?” अतस इण वास्तै यीसु रै कारण लोगां मांय रौळो पड़ग्यौ। उण मांय ऊं कीं लोग उणनै पकड़णौ चावै हा, पण कोई उणरै हाथ नीं घालियो। तो मिंदर रा चोकीदार परधान याजकौ अर फरीसियों रै खनै आया, अर उणौनै उण ऊं कयौ, “थै उणनै क्यूं कोनीं लाया?” मिंदर रा चोकीदारों जबाब दियौ, “किणी मिनख कदैई ऐड़ी बातां कोनीं किनी।” फरीसियों उणौनै जबाब दियौ, “कांई थै ई भोळा बण ग्या? कांई म्हौरै सरदार या फरीसियों मांय ऊं किणी ई उण माथै विसवास करयौ है? पण ऐ लोग जिकौ नियम कायदा नीं जांणै, वो सापित है।” नीकुदेमुस, जिकौ पैला उणरै खनै आयौ हो अर उण में ऊं एक हो, उणनै कयौ, “कांई म्हांरी व्यवस्था किणी मिनख नै, जैड़ी तांई पैला उणरी सुणन जांण नीं ले, की वो कांई करै है, दोसी ठैरावै है?” उणौनै उण जबाब दियौ, “कांई थूं भी गलील रौ है? पवितर सास्तर मांय सौध अर देख, की गलील ऊं कोई भविसयदाता परगट नीं होणै रौ है।” तो सगळा आपो आपरै घरै गिया। पण यीसु जैतून रै भाखर माथै ग्या। संवार रौ वळै वो मिंदर आयौ, सगळा लोग उणरै खनै आया, अर वो बैठनै उणौ नै उपदेस दैणै लागौ। उणीज वेळा सास्तरी अर फरीसी एक लुगाई नै पकड़नै लाया जिकौ व्यभिचार करती पकड़ी ही, अर उणनै भीड़ रै बीच ऊभी करनै यीसु नै कयौ, “हे गुरु, आ लुगाई व्यभिचार करती पकड़ी हो। मूसा रै कायदा मांय म्हौ नै आग्या दीनी है की ऐड़ी लुगाईयां नै भाठा ठोकनै मार देणी चाहीजै। सो थूं इण लुगाई रै बारै में कांई कैवै?” उणौ यीसु नै परखणै रै सारू आ बात कही ताकी उण ऊपर दोस लगाणै रै वास्तै कोई बात मिळै। पण यीसु झुकनै आंगळी ऊं धरती माथै लिखणै लाग्यौ। जद वे उण ऊं पूछणै लाग्या, तो वो सीधौ होयनै उणानै कयौ, “थौरे मे ऊं जिकौ कदैई पाप नीं करयौ, वोहीज उणनै पैला भाटो मारै।” अर वळै झुकनै जमीन माथै आंगळी ऊं लिखणै लाग्यौ। पण वे ओ सुणन मोटा ऊं लगायनै छोटौ तांई, सैंग एक एक कर उठै ऊं निकळ गिया, अर यीसु ऐकलौ रिया, अर वां लुगाई जिकौ बीच में उभी ही रैय गी। तद यीसु सीधौ होयनै उण ऊं कयौ, “हे नारी, वे कठै ग्या? कांई किणी थनै डंड री आग्या कोनीं दीनी?” वां कयौ, “हे मालिक, किणी कोनीं।” तद यीसु कयौ, “म्हैं ई थनै डंड री आग्या कोनीं दूं। जा, अर वळै पाप मती करजै।” यीसु वळै लोगां नै कयौ, “जगत रौ उजाळौ म्हैं हूं, जिकौ म्हारै लारै हो जावैला, वो अंधारै मांय कोनीं चालै, पण जीवन रौ उजाळौ पावैला।” फरीसियों उणनै कयौ, “थूं थांरी गवाई खुद ही दैवै, इण वास्तै थारी गवाई ठीक कोनीं है।” यीसु उणानै जबाब दियौ, “भली ई म्हैं म्हारी गवाई खुद दूं, तौभी म्हारी गवाई ठीक है, क्यूंकै म्हनै ठाह है म्हैं कठै ऊं आयौ अर कठै जावूं हूं। पण थै नीं जांणौ की म्हैं कठै ऊं आयौ हूं या कठै जावूंला। थै लोग मिनखां री रीत ऊं न्याव करौ हो। पण म्हैं किणरौ ई न्याव नीं करूं। पण जे म्हैं न्याव करूं भी, तो म्हारौ न्याव साचौ है, क्यूंकै म्हैं ऐकलौ कोनीं, पण म्हैं अर म्हारौ पिता है जिकौ म्हनै भेज्यौ है। थांरी कायदा मांय भी लिख्योड़ौ है, की दो जणौ री मिळन गवाई ठीक होवै है, एक गवाई म्हैं खुद हूं, अर दूजा म्हारा पिता गवाई दैवै जिकौ म्हनै भेज्यौ है।” उणौ यीसु ऊं कयौ, “थांरौ पिता कठै है?” यीसु जबाब दियौ, “थै म्हनै अर म्हारै पिता नै कोनीं जांणौ हो। जे म्हनै जांणता तो म्हारै पिता नै भी जांणता।” ऐ बातां यीसु नै मिंदर री दांन पेटी रै खनै उपदेस देते वेळा कही, अर किणी कोनीं उणनै पकड़यौ, क्यूंकै उणरौ वगत अजी तांई कोनीं आयौ हो। यीसु वळै उणौ नै कयौ, “म्हैं जावूं हूं, अर थै म्हनै सोधौला अर खुद रै पाप में मरोला। जठै म्हैं जावूं हूं, उठै थै नीं आ सकौ।” इण कारण यहूदियो कयौ, “कांई वो आपघात तो कोनीं करै, जो कैवै है, ‘जठै म्हैं जावूं उठै थै नीं आ सकौ’?” यीसु उणौ नै कयौ, “थै धरती माथला हो, म्हैं उपरलो हूं। थै इण संसार रा हो, म्हैं संसार रौ कोनीं हूं। इण वास्तै म्हैं थांनै कयौ, की थै खुद रा पापों रै कारण मरोला, क्यूंकै जठै तांई थै भरोसौ नीं करौला की वो म्हैं इज हूं, तो थै थोरै पापों में मरोला।” उणौ यीसु नै कयौ, “थूं कुण है?” यीसु उणौ नै कयौ, “वोहीज हूं जिकौ सरूआत ऊं थांनै केवतो आयौ हूं। म्हनै थांरै बाबत घणौ ई कैवणौ है अर न्याव करणौ है, पण म्हनै भेजण वाळौ साचौ है, अर जिकौ ई म्हैं उण ऊं सुण्यौ वो इज जगत ऊं कैवूं।” पण वे तौभी नीं समझया की वे आपरै पिता रै बारै में कैवै है। तद यीसु कयौ, “जद थै मिनख रै बेटे नै ऊंचाई माथै चढ़ावोला, तो थांनै ठाह पड़ैला के वो म्हैं इज हूं, अर म्हैं अपणै आप ऊं कीं नीं करूं, पण ज्यूं म्हनै पिता सिखायौ, त्यूं ही ऐ बातां कैवूं हूं। अर जिकौ म्हनै भेज्यौ है वो म्हारै साथै है, वो म्हनै ऐकलौ कोनीं छोड़यौ, क्यूंकै म्हैं हमेसां वो इज कांम करूं जिण ऊं वो खुस होवै है।” तद घणा कर मिनख उणरी ऐ बातां सुणन उणरै माथै विसवास करयौ। यीसु यहूदी लोगां नै जिकौ उणारै माथै भरोसौ करयौ उणानै कयौ, “जे थै म्हारी सिकसा माथै चालौला, तो थै म्हारा पका चेला हो। अर थै सचाई नै जांणौ ला, अर सचाई थांनै आजाद करैला।” उणौ यीसु नै जबाब दियौ, “म्हैं तो अबराहम रै वंस रा हां, अर कदैई किणी रा गुलाम कोनीं रिया। फिर थूं कीकर कैवै है की, ‘थै आजाद हो जावोला’?” यीसु उणौ नै जबाब दियौ, “म्हैं थांनै साची-साची कैवूं हूं की जिकौ कोई पाप करै है, वो पाप रौ गुलाम है। अर गुलाम रौ मालिक रै घर में हमेसां रैणौ कोनीं होवै, पण बेटे रौ हमेसां रैणौ होवै है। इण वास्तै जे बेटौ थांनै आजाद करैला, तो थै साचांणी रा आजाद हो जावोला। म्हनै ठाह है की थै अबराहम रै वंस रा हो, तौभी म्हारौ वचन नै थै थांरै हिया मांय नीं उतारिया, इण वास्तै थै म्हनै मारणौ चावौ हो। म्हैं वोहीज करूं, जिकौ म्हारै पिता रै उठै देख्यौ है, अर थै वो इज करता रैवौ हो जिकौ ई थै थांरै पिता ऊं सुण्यौ हो।” उणौ यीसु नै जबाब दियौ, “म्होरा पिता तो अबराहम है।” यीसु उणौ नै कयौ, “जे थै अबराहम री औळाद होवता, तो अबराहम रै जैड़ा कांम करता। पण अबै थै म्हनै मारणौ चावौ हो, जिण थांनै वो साचौ वचन बतायौ जिकौ परमेसर ऊं सुण्यौ हो। पण ऐड़ौ तो अबराहम कोनीं करयौ हो। थै थोरै पिता रै जैड़ा कांम करौ हो।” उणौ यीसु नै कयौ, “म्हौ व्यभिचार ऊं कोनीं जनमिया, म्हांरौ एक पिता है अरथ परमेसर।” यीसु उणौ नै कयौ, “जद परमेसर थौरा पिता व्‍हैता, तो थै म्हारै ऊं परैम राखता, क्यूंकै म्हैं परमेसर री तरफ ऊं आयौ हूं। म्हैं अठै खुद री मरजी ऊं नीं आयौ हूं, पण उणै म्हनै भेज्यौ है। थै म्हारी बात क्यूं नीं समझौ? इण वास्तै की थै म्हारौ वचन सुणणौ ही नीं चावौ। थोरा पिता सैतान हो, अर उण जैड़ा भूंडा कांम करणा थांनै चौखा लागै। वो सरूआत ऊं मिनखमार अर सचाई ऊं घिरणा करण वाळौ हो, क्यूंकै सचाई उण में है ई कोनीं। जणै वो झूठौ बोले, तो आपरै स्वभाव ऊं इज बोले है, क्यूंकै वो झूठौ है अर झूठ रौ बाप है। पण म्हैं साचौ बोलूं, इण वास्तै थै म्हारौ विसवास कोनीं करौ। थारै मांय ऊं कोई ऐड़ौ है जिकौ म्हारै माथै एक ई पाप रौ दोस लगा सकै? तो पछै म्हैं थांनै साची बात कैवूं तो थै म्हारै माथै विसवास क्यूं नीं करौ? जिकौ परमेसर री तरफ ऊं होवै है, वो परमेसर री बातां सुणै है। अर थै इण खातर नीं सुणौ की थै परमेसर री तरफ ऊं कोनीं हो।” ओ सुणन यहूदियो यीसु नै कयौ, “कांई म्हौ ठीक कोनीं कैवौ की थूं सामरी है, अर थांरै मांय दुस्ट आतमा है?” यीसु जबाब दियौ, “म्हारै मांय कोई दुस्ट आतमा कोनीं, पण म्हैं म्हारै पिता रौ आदर करूं हूं, अर थै म्हारौ अनादर करौ हो। म्हैं म्हारी महिमा नीं चावूं हूं, पण हां एक तो है जिकौ म्हारी महिमा चावै है अर न्याव करै है। म्हैं थांनै साची बात कैवूं, की जिकौ कोई मिनख म्हारै वचन माथै चालै ला, तो वो अनत काल तांई मौत नै नीं देखेला।” यहूदियो यीसु नै कयौ, “अबै म्हौ नै पकी ठाह पड़गी के थारै मांय दुस्ट आतमा है। अबराहम मर गियौ, अर भविसयदाता भी मर गिया, अर थूं कैवै है, ‘जिकौ कोई म्हारा वचन माथै चालै ला, तो वो अनत काल तांई मौत रौ स्वाद नीं चाखेला।’ म्हांरौ पिता अबराहम तो मर गियौ। कांई थूं उण ऊं बढ़ौ है? अर कांई थूं उण भविसयदाता ऊं बढ़ौ है जिकौ मर गिया? थूं अपणै आप नै कांई ठैरावै है?” तद यीसु उणौ नै कयौ, “जे म्हैं म्हारी महिमा करूं तो फालतू है। पण म्हारी महिमा करणै वाळौ म्हारौ पिता है, जिणनै थै कैवौ हो की, ‘वो म्हांरौ परमेसर है।’ अर थै तो उण नै जांणौ कोनीं, पण म्हैं जांणूं हूं। अर जे म्हैं कैवूं के म्हैं वांनै नीं जांणूं हूं, तो म्हैं ई थांरै ज्यूं झूठौ पड़ जावूं। पण म्हैं उण नै जांणूं, अर उणरै वचन ऊपर चालूं हूं। थौरा पिता अबराहम म्हारा दिन देखणै री आसा ऊं घणा खुस हा, अर उणै देख्यां अर आंणंद मनायौ।” यहूदियो यीसु नै कयौ, “थूं हाल तांई पचास साल रौ नीं होयौ, तो थै अबराहम नै कीकर देख्यौ है?” यीसु कयौ, “आ साव साची बात है की अबराहम रै जनमिया ऊं पैली म्हैं हूं।” इण बात माथै वे उणनै मारण खातर भाटा हाथ मांय लिया, पण यीसु लुकनै मिंदर रै चौक ऊं निकळ गिया। यीसु जद मारग में जातौ हो, तो उणै एक मिनख नै देख्यौ जिकौ जनम ऊं आंधौ हो। अर उणरै चेलौ उणनै पूछयौ, “हे गुरु, कीण पाप कियो हो की ओ मिनख आंधौ जनमियौ, कांई खुद रै कारण या इणरै मां-बाप रै कारण?” यीसु जबाब दियौ, “ना तो खुद रा पाप, अर ना ही इणरै माईतां रा पाप रै कारण औ आंधौ जनमियौ, पण ओ इण खातर व्‍हियौ के परमेसर रा कांम इण मांय परगट होवै। परमेसर जिकौ म्हनै भेज्यौ है, अपांनै उणरौ कांम दिन ई दिन मांय पूरौ करणौ जरुरी है, वो रात आणवाळी है जिणमे कोई कांम नीं कर सकै। जैड़ी तांई म्हैं इण जगत मांय हूं, म्हैं इण जगत रौ चांदणौ हूं।” इतौ केन उणै जमीं माथै थूकयौ, अर उण थूक मे ऊं माटी छांणी, अर वो माटी उण आंधे री आंख्यां माथै लगाय नै उणनै कयौ, “जायनै सीलोह रै कुंड मांय धोय ले।” (सीलोह सबद रौ अरथ भेज्यौड़ौ है।) वो उण जगा माथै गियौ अर आंख्यां धौई, अर पाछौ देखतोड़ौ आयौ। तद उणरा आड़ै पाड़ै रा अर दूजा, जिकौ उणनै भीख मांगतो देख्यौ हो, आपस मांय कैवण लाग्या, “कांई ओ वोहीज कोनीं, जिकौ बैठौ भीख मांगया करतौ हो?” केई जणा कयौ, “ओ वोहीज है,” अर केई जणा कयौ, “कोनीं, पण उणरै जैड़ौ है,” पण उण खुद कयौ, “म्हैं वोहीज हूं।” तद लोगां उणनै पूछयौ, “तो थूं कीकर देखणै लागौ?” उणै जबाब दियौ, “यीसु नाम रौ मिनख माटी छांणी अर म्हारी आंख्यां माथै लगायनै म्हनै कयौ, ‘सीलोह कुंड मांय जायनै धौय ले।’ म्हैं वो इज करयौ अर देखणै लागौ।” उणौ नै उण ऊं पूछयौ, “अबै वो कठै है?” उणै जबाब दियौ, “म्हनै कोनीं ठाह।” तद वे उण मिनख नै जिकौ पैला आंधौ हो फरीसियों खनै लेन गिया। जिण दिन यीसु माटी छांणी अर उणरी आंख्यां माथै लगाई अर उणनै दिखण लागौ, वो सब्त रौ दिन हो। तद फरीसियों उणनै पूछयौ, “थांरी आंख्यां कीण रीत ऊं देखण लागी?” उणै उणौनै कयौ, “यीसु माटी लगाई, पछै म्हैं धोय ली, अर अबै देखूं हूं।” उणारै मांय ऊं केई फरीसी कैवण लागा, “ओ मिनख परमेसर री तरफ ऊं कोनीं, क्यूंकै वो तो सब्त रै दिन ई कांम करै।” दूजै लोगां कयौ, “पापी मिनख इतरा चमतकार कीकर कर सकै?” इण खातर उणारै आपस मांय फूट पड़गी। तो फरीसी उण मिनख नै जिकौ आंधौ हो पाछौ पूछयौ, “जिकौ मिनख थांरी आंख्यां खोली है, थूं उणरै बारै में कांई कैवै?” उण कयौ, “वो भविसयदाता है।” पण यहूदी अधिकारियों नै अजी तांई भरोसौ नीं व्‍हियौ की वो आंधौ हो अर अबै देखण लागौ, इण खातर वे उणरा माईतां नै बुलाया। उणौ नै पूछयौ, “कांई ओ थौरो बेटौ है? कांई ओ आंधौ जनमिया हो? तो अबै ओ कीकर देख सकै?” उणरा माईतां जबाब दियौ, “म्हौ नै ठाह है की ओ म्हौरौ बेटौ है, अर ओ आंधौ जनमिया हो, पण म्हौ नै ठाह कोनीं के कांई व्‍हियौ अर अबै ओ कीकर देखण लागौ, अर नीं ओ ठाह है की कीण इणरी आंख्यां खोली। ओ खुद समझदार है इणनै इज पूछ लौ, वो आपरै बारै में खुद बता दैला।” आ बात उणरा मां बाप इण खातर कैई, क्यूंकै वे यहूदियो ऊं डरता हां, क्यूंकै यहूदी नेताओं एको कर लियौ हो, के जिकौ ई यीसु नै मसीह कैवैला, उणनै पराथना घर ऊं निकाळ दियौ जावैला। इण कारण उणरै मां-बाप कयौ, “वो खुद समझदार है उणनै इज पूछ लौ।” इण वास्तै वे दूजी बार उण मिनख नै बुलायौ जिकौ आंधौ हो, अर उणनै कयौ, “परमेसर री महिमा कर। क्यूंकै म्हौ जांणौ हो की वो मिनख पापी है।” उणै जबाब दियौ, “म्हनै ठाह कोनीं है की वो पापी है या कोनीं, पण म्हनै इतौ ठाह है की म्हैं पैला आंधौ हो, अर अबै म्हैं देख सकूं।” उणौ उणनै भळै पूछयौ, “उण थारै साथै कांई करयौ? अर कीकर थांरी आंख्यां सावळ करी?” उण उणौ नै कयौ, “देखौ सा! म्हैं एक बार बताय दियौ हूं, थै सुण्यौ कोनीं कांई? अबै दूजी बार क्यूं सुणणौ चावौ हो? कांई थै भी उणरा चेला बणणा चावौ हो?” तद वे उणनै भलौ-भूंडौ बोलया, “थूं इज उणरौ चेलौ है, म्हौ तो मूसा रा चेला हां। म्हौ नै ठाह है की परमेसर मूसा ऊं बातां करी, पण इण मिनख रौ ठाह कोनीं की ओ कठै रौ है।” उण, उणौ नै जबाब दियौ, “अरै आ तो इचरज री बात है की थै उणनै जांणौ कोनीं की वो कठै रौ है, तौभी उणै म्हारी आंख्यां सावळ कर दी है। अपां जांणौ हो, की परमेसर पापियो री कोनीं सुणै, पण वांरी सुणै जिकौ कोई परमेसर रौ भगत हो, अर उणरी इछा ऊपर चालै है। जगत रै सरूआत ऊं लेयनै आज तांई कदैई सुण्यौ कोनीं के किणी जनम ऊं आंधा री आंख्यां खोली ही। जे ओ मिनख परमेसर री तरफ ऊं नीं होवतो, तो कदैई ऐड़ा कांम नीं कर सकतौ।” उणौ उणनै जबाब दियौ, “थूं तो पको पाप मांय जनमियोड़ौ है, अर थूं म्हौ नै कांई सिखावै है?” अर उणनै उठै ऊं बारै निकाळ दियौ। जद यीसु आ बात सुणी की उणनै बारै निकाळ दियौ है, अर जद उण ऊं मिळियां तो कयौ, की “कांई थूं मिनख रै बेटे माथै विसवास करै है?” उणै जबाब दियौ, “हे मालिक, वो कुण है, की म्हैं उण माथै विसवास करूं?” यीसु उणनै कयौ, “थै उणानै देख्यां भी है, अर जिकौ थारै ऊं बातां कर रिया है ओ वोहीज है।” उणै कयौ, “हे परभु, म्हैं विसवास करूं।” अर वो यीसु नै गोडा टेकनै नमण कियो। तद यीसु कयौ, “म्हैं इण जगत मांय न्याव करणै वास्तै आयौ हूं, ताकी जिकौ आंधा है वो देखे, अर जिकौ देखे है वे आंधा व्‍है जावै।” जिकौ फरीसी उणौरै साथै हा उणौ ऐ बातां सुणन उण ऊं कयौ, “कांई म्हौ भी आंधा हो?” यीसु उणौ नै कयौ, “जे थै आंधा होता तो पापी नीं ठैरता, पण अबै थै कैवौ की, ‘म्हौ देखौ हो,’ इण वास्तै थौरो पाप बण्यौ रैवै है।” उणरै पछै यीसु कयौ, “म्हैं थांनै साची-साची बात कहूं, की जे कोई फाटक ऊं लरड़ियां रै बाड़ा मांय नीं वड़ै अर बाड़ कूदनै आवै तो वो चोर या डाकू है। पण जिकौ फाटक ऊं आवै वो लरड़ियां रौ गवाळौ है। उणरै खातर द्धारपाल फाटक खोल दैवै है, अर लरड़ियां उण रौ हेलौ सुणै है। अर वो आपरी लरड़ियां रौ नाम लेयनै बुलावै अर उणानै बारै लेयनै जावै। अर जद वो आपरी सगळी लरड़ियां नै बारै निकाळ ले, तो उणारै आगै आगै चालै, अर लरड़ियां उणरै लारै लारै वहीर व्‍है जावै, क्यूंकै वे उणरी आवाज नै पिछांणै। वे किणी असैंधा रै लारै नीं जावै, पण उण ऊं आगी दौड़ेला, क्यूंकै वे परायौ री आवाज कोनीं पिछांणै।” यीसु उणौ नै आ कथा कही, पण वे कोनीं समझया की ओ कांई कैणौ चावै है। तो यीसु उणौ नै वळै कयौ, “म्हैं थांनै साची-साची कहूं, की लरड़ियां रौ फाटक म्हैं इज हूं। जितरा ई म्हारै ऊं पैली आया वे सगळा चोर अर डाकू हा। पण लरड़ियां उणौरी कोनीं सुणी। फाटक म्हैं हूं। जे कोई म्हारी तरफ ऊं फाटक मांय परवेस करै, तो बचायो जावैला, अर मांय बारै आवतौ जावतौ रैवैला अर चारौ चरतौ रैला। चोर किणी और कांम रै सारू कोनीं पण कैवल चोरी करणै अर घात करणै अर नास करणै आवै है। म्हैं इण वास्तै आयौ की वे जीवन पावै, बल्कि पूरण जीवन पावै। “बड़िया गवाळौ म्हैं हूं। बड़िया गवाळौ आपरी लरड़ियां रै खातर खुद रौ जीव दे दैवै। मजूर जिकौ नीं तो गवाळौ है अर नीं लरड़ियां रौ मालिक है, वो सियाळियां नै आवता देखनै लरड़ियां नै छोड़नै दौड़ जावै है, अर सियाळियां लरड़ियां नै पकड़े अर तितर-बितर कर दैवै है। वो इण वास्तै दौड़ जावै की वो मजूर है, अर उणनै लरड़ियां री चिंता कोनीं। “बड़िया गवाळौ म्हैं हूं। म्हैं म्हारी लरड़ियां नै ओळखूं हूं, अर म्हारी लरड़ियां म्हनै ओळखे है। ज्यूं पिता म्हनै ओळखे, अर म्हैं पिता नै ओळखूं। अर म्हारी लरड़ियां रै वास्तै म्हारौ जीव देवूं हूं। म्हारी भळै लरड़ियां है, जिकौ इण बाड़ा री कोनीं। म्हनै उणौ नै भी लाणी जरुरी है। अर वे म्हारौ हेलौ सुणैला, तो एक ई ऐवड़ अर एक ई गवाळौ होवैला। “पिता म्हारै ऊं इण वास्तै हेत राखै, की म्हैं म्हारौ प्रांण देवूं हूं, की उणै पाछौ ले सकूं। म्हैं म्हारी मरजी ऊं प्रांण देवूं कोई म्हारै खनै ऊं खोसे कोनीं। क्यूंकै म्हनै म्हारी इछा मुजब प्रांण देवणा रौ अर पाछा लेवणा रौ हक है। ओ हक म्हारै पिता परमेसर ऊं म्हनै मिळियौ है।” इण बातां रै कारण यहूदियो मांय एक बार वळै फूट पड़गी। उण में ऊं घणाकर मिनखां कयौ, “इणनै भूत लागोड़ो है, अर ओ तो गेलो है। ऐड़ा मिनख री बातां क्यूं सुणौ हो?” दूजौ कयौ, “ऐ उपदेस भूत लागोड़े मिनख रा कोनीं है। कांई भूत लागोड़ो मिनख आंधौ री आंख्यां खोल सकै है?” सियाळा री रूत ही। यरुसलेम मांय मिंदर रौ स्थापना तैंवार मनाय रिया हा। अर यीसु मिंदर में सुलैमान रै ओसारे मांय घुम रिया हा। जद यहूदी उणरै च्यांरूमेर भेळा होया अर पूछयौ, “थूं म्हौरै मन नै कद तांई तकलीफ में राखैला? जे थूं मसीह है, तो म्हौ नै साफ-साफ बताय दे।” यीसु उणौ नै जबाब दियौ, “म्हैं थांनै पैला ई कैय दियौ, पण थै विसवास ई कोनीं करौ। जिकौ इचरज रा कांम म्हैं पिता रै नाम ऊं करूं, वे इज म्हारा गवाई है। पण थै म्हारौ विसवास कोनीं करौ, क्यूंकै म्हारी लरड़ियां मांय ऊं कोनीं हो। म्हारी लरड़ियां म्हारौ हेलौ सुणै है, अर म्हैं वांनै ओळखूं, अर वे म्हारै लारै वहीर व्‍है जावै। म्हैं वांनै अनत जीवन देवूं हूं, अर वे कदैई नीं मरेला। वांनै म्हारै हाथ ऊं कदैई कोई नीं खोस सकै। क्यूंकै म्हारा पिता, वांनै म्हनै सूपिया है, अर वे सैंगा ऊं मोटा सामरथी है, इण वास्तै वांनै कोई पिता रै हाथ ऊं खोस नीं सकै। म्हैं अर म्हारा पिता एक हां।” तद यहूदी नेता वांनै मारण खातर भाटा हाथ मांय लिया। यीसु कयौ, “म्हैं परमेसर री तरफ ऊं घणा ई भला कांम करिया। वांरै मांय ऊं कीण कांम रै वास्तै थै म्हनै भाटा ठोकणा चावौ हो?” यहूदी नेता उणनै जबाब दियौ, “चौखा कांम रै खातर म्हैं थांनै भाटा कोनीं ठोकौ, पण इण खातर के थूं मिनख होयनै अपणै आप नै परमेसर कैवै, अर आ परमेसर री निंदा है।” यीसु जबाब दियौ, “कांई थोरै कायदा मांय कोनीं लिख्योड़ौ है की, परमेसर कयौ, ‘थै सगळा ईस्वर जैड़ा हो’? जे पवितर सास्तर वांनै ईस्वर जैड़ा कैवै जिण खनै परमेसर रौ संदेस पूगियो (अर पवितर सास्तर री बातां झूठ कोनीं हो सकै), तो म्हैं जिणनै पिता नै पवितर ठैरान जगत में भेज्यौ है, थै कैवौ हो की थूं परमेसर री निंदा करै है, इण वास्तै की म्हैं कयौ, ‘म्हैं परमेसर रौ बेटौ हूं’। जे म्हैं म्हारै पिता परमेसर रौ कांम नीं करूं, तो म्हारौ विसवास मती करौ। पण जे म्हैं करूं हूं, तो भलै ई म्हारै माथै भरोसौ मती करौ, पण उण कांमां माथै तो भरोसौ करौ, जिण ऊं थै जांण अर समझ सकौ के पिता म्हारै मांय अर म्हैं पिता मांय हूं।” यहूदी वळै वांनै पकड़णा री कोसीस करी पण वे हाथ ऊं निकळ ग्या। वे यरदन नदी रै उण पार गिया, जठै यूहन्‍ना पैली बतिस्मो दियौ करतौ, अर वे उठै इज रिया, अर घणा ई लोग उणरै खनै आयनै कैता हां, “यूहन्‍ना कोई चमतकार रा कांम कोनीं करिया, पण जिकौ ई यूहन्‍ना इण मिनख रै बाबत में कियो हो, वो सगळौ साचौ हो।” अर उठै घणा जणा यीसु माथै विसवास करयौ। बैतनिय्याह गांव रै मांय लाजर नाम रौ एक मिनख हो, जिकौ बीमार हो। वो उठै आपरी बेनां मरियम अर मारथा रै साथै रैवतौ हो। आ वां इज मरियम ही जिकौ घणा मूंगा अन्तर नै परभु यीसु रै पग माथै चढ़ायनै वांरै पगां नै आपरा बालों ऊं पुंछिया हा। उणरौ इज भाई लाजर बीमार हो। इण वास्तै उणरी बेनां यीसु खनै खबर भेजी, अर कयौ, “हे परभु, जिण ऊं थै हेत राखौ हो, वो बीमार है।” आ बात सुणनै यीसु कयौ, “इण बीमारी रौ मकसद मौत नीं है, पण परमेसर री महिमा सारू है, की इणरै दवारा परमेसर रै बेटा री महिमा व्‍है।” अर यीसु मारथा अर उणरी बेन मरियम अर लाजर ऊं परैम राखतौ हो। ओ ठाह पड़ियौ, की वो बीमार है, तो जठै हा, उठै दो दिन वळै रैगा। इणरै पछै उणै आपरा चेलौ नै कयौ, “आओ, अपां वळै यहूदिया हालौ।” चेलौ यीसु नै कयौ, “हे गुरु, अबार तो यहूदी नेता थांरै भाटा ठोकणा चावता हा, अर थूं वळै उठै जावै है?” यीसु जबाब दियौ, “कांई दिन रौ उजाळौ बारैह घण्‍टा कोनीं व्‍है? जे कोई दिन रै उजाळै में चालै, तो वो ठोकर नीं खावै, क्यूंकै इण जगत रौ उजाळौ देखे है। पण कोई रात रौ चालै, वो ठोकर खावै, क्यूंकै उण वेळा चांदणौ कोनीं व्‍है।” यीसु ऐ सैंग बातां कही, अर इणरै पछै उणौ नै कैवण लागौ, की “म्हारौ बेली लाजर सूग्यौ है, पण म्हैं उणनै जगाणै जावूं हूं।” तद चेलौ यीसु नै कयौ, “हे परभु, जे वो सूग्यौ है, तो सावळ व्‍है जावैला।” यीसु रौ मतलब लाजर री मौत ऊं हो, पण चेलौ समझयो के वो ऊंग में सूतौ आराम करण रौ कयौ है। तद यीसु उणौ नै साफ-साफ कयौ, की “लाजर मर गियौ है। अर म्हनै खुसी है के थौरे कारण म्हैं उठै नीं हो इण वास्तै के थै म्हारै माथै विसवास करौ, पण अबै आओ, अपां उणरै खनै हालौ।” तद थोमा, जिकौ “जुड़वा” कहीजै है, आपरै साथी चेलौ ऊं कयौ, “आओ, अपां ई इणरै साथै मरण चालौ।” उठै पूगिया पछै यीसु नै ठाह पड़ियौ के लाजर नै तो भाखर रै खोदी कबर मांय राखै नै ई च्यार दिन व्‍हैगा। बैतनिय्याह, यरुसलेम ऊं लगोलग दो मील आगौ हो। घणा यहूदी लोग मरियम अर मारथा खनै उणरै भाई री मौत रै कारण हीमत बंधावणै रै खातर आयोड़ा हा। जद मारथा नै ठाह पड़ियौ के यीसु आ रिया है, तो वां उणौ ऊं भेट करणै गी, पण मरियम घर मांय इज बैठी रीं। मारथा यीसु नै कयौ, “हे परभु, जो थै अठै होता, तो म्हारौ भाई कदैई नीं मरतो। अर हाल तांई म्हैं जांणूं हूं, की जिकौ कीं थै परमेसर ऊं मांगोला, परमेसर थांनै दैला।” यीसु उणनै कयौ, “थारौ भाई जी उठैला।” मारथा यीसु नै कयौ, “म्हैं जांणूं हूं, की आखरी दिन में पुनरूत्थान रै दिन वो जी उठैला।” यीसु वां नै कयौ, “पुनरूत्थान अर जीवन म्हैं इज हूं, जिकौ कोई म्हारै माथै भरोसौ राखै है वो जे मर भी जावैला, तौभी जीवैला, अर जिकौ जीवता है, अर म्हारै माथै विसवास करै है, वे अनतकाल तांई नीं मरेला। कांई थूं इण बात माथै भरोसौ करै है?” वां यीसु नै कयौ, “हां परभु, म्हैं तो भरोसौ कर लियौ के परमेसर रा बेटा मसीह जिकौ जगत मांय आवण वाळा हा, वो थै इज हो।” ओ कैन वां जाती री, अर आपरी बेन मरियम नै छांनै ऊं बुलायनै कयौ, “गुरुजी अठैज है अर वे थनै बुलाय रिया हां।” जणै वां आ बात सुणी, वा हटके उठनै ऊभी होई अर यीसु ऊं मिलनै गी। यीसु हाल तांई गांव रै बारै उण जगा माथै इज हा जठै मारथा वांरै ऊं मिळी ही। तद यहूदी लोग जिकौ इणरै घर में हा, अर उणनै दिलासो दैणै आया हां, ओ देखनै की मरियम तुरत उठनै बारै गी है तो ओ समझया के वां कबर माथै रोवण जावै है, इण वास्तै वे ई उणरै लारै वहीर व्‍हैगा। जद मरियम उठै पूगी जठै यीसु हां, वां वांनै देख्यां अर वांरै पगां पड़ी अर कयौ, “हे परभु, जे थै अठै व्‍हैता तो म्हारौ भाई नीं मरतो।” जणै यीसु उणनै अर यहूदियो नै रोवता देखिया, तो आतमा मांय घणौ मौळौ पड़ियौ अर दुखी होयौ, अर यीसु कयौ, “थै उणनै कीं ठोड़ राख्यौ?” वे कयौ, “हे परभु, चालनै देख ले।” यीसु रै आंख्यां मांय आंसू आया। तो यहूदी कयौ, “देखौ ओ उण ऊं कितौ परैम राखतौ हो।” पण उण में ऊं कईक जणा कयौ, “ओ मिनख जिकौ आंधा नै आंख्यां दी, वो उणनै मरणा ऊं क्यूं नीं रोक सकयौ?” यीसु हाल तांई मन मांय घणा दुखी होयनै कबर माथै आया। वा एक गुफा ही, जिणरै माथै एक मोटो भाटो मेलियोड़ो हो। यीसु कयौ, “भाठै नै आगौ लौ।” पण मुड़दा री बेन मारथा कयौ, “हे परभु, अबार तो उण मांय ऊं भूंडी बास आवैला, क्यूंकै उणनै मरिया नै ई च्यार दिन व्‍हैगा।” यीसु उणौनै कयौ, “पण म्हैं थनै कोनीं कियो हो के, जे थूं विसवास करैला, तो परमेसर री महिमा नै देखेला?” तो उणौ उण भाटा नै आगौ लियौ, तद यीसु सरग सांम्ही देख्यौ अर कयौ, “हे पिता, म्हैं थांरौ धन्यवाद करूं हूं की थै म्हारी सुण ली। अर म्हैं जांणूं हूं, की थै हमेसां म्हारी सुणौ हो, पण जे भीड़ आड़ै-पाड़ै ऊभी ही, इण खातर म्हैं ओ कयौ, के अठै ऊभौड़ा सगळा लोग विसवास करै, की थै म्हनै भेज्यौ हो।” पछै उणै जोर ऊं हेलौ पाड़ियौ, “हे लाजर बारै निकळ आव।” अर लाजर बारै आय ग्या। वो कफन ऊं लपेटयोड़ौ हो, अर उणरै माथा ऊपर एक अंगोछौ बांधियोड़ो हो। यीसु उणौनै कयौ, “इणरै कफन नै खोलो अर इणनै जावण दो।” घणाकर यहूदी लोग जिकौ मरियम रै साथै हा, जणै वे यीसु रौ ओ कांम देख्यौ, तो उण माथै विसवास करयौ। पण केई जणा फरीसियों खनै जायनै यीसु रै कांम रा समाचार दिया। तो परधान याजकौ अर फरीसियों इण माथै सलाह-सूत करण खातर एक सभा बुलाई। वे आपस मांय पूछयौ, “अपां कांई करां हो? ओ तो मिनख साचांणी मांय घणा चमतकार रा कांम करै है। जे अपां इणनै यूं ई छोड़ दियौ, तो सैंग इण माथै विसवास करण लाग जावैला, अर रोमी आयनै अपां रौ पवितर मिंदर अर अपांरै देस नै नास कर दैला।” वांरै मांय काइफा नाम रौ एक मिनख जिकौ उण साल रौ महायाजक हो, कयौ, “थांनै कीं ठाह कोनीं है, अर नीं समझौ के सगळौ रै खातर एक मिनख रौ मरणौ ठीक है, जिण ऊं के पूरौ देस नास नीं होवैला।” आ बात उणै आपरै मन ऊं कोनीं कही, पण उण साल रौ महायाजक होयनै भविसयवांणी करी, के यीसु पूरै यहूदी लोगां रै खातर मरेला। वो कैवल इजरायल देस रै वास्तै ही नीं, पण जगत मांय परमेसर री भटकयोड़ी संतान नै एक कर दे। इण वास्तै उण दिन ऊं वे यीसु नै मारणै री योजना बणाणै लाग्या। उण वगत ऊं यीसु यहूदियो रै बीच मांय चौड़े-धाड़ै कोनीं फिरीयो। पछै वे मरूस्थल रै खनै इफ्राईम नाम रै नगरी रै मांय गिया, अर आपरै चेलौ रै साथै उठैज रैवण लागा। यहूदियो रौ फसह रौ तैंवार नैड़ौ हो, अर घणाकर लोग फसह ऊं पैला इज यरुसलेम आ गिया की वे अपणै आप नै यहूदी रीति ऊं पवितर कर सकै। वे यीसु नै सौधण लागा अर वे मिंदर रै चौक मे मिळता अर एक-दूजै नै पूछता, “थै कांई सोचो हो? कांई यीसु तैंवार में कोनीं आवैला?” उणीज वेळा परधान याजकौ अर फरीसियों चौड़े धाड़ै आ घोसणा कराई के, जिकौ ई यीसु नै देखे वो हाथोहाथ म्हौ नै खबर दैवै, ताकी म्हौ यीसु नै पकड़ सकौ। फसह तैंवार ऊं छह दिन पैला इज यीसु बैतनिय्याह में आया, जठै वो लाजर नै मरयोड़ौ मांय ऊं जीवतौ करयौ हो। उठै उणौ यीसु रै वास्तै खाणौ तैयार किनो, अर मारथा सेवा करण मांय लागोड़ी ही, अर लाजर उण में ऊं एक हो, जिकौ यीसु रै साथै खाणौ जीमण वास्तै बैठा हां। तद मरियम बरतन मांय चौखौ अर घणौ मूंगो जटामासी रौ अन्तर लेयनै यीसु रै पगां माथै चढ़ायौ, अर आपरा बालों ऊं पगां नै पूंछियां। अर अन्तर री सुगंध ऊं पूरौ घर खुसबुदार हो गियौ। पण उणरै चेलौ में ऊं यहूदा इस्‍करियोती नाम रौ एक चेलौ जे यीसु नै पकड़ाणै वाळौ हो, कैवण लागौ, “ओ अन्तर तीन सौ चांदी रै सिक्‍को में बेचनै इण अन्तर री कीमत गरीब लोगां रै मांय क्यूं नीं बांट दी?” साचांणी मांय उणनै गरीबो री फीकर कोनीं ही। वो तो एक चोर हो। अर सैंग चेलौ री रूपिया री थैली उण खनै इज रैवती। घणी बार आपरै कांम रै वास्तै वो उण मांय ऊं रूपिया काढ़ देतो। यीसु कयौ, “इणनै कीं नीं कैवणौ। आ म्हनै गाड़े जावण री तैयारी खातर ओ करयौ है। क्यूंकै गरीब तो थोरै साथै हमेसां रैवै है, पण म्हैं हमेसां थांरै साथै कोनीं रैवूंला।” जद यहूदियो री घणी भीड़ जांण लियौ की वो उठै है, तो वे नीं कैवल यीसु रै कारण आया पण इण वास्तै की लाजर नै देखे, जिणनै यीसु मरयोड़ौ मांय ऊं जीवतौ करयौ हो। तद परधान याजकौ लाजर नै ई मारणै रौ मतो कर लियौ। क्यूंकै उणरै कारण घणा यहूदी जाता रिया, अर यीसु माथै विसवास करयौ। दूजै दिन घणा लोग जिकौ तैंवार में आया हा, उणौ ओ सुणयौ, की यीसु यरुसलेम में आय रिया है। इण वास्तै वे खजूर री डाळियो ली, अर यीसु ऊं मिलण खातर निकळिया। अर पुकारनै लागा, “होसना! धन्य है इजरायल रा राजा, जिकौ परभु रै नाम ऊं आवै है।” जद यीसु नै गधी रौ एक बछेरियां मिळियां, तो वो उण माथै बैठ गिया, ज्यूं धरम सास्तर मांय लिख्योड़ौ हो, “हे सियोन री परजा डरौ मती, क्यूंकै थौरो राजा गधी रै बछेरियां माथै घणी नरमाई ऊं बैठनै थांरै खनै आय रिया है।” उणरै चेलौ आ बात पैला नीं समझया हा, पण जद यीसु री महिमा परगट होई तो उणनै याद आई की ऐ बातां उणरै बारै में लिख्योड़ी, अर लोगां नै उण ऊं इण तरैह रौ व्यवहार करयौ हो। तद भीड़ रै उण लोगां गवाई दी, जिकौ उण वेळा उणरै साथै हा जद लाजर नै कबर मांय ऊं बुलायनै मरयोड़ौ मांय ऊं जीवतौ करयौ। इण कारण लोग उण ऊं मिलनै आया हा क्यूंकै वे इण अनोखे चमतकार रै बाबत सुण्यौ हो। तद फरीसी आपस मांय बात करी के “अपां तो हार ग्या। देखौ पूरी दुनिया उणरै लारै व्‍हैगी।” जिकौ लोग उण तैंवार में आराधना करणै आया हा उणमे ऊं केई यूनानी हा। वे फिलिप्पुस नै जिकौ गलील रै बैतसैदा रौ रैवण वाळौ हो उण ऊं मिळियौ अर कयौ, “भाई सा म्हौ नै यीसु ऊं मिलनौ है।” फिलिप्पुस आयनै अद्रियास ऊं कयौ, तद अद्रियास अर फिलिप्पुस जायनै यीसु नै कयौ। इण कारण यीसु उणौ नै कयौ, “वो वगत आयग्यौ है की म्हैं मिनख रै बेटे री महिमा होवै। म्हैं थौरे ऊं साची बात कहूं, की जठै तांई गेहूंं रौ दाणौ जमीं माथै पड़न मर नीं जावै, उठै तांई वो ऐकलौ रैवै है, पण जद वो मर जावै है, तो घणा फळ लावै है। जे इण संसार मांय कोई आपरै जीव ऊं परैम राखैला तो वो उणनै गुमांय दैला। अर जे इण जगत में आपरै प्रांण ऊं परैम नीं राखैला, वो अनत जीवन रै सारू उणरी रकसा करैला। जे कोई म्हारी सेवा करणी चावै, तो वो म्हारै लारै वहीर व्‍है जावै, अर जठै म्हैं हूं, उठै म्हारा चेला भी होवैला। जे कोई म्हारी सेवा करै, तो पिता परमेसर उणरौ आदर करैला। “अबै म्हारौ मन घणौ उदास है। इण वास्तै अबै म्हैं कांई कहूं, ‘हे पिता, म्हनै इण घड़ी ऊं बचाय ले’? नीं, क्यूंकै म्हैं इण खातर इण घड़ी पूगयौ हूं। हे पिता, आपरै नाम री महिमा हो।” तद आ सरग ऊं आवाज आई, “म्हैं म्हारी महिमा दिखाई है, अर वळै दिखाऊंला।” जद जे लोग ऊभा सुण रिया हा, उणौ कयौ “बादळो गरजयो।” दूजौ कयौ, “कोई सरगदूत उण ऊं बोलियौ।” इण कारण यीसु कयौ, “ओ सबद म्हारै वास्तै कोनीं, पण थौरे भलाई वास्तै आयौ है। अबै इण जगत रौ न्याव होवै है, अबै इण जगत रै राजा सैतान नै बारै निकाळ दियौ जावैला। अर जद म्हैं धरती माथै ऊं उठायौ जाऊंला, तद हरैक मिनख रौ ध्यांन म्हारी तरफ खींचुला।” ऐड़ी बात कैन उणै ओ परगट कर दियौ, की उणरी मौत कीकर होवैला। इण कारण लोगां उणनै कयौ, “म्हौ कायदा री आ बात सुणी है, की मसीह हमेसां रैवैला, फिर थूं ओ कीकर कैवै है, की मिनख रै बेटे नै ऊंचै माथै चढ़ायौ जाणौ जरुरी है? ओ मिनख रौ बेटौ कुण है?” यीसु उणौ नै कयौ, “चांदणौ थोड़ी वेळा तांई थांरै बीच मांय है। जठै तांई चांदणौ थांरै भेळौ है तद तांई चालता रौ, ऐड़ौ नीं व्‍है के अंधारौ थांनै घेर ले। जिकौ अंधारा मांय चालै उणनै ठाह कोनीं की वो कठीनै जावै है। जठै तांई चांदणौ थोरै साथै है, चांदणै माथै विसवास राखौ, ताकी थै चांदणै री औळाद बणौ।” ऐ बातां कैन यीसु उठै ऊं जाता रिया अर अपणै आप नै वांरै ऊं लूकाय दिया। वांरी आंख्यां रै सांम्ही इता चमतकार करिया, पछै ई उणौ नै उण माथै विसवास कोनीं करयौ। ताकी यसायाह भविसयदाता रौ वचन पूरौ होवै जिकौ उणै कयौ हो, “हे परभु, म्हारै समाचार रौ कीण विसवास करयौ है? आपरा ताकतवर हाथ कीण माथै परगट होया है?” इण खातर वे भरोसौ नीं कर सकै, क्यूंकै यसायाह ओ भी कयौ है, “परमेसर वांरी आंख्यां नै आंधी, अर मन नै कठोर कर दियौ है, कठैई ऐड़ौ नीं व्‍है के वे आपरी आंख्यां ऊं देखे, अर मन ऊं समझै, अर फिरै, पछै म्हैं वांनै सावळ करूं।” यसायाह ऐ बातां इण वास्तै कही, की उणै यीसु री महिमा नै देखी, अर उणै उणरै बारै में बातां किनी। तो ई मुखियां में ऊं घणौ नै उण माथै विसवास करयौ, पण फरीसियों रै कारण खुले में नीं मानता हा, की ऐड़ौ नीं होवै की वे पराथना घर मांय ऊं निकाळ दे। क्यूंकै मिनखौ री तरफ ऊं सौभा उणौ नै परमेसर री तरफ ऊं सौभा ऊं करती घणी चौखी लागती ही। यीसु हेलौ करनै कयौ, “जे कोई म्हारै माथै विसवास करै, वो म्हारै माथै ही नीं, पण म्हनै भेजणे वाळै माथै विसवास करै है। अर जिकौ म्हनै देखे है, वो म्हनै भेजणे वाळै नै देखे है। म्हैं जगत मांय चांदणौ होयनै आयौ हूं, ताकी जे कोई म्हारै माथै विसवास करै, वो अंधारै मांय नीं रैवैला। “जे कोई म्हारी बातां सुणन नीं मांनै, तो म्हैं उणनै दोसी कोनीं ठैराऊं, क्यूंकै म्हैं जगत नै दोसी ठैराणै कोनीं, पण जगत रौ उद्धार करणै आयौ हूं। जिकौ म्हारौ कदर नीं राखै अर म्हारौ वचन नीं सुणै उणनै दोसी ठैराणै वाळौ तो एक है, जिकौ वचन म्हैं कयौ, वे इज आखरी रै दिन मांय उणनै दोसी ठैरावैला। क्यूंकै म्हैं म्हारी इछा ऊं बातां कोनीं कही, पण पिता जिकौ म्हनै भेज्यौ है उणीज म्हनै आग्या दीनी है, की कांई कांई कहूं, अर कांई कांई बोलूं। अर म्हैं जांणूं हूं, की उणरी आग्या अनत जीवन री तरफ ले जावै है। इण खातर म्हैं जे कीं बोलूं हूं, वो जैड़ौ पिता म्हारै ऊं कयौ है वेड़ौ इज बोलूं हूं।” फसह रै तैंवार ऊं पैली, जद यीसु जांण गिया, के अबै इण संसार नै छोड़नै पिता रै खनै जावण री घड़ी आयगी है, वे आपरा लोगां ऊं जिकौ जगत में हा, जैड़ौ परैम वो राखतौ हो, आखरी तांई वेड़ौ इज परैम राखतौ रियौ। अर जद सिंझ्या खाणै रै वगत सैतान समौन रै बेटौ यहूदा इस्‍करियोती रै मन मांय विचार घाल दियौ हो की यीसु नै धोखे ऊं पकड़ाणौ। यीसु आ बात जांणता हा के, “पिता परमेसर सगळौ म्हारै हाथ में कर दियौ है अर म्हैं परमेसर रै खनै ऊं आयौ हूं, अर परमेसर रै खनै जावूं हूं।” इण वास्तै खाणै माथै ऊं उठनै आपरा ऊपरला चोळौ उतारनै, अंगोछौ लेयनै आपरी कमर बांधी। तद एक बरतन मांय पांणी लेयनै चेलौ रा पग धोया अर जिण अंगोछे ऊं आपरी कमर बांधी ही उण ऊं पोंछणै लागौ। जद यीसु समौन पतरस रै खनै आयौ, तो पतरस वांनै कयौ, “हे परभु, कांई थै म्हारा पग धोवो हो?” यीसु उणौ नै जबाब दियौ, “म्हैं जिकौ अबार करूं हूं, थै उणै नीं जांणौ, पण इणरै पछै समझौ ला।” पतरस यीसु ऊं कयौ, “म्हैं थांनै म्हारा पग कदैई नीं धोवण देवूंला।” ओ सुणन यीसु जबाब दियौ, “पण जे म्हैं थांरा पग नीं धोया तो थांरै साथै म्हारौ कोई रीसतो कोनीं।” समौन पतरस यीसु नै कयौ, “हे परभु, तो म्हारा पग ही नीं, बल्कि हाथ अर माथो ई धो दो।” यीसु उणनै कयौ, “जिकौ स्‍नान कर लियौ है, उणनै सुद्ध होवण खातर सिरफ पग धोवण री जरुत है। पण वो एकदम सुद्ध है, अर थै सुद्ध हो, पण सगळा कोनीं।” वो तो खुद नै पकड़ाणै वाळै नै जांणतौ हो। इण वास्तै उणै कयौ, “थै सगळा रै सगळा सुद्ध कोनीं।” जद वो वांरा पग धोया पछै वे आपरौ चोळौ पेरियो अर पाछा हेंठे बैठ गा। तो उणौ नै कैवण लागा, “कांई थै समझया, म्हैं थांरै साथै कांई करयौ? थै म्हनै गुरु अर परभु कैवौ हो, अर ठीक इज कैवौ हो, क्यूंकै म्हैं वोहीज हूं। जे म्हैं गुरु अर परभु होन थोरा पग धो सकूं, तो थांनै ई एक-दूजै रा पग जरुर धोवणा चाहीजै। क्यूंकै म्हैं थांनै एक तरीको देखा दियौ, की ज्यूं म्हैं थोरै साथै कियो, थै भी त्यूं दूजा रै साथै किया करौ। म्हैं थांनै साची कहूं, की नौकर कदैई मालिक ऊं बढ़ौ नीं व्‍है। अर नीं भेज्यौड़ौ अपणै भेजणे वाळै ऊं। थै तो ऐ बातां समझौ हो, जे इण माथै चालौ, तो धन्य हो। “म्हैं थांरै सगळा रै बारै में कोनीं कहूं, जिणनै म्हैं चुण लियौ है, उणै म्हैं जांणूं हूं। पण ओ इण वास्तै हो, की पवितर सास्तर रौ ओ वचन पूरौ हो, ‘जिकौ म्हारी रोटी खावै है, वो इज म्हारै माथै लात उठाई।’ “म्हैं थांनै ऐ बातां इण खातर बताऊं के जद ऐ बातां पूरी व्‍है जावैला तद थै म्हारै माथै भरोसौ करौ के म्हैं वोहीज हूं। म्हैं थांरै ऊं साची कहूं, के जिकौ ई म्हनै भेजणे वाळै नै स्वीकार करै है, वो म्हनै स्वीकार करै है। अर जे म्हनै स्वीकार करै है, वो म्हनै भेजणे वाळै नै स्वीकार करै है।” ऐ बातां कैन यीसु मन मांय घणा दुखी व्‍हिया। अर आ गवाई दीनी, “म्हैं थांनै साची कहूं, की थांरै मांय ऊं एक म्हनै धोखे ऊं पकड़ावैला।” सगळा ई चेला अचूम्बे ऊं एक दूजै रौ मूंडौ देखण लागा, के ओ कीण रै बारै में कैवै है। सगळा चेलौ रै में ऊं एक चेलौ जिकौ लाडलौ कैलातो हो, यीसु रै नजीक बैठौ हो। तद समौन पतरस वांरै सांम्ही इछारौ करनै पूछयौ, “पूछौ तो, ओ किणरै बारै में कैवै है?” तद उणै उणी तरैह यीसु री तरफ झुकनै पूछयौ, “हे परभु, वो कुण है?” यीसु जबाब दियौ, “जिणनै म्हैं ओ रोटी रौ टुकड़ों डूबोयनै दूंला वोहीज है।” अर वो टुकड़ों डूबोयनै समौन रै बेटे यहूदा इस्‍करियोती नै दियौ। अर टुकड़ों लेवतौ ई सैतान उण मांय घुस ग्यौ। तद यीसु उणनै कयौ, “थनै जिकौ ई करणौ है, तुरत कर।” पण खाणौ जीमण वाळा मांय ऊं कोई नीं समझयो की यीसु उणनै ओ क्यूं कयौ। केई जणा समझया के यहूदा खनै रूपिया री थैली है, इण खातर यीसु कैवणौ चावै है, के जे कई तैंवार खातर जिकौ ई लावणो है लिया की पछै गरीबो नै जिकौ देवणो है देय दे। तद यहूदा रोटी रौ टुकड़ों लेयनै झट उठै ऊं बारै जातौ रियौ, अर ओ रात रौ वगत हो। जद यहूदा उठै ऊं बारै ग्यौ तो यीसु कयौ, “अबै म्हैं मिनख रै बेटे री महिमा होई, अर परमेसर री महिमा म्हारै मांय होई है। तो परमेसर भी आपरै में म्हारी महिमा करैला, बल्कि तुरत करैला। “हे म्हारै टाबरां, म्हैं थोड़ीक देर तांई वळै थांरै खनै हूं। पछै थै म्हनै सौधौला, अर ज्यूं म्हैं यहूदियो ऊं कयौ हो, के जठै म्हैं जावूं हूं उठै थै नीं आ सकौ, व्यौंही म्हैं थांनै भी कैवूं हूं। म्हैं थांनै एक नवी आग्या देवूं हूं, की एक-दूजै ऊं परैम राखौ। ज्यूं म्हैं थांरै ऊं परैम राखियौ है, त्यूं इज थै भी एक-दूजै ऊं परैम राखौ। जे आपस में परैम राखोला तो इण ऊं सगळा जांणैला, की थै म्हारा चेला हो।” समौन पतरस उणनै कयौ, “हे परभु, थै कठै जाओ हो?” यीसु जबाब दियौ, “जठै म्हैं जावूं हूं, उठै थूं अबार म्हारै लारै नीं आ सकै। पण इणरै पछै म्हारै लारै आवैला।” पतरस उणनै कयौ, “हे परभु, अबार म्हैं थांरै लारै क्यूं नीं आ सकूं? म्हैं तो थांरै खातर म्हारौ जीव ई दे दूंला।” यीसु जबाब दियौ, “कांई थूं म्हारै खातर अपणौ प्रांण दैला? म्हैं थनै साची कहूं की कुकड़ा री बांग दैणै ऊं पैली थूं म्हनै ओळखणै ऊं तीन बार मना करैला।” यीसु चेलौ ऊं कयौ, “थौरो मन दुखी नीं होवै। परमेसर माथै विसवास राखौ अर म्हारै माथै ई विसवास राखौ। म्हारै पिता परमेसर रै घर मांय रैवण खातर घणी जगा है, जे उठै नीं व्‍हैती तो म्हैं थांनै पैला इज कैय देतो। क्यूंकै म्हैं थोरै वास्तै उठै जगा तैयार करणै जावूं हूं। अर जद म्हैं जायनै थोरै वास्तै जगा तैयार करूं, तो पछै आयनै थांनै अपणै साथै एठै ऊं ले जाऊंला, की जठै म्हैं रैवूं उठै थै भी रैवौ। अर जठै म्हैं जावूं उठै रौ मारग थै जांणौ हो।” थोमा उणनै कयौ, “हे परभु, म्हौ कोनीं जांणौ, की थै कठै जा रिया हो। तो मारग कीकर जांणौ?” यीसु वांनै कयौ, “मारग, सचाई अर जीवन म्हैं इज हूं। म्हारै उपरात पिता खनै कोई नीं जा सकै। जे थै म्हनै जांणता होता, तो म्हारै पिता नै भी जांणता। अर अबै उणनै जांणौ हो, अर उणनै देख्यां भी हो।” फिलिप्पुस उणनै कयौ, “हे परभु, म्हौ नै पिता रा दरसण कराय दो, ओ ही म्हौरै लिए घणौ है।” यीसु जबाब दियौ, “हे फिलिप्पुस, म्हैं इतै दिन ऊं थांरै साथै हूं, अर कांई थूं म्हनै कोनीं जांणै? जिकौ म्हनै देख्यौ वो पिता नै देख्यौ। पछै थूं कीकर कैवै के, ‘म्हौ नै पिता रा दरसण कराय दो’? कांई थांनै भरोसौ कोनीं, के म्हैं पिता मांय हूं, अर पिता म्हारै मांय है? ऐ बातां जिकौ म्हैं थोरै ऊं कहूं, म्हैं म्हारी तरफ ऊं नीं कहूं, पण पिता म्हारै मांय रैन कांम करै है। म्हारौ विसवास करौ, के म्हैं पिता मांय हूं, अर पिता म्हारै मांय है, नीं तो कांमां रै कारण ई म्हारौ विसवास करौ। “म्हैं साची साची कहूं, की जिकौ म्हारै माथै विसवास राखै, ऐ कांम जे म्हैं करूं हूं, वो भी करैला। बल्कि इण ऊं मोटा मोटा कांम करैला, क्यूंकै म्हैं पिता रै खनै जावूं हूं। अर जे कीं थै म्हारै नाम ऊं मांगोला, वोहीज म्हैं करूंला, की बेटे रै दवारा पिता री महिमा होवै। जिकौ ई म्हारै नाम ऊं मांगोला, तो म्हैं वो करूंला। “जे थै म्हारै ऊं परैम राखौ हो, तो म्हारी आग्याओं नै मांनौला। म्हैं पिता ऊं अरज करूंला, अर वे थांनै एक सहायक देवेला, जिकौ थांरै हमेसां साथै रैवैला। वो सत्य री आतमा है, जिणनै संसार स्वीकार नीं कर सकै, क्यूंकै वो उणनै नीं तो देखे अर नीं जांणै। थै उणै जांणौ हो, क्यूंकै वो थोरै साथै रैवै, अर वो थोरै में रैवास करै है। “म्हैं थांनै नमाईता नीं छोड़ूला। म्हैं थांरै खनै आऊं हूं। अर थोड़ीक जेज वळै है, पछै संसार म्हनै नीं देखेला, पण थै म्हनै देखोला। इण वास्तै की म्हैं जीवतौ हूं, थै भी जीवता रैवौला। उण दिन थै जांणौला, की म्हैं पिता रै मांय हूं, अर थै म्हारै मांय, अर म्हैं थांरै मांय हूं। जिण रै खनै म्हारी आग्याओं है, अर वो उणनै मांनै है, वो म्हारै ऊं परैम राखै है। अर जिकौ म्हारै ऊं परैम राखै है, उण ऊं म्हारौ पिता परैम राखैला, अर म्हैं उण ऊं परैम राखूंला, अर अपणै आप नै उणरै माथै परगट करूंला।” उण यहूदा जिकौ इस्‍करियोती कोनीं हो, उण कयौ, “हे परभु, थै थांनै सिरफ म्हौरै माथै इज परगट क्यूं करौला, अर पूरा संसार माथै क्यूं नीं?” यीसु उणौनै जबाब दियौ, “जिकौ कोई म्हारै ऊं परैम राखैला तो वो म्हारै वचन नै मांनैला, अर म्हारौ पिता ई उण ऊं परैम राखैला, अर म्हौ उणरै खनै आवौला, अर वांरै साथै रैवौला। जिकौ म्हारै ऊं परैम नीं राखै, वो म्हारौ वचन नीं मांनै। अर जे वचन थै सुणौ हो, वो म्हारौ कोनीं बल्कि पिता रौ है, जिण म्हनै भेज्यौ। “ऐ बातां म्हैं थांरै साथै रैवतै थका थोरै ऊं कही। पण सहायक पवितर आतमा जिणनै पिता परमेसर, म्हारै नाम ऊं भेजेला, वो थांनै सगळी बातां सिखावेला, अर म्हारी सगळी बातां थांनै याद आवैला, जिकौ म्हैं थोरै ऊं केई है। “म्हैं थांनै सानति देवूं, म्हारी सानति थांनै देवूं। ज्यूं संसार दैवै है, म्हैं थांनै नीं देवूं। थौरो मन नीं दुखी होवै अर नीं डरै। थै सुण्यौ की म्हैं थांरै ऊं कयौ, ‘म्हैं जावूं हूं, अर पाछौ थांरै खनै आऊंला।’ जे थै म्हारै ऊं परैम राखौ, तो थै इण बात ऊं आंणंद मनावता के म्हैं पिता खनै जा रियौ हूं, क्यूंकै पिता म्हारै ऊं महान है। म्हैं ऐ सगळी बातां व्‍हैणा ऊं पैली थांनै बताय दी, ताकी जद ऐ बातां पूरी व्‍है, तद थै म्हारै माथै विसवास करौ। “म्हैं अबै थांरै ऊं घणी ताळ तांई बातां नीं करूंला, क्यूंकै इण संसार रौ राजा सैतान आवै है, उणरौ म्हारै माथै कीं हक नीं है। पण ओ इण वास्तै होवै है की संसार जांणै है की म्हैं पिता ऊं परैम राखूं हूं, अर जिण तरैह पिता म्हनै आग्या दी, म्हैं व्यौंही करूं। “उठो, एठै ऊं चालौ।” “साची अंगूरो री वेल म्हैं हूं, अर म्हारा पिता किसान है। जिकौ डाळी म्हारै मांय है, अर वा नीं फळै, तो वे उणनै काट दैवै है, अर जिकौ फळै वो उणनै सांगै ताकी वो सुद्ध हो वळै फळ लावै। इण वचन रै खातर जिकौ म्हैं थांनै पैला ऊं कयौ सुद्ध हो। थै म्हारै मांय बणिया रैवौ, अर म्हैं थांरै मांय। ज्यूं कोई डाळी वेल मांय नीं बणयोड़ी रै, तो अपणै आप ऊं नीं फळ सकै। व्यौंही थै भी जे म्हारै मांय नीं बणिया रौला तो नीं फळ सकौ। “म्हैं वेल हूं, थै डाळियो हो। जिकौ ई म्हारै मांय बण्यौ रैवैला अर म्हैं उण मांय वो अणूंतौ फळै ला। क्यूंकै म्हारै ऊं न्यारा होयनै थै कीं नीं कर सकौ। जे कोई म्हारै ऊं न्यारौ व्‍है, तो उणनै बेकार डाळी रै ज्यूं फेंक दियौ जावैला, अर वो सूख जावै। जद लोग उणनै भेळौ करनै लाय में नोख दैवै, अर वे बळ जावै है। पण जे थै म्हारै मांय बणिया रैवौ अर म्हारै वचन नै मांनौला, तो जिकौ चावौ वो मांगो अर वो थांरै वास्तै हो जावैला। म्हारै पिता री महिमा इण ऊं होवै है, के थै घणाहारा फळजौ, तो इज थै म्हारा चेला कहीजौ ला। “ज्यूं पिता म्हारै ऊं परैम राख्यौ, ऐड़ौ इज परैम म्हैं थांरै ऊं राख्यौ। अर म्हारा परैम मांय बण्या रैवौ। जे थै म्हारी आग्याओं नै मांनौला, तो म्हारै परैम मांय बण्या रैवौला, ज्यूं के म्हैं पिता री आग्याओं नै मानूं, अर उणारै परैम मांय बण्यौ रैवूं हूं। “म्हैं थांनै ऐ बातां इण खातर केई है, की म्हारौ आंणंद थांरै मांय बण्यौ रैवै, अर थौरो आंणंद पूरौ व्‍है जाय। म्हारी आग्या आ है, की ज्यूं म्हैं थोरै ऊं परैम राख्यौ, व्यौंही ई थै ई एक दूजा ऊं परैम राखौ। इण ऊं मोटो परैम किणी रौ कोनीं, की कोई आपरै बेली रै खातर आपरौ जीव दैवै। “जिकौ आग्या म्हैं थांनै देवूं, जे मांनौ तो थै म्हारा बेली हो। अबै ऊं म्हैं थांनै दास कोनीं कैवूंला, क्यूंकै दास कोनीं जांणै, की उणरौ मालिक कांई करै है। पण म्हैं थनै बेली कयौ है, क्यूंकै म्हैं जिकौ बातां अपणै पिता ऊं सुणी, वे सगळी थनै बताय दीनी है। “थै म्हनै कोनीं चुणियो पण म्हैं थांनै चुणीया अर थांनै नियुक्त करिया के जायनै चौखौ फळ लावौ जिकौ थौरो फळ हमेसां बणियो रैवै, की थै म्हारै नाम ऊं जिकौ ई कीं पिता ऊं मांगो, वो थांनै दैला। म्हैं थांनै ऐ आग्या देवूं की थै एक-दूजै ऊं परैम राखौ। “जे संसार थांरै ऊं बैर राखै तो याद राखजौ की वे थांरै ऊं पैली उणै म्हारै ऊं बैर राख्यौ। जे थै संसार रा व्‍हैता, तो संसार अपणौ ऊं परैम राखतौ। पण इण कारण की थै संसार रा कोनीं, मतलब की म्हैं थांनै संसार मांय ऊं चुण लिया, इण वास्तै संसार थांरै ऊं बैर राखै है। “जिकौ बात म्हैं थांरै ऊं कही ही, ‘दास आपरै मालिक ऊं बढ़ौ कोनीं होवै,’ उण बात नै याद राखौ। जे उणौ म्हनै तंग करयौ, तो थांनै ई तंग करैला। जे उणौ म्हारी बात मांनी, तो थोरी भी मांनैला। पण ऐ सगळा म्हारै नाम रै कारण थांरै साथै करैला, क्यूंकै वे म्हनै भेजणे वाळै नै कोनीं जांणै। जे म्हैं कोनीं आवतौ अर उणौ ऊं बातां नीं करतौ, तो वे गुनेगार नीं व्‍हैता। पण अबै उणौरै खनै खुद रा पाप ऊं बचणै रौ कोई बहानो कोनीं है। जे कोई म्हारै ऊं बैर राखै, तो वो म्हारै पिता ऊं ई बैर राखै। जे म्हैं इता मोटा कांम उणौरै सांम्ही नीं करतौ तो ऐ पापी नीं ठैरता। पण अबै तो उणौनै उण कांमां नै देख दिया, तद भी वे म्हारै ऊं अर म्हारै पिता ऊं बैर राखै है। ओ इण वास्तै होयौ, की वो वचन पूरौ हो, जे उणरी व्यवस्था मांय लिख्योड़ौ हो, ‘वे बेमतळब म्हारै ऊं बैर राख्यौ।’ “पण जद एक मददगार आवैला, जिणनै म्हैं थांरै खनै पिता री तरफ ऊं भेजूंला, अरथ सत्य री आतमा जिकौ पिता री तरफ ऊं निकळै है, जिकौ म्हारी गवाई दैला। अर थै ई म्हारा गवाई हो क्यूंकै थै सरूआत ऊं म्हारै साथै रिया हो।” “ऐ बातां म्हैं थोरै ऊं इण वास्तै केई की थै ठोकर नीं खाओ। वे थांनै पराथना घर मांय ऊं निकाळ दैला, वो घड़ी आवण वाळी है, जे कोई थांनै मार नोखेला ओ समझेला की, ‘म्हैं परमेसर री सेवा करूं हूं’। ऐड़ौ वे इण वास्तै करैला की उणौ नीं तो पिता नै जांण्या अर नीं म्हनै जांणै है। पण ऐ बातां म्हैं थोरै ऊं इण वास्तै केई, की जद उणरौ वगत आवैला तो थांनै याद आई, की म्हैं थांनै पैला ऊं कैह दियौ हो। “म्हैं थोरै ऊं ऐ सगळी बातां पैली कोनीं बताई क्यूंकै म्हैं थांरै साथै हो। “अबै म्हैं अपणै भेजणे वाळै रै खनै जावूं हूं, अर थांरै मांय ऊं कोई म्हारै ऊं नीं पूछै, ‘थूं कठै जावै है?’ पण म्हैं जिकौ ऐ बातां थोरै ऊं केई है, इण वास्तै थौरो मन दुख ऊं भरग्यौ। तो ई म्हैं थांनै साची कैवूं हूं, के म्हारौ जावणौ थांरै सारू बड़िया है, क्यूंकै म्हैं नीं जावूं तो वो मददगार थोरै खनै नीं आवैला। पण जे म्हैं जावूंला, तो उणनै थोरै खनै भेज दूंला। वो आयनै संसार रौ पाप अर धारमिकता अर न्याव रै बारै में निरूतर करैला। अर पाप रै बारै में इण खातर के वे म्हारै माथै विसवास कोनीं करै। अर धारमिकता रै बारै में बतावैला, क्यूंकै म्हैं पिता खनै जावूं, अर थै म्हनै पाछौ कोनीं देखोला। अर न्याव रै बारै में बतावैला, क्यूंकै संसार रौ राजा सैतान दोसी ठैरायौ ग्यौ है। “म्हैं थोरै ऊं वळै घणी बातां कैवणी चावूं, पण थै अबार उणनै चैन नीं कर सकौ। पण जद सत्य री आतमा आवैला, तो थांनै सगळी सचाई रौ मारग बतावैला, क्यूंकै वो आपरी तरफ ऊं नीं कैवैला, पण जिकौ कीं सुणैला, वोहीज कैवैला, अर आवण वाळी बातां थांनै बतावैला। वो म्हारी महिमा करैला, क्यूंकै वो म्हारी बातां में ऊं लेयनै थांनै बतावैला। जो कीं पिता रौ है, वो सगळौ म्हारौ है। इण वास्तै म्हैं कयौ, की पवितर आतमा म्हारी बातां में ऊं लेयनै थांनै बतावैला। “थोड़ी जेज पछै थै म्हनै कोनीं देखोला, पण उणरै थोड़ीक जेज पछै थै म्हनै देखोला।” उणरा केई चेलौ आपस में कयौ, “औ कांई बातां करै, ‘थोड़ी जेज पछै थै म्हनै कोनीं देखोला, पण उणरै थोड़ीक जेज पछै थै म्हनै देखोला,’ अर ‘औ इण वास्तै की म्हैं पिता रै खनै जावूं हूं’?” इण वास्तै वे कैवता हा, “आ ‘थोड़ीक जेज’ जिकौ वो कैवै है, कांई बात है? अपां कोनीं जांणौ के वो कांई कैवै।” यीसु समझ गिया के, “वे म्हारै ऊं सवाल पूछणौ चावै।” इण वास्तै उणौ नै कयौ, “कांई थै आपस में म्हारी इण बात रै बारै में पूछताछ करौ हो, ‘थोड़ीक जेज पछै थै म्हनै कोनीं देखोला, पण उणरै थोड़ीक जेज पछै थै म्हनै देखोला’? म्हैं थांनै साची कैवूं हूं, की थै रोवोला अर विलाप करौला, पण संसार आंणंद मनावेला। थै सौग करौला, पण थौरो सौग आंणंद में बदळ जावैला। औ एक जापायती लुगाई रै टाबर जनम रै ज्यूं है, जद वां टाबर जनमे तद उणनै घणी तकलीफ अर दरद व्‍है। पण जणै वा नवो जनमियोड़ा टाबर नै जगत मांय आयोड़ौ देखे, तो वा आपरा सैंग दरद नै भुलनै खुसी मनावै। इण तरैह अबार थांनै भी दुख है, पण म्हैं थोरै ऊं पाछौ मिळूंला अर थौरो मन आंणंद ऊं भर जावैला, अर थौरो आंणंद थांरै ऊं कोई कोनीं खो सकै। उण दिन थै म्हनै कीं नीं पूछौला। म्हैं थांरै ऊं साची कहूं, जे म्हारै पिता ऊं कीं मांगोला तो वे थांनै म्हारै नाम ऊं देवेला। हाल तांई थै म्हारै नाम ऊं कीं कोनीं मांगियो। मांगोला, तो मिळैला ताकी थौरो आंणंद पूरौ व्‍है। “अबार तो दिस्टांत रै रूप म्हैं थांनै ऐ बातां बताई, पण वो घड़ी आवैला, जद इणरी जरुत कोनीं व्‍हैला, अर म्हैं पिता रै बाबत सगळी बातां थांनै साफ साफ बताऊंला। उण दिन थै म्हारै नाम ऊं मांगोला। अर म्हनै थोरै खातर पिता ऊं कीं नीं मांगणै री जरुरत रैला। म्हारौ पिता खुद थांरै ऊं परैम राखै, इण वास्तै की थै म्हारै ऊं परैम राखौ हो, अर विसवास करौ हो, के म्हैं परमेसर री तरफ ऊं आयौ हूं। म्हैं पिता रै उठै ऊं संसार में आयौ हूं, अबै म्हैं संसार नै छोड़नै पिता रै खनै जावूं हूं।” उणरै चेलौ कयौ, “अबै तो थूं साफ-साफ कैवै है, वळै कोई दिस्टांत कोनीं कैवै। अबै म्हौ नै ठाह पड़गी है, के थै सैंग बातां जांणौ हो, अर इणरी जरुत कोनीं के कोई थांरै ऊं कीं पूछै। इण खातर म्हैं भरोसौ करां के थै परमेसर रै उठै ऊं आया हो।” ओ सुणन यीसु उणनै कयौ, “कांई थै अबै विसवास करौ हो? वो घड़ी आ री है, साचांणी मांय आय गी है, जद थै सैंग अठी-उठी बिखर जावोला अर म्हनै ऐकलौ छोड़ देवो ला। तो ई म्हैं ऐकलौ कोनीं क्यूंकै पिता म्हारै साथै है। “म्हैं थांनै ऐ बातां इण वास्तै केई है, के थांनै म्हारै ऊं सानति मिळै। संसार मांय थांनै कलेस सहन करणौ पड़ैला, पण हीमत राखौ, म्हैं संसार नै जीत लियौ है।” जद यीसु ऐ सैंग बातां कैय नै आपरी आंख्यां सरग रै सांम्ही जोयनै कयौ, “हे पिता, वो घड़ी आयगी है, अपणै बेटे री महिमा कर, जिण ऊं बेटौ थांरी महिमा परगट करै, क्यूंकै थै उणनै सगळै मानखा माथै हक दियौ है, की जितरा थै उणनै सूपिया है, वो उण हरैक नै अनत जीवन दे। अर अनत जीवन ओ है, के वे थांनै साचा परमेसर अर यीसु मसीह नै, जीणनै थै भेजियां हो उणनै जांणै। जिकौ कांम थै म्हनै करणै दियौ हो, वो पूरौ करनै म्हैं धरती माथै थांरी महिमा किनी है। अर अबै, हे पिता, थूं थारै साथै म्हारी महिमा उण महिमा ऊं कर जिकौ संसार नै बणाणै ऊं पैली, म्हारी थारै साथै ही। “म्हैं थारै नाम री महिमा उण मिनखां रै माथै परगट किनी जिणानै थै संसार मांय ऊं म्हनै दिया। वे थांरा हा अर थै उणानै म्हनै दिया, अर वे थांरै वचन नै मान्यौ। अबै वे जांण गिया है, के जिकौ ई कीं थै म्हनै दियौ है, वो सब थांरै दियोड़ो है। क्यूंकै जिकौ वचन थै म्हनै बताया, वो म्हैं उणौनै बताय दिया। अर वे उणानै स्वीकार करयौ, अर सचाई जांण ली है, के म्हैं थांरै उठै ऊं आयौ हूं, अर उणौ ओ विसवास करयौ की थै इज म्हनै भेज्यौ हो। “म्हैं उणरै खातर अरज करूं हूं। म्हैं सगळा संसार रै खातर अरज नीं करूं पण सिरफ वांरै खातर इज करूं जिकौ थै म्हनै दिया, क्यूंकै वे थारा है। अर जिकौ कोई म्हारा है वो सगळौ थारा है, अर जिकौ कोई थारा है वो म्हारा है। अर उणौ ऊं म्हारी महिमा परगट होई है। म्हैं आगै ऊं संसार मांय कोनीं रैवूंला, अर म्हैं थारै खनै आऊं हूं। हे पवितर पिता, थारै उण नाम री ताकत ऊं जिकौ थै म्हनै दी है, वांरी रकसा कर के वे अपां रै ज्यूं एक होवै। जद म्हैं उणरै साथै हो, तो म्हैं थारै उण नाम री ताकत ऊं, जिकौ थै म्हनै दी है, उणरी रकसा किनी। म्हैं उणरी चौकसी किनी, अर उण मिनख नै जिकौ खुद नै नास होणै रै मारग नै चुण लियौ, उणनै छोड़नै किणी रौ नास कोनीं होयौ, इण वास्तै की पवितर सास्तर में जिकौ कियो गियौ वो पूरौ हो। “अबै म्हैं थांरै खनै आऊं हूं, अर ऐ बातां जगत में कैवूं हूं, जिण ऊं वे म्हारै आंणंद ऊं भर जावै। म्हैं थारा वचन वांरै तांई पुगाय दिया हूं। अर संसार उण ऊं बैर राखै, क्यूंकै ज्यूं म्हैं संसार रौ कोनीं, त्यूं वे ई संसार रा कोनीं। म्हैं आ अरज कोनीं करूं, की थूं उणनै जगत ऊं उठाय ले, पण आ की थूं उणनै उण दुस्टी ऊं बचाय राख। ज्यूं म्हैं संसार रौ कोनीं, त्यूं वे ई संसार रा कोनीं। सत्य रै दवारा थूं उणै थारी सेवा रै खातर पवितर कर। थारौ वचन सत्य है। ज्यूं थै म्हनै संसार में भेज्यौ, इणी रीत, म्हैं ई उणनै संसार में भेज्यौ। म्हैं उणरै वास्तै अपणै आप नै थारी सेवा रै खातर पवितर करूं हूं, ताकी वे भी सत्य रै दवारा थारी सेवा रै खातर पवितर किया जावै। “म्हैं नीं सिरफ उणारै खातर ई पराथना करूं हूं, बल्कि उणौरै वास्तै भी जिकौ उणरा वचन सुणनै म्हारै माथै विसवास करैला, हे पिता, म्हारी आ अरज है की, वे सगळा एक हो जावै, जिण तरैह थूं म्हारै में है, अर म्हैं थांरै में हूं, उणी तरैह वे ई अपां में एक होय जावै, जिण ऊं संसार ओ विसवास करै की थै म्हनै भेज्यौ है। अर वा महिमा जिकौ थै म्हनै दीनी, म्हैं उणानै दीनी है के वे त्यूं ई एक हो जावै ज्यूं की अपां एक हां। म्हैं उणारै मांय अर थै म्हारै मांय, की वे सिध्द होयनै एक व्‍है जाओ। ताकी संसार जांणै की थै इज म्हनै भेज्यौ, अर ज्यूं थै म्हारै ऊं परैम राख्यौ, वैड़ौ इज उणौ ऊं परैम राख्यौ। “हे पिता, म्हैं चावूं हूं के जिणनै थै म्हनै दिया है, जठै म्हैं हूं, उठै वे ई म्हारै साथै रैवै, के वे म्हारी उण महिमा नै देखे जिकौ थै म्हनै दीनी है, क्यूंकै थै संसार री सरूआत ऊं पैला म्हारै ऊं परैम राख्यौ। “हे धरमी पिता, संसार म्हनै कोनीं जांण्यौ, पण म्हैं थांनै जांणूं। अर म्हारा लोग जांण गिया है की थै इज म्हनै भेज्यौ है। अर म्हैं थांरै नाम री महिमा उणौ नै बताई अर बतातौ रैवूंला की जिकौ परैम थांनै म्हारै ऊं हो, वो उणमे रैवै अर म्हैं ई उणमे रैवूं।” यीसु ऐ बातां कैयनै आपरै चेलौ रै साथै किदरोन नाळे रै उण पार गिया। उठै एक बगीचों हो, जिण में वो अर उणरा चेला गिया। उणौ नै धोखे ऊं पकड़ाणै वाळौ यहूदा ई इण जगा नै जांणतौ हो, क्यूंकै यीसु आपरै चेलौ रै साथै उठै जाया करतौ हो। तो यहूदा, रोमी सैनिकों री एक पलटन नै अर परधान याजकौ अर फरीसियों री तरफ ऊं भेज्या सेवकों रै साथै लालटेनो, मसालों अर हथियारों नै लेयनै उठै आया। तद यीसु, नै तो पको ठाह हो के उण साथै कांई होवण वाळौ है वांरै ऊं मिलण खातर वो आगै आया अर पूछयौ, “किणनै सौधौ हो?” उणौ यीसु नै जबाब दियौ, “यीसु नासरी नै।” यीसु कयौ, “वो म्हैं इज हूं।” अर यीसु नै धोखे ऊं पकड़ाणै वाळौ यहूदा ई उणौ रै साथै ऊभौ हो। यीसु ओ कैवतै ही, “वो म्हैं इज हूं,” वे सगळा लारै सिरकने जमीं माथै पड़ग्या। तद यीसु वळै उणौनै पूछयौ, “थै किणनै सौधौ हो?” वे बोलया, “यीसु नासरी नै।” यीसु जबाब दियौ, “म्हैं तो थोरै ऊं कैह चुकयो हूं की वो म्हैं इज हूं। जे म्हनै सौधौ हो तो इणानै जावण दो।” ओ इण वास्तै होयौ, की वो वचन पूरौ होवै, जिकौ उणै कयौ हो, की “जिकौ थै म्हनै दियौ, उणमे ऊं म्हैं एक नै ई कोनीं नास होणै दियौ।” तद समौन पतरस नै तरवार, जिकौ उणरै खनै ही, बारै काढ़ी अर महायाजक रै नौकर रौ जीमणौ कांन काट दियौ। उण नौकर रौ नाम मलखुस हो। तो यीसु पतरस नै कयौ, “थूं थांरी तरवार नै म्यांन मांय घाल दे। जिकौ दुख रौ कटोरो पिता म्हनै दियौ है, कांई म्हैं उणै नीं पीवूं?” तद रोमी सिपाई, वांरा सूबेदार अर यहूदियो रा सेवक, यीसु नै पकड़नै बांध दियौ। अर पैला वे उणनै हन्‍ना रै खनै लेन गिया, जिकौ वो उण साल रौ महायाजक काइफा रौ ससुर हो। ओ वोहीज काइफा हो, जिकौ यहूदी नेता नै समझाया हा के, “सगळौ रै खातर एक मिनख रौ मरणौ ठीक है।” समौन पतरस, अर एक चेलौ ई यीसु रै लारै वहीर हो गियो। ओ चेलौ महायाजक रै जांण-पिछांण वाळौ हो, अर यीसु रै साथै महायाजक रै आंगणै में गियौ। पण पतरस बारै बारणा माथै ऊभौ रियौ। तो वो दूजै चेले जिकौ महायाजक री जांण पिछांण वाळौ हो, बारै निकळनै, पोरैदारणी ऊं कैय, पतरस नै मांय लेयनै आयौ। वां दासी जिकौ पोरैदारणी ही, पतरस नै पूछयौ, “कांई थूं भी इण मिनख रै चेलौ मांय ऊं तो कोनीं है?” उणै कयौ, “म्हैं कोनीं हूं।” उण वेळा सियाळौ हो, इण खातर पोरैदार अर घर रा नौकर अग्‍नि सळगायनै ताप रिया हा। पतरस ई उणारै साथै ऊभौ ताप रियौ हो। तद महायाजक यीसु ऊं उणरै चेलौ रै बारै में अर उणरै उपदेस रै बारै में पूछताछ किनी। यीसु उणौनै जबाब दियौ, “म्हैं संसार ऊं खुलनै बातां किनी। म्हैं मिंदर अर पराथना घरो में, जठै सैंग यहूदी भेळा होया करता हा, उठै हमेसां उपदेस दियौ। अर छांनै में कीं नीं कयौ हो। थूं म्हारै ऊं क्यूं पूछै? सुणणै वाळौ ऊं पूछ, की म्हैं उणौ नै कांई कयौ। वे जांणै है, की म्हैं कांई कांई कयौ?” जद यीसु ओ कयौ, तो सेवकों में ऊं एक जिकौ नैड़ौ ऊभौ हो, यीसु रै थप्पड़ ठोकनै कयौ, “कांई थूं महायाजक नै इण तरैह जबाब दैवै है?” यीसु उणनै जबाब दियौ, “जे म्हैं गळत कयौ, तो गळती बता दो। अर जे ठीक कयौ, तो म्हनै क्यूं ठोकौ हो?” तद हन्‍ना, यीसु नै बांधयोड़ौ ई महायाजक काइफा रै खनै भेज दियौ। समौन पतरस ऊभौ ताप रियौ हो। तो वे उणनै पूछयौ, “कांई थूं ई उणरै चेलौ में ऊं तो कोनीं है?” उणै मना करनै कयौ, “म्हैं कोनीं हूं।” पण महायाजक रै दासो में ऊं एक, जिकौ उणरै परिवार मांय ऊं हो जिणरौ कांन पतरस काट दियौ हो, बोल्यौ, “कांई म्हैं थनै यीसु रै साथै बगीचें मांय कोनीं देख्यौ हो?” पतरस वळै नटगो, अर उणीज वेळा कुंकड़े बांग दीनी। तो वे यीसु नै काइफा रै खनै ऊं किले लेन गिया, अर दिन उगै री वेळा ही, पण वे आप किले रै मांय कोनीं गिया ताकी असुद्ध नीं होवै, पण फसह खा सकै। तो पिलातुस उणरै खनै बारै निकळ आयौ अर कयौ, “थै इण मिनख माथै कीण बात रौ दोसण लगावो हो?” वे उणनै जबाब दियौ, “जे ओ गुनेगार नीं व्‍हैतौ तो म्हैं इणनै थांनै कोनीं सूंपता।” पिलातुस उणौनै कयौ, “थै इज इणनै ले जायनै थोरै कायदा रै अनुसार इणरौ न्याव करौ।” यहूदियो उणनै कयौ, “म्हौ नै हक नीं है की किणी रौ प्रांण लौ।” इण ऊं यीसु री आ भविसयवांणी पूरी होई के वांरी मौत कीण तरीकै ऊं व्‍हैला। तो वळै पिलातुस किले मांय गियौ, अर यीसु नै बुलायनै उणनै पूछयौ, “कांई थूं यहूदियो रौ राजा है?” यीसु जबाब दियौ, “कांई थूं आ बात खुद री तरफ ऊं कैवै या दूजौ म्हारै बारै में थारै ऊं केई है?” पिलातुस जबाब दियौ, “कांई म्हैं यहूदी हूं? थारै देस रा लोग अर परधान याजकौ थनै म्हारै हाथ सूंपयौ है। थै कांई करयौ है?” यीसु जबाब दियौ, “म्हारौ राज इण संसार रौ कोनीं। जे म्हारौ राज इण संसार रौ व्‍हैतौ, तो म्हारा सेवक लड़ता, अर म्हनै यहूदियो रै हाथो में नीं सूंपता। पण म्हारौ राज अठै रौ कोनीं।” पिलातुस यीसु नै कयौ, “तो कांई थूं राजा है?” यीसु जबाब दियौ, “थूं कैवै है की म्हैं राजा हूं। म्हैं इण वास्तै जनम लियौ, अर इण वास्तै संसार मांय आयौ हूं के म्हैं सचाई री गवाई दूं। जे कोई सचाई ऊं परैम राखै, वो म्हारौ सबद सुणै है।” पिलातुस यीसु नै कयौ, “सचाई कांई है?” ओ कैन पछै पिलातुस पाछौ यहूदियो रै खनै बारै आयौ अर उणौनै कयौ, “म्हैं तो उणमे कीं दोस कोनीं देखूं। पण थांरी आ रीत है की म्हैं फसह में थोरै वास्तै एक मिनख नै छोड़ दूं। आखरी थै कांई चावौ की म्हैं थोरै वास्तै ‘यहूदियो रै राजा’ नै छोड़ दूं?” पण वे वळै हाका करनै कयौ, “इणनै कोनीं, पण म्हौ रै वास्तै बरअब्बा नै छोड़ दो।” अर बरअब्बा एक डाकू हो। इण कारण पिलातुस यीसु रै कोड़ा ठोकाया। सिपाई कांटो रौ एक मुगट गूंथनै उणरै माथा ऊपर राख्यौ, अर उणनै राजा जैड़ा बैंजनी गाभा पैराया। पछै वे उणरै खनै आय नै कैवण लागा, “यहूदियो रै राजा नै परणाम!” अर उणरै थप्पड़ों ठोकी। तो पिलातुस वळै बारै जायनै लोगां नै कयौ, “म्हैं उणनै थांरै खनै वळै बारै लावूं हूं, ताकी थै जांण लौ की उण में कोई दोस नीं दिखे।” अर यीसु कांटो रौ मुगट अर राजा जैड़ा बैंजनी गाभा पैरयोड़ा बारै निकाळनै पिलातुस उणौनै कयौ, “देखौ, ओ मिनख!” जद परधान याजकौ अर यहूदी सेवक उणनै देख्यौ, तो हाका करनै कयौ, “उणनै सूली माथै चढ़ाओ, सूली माथै चढ़ाओ।” पिलातुस उणौनै कयौ, “थै इज इणनै लेय जायनै सूली माथै चढ़ाओ, क्यूंकै म्हनै इण मांय कीं दोस निजर कोनीं आयौ।” यहूदियो उणनै जबाब दियौ, “म्हौरै भी कायदा रै रीत ऊं इणनै मौत री सजा मिळणी चाहीजै, क्यूंकै औ अपणै आप नै परमेसर रौ बेटौ कैवै है।” जद पिलातुस आ बात सुणी तो वो पैला ऊं करते घणौ डर ग्यौ। वो पाछौ किले में जायनै यीसु नै कयौ, “थूं कठै रौ है?” पण यीसु उणनै कीं जबाब कोनीं दियौ। पिलातुस यीसु नै कयौ, “म्हारै ऊं क्यूं नीं बोले? कांई थूं जांणै कोनीं की थनै छोड़ दैणै रौ हक म्हनै है, अर थनै सूली माथै चढ़ाणै रौ हक ई म्हनै है?” तद यीसु जबाब दियौ, “थांनै म्हारै माथै कोई हक कोनीं व्‍हैतौ, जे थांनै ऊपर ऊं हक नीं देवता तो। इण खातर जिकौ म्हनै थांरै हाथ मांय सूंपयौ उणरौ पाप घणौ है।” इण कारण पिलातुस उणनै छोड़णौ चायौ। पण यहूदियो चिला चिलान कयौ, “जे थूं इण मिनख नै छोड़ दैला, तो थांरी भगती राजा कैसर री तरफ कोनीं। जे कोई अपणै आप नै राजा बणावै है, वो राजा कैसर रौ सामनो करै है।” आ बात सुणनै पिलातुस यीसु नै पाछौ बारै लाया अर उण जगा एक चबूतरों हो जिकौ इबरानी में गब्बता कैवै है, अर उठै न्याव आसन माथै बैठग्यौ। अर फसह री तैयारी रौ दिन हो। अर दोपार री वगत पिलातुस यहूदियो नै कयौ, “देखौ, ओहीज है थांरौ राजा।” पण वे चिलान कयौ, “ले जाओ! ले जाओ! इणनै सूली माथै चढ़ावौ!” पिलातुस उणौनै पूछयौ, “कांई म्हैं थांरै राजा नै सूली माथै चढ़ावूं?” परधान याजकौ जोर ऊं कयौ, “कैसर नै छोड़नै म्हारौ दूजौ कोई राजा कोनीं है।” तद पिलातुस यीसु नै उणौ रै हाथ सूंप दियौ ताकी वो सूली माथै चढ़ावै। तद रोमी सैनिक यीसु नै लेन गिया अर वो आपरौ क्रूस उपाड़नै उण जगा तांई ग्यौ, जिकौ खोपड़ी री जगा कैवै है अर इबरानी मांय “गुलगुता” कैवै है। उठै उणौ नै यीसु अर उणरै साथै वळै दो मिनखां नै सूली माथै चढ़ाया, एक नै जीमणै सूली अर दूजै नै डावै सूली, अर बीच में यीसु नै। पिलातुस एक दोसपत्र लिखनै सूली माथै लगा दियौ, अर उण में ओ लिखयोड़ो हो, “यीसु नासरी, यहूदियो रौ राजा।” ओ दोसपत्र घणौ यहूदियो बांच्यां, क्यूंकै वो जगा जठै यीसु नै सूली माथै चढ़ायौ वो नगरी रै नैड़ौ हो, अर पत्र इबरानी, लतीनी अर यूनानी भासा में लिख्योड़ौ हो। तो यहूदियो रै परधान याजकौ पिलातुस नै कयौ, “ ‘यहूदियो रौ राजा,’ मती लिख पण ओ लिख ‘उणै कयौ, म्हैं यहूदियो रौ राजा हूं।’ ” पिलातुस जबाब दियौ, “म्हैं जिकौ लिख दियौ, वो लिख दियौ।” जद सिपाई यीसु नै सूली माथै चढ़ाय दियौ, तो वांरा गाभा लेयनै च्यार भाग करिया, हरैक सिपाई रै खातर एक भाग, इण तरैह कुड़तौ ई लियौ, ओ हिवयोड़ो कोनीं हो पूरौ एक सरिको गुथियोड़ो हो। इण खातर वे आपस में कयौ, “अपां इणनै नीं फाड़ा, पण इणरी चिठ्ठी खोलो की किणरै भाग में आवै।” ओ इण वास्तै होयौ की पवितर सास्तर में जिकौ कयौ वो पूरौ होवै, “वे म्हारा गाभा आपस में बांट लिया, अर म्हारै कुड़ते माथै चिठ्ठी खोली।” अतस सिपाईयो नै यूं इज करयौ। यीसु री सूली रै खनै यीसु री मां, अर उणरी मां री बेन, क्लोपास री लुगाई मरियम, अर मरियम मगदलीनी ऊभी ही। जद यीसु आपरी मां, अर उण चेले नै जिकौ लाडलौ कैलातो उठै ऊभा देख्यां, तो वे आपरी मां नै कयौ, “हे माताजी, देख, औ थारौ बेटौ है।” तो उणै चेले नै कयौ, “आ थारी मां है।” अर उणी वेळा ऊं वो चेलौ उणनै आपरै घरै लेन गियौ। इणरै पछै यीसु ओ समझ ग्यौ के अबै सैंग कांम पूरौ व्‍हैगौ है, इण वास्तै की पवितर सास्तर में जिकौ कयौ वो पूरौ होवै, कयौ, “म्हैं तिरसां हूं।” उठै खाटे अंगूर रस ऊं भरयोड़ौ एक बरतन पड़ियौ हो। तो वे रुई लेन उण मांय डूबोय नै उणनै गेडी रै मांय अड़ाय नै उणारै मूंडै रै लगायो। यीसु खाटे अंगूर रस नै चाख नै कयौ, “सगळौ पूरौ व्‍हियौ,” अर तद माथो नीचो कर नै प्रांण छोड़ दियौ। इण वास्तै की वो तैयारी रौ दिन हो, यहूदियो नै पिलातुस ऊं अरज किनी की उणौरी टांगा तोड़ दो अर वे नीचे उतार दो, ताकी सब्त रै दिन वे सूली माथै नीं रै, क्यूंकै वो सब्त रौ दिन बढ़ौ दिन हो। अतस सिपाई आय नै उण दोनूं मिनखां में ऊं पैलै री टांगा भांगी अर दूजै री भी, जिकौ यीसु रै साथै सूली माथै चढ़ायोड़ा हा। पण जद वे यीसु रै खनै आय नै देख्यौ के वो तो पैला ऊं मर गिया है, तो वांरी टांगा नीं भांगी। तो एक सिपाई उणरी बगल में भालो ठोकियो अर उण में ऊं तुरत लोई अर पांणी बारै आयौ। जिणै ओ देख्यौ, उणै गवाई दीनी है, अर उणरी गवाई साची है। अर वो जांणै है की वो साच कैवै है की थै भी विसवास करौ। ऐ बातां इण वास्तै होई की पवितर सास्तर में जिकौ कयौ वो पूरौ होवै, “उणरी कोई हडी भांगी नीं जावैला।” वळै एक जगा माथै ओ लिख्योड़ौ हो, “जिणै उणौ नै बिंधियों है, वे उणरी तरफ देखेला।” तद अरमतिया रौ यूसुफ जिकौ यहूदियो रै डर ऊं यीसु रौ गुपत चेलौ हो, यीसु री लास ले जावण खातर पिलातुस ऊं अरज करी, अर पिलातुस उणरी बात मांन ली। इण वास्तै वो आय नै यीसु री लास नै लेयग्यौ। उणरै साथै नीकुदेमुस ई, जिकौ पैली यीसु खनै रात रा मिळण खातर ग्यौ हो, वो ई लगोलग तीस किलो लोबान अर एलवा रौ भेळ लायौ। तद उणौ यीसु री लास ली अर यहूदियो री बूरणा री रीति रै मुजब यीसु री लास नै, खुसबुदार चीजों रै साथै कफन मांय लपेटियो। यीसु जिण जगा माथै सूली माथै चढ़ायौ हो उण पाड़ै एक बगीचों हो, जठै एक नवी कबर जिकौ भाखर मांय खोदयोड़ी ही, जीण मांय पैली कीण नै ई बूरयो कोनीं हो। इण वास्तै यहूदियो रै तैयारी रै दिन रै कारण उणौ यीसु नै उणीज में राख्यौ, क्यूंकै वो कबर नैड़ी ही। हपतै रै पैलै दिन मरियम मगदलीनी दिन ऊगणै ऊं पैला कबर खनै आई, अर वां देखियौ के कबर रै माथै ऊं भाटो आगौ सिरकयोड़ो है। तो वां दौड़ नै समौन पतरस अर दूजै चेलौ रै खनै जिकौ लाडलौ कैलातो हो, आय नै कयौ, “वे परभु नै कबर मांय ऊं निकाळनै ले गिया, अर म्हैं कोनीं जांणौ, की उणनै कठै राखियौ है।” तद पतरस अर दूजा चेला निकळनै कबर री तरफ गिया। वे दोनूं चेला एक साथै दौड़िया, पण दूजौ चेलौ पतरस ऊं आगै बढ़नै कबर माथै पैली पूगयौ। अर वो नीचे होयनै मांय देखियौ, उठै गाभा पड़या देख्यां, तो ई वो मांय नै कोनीं गियौ। इती देर मांय समौन पतरस ई आयग्यौ अर वो कबर माये गियो। वो ई उठै गाभा पड़या देखिया, पण वो अंगोछौ जिकौ उणारै माथा रै ऊपर बांधयोड़ौ हो, वो गाभा रै साथै कोनीं हो, पण एक न्यारी जगा माथै लपेटयोड़ौ पड़ियौ हो। तद दूजोड़े चेले जिकौ सैंगा ऊं पैली कबर खनै पूगियौ हो, वो ई कबर माये गियो अर ओ देखनै विसवास करयौ। वे तो अजी तांई पवितर सास्तर री बातां कोनीं समझता हां, की उणनै मरयोड़ौ में ऊं जी उठणौ होवैला। इणरै पछै चेला आपरै घरै जाता रिया। पण मरियम कबर रै खनै रोवती होई बारै ऊभी ही, रोती रोती नीचे कबर में निजर दीनी, दो सरगदूतो नै उजळा गाभा पैरयोड़ा एक नै सिरातिये अर दूजै नै पगोतिया खनै बैठा देखियां, जठै यीसु री लोथ राख्योड़ी ही। सरगदूत उणनै पूछयौ, “हे नारी, थूं क्यूं रोवे है?” वां जबाब दियौ, “क्यूंकै वे म्हारा परभु नै उठाय नै लेय गिया अर म्हैं कोनीं जांणूं की उणनै कठै राख्या है।” ओ कैन वां पाछी मुड़ी अर यीसु नै ऊभौ देख्यौ, पण कोनीं ओळखियौ की ओ यीसु है। यीसु उणनै पूछयौ, “हे नारी, थूं क्यूं रोवे है? थूं किणनै सौधै है?” वां माळी समझनै उणनै कयौ, “हे मालिक, जे थै उणनै उठाय नै राखियौ है तो म्हनै बताओ की उणनै कठै राखियौ है, अर म्हैं उणनै लेय जावूंला।” यीसु उणनै कयौ, “मरियम।” अर वां पाछी मुड़ नै उण ऊं इबरानी में कयौ, “रब्बूनी!” अरथ “हे गुरु”। यीसु उणनै सावचेत करता थका कयौ, “म्हारै हाथ मती लगाईजै, क्यूंकै म्हैं हाल तांई पिता रै खनै ऊपर कोनीं गियौ हूं। पण जायनै म्हारा भाइयो नै कैह दे, ‘जे के म्हैं म्हारै पिता अर थांरै पिता, अर म्हारा परमेसर अर थांरा परमेसर रै खनै ऊपर जावूं हूं।’” मरियम मगदलीनी जायनै चेलौ नै कयौ, “म्हैं परभु नै देखिया है, अर परभु म्हारै ऊं बातां किनी।” उणीज दिन जिकौ हपतै रौ पैलौ दिन हो, सिंझ्या रै वगत जद चेला यहूदियो रै डर ऊं बारणा आडौ बंद करनै भेळा व्‍हियोड़ा हा। तद अणचेत यीसु उणारै बीच में आय नै ऊभा व्‍हैगा। अर चेलौ ऊं कयौ, “थांनै सानति मिळै।” ओ कैहन यीसु नै आपरा हाथ अर बगल रा निसाण वांनै देखाया। तो चेला परभु नै देखनै घणा राजी व्‍हिया। यीसु वळै उणौ नै कयौ, “थांनै सानति मिळै। ज्यूं पिता म्हनै भेज्यौ है, उणीज रीत म्हैं थांनै भेजूं हूं।” ओ कैहन वे वांरै माथै फूंक दीनी अर उणौनै कयौ, “पवितर आतमा नै लौ। जिणरा पाप थै माफ करौला वे उणरै वास्तै माफ किया जावैला। जिणरा थै पाप माफ नीं करौला तो उणनै माफी नीं मिळैला।” पण यीसु आया उण वगत थोमा जिकौ दिदुमुस कहीजै, जिकौ बारैह चेलौ में ऊं एक हो, वो उठै कोनीं हो। जद दूजौ चेलौ उणनै कयौ के, “म्हैं परभु नै देखिया।” तो उणै वांनै कयौ, “जठै तांई म्हैं खुद उणारै हाथो मांय कील रा ठिंडा नीं देख लूं, अर कील रा ठिंडा मांय म्हारी आंगळिया नीं घालूं अर वांरी बगल मांय म्हारौ हाथ घाल नीं देख लूं, जैड़ी तांई म्हैं विसवास कोनीं करूं।” आठ दिन पछै सगळा चेला पाछा घर रै मांय भेळा हा, अर थोमा उणारै साथै हो। अर किवाड़ बंद हो, तद यीसु आया अर उणारै बीच में ऊभा होयनै कयौ, “थांनै सानति मिळै।” तो यीसु थोमा नै कयौ, “थारी आंगळिया एठै लायनै म्हारै हाथो नै देख, अर थारौ हाथ म्हारी बगल मांय घाल। अर वेम मत कर, पण म्हारौ विसवास कर।” ओ सुण थोमा जबाब दियौ, “हे म्हारा परभु, हे म्हारा परमेसर।” तद यीसु उणनै कयौ, “थै म्हनै देख्यौ है, कांई इण वास्तै विसवास करयौ है? धन्य है वे जिकौ बिना देखे विसवास करयौ।” यीसु नै वळै ई घणा ई चमतकार चेलौ नै देखाया, जिकौ इण किताब रै मांय लिखयोड़ा कोनीं है। पण ऐ इण वास्तै लिख्यौ है की थै विसवास करौ की यीसु इज परमेसर रा बेटौ मसीह है, अर विसवास कर नै उणरै नाम ऊं जीवन पाओ। इण बातां रै पछै यीसु तिबिरीयास री झील रै कांठै चेलौ रै माथै परगट करया। ओ इण रीत ऊं परगट होया। समौन पतरस, अर थोमा जिकौ दिदुमुस कहीजै है, अर नतनएल गलील रै काना नगरी रौ रैवण वाळौ, जबदी रौ बेटौ, अर उणरै चेलौ में ऊं दो जन वळै भेळा हा। समौन पतरस उण ऊं कयौ, “म्हैं मछली पकड़णै जावूं हूं।” चेलौ कयौ, “म्हौ ई थारै साथै चालौ।” अतस वे निकळनै नाव में बैठ गिया, पण उण रात कीं नीं पकड़यौ। दिन उगतै ई यीसु नै झील रै कांठै माथै ऊभा देख्या, पण चेलौ उणौनै ओळखियौ कोनीं की ऐ यीसु है। तद यीसु उण ऊं कयौ, “हे भाइयो, थांरै खनै कीं मछलिया है कांई?” वे जबाब दियौ, “कोनीं।” तो यीसु उणौनै कयौ, “नाव री जीमणी तरफ जाळ फेकों, तो मिळैला।” चेलौ व्यौंही इज करयौ अर इती सारी मछलिया ही के जाळ खेचणौ भारी पड़ग्यौ। तद उण चेले नै जिकौ लाडलौ कैलातो हो, पतरस ऊं कयौ, “ऐ तो परभु है!” समौन पतरस ओ सुणन की ओ तो परभु है, कमर में ऊपर रा गाभा बांध लियौ, क्यूंकै वो कांम करणै रै खातर ऊपर रा गाभा निकाळया हा। अर हाथोहाथ किनारै पूगणै रै खातर झील में कूद पड़ियौ। पण लारला चेलौ नाव माये इज रिया अर मछलियो ऊं हेंठा भरयोड़ा जाळ नै लगोलग दो सौ हाथ खैंचनै किनारै माथै लाया। जद वे किनारै माथै उतरिया, तो उणौ कोयलो री अग्‍नि अर उण माथै मछली राख्योड़ी, अर रोटी देखी। यीसु उणौ ऊं कयौ, “जिकौ मछलिया थै अबार पकड़ी है, उणमे ऊं कीं अठै लावौ।” समौन पतरस नाव माथै चढ़नै एक सो तिरैपन मोटी मछलियो ऊं भरयोड़ौ जाळ खैचिंयो, अर इती सारी मछलिया ही तो ई जाळ नीं फाटयौ। यीसु उणौनै कयौ, “आओ खाणौ जीमलौ।” चेला मांय ऊं किणी नै आ पूछणै री छाती कोनीं होई के, “थै कुण हो?” क्यूंकै वे जांणता हा की ओ परभु इज है। तद यीसु रोटी लेन सबां नै दी, अर व्यौंही मछलिया ई दीनी। ओ तीजी बार हो की यीसु मरयोड़ौ में ऊं जी उठनै रै पछै चेलौ नै दरसण दीना। खाणौ जीमणै रै पछै यीसु समौन पतरस नै कयौ, “हे समौन, यूहन्‍ना रा बेटा, कांई थूं इणौ ऊं बढ़न म्हारै ऊं परैम राखै?” पतरस जबाब दियौ, “हां परभु, थै तो जांणौ हो के म्हैं आप ऊं हेत राखूं।” यीसु उणनै कयौ, “म्हारै उनियां नै चरा।” यीसु पाछौ पूछयौ, “हे समौन, यूहन्‍ना रा बेटा, कांई थूं म्हारै ऊं परैम राखै है?” पतरस कयौ, “हां परभु, थै तो जांणौ इज हो म्हैं थांरै ऊं हेत राखूं।” यीसु कयौ, “म्हारी लरड़ियां री रूखाळी कर।” तीजी बार यीसु वळै उणनै पूछयौ, “हे समौन, यूहन्‍ना रा बेटा, थूं कांई म्हारै ऊं परैम राखै?” पतरस मौळौ पड़ग्यौ के यीसु तीजी बार उणनै आ बात पूछी। वो कयौ, “हे परभु, थै तो सगळौ जांणौ हो, थांनै ठाह है म्हैं थांरै ऊं हेत राखूं।” यीसु कयौ, “म्हारी लरड़ियां नै चरा। “म्हैं थांनै साची-साची कहूं, जद थूं जवान हो, तो थूं थारी कमर बांधनै जठै चावतौ हो उठै जा सकतौ हो, पण जद थूं बुढ़ौ होवैला, तो अपणा हाथ लांबा करैला, अर दूजा थांनै बांधनै जठै थूं जावणौ ई कोनीं चावै उठै थनै ले जावैला।” यीसु उणनै ओ कैवणौ चावतौ हो के परमेसर री महिमा रै खातर उणरी मौत कीकर व्‍हैला। तद यीसु उणनै कयौ, “म्हारै लारै वहीर व्‍है जा।” पतरस मुड़न उण चेले नै लारै आवतौ देखियौ, जिकौ लाडलौ कैलातो हो। औ, वो इज चेलौ हो जिकौ खाणै री वेळा यीसु रै खनै झुकनै पूछयौ हो के, “हे परभु म्हौरै मांय ऊं कुण थांनै धोखे ऊं पकड़ावैला?” उणनै देखनै पतरस यीसु नै पूछयौ, “हे परभु, इणरौ कांई व्‍हैला?” यीसु जबाब दियौ, “जे म्हैं चावूं के वो म्हारै आवण तांई ठैरयो रै, तो थनै इण ऊं कांई करणौ? थूं म्हारै लारै चाल।” इण खातर सैंग मसीह भाइयो नै आ ठाह पड़गी के औ चेलौ कोनीं मरेला। पण यीसु आ बात कोनीं कही। वे सिरफ आ बात कही के, “जे म्हैं चावूं के म्हारै पाछौ आवण तांई औ ठैरयो रै, तो थनै इण ऊं कांई करणौ?” ओ वोहीज चेलौ है जिकौ इण बातां री गवाई दैवै है अर जिणै ऐ बातां नै लिखी है। अर अपां सब जांणौ हो के उणरी गवाई साची है। यीसु वळै घणी ई चमतकार करिया। पण म्हैं सोच्यौ के यीसु रै जीवण री सैंग बातां लिखी वेती तो जिकौ किताबो लिखिजतीं वे पुरा संसार रै मांय कोनीं मावती। हे थियुफिलुस, म्हैं पैली किताब उण सगळी बातां रै बारै में लिखी जिकौ यीसु सरूआत ऊं करतौ अर सिखातौ रियौ, उण दिन तांई जद तांई वो उण प्रेरितों नै जिणौनै उणै चुणया हा पवितर आतमा रै दवारा आग्या देयनै सरग उठाया नीं गिया। अर उणै मौत रै पछै घणाहारा पका प्रमाणो ऊं अपणै आप नै उणौनै जीवतौ दिखायौ, अर चाळीस दिन तांई उणौनै देठाळौ देतो रियौ, अर परमेसर रै राज री बातां करतौ रियौ। अर उणौ ऊं मिळन उणौनै आग्या दीनी, “यरुसलेम नै मती छोड़ौ, पण म्हारै पिता परमेसर रै उण वायदे नै पूरौ होणै री बाट जोहता रौ, जिणरी चरचा थै म्हारै ऊं सुण चुकया हो। क्यूंकै यूहन्‍ना नै तो पांणी ऊं बतिस्मो दियौ है पण थोड़े दिनां रै पछै थै पवितर आतमा ऊं बतिस्मो पावौला।” जद वे भेळा होयनै यीसु नै पूछयौ, “हे परभु, कांई थूं इणी वगत इजरायल रौ राज पाछौ दैला?” यीसु उणौनै कयौ, “उण वगत या काल नै जांणणौ, जिणै पिता परमेसर नै अपणै ही अधिकार मे राख्यौ है, थौरो कांम कोनीं। पण जद पवितर आतमा थांरै ऊपर आवैला तद थै सामरथ पावौला। अर यरुसलेम अर सगळै यहूदिया अर सामरिया में, अर धरती री छोर तांई म्हारा गवाई होवैला।” ओ कैयनै वो उणौरै देखते देखते सरग में उठा लियौ, अर बादळ उणनै उणौरी आंख्यां ऊं लूकाय दियौ। उणरै जातै वगत जद वे आभै री तरफ ताक रिया हा, तो देख्यौ, दो मिनख उजळा गाभा पैरयोड़ा उणरै खनै आयनै ऊभा होया, अर उण ऊं कयौ, “हे गलीली मिनखौ, थै क्यूं ऊभा आभै री तरफ देख रिया हो? ओहीज यीसु, जिकौ थौरे खनै ऊं सरग ऊपर उठा लियौ गियौ है, जिण रीत ऊं थै उणनै सरग में जातै देख्यौ है उणी रीत ऊं वो पाछौ आवैला।” तद वे जैतून नाम रै भाखर ऊं जिकौ यरुसलेम ऊं कोई आधा मील री दूरी पे है, यरुसलेम गिया। जद वे उठै पूगा तो उण अटारी ऊपर गिया, जठै पतरस अर यूहन्‍ना अर याकूब अर अन्‍द्रियास अर फिलिप्पुस अर थोमा अर बरतुल्मै अर मती अर हलफाई रौ बेटौ याकूब अर समौन जेलोतेस अर याकूब रौ बेटौ यहूदा रैवता हा। ऐ सगळी लुगाईयां अर यीसु री मां मरीयम अर उणरै भाइयो रै साथै एक मन होयनै पराथना में लागयोड़ा रिया। उणीज दिनां में पतरस भाइयो रै बीच में जिकौ एक सौ बीस लोगां रै बराबर हा, ऊभौ होयनै कैवण लागौ, “हे भाइयो, जरुरी हो की पवितर सास्तर रौ वो लेख पूरौ हो जिकौ पवितर आतमा नै दाऊद रै मूंडै ऊं यहूदा रै बारै में, जिकौ यीसु नै पकड़ाणै वाळौ रौ अगुवो हो, पैला ऊं कयौ हो। क्यूंकै वो तो अपां में गिण लियौ, अर इण सेवकाई में सहभागी होयौ।” (यहूदा री अधरम री कमाई ऊं एक खेत मोल लियौ। उणीज जगा पैला यहूदा फांसी लगाई ही अर सीधौ पड़ियौ हो अर उणरौ पेट फूट गियौ हो अर उणरा सगळा आंतरा निकळ गिया हा। इण बात नै यरुसलेम रा सगळा रैवणवाळा जांण गिया, एठै तांई की उण खेत रौ नाम उणरी भासा में “हकलदमा” मतलब “खून रौ खेत” पड़ गियौ।) पतरस कयौ, “क्यूंकै भजन संहिता में लिख्योड़ौ है, ‘उणरौ घर उजड़ जावै, अर उणमे कोई नीं बचे।’ अर यूं भी लिख्यौ है की, ‘उणरौ पद कोई दूजौ ले ले।’ इण खातर जिता दिन तांई परभु यीसु म्हौरै साथै आवता जावता रिया मतलब यूहन्‍ना रै बतिस्मो ऊं लैयनै उणनै म्हौरै खनै ऊं उठाय जायनै तांई जिकौ लोग बराबर म्हौरै साथै रिया, उचित है की उणमे ऊं एक मिनख म्हौरै साथै उणरै जी उठनै रौ गवाई हो जावै।” तद उणौ दो नै ऊभा किया, एक यूसुफ नै, जिकौ बरसब्बा कहीजै है, जिणरौ उपनाम यूसतुस है, दूजौ मतियाह नै। अर आ पराथना की, “हे परभु, थूं जिकौ सगळौ रै मन नै जांणै है, ओ परगट कर की इण दोनो में ऊं थै किणनै चुणयौ है, की वो इण सेवकाई अर प्रेरिताई रौ पद ले, जिणै यहूदा छोड़नै डंड भुगतनै जातौ रियौ।” तद उणौ नै उणौरै बारै में परची नोखी, अर परची मतियाह रै नाम री निकळी। अतस वो उण ग्यारह प्रेरितों रै साथै गिण्यौ गियौ। जद पिन्तेकुस्त तैंवार रौ दिन आयौ, तो वे सगळा विसवासी एक जगा भेळा हा। तद अणचेत आभै ऊं जोर री आंधी जैड़ी भयंकर आवाज होई, अर उण ऊं सगळौ घर गूंज गियौ, जठै वे बैठा हा। अर उणौनै अग्‍नि रै लपटों ज्यौ निजर आई। अर उणमे ऊं हरैक माथै आ ठैरी। वे सगळा पवितर आतमा ऊं भर गिया, अर जिण परकार आतमा नै उणौनै बोलनै री सामरथ दी, अर वे अलग अलग बोली बोलण लागा। उठै यरुसलेम में हरैक देस ऊं आयोड़ा वळै भी यहूदी भगत हा। जद आ आवाज होई तो भीड़ हो गी अर लोग डर गिया, क्यूंकै हरैक नै ओहीज सुणाई देतो हो की ऐ म्हारी ही भासा में बोल रिया हा। वे सगळा अचूम्बो करनै कैवण लागा, “देखौ, ऐ जिकौ बोल रिया है कांई सगळा गलीली कोनीं? तो पछै क्यूं अपां में ऊं हरैक अपणी अपणी जनम भूमि री भासा सुणै है? अपां जिकौ पारथी अर मेदी अर एलामी अर मेसोपोटामिया अर यहूदिया अर कप्पदूकिया अर पुन्तुस अर आसिया, अर फ्रूगिया अर पंफूलिया अर मिसर अर लीबिया देस जिकौ कुरेने रै आड़ै पाड़ै है, इण सगळै देसो रा रैवणवाळा अर रोम ऊं आया यात्री, मतलब यहूदी अर यहूदी मत धारण करणवाळा, क्रेती अर अरबी भी है, पण अपणी अपणी भासा में उण ऊं परमेसर रै मोटे मोटे कांमां री चरचा सुणै है।” अर वे सगळा अचूम्बो करता होया अर डरता होया एक दूजै ऊं कैवण लागा, “ओ कांई हो रियौ है?” पण दूजौ मजाक करनै कयौ, “वे तो नई मदिरा रै नसे में चूर है।” तद पतरस उण ग्यारहों प्रेरितों रै साथै ऊभौ होयौ अर जोर ऊं कैवण लागौ, “हे यहूदियो अर हे यरुसलेम रा सगळा रैवणवाळौ, ओ जांण लौ, अर कांन लगाय नै म्हारी बातां सुणौ। ऐ लोग नसे में कोनीं है, ज्यूं थै समझ रिया हो, क्यूंकै अजी तो दिन रा नौ ही बजया है। पण आ वो बात है, जिकौ योएल भविसयदाता री तरफ ऊं कयोड़ी है, ‘परमेसर कैवै है, आखरी दिनां में ऐड़ौ होवैला म्हैं म्हारी आतमा सगळै मिनखौ ऊपर उतारूं ला, अर थौरा बेटा अर थौरी बेटियां भविसयवांणी करैला, अर थौरा जवान दरसण देखेला, अर थौरा बुढ़िया सपना देखेला। बल्कि म्हैं अपणै दासो अर अपणी दासियो ऊपर भी उण दिनां में म्हारी आतमा उतारूं ला, अर वे भविसयवांणी करैला। वळै म्हैं ऊपर आभै में अचूम्बे रा कांम अर नीचे धरती माथै चिन्ह, अरथावूं खून अर लाय अर धूंए रा बादळ दिखाऊंला। परभु रै महान अर खास दिन रै आवण ऊं पैला सूरज अंधारै अर चांद खून जैड़ौ हो जावैला। अर जिकौ कोई परभु रौ नाम ले ला, वो उद्धार पावैला।’ “हे इजरालियो, ऐ बातां सुणौ, यीसु नासरी एक मिनख हो जिणरौ परमेसर री तरफ ऊं होणै रौ सबूत उण सामरथ रै कांमां अर अचूम्बे रै कांमां अर चिन्हों ऊं परगट है, जिकौ परमेसर नै थौरे बीच उणरै दवारा करनै दिखायौ जिणै थै आप ही जांणौ हो। उणीज यीसु नै, जिकौ परमेसर री ठैरायोड़ी योजना अर पैला रौ ग्यांन रै अनुसार पकड़ायौ ग्यौ, तो थै अधरमियों रै हाथ ऊं सूली माथै चढ़ायनै मार नाख्यौ। पण उणी नै परमेसर मौत रै बन्धनों छुड़ायनै जिलायौ। क्यूंकै ओ हो ही नीं सकै की वो मौत रै वस में रै जातौ। क्यूंकै म्हौरौ पुरनिये दाऊद राजा उणरै बारै में कैवै है, ‘म्हैं परभु नै हमेसां म्हारै सांम्ही देखतौ रियौ, क्यूंकै वो म्हारै जीमणी तरफ है, ताकी म्हैं डिग नीं जाऊं। इण कारण म्हारौ मन खुस होयौ, अर म्हारी जीभ मगन होई, बल्कि म्हारी देह भी आसा में बणी रैला। क्यूंकै थूं म्हारै प्रांणौ नै अधोलोक में नीं छोड़ेला, अर नीं अपणै पवितर जन नै सड़नै दैला। थै म्हनै जीवन रौ मारग बतायौ है, थै म्हनै थारै दरसण रै दवारा आंणंद ऊं भर दैला।’ “हे भाइयो, म्हैं पुरनिये दाऊद रै बारै में थौरे ऊं हीमत रै साथै कैह सकूं हूं की वो तो मर ग्यौ अर बूरयो भी ग्यौ अर उणरी कबर आज तांई म्हौरै उठै मौजूद है। वो भविसयदाता हो, वो जांणतौ हो की परमेसर नै म्हारै ऊं सौगन खाई है की ‘म्हैं थांरै वंस में ऊं एक मिनख नै थांरै सिंहासण माथै बिठाऊंला।’ उणै होणवाळी बात नै पैला ऊं देखनै मसीह रै जी उठनै रै बारै में भविसयवांणी की, ‘नीं तो उणरौ प्रांण अधोलोक में छोड़ गियौ अर नीं उणरौ सरीर सड़ पायो।’ “इणीज यीसु नै परमेसर जिलायौ, जिणरा म्हौ सगळा गवाई हो। परमेसर रै जीमणै हाथ ऊं महान पद पायनै, यीसु नै परम पिता ऊं वायदे रै अनुसार पवितर आतमा पायनै, अर पछै उणै इण आतमा नै म्हौरै ऊपर उतार दी जिणनै अबै थै देख रिया अर सुण रिया हो। क्यूंकै दाऊद तो सरग ऊपर नीं चढ़यौ, पण वो आप कैवै है, ‘परभु नै म्हारै परभु ऊं कयौ, “म्हारै जीमणै बैठ, जैड़ी तांई की म्हैं थारै बैरियो नै थारै पगां तळौ री चौकी नीं कर दूं।” ’ “अतस अब इजरायल रौ सगळौ घराणौ पको जांण ले की परमेसर नै उणीज यीसु नै जिणनै थै सूली माथै चढ़ायौ, परभु भी बणा दियौ अर मसीह भी।” तो सुणणैवाळौ रौ काळजौ बिंधिज गियौ, अर वे पतरस अर बाकी प्रेरितों ऊं पूछण लागा, “हे भाइयो, अपां कांई करौ?” पतरस उणौनै कयौ, “मन फिराओ, अर थौरे में ऊं हरैक अपणै अपणै पापों री माफी रै खातर यीसु मसीह रै नाम ऊं बतिस्मो लौ, तो थै पवितर आतमा रौ दांन पावौला। क्यूंकै ऐ वायदा थै, अर थौरी औळाद, अर उण सैंग अळगा रैवणवाळा लोगां रै खातर भी है जिणौनै परभु म्हौरौ परमेसर अपणै खनै बुलावैला।” पतरस घणी और बातां ऊं भी गवाई देयनै समझाया की “अपणै आप नै इण पीढ़ी ऊं बचाओ।” अतस जिणौनै पतरस रौ वचन स्वीकार कियो उणौ बतिस्मो लियौ। अर उणी दिन तीन हजार मिनखौ रै लगभग उणमे मिळ गिया। और वे प्रेरितों ऊं सिकसा लेणे में, अर संगति राखनै में, अर एक साथै रोटी खाणै में, अर पराथना करनै में मगन रैवता हा। अर सगळै लोगां ऊपर भय छा गियौ, अर बोहत ऊं अचूम्बे रा कांम अर चिन्ह प्रेरितों रै दवारा परगट होता हा। अर सगळा विसवास करणवाळा भेळा रैता हा, अर उणौरी सगळी चीजों भागीदारी में ही। वे अपणी-अपणी जायदाद अर सामान बेचनै ज्यूं जिणरी जरुत होती ही बांट दिया करता हा। वे हमेसां एक मन होयनै मिंदर में भेळा होता हा, अर घर-घर जायनै आंणंद अर मन री सीधाई ऊं रोटी जीमता हा, अर परमेसर री स्तुति करता हा, अर सगळा लोग उणौ ऊं खुस हा। अर जिकौ नया उद्धार पाता हा, उणौनै परभु रोज उणमे मिळा देता हा। पतरस अर यूहन्‍ना दोपार रै तीन बजे पराथना रै वगत मिंदर में जा रिया हा। अर लोग एक जनम रै लंगड़े नै ला रिया हा, जिणनै वे हमेसां मिंदर रै उण द्धार माथै जिकौ “सुन्दर” कहीजै है, बिठा देता हा। उठै वो मिंदर में जावणवाळौ ऊं भीख मांगे। जद उणै पतरस अर यूहन्‍ना नै मिंदर में जातै देख्यां, तो उणै भीख मांगी। पतरस नै यूहन्‍ना रै साथै उणरी तरफ ध्यांन ऊं देखनै कयौ, “म्हौरी तरफ देख!” अतस वो उणौ ऊं कीं पाणै री आस राखतौ होयौ उणौरी तरफ देखण लागौ। तद पतरस कयौ, “चांदी अर सोनो तो म्हारै खनै है कोनीं, पण जिकौ म्हारै खनै है वो थनै देवूं हूं। यीसु मसीह नासरी रै नाम ऊं चाल फिर।” अर उणै उणरौ जीमणौ हाथ झालनै उणनै उठायौ, अर तुरत उणरै पगां अर घुटनो में ताकत आ गी। वो उछलनै ऊभौ हो गियौ अर चालनै फिरनै लागौ, अर चालतो, अर कूदतो, अर परमेसर री स्तुति करतौ होयौ उणौरै साथै मिंदर रै आंगणै में गियौ। सैंग लोगां उणनै चालतो फिरतौ अर परमेसर री स्तुति करतौ होयौ देखनै, उणनै पिछांण लियौ की ओ तो वोहीज है जिकौ मिंदर रै “सुन्दर” फाटक माथै बैठनै भीख मांग्या करतौ हो। अर उण घटना ऊं जिकौ उणरै साथै होई ही वे घणै अचूम्बे में पड़ गिया। जद वो मिनख पतरस अर यूहन्‍ना रै साथै हो, तो सैंग लोग घणौ अचूम्बो करता होया उण ओसारे में जिकौ सुलैमान रौ कहीजै है, उणरै खनै दौड़ता आया। ओ देखनै पतरस लोगां नै कयौ, “हे इजरालियो, थै इण मिनख माथै क्यूं अचूम्बो करौ हो? अर म्हौरी तरफ क्यूं इण परकार देख रिया हो की जांणै म्हौ ही अपणै सामरथ या भगती ऊं इणनै चलणै-फिरणै लायक बणा दियौ? अबराहम अर इसहाक अर याकूब रै परमेसर, म्हौरै बापदादों रै परमेसर नै अपणै सेवक यीसु री महिमा की। पण थै उणनै पकड़ा दियौ, अर जद पिलातुस उणनै छोड़ दैणै रौ विचार करयौ, तद थै उणरै सांम्ही उणरौ इन्कार करयौ। थै उण पवितर अर धरमी रौ इन्कार करयौ, अर विनती किनी, की एक हत्यारे नै थौरे वास्तै छोड़ दियौ जाये। अर थै जीवन रै अधिपति नै मार दियौ, जिणनै परमेसर मरयोड़ौ में ऊं जिलायौ, अर इण बात रा म्हौ गवाई हो। अर यीसु रै नाम नै, उण विसवास रै दवारा जिकौ उणरै नाम पर है, इण मिनख नै जिणनै थै देखौ हो अर जांणौ भी हो सामरथ दीनी है। उणीज विसवास नै जिकौ उणरै दवारा है, इणनै थांरै सगळौ रै सांम्ही बिलकुल भलौ सावळ कर दियौ है। “अबै हे भाइयो, म्हैं जांणूं की ओ कांम थै अजांण में कियो, अर वैड़ौ ही थौरे सरदारो नै भी कियो। पण जिण बातां नै परमेसर नै सगळै भविसयदाताओ रै जरियै पैला ही बता दियौ हो, की उणरौ मसीह दुख उठावैला, उणै उणनै इण रीति ऊं पूरौ कियो। इण वास्तै, मन फिराओ अर लौट आओ की थौरा पाप मिटाया जाये, जिण ऊं परभु रै नजीक ऊं आराम रै दिन आए, अर वो यीसु नै भेजे जिकौ थौरे वास्तै पैला ऊं मसीह ठैरायोड़ौ है। जरुरी है की वो सरग में उण वगत तांई रैवै जैड़ी तांई की वो सगळी बातां रौ सुधार नीं कर ले जिणरी चरचा जगत रै सरूआत ऊं परमेसर नै आपरै पवितर भविसयदाताओ रै जरियै ही कही है। “ज्यौ मूसा कयौ, ‘परभु परमेसर थौरे भाइयो में ऊं थौरे वास्तै म्हारै जैड़ौ एक भविसयदाता उठावैला। जिकौ कीं वो थौरे ऊं कैवै, उणरी सुण लेणी। पण हरैक मिनख जिकौ उण भविसयदाता री नीं सुणैला, वो परमेसर रै लोगां ऊं अलग करनै नास किया जावैला।’ “अर समूएल ऊं लेयनै उणरै बाद वाळौ तांई जितरा भविसयदाता बोलया उण सगळौ नै इण दिनां रौ संदेस दियौ है। थै भविसयदाता री औळाद अर उण वाचा रा हकदार हो, जिकौ परमेसर नै थौरे बापदादों ऊं बांधी, जद उणै अबराहम ऊं कयौ, ‘थारै वंस रै जरियै धरती रा सगळा घराणा आसीस पावैला।’ परमेसर नै आपरै बेटे यीसु नै उठायनै पैला थौरे खनै भेज्यौ, की थौरे में ऊं हरैक नै थौरी बुराइयो ऊं फेरनै आसीस दे।” जद पतरस अर यूहन्‍ना उण लोगां ऊं ओ कैह रिया हा, तो याजक अर मिंदर रै सिपाईयो रौ सरदार अर कीं सदूकी उणौरौ विरोध कियो। क्यूंकै वे घणा रीसे बळया की पतरस अर यूहन्‍ना लोगां नै सिखाता हा अर यीसु रौ उदाहरण देयनै मरयोड़े में ऊं जी उठनै रौ परचार कर रिया हा। उणौ उणौनै पकड़नै दूजै दिन तांई जेळ में राख्या क्यूंकै सिंझया होय गी ही। पण वचन नै सुणणैवाळौ में ऊं घणौ नै विसवास कियो, अर उणौरी गिणती लगोलग पांच हजार आदमियों रै बराबर ही। दूजै दिन ऐड़ौ होयौ की उणरै सरदार अर पुरनिये अर सास्तरी अर महायाजक हन्‍ना अर कैफा अर यूहन्‍ना अर सिकन्दर अर जितरा महायाजक रै घराणै रा हा, सगळा यरुसलेम मांय भेळा होया। वे प्रेरितों नै बीच मे ऊभा करनै पूछण लागा, “की थै ओ कांम कीण सामरथ ऊं अर कीण नाम ऊं कियो है?” तद पतरस नै पवितर आतमा ऊं भरपूर होयनै उणौनै कयौ, “हे लोगां रै सरदारो अर पुरनियो, इण लंगड़े मिनख रै साथै जिकौ भलाई किनी है, जे आज अपां ऊं उणरै बारै में पूछताछ की जावै, की वो कीकर ठीक होयौ, तो थै सगळा अर सगळा इजरायली लोग जांण ले की यीसु मसीह नासरी रै नाम ऊं जिणनै थै सूली माथै चढ़ायौ, अर परमेसर नै मरयोड़ौ में ऊं जिलायौ, ओ मिनख थौरे सांम्ही राजी खुसी ऊभौ है। ओ वोहीज भाटो है जिणनै थै राजमिस्त्रियों निकमो जांण्यौ अर वो कोने रौ भाटो हो गियौ। किणी दूजै रै जरियै उद्धार कोनीं, क्यूंकै सरग रै नीचे मिनखौ में वळै कोई दूजौ नाम नीं दियोड़ो, जिणरै जरियै म्हौ उद्धार पा सकौ।” जद उणौ पतरस अर यूहन्‍ना री हीमत देखी, अर ओ जांण्यौ की ऐ अनपढ़ अर साधारण मिनख है, तो अचूम्बो करयौ, पछै उणौनै ओळखया, की ऐ यीसु रै साथै रैह चुकया है। उण मिनख नै जिकौ सावळ होयौ हो, उणरै साथै ऊभौ देखनै, वे विरोध मे कीं नीं कैह सकया। पण उणनै सभा ऊं बारै जावण री आग्या देयनै, वे आपस मे विचार करण लागा, “म्हौ इण मिनखौ रै साथै कांई करौ? क्यूंकै यरुसलेम रै सगळै रैवणवाळौ ऊपर परगट है, की इणरै जरियै एक खास चिन्ह दिखायौ गियौ है, अर म्हौ उणरौ इन्कार नीं कर सकौ। पण इण वास्तै की आ बात लोगां मे वळै घणी फैल नीं जावै, अपां उणनै धमकाओ, की वे इण नाम ऊं वळै किणी मिनख ऊं बातां नीं करै।” तद उणौनै बुलाया अर चेताणी देयनै ओ कयौ, “यीसु रै नाम ऊं कीं भी नीं बोलणौ अर नीं सिखाणौ।” पण पतरस अर यूहन्‍ना उणौनै जबाब दियौ, “थै इज न्याव करौ, कांई ओ परमेसर रै नजीक भलौ है की म्हौ परमेसर री बात ऊं बढ़नै थौरी बात मांनौ। क्यूंकै ओ तो म्हौरै ऊं होवै कोनीं की जिकौ म्हौ देख्यौ अर सुण्यौ है, वो नीं कैवौ।” तद उणौ उणौनै वळै धमकायनै छोड़ दिया, क्यूंकै लोगां रै कारण उणौनै डंड दैणै रौ कोई मौकौ नीं मिळियौ, इण वास्तै की जिकौ घटना होई ही उणरै कारण सगळा लोग परमेसर री महिमा करता हा। वो मिनख, जिण ऊपर सावळ करणै रौ चिन्ह दिखायौ हो, चाळीस बरस ऊं घणी उमर रौ हो। वे छूटनै आपरै साथियो रै खनै आया, अर जिकौ कीं परधान याजकौ अर पुरनियो उणौनै कयौ हो, वो सगळौ उणौनै कैह सुणायो। ओ सुणनै उणौ एक मन होन ऊंचै सबद ऊं परमेसर ऊं कयौ, “हे मालिक, थूं वोहीज है जिणै सरग अर धरती अर जिकौ कीं उणमे बणाया है। थै पवितर आतमा रै जरियै थारै सेवक म्हौरै पिता दाऊद रै जरियै कयौ, ‘दूजी जातियो नै हुलड़ क्यूं मचायो? अर देस देस रै लोगां नै क्यूं फालतू बातां सोची? परभु अर उणरै मसीह रै विरोध में धरती रा राजा ऊभा होया, अर हाकिम एक साथै भेळा हो गिया।’ क्यूंकै हकीगत थारै सेवक यीसु रै विरोध में, जिणरौ थै अभिसेक कियो, हेरोदेस अर पुन्तियुस पिलातुस भी दूजी जातियो अर इजरालियो रै साथै उण नगरी मांय भेळा होया, की जिकौ कीं पैला ऊं थारी सामरथ अर इछा ऊं ठैरयो हो वोहीज कर। अबै, हे परभु, उणौरी धमकियो नै देख, अर अपणै दासो नै वरदान दे की थारौ वचन बड़े हियाव ऊं सुणावै। सावळ करणै वास्तै थूं अपणौ हाथ बढ़ा, की चिन्ह अर अचूम्बे रा कांम थारै पवितर सेवक यीसु रै नाम ऊं किया जावै।” जद वे पराथना कर चुकया, तो वो जगा जठै वे भेळा होयोड़ा हा हिल गी, अर वे सगळा पवितर आतमा ऊं भरग्या, अर परमेसर रा वचन हीमत ऊं सुणाता रिया। अर विसवास करणैवाळौ री मंडली एक चित अर एक मन रा हा एठै तांई की कोई भी अपणी जायदाद अपणी कोनीं कैवता हा, पण सगळौ भागीदारी में हो। अर प्रेरित घणी सामरथ ऊं परभु यीसु रै जी उठनै री गवाई देता रिया अर उण सबां ऊपर घणी करपा ही। अर उणमे कोई भी गरीब नीं हो, क्यूंकै जिणरै खनै जमीन या घर हो, वे उणौनै बेच बेचनै, बिकीयोड़ी चीजों रा दाम लाता, अर वो प्रेरितों रै पगां चढ़ावता हा। अर जैड़ी जिणनै जरुरत होती ही, उणरै मुजब हरैक नै बांट दिया करता हा। यूसुफ नाम, साइप्रस रौ एक लेवी वंस रौ हो जिणरौ नाम प्रेरितों नै बरनबास “मतलब हीमत बढ़ाणै वाळौ” राख्यौ हो। उणरी कीं जमीन ही, जिकौ उणै बेची, अर दाम रा रूपिया लायनै प्रेरितों रै पगां चढ़ा दिया। हनन्याह नाम रौ एक मिनख अर उणरी लुगाई, सफीरा नै थोड़ी जमीन बेची अर उणरै मोल में ऊं कईक राख दिया, अर आ बात उणरी लुगाई भी जांणती ही, अर उणरौ एक हिस्सो लायनै प्रेरितों रै पगां रै आगै राख दियौ। पतरस कयौ, “हे हनन्याह! सैतान नै थारै मन मांय आ बात क्यूं घाली की थूं पवितर आतमा ऊं कूड़ौ बोले, अर जमीन रै मोल में ऊं कईक राख छोड़ै? जद तांई वो थारै खनै री, कांई थारी कोनीं ही? अर जद बिक गी तो कांई वो धन थारै वस में कोनीं हो? थै आ बात अपणै मन में क्यूं सोची? थूं मिनखौ ऊं नीं, पण परमेसर ऊं कूड़ौ बोल्यौ है।” ऐ बातां सुणतै ही हनन्याह नीचो पड़ियौ अर मरग्यौ। अर सगळां सुणणैवाळौ माथै घणौ भय छा गियौ। पछै जवानो नै उठनै उणरी अरथी बणाई अर बारै लेय जायनै बूर दियौ। लगभग तीन घंटे रै पछै उणरी लुगाई, जिकौ कीं होयौ हो, कोनीं जांणती अर मांय आई। तद पतरस उणनै कयौ, “म्हनै बता कांई थै वो जमीन इतै मे ही बेची ही?” उणै कयौ, “हां, इतै में ही।” तद पतरस उणनै कयौ, “आ कांई बात है, की थै दोनूं जणौ नै परभु री आतमा री परीकसा रै वास्तै एको कियो है? देख, थारै घरधणी नै बूरणवाळा बारणा ऊपर ऊभा है, अर थनै भी बारै ले जावैला।” तो वो तुरत उणरै पगां पड़ी, अर मर गी, अर जवानो नै मांय आयनै उणनै मरयोड़ी देखी, अर बारै ले जायनै उणरै घरधणी रै खनै बूर दीनी। सगळै विसवासियो ऊपर अर इण बातां नै सगळा सुणणैवाळौ माथै भय छा गियौ। प्रेरितों रै हाथो बोहत चिन्ह अर अचूम्बे रा कांम लोगां रै बीच में दिखाया जाता हा, अर वे सगळा एक चित होयनै सुलैमान रै ओसारे मांय भेळा होता हा। पण दूजौ मे ऊं किणी री आ हीमत कोनीं होती ही की जा मिळौ, तौभी लोग उणरी बड़ाई करता हा। तौभी विसवास करणैवाळा मिनख अर लुगाईयां परभु री कलीसिया में घणाहारा बढ़ रिया हा। एठै तांई की लोग बीमारों नै सड़को ऊपर ला लायनै, खाटों अर खटोलों ऊपर लिटा देता हा की जद पतरस आवै, तो उणरी छाया ही उणमे ऊं किणी माथै पड़ जाए। यरुसलेम रै आजू-बाजू रै नगरो ऊं भी बोहत लोग बीमारों अर दुस्ट आतमाओ ऊं तंग होयोड़ा नै ला लायनै, भेळा होवता हा, अर सगळा सावळ कर दिया जाता हा। तद महायाजक अर उणरै सगळा साथी जिकौ सदूकियों रै पंथ रा हा, रीसे बळया अर प्रेरितों नै पकड़नै जेळ में बंद कर दिया। पण रात में परभु रौ एक सरगदूत जेळखानै रौ फाटक खौलनै उणौनै बारै लायनै कयौ, “जाओ, मिंदर में ऊभा होयनै इण जीवन री सगळी बातां लोगां नै सुणाओ।” वे ओ सुणनै सवार होते ही मिंदर में जायनै उपदेस दैणै लागा। तद महायाजक अर उणरा साथियो नै आयनै महासभा नै अर इजरालियो रै सगळा पुरनियो नै भेळा किया, अर जेळखानै में कहला भेज्या की उणौनै लावै। पण सिपाईयो नै उठै जायनै देख्यौ तो उणौनै जेळखानै में कोनीं देख्यां, अर पाछा आयनै समाचार दिया, “म्हौ जेळखानै नै बड़ी चौकसी ऊं बंद कियो हो, अर पहरेदारो नै बारै बारणा माथै ऊभा देख्यां, पण जद खोलयौ, तो मांय कोई नीं मिळियौ।” जद मिंदर में सिपाईयो रौ सरदार अर परधान याजकौ नै आ बात सुणी, तो उणौरै बारै में घणी चिंता में पड़ग्या की उणौरौ कांई होयौ। इतै में किणी नै आयनै उणौनै बतायौ, “देखौ, जिणौनै थै जेळखानै में बंद किया हा, वे मिनख मिंदर में ऊभा लोगां नै उपदेस दे रिया है।” तद सरदार, सिपाईयो रै साथै जायनै, उणौनै ले आया, पण जबरदस्ती कोनीं, क्यूंकै वे लोगां ऊं डरता हा की म्हौरै भाटा नीं ठोक दे। वो उणौनै लायनै महासभा रै सांमै ऊभा करया, तद महायाजक उणौ ऊं कयौ, “कांई म्हौ थांनै चितायनै आग्या कोनीं दी ही, की थै इण नाम ऊं उपदेस कोनीं दैणौ? तौभी देखौ, थै सगळै यरुसलेम नै अपणै उपदेस ऊं भर दियौ है अर उण मिनख रौ लोई म्हौरै ऊपर लाणौ चावौ हो।” तद पतरस अर दूजा प्रेरितों नै जबाब दियौ, “मिनखौ री आग्या ऊं बढ़नै परमेसर री आग्या रौ पालण करणौ ही म्हौरौ करम है। म्हौरै बापदादों रै परमेसर यीसु नै जिलायौ, जिणनै थै सूली माथै लटकायनै मार नोख्यौ हो। उणनै परमेसर, परभु अर मुगतिदाता ठैरायनै, अपणै जीमणै हाथ बिठा दियौ, की वो इजरालियो रौ मन फिराव री ताकत अर पापों री माफी दे। म्हौ इण बातां रा गवाई हो अर व्यौंही पवितर आतमा भी, जिणै परमेसर उणनै दीनी है जे उणरी आग्या मांनै है।” ओ सुणन वे जळण लागा, अर उणौनै मारणा चाहया। पण गमलीएल नाम रौ एक फरीसी जिकौ व्यवस्थापक अर सगळै लोगां में मानयतो हो, न्याव में ऊभौ होयनै प्रेरितों नै थोड़ी जेज रै वास्तै बारै कर दैणै री आग्या दीनी। तद उणै कयौ, “हे इजरालियो, थै जे कंई इण मिनखौ ऊं करणौ चावौ हो, सोच समझ नै करजौ। क्यूंकै इण दिनां ऊं पैला थियूदास ओ केवतो होयौ उठयौ, की ‘म्हैं’ भी कंई हूं, अर कोई च्यार सौ मिनख उणरै साथै हो गिया, पण वो मारयो गियौ अर जिता लोग उणनै मानता हा, सगळा तितर-बितर हो गिया। उणरै पछै जनगणना रै दिनां में यहूदा गलीली उठयौ। कईक लोग आपरी तरफ कर लिया, वो भी नास हो गियौ अर जिता लोग उणनै मानता हा, सगळा तितर-बितर हो गिया। इण वास्तै अबै म्हैं थौरे ऊं कैवूं हूं, इण मिनखौ ऊं आगा ही रैवौ अर इणौ ऊं कंई कांम नीं राखौ। क्यूंकै जे ओ धरम या कांम मिनखौ री तरफ ऊं होवै तद तो मिट जावैला। पण जे परमेसर री तरफ ऊं है, तो थै उणौनै कदैई मिटा नीं सकौ ला। कठैई ऐड़ौ नीं हो की थै परमेसर ऊं भी लड़नवाळा ठैहरौ।” तद उणौनै उणरी बात मांन ली। अर प्रेरितों नै बुलायनै ठोकाया, अर ओ आदेस देयनै छोड़ दिया की यीसु रै नाम ऊं वळै बात मती करजौ। वे इण बात ऊं खुस होयनै महासभा रै सांमै ऊं जाता रिया, की “म्हौ” उणरै नाम रै वास्तै बेजता होणै रै लायक तो ठैरया। वे हमेसां मिंदर में अर घर-घर में उपदेस करनै, अर इण बात रौ सुभ संदेस सुणाणै ऊं की यीसु ही मसीह है ना रूकया। उण दिनां में जद चेलौ री गिणती बोहत बढ़ण लागी, तद यूनानी भासा बोलणवाळा इबरानी भासा बोलनेवाळौ माथै कुड़कुड़ाण लागा, की “हमेसां री सेवकाई मे म्हौरी विधवाओं री सुधि कोनीं लेवे।” तद उण बारैह प्रेरितों नै सगळै विसवासी लोगां नै आपरै खनै बुलायनै कयौ, “ओ ठीक कोनीं की म्हौ परमेसर रौ वचन सिखाणा छोड़नै खिलाण-पिलाण री सेवा में रैवौ। इण वास्तै, हे भाइयो, अपणै में ऊं सात सुनाम मिनखौ नै जिकौ पवितर आतमा अर बुद्धि ऊं हो, चुण लौ, की म्हौ उणनै इण कांम ऊपर ठैरा दो। पण म्हौ तो पराथना मे अर वचन सिखाणै मे लागयोड़ा रौला।” आ बात सगळै विसवासियो नै चौखी लागी, अर उणौनै स्तिफनुस नाम रौ एक मिनख नै जिकौ विसवास अर पवितर आतमा ऊं भरपूर हो, अर फिलिप्पुस, अर प्रुखुरूस, अर नीकानोर, अर तीमोन, अर परमिनास, अर अन्ताकियावासी नीकुलाउस नै जिकौ यहूदी मत मे आय गियौ हो, चुण लियौ। इणौनै प्रेरितों रै सांमै ऊभा किया अर उणौनै पराथना करनै उणौ माथै हाथ राख्यौ। परमेसर रौ वचन फैलतौ गियौ अर यरुसलेम मे चेलौ री गिणती बोहत बढ़ती गी। अर घणाहारा याजक इण मत नै मानणवाळा हो गिया। स्तिफनुस दया अर सामरथ ऊं भरपूर होयनै लोगां में मोटा-मोटा अचूम्बे रा कांम अर चिन्ह दिखाया करतौ हो। तद उण यूनानी आराधना घर में ऊं जिकौ लिबिरतिनों री कैलाती ही, अर कुरेनी अर सिकन्दरिया अर किलिकिया अर एसिया रै लोगां में ऊं कईक उठनै स्तिफनुस ऊं वाद-विवाद करण लागा। पण उण ग्यांन अर उण आतमा रौ जिणसूं वो बातां करतौ हो, वे उणरै सांमै नीं ठैर सकया। इण कारण उणौ कई लोगां नै रूपियौ रौ लालच दियौ जिकौ कैवण लागा, “म्हौ इणनै मूसा अर परमेसर रै विरोध में निंदा री बातां कैवतै सुण्यौ है।” अर लोगां अर यहूदी नेता अर सास्तरियों नै भड़कायनै चढ़ आया अर उणनै पकड़नै महासभा में ले आया। अर झूठा गवाई ऊभा करया, जिणौ कयौ, “ओ मिनख इण पवितर मिंदर अर व्यवस्था रै विरोध में बोलणौ कोनीं छोड़ै है। क्यूंकै म्हौ उणनै ओ कैवतै सुण्यौ है की ओहीज यीसु नासरी इण मिंदर नै ढ़ा दैला, अर उण रीतियां नै बदळ दैला जिकौ मूसा नै अपांनै सौंपी है।” तद सगळा लोगां नै जिकौ सभा में बैठा हा, उण ऊपर निजर गड़ाई तो उणरौ मूंडौ सरगदूत रै जैड़ौ देख्यौ। तद महायाजक स्तिफनुस नै कयौ, “कांई ऐ बातां साची है?” स्तिफनुस कयौ, “हे भाइयो, अर बापदादों सुणौ। म्हौरौ पिता अबराहम हारान में रैवण ऊं पैला जद मेसोपोटामिया में हो। तो महान परमेसर उणनै दरसण दिया, अर उण ऊं कयौ, ‘थूं अपणै देस अर अपणै कुटुम्ब ऊं निकळनै उण देस में जा, जिकौ म्हैं थनै दिखाऊंला।’ तद वो कसदियौ रै देस ऊं निकळनै हारान में जायनै रैवण लागौ। उणरै पिता री मौत रै पछै परमेसर उणनै उठै ऊं इण देस में लायनै बसाया जिणमे अबै थै रैय रिया हो, अर उणनै कीं मीरास बल्कि पग राखनै री भी जगा कोनीं दीनी, पण वायदो कियो की म्हैं ओ देस थारै अर थारै पछै थारै वंस रै हाथ कर दूंला। जद की उण वगत उणरै कोई औळाद भी नीं ही। अर परमेसर यूं कयौ, ‘थारी औळाद रा लोग पराये देस में परदेसी होवैला, अर वे उणौनै दास बणावैला अर च्यार सौ बरस तांई दुख दैला।’ पछै परमेसर कयौ, ‘जिण जाति रा वो दास होवैला, उणनै म्हैं डंड दूंला, अर इणरै पछै वे निकळनै इण जगा म्हारी सेवा करैला।’ अर परमेसर अबराहम रै साथै खतने री वाचा बांधी। अर इणीज दसा में इसहाक उण ऊं जनमियौ अर आठवे दिन उणरौ खतनो करयौ। अर इसहाक ऊं याकूब अर याकूब ऊं बारैह कुलो रा मिनख जनमिया। “वे मिनख यूसुफ ऊं जळण करनै उणनै मिसर देस जावणवाळौ रै हाथ बेच दियौ। पण परमेसर उणरै साथै हो। अर उणनै उणरै सगळै दुखौ ऊं छुड़ायनै मिसर रै राजा फिरौन री दिस्टी में अनुग्रह अर बुद्धि दी, अर उणै इणनै मिसर ऊपर अर अपणै घर ऊपर हाकिम ठैरायौ। तद मिसर अर कनान रै सगळै देस में अकाळ पड़ियौ, जिण ऊं घणौ दुख होयौ, अर म्हौरै बापदादों नै खाणै रै लियै अन्‍न कोनीं मिळतौ हो। पण याकूब ओ सुणनै की मिसर में अनाज है, तो उणै आपरै बेटौ नै जिकौ म्हौरै बापदादों कहीजै उणौनै पैली बार भेज्या। उणरी दूजी यात्रा रै मौकै माथै यूसुफ नै आपरै भाइयो नै आपरी ओळखाण दीनी, अर फिरौन राजा नै भी यूसुफ री जाति मालूम होयगीं। तद यूसुफ नै आपरै पिता याकूब अर आपरै सगळै कुटुम्ब नै, जिकौ पचहतर लोग हा, उणौनै बुलाया ग्या। तद याकूब मिसर में गियौ, अर उठै वो अर म्हौरै बापदादा मर ग्या। उणौरी लासां सकेम में पूगायनै उण कबर में राखी, जिणै अबराहम नै चांदी देन सकेम में हमोर री औळाद ऊं मोल लियौ हो। “पण जद उण वायदे रौ पूरौ होणै रौ वगत नैड़ौ आयौ जिकौ परमेसर नै अबराहम ऊं करयौ हो, तो मिसर में म्हौरै लोगां री गिणती घणी बढ़गी ही। तद मिसर में दूजौ राजा होयौ जिकौ यूसुफ नै कोनीं जांणतौ हो। उणै म्हौरी जाति ऊं चालाकी करनै म्हौरै बापदादों रै साथै एठै तांई भूंडौ व्यवहार कियो, की उणनै आपरै टाबरां नै फेंक देणा पड़या की वे जीवता नीं रहे। “उण वगत मूसा जनमियौ। वो परमेसर री दिस्टी में बोहत ही खुबसुरत हो। वो तीन महीनै तांई आपरै पिता रै घर में पाळ-पोस की। जद घर रै बाहर छोड़ दियौ ग्यौ तो फिरौन री बेटी नै उणनै उठा दियौ, अर आपरौ बेटौ करनै पाळ-पोस की। मूसा नै मिसरियों री सगळी विधया पढ़ाई गई, अर वो वचन अर करम दोनूं में सामरथी हो। “जद वो चाळीस बरस रौ होयौ, तो उणरै मन में आयौ की ‘म्हैं अपणै इजरायली भाइयो ऊं भेट करूं।’ मूसा एक मिनख माथै अन्याव होते देखनै उणनै बचायो, अर मिसरी नै मारनै सतायोड़े रौ बदळौ लियौ। मूसा सोच्यौ की म्हारा भाई समझै ला की ‘परमेसर म्हारै हाथो ऊं उणौरौ उद्धार करैला,’ पण वे नीं समझया। दूजै दिन जद वे दो इजरायली लोग आपस में लड़ रिया हा, तो वो उठै आ गियौ। अर ओ केन उणौनै मिलाप कराणै रै वास्तै समझाया, ‘हे आदमियों, थै तो भाई-भाई हो, एक दूजै ऊपर क्यूं अन्याव करौ हो?’ पण जिकौ अपणै पड़ोसी ऊपर अन्याव करतौ हो, उणै मूसा नै ओ केन हटा दियौ, ‘थनै कीणै म्हौरै माथै हाकिम अर न्यावी ठैरायौ है? कांई जिण रीत ऊं थूं काले मिसरी नै मारयो म्हनै भी मारणौ चावै है?’ आ बात सुणनै मूसा नाह गियौ अर मिधान देस में परदेसी होयनै रैवण लागौ, अर उठै इणरै दो बेटा जनमिया। “जद पूरा चाळीस बरस बीत गिया, तो एक सरगदूत नै सीनै भाखर रै रिंदरोही में उणनै बळती व्‍ही झाड़ी री लाय में दरसण दियौ। मूसा ओ दरसण देखनै अचूम्बो करयौ, अर जद देखणै रै वास्तै वो खनै गियौ, तो परभु रौ ओ सबद होयौ, ‘म्हैं थारै बापदादों, अबराहम, इसहाक अर याकूब रौ परमेसर हूं।’ तद तो मूसा कांप उठयौ, एठै तांई की उणै देखणै री हीमत कोनीं रीं। “तद परभु उणनै कयौ, ‘थारै पगां ऊं जूती उतार ले, क्यूंकै जिण जगा थूं ऊभौ है, वो पवितर जमीन है। म्हैं हकीगत अपणै लोगां री जिकौ मिसर में है, हालत देखी है, अर उणौरी आह अर उणौरौ रोवणौ सुण्यौ है, इण वास्तै उणौनै छुड़ानै रै खातर उतरियौ हूं। अबै आ, म्हैं थनै मिसर भेजूंला।’ “जिण मूसा नै उणौ ओ केन मना कियो हो, ‘थनै कीणै म्हौ माथै हाकिम अर न्यावी ठैरायौ है?’ उणीज नै परमेसर हाकिम अर छुड़ानैवाळौ ठैरायनै, उण सरगदूत रै जरियै जिणै उणनै झाड़ी में दरसण दिया हा, भेज्यौ। ओहीज मिनख मिसर अर लाल समंदर अर रिंदरोही में चाळीस बरस तांई अचूम्बे रा कांम अर चिन्ह दिखा दिखायनै उणौनै निकाळनै लायौ। “ओ वोहीज मूसा है, जिणै इजरालियो ऊं कयौ, ‘परमेसर थौरे भाइयो में ऊं थौरे वास्तै म्हारै जैड़ौ एक भविसयदाता उठावैला।’ ओ वोहीज मूसा है, जिकौ रिंदरोही में म्हौरै इजरालियो बापदादों रै साथै हो अर सीनै भाखर माथै सरगदूत नै उण ऊं बातां की ही। उणीज नै परमेसर रौ जीवित वचन मिळिया हा, की वो वचन अपां तांई पूगावै। “पण म्हौरै बापदादों नै मूसा री मानणी नीं चाही। बल्कि मुसा नै हटायनै उणौरौ मन मिसर री तरफ जावणौ चावता हा, अर हारून ऊं कयौ, ‘म्हौरै वास्तै ऐड़ा देवता बणा, जिकौ म्हौरै आगै-आगै चालै, क्यूंकै ओ मूसा जिकौ म्हौ नै मिसर देस ऊं निकाळनै लायौ, म्हौ नीं जांणौ उणरै कांई होयौ?’ उण दिनां में उणौ एक बछड़ो बणायनै उणरी मूरती रै आगै बलि चढ़ाई, अर आपरै हाथो रै कांमां ऊं खुस होवण लागा। अतस परमेसर नै निजर फेर उणौनै छोड़ दिया, की आकासगण नै पूजै, ज्यूं भविसयदाता री किताब मांय लिख्योड़ौ है, ‘हे इजरायल रा घराणौ, कांई थै रिंदरोही में चाळीस बरस तांई पसुबलि अर अन्‍नबलि म्हनै इज चढ़ाता रिया? थै मोलेक रै तम्बू अर रिफान देवता रै तारै नै लिया फिरता हा, मतलब उण मूरतियो नै जिकौ थै नमण करणै रै वास्तै बणाई ही। अतस म्हैं थांनै बेबिलोन रै परे लेय जायनै बसाऊंला।’ “गवाई रौ तम्बू रिंदरोही में म्हौरै बापदादों रै बीच में हो, ज्यूं उणनै ठैरायौ जिणै मूसा ऊं कयौ, ‘जिकौ आकार थै देख्यौ है, उणरै अनुसार इणनै बणा।’ उणीज तम्बू नै म्हौरै बापदादों सरूआत ऊं पायनै यहोसू रै साथै एठै ले आया। जिण वगत की उणौनै उण दूजीजातियो माथै अधिकार पायो, जिणै परमेसर नै म्हौरै बापदादों रै सांमै ऊं निकाळ दिया, अर वो तम्बू राजा दाऊद रै वगत तांई रियौ। दाऊद माथै परमेसर नै अनुग्रह कियो, अतस उणै विनती करी की वो याकूब रौ परमेसर रै वास्तै रैवास बणावै। पण सुलैमान नै परमेसर वास्तै घर बणायौ। “पण परम परमेसर हाथ रै बणायोड़ा घरो में कोनीं रैवै, ज्यूं की भविसयदाता कयौ, ‘परभु कैवै है, सरग म्हारौ सिहासण, अर धरती म्हारै पगां तळै री पीढ़ी है। म्हारै वास्तै थै कीण परकार रौ घर बणाओला? अर म्हारै आराम री कौणसी जगा होवैला? कांई ऐ सगळी चीजों म्हारै हाथ री बणायोड़ी कोनीं?’ “हे जिदी लोगां, थै नीं तो सुणणौ चावौ अर नीं मानणौ चावौ थै हमेसां पवितर आतमा रौ विरोध करौ हो। ज्यूं थौरे बापदादा करता हा, व्यौंही थै भी करौ हो। भविसयदाताओ में ऊं किणनै थौरे बापदादों कोनीं सताया? उणौनै उण मसीह रै आवण रौ संदेस देवणवाळौ नै मार नोख्या, अर अबै थै भी उण मसीह नै पकड़ाणै वाळा अर मार नोखणै वाळा होया। थै सरगदूतो रै दवारा ठैरायोड़ी व्यवस्था तो मूसा ऊं पाई, पण उणरौ पालण कोनीं करयौ।” स्तिफनुस री ऐ बातां सुणनै महासभा रा लोग जळण लागा अर उण माथै दांत पीसने लागा। पण उणनै पवितर आतमा ऊं भरपूर होयनै सरग री तरफ देख्यौ अर परमेसर री महिमा नै अर यीसु रौ परमेसर रै जीमणै तरफ ऊभौ देखनै कयौ, “देखौ, म्हैं सरग नै खुलयोड़ौ, अर मिनख रै बेटे नै परमेसर रै जीमणै तरफ ऊभौ होयौ देखूं हूं।” तद उणौनै जोर ऊं चिलायनै कांन बंद कर लिया, अर एक साथै उण माथै झपटया। अर उणनै यरुसलेम नगरी रै बारै निकाळनै दोस लगाणैवाळा आपरा कोट उतार नै साऊल नाम रौ एक जवान रै पगां रै खनै राख दिया। अर उण ऊपर भाटा ठोकणै लागा। वे स्तिफनुस माथै भाटा ठोकता रिया, अर वो ओ केन पराथना करतौ रियौ, “हे परभु, यीसु, म्हारी आतमा नै ग्रहण कर।” पछै गोडा टेकनै जोर ऊं चिलायौ, “हे परभु, ओ पाप उणौ माथै मत लगा।” अर ओ केन वो प्रांण छोड़ दियौ। साऊल उणरै मौत में सहमत हो। उणीज दिन यरुसलेम रै विसवासियो ऊपर घणौ दुख पड़नै लागौ अर प्रेरितों नै छोड़नै सगळै विसवासी यहूदिया अर सामरिया देसो में तितर-बितर हो गिया। कईक परमेसर भगतो स्तिफनुस नै कबर में राख्यौ अर उणरै वास्तै घणौ विलाप करयौ। साऊल कलीसिया नै उजाड़ रियौ हो, अर घर-घर घुसनै मिनखां अर लुगाईयां नै घसीट-घसीटनै जेळखानै में घालतौ हो। जिकौ तितर-बितर होया हा, वे विसवासी सुभ संदेस सुणाता फिरया, अर फिलिप्पुस सामरिया नगरी में जायनै लोगां में मसीह रौ परचार करनै लागौ। जिकौ बातां फिलिप्पुस कही वां लोगां नै सुणनै अर जिकौ चिन्ह वो दिखातौ हो उणनै देखनै, एक चित होयनै मन लगायौ। क्यूंकै घणौ में ऊं दुस्ट आतमा जोर ऊं चिलायनै निकळ गी, अर घणाहारा लकवे रा रोगी अर लंगड़ा भी सावळ करया, अर उण नगरी में बड़ौ आंणंद छा गियौ। इण ऊं पैला उण नगरी में समौन नाम रौ एक मिनख हो, जिकौ जादू-टोणा करनै सामरिया रै लोगां नै भरमीत करतौ अर अपणै आप नै एक महान आदमी बतातौ हो। छोटे ऊं मोटे तांई सगळा उणरौ कदर करता होया कैवता हा, “इण मिनख में साचांणी परमेसर री ताकत है।” उणै बोहत दिनां ऊं उणौनै आपरै जादू रै कांमां ऊं भरमीत कर राख्या हा, इण वास्तै वे इणनै घणौ मानता हा। पण जद उणौनै फिलिप्पुस री बातां पे विसवास कियो जिकौ परमेसर रै राज अर यीसु मसीह रै नाम रौ सुभ संदेस सुणातौ हो तो लोग, कांई आदमी, कांई लुगाईयां, बतिस्मो लेवण लागा। तद समौन नै खुद ही विसवास कियो अर बतिस्मो लेन फिलिप्पुस रै साथै रैवण लागौ। वो चिन्ह अर मोटा-मोटा सामरथ रा कांम होता देखनै अचूम्बो करतौ हो। जद प्रेरितों नै जिकौ यरुसलेम में हा, सुण्यौ की सामरियो नगरी रै लोगां नै परमेसर रौ वचन मांन लियौ है तो पतरस अर यूहन्‍ना नै उणौरै खनै भेज्या। अर उणौनै जायनै विसवासी लोगां रै लियै पराथना की, ताकी पवितर आतमा पावै। क्यूंकै वो अबै तांई उणमे ऊं किणी ऊपर पवितर आतमा नीं उतरी ही, उणौनै तो खाली परभु यीसु रै नाम ऊं बतिस्मो लियौ हो। तद पतरस अर यूहन्‍ना उणौ माथै हाथ राख्यौ अर उणौ पवितर आतमा पाई। जद समौन देख्यौ की प्रेरितों रै हाथ राखणै ऊं पवितर आतमा दी जावै है, तो उणौरै खनै रूपिया लायनै कयौ, “ओ अधिकार म्हनै भी दो, की जिण किणी माथै हाथ राखूं वो पवितर आतमा पावै।” पतरस उणनै कयौ, “थांरा रूपिया थारै साथै नास होवै, क्यूंकै थै परमेसर रै वरदान नै रूपियौ ऊं मोल लेणे रौ विचार कियो। इण बात में नीं थारौ हिस्सो है, नीं भाग। क्यूंकै थारौ मन परमेसर रै आगै सीधौ कोनीं। इण वास्तै अपणी इण बुराई ऊं मन फिरायनै परभु ऊं पराथना कर, सम्भव है थारै मन रौ विचार माफ कियो जावै। क्यूंकै म्हैं देखूं हूं की थारौ मन लालच ऊं भरयोड़ौ अर पाप रै बंधन में पड़ियौ है।” समौन जबाब दियौ, “थै म्हारै वास्तै परभु ऊं पराथना करौ की जिकौ बातां थै कही, उणमे ऊं कोई म्हारै ऊपर नीं आन पड़ै।” अतस पतरस अर यूहन्‍ना गवाई देन अर परभु रौ वचन सुणायनै रास्ते में सामरियो रै घणाहारा गांवों में सुभ संदेस सुणाता होया यरुसलेम गिया। पछै परभु रै एक सरगदूत नै फिलिप्पुस ऊं कयौ, “उठ अर दखण री तरफ उण मारग माथै जा, जिकौ यरुसलेम ऊं गांजा री तरफ जावै है।” ओ मारग रिंदरोही में है। वो उठनै चाल दियौ, उण मारग ऊं, कूस देस रौ एक खास मिनख आ रियौ हो जिकौ कूसियो री राणी कन्दाके रौ मंत्री अर खजांची हो। वो आराधना करनै यरुसलेम ऊं पाछौ आ रियौ हो। वो आपरै रथ माथै बैठयोड़ौ हो, अर यसायाह भविसयदाता री किताब पढ़तौ होयौ पाछौ जा रियौ हो। तद पवितर आतमा नै फिलिप्पुस ऊं कयौ, “नैड़ौ जायनै इण रथ रै साथै हो जा।” फिलिप्पुस अधिकारी रै तरफ दौड़ियो अर उणनै यसायाह भविसयदाता री किताब पढ़ते सुण्यौ, अर पूछयौ, “थूं जिकौ पढ़ रियौ है कांई उणनै समझै भी है?” उणै कयौ, “जैड़ी तांई कोई म्हनै नीं समझाए तो म्हैं कीकर समझूं?” अर फिलिप्पुस ऊं विनती करी की वो चढ़न म्हारै खनै बैठे। पवितर सास्तर रौ पाठ वो पढ़ रियौ हो, वो ओ है। “वो उनियां रै ज्यूं बलि होणै पूगायौ गियौ, अर ज्यूं उनियां अपणै ऊन कुतरनवाळे रै सांमै चुपचाप रैवै है, व्यौंही उणै भी आपरौ मूंडौ नीं खोलयो। उणरी दीनता में उणरौ न्याव कोनीं हो पायो। उणरै वगत रै लोगां रौ वरणन कुण करैला? क्यूंकै धरती ऊं उणरौ प्रांण उठा लियौ जावै है।” इण कारण अधिकारी फिलिप्पुस नै पूछयौ, “म्हैं थारै ऊं विनती करूं हूं, ओ बता की भविसयदाता ओ किणरै बारै में कैवै है, खुद रै या किणी दूजै रै बारै मांय?” तद फिलिप्पुस नै आपरौ मूंडौ खोलयो, अर इणीज सास्तर ऊं सरूआत करनै उणनै यीसु रौ सुभ संदेस सुणाया। मारग में चालता-चालया वे किणी पांणी री जगा पूगा। तद खोजे कयौ, “देख एठै पांणी है। अबै म्हनै बतिस्मो लेणे में कांई तकलीफ है?” फिलिप्पुस कयौ, “जे थूं सगळै मन ऊं विसवास करै है तो ले सकै है।” अधिकारी जबाब दियौ, “म्हैं विसवास करूं हूं की यीसु मसीह परमेसर रौ बेटौ है।” तद उणै रथ ऊभौ करनै री आग्या दी, अर फिलिप्पुस अर अधिकारी दोनूं पांणी मांय उतरिया, अर फिलिप्पुस अधिकारी नै बतिस्मो दियौ। जद वे पांणी में ऊं निकळनै ऊपर आया, तो परभु री आतमा फिलिप्पुस नै उठायनै लैयग्या, अर अधिकारी उणनै पछै नीं देख्यौ, अर वो आंणंद करतौ होयौ आपरै मारग ऊं जातौ रियौ। फिलिप्पुस असदोद में आ निकळयौ, अर जैड़ी तांई कैसरिया में नीं पूगो, तद तांई नगर नगर सुभ संदेस सुणातौ गियौ। साऊल जिकौ अजी तांई परभु रै चेलौ नै धमकानै अर घात करनै री धुन में हो, वो महायाजक रै खनै ग्यौ। अर उणौ ऊं दमिसक नगरी रै यहूदी पराथना घरो रै नाम माथै इण तरीकै री चिठ्ठियो मांगी, की कांई मिनख, कांई लुगाईयां, जिणनै वो इण पंथ में पावै उणौनै बांधनै यरुसलेम में ले आवै। पण चालते-चालते जद वो दमिसक नगरी रै नजीक पूगो, तो एकाएक आभै ऊं उणरै च्यांरूमेर जोत चमकी, अर वो जमीन माथै नीचे पड़ियौ, अर ओ सबद सुण्यौ, “हे साऊल, हे साऊल, थूं म्हनै क्यूं सतावै है?” साऊल पूछयौ, “हे परभु, थूं कुण है?” उणै कयौ, “म्हैं यीसु हूं, जिणनै थूं सतावै है। पण अबै उठनै नगरी में जा, अर जिकौ थनै करणौ है वो थनै कयौ जावैला।” जिकौ मिनख उणरै साथै हा, वे विचार में पड़ग्या। क्यूंकै सबद तो सुणता हा, पण किणी नै देखता कोनीं हा। तद साऊल जमीन माथै ऊं उठयौ, पण जद आंख्यां खोली तो उणनै कीं देठाळौ नीं दियौ, अर वे उणरौ हाथ पकड़नै दमिसक में लैयग्या। वो तीन दिन तांई नीं देख सकयौ, अर नीं खायौ अर नीं पीयो। दमिसक में हनन्याह नाम रौ एक चेलौ हो, उण ऊं परभु दरसण में कयौ, “हे हनन्याह!” उणै कयौ, “हां परभु।” तद परभु उणनै कयौ, “उठनै उण गळी में जा जिकौ ‘सीधी’ कहीजै है, अर यहूदा रै घर में साऊल नाम रौ एक तरसुसवासी नै पूछ, क्यूंकै देख, वो पराथना कर रियौ है, अर उणै दरसण में देख्यौ की हनन्याह नाम रौ एक मिनख नै मांय आवतै अर अपणै ऊपर हाथ राखतै देख्यौ है, ताकी पाछौ देखण लागै।” पण हनन्याह जबाब दियौ, “हे परभु, म्हैं इण मिनख रै बारै मे घणौ ऊं सुण्यौ है की इणनै यरुसलेम में थारै पवितर लोगां रै साथै बोहत बुराइयां की है। अर एठै भी इणनै परधान याजकौ री तरफ ऊं अधिकार मिळियौ है की जिकौ लोग थारौ नाम लेवे है, उण सगळौ नै बांध नै ले जावै।” पण परभु उणनै कयौ, “थूं चालयौ जा। क्यूंकै वो तो दूजी जातियो अर उणरै राजाओ अर इजरालियो रै सांमै म्हारौ नाम परगट करणै रै वास्तै चुणयोड़ौ आदमी है। अर म्हैं उणनै बताऊंला की म्हारै नाम रै वास्तै उणनै कैड़ा कैड़ा दुख उठाणा पड़ैला।” तद हनन्याह उठनै उण घर में ग्यौ, अर उण माथै आपरौ हाथ राखनै कयौ, “हे भाई साऊल, परभु, मतलब यीसु, जिकौ उण मारग में, जिण ऊं थूं आयौ थनै देठाळौ दियौ हो, उणीज म्हनै भेज्यौ है की थूं पाछौ देखण लागै अर पवितर आतमा ऊं भरपूर हो जावै।” अर तुरत उणरी आंख्यां ऊं छिलके ज्यूं निकळयौ अर वो देखण लागौ, अर उठनै बतिस्मो लियौ। पछै खाणौ खायनै ताकत पाई। वो कई दिनां उण चेलौ रै साथै रियौ जिकौ दमिसक में है। अर वो तुरत यहूदी पराथना घरो में यीसु रौ परचार करनै लागौ की “यीसु मसीह परमेसर रौ बेटौ है।” सगळा सुणणवाळा अचूम्बो करनै कैवण लागा, “कांई ओ वोहीज मिनख कोनीं है जिकौ यरुसलेम में उणौनै जिकौ इण नाम नै लेता हा, उणौनै नास करतौ हो, अर एठै भी इण वास्तै आयौ हो की उणौनै बांधनै परधान याजकौ रै खनै ले जावै?” पण साऊल वळै भी सामरथी होता गियौ, अर इण बात रौ परमाण देन की यीसु ही मसीह है, दमिसक रै रैवणवाळा यहूदियो रौ मूंडौ बंद करतौ रियौ। जद घणा दिन बीत गिया, तो यहूदियो नै मिळनै उणनै मारणै री योजना बणाई। पण उणौरी योजना साऊल नै मालूम पड़ गी। वे तो उणनै मारण वास्तै रात दिन फाटको माथै घात मे लागोड़ा रैवता हा। पण रात रौ उणरै चेलौ नै उणनै छाबड़िया मांय बिठायौ, अर नगरकोट ऊपर ऊं लटकायनै उतार दियौ। यरुसलेम में पूगेन उणै चेलौ रै साथै मिळ जांणै री कोसीस करी, पण सगळा उण ऊं डरता हा, क्यूंकै उणनै विसवास कोनीं होवतो हो, की वो भी चेलौ है। पण बरनबास उणनै आपरै साथै प्रेरितों रै खनै लेय जायनै उणौनै बतायौ की उणै कीण रीत ऊं मारग में परभु नै देख्यौ, अर उणै इण ऊं बातां करी, पछै दमिसक में इणै कीकर हीमत ऊं यीसु रै नाम रौ परचार कियो। साऊल उणौरै साथै यरुसलेम में आतो-जातो रियौ अर निधड़क होयनै परभु यीसु रै नाम ऊं परचार करतौ हो। अर यूनानी भासा बोलणवाळा यहूदियो रै साथै बातचीत अर वाद-विवाद करतौ हो। पण वे उणनै मारणै री कोसीस करण लागा। ओ जांणनै विसवासी भाई उणनै कैसरिया लेय आया, अर तरसुस भेज दियौ। इण परकार सगळै यहूदिया, अर गलील, अर सामरिया में कलीसिया नै चैन मिळियौ, अर उणरी बढ़ोतरी होती गी, अर वो परभु रै भय अर पवितर आतमा री सानति में चालता अर बढ़ता गिया। पछै ऐड़ौ होयौ की पतरस हरैक जगा फिरतौ होयौ, परभु रा पवितर लोगां रै खनै भी पूगो, जिकौ लुद्दा में रैवै हो। उठै उणनै एनियास नाम रौ लकवे रौ रोगी एक मिनख मिळियौ, जिकौ आठ साल ऊं खाट में पड़ियौ हो। पतरस उणनै कयौ, “हे एनियास! यीसु मसीह थनै सावळ करै है। उठ, थारौ बिछौणौ उठा।” तद वो तुरत उठनै ऊभौ होयौ। तद लुद्दा अर सारोन रै सगळा रैवणवाळा उणनै देखनै परभु री तरफ फिरया। याफा में तबीता नाम री एक विसवासनी रैवती ही। जिणरौ नाम यूनानी में दोरकास हो मतलब हिरणी। वो बोहत भलाई रा कांम अर दांन किया करती ही। उणीज दिनां में वो बीमार होयनै मर गी। अर उणौनै उणनै नहलायनै अटारी माथै राख दी। इण वास्तै की लुद्दा याफा रै नजीक हो, चेलौ ओ सुणनै की पतरस उठै है, दो मिनख भेजनै उण ऊं विनती की, “म्हौरै खनै आवण ऊं जेज मत कर।” तद पतरस उठनै उणरै साथै हो गियौ, अर जद वो पूगो तो वे उणनै उण अटारी ऊपर लेय ग्या। सगळी विधवाओं रोती व्‍ही उणरै खनै आन ऊभी होई, अर जिकौ कुड़ता अर कपड़ा दोरकास नै उणरै साथै रैवते वैळा बणाया हा, दिखाण लागी। तद पतरस सगळौ नै बारै कर दिया, अर गोडा टेकनै पराथना की अर लास री तरफ देखनै कयौ, “हे तबीता, उठ।” तद उणै आपरी आंख्यां खोल दी, अर पतरस नै देखनै उठनै बैठी। उणै हाथ देयनै उणनै उठाई, अर परमेसर रा लोगां अर विधवाओं नै बुलायनै उणनै जीवती दिखा दी। आ बात सगळै याफा में फैल गी, अर घणौ नै परभु माथै विसवास कियो। अर पतरस याफा में समौन नाम रै किणी चमड़े रौ धंधौ करणैवाळै रै उठै घणा दिन तांई रियौ। कैसरिया में कुरनेलियुस नाम रौ एक मिनख हो, जिकौ रोम देस रै इतालियानी नाम री पलटन रौ सूबेदार हो। वो भगत हो, अर आपरै सगळै घराणै समेत परमेसर ऊं डरता हा, अर यहूदी गरीब लोगां नै बोहत दांन देतो, अर बराबर परमेसर ऊं पराथना करतौ हो। उणै दिन रै तीन बजे रै वगत दरसण में साफ रूप ऊं देख्यां की परमेसर रौ एक सरगदूत उणरै खनै मांय आयनै कैवै है, “हे कुरनेलियुस।” कुरनेलियुस वीनै ध्यांन ऊं देख्यौ अर डरनै कयौ, “हे परभु कांई है?” सरगदूत वीनै कयौ, “थारी पराथनाओं अर थारौ गरीबो नै दांन याद रै वास्तै परमेसर रै सांमै पूगा है। अर अबै याफा में मिनख भेजनै समौन नै, जिकौ पतरस कहीजै है, बुला ले। वो समौन, चमड़े रौ धंधौ करणैवाळै रै घर मेमाण है, जिणरौ घर समंदर रै कांठै है।” जद वो सरगदूत जिणै उण ऊं बातां करी ही जातौ रियौ, तो उणै दो सेवक, अर जिकौ उणरै खनै हाजिर रैवता हा उणमे ऊं एक भगत सिपाई नै बुलायौ, अर उणौनै सगळी बातां बतायनै याफा भेज्या। दूजै दिन जद वे चालता-चालता नगरी रै खनै पूगा, तो बपौर रै वगत पतरस छत माथै पराथना करनै चढ़यौ। उणनै भूख लागी अर कीं खाणौ चावतौ हो, पण जद वे तैयारी कर रिया हा तो वो दरसण देखण लागौ। अर उणै देख्यौ, की आभौ खुल गियौ, अर एक चीज मोटी चादर रै ज्यूं च्यांरू कोनों ऊं लटकती होई, धरती री तरफ उतर री है। जिणमे धरती रा सगळी तरैह रा जिनावर अर रेंगनेवाळा जीव अर आकास रा पंखेरू हा। उणनै एक ऐड़ौ सबद सुणाई दियौ, “हे पतरस, उठ मार अर खा।” पण पतरस कयौ, “नीं, परभु, कदैई नीं। क्यूंकै म्हैं कदैई कोई बिना पवितर या बिना सुद्ध चीज नीं खाई है।” पछै दूजी बार उणनै सबद सुणाई दियौ, “जिकौ कीं परमेसर सुद्ध ठैरायौ है, उणनै थूं असुद्ध मती कैह।” तीन बार ऐड़ौ इज होयौ। तद तुरत वो चीज आकास माथै उठा लियौ हो। जद पतरस अपणै मन में सोच रियौ हो, की “ओ दरसण जिकौ म्हैं देख्यौ वो कांई हो सकै है,” तो देखौ, वे मिनख जिणौनै कुरनेलियुस भेज्या हा, समौन रै घर रौ पतौ लगायनै बारणै माथै आयनै ऊभा होया, अर हैलौ करनै पूछण लागा, “कांई समौन जिकौ पतरस कहीजै है, एठीज मेमाण है?” पतरस तो उण दरसण रै बारै में सोच ही रियौ हो, की पवितर आतमा उणनै कयौ, “देख, तीन मिनख थारी खोज में है। लेकिन उठनै नीचे जा, अर नि:संकोच उणरै साथै हो ले। क्यूंकै म्हैं इज उणौनै भेज्या हूं।” तद पतरस उतरनै उण मिनखौ ऊं कयौ, “देखौ, जिणरी खोज थै कर रिया हो, वो म्हैं इज हूं। थौरे आवण रौ कांई कारण है?” उणौ कयौ, “कुरनेलियुस सूबेदार जिकौ धरमी अर परमेसर ऊं डरणवाळौ अर सगळी यहूदी जाति में उणरौ घणौ मांन है, उणै एक पवितर सरगदूत ऊं चेताणी पाई है की थनै अपणै घर बुलायनै थारै ऊं वचन सुणौ।” तद पतरस वीनै मांय बुलायनै उणरी सेवा-चाकरी की। दूजै दिन वो उणरै साथै गियौ, अर याफा रै भाइयो में ऊं कंई उणौरै साथै हो गिया। दूजै दिन वे कैसरिया पूगा, अर कुरनेलियुस अपणै कुटुम्बियो अर खास मित्रों नै भेळा करनै उणरी बाट जोह रियौ हो। जद पतरस मांय आ रियौ हो, तो कुरनेलियुस उण ऊं भेट की, अर उणरै पगां पड़नै उणनै नमण करी। पण पतरस उणनै उठायनै कयौ, “ऊभौ हो, म्हैं भी तो मिनख हूं।” अर उणरै साथै बातचीत करता होया मांय गिया, अर घणाहारा लोगां नै भेळा देखनै, उणनै कयौ, “थै जांणौ हो की दूजीजाति री संगति करणी या उणरै उठै जावणौ यहूदी रै लियै अधरम है, पण परमेसर म्हनै बतायौ है की किणी मिनख नै असुद्ध या अपवितर नीं कहूं। इण वास्तै म्हैं जद बुलायौ गियौ तो बिना कीं कयै चालयौ आयौ। अबै म्हैं पूछूं हूं की म्हनै कीण कांम रै वास्तै बुलायौ हो?” कुरनेलियुस कयौ, “इण वगत, पूरा च्यार दिन होया, म्हैं म्हारै घर में तीजै पेहर पराथना कर रियौ हो। तो देखौ, एक मिनख चमकीला गाभा पैरयोड़ा, म्हारै सांमै आयनै ऊभौ होयौ अर कैवण लागौ, ‘हे कुरनेलियुस, थारी पराथना सुण ली गी है अर थारौ गरीबो नै दांन परमेसर रै सांमै याद कियो गियौ हो। इण वास्तै किणी नै याफा भेजनै समौन नै जिकौ पतरस कहीजै है, बुला। वो समंदर रै कांठै समौन, चमड़े रौ धंधौ करणैवाळै रै घर मेमाण है।’ तद म्हैं तुरत थारै खनै लोग भेज्या, अर थै भलौ करयौ जिकौ आ गियौ। अबै अपां सगळा एठै परमेसर रै सांमै हो, ताकी जिकौ कीं परमेसर थारै ऊं कयौ है उणनै सुणौ।” तद पतरस कयौ, “अबै म्हनै पको होयौ की परमेसर किणी रौ पकस कोनीं करै, बल्कि हर जाति में जिकौ उण ऊं डरै अर धरम रा कांम करै है, वो उणनै भावै है। ओहीज वो वचन है जिणनै उणै यीसु मसीह रै दवारा जिकौ सगळौ रौ परभु है, सानति रौ सुभ संदेस सुणाते होया इजरालियो नै दियौ हो। वो वचन थै जांणौ हो, जिकौ यूहन्‍ना रै बतिस्मे रै परचार रै पछै गलील ऊं सरूआत होयनै सगळै यहूदिया में फैल गियौ। परमेसर कीण रीत ऊं यीसु नासरी नै पवितर आतमा अर सामरथ ऊं अभिसेक करयौ वो भलाई करतौ अर सगळौ नै जिकौ सैतान रा सतायोड़ा हा, सावळ करतौ फिरयौ, क्यूंकै परमेसर उणरै साथै हो। “म्हौ उण सगळै कांमां रा गवाई हो, जिकौ उणै यहूदिया रै देस अर यरुसलेम मांय भी किया, अर उणौ वीनै सूली माथै लटकायनै मार नोख्यौ। पण उणनै परमेसर तीजै दिन जिलायौ, अर परगट भी कर दियौ है। सगळै लोगां रै सांमै नीं, बल्कि उण गवाईयों रै सांमै, जिणौनै परमेसर पैला ऊं चुण लिया हा, वे गवाई म्हौ हो। मरयोड़ा मांय ऊं उणरै जीवतौ होणै रै पछै म्हौ लोगां नै उणरै साथै खायौ-पियौ। अर उणै म्हौ नै आग्या दी की लोगां में परचार करौ अर गवाई दो, की ओ वोहीज है जिणै परमेसर नै जीवतौ अर मरयोड़ौ रौ न्यावी ठैरायौ है। उणरी सगळा भविसयदाता गवाई दैवै है की जिकौ कोई उण माथै विसवास करैला, उणनै उणरै नाम रै द्धारा पापों री माफी मिळैला।” पतरस ऐ बातां कैह इज रियौ हो की पवितर आतमा वचन नै सुणणैवाळौ माथै उतर आया। अर जिता यहूदी विसवासी पतरस रै साथै आया हा, वे सगळा अचूम्बो कियो की दूजी जातियो माथै भी पवितर आतमा उतरियौ है। क्यूंकै उणौ वीनै अलग-अलग तरैह री भासा बोलते अर परमेसर री बड़ाई करते सुण्यौ। इण कारण पतरस कयौ, “कांई अबै कोई इणौनै पांणी ऊं रोक सकै है की ऐ बतिस्मो नीं पावै, जिणौनै म्हौरै ज्यूं पवितर आतमा पाई है?” अर उणै आग्या दी की उणनै यीसु मसीह रै नाम ऊं बतिस्मो दियौ जावै। तद उणौ उण ऊं विनती किनी, की वो कंई दिन वळै उणरै साथै रैवै। पछै प्रेरितों अर विसवासी लोगां नै जिकौ यहूदिया में हा सुण्यौ, की दूजी जातियो नै भी परमेसर रौ वचन मांन लियौ है। अर जद पतरस यरुसलेम में आयौ, तो खतना कियोड़े यहूदी लोग उण ऊं वाद-विवाद करनै लागा, उणौ पतरस री निंदा करते हुए कयौ, “थूं बिना खतना कियोड़े लोगां रै घर जायनै उणौरै साथै खायौ।” तद पतरस उणौनै सरूआत ऊं क्रमानुसार केन सुणाणै लागौ की, “म्हैं याफा नगरी में पराथना कर रियौ हो, अर एक दरसण देख्यौ की एक चीज, मोटी चादर रै ज्यूं च्यांरू कोनों ऊं लटकती होई, आकास ऊं उतरनै म्हारै खनै आई। जद म्हैं उण माथै ध्यांन कियो, तो उणमे धरती रा जिनावर अर वन पसु अर रेंगनेवाळा जीव अर आकास रा पंखेरू देख्यां, अर ओ सबद भी सुण्यौ, ‘हे पतरस, उठ, मार अर खा।’ “म्हैं कयौ, ‘नीं, परभु, नीं। क्यूंकै कोई बिना पवितर या बिना सुद्ध चीज म्हारै मूंडै मांय कदैई नीं गी।’ “इणरै उतर में आकास ऊं दूजी बार सबद होयौ, ‘जिकौ कीं परमेसर नै सुद्ध ठैरायौ है, उणनै असुद्ध मती कैह।’ तीन बार ऐड़ौ इज होयौ तो पछै सगळौ पाछौ आभै ऊपर खींच लियौ गियौ। “अर देखौ, तुरत तीन मिनख जिकौ कैसरिया ऊं म्हारै खनै भेज्या गिया हा, उण घर जिण में म्हौ हा, आयनै ऊभा होया। तद पवितर आतमा नै म्हारै ऊं उणौरै साथै नि:संकोच जांणै रौ कयौ, अर ऐ छह भाई भी म्हारै साथै हो गिया, अर म्हौ उण मिनख रै घर गिया। “उणै म्हौ नै बतायौ, की उणै एक सरगदूत नै आपरै घर में ऊभौ देख्यौ, जिणै उण ऊं कयौ, ‘याफा में मिनख भेजनै समौन जिकौ पतरस कहीजै है, बुला ले। वो थौरे ऊं ऐड़ी बातां कैवैला, जिणरै जरियै थूं अर थारौ सगळौ घराणौ उद्धार पावैला।’ “जद म्हैं बातां करनै लागौ, तो पवितर आतमा उण माथै उणीज रीत ऊं उतरियौ जिण रीत ऊं सरूआत में म्हौ माथै उतरियौ हो। तद म्हनै परभु रौ ओ वचन याद आयौ, जिकौ उणै कयौ हो, ‘यूहन्‍ना नै तो पांणी ऊं बतिस्मो दियौ, पण थै पवितर आतमा ऊं बतिस्मो पावौला।’ अतस जद परमेसर नै उणनै भी वोहीज वरदान दियौ, जिकौ म्हौ नै परभु यीसु मसीह माथै विसवास करनै ऊं मिळियौ हो, तो म्हैं कुण हूं जिकौ परमेसर नै रोक सकूं?” ओ सुणनै वे चुप रिया, अर परमेसर री बड़ाई करनै कैवण लागा, “तद तो परमेसर दूजी जातियो नै भी जीवन रै खातर मन फिराव रौ दांन दियौ है।” जिकौ विसवासी लोग उण दुख रै मारे जिकौ स्तिफनुस रै कारण पड़ियौ हो, तितर-बितर हो गिया हा, वे फिरता फिरता फीनीके, साइप्रस अर अन्ताकिया में पूगा। पण यहूदियो नै छोड़नै किणी और नै वचन नीं सुणाता हा। पण उणमे ऊं कीं साइप्रसवासी अर कुरेनी हा, जिकौ अन्ताकिया में आयनै यूनानियो नै भी परभु यीसु रा सुभ संदेस री बातां सुणाण लागा। परभु रौ हाथ उण ऊपर हो, अर घणाहारा लोग विसवास करनै परभु री तरफ फिरया। जद उणरी चरचा यरुसलेम री कलीसिया रै सुणणै में आई, तो उणौ बरनबास नै अन्ताकिया भेज्यौ। वो उठै पूगनै अर परमेसर रै अनुग्रह देखनै खुस होयौ, अर सगळौ नै उपदेस दियौ की तन मन लगायनै परभु ऊं लिपटया रैवौ। वो एक भलौ मिनख हो, अर पवितर आतमा अर विसवास ऊं भरपूर हो, अर दूजा घणाहारा लोग परभु माथै विसवास कियो। तद बरनबास साऊल नै सौधण रै वास्तै तरसुस चाल दियौ। जद वो उण ऊं मिळियौ तो उणनै अन्ताकिया लायौ, अर ऐड़ौ होयौ की वे एक बरस तांई कलीसिया रै साथै मिळता अर घणाहारा लोगां नै उपदेस देता रिया। अर चेला सबां ऊं पैला अन्ताकिया ही में मसीह कहीजिया। उणीज दिनां मांय कई भविसयदाता यरुसलेम ऊं अन्ताकिया आया। उणमे ऊं अगबुस नाम रौ एक ऊभौ होयनै आतमा री प्रेरणा ऊं ओ बतायौ की सगळै जगत में घणौहारौ अकाळ पड़ैला। वो अकाळ राजा क्लौदियुस रै वगत में पड़ियौ। तद चेलौ नै फैसलो कियो की हरैक अपणी अपणी पूंजी रै मुजब यहूदिया में रैवणवाळौ भाइयो री मदद रै वास्तै कीं भेजौ। उणौ ऐड़ौ ही कियो अर बरनबास अर साऊल रै हाथ कलीसिया रै मुखियौ रै खनै कीं उपहार भेज्या। उण वगत हेरोदेस राजा नै कलीसिया रा कई लोगां नै सतानै लागौ। उणै यूहन्‍ना रै भाई याकूब नै तरवार ऊं मरवा दियौ। जद उणै देख्यौ की यहूदी लोग इण ऊं खुस होवै है, तो उणै पतरस नै भी पकड़ लियौ। वे दिन अखमीरी रोटी रौ तैंवार रौ दिन हा। उणै पतरस नै पकड़नै जेळ में घाल दियौ, अर च्यार-च्यार सिपाईयो नै च्यार पहरो में राख्या, इण विचार ऊं की फसह तैंवार रै पछै उणनै लोगां रै सांमै लाओ। जेळ में पतरस बंद हो। पण कलीसिया उणरै वास्तै अंते रै साथै परमेसर ऊं पराथना कर री ही। जद हेरोदेस उणनै लोगां रै सांमै लावण वाळौ हो, उणीज रात पतरस दो सांकळौ ऊं बंधयोड़ौ दो सिपाईयो रै बीच में सो रियौ हो, अर पहरेदार द्धार ऊपर जेळ री रूखाळी कर रिया हा। तो देखौ, परभु रौ एक सरगदूत आन ऊभौ होयौ अर उण कोठरी में जोत चमकी, अर उणै पतरस री पाहळी माथै हाथ लगायनै जगायो अर कयौ, “उठ, फुरती कर।” अर उणरै हाथो ऊं सांकळ खुलनै नीचे पड़ी। तद सरगदूत उणनै कयौ, “कमर बांध, अर थारा जूता पेहर ले।” उणै वैड़ौ इज कियो। पछै सरगदूत उणनै कयौ, “थारा गाभा पैहर नै म्हारै लारै आय जा।” पतरस निकळनै उणरै लारै वहीर हो गियौ, पण ओ कोनीं जांणतौ हो की जिकौ कीं सरगदूत कर रियौ हो वो सही है, बल्कि ओ समझयो की, “म्हैं दरसण देख रियौ हूं।” तद वे पेहले अर दूजै पहरे ऊं निकळनै उण लोह रै फाटक खनै पूगा, जिकौ नगरी री तरफ है। वो उणरै लियै आप ऊं आप खुलग्या, अर वे निकळनै एक ही गळी होयनै गिया, अर तुरत ही सरगदूत उणनै छोड़नै चाल गियौ। तद पतरस सावचेत होयनै कयौ, “अबै म्हैं साचांणी जांण ली है की परभु आपरौ सरगदूत भेजनै म्हनै हेरोदेस रै हाथ ऊं छुड़ा दियौ, अर यहूदियो री सगळी आसा तोड़ दी है।” अर ओ जांणनै, पतरस उण यूहन्‍ना री मां मरियम रै घर आयौ, यूहन्‍ना जिकौ मरकुस कहीजै है। उठै घणाहारा लोग भेळा होयनै पराथना कर रिया हा। जद उणै फाटक खटखटाई, तो रूदे नाम री एक दासी देखणै आई। पतरस री बोली पिछांण नै उणै खुसी रै मारै फाटक नीं खोलयो, पण नाह नै मांय गी अर बतायौ की “पतरस बारणा ऊपर ऊभौ है।” उणौ वीनै कयौ, “थूं पागल है।” पण वो जोस ऊं बोली की सही है। तद उणौ कयौ, “उणरौ सरगदूत होवैला।” पण पतरस खटखटातो ही रियौ। अतस उणौ फाटक खोली, अर उणनै देखनै अचूम्बे में पड़ गिया। तद पतरस उणौनै हाथ ऊं इछारौ कियो की चुप रौ, अर उणौनै बतायौ की परभु कीण रीत ऊं उणनै जेळ ऊं निकाळनै लाया है। पछै कयौ, “याकूब अर भाइयो नै आ बात बता दीजौ।” तद वो निकळनै दूजी जगा चाल दियौ। सवार रै वगत पहरूओं में हलचल मच गी की पतरस रौ कांई होयौ। जद हेरोदेस नै उणरी खोज की अर नीं पायो, तो पहरूओं री जांच करनै आग्या दी की वे मार दिया जावै। अर हेरोदेस यहूदिया नै छोड़नै कैसरिया में जायनै रैवण लागौ। हेरोदेस सूर अर सैदा रै लोगां ऊं घणौ नाराज हो। इण वास्तै वे एक मन होयनै उणरै खनै आया, अर बलास्तुस नै जिकौ राजा रौ एक सेवक हो, मनायनै मेल करणौ चाहयौ, क्यूंकै राजा रै देस ऊं उणरै देस रौ पाळ-पोस होतो हो। ठैरायोड़ा दिन हेरोदेस राज पोसाक पैहरनै सिहासण माथै बैठौ, अर लोगां नै भासण दैणै लागौ। तद लोग चिलायनै कयौ, “ओ तो मिनख रौ नीं परमेसर रौ सबद है।” उणीज घड़ी परभु रौ एक सरगदूत तुरत उणनै ठोकियो, क्यूंकै उणै परमेसर नै महिमा कोनीं दी, अर वो कीड़ा पड़नै मरग्यौ। पण परमेसर रौ वचन फैलतौ गियौ अर बढ़तौ गियौ। जद बरनबास अर साऊल अपणी सेवा पूरी कर चुकया तो यूहन्‍ना जिकौ मरकुस कहीजै है, साथै लेयनै यरुसलेम ऊं आया। अन्ताकिया री कलीसिया में कई भविसयदाता अर उपदेसक हा, ज्यूं, बरनबास, अर समौन जिकौ नीगर कहीजै है, अर लूकियुस कुरेनी, अर मनाहेम जिकौ हेरोदेस रौ खास साथी हो, अर साऊल। जद वे उपवास समेत परभु री उपासना कर रिया हा, तो पवितर आतमा कयौ, “म्हारै वास्तै बरनबास अर साऊल नै उण कांम रै वास्तै अलग करौ जिणरै वास्तै म्हैं उणौनै बुलाया है।” तद उणौनै उपवास अर पराथना करनै रै पछै बरनबास अर साऊल माथै हाथ राखनै उणौनै रवाना किया। अतस वे पवितर आतमा रै भेजयोड़ा सिलूकिया गिया। अर उठै ऊं जहाज में चढ़नै साइप्रस टापू गिया। अर सलमीस नगर में पूगनै, परमेसर रौ वचन यहूदियो रै पराथना घरो में सुणाया। अर यूहन्‍ना उणरौ सेवक हो। वे उण सगळै टापू में होता होया पाफुस तांई पूगा। उठै उणौनै बार-यीसु नाम रौ एक यहूदी जादूगर झूठा भविसयदाता मिळियौ। अर वो हाकिम सिरगियुस पौलुस रै साथै हो, जिकौ बुद्धिमान मिनख हो। उणै बरनबास अर साऊल नै आपरै खनै बुलायनै परमेसर रौ वचन सुणणौ चाहता हा। पण बार-यीसु जिणनै इलीमास जादूगर भी कैवता हा, उणरौ विरोध करनै हाकिम नै विसवास करणै ऊं रोकणौ चाहयौ। अबै साऊल अपणै आपनै पौलुस कैवण लागौ, पवितर आतमा ऊं भरपूर हो उणरी तरफ टकटकी लगान देख्यौ अर कयौ, “हे सगळै कपट अर सगळी चालाकी ऊं भरयोड़ा सैतान री औळाद, सकल धरम रा बैरी। कांई थूं परभु रै सीधे मारगो नै टेडा करणा नीं छोड़ेला? अबै देख, परभु रौ हाथ थारै माथै लागौ है, अर थूं कीं वगत तांई आंधौ रैला अर सूरज नै नीं देखेला।” तद तुरत धुंधलापन अर अंधारौ उण ऊपर छा गियौ, अर वो एठीनै उठीनै टटोलनै लागौ ताकी कोई उणरौ हाथ पकड़नै लेय चालै। तद हाकिम नै जिकौ होयौ हो उणै देखनै अर परभु रै उपदेस ऊं अचूम्बो करनै विसवास कियो। पौलुस अर उणरै साथी पाफुस ऊं जहाज खोलनै पंफूलिया रै पिरगा में आया। अर यूहन्‍ना उणौनै छोड़नै यरुसलेम चाल दियौ। पिरगा ऊं आगै बढ़नै वे पिसिदिया रै इलाके अन्ताकिया में पूगा, अर सब्त रै दिन यहूदी पराथना घर में जायनै बैठग्या। व्यवस्था अर भविसयदाताओ री किताब ऊं पढ़णै रै पछै पराथना घर रै सरदारो उणरै खनै केन भेज्यौ, “हे भाइयो, जे लोगां रै उपदेस रै लियै थौरे मन में कोई बात हो तो कैह दो।” तद पौलुस ऊभौ होयनै हाथ ऊं इछारौ करनै कयौ, “हे इजरालियो, अर परमेसर ऊं डरनै वाळौ, सुणौ। इण इजरायली लोगां रै परमेसर म्हौरै बापदादों नै चुण लिया, अर जद ऐ लोग मिसर देस में परदेसी होयनै रैवता हा, तो उण वगत महान बणाया, अर अपणी ताकत ऊं निकाळनै लायौ। वो कोई चाळीस बरस तांई रिंदरोही में उणौरी देखभाळ करी। अर कनान देस में सात जातियो रौ नास करनै उणौरौ देस कोई साढ़े च्यार सौ बरस इणौरै अधिकार में कर दियौ। “इणरै पछै उणै समूएल भविसयदाता तांई उणमे न्यावी ठैराया। उणरै पछै उणौ एक राजा मांग्यौ, तद परमेसर नै चाळीस बरस रै वास्तै बिन्यामीन रै गोत्र में ऊं एक मिनख, मतलब कीस रै बेटे साऊल नै उणौ माथै राजा ठैरायौ। पछै उणनै अलग करनै दाऊद नै उणौरौ राजा बणायौ। जिणरै बारै में उणै गवाई दी, ‘म्हनै एक मिनख, यिसै रौ बेटौ दाऊद, म्हारै मन रै लायक मिळग्यौ है। वोहीज म्हारी सगळी इछा पूरी करैला।’ “दाऊद रै वंस में ऊं परमेसर अपणै वायदे रै मुजब इजरायल रै नजीक एक मुगतिदाता, मतलब यीसु नै भेज्यौ। यीसु आवण ऊं पैला यूहन्‍ना सगळै इजरालियो में मन फिराव रै बतिस्मो रौ परचार कियो। जद यूहन्‍ना अपणी सेवा पूरी करनै वाळौ हो, तो उणै कयौ, ‘थै म्हनै कांई समझौ हो? म्हैं वो कोनीं! बल्कि देखौ, म्हारै पछै एक आवण वाळौ है, जिणरै पगरखो री डोरी भी म्हैं खोलणै रै लायक कोनीं।’ “हे भाइयो, थै जिकौ अबराहम री औळाद हो। अर थै जिकौ परमेसर ऊं डरौ हो, थौरे खनै इण उद्धार रौ वचन भेज्यौ गियौ है। क्यूंकै यरुसलेम रा रैवणवाळा अर उणौरै सरदारो नै, नीं यीसु नै पिछांणयौ अर नीं भविसयदाताओ री बातां समझी, जिकौ हरैक सब्त रै दिन पढ़ता हा, इण वास्तै उणनै दोसी ठैरायनै उण बातां नै पूरी की। उणौ मार दैणै रै जोग कोई दोस उणमे नीं पायो, तौभी पिलातुस ऊं विनती किनी की उणनै मार दियौ जाय। “जद उणौ उणरै बारै में लिख्योड़ी सगळी बातां पूरी की, तो उणनै क्रूस माथै ऊं उतारनै कबर मांय राख्यौ। पण परमेसर उणनै मरयोड़ौ में ऊं जिलायौ, अर वो जिकौ उणरै साथै गलील ऊं यरुसलेम आया हा, उणौनै घणै दिनां तांई देठाळौ देतो रियौ। अबै वे ही लोगां रै सांमै उणरा गवाई है। “म्हौ थांनै उण वायदे रै बारै में जिकौ बापदादों ऊं कियोड़ौ हो, ओ सुभ संदेस सुणावौ हो, की परमेसर यीसु नै जिलायनै, वोहीज वायदो म्हौरी औळाद रै लियै पूरौ कियो, ज्यूं दूजै भजन में भी लिख्यौ है, ‘थूं म्हारौ बेटौ है, आज म्हैं इज थनै जनमायो है।’ अर उणरै इण रीत ऊं मरयोड़ौ में ऊं जिलाने रै बारै में भी की वो कदैई नीं सड़ै, उणै यौं कयौ है, ‘म्हैं दाऊद माथै की पवितर अर अटल करपा थारै माथै करूंला।’ इण वास्तै उणै एक वळै भजन में भी कयौ है, ‘थूं अपणै पवितर जन नै सड़नै नीं दैला।’ क्यूंकै दाऊद तो परमेसर री इछा रै अनुसार अपणै वगत में सेवा करनै मरग्या, अर अपणै बापदादों में जा मिळियौ, अर सड़ भी गियौ। पण जिणनै परमेसर जिलायौ, उणनै सड़नै कोनीं दियौ। “इण वास्तै, हे भाइयो, थै जांण लौ की इणरै जरियै पापों री माफी रौ सुभ संदेस थांनै दियौ जावै है। अर जिण बातां में थै मूसा री व्यवस्था रै जरियै निरदोस नीं ठैर सकौ हो, उणी सगळा में हरैक विसवास करनैवाळा यीसु मसीह जरियै निरदोस ठैरै है। इण वास्तै सावचेत रौ, ऐड़ौ नीं होवै की जिकौ भविसयदाताओ री किताब में आया है, थौरे माथै भी आ पड़ै की, ‘हे निंदा करणैवाळौ, देखौ, अर अचूम्बो करौ, अर मर जाओ, क्यूंकै म्हैं थौरे दिनां में एक ऐड़ौ कांम करूं हूं, की जे कोई थौरे ऊं उणरी चरचा करै, तो थै कदैई विसवास नीं करौला।’ ” पौलुस अर बरनबास रै बारै निकळते वैळा लोग उण ऊं विनती करनै लागा की, “अगले सब्त रै दिन म्हौ नै ऐ बातां वळै सुणाई जाय।” जद सभा उठ गी तो यहूदियो अर यहूदी मत में आयोड़ा भगतो में ऊं घणाहारा पौलुस अर बरनबास रै लारै हो गिया, अर उणौनै उणौ ऊं बातां करनै समझाया की परमेसर रै अनुग्रह में बण्या रैवौ। अगले सब्त रै दिन नगरी रै प्राय: सगळा लोग परमेसर रौ वचन सुणणै भेळा हो गिया। पण यहूदी भीड़ नै देखनै जळण लागा, अर निंदा करता होया पौलुस री बातां रै विरोध में बोलण लागा। तद पौलुस अर बरनबास बिना डरै कयौ, “जरुरी हो की परमेसर रौ वचन पैला थांनै सुणायो जातौ, पण जद थै उणनै आगौ करौ हो, अर खुद नै अनत जीवन रै लायक नीं ठैरावौ, तो देखौ, म्हौ दूजी जातियो री तरफ मुड़या हो। क्यूंकै परभु म्हौ नै आ आग्या दी है, ‘म्हैं थनै दूजी जातियो रै लियै उजाळौ ठैरायौ है, ताकी थूं धरती री छोर तांई उद्धार रौ द्धार हो।’ ” ओ सुणनै दूजी जातियो खुस होई, अर परमेसर रै वचन री बड़ाई करनै लागा। अर जिता अनत जीवन रै लियै ठैराया गिया हा, उणौ विसवास कियो। तद परभु रौ वचन उण सगळै देस में फैलनै लागौ। पण यहूदियो नै भगत अर कुलीन लुगाईयां नै अर नगर रा खास लोगां नै भड़काया, अर पौलुस अर बरनबास रै विरोध दगों करायनै उणौनै अपणी सीमा ऊं बारै निकाळ दिया। तद वे उणरै सांमै अपणै पगां री धूड़ झाड़नै इकुनियुम जातौ रियौ। अर अन्ताकिया रा विसवासी आंणंद ऊं अर पवितर आतमा ऊं भरपूर होता गिया। इकुनियुम में ऐड़ौ होयौ की वे यहूदियो रै पराथना घर में साथै साथै गिया, अर इण परकार बातां किनी की यहूदियो अर यूनानियो दोनो में ऊं घणौ नै विसवास कियो। पण विसवास नीं करनै वाळै यहूदियो नै दूजी जातियो रै मन में विसवासियो रै विरोध में उकसाए अर नफरत भर दी। वे घणा दिन तांई उठै रिया, अर परभु रै भरोसे ऊपर हीमत ऊं परचार करता हा। अर परभु उणरै हाथो ऊं चिन्ह अर अचूम्बे रा कांम करायनै अपणै अनुग्रह रै वचन ऊपर गवाई देतो हो। पण नगर रै लोगां में फूट पड़ गी ही, इण ऊं किता तो यहूदियो री तरफ अर किता प्रेरितों री तरफ हो गिया। पण जद दूजी जातियो अर यहूदी उणौरौ बेजती अर उणौ ऊपर पथराव करणै रै लियै अपणै सरदारो समेत उणौ सांमै दौड़या, तो वे इण बात नै जांण गिया, अर लूकाउनिया रै लिस्तरा अर दिरबे नगरो में, अर आजू-बाजू रै परदेसो में भाग गिया, अर उठै भी सुभ संदेस सुणाणै लागा। लिस्तरा में एक मिनख बैठौ हो, जिकौ पगां ऊं कमजोर हो। वो जनम ऊं लंगड़ो हो अर कदैई नीं चालयौ हो। वो पौलुस नै बातां करते सुण रियौ हो। पौलुस नै उणरी तरफ टकटकी लगायनै देख्यौ की उणनै सावळ हो जांणै रौ विसवास है, अर पौलुस ऊंची आवाज ऊं कयौ, “अपणै पगां ऊपर सीधौ ऊभौ हो।” तद वो उछलनै चालनै फिरणै लागौ। लोगां नै पौलुस रौ ओ कांम देखनै लूकाउनिया री भासा में ऊंची आवाज ऊं कयौ, “देवता मिनखौ रै रूप में होयनै म्हौरै खनै उतर आया है।” वे बरनबास नै ज्यूस देवता, अर पौलुस नै हिरमेस कयौ, क्यूंकै पौलुस बातां करणै में मुखिया हो। ज्यूस देवता रै उण मिंदर रौ पुजारी जिकौ उणरै नगर रै सांमै हो, बळद अर फूलों रा हार फाटको ऊपर लायनै लोगां रै साथै बलिदान करणौ चावतौ हो। पण बरनबास अर पौलुस प्रेरितों नै जद ओ सुण्यौ, तो आपरा गाभा फाड़या अर भीड़ में गिया, अर हेलौ करनै कैवण लागा, “हे लोगां, थै कांई करौ हो? म्हौ भी तो थौरे ज्यूं दुख-सुख भोगी मिनख हो। म्हौ थांनै सुभ संदेस सुणावौ हो की थै इण फालतू चीजों ऊं अलग होयनै जीवते परमेसर री तरफ फिरौ, जिणै सरग अर धरती अर समंदर अर जिकौ कीं उणमे है बणाया। “परमेसर बीते वगत में सगळी जातियो नै अपणै-अपणै मारग में चालनै दिया। तौभी उणै अपणै आप नै बे-गवाह नीं छोड़यौ, लेकिन वो भलाई करतौ रियौ, अर आभै ऊं बरसो अर फलनै वाळौ मौसम देयनै थौरे मन नै भोजन अर आंणंद ऊं भरतो रियौ।” ओ केन भी उणौ लोगां नै घणी मुसकिल ऊं रोकया की उणौरै खातर बलिदान नीं करै। पण कईक यहूदियो नै अन्ताकिया अर इकुनियुम ऊं आयनै लोगां नै अपणी तरफ कर दिया, अर पौलुस ऊपर पथराव कियो, अर मरयोड़ौ समझनै उणनै नगर रै बारै घसीट नै लेय गिया। पण जद चेला उणरै च्यांरूमेर आयनै ऊभा होया, तो वो उठनै नगर में गियौ। अर दूजै दिन वो बरनबास रै साथै दिरबे री तरफ चाल दिया। वे उण नगर रै लोगां नै सुभ संदेस सुणायनै, अर घणाहारा चेला बणायनै। लिस्तरा अर इकुनियुम अर पिसिदिया रै नजीक अन्ताकिया में पाछा आया, अर चेलौ रै मन नै मजबुत करता रिया अर ओ उपदेस देता हा की विसवास में बण्या रौ। अर ओ कैवता हा, “म्हौ नै मोटो दुख उठान परमेसर रै राज में परवेस करणौ होवैला।” अर उणौनै हरैक कलीसिया में उणौरै लियै मुखिया ठैराया, अर उपवास साथै पराथना करनै उणौनै परभु रै हाथ में सौंपया जिण माथै उणौ विसवास कियो हो। तद पिसिदिया ऊं होता होया वे पंफूलिया पूगा। पछै पिरगा नगरी में वचन सुणायनै अतालिया में आया, अर उठै ऊं वे जहाज ऊपर अन्ताकिया गिया, जठै वे उण कांम रै लियै जिकौ उणौ पूरौ कियो हो परमेसर रै अनुग्रह में सौंपया गिया हा। उठै पूगनै उणौ कलीसिया भेळी की अर बतायौ की, “परमेसर नै म्हौरै साथै होयनै कैड़ा मोटा-मोटा कांम किया, अर दूजी जातियो रै वास्तै विसवास रा द्धार खोल दिया।” अर वे अन्ताकिया रै चेलौ रै साथै घणा दिनां तांई रिया। पछै कीं लोग यहूदिया परदेस ऊं अन्ताकिया आयनै भाइयो नै सिखाणै लागा, “जे मूसा री रीत ऊं थौरो खतनो नीं हो तो थै उद्धार नीं पा सकौ।” जद पौलुस अर बरनबास रौ उणौ ऊं बोहत झगड़ौ अर वाद-विवाद होयौ तो ओ ठैरायौ गियौ की पौलुस अर बरनबास अर उणमे ऊं कीं मिनख इण बात रै बारै में प्रेरितों अर कलीसिया रै अगुवो रै खनै यरुसलेम जावै। अतस कलीसिया नै उणौनै कंई आगै तांई पुगाया, अर वे फीनीके अर सामरिया ऊं होवता होया दूजी जातियो नै मन फिराणै रौ समाचार सुणाता गिया। इण समाचार ऊं सगळा विसवासी भाई घणा खुस होया। जद वे यरुसलेम पूगा, तो विसवासी अर प्रेरित अर कलीसिया रै अगुवा उणौ ऊं आंणंद रै साथै मिळिया, अर उणौ बतायौ की परमेसर नै उणौरै साथै होयनै कैड़ा-कैड़ा कांम किया हा। पण फरीसियों रै पंथ में ऊं जिणौनै विसवास कियो हो, उणमे ऊं कंई उठनै कयौ, “दूजी जातियो नै खतना कराणै अर मूसा री व्यवस्था मानणै री आग्या दैणी चाहीजै।” तद प्रेरित अर कलीसिया रै अगुवा इण बात रै बारै में विचार करनै रै लियै भेळा होया। तद पतरस सलाह करणै रै पछै ऊभौ होयनै उणौनै कयौ, “हे भाइयो, थै जांणौ हो की घणा दिन होया परमेसर नै थौरे में ऊं म्हनै चुण लियौ की म्हारै मूंडै ऊं दूजी जातियो सुभ संदेस रौ वचन सुणनै विसवास करै। मन नै जांचनेवाळै परमेसर नै उणौनै भी म्हौरै जैड़ी पवितर आतमा देन उणरी गवाई दी। अर विसवास रै जरियै उणौरै मन सुद्ध करनै अपां में अर उणौ में परमेसर कीं भेद नीं राख्यौ। तो अबै थै क्यूं परमेसर री परीकसा करौ हो की दूजी जाति रै विसवासियो माथै ऐड़ौ क्यूं जूओ राखौ, जिणनै नीं म्हौरै बापदादा उठा सकया हा अर नीं म्हौ उठा सकौ हो? पण म्हौरौ ओ पको है की जिण रीत ऊं वे परभु यीसु री करपा ऊं उद्धार पावैला, उणीज रीत ऊं म्हौ भी पावौला।” तद सगळी सभा चुपचाप बरनबास अर पौलुस री बातां सुणन लागा, की परमेसर नै उणौरै जरियै दूजी जातियो में कैड़ा मोटा-मोटा चिन्ह, अर अचूम्बे रा कांम दिखाया। जद वे चुप होया तो याकूब कैवण लागौ, “हे भाइयो, म्हारी सुणौ। समौन बतायौ की परमेसर नै पैला पहल दूजी जातियो माथै कैड़ी करपा दिस्टी किनी की उणमे ऊं अपणै नाम रै वास्तै एक परजा बणा ली। इणसूं भविसयदाताओ री बातां भी मिळती है, ज्यूं लिख्यौ है, ‘इणरै पछै म्हैं वळै आयनै दाऊद रौ पड़योड़ौ डेरो उठाऊंला, अर उणरै खंडहरों नै पाछा बणाऊंला, अर उणनै ऊभौ करूंला। इण वास्तै की बाकी मिनख, मतलब सगळी दूजी जाति जिकौ म्हारै नाम रा कहीजै है, परभु नै सौधै, ओ वोहीज परभु कैवै है जिकौ जगत री सरूआत ऊं इण बातां रौ समाचार देतो आयौ है।’ “इण वास्तै म्हारौ विचार ओ है की दूजी जातियो में ऊं जिकौ लोग परमेसर री तरफ फिरै है, म्हौ उणौनै दुख नीं दो। पण उणौनै लिखनै भेजौ की वे मूरतों नै चढ़ायोड़ी चीजों नीं खावै। व्यभिचार नीं करै। गळौ घोंटेयोड़ौ रौ मांस नीं खावै अर लोई नीं पीवै। क्यूंकै सरूआत ऊं नगर नगर मूसा री व्यवस्था रौ परचार करनैवाळा होता होया आया है, अर वो हर सब्त रै दिन यहूदी पराथना घरो में पढ़ी जावै है।” तद सगळी कलीसिया समेत प्रेरितों अर अगुवो नै बड़िया लागौ की अपणै में ऊं कीं मिनखौ नै चुणै, मतलब यहूदा जिकौ बरसब्बा कहीजै है, अर सीलास नै जिकौ भाइयो में मुखियौ हो, अर उणौनै पौलुस अर बरनबास रै साथै अन्ताकिया भेजौ। उणौनै उणौरै हाथ आ चिठ्ठी लिखनै भेजी, “अन्ताकिया अर सीरिया अर किलिकिया रै रैवणवाळा भाइयो नै जिकौ दूजी जातियो में ऊं है, प्रेरितों अर अगुवो भाइयो री तरफ ऊं नमस्कार। म्हौ सुण्यौ हो की अपां में ऊं कीं उठै जायनै, थांनै अपणी बातां ऊं घबरा दिया, अर थौरा मन उलट दिया है पण म्हौ उणौनै आग्या नीं दीनी ही। इण वास्तै म्हौ एक मन होणौ ठीक समझया की चुणयोड़ा लोगां नै अपणै प्यारै बरनबास अर पौलुस रै साथै थौरे खनै भेजौ। ऐ ऐड़ा मिनख है जिणौनै अपणै प्रांण म्हौरै परभु यीसु मसीह रै नाम रै खातर जोखम में डाले है। इण वास्तै म्हौ यहूदा अर सीलास भेज्या है, जिकौ आपरै मूंडै ऊं भी ऐ बातां कैह दैला। पवितर आतमा नै अर म्हौ नै ठीक लागौ की इण जरुरी बातां नै छोड़, थौरे माथै और भार नीं घालौ। की थै मूरतों नै चढ़ायोड़ी चीजों नीं खावै। व्यभिचार नीं करै। गळौ घोंटेयोड़ौ रौ मांस नीं खावै अर लोई नीं पीवै। इणसूं आगा रौला तो थौरो भलौ होवैला। खुस रैवौ।” पछै वे रवाना होयनै अन्ताकिया पूगा, अर विसवासियो नै भेळा करनै वो चिठ्ठी उणौनै दे दी। वे चिठ्ठी पढ़नै उण उपदेस री बात ऊं घणा खुस होया। यहूदा अर सीलास जिकौ आप भी भविसयदाता हा, घणी बातां ऊं विसवासी भाइयो नै उपदेस देन मजबुत किया। वे कीं दिन रेन, विसवासी भाइयो ऊं सानति रै साथै रवाना होया की अपणै भेजणैवाळौ रै खनै पाछा जावै। पण सीलास नै उठै रैवणौ बड़िया लागौ। पण पौलुस अर बरनबास अन्ताकिया में रैय गिया। अर दूजा घणाहारा लोगां रै साथै परभु रै वचन रौ उपदेस करता अर सुभ संदेस सुणाता रिया। कंई दिनां पछै पौलुस नै बरनबास ऊं कयौ, “जिण जिण नगरो में म्हौ परभु रौ वचन सुणायो हो, आओ, वळै उणमे जायनै अपणै विसवासी भाइयो नै देखौ की वे कैड़ा है।” तद बरनबास नै यूहन्‍ना जिकौ मरकुस कहीजै है, साथै लेणे रौ विचार कियो। पण पौलुस नै उणै जिकौ पंफूलिया में उण ऊं अलग हो ग्यौ हो, अर कांम माथै उणौरै साथै नीं गियौ, साथै लैय जांणौ चौखौ नीं समझयो। अतस उण दोनूं में ऐड़ौ विवाद उठयौ की वे एक दूजै ऊं अलग हो ग्या, अर बरनबास, मरकुस नै लेयनै जहाज ऊं साइप्रस जातौ रियौ। पण पौलुस सीलास नै चुण लियौ, अर विसवासी भाइयो नै परमेसर री करपा में सूंपनै उठै ऊं जाता रिया। अर वो कलीसियाओ नै मजबुत करतौ होयौ सीरिया अर किलिकिया ऊं होतो होयौ निकळयौ। पछै पौलुस दिरबे अर लिस्तरा में भी गियौ। उठै तीमुथियुस नाम रौ एक चेलौ हो, जिकौ किणी विसवासी यहूदिनी रौ बेटौ हो, पण उणरौ पिता यूनानी हो। लिस्तरा अर इकुनियुम रै भाइयो में तीमुथियुस रौ नाम बड़िया हो। पौलुस री इछा ही की वो उणरै साथै चालै, अर जिकौ यहूदी लोग उण जगा में हा उणौरै कारण उणै उणरौ खतनो कियो, क्यूंकै वे सगळा जांणै हा, की उणरौ पिता यूनानी हो। अर नगर नगर जाता होया वे उण विधियों नै जिकौ यरुसलेम रै प्रेरितों अर अगुवो नै ठैराई ही, मानणै रै वास्तै उणौनै पूगाता जाता हा। इण परकार कलीसियाओ विसवास में मजबुत होती गी अर गिणती में हमेसां बढ़ती गी। वे फ्रूगिया अर गलातिया परदेसो में होयनै गिया, क्यूंकै पवितर आतमा नै उणौनै एसिया में वचन सुणाणै री मना करी। उणौ मूसिया रै नजीक पूगनै, बितूनिया में जावणौ चाहयौ, पण यीसु री आतमा उणौनै जावण कोनीं दिया। अतस वे मूसिया इलाके ऊं होयनै त्रोआस नगरी में आया। उठै पौलुस रात में एक दरसण देख्यौ की एक मकिदुनी मिनख ऊभौ होयौ उण ऊं विनती करनै कैह रियौ है, “कांठै उतरनै मकिदुनिया इलाके में आ, अर म्हौरी मदद कर।” उणरै ओ दरसण देखते ही म्हौ तुरत मकिदुनिया जावणौ चाहयौ, ओ समझनै की, “परमेसर म्हौ नै उणनै सुभ संदेस सुणाणै वास्तै बुलाया है।” इण वास्तै त्रोआस नगरी ऊं जहाज में म्हौ सीधा सुमात्राके टापू जा पूगा अर दूजै दिन नियापुलिस में आया। उठै ऊं म्हौ फिलिप्पी पूगया, जिकौ मकिदुनिया प्रान्त रौ खास नगर अर रोमियो री बस्ती है, अर म्हौ उण नगर में कीं दिनां तांई रया। सब्त रै दिन म्हौ नगर रै फाटक रै बारै नदी रै किनारै ओ समझनै गिया की उठै पराथना करनै री जगा होवैला। इण वास्तै उठै बैठी उण लुगाईयां ऊं जिकौ भेळी होई ही, बातां करनै लागा। लुदिया नाम री थुआतीरा नगर री किमती बैंजनी गाभा बेचनैवाळी एक भगत लुगाई सुण री ही। परभु नै उणरौ मन खोलयौ की वो पौलुस री बातां में मन लगाए। जद उणै आपरै घराणै समेत बतिस्मो लियौ। तो उणै म्हौरै ऊं विनती करी, “जे थै म्हनै परभु री विसवासनी समझौ हो, तो चालनै म्हारै घर में रैवौ,” अर वो म्हौ नै मनायनै लैय गी। जद म्हौ पराथना करनै री जगा जा रिया हा, तो म्हौ नै एक दासी मिळी जिणमे भावी कैवण वाळी आतमा ही। अर भावी कैवण ऊं अपणै मालिको रै लियै बोहत कीं कमायनै लाती ही। वो पौलुस रै अर म्हौरै लारै आयनै चिलायनै लागी, “ऐ मिनख परम परधान परमेसर रा दास है, जिकौ अपांनै उद्धार रै मारग री कहाणी सुणावै है।” वो घणा दिनां तांई यूं ही करती रही। पण पौलुस दुखी होयौ, अर पाछौ फुरनै उण आतमा ऊं कयौ, “म्हैं थनै यीसु मसीह रै नाम ऊं आग्या देवूं हूं की उणमे ऊं निकळ जा।” अर वो उणीज घड़ी निकळ गी। जद उणरै मालिको देख्यौ की “म्हौरी कमाई री आसा जाती रीं,” तो पौलुस अर सीलास नै पकड़नै चौक में परधानो रै खनै खींच नै लैय गिया। अर उणौनै फौजदारी रै हाकिमों रै खनै लेन गिया अर कयौ, “ऐ लोग जिकौ यहूदी है, अपांरै नगर में घणी हलचल मचा रिया है। अर ऐड़ी रीतियां बता रिया है, जिणै स्वीकार करणा या मानणौ म्हौ रोमियो रै लियै ठीक कोनीं।” तद भीड़ रा लोग उणौरै विरोध में भेळा होयनै चढ़ आया, अर हाकिमों उणौरा गाभा फाड़नै उतार दिया, अर उणौरै कोड़ा मारनै री आग्या दीनी। घणाहारा कोड़ा लगायनै उणौनै जेळ में घाल दिया अर दरोगा नै आग्या दी की इणौरी चौकसी राखै। उणै ऐड़ी आग्या पायनै उणौनै मांय री कोठरी में राख्या अर उणौरा पग काठ में कस दिया। आधी रात रै लगभग पौलुस अर सीलास पराथना करता होया परमेसर रा भजन गा रिया हा, अर कैदी उणौरी सुण रिया हा। इतै में एकाएक जोर रौ भूकम्प आयौ, एठै तांई की जेळ री नींव हिल गी, अर तुरत सगळा फाटक खुल गिया, अर सगळौ री बेड़ियों खुलगी। दरोगा जाग उठयौ, अर जेळ रा फाटक खुला देखनै समझयो की कैदी नाह गिया है, अतस उणै तरवार खींचनै अपणै आप नै मारणौ चाहयौ। पण पौलुस ऊंची आवाज ऊं हेलौ करनै कयौ, “अपणै आप नै कीं नुकसाण मती कर, क्यूंकै म्हौ सगळा एठीज हो।” तद वो दीयौ मगवांयनै मांय आयौ, अर कांपता होयौ पौलुस अर सीलास रै आगै पड़ियौ। अर उणौनै बारै लायनै कयौ, “हे गुरुओं, उद्धार पावण रै लियै म्हैं कांई करूं?” उणौ कयौ, “परभु यीसु मसीह माथै विसवास कर, तो थूं अर थारौ घराणौ उद्धार पाओला।” अर उणौ उणनै अर उणरै सगळै घर रै लोगां नै परभु रौ वचन सुणाया। रात रौ उणीज घड़ी उणै उणौनै ले जायनै उणौरै घाव धौया, अर उणै आपरै सगळै लोगां समेत तुरत बतिस्मो लियौ। तद उणै पौलुस अर सीलास नै अपणै घर में ले जायनै उणौनै खाणौ खिलायो, अर सगळै घराणै समेत परमेसर माथै विसवास करनै आंणंद कियो। जद दिन होयौ तद हाकिमों नै सिपाईयो रै हाथ कैहन भेज्या की उण मिनखौ नै छोड़ दो। दरोगा नै ऐ बातां पौलुस ऊं कही, “हाकिमों म्हनै छोड़ दैणै री आग्या भेज दी है। इण वास्तै अबै निकळनै कुसल ऊं चालया जाओ।” पण पौलुस उणनै कयौ, “उणौनै म्हौ नै जिकौ रोमी मिनख है, दोसी ठैराए बिना लोगां रै सांमै ठोकिया अर जेळ में घालया। अबै कांई म्हौ नै छांनै ऊं निकाळ रिया हो? ऐड़ौ कोनीं, पण वे खुद आयनै म्हौ नै बारै निकाळै।” सिपाईयो ऐ बातां हाकिमों ऊं कही, अर वे ओ सुणनै की रोमी है, डर गिया, अर आयनै उणौनै मनाया, अर बारै ले जायनै विनती किनी की नगर ऊं जाता रैवै। वे जेळ ऊं निकळनै लुदिया रै उठै गिया, अर विसवासी भाइयो ऊं भेट करनै उणौनै तसली दी, अर चाल दिया। पछै पौलुस अर सीलास अम्फिपुलिस अर अपुल्लोनिया होयनै थिस्सलुनीके में आया, जठै यहूदियो रौ एक पराथना घर हो। पौलुस अपणी रीति रै अनुसार उणौरै खनै गियौ, अर तीन सब्त रै दिन पवितर सास्तरों ऊं उणरै साथै वाद-विवाद कियो, अर उणरौ अरथ खोल खोलनै समझातौ हो की मसीह नै दुख उठाणौ, अर मरयोड़ौ में ऊं जी उठणौ, जरुरी हो, अर “ओहीज यीसु जिणरी म्हैं थांनै कहाणी सुणाऊं हूं, मसीह है।” उणमे ऊं कितौ नै, अर भगत यूनानियो में ऊं बोहतो नै, अर घणीहारी कुलीन लुगाईयां नै मांन लियौ, अर पौलुस अर सीलास रै साथै मिळग्या। पण यहूदियो नै जळण ऊं भरणै बाजारू लोगां में ऊं कई दुस्ट मिनखौ नै आपरै साथै ले लिया, अर भीड़ भेळी करनै नगर में हुलड़ मचाने लागा। उणौनै यासोन रै घर माथै चढ़ाई कर दी, अर किणी तरैह पौलुस अर सीलास नै लोगां रै सांमै लावणा चाया। उणनै उठै नीं पायनै वे ओ चिलातै होया यासोन अर कीं भाइयो नै नगर रै हाकिमों रै सांमै खींचनै लाया, “ऐ लोग जिणौनै जगत नै उलट पुलट कर दियौ है, एठै भी आ गिया है। यासोन नै उणै आपरै उठै उतारियो है। ऐ सैंग रा सैंग ओ कैवै है की यीसु राजा है, अर कैसर री आग्याओं रौ विरोध करै है।” उणौ लोगां नै अर नगर रै हाकिमों नै ओ सुणायनै डरा दिया। इण वास्तै उणौनै यासोन अर बाकी लोगां ऊं जमानत लेन उणौनै छोड़ दिया। विसवासी भाइयो नै तुरत रातोरात ही पौलुस अर सीलास नै बिरीया भेज दिया, अर वे उठै पूगनै यहूदियो रै पराथना घर में गिया। बिरीया रा लोग तो थिस्सलुनीके रै यहूदियो ऊं भला हा, अर उणौ घणी लालसा ऊं वचन ग्रहण किया, अर हमेसां पवितर सास्तरों में सौधता रिया की ऐ बातां योंही है की कोनीं। इण वास्तै उणमे ऊं बोहतो नै, अर यूनानी कुलीन लुगाईयां में ऊं अर मिनखौ में ऊं भी घणौ नै विसवास कियो। पण जद थिस्सलुनीके रा यहूदी जांण गिया की पौलुस बिरीया में भी परमेसर रा वचन सुणावै है, तो उठै भी आयनै लोगां नै उकसाने अर हलचल मचाने लागा। तद विसवासी भाइयो नै तुरत पौलुस नै रवाना कियो की समंदर रै कांठै चालयौ जा। पण सीलास अर तीमुथियुस उठीज रैह गिया। पौलुस नै पूगानै वाळा उणनै एथेंस तांई ले गिया, अर सीलास अर तीमुथियुस रै लियै आ आग्या देयनै रवाना किया की वे म्हारै खनै फुरती ऊं आवै। जद पौलुस एथेंस में तिमुथियुस अर सीलास री बाट जोह रियौ हो, तो नगर नै मूरतों ऊं भरयोड़ौ देखनै उणरौ काळजौ बळण लागौ। अतस वो यहूदी पराथना घर में यहूदियो अर यूनानी भगतो ऊं, अर चौक में जिकौ लोग उण ऊं मिळता हा उणौ ऊं हरैक दिन वाद-विवाद किया करतौ हो। तद इपिकूरी अर स्तोईकी पण्‍डितां में ऊं कीं उण ऊं वाद-विवाद करनै लागा, अर कीं कयौ, “ओ बकवासी कांई कैवणौ चावै है?” पण दूजौ कयौ, “वो दूजै देवताओ रौ परचारक जैड़ौ लागै है।” क्यूंकै वो यीसु रा अर पुनरूत्थान रा सुभ संदेस सुणातौ हो। तद वे उणनै अपणै साथै सभा भवन अरियुपगुस ले गिया अर पूछयौ, “कांई म्हौ जांण सकौ हो की आ नयी मत जिकौ थूं सुणावै है, कांई है? क्यूंकै थूं अनोखी बातां म्हौ नै सुणावै है, इण वास्तै म्हौ जांणणौ चावौ हो की इणरौ अरथ कांई है।” उणौनै ऐड़ौ इण वास्तै कयौ, क्यूंकै सगळा एथेंसवासी अर परदेसी जिकौ उठै रैवता हा, नई-नई कैवणै अर सुणणै रै सिवाय और किणी कांम में वगत नीं बिताता हा। तद पौलुस नै अरियुपगुस रै बीच में ऊभौ होयनै कयौ, “हे एथेंस रै लोगां, म्हैं देखूं हूं की थै हरैक बात में देवताओ नै घणा मानणैवाळा हो। क्यूंकै म्हैं फिरतौ होयौ जद थौरी पूजनै री चीजों नै देख रियौ हो, तो एक ऐड़ी वेदी भी देखी, जिण माथै लिख्योड़ौ हो, ‘अनजाणे ईस्वर रै वास्तै।’ इण वास्तै जिणनै थै बिना जांणै पूजौ हो, म्हैं थांनै उणरौ समाचार सुणाऊं हूं। जिण परमेसर नै धरती अर उणरी सगळी चीजों नै बणाई, वो सरग अर धरती रौ मालिक होयनै, हाथ रा बणायोड़ा मिंदरो में कोनीं रैवै, नीं किणी चीज री जरुरत रै कारण मिनखौ रै हाथो री सेवा लेवे है, क्यूंकै वो खुद ही सबांनै जीवन अर सवास अर सगळौ दैवै है। उणै एक ही जड़ ऊं मिनखौ री सगळी जातियो सगळी धरती माथै रैवण रै लियै बणाई है, अर उणरै ठैरायोड़ी घड़ी नै अर रैवास री सीमाओं नै इण वास्तै बांधी है, ऐड़ौ इण वास्तै होयौ की वे परमेसर नै सौधै, हो सकै उणनै टटोलते पा ले, तौभी वो म्हौरै में ऊं किणी ऊं आगौ कोनीं। क्यूंकै म्हौ उणीज में जीवता रैवौ, अर चालौ-फिरौ, अर मजबुत रैवौ हो। ज्यूं थौरे कितै कवियो नै भी कयौ है, ‘म्हौ तो उणीज रा वंसज हो।’ “अतस परमेसर रौ वंस होयनै म्हौ नै ओ समझणौ उचित कोनीं की ईसवर सोने या रूपे या भाटे रै ज्यूं है, जिकौ मिनख री कारीगरी अर विचारो ऊं गढ़या हो। इण वास्तै परमेसर नै अजी तांई नासमझ री घड़ी माथै ध्यांन कोनीं दियौ, पण अबै हरैक जगा सगळै मिनखौ नै मन फिरानै री आग्या दैवै है। क्यूंकै उणै एक दिन ठैरायौ है, जिणमे वो उण मिनख रै द्धारा धरम ऊं जगत रौ न्याव करैला, जिणै उणनै ठैरायौ है, अर उणनै मरयोड़ौ में ऊं जिलायनै आ बात सबां माथै साबित कर दी है।” मरयोड़ौ मे ऊं जी उठनै री बात सुणनै कईक तो ठटा करनै लागा, पण कईक कयौ, “म्हौ चावौ हो की थै म्हौ नै इण बात रै बारै में कोई दूजै दिन और घणौ सिखाईजो।” इण वास्तै पौलुस उणौरै बीच में ऊं निकळ गियौ। कईक मिनख उणरै साथै मिळ ग्या, अर विसवास कियो, जिणमे दियुनुसियुस जिकौ सभा भवन अरियुपगुस रौ सदस्य हो, अर दमरिस नाम री एक लुगाई ही, अर उणरै साथै वळै भी लोग हा। इणरै पछै पौलुस एथेंस छोड़नै कुरिन्थुस में आयौ। उठै उणनै अक्‍किला नाम रौ एक यहूदी मिळियौ, जिणरौ जनम पुन्तुस में होयौ हो। वो आपरी लुगाई प्रिसकिल्ला रै साथै इटली ऊं हाल इज आयौ हो, क्यूंकै क्लौदियुस सगळै यहूदियो नै रोम ऊं निकळ जांणै री आग्या दी ही। अर पौलुस उण ऊं मिलनै गियौ। उणरौ अर इणरौ एक ही धंधौ हो, इण वास्तै वो उणरै साथै रियौ अर वे कांम करनै लागा। अर उणौरौ धंधौ तम्बू बणाणै रौ हो। वो हरैक सब्त रै दिन यहूदी पराथना घर में वाद-विवाद करनै यहूदियो अर यूनानियो नै भी समझातौ हो। जद सीलास अर तीमुथियुस मकिदुनिया ऊं आया, तो पौलुस आपरौ सगळौ वगत वचन सुणाणै री धुन में यहूदियो नै गवाई देवण लागौ की यीसु ही मसीह है। पण जद वे विरोध अर निंदा करनै लागा, तो उणै आपरा गाभा झाड़नै उणनै कयौ, “थौरो लोई थौरी इज नेह माथै रैवै! म्हैं निरदोस हूं। अबै ऊं म्हैं दूजी जातियो रै खनै जाऊंला।” उठै ऊं चालनै वो तीतुस यूसतुस नाम रौ परमेसर रै एक भगत रै घर में आयौ। जिणरौ घर यहूदी पराथना घर रै खनै हो। तद पराथना घर रै सरदार क्रिसप्रुस अपणै सगळै घराणै समेत परभु माथै विसवास कियो, अर घणाहारा कुरिन्थवासी वचन सुणनै विसवास में आया अर बतिस्मो लियौ। परभु नै एक रात दरसण रै द्धारा पौलुस ऊं कयौ, “मती डर, बल्कि और केहतो जा चुप मती रै। क्यूंकै म्हैं थारै साथै हूं, अर कोई थारै माथै चढ़ाई करनै थारौ नुकसाण नीं करैला। क्यूंकै इण नगर में म्हारा बोहत लोग है।” इण वास्तै पौलुस कुरिन्थुस नगर में परमेसर रौ वचन सिखातौ होयौ डेढ़ बरस तांई रियौ। जद गल्लियो अखाया देस रौ हाकिम हो, तो यहूदी लोग एको करनै पौलुस पे चढ़ आया, अर उणनै न्याव आसन रै सांमै लायनै कैवण लागा, “ओ लोगां नै समझावै है की परमेसर री उपासना ऐड़ी रीति ऊं करौ, जिकौ व्यवस्था रै उलटी हो।” जद पौलुस बोलनै वाळौ ही हो, तो गल्लियो यहूदियो नै कयौ, “हे यहूदियो, जे ओ कीं अन्याव या दुस्टता री बात होती, तो उचित हो की म्हैं थौरी सुणतौ। पण जे ओ वाद-विवाद सबदो, अर नामों, अर थौरे एठै री व्यवस्था रै बारै में है, तो थै ही जांणौ। क्यूंकै म्हैं इण बातां रौ न्यावी नीं बणणौ चावूं।” अर उणै उणौनै न्याव आसन रै सांमै ऊं निकळवा दियौ। तद सगळै लोगां नै यहूदी पराथना घर रै सरदार सोस्थिनेस नै पकड़नै न्याव आसन रै सांमै ठोकियो। पण गल्लियो इण बातां री कीं चिंता नीं करी। पौलुस घणा दिनां तांई उठै रियौ। पछै विसवासी भाइयो ऊं विदा होयनै जहाज में सीरिया चाल दिया अर उणरै साथै प्रिसकिल्ला अर अक्‍किला हा। जावण ऊं पैला उण किंख्रिया नगर में इण वास्तै माथो मुंडायो, क्यूंकै उणै मनत मानी ही। उणै इफिसुस पूगनै उणौनै उठै छोड़या, अर आप यहूदी पराथना घर में जायनै यहूदियो ऊं विवाद करनै लागौ। जद उणौ पौलुस ऊं विनती की, “म्हौरै साथै वळै कईक दिन रैह।” तो उणै स्वीकार नीं कियो। पण ओ केन उणौ ऊं विदा होयौ, “जे परमेसर चावै तो म्हैं थौरे खनै वळै आऊंला।” तद वो इफिसुस ऊं जहाज खोलनै चाल दियौ। अर कैसरिया में उतरनै यरुसलेम गियौ अर कलीसिया नै नमस्कार किया। इणरै पछै वो अन्ताकिया में आयौ। पछै कईक दिन रेन वो उठै ऊं निकळयौ, अर एक तरफ ऊं गलातिया अर फ्रूगिया परदेसो में सगळै चेलौ नै मजबुत करतौ फिरयौ। अपुल्लोस नाम रौ एक यहूदी, जिणरौ जनम सिकन्दरिया में होयौ हो, जिकौ ग्यांनी मिनख हो अर पवितर सास्तर नै अच्छी तरैह ऊं जांणतौ हो, इफिसुस में आयौ। उणै परभु रै मारग री सिकसा पाई ही, अर मन लगायनै यीसु रै बारै में ठीक-ठीक सुणातौ अर सिखातौ हो, पण वो कैवल यूहन्‍ना रै बतिस्मे री बात जांणतौ हो। वो पराथना घर में बेखौफ होन बोलनै लागौ, पण प्रिसकिल्ला अर अक्‍किला उणरी बातां सुणनै उणनै अपणै उठै लेन आया अर परमेसर रौ मारग उणनै और भी ठीक ठीक बतायौ। जद अपुल्लोस फैसलो कियो की पार उतरनै अखाया जाऊं तो विसवासी भाइयो उणनै विसवास देयनै चेलौ नै चिठ्ठी लिखी की वे उण ऊं अच्छी तरैह ऊं मिळै। जद वो उठै पूगनै उण लोगां री घणी मदद करी जिणौनै करपा रै खातर विसवास कियो हो। क्यूंकै वो पवितर सास्तर ऊं परमाण देयनै की यीसु ही मसीह है, घणी सामरथ ऊं यहूदियो नै सगळौ रै सांमै निरूतर करतौ रियौ। जद अपुल्लोस कुरिन्थुस में हो, तो पौलुस ऊपर रै सगळै परदेस ऊं होयनै इफिसुस में आयौ। उठै कईक चेलौ नै देखनै उणौ ऊं कयौ, “कांई थै विसवास करते वैळा पवितर आतमा पाई?” उणौनै उण ऊं कयौ, “म्हौ तो पवितर आतमा री चरचा भी कोनीं सुणी।” उणै उणौनै कयौ, “तो पछै थै किणरौ बतिस्मो लियौ?” उणौ कयौ, “यूहन्‍ना रौ बतिस्मो।” पौलुस कयौ, “यूहन्‍ना ओ केन मन फिराव रौ बतिस्मो दियौ की ‘जिकौ म्हारै पछै आवण वाळौ है,’ उण माथै मतलब यीसु माथै विसवास करणौ।” ओ सुणनै उणौनै परभु यीसु रै नाम में बतिस्मो लियौ। जद पौलुस नै उणौ माथै हाथ राख्यौ, तो पवितर आतमा उणौ माथै उतरी, अर वे अलग-अलग भासा बोलनै अर भविसयवांणी करनै लागा। ऐ लगभग बारैह मिनख हा। वो यहूदी पराथना घर में जायनै तीन महीनै तांई बेखौफ होयनै बोलतौ रियौ, अर परमेसर रै राज रै बारै में विवाद करतौ अर समझातौ रियौ। पण कईक लोगां नै कठोर होयनै उणरी नीं मानी बल्कि लोगां रै सांमै इण मारग नै भूंडौ कैवण लागा, तो पौलुस उणौनै छोड़ दिया अर चेलौ नै न्यारा कर दिया, अर हमेसां तुरत्रुस री पाठसाला में वाद-विवाद किया करतौ हो। दो साल तांई यूं ही होतो रियौ, एठै तांई की आसिया रै रैवणवाळा कांई यहूदी कांई यूनानी सबांनै परभु रौ वचन सुन लियौ। परमेसर पौलुस रै हाथो ऊं अचूम्बे रा कांम दिखातौ हो। एठै तांई की रूमाल अर अंगोछा उणरै सरीर ऊं लगायनै बीमारों माथै राखता हा, अर उणौरी बीमारियो जाती रैवती ही अर दुस्ट आतमाओ उणौ में ऊं निकळ जाया करती ही। पण कईक यहूदी जिकौ झाड़ा फूंकी करता फिरता हा, ओ करनै लागा की जिणमे दुस्ट आतमा हो उण माथै परभु यीसु रौ नाम ओ कैहन फूंकता की, “जिण यीसु रौ परचार पौलुस करै है, म्हैं थनै उणरी सौगन देवूं हूं।” अर सक्‍किवा नाम रै एक यहूदी परधान याजक रै सात बेटा हा, जिकौ ऐड़ौ इज करता हा। पण दुस्ट आतमा उणौनै जबाब दियौ, “यीसु नै म्हैं जांण री हूं, अर पौलुस नै भी पिछांण री हूं, पण थै कुण हो?” अर उण मिनख नै जिणमे दुस्ट आतमा ही उणौरै माथै झपटनै उणौनै वस में लायनै, उणौरा ऐड़ा हाल किया, की वे नागा अर घायल होयनै उण घर ऊं निकळनै जाता रिया। आ बात इफिसुस रै रैवणवाळौ सगळौ यहूदी अर यूनानी भी जांण गिया, अर उण सबां ऊपर भय छा गियौ। अर परभु यीसु रै नाम री बड़ाई होई। जिणौनै विसवास कियो हो, उणमे ऊं घणौ नै आयनै अपणै अपणै कांमां नै मांन लियौ अर परगट कियो। जादू करनैवाळौ में ऊं घणौ नै अपणी-अपणी पोथियां भेळी करनै सबां रै सांमै बाळ दी, अर जद उणौरौ मोल जोड़यौ, तो पचास हजार चांदी रा सिक्‍को रै बराबर हो। इण परकार परभु रै सामरथ ऊं वचन फैलतौ गियौ अर उणरौ प्रभाव बढ़तौ रियौ। जद ऐ बातां हो चुकी तो पौलुस नै आतमा में ठान लियौ की मकिदुनिया अर अखाया ऊं होयनै यरुसलेम जाऊं, अर कयौ, “उठै जावण रै पछै म्हनै रोम नै भी देखणौ जरुरी है।” इण वास्तै अपणी सेवा करणैवाळौ में ऊं तीमुथियुस अर इरास्तुस नै मकिदुनिया भेजनै आप कीं दिन आसिया में रै गिया। उण वगत परभु यीसु रै बारै में घणौ हुलड़ होयौ। क्यूंकै देमेत्रियुस नाम रौ एक सुनार अरतिमिस रै चांदी रा छोटा-छोटा मिंदर बणायनै कारीगरो नै घणौ कांम दिलाया करतौ हो। इणनै उण कारीगरो अर ऐड़ी ही चीजों रा घणा कारीगरो नै भेळा करनै कयौ, “हे भाइयो, थै जांणौ हो की इण कांम ऊं म्हौ नै कितौ धन मिळै है। थै देखौ अर सुणौ हो की कैवल इफिसुस ही में नीं, बल्कि प्राय: सगळै आसिया में ओ केन इण पौलुस नै घणी लोगां नै समझाया अर भरमाया भी है, की जिकौ हाथ री कारीगरी है, वे ईस्वर कोनीं। इण ऊं अबै कैवल इणीज बात रौ ही डर नीं है की म्हौरै इण धंधे री बेजती होवैला, बल्कि आ की महान देवी अरतिमिस रौ मिंदर तुच्छ समझयो जावैला, अर जिणनै सगळौ आसिया अर जगत पूजै है उणरौ महत्व भी जातौ रैवैला।” वे ओ सुणनै रीस ऊं भर गिया अर चिला-चिलायनै कैवण लागा, “इफिसियो री अरतिमिस महान है!” अर सगळै नगर में घणौ हाको मच गियौ, अर लोगां नै मकिदुनियावासी गयुस अर अरिस्तर्खुस नै जिकौ पौलुस रै संगी यात्री हो, पकड़ लिया, अर एक साथै रंगसाला में नाह गिया। जद पौलुस लोगां रै खनै मांय जावणौ चाहयौ तो चेलौ नै उणनै जावण नीं दियौ। आसिया रै हाकिमों में ऊं भी उणरै कई बेलियौ नै उणरै खनै कैहन भेज्या अर विनती किनी की रंगसाला में जायनै जोखम नीं उठाणौ। उठै कोई कीं चिलातौ हो अर कोई कीं, क्यूंकै सभा में गड़बड़ी होय री ही, अर बोहत लोग तो ओ जांणता भी कोनीं हा की म्हौ कीण वास्तै भेळा होया हा। तद उणौ सिकन्दर नै, जिणै यहूदियो नै ऊभौ कियो हो, भीड़ में ऊं आगै बढ़ाया। सिकन्दर हाथ ऊं इछारौ करनै लोगां रै सांमै जबाब दैणौ चावतौ हो। पण जद उणौ जांण लियौ की वो यहूदी है, तो सगळा एक सबद में कोई दो घंटा तांई चिलाता रिया, “इफिसियो री अरतिमिस, महान है।” तद नगर रै मंत्री नै लोगां नै सान्त करनै कयौ, “हे इफिसुस रै लोगां, कुण नीं जांणै की इफिसियो रौ नगर महान देवी अरतिमिस रै मिंदर, अर आसमान री तरफ ऊं पड़ियोड़ी मूरती रौ रूखाळौ है? अतस जद की इण बातां रौ खण्डन ही नीं हो सकै, तो उचित है की थै सान्त रैवौ अर बिना सोच्या-विचारे कीं नीं करौ। क्यूंकै थै इण मिनखौ नै लाया हो, जिकौ नीं मिंदर रै लूटणवाळा है अर नीं म्हौरी देवी री निंदा करनै वाळा है। जे देमेत्रियुस अर उणरै साथी कारीगरो नै किणी ऊं विवाद हो तो कचेड़ी खुली है अर हाकिम भी है। वे एक दूजै माथै आरोप लगा सकौ हो। पण जे थै किणी और बात रै बारै में कीं पूछणौ चावौ हो, तो सभा में फैसलो कियो जावैला। क्यूंकै आज रै झगड़ै रै कारण म्हौ माथै दोस लगाए जांणै रौ डर है। इण वास्तै की इणरौ कोई कारण नीं, अर म्हौ इण भीड़ रै भेळा होणै रौ कोई जबाब नीं दे सकौ।” ओ केन उणै सभा नै रवाना की। जद हुलड़ बंद हो गियौ, तो पौलुस चेलौ नै बोलायनै समझाया, अर उणौ ऊं विदा ली अर मकिदुनिया री तरफ चाल दियौ। उण सगळै परदेस में ऊं होयनै अर चेलौ नै बोहत खुस कर नै वो यूनान में आयौ। जद तीन महीना रैयनै वो उठै ऊं जहाज ऊपर सीरिया री तरफ जांण वाळौ हो, तो यहूदी उणरी घात में लाग्योड़ा हा, इण वास्तै उणै ओ पको कियो की मकिदुनिया होयनै जातौ रैवूं। बिरीया रै पुर्रूस रौ बेटौ सोपत्रुस अर थिस्सलुनीकियों में ऊं अरिस्तर्खुस अर सिकुन्दुस, अर दिरबे रौ गयुस, अर तीमुथियुस, अर आसिया रौ तुखिकुस अर त्रुफिमुस आसिया तांई उणरै साथै चालया। वे आगै जायनै त्रोआस में म्हांरी बाट जोहता रिया। अर म्हौ अखमीरी रोटी रै तैंवार रै दिनां रै पछै फिलिप्पी ऊं जहाज माथै चढ़नै पांच दिन में त्रोआस में उणरै खनै पूगा, अर सात दिन तांई उठीज रिया। हपतै रै पैलै दिन जद म्हौ रोटी तोड़नै रै वास्तै भेळा होया, तो पौलुस नै जिकौ दूजै दिन रवाना होवण वाळौ हो, उण ऊं बातां कीं, अर आधी रात तांई बातां करतौ रियौ। जिण अटारी में म्हौ भेळा हा, उणमे घणाहारा दीया लाग रिया हा। अर यूतुखुस नाम रौ एक जवान बारी में बैठौ गेरी ऊंग ऊं झेरौं खाय रिया हो। जद पौलुस घणी जेज तांई बातां करतौ रियौ तो वो ऊंग में तीजी अटारी ऊं नीचे पड़ग्यौ, अर मरयोड़े नै उठायौ। पण पौलुस उतरनै उण ऊं लिपट गियौ, अर गळे लगायनै कयौ, “घबराओ मती, क्यूंकै उणरौ प्रांण उण में है।” अर ऊपर जायनै रोटी तोड़ी अर खायनै इती जेज तांई उण ऊं बातां करतौ रियौ की संवार होयगीं। पछै वो जातौ रियौ। अर वे उण जवान नै जीवतौ घर लेन आया अर घणी सानति मिळी। म्हौ पैला इज जहाज माथै चढ़नै अस्सुस इण विचार ऊं आगै गिया की उठै ऊं म्हौ पौलुस नै चढ़ा लौ ला, क्यूंकै उणै ओ इण वास्तै ठैरायौ हो की खुद ही पैदल जावण वाळौ हो। जद वो अस्सुस में म्हौ नै मिळियौ तो म्हौ उणनै चढ़ायनै मितुलेने में आया। उठै ऊं जहाज खोलनै म्हौ दूजै दिन खियुस टापू रै सांमै पूगा, अर अगले दिन सामुस टापू में ठैरया, पछै दूजै दिन मिलेतुस में आया। क्यूंकै पौलुस नै इफिसुस रै खनै ऊं होयनै जावण रौ पको कियो हो की कठैई ऐड़ौ नीं हो की उणनै आसिया में जेज लागै, क्यूंकै वो उतावळ में हो की जे हो सकै तो वो पिन्तेकुस्त रै दिन यरुसलेम में रैवै। पौलुस मिलेतुस ऊं इफिसुस में केन भेज्यौ, अर कलीसिया रै अगुवो नै आपरै खनै बुलाया। जद वे उण रै पार आया, तो उण ऊं कयौ, “थै जांणौ हो की पैलै इज दिन जद म्हैं आसिया में पूगो, म्हैं हरैक वगत थौरे साथै कीण तरैह रियौ। मतलब घणी नरमाई ऊं, अर रौ-रौयनै, अर उण परीकसाओं में जिकौ यहूदियो रै चालाकी रै कारण म्हारै माथै आन पड़ी, म्हैं परभु री सेवा करतौ इज रियौ। अर जे जे बातां थौरे फायदे री ही, उण नै बतानै अर लोगां रै सांमै अर घर-घर सिखाणै ऊं कदैई नीं झिझकयौ। बल्कि यहूदियो अर यूनानियो रै सांमै गवाई देतो रियौ, की परमेसर री तरफ मन फिराओ, अर म्हौरै परभु यीसु मसीह माथै विसवास करणौ चाहीजै। “अर अबै देखौ, म्हैं आतमा में बन्धयोड़ौ यरुसलेम में जावूं हूं, अर नीं जांणूं, की उठै म्हारै ऊपर कांई कांई बीतेला। कैवल ओ की पवितर आतमा हरैक नगर में गवाई दे देयनै म्हारै ऊं कैवै है, की बन्धन अर दुख थारै वास्तै तैयार है। पण म्हैं म्हारै प्रांण नै कीं नीं समझूं की उणनै प्यारौ जांणूं, बल्कि ओ की म्हैं म्हारी दौड़ नै, अर उण सेवकाई नै पूरी करूं, जिकौ म्हैं परमेसर री करपा ऊं सुभ संदेस ऊपर गवाई दैणै रै वास्तै परभु यीसु ऊं पाई हूं। “अर अबै देखौ, म्हैं जांणूं हूं, की थै सगळा जिण ऊं म्हैं परमेसर रै राज रौ परचार करतौ फिरयौ, म्हारौ मूंडौ वळै कदैई नीं देखोला। इण वास्तै म्हैं आज रै दिन थौरे ऊं गवाई देन कहूं हूं, की म्हैं थौरे में ऊं किणी रै लोई रौ दोसी नीं हूं। क्यूंकै म्हैं परमेसर री सगळी इछा नै थांनै बतानै में कदैई नीं झिझकयौ। इण वास्तै अपणी अर अपणै समुदाय री रूखाळी करता रैवौ, जिण ऊं पवितर आतमा नै थांनै मुखिया ठैराया है, की थै परमेसर री कलीसिया री रूखाळी करौ, जिकौ परमेसर आपरै बेटे रै लोई ऊं मोल लिया हा। म्हैं जांणूं हूं, की म्हारै जांणै रै पछै फाड़नैवाळा भेड़िया थौरे में आवैला, जिकौ झुंड नै नीं छोड़ेला। थौरे इज बीच मांय ऊं भी ऐड़ा ऐड़ा मिनख उठैला, जिकौ चेलौ नै अपणी तरफ खींच लेणे वास्तै टेडी मेडी बातां कैवैला। इण वास्तै जागता रैवौ, अर याद करौ, की म्हैं तीन बरस तांई रात दिन रौ रौ नै, हरैक नै सावचेत करणौ नीं छोड़यौ। “अर अबै म्हैं थांनै परमेसर रै, अर उणरै अनुग्रह रै वचन नै सौंप देवूं हूं। जिकौ थौरी बढ़ोतरी कर सकै है, अर थांनै उण लोगां रै साथै जिकौ नै पवितर किया जा चुका है, थौरो वारिस दिला सकै है। म्हैं कदैई किणी रै सोनों-चांदी या कपड़ो रौ लालच नीं कियो। थै खुद जांणौ हो की म्हारै इण हाथो नै इज म्हारी अर म्हारै साथियो री जरुतो नै पूरी की। म्हैं अपणै हरैक करम ऊं थांनै ओ दिखायौ है की कठिन मेनत करता होया म्हौ नै कमजोरो री मदद कीण तरैह करणी चाहीजै अर म्हौ नै परभु यीसु रौ वचन याद राखणौ चाहीजै जिकौ उणै खुद कयौ हो, ‘लेणे ऊं दैणौ भलौ है।’ ” ओ केन उणै गोडा टेकनै उण सगळौ रै साथै पराथना की। तद वे सगळा घणा रोया अर पौलुस रै गळे लागनै उणनै चूमनै लागा। वे खास करनै इण बात रौ सौग करता हा, जिकौ उणै कही ही, “थै म्हारौ मूंडौ वळै कदैई नीं देखोला।” अर उणौ नै उणनै जहाज तांई पूगायौ। जद म्हौ उण ऊं अलग होयनै जहाज खोलयो, तो सीधे रास्ते ऊं कोस टापू जा पूगा, अर दूजै दिन रूदुस टापू में, और उठै ऊं पतरा टापू में। उठै ऊं एक जहाज फीनीके जावतौ होयौ मिळियौ, उण माथै चढ़नै, रवाना होया। जद साइप्रस टापू दिखाई देवण लागौ, तो म्हौ उणनै डावै तरफ छोड़नै सीरिया री तरफ मुड़ गिया, क्यूंकै सूर नगर में जहाज रौ माल उतारणौ हो। इण वास्तै म्हौ भी उठै उतर गिया। उठै म्हौ चेलौ ऊं मिळिया जिणौरे साथै म्हौ सात दिन तांई रिया। उणौ आतमा ऊं प्रेरित होयनै पौलुस नै यरुसलेम जावण ऊं रोकणौ चाहयौ। जद वे दिन पूरा हो गिया, तो म्हौ उठै ऊं जाता रिया। अर आपरी लुगाईयां अर टाबरौ समेत म्हौ नै नगर रै बारै तांई पूगाया अर म्हौ किनारै ऊपर गोडा टेकनै पराथना की। तद एक दूजै ऊं विदा होयनै, म्हौ तो जहाज ऊपर चढ़या, अर वे आपरै आपरै घर जाता रिया। जद म्हौ सूर ऊं जळयात्रा पूरी करनै पतुलिमयिस नगरी में पूगा, अर भाइयो नै नमस्कार करनै उणौरै साथै एक दिन रिया। दूजै दिन म्हौ उठै ऊं चालनै कैसरिया में आया, अर फिलिप्पुस सुभ संदेस परचारक रै घर में जिकौ यरुसलेम री कलीसिया मे चुणयोड़े सातों सेवकों में ऊं एक हो, जायनै उणरै उठै रिया। उणरी च्यार कुंवारी बेटियां ही, जिकौ भविसयवांणी किया करती ही। जद म्हौ उठै घणा दिनां तांई रिया, तो अगबुस नाम रौ एक भविसयदाता यहूदिया ऊं आया। उणै म्हौरै खनै आयनै पौलुस रौ कमर पटो उठायनै, खुद रा हाथ पग बांधनै कयौ, “पवितर आतमा ओ कैवै है, की जिण मिनख रौ ओ कमर पटो है, उणनै यहूदी इण रीत ऊं बांधैला, अर दूजी जातियो रै हाथो में सौपेला।” जद म्हौ ऐ बातां सुणी, तो म्हौ अर उठै रा लोगां पौलुस ऊं विनती करी, की यरुसलेम नीं जावै। पण पौलुस जबाब दियौ, “थै कांई करौ हो की रो-रोयनै म्हारौ मन तोड़ो हो? म्हैं तो परभु यीसु रै नाम रै वास्तै यरुसलेम में नीं बांधे जावण रै वास्तै वरन मरण रै लियै भी तैयार हूं।” जद उणै नीं मान्यौ तो म्हौ ओ केन चुप हो गिया, “परभु री इछा पूरी हो।” इण दिनां रै पछै म्हौ तैयारी की अर यरुसलेम चालया। कैसरिया नगर ऊं भी कईक चेला म्हौरै साथै आया, अर म्हौ नै मनासोन नाम रै साइप्रस टापू रै एक पुराणै चेले रै उठै लेन आया, की म्हौ उणरै उठै ठैहरौ। जद म्हौ यरुसलेम में पूगा, तो विसवासी भाई घणै आंणंद रै साथै म्हौरै ऊं मिळिया। दूजै दिन पौलुस म्हौ नै याकूब रै खनै ले गियौ, जठै सगळा अगुवा भेळा होयोड़ा हा। तद पौलुस उणौनै नमस्कार करनै, जिकौ जिकौ कांम परमेसर नै उणरी सेवकाई रै दवारा दूजी जातियो में किया हा, एक एक करनै सगळा बताया। उणौ ओ सुणनै परमेसर री महिमा की, पछै उणनै कयौ, “हे भाई पौलुस, थूं देखे है, की यहूदियो में ऊं कई हजारो नै विसवास कियो है। अर सगळा व्यवस्था रै लियै खुस है। उणौनै थारै बारै में सिखाया गिया है, की थूं दूजी जातियो में रैवण वाळा यहूदियो नै मूसा ऊं फिर जायनै रौ सिखाया है, और कैवै है, ‘नीं अपणै टाबरौ रौ खतनो कराओ अर नीं रीतियां माथै चालौ।’ “तो पछै कांई कियो जाए? लोग जरुर सुणैला की थूं एठै आयौ है। इण वास्तै जिकौ म्हौ थारै ऊं कैवौ हो वो कर। म्हौरै एठै च्यार मिनख है, जिणौ नै मनत मानी है। उणौनै लेन उणौरै साथै अपणै आप नै सुद्ध कर, अर उणौरै लियै खरचो दे, की वे माथो मोडो करावै। तद सगळा जांण ले ला, की जिकौ बातां उणै थारै बारै में बताई है, उणमे कीं सचाई नीं है पण थूं आप भी व्यवस्था नै मांन नै उणरै अनुसार चालै है। “पण उण दूजी जातियो रै बारै में जिणौ विसवास कियो है, म्हौ ओ फैसलो करनै लिख भेज्यौ है की वे मूरतों नै चढ़ायोड़ी चीजों नीं खावै। व्यभिचार नीं करै। गळौ घोंटेयोड़ौ रौ मांस नीं खावै अर लोई नीं पीवै।” दूजै दिन पौलुस उण मिनखौ नै लेयनै, उणौरै साथै सुद्ध होयौ। इणरै पछै वो मिंदर में गियौ, अर उठै बता दियौ की सुद्ध होणै रै दिन, मतलब उणमे ऊं हरैक रै लियै चढ़ावौ चढ़ाए जांणै तांई रा दिन कद पूरा होवैला। जद वे सात दिन पूरा होवण वाळा हा, तो आसिया रा यहूदियो नै पौलुस नै मिंदर में देखनै सगळै लोगां उकसाया, अर यों चिलायनै पौलुस नै पकड़ लियौ, “हे इजरालियो, मदद करौ। ओ वोहीज मिनख है, जिकौ लोगां रै, अर व्यवस्था रै, अर इण जगा रै विरोध में हरैक जगा सगळै लोगां नै सिखावै है, एठै तांई की यूनानियो नै भी मिंदर में लायनै उणै इण पवितर जगा नै भीस्ट करी है।” उणौनै इण ऊं पैला इफिसुसवासी त्रुफिमुस नै उणरै साथै नगर में देख्यौ हो, अर समझता हा की पौलुस उणनै मिंदर में लेय आयौ है। तद सगळै नगर में हुलड़ मच गियौ, अर लोग दौड़नै भेळा होया अर पौलुस नै पकड़नै मिंदर रै बारै घसीट लाया, अर तुरत फाटक बंद कर दिया। जद वे उणनै मारणौ चाहता हा, तो पलटन रै सरदार नै संदेस पूगो की सगळै यरुसलेम में हुलड़ मच रियौ है। तद वो तुरत सैनिकों अर सूबेदारों नै लेयनै उणरै खनै नीचे दौड़ आयौ, अर उणौनै पलटन रै सरदार नै अर सैनिकों नै देखनै पौलुस नै ठोकणौ छोड़ दियौ। तद पलटन रै सरदार खनै आयनै उणनै पकड़ लियौ, अर दो साकंळौ ऊं बांधनै री आग्या देयनै पूछण लागौ, “ओ कुण है अर इणै कांई करयौ है?” पण भीड़ में ऊं कोई कीं अर कोई कीं चिलाता रिया। जद हुलड़ रै कारण ठीक सचाई नीं जांण सकयौ, तो उणनै गढ़ में ले जांणै री आग्या दी। जद पौलुस सीढ़ी माथै पूगो, तो ऐड़ौ होयौ की भीड़ रै दबाव रै मारे सैनिकों नै उणनै उठायनै ले जावणौ पड़ियौ। क्यूंकै लोगां री भीड़ ओ चिलाती होई उणरै लारै पड़ी ही, “उणनै मार दो।” जद वे पौलुस नै गढ़ में लेय जावण वाळा हा, तो उणै पलटन रै सरदार ऊं कयौ, “कांई म्हनै आग्या है की म्हैं थांरै ऊं कीं कहूं?” उणै कयौ, “कांई थूं यूनानी भासा जांणै है? कांई थूं वो मिसरी कोनीं, जिकौ इण दिनां ऊं पैला विद्रोही बणायनै, च्यार हजार कटारबन्द लोगां नै रिंदरोही में लेय गिया?” पौलुस कयौ, “म्हैं तो तरसुस रौ यहूदी मिनख हूं! किलिकिया रै प्रसिद्ध नगर रौ रैवासी हूं। म्हैं थौरे ऊं विनती करूं हूं की म्हनै लोगां ऊं बातां करणै दे।” जद उणै आग्या दी, तो पौलुस नै सीढ़ी माथै ऊभौ होयनै लोगां नै हाथ ऊं इछारौ कियो। जद वे चुप हो गिया तो वो इबरानी भासा में बोलण लागौ। “हे भाइयो अर पितरो, म्हारौ जबाब सुणौ, जिकौ म्हैं अबै थौरे सांमै कैवूं हूं।” वे ओ सुणनै की वो म्हौरै ऊं इबरानी भासा में बोले है, और भी चुप हो गिया। तद उणै कयौ, “म्हैं तो यहूदी मिनख हूं, जिकौ किलिकिया रै तरसुस में जनमियौ, पण इण नगर में गमलीएल रै चरणौ में बिठायनै पढ़ायो गियौ, अर बापदादों री व्यवस्था री ठीक रीति ऊं सिखायौ गियौ। अर परमेसर रै लियै ऐड़ी धुन लगाए ही, ज्यूं थै सगळा आज लगायोड़ा हो। म्हैं यीसु रै पंथ नै मांनणै अर चलनै वाळौ नै एठै तांई सतायो की उणौनै मरवा भी दिया। म्हैं कांई मिनख अर कांई लुगाई सगळौ नै बांधनै जेळखानै में घालतौ हो। इण बात रै लियै महायाजक अर सगळा बुढ़िया गवाई है, की उण ऊं म्हैं भाइयो रै नाम चिठ्ठियो लेयनै दमिसक जा रियौ हो, की उठै रा जिकौ इण पंथ माथै चालै उणौनै भी डंड दिलानै रै लियै बांधनै यरुसलेम लाऊं। “जद म्हैं चालते-चालते दमिसक रै नजीक पूगा, तो ऐड़ौ होयौ की दोपार रै लगोलग एकाएक एक घणौ उजाळौ आभै ऊं म्हारै च्यांरूमेर चमकियो। अर म्हैं धरती माथै पड़ गियौ अर ओ सबद सुण्यौ, ‘हे साऊल, हे साऊल, थूं म्हनै क्यूं सतावै है?’ “म्हैं जबाब दियौ, ‘हे परभु, थूं कुण है?’ “उणै म्हनै कयौ, ‘म्हैं यीसु नासरी हूं, जिणनै थूं सतावै है।’ म्हारै साथियो उजाळौ तो देख्यौ, पण जिकौ म्हारै ऊं बोलतौ हो उणरा सबद नीं समझया। “तद म्हैं कयौ, ‘हे परभु, म्हैं कांई करूं?’ “परभु म्हनै कयौ, ‘उठनै दमिसक में जा, अर जिकौ कीं थारै करणै रै वास्तै ठैरायौ गियौ है उठै थनै सगळौ बता दियौ जावैला।’ जद उण उजाळै रै तेज रै खातर म्हनै कीं दिखाई नीं दियौ, तो म्हैं अपणै साथियो रै हाथ पकड़े होयौ दमिसक में आयौ। “तद हनन्याह नाम रौ व्यवस्था रै अनुसार एक भगत मिनख, जिकौ उठै रैवणवाळा सगळै यहूदियो में सुनाम हो, म्हारै खनै आयौ, अर ऊभौ होयनै म्हनै कयौ, ‘हे भाई साऊल, पाछौ देखन लाग।’ उणीज घड़ी म्हारै आंखे खुल गी अर म्हैं उणनै देख्यौ। “तद उणै कयौ, ‘अपांरै बापदादों रै परमेसर नै थनै इण वास्तै ठैरायौ है की थूं उणरी इछा नै जांणै, अर उण धरमी नै देखे अर उणरै मूंडै ऊं बातां सुणै। क्यूंकै थूं उणरी तरफ ऊं सगळै मिनखौ रै सांमै उण बातां रौ गवाई होवैला जिकौ थै देखी अर सुणी है। अबै क्यूं मोड़ौ करै है? उठ, बतिस्मो ले, अर उणरौ नाम लेन खुद रै पापों नै धो दे।’ “जद म्हैं वळै यरुसलेम में आयनै मिंदर में पराथना कर रियौ हो, तो म्हैं आतमा में दरसण देख्यौ, अर उणै देख्यौ की परभु म्हारै ऊं कैवै है, ‘फुरती करनै यरुसलेम ऊं झट निकळ जा, क्यूंकै वे म्हारै बारै में थारी गवाई नीं मानैला।’ “म्हैं कयौ, ‘हे परभु, वे तो आप जांणै है की म्हैं थौरे माथै विसवास करणैवाळौ नै जेळखानै में घालतौ अर जगा-जगा पराथना घर में ठोकातो हो। जद थारा गवाई स्तिफनुस रौ खून बहायौ जा रियौ हो तद म्हैं भी उठै ऊभौ हो अर इण बात में सहमत हो, अर उणरै घातकों रै गाभौ री रूखाळी करतौ हो।’ “अर उणै म्हनै कयौ, ‘थूं जा, क्यूंकै म्हैं थनै दूजी जातियो रै खनै दुर-दुर भेजूंला।’ ” वो लोग इण बात तांई पौलुस री सुनता रिया, तद जोर ऊं चिलायौ, “ऐड़ै मिनख रौ नास करौ, ओ जीवतौ रैवण लायक कोनीं।” जद वे चिलाता अर गाभा फेंकता अर आभै रै सांमै धूड़ उडा रिया हा, तो पलटन रै सरदार कयौ, “इणनै गढ़ में ले जाओ, अर कोड़ा ठोकनै पूछताछ करौ, की म्हैं जांणूं की लोग कीण खातर उणरै विरोध में ऐड़ा चिला रिया है।” जद उणौ उणनै कोड़ा लगाणै रै वास्तै बांधयो तो पौलुस नै उण सूबेदार ऊं जिकौ खनै ऊभौ हो, कयौ, “कांई ओ सही है की थै एक रोमी मिनख नै, अर वो भी बिना दोसण ठैरायोड़े, रै कोड़ा ठोकौ?” सूबेदार ओ सुणनै पलटन रै सरदार रै खनै जायनै कयौ, “थूं ओ कांई करै है? ओ तो रोमी मिनख है।” तद पलटन रै सरदार नै उणरै खनै आयनै कयौ, “म्हनै बता, कांई थूं रोमी है?” पौलुस कयौ, “हां।” ओ सुणनै पलटन रै सरदार कयौ, “म्हैं रोमी होणै री नागरिकता रै लियै घणाहारा रूपिया दिया है।” पौलुस कयौ, “म्हैं तो जनम ऊं रोमी हूं।” तद जे लोग उणनै जांचनै वाळा हा, वे तुरत उणरै खनै ऊं आगा हो गिया, अर पलटन रौ सरदार भी ओ जांणनै की ओ रोमी है अर म्हैं उणनै बांधयो है, डर गियौ। दूजै दिन उणै ठीक-ठीक जांणणै री इछा ऊं की यहूदी उण माथै क्यूं दोसण लगावै है, उणरै बंधन खोल दिया, अर परधान याजकौ अर सगळी महासभा नै भेळी होणै री आग्या दीनी, अर पौलुस नै नीचे ले जायनै उणरै सांमै ऊभौ कर दियौ। पौलुस नै महासभा री तरफ टकटकी लगाय देखनै कयौ, “हे म्हारै भाइयो, म्हैं आज तांई परमेसर रै लियै बिलकुल साचा मन ऊं जीवन बितायो है।” इण खातर हनन्याह महायाजक उणनै जिकौ उणरै खनै ऊभा हा, उणरै मूंडै माथै थप्पड़ ठोकणै री आग्या दी। तद पौलुस उणनै कयौ, “हे चूनो फेरयोड़ी भींत, परमेसर थनै ठोकेला। थूं व्यवस्था रै मुजब म्हारौ न्याव करनै बैठौ है, अर वळै कांई व्यवस्था रै खिलाफ म्हनै ठोकणै री आग्या दैवै है?” जिकौ खनै ऊभा हा उणौ कयौ, “कांई थूं परमेसर रै महायाजक नै भूंडौ-भलौ कैवै है?” पौलुस कयौ, “हे भाइयो, म्हैं कोनीं जांणतौ हो की ओ महायाजक है, क्यूंकै लिख्यौ है, ‘अपणै लोगां रै परधान नै खराब मत कैह।’ ” तद पौलुस ओ जांण नै की एक दल सदूकियों रौ दूजौ फरीसियों रौ है, सभा में हेलौ करनै कयौ, “हे भाइयो, म्हैं फरीसी अर फरीसियों रै वंस रौ हूं, मरयोड़ौ री आसा अर पुनरूत्थान रै बारै में म्हारौ मुकदमो हो रियौ है।” जद उणै आ बात कही तो फरीसियों अर सदूकियों में झगड़ौ होणै लागौ, अर सभा में फूट पड़गी। क्यूंकै सदूकी तो कैवै है, की नीं पुनरूत्थान है, नीं सरगदूत अर नीं आतमा है, पण फरीसी दोनो नै मांनै है। तद घणौ हाको होयौ अर किता सास्तरी जिकौ फरीसियों रै दल रा हा, उठनै ऊभा होया अर ओ केन झगड़नै लागा, “म्हौ उण मिनख में कोई खोट नीं पाओ, अर जे कोई आतमा या सरगदूत उण ऊं बोल्यौ है तो पछै कांई?” जद घणौ झगड़ौ होयौ, तो पलटन रै सरदार नै इण डर ऊं की वे पौलुस रा टुकड़ा-टुकड़ा नीं कर दे, पलटन नै आग्या दीनी की उतरनै उणनै उणौरै बीच में ऊं जबरदस्ती निकाळै, और गढ़ में ले जावै। उणीज रात परभु नै उणरै खनै ऊभौ होयनै कयौ, “हे पौलुस, हीमत राख, क्यूंकै ज्यौ थै यरुसलेम में म्हारी गवाई दीनी, व्यौंही थनै रोम में भी गवाई देणी होवैला।” जद दिन होयौ, तो यहूदियो नै एको कियो, अर सौगन खाई की, “जैड़ी तांई म्हौ पौलुस नै मार नीं नोखो, तद तांई खाओ या पीयो तो लानत है म्हौरै माथै।” जिणौनै आपस में आ सौगन खाई ही, वे चाळीस जणौ ऊं घणा हा। उणौ परधान याजकौ अर अगुवो रै खनै जायनै कयौ, “म्हौ ओ ठान लियौ की जद तांई म्हौ पौलुस नै मार नीं दो, तद तांई जे कीं चाखो तो भी लानत है। इण वास्तै अबै महासभा समेत पलटन रै सरदार नै समझाओ की उणनै थौरे खनै ले आए, मांनौ की थै उणरै बारै में और भी ठीक ऊं जांच करणी चावौ हो। अर म्हौ उणरै पूगनै ऊं पैला ही उणनै मार दैणै रै लियै तैयार रैवौला।” पण पौलुस रै भांजे सुण्यौ की वे उणरी घात में है, तो गढ़ में जायनै पौलुस नै संदेस दियौ। पौलुस नै सूबेदारों में ऊं एक नै अपणै खनै बुलायनै कयौ, “इण जवान नै पलटन रै सरदार रै खनै लेन जाओ, ओ उण ऊं कीं कैवणौ चावै है।” इण वास्तै उणै उणनै पलटन रै सरदार रै खनै ले जायनै कयौ, “बंदी पौलुस म्हनै बुलायनै विनती किनी की ओ जवान पलटन रै सरदार ऊं कीं कैवणौ चावै है, इणनै उणरै खनै लेन जा।” पलटन रै सरदार नै उणरौ हाथ झालनै और अलग ले जायनै पूछयौ, “थूं म्हारै ऊं कांई कैवणौ चावै है?” उणै कयौ, “यहूदियो एको करयौ है, की थारै ऊं विनती करै की काल पौलुस नै महासभा में लाए, मांनौ वे और ठीक ऊं उणरी जांच करणी चावै है। पण उणौरी बात कोनीं मानणी, क्यूंकै उणमे ऊं चाळीस ऊं ऊपर मिनख उणरी घात में है, जिणौनै आ ठान ली है की जद तांई वे पौलुस नै मार नीं दे, तद तांई खाणौ नीं खावेला और नीं पीवैला। अर अबै वे तैयार है अर थारै फेसले री आस देख रिया है।” तद पलटन रै सरदार नै जवान नै आ आग्या देयनै रवाना कियो, “किणी ऊं नीं कैवणौ की थूं म्हनै ऐ बातां बताई है।” तद उणै दो सूबेदारों नै बुलायनै कयौ, “दो सौ सैनिक, सतर सवार, अर दो सौ भालेत, पहर रात बीते कैसरिया जावण रै वास्तै तैयार कर राखौ। अर पौलुस री सवारी रै वास्तै घोड़े तैयार राखौ, की उणनै फेलिक्स हाकिम रै खनै राजी-खुसी पूगा दो।” उणै इण तरैह री चिठ्ठी भी लिखी। “महाप्रतापी फेलिक्स हाकिम नै क्लौदियुस लूसियास रौ नमस्कार। इण मिनख नै यहूदियो पकड़नै मार दैणौ चावै है, पण जद म्हैं जांण्यौ की रोमी है, तो पलटन लेयनै छुड़ा लायौ। म्हैं जांणणौ चाहतौ हो की वे उण माथै कीण खातर दोस लगावै है, इण वास्तै उणनै उणरी महासभा में ले गियौ। तद म्हैं जांण लियौ की वे आपरी व्यवस्था रै विवादों रै बारै में उण माथै दोस लगावै है, पण मार दैणै या बांध जांणै रै लायक उणमे कोई दोस नीं है। जद म्हनै बतायौ गियौ की वे इण मिनख री घात में लागयोड़ा है तो म्हैं तुरत उणनै थारै खनै भेज दियौ, अर मुकदमे वाळौ नै भी आग्या दीनी, की थारै सांमै उण माथै आरोप राखै।” अतस जैड़ी सैनिकों नै आग्या दी ही, व्यौंही वे पौलुस नै लेयनै रातोरात अन्तिपत्रिस नगरी में आया। दूजै दिन वे घुड़सवारो नै उणरै साथै जांणै रै वास्तै छोड़नै आप गढ़ आयौ। उणौनै कैसरिया पूगनै हाकिम नै चिठ्ठी दीनी, और पौलुस नै भी उणरै सांमै ऊभौ कियो। उणै चिठ्ठी पढ़नै पूछयौ, “ओ कीण प्रान्त रौ है?” अर जद जांण लियौ की किलिकिया रौ है तो उण ऊं कयौ, “जद थारा मुकदमो करण वाळा भी आवैला, तो म्हैं थारौ फैसलो करूंला।” अर उणै उणनै हेरोदेस रै किले में पहरे में राखणै री आग्या दीनी। पांच दिन रै पछै हनन्याह महायाजक अर यहूदी अगुवो अर तिरतुल्लुस नाम रौ किणी वकील नै साथै लेन आया। उणौनै हाकिम रै सांमै पौलुस माथै दोस साबित करनै आया हा। जद वो बुलाया गिया तो तिरतुल्लुस उण माथै दोस लगायनै कैवण लागौ, “हे महाप्रतापी फेलिक्स, थौरे कारण म्हौ घणी सानति रै साथै रैह रिया हो अर थारै प्रबन्ध ऊं इण जाति रै लियै किती बुराइयां सुधरती जावै है। इण वास्तै म्हौ थनै हरैक जगा अर हरैक तरैह ऊं धन्यवाद रै साथै मांनौ हो। पण इण वास्तै की थनै वळै दुख नीं दैणौ चावूं, म्हैं थारै ऊं विनती करूं हूं, की करपा करनै म्हौरी दो एक बात सुण ले। “ इण मिनख नै कळेगारो अर जगत रै सगळै यहूदियो में दंगो कराणवाळौ, अर नासरी लोगां रै पंथ रौ मुखियौ पायो है। उणै मिंदर नै असुद्ध करणौ चाहयौ, पण म्हौ उणनै पकड़ लियौ। म्हौ उणनै अपणी व्यवस्था रै अनुसार डंड दियौ होतो, पण पलटन रै सरदार लूसियास नै उणै जबरदस्ती म्हौरै हाथ ऊं खो लियौ, अर इण परकार दोस लगानै वाळौ नै थारै सांमै आवण री आग्या दी। इण सगळी बातां नै जिण रै बारै में म्हौ उण माथै दोस लगावौ हो, थूं आप ही उणरी जांच करनै जांण ले ला।” यहूदियो नै भी उणरौ साथ देयनै कयौ, ऐ बातां सगळी सही है। जद हाकिम पौलुस नै बोलनै रौ इछारौ कियो, तो उणै जबाब दियौ, “म्हैं ओ जांणनै की थूं घणौ बरसो ऊं इण जाति रौ न्याव करै है, इण वास्तै म्हैं खुसी ऊं खुद रौ प्रत्युतर देवूं हूं। थूं आप जांण सकै है, की जद ऊं म्हैं यरुसलेम में आराधना करनै आयौ, म्हनै बारैह दिन ऊं ऊपर कोनीं होया। उणौ म्हनै नीं मिंदर में नीं पराथना घरो में, नीं नगरी में किणी ऊं विवाद करते या भीड़ लगाते देख्यौ, अर नीं तो उण बातां नै, जिणरौ वे अबार म्हारै ऊपर दोस लगावै है, थारै सांमै सच साबित कर सकै है। पण म्हैं थारै सांमै ओ मांन लैवूं हूं की जिण यीसु पन्थ नै वे कुपन्थ कैवै है, उणी रीति ऊपर म्हैं अपणै बापदादों रै परमेसर री सेवा करूं हूं, अर जिकौ बातां व्यवस्था अर भविसयदाताओ री किताबो में लिखी है, उण सबां माथै विसवास करूं हूं। अर परमेसर ऊं आसा राखूं हूं जिकौ वे आप भी राखै है, की धरमी अर अधरमी दोनूं रौ जी उठणौ होवैला। इण ऊं म्हैं आप भी यत्‍न करूं हूं की परमेसर री, अर मिनखौ रौ और म्हारौ अंतो हमेसां निरदोस रैह। “घणै बरसो रै पछै म्हैं यरुसलेम अपणै लोगां नै दांन पूगानै, अर मिंदर भेट चढ़ानै आयौ हो। उणौ म्हनै मिंदर में, सुद्ध दसा में, बिना भीड़ रै साथै, अर बिना दंगा करते होया भेट चढ़ाते पाया हां आसिया रै कई यहूदी हा उणौनै उचित हो। की जे म्हारै विरोध में उणौरै खनै कोई बात हो तो एठै थारै सांमै आयनै म्हारै ऊपर दोस लगाता। या ऐ आप ही बताए की जद म्हैं महासभा रै सांमै ऊभौ हो, तो उणौनै म्हारै में कियो गुनाह पायो। इण एक बात नै छोड़ जिकौ म्हैं उणरै बीच में ऊभौ होयनै हेलौ करनै कही ही, ‘मरयोड़ौ रै जी उठनै रै बारै में आज म्हारौ थौरे सांमै मुकदमो हो रियौ है।’ ” फेलिक्स, जिकौ यीसु रै पन्थ री बातां ठीक-ठीक जांणतौ हो, उणै ओ केन टाळ दियौ, “जद पलटन रौ सरदार लूसियास आवैला, तो थौरी बात रौ फैसलो करूंला।” अर सूबेदार नै आग्या दी की पौलुस नै कीं छूट में राखनै रूखाळी करणी, अर उणरै मित्रों में ऊं किणी नै भी उणरी सेवा करनै ऊं नीं रोकणा। कईक दिनां रै पछै फेलिक्स अपणी लुगाई द्रुसिल्ला नै, जिकौ यहूदिनी ही, साथै लेयनै आया अर पौलुस नै बुलायनै उण विसवास रै बारै में जिकौ मसीह यीसु माथै है, उण ऊं सुण्यौ। जद वो धरम, अर संयम, अर आवणवाळै न्याव री चरचा कर रियौ हो, तो फेलिक्स डरनै जबाब दियौ, “अबै तो जा, मौकौ पायनै म्हैं थनै वळै बुलाऊंला।” उणनै पौलुस ऊं कीं रूपिया मिलनै री भी आसा ही, इण वास्तै और भी बार-बार बुलायनै उण ऊं बातां किया करतौ हो। पण जद दो बरस बीत गिया तो पुरकियुस फेस्तुस, फेलिक्स री जगा माथै आया, अर फेलिक्स यहूदियो नै खुस करनै री इछा ऊं पौलुस नै जेळ में ही छोड़नै गियौ। फेस्तुस उण परदेस में पूगनै रै तीन दिन पछै कैसरिया ऊं यरुसलेम गियौ। तद परधान याजकौ अर यहूदियो रै मुखिया लोगां नै उणरै सांमै पौलुस ऊपर दोस लगाणा सरू किया। अर उण ऊं विनती करनै उणरै विरोध में ओ पकस चाहयौ, की वो उणनै यरुसलेम में बुलाए, क्यूंकै वे उणनै रास्ते ही में मार दैणै री घात में लागयोड़ा हा। फेस्तुस जबाब दियौ, “पौलुस कैसरिया में पहरे में है, अर म्हैं आप जल्दी उठै जाऊंला।” पछै कयौ, “थौरे में जिकौ अधिकार राखै है वे साथै चालै, अर जे इण मिनख नै गुनाह कियो है तो उण माथै दोस लगाए।” उणरै बीच कोई आठ दस दिन रैयनै वो कैसरिया चाल दियौ, अर दूजै दिन न्याव-आसन माथै बैठनै पौलुस नै लावण री आग्या दी। जद पौलुस आयौ तो जिकौ यहूदी यरुसलेम ऊं आया हा, उणौनै आजू-बाजू ऊभा होयनै उण माथै घणाहारा भारी दोसण लगाया, पण उणनै साबित नीं कर सकया हा। पण पौलुस जबाब दियौ, “म्हैं नीं तो यहूदियो री व्यवस्था रै अर नीं मिंदर रै अर नीं ही कैसर रै विरुद्ध कोई गुनाह कियो है।” तद फेस्तुस यहूदियो नै खुस करनै री इछा ऊं पौलुस ऊं कयौ, “कांई थूं चावै है की यरुसलेम जाऊं, अर उठै म्हारै सांमै थारौ ओ मुकदमो तय कियो जाये?” पौलुस कयौ, “म्हैं कैसर रै न्याव आसन रै सांमै बैठौ हूं, म्हारै मुकदमे रौ ओहीज फैसलो होणौ चाहीजै। ज्यौ थूं चौखी तरैह ऊं जांणै है, यहूदियो रौ म्हैं कीं गुनाह नीं कियो। जे म्हैं गुनेगार हूं अर मार दैणै लायक कोई कांम कियो है, तो मरनै ऊं नीं मुकरतो, पण जिण बातां रौ ऐ म्हारै माथै दोस लगावै है, जे उणमे ऊं कोई बात साची नीं ठैरै, तो कोई म्हनै उणरै हाथ नीं सौंप सकै। अर म्हारी विनती है की म्हारी सुनवाई कैसर राजा रै सांमै हो।” तद फेस्तुस नै मंत्रियो री सभा रै साथै बातां करनै जबाब दियौ, “थै कैसर खनै सुनवाई करणै री विनती की है, इण वास्तै थूं कैसर राजा रै खनै ही जावैला।” कईक दिन बीतनै रै पछै अग्रिप्पा राजा अर उणरी बेन बिरनीके नै कैसरिया नगर में आयनै फेस्तुस ऊं मिळिया। उणरै घणै दिनां उठै रैणै रै पछै फेस्तुस नै पौलुस रै बारै में राजा नै बतायौ, “एक मिनख है, जिणनै फेलिक्स बंदी नै एठै छोड़नै ग्यौ है। जद म्हैं यरुसलेम में हो, तो परधान याजक अर यहूदियो रै अगुवो नै दोस लगायौ अर चावै की उणनै मौत री सजा री आग्या दे। पण म्हैं उणनै जबाब दियौ की रोमियो री आ रीति कोनीं की किणी मिनख नै डंड रै लियै सूंप दे, जद तांई मिनख नै अपणै मुकदमो करनैवाळा रै सांमै ऊभौ होयनै दोस रै जबाब दैणै रौ मौकौ नीं मिळै। इण वास्तै जद वे एठै भेळा होया, तो म्हैं कीं जेज नीं की, पण दूजै ही दिन न्याव आसन माथै बैठनै उण मिनख नै लावण री आग्या दी। जद उण माथै मुकदमो करनैवाळा ऊभा होया, तो उणौ ऐड़ी भूंडी बातां रौ दोस नीं लगायौ जैड़ौ म्हैं समझतौ हो। पण वे अपणै धरम रै और यीसु नाम किणी मिनख रै बारै में, जिकौ मर गियौ हो अर पौलुस उणनै जीवतौ होणै रौ बतातौ हो, विवाद करता हा। म्हैं समझ नीं पा रियौ हो की इण बातां रौ पतौ कीकर लगाऊं? इण वास्तै म्हैं उण ऊं पूछयौ, ‘कांई थूं यरुसलेम जावैला की उठै इण बातां रौ फैसलो हो?’ पण जद पौलुस नै विनती की, की उणरै मुकदमे रौ फैसलो महाराजा रै उठै हो, तो म्हैं आग्या दी की जैड़ी तांई उणनै कैसर राजा रै खनै नीं भेजूं, उणरी रूखाळी की जाये।” तद अग्रिप्पा फेस्तुस ऊं कयौ, “म्हैं भी उण मिनख री सुणणी चावूं हूं।” उणै कयौ, “थूं काल सुण दैला।” दूजै दिन जद अग्रिप्पा अर उणरी बेन बिरनीके घणी धूमधाम ऊं आया अर पलटन रै सरदारो अर नगर रै मुखिया लोगां रै साथै दरबार में पूगा। तद फेस्तुस आग्या दी की वे पौलुस नै लेन आवै। फेस्तुस कयौ, “हे राजा अग्रिप्पा, अर हे सगळै मिनखौ जिकौ एठै म्हौरै साथै हो, थै इण मिनख नै देखौ हो। जिणरै बारै में सगळै यहूदियो नै यरुसलेम में अर एठै भी चिला-चिलायनै म्हारै ऊं विनती की, की इणरौ जीवतौ रैवणौ चौखौ कोनीं। पण म्हैं जांण लियौ की उणै ऐड़ौ कीं नीं कियो की मार दियौ जाए, अर जद की उणै आप ही महाराजा री विनती की, तो म्हैं उणनै भेजनै रौ फैसलो कियो। म्हैं उणरै बारै में कोई पकी बात नीं पाई की अपणै मालिक कैसर रै खनै लिख भेजूं। इण वास्तै म्हैं उणनै थौरे सांमै अर खास करनै हे महाराजा अग्रिप्पा, थारै सांमै लायौ हूं की जांचनै रै पछै म्हनै कीं लिखनै रौ मिळै। किणी बंदी माथै लगाया गिया आरोप रै बारै में बिना चिठ्ठी लिखे उण नै भेजणो, म्हनै ठीक कोनीं लागै है।” अग्रिप्पा पौलुस नै कयौ, “थनै अपणै बारै में बोलणै री आग्या है।” तद पौलुस हाथ उठायनै जबाब दैणै लागौ, “हे राजा अग्रिप्पा, जिती बातां रौ यहूदी म्हारै माथै दोस लगावै है, आज थारै सांमै उणरौ जबाब दैणै में म्हैं अपणै आप नै धन्य समझ रियौ हूं, खास करनै इण वास्तै की थूं यहूदियो रै सगळै व्यवहार अर विवादों नै जांणै है। अतस म्हैं विनती करूं हूं, धीरज ऊं म्हारी सुण ले। “म्हारी चाल-चलण बचपन ऊं अपणै देस अर यरुसलेम में भी जैड़ी ही, वो सगळा यहूदी जांणै है। जे वे गवाई दैणी चावै, तो सरूआत ऊं म्हनै पिछांणै है की म्हैं फरीसी होयनै अपणै धरम रै सबां ऊं खरै पन्थ रै अनुसार चालयौ। अर अबै उण वायदे में आसा रै खातर जिकौ परमेसर नै म्हौरै बापदादों ऊं की ही, म्हारै माथै मुकदमो चाल रियौ हो। उण वायदे रै पूरै होणै री आसा लगायोड़ा, म्हौरै बारैह गोत्र अपणै सगळै मन ऊं रात-दिन परमेसर री सेवा करता आया हो। हे राजा, इणीज आसा रै बारै में यहूदी म्हारै माथै दोस लगावै है। जद की परमेसर मरयोड़ौ नै जिलावै है, तो थौरे एठै आ बात क्यूं विसवास रै लायक नीं समझी जावै? “म्हैं भी समझयौ हो की यीसु नासरी रै नाम रै विरोध में म्हनै बोहत कीं करणौ चाहीजै। अर म्हैं यरुसलेम में ऐड़ौ ही कियो, अर परधान याजकौ ऊं अधिकार पायनै घणाहारा परमेसर रै लोगां नै जेळ में घालया, अर जद वे मार दिया जाता हा, तो म्हैं भी उणौरै विरोध में अपणी जायदाद देतो हो। हरैक यहूदी पराथना घर में म्हैं उणौनै ताड़ना दिला-दिलायनै यीसु री निंदा करातो हो, एठै तांई की क्रोध रै कारण ऐड़ौ पागल हो गियौ की बाहर रै नगरो में भी जायनै उणौनै सतातो हो। “इणी धुन में जद म्हैं परधान याजकौ ऊं अधिकार अर आग्या-पत्र लेयनै दमिसक जा रियौ हो। तो हे राजा, मारग में दोपार रै वैळा म्हैं आभै ऊं सूरज रै तेज ऊं भी बढ़न एक जोत, अपणै अर अपणै साथै चालनैवालौ रै च्यांरूमेर चमकती होई देखी। जद म्हौ सगळा जमीन माथै पड़ग्या, तो म्हैं इबरानी भासा में, म्हारै ऊं ओ कैवतै होयौ एक सबद सुण्यौ, ‘हे साऊल, हे साऊल थूं म्हनै क्यूं सतावै है? थूं म्हनै सताय नै खुद नै दुख पूगावै है।’ ” “म्हैं कयौ, ‘हे परभु थूं कुण है?’ “परभु कयौ, ‘म्हैं यीसु हूं, जिणनै थूं सतावै है। पण थूं उठ, खुद रै पगां माथै ऊभौ हो। क्यूंकै म्हैं थनै इण वास्तै दरसण दिया है, की नीं कैवल, जिकौ कीं थै म्हारै बारै देख्यौ है, पण वो सगळौ, जिकौ म्हैं थनै अपणै बारै में दिखाऊंला। उणरै लियै थनै सेवक अर गवाई हो जावै। अर म्हैं थनै थारै लोगां ऊं अर दूजी जातियो ऊं बचातौ रैवूंला, जिणरै खनै म्हैं थनै भेजूं हूं। की थूं उणौरी आंख्यां खौले की वे अंधारै ऊं उजाळै री तरफ, अर सैतान रै अधिकार ऊं परमेसर री तरफ फिरै, की पापों री माफी अर उण लोगां रै साथै जिकौ म्हारै माथै विसवास करनै ऊं पवितर किया है।’ “अतस हे राजा अग्रिप्पा, म्हैं उण सरगिए दरसण री बात नीं टाळी, पण पैला दमिसक में, पछै यरुसलेम में, अर यहूदिया रै सगळै देस रै रैवणवाळौ नै, अर दूजी जातियो नै समझातौ रियौ, की परमेसर री तरफ मन फिराओ अर मन फिराव रै लायक कांम करौ। इण बातां रै खातर यहूदी म्हनै मिंदर में पकड़नै मार दैणै री कोसीस करता हा। पण परमेसर री मदद ऊं म्हैं आज तांई जीवित हूं अर छोटा-मोटा सगळौ रै सांमै गवाई देवूं हूं, अर उण बातां नै छोड़नै कीं नीं कैवूं, जिकौ भविसयदाता अर मूसा भी कयौ की होवणवाळी है, की मसीह नै दुख उठाणौ पड़ैला, अर वोहीज सबां ऊं पैला मरयोड़ौ में ऊं जी उठनै, म्हौरै लोगां में अर दूजी जातियो में उजाळै रौ परचार करैला।” जद वो इण रीति ऊं जबाब देय रियौ हो, तो फेस्तुस ऊंची आवाज ऊं कयौ, “हे पौलुस, थूं पागल है। घणी पढ़ाई नै थनै पागल कर दियौ है।” पण पौलुस कयौ, “हे महोदय फेस्तुस, म्हैं पागल कोनीं, पण सचाई अर बुद्धि री बातां कैवूं हूं। राजा भी जिणरै सांमै म्हैं बेखौफ होयनै बोल रियौ हूं, ऐ बातां जांणूं हूं, अर म्हनै विसवास है की इण बातां में ऊं कोई उण ऊं लुकयोड़ी कोनीं है, क्यूंकै आ घटना किणी कोने में कोनीं होई। हे राजा अग्रिप्पा, कांई थूं भविसयदाताओ रौ विसवास करै है? हां, म्हैं जांणूं हूं की थूं विसवास करै है।” तद अग्रिप्पा पौलुस नै कयौ, “थूं इण थोड़े ही वगत में म्हनै मसीह बणाणौ चावै है?” पौलुस कयौ, “परमेसर ऊं म्हारी पराथना है की कांई थोड़े में कांई घणै में, कैवल थूं इज नीं पण जिता लोग आज म्हारी सुणै है, इण जंजीरौ नै छोड़नै वे म्हारै ज्यूं हो जावै।” तद राजा अर हाकिम फेस्तुस अर बिरनीके अर उणरै साथै बैठन वाळा उठनै ऊभा हो गिया, अर अलग जायनै आपस में कैवण लागा, “ओ मिनख ऐड़ौ तो कीं नीं कियो, जिकौ मारणै या जेळ में घालनै लायक है।” अग्रिप्पा फेस्तुस ऊं कयौ, “जे ओ मिनख कैसर री विनती नीं करतौ, तो छूट सकतौ हो।” जद ओ पको हो गियौ की म्हौ जहाज ऊं इटली जाओ, तो उणौ नै पौलुस अर कीं दूजा बंदियों नै भी रोमी राजा री पलटन रै एक सूबेदार यूलियूस नाम रै हाथ सौंप दिया। अद्रमुतियुम रै एक जहाज माथै जिकौ आसिया रै किनारै री जगा में जावण वाळौ हो, चढ़नै म्हौ उणनै खोल दियौ, अर अरिस्तर्खुस नाम रै थिस्सलुनीके रौ एक मकिदुनी म्हौरै साथै हो। दूजै दिन म्हौ सैदा में डेरो दियौ, अर यूलियूस नै पौलुस माथै करपा करनै उणनै मित्रों रै उठै जांणै दियौ ताकी वो जरुरी चीजों ला सकै। उठै ऊं जहाज खोलनै हवा विरुद्ध होणै रै खातर म्हौ साइप्रस टापू री ओट में होयनै चालया, अर किलिकिया अर पंफूलिया रै नजीक रै समंदर में होयनै लूसिया रै मूरा में उतरिया। उठै सूबेदार नै सिकन्दरिया रौ एक जहाज इटली जावतौ होयौ मिळियौ, अर उणै म्हौ नै उण माथै चढ़ा दिया। जद म्हौ घणौ दिनां तांई होळै-होळै चालनै मुसकिल ऊं कनिदुस नगर रै सांमै पूगा, तो इण वास्तै की हवा म्हौ नै आगै नीं बढ़न देती ही, म्हौ सलमोने रै सांमै ऊं होयनै क्रेते टापू री ओट में चालया, अर उणरै कांठै-कांठै मुसकिल ऊं चालनै “सुरकसित बन्दरगाह” नाम री एक जगा पूगा, जठै ऊं लसया नगर नजीक हो। जद घणा दिन बीत गिया अर समंदर यात्रा में जोखम इण वास्तै होतो हो की उपवास रै दिन बीत चुकया हा। तो पौलुस उणौनै ओ कैहन समझाया, “हे सज्जनो, म्हनै ऐड़ौ जांण पड़ै है की इण यात्रा में विपति अर घणौ नुकसाण, नीं कैवल माल अर जहाज रौ बल्कि म्हौरै प्रांणौ रौ भी होणवाळौ है।” पण सूबेदार नै पौलुस री बातां ऊं करते कप्तान अर जहाज रै मालिक री बातां ऊपर घणौ विसवास कियो। वो बन्दरगाह सरदी मौसम निकाळनै रै लायक कोनीं हो, इण वास्तै घणौ रौ विचार होयौ की उठै ऊं जहाज खोलनै जे किणी रीत ऊं हो सकै तो फीनिक्स पूगनै सरदी बिताओ। ओ तो क्रेते रौ एक बन्दरगाह है जिकौ दखिन-पच्छिम अर उतर-पच्छिम री तरफ खुले है। जद दखण हवा होळै-होळै चालन लागी, तो ओ समझनै की म्हौरौ मतलब पूरौ हो गियौ, लंगर उठायौ अर कांठै ऊं क्रेते रै खनै ऊं जावण लागा। पण थोड़ी जेज में जमीन री तरफ ऊं एक घणीहारी आंधी ऊपड़ी, जिकौ “यूरकुलीन” कहीजै है। जद आंधी जहाज रै लागी तो वो उणरै सांमै ठैर नीं सकयौ, अतस म्हौ उणनै जावण दियौ अर इणी तरैह बहातो होयौ चाल गिया। तद कौदा नाम रै एक छोटे टापू री ओट में बहता होया म्हौ घणी मुसकिल ऊं जहाज री छोटी नावो नै वस में किया। पछै मल्लाहों छोटी नावो उठायनै कई उपाय करनै जहाज नै नीचे ऊं बांधयो, अर सुरतिस रै किनारै री धूड़ में फस नीं जाओ, इण डर ऊं उणौनै पाल अर सामान उतार दियौ अर जहाज नै चालनै दियौ। जद म्हौ आंधी ऊं घणा हिचकोला अर धक्‍का खाया, तो दूजै दिन जहाज ऊं माल फेंक नै लागा, अर तीजै दिन उणौनै अपणै हाथो ऊं जहाज रौ साज-सामान भी फेंक दियौ। जद घणै दिनां तांई नीं सूरज, नीं तारा देठाळौ दिया अर घणीहारी आंधी चालती री, तो अंत में म्हौरै बचनै री सगळी आसा जाती रही। जद वे घणा दिन तांई भूखा रैह चुकया, तो पौलुस नै उणौरै बीच में ऊभौ होयनै कयौ, “हे लोगां, जे थै म्हारी बात माननै, क्रेते ऊं नीं जहाज खौलता अर नीं आ विपति आती अर नीं ओ नुकसाण उठाता। पण अबै म्हैं थांनै समझाऊं हूं, की हीमत राखौ, क्यूंकै थौरे में ऊं किणी रै प्रांण री हानि नीं होवैला, पण कैवल जहाज री। क्यूंकै परमेसर जिणरौ म्हैं हूं, अर जिणरी सेवा करूं हूं, उणरै सरगदूत नै आज रात म्हारै खनै आयनै कयौ, ‘हे पौलुस, मत डर। थनै कैसर रै सांमै ऊभौ होणौ जरुरी है। देख, परमेसर नै सबां नै जिकौ थारै साथै यात्रा करै है, थनै दिया है।’ इण वास्तै, हे सज्जनो, हीमत राखौ, क्यूंकै म्हैं परमेसर रौ विसवास करूं हूं, की ज्यूं म्हारै ऊं कयौ है, व्यौंही होवैला। पण अपांनै किणी टापू ऊपर जायनै रूकणौ होवैला।” जद चौदहवी रात आई, अर म्हौ अद्रिया समंदर में भटकता फिर रिया हा, तो आधी रात रै नजीक मल्लाहों नै अटकळ ऊं जांण्यौ की म्हौ किणी देस रै नजीक पूग रिया हो। उणौनै समंदर री गेराई मापी तो उठै कोई अस्सी हाथ ही। थोड़ी जेज पछै उणौ पांणी रै गेराई वळै मापी तो अबै साठ हाथ रैह गी है। तद पथरीली जगा ऊं टकरानै रै डर ऊं उणौनै जहाज रै लारले भाग ऊं च्यार लंगर खोलया, अर पराथना करनै लागा की किणी तरैह दिन ऊग जावै। पण जद मल्लाह जहाज माथै ऊं भागणा चावता हा, अर गलही ऊं लंगर खोलनै रै बहानै छोटी नाव जहाज में ऊं समंदर में उतार दी। तो पौलुस नै सूबेदार अर सैनिकों ऊं कयौ, “जे मल्लाह लोग जहाज ऊपर नीं रिया, तो थै भी नीं बच सकौ।” तद सैनिकों नै रस्सा काटनै छोटी नाव नीचे नोख दी। जद सुबह होणै वाळी ही, तद पौलुस ओ कैहन, सबांनै खाणौ खाणै रै लिए समझाया, “आज चौदह दिन होया की थै आस देखता-देखता भूखा रिया, अर कीं नीं खायौ। इण वास्तै थांनै समझाऊं हूं की कीं खा लौ, जिण ऊं थौरो बचाव होवै, क्यूंकै थौरे में ऊं किणी रै माथा रौ एक बाल भी नीं खीरैला।” ओ कैहन उणनै रोटी लेयनै सबां रै सांमै परमेसर रौ धन्यवाद कियो अर तोड़नै खाणै लागौ। तद वे सगळा हीमत करनै खाणौ खाणै लागा। म्हौ सगळा मिळन जहाज माथै दो सौ छिहतर लोग हा। जद वे खाणौ खायनै धापा, तो गेहूंं नै समंदर में फेंकनै जहाज हल्को करनै लागा। जद दिन उगियौ तो उणौनै उण देस नै कोनीं पिछांणयौ, पण एक जगा देखी जिणरौ किनारो चौरस हो, अर विचार कियो की जे हो सकै तो इण माथै जहाज टिकाओ। तद उणौनै लंगरों नै खोलनै समंदर में छोड़ दिया अर उणीज वगत पतवारो रै रस्से खोल दिया, अर हवा रै सांमै अगलो पाल चढ़ायनै किनारै री तरफ चालया। अर उणरौ जहाज रेत में जा टकरायो। जहाज रौ आगलो भाग उणमे फस नै रूक गियौ। पण लारलौ भाग लेहरौ रै जोर ऊं टूटनै लागौ। तद सैनिकों नै ओ विचार आयौ की बन्दियों नै मार नोखो, ऐड़ौ नीं हो की कोई तैर नै निकळनै नाह जावै। पण सूबेदार पौलुस नै बचानै री इछा ऊं उणौनै इण विचार ऊं रोकया अर ओ कयौ, “जिकौ तैर सकै है, पैला कूदनै किनारै माथै निकळ जाय। अर बाकी कोई पाटियो माथै, अर कोई जहाज री कोई चीजों रै सहारे निकळ जाये।” इण रीत ऊं सगळा कोई जमीन माथै बच निकळिया। जद म्हौ बच निकळिया, तो पतौ चालयौ की ओ टापू माल्टा कहीजै है। उठै रै रैवासियो नै म्हौरै माथै अनोखी करपा की, मेंह बरसनै रै कारण ठंड ही, इण वास्तै उणौनै अग्‍नि सळगायनै म्हौ सगळौ नै ठैराया। जद पौलुस नै लकड़ियो रौ गटो भेळौ करनै अग्‍नि माथै राख्यौ, तो एक सांप तपती ऊं बारै निकळयौ अर उणरै हाथ नै डस नै लटक गियौ। जद उण रैवासियो नै सांप नै उणरै हाथ ऊं लटकियोड़ो देख्यौ, तो आपस में कयौ, “साचांणी ओ मिनख खूनी है की जे समंदर ऊं बच गियौ, तौभी न्याव रौ देवता इणनै जीवतौ रैवण नीं दैला।” तद पौलुस सांप नै अग्‍नि में झटक दियौ, पण पौलुस नै कीं नुकसाण नीं होयौ। पण वे बाट जोहता हा की वो सूज जावैला या एकाएक पड़नै मर जावैला, पण जद वे सगळा घणी जेज तांई देखता रिया अर देख्यौ की उणरौ कीं भी नीं बिगड़यौ, तो अपणौ विचार बदळनै कयौ, “ओ तो कोई देवता है।” उण जगा रै आजू-बाजू उण टापू रै परधान पुबलियुस री धरती ही। उणै म्हौ नै आपरै घर ले जायनै तीन दिन मित्रभाव ऊं सेवा-चाकरी करी। पुबलियुस रौ पिता ताव अर पेचिस ऊं बीमार पड़ियौ हो। तो पौलुस नै उणरै घर में जायनै पराथना की, अर उण माथै हाथ राखनै पराथना की अर उणनै सावळ कियो। जद ऐड़ौ होयौ तो उण टापू रा बाकी बीमार आया अर उणौनै सावळ किया। उणौनै म्हौरौ घणौ ही आदर कियो, अर जद म्हौ चालनै लागा तो जिकौ कीं म्हौरै लिए जरुरी हो, वो जहाज माथै राख दिया। तीन महीना रै पछै म्हौ सिकन्दरिया रै एक जहाज में चाल निकळिया, जिकौ उण टापू में जहाज ठंडी में रुकयोड़ौ हो, अर जिणरौ चिन्ह दियुसकूरी हो। सुरकूसा नगरी में जा पूगा उठै म्हौ तीन दिन ठैरया। उठै ऊं म्हौ फिरनै रेगियुम नगरी में आया, अर एक दिन रै पछै दखण हवा चाली, तद म्हौ दूजै दिन पुतियुली नगरी में आया। उठै म्हौ नै विसवासी भाई मिळिया, अर उणौरै कैवण ऊं म्हौ उणौरै उठै सात दिन तांई रिया, अर इण रीति ऊं म्हौ रोम चालया। उठै ऊं विसवासी भाई म्हौरा समाचार सुणनै अप्पियुस रै चौक अर तीन-सराय तांई म्हौरै ऊं मिळनै आया, जिणौनै देखनै पौलुस नै परमेसर रौ धन्यवाद कियो अर हीमत बांधी। जद म्हौ रोम में पूगा, तो पौलुस नै अलग ऊं रैवण री आग्या दे दी ही अर उणरी निगरानी में एक सैनिक राख दियौ हो। तीन दिन रै पछै पौलुस यहूदियो रै मुखिया लोगां नै बुलाया, अर जद वे भेळा होया तो उण ऊं कयौ, “हे भाइयो, म्हैं अपणै लोगां रै या बापदादों रै व्यवहारों रै विरोध में कीं भी नीं कियो, तौभी बंदी बणायनै यरुसलेम ऊं रोमियो रै हाथ सूंप दियौ। उणौ म्हनै जांच नै छोड़ दैणौ चाहयौ, क्यूंकै म्हारै में मारणै रै लायक कोई दोस नीं हो। पण जद यहूदी इणरै विरोध में बोलण लागा, तो म्हनै कैसर री विनती करणी पड़ी। आ कोनीं की म्हनै अपणै लोगां माथै कोई दोस लगाणौ हो। इण वास्तै म्हैं थनै बुलायौ है की थारै ऊं मिळूं अर बातचीत करूं, क्यूंकै इजरायल रै मसीहा री आसा रै खातर म्हैं इण जंजीर ऊं बंधयोड़ौ हूं।” उणौनै उण ऊं कयौ, “नीं म्हौ थारै बारै में यहूदी मुखियां ऊं चिठ्ठियो पाई, अर नीं भाइयो में ऊं किणी नै आयनै थारै बारै में कीं बतायौ अर नीं भूंडौ कयौ। पण थारौ विचार कांई है? वोहीज म्हौ थारै ऊं सुणणौ चावौ हो, क्यूंकै म्हौ जांणौ हो की हरैक जगा मसीह मत रै विरोध में लोग बातां करै है।” तद उणौनै उणरै लियै एक दिन ठैरायौ, अर घणाहारा लोग उणरै उठै भेळा होया। अर वो परमेसर रै राज री गवाई देता होया, अर मूसा री व्यवस्था अर भविसयदाताओ री किताबो ऊं यीसु रै बारै में समझा-समझायनै सवार ऊं सिंझ्या तांई वरणन करतौ रियौ। तद कईक नै उण बातां नै मांन ली, अर कईको नै विसवास नीं कियो। जद वे आपस में एक मत नीं होया, तो पौलुस री इण बात रै कैवण ऊपर चाल दिया। “पवितर आतमा नै यसायाह भविसयदाता रै द्धारा थौरे बापदादों ऊं ठीक ही कयौ, ‘जायनै इण लोगां ऊं कैह, “की सुणता तो रैवौला, पण नीं समझोला, अर देखता तो रैवौला, पण थांनै दिखाई नीं दैला।” क्यूंकै इण लोगां रौ मन मोटा अर उणौरा कांन भारी हो गिया है, अर उणौनै आपरी आंख बंद की है, ऐड़ौ नीं हो की वे कदैई आंखों ऊं देखे, अर कांनो ऊं सुणै अर मन ऊं समझै अर फिरै, अर म्हैं परमेसर आत्मिक चंगा भला करूंला।’ “अतस थै जांणौ की परमेसर रै इण उद्धार री कथा दूजी जातियो रै खनै भेजी गी है, अर वे सुणैला।” जद उणै ओ कयौ तो यहूदी आपस में घणौ विवाद करनै लागा अर उठै ऊं चाल दिया। पौलुस पूरै दो बरस अपणै भाड़ै रै घर में रियौ, अर जिकौ उणरै खनै आता हा, पौलुस सबां ऊं मिळतौ रियौ। अर बिना रोक-टोक घणौ निडर होयनै परमेसर रै राज रौ परचार करतौ अर परभु यीसु मसीह री बातां सिखातौ रियौ। आ चिठ्ठी यीसु मसीह रै सेवक पौलुस री तरफ ऊं रोमियो री कलीसिया रै लिए है, जिकौ परमेसर नै प्रेरित होणै रै लियै बुलायौ गियौ, अर परमेसर रै सुभ संदेस रै परचार रै लिए अलग कियो गियौ है। इण सुभ संदेस नै परमेसर पैला इज ऊं अपणै भविसयदाताओ रै जरियै पवितर सास्तर में लिख्यौ है। ओ सुभ संदेस परमेसर रै बेटे म्हौरै परभु यीसु मसीह रै बारै में है, जिकौ सरीर रै भाव ऊं तो दाऊद रै वंस ऊं जनमियौ है। अर पवितर आतमा रै भाव ऊं मरयोड़ौ में ऊं जी उठनै रै कारण सामरथ रै साथै अपणै आप नै साबित कियो की वो परमेसर रौ बेटौ है। उण यीसु रै जरियै म्हौ नै अनुग्रह अर प्रेरिताई मिळी, की उणरै नाम रै कारण सगळी दूजी जातियो रा लोग विसवास कर नै उणरी मांनै। उण में ऊं थै भी यीसु मसीह रा होणै रै लियै बुलाया गिया हो। थै परमेसर रा प्यारा हो अर पवितर होणै रै लियै बुलाया गिया हो। म्हौरै पिता परमेसर अर परभु यीसु मसीह री तरफ ऊं थांनै अनुग्रह अर सानति मिळै। पैला म्हैं थां सगळौ रै लियै यीसु मसीह रै जरियै अपणै परमेसर रौ धन्यवाद करूं हूं, की थौरे विसवास री चरचा सगळै जगत में होय रीं है। परमेसर जिणरी सेवा म्हैं अपणी आतमा ऊं उणरै बेटे रै सुभ संदेस रै बारै में करूं हूं, वोहीज म्हारौ गवाई है, की म्हैं थांनै कीण तरैह हमेसां याद करतौ रैवूं हूं, अपणी पराथनाओं में म्हैं हमेसां ही विनती करतौ रैवूं हूं, की परमेसर री इछा ऊं थौरे खनै आवण री म्हारी यात्रा किणी तरैह पूरी हो। क्यूंकै म्हैं थौरे ऊं मिलनै री इछा राखूं हूं की म्हैं थांनै कोई आत्मिक वरदान दूं जिण ऊं थै स्थिर हो जाओ। मतलब ओ की जद म्हैं थौरे बीच में होऊं, तो म्हौ उण विसवास रै जरियै जिकौ म्हारै में अर थारै में है, एक दूजै ऊं तसली पाओ। हे विसवासी भाइयो, म्हैं कोनीं चावूं, की थै इण ऊं अजांण रैवौ, की म्हैं बार-बार थौरे खनै आवणौ चाहयौ, की जैड़ौ म्हनै दूजी जातियो में फळ मिळियौ, वैड़ौ इज थौरे में भी मिळै, पण अबार तांई कीं परेसानी रै वजैह ऊं रोकयो गियौ। म्हैं यूनानियो अर गैर यूनानियो नै अर बुद्धिमानों अर गेलो सगळौ नै सुभ संदेस सुणाणै रौ खुद नै जिम्मेदार समझूं हूं। इण वास्तै म्हैं थांनै रोमवासियों नै भी सुभ संदेस रौ उपदेस दैणै रै लियै तैयार हूं। म्हैं सुभ संदेस रै वास्तै सरमाऊ कोनीं, क्यूंकै उणमे पैला यहूदी अर पछै यूनानी रै वास्तै, उणमे हरैक विसवास करणवाळौ नै उद्धार रै लियै परमेसर री सामरथ है। क्यूंकै सुभ संदेस में परमेसर री धारमिकता विसवास ऊं अर विसवास रै लियै परगट होवै है, ज्यौ पवितर सास्तर में लिख्योड़ौ है, “विसवास ऊं धरमी जन जीवतौ रैला।” परमेसर रौ कोप तो उण लोगां रै सगळै पाप अर बुराई माथै सरग ऊं परगट होवै है, जिकौ हकीगत नै बुराई ऊं दबाए राखै है। इण वास्तै की परमेसर रै बारै में ग्यांन उणौरै मनो में परगट है, क्यूंकै परमेसर नै उणौ ऊपर परगट कियो है। जद ऊं संसार री रचना होई उणरा बिना देख्यां गुण, अनत ताकत अर परमेसर रौ स्वभाव साफ साफ दिखाई दैवै है, क्यूंकै उण चीजों ऊं वे पूरी तरैह जांणी जा सकै है, जिकौ परमेसर नै रची। इण वास्तै लोगां रै खनै कोई बहानो कोनीं। इण कारण की परमेसर नै जांणनै भी उणौ परमेसर रै लायक बड़ाई अर धन्यवाद नीं करयौ, पण फालतू विचार करनै लागा, एठै तांई की उणौरौ गेलो मन घोरअंधारै जैड़ौ हो गियौ। वे अपणै आप नै बुद्धिमान समझता हा बल्कि मूरख हा। वे लोग अविनासी परमेसर री महिमा नै नासवान मांनखै, पंखैरूओ, अर पसुओ, अर रेंगनेवाळा जीवो री मूरतों री समानता में बदळ दिया। इण कारण परमेसर उणौनै उणौरी मन री भूंडी इछाओ रै हाथो सूंप दिया। की वे आपस में अपणै सरीरो रौ अनादर करै। क्यूंकै उणौ परमेसर री हकीगत नै बदळनै झूठ बणा दी, अर सिस्टी री उपासना अर सेवा की, न की उण सिस्टी रचनेवाळै परमेसर री, जिकौ हमेसां धन्य है। आमीन। इण वास्तै परमेसर उणौनै भूंडी कामनाओ रै वस में छोड़ दिया, एठै तांई की उणौरी लुगाईयां हकीगत व्यवहार री बजाय गळत व्यवहार राखणै लागी। व्यौंही मिनख भी लुगाईयां रै साथै हकीगत व्यवहार छोड़नै आपस में कामातुर होयनै जळण लागा, अर मिनखौ नै मिनखौ रै साथै भूंडा कांम करनै लागा, अर उणौनै अपणै भूंडै कांम रौ फळ भी मिळण लागौ। अर जद उणौ परमेसर नै पिछांण नै ऊं मना कर दी, तो परमेसर उणौनै कुबुद्धि रै हाथो सौंप दिया। अर ऐ ऐड़ा भूंडा कांम करनै लागा जिकौ नीं करणा चाहीजै हा। इण वास्तै वे सगळै तरैह रा अधरम, अर पाप, अर लोभ, अर बैरभाव ऊं भर गिया। अर डाह, अर हत्या, अर झगड़ा, अर छळ, अर जळण ऊं भरपूर हो गिया, अर चुगलीखोर। बेजती करणवाळा, परमेसर ऊं नफरत करणवाळा, दूजौ रौ अनादर करणवाळा, घमंडी, मोटी मोटी बातां करणवाळा, भूंडी भूंडी बातां बणाणवाळा, मां-बाप री आग्या नीं मानणैवाळा। वे गेला, वचन भंग करणवाळा, उणमे परैम अर दया री कमी है। वे तो परमेसर रा नियम जांणै है, की ऐड़ा ऐड़ा कांम करणवाळा मौत रै डंड रै लायक है, तौभी नीं कैवल आप ही ऐड़ा कांम करै है, बल्कि करणैवाळौ ऊं राजी भी होवै है। इण वास्तै हे दूजौ पे दोस लगानवाळा, थूं चाहे कोई भी हो, थारै खनै कोई उतर कोनीं है क्यूंकै जिण बात में थूं दूजै माथै दोस लगावै है, उण बात में अपणै आप नै भी दोसी ठैरावै है, इण वास्तै की थूं जिकौ दोस लगावै है, खुद ही वोहीज कांम करै है। अर म्हौ ओ जांणौ हो की जिकौ लोग ऐड़ा कांम करै है उणौनै परमेसर रौ उचित डंड मिळै है। हे मिनख, थूं जिकौ ऐड़ा ऐड़ा कांम करणैवाळौ ऊपर दोस लगावै है, अर खुद ही ऐड़ा कांम करै है। तो कांई थूं सोचे है की थूं परमेसर रै डंड री आग्या ऊं बच जावैला? कांई थूं परमेसर री महान करपा, सहन, अर धीरज नै तुच्छ जांणै है? अर कांई ओ कोनीं जांणै, की परमेसर री करपा थनै पापों ऊं मन फिराणै री तरफ ले जावै है? पण थूं थारी कठोरता अर जिदी मन रै कारण उणरै कोप रै दिन रै लियै, खुद रै लियै कोप कमा रियौ है जद परमेसर रौ साचौ न्याव परगट होवैला। परमेसर हरैक नै उणरै करमो रै अनुसार फळ दैला। जिकौ लगातार बड़िया कांम करता होया महिमा, आदर अर अमरता री सौध में रैवै है, उणौनै परमेसर अनत जीवन दैला। पण जिकौ मतलबी है, अर हकीगत नै नीं मांनै, बल्कि अधरम नै मांनै है, उणौ माथै परमेसर रौ क्रोध अर परकोप पड़ैला। हरैक उण मिनख माथै दुख अर संकट आवैला जिकौ बुराई माथै चालै है। पैला यहूदी माथै पछै यूनानी माथै। अर जिकौ कोई भलाई माथै चालै है उणनै महिमा, आदर अर सानति मिळै ला, पैला यहूदी नै अर पछै यूनानी नै। क्यूंकै परमेसर किणी रौ पकसपात कोनीं करै। इण वास्तै जिणौ बिना मूसा री व्यवस्था जांणै पाप कियो, वे बिना व्यवस्था रै नास भी होवैला, अर जिणौ व्यवस्था जांणनै पाप कियो, उणौरौ डंड व्यवस्था रै अनुसार होवैला। क्यूंकै परमेसर रै दिस्टी में व्यवस्था नै सुणणवाळा धरमी कोनीं, पण व्यवस्था ऊपर चालनैवाळा धरमी ठैराया जावैला। इण वास्तै दूजी जाति रा लोग जिणरै खनै व्यवस्था कोनीं है, स्वभाव ऊं व्यवस्था री बातां माथै चालै है, तो चाहे उणौरै खनै व्यवस्था नीं है तौभी वे अपणी व्यवस्था खुद ही है। वे अपणै कांमां ऊं व्यवस्था री बातां अपणै अपणै काळजै में लिख्योड़ी दिखावै है अर उणौरौ अंतो भी गवाई दैवै है, उणौरौ विचार उणौनै कदैई दोसी तो कदैई निरदोस ठैरावै है। ऐ सगळी बातां सुभ संदेस रै अनुसार जिणरौ म्हैं उपदेस देवूं हूं उण दिन उजागर होवैला जद परमेसर मिनखौ री छुपयोड़ी बातां रौ, यीसु मसीह रै जरियै न्याव करैला। थूं अपणै आप नै यहूदी कैवै है, अर व्यवस्था में थारौ विसवास है, अर अपणै परमेसर रौ थनै घंमड है। अर थूं उणरी इछा नै जांणै है अर उतम बातां नै ग्रहण करै है, क्यूंकै व्यवस्था ऊं थनै सिखायौ गियौ है, थूं ओ मांनै है की थूं आंधौ रौ अगुवो है, जिकौ अंधारै में भटक रिया है उणरै लियै थूं उजाळौ है। अर अजांणौ नै सिखाणवाळौ, अर टाबरौ रौ उपदेसक है, अर ग्यांन, अर सत्य रौ नमूनो, जिकौ व्यवस्था में है, थनै मिळियौ है। कांई थूं जिकौ दूजौ नै सिखावै है, अपणै आप नै कोनीं सिखावै? कांई थूं जिकौ चोरी नीं करणै रौ उपदेस दैवै है, अर खुद ही चोरी करै है? थूं तो कैवै है, “व्यभिचार नीं करणौ,” अर खुद व्यभिचार करै है। थूं जिकौ मूरतियो ऊं नफरत करै है, अर खुद ही मिंदरो नै लूटे है। थूं जिकौ व्यवस्था रै बारै में घंमड करै है, व्यवस्था नै तोड़नै, परमेसर रौ निरादर क्यूं करै है? ज्यौ पवितर सास्तर में लिख्यौ भी है, “क्यूंकै थांरै खातर दूजी जातियो में परमेसर रै नाम री निंदा की जावै है।” जे थै व्यवस्था ऊपर चालौ, तो खतने ऊं फायदो तो है, पण जे थै व्यवस्था नै नीं मांनौ, तो थौरो खतनो बिना खतना री समान ठैरयो। इण वास्तै जे किणी रौ खतनो कोनीं होयौ हो, अर वो व्यवस्था रै पवितर नियमो माथै चालै है, तो कांई उणरै खतनो नीं होणै नै भी खतनो नीं गिण्यौ जावै? वो मिनख जिणरौ सरीर ऊं खतनो नीं होयौ है अर जिकौ व्यवस्था री पालण करै है, वो थनै दोसी ठैरावैला, क्यूंकै थारै खनै लिखित व्यवस्था है, अर थारौ खतनो भी होयौ है, तौभी थूं व्यवस्था नै तोड़े है। जिकौ बाहर ऊं यहूदी है, वोहीज वास्तव में यहूदी नीं है। सरीर रौ खतनो ही वास्तव में खतनो नीं है। साचौ यहूदी वोहीज है जिकौ मन ऊं यहूदी है। साचौ खतनो आतमा द्धारा मन रौ खतनो है, न की लिखित व्यवस्था रौ। ऐड़ै मिनख री सौभा मिनख कोनीं बल्कि परमेसर री तरफ ऊं की जावै है। तो यहूदी होणै री कांई बड़ाई, या खतने रौ कांई फायदो? हरैक तरैह ऊं घणौ हारौ। पैला तो ओ की परमेसर रौ वचन यहूदियो नै सूंपयौ गियौ। जे कईक विसवास लायक नीं निकळिया तौभी कांई होयौ? कांई उणौरै विसवास लायक नीं होणै ऊं परमेसर भी विसवास लायक नीं रैला? कदैई कोनीं। बल्कि परमेसर साचौ अर हरैक मिनख झूठौ ठैरै, ज्यौ पवितर सास्तर में लिख्यौ है, “जिण ऊं थूं अपणी बातां में धरमी ठैरै अर न्याव करते वगत थूं जय पावै।” इण वास्तै जे म्हौरौ अधरम परमेसर री धारमिकता ठैरा दैवै है, तो म्हौ कांई कैवौ? कांई ओ की परमेसर जिकौ रीस करै है अन्यावी है? ओ तो म्हैं मिनख री रीति ऊपर कैवूं हूं। कदैई कोनीं, नीं तो परमेसर जगत रौ न्याव कीकर करैला? कईक लोग कैवै है, “जे म्हारै झूठ रै कारण परमेसर री महिमा रै लियै घणी करनै परगट होई, तो पछै क्यूं पापी रै ज्यूं म्हैं डंड रै लायक ठैरयो जावूं हूं?” अर पछै क्यूं नीं कैवौ, “आओ! बुरा कांम करौ ताकी भलाई परगट हो”? ज्यूं की म्हौरै बारै में निंदा करता होया कीं लोग म्हौ ऊपर दोस लगावै है की म्हौ ऐड़ौ कैवौ हो। ऐड़ा लोग दोसी ठैराणै लायक है। वे सगळा दोसी है। तो पछै कांई होयौ? कांई म्हौ उणौ ऊं बड़िया हो? कदैई कोनीं, क्यूंकै म्हौ यहूदियो अर यूनानियो दोनूं ऊपर ओ दोस लगा चुका हो की वे सगळा रा सगळा पाप रै वस में है। ज्यौ पवितर सास्तर में लिख्योड़ौ है, “कोई धरमी कोनीं, एक भी कोनीं। कोई समझदार कोनीं, कोई परमेसर नै सौध नै वाळौ कोनीं। सगळा भटक गिया है, सगळा रा सगळा निकमा बणग्या है, कोई भलाई करणैवाळौ कोनीं, एक भी कोनीं। उणौरौ गळौ खुली होई कबर है, उणौ आपरी जीभ ऊं छळ कियो है, उणौरै होठो में सापों रौ जैर है। उणौरौ मूंडौ सराप अर कड़वाहट ऊं भरयोड़ौ है। वे मारणै रै लियै हर घड़ी तैयार रैवै है। वे जठै भी जावै नास अर कलेस लावै है, उणौ सानति रौ मारग कोनीं जांण्यौ। उणौरी आंख्यां मे परमेसर रौ भय कोनीं।” म्हौ जांणौ हो, की व्यवस्था जिकौ कीं कैवै है उणौ ऊं कैवै है, जिकौ व्यवस्था रै अधीन है। ताकी हरैक रौ मूंडौ बंद कियो जा सकै, अर सगळौ संसार परमेसर रै डंड रै लायक ठैरै। व्यवस्था रै कांमां ऊं कोई प्राणी उणरै सांमै धरमी नीं ठैरैला, क्यूंकै व्यवस्था रै जरियै सिरफ पाप री पिछांण ही करावै है। पण अबै व्यवस्था ऊं अलग परमेसर री वो धारमिकता परगट होई है, जिणरी गवाई व्यवस्था अर भविसयदाता दैवै है, यानि, परमेसर री वो धारमिकता, जिकौ यीसु मसीह माथै विसवास करणै ऊं सगळा विसवास करणैवाळौ रै लियै है, बिना किणी भेदभाव रैह। क्यूंकै सगळौ पाप कियो है अर परमेसर री महिमा ऊं दूर है। परमेसर री दया ऊं सगळौ नै फोगट में पाप मुगति रौ वरदान मिळियौ है, क्यूंकै यीसु मसीह नै सगळौ रौ उद्धार कियो है। परमेसर यीसु मसीह नै, उणमे विसवास रै जरियै पापों ऊं छुटकारो दिलानै रै लियै, लोगां नै दियौ। उणै ओ कांम यीसु मसीह रै बलिदान रै रूप मे कियो। ऐड़ौ ओ साबित करनै रै लिए कियो की परमेसर सहनसील है क्यूंकै परमेसर पैला लोगां रै उणौरै पापों रौ डंड दियै बिना छोड़ दिया हा। बल्कि इण वगत उणरी धारमिकता परगट हो, की जिण ऊं वो आप ही धरमी ठैरै, अर जिकौ यीसु माथै विसवास करै उणरौ भी धरमी ठैरानेवाळौ हो। तो घंमड करणौ कठै रियौ? उणरी तो जगा ही कोनीं। कुण सी व्यवस्था रै कारण ऊं? कांई करमो री व्यवस्था ऊं? कोनीं, बल्कि विसवास री व्यवस्था रै कारण। इण वास्तै म्हौ इण परिणाम ऊपर पूगा हो, की मिनख व्यवस्था रै कांमां रै बिना विसवास रै जरियै धरमी ठैरै है। कांई परमेसर कैवल यहूदियो रौ इज है? कांई दूजी जातियो रौ कोनीं? हां, दूजी जातियो रौ भी है। क्यूंकै एक इज परमेसर है, जिकौ खतनावाळौ नै विसवास ऊं अर बिना खतनावाळौ नै भी विसवास रै जरियै धरमी ठैरावैला। तो कांई म्हौ व्यवस्था नै विसवास रै जरियै फालतू ठैराओ हो? कदैई कोनीं, बल्कि व्यवस्था नै और भी मजबुत बणाओ हो। तो पछै म्हौ कांई कैवौ, की म्हौरै पुरनिये अबराहम नै इण धारमिकता ऊं कांई मिळियौ? क्यूंकै जे अबराहम कांमां ऊं धरमी ठैरायौ जातौ, तो उणनै घंमड करणै री जगा होती, पण परमेसर रै नजीक कोनीं। पवितर सास्तर कांई कैवै है? ओ की, “अबराहम नै परमेसर माथै विसवास कियो, अर इण ऊं वो धारमिक मान्यौ गियौ।” कांम करणैवाळै री मजूरी देणी दांन कोनीं, पण हक समझयो जावै है। जे कोई मिनख कांम करनै री बजाय उण परमेसर में विसवास करै है, जिकौ पापी नै भी छोड़ दैवै है, तो उणरौ विसवास ही उणरै धारमिकता रौ कारण बण जावै है। जिणनै परमेसर बिना करमो रै धरमी ठैरावै है, उणनै दाऊद भी धन्य कैवै है, “धन्य है वे जिणौरे अधरम रै कांमां नै माफ किया, अर जिणौरे पापों नै ढ़क दिया। धन्य है वो मिनख जिणनै परभु पापी न ठैरावै।” तो कांई ओ धन्य कैवल उणौरै लियै है जिणौरो खतनो होयोड़ा है, या पछै उणौरै लियै भी जिणौरो खतनो कोनीं होयौ। हां, ओ उण माथै भी लागू होवै है जिणौरो खतनो कोनीं होयौ। क्यूंकै म्हौ कयौ हो अबराहम रौ विसवास ही उणरै लियै धारमिक गिण्यौ गियौ। तो ओ कदै गिण्यौ गियौ? जद उणरौ खतनो हो चुकयो हो या पछै जद वो बिना खतने रौ हो। कोनीं खतनो होणै रै पछै कोनीं, बल्कि खतनो होणै ऊं पैला। अर पछै एक चिन्ह रै रूप में उणै खतनो स्वीकार कियो। जिकौ उण विसवास रै लियै धारमिकता री एक छाप ही, जिकौ उणै उण वगत दरसाया हा जद उणरौ खतनो नीं होयौ हो। इण वास्तै वो उण सगळौ रौ पिता है जिकौ बिना खतना रा विसवासी है। इण वास्तै वे भी धरमी गिण्या जावैला। अर उण खतना कियोड़ौ रौ भी पिता है, जिकौ नीं कैवल खतनो कियोड़ौ है, पण म्हौरै पिता अबराहम रै उण विसवास रै मारग माथै भी चालै है, जिकौ उणै बिना खतनो री दसा में भी कियो हो। क्यूंकै परमेसर रौ ओ वायदो की अबराहम जगत रौ वारिस होवैला। ओ वायदो उणनै अर उणरै वंसज नै व्यवस्था रै जरियै कोनीं दियौ। बल्कि उणौ विसवास री धारमिकता रै जरियै मिळियौ है। क्यूंकै जे व्यवस्था वाळा वारिस है, तो विसवास फालतू अर वायदो बेकार ठैरै। लोग व्यवस्था रौ पालण नीं करणै ऊं परमेसर नै क्रोध उपजै है, अर जठै व्यवस्था नीं उठै उणरौ विरोध भी कोनीं। इण वास्तै सिद्ध है की परमेसर रौ वायदो विसवास रौ फळ है अर ओ फोगट में ही मिळै है। इण तरैह उणरौ वायदो अबराहम रै सगळै वंस रै लियै पको है, नीं कैवल उणौरै वास्तै जिकौ व्यवस्था नै मांनै है, बल्कि उण सगळौ रै लियै भी जिकौ अबराहम रै ज्यूं विसवास राखै है। वो म्हौ सगळौ रौ पिता है। ज्यौ पवितर सास्तर में लिख्योड़ौ है, “म्हैं थांनै घणी जातियो रौ पिता ठैरायौ है।” उण परमेसर री निजर में अबराहम म्हौरौ पिता है जिणनै उण परमेसर माथै विसवास कियो है। अर परमेसर जिकौ मरयोड़ौ नै जिलावै है, अर जिकौ बातां है ही कोनीं, उणरौ नाम ऐड़ौ लेवे है की मांनौ वे है। अबराहम नै कोई आस नीं होणै पर भी आसा राखनै विसवास कियो, इण वास्तै वचन रै अनुसार “थारौ वंस ऐड़ौ होवैला,” वो घणी जातियो रौ पिता हो। वो जिकौ एक सौ बरस रौ हो, अपणै बुढ़ापे में सरीर अर सारा रै जापायती बुढ़ापे री हालत जांणनै भी विसवास में कमजोर नीं होयौ, अर नीं अविसवासी होयनै परमेसर रै वायदे माथै वेम कियो, बल्कि विसवास में पको होयनै परमेसर री महिमा की। उणनै पूरौ भरोसौ हो की परमेसर उणनै जिकौ वायदो दियौ है, उणनै पूरौ करणै में वो पूरी तरैह सामरथ है। इण वास्तै ओ विसवास उणरै लियै धारमिक गिण्यौ गियौ। पवितर सास्तर रौ ओ वचन है, “विसवास उणरै लियै धारमिक गिण्यौ गियौ,” नीं कैवल उणरै लियै लिख्यौ गियौ, बल्कि म्हौरै लियै भी है। परमेसर म्हौ नै भी जिकौ उण माथै विसवास राखै है, धरमी ठैरावैला। जिणै म्हौरै परभु यीसु नै मरयोड़ौ में ऊं जिलायौ। यीसु म्हौरै अपराधो रै लियै पकड़ायौ गियौ, अर म्हौरै धरमी ठैराणै रै लियै मरयोड़ौ में ऊं जिलायौ भी गियौ। जद म्हौ विसवास ऊं धरमी ठैरौ, तो अपणै परभु यीसु मसीह रै जरियै परमेसर रै साथै मेल राखै, जिणरै जरियै विसवास रै खातर उण अनुग्रह तांई जिणमे म्हौ बण्या हो, उण तांई म्हौरी ओळखाण भी होई, अर म्हौ परमेसर री महिमा री आसा ऊपर घंमड करौ हो। इतौ ही कोनीं, म्हौ अपणै दुखौ में भी आंणंद लेवो हो। क्यूंकै म्हौ जांणौ हो, की दुख धीरज नै जनम दैवै है। अर धीरज ऊं चौखा गुण निकळै है। चौखा गुण आसा नै जनम दैवै है। अर आ आसा म्हौ नै निरास कोनीं होवण दैवै, क्यूंकै पवितर आतमा जिकौ म्हौ नै दियोड़ी है उणरै जरियै परमेसर रौ परैम म्हौरै मन में भर दियौ गियौ है। क्यूंकै जद म्हौ कमजोर ही हा, तो ठीक वगत माथै अधरमियों रै लिए मसीह नै आपरौ बलिदान दियौ। किणी धरमी जन रै लियै कोई मरे, ओ तो हो नीं सकै है, पण हो सकै है किणी भलै मिनख रै लियै कोई मरण री भी हीमत करै। पण परमेसर म्हौ ऊपर अपणै परैम री भलाई इण रीत ऊं परगट करै है की जद म्हौ पापी ही हा तद मसीह नै म्हौरै लियै मरण रै लियै भेज्या। क्यूंकै जद म्हौ उणरै लोई रै खातर धरमी हो गिया हो, तो उणरै जरियै परमेसर रै क्रोध ऊं जरुर बचाया जाओला। क्यूंकै बैरी होणै री दसा मे तो उणरै बेटे री मौत रै जरियै म्हौरौ मेळ परमेसर रै साथै होयौ पछै मेळ हो जांणै ऊं उणरै जीवन रै खातर म्हौ उद्धार क्यूं नीं पाओला? अर कैवल ओहीज कोनीं, पण म्हौ अपणै परभु यीसु मसीह रै जरियै परमेसर में मेळ मिलाप करनै उणमे आंणंद करौ हो। इण वास्तै ज्यौ एक आदम रै जरियै पाप जगत में आयौ, अर पाप रै जरियै मौत आई, अर इण तरैह ऊं मौत सगळै लोगां रै लियै आई, क्यूंकै सगळौ नै पापों कियो। अबै देखौ व्यवस्था रै आवण ऊं पैला जगत में पाप हो, बल्कि जैड़ी तांई कोई व्यवस्था कोनीं ही, किणी रौ भी पाप कोनीं गिण्यौ जातौ। तौभी आदम ऊं लेन मूसा रै वगत तांई मौत सगळौ माथै राज करती रही। मौत उणौ माथै भी व्यौंही हावी रही, जिणौ पाप नीं कियो हो ज्यूं आदम ऊपर। आदम भी ऐड़ौ ही हो जैड़ौ आवण वाळौ मसीह। बल्कि परमेसर रौ वरदान आदम रै पाप रै जैड़ौ कोनीं हो, क्यूंकै जे उण एक मिनख रै पाप रै खातर सगळै लोगां री मौत होई, तो उण एक मिनख यीसु मसीह री करूणा रै कारण मिळै परमेसर रै अनुग्रह अर वरदान तो सगळै लोगां री भलाई रै लियै बोहत ही घणौ है। ओ वरदान आदम रै पाप ऊं आयोड़ौ फळ रै ज्यूं कोनीं है, क्यूंकै डंड रै न्याव रौ आवणौ तो एक पाप ऊं होयौ बल्कि ओ वरदान, जिकौ दोस मुगति री तरफ ले जावै है, घणै पाप रै पछै आयौ है। क्यूंकै जद एक आदम रै पाप रै खातर मौत नै उण एक ही रै जरियै राज कियो, तो जिकौ लोग अनुग्रह अर धरमरूपी वरदान घणौ पावै है, वे एक मिनख रै, यानि की यीसु मसीह रै जरियै जरुर जीवन माथै राज करैला। इण वास्तै ज्यौ एक पाप सगळै मिनखौ रै लियै डंड री आग्या रौ कारण होयौ, वैड़ौ ही एक धरम रौ कांम भी सगळै मिनखौ रै लियै जीवन रै निमित धरमी ठैराया जानै रौ कारण होयौ। क्यूंकै ज्यौ एक मिनख रै आग्या नीं मांनणै ऊं घणा लोग पापी ठैरया, व्यौंही एक मिनख रै आग्या मांनणै ऊं घणा लोग धरमी ठैरैला। व्यवस्था रौ आवणौ इण वास्तै होयौ, की अपराध बढ़ सकै। बल्कि जठै पाप बढ़यो, उठै परमेसर रौ अनुग्रह और भी घणौ बढ़यो। की ज्यौ पाप नै मौत रै जरियै राज कियो, व्यौंही म्हौरै परभु यीसु मसीह रै जरियै अनुग्रह भी अनत जीवन रै लियै धरमी ठैराते होयौ राज करै। तो वळै म्हौ कांई कैवौ? कांई म्हौ पाप ही करता रैवौ, ताकी परमेसर रौ अनुग्रह बढ़तौ रैवै? कदैई कोनीं। म्हौ जिकौ पाप रै लियै मर चुका हो पाप में ही कीकर जियोंला? कांई थै जांणौ कोनीं, की म्हौ, जिणौ यीसु मसीह में बतिस्मो लियौ है, उणरी मौत रौ ही बतिस्मो लियौ है? उणरी मौत में बतिस्मो लेणे ऊं म्हौ भी उणरै साथै बूर दिया गिया हा, ताकी ज्यौ परमपिता री महीमामय सगति रै जरियै यीसु मसीह नै मरयोड़ौ में ऊं जिलायौ गियौ हो, व्यौंही म्हौ भी एक नयो जीवन पाओ। जद म्हौ उणरी मौत में उणरै साथै रया हा, तो उणरै पाछौ जी उठनै में भी उणरै साथै रौला। म्हौ ओ जांणौ हो की म्हौरौ पुराणौ स्वभाव यीसु रै साथै ही सूली माथै चढ़ा दियौ गियौ हो, ताकी पाप ऊं भरयोड़ौ म्हौरौ सरीर नास हो जावै। अर म्हौ आगै रै लियै पाप रा गुलाम नीं बण्या रैवौ। क्यूंकै जिकौ मर गियौ वो पाप ऊं छूट गियौ। जे म्हौ मसीह रै साथै मर गिया, तो म्हौरौ विसवास है, की म्हौ उणरै साथै जीओला भी। म्हौ जांणौ हो, की मसीह मरयोड़ौ में ऊं जी उठयौ अमर है। उण माथै मौत रौ वस कदैई कोनीं चालै ला। जद मसीह मरयो है, वो हमेसां रै लियै पाप रै लियै मरयो है। बल्कि जिकौ जीवन वो जी रिया है, वो जीवन परमेसर रै लियै है। इण तरैह थै अपणै लियै भी सोचो की थै पाप रै लियै मर चुका हो, बल्कि यीसु मसीह में परमेसर रै लियै जीवता हो। इण वास्तै थौरे नासवान सरीरो रै ऊपर पाप रौ वस नीं चलै। ताकी थै पाप री इछाओ माथै कदैई नीं चालौ। अर नीं अपणै अंगो नै अधरम रै हथियार होणै रै लियै पाप नै सौंपो, बल्कि अपणै आप नै मरयोड़ौ में ऊं जी उठयौ जांणनै परमेसर नै सौंपो, अर अपणै अंगो नै धरम रै हथियार होणै रै लियै परमेसर नै सौंपो। थां ऊपर पाप रौ राज नीं होवैला, क्यूंकै थै व्यवस्था रै सहारे नीं जीयो हो, बल्कि परमेसर रै अनुग्रह रै सहारे जीयो हो। तो कांई होयौ? कांई म्हौ इण वास्तै पाप करौ, की म्हौ व्यवस्था रै अधीन कोनीं, बल्कि परमेसर रै अनुग्रह रै अधीन है? कदैई कोनीं। कांई थै कोनीं जांणौ, की जिणरी आग्या मांनणै रै लियै थै अपणै आप नै दासो रै ज्यूं सौंप देवो हो, तो थै उणरा दास हो? अर जिणरी मांनौ हो, चाहे पाप रौ जिणरौ अनत मौत है, चाहे आग्या मांनणै रौ जिणरौ अंत धारमिकता है। बल्कि परभु रौ धन्यवाद हो की जे थै पाप रा दास हा, थै अपणै मन ऊं उण उपदेसो री रीति नै मांनी जिकौ थांनै सौंपी गई ही। थांनै पापों ऊं छुटकारो मिळग्यौ अर थै धारमिकता रा दास बणग्या हो। म्हैं थौरी सारीरिक कमजोरी रै खातर मिनखौ री रीति ऊं कैवूं हूं, ज्यौ थै थौरे अंगो नै कुकरम रै लियै अपवितर अर कुकरम रै दास करनै सौपयो हो, व्यौंही अबै अपणै अंगो नै पवितरता रै लियै धरम रै दास करनै सौंप दो। जद थै पाप रा दास हा, तो धरम री तरफ ऊं आजाद हा। जिण बातां ऊं अबै थै सरमाओ हो, उण ऊं उण वगत थै कांई फळ पाता हा? क्यूंकै उणरौ अंत तो मौत है। पण अबै पाप ऊं आजाद होयनै परमेसर रै दास बणनै थांनै फळ मिळियौ जिण ऊं पवितरता हासल होवै है, अर उणरौ अंत अनत जीवन है। क्यूंकै पाप री मजूरी तो मौत है, पण परमेसर रौ फोगट रौ वरदान म्हौरै परभु मसीह यीसु में अनत जीवन है। हे विसवासी भाइयो, कांई थै कोनीं जांणौ, म्हैं उण लोगां ऊं कैह रियौ हूं जिकौ व्यवस्था नै जांणै है, की व्यवस्था रौ राज किणी मिनख माथै उण वगत तांई रैवैला, जैड़ी तांई वो जीवतौ है? क्यूंकै ब्याव करयोड़ी लुगाई व्यवस्था रै अनुसार अपणै घरधणी रै जीते जी उण ऊं बंधीयोड़ी है, पण जे धणी मर जावै, तो वां ब्याव री व्यवस्था ऊं छूट जावै है। जे धणी रै जीते जी वां किणी दूजै मिनख री हो जावै, तो वां व्यभिचारणी कहीजै ला, पण जे धणी मर जावै, तो वां उण व्यवस्था ऊं छूट गी, एठै तांई की जे किणी दूजै मिनख री हो जावै, तौभी व्यभिचारणी नीं ठैरैला। व्यौंही हे म्हारै भाइयो, थै भी मसीह री देह रै जरियै व्यवस्था रै लियै मरयोड़ा बणग्या, की उण मसीह रा हो जाओ, जिकौ मरयोड़ौ में ऊं जी उठयौ। ताकी म्हौ परमेसर रै लियै फळ लाओ। क्यूंकै जद म्हौ पुराणै मानखै स्वभाव में जी रिया हा, म्हौरी पापों री वासनाओ जिकौ व्यवस्था रै जरियै आई ही, म्हौरै अंगो ऊपर हावी ही। ताकी म्हौ ऐड़ा कांम करता हा जिणरौ फळ मौत ही। पण जिणरै अधीन म्हौ हा उणरै लियै मरनै, व्यवस्था ऊं ऐड़ा छूट गिया, की पुराणी लिखित व्यवस्था ऊं कोनीं, बल्कि परमेसर री आतमा री नई रीति ऊं अपणै मालिक परमेसर री सेवा करौ हो। तो म्हौ कांई कैवौ? कांई व्यवस्था पाप है? कदैई कोनीं! बल्कि बिना व्यवस्था रै म्हैं पाप नै कोनीं पिछांणतौ। व्यवस्था जे नीं कैवती, की लालच मत कर तो म्हैं लालच नै जांणतौ ही कोनीं। पण पाप नै मौकौ पायनै आग्या रै जरियै म्हारै में सगळै तरैह रौ लालच पैदा कियो, क्यूंकै बिना व्यवस्था रै पाप मुड़दो है। एक वगत म्हैं बिना व्यवस्था रै ही जीवतौ हो, बल्कि जद व्यवस्था रौ आदेस आयौ तो पाप जीवन में भर आयौ, अर म्हैं मर गियौ। वोहीज व्यवस्था रौ आदेस जिकौ जीवन देवण रै लियै हो, म्हारै लियै मौत ले आयौ। क्यूंकै पाप नै मौकौ पायनै उणै उणीज व्यवस्था रै आदेस रै जरियै म्हनै बहकायो, अर उणीज रै जरियै म्हनै मार भी दियौ। इण तरैह व्यवस्था पवितर है। अर आदेस पवितर, धरमी अर उतम है। तो पछै कांई इणरौ ओ अरथ है, की जिकौ उतम है, वोहीज म्हारी मौत रौ कारण बण्यौ? कदैई कोनीं। बल्कि पाप उण उतम रै जरियै म्हारै लियै मौत रौ इण वास्तै कारण बण्यौ की पाप नै पिछांणयौ जा सकै। अर व्यवस्था रै आदेस रै जरियै पाप भयानक पाप पूरौ दिखायौ जा सकै। म्हौ जांणौ हो, की व्यवस्था तो आत्मिक है, पण म्हैं सारीरिक अर पाप रै हाथ बिकयोड़ौ हूं। जिकौ म्हैं करूं हूं उणनै नीं जांणूं, क्यूंकै जिकौ म्हैं चावूं हूं वो नीं किया करूं, पण जिण ऊं म्हैं घिरणा आवै है वोहीज करूं हूं। अर म्हैं वोहीज करूं हूं जिकौ म्हैं नीं करणौ चावूं, तो म्हैं स्वीकार करूं हूं की व्यवस्था उतम है। तो ऐड़ी दसा में उणरौ करणैवाळौ म्हैं कोनीं, बल्कि पाप है, जिकौ म्हारै में बसयोड़ौ है। क्यूंकै म्हैं जांणूं हूं की म्हारै में मतलब म्हारै सरीर में कोई बड़िया चीज वास कोनीं करती। बड़िया कांम करनै इछा तो म्हारी है, पण बड़िया कांम म्हारै ऊं कोनीं होवै। क्यूंकै जिकौ बड़िया कांम म्हैं करणौ चावूं हूं, वो तो नीं करतौ, बल्कि जिकौ म्हैं नीं करणौ चावूं, वो इज भूंडा कांम म्हैं करूं हूं। पण म्हैं वोहीज करूं हूं जिणरी इछा कोनीं करूं, तो उणरौ करणैवाळौ म्हैं नीं हूं, बल्कि वो पाप है जिकौ म्हारै में बसयोड़ौ है। इण तरैह म्हैं ओ नियम पाऊं हूं की जद भलाई करनै री इछा करूं हूं, तो बुराई नै ही पाऊं हूं। क्यूंकै म्हैं अपणी अन्तरात्मा ऊं तो परमेसर री व्यवस्था ऊं घणौ खुस रैवूं हूं। पण म्हनै म्हारै अंगो में दूजै तरैह रौ नियम दिखाई दैवै है, जिकौ म्हारी बुद्धि री व्यवस्था ऊं लड़ै है, अर म्हनै पाप री व्यवस्था रौ बंदी बणा लेवे है जिकौ म्हारै अंगो में है। म्हैं कैड़ौ अभागो मिनख हूं। म्हनै इण मौत रै सरीर ऊं कुण छुड़ावैला? म्हौरै परभु यीसु मसीह रै जरियै परमेसर रौ धन्यवाद हो। इण वास्तै म्हैं खुद बुद्धि ऊं तो परमेसर री व्यवस्था रौ सेवक, पण सरीर ऊं पाप री व्यवस्था रौ गुलाम हूं। इण तरैह अबै जिकौ मसीह यीसु में है, उण ऊपर डंड री आग्या कोनीं। क्यूंकै आतमा री व्यवस्था नै जिकौ यीसु मसीह में जीवन दैवै है, म्हनै पाप री व्यवस्था ऊं जिकौ मौत री तरफ ले जावै है, आजाद कर दियौ है। क्यूंकै जिकौ कांम व्यवस्था, सरीर रै कारण कमजोर होयनै नीं कर सकी, उणनै परमेसर कियो, यानि की अपणै ही बेटे नै पापमय सरीर रै रूप में, अर पाप रै बलिदान होणै रै लियै भेजनै सरीर में पाप ऊपर डंड री आग्या दी। इण वास्तै की व्यवस्था री विधि म्हौ में जिकौ सरीर रै अनुसार कोनीं बल्कि आतमा रै अनुसार चालै है, व्यवस्था री जरुते पूरी की जा सकै। क्यूंकै सारीरिक मिनख सरीर री बातां ऊपर मन लगावै है, पण आत्मिक मिनख आतमा री बातां ऊपर मन लगावै है। सरीर ऊपर मन लगाणौ तो मौत है, पण आतमा ऊपर मन लगाणौ जीवन अर सानति है। सरीर ऊपर मन लगाणौ तो परमेसर रै विरोध है, क्यूंकै नीं तो परमेसर री व्यवस्था रै अधीन है, अर नीं हो सकै है। अर जिकौ सारीरिक स्वभाव रै अनुसार जीवै है, वे परमेसर नै खुस नीं कर सकै। पण जद परमेसर री आतमा थां में वास करै है, तो थै सारीरिक दसा में कोनीं पण आत्मिक दसा में हो। जे किणी में मसीह री आतमा कोनीं तो वो मसीह रौ कोनीं। जे मसीह थां में है, तो देह पाप रै कारण मरण उपरात भी, आतमा धारमिकता रै कारण जीवित है। जे वो आतमा जिणै यीसु मसीह नै मरयोड़ौ में ऊं जिलायौ हो, थौरे मांय वास करै है, तो वो परमेसर जिणै यीसु नै मरयोड़ौ में ऊं जिलायौ हो, थौरे नासवान सरीरो नै अपणी आतमा ऊं जिकौ थौरे मांय बसयोड़ी है, जिलावैला। इण वास्तै हे विसवासी भाइयो, म्हौ सरीर रा करजदार कोनीं, ताकी सरीर रै अनुसार जीए। क्यूंकै जे थै सरीर रै अनुसार जीओला तो मरोला, बल्कि थै आतमा रै जरियै सरीर रै व्यवहारों रौ अंत कर दो ला तो थै जी जाओला। इण वास्तै की जिता लोग परमेसर री आतमा रै चलाया चालै है, वोहीज परमेसर रा बेटा है। क्यूंकै वो आतमा जिकौ थांनै मिळी है, थांनै वळै दास बणाणै या डराणै रै लियै कोनीं है, बल्कि आप लोगां नै गोद लियोड़े बेटौ बणाणै रै लियै है, जिण ऊं म्हौ “हे अब्बा, हे पिता,” कैह नै बुलाओ हो। परमेसर री आतमा आप ही म्हौरी आतमा रै साथै गवाई दैवै है, की म्हौ परमेसर री औळाद हो। अर औळाद है तो वारिस भी, बल्कि परमेसर रै वारिस अर मसीह रै संगी वारिस है। जद म्हौ उणरै साथै दुख उठाओ तो उणरै साथै महिमा भी मिळैला। क्यूंकै म्हैं समझूं हूं, की इण वगत रै दुख अर तकलीफ उण महिमा रै सांमै, जिकौ म्हौ माथै परगट होवण वाळी है, उणरै सांमै कीं कोनीं है। क्यूंकै सिस्टी घणी आसा भरी दिस्टी ऊं परमेसर री औळाद रौ परगट होणै रौ इन्तजार कर री है। क्यूंकै सिस्टी अपणी इछा ऊं कोनीं पण अधीन करणैवाळै री तरफ ऊं, फालतू रै अधीन इण आसा ऊं की है, की सिस्टी भी आप ही विनास रै गुलामी ऊं छुटकारो पायनै, परमेसर री संतान री महिमा री आजादी हासल करैला। क्यूंकै म्हौ जांणौ हो, की सगळी सिस्टी अबै तांई मांनौ जापे रै पीड़ा में चिलाय रीं है। अर कैवल सिस्टी ही नीं म्हौ भी मांय ही मांय चिलाओ हो। म्हौ नै तो पवितर आतमा रौ पैला करपादान मिळ चुकौ है, बल्कि म्हौ परमेसर री संतान बणणै री अर अपणै सरीर री मुगति री बांट जोह रिया हो। आसा रै जरियै तो म्हौरौ उद्धार होयौ है। पण जिण चीज री आसा की जावै है, जद वो देखणै में आवै, तो पछै आसा कठै रही? क्यूंकै जिण चीज नै कोई देख रियौ है उणरी आसा कांई करैला? पण जिण चीज नै म्हौ नीं देखौ, जे उणरी आसा राखौ हो, तो धीरज ऊं उणरौ इन्तजार भी करौ हो। इण रीति ऊं परमेसर री आतमा भी म्हौरी कमजोरी में मदद करै है, क्यूंकै म्हौ नीं जांणौ, की पराथना कीण रीति ऊं करणी चाहीजै, पण परमेसर री आतमा आप ही ऐड़ी आहें भर भरणै जिकौ बयान ऊं बारै है, म्हौरै लियै विनती करै है। अर मन नै जांचनै वाळौ जांणै है, की आतमा री मनसा कांई है। क्यूंकै वो पवितर लोगां रै लियै परमेसर री इछा रै अनुसार विनती करै है। म्हौ जांणौ हो, की जिकौ लोग परमेसर ऊं परैम राखै है, अर जिणरी बुलाहट परमेसर री इछा रै अनुसार होई है, उणौरै लियै सगळी बातां मिळनै भलाई ही पैदा करै है। क्यूंकै जिणनै परमेसर पैला ऊं चुण लियौ हो उणनै पैला ऊं ठैरायौ भी है की उणरै बेटे रै स्वरूप में हो, ताकी वो घणै भाइयो में पैलौ बेटौ ठैरै। जिणौनै परमेसर पैला ऊं ठैराया, उणौनै बुलाया भी है। जिणौनै उणै बुलाया, उणौनै धरमी भी ठैराया है। अर जिणौनै धरमी ठैराया, उणौनै महिमा भी दी है। तो म्हौ इण बातां रै बारै में कांई कैवौ? जे परमेसर म्हौरी तरफ है, तो म्हौरौ विरोधी कुण हो सकै है? जिणै आपरै बेटे नै भी म्हौ सगळौ रै लियै मरण वास्तै दे दियौ, तो वो उणरै साथै म्हौ नै और सगळौ क्यूं नीं दैला? परमेसर रै चुणयोड़ौ ऊपर दोस कुण लगावैला? परमेसर ही है जिकौ उणौनै धरमी ठैराणवाळौ है। पछै कुण है जिकौ डंड री आग्या दैला? मसीह यीसु ही है जिकौ मरग्या बल्कि मुड़दो में ऊं जी भी उठया, अर परमेसर रै जीमणा पाड़ै विराजमान है, अर म्हौरै लियै पराथना करता रैवै है। कुण म्हौ नै मसीह रै परैम ऊं अलग करैला? कांई कलेस, संकट, सताव, अकाळ, नंगाई, जोखम या तरवार? ज्यूं पवितर सास्तर में लिख्योड़ौ है, “थारै लियै म्हौ हरैक दिन मौत रौ सामनौ करौ हो, म्हौ वध होवण वाळी लरड़ियां रै ज्यूं समझया गिया हो।” पण इण सगळी बातां में म्हौ उणरै जरियै जिणै म्हौरै ऊं परैम कियो है, जीत ऊं भी बढ़ नै है। क्यूंकै म्हैं पको जांणूं हूं, की न तो मौत, न जीवन, न सरगदूत, न परधानता, न इण वगत, न आवण वाळौ वगत, न सामरथ, न ऊंचाई, न गेराई अर न कोई और सिस्टी, म्हौ नै परमेसर रै परैम ऊं, जिकौ म्हौरै परभु मसीह यीसु में है, अलग कर सकै है। म्हैं मसीह में साची कैवूं हूं, झूठ कोनीं बोलूं अर म्हारौ अंतो भी पवितर आतमा में गवाई दैवै है, की म्हनै घणौ सौग है, अर म्हारौ मन हमेसां दुखी रैवै है। म्हैं अपणै कुटम्बी भाइयो अर देस रै लोगां रै भलै रै लियै मसीह ऊं अलग हो जावण रै लियै तैयार हूं। वे इजरायली है, परमेसर उणौनै गोद लिया हा। उणौनै परमेसर री महिमा अर वाचाओ अर व्यवस्था अर उपासना अर वायदो मिळियौ है। इबरानी पूरवज भी उणौरा हा, अर मसीह उणौमे जनमिया हा। मसीह महान है, अर युगानयुग स्तुति रै लायक परमेसर है। आमीन। पण ओ कोनीं की परमेसर रौ वचन टळग्यो, इण वास्तै की जिकौ इजरायल रै वंस है, वे सगळा इजरायली कोनीं, अर नीं अबराहम रै वंस होणै रै कारण सगळी उणरी औळाद ठैरै, पण पवितर सास्तर में लिख्योड़ौ है, “इसहाक ऊं इज थारौ वंस केहलावेला।” मतलब सरीर री औळाद परमेसर री औळाद कोनीं, पण वायदे री औळाद वंस गिण्या जावै है। क्यूंकै वायदे रौ वचन ओ है, “म्हैं इण वगत रै अनुसार आऊंला, अर सारा रै एक बेटौ होवैला।” अर कैवल ओहीज कोनीं, पण जद रिबका भी म्हौरै पूरवज इसहाक ऊं जापायती ही। अर अजी तांई न तो टाबर जनमिया हा, अर नीं उणौ कीं भूंडौ भलौ कियो हो, इण वास्तै, की परमेसर री मनसा जिकौ उणरै चुण लेणे रै अनुसार है, करमो रै कारण कोनीं, पण बुलाणवाळै पे बणी रैवै। परमेसर रिबका ऊं कयौ, “मोटो बेटौ छोटे बेटे रौ दास होवैला।” ज्यौ पवितर सास्तर मे लिख्योड़ौ है, “म्हैं याकूब ऊं परैम कियो, पण एसाव नै नकार दियौ।” इण वास्तै म्हौ कांई कैवौ? कांई परमेसर रै एठै अन्याव है? कदैई कोनीं। क्यूंकै वो मूसा ऊं कैवै है, “म्हैं जिण किणी माथै दया करणी चावूं उण माथै दया करूंला, अर जिण किणी माथै करपा करणी चावूं उणीज माथै करपा करूंला।” इण वास्तै आ नीं तो चाहणवाळै री, नीं दौड़णवाळै री पण दया करणैवाळै परमेसर री बात है। क्यूंकै पवितर सास्तर मे परमेसर फिरौन ऊं कयौ, “म्हैं थनै इण वास्तै ऊभौ कियो है की थारै मे अपणी सामरथ दिखाऊं, अर म्हारै नाम रौ परचार सगळी धरती माथै होवै।” इण वास्तै वो जिण माथै चावै उण माथै दया करै है, अर जिणनै चावै है उणनै कठोर बणा दैवै है। तो पछै थूं सायद म्हारै ऊं कैवै, “जे म्हौरै करमो रौ काबू करणैवाळौ परमेसर है तो पछै भी वो उणमे म्हौरौ दोस क्यूं समझै है? आखरी उणरी इछा रौ विरोध कुण कर सकै है?” हे मिनख, भला थूं कुण है जिकौ परमेसर रौ सामनौ करै है? कांई कोई चीज बणायोड़ी अपणै बणाणै वाळै ऊं पूछ सकै है, “थां म्हनै ऐड़ी क्यूं बणाई?” कांई कुम्हार नै माटी माथै अधिकार कोनीं, की एक ही लौंदे में ऊं, एक बरतन आदर रै लियै, अर दूजौ बरतन बिना आदर रै लियै बणाए? तो इणमे अचूम्बे री बात कांई है? की परमेसर नै आपरौ क्रोध दिखाणै अर अपणी सामरथ परगट करणै री इछा ऊं क्रोध रै बरतनो री, जिकौ विनास रै लियै तैयार किया हा, घणी धीरज ऊं सही, जिण ऊं जिकौ दया रै बरतनो ऊपर जिणौनै उणै महिमा रै लियै पैला ऊं तैयार किया, अपणै महिमा रै धन नै परगट कर सकै। मतलब म्हौ माथै जिणै उणै नीं कैवल यहूदियो में ऊं बल्कि दूजी जातियो में ऊं भी बुलाया। ज्यौ भविसयदाता होसे री किताब में भी कैवै है, “जिकौ लोग म्हारा कोनीं हा, उणौनै म्हैं अपणा कहूंंला। अर जिकौ धरती प्रिय कोनीं ही, म्हैं उणनै प्रिय कहूंंला।” अर, “ऐड़ौ होवैला की जिण जगा मे उण ऊं ओ कयौ हो, की ‘थै लोग म्हारी परजा कोनीं हो,’ उणीज जगा वे जीवते परमेसर री संतान कहीजैला।” अर भविसयदाता यसायाह इजरायल रै बारै में हेलौ करनै कैवै है, “भलै ही इजरायल री औळाद री गिणती समंदर री धूड़ रै कणों रै बराबर हो, तौभी उणमे ऊं थोड़ा इज बचेला। क्यूंकै परभु धरती माथै आपरै न्याव नै पूरी तरैह ऊं अर वेगौ ही पूरौ करैला।” ज्यौ यसायाह पैला भी कयौ हो, “जे सेनाओ रौ परभु म्हारै लियै कीं वंस नीं छोड़तो, तो म्हौ सदोम रै ज्यूं अर अमोरा रै ज्यूं नास ही हो जाता।” तो पछै म्हौ कांई कैवौ? म्हौ इण नतीजे माथै पूगा हो की दूजी जातियो रा लोग जिकौ धारमिकता री खोज में नीं हा, उणौ धारमिकता हासल की है। वे जिकौ विसवास रै कारण इज धारमिक ठैराया गिया। पण इजरायली, जिकौ धरम री व्यवस्था री खोज करता हा उण व्यवस्था तांई कोनीं पूगा। कीण वास्तै? इण वास्तै की वे इणरौ पालण विसवास ऊं कोनीं, बल्कि अपणै करमो ऊं कर रिया हा, वे उण चटान ऊं ठोकर खा ग्या, जिकौ ठोकर दिलावै है। ज्यौ पवितर सास्तर में लिख्योड़ौ है, “देखौ, म्हैं सियोन में एक भाटो राख रियौ हूं, जिकौ ठोकर दिलावै है, अर एक चटान जिकौ पाप करावै है। बल्कि वो जिकौ उणमे विसवास करै है, उणनै कदैई निरास नीं होणौ पड़ैला।” हे विसवासी भाइयो, म्हारै मन री इछा है अर म्हैं परमेसर ऊं उण सगळै इजरालियो रै लियै पराथना करूं हूं, की उणौरौ उद्धार हो। क्यूंकै म्हैं उणौरी गवाई देवूं हूं की उणौनै परमेसर रै लियै धुन रैवै है, पण बुद्धि रै साथै कोनीं। क्यूंकै वो लोग उण धारमिकता नै कोनीं जांणता हा जिकौ परमेसर ऊं मिळती ही अर वो अपणी इज धारमिकता री थापना रौ जतन करता रिया, इण वास्तै वे परमेसर री धारमिकता नै कोनीं स्वीकार की। मसीह नै व्यवस्था रौ अंत कियो ताकी हर कोई जिकौ विसवास करै है, परमेसर रै लियै धारमिक हो। धारमिकता रै बारै में जिकौ व्यवस्था ऊं हासल होवै है, मूसा नै लिख्यौ है, “जिकौ व्यवस्था रै नियमो माथै चालैला, वो उणरै कारण जीवतौ रैला।” बल्कि विसवास ऊं मिळण वाळी धारमिकता रै बारै में सास्तर ओ कैवै है, “थूं अपणै मन ऊं ओ मत पूछ, ‘सरग में ऊपर कुण जावैला?’ ” मतलब मसीह नै धरती माथै लावण रै लियै। “या पछै, ‘अधोलोक में कुण उतरैला?’ ” मतलब मसीह नै मरयोड़ौ में ऊं जिलायनै ऊपर लावण रै लियै। पवितर सास्तर कैवै है, “वचन थारै खनै है, थारै होठो ऊपर है अर थारै मन में है।” ओ वोहीज विसवास रौ वचन है, जिकौ म्हौ परचार करौ हो। जे थूं अपणै मूंडै ऊं कैह, “यीसु परभु है,” अर थूं अपणै मन में ओ विसवास करै की परमेसर उणनै मरयोड़ौ में ऊं जीवतौ कियो है तो थारौ उद्धार हो जावैला। क्यूंकै अपणै मन रै विसवास ऊं मिनख धारमिक ठैरायौ जावै है, अर अपणै मूंडै ऊं उणरै विसवास नै स्वीकार करणै ऊं उणरौ उद्धार होवै है। पवितर सास्तर कैवै है, “जिकौ कोई उण माथै विसवास करै है उणनै निरास नीं होणौ पड़ैला।” ओ इण वास्तै है की यहूदियो अर यूनानियो में कोई भेद कोनीं। क्यूंकै सगळौ रौ परभु एक इज है। अर उणरी दया उण सगळौ रै लियै, जिकौ उणरौ नाम लेवे है, अपरम्पार है। क्यूंकै पवितर सास्तर में लिख्योड़ौ है, “जिकौ कोई परभु रौ नाम ले ला, वो उद्धार पावैला।” पछै जिण माथै उणौ विसवास नीं कियो, वे उणरौ नाम कीकर ले? अर जिणरै बारै में सुण्यौ कोनीं उण ऊपर विसवास कीकर करै? अर परचार कियै बिना कीकर सुणै? अर परचारक वैड़ी तांई परचार कीकर दे पावैला, जैड़ी तांई उणनै भेज्यौ नीं गियौ हो? ज्यौ पवितर सास्तर में लिख्यौ है, “सुभ संदेस लावण वाळै रौ आवणौ कितौ चौखौ है।” बल्कि सगळौ सुभ संदेस नै स्वीकार कोनीं कियो। यसायाह भविसयदाता कैवै है, “हे परभु, म्हौरै उपदेस नै कीणै स्वीकार कियो?” इण वास्तै उपदेस नै सुणणै ऊं विसवास उपजै है अर उपदेस तद सुण्यौ जावै है जद कोई मसीह रै बारै में उपदेस दैवै है। पण म्हैं कैवूं हूं, “कांई उणौ म्हौरै उपदेस नै कोनीं सुण्यौ?” सुण्यौ तो जरुर है, पवितर सास्तर कैवै है, “उणरा सबद सगळी धरती माथै, अर उणरा वचन जगत रै एक छोर ऊं दूजै छोर तांई पूगिया।” बल्कि म्हैं पूछूं हूं, कांई इजरायली कोनीं समझता हा? पैला ऊं मूसा कैवै है, “म्हैं थां लोगां रै मन में ऐड़ै लोगां रै जरियै जिकौ वास्तव में कोई जाति कोनीं है, जळण पैदा करूंला। म्हैं अविसवासी जाति रै जरियै थांनै रीस दिलाऊंला।” पछै यसायाह हीमत रै साथै कैवै है, “म्हनै उण लोगां पा लियौ, जिकौ म्हनै कोनीं ढ़ूंढ़ता हा। म्हैं उणौरै लियै परगट हो गियौ, जिकौ म्हारी खोज खबर में कोनीं हा।” बल्कि परमेसर इजरालियो रै बारै में कैवै है, “म्हैं सगळै दिन आग्या नीं मानणवाळा अर अपणै विरोधियो नै स्वीकार करणै रै लियै हाथ फैलाए रियौ।” इण वास्तै म्हैं कैवूं हूं, “कांई परमेसर आपरै लोगां नै त्याग दिया?” कदैई कोनीं। म्हैं भी तो इजरायली हूं। अबराहम रै वंस अर बिन्यामीन रै गोत्र रौ हूं। परमेसर अपणै लोगां नै कोनीं छोड़या जिणौनै उणै पैला ऊं इज जांणै। कांई थै कोनीं जांणौ की पवितर सास्तर एलियाह रै बारै में कांई कैवै है, की वो इजरायल रै विरोध में परमेसर ऊं विनती करै है? उणै कयौ, “हे परभु, उणौ थारै भविसयदाताओ नै मार दिया, अर थारी वेदियो नै तोड़ नै नोख दी, अर कैवल एक भविसयदाता म्हैं इज बचयो हूं, अर वे म्हनै भी मार दैणै रौ जतन कर रिया है।” पण परमेसर ऊं उणनै कांई जबाब मिळियौ? “म्हैं अपणै लियै सात हजार मिनखौ नै राख छोड़या है, जिणौ बाल देवता रै आगै माथो कोनीं टेकयो।” ठीक इणीज रीति ऊं इण वगत भी, अनुग्रह ऊं चुणयोड़ा कीं लोग बाकी है। जे ओ परमेसर रै अनुग्रह रौ परिणाम है तो लोग जिकौ करम करै है, ओ उण करमो रौ परिणाम कोनीं है। नीं तो परमेसर रौ अनुग्रह, अनुग्रह ही नीं ठैरतौ। इण वास्तै परिणाम कांई होयौ? ओ की इजरायली जिणरी खोज में हा, वो उणौनै कोनीं मिळयो, पण चुणयोड़ौ नै मिळयो। जद की बाकी लोगां रौ काळजौ कठोर बण गियौ। ज्यौ पवितर सास्तर में लिख्योड़ौ है, “परमेसर उणौनै आज रै दिन तांई भारी ऊंग में नोख्या है, अर ऐड़ी आंख्यां दी जिकौ देख नीं सकै अर ऐड़ा कांन दिया जिकौ सुण नीं सकै।” अर दाऊद कैवै है, “उणौरौ खाणौ उणौरै लियै जाळ अर फंदो, अर ठोकर अर डंड रौ कारण हो जावै। उणौरी आंख्यां धुंधळी हो जाये, जिण ऊं वे देख नीं सकै, अर थूं उणौरी पीड़ाओं में, उणौरी कमर हमेसां झुकाए राखै।” इण वास्तै म्हैं कैवूं हूं कांई उणौ इण वास्तै ठोकर खाई की वे पड़ नै नास हो जावै? कदैई कोनीं। बल्कि उणौरै गळती करणै ऊं दूजी जातियो रै लोगां नै उद्धार मिळयो, ताकी यहूदियो में भी होड़ लग जावै। इण वास्तै जे उणौरौ पड़नो जगत रै लियै धन अर उणौरी घटी दूजी जातियो रै लियै जायदाद रौ कारण होयौ, तो उणौरै विसवास री भरपूरी ऊं वास्तव मे बोहत आसीस होवैला। म्हैं थांनै दूजी जातियो नै आ बात कैवूं हूं। जद की म्हैं दूजी जातियो रै लियै प्रेरित हूं, तो म्हैं अपणी सेवकाई में पूरी कोसीस करूं हूं, ताकी किणी रीति ऊं म्हैं अपणै कुटुम्बियो में होड़ पैदा करनै उणौमे ऊं कईको रौ उद्धार करूं। क्यूंकै जद उणौनै छोड़ दैणै ऊं जगत रै मिलाप रौ कारण होयौ, तो कांई उणौनै अपनायो जांणौ मरयोड़ौ मे ऊं जी उठनै रै बराबर नीं होवैला? जद भेट रौ पैलौ भाग पवितर है, तो सगळौ भाग भी पवितर है, अर जद जड़ पवितर ठैरी, तो डाळियो भी पवितर है। बल्कि जे कईक डाळियो तोड़ नै फेंक दी है, अर थूं जंगळी जैतून होयनै उणमे कलम कियो गियौ, अर जैतून री जड़ री चिकनाई रौ भागी होयौ है, तो डाळियो माथै घंमड नीं करणौ। अर जे थूं घंमड करै तो याद राखै की थूं जड़ नै कोनीं पण जड़ थनै पाळ री है। पछै थूं कैवैला, “डाळियो इण वास्तै तोड़ी की म्हारौ कलम चढ़ायौ जाये।” ठीक है, वे तो अविसवास रै खातर तोड़ी ही, पण थूं विसवास ऊं बण्यौ रैवै है। इण वास्तै घमंडी मत हो, पण भय मांन, क्यूंकै जद परमेसर मूल डाळियो नै नीं छोड़ी, तो थनै भी नीं छोड़ेला। इण वास्तै थूं परमेसर री करपा अर उणरी कठोरता नै देख! आ कठोरता उणौरै लियै है जिकौ पड़ग्या, बल्कि उणरी करपा थारै लियै है जे थूं अपणै माथै उणरी करपा बणी रैवण दे। नीं तो थूं भी काट दियौ जावैला। अर वो भी जे अविसवास में न रैवै, तो कलम करनै जोड़ दैला, क्यूंकै परमेसर उणौनै कलम करणै री ताकत राखै है। क्यूंकै जे थूं उण जैतून ऊं, जिकौ स्वभाव ऊं जंगळी है, काटयो गियौ अर स्वभाव रै विरुद्ध चौखै जैतून में कलम कियो गियौ, तो ऐ जिकौ मूल डाळियो है, अपणै ही जैतून में आसानी ऊं पाछी कलम करनै जोड़ दी जावैला। हे विसवासी भाइयो, कठैई ऐड़ौ नीं हो की थै अपणै आप नै बुद्धिमान समझ लौ, इण वास्तै म्हैं नीं चावूं की थै इण भेद ऊं अजांण रैवौ, की जद तांई दूजी जातियो परमेसर रै परिवार रौ अंग नीं बण जावै, तद तांई इजरायल रौ एक भाग ऐड़ौ इज कठोर रैवैला। अर इण रीति ऊं सगळौ इजरायल उद्धार पावैला। ज्यौ पवितर सास्तर में लिख्यौ है, “उद्धार करणैवाळौ सियोन ऊं आवैला, वो याकूब रै परिवार ऊं सगळी बुराइयां आगी करैला। अर उणरै साथै म्हारी आहीज वाचा होवैला, जद की म्हैं उणरै पापों नै आगा कर दूंला।” सुभ संदेस रै दिस्टी ऊं तो थौरे लियै वे परमेसर रा बैरी है, पण चुण लिया जांणै रै दिस्टी ऊं वे बापदादों रै कारण परमेसर रा प्यारा है। क्यूंकै परमेसर जिणनै बुलावै है अर वरदान जिणनै वो दैवै है, उणरी तरफ ऊं आपरौ मन कदैई नीं बदळै। क्यूंकै ज्यूं थै दूजी जातियो पैला परमेसर री आग्या नीं मांनी, पण अबै यहूदी लोगां नै आग्या नीं मांनणै ऊं थौरे ऊपर दया होई, व्यौंही उणौनै भी अबै आग्या नीं मांनी, की थां ऊपर जिकौ दया होवै है इण ऊं उण माथै भी दया हो। क्यूंकै परमेसर सगळौ नै आग्या नीं मांनणै रै बन्धन में बंद कर राख्या, ताकी वो सगळौ ऊपर दया करै। परमेसर रौ धन, बुद्धि अर ग्यांन किता अपरम्पार है। उणरौ न्याव कितौ गेहरो है, अर उणरौ मारग कितौ रहस्यमय है। पवितर सास्तर कैवै है, “परभु रै मन नै कुण जांणै है? अर उणनै सलाह देवणवाळौ कुण हो सकै है? कांई किणी परमेसर नै कदैई कीं दियौ है, जिणरै बदळै उणनै कांई दियौ जावै?” क्यूंकै सगळी रचना उणरी है, उण ऊं सगळौ कीं स्थिर है अर वो उणीज रै लियै है। उणरी महिमा हमेसां हो। आमीन। इण वास्तै हे भाइयो, म्हैं थौरे ऊं परमेसर री दया याद दिलायनै विनती करूं हूं की अपणै सरीरो नै जीवतौ, अर पवितर, अर परमेसर नै भावतो होयौ बलिदान करनै चढ़ाओ। आहीज थौरी आत्मिक सेवा है। अर इण संसार रै जैड़ा मती बणौ, बल्कि अपणै मनो नै नया करनै अपणै आप नै बदळ दो, ताकी थांनै पतौ लाग जाये की परमेसर थौरे लियै कांई चावै है, यानि जिकौ उतम है, जिकौ उणनै बोवे है, अर जिकौ सम्पूर्ण है। क्यूंकै म्हैं उण अनुग्रह रै कारण जिकौ म्हनै मिळियौ है, थांनै सगळौ नै कैवूं हूं, की जैड़ौ समझणौ चाहीजै, उण ऊं बढ़नै कोई भी अपणै आप नै नीं समझै पण ज्यौ परमेसर नै हरैक रै काबिलियत रै अनुसार बांट दियौ है, व्यौंही सुबुद्धि रै साथै अपणै नै समझै। क्यूंकै ज्यौ म्हौरी एक देह में घणाहारा अंग है, अर सगळै अंगो रौ एक जैड़ौ कांम कोनीं, व्यौंही म्हौ जिकौ घणा हो, मसीह में एक सरीर होयनै आपस में एक दूजै रा अंग हो। अर जद की उण अनुग्रह रै अनुसार जिकौ म्हौ नै दियौ गियौ है, म्हौ नै अलग अलग वरदान मिळिया है, तो जिणनै भविसयवांणी रौ वरदान मिळियौ हो, वो विसवास रै अनुसार परमेसर री भविसयवांणी करै। जे किणी नै सेवा करणै रौ वरदान मिळियौ है, तो सेवा में लाग जाये, जे कोई सिखाणवाळौ हो, तो सिखाणै में लागौ रैवै। जे किणी नै हीमत बंधाणै रौ वरदान मिळियौ है तो वो हीमत बंधावै। जे किणी नै दांन दैणै रौ वरदान मिळियौ है, तो उणनै खुले मन ऊं दांन दैणौ चाहीजै। जे किणी नै अगुवाई करणै रौ वरदान मिळियौ है, तो वो लगन रै साथै अगुवाई करै, जिणनै दया दिखाणै रौ वरदान मिळियौ है, वो खुसी ऊं दया करै। थौरो परैम साचौ हो। बुराई ऊं घिरणा करौ। भलाई मे लागयोड़ा रैवौ। आप साचै भाइयो रै ज्यूं एक दूजै ऊं सगळै मन ऊं परैम करौ। आपस में एक दूजै नै आदर रै साथै अपणै ऊं घणौ कदर दो। आप लोग कठिन मेनत अर आतमा रै तेज ऊं खुस होयनै, परभु री सेवा करौ। अपणी आसा में खुस रैवौ। तकलीफो में धीरज राखौ। हमेसां पराथना करता रैवौ। परमेसर रै लोगां री जरुत में मदद किया करौ। अर मेमाणो री सेवा करौ। जिकौ थांनै सतावै है उणौनै आसीस दो। पण उणौनै सराप मती दो, बल्कि आसीस दो। जिकौ खुस है उणौरै साथै खुस रैवौ। जिकौ दुखी है, उणौरै दुख में दुखी होवो। आपस में मेल मिलाप ऊं रैवौ। घमंडी मती बणौ, बल्कि दीनो रै साथै संगति राखौ, खुद नै बुद्धिमान मती समझौ। बुराई रै बदळै बुराई मती करौ, दुनिया रै निजर में बड़िया आचरण करणै रौ ध्यांन राखौ। जठै तांई हो सकै सगळै मांनखै रै साथै मेल मिलाप राखौ। किणी ऊं अपणै आप बदळौ मती लौ। हे भाइयो, बल्कि इणनै परमेसर रै क्रोध माथै छोड़ दो, क्यूंकै पवितर सास्तर में लिख्योड़ौ है, “परभु कयौ है, ‘बदळौ लेणो म्हारौ कांम है। म्हैं इज बदळा दूंला।’ ” पण थूं तो, “जे थारौ बैरी भूखो होवै तो खाणौ खिला, जे तिरसो होवै तो पांणी पिला, क्यूंकै जे थूं ऐड़ौ करै है तो वो थारै ऊं सरमावैला।” बुराई ऊं मती हारो, पण भलाई ऊं बुराई नै जीत लौ। हरैक मिनख अधिकारियों रै अधीन रैवै, क्यूंकै कोई अधिकार ऐड़ौ कोनीं, जिकौ परमेसर री तरफ ऊं कोनीं है। अर जिकौ अधिकार है, वो परमेसर रै ठैरायोड़ा है। इण वास्तै जिकौ कोई अधिकार रौ विरोध करै है, वो परमेसर री आग्या रा विरोध करै है। अर जिकौ परमेसर री आग्या रौ विरोध करै है, वे डंड पावैला। क्यूंकै हाकिम बड़िया कांम रा कोनीं, पण बुरै कांम रै लियै डर रौ कारण है। इण वास्तै जे थूं हाकिम बेखौफ रैवणौ चावै है, तो बड़िया कांम कर उणरी तरफ ऊं थारी सौभा होवैला। क्यूंकै वो थारी भलाई रै लियै परमेसर रौ सेवक है। पण जे थूं बुराई करै, तो डर, क्यूंकै उणरी तरवार बेकार कोनीं है। वो परमेसर रौ सेवक है, जिकौ भूंडा कांम करणैवाळौ माथै परमेसर रौ क्रोध लावै है। इण वास्तै उणौरै अधीन रैवणौ जरुरी है, नीं कैवल डर रै कारण बल्कि थौरे आपरै अंते रै कारण। इण वास्तै लगान भी दिया करौ, क्यूंकै अधिकारी परमेसर रा सेवक है अर हमेसां इण कांम में लागयोड़ा रैवै है। इण वास्तै हरैक रौ हक चुकाया करौ। जिणनै लगान चाहीजै, उणनै लगान दो। जिणनै चुंगी चाहीजै, उणनै चुंगी दो। जिण ऊं डरणौ चाहीजै, उण ऊं डरौ। जिणरौ आदर करणौ चाहीजै, उणरौ आदर करौ। आपसी परैम रै अलावा किणी रौ करज अपणै ऊपर मत राख, क्यूंकै जिकौ दूजौ ऊं परैम राखै है, वो इण तरैह व्यवस्था नै ही पूरी करै है। क्यूंकै ओ की “व्यभिचार नीं करणौ, हत्या नीं करणी, चोरी नीं करणी, लालच नीं करणौ,” अर इणनै छोड़ वळै कोई भी आग्या हो तो सगळौ रौ सारांस इण बात में पायो जावै है, “अपणै पड़ोसी ऊं अपणै ज्यूं परैम राख।” परैम पड़ोसी री कीं बुराई कोनीं करै, इण वास्तै परैम राखणौ व्यवस्था नै पूरी करणी है। वगत नै पिछांण नै ऐड़ौ इज करौ, इण वास्तै की अबै थौरे लियै ऊंग ऊं जाग उठनै री घड़ी आ पूगी है, क्यूंकै जिण वगत म्हौ विसवास कियो हो, उण वगत रै विचार ऊं अबै म्हौरौ उद्धार नैड़ौ है। रात घणी बीत गी है, अर दिन निकळन वाळौ है। इण वास्तै म्हौ अंधारै रै कांमां नै त्याग नै, उजाळै रा हथियार बांध लौ। ज्यौ दिन रौ सौभा दैवै है, व्यौंही म्हौ सीधी चाल चालौ, न की रंगरेलियो अर नसेबाजी में, नीं व्यभिचार अर लुचपन में, अर नीं झगड़ै अर जळण में। बल्कि परभु यीसु मसीह रै स्वभाव नै धारण कर लौ, अर सरीर री इछाओ नै पूरी करणै में मती लागयोड़ा रैवौ। जिकौ विसवास मे कमजोर है, उणनै अपणी संगति मे ले लौ। पण उणरै विचारो ऊपर विवाद करणै रै लियै कोनीं। कीं लोग विसवास करै है, की सगळौ कीं खाणौ वाजिब है, पण जिकौ विसवास मे कमजोर है वो साग-सब्जी ही खावै है। तो वो जिकौ हरैक तरैह रौ खाणौ खावै है, उणनै उण मिनख नै तुच्छ कोनीं समझणौ चाहीजै जिकौ कीं चीजों कोनीं खावै। व्यौंही वो जिकौ कीं चीजों कोनीं खावै है, उणनै सगळौ कीं खावण वाळै नै बूरो नीं कैणौ चाहीजै। क्यूंकै परमेसर उणौनै अपणा लिया है। थूं कुण है जिकौ दूजै रै घर रै सेवक माथै दोस लगावै है? उणरौ स्थिर रैवणौ या नीं रैवणौ उणरै मालिक ऊं संबंध रैवै है, बल्कि वो स्थिर ही कर दियौ जावैला, क्यूंकै परभु उणनै स्थिर राख सकै है। कोई तो एक दिन नै दूजै दिन ऊं बढ़नै मांनै है, अर कोई सगळै दिनां नै एक जैड़ा मांनै है। हरैक अपणै इज मन में पको कर ले। जिकौ किणी एक दिन नै मांनै है, वो परभु नै आदर दैणै रै लियै इज मांनै है। अर जिकौ सगळौ कीं खावै है, वो भी परभु नै आदर दैणै रै लियै इज खावै है। क्यूंकै वो परमेसर रौ धन्यवाद करै है। अर जिकौ किणी चीजों नै नीं खावै, वो भी ऐड़ौ इण वास्तै करै है, क्यूंकै वो भी परभु नै आदर दैणौ चावै है। वो भी परमेसर नै इज धन्यवाद दैवै है। क्यूंकै म्हौ मे ऊं नीं तो कोई सिरफ खुद रै लियै जीवै है अर नीं कोई खुद रै लियै मरै है। जे म्हौ जीवता हो, तो परभु रै लियै जीवता हो। अर जे मरो हो, तो परभु रै लियै मरो हो। मतलब म्हौ जियो या मरो, म्हौ परभु रा इज हो। क्यूंकै मसीह इण वास्तै मरया अर जी भी उठया, ताकी वो मरयोड़ा अर जीवतौ दोनो रा परभु हो सकै। थूं अपणै भाई माथै क्यूं दोस लगावै है? या फिर थूं अपणै भाई नै क्यूं तुच्छ जांणै है? म्हौ सगळौ नै परमेसर रै सिहासण रै सांमै ऊभौ होणौ है। क्यूंकै पवितर सास्तर में लिख्योड़ौ है, “परभु कैवै है, ‘म्हारै जीवन री सौगन की हरैक गोडा म्हारै सांमै टिकैला, अर हरैक जीभ परमेसर नै स्वीकार करैला।’ ” इण वास्तै म्हौ में ऊं हरैक परमेसर नै अपणौ अपणौ लेखो दैला। आखरी म्हौ आपस में दोस लगाणौ बंद करौ, अर ओ पको करौ की अपणै भाई रै मारग में म्हौ कोई अड़चन ऊभी नीं करौला अर नीं उणनै पाप रै लियै उकसाओला। म्हैं जांणूं हूं, अर परभु यीसु में म्हनै पको विसवास होयौ है की अपणै आप में कोई खाणौ अपवितर कोनीं है। वो कैवल उणरै लियै अपवितर है, जिकौ उणनै अपवितर मांनै है, उणरै लियै उणरौ खाणौ अपवितर है। जे थारै भाई नै थारै खाणै ऊं ठेस लागै है तो थूं वास्तव में परैम रौ व्यवहार कोनीं कर रियौ है। तो थूं अपणै खाणै ऊं उणरै नास रौ कारण मत बण, क्यूंकै मसीह नै एठै तांई की खुद रौ प्रांण दे दियौ। आखरी थारै लियै जिकौ खाणौ भलौ है, उणरी वजैऊं मसीह री निंदा मत होणै दे। क्यूंकै परमेसर रौ राज खावण-पीवण रौ कोनीं, पण धारमिकता अर सानति अर वो आंणंद है जिकौ पवितर आतमा ऊं हासल होवै है। जिकौ मसीह री इण तरैह सेवा करै है, उण ऊं परमेसर खुस रैवै है अर लोग उणनै आदर दैवै है। इण वास्तै म्हौ उण बात में लागया रैवौ जिण ऊं सानति अर आत्मिक बढ़ोतरी हो। खाणै रै मामले मे परमेसर रै कांम नै मत बिगाड़। हर तरैह रौ खाणौ सुद्ध है, बल्कि किणी भी मिनख रै लियै वो कीं भी खाणौ ठीक कोनीं है, जिकौ किणी और भाई नै पाप रै मारग माथै ले जाये। भलौ तो ओ है, की थूं नीं मांस खाए, अर नीं दाखरस पीए, नीं और कीं ऐड़ौ करै जिण ऊं थारौ भाई ठोकर खावै। थारौ जिकौ विसवास है, उणनै परमेसर रै सांमै अपणै मन में इज राख। धन्य है वो जिकौ उण बात में, जिणनै वो ठीक समझै है, अपणै आप नै दोसी नीं ठैरावै। पण जिकौ वेम करनै खावै है वो डंड रै लायक ठैर चुकौ, क्यूंकै वो विसवास ऊं कोनीं खावै, अर जिकौ कीं विसवास ऊं कोनीं, वो पाप है। म्हौ लोगां नै, जिकौ विसवास मे सामरथ है, अपणी सुख-सुविधा रौ कोनीं, बल्कि निबळा जिकौ विसवास मे कमजोर है उणौरौ ध्यांन राखणौ चाहीजै। म्हौ में ऊं हरैक अपणै विसवासी नै उणरी भलाई रै लियै खुस करै की उणरी आत्मिक बढ़ोतरी हो। क्यूंकै मसीह अपणै आप नै खुस कोनीं कियो हो। बल्कि ज्यौ मसीह रै बारै में पवितर सास्तर कैवै है, “थारी निंदा करणैवाळौ री निंदा म्हारै माथै आ पड़ी।” जिती बातां पैला ऊं लिख्योड़ी है, वो म्हौरै ही सिकसा रै लियै लिख्योड़ी है की म्हौ धीरज अर पवितर सास्तर री तसली रै जरियै आसा राखै। धीरज अर तसली रौ दाता परमेसर थांनै ओ वरदान दे की मसीह यीसु रै अनुसार आपस में एक मन रैवौ, ताकी थै एक मन अर एक आवाज में म्हौरै परभु यीसु मसीह रै पिता परमेसर री बड़ाई करौ। इण वास्तै, ज्यौ मसीह नै भी परमेसर री महिमा रै लियै थांनै अपनाया, व्यौंही थै भी एक दूजै नै अपनाया करौ। इण वास्तै म्हैं कैवूं हूं की जिकौ वायदो बापदादों नै दियौ गियौ हो, उणनै पको करणै रै लियै मसीह, परमेसर री सचाई रौ सबूत दैणै रै लियै, यहूदी लोगां रौ सेवक बण्यौ, अर दूजी जातियो भी परमेसर री उण दया रै खातर उणरी बड़ाई करै, ज्यौ पवितर सास्तर में लिख्योड़ौ है, “इण वास्तै म्हैं दूजी जातियो में थारौ धन्यवाद करूंला, अर थारै नाम रा भजन गाऊंला।” पछै कयौ है, “हे दूजी जातियो रा सगळा लोगां, परमेसर रै चुणयोड़े लोगां रै साथै आंणंद करौ।” अर वळै, “हे दूजी जातियो रा सगळा लोगां, परभु री बड़ाई करौ। अर हे सगळा लोगां परमेसर री बड़ाई करौ।” अर वळै यसायाह भविसयदाता कैवै है, “यिसै रौ एक वंस परगट होवैला, अर दूजी जातियो रौ हाकिम होणै रै लियै एक उठैला, उण माथै दूजी जातियो आसा राखैला।” परमेसर जिकौ आसा रौ दाता है थांनै विसवास करणै में सगळै तरैह रै आंणंद अर सानति ऊं भर दे, ताकी पवितर आतमा री सामरथ ऊं थौरी आसा बढ़ती जाये। हे म्हारै विसवासी भाइयो, म्हनै खुद नै थौरे ऊपर भरोसौ है की थै भलाई ऊं भरयोड़ा अर ग्यांन ऊं भरपूर हो, ताकी थै एक दूजै नै सिकसा दे सकौ हो। तौभी म्हैं कीं बातां रै बारै में याद दिलानै रै लियै थांनै घणी हीमत करनै लिख्यौ। ओ उण अनुग्रह रै कारण होयौ जिकौ परमेसर म्हनै दियौ है। की म्हैं दूजी जातियो रै लियै मसीह यीसु रौ सेवक होयनै परमेसर रै सुभ संदेस री सेवा याजक रै रूप में करूं, ताकी दूजी जातियो परमेसर रै आगै स्वीकार करनै भेट बण सकै अर पवितर आतमा रै जरियै परमेसर रै लियै पूरी तरैह पवितर बणै। इण वास्तै उण बातां रै बारै में जिकौ परमेसर ऊं संबंध राखै है, म्हैं मसीह यीसु में बड़ाई कर सकूं हूं। क्यूंकै म्हैं बस उणीज बातां नै कैवण री हीमत राखूं हूं, जिकौ मसीह नै दूजी जातियो नै परमेसर री आग्या मांनणै रौ मारग दिखाणै रौ कांम म्हारै वचनो, अर कांम, अर चिन्हों, अर अचूम्बे रै कांम री सामरथ ऊं, अर पवितर आतमा री सामरथ ऊं म्हारै ही जरियै पूरा किया। एठै तांई की म्हैं यरुसलेम ऊं लेयनै च्यांरूमेर इल्लुरिकुम तांई मसीह रै सुभ संदेस रौ पूरौ पूरौ परचार कियो। म्हारै मन में हमेसां आ इछा रैवै है, की म्हैं सुभ संदेस रौ उपदेस उठै दूं, जठै कोई मसीह रौ नाम तांई नीं जांणै, ताकी म्हैं किणी दूजै मिनख री नींव रै ऊपर कांम नीं करूं। पण ज्यौ पवितर सास्तर में लिख्योड़ौ है, वैड़ौ इज हो, “जिणौनै उणरौ सुभ संदेस नीं पूगौ, वे ही देखेला। अर जिणौनै नीं सुण्यौ वे ही समझै ला।” म्हारी ऐ जिम्मेदारी री वजैह ऊं म्हैं थौरे खनै आवण ऊं बार बार रूकयो रियौ। पण अबार इण देसो में म्हारै कांम रै लियै और कोई जगा नीं बची, अर घणै बरसो ऊं म्हनै थौरे खनै आवण री इछा है। इण वास्तै जद म्हैं स्पेन जाऊंला तो आसा करूं हूं थौरे ऊं मिळूंला, म्हनै उमीद है की स्पेन जातै वगत थौरे ऊं भेट होवैला। थौरे साथै कीं दिन ठैरनै रौ आंणंद लेणे रै पछै म्हनै आसा है की उठै री यात्रा रै लियै म्हनै थौरी मदद मिळैला। पण अबै तो म्हैं परमेसर रै लोगां री सेवा करणै रै लियै यरुसलेम जा रियौ हूं। क्यूंकै मकिदुनिया अर अखया रै कलीसिया रै लोगां, यरुसलेम में परमेसर रै लोगां में जिकौ कंगाल है, उणौरै लिए कीं दैणै रौ विचार कियो है। उणौनै बड़िया तो लागौ, पण वे उणरै करजदार भी है, क्यूंकै जे दूजी जातियो उणरी आत्मिक बातां में भागी होया, तो उणौनै भी वाजिब है की सारीरिक बातां में उणौरी सेवा करै। इण वास्तै म्हैं ओ कांम पूरौ करनै अर भेळौ कियोड़े इण चन्दे नै उणौरै हाथ में सौंप नै म्हैं थौरे खनै होतो होयौ स्पेन रै लियै रवाना होऊंला। अर म्हैं जांणूं हूं, की जद म्हैं थौरे खनै आऊंला, तो मसीह री पूरी आसीस रै साथै आऊंला। हे विसवासी भाइयो, म्हौरै परभु यीसु मसीह री तरफ ऊं पवितर आतमा रै परैम नै याद दिलायनै म्हैं थौरे ऊं विनती करूं हूं, की म्हारै लियै परमेसर ऊं पराथना करणै मे म्हारै साथै मिळनै लौलीन रैवौ। थै पराथना करौ की म्हैं यहूदिया रै अविसवासियो ऊं बचयो रहूंं, अर जिण सेवा रै लियै म्हैं यरुसलेम जा रियौ हूं, वो परमेसर रा लोग स्वीकार करै, ताकी परमेसर री इछा रै अनुसार म्हैं खुसी रै साथै थौरे खनै आयनै थौरे साथै आंणंद मना सकूं। सानति रौ परमेसर थौरे सगळौ रै साथै रैवै। आमीन। म्हैं थौरे ऊं किंख्रिया री कलीसिया री सेविका है, जिकौ म्हौरी बेन फीबे है, उणरै लियै सिफारिस करूं हूं, की थां जैड़ा परमेसर रा लोगां नै चाहीजै, उणौनै परभु में स्वीकार करौ, अर जिण किणी बात में उणनै थौरी जरुत हो, उणरी मदद करौ, क्यूंकै वो भी घणौ री बल्कि म्हारी भी मददगार रही है। प्रिस्का अर अक्‍किला नै म्हारौ नमस्कार। वे मसीह यीसु में म्हारै साथै कांम करणवाळा है। उणौनै म्हारै प्रांण बचानै रै लियै अपणै जीवन नै भी दाव ऊपर लगा दियौ हो। नीं सिरफ म्हैं उणौरौ धन्यवाद करूं हूं, बल्कि दूजी जातियो री सगळी कलीसिया भी उणौरौ धन्यवाद करै है। उण कलीसिया नै भी म्हारौ नमस्कार जिकौ उणरै घर में भेळी होवै है। म्हारौ खास मित्र इपैनितुस नै म्हारौ नमस्कार जिकौ आसिया में मसीह नै अपनानै वाळौ में पैलौ है। मरियम नै, जिणै थौरे लियै घणौ कांम कियो है नमस्कार। अन्‍द्रुनीकुस अर यूनियास नै जिकौ म्हारा कुटम्बी है, अर म्हारै साथै जेळ में हा अर प्रेरितों में नामी है, अर म्हारै ऊं पैला मसीह में हा, म्हारौ नमस्कार। परभु में म्हारौ खास मित्र, अम्पलियातुस नै नमस्कार। मसीह में म्हौरै साथै कांम करणवाळा उरबानुस अर म्हारै खास मित्र इस्तखुस नै नमस्कार। मसीह में खरै अर साचै अपिल्लेस नै नमस्कार। अरिस्तुबुलुस रै परिवार नै नमस्कार। म्हारै कुटम्बी हेरोदियोन नै नमस्कार। नरकिस्सुस रै घराणै नै जिकौ लोग परभु में है, उणौनै नमस्कार। परभु री सेवा में मेनत करणवाळी त्रूफैना अर त्रूफोसा नै नमस्कार। अपणी प्रिय पिरसिस नै नमस्कार, जिणै परभु री सेवा में घणी मेनत की है। रूफूस नै जिकौ परभु में चुणयोड़ौ है, अर उणरी मां जिकौ म्हारी भी मां जैड़ी है, दोनो नै नमस्कार। असुंक्रितुस अर फिलगोन अर हिरमेस अर पत्रुबास अर हिरमास अर उणरै साथै रै विसवासियो नै नमस्कार। फिलुलुगुस अर यूलिया अर नेर्युस अर उणरी बेन, अर उलुम्पास अर उणरै साथै रै सगळै परमेसर रै लोगां नै नमस्कार। आपस में हाथ मिळान नमस्कार करौ। थांनै मसीह री सगळी कलीसियाओ री तरफ ऊं नमस्कार। हे भाइयो, म्हैं थौरे ऊं विनती करूं हूं, की थां जिकौ सिकसा पाई है, उणरै विपरीत थौरे में जिकौ फूट डाले है अर दूजौ रै विसवास नै बिगाड़े है, उण ऊं सावचेत रैवौ, अर उणौ ऊं आगा रैवौ। क्यूंकै ऐड़ा लोग म्हौरै परभु मसीह री कोनीं, पण आपरै पेट री सेवा करै है। अर झूठी बातां करनै भोळे भाळे लोगां नै बहका दैवै है। थौरे आग्या मांनणै री चरचा सगळौ लोगां में पूग चुकी है। इण वास्तै थौरे ऊं म्हैं घणौ खुस हूं, पण म्हैं चावूं हूं की थै भलाई रै लियै बुद्धिमान पण बुराई रै लियै भोळा बण्यौड़ा रौ। सानति रौ परमेसर सैतान नै थौरे पगां ऊं जल्दी कुचला दैला। म्हौरै परभु यीसु मसीह रौ अनुग्रह थौरे माथै होतो रैवै। म्हारै साथै कांम करणवाळा तीमुथियुस अर म्हारै यहूदी साथी लूकियुस, यासोन अर सोसिपत्रुस रौ थांनै नमस्कार। इण चिठ्ठी रौ लेखक म्हैं तिरतियुस रौ परभु में थांनै नमस्कार। म्हारौ अर सगळी कलीसिया रौ आदर सत्कार करणैवाळौ, गायुस रौ थांनै नमस्कार। इरास्तुस जिकौ नगरी रौ भंडारी है, अर भाई क्‍वारतुस रौ थांनै नमस्कार। म्हौरै परभु यीसु मसीह रौ अनुग्रह थां सगळौ रै साथै रैवै। आमीन। उणरी महिमा हो जिकौ थौरे विसवास रै अनुसार यानि यीसु मसीह रै संदेस रै जिण सुभ संदेस रौ म्हैं उपदेस देवूं हूं, उणरै अनुसार थांनै मजबुत बणाणै में ताकतवर है। परमेसर रौ ओ भेद सनातन ऊं छुपयोड़ो हो। पण अबै परगट होयनै सनातन परमेसर री आग्या ऊं भविसयदाताओ री किताबो रै जरियै सगळी जातियो नै बतायौ है, की वे विसवास ऊं आग्या मांनणवाळा हो जावै। उण एकाएक बुद्धिमान परमेसर री यीसु मसीह रै जरियै जुग-जुग महिमा होती रैवै। आमीन। आ चिठ्ठी पौलुस री तरफ ऊं जिकौ परमेसर री इछा ऊं यीसु मसीह रौ प्रेरित होणै रै लियै बुलायौ गियौ अर भाई सोस्थिनेस री तरफ ऊं, परमेसर री उण कलीसिया रै लोगां नै लिख रियौ हूं जिकौ कुरिन्थुस नगर मे है जिकौ मसीह यीसु में पवितर कियोड़ा, अर पवितर होणै रै लियै बुलाया है। और उण सगळौ रै नाम जिकौ हरैक जगा म्हौरै अर आपरै परभु यीसु मसीह रै नाम ऊं पराथना करै है। म्हौरै पिता परमेसर अर परभु यीसु मसीह री तरफ ऊं थांनै करपा अर सानति मिळती रैवै। म्हैं थौरे बारै में अपणै परमेसर रौ धन्यवाद हमेसां करूं हूं, क्यूंकै परमेसर री आ करपा थारै ऊपर मसीह यीसु रै जरियै होई। क्यूंकै मसीह में होयनै थै हरैक बात में, मतलब बोलनै अर सगळै ग्यांन में भरपुर करिया गिया, मसीह रै बारै में म्हौ जिकौ गवाई दी, वो थौरे बीच में परमेसर नै पकी की। एठै तांई की किणी आत्मिक वरदान में थांनै घटी कोनीं, अर थां म्हौरै परभु यीसु मसीह रै परगट होणै री बाट जोहता रैवौ हो। वो थांनै आखरी तांई मजबुत भी करैला की थां म्हौरै परभु यीसु मसीह रै दिन में निरदोस ठैरौ। परमेसर विसवास लायक है, जीणे थांनै आपरै बेटे म्हौरै परभु यीसु मसीह री संगति में बुलाया है। हे म्हारै भाई बहनों, म्हैं थांरै ऊं अपांरै परभु यीसु मसीह रै नाम ऊं विनती करूं हूं की थै सगळा एक ही बात कैवौ, अर थारै में फूट नीं हो, पण एक ही मन अर एक ही मत होयनै मिळनै रैवौ। क्यूंकै हे म्हारै विसवासी भाइयो, खलोए रै घरानै रै लोगां म्हनै थौरे बारै में बतायौ है, की थौरे में लड़ाई-झगड़ा होय रिया है। म्हारौ कैवणौ ओ है, की थौरे मांय ऊं कोई तो अपणै आप नै “पौलुस रौ,” कोई “अपुल्लोस रौ,” कोई “पतरस रौ,” तो कोई “मसीह रौ” चेलौ कैवै है। कांई मसीह बंट गियौ? कांई पौलुस थौरे लियै सूली माथै चढ़ायौ गियौ? या थांनै पौलुस रै नाम माथै बतिस्मो मिळियौ? नीं ऐड़ौ नीं है। म्हैं परमेसर रौ धन्यवाद करूं हूं की क्रिस्पुस अर गयुस नै छोड़नै म्हैं थौरे में ऊं किणी नै बतिस्मो कोनीं दियौ। कठैई ऐड़ौ नीं हो, की कोई कैवै की थनै म्हारै नाम माथै बतिस्मो मिळियौ। और हां, म्हैं स्तिफनास रै घरानै नै भी बतिस्मो दियौ, इणनै छोड़नै म्हैं कोनीं जांणूं की म्हैं और किणी नै बतिस्मो दियौ। क्यूंकै मसीह म्हनै बतिस्मो दैणै वास्तै कोनीं, बल्कि सुभ संदेस सुणाणै वास्तै भेज्यौ है, अर ओ भी मानखै रै सबदो रै ग्यांन रै अनुसार कोनीं, ऐड़ौ नीं हो की मसीह रौ सूली माथै मरणौ फालतू हो। क्यूंकै क्रूस रौ संदेस नास होनेवाळौ रै लियै पागलपन है, पण अपां उद्धार पावणवाळौ रै लियै परमेसर री सामरथ है। क्यूंकै पवितर सास्तर में लिख्योड़ौ है, “म्हैं ग्यांनवानों रै ग्यांन नै नास करूंला, अर समझदारो री समझ नै तुच्छ कर दूंला।” कठै रियौ ग्यांनवान? कठै रियौ सास्तरी? कठै रियौ इण संसार रौ विवादी? कांई परमेसर संसार रै ग्यांन नै पागलपन नीं ठैराया? अपणै ग्यांन रै अनुसार परमेसर नै ओ असंभव बणा दियौ की मानंखौ अपणै ग्यांन रै जरियै उणनै जांण सकै, पण परमेसर नै ओ बड़िया लागौ की म्हौरै दियोड़े संदेस रै परचार रै जरियै विसवास करणैवाळौ नै बचाया जाय जिण परचार नै लोग मूरखता समझै है। यहूदी लोग तो चिन्ह-चमतकार चावै है, अर यूनानी लोग ग्यांन री खोज में है। पण म्हौ तो उण सूली माथै चढ़ायोड़े मसीह रौ परचार करौ हो, जिकौ यहूदियो रै लियै ठोकर रौ कारण अर दूजी जातियो रै लियै पागलपन है। पण जिकौ परमेसर रा बुलायोड़ा है, कांई यहूदी कांई यूनानी, उणौरै लियै मसीह परमेसर री सामरथ अर परमेसर रौ ग्यांन है। क्यूंकै परमेसर रौ पागलपन मिनखौ रै ग्यांन ऊं ग्यांनवान है, अर परमेसर री कमजोरी मिनखौ रै बळ ऊं घणी बलवान है। हे विसवासी भाइयो, अपणै बुलाए जांणै रौ तो सोचो की न सरीर रै अनुसार घणा ग्यांनवान, अर न घणा सामरथी, अर न घणा कुलीन बुलाया गिया। पण परमेसर नै जगत रै मूरखौ नै चुण लिया है की ग्यांनवाळौ नै बेजता करै, वळै परमेसर निबळौ नै चुण लिया है की ताकतवरो नै बेजता करै। वळै परमेसर जगत रै नीचो अर जिकौ कीं नीं है उणौनै भी चुण लिया की उणौनै जिकौ है, फालतू ठैरावै। ताकी कोई प्राणी परमेसर रै सांमै घंमड नीं कर पाए। पण परमेसर री तरफ ऊं थै मसीह यीसु में हो, जिकौ मसीह परमेसर री तरफ ऊं म्हौरै लियै ग्यांन ठैरया मतलब, धारमिकता, पवितरता, अर छुटकारो। ताकी पवितर सास्तर में लिख्योड़ौ है, “जिकौ घंमड करै वो परभु में घंमड करै।” हे विसवासी भाइयो, जद म्हैं परमेसर रौ भेद सुणातौ होयौ थौरे खनै आयौ, तो नीं मोटी-मोटी बातां करणै अर नीं घणौ ग्यांन दिखाणै आयौ। क्यूंकै म्हैं ओ ठान लियौ हो की थौरे बीच में यीसु मसीह मतलब सूली माथै चढ़ायोड़े मसीह नै छोड़नै किणी बात नै नीं जांणूं। म्हैं निबळाई अर भय रै साथै, अर घणौ कांपता होयौ थौरे साथै रियौ। और म्हारै वचन, अर म्हारै परचार में ग्यांन री लुभानेवाळी बातां कोनीं, पण पवितर आतमा अर सामरथ रौ सबूत हो, इण वास्तै की थौरो विसवास मिनखौ रै ग्यांन माथै नीं, पण परमेसर री सामरथ माथै रैवै। तौभी सिद्ध लोगां में म्हौ ग्यांन सुणावौ हो, पण इण संसार रौ अर इण संसार रै नास होवणवाळा हाकिमों रौ ग्यांन कोनीं, पण म्हौ परमेसर रौ ओ गुपत ग्यांन, भेद री रीति पे बतावौ हो, जिणनै परमेसर सनातन ऊं म्हौरी महिमा रै लियै ठैराया। उण ग्यांन नै इण संसार रै हाकिमों में ऊं किणी नै नीं जांण्यौ, क्यूंकै जे जांणता, तो महीमावान परभु नै सूली माथै नीं चढ़ाता। पण ज्यूं लिख्यौ है, “जिकौ बातां आंख्यां नै नीं देखी अर कांनो नै नीं सुणी, अर जिकौ बातां मिनख रै चित में नीं चढ़ी, वे इज है जिकौ परमेसर नै अपणै परैम राखनेवाळौ रै लियै तैयार की है।” पण परमेसर नै अपणी आतमा रै दवारा म्हौ माथै परगट कियो, क्यूंकै आहीज आतमा सगळी बातां एठै तांई की परमेसर री छुपयोड़ी बातां भी सौध लेवे है। मांनखै में ऊं कुण किणी मिनख री बातां जांणै है? कैवल मिनख री आतमा जिकौ उणमे है। व्यौंही परमेसर री बातां भी कोई नीं जांणै, कैवल परमेसर री आतमा। म्हौ संसार री आतमा कोनीं, पण वो आतमा पाई है, जिकौ परमेसर री तरफ ऊं है की म्हौ उण बातां नै जांणौ जिकौ परमेसर म्हौ नै दी है। जिणनै म्हौ मिनखौ रै ग्यांन री सिखायोड़ी बातां में कोनीं, पण आतमा री सिखायोड़ी बातां में, आत्मिक बाते आत्मिक बातां ऊं मिळा मिळायनै सुणावै है। पण सांसारिक मांनखौ परमेसर री आतमा री बातां स्वीकार कोनीं करै, क्यूंकै वे उणरी निजर में पागलो री बातां है, अर नीं वो उणै जांण सकै है क्यूंकै उणरी जांच आत्मिक रीति ऊं होवै है। आत्मिक मिनख सगळौ कीं परख लेवे है, पण उणनै कोई नीं परख सकै। क्यूंकै पवितर सास्तर में लिख्योड़ौ है, “परभु रौ मन कीणै जांण्यौ है, की उणनै सिखाओ?” पण म्हौ में मसीह रौ मन है। हे भाइयो म्हैं थौरे ऊं इण रीत बात नीं कर सकयौ ज्यूं आत्मिक लोगां ऊं, पण ज्यूं सांसारिक लोगां ऊं, अर उणौ ऊं जिकौ मसीह में टाबर ज्यूं है। म्हैं थांनै दूध पिलायो, अन्‍न नीं खिलायो, क्यूंकै थै उणनै नीं खा सकता हा, यानि अजी तांई भी नीं खा सकता हा। क्यूंकै थै अजी तांई सारीरिक हो। इण वास्तै की जद थौरे मांय नफरत अर झगड़ौ है, तो कांई थै सारीरिक कोनीं? और कांई मिनख री रीति ऊपर कोनीं चालौ? क्यूंकै जद एक कैवै है, “म्हैं पौलुस रौ हूं,” अर दूजौ कैवै, “म्हैं अपुल्लोस रौ हूं,” तो कांई थै लोगां ज्यूं कोनीं? अपुल्लोस कांई है? अर पौलुस कांई है? कैवल सेवक, जिणरै जरियै थै विसवास कियो, जैड़ौ हरैक नै परभु दियौ। म्हैं लगाया, अपुल्लोस पांणी दियौ, पण परमेसर बढ़ाया। इण वास्तै नीं तो लगानवाळौ कीं है अर नीं पांणी देवणवाळौ, पण परमेसर ही सैंग है जिकौ बढ़ाणवाळौ है। लगानवाळौ अर पांणी देवणवाळौ दोनूं रौ कांम एक जैड़ौ ही है, पण हरैक मिनख आपरी मेनत रै अनुसार अपणी ही मजूरी पावैला। क्यूंकै म्हौ परमेसर रा सहयोगी हो, थै परमेसर री खेती अर परमेसर रौ मिंदर भी हो। परमेसर रै उण करपा रै अनुसार जिकौ म्हनै दियौ ग्यौ है, म्हैं बुद्धिमान कारीगर रै ज्यूं नींव भरी, कोई दूजौ ही इणरै ऊपर मकान री सुणाई कर रियौ है। पण हरैक मिनख सावचेत रैवै की वो कीण तरैह सुणाई करै है। क्यूंकै जिकौ नींव भरी है वो खुद यीसु मसीह है और उण ऊं अलग दूजी नींव कोई भर ही नीं सकै। जे इण नींव ऊपर लोग सुणाई रै कांम में सोनों, चांदी, मूंगो भाठौ, लकड़ी, घास, फूस कांम में लावै ला, तो हरैक रौ कांम परगट हो जावैला, क्यूंकै न्याव रै दिन उणनै बतावैला, इण वास्तै अग्‍नि रै साथै परगट होवैला अर वो अग्‍नि हरैक रौ कांम परखेला की कैड़ौ है। जिणरौ कांम उण नींव माथै बणयोड़ो टिकाऊ रैवैला, वो मजूरी पावैला। जे किणी रौ कांम बळ जावैला, तो वो घाटौ उठावैला, पण वो आप बच जावैला पण बळते-बळते। कांई थै कोनीं जांणौ की थै परमेसर रौ मिंदर हो, अर परमेसर री आतमा थांरै मांय वास करै है? जे कोई परमेसर रै मिंदर नै नास करैला तो परमेसर उणनै नास करैला, क्यूंकै परमेसर रौ मिंदर पवितर है, और वो थै हो। कोई अपणै आप नै धोखो नीं दे। जे थौरे मांय ऊं कोई इण संसार में अपणै आप नै ग्यांनी समझै, तो गेलौ बणै की ग्यांनी हो जावै। क्यूंकै इण संसार रौ ग्यांन परमेसर री दिस्टी में पागलपन है, ज्यौ लिख्यौ है, “वो ग्यांनियों नै उणरी ही चालाकी में फसा दैवै है,” और वळै, “परभु ग्यांनियों रै विचारो नै जांणै है की वे फालतू है।” इण वास्तै मांनखै रै कांमां ऊपर कोई घंमड नीं करै, क्यूंकै सगळौ कीं थौरी भलाई रै लियै है। कांई पौलुस, कांई अपुल्लोस, कांई कैफा, कांई जगत, कांई जीवन, कांई मरण, कांई पैला, कांई अबार, सगळौ कीं थौरी भलाई रै लियै है, और थै मसीह रा हो, और मसीह परमेसर रौ है। मांनखौ म्हौ नै मसीह रा सेवक अर परमेसर रै भेदों रा भंडारी समझै। पछै एठै भंडारी में आ बात देखी जावै है की वो विसवास लायक हो। पण म्हारी निजर में आ घणी छोटी बात है की थै या मांनखौ कोई न्यावी म्हनै परखे, बल्कि म्हैं खुद ही अपणै आप नै कोनीं परखू। क्यूंकै म्हारौ मन म्हनै किणी बात में दोसी नीं ठैरावतो, पण इण ऊं म्हैं निरदोस नीं ठैरतौ, क्यूंकै म्हारौ परखणै वाळौ परभु है। इण वास्तै जैड़ी तांई परभु नीं आवै, उण वगत ऊं पैला किणी बात रौ न्याव नीं करौ। वोहीज तो अंधारै री छिपी बातां उजाळै में दिखावैला, अर मनो रै विचारो नै परगट करैला, तद परमेसर री तरफ ऊं हरैक री बड़ाई होवैला। हे विसवासी भाइयो, म्हैं इण बातां में थौरे वास्तै अपणी अर अपुल्लोस री चरचा कहाणी री रीति ऊपर किनी है, इण वास्तै की थै म्हौरै जरियै ओ सीखो की लिख्योड़े ऊं आगै नीं बढ़णौ, अर एक रै पकस में अर दूजै रै विरोध में घंमड नीं करणौ। क्यूंकै थारै में अर दूजै में कुण भेद करै है? अर थारै खनै कांई है जिकौ थै दूजै ऊं नीं पायो? अर जद की थै दूजै ऊं पायो है, तो ऐड़ौ घंमड क्यूं करै है की मांनौ कोनीं पायो? थै तो धाप चुका हो, थै धनवान हो चुका, थै म्हारै बिना राज किनो। पण भलौ होतो की थै राज करता की म्हौ भी थौरे साथै राज करता। म्हनै यूं लागै है की परमेसर नै अपां प्रेरितों नै मौत रौ डंड मिनखौ रै ज्यूं सबां ऊं आखरी जगा माथै राख्या है। म्हौ सगळै जगत, सरगदूतो अर मिनखौ रै सांमै तमासा बण गिया हो। म्हौ लोगां री निजर में मसीह में मूरख हो, पण थै मसीह में बुद्धिमान हो। म्हौ कमजोर हो, पण थै ताकतवर हो। थै आदर पाओ हो, पण म्हौ निरादर होवो हो। म्हौ इण घड़ी तांई भूखा तिरसा अर उघाड़ा हो, अर मार खावौ हो अर मौळा मौळा फिरौ हो। अर अपणै इज हाथो ऊं कांम करनै मेनत करौ हो। लोग म्हौ नै भूंडा कैवै है, म्हौ आसीस देवो हो, वे सतावै है, म्हौ सहन करौ हो। वे बदनाम करै है, तौभी म्हौ नरमाई ऊं बात करौ हो। म्हौ आज तांई जगत री गंदगी अर सगळौ रै लियै कचरौ बणग्या हो। म्हैं थांरी बेजती करनै रै वास्तै ऐ बातां कोनीं लिखूं, पण म्हारा लाडला बेटा जांणनै थांनै याद दिलाऊं हूं। क्यूंकै जे मसीह में थौरा सिखाणवाळा चाहे दस हजार भी होवता, तौभी थौरा पिता घणाहारा नीं हो सकै, इण वास्तै सबां ऊं पैला यीसु मसीह में सुभ संदेस सुणाणै री वजै हूं म्हैं थौरो पिता होयौ। इण वास्तै म्हैं थौरे ऊं विनती करूं हूं की म्हारै ज्यूं चालौ। इण वास्तै म्हैं तीमुथियुस नै जिकौ परभु में म्हारौ लाडलौ अर विसवास लायक बेटौ है, थौरे खनै भेज्यौ है। वो थांनै मसीह में म्हारौ व्यवहार याद दिलावै ला, ज्यूं की म्हैं हरैक जगा हरैक कलीसिया में उपदेस करूं हूं। किता जणा तो ऐड़ा घंमड में फूल गिया है, मांनौ म्हैं थौरे खनै आवणौ इज कोनीं। पण परभु चावै ला तो म्हैं थौरे खनै वेगौ ही आऊंला, अर उण घंमड में फूलयोड़ो री बातां नै कोनीं, पण उणरी सामरथ नै जांण लूं ला। क्यूंकै परमेसर रौ राज कैवल बातां में कोनीं पण सामरथ में भी है। थै कांई चावौ हो? कांई म्हैं लाठी लेयनै थौरे खनै आऊं, या पछै परैम अर नरमाई री आतमा रै साथै? एठै तांई सुणणै में आयौ है की थौरे मांय व्यभिचार होवै है, बल्कि ऐड़ौ व्यभिचार जिकौ दूजी जातियो में भी कोनीं होवै की एक मिनख आपरै पिता री दूजी लुगाई नै राखै है। थांनै सौग करणौ चाहीजै, तौभी थै घंमड करौ हो। जिण ऊं ऐड़ा कांम करणवाळा थौरे बीच में ऊं निकाळया जावै। म्हैं तो सरीर रै भाव आगौ हो, पण आतमा रै भाव ऊं थौरे साथै होयनै, मांनौ हाजिर री दसा में ऐड़ा कांम करणैवाळौ रै बारै में आ आग्या दे चुकौ हूं। की जद थै अर म्हारौ मन, म्हौरै परभु यीसु री सामरथ रै साथै भेळा हो, तो ऐड़ा मिनख म्हौरै परभु यीसु रै नाम ऊं, सरीर रै नास रै वास्तै सैतान नै सौपयो जावै, ताकी उणरी आतमा परभु यीसु रै दिन में उद्धार पावै। थौरो घंमड करणौ चौखौ कोनीं। कांई थै कोनीं जांणौ की थोड़ोक खमीर पूरै गुंदयोड़े आटे नै खमीर कर दैवै है? पुराणौ खमीर निकाळनै, अपणै आप नै सुद्ध करौ, की नयो गुंदयोड़ो आटो बण जाओ, ताकी थै अखमीरी हो। क्यूंकै म्हौरौ भी फसह, जिकौ मसीह है, बलिदान होयौ है। इण वास्तै आओ, अपां तैंवार मांय आंणंद मनाओ, नीं तो पुराणै खमीर ऊं अर नीं भूंडाई अर दुस्टता रै खमीर ऊं, पण सीधाई अर सचाई री अखमीरी रोटी ऊं। म्हैं म्हारी चिठ्ठी में लिख्यौ है की व्यभिचारियो री संगति नीं करणी। ओ नीं, की थै बिलकुल इण जगत रै व्यभिचारियो, या लोभियो, या धोखेबाजो, या मूरती पुजारियो री संगति नीं करौ। क्यूंकै इण दसा में तो थांनै जगत में ऊं निकळ जावणौ पड़तौ। म्हारौ कैवणौ ओ है की जे कोई विसवासी भाई कैहन, व्यभिचारी, या लोभी, या मूरती पुजारी, या गाळी देवणवाळौ, या पियकड़, या धोखेबाज है, तो उणरी संगति मत करजौ, बल्कि ऐड़ै मिनख रै साथै खाणौ भी नीं जीमणौ। क्यूंकै म्हनै कलीसिया रै बाहरवाळौ रौ न्याव करणै ऊं कांई कांम? कांई थै कलीसिया रै मांयलौ रौ न्याव कोनीं करौ? पण बाहरवाळौ रौ न्याव परमेसर करै है। इण वास्तै उण पापी नै अपणै बीच में ऊं निकाळ दो। जे आप लोगां में कोई आपसी झगड़ौ हो, तो थै न्याव रै लियै अविसवासियो रै खनै जाओ, अर परमेसर रै लोगां रै खनै नीं जाओ? कांई थै कोनीं जांणौ की परमेसर रा लोग जगत रौ न्याव करैला? इण वास्तै जद थांनै जगत रौ न्याव करणौ है, तो कांई थै छोटे-से झगड़ै रौ भी न्याव करणै रै लायक कोनीं? कांई थै कोनीं जांणौ की म्हौ सरगदूतो रौ न्याव करांला? तो कांई सांसारिक बातां रौ फैसलो नीं करौ? जे थांनै सांसारिक बातां रौ फैसलो करणौ हो, तो कांई उणौनै बैठाओला जिकौ कलीसिया में कीं नीं समझया जावै है? म्हैं थौरी बेजती करणै रै लियै ओ कैवूं हूं। कांई साचांणी थौरे में ऊं एक भी समझदार कोनीं मिळै, जिकौ अपणै भाइयो रौ फैसलो कर सकै? पण थौरे में भाई-भाई में मुकदमो होवै है, अर वो भी अविसवासियो रै सांम्ही। पण हकीगत थौरे में मोटो दोस तो ओ है की आपस में मुकदमा करौ हो। अन्याव सहन क्यूं नीं करौ? अपणौ घाटौ क्यूं नीं सहन करौ? इणरै बदळै थै तो खुद अन्याव करौ अर नुकसाण करौ हो, अर वो ही भाइयो रै साथै। कांई थै कोनीं जांणौ की अन्याव करणै वाळा लोग परमेसर रै राज रा वारिस नीं होवैला? धोखो नीं खाओ, नीं व्यभिचारी, नीं मूरती पुजारी, नीं पराई लुगाई खनै जावणौ, नीं मिनख मिनख रै साथै। नीं चोर, नीं लोभी, नीं पियकड़, नीं निंदा करणैवाळौ, नीं धोखेबाज परमेसर रै राज रा वारिस होवैला। और थौरे में ऊं कईक ऐड़ा ही हा। पण थै परभु यीसु मसीह रै नाम ऊं अर म्हौरै परमेसर री आतमा ऊं धोया गिया अर पवितर होया अर धरमी ठैरया। सगळी चीजों म्हारै लियै वाजिब तो है। पण सगळी चीजों फायदे री कोनीं। सगळी चीजों म्हारै लियै वाजिब है। पण म्हैं किणी बात रै अधीन नीं होवूंला। खाणौ पेट रै लियै, अर पेट खाणै रै लियै है। पण परमेसर इणनै अर उणनै दोनूं नै नास करैला। सरीर व्यभिचार रै लियै कोनीं, बल्कि परभु रै लियै है, अर परभु सरीर रै लियै है। परमेसर आपरी सामरथ ऊं परभु नै मरयोड़ौ में ऊं जिलायौ, इण तरैह अपांनै भी जीवता करैला। कांई थै कोनीं जांणौ की थौरो सरीर मसीह रौ अंग है? तो कांई म्हैं मसीह रै अंग लेयनै उणनै वेसया रौ अंग बणाऊं? कदैई कोनीं। कांई थै कोनीं जांणौ की जिकौ कोई वेसया ऊं संगति राखै है, वो उणरै साथै एक तन हो जावै है? क्यूंकै लिख्योड़ौ है, “वे दोनूं एक तन होवैला।” अर जिकौ परभु री संगति में रैवै है, वो उणरै साथै एक आतमा हो जावै है। व्यभिचार ऊं आगा रौ। जितरा दूजा पाप मिनख करै है वे सरीर ऊं बाहर है, पण व्यभिचार करणैवाळौ आपरै ही सरीर रै विरोध पाप करै है। कांई थै कोनीं जांणौ की थौरो सरीर पवितर आतमा रौ मिंदर है, जिकौ थौरे में बसयोड़ौ है अर थांनै परमेसर री तरफ ऊं मिळियौ है? थै खुद रा ही कोनीं हो। क्यूंकै थांनै दाम देयनै मोल लियोड़ा हो, इण वास्तै अपणै सरीर रै जरियै परमेसर री महिमा करौ। उण बातां रै बारै में जिकौ थै लिखी, ओ बड़िया है की कोई आदमी ब्याव ही नीं करै। पण व्यभिचार रै डर ऊं हरैक री लुगाई, अर हरैक लुगाई रौ घरधणी हो। घरधणी आपरी लुगाई रौ हक पूरौ करै, अर व्यौंही लुगाई भी आपरै घरधणी रौ। सिरफ लुगाई नै आपरै सरीर माथै हक कोनीं पर उणरै घरधणी रौ हक है। व्यौंही सिरफ घरधणी नै भी आपरै सरीर माथै हक कोनीं, पण लुगाई रौ। थै एक दूजै ऊं अलग नीं रैवौ, पण कैवल कीं वगत तांई आपसी समति ऊं की पराथना रै लियै छुट्टी मिळै, अर वळै एक साथै रैवौ। ऐड़ौ नीं हो, की थौरे असंयम रै खातर सैतान थांनै परखे। पण म्हैं जिकौ ओ कैवूं हूं वो अनुमति है, आग्या कोनीं। म्हैं ओ चावूं हूं, की जैड़ौ म्हैं हूं, वैड़ा ही सगळा मिनख हो। पण हरैक नै परमेसर री तरफ ऊं खास वरदान मिळिया है। किणी नै किणी तरैह रौ, अर किणी नै किणी और तरैह रौ। पण म्हैं कुंवारों अर विधवाओं रै बारै में कैवूं हूं, की उणरै लियै ऐड़ौ ही रैवणौ चौखौ है, जैड़ौ म्हैं हूं। पण जे वे संयम नीं रख सकै, तो ब्याव करै। कामातुर होयनै जळतौ रैवणै री बजाय ब्याव कर लेणो ही भलौ है। जिणरौ ब्याव हो गियौ है, उणनै म्हैं कोनीं, बल्कि परभु आग्या दैवै है, की लुगाई आपरै घरधणी ऊं अलग नीं हो। पण जे अलग हो भी जाए, तो बिना दूजै ब्याव किए रैवै, या अपणै घरधणी ऊं पाछौ मेळ कर ले अर नीं घरधणी आपरी लुगाई नै छोड़ै। दूजौ ऊं परभु नीं, पण म्हैं इज कैवूं हूं, जे किणी विसवासी भाई री लुगाई विसवास नीं करती हो, अर उणरै साथै रैवण ऊं खुस हो, तो वो उणनै नीं छोड़ै। अर जिण लुगाई रौ घरधणी विसवास नीं करतौ हो, अर उणरै साथै रैवण ऊं खुस हो, वो घरधणी नै नीं छोड़ै। क्यूंकै ऐड़ौ घरधणी जिकौ विसवास नीं करतौ हो, वो लुगाई रै खातर पवितर ठैरै है, अर ऐड़ी लुगाई जिकौ विसवास नीं राखै, वां घरधणी रै खातर पवितर ठैरै है। जे नीं तो थौरे टाबर असुद्ध होता, पण अबै तो पवितर है। पण जिकौ मिनख विसवास कोनीं राखै, जे वो अलग हो, तो अलग होणै दो। ऐड़ी दसा में कांई मिनख, या लुगाई बन्धन में नीं, पण परमेसर नै तो अपांनै मेल-मिलाप रै लियै बुलाया है। क्यूंकै हे लुगाई, थूं कांई जांणै है। की थूं थारै घरधणी रौ उद्धार करां दैला? अर हे आदमी, थूं कांई जांणै है की थूं थारी लुगाई रौ उद्धार करां दैला? पण ज्यूं परभु हरैक नै वरदान दियौ है, अर जैड़ा परमेसर हरैक नै बुलाया है, वैड़ा इज होयनै चालै। अर म्हैं सगळै कलीसियाओ में ऐड़ौ इज ठैरावूं हूं। जिकौ खतना कियोड़ा बुलाया गिया हो, वो खतनारहित नीं बणै। जिकौ खतनारहित बुलाया गिया हो, वो खतना नीं करावै। नीं खतना कीं है, अर नीं खतनारहित। पण परमेसर री आग्याओं नै मानणौ ही सगळौ है। हरैक मिनख जिण दसा में बुलाया हो, उणीज में रैवै। जे थूं दास रै रूप में बुलायौ हो तो चिंता नीं करै। पण जे थूं आजाद हो सकै, तो ऐड़ौ इज कांम कर। क्यूंकै जिकौ दास रै रूप में परभु में बुलाया गिया है, वो परभु रौ आजाद कियोड़ौ है। अर व्यौंही जिकौ आजाद रै रूप में बुलायोड़ा है, वो मसीह रा दास है। थांनै कीमत देयनै मोल लियोड़ा हो, मिनखौ रा दास मत बणौ। हे भाइयो, जिकौ कोई जिण दसा में बुलाया गिया है, वो उणी में परमेसर रै साथै रैवै। कुंवारियो रै बारै में परभु री कोई आग्या म्हनै नीं मिळी, पण विसवास लायक होणै रै लियै जैड़ी दया परभु नै म्हारै माथै की है, उण रै अनुसार समति देवूं हूं। इण वास्तै म्हारी समझ में ओ बड़िया है, की आजकल कलेस रै खातर मिनख जैड़ौ है, वैड़ौ इज रै। जे थारी लुगाई है, तो उण ऊं अलग होणै री कोसीस मत कर। अर जे थारै लुगाई नीं, तो लुगाई री खोज मती कर। पण जे थूं ब्याव भी करै, तो पाप कोनीं। अर जे कुंवारी कन्या ब्याव करै तो ओ पाप कोनीं। पण ऐड़ौ में सारीरिक दुख होवैला, अर म्हैं थांनै इण ऊं बचाणा चावूं हूं। हे भाइयो, म्हैं कैवूं हूं, की वगत कम है, इण वास्तै अबै ऊं वे, जिकौ सादीसुदा है ऐड़ा रैवै, मांनौ ब्याव कियो ही कोनीं। अर रोवण वाळा ऐड़ा हो, मांनौ रोवे कोनीं। अर आंणंद करणैवाळा ऐड़ा हो, मांनौ आंणंद कोनीं करै। अर मोल लेवणवाळा ऐड़ा हो, की मांनौ उणौरै खनै कीं नीं है। जिणरौ लेण-देण सांसारिक चीजों ऊं है, वे उणमे लीन नीं हो, क्यूंकै इण संसार री रीति अर व्यवहार बदळता जावै है। म्हैं ओ चावूं हूं, की थांनै चिंता नीं हो। कुंवारों मिनख परभु री बातां री चिंता मे रैवै है, की परभु नै कीकर खुस राखै। पण ब्याव कियोड़ौ मिनख संसार री बातां री चिंता में रैवै है, की खुद री लुगाई नै कीण तरैह ऊं खुस राखै। कुंवारी अर ब्याव करयोड़ी में भी फरक है। कुंवारी परभु री चिंता में रैवै है, की वां सरीर अर आतमा दोनूं में पवितर है। पण ब्याव कियोड़ी संसार री चिंता में रैवै है, की अपणै घरधणी नै खुस राखै। म्हैं आ बात थौरे ही फायदे रै वास्तै करूं हूं, न की थांनै फसाणै रै वास्तै, बल्कि इण वास्तै की जैड़ौ उचित है। ताकी थै एक चित होयनै परभु री सेवा में लागया रैवौ। अर जे कोई ओ समझै, की म्हैं अपणी बेटी कुंवारी रौ हक सीन रियौ हूं, जिणरी जवानी ढळ री है, अर जरुरी भी हो, तो जैड़ौ चाहो वैड़ौ करौ, इणमे पाप कोनीं, वो उणरौ ब्याव होवण दे। पण जिकौ मन में मजबुत रैवै है, अर उणनै जरुरी नीं हो, बल्कि अपणी इछा माथै अधिकार राखतौ हो, अर अपणै मन में आ बात ठान ली हो की वो आपरी कुंवारी बेटी नै कुंवारी राखैला, वो बड़िया करै है। इण वास्तै जिकौ आपरी कुंवारी बेटी रौ ब्याव कर दैवै है, वो बड़िया करै है, अर जिकौ ब्याव नीं करावै, वो और भी बड़िया करै है। जैड़ी तांई किणी लुगाई रौ घरधणी जीवतौ रैवै है, तद तांई वो उण ऊं बंधयोड़ी है। पण जद उणरौ घरधणी मर जावै, तो जिणसूं चावै ब्याव कर सकै, पण वो मिनख भी परभु में विसवासी ही हो। पण जैड़ी है वैड़ी ही रैवै, तो म्हारै विचार में घणी धन्य है। अर म्हैं समझूं हूं, की परमेसर री आतमा म्हारै में भी है। अबै मूरतों रै सांमै बलि कियोड़ी चीजों रै बारै में म्हौ जांणौ हो, “अपां सगळौ नै ग्यांन है।” ग्यांन घंमड पैदा करै है, पण परैम ऊं बढ़ोतरी होवै है। जे कोई समझै की, “म्हैं कीं जांणूं हूं,” तो जैड़ौ जांणणौ चाहीजै वैड़ौ अबै तांई कोनीं जांणै। पण जे कोई परमेसर ऊं परैम राखै है, तो परमेसर उणनै पिछांणै है। अतस मूरतों रै सांमै बलि कियोड़ी चीजों रै खाणै रै बारै में म्हौ जांणौ हो, की मूरत संसार में कोई चीज नीं है, अर एक नै छोड़नै और कोई परमेसर कोनीं। जद की आभै में अर धरती माथै घणाहारा ईस्वर अर घणाहारा परभु कहीजै है। पण म्हौरै तो एक इज परमेसर है। मतलब पिता जिणरी तरफ ऊं सगळी चीजों है, अर म्हौ उणीज रै लियै हो, और एक इज परभु है, मतलब यीसु मसीह जिणरै द्‍वारा सगळी चीजों होई, अर म्हौ भी उणीज रै द्‍वारा हो। पण सगळौ नै ओ ग्यांन कोनीं। पण किता तो अबार तांई मूरत नै ईस्वर समझनै रै खातर मूरतों रै सांमै बलि कियोड़ी चीजों नै चढ़ावौ समझनै खावै है, अर उणौरौ अंतो कमजोर होणै रै खातर वे जांणै है म्हौ असुद्ध हो गिया हो। चढ़ावै रौ खाणौ म्हौ नै परमेसर रै नजीक कोनीं पूगावै। जे नीं खावौ, तो म्हौरौ कोई घाटौ कोनीं, अर जे खावौ, तो भी कोई फायदो कोनीं। पण सावचेत रौ। ऐड़ौ नीं हो की थौरी आ आजादी कठैई कमजोरो रै लियै पाप रौ कारण बण जावै। क्यूंकै जे थनै ग्यांनी नै मूरत रै मिंदर में चढ़ावौ खावतै देखे, अर वो कमजोर अंते रौ मिनख हो, तो कांई उणनै मूरत रै सांमै बलि कियोड़ी चीजों नै खाणै री हीमत नीं हो जावैला? इण रीति ऊं थारै ग्यांन रै वजै ऊं वो कमजोर विसवासी भाई बहन जिणरै लियै मसीह रौ मरणौ फालतू हो जावैला। इण तरैह विसवासी भाइयो रै विरोध पाप कर नै अर उणरै अंते नै, जिकौ कमजोर है, चोट दैणै रै जरियै थै मसीह यीसु रै विरोध पाप करौ हो। इण खातर जे खाणौ म्हारै विसवासी भाई नै ठोकर रौ कारण बणावै, तो म्हैं कदैई किणी रीत ऊं मांस नीं खाऊंला, नीं हो की म्हैं अपणै विसवासी भाई रै ठोकर रौ कारण बणूं। कांई म्हैं आजाद कोनीं? कांई म्हैं प्रेरित कोनीं? कांई म्हैं यीसु नै जिकौ म्हांरौ परभु है, कोनीं देख्यौ? कांई थां परभु में म्हारै कांम री वजै ऊं कोनीं? जे म्हनै दूजा प्रेरित नीं ही मांनै, तौभी थौरे लियै तो हूं। क्यूंकै थै परभु में म्हारी प्रेरिताई रौ सबूत हो। जिकौ म्हनै जांचे है, उणौरै वास्तै म्हारौ जबाब है। कांई म्हौ नै हक कोनीं की थै म्हौरी खाणै-पीणै री जरुत पूरी करता रैवौ। कांई म्हौ नै ओ हक कोनीं, की किणी मसीही छोरी ऊं ब्याव करनै उणनै साथै लिए फिरौ, ज्यूं दूजा प्रेरित अर परभु रा भाई अर पतरस करै है? या कैवल म्हनै अर बरनबास नै ही जीवन जीने रै लियै कांम करणौ चाहीजै? कुण सिपाई आपरौ खरचो खुद उठायनै सेना में कांम करै है? कुण अंगूरो री बाड़ी लगायनै उणरौ फळ नीं खावै? कुण लरड़ियां री रूखाळी करनै उणरौ दूध कोनीं पीये? कांई म्हैं ऐ बातां मिनख री ही रीति माथै बोलूं हूं? कांई व्यवस्था भी ओहीज कोनीं कैवै? क्यूंकै मूसा री व्यवस्था में लिख्योड़ौ है, “लाटो लेते वगत चालते बळद रौ मूंडौ नीं बांधणौ।” कांई परमेसर बळदों रै ही बारै में बता रिया है? या खासकर म्हौरै लियै कैवै है। हां, म्हौरै लियै भी लिख्यौ गियौ, क्यूंकै ओ सही है, की जोतनवाळौ आसा ऊं जोते अर कटनी करणैवाळौ भागी होणै री आसा ऊं कटनी करै। जे म्हौ थौरे मांय आत्मिक चीजों बोई, की थौरी सारीरिक चीजों री मदद मांगी तो कांई आ कोई मोटी बात है? जद दूजौ नै थौरी चीजों में पांति रौ हक है, तो कांई म्हौरौ इणौ ऊं घणौ नीं होवैला? पण म्हौ ओ हक कांम में कोनीं लाया। पण सगळौ कीं सहन करौ हो की म्हौरै खातर मसीह रै सुभ संदेस में कीं भी रूकावट नीं हो। कांई थै कोनीं जांणौ की जिकौ मिंदर में सेवा करै है, वे मिंदर में चढ़ावै रौ भागी है, अर जिकौ वेदी री सेवा करै है, वे वेदी रै साथै भागी होवै है? इण रीत ऊं परभु री आग्या है की जिकौ लोग सुभ संदेस सुणावै है, उणरी जीविका सुभ संदेस ऊं पूरी हो। पण म्हैं इणमे ऊं कोई भी अधिकार कांम में नीं लायौ। अर म्हैं ऐ बातां इण वास्तै कोनीं लिखी की म्हारै लियै ऐड़ौ कियो जावै। जिण बात रौ म्हनै घंमड है उणनै कोई लैय ले इण ऊं तो म्हारौ मरणौ ही भलौ है। जद म्हैं सुभ संदेस सुणाऊं, तो म्हारै लिए कीं घंमड री बात कोनीं। क्यूंकै ओ तो म्हारै लियै जरुरी है। जे म्हैं सुभ संदेस नीं सुणाऊं, तो म्हारै माथै हाय! क्यूंकै जे अपणी इछा ऊं ओ कांम करूं हूं, तो मजूरी म्हनै मिळै है। अर जे अपणी इछा ऊं कोनीं करूं, तो भी जिम्मेदारी म्हनै सूंपयोड़ी है। तो म्हारी कुण सी मजूरी है? आ की म्हैं मसीह रौ सुभ संदेस रौ परचार मुफत में करतौ रहूंं। एठै तांई की सुभ संदेस में जिकौ म्हारौ अधिकार है उणनै भी म्हैं पूरी रीति ऊं कांम में नीं लाऊं। क्यूंकै सबां ऊं आजाद होयनै भी म्हैं अपणै आप नै सबां रौ दास बणा दियौ की घणाहारा लोगां नै मसीह में लाऊं। म्हैं यहूदियो रै लियै यहूदियो जैड़ौ बण्यौ की यहूदियो नै मसीह में लाऊं। जिकौ लोग व्यवस्था रै अधीन है उणौरै वास्तै म्हैं व्यवस्था रै अधीन नीं होणै रै बावजूद भी व्यवस्था रै अधीन बण्यौ की उणौनै जिकौ व्यवस्था रै अधीन है, मसीह में लाऊं। जिकौ व्यवस्था रै अधीन कोनीं है, म्हैं उणौरै ज्यूं बण गियौ। म्हैं खुद परमेसर री व्यवस्था ऊं आजाद कोनीं, पण मसीह री व्यवस्था रै अधीन हूं की म्हैं उणौनै जीत सकूं, जिकौ व्यवस्था रै अधीन कोनीं है। म्हैं विसवास में कमजोरो रै वास्तै कमजोर बण्यौ की कमजोरो नै मसीह में लाऊं। म्हैं सगळै मिनखौ रै वास्तै सगळौ कीं बण्यौ की किणी न किणी रीति ऊं कहीयो रौ उद्धार कराऊं। म्हैं ओ सगळौ सुभ संदेस रै लियै करूं हूं की दूजौ रै साथै उणरौ भागी हो जाऊं। कांई थै जांणौ कोनीं की दौड़ में तो सगळा ही दौड़े है, पण इनाम एक ही ले जावै है? थै व्यौंही दौड़ो, की जीत सकौ। हरैक पेहलवान सगळै तरैह रौ संयम करै है। वो तो एक मुरझाणै वाळै मुगट नै हासल करणै रै लियै ओ सगळौ करै है, पण म्हौ तो उण मुगट रै लियै करौ हो जिकौ कदैई मुरझावै कोनीं। म्हैं बिना मकसद रै मिनख रै ज्यूं कोनीं दौड़तो। म्हैं भी इणीज रीति ऊं मुक्‍कों ऊं लड़ रियौ हूं, पण उणरै ज्यूं कोनीं जिकौ हवा पीटतो होयौ लड़ै है। म्हैं अपणै सरीर नै तकलीफ देयनै अपणै वस में राखूं हूं, ऐड़ौ नीं हो की म्हैं दूजौ नै उपदेस दूं अर खुद ही किणी रीति ऊं निकमो ठैहरूं। हे भाइयो, म्हैं कोनीं जांणूं, की थै इण बात ऊं अजांण रौ की म्हौरै सगळा बापदादा परभु रै बादळो री छाया में चालया हा, अर वो लाल समंदर रै बीच ऊं पार हो गिया। अर सगळौ नै बादळो रै नीचे अर समंदर में होयनै, मूसा रा चेला बणणै रौ बतिस्मो होयौ, अर सगळौ नै एक ही आत्मिक खाणौ खायौ, अर सगळौ नै एक इज आत्मिक जळ पीयो, क्यूंकै वे उण आत्मिक चटान ऊं पीवता हा जिकौ उणरै साथै साथै चालती ही, अर वो चटान मसीह हो। पण परमेसर उणमे ऊं घणौ ऊं प्रसन्‍न नीं होयौ, इण वास्तै वे लोग रिंदरोही में ढ़ेर हो गिया। ऐ बातां म्हौरै वास्तै चेताणी ही, की ज्यूं उणौनै बुरी चीजों री इछा की, व्यौंही म्हौ बुरी चीजों री इछा नीं करौ। अर नीं थै मूरती पूजनेवाळा बणौ। ज्यूं की उणमे ऊं किता बणग्या हा, ज्यौ पवितर सास्तर में लिख्योड़ौ है, “वो लोग खाणै-पीणै में अर मौज मस्ती में मस्त रिया।” अर नीं म्हौ व्यभिचार करौ, ज्यूं उणमे ऊं कितौ नै करयौ अर एक दिन में तेईस हजार मर गिया। अर नीं म्हौ मसीह नै परखो, ज्यौ उणमे कितौ नै कियो, अर सांपो रै डसने ऊं वो मर गिया हा। अर नीं थै कुड़कुड़ाओ, जिण रीति ऊं उणमे ऊं किता कुड़कुड़ाया, अर नास करणैवाळै दूत रै जरियै मार दिया गिया। पण ऐ सगळी बातां, जिकौ उण में घटी, दिस्टांत री रीति पर ही। अर वे म्हौरी चेताणी रै खातर जिकौ जगत रै आखरी वगत नैड़ौ है। इण वास्तै जिकौ समझै है, “म्हैं विसवास में स्थिर हूं,” वो सावचेत रैवै, की कठैई विसवास ऊं भटक नीं जावै। थै किणी परीकसा में मती पड़ो, जिकौ मिनख रै सहन करणै ऊं बाहर हो। अर परमेसर विसवास लायक है। वो थांनै सामरथ ऊं बारै परीकसा में नीं पड़नै दैला, बल्कि परीकसा रै साथै उपाय भी करैला की थै सह सकौ। इण वास्तै, हे म्हारै प्यारौ, मूरती पूजा ऊं आगा रैवौ। म्हैं बुद्धिमान जांणनै, थौरे ऊं कैवूं हूं। जिकौ म्हैं कैवूं हूं, उणै थै परखो। वो धन्यवाद रौ कटोरो, जिणनै म्हौ धन्यवाद करौ हो, कांई वो मसीह रै खून री सहभागिता कोनीं? वो रोटी जिणनै म्हौ तोड़ो हो, कांई मसीह रै सरीर री सहभागिता कोनीं? इण वास्तै, की एक ही रोटी है तो म्हौ भी तो घणा हो, एक ही सरीर है। क्यूंकै म्हौ सगळा उणीज रोटी में भागी होवो हो। उण इजरायली लोगां नै देखौ। कांई बलि रै खावण वाळा वेदी रा सहभागी कोनीं? कांई है म्हारै कैवण रौ मतलब? कांई मूरती नै चढ़ायोड़ी चीज रौ कोई महत्व है या उण मूरती रौ कोई महत्व है? कोनीं, बल्कि ओ, की दूजी जाति जिकौ बलि करै है, वे परमेसर रै लियै कोनीं, पण दुस्ट आतमाओ रै लियै बलि करै है अर म्हैं कोनीं चावूं, की थै दुस्ट आतमाओ रा सहभागी हो। थै परभु रै कटोरे, अर दुस्ट आतमाओ रै कटोरे दोनूं में ऊं नीं पी सकौ। थै परभु री मेज अर दुस्ट आतमाओ री मेज दोनूं में सहभागी नीं हो सकौ। कांई म्हौ परभु नै क्रोध दिलावौ हो? कांई म्हौ उण ऊं ताकतवर हो? म्हैं सगळौ कीं करणै रौ तो आजाद हूं, पण सगळौ कीं भलाई रै लियै तो कोनीं। म्हैं सगळौ कीं करणै रौ तो आजाद हूं, पण बात ऊं म्हांरौ भरोसौ मजबुत कोनीं होवै। कोई अपणी ही भलाई नै नीं, बल्कि दूजौ री भलाई नै भी ध्यांन में राखै। जिकौ कीं कसाइयो रै उठै बिके है, वो खाओ अर अन्तरात्मा रै खातर कीं नीं पूछौ। क्यूंकै पवितर सास्तर में लिख्योड़ौ है, “धरती अर धरती में जिकौ कीं भी है सगळौ कीं परभु रौ ही है।” जे किणी अविसवासी में ऊं कोई थांनै नेवतो दे, अर थै जांणौ चाहो, तो जिकौ कीं थांरै सांमै राखै वो खाओ। अर अन्तरात्मा री भलाई रै खातर कीं नीं पूछौ। पण जे कोई थांरै ऊं कैवै, “आ तो मूरत नै बलि कियोड़ी चीज है,” तो उणरै बतानै वाळै रै खातर, अर अन्तरात्मा री भलाई रै खातर नीं खाओ। म्हारौ मतलब, थारै अंते ऊं कोनीं, पण उण दूजै रै अंते ऊं। भलौ, म्हारी आजादी दूजै रै विचार ऊं क्यूं परखी जाए? जे म्हैं धन्यवाद कर नै खाणै में सहभागी होवूं हूं, तो जिणरै वास्तै म्हैं परमेसर नै धन्यवाद करूं हूं, उणरै खातर म्हारी बेजती क्यूं होवै है? इण वास्तै थै चावै जिकौ खाओ या पीयो, चावै जिकौ कीं करौ, सगळौ परमेसर री महिमा रै लियै करौ। थै नीं यहूदियो रै लियै, नीं यूनानियो रै लियै, अर नीं परमेसर री कलीसिया रै लियै ठोकर रौ कारण बणौ। ज्यौ म्हैं भी सगळी बातां में सगळौ नै खुस राखूं हूं, अर अपणौ कोनीं, पण दूजौ रै भलै रौ ध्यांन राखूं हूं की वे उद्धार पाए। थै म्हारै ज्यूं चालौ, ज्यूं म्हैं मसीह रै ज्यूं चाल रियौ हूं। म्हैं थांरी तारीफ करूं हूं की थै सगळी बातां में म्हनै याद करौ हो, अर जिकौ सिकसा म्हैं थांनै सौंपी है, उणरौ पालण करौ हो। पण म्हैं चावूं हूं, की थै ओ जांण लौ की हरैक मिनख रौ माथो मसीह है, अर लुगाई रौ माथो घरधणी है, अर मसीह रौ माथो परमेसर है। जिकौ मिनख माथो ढ़कनै पराथना या भविसयवांणी करै है, वो आपरै माथै मसीह री बेजती करै है। पण जिकौ हरैक लुगाई उघाड़े माथै पराथना या भविसयवांणी करै है, वो आपरै माथै री बेजती करै है, क्यूंकै वां मौडी होणै रै बराबर है। जे लुगाई ओढ़नी नीं ओढ़े तो बाल ही कटा दे। जे लुगाई रै लियै बाल कटाना या मुंडाना लाज री बात है, तो ओढ़नी ओढ़े। हां, मिनख नै आपरौ माथो ढ़ाकणौ सही कोनीं, क्यूंकै वो परमेसर रौ स्वरूप अर महिमा है। पण लुगाई मिनख री महिमा है। क्यूंकै मिनख लुगाई ऊं कोनीं बण्यौ, पण लुगाई मिनख ऊं बणी है। मिनख नै लुगाई रै लिए कोनीं बणायौ, पण लुगाई नै मिनख रै लिए बणाई। इण वास्तै परमेसर मिनख नै जिकौ अधिकार दिया है उणरै अनुसार लुगाई माथो ढ़कनै राखै। उणौनै सरगदूतो री वजै ऊं भी ऐड़ौ करणौ चाहीजै। तौभी परभु में नीं तो लुगाई बिना मिनख अर नीं मिनख बिना लुगाई रौ है। जिण तरैह लुगाई री सरूआत मिनख ऊं होई है उणी तरैह अबै मिनख रौ जनम लुगाई ऊं होयौ है पण सगळी चीजों परमेसर ऊं है। थै आप ही विचार करौ। कांई लुगाई नै उघाड़े माथै परमेसर ऊं पराथना करणी सौभा दैवै है? कांई स्वाभाविक रीति ऊं भी थै कोनीं जांणौ, की जे मिनख लम्बा बाल राखै, तो उणरै लियै बेजती है? पण जे लुगाई लम्बा बाल राखै, तो उणरै लियै सौभा है क्यूंकै बाल उणनै ओढ़नी रै रूप में दियोड़ा है। पण जे कोई विवाद करणौ चावै, तो ओ जांण ले की नीं म्हौरी अर नीं परमेसर री कलीसियाओ री ऐड़ी रीति है। पण आ आग्या देते होयौ म्हैं थौरी कोई बड़ाई नीं करूं हूं। पराथना घरो में थौरो भेळौ होणै ऊं भलाई कोनीं पण बुराई ही होवै है। क्यूंकै पैला तो म्हैं ओ सुण्यौ हूं, की जद थै कलीसिया में भेळा होवो हो, तो थौरे में फूट पड़ै है, अर म्हैं इण बात माथै विसवास भी करूं हूं। पण फूट भी थौरे में जरुर होवैला, इण वास्तै की जिकौ लोग थौरे में खरा है वे सांमै आ जावै। जद थै एक जगा में भेळा होवो हो तो ओ परभु भोज खाणै रै लियै कोनीं। क्यूंकै खाणै रै वगत एक दूजै ऊं पैला अपणौ भोजन खा लेवे है, इण तरैह कोई तो भूखो रैवै है अर कोई पी नै मतवाळौ हो जावै है। कांई खाणै-पीणै रै लियै थौरा घर कोनीं? या परमेसर री कलीसिया नै कीं नीं जांणौ हो, अर जिणौरे खनै कोनीं है उणौनै बेजता करौ हो? म्हैं थौरे ऊं कांई कहूं? कांई इण बात में थौरी तारीफ करूं? कोनीं, म्हैं तारीफ कोनीं करूं। क्यूंकै आ बात म्हारै खनै परभु ऊं पुगी, अर म्हैं थांनै भी पूगा दी। की परभु यीसु नै जिण रात धोखे ऊं पकड़ावायो गियौ उणीज रात रोटी ली, अर परमेसर रौ धन्यवाद करनै उणनै तोड़ी अर कयौ, “आ म्हारी देह है, जिकौ थौरे लियै है। म्हारी याद रै लियै ओहीज किया करजौ।” इण तरैह खाणौ खाणै रै पछै उणौ कटोरो लेयनै कयौ, “ओ कटोरो म्हारै लोई में नई वाचा है। जद कदैई पीयो, तो म्हारी याद रै लियै ओहीज किया करजौ।” क्यूंकै जद थै कदैई आ रोटी खाओ, अर इण कटोरे में ऊं पीयो, तो परभु री मौत रौ परचार करौ, जैड़ी तांई वो नीं आवै। इण वास्तै जिकौ कोई गळत रीति ऊं परभु री रोटी खावै, या उणरै कटोरे में ऊं पीए, वो परभु रै सरीर अर लोई रौ दोसी ठैरैला। इण वास्तै मिनख अपणै आप नै जांच ले पछै इण रोटी में ऊं खावै, अर इण कटोरे में ऊं पीए। क्यूंकै इण खाते-पीते रै वगत परभु रै सरीर नै नीं पिछांणै, वो इण खाणै अर पीणै ऊं अपणै ऊपर डंड लावै है। इण खातर थौरे में ऊं घणा कमजोर अर रोगी है, अर घणा मरग्या है। पण जे म्हौ अपणै आप नै जांचता, तो डंड नीं पाता। पण परभु म्हौ नै डंड देयनै सुधारै है इण वास्तै की म्हौ संसार रै साथै दोसी नीं ठैरौ। इण वास्तै, हे म्हारै विसवासियो, जद थै परभु भोज खाणै रै लियै भेळा होवो, तो एक दूजै रै लियै ठैरया करौ। जे कोई भूखो हो, तो अपणै घर में खा ले, जिण ऊं थौरो भेळौ होणौ डंड रौ कारण नीं हो। अर बाकी बातां नै म्हैं आयनै ठीक करूंला। हे विसवासियो, म्हैं नीं चावूं की थै आत्मिक वरदानो रै बारै में अजांण रैवौ। थै जांणौ हो, की जद थै विसवासी नीं हा, तो गूंगी मूरतियो रै लारै ज्यूं चलाया जाता हा व्यौंही चालता हा। इण वास्तै म्हैं थांनै चेताणी देवूं हूं की जिकौ कोई परमेसर री पवितर आतमा री अगुवाई ऊं बोले है, वो कोनीं कैवै की यीसु सापित है। अर नीं कोई पवितर आतमा रै बिना कैह सकै है की यीसु परभु है। वरदान तो कई तरैह रा है, पण है उण एक ही पवितर आतमा रा है। अर सेवा भी कई तरैह री है, पण परभु एक ही है। कांम करणै रा तरीका भी बोहत है, पण सगळौ में कांम करणैवाळौ परमेसर एक ही है। सबां री भलाई रै लियै हरैक नै पवितर आतमा रौ वरदान दियौ जावै है। क्यूंकै एक नै पवितर आतमा रै द्‍वारा बुद्धि री बातां दी जावै है, अर दूजै नै उणीज आतमा रै अनुसार ग्यांन री बातां। किणी नै उण पवितर आतमा ऊं विसवास, अर किणी नै उणीज आतमा ऊं सावळ करणै रौ वरदान दियौ जावै है। वळै किणी नै सामरथ रा कांम करनै री ताकत, अर किणी नै भविसयवांणी रौ। अर किणी नै आतमा परखणै रौ, अर किणी नै अन्य भासाओं रौ, अर किणी नै भासाओं रौ अरथ बताणै रौ। पण ऐ सगळा कांम वोहीज एक पवितर आतमा करावै है, अर जिणनै जिकौ चावै है वो बांट दैवै है। क्यूंकै जिण तरैह सरीर तो एक है अर उणरै अंग बोहत है, अर उण एक सरीर रै सगळा अंग, बोहत होणै पे भी सगळा मिळनै एक ही सरीर है, उणीज तरैह मसीह भी है। क्यूंकै म्हौ सबां कांई यहूदी हो, कांई यूनानी, कांई दास, कांई आजाद एक ही पवितर आतमा रै द्धारा एक सरीर होणै रै लियै बतिस्मो लियौ, अर म्हौ सगळौ नै एक इज पवितर आतमा पाई है। इण वास्तै की सरीर में एक ही अंग कोनीं, पण घणा है। जे पांव कैवै, “म्हैं हाथ कोनीं, इण वास्तै सरीर रौ कोनीं,” तो कांई वो इण कारण सरीर रौ कोनीं? अर जे कांन कैवै, “म्हैं आंख कोनीं, इण वास्तै सरीर रौ कोनीं,” तो कांई वो इण कारण सरीर रौ कोनीं है? जे सगळौ सरीर आंख ही होती तो सुणणौ कठै होवतो? जे सगळौ सरीर कांन ही होवतो, तो सूंघणौ कठै होवतो? पण साचांणी परमेसर अंगो नै आपरी इछा रै अनुसार एक-एक करनै सरीर में राख्या है। जे वे सगळा एक ही अंग होवतो, तो सरीर नीं होवतो। पण अबै अंग तो बोहत है, पण सरीर एक ही है। आंख हाथ ऊं नीं कैह सकै, “म्हनै थारी जरुत कोनीं,” अर नीं माथो पगां ऊं कैह सकै है, “म्हनै थारी जरुत कोनीं।” पण सरीर रा वो अंग जिकौ दूजै अंगो ऊं कमजोर है, पण घणा जरुरी है। अर सरीर रै जिण अंगो नै म्हौ कम आदर देवो हो। उणीज नै म्हौ घणौ ध्यांन देवो हो। अर म्हौरै सौभाहीन अंगो रै लाज रौ घणौ ध्यांन देवो हो, म्हौरै सौभायमान अंगो नै इणरी जरुत कोनीं। पण परमेसर सरीर नै ऐड़ौ बणा दियौ है की जिण अंग नै आदर री घटी ही उणीज नै और भी घणौ आदर मिळै। ताकी सरीर में फूट नीं पड़ै, पण हरैक अंग एक दूजै रौ ध्यांन राखै। इण वास्तै जे एक अंग दुख पावै है, तो सगळा अंग उणरै साथै दुख पावै है। अर जे एक अंग री बड़ाई होवै है, तो उणरै साथै सगळा अंग आंणंद मनावै है। इण तरैह थै सगळा मिळनै मसीह रौ सरीर हो, अर अलग अलग उणरा अंग हो। अर परमेसर नै कलीसिया में अलग अलग मिनख राख्या है। पैलौ प्रेरित, दूजौ भविसयदाता, तीजौ उपदेसक, पछै सामरथ रा कांम करनैवाळा, वळै चंगा करनैवाळा, अर भलाई करनैवाळा, अर अगुवाई करनैवाळा, अर अन्य भासा बोलनैवाळा। कांई सगळा प्रेरित है? कांई सगळा भविसयदाता है? कांई सगळा उपदेसक है? कांई सगळा सामरथ रा कांम करनैवाळा है? कांई सगळौ नै सावळ करनै रौ वरदान मिळियौ है? कांई सगळा अन्य तरैह री भासा बोले है? कांई सगळा अनुवाद करै है? थै मोटे ऊं मोटे वरदानो री धुन में रैवौ। पण म्हैं थांनै और भी सबां ऊं उतम मारग बताऊं हूं। जे म्हैं मिनखौ, अर सरगदूतो री बोलियां बोलूं अर परैम नीं राखूं, तो म्हैं ठनठनाता पीतळ ज्यूं, अर झंझनाती झांझ रै ज्यूं हूं। अर जे म्हैं भविसयवांणी कर सकूं, अर सगळै भेदों अर सगळै तरैह रै ग्यांन नै समझूं, अर म्हनै एठै तांई पूरौ विसवास हो, की म्हैं भाखर नै हटा दूं, पण परैम नीं राखूं, तो म्हैं कीं भी कोनीं। जे म्हैं म्हारौ पूरौ धन कंगालो नै बांट दूं, या अपणी देह जळाणे रै लियै बलिदान कर दूं, अर परैम नीं राखूं, तो म्हनै कीं भी फायदो कोनीं। परैम धीरजवन्त है, अर दयाळु है। परैम जळण कोनीं राखै, परैम आपरी बड़ाई कोनीं करै, अर घंमड कोनीं करै। वो गळत व्यवहार कोनीं करै, वो आपरी बड़ाई कोनीं चावै, झुंझलावै कोनीं, परैम बुराई रौ कोई हिसाब कोनीं राखै। उणरौ आंणंद पाप में कोनीं, पण सचाई में है। परैम हरैक वगत रूखाळी करै है, सगळी बातां माथै विसवास करै है, सगळी बातां री आसा राखै है, परैम सगळौ सहन कर लेवे है। परैम कदैई टळै कोनीं। पण भविसयवांणी रौ वरदान खतम हो जावैला। भासाओं रौ वरदान खतम हो जावैला। ग्यांन रौ वरदान मिट जावैला। क्यूंकै म्हौरौ ग्यांन अधूरो है, अर म्हौरी भविसयवांणी अधूरी, पण जद सर्वसिद्ध आवैला, तो अधूरो मिट जावैला। जद म्हैं टाबर हो, तो म्हैं टाबरौ रै ज्यूं बोलतौ हो, टाबरौ रै ज्यूं मन हो, टाबरौ जैड़ी समझ ही। पण जद जवान हो गियौ, तो टाबरौ री बातां छोड़ दी। इण वगत तो म्हौ नै कांच में धुंधळौ दिखाई दैवै है, पण उण वगत आंमै सांमै देखोला। इण वगत म्हारौ ग्यांन अधूरो है, पण उण वगत ऐड़ी पूरी रीति ऊं पिछांणू ला, ज्यौ परमेसर म्हनै पिछांणयौ है। पण इण वगत विसवास, आसा, परैम ऐ तीनो बण्यौड़ा है, पण इणमे सगळौ मोटो परैम है। इण वास्तै परैम रौ स्वभाव राखता होया आत्मिक वरदानो री घणी इछा करता रौ। खास करनै भविसयवांणी रै वरदान री इछा करौ। क्यूंकै जिकौ अन्य भासा में बातां करै है, वो मिनखौ ऊं कोनीं, पण परमेसर ऊं बातां करै है। इण वास्तै की उणरी बातां कोई नीं समझै, क्यूंकै वो भेद री बातां पवितर आतमा में होयनै बोले है। पण जिकौ भविसयवांणी करै है, वो मिनखौ ऊं उन्‍नति अर होसले अर सानति री बातां कैवै है। जिकौ अन्य भासा में बातां करै है, वो अपणी ही उन्‍नति करै है। पण जिकौ भविसयवांणी करै है, वो कलीसिया री उन्‍नति करै है। म्हैं चावूं हूं, की थै सगळा अन्य भासाओं में बातां करौ, पण घणौ तो ओ चावूं हूं की थै भविसयवांणी करौ। क्यूंकै जे अन्य भासा रौ अरथ बताणै वाळौ कोई नीं हो तो उण ऊं भविसयवांणी घणी भली है। ताकी कलीसिया मजबुत होवै। इण वास्तै हे विसवासियो, जे म्हैं थौरे खनै आयनै अन्य भासा में बातां करूं, अर प्रकासन, या ग्यांन, या भविसयवांणी, या उपदेस री बातां थौरे ऊं नीं कहूं, तो म्हारै ऊं थांनै कांई फायदो होवैला? इणी तरैह जे बेजान चीजों भी, जिणसूं आवाज निकळै है ज्यूं बांसली, या बीन। जे उणरै स्वरों में भेद नीं हो तो जिकौ फूंके या बजायो जावै है, वो कीकर पिछांणयौ जावैला? जे तुरही रौ सबद साफ नीं हो तो कुण लड़ाई रै लियै तैयारी करैला? यूं ही थै भी जे जीभ ऊं साफ-साफ बातां नीं कैवौ, तो जिकौ कीं कयौ है वो कीकर समझयौ जावैला? थै तो फालतू बातां करनैवाळा ठैरोला। संसार में कितै ही तरैह री भासाओं क्यूं नीं हो, पण उणमे ऊं कोई भी बिना अरथ री नीं होवैला। इण वास्तै जे म्हैं किणी भासा रौ अरथ नीं समझूं, तो बोलनैवाळै री दिस्टी में परदेसी ठैरूं ला। और बोलनैवाळौ म्हारी दिस्टी में परदेसी ठैरैला। इण वास्तै थै भी जद आत्मिक वरदानो री धुन में हो, तो ऐड़ी कोसीस करौ, की थौरे वरदानो री उन्‍नति ऊं कलीसिया री आत्मिक उन्‍नति हो। इण खातर जिकौ अन्य भासा बोले, तो वो पराथना करै, की उणरौ अरथ भी जांण सकै। इण वास्तै जे म्हैं अन्य भासा में पराथना करूं, तो म्हारी आतमा पराथना करै है, पण म्हारी समझ कांम कोनीं दैवै। तो कांई करणौ चाहीजै? म्हैं आतमा ऊं भी पराथना करूंला, अर समझ ऊं भी पराथना करूंला। म्हैं आतमा ऊं गाऊंला, अर समझ ऊं भी गाऊंला। नीं तो जे थूं आतमा ही ऊं धन्यवाद करैला, तो पछै साधारण मिनख थारै धन्यवाद नै आमीन कीकर कैवैला, क्यूंकै वो तो कोनीं जांणै की थूं कांई कैवै है? थूं तो चौखी तरैह ऊं परमेसर नै धन्यवाद करै है, पण दूजै री उन्‍नति कोनीं होई। म्हैं अपणै परमेसर रौ धन्यवाद करूं हूं, की म्हैं थां सगळा ऊं घणौ अन्य भासा में बोलूं हूं। पण कलीसिया में अन्य भासा में दस हजार बातां कैवणै ऊं ओ म्हनै और भी चौखौ लागै है, की दूजौ नै सिखाणै रै लियै अपणी समझ ऊं पांच ही बातां कहूं। हे विसवासियो, थै समझ में टाबर नीं बणौ। बुराई मे तो टाबर रैवौ, पण समझ में समझदार बणौ। व्यवस्था में लिख्योड़ौ है, की परभु कैवै है, “म्हैं अन्य भासा बोलनैवाळौ रै द्‍वारा, अर पराए लोगां रै द्‍वारा इण लोगां ऊं बातां करूंला, तौभी वे म्हारी कोनीं सुणैला।” इण वास्तै अन्य भासा विसवासियो रै लियै चिन्ह कोनीं, पण दूजी जातियो रै लियै चिन्ह है, अर भविसयवांणी दूजी जातियो रै लियै कोनीं पण विसवासियो रै लियै चिन्ह है। तो जे कलीसिया एक जगा भेळी हो, अर सगळा रा सगळा अन्य भासा बोले, अर बाहरवाळा या दूजी जाति रा लोग मांय आ जावै तो कांई वे थांनै पागल कोनीं कैवै? पण जे सगळा भविसयवांणी करनै लागौ, अर कोई दूजी जाति या बाहरवाळौ मिनख मांय आ जावै, तो वो उणौरी बातां ऊं अपणै आप नै पापी समझण लागै ला अर वो उणौरै कैवण रै अनुसार डंड रौ भागी होवैला। अर उणरी बुराई सांमै आ जावैला, अर तद वो मूंडै री तरफ पड़नै परमेसर नै नमण करैला, अर मांन ले ला, की साचांणी परमेसर थौरे बीच मौजूद है। इण वास्तै हे विसवासियो, कांई करणौ चाहीजै? जद थै भेळा होवो हो, तो हरैक रै अंते में भजन, या उपदेस, या अन्य भासा, या प्रकासन, या अन्य भासा रौ अरथ बताणौ रैवै है। सगळौ आत्मिक उन्‍नति रै लियै होणौ चाहीजै। जे अन्य भासा में बातां करणी हो, तो दो या घणा हो तो तीन जन बारी-बारी ऊं बोले, अर एक मिनख अरथ बताए। पण जे अरथ बताणवाळौ नीं हो, तो अन्य भासा बोलनैवाळौ कलीसिया में सान्त रैवै, अर अपणै मन ऊं, अर परमेसर ऊं बातां करै। भविसयदाताओ में ऊं दो या तीन बोले, अर बाकी लोग उणरै वचन नै परखे। पण जे दूजौ जिकौ बैठौ है, अर किणी माथै परमेसर रौ दरसण हो, तो पैला वाळौ चुप हो जाए। क्यूंकै थै सगळा एक-एक करनै भविसयवांणी कर सकौ हो ताकी सगळा सीखें, अर सानति पावै। अर भविसयदाताओ री आतमा भविसयदाताओ रै वस में है। क्यूंकै परमेसर गड़बड़ी रौ कोनीं, पण सानति रौ परमेसर है। ज्यौ परमेसर रा लोगां री सगळी कलीसियाओ में है। लुगाईयां कलीसिया री सभा में चुप रै, क्यूंकै उणौनै बात करनै री अनुमति कोनीं, पण अधीन रैवणौ चाहीजै। ज्यौ व्यवस्था में लिख्योड़ौ भी है। जे वे कीं सीखणौ चावै, तो घर में अपणै-अपणै घरधणी ऊं पूछै, क्यूंकै लुगाई रौ कलीसिया में बातां करणी लाज री बात है। कांई परमेसर रौ वचन थारै में ऊं निकळयौ है? या कैवल थारै ही तांई पूगो है? जे अपणै आप नै भविसयदाता या आत्मिक मिनख समझै, तो ओ जांण ले, की जिकौ बातां म्हैं थांनै लिखूं हूं, वे परभु री आग्याओं है। पण जे कोई इण बातां नै नीं मांनै, तो थूं भी उणनै मती मांनै। इण वास्तै हे विसवासियो, भविसयवांणी करनै री धुन में रौ अर अन्य भासा बोलनै ऊं मना नीं करौ। पण सगळी बातां उचित अर व्यवस्थित रूप ऊं की जावै। हे विसवासियो, अबार म्हैं थांनै वोहीज सुभ संदेस बताऊं हूं जिकौ पैला सुणा चुकौ हूं, जीणनै थै स्वीकार भी कियो हो अर जिणमे थै स्थिर भी हो। जे उण सुभ संदेस नै जिकौ म्हैं थांनै सुणायो हो उणमे मजबुत रैवौ हो, तो उणीज रै द्‍वारा थौरो उद्धार भी होवै है। नीं तो थौरो विसवास करणौ फालतू होयौ। इण खातर म्हैं सबां ऊं पैला थांनै वोहीज बात पूगा दी, जिकौ म्हनै पुगी ही, की पवितर सास्तर रै वचन रै अनुसार यीसु मसीह म्हौरै पापों रै लियै मर गिया, अर धरती में बूरया गिया, अर पवितर सास्तर रै अनुसार तीजै दिन जी उठया। वो पतरस नै और, इणरै पछै बारैह में ऊं बचयोड़े प्रेरितों नै दिखाई दिया। पछै वो पांच सौ ऊं घणौ विसवासी लोगां नै एक साथै दिखाई दिया, जिणमे ऊं घणाहारा अबै तांई जीवता है जद की किता ही मौत री ऊंग सो गिया है। पछै वो याकूब नै दिखाई दिया उणरै पछै सगळै प्रेरितों नै दिखाई दिया। वो सगळौ रै पछै म्हनै भी दिखाई दिया। म्हैं अधूरे दिनां रौ जनमियोड़ौ टाबर जैड़ौ हूं। क्यूंकै म्हैं प्रेरितों में सबां ऊं छोटौ हूं, बल्कि प्रेरित कैवण रै लायक भी कोनीं, क्यूंकै म्हैं परमेसर री कलीसिया नै सताई ही। पण म्हैं जिकौ कीं भी हूं, परमेसर रै करपा ऊं हूं। अर उणरी करपा जिकौ म्हारै माथै होई, वो फालतू नीं होई। पण म्हैं उण सबां ऊं बढ़नै मेनत भी की तो भी ओ म्हारी तरफ ऊं कोनीं होयौ, पण परमेसर री करपा ऊं जिकौ म्हारै माथै ही। इण वास्तै चाहे म्हैं हूं, चाहे वे हो, म्हौ ओहीज परचार करौ हो, अर इणी माथै थै विसवास भी कियो। इण वास्तै जद की मसीह रौ ओ परचार कियो जावै है की वो मरयोड़ौ में ऊं जी उठयौ, तो थौरे में ऊं किता क्यूं कैवै है की मरयोड़ौ रौ जी उठणौ है ही कोनीं? जे मरयोड़ौ रौ जी उठणौ है ही कोनीं, तो मसीह भी कोनीं जी उठयौ। अर जे मसीह कोनीं जी उठयौ, तो म्हौरौ परचार करणौ भी फालतू है, अर थौरो विसवास भी फालतू है। अर म्हौ परमेसर रा झूठा गवाई ठैरया। क्यूंकै म्हौ परमेसर रै बारै में आ गवाई दी है की उणै मसीह नै मरयोड़ौ में ऊं जीवतौ कियो। पण जे मरयोड़ा वास्तव में जीवता नीं किया जाय तो परमेसर मसीह नै भी जीवतौ कोनीं कियो। अर जे मुड़दा नीं जी उठै, तो मसीह भी नीं जी उठयौ। अर जे मसीह नीं जी उठयौ, तो थौरो विसवास फालतू है, अर थै अबै तांई अपणै पापों में फसयोड़ा हो। बल्कि जिकौ मसीह में सो गिया है, वे भी नास होया। जे म्हौ कैवल इणी जीवन में मसीह ऊं आसा राखौ हो, तो म्हौ सगळै मिनखौ ऊं घणा अभागा हो। पण साचांणी मसीह मरयोड़ौ में ऊं जी उठयौ है, अर जिकौ मर गिया हा, उणमे ऊं पैला वो जी उठा। क्यूंकै जद एक मिनख रै जरियै मौत आई, तो एक मिनख रै जरियै मरयोड़ौ रौ जी उठणौ भी आयौ। अर ज्यूं आदम में सगळा मरे है, व्यौंही मसीह में सगळा जिलाया जावैला। पण हरैक अपणी-अपणी बारी ऊं, पैलौ फळ मसीह, इणरै पछै मसीह रै पाछौ आवण पे जिकौ मसीह रा लोग है वो सगळा जीवता किया जावैला। इणरै पछै अंत होवैला। उण वगत मसीह सगळी परधानता अर सगळौ अधिकार अर सामरथ रौ अंत करनै राज नै परमेसर पिता रै हाथ में सूंप दैला। क्यूंकै जद तांई की वो अपणै बैरियो नै अपणै पगां तळै नीं कर दे, तद तांई उणरौ राज करणौ जरुरी है। सबां ऊं आखरी बैरी जिकौ नास कियो जावैला वो मौत है। क्यूंकै, “परमेसर नै सगळौ उणरै पगां तळै कर दियौ है।” पण जद वो कैवै है की सगळौ उणरै अधीन कर दियौ है तो साफ है, की जिणै सगळौ मसीह रै अधीन कर दियौ, वो आप अलग रियौ। अर जद सगळौ परमेसर रै बेटे रै अधीन हो जावैला, तो बेटौ आप भी परमेसर रै अधीन हो जावैला जिणनै सगळौ बेटे रै अधीन कर दियौ। ताकी सगळै में परमेसर ही सगळौ हो। जे मरयोड़ौ में ऊं जी उठणौ है ही कोनीं तो उणौरौ कांई होवैला, जिकौ लोग मरयोड़ौ रै लियै बतिस्मो लेवे है, वे कांई करैला? जे मरयोड़ौ रौ जी उठणौ है ही नीं, तो पछै क्यूं उणरै लियै बतिस्मो लेवो हो? अर म्हौ भी क्यूं हर घड़ी जोखम में पड़या रौ? हे विसवासियो, म्हैं थौरे बारै में घंमड करूं हूं, की थै जिकौ म्हौरै मसीह यीसु में हो उणरी वजै ऊं म्हैं हर दिन मौत रौ सामनौ करूं हूं। जे इफिसुस नगर में लोग म्हारै ऊं जंगळी जिनावरां रै ज्यूं लड़या, तो म्हनै कांई फायदो होयौ? जे मुड़दा जिलाया नीं जावैला, तो ज्यौ कीं लोग कैवै है, “आओ, खाओं-पीओं, क्यूंकै कल तो मर ही जावोला।” धोखे में मत रैवौ, भूंडी संगति चौखै चरितर नै बिगाड़ दैवै है। धरम रै लियै जाग उठो अर पाप नीं करौ। क्यूंकै कीं ऐड़ा है जिकौ परमेसर नै कोनीं जांणै। म्हैं थांनै बेजता करनै रै लियै ओ कैवूं हूं। अबार कोई ओ कैवैला, “मुड़दा कीण रीति ऊं जी उठै है, अर कैड़ी देह रै साथै आवै है?” थै गैला मती बणौ, जिकौ कीं थूं बोए है, जैड़ी तांई वो नीं मरेला उठै तांई नीं जिलायौ जावैला। अर जिकौ थूं बोए है, ओ वो देह कोनीं जिकौ पैदा होवणवाळौ है, पण थै तो सिरफ बीज हो, चाहे गेहूंं रौ, चाहे किणी और अनाज रौ। पण परमेसर अपणी इछा रै अनुसार उणनै सरीर दैवै है, अर हरैक बीज नै उणरौ खास सरीर। सगळौ सरीर एक जैड़ौ कोनीं। मांनखै रौ सरीर अलग है, पसुओ रौ सरीर अलग है। पंखैरूओ रौ सरीर अलग है। मछलियो रौ सरीर अलग है। सरीर सरगिए भी होवै है अर सारीरिक भी। सरगिए सरीर रौ तेज अलग होवै है अर सारीरिक सरीर रौ अलग। सूरज रौ तेज अलग है, चांद रौ तेज अलग है, अर तारागणो रौ तेज अलग है, क्यूंकै एक तारै ऊं दूजै तारै रौ तेज अलग है। मरयोड़ौ रौ जी उठणौ भी ऐड़ौ ही होवै है। सरीर नासवान दसा में बोया जावै है, अर अविनासी रूप में जी उठै है। वो बिना कदर रै साथै बोयो जावै है, अर तेज रै साथै जी उठै है। कमजोरी रै साथै बोयो जावै है, अर सामरथ रै साथै जी उठै है। सारीरिक सरीर बोयो जावै है, अर आत्मिक सरीर जी उठै है। जद की सारीरिक सरीर है, तो आत्मिक सरीर भी है। ऐड़ौ ही लिख्यौ भी है, “पैलौ मिनख, मतलब आदम, जीवतौ प्राणी बण्यौ” अर आखरी आदम, जिकौ मसीह है वो जीवन देवणवाळी आतमा बणी। पैला आत्मिक जीवन कोनीं मिळै है, बल्कि सारीरिक जीवन मिळै है, इणरै पछै आत्मिक जीवन मिळै है। पैलौ मिनख धरती ऊं मतलब माटी रौ हो। दूजौ मिनख सरगिए है। जैड़ौ मिनख माटी रौ हो, वैड़ौ ही वो भी है जिकौ माटी रा है। अर जैड़ौ मिनख सरगिए है, वैड़ौ ही वो भी सरगिए है। अर ज्यूं म्हौ उणरौ जिकौ माटी रै मिनख रौ रूप धारण कियो, वैड़ौ ही उण सरगिए मिनख रौ रूप भी धारण करौला। हे विसवासियो, म्हैं ओ कैवूं हूं की मांस अर लोई परमेसर रै राज रै वारिस नीं हो सकै। अर नीं नासवान अविनासी रौ वारिस हो सकै है। देखौ, म्हैं थौरे ऊं भेद री बात कैवूं हूं, की म्हौ सगळा तो कोनीं मरो, पण बदळ जावोला। अर ओ पल भर में, पलक झपकते ही आखरी तुरही फूकते ही होवैला। क्यूंकै तुरही फूंकी जावैला, अर मुड़दा अविनासी दसा में जीवता किया जावैला, अर म्हौ बदळ जावोला। क्यूंकै जरुरी है, की ओ नासवान सरीर अविनासी नै पैहर ले, अर मरणहार सरीर अमरता नै पैहर ले। अर जद ओ नासवान अविनासी नै पैहर ले ला, अर ओ मरणहार अमरता नै पैहर ले ला, तद ओ वचन जिकौ लिख्यौ है, पूरौ हो जावैला, जीत मौत नै निगळ लियौ। “हे मौत थारी जीत कठै रही? हे मौत थारौ डंक कठै रियौ?” मौत रौ डंक पाप है, अर पाप रौ बळ है व्यवस्था। पण परमेसर रौ धन्यवाद हो, जिकौ म्हौरै परभु यीसु मसीह रै द्‍वारा म्हौ नै जयवन्त करै है। इण वास्तै हे म्हारै प्यारै विसवासियो, मजबुत अर अटल रैवौ, अर परभु रै कांम में हमेसां बढ़ता जाओ, क्यूंकै ओ जांणौ हो, की थौरी मेनत परभु में फालतू कोनीं है। अबार उण चन्दे रै बारै में जिकौ यहूदिया परदेस रै परमेसर रै लोगां रै लियै कियो जावै है, जैड़ी आग्या म्हैं गलातिया परदेस री कलीसियाओ नै दी, वैड़ौ ही थै भी करौ। हरैक हपतै रै पैलै दिन थौरे में ऊं हरैक अपणी आवक रै अनुसार कईक आपरै खनै राख छोड़ै, की म्हारै आवण पे थांनै चन्दो भेळौ नीं करणौ पड़ै। अर जद म्हैं आऊंला, तो जिणनै थै चावौ ला उणौनै म्हैं चिठ्ठियो देयनै भेज दूंला, की थौरो दांन यरुसलेम पूगा दे। अर जे म्हारौ भी जावणौ सही होयौ, तो वे म्हारै साथै जावैला। म्हैं मकिदुनिया होयनै थौरे खनै आऊंला, क्यूंकै म्हनै मकिदुनिया होयनै जावणौ ही है। जे हो सकै, तो म्हैं आपरै उठै कीं दिनां तांई रैवूंला अर सरदी रौ मौसम में थौरे उठै रैवूं, तद जिण तरफ म्हारौ जावणौ हो उण तरफ थै म्हनै सुविधा रै साथै विदा कर दैणौ। क्यूंकै म्हैं नीं चावूं की थौरे ऊं कैवल चालतो-चालतो मिळूं। पण म्हनै आसा है की जे परभु चावै तो कीं वगत तांई थौरे साथै रैवूंला। पण म्हैं पिन्तेकुस्त तैंवार तांई एठैज इफिसुस में रैवूंला, क्यूंकै म्हारै वास्तै उठै एक मोटो अर उपयोगी सेवा रौ द्धार खुलयो है, अर उठै म्हारा कई विरोधी भी है। जद तीमुथियुस थौरे खनै आ जावै, तो देखणौ की वो थौरे एठै बेखौफ रैवै। क्यूंकै वो म्हारै जैड़ौ परभु रौ कांम करै है। इण वास्तै कोई उणनै तुच्छ नीं जांणै, पण उणनै खुसी ऊं इण तरफ पूगा दीजौ की म्हारै खनै आ जावै। क्यूंकै म्हैं उणरी बाट जोह रियौ हूं की वो विसवासी भाइयो रै साथै आवै। भाई अपुल्लोस ऊं म्हैं घणी विनती करी की भाइयो रै साथै थौरे खनै आवै। पण उणनै इण वगत जावण री कीं भी इछा नीं की, पण जद मौकौ मिळैला तो आ जावैला। जागता रैवौ, विसवास में पका रैवौ, बेखौफ रैवौ, ताकतवर होवो। जिकौ कीं करौ परैम ऊं करौ। हे विसवासी भाइयो, थै स्तिफनास रै घराणै नै जांणौ हो की वे अखया परदेस रौ पैलौ फळ है। अर परमेसर रै लोगां री सेवा रै लियै तैयार रैवै है। इण वास्तै म्हैं थौरे ऊं विनती करूं हूं की ऐड़ै लोगां रै अधीन रैवौ, बल्कि हरैक रै जिकौ इण कांम में मेहनती अर सहायक है। म्हैं स्तिफनास अर फूरतूनातुस अर अखइकुस रै आवण ऊं खुस हूं, क्यूंकै थौरी तरफ ऊं जिकौ कमी ही, वो पूरी होयगी। उणौनै म्हारै अर थौरे मन री चिंता नै आगी कर दी। आप ऐड़ै लोगां रौ कदर करौ। आसिया री कलीसियाओ री तरफ ऊं थांनै नमस्कार। अक्‍किला अर प्रिस्का रौ अर उणरै घर री कलीसिया रौ भी थांनै परभु में घणा न घणा नमस्कार। एठै रा सगळै भाइयो रौ थांनै नमस्कार। हाथ मिळान आपस में नमस्कार करौ। म्हैं खुद पौलुस अपणै हाथ ऊं नमस्कार लिखूं हूं। जे कोई परभु ऊं परैम नीं राखै तो वो सापित हो। हे म्हौरै परभु, आ। परभु यीसु री करपा थांरै माथै होती रैवै। म्हारौ परैम मसीह यीसु में थांरै सगळौ रै साथै रै। आ चिठ्ठी म्हैं पौलुस री तरफ ऊं जिकौ परमेसर री इछा ऊं मसीह यीसु रौ प्रेरित हूं, अर भाई तीमुथियुस री तरफ ऊं परमेसर री उण कलीसिया रै लियै, जिकौ कुरिन्थुस नगर में है, अर अखया रै सगळै परमेसर रै लोगां रै नाम लिख रियौ हूं। म्हौरै पिता परमेसर अर परभु यीसु मसीह री तरफ ऊं थांनै करपा अर सानति मिळती रैवै। म्हौरै परभु यीसु मसीह रै पिता परमेसर रौ धन्यवाद हो, जिकौ दया रौ पिता अर सगळी तरैह री तसली देवणवाळौ परमेसर है। वो म्हौरै सगळै तकलीफो में तसली दैवै है, ताकी म्हौ उण तसली रै खातर जिकौ परमेसर म्हौ नै दैवै है, म्हौ उणौनै भी तसली दे सकौ, चाहे किणी तरैह री तकलीफ में हो। क्यूंकै ज्यूं मसीह रै घणौ दुखौ में म्हौ सहभागी होया हो, व्यौंही म्हौ घणा तसली में भी मसीह रै द्‍वारा सहभागी होया हो। जे म्हौ तकलीफ पाओ हो, तो ओ थौरी तसली अर उद्धार रै लियै है अर जे तसली पाओ हो, तो ओ थौरी तसली रै लियै है। जिणनै थै हीमत रै साथै तकलीफो नै सह लेवो हो, जिणनै म्हौ भी सह रिया हो। म्हौरी आसा थौरे बारै में पकी है, क्यूंकै म्हौ जांणौ हो, की थै ज्यौ म्हौरै दुखौ में, व्यौंही तसली में भी सहभागी हो। हे विसवासियो, म्हौ नीं चावौ की थै म्हौरै उण तकलीफ ऊं अजांण रैवौ, जिकौ आसिया परदेस में म्हौरै माथै पड़ी, म्हौ ऐड़ी तकलीफो में पड़ गिया हा, जिकौ म्हौरी ताकत ऊं बाहर हो, एठै तांई की म्हौ जीवन री आस तांई छोड़ दी ही। साचांणी, म्हौ म्हौरै मन में मांन लियौ हो, की म्हौरै माथै मौत री सजा री आग्या हो चुकी है, ताकी म्हौ म्हौरौ भरोसौ नीं राखौ, बल्कि परमेसर रौ जिकौ मरयोड़ौ में ऊं जिलावै है। उणीज म्हौ नै मौत रै ऐड़ै मोटे संकट ऊं बचाया, अर बचावैला। अर उण माथै म्हौरी आ आसा है की वो आगै भी बचातौ रैवैला। अर थै भी मिळनै पराथना रै जरियै म्हौरी मदद करौ हो, की जिकौ वरदान घणै लोगां रै जरियै म्हौ नै मिळियौ, उणरै कारण घणा लोग म्हौरी तरफ ऊं परमेसर नै धन्यवाद करै। क्यूंकै म्हौ अपणै अंते री इण गवाई माथै घंमड करौ हो, की जगत में अर खास करनै थौरे बीच म्हांरौ व्यवहार परमेसर रै लायक ऐड़ौ पवितर अर सचाई रै साथै हो, जिकौ सारीरिक ग्यांन ऊं कोनीं, पण परमेसर री करपा रै साथै हो। म्हौ थांनै और कीं नीं लिखौ, सिरफ वो जिकौ थै पढ़ो अर मांनौ भी हो। अर म्हनै आसा है की ज्यौ अबै थै म्हौ नै पूरी तरैह ऊं समझ नीं सकया, थै म्हौ नै पूरी तरैह ऊं समझ जाओला। ताकी म्हौ थौरे घंमड रौ कारण हो। व्यौंही थै भी परभु यीसु रै आवण रै दिन म्हौरै लियै घंमड रौ कारण ठैरोला। इण भरोसे ऊं म्हैं चावतौ हो की पैला थांरै खनै आऊं, की थांनै एक वळै आसीस मिळै। अर थौरे खनै ऊं होयनै मकिदुनिया जाऊं, अर पाछौ मकिदुनिया ऊं थौरे खनै आऊं अर थै म्हनै यहूदिया री तरफ कईक आगै तांई पूगाओ। इण वास्तै म्हैं जिकौ इछा की ही तो कांई म्हैं फुरती दिखाई? या जिकौ करणौ चावूं हूं कांई सरीर रै अनुसार करणौ चावूं हूं, की म्हैं बात में “हां, हा” भी करूं, अर “ना, ना” भी करूं? परमेसर साचौ गवाई है की म्हौरै उण वचन में जिकौ थौरे ऊं कयौ, “हां” अर “ना” दोनूं कोनीं पाया गिया। क्यूंकै परमेसर रौ बेटौ, यीसु मसीह जिणरौ, म्हौरै द्‍वारों मतलब म्हारै अर सिलवानुस अर तीमुथियुस रै द्‍वारों थौरे बीच में परचार होयौ, उणमे “हां” अर “ना” दोनूं कोनीं हा, पण यीसु मसीह में “हां” री “हां” होई। क्यूंकै परमेसर रा जितरा वायदा है, वे सगळा यीसु मसीह में “हां” रै साथै है इण वास्तै उणरै जरियै “आमीन” म्हौ कैवौ हो, की म्हौरै जरियै परमेसर री महिमा हो। वोहीज परमेसर है जिकौ म्हौ नै थौरे साथै मसीह में मजबुत करै है, अर जिणै म्हौ नै अभिसेक किया। वोहीज परमेसर म्हौ ऊपर आपरी मोहर लगाई, अर जमानत रै रूप में म्हौरै काळजै नै पवितर आतमा दीनी है। म्हैं परमेसर नै गवाई करनै कहूं की, दुबारो कुरिन्थुस में इण वास्तै नीं आयौ, की म्हैं थांनै तकलीफ दैणौ नीं चावतौ हो। ओ कोनीं, की म्हौ विसवास रै बारै में थारै ऊपर मालिक हो। पण थौरे आंणंद में सहायक हो क्यूंकै थै विसवास में पका रैवौ हो। इण वास्तै म्हैं म्हारै मन में ठान लियौ हो की वळै थौरे खनै उदास करणै नीं आऊं। क्यूंकै जे म्हैं थांनै उदास करूं, तो म्हनै खुस करणैवाळौ कुण होवैला? कैवल थै इज जिणौनै म्हैं उदास करूं। अर म्हैं आहीज बात थांनै इण वास्तै लिखी ही, की कठैई ऐड़ौ नीं हो, की म्हारै आवण पे जिण ऊं म्हनै आंणंद मिलनौ चाहीजै, म्हैं उणौ ऊं उदास होऊं। क्यूंकै म्हनै थां सगळौ ऊपर इण बात रौ भरोसौ है, की जिकौ म्हारौ आंणंद है, वोहीज थां सगळौ रौ आंणंद है। काळजै रै कस्ट अर कलेस रै खातर रो-रोयनै म्हैं थांनै चिठ्ठी लिखी ही, इण वास्तै कोनीं, की थांनै दुखी करूं पण इण वास्तै की थै उण घणै परैम नै जांण लौ, जिकौ म्हनै थौरे ऊं है। अर जे किणी नै दुख दियौ है, तो उणै म्हनै इज कोनीं बल्कि कीं-कीं थां सगळौ नै दुख दियौ है। म्हैं उणरै साथै घणी कठोरता नीं करतौ ऐड़ै मिनख रै लियै ओ डंड जिकौ थां विसवासी भाइयो में ऊं घणै जणौ दियौ, घणौ है। इण वास्तै इण ऊं ओ भलौ है की उणरौ अपराध माफ करौ। अर तसली दो, नीं हो की ऐड़ौ मिनख उदासी में डूब जावै। इण खातर म्हैं थांरै ऊं विणती करूं हूं, की उणनै अपणै परैम रौ सबूत दो। क्यूंकै म्हैं इण वास्तै भी लिख्यौ हो, की थांनै परख लूं, की थै म्हारी सगळी बातां नै मांनणै रै लियै तैयार हो, की कोनीं। जिणरौ थै कीं माफ करौ हो उणनै म्हैं भी माफ करूं हूं, क्यूंकै म्हैं भी जिकौ कीं माफ किया है, जे किया है, तो थौरे खातर मसीह में होयनै माफ किया है, की सैतान रौ म्हौ ऊपर दाव नीं चलै। क्यूंकै म्हौ उणरी चाल ऊं अजांण कोनीं। जद म्हैं मसीह रौ सुभ संदेस सुणाणै त्रोआस आयौ, तद परभु नै म्हारै वास्तै एक द्धार खोल दियौ। पण उठै म्हैं अपणै भाई तीतुस नै नीं पायो। इण वास्तै म्हारै काळजै में सानति नीं मिळी, अर पछै उणौ ऊं विदा होयनै म्हैं मकिदुनिया परदेस चाल दियौ। पण परमेसर रौ धन्यवाद हो, जिकौ मसीह में हमेसां म्हौ नै जय रै तैंवार में लियै फिरै है, अर अपणै ग्यांन री सुगंध म्हौरै जरियै हरैक जगा फैलावे है। क्यूंकै म्हौ परमेसर रै नजीक उद्धार पावणवाळौ, अर नास होवणवाळौ, दोनूं रै लियै मसीह री सुगंध हो। जिकौ नास हो रिया है, उणरै लियै म्हौ मौत री घातक बदबू, अर उद्धार हासल करता जा रिया मिनखौ रै लियै जीवन री प्राणदायी सुगंध है। पण इण बातां रै लायक कुण है? म्हौ उण सगळौ रै ज्यूं कोनीं, जिकौ परमेसर रै वचन में अपणै फायदे रै लियै मिलावट करै है। पण साचै मन ऊं, अर परमेसर री तरफ ऊं परमेसर नै हाजिर जांणनै मसीह में बोलो हो। कांई म्हौ वळै अपणी बड़ाई करन लागा? या म्हौ दूजै लोगां रै ज्यूं सिफारिस री चिठ्ठियो थौरे खनै लाणी या थौरे ऊं लेणी है? म्हौरी चिठ्ठी थै इज हो, जिकौ म्हौरै काळजै माथै लिख्यौड़ी है, अर उणै सगळा मिनख पिछांणै अर पढ़े है। ओ परगट है, की थै मसीह री चिठ्ठी जैड़ा हो, जिणनै म्हौ सेवकों रै ज्यूं लिख्यौ, अर जिकौ स्याही ऊं कोनीं, पण जीवते परमेसर रै पवितर आतमा ऊं भाठै री पटियों माथै कोनीं, पण काळजै री मांस रूपी पटियों माथै लिखी है। म्हौ आ बात इण वास्तै कैवौ हो, क्यूंकै मसीह रै जरियै म्हौ नै परमेसर माथै पूरौ भरोसौ है। ओ नीं, की म्हौ अपणै आप ऊं इण लायक है, की अपणी तरफ ऊं किणी बात रौ विचार कर सकौ। पण म्हौरी योग्यता परमेसर री तरफ ऊं है। उणै म्हौ नै नई वाचा रै सेवक होणै रै लायक भी किया। आ वाचा लिख्योड़ी व्यवस्था री कोनीं पण पवितर आतमा री है। लिख्योड़ी व्यवस्था मौत नै पैदा करै है मगर पवितर आतमा जीवन दैवै है। अर जे मौत लाणै वाळी व्यवस्था जिणरा आखर भाठौ माथै खोदया गिया हा, एठै तांई तेजोमय होई, की मूसा रै मूंडै माथै तेज रै कारण जिकौ घटतो भी जातौ हो, इजरायल रा लोग उणरै मूंडै माथै दिस्टी नीं कर सकता हा। जे पुराणी व्यवस्था इतरी तेजोमय ही, तो आतमा री व्यवस्था और भी तेजोमय क्यूं नीं होवैला? क्यूंकै जद दोसी ठैरानेवाळी व्यवस्था तेजोमय ही, तो धरमी ठैरानेवाळी व्यवस्था और भी तेजोमय क्यूं नीं होवैला? सच तो ओ है की नई व्यवस्था रै तेजोमय रै सांमै पुराणी व्यवस्था रौ तेजोमय, कीं तेजोमय नीं ठैरयो। क्यूंकै जद वो जिकौ घटतो जातौ हो वो तेजोमय हो, तो वो जिकौ पको रैवैला, और भी तेजोमय क्यूं नीं होवैला? इण वास्तै ऐड़ी आसा राखनै म्हौ हीमत रै साथै बोलो हो। अर मूसा रै ज्यूं कोनीं, जिणै आपरै मूंडै माथै पड़दो नाख्यौ हो, ताकी इजरायली उण घटनेवाळे तेज रै अंत नै नीं देखे। पण वे कठोर मन रा हो गिया, क्यूंकै आज तांई पुराणै नियम नै पढ़ते वगत उणौरै अकल माथै वोहीज पड़दो पड़ियौ रैवै है। पण वो सिरफ मसीह में हट जावै है। अर आज तांई जद कदैई मूसा री किताब पढ़ी जावै है, तो उणरै हिरदा ऊपर पड़दो पड़ियौ रैवै है। पण जद कदैई किणी री अकल परभु री तरफ फिरैला, तद वो पड़दो हट जावैला। परभु तो आतमा है। अर जठै कठैई परभु री आतमा है उठै आजादी है। पण जद म्हौ सगळौ रै उघाड़े मूंडै ऊं परभु रौ तेज इण तरैह परगट होवै है, जिण तरैह कांच में। तो परभु रै द्‍वारा जिकौ आतमा है, म्हौ उणीज तेजस्वी रूप में होळै-होळै करनै बदळ रिया हो। इण वास्तै जद म्हौ माथै ऐड़ी दया होई, की म्हौ नै आ सेवा मिळी, तो म्हौ हीमत कोनीं छोड़ौ। पण म्हौ लाज रा गुपत कांमां नै त्याग दिया, अर नीं चतुराई ऊं चालौ, अर नीं परमेसर रै वचन में मिलावट करौ हो, पण साच नै परगट करनै, परमेसर रै सांम्ही हरैक मिनख रै अंते में भलाई बैठाओ हो। पण जे म्हौरै सुभ संदेस माथै पड़दो पड़ियौ है, तो ओ नास होणैवाळौ रै लियै ही पड़ियौ है। अर उण अविसवासियो रै लियै, जिणरी बुद्धि नै इण संसार रै देवता यानि सैतान नै आंधी कर दी है, ताकी मसीह जिकौ परमेसर रौ प्रतिरूप है, उणरै तेजोमय सुभ संदेस रौ उजाळौ उण माथै नीं चमकै। क्यूंकै म्हौ म्हांरौ कोनीं, पण मसीह यीसु रौ परचार करौ हो, की वो परभु है। अर अपणै बारै में ओ कैवौ हो, की म्हौ यीसु रै कारण थौरा सेवक हो। इण वास्तै की परमेसर ही है, जिणै कयौ, “अंधारै में ऊं जोत चमकै,” अर वोहीज म्हौरै काळजै में जोत चमकाई, ताकी म्हौ नै यीसु मसीह में परमेसर री महिमा रै ग्यांन री जोत मिळ सकै। पण म्हौ जिकौ माटी रै बरतनो रै जैड़ा हो उणमे ओ आत्मिक धन इण वास्तै राख्यौ है, की ओ साफ हो जावै की आ असीम सामरथ म्हौरी तरफ ऊं कोनीं, बल्कि परमेसर री तरफ ऊं है। म्हौ च्यांरूमेर ऊं कलेस तो भोगो हो, बल्कि कुचलया कोनीं जाओ। घबराओ हो, पण निरास कोनीं होवो। सताया तो जाओ हो, पण त्यागा कोनीं जाओ। पटकिया तो जाओ हो, पण नास कोनीं होवो। हरैक वगत म्हौ यीसु री मौत नै अपणी देह में लियै फिरौ हो, की यीसु रौ जीवन भी म्हौरी देह में परगट हो। क्यूंकै म्हौ जीते जी हमेसां यीसु रै खातर मौत रै हाथ में सूंपया जाओ हो की यीसु रौ जीवन भी म्हौरै मरणहार सरीर में परगट हो। इण खातर मौत तो म्हौ ऊपर असर राखै है पण जीवन थौरे ऊपर। इण वास्तै की म्हौ म्हैं वोहीज विसवास री आतमा है, जिणरै बारै में लिख्यौ है, की, “म्हैं विसवास करयौ, इण वास्तै म्हैं बोलयो।” अतस म्हौ भी विसवास करौ हो, इण वास्तै बोलो हो। क्यूंकै म्हौ जांणौ हो, जिणै परभु यीसु नै जिलायौ, वोहीज म्हौ नै भी यीसु में भागी जांणनै जिलावैला, अर थौरे साथै अपणै सांमै हाजिर करैला। क्यूंकै सगळी चीजों थौरे वास्तै है, ताकी करपा घणै लोगां रै खनै पुगै अर इणरै जरियै परमेसर री महिमा रै लियै घणा ऊं घणा धन्यवाद रौ कारण बणै। इण वास्तै म्हौ हीमत कोनीं छोड़ौ। जे म्हौरौ बाहरी मानवता नास भी होतो जा रियौ है, तो भी म्हौरौ भीतरी मानवता हर दिन नयो होतो जा रियौ है। क्यूंकै म्हौरौ पलभर रौ छोटौ कलेस म्हौरै वास्तै घणौ ही खास अर अनत महिमा दिलावै है, जिणरी बराबरी किणी ऊं नीं की जा सकै। अर म्हौ तो देख्योड़ी चीजों नै कोनीं, पण अणदेखी चीजों नै देख्यां करौ हो, क्यूंकै देख्योड़ी चीजों थोड़े ही दिनां री है, पण अणदेखी चीजों हमेसां बणी रैवै है। क्यूंकै म्हौ जांणौ हो, की जद म्हांरौ घर मतलब म्हौरी सारीरिक देह नै गिरा दियौ जावैला तो म्हौरै लियै परमेसर री तरफ ऊं एक ऐड़ौ घर मतलब देह तय कियोड़ी है, जिकौ मिनख रै हाथ रा बणायोड़ा कोनीं पण सरगिए अर अनत काल रा है। म्हौ इण सारीरिक देह में रड़ता होया उण सरगिए देह नै धारण करणै री लालच करता रैवौ हो। क्यूंकै उणनै धारण करणै रै पछै म्हौ उघाड़ा नीं रौ ला। अर म्हौ इण देह में रैवता होया बोझ ऊं दबयोड़ा रड़ता रैवौ हो। क्यूंकै म्हौ उतारना कोनीं, बल्कि धारण करणा चावौ हो, ताकी वो जिकौ मरनहार जीवन में बदळ जाए। अर जिणै म्हौ नै इण बात रै वास्तै तैयार किया है वो परमेसर है, जिणै म्हौ नै इण बात री जमानत में पवितर आतमा भी दीनी है। इण वास्तै म्हौ हीमत राखौ हो अर ओ जांणौ है, की जैड़ी तांई म्हौ सरीर में रैवौ हो, तद तांई परभु ऊं आगा हो। क्यूंकै म्हौ देखणै रै अनुसार कोनीं, पण विसवास ऊं चालौ हो। इण वास्तै म्हौ हीमत राखौ हो, अर सरीर ऊं आगा होयनै परभु रै साथै रैवणौ और भी उतम समझौ हो। इण खातर म्हौरै मन में इछा है, की चाहे सरीर हो, या ना हो बल्कि म्हौ परभु नै भाता रैवौ। क्यूंकै जरुरी है, की म्हौ सगळौ रा हाल मसीह रै न्याव आसन रै सांमै खुल जाए, की हरैक मिनख अपणै-अपणै भलै भूंडै कांमां रौ बदळौ जिकौ उणै सरीर रै जरियै किया हो, वो पावै। इण वास्तै परभु रौ भय मांन नै म्हौ लोगां नै समझाओ हो पण परमेसर नै म्हौरा हाल मालूम है, अर म्हारी आसा आ है, की थौरे अंते में भी इणनै पिछांण लियौ है। म्हौ तौभी अपणी बड़ाई थौरे सांमै कोनीं करौ बल्कि म्हौ अपणै बारै में थांनै घंमड करनै रौ मौकौ देवो हो, की थै उणौनै जबाब दे सकौ, जिकौ मन माथै कोनीं, बल्कि दिखावटी बातां माथै घंमड करै है। जे लोग समझै म्हौ गैला हो, तो परमेसर रै लिए हो। जे म्हौ अबार सावचेत हो, तो थौरे वास्तै हो। क्यूंकै मसीह रौ परैम म्हौ नै मजबुत कर दैवै है। इण वास्तै की म्हौ ओ समझौ हो, की जद एक सगळौ रै लियै मरयो तो सगळा मर गिया। अर मसीह जिणरी मौत सगळौ रै लिए होई, की जिकौ जीवता है, वे आगै ऊं अपणै वास्तै नीं जीए पण उणरै वास्तै जिकौ उणौरै वास्तै मरयो अर पाछौ जी उठयौ। अबै ऊं म्हौ किणी नै दुनिया री निजर ऊं नीं देखोला। पण एक वगत हो, जद म्हौ मसीह नै वैड़ौ इज देख्यौ हो, बल्कि अबै ऐड़ौ कोनीं है। इण वास्तै जे कोई मसीह में है तो वो नई सिस्टी है। पुराणी बातां बीत गी है, देखौ, वे सगळी नई होय गई। अर सगळी बातां परमेसर री तरफ ऊं है, जिणै मसीह रै जरियै अपणै साथै म्हौरौ मेल मिलाप कियो, अर मेल मिलाप री सेवकाई म्हौ नै सूंप दी है। मतलब परमेसर नै मसीह में होयनै अपणै साथै संसार रौ मेल मिलाप कर लियौ, अर उणरै पापों रौ दोस उण माथै नीं लगायो अर उणै मेल मिलाप रौ वचन म्हौ नै सूंप दियौ है। इण वास्तै म्हौ मसीह रा राजदूत हो, मांनौ परमेसर म्हौरै जरियै समझावै है। म्हौ मसीह री तरफ ऊं विनती करौ हो, की परमेसर रै साथै मेल मिलाप कर लौ। मसीह रौ कोई पाप नीं हो। तौभी परमेसर नै म्हौरै भलाई रै वास्तै उणनै पाप रौ भागी बणायौ, जिण ऊं म्हौ उणरै जरियै परमेसर री पवितरता रा भागी बण सकौ। म्हौ जिकौ परमेसर रा भागीदार हो ओ भी समझाओ हो, की परमेसर री करपा जिकौ थौरे माथै होई, उणनै फालतू मती जावण दो। क्यूंकै परमेसर तो कैवै है, “अपणी प्रसन्‍नता रै वगत म्हैं थारी सुण ली, अर उद्धार रै दिन म्हैं थारी मदद की।” सुणौ, अबार प्रसन्‍नता रौ वगत है। सुणौ, अबार उद्धार रौ दिन है। म्हौ किणी बात में ठोकर खावण रौ कोई भी मौकौ नीं देवो, ताकी म्हौरी सेवा ऊपर कोई दोस नीं आए। पण हरैक बात में परमेसर रै सेवकों रै ज्यूं अपणै सद्गुणों नै परगट करौ हो, घणै सब्र ऊं, कलेसों ऊं, दरिद्रता ऊं, दुखौ ऊं, कोड़ा खाने ऊं, जेळ होणै ऊं, हुलड़ करनै ऊं, घणी मेनत ऊं, जागतौ रैवण ऊं, उपवास करनै ऊं, पवितरता ऊं, ग्यांन ऊं, धीरज ऊं, दयालुता ऊं, पवितर आतमा ऊं, साचै परैम ऊं, सचाई रै वचन ऊं, परमेसर री सामरथ ऊं, धारमिकता रै हथियारों ऊं जिकौ डावै-जीमणै हाथो में है, आदर अर अपमांन ऊं, सौभा अर निंदा ऊं, जे भरमानेवाळा समझै है तो भी साचै है, अजांणौ रै जैड़ा हो तो भी प्रसिद्ध हो, मरयोड़ौ रै जैड़ा हो, पण देखौ जीवता हो। म्हौ मार तो खावौ हो, पण प्रांण ऊं मरो कोनीं। सौग करणैवाळौ रै ज्यूं हो, पण हमेसां आंणंद करौ हो, कंगालो रै जैड़ा हो, पण घणौ नै धनवान बणा देवो हो। ऐड़ा हो जैड़ा म्हौरै खनै कीं कोनीं तौभी सगळौ राखौ हो। हे कुरिन्थियो, म्हौ खुलनै थौरे ऊं बातां की है, म्हौरौ काळजौ थौरे लिए खुलयोड़ौ है। थौरे लिए म्हौरै मन में कोई संकोच कोनीं, पण थौरे ही मन में संकोच है। अपणा टाबर जांणनै थौरे ऊं कैवूं हूं, की थै भी उणरै बदळै में अपणौ काळजौ खोल दो। अविसवासियो रै साथै असमान संबंध में नीं जुड़ो। क्यूंकै धारमिकता अर अधरम रौ कांई मेल जोल? या उजाळै रौ अंधारै ऊं कांई संगति? अर मसीह रौ सैतान रै साथै कांई लगाव? या विसवासी रै साथै अविसवासी रौ कांई नातो? अर मूरतों रै साथै परमेसर रै मिंदर रौ कांई संबंध? क्यूंकै म्हौ तो जीवते परमेसर रा मिंदर हो। ज्यौ परमेसर कयौ है, “म्हैं उणमे बसूंला अर उणमे चालूं ला अर फिरूं ला। अर म्हैं उणौरौ परमेसर होवूंला, अर वे म्हारा लोग होवैला।” इण वास्तै परभु कैवै है, “उणौरै बीच में ऊं निकळौ अर अलग रैवौ। अर असुद्ध चीज नै मत छुओ, तो म्हैं थांनै स्वीकार करूंला। अर म्हैं थौरो पिता होवूंला, अर थै म्हारा बेटा अर बैटियां होवोला। ओ सर्वसक्तिमान परभु परमेसर रौ वचन है।” हे प्यारौ, जद की ऐ वायदा म्हौ नै मिळिया है, तो आओ, म्हौ अपणै आप नै सरीर अर आतमा री सगळी गन्दगी ऊं सुद्ध करौ, अर परमेसर रौ भय राखता होया पवितरता नै हासल करौ। म्हौ नै अपणै काळजै में जगा दो। म्हौ नीं किणी रौ अन्याव कियो, नीं किणी रौ बिगाड़यो, अर नीं किणी नै ठगयो। म्हैं थांनै दोसी ठैराणै रै लियै ओ कोनीं कैवूं। क्यूंकै म्हैं पैला ही कैह चूकयो हूं, की थै म्हारै काळजै में ऐड़ा बस गिया हो की म्हौ थौरे साथै जीने मरनै रै लियै तैयार हो। म्हैं थांरै ऊं घणी हीमत रै साथै बोल रियौ हूं, म्हनै थौरे माथै घणौ घंमड है। म्हैं सानति ऊं भर गियौ हूं, अर अपणै सगळै कलेस में, म्हैं आंणंद ऊं घणौ भरपुर रैवूं हूं। क्यूंकै जद म्हौ मकिदुनिया में आया, तो भी म्हौरै सरीर नै चैन कोनीं मिळियौ, पण म्हौ च्यांरूमेर ऊं कलेस पाता हा, बाहर लड़ाईयां ही, अर मन में डर हो। तौभी दुखियों नै तसली देवणवाळा परमेसर नै तीतुस रै आवण ऊं म्हौ नै तसली दी, अर नीं कैवल उणरै आवण ऊं पण उणरी उण तसली ऊं भी, जिकौ उणनै थौरी तरफ ऊं मिळी ही। अर उणै थौरी लालच, अर थौरा दुख अर म्हारै लियै थौरी धुन रौ समाचार म्हौ नै सुणाया, जिणसूं म्हैं और भी खुस होयौ। क्यूंकै जे थै म्हारी चिठ्ठी ऊं दुखी होया, पण उण ऊं पछतावो कोनीं ज्यूं की पैला पछतातो हो। क्यूंकै म्हैं देखूं हूं, की उण चिठ्ठी ऊं थांनै दुख तो होयौ पण वो थोड़ी जेज रै लियै हो। अबै म्हैं खुस हूं इण वास्तै कोनीं की थांनै दुख देयनै, बल्कि इण वास्तै की थै उण दुख रै खातर मन फिराया। क्यूंकै थौरो दुख परमेसर री इछा रै अनुसार हो, की म्हौरी तरफ ऊं थांनै किणी बात रौ नुकसाण नीं हो। क्यूंकै जिकौ दुख परमेसर री इछा ऊं स्वीकार कियो जावै है, उण ऊं ऐड़ौ भलाई रौ मन बदलाव होवै है की चिंता रौ कोई सवाल ही नीं उठै। पण संसार रै दुख ऊं मौत पैदा होवै है। आप देखौ हो, की इण बात ऊं थांनै परमेसर भगती रौ दुख होयौ, थौरे में कितौ जोस, प्रत्युतर, रीस, भय, लालच, अर धुन अर डंड दैणै रौ विचार पैदा होयौ। थां सगळी तरैह ऊं ओ साबित कर दिखायौ, की थै इण बात में निरदोस हो। जद की म्हैं जिकौ थौरे खनै चिठ्ठी लिखी ही, वो नीं तो उणरै खातर लिख्यौ, जिणै अन्याव कियो, अर नीं उणरै खातर जिण माथै अन्याव होयौ, पण इण वास्तै की थौरी चिंता जिकौ म्हौरै लियै है, वो परमेसर रै सांमै थांरै माथै परगट हो जावै। ओहीज म्हौरै तसली रौ कारण है। अपणै तसली ऊं घणा म्हौ, तीतुस री खुसी में खुस हो क्यूंकै थां सगळौ रै खातर वो घणौ खुस हो। क्यूंकै जे म्हैं उणरै सांमै थौरे बारै में कीं घंमड दिखायौ, तो बेजता कोनीं होयौ। पण ज्यूं म्हौ थांरै ऊं सगळी बातां साव साची कैह दी ही, व्यौंही म्हौरौ घंमड दिखाणौ तीतुस रै सांमै भी साचौ निकळियौ। जद उणनै थांरै सगळौ रौ आग्याकारी होणै री याद आवै है, की कीकर थै भय अर कदर करता होया उण ऊं भेट की, तो उणरौ परैम थौरी तरफ और भी बढ़तौ गियौ है। म्हैं आंणंद करूं हूं, की थौरी और ऊं म्हनै हरैक बात में भरोसौ होवै है। अबै हे भाइयो, म्हौ थांनै परमेसर रै उण करपा रौ संदेस देवो हो, जिकौ मकिदुनिया री कलीसियाओ माथै होयौ है। की कलेस री कठिन परीकसा में उणरै घणौ आंणंद अर घणी कंगाली रै बढ़ जावण ऊं उणरी उदारता घणी बढ़गी है। उणरै बारै में म्हारी आ गवाई है, की उणौ आपरी सामरथ भर बल्कि सामरथ ऊं भी घणौ मन ऊं दियौ। अर इण दांन में अर यहूदिया परदेस रै परमेसर रै लोगां री सेवा में भागी होणै री करपा रै बारै में म्हौरै ऊं बार-बार घणी विनती की। अर जैड़ी म्हौ आसा करी ही, उण ऊं उणौ बढ़नै कियो। उणौ परभु नै, पछै परमेसर री इछा ऊं म्हौ नै भी अपणै आपनै दे दियौ। इण वास्तै म्हौ तीतुस नै समझायौ, की ज्यूं दांन रै कांम नै पैला सरू करणै में थांनै मदद की, वैड़ी इज थौरे बीच में उण कांम नै पूरौ करणै री मदद करै। पण ज्यूं थै हरैक बात में मतलब विसवास, वचन, ग्यांन, अर सगळै तरैह रै यत्‍न में, अर उण परैम में जिकौ म्हौ ऊं राखौ हो, बढ़ता जाओ हो, व्यौंही इण दांन रै कांम में भी बढ़ता जाओ। म्हैं आग्या री रीति माथै तो कोनीं, पण दूजौ रै दांन दैणै रै जोस रौ दिखायनै, म्हैं थौरे परैम री सचाई नै परखणै रै लियै कैवूं हूं। क्यूंकै थै म्हारै परभु यीसु मसीह री करपा जांणौ हो की वो धनवान होयनै भी थौरे लियै कंगाल बणग्यौ, ताकी उणरै कंगाल हो जांणै ऊं थै धनवान बण जाओ। इण बात में म्हारी सलाह आहीज है। ओ थौरे वास्तै बड़िया है, जिकौ गिए साल ऊं कैवल इण दांन रै कांम नै करणै में ही कोनीं, पण इण बात री इछा में भी पैला होया। इण वास्तै अबै ओ कांम पूरौ करौ, की जिण तरैह इछा करनै में थै तैयार हा, व्यौंही अपणी-अपणी पूंजी रै अनुसार पूरौ भी करौ। क्यूंकै जे मन री तैयारी हो तो दांन उणरै अनुसार स्वीकार भी होवै है, जिकौ उणरै खनै है, न की उणरै अनुसार जिकौ उणरै खनै कोनीं। ओ नीं की दूजौ नै सुख अर थांनै दुख मिळै, पण बराबरी हो। म्हौरी आ इछा है की इण वगत थौरी बढ़ती उणौरी घटी में कांम आए, ताकी उणौरी बढ़ती भी थौरी घटी में कांम आए, की बराबरी हो जाए। ज्यूं पवितर सास्तर में लिख्योड़ौ है, “जिणै घणौ भेळौ करयौ उणरौ कीं घणौ कोनीं निकळियौ अर जिणै थोड़ो भेळौ करयौ उणरौ कीं कम कोनीं निकळियौ।” परमेसर रौ धन्यवाद हो, जिणै थौरे लियै वोहीज जोस तीतुस रै मन में घाल दियौ ज्यूं म्हौरै मन में है। की उणै म्हौरौ समझाणौ मांन नै ऊं इज कोनीं बल्कि अपणी इछा ऊं थौरे खनै आयौ है। म्हौ उणरै साथै उण भाई नै भी भेज्यौ है जिणरौ नाम सुभ संदेस रै बारै में सगळी कलीसियाओ में फैलयोड़ौ है। इतरौ ही कोनीं, पण वो कलीसिया द्‍वारा ठैरायौ भी गियौ की इण दांन रै कांम रै लियै म्हौरै साथै आए अर म्हौ आ सेवा इण वास्तै करौ हो, की परभु री महिमा अर म्हौरै मन री तैयारी परगट हो जाए। म्हौ इण बात में सावचेत रैवौ हो, की इण मोटे दांन रै बारै में, जिणरौ प्रबन्ध म्हौ कर रिया हो, उणरै बारै में कोई म्हौ माथै दोस नीं लगा सकै। क्यूंकै जिकौ बातां कैवल परभु रै ही नजीक कोनीं, पण मिनखौ रै नजीक भी भली है म्हौ उणरी चिंता करौ हो। म्हौ उणरै साथै अपणै भाई नै भेज्यौ हो, जिणरौ म्हौ बार-बार परखणै घणौ जोस पायो हो। पण अबै थौरे माथै उणनै घणौ भरोसौ है, इण खातर वो और भी घणौ जोस मे है। जे कोई तीतुस रै बारै में पूछे, तो वो म्हारौ साथी, अर थौरे लियै म्हारौ सहयोगी है, अर जे म्हौरै भाइयो रै बारै में पूछे, तो वे कलीसियाओ रै भेज्यौड़ा अर मसीह री महिमा है। अतस अपणौ परैम अर म्हौरौ वो घंमड जिकौ थौरे बारै में है कलीसियाओ रै सांमै उणनै साबित करनै दिखाओ। अबार उण सेवा रै बारै में जिकौ यहूदिया परदेस रै परमेसर रै लोगां रै लियै की जावै है, म्हनै थांनै लिखणौ जरुरी कोनीं। क्यूंकै म्हैं थौरे मन री तैयारी नै जांणूं हूं, जिणरै खातर म्हैं थौरे बारै में मकिदुनिया रै लोगां रै सांमै घंमड दिखाऊं हूं, की अखाया रा लोग गिए बरस ऊं तैयार है, अर थौरे जोस नै वळै घणौ नै तैयार किया है। पण म्हैं भाइयो नै इण वास्तै भेज्या हो, की म्हौ जिकौ घंमड थौरे बारै में दिखायौ, वो इण बात में फालतू नीं ठैरै। पण ज्यौ म्हैं कयौ, व्यौंही थै तैयार रौ। ऐड़ौ नीं हो, की जे कोई मकिदुनिया रौ मिनख म्हारै साथै आवै, अर थांनै तैयार नीं देखे, तो कांई जांणै, इण भरोसे रै खातर म्हौ तो सरमाओ ला। अर थै तो और भी घणा सरमाओ ला। इण वास्तै म्हैं भाइयो ऊं विनती करणी जरुरी समझी की वे पैला ऊं थौरे खनै आवै, अर थौरी आसीस रौ फळ जिणरै बारै में पैला ऊं वचन दियोड़ो हो, तैयार करनै राखै, की ओ दबाव ऊं कोनीं पण आसीस रै फळ री तरैह तैयार हो। पण बात तो आ है, की जिकौ थोड़ो बोए है वो थोड़ो काटेला, अर जिकौ घणौ बोए है वो घणौ काटेला। हरैक जन जैड़ौ मन में होय वैड़ौ ही दांन करै, बिना इछा या मजबुरी में नीं, क्यूंकै परमेसर खुसी ऊं देवणवाळौ ऊं परैम राखै है। परमेसर सगळी तरैह री करपा थांनै घणीहारी दे सकै है। जिण ऊं हरैक बात में अर हरैक वगत, सगळौ कीं, जिकौ थांनै जरुरी हो, थौरे खनै रैह, अर हरैक भलै कांम रै वास्तै थौरे खनै घणौहारौ हो। ज्यूं पवितर सास्तर में लिख्योड़ौ है, “उणै बिखेरियो, उणै कंगालो नै दांन दियौ, उणरौ धरम हमेसां बण्यौ रैला।” अतस जिकौ बोनेवाळै नै बीज, अर खाणै रै लियै रोटी दैवै है, वो थांनै बीज दैला, अर उणरी बढ़ोतरी करैला, अर थौरे धरम रै फळौ नै बढ़ावैला। थै हरैक बात में सगळी तरैह री उदारता रै लियै जिकौ म्हौरै जरियै परमेसर रौ धन्यवाद कराओ हो, धनवान किया जाओला। इण दांन री सेवकाई नै पूरी करणै ऊं, नीं कैवल परमेसर रै लोगां री घटी पूरी होवै है, पण लोगां री तरफ ऊं परमेसर रौ घणौ धन्यवाद होवै है। थौरी इण सेवकाई रौ परमाण मांन नै वे परमेसर री महिमा करैला, क्यूंकै थै मसीह रौ सुभ संदेस नै मांननै उणरै अधीन रैवौ हो, अर थै परमेसर रै लोगां अर सगळौ रै प्रति उदार मन रा हो। अर वे थौरे वास्तै पराथना करै है, अर इण वास्तै की थौरे माथै परमेसर री घणी करपा है, थौरी चिंता करता रैवै है। परमेसर नै उणरै उण वरदान खातर जिकौ सोच ऊं बारै है, धन्यवाद हो। म्हैं पौलुस, थांनै मसीह री नरमाई, अर कोमलता में खुद खास करनै विनती करूं हूं। पण लोग कैवै है की म्हैं थौरे खनै होणै ऊं तो नरमाई बल्कि थौरे ऊं आगौ होणै पे कठोर हो जाऊं हूं। म्हैं आ विनती करूं हूं, की थौरे सांमै म्हनै कठोर होयनै हीमत करणी नीं पड़ै। ज्यूं म्हैं कितौ नै जिकौ म्हौ नै संसार रै अनुसार चालनैवाळा समझै है, कठोरता दिखाणी पड़ैला। क्यूंकै जे म्हौ संसार में चालौ फिरौ हो, तो भी संसार रै अनुसार कोनीं लड़ों। म्हौरी लड़ाई रा हथियार सांसारिक कोनीं है, पण परमेसर रै सामरथ ऊं गढ़ो नै ढ़ा देवो हो। म्हौ विचारो नै, अर हरैक ऊंची बात नै, जिकौ परमेसर रै ग्यांन रै विरोध में उठै है, तोड़ देवो हो। अर हरैक भावना नै काबू करनै मसीह रौ आग्याकारी बणा देवो हो। की जद थौरी आग्या मांनणी पूरी हो जावै, तो हरैक तरैह री आग्या नीं मांनणै वाळौ नै डंड दैणै रै लिए तैयार हो। थै इणीज बातां नै देखौ हो, जिकौ आंखों रै सांमै है। जे किणी नै अपणै आप माथै ओ भरोसौ हो की, “म्हैं मसीह रौ हूं,” तो वो ओ भी जांण ले, की जैड़ौ वो मसीह रौ है, वैड़ा म्हौ भी हो। क्यूंकै जे म्हैं उण अधिकार रै बारै में और भी घंमड दिखाऊं, जिकौ परभु थांनै बिगाड़नै रै वास्तै कोनीं बल्कि बणाणै रै वास्तै म्हौ नै दिया है, तो लजित नीं होऊंला। ओ म्हैं इण वास्तै कैवूं हूं, की चिठ्ठियो रै जरियै थांनै डरावण वाळौ नीं ठैरूं। क्यूंकै कीं लोग कैवै है, “उणरी चिठ्ठियो तो कठोर अर प्रभावसाली है। पण जद वो सांमै होवै है, तो वो सरीर रौ कमजोर अर बातां में इतौ दम कोनीं लागै।” इण वास्तै जिकौ ऐड़ौ कैवै है, की वो आ समझ राखै, की ज्यूं आगा रैह नै चिठ्ठियो में म्हौरा वचन है, वैड़ा ही थौरे सांमै म्हौरा कांम भी होवैला। क्यूंकै म्हौ नै आ हीमत कोनीं की म्हौ अपणै आप नै उणौरै साथै बराबरी या उणमे अपणै आप नै मिळाओं, जिकौ आपरी सौभा करै है। अर अपणै आप नै आपस में नाप तौल करनै एक दूजै ऊं तुलना करनै मूरख ठैरै है। म्हौ तो सीमा ऊं बारै घंमड कदैई नीं करौला, पण उण सीमा तांई जिकौ परमेसर नै म्हौरै लियै ठैराई है, अर उणमे थै भी आ गिया हो। क्यूंकै म्हौ अपणी सीमा में रैहन थौरे ऊपर घंमड करौ हो। बल्कि म्हौ ही सबां ऊं पैला मसीह रौ सुभ संदेस सुणाता होया थांरै तांई पूग चुका हो। म्हौ सीमा रै बारै दूजौ री मेनत माथै घंमड कोनीं करौ। पण म्हौ नै आस है, की ज्यौं-ज्यौं थौरो विसवास बढ़तौ जावैला त्यौं-त्यौं म्हौ अपणी सीमा रै अनुसार थौरे कारण और भी बढ़ता जावोला, ताकी म्हौ थौरी सीमा ऊं आगै बढ़नै सुभ संदेस सुणाओ। अर ओ कोनीं, की म्हौ दूजौ री सीमा रै मांय बण बणाया कांमां माथै घंमड करौ। पण पवितर सास्तर में लिख्योड़ौ है की “जिकौ घंमड करै, वो परभु माथै घंमड करै।” क्यूंकै स्वीकार वो नीं की जावै जिकौ बड़ाई खुद करै है, पण जिणरी बड़ाई परभु करै है, वोहीज स्वीकार की जावै है। म्हैं चावूं हूं की थै म्हारी छोटी सी पागलपन सहन कर लौ, ज्यूं वास्तव में थै इण वगत सहन कर भी रिया हो। क्यूंकै म्हैं थौरे बारै में परमेसर री धुन लगायो रैवूं हूं। इण वास्तै की म्हैं एक ही आदमी ऊं थोरी सगाई पकी की है, की थांनै पवितर कुंवारी रै ज्यूं मसीह नै सौंप दूं। पण म्हैं डरूं हूं की ज्यूं साप अपणी चालाकी ऊं हव्वा नै भरमा दी, व्यौंही थौरे मन नै भटका नीं दे, जिणमे मसीह रै लियै सीधाई अर पवितरता है। क्यूंकै जे कोई थौरे खनै आयनै, जिण यीसु रौ सुभ संदेस म्हौ सुणायो उणरै अलावा कोई दूजै यीसु रौ सुभ संदेस सुणावै है, या जिकौ आतमा थांनै मिळी उणरै अलावा दूजी आतमा नै स्वीकार करौ हो तो थै छुटकारै रै सुभ संदेस नै अपनायो उण ऊं अलग किणी दूजै सुभ संदेस नै अपनाओ हो, तो थै घणी आसानी ऊं उणै अपना लैवौ हो। म्हैं तो समझ रियौ हूं, की थै जिणनै मोटा प्रेरित कैवौ उण ऊं म्हैं किणी बात में कम कोनीं हूं। मांनौ की म्हैं बोलनै में अनाड़ी हूं, बल्कि ग्यांन में म्हैं किणी ऊं कम कोनीं। म्हौ हरैक तरैह ऊं हरैक एरिया में थौरे लिए इणै साफ-साफ कर दियौ है। कांई इणमे म्हैं कीं पाप कियो, की म्हैं थांनै परमेसर रौ सुभ संदेस फोगट में सुणायो, अर अपणै आप नै नीचो कियो, की थै ऊंचा हो जाओ? कईक लोग कैवै है की म्हैं थौरी सेवा करणै रै लियै दूजी कलीसियाओ नै जिकौ मदद भेजी ही, उणनै लैयनै म्हैं उणौनै लूटिया है। पण जद थौरे साथै हो, अर म्हनै घाटौ होयौ, तो म्हैं किणी माथै बोझ नीं बण्यौ, क्यूंकै विसवासी भाइयो नै, मकिदुनिया परदेस ऊं आयनै म्हारी जरुतो नै पूरी करी। अर म्हैं हरैक बात में थौरे माथै अपणै आप नै बोझ बणणै ऊं रोकयो, अर रोकयो रहूंंला। जे मसीह री सचाई म्हारै में है, तो अखया परदेस में कोई म्हनै इण घंमड ऊं नीं रोकेला। क्यूं? कांई इण वास्तै की म्हैं थांरै ऊं परैम कोनीं राखूं? परमेसर ओ जांणै है की म्हैं थौरे ऊं परैम राखूं हूं। पण जिकौ म्हैं करूं हूं, वोहीज करतौ रहूंंला। जिणसूं उण लोगां नै इण बात रौ घंमड करणै रौ मौकौ नीं मिळै की वे परचार रै कांमां में वे म्हारै बराबर है। क्यूंकै ऐड़ा लोग झूठा प्रेरित, अर छळ ऊं कांम करनैवाळा, अर मसीह रा प्रेरित होणै रौ ढ़ोग करै है। आ कीं अचूम्बे री बात कोनीं क्यूंकै सैतान आप भी ज्यूं चमकदार सरगदूत रौ रूप धारण करणै री कोसीस करै है। इण वास्तै जे उणरै सेवक भी धरम रै सेवकों रै जैड़ौ रूप धारे, तो कोई मोटी बात कोनीं। पण उणरौ अंत उणरै कांमां रै अनुसार होवैला। म्हैं और कैवूं हूं, कोई म्हनै गेलौ नीं समझै। पण जे समझौ तो गेलौ ही समझनै म्हारी सह लौ, ताकी थोड़ोक म्हैं भी घंमड कर सकूं। इण बेधड़क घंमड में जिकौ कीं म्हैं कैवूं हूं, वो परभु री आग्या रै अनुसार कोनीं पण मांनौ पागलपन ऊं इज कैवूं हूं। क्यूंकै घणा लोग सरीर रै अनुसार घंमड करै है, तो म्हैं भी घंमड करूंला। थै तो समझदार होयनै खुसी ऊं गेलौ री सह लौ। क्यूंकै जद थांनै कोई दास बणा लेवे है, तो थौरो सोसण करै है, या थौरो गळत फायदो उठावै है, या अपणै आप नै मोटो मिनख मांनै है, या थौरे मूंडै माथै थप्पड़ मारे है, तो थै सहन कर लेवो हो। म्हारौ कैवणौ बिना कदर री रीति ऊपर है, मांनौ म्हौ उणरै लिए कमजोर ज्यूं हां। पण जिण कीण बात में कोई हीमत करै है, म्हैं पागलपन ऊं कैवूं हूं तो म्हैं भी हीमत करूं हूं। कांई वे इबरानी है? म्हैं भी हूं। कांई वे इजरायली है? म्हैं भी हूं। कांई वे अबराहम रै वंस रा है? म्हैं भी हूं। कांई वे मसीह रा सेवक है? म्हैं गेला रै ज्यूं कैवूं हूं म्हैं उण ऊं बढ़नै हूं। घणी मेनत करनै में, बार-बार जेळ जावण में, कोड़ा खावण में, बार-बार मौत रौ जोखम उठाणै में। पांच बार म्हैं यहूदियो रै हाथ ऊं उनतालीस-उनतालीस कोड़ा खाया। तीन बार म्हैं डंडें ऊं मार खाई, एक बार भाठौ री मार खाई, तीन बार जहाज जिण माथै म्हैं चढ़योड़ौ हो, तूट गियौ। एक दिन-रात म्हैं समंदर में काटी। म्हैं बार-बार यात्राओं में, नदियां रै जोखम में, डाकूओ रै जोखम में, अपणी जातिवाळौ रै जोखम में, दूजी जातियो रै जोखम में, नगरो रै जोखम में, रिंदरोही रै जोखम में, समंदर रै जोखम में, झूठै भाइयो रै बीच जोखम में रैवणौ। म्हैं मेनत अर दुख में, बार-बार जागतौ रैणै में, भूखा-तिरसा में, सरदी में, कम कपड़ो में रैणौ। अर इण सगळी बातां साथै साथै, हरैक दिन सगळी कलीसियाओ री चिंता हमेसां म्हनै दबा री है। कांई किणी री कमजोरी ऊं म्हैं कमजोर कोनीं होऊं? कांई कीण रै पाप में गिरनै ऊं म्हारौ जी कोनीं दुखे? जे म्हनै घंमड करणौ जरुरी है, तो म्हैं अपणी कमजोरी री बातां माथै घंमड करूंला। परभु यीसु रौ पिता परमेसर जिकौ हमेसां धन्य है, जांणै है, की म्हैं झूठ कोनीं बोलूं। दमिसक में अरितास राजा री तरफ ऊं जिकौ हाकिम हो, उणै म्हनै पकड़नै रै दमिसकियों रै नगर माथै पेहरो बैठा राख्यौ हो। पण म्हैं छाबड़िया में खिड़की ऊं होयनै नगरकोट माथै ऊं उतारियो गियौ, अर इण तरीकै म्हैं उणरै हाथ ऊं बच निकळयौ। जद की घंमड करणौ तो म्हारै लियै ठीक कोनीं, तो भी करणौ पड़ै है। पण म्हैं परभु रै दियोड़े दरसणौ अर परकासनो री चरचा करूंला। म्हैं मसीह में एक मिनख नै जांणूं हूं, चौदह साल पैला ओ मिनख तीजै सरग तांई उठा लियौ गियौ। वो सरीर रै साथै या बिना सरीर रै म्हनै खबर कोनीं, ओ परमेसर ही जांणै है। म्हैं ऐड़ै मिनख नै जांणूं हूं, न जांणै सरीर रै साथै या बिना सरीर रै, परमेसर ही जांणै है। वो सरगलोक ऊपर उठा लियौ गियौ, अर ऐड़ी बातां सुणी जिकौ कैवण री कोनीं, अर जिणरौ वरणन करणौ किणी भी मिनख रै लिए संभव नीं है। ऐड़ै मिनख माथै तो म्हैं घंमड करूंला, पण खुद री कमजोरियो नै छोड़नै, अपणै बारै में घंमड नीं करूंला। जे म्हैं घंमड करणौ चाहूंं भी तो मूरख नीं होवूंला, क्यूंकै सच बोलूं ला, तो भी रूक जावूं हूं, ऐड़ौ नीं हो, की ज्यौ कोई म्हनै देखे है, या म्हनै सुणै है, म्हनै उण ऊं बढ़नै समझै। अर इण वास्तै की म्हैं परकासनो रौ घणौ होणै ऊं फूल नीं जाऊं, म्हारै सरीर में एक कांटो लगायो गियौ मतलब सैतान रौ एक दूत की म्हनै मुक्‍का ठोके ताकी म्हैं फूल नीं जाऊं। इण कांटे रै बारै में म्हैं परभु ऊं तीन बार विनती की, की म्हारै ऊं ओ आगौ हो जावै। पण परभु कयौ, “म्हारी करपा थारै लियै घणी है। क्यूंकै म्हारी सामरथ कमजोरी में सिद्ध होवै है।” इण वास्तै म्हैं घणै आंणंद ऊं अपणी कमजोरियो माथै घंमड करूंला, की मसीह री सामरथ म्हारै माथै छाया करती रैवै। इण खातर म्हैं मसीह रै लियै कमजोरियो, अर निंदाओं में, अर दुखौ में, अर सताव में, अर कठिनाइयो में, राजी हूं। क्यूंकै जद म्हैं कमजोर होवूं हूं, तभी म्हैं ताकतवर होवूं हूं। म्हैं गेलो तो बण्यौ, पण थै इज म्हनै ओ करणै रै लियै मजबुत कियो। थांनै तो म्हारी सौभा करणी चाहीजै ही, क्यूंकै जे म्हैं कीं भी कोनीं, तौभी जिणनै थै मोटा प्रेरित मांनौ हो उण ऊं म्हैं किणी बात में कम कोनीं हूं। साचै प्रेरित रा गुण भी म्हैं थौरे बीच में सगळै परकार रै चिन्ह अर अचूम्बे रा कांम, अर सामरथ रा कांम धीरज रै साथै दिखाया। थांनै कीण बात में दूजी कलीसियाओ ऊं कम समझया, सिवाय इणरै की म्हैं कदैई भी थौरे लिए बोझ नीं बण्यौ? म्हारौ ओ अन्याव माफ करौ। अबै, म्हैं तीजी बार थौरे खनै आवण नै तैयार हूं, म्हैं थौरे लियै बोझ नीं बणूंला। क्यूंकै म्हैं थौरी जायदाद कोनीं, बल्कि थांनै ही चावूं हूं। क्यूंकै टाबरौ नै मा-बाप रै लियै धन भेळौ नीं करणौ, पण मां-बाप नै टाबरौ रै लियै करणौ है। म्हैं थौरे लियै घणै आंणंद ऊं खरच करूंला, बल्कि खुद ही खरच हो जावूंला। कांई जितौ बढ़नै म्हैं थौरे ऊं परैम राखूं हूं, उतरौ ही घटनै थै म्हारै ऊं परैम राखोला? कीं भी हो, म्हैं थौरे माथै बोझ नीं बण्यौ। तौभी कोई न कोई म्हारै ऊपर दोस लगावै है, की चालाकी ऊं थांनै धोखो देयनै फंसा लिया। भला, जिणौनै म्हैं थौरे खनै भेज्या, कांई उणमे ऊं किणी रै जरियै म्हैं चाल करनै थौरे ऊं कीं ले लियौ? म्हैं तीतुस नै समझायनै उणरै साथै उण भाई नै थौरे खनै भेज्यौ। तो कांई तीतुस चाल करनै थौरे खनै ऊं कीं लियौ? कांई म्हौ एक ही आतमा रै चलायोड़ा नीं चालौ? कांई एक ही लीक माथै नीं चालया? थै अजी तांई समझ रिया होवोला की म्हौ थौरे सांमै जबाब दे रिया हो, म्हौ तो परमेसर नै हाजर जांणनै मसीह में बोलो हो। अर हे प्यारौ, सगळी बातां थौरी भलाई रै लियै कैवौ हो। क्यूंकै म्हनै डर है, कठैई ऐड़ौ नीं हो, की म्हैं आयनै जैड़ौ चावूं हूं, वैड़ा थांनै नीं पाऊं। अर म्हनै भी जैड़ौ थै नीं चावौ वैड़ौ नीं पाओ, की थौरे में झगड़ौ, जळण, क्रोध, विरोध, ईस्या, चुगली, घंमड अर बखेड़े हो। अर कही ऐड़ौ नीं हो की जद म्हैं पाछौ आऊंला, म्हारौ परमेसर म्हारी बेजती करै अर म्हनै घणौ रै लियै सौग करणौ पड़ै, जिणौनै पैला पाप कियो हो, अर उण भूंडै कांम, अर व्यभिचार, अर लुचपन ऊं, जिकौ उणौ किया, मन नीं फिरायो। अबै तीजी बार थौरे खनै आऊं हूं। पवितर सास्तर में लिख्योड़ौ है, “दो या तीन गवाहो रै मूंडै ऊं एक बात ठैराई जावैला।” ज्यूं म्हैं जद दूजी बार थौरे साथै हो, व्यौंही अबै आगौ रैवते होयौ उण लोगां ऊं जिणौनै पैला पाप कियो, अर दूजा सगळा लोगां ऊं अबार पैला ऊं कैह देवूं हूं, की जे म्हैं पाछौ आऊंला, तो थांनै नीं छोड़ूला। थै तो इणरौ सबूत चावौ हो, की मसीह म्हारै मांय बोले है। वो थौरे लियै कमजोर कोनीं, पण थौरे मांय सामरथी है। वो कमजोरी रै खातर सूली माथै चढ़ाया तो गिया, तौभी परमेसर री सामरथ ऊं जीवता है। म्हौ भी तो उणमे कमजोर हो। पण परमेसर री सामरथ ऊं जिकौ थौरे लियै है, उणरै साथै जीओला। अपणै आप नै परखो, की विसवास में हो की कोनीं, अपणै आप नै जांचौ। कांई थै अपणै बारै में ओ कोनीं जांणौ, की यीसु मसीह थौरे मांय है? नीं तो थै निकमा ठैरया हा। पण म्हारी आसा है की थै जांण लौ ला की म्हौ निकमा कोनीं। अर म्हौ अपणै परमेसर ऊं पराथना करौ हो, की थै कोई बुराई नीं करौ। इण वास्तै कोनीं, की म्हौ खरा दिखो, पण इण वास्तै की थै भलाई करौ, चाहे म्हौ निकमा ही ठैरौ। क्यूंकै म्हौ सचाई रै विरोध में कीं नीं कर सकौ, पण सचाई रै लियै ही कर सकौ हो। जद म्हौ कमजोर हो, अर थै ताकतवर हो, तो म्हौ राजी होवो हो। अर आ पराथना भी करौ, की थै सिद्ध हो जाओ। इण खातर म्हैं थौरे ऊं आगौ होते होयौ भी ऐ बातां लिखूं हूं, की हाजर होयनै म्हनै उण अधिकार रै अनुसार जिकौ परभु बिगाड़नै रै लियै कोनीं पण बणाणै रै लियै म्हनै दिया है, ताकी कड़ाई ऊं कीं करणौ नीं पड़ै। आखरी, हे भाइयो, खुस रैवौ। सिद्ध बणता जाओ, हीमत राखौ, एक ही मन राखौ, मेळ ऊं रैवौ, अर परैम अर सानति रौ दाता परमेसर थौरे साथै होवै। एक दूजै नै मिळनै नमस्कार करौ। सगळा परमेसर रा लोग जिकौ एठै रा थांनै नमस्कार कैवै है। परभु यीसु मसीह री करपा अर परमेसर रौ परैम अर पवितर आतमा री सहभागिता थां सगळौ रै साथै बणी रैवै। ओ कागद पौलुस री तरफ ऊं है। जिणनै प्रेरित होणै रौ हक मिनखां री तरफ ऊं कोनीं, पर परभु यीसु मसीह अर पिता परमेसर री तरफ ऊं है। यीसु मसीह नै मरयोड़ौ मे ऊं जीवता करिया। आ चिठ्ठी गलातिया री कलीसिया रै नाम, सगळै मसीह भाइयो री तरफ ऊं है जिकौ म्हारै खनै है। पिता परमेसर अर परभु यीसु मसीह ऊं थांनै दया अर सानति मिळती रैवै। यीसु मसीह अपणै आप नै अपांरै पाप वास्तै दे दिया, ताकी म्हौरै पिता परमेसर री इछा ऊं म्हौ इण पाप री दुनिया ऊं छूट सकौ। उणौरी सौभा जुग जुग होती रैवै। आमीन। म्हनै अचूम्बो होवै है की जिकौ परमेसर थांनै मसीह री दया मे बुलाया, थै इता वेगा ही उण ऊं फिर नै दूजा सुभ संदेस नै मांनण लागा हो। पण दूजौ कोई सुभ संदेस है ई कोनीं। कीं लोग ऐड़ा है जिकौ थांनै भरमा दैवै। वे मसीह रा सुभ संदेस नै बिगाड़णौ चावै है। पण चाहे म्हौ हो या कोई सरगदूत थांनै जिकौ सुभ संदेस म्हौ सुणायो उणनै छोड़नै कोई दूजौ सुभ संदेस सुणावै, तो उणरौ सतियानास होवैला। ज्यूं म्हौ पैला कयौ हो, पाछौ वळै कैवूं हूं, की जिकौ सुभ संदेस म्हैं सुणायो उणनै छोड़नै कोई दूजौ सुभ संदेस सुणावै, तो उणरौ सतियानास होवैला। म्हैं मिनखां री मांनू के परमेसर री मांनू? कांई म्हैं मिनखां नै राजी करणा चावूं? जे अबै तांई म्हैं मिनखां नै राजी राखतौ तो, मसीह रौ दास नीं होवतो। हे भाइयो, म्हैं थांनै ओ बता दूं की जिकौ सुभ संदेस म्हैं थांनै सुणायो हूं, वो मिनखां रै बणायोड़ो कोनीं है। क्यूंकै ओ म्हनै मिनखौ ऊं कोनीं मिळियौ है अर नीं कोई म्हनै सिखायौ है। पर ओ म्हारै माथै खुद यीसु मसीह परगट करयौ है। थै सुण चुका हो की जद यहूदी मत मे पैला हो, तो म्हारी चाल चलण कैड़ी ही? म्हैं परमेसर री कलीसियाओ नै घणी सतातो हो अर उणनै नास करतौ हो। यहूदियो मे म्हारी उमर रा घणा लोगां ऊं म्हैं आगै हो। क्यूंकै म्हारै बापदादों रै यहूदी रीति रिवाज नै मांनणा रौ म्हनै घणौ जोस हो। पण परमेसर म्हनै म्हारी मां रा पेट मे ही चुण लियौ हो अर आपरी करपा मे म्हनै बुलायौ हो। परमेसर री इछा ही, की वे म्हारै मे आपरै बेटे नै परगट करै अर म्हैं जिकौ यहूदी नीं है उणमे उणरौ सुभ संदेस सुणाऊं अर इण वास्तै म्हैं किणी मिनखौ री सला कोनीं ली। अर नीं ही म्हैं उण लोगां खनै यरुसलेम गियौ, जिकौ म्हारै ऊं पैला प्रेरित हा, बल्कि म्हैं हाथोहाथ अरब देस गियौ अर उठै ऊं पाछौ दमिसक नगर आयौ। पछै तीन साल बाद मे पतरस ऊं मिलनै यरुसलेम नगर गियौ अर पनरा दिन उणरै खनै रियौ। पण परभु रा भाई याकूब नै छोड़नै कोई दूजा प्रेरित ऊं कोनीं मिळियौ। जिकौ बातां म्हैं थांनै लिखूं हूं, परमेसर नै साथै राखनै कैवूं की ऐ बातां झूठी कोनीं। इणरै पछै मे सीरिया अर किलिकिया देसो मे आयौ। पण यहूदिया देस री कलीसियाओ मसीह मे ही, जिकौ म्हनै कदैई देख्यौ कोनीं हो। अर आ सुणती ही, की जिकौ मसीह रा लोगां नै सतातो हो अर सुभ संदेस माथै विसवास करणैवाळौ रौ नास करतौ हो। आज वोहीज सुभ संदेस रौ परचार करै है। वा कलीसिया म्हारी ऐ बातां सुणनै परमेसर री सौभा करती ही। चौदह साल रै पछै म्हैं बरनबास रै साथै यरुसलेम गयो अर तीतुस नै भी साथै लेन गियौ। परमेसर म्हारै मन में कयौ के, म्हनै जावणौ चाहीजै। जिकौ सुभ संदेस में यहूदी कोनीं उणौनै सुणाऊ हूं, उण सुभ संदेस रै बारै में मंडली रा परधान लोगां नै एकांत में सुणायो। ताकी ऐड़ौ नीं हो के म्हारी इण वगत री अर पैला री मेनत बेकार हो जावै। पर वे तीतुस नै जिकौ म्हारै साथै आयौ हो अर यूनान रौ हो, तो भी उणनै खतनो कराणै वास्तै मजबूर कोनीं करयौ। पण ओ सवाल उण झूठै लोगां ऊं उठयौ, जिकौ छांनै छांनै दल में भिळगा हा। जिकौ आजादी यीसु मसीह में मिळी उणरौ भेद लेन वे म्हौनै गुलाम बणाणा चावै। म्हौ उण लोगां रै सांमै एक घड़ी भी नीचा नीं रिया, ताकी सुभ संदेस री सचाई थांरै में बण्योड़ी रैवै। पर वे लोग किता ही मोटा क्यूं नीं रैवै, उणौरौ कितौ ही मांन क्यूं नीं रैवै, म्हनै उणरी कोई परवा कोनीं। क्यूंकै परमेसर किणी रौ पकसपात नीं करै। वे म्हारै संदेस में कोई कमी नीं काढ़ सकया। पर उलटा वे मांन लियौ के, जिण तरैह ऊं पतरस नै यहूदियो में सुभ संदेस सुणावण रौ कांम सूंपयौ, उणीज तरैह ऊं म्हनै जिकौ यहूदी कोनीं उणौ में सुभ संदेस सुणावण रौ कांम सूपयोड़ो है। क्यूंकै परमेसर पतरस नै यहूदियो में सुभ संदेस रा परचार वास्तै सगति दी अर प्रेरित बणायौ, उणीज तरैह ऊं परमेसर म्हनै भी प्रेरित बणायौ अर जिकौ यहूदी कोनीं उणौ में सुभ संदेस रा परचार वास्तै सगति दी। जिकौ आदमी मंडली रा थम्‍बा हा, यानि याकूब, पतरस अर यूहन्‍ना परमेसर री करपा रा उण वरदान नै जांणगा, जिकौ म्हनै मिळयो हो। वे म्हनै अर बरनबास नै आपरा जांण नै म्हौरै ऊं हाथ मिळायो। वे इण बात नै मांनगा के, म्हैं जिकौ यहूदी कोनीं उणौ में कांम करौला और वे यहूदियो में कांम करैला। वे सिरफ ओ कयौ के, मांनै गरीबो रौ ध्यांन राखणौ है। इण कांम नै तो म्हैं खुद भी करणौ चावतौ हो। पर जद पतरस अन्ताकिया आयौ तो, म्हैं उणरा मूंडा माथै उणनै हाका करिया, क्यूंकै वो गळती कर रियौ हो। वो पैला जिकौ यहूदी कोनीं उणौरै साथै खावतो हो। पर जद ऊं याकूब रै उठै ऊं की आदमी आया, तो वो जिकौ खतनो करणै चावता उणौरै डर ऊं यहूदी कोनीं उणौ ऊं आगौ रैवण लागौ। दूजा यहूदी भाई भी पतरस री तरैह ऊं दिखावो करनै लागा अर बरनबास भी उणौरै दिखावा में आयग्यौ। जद म्हैं देखियौ के, ऐ बातां सुभ संदेस रै हिसाब ऊं सही कोनीं है। तो म्हैं सगळौ रै सांमै पतरस नै कयौ, “जद थूं यहूदियो में जनम लेन, यहूदियो ज्यूं नीं चालै तो थूं जिकौ यहूदी कोनीं उणौनै यहूदियो रा रिवाज मानण वास्तै मजबूर कीकर कर सकै?” अपां जनम ऊं यहूदी हा अर अपांरौ जिकौ यहूदी कोनीं उण पापियो ऊं कीं कांम कोनीं। तो भी ओ जांण नै के, मिनख मूसा रै कायदे ऊं कोनीं, पर यीसु मसीह माथै विसवास करणा ऊं पाप माफ होवै। इण वास्तै अपां भी यीसु मसीह माथै विसवास करणा ऊं धरमी बण्या। मूसा रै कायदे माथै विसवास करणै ऊं धरमी कोनीं बण्या। क्यूंकै मूसा रै कायदे धरमी कोनीं बणा सकै। अपां यीसु मसीह ऊं पाप री माफी लेने धरमी बणौ अर मूसा रै कायदे अपांनै पापी कैवै, तो कांई यीसु मसीह पाप नै बढ़ावै? कदैई कोनीं। क्यूंकै, जिण मुसा रै कानुन नै म्हैं छोड़ दियौ अर उण हीज माथै पाछौ चालूं तो म्हैं खुद अपराधी ठैरूं हूं। मूसा रै कायदे ऊं देखौ तो म्हैं, मूसा रै कायदे वास्तै मरग्यौ हूं, ताकी म्हैं परमेसर रै वास्तै जीऊं। म्हैं यीसु मसीह रै साथै सूली माथै मरग्यौ हूं। अबै म्हैं जीवतौ कोनीं, पर म्हारै में यीसु मसीह जीवता है। म्हैं सरीर ऊं जीवतौ हूं तो, सिरफ उण विसवास ऊं जीवतौ हूं, जिकौ परमेसर रा बेटा माथै है। जिकौ म्हारै ऊं परैम करयौ अर अपणै आप नै म्हारै वास्तै दे दिया। म्हैं परमेसर री दया रौ मांन नीं बिगाड़ सकूं, क्यूंकै अगर मूसा रै कायदे ऊं पाप माफ हो जाता तो, यीसु मसीह रौ मरणौ बेकार होवतो। हे गेलौ गलातियो रा रैवणवाळौ, थांनै कुण वैम में घाल दिया? म्हैं थांनै इतौ साफ बतायो हो के, ज्यूं यीसु मसीह नै थारै सांमै सूली माथै चढ़ाया है। म्हैं थौरे ऊं ओहीज जांणणौ चावूं के, थांनै मूसा रै कायदे ऊं परमेसर री आतमा रौ वरदान मिळयो के सुभ संदेस माथै विसवास करणै ऊं? कांई थै इता गेला हो के जिकौ कांम थै परमेसर री आतमा ऊं सरू करयौ, उणनै थै सरीर ऊं पूरौ करणौ चावौ? कांई थै इता दुख यूं ही उठाया? ऐड़ौ तो कोनीं लागै! परमेसर थांनै आतमा रौ दांन दियौ अर थौरे बीच में अचूम्बे रा कांम करै है। वे इण वास्तै करै के, थै मुसा रै कानुन माथै चालो या इण वास्तै के, थै सुभ संदेस माथै विसवास करौ हो? ओ यूं ही है, ज्यूं अबराहम रै बारै में सास्तर कैवै है के, “अबराहम तो परमेसर माथै विसवास करयौ अर धरमी मानिजियो।” थै ओ जांण लौ जिकौ परमेसर माथै विसवास करै, वे अबराहम रा हाचा वंस है। पवितर सास्तर में ओ पैला ऊं इज लिख्योड़ो हो के, परमेसर माथै विसवास करणै ऊं जिकौ यहूदी कोनीं वे भी धरमी बणैला। इण वास्तै परमेसर पैला ऊं हीज अबराहम नै संदेस सुणा दियौ हो के, “थारै ऊं धरती री सगळी जातियो आसीस पावैला।” अबराहम विसवास करयौ तो उणनै आसीस मिळी, इण वास्तै जिकौ विसवास करैला, उणनै आसीस मिळैला। जिकौ लोग मूसा रै कायदे नै मांनै, उणौ माथै सराप है। क्यूंकै सास्तर में लिखयोड़ो है के, “जिकौ मूसा रै कायदे री किताब में लिखयोड़ी सगळी बातां नै पूरी नीं करै, उण माथै सराप है।” पर आ बात सगळौ रै सांमै है के, मूसा रै कायदे ऊं कोई परमेसर रै सांमै धरमी कोनीं रै सकै। क्यूंकै सास्तर कैवै है के, “धरमी आदमी विसवास ऊं जीवतौ रैवैला।” मूसा रै कायदे रौ विसवास ऊं की लेवणो देवणो कोनीं। क्यूंकै सास्तर में लिखयोड़ो है के, “जिकौ व्यवस्था रै विधान नै मांनेला, वो उणरै ही माथै जीवता रैवैला।” मसीह अपांरै वास्तै सराप नै आप ले लियौ अर मूसा रै कायदे रा सराप रै बदळै अपांनै मोल ले लिया। क्यूंकै सास्तर में लिखयोड़ो है, “जिकौ सूली माथै लटकाइजे, वो सराप में है।” ओ इण वास्तै होयौ की, अबराहम री आसीस मसीह यीसु मे दूजी जातियो तांई पुगै, अर विसवास ऊं वा परमेसर री आतमा मिळै, जिण रौ वचन दियोड़ो हो। हे भाइयो, म्हैं थांनै एक आम आदमी री ज्यूं कहूं हूं के, मिनखौ में की इकरार रै जावै, तो इण में नीं तो की जोड़ी जे, नीं ही उण में की घटाई जे अर नीं ही उणनै तोड़ सकौ। इणरौ मतलब ओ है के, परमेसर वचन अबराहम नै दियौ अर उण ऊं उण रा वंस नै दियौ। सास्तर यूं नीं कैवै के, उणरा वंस रा लोगां नै या घणा जणा नै दियौ। पर सास्तर एक जणा वास्तै कैवै के, थारा वंस नै। यानि यीसु मसीह नै। म्हारै कैणै रौ अरथ ओ है के, जिकौ इकरार परमेसर पैला हीज पको कर दियौ हो, उणनै च्यार सौ तीस साल बाद में, मुसा रौ कानुन आन टाळ नीं सकै अर नीं ही उणरा वचन बेकार हो सकै। अगर मूसा रै कायदे ऊं बापोती मिळती तो, वचन रौ कीं लेवणो देवणो कोनीं। पर परमेसर री दया ऊं अबराहम नै दियोड़ा वचन ऊं हीज बापोती फोगट में मिळै है। तो इण मूसा रै कायदे रौ कांई मतलब है? जिण वंस रै आवणा रौ वचन दियोड़ो हो, उणरै आवणा ऊं पैला तांई मूसा रै कायदे परमेसर रा हुकम नीं मानणा रै कारण दिया हा। ऐ मूसा रै कायदे सरग दूत मूसा नै दिया, जिकौ परमेसर अर मांनखै रै बीच में राजीपो करावण वाळौ हो। बीच में राजीपो कराण वाळौ एक तरफ ऊं नीं होया करै, पर वो घणी तरफ ऊं राजीपो करावै। पण परमेसर एक हीज है। तो कांई मुसा रै कायदे अर परमेसर रा वचन एक दूजा रा आंमै सांमै है? कदैई कोनीं। अगर मूसा रै कायदे रै रैवता जिन्दगी मिळती, तो मुसा रै कायदे ऊं हीज पाप माफ हो जावता। पर पवितर सास्तर कैवै है के, पूरौ संसार पाप रै हाथ में है। ताकी यीसु मसीह माथै विसवास करणै ऊं जिकौ वचन मिळयो है वो, सगळा विसवास करणै वाळा नै मिळ सकै। पर विसवास रै आवणा ऊं पैला यानि अपांरै में विसवास परगट होणै ऊं पैला, अपां मुसा रै कानुन री जेळ में हा। इण वास्तै जैड़ी तांई अपां मसीह नै नीं मांनया अर विसवास करणै ऊं धरमी नीं बण्या, मूसा रै कायदा ही अपांरा गुरु हा। अबै अपां विसवास में हा अर मूसा रै कायदे अपांरा गुरु कोनीं है। क्यूंकै अपां यीसु मसीह माथै विसवास करणै ऊं अबै परमेसर रा टाबर हा। जिता भी मसीह में बतिस्मो लियौ, वे यीसु मसीह नै धारण कर लिया। अबै नीं कोई यहूदी रियौ, अर नीं कोई यूनानी, नीं कोई गुलाम है, नीं कोई आजाद, नीं कोई नर है अर नीं कोई नारी। क्यूंकै अबै थै सगळा मसीह में एक हो। अगर थै मसीह रा हो, तो अबराहम रा वंस अर परमेसर रा वचन ऊं थै उणरा वारिस भी हो। म्हारै कैणै रौ ओ मतलब है के, वारिस जद तांई नेनो है, उणरौ सगळी चीजों माथै हक तो है। पण उण में अर दास में कीं फरक कोनीं। वो उणरै पिता रै कयोड़े वगत तांई रूखाळा अर घरवाळा रै कैणै में रैवै। उण इज तरैह ऊं अपां भी, टाबर हा, तो संसार री पुराणी सिकसा रै वस मे होयनै दास बण्योड़ा हा। पर जद वगत पूरौ हो गियौ तो, परमेसर आपरा बेटा नै भेजिया, जिकौ एक लुगाई रा पेट ऊं जनमिया अर मूसा रै कायदे में रिया। ताकी जिकौ मूसा रै कायदे में गुलाम है उणौनै मोल लेने छुड़ा दैवै अर अपां नै परमेसर रा खोळा लियोड़ो बेटा रौ पद मिळै। थै परमेसर रा बेटा हो। क्यूंकै परमेसर आपरा बेटा री आतमा अपणा हिरदा में बेली है। जिकौ परमेसर नै, “हे पिता, हे बाप” कैहन बुलावै है। इण वास्तै अबै थूं दास कोनीं, पर बेटा है अर परमेसर रै घर रौ वारिस भी है। भला, जद थै परमेसर नै नीं जांण नै उणरा दास हा, जिकौ परमेसर कोनीं हो। अबै थै परमेसर नै जांणगा हो, या यूं कैवौ के परमेसर थांनै आपरा बेटा मांन लिया। तो थै कीकर उण कमजोर अर संसार री सीख रै लारै फिरौ हो? कांई थै पाछा उणौरा गुलाम बणणा चावौ? थै दिनां नै, महीनो नै, मौसमो नै अर तैय करयोड़े सालो नै मांनो हो। म्हैं थौरे बारै में डरूं हूं के, कठैई ऐड़ौ नीं हो के म्हारी सगळी मेनत माथै पांणी फिर जावै, जिकौ म्हैं थौरे वास्तै करी हूं। हे भाइयो, म्हैं थौरे ऊं विणती करूं के, थै म्हारै जैड़ा बण जाओ, ज्यूं म्हैं थौरे जैड़ौ बणग्यौ हूं। आ म्हारी विणती है, इण वास्तै कोनीं की, थै म्हारौ कीं बिगाड़यो हो। थै जांणौ हो के म्हारै सरीर री निबळाई रै कारण म्हनै थांनै सगळौ ऊं पैला सुभ संदेस सुणावण रौ मौकौ मिळयो हो। म्हारै सरीर री कमजोरी रै कारण म्हैं थौरे माथै भार बण्यौ। तो भी थै म्हनै मांन दियौ, घिरणा कोनीं करी अर म्हनै परमेसर रौ दूत समझ नै आप में भेळौ लियौ, ज्यूं यीसु मसीह म्हैं हीज हूं। थारी वे हेत वाळी बातां कठै गी? म्हैं थारै बारै मे ओ कहूं, अगर म्हैं थांनै केवतो तो, थै म्हारै वास्तै आपरी आंख्यां निकाळ नै दे देता। तो कांई थै म्हारै हाच बोलणै ऊं म्हारा बैरी हो गिया? जिकौ मूसा रै कायदे नै मांनै, वे थौने आपरा बेली बणाणा चावै, उणौरै मन में चौखी बात कोनीं। वे थांनै म्हारै ऊं न्यारा करणा चावै है। जिण ऊं थै उणौनै मानण वाळा बण्योड़ा रैवौ। पर आ बात भी चौखी है के, म्हैं थौरे खनै रैवूं या आगौ रैवूं, लोग हर वगत थांरा बेली बणणा चावै। ओ जरुरी है के वे, चौखा कांम वास्तै बेली बणावै। हे म्हारा टाबरौ, जद तांई थै मसीह जैड़ा नीं बण जाओ, तद तांई म्हैं थारै वास्तै टाबर जनमता वगत होवण वाळी पीड़ा ज्यूं दुख देखूं हूं। मन तो ओ करै के थौरे खनै आन दूजा तरीका ऊं बोलूं, क्यूंकै म्हारै मन में थौरे बारै में संका है। थै जिकौ मूसा रै कायदे में मांनणी चावौ, कांई म्हारै खनै ऊं कोनीं सुणौ के मूसा रौ कायदो कांई कैवै? उण में लिखयोड़ो है के, अबराहम रै दो बेटा हा। एक रौ जनम उणरी दासी ऊं होयौ अर दूजा रौ उणरी लुगाई ऊं होयौ जिकौ आजाद ही। दासी ऊं जनमियौ बेटौ, अबराहम रा सरीर री इछा रौ फळ हो। पर लुगाई ऊं जनमियौ बेटौ वंस बढ़ाणै वास्तै परमेसर रा वचन रौ फळ हो। इण दोनूं बातां रौ ओ अरथ है के, ऐ दोनूं लुगाईयां दो इकरार री छाप है। एक जिकौ सीनै भाखर माथै गुलामी में दासी ऊं जनमियौ। ओ इकरार दासी हाजिरा रै बारै में बतावै। हाजिरा मांन लौ अरब देस रौ भाखर है, पर अबार यरुसलेम हैर जैड़ौ है जिकौ आपरा टाबरां साथै गुलामी में है। पर सरग में जिकौ यरुसलेम है वो आजाद है अर अपांरी मां है। क्यूंकै सास्तर में लिखयोड़ो है के, “बांझड़ी थूं कदैई बेटौ नीं जिणयो, थूं आंणंद कर। थूं कदैई टाबर जनमणा री पीड़ कोनीं झेली, थूं आंणंद रा गीत गा। क्यूंकै सुवागण ऊं घणा छोड़योड़ी रै टाबर है।” इण वास्तै हे भाइयो, अपां अबराहम रा बेटा इसहाक रै ज्यूं परमेसर रै वचन रा फळ रा टाबर हा। पर जिण वगत जिणरौ जनम सरीर री इछा ऊं होयौ है, वो उण माथै अनीती करता हा, जिकौ पवितर आतमा रा वचन ऊं जनमियौ है। अबै भी यूं हीज रैवै। पर पवितर सास्तर कांई कैवै है? “दासी अर उणरा बेटा नै घर ऊं काढ़ दो। दासी रौ बेटौ, लुगाई रा बेटा रै साथै बापोती में वारिस नीं हो सकै।” इण वास्तै भाइयो, अपां दासी रा बेटा कोनीं, पर अपां ब्याव करयोड़ी आजाद लुगाई रा बेटा हो। मसीह अपांनै आजाद रैवण वास्तै ही आजाद करिया है। इण खातर थै, पाछा गुलामी रै जुआ में मत जुतो। देखौ, म्हैं पौलुस थौरे ऊं कहूं के, अगर थै खतनो करायनै मूसा रै कायदे में जाओला, तो थौरे वास्तै मसीह में कोई फायदो नीं होवैला। तो भी म्हैं खतनो कराण चावण वाळा नै वळै कहूं के, उणनै मुसा रा हरैक कानुन मांनणा पड़ैला। जिकौ मूसा रै कायदे ऊं धरमी बणणौ चावै, वो मसीह ऊं अलग हो गिया है अर परमेसर री दया नै गमा दी है। पर अपां परमेसर रै सांमै धरमी स्वीकार करणै री बाट जोवा हा, जिकौ विसवास अर आतमा री सगति ऊं रैवैला। मसीह में नीं तो खतना वाळा रौ कीं मोल है अर नीं ही बिना खतना वाळा रौ। मोल विसवास रौ है, जिकौ परैम ऊं पैदा होवै। थै तो मसीह में सावळ हालता हा। थांनै कुण हाच रै मारग माथै हालता रोक दिया? हाच माथै चालनै ऊं रोकण वाळी सीख परमेसर री तरफ ऊं कोनीं है। जिकौ थांनै बुलाया है। याद राखौ, “थोड़ोक खमीर पूरै आटे नै फुला दैवै।” म्हनै परभु में थौरे माथै पूरौ भरोसौ है के थै, डिगोला कोनीं। पर जिकौ थांनै डिगाणा री कोसीस करै, वो कोई भी क्यूं नीं हो, उणनै परमेसर जरुर सजा देवेला। पर हे भाइयो, कीं लोग म्हारै माथै ओ आरोप लगावै है के, म्हैं खतना रौ परचार करूं हूं। कांई म्हैं खतना रौ परचार करूं हूं? अगर म्हैं ऐड़ौ करतौ तो, मसीह री सूली रा परचार करणै रै कारण म्हनै जुरम नीं सैहन करणा पड़ता। भलौ ओहीज होवतो जिकौ लोग थांनै डावाडोल करै, वे आपरा खतना रै साथै आपरौ अंग भी काट देवणो चाहीजै। हे भाइयो, थै परैम ऊं एक दूजा री सेवा करौ। थै जांणौ हो के, थांनै परमेसर आजाद रैवण वास्तै बुलाया है। ऐड़ौ नीं होवै के, थै सरीर रा भोग विलास में पड़ जाओ। क्यूंकै, “अपणै पड़ोसी नै खुद ज्यूं परैम करणै ऊं ही मुसा रा सगळा कानुन पूरा हो जावै।” पर अगर थै लोग एक दूजा नै काट नै फाड़ना रा मौका में रैवौ, तो याद राखजौ थै एक दूजा रौ सितियानास करौ हो। पर म्हैं कहूं हूं के, थै पवितर आतमा रै कैणै में चालो अर सरीर री वासना ऊं बचयोड़ा रैवौ। सरीर री वासना पवितर आतमा ऊं उलटी हालिया करै अर पवितर आतमा सरीर री वासना ऊं उलटी चालै। ऐ दोनो आपस में एक दूजा रा बैरी है। इण वास्तै जिकौ थै करणी चावौ, वो नीं कर सकौ। थै पवितर आतमा में चालो ला, तो थै मूसा रै कायदे रा गुलाम कोनीं रोला। सरीर रा कांम तो सांमै है, ज्यूं व्यभिचार, भूंडा कांम अर लुचापणो। मूरती पूजा, टोटका, बैर, झगड़ा, रीस, विरोध, सवारथ, फूट अर अधरम। मन में रीस, नसो अर भोग विलास जैड़ा घणा कांम है जिणरै बारै में म्हैं थांनै पैला कैह दियौ हो। ऐड़ा कांम करण वाळा परमेसर रा राज में वारिस नीं होवैला। आतमा रौ फळ तो परैम, सानति, आंणंद, धीरज, करपा, भलाई, नरमाई, मेळ अर खुद नै बस मे राखणौ है। ऐड़ै कांमां रै विरोध मे कोई व्यवस्था कोनीं है। जिकौ लोग यीसु मसीह रा है, वे सरीर रा लालच अर बुरी इछाओ नै सूली माथै चढ़ा दी है। अगर अपां पवितर आतमा ऊं जीवता हा तो अपांनै पवितर आतमा रै कैणै में चालणौ चाहीजै। अपां घमंडी होयनै एक दूजौ नै नीं छेड़ो अर नीं एक दूजा वास्तै मन में रीस राखौ। हे भाइयो, अगर कोई मिनख किणी पाप रै कारण पकड़ीज जावै तो थै जो धरमी हो, उणनै नरमाई ऊं संभाळौ अर उणनै धरम मारग माथै पाछौ लाओ अर सावचेत रैवौ के, थै भी किणी परीकसा में नीं फस जाओ। थै दुख में एक दूजा रा भार नै उठाओ अर इण तरीका ऊं मसीह रा कानुन नै मानता रौ। अगर कोई कीं नीं होवता भी खुद नै घणौ हमजे, तो वो खुद नै धोखो दैवै है। हर एक अपणै आप नै देख ले, ताकी थांनै खुद माथै घमण्ड करणै रौ मौकौ मिळेला। पर थांनै एक दूजा री बराबरी नीं करणी चाहीजै। क्यूंकै हरैक नै खुद रौ ही भार उठाणौ पड़ै है। जिकौ मसीह रा वचन सिखया है, वे जिकौ चौखी चीजों आपरा खनै है, वा सिखावण वाळा नै भी दे। अपणै आपनै धोखो मत दो। परमेसर री मजाक नीं उडाई जा सकै। क्यूंकै, मिनख जैड़ौ बोवेला, वो वैड़ौ ही काटेला। जिकौ सरीर वासना वास्तै बोवे, वो सरीर रै नास री फसल काटेला। जिकौ पवितर आतमा वास्तै बोवे, वो पवितर आतमा ऊं अनत जीवन री फसल काटेला। अपांनै भलाई करता हीमत नीं हारनी है। तो आओ अपां ढ़िला नीं पड़ो ताकी वगत आया फळ पा सकौ। इण वास्तै भलाई करणै रौ मौकौ नीं चुकणो, सगळौ साथै भलाई करणी, खास करनै अपणा विसवासी भाइयो साथै। देखौ, अब म्हैं कैड़ा मोटा मोटा आखर थौरे वास्तै खुद रै हाथ ऊं लिखूं हूं। जिकौ सरीर ऊं दिखाओ करै अर थांनै खतनो कराणै रौ दबाब दे, वे इण वास्तै के, मसीह री सूली रै परचार रै कारण उणौ नै दुख नीं झेलनो पड़ै। क्यूंकै, खतना करण वाळा खुद तो मूसा रै कायदे नै मांनै कोनीं, पर थौरो खतनो कराणौ चावै। ताकी वे इण बात माथै घमण्ड करै के, थै उणौरै कैणै ऊं खतनो करायो। म्हैं तो सिरफ अपांरा परभु यीसु मसीह री सूली माथै घमण्ड करूं हूं। इण कारण ऊं म्हैं संसार री निजर में अर संसार म्हारी निजर में सूली माथै मर गिया। किणी रौ खतनो होयौ के नीं होयौ, इणरौ कोई मतलब कोनीं। पण इण बात रौ मतलब है, के अपां पूरी तरैह ऊं नई सिस्टी बण जाओ। इण वास्तै इण रीत माथै चालण वाळा माथै, अर परमेसर रै इजरायल माथै सानति अर दया होती रैह। म्हैं विणती करूं के, आगै ऊं कोई म्हनै तंग मत करजौ। क्यूंकै यीसु मसीह रा निसाण म्हारै सरीर माथै लिया फिरूं हूं। हे भाइयो, अपांरा परभु यीसु मसीह रौ अनुग्रह थौरी आतमा माथै बण्योड़ो रैवै। आमीन। ओ कागद इफिसुस रा परमेसर रा पवितर अर यीसु मसीह माथै विसवास करण वाळा लोगां रै नाम पौलुस री ओर ऊं है, जिकौ परमेसर री इछा ऊं यीसु मसीह रौ चुणयोड़ौ प्रेरित है। म्हौरै पिता परमेसर अर परभु यीसु मसीह री दया अर सानति थौरे माथै बण्योड़ी रैवै। अपांरा परमेसर अर परभु यीसु मसीह रा पिता रौ धन्यवाद हो। वे यीसु मसीह माथै विसवास करणै रै कारण सरग जगा में सगळी आतमा री आसीस अपांनै दी है। वे अपांनै इण दुनिया री सरूआत ऊं पैला मसीह रै साथै गाठ जोड़ नै चुण लिया हा, ताकी अपां पिता परमेसर री निजर में पवितर अर निरदोस रैवौ। वे आपरी भली इछा ऊं, पैलाइज तैय कर लियौ हो के, अपां उणरा यीसु मसीह में खोळा लियोड़ा बेटा बणौला। आहीज उणरी खुसी अर उणरौ मकसद हो। परमेसर री महिमा ऊं भरयोड़ी दया री जे जेकार होवै, जिकौ अपांनै आपरै लाडला बेटा यीसु मसीह रै साथै गाठ जोड़ नै ऊं, बिना की दिया मिळी। यीसु मसीह री खुद री मरजी अर लोई ऊं अपांरौ छुटकारो होयौ अर पापों ऊं माफी मिळी है। ओ परमेसर री मेमा ऊं भरयोड़ी दया रै कारण होयौ। आ दया वे पूरा ग्यांन अर समझ ऊं अपांरै माथै घणी न घणी करी। वे आपरी इछा रौ भेद अपांरै माथै परगट करयौ, जिकौ वे यीसु मसीह में पूरी करणै रौ पैला हीज, खुसी ऊं तैय कर लियौ हो। परमेसर इण वास्तै तैय कर लियौ हो के, घड़ी रै पूरौ होणै रा वगत जिकौ कीं सरग में है अर जिकौ कीं धरती माथै है, सगळी रचना मसीह रै हाथ में कर दे। परमेसर सगळा आपरी मरजी ऊं करै, जिकौ वे तैय कर राखियौ है। वे अपांनै भी खुद री मरजी ऊं, खुद रा लोग बणावण वास्तै यीसु रै साथै गाठ जोड़ नै चुणया। इणनै भी वे पैला ही तैय कर दियौ हो। ताकी अपां जिकौ सबां ऊं पैला यीसु मसीह माथै आस राखौ, उणरी मेमा री जे जेकार करौ। जद थै हाचा वचन सुणया, वो थारै वास्तै छुटकारै रौ सुभ संदेस हो अर जिण ऊं थै मसीह माथै विसवास करयौ। तो परमेसर थौरे माथै पवितर आतमा री छाप लगाई। जिण रौ वायदो परमेसर पैला कर राखियौ हो। आ पवितर आतमा इण बात री गवाई है के, परमेसर आपरा लोगां ऊं जिकौ वादा करिया है, वे पूरा होवैला। अपांनै ओ विसवास दैवै है के, अपां जिकौ परमेसर रा लोग हा, उणौनै पूरौ पूरौ छुटकारो दिलावै ला। इण ऊं उणरी महिमा री जे जेकार होवै। जद ऊं म्हैं परभु यीसु में थांरा विसवास अर परमेसर रा पवितर लोगां रै वास्तै थांरा परैम रै बारै में सुण्यौ हूं, उण वगत ऊं म्हैं थौरे वास्तै परमेसर रौ धन्यवाद करणौ लारै कोनीं राखूं अर म्हारी पराथना में थांनै हमेसां याद करूं हूं। म्हैं पराथना करूं हूं, अपांरा परभु यीसु मसीह रा परमेसर जिकौ मेमा रा पिता है, थांनै ग्यांन अर भेद परगट करणै री आतमा दैवै। ताकी थै, परमेसर नै और चौखा तरीका ऊं जांण सकौ। म्हैं पराथना करूं के, थौरे मन री आंख्यां खुल जावै। इण ऊं थै जांण जाओ के, परमेसर रा बुलावणा में आसा कांई है अर परमेसर रा पवितर लोगां नै जिकौ मेमा री बापोती मिळेला, वा किती अनोखी अर अनमोल है। थै ओ भी जांण जावोला के, अपां विसवासियो में उण री सगति किती महान है। जिकौ सगति अपणा में कांम करै, उण सगति ऊं वे मसीह नै मरयोड़ा ऊं जीवता करिया अर सरग में आपरै जिमणा पाड़ै बिठाया। परभु यीसु नै सगळै राजाओ माथै, अधिकारियों माथै, आत्मिक सगतिया माथै, परभुओ रै माथै अर सगळै नामों माथै विराजमान है अर इण जुग में अर आवण वाळा जुग में भी सगळी सगतियो माथै विराजमान रैवैला। परमेसर सगळौ उणरै पगां नीचे कर दियौ अर उणौनै मंडली रौ माथो बणा दिया। मंडली उणरी काया है अर यीसु मसीह इण काया री पुरणता है अर उणरी सगति च्यांरूमेर है। थै भी परमेसर रा हुकम नीं मांनणा रै अर पाप रै कारण आतमा ऊं मरयोड़ा हा। थै पैला इण संसार री रीत माथै अर आकास में राज करणै वाळी दुस्ट आतमा रै कैणै ऊं हालता हा। जिकौ अबै भी परमेसर रा हुकम नीं मांनणा वाळा में कांम करै है। पैला अपां सगळा सरीर रा लालच पूरा करणै में दिन काढ़ता हा। सरीर अर मन री इछा पूरी करता हा। दूजा लोगां रै ज्यूं अपां भी परमेसर री रीस झेलन जोगा हा। पर परमेसर जिकौ दया रा पिता है, आपरा परैम रै कारण अपां ऊं परैम करयौ। जद अपां परमेसर रा हुकम नीं मानणा रै कारण आतमा ऊं मरयोड़ा हा। पर मसीह रै जिवता रेवणा ऊं, अपां नै भी उणरै साथै आतमा में जिवता करिया। आ ही मसीह में परमेसर री दया है, की वे अपांनै बचाया। यीसु मसीह रै साथै गाठ जोड़ रै कारण, परमेसर अपांनै यीसु मसीह साथै आतमा ऊं जिवता करिया अर सरग जगा में उणरै साथै बैठाया। ताकी परमेसर आपरी उण करपा ऊं, जिकौ यीसु मसीह रै कारण अपांरै माथै है, आपरी अपार दया नै आवण वाळा जुगो में अपांनै दिखावै। क्यूंकै, विसवास रै कारण दया ऊं ही थौरो छुटकारो होयौ है। जिकौ थांनै खुद रै कारण कोनीं मिळयो, पर ओ परमेसर रौ दांन है। नीं ही थांरा करमो रा फळ रै कारण होयौ, जिण माथै थै कोई घमण्ड करौ। क्यूंकै, अपां उणरै बणायोड़ा हो अर यीसु मसीह में गाठ जोड़ ऊं उण भला कांमां रै वास्तै घड़ियोड़ा हो, जिकौ परमेसर पैला ऊं इज अपांरै करनै वास्तै तैयार करिया है। इण कारण याद राखौ के, थै जनम ऊं यहूदी कोनीं हा अर सरीर में हाथो ऊं खतनो करायोड़ा लोग, आपरा खतना माथै घमण्ड करै अर थांनै बिना खतनावाळा कैवै। उण वगत थौरो मसीह साथै गाठ जोड़ कोनीं हो अर इजरायल रा रैवण वाळा नीं हा। वायदो रा वादा नै जांणता ही कोनीं हा, थौरे खनै कोई आसा कोनीं ही अर दुनिया में परमेसर ऊं आगा हा। पर अबै थै जिकौ परमेसर ऊं आगा हा, यीसु मसीह रै साथै गाठ जोड़ रै कारण वाणा बलिदान रा लोई ऊं परमेसर रै नैड़ा आयगा हो। यीसु मसीह ही खुद अपांरौ में सानति लावण वाळा है। वे यहूदी अर जिकौ यहूदी कोनीं रा लोगां नै एक कर दिया अर इण दोनो नै न्यारा करणवाळी नफरत री भींत नै, बीच मे ऊं तोड़ दी। यीसु मसीह यहूदियो रा कानुन कायदा नै मिटा दिया अर आपरा बलिदान ऊं दोनो नै खुद में मिला नै, परमेसर रा लोग बणा दिया। सूली माथै बैर रौ नास करनै इण ऊं दोनो नै एक काया बणान परमेसर ऊं मिलाया। वे आन थांनै जिकौ आगा हा अर जिकौ नैड़ा हा दोनो नै मेल-मिलाप रौ सुभ संदेस सुणायो। क्यूंकै मसीह ऊं हीज अपां दोनो एक ही पवितर आतमा ऊं पिता परमेसर खनै पोच सका। इण वास्तै अबै थै परमेसर री निजर में परदेसी अर अजांण कोनीं रिया, पर परमेसर रा पवितर लोगां रै साथै एक गांव रा अर परमेसर रा राज में रैवण वाळा हो गिया हो। थै ऐड़ा घर हो जिणरी नीव चुणयोड़ा चेला अर भविसयदाता है अर परभु यीसु मसीह खुद उणरी नासक रौ भाटो है। मसीह में सगळा विसवासी मिळन एक साथै परभु रै वास्तै पवितर मिंदर बण जावै। यीसु मसीह रै साथै गाठ जोड़ रै कारण थै भी पवितर मिंदर बणता जाओ हो, जिण में परमेसर पवितर आतमा ऊं वास करै है। इण वास्तै म्हैं पौलुस, जिकौ यहूदी कोनीं उणौरै वास्तै यीसु मसीह रै नाम में बन्धयोड़ो हूं। परमेसर दया करनै थौरी भलाई रै वास्तै जिकौ कांम म्हनै सूपयौ उणरै बारै में थै, जरुर सुण्यौ होवैला। ओ भेद म्हारै माथै परमेसर परगट करयौ, म्हैं जिण रै बारै में थोड़ौ लिख दियौ हो। जिण ऊं थै पढ़नै जांण सकौ के, म्हैं मसीह रौ ओ भेद समझूं। जिकौ लारली पीढ़ियो रा मिनखौ नै नीं बतायोड़ो हो, पर अबै परमेसर आपरी पवितर आतमा ऊं ओ भेद उण रा पवितर चुणयोड़ा प्रेरित अर परमेसर री बातां बतावण वाळा माथै परगट करयौ है। भेद ओ है के, सुभ संदेस ऊं अबै यहूदियो रै साथै, जिकौ यहूदी कोनीं वे भी परमेसर री बापोती में भेळा है अर यीसु मसीह में एक ही काया रा अंग अर वादा में भी भेळा हो गिया है। म्हैं परमेसर री दया रा दांन री सगति रै कारण उण रा सुभ संदेस रौ सेवक बण्यौ। म्हैं परमेसर रा सगळै पवितर लोगां में सबां ऊं नेनो हूं, तो भी म्हारै माथै आ दया होई के, जिकौ यहूदी कोनीं उणौनै म्हैं मसीह रा मुंगा मोल रौ सुभ संदेस सुणाऊ। म्हैं इण भेद नै खोलनै बताऊं के, ओ भेद सगळौ रै वास्तै कीकर कांम करै। जिकौ अपांनै बणावण वाळा परमेसर में सरूआत ऊं लुकयोड़ो हो। ताकी परमेसर रा इण महान ग्यांन नै मंडली ऊं, आत्मिक सगतियो अर परधानो माथै परगट करै। इणनै परमेसर आपरी सनातन इछा ऊं कयौ, जिण नै वे परभु यीसु मसीह में पूरौ करयौ। परभु यीसु मसीह साथै गाठ जोड़ अर उणरै माथै विसवास करणा ऊं, अपांनै आ हीमत अर भरोसौ होयौ के अपां परमेसर खनै जाओला। इण वास्तै म्हैं हाथ जोड़ नै विणती करूं हूं के, थारै कारण जिण तकलीफो नै म्हैं चैन करूं हूं, उण ऊं थै हीमत मत हार जो। क्यूंकै ऐ थौरी भलाई वास्तै है। इण वास्तै म्हैं पिता परमेसर रै सांमै गोडा टेकू, जिकौ सरग अर धरती री हर एक वंस नै पेचाण दी अर उणौ ऊं थारै वास्तै पराथना करूं हूं के, परमेसर आपरी पवितर आतमा री मेमा रा धन ऊं, थौरी अन्तर आतमा नै ताकत दैवै। विसवास ऊं मसीह थारा हिरदा में वास करै अर थै परैम में नीव राख नै जड़ पकड़नै, सगळा परमेसर रा पवितर लोगां रै साथै चौखै तरीकै ऊं जांण सकौ, की मसीह रौ परैम कितौ चौड़ौ है, कितौ लम्बौ है, कितौ ऊंचौ है अर कितौ गेहरो है। मसीह रा उण परैम नै जांण सकौ जिकौ सगळै ग्यांन ऊं न्यारौ है। थै परमेसर में रम जाओ। परमेसर सगतिसाली है अर अपांरै में कांम करण वाळी उण री सगति, जिकौ अपां विणती करनै मांगो, वा अपांरी सौच ऊं घणौ बढ़नै कर सकै है। परमेसर री मेमा, मंडली में अर यीसु मसीह में जुग जुग होती रैवै। आमीन। इण वास्तै में जिकौ परभु री सेवा में बन्धियोड़ो हूं, थौरे ऊं विणती करूं हूं के, जिण वास्तै थै बुलायोड़ा हो, उण रै जैड़ा चालो। अर पूरी दया, नरमाई अर धीरज रै साथै परैम ऊं एक दूजा रै वास्तै सहन करौ। कोसीस करता रौ के, मेळ री गाठ में आतमा रौ एको बण्योड़ो रैवै। एक ही देह है अर आतमा भी एक है। ठीक इण इज तरैह अपां एक ही आसा में भेळा होयनै बुलायोड़ा हो। एक हीज परभु, एक हीज विसवास, एक हीज बतिस्मो, अर सगळौ रा एक हीज पिता परमेसर है। जिकौ सबां ऊं ऊपर अर सगळौ रै बीच में अर सगळौ में कांम करै है। पर अपां मे ऊं सगळौ नै दया रौ दांन मिळयो है अर ज्यूं मसीह चाया, उणीज तरैह ऊं ओ खास वरदान दियौ है। इण वास्तै सास्तर कैवै है, “ वे ऊंचा चढ़िया तो, कैदियो नै छुड़ायनै साथै लेगा, अर लोगां नै वरदान दियौ।” अबै इण बात रौ कांई अरथ है के, वे ऊंचा चढ़िया? पर हो के, वे पैला पाताळ में उतरिया हा। जिकौ उतरिया ऐ वे हीज हा जिकौ सगळै आकास ऊं ऊंचा चढ़गा ताकी, वे सगळौ नै खुद ऊं भर दे। वे कीं नै चुणयोड़ा चेला, कीं नै परमेसर री बातां बतावण वाळा, कीं नै सुभ संदेस रा परचार करण वाळा, कीं नै अगुवा अर कीं नै सिखावण वाळा बणाया। वे लोगां नै इण वास्तै चुणया ताकी वे परमेसर रा पवितर लोगां नै सेवा वास्तै तैयार करै अर मसीह देह नै मजबुत करै। ओ उण वगत होवैला, जद अपां सगळा रा सगळा विसवास में अर परमेसर रै बेटा रा पूरा ग्यांन में एक हो जाओ ला। यानि के, जद अपां पूरी तरैह ऊं मसीह में रम जाओ ला। जिण ऊं अपां आगै ऊं टाबर जैड़ा नीं रैवौ, जिकौ मांनखै री ठग विधया, धोखो अर वैम री चालौ में अर सिद्धान्त रा हवा री सीख में अठै ऊं उठी उड जावै। पर परैम में हाच रै साथै हालता मसीह में बढ़ता जाओ अर मसीह देह रुपी मंडली रौ माथो है। जिण ऊं पूरी देह नै ताकत मिळै अर देह रा हर एक अंग जोड़ ऊं मिलनै आप आप रा कांम परैम ऊं करै तो, पूरी काया मजबुत होती जावै। इण वास्तै म्हैं थांनै परभु में सावचेत करूं के, थै परभु नै नीं मांनण वाळा लोगां, ज्यूं मत जीवो, क्यूंकै उणौरी सौच बेकार है। क्यूंकै उणौरी बुद्धि मरयोड़ी है। उणौ री बिना ग्यांन रै कारण, उणौरा मन कैड़ा हो गिया है। इण ऊं वे परमेसर रा जीवन ऊं आगा टाळियोड़ा है। वे बेसरम होयनै, लुचापणा में लाग गिया है अर सगळै तरैह रा भूंडा कांम वासना करणै री ताक में रैवै। पण थै यीसु मसीह री ऐड़ी सीख तो कोनीं सीखी। पर थै हाच ऊं उणरी सुणी, तो ज्यूं यीसु में हाच है अर उण में थांनै सीखाया भी। इण वास्तै थै पुराणा सभाव नै छोड़ दो, जिकौ भूंडी वासना वाळी इछा ऊं थौरो नास करै। आपरा हिरदा अर मन ऊं नवा बणता जाओ अर नवा सभाव नै पैहर लौ, जिकौ परमेसर रा हाच, धरम अर पवितरता में बणायोड़ो है। इण कारण झूठ बोलणौ छोड़नै, हरैक आपरै पाड़ोसी ऊं हाच बोलो, क्यूंकै अपां आपस में एक हीज काया रा अंग हो। रीस तो करौ, पर पाप मत करौ। सूरज रै ढ़ळनै तांई रीस नीं राखणी। सैतान नै मौकौ मत दो। चोरी करणा वाळौ, वळै चोरी नीं करै। पर भला कांम करनै वास्तै आपरा हाथो ऊं मेनत करै। ताकी जिनै जरुत पड़ै, उणनै देवण वास्तै उणरै खनै कीं रैवै। कोई दुस्ट बात थौरे मूंडै ऊं नीं निकळै। वोहीज बात निकळै जिणरी थांनै जरुत है अर जिकौ लोगां रौ उतम करै अर सुणण वाळा रौ भलौ हो। परमेसर री पवितर आतमा गवाई देन छुटकारो रा दिन वास्तै थौरे माथै छाप लगा दी है, इण वास्तै उण नै दुखी मत करौ सगळी तरैह री कड़वाहट, लड़ाई, रीस, कलेस अर निंदा, सगळी बुराई ऊं आगा रैवौ। अर थै एक दूजा रै माथै करपा करण वाळा अर दया राखण वाळा हो जाओ, ज्यूं परमेसर यीसु मसीह ऊं थांरा गुनाह माफ करिया, उण इज तरीका ऊं थै भी एक दूजा रा अपराध माफ करौ। थै परमेसर रा लाडला टाबर हो, इण वास्तै परमेसर रा सभाव में चालो। परैम करौ, ज्यूं यीसु मसीह थौरे ऊं कियो, अर अपांरै वास्तै अपणै आप नै बड़िया सुगंध रै वास्तै परमेसर रै आगै भेट करनै बलिदान हो गिया। थै परमेसर रा पवितर लोग हो, इण वास्तै थांरा में व्यभिचार अर किणी तरैह रा भूंडा कांम या लोभ री बातां नीं होणी चाहीजै। थांरा मूंडा ऊं नीं तो बेसरमी, नीं मुरखता अर नीं कोई गळत मजाक री बातां निकळनी चाहीजै। क्यूंकै ऐ बातां थांनै सौभा कोनीं दैवै। इणरी जगा थांरा मूंडा ऊं परमेसर री बड़ाई निकळनी चाहीजै। क्यूंकै थै जांणौ हो के, व्यभिचारी, भूंडा लोग अर लोभी मिनख मूरतियो नै पुजण वाळा रै बराबर है। इण वास्तै मसीह अर परमेसर रा राज में कोई बापोती कोनीं है। कोई थांनै बेकार री बातां ऊं धोखो नीं दैवै। क्यूंकै ऐड़ा कांमां रै कारण परमेसर री रीस, उणौ रौ हुकम नीं मांनण वाळा माथै भड़के। इण वास्तै थै उणौरै कांमां में भेळा मत रौ। क्यूंकै थै पैला तो अंधारै में हा, पर अबै थै मसीह रा साथै गाठ जोड़ रै कारण परभु रा चांदणा में हो। इण वास्तै अबै चांदणा रा टाबरां ज्यूं जीवो, क्यूंकै चांदणौ भलाई, धरम अर हाच रा फळ लावै। ओ परखो के, परभु नै कांई चौखौ लागै? अंधारै रा निकमे कांमां में भेळा मत रौ, पर उणौनै सांमै लाओ। क्यूंकै उणौरै लुकयोड़ा कांमां री बातां करणी भी सरम री बात है। जद सगळी बातां चांदणा में आवै, तो उणरी असलियत सांमै आ जावै। क्यूंकै चांदणौ ही सगळौ परगट करै है। इण कारण ऊं कैवै है के, “हे सुता रैवण वाळा जाग जाओ, मरयोड़ौ में ऊं जी उठो, तो मसीह रौ चांदणौ थारै माथै चमकैला।” इण वास्तै ध्यांन ऊं देखौ के। थै कीकर चालो, गेला ज्यूं नीं, पर हमजदार ज्यूं चालो। हरैक मौका नै अनमोल हमजो, क्यूंकै दिन खराब है। इण कारण ऊं गेला मत रहीजौ, पर जांणलो के, परभु री इछा कांई है। दारूड़िया मत बणौ। क्यूंकै इण ऊं लुचापणो आवै। पर आतमा में बढ़ता जाईजौ। थै भजन, आतमा रा गीत अर परभु रा गीत एक दूजा वास्तै गाता रौ। आपरा हिरदा ऊं परभु रै वास्तै भजन किरतन करता रैवौ। आप आप रा मन में परभु रै सांमै गाता अर किरतन करता रौ। हमेसां सगळी बातां वास्तै अपांरा परभु यीसु मसीह रै नाम ऊं पिता परमेसर नै धन्यवाद देता रैवौ। थै मसीह नै मानो हो, इण वास्तै एक दूजा रौ कैणौ मानो। हे लुगाइयां, आप आप रा धणी रा कैणै में रैवौ, ज्यूं परभु रा कैणै में रैवौ। क्यूंकै बींद, बींदणी रौ माथो है। ज्यूं यीसु मसीह मंडली रा माथा हा अर आप हीज मंडली नै छुटकारो देवण वाळा है। ज्यूं मंडली मसीह रै कैणै में है, लुगाईयां भी आप आप मन ऊं धणी रै कैणै में रैवौ। हे पतियो आप आप री लुगाईयां ऊं परैम राखौ, जिण तरैह ऊं मसीह मंडली रा परैम में अपणै आप नै, मंडली वास्तै दे दिया। ताकी मसीह मंडली नै परमेसर रा वचन अर पांणी ऊं स्‍नान करायनै सुद्ध और पवितर करै। अर एक ऐड़ी तेज वाळी मंडली बणान आपरै खनै ऊभी करै, जिण में कोई कलंक, कोई हळ, कोई दूजी गळत चीज नीं रैवै। पर वा पवितर अर निरदोस रैवै। मसीह मंडली ऊं परैम राखै, इण वास्तै ओ जरुरी है के, बींद आपरी बींदणी ऊं इणी तरैह ऊं परैम करै ज्यूं वो खुद ऊं परैम राखै है। क्यूंकै लोग लुगाई एक काया ज्यूं है। जिकौ आपरी लुगाई ऊं परैम राखै, वो खुद ऊं परैम राखै है। क्यूंकै कोई भी आपरा सरीर ऊं बैर कोनीं राखै पर उणनै पाळिया करै, ज्यूं मसीह आपरी मंडली साथै करै। इण वास्तै के अपां उणरी काया रा अंग हो। सास्तर में लिखयोड़ो है के, “आदमी आपरा मां बाप नै छोड़ नै आपरी लुगाई रै साथै एक तन रैवैला।” ओ मोटो भेद है। पर में मसीह अर मंडली रै बारै में कहूं हूं। पर म्हैं एक बार वळै कहूं हूं के, थै हरैक आपरी लुगाई ऊं खुद ज्यूं परैम राखौ अर लुगाई भी बींद रै कैणै में चालै। हे टाबरौ, थै परभु रा गाठ जोड़ में हो, इण वास्तै थै थौरे मां बाप रा हुकम मांनो, क्यूंकै ओ सही है। “आपरै मां बाप रौ आदर करौ।” ओ पैलौ हुकम है जिणरै साथै वायदो भी जुड़योड़ो है की, “जद थै थौरे मां बाप रौ कैणौ मांनोला, तो थारौ भलौ होवैला अर थांनै धरती माथै लम्बी उमर मिळेला।” हे टाबरौ रा मां बाप, थै भी थौरे टाबरौ नै रीस मत दिलाओ, पर परभु में सीख देता रैवौ अर उणौनै सई गळत रौ फरक हमजावता उणौनै मोटा करौ। हे दासो, जिकौ धरती माथै थांरा मालिक है, उणरौ कैणौ मांन रै साथै अर हाचा मन ऊं मानो। जिण तरैह ऊं थै मसीह रौ हुकम मानो हो। मिनखौ नै दिखावण वास्तै अर राजी करनै वास्तै सेवा मत करौ। पर मसीह रा दास ज्यूं मन ऊं परमेसर री इछा माथै चालो अर सेवा नै लोगां री सेवा जांण नीं, पर परभु री सेवा जांण नै राजी मन ऊं करौ। क्यूंकै थै जांणौ हो के, जिकौ कोई भी जितौ चौखौ कांम करैला, चाहे वो नौकर हो चाहे आजाद, परभु उण नै उतौ ही चौखौ फळ देवेला। हे मालिको थै भी थांरा नौकरो नै धमकावणो छोड़ दो अर उणौरै साथै भी चौखौ वैवार करौ। क्यूंकै थै जांणौ हो थौरे दोनो रौ मालिक सरग में है अर वे कदैई पकसपात नीं करै। कैवणौ ओहीज है के, परभु रा गाठ जोड़ अर परभु री महान सगति में मजबुत बणौ। परमेसर रा सगळा हथियार बान्ध लौ, ताकी थै सैतान री सगळी चालौ नै रोक सकौ। क्यूंकै, अपांरी आ कुसती मिनखां ऊं कोनीं है, पर आकास में राज करणा वाळी सगतियो री दुस्ट सेना ऊं अर इण धरती री अंधेर सगतियो रा परधानो ऊं अर उणौरा राजा ऊं है। इण वास्तै बुरै दिनां मे इणौरौ सांमनौ करनै वास्तै परमेसर रा सगळा हथियार बांध लौ ताकी सगळी लड़ाई पूरी कर नै टिकियोड़ा रै सकौ। इण वास्तै सचाई ऊं कमर बांधनै अर धारमिकता रौ कवच पैहर नै, सुभ संदेस रा परचार वास्तै पगां मे मेळ मिलाप रा पगरखा पैहर नै तैयार हो जाओ अर उण सगळौ रै साथै, विसवास री ढ़ाल लेन मजबुती ऊं ऊभा रैवौ। जिण ऊं थै उण सैतान रा सगळा बळता तीरो नै बुझा सकौ। उद्धार रौ मुगट पैहर लौ, अर परमेसर रै वचन रूपी आतमा री तरवार उठा लौ। हर एक मौका माथै अर सगळी बातां वास्तै आतमा मे ऊं विणती करता रौ अर इणीज तरैह ऊं परमेसर रा पवितर लोगां रै वास्तै हमेसां विणती करनै जागता रौ। म्हारै वास्तै भी विणती करजौ के, म्हनै बोलता वगत ऐड़ौ जोरदार वचन मिळै, जिण ऊं म्हैं हीमत रै साथै सुभ संदेस रौ भेद बता सकूं। जिणरै वास्तै में हांकळौ ऊं बन्धियोड़ो परमेसर रौ राजदूत हूं अर आ भी विणती करजौ के, परभु रै बारै में जैड़ा परमेसर चावै म्हैं उणनै हीमत ऊं बोलूं। बाकी री बातां थांनै तुखिकुस बतावेला, जिकौ परभु में लाडलौ भाई है अर विसवास जोगो सेवक है, इण ऊं थै जांण जावोला के म्हैं कीकर हूं अर कीकर रैवूं हूं। म्हैं तुखिकुस नै इण वास्तै थौरे खनै मेलूं के, थै म्हारी दसा जांण सकौ अर इण ऊं थांरा मन नै हीमत मिळै। पिता परमेसर अर परभु यीसु मसीह री और ऊं सगळै भाइयो नै सानति अर विसवास रै साथै परैम मिळै। जिकौ अपांरै परभु यीसु मसीह में हाचो परैम राखै, उणौ सगळौ माथै दया होती रैवै। ओ कागद यीसु मसीह रा दास पौलुस अर तिमुथियुस री और ऊं फिलिपीअन में रैवण वाळा पिता परमेसर अर यीसु मसीह रा सगळा पवितर लोगां रै, परधानो रै अर सेवकों रै नाम है। अपांरा पिता परमेसर अर परभु यीसु मसीह थांनै दया अर सानति हमेसां देता रैवै। म्हैं जद जद थांनै याद करूं, तो अपांरा परमेसर नै थौरे वास्तै धन्यवाद दूं हूं। अर जद कदै भी थौरे वास्तै पराथना करूं हूं, तो घणै आंणंद ऊं करूं, क्यूंकै थै सरुआत ऊं लेन आज तांई सुभ संदेस रा परचार में म्हारै साथै रिया हो। म्हनै इण बात रौ पूरौ भरोसौ है के, जिकौ सुभ कांम परमेसर थांरा बीच में सरु करयौ, यीसु मसीह रा पाछा आवणा रा दिन तांई परमेसर ही इण कांम नै पूरौ करैला। थौरे बारै में म्हैं ओ विचार करूं के थै म्हारै काळजै में बचयोड़ा हो। चाहे में जेळ में हूं या चाहे में बारै सुभ संदेस री हाचाई रा सबूत देन हाच नै पको करणा में लागोड़ो हूं तो, थै भी परमेसर री दियोड़ी करपा रा भागी हो। परमेसर गवाई है के, म्हैं यीसु मसीह रा परैम में थौरे लोगां नै कीता चावूं हूं। परमेसर ऊं आ विणती करूं हूं के, थौरो परैम, ग्यांन अर बुद्धि बढ़ती जावै। ताकी थै बड़िया ऊं बड़िया बातां नै जांणौ अर मसीह रा पाछा आवणा दिन तांई, पवितर अर निरदोस रैवौ। यीसु मसीह रै कारण मिळण वाळा सगळा बड़िया गुणो ऊं भर जाओ। जिण ऊं परमेसर री मेमा अर बड़ाई होती रैवै। हे भाइयो, म्हैं थांनै ओ बता दैणौ चावूं के, म्हारै साथै जिकौ बीती उण ऊं सुभ संदेस रुकियो कोनीं पर, हलो परचार होयौ। इण ऊं रोम रै राजा रा मेहल रा सगळा लोगां नै अर फौज नै ओ पतौ लागौ के, म्हैं यीसु मसीह रै वास्तै जेळ में बंद हूं। परभु में जिकौ म्हारै भाई है, उणौनै म्हारै जेळ में रेवणा ऊं हीमत मिळी है अर वे भरोसा रै साथै बिना डर ऊं परमेसर रौ वचन सुणावै है। कीं तो रीयो बळन अर झगड़ै रै कारण मसीह रौ वचन सुणावै है अर कीं लोग भला मन ऊं मसीह रौ वचन सुणावै है। भला मन ऊं परचार करणै वाळा लोग परैम रै कारण यूं करै क्यूंकै, वे जांणै है के, परमेसर म्हनै सुभ संदेस नै बचावण वास्तै चुणयौ है। कीं लोग इण मतलब ऊं वचन रौ परचार करै के, इण ऊं जेळ में म्हारी सजा बढ़ जावै। इण बातां ऊं म्हनै फरक कोनीं पड़ै। भलै ही हाचा मन ऊं या भलै ही बहाना ऊं या चाहे किणी तरैह ऊं, पर मसीह रै सुभ संदेस रौ परचार हो रियौ है। म्हैं इण बात ऊं राजी हूं। में राजी रैवूंला क्यूंकै, म्हैं जांणूं हूं के, थौरी पराथना अर यीसु मसीह री पवितर आतमा री मदद ऊं म्हैं छूट जाऊंला। म्हारी तो आहीज मोटी इछा अर आस है के, म्हैं जीवतौ रैवूं के मरु, म्हनै किणी बात ऊं नीचो नीं देखणौ पड़ै। पर म्हारी काया ऊं यीसु मसीह री बड़ाई हमेसां होती रैवै। क्यूंकै म्हारै वास्तै जीवतौ रैवणौ मसीह है अर मरुला, तो उणरै खनै पूग जाऊंला। म्हैं जीवतौ रियौ तो घणा जणा नै मसीह खनै ला सकूं ला। इण वास्तै समझ में कोनीं आवै के किणनै चुणू। क्यूंकै म्हैं दोनो रै बीच में अदर झुल में हूं। मन तो करै इण काया नै छोड़ नै मसीह खनै जातौ रैवूं! क्यूंकै ओ सबां ऊं बड़िया है। पर म्हारौ जीवतौ रैवणौ थौरे वास्तै घणौ जरुरी है। इण वास्तै म्हनै विसवास है के, म्हैं जीवतौ रैवूंला, थौरे साथै रैवूंला ताकी थै विसवास में मजबुत रेन आंणंद में बढ़ौ। जद म्हैं थौरे खनै पाछौ आऊंला तो यीसु मसीह में थौरो घमण्ड भळै बढ़ जावैला। थै इण बात रौ ध्यांन राखजौ के, थौरो चाल-चलण मसीह रा सुभ संदेस जैड़ौ रैवणौ चाहीजै। भलै ई म्हैं थौरे खनै आऊं या आगौ रैवूं। म्हैं थौरे बारै में ओहीज सुणणौ चावूं के, थै पवितर आतमा में मजबुत अर एक चित रेन सुभ संदेस रै वास्तै भरोसा ऊं कांम करौ। अर थै थौरे बैरियो ऊं थोड़ाई डरौ कोनीं। ओ इण बात रौ सबूत है के, थौरो तो छुटकारो हो जावैला पर बैरियो रौ नास हो जावैला। ओ परमेसर करैला। थौरे माथै आ दया इण वास्तै होई क्यूंकै थै मसीह माथै विसवास भी करयौ अर दुख भी झेलो हो। अबै थांनै म्हारै जैड़ी लड़ाई लड़नी है। जैड़ी लड़ाई करता म्हनै देखिया अर अबै भी करता सुणौ हो और म्हैं अबै तांई वोहीज लड़ाई लड़ू हूं। अगर मसीह थांनै हीमत दैवै, उणरौ परैम थांनै धीरज दैवै, पवितर आतमा थौरे साथै है अर थै एक दूजा रै वास्तै दया अर करपा राखौ, तो थै एक हिरदा, एक चित अर एक परैम ऊं रैवौ तो म्हनै आंणंद मिळेला। मतलबी मत बणौ या झूठी बड़ाई मत करौ, पर नरमाई ऊं एक दूजा नै खुद ऊं बढ़ नै हमजो। हर एक खुद रा भला री नीं, पर दूजा रै भला री भी सौचे। जिण तरैह ऊं यीसु मसीह रौ सभाव हो, वैड़ौ थौरो भी रैवै। वे परमेसर हा, पर खुद नै परमेसर रै बराबर रैवण री कोसीस नीं की। पर सगळौ छोड़नै, दास रा रूप में मिनख बण्या। अर मिनख रै रूप में अपणै आप नै इता नेना कर दिया के, हुकम मांनता सूली माथै मौत भी चैन कर ली। इण कारण ऊं परमेसर उणौनै सबां ऊं महान करिया अर उणौनै ऐड़ौ नाम दियौ जिकौ सगळै नामों ऊं ऊंचौ है। ताकी जिकौ की भी सरग में अर धरती माथै अर जिकौ धरती रै नीचे है, वो सगळा यीसु रै नाम में गोडा टेकें, पिता परमेसर री मेमा वास्तै, हर एक री जीभ ओ मांन ले के, यीसु मसीह ही परभु है। इण वास्तै लाडला भाइयो, जिण तरैह ऊं थै हमेसां म्हारौ हुकम मांनता आया हो, उण ही तरैह ऊं अबै भी जद में थौरे ऊं आगौ ऊं, म्हारौ हुकम मांनता रौ। परमेसर में आदर अर कैणौ मांनता खुद रै छुटकारो रै वास्तै कांम करता रहीजौ। क्यूंकै परमेसर हीज आपरी इछा नै थौरे मन में परगट करै अर वो हीज इणरै वास्तै कांम करणै री ताकत भी दैवै है। सब कांम बिना बड़बड़ाया अर बिना झगड़ै ऊं किया करौ। ताकी थै इण दुनिया रा नगटा अर पापी लोगां रै बीच में परमेसर रा निरदोस अर पवितर मिनख बण्योड़ा रौ अर दुनिया में तारा रै ज्यूं चमकता रैवौ। जद थै जिन्दगी देवण वाळौ सुभ संदेस सुणाओ, तो म्हारै खनै थौरे माथै मसीह रा पाछा आवणा रा दिन में घमण्ड करणा रौ कारण ओ होवैला के, म्हारी मेनत बेकार कोनीं गी। अगर परमेसर माथै थांरा विसवास अर सेवा वास्तै म्हनै मरणौ भी पड़ियो तो म्हैं लारै नीं रैवूंला अर म्हैं थारै साथै राजी रैवूंला। इण ऊं थै भी राजी होयनै म्हारै साथै आंणंद मनाओ। परभु यीसु मसीह चावैला तो म्हैं तिमुथियुस नै थौरे खनै वेगो भेजूंला, जिण ऊं म्हनै थांरा हाल चाल पतौ लागै। इण ऊं म्हारै मन नै सानति मिळै। क्यूंकै, म्हारै खनै तिमुथियुस जैड़ौ कोई कोनीं जिकौ म्हारै ज्यूं थौरे बारै में भलौ होचे। क्यूंकै, सगळा आपरै सवारथ री होचे, यीसु मसीह रै कांम री कोनीं होचे। पर तिमुथियुस नै थै परखयो हो अर जांण्यो हो के, ओ ज्यूं एक बेटौ आपरा बाप रै कांम में साथै रैवै, उणीज तरैह ऊं ओ सुभ संदेस रा कांम में म्हारै साथै मेनत करी है। इण वास्तै म्हनै आस है के, ज्यूं ही म्हनै ठाह पड़ैला के म्हारै साथै कांई होवण वाळौ है, म्हैं इणनै थौरे खनै मेल दूंला। तो भी म्हनै परभु में भरोसौ है के, म्हैं थौरे खनै वेगो आऊंला। म्हैं इपफ्रुदीतुस नै जिकौ अपणौ भाई, साथी आत्मिक सिपाई है, थौरे खनै मेलणो जरुरी हमजू, जिणनै थै म्हारै खनै म्हारी सेवा वास्तै दूत बणान मेलियो हो। वो थौरे ऊं मिलणो चावै है अर परेसान है, क्यूंकै थै उणरी बिमारी रै बारै में सुण लियौ हो। अर पको वो बिमार तो होय गियो हो एठै तांई की मरण वाळौ हो, पण परमेसर नै उण माथै दया की, इणनै कीं हो जावतौ तो म्हनै दुख में दुख झेलनो पड़तो। इण वास्तै म्हैं इणनै वेगो मेलूं हूं ताकी थै इण ऊं मिलनै राजी रौ अर म्हारी चिंता भी कम हो जावै। थै परभु में इण रौ सवागत करजौ अर ऐड़ा लोगां रौ राजी रेन घणौ मांन करता रहीजौ। क्यूंकै वो मसीह रा कांम वास्तै मौत नै देखी है अर आपरी जिन्दगी नै जोखम में घाली ही। जिण ऊं जिकौ कमी थौरे ऊं म्हारी सेवा में री, उणनै पूरी कर सकै। हे भाइयो, परभु रै साथै गाठ जोड़ में आंणंद करौ। थांनै दूजी भलां लिखता म्हनै कोई कस्ट कोनीं होवै, पण इण में थौरी भलाई है। कुत्तो जैड़ा मिनखां ऊं सावचेत रैवौ जिकौ भूंडा कांम करै अर जिकौ खतनो करणा माथै जोर दैवै है। सही में तो खतना वाळा अपां हा! क्यूंकै, अपां पवितर आतमा ऊं परमेसर री उपासना करौ अर दुनिया रा कायदा माथै कोनीं, पर यीसु मसीह माथै घमण्ड करां। तौभी म्हैं दुनिया रा कायदा माथै घमण्ड कर सकूं। अगर कोई ओ हमजे के, वो दुनिया रा कायदा माथै घमण्ड कर सकै, तो म्हैं उण ऊं घणौ घमंड कर सकूं। म्हारै जनमिया रै आठवे दिन म्हारौ खतनो होयौ हो। म्हैं इजरायल रा बिन्यामीन वंस में इबरानी री ओळाद हूं। मूसा रै कायदे ऊं देखौ तो में फरीसी हूं। म्हारै जोस रै बारै में कहूं तो, म्हैं कलीसियाओ माथै जुरम करणा वाळौ हो अर मूसा रै कायदे नै मानणा ऊं देखौ तो म्हैं निरदोस हो। पर जिण बातां नै म्हैं फायदे री हमजतो, उणौनै मसीह रै कारण की फायदे री कोनीं हमजू हूं। इतौ ई नीं, म्हैं परभु यीसु मसीह रै आगै सगळै ग्यांन नै कीं फायदे रौ कोनीं हमजू हूं। म्हैं यीसु मसीह रै अलावा बाकी चीजों नै बगदो हमजू हूं। ताकी म्हैं मसीह नै पा सकूं। अर म्हैं पूरौ रौ पूरौ उणरौ हो जाऊं। म्हैं खुद मूसा रै कायदे नै मानणा रै कारण धरमी कोनीं, पर म्हैं इण वास्तै धरमी हूं, जिकौ यीसु मसीह माथै विसवास करणै ऊं परमेसर ऊं मिळै। ओ विसवास करणा ऊं हीज मिळै। म्हैं चावूं के में मसीह नै जांण लूं। म्हैं उणरै मरयोड़ा मे ऊं, पाछा जी उठणै री सगति नै हमजणी चावूं अर उणरै दुखौ नै झेलन, उणरी मौत में भागी होवणौ चावूं। जिण ऊं, म्हैं मरयोड़ौ मे ऊं पाछौ जीवतौ होयनै जिन्दगी पा सकूं। हे भाइयो, म्हैं ओ नीं कैवणौ चावूं के में ऐ सगळौ कर लियौ हूं अर सिद हो गियौ हूं। पर म्हैं सिद होवण वास्तै दौड़ रियौ हूं। जिण वास्तै यीसु मसीह म्हनै बुलाया है। हे भाइयो, म्हैं ओ नीं कैवणौ चावूं के, म्हैं निसाणा माथै पोचगो हूं। पर ओ कैवणौ चावूं के, म्हैं लारली बातां भूल नै, मेनत ऊं निसाणे री तरफ दौड़ रियौ हूं। म्हैं उण निसाणे री तरफ दौड़तो जाऊं हूं, ताकी म्हैं वो इनाम पाऊं, जिण रै वास्तै परमेसर म्हनै यीसु मसीह खनै ऊपर बुलाया है। अपां जिकौ पवितर आतमा में पकयोड़ा हो। अपांरा विचार इण बातां में एक होणा चाहीजै। पर अगर थौरे मे ऊं किणी रा विचार न्यारा हो तो, परमेसर उणौनै हमजा देवेला। कीं भी हो, अपां हाच में जठै तांई पोचगा हा, उण रै ज्यूं ही चालता रैवौ। हे भाइयो, थै सगळा म्हारै ज्यूं चालो अर उणौ माथै ध्यांन दो, जिकौ ऐड़ा चालै, जैड़ा म्हैं चालौ हो। म्हैं थांनै घणी बार के चुकौ हूं अर अबै में रोवण रै साथै कैवूं हूं के, घणा जणा रौ चाल-चलण चौखौ कोनीं है, वे मसीह री सूली रा बैरी बणन जीवै है। उणौरौ नास पको है। वे पेट नै ही परमेसर हमजे है अर जिण बातां माथै सरम आवणी चाहीजै, वे उण माथै घमण्ड करै है। उणौरौ मन संसार री चीजों में लागोड़ो है। अपांरौ देस सरग माथै है अर अपां अपांनै बचावण वाळा परभु यीसु मसीह री सरग ऊं आवणा री बाट जोवो हो। वे आपरी सगति ऊं सगळौ नै आपरा वस में राखै, उण ही सगति ऊं अपांरी इण कमजोर अर नासवान काया नै, आपरी सौभा री काया रौ बणा देवेला। इण वास्तै म्हारै लाडला भाइयो, म्हैं थांनै घणौ याद करूं हूं। थै म्हारौ आंणंद हो, म्हनै थौरे माथै घमंड है। म्हारै लाडला भाइयो, थै यूं हीज परभु में मजबुत रैवौ। म्हैं यहूदिया अर सुनतुखे नै भी हमजाऊ हूं के, थै दोनूं परभु में एक मन रैवौ। हे लाडला सुजुगे, म्हैं थारै ऊं विणती करूं के, थूं इण बेनां री मदद कर। क्यूंकै, ऐ म्हारै साथै सुभ संदेस पोचावणा रा कांम में, कलेमेन्ट अर दूजा साथियो रै साथै घणी मेनत करी है। जिणरौ नाम परमेसर जिन्दगी री किताब में लिख दियौ है। परभु मे हमेसां आंणंद करौ। म्हैं वळै कैवूं के परभु मे आंणंद करौ। सगळा लोग थौरी नरमाई जांण ले। परभु रौ आवणौ नैड़ौ है। किणी बात री चिंता मत करौ। हर जरुत रै वास्तै पराथना करौ। धन्यवाद देता परमेसर रै सांमै आपरी विणती राखौ। तो परमेसर री सानति, जिकौ अपांरी समझ ऊं बारै है, अपांरा हिरदा नै अर विचारो नै यीसु मसीह में बचायनै राखै ला। हे भाइयो, जिकौ बातां हाची है, मांनणी है, सई है, पवितर है, चौखी है, मनभावणी है अर सौभा री है, चौखा गुणा री है आवण माथै हीज ध्यांन लगावो। जिकौ बातां थै म्हारै मे देखी, सुणी, सीखी अर मांनी, उणौ माथै चालो, तो सानति देवण वाळा परमेसर थौरे साथै रैवैला। म्हनै परभु में इण वास्तै आंणंद मिळयो के, थांरै में म्हारै वास्तै घणा दिनां रै बाद परैम उमड़ियो है। थांनै पैला भी म्हारी चिंता ही, पर परैम दिखाणै रौ थांनै मौकौ कोनीं मिळयो हो। म्हैं इण वास्तै नीं कैवूं हूं के, म्हनै किणी चीज री कमी है। म्हैं ओ सिखयो हूं के, हरैक दसा में सन्तोस ऊं रैवूं। म्हैं अमीरी अर गरीबी, दोनूं देखी हूं। भली खाणौ मिळै या भूखो सोवणौ पड़ै। पर हर एक दसा में सन्तोस ऊं रैवणौ रौ भेद सीखग्यौ हूं। मसीह ऊं मिलण वाळी सगति ऊं म्हैं सगळी दसा नै झेळ सकूं। पण तौभी दुख में थै म्हारौ साथ देन भलौ कियो। हे फिलिपियो, थै खुद जांणौ हो के, जद म्हैं सुभ संदेस रा परचार री सरूआत में मकिदुनिया ऊं गियौ तो, थांरै लोगां री मंडली नै छोड़ नै कोई म्हारी धन ऊं मदद कोनीं करी। जद म्हैं थिसलुनिके में हो, तो थै, एक बार नीं, पर दो बार म्हारी जरुत पूरी करी ही। म्हनै दांन कोनीं चाहीजै। पर म्हैं ओ चावूं के, थौरे खाते में आसीस जुड़ती जावै। अब म्हनै किणी चीज री जरुत कोनीं है। सगळौ है म्हारै खनै। इपफ्रुदीतुस रै साथै जिकौ दांन थै भेजिया, उण ऊं म्हारी सगळी जरुत पूरी होयगी है। आप लोगां री आ भेट, एक सुगन अर भावतो बलिदान है। जिकौ परमेसर नै भावे। म्हारौ परमेसर आप लोगां नै यीसु मसीह में महिमा रौ वो धन देवेला, जिकौ थौरी हर एक कमी घटी पूरी करैला। म्हौरै पिता परमेसर री सौभा जुग जुग तांई होती रैवै। आमीन। यीसु मसीह रा गाठ जोड़ में सगळा परमेसर रा पवितर लोगां नै म्हारौ नमस्कार। जिकौ भाई म्हारै साथै है, वे भी थांनै नमस्कार कैवै है। सगळा परमेसर रा लोग जिकौ अठै है अर खास करनै रोम रा राजा रै मेहल मे रैवै वे भी थांनै नमस्कार कैवै है। अपांरा परभु यीसु मसीह रौ अनुग्रह थौरी आतमा माथै हमेसां रैवै। ओ कागद पौलुस री ओर ऊं है, जिकौ परमेसर री इछा ऊं यीसु मसीह रौ प्रेरित है अर भाई तिमुथियुस रै ओर ऊं, कुलुसे में रैवण वाळा मसीह में विसवासी भाइयो रै नाम है। अपांरा पिता परमेसर री ओर ऊं थांनै अनुग्रह अर सानति मिळती रैवै। म्हैं थांनै हमेसां पराथना में याद करौ अर परभु यीसु मसीह रा पिता परमेसर नै थौरे वास्तै धन्यवाद देवो हो। क्यूंकै म्हैं सुण्यौ के थै यीसु मसीह माथै विसवास राखौ अर परमेसर रा सगळा पवितर लोगां ऊं परैम राखौ हो। थौरो परैम अर विसवास उण आसा रै कारण है, जिकौ सरग में थौरे वास्तै है। जिण रै बारै में थै हाचा सुभ संदेस में सुण चुका हो, जद ओ थौरे खनै आयौ हो। थै परमेसर री इण करपा रै बारै में सुण्यौ अर हाचाई जांणी अर जिण तरैह ओ थौरी जिन्दगी में कांम करयौ। उणीज तरैह ओ पूरा संसार में फळतो अर फुलतो जा रियौ है। थांनै आ सीख म्होरा लाडला साथी इपफ्रास ऊं मिळी है, जिकौ अपांरै वास्तै मसीह रौ विसवास जोगो सेवक है। वो इज मांनै पवितर आतमा ऊं परगट थांरा परैम रै बारै बतायो। इण वास्तै जिण दिन ऊं ओ सुण्यौ, म्हैं लगातार थौरे वास्तै पराथना कर रिया हा। म्हैं परमेसर ऊं विणती करां के, वे थांनै पवितर आतमा रौ ग्यांन अर समझ दैवै, जिण ऊं थै परमेसर री इछा नै जांण सकौ। ताकी थौरो चाल-चलण जैड़ौ परभु चावै वैड़ौ रैवै, जिण ऊं वे राजी रैवै अर थै भला कांम करता रैवौ अर परमेसर रा ग्यांन में बढ़ता जाओ। परमेसर री महिमा री सगति रा बळ ऊं सगळी तरैह ऊं मजबुत होता जाओ अर आंणंद रै साथै हर तरैह ऊं धीरज अर सहनसीलता दिखा सकौ। पिता परमेसर नै धन्यवाद देता रैवौ जिकौ अपांनै इण जोगा बणाया के अपां उजाळा रा राज में रैवण वाळा परमेसर रा लोगां रै साथै बापोती में पांति पा सका। वे हीज अपांनै अन्‍धारा रा राज मे ऊं छुड़ायनै आपरा लाडला बेटा रा राज में ले आया। उणांरै बेटा ऊं अपांनै छुटकारो यानि पाप ऊं माफी मिळै है। यीसु मसीह नीं दिखण वाळा परमेसर रा रूप है अर पूरी दुनिया में सगळौ ऊं मोटा अर पैला है। क्यूंकै उणमे इज परमेसर दुनिया री सगळी चीजों बणाई। सरग री अर धरती री, देखी अणदेखी, कांई सिंहासण नै, कांई परभुता नै, कांई परधानता नै अर कांई हक, सगळी चीजों वे ही बणाई अर उणरै वास्तै ही बणाई। वे सगळौ ऊं पैला भी हा अर उणरै कारण ही सगळी चीजों आपो आपरी जगा माथै टिकियोड़ी है। वे हीज मंडली रूपी काया रौ माथो है, अर वे हीज जीवण री सरूआत है, अर वे हीज सगळौ ऊं पैला मरनै जीवता होवण वाळा है। इण वास्तै सगळौ ऊं पैली जगा उणरी है। क्यूंकै पिता री इछा आहीज है के उणरा सगळा गुण उणरै बेटे में वास करै, अर यीसु मसीह रौ लोई जिकौ सूली माथै बहायो, उण ऊं सरग अर धरती री चीजों रौ परमेसर खुद में मेळ मिलाप करयौ। एक वगत हो जद थै थौरे भूंडा कांमां अर दुस्ट सौच ऊं परमेसर रा बैरी होयनै, उणौ ऊं आगा हो गिया हा। पर अबै परमेसर यीसु मसीह री काया री मौत थौरे ऊं मेळ मिलाप कर दियौ है। ताकी थांनै आपरै खनै पवितर, बिना कलंक अर निरदोस बणान लावै। ओ थांरा विसवास री नीव माथै मजबुत रैणै ऊं अर आस नीं छोड़नै ऊं होवैला, जिकौ थांनै सुभ संदेस ऊं मिळियौ है। ओ वो इज सुभ संदेस है, जिकौ आकास रै नीचे पूरी दुनिया में परचार होयौ है अर जिणरै वास्तै म्हैं पौलुस उणरौ सेवक बण्यौ हूं। म्हैं थौरे वास्तै दुख देख रियौ हूं अर इण ऊं राजी हूं। में मंडली वास्तै दुख उठाणै में लगातार मसीह रै साथै हूं। म्हनै परमेसर थौरी भलाई वास्तै सेवक बणान थौरे वास्तै सूंपयौ है, ताकी म्हैं परमेसर रै वचन रौ पूरौ पूरौ परचार करूं। जिण रौ भेद जुगो ऊं अर पीढ़ियो ऊं गुपत हो। पर अबै परमेसर रा उण पवितर लोगां माथै परगट हो गियौ है, जिण माथै वे परगट करणौ चावता। वे जांणता हा के, जिकौ यहूदी कोनीं उणौ में इण भेद री सौभा री कांई कीमत है? वा आ है की, मसीह जिकौ सौभा री आस है, वे थौरे में रैवै है। मसीह रौ परचार करनै म्हैं हरैक मांनखै नै सावचेत कर देवो अर सीख देवो, ताकी हरैक मांनखै नै मसीह रा सगळा गुणो ऊं भर नै परमेसर सांमै ऊभा करां। इण वास्तै म्हैं मसीह री सगति ऊं, तन मन लगान मेनत भी करूं हूं। म्हैं चावूं के, थै ओ जांण लौ के, म्हैं थौरे वास्तै, लौदीकिया रा विसवासियो वास्तै अर उणौरै वास्तै जिकौ म्हनै कदैई देखियौ कोनीं, किती मेनत करूं हूं। ओ में इण वास्तै कहूं ताकी उणौनै हीमत मिळै अर वे परैम रै साथै एक रैवै जिण ऊं उणौनै वो ग्यांन रौ धन मिळै अर वे परमेसर रै गेरे भेद नै समझ सकै, जिकौ खुद यीसु मसीह है। जिणमे बुद्धि अर ग्यांन रा भंडार लुकयोड़ा है। ओ म्हैं थांनै इण वास्तै कहूं के, कोई थांनै मीठी बातां ऊं धोखो नीं दैवै। म्हैं सरीर ऊं तो थौरे ऊं आगौ हूं। पर आतमा ऊं थौरे नजीक हूं अर म्हैं ओ देख नै राजी हूं के, थै मसीह में वैवार अर विसवास में मजबुत हो। जिण तरैह ऊं थै यीसु मसीह नै परभु मांन्या, उण तरैह ऊं उणरै बतायोड़े मारग माथै चालता रौ। उणमे मजबुत होन बढ़ता जाओ। जिण तरैह ऊं थांनै विसवास री सीख मिळी है, उणमे मजबुत होता जाओ अर परमेसर नै धन्यवाद देता रैवौ। सावचेत रैवौ के, कोई थांनै मिनखां रा बणायोड़ा ग्यांन, रीति रिवाज अर संसार री सीख ऊं धोखे में नीं घाल दे, जिकौ मसीह रा नीं है। क्यूंकै परमेसर पूरी तरैह ऊं मसीह री काया में वास करै है। थै उण ऊं हीज भरपूर हो, जिकौ सगळै राज अर अधिकारो रै ऊपर है। उणौ में ऐड़ौ थौरो खतनो होयौ है। जिकौ मिनखां रै हाथ ऊं नीं, पर मसीह ऊं होयौ है। जिणमे थै थौरे पाप रा सरीर नै उतार दियौ है। जद थै बतिस्मो लियौ, तो थै यीसु मसीह रै साथै बूर दिया गिया अर परमेसर री उण सगति माथै विसवास रै कारण थै जीवता भी हो गिया, जिकौ यीसु मसीह नै मरयोड़ा ऊं जीवता करया हा। थै जिकौ पाप अर सरीर में खतनो नीं करणा रै कारण मरयोड़ा हा, परमेसर थांनै मसीह रै साथै जीवता करिया अर अपांरा सगळा पाप माफ करिया। कायदे रौ वो लेख जिकौ अपांरै नाम ऊं अर विरोध में हो, उणनै सूली माथै खिलो ऊं जड़ नै अपांरै सांमै ऊं आगौ कर दियौ। वे सैतान रा राज अर अधिकारो नै आपरै माथै ऊं उतारनै उणौनै सगळौ रै सांमै सूली माथै हरा नै आपरै पगां नीचे दिया। इण वास्तै किणी रौ ओ हक कोनीं के वो खाणै पीणै में या तैंवार मनाणै में, यहूदियो रै आराम रा दिन रै बारै में या नवा चांद रै बारै में थौरे माथै दोस लगावै। क्यूंकै ऐ सगळी आवण वाळी बातां री छाया है। सई बातां तो मसीह में है। कोई मिनख थांनै आपरौ घणौ तप या सरगदूतो री पूजा रौ दिखावो कर नै थांनै सरग रा फळ ऊं आगा नीं कर दैवै। ऐड़ा मिनख झूठै परचां री बातां करै अर दुनिया रा घमण्ड में भरयोड़ा रैवै। ऐड़ा लोग मसीह में नीं रैवै है। मसीह जिकौ मंडली रूपी काया रौ माथो है। जिण ऊं पूरी काया, जोड़ अर हाडका ऊं ताकत पाने अर एक साथै मिळ नै, परमेसर में बढ़ती जावै। जद थै मसीह रै साथै मरनै संसार री बातां ऊं आगा हो गिया हो तो, थै संसार रै ज्यूं क्यूं जीवो हो? मिनखां रा हुकम अर सीख माथै अर नेमो रै वस में क्यूं रैवौ हो? ज्यूं इणनै हाथ नीं लगाणौ, इणनै मत चाखो अर इण ऊं आगा रौ। ऐ सगळा कायदा मानता मानता नास हो जावैला। क्यूंकै ऐ लोगां रा बणायोड़ा कायदा है। इण में मिनखां री बणायोड़ी भगती री रीत, झूठी दया अर सरीर री तपसया रौ फायदो तो है। पर सरीर री वासना नै नीं रोक सकै। जद थै मसीह रै साथै जिवता हो गिया हो तो, सरग री चीजों नै सौधता रैवौ। जठै मसीह परमेसर रै जिमणा पाड़ै विराजमान है। धरती री नीं पण सरग री चीजों माथै ध्यांन लगावो। क्यूंकै थौरो जूनो सभाव तो मरग्यौ है अर अबै थौरी जिन्दगी मसीह रै साथै परमेसर में लुकयोड़ी है। जद मसीह जिकौ थौरी जिन्दगी है, परगट होवैला तो उणौरै साथै सौभा में थै भी परगट हो जावोला। इण वास्तै आपरी काया ऊं उण बातां नै मार दो जिकौ धरती री है। यानि व्यभिचार, भूंडा कांम, दुस्ट सौच, दुस्ट इछा अर लोभ, जिकौ मूरती पूजा रै बराबर है। इण बातां रै कारण परमेसर रौ कोप हुकम नीं मानणा वाळै माथै पड़ै। एक वगत हो, जद थै इण दुस्ट बातां नै मानता हा अर इण माथै चालता हा। पर अबै थै भी इणरै सगळौ रै साथै रीसे बळनो, बैर राखणौ, निंदा करणी, घिरणा करणी अर मूंडा ऊं गाळियां बकणो छोड़ दो। एक दूजा ऊं झूठ मत बोलो, क्यूंकै थै आपरौ जूनो सभाव नै दुस्ट बातां रै साथै उतारनै फेंक दियौ हो अर नवा सभाव नै पैहर लियौ है, जिकौ अपांनै बणाण वाळा रौ रूप है। जिणरै ग्यांन में अपां नित नवा होता रैवौ हो। अबै मसीह में नीं तो यूनानी है, नीं यहूदी है, नीं खतनो करायोड़ा है, नीं बिना खतना वाळा है, नीं जंगळी है, नीं बिना बुद्धि है, नीं कोई गुलाम है अर नीं ही कोई आजाद है। ऐ सगळा मसीह में है अर मसीह सगळौ में है। थै परमेसर रा चुणयोड़ा पवितर अर लाडला लोग हो। इण वास्तै थै दया, भलाई, नरमाई, धीरज अर सहनसीलता नै धारण कर लो। एक दूजा री गळती नै चैन करौ अर कोई बात होवै तो एक दूजा नै माफ करौ। जिण तरैह ऊं परभु थांनै माफ करिया। थै लोग भी यूं हीज करौ। इण सगळौ ऊं बढ़न थै परैम रा पटा ऊं आपरी कमर बान्ध लौ, परैम सगळौ नै एक राखै है। मसीह री सानति थांरा हिरदा में राज करै। जिणरै वास्तै थै लोग मसीह री एक काया बणन बुलायोड़ा हो। इणरै वास्तै थै परमेसर रौ धन्यवाद देता रैवौ। मसीह रा वचन नै थै थांरा हिरदा में गेरा बेवण दो अर उणरै ग्यांन नै समझनै एक दूजा नै सीखाओ अर सावचेत करौ। परमेसर वास्तै आप आपरा हिरदा ऊं उणरा भजन, आतमा ऊं गीत अर सौभा धन्यवाद रै साथै गावो। कीं भी बोलो या करौ, वो सगळौ परभु यीसु मसीह रै नाम ऊं करौ अर उणरै जरियै पिता परमेसर रौ धन्यवाद करौ। हे लुगाईयां, जैड़ौ परभु नै चौखौ लागै, उणीज तरैह ऊं थै थौरे बींद रै कैणै में रैवौ। हे पतियो, थै आपो आपरी लुगाईयां ऊं हेत राखौ अर उणौ माथै कड़ाई मत करौ। हे टाबरौ, थै सगळी तरैह ऊं आपरा मां बाप रा हुकम मांनो, क्यूंकै इण ऊं परभु राजी होवै। हे टाबरौ रा मां बापो, थै थौरे टाबरौ नै तंग मत करौ। ऐड़ौ नीं हो जावै की उणौरी हीमत टूट जावै। हे सेवकों, थै सरीर ऊं इण दुनिया में जिकौ थांरा मालिक है, उणरौ हुकम, जद वे थांनै देखे उण वगत मिनखां नै दिखाणै रै वास्तै नीं, पर मन ऊं परभु रै डर ऊं हाचाई रै साथै मांनो। जिकौ की थै करौ वो तन मन ऊं करौ अर ओ समझ नै करौ के थै ओ मिनखां रै वास्तै नीं पर परभु रै वास्तै करौ। याद राखौ थांनै परभु इनाम में बापोती देवेला, क्यूंकै थै परभु मसीह री सेवा करौ हो। जिकौ गळत करै उणनै उणरौ फळ मिळैला, उठै कोई पकसपात नीं होवै। हे मालिको, थै ओ जांण नै आपरा दासो साथै न्याव अर चौखौ वैवार करौ के, सरग में थौरे माथै भी एक मालिक है। थै सावचेत रेन परमेसर री पराथना अर धन्यवाद दैणै में लागोड़ा रैवौ। थै म्हौरै वास्तै भी पराथना करौ के, परमेसर मांनै आपरा वचन अर मसीह रौ भेद सुणाणै रौ मौकौ दैवै, जिण वास्तै म्हैं जेळ में हूं। इण वास्तै भी पराथना करौ के, में इण भेद नै खोलनै बता सकूं, जिण तरैह ऊं म्हनै बतावणौ चाहीजै। वगत नै मूंगो समझ नै बारै वाळा रै साथै बुद्धि ऊं वैवार करौ। थौरी बोली हमेसां चौखी अर मीठी रैवै, जिण ऊं थै हरैक नै ढ़ंग ऊं जबाब दे सकौ। म्हारौ लाडलौ भाई, विसवास जोगो सेवक अर परभु में म्हारौ साथी तुखिकुस थांनै म्हारै बारै में सगळी बातां बता देवेला। म्हैं तुखिकुस नै इण वास्तै थौरे खनै मेलूं हूं ताकी ओ थांनै म्हारा समाचार दे सकै, जिण ऊं थांरा काळजा नै हीमत मिळै। इण रै साथै म्हारै लाडला विसवास जोगा भाई उनेसिमुस नै भी भेजूं हूं। ओ थांरा देस रौ हीज रैवण वाळौ है। ऐ दोनूं थांनै म्हारा अठै रैवण वाळी सगळी बातां बता देवेला। अरिस्तर्खुस जिकौ म्हारै साथै जेळ में बंद है अर मरकुस जिकौ बरनबास रौ भाई है, ऐ थांनै नमस्कार कैवै है। मरकुस रै बारै में म्हैं पैला ही थांनै कयौ हो के, ओ जद थौरे खनै आवै तो इणरै साथै चौखौ वैवार करजौ। यीसु जिकौ यूसतुस रै नाम ऊं औळखीजै, ओ भी थांनै नमस्कार कैवै है। खतना करयोड़ौ मे ऊं ऐ तीन लोग हीज म्हारै साथै परभु रै राज वास्तै कांम कर रिया है। इण ऊं म्हनै घणी हीमत मिळी है। इपफ्रास जिकौ थांरा देस रौ रैवण वाळौ है, थांनै नमस्कार कैवै है। ओ यीसु मसीह रौ सेवक हमेसां थौरे वास्तै दुख रै साथै पराथना करै है के, आप लोग पका रेन विसवास रै साथै परभु री इछा में मजबुत रैवौ। म्हैं इण बात रौ गवाई हूं के, ओ थौरे वास्तै, लौदीकिया हैर रै वास्तै अर हिरापुलिस हैर रा रैवण वाळा रै वास्तै घणी मेनत करी। लाडला वैद लूका अर देमास थांनै नमस्कार कैवै है। लौदीकिया रा भाइयो नै अर नुमफास अर उण री घर री मंडली नै नमस्कार कहीजौ। जद थै इण कागद नै पढ़ लौ तो, इणनै लौदीकिया री मंडली में भी पढ़ा दीजौ अर यूं हीज लौदीकिया रा नाम लिखयोड़ा कागद नै थै भी पढ़ लेजो। पछै अरखिपुस ऊं कहीजौ के, जिकौ सेवा परभु थनै सूपी है, उणनै सावचेती ऊं पूरी करजै। म्हैं पौलुस म्हारै हाथ ऊं नमस्कार लिखूं हूं। म्हैं हांकळौ में बन्धियोड़ो हूं, याद राखजौ। परभु थौरे माथै दया करता रैवै। आमीन। आ चिठ्ठी पौलुस अर सिलवानुस अर तीमुथियुस री तरफ ऊं थिस्सलुनीकियों री कलीसिया रै नाम, जिकौ पिता परमेसर अर परभु यीसु मसीह मे विसवास करै है। अनुग्रह अर सानति थांनै मिळती रैवै। म्हौ म्हौरी पराथना में थांनै याद करौ अर हमेसां थांरै सगळौ रै बारै में परमेसर रौ धन्यवाद करौ हो। अर म्हौ अपणै परमेसर अर पिता रै सांम्ही थांरै विसवास रा कांम, अर परैम री मेनत, अर म्हौरै परभु यीसु मसीह में आसा री धीरजता नै लगातार याद करौ हो। हे भाइयो, परमेसर रै प्यारै लोगां, म्हौ जांणौ हो की थै चुणयोड़ा हो। क्यूंकै म्हौरौ सुभ संदेस थांरै खनै नीं कैवल सबद मात्र ही में बल्कि सामरथ अर पवितर आतमा में, अर घणै पको रै साथै पूगो है। जैड़ौ थै जांणौ हो की म्हौ थांरै खातर थांरै बीच में कीकर बण गिया हा। थै मोटे कलेस मे होता होया भी पवितर आतमा रै आंणंद रै साथै, वचन नै मांन नै म्हौरी अर परभु री चाल चालन लागा। एठै तांई की मकिदुनिया अर अखया देस रै सगळै विसवासियो रै वास्तै थै नमूना बण्या। क्यूंकै थौरे एठै ऊं नीं कैवल मकिदुनिया अर अखया में परभु रा वचन सुणाया गिया, पण थौरे विसवास री जिकौ परमेसर माथै है, हरैक जगा ऐड़ी चरचा फैलगी है। इण वास्तै म्हौ नै कैवणै री जरुत ही कोनीं। क्यूंकै वे आप ई म्हौरै बारै में बतावै है की थौरे खनै म्हौ रौ आवणौ कीकर होयौ, अर थै कीकर मूरतों ऊं परमेसर री तरफ फिरया ताकी जीवते अर साचा परमेसर री सेवा करौ। अर वे लोग ओ भी कैवै है की, थै उणरै बेटे रै सरग ऊं आवण री बाट जोवता रौ परमेसर उणै मरयोड़ौ मांय ऊं जीवता करया, अरथावूं यीसु री, जिकौ म्हौ नै परमेसर रै आवण वाळै कोप ऊं बचावै है। हे भाइयो, थै आप ई जांणौ हो की म्हारौ थौरे खनै आवणौ फालतू नीं होयौ। अर थै आप ई जांणौ हो की पैला फिलिप्पी में दु:ख उठाणै अर तकलीफो सहन करणी पड़ी। बल्कि म्हौरै परमेसर म्हौ नै ऐड़ी ताकत दी, की म्हौ परमेसर रौ सुभ संदेस घणौ विरोध होणै रै बावजूद भी थांनै सुणाओ ला। क्यूंकै म्हौ रौ उपदेस नीं झूठौ है अर नीं असुद्धता ऊं, अर नीं छळ रै साथै है। पण जैड़ा परमेसर म्हौ नै योग्य ठैरायनै सुभ संदेस सूंपयौ, म्हौ वैड़ौ इज वरणन करौ हो। अर इणमे मिनखौ नै कोनीं, पण परमेसर नै, जिकौ म्हौरै मनो नै जांचे है, खुस करै है। क्यूंकै थै जांणौ हो की म्हौ नीं तो कदैई चापलूसी री बातां किनी, अर नीं लोभ रै वास्तै बहाना किया। परमेसर म्हौरौ गवाई है। अर जद म्हौ मसीह रै प्रेरित होणै रै कारण थौरे माथै बोझ घाल सकै हा, तौभी म्हौ मिनखौ ऊं आदर कोनीं चावौ हो, अर नीं थौरे ऊं नीं वळै किणी ऊं। पण जिण तरैह मां आपरै टाबरौ रौ पाळ-पोस करै है, व्यौंही म्हौ ई थौरे बीच में रैयनै कोमलता दिखाई हो। अर व्यौंही म्हौ थौरी लालसा करता होया, नीं कैवल परमेसर रा सुभ संदेस, पण अपणा-अपणा प्रांण ई थांनै देवण खातर तैयार हा, इण वास्तै की थै म्हौरै लाडका होय गिया हा। क्यूंकै, हे भाइयो, थै म्हौरै मेनत अर तकलीफो नै याद राखौ हो। म्हौ इण वास्तै रात-दिन कांम धंधौ करता होया थौरे में परमेसर रै सुभ संदेस रौ परचार कियो, की थौरे मे ऊं किणी माथै भार नीं होवै। थै आप ई गवाई हो, अर परमेसर ई गवाह है की थै विसवासियो रै बीच में म्हारा व्यवहार कैड़ौ पवितर अर धारमिक अर निरदोस रियौ। थै जांणौ हो की जैड़ा पिता आपरै टाबरौ रै साथै व्यवहार करै है, वैड़ा ही म्हौ भी थांरै में ऊं हर एक नै उपदेस देवो, अर सानति देवो, अर समझाता हा, की थौरो चाल-चलण परमेसर रै योग्य हो, जिकौ थांनै आपरै राज अर महिमा में बुलावै है। इण वास्तै म्हौ भी परमेसर रौ धन्यवाद हमेसां करौ हो, की जद म्हौरै तरफ ऊं परमेसर रौ सुभ संदेस रौ वचन थौरे खनै पूगो, तो थै उणै मिनखौ रौ कोनीं पण परमेसर रौ वचन समझनै स्वीकार कियो, अर वो थां विसवासियो में जिकौ विसवास राखौ हो, प्रभावसील है। इण वास्तै थै, हे भाइयो, परमेसर री उण कलीसियाओ की सी चाल चलणै लागा जिकौ यहूदिया देस में मसीह यीसु में है, क्यूंकै थां भी थांरै लोगां ऊं वैड़ौ इज दु:ख पायो जैड़ौ उणौ यहूदी लोगां ऊं पायो हो, जिणौ परभु यीसु नै अर भविसयदाताओ नै भी मार नाख्या अर म्हौ नै सताया। अर परमेसर उण ऊं खुस कोनीं, अर वे सगळै मिनखौ रौ विरोध करै है, अर वे दूजी जातियो ऊं उणरै उद्धार रै वास्तै बातां करणै ऊं म्हौ नै रोके है की हमेसां अपणै पापों रा घड़ा भरता रैवै, अर परमेसर रौ क्रोध उणौ माथै आ गियौ है। हे भाइयो, जद म्हौ थोड़ी जेज रै वास्तै, मन में नीं बल्कि परगट में, थौरे ऊं न्यारा हो गिया हा, तो म्हौ घणी लालसा रै साथै थौरो मूंडौ देखणै रै खातर वळै पाछा आवण रै लियै घणी कोसीस किनी। इण वास्तै म्हौ थौरे ऊं मिलनै रै लियै कोसीस कर रिया हा। म्हैं पौलुस एक बार नीं बल्कि दो बार थौरे खनै आवणौ चायौ, पण सैतान म्हौ नै रोकतो रियौ। भला म्हौरी आसा या आंणंद या बड़ाई रौ मुगट कांई है? कांई म्हौरै परभु यीसु रै नैड़ा उणरै आवण रै वैळा थै इज कोनीं होवो? म्हौरी बड़ाई अर आंणंद थै इज हो। इण वास्तै जद म्हौरै ऊं वळै नीं रहिजयौ, तो म्हौ ठैरायौ की एथेंस में ऐकला रैय जाओ, अर म्हौ तीमुथियुस नै, जिकौ मसीह रै सुभ संदेस में म्हौरा भाई अर परमेसर रा सेवक है, इण वास्तै भेज्या की वो थांनै विसवास मे हीमत बंधायनै थांनै समझावै, की कोई इण तकलीफो रै कारण डगमगा नीं जावै। क्यूंकै थै आप जांणौ हो की म्हौ नै परमेसर इण खातर ठैराया है। क्यूंकै पैला ई, जद म्हौ थौरे उठै हा तो थौरे ऊं कैवता हा की म्हौ नै तकलीफो उठाणी पड़ैला, अर ऐड़ौ इज होयौ, ज्यूं की थै जांणौ ई हो। इण कारण जणौ म्हारै ऊं वळै नीं रहिजयौ, तो थौरे विसवास रा हाल जांणणै रै खातर भेज्यौ, की कठैई ऐड़ौ नीं होवै की सैतान नै थौरी परीकसा की हो, अर अपांरी मेनत फालतू गी हो। पण अबार तीमुथियुस नै, जिकौ थौरे खनै ऊं म्हौरै एठै आयौ है, थौरे विसवास अर परैम रा सुभ संदेस सुणाया अर इण बात रौ भी सुणायो की थै हमेसां परैम रै साथै म्हौ नै याद करौ हो, अर म्हौ नै देखणै रै इछा भी राखौ हो, ज्यूं म्हौ भी थांनै देखणै री। इण वास्तै हे भाइयो, म्हौ म्हौरै सगळै दु:ख अर तकलीफो में थौरे विसवास ऊं थौरे बारै में सानति पाई। क्यूंकै अबै जे थै परभु में बणियोड़ा रैवौ तो म्हौ घणा राजी हो। अर ज्यूं आंणंद म्हौ नै थौरे कारण अपांरै परमेसर रै सांम्ही है, उणरै बदळै थौरे बारै में म्हौ कीण रीत ऊं परमेसर रौ धन्यवाद करौ? म्हौ रात दिन घणी पराथना किया करौ हो की थौरो मूंडौ देखौ अर थौरे विसवास री कमी पूरी करौ। अबै म्हौ रौ परमेसर अर पिता आप ही अर म्हौ रौ परभु यीसु, थौरे एठै आवण में म्हौरी अगुवाई करै। अर परभु ऐड़ौ करै की जैड़ौ म्हौ थौरे ऊं परैम राखौ हो, वैड़ौ इज थौरो परैम ई आपस में अर सगळै मांनखै रै साथै बढ़ै, अर उनति करतौ रैवै। अर म्हौ आ पराथना करौ की वो थौरे मनो नै ऐड़ा मजबुत करै की जद म्हौ रौ परभु यीसु आपरै सगळै पवितर लोगां रै साथै आवै, तो वे म्हौरै परमेसर अर पिता रै सांम्ही पवितरता में निरदोस ठैरै। इण वास्तै हे भाइयो, म्हौ थौरे ऊं विनती करौ हो अर थांनै परभु यीसु में समझावौ हो की ज्यौ थै म्हौरै ऊं योग्य चाल चालणौ अर परमेसर नै खुस करणौ सिखया हो, अर ज्यौ थै चालौ भी हो, व्यौंही वळै बढ़ता रौ। क्यूंकै थै जांणौ हो की म्हौ परभु यीसु री तरफ ऊं थांनै कौणसी आग्या पूगाई। क्यूंकै परमेसर री इछा आ है की थै पवितर बणौ। अरथावूं व्यभिचार ऊं बचयोड़ा रौ, अर थौरे में ऊं हरैक पवितरता अर आदर रै साथै आपरे सरीर ने काबू में राखणी सीखे, अर अभिलासा ऊं नीं, अर नीं उण लोगां री तरैह जिकौ परमेसर नै कोनीं जांणै। इण वास्तै इण बात में कोई अपणै विसवासी भाई नै नीं ठगै, अर नीं उण माथै दाव चलावै, क्यूंकै परभु इण सगळी बातां नै पलटा देवण वाळौ है। ज्यूं की म्हौ थांनै पैला इज थौरे ऊं कयौ अर चेताया भी हा। क्यूंकै परमेसर अपांनै असुद्ध होणै रै खातर कोनीं, पण पवितर होणै रै खातर बुलाया है। इण कारण जिकौ इण आग्या नै नीं मांनै है, वो मिनख नै नीं पण परमेसर नै भी नीं मांनै है, जिकौ आपरी पवितर आतमा थांनै दैवै है। बल्कि भाईचारे री प्रित रै बारै मांय ओ जरुरी कोनीं की म्हैं थांरै खनै कीं लिखूं, क्यूंकै आपस मांय परैम राखणौ थै आप इज परमेसर ऊं सीख्या हो। अर वास्तव मे सगळी मकिदुनिया रै सगळै भाइयो रै साथै ऐड़ौ करौ भी हो। पण हे भाइयो, म्हौ थांनै समझावौ हो की वळै परैम मे बढ़ता जाओ। अर ज्यूं म्हौ थांनै आग्या दीनी है, व्यौंही चुपचाप रौ अर दूजौ रै कांम मे टांग नीं अड़ाओ अर अपणै अपणै हाथो ऊं कमाणै री कोसीस करौ, ताकी अविसवासी ऊं आदर ग्रहण करौ, अर थांनै किणी चीज रै लियै दूजौ रा मौथाज नीं रैणौ पड़ैला। हे भाइयो, म्हौ चावौ हो की कोई जिकौ विसवासी मरया है, थै उणरै बारै मे भी जांणौ। ऐड़ौ नीं हो की थै अविसवासी रै ज्यूं सौग करौ जिणौनै आसा कोनीं है। क्यूंकै जे अपां विसवास करौ हो की यीसु मरया अर जी भी उठया, तो व्यौंही परमेसर उणौनै भी जिकौ यीसु में विसवास करनै मर गिया है, यीसु जद पाछौ आवैला उणौ नै साथै ले आवैला। क्यूंकै म्हौ परभु रै वचन रै अनुसार थांरै ऊं ओ कैवौ हो की म्हौ जिकौ जीवता हो अर परभु रै आवण तांई जीवता रौ ला, जिकौ मरयोड़ा है उणौ ऊं पैला यीसु ऊं कोनीं मिळ पाओला। क्यूंकै परभु आप इज सरग ऊं उतरैला। उण वेळा ललकार, अर परधान दूत रौ सबद सुणाई दैला, अर परमेसर री तुरही फूंकी जावैला। अर जिकौ मसीह में मरया है, वे पैला जी उठैला। तद अपां जिकौ जीवता अर बचया रैवौला उणरै साथै बादळो ऊपर उठा लिया जावोला की हवा में परभु ऊं मिळौ ला। अर इण रीत ऊं अपां हमेसां परभु रै साथै रैवौला। इण तरैह इण बातां ऊं एक दूजै नै सानति दिया करौ। पण हे भाइयो, परभु रै पाछौ आवण रै वगत अर काळ रै बारै में थांनै कीं लिखणै री जरुत कोनीं है। क्यूंकै थै आप ठीक जांणौ हो की ज्यूं रात में चोर अणचेत आवै है, व्यौंही परभु रौ दिन आवण वाळौ है। जद लोग कैवता होवैला, “कुसल है, अर कीं डर कोनीं,” तो उण माथै अणचेत नास आ पड़ैला, जिण तरैह अणचेत जापायती नै पीड़ा। अर वे किणी रीत ऊं नीं बचेला। पण हे भाइयो, थै तो अंधारै मांय कोनीं हो की वो दिन थांरै माथै चोर रै ज्यूं आन पड़ै। क्यूंकै थै सैंग उजाळै री औळाद अर दिन री औळाद हो। म्हौ नीं रात रा हो, नीं अंधारै रा हो। इण वास्तै म्हौ दूजौ रै ज्यूं सूता नीं रौ, पण जागता अर सावचेत रौ। क्यूंकै जिकौ सूता है वे रात रा इज सूता है, अर जिकौ मताळा होवै है वे रात रा इज मताळा होवै है। पण अपां जिकौ दिन रा हो, अर खुद रै ऊपर काबू रैवौ हो, विसवास अर परैम री झिलम पैहन नै उद्धार री आसा रौ टोप पैहन सावचेत रौ। क्यूंकै परमेसर अपांनै आपरी रीस रै डंड रै खातर कोनीं, पण इण वास्तै ठैराया है की अपां अपणै परभु यीसु मसीह रै तरफ ऊं उद्धार ग्रहण करौ। वो अपांरै लियै इण कारण मरयो की अपां चाहे जीवता हो चाहे मरयोड़ा हो, जद वो पाछौ आवैला सगळा मिळन उणरै साथै जीए। इण कारण एक दूजै नै सानति दो अर एक दूजै री उनति रौ कारण बणौ, ज्यूं की थै करौ भी हो। हे भाइयो, म्हौ थांरै ऊं विनती करौ हो की जिकौ थांरै में मेनत करै है, अर परभु में थौरे अगुवे है, अर थांनै सिकसा दैवै है, उणौ रौ कदर करौ। अर उणरै कांम रै कारण परैम रै साथै उणनै घणौ ही आदर रै लायक समझौ। आपस मांय मेल मिलाप ऊं रैवौ। हे भाइयो, म्हौ थांनै समझावौ हो की जिकौ लोग आळसी है उणौनै समझाओ, कायरों नै हीमत दो, गरीबो नै संभाळौ, सगळौ रै साथै धीरज राखौ। सावचेत! कोई किणी ऊं बुराई रै बदळै बुराई नीं करौ। पण हमेसां भलाई करनै में तैयार रौ, आपस मांय अर सगळौ ऊं भलाई करणै री कोसीस करौ। हमेसां आंणंद में रौ। लगातार पराथना में लागौड़ा रौ। हरैक बात में धन्यवाद करौ। क्यूंकै थौरे वास्तै यीसु मसीह में परमेसर री आहीज इछा है। आतमा नै मती बुझाओ। भविसवांणियो नै फालतू मत जांणौ। सगळी बातां नै परखो। जिकौ चौखी है उणनै पकड़नै राखौ। सगळी तरैह री बुराई ऊं बचयोड़ा रैवौ। सानति रौ परमेसर आप ही थांनै पूरी रीत ऊं पवितर करै। अर थौरी आतमा अर प्रांण अर सरीर म्हौरै परभु यीसु मसीह रै आवण तांई पूरा पूरा निरदोस अर सावळ रै। थौरो बुलाणै वाळौ साचौ है, अर वो ऐड़ौ इज करैला। हे भाइयो, म्हारै सारू पराथना करौ। सगळै भाइयो नै साचै मन ऊं हाथ जोड़ नै नमस्कार करौ। म्हैं थांनै परभु रै नाम ऊं आग्या देवूं हूं, की आ चिठ्ठी सगळै भाइयो नै पढ़ायनै सुणावै। म्हौरै परभु यीसु मसीह रौ अनुग्रह थांरै माथै होतो रैवै। आ चिठ्ठी पौलुस अर सिलवानुस अर तीमुथियुस री तरफ ऊं थिस्सलुनीकियों री कलीसिया रै नाम, जे म्हौरै पिता परमेसर अर परभु यीसु मसीह में है। म्हौरै पिता परमेसर अर परभु यीसु मसीह री तरफ ऊं थांनै अनुग्रह अर सानति मिळती रैवै। हे भाइयो, थौरे रै बारै में म्हौ नै हरैक वगत परमेसर रौ धन्यवाद करणौ चाहीजै, अर ओ सही भी है, क्यूंकै थौरो विसवास घणौ बढ़ रियौ है, अर थौरो सगळौ रौ परैम आपस मांय घणौ बढ़तौ रैवै है। इण वास्तै म्हौ आप परमेसर री कलीसिया में थौरे बारै में घमण्ड करौ हो की जितरा अत्याचार अर तकलीफ थै सहन करौ हो, उण सैंग मांय थौरी धीरज अर विसवास परगट होवै है। ओ परमेसर रै साचै न्याव रौ साफ सबूत है की थै परमेसर रै राज रै लायक ठैहरौ, जिणरै खातर थै दुख भी उठाओ हो। क्यूंकै परमेसर रै नैड़ौ ओ न्याव है की जिकौ थांनै दुख दैवै है, उणौनै बदळै में दुख दे। अर थांनै, जिकौ दुख मिळै है, म्हौरै साथै सैहन दैला। उण वेळा जद परभु यीसु मसीह आपरै सामरथी दूतो रै साथै, धधकती होई लाय में सरग ऊं परगट होवैला। अर जिकौ परमेसर नै नीं पिछांणै अर म्हौरै परभु यीसु रा सुभ संदेस नै नीं मांनै उणौ नै डंड मिळैला। वे परभु रै सांम्ही ऊं अर उणरी सगति रै तेज ऊं आगौ होयनै अनत विनास रौ डंड पावैला। ओ उण दिन होवैला, जद वो आपरै पवितर लोगां में महिमा पाने अर सगळै विसवास करणैवाळौ में अचूम्बे रा कारण होणै नै आवैला। उणमे थै लोग भी साथै होवोला क्यूंकै थां म्हारी गवाई माथै विसवास कियो। इण वास्तै म्हौ हमेसां थौरे वास्तै पराथना भी करौ हो की म्हौरौ परमेसर थांनै बुलाणै रै लायक समझै, अर भलाई री हरैक इछा अर विसवास रै हरैक कांम नै सामरथ समेत पूरौ करै, ताकी म्हौरै परमेसर अर परभु यीसु मसीह रै अनुग्रह रै अनुसार म्हौरै परभु यीसु रौ नाम थांरै मांय महिमा पावै, अर थै उण मांय। हे भाइयो, अबै म्हौ अपणै परभु यीसु मसीह रै पाछौ आवण, अर उणरै खनै अपणै भेळा होणै रै बारै में थांरै ऊं विनती करौ हो, की किणी आतमा, या वचन, या चिठ्ठी रै दवारा, जिकौ की मांनौ म्हौरी तरफ ऊं हो, ओ समझनै की परभु रौ दिन आ पूगो है, थौरो मन अणचेत विचार में नीं पड़ै, अर नीं थै घबराओ। किणी रीत ऊं किणी रै धोखे में नीं आवणौ, क्यूंकै वो दिन जद आवैला तद तांई धरम रौ त्याग होवैला, अर वो पाप रौ मिनख जिकौ नास होणौ है, वो भी परगट होवैला। वो विरोध करै है, अर हरैक ऊं जिकौ ईस्वर या पूज्य कहीजै है, अपणै आप नै मोटो ठैरावै है, एठै तांई की वो परमेसर रै मिंदर मांय बैठनै अपणै आप नै ईस्वर ठैरावै है। कांई थांनै याद कोनीं की जद म्हैं थौरे उठै हो, तो थौरे ऊं ऐ बातां किया करतौ हो? थै उणनै जांणौ हो, जिकौ उण अधरमी मिनख नै रोक रियौ है की वो अपणै वगत में परगट हो। क्यूंकै अधरम रौ भेद अबार भी कांम करतौ रैवै है, पण अबार एक रोकणेवाळौ है, अर जैड़ी तांई वो आगौ नीं हो जावै वो रोकयो रैवैला। तद वो अधरमी मिनख परगट होवैला, जिणनै परभु यीसु आपरै मूंडै री फूंक ऊं मार नोखेला, अर आपरै आगमन तेज ऊं भसम करैला। उण अधरमी रौ आवणौ सैतान रै कांम रै मुजब सगळी तरैह री झूठी सामरथ, अर चिन्ह, अर झूठै चमतकार रै कांमां साथै, अर नास होणैवाळौ रै खातर अधरम रै सैंग तरैह रै धोखे रै साथै होवैला। क्यूंकै उणौ सत्य ऊं परैम कोनीं कियो जिण ऊं उणौरौ उद्धार होवतो। इण कारण परमेसर उणमे एक भटकावण वाळी सामरथ नै भेजेला की वो झूठ रौ विसवास करै, ताकी जितरा लोग सत्य रौ विसवास नीं करै, बल्कि अधरम ऊं खुस होवै है, वे सगळा डंड पावै। हे भाइयो, अर परभु रै प्यारै लोगां, चाहीजै की म्हौ थौरे बारै में हमेसां परमेसर रौ धन्यवाद करता रैवौ, क्यूंकै परमेसर नै सरूआत ऊं थांनै चुण लिया हा की आतमा रै दवारा पवितर होयनै, अर सत्य रौ विसवास करनै उद्धार पाओ। इण खातर उणै थांनै म्हौरै सुभ संदेस रै दवारा बुलाया, की थै म्हौरै परभु यीसु मसीह री महिमा नै ग्रहण करौ। इण वास्तै हे भाइयो, मजबुत रौ। अर जे जे बातां थै वचन या चिठ्ठी ऊं म्हौरै ऊं सीखी है, उणनै थामे रौ। अपांरौ परभु यीसु मसीह आप ही, अर अपांरौ पिता परमेसर, जिणै अपां ऊं परैम राख्यौ अर अनुग्रह ऊं अनत सानति अर उतम आसा दीनी है, थौरे मनो में सानति दे अर थांनै हरैक चौखै कांम अर वचन में मजबुत करै। आखरी में, हे भाइयो, म्हौरै वास्तै पराथना किया करौ की परभु रौ वचन ऐड़ौ तगड़ौ फैले अर महिमा पावै, ज्यौ थौरे मांय होयौ। अर पराथना करौ की अपां टेडे अर दुस्ट मिनखौ ऊं बचया रौ, क्यूंकै हरैक में विसवास कोनीं। पण परभु साचौ है। वो थांनै मजबुत बणाय राखैला अर सैतान ऊं बचायनै राखैला। म्हौ नै परभु में थौरे ऊपर भरोसौ है की जे आग्या म्हौ थांनै देवो हो, उणनै थै जांणौ हो, अर मानता भी रैवौला। परमेसर रै परैम अर मसीह रै धीरज री अर परभु थौरे मन री अगुवाई करै। हे भाइयो, म्हौ थांनै अपणै परभु यीसु मसीह रै नाम ऊं आग्या देवो हो की थै हरैक ऐड़ै भाई ऊं आगा रौ जिकौ आळसी है अर जिकौ सिकसा उणै अपां ऊं पाई उणरै अनुसार नीं करै। क्यूंकै थै आप जांणौ हो की कीण रीत ऊं म्हौरी चाल चालनी चाहीजै, क्यूंकै म्हौ थौरे बीच में रैवता होया आळसी नीं हा, अर किणी री रोटी फोगट में नीं खाई। पण मेनत अर दुख ऊं रात दिन कांम धंधौ करता हा की थांरै में ऊं किणी माथै भार नीं बणौ। ओ नीं की म्हौ नै अधिकार कोनीं, पण इण वास्तै की अपणै आप नै थौरे वास्तै नमूनो ठैराओ, की थै म्हौरी चाल चालौ। क्यूंकै जद म्हौ थौरे उठै हा, तो ई आ आग्या थांनै देता हा की, “जे कोई कांम करणौ नीं चावै तो खाणौ भी नीं मिळैला।” म्हौ सुणौ हो की कईक लोग थौरे बीच में आळसी है, अर कांम कोनीं करै पण दूजौ रै कांम में हाथ घाले है। ऐड़ौ नै म्हौ परभु यीसु मसीह में आग्या देवो अर समझावौ हो की, चुपचाप अपणौ कांम करनै अपणी ही रोटी खाई करै। थै, हे भाइयो, भलाई करणै में हीमत नीं हारो। जे कोई म्हौरी इण चिठ्ठी री बात नै नीं मांनै तो उण माथै निजर राखौ, अर उणरी संगति नीं करौ, जिण ऊं वो आपरै आचरण ऊं लजित होवै। तौभी उणनै बैरी मती समझौ, पण विसवासी भाई जांणनै चेताणी दे दो। अबै परभु जिकौ सानति रौ झरनौ है आप इज थांनै हमेसां अर हरैक तरैह ऊं सानति दैवै। परभु थांरै सगळौ रै साथै रैवै। म्हैं, पौलुस, अपणै हाथ ऊं नमस्कार लिखूं हूं। हरैक चिठ्ठी मांय म्हारौ ओहीज चिन्ह है। म्हैं इण तरैह ऊं लिखूं हूं। म्हौरै परभु यीसु मसीह रौ अनुग्रह थांरै सगळौ माथै होतो रैवै। आ चिठ्ठी पौलुस री तरफ ऊं जिकौ म्हौरै उद्धारकर्ता परमेसर अर म्हौरी आसा रै आधार यीसु मसीह री आग्या ऊं यीसु मसीह रा प्रेरित है, तीमुथियुस रै नाम जिकौ विसवास में म्हारौ साचौ बेटौ है। पिता परमेसर, अर म्हौरै परभु यीसु मसीह री तरफ ऊं थांनै अनुग्रह, अर दया अर सानति मिळती रैवै। ज्यौ म्हैं मकिदुनिया में जातै वेळा थनै समझायौ हो, की इफिसुस मांय रैयनै कईक लोगां नै आग्या दे की झूठी सिकसा नीं दैवै। उणौनै चेताणी दो की उण कहाणियो अर अनत वंसावलियों ऊपर मन नीं लगावै, जिण ऊं झगड़ौ होवै है। ऐ बातां परमेसर रै इछा रै अनुसार कोनीं, विसवास माथै आधारित है। म्हारै आग्या रौ मकसद ओ है की सुद्ध मन अर चौखौ अंतो, अर पको विसवास ऊं परैम पैदा होवै है। इणौनै छोड़नै कीं लोग फालतू बातां री तरफ भटक गिया है, अर व्यवस्था नै सिखाण वाळा हौणा चावै है, पण जिकौ बातां कैवै है अर जिणनै हीमत ऊं बोले है, उणनै समझै कोनीं। म्हौ जांणौ हो की जे कोई परमेसर रै कायदे नै सही रीत ऊं कांम में लावै तो भली बात है। ओ जांणनै की कायदो धरमी जन रै वास्तै कोनीं पण अधरमियों, कायदो नै नीं मांनणैवाळौ, भक्तिहीनों, पापियो, अपवितर अर असुद्ध मिनखौ, मां-बाप नै घात करनै वाळौ, हत्यारो, व्यभिचारियो, मिनख मिनख रै साथै गळत कांम करण वाळौ, मिनख नै बेचनैवाळौ, झूठ बोलनेवाळौ, अर झूठी सौगन खावणवाळौ, अर इणरै उपरात खरै उपदेस रै सगळै विरोधियो रै खातर ठैराई गी है। ओहीज परमधन्य परमेसर री महिमा रै उण सुभ संदेस रै अनुसार है जिकौ म्हनै सूंपयौ गियौ है। म्हैं अपणै परभु यीसु मसीह रौ जिणै म्हनै सामरथ दीनी है, धन्यवाद करूं हूं की उणै म्हनै विसवास लायक समझनै आपरी सेवा रै खातर ठैरायौ। म्हैं तो पैला निंदा करनै वाळौ, अर सतानै वाळौ, अर अंधेर करनै वाळौ हो। तौभी म्हारै ऊपर दया होई, क्यूंकै म्हैं अविसवास री दसा में बिना समझै बूझे ऐ कांम किया हा। अर म्हौरै परभु रौ बोहत घणौ अनुग्रह उण विसवास अर परैम रै साथै जिकौ यीसु मसीह में है, म्हारै माथै होयौ। आ बात साची अर हरैक तरैह ऊं मानणै रै लायक है की यीसु मसीह पापियो रौ उद्धार करणै रै खातर जगत में आयौ, जिणमे सगळौ ऊं मोटो पापी म्हैं हूं। पण म्हारै ऊपर इण खातर दया होई की म्हैं सगळौ ऊं मोटो पापी में यीसु मसीह पूरी धीरज दिखाई, की जिकौ लोग उण माथै अनत जीवन रै खातर विसवास करैला उणरै वास्तै म्हैं एक नमूनो बणूं। अब सनातन राजा मतलब अविनासी, बिना देख्यां, एकाएक परमेसर रौ आदर अर महिमा होती रैवै। आमीन। हे बेटा तीमुथियुस, उण भविसवांणियो रै मुजब जिकौ पैला थारै बारै में की गी ही, म्हैं आ आग्या सूंप रियौ हूं की थूं उणरै मुजब चौखी लड़ाई लड़तो रै, अर विसवास अर उण चौखै अंते नै थामे राख। क्यूंकै कईक लोग अपणै विसवास ऊं भटक गिया। उण मे ऊं हुमिनयुस अर सिकन्दर है, जिणनै म्हैं सैतान नै सूंप दिया हा की वे परमेसर री निंदा करणी नीं सीखें। अबै म्हैं सगळा ऊं पैला ओ उपदेस देवूं हूं, की विनती, अर पराथना, अर निवेदन अर धन्यवाद सगळै मांनखै रै खातर कीं जावै। राजाओ अर सैंग ऊंचै पदवाळौ रै लियै पराथना करौ की म्हौ नरमाई अर सानति रै साथै सगळी भगती अर मांन ऊं जीवन बीता सकौ। अर आ पराथना म्हौरै उद्धारकर्ता परमेसर नै चौखी लागै अर उचित भी है, जिकौ ओ चावै है की सगळै मांनखै रौ उद्धार हो, अर वे सत्य नै भली भांति पिछांण ले। क्यूंकै परमेसर एक इज है, अर परमेसर अर मांनखै रै बीच में भी एक इज बिचवई है, अरथावूं यीसु मसीह जिकौ मिनख है। वो अपणै आप नै सगळौ रै छुटकारै रै दाम में दे दियौ, अर उणरी गवाई ठीक वगत माथै दीनी। म्हैं साची कैवूं हूं, झूठ कोनीं बोलूं, की म्हैं इणी मकसद ऊं परचारक अर प्रेरित अर गैर यहूदी रै खातर विसवास अर सत्य रौ उपदेसक ठैरायौ गियौ। इण वास्तै म्हैं चावूं हूं की हरैक जगा मिनख, बिना रीस अर विवाद रै साचै मन ऊं हाथो नै उठायनै पराथना किया करै। व्यौंही लुगाईयां भी मांन अर समझदारी रै साथै सुहावनै कपड़ो ऊं अपणै आप नै संवारे, न की बाल गूंथनै अर सोने अर मोतियो अर बहुमोल कपड़ो ऊं, पण भलै कांमां ऊं। क्यूंकै परमेसर री भगती करणैवाळी लुगाईयां नै ओहीज उचित है। लुगाई नै चुपचाप पूरी अधीनता ऊं परमेसर रौ वचन सीखणौ चाहीजै। म्हैं कैवूं हूं की लुगाई न उपदेस करै अर न मिनख माथै आग्या चलावै, पण चुपचाप रैवै। क्यूंकै आदम पैला, उणरै पछै हव्वा नै बणाई। अर आदम बहकायो नीं गियौ, पण लुगाई बहकावै में आयनै अपराधीनी होई। जे वो संयम सहित विसवास, परैम, अर पवितरता में मजबुत रैवै, तो मां रौ फरज निभाने रै जरियै उद्धार पावैला। आ बात साची है की जिकौ लोग कलीसिया रा अगुवा होणौ चावै है, वो भलै कांम री इछा राखै है। ओ जरुरी है की कलीसिया रा अगुवा निरदोस, अर एक इज लुगाई रौ धणी, संयमी, समझदार, सभ्य, मेमाणो रौ आदर भाव करणैवाळौ, अर सिखाणै रै लायक हो। पियकड़ या मारपीट करणैवाळौ नीं हो, बल्कि कोमल हो, अर नीं झगड़ालू, अर नीं धन रौ लोभी हो। आपरै घर नै सही ऊं चलातौ हो, अर आपरै लुगाई-टाबरां नै सगळी गम्भीरता ऊं आदर रै साथै अधीनता में राखतौ हो। जद कोई आपरै घर नै ही चलाणौ नीं जांणै, तो परमेसर री कलीसिया री रूखाळी कीकर करैला? वळै ओ की नवो चेलौ नीं हो, ऐड़ौ नीं होवै की घमण्ड करनै सैतान रौ डंड उण माथै पड़ै। अर कलीसिया रै बारै भी उणरौ नेक नाम हो, ऐड़ौ नीं होवै की वो बदनाम होयनै सैतान रै फंदे में पड़ जावै। व्यौंही कलीसिया रै सेवकों नै भी गम्भीर होणौ चाहीजै, दोरंगी, पियकड़ अर नीच कमाई रा लोभी नीं होवै। पण वो विसवास री गेहरी बातां नै सुद्ध मन ऊं संभाळनै राखणी चाहीजै। ऐ भी पैला परख ले, अर जे निरदोस निकळै तो कलीसिया रै सेवक रौ कांम करै। इण तरैह उणौरी लुगाईयां नै भी गम्भीर होणौ चाहीजै, दोस लगाणैवाळी नीं होवै, पण सावचेत अर सगळी बातां में विसवास लायक होवै। कलीसिया रा सेवक एक इज लुगाई रौ धणी होवै, अर लुगाई टाबरां अर आपरै घर नै सही चलाणौ जांणतौ होवै। क्यूंकै जिकौ कलीसिया रै सेवक रौ कांम सही तरैह ऊं कर सकै है, वे आपरै वास्तै बड़िया पद अर उण विसवास में जिकौ यीसु मसीह माथै है, मोटी हीमत हासल करै है। म्हैं थारै खनै वेगौ आवण री आसा राखैन तो भी ऐ बातां थनै इण वास्तै लिखूं हूं, की जे म्हारै आवण में मोड़ौ हो, तो थूं जांण लेजे की परमेसर रै घराणै मांय जिकौ जीवते परमेसर री कलीसिया है अर जिकौ सत्य रौ खंभौ अर नीव है, कैड़ौ व्यवहार करणौ चाहीजै। इणमे वेम कोनीं की भगती रा समाचार गम्भीर है, अरथावूं, मसीह सरीर मांय परगट होयौ, आतमा मांय वो धरमी ठैरयो, अर सरगदूतो नै वो देठाळौ दियौ। दूजै देस में उणरौ परचार होयौ, जगत नै उण माथै विसवास करयौ, अर महिमा में वो ऊपर उठायौ गियौ। पण आतमा साफ कैवै है की आवण वाळै वगत में कीं लोग भरमाणे वाळी आतमाओ अर दुस्टआतमाओ री सिकसाओ माथै मन लगायनै, विसवास ऊं भटक जावैला। ओ उण झूठै मिनखौ रै कपट रै कारण होवैला, जिणरौ अंतो मर गियौ है। वो लोग ब्याव करणै ऊं रोकेला, अर खाणै री कईक चीजों ऊं आगौ रैणै री आग्या दैला, जिणै परमेसर नै इण खातर बणाया की, विसवासी अर सत्य नै पिछांण नै वाळा उण नै धन्यवाद रै साथै खावै। क्यूंकै परमेसर री बणायोड़ी हरैक चीज बड़िया है, अर कोई चीज मना करणै रै लायक कोनीं, पण ओ की धन्यवाद रै साथै खावै। क्यूंकै परमेसर रै वचन अर पराथना रै द्‍वारा वो सुद्ध हो जावै है। जे थूं भाइयो नै ऐ बातां समझातौ रैला, तो यीसु मसीह रौ बड़िया सेवक ठैरैला। अर विसवास अर उण चौखै उपदेस री बातां ऊं, जिकौ थूं मानतो आयौ है, थारौ पाळ-पोसण होतो रैला। पण असुद्ध अर बुढ़ियों री फालतू कहाणियो ऊं आगौ रै। अर भगती री साधना कर। क्यूंकै सरीर री कसरत ऊं कम फायदो होवै है, पण भगती सगळी बातां रै वास्तै फायदेमंद है, क्यूंकै इण वगत रै अर आवण वाळै जीवन रौ भी वायदो इणी रै खातर है। आ बात साची अर हरैक तरैह ऊं मानणै लायक है। क्यूंकै म्हौ मेनत अर यत्‍न इण खातर करौ हो, की म्हौरी आसा उण जीवते परमेसर माथै है, जिकौ सगळै मिनखौ रौ अर खास करनै विसवासियो रौ उद्धारकर्ता है। इण बातां री आग्या दे अर सिखातौ रै। कोई थारी जवानी नै तुच्छ नीं समझ पावै। पण वचन, अर चाल-चलण, अर परैम, अर विसवास, अर पवितरता में विसवासियो रै खातर नमूनो बण जा। जैड़ी तांई म्हैं नीं आऊं, तद तांई पवितर सास्तर पढ़णै अर उपदेस दैणै अर सिखाणै में ध्यांन दे। उण वरदान नै जिकौ थारै में है उणरौ उपयोग करौ, जिकौ भविसयवांणी रै द्‍वारा कलीसिया रै अगुवो रै हाथ राखतै वेळा थनै मिळियौ हो। इण बातां नै सोचतो रै अर इणी मे अपणौ ध्यांन लगातौ रै, ताकी थारी उनति सगळां लोगां माथै परगट होवै। थारी अर थारै उपदेस री चौकसी राख। इण बातां माथै स्थिर रै, क्यूंकै जे यूं करतौ रैला तो थूं थारै अर थारै सुणणैवाळौ रै खातर उद्धार रौ कारण होवैला। किणी बूढ़े मिनख नै मती हाका कर, पण उणनै पिता जांणनै समझा दे, अर जवानो नै भाई जांणनै। बूढ़ी लुगाईयां नै मां जांणनै, जवान लुगाईयां नै पूरी पवितरता ऊं बेन जांणनै समझा दे। उण विधवाओं रौ, जिकौ साचांणी विधवा है, आदर कर। जे किणी विधवा रै टाबर या नाती-पोते हो, तो वे सबां ऊं पैला अपणै ही घराणै री देखभाळ भगती रै साथै करणी सीखें, अर अपणी विधवा मां रै पालण पोसण रौ फरज चुकाए, क्यूंकै परमेसर ओहीज चावै है। जिकौ साचांणी विधवा है, अर उणरौ कोई कोनीं, वो परमेसर ऊपर आसा राखै है, अर रात दिन पराथना में लागोड़ी रैवै की परमेसर उणरी जरुतो नै पूरी करै। पण जिकौ विधवा भोगविलास में पड़गी, वो जीते जी आतमा मे मर गी है। इण बातां री भी आग्या दिया कर ताकी सगळा लोग निरदोस रैवै। पण जे कोई अपणौ री अर खास करनै आपरै घराणै री चिंता नीं करै, तो वो विसवास ऊं मुकर गियौ है अर अविसवासी ऊं भी बूरो बणग्यौ है। उण विधवाओं रौ नाम मदद री परची मे लिख्यौ जाये जिकौ साठ बरस ऊं कम नीं होवै, अर एक इज धणी री लुगाई रही हो। अर वां भलै कांम में नेक नाम रियौ होवै, जिणै टाबरौ रौ पाळ-पोस कियो होवै। वां मेमाणो री सेवा किनी होवै, परमेसर रै लोगां रा पग धोया होवै, दुखियों री मदद किनी होवै, अर हरैक भलै कांम में मन लगायौ होवै। पण जवान विधवाओं रौ नाम कोनीं लिखणौ, क्यूंकै जद वे मसीह रौ विरोध करनै सुख-विलास में पड़ जावै है तो ब्याव करणौ चावै है, अर दोसी ठैरै है, क्यूंकै उणौ नै आपरै पैलै वायदे नै छोड़ दियौ है। इणरै साथै ई साथै वे घर-घर फिरनै आळसी होणौ सीखें है, अर कैवल आळसी कोनीं पण बकबक करती रैवै अर दूजौ रै कांम में बाधा घालै है अर बुरी बातां बोले है। इण वास्तै म्हैं ओ चावूं हूं की जवान विधवाओं ब्याव करै, अर टाबर जने अर घरबार संभाळै, अर किणी विरोधी नै बदनाम करनै रौ मौकौ नीं दे। म्हैं ओ इण वास्तै कैवूं हूं, क्यूंकै कईक तो विसवास ऊं भटक नै सैतान रै लारै वहीर होयगी है। जे किणी विसवासिनी रै उठै विधवाओं होवै, तो वोहीज उणरी मदद करै की कलीसिया माथै भार नीं होवै, ताकी वो उण विधवा री मदद कर सकै जिणरौ कोई कोनीं है। जिकौ कलीसिया रौ मुखियौ बड़िया प्रबन्ध करै है, खास करनै वे जिकौ वचन सुणाणै अर सिखाणै में मेनत करै है, दो गुना आदर रै लायक समझया जाये। क्यूंकै पवितर सास्तर कैवै है, “लाटो लेवणवाळै बळद रौ मूंडौ नीं बांधणौ” क्यूंकै “मजूर आपरी मजूरी रौ हकदार है।” कोई दोस किणी कलीसिया रै मुखिया माथै लगायौ जावै तो बिना दो या तीन गवाहो रै उणनै नीं सुणणौ। पाप करनैवाळौ नै सगळौ रै सांम्ही समझा दे, ताकी दूजा लोग भी डरै। परमेसर, अर यीसु मसीह अर चुणयोड़ा सरगदूतो नै हाजर जांणनै, म्हैं थांनै चेताणी देवूं हूं की थूं मन खोलनै इण बातां नै मानया कर, अर कोई कांम पकसपात ऊं नीं कर। बिना विचारे किणी नै कलीसिया री सेवा रै लियै जल्दी हाथ नीं राखणौ, अर दूजौ रै पाप में भागी नीं होणौ। अपणै आप नै पवितर बणाय राख। थूं खाली पांणी ही मत पी, पण अपणै पेट अर अपणै बार-बार बीमार होणै रै कारण थौड़ो-थौड़ो अंगूररस भी पिया कर। कईक मिनखौ रौ पाप परगट हो जावै है, अर न्याव रै खातर पैला ऊं पूग जावै है, पण कईको रै पाप पछै परगट होवै है। व्यौंही कीं भला कांम भी परगट होवै है। अर जिकौ भला कांम परगट नीं होवै, वे भी लुक नीं सकै। जिण लोगां माथै दासता रौ जूओ राख्योड़ौ है, वे आपो आपरै मालिक नै सगळै आदर रै लायक समझै, ताकी परमेसर रै नाम अर जिकौ म्हौ सिखाओ हो उणरी निंदा नीं होवै। जीणरा मालिक विसवासी है उणौ नै वे भाई होणै रै कारण तुच्छ नीं जांणै, बल्कि उणरी घणी सेवा करौ, क्यूंकै इणसूं फायदो उठाण वाळा विसवासी अर परैमी है। इण बातां रौ उपदेस दिया कर अर समझातौ रै। जे कोई अलग ई परकार रा उपदेस दैवै है अर खरी बातां नै, अरथावूं म्हौरै परभु यीसु मसीह री बातां नै अर उपदेस नै कोनीं मांनै, जिकौ भगती रै अनुसार है, तो वो घमंडी व्‍है गियौ, अर कीं नीं जांणै। बल्कि उणनै सबदो माथै वाद विवाद करणै री बीमारी है, जिणसूं जळण, अर झगड़ा, अर निंदा री बातां, अर भूंडा-भूंडा वेम करणौ, अर उण मिनखौ में फालतू लड़ाई-झगड़ा पैदा होवै है जिणरी बुद्धि बिगड़ गी है, अर वे सत्य ऊं आगा होय गिया है, जिकौ समझै है की भगती कमाई रौ द्धार है। पण परमेसर री सेवा खुसी ऊं करणी साची कमाई है। क्यूंकै नीं अपां जगत में कीं लाया हो, अर नीं कीं ले जा सकौ हो। जे म्हौरै खनै खाणौ अर कपड़ा होवै, तो इण में इज खुस रैणौ चाहीजै। पण जिकौ धनवान होणौ चावै है, वे ऐड़ी परीकसा अर फंदे अर घणी सी फालतू अर नुकसानदायी लालसाओ में फंसे है, जिकौ मांनखै नै बिगाड़ दैवै है अर विनास री खाई मे धकेल दैवै है। क्यूंकै धन रौ लोभ सगळी परकार री भूंडाई री जड़ है, जिणनै पाने री कोसीस करता होया घणौ नै विसवास ऊं भटक नै अपणै आप नै कई परकार रै तकलीफो ऊं दुखी बणा दिया है। पण हे परमेसर रै जन, थूं इण बातां ऊं आगौ, अर धरम, भगती, विसवास, परैम, धीरज अर नरमाई रै लारै चाल। विसवास री चौखी कुसती लड़। अर उण अनत जीवन नै थाम लौ, जिणरै खातर थूं बुलायौ गियौ अर घणा गवाहो रै सांम्ही चौखौ स्वीकार कियो हो। म्हैं थनै परमेसर, जिकौ सगळौ नै जीवता राखै है, अर यीसु मसीह नै जिकौ पुन्तियुस पिलातुस रै सांम्ही बड़िया गवाई दी, आ आग्या देवूं हूं, की थूं म्हौरै परभु यीसु मसीह रै पाछौ आवण तांई इण आग्या नै निसकलंक अर निरदोस राख। मसीह नै परमेसर ठीक वगत माथै दिखावैला। परमेसर परमधन्य अर एकाएक अधिपति अर राजाओ रौ राजा अर परभुओ रौ परभु है। अर अमरता कैवल परमेसर री है, अर वो अगम्य जोत में रैवै है, अर नीं उणनै किणी मिनख देख्यौ अर नीं कदैई देख सकै ला। उणरौ मांन अर राज युगानयुग रैवैला। आमीन। इण संसार रा धनवानो नै आग्या दे, की वे घमंडी नीं होवै अर चंचल धन माथै आसा नीं राखै, पण परमेसर माथै जिकौ अपांरै सुख रै खातर सगळी चीजों दैवै है। उणौनै आग्या दे की वे भलाई करै, अर भलै कांमां में धनवान बणै, अर उदार अर मदद दैणै में तैयार रैवै। अर आगै रै वास्तै ऐड़ौ धन भेळौ करौ जिण ऊं एक चौखी नींव भर नै राखै, की साचै जीवन नै वस में कर ले। हे तीमुथियुस, थनै जिकौ सौंपी गी है उणरी रूखाळी कर। अर जिण ग्यांन नै ग्यांन कैवणौ ही भूल है, उणरै असुद्ध बकवास अर विरोध री बातां ऊं आगौ रै। कीं लोग इण ग्यांन नै स्वीकार करनै विसवास ऊं भटक गिया है। थांरै सगळौ ऊपर परमेसर रौ अनुग्रह होतो रैवै। आ चिठ्ठी पौलुस री तरफ ऊं जिकौ, परमेसर रै वायदे रै अनुसार अनत जीवन जिकौ यीसु मसीह में है, परमेसर री इछा ऊं यीसु मसीह रौ प्रेरित है। म्हारै लाडले बेटे तीमुथियुस रै नाम, परमेसर पिता अर म्हौरै परभु यीसु मसीह री तरफ ऊं थनै अनुग्रह अर दया अर सानति मिळती रैवै। जिण परमेसर री सेवा म्हैं अपणै बापदादों री रीत माथै साफ अंते ऊं करूं हूं, उणरौ धन्यवाद होवै की म्हैं म्हारी पराथना में थनै रात दिन याद करूं हूं। म्हारै लियै थै जिकौ आंसू बहाया है, उणरी याद करनै थारै ऊं मिळणै री लालसा राखूं हूं की म्हैं खुसी ऊं भर जाऊं। म्हनै थारै उण साचै विसवास री याद आवै है, जिकौ पैला थारी नांनी लोइस अर थारी मां यूनीके मे हो, अर म्हनै विसवास है की वोहीज विसवास थारै मांय भी है। इण कारण म्हैं थनै याद दिलाऊं हूं की थूं परमेसर रै उण वरदान नै जिकौ म्हारै हाथ राखणै ऊं थनै मिळियौ है उणनै कांम मे ले। क्यूंकै परमेसर म्हौ नै भय री आतमा कोनीं पण सामरथ अर परैम अर संयम री आतमा दीनी है। इण वास्तै म्हौरै परभु री गवाई ऊं, अर म्हारै ऊं जिकौ उणरौ कैदी हूं लजित नीं हो, पण उण परमेसर री सामरथ रै अनुसार सुभ संदेस रै वास्तै म्हारै साथै दुख उठा। उणनै अपांरौ उद्धार कियो अर पवितर बुलाहट ऊं बुलाया, अर ओ म्हौरै कांमां रै अनुसार कोनीं। पण उणरै मकसद अर उण करपा रै अनुसार है जिकौ यीसु मसीह री करपा अनादि काल ऊं अपां माथै होई ही। पण अबै म्हौरै उद्धारकर्ता यीसु मसीह रै आगमन ऊं परगट होई है, जिणनै मौत रौ नास कियो अर जीवन अर अमरता नै उण सुभ संदेस रै दवारा परगट कियो है। म्हैं उण सुभ संदेस रौ परचारक, अर प्रेरित, अर उपदेसक भी ठैरयो। इण कारण म्हैं इण दुखौ नै भी उठाऊं हूं, पण लजित कोनीं। क्यूंकै म्हैं उणै जिण माथै म्हैं विसवास कियो है, जांणूं हूं। अर म्हनै पको विसवास है की वो म्हनै सूंपयोड़ी उण न्याव रै दिन तांई रूखाळी कर सकै है। जिकौ खरी बातां थै म्हारै खनै ऊं सुणी है, उणनै उण विसवास अर परैम रै साथै, जिकौ यीसु मसीह में है, अपणौ नमूनो बणान राख। अर पवितर आतमा रै दवारा जिकौ म्हौ में बचयोड़ो है, इण सूंपी गी चौखी आत्मिक बातां री रूखाळी कर। थूं जांणै है की आसिया देस वाळा सगळा विसवासी लोग म्हनै छोड़ दियौ है, जिणमे फूगिलूस अर हिरमुगिनेस है। उनेसिफुरूस रै घराणै माथै परभु दया करै, क्यूंकै उणै घणी बार म्हारै मन नै तसली दी, अर वो म्हारै जेळ मे रैणै ऊं लजित नीं होयौ है। पण जद वो रोम में आयौ, तो घणी कोसीस ऊं ढ़ूंढ़नै म्हारै ऊं मिळनै आयौ। परभु करै की उण न्याव रै दिन उण माथै परभु री दया हो। अर जे जे सेवा उणै इफिसुस में की है उणै भी थूं भली भाती जांणै है। इण वास्तै, हे म्हारा बेटा थूं उण करपा ऊं जिकौ यीसु मसीह में है, तगड़ौ हो जा। अर जिकौ बातां थै घणौ गवायां रै सांम्ही म्हारै ऊं सुणी है, उणै विसवासी मिनखौ नै सूंप दे, जिकौ दूजौ नै भी सिखाणै रै लायक हो। यीसु मसीह रै बड़िया योधा रै ज्यूं म्हारै साथै दुख उठा। जद कोई योधा लड़ाई में जावै है, तो इण वास्तै की अपणै अधिकारी नै खुस करै, अपणै आप नै संसार रै कांमां में कोनीं फंसावै। पछै अखाड़े में लड़नवाळा जे कायदे रै अनुसार नीं लड़ै तो ईनाम नीं पावै। जिकौ किसान मेनत करै है, फळ रौ हिस्सो पैला उणनै मिलनौ चाहीजै। जिकौ म्हैं कैवूं हूं उण माथै ध्यांन दे, अर परभु थनै सगळी बातां री समझ दैला। यीसु मसीह नै याद राख, जिकौ दाऊद रै वंस ऊं होयौ अर मरयोड़ौ मे ऊं जी उठयौ, अर ओहीज उपदेस म्हारै सुभ संदेस रै अनुसार है। इण सुभ संदेस रै खातर म्हैं कुकरमी रै ज्यूं दुख उठाऊं हूं, एठै तांई की कैद भी हूं। पण परमेसर रौ वचन कैद मे कोनीं। इण कारण म्हैं चुणयोड़े लोगां रै वास्तै सगळी चैन करूं हूं, की वे भी उण उद्धार नै जिकौ यीसु मसीह में है अनत महिमा रै साथै पावै। आ बात साची है की, “जे म्हौ उणरै साथै मर गया हा, तो उणरै साथै जीओला भी। जे अपां धीरज ऊं सहन करौला, तो उणरै साथै राज भी करौला। जे अपां उणरौ मना करौला, तो वो भी अपांरौ मना करैला। जे अपां विसवास ऊं भटक भी जाओ, तौभी वो विसवास लायक बण्यौ रैवै है, क्यूंकै वो आप खुद रौ मना कोनीं कर सकै।” इण बातां री याद उणनै दिला अर परभु रै सांम्ही याद करां दे, की छोटी छोटी बातां ऊपर वाद-विवाद नीं किया करै, जिण ऊं कीं फायदो कोनीं होवै बल्कि सुणणै वाळा बिगड़ जावै है। अपणै आप नै परमेसर रौ ग्रहणयोग्य अर ऐड़ौ कांम करणैवाळौ ठैराणै री कोसीस कर, जिकौ ईजत बणी रै, अर जिकौ सत्य रै वचन नै ठीक रीत ऊं कांम मे लातो हो। पण असुद्ध बकवाद ऊं बचयोड़ो रै, क्यूंकै ऐड़ा लोग भळै भी अभगति में बढ़ता जावैला। अर उणौरौ उपदेस सड़ै घाव री तरैह फैलतौ जावैला, अर लोगां रै विसवास नै नास कर दैला। हुमिनयुस अर फिलेतुस उणौ मांय ऊं है, जिकौ ओ कैहन सचाई ऊं भटक गिया है की, “म्हांरौ पुनरूत्थान हो चुकौ है।” इण परकार वे कईक लोगां रै विसवास नै उलट पुलट कर दैवै है। तौभी परमेसर री पकी नींव बणी रैवै है, अर उण माथै आ छाप लागी है, “परभु आपरौ नै पिछांणै है,” अर “जिकौ कोई परभु रौ नाम लेवे है, वो अधरम ऊं बचयोड़ो रैवै।” मोटे घर मांय नीं कैवल सोने-चांदी रा ही, पण काठ अर माटी रा बरतन भी होवै है। कोई-कोई आदर, अर कोई-कोई अनादर रै खातर। जे कोई अपणै आप नै भूंडाई ऊं सुद्ध करैला, तो वो आदर रौ बरतन, अर पवितर ठैरैला। अर मालिक रै कांम आवैला, अर हरैक भलै कांम रै खातर तैयार होवैला। जवानी री भूंडी इछा ऊं आगौ रै, अर जिकौ सुद्ध मन ऊं परभु रौ नाम लेवे है, उणौरै साथै धरम, अर विसवास, अर परैम, अर मेल-मिलाप रौ पीछौ कर। पण मूरखता अर फालतू रै विवादों ऊं अलग रै, क्यूंकै थूं जांणै है की इण ऊं झगड़ा पैदा होवै है। परभु रै दास नै झगड़ालू नीं होणौ चाहीजै, पण वो सगळौ रै साथै कोमल अर सिकसा में निपुण अर सहन करनैवाळौ हो। वो जिकौ विरोध करै है उणौनै नरमाई ऊं समझावै, कांई जांणै परमेसर उणनै मन फिराव रौ मन दे की वे भी सत्य नै पिछांणै, अर सैतान रै फंदे ऊं छूट जाए जिकौ सैतान री इछा पूरी करणै रै लियै उणरै वस मे हा। पण ओ याद राख की आखरी दिनां मांय कठिन वगत आवैला। क्यूंकै मिनख मतलबी, लोभी, डींगमार, अभिमांनी, निंदा करणैवाळौ, मां-बाप री आग्या टाळणैवाळा, दया नीं करणैवाळौ, अपवितर, परैम नीं राखणवाळौ, माफ नीं करणैवाळौ, दोसण लगाणैवाळौ, सहन नीं करणैवाळौ, कठोर, भलै रा बैरी, विसवासघाती, लोफर, घमंडी, अर परमेसर रा कोनीं बल्कि सुख-विलास रा ही चाहनेवाळा होवैला। वे भगती रौ रूप तो धारैला, पण उणरी सगति नै नीं मानैला। ऐड़ौ ऊं आगौ रैणौ। इण मांय ऊं कीं गळत सिखाणवाळा लोग है जिकौ घरो मांय दबे पगां घुस आवै है, अर उण कमजोर लुगाईयां नै वस मे कर लेवे है जिकौ पापों ऊं दबी अर हरैक परकार री भूंडी इछाओ रै वस में है। ऐ लुगाईयां हमेसां सीखती तो रैवै है पण सचाई री पिछांण तांई कदैई नीं पूगी। ज्यौ यनैस अर यम्ब्रेस नै मूसा रौ विरोध किनो हो, व्यौंही ऐ गळत सिखाणवाळा लोग भी सचाई रौ विरोध करै है। ऐ ऐड़ा मिनख है, जिणरी बुद्धि भीस्ट हो गी है अर वे विसवास रै बारै मांय निकमे है। पण वे इण ऊं आगै कोनीं बढ़ सकै, क्यूंकै ज्यूं यनैस अर यम्ब्रेस री नासमझ सगळै मिनखौ माथै परगट होय गी ही, व्यौंही इण गळत सिखाणवाळौ रौ भी हो जावैला। पण थै म्हारी सिकसा, चाल-चलण, मनसा, विसवास, सहन करणै री ताकत, परैम, अर धीरज नै देख्यौ है। अर सताए जांणै, अर दुख उठाणै में थै म्हारौ साथ दियौ। अर ऐड़ै दुखौ में भी जिकौ अन्ताकिया अर इकुनियुम अर लिस्तरा मे म्हारै माथै पड़िया हा, अर वळै दुखौ नै भी जिकौ म्हैं उठाया हा। पण परभु नै म्हनै उण सगळां ऊं छुड़ा लियौ। पण जिता यीसु मसीह में भगती रै साथै जीवन बिताणौ चावै है वे सगळा सताया जावैला। पण पापी अर ठग, धोखो देता होया अर धोखो खाता होया, बिगड़ता होया जावैला। पण थूं उण बातां माथै जिकौ थूं सीखी है अर विसवास कियो है, ओ जांणनै मजबुत बण्यौ रै की थै उणै कीण लोगां ऊं सीख्यौ है। अर बचपन ऊं पवितर सास्तर थारै जांण्योड़ो है, जिकौ थनै यीसु मसीह माथै विसवास करणै ऊं उद्धार प्राप्त करणै रै खातर बुद्धिमान बणा सकै है। पूरौ पवितर सास्तर परमेसर री सामरथ ऊं रचियोड़ो है अर उपदेस, अर समझानै, अर सुधारनै, अर धरम री सिकसा रै खातर फायदेमंद है, ताकी परमेसर रौ जन सिद्ध बणै, अर हरैक भलै कांम रै खातर तैयार रैवै। परमेसर अर मसीह यीसु रौ गवाई करनै, जिकौ जीवतौ अर मरयोड़ौ रौ न्याव करैला, अर उणरै परगट होणै अर राज री सुधि दिलायनै म्हैं थनै आदेस देवूं हूं, की थूं वचन रौ परचार कर, वगत अर बिना वगत तैयार रै, सगळी परकार री धीरज अर सिकसा रै साथै तसली दे अर डांट अर समझा। क्यूंकै ऐड़ौ वगत आवैला जद लोग खरा उपदेस नीं सहन सकै, पण वे आपरी भूंडी इछाओ रै अनुसार आपरै खातर घणा ही उपदेसक भेळा कर दैला, अर आपरा कांन सत्य ऊं फेरनै कथा-कहाणियों ऊपर लगावैला। पण थूं सगळी बातां मे सावचेत रै, दुख उठा, सुभ संदेस परचार रौ कांम कर, अर अपणी सेवा नै पूरी कर। म्हैं परभु री सेवा मे खुद नै बलिदान कियो जाय रियौ हूं। म्हारै मरण रौ वगत आ गियौ है। म्हैं चौखी कुसती लड़ चुकयौ हूं, म्हैं म्हारी दौड़ पूरी कर ली है, म्हैं विसवास री रूखाळी किनी है। भविसय में म्हारै खातर धरम रौ वो मुगट राख्योड़ौ है, जिणनै परभु, जिकौ धरमी अर न्यावी है, म्हनै उण दिन दैला, अर म्हनै इज कोनीं बल्कि उण सगळौ नै भी जिकौ उणरै परगट होणै नै चौखौ जांणै है। म्हारै खनै जल्दी आवण री कोसीस कर। क्यूंकै देमास नै इण संसार रै परैम मे पड़नै म्हनै छोड़ दियौ है अर थिस्सलुनीके तरफ जातौ रियौ। क्रेसकेंस गलातिया नै अर तीतुस दलमतिया री तरफ जातौ रियौ। कैवल लूका म्हारै साथै है। अर जद थूं आवैला मरकुस नै लेयनै आईजे। क्यूंकै सेवा रै खातर वो म्हारै घणौ कांम रौ है। तुखिकुस नै म्हैं इफिसुस नगर भेज्यौ है। जो कुड़तौ म्हैं त्रोआस नगर मे करपुस रै उठै छोड़ आयौ हूं, जद थूं आवै तो उणनै अर किताबो खास करनै चरमपत्रो नै लेन आए। सिकन्दर ठठेरे नै म्हारै ऊं घणी बुराइयां की है। परभु उणनै उणरै कांमां रै वाजिब बदळौ दैला। थूं भी उण ऊं सावचेत रै, क्यूंकै उणै म्हौरी बातां रौ घणौ ही विरोध कियो। जद म्हारै पैलै मुकदमे रौ बचाव कचेड़ी मे करणै लागौ तो उण वगत किणी नै म्हारौ साथ कोनीं दियौ, बल्कि सगळौ म्हनै छोड़ दियौ हो। भलौ हो की इणरौ लेखौ दैणौ नीं पड़ै। पण परभु म्हारौ सहायक रियौ अर म्हनै सामरथ दी, ताकी म्हारै दवारा पूरा पूरा परचार होवै अर सगळा गैर यहूदी सुण ले। म्हैं मौत ऊं बचायो ग्यौ हूं। अर परभु म्हनै हरैक भूंडा कांम ऊं छुड़ावैला, अर आपरै सरगिए राज मे सावचेत पूगावैला। उणरी महिमा जुग जुग होती रैवै। आमीन। प्रिस्का अर अक्‍किला रौ अर उनेसिफुरूस रै घराणै नै नमस्कार। इरास्तुस कुरिन्थुस नगर में रैय गियौ, अर त्रुफिमुस नै म्हैं मिलेतुस नगर में बिमार छोड़यौ है। सरदी ऊं पैला चालनै आवण री कोसीस कर। यूबूलुस, अर पूदेंस, अर लीनुस अर क्लौदिया, अर सगळै विसवासी भाइयो रौ थांनै नमस्कार। परभु थारै साथै रै। अर थां सगळौ माथै परमेसर री करपा होती रैवै। आ चिठ्ठी पौलुस री तरफ ऊं है, जिकौ परमेसर रा दास अर यीसु मसीह रौ प्रेरित है। परमेसर रै चुणयोड़ा लोगां रौ उणौरै विसवास में मदद करणै रै वास्तै अर म्हौरै भगती री सचाई रौ पूरौ ग्यांन री सिकसा दैणै खातर म्हनै भेज्यौ है। वो सचाई उण लोगां नै अनत जीवन री आसा दैवै है, जिणरी वायदो परमेसर नै, सनातन ऊं की है, जिकौ कदैई कूड़ौ नीं बोल सकै है। पण ठीक वगत माथै अपणै सुभ संदेस नै उण परचार रै दवारा परगट कियो, जिकौ म्हारै उद्धारकर्ता परमेसर री आग्या रै अनुसार म्हनै सूंपयौ गियौ। तीतुस जिकौ विसवास री सहभागिता ऊं म्हारौ साचौ बेटौ है, उणरै वास्तै लिखूं हूं। परमेसर पिता अर म्हारै उद्धारकर्ता मसीह यीसु री तरफ ऊं थनै अनुग्रह अर सानति मिळती रैवै। म्हैं इण वास्तै थनै क्रेते में छोड़नै आयौ हो, की थूं बाकी रयोड़ी बातां नै सुधारै, अर म्हारी आग्या रै अनुसार गांव गांव मांय जांणकार मुखियौ नै लगावै, जिकौ निरदोस अर एक इज लुगाई रौ धणी हो, जिणरा टाबर विसवासी हो, अर उणमे झगड़ालू अर आग्याओं नै नीं मानणैवाळा दोस नीं हो, क्यूंकै कलीसिया रै अगुवे नै परमेसर रौ भण्डारी होणै रै नाते निरदोस होणौ चाहीजै। नीं हठी, नीं क्रोधी, नीं पियकड़, नीं मारपीट करनैवाळौ, अर नीं रूपियौ रौ लोभी हो, पण मेमाणो रौ आदर करनैवाळौ, भलाई चावा वाळौ, खुद नै वस में राखण वाळौ, नेक, पवितर अर अनुसासित हो। अर वो विसवास लायक सिकसा ऊपर मजबुत रैवै, जिकौ सिद्धान्त रै अनुसार हो, अर खरी सिकसा ऊं उपदेस दे सकै, अर विरोधियो रौ मूंडौ भी बंद कर सकै। क्यूंकै घणाकर लोग आग्याओं नै नीं मानणैवाळा, बकवासी अर चालबाज है। खासकर यहूदी विसवासियो मांय ऊं। इणौरौ मूंडौ बंद करणौ चाहीजै। ऐ लोग नीच कमाई रै लियै गळत बातां सिखायनै घर रा घर बिगाड़ दैवै है। क्रेती लोगां मे ऊं एक जन नै, जिकौ उणौ रौ इज भविसयदाता है, कयौ है, “क्रेती लोग हमेसां झूठा, दुस्टी ढ़ौर, अर आळसी पेटु होवै है।” आ बात साची है, इण वास्तै उणौनै कड़ी चेताणी दिया कर की वे विसवास मांय पका हो जावै, अर यहूदियो री कथा कहाणियो अर उण मिनखौ री आग्याओं ऊपर मन नीं लगावै, जिकौ सचाई ऊं भटक जावै है। सुद्ध लोगां रै लियै सगळी चीजों सुद्ध है, पण असुद्ध अर अविसवासियो रै खातर कीं सुद्ध कोनीं, बल्कि उणौरी बुद्धि अर अंतो दोनूं असुद्ध है। वे कैवै है की म्हौ परमेसर नै जांणौ हो, पण आपरै कांमां रै खातर उणरौ इन्कार करै है, क्यूंकै वे लोगां री निजर में भूंडा अर आग्या नीं मानणै वाळा है, अर किणी चौखै कांम रै लायक कोनीं। पण थूं ऐड़ी बातां सिखाया कर जिकौ खरै उपदेस रै लायक है। मतलब बूढ़ा मिनख गम्भीर, समझदार अर खुद नै वस में राखणवाळौ हो, अर उणौ रौ विसवास, परैम अर धीरज पको हो। इणी तरैह बूढ़ी लुगाईयां रौ चाल-चलण पवितर लोगां जैड़ौ होवै। वे दोसण लगानवाळी अर पियकड़ नीं, पण चौखी बातां सिखाण वाळी हो, ताकी वे जवान लुगाईयां नै चेताणी देती रैवै की आपरै घरधणीयां अर टाबरौ ऊं परैम राखै। इण वास्तै खुद नै वस में राखणवाळी, पतिव्रता, घर रौ कांमकाज करणवाळी, भली, अर आपरै-आपरै धणी रै अधीन रैवणवाळी हो, ताकी परमेसर रै वचन री निंदा नीं होवै। यूं ही जवान मिनखौ नै ई समझाया कर की खुद नै वस में राखणवाळा हो। सगळी बातां मांय अपणै आप नै भलै कांमां रौ नमूनो बणा। थारै उपदेस ऊं चौखी, गम्भीरता अर ऐड़ी खराई पाई जावै की कोई उणै भूंडा नीं के सकै, जिण ऊं विरोधी अपां माथै कोई दोसण लगाणै रौ मौकौ नीं पान लजित होवै। दासो नै समझा की अपणै-अपणै मालिको रै अधीन रैवै, अर सगळी बातां में राजी राखै, अर उलटो जबाब नीं दे। चोरी चालाकी नीं करै, पण सगळी तरैह ऊं विसवासी निकळै की वे सगळी बातां में अपांरै उद्धारकर्ता परमेसर रै उपदेस री सौभा बढ़ावै। क्यूंकै परमेसर रौ वो अनुग्रह परगट है, जिकौ सगळै मिनखौ रै उद्धार रौ कारण है। अर अपांनै चेताणी दैवै है की अपां बिना भगती अर सांसारिक अभिलासाओं ऊं मन फेर नै इण जुग में खुद नै वस में राखै अर नेकी अर भगती ऊं जीवन बिताओ, जैड़ी तांई उण धन्य आसा रौ मतलब अपांरै उद्धारकर्ता महान परमेसर यीसु मसीह री महिमा रै परगट होणै री बाट जोहता रैवौ, जिणै अपणै आप नै अपांरै खातर दे दियौ, की अपांनै हरैक तरैह रै अधरम ऊं छुड़ा ले, अर सुद्ध करनै अपणै खातर एक ऐड़ी जाति बणा ले जिकौ भलै-भलै कांमां में जोस हो। पूरै अधिकार रै साथै ऐ बातां कैह, अर समझा अर सिखातौ रै। कोई थनै तुच्छ नीं जांणै। लोगां नै याद दिला की राजाओ अर अधिकारियों रै अधीन रैवै, अर उणौरी आग्या मांनै, अर हरैक चौखै कांम रै खातर तैयार रैणौ। किणी नै बदनाम नीं करै, झगड़ालू नीं हो, पण कोमल स्वभाव रौ हो, अर सगळै मिनखौ रै साथै नरमाई रै साथै रैवै। क्यूंकै म्हौ ई पैला नासमझ, अर आग्या नीं मानणै वाळा, अर भटकयोड़ा अर हरैक तरैह री अभिलासाओं अर सुख-विलास री गुलामी में हा, अर बैरभाव, अर जळण करणै में जीवन बिताता हा, अर नफरत रै लायक हा, अर एक-दूजै ऊं बैर राखता हा। पण जद म्हौरै उद्धारकर्ता परमेसर री करपा अर परैम मिनखौ माथै परगट होयौ, तो उणै म्हौरौ उद्धार कियो। अर ओ धरम रै कांमां रै कारण नीं, जिकौ म्हौ आप करया, पण अपणी दया रै अनुसार नवो जनम रौ स्‍नान अर पवितर आतमा रै नवो बणाणै रै दवारा होयौ। परमेसर म्हारै उद्धारकर्ता यीसु मसीह रै जरियै म्हौ माथै पवितर आतमा घणौहारौ उंडेलियो, जिणसूं म्हौ उणरै अनुग्रह ऊं परमेसर रै सांम्ही नेक ठैरया, अनत जीवन री आसा रै अनुसार वारिस बण्या। आ बात साची है, अर म्हैं चावूं हूं, की थूं इण बातां रै बारै में हीमत ऊं बोले इण खातर की जिणौ नै परमेसर माथै विसवास करयौ है, वे भलै-भलै कांमां में लागयोड़ा रैणै रौ ध्यांन राखै। ऐ बातां भली अर मिनखौ रै फायदे री है। पण गेलो रै विवादों, पीढ़ियो रै बारै में वाद-विवाद, कायदे रै बारै में विरोध अर झगड़ौ ऊं बचयो रै, क्यूंकै उणमे कोई फायदो नीं फालतू है। किणी बिगाड़ नै वाळै नै एक दो बार समझा-बुझानै उण ऊं अलग रै, ओ जांणनै की ऐड़ा मिनख भटक गिया है, अर पाप करतौ अपणै आप नै दोसी ठैरावै है। जद म्हैं थारै खनै अरतियास या तुखिकुस नै भेजूं तो म्हारै खनै निकुपुलिस नगर आवण री कोसीस करणी, क्यूंकै म्हैं उठीज सियाळौ बिताणै रौ विचार कियो है। जेनास वकील अर अपुल्लोस नै कोसीस करनै आगै पूगा दे, अर देख की उणौनै किणी चीज री कमी नीं होवै। अपांरै लोगां रै चौखै कांमां में लागौड़ा रैणौ सीखो, ताकी रोज री जरुते पूरी हो अर वे निकमा नीं रैवै। म्हारै सगळै साथियो रौ थनै नमस्कार। जिकौ विसवास रै खातर म्हौ ऊं परैम राखै है, उणौ नै भी नमस्कार। थांरै सगळौ माथै अनुग्रह होतो रैवै। ओ कागद यीसु मसीह रा सुभ संदेस नै सुणावण रै कारण जेळ में बंद पौलुस और भाई तिमुथियुस री ओर ऊं, म्हारै प्यारै साथी फिलेमोन, बेन अफफिया और अपांरै सिपाई साथी और फिलेमोन रै घर री कलीसिया रै नाम है। अपांरा पिता परमेसर और परभु यीसु मसीह री दया और सानति थौरे माथै हमेसां रैवै। जद म्हैं परमेसर रा पवितर लोगां और परभु यीसु मसीह रै साथै थौरो परैम और विसवास री बातां सुणूं हूं, तो हमेसां थौरे वास्तै परमेसर नै धन्यवाद देवूं और पराथना करूं हूं, के थांरा विसवास ऊं पैदा होई दयाळु भागीदारी लोगां नै मारग बतावै। जिण ऊं उणौनै उण सगळी चौखी चीजों रौ ग्यांन रै जावै जिकौ मसीह रा मकसद नै आगै बढ़ाणै ऊं अपांरै बीच में रैह री है। क्यूंकै हे भाई, म्हनै ओ जांण नै घणी हीमत और सानति मिळी के, थै आपरा भाई जैड़ा हेत ऊं परमेसर रा पवितर लोगां रा मन लीला हो गिया है। म्हनै मसीह में थांनै जिकौ करणौ चाहीजै उण वास्तै हुकम देवणा रौ हक है, तौभी म्हैं पौलुस, जिकौ बूढ़ो हो गियो हूं और यीसु मसीह रा सुभ संदेस रै कारण जेळ में बंद हूं। थारै ऊं परैम ऊं उनेसिमुस वास्तै विणती करूं हूं। जिकौ जेळ में म्हारै ऊं सुभ संदेस सुण्यौ और विसवास करणा ऊं म्हारौ बेटौ बणग्यौ। ओ पैला थारै कोई कांम रौ कोनीं हो, पर अबै ओ थारै अर म्हारै दोनो रै घणै कांम रौ है। म्हैं म्हारै इण काळजा रा टुकड़ा नै पाछौ थारै खनै मेलूं हूं। म्हैं जिकौ सुभ संदेस रै कारण जेळ में हूं, इणनै म्हैं सेवा वास्तै म्हारै खनै थारी जगा राखणी चावतौ हो। पर हे फिलेमोन थारी इछा रै बिना इणनै नीं राखियौ। ताकी थै इणनै दबाओ नीं, पर आंणंद रै साथै म्हारी सेवा वास्तै इणनै म्हारै खनै रैवण दो। हो सकै ओ थारै खनै ऊं इण वास्तै थोड़ौ आगौ रियौ, ताकी हमेसां थारै खनै रै सकै। अबै इणनै नौकर ज्यूं नीं, पर भाई ज्यूं राख जो। इणनै नौकर ज्यूं नीं, पर भाई ज्यूं परैम करजै। क्यूंकै ओ परभु में म्हारौ घणौ लाडलौ है। अगर थै म्हनै थारौ साथी समझौ तो, इणनै भी म्हारै ज्यूं मानजो। ओ थौरो कीं नुकसाण करयौ है तो, इण रौ नुकसाण म्हारै नाम मांड दीजौ। म्हैं पौलुस म्हारै हाथ ऊं लिखूं हूं के, उनेसिमुस रौ सगळौ नुकसाण म्हैं भर दूंला। म्हनै ओ याद दिलावण री जरुत कोनीं के थूं म्हारै जिन्दगी भर रौ करजदार है। हे भाई परभु में थै म्हारी आ बात मांन जाईजौ। ताकी मसीह में म्हारौ मन राजी रैवै। म्हनै पूरौ विसवास है के, जिकौ म्हैं थांनै कयौ, उण ऊं बढ़नै करौला। इण वास्तै भरोसौ करनै ओ कागद थनै लिखूं हूं। ओ भी कहूं के, थै म्हारै रैवण रै वास्तै प्रबन्ध करजौ। क्यूंकै म्हनै विसवास है, थौरी परमेसर ऊं पराथना रै कारण म्हैं वेगो छूट नै थौरे खनै आऊंला। इपफ्रास जिकौ यीसु मसीह रै कारण म्हारै साथै बन्धियोड़ो है थनै नमस्कार कैवै है। मरकुस, अरिस्तर्खुस, देमास और लूका जिकौ म्हारै साथी है उणौरौ थनै नमस्कार। अपांरा परभु यीसु मसीह रौ अनुग्रह थौरे सगळौ री आतमा माथै हमेसां रैवै। परमेसर नै बीते काल में भविसयदाताओ रै जरियै हरैक मौकै में हरैक परकार ऊं म्हौरै बापदादों ऊं बातचीत की। लेकिन इण आखरी दिनां में परमेसर म्हौरै ऊं आपरै बेटे रै जरियै बातचीत की, जिणनै उणै सगळी चीजों रौ वारिस ठैरायौ अर बेटे रै जरियै परमेसर नै सगळी सिस्टी रची है। वो बेटौ परमेसर री महिमा रौ उजाळौ, अर उणरै स्वरूप री छाप है, अर सगळी चीजों नै आपरै सामरथ रै वचन ऊं संभाळै है। उणै म्हौरै पापों नै धोयनै अबै वो सरग में सर्वसक्तिमान परमेसर रै जीमणा पाड़ै विराजमान है। अर सरगदूतो ऊं उतरौ ही उतम ठैरयो, जितौ उणै सरगदूतो ऊं मोटे पद रौ वारिस होयनै उतम नाम पायो। क्यूंकै परमेसर किणी भी सरगदूत नै कदैई ऐड़ौ नीं कयौ, “थूं म्हारौ बेटौ, आज म्हैं थारौ पिता बण्यौ हूं।” अर नीं किणी सरगदूत ऊं परमेसर ओ कयौ, “म्हैं उणरौ पिता बणूंला, अर वो म्हारौ बेटौ होवैला।” अर जद परमेसर पहिलौठे नै जगत में लावै है, तो कैवै है, “परमेसर रा सगळा सरगदूत उणरी आराधना करै।” सरगदूतो रै बारै में बतातौ होयौ ओ कैवै है, “उणै आपरै सगळै सरगदूतो नै पवन बणाया, अर आपरै सेवकों नै अग्‍नि री लपटो बणाया।” लेकिन आपरै बेटे रै बारै में ओ कैवै है, “हे परमेसर, थारौ सिहासण जुग-जुग रैवैला, थारै राज्य रौ राजडंड धारमिकता रौ राजडंड है। थां धरम ऊं परैम अर अधरम ऊं बैर राख्यौ, इण खातर हे परमेसर, थांरै परमेसर नै थांरै साथियो ऊं बढ़नै आंणंद रै तेल ऊं थांनै अभिसेक करया।” परमेसर ओ भी कैवै है, “हे परभु, सरूआत में थै धरती री सिस्टी की, अर सरग थांरै हाथो री कारीगरी है। ऐ तो नास हो जावैला, पण थूं बण्यौ रैला, अर ऐ सगळा कपड़ो रै ज्यूं पुराणा हो जावैला। अर थूं उणौनै चादर रै ज्यूं लपटेला, अर ऐ कपड़ो रै ज्यूं बदळ जावैला। लेकिन थूं वोहीज है, अर थारै बरसो रौ अनत नीं होवैला।” परमेसर कदैई किणी सरगदूत ऊं ऐड़ौ नीं कयौ, “थूं म्हारै जीमणी तरफ बैठ जा, जैड़ी तांई म्हैं थारै दुसमनो नै थारै चरणौ री चौकी नीं बणा दूं।” कांई सगळा सरगदूत उद्धार पावण वाळौ री सेवा रै लियै भेज्यौड़ी सहायक आतमाओ है? इण वास्तै म्हौ वळै घणी सावचेती रै साथै, जिकौ कीं म्हौ सुण्यौ है, उण माथै ध्यांन दैणौ चाहीजै ताकी म्हौ भटक नीं सकौ। क्यूंकै जिकौ वचन सरगदूतो रै जरियै कयौ हो जद वो स्थिर रियौ अर हरैक अपराध अर आग्या नीं मानणै रौ ठीक ठीक बदळौ मिळियौ, तो म्हौ उण महान उद्धार नै नीं मांनौ म्हौ कीकर बच सकौ ला? जिणरी घोसणा पैला परभु रै जरियै की गई ही जिण लोगां नै परभु रै इण उद्धार रौ सुण्यौ, उणौनै उणरै संदेस नै म्हौरै लियै पको कियो। अर परमेसर भी अपणी इछा रै मुजब चिन्हों, अर अचूम्बे रा कांम, अर तरैह-तरैह रा सामरथ रा कांम, अर पवितर आतमा रै वरदानो नै बांटनै रै जरियै, इणरी गवाई देता रिया। परमेसर नै उण आवण वाळै जगत, जिणरी चरचा म्हौ कर रिया हो, सरगदूतो रै अधीन कोनीं करयौ। बल्कि पवितर सास्तर में किणी आ गवाई दी है की, “मिनख कांई है, की थूं उणरी सुधि लेवे है? या मिनख रौ बेटौ कांई है, की थूं उणरी चिंता करै है? थै उणनै सरगदूतो ऊं थोड़ो इज कम करयौ, थै उण माथै महिमा अर आदर रौ मुगट राख्यौ अर उणनै थारै हाथो रै कांमां रौ अधिकार दियौ। थै सगळौ उणरै पगां तळै कर दियौ।” सगळौ कीं उणरै अधीन करता होया परमेसर नै कीं भी ऐड़ौ नीं छोड़यो जिकौ उणरै अधीन कोनीं हो। तौभी आजकल म्हौ हरैक चीज उणरै अधीन नीं देख रिया हो। लेकिन म्हौ यीसु नै जिकौ सरगदूतो ऊं थोड़ोक कम कियो हो, मौत रौ दुख उठानै रै कारण महिमा अर आदर रौ मुगट पैरयोड़ो देखौ हो, ताकी परमेसर री करपा ऊं वो हरैक मिनख रै लियै मौत रौ अनुभव करै। क्यूंकै जिणरै लियै सगळौ कीं है, अर जिणरै जरियै सगळौ कीं है, उणनै ओहीज बड़िया लागौ की जद वो घणै बेटौ नै महिमा में पुगाए, तो उणरै उद्धार करणवाळै यीसु नै दुख उठानै रै जरियै सिद्ध करै। क्यूंकै पवितर करनैवाळौ अर जिकौ पवितर किया जावै है, सगळा एक इज मूल ऊं है। इण खातर यीसु उणौनै भाई कैवण ऊं नीं लजावै। वो कैवै है, “म्हैं थारौ नाम अपणै भाइयो नै सुणाऊंला, सभा रै बीच में म्हैं थारा भजन गाऊंला।” अर पछै ओ की, “म्हैं उणरौ विसवास करूंला।” अर वळै वो कैवै है। “म्हैं एठै हूं, अर वे छोरा जिकौ म्हारै साथै है। जिणौनै परमेसर म्हनै दिया है।” इण वास्तै जद की छोरा मांस अर लोई रा भागी है, तो वो आप ही उणौरै ज्यूं उणौरौ सहभागी हो गियौ, ताकी अपणी मौत रै जरियै वो उणनै मतलब सैतान नै नास कर सकै जिणरै खनै मौत रौ अधिकार हो। अर जिता लोग मौत रै भय रै खातर जीवन भर गुलामी में फसया हा, उणौनै छुड़ा सकै। क्यूंकै वो तो सरगदूतो नै कोनीं, बल्कि अबराहम रै वंस नै संभाळतो हो। इण खातर उणौनै चाहीजै हा, की सगळी बातां में अपणै भाइयो रै जैड़ा बणै। जिण ऊं वो उण बातां में जिकौ परमेसर ऊं संबंध राखै है, एक दयाळु अर विसवास लायक महायाजक बणै ताकी लोगां रै पापों रै लियै प्रायसित दिलानै रै लियै बलि हो सकै। क्यूंकै जद उणै परीकसा री दसा में दुख उठायौ, तो वो उण री भी मदद कर सकै है, जिणरी परीकसा होवै है। इण वास्तै हे विसवासी भाइयो, थै जिकौ सरगिए बुलावै में भागी हो, उण प्रेरित अर महायाजक यीसु रौ ध्यांन करौ, जिणनै अपां स्वीकार करौ हो। जिण तरैह मूसा परमेसर रै घराणै में सगळै कांमां में विसवास लायक रिया, उणी तरैह यीसु भी उणनै ठैरानै वाळै परमेसर रै लियै विसवास लायक रिया। ज्यौ मकान बणाणै वाळौ मकान ऊं घणौ आदर खुद पावै है, व्यौंही यीसु मूसा ऊं घणौ आदर रौ भागी मांनया गिया। क्यूंकै हरैक घर नै कोई न कोई बणाणै वाळौ होवै है, लेकिन सगळौ कीं बणाणै वाळौ परमेसर है। मूसा तो परमेसर रै सगळै घर में दास रै ज्यूं विसवास लायक रिया, की जिण बातां रौ वरणन आवण वाळै वगत में होवण वाळौ हो, उणरी गवाई दे। मसीह तो बेटे रै रूप में परमेसर रै घर रौ अधिकारी है। जे म्हौ हीमत, अर अपणी आसा रै घंमड माथै आखरी तांई मजबुती ऊं बण्या रैवौ तो म्हौ भी उणरा घराणा हो। अतस ज्यौ पवितर आतमा कैवै है, “जे आज थै उणरौ सबद सुणौ, तो अपणै काळजै नै बापदादों रै ज्यूं कठोर नीं करौ, ज्यौ की रीस दिलानै रै वगत अर परीकसा रै दिन रिंदरोही में करयौ हो। उठै थौरे बापदादों चाळीस बरस तांई म्हारै कांमां नै देख्यां, उणरै पछै भी उणौनै म्हारी जांच परख की। इण खातर म्हैं उण वगत रै लोगां ऊं नाराज रियौ, अर म्हैं कयौ, ‘इणौरौ मन हमेसां भटकतो रैवै है, अर ऐ म्हारौ मारग जांणणौ नीं चावै।’ तद म्हैं रीस में आयनै सौगन खाई, ‘वो कदैई म्हारै आराम री जगा में परवेस नीं करैला।’ ” हे भाइयो, सावचेत रैवौ, की थौरे में ऐड़ौ भूंडौ अर अविसवासी मन नीं हो, जिकौ थांनै जीवते परमेसर ऊं आगा ले जावै। बल्कि जिण दिन तांई “आज” रौ दिन कहीजै है, हरैक दिन एक दूजै नै धीरज बंधाता रैवौ, ऐड़ौ नीं होवै, की थौरे में ऊं कोई पाप रै छळ में आयनै कठोर बण जावै। जे अपां अपणै सरूआत रै विसवास नै आखरी तांई मजबुती ऊं बण्या रैवौला, तो अपां मसीह रा भागी बण्या रौला। ज्यौ कयौ गयो है, “जे आज थै उणरौ सबद सुणौ, तो अपणै काळजै नै बापदादों रै ज्यूं कठोर नीं करौ, ज्यौ की रीस दिलानै रै वगत करयौ हो।” कीण लोगां सुणनै रीस दिलाई? कांई उण सगळौ नै नीं, जिकौ मूसा मिसर ऊं बचायनै निकाळया हा? अर परमेसर चाळीस बरस तांई कीण लोगां ऊं नाराज रिया? कांई उणौ ऊं कोनीं जिणौ पाप करयौ हो, अर उणौरी लासां रिंदरोही में पड़ी रही? अर परमेसर कीण ऊं सौगन खाई, “थै म्हारै आराम री जगा में परवेस नीं कर पाओला?” कांई वे इज कोनीं जिकौ आग्या नीं मानी? इण तरैह म्हौ देखौ हो, की वे विसवास लायक नीं रैवण रै खातर परवेस नीं कर सकया। इण वास्तै जद की उणरै आराम री जगा में परवेस करणै रौ वायदो अजी तांई है, तो म्हौ नै सावचेत रैवणौ चाहीजै, ऐड़ौ नीं हो, की थौरे में ऊं कोई जन उण आराम री जगा में परवेस कियै बिना रैह जावै। म्हौ नै भी उणौ रै ज्यूं सुभ संदेस सुणायो गियौ है, पण उण लोगां नै जिकौ संदेस सुण्यौ, उणौनै उण ऊं कोई फायदो कोनीं होयौ, क्यूंकै सुणणै वाळौ नै विसवास रै साथै नीं मांनया। पण म्हौ जिकौ विसवास कियो है, उण आराम री जगा में परवेस करौ हो। ज्यौ परमेसर कयौ, “म्हैं रीस में आयनै सौगन खाई ही, ‘वे कदैई म्हारै आराम री जगा में परवेस नीं कर पावैला।’ ” परमेसर ओ कयौ, जद संसार री सिस्टी रै वगत में अपणौ कांम पूरौ हो गियौ हो। क्यूंकै धरम सास्तर सातवे दिन रै बारै में ओ कैवै है, “परमेसर आपरौ सगळौ कांम निपटा नै सातवे दिन आराम कियो।” अर इण जगा वळै ओ कैवै है, “वे कदैई म्हारै आराम री जगा में परवेस नीं कर पावैला।” तो जद आ बात बाकी है कीं लोग वळै है, जिकौ उण आराम री जगा में परवेस कर पाए, पण जिणौनै उणरौ सुभ संदेस पैला सुणायो गियौ, उणौ आग्या नीं मानणै रै खातर परवेस नीं कर पाया। इण वास्तै परमेसर वळै एक खास दिन तय कियो अर उणरौ नाम दियौ “आज”। कई सालो रै पछै दाऊद रै जरियै परमेसर नै उण दिन रै बारै में सास्तर में बतायौ हो, ज्यौ पैला कयौ, “जे आज थै उणरौ सबद सुणौ, तो अपणै काळजै नै कठोर नीं करौ।” क्यूंकै जे यहोसू उणौनै आराम री जगा में परवेस करा देतो, तो उणरै पछै परमेसर नै दूजै दिन री चरचा करणै री जरुत इज कोनीं होती। अतस जांण लौ की परमेसर रै लोगां रै लियै एक आराम रौ दिन तय है।ज्यौ सातवो दिन परमेसर रै आराम रौ दिन हो। क्यूंकै जिणै उणरै आराम री जगा में परवेस कियो है, उणै भी परमेसर रै ज्यूं आपरै कांमां नै पूरा करनै आराम कियो है। अतस म्हौ उण आराम री जगा में परवेस करणै री कोसीस करौ, ऐड़ौ नीं हो, की कोई जन उणरै ज्यूं आग्या नीं मांन नै लारै रै जावै। क्यूंकै परमेसर रौ वचन जीवतौ, कांम करणैवाळौ, अर हरैक दोधारी तरवार ऊं भी घणौ तीखो है। अर प्रांण अर आतमा नै, अर गांठ गांठ, अर गूदे गूदे नै न्यारा करनै आरपार बिन्धे है अर मन री भावनाओं अर विचारो नै जांचे है। सिस्टी री कोई चीज उण ऊं छिपयोड़ी कोनीं है, बल्कि जिणनै म्हौरौ लेखौ-जोखो दैणौ है, उणरी आंख्यां रै सांमै सगळी चीजों खुली अर परगट है। इण वास्तै परमेसर रौ बेटौ यीसु एक ऐड़ौ मोटो महायाजक है, जिकौ सरग में ऊं होयनै गियौ है, तो म्हौ जिकौ स्वीकार कियो उणनै मजबुती रै साथै थामे रैणौ चाहीजै। क्यूंकै म्हौरौ ऐड़ौ महायाजक कोनीं, जिकौ म्हौरी कमजोरियो में म्हौरै साथै दुखी नीं हो सकै। जद की वो सगळी बातां में म्हौरै ज्यूं जांचयो तो गियौ, तौभी निरदोस निकळयौ। इण वास्तै म्हौ विसवास रै साथै परमेसर रै अनुग्रह रै सिहासण रै खनै जाओ, जिण ऊं म्हौ नै दया मिळैला, अर म्हौ वो अनुग्रह पाओला, जिकौ म्हौरी जरुतो में म्हौरी मदद करैला। क्यूंकै हरैक महायाजक मिनखौ में ऊं ठैरायौ जावै है, अर परमेसर रै बारै में लोगां नै बतानै रै लियै राख्यौ जावै है, ताकी वो पापों रै लियै भेट या बलियो चढ़ाया करै। अर वो नासमझ, अर भूले भटको रै साथै नरमाई ऊं व्यवहार कर सकै है, क्यूंकै वो आप ही कमजोरियो रै बस में है। अर इण वास्तै उणनै चाहीजै, की ज्यौ लोगां रै लियै, व्यौंही खुद रै लियै भी पापबलि चढ़ाया करै। अर ओ आदर रौ पद कोई अपणै आप ऊं कोनीं लईजै, जैड़ी तांई की हारून रै ज्यूं परमेसर री तरफ ऊं ठैराया नीं जावै। व्यौंही मसीह भी महायाजक बणणै री महिमा अपणै आप ऊं कोनीं ली, बल्कि परमेसर उण ऊं कयौ हो, “थूं म्हारौ बेटौ है, आज म्हैं थारौ पिता बण्यौ हूं।” इण तरैह वो दूजी जगा में भी कैवै है, “थूं मलिकिसिदक री रीति माथै हमेसां रै लियै याजक है।” यीसु आपरी देह में रैवणै रै दिनां में जोर जोर ऊं पुकारनै, अर रोवतो होयौ उण ऊं जिकौ उणनै मौत ऊं बचा सकै हो, उण ऊं पराथना अर विनती की, अर भगती रै खातर उणरी सुणी ही। अर परमेसर रौ बेटौ होते हुए भी, उणै दुख उठा उठायनै आग्या मांनणी सीखी। अर सिद्ध बणनै, अपणै सगळी आग्या मांनणैवाळौ रै लियै हमेसां रै लियै उद्धार रौ कारण हो गियौ। अर यीसु नै परमेसर री तरफ ऊं मलिकिसिदक री रीति पे महायाजक रौ पद मिळियौ। इणरै बारै में म्हौरै खनै कैवणै री तो घणी बातां है, पण जिणरौ समझाणौ मुसकिल है। क्यूंकै थै ऊंचौ सुणण लागा हो। वास्तव में इतै वगत तांई तो थांनै गुरु हो जांणौ चाहीजै हो, लेकिन थांनै तो अजी किणी ऐड़ै मिनख री जरुत है जिकौ थांनै परमेसर रै वचनो री सरूआत ऊं सिकसा वळै पाछी सिखावै। अर ऐड़ा हो गिया हो, की थांनै अन्‍न रै बदळै अजी तांई दूध इज चाहीजै। क्यूंकै दूध पीवणवाळै टाबर नै तो धरम रै वचन री पिछांण कोनीं होवै, क्यूंकै वो तो टाबर है। लेकिन अन्‍न तो जवानो रै वास्तै है, जिणौ अपणै अनुभव ऊं भलै-भूंडै में पिछांण करणी सीख ली है। इण वास्तै आओ मसीह री सिकसा री सरूआत री बातां नै छोड़नै, म्हौ सिद्धता में बढ़ौ। अर म्हौ नै उणीज सिकसा में पड़ियौ नीं रैवणौ चाहीजै ज्यौ मौत री और ले जावण वाळा करमो रै लियै पचताप, परमेसर में विसवास, अर बतिस्मे री सिकसा, माथा ऊपर हाथ राखणै, अर मरयोड़ौ रौ जी उठणौ, अर आखरी न्याव री सिकसा। जे परमेसर चावै तो म्हौ ओहीज करौ ला। जिणौ एक बार जोत पाई है, जिकौ सरगिए वरदान रौ स्वाद चाख लियौ है अर पवितर आतमा रा भागी हो गिया है, अर परमेसर रै उतम वचन रौ अर आवणवाळै जुग री सामरथ रौ स्वाद चाख लियौ है, जे ऐ भटक जावै, तो उणौनै मन फिराव रै वास्तै वळै पाछा नवा बणाणा मुसकिल है। क्यूंकै वे परमेसर रै बेटे नै आपरै लियै वळै सूली माथै चढ़ावै है अर परगट में उण माथै कलंक लगावै है। जिकौ धरती आपरै ऊपर बार-बार पड़न वाळै पांणी नै सोख लेवे अर उण लोगां रै लायक फसल उगावै है, जिकौ उण ऊपर खेती करावै है, वो धरती परमेसर रौ आसीस पावै है। बल्कि जे वो धरती कांटा अर ऊंटकटारा उपजावै है, तो वो बेकार है। उण माथै सराप पड़ नै वाळौ है, अर आखरी में उणनै बाळी जावैला। हे प्रिय भाइयो, जे म्हौ इण तरैह ऊं बोल रिया हो, तौभी म्हौ नै पूरौ विसवास है की आप लोगां री दसा इणौ ऊं घणी बड़िया है अर आप मुगति रै मारग माथै चालौ हो। क्यूंकै परमेसर अन्यावी कोनीं, की थौरा कांम, अर उण परैम नै भूल जावै, जिकौ थै उणरै नाम रै लियै इण तरैह ऊं दिखायौ, ज्यौ की परमेसर रै लोगां री सेवा की, अर कर भी रिया हो। म्हौ चावौ हो की थौरे में ऊं हरैक जीवन भर ऐड़ा इज कठिन मेनत करता रै। जे थै ऐड़ौ करौ हो तो थै पको ही उणनै पाओला जिणरी थै आसा करता रिया हो। म्हौ ओ नीं चावौ की थै आळसी हो जाओ। बल्कि थै उणरौ अनुकरण करौ जिकौ विसवास अर धीरज रै साथै उण चीजों नै पा रिया है जिणरौ परमेसर वायदो कियो हो। परमेसर अबराहम ऊं वायदो करते वगत जद सौगन खाणै रै लियै किणी नै आपरै ऊं मोटो नीं देख्यौ, तो आपरी इज सौगन खायनै कयौ, “म्हैं हकीगत थनै घणी आसीस दूंला, अर थारै वंसज नै बढ़ातो रहूंंला।” अर इण रीति ऊं उणै धीरज राखनै वायदो कियोड़ी बातां हासल की। मिनख तो आपरै ऊं कोई मोटे री सौगन खाई करै है, अर उणरै हरैक विवाद रौ फैसलो सौगन ऊं पको होवै है। इण वास्तै जद परमेसर नै वायदो री वारिस माथै और ही खुली रीति ऊं परगट करणौ चाहयौ, की वो अपणै वायदो नै कदैई कोनीं बदळै ला, तो वायदो रै खातर सौगन खाई। तो एठै दो बातां है, उणरौ वायदो अर उणरी सौगन जिकौ कदैई नीं बदळ सकै। अर जिणरै बारै में परमेसर कदैई झूठ नीं कैह सकै। इण वास्तै अपां जिकौ परमेसर रै नजीक चरण लेणे आया हो अर जिकौ आसा उणै म्हौ नै दी है, उणै राखता होया घणा खुस हो। वो आसा म्हौरै प्रांण रै लियै ऐड़ौ लंगर है जिकौ स्थिर अर पको है, अर पड़दे रै भीतर खास पवितर जगा तांई पुगै है। जठै यीसु मलिकिसिदक री रीति माथै हमेसां रै लियै महायाजक बणनै, म्हौरै लियै अगुवा रै रूप मे परेवस करयौ है। मलिकिसिदक सालेम नगर रौ राजा हो, अर महान परमेसर रौ याजक हो। जद अबराहम राजाओ नै हरा नै पाछौ आ रियौ हो, तो वो अबराहम नै मिळनै आयौ अर आसीस दी। इणनै अबराहम युध में हासल की सगळी चीजों रौ दसवो भाग भी दियौ। मलिकिसिदक नाम रौ अरथ है, “धारमिकता रौ राजा,” अर पछै सालेम रौ राजा मतलब “सानति रौ राजा है।” उणरै पिता, अर माता, अर उणरी वंसावली रौ कोई इतिहास कोनीं मिळै है। उणरै जनम अर मौत रौ भी कोई लेख कोनीं है। पण परमेसर रै बेटे रै रूप में ठैहर नै वो हमेसां रै लियै याजक बण्यौ रैवै है। अबै इण माथै विचार करौ की मलिकिसिदक कैड़ौ महान हो। जिणनै कुलपिता अबराहम बड़िया ऊं बड़िया माल जिकौ युध में हासल कियो हो उणरौ दसवो हिस्सो दियौ। लेवी रै वंस में ऊं जिकौ याजक बणै है, उणौनै आग्या मिळी है, की वे सगळै लोगां, मतलब अपणै भाइयो ऊं, चाहे वे अबराहम री देह ऊं क्यूं नीं जनमियौ हो, मूसा री व्यवस्था रै अनुसार दसवो भाग ले। पण मलिकिसिदक लेवी वंस रौ भी नीं हो, तौभी अबराहम ऊं दसवो भाग लियौ, अर उणै अबराहम नै आसीस दी, जिणरै खनै परमेसर रौ वायदो हो। इणमे वेम कोनीं की छोटौ मोटे ऊं आसीस पावै है। अर एठै तो लेवी याजक जिकौ मरणवाळा मिनख है वे दसवो भाग लेवे है। पण उठै मलिकिसिदक लेवे है, जिणरी गवाई दी जावै है की वो जीवतौ है। तो म्हौ ओ भी कैह सकौ हो की लेवी भी, जिकौ दसवो भाग लेवे है, अपणै पूरवज अबराहम रै द्धारा मलिकिसिदक नै दसवो भाग दियौ। क्यूंकै जिण वगत मलिकिसिदक लेवी वंस रै पूरवज अबराहम ऊं भेट की, उण वगत लेवी वंस आपरै पूरवज अबराहम री देह में हो। जे लेवीय परिवार रै याजक पद रै जरियै सिद्धी हासल हो सकै जिणरै सहारे ऊं लोगां नै व्यवस्था मिळी ही, तो पछै कांई जरुत ही, की दूजौ याजक मलिकिसिदक री रीति ऊपर ऊभौ हो, अर हारून परिवार री रीति रौ नीं कहीजै? क्यूंकै जद याजक रौ पद बदळयौ जावै है, तो व्यवस्था रौ भी बदळनौ जरुरी है। क्यूंकै जिणरै बारै में ऐ बातां कही जावै है की वो दूजी गोत्र रौ है, जिणमे ऊं किणी वेदी री सेवा कोनीं की। तो परगट है, की म्हौरौ परभु यीसु यहूदा रै वंस में ऊं है। अर इण वंस रै बारै में मूसा नै याजक पद री कीं भी चरचा कोनीं की। अर जिकौ म्हौ कयौ है, वो और ही सही है की मलिकिसिदक रै जैड़ौ एक वळै याजक परगट हो जावै है, जिकौ सांसारिक आग्या री व्यवस्था रै अनुसार कोनीं, पण अमर जीवन री सामरथ ऊं याजक बण गियौ है। क्यूंकै उणरै बारै में पवितर सास्तर आ गवाई दियोड़ी है, “थूं मलिकिसिदक री रीति ज्यूं अनत काल रौ याजक है।” पुराणी आग्या इण वास्तै ना रै बराबर हो गई क्यूंकै वो कमजोर अर बिना फायदे री ही। इण वास्तै की मूसा री व्यवस्था में किणी बात री सिद्धी कोनीं होई, अर उणरै जगा माथै एक ऐड़ी उतम आसा राखी है जिणरै जरियै म्हौ परमेसर रै नजीक जा सकौ हो। अर इण वास्तै की मसीह री नियुक्ति बिना सौगन कोनीं होई, क्यूंकै दूजा तो बिना सौगन याजक बणाया गिया। पण यीसु सौगन रै साथै परमेसर री तरफ ऊं नियुक्त कियोड़ौ, जिणै उणरै बारै में कयौ, “परभु नै सौगन खाई, अर वो आपरौ मन कदैई नीं बदळैला, ‘थूं अनत काल रौ याजक है।’ ” इण सौगन री वजैऊं यीसु एक उतम वाचा रौ जमानत बण गियौ है। देखौ, ऐड़ा तो घणा ही याजक बणता आया, इण रौ कारण ओ हो, की मौत उणौनै रैवण कोनीं दिया हा। पण यीसु अमर है, इण कारण उणरौ याजक पद अनत काल तांई बण्यौ रैला। इण वास्तै जिकौ उणरै जरियै परमेसर रै खनै आवै है, वो उणरौ पूरौ पूरौ उद्धार कर सकै है, क्यूंकै वो उणौरै लियै विनती करणै हमेसां जीवतौ है। अतस ऐड़ौ ही महायाजक म्हौरै लायक हो, जिकौ पवितर, अर बिना दोस रौ, अर सुद्ध, अर पापियो ऊं अलग, अर सरग ऊं ही ऊंचौ उठायोड़ो हो। उण महायाजको रै ज्यौ उणनै जरुरी कोनीं, की हमेसां पैला आपरै पापों अर पछै लोगां रै पापों रै लियै बलि चढ़ाए। उणै तो हमेसां रै लियै लोगां रै पापों रै लियै खुद अपणै आप नै बलि कर दिया। क्यूंकै व्यवस्था तो कमजोर मिनखौ नै महायाजक नियुक्त करै है। पण उण सौगन री वाचा जिकौ व्यवस्था रै पछै खाई ही, उण बेटे नै नियुक्त करै है जिकौ अनत काल रै लियै सिद्ध कियो गयो है। अबै जिकौ बातां म्हौ कर रिया हो उणमे ऊं सबां ऊं मोटी बात आ है की म्हौरौ ऐड़ौ महायाजक है, जिकौ सरग में उण सर्वसक्तिमान परमेसर रै सिंहासण रै जीमणा पाड़ै विराजमान है। वो पवितर जगा मतलब उण साचै तम्बू रौ सेवक होयौ, जिणनै किणी मिनख नै कोनीं, बल्कि परभु बणायौ है। क्यूंकै हरैक महायाजक भेट अर बलिदान चढ़ानै रै लियै ठैरायौ जातौ हो, इण कारण जरुरी है की इण महायाजक रै खनै भी कीं चढ़ानै रै लियै हो। जे वो धरती माथै होवतो तो कदैई याजक नीं होवतो, इण वास्तै की व्यवस्था रै अनुसार भेट चढ़ानै वाळा याजक तो है। जिकौ सरग में की चीजों रौ प्रतिरूप अर प्रतिबिम्ब री सेवा करै है, ज्यूं जद मूसा तम्बू बणाणै वाळौ हो, तो उणनै आ चेताणी दे दी ही, “देख जिकौ नमूनो थनै भाखर माथै दिखायौ गियौ हो, उणरै अनुसार सगळौ कीं बणाणौ।” पण उण याजकौ ऊं बढ़नै सेवा यीसु नै मिळी क्यूंकै वो जिण वाचा रौ बिचोळियो हो, वो पुराणी वाचा ऊं उतम है अर उतम चीजों रै वायदो माथै आधारित है। क्यूंकै जे पैली वाचा में कोई खोट नीं होवतो, तो दूजी वाचा रै लियै कोई जगा ही कोनीं होती। बल्कि परमेसर नै उण लोगां में खोट देखनै कैवै है, “परभु कैवै है वो दिन आ रिया, जद म्हैं इजरायल रै घराणै ऊं, अर यहूदा रै घराणै ऊं, एक नई वाचा करूंला। आ वाचा वैड़ी नीं होवैला जैड़ी म्हैं उणरै बापदादों रै साथै उण वगत की ही, जद म्हैं उणौरौ हाथ झालनै मिसर देस ऊं निकाळ लायौ। क्यूंकै परभु कैवै है, की वे म्हारी वाचा रा विसवासी नीं रिया, अर म्हैं उणौरी सुधि कोनीं ली। वळै परभु कैवै है, की जिकौ वाचा म्हैं उण दिनां रै पछै इजरायल रै घराणै ऊं करूंला, वो आ है, की म्हैं म्हारी व्यवस्था उणौरै मनो में बसाऊंला, अर उणौरै काळजै माथै म्हैं उणनै लिख दूंला, म्हैं उणौरौ परमेसर होवूंला, अर वे म्हारा लोग होवैला। अर हरैक अपणै देसवाळै नै अर अपणै भाई नै आ सिकसा नीं दैला, की थूं परभु नै जांण, क्यूंकै छोटे ऊं मोटे तांई सगळा म्हनै जांणैला। क्यूंकै म्हैं उणौरा गुनाह माफ करूंला, अर उणौरै पापों नै याद भी नीं राखूंला।” नई वाचा रै आवण ऊं उणै पैली वाचा नै पुराणी ठैरा दी, अर जिकौ चीज पुराणी अर बिना मतलब री हो जावै है, उणरौ मिट जांणौ जरुरी है। उण पैली वाचा में भी उपासना रा नियम हा, अर ऐड़ी आराधना री जगा जिकौ एक मिनख रै हाथो ऊं बण्यौड़ी ही। एक तम्बू बणायौ हो जिणरा दो भाग हा। पैलै भाग में दीवट हा, मेज ही, अर भेट री रोटियां ही। इणनै आराधना री जगा कैवता हा। अर पड़दै रै लारै एक और भाग हो, जिणनै परम पवितर जगा कैवै है। उणमे सोने री धुप वेदी, अर च्यांरूमेर सोने ऊं मढ़योड़ो वाचा रौ संदूक अर इण में मन्‍ना ऊं भरयोड़ौ सोने रौ बरतन अर हारून री लाठी जिण में फूल फळ आ गिया हा अर वाचा री पटियां राख्योड़ी ही। अर संदूक रै ऊपर दोनूं तेजोमय करूब हा, जिकौ प्रायसित रै ढ़कणै माथै छाया कियोड़ी ही। इणौरौ एक एक करनै बखाण करणै रौ वगत कोनीं है। सगळौ इण तरैह ऊं तैयार हो जांणै रै पछै याजक तम्बू रै पैलै भाग में हमेसां परवेस करनै अपणी सेवा रौ कांम करनै लागा। अर तम्बू रै दूजै भाग में कैवल महायाजक साल भर में एक इज बार जातौ, अर लोई लेन जातौ, जिणनै वो आपरै दवारा अर लोगां रै द्धारा अनजाणे में किया पापों रै लिए भेट चढ़ातौ हो। इणरै जरियै पवितर आतमा ओ बतावै है, की जैड़ी तांई तम्बू रौ पैलौ भाग ऊभौ है, उठै तांई परम पवितर जगा रौ मारग परगट कोनीं होयौ। अर ओ तम्बू तो आज रै जुग रै लिए एक दिस्टांत है। जिण में ऐड़ी भेट अर बलिदान चढ़ाया जावै है, जिण ऊं आराधना करणैवाळौ रौ अंतो सिद्ध नीं हो सकै। क्यूंकै वे कैवल खाणै पीणै री चीजों अर अलग अलग स्‍नान विधि रै आधार माथै सारीरिक नियम है, जिकौ परमेसर रै नई व्यवस्था रै वगत तांई रै लियै लागू कियोड़ा है। पण अबै मसीह इण और बड़िया व्यवस्था रौ, जिकौ अबार म्हौरै खनै है, महायाजक बणनै आ गिया है। उणै उण घणै उतम अर सिद्ध तम्बू में ऊं होयनै परवेस कियो जिकौ मिनख रै हाथो रौ बणायोड़ो कोनीं, मतलब जिकौ सांसारिक कोनीं है। बकरों अर बछड़ो रौ लोई लेयनै उणै परवेस कोनीं कियो हो, बल्कि हमेसां रै लिए भेट रूपी खुद रौ लोई लेयनै परम पवितर जगा मे परवेस कियो हो। इण तरैह उणै म्हौरै लिए पापों ऊं अनत छुटकारो पको कियो है। क्यूंकै जद व्यवस्था रै अनुसार बकरों अर बळदों रौ लोई अर कलोर री राख अपवितर लोगां माथै छिड़कनै ऊं सरीर रै भीस्टता ऊं पवितर करै है, तो मसीह रौ लोई जिणनै अपणै आप नै सनातन आतमा रै द्धारा परमेसर रै सांमै निरदोस चढ़ायौ, थौरे अंते नै मरयोड़े कांमां ऊं सुद्ध करैला, ताकी थै जीवते परमेसर री सेवा करौ। अर इण कारण मसीह नई वाचा रौ बिचोळियो है, ताकी उण मौत रै जरियै जिकौ पैली वाचा रै वगत रै अपराधो ऊं छुटकारो पावण रै लियै होई है, बुलायोड़ा लोग वायदे रै अनुसार अनत काल तांई बणयोड़ी रैवण वाळी विरासत हासल करै है। जठै तांई वसीयतनामा रौ सवाल है, तो उणरै लिए जिणनै उणै लिख्यौ है, उणरी मौत रौ परमाणित कियो जावणौ जरुरी है। क्यूंकै कोई वसीयतनामा कैवल जद ही प्रभावी होवै है, जद उणरै लिखणै वाळै री मौत हो जावै है। जैड़ी तांई उणनै लिखणै वाळौ जीवतौ रैवै है, वो कदैई प्रभावी कोनीं होवै। इण वास्तै पैली वाचा ही बिना लोई रै कोनीं बांधी गई। क्यूंकै जद मूसा सगळै लोगां नै व्यवस्था री हरैक आग्या सुणा चुकौ, तो उणै बकरों अर बछड़ो रौ लोई लेयनै, पांणी अर लाल ऊन, अर जूफा री डाळी रै साथै, उण किताब माथै अर सगळै लोगां माथै छांट दियौ। अर मूसा कयौ, “ओ उण वाचा रौ लोई है, जिणरी आग्या परमेसर नै थौरे लियै दी है।” अर इण रीति ऊं उणै तम्बू अर सेवा रै सगळै सामान माथै लोई छांटयो। अर व्यवस्था रै अनुसार सगळी चीजों लोई रै द्धारा सुद्ध की जावै है, अर बिना लोई बहाए समा कोनीं होवै। इण वास्तै जरुरी है, की सरग में की चीजों रै प्रतिरूप है, जिकौ जिनावरां रै बलिदानो रै द्धारा सुद्ध किया जावै, पण सरग में की चीजों खुद इणौ ऊं उतम बलिदानो रै द्धारा सुद्ध की जावै है। क्यूंकै मसीह नै उण हाथ रा बणायोड़ा परम पवितर जगा में जिकौ साचौ परम पवितर जगा रौ नमूनो है, परवेस कोनीं कियो, पर सरग ही में परवेस कियो, ताकी म्हौरै लियै अबै परमेसर रै सांमै दिखाई दे। ओ कोनीं की यीसु अपणै आप नै बार बार चढ़ाए, ज्यौ की महायाजक हरैक बरस बलि रौ लोई लेन परम पवितर जगा में परवेस किया करै है। नीं तो जगत री सरूआत ऊं लेयनै उणनै बार बार दुख उठाणौ पड़तौ, लेकिन अबै जुग रै अनत में वो एक बार परगट होया है, ताकी अपणै ही बलिदान रै द्धारा पाप नै आगौ कर दे। अर ज्यूं मिनखौ रै लियै एक बार मरणौ अर उणरै पछै न्याव रौ होणौ तय है, व्यौंही मसीह भी घणौ रै पापों नै उठा लेणे रै लियै एक बार बलिदान होयौ। अर जिकौ लोग उणरी बाट जोवे है, उणौरै पापों रै लियै कोनीं बल्कि उणौरै उद्धार रै लियै दूजी बार परगट होवैला। व्यवस्था जिण में आवण वाळी बड़िया चीजों रौ छाया रौ रूप है, पर उणरौ असली रूप कोनीं। इण वास्तै उण एक इज परकार रै बलिदानो रै द्धारा, जिकौ हरैक साल अचूक चढ़ाया जावै है, परमेसर रै खनै आवण वाळौ नै कदैई सिद्ध नीं कर सकै। जे ऐड़ौ होवतो तो कांई उणौरौ चढ़ायौ जाणौ बंद नीं हो जातौ? इण वास्तै की जद सेवा करणै वाळा एक ही बार सुद्ध हो जावै, तो पछै उणौरौ अंतो उणौनै पापी नीं ठैरावतो। पण इण बलिदानो द्धारा हरैक साल पापों नै याद किया करै है। क्यूंकै सम्भव कोनीं, की बळदों अर बकरों रौ लोई पापों नै दूर करै। इण कारण यीसु जगत में आवण वगत कयौ है, “बलिदान अर भेट थै नीं चाही, बल्कि म्हारै लियै एक देह तैयार की है। होम-बलियो अर पाप-बलियो ऊं थूं खुस कोनीं होयौ। तद म्हैं कयौ, ‘देख, म्हैं आ गियौ हूं, पवितर सास्तर में म्हारै बारै में लिख्योड़ौ है, ताकी हे परमेसर, थारी इछा पूरी करूं।’ ” ऊपर तो वो कैवै है, “नीं थूं बलिदान अर भेट अर होम-बलियो अर पाप बलियो नै चाही, अर नीं उण ऊं खुस होयौ,” जद की ऐ बलिदान तो मूसा री व्यवस्था रै अनुसार चढ़ाया जावै है। पछै ओ भी कैवै है, “देख, म्हैं आ गियौ हूं, ताकी थारी इछा पूरी करूं,” अतस वो पैलै वाळै बलिदानो नै मिटा दैवै है ताकी मसीह रै बलिदान नै लागू कर सकै। परमेसर री इछा ऊं म्हौ यीसु मसीह री देह रै एक इज बार बलिदान चढ़ाए जाणै रै द्धारा पवितर किया गिया हो। हरैक याजक तो ऊभौ होयनै रोज सेवा करै है, अर एक इज परकार रा बलिदान नै जिकौ पापों नै कदैई आगा नीं कर सकै, बार बार चढ़ावै है। पण मसीह तो पापों रै बदळै एक ही बलिदान हमेसां रै लियै चढ़ायनै परमेसर रै जीमणी तरफ विराजमान हो गिया। अर उणीज वगत ऊं इण बात री बाट जोह रियौ है, की उणरा बैरी उणरै चरणौ री चौकी बणै। क्यूंकै उणै एक इज चढ़ावै रै जरियै उणौनै जिकौ पवितर किया जावै है, हमेसां रै लियै सिद्ध कर दिया है। अर पवितर आतमा भी म्हौ नै आहीज गवाई दैवै है। क्यूंकै परभु पैला कयौ हो, “जिकौ वाचा म्हैं उण दिनां रै पछै उण ऊं बांधूला, वो आ है की म्हैं अपणै नियमो नै उणरै काळजै माथै लिखूंला, अर म्हैं उणरै अंते में बसाऊंला।” पछै वो ओ कैवै है, “म्हैं उणरै पापों नै अर उणरै अधरम रै कांमां नै अबै म्हैं कदैई याद नीं करूंला।” अर पछै जद पाप माफ कर दिया गिया, तो पापों रै लिए किणी बलि री कोई जरुरत कोनीं रही। इण वास्तै हे भाइयो, जद म्हौ नै यीसु रै लोई रै जरियै उण नए अर जीवते मारग ऊं परम पवितर जगा में परवेस करनै रौ पको विसवास हो गियौ है, जिकौ उणनै सरीर रूपी पड़दा मतलब म्हौरै लियै एक नया अर जीवतौ मारग खोल दियौ है। अर इण वास्तै की म्हौरौ ऐड़ौ महान याजक है, जिकौ सरग में परमेसर रै घर रौ अधिकारी है, तो आओ, म्हौ साचै मन, अर पूरै विसवास रै साथै, अर अंते रौ दोस आगौ करनै रै लियै काळजै ऊपर मसीह रै लोई रौ छिड़काव लेयनै, अर सरीर नै सुद्ध पांणी ऊं धोयनै परमेसर रै नजीक जाए। तो आओ जिण आसा नै म्हौ स्वीकार की है, उण माथै पका रौ। क्यूंकै जिणै वायदो कियो है, वो पको है। आओ, म्हौ परैम अर भलै करमो रै लियै एक दूजै नै बढ़ावो दैवै। अर एक दूजै रै साथै भेळा होणौ नीं छोड़ौ, ज्यौ घणौ तो भेळौ होणौ छोड़ दियौ है, पण एक दूजै नै समझाता रौ। अर ज्यौ ज्यौ उण दिन नै नजीक आतो देखौ, त्यौं त्यौं और ही ओ घणौ किया करौ। क्यूंकै सचाई रौ ग्यांन पा लेने रै पछै ही जे म्हौ जाणबूझ नै पाप करता ही रैवौ हो, पछै तो पापों रै लिए कोई बलिदान बाकी ही कोनीं है। हां, डंड री एक भयानक बाट अर अग्‍नि री लाय ही बाकी है जिकौ विरोधियो नै भसम कर दैला। जद व्यवस्था नै नीं मानणै वाळा दो या तीन जणौ री गवाई ऊपर, बिना दया रै मार दिया जाता हा। तो सोच लौ की वो कितै और ही भारी डंड रै लायक ठैरैला, जिणै परमेसर रै बेटे रौ आदर कोनीं कियो, अर वाचा रै लोई नै जिण रै जरियै वो पवितर ठैरायौ गियौ हो, अपवितर जांण्यौ है, अर अनुग्रह री आतमा रौ अपमांन कियो। क्यूंकै म्हौ उणनै जांणौ हो, जिणै कयौ, “बदळौ लेणो म्हारौ कांम है, म्हैं इज बदळा दूंला।” अर वळै ओ, की “परभु आपरै लोगां रौ न्याव करैला।” जीवते परमेसर रै हाथो में पड़णौ एक भयानक बात है। पण उण दिनां नै याद करौ, जिण में थै परमेसर री जोत पायनै दुखौ रौ सामनौ करता होया कलेस में मजबुती रै साथै स्थिर रिया। कदैई तो यों की थै निंदा अर कलेस सहन करता होया तमासा बण्या, अर कदैई यों की थै उणरै साझी होया जिणरी बेजती करता हा। क्यूंकै थै कैदी भाइयो रै दुख में भी दुखी होया, अर थौरी जायदाद भी खुसी ऊं लूटने दी। ओ जांणनै, की थौरे खनै एक और भी उतम अर हमेसां ठैरनैवाळी जायदाद है। इण वास्तै आप लोग हीमत नीं छोड़ौ क्यूंकै उणरौ प्रतिफळ मोटो है। क्यूंकै थांनै धीरज राखणी जरुरी है, ताकी परमेसर री इछा नै पूरी करनै, थै वायदे रौ फळ पाओ। क्यूंकै पवितर सास्तर मे लिख्योड़ौ है, “अबै थोड़ो वगत रियौ है, जद की आवण वाळौ आवैला, और देर नीं करैला। अर म्हारौ धरमी जन विसवास ऊं जीवित रैवैला, अर जे वो लारै हट जावै, तो म्हारौ मन उण ऊं राजी नीं होवैला।” बल्कि म्हौ लारै हटने वाळा कोनीं, की नास हो जाओ, बल्कि विसवास करनैवाळा हो, की प्रांणौ नै बचाओ। अबै विसवास, आसा कियोड़ी चीजों रौ पको, अर अणदेखी चीजों रौ परमाण है। क्यूंकै इणरै बारै में बुढ़ियों री बड़िया गवाई दियोड़ी है। विसवास ऊं म्हौ जांणौ हो, की सगळी सिस्टी री रचना परमेसर रै वचन ऊं होई है। ओ कोनीं, की जिकौ देखणै में आवै है, वो देख्योड़ी चीजों ऊं बण्यौ है। विसवास ऊं हाबिल नै कैन ऊं उतम बलिदान परमेसर रै लियै चढ़ाई ही, अर विसवास रै जरियै हाबिल धरमी होवण री गवाई भी दी ही। परमेसर उणरी भेटो रै बारै में गवाई दी। अर उणरै विसवास रै खातर उणरै मरण रै पछै अजी तांई वो म्हौरै ऊं बातां करै है। विसवास ऊं हनोक उठा लियौ गियौ, की मौत नै नीं देखे, अर उणरौ पतौ कोनीं मिळियौ। क्यूंकै परमेसर उणनै उठा लियौ हो, अर उणरै उठाए जावण ऊं पैला उणरी गवाई दी गई ही, की उणै परमेसर नै खुस किया हा। अर विसवास बिना परमेसर नै खुस करणौ नामुमकिन है, क्यूंकै परमेसर रै नजीक आवण वाळै नै विसवास करणौ चाहीजै, की परमेसर है, अर अपणै खोजने वाळै नै प्रतिफळ दैवै है। विसवास ऊं नूह नै उण बातां रै बारै में जिकौ उण वगत दिखाई कोनीं देती ही, चेताणी पायनै भगती रै साथै अपणै घराणै रै बचाव रै लियै जहाज बणायौ। इणरौ परिणाम ओ होयौ की संसार दोसी ठैरायौ गियौ अर नूह धारमिकता रौ वारिस होयौ, जिकौ विसवास ऊं होवै है। विसवास रै खातर ही जद अबराहम नै ऐड़ी जगा माथै जावण रै लियै बुलायौ गियौ हो, जिणनै पछै वारिस रै रूप में उणनै मिलनौ हो, लेकिन वो ओ कोनीं जांणतौ हो की वो कठै जा रियौ है, तौभी उणै आग्या मांनी अर वो चाल दियौ। विसवास ऊं उणै वायदो कियोड़े देस में, परदेसी रै ज्यौ, तम्बूओ में वास कियो। व्यौंही इसहाक अर याकूब भी रिया, जिकौ उणरै साथै उणीज वायदे रा वारिस हा। क्यूंकै वो उण पकी नींव वाळी नगरी री बाट जोह रियौ हो, जिणनै रचने वाळौ अर बणाणै वाळौ परमेसर है। विसवास ऊं सारा खुद बूढ़ी होवण पर भी जापायती होवण री सामरथ पाई। क्यूंकै उणै वायदो करनै वाळै परमेसर नै विसवास लायक जांण्यौ। अर इण तरैह अबराहम ऊं जिकौ मरयोड़े जैड़ौ हो, आभै रै तारो अर समंदर तट रै धूड़ रै कणों रै ज्यूं, अणगिणत टाबर होया। विसवास नै अपणै मन में लिए ऐ लोग मर गिया। जिण चीजों रौ वायदो दियोड़ो हो, उणौ नै वो चीजों कोनीं पाई। पर कैवल उणौ नै आगौ ऊं देख्यां अर उणौ रौ आदर भाव कियो और उणौनै ओ मांन लियौ की वे इण धरती माथै परदेसी अर बाहरी है। वे लोग जिकौ ऐड़ी बातां कैवै है, वे ओ दिखावै है की वे एक ऐड़ै देस री खोज में है जिकौ उणौरौ आपरौ है। अर जिण देस ऊं वे निकळ आया हा, जे उणरी सुधि करता तो उणौनै पाछौ जावण रौ मौकौ हो। पण वे एक उतम मतलब सरगिए देस रा अभिलासी है, इण वास्तै परमेसर उणौरौ परमेसर कैवण में उणौ ऊं कोनीं लजावै, क्यूंकै उणै तो उणौरै लिए एक नगर तैयार करनै राख्यौ है। विसवास रै खातर ही अबराहम नै, जद परमेसर उणरी परीकसा ले रियौ हो, इसहाक री बलि चढ़ाणै तैयार होयौ। वोहीज जिणनै वायदे नै साचौ मान्यौ, तो परमेसर उण ऊं कयौ हो, “इसहाक रै जरियै ही थारौ वंस बढ़ैला।” तौभी वो अपणै एकाएक बेटे री बलि देवण वाळौ हो। क्यूंकै उणै विचार कियो, की परमेसर सामरथी है, वो मरयोड़ौ में ऊं जिलाय सकै है। यूं भी कैह सकौ की इसहाक नै मरण में ऊं पाछौ पायो। विसवास रै खातर ही इसहाक नै याकूब अर एसाव नै आवण वाळी बातां रै बारै में आसीस दी। विसवास रै खातर याकूब नै मरते वगत यूसुफ रै दोनूं बेटौ नै आसीस दी। अर उणौ आपरी छड़ी री मूठ रै सहारे झुकनै परमेसर री आराधना की। विसवास ऊं यूसुफ नै, जद वो मरणवाळौ हो, तो इजरायली लोगां रै बारै में मिसर ऊं निकळ जाणै री चरचा की, अर आपरी हडियों रै बारै में आग्या दी। विसवास ऊं मूसा रै माता पिता उणनै, जनमिया रै पछै तीन महीना तांई लूकाय राख्यौ, क्यूंकै उणौ देख्यौ की टाबर घणौ फूटरौ है, अर वे राजा री आग्या ऊं नीं डरया। विसवास ऊं मूसा जद मोटो होयौ तो खुद फिरौन री बेटी रौ बेटौ होणै रौ मना कर दियौ। इण वास्तै की उणनै पाप में थोड़े दिन रौ सुख भोग नै ऊं परमेसर रै लोगां रै साथै दुख भोगणो घणौ उतम लागौ। उणै मसीह रै लिए बेजती झेलनी मिसर रै धन भंडारो ऊं घणौ उचित समझयो, क्यूंकै वो आपरौ प्रतिफळ पावण री बाट जोह रियौ है। विसवास रै खातर ही, राजा रै रीस ऊं नीं डरता होया उणै मिसर छोड़ दियौ, वो पको रियौ, मांनौ उणनै नीं दिखण वाळौ परमेसर दिख रियौ हो। विसवास ऊं ही उणै फसह अर लोई छांटनै री विधि मांनी, की नास करणैवाळौ दूत, इजरायल रै पैलै बेटे नै नास नीं करै। विसवास रै खातर ही, वे लोग लाल समंदर ऊं यूं पार हो गिया, ज्यूं कोई सूखयोड़ी धरती ऊं, लेकिन जद मिसर रै लोगां ऐड़ौ करणौ चाहयौ तो वे सगळा डूब गिया। विसवास रै खातर ही, यरीहो री च्यांरूमेर दीवार, जद लोगां सात दिन तांई उणरौ चक्‍कर लगा चुकया तो वो नीचे पड़ गी। विसवास रै खातर ही, राहाब नाम री वेसया आग्या नीं मांनणैवाळौ रै साथै नास नीं होई, क्यूंकै उणै भेदियो नै सही सलामत राख्या हा। अबै और कांई कहूं? क्यूंकै फुरसत कोनीं है, की गिदोन रौ, अर बाराक अर सिमसोन रौ, अर यिफतह रौ, अर दाऊद अर समूएल रौ, अर भविसयदाताओ रौ वरणन करूं। उणौ विसवास रै द्धारा राज्य जीता, धरम रा कांम करया, वायदो कियोड़ौ चीजों हासल की, सिंघो रौ मूंडौ बंद करयौ, अग्‍नि री लाय नै ठंडी की, तरवार री धार ऊं बच निकळिया, जिणरी कमजोरी ही ताकत में बदळ गी, अर लड़ाई में ताकतवर रया, अर विदेसी फोजों नै मार भगाया। लुगाईयां आपरै मरयोड़ौ नै पाछा जीवता पाया। किता तो मार खाते खाते मर गिया, लेकिन उणौ छुटकारो पावण री मना कर दी ताकी उणौनै एक बड़िया जीवन में पाछौ जीवन मिळ सकै। कईको री बेजती की, अर कोड़ा रौ सामनौ करणौ पड़ियौ, जद की कईको नै साकळौ ऊं बांध नै जेळ में घाल दिया। कईको नै भाठौ ऊं मारया, अर कईको नै आरे ऊं चीरया, अर तरवारो ऊं मारया गिया। वे गरीबी में, अर कलेसों में अर भूंडै व्यवहारों नै सहन करता होया वे लरड़ियां अर बकरियां री खालो ओढ़योड़ा एठीनै उठीनै भटकता रिया। अर रिंदरोही, अर भाखरो, अर गुफाओं में, अर धरती में बण्यौड़े खाडो में लुकता फिरया। क्यूंकै संसार विसवास करणैवाळै इण लोगां नै स्वीकार कोनीं करिया। विसवास रै जरियै इण सगळौ रै बारै में बड़िया गवाई दी है, तौभी उणौनै वायदो कियोड़ी चीजों कोनीं मिळी। क्यूंकै परमेसर म्हौरै लियै पैला ऊं एक उतम बात ठैराई, की वे म्हौरै बिना सिद्धता में नीं पुगै। जद गवाई देवण वाळा इता घणाहारा म्हौरै च्यांरूमेर है, तो म्हौ हरैक तरैह री रूकावट आगी करौ, अपांनै उलझान वाळा पापों नै छोड़ नै, धीरज रै साथै उण दौड़ में आगै बढ़ता जाओ। म्हौरै विसवास रौ अगुवा अर सिद्ध करनै वाळा यीसु री तरफ दिस्टी लगाओ। लाज री कोई चिंता कोनीं की, जिणै आपरै सांमै हाजिर आंणंद रै लिए सूली रौ दुख सहन कियो, अर परमेसर रै सिंहासण रै जीमणा पाड़ै विराजमान हो गिया। इण वास्तै उण माथै ध्यांन करौ, जिणै आपरै विरोध में पापियो रौ इतरौ विवाद सहन कियो की थै निरास होयनै हीमत नीं छोड़ दो। पाप रै विरोध अपणै संघरस में थांनै इतरौ कोनीं अड़नो पड़ियौ, की थौरो लोई बहायौ हो। अर थै उण उपदेस नै भूल गिया हो, जिकौ थांनै बेटौ रै ज्यूं दियौ जावै है, “हे म्हारा बेटा, परभु री ताड़ना नै हळकी बात नीं जांण, उणरी फटकार ऊं कदैई निरास नीं होणौ। क्यूंकै परभु, जिण ऊं परैम करै है, उणनै डांटे भी है, व्यौंही ज्यौ पिता आपरै बेटे नै डंड दैवै, जिण ऊं ओ घणौ परैम करै है।” थै दुख नै डांट समझनै सहन करौ। परमेसर थांनै बेटौ जांणनै थांरै साथै व्यवहार करै है। वो कयौ बेटौ है, जिणनै पिता डांटे कोनीं? जे थांनै वैड़ी इज डांट नीं दी है, जैड़ी सगळौ नै डांट दी जावै है, तो थै अपणै पिता ऊं जनमियोड़ा बेटा कोनीं हो अर साची औळाद कोनीं हो। जद की म्हौरै सारीरिक पिता भी म्हौ नै डांटे है, अर म्हौ उणौनै आदर देवो हो तो कांई आतमाओ रै पिता रै और भी अधीन नीं रैवौ, जिण ऊं म्हौ जीवता रैवौ? वे तो अपणी अपणी समझ रै अनुसार थोड़े दिनां रै लियै डांटता हा, बल्कि परमेसर तो म्हौरी भलाई रै लियै करै है, की म्हौ भी उणरी पवितरता रा भागी हो जाओ। जिण वगत डांट दी जावै है, उण वगत डांट बड़िया कोनीं लागै, बल्कि वो दुखद लागै है। लेकिन कीं भी हो, वे जिकौ डांट नै सहन कर नै पका हो गिया है, उणरै लियै आगै वगत में नेकी अर सानति रौ प्रतिफळ मिळै है। इण वास्तै अपणै ढ़ीले हाथो अर कमजोर घुटनो नै मजबुत करौ। अर अपणै पगां रै लियै सीधा मारग बणाओ, ताकी जिकौ लंगड़ा है, वो अपंग नीं हो, बल्कि चंगा हो जावै। सगळौ ऊं मेल जोल राखौ, अर उण पवितरता रा खोजी हो, जिणरै बिना कोई परभु नै कदैई नीं देखेला। अर ध्यांन ऊं देखता रैवौ, ऐड़ौ नीं हो, की कोई परमेसर रै अनुग्रह ऊं लारै रै जावै, या कोई ऐ़ड़ी फूट नीं पड़ जाये जिकौ दुख दे अर जिण ऊं घणा लोग असुद्ध हो जाये। आप लोगां में नीं तो कोई व्यभिचारी हो, अर नीं एसाव रै ज्यूं अधरमी, जिणै एक ही खाणै रै लियै आपरौ पहिलौठे रौ पद बेच दियौ। थै जांणौ तो हो, की पछै जद उणै आसीस पावण चाही, तो लायक कोनीं ठैरायौ हो, अर रो-रोयनै ढ़ूंढ़नै रै उपरात भी मन फिराव रौ मौकौ उणनै नीं मिळियौ। थै उण भाखर रै खनै नीं पूगा ज्यूं इजरायल लोग सीनै भाखर रै खनै पूगा हा। वो जगा लाय ऊं जळती ही, अर काळी घटा, अर घोर अंधारौ, अर आंधी, अर तुरही री आवाज, अर परमेसर रै बोलनै री ऐड़ी आवाज ही, जिणरै सुणणवाळौ विनती की, की अबै म्हौरै ऊं वळै बातां कोनीं करीजै। क्यूंकै वे उण आग्या नै सह नीं सकै। क्यूंकै उणौनै कयौ हो, “जे कोई पसु ही भाखर नै छुए तो उण माथै पथराव कियो जावै।” अर वो दरसण ऐड़ौ डरावणौ हो, की मूसा कयौ, “म्हैं घणौ डरयो अर कांप रियौ हूं।” बल्कि थै तो सिय्योन रै भाखर रै खनै, अर जीवते परमेसर री नगरी सरगिए यरुसलेम रै खनै आ पूगा हो। थै तो हजारो-हजारो सरगदूतो री आंणंद री सभा, अर उण पहिलौठो री कलीसिया, जिणरा नाम सरग में लिख्योड़ा है, अर सगळौ रौ न्यावी परमेसर रै खनै, अर सिद्ध कियोड़े धरमियो री आतमाओ, अर नई वाचा रौ बिचोळियो यीसु, अर छिड़काव रै उण लोई रै खनै आया हो, जिकौ हाबिल रै लोई ऊं उतम बातां कैवै है। सावचेत रैवौ, अर उण कैवणवाळै ऊं मूंडौ नीं फेरो, क्यूंकै वे लोग जद धरती माथै रा चेताणी देवणवाळै ऊं मूंडौ मोड़नै नीं बच सकया, तो म्हौ सरग माथै ऊं चेताणी करणैवाळै ऊं मूंडौ मोड़नै कीकर बच सकौ ला? उण वगत तो उणरा सबद धरती नै हिला दी, पण अबै उणै ओ वायदो कियो है, “एक बार वळै म्हैं नीं कैवल धरती नै बल्कि आभै नै भी हिला दूंला।” अर ओ सबद “एक बार वळै” इण बात नै परगट करै है, की जिकौ चीजों हिलाई जावै है, वे सरजीयोड़ी चीजों होणै रै खातर टळ जावैला, ताकी जिकौ चीजों हिलाई कोनीं जावै, वे हमेसां बणी रैवै। इण कारण म्हौ इण राज्य नै पायनै जिकौ हिलनै रौ कोनीं, उण अनुग्रह नै हाथ ऊं नीं जावण दो, जिणरै जरियै म्हौ भगती, अर भय सहित, परमेसर री ऐड़ी आराधना करौ जिण ऊं वो खुस होवै है। क्यूंकै म्हौरौ परमेसर भसम करणैवाळी एक अग्‍नि है। विसवासी भाइयो रै ज्यूं एक दूजै ऊं परैम करता रैवौ। मेमाणो री सेवा करणी मत भूलो, क्यूंकै ऐड़ौ करतौ होया कीं लोग अनजाणे में ही सरगदूतो री सेवा की है। कैदी भाइयो री ऐड़ी सुधि लौ, की मांनौ उणरै साथै थै भी जेळ में हो, अर जिणरै साथै भूंडौ व्यवहार होयौ है, उणौरी इण तरैह सुधि लो, ज्यूं मांनौ थै खुद पीड़ित हो। ब्याव सबां में आदर री बात समझी जाए, अर ब्याव रौ बिछौणौ निरदोस रैवै, क्यूंकै परमेसर व्यभिचारियो, अर पराई लुगाई रै साथै संबंध राखण वाळौ नै डंड दैला। अपणै जीवन नै धन रै लालच ऊं आगौ राखौ, अर जिकौ थौरे खनै है, उणीज ऊं संतोस रैवौ, क्यूंकै परमेसर कयौ है, “म्हैं थांनै कदैई नीं छोड़ूला, अर नीं कदैई थांनै त्यागूंला।” इण वास्तै म्हौ बेधड़क होयनै कैवौ हो, “परभु म्हारौ मददगार है, म्हैं नीं डरूं ला। मिनख म्हारौ कांई कर सकै है?” अपणै अगुवो नै याद राखौ जिणौ थांनै परमेसर रौ वचन सुणायो है। उणौरै जीवन रै परिणाम रौ विचार करौ अर उणौरै जैड़ौ ही विसवास करौ। यीसु मसीह काल अर आज अर जुग-जुग तांई एक जैड़ा है। हरैक तरैह री अजांण सिकसाओ ऊं नीं भरमाओ। थौरे मन रै लिए ओ बड़िया है की वे अनुग्रह ऊं मजबुत बणै, न की खाणै पीणै सम्बन्धी नियमो नै मांनणै ऊं, जिण ऊं उणौरौ कदैई कोई भलौ कोनीं होयौ, जिणौ उणनै मान्यौ। मसीह मे म्हौरी एक ऐड़ी वेदी है, जिण माथै ऊं खावण रौ हक उण याजकौ नै कोनीं, जिकौ तम्बू में सेवा करै है। महायाजक परम पवितर जगा माथै पापबलि रै लियै पसुओ रौ लोई तो ले जावै है, बल्कि पसुओ रौ सरीर छावनी रै बारै बाल दियौ जावै है। इण वास्तै, यीसु भी लोगां नै अपणै ही लोई रै जरियै पवितर करनै रै लियै फाटक रै बारै दुख उठायौ। इण वास्तै आओ, उण री निंदा अपणै ऊपर लियोड़ा छावनी रै बारै उणरै खनै चालौ। क्यूंकै एठै म्हौरौ कोई पको रैवणवाळौ नगर कोनीं, बल्कि म्हौ तो बाट जोह रिया हो जिकौ आवण वाळौ है। इण वास्तै आओ म्हौ यीसु रै जरियै परमेसर नै स्तुति रूपी बलिदान, मतलब उणरै नाम री महिमा करनैवाळै होठो री स्तुति हमेसां चढ़ाया करौ। अर भलाई करणी, अर अपणी चीजों औरो रै साथै बांटनी नीं भूलो। क्यूंकै परमेसर ऐड़ै इज बलिदानो ऊं राजी होवै है। अपणै अगुवो री मांनौ, अर उणरै अधीन रैवौ, क्यूंकै वे थौरे प्रांणौ रै लियै जागता रैवै है जिणनै थौरो लेखो जोखो दैणौ पड़ै है। वे ओ कांम आंणंद ऊं करै। जे चिंता रै साथै करै, तो थांनै कीं फायदो कोनीं। म्हौरै लियै पराथना करता रैवौ, क्यूंकै म्हौ नै भरोसौ है, की म्हौरौ अंतो सुद्ध है, अर म्हौ सगळी बातां में बड़िया चाल चलनी चावौ हो। म्हैं खास करनै कैवूं हूं की थै पराथना किया करौ ताकी वेगौ ही म्हैं थौरे खनै आ सकूं। अबै सानतिदाता परमेसर, जिकौ म्हौरै परभु यीसु नै जिकौ लरड़ियां रौ महान रूखाळौ है सनातन वाचा रै लोई रै गुण ऊं मरयोड़ौ में ऊं जिलाय नै ले आया, थांनै हरैक भली बात में सिद्ध करै, जिण ऊं थै उणरी इछा पूरी करौ। अर जिकौ कीं उणनै भावै है, उणनै यीसु मसीह रै जरियै म्हौरै में पैदा करै, जिणरी महिमा जुग जुग होती रैवै। आमीन। हे विसवासी भाइयो, म्हैं थौरे ऊं विनती करूं हूं, की आप म्हारै इण हीमत बढ़ानै वाळै वचनो नै मांन लौ। म्हैं थोड़े सबदो में आपनै आ चिठ्ठी लिखी है। म्हैं चावूं हूं की थांनै ध्यांन हो की म्हौरौ भाई तीमुथियुस जेळ ऊं छूट गियौ है। जे वो वेगौ आ गियौ तो म्हैं उणरै साथै थौरे ऊं मिलनै आऊंला। थांरै सगळै अगुवो अर सगळै परमेसर रा पवितर लोगां नै म्हारौ नमस्कार कैहणौ। इटली ऊं आया लोग थांनै नमस्कार भेजे है। परमेसर रौ अनुग्रह थां सगळौ रै साथै रैवै। आ चिठ्ठी परमेसर अर परभु यीसु मसीह रै सेवक याकूब री तरफ ऊं है। संसार भर मांय बिखरयोड़ी परमेसर री बारैह गोत्रों नै नमस्कार। हे म्हारै भाइयो, जद थै कई तरैह री तकलीफो में पड़ो, तो इणनै पूरै आंणंद री बात समझौ, आप जांणौ हो की आपरै विसवास रै परख नै ऊं धीरज पैदा होवै है। पण धीरज नै आपरौ पूरौ कांम करणै दो, की थै पूरा सिद्ध व्‍है जाओ अर आप में किणी बात री कमी नीं रैवै। पण जे थौरे मांय ऊं किणी नै बुद्धि री कमी होवै, तो परमेसर ऊं मांगे, जिकौ बिना ताड़ना ऊं सगळौ नै खुसी ऊं दैवै है, अर उणनै भी दी जावैला। पण विसवास ऊं मांग, अर कीं वेम मत कर। क्यूंकै वेम करणैवाळौ समंदर री लेहरौ रै ज्यूं है जिकौ हवा ऊं चालै अर उछळै है। ऐड़ौ मिनख ओ नीं समझै की, “म्हनै परभु ऊं कीं मिळैला।” क्यूंकै उणरौ मन काबू कोनीं अर उणरौ सगळौ आचरण डावाडोल है। गरीब भाई आपरै ऊंचै पद ऊपर घंमड करै। अर धनवान भाई आपरी नीच दसा ऊपर घंमड करै। क्यूंकै वो घास रै फूल री ज्यूं जातौ रैला। क्यूंकै सूरज उगतै ही तेज गरमी पड़ै है अर घास नै सुखा दैवै है, अर उणरा फूल झड़ जावै है, अर उणरी सौभा जाती रैवै है। उण तरैह अमीर भी अपणै मारग ऊपर चालतो चालतो धूड़ मांय मिळ जावैला। धन्य है वो मिनख, जिकौ परख मे मजबुत बण्यौ रैवै। क्यूंकै वो खरो निकळनै जीवन रौ मुगट पावैला, जिणरी वायदो परभु नै अपणै परैम करणैवाळौ ऊं किनी है। जद किणी री परीकसा हो, तो वो ओ नीं की, की, “म्हारी परीकसा परमेसर री तरफ ऊं होवै है।” क्यूंकै नीं तो भूंडी बातां ऊं परमेसर री परीकसा व्‍है सकै, अर नीं वो किणी री परीकसा खुद करै। पण हरैक मिनख आपरी इज लालच मांय पड़नै, अर फसने परीकसा मांय पड़ै है। पछै लालच बढ़नै पाप नै जनम दैवै है अर पाप बढ़ जावै है तो मौत नै पैदा करै है। हे म्हारै प्यारौ भाइयो, धोखो मती खाओ। क्यूंकै हरैक चौखौ वरदान अर हरैक उतम दांन ऊपर इज ऊं है, अर उजाळौ परमेसर री तरफ ऊं मिळै है, जिणमे नीं तो कोई फेर बदळ हो सकै है, अर नीं फेर बदळ रै वास्तै उण माथै छाया पड़ै है। उणै आपरी इज इछा ऊं अपांनै सत्य रै वचन ऊं पैदा करया, ताकी अपां उणरै पैदा कियोड़ी चीजों मे ऊं एक तरैह ऊं पैलौ फळ बणौ। हे म्हारै प्यारौ भाइयो, आ बात थै जांणौ हो। इण वास्तै हरैक मिनख सुणणै रै खातर तैयार अर बोलनै मांय धीरै अर रीस मांय धीमां हो, क्यूंकै मिनख री रीस परमेसर रै धरम मांय मददगार नीं व्‍है सकै, जिणनै परमेसर चावै है। इण वास्तै आप लोग हरैक तरैह री मलिनता अर बुराई नै आगी करनै, उण वचन नै नरमाई ऊं ग्रहण कर लौ, जिकौ काळजै मांय बोयो ग्यौ अर जिकौ थौरे प्रांणौ रौ उद्धार कर सकै है। पण वचन माथै चालनवाळा बणौ, अर कैवल सुणणै वाळा इज नीं जिकौ अपणै आप नै धोखो दैवै है। क्यूंकै जे कोई वचन नै सुणणै वाळा हो, अर उण माथै चालनै वाळा नीं हो, तो वो उण मिनख रै जैड़ौ है जिकौ आपरौ मूंडौ कांच मांय देखे है। इण खातर की वो अपणै आप नै देखनै जातौ रै, अर तुरत भूल जावै की, “म्हैं कैड़ौ हो?” पण जे मिनख आजादी रै सिद्ध कायदे माथै ध्यांन करतौ रैवै है, वो अपणै कांम मांय इण वास्तै आसीस पावैला की सुणनै भूले कोनीं, पण वैड़ौ इज कांम करै है। जे कोई अपणै आप नै भगत समझै, अर अपणी जीभ ऊपर लगाम नीं दे, पण आपरै काळजै नै धोखो दे, तो उणरी भगती निकमी है। अपांरै परमेसर अर पिता रै नजीक सुद्ध अर निरमल भगती आ है, की नमाईता अर विधवाओं रै कलेस मे उणरी सुधि ले, अर अपणै आप नै संसार ऊं निरदोस राखै। हे म्हारै भाइयो, थै महिमा पुरण परभु यीसु मसीह रौ विसवास करणवाळा हो। इण वास्तै थौरे में पकसपात नीं होणौ चाहीजै। क्यूंकै जे एक मिनख सोने रा छल्ला अर बड़िया गाभा पैरयोड़ो थौरी सभा में आवै अर एक गरीब ही मैला कुचला गाभा पैरयोड़ो आवै। अर थै उण बड़िया गाभा वाळै रौ मूंडौ देखनै कैवौ, “थूं उठै बड़िया जगा बैठ,” अर उण गरीब नै कैवौ, “थूं एठै ऊभौ रै,” या “म्हारै पगां खनै बैठ।” तो कांई थै आपस मांय भेद भाव कोनीं करयौ अर खराब विचार ऊं न्याव करण वाळा नीं ठैरया? हे म्हारै प्यारौ भाइयो, सुणौ। कांई परमेसर नै इण जगत रै गरीबो नै कोनीं चुणया की विसवास मांय धनवान, अर उण राज रा अधिकारी होवै, जिणनै वायदो उणनै उण ऊं की है जिकौ उण ऊं परैम राखै है? पण थै उण गरीब री बेजती किनी। कांई अमीर लोग थौरे ऊपर अत्याचार कोनीं करै अर कांई वे ही थांनै कचेड़ीयां में घसीट घसीट नै कोनीं ले जावै? कांई वे उण उतम नाम यीसु मसीह री निंदा कोनीं करै जिणरा थै कहीजौ हो? तौभी जे थै पवितर सास्तर रै इण वचन रै अनुसार की “थूं अपणै पड़ोसी ऊं अपणै समान परैम राख,” साचांणी उण राज कायदे नै पूरौ करौ हो, तो बड़िया करौ हो। पण जे थै पकसपात करौ हो, तो पाप करौ हो। अर मूसा रा कायदो थांनै गुनेगार ठैरावै है। क्यूंकै जे कोई मूसा रै सगळै कायदे रौ पालण करै है पण एक इज बात मांय चूक जावै तो वो सगळी बातां मांय दोसी ठैरयो। इण वास्तै की जिणै ओ कयौ, “थूं व्यभिचार नीं करणौ,” उणै ओ भी कयौ, “थूं हत्या नीं करणी।” इण खातर जे थै व्यभिचार तो नीं कियो पण हत्या करी तौभी थूं मूसा रै कायदे नै तोड़नै वाळौ ठैरयो। थै उण लोगां रै ज्यूं वचन बोलो, अर कांम भी करौ, जिणरौ परमेसर रै कायदे रै अनुसार न्याव होणै वाळौ है जिण ऊं आजादी मिळै है। क्यूंकै जिणै दया नीं करी, उणरौ न्याव बिना दया रै होवैला। बल्कि दया अपांनै पाप रै डंड ऊं बचावैला। हे म्हारै भाइयो, जे कोई कैवै की म्हनै विसवास है पण वो विसवास जैड़ौ करम नीं करतौ होवै, तो उण ऊं कांई फायदो? कांई ऐड़ौ विसवास कदैई उणरौ उद्धार कर सकै है? जे कोई भाई या बेन उघाड़ा हो, अर उणौनै हमेसां रोटी री कमी हो, अर थौरे में ऊं कोई उणौ ऊं कैवै, “खुसी ऊं जाओ, थै गरम रैवौ अर भर पेट खाईजौ,” पण जिकौ चीजों सरीर रै खातर जरुरी है वो उणौनै नीं दे, तो कांई फायदो? व्यौंही विसवास ही, जे करम साथै नीं होवै तो आपरै स्वभाव मे मरयोड़ौ है। बल्कि कोई कैह सकै की, “थनै विसवास है अर म्हैं करम करूं हूं।” थूं थारौ विसवास म्हनै करम बिना तो दिखा, अर म्हैं म्हारौ विसवास अपणै करमो रै अनुसार थनै दिखाऊंला। थनै विसवास है की एक इज परमेसर है। थूं बड़िया करै है। पण दुस्ट आतमा भी विसवास राखै, अर थरथरावै है। पण हे निकमे मिनख, कांई थूं ओ भी नीं जांणै की करम बिना विसवास फालतू है? जद अपांरै पिता अबराहम नै आपरै बेटे इसहाक नै वेदी माथै चढ़ायौ, तो कांई वो करमो ऊं धारमिक नीं ठैरयो हो? सो थै देख लिया की विसवास नै उणरै करमो रै साथै मिलनै कांम करयौ है अर करमो ऊं विसवास सिद्ध होयौ। अर पवितर सास्तर रौ ओ वचन पूरौ होयौ, “अबराहम नै परमेसर माथै विसवास करयौ, अर ओ उणरै खातर धरमी मान्यौ,” अर वो परमेसर रौ बेली कैलायौ। इण परकार थै देख लियौ की मिनख कैवल विसवास ऊं ही कोनीं, बल्कि करमो ऊं भी धरमी ठैरै है। व्यौंही राहाब वेसया भी जद उणै दूतो नै आपरै घर में उतारया, अर दूजै मारग ऊं रवाना करया, तो कांई करमो ऊं धारमिक नीं ठैरी? अतस ज्यूं सरीर आतमा बिना मरयोड़ी है व्यौंही विसवास भी करम बिना मरयोड़ौ है। हे म्हारै भाइयो, थौरे मे ऊं घणा उपदेसक नीं बणै, क्यूंकै जांणौ हो, की अपां उपदेसक रौ न्याव और भी कठोरता ऊं कियो जावैला। इण वास्तै की अपां सगळा घणी बार चूक जाओ हो। जिकौ कोई बोलनै मे नीं चुके, वोहीज तो सिद्ध मिनख है। अर वोहीज सगळै सरीर माथै भी लगाम लगा सकै है। जद अपां अपणै वस मे करणै रै खातर घोड़ौ रै मूंडै मे लगाम लगावो हो, तो अपां उणरै सगळै सरीर नै भी फेर सकौ हो। समंदर में चालण वाळै जहाज नै देखौ, बल्कि ऐड़ा मोटा होवै है, अर तेज हवा ऊं चलाया जावै है, तौभी एक छोटी सी पतवार रै दवारा मांझी री इछा रै मुजब घुमाई जावै है। व्यौंही जीभ ही एक छोटौ सो अंग है अर मोटी मोटी बातां करै है। सुणौ, थोड़ी सी लाय ऊं कितै मोटे वनवास मांय लाय लाग जावै है। जीभ ही एक लाय है। जिकौ अपांरै अंगो मे अधरम री एक दुनिया है अर सगळै सरीर माथै कलंक लगावै है, अर सगळै जीवन मे लाय लगा दैवै है अर जीभ भी आखरी में नरक री कुंड में जळा दी जावैला। क्यूंकै हरैक तरैह रा वन-पसु, पंखेरू, अर रेंगनेवाळा जीव अर पांणी रा जीव तो मांनखै जाति रै वस मे हो सकै है अर होय भी ग्या है। पण जीभ नै मांनखै मे ऊं कोई वस मे नीं कर सकै। वो एक ऐड़ी बला है जिकौ कदै रूकै इज नीं। वो प्रांण नास जेहर ऊं भरयोड़ी है। इण ऊं अपां परभु अर पिता री बड़ाई करौ हो। अर इण ऊं मिनखौ नै जिकौ परमेसर रै रूप मे जनमियोड़ा है सराप दैवै है। एक इज मूंडै ऊं धन्यवाद अर सराप दोनूं निकळै है। हे म्हारै भाइयो, ऐड़ौ नीं होणौ चाहीजै। कांई बेरा रै एक ही मूंडै ऊं मीठौ अर खारौ पांणी दोनूं निकळै है? हे म्हारै भाइयो, कांई अंजीर रै रूंखड़ै में जैतून, या अंगूर री डाळी मे अंजीर लाग सकै है? व्यौंही इज खारै बेरा ऊं मीठौ पांणी कोनीं निकळ सकै। थौरे मे ग्यांनी अर समझदार कुण है? जिकौ ऐड़ौ होवै वो अपणै कांमां नै बड़िया चाल चलण ऊं उण नरमाई नै परगट करै जिकौ ग्यांन ऊं पैदा होवै है। पण जे थै अपणै अपणै मन मांय कड़वी जळण अर विरोध राखौ हो, तो सचाई रै विरोध मे घंमड नीं करणौ, अर नीं झूठ बोलणौ। ओ ग्यांन वो कोनीं, जिकौ सरग ऊं उतरै है बल्कि सांसारिक, अर सारीरिक, अर सैतानी है। इण खातर जठै जळण अर विरोध होवै है, उठै असांति अर हरैक तरैह री बुराई होवै है। पण जिकौ ग्यांन सरग ऊं आवै है वो पैला तो पवितर होवै है पछै मिलनसार, कोमल अर विनम अर दया, अर चौखै फळौ ऊं लदयोड़ो अर बिना पकसपात अर बिना कपट होवै है। अर मिलाप कराण वाळौ रै लियै धारमिकता रौ फळ मेल-मिलाप रै साथै बोयो जावै है। थौरे मे लड़ाईयां अर झगड़ा कठै ऊं आग्या? कांई उण सुख-विलास ऊं कोनीं जिकौ थौरे अंगो मे लड़ै-भीड़ै है? थै लालच राखौ हो, अर थांनै मिळै कोनीं। इण वास्तै थै हत्या अर जळण करौ हो, अर कीं नीं पा सकौ। थै झगड़ौ अर लड़ौ हो। थांनै इण वास्तै नीं मिळै, की थै परमेसर ऊं मांगो कोनीं। थै मांगो हो अर पाओ कोनीं, क्यूंकै थै बुरी इछा ऊं मांगो हो, जिण ऊं थै भोग विलास में उडा दो। हे व्यभिचारी लोगां, कांई थै कोनीं जांणौ, की संसार ऊं मित्रता करणी परमेसर ऊं बैर करणौ है? जे जिकौ कोई संसार रौ मित्र होणौ चावै है, वो अपणै आप नै परमेसर रौ बैरी बणावै है। कांई थै ओ समझौ हो, की पवितर सास्तर फालतू कैवै है, जीण पवितर आतमा नै परमेसर अपांरै मांय बसाई है, वो परमेसर घणी लालसा राखै है, की म्हौ विसवास लायक बण्या रैवौ? वो तो वळै ही अनुग्रह दैवै है। इण कारण ओ लिख्यौ है, “परमेसर घमंडियो ऊं विरोध करै है, पण दीनो माथै अनुग्रह करै है।” इण खातर परमेसर रै अधीन हो जाओ। अर सैतान रौ विरोध करौ, तो वो थौरे खनै ऊं नाह जावैला। परमेसर रै नैड़ा आओ, तो वो भी थौरे नैड़ा आवैला। हे पापियो, अपणै हाथ सुद्ध करौ। अर हे कपटी लोगां अपणै काळजै नै पवितर करौ। दुखी होवो, अर सौग करौ, अर रोवो। थौरी हंसी सौग मे अर थौरो आंणंद उदासी मे बदळ जावै। परभु रै सांम्ही दीन बणौ, तो वो थांनै ऊंचा उठावैला। हे भाइयो, एक दूजै री बदनामी नीं करौ। जिकौ आपरै भाई री बदनामी करै है, या भाई माथै दोस लगावै है, वो कायदे री बदनामी करै है। अर कायदे ऊपर दोस लगावै है, तो थूं कायदे माथै चालनैवालौ नीं, पण उण न्याव करणै वाळौ बण ग्यौ है। कायदा देणवाळौ अर न्याव करणैवाळौ तो एक इज है, जिणै बचानै अर नास करणै री सामरथ है। थूं कुण है, जिकौ अपणै पड़ोसी ऊपर दोस लगावै है? थै जिकौ ओ कैवणवाळौ सुणौ, “आज कल म्हौ किणी ओर नगरी मे जायनै उठै एक बरस बितावोला, अर व्यापार करनै फायदो उठावोला।” अर ओ कोनीं जांणौ की काले कांई होवैला। सुण तो लौ, थौरो जीवन है इज कांई? थै तो मांनौ भाप ज्यौ हो, जिकौ थोड़ी जेज दिखाई दैवै है, पछै लोप हो जावै है। पण आप लोगां नै ओ कैणौ चाहीजै, “जे परभु चावै तो म्हैं जीवता रौला, अर ओ या वो कांम भी करौला।” पण अबै थै अपणी बातां ऊपर घंमड करौ हो। ऐड़ौ सगळौ घंमड बुरौ होवै है। इण वास्तै जिकौ कोई भलाई करणी जांणै है अर नीं करै, उणरै लियै ओ पाप है। हे अमीरो, सुण तो लौ। थै थौरे आवण वाळी तकलीफो ऊपर चिला-चिल्लानै रोओ। थौरो धन बिगड़ ग्यौ है अर थौरे कपड़ो नै कीड़ा खाय ग्या है। थौरे सोने-चांदी मे जंग लाग गी है। अर वो जंग थौरे ऊपर गवाई दैला, अर लाय रै ज्यूं थौरो सरीर खा जावैला। थै आखरी जुग मे धन भेळौ करयौ हो। सुणौ, जिण मजूरो नै थौरे खेत री कटनी करी, उणौरी वो मजूरी जिकौ थां धोखो देयनै राख ली है चिला री है, अर कटनी करनै वाळौ री दुहाई, सेनाओ रै परभु रै कांनो तांई पूग गी है। थै धरती माथै भोगविलास मे लाग्या रिया अर घणौ ही सुख भोग्यौ। थै इण वध रै दिन रै लियै अपणै हिवड़ै नै पाल पोचनै मोटो ताजो करयौ। धरमी नै जिकौ थौरो विरोध कोनीं कियो, उणनै थै दोसी ठैरानै मार नाख्यौ। इण वास्तै हे भाइयो, परभु रै पाछौ आवण तांई धीरज राखौ। सुणौ, किसान धरती री घणी किमती फसल री आसा राखतौ होयौ सरूआत अर आखरी बरसात होण तांई धीरज राखै है। थै भी धीरज राखौ। अर अपणै हिवड़ै नै मजबुत राखौ, क्यूंकै परभु रै आवण रौ वगत नजीक है। हे भाइयो, एक दूजै माथै दोस नीं लगाओ, ताकी थै दोसी नीं ठैरौ। देखौ, न्याव करणैवाळौ द्धार माथै ऊभौ है। हे भाइयो, जिण भविसयदाताओ नै परभु रै नाम ऊं बातां की, उणनै दुख उठानै अर धीरज राखणै रौ एक नमूनो समझौ। सुणौ, म्हौ धीरज राखनै वाळौ नै धन्य कैवौ हो। थै अय्यूब रै धीरज रै बारै में तो सुण्यौ ही है, अर परभु री तरफ ऊं जिकौ उणनै प्रतिफळ मिळियौ वो भी जांण लियौ हो, जिणसूं परभु री घणी सारी करूणा अर दया परगट होवै है। पण हे म्हारै भाइयो, सबां ऊं उतम बात आ है की सौगन नीं खाणी, नीं सरग री, नीं धरती री, नीं किणी दूजी चीजों री। पण म्हौरी बातचीत हां री हां, अर नाह री नाह हो, की थै डंड रै लायक नीं ठैरौ। जे थौरे में ऊं कोई दुखी है, तो वो पराथना करै। जे आंणंद मे है, तो वो परमेसर रा भजन गावै। जे थौरे मांय ऊं कोई बिमार हो, तो कलीसिया रै मुखियौ नै बोलाओ, अर वे परभु रै नाम ऊं उण माथै तेल मल नै उणरै खातर पराथना करै। अर विसवास री पराथना रै अनुसार रोगी बच जावैला अर परभु उणनै उठानै ऊभौ करैला। अर जे उणनै पाप भी कियो हो, तो वो भी माफ हो जावैला। इण वास्तै थै आपस मे एक दूजै रै सांम्ही अपणै-अपणै पापों नै मांन लौ, अर एक दूजै रै लियै पराथना करौ, जिण ऊं सावळ व्‍है जाओ। धरमी जन री पराथना रै प्रभाव ऊं घणौ कीं हो सकै है। एलियाह ही तो अपांरै ज्यूं दुख-सुख भोगी मिनख हो। अर उणनै गिड़गिड़ानै पराथना किनी की मेंह नीं बरसे। अर साढ़े तीन बरस तांई धरती माथै मेंह नीं बरसयो। पछै उणै पराथना किनी, तो आभै ऊं बरसा व्‍ही, अर धरती माथै फसल लागणै लागी। हे म्हारै भाइयो, जे थौरे मांय ऊं कोई सचाई रै मारग ऊं भटक जावै अर कोई उणनै फेर लावै, तो वो ओ जांण ले की जिकौ कोई किणी भटकयोड़े पापी नै फेर लावैला, वो एक प्रांण नै मौत ऊं बचावैला अर हरैक पापों ऊपर परदो नोखेला। पतरस री तरफ ऊं जिकौ यीसु मसीह रौ प्रेरित है, उण परदेसियां रै नाम, जिकौ पुन्तुस, गलतिया, कप्पदूकिया, आसिया, अर बिथुनिया मांय तितर बितर होयनै रैवता हा। पिता परमेसर थांनै अपणै पैलै ग्यांन रै अनुसार चुणया है अर पवितर आतमा नै थांनै पवितर बणाया है इणरै जरियै थै यीसु मसीह री आग्या मांनौ, अर उणरै लोई ऊं सुद्ध होवो। थांनै परमेसर रौ अनुग्रह अर सानति मिळती रैवै। म्हौरै परभु यीसु मसीह रै पिता परमेसर रौ धन्यवाद हो, जिणै यीसु मसीह नै मरयोड़ौ मांय ऊं जी उठनै रै दवारा, आपरी घणी दया ऊं अपांनै जिवती आसा रै लियै नवो जनम दियौ। अबै थौरे सरग में राख्योड़ी उण पवितर विरासत रा वारिस होग्या हो जिकौ नीं कदैई सड़ै ला अर नीं कदैई नास होवैला अर नीं कदैई खोवैला। थौरी रूखाळी परमेसर री सामरथ ऊं, विसवास रै दवारा उण उद्धार रै वास्तै बचावै है, जिकौ आवण वाळी घड़ी में परगट होणवाळी है, अर इण कारण थै मगन होवो हो, पण जरुरी है की अबै कीं दिनां तांई कही तरैह री परीकसा रै कारण दुखी हो। ओ इण वास्तै होयौ की थौरे परखयोड़ो विसवास, जिकौ अग्‍नि ऊं तायोड़ो नासवान सोने ऊं भी घणौ मूंगो है, यीसु मसीह रै परगट होणै री सौभा, महिमा अर आदर रौ कारण ठैरै। उण ऊं थै बिना देख्यां परैम राखौ हो, अर अबै तो थै उण माथै बिना देख्यां विसवास करनै ऐड़ा आंणंद अर मगन होवो हो जिणरी बखाण की ही नीं जा सकै, जिकौ महिमा ऊं भरयोड़ौ है। अर अपणै विसवास रौ प्रतिफल अरथावूं अपणी आतमा रौ उद्धार कर रिया हो। इण उद्धार रै बारै मांय उण भविसयदाताओ घणी खोजबीन अर जांच पड़ताल किनी, जिणौनै उण अनुग्रह रै बारै में जिकौ थांरै माथै होणै वाळौ हो, भविसयवांणी की ही। उणौनै इण बात री सौध किनी की मसीह री आतमा जिकौ उणमे ही, अर पैला ऊं इज मसीह रै दुखौ री अर उणरै पछै होणवाळी महिमा री गवाई देतो हो, वो कुण ऊं अर कीण घड़ी री तरफ इछारौ करतौ हो। उण माथै ओ परगट किनो, की वे आपरी नीं बल्कि थांरी सेवा रै खातर ऐ बातां किया करता हा, जिणरौ समाचार अबै थांनै उणरै दवारा मिळियौ जिणौनै पवितर आतमा रै दवारा जिकौ सरग ऊं भेज्यौ ग्यौ। थांनै सुभ संदेस सुणाया, अर इण बातां नै सरगदूत ई ध्यांन ऊं देखणै री लालसा राखै है। इण खातर अपणी अपणी बुद्धि री कमर बांधनै, अर सावचेत रैन उण अनुग्रह री पूरी आसा राखौ, जिकौ यीसु मसीह रै परगट होणै री घड़ी थांनै मिलनेवाळी है। अर आग्याकारी टाबरौ रै ज्यूं बणौ, अपणी नासमझ रै वगत री पुराणी अभिलासाओं रै ज्यूं नीं बणौ। पण ज्यौ थांरौ बुलाणै वाळौ परमेसर पवितर है, त्यौं ही थै भी अपणै सगळै चाल चलण में पवितर बणौ। क्यूंकै लिख्यौ है, “पवितर बणौ, क्यूंकै म्हैं पवितर हूं।” अर जद की थूं, “हे पिता” केन उण ऊं पराथना करौ हो, जिकौ बिना पकसपात हरैक रै कांम रै अनुसार न्याव करै है, तो अपणै परदेसी होणै रौ वगत परमेसर नै आदर देते होया जीवन बिताओ। क्यूंकै थै जांणौ हो, की थौरो निकमो चाल-चलण जिकौ बाप दादो ऊं चालयौ आवै है उण ऊं थौरो छुटकारो चांदी सोनो अरथावूं नासवान चीजों रै दवारा नीं होयौ, पण निरदोस अर निसकलंक उनियां मतलब मसीह रै किमती लोई रै दवारो होयौ। उणरौ ग्यांन तो जगत री सरूआत रै पैला ऊं जांण्यौ गियौ हो, पण अबै इण आखरी जुग मे थौरे खातर परगट होयौ जिकौ उणरै दवारो उण परमेसर माथै विसवास करौ हो, जिणनै उणै मरयोड़ौ मांय ऊं जीवतौ करयौ, अर महिमा दी। की थौरो विसवास अर आसा परमेसर माथै होवै। इण वास्तै जद की थै भाईचारे री बिना चाल विसवास रै निमित सत्य नै मानणै ऊं अपणै मनो नै पवितर करया है, तो तन मन लगायनै एक दूजै ऊं घणौ परैम राखौ। क्यूंकै थांनै नासवान नीं, पण अविनासी बीज ऊं, परमेसर रै जीवते अर हमेसां ठैरनेवाळे वचन रै दवारो नवो जनम पायो है। क्यूंकै, “हरैक मांनखौ घास री ज्यूं है, अर उणरी सगळी सौभा घास रै फूल री ज्यूं है। घास सूख जावै है, अर फूल झड़ जावै है। पण परभु रौ वचन युगानयुग बण्यौ रैवैला।” अर ओ इज सुभ संदेस रौ वचन है जिकौ थांनै सुणायो ग्यौ हो। इण वास्तै सगळी तरैह रा बैरभाव अर छळ अर कपट अर जळण अर बदनामी नै आगा करनै, नवा जनमयोड़ा टाबरौ रै ज्यूं निरमल आत्मिक दूध री लालसा करौ, ताकी उणरै दवारो उद्धार पाने रै वास्तै बढ़ता जाओ, क्यूंकै अबै थै परभु री करपा रौ स्वाद चाख लियौ है। उणरै खनै आयनै, जिणनै मिनखौ तो निकमो ठैरायौ, पण परमेसर रै नजीक चुणयोड़ौ, अर घणौ मूंगो जीवतौ भाटो है, थै ई आप जीवते भाटे रै ज्यूं आत्मिक घर बणता जाओ हो, जिण ऊं याजकौ रौ पवितर समाज बणनै, ऐड़ा आत्मिक बलिदान चढ़ाओ, जिकौ यीसु मसीह रै दवारा परमेसर नै स्वीकार हो। इण खातर पवितर सास्तर मांय भी आयौ है, “सुणौ, म्हैं सियोन नगर रै कोने रौ भाटो चुणयोड़ौ अर किमती भाटो धरू हूं। अर जिकौ कोई उण माथै विसवास करैला, वो किणी रीत ऊं लजित नीं होवैला।” इण वास्तै थौरे खातर जिकौ विसवास करौ हो, वो तो घणौ किमती है, पण जिकौ विसवास नीं करै उणरै खातर “जिण भाटे नै कारीगरो निकमो ठैरायौ हो, वोहीज कोने रौ भाटो होय गियौ।” अर “इण तरैह रौ भाटो बणग्यौ, जिण ऊं लोगां नै ठेस लागै। अर ठोकर खाणै री चटान जैड़ौ बणग्यौ है।” क्यूंकै वे तो वचन नै नीं मांन नै ठोकर खावै है अर इण रै कारण ठैरायौ गियौ है। पण थै एक चुणयोड़ा वंस, अर राज-पदधारी याजकौ रौ समाज, अर पवितर लोग, अर परमेसर री निज परजा हो, इण वास्तै की जिणै थांनै अंधारै मांय ऊं आपरी अदभुत उजाळै मांय बुलाया है, उणरा गुण परगट करौ। थै पैला तो कीं ई कोनीं हा, पण अबै तो परमेसर री परजा हो। थांरै माथै दया कोनीं होई ही, पण अबै थांरै माथै दया होई है। हे म्हारै प्यारौ भाइयो, म्हैं थौरे ऊं विनती करूं हूं, की थै अपणै आप नै परदेसी जांणनै उण सांसारिक अभिलासाओं ऊं जिकौ आतमा ऊं युध करै है, बचया रैवौ। गैर यहूदियो में थौरो चाल चलण भलौ हो। इण वास्तै की जिण जिण बातां में वे थांनै कुकरमी जांणनै बदनाम करै है, वे थौरे भलै कांमां नै देखनै उणौरै कारण करपा दिस्टी रै दिन परमेसर री महिमा करै। परभु रै वास्तै मिनखौ रै ठैरायोड़ा हरैक प्रबन्ध रै अधीन मे रैवौ। राजा रै अधीन में इण वास्तै रौ, क्यूंकै वो सगळौ माथै परधान है। अर हाकिमों रै अधीन इण वास्तै, क्यूंकै वे कुकरमियो नै डंड देवण अर चौखा कांम करणैवाळौ री सौभा रै खातर राजा री तरफ ऊं भेज्यौड़ा है। क्यूंकै परमेसर री इछा आ है, की थै भलै कांम करनै ऊं निर्बुद्धि लोगां री नासमझ री बातां नै बंद कर दो। अर अपणै आप नै आजाद जांणौ। पण अपणी इण आजादी नै बुराई रै वास्तै आड़ नीं बणाओ, पण अपणै आप नै परमेसर रा दास समझनै चालौ। सैंगो रौ आदर करौ, भाइयो ऊं परैम राखौ, परमेसर ऊं डरौ, राजा रौ कदर करौ। हे सेवकों, हरैक तरैह रै भय रै साथै अपणै मालिक रै अधीन रैवौ, नीं कैवल भलौ अर सीधौ रै, पण कठोर रै भी अधीन रौ। क्यूंकै जे कोई परमेसर रौ विचार करनै अन्याव ऊं दुख उठातौ होयौ कलेस सहन करै है, तो आ भलाई री बात है। पण जे थै भूंडा कांम करनै लात घूसा खावौ अर धीरज धरो, तो उणमे कुण सी बड़ाई री बात है? पण जे भलाई रौ कांम करनै दुख उठावो हो अर धीरज धरो हो, तो ओ परमेसर नै भावै है। अर थै इण रै खातर बुलाया गिया हो क्यूंकै मसीह ई थौरे वास्तै दुख उठायनै, थांनै एक सिकसा देन गिया है, की थै ई उणरै निसाणी माथै चालौ। सास्तर मांय लिख्योड़ौ है की, “नीं तो उणै पाप किनो, अर नीं उणरै मूंडै ऊं छळ री कोई बात निकळी।” वो गाळी सुणनै गाळी कोनीं देतो हो, अर दुख उठान किणी नै ई धमकी कोनीं देतो हो, पण अपणै आप नै साचै न्यावी रै हाथ में सूंप दियौ। वो आप इज म्हौरै पापों नै आपरी देह माथै लैयनै सूली माथै चढ़ग्या, जिण ऊं म्हौ पापों रै खातर मरनै धारमिकता रै खातर जीवन बिताओ। उणरै मार खाणै ऊं थै चंगा होया हो। क्यूंकै थै पैला भटकयोड़ी लरड़ियां री ज्यूं हा, पण अबै अपणै आतमा रै रूखाळा अर गवाळौ रै खनै पाछा आयग्या हो। हे लुगाईयां, थै ई अपणै घरधणी रै अधीन रौ। इण वास्तै की जे इण मांय ऊं कोई ऐड़ा हो जिकौ वचन नै कोनीं मानता हो, तौभी थौरे भय साथै पवितर चाल चलण नै देखनै बिना वचन रै अपणी अपणी लुगाई रै चाल चलण रै दवारा खिचया चालया आवै। अर थौरो सिंगार दिखावटी नीं हो, अरथावूं बाल गूंथणा, अर सोने रा गहणा पैरणा, या तरैह तरैह रा गाभा पैरणा। बल्कि थौरो लुकयोड़ो अर गुपत इंसानियत, नरमाई अर मन री दीनता री अविनासी सजावट ऊं सावचेत रैवौ, क्यूंकै परमेसर री निजर में इणरौ मोल घणौ है। अर पैला री वैळा री पवितर लुगाईयां भी, जिकौ परमेसर माथै आसा राखती ही, अपणै आप नै इण रीत ऊं संवारती अर अपणै अपणै धणी रै अधीन रैवती ही। ज्यौ सारा अबराहम री आग्या में रैवती अर उणनै मालिक कैवती ही। इण वास्तै थै भी जे भलाई करौ, अर किणी तरैह रै भय ऊं भयभीत नीं हो, तो उणरी बेटियां ठैरोला। त्यौं ही हे घरधणीयां, थै भी समझदारी ऊं लुगाईयां रै साथै जीवन बिताओ, अर लुगाई नै निबळां बरतन जांणनै उणरौ आदर करौ, ओ समझनै की म्हौ दोनूं जीवन रै वरदान रा वारिस हो, जिण ऊं थौरी पराथना रूक नीं सकै। म्हारी आखरी इछा है की, सैंग रा सैंग एक मन अर करपा अर भाईचारे री प्रीति राखणवाळा, अर दया करणवाळा, अर नरमाई राखणवाळा बणौ। भूंडाई रै बदळै भूंडाई मत करौ। अर नीं गाळी रै बदळै गाळी दो। पण इणरै बदळै आसीस ही दो। क्यूंकै थै आसीस रा वारिस होणै रै खातर बुलाया गिया हो। क्यूंकै सास्तर मांय लिख्योड़ौ है की, “जिकौ कोई जीवन री इछा राखै है अर चौखा दिन देखणा चावै है, वो आपरी जीभ नै भूंडाई ऊं अर अपणै होठौ नै छळ री बातां करणै ऊं रोक राखै। वो बुराई रौ साथ छोड़नै, भलाई करै। वो मेळ मिलाप नै सौधै, अर उणरै यत्‍न में रैवै। क्यूंकै परभु री आंख्यां धरमियो माथै लाग्योड़ी रैवै है, अर उणरा कांन उणरी विनती री तरफ लाग्योड़ा रैवै है, पण परभु बुराई करणै वाळौ रै विरोध रैवै है।” अर जे थै भलाई करणै में तैयार रैवौ तो थौरी बुराई करणैवाळौ पछै कुण है? अर जे थै भलै कांमां रै खातर दुख भी उठाओ, तो धन्य हो। पण उणरै डराणै ऊं मत डरौ, अर नीं घबराओ। पण मसीह नै परभु जांणनै अपणै अपणै मन में पवितर समझौ, अर जे कोई थौरे ऊं थौरी आसा रै बारै में कीं पूछै, तो उणनै उतर दैणै रै खातर हमेसां तैयार रैवौ, पण नरमाई अर भय रै साथै। अर मन भी सुद्ध राखौ, इण वास्तै की जिण बातां रै बारै में वे जिकौ थौरे मसीह चौखै चाल चलण रौ अपमांन करै है, वो लजित हो। क्यूंकै जे परमेसर री आहीज इछा हो, की थै भलाई करणै रै खातर दुख उठाओ, तो इण ऊं बड़िया ओ है की बुराई नै छोड़नै दुख ही उठा लौ। क्यूंकै मसीह नै ही, अरथावूं अधरमियों रै खातर धरमी नै पापों रै कारण एक बार दुख उठायौ, ताकी म्हौ नै परमेसर रै खनै पूगावै। वो सरीर रै भाव ऊं तो घात कियो गियौ, पण आतमा रै भाव ऊं जिलायौ गियौ। मरयोड़ौ मांय ऊं जीवतौ होणै रै पैला वो मरयोड़े लोगां री आतमा जिकौ कैद में ही उणनै सुभ संदेस सुणायो। जिणौनै उण बीते वगत में परमेसर री आग्या नीं मानी जद परमेसर नूह रै दिनां में धीरज धरनै ठैरया रिया, अर वो नाव बण रियौ हो, जिणमे बैठनै कम लोग मतलब आठ प्राणी पांणी ऊं बच ग्या हा। अर उण पांणी रौ दिस्टांत ई, अरथावूं बतिस्मो, यीसु मसीह रै जी उठनै रै द्धवारा, अबै थांनै बचावै है। उण ऊं सरीर रौ मैल नै आगौ करणै रौ अरथ कोनीं है, पण सुद्ध मन ऊं परमेसर रै वंस में हो जांणै रौ अरथ है। वो सरग माथै जायनै परमेसर रै जीमणा पाड़ै बैठ ग्या। अर सरगदूत अर सरग रौ अधिकारियों अर सगतियो उणरै अधीन कर दीनी है। इण वास्तै जद की मसीह नै सरीर में होयनै दुख उठायौ तो थै भी उण ही मनसा नै धारण करनै हथियार बांध दो, क्यूंकै जीण सरीर में दुख उठायौ, वो पाप ऊं छूट ग्यौ। ताकी भविसय मांय अपणौ बाकी सारीरिक जीवन मिनखौ री इछाओ रै अनुसार कोनीं बल्कि परमेसर री इछा रै अनुसार जियो। क्यूंकै जिकौ लोग परमेसर नै नीं जांणै उणौरी इछा री तरैह कांम करनै, अर लुचपन री भूंडी इछा, मतवालापन, व्यभिचारी, पियकड़ अर बेकार री मूरती पूजा में जठै तांई म्हौ पैला ऊं वगत गंवायौ, वो ही घणौ होयौ। इण ऊं वे अचूम्बो करै है, की थै ऐड़ै भारी लुचपन में उणरौ साथ नीं देता, अर इण वास्तै वे भूंडा भलां कैवै है। पण वे उणनै जिकौ जीवतौ अर मरयोड़ौ रौ न्याव करनै तैयार है, उणनै व्यवहार ऊं लेखो जोखो उण मसीह नै दैला। क्यूंकै मरयोड़ौ नै भी सुभ संदेस इण वास्तै सुणाया गिया, की सरीर मे तो मिनखौ रै अनुसार उणरौ न्याव हो, पण आतमा में वे परमेसर रै अनुसार जीवता रैवै। सगळी बातां रौ अंत तुरत होणै वाळौ है। इण वास्तै संयमी होयनै पराथना रै लियै सावचेत रैवौ। अर सगळां मांय उतम बात आ है की एक दूजै ऊं घणौ परैम राखौ। क्यूंकै परैम घणौ पापों नै ढ़ाप दैवै है। बिना कुड़कुड़ाए एक दूजै रौ आदर भाव करौ। जिणनै जिकौ वरदान मिळिया है, वो उणै परमेसर रै कही परकार रै अनुग्रह नै भलै भण्डारियो री ज्यूं एक दूजै री सेवा में लगावै। जे कोई बोले, तो ऐड़ौ बोले, मांनौ परमेसर रौ वचन है। जे कोई सेवा करै तो उण सगति ऊं करै जिकौ परमेसर दैवै है। जिण ऊं सगळी बातां मे यीसु मसीह रै दवारा, परमेसर री महिमा परगट हो। महिमा अर अधिकार युगानयुग उण रौ इज है। आमीन। हे म्हारै प्यारौ भाइयो, जिकौ दुख रूपी अग्‍नि थांनै परखणै रै खातर थौरे मांय भड़की है, इण ऊं ओ समझनै अचूम्बो नीं करौ की कोई अनोखी बात थौरे माथै बीत री है। पण ज्यूं ज्यूं मसीह रै दुखौ में सहभागी होवो हो, आंणंद करौ, जिण ऊं उणरी महिमा रै परगट होते वेळा भी थै आंणंद अर मगन हो। वळै जे मसीह रै नाम रै खातर थौरी निंदा की जावै है, तो धन्य हो। क्यूंकै महिमा री आतमा, जिकौ परमेसर री आतमा है, थौरे मांय वास करै है। थौरे मांय ऊं कोई मिनख हत्यारो या चोर, या कुकरमी होणै, या पराए कांम में हाथ घालनै रै कारण दुख नीं पावै। पण जे मसीह होणै रै कारण दुख पावै, तो लजित नीं हो, पण इण बात रै खातर परमेसर री महिमा करै। क्यूंकै वो घड़ी आयगी है, की पैला परमेसर रै लोगां रौ न्याव कियो जाय, अर जद की न्याव री सरूआत अपां ऊं होवैला तो उणरौ कांई अंत होवैला जिकौ परमेसर रै सुभ संदेस नै कोनीं मांनै? अर जे धरमी मिनख ही कठिनाई ऊं उद्धार पावैला, तो भगती नीं करणै अर पापी रौ कांई होवैला? इण वास्तै जिकौ परमेसर री इछा रै अनुसार दुख उठावै है, वे भलाई करता होया, अपणै अपणै प्रांण नै विसवास लायक परमेसर रै हाथ मांय सूंप दे। थौरे में जिकौ पुरनिये है, म्हैं उणरी तरैह पुरनिये अर मसीह रै दुखौ रौ गवाई अर परगट होणवाळी महिमा में सहभागी होयनै उणनै ओ समझा रियौ हूं, की परमेसर रै लोगां नै, जिकौ थौरे बीच में है रूखाळी करौ। अर ओ दबाव ऊं कोनीं, पण परमेसर री इछा रै अनुसार आंणंद ऊं, अर नीच-कमाई रै लियै नीं, पण मन लगायनै ओ कांम करौ। अर जिकौ लोग थनै सूंपया है, उण माथै हक नीं जताणौ, बल्कि लोगां रै लियै सिकसा देवणवाळा बणौ। अर जद परधान रूखाळौ परगट होवैला, तो थांनै महिमा रौ मुगट दियौ जावैला, जिकौ उणरी सौभा कम नीं होवैला। हे जवानो, इण तरैह थै भी पुरनियो रै अधीन रैवौ, बल्कि थै सगळा रा सगळा एक दूजै री सेवा रै लियै दीनता ऊं कमर बांधनै रैवौ, क्यूंकै “परमेसर घमंडियो रौ विरोध करै है, पण दीनो माथै अनुग्रह करै है।” इण वास्तै परमेसर रै ताकतवर हाथो रै नीचे दीनता ऊं रैवौ, जिण ऊं वो थांनै सही वगत माथै बढ़ावैला। अर अपणी सगळी चिंता उण ऊपर घाल दो, क्यूंकै उणनै थौरो ध्यांन है। सावचेत हो, अर जागता रैवौ, क्यूंकै थौरो विरोधी सैतान दहाड़ने वाळै सिंघ री ज्यूं इण ताक में रैवै है, की कीण नै फाड़नै खाऊं। थां विसवास मांय मजबुत होयनै, उणरौ सामनो करौ। क्यूंकै थै तो जांणौ ही हो की थौरे भाई-बेन जिकौ संसार मांय है, ऐड़ौ ही दुख भुगत रिया है। अबै परमेसर जिकौ सगळै अनुग्रह रौ दाता है, जिणै थांनै मसीह में अपणी अनत महिमा रै लियै बोलाया, थौरे थोड़ी जेज तांई दुख उठाणै रै पछै आप इज थांनै सिद्ध अर मजबुत अर ताकतवर करैला। परमेसर रौ राज युगानयुग रैवै। आमीन। म्हैं सिलवानुस रै हाथ, जिणनै म्हैं विसवास लायक भाई समझ रियौ हूं, छोटे रूप में लिखनै थांनै समझाया है अर आ गवाई दी है की परमेसर रौ साचौ अनुग्रह ओहीज है। इण मांय मजबुत रैवौ। बेबिलोन री कलीसिया जिकौ थौरे ज्यूं परमेसर रै चुणयोड़ा लोग है, वो अर मसीह में म्हारै बेटे ज्यूं मरकुस थांनै नमस्कार कैवै है। परैम ऊं हाथ जौड़ने एक दूजै नै नमस्कार करौ। थांनै सगळौ नै जिकौ मसीह मे हो सानति मिळती रैवै। म्हैं समौन पतरस री तरफ ऊं जिकौ मसीह रा दास अर प्रेरित है, ओ कागद उण लोगां रै नाम लिख रियौ हूं जिणौनै म्हारै परमेसर अर उद्धारकर्ता यीसु मसीह री धारमिकता दवारा म्हौरै ज्यूं अनमोल विसवास पायो है। परमेसर री तरफ म्हौरै परभु यीसु री पिछांण रै जरियै अनुग्रह अर सानति थौरे मांय घणी सारी बढ़ती जावै। क्यूंकै उणरै ईस्वरीय सामरथ नै सैंग कीं जिकौ जीवन अर भगती ऊं संबंध राखै है, म्हौ नै उणरी पिछांण रै दवारा दियौ है, जिणनै अपांनै अपणी ही महिमा अर सद्गुण रै अनुसार बोलाया है। जिणरै कारण उणै म्हौ नै घणा किमती अर घणा मोटा वायदा दिया है। ताकी इणरै दवारा थै उण सड़ाहट ऊं छूटनै जिकौ संसार मांय भूंडी अभिलासाओं ऊं होवै है, ईस्वरीय स्वभाव रै सहभागी हो जाओ। अर इण कारण थै सगळै तरैह री कोसीस करनै, अपणै विसवास माथै सद्गुण, अर सद्गुण माथै समझ, अर समझ माथै संयम, अर संयम माथै धीरज, अर धीरज माथै भगती, अर भगती माथै भाईचारे री प्रीति, अर भाईचारे री प्रीति माथै परैम बढ़ाता जाओ। क्यूंकै जे ऐ गुण थौरे में रैवै, अर बढ़ता जावै, तो थांनै म्हौरै परभु यीसु मसीह रै पिछांण नै मांय निकमो अर बेकार नीं होणै दैला। अर जिण मांय ऐ बातां कोनीं, वो आंधौ है, अर धुंधळौ देखे है, अर अपणै पूर्वजकाल पापों ऊं धुलनै सुद्ध होणै नै भूल बैठौ है। इण कारण हे भाइयो, अपणै बुलाय जांणै, अर चुण लियै जांणै नै सिद्ध करणै रौ भली भाति यत्‍न करनै जाओ, क्यूंकै जे ऐड़ौ करौला, तो कदैई ठोकर नीं खाओला। बल्कि इण रीत ऊं थै म्हौरै परभु अर उद्धारकर्ता यीसु मसीह रै अनत राज में घणै आदर रै साथै परवेस कर पाओला। इण वास्तै जे थै ऐ बातां जांणौ हो, अर जिकौ सत्य वचन थांनै मिळिया है, उणमे बण्या रैवौ हो, तौभी म्हैं थांनै इण बातां री सुधि दिलाणै नै हमेसां तैयार रैवूंला। अर म्हैं ओ अपणै लियै सही समझ रियौ हूं, की जद तांई म्हैं इण सरीर रै डेरे मांय हूं, तद तांई थांनै सुधि दिलायनै समझातौ रैवूं। क्यूंकै ओ जांणूं हूं, की परभु यीसु मसीह रै वचन रै अनुसार म्हारै सरीर रै डेरे नै पाड़ै जांणै रौ वगत जल्दी आवणवाळौ है। इण वास्तै म्हैं ऐड़ी कोसीस करूंला, की म्हारै मर जांणै रै पछै थै इण बातां नै हमेसां याद कर सकौ। क्यूंकै जद म्हौ थांनै अपणै परभु यीसु मसीह री सामरथ रा, अर आगमन रौ समाचार दियौ हो तो वो चतुराई ऊं गढ़ीयोड़ी कहाणियो रौ अनुसरण कोनीं कियो हो बल्कि म्हैं खुद ही उणरी महिमा नै देखी है। की उणनै परमेसर पिता ऊं आदर, अर महिमा पाई जद उण प्रतापमय महिमा में ऊं आ वाणी आई की, “ओ म्हारौ लाडलौ बेटौ है, जिण ऊं म्हैं खुस हूं।” अर जद म्हौ उणरै साथै पवितर भाखर माथै हा, तो सरग ऊं आ वाणी आवतै वैळा सुणी। अर म्हौरै खनै जिकौ भविसयदाताओ रौ वचन है, वो इण घटना ऊं मजबुत ठैरयो है अर थै ओ बड़िया करौ हो, की जिकौ ओ समझनै उण माथै ध्यांन करौ हो, की वो एक दीयौ है। जिकौ अंधारै री जगा मांय उण वेळा तांई उजाळौ देतो रैवै है जद तांई की दिन नीं उगै, अर संवार रौ तारो थौरे मन मांय नीं चमक उठै। पण पैला ओ जांण लौ की पवितर सास्तर री कोई भी भविसयवांणी किणी रै आपरै इज विचारो रै आधार पर पूरण नीं होवै। क्यूंकै कोई भी भविसयवांणी मिनख री इछा ऊं कदैई कोनीं होई, पण भगत जन पवितर आतमा रै उभारे जांणै परमेसर री तरफ ऊं बोलता हा। अर जिण तरैह उण लोगां मांय झूठा भविसयदाता हा उण तरैह थांरै मांय भी झूठा उपदेसक होवैला, जिकौ नास करणै वाळै पाखंड रौ सरूआत लुक लुकनै करैला अर उण मालिक रौ जिणनै मोल लियौ है मना करैला अर अपणै आप नै हाथोहाथ विनास मे घाल दैला। अर घणाकर उणरी तरैह लुचपन करैला, जिणरै कारण सत्य रै मारग री निंदा की जावैला। अर वे लोभ रै लियै बातां बणायनै थांनै आपरै फायदे रा कारण बणावैला, अर जिकौ डंड री आग्या उणौ माथै पैला ऊं इज होय चुकी है, उणरै आवण मे कीं जेज कोनीं, अर उणौ रौ विनास ऊंघेला नीं। क्यूंकै जद परमेसर नै उण सरगदूतो नै जिणौनै पाप करयौ हो उणौनै भी कोनीं छोड़या, अर पाताळ री अंधारै री कोठरी मांय नोख दिया, ताकी न्याव रै दिन तांई बंदी रैवै। परमेसर नै उण पुराणी दुनिया नै भी कोनीं छोड़ी, बल्कि बिना भगती संसार माथै महा जळ-प्रलय भेजनै धरम रै परचारक नूह समेत आठ मिनखां नै बचा लिया। परमेसर नै सदोम अर अमोरा रै नगरो नै विनास रौ ऐड़ौ डंड दियौ, की उणै भसम करनै राख में मिळा दिया ताकी वे आवण वाळा बिना भगती रै लोगां री सिकसा रै लियै एक दिस्टांत बणै। पण धरमी लूत नै जिकौ अधरमियों रै असुद्ध चाल चलण ऊं घणौ दुखी हो छुटकारो दियौ। क्यूंकै वो धरमी मिनख उण पापियो रै बीच मांय रैवतौ होयौ, अर उणौरै अधरम रा कांमां नै देख देखनै, अर सुण सुणनै, हरैक दिन अपणै साचै मन नै दुखी करतौ हो। इण तरैह परभु जांणै है की भगतो नै परीकसा मांय ऊं निकाळ देणा, अर अधरमियों नै न्याव रै दिन तांई डंड री दसा मांय राखणौ भी जांणै है। परमेसर खास करनै उण लोगां नै डंड दैला जिकौ भूंडी इछा रै लारै सरीर रै अनुसार चालै, अर परभु री महानता ऊं नफरत करै है। वे ढ़ीठ अर हठी है, अर सरगिए ताकतां नै भूंडा भलां कैवण ऊं कोनीं डरै है। तौभी सरगदूत जिकौ सगति अर सामरथ में उण ऊं मोटा है, परभु रै सांम्ही उणौनै भूंडा भलां केन दोस नीं लगावै। पण ऐ लोग बिना बुद्धि रै जिनावरां रै ज्यूं है, जिकौ पकड़नै अर नास होणै रै लियै पैदा होया है। अर जिण बातां नै जांणै ही कोनीं, उणरै बारै में औरो नै भूंडा भलां कैवै है, वे आपरी गंदगी मांय आप ही सड़ जावैला। दूजौ रौ बूरो करणै रै बदळै खुद रौ बूरो होवैला। उणनै दिन दोपार सुख-विलास करणौ चौखौ लागै है। ओ कलंक अर दोस है जद वे थौरे साथै खावै पीवै है, तो अपणी तरफ ऊं परैम भोज करनै भोगविलास करै है। उण इज आंख्यां मांय व्यभिचारणी बसयोड़ी है, अर वे पाप किए बिना रूक नीं सकै। वे चंचल मनवाळौ नै बहका दैवै है। उणरै मन नै लोभ करणै री आदत होय गी है, वे सराप री औळाद है। वे सीधे मारग नै छोड़नै भटक गिया है, अर बओर रौ बेटौ बिलाम रै मारग पे हो लियौ है। जिणै अधरम री मजूरी नै चौखी जांणी है। पण उणरै गुनाह रै बारै में उलाहना दी गई, अठै तांई की अबोल गधी नै मिनख री बोली ऊं उण भविसयदाता नै उणरै बावलेपन ऊं रोकयो। ऐ धोखेबाज मिनख सुखे कुंए रै ज्यूं है, अर ऐ आंधी रै उडायोड़ा बादळ रै ज्यूं है, उणरै लियै अंधारौ ठैरायौ गियौ है। वे फालतू घंमड री बातां कर करनै लुचपन रै कांमां रै दवारा, उण लोगां नै सारीरिक अभिलासाओं में फसा दैवै है, जिकौ भटकयोड़ो मांय ऊं अबार निकळ रिया है। वे उणनै आजाद होणै री वायदो तो दैवै है, पण आप ही गंदगी रा दास है, क्यूंकै जिकौ मिनख जिण ऊं हार गियौ है, वो उणरौ दास बण जावै है। अर जद वे परभु अर उद्धारकर्ता यीसु मसीह री पिछांण रै जरियै संसार री कही परकार री असुद्धता ऊं बच निकळौ, अर वळै उणमे फसने हार गिया, तो उणरी दसा पैला ऊं भी भूंडी होयगीं है। क्यूंकै धरम रै मारग में नीं जावणौ इज उणरै खातर इण ऊं भलौ होवतो, की उणै जांणनै, उण पवितर आग्या ऊं फिर जावै, जिकौ उणनै सूपी गी ही। आ कावत ठीक बैठे है की, “कुत्तो आपरी उलटी री तरफ” अर “झीलायोड़ी गंडुरी कादे मांय लिटनै रै लियै वळै चाली जावै है।” हे म्हारै प्यारौ भाइयो, अबै म्हैं थांनै आ दूजी चिठ्ठी लिखूं हूं, अर दोनूं मांय सुधि दिलान थौरे सुद्ध मन नै उभारू हूं। की थै उण बातां नै, जिकौ पवितर भविसयदाताओ पैला ऊं कही ही अर परभु, अर उद्धारकर्ता री उण आग्या नै याद करौ, जिकौ थौरे प्रेरितों रै जरियै दी गई ही। अर ओ पैला जांण लौ, की आखरी दिनां मांय हंसी ठटा करनै वाळा आवैला, जिकौ आपरी भूंडी इछा रै अनुसार चालैला। अर कैवैला, “यीसु मसीह रै आवण रौ वायदो कठै गियौ? क्यूंकै जद ऊं बापदादा सो ग्या हा, सैंग वैड़ौ इज है, ज्यौ जगत रै सरूआत ऊं हो?” वे तो जांण बूझनै ओ भुलग्यां, की परमेसर रै वचन रै दवारा आभौ पुराणै काल ऊं टिकियोड़ो है अर धरती भी पांणी मांय ऊं बणी अर पांणी मांय स्थिर है। इण पांणी रै खातर उण जुग रौ जगत पांणी मांय डूबनै नास होय ग्यौ। पण अबार इण वगत आभौ अर धरती उण वचन रै अनुसार इण वास्तै राख्या है, की बाळया जावै। अर वो बिना भगती रा मिनखौ रै न्याव अर नास होणै रै दिन तांई यूं ही राख्योड़ा रैला। हे म्हारै प्यारौ भाइयो, आ एक बात थौरे ऊं लुकयोड़ी नीं रैवै, की परभु रै उठै एक दिन हजार बरस रै बराबर है, अर हजार बरस एक दिन रै बराबर है। परभु आपरै वायदे रै बारै में मोड़ौ नीं करै, ज्यौ मोड़े नै किता लोग समझै है। पण थौरे बारै में धीरज धरै है, अर नीं चावै, की कोई नास हो। बल्कि ओ की सगळौ नै मन फिराव रौ मौकौ मिळै। पण परभु रौ दिन चोर री ज्यूं आ जावैला। उण दिन आभौ घणी हड़बड़ाहट रै आवाज ऊं जातौ रैला, अर घणी चीजों ही तापनै पिघळ जावैला, अर धरती अर उण माथला कांम बळ जावैला। जद की ऐ सगळी चीजों, इण रीत ऊं पिघळ नै वाळी है, तो थांनै पवितर जीवन अर चाल चलण अर भगती में चौखौ होणौ चाहीजै। अर परमेसर रै उण दिन री बाट कीण रीत ऊं जोवणी चाहीजै। अर उणरै वेगौ आवण रै खातर यत्‍न करणौ चाहीजै। जिणरै कारण आभौ अग्‍नि ऊं पिघळ जावैला, अर आभै रै गण घणा ही तपनै गळ जावैला। पण परमेसर रै वायदे रै अनुसार अपां एक नवो आभौ अर नवी धरती री आस देखौ हो जिणमे धारमिकता वास करैला। इण वास्तै, हे म्हारै प्यारौ भाइयो, जद की थै इण बातां री आस देखौ हो तो कोसीस करौ की थै सानति ऊं उणरै सांम्ही निसकलंक अर निरदोस ठैहरौ। अर म्हौरै परभु री धीरज नै उद्धार समझौ, ज्यौ म्हौरै परैमी भाई पौलुस भी उण ग्यांन रै अनुसार जिकौ उणनै परभु ऊं मिळियौ, थांनै लिख्यौ है। व्यौंही उणनै आपरी सगळी चिठ्ठियो मांय भी इण बातां री चरचा किनी है जिणमे किती बातां ऐड़ी है, जिणरौ समझणौ मुसकिल है, अर नासमझ अर भटकणवाळा लोग उणरै अरथ नै भी पवितर सास्तर री तरफ बातां री नाई खींच ताननै अपणै ही नास रौ कारण बणावै है। इण वास्तै हे म्हारै प्यारौ भाइयो, थै लोग पैला ही ऊं इण बातां नै जांणनै सावचेत रैवौ, ताकी अधरमियों रै भरम में फसने अपणी स्थिरता नै हाथ ऊं कठैई खौ नीं दो। पण म्हौरै परभु, अर उद्धारकर्ता यीसु मसीह रै अनुग्रह अर पिछांण मे बढ़ता रैवौ। उणरी महिमा अबै भी हो, अर युगानयुग होती रैवै। आमीन। उण जीवन रै वचन रै बारै में जिकौ सरूआत ऊं हो, जिणनै म्हौ सुण्यौ, अर जिणनै अपणी आंख्यां ऊं देख्यौ, जिणनै म्हौ ध्यांन ऊं देख्यौ अर हाथो ऊं छूयो, ओ जीवन परगट होयौ। अर म्हौ उणनै देख्यौ, अर उणरी गवाई देवो हो, अर थांनै उण अनत जीवन रौ समाचार देवो हो जिकौ पिता रै साथै हो अर म्हौ माथै परगट होयौ। जिकौ कीं म्हौ देख्यौ अर सुण्यौ, उणरौ समाचार थांनै भी देवूं हूं, इण वास्तै की थां भी म्हौरै साथै सहभागी होवो। अर म्हौरी आ सहभागिता पिता परमेसर रै साथै, अर उणरै बेटे मसीह रै साथै है। अर ऐ बातां म्हौ इण वास्तै लिखौ हो की म्हौरौ आंणंद पूरौ हो जावै। जिकौ समाचार म्हौ उण ऊं सुण्यौ अर थांनै सुणावौ हो, वो ओ है की परमेसर उजाळौ है अर उणमे कीं भी अंधारौ कोनीं। जे म्हौ कैवौ की उणरै साथै म्हौरी सहभागिता है अर पछै अंधारै में चालता रैवौ, तो म्हौ झूठा हो अर सचाई माथै कोनीं चालौ। पण जे ज्यौ वो उजाळै में है, व्यौंही म्हौ भी उजाळै में चालौ, तो एक-दूजै ऊं सहभागिता राखौ हो, अर परमेसर रै बेटे यीसु रौ लोई अपांनै सगळै पापों ऊं सुद्ध करै है। जे म्हौ कैवौ की म्हौ में कोई पाप कोनीं, तो अपणै आपनै धोखो देवो हो, अर म्हौरै में सचाई कोनीं है। जे म्हौ परमेसर रै सांमै म्हौरै पापों नै मांन लौ, तो वो म्हौरै पापों नै माफ करै ला अर म्हौरै सगळै अधरम ऊं सुद्ध करै ला, क्यूंकै वो विसवास लायक अर धरमी है। जे म्हौ कैवौ की म्हौ पाप कोनीं कियो, तो परमेसर नै झूठौ बणावौ हो, अर उणरौ वचन म्हौरै में कोनीं है। हे म्हारै प्यारै टाबरौ, ऐ बातां म्हैं थांनै इण वास्तै लिख रियौ हूं की थै पाप नीं करौ। बल्कि जे कोई पाप करै, तो पिता रै खनै म्हौरौ एक मददगार है, मतलब धरमी यीसु मसीह। वो म्हौरै पापों रै प्रायसित रै लियै बलिदान होया, अर नीं कैवल म्हौरै पापों रै लियै, बल्कि सगळै जगत रै पापों रै लियै भी। जे म्हौ उणरी आग्याओं नै मांनौला, तो उण ऊं म्हौ जांण जावोला की म्हौ उणनै जांण लियौ है। जिकौ कोई ओ कैवै है, “म्हैं उणनै जांण गियौ हूं,” अर उणरी आग्याओं नै कोनीं मांनै, वो झूठौ है अर उणमे सचाई कोनीं। पण जिकौ कोई उणरै वचन माथै चालै, उणमे साचांणी परमेसर रौ परैम सिद्ध होयौ है। म्हौ नै इणी ऊं मालूम होवै है, की म्हौ उण में हो। जिकौ कोई ओ कैवै है की म्हैं परमेसर मे बण्यौ रैवूं हूं, उणनै चाहीजै की आप भी वैड़ौ ही चालै जैड़ौ यीसु चालै है। हे प्यारौ, म्हैं थांनै कोई नई आग्या कोनीं लिखूं, बल्कि वोहीज पुराणी आग्या जिकौ सरूआत ऊं थांनै मिळी है। आ पुराणी आग्या वो वचन है जिणनै थै सुण चुकया हो। वळै म्हैं थांनै नई आग्या लिखूं हूं, अर आ तो मसीह मे अर थौरे मे साची ठैरै है, क्यूंकै अंधारौ मिटतो जावै है अर सचाई रौ उजाळौ अबै चमकन लागौ है। जिकौ कोई ओ कैवै है, “म्हैं उजाळै मे हूं” अर विसवासी भाई ऊं बैर राखै है, तो वो अजी तांई अंधारै मे ही है। जिकौ कोई अपणै विसवासी भाई ऊं परैम राखै है वो उजाळै मे रैवै है, अर ठोकर नीं खा सकै। बल्कि जिकौ कोई आपरै विसवासी भाई ऊं बैर राखै है वो अंधारै मे है अर अंधारै मे चालै है, अर नीं जांणै की कठै जावै है, क्यूंकै अंधारै नै उणरी आंख्यां आंधी कर दी है। हे प्यारै टाबरौ, म्हैं थांनै इण वास्तै लिख रियौ हूं की यीसु मसीह रै नाम ऊं थौरा पाप माफ होया। हे बुढ़ियों, म्हैं थांनै इण वास्तै लिखूं हूं की जिकौ सरूआत ऊं है थै उण परमेसर नै जांणौ हो। हे जवानो, म्हैं थांनै इण वास्तै लिखूं हूं की थै सैतान माथै जय पाई है। हे टाबरौ, म्हैं थांनै इण वास्तै लिखूं हूं की थै पिता परमेसर नै जांण गिया हो। हे बुढ़ियों, म्हैं थांनै इण वास्तै लिख्यौ है की जिकौ सरूआत ऊं है थै उण परमेसर नै जांण गिया हो। हे जवानो, म्हैं थांनै इण वास्तै लिख्यौ है की थै ताकतवर हो, अर परमेसर रौ वचन थौरे में बण्यौ रैवै है, अर थै सैतान माथै जय पाई है। थै नीं तो संसार ऊं अर नीं संसार री किणी चीजों ऊं परैम राखौ। जे कोई संसार ऊं परैम राखै है, तो उणमे पिता परमेसर रौ परैम कोनीं है। क्यूंकै जिकौ कीं संसार में है, मतलब सरीर री इछाओ, अर आंख्यां री इछाओ अर जीविका रौ घंमड, वो पिता परमेसर री तरफ ऊं कोनीं पण संसार री तरफ ऊं ही है। संसार अर उणरी इछाओ दोनूं मिटती जावै है, बल्कि जिकौ परमेसर री इछा ऊपर चालै है, वो हमेसां बण्यौ रैला। हे प्यारै टाबरौ, ओ वगत आखरी है, अर जैड़ौ थै सुण्यौ हो, की मसीह विरोधी आवणवाळौ है, उणरै अनुसार अबार भी घणा मसीह विरोधी तैयार होया है, इण ऊं म्हौ जांणौ है की ओ आखरी वगत है। मसीह विरोधी म्हौरै में ऊं निकळिया है, बल्कि वास्तव में वे म्हौरा कोनीं है, क्यूंकै जे वे म्हौरा होता तो म्हौरै साथै ही रैवता। बल्कि वे म्हौ नै छोड़नै गिया ताकी वे दिखा सकै की उणमे ऊं कोई भी वास्तव में म्हौरौ कोनीं है। पण थौरो तो उण पवितर आतमा ऊं अभिसेक होयौ है, अर थै सगळौ कीं जांणौ हो। म्हैं थांनै इण वास्तै कोनीं लिख्यौ है की थै सचाई नै कोनीं जांणौ, बल्कि थै तो उणनै जांणौ हो अर इण वास्तै भी की सचाई ऊं कोई झूठ कोनीं निकळै। झूठौ कुण है? कैवल वो जिकौ यीसु रै मसीह होणै रौ मना करै है। मसीह विरोधी वोहीज है, जिकौ पिता परमेसर रौ अर बेटे रौ मना करै है। जिकौ कोई बेटे रौ मना करै है उणरै खनै पिता भी कोनीं। जिकौ बेटे नै मांन लेवे है, उणरै खनै पिता भी है। जिकौ कीं थै सरूआत ऊं सुण्यौ है, वोहीज थौरे मे बण्यौ रैवै। जिकौ थै सरूआत ऊं सुण्यौ है, जे वो थौरे मे बण्यौ रैवै, तो थै भी बेटे अर उणरै पिता परमेसर मे बण्या रौला। अर मसीह जिकौ म्हौरै ऊं वायदो कियो वो अनत जीवन है। म्हैं ऐ बातां थांनै उणरै बारै मे लिखी है, जिकौ थांनै भटकाना चावै है। पण थौरो वो अभिसेक जिकौ मसीह री तरफ ऊं कियोड़ौ, थौरे मे बण्यौ रैवै है। अर थांनै इणरी जरुरत कोनीं की कोई थांनै सिखाए, बल्कि ज्यौ वो अभिसेक जिकौ उणरी तरफ ऊं कियोड़ौ थांनै सगळी बातां सिखावै है। अर ओ साचौ है झूठौ कोनीं, अर ज्यौ उणै थांनै सिखाया है, थै मसीह मे व्यौंही बण्या रैवौ। इण वास्तै हे प्यारौ टाबरौ, मसीह मे बण्या रैवौ की जद वो परगट हो, तो म्हौ मे हीमत हो। अर उणरै सांमै म्हौ नै लजित नीं होणौ पड़ै। जे थै ओ जांणौ हो की मसीह धरमी है तो थै ओ भी जांण लौ की वो जिकौ धारमिकता माथै चालै है परमेसर री ही औळाद है। देखौ, पिता परमेसर नै म्हौरै ऊं कैड़ौ परैम कियो है की म्हौ उणरी औळाद कहीजौ, अर म्हौ हों भी। संसार म्हौ नै कोनीं जांणै, क्यूंकै संसार उणनै भी कोनीं जांण्यौ। हे प्यारै भाइयो, अबै म्हौ परमेसर री औळाद हो, अर अजी तांई ओ परगट कोनीं होयौ, की म्हौ कांई कीं होवोला। इतौ जांणौ हो, की जद मसीह परगट होवैला तो म्हौ भी उणरै जैड़ा होवोला। क्यूंकै म्हौ उणनै वैड़ौ इज देखोला जैड़ौ वो है। अर जिकौ कोई मसीह माथै आ आसा राखै है, वो अपणै आप नै वैड़ौ इज पवितर करै है जैड़ौ वो पवितर है। जिकौ कोई पाप करै है, वो परमेसर रै कायदे नै तोड़े है क्यूंकै कायदे नै तोड़नो इज पाप है। थै तो जांणौ ही हो की मसीह म्हौरै पापों नै दूर करनै रै लियै परगट होया अर ओ भी, की उणमे कोई पाप कोनीं है। जिकौ कोई मसीह मे बण्यौ रैवै है, वो पाप कोनीं करता रैवै। जिकौ कोई पाप करता रैवै है, उणनै नीं तो उणरौ दरसण किया है अर नीं उणनै जांणै है। हे प्यारै टाबरौ, किणी रै भटकाने मे नीं आवणौ। जिकौ धरम रा कांम करै है, वोहीज मसीह रै ज्यूं धरमी है। जिकौ कोई पाप करतौ रैवै है वो सैतान री तरफ ऊं है, क्यूंकै सैतान सरूआत ऊं ही पाप करतौ आयौ है। परमेसर रौ बेटौ इण वास्तै परगट होयौ की सैतान रै कांमां नै नास करै। जिकौ कोई परमेसर ऊं जनमियौ है वो पाप कोनीं करतौ रैवै, क्यूंकै परमेसर रौ जीवन उणमे बण्यौ रैवै है, अर वो पाप करतौ नीं रैह सकै क्यूंकै परमेसर ऊं जनमियौ है। इण ऊं परमेसर री औळाद अर सैतान री औळाद जांण्या जावै है। जिकौ कोई धरम रा कांम कोनीं करै वो परमेसर ऊं कोनीं, अर वो भी कोनीं जिकौ आपरै भाई ऊं परैम कोनीं राखै। जिकौ समाचार थै सरूआत ऊं सुण्यौ, वो ओ है की एक दूजै ऊं परैम राखौ। कैन रै ज्यूं नीं बणौ, जिकौ उण सैतान ऊं हो, अर जिणै आपरै भाई नै घात कियो। अर उणनै कीण खातर घात कियो? इण खातर की उणरा कांम भूंडा हा, अर उणरै भाई रा कांम धरम रा हा। हे विसवासी भाइयो, जे संसार थौरे ऊं बैर करै है तो अचूम्बो नीं करौ। म्हौ जांणौ हो, की म्हौ मौत नै पार होयनै जीवन मे पूगा हो, क्यूंकै म्हौ विसवासी भाइयो ऊं परैम राखौ हो। जिकौ परैम कोनीं राखै, वो मौत री दसा मे रैवै है। जिकौ कोई अपणै भाई ऊं बैर राखै है, वो हत्यारो है। अर थै जांणौ हो, की किणी हत्यारे में अनत जीवन कोनीं रैवै। यीसु मसीह नै म्हौरै लियै आपरौ जीवन त्याग दियौ। इण ऊं म्हौ जांणौ हो की परैम कांई है। म्हौ नै भी अपणै भाइयो रै लियै अपणौ प्रांण दैणै रै लियै तैयार रैणौ चाहीजै। बल्कि जिण किणी रै खनै संसार री जायदाद हो अर वो आपरै भाई नै कंगाल देखनै उण माथै तरस नीं खावै, तो उणमे परमेसर रौ परैम कीकर बण्यौ रै सकै है? हे प्यारै टाबरौ, म्हौ वचन अर जीभ ऊं इज कोनीं, बल्कि कांम अर सचाई रै जरियै भी परैम करै। इण ऊं म्हौ जांणौला की म्हौ सचाई रा हो। अर म्हौ नै परमेसर रै सांमै ऊभा रैणै री हीमत होवैला। जे म्हौरौ मन म्हौ माथै दोस लगावै है तो, म्हौ जांणौ हो की परमेसर म्हौरै मन ऊं मोटो है, अर सगळौ कीं जांणै है। हे प्यारै भाइयो, जे म्हौरौ मन म्हौ नै दोस नीं दे, तो म्हौ नै परमेसर रै सांमै तसली होवै है। अर जिकौ कीं म्हौ मांगो हो, वो म्हौ नै उण ऊं मिळै है। क्यूंकै म्हौ उणरी आग्याओं नै मांनौ हो, अर जिकौ उणनै भावै है वोहीज करौ हो। अर उणरी आग्या आ है की म्हौ उणरै बेटे यीसु मसीह रै सामरथी नाम माथै विसवास करै अर जैड़ी उणै म्हौ नै आग्या दी है उणरै अनुसार आपस मे परैम राखै। अर जिकौ परमेसर री आग्याओं नै मांनै है, वो परमेसर मे, अर परमेसर उण मे बण्यौ रैवै है। अर इण ऊं, मतलब उण आतमा ऊं जिकौ परमेसर म्हौ नै दीनी है, म्हौ जांणौ हो की परमेसर म्हौरै में बण्यौ रैवै है। हे प्यारै भाइयो, हरैक आतमा रौ विसवास मती करौ, बल्कि आतमाओ नै परखो की वो परमेसर री तरफ ऊं है की कोनीं, क्यूंकै घणाहारा झूठा भविसयदाता जगत में आया है। परमेसर री आतमा थै इण रीत ऊं पिछांण सकौ हो, की जिकौ कोई मांन लेवे है की यीसु मसीह सरीर में होयनै आया है वो परमेसर री तरफ ऊं है। अर जिकौ कोई यीसु नै नीं मांनै, वो परमेसर री तरफ ऊं कोनीं। अर वो मसीह विरोधी आतमा है, जिणरी चरचा थै सुण चुकया हो की वो आवणवाळौ है, अर अबार भी जगत में है। हे प्यारै टाबरौ, थै परमेसर रा हो। इण वास्तै थै मसीह रै दुसमनो ऊपर जीत हासल की है, क्यूंकै वो परमेसर जिकौ थौरे में है, संसार में रैवणवाळै सैतान ऊं मोटो है। वे मसीह विरोधी लोग सांसारिक है। इण वास्तै वे जिकौ कीं बोले है, वो सांसारिक है अर संसार ही उणौरी सुणै है। म्हौ परमेसर रा हो। इण वास्तै जिकौ परमेसर नै जांणै है, वो म्हौरी सुणै है। इण तरैह ऊं म्हौ सचाई री आतमा नै अर लोगां नै भटकानेवाळी आतमा नै पिछांण सकौ हो। हे प्यारै भाइयो, म्हौ आपस में परैम राखौ, क्यूंकै परैम परमेसर ऊं मिळै है। जिकौ कोई परैम करै है, वो परमेसर री औळाद है अर परमेसर नै जांणै है। जिकौ परैम नीं राखै, वो परमेसर नै कोनीं जांणै है, क्यूंकै परमेसर ही परैम है। परमेसर आपरौ परैम इण तरैह दिखायौ है की उणै आपरै एकाएक बेटे नै इण संसार में भेज्यौ जिण ऊं की म्हौ उणरै बेटे रै जरियै अनत जीवन हासल कर सकौ। साचौ परैम इण में कोनीं की म्हौ परमेसर ऊं परैम कियो, बल्कि इण में है की उणै म्हौरै ऊं परैम कियो, अर म्हौरै पापों रै उद्धार रै वास्तै आपरै बेटे नै बलिदान रै लियै भेज्यौ। हे प्यारै भाइयो, जद परमेसर नै म्हौरै ऊं ऐड़ौ परैम कियो, तो म्हौ नै भी आपस में परैम राखणौ चाहीजै। परमेसर नै कदैई किणी कोनीं देख्यौ। जे म्हौ आपस में परैम राखौ, तो परमेसर म्हौ में बण्यौ रैवै है, अर उणरौ परैम म्हौ में पूरौ हो गियौ है। इण ऊं म्हौ जांणौ हो की म्हौ उणमे बण्या रैवौ हो, अर वो म्हौ में, क्यूंकै उणै आपरी आतमा म्हौ नै दी है। म्हौ देख लियौ अर गवाई भी देवो हो, की पिता परमेसर अपणै बेटे नै जगत रौ उद्धारकर्ता करनै भेज्यौ है। जिकौ कोई ओ मांन लेवे है की, “यीसु परमेसर रौ बेटौ है,” परमेसर उणमे बण्यौ रैवै है, अर वो परमेसर में। जिकौ परैम परमेसर म्हौ ऊं राखै है, उणनै म्हौ जांण गिया अर उणरौ विसवास भी कियो है। परमेसर परैम है, अर जिकौ परैम में बण्यौ रैवै है वो परमेसर में बण्यौ रैवै है, अर परमेसर उणमे बण्यौ रैवै है। इण ऊं परैम म्हौ मे सिद्ध होयौ ताकी न्याव रै दिन म्हौ नै विसवास बण्यौ रैवै, क्यूंकै जैड़ौ मसीह है, वैड़ा संसार में म्हौ भी हो। परैम मे भय कोनीं होवै, बल्कि सिद्ध परैम भय नै दूर कर दैवै है। क्यूंकै भय रौ संबंध डंड ऊं होवै है, अर जिकौ भय करै है वो परैम में सिद्ध कोनीं होया। म्हौ इण वास्तै परैम करौ हो, की पैला उणै म्हौरै ऊं परैम कियो। जे कोई कैवै, “म्हैं परमेसर ऊं परैम राखूं हूं,” अर आपरै भाई ऊं बैर राखै तो वो झूठौ है। क्यूंकै जिकौ आपरै भाई ऊं जिणनै उणै देख्यौ है परैम कोनीं राखै, तो वो परमेसर ऊं भी जिणनै उणै नीं देख्यौ उण ऊं परैम कोनीं राख सकै। मसीह ऊं म्हौ नै आ आग्या मिळी है, की जिकौ कोई परमेसर ऊं परैम राखै है, वो आपरै भाई ऊं भी परैम राखै। जिणरौ ओ विसवास है की यीसु ही मसीह है, वो परमेसर ऊं पैदा होयौ है। अर जिकौ कोई परमेसर ऊं परैम राखै है, वो उण ऊं भी परैम राखै है, जिकौ उण ऊं पैदा होयौ है। जद म्हौ परमेसर ऊं परैम राखौ हो, अर उणरी आग्याओं नै मांनौ हो, तो इण ऊं म्हौ जांणौ हो की म्हौ परमेसर री औळादों ऊं परैम राखौ हो। क्यूंकै परमेसर ऊं परैम राखणौ ओ है की म्हौ उणरी आग्याओं नै मांनौ। अर उणरी आग्याओं कठोर कोनीं है। क्यूंकै जिकौ कोई परमेसर ऊं पैदा होया है, वो संसार ऊपर जीत हासल करै है। अर वो जीत जिण ऊं संसार माथै जीत हासल होवै है वो है म्हौरौ विसवास। जिकौ ओ विसवास करै है की यीसु परमेसर रौ बेटौ है, वोहीज संसार माथै जीत हासल करै है। वो यीसु मसीह है जिकौ म्हौरै लियै बतिस्मे रौ पांणी अर सूली माथै बहाए लोई रै जरियै परगट होया। वो नीं सिरफ पांणी रै जरियै बल्कि पांणी अर लोई दोनूं रै जरियै आयौ हो। अर जिकौ गवाई दैवै है, वो आतमा है, क्यूंकै आतमा साची है। अर गवाई देवणवाळा तीन है। वो आतमा, पांणी अर लोई है। अर तीनो एक ही बात मे सहमत है। जद म्हौ मिनखौ री गवाई मांन लैवौ हो, तो परमेसर री गवाई तो उण ऊं बढ़न है। अर परमेसर री गवाई आ है, की उणै आपरै बेटे रै बारै मे गवाई दी है। जिकौ परमेसर रै बेटे माथै विसवास करै है वो आपरै में ही गवाई राखै है। जिणै परमेसर माथै विसवास कोनीं कियो उणै उणनै झूठौ ठैरायौ, क्यूंकै उणै उण गवाई माथै विसवास कोनीं कियो जिकौ परमेसर आपरै बेटे रै बारै मे दी है। अर वो गवाई आ है की परमेसर म्हौ नै अनत जीवन दियौ है, अर ओ जीवन उणरै बेटे में है। जिणरै खनै बेटौ है, उणरै खनै अनत जीवन है। अर जिणरै खनै परमेसर रौ बेटौ कोनीं, उणरै खनै अनत जीवन भी कोनीं है। म्हैं थांनै, जिकौ परमेसर रै बेटे रै नाम माथै विसवास करौ हो, इण वास्तै लिख्यौ है की, थै जांणौ की अनत जीवन थौरो है। म्हौरौ परमेसर मे ओ विसवास है की जे म्हौ उणरी इछा रै अनुसार मांगो तो, वो म्हौरी सुणै है। जद म्हौ जांणौ हो की जिकौ कीं म्हौ उण ऊं मांगो वो म्हांरी सुणै है, तो ओ भी जांणौ हो की जिकौ कीं म्हौ उण ऊं मांगो, वो पाओ भी हो। जे कोई अपणै भाई नै ऐड़ौ पाप करते देखे जिणरौ फळ मौत नीं हो, तो विनती करै, अर परमेसर उणै उणरै लियै, जिणौ ऐड़ौ पाप कियो है जिणरौ फळ मौत नीं हो, जीवन दैला। पाप ऐड़ौ भी होवै है जिणरौ फळ मौत है, इणरै बारै मे म्हैं विनती करनै रै लियै कोनीं कहूं। सगळा भूंडा कांम पाप है, पण ऐड़ौ पाप भी है जिणरौ फळ अनत मौत कोनीं है। म्हौ जांणौ हो की जिकौ कोई परमेसर री औळाद बणग्यौ, वो पाप कोनीं करतौ रैवै। बल्कि परमेसर रौ बेटौ उणौ नै बचाए राखै है। अर सैतान उणरौ कीं कोनीं बिगाड़ सकै। म्हौ जांणौ हो की म्हौ परमेसर ऊं हो, अर सगळौ संसार उण सैतान रै वस में पड़ियौ है। म्हौ ओ भी जांणौ हो की परमेसर रौ बेटौ आ गियौ है अर उणै म्हौ नै समझ दी है की म्हौ उण साचै नै पिछांणौ। अर म्हौ उणमे जिकौ सचाई है, मतलब उणरै बेटे यीसु मसीह में रैवै है। साचौ परमेसर अर अनत जीवन ओहीज है। हे टाबरौ, अपणै आप नै मूरतो ऊं बचाए राखौ। आ चिठ्ठी कलीसिया रौ अगुवो म्हैं यूहन्‍ना, री तरफ ऊं उण चुणयोड़ी बेन अर उणरै टाबरौ रै नाम, जिण ऊं म्हैं साचौ परैम राखूं हूं, अर सिरफ म्हैं इज कोनीं बल्कि वे सगळा भी परैम राखै है जिकौ सचाई नै जांणै है। वो सचाई जिकौ म्हौ में रैवास करै है, अर हमेसां म्हौरै साथै बणी रैवैला। परमेसर पिता, अर उणरौ बेटौ यीसु मसीह री तरफ ऊं करपा अर दया अर सानति, सचाई अर परैम समेत म्हौरै साथै रैवैला। म्हैं घणौ खुस होयौ की म्हैं थारै कीं टाबरौ नै आग्या रै अनुसार, जिकौ म्हौ नै पिता री तरफ ऊं मिळी ही, उण सचाई माथै चालता देख्यां। अबार हे बेन, म्हैं थांनै कोई नई आग्या कोनीं, बल्कि वोहीज जिकौ सरूआत ऊं म्हौरै खनै है, लिखूं हूं। अर थारै ऊं अरज करूं हूं की म्हौ एक दूजै ऊं परैम राखौ। अर परैम ओ है की म्हौ उणरी आग्याओं ऊपर चालै। आ वोहीज आग्या है जिकौ थै सरूआत ऊं सुणी है, अर थांनै इण माथै चालणौ भी चाहीजै। घणा ऐड़ा भरमानेवाळा जगत में निकळ आया है, जिकौ ओ कोनीं मांनै की यीसु मसीह सरीर मे होयनै आया, भरमानेवाळा अर मसीह विरोधी ऐ इज है। अपणै बारै में सावचेत रैवौ, की जिकौ मेनत म्हौ किनी है उणनै थै गुमा नीं दो, बल्कि उणरौ पूरौ फळ पाओ। जिकौ कोई मसीह री सिकसा ऊं आगै बढ़ जावै है अर उणमे बण्यौ नीं रैवै, उणरै खनै परमेसर कोनीं। जिकौ कोई उणरी सिकसा में बण्यौ रैवै है, उणरै खनै पिता भी है अर बेटौ भी है। जे कोई थौरे खनै आवै अर आ सिकसा नीं दैवै, उणनै नीं तो घर में आवण दो अर नीं नमस्कार करौ। क्यूंकै जिकौ कोई ऐड़ै मिनख रौ आदर भाव करै है, वो उणरै भूंडै कांमां मे भागीदार होवै है। म्हनै घणी बातां थांनै लिखणी है, जद की कागद अर स्याही ऊं लिखणौ कोनीं चावूं, बल्कि आसा है की म्हैं थौरे खनै आऊंला अर खनै बैठनै बातचीत करूंला, जिण ऊं म्हौरौ आंणंद पूरौ हो। थारी बेन रा बेटा बेटियां जिणनै भी परमेसर चुणया है, थनै नमस्कार कैवै है। आ चिठ्ठी कलीसिया रौ अगुवो म्हैं यूहन्‍ना री तरफ ऊं प्यारै भाई गयुस रै नाम, जिण ऊं म्हैं साचौ परैम राखूं हूं। हे प्यारै भाई, म्हारी आ पराथना है की ज्यौ थूं आत्मिक बढ़ोतरी कर रियौ है, व्यौंही थूं सगळी बातां मे बढ़ोतरी करै अर चंगो भलौ रैवै। क्यूंकै जद कईक विसवासी भाइयो नै आयनै थारै उण सचाई री गवाई दी, जिण हकीगत माथै थूं चालै है, तो म्हैं घणौ ही खुस होयौ। म्हनै इण ऊं बढ़नै और कोई आंणंद कोनीं की म्हैं सुणूं, की म्हारा टाबर सचाई माथै चालै है। हे प्यारै भाई, बड़िया है की थूं विसवासी भाइयो री मदद करै है। थूं उण विसवासी भाइयो री भी मदद करै है, जिकौ परदेसी है। उणौनै कलीसिया रै सांमै थारै परैम री गवाई दीनी है। जे थूं उणौनै उण तरैह विदा करैला जिण तरैह परमेसर रै लोगां रै लियै वाजिब है तो बड़िया करैला। क्यूंकै वे मसीह नाम रै लियै निकळिया है, अर अविसवासी लोगां ऊं कीं मदद कोनीं लेवे। इण वास्तै ऐड़ौ री मदद करणी चाहीजै, ताकी म्हौ भी सचाई री सेवा री घोसणा मे सहयोगी बण सकौ। म्हैं कलीसिया नै एक चिठ्ठी लिखी ही, बल्कि दियुत्रिफेस जिकौ उणमे अगुवो बणणौ चावै हो, वो म्हौरी बातां नै स्वीकार कोनीं करै। इण वास्तै जद म्हैं आऊंला तो उणरै कांमां रौ जिकौ वो कर रियौ है, याद दिलाऊंला, की वो म्हौरै बारै मे भूंडी भूंडी बातां बक रियौ है। उणरै लियै ओहीज काफी नीं है। क्यूंकै वो भाइयो नै स्वीकार कोनीं करै अर उणौनै जिकौ स्वीकार करणै चावै है मना करै है अर कलीसिया ऊं निकाळ दैवै है। हे प्यारै भाई, भूंडाई रै नीं बल्कि भलाई रौ अनुकरण करौ। जिकौ भलाई करै है, वो परमेसर री तरफ ऊं है, बल्कि जिकौ भूंडाई करै है, उणै परमेसर नै कोनीं देख्यौ। दिमेत्रियुस रै बारै मे सगळौ नै बड़िया गवाई दी है, अर वो साची भी है। अर म्हौ भी गवाई देवो हो, अर थूं जांणै है की म्हौरी गवाई साची है। म्हैं थनै लिखणौ तो घणौ कीं हो, बल्कि स्याही अर पेन ऊं लिखणौ कोनीं चावूं। पर म्हनै आसा है की थारै ऊं जल्दी मिळूंला, तद म्हौ खनै बैठनै बातचीत करौला। सानति थनै मिळती रैवै। एठै रा दोसत थनै नमस्कार कैवै है। उठै रा हरैक दोसतो ऊं नाम ले लैयनै नमस्कार कैह दैणौ। आ चिठ्ठी यहूदा री तरफ ऊं जिकौ यीसु मसीह रौ दास अर याकूब रौ भाई है, उण बुलायोड़ो रै नाम लिख रियौ हूं जिणौ ऊं परमेसर पिता परैम करै अर यीसु मसीह रै लियै संभाल नै राख्या गिया है। थांनै दया अर सानति अर परैम घणौहारौ मिळतौ रैवै। हे प्रियो, म्हैं थांनै उण उद्धार रै बारै में लिखनै री घणी मेनत ऊं कोसीस कर रियौ हो, जिणमे म्हौ सगळा साथै हा, पण म्हैं थांनै ओ समझाणौ जरुरी जांण्यौ की उण विसवास रै लियै पूरी कोसीस करौ जिकौ परमेसर रा पवितर लोगां नै एक इज बार सौपयो गियौ हो। क्यूंकै किता ऐड़ा मिनख छांनै ऊं थौरे मांय आयनै मिळिया है, जिणरै इण डंड रौ वरणन पुराणै वगत में पैला ही ऊं लिख्योड़ौ हो। ऐ बिना भगती रा है, अर म्हौरै परमेसर रै करपा नै लुचाई रौ पटो मांन लियौ है, अर म्हौरै एकाएक मालिक परभु यीसु मसीह रौ इन्कार करै है। थां सगळी बात जांण चुका हो, तौभी म्हैं थांनै इण बात री याद दिलाणी चावूं हूं की परभु एक कुळ नै मिसर देस ऊं छुड़ायनै रै पछै उणमे विसवास नीं करणै वाळौ नै नास कर दिया हा। म्हैं थांनै ओ भी याद दिलाणौ चावूं की जिकौ सरगदूतो नै अपणै पद नै बणाए नीं राख्यौ बल्कि आपरै निज रैवास नै छोड़ दियौ, परमेसर उणनै भी उण भीसण दिन रै न्याव रै लियै अंधारै में, जिकौ हमेसां काल रै लियै है, जंजीरौ में राख्यौ है। इण रै ज्यूं ऊं सदोम अर अमोरा अर उणरै आजू-बाजू रै नगर, व्यभिचारी हो गिया हा अर बुराई रै मारग में चाल रिया हा, अग्‍नि रै अनत डंड में पड़ नै वे म्हौरै लिए उदाहरण ठैरया है। ठीक उणीज रीति ऊं किता ऐड़ा मिनख छांनै ऊं थौरे मांय आयनै मिळग्या है जिकौ अपणै भूंडा सपनो रै लारै चालनै अपणै अपणै सरीर नै असुद्ध करै, अर सामरथ नै कीं नीं जांणै है अर ऊंचै पदवाळौ नै भला-भूंडा कैवै है। पण परधान सरगदूत मीकाइल तांई नै, जद सैतान ऊं मूसा रै लास रै बारै में बहस कर रियौ हो, तो उणनै भळौ-भूंडौ कैह नै दोस लगाने री भी हीमत कोनीं की, पण उणै ओहीज कयौ, “परभु थनै डाटे-फटकारे।” पण ऐ लोग जिण बातां नै नीं जांणै उणनै भळौ-भूंडौ कैवै है। अर जिण बातां नै अणचेत पसु रै ज्यूं स्वभाव ऊं जांणै है, उणमे अपणै आप नै नास करै है। उण ऊपर हाय! क्यूंकै वे कैन रै ज्यूं चाल चलै, अर मजूरी रै लियै बिलाम रै ज्यूं भीस्ट हो गियौ है, अर कोरह रै ज्यूं विरोध करनै नास होया है। ऐ मतलबी लोग थौरी परैम सभाओं में थौरे साथै खावै-पीवै। वे नुकसानदायक है ज्यूं समंदर में छुपयोड़ी चटान है। वे सिरफ आपरौ ही पेट भरनेवाळा रखवाळा है। वे बिना पांणी रा बादळ है, जिणनै हवा उडायनै ले जावै है। ऐ पतझड़ रै बिना फळ रा रूंखड़ा है, जिकौ दो बार मर चुकया है, अर जड़ ऊं उखड़ गिया है। ऐ समंदर री ऐड़ी भयंकर लेहरौ है, जिकौ आपरी लाज रा झाग उछाळै है। ऐ एठै-उठै भटकता ऐड़ा तारा है, जिणरै लियै युगानयुग घोर अंधारौ राख्योड़ौ है। हनोक ही जिकौ आदम रै सातवी पीढ़ी में हो, इणरै बारै में आ भविसयवांणी की, “देखौ, परभु आपरै हजारो पवितरो रै साथै आया, की सगळौ रौ न्याव करै, अर सगळै विधरमियों नै जिता भूंडा कांम रै बारै में, जिकौ विधरमी पापियो नै परभु रै विरोध में कही है, परभु उण सगळी बातां रै लियै उणौनै दोसी ठैरावैला।” ऐ लोग तो हमेसां खोट निकाळनै वाळा, कुड़कुड़ानेवाळा, अर आपरी इछाओ रै अनुसार चालनैवाळा है, अर अपणै मूंडै ऊं घंमड री बातां बोले है, अर वे फायदे रै लियै मूंडौ देखनै सौभा किया करै है। पण हे प्रियो, थै उण बातां नै याद राखौ जिकौ म्हौरै परभु यीसु मसीह रै प्रेरित पैला इज कैह चुकया है। वे थांरै ऊं कैवता हा, “आखरी दिनां में ऐड़ा मजाक करनै वाळा होवैला, जिकौ अपणी बुरी इछाओ रै अनुसार चलै ला।” ऐ तो वो है, जिकौ फूट डाले है। ऐ सांसारिक लोग है, जिणमे पवितर आतमा कोनीं। पण हे प्रियो, थै अपणै पवितर विसवास में मजबुत होता रौ अर पवितर आतमा में पराथना करता होया, अपणै आप नै परमेसर रै परैम में बणाए राखौ। अर अनत जीवन रै लियै म्हौरै परभु यीसु मसीह री दया री बाट जोहता रौ। जिकौ डावाडोल है उण माथै दया करौ। और दूजौ नै अग्‍नि मांय ऊं झपटनै निकाळौ। और उणौ माथै दया करते वगत सावचेत रैवौ, पण उणरै कपड़ो तांई भी घिरणा करौ जिकौ वासना ऊं भूंडा होय गिया है। अबै परमेसर जिकौ थांनै ठोकर खाणै ऊं बचा सकै है, अर अपणी महिमा री भरपुरी रै सांमै मगन अर निरदोस करनै ऊभा कर सकै है। उण एकाएक परमेसर म्हौरै मुगतिदाता री महिमा, गौरव, पराक्रम, अर राज मसीह यीसु, म्हौरै परभु रै जरियै ज्यूं सनातन काल ऊं ही, अबार है अर युगानयुग बणी रैवै। आमीन। आ यीसु मसीह रै दरसण री किताब है, जिकौ उणनै परमेसर इण वास्तै दी की आपरै दासो नै वो बातां, जिणरौ हाथोहाथ होणौ जरुरी है, दिखावै। अर यीसु आपरै सरगदूत नै भेजनै उणरै जरियै आपरै दास यूहन्‍ना नै बताई, जिणै परमेसर रै वचन अर यीसु मसीह री गवाई, अरथ जे कीं उणै देख्यौ हो उणरी गवाई दीनी। धन्य है वो जिकौ इण भविसयवांणी रै वचन नै पढ़े है, अर वे जिकौ सुणै है अर इणमे लिख्योड़ी बातां नै मांनै है, क्यूंकै वगत नैड़ौ आयग्यौ है। यूहन्‍ना री तरफ ऊं आसिया री सात कलीसियाओ रै नाम। उणरी तरफ ऊं जिकौ है, अर जिकौ हा, अर जिकौ आवणवाळा है। अर उण सात आतमाओ री तरफ ऊं, जिकौ उणरै सिंहासण रै सांम्ही है। अर यीसु मसीह री तरफ ऊं, जिकौ विसवास लायक गवाई अर मरयोड़ौ मांय ऊं जी उठनैवाळौ मे पहिलौठो, अर धरती रै राजाओ रौ हाकिम है, थांनै अनुग्रह अर सानति मिळती रै। जिकौ म्हौरै ऊं परैम राखै है, अर जिणै आपरै लोई रै जरियै अपांनै पापों ऊं छुड़ाया है। अर म्हौ नै एक राज अर उणरौ पिता परमेसर रै लियै याजक ही बणा दिया। उणरी महिमा अर ताकत जुग जुग होती रै। आमीन। सुणौ, वो बादळो रै साथै आवणवाळौ है। अर हरैक आंख उणनै देखेला, बल्कि जिणौ उणनै बिंधियों है, वे भी उणनै देखेला, अर धरती रा सगळा कुळ उणरै खातर छाती पीटेला। हां। आमीन। परभु परमेसर जिकौ है, अर जिकौ हा, अर जिकौ आवण वाळौ है, जिकौ सबां ऊं ताकतवर है, ओ कैवै है, “म्हैं ही अल्फा अर ओमेगा हूं।” म्हैं यूहन्‍ना, जिकौ थौरो भाई अर यीसु रै दुख, अर राज, अर धीरज में थौरे साथै हूं, परमेसर रै वचन, अर यीसु री गवाई रै कारण पतमुस नाम रै टापू में भेज्यौ गियौ। म्हैं परभु रै दिन पवितर आतमा में आ ग्या, अर म्हारै लारै तुरही ज्यूं जोर ऊं ओ सबद कैवतै सुण्यौ, “जिकौ कांई थूं देखे है वांनै पोथी मे लिखनै सातों कलीसियाओ रै खनै भेज दे, ज्यूं इफिसुस, अर स्मुरना, अर पिरगमुन, अर थुआतीरा, अर सरदीस, अर फिलदिलफिया, अर लौदीकिया नै।” अर म्हैं उणनै जिकौ म्हारै ऊं बोल रियौ हो, देखणै रै लियै म्हारौ मूंडौ फेरयो। अर लारै घूमनै म्हैं सोने रा सात दीया देख्यां, अर उण दीयौ रै बीच में मिनख रै बेटे सरीखे एक आदमी नै देख्यौ, जिकौ पगां तांई रा गाभा पैरयोड़ा, अर छाती ऊपर सोने रौ पटुको बांधयोड़ौ हो। उणरै माथा रा बाल बरफ री ज्यूं उजळा हा। अर उणरी आंख्यां अग्‍नि री लपटो री ज्यौ ही। अर उणरा पग उतम पीतळ रै जैड़ा हा जांणै भठी मे तपाया हो। अर उणरौ सबद घणै पांणी रै चालनै री आवाज रै जैड़ौ हो। अर वो आपरै जीमणै हाथ मे सात तारा लियोड़ा हा। अर उणरै मूंडै ऊं चौखी दोधारी तरवार निकळती ही। अर उणरौ मूंडौ ऐड़ौ चमकतौ हो, ज्यूं सूरज तड़कै री वैळा चमकै है। जद म्हैं उणनै देख्यौ, तो उणरै पगां में मरयोड़े जैड़ौ होयनै पड़ गियौ अर उणनै म्हारै माथै आपरौ जीमणौ हाथ राखनै ओ कयौ, “डर मती। म्हैं पैला अर आखरी हूं। म्हैं वोहीज ऊं जिणरै खनै जीवन है। पैला म्हैं मर ग्यौ हो, अर अबै देख म्हैं जुग जुग जीवतौ हूं। अर मौत अर अधोलोक री चाबियो म्हारै खनै इज है। इण वास्तै जिकौ बातां थै देखी है अर जिकौ बातां होय रीं है अर जिकौ बातां इणरै पछै होणवाळी है, उण सबां नै लिख दे। अरथावूं उण सात तारो रौ भेद जिणनै थै म्हारै जीमणै हाथ मे देख्यौ हो, अर उण सात सोने रै दीयौ रौ भेद, वे सात तारा सातों कलीसियाओ रा दूत है, अर वे सात दीया सात कलीसियाओ है।” “इफिसुस री कलीसिया रै दूत नै ओ लिख। जे सात तारा आपरै जीमणै हाथ मे लियोड़ा है, अर सोने रै सात दीयौ रै बीच मे फिरै है, वो ओहीज कैवै है की म्हैं थारै कांम, अर थारी मेनत, अर थारै धीरज नै जांणूं हूं। अर ओ भी की थूं भूंडै लोगां नै देख कोनीं सकै, अर जिकौ अपणै आप नै प्रेरित कैवै है, और है कोनीं, उणनै थै परख नै झूठा पाया। थूं धीरज राखै है, अर म्हारै नाम रै खातर दुख उठातौ उठातौ थाकयौ कोनीं। पण म्हनै थारै विरुद्ध ओ कैणौ है की थूं अपणौ पैला जैड़ौ परैम छोड़ दियौ है। इण वास्तै याद कर की थूं कठै ऊं पड़ियौ है, अर मन फिरा अर पैला रै ज्यूं कांम कर। जे थूं मन नीं फिरावैला, तो म्हैं थारै खनै आयनै थारै दीयां नै उणरी जगा ऊं आगौ ले लूं ला। पण हां, थारै मे आ बात तो है की थूं नीकुलइयों रै कांमां ऊं नफरत करै है, जिणसूं म्हैं ही नफरत करूं हूं। जिणरा कांन होवै वो सुण ले की आतमा कलीसियाओ ऊं कांई कैवै है। जिकौ जय पावै, म्हैं उणनै उण जीवन रै रूंखड़ै मे ऊं जिकौ परमेसर रै सरगलोक मांय है, फळ खाणै दूंला।” “स्मुरना री कलीसिया रै दूत नै ओ लिख। जिकौ पैला अर आखरी है, जिकौ मरग्यौ हो अर अबै जीवतौ होय गियौ है, वो ओ कैवै है की, म्हैं थारै दुख अर गरीबी नै जांणूं हूं, पण थूं साचांणी अमीर है। अर जिकौ लोग अपणै आप नै यहूदी कैवै है और है कोनीं, पण सैतान री सभा है, उणरी निंदा नै भी जांणूं हूं। जिकौ दुख थांनै झेलनो होई, उण ऊं मती डर। क्यूंकै देखौ, सैतान थौरे मांय ऊं कितौ नै जेळ में नोखणा चावै है ताकी थै परखा जाओ। अर थांनै दस दिन तांई तकलीफो उठाणी पड़ैला। मरण तांई विसवासी रै, तो म्हैं थनै जीवन रौ मुगट दूंला। जिणरा कांन होवै, वो सुण ले की आतमा कलीसियाओ ऊं कांई कैवै है। जिकौ जय पावै, उणनै दूजी मौत ऊं नुकसाण नीं होवैला।” “पिरगमुन री कलीसिया रै दूत नै ओ लिख। जिणरै खनै दोधारी अर तेज तरवार है, वो ओ कैवै है की, म्हैं ओ जांणूं हूं की थूं उठै रैवै है जठै सैतान रौ सिहासण है। थूं म्हारै नाम माथै स्थिर रैवै है, अर म्हारै ऊपर विसवास करनै ऊं उण दिनां मे ही लारै नीं सिरकयो जिणमे म्हारौ विसवास लायक गवाई अन्तिपास, थौरे बीच उण जगा माथै घात कियो जठै सैतान रैवतौ हो। पण म्हनै थारै विरुद्ध कीं बातां कैवणी है, क्यूंकै थारै एठै कीं ऐड़ा है, जिकौ बिलाम री सिकसा नै मांनै है, जिणनै बालाक नै इजरालियो रै आगै ठोकर रौ कारण राख नै सिखायौ की वे मूरतियो रै आगै चढ़ायोड़ी चीजों खावै अर व्यभिचार करै। व्यौंही थारै उठै केई ऐड़ा है, जिकौ नीकुलइयों री सिकसा नै मांनै है। अतस मन फिरा, नीं तो म्हैं थारै खनै जल्दी ही आयनै, अपणै मूंडै री तरवार ऊं उणरै साथै लड़ूला। जिणरा कांन होवै, वो सुण ले की आतमा कलीसियाओ ऊं कांई कैवै है। जिकौ जय पावै, उणनै म्हैं छांनै ऊं मन्‍ना म्हारै मांय ऊं दूंला, अर उणनै एक सफेद भाटो भी दूंला। अर उण भाटे माथै एक नवो नाम लिख्योड़ौ होवैला, जिणै उणरै पावण वाळै रै सिवाय और कोई नीं जांणैला।” “थुआतीरा री कलीसिया रै दूत नै ओ लिख। परमेसर रौ बेटौ जिणरी आंख्यां अग्‍नि री झाळ री ज्यूं, अर जिणरा पग उतम पीतळ रै ज्यूं है, वो ओ कैवै है की, म्हैं थारै कांमां, थारै परैम अर विसवास अर सेवा अर धीरज, नै जांणूं हूं अर ओ भी की थारा लारला कांम पैलौ ऊं अबै बढ़न है। पण म्हनै थारै विरुद्ध ओ कैवणौ है की थूं उण लुगाई इजेबेल नै रैवण दैवै है जिकौ अपणै आप नै भविसयदाती कैवै है, अर म्हारै दासो नै व्यभिचार करनै अर मूरतियो रै आगै चढ़ाई गी चीजों खाणै सिखाय नै भरमावै है। म्हैं उणनै मन फिराणै रै वास्तै मौकौ दियौ, पण वो अपणै व्यभिचार ऊं मन फिराणौ नीं चावती। सुण, म्हैं उणनै बीमारी री खाट ऊपर नांखू हूं। अर जिकौ उणरै साथै व्यभिचार करै है जे वे भी उणरै इण कांमां ऊं मन नीं फिरावैला तो म्हैं उणनै मोटी तकलीफ मे नांखूला। म्हैं उणरै टाबरां नै मार नांखूला। तो सगळी कलीसियाओ जांण ले ला की हीवड़ै अर मन नै परखणै वाळौ म्हैं इज हूं, अर म्हैं थौरे में ऊं हरैक नै उणरै कांमां रै अनुसार बदळा दूंला। पण थै थुआतीरा रै बाकी लोगां ऊं, जितरा इण सिकसा नै कोनीं मांनै, अर उण बातां नै जिणै सैतान री गेहरी बातां कैवै है कोनीं जांणै, ओ कैवै है, की म्हैं थारै माथै वळै बोझ नीं घालूं ला। पण हां, जिकौ थौरे खनै है उणनै म्हारै आवण तांई थामे रौ। जिकौ जीतैला, अर म्हारै कांमां रै अनुसार आखरी तांई करतौ रैवै, म्हैं उणनै जाति जाति रै लोगां ऊपर अधिकार दूंला। अर वो लोहे रा राजडंड लियोड़ा उण ऊपर राज करैला, जिण तरैह माटी रा बरतन चकनाचूर व्‍है जावै है। म्हैं भी ऐड़ौ इज अधिकार अपणै पिता ऊं पायो हूं। अर म्हैं उणनै ऐड़ौ चमका दूंला ज्यूं प्रभात रौ तारो। जिणरा कांन होवै वो सुण ले की आतमा कलीसियाओ ऊं कांई कैवै है।” “सरदीस री कलीसिया रै दूत नै ओ लिख। जिणरै खनै परमेसर री सात आतमाओ अर सात तारा है, वो ओ कैवै है की म्हैं थारै कांमां नै जांणूं हूं। थूं जीवतौ तो कैविजै है, पण है मरयोड़ौ। सावचेत हो, अर उण चीजों नै जिकौ बाकी रैय गी है अर जिकौ मिटनै पर है, उणै मजबुत कर। क्यूंकै म्हैं थांरै किणी कांम नै म्हारै परमेसर रै नजीक पूरौ कोनीं पायो। इण वास्तै याद कर की थै कैड़ी सिकसा पाई अर सुणी ही, अर उणमे बण्यौ रै अर मन फिरा। जे थूं सावचेत नीं रैला, तो म्हैं चोर री ज्यूं आ जाऊंला अर थूं कदैई नीं जांण सकै ला, की म्हैं कीण घड़ी थांरै पर आ पड़ूं ला। पण हां, सरदीस में थांरै उठै कईक ऐड़ा लोग है, जिणौनै अपणै अपणै कपड़े असुद्ध कोनीं किया, वे सफेद कपड़ा पैरयोड़ा म्हारै साथै घूमेला क्यूंकै वे इण लायक है। जिकौ जीतैला, उणनै इण तरैह सफेद कपड़ा पैराया जावैला, अर म्हैं उणरौ नाम जीवन री पोथी मांय ऊं किणी रीत ऊं कोनीं काटू ला, पण उणरौ नाम अपणै पिता अर उणरै सरगदूतो रै सांम्ही मांन लूं ला। जिणरा कांन होवै, वो सुण ले की आतमा कलीसियाओ ऊं कांई कैवै है।” “फिलदिलफिया री कलीसिया रै दूत नै ओ लिख। जिकौ पवितर अर सत्य है, अर जिकौ राजा दाऊद री चाबी राखै है, जिणरै खोलयोड़ौ नै कोई बंद नीं कर सकै अर बंद कियोड़ौ नै कोई खोल नीं सकै, वो ओ कैवै है की, म्हैं थांरै कांमां नै जांणूं हूं। सुण, म्हैं थारै सांम्ही एक बारणौ खोल राख्यौ है, जीणे कोई बंद नीं कर सकै। थारी सामरथ थोड़ी सी तो है, तो भी थूं म्हारै वचन रौ पालण करयौ है अर म्हारै नाम रौ मना कोनीं करयौ। सुण, म्हैं सैतान रै उण सभा वाळौ नै थारै वस में कर दूंला जिकौ यहूदी बण बैठया है, पण है कोनीं बल्कि झूठ बोले है। सुण, म्हैं ऐड़ौ करूंला की वे आयनै थारै पगां मे पड़ैला, अर ओ जांण जावैला की म्हैं थारै ऊं परैम राख्यौ है। थै म्हारै धीरज रै वचन नै थामयौ है, इण वास्तै म्हैं भी थनै परीकसा रै उण वगत बचाय राखूंला, जिकौ धरती ऊपर रैवण वाळौ नै परखण रै खातर सगळै संसार ऊपर आवण वाळौ है। म्हैं जल्दी इज आवण वाळौ हूं। जिकौ कीं थारै खनै है, उणै थामे रख की कोई थारौ जीवन रौ मुगट खों नीं ले। जिकौ जीतैला, उण म्हैं अपणै परमेसर रै मिंदर में एक खंभौ बणाऊंला। अर वो पछै कदैई बारै नीं निकळै ला। अर म्हैं अपणै परमेसर रौ नाम उण माथै लिखूंला। अर अपणै परमेसर री नई नगरी यरुसलेम रौ नाम उण माथै लिखूंला, जिकौ म्हारै परमेसर रै खनै ऊं सरग ऊं उतरनै वाळौ है। अर अपणौ नयो नाम भी उण माथै लिखूंला। जिणरा कांन होवै, वो सुण ले की आतमा कलीसियाओ ऊं कांई कैवै है।” “लौदीकिया री कलीसिया रै दूत नै ओ लिख। जिकौ आमीन अर विसवास लायक अर साचा गवाई है, अर परमेसर री सिस्टी रौ मूल कारण है, वो ओ कैवै है की, म्हैं थारै कांमां नै जांणूं हूं की थूं नीं तो ठंडो है अर नीं गरम। भलौ होवतो की थूं ठंडो या गरम होवतो। इण वास्तै की थूं गुनगुनों है, अर नीं ठंडो है अर नीं गरम, म्हैं थनै अपणै मूंडै मांय ऊं उगलनै पर हूं। थूं कैवै है ‘म्हैं धनी हूं अर धनवान होय ग्यौ हूं अर म्हनै किणी चीज री कमी कोनीं।’ अर ओ कोनीं की थूं अभागो अर तुच्छ अर कंगाल अर आंधौ अर नागा है। इण वास्तै म्हैं थांनै समझ दैवूं हूं की अग्‍नि मांय ताया होयौ सोनो म्हारै ऊं मोल ले की थूं अमीर हो जावै। अर सफेद कपड़ा लैय ले की पैहन थांनै अपणै नागा होवण री लाज नीं आवै। अर अपणी आंख्यां मांय लगाण खातर सुरमो ले की थूं देखणै लागै। म्हैं जीण जीण ऊं परैम करूं हूं, उण सबां नै उलाहना अर ताड़ना देवूं हूं। इण वास्तै सावचेत हो अर मन फिरा। सुण, म्हैं बारणा ऊपर ऊभौ खटखटाऊं हूं। जे कोई म्हारौ सबद सुणनै द्धार खोले ला, तो म्हैं उणरै खनै मांय आयनै उणरै साथै खाणौ जीमूला अर वो म्हारै साथै जीमैला। जिकौ जीतैला, म्हैं उणनै अपणै साथै अपणै सिंहासण ऊपर बिठाऊंला, ज्यूं म्हैं भी जीतनै अपणै पिता रै साथै उणरै सिंहासण ऊपर बैठ ग्यौ। जिणरा कांन होवै वो सुण ले की आतमा कलीसियाओ ऊं कांई कैवै है।” इण बातां रै पछै जिकौ म्हैं निजर की तो कांई देखूं हूं की सरग में एक बारणौ खुलयोड़ौ है, अर जिणनै म्हैं पैला तुरही रै सबद ऊं अपणै साथै बातां करतौ सुण्यौ हो, वोहीज कैवै है, “एठै ऊपर आय जा। अर म्हैं वो बातां थांनै दिखाऊंला, जिणरौ इण बातां रै पछै पूरौ होणौ जरुरी है।” तुरत म्हैं पवितर आतमा में आयग्यौ। अर कांई देखूं हूं की एक सिंहासण सरग मांय राख्योड़ौ है, अर उण सिंहासण ऊपर कोई बैठौ है। वो लाल हीरै अर लाल मणि जैड़ौ चमकतौ हो, अर उण सिंहासण रै च्यांरूमेर हरै हीरै जैड़ौ एक मेघधनुस चमकतौ हो। अर उण सिंहासण रै च्यांरूमेर चौबीस सिंहासण है। अर इण सिंहासणां ऊपर चौबीस पुरनिया सफेद कपड़ा पैरयोड़ा बैठा है, अर उणौरै माथो ऊपर सोने रा मुगट है। अर उण सिंहासण मांय ऊं बिजळियां अर मेंह घोर री आवाज निकळै है अर सिंहासण रै सांम्ही अग्‍नि रा सात दीया लाग रिया है, ऐ परमेसर री सात आतमाओ है। अर उण सिंहासण रै सांम्ही मांनौ बिल्लौर रै ज्यूं कांच रौ समंदर है, अर सिंहासण रै बीच में और सिंहासण रै च्यांरूमेर च्यार जीवता प्राणी है, जिणरै आगै लारै आंख्यां ही आंख्यां है। पैलौ जीवतौ प्राणी सिंघ रै ज्यूं है, अर दूजै जीवते प्राणी रौ मूंडौ बछड़ै रै ज्यूं है, तीजै जीवते प्राणी रौ मूंडौ मिनख रै जैड़ौ है, अर चौथे जीवते प्राणी उडतौ होयौ बाज रै ज्यूं है। अर च्यारौ प्राणियों रै छह छह पाख्यौ है, अर मांय बारै आंख्यां ही आंख्यां है। अर वे रात दिन बिना आराम किए ओ कैता रैवै है, “पवितर, पवितर, पवितर परभु परमेसर, सर्वसक्तिमान, जिकौ हा, अर जिकौ है, अर जिकौ आवण वाळौ है।” अर जद वे प्राणी उणरी जिकौ सिंहासण ऊपर बैठा हा, अर जिकौ युगानयुग जीवता है, महिमा अर आदर अर धन्यवाद करौला, तो चौबीस वडेरा सिंहासण ऊपर बैठण वाळै रै सांम्ही पगां पड़ैला, अर उणनै जिकौ युगानयुग जीवतौ है परणाम करैला। अर अपणै अपणै मुगट सिंहासण रै सांम्ही ओ कैवता होया नोख दैला। “हे म्हौरै परभु, अर परमेसर, थूं इज महिमा, अर आदर, अर सामरथ रै लायक है। क्यूंकै थै इज सगळी चीजों बणाई अर वे थारी इज इछा ऊं ही, अर बणाई गी।” जिकौ सिंहासण ऊपर बैठौ हो, म्हैं उणरै जीमणै हाथ मांय एक किताब देखी ही जिकौ मांय ऊं अर बारै ऊं लिखयोड़ी ही, अर वो सात मुहर लगाय नै बंद कियोड़ी ही। पछै म्हैं एक ताकतवर सरगदूत नै देख्यौ जिकौ ऊंची आवाज ऊं घोसणा की, “इण किताब नै खोलनै अर इणरी मुहरो तोड़नै रै लायक कुण है?” पण नीं सरग मांय, नीं धरती माथै, नीं धरती रै नीचे कोई उण किताब नै खोलणै या उण माथै निजर घाल नै रै लायक निकळयौ। तद म्हैं फूट फूटनै रोवण लागौ, क्यूंकै उण किताब नै खोलनै या उण ऊपर निजर घाल नै रै लायक कोई नीं मिळियौ। इण कारण उण वडेरो में ऊं एक म्हनै कयौ, “मती रोव। सुण, यहूदा रै गोत्र रौ वो सिंघ जिकौ दाऊद रौ मूल है, उण किताब नै खोलणै अर उणरी सातों मुहरे तोड़नै रै खातर जीतयो है।” तद म्हैं उण सिंहासण अर च्यांरू जीवते प्राणियों अर उण वडेरो रै बीच में, एक बलि करयोड़ौ उनिया जैड़ौ ऊभौ देख्यौ। उणरै सात सींग अर सात आंख्यां ही। ऐ परमेसर री सातों आतमाओ है जिकौ सगळी धरती माथै भेजी गी है। वो आयनै उणरै जीमणै हाथ ऊं जिकौ सिंहासण माथै बैठौ हो, वो किताब ले ली। जद उणै किताब ले ली, तो वे च्यांरू जीवते प्राणी अर चौबीस वडेरा उण उनिया रै पगां पड़या। उणमे ऊं हरैक रै हाथ में वीणो अर धूप, जिकौ पवितर लोगां री पराथनाओं है उण ऊं भरयोड़ा सोने रा कटोरा हा। वे ओ नवो गीत गान लागा, “थूं इण किताब नै लेवण, अर इणरी मुहरो खोलनै रै लायक है। क्यूंकै थै बलि होयनै अपणै लोई ऊं हरैक कुळ अर भासा अर लोग अर जाति में ऊं परमेसर रै लियै लोगां नै मोल लिया है, अर उणनै म्हौरै परमेसर रै लियै एक राज अर याजक बणाया। अर वे धरती माथै राज करै है।” जद म्हैं देख्यां, तो उण सिंहासण अर उण जीवता प्राणियों अर उण वडेरा रै च्यांरूमेर घणाहारा सरगदूतो नै बोलता सुण्या, जिणरी गिणती लाखो अर करोड़ो री ही, अर वे ऊंची आवाज ऊं कैवता हा, “बलि कियोड़ौ उनियां इज सामरथ अर धन अर ग्यांन अर सगति अर आदर अर महिमा अर धन्यवाद रै लायक है।” पछै म्हैं सरग में अर धरती माथै अर धरती रै नीचे अर समंदर रै मांय हरैक जीव नै ओ केवतो सुण्यौ, “जिकौ सिंहासण माथै बैठौ है उणरौ अर उनियां रौ धन्यवाद अर आदर अर महिमा अर राज युगानयुग रैवै।” अर च्यांरू जीवतौ प्राणियों आमीन कयौ, अर वडेरो झुकनै परणाम करयौ। पछै म्हैं देख्यौ की उनियां उण सात मुहरो मांय ऊं एक नै खोली। अर उण च्यार जीवतौ प्राणियों मे ऊं एक नै गरजते जैड़ौ ओ सबद सुण्यौ, “आओ।” म्हैं निजर किनी, अर देख्यौ, एक सफेद घोड़ौ है, अर उणरौ सवार धनुस लियोड़ो है। अर उणनै एक मुगट दियोड़ो, अर वो जय करतौ होयौ निकळियौ की वळै ही जय हासल करै। अर जद उनिया दूजी मुहर खोली, तो म्हैं दूजै जीवित प्राणी नै ओ कैवतै सुण्यौ, “आओ।” पछै एक वळै घोड़ौ निकळियौ, जिकौ लाल रंग रौ हो। उणरै सवार नै ओ अधिकार दियोड़ो, की धरती माथै ऊं सानति उठा ले, ताकी लोग एक दूजै रौ खून करै। अर उणनै एक मोटी तरवार दीनी। अर जद उनिया तीजी मुहर खोली, तो म्हैं तीजै जीवित प्राणी नै ओ कैवतै सुण्यौ, “आओ।” म्हैं निजर किनी की, अर देख्यौ, एक काळौ घोड़ौ है, अर उणरै सवार रै हाथ में एक तराजू है। वळै म्हैं उण च्यारौ जीवतौ प्राणियों रै बीच में ऊं एक सबद ओ कैवतै सुण्यौ, “एक दिन री मजूरी सेर गेहूंं ही मिळैळा अर एक दिन री मजूरी में तीन सेर जौ ही मिळैला, पण जैतून तेल अर अंगूररस री फसल नै बरबाद नीं करणी।” जद उनिया चौथी मुहर खोली, तो म्हैं चौथे जीवित प्राणी रौ सबद ओ कैवतै सुण्यौ, “आओ।” म्हैं निजर किनी, अर देख्यौ, एक पीळौ घोड़ौ है। अर उणरै सवार रौ नाम मौत है, अर नरक उणरै लारै लारै है। अर उणनै धरती री चौथाई भाग ऊपर अधिकार दियोड़ो है, की तरवार, अर अकाळ, अर मरी, अर धरती रै जंगळी जिनावरां रै जरियै लोगां नै मार नोखे। जद उनिया पांचवी मुहर खोली, तो म्हैं वेदी रै नीचे उणरै जीवित प्रांणौ नै देख्यां, जिकौ परमेसर रै वचन रै कारण अर उण गवाई दैणै रै कारण मारया गिया हा। उणौ ऊंची आवाज ऊं बुलायनै कयौ, “हे पवितर अर सत्य परभु, थूं कदै तांई न्याव नीं करैला? अर धरती रै रैवणवाळौ ऊं म्हांरौ लोई रौ बदळौ कदै तांई नीं ले ला?” अर उण में ऊं हरैक नै उजळो कपड़ो दियौ, अर उणौ ऊं कयौ, “वळै थोड़ी जेज आराम करौ, जैड़ी तांई थौरे संगी दास, अर भाई, जिकौ थौरे ज्यूं वध होणवाळा है, उणरी भी गिणती पूरी नीं हो जावै।” जद उनिया छठी मुहर खोली, तो म्हैं देख्यौ, की एक जोरदार भूकम्प होयौ, अर सूरज कांम्बल री ज्यूं काळी अर चांद लोई रै जैड़ौ व्‍है गियौ। आभै रा तारा धरती माथै यूं पड़या ज्यूं घणी आंधी ऊं हिलनै अंजीर रै रूंखड़ै ऊं काचा फळ झड़ै है। आभौ ऐड़ौ सरक ग्यौ, ज्यूं कागद भेळा करनै ऊं सरक जावै है। अर हरैक भाखर, अर टापू, अपणी अपणी जगा ऊं सरक ग्या। अर धरती रै राजा, अर परधान, अर सरदार, अर धनवान अर सामरथी लोग, अर हरैक दास, अर हरैक आजाद, भाखरो री खोहों में, अर चटानों में जायनै लुकया। अर भाखरो, अर चटानों ऊं कैवण लागा, “म्हौरै माथै आ पड़ो। अर म्हौ नै उणरै मूंडै ऊं जिकौ सिंहासण माथै बैठौ है अर उनियां रै परकोप ऊं लूकाय लौ। क्यूंकै उणरै परकोप रौ खतरनाक दिन आय पूगो है, अबै कुण ठैहर सकै है?” इणरै पछै म्हैं धरती रै च्यांरू कोनों ऊपर च्यार सरगदूत ऊभा देख्यां, वे धरती री च्यांरूमेर हवा नै रोक रिया हा ताकी धरती या समंदर या किणी दरखत ऊपर हवा नीं लागै। पछै म्हैं एक वळै सरगदूत नै जीवते परमेसर री मुहर लियोड़ी पूरब ऊं ऊपर री तरफ आवतौ देख्यौ। उणै उण च्यारौ सरगदूतो ऊं जिणौनै धरती अर समंदर रौ नुकसाण करणै रौ अधिकार दियोड़ो हो, ऊंची आवाज ऊं बोलनै कयौ, “जैड़ी तांई म्हौ अपणै परमेसर रै दासो रै माथा ऊपर मुहर नीं लगा दो, उठै तांई धरती अर समंदर अर दरखतो रौ नुकसाण नीं करणौ।” जिण ऊपर मुहर दी है म्हैं उणरी गिणती सुणी है, अरथावूं इजरायल री औळादों रै सगळै गोत्रों में ऊं एक लाख चौवालीस हजार ऊपर मुहर लगा दी। यहूदा रै गोत्र में ऊं बारैह हजार ऊपर मुहर लगाई। रूबेन रै गोत्र में ऊं बारैह हजार ऊपर, गाद रै गोत्र में ऊं बारैह हजार ऊपर, आसेर रै गौत्र में ऊं बारैह हजार ऊपर, नप्ताली रै गोत्र में ऊं बारैह हजार ऊपर, मनस्सिह रै गोत्र में ऊं बारैह हजार ऊपर, समौन रै गोत्र में ऊं बारैह हजार ऊपर, लेवी रै गोत्र में ऊं बारैह हजार ऊपर, इस्साकार रै गोत्र में ऊं बारैह हजार ऊपर, जबूलून रै गोत्र में ऊं बारैह हजार ऊपर, यूसुफ रै गोत्र में ऊं बारैह हजार ऊपर, अर बिन्यामीन रै गोत्र में ऊं बारैह हजार ऊपर मुहर दीनी। इणरै पछै म्हैं निजर किनी, अर देख्यौ, हरैक जाति अर कुळ अर लोग अर भासा में ऊं एक ऐड़ी घणी भीड़, जिणनै कोई गिण नीं सकै हो, उजळा गाभा पैरयोड़ा अर आपरै हाथ में खजूर री डाळियो लियोड़ी सिंहासण रै सांम्ही अर उनियां रै सांम्ही ऊभी है, अर ऊंचै सबद ऊं बोलनै कैवै है, “उद्धार रै लियै म्हौरै परमेसर रौ, जिकौ सिंहासण ऊपर बैठौ है, अर उनियां री जय जयकार हो।” अर सगळै सरगदूत, उण सिंहासण अर वडेरा अर च्यारौ जीवता प्राणियों रै च्यांरूमेर ऊभा हा। पछै वे सिंहासण रै सांम्ही झुकनै परमेसर नै नमण करनै कयौ, “आमीन! अपांरै परमेसर री स्तुति अर महिमा अर ग्यांन अर धन्यवाद अर आदर अर सामरथ अर सगति युगानयुग बणी रैवै। आमीन।” इण कारण वडेरो में ऊं एक म्हनै कयौ, “ऐ उजळा गाभा पैरयोड़ा कुण है? अर कठै ऊं आया है?” म्हैं उणनै कयौ, “हे मालिक थूं ही जांणै है।” उणै म्हनै कयौ, “ऐ वे है, जिकौ उण महाक्लेस में ऊं निकळनै आया है। इणौनै आपो आपरा गाभा उनियां रै लोई में धोयनै उजळा करया है। इण कारण वे परमेसर रै सिंहासण रै सांमै है, अर उणरै मिंदर में रात-दिन सेवा करै है, अर जिकौ सिंहासण ऊपर बैठौ है, वो उणौरै मांय रैवता होया उणौरी रूखाळी करैला। वे पछै भूखा अर तिरसां नीं होवैला। अर नीं उणौ ऊपर तावड़ो, नीं कोई तपती पड़ैला। क्यूंकै उनियां जिकौ सिंहासण रै बीच में है उणरी रूखाळी करैला। अर उणनै जीवन रूपी जळ रै झरनौ रै खनै ले जाया करैला। अर परमेसर उणरी आंख्यां ऊं सगळा आंसू पोंछ दैला।” जद उनिया सातवी मुहर खोली, तो सरग मांय आधो घण्‍टों तांई सन्‍नाटो छाय ग्यौ हो। अर म्हैं उण सातों सरगदूतो नै जिकौ परमेसर रै सांमै ऊभा रैवै है, देख्यां, अर उणौनै सात तुरहियां दीनी। पछै एक वळै सरगदूत सोने रौ धूपदान लियोड़ो आयौ, अर वेदी रै नजीक ऊभौ होयौ। अर उणनै घणौहारौ धूप दियौ, की सैंग पवितर लोगां री पराथनाओं रै साथै सिंहासण रै सांमै वाळी सोने री वेदी ऊपर चढ़ाओ। अर उण धूप रौ धुओं पवितर लोगां री पराथनाओं रै साथै सरगदूत रै हाथ ऊं परमेसर रै सांमै पूग गियौ। अर सरगदूत नै धूपदान लेयनै उण में वेदी री अग्‍नि भरी, अर धरती ऊपर नोख दी। अर गरजनो अर आवाज अर बिजळियां अर भूकम्प होवण लागा। अर वे सातों सरगदूत जिणरै खनै सात तुरहियां ही, बजाणै तैयार होया। पैला सरगदूत नै तुरही बजाई, अर लोई ऊं मिळयोड़ा ओळा अर लाय पैदा होई, अर धरती ऊपर छोड़ी, अर धरती री एक तिहाई बळ गी, अर दरखतो री एक तिहाई बळ गी, अर सैंग हरी घास भी बळ गी। दूजै सरगदूत नै तुरही बजाई, तो मांनौ लाय ऊं बळतो होयौ एक मोटो भाखर समंदर में नांख्यौ गियौ। अर समंदर रौ एक तिहाई लोई व्‍है गियौ, अर समंदर रै एक तिहाई प्राणी मरग्या, अर एक तिहाई जहाज नास व्‍है गिया। तीजै सरगदूत नै तुरही बजाई, अर एक मोटो तारो जिकौ मसाल रै ज्यूं बळतो हो सरग ऊं टूटो, अर नदियां री एक तिहाई ऊपर अर पांणी रै झरनौ ऊपर आय पड़ियौ। उण तारै रौ नाम नागदौना है। अर एक तिहाई पांणी नागदौना जैड़ौ खारौ व्‍है गियौ, अर घणा मिनख उण पांणी रै खारै होय जांणै ऊं मर गिया। चौथे सरगदूत नै तुरही बजाई, अर सूरज री एक तिहाई, अर चांद री एक तिहाई अर तारो री एक तिहाई ऊपर आपति आई, एठै तांई की उणौ रौ एक तिहाई अंग अंधारौ होय गियौ अर दिन री एक तिहाई में उजाळौ नीं रियौ, अर व्यौंही रात में भी। जद म्हैं वळै देख्यौ, तो आभै रै बीच में एक बाज नै उड़तै अर ऊंचै सबद ऊं ओ कैवतै सुण्यौ, “उण तीन सरगदूतो री तुरही रै सबदो रै कारण, जिणरौ बजाणौ अजी बाकी है, धरती रै रैवणवाळौ ऊपर हाय, हाय, हाय।” जद पांचवें सरगदूत नै तुरही बजाई, तो म्हैं सरग ऊं धरती माथै एक तारो पड़तौ होयौ देख्यौ, अर उणनै पाताळ कुंड री कूचीं दीनी। अर उणै पाताळ कुंड नै खोलयौ, अर कुंड में ऊं मोटी भठी रै धूंए जैड़ौ हो, अर कुंड रै धूंए ऊं सूरज अर आभौ अंधारौ होय गियौ। अर उण धूंए में ऊं धरती माथै टिडियां निकळी, अर उणौनै बिच्छूओ जैड़ी सगति दीनी। उण ऊं कयौ गियौ की नीं धरती री घास नै, नीं किणी हरयाळी नै, नीं किणी दरखत नै नुकसाण पुगाणौ, कैवल उण मिनखौ नै जिण रै माथा ऊपर परमेसर री मुहर कोनीं है। उण लोगां नै मारणै रौ तो कोनीं पण पांच महीनै तांई पीड़ा दैणै रौ अधिकार दियौ है। अर उणरी पीड़ा ऐड़ी ही, ज्यूं बिच्छू रै डंक मारणै ऊं मिनख नै होवै है। उण दिनां मांय मांनखौ मौत नै सौधेला अर नीं मिळैला। अर मरण री इछा करैला, अर मौत उणौ ऊं आगी जावैला। अर उण टिडियां रौ रूप लड़ाई रै लियै तैयार कियोड़ा घोड़ौ रै ज्यूं हो, अर उणौरै माथा ऊपर जांणै सोने रौ मुगट हो। अर उणौ रौ मूंडौ मांनखै रै ज्यूं हो। अर उणौ रा बाल लुगाईयां रै बालों जैड़ा अर दांत सिंघो रै दांतो जैड़ा हा। वे जांणै लोह री झिलम पैरयोड़ी हा। अर उणौरै पांख्यौ रौ सबद ऐड़ौ हो ज्यूं रथों अर घणा घोड़ा रौ जिकौ लड़ाई में नाह रिया हो। अर उणौरी पूंछ बिच्छूओ रै जैड़ी ही, अर उणमे डंक हो, अर उणै पांच महीनै तांई मानखै नै दुख दैणै री जिकौ सामरथ ही, वो उण री पूंछों मे ही। पाताळ कुंड रौ दूत उण ऊपर राजा हो, उणरौ नाम इबरानी में अबद्धोन, अर यूनानी में अपुल्लयोन हो। इण दोनूं नाम रौ मतलब नास करणैवाळौ होवै है। पैली विपति बीत गी, सुणौ, अबै इणरै पछै दो विपतियां वळै आवण वाळी है। जद छठवे सरगदूत नै तुरही बजाई तो जिकौ सोने री वेदी परमेसर रै सांमै है उणरै च्यांरू खूणाऊं म्हैं ऐड़ौ सबद सुण्यौ। मांनौ कोई छठवे सरगदूत ऊं, जिणरै खनै तुरही ही, कैह रियौ है, “उण च्यार सरगदूतो नै जिकौ मोटी नदी फुरात रै खनै बांधयोड़ा है, खोल दो।” वे च्यारौ दूत खोल दिया हा जिकौ उण घड़ी, अर दिन, अर महीनै, अर बरस रै लियै मांनखै री एक तिहाई नै मार नोखणै री तैयार किया हा। उणरी फौज रै सवारों री गिणती बीस करोड़ ही। म्हैं उणौरी गिणती सुणी। म्हनै इण दरसण में घोड़ा अर उणरा सवार देठाळौ दियौ, जिणरै झिलम अग्‍नि जैड़ी लाल, अर तेजाब जैड़ी पीळी, अर गेरा नीला रंग री ही। अर उण घोड़ौ रा माथा सिंघो रै माथो जैड़ा हा। अर उणौरै मूंडै में लाय, अर धुओं, अर गन्धक निकळ री ही। इण तीनो महामारियो यानि लाय अर धूंए अर तेजाब ऊं, जिकौ उणौरै मूंडै ऊं निकळती ही मांनखै नै एक तिहाई मार नोखया हा। क्यूंकै उण घोड़ौ री सामरथ उणौरै मूंडै अर उणौरै पूंछों में ही। इण वास्तै उणौरी पूंछों सांपो जैड़ी ही, अर उण पूंछों रै माथो भी हो अर उणौ ऊं वे पीड़ा देता हा। बाकी मांनखौ जिकौ उण महामारियो ऊं नीं मरिया हा, आपरै हाथो रै कांमां ऊं मन नीं फिरायो, की दुस्ट आतमाओ री, अर सोने अर चांदी अर पीतळ अर भाठा अर काठ री मूरतियो री पूजा नीं करै जिकौ नीं देख सकै, नीं सुण सकै, नीं चाल सकै है। अर जिकौ लोई, अर टोना, अर व्यभिचार, अर चोरी उणौनै की ही, उण ऊं मन नीं फिरायो। वळै म्हैं एक दूजौ ताकतवर सरगदूत नै बादळ ओढ़योड़ो सरग ऊं उतरते देख्यौ, उणरै माथा ऊपर मेंहधनुस हो। अर उणरौ मूंडौ सूरज री ज्यूं अर उणरा पग लाय रै खंभै जैड़ा हा। उणरै हाथ में एक छोटी सी खुली किताब ही। उणै आपरौ जीमणौ पग समंदर माथै अर डावौ पग धरती माथै राख्यौ, अर ऐड़ौ जोर रै सबद ऊं चिलायौ, ज्यूं सिंघ गरजयो हो। अर जद वो चिलायौ तो गरजनै री सात आवाज सुणाई दीनी। जद सातों गरजनै री आवाज सुणाई दे चुका, तो म्हैं लिखणैवाळौ ही हो, पण म्हैं सरग ऊं ओ सबद सुण्यौ, “जिकौ बातां गरजनै रै उण सात आवाज ऊं सुणी है उणै छांनै राख, अर मत लिख।” जिण सरगदूत नै म्हैं समंदर अर धरती माथै ऊभौ देख्यौ हो, उणै आपरौ जीमणौ हाथ सरग री तरफ उठायौ, अर जिकौ युगानयुग जीवता है, अर जिणनै सरग रौ अर जिकौ कीं उणमे है, अर धरती रौ अर जिकौ कीं उण माथै है, अर समंदर रौ अर जिकौ कीं उणमे है उणौनै सरजया है, उण परमेसर री सौगन खायनै सरगदूत कयौ, “अबै तो और जेज कोनीं होवैला। बल्कि सातवे सरगदूत रै तुरही बजानै ऊं होणै वाळै सबद रै दिनां में परमेसर रौ छांनै मनोरथ उण सुभ संदेस रै मुजब जिकौ उणै आपरै दास भविसयदाताओ नै दियौ, पूरौ होवैला।” जिण सबद नै म्हैं सरग ऊं बोलतौ सुण्यौ हो, वो वळै म्हारै साथै बातां करणै लागा, “जा, जिकौ सरगदूत समंदर अर धरती माथै ऊभौ है, उणरै हाथ ऊं वो खुली किताब ले लौ।” म्हैं सरगदूत रै खनै जायनै कयौ, “आ छोटी किताब म्हनै दे।” उणै म्हनै कयौ, “ले, इणै खा ले। आ थांरौ पेट खराब तो करैला, पण थांरै मूंडै मांय सहद जैड़ी मीठी लागैला।” अतस म्हैं वो छोटी किताब उण सरगदूत रै हाथ ऊं लैयनै खायग्यौ। वो म्हारै मूंडै मांय सहद ऊं मीठी तो लागी, पण जद म्हैं उणनै खाय गियौ, तो म्हारौ पेट खराब होय गियौ। तद म्हारै ऊं ओ कयौ, “थांनै घणै लोगां, अर जातियो, अर भासाओं अर राजाओ रै बारै में वळै भविसयवांणी करणी होवैला।” पछै म्हनै नापनै रै लियै एक सरकंडो दियौ, अर किणी कयौ, “उठ, परमेसर रै मिंदर अर वेदी नै नाप ले, अर उणमे उपासना करणैवाळौ नै गिण ले। पण मिंदर रै च्यार दीवारी रै बारै छोड़ दे। उणै मत नाप क्यूंकै वो गैर यहूदियो नै दियोड़ो है, अर वे पवितर नगर नै बयाळीस महीनै तांई आपरै पगां ऊं रौंदेला। म्हैं म्हारै दो गवाहो नै ओ अधिकार दूंला, की बोरा ओढ़नै एक हजार दो सौ साठ दिन तांई भविसयवांणी करै।” ऐ वे इज दो गवाई जैतून रा दो दरखत नै अर दो दीवट नै दिखावै है जिकौ धरती रै राज करणैवाळा परभु रै सांमै सरग में ऊभा रैवै है। जे कोई उणौनै नुकसाण पुगाणौ चावै है, तो उणरै मूंडै ऊं लाय निकळ नै उणरै बैरियो नै भसम करै है। अर जे कोई उणौनै नुकसाण पुगाणौ चावैला, तो जरुर इणी रीत ऊं मार दियौ जावैला। उणै अधिकार है, की आभै नै बंद करै, की उणरी भविसयवांणी रै दिनां में मेंह नीं बरसे, अर उणै सगळै पांणी ऊपर अधिकार है, की उणै लोई बणावै, अर जद जद चावै तद तद धरती ऊपर हरैक तरैह री तकलीफो लावै। जद वे आपरी गवाई दे दैला, तो वो डरावणौ पसु जिकौ पाताळ कुंड मांय ऊं निकळै ला, उणौ ऊं लड़नै उणौनै जीतैला अर उणौनै मार दैला। उणौरी लासां उण मोटे नगर रै चौक में पड़ी रैवैला, जठै उणौरौ परभु ही सूली माथै चढ़ायौ गियौ हो। ओ नगर बुराई री वजै ऊं आत्मिक रीति ऊं सदोम अर मिसर रै नाम ऊं बोल्यौ जावै है। सगळै लोगां अर कुलो अर भासाओं अर जातियो रै कईक लोग उणौरी लासां नै साढ़ै तीन दिन तांई देखता रैला, अर उणौरी लासां नै कबर में राखणै नीं दैला। धरती रा रैवण वाळा उणौरै मरण ऊं राजी अर मगन होवैला, अर एक दूजै रै खनै भेट भेजेला, क्यूंकै इण दोनो भविसयदाताओ नै धरती रा रैवण वाळा नै घणौ दुख दियौ हो। पण साढ़ै तीन दिन रै पछै परमेसर री तरफ ऊं इण दोनो में प्रांण आयौ अर वे उठनै ऊभा होया, अर उणौनै देखणै वाळौ ऊपर भय छा गियौ। तद उणै सरग ऊं जोर रौ सबद सुणाई दियौ, “एठै ऊपर आओ!” ओ सुण वे बादळो पर सवार होयनै आपरै बैरियो रै देखते देखते सरग ऊपर चढ़ग्या। पछै उणी घड़ी एक घणौहारौ भूकम्प होयौ, अर नगरी रौ दसवो भाग टूट पड़िया। अर उण भूकम्प ऊं सात हजार मिनख मरग्या, अर बाकी डरग्या अर सरग रै परमेसर री महिमा की। दूजी विपति बीत चुकी। सुणौ, तीजी विपति जल्दी आवण वाळी है। जद सातवे दूत नै तुरही बजाई, तो सरग में इण बारै रै मोटा मोटा सबद होवण लागा। “जगत रौ राज म्हौरै परभु रौ अर उणौरै मसीह रौ होय ग्यौ, अर वो युगानयुग राज करैला।” तद चौबीस पूर्वजों जिकौ परमेसर रै सांम्ही अपणै अपणै सिंहासण ऊपर बैठा हा, मूंडै रै बल झुकनै परमेसर नै नमण करनै ओ कैवण लागा, “हे सर्वसक्तिमान परभु परमेसर, जो है अर जो हा, म्हौ थौरो धन्यवाद करौ हो की थै अपणी घणी सामरथ नै कांम में लायनै राज कियो है। जातियो नै रीस करी, पण थांरौ परकोप आ पड़ियौ, अर वो घड़ी आय पूगी है की मरयोड़ौ रौ न्याव कियो जावैला, अर थारा दास भविसयदाताओ अर पवितर लोगां नै अर उण छोटे मोटे नै जिकौ थारै नाम ऊं डरै है बदळा दिया जावैला, अर धरती रै बिगाड़ नै वाळा नास किया जावैला।” तद परमेसर रौ जिकौ मिंदर सरग में है वो खोलयो गियौ, अर उणरै मिंदर मांय उणरी वाचा रौ संदूक देठाळौ दियौ। अर बिजळी चमकण लागी अर गरजनै री आवाज आई अर भूकम्प होया अर मोटा मोटा ओळा पड़या। वळै सरग में एक मोटो चिन्ह देठाळौ दियौ, अरथावूं एक लुगाई जिकौ सूरज ओढ़योड़ी ही, अर चांद उणरै पगां तळै हो, अर उणरै माथा ऊपर बारैह तारो रौ मुगट हो। वो जापायती होई, अर चिलाती ही, क्यूंकै जनम दैणै री पीड़ा में ही। एक वळै चिन्ह सरग में देठाळौ दियौ। अर सुणौ, एक मोटो लाल अजगर हो, जिणरै सात माथा अर दस सींग हा, अर उणरै माथो ऊपर सात राजमुगट हा। उणरी पूंछ नै आभै री एक तिहाई तारो नै खींचनै धरती ऊपर नोख दिया। वो अजगर उण लुगाई रै सांम्ही जिकौ जापायती ही, ऊभौ होयौ की जद वो टाबर जने तो उण टाबर नै गीट जावै। अर वो बेटौ जनी जिकौ लोह रौ डंड लियोड़ो सगळी जातियो माथै राज करणै वाळौ है, अर वो टाबर एकाएक परमेसर रै खनै अर उणरै सिंहासण रै खनै उठाय नै पूगा दियौ। अर वां लुगाई उण रिंदरोही में नाह गी जठै परमेसर री तरफ ऊं उणरै लियै एक जगा तैयार कियोड़ी ही की उठै वो एक हजार दो सौ साठ दिन तांई पाळी पोची जाय। पछै सरग में लड़ाई व्‍ही, खास मीकाईल अर उणरै सरगदूत अजगर ऊं लड़नै निकळिया। अर अजगर अर उणरा दूत उण ऊं लड़या। पण अजगर टिक नीं सकयौ, अर सरग में उणौरै लियै पछै कोई जगा कोनीं री। तद वो मोटो अजगर, मतलब वोहीज पुराणौ सांप जिकौ इबलीस अर सैतान कहीजै है, अर सगळै संसार नै भरमानै वाळौ है, धरती माथै फेंक दियौ। अर उणरै दूत उणरै साथै फेंक दिया। वळै म्हैं सरग ऊं ओ मोटो सबद आते सुण्यौ, “अबै म्हौरै परमेसर रौ उद्धार, अर सामरथ अर राज अर उणरै मसीह रौ अधिकार परगट होयौ है, क्यूंकै म्हौरै भाइयो ऊपर दोस लगाणै वाळौ, जिकौ रात दिन म्हौरै परमेसर रै सांम्ही उण ऊपर दोस लगाया करतौ हो, नीचे फेंक दियौ गियौ। वे उनियां रै लोई रै कारण अर आपरी गवाई रै वचन रै कारण उण ऊपर जीत हासल करी, अर उणौनै आपरै प्रांणौ री चिंता कोनीं की, एठै तांई की मौत ही सहन कर ली। इण कारण हे सरग अर उणमे रैवण वाळौ, आंणंद मनाओ। पण धिकार हे धरती, अर समंदर, माथै क्यूंकै सैतान घणी रीस रै साथै थौरे खनै उतर आयौ है, क्यूंकै जांणै है की उणरौ थोड़ो इज वगत बाकी है।” जद अजगर देख्यौ की, “म्हैं धरती माथै फेंक दियौ गियौ हूं,” तो वो उण लुगाई रै पाछळ पड़ग्यौ, जिकौ बेटौ जनी ही। पण उण लुगाई नै मोटे उकाब री दो पाखां दियोड़ी ही की अजगर रै सांमै ऊं उड़नै रिंदरोही में उण जगा पूग जावै, जठै वो साढ़े तीन बरस तांई पाळी जावै। अर अजगर नै उण लुगाई रै लारै आपरै मूंडै ऊं नदी रै ज्यूं पांणी बहायौ की उणनै इण नदी ऊं डूबा दूं। पण धरती नै उण लुगाई री मदद की, अर आपरौ मूंडौ खोलनै उण नदी नै जिकौ अजगर आपरै मूंडै ऊं बहाई ही, पी ली। तद अजगर लुगाई माथै रीसे बळयौ, अर उणरी बाकी औळाद ऊं, जिकौ परमेसर री आग्याओं नै मांनै अर यीसु री गवाई दैणै पर स्थिर है, उणौ ऊं लड़नै ग्यौ। अर वो अजगर समंदर रै बालू ऊपर जाय ऊभौ होयौ। तद म्हैं एक डरावणै पसु नै समंदर में ऊं निकळतो देख्यौ, जिणरै दस सींग अर सात माथा हा। उणरै सींगो ऊपर दस राजमुगट, अर उणौरै हरैक रै माथा ऊपर परमेसर री निंदा रा नाम लिख्यौड़ा हा। जिकौ पसु म्हैं देख्यौ, वो चीते रै जैड़ौ हो। अर उणरा पग भालू रै ज्यूं, अर मूंडौ सिंघ रै जैड़ौ हो। अर उण अजगर नै आपरी सामरथ, अर आपरौ सिंहासण, अर मोटो अधिकार, उणनै दे दियौ। अर म्हैं उणरै माथै ऊपर ऐड़ौ मोटो घाव लागोड़ो देख्यौ, जांणै वो मरण वाळौ हो, पछै उणरौ जानलेवा घाव सावळ होय गियौ, अर सगळी धरती रा लोग उण पसु रै लारै लारै अचूम्बो करता होया चालया। अर उणौ अजगर री पूजा की, क्यूंकै उणै पसु नै आपरौ अधिकार देय दियौ हो। वळै उणौनै उण डरावणै पसु री भी पूजा किनी ओ कैयनै, “इण पसु रै जैड़ौ कुण है? कुण इण ऊं लड़ सकै है?” उण डरावणै पसु नै मोटा बोल बोलणै अर निंदा करणै रै वास्तै एक मूंडौ दियौ, अर उणनै बयाळीस महीनै तांई कांम करणै रौ अधिकार दियौ। उणनै परमेसर री बेजती करणै रै वास्तै मूंडौ खोलयो की उणरै नाम अर उणरै तम्बू अरथावूं सरग रै रैवणवाळौ री बेजती करै। अर उणनै ओ अधिकार दियौ, की परमेसर रै पवितर लोगां ऊं लड़ै, अर उणौ माथै जीत हासल करै, अर उणनै हरैक कुळ, अर लोग, अर भासा, अर जाति ऊपर अधिकार दियौ गियौ। धरती रा वो सगळा रैवणवाळा, जिणरा नाम उण उनियां री जीवन री किताब में लिख्या कोनीं ग्या हा, वो उण डरावणै पसु री पूजा करैला। उनियां जिकौ जगत री सरूआत ऊं बलि होणै रै खातर तैयार कियोड़ौ हो। जिणरा कांन होवै वो सुण ले। जिणनै कैद में पड़णौ है, वो कैद में पड़ैला। जिकौ तरवार ऊं मारैला, जरुरी है की वो तरवार ऊं मारयो जावैला। परमेसर रा पवितर लोगां रौ धीरज अर विसवास इणी में है। पछै म्हैं एक वळै डरावणै पसु नै धरती में ऊं निकळतो होयौ देख्यौ, उणरै उनियां रै जैड़ा दो सींग हा, पण वो अजगर रै ज्यूं बोलतौ हो। वो उण पैलै डरावणै पसु रा सगळा अधिकार उणरै सांमै कांम में लातो हो, अर धरती अर उणरै रैवणवाळौ ऊं उण पैलै पसु री, जिणरौ प्राणघातक घाव सावळ होय गियौ हो, पूजा करातो हो। वो मोटा मोटा चिन्ह देखातो हो, एठै तांई की मिनखौ रै सांम्ही आभै ऊं धरती माथै अग्‍नि बरसा देतो हो। पैला डरावणै पसु रै अधिकार ऊं वो चमतकार बतातौ हो, वो धरती रै रैवणवाळौ नै भरमातो हो अर केवतो हो की जिण पसु रै तरवार लगी ही वो जी ग्यौ है, अर उणरी मूरत बणाओ। उणनै उण पसु री मूरती में प्रांण घालनै रौ अधिकार दियोड़ो हो की पसु री मूरती बोलण लागै, अर जिता लोग उण पसु री मूरती री पूजा नीं करै, उणौनै मरवा नोखे। उणै छोटे-मोटे, अमीर-कंगाल, आजाद-गुलाम सबां रै जीमणै हाथ या उणौरै माथा ऊपर एक एक छाप लगाणै वास्तै मजबूर किया। की उणनै छोड़ जिण ऊपर छाप मतलब उण डरावणै पसु रौ नाम या उणरै नाम रौ अंक नीं हो, दूजा कोई लेण-देण नीं कर सकै। ग्यांन इणी में है। जिणै बुद्धि हो वो इण पसु रौ अंक जोड़ ले, क्यूंकै वो मांनखै रा अंक है, अर उणरा अंक छह सौ छियासठ है। वळै म्हैं निजर की, अर देख्यौ, वो उनियां सिय्योन भाखर माथै ऊभौ है, अर उणरै साथै एक लाख चौवालीस हजार लोग है, जिणौरे माथै ऊपर उणरौ अर उणरै पिता रौ नाम लिख्योड़ौ है। अर सरग ऊं म्हनै एक ऐड़ौ सबद सुणाई दियौ जिकौ जळ री घणी धाराओ अर घणै गरजनै रै जैड़ौ सबद हो, अर जिकौ सबद म्हैं सुण्यौ वो ऐड़ौ हो मांनौ वीणो बजाणैवाळौ वीणो बजाय रियौ हो। वे सिंहासण रै सांमै अर च्यारौ जीवित प्राणियों अर पूर्वजों रै सांमै एक नवो गीत गा रिया हा। उण एक लाख चौवालीस हजार जणौ नै छोड़, जिकौ धरती माथै ऊं मोल लियोड़ा हा, कोई वो गीत नीं सीख सकै हो। ऐ वे है जिकौ लुगाईयां रै साथै असुद्ध नीं होया, पण कुंवारा है। ऐ वे इज है की जठै कठै उनियां जावै है, वे उणरै लारै हो जावै है। ऐ तो परमेसर रै निमित पैलौ फळ होणै रै लियै मिनखौ में ऊं मोल लियोड़ा है। उणरै मूंडै ऊं कदैई झूठ कोनीं निकळयौ हो, वे निरदोस है। पछै म्हैं एक वळै सरगदूत नै आभै रै बीच में उडतौ होयौ देख्यौ, जिणरै खनै धरती माथै रा रैवणवाळौ री हरैक जाति, अर कुळ, अर भासा, अर लोगां नै सुणाणै रै लियै सनातन सुभ संदेस हो। उणै जोर ऊं कयौ, “परमेसर ऊं डरौ, अर उणरी महिमा करौ, क्यूंकै उणरै न्याव करणै रौ वगत आय ग्यौ है। अर उणरा भजन करौ, जिणै सरग अर धरती अर समंदर अर जळ रा झरना बणाया।” वळै इणरै पछै एक वळै, दूजौ सरगदूत ओ केवतो होयौ आयौ, “उणरौ सर्वनास हो गियौ है, वो मोटे बेबिलोन नगर रौ सर्वनास होय ग्यौ, जिणनै आपरै व्यभिचार री वासना री दाखरस सगळी जातियो नै पिलाई है।” वळै इणरै पछै एक वळै, तीजौ सरगदूत जोर री आवाज ऊं ओ केवतो होयौ आयौ, “जिकौ कोई उण डरावणौ पसु अर उणरी मूरती री पूजा करै, अर आपरै माथा या आपरै हाथ ऊपर उणरी छाप ले, वो परमेसर रै परकोप री निरी मदिरा, जिकौ उणरै रीस रै कटोरे में घाली गी है, पीएला अर पवितर सरगदूतो रै सांम्ही अर उनियां रै सांम्ही अग्‍नि अर गन्धक री पीड़ा में पड़ैला। उणरी पीड़ा रौ धुओं युगानयुग उठतौ रैला, अर जिकौ उण डरावणै पसु अर उणरी मूरती री पूजा करै है, अर जिकौ उणरै नाम री छाप लेवे है, उणौनै रात-दिन आराम नीं मिळैला।” परमेसर रा पवितर लोगां रौ धीरज इणी में है, जिकौ परमेसर री आग्याओं नै मांनै अर यीसु माथै विसवास राखै है। पछै म्हैं सरग ऊं ओ सबद सुण्यौ, “लिख। जिकौ लोग परभु में मरै है, वो अबै ऊं धन्य है।” आतमा कैवै है, “हां, क्यूंकै वे आपरै सगळी मेनत ऊं आराम पावैला, अर उणरै कांम उणरै साथै हो लेवे है।” म्हैं निजर की, अर देख्यौ, एक उजळो बादळ है, अर उण बादळ माथै मिनख रै बेटे जैड़ौ कोई बैठौ है, जिणरै माथा ऊपर सोने रौ मुगट अर हाथ में चौखौ दातरो है। पछै एक वळै सरगदूत मिंदर में ऊं निकळनै उण ऊं, जिकौ बादळ ऊपर बैठौ हो, जोर ऊं हेलौ करनै कयौ, “अपणौ दातरो लगायनै कटनी कर, क्यूंकै कटनी रौ वगत आय गियौ है, इण वास्तै की धरती री खेती पक गी है।” अतस जिकौ बादळ माथै बैठौ हो उणै धरती माथै आपरौ दातरो लगायौ, अर धरती रौ कातीरो लियौ। पछै एक वळै सरगदूत उण मिंदर में ऊं निकळयौ जिकौ सरग में है, अर उणरै खनै भी चौखौ दातरो हो। पछै एक वळै सरगदूत जिणनै अग्‍नि माथै अधिकार हो, वेदी में ऊं निकळयौ, अर जिणरै खनै चौखौ दातरो हो उण ऊं ऊंची आवाज ऊं कयौ, “आपरौ चौखौ दातरो लगायनै धरती रै बगीचें में लुम्बा काट ले, क्यूंकै उणरा अंगूर पक ग्या है।” तद उण सरगदूत नै धरती माथै आपरौ दातरो लगायौ अर धरती री अंगूरो री वाड़ी रा फळ काटनै अपणै परमेसर रै परकोप रै मोटे रसकुंड में नोख दिया। अर नगरी रै बारै उण रसकुंड में अंगूर खूंदया, अर रसकुंड में ऊं इतरौ लोई निकळयौ की घोड़ौ री लगामो तांई पूगो, अर सौ कोस तांई बह ग्यौ। पछै म्हैं सरग में एक वळै मोटो अर अचूम्बो चिन्ह देख्यौ, मतलब सात सरगदूत जिणरै खनै सातों आखरी विपतियां ही, क्यूंकै उणरै अंत हो जांणै पर परमेसर रै परकोप रौ अंत है। तद म्हैं अग्‍नि मिळियोड़े कांच जैड़ौ एक समंदर देख्यौ। अर जिकौ लोग उण डरावणै पसु माथै अर उणरी मूरती माथै अर उणरै नाम रै अंक माथै जीत पाई ही, उणौनै उण कांच रै समंदर रै नजीक परमेसर री वीणाओं रै लियै ऊभा देख्यां। वे परमेसर रै दास मूसा रा गीत, अर उनियां रा गीत गान कैवता हा, “हे सर्वसक्तिमान परभु परमेसर, थांरा कांम महान अर अदभुत है। हे युग-युग रा राजा, थारी चाल ठीक अर साची है”। “हे परभु, कुण थारै ऊं नीं डरैला अर थारै नाम री महिमा नीं करैला? क्यूंकै कैवल थूं ही पवितर है। सगळी जातियो आयनै थारै सांम्ही नमण करैला, क्यूंकै थारै न्याव रा कांम परगट होय गिया है।” इणरै पछै म्हैं देख्यां की सरग में वाचा रै तम्बू रौ मिंदर खुल रियौ है। अर वो सातों सरगदूत जिणरै खनै सातों विपतियां ही, सफेद अर सुद्ध अर चमकीला गाभा पैरयोड़ा अर कमर में सोने री पटियां बांधयोड़ी मिंदर ऊं निकळयौ। तद उण च्यारौ जीवता प्राणियों में ऊं एक नै उण सात सरगदूतो नै परमेसर, जिकौ युगानयुग जीवता है, परकोप ऊं भरयोड़ा सात सोने रा कटोरा दिया। अर परमेसर री महिमा अर उणरी सामरथ रै कारण मिंदर धुंए ऊं भर ग्यौ, अर जैड़ी तांई उण सातों सरगदूतो री सातों विपतियां मिट नीं गी उठै तांई कोई मिंदर में नीं जा सकै। पछै म्हैं मिंदर में किणी रै ऊंची आवाज ऊं उण सातों सरगदूतो ऊं ओ कैवतै सुण्यौ, “जाओ, परमेसर रै परकोप रा सातों कटोरा नै धरती माथै उंडेल दो।” अतस पैलै सरगदूत नै जायनै आपरौ कटोरो धरती माथै उंडेल दियौ। तद उण मिनखौ रै, जिण ऊपर पसु री छाप ही अर जिकौ मूरती री पूजा करता हा, एक तरैह रा भूंडा अर दुखदाई फोड़ा निकळिया। दूजै सरगदूत नै आपरौ कटोरो समंदर माथै उंडेल दियौ, अर वो मरयोड़े मिनख रै लोई जैड़ौ बण ग्यौ, अर समंदर रै मायला हरैक जीवधारी मर ग्या। तीजै सरगदूत नै आपरौ कटोरो नदियां अर पांणी रै झरनौ माथै उंडेल दियौ, अर वे लोई बण ग्यौ। तद म्हैं पांणी रै सरगदूत नै ओ कैवतै सुण्यौ, “हे पवितर, जिकौ है अर जिकौ हा, थूं न्यावी है अर थै ओ न्याव करयौ। क्यूंकै उणौनै पवितर लोगां अर भविसयदाता रौ खून बहायौ हो, अर थै उणौ नै लोई पिलायो। क्यूंकै वे इण लायक हा।” पछै म्हैं वेदी ऊं ओ सबद सुण्यौ, “हां, हे सर्वसक्तिमान परभु परमेसर, थांरा फैसला ठीक अर साचा है।” अर चौथे सरगदूत नै आपरौ कटोरो सूरज माथै उंडेल दियौ, अर उणनै मिनखौ नै अग्‍नि ऊं बाल नै रौ अधिकार दियौ। मिनख घणै तप ऊं बळवा लाग्या, अर परमेसर रै नाम री जिणनै इण विपतियां माथै अधिकार है, निंदा की पण उणरी महिमा करणै रै लियै मन नीं फिरायो। पांचवें सरगदूत नै आपरौ कटोरो डरावणै उण पसु रै सिंहासण माथै उंडेल दियौ, अर उणरै राज में अंधारौ छा ग्यौ। लोग पीड़ा रै मारे अपणी अपणी जीभ चबानै लागा, अर अपणी पीड़ाओं अर फोड़ो रै कारण सरग रै परमेसर री निंदा की। पण अपणै अपणै कांमां ऊं मन नीं फेरयो। छठै सरगदूत नै आपरौ कटोरो महानदी फरात ऊपर उंडेल दियौ, अर उणरौ पांणी सूख ग्यौ की पूरब दिसा रै राजाओ रै लियै मारग तैयार हो जाय। पछै म्हैं उण अजगर रै मूंडै ऊं, अर उण डरावणै पसु रै मूंडै ऊं, अर उणरै झूठै भविसयदाता रै मूंडै ऊं तीन असुद्ध आतमाओ नै मेढ़को रै रूप में निकळता देख्यां। ऐ चिन्ह दिखाणवाळी दुस्ट आतमा है, जिकौ सगळै संसार रै राजाओ रै खनै निकळनै इण वास्तै जावै है की उणै सर्वसक्तिमान परमेसर रै उण मोटे दिन री लड़ाई रै लियै भेळा करै, “सुण, म्हैं चोर रै ज्यूं आऊं हूं। धन्य वो है जिकौ जागता रैवै है, अर आपरै गाभा री चौकसी करै है की नागो नीं फिरै, अर लोग उणरौ नंगापन नीं देखे।” अर दुस्ट आतमाओ नै सगळै राजाओ नै उण जगा भेळा करया जिकौ इबरानी में हर-मगिदोन कैविजै है। सातवे सरगदूत नै आपरौ कटोरो हवा में उंडेल दियौ, अर मिंदर रै सिंहासण ऊं ओ मोटो सबद होयौ, “होय गियौ!” पछै बिजळियां चमकी, अर सबद अर गरजन व्‍ही, अर एक ऐड़ौ जोर रौ भूकम्प आयौ की जद ऊं मिनख री सरूआत धरती माथै व्‍ही, तद ऊं ऐड़ौ जोर रौ भूकम्प कदैई नीं आयौ हो। इणसूं उण मोटे नगर रा तीन टुकड़ा व्‍है ग्या, अर जाति जाति रा नगर नीचा पड़या। अर मोटे बेबिलोन री याद परमेसर रै उठै होयौ की वो आपरै रीस री जलजलाहट री मदिरा उणनै पिलावै। अर हरैक टापू आपरी जगा ऊं हट ग्या, अर भाखरो रौ पतौ ही नीं लागौ। आभै ऊं मिनखौ ऊपर मण मण भर रा मोटा ओळा पड़या, अर इण वास्तै की आ विपति घणी ही भारी ही, लोगां नै ओळौ री विपति रै कारण परमेसर री निंदा करी। जिण सात सरगदूतो रै खनै वो सात कटोरा हा, उणमे ऊं एक आयनै म्हारै ऊं ओ कयौ, “एठै आ, म्हैं थांनै उण मोटी वेसया रौ डंड दिखाऊं, जिकौ घणैहारे पांणी खनै बैठी है, जिणरै साथै धरती रै राजाओ नै व्यभिचार करयौ। अर धरती रै रैवणवाळा उणरै व्यभिचार री मदिरा ऊं मताला होय ग्या हा।” तद वो म्हनै आतमा में रिंदरोही में लेय गया, अर म्हैं लाल रंग रै डरावणै पसु माथै, जिकौ निंदा रै नामों ऊं भरयोड़ौ हो अर जिणरै सात माथा अर दस सींग हा, एक लुगाई नै बैठी व्‍ही देखी। आ लुगाई बैंजनी अर लाल रंग रा गाभा पैरयोड़ा हा, अर सोने अर किमती मणियों अर मोतियो ऊं सजयोड़ी ही, अर उणरै हाथ में एक सोने रौ कटोरो हो जिकौ घिरणा री चीजों ऊं अर उणरै व्यभिचार री गंदी चीजों ऊं भरयोड़ौ हो। उणरै माथा ऊपर भेदवाळौ ओ नाम लिख्योड़ौ हो, “मोटो बेबिलोन, धरती री वेसयाओ, अर गंदी चीजों री माता।” म्हैं उण लुगाई नै पवितर लोगां रौ लोई अर यीसु रै गवाहो रौ लोई पीणै ऊं मताली देखी। उणनै देखनै म्हैं अचूम्बो करयौ। तद उण सरगदूत म्हारै ऊं कयौ, “थूं क्यूं अचूम्बो करै? म्हैं इण लुगाई अर उण डरावणै पसु रौ, जिण माथै वां सवार है अर जिणरै सात माथा अर दस सींग है, थनै भेद बताऊं हूं। जिकौ डरावणै पसु थै देख्यौ है, वो पैला तो हो, पण अबै कोनीं है, अर पाताळ कुंड ऊं निकळनै विनास में पड़ैला। अर धरती रै रैवणवाळा जिणरा नाम जगत री सरूआत रै वगत ऊं जीवन री पोथी में लिख्या कोनीं ग्या, इण पसु री आ दसा देखनै अचूम्बो करैला। क्यूंकै, पैला हा, अर अबै कोनीं है अर वळै आ जावैला। “उण बुद्धि रै लियै जिणमे ग्यांन है, ओहीज मौकौ है। वे सातों माथा सात भाखर है जिण माथै वां लुगाई बैठी है। वे सात राजा ही है, पांच तो नास होय ग्या है, अर एक अजी है अर एक अजी तांई आयौ कोनीं, अर जद आवैला तो कीं वगत तांई उणरौ रैणौ भी जरुरी है। जिकौ डरावणौ पसु पैला हो, अर अबै नीं है, वो आप आठवां राजा है अर उण सातों में ऊं पैदा होयौ, अर विनास में पड़ैला। “जिकौ दस सींग थै देख्यां वो दस राजा है, जिणौ अजी तांई राज कोनीं पायो। पण उण डरावणै पसु रै साथै घड़ी भर रै लियै राजाओ जैड़ौ अधिकार पावैला। ऐ सगळा एक मन होवैला, अर वे अपणी अपणी सामरथ अर अधिकार उण डरावणै पसु नै दैला। वे उनियां ऊं लड़ैला, अर उनियां उण ऊपर जय पावैला, क्यूंकै वो परभुओ रौ परभु अर राजाओ रौ राजा है, अर जिकौ बुलायोड़ा अर चुणयोड़ा अर विसवासी है वे उणरै साथै है।वे भी जय पावैला।” पछै उण म्हारै ऊं कयौ, “जिकौ पांणी थै देख्यौ, जिण खनै वेसया बैठी है, वे तो लोग अर भीड़ अर जातियो अर भासाओं है। जिकौ दस सिंग थै देख्यां, वे और डरावणौ पसु उण वेसया ऊं बैर राखैला, अर उणनै लाचार अर नागी कर दैला, अर उणरौ सरीर खा जावैला, अर उणनै अग्‍नि में बाल दैला क्यूंकै परमेसर उणरै मन में ओ विचार घालैला की वे उणरी मनसा पूरी करै, अर जैड़ी तांई परमेसर रै वचन पूरा नीं हो ले उठै तांई एक मन होयनै अपणा अपणा राज डरावणै पसु नै दे दे। वां लुगाई, जिणनै थै देखी है, वो मोटो नगर है जिकौ धरती रै राजाओ ऊपर राज करै है।” इणरै पछै म्हैं एक सरगदूत नै सरग ऊं उतरतो देख्यौ, जिणनै मोटो अधिकार मिळियोड़ो हो। अर धरती उणरै तेज ऊं चमक उठी। उणै ऊंचै सबद ऊं हेलौ करनै कयौ, “नास होयौ, मोटो बेबिलोन नास व्‍है ग्यौ! वो दुस्ट आतमाओ रौ रैवास, अर हरैक असुद्ध आतमा रौ अडो, अर हरैक असुद्ध अर भूंडै जिनावरां रौ अडो व्‍है ग्यौ। क्यूंकै उणरै व्यभिचार री खतरनाक मदिरा रै खातर सगळी जातियो गिर गी है, अर धरती रै राजाओ नै उणरै साथै व्यभिचार करयौ है, अर धरती रा व्यापारी उणरै सुख-विलास रै घणै होणै रै खातर धनवान होया है।” पछै म्हैं सरग ऊं एक वळै सबद सुण्यौ, “हे म्हारै लोगां, उण में ऊं निकळ आओ की थै उणरै पापों में भागी मत होवो, अर उणरी तकलीफो में ऊं कोई थांरै ऊपर नीं आ पड़ै। क्यूंकै उणरै पापों रौ ढ़ेर सरग तांई पूग गियौ है, अर उणरै अधरम परमेसर नै याद आवै है। जैड़ौ उणै थांनै दियौ है वैड़ौ ही उणनै दो, अर उणरै कांमां रै मुजब उणै दो गुणा बदळा दो। जिण कटोरे में उणै भर नै दियौ हो उणी में उणरै लियै दो गुणा भर दो। जिती उणै आपरी सौभा की अर सुख विलास कियो, उती उणनै पीड़ा अर सौग दो। क्यूंकै वां आपरै मन में कैवै है, ‘म्हैं राणी ज्यूं बैठी हूं, विधवा कोनीं। अर सौग में कदैई नीं पड़ूं ला।’ इण खातर एक इज दिन में उण ऊपर विपतियां आ पड़ैला, ज्यूं मौत, सौग, अर अकाळ। अर वो अग्‍नि में भसम कर दी जावैला, क्यूंकै उणरौ न्यावी परभु परमेसर सगतिमान है। “धरती रै राजा जिणौनै उणरै साथै व्यभिचार अर सुख-विलास कियो, जद उणरै बळणै रा धुआं देखेला, तो उणरै खातर रोवेला अर छाती पीटेला। उणरी पीड़ा रै डर रै मारै वे घणा आगा ऊभा होयनै कैवैला, ‘हे मोटे नगर, बेबिलोन! हे मजबुत नगर, हाय! हाय! घड़ी भर में ही थनै डंड मिळ ग्यौ है।’ “धरती रा व्यापारी उणरै खातर रोवेला अर कळपैला, क्यूंकै अबै कोई उणरौ माल मोल कोनीं ले ला। अरथावूं सोनों, चांदी, रत्‍न, मोती, अर मलमल, अर बैंजनी, रेसमी, अर लाल रंग रा गाभा, अर हरैक तरैह रा सुगन्धित काठ, अर हाथीदात री हरैक तरैह री चीजों, अर किमती काठ, अर पीतळ अर लोह अर संगमरमर री सगळी भांति री चीजों, अर दालचीनी, मसालो, धूप, अन्तर, लोबान, मदिरा, तेल, मैदो, गेहूंं, गाय-बळद, लरड़ियां-बकरियां, घोड़ा, रथ। अर मिनखौ नै गुलाम बणाणै वास्तै भी बेचे है। “अबै थारै मन लायक फळ थारै खनै ऊं जाता रिया, अर मधुर अर भड़कीली चीजों थारै ऊं आगी होय गी है, अर वे कदैई नीं मिळैला, इण चीजों रै व्यापारी जिकौ उणरै दवारा धनवान होय गिया हा, उणरी पीड़ा रै डर रै कारण आगा ऊभा रैला, अर रोता अर कळपता होया कैवैला, ‘हाय! हाय! ओ मोटो नगर जिकौ मलमल, अर बैंजनी अर लाल रंग रा गाभा पैरयोड़ा हा, अर सोनों अर रत्‍नों अर मोतियो ऊं सजायोड़ो हो। घड़ी भर में ही उणरौ ऐड़ौ घणौहारौ धन नास व्‍है ग्यौ।’ ” हरैक नाव चलानवाळा अर यात्री अर कप्तान, अर जिता समंदर ऊं कमाता हा, सगळा आगा ऊभा रिया, अर उणरै बळणै रौ धुआं देखनै हेलौ करनै केवोला, “कौण सौ नगर इण मोटे नगर रै जैड़ौ है?” अपणै अपणै माथा ऊपर धूड़ घालैला, अर रोता होया अर कळपता होया चिला चिलानै कैवैला, “हाय! हाय! ओ मोटो नगर जिणरी जायदाद रै दवारा समंदर रा सगळा जहाज वाळा धनवान होय ग्या हा, पण देख, घड़ी भर में ही उजड़ ग्यौ। “हे सरग, अर हे पवितर लोगां, अर प्रेरितों, अर भविसयदाताओ, उण खातर आंणंद करौ, क्यूंकै परमेसर नै न्याव करनै उण ऊं थौरो बदळौ लियौ है!” पछै एक ताकतवर सरगदूत नै मोटी चक्‍की रौ पाट रै जैड़ौ एक भाठौ उठायौ, अर ओ कैन समंदर में फेंक दियौ, “मोटो नगर बेबिलोन यूं ही घणी ताकत ऊं गिरायो जावैला, अर पछै कदैई उणरौ पतौ नीं चालै ला। वीणा बजाणैवाळा, अर गायक, अर बंसी बजाणवाळा, अर तुरही बजाणवाळा रौ सबद पछै कदैई थांनै सुणाई नीं दैला। अर किणी धंधे रौ कारीगर भी पछै कदैई थांरै में नीं मिळैला। अर चक्‍की रै चालनै री आवाज पछै कदैई थांनै सुणाई नीं दैला।” अर दीये रौ उजाळौ पछै कदैई थांरै में नीं चमकैला, अर बींद अर बींदणी री आवाज पछै कदैई थांनै सुणाई नीं दैला। क्यूंकै थारा व्यापारी धरती रा परधान हा, अर थारै जादू टोने ऊं सगळी जातियो भरमाई गी है। परमेसर रा भविसयदाताओ अर उणरै पवितर लोगां, अर धरती माथै घात कियोड़ौ रौ लोई रौ जिम्मेदार ओहीज नगर है। इणरै पछै म्हैं सरग में मांनौ घणी भीड़ नै ऊंची आवाज ऊं ओ कैवतै सुण्यौ, “हल्लिलूय्याह! उद्धार अर महिमा अर सामरथ म्हौरै परमेसर री ही है। क्यूंकै उणरौ फैसलो साचौ अर ठीक है। उणै उण मोटी वेसया नै, जिकौ अपणै व्यभिचार ऊं धरती नै भीस्ट करती ही, न्याव कियो अर उण ऊं अपणै दासो रै लोई रौ बदळौ लियौ है।” पछै दूजी बार उणौ कयौ, “हल्लिलूय्याह! उणरै बळणै रौ धुआं युगानयुग उठतौ रैला।” तद चौबीस पूर्वजों अर च्यार जीवित प्राणियों नै परमेसर रै पगां पड़नै नमण करी, जिकौ सिंहासण ऊपर बैठा हा, अर कयौ, “हल्लिलूय्याह! आमीन!” तद सिंहासण में ऊं एक आवाज निकळी, “हे अपांरै परमेसर ऊं सगळा डरनवाळौ दासो, कांई छोटा, कांई मोटा। थै सगळा उणरी स्तुति करौ।” पछै म्हैं घणी भीड़ रै ज्यूं अर घणै पांणी रै झरना रै ज्यूं आवाज, अर बादळ रै गरजणै रै ज्यूं घणी आवाज सुणी। “हल्लिलूय्याह! क्यूंकै परभु अपांरा परमेसर सर्वसक्तिमान राज करै है। आओ, अपां आंणंद अर मगन हो, अर उणरी स्तुति करौ, क्यूंकै उनियां रौ ब्याव आय गियौ है, अर उणरी बींदणी अपणै आप नै तैयार कर ली है। उणनै सुद्ध अर चमकदार महीन मलमल पैरणै रौ अधिकार दियौ गियौ।” क्यूंकै उण महीन मलमल रौ अरथ पवितर लोगां रै धरम रा कांम है। तद सरगदूत म्हारै ऊं कयौ, “ओ लिख, की धन्य वे है, जिकौ उनियां रै ब्याव रै खाणै में बुलाया गिया है।” पछै उणै म्हारै ऊं कयौ, “ऐ वचन परमेसर रा सत्य वचन है।” तद म्हैं उणनै नमण करनै रै लियै उणरै पगां पड़ियौ। उणै म्हनै कयौ, “देख, ऐड़ौ मत कर, म्हैं थांरौ अर थांरै भाइयो रौ संगी दास हूं, जिकौ यीसु री गवाई दैणै रै लियै तैयार हूं, परमेसर नै ही नमण कर। क्यूंकै यीसु री गवाई भविसयदाता री आतमा है।” पछै म्हैं सरग नै खुलयोड़ौ देख्यौ, अर देखूं हूं की एक उजळो घोड़ौ है। अर उण माथै एक सवार है, जिकौ विसवास लायक अर सत्य कहीजै है। अर वो धरम रै साथै न्याव अर युध करै है। उणरी आंख्यां अग्‍नि री लपटो है। अर उणरै माथा ऊपर घणाहारा राज मुगट है। उण ऊपर एक नाम लिख्योड़ौ है, जिणै उणनै छोड़ ओर कोई नीं जांणै। वो लोई छिड़कयोड़ो गाभा पैरया है, अर उणरौ नाम परमेसर रौ वचन है। सरग री सेना सफेद घोड़ौ माथै सवार अर सफेद अर सुद्ध मलमल पैरयोड़ो उणरै लारै लारै है। जाति जाति नै मारणै रै लियै उणरै मूंडै ऊं एक चौखी तरवार निकळै है। वो लोह रौ राज डंड लियोड़ो उण माथै राज करैला, अर सर्वसक्तिमान परमेसर रै खतरनाक परकोप री जलजलाहट री मदिरा रै कुंड में दाख रौंदेला। उणरै कपड़ा अर जांघ माथै ओ नाम लिख्यौ है, “राजाओ रौ राजा अर परभुओ रौ परभु।” पछै म्हैं एक सरगदूत नै सूरज माथै ऊभौ देख्यौ। उणै जोर ऊं हेलौ करनै आभै रै बीच में ऊं उड़नै वाळा सगळा पंखैरूओ ऊं कयौ, “आओ, परमेसर रै महान भोज रै लियै भेळा हो जाओ, जिण ऊं थै राजाओ रौ सरीर, अर सरदारो रौ सरीर, अर ताकतवर मिनखौ रौ सरीर, अर घोड़ौ रौ अर सवारों रौ सरीर, अर कांई आजाद कांई गुलाम, कांई छोटा कांई मोटा, सगळै लोगां रौ सरीर खाओ।” पछै म्हैं उण डरावणै पसु, अर धरती रै राजाओ अर उणरी सेनाओ नै उण घोड़े रै सवार अर उणरी सेना ऊं लड़नै रै लियै भेळा देख्यां। वो डरावणौ पसु, अर उणरै साथै वो झूठौ भविसयदाता पकड़यौ जिणै उणरै सांमै ऐड़ा चिन्ह दिखाया हा जिणरै दवारा उणै उणौनै भरमाया जिण माथै उण पसु री छाप ही अर जिकौ उणरी मूरती री पूजा करता हा। ऐ दोनूं जीते जी उण अग्‍नि री झील में, नोख दिया जिकौ तेजाब ऊं जळे है। बाकी लोग उण घोड़े रै सवार री तरवार ऊं, जिकौ उणरै मूंडै ऊं निकळती ही, मार नोखया। अर सगळा पंखेरू उणरै सरीर नै खायनै धाप ग्या। पछै म्हैं एक सरगदूत नै सरग ऊं उतरतो देख्यौ, जिणरै हाथ में पाताळ कुंड री कुंजी, अर एक मोटी जंजीर ही। उणै उण अजगर, यानि पूरानै सांप नै, जिकौ इबलीस अर सैतान है, पकड़नै हजार साल रै लियै बांध दियौ, अर उणनै पाताळ कुंड में घालनै बंद कर दियौ अर उण माथै मुहर लगा दी की वो हजार साल रै पूरा होणै तांई जाति जाति रै लोगां नै वळै नीं भरमाए। इणरै पछै जरुरी है की वो थोड़ी जेज रै खातर वळै खोलयो जावै। पछै म्हैं सिंहासण देख्यां, अर उण माथै लोग बैठ ग्या, अर उणनै न्याव करणै रौ अधिकार दियौ। म्हैं उणरी आतमाओ नै भी देखी, जिणरै माथा यीसु री गवाई दैणै अर परमेसर रै वचन रै खातर काटया गिया हा, अर जिणौ नै नीं उण पसु री, अर नीं उणरी मूरती री पूजा करी, अर नीं उणरी छाप अपणै माथा अर हाथो पर ली ही। वे जीवता होयनै मसीह रै साथै हजार बरस तांई राज करता रिया। जैड़ी तांई ऐ हजार साल पूरा नीं व्‍है उठै तांई बाकी मरयोड़ा जी नीं उठै। ओ तो पैलौ पुनरूत्थान है। धन्य अर पवितर वो है, जिकौ इण पैलै पुनरूत्थान रौ भागी है। ऐड़ौ पण दूजी मौत रौ कीं भी अधिकार कोनीं, पण वे परमेसर अर मसीह रै याजक होवैला अर उणरै साथै हजार साल तांई राज करैला। जद हजार साल पूरा हो जावैला तो सैतान कैद ऊं छोड़ दियौ जावैला। वो उण जातियो नै जिकौ धरती रै च्यांरूमेर होवैला, ज्यूं गोग अर मागोग नै जिणरी गिणती समंदर री बालू रै बराबर होवैला, भरमा नै लड़ाई रै लियै भेळा करणै वास्तै निकळै ला। वे सैतान री सगळी सेना धरती माथै फैल नै परमेसर रै पवितर लोगां रौ डेरो अर प्रिय नगर नै घेर लैई। पण अग्‍नि सरग ऊं उतरनै उणौनै भसम करैला। उणरौ भरमानै वाळौ सैतान अग्‍नि अर तेजाब री उण झील में, जिणमे वो डरावणौ पसु अर झूठा भविसयदाता भी होवैला, उणौरै साथै नोख दिया जावैला। अर वे रात दिन युगानयुग पीड़ा में तड़पता रैला। पछै म्हैं एक मोटो सफेद सिंहासण अर उणनै, जिकौ उण माथै बैठौ होयौ है, देख्यां। उणरै सांम्ही ऊं धरती अर आभौ नाह गिया, अर उणौरौ नास व्‍है गियौ। पछै म्हैं छोटे मोटे सबां मरयोड़ौ नै सिंहासण रै सांम्ही ऊभा देख्यां, अर किताबो खोली गी। अर पछै एक वळै किताब खोली गी, अरथ जीवन री किताब। अर ज्यूं उण किताबो में लिख्योड़ौ हो, व्यौंही उणरै कांमां रै मुजब मरयोड़ौ रौ न्याव करयौ गियौ। समंदर नै उण मरयोड़ौ नै जिकौ उणमे हा दे दिया, अर मौत अर अधोलोक नै उण मरयोड़ौ नै जिकौ उणमे हा दे दिया। अर उण में ऊं हरैक रै कांमां रै मुजब उणौरौ न्याव करयौ गियौ। मौत अर अधोलोक अग्‍नि री झील में नोखया। आ अग्‍नि री झील दूजी मौत है। अर जिण किणी रौ नाम जीवन री किताब मांय लिख्योड़ौ कोनीं मिळियौ, वो भी अग्‍नि री झील में नोख्यौ गियौ। पछै म्हैं नवो आभौ अर नवी धरती नै देख्यां, क्यूंकै पैला आभौ अर पैली धरती जाती री ही, अर समंदर भी नीं रियौ। पछै म्हैं पवितर नगर नवे यरुसलेम नै सरग ऊं परमेसर रै खनै उतरते देख्यौ। वो उण बींदणी रै ज्यूं ही जिकौ आपरै बींद रै लियै सिंगार करयौ हो। पछै म्हैं सिंहासण में ऊं किणी नै ऊंची आवाज ऊं ओ कैवतै सुण्यौ, “देख, परमेसर रौ डेरो मिनखौ रै बीच में है। वो उणरै साथै डेरो करैला, अर वे उणरा लोग होवैला, अर परमेसर आप उणौरै साथै रैला अर उणौरौ परमेसर होवैला। वो उणौरी आंख्यां ऊं सगळा आंसू पोंछ दैला। अर इणरै पछै मौत नीं रैला, अर नीं सौग, नीं विलाप, नीं पीड़ा रैला। पैली बातां जाती रीं।” जिकौ सिंहासण माथै बैठौ हो, उणै कयौ, “देख, म्हैं सगळौ नवो कर देवूं हूं।” पछै उणै कयौ, “लिख ले, क्यूंकै ऐ वचन विसवास रै योग्य अर सत्य है।” पछै उणै म्हारै ऊं कयौ, “ऐ बातां पूरी होयगी है। म्हैं अल्फा अर ओमेगा, सरूआत अर आखरी हूं। म्हैं तिरसे नै जीवन रै जळ रै झरनै में ऊं मुफत में पिलाऊंला। जिकौ जय पावैला वोहीज इण चीजों रौ वारिस होवैला, अर म्हैं उणरौ परमेसर होवूंला अर वो म्हारौ बेटौ होवैला। पण डरपोको, अर अविसवासियो, अर घिनौनों, अर हत्यारो, अर व्यभिचारियो, अर जादू-टोणा करणवाळा, अर मूरती पुजारियो, अर सगळै झूठौ रौ भाग उण झील में मिळैला जिकौ अग्‍नि अर गन्धक ऊं बळती रैवै है। आ दूजी मौत है।” पछै जिण सात सरगदूतो रै खनै सात आखरी विपतियां ऊं भरयोड़ा सात कटोरा हा, उणमे ऊं एक म्हारै खनै आयौ, अर म्हारै साथै बातां करनै कयौ, “एठै आ, म्हैं थनै बींदणी यानि उनियां री लुगाई दिखाऊंला।” तद वो दूत म्हनै परमेसर री आतमा में एक मोटे अर ऊंचै भाखर माथै लेय ग्या, अर पवितर नगर यरुसलेम नै सरग ऊं परमेसर रै खनै ऊं उतरते दिखायौ। परमेसर री महिमा उणमे ही, अर उणरी जोत अनमोल भाठौ, अरथावूं बिल्लौर रै कांच री ज्यूं यसब री नाई साफ ही। उणरै च्यांरूमेर एक मोटी अर ऊंची दीवार ही, अर उणरै बारैह फाटक अर फाटको माथै बारैह सरगदूत हा। अर उण फाटको माथै इजरालियो रै बारैह गोत्रों रा नाम लिखयोड़ा हा। पूरब री तरफ तीन फाटक, उतर री तरफ तीन फाटक, दक्‍खिण री तरफ तीन फाटक, अर पच्छिम री तरफ तीन फाटक हा। नगर री दीवार नींव रै बारैह भाठौ माथै खड़ी ही, अर उण माथै उनियां रै बारैह प्रेरितों रै बारैह नाम लिखयोड़ा हा। जिकौ दूत म्हारै साथै बातां कर रियौ हो, उणरै खनै नगर अर उणरै फाटको अर उणरी दीवार नै नापणै रै लियै एक सोने रौ गज हो। वो नगर चौकोर बणयोड़ो हो अर उणरी लम्बाई, चौड़ाई रै बराबर ही। अर उणै उण गज ऊं नगर नै नापयो, तो साढ़ै सात सौ कोस निकळौ। उणरी लम्बाई अर चौड़ाई अर ऊंचाई बराबर ही। सरगदूत उण दीवार नै मिनख रै हाथ रै नाप ऊं नापयो, तो एक सौ चौवालीस हाथ निकळी। उणरी दीवार यसब री किमती भाटे ऊं बणी ही, अर नगर ऐड़ै सुद्ध सोने रौ हो जिकौ साफ कांच रै ज्यूं हो। उण नगर री नींवों हर तरैह रै किमती भाठौ ऊं सजायोड़ी ही। पैली नींव यसब री, दूजी नीलमणि री, तीजी लालड़ी री, चौथी मरकत री, पांचवी गोमेदक री, छठी माणिक्य री, सातवी पीतमणि री, आठवी पेरोज री, नवी पुखराज री, दसवी लहसनिए री, ग्यारहवीं धूम्रकान्त री, अर बारहवी याकूत री ही। बारैह ही फाटक मोतियो रा हा। एक एक फाटक एक एक मोती रा बण्या हा। नगर री सड़क साफ कांच रै ज्यूं सुद्ध सोने री ही। म्हैं उणमे कोई मिंदर नीं देख्यौ, क्यूंकै सर्वसक्तिमान परभु परमेसर अर उनियां उणौ रौ मिंदर है। उण नगर में सूरज अर चांद रै उजाळै री जरुरत कोनीं, क्यूंकै परमेसर रै तेज ऊं उण में उजाळौ व्‍है रियौ है, अर उनियां उणरौ दीयौ है। जाति जाति रा लोग उणरी जोत में चालैला-फिरैला, अर धरती रै राजा अपणै अपणै तेज रौ सामान उणमे लावै ला उणरा फाटक दिन में कदैई बंद नीं होवैला, अर रात उठै नीं होवैला। लोग जाति जाति रै तेज अर धन-दोलत रौ सामान उठै लावै ला। पण उणमे कोई अपवितर चीज या भूंडा कांम करणैवाळा, या झूठ गढ़नेवाळा किणी रीत ऊं परवेस नीं करैला। पण कैवल वे लोग जिणरै नाम उनियां रै जीवन री किताब मांय लिखयोड़ा है। पछै उणै म्हनै बिल्लौर रै कांच री ज्यूं झळकती व्‍ही, जीवन रै जळ री नदी दिखाई, जिकौ परमेसर अर उनियां रै सिंहासण ऊं निकळनै, उण नगर री सड़क रै बीचो बीच बहती ही। अर नदी रै इण पार अर उण पार जीवन रा दरखत हा। उणमे बारैह तरैह रा फळ लागता हा, अर वो हर महीनै फळतो हो। अर उण दरखत रै पतौ ऊं सगळी जाति रा लोग सावळ होता हा। पछै सापित नीं होवैला, अर परमेसर अर उनियां रौ सिंहासण उण नगर में होवैला अर उणौरा दास उणौरी सेवा करैला। वे उणरौ मूंडौ देखेला, अर उणौरौ नाम उणौरै माथो ऊपर लिख्योड़ौ होवैला। पछै रात नीं होवैला, अर उणौनै दीये अर सूरज रै उजाळै री जरुरत कोनीं होवैला, क्यूंकै परभु परमेसर उणौनै उजाळौ दैला, अर वे लोग युगानयुग राज करैला। पछै सरगदूत म्हारै ऊं कयौ, “ऐ वचन विसवास रै लायक अर सच है। परभु परमेसर, जिकौ भविसयदाताओ नै पवितर आतमा दैवै है, वो आपरै सरगदूत नै भेज्यौ की अपणै दासो नै वे बातां बताए, जे जल्दी पूरी होवण वाळी है।” यीसु कयौ सुणौ, “म्हैं जल्दी आवणवाळौ हूं! धन्य है वो, जिकौ इण किताब री भविसयवांणी री बातां मांनै है।” म्हैं वोहीज यूहन्‍ना हूं, जिकौ ऐ बातां सुणतौ अर देखतौ हो। जद म्हैं सुण्यौ अर देख्यौ, तो जिकौ सरगदूत म्हनै ऐ बातां दिखाई ही, म्हैं उणनै नमण करणै रै लियै पगां पड़ियौ। पण उणै म्हनै कयौ, “देख, ऐड़ौ मत कर। क्यूंकै म्हैं थारौ, अर थांरै भाई भविसयदाताओ, अर इण किताब री बातां नै मांनणैवाळौ रौ संगी दास हूं। परमेसर नै इज नमण कर।” पछै उणै म्हारै ऊं कयौ, “इण किताब री भविसयवांणी री बातां नै बंद मत कर। क्यूंकै वगत नजीक है। जिकौ अन्याव करै है, वो अन्याव ही करतौ रैवै। अर जिकौ घिनौना है, वो घिनौना बण्यौ रैवै। अर जिकौ धरमी है, वो धरमी बण्यौ रैवै। अर जिकौ पवितर है, वो पवितर बण्यौ रैवै।” यीसु कयौ सुणौ, “म्हैं जल्दी आवणवाळौ हूं। अर हरैक रै कांम रै मुजब बदळौ दैणै रै खातर प्रतिफळ म्हारै खनै है। म्हैं अल्फा अर ओमेगा, पैला अर आखरी, आदि अर अंत हूं।” धन्य वे है, जिकौ आपरा कपड़ा धो लेवे है, क्यूंकै उणै जीवन रै दरखत खनै आवण रौ अधिकार मिळैला, अर वे फाटको ऊं होयनै नगर में परवेस करैला। पण जादू-टोणा करणवाळा, अर व्यभिचारी, अर हत्यारे अर मूरती पूजणवाळा, अर हरैक झूठ नै चाहनेवाळा अर बणाणैवाळा कुत्ते रै ज्यूं नगर ऊं बारै रैला। “म्हैं, यीसु, अपणै सरगदूत नै इण वास्तै भेज्यौ, की थौरे आगै कलीसियाओ रै बारै में इण बातां री गवाई दे। म्हैं दाऊद रौ मूल अर वंस, अर सवार रौ चमकतौ होयौ तारो हूं।” पवितर आतमा अर बींदणी दोनूं कैवै है, “आ!” अर सुणणैवाळा भी कैवै, “आ।” जिकौ तिरसो हो वो आवै, अर जिकौ कोई चावै वो जीवन रौ जळ मुफत में लेय ले। म्हैं यूहन्‍ना, हरैक नै जिकौ इण किताब री भविसयवांणी री बातां सुणै है, गवाई दैवै है। जे कोई मिनख इण बातां मांय कीं बढ़ावै तो परमेसर उण विपतियां नै, जिकौ इण किताब में लिखी है, उण माथै बढ़ावैला। जे कोई इण भविसयवांणी री किताब री बातां में ऊं कीं निकाळ दे, तो परमेसर उण जीवन रै दरखत अर पवितर नगर में ऊं, जिणरौ वरणन इण किताब में है, उणरौ भाग निकाळ दैला। जिकौ इण बातां री गवाई दैवै है वो ओ कैवै है, “हां, म्हैं जल्दी आवणवाळौ हूं।” आमीन। हे परभु यीसु आ। परभु यीसु रौ अनुग्रह पवितर लोगां रै साथै रैवै। आमीन।