﻿<?xml version="1.0" encoding="utf-8"?>
<bible language="Mewari (नुवो नेम (मेवड़ी नया नियम))" status="(c) 2010-2017, New Life Computer Institute" link="https://www.bible.com/bible/3120/MAT.16.%25E0%25A4%258F%25E0%25A4%25AE%2520%25E0%25A4%259F%25E0%25A5%2580%2520%25E0%25A4%2586%25E0%25A4%25B0">
	<testament name="New">
		<book number="40">
			<chapter number="1">
				<verse number="1">अबराम का बेटा, दाऊद का बेटा ईसू मसी की वंसावली को बखाण अस्यान हे,</verse>
				<verse number="2">अबराम को बेटो इसाक, पछे इसाक को बेटो याकूब, याकूब को बेटो यहूदो हो अन वींके ओरी भी ओलाद ही।</verse>
				<verse number="3">यहूदा को बेटा फरिस अन ज्योरो हा अन फरिस अन ज्योरो की माँ तोमार ही। फरिस को बेटो हिस्तोन अन हिस्तोन बेटो एराम हो।</verse>
				<verse number="4">एराम को बेटो अमीनादाब हो, अमीनादाब को बेटो नसोन, नसोन को बेटो सलमोन हो।</verse>
				<verse number="5">सलमोन अन वींकी लुगई राहब को बेटो बोहाज हो अन बोहाज अन वींकी लुगई रुत को बेटो ओबेद हो अन पछे ओबेद को बेटो यिसे हो।</verse>
				<verse number="6">यिसे को बेटो राजा दाऊद हो।</verse>
				<verse number="7">दाऊद को बेटो सुलेमान, वीं लुगईऊँ जनम व्यो, ज्या लुगई पेल्या उरिया की लुगई ही।</verse>
				<verse number="8">सुलेमान को बेटो रहबाम हो, रहबाम को बेटो अबिया हो अबिया को बेटो आसा हो, आसा को बेटो यहोसापात हो अन यहोसापात को बेटो योराम हो, अन योराम को बेटो उज्जिया हो।</verse>
				<verse number="9">उज्जिया को बेटो योताम हो अन योताम को बेटो आहाज हो, आहाज को बेटो हिजक्या हो।</verse>
				<verse number="10">हिजक्या को बेटो मनस्सिया हो। मनस्सिया को बेटो आमोन हो अन आमोन को बेटो योस्सिया हो।</verse>
				<verse number="11">अन इजराएलऊँ बंदी वेन बेबीलोन जाती दाण योसिया को बेटो यकुन्या व्यो अन वींके ओरी भई व्या।</verse>
				<verse number="12">बंदी वेन बाबुल पोछ्याँ केड़े यकुन्या को बेटो सालतिएल व्यो अन सालतिएल को बेटो जरुब्बाबेल हो।</verse>
				<verse number="13">अन जरुब्बाबेल को बेटो अबीहुद हो, अबीहुद को बेटो इल्याकिम हो अन इल्याकिम को बेटो अज्योर हो।</verse>
				<verse number="14">अज्योर को बेटो सदोक हो, सदोक को बेटो अखीम हो अन अखीम को बेटो इलीहुद हो।</verse>
				<verse number="15">इलीहुद को बेटो एलीयाजार हो, एलीयाजार को बेटो मत्तान हो अन मत्तान को बेटो याकूब हो।</verse>
				<verse number="16">याकूब को बेटो युसुप हो ज्यो मरियम को धणी हो मरियमऊँ ईसू को जनम व्यो ज्यो मसी केवावे हे।</verse>
				<verse number="17">अस्यान अबरामऊँ दाऊद तईं चवदा पिड़ीयाँ वीं। दाऊदऊँ लेन बंदी बणान बेबीलोन ले जाया तईं चवदा पीड़ी वी। बेबीलोन पोछ्याँ केड़े ईसू मसी का जनम तईं चवदा पिड़ीयाँ वीं।</verse>
				<verse number="18">ईसू मसी को जनम ईं तरिया व्यो, जद्याँ वींकी माँ मरियम की हगई यसुपऊँ वेगी तो वाँके ब्याव वेबा के, पेल्याई मरियम पुवितर आत्मा की तागतऊँ गरबवती वेगी।</verse>
				<verse number="19">ईं वाते वींको घर–धणी युसुप ज्यो धरमी मनक हो अन वींने बदनाम ने करबो छातो हो, ईं वाते वो छानो–मानो वींने छोड़बा को बच्यार किदो।</verse>
				<verse number="20">जद्याँ वो ईं बाताँ पे होच-बच्यार कररियो हो के, परबू को एक हरग-दुत वींने हपना में दिक्यो अन केबा लागो, “हे युसुप, दाऊद की बेटा, थूँ आपणी हगई वीं तकी मरियमऊँ ब्याव करन अटे लेन आबाऊँ मती दरप, काँके ज्यो वींका पेट में हे, वो पुवितर आत्मा का आड़ीऊँ हे।</verse>
				<verse number="21">वाँ एक छोरा ने जणी, थूँ वींको नाम ईसू राकज्ये, काँके वो आपणाँ मनकाँ ने वाँका पापाऊँ बचाई।”</verse>
				<verse number="22">यो हारोई ईं वाते व्यो के, ज्यो बचन परमेसर का आड़ीऊँ बोलबावाळे क्यो हो, वो पूरा वेवे के,</verse>
				<verse number="23">“देको, एक कूँवारी गरबवती वेई अन एक बेटा ने जनम देई, अन वींको नाम इम्मानुएल राक्यो जई,” जिंको मतलब हे, “परमेसर आपणी हाते हे।”</verse>
				<verse number="24">तद्याँ युसुप नींदऊँ जाग्यो अन वणी वस्यानीस किदो जस्यान परमेसर का हरग-दुत क्यो हो। वो मरियमऊँ ब्याव करन आपणाँ घरे लायो।</verse>
				<verse number="25">अन जतरे वणी पूत ने जण्यो, वतरे वो वींका नके ने ग्यो। वणी आपणाँ बेटा को नाम ईसू राक्यो।</verse>
			</chapter>
			<chapter number="2">
				<verse number="1">हेरोदेस राजा का राज करबा की टेम में जद्याँ यहूदियाँ परदेस का बेतलेम नगर में ईसू को जनम व्यो, तो उगमणी दसाऊँ नरई ज्योतिसी माराज यरूसलेम में आन यो पूँछबा लागा के,</verse>
				<verse number="2">“यहूदियाँ को राजा, ज्यो जनम्यो हे वो कटे हे? काँके माँकाणी उगमणी दसा में वींको तारो देक्यो अन वींने नमस्कार करबा ने आया हा।”</verse>
				<verse number="3">यो हुणन राजा हेरोदेस अन वाँकी लारे यरूसलेम का नरई मनक घबराग्या।</verse>
				<verse number="4">तद्याँ वणी राजा हारई मोटा याजकाँ अन मूसा का नेमा ने हिकाबावाळा ने बलाया अन वाँकाऊँ पूँछ्यो, “मसी को जनम कटे वेणो छावे?”</verse>
				<verse number="5">वणा क्यो, “यहूदियाँ परदेस का बेतलेम नगर में, काँके परमेसर का आड़ीऊँ बोलबावाळा अस्यान लिक्यो हे के,</verse>
				<verse number="6">“‘हो यहुदया के बेतलेम नगर का मनकाँ, थाँको नगर दूँजा नगराऊँ कम ने हे, काँके अटाऊँ एक मनक राजा बणी। जो इजराएल में रेबावाळा मारा मनकाँ की आगेवाणी करी।’”</verse>
				<verse number="7">तो हेरोदेस छानेऊँ ज्योतिसी माराजा ने बलान पूँछ्यो के, तारो कणीक दाण दिक्यो हो?</verse>
				<verse number="8">वणी वाँने यो केन बेतलेम खन्दाया के, “जावो, वीं बाळक का बारा में सई-सई पतो करो। अन जद्याँ वो लाद जावे तो मने हमच्यार करज्यो, ताँके मूँ भी आन वींने नमस्कार करूँ।”</verse>
				<verse number="9">वीं राजा की बात हुणन पराग्या अन ज्यो तारो वाँने उगमणी दिसा में दिक्यो, वो भी वाँकी लारे-लारे चालबा लागो अन जटे बाळक हो, वटे पोछन ढबग्यो।</verse>
				<verse number="10">वीं तारा ने देकन घणा राजी व्या।</verse>
				<verse number="11">वीं वणी घरे ग्या, जटे बाळक ने वींकी बई मरियम की लारे देक्यो अन गोडा टेकन वींको नमस्कार किदो। आपणी–आपणी जोळ्या खोलन वींने होना, लोबान अन अंतर भेंट किदा।</verse>
				<verse number="12">परमेसर वाँने हपना में हेंचेत किदा के, हेरोदेस के नके पाच्छा मत जाज्यो, तो वे दूजाँ गेलाऊँ आपणे देस पराग्या।</verse>
				<verse number="13">वणा जोतिसी माराज के पाच्छा जाबा केड़े, परबू को एक हरग-दुत युसुप ने हपना में दिक्यो अन वींने क्यो, “उठ, बाळक अन वींकी माँ ने लेन मिसर नाम का देस में परोजा अन जतरे मूँ थने ने कूँ, वतरे वटेई रिज्ये। काँके हेरोदेस ईं बाळक ने होदरियो हे के, वींने मरबा नाके।”</verse>
				<verse number="14">तद्याँ वो रात नेई उटन बाळक अन वींकी माँ ने लेन मिसर देस के वाते निकळ्ग्यो।</verse>
				<verse number="15">अन जतरे हेरोदेस ने मरियो वतरे वटेईस रियो, ईं वाते के, वो बचन ज्यो परमेसर का आड़ीऊँ बोलबावाळा क्यो हो वो पूरा वेवे के, “में आपणाँ पूत ने मिसरऊँ बारणे बलायो।”</verse>
				<verse number="16">जद्याँ हेरोदेस यो देक्यो के, ज्योतिसी माराज वींकी लारे धोको किदो हे, तो वो रीस में आग्यो अन आदेस देन मनकाँ ने खन्दान, ज्योतिसी माराज क्यो वीं टेम के, लगे-भगे का जनम्याँ बेतलेम अन वींकी अड़े-भड़े का गामड़ा का हाराई दो वर तईं का बाळकाँ ने मरबा नाक्या।</verse>
				<verse number="17">तद्याँ ज्यो बचन यरमिया नाम का परमेसर का आड़ीऊँ बोलबावाळे क्यो हो वो पूरा व्यो के,</verse>
				<verse number="18">“रामाह नगर में एक दुक भरी अवाज हुणई गी, अवाज रोणो-धोणो अन हाका-भार की ही, राएल आपणाँ बाळकाँ का वाते रोरी ही, अन छानी भी ने रेणी छारी ही, काँके वींका हाराई बाळक अबे ने रिया हा।”</verse>
				<verse number="19">हेरोदेस के मरिया केड़े परबू के हरग-दुत मिसर में युसुप के हपना में आन क्यो, “उठ, अन बाळक अन वींकी माँ ने लेन इजराएल देस में परोजा, काँके ज्यो बाळक ने मारणो छातो हो, वो तो मरग्यो हे।”</verse>
				<verse number="20"></verse>
				<verse number="21">तो पछे युसुप उट्यो अन बाळक अन वींकी माँ ने लेन इजराएल देस में आग्यो।</verse>
				<verse number="22">पण, युसुप यो हुणन के अरखिलाउस आपणाँ बाप हेरोदेस की जगाँ राज कररियो हे, तो वो वटे जाबाऊँ दरपग्यो, पछे पाच्छी हपना में परमेसर की आग्या हुणन गलील परदेस में परोग्यो।</verse>
				<verse number="23">अन नासरत नाम का नगर में घर बणान रेवा लागग्यो, अस्यान वो बचन पूरो व्यो, ज्यो नरई परमेसर का आड़ीऊँ बोलबावाळा क्यो हो, “वो नासरी नामऊँ जाण्यो जई।”</verse>
			</chapter>
			<chapter number="3">
				<verse number="1">वाँ दनाँ में बतिस्मा देबावालो यहुन्नो यहूदियाँ परदेस का हुन्ना काँकड़ में आयो,</verse>
				<verse number="2">अन परच्यार करबा लागो, “पापऊँ मन फेरो, काँके हरग को राज आबावाळो हे।”</verse>
				<verse number="3">यो यहुन्नो वोईस हो जिंका वाते परमेसर का आड़ीऊँ बोलबावाळे यसाया बताते तके क्यो हो के, “हुन्ना काँकड़ में एक बोलबावाळा को हाको हुणारियो हो के, ‘परबू को गेलो त्यार करो अन वींकी हड़क हुदी करो।’”</verse>
				<verse number="4">यहुन्नो का गाबा ऊँट की ऊन का बण्या तका हा अन वणी कमर में खालड़ा को कमरपट्यो बांद मेल्यो हो। टिड़्या अन हुन्ना काकड़ को हेंत वींको खाणो हो।</verse>
				<verse number="5">तद्याँ यरूसलेम अन हाराई यहूदियाँ का मनक अन यरदन नंदी का अड़े-भड़े का मनक वींका नके आन अगेटा व्या।</verse>
				<verse number="6">वाँकाणी आपणाँ पापाँ ने मान्याँ अन यरदन नंदी में यहुन्ने आपणाँ हाताऊँ वाँने बतिस्मो दिदो।</verse>
				<verse number="7">जद्याँ यहुन्ने यो देक्यो के, नरई फरीसी अन सदुकी वाँका नके बतिस्मो लेबा ने आरिया हे तो वणी वाँकाऊँ क्यो, “ओ, हाँप का बच्या। थाँने कणी हेंचेत कर दिदा हे के, थाँ परमेसर की आबावाळी रीसऊँ बंच निकळो?</verse>
				<verse number="8">थाँने ईं बात को परमाण देणो पड़ी के, हाचेई थाँका मन बदल्या हे के कोयने।</verse>
				<verse number="9">अन आपणाँ-आपणाँ मन में यो ने होचो के, ‘आपीं अबराम का बंसज हा’ काँके, मूँ थाँकाणी केवूँ हूँ के, परमेसर अबराम का वाते अणा भाटाऊँ भी बाळक पेदा कर सके हे।</verse>
				<verse number="10">अबे रूँकड़ा की जड़ा में कराड़ो मेल दिदो ग्यो हे अन ज्यो हव फल ने देवे हे वाँने काट दिदा जाई।</verse>
				<verse number="11">मूँ तो थाँने मन फेरबा का वाते पाणीऊँ बतिस्मो दूँ हूँ पण वीं ज्यो मारा केड़े आबावाळो हे, वो माराऊँ भी हेलो मोटो हे। मूँ तो वाँका पगरख्याँ का कसणा खोलबा के जोगो भी ने हूँ। वो थाँने पुवितर आत्मा अन वादीऊँ बतिस्मो देई।</verse>
				<verse number="12">वींका हाताँ में वींको हुपड़ो हे जणीऊँ वो धानऊँ हुंकला ने अलग करी अन आपणाँ खेत मेंऊँ होजा किदो तका गव भेळा करन, कोठा में भरी अन हुंकला ने वीं वादी में बाळी, ज्याँ कदी ने बजे हे।”</verse>
				<verse number="13">वीं टेम ईसू गलीलऊँ चालन यरदन नंदी का कनारे यहुन्ना का नके बतिस्मो लेबा ने आया।</verse>
				<verse number="14">पण यहुन्ने ईसू ने रोकता तके क्यो के, “मने तो खुद थाँराऊँ बतिस्मो लेबा की जरूत हे, तो पछे थूँ मारा नके काँ आयो हे?”</verse>
				<verse number="15">ईसू वींने क्यो, “अबाणू तो अस्यानीस वेबा दे। माने ज्यो परमेसर छावे हे वींने पूरो करबा का वाते योईस करणो हे।” तद्याँ यहुन्ने वींकी बात मान लिदी।</verse>
				<verse number="16">अन तद्याँ ईसू बतिस्मो लिदो अन जस्यानी वो पाणीऊँ बारणे आयो तो आकास खुलग्यो अन वणी परमेसर की आत्माने एक परेवड़ा का जस्यान रेटे उतरती अन आपणाँ माता पे आती देकी।</verse>
				<verse number="17">तद्याँ आ आकासवाणी वी के, “यो मारो लाड़लो पूत हे, जणीऊँ मूँ घणो राजी हूँ।”</verse>
			</chapter>
			<chapter number="4">
				<verse number="1">ईंका केड़े पुवितर आत्मा ईसू ने हुन्ना कांकड़ में लेगी, ताँके सेतान का हाताऊँ वींकी जाँच-परक किदी जा सके।</verse>
				<verse number="2">चाळीस रात-दन भुको रिया केड़े ईसू ने जोरकी भूक लागी।</verse>
				<verse number="3">तो वींकी परक करबावाळो वींका भड़े आयो अन क्यो, “यद्याँ थूँ परमेसर को पूत हे तो अणा भाटा ने के, ईं रोट्याँ बण जावे।”</verse>
				<verse number="4">ईसू क्यो, “सास्तर में ओ लिक्यो हे के, “‘मनक बेस रोट्याऊँईस ने जीवे हे पण हरेक बचनऊँ जीं परमेसर का मुण्डाऊँ निकळे हे, जीवतो रेई।’”</verse>
				<verse number="5">पछे सेतान वींने पुवितर नगर यरूसलेम में लेग्यो। वटे मन्दर का हाराऊँ ऊँचा गुम्बद पे ऊबो किदो।</verse>
				<verse number="6">पछे सेतान वणीऊँ क्यो, “यद्याँ थूँ परमेसर को पूत हे तो अटेऊँ रेटे कुद जा, काँके सास्तर में ओ लिक्यो हे, “‘वीं थारी हार-हमाळ का वाते हरग-दुताँ ने खन्दाई अन वीं थने हातु-हात तोक लेई ताँके थाँरा पगाँ के भाटा की ने लाग जावे।’”</verse>
				<verse number="7">ईसू वींने क्यो, “पण सास्तर यो भी केवे हे के, “‘थूँ आपणाँ परबू परमेसर की परक मती कर।’”</verse>
				<verse number="8">ईंका केड़े सेतान ईसू ने हाराऊँ ऊँचा मंगरा पे लेग्यो अन वाँने दनियाँ का हाराई राज अन मानता बताई।</verse>
				<verse number="9">सेतान वींने क्यो, “ईं हारई चिजाँ थने दी देवूँ यद्याँ थूँ मारा पगा में पड़न मने माने।”</verse>
				<verse number="10">पछे ईसू वींने क्यो, “हे सेतान, छेटी वेजा। सास्तर यो केवे हे, “‘थूँ आपणाँ परबू परमेसर ने मान अन बेस वाँकीईस सेवा-चाकरी कर।’”</verse>
				<verse number="11">पछे सेतान ईसू ने छोड़न भागग्यो अन हरग-दुत आन वाँकी सेवा-चाकरी करबा लागा।</verse>
				<verse number="12">जद्याँ ईसू हुण्यो के, यहुन्नो पकड़ाग्यो हे, तो वो गलील में परदेस परोग्यो।</verse>
				<verse number="13">पण वो नासरत नगर में ने रियो अन जान कफरनूम नगर में, ज्यो जबलुन अन नप्ताली हाकम का देस में गलील समन्द का अड़े-भड़े हो, वटे रेवा लागो।</verse>
				<verse number="14">यो ईं वाते व्यो, ताँके परमेसर का आड़ीऊँ बोलबावाळा यसाया ज्यो क्यो हो वो पूरो वेवे के,</verse>
				<verse number="15">“जबलुन अन नप्ताली का देस समन्द का गेला पे, यरदन नंदी का आतमणी दसा में, ज्यो यहूदी ने हे वाँका देस गलील में।</verse>
				<verse number="16">ज्यो लोग अंदारा में जीरिया हा वाँकाणी एक मोटो ऊजासो देक्यो अन ज्यो मोत की दरप में जीरिया हा, वाँका पे भाग फाट्या को उजितो चमके।”</verse>
				<verse number="17">वीं टेमऊँ ईसू हव हमच्यार की सरुआत कर दिदी के, “पापऊँ मन फेरो, काँके हरग को राज आबावाळो हे।”</verse>
				<verse number="18">जद्याँ ईसू गलील का समन्द का नके वेन जारियो हा। वटे वणा दो हगा भई समोन ज्यो पतरस केवातो हो अन वींका भई अन्दरियास ने समन्द में आपणाँ जाळ नाकता तका देक्या। काँके वीं माछळी पकड़बावाला हा।</verse>
				<verse number="19">ईसू वाँने क्यो, “मारा पाच्छे आवो, मूँ थाँने हिकाऊँ के, लोगाँ का वाते माछळी पकड़बा के वजे मनकाँने परमेसर का राज में कस्यान लावे हे।”</verse>
				<verse number="20">वीं तरत आपणाँ जाळ वटेई छोड़न ईसू का लारे वेग्या।</verse>
				<verse number="21">पछे वी वटेऊँ आगे चाल पड़्या अन वणा देक्यो के, जबदी को छोरो याकूब अन वींको भई यहुन्नो आपणाँ बाप जबदी का हाते नाव में बेट्यो तको आपणी जाळाँ ने हळजारिया हा। ईसू वाँने भी बलाया।</verse>
				<verse number="22">अन वीं तरत नाव अन आपणाँ बापू जब्दी ने वटेई छोड़न वींका पाच्छे वेग्यो।</verse>
				<verse number="23">ईसू हाराई गलील देस में यहुदया का परातना घर में हरग का राज को हव हमच्यार को उपदेस देतो अन तरे-तरे का रोगा ने हव करतो तको फरबा लागो।</verse>
				<verse number="24">हाराई सिरिया देस में वाँको हव हमच्यार फेलग्यो। ईं वाते लोग अस्या हाराई मनकाँ ने ज्यो तरे-तरे की मांदकीऊँ माँदा हा, जणामें हुगळी-आत्मा, जाँने मरगी का जोला आता हा, अन जीं लकवा का माँदा हाँ, वाँने ईसू का नके लाया अन ईसू वाँने हव किदा।</verse>
				<verse number="25">ईं वाते गलील देस, दस नगराँ को गामाँ की जगाँ जिंने दिकापुलिस केता हा, यरूसलेम, यहूदियाँ अन यरदन नंदी की पेले पाल्डे का मनकाँ की मोटी-मोटी टोळी वाँका नके आबा लागी।</verse>
			</chapter>
			<chapter number="5">
				<verse number="1">जद्याँ ईसू मनकाँ की मोटी टोळी देकी, तो वो मंगरा पे पराग्यो अन वटे जान बेटग्यो अन वींका चेला वींका नके आग्या।</verse>
				<verse number="2">तद्याँ ईसू वाँने उपदेस देता तका क्यो,</verse>
				<verse number="3">“धन्ने हे वीं ज्यो हरदाऊँ गरीब हे, काँके हरग को राज वाँकोइस हे।</verse>
				<verse number="4">धन्ने हे वीं ज्यो रोवे हे, काँके परमेसर वाँने सान्ती देई।</verse>
				<verse number="5">धन्ने हे वीं ज्यो नरमाई राके हे, काँके वीं ईं धरती का अदिकारी वेई।</verse>
				<verse number="6">धन्ने हे वी ज्यो धरम का काम करबा में आगता रेवे हे, परमेसर वाँकी मरजी पुरी करी।</verse>
				<verse number="7">धन्ने हे वीं, ज्यो दयाळू हे, काँके वाँपे दया किदी जाई।</verse>
				<verse number="8">धन्ने हे वीं, जणा का मन पुवितर हे, काँके वीं परमेसर का दरसण करी।</verse>
				<verse number="9">धन्ने हे वीं, जीं मेल-मिलाप को काम करे हे, काँके वीं परमेसर का छोरा-छोरी केवाई।</verse>
				<verse number="10">धन्ने हे वीं, ज्यो धरम का वाते दुक भोगे हे, काँके हरग को राज वाँको हे।”</verse>
				<verse number="11">धन्ने हो थाँ, काँके मनक मारा नामऊँ थाँकी नन्दयाँ करे, अन हतावे अन जूटी बाताँ करन थाँका विरोद में हारी तरियाँ की खोटी बाताँ करे हे।</verse>
				<verse number="12">तद्याँ थाँ राजी वेज्यो अन आणन्द मनाज्यो, काँके हरग में थाँने ईंको फळ मली। यो वस्यानीस हे जस्यान थाँकाऊँ पेल्याँ परमेसर का आड़ीऊँ बोलबावाळा लोगाँ ने हताया हा।</verse>
				<verse number="13">“थाँ धरती का हाराई मनकाँ का वाते लूण हो, पण यद्याँ लूण को हवाद बगड़ जावे तो वो पाछो खारो ने बणायो जा सके हे। अन नेई वो कई कामे आवे हे पण वींने फेंक दिदो जावे, जणीऊँ वो मनकाँ का पगाँऊँ गुद्‍यो जावे।”</verse>
				<verse number="14">“थाँ धरती का वाते उजितो हो अन ज्यो नगर मंगरा पे हे, वो हपी ने सके हे।</verse>
				<verse number="15">मनक दिवो लगान कणी ठामड़ा का रेटे ने मेले हे, पण वींने आल्याँ में मेले, ताँके घर का हाराई मनकाँने उजितो मल सके।</verse>
				<verse number="16">अणी तरियाँ थाँको उजितो मनकाँ का हामे अस्यान चमके के, वीं थाँका हव कामाँ ने देके अन थाँका परमपिता की, ज्यो हरग में बिराजे हे, वींकी मेमा करे।”</verse>
				<verse number="17">“यो मती होचो के, मूँ मूसा का नेम कन परमेसर का आड़ीऊँ बोलबावाळा की बाताँ ने खतम करबा ने आयो हूँ, पण वाँने पुरी करबा ने आयो हूँ।</verse>
				<verse number="18">मूँ थाँकाऊँ हाँची केवूँ हूँ के, आकास अन धरती टळ सके हे, पण मूसा का नेमा में लिक्या तका हरेक अकर अन सबद तद्याँ तईं बण्या तका रेई जद्याँ वीं पूरा ने वे जावे।”</verse>
				<verse number="19">“ईं वाते ज्यो कुई अणा फोरीऊँ फोरी आग्या मेंऊँ कणी एक ने भी तोड़े अन वस्यानई मनकाँ ने हिकावे तो वींको हरग का राज में मान ने वेई, पण ज्यो कुई अणा आग्या को पालण करी अन वाँने हिकाई तो वो हरग का राज में मान पाई।</verse>
				<verse number="20">काँके मूँ थाँकाऊँ केवूँ हूँ के, यद्याँ थाँकी धारमिकता मूसा का नेमा ने हिकाबावाळा अन फरीसियाँ की भगतीऊँ मोटी ने वेई, तो थाँ हरग का राज में कदी ने जा सको।”</verse>
				<verse number="21">“थाँ जाणो हो के, आपणाँ बड़ाबा ने क्यो ग्यो हो के, ‘हत्या मती करो अन यद्याँ कुई हत्या करे हे तो वींने कोरट में दोसी ठेरायो जाई।’</verse>
				<verse number="22">पण मूँ थाँकाऊँ यो केऊँ हूँ के, ज्यो कुई आपणाँ भई पे रीस करी, वो सबा में दण्ड के जोगो मान्यो जाई। ज्यो कुई आपणाँ भई ने बेजत करी वींने मोटी सबा में दण्ड के जोगो मान्यो जाई। ज्यो कुई आपणाँ भई ने हराप देवे हे, वो नरक की वादी के जोगो वेई।</verse>
				<verse number="23">“ईं वाते जद्याँ वेदी पे परमेसर का वाते चडावो चड़ाती दाण थाँने ओ आद राकणो छावे के, थाँरा भई का मन में थाँरा वाते विरोद हे,</verse>
				<verse number="24">तो आपणाँ चड़ावा ने वटेईस वेदी हामें छोड़ दो, अन जान पेल्या आपणाँ भईऊँ हमजोतो कर अन पछे आपणाँ चड़ावा ने पूरो कर।</verse>
				<verse number="25">“यद्याँ थूँ आपणाँ विरोदी का हाते कोरट में जाती दाण गेला में वे तो जट-पट वणीऊँ हमजोतो करले कटे अस्यान ने वे के, थाँरो विरोदी थने हाकम का हाताँ में हूँपे, अन हाकम थने सपाई का हाताँ में हूँपे अन थूँ जेळ में नाक्यो जावे।</verse>
				<verse number="26">मूँ थाँकाणी हाचेई कूँ हूँ के, जद्याँ तईं थूँ कोड़ी-कोड़ी ने भर देई तद्याँ तईं वटेऊँ ने छुट सकी।</verse>
				<verse number="27">“थाँ जाणो हो अन क्यो ग्यो हो के, ‘कुकरम ने करणो।’</verse>
				<verse number="28">पण मूँ थाँकाऊँ केवूँ हूँ के, ज्यो कुई कणी परई लुगई ने बुरी नजरऊँ देके हे, वो वींका मन में वींऊँ कुकरम कर चुक्यो हे।</verse>
				<verse number="29">यद्याँ थाँकी जीमणी आँक थाँने पाप में नाके, तो वींने काड़न फेंक दे, काँके थाँका वाते यो हव हे के, थाँका अंग मूँ एक नास वे जावे अन थाँको पूरो सरीर नरक में ने नाक्यो जई।</verse>
				<verse number="30">यद्याँ थारो जीमणो हात थाँने पाप में नाके, तो वींने काटन फेंक दो, काँके थाँका वाते यो हव हे के, थाँका अंगा मूँ एक नास वे जावे, अन थाँको आको सरीर नरक में ने नाक्यो जावे।</verse>
				<verse number="31">“थाँने यो भी बतायो ग्यो हो के, ‘ज्यो कुई आपणी लुगई ने छोड़णो छावे, तो वींने तलाक पतर लिकन देणो छावे।’</verse>
				<verse number="32">पण मूँ थाँकाऊँ यो केवूँ हूँ के, ज्यो कुई आपणी लुगई ने कुकरम के अलावा कणी ओरी बातऊँ तलाक देवे हे अन वा लुगई कणी दूजाँ का हाते रेवे तो वींके कुकरमी वेबा को जिमेदार वींको पेलो धणी हे। ज्यो कुई वीं तलाक दिदी तकीऊँ ब्याव करे, तो वो भी कुकरम करे हे।</verse>
				<verse number="33">“थाँ ओ भी जाणो हो के, आपणाँ बड़ाबाऊँ क्यो ग्यो हो के, ‘जूटा होगन मती खाज्यो, पण परबू का वाते आपणाँ होगन ने पूरा करज्यो।’</verse>
				<verse number="34">पण मूँ थाँकाऊँ यो केवूँ हूँ के, कदी होगनई मती खावो, ने हरग की, काँके वटे परमेसर की गाद्दी हे।</verse>
				<verse number="35">अन ने धरती की, काँके वाँ वाँका पगाँ की चोकी हे, अन ने यरूसलेम की, काँके वो मोटा राजा को नगर हे।</verse>
				<verse number="36">आपणाँ माता का भी होगन मती खाज्ये, काँके थूँ थाँरा बाला मेंऊँ एक भी बाळ ने धोळो अन नेई काळो कर सके हे।</verse>
				<verse number="37">पण थाँकी बात हाँ की ‘हाँ’ अन ने की ‘ने’ वेवे। काँके ज्यो कुई अणीऊँ हेलो बोले हे तो वो सेतान का आड़ीऊँ हे।</verse>
				<verse number="38">“थाँ हुण चुक्या हो, थाँने क्यो ग्यो हो के, ‘आँक का बदले आँक, अन दात का बदले दाँत।’</verse>
				<verse number="39">पण मूँ थाँकाऊँ यो केवूँ हूँ के, कणी बुरई करबावाळा का हाते बुरई मती करो, पण ज्यो कुई थाँका जीमणो गाल्डा पे रेपट मारे, तो वाँकी आड़ी दूज्यो गालड़ो भी कर देज्यो।</verse>
				<verse number="40">यद्याँ कुई थाँका पे मुकदमो करन थाँको कुरतो भी लेणो छावे, तो थाँ वींने आपणो चादरो भी दे दिज्यो।</verse>
				<verse number="41">ज्यो कुई थाँने जबरदस्ती आपणो सामान तोकान एक कोस चलावे तो थाँ वाँका हाते दो कोस परा जाज्यो।</verse>
				<verse number="42">यद्याँ कुई थाँकाऊँ कई मांगे तो वींने वो दे देज्यो। ज्यो थाँकाऊँ उदार लेणो छावे, वाँने नटज्यो मती।</verse>
				<verse number="43">“थाँने हुणायो ग्यो हो, यो क्यो ग्यो हो के, ‘आपणाँ पड़ोसीऊँ परेम राकणो, अन आपणाँ दसमणाऊँ दसमणी राकणी।’</verse>
				<verse number="44">पण मूँ थाँकाऊँ यो केवूँ हूँ के, आपणाँ दसमणाऊँ परेम राकज्यो अन आपणाँ हताबावाळा का वाते भी परातना करज्यो।</verse>
				<verse number="45">जणीऊँ थाँ आपणाँ हरग का परम बापू की ओलाद केवावो, काँके वीं भला अन बुरा दुयाँ पे आपणो सुरज उगावे हे, अन धरमी अन पापी दुयाँ पे बरका वरावे हे।</verse>
				<verse number="46">काँके यद्याँ थाँ आपणाँऊँ परेम करबावाळाऊँ परेम राको हो, तो थाँका वाते कई भलो वेई? कई कर लेबावाळो भी अस्यान ने करे हे?</verse>
				<verse number="47">यद्याँ थाँ आपणाँ भई-बन्दाऊँइस नमस्कार करो, तो कस्यो नवई को काम करो हो? कई ज्यो यहूदी ने हे वीं अस्यान ने करे हे?</verse>
				<verse number="48">ईं वाते थाँ पाका बणो, जस्यान थाँका हरग का परम बापू हे।”</verse>
			</chapter>
			<chapter number="6">
				<verse number="1">“ध्यान राकज्यो के, थाँ लोगाँ का हामे मोटा बाजबा का वाते दान-पन मती करो, ने तो थाँ थाँका हरग का परम बापऊँ भी फळ ने पावो।</verse>
				<verse number="2">“ईं वाते जद्याँ थाँ कणी जरुतवाळा ने दान देवो हो तो आपणी बड़ई मती करज्यो, जस्यान के परातना घर में अन गेला-गाटे कपटी मनक दूजाऊँ आपणी बड़ई करबा का वाते करे हे। मूँ थाँने हाचेई केवूँ हूँ के, वाँने वाँको फळ पेल्याई दिदो जा चुक्यो हे।</verse>
				<verse number="3">पण जद्याँ थूँ दान करे, तो ज्यो थारो जीमणा हात करे हे, वींकी थाँरा डावा हात ने खबर ने पड़णी छावे।</verse>
				<verse number="4">ईंऊँ थाँको दान एकदम छाने रेई अन थाँको बाप ज्यो छानेकूँ थाँ करो हो वींने देके हे, वो थाँने ईंको फळ देई।</verse>
				<verse number="5">“जद्याँ थाँ परातना करो, तो कपटी मनकाँ का जस्या परातना मती करज्यो, काँके वीं मनकाँ ने दिकावा का वाते परातना घर में अन गेला का ऊपरे ऊबा वेन परातना करणो वाँने हव लागे हे। मूँ थाँने हाचेई केवूँ हूँ के, वणा आपणो फल पा लिदो हे।</verse>
				<verse number="6">पण जद्याँ भी थूँ परातना करे आपणाँ ओवरा में जा अन कमाड़ बन्द करन आपणाँ बापू परमेसरऊँ ज्यो छाने में हे परातना कर अन थाँको बाप छाने में देके हे, वो थाँने वींको फळ देई।</verse>
				<verse number="7">“परातना करती टेम जो यहूदी ने हा वाँके जस्यान हाका-हूक मती करो, काँके वीं हमजे हे के, वाँका हेला बोलबाऊँ वाँकी परातना हुण लिदी जाई।</verse>
				<verse number="8">ईं वाते थाँ वाँके जस्यान मती बणो, काँके थाँको बाप थाँके मांगबाऊँ पेल्या जाणे हे के, थाँके किंकी जरूत हे।</verse>
				<verse number="9">ईं वाते थाँ ईं तरियाँ परातना करिया करो, “‘हो माकाँ बापू, थाँ ज्यो हरग में हे, थाँको नाम पुवितर मान्यो जावे।</verse>
				<verse number="10">थाँको राज आवे, थाँकी मरजी जस्यान हरग में पुरी वेवे हे, वस्यानीस धरती पे भी वेवे।</verse>
				<verse number="11">माँके दन भर की रोटी आज माने दे।</verse>
				<verse number="12">अन जस्यान माँ माकाँ दसमणा ने माप किदा हे, वस्यानीस थाँ भी माकाँ पापाँ ने माप करो।</verse>
				<verse number="13">माँने अस्यी तागत देज्यो ताँके, माँ हारी तरिया की परक को सामनो कर सका, अन माने बुरईऊँ बचावो। काँके राज अन तागत अन मेमा हमेस्यान थाँकीस हे।’” आमीन।</verse>
				<verse number="14">ईं वाते यद्याँ थाँ मनकाँ का अपरादा ने माप करो, तो थाँको हरग को बाप भी थाँने माप केरी।</verse>
				<verse number="15">अन यद्याँ थाँ मनकाँ का अपरादा ने माप ने करो, तो थाँको बाप भी थाँका अपरादा ने माप ने केरी।</verse>
				<verse number="16">“जद्याँ थाँ एकाणो करो, तो कपट्या के जस्यान थाँको मुण्डो लटक्यो तको ने रेवे, काँके वीं खुद को मुण्डो अस्यानई लटकान राके हे, ईंऊँ वाँने मनक एकाणो राकबावाळा भगत हमजे। मूँ थाँने हाँची केऊँ हूँ के, वणा ईंको फळ पा लिदो हे।</verse>
				<verse number="17">पण जद्याँ थाँ एकाणो राको तो आपणाँ बाला में तेल लगावो अन मुण्डा ने धोवे।</verse>
				<verse number="18">ताँके मनक ने पण थाँको बाप ज्यो छाने में हे, थाँने एकाणो राकबावाळा हमजे। अणी दसा में थाँको बाप ज्यो थाँ छाने में करो हो वींने देके हे, वो थाँने फळ देई।</verse>
				<verse number="19">“थें आपणाँ वाते धरती पे धन-दोलत भेळी मती करो, काँके वाँने किड़ा अन जंग नास कर देई। अन चोर वींने लूट सके हे।</verse>
				<verse number="20">पण अणीऊँ यो हव हे के, थाँ आपणाँ वाते हरग में हाँची धन-दोलत भेळी करो, वटे ने तो किड़ा अन जंग वींने हड़ा सके हे। अन ने चोर वटे चोरी सके हे।</verse>
				<verse number="21">आद राको जटे थाँकी धन-दोलत वेई वटे थाँको मन लाग्यो रेई।</verse>
				<verse number="22">“देह को दिवो आँक हे, ईं वाते यद्याँ थाँकी आक्याँ नरोगी हे, तो थाँको हारी देह भी उजिता वाळी रेई।</verse>
				<verse number="23">पण यद्याँ थाँकी आँक नरोगी ने हे, तो थाँकी हारी देह में अंदारो वेई, ईं वाते वो उजितो ज्यो थाँकामें हे यद्याँ अंदारो वेई तो वो अंदारो कतरो मोटो वेई?</verse>
				<verse number="24">“कुई भी मनक एक लारे दो मालिकाँ की सेवा ने कर सके हे, काँके वो एकऊँ दसमणी अन दूजाऊँ लाड़ राकी कन एकऊँ मल्यो रेई अन दूजाँ ने बेकार जाणी। थाँ परमेसर अन धन-दोलत दुयाँ की सेवा एक हाते ने कर सको हो।</verse>
				<verse number="25">“ईं वाते मूँ थाँने केवूँ हूँ के, आपणाँ जीव का वाते यो होच मती करज्यो के, आपाँ कई खावा, कई पिबा, अन ने आपणी देह के वाते के, कई पेरा। कई जीव खाणाऊँ अन देह गाबाऊँ खास कोनी?</verse>
				<verse number="26">हवा में ऊड़बा वाळा जीव-जनावराँ ने देको! वीं ने तो कुई बोवे हे, ने कई काटे हे, अन नेई बकारिया में धान भरे हे! तद्याँ भी थाँको हरग को बाप वाँको पेट भरे हे। कई थाँ वणाऊँ खास कोयने हो?</verse>
				<verse number="27">थाँकामें कूण अस्यो हे, ज्यो फिकर करन आपणी उमर में एक घड़ी भी बढा सके हे?</verse>
				<verse number="28">“थाँ गाबा का वाते काँ होच करो हो? कांकड़ का फूलाँ ने देको के, वीं कस्यान खले हे, वीं ने तो काम-काज करे हे, अन नेई आपणाँ वाते गाबा बणावे हे।</verse>
				<verse number="29">तो भी मूँ थाँकाऊँ कूँ हूँ के, सुलेमान राजा भी, आपणाँ राज का वेभव में वाँ फूलाँ की रूपाळापणा का जस्यान गाबा ने पेर सक्यो।</verse>
				<verse number="30">ईं वाते जद्याँ परमेसर छापेड़ा की चुंटी ने, ज्यो अबाणू हे, अन काले वादी में बाळी जई, वींने अतरी हव बणावे हे, तो हो कम विस्वासवाळा, कई थाँने हव गाबा ने पेराई?</verse>
				<verse number="31">“ईं वाते थाँ होच करन यो मती केज्यो के, ‘माँ कई खाबा, कन कई पिबा अन कई पेरा?’</verse>
				<verse number="32">काँके बना विस्वासवाळा मनक ईं हारी चिजाँ का पाच्छे दोड़ता रेवे हे, अन थाँके हरग को बाप जाणे हे के, थाँके ईं हारी चिजाँ छावे हे।</verse>
				<verse number="33">ईं वाते पेल्या थाँ परमेसर का राज ने होदो अन हाँच पे चालो, तो ईं हारी चिजाँ भी थाँने मल जाई।</verse>
				<verse number="34">ईं वाते थाँ काले को होच मती करो, काँके काल को दन आपणी होच खुदई कर लेई। आज का वाते आज कोईस दुक घणो हे।”</verse>
			</chapter>
			<chapter number="7">
				<verse number="1">“दूजाँ पे दोस मती लगावो, ताँके परमेसर भी थाँका पे दोस ने लगावे।</verse>
				<verse number="2">काँके थाँको भी न्याव वस्यानीस करियो जाई, जस्यान थाँ न्याव करबा की टेम में दूजाँ मनकाँ का हाते करो हो। परमेसर थाँने वणीस नापऊँ नापी जणीऊँ थाँ दूजाँ ने नापो हो।</verse>
				<verse number="3">“थने आपणाँ भई की आक्याँ में फोरो तरकल्यो तो दिके हे, तो आपणी आक्याँ को मोटो तरकल्यो काँ ने दिके हे?</verse>
				<verse number="4">जद्याँ थारी आक्याँ में मोटो तरकल्यो हे, तो थूँ आपणाँ भईऊँ कस्यान के सके हे के, ‘आव मूँ थारी आक्याँऊँ तरकल्यो काड़ दूँ’?</verse>
				<verse number="5">हे कपटी पेल्याँ आपणी आक्याँ मूँ मोटो तरकल्यो काड़ ले, तद्याँ थूँ खुद का भई की आक्याँ मूँ फोरो तरकल्या ने हुदो देकन काड़ सेकी।</verse>
				<verse number="6">“गण्डकड़ा का हामे पुवितर चिजाँ मती फेको अन ने हूँरा का हामे मोती वकेरो। काँके थाँ अस्यान करो तो वीं हूँर मोती ने आपणाँ पगाँ में गूंदी अन गण्डकड़ा पाच्छा फरन थाँकी पीड़ी पकड़ी।</verse>
				<verse number="7">“परमेसरऊँ माँगो, तो थाँने दिदो जाई, होदो तो थाँने मल जाई, कमाड़ वजाओ तो थाँका वाते खोल्या जाई।</verse>
				<verse number="8">काँके ज्यो कुई मांगे हे, वाँने दिदो जावे हे, ज्यो होदे हे, वो पावे हे, अन ज्यो कमाड़ वजाई, वाँका वाते खोल्यो जाई।</verse>
				<verse number="9">“थाँकामूँ अस्यो कूण मनक हे के, यद्याँ वींको छोरो वणीऊँ रोटी मांगे तो वो वींने भाटो देवे हे?</verse>
				<verse number="10">कन माछळी मांगे, तो वो वाँने हाँप देवे हे?</verse>
				<verse number="11">ईं वाते यद्याँ थाँ बुरा वेता तका भी आपणाँ छोरा-छोरी ने हव चिजाँ देणी हव हमज्यो हो, तो थाँरो हरग को बाप परमेसर माँगबावाळा ने हव चिजाँ काँ ने देई?</verse>
				<verse number="12">“ईं वाते थाँ छावो हो के, मनक थाँका हाते हव वेवार राके, तो थाँ भी वाँका लारे वस्यानीस करो। काँके ओ मूसा का नेमा अन परमेसर का आड़ीऊँ बोलबावाळा का जरिये बतायो ग्यो हे।</verse>
				<verse number="13">“हाँकड़ा गेलाऊँ जावो, काँके चोड़ो गेलो हेल हे वो गेलो नरक में ले जावे हे अन घणा मनक चोड़ा गेला पे जारिया हे।</verse>
				<verse number="14">पण हाँकड़ा गेले जाणो घणो अबको हे यो गेलो जीवन का आड़ी ले जावे हे। अन थोड़ाक मनक अणी गेला पे चाले हे।</verse>
				<verse number="15">“परमेसर का आड़ीऊँ बोलबावाळा जीं जूटा हे, वणाऊँ हेंचेत रेज्यो। वीं थाँका नके गारा का वेस में आवे हे, पण वीं मयनेऊँ अड़क्या वरगड़ा का जस्यान वेवे हे।</verse>
				<verse number="16">थाँ वाँका करमाऊँ वाँने ओळक लेवो। कई कुई मनक ने तो झाड़क्याऊँ अंगूर अन ने थोरऊँ टीमरूँ तोड़े हे।</verse>
				<verse number="17">ईं तरियाँ हव रूँकड़ा के हव फल लागे हे अन खोटा रूँकड़ो के खोटा फल लागे हे।</verse>
				<verse number="18">हव रूँकड़ो खोटो फल ने लावे हे, अन ने खोटो रूँकड़ो हव फल ला सके हे।</verse>
				<verse number="19">ज्यो ज्यो रूँकड़ो हव फळ ने लावे, वो काट्यो जाई अन वादी में बाळ्यो जाई।</verse>
				<verse number="20">ईं वाते मूँ थाँने ओरी केरियो हूँ के, अणी तरिया थाँ वाँका करमाऊँ वाँने ओळक लेवो।</verse>
				<verse number="21">“ज्यो मने, हो परबू, हो परबू केवे हे वाँका मेंऊँ हाराई हरग का राज में ने जई सकी, पण वोईस जा सकी, ज्यो मारा हरग का बाप की मरजी पे चाले हे।</verse>
				<verse number="22">वीं टेम में नरई मनक माराऊँ केई, ‘ओ परबू, ओ परबू, कई माँ थाँका नामऊँ आगेवाणी ने किदी? कई थाँका नामऊँ हुगली आत्माने काड़ी? कई, थाँका नामऊँ नरई परच्या ने किदा?’</verse>
				<verse number="23">तद्याँ मूँ वाँने खोलन केऊँ के, ‘में थाँने कदी भी ने ओळक्या, हो कुकरम करबावाळा, मारा नकेऊँ परा जावो।’</verse>
				<verse number="24">“ईं वाते ज्यो कुई मारी ईं बाताँ हुणन वाँने माने हे, वो वीं अकलवाळा मनक जस्यान वेई जणी आपणो घर छाँट पे बणायो।</verse>
				<verse number="25">अन बरका वरी अन नंदी ढावा ऊपरे आई अन डूँज चाली, अन वीं घर पे लागी, पछे भी वो घर ने हड़्यो, काँके वाँकी नीम छाँट पे बणईगी ही।</verse>
				<verse number="26">“पण ज्यो कुई मारी ईं बाताँ हुणे हे अन वो वाँने ने माने हे, तो वो वीं बना अकल का मनक का जस्यान वेई जणी आपणो घर रेत पे बणायो।</verse>
				<verse number="27">अन बरका वरी, अन नंदी अई, अन वीं घरऊँ टकराई अन वो हड़ीन धुळा भेलो वेग्यो।”</verse>
				<verse number="28">जद्याँ ईसू बाताँ कर चुक्यो, तो अस्यान व्यो के, भीड़ वाँका उपदेस हुणन अचम्बो करबा लागी।</verse>
				<verse number="29">काँके ईसू मनकाँ ने मूसा का नेमा ने हिकाबावाळा का जस्यान ने, पण हकऊँ उपदेस देता हा।</verse>
			</chapter>
			<chapter number="8">
				<verse number="1">जद्याँ ईसू मंगराऊँ रेटे उतरिया, तो एक मोटी भीड़ वाँका पाच्छे वेगी।</verse>
				<verse number="2">अन देको, वटे एक कोड़यो मनक वाँका नके आन धोग देन क्यो, “हो परबू मूँ जाणूँ हूँ के, थाँ मारो कोड़ मटा सको हो।”</verse>
				<verse number="3">ईंपे ईसू हात लाम्बो करन वींके अड़ायो अन क्यो, “मूँ छावूँ हूँ के, थाँरो कोड़ जातो रे अन तरत वींको कोड़ जातो रियो।”</verse>
				<verse number="4">ईसू वणीऊँ क्यो, “देक, ईंका बारा में किंने केज्ये मती पण जान आपणाँ खुद ने याजकाँ ने बता अन ज्या बोलमा मूसे चढाबा के वाते बतई हे वींने चढा, जणीऊँ मनकाँ ने यो सबूत मल जावे के, थाँरो कोड़ जातो रियो।”</verse>
				<verse number="5">जद्याँ ईसू कफरनूम नगर में आयो तो एक हो हपाया को सूबेदार वाँका नके आन वणीऊँ अरज किदी के,</verse>
				<verse number="6">“हो परबुजी, मारो दास घर में मांदो पड़्यो हे वो लकवा में आग्यो हे, वींके घणो दुक वेरियो हे।”</verse>
				<verse number="7">ईसू वणीऊँ क्यो, “मूँ वटे आन वींने हव करूँ।”</verse>
				<verse number="8">ईंपे अदिकारी वींने क्यो, “हो परबुजी, मूँ अणी जोगो ने हूँ के, थाँ मारे घरे आवो, पण बेस आदेस कर देवो, तो मारो दास हव वेजई।</verse>
				<verse number="9">काँके मूँ भी एक अस्या मोटा अदिकारी की दबियादारी में काम करूँ हूँ अन मारा रेटे भी सिपाई हे। जद्याँ मूँ एक सपईऊँ केवूँ हूँ, ‘जा’ तो वो चाल्यो जावे हे अन दूजाऊँ केवूँ, ‘आ’ तो वो आ जावे हे। मूँ मारा दासऊँ केवूँ के ‘यो कर’, तो वो वोईस काम करे हे।”</verse>
				<verse number="10">जद्याँ ईसू यो हुण्यो तो अचम्बा में पड़न आपणाँ पाच्छे आरिया हा वाँने क्यो, “मूँ थाँने हाचेई कूँ हूँ के, में अस्यो विस्वास इजराएल का मनकाँ में भी ने देक्यो।”</verse>
				<verse number="11">मूँ थाँने यो ओरी बताऊँ हूँ के, “नरई मनक उगमणी, आतमणी आड़ीऊँ आई अन जीमणा में अबराम इसाक अन याकूब का हाते हरग का राज में आपणी-आपणी जगाँ पे बेटी।</verse>
				<verse number="12">पण जणी परजा ने परमेसर हरग को राज देबावाळा हा, वींने अंदारा में नाक दिदी जाई जटे वीं मनक हाका-भार मेलता तका रोता रेई।”</verse>
				<verse number="13">तद्याँ ईसू वणी सेना का अदिकारीऊँ क्यो, “जा थाँरा वाते वस्यानीस वेई जस्यान थारो विस्वास हे।” अन वणीस दाण वीं सेना का अदिकारी को दास हव वेग्यो।</verse>
				<verse number="14">जद्याँ ईसू पतरस का घरे आया तो देक्यो के, पतरस का हवजी ने ताव आरियो जणीऊँ वीं माचा में हुता हा।</verse>
				<verse number="15">ईसू वाँके हात अड़ायो अन तरत वाँको ताव उतरग्यो, अन वीं उटन वाँकी सेवा-चाकरी करबा लागग्या।</verse>
				<verse number="16">जद्याँ दन आत ग्यो तद्याँ ईसू का नके मनक नरई मनकाँ ने लाया ज्यामें हुगली आत्मा ही अन ईसू वणा हारई आत्माने आपणाँ बचनऊँ काड़ दिदी अन हाराई माँदा मनकाँ ने हव किदा।</verse>
				<verse number="17">यो ईं वाते व्यो, ताँके ज्यो बचन यसाया परमेसर का आड़ीऊँ बोलबावाळे क्यो हो वो पूरो व्यो के, “वणा माँदा मनकाँ ने हव किदा, अन आपणी मांदकी ने सेण कर लिदी।”</verse>
				<verse number="18">जद्याँ ईसू आपणाँ च्यारूँमेर लोगाँ की टोळी देकी तो वाँकाणी आपणाँ चेला ने समन्द का पेली पाल्ड़े जाबा को आदेस दिदो।</verse>
				<verse number="19">तद्याँ एक मूसा का नेमा ने हिकाबावाळो वाँका नके आन ईसुऊँ क्यो, “हो गरू, जटे थाँ जावो मूँ वटे आऊँ, मूँ थाँका पाच्छे चालूँ।”</verse>
				<verse number="20">ईसू वींकी बात हुणन क्यो, “हिवाळ्या के, तो खोकल वेवे हे अन आकास का जनावराँ का वाते गवाळा वेवे हे पण मनक का पूत का वाते मातो ढाँकबा का वाते भी जगाँ ने हे।”</verse>
				<verse number="21">अन एक दूजे चेले ईसुऊँ क्यो, “हो परबू, मने पेल्या जाबा दो के, मूँ आपणाँ बाप ने गाड़ दूँ।”</verse>
				<verse number="22">ईसू वणीऊँ क्यो, “अबे थूँ मारा पाच्छे चाल, काँके परमेसर वणा मनकाँ ने मरिया तका हमजे हे जाँने अनंत जीवन को पतो कोयने हे, ईं वाते मरिया तका ने खुद आपणी लास गाड़बा दे।”</verse>
				<verse number="23">ईंका केड़े जद्याँ ईसू नाव में बेट्यो, तो वाँका चेला वाँके हाते आया।</verse>
				<verse number="24">अन देको, अणाचेत की समन्द में एक अस्यी डूँज चाली के, नाव में पाणी भरबा लागो, पण ईसू तो हूरिया हा।</verse>
				<verse number="25">तद्याँ चेला वींका नके आन वाँने जगाया अन क्यो, “हो परबू, आपाँने बचावो, आपीं डुबवावाळा हा।”</verse>
				<verse number="26">तद्याँ ईसू वणाऊँ क्यो, “हो कम विस्वासवाळा, काँ दरपो हो?” अन वाँकाणी उटन डूँज अन लेराँ ने तापड़ी अन च्यारूँमेर डूँज सान्त वेगी।</verse>
				<verse number="27">अन चेला अचम्बो करन केबा लागा, “यो कूण मनक हे? ईंको आदेस डूँज अन लेराँ भी माने हे।”</verse>
				<verse number="28">जद्याँ ईसू पेली पाल्डे गदरेनिया का नगर का नके पूग्या, तो दो मनक ज्यामें हुगली आत्मा ही, वीं कबरऊँ बारणे निकळता तका वाँकाऊँ मल्या। वीं अतरा खतरनाक हाँ के, कुई भी वणी गेलाऊँ ने जाता हा।</verse>
				<verse number="29">वाँकाणी ईसू ने ओळकन हाका-भार किदी अन क्यो, “हो परमेसर का पूत, थूँ माँकाऊँ कई छावे हे? कई थूँ माँने टेमऊँ पेल्याई दण्ड देबाने अटे आयो हे?”</verse>
				<verse number="30">वाँकाऊँ थोड़ीक छेटी हूँरा की रेवड़ चररी ही।</verse>
				<verse number="31">हुगली आत्मा वाँकाऊँ या अरज किदी के, “यद्याँ थूँ माने काडे़ हे, तो हूँरा का रेवड़ में खन्दा दे।”</verse>
				<verse number="32">ईंपे ईसू वाँकाऊँ क्यो, “जावो!” अन वीं वणा दुई मनकाँऊँ निकळन हूँरा में धसगी अन हारी रेवड़ घाटीऊँ पड़ती-गुड़ती तकी समन्द में जान डुब मरी।</verse>
				<verse number="33">रेवड़ का गवाळ्याँ भागग्या अन नगर में जान वटे ज्यो कई व्यो हो वो अन ज्यामें हुगली आत्मा ही वाँका हारई को हाल के हूँणाया।</verse>
				<verse number="34">तद्याँ नगर का हाराई मनक ईसुऊँ मलबा ने आया, अन वाँने देकन अरज किदी के, “माकाँ अटूँ परोजा।”</verse>
			</chapter>
			<chapter number="9">
				<verse number="1">पछे ईसू एक नाव में जा बेट्यो अन समन्द की पेले पाल्डे कफरनूम नगर में आयो जटे वीं रेता हा।</verse>
				<verse number="2">लोग-बाग एक माँदा ने माचा पे हुवाण वाँके नके लाया, ईसू वाँका विस्वास ने देकन वणी लकवा का माँदा मनकऊँ क्यो, “बाळक हिम्मत राक, थाँरा पाप माप वेग्या हे।”</verse>
				<verse number="3">तद्याँ कुई मूसा का नेमा ने हिकाबावाळा एक-दूजाऊँ केबा लागा, “ओ मनक आपणी वाणीऊँ परमेसर की बुरई कररियो हे।”</verse>
				<verse number="4">ईसू वाँके मन की बात जाणन वणाऊँ क्यो, “थाँ आपणाँ मना में खोटा बच्यार काँ लावो हो?</verse>
				<verse number="5">हेलो हेल कई हे? यो केणो के ‘थाँरा पाप माप वेग्या’ कन ओ केणो ‘उठ, अन परोजा?’</verse>
				<verse number="6">अणीऊँ थाँ ओ जाण सको हो के, ईं धरती पे पापाँ की मापी देबा को अदिकार मनक का पूत ने भी दिदो ग्यो हे।” पछे ईसू लकवा का माँदा मनकऊँ क्यो, “ऊबो वे, आपणो माचो उठान घरे परोजा।”</verse>
				<verse number="7">वो लकवा को मांदो मनक ऊबो वेन आपणाँ घरे परोग्यो।</verse>
				<verse number="8">जद्याँ मनकाँ ओ देक्यो तो वीं दरपग्या अन परमेसर की मेमा करबा लागा के, जणा एक मनक ने अस्या अचम्बावाळा काम करबा को अदिकार दिदो हे।</verse>
				<verse number="9">वटूँ आगे चालन ईसू मत्ती नाम का एक मनक ने चुंगी नाका पे बेट्यो देक्यो अन वणीऊँ क्यो, “मारा पाच्छे अई जा।” वो वाँका पाच्छे चालबा लागो।</verse>
				<verse number="10">जद्याँ ईसू मत्ती का घरे आपणाँ चेला हाते खाणो खाबा ने बेटो तो नरई कर लेबावाळा अन पापी आन वाँका हाते खाणो खाबा ने बेटग्या।</verse>
				<verse number="11">ओ देकन फरीसी ईसू का चेलाऊँ क्यो, “थाँको गरू कर लेबावाळा अन पाप्याँ का हाते खाणो काँ खावे हे?”</verse>
				<verse number="12">ओ हुणन ईसू वाँकाऊँ क्यो, “हव मनकाँ का वाते ने पण माँदा मनकाँ का वाते दागदर की जरुरत पड़े हे।</verse>
				<verse number="13">ईं वाते थें जान ईंको अरत सास्तरा में कई हे वींने हमजो, ‘मूँ बली ने छावूँ हूँ, पण दया-भाव छावूँ हूँ।’ मूँ धरमिया कोयने, पण पापी मनकाँ ने बलावा आयो हूँ।”</verse>
				<verse number="14">तद्याँ बतिस्मा देबावाळा यहुन्ना का चेला ईसू का नके आन क्यो, “कई बात हे के, माँ अन फरीसी अतरा एकाणा राका हा, पण थाँका चेला काँ ने राके हे?”</verse>
				<verse number="15">ईसू वाँकाऊँ क्यो, “ब्याव के टेम में जद्याँ तईं बींद आपणाँ जान्या का हाते हे तो कई वींका जान्या रोवणो-धोवणो करी? पण वीं दन जद्याँ बींदराजा ने वाँकाऊँ छेटी किदो जई, वीं टेम वीं एकाणो राकी।</verse>
				<verse number="16">अन अस्यानीस, कुई भी जूना गाबा के, नुवा गाबा मूँ फाड़न कारी ने लगावे अन कदी लगा भी दे, तो नुवा गाबा की कारी भेळी वेन जूना गाबा ने भी फाड़ दे अन वो फाट्यो गाबो ओरी हेलो फाट जावे।</verse>
				<verse number="17">अन अस्यानीस कुई जूनी मसक में नुवो अंगूरा को रस ने भरे अन जद्याँ कुई यो काम करे, तो नुवो अंगूरा को रस फेलन जूनी मसक ने फाड़ दे अन अस्यान मसक की हाते रस भी खराब वे जावे। ईं वाते नुवो अंगूरा को रस नुवी मसका मेंईस भरयो जावे हे।”</verse>
				<verse number="18">ईसू वाँकाऊँ या बाताँ केईसरियो हो अन एक परातना घर को मुक्यो आन वाँके आगे गोड़ टेकन अरज किदी के, “मारी नान्नीक छोरी अबाणू मरगी हे, पण थाँ चालन थाँको हात वाँका माता पे मेली दो तो वाँ पाच्छी जीवती वे जाई।”</verse>
				<verse number="19">ईसू ऊबो व्यो अन आपणाँ चेला का हाते वींका हाते चाल पड़्यो।</verse>
				<verse number="20">अन देको एक लुगई जिंके बारा सालऊँ परदा को रोग हो। पाच्छेऊँ आन ईसू का गाबा की कोर के अड़गी।</verse>
				<verse number="21">काँके वाँ आपणाँ मन में ओ बच्यार कररी ही के, “यद्याँ मूँ वींका गाबा का भी अड़ जाऊँ तो मूँ हव वे जाऊँ।”</verse>
				<verse number="22">ईसू पाछो फरन वींने देकी अन क्यो, “हे बेटी हिम्मत राक, थारे विस्वास थने हव कर दिदी हे।” वाँ लुगई वणीस दाण एकदम आपणी मादंगीऊँ हव वेगी।</verse>
				<verse number="23">जदी ईसू वीं परातना घर का मुक्या के घर में पूग्यो तो होक मनाबा की वाँसळी बजाबावाळा अन वटे लोगाँ ने रोवणो-धोवणो करता तका देक्या।</verse>
				<verse number="24">जद्याँ ईसू क्यो, “छेटी वे जावो, बाळकी मरी कोयने हे, वा तो हूँ री हे।” ईं बात पे वीं मनक वींकी रोळ करबा लागा।</verse>
				<verse number="25">पण जद्याँ लोगाँ की भीड़ ने बारणे काड़ दिदी, तो ईसू में जान बाळकी को हात पकड़क्यो अन जीवती वेगी।</verse>
				<verse number="26">अन ईं बात की खबर च्यारूँमेर फेलगी।</verse>
				<verse number="27">जद्याँ ईसू वटूऊँ आगे जाबा लागो, तो दो आन्दा वाँका पाच्छे वेग्या अन केबा लागा, “हे दाऊद का पूत, माकाँ पे दया करो।”</verse>
				<verse number="28">जद्याँ वो घर में पूग्यो, तो वीं आन्दा वाँका नके आया अन ईसू वाँकाऊँ क्यो, “कई थाँने विस्वास हे के, मूँ यो कर सकूँ हूँ?” वाँकाणी क्यो, “हाँ, मालिक।”</verse>
				<verse number="29">तद्याँ ईसू वाँकी आक्याँ के हात अड़ान क्यो, “थाँको विस्वास जस्यो हे वस्यानीस थाँका वाते वेवे।”</verse>
				<verse number="30">अन वाँकी आक्याँ खलगी। ईसू वाँने चेताते तके क्यो, “ध्यान राकज्यो, ईं बाताँ का बारा में किंने पतो ने चालणो छावे।”</verse>
				<verse number="31">पण वणा वटेऊँ जान ईं बात ने च्यारूँमेर फेला दिदी।</verse>
				<verse number="32">जद्याँ ईसू बारणे जारिया हाँ, तो वणा देक्यो लोग-बाग एक गूँगा ने जिंमें हुगली आत्मा ही, वाँका नके लाया।</verse>
				<verse number="33">अन जद्याँ हुगली आत्मा काड़ दिदी गी, तो गुँगो मनक बोलबा लागो। ईंपे वाँ भीड़ अचम्बो करन क्यो, “इजराएल में अस्यान पेल्याँ कदी भी ने देक्यो।”</verse>
				<verse number="34">पण फरीसी क्यो, “यो तो हुगली आत्मा का हाकम की मदतऊँ हुगली आत्माने काडे़ हे।”</verse>
				<verse number="35">ईसू हारई नगराँ अन गामाँ में जाता अन वाँका परातना घर में हिकाता रिया अन परमेसर का राज का हव-हमच्यार को परच्यार करता रिया अन हारी मांदकी अन कमजोरियाँ ने छेटी करता रिया।</verse>
				<verse number="36">जद्याँ ईसू लोगाँ की भीड़ ने देकता तो वाँने लोगाँ पे बाळ आ जाती, काँके वाँने लागतो हे के, ईं बणा गवाळ वाळा गारा के जस्यान हे। ईं दकी अन भटक्या तका का जस्यान हा।</verse>
				<verse number="37">तद्याँ ईसू आपणाँ चेलाऊँ क्यो, “पाक्या तका खेत नरई हे पण दानक्याँ घणा कम हे।</verse>
				<verse number="38">ईं वाते खेत का मालिक परमेसरऊँ परातना करो के, वीं आपणाँ खेता की हाँक काटबा का वाते दानक्याँ खन्दावे।”</verse>
			</chapter>
			<chapter number="10">
				<verse number="1">पछे ईसू आपणाँ बाराई चेला ने नके बलान, वाँने हक दिदो के, थाँ हुगली आत्माने बारणे काड़ो अन हारई मांदकी अन हारई तरिया की कमजोरियाँ ने छेटी करे।</verse>
				<verse number="2">ईं बाराई थरप्या तका चेला का नाम ईं हे, पेलो समोन, ज्यो पतरस केवावे हे, अन वींको भई अन्दरियास, जबदी को छोरो याकूब, अन वींको भई यहुन्नो।</verse>
				<verse number="3">फिलिपुस, अन बरतुलमे, थोमो, चुंगी लेबावाळो मत्ती, हलफई को छोरो याकूब, अन तद्दे</verse>
				<verse number="4">देसभगत समोन अन यहूदो इसकरियोती जणी ईसू ने धोकाऊँ पकड़ाया हा।</verse>
				<verse number="5">अणा बाराई चेला ने ईसू हक दिदो अन ओ आदेस देन खन्दाया, “ज्यो यहूदी ने हे वाँका नके मती जाज्यो अन कणी सामरिया का कणी नगर में मती जाज्यो।</verse>
				<verse number="6">पण इजराएल का घराणा का नके जाज्यो जीं गम्या तका गारा का जस्यान हे।</verse>
				<verse number="7">अन वणा हाराई ने ओ उपदेस दो के, ‘हरग को राज नके हे।’</verse>
				<verse number="8">माँदा ने हव करो, मरिया तका ने जीवता करो, कोड़्या को कोड़ खतम करो अन हुगली आत्माने काड़ो। थाँ ईंने फोगट में पायो, तो ईंने फोगट मेंईस बाँटो।</verse>
				<verse number="9">आपणाँ खुल्या में ने होनो, ने रिप्या-कोड़ी, ने तांबा का सिक्का लो।</verse>
				<verse number="10">गेला की जातरा का वाते ने जोळी राको अन थाँ पेर मेल्या हे ईंके अलावा कुरतो मत लेज्यो, ने पगरख्याँ अन ने लाकड़ी लेज्यो, काँके दानक्याँ ने वींकी दानकी मलणी छावे।”</verse>
				<verse number="11">“थाँ जद्याँ कणी नगर कन गाम में जावो, तो पतो लगावो के, वटे विस्वास के जोगो कूण हे अन जटा तईं वटूँ ने जावो, वींका वटेईस रेवो।</verse>
				<verse number="12">अन घर की डेळी में पग मेलताई वाँने आसिरवाद दिज्यो।</verse>
				<verse number="13">यद्याँ वीं घर का मनक आसिरवाद का ज्योगा वेई तो थाँको आसिरवाद वाँने लागी, पण यद्याँ वीं ज्योगा ने वेई तो थाँको आसिरवाद थाँका नके पाछो आ जई।</verse>
				<verse number="14">ज्यो कुई थाँको मान ने केरी कन थाँकी बाताँने ने हुणे तो वीं घरऊँ कन नगरऊँ निकळता तका आपणाँ पगाँ को धूळो वटेई जाटक दिज्यो, अस्यो करन वणा लोगाँ ने चेताज्यो के, परमेसर थाँने दण्ड देई, काँके थाँ वाँका संदेसा ने अनहुण्यो किदा हे।</verse>
				<verse number="15">मूँ थाँकाऊँ हाचेई कूँ हूँ के, न्याव का दन में वीं नगर को हाल सदोम अन अमोरा का हालऊँ घणो खराब वेई।</verse>
				<verse number="16">“देको हूँस्यार रेज्यो, मूँ थाँने अदिकार का हाते अस्यान बारणे खन्दारियो हूँ जस्यान गारा ने वरगड़ा का बचमें खन्दाया जावे ईं वाते हाँप का जस्यान हेंचेत रो अन परेवड़ा का जस्यान भोळा बणो।</verse>
				<verse number="17">पण थें लोगाऊँ हेंचेत रेज्यो, काँके वीं थाँने मोटी पंचातयाँ का पंचाँ का हाताँ में हूँप देई अन परातना घर में कोड़ाऊँ कुटी।</verse>
				<verse number="18">थाँने हाकम अन राजा का हामे ऊबो वेणो पेड़ी, काँके थाँ मारा बारा में लोगाँ ने हिक देवो हो। अणीऊँ वीं दाण थाँने ज्यो यहूदी ने हे वाँका में मने साबत करबा को मोको मली।</verse>
				<verse number="19">जद्याँ वीं थाँने पकड़ी तो थाँ आ चन्ता मती करज्यो के, थाँने कई केणो हे अन कस्यान केणो हे, काँके वीं टेम में थाँने पुवितर आत्मा बता देई के, थाँने कई केणो हे।</verse>
				<verse number="20">अन ओ आद राकज्यो बोलबावाळा थाँ कोयने, पण थाँको परम बापू परमेसर की आत्मा थाँकामें आन बोली।</verse>
				<verse number="21">“भई आपणाँ भई के, बई-बापू आपणाँ बाळकाँ के अन बाळक आपणाँ बई-बापू के विरोद में जाई अन वाँने धोकाऊँ पकड़वान मरबा नाकी।</verse>
				<verse number="22">मारा नामऊँ हाराई मनक थाँकाऊँ दसमणी केरी, पण ज्यो आपणी आकरी घड़ी तईं सेण करतो रेई वोईस बचायो जाई।</verse>
				<verse number="23">वीं जद्याँ थाँने एक नगर में हतावे, तो थें दूजाँ नगर में परा जाज्यो, मूँ थाँने हाचेई केवूँ हूँ के, थाँ इजराएल का हाराई नगराँ में ने जावो वतरे मनक को पूत पाछो आ जई।</verse>
				<verse number="24">“चेला आपणाँ घरऊँ मोटो कोयने वेवे हे अन नेई हाळी आपणाँ मालिकऊँ मोटो वेवे हे।</verse>
				<verse number="25">चेला ने गरू का बराबर वेवा में अन हाळी ने मालिक का बराबर वेवा मेंईस संतोक करणो छावे। यद्याँ वीं घर का मालिक ने बालजेबूल केवे, तो वाँका घर का लोगाँ ने ओरी हेलो बुरो काँ ने केई?</verse>
				<verse number="26">“ईं वाते वणा लोगाऊँ मती दरपो, ज्यो थाँकी रोळ अन थाँका हाते बुरो करे हे, काँके ज्यो कई ढाक्यो तको हे अन छाने हे वींने परमेसर हाराई का हामे चोड़े करी।</verse>
				<verse number="27">मूँ अंदारा में ज्यो कई थाँकाऊँ केवूँ हूँ, वींने थाँ दन का उजिता में केज्यो। ज्यो कई में थाँका कान्दड़ा में क्यो, थाँ मेड़ी माते चड़न, वींको परच्यार करो।</verse>
				<verse number="28">वाँकाऊँ मती दरपो, ज्यो बेस थाँने मार कर सके हे पण थाकी आत्माने नास ने सके हे, बेस वीं परमेसरऊँ दरपज्यो ज्यो सरीर अन आत्मा दुयाँ ने नरक में नाकन नास कर सके हे।</verse>
				<verse number="29">कई आटना में दो सरकल्या ने वके हे? पण जद्याँ वाँका मूँ एक भी जमीं पे पड़न मरे हे तो थाँका परम बापू परमेसर ने ईंको पतो रेवे हे।</verse>
				<verse number="30">अन अटा तईं के, वणा थाँका माता का एक-एक बाल भी गण्या तका हे।</verse>
				<verse number="31">ईं वाते दरपज्यो मती, काँके परमेसर की नजराँ में थाँको मोल वीं सरकल्याऊँ हेलो हे।</verse>
				<verse number="32">“ज्यो कुई मनकाँ का हामे मने मान लेई, तो मूँ भी मारा बापू का हामे ज्यो हरग में वींने मानूँ लू।</verse>
				<verse number="33">ज्यो कुई मने हाराई मनकाँ का हामे ने मानी, मूँ भी वाँने हरग में बिराज्या तका मारा परम बापू परमेसर का हामे ने मानूँ।</verse>
				<verse number="34">“थाँ यो मत होचो के, मूँ धरती पे लोगाँ में मेल-मिलाप को मस बणाबा ने आयो हूँ, पण मूँ तो वाँने लड़ाबा का वाते आयो हूँ।</verse>
				<verse number="35">मूँ बेटा ने आपणाँ बाप का विरोद में, बेटी ने बई का विरोद में, लाड़ी ने हवजी का विरोद में करबा ने आयो हूँ।</verse>
				<verse number="36">मनकाँ का दसमण, वाँके खुद का घरकाइस वेई।</verse>
				<verse number="37">“ज्यो माराऊँ आपणाँ बई-बापूऊँ हेलो लाड़ करे हे, वो मारो चेलो बणाबा जोगो ने हे। ज्यो खुद का छोरा-छोरियाऊँ हेलो लाड़ राके हे वो भी मारो चेलो बणबा के जोगो ने हे।</verse>
				<verse number="38">अन ज्यो भी मारा वाते दुक उटाबा अन मरबा का वाते त्यार ने हे वो मारो चेलो बणाबा के जोगो ने हे।</verse>
				<verse number="39">ज्यो आपणो जीव बंचाबा की मरजी राके हे, आपणो जीव खो देई, पण ज्यो मारा वाते खुद को जीव देई, वीं वींने पाछो पाई।</verse>
				<verse number="40">“ज्यो थाँने माने हे वीं मने भी मानी अन ज्यो मने मानी हे वो अदिकार का हाते मने खन्दाबावाळा परमेसर ने भी मानी।</verse>
				<verse number="41">ज्यो भी परमेसर का आड़ीऊँ बोलबावाळा ने परमेसर का आड़ीऊँ बोलबावाळा मानन मानी, वो भविसवक्‍ता का जस्यान फळ पाई। अन ज्यो धरमी मनक ने धरमी मानी, वो धरमी का जस्यान फळ पाई।</verse>
				<verse number="42">ज्यो कुई अणा भोळा चेलो मूँ मारो चेला जाणन किंने एक ने भी एक लोट्यो पाणी पाई, मूँ थाँकाऊँ सई कूँ हूँ, वो कणी भी तरियाऊँ आपणो फळ ने खोई।”</verse>
			</chapter>
			<chapter number="11">
				<verse number="1">जद्याँ ईसू आपणाँ बाराई थरप्या तका चेला ने आदेस दे दिदा, ईंका केड़े वीं नगराँ में उपदेस अन परच्यार करबा वटूऊँ पराग्या।</verse>
				<verse number="2">बतिस्मो देबावाळो यहुन्ने जेळ में मसी का कामाँ को हमच्यार हामळन आपणाँ चेला ने वाँकाऊँ ओ पूँछबा खन्दायो के,</verse>
				<verse number="3">“कई ज्यो आबावाळो हो वो थूँईस हे कन माँ कणी दूजाँ की वाट नाळा?”</verse>
				<verse number="4">ईसू वाँने क्यो, “ज्यो कई थाँकाणी हुणो हो अन देको हो, वो हाराई जान यहुन्नाऊँ के दिज्यो के,</verse>
				<verse number="5">आन्दा पाच्छा देकबा लागा हे अन लंगड़ा चालबा-फरबा लागा हे, कोड़्या को कोड़ हव वेरियो हे अन बेरा हुणरिया हे अन मरिया तका जीवता वेरिया हा। अन दकी अन गरीब मनकाँ ने हव हमच्यार हुणायो जारियो हे।</verse>
				<verse number="6">वीं मनक धन्न हे, ज्याँने मने मानबा में कई सक ने हे।”</verse>
				<verse number="7">जद्याँ यहुन्ना का चेला वटेऊँ जाबा लागा हा, तो ईसू यहुन्ना का बारा में लोग-बागाऊँ केबा लागो, “थाँ हुन्ना कांकड़ में कई देकबा ग्या हाँ? कई हवा में हालता आकण्डा ने?</verse>
				<verse number="8">तो पछे कई देकबा ने ग्या, कई मेंगा गाबा पेरिया तका मनक ने? देको, ज्यो मेंगा गाबा पेरे हे, वीं मेलाँ में रेवे हे।</verse>
				<verse number="9">तो थाँ काँ ग्या? कई कणी परमेसर का आड़ीऊँ बोलबावाळा ने देकबाने? हाँ, मूँ थाँकाऊँ कूँ हूँ के, जिंने थाँ देक्यो हे वो परमेसर का आड़ीऊँ बोलबावाळाऊँ भी मोटो हे।</verse>
				<verse number="10">यो वोईस हे, जिंका बारा में पुवितर सास्तर में लिक्यो हे के, “देक, मूँ आपणाँ दूत ने अदिकार का हाते थाँरा आगे खन्दाऊँ हूँ, ज्यो मनकाँ का मन ने थाँरा वाते त्यार करी।”</verse>
				<verse number="11">“मूँ थाँकाऊँ हाँची कूँ हूँ के, जीं लगईऊँ जनम्याँ हे, वाँका मूँ यहुन्नो बतिस्मा देबावाळाऊँ कुई मोटो कोयने हे। पण हरग का राज में फोराऊँ फोरो मनक भी यहुन्नाऊँ मोटो हे।</verse>
				<verse number="12">यहुन्ना बतिस्मा देबावाळा का दनाऊँ अबाणू तईं ओ संदेस परच्यार किदो ग्यो के, परमेसर का राज का लोगाँ का हाते मार-पिट किदी जावे अन मार-पिट करबावाळा वीं राज ने लेबा की कोसीस करे हे।</verse>
				<verse number="13">यहुन्ना के आबा तईं हाराई परमेसर का आड़ीऊँ बोलबावाळा अन मूसा का नेम ईं बात की आगेवाणी करे हे के, परमेसर मनकाँ का जीवन पे राज करी।</verse>
				<verse number="14">यद्याँ थें अणी बात पे विस्वास करो तो हुणो, यहुन्नोईस एलियो हे, ज्यो आबावाळो हो।</verse>
				<verse number="15">ज्याँके हुणबा का वाते कान्दड़ा हे वीं हुणलो।</verse>
				<verse number="16">“मूँ ईं टेम की पीड़ी का लोगाँ ने किंका बराबर गणूँ? वीं वणा बाळकाँ का जस्यान हे, ज्यो बजारा में बेटन एक-दूजाऊँ हेलो पाड़न केवे हे के,</verse>
				<verse number="17">‘माँ थाँका वाते बाजो बजायो, अन थाँ ने नाच्या, माँ होक-गीत किदो, पण थाँ ने रोया।’</verse>
				<verse number="18">यहुन्नो दूजाँ के जस्यान ने तो खातो अन ने दाकरस पितो अन वीं मनक केवे हे के, ‘वींमें हुगली आत्मा हे।’</verse>
				<verse number="19">पछे मनक को पूत दूजाँ का जस्यान खातो-पितो आयो अन वीं केवे हे के देको, ‘यो खवगड़्यो अन दारुड़्यो हे, कर लेबावाळा को अन पाप्याँ को गोटी हे।’ पण परमेसर का ग्यान पे चालबावाळा आपणाँ करमाऊँ वींको ग्यान हाँचो साबत वेवे हे।”</verse>
				<verse number="20">तद्याँ ईसू वणा नगराँ ने धिकार देबा लागो, जणामें वणी नरई अचम्बावाळा काम किदा हा। काँके वटा का लोगाँ पाप करणो ने छोड़्यो अन ने आपणाँ मन ने वींका आड़ी फेरियो।</verse>
				<verse number="21">ईसू क्यो, “खुराजीन अन बेतसेदा नगर का लोगाँ, थाँने धिकार हे, काँके जीं परच्या बताया ग्या, यद्याँ वीं सूर अन सेदा नगर में किदा जाता, तो वटे का मनक बोरी का गाबा पेरन अन आपणाँ सरीर पे वानी लगान कदी का पापऊँ मन फेर लेता।</verse>
				<verse number="22">पण मूँ थाँकाऊँ केवूँ हूँ के, न्याव का दन में थाँकी दसा सूर अन सेदा की दसाऊँ भी घणी खराब वेई।</verse>
				<verse number="23">अन हे कफरनूम, कई थूँ बच्यार करे हे के, थने हरग में उटायो जाई? थूँ तो पाताळ में नाक्यो जाई। जीं अचम्बा का काम थाँरा में किदा ग्या, यद्याँ सदोम में किदा जाता, तो वटा का मनक आपणाँ मना ने पापऊँ फेर लेता अन आज तईं वो नगर बस्यो तको रेतो।</verse>
				<verse number="24">पण मूँ थाँकाणी केवूँ हूँ के, न्याव का दन थारे लोगाँ की दसा सदोम नगर का लोगाँ की दसाऊँ भी घणी खराब वेई।”</verse>
				<verse number="25">वीं दाण ईसू क्यो, “हो परम बापू, हरग अन धरती का परबू, मूँ थाँको धन्नेवाद करूँ हूँ के, थाँ अणा बाताँ ने ग्यानी अन स्याणाऊँ हपान राकी अन भोळा मनकाँ पे परगट किदी हे।</verse>
				<verse number="26">अन हाँ परम बापू, यो ईं वाते व्यो, काँके थाँने योईस हव लागो।</verse>
				<verse number="27">“मारा परम बापू मने हारोई हूँप्यो हे, परमेसर के अलावा कुई बेटा ने कोयने जाणे हे, अन ने कुई बेटा के अलावा परमेसर ने जाणे हे, पण अबे वीं मनक परमेसर ने जाणे हे जाँने बेटो बतावे हे।</verse>
				<verse number="28">“ओ थाँक्या, माँदा अन बोजऊँ दब्या तका मनकाँ, मारा नके आवो, मूँ थाँने आराम देवूँ।</verse>
				<verse number="29">मारो जूँड़ो आपणाँ खादा पे जोत लो अन माराऊँ हिको, काँके मूँ हुदो हूँ अन मारो मन दयाऊँ भरियो तको हे अन थाँने भी आपणाँ मन में आराम मली,</verse>
				<verse number="30">काँके मारो जूँड़ो जोतबा में हेल अन बोज में हलको हे।”</verse>
			</chapter>
			<chapter number="12">
				<verse number="1">वीं टेम ईसू आराम का दन खेता में वेन जारिया हो अन वाँका चेला ने भूक लागी तो वीं गव की ऊम्याँ तोड़-तोड़न खाबा लागा।</verse>
				<verse number="2">फरीसी ओ देकन वाँकाऊँ क्यो, “देक, थाँरा चेला वो काम करे हे, ज्यो आपणाँ मूसा का नेमा का हस्याबूऊँ आराम का दन करणो हव कोयने हे।”</verse>
				<verse number="3">ईसू वाँकाऊँ क्यो, “कई थें ओ ने भण्यो के, जद्याँ दाऊद अन वाँका हण्डाळी ने भूक लागी तो वणा कई किदो?</verse>
				<verse number="4">वो अन वींका हण्डाळ्याँ परमेसर का मन्दर में ग्या अन चड़ाई तकी रोट्याँ खादी, ज्याँने याजक ने छोड़न कुई दूजाँ ने खाता हा?</verse>
				<verse number="5">कई थें नेमा में ने भण्यो के, आराम का दन याजकईस मन्दर में काम करन आराम का दन का नेम ने तोड़े हे? पण वाँने कुई भी कई ने केवे हे।</verse>
				<verse number="6">पण मूँ थाँकाऊँ कूँ हूँ के, अटे ज्यो हे, वो मन्दरऊँ भी मोटो हे।</verse>
				<verse number="7">यद्याँ थें आँको मतलब हमजता तो थाँ जाणता के, ‘मूँ दयाऊँ राजी वूँ हूँ, बलीदानऊँ ने,’ तो थाँ बना दोस का मनकाँ पे दोस ने लगाता।</verse>
				<verse number="8">काँके मनक को पूत तो आराम का दन को भी परबू हे।”</verse>
				<verse number="9">ईसू वटेऊँ चालन यहूदियाँ का परातना घर में आया।</verse>
				<verse number="10">वटे एक मनक हो, जिंको हात लुलो हो। मनकाँ ईसू पे दोस लगाबा का वाते वाँकाऊँ पूँछ्यो, “कई आराम का दन कणी मांदाने हव करणो नेमा का हिसाबऊँ सई हे के ने?”</verse>
				<verse number="11">तो ईसू वाँकाऊँ क्यो, “थाँकामें अस्यो कूण हे जिंको एक गारो वे, अन आराम का दन खाड़ा में पड़ जावे, तो वो वींने बारणे ने काड़ी कई?</verse>
				<verse number="12">पछे मनक तो एक गाराऊँ घणो अनमोल हे। ईं वाते आराम का दन भलो करणो हव हे।”</verse>
				<verse number="13">तद्याँ ईसू वीं लुला मनकऊँ क्यो, “आपणो हात लाम्बो कर।” वणी हात लाम्बो किदो अन वींको हात दूजाँ हात का जस्यान पेल्या हो वस्यान हव वेग्यो।</verse>
				<verse number="14">पछे फरीसी वटूँ पराग्या अन ईसू ने मारबा को गेलो होदबा लागा।</verse>
				<verse number="15">ईसू वणा लोगाँ की बात ने जाणन वटाऊँ पराग्या अन नरई लोग-बाग वाँका पाच्छे चालबा लागा, अन वाँकाणी वाँ हाराई ने वाँकी मांदकीऊँ हव किदा।</verse>
				<verse number="16">पण वाँकाणी वाँने हेंचेत किदा के, ईं बात को परच्यार मती करो।</verse>
				<verse number="17">यो ईं वाते व्यो के, परमेसर का आड़ीऊँ बोलबावाळा यसाया का मुण्डाऊँ परमपिता परगट किदो, वो पूरो वे,</verse>
				<verse number="18">“देको, यो मारो दास हे, जिंने में थरप्यो हे, मारो लाड़लो हे, जणीऊँ मूँ घणो राजी हूँ। मूँ मारी आत्मा वींमें राकूँ अन वो हाराई मनकाँ को न्याव करी।</verse>
				<verse number="19">वो ने कदी कणीऊँ लड़ई करी, अन नेई हाका-भार करी, अन नेई बजार में कुई वींकी अवाज हूणी।</verse>
				<verse number="20">जद्याँ तईं वो मनकाँ को ईमानदारी का हाते न्याव ने करी वो किंकोई नास ने करी, वीं पलई वाड़ा का पतला टिण्डका का जस्यान वाँको वो कन दिवा का धूवा का जस्यान कमजोर वो।</verse>
				<verse number="21">पछे हाराई मनक आपणी आस वींका नाम पे राकी।”</verse>
				<verse number="22">तद्याँ लोग-बाग हुगली आत्मा धस्यी तका एक मनक ने ईसू का नके लाया ज्यो वणी आत्मा की वजेऊँ आंदो अन गूँगा हो। अन ईसू वींने हव किदो, अन वो बोलबा अन देकबा लागो।</verse>
				<verse number="23">ईंपे हारई मनक ओ देकन अचम्बा में पड़ग्या अन क्यो, “ओ कई दाऊद की ओलाद मसी हे?”</verse>
				<verse number="24">पण फरीसियाँ ओ हुणन तरत क्यो, “ओ तो हुगली आत्मा का सरदार बालजेबूल की मदतऊँ हुगली आत्मा काड़े हे।”</verse>
				<verse number="25">ईसू वाँका मन ने जाणन वाँकाऊँ क्यो, “कणी भी राज में यद्याँ फुट पड़ जावे, तो वो नास वे जावे हे अन कुई नगर कन घर-परवार में फुट वेवे हे, वो अटल ने रेई।</verse>
				<verse number="26">अन यद्याँ सेतानईस सेतान ने काड़े, तो वो खुद कोईस विरोदी वेग्यो हे। पछे वींको राज कस्यान टक्यो तको रेई?</verse>
				<verse number="27">यद्याँ मूँ बालजेबूल की मदतऊँ हुगली आत्मा नवाड़ू हूँ, तो थाँका चेला किंकी मदतऊँ नवाड़ो हो? ईं वाते वींइस थाँने ईं बातऊँ गलत साबत करी।</verse>
				<verse number="28">पण यद्याँ मूँ परमेसर की आत्मा की मदतऊँ हुगली आत्मा नवाड़ू हूँ, तो परमेसर को राज थाँका नके आ पूग्यो हे।</verse>
				<verse number="29">“यद्याँ कुई तागतवर मनक का घर ने लुटणो छावे हे तो वो पेल्याँ वीं तागतवर मनक ने बांदी। तद्याँ वो वींका घर ने लूट सके हे।</verse>
				<verse number="30">“ज्यो मारा हाते ने हे वो मारो विरोदी हे, ज्यो मारो चेला वेबा का वाते मनकाँ ने भेळा ने करे हे, वो वाँने माराऊँ छेटी करबा को मस वेवे हे।</verse>
				<verse number="31">ईं वाते मूँ थाँकाऊँ कूँ हूँ के, मनक का हाराई पाप अन मुण्डाऊँ किदी तकी बुरई माप किदी जाई, पण पुवितर आत्मा की बुरई कदीई माप ने किदी जई।</verse>
				<verse number="32">ज्यो कुई मनक का पूत का विरोद में कई भलो-बुरो बात केई, वींको ओ गुनो परमेसर माप कर सके हे, पण ज्यो कुई पुवितर आत्मा का विरोद में कई केई, वाँको यो गुना ने तो ईं जुग में अन नेई आबावाळा जुग में माप किदो जाई।</verse>
				<verse number="33">“यद्याँ थाँ हव फळ पाणा छारिया हो तो थाँने एक हव रूँकड़ो लगाणो पड़ी अन बुरा रूँकड़ा लगावो तो बुरा फळइस पावो, काँके रूँकड़ो आपणाँ फळऊँ ओळक्यो जावे हे।</verse>
				<verse number="34">हो हाँप का बच्या, थें बुरा वेन कस्यान हव बाताँ कर सको हो? काँके ज्यो मन में हे, वोईस मुण्डा में आवे हे।</verse>
				<verse number="35">हव मनक मन का हव भण्डारऊँ हव बात काड़े हे अन हूँगलो मनक मन का हूँगला भण्डारऊँ हुगली बाताँ काड़े हे।</verse>
				<verse number="36">“मूँ थाँकाऊँ कूँ हूँ के, जीं जीं फोगट की बाताँ मनक केवे हे, न्याव का दन वीं हाराई बाताँ को वाँने हस्याब देणो पड़ी।</verse>
				<verse number="37">काँके थाँ थाँकी किदी तकी बाताँ के मस दोसी अन बना दोस का ठेराया जावो।”</verse>
				<verse number="38">ईंपे कुई सास्तरी अन फरीसी ईसुऊँ क्यो, “हो गरू, माँ थाँका हाताँ को कई परच्यो देकणा छावाँ हा।”</verse>
				<verse number="39">पण ईसू वाँने क्यो, “ईं दनियाँ का हूँगला अन कुकरमी लोग हरग को हेन्याण मागे हे, पण परमेसर का आड़ीऊँ बोलबावाळा योना का हेन्याण ने छोड़न कुई दूज्यो हेन्याण वाँने ने दिदो जई।</verse>
				<verse number="40">योनो तीन दनाँ तईं माछळी का पेट में रियो, वस्यानीस मनक को पूत तीन दन पाताळ में रेई।</verse>
				<verse number="41">नीनवे नगर का लोग-बाग न्याव का दन ईं जुग का लोगाँ का हाते उटन थाँने दोसी बणाई, काँके वाँकाणी योना को परच्यार हामळन वणा आपणाँ मन पापऊँ फेर लिदो अन देको, अटे ज्यो हे, वो योनाऊँ भी मोटो हे।</verse>
				<verse number="42">आतमणी दिसा की राणी न्याव का दनाँ में अणी जुग का मनकाँ का हाते उटन थाँने दोसी बणाई, काँके वाँ राजा सुलेमान को ज्यान हुणबा का वाते धरती का अणी खुणाऊँ वीं खुणा तईं अई अन देको, अटे ज्यो हे वो सुलेमानऊँ भी मोटो हे।</verse>
				<verse number="43">“जद्याँ हुगली आत्मा मनक मूँ निकळ जावे हे, तो हून्नी जगाँ में रईम्बो का वाते जगाँ होदती रेवे हे अन वींने जगाँ ने मले हे,</verse>
				<verse number="44">तद्याँ वाँ आपणाँ खुदऊँ केवे हे, ‘मूँ आपणाँ वीं घर में जटाऊँ निकळी ही, पाच्छी परी जाऊँ।’ अन पाच्छी फरन आवे तो वटे हुन्नो, साप-सपई अन हारोई ठाणे पावे हे।</verse>
				<verse number="45">तद्याँ वाँ जान आपणाँऊँ ओरी हुगली हात आत्माने आपणाँ हाते ले आवे हे, अन वीं वींमें धसने वटे वास करे हे, अन वीं मनक की पाछली दसा पेल्याऊँ भी हुगली वे जावे हे। ईं जुग का हूँगला मनकाँ की दसा भी अस्यानीस वेई।”</verse>
				<verse number="46">अबाणू तईं ईसू मनकाँ की भीड़ऊँ बाताँ कररियो हो, तद्याँ वाँकी बई अन भई बारणे ऊबा हा अन वाँकाऊँ बाताँ करणा छाता हा।</verse>
				<verse number="47">ईं वाते कणी ईसुऊँ क्यो, “देक थारी बई अन थारो भई बारणे ऊबा हे, अन थाँराऊँ बाताँ करणा छावे हे।”</verse>
				<verse number="48">यो हामळन ईसू केबावाला ने क्यो, “मारी बई कूण हे? अन कूण हे मारा भई?”</verse>
				<verse number="49">अन आपणाँ विस्वास्याँ की आड़ी आपणाँ हात लाम्बो करन क्यो, “देको, मारी बई अन मारो भई ईं हे।</verse>
				<verse number="50">काँके ज्यो कुई मारा हरग का बाप की मरजी पे चाले, वो मारो भई, मारी बेन अन मारी बई हे।”</verse>
			</chapter>
			<chapter number="13">
				<verse number="1">वणीस दन ईसू आपणाँ चेला की लारे समन्द का कनारे जान बेटग्यो अन उपदेस देबा लागग्यो।</verse>
				<verse number="2">अन वाँका नके भीड़ समन्द का कनारा पे ऊबी ही अन वो नाव में जान बेटग्यो।</verse>
				<verse number="3">अन वो वाँकाऊँ केणी में घणी बाताँ किदी अन वणी वाँने क्यो, “एक करसाण बीज बोवा निकळयो।</verse>
				<verse number="4">बीज वाती दाण थोड़ाक बीज गेला के कनारे पड़्या अन सरकल्या वाँने चगगी।</verse>
				<verse number="5">थोड़ाक बीज काँकरी जमीं पे पड़्या, वटे वाँने हव गारो ने मलबाऊँ अन ऊण्डो गारो ने मलबाऊँ वी जट उगग्या।</verse>
				<verse number="6">पण तावड़ा का मस कमलाग्या अन जड़ ने जमवाऊँ हुकग्या।</verse>
				<verse number="7">थोड़ाक बीज झाड़क्याँ में पड़्या अन झाड़क्याँ मोटा वेन वाँने दबा दिदा।</verse>
				<verse number="8">पण थोड़ाक हव जमीं पे पड़या, अन हेली हाँक पेदा किदी, कटे हो गुणी, हाठ गुणी, अन कटे तीस गुणी हाँक।”</verse>
				<verse number="9">पछे ईसू क्यो, “जिंके हुणबा का वाते कान्दड़ा वे, वीं हुणे।”</verse>
				<verse number="10">चेला ईसू का नके आया अन वणाऊँ क्यो, “थाँ लोगाऊँ केणी में बाताँ काँ करो हो?”</verse>
				<verse number="11">वणी क्यो, “थाँने हरग का राज का भेद की हमज दिदी हे पण अणा लोगाँ ने ने दिदी हे।</verse>
				<verse number="12">ज्यो मारी बाताँ हुणे अन हमजे हे, परमेसर वींने ओरी घणी हमज देई पण ज्यो मारी बाताँने कोयने हुणे अन ने हमजे हे वो ज्यो कई भी हमजे हे वींने भी भुल जाई।</verse>
				<verse number="13">मूँ वाँकाऊँ केणी में बाताँ ईं वाते करूँ हूँ के, मूँ ज्यो कई करूँ हूँ वो वाँने दिके हे पण हमजे कोयने अन ज्यो कई कूँ हूँ वो हुणे पण हमजे कोयने।</verse>
				<verse number="14">वाँका बारा में परमेसर का आड़ीऊँ बोलबावाळा यसाया की आ बात पुरी वेवे हे के, “‘थें कान्दड़ाऊँ हुणो पण हमजोगा ने, अन आक्याँऊँ देको पण थाँने हूँजी कोयने,</verse>
				<verse number="15">काँके अणा मनकाँ को मन गाटो वेग्यो हे, अणा वाँने कान्दड़ाऊँ हूणाणो बन्द वेग्यो अन वाँकाणी आपणी आक्याँ बन्द कर लिदी हे। ताँके कटे अस्यान ने वे जावे के, वाँकी आक्याँ देकती, कान्दड़ा हूणता, अन वाँका मनऊँ हमजता जणीऊँ वीं आपणाँ मन ने पापऊँ फेरन मारा नके आता अन मूँ वाँने बंचाऊँ।’”</verse>
				<verse number="16">“पण धन्न हो थाँ, थाँकाऊँ परमेसर राजी हे काँके थाँ देको हो अन हमजो हो।</verse>
				<verse number="17">काँके मूँ थाँकाऊँ हाचेई कूँ हूँ के, नरई परमेसर का आड़ीऊँ बोलबावाळा अन धरमी मनक अणा बाताँ ने देकणी अन हूणणी छाता हा, पण वीं ने देक सक्या अन ने हुण सक्या।</verse>
				<verse number="18">“अबे थाँ बीज बोवावाळा की केणी को अरत हुणो।</verse>
				<verse number="19">गेला का कनारे पड़्या तका बीज वणा मनकाँ का जस्या हे जीं ओ तो हुणे हे के, परमेसर कस्यान लोगाँ का मन पे राज करे हे पण वीं वींने हमजे कोयने। अन पछे सेतान आवे अन ज्यो बाताँ वणा हूणी ही वणा हारी बाताँ ने भुलई देवे हे।</verse>
				<verse number="20">अन ज्यो काँकरा की जमीं पे पड़्या वीं वणा मनकाँ ने बतावे हे, ज्यो बचन हामळन तरत खुसी का हाते मान ले हे।</verse>
				<verse number="21">पण आपणाँ में जड़ ने पकड़बा का मस वीं थोड़ाक दनईस रेवे हे, अन जद्याँ परमेसर पे विस्वास करबा की वजेऊँ मनक वाँकाऊँ हव वेवार ने राके अन हतावे तो वीं विस्वास करणो छोड़ देवे हे।</verse>
				<verse number="22">ज्यो बीज झाड़क्याँ में वाया ग्या, वीं वणा मनकाँ का जस्यान हे, ज्यो परमेसर का बचन ने हुणे हे, पण ईं दनियाँ की चन्ता अन धन-माया को लोब-लाळच वाँने परमेसर को बचन भुलई दे के, परमेसर वाँकाऊँ कई छावे हे अन वो फळ ने लावे।</verse>
				<verse number="23">ज्यो बीज हव जगाँ में बोयो ग्या वीं खुब फळ लाया वीं वणा मनकाँ का जस्यान हे ज्यो हो गुणा, हाठ गुणा, अन कटे तीस गुणा फळ लावे।”</verse>
				<verse number="24">ईसू वाँने एक ओरी केणी हुणई, “हरग को राज वीं मनक का जस्यान हे जणी आपणाँ खेत में हव बीज वाया।</verse>
				<verse number="25">जद्याँ लोग-बाग हूँ रिया हा तो वाँको दसमण आन गव का बचमें चारा का बीज छाँटन परोग्यो।</verse>
				<verse number="26">जद्याँ बीज उगन मोटा व्या अन ऊम्याँ आबा लागी, तो वींका लारे चारो भी उग्यो।</verse>
				<verse number="27">ईंपे वी करसाण का हाळी आन वाँऊँ क्यो, ‘ओ मालिक, कई थें आपणाँ खेत में हव गवा का बीज ने वाया हाँ? पछे चारो कटेऊँ ऊगग्यो?’</verse>
				<verse number="28">वाँकाणी वाँकाऊँ क्यो, ‘ओ कणी दसमण को काम हे।’ वींका हाळी वणीऊँ क्यो, ‘थाँ को तो माँ जान चारा परो ऊपाड़ नाका।’</verse>
				<verse number="29">वाँकाणी क्यो, ‘ने,’ अस्यो ने वे के, ‘थाँ चारा का लारे गव भी ऊपाड़ नाको।</verse>
				<verse number="30">दुयाँ ने लारे मोटा वेबा दो अन हाक काटबा की टेम में मूँ काटबावाळा केऊँ के, पेली वीं चारा ने बालबा का वाते काटी ले अन पछे खळा में गव भेळा करबा का वाते काटे।’”</verse>
				<verse number="31">ईसू वाँने एक ओरी केणी हुणई, “हरग को राज हरूँ का एक दाणा का जस्यान हे, ज्याँने कणी मनक लेन आपणाँ खेत में वायो।</verse>
				<verse number="32">वो हाराई बीजाऊँ फोरो तो वेवे हे पण जद्याँ यो ऊँगे हे तो खेत की हाराई साग-सबजीऊँ मोटो वे जावे हे। अन उड़बावाळा जनावर आन वींकी डाळ्याँ पे गवाळा बणावे हे।”</verse>
				<verse number="33">ईसू वाँने एक ओरी केणी क्यो, “हरग को राज खमीर का जस्यान हे जिंने कुई लुगई थोड़ोक लेन तीन पसेरी आटा में मला देवे अन देकताई-देकता वणी हाराई आटा ने खमीर फुजई देवे हे।”</verse>
				<verse number="34">ईं हारी बाताँ ईसू लोगाँ ने केणीऊँ बतई अन ईसू लोगाऊँ बना केणी के कई भी ने केता हा।</verse>
				<verse number="35">ईं वाते ज्यो बचन परमेसर का आड़ीऊँ बोलबावाळा का मुण्डाऊँ क्यो ग्यो हे, वो पूरो वे के, “मूँ केणी में वणा बाताँ का भेद ने केऊँ, जीं दनियाँ की रचना की टेमऊँ छाने हे।”</verse>
				<verse number="36">तद्याँ ईसू भीड़ ने छोड़न घरे पराग्या अन वाँका चेला वाँका नके आन क्यो, “चारा की केणी को अरत माँने हमजा।”</verse>
				<verse number="37">ईसू वाँने बतायो, “हव बीज बोवावाळो मनक को पूत हे।</verse>
				<verse number="38">खेत या दनियाँ हे, हव बीज परमेसर का राज का मनक अन चारो सेतान की ओलाद हे।</verse>
				<verse number="39">जीं दसमण वो बीज बोयो हे वो सेतान हे। हाँक काटबा की टेम दनियाँ को अन्त हे अन हाँक काटबावाळा हरग-दुत हे।</verse>
				<verse number="40">जस्यान चारो भेळा किदो जावे हे अन वादी में बाळयो जावे हे। वस्यानीस ईं दनियाँ का अन्त का टेम में वेई।</verse>
				<verse number="41">मनक को पूत हरग-दुताँ ने अदिकार का हाते खन्दाई, अन वीं च्यारूँमेरऊँ वणा हाराई मनकाँ ने भेळा करी जीं दूजाँ मनकाँ ने पाप में नाके हे अन वाँने ज्यो परमेसर की आग्या ने माने हे</verse>
				<verse number="42">अन वाँने वादी का कूण्ड़ा में नाकी, जटे रोणो अन दाँत पीसणो वेई।</verse>
				<verse number="43">वी टेम में धरमी मनक आपणाँ बाप का राज में सुरज का जस्यान ऊजासो देई। जिंके हुणबा का वाते कान्दड़ा वे वीं हुणे।</verse>
				<verse number="44">“हरग को राज खेत में हप्या तका धन का जस्यान हे, ज्यो कणी मनक ने मल्यो अन वणी पाछो वटेईस छुपा दिदो, अन राजी वेता तका आपणी जगाँ-जादाद ने बेंच दिदी अन वीं खेत ने मोल ले लिदो।</verse>
				<verse number="45">हरग को राज एक वोपारी का जस्यान हे ज्यो हव मोत्या की भाळ में रेवे हे।</verse>
				<verse number="46">जद्याँ वाँने एक किमती मोती मल्यो तो वाँकाणी जान आपणी हारी जगाँ-जादाद ने बेंच दिदी अन वींने मोल ले लिदो।</verse>
				<verse number="47">“हरग को राज अस्यो हे के, थोड़ाक माछळ्याँ पकड़बा आपणाँ जाळ ने समन्द में फेक्यो अन वींमें हाराई तरिया की माछळ्याँ फंसगी।</verse>
				<verse number="48">अन जद्याँ जाळ भरग्यो, तो वीं वींने कनारे पे खेंच लाया अन वणा माछळ्याँ मूँ हव ही वाँने ठोपळा में भर लिदी अन ज्यो बना काम की ही वाँने पाच्छी फेंक दिदी।</verse>
				<verse number="49">दनियाँ का अन्त में भी अस्योईस वेई। हरग का दूत आन पापी मनकाँ ने धरमी मनकाऊँ अलग करी।</verse>
				<verse number="50">अन पापी मनकाँ ने वादी का कूण्ड़ा में नाक देई, जटे हाका-भार अन रोवणो वेई।”</verse>
				<verse number="51">ईसू आपणाँ चेलाऊँ क्यो, “कई थाँ ईं हारी बाताँ हमज्या?” वणा क्यो, “हाँ।”</verse>
				<verse number="52">वाँकाणी वाँने क्यो, “ईं वाते नेमा ने हिकाबावाळा ज्यो परमेसर का राज का चेला बण्या हे, वीं वणी घरवाळा का जस्यान हे ज्यो भण्डारऊँ नई अन जूनी चिजाँ बारणे काड़े हे।”</verse>
				<verse number="53">जद्याँ ईसू ईं हारी केण्याँ के दिदी तो पछे वटूँ पराग्या।</verse>
				<verse number="54">अन आपणाँ नगर नासरत में आन यहूदी परातना घर में अस्यो उपदेस देबा लागो के, मनक अचम्बा में पड़न केबा लागा, “ईंने अस्यी अकल अन तागत का काम करबा की सगती कटूँ मली?</verse>
				<verse number="55">कई यो हुतार को छोरो तो कोयने? कई ईंकी बई को नाम मरियम अन ईंका भायाँ का नाम याकूब, युसुप, समोन अन यहूदो ने हे?</verse>
				<verse number="56">अन ईंकी हारी बेना आपणाँ बचमें ने रेवे हे? पछे ईंने ओ हारोई कटाऊँ मल्यो?”</verse>
				<verse number="57">ईं तरियाँ वणा हाराई ईसू पे विस्वास ने किदो। पण ईसू वाँने क्यो, “परमेसर का आड़ीऊँ बोलबावाळा ने आपणाँ देस अन आपणाँ घर ने छोड़न हारी जगाँ मान मले हे।”</verse>
				<verse number="58">अन ईसू वटे वाँके विस्वास ने करबा का मस नरई अचम्बा का काम ने किदा।</verse>
			</chapter>
			<chapter number="14">
				<verse number="1">वी टेम गलील का राजा हेरोदेस ईसू का बारा में हामळयो।</verse>
				<verse number="2">वणी आपणाँ नोकराऊँ क्यो, “ओ वोईस बतिस्मा देबावालो यहुन्नो हे! ज्यो मरिया तका मेंऊँ पाछो जी उट्यो हे, ईं वाते वींमूँ अचम्बा का काम परगट वेवे हे।”</verse>
				<verse number="3">काँके पेल्याँ हेरोदेस आपणो भई फिलिपुस जद्याँ जीवतो हो तद्याँ वींकी लुगई हेरोदियासऊँ ब्याव कर नाक्यो हो, जणी वजेऊँ यहुन्ने हेरोदेस ने ओळमो दिदो हो के, थने थाँरे भई की लुगई ने राकणी नेमा हस्याबूँ सई ने हे, तो हेरोदियास के केबाऊँ हेरोदेस वींने जेल में नकवा दिदो हो।</verse>
				<verse number="4"></verse>
				<verse number="5">अन वो वींने मारणो छातो हो, पण मनकाऊँ दरपतो हो काँके मनक वींने परमेसर का आड़ीऊँ बोलबावाळो मानता हा।</verse>
				<verse number="6">पण जद्याँ राजा हेरोदेस को जनम को दन आयो, तो हेरोदियास की छोरी मेमाना का हामे नाच बतान राजा हेरोदेस ने घणो राजी किदो।</verse>
				<verse number="7">ईंपे वणी होगन खान बचन दिदो, “मांग ज्यो थूँ मांगी, वो मूँ थने देऊँ।”</verse>
				<verse number="8">वाँ आपणी बई का हिकावा में आन बोली, “बतिस्मा देबावाळा यहुन्ना को मातो कटवान थाळी में मेलन देदो।”</verse>
				<verse number="9">राजो घणी दकी व्यो, पण आपणाँ होगनऊँ अन मेमाना का मस हुकम दिदो के, मातो दे दिदो जावे।</verse>
				<verse number="10">अन वाँकाणी जेळ में कुई लोग ने खन्दान यहुन्ना को मातो कटवा नाक्यो।</verse>
				<verse number="11">अन वींको मातो थाळी में सजान लायो ग्यो अन वी छोरी ने दे दिदो अन वाँ वींने आपणी बई का नके लेगी।</verse>
				<verse number="12">तद्याँ यहुन्ना का चेला आया वींका मरिया तका डील ने लेग्या अन वींने एक कबर में गाड़ दिदो। अन पछे जान यो हमच्यार ईसू ने दिदो।</verse>
				<verse number="13">जद्याँ ईसू ओ हुण्यो, तो वो नाव पे चड़न वटूँ कणी हून्नी जगाँ में परोग्यो। लोगाँ ओ हुणन समन्द का कनारे-कनारे वाँका पाच्छे वेग्या।</verse>
				<verse number="14">जद्याँ ईसू नावऊँ बारणे आया तो वणा एक मोटी भीड़ देकी तो वाँने वाँका पे दया आगी अन माँदा मनकाँ ने हव किदा।</verse>
				<verse number="15">जद्याँ हाँज पड़गी, तद्याँ वाँका चेला वाँका नके आया अन क्यो, “अटे हून्नी जगाँ हे अन मोड़ो वेरियो हे लोगाँ ने परी हिक दो, ताँके वीं गाम में खाणो मोल ले सके अन खावे।”</verse>
				<verse number="16">पण ईसू वाँऊँ क्यो, “वाँके जाबा की कई जरूत कोयने! थाँईस अणाने खाबा का वाते दो।”</verse>
				<verse number="17">चेला वाँने क्यो, “माकाँ नके पाँच रोट्याँ अन दो माछळ्याँ ने छोड़न ओरी कई ने हे।”</verse>
				<verse number="18">ईसू क्यो, “वाँने मारे नके लावो।”</verse>
				<verse number="19">तद्याँ वणा मनकाँ ने क्यो के, रेटे बेट जावो अन वणा पाँच रोट्याँ अन दो माछळ्याँ लिदी अन हरग का आड़ी देकन धन्नेवाद दिदो अन रोट्याँ का कवा करन चेला ने दिदी चेला वाँने मनकाँ में बांट दिदी।</verse>
				<verse number="20">तद्याँ हाराई खान धापग्या, तो चेला बंची तकी रोट्याँ का बारा ठोपळा भरिया।</verse>
				<verse number="21">अन वटे खाणो खाबा वाला में लुगायाँ अन छोरा-छोरी ने छोड़न, पाँच हजार मनक मनकईस हा।</verse>
				<verse number="22">तद्याँ वाँकाणी आपणाँ चेला ने नाव पे चड़ाया ताँके वीं वाँकाऊँ पेल्याँ पेली परा जावे, जतरे मूँ लोगाँ ने हिक देन अऊँ।</verse>
				<verse number="23">वो लोगाँ ने खन्दान परातना करबा ने एक मंगरा पे पराग्यो अन हाँज हुदी वो एकलो हो।</verse>
				<verse number="24">वी दाण नाव समन्द का वच्छा-वच्छ लेराऊँ हिळोळा लेरी ही, काँके हवा हामेंऊँ चालरी ही।</verse>
				<verse number="25">ईसू रात के चोती पोर में लगे-भगे भाग फाट्या समन्द पे चालतो तको वाँका नके आयो।</verse>
				<verse number="26">चेला वाँने पाणी पे चालता तको देकन दरपग्या अन केबा लागा, “ओ भूत हे!” अन दरपऊँ हाका-भार मेलबा लागा।</verse>
				<verse number="27">तद्याँ ईसू तरत वाँकाऊँ क्यो, “हिम्मत राको! मूँ हूँ, दरपो मती!”</verse>
				<verse number="28">पतरस वाँने क्यो, “ओ परबू यद्याँ थूँ हे, तो मने आपणाँ नके पाणी पे चाळन आबा को हुकम दे।”</verse>
				<verse number="29">ईसू क्यो, “आव!” तद्याँ पतरस नाव पूँ उतरन ईसू का नके जाबा ने पाणी पे चाळबा लागो।</verse>
				<verse number="30">पण वो डूँज ने देकन दरपग्यो, अन जद्याँ डुबवा लागो तो हाका-भार मेलन क्यो, “हो परबू, मने बचा!”</verse>
				<verse number="31">ईसू तरत हात लाम्बो करन वींने पकड़ लिदो अन वींकाऊँ क्यो, “ये कम विस्वास करबावाळा, थाँ काँ भेंम किदो?”</verse>
				<verse number="32">तद्याँ वीं नाव में चड़ग्या, तो वइरो ढबग्यो।</verse>
				<verse number="33">ईंपे वाँकाणी ज्यो नाव में हाँ, वीके धोग लगान क्यो, “हाँचाई, थूँ परमेसर को पूत हे।”</verse>
				<verse number="34">जद्याँ वीं समन्द पार करन पेली पाल्ड़े गन्नेसरत नगर का नके पूग्या।</verse>
				<verse number="35">वटा का मनकाँ ईसू ने ओळक लिदा अन अड़े-भड़े का हाराई देस में हमच्यार खन्दायो अन वीं हाराई माँदा मनकाँ ने वाँका नके लाया,</verse>
				<verse number="36">अन वाँकाऊँ परातना करबा लागा के, वो वाँने आपणाँ गाबा का पल्‍ला की कोर के अड़बा दो अन जतरा भी अड्या, वीं हाराई हव वेग्या।</verse>
			</chapter>
			<chapter number="15">
				<verse number="1">तद्याँ यरूसलेमऊँ कुई फरीसी अन नेमा ने हिकाबावाळा ईसू का नके आन केबा लागा,</verse>
				<verse number="2">“थाँरा चेला बड़ाबा की रिति-रिवाज ने काँ ने माँने हे? वीं बना हात धोयाई रोटी काँ खावे हे?”</verse>
				<verse number="3">ईसू वाँने क्यो, “थाँ भी आपणाँ बड़ाबा का रिति-रिवाज मानन परमेसर का आदेसा ने टाळ देवो हो।</verse>
				<verse number="4">काँके परमेसर क्यो, ‘आपणाँ बई-बापू को मान राकज्ये’, अन ‘ज्यो कुई बाप कन बई ने बुरो केवे, वीं मोत का घाट ऊतारिया जावे।’</verse>
				<verse number="5">पण थाँ लोगाँ ने हिकावो हे के, यद्याँ थाँका बई-बापू थाँकाऊँ कई मांगे तो थाँ वाँकाऊँ केज्यो के, ‘वा तो में परमेसर के चड़ा दिदी हे।’</verse>
				<verse number="6">ईं बात की वजेऊँ वणी मनक ने आपणाँ बई-बापू की सेवा करबा की जरुरत ने हे। अस्यान करन थाँ आपणाँ रिति-रिवाजऊँ परमेसर की आग्या ने टाळ देवो हो।</verse>
				<verse number="7">हो कपटी मनकाँ, परमेसर का आड़ीऊँ बोलबावाळा थाँका वाते सइस क्यो हे के,</verse>
				<verse number="8">“‘ईं लोग होटऊँ तो मारो मान राके हे, पण अणाको मन माराऊँ घणो छेटी हे।</verse>
				<verse number="9">अन ईं बेकार में मने माँने हे, काँके ईं मनकाँ का रिति-रिवाज ने मारा उपदेस बणान हिकावे हे।’”</verse>
				<verse number="10">तद्याँ ईसू लोग-बागाँ ने आपणाँ नके बलान वाँकाऊँ क्यो, “हुणो अन हमज्यो।</verse>
				<verse number="11">ज्यो मुण्डा में जावे हे, वो मनकाँ ने असुद ने करे, पण ज्यो मुण्डाऊँ निकळबावाळा बुरा सबदइस वींने वटाळ देवे हे।”</verse>
				<verse number="12">तद्याँ चेला आन वाँकाऊँ क्यो, “कई थूँ जाणे हे के, फरीसियाँ ने थाँकी आ बात घणी बुरी लागी हे?”</verse>
				<verse number="13">तद्याँ ईसू क्यो, “जणी रूँकड़ा ने मारा हरग का बापू परमेसर ने लगायो, वो उकाड़्यो जाई।</verse>
				<verse number="14">वाँने जाबा दो, वीं तो आंदा का आंदा नेता हे अन आंदो यद्याँ आंदा ने गेलो बतावे, तो दुई खाड़ा में पड़ जई।”</verse>
				<verse number="15">ओ हुणन पतरस वाँकाऊँ क्यो, “वणी असुद बात को अरत माने हमजा दो।”</verse>
				<verse number="16">ईसू क्यो, “कई थाँ भी आलतरे ने हमज्या हो?</verse>
				<verse number="17">कई थें ने जाणो हो? मुण्डाऊँ खई तकी चिजाँ मन में ने जावे, पेट में जावे अन पछे पेटऊँ बारणे निकळ जावे हे।</verse>
				<verse number="18">पण ज्यो कुई मुण्डाऊँ निकळे हे, वो मनऊँ निकळे हे अन वोईस मनक ने असुद करे हे।</verse>
				<verse number="19">काँके मनऊँ खराब बच्यार, हत्या, पराई लगाई का हाते हूँगला काम, कुकरम, चोरी, जूटी गवई अन परमेसर की बुरई निकळे हे।</verse>
				<verse number="20">ईंस बाताँ हे, ज्यो मनक ने वटाळ देवे हे। पण हात धोया बना खाणो जीमणो मन ने असुद ने करे हे।”</verse>
				<verse number="21">ईसू ऊठेऊँ निकळन, सूर अन सेदा का परदेस का आड़ी पराग्या।</verse>
				<verse number="22">वीं परदेसऊँ एक लुगई अई ज्या कनानी जात की ही अन वाँ कल्ड़ो हाका-भार मेलन केबा लागी, “हो परबू जी! दाऊद का पूत, मारा पे दया कर! मारी बेटी ने हुगली आत्मा घणी सता री हे।”</verse>
				<verse number="23">पण ईसू वींने कई जवाब ने दिदो। तद्याँ वाँका चेला आन वींऊँ अरज करबा लागा, “ईंने जाबा का वाते किदो, काँके वाँ आपणाँ पाच्छे हाका-भार मेलती तकी आरी हे।”</verse>
				<verse number="24">वाँकाणी जवाब दिदो, “इजराएल का परवार का गमाणा तका गारा ने छोड़न मूँ किंका नके ने खन्दायो ग्यो हूँ।”</verse>
				<verse number="25">पण वाँ अई, अन ईसू के पगाँ पड़न केबा लागी, “ओ परबू जी, मारी मदत करो।”</verse>
				<verse number="26">ईसू जवाब दिदो, “छोरा-छोरी की रोट्याँ गण्डकड़ा का मुण्डागे फेंक देणी हव बात कोयने।”</verse>
				<verse number="27">वाँकाणी क्यो, “हाँची वाते हे परबू जी, पण गण्डकड़ा भी चुर चार अन हेटाड़ो खावे हे। ज्यो वाँका मालिक का टेबुलऊँ हेठे पड़े हे।”</verse>
				<verse number="28">ईंपे ईसू वींने जवाब दिदो, “हे नारी, थाँरो विस्वास मोटो हे। जस्यान थूँ छावे हे, थाँरा वाते वस्यानीस वेवे।” अन वींकी छोरी वणीस दाण हव वेगी।</verse>
				<verse number="29">ईसू वटेऊँ गलील समन्द का नके आयो, अन मंगरा पे चड़न बेटग्यो।</verse>
				<verse number="30">तद्याँ लोगाँ का टोळा का टोळा वाँका नके आया। वीं आपणाँ हण्डे लुला, लंगड़ा, आंदा, बोबड़ा अन नरई दूजाँ घणा माँदा मनकाँ ने वाँका नके लाया, अन वाँका पगाँ में नाक दिदा, अन वाँकाणी वींने हव किदा।</verse>
				<verse number="31">जद्याँ लोग-बागाँ ओ देक्यो के, बोबड़ा बोले हे, लुला हव वेरिया हे, लंगड़ा चाले हे, अन आंदा देके हे तो अचम्बो करन इजराएल का परमेसर की मेमा किदी।</verse>
				<verse number="32">ईसू आपणाँ चेला ने बलाया अन क्यो, “मने अणा लोगाँ पे बाळ आवे हे, काँके वीं तीन दनाऊँ आपणाँ हाते हे अन वाँका नके कई खाबा को कोयने हे। मूँ वाँने भूका जाबा देणो ने छावूँ हूँ, कटे अस्यान ने वेजा के, वीं गेला मेंईस थाकन रेटे पड़ जावे।”</verse>
				<verse number="33">चेला वींने क्यो, “माँने ईं हुन्ना कांकड़ में कटूँऊँ अतरी रोट्याँ मली के, माँ अतरी मनकाँ ने धपावा?”</verse>
				<verse number="34">ईसू वाँकाऊँ पूँछ्यो, “थाँका नके कतरी रोट्याँ हे?” वाँकाणी क्यो, “हात, अन थोड़ीक फोरी माछळ्याँ हे।”</verse>
				<verse number="35">अन वाँकाणी लोगाँ ने जमीं पे पंगतऊँ बेटबा को हुकम दिदो।</verse>
				<verse number="36">अन ईं हात रोट्याँ अन माछळ्याँ लिदी, अन धन्नेवाद करन तोड़ी अन आपणाँ चेला ने देतो ग्यो, चेला लोग-बागाँ ने देता रिया।</verse>
				<verse number="37">ईं तरिया हाराई मनक खाणो खान धापग्याँ अन पछे बंची तकी रोट्याँ ने भेळी करन हात ठोपला भरिया।</verse>
				<verse number="38">खाबावाळी लुगायाँ अन छोरा-छोरी ने छोड़न च्यार हजार मनक हा।</verse>
				<verse number="39">तद्याँ वो लोगाँ की टोळी ने हिक देन नाव में चड़ग्या अन मगदन देस की हीमा में आयो।</verse>
			</chapter>
			<chapter number="16">
				<verse number="1">फरीसी अन सदुकियाँ ईसू का नके आन परक करबा का वाते क्यो, “माने हरग को हेन्याण बता। ताँके माने पतो लागे के, थने परमेसर का आड़ीऊँ अदिकार मल्यो तको हे।”</verse>
				<verse number="2">ईसू वाँने जवाब दिदो, “हाँजकी टेम में थाँ केवो हो, ‘मोसम हव रेई, काँके आकास रातो हे,’</verse>
				<verse number="3">अन भाग-फाट्याँ केवो हो, ‘आज बरका आई, काँके आकास रातो अन धुळ भरियो हे।’ थाँ आकास ने देकन वींका भेद बता सको हो, पण टेम का हेन्याण का भेद ने काँ ने बता सको हो?</verse>
				<verse number="4">ईं जुग का हूँगला अन कुकरमी मनक हेन्याण की मांग करे हे, पण योना का हेन्याण ने छोड़ वाँने ओरू कुई हेन्याण ने दिदो जाई।” अन पछे ईसू वाँने छोड़न परोग्यो।</verse>
				<verse number="5">ईसू का चेला समन्द का पेले पाल्ड़े ग्या, पण खाणो लारे लाणो भूलग्या हा।</verse>
				<verse number="6">ईसू वाँने क्यो, “देको, फरीसियाँ अन सदुकियाँ का हाज्याऊँ बंचन रेज्यो।”</verse>
				<verse number="7">वीं एक-दूजाऊँ केबा लागा, “आपीं रोट्याँ ने लाया ईं वाते वो अस्यान केवे हे।”</verse>
				<verse number="8">ओ जाणन, ईसू वाँने क्यो, “हो कम विस्वासवाळा, थाँ एक-दूजाऊँ कई बाताँ करो हो के, आपाँ नके रोटा कोयने?</verse>
				<verse number="9">कई थाँ अबाणू भी ने हमज्या? कई थाँने वीं पाँच हजार की पाँच रोट्याँ आद कोयने, अन पछे थाँ कतरी ठोपल्याँ तोकी ही?</verse>
				<verse number="10">अन ने वीं आद कोयने के, च्यार हजार का मनकाँ वाते हात रोट्याँ, अन ओ ने के थाँ कतरा ठोपला तोक्या हाँ?</verse>
				<verse number="11">थें काँ ने हमज्या हो के, मूँ थाँकाऊँ रोट्याँ का वाते ने क्यो? पण ओ क्यो के, थाँ फरीसी अन सदुकियाँ का खमीरऊँ हेंचेत रेज्यो।”</verse>
				<verse number="12">तद्याँ वाँकी हमज में आयो के, वीं रोट्याँ का खमीरऊँ ने, पण फरीसियाँ अन सदुकियाँ की हिकऊँ हेंचेत रेवा का वाते क्यो हो।</verse>
				<verse number="13">ईसू केसरिया देस का फिल्‍लिपी नगर का नके आयो अन आपणाँ चेलाऊँ पूँछबा लागो, “लोग-बाग मनक का पूत का बारा में कई केवे हे?”</verse>
				<verse number="14">वाँकाणी क्यो, “कुई तो यहुन्नो बतिस्मो देबावाळो केवे हे, अन कुई एलिया, अन घणा खरा यिर्मयाह कन परमेसर का आड़ीऊँ बोलबावाळो मेंऊँ कस्योई एक माने हे।”</verse>
				<verse number="15">ईसू वाँने पूँछ्यो, “पण थाँ मारा बारा में कई केवो हो?”</verse>
				<verse number="16">समोन पतरस जटऊँ क्यो, “थूँ जीवता परमेसर को पूत मसी हे।”</verse>
				<verse number="17">ईसू वाँने जवाब दिदो, “हो समोन, योना का पूत, थूँ धन्न हे, काँके थने आ बात कणी मनक ने क्यो, पण मारा बाप ने ज्यो हरग में हे, आ बात थाँरा पे परगट किदी हे।</verse>
				<verse number="18">अन पतरस मूँ भी थाँराऊँ केवूँ हूँ, थाँरा नाम को मतलब छाँट हे अन मूँ अणीस छाँट पे मारी मण्डली बणाऊँ। अन मोत की तागत वींपे असर ने केरी।</verse>
				<verse number="19">मूँ थने हरग का राज की कुस्याँ देऊँ अन ज्यो कुई थूँ धरती पे बांदी, वो हरग में बदी अन ज्यो कुई धरती पे खोली, वो हरग में खली।”</verse>
				<verse number="20">तद्याँ वाँकाणी चेला ने हेंचेत किदा के, “किंने भी मती किज्यो के मूँ मसी हूँ।”</verse>
				<verse number="21">वीं टेमऊँ ईसू आपणाँ चेला ने बतावा लागो, “जरूरी हे के, मूँ यरूसलेम जऊँ, अन मूसा का नेमा हिकाबावाळा, यहूदी नेता अन मुक्या याजकाँ का हाताऊँ नरई दुक उठाऊँ, अन मार नाक्यो जऊँ, अन तीजे दन पाछो मरिया तका मेंऊँ जी उटूँ।”</verse>
				<verse number="22">ईंपे पतरस वींने दूजी आड़ी लेजान तापड़्यो अन क्यो, “हो परबू, परमेसर ओ ने करे! थाँका हाते अस्यान कदी भी ने वेई।”</verse>
				<verse number="23">ईसू पाच्छा फरन पतरसऊँ क्यो, “हे सेतान, मारा नकेऊँ छेटी वेजा! थूँ मारा वाते ठोकर को कारण हे, काँके थूँ परमेसर की बाताँ पे ने, पण मनकाँ की बाताँ पे मन लगावे हे।”</verse>
				<verse number="24">तद्याँ ईसू आपणाँ चेलाऊँ क्यो, “यद्याँ कुई मारा पाच्छे आणो छावे, तो आपणाँ खुद ने नटे अन आपणी हूळी उठावे, अन मारा पाच्छे वेजा।</verse>
				<verse number="25">काँके ज्यो कुई आपणो जीव बचाणो छावे, वो वींने खोई अन ज्यो कुई मारा वाते आपणो जीव खोई, वो वींने पाई।</verse>
				<verse number="26">यद्याँ मनक आका जग ने पा लेवे, अन आपणाँ जीव को नकसाण करे, तो वींने कई फायदो वेई? मनक आपणाँ जीव पाछो पाबा का बदले कई दे सके हे कई?</verse>
				<verse number="27">मनक को पूत आपणाँ हरग-दुत का हाते आपणाँ बाप की मेमा में आई, अन वीं बगत वीं हाराई ने वाँका करमा का जस्यान फळ देई।</verse>
				<verse number="28">मूँ थाँने हाचेई केवूँ हूँ के, ज्यो अटे ऊबा हे, वाँका मूँ कुई अस्या हे के, वीं जद्याँ तईं मनक का पूत ने वींका राज में आता तका ने देक लेई, जद्याँ तईं वाँने मोत ने आई।”</verse>
			</chapter>
			<chapter number="17">
				<verse number="1">छे दनाँ का केड़े ईसू, पतरस, याकूब अन वींका भई यहुन्ना ने मंगरा पे लेग्या।</verse>
				<verse number="2">वटे वाँका हामे ईसू को रूप बदलग्यो, अन वींका मुण्डो सुरज का जस्यान गाबा उजिता का जस्यान चमकबा लागा।</verse>
				<verse number="3">अन वाँने अणाचेत का मूसो अन एलियो वाँका हाते वणीऊँ बात-बच्यार करता तका देकाणा।</verse>
				<verse number="4">ईंपे पतरस ईसुऊँ क्यो, “हो परबू, आपणो अटे रेणो हव हे। यद्याँ थाँकी मरजी वे तो मूँ अटे तीन ओड़्या बणाऊँ एक थाँका वाते, एक मूसा का वाते, अन एलिया का वाते।”</verse>
				<verse number="5">वो बोलईस रियो हो के, एक चमकते तके वादळे वाँने ढाक दिदा, अन वीं वादळाऊँ आ वाणी निकळी, “ओ मारो लाड़लो पूत हे, जणीऊँ मूँ राजी हूँ। ईंकी हुणो।”</verse>
				<verse number="6">चेला ओ हामळन वींका पगाँ में पड़ग्या अन दरपग्या।</verse>
				<verse number="7">ईसू वाँका नके आन वाँके हात अड़ायो अन क्यो, “ऊबा वो, दरपो मत।”</verse>
				<verse number="8">तद्याँ वीं नाळ्या तो ईसू ने छोड़न ओरी किंनेई ने देक्या।</verse>
				<verse number="9">जद्याँ वीं मंगराऊँ रेटे उतरिया हाँ तद्याँ ईसू वाँने ओ क्यो, “जद्याँ तई मनक को पूत मरिया तकाऊँ ने जी उटी, तद्याँ तईं ज्यो कई थाँ देक्यो हे किंने भी मती किज्यो।”</verse>
				<verse number="10">ईंपे वाँका चेला वणीऊँ पूँछ्यो, “पच्छे मूसा का नेमा ने हिकाबावाळा अस्यान काँ केवे हे के, एलिया को पेल्याँ आणो जरूरी हे?”</verse>
				<verse number="11">ईसू क्यो, “एलियो जरुर अई, अन हारोई हदारी।</verse>
				<verse number="12">पण मूँ थाँकाऊँ केवूँ हूँ के, एलियो आग्यो हे, अन लोग-बागाँ वींने ने ओळ्क्यो। पण जस्यान छाया वस्यान वींका हाते किदो। अणीस तरियाँ मनक को पूत भी वाँका हाताऊँ दुक उटाई।”</verse>
				<verse number="13">तद्याँ चेला हमज्या के, वाँकाणी आपाऊँ यहुन्ना बतिस्मा देबावाळा का बारा में क्यो हे।</verse>
				<verse number="14">जद्याँ वीं लोगाँ की टोळी में पाच्छा आया, तो वटे एक मनक वाँका नके आयो अन पगा पड़न केबा लागो,</verse>
				<verse number="15">“हो परबू, मारा पूत पे दया कर! काँके वींने मर्गी को जोलो आवे हे, अन वो घणो दुक भोगरियो हे अन वो नरी दाण वादी में अन नरी दाण पाणी में पड़ जावे हे।</verse>
				<verse number="16">में थाँरा चेलाऊँ ईं हुगली आत्माने बारणे निकाळबा के वाते परातना करई। पण, वीं ईंने ने निकाळ सक्या।”</verse>
				<verse number="17">ईसू वींकी बात हुणन क्यो, “अरे बना विस्वास का मनक, मूँ थाँकी लारे कतरा दन तईं रेऊँ? अन कतरा दन थाँकी बाताँ ने सेण करूँ? वीं छोरा ने मारा नके लावो।”</verse>
				<verse number="18">तद्याँ ईसू हुगली आत्माने आग्या दिदी अन वाँ वणी छोरा मूँ बारणे निकळगी अन छोरो वणीस दाण हव वेग्यो।</verse>
				<verse number="19">तद्याँ चेला एकला में ईसू का नके आन क्यो, “में हारई जणा ईं हुगली आत्माने काँ ने काड़ सक्या?”</verse>
				<verse number="20">ईसू वाँने क्यो, “थाँका कम विस्वास की वजेऊँ। मूँ थाँकाऊँ हाचेई केवूँ हूँ, यद्याँ थाँको विस्वास हरूँ का दाणा का जतरोक भी वेतो, तो ईं मंगराऊँ केता के, ‘अटूऊँ हरकन वटे जातो रे, तो वो जातो रेई।’ कुई बात थाँका वाते अबकी ने वेई।</verse>
				<verse number="21">अस्यी हुगली आत्मा बना एकाणो अन परातना के ने निकळे हे।”</verse>
				<verse number="22">जद्याँ वीं गलील में हाँ, तो ईसू वाँने क्यो, “मनक को पूत मनकाँ का हाताँ में धोकाऊँ पकड़वायो जाई।</verse>
				<verse number="23">वीं वींने मार नाकी, अन वो तीजे दन जी उटी।” ईंऊँ वीं चेला घणा दकी वेग्या।</verse>
				<verse number="24">जद्याँ ईसू अन वींका चेला कफरनूम पूग्या, तो मन्दर का हाँसल लेबावाळा पतरस का नके आन पूँछ्यो, “कई, थाँको गरू मन्दर को हाँसल ने देवे हे?”</verse>
				<verse number="25">पतरस क्यो, “हाँ, देवे हे।” जद्याँ पतरस घरमें आयो, तो ईसू वाँके पूँछबा का पेल्याई वणीऊँ क्यो, “हे समोन, थूँ कई होच-बच्यार करे हे? धरती का राजा हाँसल किंकाऊँ लेवे हे? आपणाँ पूतऊँ कन परायाऊँ?”</verse>
				<verse number="26">पतरस वाँकाऊँ क्यो “परायाऊँ ।” ईसू वींने क्यो, “तो पछे पूत ने हाँसल देबाऊँ बंचग्या।</verse>
				<verse number="27">तद्याँ भी ईं वाते के, आपाँ वाँने नाराज ने करा। ईं वाते थूँ समन्द का कनारे जाळ नाक अन ज्यो माछळी पेल्या निकळे वींने ले, वींको मुण्डो खोलबाऊँ थने एक रिप्यो मेली। वींने लेजान मारा अन खुद का आड़ीऊँ वाँने दे दिज्ये।”</verse>
			</chapter>
			<chapter number="18">
				<verse number="1">वीं बगत ईसू का चेला वींका नके आन पूँछबा लागा, “हरग का राज में मोटो कूण हे?”</verse>
				<verse number="2">ईंपे वणा एक छोरा ने भड़े बलान वाँका वच्छे ऊबो किदो</verse>
				<verse number="3">अन क्यो, “मूँ थाँकाऊँ हाचेई केवूँ हूँ के, जद्याँ तईं थाँ पापऊँ ने फरो अन छोरा का जस्यान ने वणो, थाँ हरग का राज में ने जा सको।</verse>
				<verse number="4">ज्यो कुई आपणाँ खुद ने अणी छोरा का जस्यान फोरो बणाई, वो हरग का राज में मोटो वेई।</verse>
				<verse number="5">अन ज्यो भी मारा नामऊँ ईं छोरा का जस्यान किंने मानी, वो मने मानी।</verse>
				<verse number="6">“पण ज्यो कुई अणा फोरामूँ फोरा ने, ज्यो मारा पे विस्वास करे हे वाँका मूँ एक ने भी ठोकर खवाड़ी, वाँका वाते ओ वेतो के, मोटी घट्टी को पाट वाँका गळा में लटकायो जातो, अन ऊण्डा समन्द में नाक्यो जातो।</verse>
				<verse number="7">ठोकर देबावाळा ने धिकार हे। ठोकर को लागणो जरूरी हे, पण धिकार हे, वीं मनक पे जणीऊँ आ ठोकर लागे हे।</verse>
				<verse number="8">“यद्याँ थारो हात कन थारो पग थने ठोकर खुवावे, तो वींने काटन फेक देज्ये। टुट्यो कन लंगड़ो वेन अनंत जीवन में परवेस करणो थाँरा वाते ईंऊँ हव हे के, दो हात कन दो पगाँ वेता तका थूँ कदी ने बजबा वाळी वादी में नाक्यो जावे।</verse>
				<verse number="9">यद्याँ थारी आँक थने पाप में नाके, तो वींने काड़न फेंक दे, काण्यो वेन अनंत जीवन में परवेस करणो थाँका वाते हव हे के, दो आक्याँ रेता तका थूँ नरक की वादी में नाक्यो जावे।</verse>
				<verse number="10">“देको, थाँ अणा फोरामूँ कणी ने बेकार मती जाणो, काँके मूँ थाँकाऊँ केवूँ हूँ के, हरग में वाँका दूत मारा हरग का बाप को मुण्डो हमेस्या देकता रेवे हे।</verse>
				<verse number="11">काँके मनक को पूत गमाणा तका ने होदबा आयो हे।</verse>
				<verse number="12">“थें कई होच-बच्यार करो हो? यद्याँ कणी मनक के, हो गारा वे, अन वाकामूँ एक गमा जावे, तो कई वो एक कम हो गारा ने वटेई छोड़न, मंगरा का ऊपरे जान वणी गमाणा तका गारा ने ने होदी?</verse>
				<verse number="13">अन यद्याँ अस्यान वेवे के, वो वीं गारा ने होदले, तो मूँ थाँकाऊँ हाचेई कूँ हूँ के, वो वीं एक कम हो गारा का वाते जीं ने गमाया हा, अतरो राजी ने वेई जतरो वणी एक गमाणा तका गारा का वाते वेई।</verse>
				<verse number="14">अस्यानीस थाँका बाप की ज्यो हरग में हे वाँकी या मरजी ने हे के, अणा फोरामूँ एक को भी नास वेवे।</verse>
				<verse number="15">“यद्याँ थाँको विस्वासी भई थाँका हामे अपराद करे, तो जावो अन एकला में वात करन वींने हमजा। यद्याँ वो थारी हामळे तो थें आपणाँ भई ने आपणो बणा लिदो हे।</verse>
				<verse number="16">यद्याँ वो ने हुणे, तो एक कन दो जणा ने आपणाँ हाते ओरी लेजा, ताँके हरेक बात दो कन तीन गवा का मुण्डाऊँ गवई दिदी जावे।</verse>
				<verse number="17">यद्याँ वो वाँकी भी ने हुणे, तो मण्डलीऊँ के दे, पण यद्याँ वो मण्डली की भी ने हामळे तो थूँ वींने जो यहूदी ने हे वाँके अन कर लेबावाळा का जस्यान मानज्ये।</verse>
				<verse number="18">“मूँ थाँकाऊँ हाचेई केवूँ हूँ के, ज्यो कुई थाँ धरती पे बांदो, वो हरग में बदी अन ज्यो कुई थाँ धरती पे खोलो, वो हरग में भी खली।</verse>
				<verse number="19">पाछो मूँ थाँकाऊँ केवूँ हूँ, यद्याँ थाँकाऊँ दो जणा धरती पे कणी एक बात का वाते एक मन वेन वींने मांगी, तो वो मारा बाप की ओरू ज्यो हरग में हे, वाँका वाते वेजई।</verse>
				<verse number="20">काँके जटे दो कन तीन मारा नाम पे भेळा वेवे हे, वटे मूँ वाँका वसमें वेऊँ हूँ।”</verse>
				<verse number="21">तद्याँ पतरस ईसू का नके आन पूँछ्यो, “हो परबू जी, यद्याँ मारो विस्वासी भई मारा विरोद में कई अपराद करतो रेवे, तो मूँ कतरी दाण वींने माप करूँ? कई हात दाण तई?”</verse>
				<verse number="22">ईसू वींने क्यो, “मूँ थाँराऊँ ओ ने केवूँ के, खाली हात-दाणइस कई, पण हात का हित्तर गुणा तईं माप करतो रेणो छावे।</verse>
				<verse number="23">“ईं वाते हरग को राज वीं राजा का जस्यान हे, जणी आपणाँ दासा को लेको लेणो छावे हे।</verse>
				<verse number="24">जद्याँ वो लेको लेबा लागो, तो एक जणो वाँका हामे लायो ग्यो, जिंपे दस हजार चाँदी का सिक्का को करजो निकळ्यो हो।</verse>
				<verse number="25">जद्याँ वींका नके पाच्छा देबा का वाते कई कोयने हो, तो वींके मालिक क्यो, यो अन ईंकी लगई अन छोरा-छोरी अन ज्यो कुई ईंको हे हारोई बेच्यो जावे, अन करजो भरियो जावे।</verse>
				<verse number="26">ईंपे वणी दास पगाँ में पड़न वणीऊँ अरज किदी अन क्यो, ‘हो मालिक संतोक राक, मूँ हारोई दे देऊँ।’</verse>
				<verse number="27">तद्याँ वणी दास का मालिक दया करन वींने छोड़ दिदो, अन वींको करजो भी माप कर किदो।</verse>
				<verse number="28">“पण जद्याँ वो नोकर बारणे आयो, तो वींका हाते का नोकराऊँ मेंऊँ एक नोकर वींने मल्यो ज्यो वींको हो दिनार को करजदार हो, वाँकाणी वाँने पकड़न वींको गळो दबायो अन क्यो, ‘ज्यो कुई थाँराऊँ लेणो हे वो दिदे।’</verse>
				<verse number="29">“ईंपे वींका हाते को नोकर वींका पगाँ में पड़न वणीऊँ अरज करबा लागो, ‘संतोक राक, मूँ हारोई दे देऊँ।’</verse>
				<verse number="30">पण वो ने मान्यो, पण जान वींने जेळ में नाक दिदो के, जद्याँ तईं करजो ने देवे, तद्याँ तईं वो वटेईस रेवे।</verse>
				<verse number="31">वींका हाते दूजाँ नोकर ज्यो व्यो हो वो देकन घणा दकी व्या, अन जान आपणाँ मालिक ने पूरो हाल बता दिदो।</verse>
				<verse number="32">तद्याँ वींका मालिक वाँने बलान क्यो, ‘हे पापी नोकर, थें ज्यो माराऊँ अरज किदी, तो में थारो हारोई करज्यो माप कर दिदो।</verse>
				<verse number="33">ईं वाते जस्यान में थाँका पे दया किदी, वस्यानीस कई थने भी आपणाँ हाते का नोकर पे दया ने करणी ही?’</verse>
				<verse number="34">अन वींको मालिक गुस्सा में वेन वींने सजा देबावाला का हाताँ में हूँप दिदो के, जद्याँ तईं वो करजो ने चुकावे, तद्याँ तईं वाँका हाताँ में रेवे।”</verse>
				<verse number="35">पछे पाछो ईसू क्यो, “अणी तरियाँ यद्याँ थाँकाऊँ हर कुई आपणाँ विस्वासी भई ने मनऊँ माप ने केरी, तो मारो बाप ज्यो हरग में हे, थाँका हाते भी वस्यानीस करी।”</verse>
			</chapter>
			<chapter number="19">
				<verse number="1">जद्याँ ईसू ईं बाताँ के चुक्यो, तो गलीलऊँ पराग्या अन यरदन नंदी का पेले पाल्ड़े यहूदियाँ का परदेस में आयो।</verse>
				<verse number="2">तद्याँ मोटी टोळी वाँका पाच्छे चालगी, अन वाँकाणी वटे माँदा ने हव किदा।</verse>
				<verse number="3">तद्याँ कुई फरीसी जाँच-परक करबा का वाते वाँका नके आन केबा लागा, “कई कस्यी भी बातऊँ आपणी लुगई ने तलाक देणो हव हे?”</verse>
				<verse number="4">वाँकाणी जवाब दिदो, “कई थाँ सास्तर में ने भण्यो के, दनियाँ ने बणाबावाळा वाँने सरुवात में ‘वाँने मनक अन लुगई का रूप में रच्या हा?’</verse>
				<verse number="5">अन ओरी भी क्यो, ‘ईं मस मनक आपणाँ बई-बापूऊँ अलग वेन आपणी लुगई का हाते रेई अन वीं दुई एक सरीर वेई।’</verse>
				<verse number="6">ईं वाते वीं अबे दो ने, पण एक वेई। ईं वाते जाँने परमेसर मला दिदा हे, वाँने कुई मनक न्यारा ने करे।”</verse>
				<verse number="7">वाँकाणी वाँने क्यो, “पच्छे मूसे ओ काँ क्यो के, तलाक पतर देन वींने छोड़ दो?”</verse>
				<verse number="8">ईसू वाँने क्यो, “मूसे थाँका कल्डा मन के वाते थाँने आपणी–आपणी लुगई ने छोड़ देबा को हुकम दिदो, पण ठेटऊँ ओ ने हो।”</verse>
				<verse number="9">मूँ थाँकाऊँ केवूँ हूँ के, “यद्याँ कुई लुगई कुकरमी ने वेवे तद्याँ भी वींको धणी वींने छोड़ देवे हे अन दूजीऊँ ब्याव करे, वो कुकरम हे।”</verse>
				<verse number="10">चेला वाँने क्यो, “यद्याँ मनक को लुगई का हाते अस्यो रिस्तो वे, तो ब्याव करणो हव कोयने।”</verse>
				<verse number="11">ईसू वाँने क्यो, “हाराई ओ बचन ने मान सके, बेस वीं ज्याँने ओ दान दिदो ग्यो हे।</verse>
				<verse number="12">काँके कुई गतराड़ा अस्या हे, ज्यो माँ का गरबऊँ ईंस अस्या जनम्याँ। अन कुई गतराड़ा अस्या हे, ज्याँने मनकाँ बणाया अन कुई गतराड़ा अस्या हे, जणा हरग का राज का मस ब्याव ने करबा को फेसलो किदो हे। ज्यो ईं बचन ने गरेण कर सके हे, वीं गरण करले।”</verse>
				<verse number="13">तद्याँ लोग-बाग छोरा-छोरी ने ईसू नके लाया के, वो वाँपे हात मेले अन वाँका वाते परातना करे, पण चेला वाँके डाट-फटकार मेली।</verse>
				<verse number="14">पण ईसू क्यो, “छोरा-छोरी ने मारा नके आबा दो, अन अणाने तापड़ो मती, काँके हरग को राज अस्याईस को हे।”</verse>
				<verse number="15">ईसू छोरा-छोरी का माता पे हात मेलन वटेऊँ परोग्यो।</verse>
				<verse number="16">एक मनक ईसू का नके आयो अन वाँकाऊँ क्यो, “हो गरुजी, मूँ कस्यो भलो काम करूँ के, अनंत जीवन पाऊँ?”</verse>
				<verse number="17">ईसू वींने क्यो, “थूँ मने हाँचो काँ केवे हे? हाँचो तो खाली परमेसरइस हे, पण यद्याँ थूँ अनंत जीवन पाणो छावे, तो वाँकी आग्या ने मान्याँ कर।”</verse>
				<verse number="18">वणी वाँने क्यो, “कस्यी आग्या?” ईसू क्यो, “ओ के हत्या मती करज्ये, कुकरम मती करज्ये, चोरी मती करज्ये, जूटी गवई मती दिज्ये,</verse>
				<verse number="19">आपणाँ बई-बापू को आदर-मान राकज्ये अन आपणाँ पड़ोसीऊँ आपणाँ जस्यान परेम राकज्ये।”</verse>
				<verse number="20">वणी मोट्यार ईसुऊँ क्यो, “ईं हाराई ने तो मूँ मानतो आयो हूँ, अबे मारा में कणी बात की कमी हे?”</verse>
				<verse number="21">ईसू वाँने क्यो, “यद्याँ थूँ पाको बणणो छावे हे तो थूँ जा, अन आपणी धन-दोलत बेचन गरीबा ने दिदे, अन थने हरग में हाँचो धन मेली। तद्याँ आन मारा पाच्छे वेजा।”</verse>
				<verse number="22">पण वो मोट्यार आ बात हुणन घणो दकी वेन परोग्यो, काँके वो घणो रिप्यावाळो हो।</verse>
				<verse number="23">तद्याँ ईसू आपणाँ चेलाऊँ क्यो, “मूँ थाँने हाँची केवूँ हूँ के, रिप्यावाळा को परमेसर का राज में जाणो घणो दोरो हे।</verse>
				<verse number="24">थाँकाऊँ पाछो केवूँ हूँ के, जस्यान ऊँट हुई का नाका मेंऊँ ने निकळ सके, वस्यानीस रिप्यावाळा को परमेसर का राज में जाणो घणो दोरो हे।”</verse>
				<verse number="25">ओ हुणन चेला अचम्बा में पड़ग्या अन पूँछ्यो, “तो पछे कूण बंचायो जा सके हे?”</verse>
				<verse number="26">ईसू वाँकी आड़ी देकन क्यो, “मनकाऊँ तो ओ ने वे सके हे, पण परमेसरऊँ हारोई वे सके हे।”</verse>
				<verse number="27">ईंपे पतरस वाँने क्यो, “देको, माँ तो हारोई छोड़न थाँरा पाच्छे वेग्या हाँ, तो माने कई मली?”</verse>
				<verse number="28">ईसू वाँने क्यो, “मूँ थाँकाऊँ हाचेई केवूँ हूँ के, नुवा युग में जद्याँ मनक को पूत आपणी मेमा की गाद्दी पे विराजी, तो थाँ भी ज्यो मारा पाच्छे वेग्या हो, बारा गाद्‍याँ पे बेटन इजराएल की बाराई कोमाँ को न्याव करो।</verse>
				<verse number="29">अन जणी कणी घर, भायाँ, बेना, बाप, बई, छोरा-छोरी अन खेता ने मारा नाम का वाते छोड़ दिदा हे, वाँने हो गुणी मली। अन वो हरग में अनंत जीवन को हकदार वेई।</verse>
				<verse number="30">पण नरई जी पेल्या हे, वी पाच्छे वे जाई, अन नरई जी पाच्छे हे, वीं पेल्या वे जाई।”</verse>
			</chapter>
			<chapter number="20">
				<verse number="1">हरग को राज एक जमींदार का जस्यान हे, ज्यो भाग-फाट्याँ निकळ्यो के, अंगूर का बाग का वाते दानक्याँ लावे।</verse>
				<verse number="2">वणी दानक्याँ ने एक चाँदी का सिक्का की दानकी पे आपणी बाग में काम करबा का वाते खन्दाया।</verse>
				<verse number="3">“पछे रोटा बणाबा की टेम में एक दूजाँ मनक ने बजार में फालतू ऊबा तको देक्यो।</verse>
				<verse number="4">अन वणीऊँ क्यो, ‘थूँ भी मारा बाग में जा अन ज्यो कई थने हव लागी, थने देऊँ।’ अस्यान वो भी परोग्यो।</verse>
				<verse number="5">पछे वणी दपराँ में अन तीजा पेर का लगे-भगे जान जान वस्यानीस किदो।</verse>
				<verse number="6">एक घड़ी दन रेता वो पाछो जान कणी दूजाँ ने बजार में ऊबा तका देक्या, तो वणी वाँकाऊँ क्यो, ‘कई थाँ अटे पूरा दन यूँई ऊबा रिया?’”</verse>
				<verse number="7">वाँकाणी वींने क्यो, “ईं वाते ऊबा हाँ के, ‘कणी माने दानकी पे ने लगाया।’ वणी वाँने क्यो, थाँ भी बाग में जावो।”</verse>
				<verse number="8">“हाँज पड़्या अंगूरा का बाग के मालिक आपणाँ मुनीमऊँ क्यो, ‘दानक्याँ ने बलान पालाऊँ लेन आगे का हाराई ने दानकी दिदे।’</verse>
				<verse number="9">जद्याँ वीं आया ज्यो घड़ीभर दन रेग्यो हो, वीं दाण दानकी पे लगाया ग्या हाँ, वाँने एक चाँदी को सिक्को मल्यो।</verse>
				<verse number="10">ज्यो पेल्या आया वाँकाणी ओ हमज्या के, माने अणाऊँ नरोई मेली, पण वाँने भी एक चाँदी सिक्को मल्यो।</verse>
				<verse number="11">जद्याँ दानकी मली, तो वीं जमींदार पे गुस्सो करता केबा लगा,</verse>
				<verse number="12">‘ईं पाच्छे आबावाळा तो एक घड़ी काम किदो, अन थाँ वाँने माकाँ जस्यानीस बणा दिदा, पण माँ तो दन भर बोज तोक्यो अन तावड़ा में तपयाँ।’</verse>
				<verse number="13">जमींदार वाँका मूँ एक ने क्यो, ‘हे भई, मूँ थाँकाऊँ कुई बुरो ने कररियो हूँ। कई आपाँ एक चाँदी का सिक्को देबा को ते ने किदो हो?</verse>
				<verse number="14">ज्यो थारो हे, ले अन परोजा। मारी मरजी या हे के, जतरी दानकी थने दूँ अतरीईस पछे आबावाळा ने भी दूँ।</verse>
				<verse number="15">कई ओ हव ने के, मूँ आपणाँ मालऊँ ज्यो छावूँ वो करूँ? कई मारो दयाळू वेबा का मस थूँ रिस्याँ बळे हे?’”</verse>
				<verse number="16">तो पछे ईसू वाँने क्यो, “ईं तरियाँ जीं पाच्छे हे, वीं पेलो वेई, अन जीं पेला हे, वीं पाच्छे वेई।”</verse>
				<verse number="17">ईसू यरूसलेम जाती दाण बाराई थरप्या तका चेला ने हून्नी जगाँ में लेग्यो अन गेला में वाँकाऊँ केबा लागो,</verse>
				<verse number="18">“देको, आपीं यरूसलेम जारिया हाँ अन मनक को पूत मुक्य याजकाँ अन नेमा ने हिकाबावाळा का हाताऊँ पकड़्यो जाई, अन वीं वींने मारबा का वाते ठेराई।</verse>
				<verse number="19">अन वींने ज्यो यहूदी ने हा वाँका हाताँ में हूँपी के, वीं वींकी रोळ करी, वीं वींके कोड़ा मारी अन हूळी पे चड़ाई, अन वो तीजे दन जिवायो जाई।”</verse>
				<verse number="20">जद्याँ जब्दी का छोरा की बई आपणाँ छोरा का हाते ईसू का नके आन हाता-जोड़ी किदी के, वींऊँ कई माँगबा लागी।</verse>
				<verse number="21">ईसू वींने पूँछ्यो, “थूँ कई छावे हे?” वाँ बोली, “ओ बचन दे के, ईं दो छोरा थाँका राज में एक थारे जीमणा पाल्ड़े अन एक थाँके डावा पाल्ड़े बेटे।”</verse>
				<verse number="22">ईसू वींने जवाब दिदो, “थें ओ ने जाणो हो के, कई माँगरिया हो। ज्यो दुक को प्यालो मूँ पिबा में हूँ, कई थें पीं सको हो?” वाँकाणी वाँने क्यो, “हा, पीं सका हा।”</verse>
				<verse number="23">ईसू वाँने क्यो, “थें मारो प्यालो पींवो, पण मारी जीमणा पाल्ड़े अन डावा पाल्ड़े किंने बेटाबा को मारो काम कोयने, पण ज्याँका वाते मारा बाप की ओरुँ त्यार किदो ग्यो हे, वाँका वाते हे।”</verse>
				<verse number="24">ओ हुणन ईसू का दस चेला वीं दुई भायाँ पे गुस्सा में वेग्या।</verse>
				<verse number="25">ईसू वाँने नके बलान क्यो, “थाँ जाणो हो के, ज्यो यहूदी ने हे वीं हाकम आपणाँ मनकाँ पे हक राके हे। मोटा मनक फोरा मनकाँ ने आपणाँ हक को गलत रूपऊँ काम में लेवे हे।</verse>
				<verse number="26">पण थाँका बचमें अस्यो ने वेई। पण ज्यो कुई थाँकामूँ मोटो वेणो छावे, वो थाँको नोकर-चाकर वणे।</verse>
				<verse number="27">अन ज्यो थाँकामें सबाऊँ मुक्यो बणबो छावे, वो हाराई को हाळी बणे।</verse>
				<verse number="28">जस्यान के मनक को पूत ईं वाते ने आयो के, वींकी सेवा-चाकरी किदी जावे पण ईं वाते आयो के, नरई ने छुड़ाबा का वाते आपणी जीव देवे।”</verse>
				<verse number="29">जद्याँ वीं यरीहो नगरऊँ जारिया हाँ, तो एक मोटी टोळी वाँका पाच्छे आबा लागी।</verse>
				<verse number="30">अन दो आन्दा, ज्यो गेला का कनारा पे बेटा हाँ, ओ हामळन के, ईसू जारिया हे, तो हाका-भार मेलन केबा लागो, “हो परबू, दाऊद का वस, माकाँ पे दया कर।”</verse>
				<verse number="31">लोग-बाग वाँने तापड़ता तका क्यो, छाना रेवो, पण वीं ओरू भी ज्योराऊँ हाका-भार करन केबा लागा, “ओ दाऊद का वंस, माँकापे दया कर।”</verse>
				<verse number="32">तद्याँ ईसू ऊबो रेन वाँकाऊँ क्यो, वाँने बलाया अन क्यो, “थें कई छावो हो के, मूँ थाँका वाते कई करूँ?”</verse>
				<verse number="33">वाँकाणी वाँने क्यो “ओ परबू, ओ करो के, माँ देकबा लाग जावा।”</verse>
				<verse number="34">ईसू ने वाँका पे दया अई अन वाँकी आक्याँ पे हात अड़ायो। वीं तरत देकबा लागा अन ईसू का पाच्छे चालबा लागा।</verse>
			</chapter>
			<chapter number="21">
				<verse number="1">जद्याँ ईसू अन वींका चेला यरूसलेम का नके पोछ्याँ अन जेतुन का मंगरा पे बेतफगे का नके आया, तो ईसू दो चेला ने ओ केन खन्दाया,</verse>
				<verse number="2">“आपणाँ हामे वाळा गाम में जावो! वटे जाताई थाँने एक गदेड़ी बंदी तकी मेली, अन वाँका नके वींको एक बाछरो बंद्‍यो तको मली। वींने खोलन मारा नके ले आवो।</verse>
				<verse number="3">यद्याँ कुई थाँकाऊँ पुच्छे, तो केज्यो के, ‘परबू ने ईंकी सावना हे,’ तद्याँ वो तरत वींने खोलन थाँका हाते खन्दा देई।”</verse>
				<verse number="4">यो ईं वाते व्यो के, ज्यो बचन परमेसर का आड़ीऊँ बोलबावाळा का मुण्डाऊँ बोल्या ग्या हा, वीं पूरा वेवे हे के,</verse>
				<verse number="5">“सिय्योन की छोरीऊँ केवो, ‘देक, थारो राजो थाँका नके आवे हे। वो भलो हे अन गदेड़ी पे बेटो तको हे वो गदेड़ी का बाछरा पे बेटो हे।’”</verse>
				<verse number="6">चेला जान, जस्यान ईसू वाँने क्यो हो, वस्यानीस किदो।</verse>
				<verse number="7">अन गदेड़ी अन वींका बच्या ने लान, वींपे आपणाँ गाबा नाक्या काँके ईसू को वींपे बेटणो हो।</verse>
				<verse number="8">तद्याँ नरई लोग-बागाँ आपणाँ गाबा गेला में बसा दिदा अन दूजाँ लोगाँ रूँकड़ाऊँ डाळ्याँ काटन गेला में नाक दिदी।</verse>
				<verse number="9">जीं मनक आगे हा अन जीं पाच्छे हा वीं केरिया हा, “दाऊद का वंसज ने होसाना। धन्न हे वाँने जी परबू का नामऊँ आवे हे, हरग में होसाना।”</verse>
				<verse number="10">जद्याँ वीं यरूसलेम में आया, तो हारई नगर में हाका-हूक बेवा लागी, अन लोग-बाग केबा लागा, “ओ कूण हे?”</verse>
				<verse number="11">लोग-बागाँ क्यो, “ओ गलील का नासरत नगर को परमेसर का आड़ीऊँ बोलबावाळो ईसू हे।”</verse>
				<verse number="12">ईसू परमेसर का मन्दर में जान वीं हारई ने, ज्यो मन्दर में लेण-देण को काम कररिया हाँ, वाँने बारणे काड़ दिदा, अन विदेसी रिप्या बदलबावाळा का तकता अन परेवड़ा बेचबावाळा की दकाना ने उलटी कर नाकी।</verse>
				<verse number="13">अन वाँकाऊँ क्यो, “सास्तर में लिक्यो हे, ‘मारो घर परातना को घर केवाई।’ पण, थाँ ईंने ‘चोरा को ठाणो’ बणा दिदो हे।”</verse>
				<verse number="14">तद्याँ आंदा अन लुला-लंगड़ा, मन्दर में वाँका नके आया, अन वाँने वणी हव किदा।</verse>
				<verse number="15">पण जद्याँ मुक्य याजकाँ अन नेमा ने हिकाबावाळा अणा, मोटा कामाँ ने, ज्यो वाँकाणी किदा, अन छोरा-छोरी ने मन्दर में, “दाऊद का वंसज ने होसाना बोलता तका देक्यो, तो वीं गुस्सा में आग्या।”</verse>
				<verse number="16">अन ईसू वाँने केवा लागा, “कई थूँ हुणे हे के, ईं कई केवे हे?” ईसू वाँने क्यो, “कई थाँ सास्तर में ने भण्यो, ‘छोरा-छोरी अन दूद पिवता फोरा बाळकाँ का मुण्डाऊँ थाँ घणी जे-जेकार करई हे’?”</verse>
				<verse number="17">तद्याँ ईसू वाँने छोड़न नगर का बारणे का गाम बेतनियाँ पूग्यो अन रात वटेईस रियो।</verse>
				<verse number="18">भाग-फाट्याँ जद्याँ ईसू यरूसलेम सेर में आरियो हो, तो वींने भूक लागी।</verse>
				<verse number="19">हड़क का आड़ी वणी एक अंजीर को रूँकड़ो देकन वो वींका भड़े ग्यो, तो वींने पान्दड़ा ने छोड़ वींमें ओरू कई ने मल्यो। तो ईसू रूँकड़ा ने क्यो, “अबे थाँरे में कदी कई फळ ने लागी।” अन वो रूँकड़ो तरत हुकग्यो।</verse>
				<verse number="20">ओ देकन चेला होच-बच्यार में पड़ग्या अन क्यो, “ओ अंजीर को रूँकड़ो अतरी जट कस्यान हुकग्यो हे?”</verse>
				<verse number="21">ईसू वाँने जवाब दिदो, “मूँ थाँकाऊँ हाचेई केवूँ हूँ, यद्याँ थाँ विस्वास राको अन भेंम ने करो, तो थाँ बेस ओईस ने करो, ज्यो ईं अंजीर का रूँकड़ा का हाते किदो हे, पण यद्याँ ईं मंगराऊँ भी केवो, ‘अटूँ उड़ जा, अन समन्द में जा पड़,’ तो वो वे जाई।</verse>
				<verse number="22">अन थाँ परातना में ज्यो भी विस्वासऊँ मांगो, वो हारोई थाँने मली।”</verse>
				<verse number="23">ईसू मन्दर में ऊबा वेन उपदेस हुणारिया हा, तो मुक्य याजक अन यहूदी नेता वाँका नके आन पूँछ्यो, “थूँ ओ किंका हकऊँ करे हे? अन थने ओ हक कूणी दिदो हे?”</verse>
				<verse number="24">ईसू वाँने जवाब दिदो, “मूँ भी एक बात पूँछणी छावूँ हूँ, यद्याँ वाँ मने बतावो, तो मूँ भी थाँने बताऊँ के, ईं काम किंका हकऊँ करूँ हूँ।</verse>
				<verse number="25">बतावो यहुन्ना को बतिस्मो कटेऊँ आयो? हरग का आड़ीऊँ कन मनकाँ की आड़ीऊँ?” तद्याँ वीं एक-दूजाऊँ केबा लागा, “यद्याँ आपाँ केवा ‘हरग का आड़ीऊँ,’ तो वो आपाऊँ केई, ‘पच्छे थाँ वींपे विस्वास काँ ने किदो?’</verse>
				<verse number="26">अन यद्याँ केवाँ, ‘मनकाँ का आड़ीऊँ,’ तो आपाँने मनकाँ की टोळी की दरप हे, काँके वी हाराई यहुन्ना ने परमेसर का आड़ीऊँ बोलबावाळो माने हे।”</verse>
				<verse number="27">ईं वाते वणा ईसू ने जबाव दिदो, “माँ ने जाणा।” तो ईसू भी वाँकाऊँ क्यो, “तो मूँ भी थाँने ने बताऊँ के, ईं काम किंका हकऊँ करूँ हूँ।”</verse>
				<verse number="28">“थाँ कई होचो हो? कणी मनक का दो बेटा हे, वो मोटा बेटा का नके जान क्यो, ‘हे बेटा आज के दन अंगूरा का बाग में जान काम कर।’</verse>
				<verse number="29">पण वणी जबाव दिदो, ‘मूँ ने जाऊँ,’ पण पछे पछताण परोग्यो।</verse>
				<verse number="30">पछे बाप दूजाँ छोरा का नके जान अस्यानीस क्यो। बेटे जबाव दिदो ‘हाँ मूँ जाऊँ,’ पण ने ग्यो।</verse>
				<verse number="31">बतावो अणा दुयाँ मूँ कणी बाप की बात मानी?” वाँकाणी क्यो, “पेले बेटे।” ईसू वाँने क्यो, “मूँ थाँने हाचेई केवूँ हूँ के, कर लेबावाळा अन वेस्या थाँकाऊँ पेल्या परमेसर का राज में जाई।</verse>
				<verse number="32">काँके यहुन्नो बतिस्मो देबावाळो धरम को गेलो बतातो तको थाँका नके आयो अन थाँ वींपे विस्वास ने किदो, पण कर लेबावाळा अन वेस्या वींपे विस्वास किदो अन पछे भी थाँ ओ देकन पापऊँ मन ने फेरिया अन ने वींको विस्वास किदो।”</verse>
				<verse number="33">ईसू क्यो, “एक ओरी केणी हुणो। एक जमींदार हो, जणी अंगूरा को एक बाग लगायो, वींके च्यारूँमेर हड़ो किदो, वींमें रस को कुण्ड भी बणायो अन वींमें एक डागळो बणायो अन हिंजारिया ने हिजारे देन परोग्यो।</verse>
				<verse number="34">जद्याँ हाँक पाकबा की टेम वी, वाँकाणी आपणाँ थोड़ाक दासा ने वींकी हाँक को हिस्सो लेबा का वाँते हिंजारिया का नके खन्दाया।</verse>
				<verse number="35">पण हिंजारिया वींका दासा ने पकड़न किंने मारया-कुट्या, अन किंने मार नाक्या, अन किंके भाटा की ठोकी।</verse>
				<verse number="36">पछे वणी पेल्याँऊँ भी हेला दासा ने खन्दाया, अन वणा वाँका हाते भी वस्यानीस किदो।</verse>
				<verse number="37">अन्त में वणी आपणाँ एकाएक पूत ने वाँका नके ओ होचन खन्दायो के, ‘वीं मारा पूत को तो मान करी।’</verse>
				<verse number="38">“पण वीं हिंजारिया वीं छोरा ने देकन एक-दूजाऊँ क्यो, ‘ओ तो ईं बाग का मालिक को छोरो हे ज्यो जगाँ-जादाद को वेबावाळो मालिक हे। आवो ईंने मार नाका अन ईंकी जगाँ-जादाद ले लेवा।’</verse>
				<verse number="39">ईं वाँते वणा वींने पकड़्यो अन बागऊँ बारणे काड़न मार दिदो।</verse>
				<verse number="40">“ईं वाते ईसू वाँने पूँछ्यो, जद्याँ बाग को मालिक आई, तो वो हिंजारिया का हाते कई केरी?”</verse>
				<verse number="41">वाँकाणी वाँने क्यो, “वो वीं हत्यारा ने मार नाकी अन बाग ने दूजाँ ने हिजारे दिदे, ज्यो टेम-टेम पे वींने हाँक को हिस्सो देतो रेई।”</verse>
				<verse number="42">ईसू वींने क्यो, “कई थाँ पवितर सास्तर में ओ ने भण्यो के, “‘जणी भाटा ने राज कारीगर बेकार जाण्यो हो, वोईस खुणा को खास भाटो बणग्यो। ओ परबू का आड़ीऊँ व्यो, अन मारी नजर में मोटी बात वीं?’”</verse>
				<verse number="43">“ईं वाँते मूँ थाँकाऊँ केऊँ हूँ के, परमेसर को राज थाँकाऊँ ले लिदो जाई अन अस्या लोगाँ ने दे दिदो जाई, ज्यो वींकी राज का वाते हाक लाई।</verse>
				<verse number="44">ज्यो ईं भाटा पे पेड़ी, वो वखर जई अन जिंपे वो पड़ी वो वींने पीस देई।”</verse>
				<verse number="45">मुक्य याजकाँ अन फरीसी वींकी या केणी हुणन हमजग्या के, “यो आपणाँ बारा मेंईस केरियो हे।”</verse>
				<verse number="46">ईं वाते वणा वींने पकड़णो छायो, पण वीं मनकाऊँ दरपग्या, काँके मनक वींने परमेसर का आड़ीऊँ बोलबावाळो मानता हा।</verse>
			</chapter>
			<chapter number="22">
				<verse number="1">एक दाण पाच्छा ईसू वाँने केणी केबा लागा के,</verse>
				<verse number="2">“हरग का राज वीं राजा के जस्यान हे जणी आपणाँ पूत का ब्याव को जीमणो किदो।</verse>
				<verse number="3">राजा जीमणा में नुत्याँ तका मनकाँ ने बलावा का वाते आपणाँ नोकराँ ने खन्दाया, पण वीं लोग-बाग ने आया।</verse>
				<verse number="4">“पछे वणी दूजाँ नोकराँ ने ओ केन खन्दाया के नुत्या तका मेमानाऊँ केवो, ‘देको, मूँ जीमणो त्यार कर चुक्यो हूँ। पाळ्या तका जनावर ने मार दिदा हे अन हाराई जीमणो त्यार हे। जीमण में पधारो।’</verse>
				<verse number="5">“पण मनकाँ कई ध्यान ने दिदो अन आपणाँ गेले पराग्या। कुई तो आपणाँ खेत पे, तो दूज्यो आपणाँ वोपार पे पराग्या।</verse>
				<verse number="6">अन कणी तो वींका नोकराँ ने पकड़न वाँने कुट्या अन वाँकी हत्या कर दिदी।</verse>
				<verse number="7">तद्याँ राज्यो रीस में आन आपणी सेना खन्दाई वणा हत्यारा ने मारन वाँका नगर में वादी लगा दिदी।</verse>
				<verse number="8">“तद्याँ वणी आपणाँ नोकराऊँ क्यो, ‘ब्याव को जीमणो त्यार हे, पण जान्ये नुत्या हा, वीं बेकार निकळ्या।</verse>
				<verse number="9">ईं वाते चोगान पे जावो अन जतरा भी मनक थाँने मले, जीमणा में नुतन लावो।’</verse>
				<verse number="10">वीं नोकर चोगान में ग्या अन ज्यो भी हव कन खराब वाँने मल्या, हाराई ने भेळा किदा अन ब्याव को घर जीमण का मेमानाऊँ भरग्यो।</verse>
				<verse number="11">“पण जद्याँ जीमणा में नुत्या तका पामणा ने देकबा का वाते राज्यो आयो, तो वाँकाणी वटे एक मनक ने देक्यो, ज्यो ब्याव का गाबा पेरिया तको ने हो।</verse>
				<verse number="12">अन राजा वींकाऊँ क्यो, ‘भई, थूँ अटे बना ब्याव का गाबा पेरिया कस्यान आग्यो?’ अन वो कई भी ने बोल्यो।</verse>
				<verse number="13">तद्याँ राजे नोकराँ ने ओ हुकम दिदो, ‘वींका हात-पगाँ ने बाँदन वींने बारणे अंदारा ओवरा में नाक दिदो, जटे रोवतो अन हाका-भार करतो रेई।’</verse>
				<verse number="14">“काँके बलाया तका तो नरई हे, पण चुण्या तका थोड़ा हे।”</verse>
				<verse number="15">तद्याँ फरीसी जान आपस बात करबा लागा के, ईसू ने कस्यान ईंकी खुद की तकी बाताँ में फँसावा।</verse>
				<verse number="16">ईं वाते फरीसी आपणाँ चेला ने हेरोदिया का गुट का थोड़ाक मनकाँ का हाते ईसू का नके खन्दाया अन वणा क्यो, “हो गरुजी, माँ जाणा हाँ के, थूँ हाँचो हे, अन परमेसर को गेलो हाँचऊँ हिकावे हे, अन किंकीई दरप ने राके हे, काँके थूँ मनकाँ को मुण्डो देकन बाताँ ने करे हे।</verse>
				<verse number="17">ईं वाते माने बता थूँ कई होचे हे के, राजा केसर ने कर देणो हव हे के कोयने?”</verse>
				<verse number="18">ईसू वाँकी चाल ने जाणन क्यो, “हो कपटी, मने काँ जाँचो-परको हो?</verse>
				<verse number="19">कर को सिक्को मने बतावो।” तद्याँ वीं वाँका नके एक चाँदी को सिक्को लाया।</verse>
				<verse number="20">ईसू वाँने पूँछ्यो, “ईंपे नाम अन हेन्याण किंको हे?”</verse>
				<verse number="21">वणा वाँने क्यो, “राजा केसर को।” तद्याँ ईसू वाँने क्यो, “ज्यो केसर को हे, वो केसर ने अन ज्यो परमेसर को हे, वो परमेसर ने दो।”</verse>
				<verse number="22">ओ हुणन वणा अचम्बो किदो अन वाँने छोड़न पराग्या।</verse>
				<verse number="23">वीं दन सदुकी मनक ज्यो केता हाँ के, मरिया तका को पाछो जीवणो ने वे सके हे। वीं ईसू का नके आया अन वाँकाऊँ पूँछ्यो,</verse>
				<verse number="24">“हो गरू, मूसे का नेमा का जस्यान तो, यद्याँ कुई मनक बना आस-ओलादई मर जावे, तो वींको भई वींकी लगईऊँ ब्याव करन आपणाँ भई का वाते बंस बड़ावे।</verse>
				<verse number="25">अबे देको, माकाँ अटे हात भई हा, पेलो ब्याव करन मरग्यो, अन आस-ओलाद ने वेबा का मस आपणी लुगई ने आपणाँ भई का वाते छोड़ ग्यो।</verse>
				<verse number="26">अस्यानीस दूजे अन तीजे भी किदो, अन हातेई भई का वच्छे अस्यानीस व्यो।</verse>
				<verse number="27">हारई का केड़े वाँ लुगई भी मरगी।</verse>
				<verse number="28">काँके वाँ हातई भायाँ की लुगई वीं ही, तो अबे माँने बतावो, अणाके पाच्छा जी उठबा का केड़े वाँ वणा हातेई भायाँ मूँ किंकी लुगई वेई?”</verse>
				<verse number="29">ईसू वाँने क्यो, “थें नेमीई डापा में पड़ग्या, ने तो सास्तर जाणो हो अन ने परमेसर की तागत ने।</verse>
				<verse number="30">काँके पाच्छा जी उठबा केड़े ब्याव ने वेई, पण वीं हरग में परमेसर का हरग-दुताँ का जस्यान वेई।</verse>
				<verse number="31">पण मरिया तका का मेंऊँ जी उठबा का बारा में कई ओ बचन ने भण्यो ज्यो परमेसर, थाँकाऊँ क्यो हो के,</verse>
				<verse number="32">‘मूँ अबराम को परमेसर, इसाक को परमेसर अन याकूब को परमेसर हूँ’? मूँ मरिया तका को कोयने, पण जीवता को परमेसर हे।”</verse>
				<verse number="33">ओ हुणन लोग-बाग वींका उपदेसऊँ अचम्बा में पड़ग्या।</verse>
				<verse number="34">जद्याँ फरीसियाँ ओ हुण्यो के, ईसू सदुकियाँ को मुण्डो बन्द कर दिदो, तो वीं एक हाते अगेटा व्या।</verse>
				<verse number="35">वणा मूँ एक मूसा का नेमा ने हिकाबावाळे ईसू ने परकबा का वाते वणीऊँ पूँछयो,</verse>
				<verse number="36">“हो गरू, मूसा का नेमा में कस्यी आग्या मोटी हे?”</verse>
				<verse number="37">ईसू वींने क्यो, “थूँ आपणाँ परबू परमेसरऊँ आपणाँ पूरा मन, पूरा जीव अन पुरी अकल का हाते परेम राक।</verse>
				<verse number="38">मोटो अन खास हुकम तो योईस हे।</verse>
				<verse number="39">अन वींके जस्यान दूजो हुकम भी हे के, ‘थूँ आपणाँ पड़ोसीऊँ आपणाँ जस्यान परेम राक।’</verse>
				<verse number="40">हाराई मूसा का नेम अन परमेसर का आड़ीऊँ बोलबावाळा को अणा दुई हुकम को आसरो हे।”</verse>
				<verse number="41">जद्याँ फरीसी अगेटा हाँ, तो ईसू वाँने पूँछ्यो,</verse>
				<verse number="42">“मसी का बारा में थाँ कई होचो हो? वो किंको पूत हे?” वाँकाणी वाँने जवाब दिदो, “दाऊद को।”</verse>
				<verse number="43">ईसू वाँने पूँछ्यो, “तो पछे दाऊद आत्मा में वेन वींने ‘परबू’ कई लेबा ने केतो हो? अन लिक्यो तको भी हे के,</verse>
				<verse number="44">“‘परबू, मारा परबूऊँ क्यो, मारा जींमणी पाल्ड़े बेटन राज कर, जद्याँ तईं मूँ थाँका दसमणा ने थाँका पगतळ्याँ ने कर दूँ।’”</verse>
				<verse number="45">“पछे जद्याँ दाऊद वींने ‘परबू’ केवे हे, तो वो वींको पूत कस्यान वे सके?”</verse>
				<verse number="46">ईसू की या बात हुणन कुई भी एक बात भी ने के सक्यो। वणी दनऊँ कणी वाँकाऊँ कई पूँछबा की हिम्मत ने किदी।</verse>
			</chapter>
			<chapter number="23">
				<verse number="1">तद्याँ ईसू मनकाँ की टोळी अन आपणाँ चेलाऊँ क्यो,</verse>
				<verse number="2">“नेमा ने हिकाबावाळा अन फरीसी, मूसा का नेमा का अदिकारी हे।</verse>
				<verse number="3">ईं वाते वीं थाँकाऊँ ज्यो कुई कई केवे, वो करणो अन मानणो, पण वाँका जस्यान काम मती करज्यो, काँके वीं केवे हे पण करे हे कोयने।</verse>
				<verse number="4">वीं एक अस्या बोज ने जिंने तोकणो अबको हे, वींने मनकाँ का खादा पे मेले हे। पण खुद वींने आपणी आँगळीऊँ भी टेको ने देणो छावे हे।</verse>
				<verse number="5">“वीं आपणाँ हाराई काम लोगाँ ने बतावा का वाते करे हे। वीं हात अन माता पे बांदबा वाळा आपणाँ ताबीजा ने जिंमें वीं सास्तर ने लिकता हा, वाँने मोटा करे हे अन आपणी जोळ्या ने वदावे हे। ताँके मनक वाँने धरमी हमजे।</verse>
				<verse number="6">वीं जीमणा में खास-खास जगाँ, अन सबा में खास आसन,</verse>
				<verse number="7">बजार में नमस्कार अन वाँने खुद ने गरुजी केवाणो हव लागे हे।</verse>
				<verse number="8">“पण थाँ मनकाँऊँ खुद ने ‘गरुजी’ मती केवाज्यो, काँके थाँको तो एकीस गरू हे, अन थाँ हाराई जस्यान हो।</verse>
				<verse number="9">थाँ धरती पे किंनेई भी आपणाँ खुद का मेमामय बाप मती केज्यो, काँके थाँको आत्मिक बाप तो एकीस हे, ज्यो हरग में हे।</verse>
				<verse number="10">अन कणीऊँ भी आपणाँ खुद ने मालिक मती केवाज्यो, काँके थाँको एकीस मालिक हे, ओर वो मसी हे।</verse>
				<verse number="11">ज्यो थाँका मेंऊँ मोटो वेवे, वो थाँको दास वणे।</verse>
				<verse number="12">ज्यो कुई आपणाँ खुद ने मोटो बणाई, वो फोरो किदो जाई। अन ज्यो कुई आपणाँ खुद ने फोरो बणाई, वो मोटो बणायो जाई।</verse>
				<verse number="13">“ओ कपटी, मूसा का नेमा ने हिकाबावाळा अन फरीसियाँ, थाँने धिकार हे! थाँ मनकाँ का वाते हरग का राज को बारणो बन्द करो हो, ने तो थाँ खुद परवेस करो हो अन ने वींमें परवेस करबावाळा ने परवेस करबा देवो हो।</verse>
				<verse number="14">“ओ कपटी, मूसा का नेमा ने हिकाबावाळा अन फरीसियाँ, थाँने धिकार हे! थाँ विदवा लुगायाँ का घराँ ने खा जावो हो अन बतावा का वाते नरई टेम तईं परातना करता रेवो हो, ईं वाते थाँ कल्ड़ो दण्ड पावो।</verse>
				<verse number="15">“ओ कपटी मूसा का नेमा ने हिकाबावाळा अन फरीसियाँ, थाँने धिकार हे! थाँ एक जणा ने आपणाँ आड़ी लाबा का वाते रात-दन एक कर देवो हो। जद्याँ वो थाँका आड़ी आ जावे हे तो वींने आपणाँऊँ हेलो हुगलो बणा देवो हो।</verse>
				<verse number="16">“ओ आन्दा अगुवाँ, थाँने धिकार हे। थाँ केवो हो के, ‘यद्याँ कुई मन्दर की होगन खावे हे तो कई ने, पण यद्याँ कुई मन्दर का होना का होगन खावे, तो वींने वींको पालण करणो जरूरी हे।’</verse>
				<verse number="17">हो आन्दा वेण्डा मनकाँ, कूण मोटो हे, होनो कन वो मन्दर जीऊँ होनो पुवितर वेवे हे?</verse>
				<verse number="18">“पछे थाँ अस्यान भी केवो हो के, ‘यद्याँ कुई वेदी की होगन खावे तो कई ने, पण ज्यो चड़ावो वींपे हे, यद्याँ कुई वींकी होगन खावे, तो वींने वाँ होगन पुरी करणी जरूरी हे।’</verse>
				<verse number="19">ओ आन्दा, कूण मोटो हे, चड़ावो कन वेदी ज्याऊँ चड़ावो पुवितर वणे हे?</verse>
				<verse number="20">ईं वाते ज्यो वेदी की होगन खावे हे। तो वीं वेदी का हाते वेदी में ज्यो राक मेल्यो हे, वणा हाराई का होगन खावे हे।</verse>
				<verse number="21">ज्यो मन्दर का होगन खावे हे, वो मन्दर अन वींमें रेबावाळा परमेसर का भी होगन खावे हे।</verse>
				<verse number="22">ज्यो हरग की होगन खावे हे, वो परमेसर की गाद्दी का अन वींपे बिराजबावाळा का भी होगन खावे हे।</verse>
				<verse number="23">“हो कपटी, मूसा का नेमा ने हिकाबावाळा अन फरीसियाँ, थाँने धिकार हे! थाँ पोदिनो अन सोप, अन जीरा को दसमो हिस्सो तो देवो हो, पण थाँ नेमा की खास बाताँ ने छोड़ देवो हो। जस्यान के दया, अन विस्वास अन न्याव ने छोड़ दिदो हे। पण अणीऊँ तो ओ हव हो के, थाँ अणा खास बाताँने ने छोड़ता अन वणा ने भी करता रेता।</verse>
				<verse number="24">हो आंदा अगुवाँ, थाँ आपणाँ पाणी मेंऊँ माछर ने तो काड़ दो हो, पण ऊँट ने खा जावो हो।</verse>
				<verse number="25">“हो कपटी, मूसा का नेमा ने हिकाबावाळा अन फरीसियाँ, थाँने धिकार हे! थें तो प्याला अन थाळयाँ ने उपरे-उपरेऊँ तो मांजो हो पण वीं मयनेऊँ कपट अन हवारतऊँ भरी तकी हे।</verse>
				<verse number="26">हो आंदा फरीसियाँ! पेल्याँ प्याला अन थाळयाँ ने मयनेऊँ मांजो, ताँके वीं बारणेऊँ भी साप नजरे आवे।</verse>
				<verse number="27">“हो कपटी, मूसा का नेमा ने हिकाबावाळा अन फरीसियाँ, थाँने धिकार हे! थाँ आरास ढोळी तगी कबराँ का जस्यान हो ज्यो ऊपरेऊँ रुपाळी नजरे आवे हे, पण मयनेऊँ मरिया तका मनकाँ का हाड़क्या अन हारई तरिया की हुगली बाताँऊँ भरी तकी हे।</verse>
				<verse number="28">अणी तरिया थाँ भी ऊपरेऊँ मनकाँ ने धरमी बतावो हो, पण मयनेऊँ कपटी अन पापऊँ भरिया तका हो।</verse>
				<verse number="29">“हो कपटी, मूसा का नेमा ने हिकाबावाळा अन फरीसियाँ, थाँने धिकार हे! थाँ परमेसर का आड़ीऊँ बोलबावाळा की कबराँ बणावो हो अन धरमिया की कबराँ सजावो हो।</verse>
				<verse number="30">अन केवो हो के, ‘यद्याँ माँ आपणाँ बड़ाबा का दनाँ में वेता तो परमेसर का आड़ीऊँ बोलबावाळा की हत्या में वाँके हाते भेळा ने वेता।’</verse>
				<verse number="31">अणीऊँ तो थाँ खुद आपणी गवई देवो हो के, थाँ परमेसर का आड़ीऊँ बोलबावाळा का हत्यारा की ओलाद हो।</verse>
				<verse number="32">ईं वाते ज्यो थाँका बड़ाबा सरू किदो, थाँ वींने पूरो करो।</verse>
				<verse number="33">“अरे हाँप अन हापाँ का छोरा-छोरी, थाँ कस्यान होचो हो के, थाँ नरक की सजाऊँ बंच जावो?</verse>
				<verse number="34">ईं वाते देको, मूँ थाँका नके परमेसर का आड़ीऊँ बोलबावाळा अन अकलमन्द अन गरुवा ने खन्दाऊँ हूँ अन वणा मूँ करता ने तो मार नाको अन हूळी चड़ावो, अन किंने आपणाँ परातना घर में कोड़ा मारो अन एक नगरऊँ दूजाँ नगर दोड़ता फरो हो।</verse>
				<verse number="35">जणीऊँ धरमी हाबिलऊँ लेन बरक्या का पूत जकरय्या तईं, जिंने थाँ मन्दर अन वेदी का वसमें मार नाक्यो हाँ, अन जतरा धरमिया की हत्या अटे धरती पे वीं हे, वणा हारई मनकाँ की हत्या की सजा थाँका माता आई।</verse>
				<verse number="36">मूँ थाँने हाँची केवूँ हूँ के, ईं हारी बाताँ को दण्ड ईं पीड़ी का लोगाँ ने भुगतणो पड़ी।</verse>
				<verse number="37">“हे यरूसलेम, हे यरूसलेम! थूँ परमेसर का आड़ीऊँ बोलबावाळा की हत्या करे हे, अन ज्याँने थाँरा नके खन्दाया ग्या, वाँके थूँ भाटा की ठोके हे। कतरी दाण में बच्यार किदो के, जस्यान कूकड़ी आपणाँ बच्या ने आपणाँ फाकड़ा रेटे भेळा करे हे, वस्यानीस मूँ भी थाँरा छोरा-छोरी ने भेळा करूँ, पण थाँ ओ ने छायो।</verse>
				<verse number="38">अबे देक, थाँरो आरादना घर थाँका वाते उजाड़ दिदो जाई।</verse>
				<verse number="39">मूँ थाँकाऊँ केवूँ हूँ के, अबेऊँ जद्याँ तईं थाँ ने केवो के, ‘धन्ने हे वीं, ज्यो परबू का नामऊँ आवे हे, तद्याँ तईं मने पाछो कदी ने देको।’ ”</verse>
			</chapter>
			<chapter number="24">
				<verse number="1">जद्याँ ईसू मन्दरऊँ बारे जारिया हा, तो वाँका चेला वाँने मन्दर की मेड़ी बतावा का वाते वाँका नके आया।</verse>
				<verse number="2">ईंपे ईसू चेला ने क्यो, “थें अणी मेड़ी ने देकरिया हो? मूँ थाँकाऊँ हाचेई केवूँ हूँ, अटे एक भाटा पे दूज्यो भाटो टक्यो ने रेई, एक-एक भाटो हड़ा दिदो जाई।”</verse>
				<verse number="3">जद्याँ ईसू जेतुन का मंगरा पे बेट्या तका हा, तो चेला अकेला वाँका नके आन क्यो, “माने बता के, ईं बाताँ कदी वेई? थाँके आबा को अन जग का अन्त को कई हेन्याण वेई?”</verse>
				<verse number="4">ईसू वाँने क्यो, “हूँस्यार रेवो, कुई थाँकाऊँ छळ ने कर लेवे,</verse>
				<verse number="5">काँके नरई अस्या वेई, ज्यो मारा नामऊँ आन केई, ‘मूँईस मसी हूँ,’ अन नरई ने भटकाई।</verse>
				<verse number="6">जद्याँ थें लड़ायाँ अन लड़ायाँ का बारा में हुणो, तो घबराज्यो मती। पण देको, अस्यान तो वेई, पण ओ अन्त कोयने हे।</verse>
				<verse number="7">एक देस दूजाँ देसऊँ लड़ेलो अन एक राज दूजाँ राज पे चड़ई केरी। कई जगाँ भूकम आई अन काळ पेड़ी। अस्यान दुक अन पिड़ा की सरुआत वेई।</verse>
				<verse number="8">पण ईं हारई बाताँ कळेस की सरुआत की वेई।”</verse>
				<verse number="9">“तद्याँ वीं हताबा का वाते थाँने पकड़वाई, अन थाँने मार नाकी, अन मारा नाम का मस हारई जात्या का लोग-बाग थाँकाई दसमणी राकी।</verse>
				<verse number="10">तद्याँ नरई मनक विस्वास करणो छोड़ देई, अन एक दूजाने धोकाऊँ पकड़वाई अन एक-दूजाऊँ दसमणी राकी।</verse>
				<verse number="11">नरई जूटा मनक परमेसर का आड़ीऊँ बोलबावाळा का वाते ऊबा वेई, अन नरई ने भटकाई।</verse>
				<verse number="12">काँके अधरम बड़ जई, जणीऊँ नरई को परेम कम पड़ जई।</verse>
				<verse number="13">पण, ज्यो अन्त तक सेण करी, वो बंचायो जाई।</verse>
				<verse number="14">अन हरग राज को ओ हव हमच्यार हारई दनियाँ का हारी जात्या का वाते गवई का रूप में परच्यार किदो जई, तद्याँ अंत आ जई।</verse>
				<verse number="15">“ईं वाते जद्याँ थाँ वीं ‘उजाड़ करबावाळी अबकी चीज ने,’ जिंको बखाण दानियेल परमेसर का आड़ीऊँ बोलबावाळा का मुण्डाऊँ करियो ग्यो हे, मन्दर की पुवितर जगाँ पे ऊबी देको, भणबावाळा खुद हमज ले के, ईंको कई मतलब हे।</verse>
				<verse number="16">तद्याँ ज्यो लोग यहूदियाँ देस में वे, वाँने मंगरा पे भाग जाणो छावे।</verse>
				<verse number="17">ज्यो मनक आपणाँ घर की मेड़ी पे वेई, वे घर मयने जान कई भी चीज वाँके लारे लेबा का वाते टेम खराब ने करे।</verse>
				<verse number="18">अन ज्यो खेता में वेवे, वो आपणाँ गाबा लेबा ने पाछो भी ने फरे।</verse>
				<verse number="19">“वाँ दनाँ वीं लुगायाँ जी गरबवती वेई अन ज्याँके दूद पीता बाळक वेई, वाँका वाते वे दन घणा दुक भरिया वेई।</verse>
				<verse number="20">परातना करिया करो के, थाँने हियाळा का दनाँ में कन आराम का दन नाणो ने पड़े।</verse>
				<verse number="21">काँके वाँ दनाँ में अस्यो कळेस वेई, जस्यो जद्याँऊँ परमेसर ईं धरती ने बणई, वीं दनऊँ आज तईं कदी भी ने व्यो अन ने आगे कदी वेई।</verse>
				<verse number="22">“यद्याँ वीं दनाँ ने परमेसर कम करबा को बच्यार ने किदो वेतो तो कुई भी मनक ने बंचतो, पण आपणाँ चुण्या जाबा का मस परमेसर वणा दनाँ ने कम करी।</verse>
				<verse number="23">“वाँ दनाँ में कुई थाँकाऊँ केई, ‘देको, ओ हे मसी,’ कन ‘वो हे मसी’ तो वाँको विस्वास मती करज्यो।</verse>
				<verse number="24">मूँ ओ केवूँ हूँ काँके जूटा मसी अन जूटा मनक परमेसर का आड़ीऊँ बोलबा का वाते ऊबा वेई अन अस्या अस्या नरोगा हेन्याण बताई अन अचम्बावाळा काम केरी के, वीं चुण्या तका ने भी भटका देई।</verse>
				<verse number="25">देको, में थाँने पेल्याई ईं हारी बता दिदी हे।</verse>
				<verse number="26">“ईं वाते यद्याँ वीं थाँकाऊँ केई, देको वो काकड़ में हे, तो वटे मती जाज्यो कन वो केवे, ‘देको वो ओवरा में हे’ तो वाँको विस्वास मती करज्यो।</verse>
				<verse number="27">काँके जस्यान बिजळी उगमणीऊँ आतमणी तईं चमके हे, वस्यानीस मनक का पूत को भी आवणो वेई।</verse>
				<verse number="28">थाँ तो जाणोइस हो के, जटे लास वेई, वटे हेवळा भी भेळा वेई।</verse>
				<verse number="29">“वाँ दनाँ दक-पीड़ा की बगत के पछे सुरज काळो पड़ जाई अन चाँदऊँ वींकी चाँदणी जाती रेई। आकासऊँ तारा नीचे पड़बा लाग जाई अन आकास की हारी सगत्याँ हाल जाई।</verse>
				<verse number="30">“वीं टेम मनक का पूत का आबा को हेन्याण आकास में परगट वेई। तद्याँ धरती पे हारी जाता का मनक हाका-भार करी अन मनक का पूत ने तागत अन मेमा का हाते हरग का वादळा पे परगट वेता देको।</verse>
				<verse number="31">वो रणभेरी की मोटी अवाज का हाते आपणाँ दुताँ ने खन्दाई, वीं धरती की च्यारई दिसा मेंऊँ अन बादळा का खुणाऊँ आपणाँ गण्या-चुण्या लोगाँ ने अगेटा केरी।</verse>
				<verse number="32">“अंजीर का रूँकड़ा की ईं केणीऊँ हिक लेवो। जदी वाँकी डाळयाँ कँवळी वे जावे, अन वींपे कूँपळा फूटबा लागे, तो थें जाण जावो के, उनाळो आबा में हे।</verse>
				<verse number="33">अस्यानीस थें वे हारी बाताँ वेती देको, तो जाण जाज्यो के, अबे वाँ टेम भडे़ आगी हे, वो बगत चालूँ वेबा मेंईस हे।</verse>
				<verse number="34">मूँ थाँने हाँची केरियो हूँ के, ईं पिड़ीयाँ का मनकाँ के मरबा के पेल्याँई हारी बाताँ वे जाई।</verse>
				<verse number="35">धरती अन आकास टळ जाई, पण मारो बचन कदी ने टळी।</verse>
				<verse number="36">“वीं दन अन वीं घड़ी का वाते कुई भी ने जाणे हे, ने हरग-दुत अन ने पूत, पण बेस परम बापू।</verse>
				<verse number="37">जस्यान नूह का दन में व्यो हो, वस्यानीस मनक का पूत को भी आणो वेई।</verse>
				<verse number="38">काँके जस्यान जळ-परलयऊँ पेल्या का दनाँ में, जणी दन तईं नूह नाव में ने चड़यो हो, वीं दन तईं लोग-बाग खाता-पिता हा अन वाँमें ब्याव वेता हा।</verse>
				<verse number="39">अन जळ-परलय आन वीं हारई ने डुबा दिदा, तद्याँ तईं वाँने कई भी पतो ने पड़यो। वस्यानीस मनकाँ का पूत को भी आवणो वेई।</verse>
				<verse number="40">वीं टेम दो मनक खेत में वेई, एक ने ऊपरे उठा लिदो जई अन दूजाँ ने वटेई छोड़ दिदो जई।</verse>
				<verse number="41">दो लुगायाँ दाळ दळती वेई, एक ने ऊपरे उठा लिदी जाई, अन दूजी ने वटेई छोड़ दिदी जाई।</verse>
				<verse number="42">“ईं वाते थें भी जागता रो, काँके थाँ ने जाणो हो के, थाँको परबू कणी दन अई जावे।</verse>
				<verse number="43">पण ओ जाण लो के, यद्याँ घर का मालिक ने आ खबर वेती के, चोर कणी टेम आई तो जागतो रेतो अन घर में चोरी ने वेबा देतो।</verse>
				<verse number="44">ईं वाते थें भी त्यार रेज्यो, काँके जीं टेम का वाते थें होचो भी ने हो, वीं घड़ी मनक को पूत आ जई।</verse>
				<verse number="45">“ईं वाते होचो, विस्वास अन अकलवाळो दास कूण हे, जिंने मालिक आपणाँ नोकर अन हाळी का माते एक हाकम बणायो के, टेम-टेम पे वाँने खाणो खुवावे?</verse>
				<verse number="46">धन्ने हे वीं दास, जिंने वींको मालिक आन अस्यानीस करतो तको देके।</verse>
				<verse number="47">मूँ थाँकाऊँ हाचेई कूँ हूँ के, वो वींने आपणी हारी धन-दोलत पे हाकम बणाई।</verse>
				<verse number="48">पण यद्याँ वो निकमो दास होचबा लागे के, ‘मारा मालिक ने आबा में आलतरे टेम हे,’</verse>
				<verse number="49">अन आपणाँ हण्डाळ्याँ ने कुटबा-मारबा लागे, अन दारुँड़ीया का हाते खावे-पीवे।</verse>
				<verse number="50">तो वो दास को मालिक अस्यी टेम आई, जद्याँ वो वाट ने नाळतो वेई, अन वीं घड़ी जद्याँ वींकी वींने खबर भी ने वेई।</verse>
				<verse number="51">तद्याँ वो वींने घणी गाटी सजा देई। अन वींने कपट्या का हाते राकी, जटे हाका-भार अन रोवणो वेई।”</verse>
			</chapter>
			<chapter number="25">
				<verse number="1">वीं टेम ईसू क्यो, हरग को राज वीं दस कूँवारी छोरियाँ का जस्यान वेई जी आपणाँ दिवा लेन बींदऊँ मलबा गी।</verse>
				<verse number="2">वणा छोरियाँ में पाँच अण-हमज अन पाँच हमजदार ही।</verse>
				<verse number="3">अण-हमज आपणाँ दिवा तो लिदा, पण आपणाँ हाते हेलो तेल ने लिदो।</verse>
				<verse number="4">पण हमजदारा आपणाँ दिवा का हाते तेल भी हेलो लिदो।</verse>
				<verse number="5">जद्याँ बींद का आबा में थोड़ीक देर वेगी, तो वीं हारई ऊँगवा लागी अन हूँई गी।</verse>
				<verse number="6">“आदी रात में हो हाको व्यो, ‘देको, बींद, आरियो हे! वणीऊँ मलबा का वाते चालो।’</verse>
				<verse number="7">तद्याँ वीं हारई कुवारिया उटन आपणाँ दिवा ने त्यार करबा लागी।</verse>
				<verse number="8">अन अण-हमजदार हमजदाराऊँ क्यो, ‘थाँ माने थोड़ोक तेल दिदो ने, काँके माकाँ दिवा बजवा में हे।’”</verse>
				<verse number="9">“पण हमजदारा क्यो, ‘ने, काँके ओ माकाँ अन थाँका वाते पूरो ने वेई तो, ईं वाते हव ओ हे के, थाँ बेचबावाळा का नके जान आपणाँ वाते तेल मोल लिलो।’”</verse>
				<verse number="10">“जद्याँ वीं लेबा ने जारी ही, तो बींद आ पूग्यो अन ज्यो त्यार ही, वीं तो वाँका हाते ब्याव में परीगी अन पछे कणी कमाड़ बन्द कर दिदा।”</verse>
				<verse number="11">“ईंका केड़े वीं दूजी कुवारिया छोरियाँ भी आन केबा लागी, ‘हो मालिक, हो मालिक, माकाँ वाते कमाड़ खोल दो।’</verse>
				<verse number="12">वणी क्यो, ‘मूँ थाँकाऊँ हाचेई केवूँ हूँ, मूँ थाँने ने ओलकूँ हूँ।’”</verse>
				<verse number="13">तो पछे ईसू क्यो, “ईं वाते हेंचेत रेवो, काँके थाँ ने तो वीं दन ने जाणो हो, ने वीं टेम ने, जद्याँ मनक को पूत आई।”</verse>
				<verse number="14">“हरग को राज वणा मनक का जस्यान वेई, जणी यातरा पे जाती दाण आपणाँ दासा ने बलान आपणी धन-दोलत वाँने हूँप दिदी।</verse>
				<verse number="15">वणी एक ने होना का सिक्का भरी तकी पाँच नोळ्या अन दूजाँ ने दो, अन तीजा ने एक दिदी, वणी हर जणा ने वाँकी हेसियत का जस्यान दिदो, अन तद्याँ यातरा पे परोग्यो।</verse>
				<verse number="16">तद्याँ, जिंने पाँच नोळ्या मली हा, वणी तरत जान वोपार में किदो अन पाँच नोळ्या ओरी कमई।</verse>
				<verse number="17">ईं तरिया जिंने दो नोळ्या मली ही, वणी दो ओरी कमई।</verse>
				<verse number="18">पण जिंने एक नोळी मली ही, वणी जान खाड़ो खोदयो, अन आपणाँ मालिक को धन हपा दिदो।</verse>
				<verse number="19">“नरई दनाँ केड़े वणा दासा को मालिक आन वाँकाऊँ हस्याब पूँछबा लागो।</verse>
				<verse number="20">जिंने पाँच नोळ्या मली ही, वणी पाँच नोळ्या ओरी लान क्यो, ‘हो मालिक, थाँ मने पाँच नोळ्या दिदी ही, देको, में पाँच नोळ्या ओरी कमई हे।’</verse>
				<verse number="21">“वींके मालिक वणीऊँ क्यो, ‘धन हे हव अन विस्वास जोगा दास, थूँ थोड़ा में विस्वास जोगो रियो। मूँ थने नरई चिजाँ को हकदार बणाऊँ। आपणाँ मालिक का घर में जान खुसी मना।’</verse>
				<verse number="22">अन जिंने दो नोळ्या मली ही, वणी भी आन क्यो, ‘हो मालिक, थाँ मने दो थेल्या दिदी ही, देको, में दो ओरी कमई हे।’</verse>
				<verse number="23">वींके मालिक वणीऊँ क्यो, ‘धन हे हव अन विस्वास जोगा दास, थूँ थोड़ा में विस्वास जोगो रियो। मूँ थने नरई चिजाँ को हकदार बणाऊँ। आपणाँ मालिक का घर में जान खुसी मना।’</verse>
				<verse number="24">“तद्याँ जिंने एक थेली मली ही, वणी आन क्यो, ‘हो मालिक, मूँ थाँने ओळकूँ हूँ के, थाँ कल्ड़ो मनक हो। थूँ जटे ने वावे वटूऊँ काटे हे, अन जटे ने छाँटे हे वटूऊँ भेळो करे हे।</verse>
				<verse number="25">ईं वाते मूँ दरपग्यो अन जान थाँको धन खाड़ा में हपा दिदो, देको, ज्यो थाँको हे, वो ओ हे।’</verse>
				<verse number="26">वींके मालिक वींने क्यो, ‘हे कपटी अन बना काम का दास,’ जद्याँ थूँ ओ जाणतो हो के, जटे में ने वायो वटूऊँ काटू हूँ, अन जटे में ने छाँटयो वटूऊँ भेळो करूँ हूँ।</verse>
				<verse number="27">तो थूँ मारो धन साहुकारा ने दे देतो। अन जद्याँ मूँ आतो तो आपणो मूँळ ब्याज का हाते ले लेतो।</verse>
				<verse number="28">“‘ईं वाते या होना का सिक्का की नोळी अणीऊँ लेलो, अन जिंका नके दस हे, वींने दिदो।</verse>
				<verse number="29">काँके जिंका नके हे, वींने ओरी दिदो जाई अन वींका नके नरोई वे जाई, पण ज्याँका नके ने हे, वाँकाऊँ ज्यो कई भी वाँका नके हे, ले लिदो जाई।</verse>
				<verse number="30">ईं वाते ईं बना काम का दास ने बारणे अंदारा में नाक दो, जटे हाका-भार अन रोवणो वेवे।’</verse>
				<verse number="31">“जद्याँ मनक को पूत आपणी मेमा में आई अन हाराई हरग-दुत वींका हाते आई, तो वो आपणी मेमा की राजगाद्दी पे बिराजी।</verse>
				<verse number="32">अन दनियाँ का हाराई मनक वाँका हामे भेळा वेई अन जस्यान गवाळ गारा ने बकरियाँऊँ अलग कर देवे हे, वस्यानीस वीं वाँने एक-दूजाऊँ अलग करी।</verse>
				<verse number="33">अन वो आपणाँ गारा ने आपणी जीमणी पाल्ड़े अन बकरियाँ ने डावी पाल्ड़े ऊबा केरी।</verse>
				<verse number="34">“तद्याँ राजो आपणी जीमणी पाल्ड़े वाळाऊँ केई, ‘हो मारा बापू का धन्न मनकाँ, आवो, वीं राज का हकदार वे जावो, ज्यो जग का बणावाऊँ पेल्या थाँका वाते त्यार किदो ग्यो हे।</verse>
				<verse number="35">काँके मूँ भुको हो, अन थाँ मने खाबा को दिदो, मूँ तरियो हो अन थाँ मने पाणी पायो। मूँ बारवासी हो, अन थाँ मने घर में राक्यो।</verse>
				<verse number="36">मूँ नांगो हो, अन थाँ मने गाबा पेराया। मूँ मांदो हो अन थाँ मारी हार-हमाळ किदी, मूँ जेळ में हो अन थाँ माराऊँ मलबा आया।’</verse>
				<verse number="37">“तद्याँ धरमी वाँने केई, ‘हो परबू, माँकाणी थाँने कदी भूका देक्या अन खावा को दिदो अन कदी तरियो देक्यो अन पाणी पायो?</verse>
				<verse number="38">माँ कदी थाँने बारवासी देक्या अन आपणाँ घर में राक्या। अन कदी नांगा देक्या अन गाबा पेराया?</verse>
				<verse number="39">माँ कदी थाँने माँदा कन जेळ में बन्द देक्यो अन थाँकाऊँ मलबा आया?’</verse>
				<verse number="40">“तद्याँ राजा वाँने केई, ‘मूँ थाँकाऊँ हाँची केवूँ हूँ के, थाँ ज्यो मारा ईं फोराऊँ फोरा भायाँ मेंऊँ किंका एक का लारे भी किदो, तो वो माराईस हाते किदो हे।’</verse>
				<verse number="41">“तद्याँ वो डावा पाल्ड़े वाळाऊँ केई, ‘हो हरापवाळा मनकाँ, मारा हामेंऊँ वीं कदी ने बजबा वाळी वादी में पड़ जावो, ज्या सेतान अन वींका दुताँ का वाते त्यार किदी गी हे।</verse>
				<verse number="42">काँके मूँ भुको हो, अन थाँ मने खाबा को ने दिदो, मूँ तरियो हो, अन थाँ मने पाणी ने पायो।</verse>
				<verse number="43">मूँ बारवासी हो, अन थाँ मने आपणाँ घर में ने राक्यो, मूँ नांगो हो, अन थाँ मने गाबा ने पेराया। मूँ मांदो अन जेळ में हो, अन थाँ माराऊँ मलबा का वाते ने आया।’</verse>
				<verse number="44">“तद्याँ वीं केई, ‘हो परबू, माँ थाँने कदी भूका, तरियो, परदेसी, नांगो, माँदा अन जेळ में देक्यो अन थाँकी सेवा-चाकरी ने करी?’</verse>
				<verse number="45">“तद्याँ वो वाँने केई, ‘मूँ थाँकाऊँ हाचेई केवूँ हूँ के, थाँ ज्यो अणा फोराऊँ फोरामूँ कणी एक का हाते ने किदो हे तो वो मारा हाते भी ने किदो।’</verse>
				<verse number="46">अन ईं बुरा मनक अनंत दण्ड की सजा भुगती, पण धरमी अनंत जीवन पाई।”</verse>
			</chapter>
			<chapter number="26">
				<verse number="1">जद्याँ ईसू ईं बाताँ के चुक्यो, तो आपणाँ चेलाऊँ केबा लागा,</verse>
				<verse number="2">“थें जाणो हो के, दो दन केड़े बना हाज्या की रोट्याँ को तेवार हे अन मनक का पूत ने हूळी पे चड़ाबा का वाते धोकाऊँ पकड़वायो जाई।”</verse>
				<verse number="3">तद्याँ मुक्य याजकाँ अन भूण्डा यहूदी नेता केफा नाम का मोटा याजक की गवाड़ी में भेळा व्या।</verse>
				<verse number="4">अन आपस में बच्यार करबा लागा के, ईसू ने कस्यान जाळ में फसान मार नाका।</verse>
				<verse number="5">पण वीं केता हाँ, “आपाँने यो तेवार का टेम में ने करणो छावे, कटे अस्यान ने वेजा के, मनकाँ में लड़ई वे जावे।”</verse>
				<verse number="6">जद्याँ ईसू बेतनियाँ नगर में समोन का घर में हा, जिंको कोड़ हव वेग्यो हो।</verse>
				<verse number="7">तो एक लुगई धोळा भाटा का बणया ठामड़ा में मेंगा मोल को अंतर लेन वाँका नके अई, अन जद्याँ ईसू जीमबा ने बेट्या हा, तो वाँका माता पे उन्दा दिदो।</verse>
				<verse number="8">ओ देकन वींका चेला रिस्याँ बळन केबा लागा, “अणी यो अंतर कई लेबा ने बगाड़ दिदो?</verse>
				<verse number="9">ईंने तो हेला रिप्या में बेचन, वीं रिप्या गरब भिकारिया में बाट्या जा सकता हा।”</verse>
				<verse number="10">ओ जाणन ईसू वाँने क्यो, “लुगई ने काँ परेसान करो हो? वणी तो मारा वाते हव किदो हे।</verse>
				<verse number="11">गरीब-भिकारी तो थाँका नके हमेस्यान रेवे हे, पण मूँ थाँका हाते ने रेऊँ।</verse>
				<verse number="12">वणी मारा सरीर पे ज्यो अंतर उंदायो हे, वो मारा गाड़्या जाबा का वाते किदो हे।</verse>
				<verse number="13">मूँ थाँकाऊँ हाचेई केवूँ हूँ के, हारई जगाँ में जटे-कटे भी ओ हव-हमच्यार परच्यार किदो जाई, वटे ईंका ईं काम को भी बखाण वाँकी आद में किदो जाई।”</verse>
				<verse number="14">तद्याँ यहूदो इसकरियोती नाम को बारा चेला मूँ एक चेला मुक्य याजकाँ का नके जान क्यो,</verse>
				<verse number="15">“यद्याँ मूँ ईसू ने थाँका हाताँ में पकड़वा दूँ, तो मने कई देवो?” वणा वींने तीस चान्दी का सिक्का दे दिदा।</verse>
				<verse number="16">अन वो वीं टेमऊँ वींने पकड़ाबा को सई मोको होदबा लागो।</verse>
				<verse number="17">बना हाज्या की रोट्याँ को तेवार के पेला दन, चेला ईसू का नके आन पूँछबा लागा, “थूँ कई छावे के, माँ थाँरा वाँते फसे का खाणा की त्यारी कटे करा?”</verse>
				<verse number="18">ईसू क्यो, “नगर में फलाणा आदमी का नके जान वणीऊँ केवो के, गरू केवे हे के, ‘मारो टेम नके हे, मूँ आपणाँ चेला का हाते थाँरा अटे फसे को तेवार मनाऊँ।’”</verse>
				<verse number="19">ईं वाते चेला ईसू की आग्या मानी अन फसे का तेवार की त्यारी किदी।</verse>
				<verse number="20">जद्याँ हाँज वीं, तो ईसू बाराई चेला का हाते खाणो खाबा ने बेटो।</verse>
				<verse number="21">जद्याँ वीं खारिया हाँ, तो ईसू क्यो, “मूँ थाँने हाँची-हाँची केवूँ हूँ के, थाँकामूँ कुई एक मने धोकाऊँ पकड़ा देई।”</verse>
				<verse number="22">ईंपे चेला नरई दकी व्या अन वीं वाँकाऊँ हाराई पूँछबा लागा, “हो परबू, कई वो मूँ हूँ?”</verse>
				<verse number="23">तद्याँ ईसू वाँने क्यो, “जिंको हात मारी थाळी में हे, वो मने धोकाऊँ पकड़वाई।</verse>
				<verse number="24">मनक का पूत ने तो मरणोइस हे, जस्यान वाँका वाते लिक्यो हे, पण ज्यो मनक का पूत ने पकड़ाई, वींका वाँते घणी दुक बात वेई। वीं मनक के वाते आ बात घणी हव वेती, जदी वो जनमई ने लेतो।”</verse>
				<verse number="25">जद्याँ वींने पकड़ाबावाळे यहुदे इसकरियोती क्यो के, “हो गरू, कई वो मूँ हूँ?” ईसू वींने क्यो, “हाँ, अस्यानीस हे ज्यो थें क्यो हे।”</verse>
				<verse number="26">जदी वे जीमणो जिमरिया हा, ईसू रोटी हात में लिदी अन धन्नेवाद की परातना किदी। रोटी ने तोड़ी अन वाँ चेला ने देता तका क्यो, “लो, ओ मारो डील हे।”</verse>
				<verse number="27">पछे ईसू प्यालो लेन धन्नेवाद किदो, अन हाराई ने देन क्यो, “थें हाराई ईंमूँ पिवो।</verse>
				<verse number="28">काँके यो मारो वो लुई हे, ज्यो एक नुवो वादो हे, ज्यो नरई के पाप की मापी का वाते वेवाड़्यो जावे हे।</verse>
				<verse number="29">थाँने हाँची केऊँ के, अबे मूँ वीं दन तक अंगूरा को रस ने छाकूँ, जद्याँ तईं थाँका हाते आपणाँ बाप का राज में नुवो ने पीऊँ।”</verse>
				<verse number="30">पछे वीं भजन गान जेतुन का मंगरा पे पराग्या।</verse>
				<verse number="31">तद्याँ ईसू वाँकाऊँ क्यो, “थाँ हाराई आज की रात में मने छोड़न भाग जावो। काँके सास्तर में लिक्यो हे के, “‘मूँ गवाळ ने मारुँ अन रेवड़ का गारा वखर जई।’”</verse>
				<verse number="32">पण मूँ आपणाँ जी उठबा का केड़े थाँकाऊँ पेल्याँ गलील परो जाऊँ।</verse>
				<verse number="33">ईंपे पतरस ईसुऊँ क्यो, “यद्याँ हाराई थने छोड़न जावे, तो पलई जावे, पण मूँ कदी भी थने छोड़न ने जाऊँ।”</verse>
				<verse number="34">ईसू वींने क्यो, “मूँ थाँराऊँ हाँची केवूँ के, आज राते कूकड़ा के बोलबाऊँ पेल्या, थूँ तीन दाण मने ओळकबाऊँ नट जाई।”</verse>
				<verse number="35">पतरस वाँने क्यो, “यद्याँ मने थाँरा हाते मरणो भी पड़े, तो भी मूँ थाँका वाते कदी ने नटूँ।” अस्यानीस दूजाँ हाराई चेला भी क्यो।</verse>
				<verse number="36">तद्याँ ईसू एक असी जगाँ पे आया, जिंने गतसमने को बाग केता हा। वटे ईसू आपणाँ चेलाऊँ क्यो, “अटेईस बेटा रिज्यो, जद्याँ तईं मूँ वटे जान परातना करूँ।”</verse>
				<verse number="37">वो पतरस अन जबदी का दुई छोरा ने हाते लेग्यो। ईसू दकी अन कायल वेबा लागो।</verse>
				<verse number="38">तद्याँ ईसू वाँने क्यो, “मारो जीव घणो दकी हे, अटा तईं के, मारो जीव निकळबा में हे। थाँ अटेईस ठमो अन मारा हाते जागता रेवो।”</verse>
				<verse number="39">पछे थोड़ाक आगे जान वे धरती पे उन्दो पड़न परातना किदी, “ओ मारा बाप, यद्याँ वे सके तो या दुक को प्यालो माराऊँ छेटी वे जावे, तो भी मूँ छावूँ जस्यान ने, पण जस्यान थूँ छावे वस्यानीस वेवे।”</verse>
				<verse number="40">पछे वो वाँका चेला का नके आन वाँने हुता देक्या अन पतरसऊँ क्यो, “कई थाँ मारा हाते एक घड़ी भी ने जाग सक्या?</verse>
				<verse number="41">जागता रेवो, अन परातना करता रेवो के, ताँके थें जाँच-परक में ने पड़ो। आत्मा तो त्यार हे, पण सरीर दुबळो हे।”</verse>
				<verse number="42">पछे वाँकाणी दूजी दाण जान आ परातना किदी, “हो मारा बाप, यद्याँ ओ दुक को प्यालो मारे पिया बगर ने छेटी वे, तो थाँका मरजी पुरी वेवे।”</verse>
				<verse number="43">तद्याँ ईसू पाच्छा आन वाँने पाच्छा हूँता तका देक्या, काँके वीं गेरी नींद में हाँ।</verse>
				<verse number="44">ईसू वाँने छोड़न वो पाछो परोग्यो, अन वणीस तरिया पाच्छी तीजी दाण परातना किदी।</verse>
				<verse number="45">तद्याँ ईसू चेला का नके आन वाँकाऊँ क्यो, “कई थाँ आलतरे भी हुता हो? अन रईम्बो लेरिया हो? देको, टेम आग्यो हे, मनक को पूत पाप्याँ का हाताँ में पकड़वायो जावे हे।</verse>
				<verse number="46">ऊबा वे जावो, आवो चाला। देको, मने धोकाऊँ पकड़बावाळा आरिया हे।”</verse>
				<verse number="47">ईसू अस्यान बोलरियो हो के, वींका बारई चेला मूँ एक यहूदो वटे आयो। वींका लारे लाट्याँ-तलवाराँ लिदी तकी एक मोटी टोळी ही। जिंने मुक्य याजकाँ, मूसा का नेमा ने हिकाबावाळा अन दाना यहूदी नेता खन्दई ही</verse>
				<verse number="48">ईसू ने धोकाऊँ पकड़ाबावाळा भीड़ ने इसारो किदो हो, “जिंके मूँ बोको देऊँ वोईस ईसू हे, वींने पकड़ लिज्यो।”</verse>
				<verse number="49">अन पछे वो ईसू का नके आन क्यो, “हो गरुजी, नमस्कार।” अन वाँके बोको दिदो।</verse>
				<verse number="50">ईसू वींने क्यो, “हे दोस्त, जीं काम का वाँते थूँ आयो हे, वींने करले।” पछे भीड़ का मनकाँ नके आन ईसू ने बंदी बणा लिदा।</verse>
				<verse number="51">पछे ईसू का हण्डाळ्याँ मूँ एक जणे तरवार म्यानऊँ काड़ दिदी अन मायाजक का नोकर पे वार करन वींको कान्दड़ो काट दिदो।</verse>
				<verse number="52">तद्याँ ईसू वींने क्यो, “आपणी तरवार म्यान में राक, काँके ज्यो तरवार चलावे हे, वीं हाराई तरवार ऊइस मारिया जाई।</verse>
				<verse number="53">कई थाँ ने जाणे के, मूँ आपणाँ बापूऊँ अरज कर सकूँ हूँ, अन वो हरग दुताँ की बाराई फोजाऊँ हेला मारा नके अबाणू भेळा कर देई?</verse>
				<verse number="54">यद्याँ मूँ अस्यान करूँ, तो पवितर सास्तर में लिकी तकी बाताँ कस्यान पुरी वेई? वींमें जीं बाताँ लिकी तकी हे वीं पुरी वेणी जरूरी हे।”</verse>
				<verse number="55">वीं टेम ईसू भीड़ऊँ क्यो, “कई थाँ तरवाराँ अन लठ लेन मने चोर का जस्यान पकड़बा का वाते आया हो? मूँ हरेक दन रोज मन्दर में बेटन उपदेस दिया करतो हो, तद्याँ तो थाँ मने ने पकड़्यो।</verse>
				<verse number="56">पण ओ हारोई ईं वाते व्यो के, परमेसर का आड़ीऊँ बोलबावाळा की बाताँ पुरी वेवे।” तद्याँ हाराई चेला वींने छोड़न भागग्या।</verse>
				<verse number="57">तद्याँ ईसू ने पकड़बावाळा वींने केफा नाम का मायाजक का नके लेग्या, जटे नेमा ने हिकाबावाळा अन दाना नेता भेळा व्या तका हा।</verse>
				<verse number="58">पतरस छेटी-छेटी वाँका पाछे-पाछे मायाजक की गवाड़ी तईं ग्यो, अन मयने जान नतीजो देकबा का वाते पेरादारा का हाते बेटग्यो।</verse>
				<verse number="59">मुक्य याजकाँ अन हारी पंचात ईसू ने मार नाकबा का वाते वाँका विरोद में जूटी गवई का ताक में हाँ।</verse>
				<verse number="60">पण नरई जूटी गवई देबावाळा आबा पे भी वाँको काम ने बण्यो। आकरी में दो जणा आगे आया,</verse>
				<verse number="61">अन क्यो, “अणी मनक क्यो हे के, ‘मूँ परमेसर का मन्दर ने हण्ड़ा सकूँ हूँ अन वींने तीन दन में पाछो बणा सकूँ हूँ।’”</verse>
				<verse number="62">तद्याँ मायाजक ऊबा वेन ईसुऊँ क्यो, “ईं मनक, थाँरा विरोद में ईं गवायाँ देरिया हे, थूँ खुद ने बंचाबा का वाते काँ ने बोलरियो हे?”</verse>
				<verse number="63">पण ईसू छानारिया। तद्याँ मायाजक वाँकाऊँ क्यो, “मूँ थने जीवता परमेसर की होगन दूँ हूँ के, यद्याँ थूँ परमेसर को पूत मसी हे, तो माँकाऊँ के दे।”</verse>
				<verse number="64">ईसू वाँने क्यो, “थें खुदई के दिदो, पण मूँ थाँकाऊँ ओ भी केवूँ हूँ के, अबेऊँ थाँ मनक का पूत ने मेमावान परमेसर का जीमणा पाल्ड़े बेट्यो तको अन आकास का वादळा पे आतो तको देको।”</verse>
				<verse number="65">ईं बात पे मायाजक आपणाँ गाबा फाड़न अन क्यो, “अणी परमेसर की नन्दयाँ किदी हे, अबे मारे गुवा की कई जरूत ने हे? देको, थाँ अबाणू ईंने परमेसर की नन्दया हामळी हे।</verse>
				<verse number="66">अन अबे थाँ कई होचो हो?” वणा जवाब दिदो, “यो गुनेगार हे, ईंने मार देणो छावे।”</verse>
				<verse number="67">तद्याँ वाँकाणी ईसू का मुण्डा पे थूँक्यो अन वींके लाता-गुमा मेल्या, अन कणी दूजाँ वींके रेपटाँ मेलन क्यो,</verse>
				<verse number="68">“हो मसी, माँने आगेवाणी करन बता के, थाँरे कणी ठोकी?”</verse>
				<verse number="69">पतरस बारणे आगंणा में बेट्यो तको हो, तो एक नोकराणी वींका नके आन क्यो, “थूँ भी वीं गलील का ईसू का हाते हो।”</verse>
				<verse number="70">पण परतस हाराई का हामे ओ केता तको नकार दिदो के, “मने पतो कोयने, थूँ कई केरी हे।”</verse>
				<verse number="71">जद्याँ वो बारणे डेळी में ग्यो, तो दूजी नोकराणी वींने देकन ज्यो वटे हाँ वाँकाऊँ क्यो, “ओ भी तो नासरत का ईसू का हाते हो।”</verse>
				<verse number="72">एक दाण पाछो पतरस होगन खान नकारन क्यो, “मूँ वी मनक ने ने ओळकूँ हूँ।”</verse>
				<verse number="73">थोड़ीक देर केड़े ज्यो वटे ऊबा हाँ, वणा पतरस का नके आन वणीऊँ क्यो, “हाँचई थूँ वाँका मूँ एक हे, काँके थारी बोली थारो भेद बतारी हे।”</verse>
				<verse number="74">तद्याँ वो मातो कुटबा लागो अन होगन खाबा लागो के, “मूँ वीं मनक ने ने ओळकूँ हूँ।” अन तरत कूकड़ो बोल्यो।</verse>
				<verse number="75">तद्याँ पतरस ने ईसू की बतई तकी बात आद अई के, “कूकड़ा का बोलबाऊँ पेल्याँ थूँ तीन दाण मने ओळकबाऊँ नकार देई।” अन वो बारणे जान छाती कूट-कूटन रोबा लागो।</verse>
			</chapter>
			<chapter number="27">
				<verse number="1">जद्याँ भाग-फाट्याँ वीं हारई मुक्य याजकाँ अन दाना नेता ईसू ने मार नाकबा को बच्यार किदो।</verse>
				<verse number="2">वाँकाणी ईसू ने बाँदन लेजान पिलातुस हाकम ने हूँप दिदो।</verse>
				<verse number="3">जद्याँ ईसू ने धोकाऊँ पकड़ाबावाळे यहूदो देक्यो के, ईसू दोसी ठेरायो ग्यो हे, तो वो पछतायो अन तीस चाँदी का सिक्का मुक्य याजकाँ अन दाना नेता का नके पाच्छा लेग्यो।</verse>
				<verse number="4">अन क्यो, “में बना दोस का मनक ने मारबा का वाते पकड़ान पाप किदो!” तो वाँकाणी क्यो, “माँने कई? थूँ थारी जाणे।”</verse>
				<verse number="5">तद्याँ वो वणा सिक्का ने मन्दर में फेंकन परोग्यो अन जान आपणाँ खुद के फाँसी लगा दिदी।</verse>
				<verse number="6">मुक्य याजकाँ वणा सिक्का ने लेन क्यो, “आने मन्दर का भण्डार में राकणा हव कोयने, काँके ओ लुई को मोल हे।”</verse>
				<verse number="7">ईं वाते होच-बच्यार करन वणा सिक्काऊँ बारवास्याँ ने गाड़बा का वाते कुमार को खेत मोल ले लिदो।</verse>
				<verse number="8">ईं वाते वो खेत आज तईं “लुई को खेत” बाजे हे।</verse>
				<verse number="9">तद्याँ ज्यो बचन परमेसर का आड़ीऊँ बोलबावाळे यरमिया क्यो हो वो पूरो व्यो के, “वणा चाँदी का तीस सिक्का लिदा, अन ईं वीं सिक्का हा, ज्याँने इजराएल का मनकाँ वींका मोल में देबा का वाते ते किदा हा।</verse>
				<verse number="10">अन जस्यान परबू मने हुकम दिदो हो वस्यानीस वणा वाँ सिक्काऊँ कुमार को खेत मोल ले दिदो।”</verse>
				<verse number="11">जद्याँ ईसू हाकम पिलातुस का हामे ऊबा हा, तो हाकम वाँकाऊँ पूँछ्यो, “कई थूँ यहूदियाँ को राजो हे।” ईसू वींने क्यो, “थूँ खुदई केरियो हे।”</verse>
				<verse number="12">जद्याँ मुक्य याजकाँ अन दाना नेता वींपे दोस लगारिया हाँ, तो वणी कई जवाब ने दिदो।</verse>
				<verse number="13">ईंपे पिलातुस वींने क्यो, “कई थूँ ने हुणरियो हे के, ईं थाँरा विरोद में कतरी गवायाँ देरिया हे?”</verse>
				<verse number="14">पण ईसू वाँने एक भी जवाब ने दिदो, अणीऊँ हाकम पिलातुस ने भी घणो अचम्बो व्यो।</verse>
				<verse number="15">हाकम पिलातुस को फसे का तेवार पे आ रीत ही के, लोगाँ का वाते कणी एक ने जेळ मेंऊँ जिंने वीं छाता हाँ, छोड़ देतो हो।</verse>
				<verse number="16">वीं टेम वाँका वटे बरब्बा नाम को एक नामी मनक जेळ में हो।</verse>
				<verse number="17">ईं वाते जद्याँ मनक भेळा व्या, तो पिलातुस वाँने क्यो, “थाँ कई छावो हो के, मूँ थाँका वाते किंने छोड़ दूँ? बरब्बा ने कन ईसू ने ज्यो मसी बाजे हे?”</verse>
				<verse number="18">काँके वो जाणतो हो के, वणा ईसू ने रिस्याँ बळता तका पकड़वायो हे।</verse>
				<verse number="19">जद्याँ पिलातुस न्याव की गाद्दी पे बिराज्यो तको हो तो वाँकी लुगई वींने ओ हमच्यार खन्दायो, “थूँ वणी धरमी मनक का मामला में भेळा मती रेज्ये। काँके में आज हपना में वाँका वाते घणो दुक जेल्यो हे।”</verse>
				<verse number="20">मुक्य याजकाँ अन दाना नेता लोगाँ ने हिकावा लागा के, वीं बरब्बा ने मांगे, अन ईसू ने मरबा देवे।</verse>
				<verse number="21">हाकम पिलातुस वाँने पूँछ्यो, “अणा दुयाँ मूँ किंने छावो हो के, मूँ थाँका वाते छोड़ दूँ?” वाँकाणी क्यो, “बरब्बा ने।”</verse>
				<verse number="22">हाकम पिलातुस वाँने पूँछ्यो, “पछे ईसू ने, ज्यो मसी बाजे हे, वींको कई करूँ?” हारई वाँने क्यो, “वींने हूळी पे चढा दो!”</verse>
				<verse number="23">हाकम पिलातुस वाँने पूँछ्यो, “काँ, वणी कई खोटो काम किदो हे?” पण वीं ओरी हाका-हूक करन केबा लागा, “वींने हूळी पे चढा दो।”</verse>
				<verse number="24">जद्याँ पिलातुस देक्यो के, कई फायदो कोयने पण ईंका हामे ओरी हाका-हूक वेबा लागी हे, तो वाँकाणी हतेळी में पाणी लेन भीड़ का हामे आपणाँ हात धोया अन क्यो, “मूँ ईं धरमी का लुईऊँ बना दोस को हूँ, थाँईस जाणो।”</verse>
				<verse number="25">हाराई लोगाँ जवाब दिदो, “ईंकी मोत की जवाबदारी माँ अन माकाँ छोरा-छोरी लेवा हा।”</verse>
				<verse number="26">ईंपे वणी बरब्बा ने वाँका वाँते छोड़ दिदो, अन ईसू के कोड़ा लगान हूळी पे चढाबा वाते हूँप दिदो।</verse>
				<verse number="27">तद्याँ हाकम पिलातुस का सपायाँ ईसू ने किला में लेग्या अन हारी फोज वाँका च्यारूँमेर भेळी वेगी।</verse>
				<verse number="28">अन वणा वाँका गाबा उतारन वाँने दरबारी गाबा पेराया।</verse>
				<verse number="29">अन काँटा को मुकट गूँतन वाँका माता पे मेल्यो, अन वाँका जीमणा हात में कामड़ी दिदी अन वाँका आगे जुकन वाँकी रोळ करन क्यो, “हो यहूदियाँ का राजा, अमर रेवे!”</verse>
				<verse number="30">अन वींपे थूँक्यो अन वाईस कामड़ी लेन वाँका माता पे ठोकबा लागा।</verse>
				<verse number="31">जदी वणा वाँकी रोळ करन, वींका दरबारी गाबा उतार्या अन वींने आपणाँ खुद का गाबा पेरा दिदा अन पछे वींने हूळी पे चड़ाबा ने लेग्या।</verse>
				<verse number="32">बारणे जाती दाण वाँने समोन नाम को एक कुरेन को रेबावाळो मनक मल्यो वणा वींने पकड़्यो अन जोर नाक्यो के, वो ईसू की हूळी उठान चाले।</verse>
				<verse number="33">पछे वीं वणी जगाँ पे ज्यो गलगता ईंको मतलब कपाळ की जगाँ बाजे हे वटे पोछ्याँ,</verse>
				<verse number="34">तो वणा ईसू ने कड़वी चीज मलायो तको अंगूरा को रस पिबा का वाते दिदो, पण वणा वींने छाकन पिणो ने छायो।</verse>
				<verse number="35">तद्याँ वाँकाणी ईसू ने हूळी पे चढा दिदो अन गोट्याँ नाकन वाँका गाबा बाँट लिदा।</verse>
				<verse number="36">अन वटे बेटन पेरो देबा लागा।</verse>
				<verse number="37">अन वींकी सजा की पाटी वाँका माता पे लगाई के, “ओ यहूदियाँ को राजा ईसू हे।”</verse>
				<verse number="38">तद्याँ ईसू का हाते दो चोर ने एक जींमणी पाल्ड़े अन दूजाने डावी पाल्डे, हूळ्याँ पे चड़ाया ग्या।</verse>
				<verse number="39">गेला में आबाजाबा वाळा मातो ठणकान वींकी नन्दयाँ कररिया हा,</verse>
				<verse number="40">अन ओ केरिया हाँ, “ए मन्दर ने हल्ड़ाबावाळा अन तीन दन में बणाबावाळा, आपणाँ खुद ने तो बंचा ले। यद्याँ थूँ परमेसर को पूत हे, तो हूळीऊँ रेटे उतर आ।”</verse>
				<verse number="41">ईं तरियाँ मुक्य याजकाँ अन मूसा का नेमा ने हिकाबावाळा अन दाना नेता हाते मलन रोळ कर-करन केरिया हाँ,</verse>
				<verse number="42">“अणी ओरा ने बंचाया, पण आपणाँ खुद ने ने बंचा सके। ओ तो इजराएल को राजा हे, अबे हूळीऊँ उतरन आवे तो आपाँ ईंपे विस्वास करा।</verse>
				<verse number="43">अणी परमेसर पे विस्वास राक्यो हे यद्याँ वो ईंने छावे हे, तो अबे ईंने बंचा ले, काँके अणी क्यो हो के, ‘मूँ परमेसर को पूत हूँ।’ ”</verse>
				<verse number="44">ईं तरिया चोर भी ज्यो वाँका हाते हूळ्याँ पे चड़ाया ग्या हा, वींकी नन्दया कररिया हाँ।</verse>
				<verse number="45">दपराँ का बारा बज्याँ लेन तीन बज्या तईं वीं हारा देस में अन्दारो रियो।</verse>
				<verse number="46">तीन बजाँ का भड़े ईसू कल्ड़ी हाका-भार मेलन क्यो, “एली, एली, लमा सबकतानी?” ईंको मतलब “हो मारा परमेसर, हो मारा परमेसर थाँ मने काँ छोड़ दिदो?”</verse>
				<verse number="47">ज्यो वटे ऊबा हाँ, वणा मूँ कतराई ओ हुणन क्यो, “वो तो एलिया ने बलारियो हे।”</verse>
				<verse number="48">वाँका मूँ एक तरत दोड्यो, अन रुँई का फूबाँ ने खाटा अंगूरा का रस में डबोक्यो अन लाकड़ी पे मेलन वींने सुकायो।</verse>
				<verse number="49">पण दूजाँ क्यो, “ठम जावो, देको एलियो, ईंने बंचाबा आवे हे के ने।”</verse>
				<verse number="50">तद्याँ ईसू ज्योरऊँ हाका-भार करन जीव छोड़ दिदो।</verse>
				<verse number="51">अन वणीस दाण मन्दर को परदो ऊपरेऊँ हेठे तई फाटन दो टुका वेग्यो। धरती हालगी अन छाँटा फाटगी।</verse>
				<verse number="52">अन अटा तईं कबराँ खुलगी, अन मरिया तका पुवितर मनकाँ मेंऊँ नरई पाच्छा जीवता वेग्या।</verse>
				<verse number="53">अन वीं करबा मेंऊँ निकळ आया अन ईसू के पाच्छा जी उठबा केड़े पुवितर नगर यरूसलेम में ग्या अन नरई ने दिकई दिदा।</verse>
				<verse number="54">तद्याँ रोमी सेनापती अन ज्यो वींका हाते ईसू के पेरो देरियो हाँ, भूकम अन ज्यो कई व्यो हो, वींने देकन घणा दरपग्या अन क्यो, “हाँचई में ओ परमेसर को पूत हो।”</verse>
				<verse number="55">वटे नरई लगाया ज्यो गलीलऊँ ईसू की सेवा-चाकरी करती तकी वाँका हाते आई ही, वीं छेटीऊँ ओ देकरी ही।</verse>
				<verse number="56">वाँका मूँ मरियम मगदलीनी, अन याकूब अन योसेस की माँ मरियम, अन जबदी का छोरा की बई ही।</verse>
				<verse number="57">जद्याँ हाँज वीं तो युसुप नाम को अरमतिया को एक रिप्यावाळो मनक आयो, वो खुदई ईसू को चेलो हो।</verse>
				<verse number="58">वो पिलातुस का नके जान ईसू की लास मांगी। ईंपे पिलातुस हुकम दे दिदो के, लास ईंने दे दिदी जावे।</verse>
				<verse number="59">युसुप लास लिदी अन वींने नवा धोळो पसेवड़ा में लपेटी,</verse>
				<verse number="60">अन वाँने आपणी नुई कबर में मेली, ज्यो वणी मोटी छाट में बणई ही, अन कबर का बाणा पे मोटो भाटो आड़ो देन परोग्यो।</verse>
				<verse number="61">मरियम मगदलीनी अन दूजी मरियम वटे कबर का हामे बेटी ही।</verse>
				<verse number="62">दूजे दन ज्यो त्यारी का दन का केड़े को दन हो, मुक्य याजकाँ अन फरीसी पिलातुस का नके भेळा वेन क्यो,</verse>
				<verse number="63">“हो माराज, माने आद हे के, वो भटकबावाळो जद्याँ वो जीवतो हो, तो वणी क्यो हो के, ‘मूँ तीन दनाँ केड़े पाछो जी उटूँ।’</verse>
				<verse number="64">ईं वाते हुकम दो के, तीजा दन तईं कबर की रुकाळी करी जावे, अस्या ने वे के, वाँका चेला आन वींने चुरा लेजा अन लोगाऊँ केबा लागा के, ‘वो मरिया तका मेंऊँ जी उट्यो हे। तद्याँ यो धोको पेल्या का धोकाऊँ भी मोटो वेई।’ ”</verse>
				<verse number="65">पिलातुस वाँने क्यो, “थाँ पेरा का वाते रुकाळ्या ले जावो अन आपणी हमज का जस्यान रुकाळी करो।”</verse>
				<verse number="66">तद्याँ वीं रुकाळ्या ने हाते लेन पराग्या। अन भाटा पे मोर लगान कबर की रुकाळी किदी।</verse>
			</chapter>
			<chapter number="28">
				<verse number="1">आराम का दन का केड़े हपता का पेले दन दितवार ने भाग-फाट्याँ मरियम मगदलीनी अन दूजी मरियम कबर में ईसू ने देकबा अई।</verse>
				<verse number="2">अन वटे अणाचेत को एक मोटो भूकम आयो, काँके परबू को एक दूत हरगऊँ आयो अन वाँका नके आन वो भाटो तोकन हरका दिदो, अन वींपे बेटग्यो।</verse>
				<verse number="3">वींको रूप विजळी का जस्यान अन वाँका गाबा बरप का जस्यान धोळा-फट हा।</verse>
				<verse number="4">वींकी दरपऊँ कबर की रुकाळी करबावाळा धुंज ग्या अन मरिया तका के जस्यान वेग्या।</verse>
				<verse number="5">तद्याँ हरग-दुत वणा लुगायाऊँ क्यो, “दरपो मती, मूँ जाणूँ हूँ के, थाँ ईसू ने ज्यो हूळी पे चड़ायो ग्यो हो वींने होदो हो।</verse>
				<verse number="6">वो अटे ने हे, पण आपणाँ बचना का बताया जस्यान जी उट्यो हे। आवो, वा जगाँ देको, जटे वींकी लास राकी ही।</verse>
				<verse number="7">अन जट जावो अन वींका चेलाऊँ केवो के, ‘वो मरिया तका मूँ जी उट्यो हे, अन वो थाँका हाराऊँ पेल्या गलील जावे हे, वटे वींको दरसण पावो!’ देको, में थाँकाऊँ के दिदो, वींने आद राकज्यो।”</verse>
				<verse number="8">वीं लुगायाँ दरपी तकी अन आणन्द का हाते कबर पूँ वाँका चेला ने हव हमच्यार देबा का वाते दोड़न गी।</verse>
				<verse number="9">तद्याँ अणाचेत का ईसू वाँने मल्यो अन क्यो, “थाँने सान्ती मले।” वीं वाँका नके आन वाँके पगा पड़गी अन वाँकी मेमा करबा लागी।</verse>
				<verse number="10">तद्याँ ईसू वाँने क्यो, “दरपो मती। मारा भायाँ ने जान केवो के, वीं गलील परा जावे, वीं मने वटेईस देकी।”</verse>
				<verse number="11">वीं लुगायाँ गेला मेंईस ही अन रुकाळी करबावाळा मूँ कुई नगर में आन हारई हाल मुक्य याजकाँ ने बता दिदो।</verse>
				<verse number="12">तद्याँ वाँकाणी दाना यहूदी नेता का हाते भेळा वेन सला किदी अन रुकाळी करबावाळा ने नरई रिप्या देन,</verse>
				<verse number="13">वाँने क्यो के, “वीं मनकाँ ने केवे के, ‘जद्याँ माँ राते हूरिया हाँ, तो वाँका चेला आन वींकी लास चुरा लेग्या।’</verse>
				<verse number="14">अन यद्याँ आ बात हाकम का नके जई, तो माँ वींने हमजा देवा अन थाँने अणी आपतऊँ बंचा लेवा।”</verse>
				<verse number="15">ईं वाते, वणा रिप्या लेन जस्यान हिकायो हो, वस्यानीस किदो। आ बात आज तईं यहूदी लोगाँ अणीस तरियाँ फेली तकी हे।</verse>
				<verse number="16">पछे ईसू का ग्याराई चेला गलील में वीं मंगरा पे ग्या, जटे जाबा का वाते ईसू वाँने क्यो हो।</verse>
				<verse number="17">वणा वटे ईसू को दरसण पान हाता-जोड़ी किदी, पण कणी कणी ने तो मन में भेंम व्यो।</verse>
				<verse number="18">पछे ईसू वाँका नके आन क्यो, “हरग अन धरती को हारोई अदिकार मने दिदो तको हे।</verse>
				<verse number="19">ईं वाते जावो, अन हाराई देसा का लोगाँ ने चेला बणावो अन बापू, पूत अन पुवितर आत्मा का नामऊँ बतिस्मो दो,</verse>
				<verse number="20">अन वाँने हारी बाताँ ज्यो में थाँने क्यो हो, वाँने मानबा हिकावो। आद राकज्यो, मूँ दनियाँ का अंत तईं हमेस्यान थाँका हाते हूँ।”</verse>
			</chapter>
		</book>
		<book number="41">
			<chapter number="1">
				<verse number="1">परमेसर का पूत ईसू मसी का हव हमच्यार की सरुआत।</verse>
				<verse number="2">जस्यान यसाया परमेसर का आड़ीऊँ बोलबावाळे लिक्यो हे, “देक, मूँ आपणाँ दूत ने थाँरा आगे खन्दाऊँ, ज्यो थाँरा वाते गेलो हुदो करी</verse>
				<verse number="3">हुन्ना काँकड़ में एक बोलबावाळा को हाको हुणारियो हो के, ‘परबू को गेलो त्यार करो अन वींकी हड़क हुदी करो।’”</verse>
				<verse number="4">यहुन्नो हुन्ना काँकड़ में बतिस्मा देतो अन परच्यार करतो तको आयो अन केतो हो के, “पापऊँ मन फेरो अन बतिस्मो लो, जणीऊँ परमेसर थाँका पाप माप करी।”</verse>
				<verse number="5">यहूदी परदेस अन यरूसलेम नगर का नरई मनक वींका नके उपदेस हुणबा वाते ग्या। जणा आपणाँ पाप ने मान लिदा वाँने वणी यरदन नंदी में बतिस्मो दिदो।</verse>
				<verse number="6">यहुन्नो ऊँट की ऊन का बण्या तका गाबा पेरतो अन कमर पे खालड़ा को पट्टो बंद्‍यो राकतो हो। वो हुन्ना काँकड़ में टिड़्या अन माक्याँ को हेंत खातो हो।</verse>
				<verse number="7">वो ईं बात को परच्यार करतो के, “मारा पाच्छे एक मनक आबावाळो हे, ज्यो माराऊँ भी घणो मोटो हे, मूँ वींके अतरो भी लायक कोयने के, वींकी पगरख्याँ खोल सकूँ।</verse>
				<verse number="8">मूँ थाँने पाणीऊँ बतिस्मो देऊँ, पण वो थाँने पुवितर आत्माऊँ बतिस्मो देई।”</verse>
				<verse number="9">वाँ दनाँ अस्यी बात वी के, ईसू गलील का नासरत नगरऊँ आया अन वणा यरदन नंदी में यहुन्ना नकूँ बतिस्मो लिदो।</verse>
				<verse number="10">जस्यानी पाणीऊँ बारणे निकळ्या तो, वणा देक्यो के, आकास खुल्यो तको अन परमेसर की आत्मा परेवड़ा की जस्यान वींका ऊपरे उतरी।</verse>
				<verse number="11">पछे हरगऊँ अवाज अई के, “थूँ मारो लाड़लो बेटो हे अन मूँ थाँराऊँ घणो राजी हूँ।”</verse>
				<verse number="12">पछे तरत परमेसर की आत्मा वींने हुन्ना काँकड़ में खन्दा दिदो,</verse>
				<verse number="13">जटे चाळी दनाँ तईं सेतान वींकी जाँच-परक करतो रियो। वटे वीं हुन्ना काँकड़ का जनावराँ का लारे हा अन हरग-दुत वाँकी सेवा-चाकरी करता हाँ।</verse>
				<verse number="14">ईंका केड़े जद्याँ यहुन्ना ने जेळ में बन्द कर नाक्यो हो, पछे ईसू गलील में आया अन वटे परमेसर का हव हमच्यार को परच्यार करबा लागा।</verse>
				<verse number="15">वाँकाणी क्यो, “अबे टेम पुरी वेगी हे अन परमेसर को राज आरियो हे। थाँ मन बदलो अन परमेसर का हव हमच्यार पे विस्वास करो।”</verse>
				<verse number="16">जद्याँ ईसू गलील समन्द के नके वेन निकळरया हाँ, तो वाँ समोन अन वींका भई अन्दरियास ने समन्द में आपणी जाळ बिछाता तका देक्या, काँके वीं दुई माछळ्याँ पकड़बावाळा हाँ।</verse>
				<verse number="17">तो ईसू वाँने क्यो, “थाँ मारी लारे आवो, मूँ थाँने परमेसर का राज में मनकाँ ने लाबावाळा बणा देऊँ।”</verse>
				<verse number="18">तो पगईं वीं दुई जणा आपणो जाळ छोड़न ईसू का लारे वेग्या।</verse>
				<verse number="19">पछे थोड़ाक आगे जान ईसू जब्दी का छोरा याकूब ने अन वींका भई यहुन्ना ने देक्यो। वीं दुई आपणी नाव में जाळाँ ने हळजारिया हा।</verse>
				<verse number="20">वाँकाणी तरत वाँने बलाया, तो वीं दुई आपणाँ बापू जब्दी ने दानक्याँ का हाते नाव मेंईस छोड़न ईसू का लारे ग्या।</verse>
				<verse number="21">अन वे हंगळा कफरनूम नगर में ग्या, पछे आगले आराम के दन ईसू यहूदियाँ का परातना घर में पूग्या अन मनकाँ ने उपदेस हुणाबा लागा।</verse>
				<verse number="22">वाँका उपदेस हुणन लोग-बाग घणा अचम्बा में पड़ग्या, काँके वे मूसा का नेमा ने हिकाबावाळा के जस्यान ने, पण हकऊँ उपदेस देरिया हा।</verse>
				<verse number="23">वटे वीं यहूदी परातना घर में एक अस्यो मनक भी हो, जिंमें हुगली आत्मा धस्यी तकी ही, तो वो जोरऊँ हाको करन बोल्यो,</verse>
				<verse number="24">“हे, नासरत का ईसू, थूँ मारा नकूँ कई छावे हे? कई, थूँ मारो नास करबा ने आयो हे? मूँ थाँने जाणूँ हूँ के, थूँ कूण हे, थूँ परमेसर को पुवितर मनक हे।”</verse>
				<verse number="25">तो ईसू वींने तापड़न क्यो, “छानी रे अन ईंमूँ बारणे निकळजा।”</verse>
				<verse number="26">पछे वा हुगली आत्मा वीं मनक ने धधूणियो अन जोरको हाको करन बारणे निकळगी।</verse>
				<verse number="27">हारई जणा अचम्बा में पड़ग्या अन अतरो अचम्बो व्यो के, वे एक-दूँजा ने पूँछबा लागा, “यो कई हे? यो कई नुवो उपदेस हे? वो हकऊँ हुगली आत्माने आदेस देवे अन वा आत्मा वींने भी माने हे।”</verse>
				<verse number="28">अणीऊँ गलील अन वींका अड़े-भड़े की हारी जगाँ में ईसू को नाम तरत फेलग्यो।</verse>
				<verse number="29">पछे ईसू अन वींका चेला परातना घरऊँ निकळन याकूब अन यहुन्ना की लारे समोन अन अन्दरियास का घरे ग्या।</verse>
				<verse number="30">समोन का हवजी हुता हा, काँके वाँने ताव आरियो हो। जद्याँ ईसू वटे आया तो वाँने वाँका बारा में बतायो ग्यो।</verse>
				<verse number="31">तो ईसू वाँका नके ग्या अन हात पकड़न वाँने बेटा किदा, तो तरत वाँको ताव उतरग्यो अन वीं वाँकी सेवा-चाकरी करबा लागग्या।</verse>
				<verse number="32">दन आत्याँ केड़े, जद्याँ हाँज पड़गी, तो वटा का मनक हंगळा हुगली आत्माऊँ दकी अन मान्दा मनकाँ ने वाँका नके लाया।</verse>
				<verse number="33">गाम का हारई मनक वाँका घर का बारणे आग्या।</verse>
				<verse number="34">वाँ घणा जणा ने नरी मांदकीऊँ हव किदा अन नरई जणा मूँ हुगली आत्माने बारणे काड़ी। ईसू वणा आत्माने कई ने केबा दिदो, काँके वी वाँने जाणती ही।</verse>
				<verse number="35">भाग-फाट्याँईं जद्याँ अन्दारो हो, ईसू उटन घरऊँ हून्नी जगाँ में पराग्या, जटे वणा परातना किदी।</verse>
				<verse number="36">पण, समोन अन वींकी लारे का हण्डाळ्याँ वींने हमाळबा निकळ्या</verse>
				<verse number="37">अन वाँने हमाळन क्यो, “हंगळा जणा थाँने होदरिया हे।”</verse>
				<verse number="38">पण ईसू वाँने क्यो, “आपाँने अड़े-भड़े का गामाँ में भी जाणो छावे, अन वटे भी परच्यार करा, काँके मूँ ईं काम वातेईस आयो हूँ।”</verse>
				<verse number="39">तो अस्यान वीं गलील में हंगळी जगाँ यहूदियाँ का परातना घर में परच्यार करता अन मनकाँऊँ हुगली आत्माने बारणे निकाळता रिया।</verse>
				<verse number="40">पछे एक कोड़यो मनक ईसू नके आयो। वो वाँका हामे धोग देन क्यो, “यद्याँ थाँ छावो, तो मने हव कर सको हो।”</verse>
				<verse number="41">वींने वींका पे दया अई अन वणा आपणो हात लाम्बो करन वींके अड़ायो अन क्यो, “मूँ छावूँ के, थूँ हव वेजा।”</verse>
				<verse number="42">अन वींने तरत कोड़ऊँ छुटकारो मलग्यो अन वो पुरी तरियाऊँ हव वेग्यो।</verse>
				<verse number="43">ईसू वींने कड़ी चेतावणी देन क्यो, “देक, ईं बात का बारा में थूँ दूजाँ ने मत बताज्ये, पण याजक का नके जा अन आपणे आप ने बतान मूसा का नेमाऊँ आपणे सुद वेबा की भेंट चड़ाज्ये, ताँके दूजाँ ने भी थारे हव वेबा को सबूत मल सके।” पछे ईसू वींने पगईं खन्दा दिदो।</verse>
				<verse number="44"></verse>
				<verse number="45">पण, वो बारणे जान चोड़े-धाड़े ईं बात को परच्यार करबा लागो। ईं वाते ईसू कदी नगर में चोड़े-धाड़े ने जा सक्या, पण वीं हून्नी जगाँ में रेरिया हा अन मनक हर कटूँई वाँका नके आता रिया।</verse>
			</chapter>
			<chapter number="2">
				<verse number="1">थोड़ाक दनाँ पछे ईसू कफरनूम आया, अन वटे आ बात फेलगी के, वो घरे हे।</verse>
				<verse number="2">पछे वटे अतरा मनक भेळा वेग्या हाँ के, घर का बारणा में पग मेलबा जतरीक जगाँ भी ने री। ईसू वाँने परमेसर को हमच्यार हुणारिया हा।</verse>
				<verse number="3">वीं टेम में लकवा का माँदा मनक ने च्यार जणा तोकन वटे लाया।</verse>
				<verse number="4">पण, वीं भीड़-भाड़ऊँ वींने ईसू के नके ने लेजा सक्या हा, ईं वाते जटे ईसू बेटा हा, वाँका ऊपरेऊँ केलू-डाडा ने छेटी लेन, हेरा मूँ माचा पे हूँवाणन मनक ने रेटे उतार दिदो।</verse>
				<verse number="5">वाँका ईं विस्वास ने देकन ईसू लकवा का माँदा मनक ने क्यो, “ए मारा बेटा, थाँरा पाप माप वेग्या।”</verse>
				<verse number="6">वीं दाण कुई मूसा का नेमा ने हिकाबावाळा वटे बेटा हा। वे आपणाँ मनईंमन में होचबा लागा के,</verse>
				<verse number="7">“यो मनक अस्यी बाताँ काँ करे हे? यो तो परमेसर की नन्दयाँ करे हे। परमेसर ने छोड़न दूजो कूण पापाँ ने माप कर सके?”</verse>
				<verse number="8">फटाकऊँ ईसू मन में आ बात जाणग्या के, वे लोग मन में कई होचरया हे अन वाँकाणी वाँने क्यो, “थाँ मन में अस्यी बाताँ काँ होचरया हो?</verse>
				<verse number="9">कई लकवा का माँदा ने यो केणो हेल हे के, ‘थाँरा पाप माप वेग्या’, कन अस्यान केणो के ‘उठ, आपणो माचो तोक अन परोजा?’</verse>
				<verse number="10">पण, मूँ थाँने ईं बात को सबूत दे सकूँ हूँ के, ईं धरती पे मनक का पूत(ईसू) ने यो पूरो हक हे के, वो पापाँ ने माप कर सके।” पछे ईसू वीं लकवा का माँदा मनक ने क्यो,</verse>
				<verse number="11">“मूँ थने केवूँ, ऊबो वे, आपणो माचो तोक अन घरे परोजा।”</verse>
				<verse number="12">वो ऊबो व्यो, तरत आपणो माचो तोक्यो अन वाँ हंगळा ने देकतईं देकता वो बारणे परोग्यो। यो देकन हारई जणा अचम्बा में पड़ग्या, अन वाँकाणी परमेसर की बड़ई किदी अन बोल्या, “माँकाणी अस्यी बात कटेई ने देकी।”</verse>
				<verse number="13">पछे ईसू पाच्छा गलील समन्द का कनारे ग्या, अन हंगळी भीड़ वाँका नके आरी ही अन ईसू वाँने उपदेस देबा लागा।</verse>
				<verse number="14">चालता तका वणा हलफई का छोरा लेवी ने चुंगी नाका पे बेटो तको देक्यो अन वींने क्यो, “मारा पाच्छे आ” अन लेवी ऊबो व्यो अन वाँका पाच्छे चाल पड़्यो।</verse>
				<verse number="15">ईंका केड़े जद्याँ ईसू अन वाँका चेला लेवी का घरे खाणो खारिया हा, तद्याँ नरई चुंगी लेबावाळा अन पापी भी वाँकी लारे खाणो खारिया हा अन वे हंगळा वाँका पाछे-पाछे आया हा।</verse>
				<verse number="16">जद्याँ मूसा का नेमा ने हिकाबावाळा ज्यो फरीसी हा वणा देक्यो के, ईसू चुंगी लेबावाळा अन पापी लोगाँ के लारे खाणो खारिया हे, तो वाँका चेलाऊँ क्यो, “ईसू चुंगी लेबावाळा अन पापी लोगाँ की लारे खाणो काँ खावे हे?”</verse>
				<verse number="17">ईसू यो हुणन वाँने क्यो, “हव मनक के वाते एलाज करबावाळा की जरूत ने वे, पण माँदा मनक के वाते जरूत वेवे हे। मूँ धरमियाँ ने कोयने, पण पाप्याँ ने बंचाबा आयो हूँ।”</verse>
				<verse number="18">जद्याँ यहुन्ना का चेला अन फरीसी एकाणा राकता हा, तो थोड़ाक मनक ईसू का नके आया अन पूँछबा लागा, “यहुन्ना अन फरीसियाँ का चेला काँ एकाणो राके हे अन थाँका चेला एकाणो काँ ने राके?”</verse>
				<verse number="19">तो ईं बात पे ईसू क्यो, “जतरे बींदराजा जान्या की लारे हे, वाँने एकाणो राकबा की जरूत हे कई? जतरे बींद वाँकी लारे हे, वीं एकाणो ने राकी</verse>
				<verse number="20">पण, वीं दन आई, जद्याँ बींद वाँकाऊँ अलग वे जाई, तो वीं एकाणो राकी।</verse>
				<verse number="21">“कुई भी मनक जूना गाबा के, नुवा गाबा की कारी ने लगावे अन जदी लगा भी दे, तो नुवा गाबा की कारी भेळी वेन जूना गाबा ने फाड़ दे अन वो फाट्यो गाबो ओरी हेलो फाट जाई।</verse>
				<verse number="22">अन अस्यानीस कुई जूनी मसक में नुवा अंगूरा को रस ने भरे अन जद्याँ कुई यो काम करे, तो नुवा अंगूरा को रस फेलन जूनी मसक ने फाड़ देई अन मसक की लारे अंगूरा को रस भी खराब वे जाई, पण नुवा अंगूरा को रस नुवी मसका मेंईस भरियो जावे हे।”</verse>
				<verse number="23">अस्यान व्यो के, आराम के दन ईसू खेता में वेन जारिया हा, अन जाता-जाता वाँका चेला खेताँऊँ गव की ऊम्याँ तोड़बा लागा।</verse>
				<verse number="24">ईं बात पे फरीसी मनकाँ ईसू ने क्यो, “देको, थाँका चेला आराम के दन अस्यान काँ करे हे? आ बात तो आराम का दन का खिलाप हे।”</verse>
				<verse number="25">ईंपे ईसू वाँकाऊँ क्यो, “थाँ ने भण्यो के, जद्याँ दाऊद अन वींकी लारे का मनकाँ ने भूक लागी अन खाबा ने कई ने हो, तो वणा कई किदो?</verse>
				<verse number="26">जद्याँ अबियातार मोटो याजक हो, तद्याँ वो परमेसर का मन्दर में ग्यो अन परमेसर के चड़ई तकी रोट्याँ खादी अन वींकी लारे का मनकाँ ने भी दिदी, ज्यो खाणो रिति-रिवाजऊँ मोटा याजक ने छोड़न दूजाँ ने खा सकता हा।”</verse>
				<verse number="27">ईसू वाँने यो भी क्यो, “आराम को दन मनकाँ का वाते बणायो ग्यो हे, ने के, मनक आराम का दन का वाते।</verse>
				<verse number="28">ईं वाते मनक को पूत (ईसू) आराम का दन को भी परबू हे।”</verse>
			</chapter>
			<chapter number="3">
				<verse number="1">एक दाण पछे ईसू यहूदी लोगाँ का परातना घर में ग्या, वटे एक जणो हो, जिंको हात में लकवो व्यो तको हो।</verse>
				<verse number="2">कुई मनक ईं बात पे गात लगान बेटा हा के, ईसू वींने आराम का दन हव करी के ने करी? अणीऊँ वींपे दोस लगाबा को कुई मोको मल जा।</verse>
				<verse number="3">ईसू लकवा का माँदा मनक ने क्यो, “हाराई का हामे ऊबो वेजा।”</verse>
				<verse number="4">अन वणा लोगाँ ने पूँछयो, “कई हव हे के, आराम का दन किंकोई भलो करणो कन बुरो करणो? किंकोई जीव बंचाणो हव हे कन मारणो?” पण, वीं हंगळा छानारिया।</verse>
				<verse number="5">ईसू गुस्सा में हा जद्याँ वणा च्यारूँमेर वाँने देक्या, पण वीं वाँकी बुरई अन हठ ने देकन घणा दकी व्या। पछे वीं मनकऊँ क्यो, “थारो हात लाम्बो कर।” वणी हात लाम्बो किदो अन वींको हात हव वेग्यो।</verse>
				<verse number="6">तद्याँ फरीसी वटूँ पराग्या अन वाँकी लारे हेरोदिया राजा का दल का मनक ईसू ने मारबा की कळा होचबा लागा के, वींने कस्यान मार सका?</verse>
				<verse number="7">ईसू आपणाँ चेला की लारे गलील समन्द पे पराग्या, वाँका पाच्छे गलीलऊँ घणी भीड़ वेगी ही, वे यहूदियाँ,</verse>
				<verse number="8">यरूसलेम नगर अन इदूमिया, यरदन नंदी के पार अन सूर-सेदा जगाँ का लोगाँ की भीड़ भी वाँका कामाँ का बारा में हुणन अई।</verse>
				<verse number="9">अन भीड़ की वजेऊँ वणा आपणाँ चेला ने क्यो हो के, वीं वींके वाते एक नाव त्यार राके, ताँके भीड़ वींने दबा ने सके।</verse>
				<verse number="10">अबे रूँकड़ा की जड़ा काटबा का वाते कराड़ो मेल्यो ग्यो हे। जीं रूँकड़ा हव फळ ने देई वाँने काट्या जाई अन वादी में नाक दिदो जाई।</verse>
				<verse number="11">जद्याँ कणी मनक में हुगली आत्मा ही, वीं ईसू ने देकती, तो वे हंगळी आत्मा वाँका हामे रेटे पड़ जाती अन ज्योर की हाका-भार करती तकी केती, “थूँ परमेसर को पूत हे।”</verse>
				<verse number="12">पण वो वाँने चेतातो तको केतो के, थें हेंचेत रेवो अन ईं बात को परच्यार मती करो।</verse>
				<verse number="13">पछे ईसू एक मंगरा पे चड़ग्या अन वीं जिंने छाता हा, वाँने आपणाँ नके बलाया। वीं हंगळा वाँका नके आया।</verse>
				<verse number="14">वणा मूँ वणा बारा जणा ने थरप्या अन वाँने “थरप्या तका” केन बलाया, काँके वीं वींका लारे रेवे अन वो वाँने हक का हाते खन्दावे, ताँके वीं परच्यार करे,</verse>
				<verse number="15">अन वाँका नके हुगली आत्माने बारणे निकाळबा को हक हो।</verse>
				<verse number="16">ईं बाराई जणा हा, समोन (जिंने वणा पतरस नाम दिदो।)</verse>
				<verse number="17">जब्दी को छोरो याकूब अन याकूब को भई यहुन्नो (जिंको नाम वणा बोनरगेस राक्यो, जिंको मतलब हे, “गाजबावाळो।”)</verse>
				<verse number="18">अन्दरियास, फिलिपुस, बरतुलमे, मत्ती, थोमो, हलफई को छोरो याकूब, तद्दीयुस अन देस परेमी समोन,</verse>
				<verse number="19">अन यहूदो इसकरियोती, जणी आगे ईसू ने धोकाऊँ पकड़ाया हा।</verse>
				<verse number="20">तद्याँ वीं घरे पराग्या, जटे एक दाण पाच्छी अतरी हेली भीड़ अगेटी वेगी ही के, ईसू अन वाँका चेला खाणो तक ने खा सक्या।</verse>
				<verse number="21">जद्याँ वाँका परवार का लोगाँ यो हुण्यो, तो वीं वाँने लेबा निकळग्या, काँके कुई मनकाँ क्यो के, वींको मन ठाणे कोयने हे।</verse>
				<verse number="22">यरूसलेमऊँ आया तका मूसा का नेमा ने हिकाबावाळा केता हा, “वींमें हुगली आत्मा को राजा, बालजेबूल धस्यो तको हे। ईं वाते वो वींकी तागतऊँ दूजी हुगली आत्माने बारणे निकाळ सके हे।”</verse>
				<verse number="23">ईसू वाँने आपणाँ नके बलाया अन केणी ने काम में लेता तका वाँने केबा लागा, “एक सेतान, दूजाँ सेतान ने कस्यान भगा सके हे?</verse>
				<verse number="24">जदी कस्या राज का बचमें फुट पड़ जावे, तो वो राज कदी ने बंच पावे।</verse>
				<verse number="25">अन जद्याँ कस्याई घर का लोगाँ बचमें फुट पड़ जावे, तो वो घर कदी ने बंच पावे।</verse>
				<verse number="26">ईं तरिया जदी सेतान खुद आपणो विरोद करे अन फुट नाके, तो वो कदी बच्यो ने रे सके अन वींको नास वे जावे।</verse>
				<verse number="27">“कस्या भी तागतवर मनक का घर में घुसन कुई वींका माल ने लूटन ने लेजा सके हे, जतरे सबाऊँ पेल्या वीं तागतवर मनक ने बान्द ने देवे। अस्यानीस करन वो वींको घर लूट सके हे।</verse>
				<verse number="28">“मूँ थाँने सई केवूँ, मनक ने हर बात पे मापी मल सके हे, ज्यो वाँका पाप अन परमेसर की नन्दयाँ ज्यो वीं करे, माप किदी जा सके हे।</verse>
				<verse number="29">पण, पुवितर आत्मा की कुई नन्दयाँ करे, तो वींने मापी कदी ने मल सके, काँके वो पाप अनंतकाल तईं बण्यो रेई।”</verse>
				<verse number="30">ईसू ओ ईं वाते क्यो, काँके कुई मनक केता हा के, वाँमें हुगली आत्मा धस्यी तकी हे।</verse>
				<verse number="31">वीं दाण वींकी बई अन वींका भई वटे आया अन बारणे ऊबा रेन वींने मयनूँ बलायो।</verse>
				<verse number="32">ईसू का च्यारूँमेर भीड़ बेटी ही अन वणा वींने क्यो, “देक, थारी बई अन थाँरा भई-बेन थने बलारिया हे।”</verse>
				<verse number="33">ईसू वाँने जवाब दिदो, “मारी बई कूण हे? कूण मारा भई हे?”</verse>
				<verse number="34">वणा च्यारूँमेरऊँ बेटा तका लोगाँ ने देकन क्यो, “देको या हे मारी बई अन ईं हे मारा भई।</verse>
				<verse number="35">ज्यो कुई परमेसर की बाताँ पे चाले, वींइस मारा भई-बेन अन मारी बई हे।”</verse>
			</chapter>
			<chapter number="4">
				<verse number="1">ईसू गलील का समन्द के कनारा पे उपदेस देणो सरू किदो अन वटे वींका च्यारूँमेर घणी भीड़ अगेटी वेगी ही, ईं वाते वो समन्द के कनारे एक नाव में जा बेट्यो अन लोगाँ की भीड़ समन्द का कनारे जमीं पे ऊबी री।</verse>
				<verse number="2">वणा केणी केन वाँने नरी बाताँ हिकई ही, आपणाँ उपदेस में वणा क्यो,</verse>
				<verse number="3">“हुणो, एक दाण एक करसाण बीज बोवा निकळ्यो।</verse>
				<verse number="4">वीं टेम अस्यो व्यो के, वणी बीज बोया, तो थोड़ाक बीज गेला का कनारा पे पड़ग्या हा, तो उड़बावाळा जीव-जनावर आया अन वणा बीज ने चुगग्या।</verse>
				<verse number="5">थोड़ाक बीज काँकरी जमीं पे पड़्या हा, वटे थोड़ोक गारो हो, तो वीं बीज काँकरा में हट उगग्या।</verse>
				<verse number="6">अन जद्याँ सुरज उग्यो, तो वीं बळग्या अन जड़ हेवी वेबाऊँ कमलाग्या।</verse>
				<verse number="7">थोड़ाक बीज झाड़क्याँ में पड़्या अन झाड़क्याँ मोटा वेन वाँने दबा दिदा अन वीं फळ ने लाया।</verse>
				<verse number="8">पण, थोड़ाक बीज हव जमीं पे पड़ग्या, तो वीं उगन हव मोटा व्या अन हव अन्न पेदा व्यो, जणीऊँ तीस गुणी, हाठ गुणी अन हो गुणी हेली हाक वी।”</verse>
				<verse number="9">पछे ईसू क्यो, “जिंके हुणबा का वाते कान्दड़ा हे, वीं हुणे।”</verse>
				<verse number="10">पछे जद्याँ वीं एकला हा, तो वींका बाराई चेला की लारे दूजाँ ज्यो अड़े-भड़े लोग-बाग वाँका नके आया। वाँ हंगळा जणा वींने केणी का बारा में पूँछ्यो।</verse>
				<verse number="11">ईसू वाँने बतायो, “थाँने तो परमेसर का राज को भेद बता दिदो हे। पण, दूजाँ लोग ज्यो बारणे हे, वाँने वीं हंगळी बाताँ केणी में हुणाई जाई।</verse>
				<verse number="12">ईं वाते, “‘वीं देके अन देकताई रेई, पण वाँने कई हूजे कोयने। वीं हुणे अन हुणताई रेई, पण वीं कई हमजे कोयने। यद्याँ वीं अस्यान हमजता, तो परमेसर का नके आता अन वो वाँने माप करतो।’”</verse>
				<verse number="13">ईसू वाँने क्यो, “जद्याँ थाँ ईं केणीने ने हमजो, तो कस्यी भी केणी ने कस्यान हमज पावो?</verse>
				<verse number="14">करसाण ज्यो बोवे, वो बीज परमेसर को सन्देसो हे।</verse>
				<verse number="15">कुई मनक गेला का कनारा का जस्यान हे, जटे बीज बोया जावे हे। जद्याँ वीं सन्देसा ने हुणे, तद्याँ फटाकऊँ सेतान आन सन्देसा ने लेन परो जावे।</verse>
				<verse number="16">अन कुई मनक काँकरा की जमीं का जस्यान हे, जटे बीज बोयो जावे हे, वीं सन्देसा ने हुणन आणन्दऊँ अपणा लेवे।</verse>
				<verse number="17">पण, वो सन्देसो वाँका मन में जड़ ने पकड़े, ईं वाते वीं थोड़ीक देर रूके अन जद्याँ ईं सन्देसा का मस वाँका पे दुक अन हताव आवे, तद्याँ वीं फटाकऊँ आपणाँ विस्वासऊँ छेटी वे जावे हे।</verse>
				<verse number="18">दूजाँ मनक, झाड़क्याँ में बोया तका बीज का जस्यान हे, ज्यो सन्देसा ने हुणे,</verse>
				<verse number="19">पण ईं जीवन की चन्ता, धन-दोलत को लाळच अन दूजी चिजाँ ने लेबा को मन वाँमें आ जावे अन वीं सन्देसा ने दबा देवे। ईं वाते वाँके फळ ने लागे।</verse>
				<verse number="20">अन कुई मनक तो हव गारा का जस्यान हे जटे बीज बोयो जावे हे, वीं सन्देसा ने हुणे अन मन में उतारे, ईं वाते वीं फळ लावे, ज्यो कटे तीस गुणा, कटे हाठ गुणा अन कटे हो गुणाऊँ भी हेला फळ लावे।”</verse>
				<verse number="21">पछे ईसू वाँने क्यो, “दिवाण्या ने लगान ठामड़ा कन माचा का रेटे ने मेले पण वींने आल्याँ में मले।</verse>
				<verse number="22">ज्यो कई भी छाने हे, वींने परगट किदो जाई अन ज्या भी चीज ढाँकी तकी हे, वींने चोड़े किदी जाई।</verse>
				<verse number="23">जिंके हुणबा का वाते कान्दड़ा हे, वीं हुणे।”</verse>
				<verse number="24">पाछो ईसू वाँने क्यो, “ज्यो भी थाँ हुणो, वींने ध्यान लगान हुणलो, जीं नापऊँ थाँ दूजाँ ने नापो, वीं नापऊँ थाँ खुद भी नाप्या जावो अन वीं नापऊँ थाँने हेलो दिदो जाई।</verse>
				<verse number="25">जिंका नके हे, वींने ओरी दिदो जाई अन जिंका नके कई ने हे, वींका नकूँ ज्यो थोड़ो घणो वेई, वो भी ले लिदो जाई।”</verse>
				<verse number="26">पछे ईसू क्यो, “परमेसर को राज अस्यो हे, जस्यान कुई मनक खेत में बीज बोवे।</verse>
				<verse number="27">जद्याँ रात ने हुवे, परभाते उटे अन दने जागतो रेवे तद्याँ बीज उगन मोटो वे जावे, पण वींने नंगे भी ने पड़े के, यो कस्यान वेरियो हे?</verse>
				<verse number="28">धरती अपणेआप धान पेदा करे हे, पेल्याँ गूँपळ, पछे ऊम्याँ अन ऊम्याँऊँ भरपूर धान।</verse>
				<verse number="29">जद्याँ धान पाक जावे, तो वो तरत वींने दाँतळीऊँ काटे, काँके हाक काटबा को टेम आग्यो हे।”</verse>
				<verse number="30">पछे ईसू पूँछ्यो, “आपाँ कस्यान बतावा के, परमेसर को राज किंके जस्यान हे? वींने हमजबा का वाते आपाँ कस्यी केणी ने काम में लावाँ?</verse>
				<verse number="31">वो जमीं पे बोया तका हरूँ का दाणा का जस्यान हे, ज्यो हाराई बीजाऊँ फोरो वेवे हे।</verse>
				<verse number="32">पण, थोड़ाक दनाँ केड़े वो मोटो वेन बाग का हाराई पोदाऊँ भी मोटो वे जावे अन वींकी डाळयाँ अतरी मोटी वे जावे के, उड़बावाळा जनावर भी वींकी छाया में गवाळो बणान रे सके।”</verse>
				<verse number="33">अस्यी ओरी नरी केण्याँ केन ईसू सन्देस देता हा अन जतरो वे हमज सके, वतरो बताता हा।</verse>
				<verse number="34">बनाई केणी काम में लिदा तका वीं वाँने कई भी ने हुणाता हा, पण जद्याँ हाराई चेला का लारे वीं एकला वेता, तद्याँ हारी बाताँ को मतलब वाँने हमजाता हा।</verse>
				<verse number="35">वीं दन जद्याँ हाँज पड़ी, ईसू चेला ने क्यो, “चालो, आपाँ समन्द के, वीं पार चाला।”</verse>
				<verse number="36">ईं वाते, वणा भीड़-भाड़ ने छोड़ दिदी। वींका चेला भी वणी नाव में ग्या, जिंमें ईसू पेल्याई बेट्या हा अन वाँने लेन पराग्या अन वाँकी लारे ओरी नावाँ ही।</verse>
				<verse number="37">अणाचेत की एक कल्ड़ी डूँज अई, लेराँ नावऊँ टकराबा लागी अन नाव में पाणी भराबा में हो।</verse>
				<verse number="38">पण, ईसू नाव का पाला हिस्सा में हराणो लगान हूरिया हा। चेला वाँने जगान क्यो, “ओ गरुजी, थाँने कई होच कोयने? आपाँ डूबरया हा।”</verse>
				<verse number="39">तो ईसू ऊबा व्या अन डूँज ने तापड़न क्यो, “सान्त वेजा।” अन लेराँ ने क्यो, “ठम जावो।” वीं दाणई डूँज ठमगी अन च्यारूँमेर सान्ती वेगी।</verse>
				<verse number="40">पछे ईसू चेला ने क्यो, “थाँ दरपो काँ हो? कई, थाँने अबार तईं विस्वास कोयने?”</verse>
				<verse number="41">पण, वीं हाराई, घणा दरपग्या हा अन वाँ एक-दूँजा ने क्यो, “अरे, यो कूण हे? जिंकी डूँज अन लेराँ भी आग्या माने हे।”</verse>
			</chapter>
			<chapter number="5">
				<verse number="1">ईसू अन चेला गलील समन्द के पेले पार गरासेनिया का देस में पूग्या।</verse>
				<verse number="2">जद्याँ ईसू नावऊँ बारणे आया, तो तरत एक मनक कबराऊँ निकळन वाँका नके आयो, जिंमें हुगली आत्मा ही।</verse>
				<verse number="3">वो कबराँ में रेतो हो अन वींने कुई भी हाकळाऊँ ने बांद सकतो हो।</verse>
				<verse number="4">काँके वींने घणी दाण बाद्यो, पण वो हाँकळा ने तोड़ देतो अन बेड़ियाँ का भी टुका-टुका कर देतो अन कुई भी वींने आपणाँ काबू में ने कर पातो।</verse>
				<verse number="5">वो रात-दन कबराँ की जगाँ में अन मंगरा में हाको करतो अन खुद के भाटाऊँ चिरा पाड़न खुद ने लोया-जाळ करतो।</verse>
				<verse number="6">वणी जद्याँ छेटीऊँ ईसू ने देक्या, तो वो वाँका आड़ी दोड़्यो अन वाँके पगाँ पड़ग्यो।</verse>
				<verse number="7">अन जोरऊँ हाको करन बोल्यो, “सबाऊँ मोटा परमेसर का पूत, हे ईसू, थूँ मारा नकूँ कई छावे हे? थने परमेसर की होगन हे, थूँ मने मती हता।”</verse>
				<verse number="8">वणी ओ ईं वाते क्यो, काँके ईसू वींने क्यो हो, “ए हुगली आत्मा, ईं मनकऊँ बारणे निकळजा।”</verse>
				<verse number="9">तद्याँ ईसू वींने पूँछ्यो, “थारो नाम कई हे?” वणी क्यो, “मारो नाम टोळी हे, काँके माँ नरई हा।”</verse>
				<verse number="10">वणी ईसुऊँ नरी दाण हाता-जोड़ी किदी के, वो वाँने ईं जगाऊँ ने खन्दावे।</verse>
				<verse number="11">वीं टेम वाँका भड़े का मंगरा पे गडूरा की एक टोळी चररी ही।</verse>
				<verse number="12">अन वीं हुगली आत्मा वींऊँ हाता-जोड़ी किदी के, “माने वणा गडूरा की टोळी में खन्दा दे, तो माँ वाँमें धस जावा।”</verse>
				<verse number="13">अन ईसू वाँने आग्या दिदी, पछे वीं हुगली आत्मा वीं मनकऊँ निकळन वाँ गडूरा की टोळी में धसगी अन वाँ टोळी, जिंमें दो हजार के, लगे-भगे गडूरा हा, ज्यो मंगरा का ढाळऊँ पड़ता-गुड़ता समन्द में पड़न डुबग्या।</verse>
				<verse number="14">अन पछे टोळी का रूकाळया मनक गाम अन खेता में भागता तका जान आ खबर हुणई, तो लोग-बाग ज्यो भी व्यो, वींने देकबा आया।</verse>
				<verse number="15">वीं ईसू का नके ग्या अन देक्यो के, वो मनक, जिंमें नरी हुगली आत्मा रेती ही, वींने गाबा पेरियो तको अन पुरी तरियाऊँ ठीक वेन वटे बेटो तको देकन वीं दरपग्या हा।</verse>
				<verse number="16">अन जीं देकबावाळा हा, वाँकाणी लोगाँ ने हुगली आत्मा धस्यी तकी मनक का अन गडूरा को हाल के हुणायो।</verse>
				<verse number="17">तद्याँ वाँ मनकाँ ईसुऊँ हाता-जोड़ी करन क्यो, “माकाँ अटूँ परोजा।”</verse>
				<verse number="18">अन जद्याँ ईसू नाव में चड़रिया हा, तो जीं मनक में हुगली आत्मा धस्यी ही, वो अरज करबा लागो, “मने भी थारी लारे ले चाल।”</verse>
				<verse number="19">पण, ईसू वींने आपणी लारे चालबा की आग्या ने दिदी अन क्यो, “आपणे घरे परोजा अन आपणाँ घर का ने बताज्ये के मालिक थाँरा लारे कई-कई काम किदा अन कस्यान दया किदी।”</verse>
				<verse number="20">ईं वाते वो वटूँ परोग्यो अन दस गामाँ का हिमाड़ा जिंने दिकापुलिस केता हा, वटा का मनकाँ ने बताबा लागो के, ईसू मारा वाते कतरो मोटो काम किदो हे। तद्याँ हाराई अचम्बा में पड़ग्या।</verse>
				<verse number="21">ईसू जद्याँ नावऊँ समन्द के पेले पाड़े ग्यो, तद्याँ वाँके च्यारूँमेर एक घणी भीड़ वीं कनारा पे भेळी वेगी ही।</verse>
				<verse number="22">वीं दाण यहूदी परातना घर को एक मुक्यो हो, जिंको नाम याईर हो, वटे आयो अन ईसू ने देक्या, तो वो वींका पगाँ में पड़ग्यो</verse>
				<verse number="23">अन हाता-जोड़ी करन बोल्यो, “मारी फोरीक छोरी मरबा ने हे। मारी परातना हे के, थूँ मारी लारे चाल अन आपणो हात वींका माता पे मेल, जींऊँ वा हव वेजा अन मरबाऊँ बंच जावे।”</verse>
				<verse number="24">तद्याँ ईसू वींका हाते चाल पड़्यो अन एक मोटी भीड़ वींकी लारे जारी ही, जींऊँ वो च्यारूँमेरऊँ दब्यो जारियो हो।</verse>
				<verse number="25">वटे एक लुगई ही, जिंके बारा सालऊँ लगातार परदा को रोग हो।</verse>
				<verse number="26">वा नरई वेदजीऊँ एलाज कराती-कराती घणी दकी वेगी ही। वींका नके ज्यो भी हो, हंगळो धन खरच कर दिदो, पण वींकी हालत में कई हुदार ने व्यो, पण हालत हेली बगड़ती गी।</verse>
				<verse number="27">वणी ईसू का बारा में हुण्यो तको हो, वा भीड़-भाड़ में वाँका पाच्छे गी अन वाँका गाबा के अड़गी,</verse>
				<verse number="28">काँके वा मनईंमन में केरी ही, “यद्याँ मूँ वींका गाबा का भी अड़ जाऊँ तो मूँ हव वे जाऊँ।”</verse>
				<verse number="29">अन पछे तरत वींके परदा की मांदकी हव वेगी अन वींने आपणाँ डील में अस्यान मेसूस व्यो के, वींको रोग हव वेग्यो हे।</verse>
				<verse number="30">अन तरत ईसू ने ज्यान पड़ग्यो के, वींकी तागत वींऊँ बारणे निकळी हे। वो भीड़ में पाछो फरियो अन पूँछयो, “मारा गाबा के कूण अड़्यो हे?”</verse>
				<verse number="31">तद्याँ वींका चेला वींने क्यो, थूँ देकरियो हे के, भीड़ थाँने च्यारूँमेरऊँ दबाती जारी हे अन तुई थाँ पूँछरिया हो के, “मारे कूण अड़्यो?”</verse>
				<verse number="32">पण, वो च्यारूँमेर देकतो ईं रेग्यो के, अस्यान कूण किदो?</verse>
				<verse number="33">पछे, वा लुगई यो जाणती तकी के वींने कई व्यो हे, ईं वाते वाँ दरपऊँ धूजती तकी ईसू का हामे अई अन वींका पगाँ पड़न हंगळी बात सई-सई के दिदी।</verse>
				<verse number="34">ईसू वींने क्यो, “हे बेटी, थाँरा विस्वासऊँ थूँ हव वेगी हे। सान्तीऊँ जा, थारी मांदकी छेटी वेगी हे।”</verse>
				<verse number="35">जद्याँ ईसू बोलइसरिया हा, तद्याँ याईर का घरऊँ कुई मनक आया अन याईरऊँ क्यो, “थारी बेटी मरगी। अबे थूँ गरुजी ने यूँई दुक मती दे?”</verse>
				<verse number="36">पण, ईसू वा हंगळा की बात अणहूणी कर दिदी अन यहूदी परातना घर का मुक्याऊँ क्यो, “दरपे मती, बेस विस्वास कर।”</verse>
				<verse number="37">पछे वो हाराई ने छोड़न खाली पतरस, याकूब अन याकूब का भई यहुन्ना ने लारे लेन,</verse>
				<verse number="38">यहूदी परातना घर का मुक्या का घरे ग्यो अन देक्यो के वटे लोग-बाग जोरऊँ रोरिया हा अन हाका-भार कररिया हा।</verse>
				<verse number="39">वो मयने ग्यो अन वाँकाऊँ क्यो, “यो रोणो-धोणो अन हाका-भार काँ कररिया हो? बाळकी मरी कोयने, वाँ तो हुती तकी हे।”</verse>
				<verse number="40">ईं बात पे वाँ लोगाँ वींकी रोळ किदी। पछे वणा हंगळा लोगाँ ने बारणे खन्दा दिदा अन बाळकी का बई-बापू अन आपणाँ तीन चेला ने लेन वीं ओवरा में ग्या, जटे बाळकी ही।</verse>
				<verse number="41">वणा बाळकी को हात पकड़न क्यो, “तलीता कोम।” ईंको मतलब हे “नानी बाळकी मूँ थने कूँ हूँ, थूँ ऊबी वेजा।”</verse>
				<verse number="42">पछे वाँ बाळकी फटाकऊँ ऊबी वेगी अन अटने-वटने चालबा-फरबा लागी। वा बाळकी बारा वर की ही। ईंने देकन हंगळा लोग अचम्बा में पड़ग्या।</verse>
				<verse number="43">ईसू वाँने कल्ड़ी आग्या दिदी के, किंने भी ईंका बारा में मत बताज्यो। अन पछे वाँने क्यो के, “वीं बाळकी ने खाबा वाते कई दे।”</verse>
			</chapter>
			<chapter number="6">
				<verse number="1">पछे ईसू वीं जगाँ ने छोड़न आपणाँ नगर में पराग्या। वींका चेला भी वींके हाते हा।</verse>
				<verse number="2">जद्याँ आराम को दन आयो, तो वणा यहूदियाँ का परातना घर में उपदेस देणो सरू कर दिदो। वटे घणा मनक हा, ज्यो वाँकी बाताँ हुणन अचम्बा में पड़ग्या। तद्याँ वीं बोल्या, “ईंने ईं बाताँ कटूँ मली हे? आ कस्यी अकल हे, ज्यो ईंने मली हे? यो अस्या अचम्बावाळा काम कस्यान करे हे?</verse>
				<verse number="3">कई, यो वो हुतार तो ने हे, ज्यो मरियम को छोरो हे अन कई याकूब, योसेस, यहूदा अन समोन को भई तो ने हे? कई, ईंकी बेना आपणाँ अटे तो ने हे?” ईं वाते वाँ लोगाँ वींने नकार दिदो।</verse>
				<verse number="4">तद्याँ ईसू वाँने क्यो, “कस्या भी परमेसर का आड़ीऊँ बोलबावाळा ने वींको देस हगा-होई अन परवार ने छोड़न, दूजाँ कुई वींको मान ने गटावे हे।”</verse>
				<verse number="5">वटे ईसू कस्याई अचम्बावाळा काम ने कर सक्या, बेस माँदा मनकाँ पे हात राकन हव किदा।</verse>
				<verse number="6">लोगाँ ने विस्वास ने करता देकन ईसू ने घणो अचम्बो व्यो। पछे ईसू गामाँ में ग्यो अन च्यारूँमेर उपदेस देतो रियो।</verse>
				<verse number="7">वणा आपणाँ बाराई चेला ने बलाया अन दो-दो जणा ने बारवास में खन्दाया। वणी वाँने हुगली आत्माने निकालबा को हक दिदो।</verse>
				<verse number="8">अन यो आदेस भी दिदो, “थाँ आपणी लाटी के अलावा ओरी कई मत लिज्यो, ने रोटी, ने जोळी, ने बटवा में रिप्या-कोड़ी।</verse>
				<verse number="9">थें पगरख्याँ तो पेरज्यो, पण दो-दो कुरता हाते मती लेज्यो।”</verse>
				<verse number="10">अन अस्यान भी क्यो, “जीं घर में थाँने मान मले वटे अतरीक देर तईं रको, जतरी देर तईं वाँ जगाँ ने छोड़ो।</verse>
				<verse number="11">जद्याँ कसी जगाँ का मनक थाँने ने माने अन थाँकी बात ने हुणे, तो थाँ वा जगाँ छोड़ दिज्यो अन आपणाँ पगाँ को धूळो वटेई जाटक दिज्यो, तद्याँ या बात वाँका वाते चेतावणी रेई के, वाँका नास को कारण वीं खुदईस हे।”</verse>
				<verse number="12">पछे चेला वटूँ पराग्या अन वणा परच्यार किदो के, “पापऊँ मन फेरो।”</verse>
				<verse number="13">वाँकाणी नरी हुगली आत्माने बारणे निकाळी, नरई माँदा मनकाँ के जेतुन को तेल लगान हव किदा।</verse>
				<verse number="14">राजा हेरोदेस ने आ बात को पतो लागग्यो काँके, ईसू को नाम हंगळी जगाँ फेलग्यो हे। कुई मनक तो केरिया हा, “बतिस्मा देबावाळो यहुन्नो मरिया तका मूँ पाछो जीवतो वेग्यो हे। ईं वाते वींमें ईं सगत्याँ चमत्कार कररी हे।”</verse>
				<verse number="15">दूजाँ मनक केरिया हा, “वो एलियो हे।” पण, कुई ओरी दूजाँ जणा केरिया हा, “यो पेलाँ का जमाना का परमेसर का आड़ीऊँ बोलबावाळा मूँ कुई एक हे।”</verse>
				<verse number="16">जद्याँ हेरोदेस ईं बाताँ हूणी, तद्याँ वो बोल्यो, “यहुन्नो, जिंको मातो में कटवायो, वो पाछो जीवतो वेग्यो हे।”</verse>
				<verse number="17">काँके हेरोदेस खुदईस यहुन्ना ने बन्दी बणाबा अन जेळ में नाकबा को आदेस दिदो हो। वणी आपणाँ भई फिलिपुस की लुगई हेरोदियासऊँ ब्याव कर लिदो हो, ईं वाते वणी अस्यो किदो।</verse>
				<verse number="18">काँके यहुन्नो हेरोदेस ने केतो हो के, थाँरो आपणाँ भई की लुगईऊँ ब्याव करणो हव बात कोयने हे।</verse>
				<verse number="19">ईं बात पे हेरोदियास वींऊँ दसमणी राकबा लागी अन वाँ यो छाती ही के, वींने मरवा नाकूँ। पण, वाँ हेरोदेस का मस अस्यो ने कर सकी।</verse>
				<verse number="20">हेरोदेस यहुन्नाऊँ दरपतो हो, काँके हेरोदेस जाणतो हो के, यहुन्नो एक खरो अन भलो मनक हो, ईं वाते वो ईंको बचाव करतो हो। हेरोदेस ने यहुन्ना की बाताँ हुणन घबरावणी वेती ही, पण वीं बाताँ वींने घणी भाती भी ही।</verse>
				<verse number="21">आकरी में हेरोदियास ने अस्यो एक मोको मलग्यो, जद्याँ हेरोदेस आपणाँ जनम दन पे मोटा अदिकारी, सेनापत्याँ अन गलील का मोटा-मोटा मनकाँ के वाते एक जीमणो राक्यो।</verse>
				<verse number="22">तद्याँ हेरोदियास की छोरी मयने जान असी नाची के वटे जीमण में आया तका हंगळा मेमाना अन हेरोदेस ने घणा राजी किदा। ईं बात पे राजा हेरोदेस वीं छोरी ने क्यो, “थूँ माँग, ज्यो भी चीज थारे छावे, मूँ थने देऊँ।”</verse>
				<verse number="23">पछे राजा वींऊँ होगन खान क्यो, “मूँ थने कई भी देबाने त्यार हूँ, अटा तईं के, मारो आदो राज-पाट।”</verse>
				<verse number="24">ईं बात पे वा बारणे निकळी अन आपणी माँ नके गी अन वींने पूँछ्यो, “मने कई चीज माँगणी छावे?” पछे वींकी माँ बतायो, “बतिस्मा देबावाळा यहुन्ना को मातो।”</verse>
				<verse number="25">तद्याँ वा तरत दोड़ी अन मयने राजा का भड़े अई अन क्यो, “मूँ छावूँ हूँ के, थाँ मने अबाणूइस बतिस्मा देबावाळा यहुन्ना को मातो कटवान थाळी में मेलन दिदो।”</verse>
				<verse number="26">ईं बात पे राजा ने घणो दुक व्यो। पण, वो आपणाँ होगन अन जीमणा में आया मेमाना का मस वीं छोरी ने नटणो ने छावतो हो।</verse>
				<verse number="27">ईं वाते राजा तरत एक जल्‍लाद ने वींको मातो काट लाबा को आदेस दिदो। पछे वो जल्‍लाद, जेळ में जान यहुन्ना को मातो काट्यो।</verse>
				<verse number="28">अन थाळी में मेलन वीं छोरी ने दिदो अन वा छोरी वींने लेजान आपणी बई ने दिदो।</verse>
				<verse number="29">जद्याँ यहुन्ना का चेला आ बात हुणन, वींका मरिया तका डील ने लेग्या अन वींने एक कबर में गाड़ दिदो।</verse>
				<verse number="30">पछे थरप्या तका ईसू के नके पाच्छा आन हंगळी बात वींने बतायी ही, ज्यो वाँ किदी अन हिकई।</verse>
				<verse number="31">वटे घणा मनक आरिया जारिया हा, ईं वाते वाँने खाणो खाबा को टेम भी ने मल पारियो हो। ईं वाते ईसू वाँने क्यो, “चालो, आपाँ हून्नी जगाँ पे चाला अन थोड़ोक रईम्बो ला।”</verse>
				<verse number="32">ईं वाते वे नाव में बेटन एक हून्नी जगाँ पे पराग्या।</verse>
				<verse number="33">घणा जणा वाँने जाता तका देक्या अन वाँने ओळक लिदा के, वे कूण हे? ईं वाँते वे हंगळा नगरा का लोग दोड़-दोड़न ईसू अन चेलाऊँ भी पेल्याँ वटे जा पूग्या।</verse>
				<verse number="34">जद्याँ ईसू नावऊँ बारणे निकळ्या, तो वाँ घणी भीड़ देकी, तद्याँ वाँका पे घणी दया अई। काँके वे हंगळा गारा का जस्यान हा, ज्याँको कुई गवाळ्यो ने हो। तो ईसू वाँने नरी बाताँ हिकाबा लागा।</verse>
				<verse number="35">जद्याँ हाँज पड़गी, तद्याँ वाँका चेला वाँका नके आया अन बोल्या, “आ एक काकड़ की जगाँ हे अन अन्दारो भी घणो वेग्यो हे।</verse>
				<verse number="36">मनकाँ ने अड़े-भड़े का गामाँ अन वस्तायाँ में जाबा दो, ताँके वे आपणाँ वाते खाबा ने कई चीज मोल ले सके।”</verse>
				<verse number="37">पण, ईसू चेलाऊँ क्यो, “वाँने खाबा का वाते थाँ कई दो।” तद्याँ वाँ वींने क्यो, “कई थें छावो के, माँ जावाँ? अन दोस्ये चान्दी का रिप्या की रोट्याँ मोल लेन आवा अन वाँने खाबा ने देवाँ।”</verse>
				<verse number="38">ईसू वाँने क्यो, “जावो अन देको, थाँका नके कतरी रोट्याँ हे?” वणा पतो करन वाँकाऊँ क्यो, “आपणाँ नके पाँच रोट्याँ अन दो माछळ्याँ हे।”</verse>
				<verse number="39">पछे वणा चेला ने आग्या दिदी, “लिली-लिली चुंटी पे अणा हंगळा ने पंगताँ में बेठाण दो।”</verse>
				<verse number="40">तद्याँ वे हंगळा हो-हो अन पचा-पचा की पंगताँ में बेटग्या।</verse>
				<verse number="41">अन ईसू पाँच रोट्याँ अन दो माछळ्याँ उठान हरग के दयने देकन परमेसर ने धन्नेवाद दिदो अन रोट्याँ तोड़-तोड़न आपणाँ चेला ने परोसबा ने दिदी अन वणा वीं दो माछळ्याँ भी वाँ मनकाँ में बाँट दिदी।</verse>
				<verse number="42">हंगळा जणा खान धापग्या।</verse>
				<verse number="43">अन पछे वाँ चेला, बंची तकी रोट्याँ अन माछळ्याँ ने बारा ठोपल्याँ भरन तोकी।</verse>
				<verse number="44">ज्याँ लोगाँ रोट्याँ खादी ही, वाँका में मनक मनकईस लगे-भगे पाँच हजार हाँ।</verse>
				<verse number="45">पछे, जट ईसू आपणाँ चेला ने नाव पे चड़ाया, ताँके जतरे ईसू वीं भीड़ ने विदा करे, वतरे वीं वाऊँ पेल्याँ पेला पाल्ड़े बेतसेदा परा जावे।</verse>
				<verse number="46">वीं वाँने विदा करन परातना करबा वाते मंगरा पे चड़ग्या।</verse>
				<verse number="47">अन जद्याँ हाँज वीं, तद्याँ नाव समन्द का गाबे ही अन ईसू एकला जमीं पे हा।</verse>
				<verse number="48">वे देक्यो के, चेलाऊँ नाव ने आगे डगाणो घणो भारी पड़रियो हे, काँके वइरो वाँके हामे चालरियो हो। तो भाग-फाट्याँ के लगे-भगे वो समन्द पे चालतो तको वाँका नके आयो अन वाँकाऊँ आगे निकलणो छातो हो,</verse>
				<verse number="49">तो वाँ चेला ईसू ने पाणी पे चालता देकन होच्यो के, यो कुई भूत हे। तो वाँ हंगळाईं हाको कर दिदो।</verse>
				<verse number="50">काँके वाँ हंगळा जणा वींने देकन दरपग्या हा, तो जट ईसू वाँने बतळान क्यो, “हिम्मत राको, दरपो मती, यो तो मूँ हूँ।”</verse>
				<verse number="51">पछे वो नाव में चड़न वाँकी लारे वेग्यो अन वइरो ढबग्यो। ईं बात पे वाँने घणो अचम्बो व्यो।</verse>
				<verse number="52">काँके वे पाँच हजार लोगाँ ने खाणो खुवाबा को मतलब ने हमज्या हाँ, काँके वाँकी अकल काम ने कररी ही।</verse>
				<verse number="53">समन्द पार करबा केड़े, वीं गन्नेसरत नगर में पूग्या अन वटे नाव ने बांद दिदी।</verse>
				<verse number="54">जद्याँ वे नावऊँ उतरन बारणे आया, तद्याँ लोग-बाग ईसू ने तरत ओळक लिदा हाँ।</verse>
				<verse number="55">पछे वे लोग च्यारूँमेर दोड़न ग्या अन हंगळा जणा ने यो बतायो के, ईसू वटे हे, तो मनक माँदा मनकाँ ने माचा पे हूँवाणन वटे लेग्या।</verse>
				<verse number="56">वो गाम, सेर अन वस्ती में कटे भी जातो हो, तो लोग-बाग आपणाँ माँदा मनकाँ ने बजार का चोगान में राक देता अन वींऊँ परातना करता तका केता के, वो आपणाँ गाबा को एक कोर भी वाँके अड़ाबा दे। तो ज्यो भी वीं कोर के अड़ता, वे हंगळा हव वे जाता।</verse>
			</chapter>
			<chapter number="7">
				<verse number="1">यरूसलेमऊँ आया तका थोड़ाक फरीसी अन मूसा का नेमा ने हिकाबावाळा लोग, ईसू के भड़े आन भेळा वेग्या।</verse>
				<verse number="2">वणा देक्यो के, ईसू का थोड़ाक चेला फरीसी का नेमा के जस्यान हात धोन खाणो ने खारिया हे।</verse>
				<verse number="3">काँके फरीसी अन हारई यहूदी लोग आपणाँ पूरबजाँ का रिति-रिवाज का नेमा के जस्यान हात हव तरियाऊँ ने धो लेता, वतरे खाणो ने खाता हा।</verse>
				<verse number="4">अन वीं बजारऊँ आन जतरे हापड़ ने लेता, वतरे वीं खाणो ने खाता हा। अस्यानीस नरी ओर भी अस्यी रीतियाँ ही, जिंको पालण करता हा, जस्यान के लोट्या, कळस अन ताँबा का ठामड़ा ने माँजणा अन धोणा।</verse>
				<verse number="5">ईं वाते वाँ फरीसियाँ अन मूसा का नेमा ने हिकाबावाळा ईसुऊँ पूँछ्यो, “थाँका चेला पूरबजाँ का नेमा को पालण काँ ने करे हे अन बना हात धोया खाणो काँ खा लेवे हे?”</verse>
				<verse number="6">ईसू वाँने क्यो, “थाँने कपटी केन यसाया ज्यो परमेसर का आड़ीऊँ बोलबावाळे हाँचो क्यो अन लिक्यो हो, “परमेसर केवे के, ‘ईं मारो आदर होटऊँ तो करे, पण अणाको मन माराऊँ घणो छेटी राके।</verse>
				<verse number="7">अणाकी भगती बना काम की हे, काँके ईं लोगाँ ने मनकाँ का बणाया तका नेमा ने परमेसर का नेमा का जस्यान हिकावे हे।’”</verse>
				<verse number="8">“थाँ परमेसर को आदेस टाळन एक दयने राक दिदो हे अन थाँ मनकाँ का रिति-रिवाजाँ ने मानरिया हो।”</verse>
				<verse number="9">पछे ईसू वाँने क्यो, “थाँ आपणी रीतियाँ ने मनाबा का वाते परमेसर का आदेसा ने टाळबा में घणा हूँस्यार हो।</verse>
				<verse number="10">काँके मूसे क्यो हो, ‘ज्यो आपणाँ बई-बापू को आदर ने करे अन अपमान करे, वींने मार देणो छावे।’</verse>
				<verse number="11">पण, थाँ केवो के, यद्याँ कुई मनक आपणाँ बई-बापूऊँ केवे के, मारी जणी चिजऊँ थाँने नफो वे सकतो हो वा तो कुरबान हे, जिंको अरत हे ‘परमेसर का वाते अलग किदो तको तोफो।’</verse>
				<verse number="12">अस्यान केन थाँ वींने आपणाँ बई-बापू की सेवा-चाकरी करबा ने देवो हो।</verse>
				<verse number="13">ईं तरियाऊँ थाँ आपणाँ बणाया तका रीति-रिवाजाऊँ परमेसर का बचनाँ ने टाळ दो हो, अस्यानई थाँ नरी बाताँ करता रेवो हो।”</verse>
				<verse number="14">पछे ईसू भीड़ ने आपणाँ भड़े पाच्छी बलई अन क्यो, “थाँ हारई मारी बात हुणो अन हमज्यो।</verse>
				<verse number="15">अस्यी कुई चिजाँ कोयने हे, ज्यो बारणेऊँ मनक का मयने जान वींने ने वटाळे, पण ज्यो मुण्डाऊँ निकळबावाळा बुरा सबदइस वींने वटाळ देवे।”</verse>
				<verse number="16">जिंके हुणबा का वाते कान्दड़ा हे, वीं हुणे।</verse>
				<verse number="17">पछे जद्याँ भीड़ ने छोड़न वो घर मयने ग्यो, तो वींका चेला वींने ईं केणी का बारा में पूँछ्यो।</verse>
				<verse number="18">तद्याँ वणी वाँने क्यो “कई, थें भी दूजाँ के जस्यान हमजदार ने हो? कई, थाँ ने हमजो के, कस्यी भी चीज ज्यो मनक में बारणेऊँ मयने जावे, वा वींने ने वटाळे।</verse>
				<verse number="19">काँके वाँ चीज वींका मन में ने जावे, पेट में जावे अन पछे पेटऊँ बारणे निकळ जावे हे।” अस्यान केन वणा खाबा की हंगळी चिजाँ ने सुद बतई।</verse>
				<verse number="20">पछे वणा क्यो, “ज्यो कुई मुण्डाऊँ निकळे हे, वोईस वींने वटाळ देवे हे।</verse>
				<verse number="21">काँके मनक का मन का मयनेऊँ खराब बच्यार, कुकरम, चोरी, हत्या,</verse>
				<verse number="22">लोब-लाळच, हरेक तरे की दुस्टता, छळ-कपट, नागोपणो, रिस्याँ, नन्दयाँ, मेपणो अन बेण्डापणो बारणे आवे।</verse>
				<verse number="23">ईं हंगळी खराब बाताँ मयनेऊँ बारणे आन मनकाँ ने वटाळ देवे।”</verse>
				<verse number="24">पछे ईसू वाँ जगाँ छोड़ दिदी अन सूर सेर के अड़े-भड़े का परदेस में निकळग्यो। वटे वो एक घर में ग्यो अन वो ने छातो हो के, किंने भी वींके आबा को पतो चाले, पण वो खुद ने हपा ने सक्यो।</verse>
				<verse number="25">जद्याँ एक लुगई, जिंकी छोरी में हुगली आत्मा धस्यी तकी ही, वा ईसू का बारा में हुणन, जट वींका नके अई अन वींका पगाँ पड़गी।</verse>
				<verse number="26">वा लुगई यहूदी ने ही, अन सिरिया देस के फिनीकी में पेदा वीं ही। वणी आपणी छोरीऊँ हुगली आत्माने बारणे निकाळबा की परातना किदी।</verse>
				<verse number="27">ईसू वींने क्यो, “पेल्याँ छोरा-छोरी ने धापबा दे। काँके छोरा-छोरी की रोट्याँ गण्डकड़ा का मुण्डागे फेंक देणी हव बात कोयने।”</verse>
				<verse number="28">लुगई वींने जबाव दिदो, “हो परबू जी, गण्डकड़ा भी तो छोरा-छोरी का पड़या तका खाणा का टुका खा लेवे हे।”</verse>
				<verse number="29">पछे ईसू वींने क्यो, “थाँरा ईं जवाब के मस, थूँ आपणाँ घरे परी जा, हुगली आत्मा थारी छोरी ने छोड़न बारणे निकळगी हे।”</verse>
				<verse number="30">तो वा घरे परीगी अन आपणी बेटी ने माचा पे हुती तकी देकी। हुगली आत्मा वींऊँ बारणे निकळगी ही।</verse>
				<verse number="31">पछे ईसू सूर देस का इलाकाऊँ निकळन सिदोन वेन, दिकापुलिस ईंको मतलब दस नगरा का गेलाऊँ वेन गलील समन्द का भड़े जा पूग्या।</verse>
				<verse number="32">वटे थोड़ागणा मनक ईसू का नके एक जणा ने लाया, ज्यो गूँगा अन बेरो हो। तो वणा ईसुऊँ परातना किदी के, वो वींपे आपणो हात मेले।</verse>
				<verse number="33">ईसू वींने भीड़ऊँ एक आड़ी लेग्या अन आपणी आँगळी वींका कान्दड़ा में नाकी अन पछे वणा थूँक्यो अन वीं मनक की जीब के हात अड़ायो।</verse>
				<verse number="34">पछे हरग आड़ी देकन, लाम्बो हाँ लेन क्यो, “इप्फाता”, ईंको मतलब हे “खुल जा।”</verse>
				<verse number="35">अन तरत वींका कान्दड़ा खुलग्या अन जीब की गाँठ खुलगी अन वो बोलबा लागग्यो।</verse>
				<verse number="36">पछे ईसू लोगाँ ने आदेस दिदो के, यो किंने भी बताज्यो मती, पण वणा मनकाँ ने जतरा ढाबया, वणा वतरोई वणी बात को हेलो परच्यार कर दिदो।</verse>
				<verse number="37">अन जणा लोगाँ यो हुण्यो, तो वीं हंगळा घणा अचम्बा में आन केबा लाग्या, “ईसू ज्यो भी करे, हंगळोई हव करे। अटा तईं, वो बेरा ने हुणबा की अन गूँगा ने बोलबा की सगती देवे हे।”</verse>
			</chapter>
			<chapter number="8">
				<verse number="1">वाँ दनाँ में एक दूजाँ मोका पे घणी भीड़ भेळी वी। वाँका नके खाबा के वाते कई ने हो। ईसू आपणाँ चेला ने भड़े बलाया अन वाँने क्यो,</verse>
				<verse number="2">“मने अणा मनकाँ पे बाळ आरी हे, काँके अणा मनकाँ ने मारी लारे तीन दन वेग्या हे अन वाँका नके खाबा वाते कई ने हे।</verse>
				<verse number="3">जदी मूँ वाँने भूकई घरे खन्दा देऊँ, तो वीं गेला मेंईस थाकन वाँको जीव घबरा जाई, काँके कुई तो घणा छेटीऊँ आया हे।”</verse>
				<verse number="4">वाँका चेला जबाव दिदो, “ईं हुन्ना काँकड़ में अणा मनकाँ ने खाणो खुवाबा के वाते खाणो कटेई ने मल सके?”</verse>
				<verse number="5">पछे ईसू वाँने पूँछ्यो, “थाँका नके कतरी रोट्याँ हे?” वाँकाणी जबाव दिदो “हात।”</verse>
				<verse number="6">पछे वीं भीड़ ने रेटे बेटबा का वाते क्यो अन वणा हात रोट्याँ लिदी अन परमेसर ने धन्नेवाद दिदो। पछे वणा आपणाँ चेला ने रोट्याँ तोड़न बाँटबा का वाते दिदी अन पछे वणा लोगाँ ने परोस दिदी।</verse>
				<verse number="7">वाँका नके थोड़ीक फोरी माछळ्याँ भी ही। वणा परमेसर ने धन्नेवाद केन वाँने भी बाँटबा वाते दे दिदी।</verse>
				<verse number="8">मनक खाणो खान धापग्याँ अन पछे बंची तकी रोट्याँ ने भेळी करन हात ठोपला भरिया।</verse>
				<verse number="9">वटे लगे-भगे च्यार हजार मनक वेई। पछे ईसू वाँने हिक दिदी।</verse>
				<verse number="10">अन वीं जट आपणाँ चेला की लारे नाव में बेटन दलमनूता नाम का परदेस में पराग्या।</verse>
				<verse number="11">पछे फरीसी ईसू नके आया अन वाँकाऊँ बेस करबा लागा। अन वाँकी परक करबा वाते वणाऊँ हरग को निसाण माँग्यो।</verse>
				<verse number="12">तो ईसू लाम्बो हाँ लेन वाँने क्यो, “ईं पीड़ी का मनक कस्योई निसाण काँ देकबो छावे? मूँ थाँने हाचेई केवूँ हूँ ईं जुग का मनकाँ ने कस्योई निसाण ने दिदो जाई।”</verse>
				<verse number="13">पछे वो वाँने छोड़न पाछो नाव में आग्यो अन समन्द का पेला पाल्ड़े परोग्यो।</verse>
				<verse number="14">ईसू का चेला खाणो लारे लाणो भूलग्या हा। वीं नाव में एक रोटी के बगर वाँका नके ओरी कई ने हो?</verse>
				<verse number="15">ईसू वाँने चेतावणी देन क्यो, “फरीसियाँ अन हेरोदेस का हाज्याऊँ बंचन रिज्यो।”</verse>
				<verse number="16">वाँकाणी होच-बच्यार करन केबा लागा के, आपणाँ नके तो रोटी कोयने हे।</verse>
				<verse number="17">ईसू जाणतो हो के, वी कई केरिया हे? ईं वाते यो पूँछ्यो, “रोटी ने हे, ओ थें काँ होच-बच्यार कररिया हो? कई, थें अबाणू भी ने हमज्यो कई, थाँकामें अकल कोयने?</verse>
				<verse number="18">थाँके आक्याँ हे, कई थें देक ने सको? थाँके कान्दड़ा हे, कई थें हुण ने सको? कई थाँने आद कोयने?</verse>
				<verse number="19">जदी में पाँच हजार मनकाँ ने पाँच रोट्याँ तोड़न दिदी, थाँकाणी वाँ टुका ने कतरी ठोपल्याँ में भरिया हा?” वाँकाणी क्यो, “बारा।”</verse>
				<verse number="20">अन ईसू पूँछ्यो, “जदी च्यार हजार मनकाँ का वाते हात रोट्याँ ही, तो थाँ कतरी ठोपल्याँ में वणा टुका ने भरन तोक्या हा?” वाँकाणी क्यो “हात।”</verse>
				<verse number="21">पछे ईसू वाँने क्यो “कई, थें अबाणू भी ने हमज्या?”</verse>
				<verse number="22">पछे वीं बेतसेदा नाम का गाम में आग्या। वटे कुई मनक ईसू का नके एक आन्दा ने लाया अन परातना किदी के, वो वींके हात लगावे।</verse>
				<verse number="23">वणा आन्दा मनक को हात पकड़्यो अन वींने गाम का बारणे लेग्या। वणा वींकी आक्याँ पे थूँक्यो। आपणो हात वींपे मेल्यो अन वींने पूँछ्यो “कई, थने दिकरियो हे?”</verse>
				<verse number="24">ऊपरे देकन वणी क्यो, “मने मनक दिकरिया हे। वी च्यारूँमेर रूँकड़ा के जस्यान चालता तका दिकरिया हे।”</verse>
				<verse number="25">जदी ईसू दूजी दाण वींकी आक्याँ पे हात मेल्यो, वणी आपणी आक्याँ पुरी तरियाऊँ खोल दिदी। वींने देकबा की तागत पाच्छी मलगी अन वो एकदम सई देकबा लागो।</verse>
				<verse number="26">पछे ईसू वींने घरे खन्दाता तका क्यो, ईं गाम में जाज्ये मती।</verse>
				<verse number="27">अन पछे ईसू अन वाँका चेला केसरिया देस का फिल्‍लिपी नगर का भड़े का गामाँ में पराग्या। गेला में ईसू आपणाँ चेला ने पूँछयो, “मारा वाते मनक कई केवे के, मूँ कूण हूँ?”</verse>
				<verse number="28">वाँकाणी जबाव दिदो, “बतिस्मा देबावाळो यहुन्नो, तो कुई मनक एलिया अन दूजाँ थने परमेसर का आड़ीऊँ बोलबावाळो मेंऊँ कस्योई एक माने हे।”</verse>
				<verse number="29">पछे ईसू वाँने पूँछ्यो, “अन थाँ मने कई केवो हो के, मूँ कूण हूँ?” पतरस वींने क्यो, “थूँ मसी हे।”</verse>
				<verse number="30">पछे वणा वाँने या चेतावणी दिदी के, “थाँ मारा बारा में ओ किंने भी मती केज्यो।”</verse>
				<verse number="31">अन वो वाँने हिकाबा लागो, “मनक का पूत(ईसू) ने घणो दुक जेळणो पेड़ी अन पंच, मोटो याजक अन मूसा का नेमा ने हिकाबावाळाऊँ वो भुला दिदो जाई अन हाँची में वो मारियो जाई अन पछे तीजे दन वो मरयाँ तका मूँ जीवतो वे जाई।”</verse>
				<verse number="32">वणा वाँने या बात हाँची बता दिदी। पछे पतरस वींने एक आड़ी लेग्यो अन तापड़्यो।</verse>
				<verse number="33">पण, ईसू पाच्छे फरन आपणाँ चेला ने देक्या अन पतरस ने तापड़ता तका बोल्या, “सेतान, माराऊँ छेटी वेजा। थाँरो होचणो परमेसर का आड़ीऊँ कोयने, पण मनकाँ का जस्यान हे।”</verse>
				<verse number="34">पछे, ईसू भी आपणाँ चेला की लारे मनकाँ की भीड़ ने बलई अन वाँने क्यो, “जदी कुई मारी लारे आणो छावे, तो वो आपणाँ खुद ने भुल जाई अन आपणी हूळी लेन मारा पाच्छे अई जावे।</verse>
				<verse number="35">काँके ज्यो भी आपणाँ जीव ने बंचाणो छावे, तो वो वींने गमाई। अन ज्यो कुई मारा वाते अन हव हमच्यारा का वाँते जीव देई, वींको जीव बंचायो जाई।</verse>
				<verse number="36">जदी कुई मनक आपणी जीव ने खोन आकी दनियाँ ने पा लेवे, तो वींको कई फायदो?</verse>
				<verse number="37">मनक आपणो जीव पावा का वाते कई ने दे सके हे।</verse>
				<verse number="38">जद्याँ कुई मारा अन मारी हिकऊँ, कुकरमी अन पापी जमानाऊँ हरमाई तो मूँ ज्यो मनक को पूत(ईसू) हूँ, जद्याँ पुवितर हरग-दुताँ की लारे परमेसर की मेमा में आऊँ, तो वींका वाते हरमाऊँ।”</verse>
			</chapter>
			<chapter number="9">
				<verse number="1">अन पछे ईसू वाँने क्यो, “मूँ थाँने हाँची बात केऊँ, वटे ज्यो ऊबा हे, वींमें कुई अस्या हे, ज्यो परमेसर का राज ने सगतिऊँ आता तका देक ने लेई, वतरे आपणी मोतने ने देकी।”</verse>
				<verse number="2">छे दन केड़े ईसू, पतरस, याकूब अन यहुन्ना ने लारे लेन एक ऊँचा मंगरा पे ग्या। वाँने छोड़न वटे ओरी कुई ने हा। वटे चेला का हामे ईसू को रूप बदलग्यो।</verse>
				<verse number="3">वींका गाबा अस्या चमकरिया हा धोळा-फट। जस्यान ईं धरती पे कस्यो भी धोबी अतरा ऊजळा ने धो सके।</verse>
				<verse number="4">एलियो अन मूसो भी वाँके हामे परगट व्या। वीं ईसुऊँ बाताँ कररिया हा।</verse>
				<verse number="5">जदी पतरस बोल्यो अन ईसुऊँ क्यो, “हो गरू, आ बात घणी रुपाळी हे के, माँ हारई अटे हा। माने तीन टापाँ बणाबा दे। एक थाँके वाते, एक मूसा के वाते अन एक एलिया का वाते।”</verse>
				<verse number="6">पतरस अन वाँका हण्डाळ्याँ घबराग्या ईं वाँते पतरस हमज ने पायो के, वाँने कई जवाब देणो छावे।</verse>
				<verse number="7">तद्याँ एक बादळो आयो अन वाँपे छाग्यो, बादळाऊँ अस्यान सबद निकळ्यो के, “यो मारो लाड़लो पूत हे, ईंकी हुणो।”</verse>
				<verse number="8">अन वणा जट च्यारूँमेर देक्यो, तो ईसू के लारे ओरी किंनेई ने देक्या।</verse>
				<verse number="9">जदी वी मंगराऊँ रेटे उतरिया हा, वी दाण ईसू वाँने आदेस दिदो, “थाँकाणी ज्यो भी देक्यो, वो हारोई दूजाँ ने मत बताज्यो, जतरे तईं मनक को पूत(ईसू) मरन पाछो जीवतो ने वेजावे।”</verse>
				<verse number="10">वाँकाणी यो आदेस मान लिदो, पण वीं होच-बच्यार करिया हा के, “मरन पाछो जीवतो वे उटी” आ बात कई हे? ईंको मतलब कई हे?</verse>
				<verse number="11">पछे वाँकाणी ईसुऊँ क्यो, “मूसा का नेमा ने हिकाबावाळा अस्यान काँ केवे के, एलिया को पेल्याँ आणो जरूरी हे?”</verse>
				<verse number="12">ईसू वाँने क्यो, “हा, हारी बात ने हव करबा वाते एलियो जरुर आई। पण मनक का पूत(ईसू) के वाते यूँ काँ लिक्यो हे के, वींने घणो दुक जेलणो पेड़ी अन मनक वींने नकार देई?</verse>
				<verse number="13">मूँ थाँने बताऊँ, एलियो आग्यो हे अन लोग वस्यानीस किदो जस्यान वीं छाता हा, अन वस्यानीस जस्यान परमेसर का बचना में लिक मेल्यो हे।”</verse>
				<verse number="14">जद्याँ वीं दूजाँ चेला के भड़े आया, तो वाँका च्यारूँमेर घणी भीड़ देकी अन वाँ देक्यो के वाँकी लारे मूसा का नेमा ने हिकाबावाळा भेजा-मारी कररिया हे।</verse>
				<verse number="15">अन ज्यूँई हारई जणा ईसू ने देक्या, तो वे अचम्बा में वेग्या अन नमस्कार करबा ने वाँका दयने दोड़्या।</verse>
				<verse number="16">तो पछे वणा वाँने पूँछ्यो, “थें वाँकाऊ कसी बात पे भेजा-मारी कररिया हो?”</verse>
				<verse number="17">भीड़भाड़ऊँ एक मनक जबाव दिदो, “हो गरुजी, मूँ आपणाँ बेटा ने थाँका नके लायो हूँ। वींमें एक हुगली आत्मा हे, ज्यो वींने बोलबा ने देवे।</verse>
				<verse number="18">जदी या हुगली आत्मा वींने धँधुणती, तो वा ईंने जमीं पे नाक दे अन ईंका मुण्डाऊँ जाग निकळे अन यो दाँत पीसबा लाग जावे अन कल्ड़ो वे जावे। में थाँरा चेलाऊँ ईं हुगली आत्माने बारणे निकाळबा के वाते परातना करई। पण, वीं ईंने ने निकाळ सक्या।”</verse>
				<verse number="19">पछे ईसू वाँने क्यो, “अरे बना विस्वास का मनक, मूँ थाँकी लारे कतरा दन तईं रेऊँ? अन कतरा दन थाँकी बाताँ ने सेण करूँ। छोरा ने मारा नके लावो।”</verse>
				<verse number="20">जदी वी छोरा ने वाँका नके लाया। अन जस्यानीस हुगली आत्मा ईसू ने देक्यो, तो वीं छोरा ने कल्ड़ो कर दिदो। वो नीचे पड़ग्यो अन तड़पबा लागो। वींका मुण्डामूँ जाग निकळबा लागा।</verse>
				<verse number="21">जदी ईसू वींका बापू ने पूँछ्यो, “यो अस्यान कतराक दनाऊँ हे?” बापू जबाव दिदो, “यो बाळपणाऊँ अस्यान हे।”</verse>
				<verse number="22">“हुगली आत्मा ईंने कई दाण मारबा वाते कदी तो वादी में फेंक दे अन कदी पाणी में। यद्याँ, थूँ कर सके, तो माकाँ पे बाळ करन भलो कर।”</verse>
				<verse number="23">ईसू वाँने क्यो, “थाँकाणी अस्यान काँ केरिया हो, ‘थाँ कर सको हो तो करो।’ विस्वास करबावाळा मनक के वाते हारोई वे सके हे।”</verse>
				<verse number="24">तो फटाकऊँ बाळक का बापू जोरू बोल्यो, “मूँ विस्वास करूँ हूँ, पण वो पाको ने हे। ईं वाते मारा पाको विस्वास करबा में मदत कर दे।”</verse>
				<verse number="25">जदी ईसू देक्यो, मनकाँ की भीड़ वाँका उपरातळी पड़री ही, तो वाँकाणी हुगली आत्माने हुकम दिदो, “हे छोरा ने बेरो-गूँगो करबावाळी आत्मा, मूँ थने केऊँ हूँ, ईंऊँ बारणे निकळजा अन पाच्छी ईंमें मत धसज्ये।”</verse>
				<verse number="26">जदी हुगली आत्मा हाका-भार मेली। छोरा ने घणा मरोड़ा आया अन हुगली आत्मा बारणे निकळगी, छोरो मरग्यो जस्यान दिकबा लागो। तो नरई जणा क्यो, “वो मरग्यो।”</verse>
				<verse number="27">पछे ईसू छोरा ने हातऊँ पकड़न बेटो किदो। तो वो ऊबो वेग्यो।</verse>
				<verse number="28">ईंका केड़े ईसू एक घरे पराग्या। जद्याँ वीं एकला हा, वीं दाण वाँका चेला वाँने पूँछ्यो, “में हारई जणा ईं हुगली आत्माने काँ ने काड़ सक्या?”</verse>
				<verse number="29">ईं बात पे ईसू वाँने क्यो, “असी हुगली आत्मा बना परातना किदा तका बारणे ने निकळ सके।”</verse>
				<verse number="30">पछे वाँकाणी वटूऊँ पराग्या, अन जद्याँ गलील का हिमाड़ा में वेन जारिया हा। वीं ने छारिया हा के, ईंकी किंने भी नंगे पड़े।</verse>
				<verse number="31">काँके वो आपणाँ चेला ने उपदेस देरियो हो, “मनक को पूत (ईसू) धोकाऊँ पकड़वायो जाई अन वे वींने मार देई। मरिया पछे तीन दन के केड़े वो पाछो जीवतो वे जाई।”</verse>
				<verse number="32">पण, आ बात वाँके हमज में ने आई अन ईसुऊँ आ बात पूँछबाऊँ दरपता हा।</verse>
				<verse number="33">पछे वी कफरनूम में आया। ईसू जदी घर में हा, वणा चेलाऊँ पूँछ्यो, “गेला में थें कस्यी बात पे बात-बच्यार कररिया हा?”</verse>
				<verse number="34">पण, वी छाना-माना रिया, काँके वे गेला में बात-बच्यार कररिया हा के, माँकाऊँ मोटो कूण हे?</verse>
				<verse number="35">तो वो बेटग्यो अन बारई चेला ने आपणाँ नके बलाया अन वाँने क्यो, “जदी कुई हारऊँ मोटो बणणो छावे, तो वींने हारऊँ फोरो अन दास बणन रेणो पेड़ी।”</verse>
				<verse number="36">अन पछे वीं एक फोराक बाळक ने लेन चेला का हामे ऊबो किदो अन छोरा ने आपणाँ खोळा में लेन क्यो,</verse>
				<verse number="37">“मारा नामऊँ ज्यो कुई आ बाळकाऊँ एक बाळक ने मान लेई, वो मने मान लेई। अन ज्यो कुई मने मानी वो मनेइस ने, पण जणी मने खन्दायो हे वींने भी मानी।”</verse>
				<verse number="38">यहुन्ने ईसू ने क्यो, “ओ गरुजी, माँकाणी एक मनक ने थाँका नामऊँ हुगली आत्माने बारणे काड़तो तको देक्यो हे। माँकाणी वींने रोकणो छाया, काँके वो माकाँ मईने को ने हे।”</verse>
				<verse number="39">पण, ईसू क्यो, “वींने रोको मती।” काँके ज्यो कुई मारा नामऊँ हव केरी, वो पछे कदी मने खराब ने केई।</verse>
				<verse number="40">वो ज्यो आपणो दसमण ने हे, वीं आपणी आड़ी हे।</verse>
				<verse number="41">ज्यो कुई मारा नामऊँ एक लोट्यो पाणी पाई, थाँने ईं वाते पाई के, थाँ मसी का हो। मूँ थाँने हाँची बात केऊँ के, वींने ईंको फळ हाँची मली।</verse>
				<verse number="42">पण ज्यो कुई ईं फोरामूँ कणी एक ने ज्यो मारा पे विस्वास राके हे, वींने पाप का गेला में लेजाई तो वींका वाते यो हव हे के, वाँकी गेंटी में एक गाणी को पाट बाँदन समन्द में फेंक देणो छावे।</verse>
				<verse number="43">यद्याँ थारो हात थाँराऊँ पाप करावे, तो ईंने काट दे। टूटो वेन हरग में जाणो हव हे, ईंऊँ के दो हाँतावाळा वेन नरक में जाबाऊँ जटे वादी कदी ने बजे,</verse>
				<verse number="44">जटे किड़ो ने मरे, जटे वादी कदी ने बजे।</verse>
				<verse number="45">जदी थारो पग थाँने पाप का गेला में ले जावे, तो वींने काट दो।</verse>
				<verse number="46">दो पगाँ को वेन नरक में जावाऊँ, खोड़्यो वेन हरग में जाणो हव हे।</verse>
				<verse number="47">यद्याँ थारी आँक थने पाप में नाके, तो वींने फोड़न बारणे निकाळ देणी। काण्यो वेन परमेसर का राज में जाणो हव हे, ईंऊँ के दो आक्याँ वेता तका नरक में जाणो।</verse>
				<verse number="48">जटे किड़ो ने मरे, जटे वादी कदी ने बजे।</verse>
				<verse number="49">“जस्यान के एक बली ने लूण छाँटन वींने उजळो करी, वस्यानई हारई मनकाँ ने दुक की वादीऊँ उजळो करी।</verse>
				<verse number="50">“लूण हव हे। पण, जदी लूण आपणो खार छोड़ देवे, तो वींने पाछो खारो कस्यान बणा सको? “खुद में उजळो करबावाळो लूण राको अन एक-दूजाऊँ सन्तोकऊँ रेवो।”</verse>
			</chapter>
			<chapter number="10">
				<verse number="1">पछे ईसू वीं जगाँ ने छोड़ दिदी अन यहूदियाँ का हिमाड़ा में यरदन नंदी का ईं पाल्डे आग्या। भीड़ च्यारूँमेरऊँ वाँका नके आबा लागी अन वो रोज उपदेस देतो, वस्यान देबा लागो।</verse>
				<verse number="2">पछे कुई फरीसी वाँका नके आया अन वाँकाणी ईसू ने फसाबा का वाते पूँछ्यो, “कई, कस्या भी मनक के वाते हव हे के, वो आपणी लुगई ने छोड़ दे?”</verse>
				<verse number="3">ईसू वाँने जबाव दिदो, “मूसे थाँने कई आग्या दिदी ही?”</verse>
				<verse number="4">वाँकाणी क्यो, “मूसे कस्याई मनक ने तलाक पतर लिकन आपणी लुगई ने छोड़बा को आदेस दिदो हो।”</verse>
				<verse number="5">ईसू वाँने क्यो, “मूसे थाँका कल्डा मन के वाते आ आग्या लिकी हे।</verse>
				<verse number="6">पण जद्याँऊँ दनियाँ बणी, वीं दाणऊँ परमेसर वाँने मनक अन लुगई का रूप में रच्या हा।</verse>
				<verse number="7">‘ईं वाते एक आदमी आपणाँ बई-बापू ने छोड़न आपणी लुगई का हाते मल्यो तको रेई।</verse>
				<verse number="8">अन वीं दुई एक डील वे जाई।’ ईं वाते वीं दुई दो ने पण एक वेई।</verse>
				<verse number="9">ईं वाते जाँने परमेसर मला दिदा हे, वाँने कुई मनक न्यारा ने करे।”</verse>
				<verse number="10">पछे वे हारई पाच्छा घरे ग्या, तो चेला ईसुऊँ अणी बात का बारा पूँछ्यो।</verse>
				<verse number="11">वे वाँने क्यो, “ज्यो कुई आपणी लुगई ने छोड़न दूजी लुगईऊँ नातो करे, तो वो पेली लुगई का खिलाप में कुकरम करे हे।</verse>
				<verse number="12">अन जदी कुई लुगई आपणाँ धणी ने छोड़ दे अन दूजाँ मनक का हाते नातो कर लेवे, तो वाँ कुकरम करे हे।”</verse>
				<verse number="13">पछे लोग-बाग ईसू का नके आपणाँ फोरा-फोरा बाळकाँ ने लाया के, वीं वाँका माते हात राक राकन आसिरवाद देवे पण, वींका चेला वाँने तापड़ दिदा।</verse>
				<verse number="14">जदी ईसू यो देक्यो, तो वाँने घणी रीस अई। पछे वणा चेला ने क्यो, “फोरा-फोरा बाळकाँ ने मारा नके आबा दो। वाँने रोको मती, काँके परमेसर को राज अस्या कुईस हे।</verse>
				<verse number="15">मूँ थाँने सई केऊँ हूँ के, ज्यो कुई परमेसर का राज ने एक फोरा बाळक जस्यान ने माने, वो वींमें कदी ने जा सकी।”</verse>
				<verse number="16">पछे वाँ बाळकाँ ने खोळा में लिदा अन वाँका माता पे हात मेलन वाँने आसिरवाद दिदो।</verse>
				<verse number="17">अन जदी ईसू निकळन गेला में जारिया हा, तो एक मनक वाँका आड़ी दोड़तो तको आयो, अन वाँका हामे गोडा टेकन क्यो, “ओ हाँचा गरुजी, अनंत जीवन पाबा का वाते मने कई करणो छावे?”</verse>
				<verse number="18">ईसू वींने जबाव दिदो, “थूँ मने हाँचो काँ केवे? परमेसर का बना ओरी कुई हाँचो कोयने।</verse>
				<verse number="19">थूँ परमेसर की आग्या जाणे हे, ‘हत्या ने करणी, कुकरम ने करणा, चोरी ने करणी, जूटी गवई ने देणी, छळ मत करज्ये अन आपणाँ बई-बापू को मान राकज्ये।’”</verse>
				<verse number="20">वीं मनक ईसू ने क्यो, “हे गरू, मूँ मारा नानपणऊँ आ हारी बाताँ ने मानतो आयो हूँ।”</verse>
				<verse number="21">ईसू हुदा वींका आड़ी नाळ्या अन वींने लाड़ऊँ देकन क्यो, “थने एक ओरी काम करणो हे, ज्यो भी थाँरा नके हे, वींने बेचन गरीबा में बाँट दे। हरग में थने खजानो मली, पछे थूँ आ अन मारा पाच्छे वेजा।”</verse>
				<verse number="22">ईसू का अस्यान केबाऊँ वींको मुण्डो उतरग्यो अन घणो दकी वेन परोग्यो, काँके वो घणो रिप्यावाळो हो।</verse>
				<verse number="23">ईसू च्यारूँमेर देकन आपणाँ चेला ने क्यो, “ज्यो रिप्यावाळो हे वींको परमेसर का राज में जाणो घणो दोरो हे।”</verse>
				<verse number="24">वाँकी बात पे चेला अचम्बा में पड़ग्या, पण ईसू वाँने केतो रियो, “मारा बाळकाँ, परमेसर का राज में जाणो घणो दोरो हे।</verse>
				<verse number="25">जस्यान ऊँट हुई का नाका मेंऊँ ने निकळ सके, वस्यानीस रिप्यावाळा को परमेसर का राज में जाणो घणो दोरो हे।”</verse>
				<verse number="26">वाँने ओरी घणो अचम्बो व्यो अन वे हारई एक-दूँजा ने पूँछबा लागा, “तो पछे कूण बंचायो जाई?”</verse>
				<verse number="27">ईसू वाँका आड़ी देकन क्यो, “मनकाऊँ तो ओ ने वे सके, पण परमेसरऊँ वे सके, काँके परमेसरऊँ हारोई वे सके हे।”</verse>
				<verse number="28">पछे पतरस वाँने केबा लाग्यो, “देको, माँकाणी तो हारोई छोड़न थाँरा पाच्छे वेग्या हाँ।”</verse>
				<verse number="29">ईसू क्यो, “मूँ थाँने हाँची केऊँ हूँ, कुई भी मारा वाते अन हव हमच्यार का वाते घर-बार, भई-बेन, बई-बापू, छोरा-छोरी अन खेत-कूड़ा हाराई ने छोड़े देई,</verse>
				<verse number="30">वींने ईं जमारा मेंऊँ हो गुणा हेला घर-बार, भई-बेन, बई, छोरा-छोरी अन खेत-कूड़ा ने मली, पण हताव का हाते आबावाळा जमाना में अनंत जीवन मली।</verse>
				<verse number="31">अन घणा जणा ज्यो आज हाराऊँ आगे हे, वीं हाराऊँ पाच्छे वे जाई। घणा जणा वे हे, ज्यो हाराऊँ पाच्छे हे, वीं हाराऊँ आगे वे जाई।”</verse>
				<verse number="32">पछे ईसू अन चेला यरूसलेम में जारिया हा अन जदी वीं गेला में हा, तो ईसू वाँकाऊँ आगे-आगे चालरिया हा। चेला अचम्बा में पड़ग्या अन ज्यो वाँके पाछे-पाछे चालरिया हा, वीं भी दरपवा लागा। जदी ईसू आपणाँ बाराई चेला ने न्यारा लेन वाँकाऊँ वे बाताँ केबा लागा, ज्यो ईसू पे आबावाळी ही।</verse>
				<verse number="33">“देको, आपीं यरूसलेम जारिया हाँ। मनक का पूत ने (ईसू) धोकाऊँ पकड़न मुक्य याजकाँ अन मूसा का नेमा ने हिकाबावाळा ने हूँप देई अन वीं वींने मोत को दण्ड देन, ज्यो यहूदी ने हे वाँने हूँप देई।</verse>
				<verse number="34">अन वीं वाँकी रोळ केरी अन वाँका पे थूँकी, वीं वाँके कोड़ा मारी अन पछे वींने मार नाकी, पण तीजे दन वो पाछो जीवतो वे जाई।”</verse>
				<verse number="35">पछे जद्याँ जब्दी को छोरा याकूब अन यहुन्नो वाँका नके आया अन बोल्या, “गरुजी, माँ छावाँ हाँ के, ज्यो भी थाँकाऊँ माँगा, थें माकाँ वाते करो।”</verse>
				<verse number="36">ईसू वाँने पूँछ्यो, “थाँ माराऊँ कई छारिया हो, ज्यो मूँ थाँका वाते करूँ?”</verse>
				<verse number="37">पछे वाँ वाँने क्यो, “जदी थाँकाणी थाँका मेमा का राज की गाद्दी पे बिराज्यो तो माँने ओ हुकम दो के, माँ दूयाँमेंऊँ एक तो थाँके डावा पाल्ड़े अन एक जीमणा पाल्ड़े बेटाँ।”</verse>
				<verse number="38">ईसू वाँने पूँछ्यो, “थें ने जाणो हो, थें कई मांगरिया हो? ज्यो दुक को प्यालो मूँ पिबा ने त्यार हूँ, कई थाँकाणी पीं सको? अन ज्यो बतिस्मो मूँ लेबा ने हूँ, कई थें वींने ले सको?”</verse>
				<verse number="39">वाँकाणी वाँने क्यो, “में वस्यान कर सका हाँ।” पछे ईसू वाँने क्यो, “थाँ वो प्यालो पिवो, ज्यो मूँ पीवूँ। थाँ वो बतिस्मो लेवो, ज्यो मूँ लेबा ने हूँ।</verse>
				<verse number="40">पण, मारा जीमणा अन डावा पाल्ड़े बेटबा की जगाँ देणी मारो हक को काम कोयने, पण वा जगाँ वणा मनकाँ का वाते हे जिंका वाते ईंने त्यार किदी हे।”</verse>
				<verse number="41">जद्याँ दूजाँ दस चेला ओ हुण्यो, तो वे याकूब अन यहुन्ना पे रीस करबा लागा।</verse>
				<verse number="42">पछे ईसू वाँने आपणाँ नके बलाया अन वाँने क्यो, “थें जाणो हो के, ज्यो यहूदी ने हे, वींका राज करबावाळा वाँका पे राज कररिया अन वाँका हाकम वाँपे दब्बेदारी कररिया हे।</verse>
				<verse number="43">पण, थाँकामें अस्यान कोयने हे। पण ज्यो कुई थाँकामूँ मोटो वेणो छावे, वो थाँको दास वणे।</verse>
				<verse number="44">अन ज्यो थाँकामें सबाऊँ मुक्यो बणबो छावे, वो हाराई को हाळी बणे।</verse>
				<verse number="45">काँके मनक को पूत (ईसू) सेवा कराबाने ने आयो, वो तो सेवा करबा आयो हे अन घणा जणा का छूटकारा का वाते आपणो जीव देबाने आयो हे।”</verse>
				<verse number="46">पछे वीं यरीहो नगर में आया अन जदी ईसू आपणाँ चेला अन घणी भीड़ के लारे यरीहो छोड़न जारिया हा, तो तिमाई को छोरो बरतिमाई नाम को एक आन्दो भिकारी गेला के एक पाल्ड़े बेटो हो।</verse>
				<verse number="47">जदी वणी हुण्यो ओ नासरत को ईसू हे, तो वणी कल्ड़ी हाका-भार किदी, “हे दाऊद का पूत, मारा पे दया कर।”</verse>
				<verse number="48">नरई लोगाँ वींने छानो रेवा का वाते तापड़्यो, पण वो ओरी ज्योरऊँ केबा लागो, “ओ दाऊद का पूत, मारा पे दया कर।”</verse>
				<verse number="49">जदी यो देकने ईसू रक्या अन बोल्या, “वींने मारा नके लावो।” तो वे लोग वीं आन्दा मनक ने बलान लाया अन वींने क्यो, “हिम्मत राक, ऊबो वे। वो थने बलारियो हे।”</verse>
				<verse number="50">वो आपणाँ उपरला गाबा छेटी फेंकन उछळ पड़्यो अन ईसू का नके आयो।</verse>
				<verse number="51">पछे ईसू वींने पूँछ्यो, “थूँ मारा नकूँ कई छावे हे?” वीं आन्दे ईसुऊँ क्यो, “ओ गरुजी, मूँ देकणो छाऊँ हूँ।”</verse>
				<verse number="52">जद्याँ ईसू बोल्यो, “परोजा, थाँरा विस्वासऊँ थूँ हव वेग्यो हे।” पछे वो वणीस दाण देकबा लाग्यो अन गेला में ईसू का पाच्छे चाल पड़्यो।</verse>
			</chapter>
			<chapter number="11">
				<verse number="1">पछे जदी वीं यरूसलेम के भड़े जेतुन का मंगरा पे बेतफगे अन बेतनियाँ नगर में पूग्या, तो ईसू आपणाँ चेला मूँ दो जणा ने ओ केन आगला गाम में खन्दाया के,</verse>
				<verse number="2">“थें आगला गाम में जावो। वींमें पूगताई एक गदेड़ी को बच्यो बन्दयो तको मली। जिंका पे पेल्या कुई ने बेटो तको हे, वींने खोलन अटे लावो।</verse>
				<verse number="3">अन जदी कुई थाँने पूछे, ‘थें ओ काँ कररिया हो?’ तो थाँकाणी केज्यो, ‘परबू ने ईंकी सावना हे, पाछो परबू ईंने जट खन्दा देई।’”</verse>
				<verse number="4">जदी वीं वटूँ पराग्या अन गेला का भड़े एक घर की पोळ में गदेड़ी को बच्यो बन्दयो तको देक्यो, तो वाँकाणी वींने खोलबा लागा।</verse>
				<verse number="5">थोड़ाक मनक, ज्यो वटे ऊबा हा, वणा पूँछ्यो, “थाँ यो कई कररिया हो? ईं गदेड़ी का बच्या ने काँ खोलरिया हो?”</verse>
				<verse number="6">ईसू का चेला वाँ लोगाँने आ बात अस्यान की, जस्यान ईसू वाँने बतई। ईं वाते वाँकाणी वाँने जाबा दिदा।</verse>
				<verse number="7">पछे वे गदेड़ी का बच्या ने ईसू का नके लेन आया। वाँकाणी वींपे गाबा मेल्या अन पछे ईसू वींपे बेटग्या।</verse>
				<verse number="8">घणा मनक वाँकी आवभगत करबा का वाते आपणाँ गाबा गेला में बसा दिदा अन घणा जणा खेताँऊँ डाळ्याँ काटन वटे नाक दिदी।</verse>
				<verse number="9">वे मनक ज्यो आगे हा अन ज्यो पाच्छे हा, बोलरिया हा, “परमेसर की जे हो, परबू का नामऊँ आबावाळा राजा ने परमेसर आसिरवाद दे।</verse>
				<verse number="10">आपणाँ बड़ाबा दाऊद को राज आरियो हे, वीं राज ने परमेसर आसिरवाद दे। हरग में परमेसर की जे हो।”</verse>
				<verse number="11">ईसू यरूसलेम का मन्दर में आया अन च्यारूँमेर हारी चिजाँ देकी। पण दन आँतवाने हो, ईं वाते वो बाराई चेला की लारे बेतनियाँ नगर में परोग्यो।</verse>
				<verse number="12">आगले दन जदी वे बेतनियाऊँ पाच्छा निकळरिया हा, तो ईसू ने भूक लागी।</verse>
				<verse number="13">थोड़ाक छेटी वाँने एक अंजीर को हरियो-भरियो रूँकड़ो नजर आयो। तो वीं फळ पाबा की आस में रूँकड़ा के भड़े ग्या, पण वाँने वटे पान्दड़ाइस दिक्या, काँके अंजीर का फळ लागबा की टेम कोयने ही।</verse>
				<verse number="14">जदी ईसू रूँकड़ा ने क्यो, “अबे कुई कदी थारो फळ ने खाई।” वींका चेला ओ हुण लिदो हो।</verse>
				<verse number="15">पछे वे यरूसलेम आया अन मन्दर में ग्या, तो ईसू वाँ लोगाँने ज्यो मन्दर में बेंचबा अन लेबावाळा लेण-देण कररिया हा, ईसू वाँने बाणे निकाळबो सरू कर दिदो। तो वे रिप्या को लेण-देण करबावाळा की तकता उळट-पुळट कर दिदा अन परेवड़ा बेंचबावाळा का बाजोट्या उळट-पुळट कर दिदा।</verse>
				<verse number="16">अन वणा किंने भी मन्दर का चोक मूँ कसी भी चिजाँ ने लेजाबा ने दिदी।</verse>
				<verse number="17">पछे वणा उपदेस देता तका क्यो, “परमेसर का बचना में ओ ने लिक्यो हे, ‘मारो घर हारई देसा का मनकाँ का वाते परातना करबा की जगाँ केवाई’ पण, थाँ ईंने ‘चोरा को ठाणो’ बणा दिदो हे।”</verse>
				<verse number="18">जदी मुक्य याजकाँ अन मूसा का नेमा ने हिकाबावाळा ओ हुण्यो, तो वींने मारबा को गेलो होदबा लागा। पण वे वाँकाऊँ दरपता हा, काँके हारई मनक वाँका उपदेसाऊँ अचम्बा में पड़ जाता हा।</verse>
				<verse number="19">पछे जदी दन आँतबा लागो तो ईसू अन वाँका चेला नगरऊँ बाणे निकळन पराग्या।</verse>
				<verse number="20">आगले दन हवेर पेल्याँ जदी ईसू आपणाँ चेला के लारे जारिया हा, तो वणा अंजीर का रूँकड़ा ने जड़मूँ हूक्यो तको देक्यो।</verse>
				<verse number="21">जदी पतरस वीं बात ने आद करन ईसुऊँ क्यो, “हो गरुजी, थाँ देको, जीं अंजीर का रूँकड़ा ने थाँ हराप दिदो हो, वो हुकग्यो हे।”</verse>
				<verse number="22">ईसू वाँने जबाव दिदो, “परमेसर पे विस्वास राक।</verse>
				<verse number="23">मूँ थाँने हाँची केऊँ हूँ, जदी कुई मंगरा ने ओ केवे के, ‘थूँ अटूँ उखड़न समन्द में जान पड़जा’ अन वींका मन में कस्यो भेंम ने वे अन परमेसर पे विस्वास राके, तो जस्यान वो केवे वस्यानीस वे जाई अन वींका वाते वस्योई वे जाई।</verse>
				<verse number="24">ईं वाते मूँ थाँने केऊँ हूँ, थाँकाणी परातना में ज्यो भी माँगो, विस्वास करो के, वो थाँने मलग्यो। तो थें ज्यो माँगो वो थाँने मल जाई।</verse>
				<verse number="25">अन जदी थाँकाणी परातना करबा ने ऊबा वेवो, तो कणी थाँको बुरो किदो वे, तो वींने माप कर दो। जींऊँ परमेसर ज्यो हरग में रेबावाळो थाँको बाप हे, थाँका पाप भी माप कर देई।</verse>
				<verse number="26">अन जदी थें माप ने करो, तो ज्यो हरग में थाँको बापू हे, वो थाँने भी माप ने करी।”</verse>
				<verse number="27">एक दाण पाच्छा वीं यरूसलेम आया। ईसू जदी मन्दर का चोक में फररिया हा, तो खास याजकाँ, मूसा का नेमा ने हिकाबावाळा अन दाना यहूदी नेता हारई वाँका नके आया।</verse>
				<verse number="28">अन पूँछ्यो, “थने ओ काम करबा को कई हक हे? ओ हक थने कूण दिदो?”</verse>
				<verse number="29">पछे ईसू वाँने क्यो, “मूँ थाँने एक बात पूँछू हूँ, जदी थाँकाणी मने जबाव दे देवो, तो मूँ भी थाँने बता देऊँ के, मूँ ओ काम किंका हकऊँ कररियो हूँ।</verse>
				<verse number="30">मने जबाव दो, ज्यो बतिस्मो यहुन्नो देतो हो, वो हक वींने कटूँ मल्यो परमेसरऊँ कन मनकाऊँ?”</verse>
				<verse number="31">वीं एक-दूजाऊँ बात-बच्यार करबा लागा, “आपाँ कई केवाँ? जदी आपीं ओ केवाँ के, ‘ओ हक वींने परमेसरऊँ मल्यो हे’, तो पछे वो केई, ‘थाँकाणी यहुन्ना पे विस्वास काँ ने किदो?’</verse>
				<verse number="32">पण, जदी आपाँ अस्यान केवाँ, ‘वो मनकऊँ मल्यो हो’, तो लोग-बाग आपाँ पे रिस्याँ बेळी।” वीं लोगाऊँ घणा दरपता हा, काँके हारई जणा ओ मानता हा के, यहुन्नो सई में एक परमेसर का आड़ीऊँ बोलबावाळो हो।</verse>
				<verse number="33">ईं वाते वाँकाणी ईसू ने जबाव दिदो, “में ने जाणा।” ईं बात पे ईसू वाँने क्यो, “तो पछे मूँ भी थाँने आ ने बतऊँ के, मूँ ओ हारोई काम किंका हकऊँ करूँ हूँ।”</verse>
			</chapter>
			<chapter number="12">
				<verse number="1">ईसू केणी में वाँने केबा लागो, “एक मनक अंगूरा को एक बाग लगायो अन वींके च्यारूँमेर हड़ो किदो। पछे अंगूरा को रस निकाळबा के वाते गाणी अन रुकाळी का वाते डागळो बणायो, अन हिंजारिया ने हिजारे देन जातरा पे परोग्यो।</verse>
				<verse number="2">पछे अंगूर पाकबा अन तोड़बा की टेम में आपणी पाँती लेबा का वाते वीं हिंजारिया का नके एक हाळी खन्दायो।</verse>
				<verse number="3">पण, वाँकाणी वीं हाळी ने पकड़न कुट्यो अन रिता हात पाछो नवाड़ दिदो।</verse>
				<verse number="4">पछे वणी बाग को मालिक दूजाँ हाळी ने वाँका नके खन्दायो। वाँ हिंजारिया वींको घणो माजणो बगाड़यो अन वींको मातो फोड़ नाक्यो।</verse>
				<verse number="5">वाँ पछे तीजा हाळी ने वाँका नके खन्दायो, जिंने भी वाँकाणी मार नाक्यो। अस्यान दूजाँ हारई हाळयाँ ने खन्दाया, जीमूँ वाँकाणी किंने तो कुट्या अन किंने तो नेमी मार नाक्या।</verse>
				<verse number="6">अबे तो वाँका नके वाँको एकाएक पूत बच्यो, ज्यो वींको लाड़लो पूत हो। पछे हाराई केड़े वींने अस्यान होचन वीं हिंजारिया नके खन्दायो के, वे मारा पूत को तो मान राकी।</verse>
				<verse number="7">वे हिंजारिया एक-दूँजा ने क्यो, ‘ओ तो वींको छोरो हे, ज्यो हकदार बेणी। आवो, आपाँ ईंने भी मार नाका, तो पछे ईंका मरयाँ केड़े ईंकी जमीं-जादाद हारोई आपणो वे जाई।’</verse>
				<verse number="8">अस्यान वाँकाणी वींने भी मार नाक्यो अन अंगूरा का बाग का बारणे फेंक दिदो।”</verse>
				<verse number="9">ईसू पूँछ्यो, “अंगूरा का बाग को मालिक वाँ हिंजारिया का हाते कई केरी? वो आन, ईं हिंजारिया ने मार नाकी अन बाग दूजाँ ने हूँप देई।</verse>
				<verse number="10">कई, थें सास्तर को ओ बचन ने भण्यो, “‘वो भाटो, जिंने कारीगर कई काम को ने हमज्यो, वोईस नीम को खास भाटो बण्यो।</verse>
				<verse number="11">ओ परबू परमेसर किदो, ज्यो आपणी नजर में अनोको हे।’”</verse>
				<verse number="12">यहूदी नेता ओ जाणरिया हे या केणी वणी आपणाँ खिलाप मेंईस क्यो हे, तो वे वींने पकड़वा वाते, कतरी कळा होचबा लागा। पण, दूजाँ मनकाऊँ वे दरपता हा, ईं वाते वाँने छोड़न पराग्या।</verse>
				<verse number="13">जदी यहूदी नेता फरीसी मनकाँ अन राजा हेरोदिया के दल का मनकाँ ने ईसू ने बाताँ में उळजाबा का वाते खन्दाया।</verse>
				<verse number="14">वे वींका नके आया अन बोल्या, “गरुजी, माँ जाणा हाँ के, थाँकाणी हाँची केवो अन दूजाँ मनक कई होची ईंको थाँने कई होस कोयने? काँके थाँ मनकाँ को मुण्डो देकन बाताँ ने करो हो, पण हाँचऊँ परमेसर का गेला की हिक देवो हो। तो बतावो रोम का राजा ने लगान देणी सई हे कन कोयने? आपाँने वींने लगान देणी छावे के, ने देणी छावे?”</verse>
				<verse number="15">ईसू वाँकी चाल हमजग्या। वे वाँने क्यो, “थें मारी परक काँ कररिया हो? एक चान्दी का रिप्यो लावो, तो मूँ वींने देकूँ।”</verse>
				<verse number="16">तो वे चान्दी को रिप्यो लेन आया। पछे ईसू वाँने पूँछ्यो, “ईंका पे किंको नाम अन छाप लगई तकी हे?” वाँकाणी क्यो, “रोम का राजा की।”</verse>
				<verse number="17">जदी ईसू वाँने बतायो, “ज्यो रोम देस का राजा को हे, वो रोम का राजा ने देदो अन ज्यो परमेसर को हे, वो परमेसर ने देदो।” तो वे घणा अचम्बा में पड़ग्या।</verse>
				<verse number="18">पछे कुई सदुकी मनक मरबा का पछे जीवतो उठबा में विस्वास ने करता हा। वीं वाँका नके आया अन वाँकाणी वाँने पूँछ्यो,</verse>
				<verse number="19">“ओ गरुजी, मूसे ओ नेम लिक्यो हे, ‘जदी किंको भई मर जावे अन वींकी लुगई के छोरा-छोरी ने वे, तो वींका भई वींऊँ ब्याव करले अन पछे आपणाँ भई का बंस ने आगे बड़ावे।’</verse>
				<verse number="20">एकदाण की बात हे एक जगाँ हात भई हा। हारऊँ मोटे भई ब्याव किदो अन बना छोरा-छोरी वींयाईं मरग्यो।</verse>
				<verse number="21">पछे दूजे भई भी वींकी लुगईऊँ ब्याव किदो, पण वो भी बना छोरा-छोरी मरग्यो। तीजे भई भी अस्यानीस किदो।</verse>
				<verse number="22">अन हातीई भायाँ अस्यानीस किदो, पण किंकेई भी छोरा-छोरी ने जनम्याँ अन पछे वा लुगई भी मरगी।</verse>
				<verse number="23">मरिया केड़े जी दन वीं भई पाच्छा जीवता वेई, तो बतावो, वा लुगई किंकी वेई? काँके वे हाती भई वीं लुगईऊँ ब्याव किदो हो।”</verse>
				<verse number="24">ईसू वाँने क्यो, “थें नेमीई डापा में पड़ग्या, ने तो सास्तर जाणो हो अन ने परमेसर की तागत ने।</verse>
				<verse number="25">काँके वीं मनक जदी मरिया तका पाच्छा जीवता वे जाई, तो वीं ब्याव ने केरी अन नेई छोरियाँ ने ब्याव का वाते देई, पण वीं हरग-दुत का जस्यान हरग में वेई।</verse>
				<verse number="26">मरिया तका जीवता वेन उठबा का बारा में थाँकाणी मूसा की किताब में जटे हळगता तका झाड़क्याँ का बारा में लिक्यो हे, कई थाँ वो ने भण्यो? वटे परमेसर मूसा ने क्यो हो, ‘मूँ अबराम को परमेसर हूँ, इसाक को परमेसर हूँ अन याकूब को परमेसर हूँ।’</verse>
				<verse number="27">वो मरिया तका को कोयने, पण जीवता मनकाँ को परमेसर हे। थें घणा डापा में पड़ग्या हो।”</verse>
				<verse number="28">पछे एक मूसा का नेमा ने हिकाबावाळो आयो अन वणी ईसू ने बात-बच्यार करता तका हुण्यो। यो देकन के ईसू सदुकियाँ ने हव तरियाऊँ जवाब दिदो हे, तो वणी ईसुऊँ पूँछ्यो, “हारऊँ मोटी आग्या कई हे?”</verse>
				<verse number="29">ईसू जबाव दिदो, “हारऊँ मोटी आग्या आ हे। ‘हे इजराएल हुण, बेस परबू परमेसरइस आपणो एक परबू हे।</verse>
				<verse number="30">हारई मनऊँ, जीवऊँ, अकलऊँ अन आपणी हारी तागतऊँ थने आपणाँ परबू परमेसरऊँ परेम करणो छावे।’</verse>
				<verse number="31">दूजी आग्या आ हे के, ‘आपणाँ पड़ोसीऊँ भी अतरो परेम कर, जतरो परेम थूँ आपणाँऊँ करे।’ अणा दुई आग्याऊँ मोटी दूजी कसी आग्या कोयने हे।”</verse>
				<verse number="32">ईं बात पे मूसा का नेमा ने हिकाबावाळे वाँने क्यो, “ओ गरुजी, थाँकी आ बात हव हे, थाँ तो हाँची बात क्यो। बेस एकीस परमेसर हे अन वींने छोड़न दूज्यो कुई कोयने।</verse>
				<verse number="33">हारई मनऊँ, हारई अकलऊँ, अन आपणी हारई तागतऊँ थने परमेसरऊँ परेम करणो छावे। अन आपणाँ पड़ोसीऊँ भी अतरो परेम कर, जतरो परेम थूँ खुदऊँ करे। अणा दुई आग्या ने मानणी, हाराई होमऊँ अन बलीदानाऊँ भी बड़िया हे।”</verse>
				<verse number="34">जदी ईसू ओ देक्यो के, वो मनक पुरी हमजदारीऊँ जबाव दिदो, तो वणा क्यो, “थूँ परमेसर का राजऊँ घणो छेटी कोयने।” ईंका पछे कुई भी ईसुऊँ कस्योई सवाल पूँछबा की हिम्मत ने किदी।</verse>
				<verse number="35">पछे ईसू मन्दर में उपदेस देता तका ओ सवाल किदो, “मूसा का नेमा ने हिकाबावाळा कस्यान केवे के, मसी दाऊद का वंस को हे?</verse>
				<verse number="36">दाऊद खुद पुवितर आत्मा की बात हुणन क्यो, “‘परबू परमेसर मारा परबूऊँ क्यो, मारा जीमणा पाल्ड़े बेट, जतरे मूँ थाँरा दसमणा ने पगाँ का बाजोट ने कर दूँ।’”</verse>
				<verse number="37">“दाऊद खुद वाँने ‘परबू’ केतो हो, तो पछे मसी दाऊद को बंस कस्यान वे सके?” एक मोटी भीड़ वाँकी बात राजी मनऊँ हुणरी ही।</verse>
				<verse number="38">आपणाँ उपदेस में वे क्यो, “मूसा का नेमा ने हिकाबावाळाऊँ हूँस्यार रेणो। वाँने आपणाँ जब्बा पेरन अटने-वटने गूमणो हव लागे हे। अन वीं छावे के, बजार में दूजाँ लोग माने नमस्कार केवे।</verse>
				<verse number="39">अन परातना घर में वे मोटी गादी पे बेटबो छावे हे। वे जीमण में भी हव जगाँ की आस करता रेवे।</verse>
				<verse number="40">वाँ लुगई जिंको धणी सान्त वेग्यो, वाँको धन कोसबो छावे हे। वीं दिकाबा का वाते मोटी परातना करे। वाँ मनकाँ ने घणी मोटी सजा मेली।”</verse>
				<verse number="41">ईसू मन्दर की दान-पेटी के हामे बेटन देकरियो हा के, लोग-बाग दान-पेटी में रिप्या कस्यान नाकरिया हे। घणा धनी मनक घणा रिप्या नाक्या।</verse>
				<verse number="42">पछे वटे एक गरीब लुगई जिंको धणी सान्त वेग्यो हो, वा अई अन वणी वींमें दो फोरा ताँबा का सिक्का नाक्या, ज्याँको मोल घणो कम हो।</verse>
				<verse number="43">पछे वे आपणाँ चेला ने बलाया अन वाँने क्यो, “मूँ थाँने हाँची बात केऊँ, सबाका का दानऊँ वाँ लुगई जिंको धणी सान्त वेग्यो, वींको दान हेलो हे।</verse>
				<verse number="44">काँके हारई आपणाँ रिप्या की बड़ोतरीऊँ नाक्या, पण ईं लुगई आपणी गरीबी हालत में भी ज्यो थोड़ाक रिप्या नके हा, वे हारई दे दिदा। वींका नके अतराक रिप्या हा, ज्यो वींका जीव को आसरो हो।”</verse>
			</chapter>
			<chapter number="13">
				<verse number="1">जदी वीं मन्दर मेंऊँ निकळरिया हा, तो ईसू के एक चेले क्यो, “गरुजी, देको ईं भाटा अन मेड़्या कतरी गजब की हे?”</verse>
				<verse number="2">ईं बात पे ईसू वाँने क्यो, “थूँ आ मोटी मेड़्या ने देकरियो हे, अटे एक भाटा पे दूज्यो भाटो टक्यो ने रेई, एक-एक भाटो हड़ा दिदो जाई।”</verse>
				<verse number="3">जदी वो जेतुन का मंगरा पे मन्दर का हामे बेटो हो, तो वींने पतरस, याकूब, यहुन्ना अन अन्दरियास एकेला में जान पूँछ्यो,</verse>
				<verse number="4">“माने बता, ओ हारोई कदी वेई? जदी ओ हारोई पूरो वेई, तो वींको निसाण कस्यान वेई?”</verse>
				<verse number="5">ईं बात पे ईसू क्यो, “हूँस्यार रेवो, कुई थाँकाऊँ छळ ने कर लेवे।</verse>
				<verse number="6">मारा नामऊँ घणा जणा आई अन थाँने बताई के, ‘मूँ मसी हूँ’, अन अस्यान वीं घणा जणा ने धोको देई।</verse>
				<verse number="7">जद्याँ थें लड़ायाँ अन लड़ायाँ का बारा में हुणो, तो घबराज्यो मती। अस्यान तो वेई, पण ओ अन्त कोयने हे।</verse>
				<verse number="8">एक देस दूजाँ देसऊँ लड़ेलो अन एक राज दूजाँ राज पे चड़ई केरी। कई जगाँ भूकम आई अन काळ पेड़ी। अस्यान दुक अन पिड़ा की सरुआत वेई।</verse>
				<verse number="9">“आपणाँ वाते खुद हेंचेत रेवो। वे मनक थाँने पकड़न कोरट में पेस केरी अन पछे थाँने वाँका परातना घर में मारी कुटी अन मारा वाते थाँने हाकम अन राजा के आगे ऊबो वेणो पेड़ी। ईंऊँ थाँ वाँने मारो हव हमच्यार हुणा सको।</verse>
				<verse number="10">पण, अन्त आबा का पेल्याँ ओ जरूरी हे के, हारा देसा में मारा हव हमच्यार को परच्यार किदो जावे।</verse>
				<verse number="11">अन जदी वीं थाँने पकड़न थाँका पे मुकदमो चलाई, तो पेल्याँ ओ होच मत करज्यो के, थाँने कई केणो हे? वी टेम थाँने ज्यो बात बतई जाई, वाँ बात बोलणी। काँके बोलबावाळा थें कोयने, पण पुवितर आत्मा हे।</verse>
				<verse number="12">भई, भई ने धोकाऊँ पकड़ान मरवाई। बाप बेटा ने धोकाऊँ मरवाई, छोरा-छोरी आपणाँ बई-बापू का खिलाप ऊबा वेन वाँने मरवाई।</verse>
				<verse number="13">मारा वाते हारई जणा थाँकाऊँ दसमणी राकी। पण, ज्यो अन्त तक सेण करी, वो बंचायो जाई।</verse>
				<verse number="14">“तद्याँ थें ‘उजाड़ करबावाळी अबकी चिजाँ ने’, जटे ने वेणी छावे, वटे ऊबी देको। (भणबावाळा हमज ले ईंको कई मतलब हे) जदी ज्यो मनक यहूदियाँ देस में वेई, वींने मंगरा में भाग जाणो छावे।</verse>
				<verse number="15">ज्यो मनक आपणाँ घर की मेड़ी पे वेई, वे घर मयने जान कई भी चीज वाँके लारे लेबा का वाते टेम खराब ने करे।</verse>
				<verse number="16">अन ज्यो खेता में वेई, वो आपणाँ जब्बो लेबा के वाते घरे ने जावे।</verse>
				<verse number="17">वे लुगायाँ जी गरबवती वेई अन ज्याँके दूद पीता बाळक वेई, वाँका वाते वे दन घणा दुक भरिया वेई।</verse>
				<verse number="18">थें परातना करो के, ओ हारई हियाळा का दनाँ में ने वेवे।</verse>
				<verse number="19">काँके वाँ दनाँ में अस्यी अबकी टेम आई, जस्यी अबकी टेम परमेसर ईं धरती ने रची हे, वींका पेल्याँऊँ आज तईं ने अई अन ने कदी आई।</verse>
				<verse number="20">अन जदी परमेसर वाँ दनाँ ने कम ने किदा वेता, तो ईं धरती पे कुई ने बंच सकतो। पण, वाँ गण्या-चुण्या मनक का वाते, जाँने वणा चुण्या हे, वाँ दनाँ ने कम किदा हे।</verse>
				<verse number="21">“वाँ दनाँ जदी कुई थाँने केवे ‘देको, ओ हे मसी अन वो हे मसी।’ तो वाँका पे विस्वास मत करज्यो।</verse>
				<verse number="22">काँके जूटा मसी अन जूटा मनक परमेसर का आड़ीऊँ बोलबावाळा आई। वे अस्या अस्या गजब का परच्या बतई अन अस्या अचम्बा में नाकबा का काम करी के, वे सके तो वे परमेसर का चुण्या तका लोगाँ ने भी डापा में नाक देई।</verse>
				<verse number="23">ईं वाते थें हूँस्यार रेज्यो। ईं हारी बाताँ में थाँने बगतऊँ पेल्याँई बता दिदी हे।</verse>
				<verse number="24">“वाँ दनाँ दक-पीड़ा की बगत के पछे सुरज काळो पड़ जाई अन चाँदऊँ वींकी चाँदणी जाती रेई।</verse>
				<verse number="25">आकासऊँ तारा नीचे पड़बा लाग जाई अन आकास की हारी सगत्याँ हाल जाई।</verse>
				<verse number="26">तद्याँ लोग, मनक का पूत ने सगती अन घणी मेमा के लारे बादळा में आता तका देकी।</verse>
				<verse number="27">पछे वे आपणाँ हरग दुताँ ने खन्दाई अन वीं धरती की च्यारई दिसा मेंऊँ अन बादळा का खुणाऊँ आपणाँ गण्या-चुण्या लोगाँ ने अगेटा केरी।</verse>
				<verse number="28">“अंजीर का रूँकड़ा की ईं केणीऊँ हिक लेवो। जदी वाँकी डाळयाँ कँवळी वे जावे, अन वींपे कूँपळा फूटबा लागे, तो थें जाण जावो के, उनाळो आबा में हे।</verse>
				<verse number="29">अस्यानीस थें वे हारी बाताँ वेती देको, तो जाण जाज्यो के, अबे वाँ टेम भडे़ आगी हे, वो बगत चालूँ वेबा मेंईस हे।</verse>
				<verse number="30">मूँ थाँने हाँची केरियो हूँ के, ईं पिड़ीयाँ का मनकाँ के मरबा के पेल्याँई हारी बाताँ वे जाई।</verse>
				<verse number="31">धरती अन आकास टळ जाई, पण मारो बचन कदी ने टळी।</verse>
				<verse number="32">“वीं दन का बारा में किंने पतो ने हे, ने हरग का दुताँ ने अन ने परमेसर का पूत ने। बेस, बापू परमेसरई जाणे हे।</verse>
				<verse number="33">देको, हूँस्यार अन जागता रो, काँके थाँ ने जाणो हो के, वा बगत कदी आई।</verse>
				<verse number="34">ओ अस्यानीस हे, जस्यान कुई मनक कस्यी यातरा पे जातो तको आपणाँ नोकराँ ने आपणो घर हूँप जावे, अन हारा ने न्यारो-न्यारो काम हूँप दे अन चोकीदार ने ओ हुकम दे के, वो जागतो रेवे।</verse>
				<verse number="35">ईं वाते थें भी जागता रो, काँके थाँ ने जाणो हो के मालिक कदी आ जावे। हाँज पड़्या आई कन आदी रात को। कूकड़ो बोलबा की टेम कन दन उगाँ।</verse>
				<verse number="36">अस्यो ने वे जावे के, वो अणाचेत को आ जावे, अन थें हूँता तका मलो।</verse>
				<verse number="37">ज्यो मूँ थाँने कूँ हूँ, वो हाराऊँ भी केऊँ के, जागता रो।”</verse>
			</chapter>
			<chapter number="14">
				<verse number="1">फसे को अन बना हाज्या की रोट्याँ का तेवार के दो दन पेल्याँ की बात हे, मुक्य याजकाँ अन मूसा का नेमा ने हिकाबावाळा एक असी जाळ वसारिया हा। जींऊँ वे ईसू ने ईं जाळ में नाकन बंदी बणान मार सके।</verse>
				<verse number="2">पण वीं केता हा के, “ओ तेवार का दनाँ में ने करणो छावे। दूजाँ मनक लड़ई-जगड़ो कर देई।”</verse>
				<verse number="3">जदी बेतनियाँ में ईसू समोन ज्यो पेल्याँ कोड़ी हो, वींके घर में जीमणो जिमरिया हाँ, वीं टेम एक लुगई धोळा भाटा का ठामड़ा में हव वाना को खरो अन मेंगा मोल को अंतर लेन अई। वणी ठामड़ा ने फोड़्यो अन अंतर ईसू का माता पे ऊँदा दिदो।</verse>
				<verse number="4">ईं बात पे उटे बेटा तका थोड़ाक मनक एक-दूँजा ने केबा लागा, “अंतर को अस्यान काँ नकसाण किदो?</verse>
				<verse number="5">ओ अंतर तीन सो चान्दी का रिप्याऊँ भी हेला रिप्या में बेंच देती अन पछे वीं धन ने गरीबा में बाँट देती।” वाँ हारई वींकी घणी खोट्याँ खादी।</verse>
				<verse number="6">जदी ईसू क्यो, “वींने काँ तंग करिया हो? छोड़ दो। वे तो मारा वाते एक हव काम किदो हे।</verse>
				<verse number="7">गरीब मनक तो रोज थाँकी लारे रेवे। ईं वाते हर-कदी थें वाँकी मदत कर सको हो। पण, मूँ थाँकी लारे रोज ने रेऊँ।</verse>
				<verse number="8">अणी लुगई वो काम किदो हे, ज्यो वा कर सके। अणी टेमऊँ पेल्याँई मारा सरीर ने गाड़बा वाते हव वाना को अंतर नाकन ईंने त्यार कर दिदो हे।</verse>
				<verse number="9">मूँ थाँने हाँची बात केऊँ, ईं हारी दनियाँ में जटे भी हव हमच्यार को परच्यार किदो जाई, वटे अणी लुगई ज्यो काम किदो हे, वीं बारा में बात-बच्यार करता तका आद कररिया करी।”</verse>
				<verse number="10">जदी यहूदो इसकरियोती, ज्यो ईसू का बारई चेला में एक हो। ज्यो मुक्य याजकाँ नके ईसू ने धोकाऊँ पकड़ाबा का वाते ग्यो।</verse>
				<verse number="11">वींकी बात हुणन वीं घणा राजी व्या अन वाँकाणी वाँने घणा रिप्या देबा को बचन दिदो। ईं वाते पछे यहूदो ईसू ने धोकाऊँ पकड़ाबा को मोको होदबा लागो।</verse>
				<verse number="12">बना हाज्या की रोट्याँ का तेवारऊँ पेलो दन जदी गारा का उनन्या ने फसे खाबा की बली चड़ावे, वीं दन चेला ईसू ने पूँछ्यो, “थूँ कई छावे हे, आपाणी कटे जान खाबा के वाते फसे को जीमणो बणावा।”</verse>
				<verse number="13">तद्याँ ईसू आपणाँ दो चेला ने ओ केन खन्दाया हाँ, “नगर में जावो, वटे थाँने एक मनक पाणी की कळी लेन मेली, थाँ वींका पाच्छे जाज्यो।</verse>
				<verse number="14">पछे जटे भी वो घर मयने जावे, वीं घर का मालिक ने केज्यो, ‘गरुजी क्यो हे जीमणा वाते माँको ओवरो कटे हे, जटे मूँ आपणाँ चेला की लारे फसे का तेवार को जीमणो कर सकूँ।’</verse>
				<verse number="15">पछे वो थाँने मेड़ी ऊपरे एक मोटो सज्यो अन त्यार किदो तको ओवरो बताई, वटे आपणाँ वाते जीमणो त्यार करो।”</verse>
				<verse number="16">जदी वींका चेला नगर दिने चाल्या, वटे हारी बात वस्यानीस मली, जस्यान ईसू वाँने की ही। तद्याँ वाँकाणी फसे का तेवार को जीमणो त्यार किदो।</verse>
				<verse number="17">जद्याँ हाँज वीं, तो ईसू आपणाँ बाराई चेला के लारे वटे आग्या।</verse>
				<verse number="18">जदी वे हारई जणा बेटन जीमणो जिमरिया हा, तद्याँ ईसू क्यो, “मूँ हाँची केऊँ के, थाँकामूँ एक जणो, ज्यो मारा हाते जीमरियो हे। वो मने धोकाऊँ पकड़ा देई।”</verse>
				<verse number="19">ईं बात पे वीं दकी व्या अन एक का पछे एक ईसुऊँ पूँछबा लागा, “कई वो मूँ तो ने हूँ?”</verse>
				<verse number="20">ईसू वाँने क्यो, “वो थाँ बारा चेला मूँ एक हे, ज्यो मारी लारे प्याला में रोटी डबोकरियो हे।</verse>
				<verse number="21">मनक का पूत ने तो मरणोइस हे, जस्यान वाँका वाते लिक्यो हे, पण ज्यो मनक का पूत ने पकड़ाई, वींका वाँते घणी दुक बात वेई। वीं मनक के वाते आ बात घणी हव वेती, जदी वो जनमई ने लेतो।”</verse>
				<verse number="22">जदी वे जीमणो जिमरिया हा, ईसू रोटी हात में लिदी अन धन्नेवाद की परातना किदी। रोटी ने तोड़ी अन वाँ चेला ने देता तका क्यो, “लो, ओ मारो डील हे।”</verse>
				<verse number="23">पछे वणा प्यालो लिदो, परमेसर ने धन्नेवाद दिदो अन वो चेला ने दिदो अन वणा हारई पिदो।</verse>
				<verse number="24">जदी ईसू क्यो, “ओ मारो लुई हे, यो परमेसर का नवा करार की हेन्याणी हे, ज्यो घणा जणा के वाते वेवाड़्यो ग्यो हे।</verse>
				<verse number="25">थाँने हाँची केऊँ के, अबे मूँ वीं दन तईं अंगूरा को रस ने छाकूँ, जदी परमेसर का राज में नवा अंगूरा को रस ने पीऊँ।”</verse>
				<verse number="26">तद्याँ एक भजन गान वीं हाराई जेतुन का मंगरा पे पराग्या।</verse>
				<verse number="27">ईसू वाँने क्यो, “थें हारई मने छोड़न भाग जावो। काँके परमेसर का बचना में लिक्यो हे, ‘मूँ गारा की रुकाळी करबावाळा ने मार नाकूँ अन गारा बकर जाई।’</verse>
				<verse number="28">पण, जीवतो वेबा के केड़े मूँ थाँकाऊँ पेल्याँई गलील परो जाऊँ।”</verse>
				<verse number="29">जदी पतरस बोल्यो, “ईं हारई थने छोड़ देई। पण, मूँ थने कदी ने छोड़ूँ।”</verse>
				<verse number="30">ईं बात पे ईसू वींने क्यो, “मूँ थने हाँची केऊँ, आज राते कूकड़ा के दो दाण बोलबाऊँ पेल्याँ थूँ मने तीन दाण ओळकबाऊँ नट जाई।”</verse>
				<verse number="31">ईं बात पे पतरस ओरी कल्ड़ो बोल्यो, “यद्याँ मने थाँरा हाते मरणो भी पड़े, तो भी मूँ थने ने नटूँ।” अन दूजाँ हाराई चेला भी अस्यानीस क्यो।</verse>
				<verse number="32">पछे वे एक असी जगाँ पे आया, जिंने गतसमने को बाग केता हा। वटे ईसू आपणाँ चेलाऊँ क्यो, “जतरे मूँ परातना करूँ, थें अटेईस बेटो।”</verse>
				<verse number="33">पतरस, याकूब अन यहुन्ना ने भी वो आपणी लारे लेग्यो। वो घणो दकी अन परेसान वेरियो हो।</verse>
				<verse number="34">वे वाँने क्यो, “मारा मन में घणो दुक हे, जींऊँ मारो जीव निकळबा में हे। थें अटे रुको अन जागता रेवो।”</verse>
				<verse number="35">पछे थोड़ाक आगे जान वे धरती पे उन्दो पड़न परातना किदी के, यद्याँ वे सके तो यो दुक को टेम ने मारापूँ टळ जावे।</verse>
				<verse number="36">पछे वो बोल्यो, “बापू, ओ मारा बापू! थाँरा वाते हारोई काम होरो हे। ईं दुक का प्याला ने माराऊँ छेटी कर दे। पण ज्यो मूँ छाऊँ वो ने, पण ज्यो थूँ छावे वोईस कर।”</verse>
				<verse number="37">पछे वो पाछो आयो, तो आपणाँ चेला ने हुता देकन पतरसऊँ क्यो, “समोन, थूँ हूँरियो हे? कई थूँ एक घड़ी भी ने जाग सक्यो?</verse>
				<verse number="38">जागता रेवो अन परातना करो, जींऊँ थाँ कस्यी भी जाँच-परक में ने पड़ो। आत्मा तो त्यार हे, पण सरीर घणो दुबळो हे।”</verse>
				<verse number="39">अन ईसू पाछो परोग्यो अन वईस बात लेन परातना करबा लागो।</verse>
				<verse number="40">जदी वो दूजी दाण पाछो आयो, तो वे वाँने पाच्छा हूँता तका देक्या। वाँकी आक्याँ में नींद भरी ही। वाँने कई ने हुजरियो हो, वे कई जबाव देवे?</verse>
				<verse number="41">वो तीजी दाण पाछो आन वाँने क्यो, “कई, थें अबाणू भी हुता अन रियाम्बो लेरिया हो? बेस, वा घड़ी आ पूगी हे, जदी मनक को पूत(ईसू) धोकाऊँ पकड़ान पाप्याँ का हाताँ में हूँप्यो जाई।</verse>
				<verse number="42">ऊबा वे जावो, आवो चाला। देको, मने धोकाऊँ पकड़बावाळा आरिया हे।”</verse>
				<verse number="43">ईसू अस्यान बोलरियो हो के, वींका बारई चेला मूँ एक यहूदो वटे आयो। वींका लारे लाट्याँ-तलवाराँ लिदी तकी एक टोळी ही। जिंने मुक्य याजकाँ, मूसा का नेमा ने हिकाबावाळा अन दाना यहूदी नेता खन्दई ही।</verse>
				<verse number="44">धोकाऊँ पकड़बावाळे वाँने ओ इसारो किदो, “मूँ जिंके गळे मलूँ, वोईस ईसू हे। वींने बन्दी बणा लिज्यो अन पकड़न पूरा हेंचेतऊँ ले जाज्यो।”</verse>
				<verse number="45">जस्यानी यहूदो वटे आयो, वो ईसू का नके जान क्यो, “गरुजी” अन वाँके गळे मल्यो।</verse>
				<verse number="46">पछे वाँकाणी ईसू ने पकड़न बन्दी बणा दिदा।</verse>
				<verse number="47">तो ईसू को एक चेलो, ज्यो वाँका नके ऊबो हो, आपणी तरवार निकाळन मायाजक का एक नोकर पे चला दिदी, जींऊँ वींको कान्दड़ो कटग्यो।</verse>
				<verse number="48">पछे ईसू वाँने क्यो, “कई, मूँ अपरादी हूँ? ज्यो थाँ मने लाट्याँ-तलवाराँ लेन पकड़बा आया हो।</verse>
				<verse number="49">रोज मन्दर में उपदेस देतो तको मूँ थाँकी लारे हो, पण थाँ मने ने पकड़्यो। अबे अस्यान, ईं वाते व्यो के, परमेसर का सास्तर को बचन पूरो वे सके।”</verse>
				<verse number="50">पछे वींका हारई चेला वींने छोड़न भागग्या।</verse>
				<verse number="51">बना गाबा पेरियाँ अन चादरो ओड़या तको एक मोट्यार वाँका पाछे-पाछे आयो, तो मनक वींने पकड़बा लागा।</verse>
				<verse number="52">पण, वो आपणो चादरो छोड़न उगाड़ो-पुगाड़ो भागग्यो।</verse>
				<verse number="53">वे ईसू ने मायाजक का नके लेग्या। पछे हारई मुक्य याजकाँ, दाना यहूदी नेता अन मूसा का नेमा ने हिकाबावाळा अगेटा व्या।</verse>
				<verse number="54">पतरस वाँऊँ छेटी रेतो तको वाँका पाच्छे मायाजक की गवाड़ी का मयने पराग्यो अन वटे पेरादारा का हाते बेटन तापबा लागो।</verse>
				<verse number="55">हारई मुक्य याजकाँ अन यहूदियाँ की पुरी महासबा ईसू ने मोत की सजा देबा के वाते वाँका विरोद में सबूत होदरी ही, पण वे होद ने सक्या।</verse>
				<verse number="56">कतरई जणा वींका विरोद में गवई दिदी, पण वाँकी गवई जूटी ही अन एक हरीकी ने ही।</verse>
				<verse number="57">पछे कुई मनक ऊबा व्या अन वींका विरोद में जूटी गवई देता तका केबा लागा,</verse>
				<verse number="58">“माँकाणी ईंने ओ केतो हुण्यो के, ‘मनक का हाताऊँ बण्या मन्दर ने मूँ हल्डा देऊँ अन पछे तीन दन में दूज्यो मन्दर बणा देऊँ, ज्यो मनकाऊँ बण्यो तको ने वेई।’”</verse>
				<verse number="59">पण, ईंमें वाँकी गवायाँ एक जस्यी कोयने ही।</verse>
				<verse number="60">जदी वाँका हामे मायाजक ऊबो वेन ईसू ने पूँछ्यो, “ईं मनक, थाँरा विरोद में ईं गवायाँ देरिया हे, थूँ खुद ने बंचाबा का वाते काँ ने बोलरियो हे?”</verse>
				<verse number="61">ईं बात पे ईसू छाना-माना रिया। कई जबाव ने दिदो। मायाजक वाँने पाछो पूँछ्यो, “कई, थूँ मेमामय परमेसर को पूत मसी हे?”</verse>
				<verse number="62">ईसू बोल्यो, “मूँ हूँ, थें मनक का पूत ने, वीं सगतीवान का जीमणा पाल्ड़े बेटो अन हरगऊँ आता तका बादळा में देको।”</verse>
				<verse number="63">मायाजक आपणी रीसऊँ जब्बो फाड़न क्यो, “माने ओरी गवई की जरूत ने हे।</verse>
				<verse number="64">थाँ ईंने परमेसर की नन्दयाँ करतो तको हुण्यो हे। अबे थाँको कई बच्यार हे?” वे हारई वाँने अपरादी केता तका क्यो, “ईंने मोत की सजा मलणी छावे।”</verse>
				<verse number="65">जदी मनक वींपे थूँक्यो अन वींको मुण्डो ढाँकन मुक्की ठोकी अन केबा लागा, “आगेवाणी करन बोल थारे कूण ठोकी?” अन पछे पेरादारा वींने पकड़न रेपटाँ मारी।</verse>
				<verse number="66">पतरस अबाणू रेटे गवाड़ी में बेटो हो मायाजक की एक दासी अई।</verse>
				<verse number="67">जदी वे पतरस ने वटे तापतो तको देक्यो, तो ध्यानऊँ वींने ओळकन बोली, “थूँ तो नासरत का ईसू का लारे रेतो हो?”</verse>
				<verse number="68">पण, पतरस नटग्यो अन केबा लागो, “मूँ ने जाणूँ हूँ अन थूँ कई केरी हे मारी हमज में ने अईरो हे।” ओ केता तका वो डेळी तक परोग्यो अन पछे कूकड़ो बोल्यो।</verse>
				<verse number="69">वाँ दासी जदी वींने दूजी दाण देक्यो, तो वा उटे ऊबा तका मनकाँऊँ पाच्छी केबा लागी, “ओ मनक वाँ मनकाँ मूँ एक हे।”</verse>
				<verse number="70">पतरस पाछो नटग्यो। पछे थोड़ीक देर केड़े उटे ऊबा मनक पतरस ने क्यो, “हाँची में थूँईस हे, वाँ मनकाँ मूँ एक, काँके थूँ गलील को हे।”</verse>
				<verse number="71">जदी पतरस बोल्यो, “मूँ होगन खान हाँची केरियो। यद्याँ मूँ हाँची ने केरियो हूँ, तो परमेसर मने दण्ड दे। जिंके बारा में थाँकाणी बात कररिया हो, वीं मनक ने मूँ ने जाणूँ।”</verse>
				<verse number="72">जट दूजी दाण कूकड़ो बोल्यो अन पतरस ने वीं टेम पे ईसू का सबद आद आग्या, ज्यो वाँकाणी क्या हा, “कूकड़ा के दो दाण बोलबाऊँ पेल्याँ थूँ मने तीन दाण ओळकबाऊँ नट जाई।” तो पतरस मन में ओ होचन कल्ड़ो-कल्ड़ो रोबा लागो।</verse>
			</chapter>
			<chapter number="15">
				<verse number="1">जस्यानी भाग-फाट्याँ वणा मुक्य याजकाँ, मूसा का नेमा ने हिकाबावाळा, दाना यहूदी नेता अन हारी यहूदी महासबा एक सला किदी। वे ईसू ने बाँदन लेग्या अन वींने पिलातुस ने हूँप दिदो।</verse>
				<verse number="2">पिलातुस वींने पूँछ्यो, “कई, थूँ यहूदियाँ को राजा हे?” ईसू जबाव दिदो, “अस्यान थूँ केरियो हे।”</verse>
				<verse number="3">पछे मुक्य याजकाँ वींपे नरई दोस लगाया।</verse>
				<verse number="4">पिलातुस वींने दूजी दाण पूँछ्यो, “कई, थने जबाव ने देणो हे? देक, वे कतरी बाताँ को थाँरा पे दोस लगारिया हे।”</verse>
				<verse number="5">पण, ईसू अबे भी कई जबाव ने दिदो। ईं बात पे पिलातुस ने घणो अचम्बो व्यो।</verse>
				<verse number="6">हारई फसे का तेवार पे कस्याई बन्दी ने छोड़बा की एक रीत ही, जिंने लोग छाता हाँ, वाँका वाते पिलातुस वींने छोड़ देतो हो।</verse>
				<verse number="7">वीं टेम बरब्बा नाम को एक बन्दी, वो दंगो करबावाळा का हाते जेळ में हो, जणी लड़ई में लोगाँ की हत्या किदी ही।</verse>
				<verse number="8">लोग आया अन पिलातुसऊँ पूँछबा लागा के, पिलातुस वाँका वाते वस्यानीस करे जस्यान वो वाँका वाते करतो आयो हे।</verse>
				<verse number="9">पिलातुस वाँने पूँछ्यो, “कई, थें छावो हो के, मूँ थाँका वाते यहूदियाँ का राजा ने छोड़ दूँ?”</verse>
				<verse number="10">पिलातुस ईं वाते क्यो हो, काँके वो जाणतो हो के, मुक्य याजकाँ ईसू ने रिस्याँ बळता तका वींने हूँपवा वाते पकड़ायो हे।</verse>
				<verse number="11">पण, मुक्य याजकाँ भीड़ ने ऊँसी दिदी, वीं ईसू की जगाँ वाँका वाते बरब्बा ने छोड़े दे।</verse>
				<verse number="12">पण, पिलातुस लोगाऊँ पाछो पूँछ्यो, “जिंने थें यहूदियाँ को राजा केवो, वींको मूँ कई करूँ बतावो?”</verse>
				<verse number="13">वणा जबाव में हाका करन क्यो, “वींने हूळी पे चड़ा दो।”</verse>
				<verse number="14">जदी पिलातुस वाँने पूँछ्यो, “काँ, वे अस्यो कई अपराद किदो?” पण, वाँ मनकाँ ओरुँ कल्ड़ो हाको करन क्यो, “वींने हूळी पे चड़ा दो।”</verse>
				<verse number="15">पिलातुस भीड़ ने राजी करणो छातो हो, ईं वाते वे वाँका वाते बरब्बा ने छोड़ दिदो अन ईसू के कोड़ा लगाया अन हूळी पे चढाबा का वाते ने सपायाँ ने हूँप दिदो।</verse>
				<verse number="16">पछे सपायाँ वींने रोम का राजपाल के मेल की गवाड़ी में लेग्या। अन लारे का सपायाँ की पुरी फोज बला लिदी।</verse>
				<verse number="17">पछे वाँ ईसू ने दरबारी गाबा पेराया अन काँटा को एक मुकट बणान वींका माता पे मेल दिदो।</verse>
				<verse number="18">पछे वींकी रोळ करबा के वाते नमस्कार करन केबा लागा, “यहूदियाँ का राजा की जे हो।”</verse>
				<verse number="19">वे वींका माता पे लाटी ठोकरिया हा। वे वींपे थूँकरिया अन आगे गोडा टेकन धोग देरिया हा।</verse>
				<verse number="20">अस्यान जदी वाँकी रोळ करन, वींका दरबारी गाबा उतार्या अन वींने आपणाँ खुद का गाबा पेरा दिदा अन पछे वींने हूळी पे चड़ाबा ने लेग्या।</verse>
				<verse number="21">वाँने कुरेन को रेबावाळो सिमोन नाम को एक मनक गेला में मल्यो, वो गाममूँ नगर में आरियो हो। वो सिकन्दर अन रूपूस को बाप हो। सपायाँ वींने दरपान क्यो के, वो ईसू की हूळी तोकन चाले।</verse>
				<verse number="22">पछे वे ईसू ने गलगता नाम की जगाँ पे लेग्या। जिंको मतलब “कपाळ की जगाँ।”</verse>
				<verse number="23">जदी वाँ वींने मीर नाम की ओगद मलायो तको खाटा अंगूरा को रस पिबा ने दिदो। पण, वाँकाणी वींने ने पिदो।</verse>
				<verse number="24">पछे वींने हूळी पे चड़ा दिदो अन वाँका गाबा कूणी लेई, वींका वाते गोट्याँ नाकी।</verse>
				<verse number="25">हवेर पेल्याँ नो बजी ही, जदी वाँकाणी वींने हूळी पे चड़ा दिदो हो।</verse>
				<verse number="26">अन वाँको दोसपतर लिकन वाँका ऊपरे लगा दिदो, “यहूदियाँ को राजा।”</verse>
				<verse number="27">वींकी लारे दो डाकू ने हूळ्याँ पे चड़ाया, एक वींका जीमणा पाल्ड़े अन दूज्यो डावा पाल्ड़े।</verse>
				<verse number="28">अणीऊँ परमेसर को ओ बचन पूरो व्यो के, वो अपरादिया की लारे गण्यो जाई।</verse>
				<verse number="29">वींका भड़े निकळता तका लोग-बाग आपणो मातो ठणकान, वींकी नन्दयाँ करन केरिया हा, “हा, हा! थूँईस हे, ज्यो तीन दनाँ में मन्दर ने हल्डान पाछो बणाबावाळो।</verse>
				<verse number="30">अबे हूळीऊँ रेटे उतर आ अन खुद ने तो बंचा ले।”</verse>
				<verse number="31">अस्यानीस मुक्य याजकाँ अन मूसा का नेमा ने हिकाबावाळा भी ईसू की रोळ किदी अन वीं एक-दूँजा ने केबा लागा, “ओ दूजाँ ने बंचातो हो, पण खुद आपणाँ ने बंचा ने सक्यो।</verse>
				<verse number="32">अबे यो मसी ज्यो इजराएल को राजा हे, हूळीऊँ रेटे उतर आवे, तो माँकाणी ओ देकन विस्वास कर सका।” अन वाँ दुयाँ, ज्यो वाँकी लारे हूळ्याँ पे चड़ाया हा, वीं वींकी नन्दया कररिया हा।</verse>
				<verse number="33">पछे हारई दनियाँ में दपराँ की बारा बज्याऊँ लेन तीन बज्या तईं अन्दारो रियो।</verse>
				<verse number="34">दन की तीन बज्या कल्ड़ो हाको करन ईसू क्यो, “इलोई, इलोई, लमा सबकतानी?” ईंको मतलब हे, “हे मारा परमेसर, हे मारा परमेसर, मने थें काँ छोड़ दिदो?”</verse>
				<verse number="35">ज्यो वाँका भड़े हो, वाँ जदी ओ हुण्यो। तो वे बोल्या, “हुणो, ओ एलिया ने बलारियो हे।”</verse>
				<verse number="36">जदी एक मनक दोड़न खाटा अंगूरा का रस में डूब्यो तको रुँई को फुम्बो एक कामड़ी में टाँकन लायो अन ईसू ने सूँकवा का वाते दिदो अन क्यो, “रुको, देकाँ ईंने रेटे उतारबा ने एलियो आवे कन ने आवे।”</verse>
				<verse number="37">पछे ईसू ज्योरऊँ हाको किदो अन जीव छोड़ दिदो।</verse>
				<verse number="38">तद्याँईस मन्दर को परदो ऊपरेऊँ रेटे तक फाटन दो टुका वेग्यो।</verse>
				<verse number="39">हो सपायाँ का हाकम, ज्यो ईसू का हामे ऊबो हो, वींने बोलतो तको हुण्यो अन देक्यो के, वींको जीव कस्यान निकळयो। वणी क्यो, “ओ मनक हाँची में परमेसर को पूत हो।”</verse>
				<verse number="40">घणी लुगायाँ छेटीऊँ देकरी ही, जिंमें मरियम मगदलीनी, फोरा याकूब अन योसेस की माँ मरियम अन सलोमी ही।</verse>
				<verse number="41">जदी ईसू गलील में हो। तो लुगायाँ वींने मानती अन वींकी सेवा-चाकरी करती, ओरी घणी लुगायाँ ही, ज्यो वींकी लारे यरूसलेम तईं अई ही।</verse>
				<verse number="42">हाँज पड़गी अन आराम का दन का पेल्याँ को दन त्यारी करबा को दन हो।</verse>
				<verse number="43">ईं वाते अरमतिया को यूसप आयो। वो यहूदी मासबा को मान्यो तको नेतो हो अन परमेसर का राज के आबा की बाट ज्योतो हो। वो हिम्मत करन पिलातुस का भड़े ग्यो अन ईसू की लास माँगी।</verse>
				<verse number="44">पिलातुस ने घणो अचम्बो व्यो के, वो अतरो वेगो कस्यान मरग्यो। वे सपायाँ का हाकम ने बलायो अन वींने पूँछ्यो, “कई, वींने मरिया ने नरी देर वेगी?”</verse>
				<verse number="45">जदी वे सपायाँ का हाकमऊँ ईसू की मोत का बारा में हुण लिदो, तो यूसप ने ईसू की लास देबा को हुकम दिदो।</verse>
				<verse number="46">पछे यूसप हण का बणया तका गाबा मोल लिदा अन ईसू की लास ने हूळीऊँ रेटे उतारी, वींकी लास ने वी गाबा में पलेट लिदी अन वींने एक कबर में मेल दिदी। वाँ कबर मंगरा ने काटन बणई तकी ही अन पछे कबर का मुण्डा पे एक भाटो हरका दिदो।</verse>
				<verse number="47">मरियम मगदलीनी अन योसेस की माँ मरियम देकरी ही के, ईसू की लास कटे मेली हे।</verse>
			</chapter>
			<chapter number="16">
				<verse number="1">आराम का दन निकळ्या केड़े मरियम मगदलीनी, सलोमी अन याकूब की माँ मरियम ईसू की लास के वाते हव वाना की चिजाँ मोल लिदी।</verse>
				<verse number="2">हपता के पेले दन दितवार ने भाग-फाट्याँ को सुरज निकळताईं वे कबर पे गी।</verse>
				<verse number="3">वीं एक-दूँजा ने पूँछरी ही, “आपणाँ वाते कबर का मुण्डा पूँ भाटो कूण हरकाई?”</verse>
				<verse number="4">जद्याँ पछे वाँकाणी आक्याँऊँ देक्यो के, कबर पूँ वो भाटो ज्यो मोटो हो, वो छेटी हरक्यो तको हे।</verse>
				<verse number="5">पछे जदी वे कबर में गी, तो वाँकाणी देक्यो एक मोट्यार धोळा-फट गाबा पेरिया जीमणा पाल्ड़े बेटो हे, तो वे दरपगी।</verse>
				<verse number="6">पछे वीं मोट्यार वाँने क्यो, “दरपो मती, थें ज्यो ईसू नासरत नगर को रेबावाळो हो, जिंने थाँ होदरी हो, जिंने हूळी पे चड़ायो हो, वो जीवतो वेग्यो हे। वो अटे कोयने हे। ईं जगाँ ने देको, जटे वींने मेल्यो हो।</verse>
				<verse number="7">अबाणू थें जावो अन वींका चेला अन पतरस ने को के, ‘वो थाँकाऊँ पेल्याँईं गलील में जा पूग्यो हे। जस्यान वणी थाँने क्यो हो, वो थाँने वटे मली।’”</verse>
				<verse number="8">दरप अन अचम्बा में डूबी तकी लुगायाँ कबर पूँ बारणे निकळन भागी। वाँ किंनेई कई बात ने बतई ही, काँके वीं घणी घबरई तकी ही।</verse>
				<verse number="9">हपता के पेले दन दितवार ने वो जीवतो व्या केड़े, हारऊँ पेल्याँ मरियम मगदलीनी का मुण्डागे परगट व्यो, जिंने वे हात हुगली आत्माऊँ छुटकारो दिदो हो।</verse>
				<verse number="10">वणी ईसू का चेला ने, ज्यो होक में डुबन रोरिया हा, बतायो।</verse>
				<verse number="11">जदी वाँ चेला हुण्यो के, ईसू जीवतो हे अन वाँ वींने देक्यो हे, वाँकाणी विस्वास ने किदो।</verse>
				<verse number="12">ईंका केड़े चेला मूँ दो जणा के मुण्डागे ईसू एक दूजाँ रूप में परगट व्या, जदी वे यरूसलेमऊँ आपणाँ गाम जारिया हा।</verse>
				<verse number="13">वाँकाणी पाच्छा आन दूजाँ ने ईं बात का हमच्यार दिदा, पण दूजाँ भी वाँको विस्वास ने किदो।</verse>
				<verse number="14">पछे जदी वींका ग्यारई चेला रोट्याँ खारिया हा, ईसू वाँका मुण्डागे परगट व्या अन वे वाँने वाँका बना विस्वास, कल्डा मन के वाते फटकारिया, काँके वणा वाँका हमच्यार को विस्वास ने किदो हो, जणा ईसू ने जीवता व्या केड़े देक्या हा।</verse>
				<verse number="15">पछे ईसू वाँने क्यो, “दनियाँ की हारी जगाँ में जावो अन हारई लोगाँ ने हव हमच्यार हुणावो।</verse>
				<verse number="16">ज्यो कुई विस्वास करे अन बतिस्मो लेवे, वो बंचायो जाई अन ज्यो विस्वास ने करे, वो दोसी ठेरायो जाई।</verse>
				<verse number="17">ज्यो मारा पे विस्वास करी, वो अचम्बा का काम करी, वे मारा नामऊँ हुगली आत्माने बारणे काड़ी, अन वे नुवी-नुवी बोल्याँ बोली।</verse>
				<verse number="18">यद्याँ वे आपणाँ हातऊँ हाँप पकड़ लेई अन वे जदी जेर भी पीं जाई, तुई वाँके कई नकसाण ने वेई। वे माँदा पे आपणो हात राकी अन वे हव वे जाई।”</verse>
				<verse number="19">जदी परबू ईसू वाँकाऊँ बात कर लिदी, तो वे हरग में उठा लिदा ग्या। वो परमेसर का जीमणा पाल्ड़े जान बेटग्या।</verse>
				<verse number="20">वींका चेला बारणे जान हारी जगाँ परच्यार किदो, वाँकी लारे परबू काम कररिया हा। वाँका अचम्बावाळा काम की वजेऊँ ज्यो वे परच्यार कररिया हा, वीं सिद वेता ग्या।</verse>
			</chapter>
		</book>
		<book number="42">
			<chapter number="1">
				<verse number="1">हुकम थियोपलुस, ज्यो बाताँ आपणाँ बसमें वीं ही वणा बाताँ ने वसन का दास खुद सरुआतऊँ देकी अन आपाँने बतई। वणा बाताँ ने सई तरियाऊँ लिकबा का वाते नरई मनकाँ कोसीस किदी ही। में अणा हारी बाताँ की सरुआतऊँ सई तरियाऊँ परक कर लिदी ही, ईं वाते मने ओ हव लाग्यो के, मूँ भी अणा हारी बाताँ ने थाँका वाते सई तरियाऊँ एक का पसे एक लिकूँ,</verse>
				<verse number="2"></verse>
				<verse number="3"></verse>
				<verse number="4">ताँके थाँ ओ पुरी तरियाऊँ जाण सको के, जीं भी बाताँ थाँने हिकई गी हे, वीं हाँची अन अटल हे।</verse>
				<verse number="5">यहूदियाँ के राजा हेरोदेस की टेम में मन्दर में सेवा-चाकरी करबावाळा समाज को अबिया पीड़ी मेंऊँ एक जकरय्या नाम को एक सेवा करबावाळो याजक हो अन वींकी लुगई को नाम एलीसिबा हो, वाँ हारून का बंस की ही।</verse>
				<verse number="6">वीं दुई परमेसर की देकणी में घणा धरमी हा। अन परमेसर की आग्या को अन वींका नेमाँ को वीं पुरी तरियाऊँ पालण करता हा।</verse>
				<verse number="7">वाँके कई ओलाद ने ही। काँके एलीसिबा बाँज ही अन वीं डोकरा-डोकरी हा।</verse>
				<verse number="8">जद्याँ जकरय्या का दल को ओसरो हो अन वो याजक का रूप में परमेसर की सेवा-चाकरी कररियो हो।</verse>
				<verse number="9">तद्याँ परमेसर की सेवा करबावाळा की रिति-रिवाज के जस्यान मन्दर में धुप-ध्यान करबा का वाते परच्याँ नाकी अन परची जकरय्या का नाम की निकळी। अन वो परबू का मन्दर में ग्यो हो।</verse>
				<verse number="10">धुप-ध्यान करती टेम लोग-बागाँ की हारी भीड़ बारणे परातना कररी ही।</verse>
				<verse number="11">वीं टेम में जकरय्या का हामे परबू परमेसर को एक हरग-दुत परगट व्यो। वो धुप-ध्यान करबा की वेदी का जीमणा पाल्ड़े ऊबो तको वींने दिक्यो।</verse>
				<verse number="12">अन जकरियो वींने देकन दरपन घबराग्यो। अन वींका में कल्ड़ी दरप भरईगी।</verse>
				<verse number="13">पण, हरग-दुत वींने क्यो, “जकरय्या दरपे मती। काँके, थारी परातना परमेसर हूँण लिदी हे। ईं वाते थाँरी घरवाळी एलीसिबा एक बेटा ने जणी। वींको नाम यहुन्नो राकज्ये।</verse>
				<verse number="14">जणीऊँ थूँ राजी अन खुस वेई अन नरई लोग-बाग वींका जनमऊँ आणन्द मनाई।</verse>
				<verse number="15">काँके वो परबू परमेसर की देकणी में मोटो वेई। वो दाकरस अन दारू कदी ने पीई। वो आपणी माँ की कोख मेंईस पुवितर आत्माऊँ भर जाई।</verse>
				<verse number="16">वो इजराएल का घणा लोगाँ ने परबू परमेसर का आड़ी फेरी।</verse>
				<verse number="17">वो एलिया के जस्यान की आत्मा अन तागत में वेन परबू का आगे-आगे चाली। मनकाँ को मन वाँके छोरा-छोरी का आड़ी फेर देई, अन परमेसर की आग्या ने ने मानबावाळा ने धारमिकता की अकल का आड़ी लेजाई। अन मनकाँ ने परबू का वाते त्यार करी।”</verse>
				<verse number="18">तद्याँ जकरये परमेसर का हरग-दुतऊँ क्यो के, “मूँ ईंपे कस्यान विस्वास करूँ? काँके मूँ तो एक डोकरो हूँ अन मारी घरवाळी भी डोकरी हे।”</verse>
				<verse number="19">हरग-दुत वींने क्यो के, “मूँ जिबराईल हूँ। अन हमेस्यान परमेसर का हामे हाजीर रूँ हूँ। अन वणा मने थाँराऊँ बात करबा का वाते अन ओ हव हमच्यार केबा के वाते खन्दायो हे।</verse>
				<verse number="20">में ज्यो क्यो हो, वो तो आपणाँ टेम में पूरो वे जाई, पण थें तो ईंपे विस्वास ने किदो। ईं वाते जद्याँ तईं ओ पूरो ने वेई तद्याँ तईं थूँ बोबड़ो रेई।”</verse>
				<verse number="21">अन बारणे लोग जकरय्या की वाट नाळन अचम्बो करबा लागा के, वींने मन्दर में अतरी टेम कस्यान लागी?</verse>
				<verse number="22">जद्याँ वो बारणे आयो, तो वो बोल ने सक्यो तो वे हमजग्या के, वणी मन्दर में किंकाई दरसण किदा हे। वो हातऊँ हानी करतो रियो अन बोबड़ो वेग्यो।</verse>
				<verse number="23">जद्याँ वींकी सेवा-चाकरी का दन पूरा व्या, तो वो आपणाँ घरे परोग्यो।</verse>
				<verse number="24">थोड़ाक दनाँ केड़े एलीसिबा गरबवती वीं अन पाँच मिना तईं वणी ईं बात ने हपई राकी।</verse>
				<verse number="25">वणी क्यो, “अबे आकरी में परबू मारा पे दया किदी अन लोगाँ का हामेंऊँ मारी बेजती छेटी किदी हे।”</verse>
				<verse number="26">जकरय्या की लुगई एलीसिबा के जद्याँ छटो मीनो चालरियो हो, तद्याँ परमेसर का आड़ीऊँ जिबराईल नाम को हरग-दुत गलील का नासरत नगर में एक कूँवारी के नके खन्दायो ग्यो।</verse>
				<verse number="27">जिंकी हगई युसुप नाम का एक मनकऊँ वीं ही, ज्यो दाऊद का बंस को हो। वीं कूँवारी को नाम मरियम हो।</verse>
				<verse number="28">अन हरग-दुत वींका नके परगट वेन क्यो, “राजी वे, परबू की दया थाँरा पे वीं हे अन वीं थाँरा लारे हे।”</verse>
				<verse number="29">ओ हामळन वा घबरागी अन होचबा लागी के, “ईंको मतलब कई हे?”</verse>
				<verse number="30">तद्याँ हरग-दुत वींने क्यो, “मरियम दरपे मती, परबू परमेसर की दया थाँरा पे हे।</verse>
				<verse number="31">अन देक, थूँ गरबवती वेई अन थारे एक छोरो वेई। थूँ वींको नाम ईसू राकज्ये।</verse>
				<verse number="32">वो मोटो मान्यो जाई अन परम परदान परमेसर को पूत केवाई अन परबू परमेसर वींका बड़ाबा दाऊद की गाद्दी वींने हूँपी।</verse>
				<verse number="33">वो याकूब का बंसा पे अमर राज केरी अन वींको राज कदी ने मटी।”</verse>
				<verse number="34">मरियम हरग-दुतऊँ क्यो, “ओ कस्यान वेई? मूँ तो आलतरे कूँवारी हूँ।”</verse>
				<verse number="35">हरग-दुत वींने क्यो के, “पुवितर आत्मा थाँरा डिले आई अन परम परदान की तागत थाँरा ऊपरे वेई। ईं वाते जनम लेबावाळो पुवितर बाळक परमपिता परमेसर को पूत वाजी।</verse>
				<verse number="36">अन देक, थाँरा परवार की एलीसिबा के भी भुढापा में बेटो जनम लेबावाळो हे। ज्या बाँजड़ी वाजती ही, अबाणू वींके छटो मीनो हे।</verse>
				<verse number="37">काँके परमेसर के वाते कस्यो भी काम अबको कोयने हे।”</verse>
				<verse number="38">पछे मरियम हरग-दुतऊँ क्यो, “देको, मूँ परबू की दासी हूँ। जस्यान थाँ क्यो, वस्योईस मारा वाते वेवे।” अन वो हरग-दुत वींका नकूँ परोग्यो।</verse>
				<verse number="39">थोड़ाक दन केड़े तरत त्यार वेन मरियम मंगरा में बस्या तका यहूदा परदेस का एक नगर में गी।</verse>
				<verse number="40">अन वाँ जकरय्या का घरे जान एलीसिबाऊँ नमस्कार किदो।</verse>
				<verse number="41">जस्यानी एलीसिबा मरियम का नमस्कार ने हामळयो, तो वींका पेट में बाळक फदकबा लागो अन एलीसिबा पुवितर आत्माऊँ भरगी।</verse>
				<verse number="42">अन वणी हाको करन क्यो, “थूँ हंगळी लुगायाँ में धन्न हे अन थाँरा पेट को फळ धन्न हे।</verse>
				<verse number="43">अन आ दया मारा ऊपरे कटू वीं काँके मारा परबू की बई मारा नके अई।</verse>
				<verse number="44">अन देक, जस्यानीस थारो नमस्कार मारा कान्दड़ा में पड़्यो, तो वस्यानीस बाळक मारा पेट में आणन्दऊँ फदक्यो।</verse>
				<verse number="45">ज्यो बाताँ परबू थने की हे, वींने थें मानी के, वीं पुरी वेई। ईं वाते थूँ धन्न हे।”</verse>
				<verse number="46">तद्याँ मरियम क्यो, “मारो जीव परबू की बड़ई करे।</verse>
				<verse number="47">अन मारी आत्मा मने बंचाबावाळा परमेसरऊँ राजी हे।</verse>
				<verse number="48">काँके, वीं आपणी दासी की नरमई पे ध्यान दिदो हे। ईं वाते देकज्यो, आजऊँ हंगळा जुग-जुग का लोग मने धन्न केई।</verse>
				<verse number="49">काँके, वीं सामरतवान परमेसर मारा वाते मोटा-मोटा काम किदा हे अन वाँको नाम पुवितर हे।</verse>
				<verse number="50">वाँको मान करबावाळा पे वाँकी दया पिड़ीऊँ पीड़ी रेवे हे।</verse>
				<verse number="51">वणा आपणाँ ज्योरावर हाताऊँ मोटा-मोटा काम किदा, अन ज्यो मन में घमण्ड करता हा, वाँने बखेर दिदा।</verse>
				<verse number="52">वणी दरबाराँ ने गादीऊँ उतार दिदा। पण, ज्यो उदास हा, वाँने ऊपरे उटाया।</verse>
				<verse number="53">वणी भूका ने हव चिजाँऊँ भर दिदा अन रिप्यावाळा ने खाली हाताई काड़ दिदा।</verse>
				<verse number="54">वणी आपणाँ दास इजराएल को हमाळ किदो। वाँने वो वादो आद रियो जिंने वणा आपणाँ बड़ाबाऊँ किदो हो के, ‘मूँ अबराम अन वींकी पीड़ी पे हमेस्यान दया करतो रेऊँ।’ वणा ईं वादाऊँ इजराएल ने आद राकन वींकी मदत किदी।”</verse>
				<verse number="55"></verse>
				<verse number="56">मरियम लगे-भगे तीन मिना तईं एलीसिबा की लारे री अन पसे वाँ आपणाँ घरे अईगी।</verse>
				<verse number="57">एलीसिबा का मिना पूरा व्या अन वणी एक बेटो जण्यो।</verse>
				<verse number="58">वींके आस-पड़ोस वाळा अन हगा-होई ओ हामळन के, वींका पे परबू परमेसर दया किदी हे। वाँका हाते आणन्द मनायो।</verse>
				<verse number="59">ईंका केड़े जद्याँ बाळक आट दन को व्यो तो मनक बाळक को खतनो करबा ने आया अन वीं वींको नाम वींका बाप का नाम का जस्यानीस जकरयो राकणो छारिया हा।</verse>
				<verse number="60">पण, वींकी माँ ऊपड़ताई बोली, “ने ने, वींको नाम यहुन्नो राक्यो जावे।”</verse>
				<verse number="61">तद्याँ मनकाँ वींकाऊँ क्यो, “थाँरा परवार में ओ नाम तो किंको भी ने हे।”</verse>
				<verse number="62">तद्याँ वणा वींका बाप का आड़ी हानी करन क्यो के, “वीं ईंको नाम कई देणो छावे हे?”</verse>
				<verse number="63">पसे जकरये एक पाटी मगई अन वींपे लिक्यो के, “ईंको नाम यहुन्नो हे।” ओ देकन हाराई लोग-बाग अचम्बा में पड़ग्या।</verse>
				<verse number="64">अस्यान वेताई जकरय्या की बोली खलगी अन वो परबू परमेसर की बड़ई करबा लागो।</verse>
				<verse number="65">वींका अड़े-भड़े रेबावाळा हाराई दरपग्या अन ईं हंगळी बाताँ मंगरा में बस्या तका यहूदा परदेस में च्यारूँमेर फेलगी।</verse>
				<verse number="66">हंगळा हूँणबा वाळा आपणाँ मना मेंईस बच्यार करन क्यो, “ओ बाळक कस्यो वेई?” काँके परबू को हात ईंका पे हे।</verse>
				<verse number="67">वींको बाप जकरियो पुवितर आत्माऊँ भरग्यो अन परमेसर का आड़ीऊँ ओ बताबा लागो,</verse>
				<verse number="68">“इजराएल का परमेसर की जे हो। काँके, वणा आपणाँ लोगाँ पे करपा किदी हे अन वाँने छुड़ाया हे।</verse>
				<verse number="69">वणा आपणाँ दास दाऊद का पिड़ीऊँ माकाँ वाते जोरावर मुगतीदाता ने पेदा किदो हे।</verse>
				<verse number="70">नरी पेल्याँ परमेसर आपणाँ आड़ीऊँ बोलबावाळा पुवितर मनकाऊँ वादो किदो हो।</verse>
				<verse number="71">वो माँने माकाँ दसमणाऊँ अन माकाँ हंगळा विरोदी का हाताऊँ छुड़ाई।</verse>
				<verse number="72">वणा क्यो, वीं आपणो पुवितर करार आद करन आपणाँ बड़ाबा पे दया करी।</verse>
				<verse number="73">वणा आ होगन आपणाँ बड़ाबा अबरामऊँ खादा हा</verse>
				<verse number="74">के, वाँ आपाँने आपणाँ दसमणा का हाताऊँ छुड़ाई। अन आपाँ बना दरप्याँ परबू की सेवा करा।</verse>
				<verse number="75">अन आपीं आपणी हारी जीवन में वाँका हामे पुवितर अन धरमी बण्या तका रेवा।</verse>
				<verse number="76">हे मारा बेटा, थूँ, परम परदान परमेसर का आड़ीऊँ बोलबावाळो केवाई। थूँ परबू को गेलो त्यार करबा के वाते वाँके आगे-आगे चाली।</verse>
				<verse number="77">अन मनकाँ ने हिकाई के, थाँका पापाँ की मापी वेबाऊँ थाँ बंचाया जावो।</verse>
				<verse number="78">आपणाँ परमेसर की दयाऊँ आपणाँ पे मुगतीदातो एक उगता तका सुरज का उजितो का जस्यान हरगऊँ आपणाँ ऊपरे वेई,</verse>
				<verse number="79">अंदारा अन मोत की छाया में जीवबावाळा पे पुवितर उजितो चमकी, अन आपाँने खरई अन सान्ती का गेला पे लेजाई।”</verse>
				<verse number="80">अन वो बाळक डिल-डोलऊँ अन आत्माऊँ बड़तो तको ज्योरावर वेतो ग्यो। वो इजराएल के हामे परच्यार करबा का दनाँ तईं हुन्ना काँकड़ में रेई।</verse>
			</chapter>
			<chapter number="2">
				<verse number="1">वाँ दनाँ में ओगुस्तुस केसर आदेस दिदो के, हाराई रोम देस का लोगाँ का नाम लिक्या जावे।</verse>
				<verse number="2">या पेली जनगणना ही जद्याँ कुरीनियस सिरिया परदेस को राजपाल हो।</verse>
				<verse number="3">अन हंगळा लोग नाम लिकाबा का वाते आपणाँ-आपणाँ गाम ग्या।</verse>
				<verse number="4">युसुप, गलील देस का नासरत नगरऊँ यहूदा परदेस में दाऊद का सेर बेतलेम ग्यो, काँके वो दाऊद का बंस को हो।</verse>
				<verse number="5">वो आपणी हगई किदी तकी मरियम का हाते नाम लिकाबा का वाते ग्यो, ज्या गरबवती ही।</verse>
				<verse number="6">वीं वटे हा, वीं दाण मरियम का मिना पूरा वेग्या।</verse>
				<verse number="7">मरियम आपणाँ पेला बेटा ने जनम दिदो अन वींने गाबा में लपेटन ठाण में मेल्यो काँके, वाँका वाते हरई में जगाँ ने ही।</verse>
				<verse number="8">अन वीं देस का कतराई गवाळ्याँ हा, जीं काकड़ में रात की टेम में आपणाँ गारा का टोळा की रुकाळी कररिया हा।</verse>
				<verse number="9">वीं टेम परमेसर को एक हरग-दुत वाँका हामे परगट व्यो अन परबू परमेसर की मेमा को तेज वाँका च्यारूँमेर चमक्यो अन वीं घणा दरपग्या।</verse>
				<verse number="10">तद्याँ हरग-दुत वाँकाऊँ क्यो, “दरपो मती अन देको। मूँ थाँका वाते हव हमच्यार लायो हूँ, जणीऊँ हारी मनक जात घणी राजी वे जाई।</verse>
				<verse number="11">आज दाऊद का नगर में थाँका वाते एक मुगतीदाता को जनम व्यो हे अन वोईस परबू मसी हे।</verse>
				<verse number="12">वाँकी ओळकाण आ हे के, थाँ एक बाळक ने गाबा में लपेट्यो तको अन वींने ठाण में हूँतो तको पावो।”</verse>
				<verse number="13">वणीस दाण एकाएक वाँ हरग-दुत के लारे हरग-दुताँ की फोज परमेसर की बड़ई करती तकी दिकी, वीं ओ केरिया हा,</verse>
				<verse number="14">“हरग में परमेसर की बड़ई अन धरती पे वाँ मनकाँ ने सान्ती मले, ज्याऊँ वो राजी हे।”</verse>
				<verse number="15">जद्याँ हरग-दुत वाँका नकेऊँ पाच्छा हरग में पराग्या। गवाळ्याँ एक-दूजाऊँ केबा लागा के, “आपीं बेतलेम में चाला अन ज्या बात परबू परमेसर आपाँने बताई हे, वींने देका।”</verse>
				<verse number="16">वीं तरत वटे पराग्या मरियम अन युसुप ने देक्या अन बाळक ने ठाण में हूँतो तको देक्यो।</verse>
				<verse number="17">गवाळ्याँ ओ देकन ज्या बात हरग-दुत की ही, हाराई ने बता दिदी।</verse>
				<verse number="18">ईं बात ने जणा भी हूणी। वीं अचम्बो करबा लागग्या।</verse>
				<verse number="19">पण, मरियम अणा हंगळी बाताँ आपणाँ मन में राकन होचबा लागी।</verse>
				<verse number="20">गवाळ्याँ ने जस्यान क्यो ग्यो हो वीं वस्यानीस देकन परमेसर का गुणगान गाता तका अन बड़ई करता तका आपणाँ घरे पराग्या।</verse>
				<verse number="21">आटमें दन, जद्याँ बाळक का खतना को टेम आयो। जद्याँ वींको नाम ईसू राक्यो ग्यो। ज्यो नाम बाळक के मरियम के पेट में आबाऊँ पेल्याई हरग-दुत बता दिदो हो।</verse>
				<verse number="22">अन जद्याँ मूसा का नेमा का हस्याबूऊँ वाँके पुवितर वेबा का दन पूरा व्या, तद्याँ वीं बाळक ईसू ने यरूसलेम का मन्दर में परबू परमेसर का हामे हाजर करबा ने लाया।</verse>
				<verse number="23">परबू की वेवस्ता का हस्याबूऊँ, “हरेक पेलो नर बाळक परबू परमेसर का वाते अरपण किदो जाई।”</verse>
				<verse number="24">अन परबू की वेवस्ता का जस्यान, “कमेड़ी की एक ज्योड़ी कन कबुतराँ का दो बच्याँ लेन बली चड़ाया जावे।”</verse>
				<verse number="25">वीं टेम यरूसलेम में समोन नाम को एक मनक हो, वो धरमी अन भगत हो। वो इजराएल की सान्ती की वाट नाळरियो हो अन पुवितर आत्मा वींका हाते ही।</verse>
				<verse number="26">पुवितर आत्मा वींने बतायो हो के, “जद्याँ तईं थूँ परबू का मसी ने देक ने लेई, तद्याँ तईं थारी मोत ने वेई।”</verse>
				<verse number="27">अन जद्याँ वो समोन परमेसर की आत्मा का हिकाऊँ मन्दर में आयो तद्याँ ईसू का बई-बापू वींका वाते मूसा का नेमा के जस्यान करबा ने वींने मन्दर में लाया।</verse>
				<verse number="28">तद्याँ समोन वींने आपणाँ खोळा में लिदो अन परमेसर की बड़ई करते तके क्यो,</verse>
				<verse number="29">“परबू जी, थाँ थाँका बचन ने पूरो किदो हे, अबे थाँको दास आपणाँ नके सान्तीऊँ बला लो।</verse>
				<verse number="30">काँके मारी आक्याँ थाँरी मुगती ने देक लिदी हे।</verse>
				<verse number="31">जिंने थाँ हंगळा लोगाँ का हामे त्यार किदो हे।</verse>
				<verse number="32">वो जी यहूदी ने हे, वाँका वाते थाँकी मुगती को गेलो बताबावाळो उजितो अन थाँका इजराएल का मनकाँ ने मेमा देबावाळो हे।”</verse>
				<verse number="33">अन वींका बई-बापू ईंका बारा में ज्यो कई क्यो ग्यो हो वणीऊँ वाँने अचम्बो व्यो।</verse>
				<verse number="34">जद्याँ समोन वींने आसिरवाद दिदो अन वींकी बई मरियमऊँ क्यो, “देक, यो बाळक इजराएल में घणा लोगाँ का नास अन भला को कारण बणी, अन परमेसर ईंने एक अस्यो हेन्याण बणायो हे, जिंको विरोद करियो जाई।</verse>
				<verse number="35">जणीऊँ घणा जणा का मना का बच्यार परगट वेई अन थाँरी आत्मा घणी दकी वेई।”</verse>
				<verse number="36">असेर गोत में फनुएल की बेटी परमेसर का आड़ीऊँ बोलबावाळी ही। वींको नाम हन्ना हो अन वाँ डोकरी ही। वाँ पन्याँ केड़े आपणाँ धणी का लारे खाली हात वर तईं री ही।</verse>
				<verse number="37">वाँ अबाणू विदवा ही अन चोरासी वर की ही। वाँ मन्दर मेंईस रेती ही। वा एकाणा अन परातना का हाते रात-दन परमेसर की सेवा करती ही।</verse>
				<verse number="38">वीं टेम में वाँ भी वटे अई। वणी परमेसर को धन्नेवाद दिदो अन ज्यो मनक यरूसलेम ने छुड़ाबा की वाट नाळरिया हा। वणा हाराई ने बाळक ईसू का बारा में बताबा लागगी।</verse>
				<verse number="39">जद्याँ युसुप अन मरियम परबू की वेवस्ता का जस्यान ज्यो भी करणो हो वो हाराई करन गलील परदेस में आपणाँ नगर नासरत में आया।</verse>
				<verse number="40">अन वो बाळक डिल-डोल में जोरावर अन अकल में बड़तो ग्यो अन परमेसर को दया वींपे ही।</verse>
				<verse number="41">वींका बई-बापू हर साल फसे का तेवार पे यरूसलेम जाता हा।</verse>
				<verse number="42">जद्याँ ईसू बारा वर का व्या तद्याँ तेवार की रीत की तरियाँ वीं यरूसलेम ग्या।</verse>
				<verse number="43">अन जद्याँ तेवार का दन वीत ग्या। तद्याँ वी पाच्छा आबा लागा। पण, बाळक ईसू यरूसलेम मेंईस रेग्यो हो। ईंको वींका बई-बापू ने पतो ने हो।</verse>
				<verse number="44">वणा यो होच्यो के, वो आपणाँ हण्डाळ्याँ का हाते वेई अन वी चालता रिया एक दन वेग्यो, पण वो वाँका नके ने आयो तो पसे वी वींने आपणाँ हगा-होई अन ओळकाण वाळा में होदबा लागा।</verse>
				<verse number="45">पण वो तो कटेई ने मल्यो। तो वीं वींने होदता-होदता पाच्छा यरूसलेम में आया।</verse>
				<verse number="46">तीन दन केड़े वणा वींने मन्दर में धरम गरुवा का हाते बेटो तको वाँकी बाताँ हामळतो अन वाँकाऊँ सवाल-जवाब करतो तको दिक्यो।</verse>
				<verse number="47">ज्यो लोग-बाग बाळक ईसू की बाताँ ने हुणरिया हा, वी हाराई वींकी हमज अन वींका जबावऊँ अचम्बा में पड़ग्या हा।</verse>
				<verse number="48">वींका बई-बापू वींने देकन अचम्बो में आग्या। अन वींकी बई वणीऊँ क्यो, “हे मारा बेटा, थें कई लेवा माँकाऊँ अस्यो किदो? देक, थाँरा बापू अन मूँ कतरा परेसान वेन थने होदरिया हा।”</verse>
				<verse number="49">ईसू वणाऊँ क्यो, “थाँ मने कई लेवा होदरिया हो? कई थाँ यो ने जाणता हा के, मारा बाप का घर में मारो रेणो जरूरी हे?”</verse>
				<verse number="50">पण, वणा ईं बात ने ने हमजी।</verse>
				<verse number="51">तो पसे वो वाँका हाते नासरत में पाछो आयो अन वाँकी आग्या को पालण करतो रियो। वींकी बई अणा हारी बाताँ ने आपणाँ मनईंमन में राकी।</verse>
				<verse number="52">ईसू अकल अन डील में, परमेसर अन मनकाँ की करपा में बड़तो ग्यो।</verse>
			</chapter>
			<chapter number="3">
				<verse number="1">दरबार केसर तिबिरियस का राज को पन्दरवा वर में पुन्तियुस पिलातुस यहूदा परदेस को राजपाल हो। हेरोदेस गलील परदेस को हाकम हो। अन वींको भई फिलिपुस इतुरिया अन त्रखोनितिस परदेस को हाकम हो अन लिसानियास अबिलेने परदेस को हाकम हो।</verse>
				<verse number="2">अन हन्ना अन केफा मोटो याजक हा, वणी टेम परमेसर को बचन हुन्ना काँकड़ में जकरय्या का बेटा यहुन्ना का नके पूग्यो।</verse>
				<verse number="3">तद्याँ यहुन्नो यरदन नंदी का अड़े-भड़े का नगराँ में ग्यो अन परच्यार करबा लागो के, “पापऊँ मन फेरो अन बतिस्मो लो जणीऊँ परमेसर थाँका पाप माप करी।”</verse>
				<verse number="4">जस्यान के, परमेसर का आड़ीऊँ बोलबावाळा यसाया की किताब में लिक्यो हे के, “हुन्ना काँकड़ में एक बोलबावाळा को हाको हुणारियो हो के, ‘परबू को गेलो त्यार करो अन वींकी हड़क हुदी करो</verse>
				<verse number="5">हरेक घाट्याँ ने भर दिदी जाई अन हाराई मंगरा-मंगरिया ने हिदा कर दिदा जाई। जीं वाँका हे, वी हूँदा अन ज्यो उबड़-खाबड़ हे, वीं हम्मा किदा जाई।</verse>
				<verse number="6">अन हाराई मनक परमेसर की मुगती ने देकी।’”</verse>
				<verse number="7">ज्या मनकाँ की भीड़ यहुन्ना का नके बतिस्मो लेबा ने अई वाँकाऊँ वणी क्यो, “ओ, हाँप का बच्या। थाँने कणी हेंचेत कर दिदा हे के, थाँ परमेसर की आबावाळी रीसऊँ बंच निकळो?</verse>
				<verse number="8">थाँको वेवार अस्यो वेणो छावे के, थाँ मन फेर लिदो हे। थाँ आपणाँ-आपणाँ मना में यो मती होचो के, ‘आपीं अबराम का बंस का हा।’ मूँ थाँकाऊँ केऊँ हूँ के, परमेसर अणा भाटाऊँ अबराम का वाते ओलाद जण सके हे।</verse>
				<verse number="9">अबे रूँकड़ा की जड़ा काटबा का वाते कराड़ो मेल्यो ग्यो हे। जीं रूँकड़ा हव फळ ने देई वाँने काट्या जाई अन वादी में नाक दिदो जाई।”</verse>
				<verse number="10">जद्याँ लोगाँ वणीऊँ पूँछ्यो के, “अबे माँने कई करणो छावे?”</verse>
				<verse number="11">यहुन्ने वणाऊँ क्यो, “जिंका नके दो कुरता हे एक जिंका नके ने हे, वींने दे देवे अन जिंका नके खाणो हे वीं भी अस्यानीस करे।”</verse>
				<verse number="12">लगान लेबावाळा भी वींका नके बतिस्मा लेबा आया। वणा यहुन्नाऊँ क्यो, “हो गरुजी, माँ कई कराँ?”</verse>
				<verse number="13">यहुन्ने वणाऊँ क्यो, “ते किदा तकाऊँ लगानऊँ हेलो मती लेज्यो।”</verse>
				<verse number="14">कुई अदिकारियाँ यहुन्नाऊँ क्यो, “माँ कई करा?” यहुन्ने वणाऊँ क्यो, “किंका नकेऊँ भी ज्योर-जुलमऊँ रिप्या मती लो। अन नेई किंपे जूटो आरोप लगावो। थाँ आपणी तनकाऊँ सन्तोक राको।”</verse>
				<verse number="15">मनक मसी के आबा की वाट नाळरिया हा अन यहुन्ना का बारा में होचबा लागा के, “कटे योईस तो मसी ने हे।”</verse>
				<verse number="16">यहुन्ने वणाऊँ क्यो, “मूँ तो थाँने पाणीऊँ बतिस्मा देरियो हूँ। पण, ज्यो आबावाळो हे, वो माराऊँ घणो ज्योरावर हे। मूँ वींके अतरोक लायक भी ने हूँ के, वींकी पंगरख्या ने खोल सकूँ। वी पुवितर आत्मा अन वादीऊँ थाँने बतिस्मो देई।</verse>
				<verse number="17">वींको छाणो वींका हाताँ में हे अन वो आपणाँ खळा ने हव तरियाऊँ साप करी। वो धान ने बकारी में नाकी पण, डन्कळ्याँने कदी ने बजबा वाळी वादी में बाळ देई।”</verse>
				<verse number="18">अस्यान वो नरी तरियाऊँ वणा मनकाँ ने हमजान हव हमच्यार हूणातो हो।</verse>
				<verse number="19">हेरोदेस आपणाँ भई की लुगई हेरोदियासऊँ ब्याव कर लिदो अन ईंके अलावा नरई बुरो काम किदा। ईं वाते यहुन्ने वींने तापड़्यो,</verse>
				<verse number="20">तो हेरोदेस वणाऊँ भी हेलो बुरो काम किदो के, यहुन्ना ने पकड़न जेळ में नाक दिदो।</verse>
				<verse number="21">अणीऊँ पेल्याँ जद्याँ हाराई मनक यहुन्नाऊँ बतिस्मा लेरिया हा। तद्याँ ईसू भी बतिस्मो लिदो। जद्याँ ईसू परातना कररिया हा, तद्याँ आकास खुलग्यो।</verse>
				<verse number="22">अन पुवितर आत्मा परेवड़ा का जस्यान रूप में आन वाँका ऊपरे उतरी। अन आकासवाणी वींके, “थूँ मारो लाड़लो पूत हे, मूँ थाँराऊँ घणो राजी हूँ।”</verse>
				<verse number="23">जद्याँ ईसू खुद की सेवा सरू किदी तद्याँ वीं तीस वर का हा। अन मनक अस्यान होचता के, वो युसुप को बेटो हे। युसुप एली को बेटा हे।</verse>
				<verse number="24">अन एली ज्यो मतात को, मतात ज्यो लेवी को, लेवी मलकी को, मलकी यन्ना को, यन्ना युसुप को,</verse>
				<verse number="25">युसुप मतियाह को, मतियाह आमोस को, आमोस नहूँम को, नहूँम असल्याह को, असल्याह नोगह को,</verse>
				<verse number="26">नोगह मात को, मात मतियाह को, मतियाह सिमी को, सिमी योसेख को, योसेख योदाह को,</verse>
				<verse number="27">योदाह योनान को, योनान रेसा को, रेसा जरुब्बाबेल को, जरुब्बाबेल सलतियेल को, सलतियेल नेरी को,</verse>
				<verse number="28">नेरी मलकी को, मलकी अद्दी को, अद्दी कोसाम को, कोसाम इलमोदाम को, इलमोदाम एर को,</verse>
				<verse number="29">एर यहोसु को, यहोसु एलीएजर को, एलीएजर योरिम को, योरिम मतात को, मतात लेवी को।</verse>
				<verse number="30">लेवी समोन को, समोन यहूदा को, यहूदा युसुप को, युसुप योनान को, योनान एल्याकिम को।</verse>
				<verse number="31">एल्याकिम मलेयाह को, मलेयाह मिन्ना को, मिन्ना मतात को, मतात नातान को, नातान दाऊद को।</verse>
				<verse number="32">दाऊद यिसे को, यिसे ओबेद को, ओबेद बोअज को, बोअज सलमोन को, सलमोन नहसोन को,</verse>
				<verse number="33">नहसोन अमीनादाब को, अमीनादाब आदमीन को, आदमीन अरनी को, अरनी हेस्रोन को, हेस्रोन फिरिस को, फिरिस यहूदा को,</verse>
				<verse number="34">यहूदा याकूब को, याकूब इसाक को, इसाक अबराम को, अबराम तेरह को, तेरह नहोर को,</verse>
				<verse number="35">नहोर सरेग को, सरेग रऊ को, रऊ फिलिग को, फिलिग एबेर को, एबेर सिलह को।</verse>
				<verse number="36">सिलह केनान को, केनान अर्पग्यत को, अर्पग्यत सेम को, सेम नूह को, नूह लामेक को,</verse>
				<verse number="37">लामेक मथूसलेह को, मथूसलेह हनोक को, हनोक येरेद को, येरेद मेहललेह को, मेहललेह केनान को,</verse>
				<verse number="38">केनान एनोस को, एनोस सेत को, सेत आदम को अन आदम जिंने परमेसर रच्यो हो।</verse>
			</chapter>
			<chapter number="4">
				<verse number="1">ईसू पुवितर आत्माऊँ भरन यरदन नंदीऊँ पाच्छा आया अन आत्मा वाँने हुन्ना काकड़ में लेग्यो।</verse>
				<verse number="2">अन वटे सेतान चालीस दनाँ ईसू की जाँच-परक करतो रियो। वणा दनाँ में ईसू कई ने खादो, अणा दनाँ केड़े वाँने जोरकी भूक लागी।</verse>
				<verse number="3">तो सेतान ईसुऊँ क्यो, “यद्याँ थूँ परमेसर को पूत हे, तो अणी भाटाऊँ के, रोटी बणजा।”</verse>
				<verse number="4">ईसू वींने क्यो, “पुवितर सास्तर में लिक्यो हे, ‘मनक बेस रोट्याऊँईस जीवतो ने रेई।’”</verse>
				<verse number="5">तद्याँ सेतान ईसू ने नरोई ऊसे लेग्यो। वणी ईसू ने घड़ीभर में दनियाँ का हाराई राज बताया।</verse>
				<verse number="6">अन सेतान ईसुऊँ क्यो, “मूँ अणा हाराई को अदिकार अन मेमा थने दे देऊँ, काँके यो मने हूँप्यो तको हे। मूँ जिंने छावूँ, वींने दे सकूँ हूँ।</verse>
				<verse number="7">यद्याँ थूँ मारा पगा में पड़न मने माने, तो ईं हाराई थाँरा वे जाई।”</verse>
				<verse number="8">ईसू वींने जवाब दिदो, “पुवितर सास्तर में लिक्यो हे के, ‘थूँ आपणाँ परबू परमेसर ने नमण कर अन बेस वाँकीईस सेवा कर।’”</verse>
				<verse number="9">तद्याँ सेतान वींने यरूसलेम में लेग्यो अन वींने मन्दर की हारऊँ ऊसी जगाँ ऊपरे ऊबो किदो अन क्यो, “यद्याँ थूँ परमेसर को बेटो हे, तो अटूऊँ कुद जा।</verse>
				<verse number="10">काँके पुवितर सास्तर में लिक्यो तको हे के, ‘परमेसर थाँरो ध्यान राकबा का वाते हरग-दुताँ ने आग्या देई।’</verse>
				<verse number="11">वीं थने आपणाँ हाताऊँ तोक लेई, अस्यो ने वे के, थाँरा पगाँ के भाटा की लाग जावे।”</verse>
				<verse number="12">ईसू वींने जबाव दिदो, “पुवितर सास्तर में यो भी लिक्यो हे के, ‘थूँ आपणाँ परबू परमेसर की कदी परक मती करज्ये।’”</verse>
				<verse number="13">पछे सेतान हारी तरियाऊँ परकन हव मोका के आबा तईं ईसू का नकेऊँ परोग्यो।</verse>
				<verse number="14">ईसू पुवितर आत्मा की तागतऊँ भरन गलील में आया अन वटे वाँकी बाताँ अड़े-भड़े हारीई परदेस में फेलगी।</verse>
				<verse number="15">ईसू वाँका परातना घर में उपदेस देबा लागा अन हाराई मनक वींकी बड़ई करता हा।</verse>
				<verse number="16">ईसू नासरत नगर में ग्यो, जटे वाँको लालण-पालण व्यो हो। वो रीत के जस्यान आराम का दन में परातना घर में ग्यो अन धरमसास्तर भणबा का वाते ऊबो व्यो।</verse>
				<verse number="17">परमेसर का आड़ीऊँ बोलबावाळा यसाया की किताब वींने दिदी गी अन वो वींने खोलन भणबा लागग्यो जटे लिक्यो तको हो के,</verse>
				<verse number="18">“परमेसर की आत्मा मारा ऊपरे हे। काँके वणा मने गरीब मनकाँ ने हव हमच्यार हूँणबा का वाते चुण्यो हे। वणीस मने खन्दायो हे के, मूँ केदयाँ ने छुड़ाबा को अन आन्दा ने देकबा का सन्देस को परच्यार करूँ अन दब्या तका मनकाँ ने ऊँसा उठऊँ।</verse>
				<verse number="19">अन हेलो पाडूँ के, परमेसर की दया दिकावा को जुग आग्यो हे।”</verse>
				<verse number="20">पसे वणी किताब बन्द करन सेवा-चाकरी करबावाळा का हात में दिदी अन रेटे बेटग्यो अन परातना घर का हाराई मनक वींने देकबा लागा।</verse>
				<verse number="21">तद्याँ ईसू वाँकाऊँ क्यो, “आज ईं सास्तर को यो बचन पूरो व्यो जस्यान थाँ हुणरिया हो।”</verse>
				<verse number="22">हाराई लोगाँ ईसू की बड़ई किदी अन जी दया की बाताँ वींका मुण्डाऊँ निकळी ही, वाँने हुणन अचम्बो किदो। वी केबा लागा, “कई यो युसुप को बेटो ने हे?”</verse>
				<verse number="23">ईसू वाँकाऊँ क्यो, “थाँ मारा पे या केवत जरुर केवो, ‘हे वेद पेल्याँ आपणाँ खुद ने साबत कर। अन यो भी केवो के, कफरनहूँम में ज्यो कई किदो हे वींका बारा में माँ हुण्यो हे, वस्योईस आपणाँ नगर में भी कर।’”</verse>
				<verse number="24">मूँ थाँकाऊँ हाँची कूँ हूँ के, “कुई भी परमेसर का आड़ीऊँ बोलबावाळो आपणाँ खुद का गाम में मान ने पाई।”</verse>
				<verse number="25">अन मूँ थाँकाऊँ हाँची केऊँ हूँ के, “जद्याँ एलिया का दनाँ में हाड़ा तीन वर तईं बरका ने वरी, अन हाराई देस में जोरदार काळ पड़्यो, तो इजराएल में घणी विदवा लुगायाँ ही।”</verse>
				<verse number="26">पण एलिया ने सेदा देस का सारपत नगर की रेबावाळी विदवा लुगई ने छोड़न किंका भी नके ने खन्दायो ग्यो।</verse>
				<verse number="27">अन परमेसर का आड़ीऊँ बोलबावाळा एलीसा का दनाँ में इजराएल देस में नरई कोड़्या मनक हा, तद्याँ भी सिरिया देस का रेबावाळा नामान ने छोड़न किंने भी हव ने किदो ग्यो।</verse>
				<verse number="28">यो हूँणन परातना घर का हाराई मनक घणा गुस्सा में आग्या।</verse>
				<verse number="29">वीं ऊबा वेग्या अन ईसू ने नगरऊँ बारणे काड़ दिदा अन जणी मंगरी ऊपरे वाँका नगर बस्यो तको हो, वींने वींपे लेग्या के, वींने मंगरी का ठेट ऊपरेऊँ रेटे नाक दा।</verse>
				<verse number="30">पण ईसू वाँका बचमेंऊँ निकळन पराग्या।</verse>
				<verse number="31">पसे ईसू गलील परदेस का कफरनूम नगर में ग्या अन आराम का दन मनकाँ ने उपदेस देबा लागा।</verse>
				<verse number="32">मनक वींका उपदेस हूँणन अचम्बो करबा लागा, काँके वो हक के हाते बोलतो हो।</verse>
				<verse number="33">वटे परातना घर में एक मनक हो, जिंमें हुगली आत्मा ही। वो जोरऊँ हाका करन केवा लागो,</verse>
				<verse number="34">“हो नासरत का ईसू, थूँ माँकाऊँ कई छावे हे? कई थूँ माँको नास करबा ने आया हे? मूँ जाणूँ हूँ थूँ कूण हे, थूँ परबू परमेसर को पुवितर मनक हे।”</verse>
				<verse number="35">ईसू वींने तापड़न क्यो, “छानो रे, अन अणी मनकऊँ बाणे निकळजा।” वणी हुगली आत्मा वींने हाराई मनकाँ हामे रेटे पटक्यो अन वींके कई नकसाण ने किदो अन वींमूँ बारणे निकळगी।</verse>
				<verse number="36">हाराई मनक अचम्बो करबा लागा अन एक-दूजाऊँ केबा लागा, “या कस्यी बात हे? वो अदिकार अन सामरत का हाते हुगली आत्माने आदेस देवे हे अन वाँ भी निकळ जावे हे।”</verse>
				<verse number="37">अन ईंका केड़े ईसू का बारा में अड़े-भड़े का गामाँ में बाताँ वेबा लागगी।</verse>
				<verse number="38">ईसू परातना घरऊँ उटन समोन का घरे ग्या, वींका हवजी ने ताव आरियो हो। ईं वाते वणा वाँका वाते ईसुऊँ अरज किदी।</verse>
				<verse number="39">ईसू जी वीके हराणे ऊबा रेन अदिकारऊँ ताव उतरबा का वाते क्यो वणीस दाण वींको ताव उतरग्यो अन वाँ वाँकी सेवा-चाकरी करबा लागी।</verse>
				<verse number="40">जद्याँ दन आतबाने हो तो हंगळा लोग-बाग नरई माँदा मनकाँ ने ईसू का नके लाया। ईसू जी एक-एक के माता पे हात मेलन वाँने हव कर दिदा।</verse>
				<verse number="41">हुगली आत्मा घणा जणा मेंऊँ ओ हाँको करती तकी यु बोलती तकी निकळी, “थूँ परमेसर का पूत हे।” पण ईसू वाँने तापड़न वाँने बोलबा ने दिदी, काँके वीं जाणती ही के, “ईसूइस मसी हे।”</verse>
				<verse number="42">ईसू वेगा भाग-फाट्याँ घरऊँ निकळन कणी हून्नी जगाँ में पराग्या। लोग वाँने होदता-होदता वाँके नके पराग्या अन वाँकाऊँ परातना करन क्यो के, “वीं वाँने छोड़न ने जावे।”</verse>
				<verse number="43">पण ईसू वाँने क्यो, “मने दूँजा नगराँ में भी परमेसर का राज को हव हमच्यार हूणाणो हे। काँके मूँ अणी काम का वातेईस खन्दायो ग्यो हूँ।”</verse>
				<verse number="44">अन वो यहुदया परदेस का परातना घर में हव हमच्यार हुणाबा लागो।</verse>
			</chapter>
			<chapter number="5">
				<verse number="1">एक दाण ईसू गन्नेसरत का समन्द का कनारे ऊबा तका हा अन लोगाँ की भीड़ परमेसर का बचन हुणाबा का वाते वाँके च्यारूँमेर ऊबी तकी ही।</verse>
				<verse number="2">तद्याँ समन्द का कनारे ईसू दो नावाँ ने देकी, वणा मूँ माछळी पकड़बावाळा उतरन आपणाँ-आपणाँ जाळ धोईरिया हा।</verse>
				<verse number="3">अन ईसू वणा नावाँ मूँ समोन की नाव में चड़न वणीऊँ क्यो, “नाव ने कनाराऊँ थोड़ीक ऊण्डा पाणी में ले चालो।” तद्याँ वी नाव में बेटन लोगाँ ने उपदेस देबा लागा।</verse>
				<verse number="4">जद्याँ वी उपदेस पूरो करन समोनऊँ क्यो, “नाव ने ओर भी उण्डी ले चालो अन माछळ्याँ पकड़बा का वाते आपणाँ जाळ नाको।”</verse>
				<verse number="5">समोन ईसुऊँ क्यो, “हे मालिक, माँ पुरी रात-भर मेनत किदी पण कई हाते ने लागो। तो भी थाँका केवाऊँ जाळ नाकूँ।”</verse>
				<verse number="6">जद्याँ वणा अस्यो किदो अन जाळ में अतरी माछळ्याँ अई के, वाँको जाळ फाटबा लागो।</verse>
				<verse number="7">तो वणा आपणाँ हण्डाळ्याँ ने ज्यो दूजी नाव में हा, हानी किदी के, “वीं आन माँकी मदत करे।” वीं आया अन वणा दुई नावा ने माछळयाऊँ अतरी भरी के नावाँ डुबवा लागी।</verse>
				<verse number="8">यो देकन समोन पतरस ईसू का पगा में पड़ग्यो अन वणाऊँ क्यो, “ओ परबू, माराऊँ छेटी परा जावो, काँके में थाँकी बात पे विस्वास ने किदो, मूँ पापी मनक हूँ।”</verse>
				<verse number="9">काँके अतरी माछळ्याँ पकड़ईगी ही, ईं वाते यो देकन वींने अन वींका हाराई हण्डाळ्याँ ने अचम्बो व्यो।</verse>
				<verse number="10">वणीस तरियाँ जब्दी का बेटा याकूब अन यहुन्ना ने भी, जी समोन का हण्डाळ्याँ हा, अचम्बो व्यो। जद्याँ ईसू समोनऊँ क्यो, “दरपे मती। अबे थूँ परमेसर का राज में मनकाँ ने लाबावाळो बणी।”</verse>
				<verse number="11">पसे वीं नावा ने बारणे लाया अन हारोई छोड़न ईसू का लारे वेग्या।</verse>
				<verse number="12">जद्याँ ईसू एक नगर में हा, तद्याँ वटे एक कोड़यो मनक हो वो ईसू ने देकन वाँका पगाँ में धोग दिदो अन वाँकाऊँ अरज करबा लागो, “ओ परबू, थाँ छावो, तो मने हव कर सको हो।”</verse>
				<verse number="13">ईसू वींके हात अड़ायो अन क्यो, “मूँ छावूँ हूँ, थूँ हव वेजा।” अन वींको कोड़ तरत जातो रियो।</verse>
				<verse number="14">अन ईसू वींने आग्या दिदी, “ईं बात ने कने केज्ये मती। पण, अबे जा अन आपणाँ खुद ने याजकाँ ने बता अन कोड़ऊँ हव वेबा का वाते ज्यो मूसे ज्याँ बोलमा ठेराई हे। वींने चढा, जणीऊँ वाँने सबूत मले के, थूँ हव वेग्यो।”</verse>
				<verse number="15">पण, ईसू की चरचा घणी फेलबा लागी के, नरई मनक ईसू जी की बाताँ हुणबा का वाते अन मांदकीऊँ हव वेबा का वाते भेळा वेबा लागा।</verse>
				<verse number="16">पण ईसू हुन्ना काकड़ में जान परातना करता हा।</verse>
				<verse number="17">एक दन अस्यो व्यो के, ईसू उपदेस देरिया हा अन वटे फरीसी अन यहूदी धरम गरू बेटा तका हा। वीं गलील, यहूदा परदेस की हंगळी जगाँऊँ अन यरूसलेमऊँ आया तका हा। माँदा ने हव करबा का वाते परबू परमेसर की तागत ईसू का हाते ही।</verse>
				<verse number="18">वीं दाण घणा लोग-बाग एक मनक ने, ज्यो लुलो हो वींने माचा पे हूँवाणन लाया। वणा वींने घर में ले जावा अन ईसू का हामे लाबा की कोसीस किदी।</verse>
				<verse number="19">जद्याँ वीं भीड़भाड़ऊँ वींने में ने लेजा सक्या। तो वी घर माते चड़या अन केलू-डाडा आगा करन वींने माचा का हाते ईसू का हामे उतारियो।</verse>
				<verse number="20">वींको विस्वास देकन ईसू वणी लुला मनकऊँ क्यो, “हे भई, थाँरा पाप माप वेग्या।”</verse>
				<verse number="21">जद्याँ मूसा का नेमा ने हिकाबावाळा अन फरीसी आपस में बात करबा लागा के, “ओ कूण हे? ज्यो परमेसर की नन्दयाँ करे हे। परमेसर ने छोड़न कूण पाप माप कर सके हे?”</verse>
				<verse number="22">पण, ईसू वाँका बच्यार जाणग्या हा, वणा वाँकाऊँ क्यो, “थाँ आपणाँ मना में अस्यान काँ होचरया हो?</verse>
				<verse number="23">हेल बात कई हे? कई यो केणो के, ‘थाँरा पाप माप व्या’ कन पसे यो के, ‘उठ, अन चाल-फर’?</verse>
				<verse number="24">पण, अणी वाते थाँ जाण सको के, मने मनक का पूत ने अणी धरणा में पाप माप करबा को हक हे।” अन ईसू जी वणी लुला मनक ने क्यो, “मूँ थाँराऊँ केवूँ हूँ, उठ अन आपणो माचो ने लेन आपणाँ घरे परोजा।”</verse>
				<verse number="25">वो तरत वींका हामे ऊबो व्यो, अन जीं माचा पे वो हूँतो हो वींने तोकन, परमेसर की बड़ई करतो तको आपणाँ घरे परोग्यो।</verse>
				<verse number="26">तद्याँ वी हंगळा होच में पड़ग्या अन परमेसर की बड़ई करबा लागग्या। वीं दरपन केबा लागा, “आज माँ जोरदार अचम्बावाळी बात देकी हे।”</verse>
				<verse number="27">वींका केड़े ईसू बारणे पराग्या। वणा लेवी नाम का एक लगान लेबावाळा अदिकारी ने चुंगी नाका ऊपरे बेटो तको देक्यो। ईसू वणीऊँ क्यो, “मारा पाच्छे आ।”</verse>
				<verse number="28">तद्याँ वो लेवी हारोई छोड़न ऊबो व्यो अन ईसू का पाच्छे चालबा लागो।</verse>
				<verse number="29">वणी लेवी आपणाँ घर में ईसू की आवभगत का वाते मोटो जीमण राक्यो। अन आया तका मेमान में नरई लगान लेबावाळा अन दूजाँ मनक भी हा। ईं हाराई ईसू का हाते जीमण में बेटा हा।</verse>
				<verse number="30">यो देकन फरीसियाँ अन वाँका सास्तर हिकाबावाळा ईसू का चेलाऊँ यो केन सिकायत करबा लागा, “थाँ लगान लेबावाळा अन दूजाँ पाप्याँ का हाते काँ खावो-पीवो हो?”</verse>
				<verse number="31">ईसू वणाऊँ क्यो, “इलाज हव मनकाँ का वाते कोयने पण, माँदा मनकाँ का वाते हे।</verse>
				<verse number="32">मूँ धरमियाँ ने ने पण, पाप्याँ का मन बदलबा आयो हूँ।”</verse>
				<verse number="33">वणा मनकाँ ईसुऊँ क्यो, “यहुन्ना का चेला तो हरेक टेम में एकाणो राके हे अन परातना करे हे। फरीसियाँ का चेला भी अस्यानीस करे हे। पण, थाँका चेला तो हमेस्यान खावे-पीवे हे?”</verse>
				<verse number="34">ईसू वणाऊँ क्यो, “जद्याँ तईं बींद जान्या का लारे हे तो कई वी एकाणो राकी?</verse>
				<verse number="35">पण वीं दन आई जद्याँ बींद वणाऊँ छेटी करियो जाई, तद्याँ वीं एकाणो राकी।”</verse>
				<verse number="36">ईसू वाँने एक ओरी केणी की, “कुई, मनक नवा गाबा को टूकड़ो फाड़न जूना गाबा के कारी ने लगावे। ने तो नवा गाबा फाट जाई अन वीं नुवा गाबा की कारी जूना गाबा जस्यी हव ने लागी।</verse>
				<verse number="37">कुई भी मनक नुवा अंगूरा को रस ने जूनी मसक में ने भरे हे। ने तो नुवो अंगूरा को रस जूनी मसक ने फाड़न ढळ जाई। अन मसका भी फाटीन बेकार वे जाई।</verse>
				<verse number="38">ईंके बजाये नुवो अंगूरा को रस हमेस्यान नुवी मसका मेंईस भरियो जावे हे।</verse>
				<verse number="39">कुई भी मनक जूना दाकरस ने पीन नुवो दाकरस ने माँगे हे। वो केवे हे के, ‘जूनोईस हव हे।’”</verse>
			</chapter>
			<chapter number="6">
				<verse number="1">ईंका केड़े ईसू आराम का दन खेत में वेन जारिया हा अन ईसू का चेला गव की ऊम्याँ तोड़न हाताऊँ मसळन खारिया हा।</verse>
				<verse number="2">तद्याँ कुईक फरीसी केबा लागा, “थाँ यो काम कई लेबा करो हो, ज्यो आराम का दन करणो मना हे?”</verse>
				<verse number="3">ईसू वाँकाऊँ क्यो, “कई थाँ यो ने भण्यो के, जद्याँ आपणो पुरवज दाऊद अन वींका हण्डाळ्याँ भूका हा तद्याँ दाऊद कई किदो हो?</verse>
				<verse number="4">वो कई लेबा परमेसर का मन्दर में ग्यो, अन चड़ई तकी रोट्याँ लेन खादी अन आपणाँ हण्डाळ्याँ ने भी दिदी, जणा ने खाणी, याजक ने छोड़न दूजाँ के खाणी हव ने हे।”</verse>
				<verse number="5">अन वणा वाँकाऊँ ओरी क्यो, “मूँ, मनक को पूत आराम का दनाँ को भी परबू हे।”</verse>
				<verse number="6">अन अस्यो व्यो के, कणी दूजाँ आराम का दन में वीं परातना घर में जान उपदेस देबा लागा अन वटे एक मनक हो, जिंको जीमणो हात रियो तको हो।</verse>
				<verse number="7">वटे फरीसी अन धरम गरू वाँका ऊपरे दोस लगाबा की ताक में हा के, वो आराम का दन वींने हव करे के ने करे।</verse>
				<verse number="8">पण ईसू अणी बात ने जाणग्या हा। ईं वाते वणा वीं मनक ने क्यो, “ऊबो वेजा अन वो हाराई का हामे आन ऊबा वेग्यो।”</verse>
				<verse number="9">पछे ईसू वणाऊँ क्यो, मूँ थाँकाऊँ पूँछू हूँ के, “आपणाँ नेमा का जस्यान आराम का दन कई करणो सई हे? किंकोई भलो करणो कन बुरो करणो, किंको जीवन बचाणो कन नास करणो?”</verse>
				<verse number="10">अन वणा हंगळी आड़ी देकन वणीऊँ क्यो, “आपणो हात लम्बो कर, वणी वस्यानीस किदो अन वींको हात पेल्याँ के जस्यान हव वेग्यो।”</verse>
				<verse number="11">पण वीं हाराई रीस में आन एक-दूजाऊँ बात-बच्यार करबा लागा के, “अबे आपाँ ईसू को कई करा?”</verse>
				<verse number="12">अन वणा दनाँ में ईसू एक मंगरा ऊपरे परातना करबा का वाते ग्या, अन परमेसरऊँ परातना करबा में हारी रात वितई।</verse>
				<verse number="13">जद्याँ दन व्यो, तो वणी आपणाँ हाराई चेला ने बलाया अन वाँका मूँ बारा चेला ने चुण्या, अन वाँने थरप्या तका केन बलाया।</verse>
				<verse number="14">अन वीं ईं हे, समोन जणी को नाम वणा पतरस भी राक्यो, अन वींको भई अन्दरियास अन याकूब अन यहुन्नो अन फिलिपुस अन बरतुलमे।</verse>
				<verse number="15">अन मत्ती अन थोमो अन हलफई को बेटो याकूब अन समोन ज्यो देसभगत केवातो हो।</verse>
				<verse number="16">अन याकूब को बेटो यहूदो, अन यहूदो इसकरियोती, ज्यो आगे जान ईसुने धोकाऊँ पकड़ाबावाळो बण्यो हो।</verse>
				<verse number="17">जद्याँ ईसू थरप्या तका चेला का हाते मंगराऊँ उतरन छापर में आया, तद्याँ वटे वाँका चेला की मोटी भीड़ ही। अन वटे वाँने हुणबा अन आपणी बिमारियाँऊँ हव वेवा का वाते नरई मनक भेळा व्या, ज्यो सूर अन सेदा का समन्द कनाराऊँ अन यहुदया अन यरूसलेमऊँ आया हा। अन हुगली आत्माऊँ हताया तका लोग-बाग भी हव करिया जाता हा।</verse>
				<verse number="18"></verse>
				<verse number="19">हाराई वींके हात लगाणा छाता हा, काँके वाँकाऊँ तागत निकळन वणा हाराई ने हव करती ही।</verse>
				<verse number="20">तद्याँ ईसू आपणाँ चेला ने देकन क्यो, “धन्ने हो थाँ, जी गरीब हो, काँके परमेसर को राज थाँकोईस हे।</verse>
				<verse number="21">धन्ने हो थाँ, जी भूका हो, थाँ धपाया जावो, धन्ने हो थाँ, जो आज रोवो हो, थाँ आगेऊँ आणन्द मनावो।”</verse>
				<verse number="22">धन्ने हो थाँ, जद्याँ मूँ, मनक का पूत का मस लोग-बाग थाँकाऊँ दसमणी राकी, अन थाँने बारणे काड़्या जाई अन थाँने लाजा मारिया जाई, थाँने बुरा मानन थाँने नट जाई।</verse>
				<verse number="23">वणी दन थाँ राजी वेन आणन्द मनाज्यो, काँके थाँका वाते परमेसर का राज में मोटो फळ हे। आद राकज्यो के, वाँका बड़ाबा भी परमेसर का आड़ीऊँ बोलबावाळा का हाते भी वस्योईस करिया करता हा।</verse>
				<verse number="24">पण हो धनवान, धिकार हे थाँने, काँके थाँ आपणाँ सक पा चुक्या हो।</verse>
				<verse number="25">हो धाप्याँ तका धिकार हे थाँने, थाँ भूका वेवो अन हो आणन्द मनाबावाळा धिकार हे थाँने, काँके थाँ रोवो अन होक करो।</verse>
				<verse number="26">यद्याँ मनक थाँने भला केवे हे तो धिकार हे थाँने, काँके वाँका बड़ाबा भी परमेसर का आड़ीऊँ जूट बोलबावाळा का हाते भी वस्योईस करिया करता हा।</verse>
				<verse number="27">पण ओ हूणबावाळा मूँ थाँकाऊँ केवूँ हूँ के, आपणाँ दसमणाऊँ परेम राको। अन ज्यो थाँकाऊँ नपरत राके हे, वाँका हाते भलई करो।</verse>
				<verse number="28">ज्यो थाँने हराप देवे थाँ वाँने आसिरवाद दो अन ज्यो थाँका हाते हुगलो वेवार राके वाँका वाते थाँ भी परातना करो।</verse>
				<verse number="29">ज्यो थाँरा एक गाल्याँ पे रेपट मेले तो दूजो गाल्यो भी वींका हामे कर दिज्ये। अन ज्यो थाकी कामळ लेवे तो वींने थाँको कुरतो लेबा वाते भी मती रोकज्ये।</verse>
				<verse number="30">ज्यो भी थाँकाऊँ कई मांगे, तो वींने दिदो अन ज्यो थाकी कई चीज लिले, तो वींने पाच्छी मती माँगज्यो।</verse>
				<verse number="31">जस्यान थाँ छावो के, दूँजा लोग माँकाऊँ अस्यान वेवार राके हे तो थाँ भी वस्यानीस वाँका हाते वेवार राको।</verse>
				<verse number="32">यद्याँ थाँ आपणाँऊँ परेम राकबावाळाऊँ परेम राको हो तो, ईंमें आसीस मलबावाळी कस्यी बात हे? काँके पापी मनक भी आपणाँऊँ परेम राकबावाळाऊँ परेम राके हे।</verse>
				<verse number="33">यद्याँ थाँ आपणाँ हाते भलाई करबावाळाऊँ भलाई करो हो तो, ईंमें आसीस मलबावाळी कस्यी बात हे? काँके पापी मनक भी अस्यानीस करे हे।</verse>
				<verse number="34">थाँ जीं पाच्छा दी देवे हे वाँनेईस उदार देवो हो, तो ईंमें आसीस मलबावाळी कस्यी बात हे? काँके पापी मनक भी पाप्याँ ने हाराई पाच्छा लेबा की आस में उदार देवे हे।</verse>
				<verse number="35">पण थाँ आपणाँ दसमणाऊँ परेम राको अन भलई करो, अन पाच्छा पाबा की आस ने राकन उदार दो, तद्याँ थाँने मोटो ईनाम मली अन थाँ परबू परमेसर की ओलाद केवावो, काँके परमेसर आग्या ने मानबावाळा अन पापी मनकाँ पे भी दया करे हे।</verse>
				<verse number="36">जस्यान थाँका बापू परमेसर दया करबावाळा हे, वस्यानीस थाँ भी दया करबावाळा बणो।</verse>
				<verse number="37">दोस ने लगावो, तो थाँका ऊपरे भी दोस ने लगायो जाई। किंने दोसी मती ठेरावो, तो थाँ भी दोसी ने ठेराया जावो। माप करो, थाँने भी मापी दिदी जाई।</verse>
				<verse number="38">दूजाँ ने देवो, तो थाँने भी दिदो जाई। मनक पूरा नाप ने दबा-दबान अन हला-हलान ढळतो तको थाँका खोळा में नाकी, काँके जणी नापऊँ थाँ नापो हो, वणीऊँ थाँका वाते भी माप्यो जाई।</verse>
				<verse number="39">पसे ईसू वाँकाऊँ एक केणी क्यो, “कई आंदो आंदा ने गेलो बता सके हे? अस्यान करी तो वीं दुई खाड़ा में पड़ जाई।</verse>
				<verse number="40">चेलो आपणाँ गरुऊँ मोटो ने वेवे हे, पण ज्यो कुई पुरी तरियाऊँ निपुण वे जावे हे, वो आपणाँ गरू के जस्यान वे जाई।</verse>
				<verse number="41">थूँ आपणाँ भई की फोरीक बुरई कई लेवा देके हे? अन थने आपणी खुद की मोटी बुरई तो दिकी भी कोयने?</verse>
				<verse number="42">जद्याँ थूँ आपणी खुद की मोटी बुरई ने ने देक सके हे तो, आपणाँ भईऊँ कई लेवा केवे के, ‘हे भई ठम, मूँ थाँरी बुरई छेटी करूँ’? अरे कपटी, पेली आपणी बुरई ने छेटी कर, पसे थूँ आपणाँ भई की बुरई सई कर सकी।”</verse>
				<verse number="43">कुई भी हव रूँकड़ो ने हे ज्यो बुरो फळ लावे हे अन नेई कुई बुरो रूँकड़ो हे ज्यो हव फळ लावे हे।</verse>
				<verse number="44">हाराई रूँकड़ा आपणाँ फळाऊँ ओळक्या जावे हे, काँके मनक झाड़क्याऊँ अंजीर ने तोड़े हे अन नेई बोड़ी का रूँकड़ाऊँ अंगूर तोड़े हे।</verse>
				<verse number="45">भलो मनक आपणाँ मन का भण्डारऊँ हव बाताँ काड़े हे अन बुरो मनक बुरी बाताँ काड़े हे। मतलब योईस हे के, जिंका मन में जस्यो वेई वस्योईस बोली।</verse>
				<verse number="46">जद्याँ थाँ मारो केणो ने मानो, तो कई लेवा मने, हो परबू, हो परबू केवे हो?</verse>
				<verse number="47">ज्यो कुई मारा नके आवे हे अन मारी बाताँ हुणे अन वाँने माने हे, वीं कस्या वेई? मूँ थाँने बतऊँ।</verse>
				<verse number="48">वीं वणी मनक का जस्यान वेई, जणी घर बणाती दाण नीम ने उण्डी खोदन मोटी छाँट पे घर बणायो हो अन बाड़ अई जद्याँ वणी के टकरई पण वणी घर ने हला ने सकी, काँके वो सई तरियाऊँ पाको बण्यो तको हो।</verse>
				<verse number="49">पण जी हुणे अन ने माने, वी वणी मनक का जस्यान वेई, जणी आपणो घर बना नीम को बणायो अन जद्याँ बाड़ अई, तो घर तरत धड़ग्यो अन नंसगी नास वेग्यो।</verse>
			</chapter>
			<chapter number="7">
				<verse number="1">जद्याँ ईसू वणा लोगाँ ने हारी बाताँ हूँणा दिदी, तो वीं कफरनूम में आग्या।</verse>
				<verse number="2">अन वटे एक सपायाँ को हाकम हो, जिंको दास अरतो मांदो हो के, मरबा में हो, वो वीं दासऊँ घणो परेम करतो हो।</verse>
				<verse number="3">वणी ईसू का बारा हुण्यो तो वणी नरई डोकरा यहूदी नेता ने वणीऊँ अरज करबा ने खन्दाया के, वो वटे आन मारा दास ने हव करे।</verse>
				<verse number="4">तो वीं ईसू का नके जान हाँचा मनऊँ अरज करता तका क्यो के, “वींका वाते थाँ ओ करो, वो ईंके जोगो हे,</verse>
				<verse number="5">काँके वो आपणाँ लोगाऊँ परेम करे हे, वणी आपणाँ वाते परातना करबा को घर भी बणायो हे।”</verse>
				<verse number="6">ईसू वाँके हाते चाल पड़्या, जद्याँ वीं वींका घरऊँ थोड़ाक छेटी हा, वणी अदिकारी आपणाँ हण्डाळ्याँ ने वींने यो केवा वाते खन्दाया के, “हो परबू, थाँ दुक मती देको, काँके मूँ अणी जोगो ने हूँ के, थाँ मारा घरे आवो।</verse>
				<verse number="7">अणीऊँ मूँ आपणाँ खुद ने अस्यो भी ने हमज्यो के, मूँ थाँका नके अऊँ बेस थूँ खाली के देई तो, मारो दास हव वे जाई।</verse>
				<verse number="8">काँके मूँ भी कणी अदिकारी का केवा में काम करबावाळो मनक हूँ अन मारा रेटे भी घणा अदिकारी हे, एक ने केवूँ के ‘जा’, तो वो जावे हे अन एक कूँ केवूँ के, ‘आव’ तो वो आवे हे अन आपणाँ कणी दास ने कूँ के, ‘यो कर’, तो वो करे हे।”</verse>
				<verse number="9">ईसू या बात हूणी तो वाँने घणो अचम्बो व्यो। तद्याँ वणा पाच्छा फरन आपणे पाच्छे आबावाळा ने क्यो, “मूँ थाँने कूँ हूँ के, अस्यो विस्वास करबावाळो मने हाराई इजराएल का लोगाँ में भी कटेई ने मल्यो।”</verse>
				<verse number="10">अन जद्याँ वणी खन्दाया तका वीं पाच्छा घरे ग्या तो वणा वीं दास ने ताकड़े देक्यो।</verse>
				<verse number="11">पसे अस्यान व्यो के, ईसू नाइन नाम का नगर में ग्या, वाँका चेला अन नरई मनक वाँका पाच्छे अईरा हा।</verse>
				<verse number="12">जद्याँ वीं वणी नगर की फाटक का नके पूग्या तो, वटे कई वेवे हे के, लोग-बाग एक मरिया तका मनक ने खाटली पे हूँवाणन बारणे लईरा हा, ज्यो आपणी माँ को एकाएक बेटो हो, अन वा विदवा ही। अन वणी नगर का नरई मनक वींका हाते हा।</verse>
				<verse number="13">जद्याँ परबू वींने देकी तो वाँने दया आगी अन वणा क्यो, “रो मती।”</verse>
				<verse number="14">तद्याँ वणी खाटली का नके जान वींके हात लगायो तो हाराई मनक ठम ग्या, तद्याँ वणी क्यो, “हे मोट्यार, मूँ थने केऊँ हूँ, बेटो वे।”</verse>
				<verse number="15">जद्याँ वो मरियो तको मोट्यार बेटो वेग्यो अन बोलबा लागग्यो। अन ईसू वींने वींकी बई ने हूँप दिदो।</verse>
				<verse number="16">ईंपे वीं हाराई मनक दरपग्या अन परमेसर की जे-जेकार करबा लागा के, “आपणाँ बसमें एक मोटा परमेसर का आड़ीऊँ बोलबावाळो परगट व्यो हे।” अन केबा लागा के, “परमेसर आपणाँ लोगाँ की मदत करबा ने आग्या हे।”</verse>
				<verse number="17">ईसू की या बाताँ हाराई यहूदियाँ परदेस अन अड़े-भड़े का गामाँ में फेलगी।</verse>
				<verse number="18">अणा हाराई बाताँ का बारा में यहुन्ना का चेला यहुन्ना ने हारोई बतायो। अणी वाते वणी आपणाँ दो चेला ने बलान</verse>
				<verse number="19">परबू ईसू का नके यो पतो करबा ने खन्दाया के, “कई थूँ वोईस हे ज्यो आबावाळो हे, कन पछे माँ कणी दूजाँ की वाट नाळा?”</verse>
				<verse number="20">वीं ईसू का नके आन क्यो, “यहुन्ने बतिस्मा देबावाळे माँने थाँका नके यो पतो करबा ने खन्दाया हे के, ‘कई थाँ वींइस हे ज्यो आबावाळो हो कन पसे माँ कणी दूजाँ की वाट नाळा?’”</verse>
				<verse number="21">वणीस दाण ईसू घणा माँदा अन दकी मनकाँ ने हव किदा, नरई ने हुगली आत्माऊँ छुड़ाया अन घणा आंदा ने देकता किदा।</verse>
				<verse number="22">अन वणी वाँकाऊँ क्यो, “ज्यो कई थाँ देक्यो हे अन हुण्यो हे, जान यहुन्नाऊँ केवो के, आंदा देकबा लागा हे, लंगड़ा चालबा-फरबा लागा हे, कोड़्या को कोड़ मटायो जारियो हे, बेरा हुणबा लागा हे, मरिया तका पाच्छा जीवता वेरिया हे, अन गरीब मनकाँ ने हव हमच्यार हुणायो जारियो हे।</verse>
				<verse number="23">वीं मनक धन्न हे, ज्याँने मने मानबा में कई सक ने हे।”</verse>
				<verse number="24">जद्याँ यहुन्ना का दूत पाच्छा चाल पड़्या तो ईसू यहुन्ना का बारा में मनकाँऊँ केबा लागा, “थाँ हुन्ना काकड़ में कई देकबा ने ग्या हा? कई वइराऊँ हालता तका रूँकड़ा का पान्दड़ा?</verse>
				<verse number="25">तो पसे थाँ कई देकबा ने ग्या हा? कई घणा बड़िया गाबा पेरिया तका मनक ने? देको, ज्यो चमकदार गाबा पेरे हे अन सक-चेन में रेवे हे, वीं मेलाँ में रेवे हे।</verse>
				<verse number="26">तो पछे कई देकबा ग्या हो? कई थाँ कणी परमेसर का आड़ीऊँ बोलबावाळा ने? हा, मूँ थाँकाऊँ केऊँ हूँ के, जिंने थाँ देक्यो हे, वो परमेसर का आड़ी बोलबावाळाऊँ भी मोटो हे।</verse>
				<verse number="27">यो वोईस हे, जिंका बारा में पुवितर सास्तर में लिक्यो ग्यो हे के, ‘देक मूँ थाँराऊँ पेल्याँ आपणो दूत ने खन्दारियो हूँ, ज्यो थाँराऊँ पेल्याँ थाँरो गेलो त्यार करी।’</verse>
				<verse number="28">मूँ थाँकाऊँ केवूँ हूँ के, ज्यो लुगायाऊँ जनम्याँ हे, वाँका मूँ यहुन्नाऊँ मोटो कुई भी ने हे, पण परमेसर का राज को फोराऊँ फोरा मनक भी वणीऊँ मोटो हे।”</verse>
				<verse number="29">यहुन्नाऊँ बतिस्मो लिदा तका हाराई लोग-बाग अटा तईं के, लगान लेबावाला भी ईसू की ईं बात ने हुणन परमेसर का गेला ने हाँचो मान लिदो।</verse>
				<verse number="30">पण फरीसी अन वेवस्ता करबावाळा वणीऊँ बतिस्मो ने लिदो अन आपणाँ वाते परमेसर की मनसा ने टाळ दिदी।</verse>
				<verse number="31">पसे ईसू पाछो क्यो, “मूँ अणी जुग का मनकाँ की कणीऊँ बराबरी करूँ के, वी किंके जस्यान हे?</verse>
				<verse number="32">अबाणू का जुग का लोग चोतरा पे खेलबावाळा बाळकाँ का जस्या हे, ज्यो एक-दूजाऊँ केवे हे के, माँ थाँका वाते बाजो बजायो अन थाँ ने नाच्या, अन माँ सोक-गीत गायो अन थाँ ने रोया।</verse>
				<verse number="33">काँके यहुन्नो बतिस्मा देबावाळो ने तो रोटी खातो हो अन नेई अंगूरा को रस पितो हो, अन थाँ केवो हो के, ‘वींमें हुगली आत्मा हे।’</verse>
				<verse number="34">पसे मूँ मनक को पूत खातो-पितो आयो तो, थाँ केरिया हो, ‘देको यो खवगड़्यो अन पीबावाळो मनक हे। अन लगान लेबावाळा अन पाप्याँ को हण्डाळ्यो हे।’</verse>
				<verse number="35">पण परमेसर की अकल के जस्यान चालबावाळा वाँकी अकल ने सई साबत करी।”</verse>
				<verse number="36">पछे कणी फरीसी ईसू की मनवार करन क्यो के, “गरुजी आज रोट्याँ आपणाँ घरीस हे।” तद्याँ ईसू वाँके घरे ग्या अन रोटी खाबा ने बेटा।</verse>
				<verse number="37">अन देको, वणी नगर की एक पापी लुगई यो हुणन के, वी फरीसी का घरे रोटी खारिया हे, तो वाँ धोळा भाटा की सिसी में मेंगा मोल को अंतर लई।</verse>
				<verse number="38">अन वींका पाच्छे ऊबी रेन, रोती तकी आपणाँ आसूऊँ वींका पगाँ ने आला करन आपणाँ केसऊँ पोछबा लागी, अन वींका पगाँ के बोका देन अंतर लगाबा लागी।</verse>
				<verse number="39">यो देकन, वो फरीसी जणी वींने बलायो हो, आपणाँ मन में होचबा लागो, “यद्याँ यो परमेसर का आड़ीऊँ बोलबावाळो वेतो तो जाण लेतो के, वाँ कस्यी अन कूण लुगई हे? के, वा तो पापी लुगई हे।”</verse>
				<verse number="40">तद्याँ ईसू वींने क्यो, “हे समोन मने थाँराऊँ कई केणो हे।” वणी क्यो, “हाँ, गरुजी केवो।”</verse>
				<verse number="41">ईसू क्यो, “कणी जमींदार के दो करजावाळा हा, एक का ऊपरे पानस्ये चाँदी का रिप्या को अन दूजाँ का ऊपरे पचास चाँदी का रिप्या को करज हो।</verse>
				<verse number="42">जद्याँ वीं मूँळ पूँजी भी ने दे सक्या, तो वणी दुयाँ का करज माप कर दिदो। अबे थूँ बता, वाँका मूँ कूण वणीऊँ हेलो परेम करी?”</verse>
				<verse number="43">समोन जवाब दिदो के, “मारा बच्यार में तो, वो जिंको हेलो करज माप किदो हे।” ईसू क्यो, “थें सई क्यो हे।”</verse>
				<verse number="44">अन ईसू वणी लगई की आड़ी फरन समोनऊँ क्यो, “कई थूँ अणी लुगई ने देकरियो हे? मूँ थाँरा घरे आयो पण थें मारा पगा ने धोबा का वाते पाणी भी ने दिदो, पण अणी मारा पगा ने आसूऊँ धोयाँ अन केसऊँ पूँछ्या हे।</verse>
				<verse number="45">थें मारे स्वागत में बोको ने दिदो, पण जद्याँऊँ मूँ आयो हूँ तद्याँऊँ या मारा पगा के बोका देती तकी ने ठमी हे।</verse>
				<verse number="46">थें मारा माता में तेल ने लगायो, पण अणी मारा पगा के अंतर लगायो हे।</verse>
				<verse number="47">अणी वाते मूँ थाँराऊँ कूँ हूँ के, ईंका पाप ज्यो नरई हा, माप व्या, काँके अणी घणो परेम किदो हे। पण जणा का थोड़ो माप व्या हे, वीं थोड़ो परेम राके हे।”</verse>
				<verse number="48">तद्याँ ईसू वीं लुगईऊँ क्यो, “थाँरा पाप माप वेग्या हे।”</verse>
				<verse number="49">जद्याँ जी लोग-बाग वींका हाते खाणो खाबा ने बेटा हा, वीं आपणाँ-आपणाँ मना में होचबा लागा के, “यो कूण हे ज्यो पापाँ की मापी भी देवे हे?”</verse>
				<verse number="50">पण ईसू वी लुगईऊँ क्यो, “थाँरा विस्वासऊँ थूँ बंचगी हे, राजी खुसीऊँ परी जा।”</verse>
			</chapter>
			<chapter number="8">
				<verse number="1">ईंका केड़े ईसू नगर-नगर अन गामाँ-गामाँ में परमेसर का राज को हव हमच्यार हुणाता तका फरबा लागा। अन वीं थरप्या तका बारा चेला भी वाँका हाते हा।</verse>
				<verse number="2">अन हुगली आत्मा अन मांदकीऊँ हव वी तकी नरी लुगायाँ भी वाँका हाते ही। वाँका मूँ हात हुगली आत्माऊँ हव वी तकी मरियम मगदलीनी नाम की एक लुगई भी ही।</verse>
				<verse number="3">अन हेरोदेस का दरबार का एक अदिकारी खुजा की लुगई योअन्ना अन सुसन्ना अन घणी हारी दूजी लुगायाँ ही। ईं आपणी धन-दोलतऊँ ईसू अन वाँका चेला की सेवा-चाकरी करती ही।</verse>
				<verse number="4">जद्याँ नगर-नगर का लोग-बाग वाँका नके आरिया अन नरई मनक भेळा वेग्या हा, तो ईसू वाँकाऊँ केणीऊँ आ बाताँ किदी के,</verse>
				<verse number="5">“एक दाण एक करसाण हो, वो बीज बोवा ने ग्यो। तो कई व्यो बोती दाण थोड़ाक बीज गेला का कनारे पड़या, ज्यो घसरई ग्या, अन उड़बावाळा जीव-जनावर वाँने चुगग्या।</verse>
				<verse number="6">अन थोड़ाक बीज काँकरा में पड़्या, वीं उग्या पण गारो ने मलबाऊँ वीं हूँक ग्या।</verse>
				<verse number="7">थोड़ाक बीज झाड़क्याँ में पड़्या अन झाड़क्याँ हाते–हाते वदन वाँने दबा दिदा।</verse>
				<verse number="8">अन थोड़ाक बीज हव जगाँ में पड़्या, अन वीं उग्या अन हो गुणा फळ लाया।” यो केन वणा ज्योरऊँ क्यो, “जिंके हुणबा का वाते कान्दड़ा हे, वीं हुणे।”</verse>
				<verse number="9">पछे चेला ईसुऊँ पूँछ्यो, “अणी केणी को अरत कई हे?”</verse>
				<verse number="10">ईसू वाँने क्यो, “थाँने परमेसर का राज का भेद ने हमजबा की हमज दिदी गी हे, पण दूजाँ ने ईं बात ने केणी में हुणई जावे हे के, “‘वीं देकता तका भी ने देके अन हूणता तका भी ने हुणे।’”</verse>
				<verse number="11">अणी केणी को अरत यो हे, बीज तो परमेसर की वाणी हे।</verse>
				<verse number="12">ज्यो बीज गेला का कनारा पे पड़्या, ईं वीं मनक हे के, जद्याँ वणा बचन हुण्या, तद्याँ सेतान आन वणा का मन मेंऊँ वणा बचनाँ ने निकाळ लेवे हे, ताँके वी विस्वास ने कर सके अन बंचाया ने जावे।</verse>
				<verse number="13">काँकरा वाळी जगाँ का बीज वणा मनकाँ का जस्यान हे के, जद्याँ वी हुणे, तो वी आणन्द का हाते परमेसर की वाणी ने माने हे। पण वीं जड़ ने पकड़वा का मस थोड़ीक दाण विस्वास करे हे अन परक की दाण वी भाग जावे हे।</verse>
				<verse number="14">अन ज्यो बीज झाड़क्याँ में पड़्या वी वणी मनक का जस्यान हे, जी बचन माने तो हे, पण वीं चन्ता-फिकर अन मो-माया अन जीवन का भोग-विलास में दब जावे हे अन वाँके फळ भी ने पाके हे।</verse>
				<verse number="15">पण हव जगाँ वाया तका बीज वी मनक का जस्यान हे, जी बचन हुणे वी आपणाँ हव अन हाँचा मन में हमाळी राके अन हमेस्यान वींके जस्यानीस चालन वी हव फळ लावे हे।</verse>
				<verse number="16">“कुई भी मनक दिवाण्या ने ठामड़ा का रेटे ने मेले हे, अन नेई माचा का रेटे राके हे, पण वींने आल्याँ में मेले हे ताँके में आबावाळा ने उजितो मले।</verse>
				<verse number="17">कई भी छाने ने हे ज्यो परगट ने वेई। अन ने कई ढाक्यो तको हे ज्यो चोड़े ने वेई।</verse>
				<verse number="18">ईं वाते ध्यानऊँ हुणो के, थाँ कस्यान हुणरिया हो? जणी का नके हे, वींने ओरू भी दिदो जाई। अन जिंका नके ने हे, वींकाऊँ वो भी ले लिदो जाई, जिंने वीं आपणाँ खुद को हमजे हे।”</verse>
				<verse number="19">तद्याँ ईसू की बई अन भई वाँका नके आया, पण भीड़ का मस वीं वाँका नके ने जा सक्या।</verse>
				<verse number="20">ईं वाते कणी ईसू ने क्यो के, “थाँकी बई अन थाँका भई बारणे ऊबा हे थाँकाऊँ मलणा छारिया हे।”</verse>
				<verse number="21">पण ईसू वींने जवाब दिदो के, “मारी बई अन मारा भई तो ईं हे, ज्यो परमेसर की बात ने हुणे हे अन माने हे।”</verse>
				<verse number="22">पसे एक दन अस्यो वे के, वीं आपणाँ चेला का हाते नाव में बेट्या अन वाँकाऊँ क्यो के, “आवो, समन्द का पेली पाल्ड़े चाला, तो वीं चाल पड़्या।”</verse>
				<verse number="23">पण जद्याँ नाव चालरी ही, जद्याँ ईसू हूँ ग्या हा। तद्याँ अणाचेत की समन्द में ज्योरऊँ डूँज चालबा लागी, अन नाव में पाणी भरबा लागग्यो अन वी घणी अबकी टेम में आग्या।</verse>
				<verse number="24">जद्याँ वी ईसू नके आया अन वाँने नींदऊँ जगान केबा लागा, “हो परबुजी आपीं डुबरिया हा।” तद्याँ वी उठा वेन डूँज अन लेराँ ने हाँको करन तापड़ी अन वी रकगी अन च्यारूँमेर सान्ती वेगी।</verse>
				<verse number="25">अन वणा वाँकाऊँ क्यो, “थाँको विस्वास कटे हो?” पण वीं दरपग्या अन अचम्बा में आग्या अन एक-दूजाऊँ केबा लागा, “ईं कूण हे? ज्यो डूँज अन पाणी ने भी आग्या देवे हे, अन वी अणाको केणो माने हे।”</verse>
				<verse number="26">पसे वीं नावऊँ समन्द ने पार करन गरासेनिया का परदेस में पूगा ज्यो गलील का समन्द के पेले पाल्ड़े हो।</verse>
				<verse number="27">जद्याँ ईसू कनारे उतरियो, तो वणी नगर को एक मनक वाँकाऊँ मल्यो, जिंमें हुगली आत्मा ही अन वो घणा दनाऊँ नागो-पुगो फरतो हो वो घरे ने रेतो हो, पण कबराँ मेंईस रेतो हो। अन जद्याँ मनक वींका हात-पगाँ ने हाँकळा अन बेड़्याऊँ बांदता हा, तो वो वणा ने तोड़ नाकतो हो, अन हुगली आत्मा वींने हुन्ना काकड़ में ले जाती ही। वो ईसू ने देकन हाको करबा लागो अन धोग देन केबा लागो, “हो परम-परदान परमेसर का बेटा ईसू, मने थाँकाऊँ कई लेणो-देणो। मूँ अरज करूँ हूँ, मने दुक मती दो।” काँके, ईसू वणी हुगली आत्माने वणी मनक मेंऊँ निकळबा की आग्या दे रिया हा।</verse>
				<verse number="28"></verse>
				<verse number="29"></verse>
				<verse number="30">ईसू वींने पूँछ्यो, “थारो नाम कई हे?” वणी क्यो, “मारो नाम टोळी हे।” काँके नरी हुगली आत्मा वींका में ही।</verse>
				<verse number="31">अन वणी ईसुऊँ अरज किदी के, माने पाताळ में जावा को हुकम मती दो।</verse>
				<verse number="32">वीं टेम में मंगरा का माते हूँरा की एक रेवड़ चररी ही। ईं वाते वणा हुगली आत्मा ईसुऊँ अरज किदी के, वो वाँने हूँरा में जाबा दे। तो ईसू वाँने हूँरा में जाबा की हाँ कर दिदी।</verse>
				<verse number="33">तद्याँ हुगली आत्मा की टोळी वणी मनकऊँ निकळन हूँरा की रेवड़ में गी अन वाँ घाटी मेंऊँ पड़ता-गुड़ता तका भागन समन्द में जान डुबगी अन मरगी।</verse>
				<verse number="34">गवाळ ज्यो व्यो हो, वो देकन भागग्या अन वणा नगर अन गामाँ में जान आ आक्याँ देकी बात बतई दिदी।</verse>
				<verse number="35">अन लोग-बाग ज्यो व्यो हो वींने देकबा वाते आया, अन ईसू का नके आन वणी मनकऊँ हुगली आत्मा निकळी ही, वींने ईसू जी का चरणा बेट्यो तको अन वणी मनक गाबा पेरिया तका हा अन वींको दिमाग सई वेग्यो हो। यो देकन वीं मनक दरपग्या।</verse>
				<verse number="36">अन जणा यो देक्यो हो वणा वाँने बतायो के, वो हुगली आत्मा धस्यी तकी मनक कस्यान हव व्यो।</verse>
				<verse number="37">तद्याँ गरासेनिया परदेस का अड़े-भड़े का हाराई लोगाँ ईसुऊँ अरज किदी के, माकाँ अटूँ परोजा। काँके वीं घणा दरपग्या हा, ईं वाते वीं नाव में बेटन पाच्छा जाबा लागा।</verse>
				<verse number="38">तद्याँ जणी मनकऊँ हुगली आत्मा निकळी ही वणी ईसुऊँ अरज किदी के, “मने भी थाँका हाते ले जावो।” पण ईसू जी वींने यो केता तका गेले किदो के,</verse>
				<verse number="39">“आपणाँ घरे जा अन ज्यो कई मोटो काम परमेसर थाँरा वाते किदो हे, वो बता।” ईं वाते वो पाछो जान, ज्यो कई ईसू वींका हाते किदो, वींने नगर में हाराई ने केतो रियो।</verse>
				<verse number="40">ईंका केड़े जद्याँ ईसू पाच्छा पेला पाल्डेऊँ उले पाल्डे आया तो एक घणी भीड़ वाँके आवभगत का वाते अई, काँके वीं वाँकी वाट नाळरिया हा।</verse>
				<verse number="41">अन वटे याईर नाम को मनक आयो, ज्यो परातना घर को हाकम हो। अन वो ईसू का पगा में पड़न अरज करबा लागो के, “मारे घरे आवो।”</verse>
				<verse number="42">काँके वींके एकीस छोरी ही ज्या बारा वर की ही। अन वाँ मरबा के जस्यान वेरी ही। जद्याँ ईसू वींका घरे जारिया हा, तद्याँ मनक वाँके ऊपरे च्यारूँमेरऊँ पड़बा लागा।</verse>
				<verse number="43">अन वाँका मूँ एक लुगई ही जिंके बारा सालऊँ परदा को रोग हो, अन जणी आपणी हारी धन-दोलत वेदऊँ एलाज करबा में खरच कर नाकी, तद्याँ भी वींके आराम ने पड़्यो हो।</verse>
				<verse number="44">वाँ लुगई ईसू का पाच्छे आन वाँके पेरिया तका अंगरखा की कोर के हात अड़ायो अन तरत वींके परदा को रोग हव वेग्यो।</verse>
				<verse number="45">अतराक में ईसू जी क्यो, “मारे कणी हात अड़ायो हे?” तद्याँ हाराई नटबा लागा, तो पतरस अन वाँका हण्डाळ्याँ वाँकाऊँ क्यो, “हो मालिक, थाँने तो भीड़ च्यारूँमेरऊँ गेर मेल्या हे अन हाराई थाँके ऊपरे पड़रिया हे।”</verse>
				<verse number="46">पण ईसू क्यो, “कणी तो मारे हात अड़ायो हे, मने खबर पड़ी हे के, मारा मेंऊँ तागत निकळी हे।”</verse>
				<verse number="47">जद्याँ वणी लगई देक्यो के, मूँ भाग तो ने सकूँ हूँ, तो वाँ धूजती तकी ईसू का हामे अई अन वाँके पगाँ में पड़न हाराई लोगाँ का हामे बतायो के, में किंका वाते अणाके हात अड़ायो अन कस्यान फटाकऊँ हव वेगी।</verse>
				<verse number="48">ईसू वणी लुगईऊँ क्यो, “हे बेटी थाँरे विस्वासईस थने हव किदी हे, राजी खुसीऊँ परी जा।”</verse>
				<verse number="49">ईसू यो केईसरिया हा अन परातना घर का हाकम का घरऊँ कुई वटे आयो अन हाकम ने क्यो, “थारी बेटी मरगी हे, अबे गरुजी ने दुक मती दे।”</verse>
				<verse number="50">ईसू जी यो हुण लिदो अन वणीऊँ क्यो, “दरपे मती, बेस विस्वास राक, तो वा बंच जाई।”</verse>
				<verse number="51">जद्याँ ईसू घर में आया तो वणा पतरस, यहुन्ना, याकूब अन छोरी का बई-बापू ने छोड़न दूजो कणी ने आपणाँ हाते घर में ने आबा दिदा।</verse>
				<verse number="52">अन हाराई वींका वाते रो-रोन छाती-माता कुटरिया हा, पण ईसू वाँकाऊँ क्यो, “रोवो मती, वाँ मरी ने हे बेस हूँती हे।”</verse>
				<verse number="53">अणी बातऊँ मनक वाँकी मजाक करबा लागा। काँके लोग जाणता हा के, वाँ मरगी हे।</verse>
				<verse number="54">पण ईसू वींको हात पकड़्यो अन जोरऊँ क्यो, “हे बेटी उटी वे।”</verse>
				<verse number="55">तद्याँ वींको जीव पाछो अई ग्यो अन वाँ तरत उटी वेगी, पछे ईसू वींका बई-बापूऊँ क्यो, “ईंने खाबा वाते कई दो।”</verse>
				<verse number="56">अणीऊँ वींका बई-बापू ने घणो अचम्बो व्यो, पण ईसू वाँने आग्या दिदी के, ज्यो कई व्यो हे, वो किंने केज्यो मती।</verse>
			</chapter>
			<chapter number="9">
				<verse number="1">पसे ईसू आपणाँ बाराई थरप्या तका चेला ने एक हाते बलान वाँने हारी हुगली आत्मा अन मांदकी ने छेटी करबा की तागत अन अदिकार दिदो।</verse>
				<verse number="2">वाँने परमेसर का राज को परच्यार करबा का वाते अन माँदा मनकाँ ने हव करबा का वाते हक का हाते खन्दाया।</verse>
				<verse number="3">अन ईसू वाँकाऊँ क्यो, “आपणी जातरा का वाते कई मती लेज्यो, ने तो लाकड़ी अन नेई जोळी, नेई रोटी, नेई रिप्या-कोड़ी अन नेई दो-दो जोड़ी गाबा।</verse>
				<verse number="4">कस्या भी गाम में जाया केड़े थाँकी आवभगत जणी घर में पेली वेवे, वणी घर में जतरे पाच्छा वणी गामऊँ जावो वतरे वटेईस रेज्यो।</verse>
				<verse number="5">जणी नगर में थाँकी आवभगत ने वेवे, वटूँ निकळता तका आपणाँ पगाँ को धूळो वटेईस जाटक दिज्यो, ताँके ईं बात को वाँने पतो पड़ जावे के, वाँका नास को कारण वे खुदईस हे।”</verse>
				<verse number="6">अस्यान वी वटूँ चाल पड़्या अन गामाँ-गामाँ में हव हमच्यार हुणाता तका अन हंगळी जगाँ लोग-बागाँ ने मांदकीऊँ हव करता रिया।</verse>
				<verse number="7">जद्याँ गलील का दरबार हेरोदेस, ज्यो कई व्यो हो, वींका बारा में हुण्यो, तो वो भेंम में पड़ग्यो, काँके थोड़ाक मनक केरियो हो के, “यहुन्ना मरिया तकाऊँ जीवतो वेग्यो हे।”</verse>
				<verse number="8">दूजाँ मनक केरिया हा के, “एलियो परगट वेग्यो हे।” अन नरई अस्यान भी केरिया हा के, “पुराणा जमाना को कस्योई परमेसर का आड़ीऊँ बोलबावाळो पाछो जी उट्यो हे।”</verse>
				<verse number="9">पण, दरबार हेरोदेस क्यो, “यहुन्नो, जिंको मातो में कटवायो हो। पसे यो कूण हे, जिंका बारा में मूँ अस्यी बाताँ हुणरियो हूँ?” अन हेरोदेस ईसू ने देकबा की कोसीस करबा लाग्यो।</verse>
				<verse number="10">पसे थरप्या तका चेला पाच्छा आया। ज्यो कई व्यो, वो ईसू ने बता दिदो अन पसे ईसू वाँने अलग करन आपणाँ हाते लेन बेतसेदा नगर में पराग्या।</verse>
				<verse number="11">ईं बात को पतो लोगाँ ने पड़ग्यो तो हाराई लोग वाँके पाच्छे चालबा लागग्या। ईसू वाँकी आवभगत किदी अन परमेसर का राज की बाताँ बताबा लागग्या। ज्यो मनक हव वेणा छारिया हा वाँने ईसू हव किदा।</verse>
				<verse number="12">जद्याँ दन आँतबा में हो तो बाराई चेला ईसू का नके आन क्यो, “लोगाँ ने हिक दो परी, ताँके वीं अड़े-भड़े का गामाँ अन ढाण्याँ में जान रे सके अन खाणो खा सके, काँके आपीं तो अटे हुन्ना काकड़ में हा।”</verse>
				<verse number="13">ईसू वाँकाऊँ क्यो, “थाँईस अणाने खाबा ने दो।” वणा क्यो, “माँके नके पाँच रोट्याँ अन दो माछळ्याँ छोड़न ओर कई ने हे। पण, कटे थाँ यो तो ने छावो हो के, माँ जावा अन अणा हाराई का वाते खाणो मोल लेन आवा।”</verse>
				<verse number="14">वटे लगे-भगे खाली मनक मनकईस पाँच हजार हा। जद्याँ ईसू आपणाँ चेलाऊँ क्यो, “वाँने पचास-पचास की पंगताँ में बेवाड़ दो।”</verse>
				<verse number="15">वणा अस्यानीस किदो अन वाँने बेवाड़ दिदा।</verse>
				<verse number="16">पछे ईसू पाँच रोट्याँ अन दो माछळ्याँ लिदी अन हरग आड़ी देकन परमेसर ने धन्नेवाद दिदो अन वाँने तोड़न आपणाँ चेला दिदी के, वाँने लोगाँ ने परोस दे।</verse>
				<verse number="17">अस्यान वीं हाराई खान धापग्या अन चेला बची तकी रोट्याँ की बारा ठोपळा भरिया।</verse>
				<verse number="18">एक दन ईसू ऐकला परातना करिया हा, तो वाँका चेला भी वाँके नके आया। तद्याँ ईसू वाँकाऊँ पूँछ्यो के, “लोग-बाग कई केवे हे के, मूँ कूण हूँ?”</verse>
				<verse number="19">वणा वाँकाऊँ क्यो, “कुई तो थाँने यहुन्नो बतिस्मा देबावाळो केवे हे तो कुई थाँने एलिया अन कुई तो परमेसर का आड़ीऊँ बोलबावाळा मेंऊँ कुई पुराणा जी उट्यो हे।”</verse>
				<verse number="20">तद्याँ ईसू वाँकाऊँ पूँछ्यो, “पण थाँ मारा बारा में कई होचो हो?” पतरस वाँने क्यो, “थाँ परमेसर का आड़ीऊँ खन्दाया तका मसी हो।”</verse>
				<verse number="21">तद्याँ ईसू वाँने चेतान क्यो के, “यो थाँ किंने भी मती केज्यो।”</verse>
				<verse number="22">ईसू चेलाऊँ क्यो, “मूँ, मनक का पूत का वाते यो घणो जरूरी हे के, मूँ दुक जेलूँ अन भूण्डा यहूदी नेता, मोटा याजक अन धरम गरू मने नकारन मार देई अन मूँ तीजे दन पाछो जी उटायो जाऊँ।”</verse>
				<verse number="23">पछे ईसू वणा हाराऊँ क्यो, “यद्याँ कुई मारा पाच्छे आणो छावे हे, तो वो आपणाँ खुद ने नकारे अन हरेक दन आपणी हूळी उठातो तको मारा पाच्छे चाले।</verse>
				<verse number="24">काँके ज्यो कुई धरती पे आपणाँ खुद को जीवन बंचाणो छावे हे वो आपणो हरग को जीवन खो देई। पण, ज्यो कुई धरती पे मारा वाते आपणो जीवन खोई, वो हरग को जीवन पाई।</verse>
				<verse number="25">यद्याँ कुई मनक हारी दनियाँ ने जीत ले अन आपणो हरग को जीवन खो दे कन भटक जावे तो, ईंमें वींको कई नफो हे?</verse>
				<verse number="26">ज्यो कुई माराऊँ अन मारी बाताँऊँ लाजा मरी तो जद्याँ मूँ, मनक को पूत आपणी अन बापू परमेसर की अन पुवितर हरग-दुताँ की मेमा में पाछो आऊँ तो मूँ भी वाँकाऊँ मुण्डो फेर लेऊँ।</verse>
				<verse number="27">मूँ थाँकाऊँ हाँची केवूँ हूँ के, अटे ऊबा हे अणामूँ नरई अस्या हे जीं जद्याँ तईं परमेसर का राज ने देक ने लेई, तद्याँ तईं वीं ने मरी।”</verse>
				<verse number="28">ईं बाताँ व्या पसे ईसू आट दन केड़े पतरस, यहुन्नो अन याकूब का हाते परातना करबा का वाते मंगरा पे ग्या।</verse>
				<verse number="29">जद्याँ वी परातना कररिया हा, तो वाँको मुण्डा को रूप बदलग्यो अन वाँका गाबा धोळा-फट वेन चमकबा लागा।</verse>
				<verse number="30">अन देको अणाचेत का वटे दो मनक परगट व्या, वीं ईसुऊँ बाताँ करबा लागा। वीं दो मनक मूसा अन एलिया हा।</verse>
				<verse number="31">जीं आपणी मेमा का हाते परगट व्या हा, अन ईसू यरूसलेम में आपणी मोतऊँ परमेसर की मरजी ने पुरी करबा का बारा में वीं बात कररिया हा।</verse>
				<verse number="32">पण, पतरस अन वाँका हण्डाळ्याँ गेरी नींद में हा अन जद्याँ वीं जाग्या तो वणा ईसू की मेमा ने देकी अन वणा दुई जणा ने भी देक्या ज्यो ईसू का हाते हा।</verse>
				<verse number="33">जद्याँ वी ईसू का नकेऊँ जाबा लागा तो पतरस ईसुऊँ क्यो, “हो मालिक, माँको अटे रेणो भलो हे, माँ अटे तीन छतरिया बणावा एक थाँका वाते, एक मूसा का वाते अन एक एलिया वाते।” वो खुद ने जाणतो हो के, वो कई केरियो हे।</verse>
				<verse number="34">वो यो केईस रियो हो, एक वादळा की छाया वाँका पे आगी अन ज्यूँई आको वादळो वाँका पे आग्यो तो वीं दरपग्या।</verse>
				<verse number="35">अन वणी वादळा मेंऊँ आ वाणी वी के, “यो मारो बेटो हे अन मारो चुण्यो तको हे, ईंकी हुणो।”</verse>
				<verse number="36">आ वाणी वेतई वणा ईसू ने ऐकला देक्या अन वी छानारिया अन ज्यो कई देक्यो हो। वींका बारा में वणा वीं टेम में कणीऊँ कई ने क्यो।</verse>
				<verse number="37">दूजे दन ईसू अन वींका चेला मंगरा ऊपरेऊँ उतररिया हा, तो एक मोटी भीड़ वाँकाऊँ मलबा आई।</verse>
				<verse number="38">अन देको वणी भीड़ऊँ एक जणे जोरऊँ क्यो, “ओ गरुजी, मूँ थाँकाऊँ अरज करूँ हूँ के, मारा बेटा ऊपरे दया करो, काँके वो मारे एकलो बेटो हे।</verse>
				<verse number="39">अन अणाचेत की एक हुगली आत्मा वींमें आ जावे हे अन वो हाको करबा लाग जावे अन वाँ वींने अस्यो मरोड़े हे के, वींका मुण्डाऊँ जाग आ जावे हे। अन वाँ वींने कदीस ने छोड़े हे अन हमेस्यान वींका सरीर ने खारी ही।</verse>
				<verse number="40">में थाँरा चेलाऊँ ईं हुगली आत्माने बारणे निकाळबा के वाते परातना करई। पण, वीं ईंने ने निकाळ सक्या।”</verse>
				<verse number="41">ईसू मनकाँ की भीड़ऊँ क्यो, “ओ बना विस्वास का मनक अन भटक्या तका लोगाँ मूँ थाँका हाते कटा तईं रेवूँ?” अन वींका बाप ने क्यो, “आपणाँ बेटा ने अटे ल्या।”</verse>
				<verse number="42">वो वीं छोरा ने लईरो हो तद्याँ हुगली आत्मा छोरा ने पटकन मरोड़्यो। पण, ईसू वणी हुगली आत्माने तापड़ी अन छोरो ने हव करन वींका बाप ने हूँपे दिदो।</verse>
				<verse number="43">जद्याँ हाराई लोगाँ परमेसर की सामरत ने देकी, तो वाँकी आक्याँ खुली की खुली रेगी। ईसू मसी ज्यो भी किदो हो वींने देकन लोग-बाग अचम्बो कररिया हा तो ईसू आपणाँ चेलाऊँ क्यो,</verse>
				<verse number="44">“अबे मूँ ज्यो केरियो हूँ, वो कानो देन हुणो। मूँ मनक को पूत मनकाँ का हाताँ में धोकाऊँ पकड़वायो जाऊँ।”</verse>
				<verse number="45">पण, चेला अणी बाताँ ने हमज ने सक्या अन या बात वाँकाऊँ छाने ही जणीऊँ वीं ईंने जाण ने सक्या अन वीं वणाऊँ या बात पूँछबाऊँ दरपता हा।</verse>
				<verse number="46">एक दाण ईसू का चेला का बंच में अणी बात में होड़ा-होड़ वेबा लागी के, “आपाँ मूँ मोटो कूण हे?”</verse>
				<verse number="47">ईसू यो जाणग्या के, वाँका मना में कई चालरियो हे। ईं वाते वणा एक बाळक ने आपणाँ नके ऊबो करन</verse>
				<verse number="48">चेलाऊँ क्यो, “ज्यो कुई अणी बाळक ने मारा नामऊँ गरेण करे हे, वी मने भी गरेण करे हे अन जणी मने खन्दायो हे वींने भी करी। काँके ज्यो थाँ हारामूँ फोरो हे, वोईस हाराऊँ मोटो हे।”</verse>
				<verse number="49">तद्याँ यहुन्ने क्यो, “ओ मालिक, माँ एक मनक ने थाँका नामऊँ हुगली आत्मा काड़तो तको देक्यो हे अन माँ वींने नटग्या, काँके वो आपणाँ समू को ने हे।”</verse>
				<verse number="50">ईसू वणीऊँ क्यो, “वींने रोको मती, काँके ज्यो आपणो दसमण ने हे, वीं आपणी आड़ी हे।”</verse>
				<verse number="51">अन अस्यान व्यो जद्याँ वाँने हरग में उटाया जावा का दन पूरा वेबा में हा, तो ईसू यरूसलेम में जाबा का वाते ते किदो अन चाल पड़्यो।</verse>
				<verse number="52">अन वणा आपणाँ पेल्याँ आपणाँ दुताँ ने आगे खन्दाया। वी चाल पड़्या अन एक सामरिया मनकाँ का गाम में ग्या के, वाँका वाते त्यारी करे।</verse>
				<verse number="53">पण, वटा का लोगाँ वींकी आवभगत ने किदी, काँके वो यरूसलेम में जईरो हो।</verse>
				<verse number="54">ओ देकन वाँका चेला याकूब अन यहुन्ने क्यो, “ओ परबुजी, थाँ छावो तो, माँने हुकम दो, माँ आको नास आकासऊँ वादी वरान कर दा?”</verse>
				<verse number="55">पण, ईसू वाँका आड़ी फरन वाँने तापड़्या।</verse>
				<verse number="56">तद्याँ ईसू आपणाँ चेला का हाते दूजाँ गाम पराग्या।</verse>
				<verse number="57">जद्याँ वी गेले-गेले जारिया हा। तो कणी वाँकाऊँ क्यो, “थाँ जटे-जटे जावो, मूँ थाँका पाच्छे आऊँ।”</verse>
				<verse number="58">ईसू वणीऊँ क्यो, “हिवाळ्या का नके तो खोकल वेवे हे अन आकास का जीव-जनावराँ का वाते तो गवाळा वेवे हे। पण, मूँ मनक का पूत का नके मातो ढाकबा जतरीक भी जगाँ ने हे।”</verse>
				<verse number="59">ईसू दूजाऊँ क्यो, “मारे पाच्छे चाल।” पण वणी क्यो, “हो परबू, मने पेल्या जाबा दो के, मूँ आपणाँ बाप ने गाड़ दूँ।”</verse>
				<verse number="60">ईसू वणीऊँ क्यो, “मरिया तका ने आपणाँ मरिया तका ने गाड़बा दो। पण, थूँ जा अन परमेसर का राज का बारा में परच्यार कर।”</verse>
				<verse number="61">एक दूजे ओरी क्यो, “ओ परबू, मूँ थाँका पाच्छे चालूँ। पण, पेल्या मने जाबा दो के, मूँ आपणाँ घर का लोग-बागाऊँ हिक ल्यऊँ।”</verse>
				<verse number="62">ईसू वणीऊँ क्यो, “ज्यो आपणो हात हळ पे राकन पाच्छे देकतो रेवे हे वो परमेसर का राज में कई काम को ने हे।”</verse>
			</chapter>
			<chapter number="10">
				<verse number="1">अणी बात का केड़े परबू बोईतर चेला ने त्यार किदा। ईसू जणी-जणी नगर, गाम ढाणी में जाबावाळो हो। वणामें दो-दो चेला ने आपणाँ पेल्या खन्दाया।</verse>
				<verse number="2">वणा वाँकाऊँ क्यो के, “पाक्या तका खेत तो घणा हे। पण, दानक्याँ कम हे। अणी वाते हाक का मालिकऊँ परातना करो के, वो आपणी हाक का वाते दानक्याँ खन्दावे।</verse>
				<verse number="3">थाँ जावो अन आद राको, मूँ थाँने गारा के जस्यान करन वरगड़ा का बचमें खन्दारियो हूँ।</verse>
				<verse number="4">ईं वाते ने तो बटुवो अन नेई थेलो, नेई एक ओरी जोड़ी पगरख्याँ लो अन नेई गेला में कणीऊँ नमस्कार करबा का वाते रकज्यो।</verse>
				<verse number="5">जणी घर में जावो। पेली केज्यो, ‘अणी घर में सान्ती मले।’</verse>
				<verse number="6">जद्याँ वणी घर में कूण हव मनक वेई, तो थाँकी सान्ती वींने मली। ने वेई तो थाँकी सान्ती थाँका नके पाच्छी आ जाई।</verse>
				<verse number="7">वणी घर मेंईस रेवो अन जो कई वटूँ मले, वोईस खावो-पीवो, काँके दानक्याँ ने आपणी दानकी मलणी छावे। घर-घर मती फरज्यो।</verse>
				<verse number="8">अन जणी नगर में थाँ जावो अन वटा का लोग-बाग थाँने पामणा के जस्यान आपणाँ घर में बलावे। तो जो कई थाँका हामे परोसे वोईस खाज्यो।</verse>
				<verse number="9">वटा का माँदा मनकाँ ने हव करो अन वाँने केज्यो के, ‘परमेसर को राज थाँका बचमें आ पूग्यो हे।’</verse>
				<verse number="10">पण, जणी नगर में जावो अन वटा का लोग-बाग थाँको आदर ने करे, तो वाँका बजार में जान केवो के,</verse>
				<verse number="11">‘थाँके नगर को धूळो जो माँके पगाँ पे लाग्यो हे वो माँ थाँका विरोद में थाँका हामे जाटक रिया हा। तद्याँ भी ओ आद राकज्यो के, परमेसर को राज थाँका का बचमें आ पूग्यो हे।’</verse>
				<verse number="12">मूँ थाँकाऊँ केवूँ हूँ के, न्याव का दन वणी नगर की दसा सदोम का लोग-बागाँ की दसाऊँ खराब वेई।”</verse>
				<verse number="13">“ओ खुराजीन, ओ बेतसेदा, थाँने धिकार हे, काँके जो परच्यो थाँकामें वतायो हे। यद्याँ यो सूर अन सेदा का नगराँ में करियो जातो। तो कदका बोरी का गाबा पेरन वानी में लोटन यो दिका देता के, वणा आपणाँ पापाऊँ मन फेर लिदो हे।</verse>
				<verse number="14">पण, न्याव का दन थाँ सूर अन सेदा नगराऊँ हेलो दण्ड पावो।</verse>
				<verse number="15">अरे ए कफरनूम, कई थूँ हरग तईं ऊसो उटायो जाई? ने। थूँ तो रेटे पाताळ में नाक्यो जाई।”</verse>
				<verse number="16">ईसू आपणाँ चेलाऊँ क्यो, “जो थाँकी हुणे हे, वी मारी हुणे हे अन ज्यो थाँने बेकार हमजे हे वीं मने भी बेकार हमजे हे। अन ज्यो मने बेकार हमजे हे वीं मने खन्दाबावाळा ने भी बेकार हमजे हे।”</verse>
				<verse number="17">वी बोईतर चेला खुस वेन पाच्छा आया अन बोल्या, “ओ परबुजी, थाँका नामऊँ हुगली आत्मा भी माकाँ बंस में वे जावे हे।”</verse>
				<verse number="18">ईंपे ईसू वाँकाऊँ क्यो, “मूँ सेतान ने विजळी के जस्यान हरगऊँ पड़तो तको देकरियो हूँ।</verse>
				<verse number="19">हुणो, में थाँने हापाँ अन बिच्छुवाँ ने पगाँऊँ कुछळवा को अन दसमण की हारी सगती पे अदिकार दिदो हे अन कस्यी भी चिजऊँ थाँको नकसाण ने वेई।</verse>
				<verse number="20">पण, ईं वातेईस राजी मती वेवो के, हुगली आत्मा थाँका बंस में हे, पण अणीऊँ खुस वेवो के, थाँको नाम हरग में लिक्यो ग्यो हे।”</verse>
				<verse number="21">वणी दाण ईसू पुवितर आत्माऊँ भरन खुसीऊँ राजी वेग्या अन क्यो, “ओ बापू, हरग अन धरती का परबू, मूँ थाँको धन्नेवाद करूँ हूँ के, थाँ अणा बाताँ ने अकलमन्दाऊँ अन हमजदाराऊँ हपान राकी अन बाळकाँ का ऊपरे परगट किदी। ओ परबू जी, काँके अस्यान थाँने बड़िया लागे हे।”</verse>
				<verse number="22">“मने मारा बापू हारोई हूँप दिदो हे अन कुई भी ने जाणे हे के, बेटो कूण हे? अन बाप अन बेटो कूण हे? यो भी कुई ने जाणे हे कन पसे वाँके अलावा ज्याँने बेटो बताणो छारियो हे।”</verse>
				<verse number="23">पसे वी चेला का आड़ी फरन छानेऊँ केवे हे, “थाँ करता धन्न हो, ज्यो थाँने ईं बाताँ देकबा को मोको मल्यो।</verse>
				<verse number="24">काँके, मूँ थाँने बताणो छावूँ हूँ के, नरई राजा अन परमेसर का आड़ीऊँ बोलबावाळा अणा बाताँ ने देकणी छाया, पण वीं देक ने सक्या अन ज्यो बाताँ थाँ हुणरिया हो वाँने वणा हूणणी छई, पण हुण ने सक्या।”</verse>
				<verse number="25">अन देको, मूसा का नेम हिकाबावाळो ऊबो व्यो अन ईसू की परक करबा का वाते वणीऊँ पूँछ्यो, “गरुजी, अनंत जीवन पाबा का वाते मूँ कई करूँ?”</verse>
				<verse number="26">ईसू वणीऊँ क्यो, “वेवस्ता की विदी में कई लिक्यो तको हे? वटे थाँ कई भण्यो हो?”</verse>
				<verse number="27">वणी वणाऊँ क्यो, “थूँ आपणाँ परबू परमेसरऊँ आपणाँ पूरा मन अन पुरी आत्माऊँ अन आपणी हारी सगतिऊँ अन आपणी हारी अकलऊँ परेम कर, अन आपणाँ पड़ोसीऊँ आपणाँ जस्यान परेम राक।”</verse>
				<verse number="28">तद्याँ ईसू वणीऊँ क्यो, “थें बड़िया जवाब दिदो हे अन थूँ अस्यान करी तो, थूँ अनंत जीवन पाई।”</verse>
				<verse number="29">पण, वणी आपणाँ खुद ने धरमी बतावा की मरजी राकते तके ईसुऊँ क्यो, “मारो पड़ोसी कूण हे?”</verse>
				<verse number="30">ईसू वणीऊँ क्यो, “देको, एक मनक यरूसलेमऊँ यरीहो जारियो हो, तो डाकू वींने गेर लिदो अन वणा हारोई वींपूँ कोस लिदो अन वींने नांगो कर दिदो। अन कूटन अदमरियो करन पराग्या।</verse>
				<verse number="31">पसे अस्यान व्यो के, वणीस गेलाऊँ एक याजक जारियो हो। जद्याँ वणी वीं मनक ने देक्यो तो मुण्डो फेरन परोग्यो।</verse>
				<verse number="32">अणीस तरिया मन्दर में सेवा करबावाळो लेवी समू को मनक भी वणीस गेले आयो। वो भी वींने देकन परोग्यो।</verse>
				<verse number="33">पण, एक सामरी मनक भी वणी गेले जारियो हो, वणी वीं अदमरिया मनक ने पड़्यो तको देक्यो तो, वींने दया आगी।</verse>
				<verse number="34">ईं वाते वो वींका नके ग्यो अन वींके लागी ही वटे तेल अन अंगूरा को रस लगान दवई-पट्टी किदी। पसे वींने आपणाँ गदेड़ा पे बेठाण धरमसाला में लेग्यो अन वींकी सेवा-चाकरी किदी।</verse>
				<verse number="35">दूजे दन वणी दो चान्दी का रिप्या निकाळ वणी धरमसाला का मालिक ने दिदा अन वणीऊँ क्यो, ‘अणी की सेवा-चाकरी करज्ये अन ईंका ऊपरे थारो ज्यो भी खरचो ओरी लागी, पाच्छी आती दाण मूँ थने दे देऊँ।’”</verse>
				<verse number="36">ईसू वणीऊँ पूँछ्यो अबे वता, “थारी हमज में वणी अदमरिया तका मनक को वणा तीनामूँ पड़ोसी कूण हे?”</verse>
				<verse number="37">मूसा का नेम हिकाबावाळे क्यो, “वोईस जणी वींपे दया किदी।” ईसू वणीऊँ क्यो, “जा, थूँ भी वस्योईस कर।”</verse>
				<verse number="38">जद्याँ ईसू अन वींका चेला आपणाँ गेले जारिया हा। वी एक गाम में पूग्या। वटे मारता नाम की एक लगई वाँने आपणाँ घरे लेगी।</verse>
				<verse number="39">अन मरियम नाम की वींके बेन ही। वा परबू का चरणा में बेटन वाँकी वाणी हूणती री।</verse>
				<verse number="40">वणी दाण तरिया-तरिया की त्यारी करता तकी मारता घबरागी अन वाँ ईसू का नके आन बोली, “ओ परबू जी, कई थाँने चन्ता ने हे के, मारी बेन मने सेवा करबा का वाते एकलीई छोड़ दिदी हे। अणी वाते वणीऊँ क्यो, मारी मदत करे।”</verse>
				<verse number="41">परबू वींने क्यो, “मारता, ओ मारता, थूँ घणी बाताँ का वाते चन्ता करन घबरावे हे।</verse>
				<verse number="42">पण, एक बात घणी जरूरी हे अन वणी मरियम खास भाग ने चुण लिदो हे। ज्यो वणीऊँ कदी लिदो ने जाई।”</verse>
			</chapter>
			<chapter number="11">
				<verse number="1">पसे ईसू कटे परातना कररियो हो अन जद्याँ वणा परातना कर नाकी। तो वाँका चेला मूँ एक चेले वाँने क्यो, “ओ परबू जी, जणी तरिया यहुन्ने आपणाँ चेला ने परातना करबा ने हिकाया हा। वणीस तरिया माने भी हिकावो।”</verse>
				<verse number="2">ईसू वाँकाऊँ क्यो, “जद्याँ थाँ परातना करो। तो केज्यो, “ओ माकाँ बापू, थाँको नाम पुवितर मान्यो जावे। थाँको राज आवे।</verse>
				<verse number="3">माँके दन भर की रोटी आज माने दे।</verse>
				<verse number="4">अन माकाँ पाप माप करो काँके, माँ भी माकाँ हाराई गुनेगाराँ ने माप किदा हे माँने अस्यी तागत देज्यो ताँके, माँ हारी तरिया की परक को सामनो कर सका।”</verse>
				<verse number="5">पसे ईसू वाँकाऊँ क्यो, “थाँका मेंऊँ कूण अस्यो हे के, वींके एक दोस्त वेवे अन वो आदी रात में वींका नके जान वणीऊँ केवे के, ‘दोस्त मने तीन रोट्याँ दिदे,</verse>
				<verse number="6">काँके एक मनक मारा घरे रात रक्यो हे अन वींकी मनवार करबा का वाते मारा नके कई ने हे।’</verse>
				<verse number="7">अन वणी मयनेऊँ जवाब दिदो, ‘मने परेसान मती कर, अबाणू कमाड़ लागग्या हे अन मारा छोरा-छोरी मारा नके बिछाणा पे हूँता तका हे, ईं वाते मूँ उठ ने सकूँ हूँ।’”</verse>
				<verse number="8">मूँ थाँकाऊँ केवूँ हूँ, यद्याँ वींको यार-दोस्त वेता तका भी वींकी हुणन वो ने देवे, तद्याँ भी थाँ बना हरमाता तका माँगता रेवो तो, वो उटन थाँने थाँकी जरूत के जतरो दे देई।</verse>
				<verse number="9">मूँ थाँकाऊँ केवूँ हूँ के, माँगो, तो थाँने दिदो जाई, होदो तो थाँने मल जाई, कमाड़ वजावो, तो थाँका वाते खोल्यो जाई।</verse>
				<verse number="10">काँके, ज्यो कुई माँगे हे, वीं पावे हे। ज्यो कुई होदे हे, वाँने मल जावे हे। ज्यो वजावे हे, वींका वाते खोल्यो जाई।</verse>
				<verse number="11">थाँकामूँ कूण अस्यो बाप वेई? जिंको बेटो रोटी माँगे अन वो वींने रोटी का बदले भाटो दे देवे अन माछळी मागे अन माछळी का बदले हाँप देवे।</verse>
				<verse number="12">अन यद्याँ वो ईण्डो माँगे अन ईण्डा का बदले विच्छु दे देवे।</verse>
				<verse number="13">अणी वाते थाँ बुरा वेता तका भी आपणाँ छोरा-छोरी ने हव चिजाँ देणी जाणो हो। तो हरग को मालिक आपणाँ माँगबावाळा ने पुवितर आत्मा काँ ने देई?</verse>
				<verse number="14">पसे ईसू एक बोबड़ा मनक मूँ हुगली आत्मा निकाळी। जद्याँ हुगली आत्मा निकळगी तो बोबड़ो बोलबा लागग्यो अन लोग-बाग ओ परचो देकन अचम्बो करबा लागा।</verse>
				<verse number="15">पण, वाकामूँ नरई केबा लागा, “ओ तो हुगली आत्मा का हाकम बालजेबूल का नामऊँ हुगली आत्मा काड़े हे।”</verse>
				<verse number="16">अन नरई वाँने परकबा का वाते आकासऊँ हेन्याण माग्यो।</verse>
				<verse number="17">पण, ईसू वाँका मन की बात ने जाणन क्यो, “जणी राज में फुट पड़ जावे हे, वो राज उजड़ जावे हे अन जणी घर में फुट पड़े हे, वो घर को नास वे जावे हे।</verse>
				<verse number="18">यद्याँ सेतान आपणो खुद को विरोदी वे जावे, तो वींको राज कस्यान बण्यो तको रे सके हे? में यो ईं वाते पूँछ्यो, काँके, थाँ मारा बारा में केवो हो के, यो हुगली आत्मा का हाकम बालजेबूल की मदतऊँ हुगली आत्मा काड़े हे।</verse>
				<verse number="19">पलई मूँ हुगली आत्मा का हाकम बालजेबूल की मदतऊँ हुगली आत्मा काड़ू हूँ, तो थाँका चेला किंकी मदतऊँ काड़े हे? अणी वाते वींइस थाँको न्याव करी।</verse>
				<verse number="20">पण यद्याँ मूँ परमेसर की ताकतऊँ हुगली आत्माने काड़ू हूँ। तो हमजी लो परमेसर को राज थाँका बचमें आ पूग्यो हे।</verse>
				<verse number="21">“जद्याँ एक तागतवर मनक हत्यार लेन आपणाँ घर की रुकाळी करे हे, तो वींकी धन-दोलत बची तकी रेवे हे।</verse>
				<verse number="22">पण, जद्याँ वणीऊँ भी ज्योरावर मनक हमलो करन वणीऊँ जीत जावे हे, तो वींका वी हत्यार जिंपे वींने भरोसो हे, वो कोस लेवे हे अन वींकी धन-दोलत लूट लेवे हे।</verse>
				<verse number="23">ज्यो मारा हाते ने हे, वी मारा विरोदी हे अन जी मारा हाते परमेसर का राज मनकाँ भेळा ने करे हे, वीं वाँने परमेसरऊँ छेटी करे हे।</verse>
				<verse number="24">“जद्याँ हुगली आत्मा मनक का मयनेऊँ निकळ जावे हे, तो वी हूकी जगाँ में रईम्बो लेवा का वाते फरती रेवे हे अन जद्याँ ने पावे हे, तो केवे हे के, ‘मूँ वणी घर में पाच्छी जावूँ, जटूँ मूँ निकळी हूँ।’</verse>
				<verse number="25">अन पाच्छी आईने वणने साप-सुतरो अन सज्यो-सजायो पावे हे।</verse>
				<verse number="26">जद्याँ वा आन आपणाँ हाते ओर भी हात हुगली आत्माने लावे हे अन वी वणी में घुसने वास करे हे अन वणी मनक की दसा पेल्याऊँ भी हेली खराब वे जावे हे।”</verse>
				<verse number="27">जद्याँ ईसू ईं बाताँ केरिया हो, तो भीड़ मूँ कणी लुगई हाको करन क्यो, “धन्ने हे वाँ लुगई, जणी थने जण्यो अन दूद पायो।”</verse>
				<verse number="28">ईंपे ईसू वींने क्यो, “हाँ, पण अणीऊँ भी हेला धन्ने हे वी, जी परमेसर की वाणी हुणे अन माने हे।”</verse>
				<verse number="29">जद्याँ लोग-बागाँ की भीड़ हेली वेती जारी ही, तो ईसू केबा लागा के, “अणी जुग का लोग-बाग बेण्डा हे। वीं हेन्याण मागे हे। पण, परमेसर का आड़ीऊँ बोलबावाळा योना का हेन्याण ने छोड़न कस्यो भी दूजाँ हेन्याण वाँने ने बतायो जाई।</verse>
				<verse number="30">जणी तरिया योनो नीनवा का लोग-बागाँ का वाते हेन्याण ठेरियो। वणीस तरिया मूँ मनक को पूत भी अणी जुग का लोग-बागाँ का वाते हेन्याण ठेरूँ।”</verse>
				<verse number="31">“आतमणी दिसा की राणी सिबा न्याव का दन परगट वेन अणी पीड़ी का मनकाँ ने दोसी ठेराई। काँके वाँ सुलेमान का ग्यान ने हुणबा का वाते धरती का एक खुणाऊँ दूजे खूणे तईं गी ही। अबे देको, अटे वो हे, ज्यो सुलेमानऊँ भी मोटो हे।</verse>
				<verse number="32">नीनवा का लोग-बाग न्याव का दन अणी पीड़ी का लोग-बागाँ का विरोद में ऊबा रेन दोसी ठेराई। काँके वणा योना का परच्यार ने हुणन मन फेरियो अन देको, अटे वो हे, ज्यो योनाऊँ भी मोटो हे।”</verse>
				<verse number="33">“दिवो लगान कूण वींने हपी तकी जगाँ में कन पसे कणी ठामड़ा का रेटे ने मेले हे, पण वो वींने आल्याँ में मेले हे, ताँके मयने आबावाळा ने उजितो मले।</verse>
				<verse number="34">थाँरा देह को दिवो थारी आक्याँ हे, अणी वाते यद्याँ थारी आक्याँ साप हे तो पुरी देह उजिताऊँ भरी तकी हे। पण, यद्याँ ईं बुरी हे, तो थारी देह अन्दारावाळी वे जाई।</verse>
				<verse number="35">ईं वाते ध्यान दो के, ज्यो उजितो थाँकामें हे। वो अंदारो ने वे जावे।</verse>
				<verse number="36">ईं वाते यद्याँ थाँकी आकी देह उजितो हे अन वींको कस्यो भी भाग अन्दारावाळो ने रेवे, तो आकी देह अस्यो उजितो देई, जस्यान दिवो हगलती दाण आपणी चमकऊँ थाँने उजितो देवे हे।”</verse>
				<verse number="37">जद्याँ ईसू बाताँ करीस रिया हा। तो कणी फरीसी वाँकी मनवार किदी के, “मारे हाते खाणो खाबा ने मारा घरे पधारो।” ईसू वींका घरे जान खाणो खाबा ने बेट्या।</verse>
				<verse number="38">फरीसी ने यो देकन घणो अचम्बो व्यो के, वणी खाणो खाबा का पेल्याँ आपणी रीत का हस्याबूँ हात ने धोया।</verse>
				<verse number="39">ईंपे परबू वाँकाऊँ क्यो, “ओ फरीसी, थाँ तो प्याळ्या अन थाळयाँ ने उपरे-उपरेऊँ मांजो हो, पण, थाँका मयने लाळच अन पाप भरियो तको हे।</verse>
				<verse number="40">ओ बना अकलवाळा, जणी बारणे को भाग बणायो हे, कई वणी मयने को भाग ने बणायो?</verse>
				<verse number="41">पण, हा, थाँ खुद का मन ने साप करन आपणाँ नके ज्यो भी हे, वो दान कर देवो, तो देकज्यो, थाँकी हारी चिजाँ थाँका वाते सुद वे जाई।”</verse>
				<verse number="42">“पण, ओ फरीसियाँ, थाँने धिकार हे थाँ पोदिनो अन सुदाब नाम की जड़ी बूटी अन हारी तरियाँ का जड़ी-बुट्याँ को दसवो हिस्सो देवो हो। पण, थाँ लोगाँ का हाते पकसपात करो हो अन परमेसर का वाते परेम ने टाळ देवो हो। वेणो तो यो छावतो के, थाँ मनकाँ का हाते पकसपात ने करता अन परमेसर का परेम ने भी दिकाता अन हातेई हाते दसमो भाग भी देता।</verse>
				<verse number="43">“ओ फरीसियाँ, थाँने धिकार हे। थाँ यहूदियाँ का परातना घर में ऊँचा-ऊँचा आसन छावो हो अन बजारा में आदर-मान छावो हो।</verse>
				<verse number="44">“थाँने धिकार हे। काँके थाँ वणी हपी तकी कबर की तरियाँ हो। जिंका ऊपरे लोग-बाग चाले हे। पण, वी ने जाणे हे के, वींमें कई हे।”</verse>
				<verse number="45">जद्याँ एक मूसा का नेम हिकाबावाळा ईसुऊँ क्यो, “ओ गरुजी, जद्याँ थाँ अस्यी बाताँ केवो हो, तो थाँ माँको भी अपमान करो हो।”</verse>
				<verse number="46">अणी बात ने हूँणने ईसू क्यो, “ओ मूसा का नेमा ने हिकाबावाळा थाँने धिकार हे। थाँ अस्यो बोज जिंने उठाणो भी घणो दोरो हे। मनकाँ रे ऊपरे लादो हो। पण, थाँ खुद वणी बोज के आपणी आँगळीऊँ भी टेको ने देणो छावो हो।</verse>
				<verse number="47">थाँने धिकार हे, थाँ वणा परमेसर का आड़ीऊँ बोलबावाळा का वाते कबराँ बणावो हो, ज्याँने थाँका बड़ाबा मार नाक्या हा।</verse>
				<verse number="48">अस्यान करन थाँ ओ साबत करो हो के, थाँ आपणाँ बापदादा का कामाँऊँ राजी हो, काँके वणा तो वाँने मार नाक्या हा अन थाँ वाँकी कबराँ बणावो हो।</verse>
				<verse number="49">ईं वाते परमेसर को ग्यान भी केवे हे के, ‘मूँ वाँका नके परमेसर का आड़ीऊँ बोलबावाळा अन खन्दाया तका ने खन्दाऊँ। पसे वीं वाकामूँ वीं करता ने तो मार नाकी अन नरई ने हताया करी।’</verse>
				<verse number="50">ताँके जतरा परमेसर का आड़ीऊँ बोलबावाळा को लुई दनियाँ की रचनाऊँ अबाणू तईं वेवाड़्यो ग्यो हे, वींको हिसाब ईं पिड़ीऊँ लिदो जाई।</verse>
				<verse number="51">हाबिल की हत्याऊँ लेन जकरय्या की हत्या तईं ज्या वेदी अन मन्दर का बचमें किदी गी हे, मूँ थाँकाऊँ हाँची केवूँ हूँ, ईंको हिसाब अणीस पिड़ीऊँ लिदो जाई।</verse>
				<verse number="52">धिकार हे नेमा ने हिकाबावाळा ने। थाँ ग्यान का कमाड़ की चाब्याँ तो ले लिदी ही, पण ने तो थाँ वींमें खुद ग्या हो अन ज्यो वींमें जाणा छारिया हा, वाँने भी थाँ रोक दिदा हे।”</verse>
				<verse number="53">जद्याँ ईसू वटाऊँ निकळग्या, तो सास्तरी अन फरीसी वाँकाऊँ घणी दसमणी राकबा लागा अन वाँने छेड़ाबा लागा के, वीं घणी हारी बाताँ पे बात-बच्यार करे।</verse>
				<verse number="54">अन वाँने फसाबा का वाते अस्या मोका की वाट नाळावा लागा के, ईसू का मुण्डाऊँ कुई बुरी बात निकळे।</verse>
			</chapter>
			<chapter number="12">
				<verse number="1">पसे जद्याँ हजारो मनक भेळा वेग्या हा अन अटा तईं के, मनक एक-दूँजा के ऊपरे पड़रिया हा, तद्याँ ईसू आपणाँ चेलाऊँ क्यो के, “फरीसियाँ का कपट रूपी हाज्याऊँ बंचन रेवो।</verse>
				<verse number="2">कई भी छाने ने हे ज्यो परगट ने किदो जाई अन ने कई ढाक्यो तको हे ज्यो चोड़े ने किदो जाई।</verse>
				<verse number="3">अणी वाते ज्यो कई थाँ अन्दारा में क्यो हे। वो उजिता में हुण्यो जाई। अन ज्यो थाँ ओवरा में छाने-छाने किंका कान्दड़ा में क्यो हो, वींने मेड़्या पूँ हाराई का हामे घोसित किदो जाई।”</verse>
				<verse number="4">“पण, हो मारा हण्डाळ्याँ, मूँ थाँकाऊँ कूँ हूँ के, वाँकाऊँ मती दरपो, जी खाली थाँकी देह को नास कर सके हे। पण, वींका केड़े वीं कई ने कर सके हे, वाँकाऊँ दरपो मती।</verse>
				<verse number="5">मूँ थाँने बताऊँ हूँ के, थाँने बेस परमेसरऊँ दरपणो छावे। ज्यो मारन नरक में नाकबा की तागत राके हे।</verse>
				<verse number="6">कई दो प्यईसा की पाँच सरकल्या ने वके हे? पछे भी परमेसर वाकामूँ एक ने भी ने भूले हे।</verse>
				<verse number="7">अन देको, थाँका माता का एक-एक बाल तक गण्या तका हे। अणी वाते दरपो मती। थाँ तो नरी सरकल्याऊँ घणा किमती हो।”</verse>
				<verse number="8">“मूँ थाँकाऊँ केवूँ हूँ, ज्यो कुई मनकाँ का हामे मने मान लेई वाँने मूँ मनक को पूत परमेसर का हरग-दुताँ का हामे मान लेऊँ।</verse>
				<verse number="9">पण, ज्यो मनकाँ का हामे मने ने माने हे, वाँने भी परमेसर का हरग-दुताँ का हामे ने मान्यो जाई।</verse>
				<verse number="10">ज्यो कुई मूँ मनक का पूत का विरोद में कई गलती करी, वींकी गलती माप किदी जाई, पण ज्यो कुई पुवितर आत्मा का विरोद में कई गलती करी, तो वींने कदी माप ने किदो जाई।</verse>
				<verse number="11">“जद्याँ मनक थाँने यहूदी पंचात में, हाकम का हामे अन अदिकारियाँ का हामे लेजाई, तो चन्ता मती करज्यो के, थाँ आपणो बचाव कस्यान करो कन थाँने कई केणो पड़ी।</verse>
				<verse number="12">काँके पुवितर आत्मा थाँने हिकाई के, वणी टेम थाँने कई केणो हे।”</verse>
				<verse number="13">पसे लोग-बागाँ की भीड़ मेंऊँ एक जणे ईसुऊँ क्यो, “ओ गरुजी, थाँ मारा भईऊँ केवो के, मारा बाप की धन-दोलत को बटवारो कर दे।”</verse>
				<verse number="14">ईसू वींने क्यो, “अरे भला मनक, मने थाँको न्याव कन बटवारो करबावाळो कणी बणायो हे?”</verse>
				<verse number="15">अन वणा ओरी भी क्यो, “हेंचेत रेवो अन हारी तरियाँ का लोब-लाळचऊँ आपणाँ खुद ने बचान राको, काँके कणी को जीवन वींकी धन-दोलतऊँ बड़न ने वेवे हे।”</verse>
				<verse number="16">पसे ईसू वाँकाऊँ एक केणी की के, “कणी धनवान के हव हाक पेदा वी।</verse>
				<verse number="17">जद्याँ वो आपणाँ मन में बच्यार करबा लागो के, ‘मूँ कई करूँ। काँके मारा अटे जगाँ ने हे। जटे मारी हाक ने मेलू।’</verse>
				<verse number="18">पसे वणी मनक क्यो, ‘मूँ ओ करूँ हूँ के, मारी बकारियाँ ने तोड़न मोटी वणाऊँ, अन पसे वाँमें हारी हाक अन दूजी हारी चिजाँ मेलू।</verse>
				<verse number="19">अन आपणी आत्माऊँ केवूँ के, “आत्मा, थाँरा पा घणा वरा का वाते धन-दोलत हे। आणन्द का हाते खा अन पीं अन राजी-खुसी रे।” ’</verse>
				<verse number="20">पण, परमेसर वणीऊँ क्यो, ‘ए वेण्डा मनक, अणी रातेईस थूँ मर जाई। जो कई भी थें भेळो किदो हे। वो किंको रेई?’</verse>
				<verse number="21">अणीस तरियाँ अस्याईस वीं मनक भी हे, जी आपणाँ वाते धन-दोलत भेळी करे हे, पण परमेसर की देकणी में वो धनवान ने हे।”</verse>
				<verse number="22">पसे ईसू आपणाँ चेलाऊँ क्यो, ईं वाते मूँ थाँकाऊँ केवूँ हूँ के, आपणाँ जीव की चन्ता-फिकर मती करज्यो के, “आपाँ कई खावा? आपाँ कई पेरो?</verse>
				<verse number="23">काँके खाणाऊँ जीव अन कपड़ाऊँ सरीर घणो खास हे।</verse>
				<verse number="24">कागला पे ज्यान दो के, वी ने तो कई बावे हे, अन ने काटे हे अन ने वाँका नके बकारिया वेवे हे, तुई परमेसर वाँने पाळे हे। पण थाँको मोल तो जीव-जनावराऊँ घणो हेलो हे।</verse>
				<verse number="25">थाकामूँ कूण अस्यो हे? ज्यो चन्ता करन आपणी उमर में एक घड़ी भी बढा सके हे।</verse>
				<verse number="26">अणी वाते यद्याँ थाँ हाराऊँ फोरा काम ने भी ने कर सको हो, तो दूजी बाताँ का वाते, कई लेबा चन्ता-फिकर करो हे?</verse>
				<verse number="27">काकड़ का फुल पे ज्यान दो के, वी कस्यान मोटा वेवे हे? वी ने तो काम करे हे। अन नेई काते हे। तद्याँ भी मूँ थाँकाऊँ केवूँ हूँ के, सुलेमान भी आपणाँ हाराई वेभव में वणाऊँ कणी एक तरिया गाबा ने पेरी राक्या हा।</verse>
				<verse number="28">ईं वाते यद्याँ परमेसर काकड़ का फुल ने जी आज हे अन ज्याँने काले बाळ दिदा जाई। वाँने अस्यो पेरावो पेरावे हे, तो हो कम विस्वासवाळा मनकाँ, वीं थाँकी देक-रेक काँ ने करी?</verse>
				<verse number="29">अन थाँ ईं बात की खोज में मती रेवो के, कई खावा अन कई पिवाँ अन नेई ईंका बारा में होचन चन्ता करो।</verse>
				<verse number="30">काँके दनियाँ की हाराई मनक जी परमेसर ने ने माने हे, वीं अणा हारी चिजाँ की खोज में रेवे हे अन थाँका बापू परमेसर जाणे हे के, थाँने अणा चिजाँ की जरूत हे।</verse>
				<verse number="31">पण, थाँ परमेसर का राज की खोज में रेवो। तो ईं हारी चिजाँ भी थाँने मल जाई।”</verse>
				<verse number="32">“ओ नाना गारा, दरपो मती। काँके थाँरा बापू ने यो हव लागो हे के, थाँने राज देवे।</verse>
				<verse number="33">ईं वाते आपणी धन-दोलत ने बेचन दान कर दो अन आपणाँ वाते अस्या खुल्या वणावो, जी जूना ने वेवे हे। हरग में अस्यो धन भेळो करो, ज्यो ने घटे अन नेई कुई वींको नकसाण कर सके हे अन नेई वटे कुई चोर जा सके हे अन ने वटे किड़ा लागे हे।</verse>
				<verse number="34">काँके जटे थाँकी धन-दोलत वेई, वटे थाँको मन लाग्यो रेई।</verse>
				<verse number="35">“ज्यो कई भी काम आवे वींने करबा का वाते त्यार रेवो अन थाँका दिवा बळता रेवे।</verse>
				<verse number="36">अन थाँ वणा मनकाँ की तरिया बणो, जी आपणाँ मालिक की वाट नाळरिया वे के, वो ब्यावऊँ कदी घरे आई। जद्याँ अईन कँवाड़ वजाई, तो तरत वींका वाते खोल देवाँ।</verse>
				<verse number="37">धन्न हे वीं दास, जणा ने मालिक जागता तका अन त्यार देके। मूँ थाँकाऊँ हाचेई केवूँ हूँ के, वो भी त्यार वेन वाँने जीमबा का वाते बेवाड़ी अन नके आन वाँकी सेवा-चाकरी करी।</verse>
				<verse number="38">यद्याँ वी रात में दूजाँ पेर कन तीजा पेर में आन वाँने जागता देके, तो वी दास धन्न हे।</verse>
				<verse number="39">पण, थाँ यो ज्यान राको के, यद्याँ घर को मालिक जाणतो के, चोर कणी घड़ी आई, तो वो जागता रेवे अन आपणाँ घर में चोरी ने वेवा देतो।</verse>
				<verse number="40">अन थाँ भी त्यार रेवो, काँके जणी टेम थाँ होचो भी कोयने, वणी टेम मूँ मनक को पूत अई जाऊँ।”</verse>
				<verse number="41">जद्याँ पतरस ईसुऊँ पूँछ्यो, “ओ परबू, कई या केणी थाँ माँकाऊँ कन सबाऊँ केवो हे?”</verse>
				<verse number="42">परबू क्यो, “हमजदार अन विस्वास जोगो दास कूण हे? जिंने वींको मालिक वींने नोकर-चाकर का ऊपरे हाकम ठेरावे के, वाँने टेम-टेम पे तनका देवे।</verse>
				<verse number="43">धन्न हे वी दास, ज्याँने वाँको मालिक आन अस्यानीस करता देके।</verse>
				<verse number="44">मूँ थाँकाऊँ हाचेई केवूँ हूँ, वो वींने आपणी हारी दोलत का ऊपरे हाकम बणाई।</verse>
				<verse number="45">पण, यद्याँ वी दास होचबा लाग जावे के, ‘माँके मालिक के आबा में आलतरे टेम हे,’ अन नोकर-चाकर ने मारबा-कुटबा अन खाबा-पिबा अन नसा में धुत वेवा लागे।</verse>
				<verse number="46">तो वणी दास को मालिक अस्या दन आ जाई के, वो वींकी वाट ने नाळतो वेई अन अस्यी टेम जिंने वो जाणतो भी ने वेई, वीं टेम वो अई जाई। अन मालिक वींने टुका-टुका कर देई अन वींने बना विस्वास करबावाळा का बसमें राक देई।”</verse>
				<verse number="47">वी दास जी आपणाँ मालिक की मरजी ने जाणे हे अन त्यार ने रिया अन ने वींकी मरजी का जस्यान चाल्या, वी घणी बुरी तरिया मारिया जाई।</verse>
				<verse number="48">अन जणी दास मार खावा को काम किदो, पण मालिक की मरजीऊँ अणजाण हो तो, वो कम मार खाई। ईं वाते ज्याँने हेलो दिदो ग्यो हे, वाँकाऊँ हेलो माँग्यो जाई अन ज्याँने हेलाऊँ हेलो हूँप्यो ग्यो हे, वाँकाऊँ घणो हेलो लिदो जाई।</verse>
				<verse number="49">ईसू क्यो, “मूँ धरती पे वादी लगाबा ने आयो हूँ अन मूँ छावूँ हूँ? बेस, यो के, वादी अबाणूई लाग जावे।</verse>
				<verse number="50">मने एक कल्डा बतिस्मा की टेम में वेन जाणो अन जद्याँ तईं ओ पूरो ने वे जावे, तद्याँ तईं मने आराम ने मली।</verse>
				<verse number="51">कई थाँ यो होचो हो के, मूँ धरती पे मेल-मिलाप करबा आयो हूँ। मूँ थाँकाऊँ केवूँ हूँ, मेल करावा ने पण, फुट नाकबा आयो हूँ।</verse>
				<verse number="52">अबेऊँ एक घर में पाँच जणा एक-दूजाऊँ विरोद राकी। तीन जणा दो जणाऊँ अन दो जणा तीन जणाऊँ।</verse>
				<verse number="53">बाप बेटाऊँ अन बेटो बापऊँ विरोद राकी। बई बेटीऊँ अन बेटी बईऊँ अन हवजी लाड़ीऊँ अन लाड़ी हवजीऊँ विरोद राकी।”</verse>
				<verse number="54">ईसू लोग-बागाँ की भीड़ऊँ क्यो, “जद्याँ थाँ वादळा ने आतमणी आड़ीऊँ आता देको, तो थाँ तरत केवो हो के, ‘बरका आई’ अन अस्योईस वेवे हे।</verse>
				<verse number="55">जद्याँ थाँ लंकव आड़ीऊँ वइरो चाले हे, तो केबा लागो हो के, ‘लूँ वाजी’ अन अस्योईस वेवे हे।</verse>
				<verse number="56">ओ कपटी मनकाँ, थाँ धरती अन आकास का रूप को अरत को भेद करणो जाणो हो, पण ईं टेम का बारा में भेद करणो काँ ने जाणो हो?”</verse>
				<verse number="57">ईसू हेंचेत करता रेवे हे के, “थाँ खुदई जाणो लो के, हाँच कई हे?</verse>
				<verse number="58">जद्याँ थूँ आपणाँ विरोदी का हाते कोरट में जारियो हे। तो थूँ गेला मेंईस वणीऊँ हमजोतो करबा की कोसीस करले। कटे अस्यान ने वेवे के, वी थने कोरट का हाकम का नके जबरदस्ती ले जावे अन हाकम थने सपई ने हूँपे अन सपई थने जेळ में नाक देई।</verse>
				<verse number="59">मूँ थाँकाऊँ हाचेई कूँ हूँ के, जद्याँ तईं थाँ जुरमाना की पई-पई ने दी देवो, वतरे थाँ वटाऊँ छुट ने सको।”</verse>
			</chapter>
			<chapter number="13">
				<verse number="1">वीं दाण थोड़ाक मनक ईसू का कने आया अन वाँने केवा लागा के, जद्याँ थोड़ाक गलीली मनक बली चड़ारिया हा, वीं दाण पिलातुस वाँने मारवा नाक्या अन वाँको लुई वाँकी बली मेंईस मला दिदो।</verse>
				<verse number="2">यो हूँणने ईसू वाँकाऊँ क्यो, “कई थाँ यो हमजो हो के, ईं गलीली मनक हाराई गलीलियाऊँ पापी हा, ईं वाते वाँने ओ भुगतणो पड़्यो?</verse>
				<verse number="3">मूँ थाँकाऊँ केवूँ हूँ के, ने, पण यद्याँ थाँ आपणाँ पापाऊँ मन ने, ने बदलो तो थाँ भी मरो जस्यान वीं मरिया हा।</verse>
				<verse number="4">कन थाँ वणा अठारा जणा का बारा में ज्याँका ऊपरे सिलोह को गुमट पड़्यो अन वीं दबन मरग्या, कई होचो हो के, वीं यरूसलेम में रेबावाळा हाराई मनकऊँ हेला पापी हा?</verse>
				<verse number="5">मूँ थाँकाऊँ केवूँ हूँ के, ने, पण यद्याँ थाँ भी पापाऊँ मन ने, ने बदलो तो थाँ हाराई भी मरो जस्यान वीं मरिया हा।”</verse>
				<verse number="6">पसे ईसू या केणी की के, “कणी अंगूरा का बाग में एक अंजीर को रूँकड़ो हो। कुई वणी रूँकड़ा का फळ होदबा ग्यो पण वींने वणी रूँकड़ा के फळ ने लादा।</verse>
				<verse number="7">जद्याँ वणी बाग का रुकाळ्याऊँ क्यो, ‘देक, मूँ तीन सालाऊँ अणी अंजीर का रूँकड़ा के फळ देकबा आवूँ हूँ पण, मने फळ ने मले। ईंने परो काट दे, काँके अणी रूकड़े या जगाँ फालतू में रुंद मेली हे।’</verse>
				<verse number="8">ईंपे वणी वाँकाऊँ क्यो के, ‘ओ मालिक, ईंने अणी साल तो ओरी रेवा दो के, मूँ अणी गोड़ का च्यारूँमेर खोदन खाद नाकूँ,</verse>
				<verse number="9">ईंका केड़े भी आबावाळा साल में फळ ने लागे, तो ईंने परो काट नाकज्ये।’”</verse>
				<verse number="10">आराम का दन ईसू एक परातना घर में उपदेस देरिया हा।</verse>
				<verse number="11">अन देको, एक लुगई ही, जिंके अठारा वराऊँ एक दुबळी करबावाळी हुगली आत्मा लागी तकी ही अन वाँ कुबड़ी वेगी ही अन वाँ कणी भी तरियाऊँ हूँदी ने वे सकती ही।</verse>
				<verse number="12">ईसू ने वीं लुगई पे दया अई अन वींने नके बलई अन क्यो, “ए लुगई, थूँ अबे हव वेगी हे।”</verse>
				<verse number="13">जद्याँ ईसू वींका माता पे हात मेल्यो अन वाँ कुबड़ी हुदी ऊबी वेगी अन परमेसर की बड़ई करबा लागगी।</verse>
				<verse number="14">ईसू आराम का दन वींने हव किदी ही। ईं वाते परातना घर का एक मुक्या ने रीस आगी अन वणी लोगाऊँ क्यो, “छे दन हे, जणामें काम-काज करणो छावे, ईं वाते वणा दनाँ मेंईस आन हव वो, पण आराम का दन हव वेवा मती आवो।”</verse>
				<verse number="15">यो हूँणन परबू क्यो, “ओ कपट राकबावाळा, कई आराम का दन में थाँकामूँ कूण आपणाँ बळद ने कन गदा ने खूँटाऊँ खोलन पाणी पावा ने ले जावे हे?</verse>
				<verse number="16">अन कई यो हव ने हो के, या लुगई ज्या अबराम की बेटी हे अन हुगली आत्मा अठारा वराऊँ लागी तकी हे, जिंने आराम का दन में अणी बन्धनऊँ छूड़ई हे।”</verse>
				<verse number="17">जद्याँ ईसू या बात की, तो वींका हाराई विरोदी लाजा मरबा लागा अन हाराई मनक वणी परचा का कामऊँ ज्यो वणा किदो हो वणीऊँ बड़ई करबा लागग्या।</verse>
				<verse number="18">पसे ईसू क्यो, “परमेसर को राज कणी तरिया को हे? अन मूँ वींको बखाण कस्यान करूँ?</verse>
				<verse number="19">वो एक हरूँ का एक दाणा का जस्यान हे, जिंने कणी मनक आपणाँ खेत में वायो अन वो मोटो व्यो, तो आकास का जीव-जनावर वींका डाळ्याँ का ऊपरे गवाळा बणाया।”</verse>
				<verse number="20">ईसू पाछो ओरी क्यो, “मूँ परमेसर का राज को बखाण कस्यान करूँ?</verse>
				<verse number="21">वो खमीर का जस्यान हे, जिंने एक लुगई तीन पसेरी आटा में मलायो अन देकता देकता वो आटो खमीरऊँ फुलग्यो।”</verse>
				<verse number="22">ईसू जद्याँ नगर अन गाम-गाम उपदेस देता यरूसलेम जारिया हा।</verse>
				<verse number="23">तद्याँ कणी वाँकाऊँ पूँछ्यो, “ओ परबू जी, कई मुगती पाबावाळा थोड़ा हे?”</verse>
				<verse number="24">ईंपे ईसू वींने क्यो, “हाँकड़ा गेलाऊँ जाबा की कोसीस करो काँके, मूँ थाँकाऊँ केवूँ हे के, घणा मनक अस्यान करणो छाई पण वीं ने कर सकी।</verse>
				<verse number="25">जद्याँ घर को मालिक पोळ का कमाड़ बन्द कर देवे अन थाँ बारणे ऊबा वेन पोळ की हाँकळ वजान केवो, ‘ओ स्वामी जी, माकाँ वाते कमाड़ खोल दो।’ “वो जबाव दे के, ‘मूँ थाँने ने जाणूँ हूँ अन थाँ कटा का हो?’</verse>
				<verse number="26">“जद्याँ थाँ केबा लाग जावो के, ‘माँ थाँका हाते खादो-पीदो हो अन थाँ माँने नरी जगाँ बजारा में, गामाँ में उपदेस दिदा हा।’</verse>
				<verse number="27">“पण, वी थाँकाऊँ केई के, ‘मूँ थाँने केरियो हूँ के, मूँ थाँने ने जाणूँ हूँ के, थाँ कूण हो, ओ बुरा करमवाळा, मारा नकेऊँ परा जावो।’</verse>
				<verse number="28">“थाँ अबराम, इसाक, याकूब अन नरई परमेसर का आड़ीऊँ बोलबावाळा ने परमेसर का राज में देको, पण यद्याँ थाँने परमेसर का राजऊँ बारणे काड़ दिदा जाई, जटे तो बेस रोवणो अन दात पिसणाईस वेई।</verse>
				<verse number="29">अन उगमणी, आतमणी, धरव अन लंकवऊँ लोग-बाग आई अन परमेसर का राज में जीमण जीमी।</verse>
				<verse number="30">अन देको, नरई पाच्छे हे वीं पेली वे जाई अन जीं पेली हे वीं पाच्छे वे जाई।”</verse>
				<verse number="31">वणीस दाण कुई फरीसी आया अन वणा ईसुऊँ क्यो, “अटूऊँ परा जावो, काँके हेरोदेस थाँने मारणो छारियो हे।”</verse>
				<verse number="32">ईसू वणाऊँ क्यो, “वणी हिवाळ्या ने जान के दो के, ‘मूँ आज अन काले हुगली आत्माने बारणे काड़ू अन माँदा ने हव करूँ हूँ अन तीजे दन आपणो काम पूरो करूँ।’</verse>
				<verse number="33">पसे भी मने आज, काले अन परसु चालतोईस रेणो हे, काँके अस्यान ने वे जावे के, कुई परमेसर का आड़ीऊँ बोलबावाळो यरूसलेम देस का बारणे मारियो जावे।”</verse>
				<verse number="34">“ओ यरूसलेम, ओ यरूसलेम, थूँ ज्यो परमेसर का आड़ीऊँ बोलबावाळा ने मार नाके हे अन ज्यो थाँरा नके आवे हे वाँका ने भाटा मारे हे। कतरी दाण में यो छायो हो के, जस्यान कूकड़ी आपणाँ बच्या ने आपणाँ फाकड़ा का रेटे भेळा करन राके हे, मूँ भी वस्यानीस थाँरा मनकाँ ने भेळा करूँ, पण थें यो ने छायो हो।</verse>
				<verse number="35">देक, थारो आरादना घर थाँरा वाते उजाड़ पड़्यो हे। मूँ थाँराऊँ केवूँ हूँ के, थूँ मने वणी टेम तईं पाछो ने देक सकी जद्याँ तईं यो टेम ने आजा वे के थूँ केवे, ‘परबू का नामऊँ आबावाळा राजा ने परमेसर आसिरवाद दे।’ ”</verse>
			</chapter>
			<chapter number="14">
				<verse number="1">एक दाण आराम का दन फरीसियाँ मूँ कणी खास फरीसी का घरे ईसू खाणो खाबा का वाते ग्या अन वीं मनक वाँने पकड़बा का मोका की वाट नाळरिया हा।</verse>
				<verse number="2">अन देको, एक मनक वाँकी आक्याँ का हामे हो, जिंके हात-पग पाणी भरबाऊँ हूजी रिया हा।</verse>
				<verse number="3">ईंपे ईसू यहूदी सास्तरी अन फरीसियाऊँ क्यो, “सबत का दन किंने ठीक करणो नेमा का हस्याबूँ हव हे के, ने?”</verse>
				<verse number="4">पण, वीं छानारिया। ईसू वींके हात लगान वींने हव किदो अन जाबा दिदो।</verse>
				<verse number="5">ईंका केड़े वणी क्यो, “थाँकामूँ किंको बेटो कन बळद कूण्ड़ा में पड़ जावे तो थाँकाऊँ कूण अस्यो हे के, ज्यो वींने सबद का दन तरत बारणे ने काड़े?”</verse>
				<verse number="6">पण वी अणी बात को जवाब ने दे सक्या।</verse>
				<verse number="7">जद्याँ ईसू देक्यो के, मेमान आपणाँ वाते कणी तरिया ऊँची जगाँ होदरिया हे, तो वो वणाऊँ एक केणीऊँ केबा लागो के,</verse>
				<verse number="8">“जद्याँ कुई थाँने ब्याव को नुतो देवे, तो ऊँची जगाँ में मती बेटज्यो, कटे अस्यान ने वे जावे के, वणी थाँकाऊँ भी कणी मोटा मनक ने नुत्यो वे।</verse>
				<verse number="9">अन जणी थाँने अन वींने दुयाँ ने ब्याव में नुत्या वे। वो आवे अन थने केवे के, ‘आपणी या जगाँ ईंने दिदो’ तो थने लाजा मरन हाराऊँ रेटे बेटणो पड़ी।</verse>
				<verse number="10">ईं वाते कुई थाँने नुतो देवे तो थाँ हाराऊँ रेटे जान बेटज्यो ताँके ज्यो थाँने नुतो देवे वो आन थाँने केई, ‘भई उटो वे अन ऊपरे बेट’ अणीऊँ वटे हाराई मेमाना में थाँको मान बड़ी।</verse>
				<verse number="11">काँके हरेक ज्यो आपणाँ खुद ने ऊसो करी, वींने रेटे किदो जाई अन ज्यो आपणाँ खुद ने रेटे करी वींने ऊसो किदो जाई।”</verse>
				<verse number="12">पसे ईसू वीं जीमणवाळाऊँ क्यो, “जद्याँ थूँ दने कन राते जीमणो राके, तो आपणाँ हण्डाळ्याँ, भायाँ, परवारवाळा कन रिप्यावाळा पड़ोस्याँ ने मती बुलाज्ये, कटे अस्यान ने वे के, वीं भी आपणाँ जीमण में थने बलान ईंको बदलो पाछो उतार देई।</verse>
				<verse number="13">पण जद्याँ थूँ जीमणो राके तो गरीबा, लंगड़ा, लकवा मारिया तका अन आंदा ने बलाज्ये।</verse>
				<verse number="14">तद्याँ थूँ धन्न वेई, काँके वाँका नके थने देबा का वाते कई ने हे। ईंको फळ थाँने परमेसर वीं दन देई जद्याँ थाँ धरमी मनक का हाते पाच्छा जी उटी।”</verse>
				<verse number="15">पसे ईसू का हाते खाणो खारिया मनकाँ मूँ एक मनक यो हुणन ईसुऊँ क्यो, “हरेक वो मनक धन्न हे, ज्यो परमेसर का राज में खाणो खावे हे।”</verse>
				<verse number="16">तद्याँ ईसू वणीऊँ क्यो, “एक दाण एक मनक एक मोटा जीमणा की त्यारी कररियो हो, वणी नरई मनकाँ ने नुता दिदा।</verse>
				<verse number="17">जद्याँ खाणो त्यार वेग्यो तो वणी आपणाँ दास ने खन्दान हाराई नुत्याँ तका मनकाँ ने नुत्या के, ‘आवो, अबे खाणो त्यार वेग्यो हे।’</verse>
				<verse number="18">पण वीं हाराई आगा-पाछा वेबा लागा, एक जणे क्यो, ‘में एक खेत मोल लिदो हे, मने वो देकवा जाणो हे। करपा करन मने माप कर दे।’</verse>
				<verse number="19">पसे दूजे जणे क्यो, ‘में पाँच जोड़ी बळद मोल लिदा हे, मूँ वाँने परकबा जारियो हूँ। करपा करन मने माप कर।’</verse>
				<verse number="20">एक जणे क्यो, ‘में ब्याव किदो हे, ईं वाते मूँ ने आ सकूँ हूँ।’</verse>
				<verse number="21">अस्यान जद्याँ वींको दास पाछो आन वींने हारी बाताँ बतई तो ईंपे घर का मालिक ने घणो गुस्सो आयो अन वणी आपणाँ दासऊँ क्यो, ‘फटा-फट जा अन नगर की हरेक गळ्याँ मूँ गरीबा, लंगड़ा, लकवा मारिया तका अन आंदा मनकाँ ने अटे बला ला।’</verse>
				<verse number="22">वणी दास पाछो आन वणीऊँ क्यो, ‘हो मालिक, थाँकी आग्या पुरी कर दिदी हे पण अबे भी जगाँ खाली पड़ी तकी हे।’</verse>
				<verse number="23">पसे वणी मालिक क्यो, ‘नगर में अन खेता में बाड़ा-वुड़ी हारी जगाँ में जावो अन हरेक मनक ने हाता-जोड़ी करन अटे लावो ताँके मारो घर पूरो भर जावे।</verse>
				<verse number="24">अन मूँ थाँकाऊँ कूँ हूँ के, ज्यो पेल्याँ नुत्या ग्या हा, वाँका मूँ एक भी जीमण में जीम ने सकी।’”</verse>
				<verse number="25">जद्याँ लोगाँ की भीड़ ईसू का पाच्छे जारी ही तो ईसू पाच्छा फरन वाँने क्यो,</verse>
				<verse number="26">“यद्याँ कुई मारा पाच्छे आवे अन आपणाँ बई-बापू, लुगई अन छोरा-छोरी अन भई-बेन अन अटा तईं आपणाँ जीव ने भी माराऊँ प्यारो माने, तो वो मारो चेलो ने बण सके हे।</verse>
				<verse number="27">अन ज्यो आपणी हूळी ने ने तोके अन मारा पाच्छे ने आवे, वो मारो चेलो ने वे सके हे।”</verse>
				<verse number="28">“थाँकामूँ कूण अस्यो हे ज्यो मेल बणाणो छावे अन पेली बेटन वींके खरचा को हस्याबूँ ने लगावे के, वींने बणाबा में कतरो खरचो लागी वो ‘मारा नके हे के ने हे?’</verse>
				<verse number="29">कटे अस्यान ने वे के, वो नीम भर दे अन वींने पूरो ने कर सके तो, जणा वींने ओ करतो तको देक्यो हे, ओ हारोई देकन वींकी रोळ करी अन केई के,</verse>
				<verse number="30">‘अरे देको अणी मनक ईंने बणाणो सरू तो किदो पण ईंने पूरो ने कर सक्यो।’</verse>
				<verse number="31">“अस्यो कुई राजो वेई ज्यो कणी दूजाँ राजा का विरोद में लड़ई करबा ने जावे अन पेल्याँ ओ बेटन बच्यार ने करे के कई, आपणाँ दस हजार सपई लेन वणा बीस हजार सपई को आपाँ सामनो कर सका के ने?</verse>
				<verse number="32">ने तो वो राजा थोड़ाक छेटी रेता तकाई, आपणाँ दुताँ ने खन्दान मेल-मिलाप करणो छाई।</verse>
				<verse number="33">अणी तरियाँ थाँकामूँ कुई भी ज्यो आपणी हारी चिजाँ ने ने छोड़ देवे, मारो चेला ने वे सके हे।</verse>
				<verse number="34">“लूण तो हव हे पण, यद्याँ लूण को हवाद बगड़ जावे, तो वींको हवाद पाछो कस्यान लायो जा सके हे।</verse>
				<verse number="35">वो ने तो धुळा का वाते अन ने खात का वाते काम आवे हे, पण, वींने लोग-बाग बारणे फेंक देवे हे।” “जिंके हुणबा का वाते कान्दड़ा हे, वीं हुणे।”</verse>
			</chapter>
			<chapter number="15">
				<verse number="1">एक दन नरई लगान लेबावाळा अन पापी ईसू का नके आया, ताँके वाँका उपदेस हुणे।</verse>
				<verse number="2">तो फरीसी अन सास्तरी बड़बड़ करन केवा लागा के, “यो तो पाप्याऊँ मले–जूले हे अन वाँके हाते खावे-पीवे भी हे।”</verse>
				<verse number="3">ईंपे ईसू वाँने एक केणी केबा लागा,</verse>
				<verse number="4">“मानो थाँकामूँ किंका नके हो गारा हे अन वाँका मूँ एक खुवा जावे, तो कई नन्याणूँ ने हुन्ना काकड़ में छोड़न वणी खुवाया तका गाडरा ने जद्याँ तईं होदतो रेवे तद्याँ वो मल ने जावे? हाँ वो अस्यानीस करे हे।</verse>
				<verse number="5">जद्याँ वो मल जावे तो वींने आणन्दऊँ आपणाँ खाँदा ऊपरे तोक लेवे हे।</verse>
				<verse number="6">अन घर में आन यार-दोस्ताऊँ अन आस-पड़ोस्याँ ने भेळा करन केवे हे के, ‘आणन्द मनावो, काँके मारो खुवायो तको गाडरो मलग्यो हे।’</verse>
				<verse number="7">मूँ थाँकाऊँ केवूँ हूँ के, अणीईस तरियाऊँ एक मन फेरबावाळा पापी का बारा भी हरग में अतरोइस आणन्द वेगा, जतरो वणा नन्याणूँ धरमी भगताँ का वाते ने वेवे हे ज्याँने मन बदलवा की कई जरुरत ने हे।”</verse>
				<verse number="8">“अस्यानीस एक लुगई हे अन जिंका नके दस चाँदी सिक्का वे अन वाँका मूँ एक गम जावे, तो वाँ दिवो बाळन अन घर में बुवारो काड़न जद्याँ तईं मल ने जावे तद्याँ होदती रेवे।</verse>
				<verse number="9">जद्याँ मल जावे हे, तो वाँ आपणी गोटणा अन पड़ोस्याँ ने भेळा करन केवे हे के, ‘आणन्द करो, काँके मारो खुवायो तको चाँदी का सिक्को मलग्यो हे।’</verse>
				<verse number="10">मूँ थाँकाऊँ केवूँ हूँ के, अणीस तरियाऊँ एक मन फेरबावाळा पापी का बारा में परमेसर का हरग-दुताँ का हामें आणन्द वेवे हे।”</verse>
				<verse number="11">पसे ईसू क्यो, “कणी मनक के दो बेटा हा।</verse>
				<verse number="12">वणा मूँ नानक्ये बेटे आपणाँ बापऊँ क्यो, ‘ओ बापू, धन-दोलत मूँ ज्यो भाग मारे पाँती आवे हे वो मने दिदो।’ तो वणी आपणी हारी दोलत दुयाँ में बाट दिदी।</verse>
				<verse number="13">अन थोड़ाक दन केड़े नानक्यो बेटो आपणी पांती को धन-दोलत ज्यो हो वींने भेळो करन नरई छेटी का देस में परोग्यो अन वटे बुरा कामाँ में आपणी हारी धन-दोलत ने उड़ा दी।</verse>
				<verse number="14">जद्याँ वणी हारी धन-दोलत उड़ई दिदी अन पसे वणी देस में जोरदार काळ पड़्यो अन वो कंगाळ वेग्यो अन परेसानी में रेवा लागो।</verse>
				<verse number="15">अन वो वणी देस में रेबावाळा मूँ एक का वटे दानकी करबा ने ग्यो। वणी वींने आपणाँ खेत में हूरा ने चराबा का वाते खन्दायो।</verse>
				<verse number="16">अन वो छोरो छावतो हो के, वणा फळ्याऊँ जिंने हूर खाता हा आपणी भूक मटावे हे, पण वींने कुई भी कई ने देतो हो।</verse>
				<verse number="17">“जद्याँ वो आपणाँ आपाँ में आयो, तद्याँ वो केबा लागो के, ‘मारा बाप के कतराई दानक्याँ हे वाँने भरपेट खाणो मले हे अन मूँ अटे भूका मररियो हूँ।</verse>
				<verse number="18">ईं वाते मूँ अबे अटूँ आपणाँ बापू का नके जाऊँ अन वाँकाऊँ केऊँ, “ओ बापू, में हरग का परमेसर अन थाँका विरोद में पाप किदो हे।</verse>
				<verse number="19">अबे मूँ अणी जोगो ने रियो के, थाँको बेटो केवऊँ, मने थाँका अटे आपणाँ एक दानक्याँ का जस्यान राक लो।” ’</verse>
				<verse number="20">तद्याँ वो वटूँ आपणाँ पापाँ का नके परोग्यो। “वो थोड़ाक छेटी हो अन वींका बापू वींने देक लिदो तो वींका बापू ने वींपे घणी दया अई। ईं वाते वो दोड़न वींने आपणे गळे लगा दिदो अन बोको दिदो।</verse>
				<verse number="21">वणी बेटे वींका बापूऊँ क्यो, ‘ओ बापू, में थाँकी देकणी में अन परमेसर का विरोद में पाप किदो हे, अन अबे मूँ थाँको बेटो केवावे के, जोगो ने रियो हूँ।’</verse>
				<verse number="22">पण, वींका बापू आपणाँ दासा ने क्यो, ‘फटाकऊँ हव गाबा लावो अन ईंने पेरावो अन ईंका हात में वीटी अन ईंका पंगा में बुट पेरावो।</verse>
				<verse number="23">अन एक मोटो जनावर लावो अन मारो, ताँके वींने खाबा अन आणन्द मनावा।</verse>
				<verse number="24">काँके मारो ओ बेटो मरग्यो हो अन पाछो जीवग्यो हे, खुवाग्यो हो पण अबे पाछो लादग्यो हे।’ वीं आणन्द करबा लागग्या।</verse>
				<verse number="25">“पण, वींको मोटो बेटो ज्यो कूण्ड़ा पे हो, जद्याँ वो घरे का नके आयो तो वींने गावा-बजावा की अवाज हुणई दिदी।</verse>
				<verse number="26">तो वणी एक दास ने आपणाँ नके बलान क्यो, ‘यो हारोई कई वेरियो हे?’</verse>
				<verse number="27">दास वणीऊँ क्यो, ‘थारो नानक्यो भई आयो हे अन थाँरा बापू एक मोटो जनावर काट्यो हे काँके वो हाजो-हातरो पाछो आग्यो हे।’</verse>
				<verse number="28">यो हुणन वो घणी रीस में आग्यो अन घर में ने जाणो छायो, पण वींका बापू बारणे आन वींने मनावा लागा।</verse>
				<verse number="29">वणी आपणाँ बापू ने क्यो के, ‘देको, मूँ अतरा सला वेग्या थाँकी हाँचा मनऊँ सेवा कररियो हूँ अन कदी भी थाँका हुकम ने ने टाळ्यो हे, तद्याँ भी थाँ मने एक बकरी को बच्यो भी ने दिदो हे के, मूँ आपणाँ हण्डाळ्याँ का हाते आणन्द मनातो।</verse>
				<verse number="30">अन जद्याँ थाँको यो बेटो, जणी थाँकी धन-दोलत बुरा कामाँ में उड़ान आयो हे, तो थाँ वींका वाते एक मोटो जनावर काट्यो हे।’</verse>
				<verse number="31">ईंपे बाप वणीऊँ क्यो, ‘हे बेटा, थूँ हमेस्यान मारा हाते रियो हे अन ज्यो कई मारो हे वो हारो थाँरोईस तो हे।</verse>
				<verse number="32">पण, अबे आणन्द मना अन राजी वेणो छावे, काँके यो थाँरो भई ज्यो मरग्यो हो पाछो जीवतो वेग्यो हे, यो खुवाग्यो हो पण अबे पाछो लादग्यो हे।’ ”</verse>
			</chapter>
			<chapter number="16">
				<verse number="1">पसे ईसू आपणाँ चेलाऊँ क्यो, “एक सेठ के एक मुनीम हो। लोग-बाग सेठ का हामे वींपे यो दोस लगाबा लागा के, ‘यो थाँकी हारी धन-दोलत उड़ारियो हे।’</verse>
				<verse number="2">ईं वाते वणी मुनीम ने बलान क्यो, ‘या कई बात वेरी हे थाँरा बारा में? ज्या मूँ थाँरा बारा में हुणरियो हूँ। आपणाँ मुनीमपणा को मने हिस्याब दे। काँके आगेऊँ थूँ मुनीम को काम ने कर सके हे।’</verse>
				<verse number="3">तद्याँ मुनीम होच-बच्यार में पड़ग्यो के, ‘अबे मूँ आगे कई करूँ?’ काँके मारो मालिक माराऊँ मुनीम को पद लेबावाळो हे। मारा में अतरो ज्योर ने रियो के, मूँ खेता में दानकी को काम करूँ अन भीक मांगबाऊँ तो मूँ घणो हरमाऊँ हूँ।</verse>
				<verse number="4">ठीक हे, अबे मारा हमज आग्यो के, मने कई करणो छावे, जद्याँ माराऊँ मुनीमपणा को पद ले लिदो जावे, तद्याँ लोग-बाग आपणाँ घर में मारी आवभगत कर सके।</verse>
				<verse number="5">ईं वाते वणी मुनीम मालिक का हाराई करजदाराँ ने बलायो अन एकऊँ पूँछ्यो के, ‘थारे ऊपरे मारा मालिक को कतरो करज्यो हे?’</verse>
				<verse number="6">वणी क्यो, ‘हो मण तेल।’ ईंपे वणी वींकाऊँ क्यो के, ‘आपणी पोती ले अन पचास लिक ले।’</verse>
				<verse number="7">पसे वणी दूजाऊँ पूँछ्यो, ‘थारे ऊपरे कतरो करज्यो हे?’ वणी क्यो, ‘हो मण गऊँ।’ जद्याँ वणी वींकाऊँ क्यो, ‘आपणी पोती ले अन अस्यी लिक ले।’</verse>
				<verse number="8">वणी मालिक वणी अधरमी मुनीम ने सेबासी दिदी, काँके वणी चालाकीऊँ काम किदो हे, अणी दनियाँ का लोग-बाग परमेसर का मनकाँ का वेवारऊँ घणाई चतूर हे।”</verse>
				<verse number="9">“ईसू वाँने क्यो, मूँ थाँकाऊँ केवूँ हूँ दनियाँ की धन-दोलतऊँ आपणाँ वाते यार-दोस्त बणई लो, काँके जद्याँ धन-दोलत खतम वे जाई। तो वी अनंत घर में थाँकी आवभगत करी।</verse>
				<verse number="10">ज्यो थोड़ाऊँ थोड़ा में हाँचो हे, वो हेला में भी हाँचो निकळी। ज्यो थोड़ाऊँ थोड़ो में अधरमी हे। वो हारी बाताँ में भी अधरमी वेई।</verse>
				<verse number="11">ईं वाते जद्याँ अधरम का धन में हाँचा ने रेवो, तो ज्यो हरग को हाँचो धन वो थाँने कूण देई?</verse>
				<verse number="12">यद्याँ थाँ पराया धन में हाँचा ने रेवो। तो ज्यो थाँको हे, वो थाँने कूण देई?</verse>
				<verse number="13">कस्योई दास दो मालिकाँ की सेवा ने कर सके हे। काँके वो तो एकऊँ वेर राकी अन दूजाऊँ परेम राकी कन पछे एकऊँ मल्यो तको रेई अन दूजाँ ने बेकार जाणी। थाँ परमेसर अन धन, अणा दुयाँ की सेवा एक हाते ने कर सको हो।”</verse>
				<verse number="14">जद्याँ फरीसी जी धन का लोबी हा, वणा ईं हारी बाताँ हूणी, तो ईसू की रोळ करबा लागग्या।</verse>
				<verse number="15">ईंपे ईसू वाँने क्यो, “थाँ अस्या लोग-बाग हो, जी मनकाँ का हामे आपणाँ खुद ने धरमी बतावे हे, पण परमेसर थाँका मन ने जाणे हे। मनक जिंने मोटा हमजे हे, वो परमेसर की देकणी में कई ने हे।</verse>
				<verse number="16">“मूसा का नेम अन परमेसर का आड़ीऊँ बोलबावाळा की बाताँ को परच्यार यहुन्ना बतिस्मा देबावाळा की टेम तईं व्यो, ईंका केड़े परमेसर का राज का हव हमच्यार को परच्यार व्यो अन नरई मनक परमेसर का राज में आबा का वाते खुब मेनत करिया हे।</verse>
				<verse number="17">पछे भी आकास अन धरती को नास वेणो तो हेल हे। पण, मूसा का नेमा का एक-एक अकर की तागत हमेस्यान अटल हे।”</verse>
				<verse number="18">ईं वाते ज्यो भी आपणी लुगई ने छोड़न दूजीऊँ ब्याव करे हे, वो कुकरम करे हे, अन ज्यो छोड़ी तकी लुगईऊँ ब्याव करे हे, तो वो भी कुकरम करे हे।</verse>
				<verse number="19">एक धनवान मनक हो। ज्यो हमेस्यान मेंगाऊँ मेंगा गाबा पेरतो हो अन हरेक दन धूम-धाम अन भोग-विलासऊँ रेतो हो।</verse>
				<verse number="20">अन वटे लाजर नाम को एक गरीब दकी मनक हो, ज्यो फोड़ा-फुस्याऊँ अन दकऊँ भरिया तको हो वींने मनक रिप्यावाळा मनक का घर का बारणा पे छोड़ देता हा।</verse>
				<verse number="21">वणी रिप्यावाळा मनक का टेबुलऊँ जीं चुरा-चुरी अन कवा पड़ता हा। वणीऊँ वो पेट भरबा का वाते तरसतो हो। अटा तईं के, फोड़ा-फुस्याँ ने भी गण्डकड़ा चाटता हा।</verse>
				<verse number="22">पसे अस्यान व्यो के, वो गरीब दकी मनक मरग्यो अन हरग-दुत वींने अबराम की गोद में बेवाड़ दिदो। अन पछे वो रिप्यावाळो मनक भी मरियो अन वींने गाड़ दिदो।</verse>
				<verse number="23">नरक में दुक में तड़पता तका जद्याँ वणी आक्याँऊँ देक्यो के, अबराम वणीऊँ घणो छेटी हे, पण, वींने वो गरीब लाजर वींकी गोद में दिक्यो।</verse>
				<verse number="24">तद्याँ वणी हाको करन क्यो, “ओ बापू अबराम, मारा पे दया करो।” लाजर ने खन्दावो ताँके, वो आपणी आँगळी ने पाणी में डबोन मारी जीब ने हीळी करे, काँके मूँ अणी वादी में तड़परियो हूँ।</verse>
				<verse number="25">पण अबराम वणीऊँ क्यो, “हे बेटा, याद कर के, थें आपणाँ आकाई जीवन में हारी हव चिजाँ को भोग कर नाक्यो हे अन अणीस तरिया लाजर खराब चिजाँ को किदो। पण, अबे यो अटे सान्ती पारियो हे अन थूँ दुक में पड़न तड़परियो हे।</verse>
				<verse number="26">ईं वाते अबे मारे अन थाँरा बचमें एक घणो ऊण्डो खाड़ो राक्यो ग्यो हे के, अटेऊँ कुई भी वीं पाल्ड़े जाणो भी छावे तो ने जा सकी अन वटाऊँ कुई ईं पाल्ड़े मारा नके आवणो छावे, तो भी वो ने आ सकी।”</verse>
				<verse number="27">वणी क्यो, “ओ बापू, अबे मूँ थाँकाऊँ परातना करूँ हूँ के, थूँ वींने मारा बाप का घरे खन्दा दे,</verse>
				<verse number="28">ताँके वो मारे पाँच भई हे, वाँने चेतावे, कटे अस्यान ने वे के, वी भी अणी दुक में पड़े।”</verse>
				<verse number="29">पण अबराम वणीऊँ क्यो, “वाँका नके मूसा अन परमेसर का आड़ीऊँ बोलबावाळा की किताब हे। वाँने वणा की हुणाबा दे।”</verse>
				<verse number="30">पण, वणी वाँकाऊँ क्यो, “ओ बापू, अबराम यूँ ने, यद्याँ मरिया तकाऊँ कुई वाँका नके जाई तद्याँईस वी मन बदली।”</verse>
				<verse number="31">पण अबराम वींने क्यो, “यद्याँ वी मूसा अन परमेसर का आड़ीऊँ बोलबावाळा की किताबाँ की बात ने माने हे, तो वी यद्याँ कुई मरिया तका मेंऊँ भी वाँका नके जाई तद्याँ भी वी वींकी ने मानी।”</verse>
			</chapter>
			<chapter number="17">
				<verse number="1">ईसू आपणाँ चेलाऊँ क्यो, “अस्यो तो वे ने सके के, ठोकर खवाड़ाबा वाळी बाताँ ने वेवे, पण, धिकार हे वणी मनक पे जिंका मस ईं ठोकर की बाताँ वेवे।</verse>
				<verse number="2">ज्यो अणा फोरामूँ कणी एक ने भी ठोकर खवाड़े हे, तो वींका वाते यो हव हे के, घट्टी को पाट वींका गळा में लटकायो जावे अन समन्द में नाक दिदो जावे।</verse>
				<verse number="3">हेंचेत रेवो। यद्याँ थाँको भई पाप करे। तो वींने हमजाज्यो अन वो अणीऊँ पछतावे तो वींने माप कर देज्यो।</verse>
				<verse number="4">यद्याँ वो दन में हात दाण थाँरा विरोद में पाप करे अन हातई दाण थाँरा नके आन केवे के, ‘मूँ मनऊँ घणो दकी हूँ’, तो वींने माप कर देज्यो।”</verse>
				<verse number="5">ईंपे में थरप्या तका चेला परबूऊँ क्यो, “माकाँ विस्वास ने बढा।”</verse>
				<verse number="6">तद्याँ परबू क्यो, “यद्याँ थाँकामें हरूँ का दाणा के जतरोक भी विस्वास वेतो, तो थाँ ईं हेतूत का रूँकड़ाऊँ केता के, ‘जड़ हमेत उखड़न समन्द में लागी जा’, तो वो थाँकी बात मान लेतो।”</verse>
				<verse number="7">“पण, थाँकामूँ अस्यो कूण हे, जिंको दास हळ ज्योतरियो वे कन गारा चरातो वे अन जद्याँ वो खेतऊँ आवे, तो वणीऊँ केवे, ‘तरत आन खाणो खाबा का वाते बेट जा’?</verse>
				<verse number="8">‘कई वो वणीऊँ यु ने केई? मारा खाबा का वाते कई बणा अन त्यार वेन जतरे मूँ खाणो खा ने लूँ, वतरे मारी चाकरी करतो रे, ईंका केड़े थूँ खाणो खई लेज्ये’?</verse>
				<verse number="9">कई वींको क्यो करबा के केड़े वो वणी दास की बड़ई करी?</verse>
				<verse number="10">अणी तरियाँ थाँ भी जद्याँ वणा हाराई कामाँ ने कर नाको। ज्याँकी आग्या थाँने दिदी गी हे, तो अस्यान केज्यो के, ‘माँ तो हुदा-हादा दास हा, ज्यो माँने करणो छावे वोईस माँ किदो।’ ”</verse>
				<verse number="11">पसे अस्यान व्यो के, वीं यरूसलेम में जाती दाण सामरिया अन गलील का बचमें वेन जारिया हा।</verse>
				<verse number="12">जद्याँ वी एक गाम में ग्या, तो वटे ईसू ने दस कोड़ी मनक थोड़ाक छेटी ऊबा तका दिक्या।</verse>
				<verse number="13">वणा मनकाँ हाको करन क्यो, “ओ ईसू, ओ मालिक, माकाँ पे दया करो।”</verse>
				<verse number="14">जद्याँ ईसू वाँने देकन क्यो, “जान आपणाँ खुद ने याजकाँ ने बतावो।” अन पसे अस्यान व्यो के, वीं गेला में जाता-जाताई हव वेग्या।</verse>
				<verse number="15">जद्याँ वाँका मूँ एक जणो यो देक्यो के, मूँ हव वेग्यो हूँ। तो वो जोरऊँ परमेसर की बड़ई करतो तको पाछो आग्यो।</verse>
				<verse number="16">अन ईसू की बड़ई करतो तको वाँके पगा में पड़ग्यो। वो एक सामरी मनक हो।</verse>
				<verse number="17">यो देकन ईसू क्यो, “दस का दस हव व्या हा, तो पछे वी नो जणा कटे हे?</verse>
				<verse number="18">कई अणी बारवासी ने छोड़न वणा मूँ कुई ने हे ज्यो परमेसर की बड़ई करे?”</verse>
				<verse number="19">पछे ईसू वणीऊँ क्यो, “ऊबो वे अन परोजा। थाँरा विस्वास थने हव किदो हे।”</verse>
				<verse number="20">एक दाण फरीसियाँ ईसुऊँ पूँछ्यो के, “परमेसर को राज कदी आई?” ईसू वाँने क्यो, “परमेसर का राज परगट रूप में ने आई।</verse>
				<verse number="21">अन नेई ईंका वाते लोग-बाग केई के, ‘देको, अटे हे कन पछे वटे हे’, काँके परमेसर को राज तो थाँका मयने हे।”</verse>
				<verse number="22">पण, ईसू आपणाँ चेलाऊँ क्यो, “अस्यी टेम आई, जद्याँ थाँ मूँ मनक का पूत का दनाँ मेंऊँ एक दन ने भी देकबाऊँ तरसेगा, पण ने देक सको।</verse>
				<verse number="23">अन लोग-बाग थाँकाऊँ केई, ‘देको, अटे कन वटे हे।’” पण थाँ वटे मती जाज्यो अन वाँके पाच्छे मत चालज्यो।</verse>
				<verse number="24">जणी तरिया बिजळी चमकन आकास का एक खुणाऊँ दूजाँ खुणा में जावे हे। वस्यानीस मूँ मनक को पूत भी आपणाँ दनाँ में आऊँ।</verse>
				<verse number="25">पण, पेल्याँ ओ जरूरी हे के, मूँ हेलाऊँ हेलो दुक उठऊँ अन अणी पीड़ी का लोग-बागाऊँ त्याग्यो जावे।</verse>
				<verse number="26">जणी तरिया नूह की टेम में भी व्यो, वणीस तरिया मूँ मनक का पूत की टेम में भी वेई।</verse>
				<verse number="27">जद्याँ तई नूह नाव में ने चड़्यो वीं टेम तईं लोग-बाग खाता-पिता अन ब्याव करता हा, तद्याँ बाड़ अई अन हारोई नास वेग्यो।</verse>
				<verse number="28">अन लुत का दनाँ में भी अस्यानीस व्यो। वी खाता-पिता, लेण-देण करता अन खेती करता हा अन घर बणाता हा।</verse>
				<verse number="29">पण, जीं दन लुत सदोमऊँ निकळग्यो, वणीस दन आकासऊँ वादी अन तेजाब की बरका वरी अन वीं हाराई मनक नास वेग्यो।</verse>
				<verse number="30">जणी दन मूँ मनक को पूत आऊँ। वणी दन भी अस्यानीस वेई।</verse>
				<verse number="31">वणी दन जी मेड़ी पे वे अन वाँको सामान रेटे घर रे मयने वे तो, वीं सामान लेबा का वाते रेटे ने उतरे। ईं तरिया ज्यो कुई खेत में वे, वीं पाच्छा कई भी सामान लेबा का वाते ने आवे।</verse>
				<verse number="32">आद राको के, लुत की लुगई का हाते कई व्यो हो।</verse>
				<verse number="33">ज्यो कुई धरती पे आपणाँ खुद को जीवन बंचाणो छावे हे वो आपणो हरग को जीवन खो देई। पण, ज्यो कुई धरती पे मारा वाते आपणो जीवन खोई, वो हरग को जीवन पाई।</verse>
				<verse number="34">मूँ थाँकाऊँ केवूँ हूँ के, वणी रात दो मनक एक माचा पे हूँता वेगा, तो एक ने तोक लिदो जाई अन दूजाँ ने वटेईस छोड़ दिदो जाई।</verse>
				<verse number="35">दो लुगायाँ एकीस जगाँ घट्टी पीसती वेगा तो एक तोक लिदी जाई अन दूजी ने वटेईस छोड़ दिदी जाई।</verse>
				<verse number="36">दो मनक खेत में काम करता वेई तो एक तोक लिदो जाई अन दूजाँ ने वटेईस छोड़ दिदो जाई।</verse>
				<verse number="37">तद्याँ ओ हुणन चेला ईसुऊँ क्यो, “ओ परबू, अस्यान कटे वेई?” वणा वाँकाऊँ क्यो, “जस्यान लास का नके थाँ हेवळा ने देको हो, वस्यानीस अणा बाताँ ने भी ओळक लेवो।”</verse>
			</chapter>
			<chapter number="18">
				<verse number="1">पसे ईसू वाँने अणी बारा में एक केणी हूँणई के, हरदाण परातना करतो रेणो अन कदी हिम्मत ने हारणी।</verse>
				<verse number="2">ईसू वाँने क्यो, “कणी नगर में एक न्याव करबावाळो रेतो हो, ज्यो ने तो परमेसरऊँ दरपतो हो अन नेई कणी मनक की परवा करतो हो।</verse>
				<verse number="3">अन वणी नगर में एक विदवा लुगई रेती ही। वाँ वींका नके आन केती रेती के, ‘मारो अन मारे दसमणा का बचमें हाँचो न्याव कर।’</verse>
				<verse number="4">वणी नरी दाण तो वींकी ने मानी पण आकरी में मन में होच-बच्यार किदो, ‘मूँ कदी भी परमेसरऊँ ने दरपूँ हूँ अन नेई कणी मनक की परवा करूँ हूँ।</verse>
				<verse number="5">पण पसे भी या विदवा लुगई मने हताती रेवे हे, ईं वाते मूँ वींको न्याव करूँ। कटे अस्यान ने वे के, आकोदाण आ-आन मने परेसान करे।’ ”</verse>
				<verse number="6">परबू क्यो, “हुणो के, यो अधरमी न्याव करबावाळो कई केवे हे?</verse>
				<verse number="7">तो कई परमेसर आपणाँ चुण्या तका को हाँचो न्याव ने करी, जी रात-दन वाँकाऊँ अरज करता रेवे हे। कई वी वाँका न्याव करबा में मोड़ो करी?</verse>
				<verse number="8">मूँ थाँकाऊँ केवूँ हूँ के, वी तरत वाँको हाँचो न्याव करी। पण मूँ मनक को पूत जद्याँ आऊँ, तो कई मूँ धरती पे विस्वास पाऊँ?”</verse>
				<verse number="9">“पसे ईसू वणा लोग-बागाँ ने जी अणी बात का वाते आपणाँ खुद पे भरोसो राकता हा के, ‘माँ धरमी हाँ अन दूजाँ बेकार हे।’ वाँने आ केणी हुणई के,</verse>
				<verse number="10">‘दो मनक मन्दर में परातना करबा ग्या, एक फरीसी हो अन दूज्यो लगान लेबावाळो हो।’</verse>
				<verse number="11">फरीसी ऊबो वेन आपणाँ मन में या परातना करबा लागो के, ‘ओ परमेसर, मूँ थाँको धन्नेवाद करूँ हूँ के, मूँ दूजाँ मनकाँ की जस्यान लोबी, दूजाँ को बुरो करबावाळो, दूजी लुगायाँ का हाते गलत वेवार करबावाळो ने हूँ अन नेई अणी लगान लेबावाळा के जस्यो हूँ।</verse>
				<verse number="12">मूँ हपता में दो दाण एकाणो राकूँ हूँ। मूँ मारी हारी कमई को दसमो हिस्सो भेंट भी देवूँ हूँ।’</verse>
				<verse number="13">पण, वणी लगान लेबावाळे ज्यो छेटी ऊबो हो अन हरग आड़ी मुण्डो ऊसो भी ने किदी पण, वणी रो-रोन क्यो, ‘ओ परमेसर मूँ पापी हूँ, मारा पे दया करो।’</verse>
				<verse number="14">मूँ थाँकाऊँ हाँची केवूँ हूँ के, परमेसर की नजराँ में वो फरीसी ने पण लगान लेबावाळो धरमी ठेरायो ग्यो अन घरे ग्यो, काँके ज्यो कूण आपणाँ खुद ने मोटो मानी, वो फोरो किदो जाई अन जी आपणाँ खुद ने फोरो मानी, वो मोटो बणायो जाई।”</verse>
				<verse number="15">एक दन लोग-बाग आपणाँ छोरा-छोरी ने ईसू का नके लाबा लागा के, वी वाँका ऊपरे हात मेलन आसिरवाद दे, पण वाँका चेला यो देकन वाँने तापड़वा लागा।</verse>
				<verse number="16">पण ईसू छोरा-छोरी ने नके बलान चेलाऊँ क्यो, “छोरा-छोरी ने मारा नके आबा दो अन अणाने रोको मती, काँके परमेसर को राज अस्याकोईस हे।</verse>
				<verse number="17">मूँ थाँकाऊँ केवूँ हूँ के, ज्यो कुई परमेसर का राज ने छोरा-छोरी का जस्यान ने मानी, वी कदी वींमें ने जाई।”</verse>
				<verse number="18">एक यहूदी हाकम ईसुऊँ पूँछ्यो, “ओ हव गरुजी, अनंत जीवन पाबा का वाते मूँ कई करूँ?”</verse>
				<verse number="19">ईसू वींने जबाव दिदो, “थूँ मने हाँचो काँ केवे? परमेसर का बना ओरी कुई हाँचो कोयने।</verse>
				<verse number="20">थूँ परमेसर की आग्या तो जाणे हे के, ‘कुकरम ने करणो, हत्या ने करणी अन चोरी ने करणी, किंकी जूटी गवई ने देणी अन आपणाँ बई-बापू को मान राकणो।’ ”</verse>
				<verse number="21">वणी क्यो, “मूँ अणाने तो नानपणऊँ मानतो आयो हूँ।”</verse>
				<verse number="22">ओ हूँणन ईसू वींने क्यो, “थाँरा में अबे भी एक कमी हे। आपणी हारी धन-दोलत ने गरीबा में बाँट दे अन पाछो आने मारे पाच्छे चाल थने हरग में धन-दोलत को खजानो मली।”</verse>
				<verse number="23">वो ओ हूँणन घणो दकी व्यो, काँके वो घणो रिप्यावाळो हो।</verse>
				<verse number="24">ईसू वींने देकन क्यो, “रिप्या-कोड़ी वाळा को परमेसर का राज में जाणो घणो दोरो हे।</verse>
				<verse number="25">जस्यान ऊँट हुई का नाका मेंऊँ ने ने निकळ सके, वस्यानीस रिप्यावाळा को परमेसर का राज में जाणो घणो अबको हे।”</verse>
				<verse number="26">वणा लोग-बाग जद्याँ आ बात हूणी तो वणा ईसुऊँ पूँछ्यो, “तो पसे कूण बंचायो जाई?”</verse>
				<verse number="27">ईसू वाँने क्यो, “ज्यो मनकाऊँ ने वे सके हे, वो परमेसरऊँ वे सके हे।”</verse>
				<verse number="28">तो पसे पतरस ईसुऊँ क्यो, “देको, माँ तो घर-बार हारोई छोड़न थाँका पाच्छे चालबा लागा हा।”</verse>
				<verse number="29">ईसू वाँकाऊँ क्यो, मूँ थाँकाऊँ हाँची केवूँ हूँ के, “ज्यो कुई परमेसर का राज का वाते घर-बार कन आपणी खुद की लुगई ने कन भई-बन्दा कन बई-बापू ने कन छोरा-छोरी ने छोड़ देवे हे,</verse>
				<verse number="30">वो अणी टेम में अणा हारईऊँ हेला पाई अन हातेई हाते आबावाळा परमेसर का राज में अनंत जीवन पाई।”</verse>
				<verse number="31">पसे ईसू आपणाँ बाराई थरप्या तका चेला ने एक आड़ी लेजान वाँकाऊँ क्यो, “देको, आपाँ यरूसलेम जारिया हाँ अन हारी बाताँ मूँ मनक का पूत का वाते परमेसर का आड़ीऊँ बोलबावाळा लिकी हे, वीं हारी पुरी वेई।</verse>
				<verse number="32">काँके मूँ ज्यो यहूदी ने हे वाँका हाताँ में हूँप्यो जाऊँ अन वी मारी रोळ करी। मारो अपमान करियो जाई अन मारा ऊपरे थूँक्यो जाई।</verse>
				<verse number="33">पसे मने कुटी अन मार नाकी, पण मूँ तीजे दन पाछो जीवतो वे जाऊँ।”</verse>
				<verse number="34">ईं चेला अणा बाताँ मूँ एक भी बात हमज ने सक्या। अन ईं बाताँ वाँका कान्दड़ा में ने पड़ी अन वीं हमज ने सक्या के, वीं ईं बाताँ किंका बारा में केरिया हा।</verse>
				<verse number="35">जद्याँ ईसू यरीहो का नके पूग्या, तो वाँने एक आंदो मनक हड़क का कनारे बेटन भीक मांगतो तको मल्यो।</verse>
				<verse number="36">अन वणी अणाचेत को भीड़-भाड़ का हाका-हूक हुणन पूछबा लागो, “ओ कई वेरियो हे?”</verse>
				<verse number="37">लोगाँ वींने बतायो, “नासरत का ईसू जारिया हे।”</verse>
				<verse number="38">तद्याँ वणी जोरऊँ हाको करन क्यो, “ओ ईसू, दाऊद की ओलाद, मारा पे दया करो।”</verse>
				<verse number="39">जी मनक आगे-आगे जारिया हे, वणा वींने तापड़न क्यो, “छानो रे।” पण, वो ओरू भी कल्ड़ो हाको करबा लागो के, “ओ दाऊद का ओलाद, मारा पे दया कर।”</verse>
				<verse number="40">तद्याँ ईसू वटेई रक ग्या अन आग्या दिदी के, “वींने मारा नके लावो” अन जद्याँ वी वींने लाया तो ईसू वणीऊँ पूँछ्यो,</verse>
				<verse number="41">“थूँ कई छावे हे के, मूँ थाँरा वाते कई करूँ?” वणी क्यो, “ओ परबू, मूँ पाछो देकणो छावूँ हूँ।”</verse>
				<verse number="42">ईसू वणीऊँ क्यो, “देकबा लागज्या, थारे विस्वासईस थने हव किदो हे।”</verse>
				<verse number="43">वो तरत देकबा लागो अन परमेसर की बड़ई करतो तको वाँके पाच्छे चालबा लागो अन यो परचो देकन हाराई लोग-बाग परमेसर की मेमा करबा लागा।</verse>
			</chapter>
			<chapter number="19">
				<verse number="1">जद्याँ ईसू यरीहो नगर में वेन जारिया हा।</verse>
				<verse number="2">अन वटे जक्कई नाम को एक मनक हो, ज्यो चुंगी लेबावाळा हो अन वो घणो रिप्यावाळो हो।</verse>
				<verse number="3">वो ईसू का दरसण करणो छावतो हो के, “वीं कस्याक दिके हे?” पण भीड़-भाड़ का मस वो देक ने सकतो हो, काँके वो ठेगणो हो।</verse>
				<verse number="4">ईं वाते वो वाँने देकबा का वाते आगे जान एक गुलर का रूँकड़ा का ऊपरे चड़ग्यो, काँके वीं वणीस गेलाऊँ जाबावाळा हा।</verse>
				<verse number="5">जद्याँ ईसू वणी जगाँ पूग्यो, तो ऊपरे देकन वणीऊँ क्यो, “ए जक्कई फटा-फट रेटे उतर, काँके आज मने थाँरा घर में रकणो घणो जरूरी हे।”</verse>
				<verse number="6">वो उतावळो वेन उतरन राजी वेतो तको वाँने आपणाँ घरे लेग्यो।</verse>
				<verse number="7">यो देकन हाराई लोग-बाग मन में बड़बड़ान केबा लागा के, “वी तो एक पापी मनक का अटे रकरियो हे।”</verse>
				<verse number="8">जक्कई ऊबो वेन परबूऊँ क्यो, “ओ परबू जी, देको, मूँ मारी कमई को आदो हिस्सो गरीब-अनाता ने देवूँ हूँ अन यद्याँ किंको भी मन दुकान लिदो हे, तो वींने च्यार-गुणो पाछो दी देवूँ।”</verse>
				<verse number="9">तद्याँ ईसू वणीऊँ क्यो, “आज अणी घर में छुटकारो आयो हे, काँके अणी विस्वास करन ओ बता दिदो हो के, ओ भी अबराम की ओलाद हे।</verse>
				<verse number="10">मूँ मनक को पूत गमाया तका ने होदबा अन वाँने बंचाबा का वाते आयो हे।”</verse>
				<verse number="11">जद्याँ वी ईं बाताँ हुणरिया हा, तो ईसू एक केणी में वाँने क्यो काँके वी यरूसलेम का नके हा अन मनक हमजता हा के, परमेसर को राज अबाणू आबावाळो हे।</verse>
				<verse number="12">ईं वाते ईसू वाँने क्यो, “एक रिप्यावाळो मनक दूर देस परोग्यो, ताँके वो पाछो राजा वणन आवे।</verse>
				<verse number="13">अन वणी आपणाँ नोकर-चाकर मेंऊँ दस जणा ने बलान वाँने एक-एक मोराँ दिदी अन वाँने क्यो, ‘मारे पाच्छे आबा तई थाँ लेण-देण करज्यो।’</verse>
				<verse number="14">पण, वींके नगर का रेवासी वणीऊँ वेर राकता हा, ईं वाते पाच्छे दूतऊँ हमच्यार खन्दायो के, ‘माँ ने छावाँ के, यो माकाँ ऊपरे राज करे।’</verse>
				<verse number="15">जद्याँ वो राजा को पद लेन पाछो आयो। तो कई व्यो के, वणी आपणाँ नोकर-चाकर ने बलाया, ज्याँने वणी मोराँ दिदी ही के, वणा कई लेण-देण करन कमायो।</verse>
				<verse number="16">जद्याँ पेले नोकर आन क्यो, ‘हो मालिक थारी मोरऊँ में दस मोराँ ओरी कमई हे।’</verse>
				<verse number="17">वणी वींने क्यो, ‘धन्न हे हव दास, थने धन्न हे। थूँ थोड़ाक मेई विस्वास राक्यो। अबे थूँ दस ठिकाणा ऊपरे अदिकार राकी।’</verse>
				<verse number="18">दूजे नोकर आन क्यो, ‘हो मालिक, थारी मोरऊँ में पाँच मोराँ ओरी कमई हे।’</verse>
				<verse number="19">वणी वींने भी क्यो, ‘थूँ भी पाँच ठिकाणा को हाकम बणी।’</verse>
				<verse number="20">तीजे नोकर आन क्यो, ‘ओ मारा मालिक, थाँकी मोर या हे। जिंने में आपणी पेटी में हपई राकी ही।</verse>
				<verse number="21">काँके मूँ थाँकाऊँ दरपतो हो। ईं वाते के, थूँ घणो गाटो मनक हे। जटे थूँ ने मेले, वटूँ थूँ ली लेवे हे। अन ज्यो थें ने वायो, वटूँ काटे हे।’</verse>
				<verse number="22">वणी वींने क्यो, ‘ए बुरा दास, मूँ थाराईस मुण्डाऊँ थने दोसी मानूँ हूँ। थूँ मने जाणतो हो के, मूँ गाटो मनक हूँ। जटे मूँ ने मेलू, वटूँ मूँ लेवूँ हूँ अन जटे ने वावूँ, वटूँ काटे हूँ।’</verse>
				<verse number="23">तो थें मारी मोर हवकारा का नके कई लेबा ने मेली के, मूँ आन ब्याज का हाते मूँळ पूँजी भी ली लेतो?</verse>
				<verse number="24">अन ज्यो लोग-बाग नके ऊबा हा, वाकाँऊँ मालिक क्यो, ‘या मोर अणीऊँ लिलो अन जिंका नके दस मोराँ हे। वींने दिदो।’</verse>
				<verse number="25">वणा वींकाऊँ क्यो, ‘ओ मालिक, वींका नके तो दस मोराँ हे।’</verse>
				<verse number="26">मूँ थाँकाऊँ केवूँ हूँ के, ‘जिंका नके हे, वींने ओरी दिदो जाई अन जिंका नके ने हे, वणीऊँ ज्यो भी वींका नके हे, ले लिदो जाई।</verse>
				<verse number="27">पण, मारा वणा दसमणा ने जी ओ ने छावे हे के, मूँ वाकाँपे राज करूँ, वाँने मारा हामें लावो अन मार नाको।’ ”</verse>
				<verse number="28">ईं बाताँ क्या केड़े ईसू चेला का आगे-आगे यरूसलेम का आड़ी चालबा लागा।</verse>
				<verse number="29">अन जद्याँ वी जेतुन नाम का मंगरा में बेतफगे अन बेतनियाँ का नके पूग्यो, तो वणा आपणाँ चेला मेंऊँ दो जणा ने आ बात केन खन्दाया के,</verse>
				<verse number="30">“आगे वाळा गाम में जावो अन वणमें जाताई थाँने एक गदेड़ी को बाछरो जणी ऊपरे कुई भी कदी सवारी ने किदी वे। वो थाँने बन्दयो तको मली। वींने खोलन लावो।</verse>
				<verse number="31">अन यद्याँ कुई थाँकाऊँ पूछे के, ‘ईंने कई लेबा ने खोलो हो’, तो वाँने अस्यान केज्यो के, ‘परबू ने ईंकी जरूत हे।’ ”</verse>
				<verse number="32">जी अणी काम का वाते खन्दाया ग्या हा। वणा जान जस्यो वाँने क्यो हो वस्योईस वणा वटे पायो।</verse>
				<verse number="33">जद्याँ वी गदेड़ी का बाछरा ने खोलरिया हा, तो वींके मालिक वणाऊँ पूँछ्यो, “ईं गदेड़ी का बच्या ने काँ खोलरिया हो?”</verse>
				<verse number="34">वणा वींकाऊँ क्यो, “परबू जी के, ओ बाछरो छारियो हे।”</verse>
				<verse number="35">पसे वीं वींने ईसू का नके लेन आया अन आपणाँ चादरा वणी बाछरा ऊपरे नाकन ईसू जी ने वींका ऊपरे बेटा दिदा।</verse>
				<verse number="36">जद्याँ वी जारियो हा, तो मनक आपणाँ गाबा बिछाता जारिया हा।</verse>
				<verse number="37">वो जेतुन का छापर में पूग्यो। तो भगताँ की हारी टोळी जणा वाँका परच्या आपणी आक्याँऊँ देक्या हा। वी राजी वेन ज्योरऊँ हाको करन परमेसर की बड़ई करबा लागा के,</verse>
				<verse number="38">“धन्ने हे वो राजा, जो परबू का नामऊँ आवे हे। हरग में सान्ती अन आकास में मेमा वेवे।”</verse>
				<verse number="39">जद्याँ भीड़-भाड़ मेंऊँ कुई फरीसी ईसुऊँ केबा लागा, “ओ गरुजी, थाँका चेला ने हाका-हूक करबाऊँ रोको।”</verse>
				<verse number="40">ईसू वींने जबाव दिदो, “मूँ थाँकाऊँ केवूँ हूँ, यद्याँ ईं छानारिया, तो ईं भाटा हाका-हूक करबा लाग जाई।”</verse>
				<verse number="41">जद्याँ ईसू यरूसलेम का नके आया, तो वींने देकन वी रोबा लागा।</verse>
				<verse number="42">अन क्यो, “कतरो, भलो वेतो के, थूँ अणा दनाँ की हव बाताँ ने ओळकतो जीं थाँरा वाते सान्ती लाती, पण, अबे भी वी थारी आक्याँऊँ ओजल हे।</verse>
				<verse number="43">काँके वी दन थाँरा ऊपरे आई के, थाँरा दसमण एगट करन थने गेर लेई अन च्यारूँमेरऊँ थने दबाई।</verse>
				<verse number="44">अन थने अन थाँरा छोरा-छोरी ने जी थाँरा में हे, धुळा भेळा करी अन थाँरा में भाटा पे भाटा भी ने रबा देई। काँके, थें वणी घड़ी जद्याँ परमेसर थाँरा पे दया किदी ही तो थें ने ओळकी ही।”</verse>
				<verse number="45">पसे ईसू मन्दर की चोकी में आन वोपार करबावाळा ने बारणे काड़बा लागो।</verse>
				<verse number="46">अन वणाऊँ क्यो, “लिक्यो तको हे के, ‘मारो घर परातना को घर वेई।’ पण, थाँ ईंने ‘चोरा को ठाणो’ बणा दिदो हे।”</verse>
				<verse number="47">अन वी हरेक दन मन्दर में उपदेस दिया करता हा अन मुक्य याजकाँ, मूसा का नेमा ने हिकाबावाळा अन दाना यहूदी नेता वाँने मारबा को गेलो होदबा लागा।</verse>
				<verse number="48">पण वाँने मारबा को कई मोको ने मल्यो, काँके हाराई मनक मन लगान वाँकी बाताँ हूणता हा।</verse>
			</chapter>
			<chapter number="20">
				<verse number="1">एक दन अस्यो व्यो के, जद्याँ ईसू मन्दर में लोग-बागाँ की भीड़ ने उपदेस देरिया हा अन हव हमच्यार हुणारियो हा। तो वटे मुक्य याजक, मूसा का नेमा ने हिकाबावाळा अन दाना यहूदी नेता आन ऊबा वेग्या।</verse>
				<verse number="2">अन केबा लागा के, “माँने बता के, थूँ ईं काम किंकी आग्याऊँ करे हे अन वो कूण हे? जणी थने ओ अदिकार दिदो हे?”</verse>
				<verse number="3">ईसू वाँने जबाव दिदो के, “मूँ भी थाँकाऊँ एक बात पूँछू हूँ, मने बतावो।</verse>
				<verse number="4">यहुन्ना को बतिस्मो हरग का आड़ीऊँ हो कन मनकाँ का आड़ीऊँ हो?”</verse>
				<verse number="5">जद्याँ वीं एक-दूजाऊँ बच्यार करन केबा लागा के, “यद्याँ आपाँ केवाँ के, ‘हरग का आड़ीऊँ हे’, ‘तो वो केई, पसे थाँ वींपे विस्वास का ने किदो?’</verse>
				<verse number="6">अन यद्याँ आपाँ केवाँ के, ‘मनकाँ का आड़ीऊँ हे।’ तो हाराई लोग-बाग आपणे भाटा मारी। काँके वीं हाँची में जाणे हे के, यहुन्नो परमेसर का आड़ीऊँ बोलबावाळो हो।”</verse>
				<verse number="7">ईं वाते वणा जबाव दिदो, “माँ ने जाणा हाँ के, वो किंका आड़ीऊँ हो।”</verse>
				<verse number="8">ईसू वाँने क्यो, “तो मूँ भी थाँने ने बतावूँ के, मूँ ईं काम किंकी आग्याऊँ करूँ हूँ।”</verse>
				<verse number="9">तद्याँ ईसू लोग-बागाऊँ या केणी केबा लागा के, “कणी मनक आपणी जमीं पे अंगूरा को एक बाग लगायो अन दूजाँ ने हिजारे दे दिदो अन घणा दनाँ का वाते परदेस परोग्यो।</verse>
				<verse number="10">जद्याँ हाँक की टेम अई, तो वणी मनक हिंजारिया का नके एक नोकर ने खन्दायो के, वो बाग का फळा को भाग वींने दी देवे पण, वणा हिंजारिया वींने कुट्यो अन खाली हातई पाछो खन्दा दिदो।</verse>
				<verse number="11">पसे वणी एक दूजाँ नोकर ने खन्दायो अन वणा वींने भी कूटन वींको अपमान करन खाली हातई पाछो खन्दा दिदो।</verse>
				<verse number="12">पसे वणी तीजा नोकर ने खन्दायो अन वणा वींने भी मार-कूटन अदमरियो करन खन्दा दिदो हो।</verse>
				<verse number="13">तद्याँ बाग का मालिक क्यो, अबे मूँ कई करूँ? मूँ मारा लाड़ला बेटा ने खन्दाऊँ। वे सके के, वी वींको मान करी।”</verse>
				<verse number="14">जद्याँ हिंजारिया वींने देक्यो, तो एक-दूजाऊँ बात करबा लागो के, यो तो अणी बाग का मालिक को छोरो हे। आवो, आपाँ ईंने मार नाका। तो ओ अंगूरा को बाग आपणो वे जाई।</verse>
				<verse number="15">अन वणा वींने बागऊँ बारणे काड़न वींने मार नाक्यो, तो बतावो अबे बाग को मालिक वणा हिंजारिया का हाते कई करी?</verse>
				<verse number="16">कई वो आन वणा हिंजारिया ने खतम करी अन बाग दूजाँ ने हूँप देई। यो हूँणन वणा क्यो, “परमेसर अस्यान कदी ने करे हे।”</verse>
				<verse number="17">ईसू वाँका आड़ी देकन क्यो, “पसे ओ कई लिक्यो तको हे के, ‘जणी भाटा ने राज-मिस्तरियाँ बेकार बतायो, वोईस खुणा को खास भाटो वेग्यो’?</verse>
				<verse number="18">ज्यो कुई ईं भाटा पे पेड़ी, वो वखर जई अन जिंपे वो पड़ी वो वींने पीस देई।”</verse>
				<verse number="19">वी दाण मूसा का नेमा ने हिकाबावाळा अन मुक्य याजकाँ वींने पकड़णो छारिया, काँके वीं हमजग्या हा के, वणी माकाँ उपरेईस या केणी की हे। पण, वीं लोग-बागऊँ दरपग्या हा।</verse>
				<verse number="20">वी हाराई वींने पकड़बा की ताक में रेवा लाग्या के, वो कई गलती करे, ईं वाते वणा वींका वाते भेदू खन्दाया। वणा खरा वेबा का नाटक रच्यो, ताँके वींने बाताँ में फसान राजपाल अन अदिकारियाँ का हाताँ में हूँप दे।</verse>
				<verse number="21">वणा भेदू ईसुऊँ ओ पूँछ्यो के, “ओ गरुजी, माँ जाणा हाँ के, थाँ हव केवो हो अन हिकावो भी हो अन किंको भेद-भाव भी ने करो हो। पण, थाँ तो परमेसर को गेलो हाँचऊँ बतावो हो।</verse>
				<verse number="22">तो कई माँने राजा केसर ने हाँसल देणो छावे के ने देणो छावे?”</verse>
				<verse number="23">ईसू वाँकी चाल ने हमजग्या अन वाँने क्यो,</verse>
				<verse number="24">“मने एक मोर बतावो? अन ईंपे किंकी मूरती अन नाम हे?” वणा क्यो, “राजा केसर की।”</verse>
				<verse number="25">ईंपे ईसू वाँने क्यो, “तो ज्यो राजा केसर को हे, वो केसर ने दो अन ज्यो परमेसर को हे, वो परमेसर ने दो।”</verse>
				<verse number="26">वी लोग-बागाँ का हामे ईं बात ने पकड़ ने सक्या, पण वाँका अणी जवाबऊँ वीं अचम्बा में पड़ग्या।</verse>
				<verse number="27">पसे कुई सदुकी ईसू का नके आया अन अणा सदुकी मनकाँ को केणो हे के, मरयाँ तका को पाछो जी उटणो ने वेवे हे।</verse>
				<verse number="28">वणा ईसुऊँ पूँछ्यो, “ओ गरुजी, मूसे तो माकाँ वाते ओ लिक्यो हे के, यद्याँ किंको भई आपणी लुगई का हाते रेतो तको बनाई आस-ओलाद मर जावे। तो वींको भई वींकी लुगईऊँ ब्याव करले अन आपणाँ भई का वाते आस-ओलाद पेदा करे।</verse>
				<verse number="29">एक दाण अस्यो वे के, हात भई हा, पेलो भई ब्याव करन बनाई आस-ओलाद मरग्यो।</verse>
				<verse number="30">पसे दूजे अन ईंका केड़े तीजे भई भी वणी लुगईऊँ ब्याव किदो।</verse>
				<verse number="31">अणी तरिया हातई वणीऊँ एक का केड़े एक ब्याव किदो अन बनाई आस-ओलाद मरग्या हा।</verse>
				<verse number="32">हाराई केड़े वा लुगई भी मरगी।</verse>
				<verse number="33">ईं तरिया वी पाच्छा जीवता वेबा का केड़े वा लुगई किंकी लुगई बणी, काँके वाँ हातई भायाँ की लुगई बण चुकी ही।”</verse>
				<verse number="34">तद्याँ ईसू वणाऊँ क्यो, “अणी जुग में ब्याव वेवे हे।</verse>
				<verse number="35">पण, वी मनक वणी जुग में परवेस करन मरिया तकाऊँ जीवता वेबा का काबिल हे, वीं ब्याव ने करी।</verse>
				<verse number="36">वी पाच्छा कदी भी ने मरी, काँके वी हरग-दुताँ का जस्यान वेगा अन वीं पाच्छा जीबावाळा की ओलाद वेबाऊँ परमेसर की ओलाद भी ठेरी।</verse>
				<verse number="37">पण, या बात हे के, मरिया तका पाच्छा जी उटे हे, तो मूसे भी बळता तका रूँकड़ा की केणी बतई ही के, ‘वो परबू ने अबराम का परमेसर अन इसाक का परमेसर अन याकूब का परमेसर केवे हे।’</verse>
				<verse number="38">परमेसर तो मरिया तका को परमेसर ने हे पण, जीवता को परमेसर हे, काँके वींका हाराई मनक जीं वींका हे, वीं जीवता हे।”</verse>
				<verse number="39">तद्याँ यो हूँणन नेमा ने हिकाबावाळा मेंऊँ कतरा जणा ओ क्यो के, “ओ गरू, थाँ हाँची बात केवो हो।”</verse>
				<verse number="40">अन ईंका केड़े वणा की ईसुऊँ कई ओरी पूछबा की हिम्मत ने वी।</verse>
				<verse number="41">पसे ईसू वाँकाऊँ क्यो, “थाँ मसी ने दाऊद को वंस काँ केवो हो?</verse>
				<verse number="42">काँके दाऊद खुद भजन की किताब में केवे हे के, “परबू परमेसर, मारा परबूऊँ क्यो, मारा जीमणा पाल्डे बेट।</verse>
				<verse number="43">जद्याँ तईं मूँ थाँरा दसमणा ने थाँरा पगाँ का रेटे ने कर दूँ।”</verse>
				<verse number="44">“ईं तरियाँ दाऊद तो मसी ने ‘परबू’ केवे हे, तो पसे वो वींकी ओलाद कस्यान वे सके?”</verse>
				<verse number="45">जद्याँ हाराई मनक हुणरिया हा, तो ईसू आपणाँ चेलाऊँ क्यो,</verse>
				<verse number="46">“मूसा का नेमा ने हिकाबावाळाऊँ हूँस्यार रेवो, ज्याँने लाम्बा-लाम्बा कुरता पेरणा घणा हव लागे हे अन ज्याँने बजाराँ में नमस्कार अन मोटी-मोटी सबा में ऊँचा-ऊँचा आसन अन जीमणा में ऊँची जगाँ पे बेटणो घणो हव लागे हे।</verse>
				<verse number="47">वाँ लुगई जिंको धणी सान्त वेग्यो, वाँको धन कोसबो छावे हे। वीं दिकाबा का वाते मोटी परातना करे। वाँ मनकाँ ने घणी कल्ड़ी सजा मेली।”</verse>
			</chapter>
			<chapter number="21">
				<verse number="1">जद्याँ ईसू मन्दर में हा, तो वणा रिप्या-कोड़ी वाळा मनकाँ ने आपणो आपणो दान दान-पेटी में नाकता तका देक्या।</verse>
				<verse number="2">अन वणा एक गरीब विदवा लुगई ने भी वणी में दो फोरा ताँबा का सिक्का नाकती तकी देकी।</verse>
				<verse number="3">तद्याँ ईसू क्यो, “मूँ थाँकाऊँ हाचेई केवूँ हूँ के, सबाका का दानऊँ वाँ लुगई जिंको धणी सान्त वेग्यो, वींको दान हेलो हे,</verse>
				<verse number="4">काँके हारई आपणाँ रिप्या की बड़ोतरीऊँ नाक्या। पण, अणी लुगई आपणी घटतीऊँ हारी पूँजी दान दे दिदी हे।”</verse>
				<verse number="5">कुई लोग-बाग मन्दर का वाते केरिया हा के, वो कस्या रूपाळा भाटा अन परमेसर के दान किदी तकी चिजाँऊँ सजायो ग्यो हे,</verse>
				<verse number="6">तो ईसू क्यो, “वीं दन आई जद्याँ ज्यो कई थाँ देको हो। वींकामूँ अटे कस्याई भाटा पे भाटो भी ने मली। यो हारोई हल्डा दिदो जाई।”</verse>
				<verse number="7">वणा ईसुऊँ पूँछ्यो, “ओ गरुजी, ओ हारोई कदी वेई? ईं बाताँ जद्याँ पुरी वेबा लागी, तो वणी टेम को कई हेन्याण वेई?”</verse>
				<verse number="8">ईसू क्यो, “हेंचेत रिज्यो, ताँके थाँ भरमाया ने जावो काँके, घणा मारा नामऊँ आई अन केई के, ‘मूँ वोईस हूँ’ अन ‘ओ अन्त टेम आग्यो हे।’ थाँ वाँका पाच्छे परा मत जाज्यो।</verse>
				<verse number="9">अन जद्याँ थाँ युद अन लड़ई की बाताँ हुणो, तो दरपज्यो मती। काँके ईं बाताँ को पेल्या वेणी जरूरी हे। पण, वणी टेम तरत अन्त ने वेई।”</verse>
				<verse number="10">तद्याँ ईसू वाँने ओरी क्यो के, “एक देस दूजाँ देस पे अन एक राज का दूजाँ राज पे चड़ई केरी।</verse>
				<verse number="11">अन मोटा-मोटा भूकम आई अन जगाँ जगाँ काळ अन तरे-तरे की बीमारियाँ वेई अन बादळाऊँ गजब-गजब की बाताँ वेई अन मोटा-मोटा दरप का हेन्याण दिकी।</verse>
				<verse number="12">पण, अणा हारी बाताँऊँ पेल्याँ वीं मारा नाम का पाच्छे चालबा की वजेऊँ थाँने पकड़ी अन हताई अन यहूदियाँ का परातना घर में हूँपी अन जेल में नाक देई अन राजपाल अन अदिकारियाँ का हामें ऊबा करी।</verse>
				<verse number="13">पण, ओ थाँके मारा बारा में गवई देबा की टेम वेई।</verse>
				<verse number="14">ईं वाते ईं बाताँ वेबा के पेल्याई आपणाँ-आपणाँ मन ने त्यार करलो। थाँने थाँका बचाव में कई केणो हे, ईंकी थाँ चन्ता मत करज्यो।</verse>
				<verse number="15">मूँ थाँने अस्या बोल अन अकल देवूँ के, थाँका हाराई दसमण थाँको सामनो ने कर सकी अन थाँने रोक ने पाई।</verse>
				<verse number="16">अन थाँका बई-बापू, भई-बन्द अन परवार का हण्डाळ्याँ भी थाँने धोकाऊँ पकड़वाई। अटा तईं के थाँकामूँ नरई ने मरवा नाकी।</verse>
				<verse number="17">अन मारा नाम का पाच्छे चालबा की वजेऊँ घणा लोग-बाग थाँकाऊँ दसमणी राकी।</verse>
				<verse number="18">पण, थाँका माता को एक बाल भी वाँको ने वेई।</verse>
				<verse number="19">विस्वास में गाटा रेवा की वजेऊँ थाँ अनंत जीवन पाँ लेवो।</verse>
				<verse number="20">“जद्याँ थाँ यरूसलेम ने सपायाऊँ भरियो तको देको। तो हमज लिज्यो के, वींके उजाड़ वेबा की टेम आगी हे।</verse>
				<verse number="21">जद्याँ जी यहूदियाँ देस में वेई। वाँने मंगरा ऊपरे चढ़ जाणो छावे अन जी यरूसलेम नगर में हे वाँने नगर छोड़ देणो छावे अन जीं बारणे गामाँ में वेई, वाँने नगर में ने जाणो छावे।</verse>
				<verse number="22">ईं दन अस्या वेगा ज्यामें दण्ड की वीं बाताँ जीं पेल्याऊँ पुवितर सास्तर में लिकी गी वीं पुरी वेई।</verse>
				<verse number="23">वणा दनाँ वे लुगायाँ जी गरबवती वेई अन ज्याँके दूद पीता बाळक वेई, वाँके वाते घणो अबको टेम वेई, काँके अणीऊँ बचन दोड़ ने सकी। काँके वीं टेम में धरती पे मोटा-मोटा कळेस अन अणा लोग-बागाँ का ऊपरे परमेसर को कोप वेई।</verse>
				<verse number="24">मनक तरवाराऊँ काट्या जाई अन दूजाँ ने बंदी बणान दूजाँ देस में पूगा दिदा जाई अन यरूसलेम जी यहूदी ने हे वाँका पगाँ का रेटे गुद्‍या जाई तद्याँ तईं वाँको टेम पूरो ने वे जावे।</verse>
				<verse number="25">“चाँद-सूरज अन तारा में हेन्याण दिकई दिदा जाई अन धरती में हाराई देसा का लोग-बागाँ पे कळेस आई। काँके वीं समन्द की गाजबाऊँ अन लेराऊँ घबरा जाई।</verse>
				<verse number="26">दरपणीऊँ अन दनियाँ ऊपरे आबावाळा टेम की बाट देकता देकता लोग-बागाँ का जीव में जीव ने रेई। आकास की हारी सगत्याँ हाल जाई।</verse>
				<verse number="27">ईंका केड़े लोग मूँ मनक का पूत ने आपणी तागत का हाते अन मोटी मेमा का हाते वादळा पे आता तका देकी।</verse>
				<verse number="28">जद्याँ ईं बाताँ वेती देकी, तो थाँ हूँदा ऊबा वेन आपणाँ माता ने ऊपरे करज्यो, काँके वीं टेम थाँको छुटकारो नकेईस वेई।”</verse>
				<verse number="29">ईसू वाँने एक केणी भी क्यो के, “अंजीर का रूँकड़ा ने अन हाराई रूँकड़ा ने देको।</verse>
				<verse number="30">जस्यानी वाँकी कूँपळा फूटे, तो थाँ देकन खुदई जाण लो के, उनाळो आबावाळो हे।</verse>
				<verse number="31">अस्यानीस थें वे हारी बाताँ वेती देको, तो जाण जाज्यो के, परमेसर को राज को दन नके हे।</verse>
				<verse number="32">मूँ थाँने हाँची केरियो हूँ के, ईं पिड़ीयाँ का मनकाँ के मरबा के पेल्याँई हारी बाताँ वे जाई।</verse>
				<verse number="33">धरती अन आकास टळ जाई, पण मारो बचन कदी ने टळी।</verse>
				<verse number="34">“ईं वाते थाँ हेंचेत रो, अस्यो ने वे के, थाँ खाबा-पिबा में अन दनियाँ की चन्ता-फिकर में ने पड़ जावे अन वी दन फंदा का जस्यान थाँका ऊपरे अणाचेत आ जावे।</verse>
				<verse number="35">काँके वीं दन धरती का हाराई रेबावाळा लोग-बाग का ऊपरे ईं तरियाऊँ आई।</verse>
				<verse number="36">ईं वाते जागता रो अन हरेक टेम परातना करता रेवो, ताँके थाँ अणा हारी आबावाळी आपतीऊँ बचन अन मूँ मनक का पूत का हामें ऊबा रेवा के जोगा बण सको।”</verse>
				<verse number="37">ईसू वणा दनाँ में मन्दर में उपदेस करतो हो अन रात ने बारणे जान जेतुन नाम का मंगरा ऊपरे रिया करतो हो।</verse>
				<verse number="38">अन रोज हवेर पेल्याँ वेगा नरई लोग-बाग वींका उपदेस हूँणबा का वाते मन्दर में वींका नके आया करता हा।</verse>
			</chapter>
			<chapter number="22">
				<verse number="1">बना हाज्या की रोट्याँ को तेवार आबावाळो हो, जिंने फसे को तेवार केता हा।</verse>
				<verse number="2">अन मुक्य याजक अन नेमा ने हिकाबावाळा ईं बात की ताक में हा के, ईसू ने कस्यान मारा। पण, वी लोग-बागाऊँ दरपता हा।</verse>
				<verse number="3">ईसू का बाराई थरप्या तका चेला में गण्यो जाबावाळो यहूदो जिंने इसकरियोती भी केता हा, वींमें सेतान आग्यो।</verse>
				<verse number="4">वणी जान मन्दर का मुक्य याजकाँ अन पेरादाराँ का मुक्या का हाते बात–बच्यार किदी के, ईसू ने कणी तरिया वाँका हाताँ में पकड़वावे।</verse>
				<verse number="5">ईं बात पे वी घणा राजी व्या अन वींने रिप्या-कोड़ी देबा को बचन दिदो।</verse>
				<verse number="6">यहूदो ईं बात में मान ग्यो अन मोको देकबा लागो के, बना हाका-हूक ईसू ने वाँका हाताँ में धोकाऊँ पकड़ा देवे।</verse>
				<verse number="7">जद्याँ बना हाज्या की रोट्याँ के तेवार को दन आयो, जिंमें फसे का गारा की बली दिदी जाती ही।</verse>
				<verse number="8">तो ईसू पतरस अन यहुन्ना ने यो केन खन्दायो के, “जान आपणे जीमण का वाते फसे की त्यारी करो, ताँके आपाँ खा सका।”</verse>
				<verse number="9">वणा वींकाऊँ क्यो, “माँ कटे तेवार मनाबा की त्यारी कराँ?”</verse>
				<verse number="10">ईसू वाँकाऊँ क्यो, “देको, नगर में जाताई एक मनक पाणी की कळी माता का पे ले जातो तको थाँने मली। जणी घर में वो जावे, थाँ वींका पाछे-पाछे परा जाज्यो।</verse>
				<verse number="11">अन वीं घर का मालिकऊँ केज्यो के, ‘गरुजी थाँराऊँ केवे हे के, वा ओवरी कटे हे जणीमें मूँ आपणाँ चेला की लारे फसे का तेवार को जीमण जीम सकूँ?’</verse>
				<verse number="12">वो थाँने सजी तकी मेड़ी ऊपरे एक मोटी ओवरी बता देई अन थाँ वटे त्यारी करज्यो।”</verse>
				<verse number="13">वणा जान जस्यान ईसू वाँकाऊँ क्यो हो, वस्योईस पायो अन फसे का तेवार को जीमणो त्यार किदो।</verse>
				<verse number="14">जद्याँ वा घड़ी अईगी, तो ईसू आपणाँ थरप्या तका चेला का हाते जीमबा का वाते बेटा।</verse>
				<verse number="15">ईसू वाँने क्यो, “मारी आ घणी मनसा ही के, मूँ दुक जेलबा के पेल्या ईं फसे का तेवार को जीमण थाँका हाते जीमूँ।</verse>
				<verse number="16">मूँ थाँकाऊँ केवूँ हूँ के, जद्याँ तईं परमेसर का राज में अणी जीमण को मतलब पूरो ने वेई, तद्याँ तईं मूँ यो जीमणो पाछो ने जीमूँ।”</verse>
				<verse number="17">पछे ईसू प्यालो लेन धन्नेवाद दिदो अन क्यो, “ईंने लो अन एक-दूँजा में बाँट लो।</verse>
				<verse number="18">मूँ थाँकाऊँ केवूँ हूँ के, जद्याँ तईं परमेसर को राज ने आवे, तद्याँ तईं मूँ अंगूरा को रस अबे कदी ने पीवूँ।”</verse>
				<verse number="19">पसे वणी रोटी लिदी अन धन्नेवाद देन तोड़ी अन वाँने ओ केता तका दिदी के, “आ रोटी मारो डील हे, ज्या थाँका वाते दिदो ग्यो हे। मने आद करबा का वाते अस्यानीस करिया करज्यो।”</verse>
				<verse number="20">अणीस तरिया जद्याँ वणा खाणो खा लिदो तो ईसू प्यालो लिदो अन क्यो, “ओ प्यालो मारा वीं लुई को हेन्याण हे ज्यो थाँका वाते वेवाड़्यो जारियो हे, ओ परमेसर को नुवो वादो हे।”</verse>
				<verse number="21">“पण, देकज्यो, ज्यो मने धोकाऊँ पकड़वाई, वो मारा हाते अणी जीमण में हे।</verse>
				<verse number="22">मनक का पूत का वाते जस्यो लिक्यो ग्यो हे के, वो मारियो जाई, पण धिकार हे वीं मनक ने जिंका हाताऊँ वो धोकाऊँ पकड़ावायो जाई।”</verse>
				<verse number="23">ईं बात पे वी एक-दूजाऊँ सवाल करबा लागा, “आपाँ मूँ कूण वे सके हे ज्यो अस्यो काम करी?”</verse>
				<verse number="24">पसे ईसू का चेला में एक बेस वी के, “आपणाँ मूँ कूण मोटो हमज्यो जावे हे?”</verse>
				<verse number="25">ईसू वाँने क्यो, “दनियाँ का हाकम वाँका ऊपरे राज करे हे अन वी वाँका पे हुकम चलावे हे, वी खुद ने परोपकारी बताणा छावे हे।</verse>
				<verse number="26">पण, थाँ अस्या ने हो पण, ज्यो थाँकामें मोटो हे, वींने हाराऊँ फोरो बणणो छावे अन ज्यो हाकम हे, वींने नोकर की तरिया वेणो छावे।</verse>
				<verse number="27">काँके मोटो कूण हे? वो जो जीमण में जीमें हे कन पसे वो जो परुसकारी करे हे? कई वी ने जी जीमण में जीमें हे? पण, मूँ थाँका बचमें वणी परुसकारी करबावाळा दास की तरिया हे।</verse>
				<verse number="28">“थाँ वींइस हो, जी मारा परक की टेम हमेस्यान मारा हाते रिया हो।</verse>
				<verse number="29">जस्यान मारा परम बापू मने दिदो हे, वस्यानीस मूँ थाँने राज करबा को अदिकार देरियो हूँ,</verse>
				<verse number="30">ताँके थाँ भी मारा राज में मारी हाते जीमण में खावो-पीवो अन थाँ राज-दरबार में बेटन इजराएल की बाराई कोमाँ को न्याव करो।”</verse>
				<verse number="31">ईसू पतरसऊँ क्यो, “समोन, ए समोन हुण, जस्यान एक करसाण गव ने होजा करे हे वस्यान थाँने परकबा का वाते थाँने सेतान मांग लिदा हे।</verse>
				<verse number="32">पण, में थाँरा वाते परातना किदी हे के, थाँरो विस्वास बण्यो तको रेवे अन जद्याँ थूँ पाछो हाँच का गेला पे आवे, तो आपणाँ लोगाँ ने गाटा करज्ये।”</verse>
				<verse number="33">पतरस वाँने क्यो, “ओ परबू जी, मूँ थाँका हाते जेळ जाबा का वाते नेईस ने, पण मरबा रे वाते भी त्यार हूँ।”</verse>
				<verse number="34">ईसू वींने क्यो, “ए पतरस, मूँ थने बतावूँ हूँ के, आज कूकड़ो जद्याँ तईं ने बोली। वणीऊँ पेल्याँ थूँ तीन दाण मने ओळकबाऊँ नट जाई के, ‘मूँ ईंने ने जाणूँ हूँ।’ ”</verse>
				<verse number="35">पसे ईसू आपणाँ चेलाऊँ क्यो, “जद्याँ में थाँने बना बटवा, जोळी अन बना पगरख्याँ के खन्दाया हा। तो कई थाँने कणी भी बात की कमी वी?” वणा क्यो, “कणी भी बात की कमी ने वी।”</verse>
				<verse number="36">पाछो ईसू वाँकाऊँ क्यो, “पण, अबे जिंका नके बटवा वेवे, वी वींने लिले अन जोळी भी अन जिंका नके तरवार ने वेवे, वी आपणाँ चादरो बेचन तरवार मोल ली ले।</verse>
				<verse number="37">काँके मूँ थाँकाऊँ केवूँ हूँ के, यो ज्यो सास्तर में लिक्यो हे के, ‘वो अपरादिया का हाते गण्यो ग्यो।’ या बात मारा में पुरी वेणी घणी जरूरी हे, काँके अबे ईं बात के वेबा की टेम आगी हे।”</verse>
				<verse number="38">चेला क्यो, “ओ परबू जी, देको, अटे दो तरवाराँ हे।” ईसू क्यो, “ईं तो खुब हे।”</verse>
				<verse number="39">पसे ईसू बारणे निकळन रोज का जस्यान जेतुन का मंगरा पे ग्या अन चेला वाँका हाते आया।</verse>
				<verse number="40">वणी जगाँ जान वणी चेलाऊँ क्यो, “परातना करो के, थाँने परक में ने पड़णो पड़े।”</verse>
				<verse number="41">अन ईसू वणाऊँ अलग एक भाटो फेंक्यो जावे वतराक छेटी जान गोडा टेकन परातना करबा लागा,</verse>
				<verse number="42">“ओ बापू, यद्याँ थाँकी मरजी वे, तो अणी दुक का प्याला ने मारा नकूँ छेटी कर दो। पछे भी मारी मरजी ने पण, थाँरी मरजी पुरी वे।”</verse>
				<verse number="43">तद्याँ एक हरग-दुत वटे परगट व्यो अन वाँने धिज्यो बंदायो।</verse>
				<verse number="44">वणी टेम ईसू घणा दुक का हाते परातना करबा लागो, वाँको पसीणो लुई का जस्यान टपकन जमीं पे पड़रियो हो।</verse>
				<verse number="45">जद्याँ ईसू परातना करन उट्या अन आपणाँ चेला का नके आन वाँने दुक का हाते हूँता देक्या।</verse>
				<verse number="46">तो ईसू वाँकाऊँ क्यो, “अरे हुई काँ रिया हो? उटो अन परातना करो, ताँके थाँ परक में ने पड़ो।”</verse>
				<verse number="47">ईसू बाताँ कररिया हा अन एक मनकाँ टोळी आई, यहूदा नाम को चेलो ज्यो वाँका बारा थरप्या तका चेला मेंऊँ एक हो, वो मनकाँ की टोळी की आगेवाणी कररियो हो। वो ईसू का नके आन नमस्कार करबा का वाते वींके बोको दिदो।</verse>
				<verse number="48">पण ईसू वणीऊँ क्यो, “ए यहूदा, कई थूँ एक बोको देन मूँ मनक का पूत ने धोकाऊँ पकड़वारियो हे।”</verse>
				<verse number="49">ईसू का हातेवाळा जद्याँ देक्यो के, कई वेबावाळो हे, तो वणा क्यो, “ओ परबू जी, कई माँ तरवारऊँ वार कराँ?”</verse>
				<verse number="50">अतराक में वणाऊँ एक जणे मायाजक का नोकर पे तरवारऊँ वार करन जीमणो कान्दड़ो काट दिदो।</verse>
				<verse number="51">ओ देकन ईसू क्यो, “ऊबा रो, ओ थाँ मत करो।” अन ईसू वींका नोकर का कान्दड़ा के हात लगान हव किदो।</verse>
				<verse number="52">पसे मुक्य याजक अन मन्दर का पेरेदारा का मुक्या अन भूण्डा यहूदी नेता ने जी ईसू ने पकड़बा आया हा, वाँकाऊँ ईसू क्यो, “कई, थाँ मने अपरादी हमजन तरवार अन लाट्याँ लेन पकड़वा आयो हो?</verse>
				<verse number="53">जद्याँ मूँ मन्दर में थाँका हाते हो, तो थाँ मने ने पकड़्यो हो पण, यो थाँको टेम हे जिंपे अंदारा को राज हे।”</verse>
				<verse number="54">पसे वीं ईसू ने पकड़न ले पराग्या अन मायाजक का घरे लेग्या। पतरस थोड़ाक छेटी वाँका पाछे-पाछे आरियो हो।</verse>
				<verse number="55">अन जद्याँ वी आगंणा में धूणी लगान तापरिया हा, तद्याँ पतरस भी वाँके बचमें जान तापबा लागग्यो।</verse>
				<verse number="56">अन एक दासी वादी का उजिता में वींने बेट्यो तको देकन केबा लागी, “ओ भी वींका हाते हो।”</verse>
				<verse number="57">पण, परतस नटन क्यो, “ए लुगई, मूँ वींने ने ओळकूँ हूँ।”</verse>
				<verse number="58">थोड़ीक दाण केड़े कणी दूजे वींने देकन क्यो, “थूँ भी वाँका मूँ एक हे।” पतरस क्यो, “ए भई, वो मूँ ने हूँ।”</verse>
				<verse number="59">एक घण्टा केड़े एक दूजे मनक ज्योरऊँ हाको करन क्यो, “ओ भी तो वींका हाते हो, काँके यो भी तो गलील को हे।”</verse>
				<verse number="60">पण पतरस बोल्यो, “ए भई, मूँ ने जाणूँ के, थूँ कई केवे हे!” वो या बात केरियो हो के, तरत कूकड़ो बोल ग्यो।</verse>
				<verse number="61">जद्याँ परबू पतरस का आड़ी देक्यो अन पतरस ने परबू की वा बात आद अई। ज्याँ वणा क्यो हे के, “आज कूकड़ा के बोलबा का पेल्या थूँ तीन दाण मने ओळकबाऊँ नट जाई।”</verse>
				<verse number="62">तद्याँ परतस बारणे जान घणो रोबा लागो।</verse>
				<verse number="63">जणा मनक ईसू जी ने पकड़ राक्या हा, वी वाँकी रोळ करन वाँने कुटबा लागा।</verse>
				<verse number="64">अन वींकी आक्याँ ढाकन वाँकाऊँ पूछबा लगा के, “अबे आगेवाणी करन बतावो के, थाँके कणी ठोकी?”</verse>
				<verse number="65">वींको अपमान करबा का वाते वणा वाँकाऊँ ओरी घणी बाताँ किदी।</verse>
				<verse number="66">दन उगताई मुक्य याजक, नेमा ने हिकाबावाळा अन दाना यहूदी नेता भेळा व्या अन ईसू ने आपणी सबा में लान पूँछ्यो,</verse>
				<verse number="67">“माने बता के कई थूँ बचाबावाळो मसी हे।” ईसू वाँने क्यो, “यद्याँ मूँ थाँकाऊँ केवूँ, तो भी थाँ मने मानबावाळा ने हो।</verse>
				<verse number="68">अन यद्याँ मूँ थाँकाऊँ पूँछू, तो थाँ जबाव ने दे पावो।</verse>
				<verse number="69">पण, अबे मूँ मनक को पूत सबाऊँ तागतवर परमेसर का जीमणा पाल्ड़े बेटायो जाऊँ।”</verse>
				<verse number="70">ईंपे वणा हाराई मनकाँ क्यो, “तो कई थूँ परमेसर को पूत हे?” वणी क्यो, “थाँ खुदई हाँच केरिया हो के, मूँ वोईस हूँ।”</verse>
				<verse number="71">तद्याँ वणा क्यो, “अबे आपाँने गवई की कई जरूत हे, काँके आपाँ खुदई ईंका मुण्डाऊँ हूँण लिदो हे।”</verse>
			</chapter>
			<chapter number="23">
				<verse number="1">तद्याँ हारी सबा ऊबी वेगी अन वींने राजपाल पिलातुस का नके लेग्या।</verse>
				<verse number="2">अन मनक यो केन वींपे दोस लगाबा लागा के, “माँ ईंने लोग-बागाँ ने भटकातो तको पकड़्यो हे। यो राजा केसर ने हाँसल जमा करबा का वाते नटे हे अन यो आपणाँ खुद ने राजा मसी केवे हे।”</verse>
				<verse number="3">पिलातुस ईसुऊँ पूँछ्यो, “कई, थूँ यहूदियाँ को राजा हे?” ईसू वींने जबाव दिदो, “थूँ खुदई हाँच केरियो हे, मूँ वोईस हूँ।”</verse>
				<verse number="4">तद्याँ पिलातुस मुक्य याजकाँऊँ अन लोग-बागाऊँ क्यो, “मने अणी मनक में कई दोस ने मलरियो हे।”</verse>
				<verse number="5">पण, वी यो केता तका वींपे ज्योर देबा लागा के, “अणी पूरा यहूदियाँ में लोग-बागाँ ने आपणाँ उपदेसाऊँ भरमाया हे। अणी गलीलऊँ सरू किदो अन अबे हारोई गेलो पार करन अटे आ पूग्यो हे।”</verse>
				<verse number="6">ओ हुणन पिलातुस पूँछ्यो, “कई ओ मनक गलीली हे?”</verse>
				<verse number="7">अन ओ जाणन के, ईसू हेरोदेस का राज का हे, तो वाँने हेरोदेस का नके खन्दा दिदो। वणा दनाँ में हेरोदेस भी यरूसलेम में हो।</verse>
				<verse number="8">जद्याँ हेरोदेस ईसू ने देक्या तो, वो घणो राजी व्यो, काँके नरी टेमऊँ वींने देकणो छारियो हो अन वो वींका बारा में पेल्या हूँण चुक्यो हो, वो ईसू का हाताऊँ परच्यो देकबा की मरजी राकतो हो।</verse>
				<verse number="9">वो ईसुऊँ घणा सवाल पूछतो रियो पण, ईसू कई भी जबाव ने दिदो।</verse>
				<verse number="10">मुक्य याजकाँ अन नेमा ने हिकाबावाळा वटे ऊबा तका हा अन वी वींका पे दोस लगारिया हा।</verse>
				<verse number="11">तद्याँ दरबार हेरोदेस आपणाँ सपायाँ का हाते मलन बुरा वेवार करन वींकी रोळ किदी अन वींने जामूणिया रंग का गाबा पेरान वींने पिलातुस का नके पाछो खन्दा दिदो।</verse>
				<verse number="12">वणी दनऊँ पिलातुस अन हेरोदेस का वसमें राजिपो वेग्यो अणीऊँ पेल्या वी एक-दूँजा का दसमण हा।</verse>
				<verse number="13">पसे पिलातुस मुक्य याजकाँ, यहूदी नेता अन लोग-बागाँ ने एक हाते बलान वाँकाऊँ क्यो,</verse>
				<verse number="14">“थाँ अणी मनक ने लोग-बागाँ ने भरमावो वाळो हमजन मारे नके लाया हो अन देको, में थाँका हामे वींकी परक किदी हे। पण, थाँ जणा बाताँ को ईंपे दोस लगावो हो, वणा बाताँ मेंऊँ ईंपे कई दोस ने पायो हे।</verse>
				<verse number="15">अन नेई हेरोदेस पायो, काँके वणी ईंने आपणाँ नके पाछो खन्दा दिदो हे अन देको, अणी अस्यो कई भी ने किदो के, यो मोत की सजा को भुगते।</verse>
				<verse number="16">ईं वाते मूँ ईंके कोड़ा मारन छोड़ देवूँ हूँ।”</verse>
				<verse number="17">पिलातुस फसे का तेवार पे हर साल लोग-बागाँ का वाते कस्या भी एक बन्दी ने छोड़तो हो।</verse>
				<verse number="18">तद्याँ हाराई मनक हाको करबा लागा के, “ईंने मोत की सजा दो अन माकाँ वाते बरब्बा ने छोड़ दो।”</verse>
				<verse number="19">बरब्बा ने नगर में लड़ई-जगड़ो अन हत्या का करबा का मस जेळ में बन्द कर मेल्यो हो।</verse>
				<verse number="20">पिलातुस ईसू ने छोड़णो छारियो हो ईं वाते वणी एक दाण ओरी मनकाँ ने हमजाया।</verse>
				<verse number="21">पण वीं ज्योरऊँ हाको करन केबा लागा, “ईंने हूळी पे चढा दो, ईंने हूळी पे चढा दो।”</verse>
				<verse number="22">पिलातुस मनकाँऊँ तीजी दाण पूँछ्यो, “अणी कई गलत किदो हे? में तो ईंमें कई दोस ने पायो हे, जणीऊँ यो मोत को दण्ड भुगते। ईं वाते मूँ ईंके कोड़ा लगवान छोड़ देऊँ।”</verse>
				<verse number="23">पण वी हाराई मनक एक दाण पाछो हाको करन बोल्या, “ईंने हूळी पे चढा दो।” अन वाँके हाका-भार करबा वाँकी बात बणगी।</verse>
				<verse number="24">ईं वाते पिलातुस हुकम दिदो के, जस्यान मनक केरिया हे वस्यान किदो जावे।</verse>
				<verse number="25">अन वणी वीं मनक ने छोड़ दिदो, जणी लड़ई-जगड़ो अन हत्या किदी ही। यो मनक वोईस हो जिंका बारा में लोगाँ मांग किदी ही। ईसू ने मनकाँ का हाताँ में हूँप दिदो ताँके जस्यान वी छावे वस्यान कर सके।</verse>
				<verse number="26">जद्याँ वीं मनक ईसू ने लेन जारिया हा, तो वणा समोन नाम को एक कुरेनी ने गामऊँ आवतो तको देक्यो। वणा वींने पकड़न वींका खाँदा ऊपरे हूळी मेल दिदी, ताँके वो ईसू का पाछे-पाछे चाले।</verse>
				<verse number="27">अन लोग-बागाँ की मोटी भीड़ वींका पाच्छे चालरी ही अन वाँका में नरी लुगायाँ भी ही, जी ईसू का वाते रोरी ही अन छाती कुटरी ही।</verse>
				<verse number="28">ईसू वाँका आड़ी देकन क्यो, “ओ यरूसलेम की बेट्या, मारा वाते मती रोवो पण, आपणाँ अन आपणाँ बाळकाँ का वाते रोवो।</verse>
				<verse number="29">काँके देको अस्या दन आरिया हे, जद्याँ मनक केई, ‘घणी भाग्यवाळी हे वी लुगायाँ जी बना छोरा-छोरी की हे अन घणी भाग्यवाळी हे वा कोख जणी कदी बाळक ने जण्यो हे अन घणा भाग्यवाळी हे वी लुगायाँ जणा कदी आपणाँ छोरा-छोरी ने दूद ने पायो।’</verse>
				<verse number="30">पछे वीं मनक मंगराऊँ केई के, ‘थाँ माकाँ ऊपरे पड़ जावो’ अन मंगरियाँऊँ केई के, ‘माने ढाकी दो।’</verse>
				<verse number="31">काँके जद्याँ मनक हरा रूँकड़ा का हाते अस्यो करे हे, तो वीं हूका रूँकड़ा का हाते कई-कई ने करी?”</verse>
				<verse number="32">अन वाँका हाते दो मनकाँ ने भी, ज्यो गुनेगार हा, वाँने भी मोत की सजा देबा का वाते ले जारिया हा।</verse>
				<verse number="33">जद्याँ वीं वणी जगाँ आया, जिंको नाम “खोपड़ी” हो। तो वणा गुनेगार मनकाँ ने भी ईसू का एक जीमणा पाल्डे अन दूजाँ ने डावा पाल्डे हूळी पे चड़ा दिदा।</verse>
				<verse number="34">जद्याँ ईसू बोल्या, “ओ बापू, अणाने माप कर दो, काँके ईं लोग ने जाणे हे के, ईं कई कररिया हे।” पसे सपायाँ कागद की गोट्याँ नाकन वाँका गाबा बाँट लिदा।</verse>
				<verse number="35">लोग-बाग देकरिया हा अन यहूदी नेता वींकी रोळ करन केरिया हा के, “थें दूजाँ ने तो बंचाया हे, अबे यद्याँ थूँ परमेसर को हाँचो चुण्यो तको मसी वेवे तो खुद ने भी बचई ले।”</verse>
				<verse number="36">सपई भी वाँका नके आन खाटा अंगूरा का रस में डुबायो तको फूंबो पिबा का वाते दिदो अन रोळ करन क्यो,</verse>
				<verse number="37">“यद्याँ थूँ यहूदी लोगाँ को राजा हे, तो खुद ने बंचा ले।”</verse>
				<verse number="38">वींका माता ऊपरे एक कागद लिकन लटका दिदो के, “यो यहूदियाँ को राजा हे।”</verse>
				<verse number="39">वटे लटकाया तका दो गुनेगाराँ मेंऊँ एक मनक भी ईसू की रोळ करते तके क्यो, “कई थूँ मसी कोयने हे? थूँ खुद ने अन माँने भी बंचा ले।”</verse>
				<verse number="40">पण, दूजे वीं पेल्यावाळा ने तापड़न क्यो, “कई थूँ परमेसरऊँ ने दरपे हे? थने भी तो याईस सजा मलीरी हे।</verse>
				<verse number="41">अन आपाँ तो न्यावऊँ सजा पई, काँके आपाँ तो आपणाँ काम को फळ पारिया हा, पण अणी तो कई बुरो ने किदो हे।”</verse>
				<verse number="42">पसे वणी क्यो, “ओ ईसू, जद्याँ थाँ आपणाँ राज में आवो, तो मने आद राकज्यो।”</verse>
				<verse number="43">ईसू वींने क्यो, “मूँ थाँराऊँ हाचेई में केवूँ हूँ के, आजइस थूँ मारी लारे हरग में वेई।”</verse>
				<verse number="44">वीं दाण दन की बारा बजी री ही, तद्याँ बारा बज्याऊँ तीन बज्या तईं आकी धरती अंदारो रियो,</verse>
				<verse number="45">काँके सुरज भी ने चमकरियो हो अन मन्दर को परदो फाटन दो टुकड़ा वेग्यो।</verse>
				<verse number="46">पसे ईसू ज्योरऊँ हाको करन क्यो, “ओ बापू, मूँ मारी आत्माने थाँका हाताँ में हूँपूँ हूँ।” यो केन ईसू आपणाँ जीव छोड़ दिदो।</verse>
				<verse number="47">वटे ज्यो कई व्यो हो वींने देकन सपायाँ को हाकम ओ केन परमेसर की बड़ई किदी के, “हाँची में ओ मनक धरमी हो।”</verse>
				<verse number="48">वटे देकबा आया मनक ज्यो कई व्यो हो वींने देकन छाती-मातो कूटन आपणाँ-आपणाँ घरे पराग्या।</verse>
				<verse number="49">पण ईसू की जाण-पेचाणवाळा अन जीं लुगायाँ गलीलऊँ वींकी लारे अई ही, वीं हाराई छेटी ऊबी रेन ओ हारोई देकरी ही।</verse>
				<verse number="50">वटे युसुप नाम को एक मनक हो। ज्यो यहूदियाँ का मोटी सबा में मंतरी हो, वो एक घणो धरमी मनक हो। वो वाँकी ईसू ने मारबा की राय में अन वाँका अणी कामाँऊँ राजी कोयने हो अन वो यहूदियाँ का देस में अरमतिया नाम की जगाँ को रेबावाळो हो अन परमेसर की राज बाट नाळवावाळो हो।</verse>
				<verse number="51"></verse>
				<verse number="52">वो युसुप पिलातुस का नके ग्यो अन वणीऊँ परातना किदी के, “ईसू की लास मने दिदे।”</verse>
				<verse number="53">वो लास ने हूळीऊँ उतारन एक हव धोळा चादरा में पळेटी अन मंगरा में छाट पे खोदी तकी एक कबर में मेल दिदी। वीं कबर में पेल्याँ किंने भी ने गाड़्यो ग्यो हो।</verse>
				<verse number="54">वो दन हकरवार हो अन सबत को दन सरू वेबा में हो।</verse>
				<verse number="55">गलील परदेसऊँ अई तकी लुगायाँ भी वींका हाते वटे अई। वणा भी ईं कबर ने देकी अन ओ देक्यो के, लास ने वटे कस्यान मेली ही।</verse>
				<verse number="56">अन वणा पाच्छी आन ईसू की लास पे लगाबा का वाते हव बानावाली चिजाँ अन अंतर त्यार किदो। नेमा का रिती जस्यान वणा आराम का दन आराम किदो।</verse>
			</chapter>
			<chapter number="24">
				<verse number="1">हपता का पेलेई दन दितवार ने वेगी हवेर पेल्या वीं लुगायाँ हव बानावाली चिजाँ अन अंतर लेन कबर के नके अई, जिंने वणा खुद बणायो हो।</verse>
				<verse number="2">वाँने कबर का मुण्डा पूँ मोटो भाटो छेटी हरकायो तको मल्यो।</verse>
				<verse number="3">अन वीं मयने गी, पण वाँने परबू ईसू की लास ने लादी।</verse>
				<verse number="4">तद्याँ वे ईं बातऊँ दरप अन संका में आगी ही अन देको अणाचेत का वाँका नके चमकता तका गाबा पेरियाँ तका दो मनक आन ऊबा वेग्या।</verse>
				<verse number="5">जद्याँ वीं दरपगी अन रेटे मुण्डो करन ऊबी वेगी, तो वणा मनकाँ लुगायाऊँ क्यो, “थाँ जीवता ने मरिया तका में काँ होदो हो?</verse>
				<verse number="6">वो अटे कोयने हे, पण वो पाछो जीवतो वेग्यो हे। आद करो के, वणी थाँने गलील में कई क्यो के,</verse>
				<verse number="7">‘ओ जरूरी हो के, मूँ मनक का पूत पाप्याँ का हाताँ में पकड़वायो जाऊँ अन पसे मूँ हूळी पे चड़ा दिदो जाऊँ अन मूँ पाछो तीजे दन जीवतो वे जाऊँ।’ ”</verse>
				<verse number="8">तद्याँ वणा लुगायाँ ने वींकी बाताँ आद अईगी।</verse>
				<verse number="9">अन वीं कबरऊँ पाच्छी आन वणा ग्याराई चेला ने अन हाराई ने आ बात बतई।</verse>
				<verse number="10">जणा लुगायाँ थरप्या तका चेला ने आ बात बतई ही वणामें मरियम मगदलीनी अन योना अन याकूब की बई मरियम अन वणा का हाते की दूजी लुगायाँ भी ही।</verse>
				<verse number="11">पण, वाँकी ईं बाताँ चेला ने जूटी लागी अन वणा अणा बाताँ ने अणहूणी करन टाळ दिदी।</verse>
				<verse number="12">तद्याँ पतरस उटन कबर का आड़ी दोड़्यो अन वणी कबर में छाकन देक्यो के, तो वटे धोळा चादरो पड़्या हा ओर कई ने हो। पसे वटे ज्यो भी वणी देक्यो वींमें अचम्बो करतो तको आपणाँ घरे परोग्यो।</verse>
				<verse number="13">वणीस दन ईसू का चेला मेंऊँ दो जणा यरूसलेमऊँ च्यार कोस छेटी बस्या तका इम्माऊस नाम का गाम में जारिया हा।</verse>
				<verse number="14">अन वीं अणा हारी बाताँ पे जी अबाणू वीं ही होच-बच्यार करता तका एक-दूजाऊँ बाताँ करता तका जारिया हा।</verse>
				<verse number="15">वीं जद्याँ एक-दूजाऊँ बाताँ कररिया हा, तो खुद ईसू वाँका वटे परगट व्या अन वाँके हाते-हाते चालबा लागा।</verse>
				<verse number="16">पण, वाँकी आक्याँ अस्यी बन्द कर दिदी गी ही के, वीं वींने देकता तका भी ओळक ने सक्या।</verse>
				<verse number="17">तो ईसू वणाऊँ पूँछ्यो, “आ कई बात हे, ज्यो थाँ एक-दूजाऊँ कररिया हो?” वीं दकी वेन ऊबा रेग्या।</verse>
				<verse number="18">ओ हूँणन वाँका मेंऊँ क्लियुपास नाम के एक मनक क्यो, “कई थूँ यरूसलेम में एकलो ईं परदेसी हे? ज्यो थूँ जाणे कोयने हे के, अणा दनाँ में वटे कई वेरियो हे?”</verse>
				<verse number="19">ईसू वणाऊँ पूँछ्यो, “कस्यी बाताँ?” वणा ईसू ने क्यो, “हारी बाताँ नासरत का ईसू का बारा में हे, वो अस्यो मनक हो, जणी ज्यो भी क्यो हो अन ज्यो किदो हो अणीऊँ वणी परमेसर अन हाराई लोग-बागाँ का हामे यो बता दिदो के, वो एक मोटो परमेसर का आड़ीऊँ बोलबावाळो हो।</verse>
				<verse number="20">वींने मुक्य याजकाँ अन माकाँ हाकमाँ पकड़वा दिदो के, वींने मोत की सजा को दण्ड दिदो जावे अन वींने हूळी पे चड़ायो।</verse>
				<verse number="21">पण, माँने भरोसो हो के, वोईस इजराएल ने छुटकारो देई। ईं हारी बाताँ व्या ने आज तीन दन वेग्या हे।</verse>
				<verse number="22">अन माँके अटा की नरी लुगायाँ माकाँ में एक अचम्बो पेदा कर दिदो हे, जीं हवेर पेल्याँ वेगी कबर में गी ही।</verse>
				<verse number="23">पण जद्याँ वाँने वींकी लास वटे ने मली, तो वीं ओ केती तकी अई के, माँ हरग-दुत का दरसण किदा अन वणा दुताँ माँने क्यो के, ‘ईसू पाछो जीवतो वेग्यो हे।’</verse>
				<verse number="24">जद्याँ माकाँ हण्डाळ्याँ मूँ कुई कबर पे ग्या अन ज्यो वणा लुगायाँ क्यो हो, वस्यीईस बात वटे देकी, पण ईसू ने, ने देक्या।”</verse>
				<verse number="25">तद्याँ ईसू वाँने क्यो, “ओ बना अकल का अन परमेसर का आड़ीऊँ बोलबावाळा की बाताँ पे भरोसो ने करबावाळा मनकाँ।</verse>
				<verse number="26">कई ओ जरूरी ने हो के, मसी ओ दुक जेलन आपणी खुद की मेमा में जावे?”</verse>
				<verse number="27">अन अणी तरिया मूसाऊँ सरू करन हाराई परमेसर का आड़ीऊँ बोलबावाळा का सास्तर में वींका बारा में क्यो ग्यो हो, वणा वींको बखाण करन वाँने हमजाया।</verse>
				<verse number="28">अतराक में वीं वणी गाम में पूग ग्या, जटे वीं जारिया हा अन ईसू का ढंगऊँ ओ लागो के, वींके ओर आगे जाणो हे।</verse>
				<verse number="29">पण, वणा वींने ओ केन रोक्यो के, “माँकी लारे रे अन हाँज पड़गी अन दन आत ग्यो हो।” तद्याँ वो वाँकी लारे रेवा का वाते मयने ग्यो।</verse>
				<verse number="30">जद्याँ वो वाँकी लारे खाणो खाबा ने बेट्यो, तो वणी रोटी लेन परमेसर ने धन्नेवाद दिदो अन रोटी तोड़न वाँने दिदी।</verse>
				<verse number="31">वणीस दाण वाँकी आक्याँ खलगी अन वणा वींने ओळक लिदो हो, पण वो वाँकी आक्याँ आगेई खुवाग्यो।</verse>
				<verse number="32">पसे वीं एक-दूजाऊँ केबा लागा, “जद्याँ वो गेला में आपाऊँ बाताँ कररियो हो अन पुवितर सास्तर को अरत आपाँने हमजारियो हो, तो कई आपणाँ मन में धिज्यो ने बन्द रियो हो?”</verse>
				<verse number="33">वीं वणीस दाण पाच्छा यरूसलेम पराग्या अन वणा ग्याराई चेला ने अन वाँका हण्डाळ्याँ ने एक हाते देक्याँ।</verse>
				<verse number="34">जीं वटे बेटा हा, वीं केरिया हा के, “परबू हाँचई में जीवतो वेग्यो हे अन समोन ने दिक्यो हे।”</verse>
				<verse number="35">तद्याँ वणा दुयाई भी वाँने गेला की हारी बाताँ बता दिदी अन ओ भी क्यो के, माँ रोटी देती दाण ईसू ने ओळक्या हा।</verse>
				<verse number="36">चेला आ बात कररिया हा के, वो खुद वाँका हामे परगट व्यो अन वाँने क्यो के, “थाँने सान्ती मले।”</verse>
				<verse number="37">पण, वीं घबराग्या अन दरपग्या के, “आपाँ तो कस्याई भूत ने देकरिया हा।”</verse>
				<verse number="38">तो ईसू वाँकाऊँ क्यो, “थाँ काँ घबरारिया हो? थाँ मन में भेंम काँ करो हो?</verse>
				<verse number="39">मारा हात-पगाँ ने देको के, मूँ वोईस हूँ। मारे अड़न देको, काँके भूत के हाड़क्या अन माँस ने वेवे, जस्यान थाँ मारा में देकरिया हो।”</verse>
				<verse number="40">ओ केन ईसू आपणाँ हात-पगाँ ने बताया।</verse>
				<verse number="41">पण वीं हाराई आणन्द अन अचम्बा का मस अबाणू तईं ने हमज सक्या हा के, आपाँ हाँची में ईंने देकरिया हा। तो ईसू वाँने पूँछ्यो, “कई, थाँका नके खाबा का वाते कई हे?”</verse>
				<verse number="42">तो वणा वींने हेकी तकी माछळी का टुका दिदा।</verse>
				<verse number="43">वणी वाँने लेन वाँके हामेईस खादा।</verse>
				<verse number="44">पसे ईसू वाँकाऊँ क्यो, “ईं मारी वीं बाताँ हे, जद्याँ मूँ थाँके हाते रेते तके थाँकाऊँ क्यो हो। जतरी बाताँ मूसा के नेमा में अन परमेसर का आड़ीऊँ बोलबावाळा अन भजनाँ की किताब में मारा बारा में लिकी तकी हे, वीं हारी पुरी वेणीईस हे।”</verse>
				<verse number="45">तद्याँ वणी वाँने सास्तर ने हमजबा के वाते वाँने अकल दिदी।</verse>
				<verse number="46">अन वाँने क्यो, “ओ लिक्यो तको हे के, मसी दुक उटाई अन तीजे दन मरियो तका मेंऊँ जीवतो वे जाई।</verse>
				<verse number="47">अन यरूसलेमऊँ लगान हाराई धरती का लोगाँ में मन फेरबा को अन पापऊँ मापी को परच्यार वींका नामऊँईस किदो जाई।</verse>
				<verse number="48">थाँ अणी हारी बाताँ का गुवा हो।</verse>
				<verse number="49">अन देको, जणी पुवितर आत्मा ने देबा को वादो परमपिता किदो हो, वींने मूँ थाँका ऊपरे उतारू, पण जद्याँ तईं हरगऊँ तागत ने पावो तो थाँ ईं नगर मेंईस रेज्यो।”</verse>
				<verse number="50">तद्याँ ईसू वाँने बेतनियाँ गाम तईं लेग्यो अन आपणाँ हाताँ ने लाम्बा करन वाँने आसिरवाद दिदो।</verse>
				<verse number="51">अन पसे आसिरवाद देतो तको ईसू वाँकाऊँ न्यारो वेन हरग में उठा लिदो ग्यो।</verse>
				<verse number="52">अन वणा हाराई वींके गोडा टेकन धोक देन राजी वेता तका यरूसलेम में पराग्या।</verse>
				<verse number="53">वीं रोज मन्दर में भेळा वेन परमेसर का भजन करिया करता हा।</verse>
			</chapter>
		</book>
		<book number="43">
			<chapter number="1">
				<verse number="1">किंकी भी रचना करबाऊँ पेल्या बचन हो अन बचन परमेसर का हाते हो अन वो बचनइस परमेसर हे।</verse>
				<verse number="2">किंकी भी रचना वेबाऊँ पेल्या बचन परमेसर का हाते हो।</verse>
				<verse number="3">बचनऊँईस परमेसर दनियाँ की हारी चिजाँ बणई अन बचन का बना कई भी चीज ने बणईगी।</verse>
				<verse number="4">बचन मेंईस जीवन हो अन वो जीवन मनकाँ का वाते उजितो हो।</verse>
				<verse number="5">वो उजितो अंदारा में चमकतो रेवे हे अन अंदारो वींने कदी ने बजा सक्यो।</verse>
				<verse number="6">परमेसर आपणाँ आड़ीऊँ आपणाँ एक दूत ने खन्दायो जिंको नाम यहुन्नो हो।</verse>
				<verse number="7">यहुन्नो भी वीं उजिता की गवई देबा ने आयो, ताँके हाराई वींकी हुणन उजिता पे विस्वास करे।</verse>
				<verse number="8">वो खुद तो उजितो ने हो, पण उजिता की गवई देबा आयो हो।</verse>
				<verse number="9">वो उजितो हाँचो हे, ज्यो हाराई मनकाँ ने उजितो में लाई, वो दनियाँ की नजराँ में आरियो हो।</verse>
				<verse number="10">वो बचन अणी दनियाँ मेंईस हो अन परमेसर वणीऊँस दनियाँ बणई, पण दनियाँ का लोगाँ वींने ने ओळक्यो।</verse>
				<verse number="11">वो आपणाँ लोगाँ का बसमें आयो अन पण वणा वींने ने ओळक्यो।</verse>
				<verse number="12">पण जणा भी वींने मान्यो अन वींपे विस्वास किदो, वाँने वणी परमेसर की ओलाद वेबा को हक दिदो।</verse>
				<verse number="13">परमेसर की ओलाद वेबा का वाते वीं मनक की मरजी का मस देहऊँ ने जनम्याँ, पण वीं तो परमेसर की मरजीऊँ आत्मिक रूप में जनम्याँ।</verse>
				<verse number="14">अन बचन देह रूप धारण लिदो अन दया अन हाँचऊँ भरियो-पुरयो वेन आपणाँ बचमें वास किदो। आपाँ वींकी अस्यी मेमा देकी, या बापू परमेसर का एकाएक बेटा की मेमा ही।</verse>
				<verse number="15">यहुन्ने वींका बारा में गवई दिदी अन हेलो पाड़न क्यो के, “यो वोईस हे, जिंको बखाण में किदो हे के, ‘ज्यो मारा पाच्छे आरियो हे, वो माराऊँ मोटो हे, काँके वो मारा जनमबा के पेल्याँई मोजुद हो।’”</verse>
				<verse number="16">वाँकी दया की भरपईऊँ आपाँ हाराई ने आसिरवाद पे आसिरवाद मल्या।</verse>
				<verse number="17">आपाँने नेम तो परमेसर मूसाऊँ दिदा, पण दया अन हाँच ईसू मसीऊँ मल्यो।</verse>
				<verse number="18">परमेसर का कदी कणी दरसण ने किदा, बेस एकाएक बेटो ज्यो खुद परमेसर हे अन वाँका खोळा में हे, वणी वाँने आपणाँ पे परगट किदा।</verse>
				<verse number="19">जद्याँ यरूसलेमऊँ यहूदी अदिकारी जद्याँ याजकाँ अन लेवीयाँ ने यहुन्नाऊँ ओ पूँछबा के वाते खन्दाया के, “थूँ कूण हे?”</verse>
				<verse number="20">तद्याँ वणी हुदोई खोलन के दिदो के, “मूँ मसी ने हूँ।”</verse>
				<verse number="21">तद्याँ वणा वींकाऊँ पूँछ्यो, “तो थूँ कूण हे? कई, थूँ एलियो हे?” यहुन्ने वाँने जवाब दिदो, “ने, मूँ वो ने हूँ।” तो वणा पूँछ्यो, “कई थूँ परमेसर का आड़ीऊँ बोलबावाळो हे?” वणी क्यो, “कोनी।”</verse>
				<verse number="22">तद्याँ वणा वींकाऊँ पूँछ्यो, “तो पछे थूँ हे कूण? माँने बता, ताँके माँ माँने खन्दाबावाळा ने बता सका के, थूँ थाँरा खुद का बारा में कई केवे हे?”</verse>
				<verse number="23">जस्यान यसाया परमेसर का आड़ीऊँ बोलबावाळा लिक्यो हो, वींके जस्यान यहुन्ने वाँकाऊँ क्यो, “मूँ काँकड़ में एक हाका करबावाळा की वाणी हूँ के, ‘थाँ परबू का वाते गेलो हुदो करो।’”</verse>
				<verse number="24">ईं मनक फरीसियाँ का आड़ीऊँ खन्दाया तका हा।</verse>
				<verse number="25">अणा वींकाऊँ ओ सवाल किदो के, “यद्याँ थूँ मसी ने हे, अन ने एलियो, अन ने परमेसर का आड़ीऊँ बोलबावाळो हे, तो पछे मनकाँ ने बतिस्मा कई लेबा ने देवे हे?”</verse>
				<verse number="26">यहुन्ने वाँकाऊँ क्यो, “मूँ पाणीऊँ बतिस्मो देरियो हूँ, पण थाँका बचमें एक मनक हे, जिंने थाँ ने जाणो हो।</verse>
				<verse number="27">अन ज्यो मारा केड़े आबावाळो हे। मूँ वींकी पगरख्याँ का कसणा खोलबा के जोगो भी ने हूँ।”</verse>
				<verse number="28">ईं हारी बाताँ यरदन नंदी के पेली पार बेतनियाँ में वीं, जटे यहुन्नो बतिस्मा देतो हो।</verse>
				<verse number="29">आगले दन यहुन्ने ईसू ने आपणाँ आड़ी आवता तका देकने क्यो, “ओ परमेसर को उन्यो हे, ज्यो दनियाँ का लोगाँ का पापाँ ने आपणाँ ऊपरे ले लेई।</verse>
				<verse number="30">ओ वोईस हे, जिंका बारा में ओ क्यो हो के, ‘एक मनक मारा केड़े आबावाळो हे, ज्यो माराऊँ मोटो हे, काँके वो मारा जनमबा के पेल्याँई मोजुद हो।’</verse>
				<verse number="31">अन पेल्याँ मुँई वींने ने ओळकतो हो, पण ईं वाते पाणीऊँ बतिस्मो देतो आरियो हूँ, ताँके इजराएल देस का मनक वींने ओळक सके।”</verse>
				<verse number="32">पछे यहुन्ने आपणी गवई दिदी के, “में आत्माने परेवड़ा की तरियाँ आकासऊँ उतरती तकी देकी अन वाँ वाँका ऊपरे आन ठमगी।</verse>
				<verse number="33">मूँ तो वींने ओळकतो ने हो, पण परमेसर मने पाणीऊँ बतिस्मो देबा का वाते खन्दायो, वणा मने क्यो, ‘थूँ पुवितर आत्माने उतरती अन किंके ऊपरे रकती तकी देकी, ओ वोईस मनक वेई, ज्यो पुवितर आत्माऊँ बतिस्मो देई।’</verse>
				<verse number="34">में अणा बाताँ ने वेती तकी देकी अन गवई दूँ हूँ के, ‘ओईस परमेसर को पूत हे।’”</verse>
				<verse number="35">दूजे दन यहुन्नो अन वींका चेला मूँ दो जणा वटे ऊबा हा।</verse>
				<verse number="36">अन वणी ईसू ने देकन ज्यो वाँका नकेऊँ जारियो हो क्यो, “देको, ओ परमेसर को उन्यो जारियो हे।”</verse>
				<verse number="37">जद्याँ वाँ दुई चेला वींने आ केतो तको हुण्यो, तो वीं ईसू का पाच्छे चाल पड़्या।</verse>
				<verse number="38">ईसू पाच्छा फरन वाँने पाच्छे आवता तका देकन वणाऊँ क्यो, “थाँ कई होदरिया हो?” तो वणा क्यो, “हो गरुजी, थाँ कटे रेवो हो?”</verse>
				<verse number="39">ईसू वाँने क्यो, “आवो अन देक लो।” अन वीं वाँका हाते चालबा लागा। वाँकाणी देक्यो के, वीं कटे रेवे हे। वीं दन वीं वींका हातेईस रिया, काँके वीं दाण हाँजका की च्यार बजरी ही।</verse>
				<verse number="40">वीं दुई यहुन्ना की बाताँ हुणन ईसू का पाच्छे चालबा लागा हा, वाकाँमें एक समोन पतरस को भई अन्दरियास हो।</verse>
				<verse number="41">वणी पेल्याँ आपणाँ भई समोनऊँ मलन क्यो, “माँने मसी मलग्यो हे।” मसी को मतलब चुण्यो तको।</verse>
				<verse number="42">पछे अन्दरियास समोन ने ईसू का नके लायो। ईसू वींने देकन क्यो के, “थूँ यहुन्ना को छोरो समोन हे, पण थूँ केफा नामऊँ जाण्यो जाई।” केफा जिंने पतरस भी केवे हे, ज्याँको मतलब छाट भी वेवे हे।</verse>
				<verse number="43">दूजे दन ईसू गलील जाबा का वाते ते किदो अन फिलिपुस मलग्यो तो वींने क्यो, “मारा पाच्छे चाल।”</verse>
				<verse number="44">फिलिपुस, अन्दरियास अन पतरस का नगर बेतसेदा का रेवासी हो।</verse>
				<verse number="45">फिलिपुस नतनएलऊँ मल्यो अन वणीऊँ क्यो के, “जिंको बखाण परमेसर का आड़ीऊँ बोलबावाळा किदो अन मूसे आपणाँ नेमा में क्यो हो, वो माँने मलग्यो हे। वो युसुप को छोरो नासरत को रेबावाळो ईसू हे।”</verse>
				<verse number="46">नतनएल वणीऊँ क्यो, “कई हव चीज भी नासरतऊँ निकळ सके हे?” फिलिपुस वणीऊँ क्यो, “चालन खुदई देक ले।”</verse>
				<verse number="47">ईसू नतनएल ने आपणाँ आड़ीऊँ आवतो तको देकन वाँका बारा में क्यो, “देको, यो हाँचो इजराएली हे, ईंमें कई खोट ने हे।”</verse>
				<verse number="48">नतनएल ईसुऊँ पूँछ्यो, “थाँ मने कस्यान ओळको हे?” ईसू वींने जवाब दिदो के, “फिलिपुस थने बलायो वणीऊँ पेल्याँ में थने देक्यो, जद्याँ थूँ अंजीर का रूँकड़ा का रेटे बेटो तको हो।”</verse>
				<verse number="49">नतनएल वाँने जवाब दिदो, “हो गरुजी, थाँ परमेसर का पूत हे। थाँ इजराएल को राजा हे।”</verse>
				<verse number="50">ईसू वींने क्यो, “में ज्यो थने क्यो के, में थने अंजीर का रूँकड़ा के रेटे देक्यो, कई थूँ ईं बात की वजेऊँ विस्वास करे हे? तो थूँ आगे भी अणीऊँ मोटा-मोटा काम देकी।”</verse>
				<verse number="51">ईंके केड़े ईसू वाँने क्यो, “मूँ थाँकाऊँ हाँची केवूँ हूँ के, थाँ हरग ने खुलो तको अन परमेसर का हरग-दुताँ ने मनक का पूत (ईसू) पे उतरता अन चड़ता तका देको।”</verse>
			</chapter>
			<chapter number="2">
				<verse number="1">पछे तीजे दन गलील परदेस का काना नगर में किंको ब्याव हो अन ईसू की माँ भी वटे ब्याव में ही।</verse>
				<verse number="2">ईसू अन वींका चेला ने भी वीं ब्याव में नुत्या ग्या हा।</verse>
				<verse number="3">वटे जद्याँ अंगूरा को रस खतम वेग्यो, तो ईसू की माँ ईसुऊँ क्यो, “अटे अबे अंगूरा को रस खतम वेग्यो हे।”</verse>
				<verse number="4">ईसू क्यो, “ओ मास्या, मने कई करबा का वाते मती केवो। अबाणू मारी टेम ने अई हे।”</verse>
				<verse number="5">ईसू की माँ नोकर-चाकरऊँ क्यो, “वो ज्यो कई थाँकाऊँ केवे, थाँ वो करज्यो।”</verse>
				<verse number="6">विदी-विदान का जस्यान यहूदी मनकाँ के हापड़बा-धुपड़बा की रीत ही। ईं वाते वटे पाणी भरबा का भाटा का छे कळा पड़्या तका हाँ, वणा हरेक कळा में लगभग हो लीटर तईं पाणी भरियो जा सकतो हो।</verse>
				<verse number="7">ईसू वणा नोकर-चाकरऊँ क्यो, “अणा कळा ने पाणीऊँ भर दो।” तो नोकराँ वाँने लबा-लब भर दिदा।</verse>
				<verse number="8">पछे पाछो वणा नोकर-चाकरऊँ क्यो, “ईंमूँ थोड़ोक पाणी लो अन ईंने जीमणा का मुक्या का नके ले जावो।” अन वीं लेग्या।</verse>
				<verse number="9">जद्याँ मुक्ये ओ पाणी चाक्यो, ज्यो अंगूरा को रस बणग्यो हो, वो ने जाणतो हो के, ओ कटाऊँ आयो, पण जणा नोकर-चाकर पाणी काड्यो हो, वीं जाणता हाँ। तो वणी मुक्ये बींद ने बलायो,</verse>
				<verse number="10">अन वणीऊँ क्यो, “हाराई तो पेल्याँ हव अंगूरा को रस परुसे हे अन जद्याँ पावणा घणा पीन धाप जावे हे। तो वाँने, हलको अंगूरा को रस देवे हे, पण थाँ हव रस अबाणू तईं राक मेल्यो हे।”</verse>
				<verse number="11">ईसू गलील का काना नगर में आपणो ओ पेलो परच्यो देन आपणी मेमा परगट किदी अन वाँका चेला वाँके ऊपरे विस्वास किदो।</verse>
				<verse number="12">ईंका केड़े ईसू अन वाँकी माँ अन वाँका भई अन वाँका चेला कफरनूम नगर में ग्या अन वीं वटे थोड़ाक दन तईं रिया।</verse>
				<verse number="13">यहूदियाँ को फसे को तेवार लगतो हो, ईं वाते ईसू यरूसलेम ग्या।</verse>
				<verse number="14">ईसू मन्दर का चोक में आया तो वणा ढान्ढा-ढोर, गारा अन परेवड़ा ने बेचबावाळा अन रिप्या-कोड़ी को लेण-देण करबावाळा ने बेट्या तका देक्या।</verse>
				<verse number="15">ईं वाते ईसू हण को कोड़ो बणान हाराई ढान्ढा-ढोर अन गारा ने मन्दर का चोकऊँ बारणे काड़ दिदा, अन लेण-देण करबावाळा का रिप्या-कोड़ी बखेर दिदा, अन वाँका तकता उळट-पुळट कर दिदा।</verse>
				<verse number="16">अन परेवड़ा ने बेचबावाळा ने तापड़ता तका क्यो, “अणाने अटूँ ले जावो। मारा बाप का घर ने वोपार को घर मती बणावो।”</verse>
				<verse number="17">तद्याँ वाँका चेला ने आ बात फटाकऊँ आद अई के, सास्तर में लिक्यो हे, “थाँका घर का वाते मारो परेम मने खारियो हे।”</verse>
				<verse number="18">ईं बात पे यहूदी अदिकारी ईसुऊँ क्यो, “थूँ माने अस्यो कई परच्यो बता सके हे जणीऊँ माँने यो पतो लागे के, थूँ ज्यो कररियो हे, वो करबा को थने हक हे?”</verse>
				<verse number="19">ईसू वाँने जवाब दिदो, “ईं मन्दर ने धड़ा दो, मूँ ईंने तीन दनाँ में पाछो बणा देऊँ।”</verse>
				<verse number="20">ईंपे यहूदी मनकाँ क्यो, “ईं मन्दर ने बणावा में छियाळी वर लागा, अन कई थूँ ईंने तीन दनाँ में पाछो बणा देई?”</verse>
				<verse number="21">पण ईसू आपणी बात में आपणाँ देह का मन्दर का वाते क्यो हो।</verse>
				<verse number="22">आगे जान जद्याँ वो मरिया तकाऊँ पाछो जी उठयो तो वाँका चेला ने यो आद आयो हो के, वाँकाणी ओ क्यो हो। अन वणा पवितर सास्तर अन वो बचन ने ज्यो ईसू क्यो, वींपे विस्वास किदो।</verse>
				<verse number="23">जद्याँ ईसू यरूसलेम में फसे का तेवार की टेम में हो, तद्याँ नरई लोग-बाग वाँका परच्या पे अन ज्यो वीं करता हा, वाँने देकन वींपे विस्वास किदो।</verse>
				<verse number="24">पण ईसू आपणाँ खुद ने वाँका भरोस्ये ने हुप्यो, काँके वीं हाराई ने जाणता हा।</verse>
				<verse number="25">अन ईसू ने ईं बात की कई जरुरत ने हे के, कुई वाँने आन लोगाँ का बारा में बतावे, काँके लोगाँ का मना में कई चालरियो हे, वींने वो हव तरियाऊँ जाणतो हो।</verse>
			</chapter>
			<chapter number="3">
				<verse number="1">वटे फरीसियाँ में निकेदुस नाम को एक मनक हो। वो यहूदी मनकाँ को नेतो हो।</verse>
				<verse number="2">वो एक दन राते ईसू का नके आन क्यो, “हो गरुजी, माँ जाणा हाँ के, थाँ गरुजी हो अन थाँ परमेसर का आड़ीऊँ खन्दाया तका हो, काँके अस्या परच्या, जी थाँ बतावो हो, यद्याँ परमेसर वाँका हाते ने वेवे, तो वो ने बता सके हे।”</verse>
				<verse number="3">ईसू वींने जवाब दिदो के, “मूँ थाँराऊँ सई केवूँ हूँ, यद्याँ थूँ पाछो जनम ने लेवे, तो परमेसर का राज ने देक ने सकी।”</verse>
				<verse number="4">निकेदुमस वाँकाऊँ क्यो, “मनक जद्याँ डोकरो वे जावे हे, तो वो कणी तरियाऊँ जनम ले सके हे? कई वो आपणी माँ का पेट में दूजी दाण जान जनम ले सके हे?”</verse>
				<verse number="5">ईसू वींने जवाब दिदो के, “मूँ थाँकाऊँ हाचेई केवूँ हूँ, जद्याँ तईं कुई मनक पाणी अन पुवितर आत्माऊँ ने जनमे तो वो परमेसर का राज में ने जा सकी।</verse>
				<verse number="6">मनक देहऊँ देह ने जनम देवे हे पण वाँ पुवितर आत्माइस हे ज्या आत्मिक रूप में जनमे देवे हे।</verse>
				<verse number="7">अचम्बो मती कर, काँके मूँ थाँकाऊँ केरियो हूँ के, ‘थाँने नुवी रितऊँ जनम लेणो जरूरी हे।’</verse>
				<verse number="8">बायरो जटे छावे वटे चाले हे, अन थाँ वाँकाणी अवाज हुण सको हो, पण ने जाणो हो के, वो कटेऊँ आरियो हे अन कटने जारियो हे। ज्यो कुई पुवितर आत्माऊँ जनमे हे, वो भी अस्यानीस हे।”</verse>
				<verse number="9">निकेदुमस वाँने जवाब दिदो के, “ओ कस्यान वे सके हे?”</verse>
				<verse number="10">ओ हुणन ईसू वणीऊँ क्यो, “थूँ इजराएली मनकाँ को नेतो वेन, कई यो भी ने जाणे हे?</verse>
				<verse number="11">मूँ थाँकाऊँ हाँची केवूँ हूँ के, ज्यो माँ जाणा हाँ, वोईस केबा हाँ, अन ज्यो देक्यो हे, वींकी गवई देवा हा, पण थाँ लोग माँकी गवईने ने मानो हो।</verse>
				<verse number="12">जद्याँ में थाँने धरती की बाताँ बतई, अन थाँ विस्वास ने किदो हो। तो यद्याँ मूँ थाँने हरग की बाताँ कूँ, तो थाँ कस्यान विस्वास करो?</verse>
				<verse number="13">अन कुई भी हरग में ने ग्यो, बेस वो मनक को पूत ज्यो हरगऊँ उतरियो हे।</verse>
				<verse number="14">“जीं तरिया मूसे काकड़ में पीतळ का हाँप ने ऊसो उटायो हो, वणीस रितीऊँ जरूरी हे के, मनक को पूत भी ऊसो उटायो जाई।</verse>
				<verse number="15">अणीऊँ ज्यो कुई वींपे विस्वास करी वो अनंत जीवन पाई।</verse>
				<verse number="16">काँके परमेसर जगतऊँ अस्यान परेम किदो, वणा आपणाँ एकाएक पूत ने दे दिदो, ताँके ज्यो कुई वींपे विस्वास करे, वी नास ने वेई, पण अनंत जीवन पाई।</verse>
				<verse number="17">परमेसर आपणाँ पूत ने दनियाँ में ईं वाते ने खन्दायो के, वो दनियाँ का मनकाँ ने दण्ड देवे। पण ईं वाते खन्दायो के, दनियाँ का मनकाँ ने बंचा सके।</verse>
				<verse number="18">“ज्यो कुई वींपे विस्वास करे, वाँने माप किदा जावे हे, पण ज्यो वाँका पे विस्वास ने करे, वीं दण्ड का भोगी वेग्या हे, काँके वणा परमेसर का एकाएक पूत पे विस्वास ने किदो।</verse>
				<verse number="19">अन दण्ड को कारण ओ हे के, उजितो जगत में आयो। अन मनक अंदारा ने उजिताऊँ घणो रुपाळो जाण्यो, काँके वाँका काम बुरा हा।</verse>
				<verse number="20">ज्यो कुई बुरई करे हे, वो उजिताऊँ रिस्याँ बळे हे अन उजिता का नके ने आवे हे, काँके वो ने छावे के, वींका काम हाराई जाणे।</verse>
				<verse number="21">पण ज्यो हाँच पे चाले हे, वो उजिता का नके आवे हे, ताँके वींका काम परगट वे के, ज्यो कई वणा किदो, वो परमेसर छावता हा।”</verse>
				<verse number="22">ईंका केड़े ईसू अन वाँका चेला यरूसलेम नगरऊँ यहूदियाँ परदेस का रेटला इलाका में आया, अन वीं वटे वाँका लारेरियो अन मनकाँ ने बतिस्मो देबा लागो।</verse>
				<verse number="23">अन यहुन्नो भी सालेम नगर का भडे़ एनोन नाम जगाँ में बतिस्मो देतो हो, काँके वटे नरोई पाणी हो अन लोग-बाग आन बतिस्मो लेता हा।</verse>
				<verse number="24">यहुन्नो वीं टेम तईं जेल में बंदी ने बणायो ग्यो हो।</verse>
				<verse number="25">वटे यहुन्ना का चेला अन एक यहूदी मनक के हाते यहूदियाँ का साप-सपई का रिवाज का बारा में वाद-विवाद व्यो हो।</verse>
				<verse number="26">अन वणा चेले यहुन्ना का नके आन वणीऊँ क्यो, “हो गरुजी, ज्यो मनक यरदन नंदी का पेली पार थाँका लारे हो अन जिंकी थाँ गवई दिदी ही, अबे वो मनकाँ ने बतिस्मो देरियो हे, अन हाराई मनक वींका नके जारिया हे।”</verse>
				<verse number="27">यहुन्ने वाँने जवाब दिदो, “जद्याँ तईं परमेसर ने देवे तद्याँ तईं कुई कई ने पा सके हे।</verse>
				<verse number="28">थाँ खुद हाराई मारा गवा हो जणी दाण में क्यो हो, ‘मूँ मसी ने हूँ। पण मूँ तो वींके आगे खन्दायो ग्यो हूँ।’</verse>
				<verse number="29">वोईस बींद हे, जिंकी लाड़ी हे, पण बींद को यार ज्यो ऊबो रेन वींकी हुणे अन वो बींद की वाणीऊँ घणो राजी वेवे हे। अस्यानीस मारो आणन्द पूरो व्यो हे।</verse>
				<verse number="30">अबे अस्यान वेवे के, मनकाँ में मारो मान घटे अन ईसू को वदे।</verse>
				<verse number="31">“ज्यो ऊपरेऊँ आवे हे वो हाराऊँ मोटो हे। ज्यो धरतीऊँ आवे हे वो धरती को हे अन वो धरती किइस बाताँ करे हे। ज्यो हरगऊँ आवे हे, वो हाराई का ऊपरे हे।</verse>
				<verse number="32">ज्यो कई वणी देक्यो अन हुण्यो हे, वींका बारा में बतावे हे, पण कुई भी मनक वींकी ने माने हे।</verse>
				<verse number="33">जणी भी वाँकी बात मान लिदी, वणी वाँकी बात ने मान लिदी हे के, परमेसर हाँचो हे।</verse>
				<verse number="34">काँके जिंने परमेसर खन्दायो हे, वो परमेसर की बाताँ केवे हे, काँके परमेसर वींने आपणी आत्माऊँ भरपूर किदो हे।</verse>
				<verse number="35">परमेसर आपणाँ बेटाऊँ लाड़ राके हे, अन वणा हारी चिजाँ वींका हात में हूँपी हे।</verse>
				<verse number="36">ज्यो बेटा ऊपरे विस्वास करे हे, वो अनंत जीवन पावे हे, पण ज्यो बेटा की ने माने हे, वो जीवन ने कोयने पावे, पण वींपे परमेसर को कोप वेतो रेवे हे।”</verse>
			</chapter>
			<chapter number="4">
				<verse number="1">फरीसी मनकाँ हुण्यो हे के, ईसू यहुन्नाऊँ हेला चेला बणारियो हे अन वाँने बतिस्मो देवे हे,</verse>
				<verse number="2">पण ईसू खुद ओ बतिस्मा को काम ने करता हा, पण वींका चेला ओ काम कररिया हा।</verse>
				<verse number="3">जद्याँ ईसू ने ओ पतो पड़्यो के, फरीसी यो हुण्यो, तो वीं यहूदियाँ परदेस ने छोड़न पाच्छा गलील परदेस का आड़ी पराग्या।</verse>
				<verse number="4">अणी टेम वींने सामरिया परदेस वेन जाणो पड़्यो।</verse>
				<verse number="5">ईं वाते वीं सामरिया परदेस के सुखार नगर में आया, यो नगर वीं जगाँ का नके हो, जिंने बड़ाबा याकूब आपणाँ बेटा युसुप ने दिदी ही।</verse>
				<verse number="6">बड़ाबा याकूब को कूड़ो भी वटेईस हो। ईं वाते ईसू गेलाऊँ थाक्या तका वीं कूण्ड़ा पे रईम्बो लिदो, अन या बात दपराँ की टेम वीं।</verse>
				<verse number="7">अतराक में एक सामरी लुगई पाणी लेबा ने अई, तो ईसू वणीऊँ क्यो, “मने पाणी पई दे।”</verse>
				<verse number="8">वीं दाण वींका चेला तो नगर में खाणो मोल लेबा ने ग्या तका हा।</verse>
				<verse number="9">वणा दनाँ में यहूदी सामरिया मनकाऊँ कई वेवार ने राकता हा। ईं वाते वणी सामरी लुगई वाँकाऊँ क्यो, “थूँ यहूदी वेन एक सामरी लुगईऊँ पाणी काँ मांगे हे?”</verse>
				<verse number="10">ईसू वींने जवाब दिदो, “यद्याँ थूँ परमेसर का दान ने जाणती, अन ओ भी जाणती वो कुई हे, ज्यो थाँराऊँ केवे हे, ‘मने पाणी पा’, तो थूँ वणीऊँ मांगती अन वो थने जीवन को जळ देतो।”</verse>
				<verse number="11">वणी लुगई वाँकाऊँ क्यो, “हो हुकम, थाँके नके पाणी भरबा को तो कई ने हे अन कूड़ो भी ऊण्डो हे, तो वो जीवन को जळ थाँरा नके कटेऊँ आयो?</verse>
				<verse number="12">कई थूँ माकाँ बड़ाबा याकूबऊँ मोटो हे, जणी माने ओ कूड़ो दिदो अन वणी खुद अन वींकी ओलाद अन वींका ढान्ढा-ढोर के हाते अटेऊँ पाणी पिदो?”</verse>
				<verse number="13">ईसू वींने जवाब दिदो के, “ज्यो कुई अटूँ पाणी पीई वींने पाच्छी तर लागी,</verse>
				<verse number="14">पण ज्यो कुई वो पाणी पीई ज्यो मूँ वाँने देऊँ, वाँने पाच्छी कदी तर ने लागे। पण ज्यो पाणी मूँ वाँने देवूँ, वो वींमें अनंत जीवन देबावाळी नंदी बण जाई।”</verse>
				<verse number="15">वणी लुगई वाँकाऊँ क्यो, “हो मालिक, वो पाणी मने दे, ताँके मूँ पाच्छी तरी ने वूँ अन नेई मने पाणी लेबा ने अतरी छेटी आणो पड़े।”</verse>
				<verse number="16">ईसू वींने क्यो, “जा, आपणाँ घरधणी ने अटे बला ला।”</verse>
				<verse number="17">वीं लुगई जवाब दिदो, “मूँ बना धणी की हूँ।” ईसू वींने क्यो, “थूँ सई केवे हे के, थूँ बना धणी की हे।</verse>
				<verse number="18">काँके थूँ पाँच धणी कर चुकी हे, अन जिंका नके थूँ अबाणू हे, वो भी थारो धणी ने हे। ईं वाते थें क्यो वो सई हे।”</verse>
				<verse number="19">वीं लुगई क्यो, “हो मारा मालिक मने पतो पड़रियो हे के, थूँ परमेसर का आड़ीऊँ बोलबावाळो हे।</verse>
				<verse number="20">माकाँ बड़ाबा ईं मंगरा का ऊपरे आरादना करता हा अन थाँ यहूदी केवो हो के, यरूसलेमईस आरादना करबा की जगाँ हे।”</verse>
				<verse number="21">ईसू वींने क्यो, “हे लुगई, मारी बात पे विस्वास कर के, वाँ टेम आरी हे के, थाँ मनक ने तो ईं मंगरा पे बापू परमेसर की आरादना करो अन नेई यरूसलेम में।</verse>
				<verse number="22">थाँ सामरी मनक यो ने जाणो हो के, थाँ किंकी आरादना करो हो, पण माँ यहूदी मनक जाणा हा के, माँ किंकी आरादना कराँ हा, काँके यहूदियाँ मेंऊँस उदार आवे हे।</verse>
				<verse number="23">पण वाँ टेम आरी हे, अन अबाणू भी हे जद्याँ पुवितर आत्मा की तागतऊँ मनक परमेसर की हाँची आरादना करी, जस्यी परमेसर छावे हे।</verse>
				<verse number="24">परमेसर आत्मा हे, अन ओ जरूरी हे के, वींकी आरादना आत्मा अन हाँचऊँ करणी छावे।”</verse>
				<verse number="25">वणी सामरी लुगई क्यो, “मूँ जाणूँ हूँ के, मसी जिंको मतलब चुण्यो तको हे, वो आबावाळो हे, जद्याँ वो आई, तो आपाँने हारी बाताँ बता देई।”</verse>
				<verse number="26">ईसू वींने क्यो, “मूँ ज्यो थाँराऊँ बाताँ कररियो हूँ, मूँ वोईस हूँ।”</verse>
				<verse number="27">अतराक में वींका चेला भी आग्या अन अचम्बो करबा लागा के, वो लुगईऊँ बाताँ कररियो हे। तद्याँ भी कणी भी वणी लुगईऊँ ने पूँछ्यो के, “थूँ कई छावे हे?” अन नेई ईसुऊँ के, “थूँ कणी वाते वणीऊँ बात कररिया हो।”</verse>
				<verse number="28">तद्याँ वाँ लुगई आपणी पाणी भरबा की वेली वटेई छोड़न नगर में परीगी अन लोगाऊँ केबा लागी,</verse>
				<verse number="29">“आवो, एक मनक ने देको, जणी हारोई बता दिदो, ज्यो कई में किदो। कई ओईस मसी तो ने हे?”</verse>
				<verse number="30">ईं वाते मनक नगरऊँ निकळन ईसू का नके आबा लागा।</verse>
				<verse number="31">वीं दाण चेला ईसुऊँ अरज करबा लागा, “हो गरुजी, कई खई लो।”</verse>
				<verse number="32">पण ईसू वाँकाऊँ क्यो, “मारा नके खाबा के वाते अस्यो खाणो हे जिंने थाँ ने जाणो हो।”</verse>
				<verse number="33">तद्याँ चेला एक-दूजाऊँ क्यो, “कुई ईंका वाते खाणो तो ने लायो?”</verse>
				<verse number="34">ईसू वाँने क्यो, “मारो खाणो ओ हे के, मूँ मने खन्दाबावाळा की मरजी पे चालूँ अन वींको काम पूरो करूँ, ज्यो वणी मने हुप्यो हे।</verse>
				<verse number="35">कई थाँ ने केवो के, ‘हाक काटबा में अबाणू भी च्यार मिना पड़्या तका हे’? देको, मूँ थाँकाऊँ केवे हूँ, आपणी आक्याँऊँ खेता ने देको, वीं हाक काटबा के वाते त्यार वेग्या हे।</verse>
				<verse number="36">अन हाक काटबावाळा दानक्याँ दानकी पावे अन अनंत जीवन का वाते हाक ने भेळी करे हे, ताँके बोवावाळा अन काटबावाळा दुई मलन आणन्द मनावे।</verse>
				<verse number="37">काँके ईंपे आ कावत ठीक बेटे हे के, ‘वावे कुई ओर अन काटे कुई ओर हे।’</verse>
				<verse number="38">में थाँने वो खेत काटबा के वाते खन्दाया, जिंमें थें काम ने किदो। वींमें दूजाँ मेनत किदी अन अबे थाँ वाँकी मेनत का काम का फळ में भी भागी बणग्या हो।”</verse>
				<verse number="39">वणी सामरी लुगई की गवई की वजेऊँ घणा सामरी मनकाँ ईसू पे विस्वास किदो। काँके वणी लुगई गवई में क्यो हो के, “में ज्यो कई किदो हो, वो हाराई वणा बता दिदो।”</verse>
				<verse number="40">जद्याँ वीं सामरी लोग-बाग वाँका नके आया अन अरज करबा लागा के, “माकाँ अटे रेवो।” ईं वाते ईसू वटे दो दन तईं रियो।</verse>
				<verse number="41">ईसू का बचनाँ ने हुणन दूजाँ ओरी नरई सामरी मनकाँ भी वाँका पे विस्वास किदो।</verse>
				<verse number="42">वणा मनकाँ वीं लुगईऊँ क्यो, “अबे थाँरे केबाऊँईस विस्वास ने करा हा, पण माँ खुद ईंने हुणन जाणग्या हाँ के, योईस हाँची में ईं दनियाँ ने बंचाबावाळो हे।”</verse>
				<verse number="43">पछे ईसू वटे दो दन रिया अन पछे वटूँ गलील परदेस में पराग्या।</verse>
				<verse number="44">काँके ईसू खुदई क्यो हो के, कुई परमेसर का आड़ीऊँ बोलबावाळा आपणाँ खुद का देस में आदर-मान ने पावे हे।</verse>
				<verse number="45">जद्याँ वो गलील में आयो, तो गलील का लोग-बाग वींकी आवभगत किदी। काँके वणा वींका कामाँ ने देक्याँ हा, जद्याँ वणा यरूसलेम में फसे के तेवार पे किदा हा। काँके वीं दाण ईं मनक भी वटे तेवार में ग्या तका हा।</verse>
				<verse number="46">ईंका केड़े पाछो वो गलील का काना नगर में ग्यो जटे वणी पाणी को अंगूरा को रस बणायो हो। अन वटे एक कफरनूम नगर का राजा को अदिकारी हो, जिंको छोरो मांदो हो।</verse>
				<verse number="47">जद्याँ वणी अदिकारी यो हुण्यो के, ईसू यहूदियाँ परदेसऊँ गलील परदेस में आग्या हे, तो वो वाँके नके ग्यो अन वाँकाऊँ अरज करबा लागो के, “चालो, अन मारा छोरा ने हव कर दो, काँके वो मरबा में हे।”</verse>
				<verse number="48">ईसू वीं अदिकारी ने क्यो, “जद्याँ तईं थाँ हेन्याण अन अचम्बा का कामाँ ने ने देको तद्याँ तईं थाँ विस्वास ने करो।”</verse>
				<verse number="49">अदिकारी ईसुऊँ क्यो, “हे मालिक, मारा छोरा की मोत वेबाऊँ पेल्या परा चालो।”</verse>
				<verse number="50">ईसू वींने क्यो, “जा, थाँरा छोरा को बाल ईं वाँको ने वेई।” वणी ईसू की बात पे विस्वास किदो अन परोग्यो।</verse>
				<verse number="51">अन जद्याँ वो अदिकारी गेला मेंईस हो के, वींका नोकर वींके नके आग्या अन केबा लागो के, “थारो छोरो हव वेग्यो हे।”</verse>
				<verse number="52">वणी वाँकाऊँ पूँछ्यो, “छोरो कणीक दाण हव व्यो?” वाँकाणी क्यो, “काले दपराँ की टेम का लगे-भगे वींको ताव उतरग्यो हो।”</verse>
				<verse number="53">तद्याँ वीं छोरा को बाप जाणग्यो के, ओ वीं टेम व्यो जणी टेम ईसू वणीऊँ क्यो के, “जा थाँ छोरा को बाल ईं वाँको ने वेई।” ईं वाते वणी अन वींका हाराई परवारवाळा ईसू पे विस्वास किदो।</verse>
				<verse number="54">यो दूज्यो परच्यो हो ज्यो ईसू यहूदियाँ परदेसऊँ गलील परदेस में आन दिदो।</verse>
			</chapter>
			<chapter number="5">
				<verse number="1">अणा हारी बाताँ का पछे यहूदी लोग-बागाँ का एक धारमिक तेवार में ईसू यरूसलेम ग्या।</verse>
				<verse number="2">यरूसलेम में भेड़ फाटक के नके एक कुण्ड हो, जिंने इबरानी भासा में “बेतसेदा” केता हो अन वींके च्यारूँमेर पाँच टापरियाँ बणी तकी ही।</verse>
				<verse number="3">जणामें नरई माँदा मनक ज्यामें आन्दा, लंगड़ा अन लकवा मारिया तका मनक पड़्या रेता हा।</verse>
				<verse number="4"></verse>
				<verse number="5">वटे एक मनक हो, ज्यो अड़तीस वराऊँ मांदो हो, वो वटेईस पड़्यो तको हो।</verse>
				<verse number="6">ईसू वींने वटे पड़्या तको देकन अन ओ जाणन के, वो घणा दनाऊँ अणी दसा में हे। तो ईसू वींने क्यो, “कई थूँ हव वेणो छावे हे?”</verse>
				<verse number="7">वीं मांदे मनक वाँने जवाब दिदो के, “हो हुकम, मारा नके कुई मनक ने हे के, जद्याँ पाणी हलायो जावे, तो मने कुण्ड में उतारे, पण मारे उतरता-उतरता दूजाँ माराऊँ पेल्या उतर जावे हे।”</verse>
				<verse number="8">ईसू वींने क्यो, “उठ, आपणो माचो उठा अन चाल-फर।”</verse>
				<verse number="9">अन वो मनक तरत हव वेग्यो, अन आपणो कुतल्यो उठान चालबा-फरबा लागो। यो दन सबत को दन हो।</verse>
				<verse number="10">ईं वाते यहूदी अदिकारी मनकाँ ज्यो मांदकीऊँ हव किदो ग्यो हो। वींने केबा लागा के, “थाँरो कुतल्यो उठाणो ठीक ने हे, यो आपणाँ नेमा का खिलाप हे, काँके आज सबत को दन हे।”</verse>
				<verse number="11">ईंपे वणी वाँने जवाब दिदो के, “जणी मने हव किदो, वणी मने क्यो, ‘आपणो वसाणो उठा अन चाल-फर।’”</verse>
				<verse number="12">तो मनकाँ वींने पूँछ्यो, “वो कूण मनक हे जणी थने क्यो, ‘वसाणो उठान चाल-फर’?”</verse>
				<verse number="13">पण वो ज्यो हव वेग्यो हो, वो ने जाणतो हो के, “वो कूण हे।” काँके वणी जगाँ नरई भीड़ वेबाऊँ ईसू पराग्या हा।</verse>
				<verse number="14">अणा हारी बाताँ के पछे वो मनक ईसू ने मन्दर में मल्यो, जद्याँ ईसू वींने क्यो, “देक, अबे थूँ हव वेग्यो हे, अबे पाछो थूँ पाप मती करज्ये, अस्यान ने वे कुई मोटी आपत थारे गळा में पड़ जावे।”</verse>
				<verse number="15">पछे वो मनक परोग्यो अन जान यहूदी अदिकारी मनकाऊँ के दिदो के, “जणी मने हव किदो हे, वो ईसू हे।”</verse>
				<verse number="16">ईं वाते यहूदी मनक वाँने हताबा लागा, काँके ईसू यो काम आराम का दन में किदो हो।</verse>
				<verse number="17">ईं वाते ईसू वाँकाऊँ क्यो के, “मारो बाप कदी भी काम करतो तको ने रके हे, ईं वाते मूँ भी काम करतो रूँ हूँ।”</verse>
				<verse number="18">या बात यहूदी अदिकारियाँ ने घणी अकरगी अन वीं ईसू ने मारबा का ओरी हेला मोका होदबा लागा। काँके ईसू बेस सबद का नेम नेईस ने तोड़्यो, पण परमेसर ने आपणो बाप बतान खुद ने परमेसर का बराबर कर दिदो।</verse>
				<verse number="19">ईं बात पे ईसू वाँने क्यो, “मूँ थाँने सई–सई केवूँ हूँ, मूँ, बेटो, खुद कई ने कर सके हे, मूँ बेस वोईस करूँ हे, ज्यो बापू परमेसर ने करता तका देकूँ हे। काँके परमेसर ज्यो कई करे हे। मूँ भी वस्यानीस करूँ हूँ।</verse>
				<verse number="20">काँके परमेसर माराऊँ लाड़ राके हे अन ज्यो ज्यो काम वो खुद करे हे, वीं हाराई मने बतावे हे अन वो अणीऊँ भी मोटा-मोटा ने मने करबा का वाते देई। तद्याँ थाँ देकन अचम्बो करो।</verse>
				<verse number="21">जस्यान परमेसर मरिया तका ने उठान जिवावे हे, वस्यानीस मूँ बेटो भी ज्याँने छाऊँ हे, वाँने जीवावूँ हूँ।</verse>
				<verse number="22">अन परमेसर किंको भी न्याव ने करे हे, पण न्याव करबा को हारोई काम मने हूँप दिदो हे।</verse>
				<verse number="23">ईं वाते हाराई लोग-बाग जस्यान परमेसर को आदर-मान करे हे वस्यानीस मारो भी आदर-मान केरी। ज्यो मारो आदर-मान ने करे हे, वीं वणा परमेसर को भी आदर-मान ने करी, जणा मने खन्दायो हे।</verse>
				<verse number="24">“मूँ थाँने सई-सई केवूँ हूँ, ज्यो मारा बचनाँ ने हुणन मारा खन्दाबावाळा को विस्वास करे हे, वो अनंत जीवन पावे हे। अन वाँने दण्ड ने दिदो जाई, पण वीं मोतऊँ छेटी वेन जीवन में परवेस करग्या हे।</verse>
				<verse number="25">मूँ थाँकाऊँ सई-सई केवूँ हूँ, वो टेम आरियो हे, अन अबाणू भी हे, जीं मरिया तका हा, वीं परमेसर का बेटा का बचन हूणी अन ज्यो हूणी, वीं जीवता वे जाई।</verse>
				<verse number="26">काँके जस्यान बापू परमेसर आपणाँ खुद में जीवन राक मेल्यो हे, वस्यानीस वणा मने ओ हक दिदो हे के, मूँ भी आपणाँ खुद में जीवन राकूँ।</verse>
				<verse number="27">पण मने न्याव करबा को भी हक दिदो ग्यो हे काँके मूँ, मनक को पूत हूँ।</verse>
				<verse number="28">“ईंपे थाँ अचम्बो मती करो, काँके वाँ टेम आरी हे के, ज्यो भी कबराँ में हे, वीं मारा बचन हूणी,</verse>
				<verse number="29">अन कबराऊँ बारणे आ जाई। जणा भलई किदी हे वीं जीवन का वाते मरिया तकाऊँ पाच्छा जीवता वे जाई। जणा बुरई किदी हे, वीं दण्ड पाबा का वाते जीवता वे जाई।</verse>
				<verse number="30">“मूँ आपणाँ खुद का हकऊँ कई भी ने कर सकूँ हूँ, ज्यो परमेसरऊँ हूणूँ हूँ, वींके जस्यानीस न्याव करूँ हूँ। अन मारो न्याव हाँचो हे, काँके मूँ मारी मरजी ने कोयने, पण मारा खन्दाबावाळा की मरजी ने पुरी करूँ हूँ।</verse>
				<verse number="31">“यद्याँ मूँ खुद मारी गवई दूँ, तो वाँ मानबा जोगी ने वेई।</verse>
				<verse number="32">मूँ ने पण कुई ओरी हे ज्यो मारी गवई देवे हे अन मूँ जाणूँ हूँ के, ज्याँ वो गवई देवे हे, वाँ हाँची हे।</verse>
				<verse number="33">थाँ आपणाँ मनकाँ ने यहुन्ना का नके पूछबा का वाते खन्दाया हा, तद्याँ वणी हाँच की गवई दिदी।</verse>
				<verse number="34">में या बात ईं वाते ने क्यो के, मनक बारा में गवई देवे, पण ईं वाते क्यो, ताँके थाँ बंचाया जावो।</verse>
				<verse number="35">यहुन्नो तो वीं दिवा का जस्यान हो ज्यो बळतो अन उजितो देतो रेवे हे अन थाँ वींका उजिता को थोड़ाक टेम तईं मजो लेणा छावता हा।</verse>
				<verse number="36">पण मारा नके एक ओरी गवा हे जिंकी गवई यहुन्ना की गवईऊँ मोटी हे काँके परमेसर ज्यो काम पूरो करबा के वाते मने हुप्यो हे, मूँ वाँका काम ने कररियो हूँ अन वीं कामइस मारी गवई हे के, परमेसर मने खन्दायो हे।</verse>
				<verse number="37">परमेसर जणा मने खन्दायो हे, वीं भी मारी गवई देवे हे। थाँकाणी वाँकी वाणी कदी भी ने हूणी अन ने थाँ वींने देक्यो हे।</verse>
				<verse number="38">अन नेई खुद का मन में वाँका बचन राको हो, काँके थाँ वींपे विस्वास ने करो हो, जिंने परमेसर खन्दायो हे।</verse>
				<verse number="39">थाँ सास्तरा की किताब में होदो हो, काँके थाँ हमज्यो हो के, थाँने वींमें अनंत जीवन मले हे। पण ईं हाराई सास्तर भी मारी गवई देवे हे।</verse>
				<verse number="40">पछे भी थाँ अनंत जीवन पाबा का वाते मारा नके ने आणा छावो हो।</verse>
				<verse number="41">“मूँ मनकाँ का मुण्डाऊँ किदी तकी बड़ई ने छावूँ हूँ।</verse>
				<verse number="42">काँके मूँ थाँने ओळकूँ हूँ के, थाँ कणी तरिया का मनक हो। थाँकामें परमेसर को परेम कोयने हे।</verse>
				<verse number="43">मूँ मारा बापू परमेसर का हकऊँ आयो हूँ, तद्याँ भी थाँ मने ने मानो हो। पण यद्याँ कुई दूजो आपणाँ खुद का नामऊँ आवे, तो थाँ वींने मान लेवो हो।</verse>
				<verse number="44">थाँ ज्यो एक-दूजाऊँ मान छावो हो अन वो मानज्यो खाली परमेसर का आड़ीऊँ मले हे, वींकी थाँने कई परवा ने हे। तो थाँ मारा पे कस्यान विस्वास कर सको हो?</verse>
				<verse number="45">यो मती हमज्यो के, मूँ मारा बापू परमेसर का हामे थाँका ऊपरे दोस लगाऊँ। थाँका पे दोस लगाबावाळो तो मूसो हे, जिंपे थाँ आस लगा मेली ही।</verse>
				<verse number="46">यद्याँ थाँ हाँची में मूसा को विस्वास करता, तो मारो भी विस्वास करता, काँके वणी मारा बारा मेंईस लिक्यो हे।</verse>
				<verse number="47">पण यद्याँ थाँ वणी ज्यो लिक्यो हे वींपे भी विस्वास ने करो हो तो पछे मारी बाताँ पे कस्यान विस्वास करो?”</verse>
			</chapter>
			<chapter number="6">
				<verse number="1">ईंका केड़े ईसू गलील समन्द के पेली पार ग्या, जिंने तिबिरियस समन्द भी केता हा।</verse>
				<verse number="2">अन एक मोटी भीड़ वाँका पाच्छे वेगी, काँके ज्यो परच्या का काम वीं माँदा मनकाँ पे बतातो हो, वी वाँने देकता हा।</verse>
				<verse number="3">तद्याँ ईसू मंगरा पे चढन आपणाँ चेला के हाते बेटग्या।</verse>
				<verse number="4">यहूदी लोगाँ को फसे को तेवार नके हो।</verse>
				<verse number="5">जद्याँ ईसू अटने वटने देक्यो के, एक मोटी भीड़ वाँका नके अईरी हे, तो वणा फिल्‍लीपुसऊँ पूँछ्यो, “ईं हारई लोगाँ के खाबा का वाते रोट्याँ कटाऊँ मोल ला सका हा?”</verse>
				<verse number="6">ईसू या बात फिलिपुस ने परकबा के वाते पूछी ही, काँके ईसू तो खुद पेल्याऊँ जाणता हा के, “कई करणो हे।”</verse>
				<verse number="7">फिलिपुस वींने जवाब दिदो, “दो सो चाँदी का सिक्का की रोट्याँ लान थोड़ी थोड़ी हाराई ने देवाँ, तद्याँ भी वीं कम पड़ जाई।”</verse>
				<verse number="8">ईसू का चेला मूँ एक दूजे चेले अन्दरियास, ज्यो समोन पतरस को भई हो, वणी क्यो,</verse>
				<verse number="9">“अटे एक छोरा के नके पाँच जो की रोट्याँ अन दो माछळ्याँ हे, पण अतरा लोगाँ में अणाऊँ कई वेई?”</verse>
				<verse number="10">ईसू जवाब दिदो, “लोगाँ ने बेवाड़ी दो।” वाँ जगाँ घणी चुंटी हो। वटे मनक मनकईस लगे-भगे पाँचेक हजार हा। वीं वटे बेटग्या।</verse>
				<verse number="11">तद्याँ ईसू रोट्याँ लिदी अन परमेसर ने धन्नेवाद देन बेठबावाला ने जतरी वीं छावता हा, वतरी बाट दिदी अन वस्यानीस वणा माछळ्याँ भी जतरी छावता हा, बांट दिदी।</verse>
				<verse number="12">जद्याँ वीं खान धापग्या तो ईसू आपणाँ चेलाऊँ क्यो, “परोस्या केड़े बंची तकी रोट्याँ भेळी करो, जणीऊँ एक भी रोटी बेकार ने वेवे।”</verse>
				<verse number="13">पछे चेला मनकाँ में जो की पाँच रोट्याँ के परोसबा का केड़े बंचगी ही वणाऊँ बारा ठोपला भरिया।</verse>
				<verse number="14">तद्याँ ज्यो परच्यो ईंस बतायो वींने वीं लोग देकन केबा लागा के, “ईं दनियाँ में ज्यो परमेसर का आड़ीऊँ बोलबावाळो आबावाळो हे। हाँची में यो वोईस हे।”</verse>
				<verse number="15">ईसू यो जाणन के, “वी लोग मने जबरदस्ती पकड़न राजा बणबा के वाते आरिया हे।” तो वीं एकलाई मंगरा पे परोग्या।</verse>
				<verse number="16">जद्याँ हाँज हुई तो वाँका चेला समन्द का कनारे ग्या।</verse>
				<verse number="17">अन अंदारो घणो वेग्यो हो, पण ईसू वाँके नके आलतरे ने आया हा, तो नाव में बेटन समन्द के पेली पार कफरनूम का आड़ी चाल पड़्या।</verse>
				<verse number="18">अन डूँज के मस समन्द को पाणी ज्योर-ज्योरऊँ हिळोळा मारबा लागो।</verse>
				<verse number="19">जद्याँ वीं नावऊँ दो-तीन कोस का लगे-भगे जातारिया, तो वणा ईसू ने समन्द का पाणी पे चालता तका आपणी आड़ी आता देक्या तो, वीं ओरू भी घणा दरपग्या।</verse>
				<verse number="20">पण ईसू वाँने क्यो, “यो तो मूँ हूँ, दरपो मती।”</verse>
				<verse number="21">ईं वाते वणा ईसू ने राजी मनऊँ नाव में चढा लिदा। अन तरत वाँ नाव वी जगाँ पोंछगी, जटे वीं जारिया हा।</verse>
				<verse number="22">आगले दन लोग-बागाँ की भीड़, ज्या समन्द के पेली पार रेगी ही, वाँने यो पतो पड़्यो के, वटे एकीस नाव ही अन ईसू आपणाँ चेला का हाते वींमें ने ग्या हा।</verse>
				<verse number="23">तद्याँ कुई नावाँ तिबिरियस नगरऊँ वीं जगाँ अई, जटे वणा परबू ने धन्नेवाद देयाँ केड़े रोट्याँ खादी ही।</verse>
				<verse number="24">जद्याँ लोग-बागाँ की भीड़ देक्यो के, अटे ने तो ईसू हे अन नेई वींका चेला हे, तो वीं नावाँ में बेटन ईसू ने होदता तका कफरनूम आग्या।</verse>
				<verse number="25">जद्याँ समन्द का पेली पार जान मनकाँ ईसुऊँ मलन क्यो, “हो गरुजी, थाँ अटे कदी आया?”</verse>
				<verse number="26">ईसू वाँने जवाब दिदो, “मूँ थाँकाऊँ सई-सई केवूँ हूँ, थाँ मने ईं वाते ने होदो हो के, थाँ मोटा-मोटा परच्या देक्या, पण ईं वाते के, थाँने भरपेट रोट्याँ खवाड़ी ही।</verse>
				<verse number="27">वीं खाणा वाते मेनत मती करो, ज्यो वासी जावे हे। पण वीं खाणा का वाते मेनत करो, ज्यो अनंत जीवन का वाते हे। अन यो खाणो मनक को पूत थाँने देई, काँके परमेसर वींने यो अदिकार दिदो हे।”</verse>
				<verse number="28">वणा मनकाँ ईसुऊँ क्यो, “परमेसर जणा कामाँ ने छावे हे, वाँने करबा का वाते माँ कई करा?”</verse>
				<verse number="29">ईसू वाँने जबाव दिदो, “परमेसर ज्यो छावे हे, वो यो हे के, जिंने वणी खन्दायो हे, वींपे विस्वास करो।”</verse>
				<verse number="30">तद्याँ वणा वींकाऊँ पूँछ्यो, “पछे थूँ कस्यो परच्यो बताई, जिंने देकन माँ थाँरा पे विस्वास करा? थूँ कई कर सके हे?</verse>
				<verse number="31">माकाँ बडाबा हुन्ना काकड़ में मन्ना खादो हो। जस्यान पवितर सास्तर में बतायो ग्यो हे के, ‘परमेसर वाँने खाबा के वाते, हरगऊँ रोट्याँ दिदी ही।’ ”</verse>
				<verse number="32">ईंपे ईसू वाँने क्यो, “मूँ थाँने हाँची बताऊँ हूँ वो मूसो ने हो जणी थाँने खाबा का वाते हरगऊँ रोट्याँ दिदी ही। पण वीं मारा बापू परमेसर हे, जीं थाँने हरगऊँ हाँची रोट्याँ देवे हे।</verse>
				<verse number="33">वीं रोट्याँ ज्याँने परमेसर देवे हे वीं हरगऊँ उतरे हे अन दनियाँ का मनकाँने जीवन देवे हे।”</verse>
				<verse number="34">लोग-बागाँ वणाऊँ क्यो, “हो मालिक, अबे माने वाँ रोटी दो अन हमेस्या देतो रेज्यो।”</verse>
				<verse number="35">तद्याँ ईसू वाकाँऊँ क्यो, “जीवन की रोटी मूँ हूँ। ज्यो मारा नके आवे हे वो कदी भुको ने रेई, अन ज्यो मारा पे विस्वास करे हे, वो कदी तरियो ने रेई।</verse>
				<verse number="36">पण में थाँने पेल्याई क्यो हे के, थाँ मने देक लिदो हे, पछे भी थाँ मारा पे विस्वास ने करो हो।</verse>
				<verse number="37">ज्याँने भी परमेसर मने हुप्याँ हे वीं हाराई मारा नके आई अन ज्यो कुई मारा नके आई, वणाऊँ मूँ कदी भी मुण्डो ने फेरूँ।</verse>
				<verse number="38">काँके मूँ आपणी मरजी ने, पण वींकी मरजी ने पुरी करबा ने आयो हूँ, जणी मने हरगऊँ खन्दायो हे।</verse>
				<verse number="39">अन मने खन्दाबावाळा की याईस मरजी हे के, ज्याँने परमेसर मने हुप्याँ हे, वाँका मूँ किंको भी नास ने वेबा दूँ अन अन्त का दन में हाराई ने जीवता कर देऊँ।</verse>
				<verse number="40">काँके याईस मारा बाप की मरजी हे के, ज्यो कुई बेटा ने देके, अन वींपे विस्वास करे, वीं अनंत जीवन पावे। अन मूँ खुद वाँने अन्त का दन में पाछो जीवाई देऊँ।”</verse>
				<verse number="41">अणा बाताँऊँ यहूदी मनक ईसू पे बक-बक करबा लागा, काँके वो केतो हो के, “वाँ रोटी मूँ हूँ ज्या हरगऊँ उतरी हे।”</verse>
				<verse number="42">अन वणा क्यो, “कई यो युसुप को बेटो ईसू ने हे, कई आपाँ ईंका बई-बापूने ने ओळका हा। पछे यो कस्यान के सके हे के, ‘यो हरगऊँ उतरियो हे’?”</verse>
				<verse number="43">ईसू वाँने जवाब दिदो, “एक-दूजाऊँ बक-बक मती करो।</verse>
				<verse number="44">कुई भी मारा नके ने आ सके हे, जद्याँ तईं मने खन्दाबावाळा परमेसर वींने मारा ओड़ी बला ने ले, अन मूँ वाँने अन्त का दन में पाच्छा जिवई देऊँ।</verse>
				<verse number="45">परमेसर का आड़ीऊँ बोलबावाळा आपणाँ लेक में यो लिक्यो हे के, ‘वीं हाराई परमेसर का आड़ीऊँ हिकाया तका वेई।’ ज्यो कूण बापऊँ हुणे अन हिके हे, वीं मारा नके आवे हे।</verse>
				<verse number="46">ओ ने के कणी परमेसर ने देक्या। पण मूँ ज्यो परमेसर का आड़ीऊँ हे, बेस मेंईस वींने देक्यो हे।</verse>
				<verse number="47">मूँ थाँने सई-सई केवूँ हूँ के, ज्यो कुई मारा पे विस्वास करे हे, अनंत जीवन वाँकोइस हे।</verse>
				<verse number="48">मूँ जीवन की रोटी हूँ, ज्या अनंत जीवन देवे हे।</verse>
				<verse number="49">थाँका बड़ाबा हुन्ना कांकड़ में मन्नो खादो हो, तद्याँ भी वीं मरग्या।</verse>
				<verse number="50">पण ज्यो कुई हरगऊँ उतरी तकी ईं रोटी ने खाई, वो कदी भी ने मरी।</verse>
				<verse number="51">जीवन की रोटी जा हरगऊँ उतरी हे वाँ मूँईस हूँ। यद्याँ कुई अणी रोटी ने खाई, तो वीं हमेस्यान जीवता रेई अन ज्या रोटी मूँ दनियाँ का जीवन का वाते देवूँ, वाँ मारी देह हे। अणीऊँस दनियाँ का मनक जीवता रेवे हे।”</verse>
				<verse number="52">ईंपे यहूदी लोग-बागाँ यो केन एक-दूजाऊँ बेस करबा लागा के, “ओ मनक कस्यान आपणी खुद की देह खाबा ने दे सके हे?”</verse>
				<verse number="53">ईसू वाँने क्यो, “मूँ थाँकाऊँ हाँची केवूँ हूँ जद्याँ तईं मनक का पूत की देह ने ने खावो, अन वींको लुई ने पिवो, तद्याँ तईं थाँकामें जीवन भी ने वेई।</verse>
				<verse number="54">ज्यो मारी देह खावे हे अन लुई पिवे हे, अनंत जीवन वींकोइस हे, अन मूँ आकरी का दन में वींने पाछो जीवतो कर देऊँ।</verse>
				<verse number="55">काँके मारी देह हाँचो खाणो हे अन मारो लुई हाँची पिबा की चीज हे।</verse>
				<verse number="56">ज्यो मारी देह खावे अन लुई पीई हे, वीं मारा में बण्या तका रेई अन मूँ वाँका में बण्यो तको रेऊँ।</verse>
				<verse number="57">जस्यान मने जीवता बापू खन्दायो अन मूँ मारा बापू का कारण जीवतो हूँ वस्यानीस वीं भी ज्यो मने खाई मारा कारण जीवता रेई।</verse>
				<verse number="58">या हरगऊँ उतरी तकी रोटी हे, आ वणी मन्ना का जस्यान ने हे, जिंने आपणाँ बड़ाबा खादो, तद्याँ भी वीं मरग्या। पण ज्यो कुई या रोटी खाई, वीं हमेस्यान जीवता रेई।”</verse>
				<verse number="59">ईं हारी बाताँ ईसू कफरनूम नगर का एक परातना घर में किदी ही।</verse>
				<verse number="60">ईसू पे विस्वास करबावाळा मूँ घणा जणा यो हुणन क्यो के, “या हिक घणी अबकी हे। ईंने कूण मान सके?”</verse>
				<verse number="61">ईसू ने आपणाँ मन में पतो पड़ग्यो के, मारा पे विस्वास करबावाळा ने ईं बात को ओळमो हे। तद्याँ ईसू वाँने क्यो, “कई या हिक थाँने बुरी लागी हे?</verse>
				<verse number="62">अन यद्याँ थाँ मनक का पूत ने जटे वो पेल्याँ हो, वीं जगाँ पाछो ऊपरे हरग में जाता तको देको, तो कई करो?</verse>
				<verse number="63">परमेसर की आत्मा तो जीवन देबावाळी हे, पण मनकाँ की तागतऊँ कई फायदो ने हे। जीं बचन में थाँकाऊँ क्या हे, वीं आत्मिक जीवन देवे हे।</verse>
				<verse number="64">पण थाँकामें नरई अस्या हे जीं विस्वास ने करे।” काँके ईसू पेल्याऊँ ओ जाणतो हो के, वीं कुई हे, ज्यो विस्वास ने करी। अन वो कुई हे ज्यो वींने धोकाऊँ पकड़वाई।</verse>
				<verse number="65">अन ईसू क्यो, “ईं वाते में थाँने क्यो हो के, जद्याँ तईं परमेसर आबा ने दे, वतरे कुई भी मनक मारा नके ने आ सके हे।”</verse>
				<verse number="66">ईं बात की वजेऊँ ईसू का पाच्छे चालबावाळा नरई वींने छोड़न पराग्या अन कदी भी वीं पाच्छा ने आया।</verse>
				<verse number="67">तद्याँ ईसू आपणाँ बाराई चेलाऊँ क्यो, “कई थाँ भी जाणा छारिया हो?”</verse>
				<verse number="68">समोन पतरस वींने जवाब दिदो, “हो परबू, माँ किंका नके जावाँ? अनंत जीवन का बचन तो थाँका नकेईस हे।</verse>
				<verse number="69">अबे माँ विस्वास किदो अन ओळकग्या हाँ के, परमेसर का आड़ीऊँ आबावाळो पुवितर मनक थाँईस हो।”</verse>
				<verse number="70">ईसू वाँने क्यो, “कई में थाँ बारेई जणा ने चुण्या हे? पछे भी थाँकामूँ एक जणो सेतान हे।”</verse>
				<verse number="71">यो वाँकाणी समोन इसकरियोती का पूत यहूदा का वाते क्यो हो, काँके यो वोईस हो ज्यो वणा बारा मेंऊँ एक हो, वो वाँने धोको देन पकड़ाबावाळो हो।</verse>
			</chapter>
			<chapter number="7">
				<verse number="1">ईंका केड़े पछे ईसू गलील में जातरा किदी। वो यहूदियाँ परदेस में जाणो ने छावतो हो, काँके यहूदी अदिकारी वींने मारबा की कोसीस कररिया हा।</verse>
				<verse number="2">अन यहूदियाँ मनकाँ को झोपड़्या को तेवार नके हो।</verse>
				<verse number="3">ईं वाते ईसू का भई वणीऊँ क्यो, “थूँ अटेऊँ यहूदियाँ परदेस परोजा, ताँके ज्यो काम थूँ करे हे, वींने थने मानबावाळा भी देक सके।</verse>
				<verse number="4">यद्याँ कुई भी मनक प्रसिद वेणो छावे तो वो छुपन कई ने करे। थूँ यो काम करे हे, तो आपणाँ खुद ने दनियाँ का हामे परगट कर।”</verse>
				<verse number="5">काँके वींका भई भी वींको विस्वास ने करता हा।</verse>
				<verse number="6">तद्याँ ईसू वाँने क्यो, “मारा वाते अबाणू तेवार में जाबा का वाते सई टेम ने आयो हे, पण थाँका वाते हरेक टेम सई हे।</verse>
				<verse number="7">या दनियाँ थाँकाऊँ नपरत ने राके हे, पण माराऊँ नपरत राके हे, काँके मूँ वाँका विरोद में केऊँ के, वाँका काम बुरा हे।</verse>
				<verse number="8">ईं तेवार में थाँ जावो। मूँ अबाणू ईं तेवार में ने जावूँ, काँके मारो वाते सई टेम आलतरे ने आयो हे।”</verse>
				<verse number="9">ईसू वाँकाऊँ ईं बात करन गलील मेंईस रेग्यो।</verse>
				<verse number="10">ईंका केड़े जद्याँ वींका भई तेवार में पराग्या, तो वो भी छानो-मानो वटे परोग्यो।</verse>
				<verse number="11">यहूदी अदिकारी तेवार में ओ केता तका वींने होदरिया हाँ के, “वो कटे हे?”</verse>
				<verse number="12">ईसू का बारा में लोगाँ में छाने-छाने घणी बाताँ वी। कतराई तो केता हाँ, “वो भलो मनक हे।” अन दूजाँ केता हा के, “ने, वो तो लोगाँ ने भरमावे हे।”</verse>
				<verse number="13">कुई भी मनक वाँका वाते खुलन बाताँ ने कर पारियो हो, काँके वीं लोग-बाग यहूदी अदिकारियाऊँ दरपता हा।</verse>
				<verse number="14">जद्याँ तेवार का आदा दन बीत चुक्यो हा, तो ईसू मन्दर में जान उपदेस देबा लागो।</verse>
				<verse number="15">तद्याँ यहूदी अदिकारियाँ घणो अचम्बा किदो अन क्यो, “यो मनक अतरो कस्यान जाणे हे, यो तो आपणाँ अटे कदी भणवाई ने आयो?”</verse>
				<verse number="16">ईसू वाँने क्यो, “ज्या हिक मूँ देरियो हूँ वाँ मारी ने हे, पण मने खन्दाबावाळा की हे।</verse>
				<verse number="17">यद्याँ कुई वींकी मरजी पे चालणो छावे, तो वीं खुद ईं हिकऊँ जाण जाई के, या हिक परमेसर का आड़ीऊँ हे कन मारा आड़ीऊँ हे।</verse>
				<verse number="18">ज्यो कुई आपणाँ आड़ीऊँ केवे हे वो खुद की बड़ई छावे हे पण ज्यो आपणाँ खन्दाबावाळा की बड़ई छावे हे वो हाँचो हे अन वींमें कई खोट ने हे।</verse>
				<verse number="19">कई मूसे थाँने वेवस्ता का नेम ने दिदा हा? पण थाँकामूँ कुई भी नेम को पालण ने करे हे। तो थाँ मने मारबा की कोसीस काँ कररियाँ हो?”</verse>
				<verse number="20">लोग-बाग वींने क्यो, “थाँरा में हुगली आत्मा धस्यी तकी हे। कूण हे ज्यो थने मारणो छावे हे?”</verse>
				<verse number="21">ईसू वाँने क्यो, “में एक काम किदो हे अन थाँ हाराई अचम्बो करो हो।</verse>
				<verse number="22">सबद का दन थाँ मूसा की आग्या ने मानन जद्याँ थाँ मनकाँ को खतनो करो हो, तो थाँ भी तो सबद का दन काम करो हो। पण या रीत तो मूसा का पेल्याऊँ आपणाँ बड़ाबा की टेमऊँ चाली आरी हे।</verse>
				<verse number="23">सबद का दन कणी मनक को खतनो करबाऊँ मूसा को नेम ने टुटे हे, तो थाँ मारा पे गुस्सा काँ करो हो के, में एक मनक ने सबद के दन पुरी तरियाऊँ हव कर दिदो हे?</verse>
				<verse number="24">मुण्डा देकन न्याव मती करो, पण ठीक-ठीक न्याव करो।”</verse>
				<verse number="25">जद्याँ कुई यरूसलेम का रेबावाळा केबा लागा, “कई यो वोईस हे, जिंने लोग-बाग मारबा की ताक में हे?</verse>
				<verse number="26">पण देको, यो तो चोड़े-धाड़े बाताँ करे हे अन कुई भी वींने कई ने के पारिया हे। कई यहूदी अदिकारी हाँची में जाणतो ने ग्या हे के, योईस मसी हे?</verse>
				<verse number="27">ईंने तो आपाँ जाणा हाँ के, यो कटा को हे। पण हाँची में मसी आई, तो कुई ने जाणी के, वो कटाऊँ आयो हे।”</verse>
				<verse number="28">तद्याँ ईसू मन्दर में हिक देता तका जोरऊँ क्यो, “थाँ केवो हो के, थाँ हाँची में मने जाणो हो अन यो भी जाणो हो के, मूँ कटा को हूँ। मूँ खुद आपणाँ आड़ीऊँ ने आयो, पण मने खन्दाबावाळो हाँचो हे। वींने थाँ ने ओळको हो।</verse>
				<verse number="29">पण मूँ वींने ओळकूँ हूँ, काँके मूँ वींका आड़ीऊँ खन्दायो तको हूँ।”</verse>
				<verse number="30">पछे वीं वींने पकड़णो छायो, पण कुई भी वींने हात ने लगा सक्यो, काँके वींके पकड़्यो जावा को टेम अबाणू ने आयो हो।</verse>
				<verse number="31">पछे भी वीं भीड़ मेंऊँ घणा लोग-बाग वींपे विस्वास किदो अन केबा लागा के, “जद्याँ मसी आई तो वो जतरा परच्या अणी बताया हे अणीऊँ हेला ने बताई, कई वो अस्यान करी?”</verse>
				<verse number="32">फरीसी जद्याँ मनकाँ ने ईसू का बारा में छाने-छाने बाताँ करता तका हुण्या, तो वणा अन मुक्य याजकाँ ईंस ने पकड़बा का वाते मन्दर का चोकीदाराँ खन्दाया।</verse>
				<verse number="33">ईंपे ईसू क्यो, “मूँ थोड़ी देर तईं थाँका रेवूँ हूँ, तद्याँ मूँ मारा खन्दाबावाळा के नके पाछो परो जाऊँ।</verse>
				<verse number="34">थाँ मने होदो पण मूँ ने लादूँ अन जटे मूँ हूँ वटे थाँ ने आ सको हो।”</verse>
				<verse number="35">यहूदी अदिकारी एक-दूजाऊँ केबा लागा, “यो कटे जाबावाळो हे, जटे ईंने होदा अन यो ने लादी? कई यो युनानी नगराँ में जाई जटे आपणाँ मनक रेवे हे अन कई युनानी मनकाँ ने हिकाई?</verse>
				<verse number="36">अन अणी बात को अरत कई हे ज्यो अणी क्यो हे के, ‘थाँ मने होदो, पण मूँ ने लादूँ,’ अन ‘जटे मूँ हूँ वटे थाँ ने आ सको’?”</verse>
				<verse number="37">पछे तेवार के आकरी दन ज्यो खास दन वेतो हो। वीं दन ईसू ऊबो वेन जोरऊँ क्यो, “यद्याँ कुई तरियो वे तो मारा नके आवे अन पिवे।</verse>
				<verse number="38">ज्यो कुई मारा में विस्वास केरी, जस्यान पवितर सास्तर बतावे हे के, ‘वींका मेंऊँ जीवन का पाणी की नंद्‍याँ वेबा लागा जई।’”</verse>
				<verse number="39">ईसू या बात पुवितर आत्मा का बारा में किदी ही, ज्या वींपे विस्वास करबावाळा ने मलबावाळी ही। अबाणू तईं या आत्मा किंने भी ने मली ही, काँके ईसू आलतरे आपणी मेमा उटाया ने ग्या हा।</verse>
				<verse number="40">तद्याँ भीड़ मेंऊँ कुई ईं बाताँ हुणन क्यो, “हाँची में, यो परमेसर का आड़ीऊँ बोलबावाळो हे।”</verse>
				<verse number="41">कुई दूजाँ मनक केरिया हा के, “यो मनक मसी हे।” पण कुई केरिया हा, “मसी गलीलऊँ ने आई।</verse>
				<verse number="42">कई सास्तर में यो ने लिक्यो हे के, मसी दाऊद का बंसऊँ अन बेतलेम गामऊँ आई, जटे राजा दाऊद रेतो हो?”</verse>
				<verse number="43">अस्यान ईसू की वजेऊँ मनकाँ में फुट पड़गी।</verse>
				<verse number="44">वणा मेंऊँ थोड़ाक जणा वींने पकड़ाणो छारिया हा, पण कुई भी वींके हात ने लगा सक्यो।</verse>
				<verse number="45">जद्याँ मन्दर का चोकीदार पाच्छा आग्या, तो मुक्य याजकाँ अन फरीसियाँ वाँकाऊँ पूँछ्यो, “थाँ वींने पकड़न काँ ने लाया?”</verse>
				<verse number="46">वणा जवाब दिदो, “कुई भी मनक कदी अस्यी बाताँ ने किदी जस्यी वो करे हे।”</verse>
				<verse number="47">अणीऊँ फरीसियाँ वाँकाऊँ क्यो, “कई थाँ भी तो ने भरमाया ग्या हो?</verse>
				<verse number="48">थाँ यहूदी अदिकारियाँ कन फरीसियाँ मूँ किंने एक ने भी जाणो हो कई? जणी ईंपे विस्वास किदो वेवे?</verse>
				<verse number="49">पण या मनकाँ की भीड़ ज्या मूसा का नेमाने ने जाणे हे। परमेसर को हराप ईंपे हे।”</verse>
				<verse number="50">निकेदुमस ज्यो पेल्याँ ईसू का नके ग्यो हो अन यो वणा फरीसियाँ मूँ एक हो, वणी क्यो,</verse>
				<verse number="51">“आपणी मूसा का नेमा में कणी भी मनक की जद्याँ तईं वींकी पेल्याँ हुण ने लेवे अन हमज ने लेवे के, वो कई करे हे। वतरे वींने दोसी ने बणायो जावे हे।”</verse>
				<verse number="52">वणा वींने जवाब दिदो, “कई थूँ भी गलील को हे? सास्तर में देक अन होद के, गलीलऊँ कुई भी परमेसर का आड़ीऊँ बोलबावाळो परगट ने वेबावाळो हे।”</verse>
				<verse number="53"></verse>
			</chapter>
			<chapter number="8">
				<verse number="1">पछे ईसू जेतुन का मंगरा पे पराग्या।</verse>
				<verse number="2">अन आगले दन भाग-फाट्याँ पाच्छा मन्दर की चोकी में आया अन हारई लोग-बाग वाँका नके आया जद्याँ वीं बेटन वाँने हिकबा लागा।</verse>
				<verse number="3">तद्याँ नेमा ने हिकाबावाळा अन फरीसी लोग कुकरम में पकड़ाणी तकी एक लुगई ने वटे लाया अन वींने हाराई का बचमें ऊबी कर दिदी।</verse>
				<verse number="4">अन वणा ईसुऊँ क्यो, “हो गरुजी, या लुगई कुकरम करती तकी पकड़ागी हे।</verse>
				<verse number="5">मूसा का नेम माने आग्या देवे हे के, अस्यी लुगई ने भाटा ठोकन मार देणी छावे। तो ईं वाते थूँ अणी बारा में कई केवे हे?”</verse>
				<verse number="6">वाँकाणी ईसू की जाँच-परक का वाते या बात किदी, काँके वाँने वींपे दोस लगाबा का वाते कई बात मल जावे। पण ईसू पगा पे बेटन धुळा में आँगळीऊँ कई लिकबा लागो।</verse>
				<verse number="7">जद्याँ वीं वाँकाऊँ पूँछता रिया, तो वो हुदो ऊबो वेन वाँकाऊँ क्यो, “थाँका मेंऊँ कणी पाप ने किदो वे, वो पेल्याँ ईंके भाटा की ठोको।”</verse>
				<verse number="8">अन ईसू पाच्छा पगा पे बेटन धुळा में आँगळीऊँ लिकबा लागा।</verse>
				<verse number="9">तद्याँ या बात हुणन हाराई मनक एक-एक करन पराग्या अन हाराऊँ पेल्याँ भूण्डा मनक ग्या अन आकरी में वटे लुगई अन ईसूइस बच्या।</verse>
				<verse number="10">पसे ईसू हुदा ऊबा वेन वणीऊँ पूँछ्यो, “वीं हारई कटे ग्या? कई कुई भी थने सजा देबा का वाते ने रक्यो?”</verse>
				<verse number="11">वणी लुगई वाँकाऊँ क्यो, “हो मालिक कुई ने बच्यो।” तो ईसू वींने क्यो, “मूँ भी थने सजा ने देवूँ हूँ। जा अन अबे पाप मती करज्ये।”</verse>
				<verse number="12">तद्याँ ईसू फरीसियाऊँ पाछो क्यो, “दनियाँ को उजितो मूँ हूँ, ज्यो मारा नके आई, वीं अंदारा में ने चाली, पण जीवन को उजितो पाई।”</verse>
				<verse number="13">फरीसी वाँकाऊँ क्यो, “थूँ आपणी गवई खुद देवे हे। ईं वाते थाँरी गवई मानबा जोगी हे।”</verse>
				<verse number="14">ईसू वाँने क्यो, “मूँ मारी गवई पलई देवूँ, पछे भी मारी गवई मानबा जोगी हे, काँके मूँ जाणूँ हूँ के, मूँ कटाऊँ आयो हूँ अन कटे जाऊँ। पण थाँ ने जाणो हो के, मूँ कटाऊँ आयो हूँ अन कटे जाऊँ।</verse>
				<verse number="15">थाँ मनकाँ का नेमा ने देकन न्याव करो हो, पण मूँ किंकोई न्याव ने करूँ हूँ।</verse>
				<verse number="16">अन यद्याँ मूँ न्याव करूँ, तो मारो न्याव हाँचो हे। काँके ईंमें मूँ एकलो ने हूँ, पण मारा हाते मने खन्दाबावाळा परमेसर भी हे।</verse>
				<verse number="17">अन जस्यान थाँका नेमा में भी लिक्यो हे के, ‘यद्याँ दो जणा एक जस्यी गवई देवे, तो वाँ हाँची हे।’</verse>
				<verse number="18">एक तो मूँ खुद, खुद की गवई देवूँ हूँ, अन दूँजा मारा बापू मारी गवई देवे हे जणी मने खन्दायो हे।”</verse>
				<verse number="19">ईंपे वणा वींकाऊँ पूँछ्यो, “थाँरा बापू कटे हे?” ईसू जवाब दिदो, “ने थाँ मने ओळको हो, नेई मारा बापू ने। यद्याँ मने जाणता तो मारा बापू ने भी ओळकता।”</verse>
				<verse number="20">ईं बाताँ वणी मन्दर के दान-पेटी का भड़े हिक देती दाण क्यो अन कणी भी वींने ने पकड़्यो, काँके वींको टेम आलतरे ने आयो हो।</verse>
				<verse number="21">ईसू पाछो एक दाण ओरी वाँने क्यो, “मूँ परो जाऊँ अन थाँ मने होदो, पण थाँ खुद का पाप मेंईस मरोगा। जटे मूँ जारियो हूँ, वटे थाँ ने आ सको।”</verse>
				<verse number="22">ईं वाते यहूदी अदिकारी केबा लागा, “कई वो आपणाँ खुद ने मारबावाळो हे, काँके वो केवे हे के, ‘जटे मूँ जाऊँ, वटे थाँ ने आ सको’?”</verse>
				<verse number="23">ईंपे ईसू वाँने क्यो, “थाँ ईं धरती का हो पण मूँ ने हूँ, मूँ ऊपरे हरगऊँ आयो हूँ। थाँ अणी दनियाँ का हो, पण मूँ अणी दनियाँ को ने हूँ।</verse>
				<verse number="24">ईं वाते में थाँकाऊँ क्यो के, थाँ खुद आपणाँ पाप मेंईस मरो, काँके यद्याँ थाँ विस्वास ने केरो के, ‘मूँ वोईस हूँ’ तो थाँ थाँके खुद का पाप मेंईस मरो।”</verse>
				<verse number="25">वाँकाणी ईसुऊँ पूँछ्यो, “थूँ कूण हे?” ईसू वाँने जवाब दिदो, “मूँ वोईस हूँ ज्यो सरूऊँ थाँने केतो आरियो हूँ।</verse>
				<verse number="26">थाँका बारा में मने घणी बाताँ करणी हे अन थाँने सजा देबा का वाते भी घणी बाताँ हे पण मने खन्दाबावाळो हाँचो हे अन ज्यो में वणीऊँ हुण्यो हे वोईस मूँ दनियाँ ने केवूँ हूँ।”</verse>
				<verse number="27">वाँकाणी यो ने हमज पाया के, यो बापू परमेसर का बारा में बतारियो हे।</verse>
				<verse number="28">ईं वाते ईसू क्यो, “जद्याँ मनक का पूत ऊसो उटायो जाई, तद्याँ थाँ हमज जावो के ‘मूँ कूण हूँ’ अन यो भी जाण जावो के, मूँ मारी ओरुँ कई ने करूँ। पण मूँ ज्यो कई केवूँ हूँ, वस्यानीस केवूँ हूँ, जस्यान मारा बापू मने हिकायो हे।</verse>
				<verse number="29">जणी मने खन्दायो हे, वो मारे नके हे। वणी मने कदी एकलो ने छोड़्यो, काँके मूँ हमेस्यान वोईस करूँ हूँ, ज्यो वींने भावे हे।”</verse>
				<verse number="30">ईसू जद्याँ ईं बाताँ केरियो हो, तद्याँ नरई वींपे विस्वास किदो।</verse>
				<verse number="31">जणा यहूदी मनकाँ वींपे विस्वास किदो, वाँने ईसू क्यो, “यद्याँ थाँ मारा हिक का जस्यान चाल पे अटल रेवो, तो हाचेई मने मानबावाळा बणो।</verse>
				<verse number="32">थाँ हाँच ने ओळको अन हाँच थाँने आजाद करी।”</verse>
				<verse number="33">ईं वाते वणा ईसुऊँ पूँछ्यो, “माँ अबराम की बंस हा, माँ कदी भी किंका गुलाम ने रिया। तो थूँ ओ कस्यान के सके हे के, ‘थाँ आजाद वे जावो’?”</verse>
				<verse number="34">ईसू वाँने क्यो, “मूँ थाँकाऊँ हाँची केवूँ हूँ, ज्यो कुई पाप करे हे, वो पाप को गुलाम हे।</verse>
				<verse number="35">मालिक का घर में कुई गुलाम हक ने जमा सके हे, पण मालिक का पूत को हमेस्यान हक रेवे हे।</verse>
				<verse number="36">ईं वाते यद्याँ पूत थाँने आजाद करी, तो थाँ हाचेई आजाद वेवो।</verse>
				<verse number="37">मूँ जाणूँ हूँ के, थाँ अबराम की बंसज हो। पछे भी थाँ मने मारबा की ताक में रेवो हो, काँके थाँ मारी हिकने ने मानो हो।</verse>
				<verse number="38">मूँ वोईस बताऊँ हूँ जस्यान मने मारा बापू परमेसर बतायो हे अन थाँ वोईस करो जस्यान थाँ थाँका बापूऊँ हुण्यो हे।”</verse>
				<verse number="39">वाँकाणी ईसुऊँ क्यो, “माँ अबराम की ओलाद हा।” ईंपे ईसू वाँने क्यो, “यद्याँ थाँ अबराम की ओलाद वेता, तो अबराम के जस्यान काम करता।</verse>
				<verse number="40">में परमेसरऊँ हूणी तकी हाँची बाताँ थाँने बता दिदी हे, ईं वजेऊँ थाँ मने मारबा का वाते त्यार बेट्या तका हो। पण अबराम तो थाँके जस्यान ने किदो हो।</verse>
				<verse number="41">थाँ तो थाँका बाप को काम कररिया हो।” वणा ईसुऊँ क्यो, “माँ कूकरमऊँ पेदा ने व्या हा। माँको एकीस बाप हे अन वो परमेसर हे।”</verse>
				<verse number="42">ईसू वाँने क्यो, “यद्याँ परमेसर थाँको बाप वेतो, तो थाँ माराऊँ भी परेम करता, काँके मूँ परमेसर का आड़ीऊँ आयो हूँ अन अटे हूँ। मूँ मारी मरजीऊँ ने आयो, पण मने वणा खन्दायो हे।</verse>
				<verse number="43">थाँ मारी हिकने काँ ने हमजो हो? ईंको कारण योईस हे के, थाँ मारी बाताँने ने हुणो हो।</verse>
				<verse number="44">थाँको बाप तो सेतान हो अन थाँ वींकी मरजी ने पुरी करणा छावो हो। वो तो ठेटऊँ हत्यारो हो। वो कदी भी हाँच का आड़ी ने रियो, काँके वींमें हाँच कोयने हे, जद्याँ वो जूट बोले हे, तो आपणाँ हाव-भाव के तरिया बोले हे। काँके वो जूटो हे अन हरेक जूट को बाप हे।</verse>
				<verse number="45">पण मूँ हाँच बोलूँ हूँ, ईं वाते थाँ मारा ऊपरे विस्वास ने करो हो।</verse>
				<verse number="46">थाकामूँ कुई भी मारा पे पाप को दोस ने लगा सके हे? यद्याँ मूँ हाँच बोलूँ हूँ, तो थाँ मारा पे विस्वास काँ ने करो हो?</verse>
				<verse number="47">ज्यो परमेसर को हे, वो परमेसर की बाताँ हुणे हे। थाँ ईं वाते ने हुणो हो, काँके थाँ परमेसर का ने हो।”</verse>
				<verse number="48">यहूदी मनकाँ ईसू ने पूँछ्यो, “कई माँको यो केणो सई ने के, थूँ सामरी हे अन थाँरा में हुगली आत्मा धस्यी तकी हे?”</verse>
				<verse number="49">ईसू वाँने क्यो, “मारा में हुगली आत्मा कोयने हे। मूँ मारा बाप ने मान देवूँ हूँ। अन थाँ मारी बेजती करो हो।</verse>
				<verse number="50">मूँ मारा खुद को मान ने छावूँ हूँ। पण एक हे ज्यो मारो मान छावे हे, अन वोईस न्याव भी करे हे।</verse>
				<verse number="51">मूँ थाँने हाचेई केवूँ हूँ, यद्याँ कुई मारी हिक को पालण करी, तो वो कदी ने मरी।”</verse>
				<verse number="52">ईंपे यहूदी नेता वाँने क्यो, “अबे माँने पको विस्वास वेग्यो हे के, थाँरा में हुगली आत्मा धस्यी तकी हे। अबराम अन परमेसर का आड़ीऊँ बोलबावाळा तो मरग्या, पण थूँ केवे हे के, ‘यद्याँ कुई मारी हिक ने मानी, तो वो कदी ने मरी।’</verse>
				<verse number="53">कई थूँ माकाँ बड़ाबा अबरामऊँ भी मोटो हे? वो तो मरग्यो अन परमेसर का आड़ीऊँ बोलबावाळा भी मरग्या। तो पछे थूँ आपणाँ खुद ने कई हमजे हे?”</verse>
				<verse number="54">ईसू वाँने क्यो, “यद्याँ मूँ खुद को मान करतो, तो वो मान कई ने हे। पण मने मान देबावाळो मारो बाप हे, जिंने थाँ थाँको परमेसर केवो हो।</verse>
				<verse number="55">थाँ वींने ने जाणो हो, पण मूँ वींने जाणूँ हूँ। यद्याँ मूँ केतो के, मूँ वींने ने जाणतो, तो मूँ थाँका जस्यान जूट बोलवावाळो जूटो ठेरतो। पण मूँ वींने जाणूँ हूँ अन वींका बचना को पालण करूँ हूँ।</verse>
				<verse number="56">थाँका बापू अबराम यो जाणन खुस व्या के, वो मारे आबा को दन देकी अन वणी वो देक्यो अन राजी व्यो।”</verse>
				<verse number="57">पछे यहूदी नेता वाँकाऊ क्यो, “अबार तईं थाँ पचा वर का भी ने व्या अन थें अबराम ने कस्यान देक लिदो?”</verse>
				<verse number="58">ईसू वाँकाऊँ क्यो, “मूँ थाँकाऊँ हाचेई केऊँ हूँ के, अबराम का जनम लेबा के, पेल्याँऊँ मूँ मोजुद हूँ।”</verse>
				<verse number="59">ईं बात पे वणा ईसू ने मारबा के वाते भाटा हाताँ में ले लिदा, पण वो छानेकूँ मन्दरऊँ बारणे निकलग्यो।</verse>
			</chapter>
			<chapter number="9">
				<verse number="1">जद्याँ ईसू जारिया हा, तो वणा एक मनक ने देक्यो, ज्यो जनम को आंदो हो।</verse>
				<verse number="2">ईसू का चेला वाँकाऊँ पूँछ्यो, “हो गरुजी, किंका पाप का मस यो आंदो जनम्यो, ईं मनक का कन पछे ईंका बई-बापू के पाप का मस?”</verse>
				<verse number="3">ईसू वाँकाऊँ क्यो, “ने अणी पाप किदो हो, नेई ईंका बई-बापू, पण ओ ईं वाते व्यो के, परमेसर को काम ईंपे परगट वे सके अन मनक वींने देके।</verse>
				<verse number="4">जणी मने खन्दायो हे, आपाँने वींका काम दन ईं दन में करणा घणा जरूरी हे, काँके रात वेबावाळी हे जिंमें कुई काम ने कर सकी।</verse>
				<verse number="5">जद्याँ तईं मूँ जगत में हूँ, तद्याँ तईं मूँ जगत को उजितो हूँ।”</verse>
				<verse number="6">ओ केन ईसू जमीं पे थूँक्यो अन वणी थुकऊँ धुळा ने आलो किदो, अन वो धूळो वीं आंदा की आक्याँ पे लगान,</verse>
				<verse number="7">वणीऊँ क्यो, “जा, अन सिलोह का कुण्ड में धोई ले” (सिलोह को मतलब “खन्दायो तको।”) वणी जान धोयो, अन देकबा लागो अन पाछो आग्यो।</verse>
				<verse number="8">तद्याँ अड़े-भड़े का लोगाँ अन जणा पेल्याँ वींने भीक मांगतो तको देक्यो हो। वीं केबा लागा, “कई यो वो तो ने हे, ज्यो बेटो तको भीक मांगतो हो?”</verse>
				<verse number="9">नरई तो यो क्यो, “यो वोईस हे”, दूजाँ क्यो, “ने यो वो ने हे, पण वींका जस्यान दिके हे।” ईं वाते वणी खुद क्यो, “मूँ वोईस हूँ।”</verse>
				<verse number="10">तद्याँ मनक वणीऊँ पूँछबा लाग्या, “थारी आक्याँ कस्यान खलगी?”</verse>
				<verse number="11">वणी जवाब दिदो, “ईसू नाम को एक मनक धूळो आलो करन मारी आक्याँ पे लगायो अन माराऊँ क्यो, ‘सिलोह का कुण्ड में जान धोई ले।’ तो मूँ ग्यो अन जस्यानी में धोयो तो देकबा लागो।”</verse>
				<verse number="12">पसे वणा हारई यो पूँछ्यो, “वो कटे हे?” वणी क्यो, “मने ध्यान कोयने।”</verse>
				<verse number="13">पछे लोग-बाग वींने ज्यो पेलाँ आंदो हो, फरीसियाँ का नके लेग्या।</verse>
				<verse number="14">जणी दन ईसू धुळा ने आलो करन वींकी आक्याँ खोली ही, वो सबत को दन हो।</verse>
				<verse number="15">ईं वाते फरीसियाँ वींने एक दाण पाछो पूँछबा लागा, “थाँरी आक्याँ कस्यान खलगी?” वणी मनक क्यो, “वणी थोड़ोक आलो धूळो मारी आक्याँ पे लगायो अन में धोयो अन अबे मूँ देक सकूँ हूँ।”</verse>
				<verse number="16">अणी पे कुई फरीसी केबा लागा, “जणी मनक यो किदो हे वो मनक परमेसर का आड़ीऊँ ने हे, काँके वो आराम का दन का नेमाने ने माने हे।” दूजाँ क्यो, “पापी मनक कस्यान अस्या परच्या बता सके हे?” अणी बात पे वाँका में आपस में फुट पड़गी।</verse>
				<verse number="17">फरीसियाँ वी आन्दाँऊँ पाछो पूँछ्यो, “वणी थारी आक्याँ खोली हे। थूँ वींका वाते कई केवे हे?” वणी क्यो, “वो परमेसर का आड़ीऊँ बोलबावाळो हे।”</verse>
				<verse number="18">पण यहूदी अदिकारियाँ ने विस्वास ने व्यो के, वो आंदो हो अन अबे देकबा लागो, वणा वींका बई-बापू ने बलान,</verse>
				<verse number="19">वाँने यो केन पूँछ्यो, “कई यो थाँको बेटो हे? थाँ केवो के, यो जनमऊँ आंदो हो, यद्याँ आंदो हो तो अबे यो कस्यान देके सके हे?”</verse>
				<verse number="20">वींका बई-बापू क्यो, “माँ जाणा हा के, यो माँको बेटो हे अन आन्दो जनम्यो हो।</verse>
				<verse number="21">पण माँ यो ने जाणा हाँ के, अबे यो कस्यान देके हे अन ने यो जाणा हाँ के, कणी ईंकी आक्याँ खोली। अणीऊँ पूछी लो, यो तो अबे हमजदार वेग्यो हे। आपणाँ बारा में यो खुद बता सके हे।”</verse>
				<verse number="22">या बात वींका बई-बापू ईं वाते किदी, काँके वीं यहूदी अदिकारियाऊँ दरपता हाँ। काँके वणा एको कर मेल्यो हो के, ज्यो कुई ईसू ने मसी केन मानी, वींने परातना घरऊँ बारणे काड़्यो जाई।</verse>
				<verse number="23">ईं वाते वींका बई-बापू क्यो, “वो हमजणो हे, वणीऊँ थाँ पुछ लो।”</verse>
				<verse number="24">तद्याँ वाँकाणी वीं मनकऊँ ज्यो आंदो हो, दूजी दाण बलान क्यो, “हव वेग्यो ईं वाते, परमेसर को गुणगान कर वींको ने, काँके माँ तो यो जाणा हाँ के, वो मनक पापी हे।”</verse>
				<verse number="25">ईंपे वणी जवाब दिदो, “मूँ ने जाणूँ के, वो पापी हे कन कोयने। मूँ तो बेस एक बात जाणूँ हूँ, पेल्याँ मूँ आंदो हो अन अबाणू देक सकूँ हूँ।”</verse>
				<verse number="26">तो वणा वणी पूँछ्यो, “वणी थाँरा हाते कई किदो? अन कस्यान थारी आक्याँ खोली?”</verse>
				<verse number="27">वणी वाँने क्यो, “मूँ तो थाँने के चुक्यो, अन थाँ ने हुण्यो। अबे दूजी दाण काँ हूणणो छारिया हो? कई थाँ भी वींका चेला बणणा छारिया हो?”</verse>
				<verse number="28">तद्याँ वणा वींकी बेजती किदी अन क्यो, “थूँईस वींने माने हे, माँ तो मूसा का चेला हा।</verse>
				<verse number="29">माँ यो जाणा हाँ के, परमेसर मूसाऊँ बाताँ किदी, पण ईं मनकने ने जाणा हाँ यो कटा को हे?”</verse>
				<verse number="30">वणी वाँने क्यो, “आ तो अचम्बा की बात हे के, थाँ वींने ने जाणो हो के, वो कटा को हे, तो भी वणी मारी आक्याँ खोल दिदी।</verse>
				<verse number="31">माँ जाणा हाँ के, परमेसर पाप करबावाला की ने हुणे, पण यद्याँ कुई परमेसर को भगत वे अन वाँकी मरजी में चालतो वे, तो वो वाँकी हुणे हे।</verse>
				<verse number="32">ईं जगत का सरुवातऊँ यो कदी हुणबा में ने आयो के, कणी जनम का आंदा मनक की आक्याँ खोली वेवे।</verse>
				<verse number="33">यद्याँ यो मनक परमेसर का आड़ीऊँ ने वेतो, तो कई भी ने कर पातो।”</verse>
				<verse number="34">यहूदी अदिकारियाँ वाँने क्यो, “थूँ तो पाप मेंईस जनम्यो हे, थूँ माने कई हिकावे हे?” अन वाँकाणी वींने परातना घरऊँ बारणे काड़ दिदो।</verse>
				<verse number="35">जद्याँ ईसू हुण्यो के, वीं आंदा मनक ने बारणे काड़ दिदो हे तद्याँ ईसू वणीऊँ मल्या तो वींने क्यो, “कई थूँ मनक का पूत पे विस्वास करे हे?”</verse>
				<verse number="36">वणी मनक क्यो, “हो मालिक, मने बतावो वो कूण हे, ताँके मूँ वींका ऊपरे विस्वास करूँ।”</verse>
				<verse number="37">ईसू वणी मनकऊँ क्यो, “थें वींने देक्यो भी हे, अन ज्यो अबाणू थाँराऊँ बात कररियो हे, यो मनक वोईस हे।”</verse>
				<verse number="38">वणी क्यो, “हो परबू जी, मूँ विस्वास करूँ हूँ।” अन वाँका पगा में पड़न धोग दिदो।</verse>
				<verse number="39">तद्याँ ईसू क्यो, “मूँ जगत में न्याव करबा का वाते आयो हूँ, ताँके ज्यो आंदा हे, वीं देकबा लागे अन ज्यो देके हे, वीं आंदा वे जाई।”</verse>
				<verse number="40">ज्यो फरीसी वींका लारे ऊबा हा, वाँकाणी ईं बाताँ हुणन वाँने क्यो, “कई, माँ भी आंदा हाँ?”</verse>
				<verse number="41">ईसू वाँने क्यो, “यद्याँ थाँ आन्दा वेता तो पापी ने वेता, पण अबे केवो हो के, ‘माँ देका हा,’ ईं वाते थाँको पाप बण्यो रेवे हे।”</verse>
			</chapter>
			<chapter number="10">
				<verse number="1">पछे ईसू ओरी क्यो, “मूँ थाकाँऊँ हाँची केऊँ हूँ, ज्यो गारा का बाड़ा का बारणाऊँ ने पण बाड़ा की कोट कूदन में जावे हे, वीं चोर-डाकू हे।</verse>
				<verse number="2">पण ज्यो बाड़ा में बारणाऊँ आवे हे, वो गारा को गवाळ हे।</verse>
				<verse number="3">वाँका वाते चोकीदार बारणो खोल देवे हे, अन गारा वाँकी बोली ने ओळके हे। वो आपणाँ गारा ने नामऊँ बलावे हे अन बारणे ले जावे हे।</verse>
				<verse number="4">जद्याँ वो आपणाँ गारा ने बारणे काड़ नाके, तो वीं गारा वींका पाछे-पाछे चाले हे, काँके वीं गारा वींकी बोली ओलके हे।</verse>
				<verse number="5">पण गारा कणी पराया का पाच्छे ने जावे हे, पण वीं तो वाँकाऊँ दरपे, काँके वीं पराया की बोलीने ने ओळके हे।”</verse>
				<verse number="6">ईसू वाँकाणी या केणी क्यो, पण वीं हमज ने सक्या के, वीं वाकाँऊँ कई केरिया हे।</verse>
				<verse number="7">जद्याँ ईसू वाँने क्यो, “मूँ थाँकाऊँ सई-सई केवूँ हूँ, गारा का वाते बारणो मूँ हूँ।</verse>
				<verse number="8">जतरा माराऊँ पेल्याँ आया वीं हाराई चोर अन डाकू हा, पण गारा वाँकी बातने ने मानी।</verse>
				<verse number="9">बारणो मूँ हूँ, यद्याँ कुई मारी हुणन परवेस करे हे, तो वो बंचायो जाई। अन मयने आया जाया केरी अन वटे धपायो जाई।</verse>
				<verse number="10">चोर कणी दूजाँ काम के वाते ने, पण बेस चोरी करबा, मारबा अन नास करबा ने आवे हे। पण मूँ ईं वाते आयो के, थाँ भरपूर जीवन पा सको।</verse>
				<verse number="11">“मूँ हव गवाळ हूँ। हव गवाळ आपणाँ गारा का वाते आपणो जीव भी दे देवे हे।</verse>
				<verse number="12">पण दानकी पे गारा ने चराबावाळो ने तो हव गवाळ्यो वेवे हे अन ने गारा को मालिक वेवे हे। ईं वाते जद्याँ बरगड़ा ने आतो देके, तो गारा ने हुन्ना छोड़न भाग जावे हे अन बरगड़ो वाँने पकड़बा का वाते जपटा मारन वाँने बखेर देवे हे।</verse>
				<verse number="13">दानकी पे आयो तको गवाळ्यो ईं वाते भाग जावे हे, काँके वो दानकी पे काम करे हे अन वो गारा की परवा कोयने करे हे।</verse>
				<verse number="14">हव गवाळ मूँ हूँ, मूँ मारा गारा ने ओळकूँ हूँ अन मारा गारा मने ओळके हे।</verse>
				<verse number="15">जस्यान बापू परमेसर मने ओळके हे अन मूँ बापू परमेसर ने ओळकूँ हूँ। अन मूँ गारा के वाते आपणो जीव देवूँ हूँ।</verse>
				<verse number="16">मारे ओर भी गारा हे, ज्यो ईं बाड़ा में ने हे। मने वाँने भी लाणा घणा जरूरी हे। वीं मारी बोली ओळकी, तद्याँ एकीस रेवड़ वेई अन एकीस गवाळ्यो वेई।</verse>
				<verse number="17">“बापू परमेसर माराऊँ ईं वाते परेम करे हे, काँके मूँ मारी मरजीऊँ मारो जीव देबा का वाते त्यार रेवूँ हूँ, ताँके मने मारो जीवन पाछो मल सके।</verse>
				<verse number="18">कुई भी माराऊँ मारो जीवन ने ले सके, पण मूँ खुदई दी देऊँ हूँ। मने ईंने देबा को हक हे अन पाछो लेबा को भी हक हे। परमेसर मने अस्यान करबा का वाते आग्या दिदी हे।”</verse>
				<verse number="19">अणा बाताँ केड़े पाच्छी यहूदी लोग-बागाँ में एक दाण ओरी फुट पड़गी।</verse>
				<verse number="20">वणा मूँ घणा बोलबा लागा, “वींमें हुगली आत्मा हे, अन वो बेण्डो वेग्यो हे, वींकी काँ हुणो हो?”</verse>
				<verse number="21">दूजाँ लोग-बागाँ क्यो, “ईं बाताँ अस्या मनक की ने हे जिंमें हुगली आत्मा वे। हाँची में कुई हुगली आत्मा आंदा की आक्याँ ने खोल सके हे?”</verse>
				<verse number="22">वीं दाण हियाळो को टेम हो अन यरूसलेम में मन्दर की थापणा को तेवार मनायो जारियो हो।</verse>
				<verse number="23">ईसू मन्दर में सुलेमान का बणाया तका बरामदा में गुमरिया हा।</verse>
				<verse number="24">तद्याँ यहूदी लोगाँ वाँके च्यारूँमेर ऊबा वेन अन वाँकाऊँ क्यो, “थूँ कटा तईं माँने भेंम में राकी? यद्याँ थूँ मसी हे तो माने सई-सई बता दे।”</verse>
				<verse number="25">ईसू वाँने क्यो, “में थाँने के दिदो, पण थाँ विस्वास ने करो हो। ज्यो काम मूँ मारा बापू परमेसर का नामऊँ करूँ हूँ, वीं हाराई मारा गवा हे।</verse>
				<verse number="26">पण थाँ विस्वास ने करो हो, काँके थाँ मारा गारा मेंऊँ ने हो।</verse>
				<verse number="27">मारा गारा मारी बोली हुणे हे। मूँ वाँने ओळकूँ हूँ, अन वीं हाराई मारा पाछे-पाछे चाले हे।</verse>
				<verse number="28">अन मूँ वाँने अनंत जीवन दूँ हूँ। वाँको कदी भी नास ने वेई अन ने कुई वाँने मारा हाताऊँ कोस सकी।</verse>
				<verse number="29">मारा परमेसर, जणी वाँने मने हुप्याँ हे, वो हाराऊँ मोटो हे अन कुई वाँने परमेसर का हाताऊँ कोस ने सकी।</verse>
				<verse number="30">मूँ अन मारा बापू परमेसर एकीस हाँ।”</verse>
				<verse number="31">तद्याँ यहूदी अदिकारियाँ ईसू के भाटा मारबा के वाते पाच्छा भाटा तोक लिदा।</verse>
				<verse number="32">ईंपे ईसू वाँने क्यो, “में थाँका बचमें घणा हव काम किदा ज्याँने परमेसर मने करबा का वाते दिदा हा। वाँका मेंऊँ कणी काम का वाते थाँ मारा ऊपरे भाटा मारबा का वाते तोक्या हे?”</verse>
				<verse number="33">वणा वाँने क्यो, “हव कामाँ का वाते माँ थाँरे भाटा ने ठोका, पण परमेसर की नन्दयाँ करबा का वाते ठोका हा। अन ईं बात का वाते के, थूँ मनक वेन आपणाँ खुद ने परमेसर को दरज्यो देवे हे।”</verse>
				<verse number="34">ईसू वाँने जवाब दिदो, “कई थाँका सास्तरा में ने लिक्यो हे के परमेसर क्यो, ‘थाँ हाराई परमेसर का जस्यान हो’?</verse>
				<verse number="35">परमेसर वणा मनकाँ ने परमेसर का जस्या क्यो हे ज्याँने परमेसर को बचन दिदो ग्यो। अन आपाँ जाणा हाँ के, पवितर सास्तर की बाताँ कदी जूट ने वे सके हे।</verse>
				<verse number="36">तो जद्याँ में क्यो के, मूँ परमेसर को बेटो हूँ। तो थाँ क्यो, ‘मूँ परमेसर की नन्दयाँ करूँ हूँ।’ पण मूँ तो वोईस हूँ, जिंने परमेसर चुणन ईं दनियाँ में खन्दायो हे।</verse>
				<verse number="37">यद्याँ मूँ आपणाँ परमेसर का काम ज्याँने वीं छावे हे, ने करूँ, तो थाँ मारो विस्वास मती करो।</verse>
				<verse number="38">पण यद्याँ मूँ वाँने करूँ हूँ, तो भी थाँ मारो विस्वास ने करो हो, पण थाँ वणा कामाँ को तो विस्वास करो, जणीऊँ थाँ जाण जावो अन हमजो के, बापू परमेसर मारा में हे अन मूँ बापू परमेसर में हूँ।”</verse>
				<verse number="39">ईंपे वणा यहूदी मनकाँ एक दाण ओरी ईसू ने पकड़बा की कोसीस किदी, पण वो वाँका हाताऊँ बंचन निकळग्यो।</verse>
				<verse number="40">पछे ईसू यरदन नंदी का पेले पाल्ड़े वीं जगाँ में परोग्यो, जटे यहुन्नो पेल्या बतिस्मो देतो हो अन ईसू वटेईस रियो।</verse>
				<verse number="41">नरई लोग-बागाँ वाँके नके आता अन केता हा, “यहुन्ने कई परच्यो ने बताया, पण ज्यो कई यहुन्नो ईं मनक का बारा में केतो हो, वो हारोई हाँचो हो।”</verse>
				<verse number="42">अन वटे नरई लोग-बाग ईसू पे विस्वास किदो।</verse>
			</chapter>
			<chapter number="11">
				<verse number="1">बेतनियाँ नगर में एक लाजर नाम को मांदो मनक आपणी बेना मरियम अन मारता का हाते रेतो हो।</verse>
				<verse number="2">यो लाजर नाम को मांदो मनक वणीस मरियम को भई हो, जणी परबू का पगा पे अंतर नाकन आपणाँ बालऊँ पूँछ्या हा।</verse>
				<verse number="3">तद्याँ वींकी बेना ईसू का नके हमच्यार खन्दायो के, “हो परबू, देको थाँका पाको दोस्त लाजर मांदो हे।”</verse>
				<verse number="4">ओ हुणन ईसू क्यो, “या मांदकी लाजर के मरबा की ने, पण परमेसर की मेमा का वाते हे, काँके वणीऊँ परमेसर का बेटा की मेमा वेई।”</verse>
				<verse number="5">ईसू मारता अन वींकी बेन अन लाजरऊँ परेम राकता हा।</verse>
				<verse number="6">पछे भी जद्याँ वणी हुण्यो के, वो मांदो हे। तद्याँ भी वो जटे हो, वटे दो दनाँ तईं ओरी रक्यो।</verse>
				<verse number="7">ईंका केड़े ईसू चेलाऊँ क्यो, “आवो, आपाँ पाच्छा यहुदया परदेस परा चाला।”</verse>
				<verse number="8">चेला वाँकाऊँ क्यो, “हो गरुजी, थोड़ाक दन पेल्याँ तो वटे यहूदी मनक थाँका पे भाटा फेकणा छारिया हा, तद्याँ भी थाँ पाच्छा वटे काँ जाणा छारिया हो?”</verse>
				<verse number="9">ईसू वाँने क्यो, “एक दन में बारा घण्टा उजितो रेवे हे। यद्याँ कुई दन का उजिता में चाले तो ठोकर ने खाई, काँके जग का उजिता में हारोई सई वींने दिके हे।</verse>
				<verse number="10">पण यद्याँ कुई रात में चाले तो वो ठोकर खावे हे, काँके रात में उजितो ने वेवे हे।”</verse>
				<verse number="11">ईसू ईं बाताँ किदी अन वाँकाऊँ केबा लागो, “आपणो दोस्त लाजर हूँरियो हे, पण मूँ वींने जगाबा का वाते जारियो हूँ।”</verse>
				<verse number="12">तद्याँ चेला वींने क्यो, “हो परबू, यद्याँ वो हूँग्यो हे, तो हव वे जाई।”</verse>
				<verse number="13">ईसू तो वींकी मोत का वाते क्यो हो, पण वीं हमज्या हाँ के, वणी नींदऊँ हूँ जाबा का वाते क्यो हो।</verse>
				<verse number="14">तो ईसू वाँकाऊँ हुदोई के दिदो, “लाजर मरग्यो हे।</verse>
				<verse number="15">अन मूँ थाँका वाते खुस हूँ के, मूँ वटे ने हो, काँके अबे थाँ मारा पे विस्वास कर सको। आवो अबे आपीं वींका नके चाला।”</verse>
				<verse number="16">तद्याँ थोमो जिंने जोड़ला भी केता हा, वणी दूजाँ चेलाऊँ क्यो, “आवो, आपाँ भी गरुजी का हाते चाला, ताँके अणाका हाते मर सका।”</verse>
				<verse number="17">वटे बेतनियाँ पूग्या केड़े ईसू ने नंगे पड़ी के, लाजर की लास ने छाट में खोदी तकी कबर में मेल्या ने च्यार दन वेग्या हे।</verse>
				<verse number="18">बेतनियाँ नगर यरूसलेमऊँ एक कोस छेटी हो।</verse>
				<verse number="19">नरई यहूदी मारता अन मरियम का नके वाँका भई की मोत पे वाँने संतोक देबाने आया हा।</verse>
				<verse number="20">जद्याँ मारता ईसू का आबा को हमच्यार हुण्यो, तो वाँ वाँकाऊँ मलबा ने गी, पण मरियम घर में बेटी री।</verse>
				<verse number="21">मारता ईसुऊँ क्यो, “हो परबू, यद्याँ थाँ अटे वेता, तो मारो भई ने मरतो।</verse>
				<verse number="22">अन मूँ अबाणू भी मूँ जाणूँ हूँ के, ज्यो कई थाँ परमेसरऊँ मांगो, परमेसर थाँने वो दी देई।”</verse>
				<verse number="23">ईसू वींने क्यो, “थारो भई पाछो जीवतो वे जाई।”</verse>
				<verse number="24">मारता वींकाऊँ क्यो, “मूँ जाणूँ हूँ के, आकरी का दन में पाछो जीवतो वे जाई।”</verse>
				<verse number="25">ईसू वींने क्यो, “जीवन मारा में हे अन मरिया केड़े पाछो जीवतो वेणो मारा में हे। ज्यो कुई मारा पे विस्वास करी, वीं यद्याँ मर भी जाई तद्याँ भी पाच्छा जी उटी।</verse>
				<verse number="26">अन ज्यो कुई जीवतो हे अन मारा पे विस्वास करे हे, वो कदी ने मरी। कई थूँ मारा पे विस्वास करे हे?”</verse>
				<verse number="27">वणी ईसुऊँ क्यो, “हाँ, परबू, मूँ विस्वास करूँ हूँ के, थाँईस मसी हो, अन ज्यो परमेसर को बेटो जगत में आबावाळो हो, वो थूँईस हे।”</verse>
				<verse number="28">अस्यान केन मारता पाच्छी परीगी अन आपणी बेन मरियम ने बलान छानेकूँ क्यो, “गरुजी अटेईस हे अन थने बलारिया हे।”</verse>
				<verse number="29">ओ हुणन मरियम वटे वाँका नके तरत अई।</verse>
				<verse number="30">ईसू अबाणू भी गाम में ने पूग्यो हा पण वीं वटेईस हा, जटे मारता वाँकाऊँ मली ही।</verse>
				<verse number="31">तद्याँ ज्यो वींके हाते घर में हाँ अन दिलासो देरिया हाँ, ओ देकन के मरियम आगतऊँ बारणे गी ओ हमज्या के, वाँ कबर पे रोबा ने जावे हे, ईं वाते वाँका पाच्छे चालबा लागा।</verse>
				<verse number="32">जद्याँ मरियम वटे पोंछी जटे ईसू हाँ, तो वाँने देकताई वाँका पगाँ में पड़गी अन क्यो, “हो परबू, यद्याँ थाँ अटे वेता तो मारो भई ने मरतो।”</verse>
				<verse number="33">जद्याँ ईसू वींने अन यहूदी लोग-बागाँ ने ज्यो वींका लारे आया हाँ, वाँने रोता देकन, वो हरदा में घणो दकी व्यो अन आत्मा में घणो उदास वेग्यो,</verse>
				<verse number="34">अन क्यो, “थाँकाणी वींने कटे मेल्यो हे?” वाँकाणी वींने क्यो, “हो परबू, चालन देको।”</verse>
				<verse number="35">ईसू की आक्याँ में आसूँ आग्या।</verse>
				<verse number="36">तद्याँ यो देकन यहूदी केबा लागा, “देको, यो वणीऊँ, कतरो परेम राके हे।”</verse>
				<verse number="37">पण वाँका मूँ कुई केबा लागा, “अणी आंदा की आक्याँ खोली, तो कई यो लाजर ने मरबाऊँ ने बंचा सकतो?”</verse>
				<verse number="38">ईसू आत्मा में घणो दकी वेन कबर के पे आया। वटे एक गुफा ही अन एक मोटो भाटो वींका मुण्डा ने ढाक मेल्यो हो।</verse>
				<verse number="39">पसे ईसू क्यो, “भाटो छेटी करो।” वीं मरिया तका लाजर की बेन मारता वाँने केबा लागी, “हो परबू, अबे तो वींमें वाना आरी वेई, काँके वींने गाड़्या ने च्यार दन वेग्या हे।”</verse>
				<verse number="40">ईसू वींने क्यो, “कई में थने ने क्यो हो के, यद्याँ थूँ विस्वास करी, तो परमेसर की मेमा ने देकी?”</verse>
				<verse number="41">तद्याँ वाँकाणी वीं भाटा ने छेटी किदो। पसे ईसू ऊपरे देकन क्यो, “हो बापू परमेसर, मूँ थाँको धन्नेवाद करूँ हूँ, काँके थाँ मारी हूणी हे।</verse>
				<verse number="42">मूँ जाणूँ हूँ के, थाँ हरदाण मारी हुणो हो, पण ज्या भीड़ च्यारूँमेर ऊबी हे, वाँका वाते में यो क्यो, जणीऊँ ईं मनक विस्वास करे के, थाँ मने खन्दायो हे।”</verse>
				<verse number="43">यो केन वणी जोरऊँ हाको करन क्यो, “हे लाजर, बारणे आ।”</verse>
				<verse number="44">तद्याँ ज्यो मरग्यो हो, वो कपनऊँ पळेट्यो तकोई बारणे आग्यो, अन वींका मुण्डा पे भी गाबा पळेट्या तका हा। ईसू क्यो, “ईंने खोल दो अन जाबा दो।”</verse>
				<verse number="45">तद्याँ ज्यो यहूदी मनक मरियम के हाते आया हाँ, वणा ईसू को यो काम देकन वींकामूँ नरई वींपे विस्वास किदो।</verse>
				<verse number="46">पण वणा मूँ कुई फरीसियाँ का नके जान ईसू का ईं काम को हमच्यार दिदो।</verse>
				<verse number="47">ईंपे मुक्य याजकाँ अन फरीसियाँ मोटी सबा बलान क्यो, “आपणाँ ने कई करणो छावे? यो मनक घणा परच्या बतारियो हे।</verse>
				<verse number="48">यद्याँ आपाँ वींने अस्यानीस करबा देवा तो हाराई मनक वींका पे विस्वास करबा लागी, अन रोमी अदिकारी अटे आन आपणाँ मन्दर को अन आपणाँ देस को नास कर देई।”</verse>
				<verse number="49">तद्याँ वाँका मूँ केफा नाम को एक मनक ज्यो वीं टेम को मोटो याजक हो, वीं हाराऊँ क्यो, “थाँ कई भी ने जाणो हो।</verse>
				<verse number="50">अन नेई ईं बात ने हमजो हो के, हाराई मनकाँ के मरबा बजे एक मनक को मरणो हव हे,” जणीऊँ हारोई देस नास वेबाऊँ बंच जावे।</verse>
				<verse number="51">या बात वणी आपणाँ मनऊँ ने किदी, पण वो वीं टेम को मोटो याजक हो अन वणी आगेवाणी किदी के, ईसू यहूदी लोगाँ का वाते मरबा ने जारियो हे।</verse>
				<verse number="52">वो बेस यहूदी मनकाँ का वातेईस ने मरी, पण परमेसर का हाराई वकरिया तका लोगाँ ने एक हाते करबा का वाते भी मरी।</verse>
				<verse number="53">वीं दनऊँ वीं हाराई यहूदी अदिकारी वींने मारबा की ओजणा बणाबा लागा।</verse>
				<verse number="54">ईंका केड़े ईसू वणा यहूदी मनकाँ में खुला में ने फर सक्यो, पण वटाऊँ ईप्राईम नगर का नके हुन्ना काकड़ का भड़े की ढाणी में परोग्यो अन आपणाँ चेला की लारे वटे रेवा लागो।</verse>
				<verse number="55">यहूदी लोगाँ को फसे को तेवार आबावाळो हो अन हाराई देसऊँ मनक यरूसलेम देस में ग्या, ताँके तेवारऊँ पेल्याँ पुवितर वेबा का रिवाज ने पुरी करे।</verse>
				<verse number="56">ईं वाते वाँकाणी ईसू ने होदबा लागा अन मन्दर की चोकी में ऊबा वेन एक-दूजाऊँ केबा लागा, “थाँ कई बच्यार कररिया हो? कई वो हाँची में अणी तेवार में आई?”</verse>
				<verse number="57">पछे मुक्य याजकाँ अन फरीसियाँ यो आदेस काड़्यो के, यद्याँ किंने याँ खबर पड़े के, ईसू कटे हे तो वो बतावे, ताँके वींने पकड़ सका।</verse>
			</chapter>
			<chapter number="12">
				<verse number="1">ईसू फसे का तेवार का छे दनाँ पेल्याँ बेतनियाँ नगर में आया जटे लाजर हो, जिंने ईसू मरिया तकाऊँ जिवायो हो।</verse>
				<verse number="2">वणा वाँका वाते जीमणो त्यार किदो। अन मारता खाणो परोसरी ही अन लाजर वींकामूँ एक हो, ज्यो वाँका लारे खाणो खाबा ने बेट्यो हो।</verse>
				<verse number="3">जदी मरियम जटामांसी को खरो अन मेंगो अंतर ठामड़ा लेन लई अन ईसू का पगा पे उन्दायो अन आपणाँ बालाऊँ पगा ने पूँछ्याँ। अन अंतर की बानाऊँ घर में खुसबु आबा लागी।</verse>
				<verse number="4">पण वाँका चेला मूँ यहूदो इसकरियोती नाम को एक चेलो ज्यो वाँने धोकाऊँ पकड़ाबावाळो हो वणी क्यो,</verse>
				<verse number="5">“यो अंतर तीन सो चाँदी का सिक्का में बेचन गरीबा ने काँ ने दिदो ग्यो?”</verse>
				<verse number="6">वाँकाणी या बात ईं वाते ने की के, वींने गरीबा की चन्ता ही। पण ईं वाते क्यो, काँके वो चोर हो। वाँका नके वाँके रिप्या की नोळी ही अन वो वींमेंऊँ रिप्या काड़ लेतो हो।</verse>
				<verse number="7">ईसू क्यो, “वींने रोको मती, वणी यो हाराई मारे गाड़ जाबा की त्यारी में किदो हे।</verse>
				<verse number="8">काँके गरीब तो थाँका लारे हरदाण रेई, पण मूँ थाँका हाते हमेस्या तईं ने रेऊँ।”</verse>
				<verse number="9">फसे का तेवार में आया तका यहूदी मनकाँ जद्याँ यो हुण्यो के, ईसू बेतनियाँ में हे, तो वीं बेस ईसू नेईस ने, पण लाजर ने भी देकबा ने आया जिंने ईसू मरिया तकाऊँ जिवायो हो।</verse>
				<verse number="10">तद्याँ मोटा याजकाँ लाजर ने भी मार नाकबा की ओजणा बणई।</verse>
				<verse number="11">काँके लाजर की वजेऊँ नरई यहूदी मनक वाँने छोड़न दिदा अन ईसू ने मानबा लागा हा।</verse>
				<verse number="12">दूजाँ दन नरई लोगाँ ज्यो तेवार में आया हाँ, वणा यो हुण्यो के, ईसू यरूसलेम आरिया हे।</verse>
				<verse number="13">ईं वाते वीं खजुर की डाळ्याँ लिदी अन वाँकाऊँ मलबा ने निकल्या, अन केबा लागा, “परमेसर की मेमा वेवे, परबू का नामऊँ आबावाळा ने परमेसर आसीस देवे। इजराएल का राजा ने परमेसर आसीस देवे।”</verse>
				<verse number="14">तद्याँ ईसू ने गदेड़ी को बच्यो मल्यो, तो वो वींपे बेटग्यो। जस्यान पुवितर सास्तर में लिक्यो तको हे के,</verse>
				<verse number="15">“हो यरूसलेम का मनकाँ, दरपो मती। देको, थाँको राजा गदेड़ी का बच्याँ पे बेटन आरियो हे।”</verse>
				<verse number="16">वाँका चेला ने वीं टेम ईं बाताँ नंगे ने पड़ी ही, पण जद्याँ ईसू मेमा परगट वीं, तद्याँ वाँने हमज में आयो के, ईं बाताँ वींके बारा मेंईस सास्तर में लिकी गी ही के, मनक वाँकाऊँ ईं तरियाँ को वेवार किदो हो।</verse>
				<verse number="17">तद्याँ भीड़ मेंऊँ मनकाँ गवई दिदी, ज्यो वीं टेम वाँका हाते हाँ, जद्याँ ईसू लाजर ने कबरऊँ मोतऊँ जिवायो। ईं बारा में दूँजा मनकाँ ने बतायो।</verse>
				<verse number="18">लोग-बाग वाँकाऊँ मलबा ईंवातेइस आया हा, काँके वणा हुण्यो हो के, वणी ओ परच्यो बतायो हे।</verse>
				<verse number="19">तद्याँ फरीसी एक-दूजाऊँ केबा लागा, “आपाँ कई ने कर सक्या हा। देको, हारी दनियाँ वाँका पाच्छे चालबा लागी हे।”</verse>
				<verse number="20">ज्यो लोग-बाग वीं तेवार की टेम यरूसलेम में आरादना करबा ने आया हा, वाँका में कुई युनानी मनक भी हा।</verse>
				<verse number="21">वणा लोगाँ गलील का बेतसेदा का रेबावाळा फिलीप्पुस का नके आन वणीऊँ अरज किदी, “हुकम, माँ ईसुऊँ मलणा छारिया हाँ।”</verse>
				<verse number="22">तो पछे फिलीप्पुस जान अन्दरियासऊँ क्यो, तद्याँ अन्दरियास अन फिलीप्पुस दुई जान ईसुऊँ क्यो।</verse>
				<verse number="23">ईं बात पे ईसू वाँने क्यो, “वाँ टेम आगी हे के, मनक का पूत की मेमा वेवे।</verse>
				<verse number="24">मूँ थाँकाऊँ हाँची केवूँ हूँ के, जद्याँ तईं गऊँ को दाणो जमीं में ने पड़ जावे, वो एकलो रेवे हे, पण जद्याँ मर जावे हे, तो हेला दाणा लावे हे।</verse>
				<verse number="25">ज्यो खुद का जीवऊँ परेम राके हे, वो वींने खोई अन ज्यो अणी दनियाँ में आपणाँ जीवऊँ परेम ने राकी, वो अनंत जीवन का वाते वींने ने खोई।</verse>
				<verse number="26">यद्याँ कुई मारी सेवा करणो छावे, तो वींने मारे पाच्छे चालणोइस पेड़ी, जणीऊँ जटे मूँ हूँ, वटे वो भी वेवे। यद्याँ कुई मारी सेवा-चाकरी करी, तो मारा बापू परमेसर भी वाँको आदर-मान करी।</verse>
				<verse number="27">“अबे मारो जीव दकी हे। ईं वाते कई मूँ यो कूँ के, ‘हो बापू, मने अणी घड़ीऊँ बंचा’? ने, पण मूँ तो अणी घड़ी का दुक नेईस भोगबा आयो हूँ।</verse>
				<verse number="28">हो बापू, थाँका नाम की मेमा बतावो।” तद्याँ हरग या अवाज अई, “में मारी मेमा बतई हे अन ओरू भी बताऊँ।”</verse>
				<verse number="29">तद्याँ ज्यो मनक ऊबा तका हुणरिया हा, वणा क्यो के, “बादळो गाज्यो हे।” कणी दूजाँ यो क्यो, “कूण हरग-दुत वाँकाऊँ बात किदी हे।”</verse>
				<verse number="30">अणी पे ईसू क्यो, “आ अवाज मारा वाते ने हे, पण थाँका नफा की हे।</verse>
				<verse number="31">अबे ईं दनियाँ को न्याव वेबा में हे, अबे अणी दनियाँ का हाकम ज्यो सेतान हे, वींने निकाळ दिदो जाई।</verse>
				<verse number="32">पण, जद्याँ मूँ ऊसो उटायो जाऊँ, तो हाराई ने मारी आड़ी खेंचू।”</verse>
				<verse number="33">अस्यान केन वणी परगट कर दिदो हो, वो कस्यी मोतऊँ मरी।</verse>
				<verse number="34">ईंपे लोग-बाग क्यो, “माँ सास्तर की या बात हूणी हे के, मसी हमेस्या का वाते जीवतो रेई, पछे थूँ का केवे हे के, मनक का पूत ने ऊसो उटायो जाणो जरूरी हे? यो मनक को पूत कूण हे?”</verse>
				<verse number="35">ईसू वाँने क्यो, “उजितो अबाणू थोड़ीक देर ओरी थाँका बचमें रेई। जद्याँ तईं उजितो थाँका लारे हे तद्याँ तईं चालता रेवो। अस्यान ने वे के, अंदारो थाँका ऊपरे वे जावे। ज्यो अंदारा में चाले हे वो ने जाणे के, वो कटने जारियो हे।</verse>
				<verse number="36">जद्याँ तईं उजितो थाँका लारे हे, उजिता में विस्वास करो। अणीऊँ थाँ उजिता का मनक बणो।” ईं बाताँ केन ईसू पराग्या अन खुद वाँकाऊँ हपन रिया।</verse>
				<verse number="37">ईसू यहूदी का मनकाँ का हामे अतरा परच्या बताया, तो भी वाँकाणी वाँपे विस्वास ने किदो।</verse>
				<verse number="38">ताँके यसाया परमेसर का आड़ीऊँ बोलबावाळा को यो बचन पूरो वे, ज्यो वणी क्यो, “हो परबू, मारा हमच्यार को कणी विस्वास किदो हे? अन परबू की मेमा किंके ऊपरे परगट वीं हे?”</verse>
				<verse number="39">ईं वाते वीं विस्वास ने कर सक्या। काँके यसाया यो भी क्यो हे के,</verse>
				<verse number="40">“परमेसर वाँकी आक्याँ ने आंदी अन वाँका मन कल्डा कर दिदा हे, ताँके वीं आक्याँऊँ ने देक सके अन मनऊँ ने हमजे सके, कदी अस्यान ने वे के, वी मारा आड़ी फरे अन मूँ वाँने हव करूँ।”</verse>
				<verse number="41">यसाया ईं बाताँ ईं वाते किदी के, वणी ईसू की मेमा देकी अन वींका बारा में बाताँ भी किदी।</verse>
				<verse number="42">ईंपे नरई यहूदी अदिकारियाँ मेंऊँ भी नरई वींपे विस्वास किदो, पण फरीसियाँ की वजेऊँ वीं ईं बात खुला में ने मानता हा, कटे अस्यान ने वे के, वाँने परातना घरऊँ बारणे काड़्या जावे,</verse>
				<verse number="43">काँके मनकाँ की बड़ई वाँने परमेसर की बड़ईऊँ घणी वाली लागती ही।</verse>
				<verse number="44">ईसू जोरऊँ क्यो, “ज्यो मारा पे विस्वास करे हे, वो मारा पेईस ने पण मने खन्दाबावाळा पे भी विस्वास करे हे।</verse>
				<verse number="45">अन ज्यो कुई मने देके हे वो मने खन्दाबावाळा ने भी देके हे।</verse>
				<verse number="46">मूँ दनियाँ में उजिता का जस्यान आयो हूँ, ईं वाते ज्यो कुई मारा पे विस्वास करी, वो अंदारा में ने रेई।</verse>
				<verse number="47">यद्याँ कुई मारी बाताँ हुणन ने माने, तो मूँ वाँने दोसी ने केवूँ, काँके मूँ दनियाँ ने दोसी ठेराबा के वाते ने, पण दनियाँ ने बंचाबा का वाते आयो हूँ।</verse>
				<verse number="48">ज्यो मने नकारे हे अन मारा बचनाँने ने माने हे वाँने दोसी ठेराबावाळो तो एकीस हे, ईंको मतलब जीं बचन में बताया, वींइस आकरी दन में वाँने दोसी बणाई।</verse>
				<verse number="49">काँके में आपणी आड़ीऊँ बाताँ ने किदी। पण बापू जणा मने खन्दायो हे वणी मने आग्या दिदी हे के, मने कई केणो अन कस्यान केणो हे।</verse>
				<verse number="50">अन मूँ जाणूँ हूँ के, वाँकी आग्या अनंत जीवन का आड़ी ले जावे हे। ईं वाते मूँ ज्यो कई केवूँ हूँ, वो जस्यान बापू माराऊँ क्यो, वस्यान मूँ केवूँ हूँ।”</verse>
			</chapter>
			<chapter number="13">
				<verse number="1">फसे का तेवार पेल्याँ जद्याँ ईसू जाणग्यो के, “मारी वाँ घड़ी आ पूगी हे के, मूँ दनियाँ छोड़न बापू का नके जाऊँ।” तो ईसू आपणाँ लोगाऊँ ज्यो दनियाँ में हाँ, जस्यान परेम वो राकतो हो आकरी तईं वस्यानीस परेम राकतो रियो।</verse>
				<verse number="2">जद्याँ ईसू अन वींका चेला हाजकाँ की टेम में खाणो खारिया हा, वीं टेम समोन का पूत यहूदा इसकरियोती का मन में सेतान ईसू ने धोकाऊँ पकड़वाबा की बाताँ नाक दिदी ही।</verse>
				<verse number="3">ईसू, यो जाणता हा के, “परमेसर हारोई मारा हाताँ में कर दिदो हे अन मूँ परमेसर का नकेऊँ आयो हूँ अन परमेसर का नके जावूँ हूँ।”</verse>
				<verse number="4">ईं वाते ईसू खाणो खाता तका उटन आपणो कुरतो उतार दिदो अन हस्ताड़ो आपणी कमर पे लपेट दिदो।</verse>
				<verse number="5">तद्याँ गड़ा में पाणी भरन चेला का पगाँ ने धोबा लागो अन जणी हस्ताड़ाऊँ वाँकी कमर बन्दी ही वणीऊँ वाँका पगाँ ने पूँछबा लागो।</verse>
				<verse number="6">जद्याँ वो समोन पतरस का नके आयो तद्याँ पतरस वाँने क्यो, “हो परबू, कई थाँ मारा पगा ने धोवो?”</verse>
				<verse number="7">ईसू वींने क्यो, “ज्यो मूँ करूँ, थूँ ईंने अबाणू ने जाणे हे, पण पछे हमज जाई।”</verse>
				<verse number="8">पतरस वींने क्यो, “अस्यो कदी ने वेई के, थाँ मारा पगाँ ने कदी धोवो।” यो हुणन ईसू वींने क्यो, “यद्याँ मूँ थाँरा पग ने धोऊँ, तो थूँ मारो चेलो ने हे।”</verse>
				<verse number="9">समोन पतरस वींने क्यो, “हो परबू, मारा पगा नेईस ने, पण हात अन माता ने भी धो दो।”</verse>
				<verse number="10">ईसू वींने क्यो, “ज्यो हापड़ चुक्यो हे वाँने पगा के अलावा कई धोबा की जरुरत ने हे। पण एक ने छोड़न थाँ हाराई सई हो।”</verse>
				<verse number="11">ईसू तो आपणाँ पकड़ाबावाळा ने ओळकतो हो ईं वाते वणी क्यो, “एक ने छोड़न थाँ हाराई सई हो।”</verse>
				<verse number="12">जद्याँ वो वाँका पगा ने धो चुक्यो अन आपणाँ कोट पेरन पाछो आपणी जगाँ पे बेटग्यो, तो वो वणाऊँ केबा लागो, “कई में ज्यो किदो वींका बारा में थाँ हमज्या?</verse>
				<verse number="13">थाँ मने ‘गरू’ अन ‘परबू’ केवो हो। थाँ सई केवो हो, काँके मूँ वोईस हूँ।</verse>
				<verse number="14">यद्याँ मूँ परबू अन गरू वेन थाँका पगाँ ने धोया तो थाँने भी एक दूजाँ का पगा ने धोणा छावे।</verse>
				<verse number="15">काँके में थाँने नमुनो बता दिदो हे के, जस्यान में थाँका हाते किदो हे, थें भी वस्यानीस करता रेवो।</verse>
				<verse number="16">मूँ थाँने सई-सई केवूँ हूँ, हाळी मालिकऊँ मोटो ने हे, अन नेई खन्दायो तको आपणाँ खन्दाबा वाळाऊँ।</verse>
				<verse number="17">अबे थाँ यो हाँच जाणग्यो हो अन यद्याँ थाँ अस्यान करो तो परमेसर थाँने आसीस देई।</verse>
				<verse number="18">“मूँ थाँका हाराई का वाते ने केवूँ हूँ, जाँने में चुण लिदा वाँने मूँ जाणूँ हूँ, पण यो ईं वाते हे के, पुवितर सास्तर को यो लेक पूरो वे, ‘ज्यो मारा रोटा खावे हे, वीं मारा पे लात उठई।’</verse>
				<verse number="19">“अबाणू वींके वेबा के पेल्याँ थाँने ईं वाते बतारियो हूँ ताँके जद्याँ यो वे जाई तो थाँ विस्वास करो के, मूँ वोईस हूँ।</verse>
				<verse number="20">मूँ थाँने सई-सई केवूँ हूँ के, ज्यो मने खन्दाबावाळा ने माने हे, वो मने माने हे। अन ज्यो मने गरेण करे हे, वो मने खन्दाबावाळा ने भी गरेण करे हे।”</verse>
				<verse number="21">या बाताँ क्या केड़े ईसू मन में घणो दकी व्यो अन क्यो, “मूँ थाँने सई-सई केवूँ हूँ के, थाँकामूँ एक जणो मने धोकाऊँ पकड़ा देई।”</verse>
				<verse number="22">तद्याँ चेला होच में पड़ग्या अन एक दूजाँ का मुण्डा ने देकबा लागा के, ईं किंका बारा में केरिया हे।</verse>
				<verse number="23">ईसू चेला मेंऊँ एक चेलो लाड़लो केवातो हो, वो ईसू का नके बेटो हो।</verse>
				<verse number="24">तद्याँ समोन पतरस वींका आड़ी हानी किदी के, वो ईसुऊँ पूछे के, “वो किंका बारा में केरिया हे?”</verse>
				<verse number="25">तद्याँ वो ईसू का कान्दड़ा का नके मुण्डा लेजान क्यो, “हो परबू, वो कूण हे?”</verse>
				<verse number="26">ईसू वाँने क्यो, “जिंने मूँ यो रोटी को कवो थाळी में डुबान देवूँ वोईस हे।” अन वणा कवो डुबान समोन इसकरियोती का पूत यहूदा ने दिदो।</verse>
				<verse number="27">कवो लेताई सेतान वींमें धसग्यो। तद्याँ ईसू वींने क्यो, “ज्यो थूँ करबा ने जारियो हे, वो जट कर।”</verse>
				<verse number="28">पण जीमणा में बेठबावाला मेंऊँ कुई भी ने हमज्यो के, ईसू वणीऊँ या बात काँ किदी।</verse>
				<verse number="29">यहूदा का नके रिप्या की नोळी रेती ही। ईं वाते वाँकाणी यो हमज्या के, ईसू वणीऊँ केरियो हे के, ज्यो कई आपाँने तेवार के वाते छावे वो मोल लिले कन पछे गरीबा ने कई दिदे।</verse>
				<verse number="30">तद्याँ यहूदो रोटी को कवो लेन तरत बारणे परोग्यो अन या रात की टेम ही।</verse>
				<verse number="31">जद्याँ यहूदो बारणे परोग्यो तो ईसू क्यो, “अबे टेम आग्यो हे मूँ, मनक का पूत मेमावान व्यो हूँ अन माराऊँ परमेसर की मेमा वेई।</verse>
				<verse number="32">यद्याँ माराऊँ परमेसर की मेमा वेवे हे तो तरत परमेसर खुद मूँ मनक का पूत ने मेमा देई।”</verse>
				<verse number="33">“हो मारा प्यारा बाळकाँ, मूँ थाँका लारे थोड़ीक देर तईं हूँ, थें मने होदो अन जस्यान में यहूदी अदिकारियाऊँ क्यो हे, वस्यानीस मूँ थाँकाऊँ भी केवूँ हूँ, ‘जटे मूँ जारियो हूँ वटे थाँ ने जा सको।’</verse>
				<verse number="34">मूँ थाँने एक नुवी आग्या देरियो हूँ के, एक-दूजाऊँ परेम राको। जस्यान में थाँकाऊँ परेम किदो वस्यानीस थाँ भी एक-दूजाऊँ परेम राको।</verse>
				<verse number="35">यद्याँ थाँ एक-दूजाऊँ परेम राको, तो अणीऊँ हाराई जाण जाई के, थाँ मारा चेला हो।”</verse>
				<verse number="36">समोन पतरस ईसुऊँ क्यो, “हो परबू, थाँ कटे जावो हो?” ईसू वींने क्यो, “जटे मूँ जावूँ हूँ वटे थूँ अबे मारा पाच्छे ने आ सके, पण ईंका केड़े थूँ मारा नके आई।”</verse>
				<verse number="37">पतरस वाँने क्यो, “हो परबू, अबाणू मूँ थाँके पाच्छे काँ ने आ सकूँ हूँ? मूँ तो थाँका वाते मारो जीव देबा ने त्यार हूँ।”</verse>
				<verse number="38">ईसू वींने क्यो, “कई थूँ हाँची में मारा वाते आपणो जीव देई? मूँ थाँराऊँ सई-सई केवूँ हूँ के, कूकड़ो जद्याँ तईं ने बोली वतरे थूँ तीन दाण मने ओळकबाऊँ नट जाई।”</verse>
			</chapter>
			<chapter number="14">
				<verse number="1">ईसू आपणाँ चेलाऊँ क्यो, “थाँ दकी मती वेवो, पण परमेसर पे विस्वास राको अन मारा पे भी विस्वास राको।</verse>
				<verse number="2">मारा परमेसर का घर में नरी रेवा की जगाँ हे, यद्याँ ने वेती तो मूँ थाँकाऊँ के देतो। काँके मूँ परमेसर का घर में थाँका वाते जगाँ त्यार करबा ने जावूँ हूँ।</verse>
				<verse number="3">जगाँ बणाया केड़े मूँ पाछो थाँने लेबा ने आऊँ अन पछे आपाँ हातेईस रेवा।</verse>
				<verse number="4">जटे मूँ जवूँ हूँ वटा को गेलो थाँ जाणो हो।”</verse>
				<verse number="5">तो थोमा वाँकाऊँ क्यो, “हो परबू, माँ ने जाणा हाँ के, थूँ कटे जारियो हे। तो गेलो कस्यान जाणा?”</verse>
				<verse number="6">ईसू वींने क्यो, “हाँच, जीवन अन गेलो मूँईस हूँ। मारा बना कुई परमेसर का नके ने जा सकी।</verse>
				<verse number="7">जद्याँ थाँ मने ओळक लेता, तो मारा बाप ने भी जाणा जाता। पण अबे थाँ परमेसर ने जाणो हो अन देक्यो हे।”</verse>
				<verse number="8">फिलिपुस वाँकाऊँ क्यो, “हो परबू, बापू का माने दरसण करई दे, यो माकाँ वाते घणो हे।”</verse>
				<verse number="9">ईसू वींने क्यो, “हे फिलिपुस, मूँ अतरा दनाऊँ थाँरा हाते हूँ, अन कई थूँ मने ने ओळके हे? जणी मने देक्यो हे वणी बापू ने देक्या हे। तो थूँ काँ केवे हे के, ‘माने बापू का दरसण करई दे’?</verse>
				<verse number="10">कई थूँ विस्वास ने करे के, मूँ बापू में हूँ अन बापू मारा में हे? ईं बाताँ मूँ आपणाँ आड़ीऊँ ने केवूँ हूँ, पण बापू मारा में रेन काम करे हे।”</verse>
				<verse number="11">मारो विस्वास करो के, मूँ बाप में हूँ अन बाप मारा में हे, ने तो मारा कामाँ ने देकन मारा पे विस्वास तो करो।</verse>
				<verse number="12">“मूँ थाँकाऊँ सई-सई केवूँ हूँ के, ज्यो मारा पे विस्वास करे हे, वो ज्यो काम मूँ करूँ हूँ वो भी करी। पण अणीऊँ भी मोटा काम करी, काँके मूँ परमेसर के नके जारियो हूँ।</verse>
				<verse number="13">ज्यो कई थाँ मारा नामऊँ मांगो, वो मूँ करूँ, ताँके पूत की वजेऊँ परमेसर की बड़ई वेवे।</verse>
				<verse number="14">यद्याँ थाँ माराऊँ मारा नामऊँ कई मांगो, तो मूँ वो करूँ।”</verse>
				<verse number="15">ईसू आपणाँ चेलाऊँ क्यो, “यद्याँ थाँकाणी माराऊँ परेम राको तो, तो मारी आग्या भी मानो।</verse>
				<verse number="16">मूँ बापऊँ परातना करूँ, अन वीं थाँने एक ओरू हण्डाळ्यो देवे, ताँके वो हमेस्या थाकी लारे रेई।</verse>
				<verse number="17">वाँ पुवितर आत्मा हे। ज्या दनियाने ने मल सके हे, काँके दनियाँ वींने ने देक सके हे अन ने ओळके हे। पण थाँ वींने ओळको हो, काँके वाँ थाँका लारी रेई अन वाँ थाँकामें वास करी।”</verse>
				<verse number="18">“मूँ थाँने एकला ने छोड़ूँ। मूँ थाँका नके आऊँ।</verse>
				<verse number="19">अन थोड़ीक टेम रेग्यो हे पछे ईं दनियाँ में कुई मने ने देकी पण थाँ मने देको। काँके मूँ जीवूँ हूँ अन थाँ भी जीवो।</verse>
				<verse number="20">वीं दन थाँ जाणो के, मूँ आपणाँ बाप में हूँ अन थाँ मारा में अन मूँ थाँकामें हूँ।</verse>
				<verse number="21">जीं मारी आग्या माने हे। वींइस माराऊँ परेम करे हे अन ज्यो माराऊँ परेम राके हे, वाँकाऊँ मारा परमेसर परेम राकी, अन मूँ वाँकाऊँ परेम राकूँ अन आपणाँ खुद ने वाँका पे परगट करूँ।”</verse>
				<verse number="22">दूजो यहूदो ज्यो इसकरियोती ने हो वणी क्यो, “हो परबू, यो कस्यान वेवे के, थूँ आपणाँ खुद ने माकाँ पे परगट करणो छावो हे पण दनियाँ पे ने?”</verse>
				<verse number="23">ईसू वींने क्यो, “यद्याँ कुई माराऊँ परेम राकी, तो वो मारा बचनाने मानी, अन मारा बापू वाँकाऊँ परेम करी अन माँ वाँका नके आवा अन वाँका हाते रेवा।</verse>
				<verse number="24">ज्यो कुई माराऊँ परेम ने करे वो मारा बचना ने ने माने हे। ज्यो बचन थाँ हुणो हो वो मारो ने हे पण मारा बापू परमेसर को हे, जणा मने खन्दायो हे।”</verse>
				<verse number="25">“ईं बाताँ में थाँका लारे रेता तका किदी हे।</verse>
				<verse number="26">पण हण्डाळी को मतलब पुवितर आत्मा जिंने परमेसर मारा नामऊँ खन्दाई, वाँ थाँने हारी बाताँ हिकाई अन ज्यो कई में थाँकाऊँ क्यो हे, वो हारोई थाँने आद अवाड़ी।</verse>
				<verse number="27">“मूँ थाँने सान्ती देन जारियो हूँ, आपणी खुद की सान्ती थाँने देवूँ हूँ। दनियाँ देवे हे वस्यान मूँ थाँने ने देवूँ हूँ। थाँको मन दकी ने वेवे अन ने थाँ दरपे।</verse>
				<verse number="28">थाँ हुण्यो हे के में थाँकाऊँ क्यो, ‘मूँ जारियो हूँ पण थाँका नके पाछो आऊँ।’ यद्याँ थाँ माराऊँ परेम राकता तो थाँ राजी वेता के, मूँ बापू परमेसर का नके जारियो हूँ। काँके बापू परमेसर माराऊँ मोटा हे।</verse>
				<verse number="29">यो हारोई वेबा के पेल्याँई में थाँने हारोई के दिदो, ताँके यो वे जदी थाँ हाराई विस्वास करो।</verse>
				<verse number="30">“मूँ अबे थाँकाऊँ ओरी बाताँ ने कर सकूँ हूँ, काँके अणी दनियाँ का हाकम सेतान आवे हे। ईंको मारा पे कई हक ने हे।</verse>
				<verse number="31">पण यो ईं वाते वेवे हे के, दनियाँ हमजे के, मूँ बापू परमेसरऊँ परेम राकूँ हूँ अन जस्यान बाप मने आग्या दिदो हे वस्यानीस करूँ हूँ। “अबे उटो अटाऊँ चाला परा।”</verse>
			</chapter>
			<chapter number="15">
				<verse number="1">ईसू क्यो, “हाँची अंगूरा की वेलड़ी मूँ हूँ अन बापू परमेसर ईं बाग को माळी हे।</verse>
				<verse number="2">ज्याँ डाळी मारा में हे अन फळ ने लावे हे, वो वींने काट नाके हे अन ज्या फळ देवे हे, वींने वो छांगे हे, ताँके वाँ साप वे सके अन ओरी फळ लावे।</verse>
				<verse number="3">थाँ तो वणा बचनाँने मानबा का मस ज्यो में थाँकाऊँ क्यो हे पेल्याऊँ साप हो।</verse>
				<verse number="4">थाँ मारा में बण्या रेवो अन मूँ थाँकामें बण्यो रेऊँ। जस्यान डाळी यद्याँ अंगूरा की वेलड़ी में लागी ने रेवे हे तो आपणाँ खुदऊँ ने फळ सके हे। वस्यानीस थाँ मारा बना फळ ने ला सको।”</verse>
				<verse number="5">“मूँ अंगूरा की वेलड़ी हूँ, थाँ डाल्याँ हो, ज्यो मारा में बणी रेवे हे अन मूँ वाँमें वाँ हेला फळ देवे हे। काँके माराऊँ न्यारा वेन थाँ कई भी ने कर सको हो।</verse>
				<verse number="6">ज्यो मारा में बण्यो ने रेवे, वो वणी बेकार डाळी का जस्यान हे जिंने तोड़न हूँकबा का वाते फेक दिदो जावे हे। अस्यी डाळ्याँ बळीता का वाते काम आवे हे।</verse>
				<verse number="7">यद्याँ थाँ मारा में बण्या रेवो अन मारा बचन थाँकामें बण्यो रेई, तो ज्यो भी छावो माँगो वो थाँका वाते वेजई।</verse>
				<verse number="8">परमेसर की मरजी का जस्यान काम करो अणीऊँ मारा बापू परमेसर की मेमा वेई, तद्याँई थाँ मारा चेला केवावो।</verse>
				<verse number="9">“जस्यान बाप माराऊँ परेम किदो, वस्यानीस मूँ थाँकाऊँ परेम राकूँ हूँ। मारा परेम में बण्या तका रेवो।</verse>
				<verse number="10">यद्याँ थाँ मारी आग्या मानो, तो मारा परेम में बण्या रेवो जस्यान के, मूँ आपणाँ बाप की आग्या मानी हे अन वाँका परेम में बण्या रेवूँ हूँ।</verse>
				<verse number="11">“में ईं बाताँ थाँकाऊँ ईं वाते किदी, ताँके मारो आणन्द थाँने मले अन थाँको आणन्द पूरो वे जावे।</verse>
				<verse number="12">मारी आग्या या हे के, जस्यान में थाँकाऊँ परेम किदो हे वस्यानीस थाँ भी एक-दूजाऊँ परेम राको।</verse>
				<verse number="13">अणीऊँ मोटो परेम कस्योई ने हे के, कुई आपणाँ दोस्त के वाते आपणो जीव दी देवे।</verse>
				<verse number="14">ज्या आग्या मूँ थाँने देवूँ हूँ, यद्याँ वींने मानो तो थाँ मारा दोस्त हो।</verse>
				<verse number="15">अबेऊँ मूँ थाँने दास ने केवूँ, काँके दास ने जाणे हे के, वाँको मालिक कई करे हे। पण थाँने मूँ दोस्त केन बतळाया हे, काँके में ज्यो बाताँ आपणाँ बापऊँ हूणी, वीं हारी थाँने बता दी हे।</verse>
				<verse number="16">थाँ मने ने चुण्यो पण में थाँने चुण्या हे अन थाँने ठेराया हे के, थाँ अस्या फळ-फळो जीं हमेस्या बण्या रेवे। तद्याँ थाँ मारा नामऊँ ज्यो कई बापऊँ मांगो, वो थाँने दे।</verse>
				<verse number="17">ईं वाते में थाँने आग्या दिदी हे के, थाँ एक-दूजाऊँ परेम राको।”</verse>
				<verse number="18">“यद्याँ दनियाँ थाँकाऊँ दसमणी राके हे तो थाँ जाणो हो के, वाँ थाँकाऊँ पेल्या माराऊँ दसमणी राके हे।</verse>
				<verse number="19">यद्याँ थाँ दनियाँ का वेता, तो दनियाँ थाँकाऊँ परेम राकती। पण ईं वाते के, थाँ दनियाँ का ने हो पण में थाँने दनियाँ मेंऊँ चुण लिदा हे ईं वाते दनियाँ थाँकाऊँ दसमणी राके हे।</verse>
				<verse number="20">ज्यो बाताँ में थाँकाऊँ किदी ही के, दास आपणाँ मालिकऊँ मोटो ने वेवे हे। वाँने आद राकज्यो। यद्याँ वणा मने हतायो हे, तो थाँने भी हताई। यद्याँ वणा मारी बाताँ मानी, तो थाँकी भी मानी।</verse>
				<verse number="21">पण वीं यो हारोई मारा नाम का मस थाँका हाते करी, काँके वणा मने खन्दाबावाळा ने ने ओळक्यो हो।</verse>
				<verse number="22">यद्याँ मूँ ने आतो अन वाँकाऊँ बाताँ ने करतो, तो वीं पापी ने वेता, पण अबे वाँका नके वाँके पापऊँ बचंबा का वाते कई आळको ने हे।</verse>
				<verse number="23">ज्यो माराऊँ दसमणी राके हे, वो मारा बापऊँ भी दसमणी राके हे।</verse>
				<verse number="24">यद्याँ मूँ वाँका में वीं काम ने करतो, जिंमें किदो, तो वीं पापी ने बणता। पण अबे वाँकाणी वणा कामाँ ने देक्या हे, तद्याँ भी वीं माराऊँ अन मारा बापूऊँ दसमणी किदी।</verse>
				<verse number="25">यो ईं वाते व्यो के, वो बचन पूरो वे, ज्यो वाँके सास्तर में लिक्यो तको हे के, ‘वाँकाणी माराऊँ फालतू में दसमणी किदी।’</verse>
				<verse number="26">“पण जद्याँ वो हण्डाळी आई, जिंने मूँ थाँका नके बाप का आड़ीऊँ खन्दाऊँ, ईंको मतलब हाँच की आत्मा ज्यो बाप का आड़ीऊँ हे, तो वाँ मारी गवई देई।</verse>
				<verse number="27">अन थाँ भी मारा गवा हो, काँके थाँ ठेटऊँ मारा हाते रिया हो।</verse>
			</chapter>
			<chapter number="16">
				<verse number="1">“ईं बाताँ में थाँकाऊँ ईं वाते क्यो हो, ताँके थाँ पाप ने पड़ो।</verse>
				<verse number="2">वीं थाँने परातना घरऊँ बारणे काड़ देई, पण वा टेम आई जद्याँ कुई थाँने मार नाकी, अन अस्यान करन वी हमजी के, ‘आपाँ परमेसर की सेवा कररिया हे।’</verse>
				<verse number="3">वीं यो ईं वाते करी काँके, वीं बापू परमेसर ने ने जाणे अन ने मने जाणे हे।</verse>
				<verse number="4">पण में ईं बाताँ ईं वाते थाँने क्यो के, जद्याँ अणाको टेम आई तो थाँने आद आ जई के, में थाँने पेल्याई के दिदो हो। “में सरू में थाँने ईं बाताँ ईं वाते ने किदी, काँके मूँ थाँका हाते हो।</verse>
				<verse number="5">अबे मारी टेम आगी हे के, मूँ मने खन्दाबावाळा का नके जाऊँ हूँ अन थाकामूँ कई माराऊँ ने पुच्छे के, ‘थूँ कटे जारियो हे?’</verse>
				<verse number="6">पण में ईं बाताँ थाँकाऊँ किदी हे, ईं वाते थाँका मन दकऊँ भरग्या हे।</verse>
				<verse number="7">तो भी मूँ थाँकाऊँ सई केवूँ हूँ के, मारो जाणो थाँका वाते हव हे, काँके यद्याँ मूँ ने जाऊँ तो वो हण्डाळी थाँका नके ने आई। पण यद्याँ मूँ जाऊँ, तो वींने थाँका नके खन्दा देऊँ।</verse>
				<verse number="8">जद्याँ वो आई तो वो साबत करी के, पाप, धारमिकता अन परमेसर का न्याव का बारा में दनियाँ का लोगाँ की होच गलत हे।</verse>
				<verse number="9">वो पाप का बारा में ईं वाते बताई, काँके दनियाँ का मनकाँ को मारा पे विस्वास ने करणो पाप हे।</verse>
				<verse number="10">वो धारमिकता की बात ईं वाते बताई, काँके मूँ बापू का नके जारियो हूँ अन थाँ अबे ओरी मने ने देक पावो।</verse>
				<verse number="11">अन न्याव की बात ईं वाते बताई, काँके परमेसर पेल्याईं ते कर मेल्यो हो के, ईं दनियाँ का हाकम ज्यो सेतान हे, वो दोसी ठेरायो ग्यो।</verse>
				<verse number="12">“मने थाँकाऊँ दूजी ओरी नरी बाताँ केणी हे, पण अबाणू थाँ वाँने सेण ने कर सको।</verse>
				<verse number="13">पण जद्याँ हाँच की आत्मा आई, तो थाँने हारई हाँच को गेलो बता देई, काँके वाँ खुद का आड़ीऊँ ने केई पण ज्यो कई हूणी वो केई अन आबावाळी बाताँ थाँने बताई।</verse>
				<verse number="14">वाँ मारी मेमा करी, काँके वाँ मारी बाताँ मूँ लेन थाँने बताई।</verse>
				<verse number="15">ज्यो कई परमेसर को हे, वो हारोई मारो हे। ईं वाते में क्यो के, वाँ पुवितर आत्मा मारी बाताँ मूँ लेन थाँने बताई।</verse>
				<verse number="16">“थोड़ाक टेम केड़े थाँ मने ने देको अन पछे थोड़ीक टेम केड़े मने देको।”</verse>
				<verse number="17">तद्याँ वाँका कुई चेला एक-दूजाऊँ क्यो, “यो कई हे ज्यो यो आपाऊँ केवे हे, ‘थोड़ीक टेम केड़े मने थाँ ने देको अन पछे थोड़ीक टेम केड़े थाँ मने देको,’ अन ‘यो ईं वाते के, मूँ बापू का नके जाऊँ हूँ’?</verse>
				<verse number="18">अन या ‘थोड़ीक टेम केड़े’ ज्यो यो केवे हे, या कई बात हे? माँके हमज में ने आरियो हे के, यो कई केवे हे।”</verse>
				<verse number="19">ईसू यो हमजन के, “वीं माराऊँ कई पूँछणा छारिया हे।” ईं वाते वणा क्यो, “कई थाँ एक-दूजाऊँ मारी ईं बाताँ का बारा पूँछरिया हो के, ‘थोड़ीक टेम केड़े थाँ मने ने देको अन पछे थोड़ीक टेम में मने देको’?</verse>
				<verse number="20">मूँ थाँने सई-सई केवूँ हूँ के, थाँ रोवो अन होक करो, पण आकी दनियाँ राजी वेई। थाँने दुक वेई, पण थाँको दुक सक में बदल जाई।</verse>
				<verse number="21">बाळक जणवा की टेम लुगई ने पिड़ा वेवे हे, काँके वाँके दुक की घड़ी हे। पण जद्याँ वाँ बाळक ने जनम दे देवे, तो वाँ अणी खुसीऊँ के, दनियाँ में एक बाळक जनम्यो हे, वीं दुक की घड़ी ने पाच्छी आद ने राके हे।</verse>
				<verse number="22">ईं वाते थाँने भी अबाणू दुक हे, पण मूँ थाँकाऊँ पाछो मलूँ अन थाँको जीवड़ो खुसीऊँ भर जाई अन थाँकी खुसी थाँकाऊँ कुई ने कोस सकी।</verse>
				<verse number="23">“वीं दन थाँ माराऊँ कई ने पूछो। मूँ थाँने सई-सई केवूँ हूँ यद्याँ मारा बापूऊँ कई मांगो तो वो मारा नामऊँ थाँने दी देई।</verse>
				<verse number="24">अबाणू तईं थाँ मारा नामऊँ कई ने माग्यो, मांगो तो पावो अणीऊँ थाकी खुसी पुरी वे जाई।</verse>
				<verse number="25">“में ईं बाताँ थाँकाऊँ केण्याँ में किदी हे। पण वाँ टेम आरी हे के, मूँ थाँकाऊँ पाच्छी केण्याँ में बाताँ ने करूँ। पण खुलन थाँने बाप का बारा में बताऊँ।</verse>
				<verse number="26">वीं दन थाँ खुद मारा नामऊँ मांग सको अन मने या जरूत ने पड़ी के, मूँ थाँका वाते बापऊँ मांगू।</verse>
				<verse number="27">मारा बापू तो खुदई थाँकाऊँ परेम करे हे, काँके थाँ माराऊँ परेम किदो अन यो भी विस्वास किदो हे के, मूँ परमेसर का आड़ीऊँ आयो हूँ।</verse>
				<verse number="28">हा, मूँ परमेसर का आड़ीऊँ ईं दनियाँ में आयो अन अबे ईं दनियाँ ने छोड़न बापू का नके जारियो हूँ।”</verse>
				<verse number="29">वाँका चेला क्यो, “देको, अबाणू थाँ खुलन बाताँ केरिया हो अन कुई केणी ने केरिया हो।</verse>
				<verse number="30">अबे माँ जाणग्या के, थूँ हारोई जाणे हे अन ईंमें थाँकी मरजी कोयने हे के, कुई थाँकाऊँ कई पूछे। अणीऊँ माँ विस्वास करा हाँ के, थूँ परमेसर की आड़ीऊँ खन्दायो तको हे।”</verse>
				<verse number="31">यो हुणन ईसू वाँने क्यो, “कई आकरी में थाँने विस्वास वेग्यो हे?</verse>
				<verse number="32">देको, वा टेम आरी हे पण आगी हे के, थाँ हाराई अटने-वटने वेन आपणो आपणो गेलो नापो, अन मने एकलो छोड़ देवो। पण मूँ एकलो कोयने काँके बापू मारे लारे हे।</verse>
				<verse number="33">में थाकाँऊँ ईं बाताँ ईं वाते किदी के, थाँने माराऊँ सान्ती मले, दनियाँ में तो थाँने दुक मल्यो हे पण हिम्मत राको, में दनियाँ ने जीत लिदी हे।”</verse>
			</chapter>
			<chapter number="17">
				<verse number="1">ईसू ईं बाताँ किदी अन आपणी मुण्डो हरग आड़ी करन क्यो, “ओ मारा बापू, वाँ टेम आगी हे, आपणाँ पूत की मेमा करो, ताँके पूत भी थाकी मेमा करे।</verse>
				<verse number="2">काँके थाँ वींने हाराई मनकाँ का ऊपरे अदिकार दिदो के, ज्याँने थाँ वींने दिदा हे वणा हाराई ने वो अनंत जीवन देवे।</verse>
				<verse number="3">अन अनंत जीवन यो हे के, वीं एकाएक हाँचा परमेसर ने अन ईसू मसी ने, जिंने थाँ खन्दायो हे, ओळके।</verse>
				<verse number="4">ज्यो काम थाँ मने करबा ने दिदो हो, वींने पूरो करन में धरती पे थाँकी मेमा परगट किदी हे।</verse>
				<verse number="5">अन अबे हो बापू, थूँ आपणाँ हाते मारी मेमा वीं मेमाऊँ करज्यो दनियाँ का बणावाऊँ पेल्याई आपणाँ हाते ही।</verse>
				<verse number="6">“में थाँका मेमावान नाम ने वणा मनकाँ ने परगट किदा हे, ज्याँने थाँ दनियाऊँ मने दिदा। वीं हाराई थाँका हा अन थाँ वणा हाराई ने मने दिदा अन वाँकाणी थाँका बचना ने मान लिदा हे।</verse>
				<verse number="7">अबे वीं हमजग्या हे के, ज्यो कई थाँ मने दिदो, वो हारोई थाँका आड़ीऊँ हे।</verse>
				<verse number="8">काँके ज्यो बचन थाँ मने दिदो, में वाँने वोईस बचन दिदो। अन वणा वींको विस्वास किदो। अन वीं ईं हाँच ने जाण लिदो हे के, मूँ थाकी आड़ीऊँ आयो हूँ, अन विस्वास कर लिदो हे के, थाँईस मने खन्दायो हे।</verse>
				<verse number="9">“मूँ वाँका वाते परातना करूँ हूँ, मूँ दनियाँ का वाते परातना ने करूँ हूँ। पण वाँका वाते ज्याँने थाँ मने दिदा, काँके वी हाराई थाँका हे।</verse>
				<verse number="10">अन ज्यो कुई मारा हे वीं हाराई थाँका हे, अन ज्यो कुई थाँको हे वो मारो हे अन अणाऊँ मारी मेमा वीं हे।</verse>
				<verse number="11">मूँ अबे दनियाँ में ने रेऊँ, पण ईं हाराई दनियाँ में रेई, अन मूँ थाँका नके आवूँ हूँ। हो पवितर बापू आपणाँ वीं नाम की तागतऊँ ज्यो थाँ मने दिदो हे, वाँकी रुकाळी करो, ताँके वीं हाराई आपणे जस्यान एक वे सके।</verse>
				<verse number="12">जद्याँ मूँ वाँका लारे हो, तो में थाँका नाम की तागतऊँ ज्यो थाँ मने दिदो हे, वाँकी रुकाळी किदी। में वाँने हमाळ राक्या अन बेस वीं मनक छोड़न ज्यो नास का आड़ी लेजाबावाळा गेले चाल पड़्यो, ओर किंकोई नास ने व्यो, ईं वाते के पवितर सास्तर में ज्यो बतायो ग्यो वो पूरो वेवे।</verse>
				<verse number="13">“अबाणू मूँ थाँका नके आवूँ हूँ, पण ईं हारी बाताँ दनियाँ ने बताऊँ हूँ, ताँके वीं मारा आणन्दऊँ भर जावे।</verse>
				<verse number="14">में थाँको बचन वाँने दिदो, अन दनियाँ वाँकाऊँ दसमणी किदी, काँके जस्यान मूँ दनियाँ को ने, वस्यान वीं भी दनियाँ का कोयने हे।</verse>
				<verse number="15">मूँ या परातना ने करूँ के, थूँ वाँने दनियाऊँ उठा ले, पण या के, थूँ वाँने बुरईऊँ बंचान राक।</verse>
				<verse number="16">जस्यान मूँ दनियाँ को ने हूँ, वस्यानीस वीं भी दनियाँ का ने हे।</verse>
				<verse number="17">हाँचऊँ वाँने पुवितर करन थाँरी सेवा का वाते त्यार कर। थाँका बचन हाँचा हे।</verse>
				<verse number="18">जस्यान थाँ मने दनियाँ में खन्दायो, वस्यानीस में भी वाँने दनियाँ में अलग अलग जगाँ में खन्दाया हे।</verse>
				<verse number="19">मूँ वाँका वाते खुद ने पुवितर करन थाँरी सेवा करबा का वाते देवूँ हूँ। जणीऊँ वीं भी हाँचऊँ पुवितर वेन थाँरी सेवा का वाते खुद ने दिदे।</verse>
				<verse number="20">“मूँ बेस अणाका वातेईस परातना ने करूँ हूँ, पण वाँका वाते भी जीं अणाका बचना ने हुणन मारे पे विस्वास करी।</verse>
				<verse number="21">हो बापू, मारी या अरज हे के, वीं हाराई एक वेवे, जस्यान मूँ थाँकामें हूँ अन थाँ मारा में हो, वस्यानीस वीं भी आपाँ में एक वेवे, जणीऊँ दनियाँ विस्वास करे के, थाँ मने खन्दायो हे।</verse>
				<verse number="22">वाँ मेमा ज्या थाँ मने दिदी में वाँने दिदी हे, ताँके वीं वस्यानीस एक वेवे जस्यान आपाँ एक हाँ।</verse>
				<verse number="23">मूँ वाँका में अन थाँ मारा में वेवो, जणीऊँ वीं पुरी तरियाऊँ आपाँ में एक वे जावे। अन दनियाँ जाणे के, थाँ मने खन्दायो हे, अन जस्यान थाँ माराऊँ परेम किदो वस्यानीस वाँकाऊँ भी परेम करो हो।</verse>
				<verse number="24">“हो बापू, मूँ छावूँ हूँ के, ज्याँने थाँ मने दिदा हे, वीं जटे मूँ हूँ वटे वीं भी मारा लारे वेवे। ताँके वीं मारी वणी मेमा ने देके ज्यो थाँ मने दिदी, काँके थाँ दनियाँ का बणावाऊँ पेल्याऊँ माराऊँ परेम किदो।</verse>
				<verse number="25">हो धरमी बापू, दनियाँ थाँने ने ओळक्यो, पण मूँ थने ओळकूँ हूँ, अन मारा विस्वासी भी जाणे के, थाँईस मने खन्दायो हे।</verse>
				<verse number="26">में थाँको मेमावान नाम ने वाँने बतायो अन बतातो रेऊँ, जणीऊँ ज्यो परेम थाँने माराऊँ हो वाँका में भी रेवे, अन मूँ वाँका में रेवूँ।”</verse>
			</chapter>
			<chapter number="18">
				<verse number="1">ईसू या परातना करिया केड़े आपणाँ चेला की लारे किद्रोन वाळा के पार ग्या। वटे एक बाग हो। जिंमें वीं अन वाँका चेला ग्या।</verse>
				<verse number="2">वाँने धोकाऊँ पकड़बावाळो यहूदो भी वाँ जगाँ जाणतो हो। काँके ईसू नरी दाण आपणाँ चेला की लारे वटे जाया करता हा।</verse>
				<verse number="3">तद्याँ यहूदो रोमी सेना का एक दल ने अन मुक्य याजकाँ अन फरीसियाँ की आड़ीऊँ मन्दर का चोकीदाराँ ने लेन वटे आयो। अन वाँका हाताँ में मसाळ, लालटेन अन हत्यार हा।</verse>
				<verse number="4">तद्याँ ईसू वणा हारी बाताँ ने ज्यो वींपे आबावाळी ही जाणन आगे आयो अन वाँने क्यो, “थाँ किंने होदरिया हो?”</verse>
				<verse number="5">वाँकाणी वाँने क्यो, “नासरत का ईसू ने।” ईसू वाँकाऊँ क्यो, “मूँ वोईस हूँ।” वाँने धोकाऊँ पकड़वाबावाळो यहूदो भी वाँकी लारे ऊबो हो।</verse>
				<verse number="6">जद्याँ ईसू ओ क्यो के, “मूँ वोईस हूँ,” तो वीं तरत पाच्छे हरक्याँ अन रेटे पड़ग्या।</verse>
				<verse number="7">तद्याँ ईसू वाँने पाछो पूँछ्यो, “थाँ किंने होदरिया हो?” वणा क्यो, “नासरत का ईसू ने।”</verse>
				<verse number="8">ईसू वाँने जबाव दिदो, “मूँ तो थाँने के चुक्यो हूँ के, मूँ वोईस हूँ। यद्याँ मनेइस होदरिया हो तो अणाने जाबा दो।”</verse>
				<verse number="9">ओ वणा ईं वाते क्यो, ताँके वो बचन पूरो वेवे ज्यो वणा क्यो हो, “ज्याँने थाँ मने दिदा हे वाँका मूँ एक ने भी ने खुवावे।”</verse>
				<verse number="10">तद्याँ समोन पतरस तरवार ज्या वींका नके ही ताणी अन मायाजक का दास को जीमणो कान्दड़ो काट दिदो। वीं दास को नाम मलकुस हो।</verse>
				<verse number="11">पण ईसू पतरस ने क्यो, “आपणी तरवार म्यान में राक। ज्यो दुक को प्यालो मारा बापू मने दिदो हे, कई मूँ वींमूँ ने पीवूँ?”</verse>
				<verse number="12">तद्याँ रोमी सपायाँ अन वाँका सूबेदार अन यहूदियाँ का मन्दर का चोकीदार ईसू ने पकड़ लिदा अन बाँदन,</verse>
				<verse number="13">पेल्याँ वींने हन्ना का नके लेग्या। काँके हन्ना वीं वर का मायाजक केफा को होरो हो।</verse>
				<verse number="14">ओ वोईस केफा हो, जणी यहूदियाँ अदिकारियाँ ने सला दिदी ही के, हाराई मनकाँ के मरबा बजे एक मनक को मरणो हव हे।</verse>
				<verse number="15">समोन पतरस अन एक दूजो चेलो भी ईसू का पाच्छे आया। ओ दूजो चेलो मोटा याजक के जान-पेचाणवाळो हो। ईं वाते वो ईसू की लारे मोटा याजकाँ का आगंणा में परोग्यो।</verse>
				<verse number="16">पण पतरस बारणे बाणा पे ऊबो रियो। तद्याँ वो दूजो चेलो ज्यो मोटा याजक की पेचाणवाळो हो, बारणे आयो अन चोकीदारणीऊँ केन पतरस ने मयने लेग्यो।</verse>
				<verse number="17">वटे एक दासी ज्या चोकीदारणी ही। वणी पतरसऊँ क्यो, “कई थूँ भी तो ईं मनक का चेला मयनूँ एक ने हे?” वणी क्यो, “ने, ने मूँ कोयने हूँ।”</verse>
				<verse number="18">दास अन चोकीदार ठन्डऊँ बंचबा के वाते धूणी लगान तापरिया हा अन पतरस भी वाँका हाते ऊबो वेन तापरियो हो।</verse>
				<verse number="19">तद्याँ मोटे याजक ईसुऊँ वाँका चेला का बारा में अन वाँकी हिक का बारा में पूँछ्यो।</verse>
				<verse number="20">ईसू वाँने क्यो, “में हाराऊँ खुलन बाताँ किदी। में परातना घर अन मन्दर में, जटे हारई मनक भेळा व्या करता हा। वटे हरदाण हिक दिदी अन छाने कई भी ने क्यो।</verse>
				<verse number="21">पछे थूँ माराऊँ कई पूछे हे? हुणबावाळाऊँ पुछ के, में वाँकाऊँ कई क्यो। वीं जाणे हे के, में कई-कई क्यो।”</verse>
				<verse number="22">जद्याँ ईसू अस्यान क्यो तो मन्दर को एक चोकीदार ईसू का नकेईस ऊबो हो वणी ईसू के छापट मारन क्यो, “कई मोटा याजक ने जवाब ईं तरिया देवे हे?”</verse>
				<verse number="23">ईसू वींने जबाव दिदो, “यद्याँ में गलत क्यो, तो हाराई का हामे साबत कर। अन यद्याँ में सई क्यो हे तो मारे काँ ठोकी?”</verse>
				<verse number="24">तद्याँ हन्ना ईसू ने बन्दयो तकोईस मोटा याजक केफा का नके खन्दा दिदो।</verse>
				<verse number="25">समोन पतरस ऊबो तको तापरियो हो। तद्याँ कणी वींने क्यो, “कई थूँ भी तो ईंका चेला मूँ एक हे?” पण पतरस नटग्यो अन क्यो, “ने मूँ ने हूँ।”</verse>
				<verse number="26">मोटा याजक का दासाँ मूँ एक ज्यो वींका परवार को हो। जिंको पतरस कान्दड़ो काट नाक्यो हो वणी क्यो, “कई में थने ईंका हाते बाग में ने देक्यो हो?”</verse>
				<verse number="27">पतरस पाछो एक दाण ओरी नटग्यो अन तरत कूकड़ो बोल ग्यो।</verse>
				<verse number="28">तद्याँ वीं ईसू ने केफा का नकेऊँ रोमी राजपाल का दरबार में लेग्या अन भाग-फाट्याँ को टेम हो, पण यहूदी अदिकारी ज्यो वींने लेग्या हाँ वीं खुद दरबार मयने ने ग्या, ताँके असुद ने वेवे, पण फसे का तेवार को खाणो खा सके।</verse>
				<verse number="29">तद्याँ पिलातुस वाँका नके बारणे आयो अन क्यो, “थाँ अणी मनक पे किंको दोस लगावो हो?”</verse>
				<verse number="30">वाँकाणी वींने जवाब दिदो, “यद्याँ यो अपरादी ने वेतो तो माँ ईंने थाँरा हाताँ में ने हूँपता।”</verse>
				<verse number="31">पिलातुस वाँने क्यो, “थाँ ईंने ले जावो अन आपणाँ नेमा के हस्याबूऊँ न्याव करो।” यहूदी लोगाँ वींने क्यो, “माँने यो हक ने हे के, किंने मोत को दण्ड देवा।”</verse>
				<verse number="32">यो ईं वाते व्यो के, ईसू की वाँ बात पुरी वेवे ज्याँ वणा आपणी मोत का बारा क्यो हो के, वींकी मोत कस्यान वेई।</verse>
				<verse number="33">तद्याँ पिलातुस पाछो दरबार में ग्यो अन ईसू ने बलान वणीऊँ पूँछ्यो, “कई थूँ यहूदियाँ को राजा हे?”</verse>
				<verse number="34">ईसू वींने क्यो, “कई थाँ आ बात आपणाँ आड़ीऊँ केवो हो कन दूजाँ जणा मारा बारा में थाँने की हे?”</verse>
				<verse number="35">पिलातुस क्यो, “कई मूँ यहूदी हूँ? थाराईस यहूदी मनकाँ अन मुक्य याजकाँ थने मारा हात में हूँप्यो हे। थें अस्यो कई किदो हे?”</verse>
				<verse number="36">ईसू वींने क्यो, “मारो राज ईं दनियाँ को ने हे। यद्याँ मारो राज ईं दनियाँ को वेतो तो मने मानबावाळा लड़ता के, मूँ यहूदियाँ का हाताँ में हूँप्यो ने जाऊँ। पण मारो राज अटा को ने हे।”</verse>
				<verse number="37">पिलातुस वींने क्यो, “तो कई थूँ राजा हे?” ईसू वींने क्यो, “थूँ केवे हे के, मूँ राजा हूँ। में ईं वाते जनम लिदो अन ईं वाते दनियाँ में आयो हूँ के, हाँच की गवई दूँ अन ज्यो कुई हाँचो हे, वो मारो बचन हुणे हे।”</verse>
				<verse number="38">पिलातुस वींने क्यो, “हाँच कई हे?” ओ केन वो पाछो यहूदी मनकाँ का नके ग्यो अन वाँने क्यो, “मूँ तो वींका में कई दोस ने पावूँ हूँ।</verse>
				<verse number="39">पण, थाँकी आ रीत हे के, मूँ फसे का तेवार पे थाँका वाते कणी एक केदी ने छोड़ दूँ। ईं वाते थाँ छावो, तो मूँ अणी ‘यहूदियाँ का राजा’ ने छोड़ दूँ?”</verse>
				<verse number="40">तद्याँ वणा कल्ड़ो हाको करन क्यो, “ईंने मती छोड़ो, पण माकाँ वाते बरब्बा ने छोड़ दो।” बरब्बा एक दंगो करबावाळो हो।</verse>
			</chapter>
			<chapter number="19">
				<verse number="1">तद्याँ पिलातुस ईसू ने पकड़वान कोड़ा लगवाया।</verse>
				<verse number="2">पछे सपायाँ काँटा की डाळ्याँ को मुकट गूँतन ईसू का माता पे मेल दिदो। अन वींने दरबारी गाबा पेरायाँ।</verse>
				<verse number="3">अन वींका नके आन क्यो, “यहूदियाँ का राजा अमर रेवे!” अन वींके रेपटाँ मेली।</verse>
				<verse number="4">तद्याँ पिलातुस पाछो बारणे आन लोगाऊँ क्यो, “देको, मूँ वींने थाँका नके पाछो बारणे लावूँ हूँ। ईं वाते थाँ हमजो के, मूँ वींमें कई भी दोस ने पावूँ हूँ।”</verse>
				<verse number="5">तद्याँ ईसू काँटा को मुकट अन दरबारी गाबा पेरिया तका बारणे निकळ्यो अन पिलातुस मनकाँऊँ क्यो, “देको, ओ रियो वो मनक।”</verse>
				<verse number="6">जद्याँ मोटा याजकाँ अन मन्दर का चोकीदाराँ वींने देक्यो, तो हाको करन क्यो, “ईंने हूळी पे चड़ई दो, ईंने हूळी पे चड़ई दो।” पिलातुस वाँकाऊँ क्यो, “थाँईस ईंने हूळी पे चड़ावो, काँके में ईंमें कई दोस ने पायो हे।”</verse>
				<verse number="7">यहूदी मनकाँ वींने क्यो, “आपणो भी नेम हे अन वीं नेमा का हस्याबूऊँ वो मोत के घाट उतारबा के लायक हे। काँके अणी खुद ने परमेसर को पूत बतायो हे।”</verse>
				<verse number="8">जद्याँ पिलातुस आ बात हूणी, तो वो भी घणो दरपग्यो।</verse>
				<verse number="9">अन पछे दरबार का मयने जान ईसुऊँ क्यो, “थूँ कटा को हे?” पण, ईसू वींने कई जबाव ने दिदो।</verse>
				<verse number="10">ईंपे पिलातुस ईसुऊँ क्यो, “थूँ माराऊँ काँ ने बोलरियो हे? कई थूँ ने जाणे के, थने छोड़बा को हक मारा नके हे अन थने हूळी पे चड़ाबा को भी मने हक हे?”</verse>
				<verse number="11">ईसू जवाब दिदो, “यद्याँ परमेसर थाँने मारा पे यो हक ने देता, तो थाँ कई ने कर सकता। तो थारो मारा पे कई हक ने वेतो। ईं वाते जणा मने थाँरा हाताँ में हूँप्यो हे, वीं थाँराऊँ भी हेला पापी हे।”</verse>
				<verse number="12">ईंपे पिलातुस वींने छोड़ देणो छायो हो। पण, यहूदी मनकाँ ज्योर की हाको करन क्यो, “यद्याँ थूँ ईंने छोड़ हे, तो थूँ रोम राजा का हण्डाळ्यो ने हे। ज्यो कुई खुद ने राजा बणावे हे। वो रोमी सरकार को विरोदी हे।”</verse>
				<verse number="13">ईं बाताँ हुणन पिलातुस ईसू ने बारणे लायो अन वटे न्याव की गाद्दी पे बेटग्यो, वीं जगाँ ने भाटो को चबुतरो भी केता हो। जिंने इबरानी भासा में “गब्बता” भी केता हा।</verse>
				<verse number="14">यो फसे का तेवार की त्यारी को दन हो अन दपराँ की बारा बज्याँ के लगे-भगे टेम हो। तद्याँ पिलातुस यहूदियाँऊँ क्यो, “देको, ओ रियो थाँको राजा।”</verse>
				<verse number="15">पण, वीं ओरी ज्योरऊँ हाको करन क्यो, “ईंने मारी नाको, ईंने मारी नाको, ईंने हूळी पे चड़ई दो।” पिलातुस वाँने क्यो, “कई थाँ छावो हो के, मूँ थाँका राजा ने हूळी पे चड़ई दूँ?” मुक्य याजकाँ जबाव दिदो, “रोमी राजा ने छोड़न माँको कुई दूज्यो राजा कोयने हे।”</verse>
				<verse number="16">तद्याँ पिलातुस ईसुने वाँका हाताँ में हूँप दिदो, ताँके वींने हूळी पे चड़ायो जावे। तद्याँ रोमी सपायाँ ईसू ने पकड़न लेग्या।</verse>
				<verse number="17">अन ईसू आपणी हूळी उठातो तको वीं जगाँ पे ग्यो ज्या “कपाळ की जगाँ” केवाती ही अन इबरानी भासा में “गलगता” केवाती ही।</verse>
				<verse number="18">वटे वणा वींने अन वींकी लारे का दो जणा ने भी हूळ्याँ पे चड़ाया। एक ने अटने अन एक ने वटने अन दोयाँ के बचमें ईसू ने।</verse>
				<verse number="19">पिलातुस एक दोसपतर लिकन हूळी पे टाँक दिदो अन वींमें ओ लिक्यो हो, “नासरत का ईसू, यहूदियाँ को राजा।”</verse>
				<verse number="20">ओ दोसपतर नरई यहूदियाँ भण्यो, काँके वीं जगाँ जटे ईसू हूळी पे चड़ायो ग्यो हो, ज्याँ नगर का भड़े ही अन वो पतर इबरानी, लतीनी अन युनानी भासा में लिक्यो तको हो।</verse>
				<verse number="21">तद्याँ मोटा याजकाँ पिलातुस नके जान क्यो, “थें ज्यो पतर पे ‘यहूदियाँ को राजा’ लिकवायो हे, वींने बदलवान अस्यान लिका के, ‘वणी क्यो के, मूँ यहूदियाँ को राजा हूँ।’”</verse>
				<verse number="22">पिलातुस क्यो, “में ज्यो लिकवा दिदो हे, बेस वो लिकवा दिदो हे।”</verse>
				<verse number="23">जद्याँ सपायाँ ईसू ने हूळी पे चढा दिदो हो। तो वाँका गाबा लेन च्यार भाग किदा। हाराई सपायाँ का वाते एक-एक भाग ले लिदो अन कुरतो भी ले लिदो। पण, कुरतो बनाई हींम्यो तको ऊपरेऊँ नीचे तईं हाताऊँ बणायो तको हो।</verse>
				<verse number="24">ईं वाते वाँकाणी एक-दूजाऊँ क्यो, “आपाँ ईंने ने फाड़ा पण, ईंका वाते गोट्याँ नाका के, ओ किंको वेई।” ओ ईं वाते व्यो के, पवितर सास्तर में ज्यो लिक्यो हे, वो पूरो वे, “वाँकाणी मारा गाबा एक-दूँजा में बाँट लिदा, अन मारा कुरता का वाते कागद की गोटी नाकी।” ईं वाते सपायाँ अस्यानीस किदो।</verse>
				<verse number="25">ईसू की हूळी का भड़े वींकी बई, वींकी मासी, क्लोपास की घरवाळी मरियम अन मरियम मगदलीनी ऊबी ही।</verse>
				<verse number="26">जद्याँ ईसू आपणी बई अन वो चेला ज्यो लाड़लो केवातो हो, भड़े ऊबा देक्या तो आपणी बईऊँ क्यो, “ओ मास्या, ओ थारो बेटो हे।”</verse>
				<verse number="27">तद्याँ वणा आपणाँ चेलाऊँ क्यो, “आ थारी बई हे।” अन वीं टेमऊँ वो चेलो वींने आपणाँ घरे लेग्यो।</verse>
				<verse number="28">ईंका केड़े ईसू ओ जाणन के, अबे हारोई पूरो वेग्यो हे। तो वणी पवितर सास्तर में ज्यो बतायो ग्यो हो वो पूरो वेवा वाते क्यो, “मूँ तरियो हूँ।”</verse>
				<verse number="29">वटे एक खाटा अंगूरा को रसऊँ भरियो तको ठामड़ो वटे मेली मेल्यो हो। ईं वाते वाँकाणी खाटा अंगूरा का रस में नाक्यो तको फूंबो एक रूँकड़ा की कामड़ी पे मेलन वींका मुण्डा के अड़ायो।</verse>
				<verse number="30">अन पसे ईसू अंगूरा का रस चाक्या केड़े बोल्यो, “पूरो व्यो।” अन मातो नमान जीव छोड़ दिदो।</verse>
				<verse number="31">ओ सबत की त्यारी को दन हो, सबत के दन वाँकी लासा हूळी पे ने टाँगी रेवे, ईं वाते यहूदी अदिकारियाँ पिलातुसऊँ अरज करन क्यो, वाँका पंगा ने तोड़न वाँकी लासा ने हूळीऊँ उतारन वटेऊँ छेटी कर दा काँके वो सबद को दन घणो खास दन हो। वो ईं वजेऊँ खास हो, काँके ओ फसे का तेवार की टेम में आरियो हो।</verse>
				<verse number="32">ईं वाते सपायाँ आन वाँ दुई मनकाँ का पगाँ ने तोड़ नाक्या, ज्याँने ईसू का हाते हूळी पे चड़ाया ग्या हा।</verse>
				<verse number="33">पण, जद्याँ ईसू का नके आन देक्यो के, वो मरग्यो हे, तो वाँकी टांगा ने तोड़ी।</verse>
				<verse number="34">अन वणा सपायाँ मेंऊँ एक जणे वाँकी पाळी में भालो घुसा दिदो अन जणीऊँ तरत लुई अन पाणी निकळ्यो।</verse>
				<verse number="35">यो बताबावाळो वो हे जणी यो देक्यो जणीऊँ थाँ भी विस्वास करो। अन वो जाणे के, वो हाँच बोले हे।</verse>
				<verse number="36">ईं बाताँ ईं वाते वींके, पवितर सास्तर में ज्यो बतायो ग्यो हो वो पूरो वेवे के, “वींको एक भी हाड़क्यो ने तोड़्यो जाई।”</verse>
				<verse number="37">पछे एक ओरी दूजी जगाँ ओ लिक्यो हे के, “जणी वींके भालो घुसायो हे, वींने वीं देकी।”</verse>
				<verse number="38">अणा बाताँ केड़े अरमतिया को रेबावाळे युसुप ज्यो ईसू ने मानबावाळो हो। पण यहूदी अदिकारियाँ की दरपऊँ आ बात छाने राकतो हो, वणी पिलातुसऊँ अरज किदी के, कई वो ईसू की लास लेजा सके हे। पिलातुस वींकी अरज हूणी अन वो आन ईसू की लास लेग्यो।</verse>
				<verse number="39">निकेदुमस, ज्यो हाराऊँ पेल्या ईसू का नके रात ने ग्यो हो। वो वटे एलवो अन गंधरस मलई तकी चीज लेन आयो ज्या लगभग तीस किलो ही।</verse>
				<verse number="40">पछे वीं ईसू की लास लेग्यो। अन यहूदी मनकाँ के लास ने गाड़बा की रीत की तरियाऊँ हव बाना का तेल की लारे कापळा में वींने लपेट्यो।</verse>
				<verse number="41">वीं जगाँ पे जटे ईसू हूळी पे चडाया ग्या हा। वींका नकेईस एक बाग हो अन वीं बाग में एक भाटा में खोदी तकी नुवी कबर ही। जिंमें कदी भी कणी लास ने राकी ही।</verse>
				<verse number="42">काँके सबद को दन सरू वेबावाळो हो, अन वाँ कबर भी नकेईस ही, तो वणा ईसू की लास वींमें मेल दिदी।</verse>
			</chapter>
			<chapter number="20">
				<verse number="1">हपता का पेले दन दितवार ने मरियम मगदलीनी भाग-फाट्याँईं कबर पे अई अन कबर का मुण्डाऊँ भाटा ने छेटी हरक्यो तको देक्यो।</verse>
				<verse number="2">तद्याँ वा दोड़न समोन पतरस अन दूजाँ चेला के नके, ज्यो लाड़लो केवातो हो, वटे आन क्यो, “वीं परबू ने कबरऊँ काड़न ले पराग्या हे अन माँ ने जाणा के, वींने कटे राक मेल्यो हे।”</verse>
				<verse number="3">तद्याँ पतरस अन दूज्यो चेलो कबर का आड़ी चाल पड़्या।</verse>
				<verse number="4">वाँ दुई लारे-लारे दोड़रिया हा पण, दूज्यो चेलो पतरसऊँ आगे निकळन कबर पे पेल्याँ पूग्यो।</verse>
				<verse number="5">अन रेटे जुकन कापळा का गाबा पड़्या तका देक्या। पण वो कबर का मयने ने ग्यो।</verse>
				<verse number="6">तद्याँ समोन पतरस वाँका पाच्छे आग्यो अन कबर का मयने जान कापळा का गाबा पड़्या तका देक्या।</verse>
				<verse number="7">अन ज्यो हसताड़ो वाँका माता पे बन्दयो तको हो। कापळा की लारे पड़्यो तको ने हो, पण दूजी जगाँ हामटन मेल्यो तको हो।</verse>
				<verse number="8">तद्याँ दूज्यो चेलो भी ज्यो कबर पे पेल्या पोंछ्यो हो, मयने ग्यो अन ओ देकन विस्वास किदो।</verse>
				<verse number="9">वीं अबाणू तईं भी सास्तर की आ बात ने हमजता हा के, वींको मरन पाछो जीवतो वणो पको हे।</verse>
				<verse number="10">तद्याँ वीं चेला पाच्छा आपणाँ-आपणाँ घरे पराग्या।</verse>
				<verse number="11">पण, मरियम रोती तकी कबर के नके बारणे ऊबी वेगी अन रोती तकी जुकन कबर का मयने नाळरी ही।</verse>
				<verse number="12">अन जटे ईसू की लास मेली ही, वटे दो हरग-दुताँ ने चमकण्या गाबा पेरया तका एक ने तो हराणे अन दूजाँ ने पगात्याँ बेटा देक्या।</verse>
				<verse number="13">वाँकाणी वींने क्यो, “ए लुगई, थूँ काँ रोवे हे?” वणी क्यो, “वीं मारा परबू ने ले पराग्या हे अन मूँ ने जाणूँ हूँ के, वींने कटे मेल्यो हे?”</verse>
				<verse number="14">ओ केन वा पाच्छी फरी अन ईसू ने ऊबा तका देक्या, पण वाँ वाँने ओळक ने सकी के, वीं ईसू हे।</verse>
				<verse number="15">ईसू वींने क्यो, “ए लुगई, थूँ काँ रोवे हे? किंने होदरी हे?” वाँ वींने माळी हमजन क्यो, “ओ बासा, थाँ वींने लेग्या वो तो मने बतावो के, वींने कटे मेल राक्यो हे। ताँके मूँ वींने ले जवूँ।”</verse>
				<verse number="16">ईसू वींने क्यो, “मरियम।” वाँ पाच्छी फरी अन वाँकाऊँ इबरानी भासा में क्यो, “रब्बुनी।” ईंको मतलब हे, “हे गरू।”</verse>
				<verse number="17">ईसू वींने क्यो, “मारे हात मती लगा, काँके मूँ अबाणू बाप का नके ने ग्यो हूँ। पण, मारा भायाँ का नके जान वाँने के दे के, ‘मूँ मारा बाप अन थाँका बाप अन मारा परमेसर अन थाँका परमेसर का नके ऊपरे जारियो हूँ।’ ”</verse>
				<verse number="18">मरियम मगदलीनी जान चेला ने आ बात बतई के, “में परबू ने देक्या हे।” ज्यो कई परबू वींने क्यो हो, वणी वो वाँने बतायो।</verse>
				<verse number="19">हपता को पेला दन दितवार के हाजकाँ वींका चेला यहूदी अदिकारियाँ की दरपऊँ कमाड़ बन्द करन घर में बेटा हा। वीं टेम ईसू आया अन वाँका बचमें ऊबा वेन वाँकाऊँ क्यो, “थाँने सान्ती मले।”</verse>
				<verse number="20">अन ओ केन वणा आपणाँ हात अन आपणी पाँळी का घाव बताया। तद्याँ चेला परबू ने देकन राजी व्या।</verse>
				<verse number="21">ईसू पाछो वाँकाऊँ क्यो, “थाँने सान्ती मले। जस्यान बाप मने खन्दायो हे, वस्यानीस मूँ थाँने खन्दावूँ हूँ।”</verse>
				<verse number="22">ओ केन वाँ वाँपे फूँक लगई अन क्यो, “पुवितर आत्माने गरण करो।</verse>
				<verse number="23">ज्याँका पाप थाँ माप करो, वाँका पाप माप किदा जाई। ज्याँने थाँ माप ने करो, वीं माप ने करया जाई।”</verse>
				<verse number="24">पण बाराई चेला मेंऊँ एक थोमो, ज्यो जोडलो केवातो हो जदी ईसू वटे आया, तो वाँकी लारे ने हो।</verse>
				<verse number="25">जदी दूजाँ चेला वाँकाऊँ केबा लागा, “माँ परबू ने देक्याँ हे।” तद्याँ वणी वींकाऊँ क्यो, “जद्याँ तईं मूँ वाँका हाताँ में खीलाँ का निस्याण में आँगळी ने गोड़ूँ अन वाँकी पाँळी में आपणो हात ने गालूँ तद्याँ तईं मूँ विस्वास ने करूँ।”</verse>
				<verse number="26">आट दनाँ केड़े वाँका चेला घर मेंईस हा अन थोमो वाँका लारे हो अन कमाड़ जड़्यो तको हो। तद्याँ ईसू आया अन वाँका बचमें ऊबा वेन क्यो, “थाँने सान्ती मले।”</verse>
				<verse number="27">तद्याँ ईसू ने थोमाऊँ क्यो, “आपणी आँगळी लगान मारा हाताँ ने देक अन आपणो हात पाळा में गाल। विस्वास मती छोड़, पण विस्वासवाळो बण।”</verse>
				<verse number="28">ओ हुणन थोमा जबाव दिदो, “ओ मारा परबू, ओ मारा परमेसर।”</verse>
				<verse number="29">ईसू वींने क्यो, “थें मने देक्यो हे, ईं वाते विस्वास किदो हे। पण धन्न हे वीं मनक जणा मने बनाई देक्या विस्वास किदो।”</verse>
				<verse number="30">ईसू ओरी नरई परच्या चेला का हामे बताया। ज्यो ईं किताब में ने लिक्या ग्या हे।</verse>
				<verse number="31">पण, ईं वाते लिक्या ग्या हे के, थाँ विस्वास करो के, ईसूइस परमेसर को पूत मसी हे अन विस्वास करन वाँका नामऊँ जीवन पावो।</verse>
			</chapter>
			<chapter number="21">
				<verse number="1">अणा बाताँ का केड़े ईसू खुद तिबिरियस नाम का समन्द का कनारे आपणाँ चेला के हामे परगट व्या अन आ बात अस्यान वीं।</verse>
				<verse number="2">समोन पतरस अन थोमो, ज्यो दिदुमस नामऊँ जाण्यो जातो हो अन गलील के काना नगर को नतनएल अन जब्दी का छोरा की लारे वाँका चेलाऊँ दो जणा ओरी हा।</verse>
				<verse number="3">समोन पतरस वाँकाऊँ क्यो, “मूँ माछळ्याँ पकड़बा ने जारियो हूँ।” तो वणा वींने क्यो, “माँ भी थाँरा हाते आवा।” तो वीं नाव में चड़ग्या पण, वणी रात वीं एक भी माछळी ने पकड़ सक्या।</verse>
				<verse number="4">भाग-फाट्याँईं ईसू कनारा पे आन ऊबा वेग्या हा, तुई चेला वाँने ने ओळक्या के, ईं ईसू हे।</verse>
				<verse number="5">तद्याँ ईसू वाँकाऊँ क्यो, “ओ भायाँ, थाँका नके माछळ्याँ हे कई?” वाँकाणी क्यो, “कोयने।”</verse>
				<verse number="6">तो ईसू वाँकाऊँ क्यो, “नाव की जीमणा पाल्डे जाळ नाको तो पावो।” ईं वाते वाँकाणी जाळ नाक्यो, अन हेली माछळ्याँ वेबाऊँ जाळ खेंच ने सक्या।</verse>
				<verse number="7">तद्याँ वणी चेले ज्यो लाड़लो हो पतरसऊँ क्यो, “ईं तो परबू हे।” समोन पतरस यो हुणन के, वो परबू हे, कमर में हसताड़ो बांद दिदो, काँके वणी काम करबा का वाते उपरला गाबा खोल मेल्या हा। अन पाणी में कुद ग्यो, ताँके जट कनारे पे जा सके।</verse>
				<verse number="8">तो दूजाँ चेला वींका पाच्छे नाव में माछळयाऊँ भरी तकी जाळ खेंचता तका आया, काँके वीं कनारे हेला छेटी ने हा, वीं हो गज छेटी हा।</verse>
				<verse number="9">जदी वीं कनारा पे आया तो वणा खीरा पे माछळी अन रोट्याँ मेली तकी देकी।</verse>
				<verse number="10">ईसू वाँने क्यो, “ज्यो माछळी थाँ अबाणू पकड़ी हे, वाँका मेंऊँ थोड़ीक लावो।”</verse>
				<verse number="11">तो समोन पतरस नाव पे चढन एक हो तिरेपन मोटी माछळयाऊँ भरियो तको जाळ कनारा पे खेंच्यो, अन अतरी माछळ्याँ ही तद्याँ भी जाळ ने फाटी।</verse>
				<verse number="12">ईसू वाँकाऊँ क्यो, “आवो, रोटी खावो,” चेला मेंऊँ किंनेई हिम्मत ने वी के, वाँकाऊँ पूछे, “थाँ कूण हो?” काँके वीं जाणता हा के, ईं परबुइस हे।</verse>
				<verse number="13">तद्याँ ईसू आगे आया अन रोट्याँ लेन वाँने दिदी अन वस्यानीस माछळ्याँ भी दिदी।</verse>
				<verse number="14">यो तीजी दाण हो के, ईसू मरिया तका मेंऊँ पाच्छा जीं उठबा के केड़े चेला ने दरसण दिदा।</verse>
				<verse number="15">जीमणा के पछे ईसू समोन पतरसऊँ पूँछ्यो, “ए समोन, यहुन्ना का बेटा, कई थूँ अणाऊँ हेलो परेम माराऊँ राके हे?” वणी वाँने क्यो, “हाँ, परबू जी, थाँ तो जाणो हो के, मूँ थाँकाऊँ कतरोक परेम राकूँ हूँ?” ईसू वींने क्यो, “मारा उन्याँ ने चरा।”</verse>
				<verse number="16">वाँकाणी पाछो दूजी दाण वींने क्यो, “ए समोन, यहुन्ना का बेटा। कई थूँ माराऊँ परेम करे हे?” पतरस वाँने क्यो, “हाँ परबू, थाँ जाणो हो के, मूँ थाँकाऊँ कतरोक परेम करूँ हूँ?” वणा वींने क्यो, “थूँ मारा गारा की रुकाळी कर।”</verse>
				<verse number="17">ईसू तीजी दाण क्यो, “ए समोन, यहुन्ना का बेटा, कई थूँ माराऊँ परेम राके हे?” तो पतरस दकी वेग्यो के, वाँकाणी वींने तीजी दाण अस्यान काँ क्यो, “कई थूँ माराऊँ परेम राके हे?” अन वाँने क्यो, “ओ परबू, थाँ तो सब जाणो हो। थाँ ओ भी जाणो हो के, मूँ थाँकाऊँ परेम करूँ हूँ।” ईसू वींने क्यो, “मारा गारा ने चरा।</verse>
				<verse number="18">मूँ थाँराऊँ सई-सई केवूँ हूँ, जद्याँ थूँ मोट्यार हो। तो जटे जाणो छातो हो, वटे जातो। पण, जदी थूँ डोकरो वेई। तो आपणाँ हात ऊँचा केरी अन दूज्यो थने बाँदन जटे थूँ ने जई वटे ले जई।”</verse>
				<verse number="19">वणा अणा बाताँऊँ इसारो किदो के, पतरस कस्यी मोतऊँ परमेसर की बड़ई करी। तद्याँ ईसू वणीऊँ क्यो, “मारा पाच्छे वेजा।”</verse>
				<verse number="20">पतरस पाछो फरन वीं चेला ने पाच्छे आतो तको देक्यो। ज्यो लाड़लो केवातो हो। यो वोईस जणी जीमबा की टेम वाँके कान्दड़ा नके मुण्डो करन पूँछ्यो, “हो परबू, थाँने धोकाऊँ पकड़बावाळो कूण हे?”</verse>
				<verse number="21">वींने देकन पतरस ईसुऊँ क्यो, “ओ परबू, ईंको कई हाल वेई?”</verse>
				<verse number="22">ईसू वींने क्यो, “यद्याँ मूँ छावूँ के, वो मारे पाछो आबा तईं जीवी, तो थाँरे अणीऊँ कई हे? थूँ तो मारा पाच्छे वेजा।”</verse>
				<verse number="23">ईं वाते चेला में या बात फेलगी के, वो चेलो ने मरी। ईसू वींने ओ ने क्यो हो के, वो ने मरी। पण ओ क्यो के, “यद्याँ मूँ छावूँ के, वो मारे आबा तईं जीवी, तो थाँरे अणीऊँ कई हे?”</verse>
				<verse number="24">यो वोईस चेलो हे। ज्यो अणा बाताँ की गवई देवे अन जणी अणा बाताँ ने लिकी हे अन आपाँ जाणा हाँ के, वाँकी गवई हाँची हे।</verse>
				<verse number="25">ओरी भी नरई काम हे। ज्याँने ईसू किदा हे। यद्याँ वीं हाराई लिक्या जाता, तो मूँ हमजूँ हूँ के, ज्या किताबाँ लिकी जाती वाँ ईं दनियाँ में भी ने माती।</verse>
			</chapter>
		</book>
		<book number="44">
			<chapter number="1">
				<verse number="1">“हे थियोपलुस, में पेली किताब में वीं बाताँ लिकी, जो बाताँ ईसू का काम की सरुआतऊँ लेन</verse>
				<verse number="2">परमेसर की पुवितर आत्मा ईसू ने हरग में लेन परीगी वीं दन तईं ईसू हिकई अन किदी। ईसू को हरग में जाबाऊँ पेल्या ईसू थरप्या तका चेला ने पुवितर आत्माऊँ उपदेस दिदा।</verse>
				<verse number="3">वो हूळी पे दक भोगन मरिया केड़े पाका सबूत का हाते नरी दाण परगट व्यो, वो जीवतो हे। अन चाळी दनाँ तईं चेला वींने देक्यो अन वो वाँने परमेसर का राज का बारा में बतातो रियो।</verse>
				<verse number="4">जद्याँ वीं हारई एक हाते हा, वीं दाण ईसू वाँने आदेस दिदो, ‘यरूसलेम मती छोड़ो, पण परमपिता का वीं वादा के वाते वाट नाळो, जिंका बारा में, में थाँने क्यो हो।</verse>
				<verse number="5">यहुन्ने तो थाँने पाणीऊँ बतिस्मो दिदो हो, पण अबे थोड़ाक दनाँ केड़े थाँने पुवितर आत्माऊँ बतिस्मो दिदो जाई।’”</verse>
				<verse number="6">ईं वाते थरप्या तका चेला अगेटा वेन ईसुऊँ पूँछ्यो, “ओ परबू, कई थाँ ईं दाण ईं राज ने इजराएल का लोगाँ ने पाछो हूँप देवो?”</verse>
				<verse number="7">ईसू वाँने क्यो, “वीं मोका अन बगत की पेचाण करणो परमपिता आपणाँ हक में राक्यो हे अन ईं मोका अन बगत ने थाँने जाणबा की जरुरत कोयने हे।</verse>
				<verse number="8">पण, जद्याँ पुवितर आत्मा थाँका पे आई, तो थाँ सगतिऊँ भर जावो अन आकाई यरूसलेम, यहूदियाँ अन सामरियाऊँ लगान धरती का खुणा-खुणा तईं मारा गवा बेणो।”</verse>
				<verse number="9">आ बात केन वाँकाणी देकतईं देकता ईसू ने वटूँ हरग में उठा लिदा ग्या अन बादळा में वे नजराऊँ ओजल वेग्या।</verse>
				<verse number="10">जद्याँ वे लोग-बाग ईसू ने हरग में जाता तका देकरिया हा, वीं दाणइस वटे धोळा गाबा पेरिया तका दो जणा वाँका बचमें परगट वेग्या।</verse>
				<verse number="11">अन पछे वाँ दुई जणा क्यो, “ओ गलील का रेबावाळा, थाँ अटे ऊबा-ऊबा आकास में काँ देकरिया हो? वीं ईसू, जीं आज अटूँ हरग में पराग्या वस्यानीस, एक दन थाँ वाँने पाच्छा हरगऊँ आता तका देको।”</verse>
				<verse number="12">पछे वीं हंगळाईं जणा जेतुन नाम का मंगरा पूँ यरूसलेम पाच्छा आग्या, जो यरूसलेमऊँ एक आदो कोस छेटी हो।</verse>
				<verse number="13">वे वटे आन ऊपरे एक ओवरा में ग्या, जटे वे रेता हाँ, वाँका में पतरस, यहुन्नो, याकूब, अन्दरियास, फिलिपुस, थोमो, बरतुलमे, मत्ती, हलफई को छोरो याकूब, देसभगत समोन अन याकूब को बेटो यहूदो।</verse>
				<verse number="14">ईं हाराई रोज एक मन वेन परातना करबा वाते भेळा वेता हा। आका हाते थोड़ीक लुगायाँ, ईसू की बई मरियम अन ईसू का भई भी हा।</verse>
				<verse number="15">थोड़ाक दनाँ केड़े एक विस्वास्याँ की सबा जिंमें होन बीस जणा हा, वटे परतस ऊबो वेन केबा लागो,</verse>
				<verse number="16">“ओ मारा भई अन बेना, ईसू ने बंदी बणाबावाळा ने गेलो बताबावाळो यहूदो, जिंका बारा में सास्तर में लिक्यो हे, जो दाऊद का मुण्डाऊँ पुवितर आत्मा नरई दनाँ पेल्याँई के दिदो हो, वाँ बात पुरी वेणी जरूरी ही।</verse>
				<verse number="17">यहूदो आपणाँ मेंईस एक हो अन ईं सेवा का काम में वींकी भी पाँती ही।”</verse>
				<verse number="18">यहूदो आपणाँ वीं नीच कामऊँ जो भी धन-दोलत कमई ही, वीं दोलतऊँ एक खेत मोल लिदो। वो वीं खेत में माता वराणो पड़्यो अन वींको पेट फूटग्यो अन आतेड़ा-ओजेड़ा बारणे निकळग्या अन मरग्यो।</verse>
				<verse number="19">आ बात यरूसलेम में रेबावाळा हाराई जणा जाणग्या हा। ईं वाते वीं खेत ने वाँकी बोली में हकेलदामा केता हा जिंको मतलब हे, “लुई को खेत”।</verse>
				<verse number="20">भजनाँ की किताब में लिक्यो हे के, वींको घर उजड़ जावे वीं घर में कुई ने रेवे अस्यान भी लिक्यो हे के, वींकी जगाँ कुई दुसरो जणो लेले।</verse>
				<verse number="21">ईं वाते ओ काम जरूरी हो के, ईसू मसी की जीवतो वेबा की गवई देबावाळो एक जणो ओर भी माकाँ हण्डे भेळो वेणो छावे। ओ मनक अस्यो वेणो छावे के जीं टेम ईसू आपणे हाते रेन जातरा किदी जीं हंगळा आबाजाबा की टेम में वो मनक भी आपणे हण्डे हो। ईंको मतलब यहुन्ना का बतिस्माऊँ लगान ईसू हरग में ग्या वटा तईं जो मनक माँकी हण्डे हो।</verse>
				<verse number="22"></verse>
				<verse number="23">ईं वाते वाँ दो जणा ने ऊबा किदा, ज्यामूँ एक को नाम युसुप हो, जिंने बरसब्बो केता हा अन वींने युसतुस भी केता हा अन दूजो मत्ती हो।</verse>
				<verse number="24">पछे वाँ हंगळा जणा परातना करन केबा लागा के, ओ परबुजी, थाँ तो हारई को मन जाणो हो अन अबे माने ओ बतावो के, आ दुई जणाऊँ थाँ किंने थरपणो छावो हो,</verse>
				<verse number="25">के वो ईं थरप्या तका का काम अन सेवा जगाँ की ले, जो यहूदो छोड़न आपणी जगाँ परोग्यो जिंके वो लायक हो।</verse>
				<verse number="26">पछे वाँकाणी ईं वाते गोट्याँ नाकी अन गोटी मत्ती का नाम की निकळी। अस्यान वो मत्ती ग्यारा चेला में भेळो वेग्यो।</verse>
			</chapter>
			<chapter number="2">
				<verse number="1">जद्याँ पिन्तेकुस के तेवार को दन आयो, तो वीं हारई विस्वासी जणा एक जगाँ पे भेळा वेग्या हा।</verse>
				<verse number="2">वीं दाण आकासऊँ डूँज के जस्यान अवाज अई अन जणी घर में वे बेटा हा, वो घर गूँज उट्यो।</verse>
				<verse number="3">अन वाँने हगलती तकी वादी की लपटा जीब का जस्यान दिकबा लागी अन वीं हरेक का ऊपरे आगी।</verse>
				<verse number="4">वीं हाराई जणा पुवितर आत्माऊँ भरग्या अन जस्यान पुवितर आत्मा की सामरत वाँने मली वीं तरे-तरे की बोली में बोलबा लागा।</verse>
				<verse number="5">वटे यरूसलेम में धरती का हारई देसाऊँ आया तका यहूदी भगत हा।</verse>
				<verse number="6">जद्याँ वटे आ अवाज अई, तो भीड़-भाड़ भेळी वेगी। अन अचम्बा में पड़गी काँके वणा हुण्यो के, वीं हारई विस्वास्याँ हूणबावाळा की भासा में बोलरिया हा।</verse>
				<verse number="7">तो वीं ओरी अचम्बा में पड़न बोल्या के, “ये हंगळा बोलबावाळा गलील हिमाड़ा का कोयने कई?</verse>
				<verse number="8">तो पछे आपाँ मूँ हरेक मनक अणाने आपणीस बोली में बोलतो तको कस्यान हुणरियो हे।</verse>
				<verse number="9">आपाँ में पारथी, मेदी अन एलामी, मेसोपोटामियाँ का रेवासी, यहूदियाँ अन कापुदुक्या, पुन्तुस अन आसिया</verse>
				<verse number="10">फ्रिग्या अन पंपिलिया, मिसर अन सायरस नगर के भड़े का लिबिया परदेस का मनक, रोमऊँ आया जातरी हे।</verse>
				<verse number="11">करेती अन अरब देस में रेबावाळा, ज्यामें यहूदी धरम मानबावाळा लोग-बाग अन कुई तो जनमऊँ यहूदी हा। पण आपाँ सब जणा परमेसर का अचम्बा में नाकबावाळा कामाँ ने आपणी-आपणी भासा मेंईस कस्यान हुणरिया हा?”</verse>
				<verse number="12">वीं हारई जणा अचम्बा पड़ग्या अन घबराग्या, एक-दूजाऊँ पुछ रिया हा के, “ओ हारोई कई वेरियो हे?”</verse>
				<verse number="13">पण दूजाँ लोगाँ चेला की मजाक उडान केरिया हा, “वणा तो दारू पीं मेल्यो हे।”</verse>
				<verse number="14">पतरस वाँ ग्याराई चेला की लारे ऊबो वेन जोरऊँ केबा लागो, “ओ यहूदी लोगाँ अन यरूसलेम का रेवास्याँ ईं बात को पतो थाँने पड़बा दो अन थाँ कान लगान मारी हुणो।</verse>
				<verse number="15">ईं लोग-बाग नसा में कोयने हे जस्यान थाँ हमजरिया हो, अबाणू तो दन को पेलो पोर व्यो हे।</verse>
				<verse number="16">पण या बात वा हे, जो योएल परमेसर का आड़ीऊँ बोलबावाळा की ही,</verse>
				<verse number="17">“‘परमेसर केवे के अन्त की टेम में अस्यो वेई के, मूँ आपणी आत्मा हारई मनकाँ में नाकूँ, थाँका बेटा-बेटी परमेसर का आड़ीऊँ बोलबा लाग जाई, थाँका मोट्यार मनक दरसावो देकी, अन भूण्डा-ठाड़ा लोग-बाग हपनो देकी।</verse>
				<verse number="18">हाँ, वाँ दनाँ मेंईस, मूँ आपणाँ दास-दास्याँ में भी आत्मा नाक देऊँ, तो वीं भी परमेसर का आड़ीऊँ बोलबा लाग जाई।</verse>
				<verse number="19">अन मूँ आकास पे अनोका काम करूँ अन धरती पे हेन्याणी बताऊँ। वाँ दनाँ में खून, वादी अन धूवाड़ा का बादळा वेई।</verse>
				<verse number="20">परबू के पाच्छा आबा के मेमा अन बड़ो दन आबा की बगतऊँ पेल्याँ, सुरज काळो अन चाँद खून जस्यान रातो वे जाई।</verse>
				<verse number="21">अन जो भी परबू ने हेलो पाड़ी वीं हंगळा बंचाया जाई।’”</verse>
				<verse number="22">“ओ इजराएल का लोगाँ, आ बाताँ हुणो, परमेसर, ईसू नासरीऊँ अनोका काम, परच्या अन हेन्याण्याँ करान ओ साबत किदो के, वणा वींने थाँका वातेईस खन्दायो हे, जो थाँके गाबे व्यो हे अन थाँ खुद भी जाणो हो।</verse>
				<verse number="23">ईसू ने परमेसर आपणी पाक्की ओजणा अन पेली का ग्यानऊँ होच-हमजन थाँने हूँप्यो अन थाँकाणी वींने नीच मनकाँ का हाताँ में पकड़वान हूळी पे खीलाँ ठुकवान मरवा नाक्यो।</verse>
				<verse number="24">पण, परमेसर वींने मोत का दकऊँ छुड़ान पाछो जीवतो कर दिदो, काँके वाँका वाते ओ वे ने सके के, मोत वींने आपणाँ बस में राके।</verse>
				<verse number="25">जस्यान के दाऊद वींका बारा में क्यो हे, “‘में परबुजी ने हमेस्यान आपणाँ हामेईस देक्या हे, वीं मारा हाते हे, ताँके मूँ डगूँ कोयने।</verse>
				<verse number="26">ईंऊँ मारो मन राजी हे, अन मारा मुण्डाऊँ राजी-खुसी की बाताँ निकळी, मारी काया भी आस में जीई,</verse>
				<verse number="27">काँके थूँ मारी आत्माने पाताळ मेंईस ने छोड़ी, थूँ आपणाँ ईं पुवितर मनक ने कबर में हड़बा ने देई।</verse>
				<verse number="28">थें मने जीबा को गेलो बतायो हे, थाँ मारा लारे रेन मने आणन्दऊँ भर देवो।’”</verse>
				<verse number="29">“ओ मारा भई-लोगाँ, मूँ पूरा भरोसाऊँ आपणाँ बड़ाबा दाऊद का बारा में थाँने बता सकूँ के, वींकी मोत वेगी अन वींने गाड़ दिदो, अटा तईं के, वींकी कबर अटे आज भी मोजुद हे।</verse>
				<verse number="30">पण, वो एक परमेसर का आड़ीऊँ बोलबावाळो हो अन जाणतो हो के, परमेसर वींने अस्यान बचन दिदो के, वो वींका बंसऊँ किंने भी एक जणा ने आपणी गाद्दी पे बेटाई।</verse>
				<verse number="31">दाऊद पेल्याँईं देक्यो के, आगे कई वेई ईं वाते वाँकाणी ईसू मसी के पाछो जीवतो वे जाबा का बारा में बतायो हे के, “‘वींने पाताळ में ने छोड़्यो अन नेईं वींको सरीर कबर में हड़्यो-गळ्यो।’”</verse>
				<verse number="32">अणीस ईसू ने परमेसर पाछो जीवतो कर दिदो, ईं बात का माँ हारई गवा हाँ।</verse>
				<verse number="33">ईसू परमेसर का जीमणा पाल्डे आपणो हंगळाऊँ ऊसी जगाँ बिराजो अन जस्यान परमेसर वादो किदो वस्यान पुवितर आत्मा पई। वाईस पुवितर आत्मा आपणाँ ने दे दिदी, जिंका बारा थाँ देकरिया अन हुणरिया हो।</verse>
				<verse number="34">दाऊद खुद तो हरग में ने ग्यो, पण वो केवे हे, “‘परमपिता परमेसर मारा परबूऊँ क्यो के, मारा जीमणा पाल्डे बेटो,</verse>
				<verse number="35">जतरे मूँ थाँका दसमणा ने थाँका पगाँ का बाजोट ने कर दूँ।’”</verse>
				<verse number="36">ओ इजराएल, ईं वाते आ बात पाक्की मान लेवो के, जिंने थाँ हूळी पे चड़ा दिदो हे वणीस ईसू ने परमेसर, परबू अन मसी बणायो हो।</verse>
				<verse number="37">लोग-बागाँ जद्याँ ओ हुण्यो, तो वाँको मन दकी वेग्यो अन पतरस की लारे दूजाँ चेलाऊँ क्यो, “तो भायाँ, माने कई करणो छावे?”</verse>
				<verse number="38">पतरस वाँने क्यो, “मन ने बदलो अन आपणाँ पापाँ की मापी के वाते थें हारई ईसू मसी का नामऊँ बतिस्मो लेवो। परमेसर थाँने पापाऊँ मापी देई अन थाँने पुवितर आत्मा को दान मल जाई।</verse>
				<verse number="39">काँके ओ वादो थाँका वाते, थाँका छोरा-छोरी अन वाँ हंगळा जणा के वाते जो नरई छेटी हे, अन वाँ हाराई लोगाँ का वाते ज्याँने परमेसर आपणाँ नके बलावे हे।”</verse>
				<verse number="40">पतरस नरई बाताँ केन गवई देन अन अरज करन क्यो, “ईं खराब पिड़ीऊँ खुद ने बंचान राको।”</verse>
				<verse number="41">वामूँ जणी-जणी सन्देसा ने मान्यो, वाँने बतिस्मो दिदो ग्यो अन वीं दन वाँकी मण्डली में लगे-भगे तीनेक हजार लोग-बाग मलग्या।</verse>
				<verse number="42">वाँकाणी थरप्या तका चेला का उपदेस, सत्संग, परबू ने आद करता तका रोटी तोड़णी अन परातना में आपणो जीव लगा दिदो हो।</verse>
				<verse number="43">चेला अनोका अन परच्या का काम करबा लागा, वींऊँ हारई मनक हक्का-बक्का रेग्या।</verse>
				<verse number="44">हारई विस्वासी एक लारे हा अन वाँका नके जो भी हो, वींने वे बाँट लेता हा।</verse>
				<verse number="45">वाँकाणी आपणी जमीं-जादाद अन दूजी चिजाँ बेंच देता हाँ अन जरूत के जस्यान वाँ हारई में बाँट देता हा।</verse>
				<verse number="46">वीं हरेक दन एक मन वेन मन्दर में मलता रेता हा। वीं आपणाँ घराँ में राजी वेता तका हुदा मनऊँ मल-जुलन रोटी तोड़ता अन खाता हा</verse>
				<verse number="47">परबू की बड़ई करता अन हंगळा लोगाँ का भलई का कामऊँ राजी वेता। अन परमेसर हरेक दन बंचाया तका लोगाँ ने आपणी मण्डली में भेळा कर देता।</verse>
			</chapter>
			<chapter number="3">
				<verse number="1">दपराँ केड़े तीनेक बज्या परातना की टेम पे पतरस अन यहुन्नो मन्दर में जारिया हा।</verse>
				<verse number="2">वाँ दनाँ में वटे एक जनमऊँ लंगड़ो मनक हो, जिंने लोग हरेक दन तोकन ले जाता हा अन मन्दर का सुन्दर नाम का बाणा पे बेटा देता हा, ताँके वो मन्दर में जाबावाळा लोगाऊँ भीक माँग सके।</verse>
				<verse number="3">वणी लंगड़े मनक जद्याँ ओ देक्यो के, यहुन्नो अन पतरस मन्दर में जाबाई वाळा हे, तो वणी वाँकाऊँ भीक माँगी।</verse>
				<verse number="4">यहुन्ना की लारे-लारे पतरस भी वाँका दयने देकतो तको बोल्यो, “माकाँ दयने देक।”</verse>
				<verse number="5">तो वणी भिकारी वाँका नकूँ कई मलबा की आसऊँ वाँका आड़ी देक्यो।</verse>
				<verse number="6">पण, पतरस क्यो, “मारा नके थने देबा वाते कई ने हे, पण जो भी मारा नके हे, वो मूँ थने देरियो हूँ। ईसू मसी नासरी का नामऊँ उठ अन चाल।”</verse>
				<verse number="7">पछे पतरस वींको जीमणो हात पकड़न ऊबो किदो। तो पगई वींका पगाँ अन गोडा में जीव आग्यो।</verse>
				<verse number="8">अन वो फदकन ऊबो वेग्या अन चालबा लागो। ओ उछळ्तो, चालतो अन परमेसर की बड़ई करतो तको वाँकी लारे मन्दर में ग्यो।</verse>
				<verse number="9">हारई लोगाँ वींने चालतो तको अन परमेसर की बड़ई करतो तको देक्यो।</verse>
				<verse number="10">लोग-बागाँ वींने ओळक लिदो के, ओ तो वोईस मनक हे, जो मन्दर का सुन्दर नाम का बाना पे बेटन भीक मांगतो हो। वींका पे जा करपा व्यी, वीं बात पे वे अचम्बा अन हक्का-बक्का रेग्या।</verse>
				<verse number="11">वो मनक आलतरे पतरस अन यहुन्ना की लारे हो। ईं वाते हारई लोग-बाग अचम्बा में आन सुलेमान का बरामदा तईं वींका लारे दोड़ता तका नके आया।</verse>
				<verse number="12">जद्याँ पतरस ओ देक्यो, तो वो लोग-बागाँ ने केबा लागो, “ओ इजराएल का लोग-बागाँ, थाँ ईं बात पे अचम्बा में काँ आरिया हो? अन अस्यान घूर-घूरन माकाँ दयने काँ ताकरिया हो, जस्यान के माँ ईं मनक ने आपणी तागत अन भगतीऊँ चालतो-फरतो किदो हे?</verse>
				<verse number="13">अबराम, इसाक अन याकूब का परमेसर, आपणाँ बड़ाबा का परमेसर आपणाँ सेवक ईसू की मेमा किदी। थाँकाणी वींने मराबा के वाते पकड़वा दिदो अन पछे पिलातुस वींने छोड़बा की बात ठाणी, तो थाँ लोगाँ पिलातुस के हामे भी वींने नकार दिदो।</verse>
				<verse number="14">थाँ लोगाँ वीं धरमी अन नेकवान मनक ने नकार दिदो अन थाँका वाते एक हत्यारा की माँग किदी।</verse>
				<verse number="15">थाँ जीवनदाता ने मरवा नाक्यो, पण परमेसर वींने मरिया तका मूँ पाछो जीवतो कर दिदो, माँ ईं बात का गुवा हा।</verse>
				<verse number="16">काँके ईसू का नाम पे विस्वास करबा का मसऊँ यो मनक ताकड़े वेग्यो, जिंने थाँ देकरिया हो अन जाणो हो। हाँ, ईं मनक का विस्वासऊँ यो मनक थाँका हामे पुरी तरियाँ हव व्यो हे।”</verse>
				<verse number="17">हो भई-लोगाँ, मने नंगे हे के, थाँ अन थाँका नेता ईसू के विरोद में जो कई भी किदो हे वो अणजाण में किदो,</verse>
				<verse number="18">परमेसर आपणाँ आड़ीऊँ बोलबावाळा का मुण्डाऊँ ओ पेल्याँई क्यो के, मसी ने दुक जेळणो पेड़ी अन परमेसर ईं काम ने अस्यानीस पूरो किदो।</verse>
				<verse number="19">ईं वाते थाँ आपणो मन बदलो अन परमेसर का दयने आ जावो, ताँके परमेसर थाँका पापाँ ने माप करे</verse>
				<verse number="20">तद्याँ थाँका जीवन में परमेसर की मोजुदगीऊँ संतोक को टेम आई अन परबू थाँका वाते ईसू मसी ने खन्दाई, जो पेल्याई थाँका वाते थरप्यो ग्यो हे।</verse>
				<verse number="21">मसी ने वीं दाण तईं हरग में रेणो पेड़ी, जतरे वीं हारी बाताँ परमेसर पेल्याँ के जस्यान कोयने कर दे, जिंका बारा में नरई पेल्याँ परमेसर आपणाँ आड़ीऊँ बोलबावाळा पुवितर मनकाँ का मुण्डाऊँ बतायो हो।</verse>
				<verse number="22">काँके मूसे आपणाँ बड़ाबाऊँ क्यो हो, परमेसर थाँका वाते थाँ लोगाँमूईस एक मारे जस्यो परमेसर का आड़ीऊँ बोलबावाळा ने ऊबो केरी। वो थाँने जो भी केवे, थाँ वा बात मानन चालज्यो।</verse>
				<verse number="23">अन जो भी परमेसर का आड़ीऊँ बोलबावाळा की बाताँ ने, ने हूणी, तो वींने परमेसर का लोगाँ मूँ बारणे काड़ देई।</verse>
				<verse number="24">हाँ, समुएल अन वींका केड़े आया हारई परमेसर का आड़ीऊँ बोलबावाळा, जद्याँ भी कई क्यो तो वणा ईं दनाँ का बारा मेंईस क्यो हो।</verse>
				<verse number="25">अन थाँ तो वाँ परमेसर का वादो जो परमेसर का आड़ीऊँ बोलबावाळा किदो अन वीं करार का वारिस हो, जो परमेसर थाँका बड़ाबा का लारे किदो हो। वणी अबरामऊँ क्यो हो, “थारी ओलादाँऊँ धरती का लोग आसीस पाई।”</verse>
				<verse number="26">परमेसर जद्याँ आपणाँ दास ईसू ने चुण्यो अन सबाऊँ पेल्याँ वींने थाँका नके खन्दायो, ताँके थाँने खराब गेलाऊँ थाँको मन बदलन आसीस देवे।</verse>
			</chapter>
			<chapter number="4">
				<verse number="1">जद्याँ वीं दुई जणा लोगाऊँ बात-बच्यार कररिया हा, वीं दाण ईं याजक, मन्दर को मुक्यो अन सदुकी लोग वाँका नके आया</verse>
				<verse number="2">वे वाँ दुई जणाऊँ ईं बात पे रिस्याँ बळरिया हा के, पतरस अन यहुन्नो ईसू के मरिया केड़े पाछो जीवतो वेबा को परच्यार करन मरिया तका को पाछो जीवतो वेबा ने साबत कररिया हा।</verse>
				<verse number="3">ईं वाते वाँ वाँने पकड़न बन्दी बणा लिदा अन दूजे दन तईं वाँने जेळ में राक्या हा, काँके हाँज वेगी ही।</verse>
				<verse number="4">पण, जणा वीं परच्यार ने हुण्यो, वामूँ नरई जणा विस्वास किदो। विस्वास करबावाळा की गणती लगे-भगे पाँचेक हजार पोंछगी ही।</verse>
				<verse number="5">आगले दन नेता, बुड़ा-ठाड़ा अन यहूदी धरमसास्तरी यरूसलेम में भेळा व्या।</verse>
				<verse number="6">वीं मोटा याजक हन्ना, केफा, यहुन्ना, सिकन्दर अन मोटा याजकाँ का परवार का दूजाँ जणाऊँ मल्या।</verse>
				<verse number="7">वे वाँ दुई थरप्या तका ने लाया अन पूँछबा लागा, “थाँकाणी कस्यी सगती अन कस्या हकऊँ ओ काम किदो?”</verse>
				<verse number="8">तो पतरस का डिले पुवितर आत्मा आन वाँने क्यो, “ओ नेता अन बुड़ा-ठाड़ा लोगाँ,</verse>
				<verse number="9">जद्याँ आज थाँ माँकाऊँ एक लंगड़ा को भलो करबा के वाते पूँछरिया हो के, ‘वो हव कस्यान व्यो?’</verse>
				<verse number="10">तो थाँ सब जणा अन इजराएल का लोगाँ ने ओ पतो वेणो छावे के, ओ मनक थाँके हामे ईसू मसी नासरी का नामऊँ पुरी तरियाऊँ हव वेन थाँका हामे ऊबो हे, वो ईसू नासरी, जिंने थाँकाणी हूळी पे चड़ा दिदो हो अन परमेसर पाछो वींने मरिया तका मूँ जीवतो कर दिदो।”</verse>
				<verse number="11">सास्तर ईसू का बारा में अस्यान केवे हे के, “‘ओ वोईस भाटो हे, जिंने थाँ कारिगराँ नकार दिदो, आज वोईस भाटो खास नीम को बणग्यो हे।’”</verse>
				<verse number="12">बेस वोईस ईसू आपाँने बंचा सके हे, काँके ईं हारी धरती अन लोगाँ में दूजो नाम कोयने हे, जो आपाँने बंचा सके।</verse>
				<verse number="13">जद्याँ वणा पतरस अन यहुन्ना की हिम्मत देकी अन हमज्या के, वे दुई अणभण्या अन भला मनक हे। तो वाँने घणो अचम्बो व्यो। पछे वे जाणग्या के, ईं दुई ईसू की लारे रे चुक्या हाँ।</verse>
				<verse number="14">अन वे वीं हव व्या तका लंगड़ा मनक ने वाँकी लारे ऊबो देक्यो, तो वाँके हामे बोल ने सक्या।</verse>
				<verse number="15">वाँ वाँने यहूदी सबाऊँ बारणे जाबा वाते क्यो, अन पछे बात-बच्यार करबा लागा के,</verse>
				<verse number="16">“ईं लोगाँ की लारे अबे कई कराँ? काँके यरूसलेम का हारई लोग-बाग ओ जाणे हे के, वाँ घणा अचम्बावाळो परच्यो दिदो हे। अबे आपाँ वाँने नकार भी तो ने सका।</verse>
				<verse number="17">पण, आपाँ आने चेतावणी दे देवाँ के, वीं ईसू का नाम को परच्यार अबे किंका भी हामे ने करे, ताँके लोगाँ में आ बात ओर ने फेले।”</verse>
				<verse number="18">तद्याँ वे वाँने मयने बलाया अन ओ क्यो के, थें कदी भी ईसू का नामऊँ ने तो किंने कई केवो अन नेई उपदेस देवो।</verse>
				<verse number="19">पण, पतरस अन यहुन्ने जबाव दिदो, “थाँईस बतावो, परमेसर का हामे हव कई हे? माँ परमेसर की हुणा कन थाँकी हुणा।</verse>
				<verse number="20">अन ओ तो वेई ने सके के, माँ जो कई भी देक्यो अन हुण्यो हे, वींने ने बतावा।”</verse>
				<verse number="21">तो पछे मोटी सबा का लोगाँ वाँ दुई जणा ने तापड़न छोड़ दिदा। वाँने सजा देबा को कई भी मोको ने मल्यो हो, काँके जो भी व्यो, वींका वाते लोग-बाग परमेसर की मेमा गारिया हाँ।</verse>
				<verse number="22">जीं मनक पे आ करपा व्यी ही, वींकी उमर चाळी वराऊँ हेली ही।</verse>
				<verse number="23">जद्याँ पतरस अन यहुन्ना ने छोड़ दिदा, तो वे आपणाँ लोग-बागाँ नके आया अन वाँने जो भी यहूदी मोटा याजक अन बुड़ा-ठाड़ा क्यो हो, वो सब वाँने के हुणायो।</verse>
				<verse number="24">जद्याँ वाँ लोगाँ ओ हुण्यो, तो वे एक मन वेन परमेसरऊँ कल्ड़ी अवाज में परातना करबा लागा के, “मालिक, थाँईस हो जो आकास, धरती, समन्द अन वीं मयने जो भी हे, वींने बणायो।</verse>
				<verse number="25">थाँईस पुवितर आत्माऊँ आपणाँ दास अन माकाँ पुरवज दाऊद का मुण्डाऊँ क्यो हो, “‘अणा ज्यो यहूदी ने हे वा लोगाँ काँ हाका-हूक किदी? अन बेकार में लोगाँ काँ जाळ बचायो?</verse>
				<verse number="26">परबू अन वाँका मसी का विरोद में धरती का राजा त्यार वेग्या अन राज करबावाळा दरबार में अगेटा व्या।’”</verse>
				<verse number="27">काँके हाँचई में, थाँका पुवितर दास ईसू, जिंको थाँ राजतलक किदो। वींका विरोद में हेरोदेस अन पिलातुस, ज्यो यहूदी ने हा अन इजराएल्याँ की लारे वेन ईं नगर में भेळा व्या।</verse>
				<verse number="28">वीं हारोई करबा ने भेळा व्या, ताँके जो पेल्याऊँ थाँकी तागत अन मरजीऊँ पूरो व्यो हो, वो पूरो वेवे।</verse>
				<verse number="29">अन अबे ओ परबू, थाँ वाँकी दरपावणी ने देको अन थाँका चेला ने बना दरप्या थाँरा बचन हुणाबा की सगती दो।</verse>
				<verse number="30">थूँ थाँरा पुवितर दास ईसू का नामऊँ लोग-बागाँ ने हव करबा के वाते, अचम्बा अन हेन्याणी का काम करबा के वाते आपणो हात बड़ा।</verse>
				<verse number="31">जद्याँ वणा परातना कर लिदी, तो वाँ जगाँ जटे वे अगेटा व्या हाँ, हालगी। अन वे हारई पुवितर आत्माऊँ भरग्या अन परमेसर का वसना ने बना दरप्याई हुणाबा लागग्या।</verse>
				<verse number="32">हारई विस्वास करबावाळा एक मन अन हरदा का हाँ। अटा तईं के, वे आपणी धन-दोलत ने आपणी ने केता हा, पण हारी चिजाँ वाँका भेळा में ही।</verse>
				<verse number="33">अन वे थरप्या तका परबू ईसू के पाछो जीवतो वेबा की गवई देता अन परमेसर वाँ हाराई ने घणो आसीस दिदो।</verse>
				<verse number="34">वाँकी बंच में किंने भी कणी की कमी ने ही, काँके जिंका नके जगाँ अन घर-बार हा, वे वाँने बेंच देता अन वींऊँ जो भी रिप्या-कोड़ी मलता,</verse>
				<verse number="35">वाँने लान थरप्या तका का पगाँ में मेल देता। अन जिंने जतरीक जरूत वेती, वीं हस्याबूऊँ एक-दूँजा ने बाँट देता हा।</verse>
				<verse number="36">जस्यान के, युसुप नाम को एक लेवी हो, जो साइपरस नाम का देस को हो। थरप्या तका वींको नाम बरनबास राक्यो हो, जिंको मतलब धिजो बंदाबावाळो पूत।</verse>
				<verse number="37">वींके खेत हो, जिंने बेंच दिदो अन वींका रिप्या-कोड़ी लान थरप्या तका का पगाँ में मेल दिदा।</verse>
			</chapter>
			<chapter number="5">
				<verse number="1">हनन्या नाम को एक मनक अन वींकी लुगई सपीरा, वे दुई जणा मलन आपणाँ एक हिस्सा की जगाँ बेंच दिदी।</verse>
				<verse number="2">अन पछे आपणी लुगई की देकणी में वीं रिप्या-कोड़ी मूँ थोड़ाक राक लिदा अन बंच्या तका रिप्या थरप्या तका का पगाँ में मेल दिदा।</verse>
				<verse number="3">ईं बात पे पतरस क्यो, “ए हनन्या, सेतान थाँरा मन में आ बात कस्यान ले आयो के, थूँ पुवितर आत्माऊँ जूट बोले अन जगाँ-जमीं का आया रिप्या-कोड़ीऊँ थोड़ाक बंचान आपणाँ नके राक ले।</verse>
				<verse number="4">कई, वीं जमीं ने बेंचबाँऊँ पेल्याँ वा थारी कोयने ही? अन जद्याँ वा जमीं थें बेंच दिदी, तो वे रिप्या-कोड़ी थाँरा नके ने हाँ? थें आ बात करबाऊँ पेल्याँ काँ ने होची? थूँ लोगाऊँ ने पण परमेसरऊँ जूट बोल्यो हे।”</verse>
				<verse number="5">ईं बाताँ हुणन हनन्या जमीं पे पड़्यो अन मरग्यो। जणा भी लोगाँ ईंका बारा में हुण्यो वे दरपग्या।</verse>
				<verse number="6">पछे थोड़ाक मोठ्याराँ उटन वींने कापळा में पळेटन बारणे लेग्या अन गाड़ दिदो।</verse>
				<verse number="7">वींका एक पेर केड़े वींकी लुगई मयने अई पण वाँ ने जाणती ही के, कई व्यो हो।</verse>
				<verse number="8">तो पतरस वींने पूँछ्यो, “मने ओ बता के, वाँ जगाँ थाँ अतराक में बेंची?” वीं क्यो, “हाँ अतराक मेंईस बेंची।”</verse>
				<verse number="9">तो पतरस वींने क्यो, “थाँ दुई जणा परमेसर की आत्माने परक करबा के वाते काँ राजी व्या? देक, थाँरा घरधणी ने गाड़बावाळा बारणा में ऊबा हे, अन वीं थने भी तोकन लेजाई।”</verse>
				<verse number="10">तद्याँ तरत वाँ भी वींका पगाँ में पड़न मरगी। पछे वीं मोट्यार मयने आया अन देक्यो के, “वाँ मरगी हे, तो वे वींने तोकन लेग्या अन वींने वींका घरधणी के भडे़ईस गाड़ दिदी।</verse>
				<verse number="11">आ बात पे हारी विस्वास्याँ की मण्डली का लोग अन जणी भी वींका बारा में हुण्यो, वे दरपग्या।”</verse>
				<verse number="12">थरप्या तका का हाताऊँ मनकाँ में नरई अनोका अन अचम्बा का काम वेरिया हा। वे हारई जणा एक मन वेन सुलेमान का बरामदा में भेळा वेता हा।</verse>
				<verse number="13">वाँका भेळा मलबा की हिम्मत कुई ने करतो हो, पण, तुई लोग-बाग वाँकी बड़ई करता हा।</verse>
				<verse number="14">परबू पे विस्वास करन नरई लोग मण्डली में ओरू भी आन मलरिया हा, जिंमें नरई लोग-लुगायाँ ही।</verse>
				<verse number="15">थरप्या तका का कामाँ की वजेऊँ लोग-बाग माँदा मनकाँ ने गेला में लान खुतलियाँ पे हुवाण देता, ताँके जद्याँ भी पतरस अटने निकळे, तो कमुकम वींकी छाया आ माँदा मनकाँ पे पड़ जावे।</verse>
				<verse number="16">यरूसलेम के अड़े-भड़े का नगराऊँ लोग-बाग माँदा अन ज्याँमें हुगली आत्मा ही वाँने लाबा लागा अन वे हारई हव वे जाता हा।</verse>
				<verse number="17">तो मोटो याजक अन वाँका हण्डाळी, जो सदुकी पन्त का हाँ, वे रिस्याँ बळबा लागा।</verse>
				<verse number="18">अन थरप्या तका ने पकड़न जेळ में नाक दिदा।</verse>
				<verse number="19">पण, रात में परबुजी के एक हरग-दुत जेळ का कमाड़ा ने खोलन वाँने बारणे निकाळन क्यो,</verse>
				<verse number="20">“मन्दर में जान आपणाँ नुवा जीवन की हारी बाताँ मनकाँ ने हुणावो।”</verse>
				<verse number="21">वे ओ मानन भाग-फाट्याँ मन्दर में जान लोगाँ ने हिकाबा लागा। अन वटे मोटा याजक अन वाँका हण्डाळी यहूदी सबा का हारी इजराएल का बूढा मनकाँ की मोटी सबा बलई। पछे वाँकाणी जेळऊँ थरप्या तका ने लाबा को हुकम दिदो।</verse>
				<verse number="22">पण जद्याँ नोकर जेळ में पूगा, तो वटे वाँने थरप्या तका चेला ने मल्या। वाँकाणी पाच्छा आन क्यो,</verse>
				<verse number="23">“माँकाणी जद्याँ जेळ में ग्या तद्याँ जेळ में जाप्ताऊँ ताळा लागा तका देक्या अन कमाड़ का बारणे पेरादार ऊबा हा, पण जद्याँ माँ कमाड़ खोल्या, तो माँने मयने कुई ने मल्या।”</verse>
				<verse number="24">जद्याँ मन्दर का पेरादाराँ का मुक्या अन याजकाँ ईं बाताँ हूणी, तो वीं वाँका बारा में चक्कर में पड़न होचबा लागा के, “अबे कई वेई?”</verse>
				<verse number="25">पछे कुई मयने आन क्यो, “देक, ज्याँ लोगाँ ने थाँकाणी जेळ में नाक्या हा, वे मन्दर में ऊबा वेन हिकारिया हे।”</verse>
				<verse number="26">ईं वाते मन्दर का पेरादाराँ का मुक्यो आपणाँ सपायाँ की लारे वटे ग्यो अन थरप्या तका ने बना लड़ई-जगड़ा किदाई लेन आयो, काँके वाँने दरपणी ही के कटई लोग-बाग भाटा ने फेकबा लाग जा।</verse>
				<verse number="27">वे थरप्या तका ने मयने लेन आया अन मोटा यहूदी सबा का हामे ऊबा कर दिदा। पछे मोटे याजक वाँने पूँछते तके क्यो,</verse>
				<verse number="28">“माँकाणी ईं नामऊँ ने हिकाबा को आदेस दिदो हो, तुई थाँ हारई यरूसलेम में हिका दिदो हे। कई थाँ ईं मनक की मोत को अपराद मारा पे नाकबो छावो हो।”</verse>
				<verse number="29">पतरस अन थरप्या तका जबाव दिदो, “आपणाँ ने मनकाँ की ने, पण परमेसर की आग्या मानणी छावे।</verse>
				<verse number="30">ईं आपणाँ बड़ाबा का परमेसर, ईसू ने मरयाँ तकाऊँ पाछो जीवतो करन ऊबो कर दिदो हे, जिंने हूळी पे लटकान थाँ लोगाँ मार नाक्यो।</verse>
				<verse number="31">परमेसर वींनेईस राजा अन छुड़ाबावाळो मानन आपणाँ जीमणा पाल्डे बेटा दिदो हे, ताँके इजराएली लोग ने आपणो पापाऊँ मन बदलबा को मोको मले अन परमेसर वाँका पापाँ ने माप करे।</verse>
				<verse number="32">ईं बात का माँ गवायाँ हाँ अन वस्यानीस वा पुवितर आत्मा भी हे, जो पुवितर आत्मा परमेसर वाँने दिदी हे, जो कुई वींकी बात माने हे।”</verse>
				<verse number="33">जद्याँ मोटी सबा का लोग ओ हुण्यो, तो वे रीस में आन थरप्या तका ने मारणो छाया।</verse>
				<verse number="34">पण, एक गमलियल नाम को फरीसी हो, जो यहूदी धरम सास्तरा ने हिकाबावाळो हो अन हारई मनक वींको आदर-मान करता हा, वो ऊबो व्यो अन ओ क्यो के, अणाने थोड़ीक देर का वाते बारणे कर दो।</verse>
				<verse number="35">पछे वो वाँने बोल्यो, “ओ इजराएल का मनकाँ, थाँ अणा मनकाँ की लारे जो भी करणो छारिया हो, वो हेंचेत रेन करजो।”</verse>
				<verse number="36">थोड़ाक वरा पेल्याँ खुद ने मोटो बताबावाळो थियोदास आयो अन च्यारसेक लोग-बाग वींकी लारे वेग्या हा, पण जद्याँ वींने मार दिदो ग्यो तो वींकी लारे का हण्डाळी तितर-बितर वेग्या अन वींको आन्दोलन खतम वेग्यो।</verse>
				<verse number="37">अस्यानीस जनगणना का टेम पे गलील में रेबावाळो यहूदो परगट व्यो। वे भी नरई लोग-बागाँ ने आपणाँ दयने खेंचया हा। पण वो भी मरग्यो। अन वींका चेला भी बखरग्या।</verse>
				<verse number="38">ईं वाते मूँ थाँने केवूँ के, अणा मनकाँ का विरोद में कई मत करो आने अस्यानीस छोड़ दो। यद्याँ आका ईं काम अन ओजणा मनकाँ की आड़ीऊँ हे तो वे वस्यानीस खतम वे जाई,</verse>
				<verse number="39">पण जदी ईं काम परमेसर की आड़ीऊँ हे तो, थाँ वाँने रोक ने सको अन थाँ खुद परमेसर के विरोद में लड़ता तका दिको। वाँकाणी वाँकी सला मान लिदी।</verse>
				<verse number="40">अन थरप्या तका ने मयने बलान वाँके चामट्याँ लगाया अन हुकम दिदो के, ईसू का नाम में कई मत किज्यो, पछे वाँने छोड़ दिदा हा।</verse>
				<verse number="41">अन वे थरप्या तका यहूदी सबाऊँ राजी वेन पराग्या काँके, परमेसर वाँने ईसू का नाम का वाते अपमान भोगबा का जोगा मान्याँ हे।</verse>
				<verse number="42">पछे वीं हरेक दन मन्दर अन घर-घर में हिकाता अन हव हमच्यार को परच्यार करता तका कदी ने रूक्या के, “ईसू ईं मसी हे।”</verse>
			</chapter>
			<chapter number="6">
				<verse number="1">वाँ दनाँ जदी चेला नरई हेला वेबा लागा, तो युनानी रिति-रिवाज मानबावाळा यहूदी, इबरानी रिति-रिवाज मानबावाळा यहूदियाँ पे छीजता के, रोज चिजाँ बाँटबा पे वाँकी विदवा लुगायाँ का हाते भेद-भाव करे हे।</verse>
				<verse number="2">तद्याँ वाँ बारई थरप्या तका आपणाँ चेला की पुरी मण्डली ने एक जगाँ बलान क्यो, “आपणाँ ने परमेसर का बचनाँ ने छोड़न खाबा-पिबा की वेवस्ता करणी हव काम कोयने हे।</verse>
				<verse number="3">ईं वाते ओ भई-लोगाँ, थाँ आपणाँ मूँ मोतबीर, पुवितर आत्माऊँ भरिया तका अन हव अकलवाळा हात मनकाँ ने थरप लो, ताँके माँ वाँने ओ काम हूँप सका।</verse>
				<verse number="4">पण, माँ तो हाराई टेम परातना अन बचन हुणबा का काम में जीव लगा देवाँ।”</verse>
				<verse number="5">आ बात हारी मण्डली के आसे आगी अन वाँकाणी परमेसर पे विस्वास राकबावाळो अन पुवितर आत्माऊँ भरियो तको इस्तीपनुस नाम को एक मनक ने, अन फिलिपुस, परखुरूस, नीकानोर, तीमोन, परमिनास अन यहूदी धरम में आया तका अन्ताकियावासी नीकुलायस ने थरप लिदा।</verse>
				<verse number="6">अन आ हातई जणा ने थरप्या तका का हामे लान ऊबा कर दिदा, पछे थरप्या तका परातना करन वाँपे हात राक्यो।</verse>
				<verse number="7">अस्यान परमेसर का बचन दन-दूणा रात चोगुणा फेलतारिया अन यरूसलेम में चेला की मण्डली हेलीऊँ हेली वेबा लागी, अन याजकाँ का नरई लोग ईसू पे विस्वास करबा लागग्या।</verse>
				<verse number="8">इस्तीपनुस परमेसर की करपा अन सगतिऊँ भरियो तको मनक हो, वो लोग-बागाँ में मोटा-मोटा अचम्बा का काम अन अनोका हेन्याण बतातो हो।</verse>
				<verse number="9">पण, आजाद नाम की एक मण्डली का मनक केवाया जो एक यहूदी परातना करबा के घर का मनक कुरेन, सिकन्दरिया, किलिकिया नगर अन आसिया परदेसऊँ आया यहूदी हाँ, वीं वींको विरोद करता तका बात-बच्यार करबा लागा।</verse>
				<verse number="10">पण, वो पुवितर आत्माऊँ मली तकी अस्यी अकल की बाताँ केतो के, वे वींका हामे ने आ सक्या।</verse>
				<verse number="11">पछे वाँ लोगाँ, दूजाँ मनकाँ ने लोब-लाळच देन केवायो, “माँकाणी ईंने परमेसर अन मूसा की खोट्याँ खातो तको देक्यो हे।”</verse>
				<verse number="12">अस्यान वाँकाणी लोग-बागाँ, यहूदी बुड़ा-ठाड़ा अन धरम सास्तरिया ने हींकान भड़काया। तो वाँकाणी आन वींने पकड़न यहूदी मोटी सबा का हामे लेग्या।</verse>
				<verse number="13">वाँकाणी जो जूटा गवायाँ ने पेस किदा जणा क्यो, “ओ मनक तो ईं पुवितर मन्दर अन मूसा का नेमा ने हिकाबावाळा का विरोद में बोलतो तको कदी थाँके भी कोयने।</verse>
				<verse number="14">माँकाणी ईंने ओ केतो तको हुण्यो के, ओ ईसू नासरी ईं मन्दर ने नास कर देई अन मूसे जो रिति-रिवाज दिदा, वाँने भी बदल देई।”</verse>
				<verse number="15">जद्याँ पछे यहूदी मोटी सबा में बेटा तका हारई लोग-बागाँ वींने धारन देक्यो के, वींको मुण्डो हरग-दुत जस्यान हो।</verse>
			</chapter>
			<chapter number="7">
				<verse number="1">तद्याँ मोटे याजक पूँछ्यो, “कई ईं बाताँ हाँची हे?”</verse>
				<verse number="2">इस्तीपनुस जवाब दिदो, “ओ यहूदी भई-बन्दा अन बड़ा-बुड़ा लोगाँ हुणो, आपणाँ बापू अबराम हारान देस में रेबाऊँ पेल्याँ जद्याँ मेसोपोटामियाँ में हो, तद्याँ वींने मेमामय परमेसर दरसावो दिदो</verse>
				<verse number="3">अन क्यो, थूँ आपणाँ देस अन घर-परवार ने छोड़न वीं देस में जा, जो मूँ थने बताऊँ।”</verse>
				<verse number="4">तद्याँ वो कसदिया का देसऊँ निकळन हारान देस में जा बस्यो अन वींका बाप का मरिया केड़े परमेसर वींने वटाऊँ ईं देस में लान बसायो ज्यामें थें अबाणू रेरिया हो।</verse>
				<verse number="5">अन वींने एक पग मेलबा जतरीक जगाँ भी ने दिदी ही, पण वे ओ वादो किदो के, “मूँ ओ देस थने अन थाँरा बंस ने हूँप देऊँ।” वीं दाण वींके ओलाद कोयने ही।</verse>
				<verse number="6">अन परमेसर ओ क्यो, “थारी ओलादाँ पराया देस में परदेसी वेई अन वे वाँने दास बणाई अन च्यारसे सालाँ तईं दुक देई।</verse>
				<verse number="7">अन जीं जात का वीं दास बेणी, वींने मूँ दण्ड देऊँ अन ईंका केड़े वे अटीस आन अणीस जगाँ मारी मेमा केरी।”</verse>
				<verse number="8">अन वीं अबराम ने करार को हेन्याण जस्यो खतना का रिति-रिवाज दिदा। ईं वाते वो वींका पूत इसाक का जनम के आटमें दन खतनो किदो अन वस्यानीस इसाक याकूब को अन याकूब बारा छोरा को खतनो किदो।</verse>
				<verse number="9">याकूब का छोरा आपणाँ भई युसुप पे रिस्याँ बळन मिसर देस जाबावाळा मनकाँ को हाळी वेबा वाँते बेंच दिदो पण परमेसर वींकी लारे हो।</verse>
				<verse number="10">अन वींने हारई दकऊँ छुड़ायो अन मिसर का राजा का हामे अस्यी करपा अन अकल दिदी के फिरोन वींने मिसर देस को हाकम अन आपणाँ घर की देक-रेक करबावाळो बणायो।</verse>
				<verse number="11">वीं दाण मिसर अन कनान का देसाँ में काळ पड़्यो, जिंमें घणो दुक जेलणो पड़्यो अन आपणाँ बड़ाबा ने खाबा का फोड़ा पड़ग्या।</verse>
				<verse number="12">पण याकूब ओ हुणन के, मिसर में धान हे, तो वणी पेल्याँ छोरा ने वटे खन्दाया जो आपणाँ बड़ाबा हा।</verse>
				<verse number="13">वाँकी दूजी जातरा पे युसुप आपणाँ भायाँ ने बता दिदो के, मूँ थाँको भई हूँ। अन युसुप के परवार का बारा में मिसर का राजा ने नंगे पड़गी।</verse>
				<verse number="14">तद्याँ युसुप आपणाँ बापू याकूब अन वाँका हारई परवार ने बुलाबा के वाते खन्दाया, जो पिच्योतर जणा हा।</verse>
				<verse number="15">पछे याकूब मिसर ग्यो अन वटेई वो अन आपणाँ दूजाँ बड़ाबा सान्त वेग्या।</verse>
				<verse number="16">वाँकी लास वटूँ पाच्छी सकेम नाम की जगाँ लाया, जटे वाँने कबर में गाड़ दिदा हाँ। आ वाईस हमादी ही, जिंने अबराम हमोर का बेटा नकूँ रिप्या देन मोल लिदी ही।</verse>
				<verse number="17">पण, जद्याँ वा बात पुरी वेबा को टेम भड़े आयो, जो वादो परमेसर अबरामऊँ किदो हो, मिसर में माकाँ लोग नरई हेला वेग्या।</verse>
				<verse number="18">तद्याँ मिसर में दूजो राजो बण्यो, जो युसुप का बारा में ने जाणतो हो।</verse>
				<verse number="19">वणी आपणाँ मनकाँ की लारे छळ किदो अन आपणाँ बड़ाबा ने घणो दुक देन मजबूर किदा के, आपणाँ बाळक-टाबर ने मरबा वाते घरऊँ बारणे नाक दे।</verse>
				<verse number="20">वीं दाण मूसा को जनम व्यो, वो परमेसर की देकणी में घणो रुपाळो हो अन तीन मिना तईं आपणाँ बई-बापू का घरे रियो।</verse>
				<verse number="21">पछे जद्याँ वींने बारणे नाक दिदो हो, तो मिसर का राजा की बेटी वींने आपणो बेटो मानन राक्यो अन मोटो किदो।</verse>
				<verse number="22">मूसा ने मिसर की हारी वद्‍या भणई अन वो आपणी वाणी अन करम दोयाँ में ताकडे़ हो।</verse>
				<verse number="23">जद्याँ वो चाळी वरा को व्यो, तो वींका मन में ओ बच्यार आयो के, मूँ आपणाँ इजराएली भायाँऊँ मलूँ।</verse>
				<verse number="24">जद्याँ मूसे देक्यो के एक मिसर का मनक वाँका मूँ एक मनक पे अन्याव कररियो हे, तो वे वींने बंचायो अन मिसर का मनक ने मारन वींको बदलो चुकायो।</verse>
				<verse number="25">वे ओ होच्यो के, मारा भई हमजी परमेसर वींका हातऊँ मुगती देवई, पण वाँकाणी ने हमज्या।</verse>
				<verse number="26">दूजे दन मूसे देक्यो के आपणाँ मनकाँ मूँ कुई लड़रिया हा, तो वाँने हमजोतो करबा के वाते क्यो, “भई, थें तो भई-भई वेन एक-दूँजा पे अन्याव काँ करो हो?”</verse>
				<verse number="27">पण, जो आपणाँ पड़ोस्याँ पे अन्याव करियो हो, वणी मूसा ने धको देन क्यो, “थने कूण माकाँ पे राज करबावाळो अन पटेल बणायो हे?”</verse>
				<verse number="28">कई थें जस्यान काले मिसर का मनक ने मारियो, वस्यान मने भी मारणो छावे हे?</verse>
				<verse number="29">आ बात हुणन मूसो भाग्यो अन मिद्यान देस में परदेसी वेन रेवा लागो अन वटेई वींके दो बेटा व्या।</verse>
				<verse number="30">जद्याँ चाळी साल पूरा व्या, तो एक हरग-दुत सिनाई मंगरा का नके हुन्ना काँकड़ में हळगता तका झाड़ की जाळ में परगट व्यो।</verse>
				<verse number="31">मूसे जद्याँ ओ देक्यो, तो वो अचम्बा में पड़ग्यो अन ओरुँ हव तरियाऊँ देकबा का वाते झाड़ का नके ग्यो तो वणी परबू की अवाज हूणी,</verse>
				<verse number="32">मूँ थाँरा बड़ाबा को परमेसर हूँ, अबराम, इसाक अन याकूब को परमेसर हूँ। तो मूसो घबरान धूँजवा लागो अन वटे देकबा की भी हिम्मत ने कर सक्यो।</verse>
				<verse number="33">तद्याँईस परबू वींने क्यो, “आपणाँ पगाँ की पगरख्याँ उतार, काँके जीं जगाँ पे थूँ ऊबो हे, वाँ पुवितर जगाँ हे।</verse>
				<verse number="34">में मिसर में आपणाँ लोग-बागाँ की लारे अन्याव वेता देक्यो अन वाँने रोता तका हुण्या। वाँने छुड़ाबा के वाते मूँ अटे आयो हूँ। अबे अटे आ, मूँ थने मिसर खन्दाऊँ।”</verse>
				<verse number="35">“जीं मूसा ने वाँकाणी ओ केन नकार दिदो, ‘थने कूण माकाँ पे राज करबावाळो अन पटेल बणायो हे?’ वींनेईस परमेसर राज करबा अन छुड़ाबावाळो बणान वीं हळगता तका झाड़ में दरसावो दिदा तका हरग-दुत की मदतऊँ खन्दायो।</verse>
				<verse number="36">वो वाँने मिसर देस में, राता समन्द पे, अन हुन्ना काकड़ में चाळी सालाँ तईं अनोका काम करतो अन परच्यो देतो तको मिसर देसऊँ बारणे निकाळन लायो।</verse>
				<verse number="37">अन वणीस मूसे इजराएल का लोगाऊँ क्यो हो, ‘परमेसर थाँ यहूदी भई-बन्दाऊँ थाँका वाते मारा जस्यो एक परमेसर का आड़ीऊँ बोलबावाळो खन्दाई।’</verse>
				<verse number="38">ओ वोईस हे, जणी हुन्ना कांकड़ में इजराएली लोगाँ की लारे, सिनाई मंगरा पे बात किदा तका हरग-दुत की लारे अन आपणाँ बड़ाबा की लारे हो। वींनेईस आपणाँ ने देबा वाते परमेसर को जीवन देबावाळो बचन मल्यो हे।</verse>
				<verse number="39">“पण, आपणाँ बड़ाबा वींकी ने मानी अन वींने नकारन आपणो मन मिसर देस दयने फेर दिदो।</verse>
				<verse number="40">अन अस्यान वे हारूनऊँ क्यो, ‘आपणाँ वाते अस्या बावजी बणा, जो आपाँने गेलो बतावे, काँके आपाँने जाणा के, जो आपाँने मिसर देसऊँ अटे लायो वीं मूसा के कई वेग्यो हे।’</verse>
				<verse number="41">अस्यान वाँकाणी एक केल्डा की मूरत बणान वीके आगे बली चड़ई अन वे आपणाँ हातऊँ किदा काम पे राजी वेबा लागा।</verse>
				<verse number="42">ईं वाते परमेसर वाँने छोड़ दिदा के, वे आकास का गरे-नंगतर की पुजा करे, जस्यान परमेसर का आड़ीऊँ बोलबावाळा की पोती में लिक्यो हे, “‘ओ इजराएल का लोगाँ, कई चाळी सालाँ तईं हुन्ना काँकड़ में थाँ जीव-जनावर की बलियाँ अन भेंट मनेइस चड़ाता हा?</verse>
				<verse number="43">थाँ मोलेक बावजी को तम्बू अन रिपान नाम का तारा बावजी की मूरताँ ने लेन फरता हा, ज्याँने थाँकाणी पूजबा के वाते बणई ही। ईं वाते मूँ थाँने बाबुल का देसऊँ भी छेटी खन्दाऊँ।’</verse>
				<verse number="44">“परमेसरऊँ मलबा को तम्बू हुन्ना कांकड़ में आपणाँ बड़ाबा की लारे हो। ओ तम्बू वस्यानीस बणायो हे, जस्यान परमेसर मूसा ने बणाबा के वाते बतायो हो।</verse>
				<verse number="45">ईंका केड़े जद्याँ आपणाँ बड़ाबा ईं तम्बू ने पान आपणाँ हाते लेग्या, जद्याँ वीं यहोसु का हाते वीं जगाँ पे कबजो कर लिदो, जीं जगाँऊँ परमेसर पेल्याँऊँ ज्यो यहूदी ने हा वा लोगाँ ने बापदादा की देकणी में भगा दिदा। वो तम्बू दाऊद की टेम तईं अटेईस हो।</verse>
				<verse number="46">राजा दाऊद पे परमेसर करपा किदी अन वे अरज किदी के, वो याकूब का परमेसर के वाते मन्दर बणावे।</verse>
				<verse number="47">पण, वो राजा सुलेमानईस हो जणी वींका वाते मन्दर बणायो।</verse>
				<verse number="48">“पण, परम पिता परमेसर मनकाँ का हातऊँ बणाया तका मन्दर में ने रेवे, जस्यान के परमेसर का आड़ीऊँ बोलबावाळे क्यो,</verse>
				<verse number="49">“‘परबुजी केवे, हरग मारो आसन अन धरती मारा पगाँ को बाजोट्यो हे। मारा वाते थाँ कस्योक घर बणावो? अन अस्यी कस्यी जगाँ हे जटे मूँ रियाम्बो ले सकूँ?</verse>
				<verse number="50">कई ए हंगळी चिजाँ मारी हात की बणई तकी कोयने?’</verse>
				<verse number="51">“इस्तीपनुस बोलतो ग्यो ओ अडीग लोगाँ, थाँको मन परमेसरऊँ कतरो छेटी हे, थें तो परमेसर का संदेसा ने मानोईस कोयने। थाँ आपणाँ बड़ाबा जस्यानीस हमेस्यान पुवितर आत्मा को विरोद किदो।</verse>
				<verse number="52">अस्यो एक भी परमेसर का आड़ीऊँ बोलबावाळो हो कई, जिंने थाँका बड़ाबा ने हतायो? वाँकाणी तो वाँने भी मार नाक्या, ज्याँकाणी नरई दनाँ पेल्याँईं वीं धरमी के आबा की घोसणा कर दिदी ही, जिंने अबे थाँकाणी छळ करन पकड़वा दिदो अन मार दिदो।</verse>
				<verse number="53">थाँईस हो जो हरग-दुताऊँ दिदा ग्या परमेसर का नेमा ने पाया, पण वाँको पालण ने किदो।”</verse>
				<verse number="54">जद्याँ यहूदी मोटी सबा का लोग ओ हुण्यो तो, वीं रीस में आन राता-पीळा वेग्या अन दाँत पीसबा लागा।</verse>
				<verse number="55">पण, पुवितर आत्माऊँ भरियो तको इस्तीपनुस हरग दयने देक्यो अन वीं परमेसर की मेमा अन ईसू ने परमेसर का जीमणे पाल्डे ऊबो देक्यो।</verse>
				<verse number="56">तो वणा क्यो, “देको, मूँ देकरियाऊँ के, हरग खुल्यो तको हे अन मनक को पूत परमेसर के जीमणा पाल्डे ऊबो हे।”</verse>
				<verse number="57">ईं बात पे वाँकाणी हाका-भार करन आपणाँ कान्दड़ा में आँगळी दे दिदी अन पछे वे हारई जणा एक लारे वींपे टूट पड़्या।</verse>
				<verse number="58">वे वींने धक्का-मुक्की देता तका नगरऊँ बारणे लाया अन वींपे भाटा फेंकबा लागा। वीं दाण गवायाँ आपणाँ जब्बो उतारन साउल नाम का मनक के पगाँ में मेल दिदा।</verse>
				<verse number="59">अन वे इस्तीपनुस पे भाटा फेंकताई रिया, जद्याँ वो ओ केतो तको परातना किदी, “ओ परबू ईसू, मारो जीव लेलो।”</verse>
				<verse number="60">पछे वो गोडा टेकन कल्ड़ी अवाजऊँ क्यो, “परबू, ईं पाप ने वाँका माते मत नाकजो।” अतरोक केन वो मरग्यो।</verse>
			</chapter>
			<chapter number="8">
				<verse number="1">अस्यान साउल इस्तीपनुस की हत्या में मदत किदी। वणीस दनऊँ यरूसलेम की विस्वास्याँ की मण्डली पे घणो हताव वेबो सरू वेग्यो। थरप्या तका ने छोड़न वे हारई विस्वासी यहूदियाँ अन सामरिया का हिमाड़ा में वखर ग्या।</verse>
				<verse number="2">कुई भगत लोग इस्तीपनुस ने कबर में गाड़्यो अन वींका वाते कल्ड़ी हाका-भार करन रोणो-धोणो किदो।</verse>
				<verse number="3">साउल विस्वास्याँ की मण्डली ने खतम करबो सरू कर दिदो। वो घर-घर में जान विस्वासी लोग-लुगायाँ ने ठल्डतो तको जेळ में नाकबा लागो।</verse>
				<verse number="4">वकरिया तका विस्वासी लोग-बाग हर जगाँ जा-जान हव हमच्यारा को सन्देसो हुणाबा लागा।</verse>
				<verse number="5">फिलिपुस सामरिया नगर में परोग्यो अन वटे लोग-बागाँ में अस्यान परच्यार करबा लागो के, ईसू ईं मसी हे।</verse>
				<verse number="6">जद्याँ वाँ लोगाँ फिलिपुस की बात हूणी अन वींका अचम्बा का काम देक्या, तद्याँ वाँकाणी फिलिपुस की बात पे पूरो मन लगायो।</verse>
				<verse number="7">नरई लोग-बाग में धस्यी तकी हुगली आत्मा हाका-भार करती तकी बारणे निकळगी अन नरई लकवा का मान्दा अन लुला-लंगड़ा हव वेरिया हा।</verse>
				<verse number="8">ईं वाते वीं नगर में घणो आणन्द हो।</verse>
				<verse number="9">वटेई समोन नाम को एक मनक रेतो हो। वो नरई दनाँऊँ वीं नगर में टोटका करतो हो अन सामरिया का लोग-बागाँ ने अचम्बा में नाकतो रेतो हो। वो खुद ने मोटो मानतो हो।</verse>
				<verse number="10">फोराऊँ लगान मोटा मनक हारई वींकी बात पे चेतो देन केता, “ओ मनक परमेसर की वाँ सगती हे, जिंने ‘मोटी सगती’ केवे हे।”</verse>
				<verse number="11">वीं नरई दनाँऊँ वाँ लोगाँ ने आपणाँ टोटका का कामाँऊँ अचम्बा में नाक मेल्या हा, ईं वाते वीं वींने घणो मानता हा।</verse>
				<verse number="12">पण वणा लोगाँ फिलिपुस का संदेसा पे भरोसो किदो, काँके फिलिपुस वाँने परमेसर का राज अन ईसू मसी नाम को हव हमच्यार हूणातो हो। तो हारई लोग-लुगायाँ बतिस्मो लेबा लागा।</verse>
				<verse number="13">तद्याँ समोन खुद भी भरोसो किदो अन बतिस्मो लेन फिलिपुस की लारे रेवा लागो। वो परच्या अन अनोका कामाँ ने देकन अचम्बा में पड़ग्यो।</verse>
				<verse number="14">जद्याँ जो थरप्या तका यरूसलेम में हा, वाँकाणी हुण्यो के, सामरिया का लोगाँ परमेसर को बचन मान लिदो हे, तो पतरस अन यहुन्ना ने वाँका नके खन्दाया।</verse>
				<verse number="15">वाँकाणी वटे जान वाँका वाते परातना किदी के, वाँने पुवितर आत्मा मले,</verse>
				<verse number="16">काँके वाँ दनाँ तईं पुवितर आत्मा किंका पे भी ने उतरी ही, अन वाँकाणी तो बेस परबू ईसू का नाम में बतिस्मो लिदो हो।</verse>
				<verse number="17">जद्याँ परतस अन यहुन्ने वाँका पे हात मेल्यो तद्याँ पुवितर आत्मा वाँने मली।</verse>
				<verse number="18">जद्याँ समोन देक्यो के, थरप्या तका का हात मेलबाऊँ पुवितर आत्मा मल जावे, तो वाँका नके रिप्या लान क्यो,</verse>
				<verse number="19">“ओ सगती मने भी दो, ताँके मूँ जिंपे भी हात मेलू, वींने पुवितर आत्मा मले।”</verse>
				<verse number="20">पतरस वींने क्यो, “थाँरा रिप्या थारी लारे ईं नास वे जाई, काँके थें परमेसर को वरदान रिप्याऊँ मोल लेबा को बच्यार किदो।</verse>
				<verse number="21">ईं बात में थारी ने पाँती हे अन ने थूँ भेळो हे, काँके थारो मन परमेसर के हामे हव कोयने।</verse>
				<verse number="22">ईं वाते आपणाँ ईं खोटऊँ मन बदलन परबूऊँ परातना कर, परबू थाँरा बुरा बच्यार माप कर देई।</verse>
				<verse number="23">काँके मूँ देकूँ के, थाँको मन कळ्डोजेर अन खराब कामाँ में फस्यो तको हे।”</verse>
				<verse number="24">समोन जबाव दिदो, “थाँ मारा वाते परबूऊँ अरज करो के, जो बाताँ थाँ हुणई, वाँकाऊँ एक भी बात मारा पे ने बीते।”</verse>
				<verse number="25">ईंका केड़े वे गवई देन परबू का बचन हुणान यरूसलेम आरिया हा, तद्याँ सामरिया का नरई गामाँ में हव हमच्यार हुणाता ग्या।</verse>
				<verse number="26">पछे परबू के एक हरग-दुत फिलिपुसऊँ क्यो, “उटन लंकवऊँ पाल्डे वीं कांकड़ का गेला पे जा, जो यरूसलेमऊँ गाजा जारियो हे।”</verse>
				<verse number="27">वो उटन वटे परोग्यो, जद्याँ इथोपिया देस को एक मनक आरियो हे, जो खोजे अन इथोपिया की राणी कन्दाके को मंतरी अन खजाना को अदिकारी हो। वो परातना करबा ने यरूसलेम आयो हो।</verse>
				<verse number="28">वो आपणाँ रत पे बेटो तको हो अन यसाया नाम का परमेसर का आड़ीऊँ बोलबावाळा की किताब भणतो तको पाछो जारियो हो।</verse>
				<verse number="29">तद्याँ पुवितर आत्मा फिलिपुस ने क्यो, “भड़े जान ईं रत की लारे वेजा।”</verse>
				<verse number="30">फिलिपुस वींका दयने दोड़्यो अन वींने परमेसर का आड़ीऊँ बोलबावाळा यसाया की किताब भणतो तको हुण्यो अन पूँछ्यो, “थूँ जो भी भणरियो हे, वींने हमजे हे कई?”</verse>
				<verse number="31">अदिकारी क्यो, “जतरे मने कुई ने हमजावे, तो मूँ कस्यान हमजूँ?” अन वे फिलिपुस ने रत पे चड़न वींका भड़े बेटबा वाते बलायो।</verse>
				<verse number="32">वो किताब को जो भाग भणरियो हो वो अस्यान हो। “वींने बली वेबावाळा गारा का जस्यान ले जारिया हा। वो तो वीं उन्याँ का जस्यान छानो-मानो हो, जो आपणी ऊन काटबावाळा का हामे छानो रेवे।</verse>
				<verse number="33">अस्यान वींने निचो दिकान न्यावऊँ छेटी कर दिदो। वींकी आबावाळी पीड़ी को बखाण कूण केरी? काँके धरतीऊँ वींको जीव ले लिदो हो।”</verse>
				<verse number="34">ईं बात पे अदिकारी फिलिपुसऊँ पूँछ्यो, “थूँ मने ओ बता के, परमेसर का आड़ीऊँ बोलबावाळा ओ किंका बारा में केवे, वाँका बारा में कन दूजाँ का बारा में?”</verse>
				<verse number="35">तद्याँ फिलिपुस बखाण करणो सरू कर किदो अन सास्तर का अणीस पाटऊँ सरू करते तके वींने ईसू को हव हमच्यार हुणायो।</verse>
				<verse number="36">गेला में चालता तका वे वीं जगाऊँ वेन जारिया हा जटे पाणी हो, पछे वे अदिकारी क्यो, “देको, अटे पाणी हे, अबे मने बतिस्मो लेबा में कई रोक हे?”</verse>
				<verse number="37">फिलिपुस जबाव में क्यो, “जद्याँ थूँ आपणाँ मनऊँ भरोसो करे, तो बतिस्मो ले सके।” वे अदिकारी क्यो, “हाँ, मूँ भरोसो करूँ के, ईसू मसी परमेसर को पूत हे।”</verse>
				<verse number="38">तद्याँ वे अदिकारी रत ने रोकबा के वाते क्यो। पछे फिलिपुस अन वो अदिकारी दुई पाणी में उतरग्या अन फिलिपुस वींने बतिस्मो दिदो।</verse>
				<verse number="39">अन जद्याँ वे पाणीऊँ बाणे निकळ्या, तो फिलिपुस ने परबू की आत्मा लेन परोग्यो अन वो अदिकारी पछे वींने कदी ने देक सक्यो अन वो राजी वेतो तको आपणे गेले-गेले परोग्यो।</verse>
				<verse number="40">फिलिपुस खुद ने असदोद नगर में पायो अन हारई नगराँ में हव हमच्यार को परच्यार करतो तको केसरिया नगर में परोग्यो।</verse>
			</chapter>
			<chapter number="9">
				<verse number="1">साउल अबाणू भी परबू का चेला ने मारबा का वाते दरपातो हो। वो खास मोटा याजक नके ग्यो</verse>
				<verse number="2">अन वे दमिसक का परातना-घराँ को वींने ओळकाण की एक पानड़ी देबा का वाते अरज किदी। ताँके वींने वटे कुई भी ईं पन्त को मनक मले, पलेई वा लुगई वेवे कन आदमी, वो वाँने बन्दी बणान पाच्छा यरूसलेम लावे।</verse>
				<verse number="3">जद्याँ वो ग्यो अन दमिसक के भड़े पूग्यो, तो अणाचेत को वींके च्यारूँमेर आकासऊँ उजितो वेग्यो।</verse>
				<verse number="4">वो रेटे पड़ग्यो अन एक अवाज हूणी, जो वींने केरी ही, “साउल, ए साउल! थूँ मने काँ हतारियो हे?”</verse>
				<verse number="5">साउल पूँछ्यो, “परबू, थाँ कूण हो?” वीं बोल्या, “मूँ ईसू हूँ, जिंने थूँ हतारियो हे।”</verse>
				<verse number="6">पण, अबे थूँ ऊबो वेजा अन नगर में जा, वटे थने बता दिदो जाई के, थने कई करणो हे।</verse>
				<verse number="7">जो भी मनक वींकी लारे जातरा कररिया हा, वीं छाना-माना ऊबा हा। वाँकाणी अवाज तो हूणी ही, पण किंनेई कई दिक्यो कोयने हो।</verse>
				<verse number="8">पछे साउल ऊबो व्यो अन आपणी आक्याँ खोली, पण वो कई ने देक सक्यो। ईं वाते वींका हण्डाळी वींको हात पकड़न दमिसक लेग्या।</verse>
				<verse number="9">तीन दनाँ तईं वो कई भी ने देक सक्यो हो अन नेईं कई खादो-पीदो हो।</verse>
				<verse number="10">दमिसक में एक हनन्या नाम को एक विस्वासी रेतो हो। परबुजी वींने दरसावो देन क्यो, “हनन्या”। तो वो बोल्यो, “परबू, मूँ अटे हूँ।”</verse>
				<verse number="11">परबू वींने क्यो, “ऊबो वेजा अन ‘हेटा’ केबावावाळी गळी में जा अन वटे यहूदा का घरे जान तरसूस का रेवासी साउल नाम का एक मनक के वाते पूछताछ कर, वो परातना कररियो हे</verse>
				<verse number="12">अन वणी एक दरसावो में देक्यो के, हनन्या नाम के एक मनक आन वींपे हात मेल्यो ताँके वो पाछो देकबा लाग जावे।”</verse>
				<verse number="13">हनन्या जबाव दिदो, “परबू, में ईं मनक के वाते नरई लोगाऊँ हुण्यो हे। यरूसलेम में थाँने मानबावाळा लोगाँ की लारे अणी जो भी बुरो किदो हो, वो हारोई में हुण्यो हे।</verse>
				<verse number="14">अन अटे भी ओ मोटा याजकाँऊँ अदिकार लेन थाँका नाम पे भरोसो राकबावाळा मनकाँ ने बन्दी बणाबा वाते आयो हे।”</verse>
				<verse number="15">पण, परबू वींने क्यो, “थूँ जा। काँके ईं मनक ने हारी जात्या, राजा अन इजराएल का लोगाँ में मारो नाम फेलाबा वाते चुण्यो हे।</verse>
				<verse number="16">मूँ वींने ओ हारोई बताऊँ, जो वींने मारा नाम के वाते सेण करणो पेड़ी।”</verse>
				<verse number="17">अन हनन्या निकळग्यो अन वीं घर मयने ग्यो अन साउल पे आपणो हात मेल्यो अन क्यो, “भई साउल, परबू ईसू मने खन्दायो हे, जो थने गेला में दिकई दिदा हा, ताँके थूँ पाछो देकबा लाग जावे अन पुवितर आत्माऊँ भर जावे।”</verse>
				<verse number="18">पछे तरत छोपटा जस्यान कई चीज वींकी आक्याँऊँ पड़ी अन पछे वींने दिकबा लागग्यो। वो ऊबो व्यो अन बतिस्मो लिदो।</verse>
				<verse number="19">पछे खाणो खादा केड़े वींने तागत पाच्छी मलगी। वो दमिसक में चेला की लारे थोड़ाक दन रियो।</verse>
				<verse number="20">पछे वो यहूदी परातना घर में पूगो अन तरत परच्यार करबा लागो के, “ईसू ईंस परमेसर को पूत हे।”</verse>
				<verse number="21">जणी भी ओ हुण्यो, तो अचम्बा में पड़ग्या अन केबा लागा, “कई ओ मनक वोईस हे, जो यरूसलेम में ईसू का नाम पे भरोसो करबावाळा मनकाँ ने मारतो हो? कई ओ मनक अटे वाँ लोगाँ ने पकड़न बन्दी बणान मोटा याजकाँ के हामे लेजाबा के वाते ने आयो हो?”</verse>
				<verse number="22">पण, साउल अणीऊँ भी हेली सगतिऊँ परच्यार करतो हो के, दमिसक में रेबावाळा यहूदियाँ की बोलती बन्द कर देतो हो अन ओ साबत करन केतो हो के, “ईसू ईं मसी हे।”</verse>
				<verse number="23">नरई दन निकळबा के केड़े यहूदी लोगाँ वींने मारबा की ओजणा लगई।</verse>
				<verse number="24">पण, वाँकी ओजणा साउल ने नंगे पड़गी। वे लोग नगर का फाटक पे रात-दन ताकता रेता हाँ ताँके वींने मार नाके।</verse>
				<verse number="25">पण, वींका चेला रात नेई वींने लेन, ठोपली में बेठाण नगर की बारली भींतऊँ लटकान वींने रेटे उतार दिदो।</verse>
				<verse number="26">पछे जद्याँ वो यरूसलेम पूग्यो, तो वो चेला में भेळो वेबा वाते कोसीस करबा लागो। पण, वीं तो हारई जणा दरपग्या हा अन वाँने ओ भरोसो कोयने हो के, वो भी एक चेलो हे।</verse>
				<verse number="27">पण, बरनबास वींकी मदत करबा ने आयो अन वींने थरप्या तका का नके लेग्यो। वणी वाँने बतायो के, साउल परबू ने गेला में कस्यान देक्या अन परबू वींऊँ कस्यान बाताँ किदी ही अन पछे दमिसक में वे कस्यान हिम्मत राकन ईसू नाम में परच्यार किदो।</verse>
				<verse number="28">पछे साउल वींकी लारे यरूसलेम में आबाजाबा लागो अन बना दरप्या परबू नाम में उपदेस देतो हो।</verse>
				<verse number="29">वो युनानी भासा बोलबावाळा यहूदियाँऊँ बात-बच्यार करतो, पण वे वींने मारबा वाते ताकरिया हा।</verse>
				<verse number="30">पण, जद्याँ भई-बन्दा ने ईं बात को पतो पड़्यो, तो वे वींने केसरिया नगर लेग्या अन पछे तरसूस खन्दा दिदो।</verse>
				<verse number="31">अस्यान वीं टेम में हारई यहूदियाँ, गलील अन सामरिया की मण्डळ्याँ सान्तीऊँ रेरी ही। ओरी हेली तागतवर वेबा लागी अन परबू ने मानता तका जीरिया हा अन पुवितर आत्मा वाँने ओरी मदत किदी, तो वे ओरी हेली वेबा लागी।</verse>
				<verse number="32">पछे वो पतरस हारी जगाँ जातरा करतो तको लिद्दा देस में ईसू ने मानबावाळा लोगाऊँ मलबाग्यो।</verse>
				<verse number="33">वटे वींने एन्यास नाम को एक मनक मल्यो, जो आट वराऊँ खुतलियाँ पे पड़ग्यो हो, जिंने लकवो वेग्यो हो।</verse>
				<verse number="34">पतरस वींने क्यो, “एन्यास, ईसू मसी थने हव करी, ऊबो वे अन आपणो वसाणो हामट” तो वो तरत ऊबो वेग्यो।</verse>
				<verse number="35">पछे लिद्दा अन सारोन का रेवासी वींने देक्यो अन वीं परबू ने मानबा लागग्या।</verse>
				<verse number="36">यापा में तबीता नाम की एक चेली रेती ही, जिंका नाम को मतलब हो “हरणी” वाँ हमेस्यान हव काम-काज करती अन गरीबा ने दान-पन करती।</verse>
				<verse number="37">वाँ दनाँ मेंईस वाँ मांदी वेन मरगी। वाँकाणी वींकी लास ने हपड़ई अन पछे ऊपरे ओवरा में हुवाण दिदी।</verse>
				<verse number="38">लिद्दा देस यापा नगर का भडे़ई हो। तो चेला जद्याँ ओ हुण्यो के पतरस लिद्दा में हे, तो वाँकाणी वींका नके दो मनक खन्दाया ताँके वीं वींऊँ अरज करे, “करपा करन, हट माकाँ नके आजा।”</verse>
				<verse number="39">तो पतरस वाँकी लारे परोग्यो। जद्याँ पतरस वटे पूगो, तो वे वींने ऊपरे वीं ओवरा में लेग्या जटे हारी राडी-बायाँ रोती-धोती तकी वे गाबा-छींतरा बताती तकी च्यारूँमेर भेळी वेगी, जो गाबा वे तबीता नाम की चेली बणाया हा, जद वाँ वाँके हाते ही।</verse>
				<verse number="40">पतरस हारई जणा ने बारणे खन्दान गोडा टेकन परातना किदी। पछे वीं लास दयने देकन क्यो, “हे तबीता, ऊबी वेजा।” वा आपणी आक्याँ खोलन पतरस ने देकती तकी उटी वेगी।</verse>
				<verse number="41">वींने पतरस हात पकड़न ऊबी किदी अन पछे वाँ राडी-बायाँ अन ईसू ने मानबावाळा लोगाँ ने बलान वाँने हूँप दिदी।</verse>
				<verse number="42">हारई यापा देस में ईं बात को पतो पड़ग्यो अन नरई लोगाँ परबू पे विस्वास किदो।</verse>
				<verse number="43">पछे पतरस यापा मेंईस समोन नाम का एक चामड़ा को काम करबावाळा के घरे नरई दनाँ तईं रियो।</verse>
			</chapter>
			<chapter number="10">
				<verse number="1">केसरिया में कुरनेल्युस नाम को एक मनक हो। वो रोम की इटालनी नाम की फोज का हो सपायाँ पे सरदार हो।</verse>
				<verse number="2">वो एक धरमी अन परमेसरऊँ दरपबावाळो मनक हो अन वींको परवार भी वस्योईस हो। वो लोगाँ ने खुला मनऊँ घणो दान-पन करतो हो अन हमेस्यान परमेसरऊँ परातना करतो हो।</verse>
				<verse number="3">वे दन का तीजा पेर में एक दरसावो में देक्यो के, परमेसर को एक हरग-दुत वाँका नके आयो हे अन वींने केरियो हे, “ओ कुरनेल्युस।”</verse>
				<verse number="4">तो कुरनेल्युस दरपतो तको ध्यानऊँ हरग-दुत ने देकतो तको बोल्यो, “ओ परबू, कई हे?” हरग-दुत वींने क्यो, “परमेसर थारी परातना हूणी हे अन थाँरा किदा तका दान-पनऊँ परमेसर राजी वेग्या हे।</verse>
				<verse number="5">ईं वाते अबे किंने यापा देस में खन्दा अन समोन नाम का जो पतरस केवावे हे वींने अटे बला ले।</verse>
				<verse number="6">वो समोन नाम का एक चामड़ा का काम करबावाळा की लारे रेरियो हे, जिंको घर समन्द का कनारे हे।”</verse>
				<verse number="7">वो हरग-दुत जो वींऊँ बाताँ करियो हो, परोग्यो, तो कुरनेल्युस आपणाँ दो नोकराँ अन एक सपई जो धरमी मनक हो वींने बलायो जो वींकी हार-हमाळ करता हा।</verse>
				<verse number="8">अन जो भी व्यो हे, वाँने हारी बात बतान यापा देस खन्दा दिदा।</verse>
				<verse number="9">आगले दन जद्याँ वे चालता-चालता नगर के भडे़ पूगबाने हाँ, तद्याँई पतरस दपराँ की परातना करबा के वाते मेड़ी पे चड्यो।</verse>
				<verse number="10">वींने भूक लागी, तो वो कई खाणो छारियो हो। जद्याँ खाणो बणरियो हो, वीं टेम वो एकाएक होस भुलग्यो।</verse>
				<verse number="11">अन वे देक्यो के, आकास खुलग्यो अन एक मोटा चादरा जस्यान कई चीज हे जिंका च्याराई खुणा पकड़न रेटे उतररी हे।</verse>
				<verse number="12">वींमें हारई तरे का जीव-जनावर हा, ज्यामें धरती का किड़ा-मकोड़ा अन आकास का उड़बावाळा जनावर हा।</verse>
				<verse number="13">पछे एक अवाज अई के, “पतरस उठ अन आने मारन खा।”</verse>
				<verse number="14">पतरस क्यो, “परबू मूँ अस्यो ने कर सकूँ हूँ, काँके में कदी भी हुगली अन असुद चिजाँ ने खादी।”</verse>
				<verse number="15">तो पाच्छी वींने दूजी दाण अवाज हुणई, “जो भी चिजाँ ने परमेसर सुद क्यो हे, वींने असुद ने केणी।”</verse>
				<verse number="16">तीन दाण अस्यानीस व्यो अन वाँ चीज पाच्छी आकास में उठा लिदी गी।</verse>
				<verse number="17">पतरस जो दरसावो में देक्यो हो, वींका वाते वो होचरियो हो, जद्याँई कुरनेल्युस का खन्दाया तका मनक पतो पूँछता तका बारणा पे आग्या।</verse>
				<verse number="18">वाँकाणी बारणे बलान पूँछ्यो, “कई पतरस केवावे, जो समोन अटेई रूक्यो तको हे?”</verse>
				<verse number="19">पतरस अबाणू भी वीं दरसावो के वातेई होचरियो हो, तद्याँ आत्मा वींने क्यो, “हुण, तीन मनक थने होदरिया हे।</verse>
				<verse number="20">ईं वाते ऊबो वे अन रेटे उतर आगो-पाछो मत वे अन वाँकी लारे परोजा, काँके वाँने में खन्दाया हे।”</verse>
				<verse number="21">पछे पतरस रेटे उतरियो अन वाँ लोगाँ ने क्यो, “मूँ तो वोईस मनक हूँ, जिंने थाँ होदरिया हो। थें काँ आया हो?”</verse>
				<verse number="22">वे बोल्या, “माँ ने फोज का सरदार कुरनेल्युस खन्दाया हे, जो एक धरमी अन परमेसरऊँ दरपबावाळो मनक हे। हाराई यहूदी मनकाँ में वींको घणो मान-समान हे। वींने परबू के हरग-दुत क्यो के, वो थाँने आपणाँ घरे बलावे अन जो थें केवो, वो हुणे।”</verse>
				<verse number="23">ईं वाते पतरस वाँने मयने बलान मनवार किदी, पछे आगले दन वो त्यार वेन वाँकी लारे परोग्यो अन यापा देस का रेवासी थोड़ाक विस्वासी वींकी लारे ग्या।</verse>
				<verse number="24">पछे आगलेई दन वो केसरिया परोग्यो। वटे आपणाँ हगा-होई अन भई-बन्दा ने बलान कुरनेल्युस वाँकी बाट नाळरियो हो।</verse>
				<verse number="25">पतरस जद्याँ मयने जाबाई वाळो हो, तद्याँ कुरनेल्युस वींने मल्यो। कुरनेल्युस वींका पगाँ में पड़न धोक दिदो।</verse>
				<verse number="26">पण, पतरस वींने बेटो करतो तको क्यो, “ऊबो वे, मारे धोक मत दे, मूँ भी तो एक मनक हूँ।”</verse>
				<verse number="27">पछे वींका लारे बाताँ करतो तको वो मयने परोग्यो अन वटे वीं नरई लोगाँ ने अगेटा व्या तका देक्या।</verse>
				<verse number="28">पतरस वाँने क्यो, “थाँ जाणो हो के, एक यहूदी के वाते ज्यो यहूदी ने हे वणीऊँ वेवार राकणो कन वाँका नके जाणो नेम को उल्टो हे। पण परमेसर मने बतायो के, मूँ किंने भी हुगलो अन असुद ने केवूँ।</verse>
				<verse number="29">ईं वाते जद्याँ मने बलायो अन मूँ बनाई आगो-पाछो व्याई अटे आग्यो हूँ। ईं वाते अबे मूँ पूँछू हूँ के, थें मने अटे काँ बलायो हे?”</verse>
				<verse number="30">तो कुरनेल्युस क्यो, “चार दन पेल्याँ अणीस टेम का तीजे पेर में, मूँ घरे परातना करियो हो। तद्याँ अणाचेत को चमकता तका गाबा पेरिया एक मनक मारा हामे आन ऊबो वेग्यो,</verse>
				<verse number="31">अन क्यो, कुरनेल्युस! परमेसर थारी परातना हूणी हे अन थाँरा लोगाँ ने दिदा तका दान-पन हाराईऊँ परमेसर राजी वेग्या हे।</verse>
				<verse number="32">ईं वाते अबे किंने यापा देस में खन्दा अन समोन नाम का जो पतरस केवावे हे वींने अटे बला ले। वो समोन नाम का एक चामड़ा का काम करबावाळा की लारे रेरियो हे, जिंको घर समन्द का कनारे हे।”</verse>
				<verse number="33">ईं वाते में तरत थने बलाबा खन्दाया अन थें अटे आन हव काम किदो। तो अबे परमेसर की मोजुदगी में माँ वो हारई हुणबा के वाते त्यार हा, जो परबू थने आदेस दिदो हे।</verse>
				<verse number="34">पछे पतरस बोलबा लागो के, “अबे हाँचई में मूँ हमजग्यो हूँ के, परमेसर कई दूज-भराँत ने करे।</verse>
				<verse number="35">कस्यी भी जात कन कणी भी देस को जो भी मनक परबूऊँ दरपतो रेवे अन हुदा काम करे तो, परबू वींने आपणो मान लेवे।</verse>
				<verse number="36">थाँ ईं सन्देस ने जाणो हो, जो इजराएली लोगाँ का वाते खन्दायो ग्यो हे, जो हाराई को परबू ईसू मसीऊँ सान्ती मले हे, वीं हव हमच्यार की घोसणा हे।</verse>
				<verse number="37">थें वा बात जाणो हो के, यहुन्ना बतिस्मा का संदेसो देबा केड़े, गलीलऊँ सरू वेन आकई यहूदियाँ में कई व्यो हो।</verse>
				<verse number="38">ईसू नासरी का बारा में थाँ तो जाणो हो, परमेसर पुवितर आत्मा अन सगतिऊँ वींको तलक कस्यान किदो हो। वणी हव काम किदा अन सेतानऊँ दकी हारई जणा ने हव करतो तको च्यारूँमेर कस्यान गुमतो हो, काँके परमेसर वाँकी लारे हो।</verse>
				<verse number="39">अन आपाँ हारई जणा आ बाताँ का गवा हाँ, जो बाताँ वणी यहूदियाँ देस अन यरूसलेम में किदी ही, जिंने वाँकाणी हूळी पे लटकान मार नाक्यो।</verse>
				<verse number="40">पण, परमेसर वींने पाछो तीजे दन जीवतो कर दिदो अन परगट कर दिदो।</verse>
				<verse number="41">वाँ हारई मनकाँ के हामे कोयने, पण बेस वाँ गवा के हामे, जो पेल्याँई परमेसर का हातऊँ थरप्या ग्या हा, ज्याँकाणी मरिया तकाऊँ जीवता व्या केड़े वाँकी लारे खादो-पीदो हो।</verse>
				<verse number="42">वणीस माँने आदेस दिदो के, आपीं लोगाँ में घोसित कराँ अन गवई देवा के, ओ वोईस हे, जो परमेसर का हातऊँ जीवता अन मरिया तका को न्याव करबावाळो बणायो हे।</verse>
				<verse number="43">हारई परमेसर का आड़ीऊँ बोलबावाळा वींका बारा में गवई दिदी के, वींपे भरोसो करबावाळो हरेक मनक वींका नामऊँ पापाँ की मापी पाई।”</verse>
				<verse number="44">जद्याँ पतरस ईं बाताँ कररियो हो, तद्याँई हारई जणामें पुवितर आत्मा आगी, ज्याँकाणी हव हमच्यार हुण्या हा।</verse>
				<verse number="45">तो पतरस की लारे यापाऊँ आया यहूदी मनक अचम्बा में पड़ग्या, काँके पुवितर आत्मा को दान ज्यो यहूदी ने हा वाँ लोगाँ पे भी उन्दायो ग्यो हो।</verse>
				<verse number="46">वे वाँने तरे-तरे की भासा बोलता तका अन परमेसर की मेमा करता तका हुणरियो हा। तद्याँ पतरस बोल्यो,</verse>
				<verse number="47">“कई, अणा लोग-बागाँ ने पाणी को बतिस्मो देबा वाते माने कुई रोक सके हे? आने भी वस्यानीस पुवितर आत्मा मली हे, जस्यान आपाँने।”</verse>
				<verse number="48">अस्यान वे ईसू मसी का नामऊँ बतिस्मो लेबा को आदेस दिदो। पछे वाँकाणी पतरसऊँ अरज किदी के, वो थोड़ाक दन वाँकी लारे रूके।</verse>
			</chapter>
			<chapter number="11">
				<verse number="1">आकई यहूदियाँ में थरप्या तका चेला अन विस्वास्याँ ओ हुण्यो के, परमेसर का बचनाँ ने ज्यो लोग यहूदी ने हे, वाँकाणी भी मान लिदा हे।</verse>
				<verse number="2">जद्याँ पतरस यरूसलेम पूग्यो, तो जो भी लोग-बाग खतना किदा तका हा, वाँकाणी वींका पे दोस लगायो।</verse>
				<verse number="3">वे केबा लागा के, “थूँ यहूदी ने हा वाँके घरे ग्यो अन वाँके हाते खादो-पीदो भी हे।”</verse>
				<verse number="4">तद्याँ पतरस वाँने ज्या बात हाँचई में व्यी ही, वाँ बताबा लागो।</verse>
				<verse number="5">जद्याँ मूँ यापा नगर में परातना कररियो हो तद्याँ एक दरसावो देक्यो। वींमें देक्यो के, एक मोटा चादरा जस्यान आकासऊँ कुई चीज धरती पे उतररी ही अन अस्यान लागरियो हो के, वींका च्यारई खुणा पकड़न कुई वींने उतार रियो हे। पछे वा चीज मारा नके आगी।</verse>
				<verse number="6">वींमें हारई तरे का जीव-जनावर हा, ज्यामें धरती का किड़ा-मकोड़ा अन आकास का उड़बावाळा जनावर हा।</verse>
				<verse number="7">पछे मने एक अवाज हुणई, जो मने केरी ही, पतरस उठ अन आने मारन खा।</verse>
				<verse number="8">पण में क्यो, “परबू मूँ अस्यो ने कर सकूँ हूँ, काँके में कदी भी हुगली अन असुद चिजाँ कोयने खादी।”</verse>
				<verse number="9">तो आकासऊँ दूजी दाण पाच्छी अवाज अई अन क्यो, “जो भी चिजाँ ने परमेसर सुद क्यो हे, वींने खराब ने हमज।”</verse>
				<verse number="10">तीन दाण अस्यानीस व्यो अन वीं चिजाँ पाच्छी आकास में उठा लिदी गी।</verse>
				<verse number="11">वणीस दाण जटे मूँ रूक्यो तको हो, वीं घर में तीन जणा आया, ज्याँने मारा वाते केसरियाऊँ खन्दाया ग्या हा।</verse>
				<verse number="12">परमेसर की आत्मा मने बना भेंमऊँ वाँके लारे जाबा के वाते क्यो। ईं छेई भई भी मारी लारे आया अन माँकाणी वीं मनक के घरे ग्या।</verse>
				<verse number="13">वीं मनक माँने बतायो के, एक हरग-दुत ने आपणाँ घर में ऊबो तको देक्यो हो। जो केरियो हो के, “थूँ किंनेई यापा नगर में खन्दान समोन जिंको नाम पतरस भी हे, वींने अटे बलईदे।”</verse>
				<verse number="14">वो थने बचन हुणाई, जींऊँ थूँ अन थारो परवार बंचायो जाई।</verse>
				<verse number="15">जद्याँ में बचन हुणाबो सरू किदो, तो पुवितर आत्मा वाँका पे उतरग्यो, जस्यान सरू में आपाँ पे उतरियो हो।</verse>
				<verse number="16">पछे मने परबू को क्यो तको ओ बचन आद आग्यो, “यहुन्नो तो पाणीऊँ बतिस्मो देतो हो, पण थाँने पुवितर आत्माऊँ बतिस्मो दिदो जाई।”</verse>
				<verse number="17">तो अस्यान परमेसर वाँ लोगाँ ने भी वोईस वरदान दिदो हो, जो परमेसर आपाँने परबू ईसू मसी पे विस्वास करबाऊँ दिदो, तो पछे मूँ वाँको विरोद करबावाळो कूण हूँ?</verse>
				<verse number="18">विस्वास्याँ जद्याँ ओ हुण्यो, तो वे छाना-माना वेग्या अन परमेसर की मेमा करता तका केबा लागा, “आ हव बात हे, परमेसर जो यहूदी ने वाँने भी पापऊँ मन बदलबा को अन नुवो जीवन पाबा को मोको दिदो हे।”</verse>
				<verse number="19">जो लोग-बाग इस्तीपनुस की टेम में व्या हतावऊँ बखरग्या हा। वीं फिनिक, साइपरस अन अन्ताक्या में पराग्या अन वे यहूदी मनकाँ नेईस हव हमच्यार हुणाता हा।</verse>
				<verse number="20">सायरस अन कुरेन का थोड़ाक विस्वासी लोग अन्ताक्या में आया अन ज्यो यहूदी ने हा, वाँ लोगाँ ने परबू का हव हमच्यार हुणाबा लागा।</verse>
				<verse number="21">परबू की सगती वाँके लारे ही। ईं वाते नरई लोगाँ ईसू पे भरोसो करन परबू का आड़ी आग्या।</verse>
				<verse number="22">ईं बात को पतो जद्याँ यरूसलेम की मण्डली ने पड़्यो, तो वाँकाणी बरनबास ने अन्ताक्या खन्दायो।</verse>
				<verse number="23">जद्याँ बरनबास अन्ताक्या पूगो, तो लोगाँ पे परमेसर की करपा देकन वो घणो राजी व्यो अन वणी हारई लोगाँ ने धिजो बन्दान परबू में बण्या तका रेवा वाते क्यो।</verse>
				<verse number="24">बरनबास एक हव मनक हो, जो पुवितर आत्मा अन विस्वासऊँ भरयो तको हो। अस्यान परबू की लारे ओर नरई लोग-बाग भेळा वेग्या।</verse>
				<verse number="25">तद्याँ वो साउल ने होदबा के वाते तरसूस परोग्यो।</verse>
				<verse number="26">पछे बरनबास वींने अन्ताक्या में लायो अन वीं मण्डली का लोगाँ में भेळा वेता हा अन नरई लोगाँ का समू ने हिकाता हा। अन्ताक्या मेंईस पेली दाण चेला “मसीही” केवाया।</verse>
				<verse number="27">अन अणाईस दनाँ में यरूसलेमऊँ थोड़ाक परमेसर का आड़ीऊँ बोलबावाळा अन्ताक्या में आया।</verse>
				<verse number="28">वाँका मूँ अगबुस नाम को एक परमेसर का आड़ीऊँ बोलबावाळो ऊबो वेन परमेसर की आत्माऊँ आ आगली बतई के, आकी दनियाँ में काळ पड़बा वाळो हे, जो कलोदियुस की टेम में पड़्यो।</verse>
				<verse number="29">तद्याँ चेला धारियो के, जणीऊँ जतरोक भी बण सके, वो यहूदियाँ में रेबावाळा भई-बन्दा के वाते खन्दाई।</verse>
				<verse number="30">तो पछे वाँकाणी अस्यान ईंस किदो, यरूसलेम का विस्वास्याँ का बुड़ा-ठाड़ा के नके बरनबास अन साउल की लारे खन्दायो।</verse>
			</chapter>
			<chapter number="12">
				<verse number="1">ईं टेम में राजा हेरोदेस मण्डली का कुई विस्वासी लोगाँ ने हताणो सरू कर दिदो हो।</verse>
				<verse number="2">वणी यहुन्ना का भई याकूब ने तरवारऊँ मरवा नाक्यो।</verse>
				<verse number="3">वणी जद्याँ ओ देक्यो के, ईं बातऊँ यहूदी राजी वेरिया हे, तो पतरस ने भी बन्दी बणाबा के वाते आगे बड़्यो। आ बात बना हाज्या की रोट्याँ का तेंवार पे व्यी ही।</verse>
				<verse number="4">हेरोदेस पतरस ने पकड़न जेळ में नाक दिदो। वींके च्यार-च्यार सपायाँ का च्यार टोळा बणान पेरो लगवा दिदो। वींकी ईं मनसा ही के, फसे का तेवार केड़े वींपे लोगाँ के हामे मुकदमो चलाणो हो।</verse>
				<verse number="5">तो पतरस ने जेळ में राक्यो हो, पण मण्डली का मनक हाँचा मनऊँ वींका वाते परमेसरऊँ परातना करता रिया हा।</verse>
				<verse number="6">जद्याँ हेरोदेस मुकदमो चलाबा का वाते पतरस ने लाबा में हो, वीं रात पतरस दो सपायाँ के बचमें हूतो हो। वो दो हाकळाऊँ बन्दयो हो अन जेळ का बाना पे पेरादार रुकाळी कररिया हा।</verse>
				<verse number="7">अणाचेत, परबू को एक हरग-दुत वटे आ पूग्यो, जेळ की ओवरी में उजितो वेग्यो, वणी हरग-दुत पतरस को खांदो ठपकारन वींने जगाते तके क्यो, “फटाकऊँ ऊबो वेजा”, तरत हाँकळा वींका हातऊँ आपूँ-आप खलगी।</verse>
				<verse number="8">तो पछे हरग-दुत वींने क्यो, “त्यार वेन आपणी पगरख्याँ पेर ले।” पतरस भी वस्यानीस किदो। हरग-दुत वींने पाछो क्यो, “मारी लारे आ।”</verse>
				<verse number="9">पछे पतरस वींके पाछे-पाछे बाणे निकळ्यो, पण वींके हमज में ने आरियो हो के, जो भी हरग-दुत कररियो हे वो हाँचई में हे, के मूँ कस्योई हपनो देकरियो हूँ।</verse>
				<verse number="10">तो पेली अन दूजी पेरादाराँ की टोळी ने पार करन वो लोड़ा की फाटक के भड़े आग्यो, जो नगर के दयने ही। वा फाटक आपूँ-आप खलगी अन वे बाणे निकळग्या। वे गळीऊँ जारिया हा के, वो हरग-दुत तरत वींने छोड़न परोग्यो।</verse>
				<verse number="11">पछे पतरस ने नंगे पड़ी अन वो बोल्यो, “अबे मारे हमज में आयो के, ओ हारोई हाँचई में हे, परबू आपणाँ हरग-दुत ने खन्दान मने हेरोदेस का कब्जाऊँ छुड़ायो अन ईं तरियाँ यहूदी लोग जो करबा का वाते छाता हा वींऊँ परमेसर मने बंचायो।”</verse>
				<verse number="12">जद्याँ वो ओ हमजग्यो, तो वो यहुन्नो जिंको दूजो नाम मरकुस भी हो, वींकी बई मरियम का घरे परोग्यो वटे नरई लोग-बाग अगेटा वेन परातना कररिया हा।</verse>
				<verse number="13">पतरस बारणे का कुँवाड़ ने बजायो, तो वींने देकबा के वाते रूदे नाम की एक दासी अई।</verse>
				<verse number="14">पतरस की बोली ओळकन वा राजी वेगी अन बना कुँवाड़ खोलियाई दोड़न मयने गी अन क्यो के, पतरस बारणा आगे ऊबो हे।</verse>
				<verse number="15">वाँकाणी वींने क्यो, “थूँ वेडी वेगी हे!” पण, वा जोरावरीऊँ केरी ही के, या बात हाँची हे। तो वाँकाणी क्यो, “वो वींको दूत वेई।”</verse>
				<verse number="16">अटीने पतरस बारणा आगे कुँवाड़ बजाईसरियो हो, तद्याँ वाँ लोग-बागाँ कुँवाड़ खोलन वींने देक्यो, तो वे अचम्बा में पड़ग्या।</verse>
				<verse number="17">वणी वाँने हानी करन छाना रेवा वाते क्यो। परबू वींने जेळऊँ कस्यान बारणे निकाळ्यो वींका बारा में बतान क्यो, “याकूब अन दूजाँ भायाँ ने भी ओ बता दिज्यो।” अन पछे वो वीं जगाँ ने छोड़न दूजी जगाँ परोग्यो।</verse>
				<verse number="18">जद्याँ दन उग्यो, तो पेरादार घबरान होचरया हा के, पतरस कटे ग्यो?</verse>
				<verse number="19">ईंका केड़े जद्याँ हेरोदेस वींने हमाळ्यो अन वो ने लादो, तो वे पेरादाराँऊँ पूछताछ किदी अन वाँने मारबा को हुकम दे दिदो। अन पछे हेरोदेस यहूदियाँऊँ जान केसरिया में थोड़ाक दन रियो।</verse>
				<verse number="20">वो सूर अन सेदा का मनकाँ पे घणो रिस्याँ बळतो हो। ईं वाते वे अगेटा व्या अन एक मन वेन वींऊँ मलबा आया। वाँकाणी राजा को खास मनक बलासतुस का नके जान वींने मनायो अन पछे वीं हेरोदेस नके जान हमजोता वाते क्यो, काँके वाँका देस में धान हेरोदेस का देसऊँ आतो हो।</verse>
				<verse number="21">एक ते किदा तके दन हेरोदेस राज-दरबारी गाबा पेरन गाद्दी पे बिराजो तको मनकाँ ने भासण देबा लागो।</verse>
				<verse number="22">लोगाँ जोरऊँ हारो करन क्यो, “आ तो कस्या देवता की अवाज हे, मनक की तो कोयने हे।”</verse>
				<verse number="23">तरत परबू के हरग-दुत हेरोदेस पे वार किदो, काँके हेरोदेस परमेसर ने मान ने दिदो अन वींके किड़ा पड़ग्या अन वो मरग्यो।</verse>
				<verse number="24">पण ईंका बचमें, परमेसर का वसना को परच्यार-परसार बड़तो रियो।</verse>
				<verse number="25">बरनबास अन साउल यरूसलेम में आपणो सेवा को काम खतम करन मरकुस नाम का यहुन्ना ने भी आपणी लारे लेन पाच्छा आग्या।</verse>
			</chapter>
			<chapter number="13">
				<verse number="1">अन्ताक्या का विस्वास्याँ की मण्डली में परमेसर का आड़ीऊँ बोलबावाळा अन हिकाबावाळा हा, बरनबास अन समोन जो नीगर केवावे हे, अन कुरेन को लुकियुस, देस का चोता हिस्सा को राजपाल हेरोदेस की लारे पळ्या-बड़्या मनाएन अन साउल जस्या नरई हिकाबावाळा हा।</verse>
				<verse number="2">वे जद्याँ वरत करता तका परबू की मेमा कररिया हा, तद्याँई पुवितर आत्मा क्यो, “बरनबास अन साउल ने जीं काम के वाते में बलाया हा, वीं काम के वाते वाँने न्यारा कर दो।”</verse>
				<verse number="3">जद्याँ वे वरत अन परातना करन बरनबास अन साउल पे आपणो हात मेल्यो अन वाँने हिक दे दिदी।</verse>
				<verse number="4">पुवितर आत्माऊँ खन्दान बरनबास अन साउल सलुक्या ग्या, वटूँ नाव में बेटन वे साइपरस नाम का टापू पे पूगा।</verse>
				<verse number="5">अन वे सलमीस नगर पूगा, तो वाँकाणी यहूदियाँ की परातना घर में परमेसर का बचनाँ को परच्यार किदो। मरकुस नाम को यहुन्नो वाँकी सायता करबा वाते वाँकी लारे हो।</verse>
				<verse number="6">वीं आकई टापू की जातरा करता तका वीं पाल्ड़े का पापुस तईं जा पूगा। वटे वाँने बारईसू नाम को एक यहूदी जादूगर अन जूटो परमेसर का आड़ीऊँ बोलबावाळो मल्यो।</verse>
				<verse number="7">वो घणा हूँस्यार राजपाल हरग्युस पोलुस को हण्डाळी हो। हरग्युस पोलुस परमेसर को बचन हुणबा के वाते बरनबास अन साउल ने पाच्छा बलाया हा।</verse>
				<verse number="8">पण अलीमास जादूगर, जिंको युनानी नाम बारईसू हो, वणी वाँको विरोद किदो। वीं टापू के राजपाल को विस्वास तोड़बा के वाते जोर दिदो।</verse>
				<verse number="9">पछे साउल जिंको दूजो नाम पोलुस हो। वो पुवितर आत्माऊँ भरन, अलीमास के हामे ताकते तके क्यो,</verse>
				<verse number="10">“हे हंगळा छळ-कपटऊँ भरिया तका सेतान का पूत, थूँ हारी तरिया की भलई को दसमण, कई थूँ परबू का हव गेला ने बगाड़णो ने छोड़ी?</verse>
				<verse number="11">अबे देक परबू को हात थाँरा दयने आरियो हे। थूँ आन्दो वे जाई अन थोड़ाक दनाँ तईं दन को उजितो भी ने देक सेकी।” तरत वींने धुधळो दिकबा लागो अन अन्दारो पड़ग्यो, वो अटने-वटने हात लाम्बो करबा लागो के, कुई वींको हात पकड़न वींने चलावे।</verse>
				<verse number="12">जद्याँ टापू के राजपाल ओ सब देक्यो, तो वो परबू पे भरोसो करबा लागो अन परबू का वसना की हिकईऊँ घणो अचम्बो व्यो।</verse>
				<verse number="13">पछे पोलुस अन वींका हण्डाळी पापुसऊँ नाव में बेटन पफुलिया का पिरगा में आ पूग्या। पण यहुन्नो जिंको नाम मरकुस हो, वाँने वटेई छोड़न यरूसलेम परोग्यो।</verse>
				<verse number="14">वटने वे आपणी जातरा करता तका पिरगाऊँ पिसदिया का अन्ताक्या में आ पूगा। पछे सबत के दन यहूदी परातना घर में जान बेटग्या।</verse>
				<verse number="15">मूसा की वेवस्ता का नेम अन परमेसर का आड़ीऊँ बोलबावाळा की पोत्याँ का पाट भणन यहूदी परातना घर का अदिकारी वाँका नके अस्यान पूँछबा खन्दाया के, “ओ भई-लोगाँ, थाँका नके धिजो बन्दाबा के वाते ओरी बचन वेवे, तो हुणावो।”</verse>
				<verse number="16">ईं बात पे पोलुस ऊबो व्यो अन हातऊँ हानी करतो तको केबा लागो, ओ इजराएल का अन परमेसरऊँ दरपबावाळा लोगाँ हुणो।</verse>
				<verse number="17">“इजराएल का लोगाँ के परमेसर आपणाँ पूरबजाँ ने थरप्या अन जद्याँ आपणाँ लोग मिसर देस में रूक्या तका हा, तो वाँकाणी वाँने मान बणाया अन वे आपणी सगतिऊँ वाँने मिसरऊँ बारणे लाया हा।</verse>
				<verse number="18">अन पछे चाळी सालाँ तईं वो हुन्ना काँकड़ में वाँने सेण करतो रियो।</verse>
				<verse number="19">अन कनान देस का हात राज ने खतम करन वणी वा जगाँ इजराएल का लोगाँ ने बापोती का रूप में दे दिदी।</verse>
				<verse number="20">ईं हारई काम में लगे-भगे हाडा च्यारसे वर लागा। ईंका केड़े परमेसर का आड़ीऊँ बोलबावाळा समुएल की टेम तईं वाँने नरई न्याव करबावाळा दिदा हा।</verse>
				<verse number="21">पछे वाँकाणी एक राजो माँग्यो, तो परमेसर वाँने बिन्यामीन की गोत का कीस का छोरा साउल ने चाळी सालाँ तईं राजो बणायो।</verse>
				<verse number="22">पछे साउल ने हटान दाऊद ने वाँको राजो बणायो, जिंका बारा परमेसर अस्यान क्यो हो के, में ईसे का पूत दाऊद ने देक्यो हे के, वो एक अस्यो मनक जो मारा मन का जस्यान हे। मूँ जो कई भी छावूँ, हारोई वो केरी।</verse>
				<verse number="23">अणीस मनक का बंसऊँ आपणो बचन पूरो करबा के वाते परमेसर इजराएल का लोगाँ ने बंचाबावाळा ईसू ने खन्दायो।</verse>
				<verse number="24">ईसू का आबाऊँ पेल्याँ यहुन्नो इजराएल का मनकाँ ने मन बदलन बतिस्मो लेबा को परच्यार करतो हो।</verse>
				<verse number="25">यहुन्नो जद्याँ आपणो काम पूरो करबा में हो, तो वणी क्यो, ‘जस्यान थें मारा बारा में होचरया हो वस्यान मूँ ने हूँ। पण, एक अस्यो मनक मारा केड़े आरियो हे, मूँ जिंकी पगरख्याँ का कसणा खोलबा के जोगो भी कोयने हूँ।’”</verse>
				<verse number="26">ईं वाते भई-लोगाँ, अबराम की ओलादाँ अन थाँकामूँ परमेसरऊँ दरपबावाळा लोगाँ, बंचाबावाळो ओ सन्देसो आपणाँ वातेई खन्दायो ग्यो हे।</verse>
				<verse number="27">यरूसलेम में रेबावाळा अन वाँका अदिकारियाँ भी ईसू ने कोयने ओळक्यो अन सबद का हरेक दन हुणाता तका परमेसर का आड़ीऊँ बोलबावाळा का बचन ने कोयने हमज्या, पण ईसू पे दोस लगान वाँ वसना ने पूरा किदा।</verse>
				<verse number="28">अन जद्याँ वींने मारबा के वाते कई मोको ने मल्यो, तुई वाँकाणी पिलातुसऊँ वींने मारबा के वाते क्यो।</verse>
				<verse number="29">ईसू वाते जो भी सास्तर में लिक्यो हो, वो हारोई वणा पूरो कर नाक्यो हो, तो वाँकाणी वींने हूळीऊँ उतारन कबर में मेल दिदो।</verse>
				<verse number="30">पण, परमेसर वींने मरिया केड़े पाछो जीवतो कर दिदो हो।</verse>
				<verse number="31">अन पछे जो भी मनक गलीलऊँ यरूसलेम तईं वींकी लारे आया हा, वाँका हामे वो नरई दनाँ तईं परगट व्यो। वीं अबे मनकाँ में वींकी गवई हे।</verse>
				<verse number="32">माँ अटे वो हव हमच्यार लाया हा जिंका बारा में परमेसर आपणाँ बड़ाबाऊँ वादो किदो हो,</verse>
				<verse number="33">जो आपीं आपणाँ पूरबजाँ का बंस का हा, आपणाँ वाते परमेसर पूरो किदो हे। जस्यान के, भजनाँ की किताब का दूजाँ पाट में लिक्यो हे, “थूँ मारो बेटो हे, आजइस मूँ थारो बापू बण्यो हूँ।”</verse>
				<verse number="34">अन परमेसर वींने मरयाँ तकाऊँ जीवतो किदो, ताँके वींकी देह कदी हड़े कोयने। ईंका बारा में परमेसर अस्यान क्यो हो, “मूँ थने पुवितर वरदान देवूँ, जिंको में दाऊदऊँ वादो किदो हो।”</verse>
				<verse number="35">अस्यानीस वणी एक ओरी भजन में क्यो हे, “थूँ आपणाँ वीं धरमी मनक ने हड़बा ने देई।”</verse>
				<verse number="36">पछे दाऊद आपणाँ जुग में परमेसर के वाते आपणो काम पूरो करन मरग्यो अन वींने वटेईस गाड़्यो जटे वींका बड़ाबा ने गाड़्या हा, वींकी लास हड़गी,</verse>
				<verse number="37">पण जणी ने परमेसर मरिया तकाऊँ पाछो जीवतो किदो, वींकी लास कदी ने हड़ी।</verse>
				<verse number="38">ईं वाते ओ भायाँ, थाँकाणी जाणणो छावे के, बेस ईसुऊँइस थाँका वाते हाराई पापाँ की मापी घोसित वीं हे अन जो कुई भी विस्वास करी वो परमेसर का हामे सई मान्यो जाई, अस्यान मूसा का नेम कदी ने कर सके।</verse>
				<verse number="39"></verse>
				<verse number="40">ईं वाते अबे हेंचेत रेवो, कटेई परमेसर का आड़ीऊँ बोलबावाळा जो क्यो हो, वो थाँका हाते ने वे जावे,</verse>
				<verse number="41">“‘रोळ करबावाळा देको, अचम्बा में आन मर जावो, काँके थाँका जुग में एक अस्यो काम करूँ, जिंने कुई थाँने हमजाई तुई थें विस्वास ने करो।’”</verse>
				<verse number="42">पोलुस अन बरनबास जद्याँ वटूँ जारिया हा, तो लोगाँ वाँने आगला सबत के दन अस्यी बाताँ ओरी केबा के वाते क्यो।</verse>
				<verse number="43">जद्याँ सबा खतम व्यी, तो नरई यहूदी अन यहूदी धरम ने मान लिदा तका लोग भी पोलुस अन बरनबास का पाच्छे वेग्या। पोलुस अन बरनबास वाँकाऊँ बाताँ करता तका लोगाँ ने मनारिया हा के, वे परमेसर की करपा में बण्या रेवे।</verse>
				<verse number="44">आगले सबत के दन तो हारई नगर का मनक परमेसर का बचन हुणबा के वाते भेळा वेग्या।</verse>
				<verse number="45">जद्याँ यहूदियाँ आ मनकाँ की भीड़ देकी, तो वे रिस्याँ बळता तका पोलुस जो भी क्यो हो, वींको विरोद करबा लागा अन खोट्याँ खाबा लागा।</verse>
				<verse number="46">पण पोलुस अन बरनबास बनाई दरप्या क्यो, “ओ जरूरी हे के, परमेसर का बचन सबऊँ पेल्याँ थाँने हूणावाँ, पण थाँकाणी वाँने नकारता तका खुद ने अमर जीवन जीबा के जोगा ने हमज्या। ईं वाते माँ अबे यहूदियाँ ने छोड़न जो यहूदी ने हे वाँका नके जारिया हा।</verse>
				<verse number="47">काँके परबू माँने ओ आदेस दिदो के, “‘में थाँने जो यहूदी ने हे, वाँके वाते उजितो बणायो, ताँके वीं बंचाया जाई, धरती का ईं खुणाऊँ वीं खुणा तईं।’”</verse>
				<verse number="48">वाँ लोगाँ जो यहूदी ने हे जद्याँ ओ हुण्यो, तो वे घणा राजी व्या अन परमेसर का वसना को मान किदो अन जणा अमर जीवन जीबा ने चुण्यो वणा विस्वास किदो।</verse>
				<verse number="49">अस्यान वटे हारी जगाँ परबू का बचन फेलग्या।</verse>
				<verse number="50">तो वटने यहूदियाँ, जानी-मानी लुगायाँ जणी यहूदी धरम ने मान लिदो हो अन नगर का मुक्या ने उकसाया, तो वे पोलुस अन बरनबास पे अन्याव करन हताबा लागा अन दरपाता तका जोरावरीऊँ वाँने आपणाँ अटूँ बारणे निकाळ दिदा।</verse>
				<verse number="51">पछे पोलुस अन बरनबास वाँका विरोद में आपणाँ पगाँ को धूळो जाटकन इकुनियम पराग्या।</verse>
				<verse number="52">पण, विस्वासी लोग राजी वेता तका पुवितर आत्माऊँ भरग्या।</verse>
			</chapter>
			<chapter number="14">
				<verse number="1">इकुनियम में अस्यान व्यो के, वीं दुई जणा यहूदियाँ की सबा में हाते ग्या, अन अस्यान बाताँ किदी के यहूदियाँ अन जो यहूदी ने हे वणा विस्वास किदो</verse>
				<verse number="2">पण विस्वास ने करबावाळा यहूदियाँ मनक जो यहूदी ने हे वाँका मन में विस्वास्याँ को विरोद करबा वाते उकसाया।</verse>
				<verse number="3">वीं दुई जणा घणा दन तईं वटीस रिया अन बना दरप्याँ परबू की बाताँ ने बताता रिया, अन परबू वाँने तागत देन वाँकाऊँ अचम्बा अन हेन्याणी का काम करवान वाँका करपाऊँ भरया तका संदेसा को मान बड़ातो रियो।</verse>
				<verse number="4">पण वीं नगर का मनकाँ में फुट पड़गी, तो थोड़ाक मनक यहूदियाँ के आड़ी अन थोड़ाक थरप्या तका का आड़ी वेग्या हा,</verse>
				<verse number="5">पण जो यहूदी ने हा वीं अन यहूदी मनक आपणाँ नेता ने भी हाते लेन वाँकी नन्दया करबा वाते अन भाटाऊँ ठोकबा वाते होच्यो।</verse>
				<verse number="6">तो वीं हंगळी बाताँ ने जाणन वटूँ लुकानिया का लुस्त्रा अन दिरबे अन अड़े-भड़े का नगर में भागग्या</verse>
				<verse number="7">अन वटे हव हमच्यार हुणाबा लागा।</verse>
				<verse number="8">लुस्त्रा नगर में एक मनक जनमऊँ लंगड़ो हो, जो कदी ने चाल्यो हो</verse>
				<verse number="9">वो मनक पोलुस ने बाताँ करतो तको हुणरियो हो, पोलुस वींका आड़ी देक्यो अन होच्यो के, ईंमें हव वेबा को विस्वास हे।</verse>
				<verse number="10">अन पोलुस जोरऊँ हाको करन क्यो, “आपणाँ पगाँ पे ऊबो वे” वो ओ हुणताई फदकन ऊबो व्यो अन चालबा-फरबा लागग्यो।</verse>
				<verse number="11">वटा का मनक पोलुस को ओ काम देकन, लुकानिया की भासा में जोरऊँ क्यो, “कुई देवताँ मनक को रूप धारण करन आपणाँ बंच में परगट व्या हे।”</verse>
				<verse number="12">वणा मनक बरनबास ने जेयास अन पोलुस ने हिरमेस क्यो, काँके पोलुस बाताँ करबा में खास हो।</verse>
				<verse number="13">जेयास को मन्दर नगर का बारणे हो। वींको पूजारी हाण्ड अन फूला को हार लेन फाटकाँ के बारणे आन पोलुस अन बरनबास के वाते बली देणो छारियो हो।</verse>
				<verse number="14">पण जदी थरप्या तका चेला पोलुस अन बरनबास ओ हुण्यो, तो आपणाँ गाबा फाड़न भीड़ में ग्या अन जोरऊँ केबा लागा,</verse>
				<verse number="15">“हो लोगाँ, थाँ ओ कई कररिया हो। माँ भी थाँके जस्यानीस मनक हाँ, अन थाँने हव हमच्यार हुणाबा आया, ताँके थाँ अणा फोगट की चिजाँऊँ छेटी वेन जीवता परमेसर के आड़ी आवो, जणी हरग, धरती, समन्द अन जो कई अणामें हे वणीस बणाया हे।</verse>
				<verse number="16">वणी बित्या तका टेम में दनियाँ का लोगाँ ने आपणाँ-आपणाँ गेला पे चालबा दिदा।</verse>
				<verse number="17">पण तद्याँ भी वो भलई करतो तको खुद की गवई देतो रियो, आकासऊँ बरका वरई, हारी रिता में हव हाक देतो रियो अन थाँको मन आणन्दऊँ भरतो रियो।”</verse>
				<verse number="18">ओ केन भी भीड़ ने घणी अबकीऊँ रोकी के, वीं वींका वाते बली ने देवे।</verse>
				<verse number="19">पण थोड़ाक यहूदियाँ अन्ताक्या अन इकुनियमऊँ आन मनकाँ ने आपणी आड़ी करन पोलुस के भाटा ठोक्या अन वींने मरियो तको हमजन नगरऊँ बारणे गड़ीन लेग्या।</verse>
				<verse number="20">पण जदी चेला वींके च्यारूँमेर आन ऊबा वेग्या, तो वो ऊबो वेन नगर में ग्यो अन दूजे दन बरनबास के हाते दिरबे नगर में परोग्यो।</verse>
				<verse number="21">वीं दुई वणी नगर में मनकाँ ने हव हमच्यार हुणाता अन वटे घणा चेला बणाया, पछे पाच्छा लुस्त्रा, इकुनियम अन पिसदिया का अन्ताक्या में पराग्या।</verse>
				<verse number="22">अन चेला ने हिम्मत देन विस्वास में बड़वा वाते धिजो बन्दाता रिया अन केता रिया के “परमेसर का राज में जाबा वाते आपाँने घणो दुक जेळणो पेड़ी।”</verse>
				<verse number="23">वटे की हरेक विस्वास्याँ की मण्डली में बुड़ा-ठाड़ा ने थरप्या अन वाँने वरत अन परातना करन परबू का हाताँ में हूँप दिदी, जिंपे वीं विस्वास करता हा।</verse>
				<verse number="24">तद्याँ वीं दुई पिसदिया वेता तका पंफुलिया देस में ग्या।</verse>
				<verse number="25">पछे पिरगा देस में हव हमच्यार हुणान अन्तळिया देस में पूग्या।</verse>
				<verse number="26">वटूँ जाँज में बेटन अन्ताक्या में ग्या अन अटेईस वीं काम के वाते वणा ने परमेसर का अनुगरे में हुप्याँ ग्या हा। जिंने वणा अबाणू पूरो किदो हे।</verse>
				<verse number="27">जदी वणा वटे जान वटा की विस्वास्याँ की मण्डली का मनकाँ ने भेळा किदा, अन जो काम परमेसर वाँका हाते किदो हो वींने बतायो, अन केबा लागा के जो यहूदी ने हे, वाँका वाते भी विस्वास करबा ने परमेसर गेलो खोल नाक्या हे।</verse>
				<verse number="28">अन पछे वीं वटे विस्वासी मनकाँ के हाते नरई दन तईं रिया।</verse>
			</chapter>
			<chapter number="15">
				<verse number="1">पछे थोड़ाक मनक यहूदियाँऊँ आन वाँने हिकावा लागा, “यद्याँ मूसा का रिति-रिवाजऊँ थाँको खतनो ने वेतो तो, थें बंचाया ने जाता”।</verse>
				<verse number="2">जद्याँ पोलुस अन बरनबास वाकाँऊँ बात-बच्यार किदी अन वाँका में लड़ई वेगी, तो ओ चुण्यो के, पोलुस अन बरनबास अन वाँका मूँ थोड़ाक मनक ईं बात को फेसलो करबा का वाते आपणाँ थरप्या तका अन बड़ाबा नके यरूसलेम जाई।</verse>
				<verse number="3">विस्वास्याँ की मण्डली का मनक वाँने खन्दाया। वीं फिनाके अन सामरिया देस में जाता तका, जो यहूदी ने हा वणा जस्यान विस्वास किदो, वो मण्डली में बताता ग्या, तो मण्डली का लोग ओ हुणन घणा राजी व्या।</verse>
				<verse number="4">जद्याँ वीं यरूसलेम पराग्या, तो वटा की मण्डली का थरप्या तका अन बड़ाबा वाकाँऊँ घणा आणन्दऊँ मल्या अन वीं मनकाँ ने बतावा लागा के, परमेसर माकाँ लारे कस्या-कस्या काम किदा।</verse>
				<verse number="5">पण फरीसियाँ जणा विस्वास किदो हो, वाकामूँ नरई जणा ऊबा वेन क्यो, “जो यहूदी ने हे वाँ लोगाँ ने खतनो कराणो छावे अन मूसा का नेमा को पाळन करणो छावे।”</verse>
				<verse number="6">तद्याँ थरप्या तका अन बुड़ा-ठाड़ा मनक वीं बात पे बच्यार करबा के वाते भेळा व्या।</verse>
				<verse number="7">तद्याँ बात-बच्यार व्या केड़े पतरस ऊबो वेन क्यो, “हो भायाँ, थाँ जाणो हो के, नरई दन पेल्या परमेसर थाँकामूँ मने चुण्यो के, माराऊँ जो यहूदी ने हे वीं हव हमच्यार हुणन विस्वास करे।</verse>
				<verse number="8">मन ने जानबावाळे परमेसर आपणाँ जस्यान वाकाँने भी पुवितर आत्मा देन वाँने भी अपणा लिदा।</verse>
				<verse number="9">वणी आपाँ अन वाँका में कुई दूज-भराँत ने राकी अन वाँका पापाँ ने माप किदा काँके वणा विस्वास किदो।</verse>
				<verse number="10">तो अबे, थाँ काँ परमेसर की परक करो के विस्वासी पे अतरो बोज नाको के, वींने ने तो आपणाँ बापदादा अन ने आपीं तोक सका।</verse>
				<verse number="11">पण, माँ ओ विस्वास कराँ हा के, माँ परबू ईसू की करपाऊँ बंचाया ग्या हा, जस्यान के वे।”</verse>
				<verse number="12">तद्याँ हंगळा सबा का लोग छाना-माना वेग्या अन पोलुस अन बरनबास की बाताँ हुणबा लागा, के परमेसर वाकाँऊँ जो यहूदी ने हे वाँका में कस्यान हेन्याण अन अचम्बा का काम कर दिकाया।</verse>
				<verse number="13">जदी वीं के चुक्या, तो याकूब ऊबो वेन केबा लागो, “हो भायाँ, मारी बात हुणो,</verse>
				<verse number="14">अबाणू थोड़ीक दाण पेल्याँ समोन ओ बतायो हे के, कस्यान परमेसर पेल्याई पेल्याँ जो यहूदी ने हे वामूँ थोड़ाक लोगाँ ने आपणाँ वाते चुणन आपणो परेम परगट किदो।</verse>
				<verse number="15">ईं बातऊँ परमेसर का आड़ीऊँ बोलबावाळा की बात मलती-जुलती हे, जस्यान लिक्यो हे के,</verse>
				<verse number="16">“‘ईंका केड़े मूँ पाछो आन दाऊद का राज ने पाछो लाऊँ, ढूँण्डा पड़्या तका ने पाच्छा बणान ऊबो करूँ,</verse>
				<verse number="17">ईंका वाते हारी दनियाँ का लोग जो बंच्या तका हे, वीं परबू ने होदे जो यहूदी ने हे, वाँने में बलाया हे, वे हारई मारा नके आई।</verse>
				<verse number="18">वेईस बाताँ हे, ज्याँने मूँ पेल्याऊँ केतो आरियो हूँ।’”</verse>
				<verse number="19">याकूब पाछो क्यो, “ईं वाते में ओ धारियो हे के, जो यहूदी ने हे, वीं परमेसर का आड़ी आवे, तो आपाँने वाँने दुक ने देणो छावे,</verse>
				<verse number="20">पण वाँने आपाँ ओ लिकीन खन्दावाँ के, थाँ मूरताँ पे चड़ई तकी चिजाँ ने मत खाज्यो अन कूकरमऊँ छेटी रेज्यो, गळो मरोड़िया तका को माँस ने खावो, अन लुई ने पीजो।</verse>
				<verse number="21">सरुआतऊँ मूसा का नेमा ने हरेक सबद का दन यहूदियाँ का परातना घर में भण्यो जावे हे अन नगर-नगर में परच्यार वेतो आरियो हे।”</verse>
				<verse number="22">तद्याँ थरप्या तका, बुड़ा-ठाड़ा, हंगळी विस्वास्याँ की मण्डळ्याँ के हण्डे आपणाँ मूँ थोड़ाक मनकाँ ने चुणन पोलुस अन बरनबास के हाते अन्ताक्या खन्दाबा का वाते फेसलो किदो। अन वणा भायाँ मूँ जाणिता मनक, यहूदो जो बरसबा केवावे, सिलास ने चुणन वाँका हण्डे खन्दाया।</verse>
				<verse number="23">वाँकाणी वाँका हाते ओ लिकन खन्दायो, “अंताकिया, सिरिया अन किलिकिया में रेबावाळा जो यहूदी ने हे, वाँ विस्वास्याँ ने थाँका भई थरप्या तका अन बड़ाबा को नमस्कार।</verse>
				<verse number="24">माँ हुण्यो हे के, माकाँ मूँ कुई थाँका अटे आन, थाँने वाँकी बाताँऊँ घबरा दिदा अन मन ने पळट दिदा, पण माँ वाँने आग्या ने दिदी ही।</verse>
				<verse number="25">ईं वाते माँ हंगळा भेळा वेन बात-बच्यार करन आपणाँ मूँ थोड़ाक मनकाँ ने प्यारा पोलुस अन बरनबास के हाते थाँका नके खन्दावाँ।</verse>
				<verse number="26">ईं अस्या मनक हे, जो आपणो जीव ने परबू ईसू मसी का नाम के वाते दुक में नाक्यो हे।</verse>
				<verse number="27">ईं वाते माँ यहूदा अन सिलास ने खन्दाईरा हा, जो आपणाँ मुण्डाऊँ ईं बाताँ के देई।</verse>
				<verse number="28">पुवितर आत्माने अन माने बड़िया लागो के, थाँका पे जरूरी बाताँ ने छोड़न, कई ओरुँ दूजो बोज ने मेलाँ</verse>
				<verse number="29">के थाँ मूरताँ के चड़ई तकी चिजाँ, अन गळो मरोड़िया तका को माँस ने खावो, कूकरमऊँ छेटी रेज्यो अन लुई ने पीजो। ईंऊँ थाँको भलो वेई, अबे माँ विदा लेवा।”</verse>
				<verse number="30">पछे वीं वटूँ हिक लेन अंताकिया ग्या, अन वटे मनकाँ ने भेळा करन वो कागद वाँने दे दिदो।</verse>
				<verse number="31">धिजो बन्दाबावाळा कागद ने भणन वाँने घणो आणन्द व्यो।</verse>
				<verse number="32">यहूदा अन सिलास जो परमेसर का आड़ीऊँ बोलबावाळा हा, वाँने ओरी उपदेस देन वाँने धिजो बन्दान विस्वास में गाटा किदा।</verse>
				<verse number="33">वीं वटे थोड़ाक दन रेन, वटा का मनक वाँने परेमऊँ पाच्छा जटेऊँ आया हाँ वटे खन्दा दिदा।</verse>
				<verse number="34">(पण सिलास ने वटे रेणो बड़िया लागो।)</verse>
				<verse number="35">पण पोलुस अन बरनबास अंताकिया में रिया, अन दूजाँ मनकाँ के हाते परबू का बचन हिकाता अन हव हमच्यार को परच्यार करता रिया।</verse>
				<verse number="36">थोड़ाक दन केड़े पोलुस बरनबासऊँ क्यो “आपाँ जणी-जणी नगर में परबू को बचन हुणायो हो, वटे चाला अन देकाँ के आपणाँ वीं भई कई कररिया हे।”</verse>
				<verse number="37">तद्याँ बरनबास यहुन्ना ने जो मरकुस केवातो हो वींने हाते लेबा को बच्यार किदो।</verse>
				<verse number="38">पोलुस वींने ले जाणो हव ने हमजो काँके मरकुस पंफुलिया नाम का नगरऊँ वाँने छोड़ दिदो अन परबू का काम का वाते वाँका लारे ने ग्यो।</verse>
				<verse number="39">ईंऊँ अस्यी माता-फोड़ी वेगी अन वीं एक-दूजाऊँ अलग वेग्या, अन बरनबास मरकुस ने हाते लेन जाँजऊँ साइपरस परोग्यो।</verse>
				<verse number="40">पण पोलुस सिलास ने चुण्यो, अन विस्वासी भायाँ पोलुस ने परबू की करपा में हूँप दिदो अन वीं वटूँ पराग्या।</verse>
				<verse number="41">अन पोलुस सिरिया अन किलिकिया में जातरा करतो तको विस्वास्याँ की मण्डळ्या ने धिजो बन्दातो तको परोग्यो।</verse>
			</chapter>
			<chapter number="16">
				<verse number="1">पछे पोलुस दिरबे अन लुस्त्रा नगर में ग्यो, वटे तिमुतियुस नाम को एक विस्वासी रेतो हो, जो एक यहूदी विस्वासी लुगई को छोरो हो, पण वींका बापू युनानी हा।</verse>
				<verse number="2">वींकी लुस्त्रा अन इकुनियम का विस्वास्याँ में हव पेट ही।</verse>
				<verse number="3">पोलुस की मरजी ही के, तिमुतियुस ने आपणाँ हाते लेन जावे। ईंका वाते पोलुस वींको खतनो किदो, काँके वटे रेबावाळा हंगळा यहूदी मनक जाणता हा के, वींका बापू युनानी हे।</verse>
				<verse number="4">अन वीं नगरऊँ जाता तका वीं नेमा ने, जो यरूसलेम का थरप्या तका मनक अन बुड़ा-ठाड़ा बणाया हा, वाँने हिकाता अन मानबा के वाते केता हा।</verse>
				<verse number="5">ईं तरियऊँ वटे विस्वास्याँ की मण्डळ्या विस्वास में बड़गी अन रोज वाँकी गणती हेली वेती।</verse>
				<verse number="6">वीं फुरगिया अन गलातिया का इलाका में वेन ग्या, काँके पुवितर आत्मा वाँने आसिया में हव हमच्यार हुणाबा वाते नटग्यो हो।</verse>
				<verse number="7">वीं मुसिया नगर का हिमाड़ा में जान, बितुनिया में जाणो छारिया हा, पण ईसू की आत्मा वाँने जाबा ने दिदा।</verse>
				<verse number="8">अन, वीं मुसिया में वेन त्रोआस नगर में ग्या</verse>
				<verse number="9">वटे पोलुस रात में दरसावो देक्यो के, एक मकिदुनिया को मनक ऊबो वेन पोलुसऊँ अरज करबा लागो, “वटूँ मकिदुनिया आ अन माँकी मदत कर।”</verse>
				<verse number="10">पोलुस ओ दरसावो देकतईं, तरत माँ मकिदुनिया जाणो छायो, ओ हमजन के, परमेसर माँने वटे हव हमच्यार हुणाबा वाते बलाया हे।</verse>
				<verse number="11">ईं वाते त्रोआसऊँ माँ जाँजऊँ हुदा सुमात्रा में वेन दूजे दन नियापुलिस पूग्या।</verse>
				<verse number="12">पछे वटूँ माँ फिलिप्पी पूग्या, जो मकिदुनिया देस को मुक्य नगर हो अन रोमियाँ की वस्ती ही, अन वटे थोड़ाक दन रिया</verse>
				<verse number="13">माँ सबद का दन ओ हमजन नगर का फाटक बारणे नंदी का घाट पे ग्या के, वटे परातना करबा की जगाँ वेई, अन वटे नरी लुगायाँ भेळी वेरी ही, वाँका नके जान वाकाँऊँ बाताँ करबा लागा।</verse>
				<verse number="14">वटे लुदिया नाम की एक लुगई ही, जो थुआतीरा नगर की ही, ज्या रेसम का गाबा बेंचती अन भगती करबावाळी ही। परमेसर वींका मन में आ बात नाकी के, वा पोलुस की बाताँ ने ध्यानऊँ हुणे।</verse>
				<verse number="15">जदी वा लुगई अन वींका परवारवाळा हंगळा हाते बतिस्मो लिदो तो वणी माँकी मनवार किदी के, “यद्याँ थाँ मने परमेसर में विस्वास करबावाळी लुगई हमजो, तो अटूँ मारे हाते चालो अन मारे घरे रो।” जद्याँ तईं माँ राजी ने व्या, तद्याँ तईं वा मनवार करतिइस री।</verse>
				<verse number="16">जदी माँ परातना करबा की जगाँ जईरा हा, तो माने एक दासी मली, जिंमें आगली बाताँ बताबावाळी आत्मा ही, अन वा लुगई आगली बतान आपणाँ मालिकाँ के वाते नरोई कमान लाती ही।</verse>
				<verse number="17">वाँ पोलुस अन माँके पाच्छे आन हाको करबा लागी के, “ईं मनक परम-परदान परमेसर का भगत हे, जो थाँने बंचाबावाळो गेलो बतावे हे।”</verse>
				<verse number="18">वा नरई दनाँ तईं अस्यानीस करती री, जद्याँ पोलुस घणो परेसान व्यो, अन पाछो फरन वीं हुगली आत्माऊँ क्यो “मूँ थने ईसू मसी का नामऊँ आग्या दूँ हूँ के, अणी मूँ निकळजा” अन वा वणीस दाण वींमूँ बारणे निकळगी।</verse>
				<verse number="19">जदी वींका मालिकाँ देक्यो के, आपणी कमई की आस जाती री, तो पोलुस अन सिलास ने पकड़न बजार का बंच में अदिकारियाँ का नके गड़ीन लाया।</verse>
				<verse number="20">वाँने अदिकारियाँ नके लेग्या अन क्यो, “ईं मनक जो यहूदी हे, आपणाँ नगर में माहोल खराब कररिया हे।</verse>
				<verse number="21">अन अस्या रिति-रिवाज बतारिया हे, जणा ने मानणा अन करणा आपीं रोमी लोगाँ का नेमा के विरोद में हे।”</verse>
				<verse number="22">तद्याँ भीड़ वाँका विरोद में वेगी, अन अदिकारियाँ वाँका गाबा फाड़बा अन हरियाऊँ मारबा को हुकम दिदो।</verse>
				<verse number="23">वाँने खुब कूटन जेळ में नाक दिदा अन वाँने जाप्ता में राकबा के वाते पेरादाराँ ने राक्या,</verse>
				<verse number="24">वाँकाणी हुकम मानन वाँने जेळ की मयने की कोटड़ी में नाकन वाँके पगाँ में बेड़ियाँ नाक दिदी।</verse>
				<verse number="25">आदीक रात का पोलुस अन सिलास परातना कररिया अन परमेसर का वाते भजन गारिया हा। जेळ में दूजाँ ओर मनक हा वीं वाँने हुणरिया हा,</verse>
				<verse number="26">अणाचेत को जोरऊँ भूकम आयो, अन जेळ की नीमा हालगी अन फटाकऊँ हंगळा कमाड़ खुलग्या अन हंगळा मनकाँ की हाँकळा खुलगी</verse>
				<verse number="27">जेळ को अदिकारी जागग्यो अन जेळ का हंगळा कमाड़ खुला तका देकन होच्यो के, हंगळा केदी भागग्या हे, ओ हमजन खुदाखुद तरवार लेन मरणो छायो।</verse>
				<verse number="28">पण पोलुस जोरऊँ हाको करन क्यो, “थूँ खुद ने मत मार, काँके माँ हाराई अटीस हाँ”।</verse>
				<verse number="29">तद्याँ अदिकारी उजिता वाते पूँछ्यो अन दरपन धूजतो तको पोलुस अन सिलास के पगाँ पड़ग्यो,</verse>
				<verse number="30">अन वाँने बारणे लान क्यो, “हो भई-लोगाँ! बंचबा के वाते मूँ कई करूँ?”</verse>
				<verse number="31">वणा क्यो “परबू ईसू पे विस्वास केरी, तो थूँ अन थाँको परवार बंच जाई।”</verse>
				<verse number="32">वणा वींने अन वींका घर का हंगळा ने परबू का बचन हुणाया।</verse>
				<verse number="33">वो रात में वणीस दाण पतरस अन सिलास ने लेग्यो अन वाँके लागी तकी ने धुई अन वणी अन वींका घर का हंगळा मनक तरत बतिस्मो लिदो।</verse>
				<verse number="34">वो वाँने घरे लेग्यो अन वणा ने रोट्याँ खुवई। वीं अन वींको हारोई कटुम्ब परमेसर पे विस्वास करन आणन्दऊँ भरग्यो।</verse>
				<verse number="35">जद्याँ दन व्यो तद्याँ हाकिमा अदिकारियाँ के हाते केन खन्दायो के वणा मनकाँ ने छोड़ दो।</verse>
				<verse number="36">पेरादार आ बात पोलुस ने की “हाकम थाँने छोड़ देबा को हुकम दिदो हे, ईं वाते ऊबा वो अन आरामऊँ परा जावो”</verse>
				<verse number="37">पण पोलुस अदिकारियाँ ने क्यो “माँ रोमी मनक हाँ, तुई वे बना दोसऊँ माँने मनकाँ के हामे कुट्या अन जेळ में नाक्या, अबे कई माँने छानेकूँ निकळबाने केरिया हो?, अस्यान ने वेवे, पण वीं खुद आन माने बारणे काड़ी।”</verse>
				<verse number="38">जद्याँ अदिकारियाँ या बात हाकमऊँ जान क्यो तद्याँ या बात हुणन हाकम दरपग्या के, वीं रोमी हे।</verse>
				<verse number="39">अन हाकम आन वाँने हमजाया अन वाँने बारणे लेजान हाता-जोड़ी किदी अन वीं नगरऊँ जाबा ने क्यो।</verse>
				<verse number="40">वे जेळऊँ निकळन लुदिया के वटे ग्या, अन हंगळा विस्वास्याँ ने धिजो बन्दान पराग्या।</verse>
			</chapter>
			<chapter number="17">
				<verse number="1">पछे वीं अम्पिपुलिस अन अपुलोनिया नगराँ में वेन थिसलुनीके में आया, जटे यहूदियाँ को एक परातना घर हो।</verse>
				<verse number="2">पोलुस आपणाँ रिति-रिवाज के जस्यान वाँऊँ मलबाग्यो, अन तीन सबद का दनाँ में वाँका हाते पुवितर सास्तरऊँ बात-बच्यार किदी।</verse>
				<verse number="3">अन एक-एक बचन ने हव तरियऊँ साबत करन हमजातो हो के, मसी को अस्यान दुक जेळणो अन मरिया तकाऊँ जीवतो वेणो जरूरी हो, अन ईसू, जिंको मूँ थाँने हव हमच्यार हुणारियो हूँ, वोईस मसी हे।</verse>
				<verse number="4">वटे वणा मूँ नरई मनक पोलुस अन सिलास ने मानन, वाँके हाते वेग्या अन अस्यानीस नरई युनानी भगत अन नरी जानी-मानी लुगायाँ भी वाँके हाते वेगी।</verse>
				<verse number="5">पण यहूदियाँ थोड़ाक फोगट्या मनकाँ ने आपणाँ आड़ी मला लिदा, अन भेळा वेन नगर में धामा-चोकड़ी मचाबा लाग्या अन वाँने हंगळा के हामे लाबा वाँते यासोन का घर पे हमलो कर दिदो।</verse>
				<verse number="6">जद्याँ वाँने पोलुस अन सिलास ने मल्या, तो वीं यासोन अन कुई विस्वास्याँ ने पकड़न नगर का हाकमाँ का नके गड़ीन लान हाको करन केबा लागा, “अणा मनकाँ दनियाँ में उळट-पुळट किदी हे, अन वीं मनक अटे भी आग्या हे</verse>
				<verse number="7">अन यासोन वणा ने आपणाँ अटे राक मेल्या हे अन वीं हंगळाईं ओ केवे हे के ‘ईसू ही राजो हे’, अन राजा केसर की आग्या ने कोयने माने।”</verse>
				<verse number="8">ओ केन वणा मनकाँ, भीड़ अन नगर का हाकमाँ के बचमें हाका-हूक कर दिदी।</verse>
				<verse number="9">तद्याँ अदिकारियाँ यासोन अन वाँका नकूँ जरीबानो लेन छोड़ दिदा।</verse>
				<verse number="10">यासोन अन विस्वासी भायाँ, पोलुस अन सिलास ने रातूँ-रात वटूँ बिरिया नगर खन्दा दिदा, अन वीं वटे जान यहूदियाँ का परातना घर में ग्या।</verse>
				<verse number="11">बिरिया का लोग थिसलुनीके का लोगाऊँ खुला मन का हा। आपणो मन लगान बचन हूणता हा अन हरेक दन पुवितर सास्तर में होदता के, जो भी पोलुस केरियो हे, वो हे के ने हे।</verse>
				<verse number="12">वणा मूँ खास यहूदी लोगाँ अन जानी-मानी लुगायाँ अन मोट्यार भी विस्वास किदो।</verse>
				<verse number="13">पण जदी थिसलुनीके का यहूदी जाणग्या के, पोलुस बिरिया में भी परमेसर का बचन हुणारियो हे, तो वीं वटे आन भीड़ ने उकसान भड़कई।</verse>
				<verse number="14">तद्याँ तरत विस्वासी लोगाँ पोलुस ने वटूँ समन्द का नके खन्दा दिदो पण सिलास अन तिमुतियुस बिरिया मेंईस रेग्या।</verse>
				<verse number="15">पोलुस ने मेलबा ग्या वीं वाँके हाते एतेंस नगर तईं ग्या अन ओ हमच्यार लेन आया के सिलास अन तिमुतियुस ने फटाकऊँ मारा नके खन्दावे।</verse>
				<verse number="16">जदी पोलुस एतेंस में वणा की वाट नाळरियो हो, तो वटे हंगळी जगाँ मूरताँ देकन वींको मन घणो दकी वेग्यो।</verse>
				<verse number="17">वो यहूदियाँ का परातना घर में यहूदियाँऊँ अन जो यहूदी ने हा वीं भगताऊँ, चोराया अन बाजार में जो कुई मलतो वाँकाऊँ रोज बात-बच्यार करतो रेतो।</verse>
				<verse number="18">तद्याँ इपिकुरी अन स्तोकी का थोड़ाक अकलमन्द मनक वींकाऊँ आपणी बात-बच्यार किदी अन क्यो, “ओ बेण्डो कई केणो छारियो हे”। पण दूजाँ क्यो “ओ दूजाँ देवी-देवताँ का बारा में बतावे हे”। वे अस्यान ईं वाते केरिया हा, काँके वो ईसू का बारा में अन वींके पाछो जीवतो वेबा को हव हमच्यार हुणारियो हो।</verse>
				<verse number="19">तद्याँ वीं वींने आपणाँ हाते अरियुपगुस नाम की सबा में लेग्या अन पुछ्यो, “कई माँ जाण सका हाँ के, थूँ ओ नुवी बाताँ हुणावे हे, वे कई हे?</verse>
				<verse number="20">काँके जो बाताँ थूँ हुणावे हे वे माने अणजाणी लागे हे, ईं वाते माँ जाणणा छावाँ के अणाको कई मतलब हे।”</verse>
				<verse number="21">हंगळा एतेंस वासी अन परगाम का लोग जो वटे रेवे हे, वे नुवी-नुवी बाताँने हुणबा अन हुणाबा को मोको होदता हा।</verse>
				<verse number="22">तद्याँ पोलुस अरियुपगुस सबा का बचमें ऊबो वेन केबा लागो, हो एतेंस का लोगाँ, में देक्यो हे के, थें सब हारई बाताँ में घणा धरमी हो।</verse>
				<verse number="23">काँके मूँ अटने-वटने फरतो तको थाँकी पूजबा की चिजाँ ने देकरियो हो, तो एक अस्यी वेदी भी देकी जिंपे मण्ड्यो हे, “अणजाण परमेसर के वाते।” ईं वाते थाँ जिंने बना जाण्या पूजो हो, मूँ थाँने वींको हव हमच्यार हूँणऊँ हूँ।</verse>
				<verse number="24">जणी परमेसर धरती अन ईंकी हंगळी चिजाँ ने बणई, वो हरग अन धरती को परबू हे अन वो हाताऊँ बणाया तका मन्दर में कोयने रेवे हे।</verse>
				<verse number="25">अन वींके कई कमी ने हे, के वो मनकाँऊँ सेवा लेवे, काँके वो खुदईस हंगळा ने जीव, जीवन अन हंगळी चिजाँ देवे हे।</verse>
				<verse number="26">वाँकाणी एकीस मनकऊँ हंगळा लोगाँ ने बणाया ताँके वे आकी धरती पे रेवे, अन वणीस ते किदो के, वे कटे रेई अन वाँकी उमरकाळ भी ते किदा।</verse>
				<verse number="27">परमेसर अस्यान किदो के, वीं परमेसर ने होदे, अन वींका नके जान वींने पाले। यद्याँ के वो आपाऊँ छेटी कोयने।</verse>
				<verse number="28">“काँके आपीं वणी मेंईस जीवता हाँ अन चाला-फराँ हाँ अन आपीं वींका मेंईस रेवा हाँ।” जस्यानीस थाँका कवियाँ भी क्यो हो के, “आपीं तो वींकाईस बंस का हाँ।”</verse>
				<verse number="29">आपीं परमेसर का बंस का वेन आपाँने ओ हमजणो हव ने हे के, परमेसर मनक का हाताऊँ अन कारीगरीऊँ बणाई तकी होना-चाँदी की अन भाटा की मूरताँ के जस्यान कोयने हे।</verse>
				<verse number="30">ईं वाते परमेसर वीं दाण का मनकाँ की, परमेसर ने ने जाणबा अण-हमज पे ध्यान ने दिदो, पण अबे हरेक जगाँ लोगाँ ने मन फराबा की आग्या देवे हे।</verse>
				<verse number="31">काँके वणी एक दन ठेरायो हे, वीं आपणाँ थरप्या तकाऊँ वो धरती का हंगळा मनकाँ को हाँचऊँ न्याव केरी, अन वणी मरिया तका मूँ पाछो जीवतो वेन हंगळा मनकाँ में आ बात पाकी कर दिदी हे।</verse>
				<verse number="32">पाछो जी उठबा की बात ने हुणन कुई मनक रोळ करबा लागा, अन कुई तो क्यो “आ बात माँ पाच्छी हूणणो छावाँ हाँ”</verse>
				<verse number="33">ईंपे पोलुस वटूँ परोग्यो।</verse>
				<verse number="34">पण थोड़ाक मनक वींका हाते वेग्या, अन विस्वास किदो। वणा मूँ दियुनुसियस जो अरियुपगुस सबा को सदस हो, दमरिस नाम की लुगई ही, अन वणाके हाते ओरू घणा लोग भी हा।</verse>
			</chapter>
			<chapter number="18">
				<verse number="1">ईंका केड़े पोलुस एतेंसऊँ कुरिन्तुस ग्यो।</verse>
				<verse number="2">वटे वींने अक्‍विला नाम को एक यहूदी मनक मल्यो, जिंको जनम पुन्तुस में व्यो हो। वो आपणी घरवाळी प्रिस्किला के हाते इटलीऊँ अटे आयो हो, काँके वटे रोम के राजा क्लोदियुस हंगळा यहूदियाँ ने रोमऊँ बारणे जाबा की आग्या दिदी ही। पोलुस वाँके नके ग्यो।</verse>
				<verse number="3">वीं हाराई को धन्धो एकीस हो, ईं वाते वीं हाते रेन काम करबा लागा। वणा को काम डेरा वणाबा को हो।</verse>
				<verse number="4">वीं हरेक सबद का दन यहूदियाँ के परातना घर जाईन, यहूदियाँ अन युनानियाँऊँ बात-बच्यार करता हा अन वाँने मनाबा की कोसीस करता हा।</verse>
				<verse number="5">जद्याँ सिलास अन तिमुतियुस मकिदुनियाऊँ आया, तो पोलुस आको दन बचन हुणाबा की धुन में हो अन यहूदियाँ ने गवई देतो हो के “ईसू ही मसी हे।”</verse>
				<verse number="6">पण जद्याँ वीं विरोद करबा अन रिस्याँ बळवा लागा, तो पोलुस आपणाँ गाबा जाटकन वाँकाऊँ क्यो, “यद्याँ थाँ अबे नास वेवो तो, याँ जिमेदारी थाँकीस हे अन ईंका वाते मूँ जिमेदार ने हूँ। अबे मूँ जो यहूदी ने हे वाँका नके जाऊँ।”</verse>
				<verse number="7">वटूँ चालन वो तीतूस युस्तुस नाम का परमेसर का भगत का घरे ग्यो, जिंको घर यहूदियाँ का परातना घर का जोड़ीस हो।</verse>
				<verse number="8">तद्याँ वटे परातना घर के मुक्ये आपणाँ हंगळा परवार हमेत विस्वास किदो। ओ हुणन कुरिन्तुस नगर का नरई लोगाँ विस्वास किदो अन बतिस्मो लिदो।</verse>
				<verse number="9">परबू एक रात में पोलुस ने दरसावो देन क्यो, “दरप मती, अन बचन हूणातो रे, छानो मती रे,</verse>
				<verse number="10">काँके मूँ थारे हाते हूँ, अन कुई थने नकसाण करबा के वाते हमलो ने केरी, काँके अणी नगर में नरई लोग मारा हे”।</verse>
				<verse number="11">ईं वाते पोलुस वणी नगर में परमेसर का वसना ने डोड़ वर तईं हिकाया।</verse>
				<verse number="12">जदी गलिया नाम को अखाया देस को राजपाल बण्यो, यहूदी लोगाँ एगट करन पोलुस ने पकड़ लिदो, अन वींने न्याव-गादी का हामे लाया</verse>
				<verse number="13">अन क्यो “यो मनक लोगाँ ने भोळारियो हे के, परमेसर की परातना अस्यान करो, ज्या वेवस्ता के नेमा के विरोद में हे।”</verse>
				<verse number="14">जदी पोलुस बोलवा मेई हो, गलिया यहूदियाँऊँ क्यो, “हो यहूदियाँ, आ बात जूटी अन फोकटी वेती, तो मूँ थाँकी हूणतो।</verse>
				<verse number="15">पण यद्याँ ओ थाँका सबद, खुद का नेमा अन नाम को बात-बच्यार हे तो थें जाणो हो, मूँ अणा चिजाँ को न्याव ने करणो छारियो हूँ”</verse>
				<verse number="16">अन वणी वाँ हाराई ने न्याव-गादी का हामेऊँ बारणे खन्दा दिदा।</verse>
				<verse number="17">तद्याँ हंगळा लोगाँ परातना घर का मुक्या सोस्तिनेस ने पकड़न न्याव-गादी का हामे कुट्यो, पण राजपाल गलिया ईं बाताँ ने मन में ने लिदी।</verse>
				<verse number="18">पोलुस नरई दन तईं वटे रियो। पछे वटा का भई-बेनाऊँ हिक लिदी अन किंकरिया में टाट कड़ई, काँके वणी बोलमा बोली ही। अन जाँज में बेटन सिरिया में जाबा लागो, वींका हाते प्रिसकिल्‍ला अन अक्‍विला भी हा।</verse>
				<verse number="19">वणी इपिसुस नगर में जान वणा दुई ने वटेईस छोड़्या अन यहूदियाँ का परातना घर में जान यहूदियाँऊँ बात-बच्यार करबा लागो।</verse>
				<verse number="20">जद्याँ वणा वींऊँ क्यो के, माँके हाते थोड़ाक दन ओर रे तो पोलुस वाँकी बात कोयने मानी।</verse>
				<verse number="21">पण पोलुस ओ केन वाँका नकेऊँ ग्यो, “यद्याँ परमेसर की मरजी वेई तो थाँका नके पाछो आऊँ”। तद्याँ वो इपीसुसऊँ जाँज में बेटन चाल पड़्यो।</verse>
				<verse number="22">अन केसरिया नगर वेतो तको यरूसलेम ग्यो अन वटे विस्वास्याँ की मण्डळीऊँ नमस्कार करन अन्ताक्या नगर ग्यो।</verse>
				<verse number="23">पछे थोड़ाक दन वटे रियो, ईंका केड़े गलातिया अन फरूगिया का देसा में विस्वास्याँ ने विस्वास में गाटा करतो ग्यो।</verse>
				<verse number="24">अपुलोस नाम को यहूदी मनक, जिंको जनम सिकन्दरिया में व्यो हो, जो हव भण्यो-पड़यो हो अन पुवितर सास्तर ने बड़या तरियऊँ जाणतो हो, इपिसुस में आयो।</verse>
				<verse number="25">वींने परबू का गेला पे चालबा की हिकावण दिदी ही, अन वो मन लगान बड़िया तरियऊँ परबू का बारा में हूणातो अन हिकातो हो, पण बेस वो यहुन्ना का बतिस्मो की बाताँइस जाणतो हो।</verse>
				<verse number="26">वो यहूदियाँ का परातना घर में बना दरप्या बोलतो हो। प्रिसकिल्‍ला अन अक्‍विला वींकी बाताँ ने हुणन वींने आपणाँ घरे लेग्या अन वणी वाँने परमेसर का गेला का बारा में एकदम सई तरियऊँ हमजाया।</verse>
				<verse number="27">जदी वणी होच्यो के वटूँ अखाया जाऊँ तो इपिसुस का विस्वास्याँ वींने धिजो बन्दायो अन अखाया का विस्वास्याँ ने लिक्यो के वीं ईंकी आवभगत करे। अन वणी वटे जान लोगाँ की मदत किदी जणा परमेसर की करपाऊँ विस्वास किदो हो।</verse>
				<verse number="28">वो पुवितर सास्तरऊँ यहूदियाँ का हामे तागतऊँ वाद-विवाद करन ओ साबत करतो रियो के, ईसू ही मसी हे।</verse>
			</chapter>
			<chapter number="19">
				<verse number="1">जद्याँ अपुलोस कुरिन्तुस नगर में हो, तो पोलुस मईने का इलाकाऊँ वेतो तको इपिसुस में आयो। वटे वणी थोड़ाक चेला ने देक्याँ</verse>
				<verse number="2">अन वाँने पूँछ्यो, “कई थाँ विस्वास किदो वीं दाण पुवितर आत्माने पई?” वाँकाणी क्यो, “माँ तो पुवितर आत्मा की बात ने हुणीस कोयने।”</verse>
				<verse number="3">वणी वाँने पूँछ्यो, “पच्छे थाँ कस्यो बतिस्मो लिदो?” वाँकाणी क्यो, “यहुन्ना को बतिस्मो लिदो”।</verse>
				<verse number="4">पोलुस वाँकाऊँ क्यो, “जणी पापाऊँ मन फरायो हे वाँका वाते यहुन्ना को बतिस्मो हे अन वणी लोगाँ ने क्यो के, जो माराऊँ केड़े आबावाळो हे, वो ईसू मसी हे, जिंपे थाँ विस्वास करजो”</verse>
				<verse number="5">ओ हुणन वाँकाणी परबू ईसू मसी का नाम में बतिस्मो लिदो।</verse>
				<verse number="6">जद्याँ पोलुस वणापे हात राक्यो, तो पुवितर आत्मा वाँके डिले आयो, अन वीं तरे-तरे की बोली ने अन परमेसर का आड़ीऊँ बोलबा लागा।</verse>
				<verse number="7">ईं हाराई लगे-भगे बारा हा।</verse>
				<verse number="8">वो वटे यहूदियाँ का परातना घर में जान तीन मिना तईं बना दरप्या बचन बोलतो रियो, अन परमेसर का राज का बारा में बात-बच्यार करन लोगाँ ने हमजातो रियो।</verse>
				<verse number="9">पण जद्याँ थोड़ाक लोग नसेड़ा वेन वींकी बात पे विस्वास ने किदो अन लोगाँ का हामे परमेसर का गेला का बारा में भलो-बुरो केबा लागा। तो पोलुस वाँने छोड़ दिदा अन चेला ने लारे ले लिदा अन पछे हर-दन तुरनुस नाम की पाटसाला में बात-बच्यार करतो रियो।</verse>
				<verse number="10">दो वर तईं अस्यानीस वेतो रियो, अन अस्यान आसिया में रेबावाळा हंगळा यहूदी अन युनानी लोगाँ परबू का बचन हुण लिदा हा।</verse>
				<verse number="11">परमेसर पोलुस का हाताऊँ अचम्बावाळा काम करवाता हा,</verse>
				<verse number="12">अटा तईं के रुमाल अन हस्ताड़ा पोलुस के अड़ान, माँदा मनकाँ के अड़ाता तो वीं हव वे जाता अन हुगली आत्मा भी वाँका मूँ निकळ जाती ही।</verse>
				<verse number="13">पण थोड़ाक यहूदी जाणकार, जो हरेक जगाँ जान हुगली आत्माने निकाळता हा, वीं भी ईंका वाते परबू ईसू को नाम लेता हा अन केता हा के “जणी ईसू को परच्यार पोलुस करे हे, वींका नामऊँ हुकम दूँ हूँ”।</verse>
				<verse number="14">इस्किवा नाम का एक यहूदी मुक्या याजक के हात छोरा हा, जीं भी अस्यानीस करता हा,</verse>
				<verse number="15">पण हुगली आत्मा वाँने क्यो, “ईसू ने तो माँ जाणा अन पोलुस ने भी ओळका हाँ, पण थाँ कूण हो?”</verse>
				<verse number="16">अन जणी में हुगली आत्मा ही, वो वाँका पे जपट्यो अन वाँने हरा दिदा। वे नागा-पागा अन लोया-जाळ वेन वीं घरऊँ भागग्या।</verse>
				<verse number="17">आ बात इपिसुस में रेबावाळा हंगळा यहूदी अन युनानी जाणग्या, अन दरपबा लागा। परबू ईसू का नाम की बड़ई करबा लागग्या।</verse>
				<verse number="18">जणा विस्वास किदो हो, वीं वटे आन जीं जीं हूँगला काम वे करता हा वाँने हंगळा के हामे मान लिदा।</verse>
				<verse number="19">झाड़-फूक करबावाळा हंगळा जणा आपणाँ पोत्या-पानड़ा लाया अन हंगळा के हामे बाळ नाक्या। वणा पोत्या-पानड़ा का रिप्या जोड़्याग्या तो पचा हजार चाँदी का सिक्का के जतरा व्या।</verse>
				<verse number="20">ईं तरियऊँ परबू का बचन सामरतऊँ हरेक जगाँ बड़वा लागी।</verse>
				<verse number="21">ईं बाताँ व्या केड़े पोलुस आपणी आत्मा में होच्यो के मकिदुनिया अन अखाया वेन यरूसलेम जाऊँ, अन क्यो “वटे जान मने रोम में भी जाणो पड़ी।”</verse>
				<verse number="22">ईं वाते वणी आपणी मदत करबावाळा मूँ, तिमुतियुस अन अरास्तुस ने मकिदुनिया खन्दाया अन खुद थोड़ाक दन आसिया में रियो।</verse>
				<verse number="23">वीं टेम इपिसुस में परबू का गेला का बारा में घणो हुल्‍लड़ मच्यो।</verse>
				<verse number="24">दिमेत्रियुस नाम को एक होनार चाँदीऊँ, अरतिमिस देवी को मन्दर बणातो हो अन वींका कामाँऊँ कारिगराँ ने हेलो नफो मलतो हो,</verse>
				<verse number="25">वणी अस्यी चिजाँ वणाबावाळा कारिगराँ ने भेळा किदा अन क्यो, “हो लोगाँ, थाँ जाणो हो के, आपाँने ओ काम करवाऊँ नरई रिप्या-कोड़ी मले हे।</verse>
				<verse number="26">थाँ देक्यो अन हुण्यो भी हे के, बेस इपिसुस मेंईस ने, पण हंगळा आसिया का लोगाँ ने पोलुस ओ केन भोळाया हे के, जीं हाताऊँ घड्या तका देवताँ हे, वींमें परमेसर ने हे।</verse>
				<verse number="27">ईंऊँ बेस या एक बातईस की दरप कोयने हे के, आपणो काम धन्धो बदनाम वेई, पण ओ भी के, आपणी पुवितर देवी अरतिमिस का मन्दर ने भी नेजोगो मान्यो जाई अन ईं मोटी देवी की मेमा भी खतम वे जाई, जिंने हंगळा आसिया अन दनियाँ का लोग पूजे हे।”</verse>
				<verse number="28">ओ हुणन हंगळा रीस में आग्या अन हाका करन केबा लागा, “इपिसियों की देवी अरतिमिस मोटी हे।”</verse>
				<verse number="29">अन हंगळा नगर में हाका-भार वेगी, अन लोगाँ मकिदुनिया का गयुस अन अरिस्तखुस जो पोलुस का हण्डाळ्याँ हा, वाँने पकड़ लिदा, अन हंगळा एक हाते मेदान में आग्या अन भेळा वेग्या।</verse>
				<verse number="30">जदी पोलुस लोगाँ का नके जाणो छायो तो चेला वींने जाबा ने दिदो।</verse>
				<verse number="31">वीं इलाका का थोड़ाक आसिया हाकिमा भी जो पोलुस का हण्डाळ्याँ हा, वणा पोलुस के संदेसो खन्दायो के, वो मेदान में जान कई आपत माते ने ले।</verse>
				<verse number="32">वटे सबा में नरई मनक हाका-हूक कररिया हा, अन थोड़ा कई केरिया हा, दूजाँ ओरी कई केरिया हा, काँके वामूँ घणा तो ओ ने जाणता के वीं वटे कणी वाते भेळा व्या हा।</verse>
				<verse number="33">तद्याँ थोड़ाक यहूदी मनक सिकन्दर ने ऊबो करन आगे खन्दायो। अन वो लोगाँ ने छाना करबा वाते हाताऊँ हानी किदी अन बात-बच्यार करणो छारियो हो।</verse>
				<verse number="34">पण जदी मनकाँ ने नंगे पड़गी के ओ यहूदी हे तो वीं हंगळा एक हाते दो घण्टा तईं हाका करता रिया “इपिसियों की देवी अरतिमिस मोटी हे”।</verse>
				<verse number="35">तद्याँ नगर के बाबू, लोगाँ ने छाना करन क्यो “हो इपिसुस का लोगाँ, हंगळा मनक जाणे हे के, इपिसुस मोटी देवी अरतिमिस का मन्दर को रुकाळ्यो हे अन वींकी मूरत हरगऊँ अई हे।</verse>
				<verse number="36">अणा बाताँ ने कुई नट ने सके, ईं वाते थाँ छाना-माना रो अन कस्यी भी बात पे बात-बच्यार मत करो।</verse>
				<verse number="37">थाँ अणा मनकाँ ने पकड़न लाया, अणा ने तो मन्दर ने लुट्यो अन ने ही देवी माँ को अपमान किदो हे।</verse>
				<verse number="38">यद्याँ दिमेत्रियुस अन वींका हण्डाळ्याँ कारिगराँ हाते लड़ई-जगड़ो किदो वे तो, न्याव-गादी के हामे जावो, हाकम वटे हे वाँको न्याव वटे वेई।</verse>
				<verse number="39">पण थाँकामूँ किंने ओरुँ कई केणो अन पूँछणो वे तो वीं बात को हमजोतो न्याव सबा में किदो जाई।</verse>
				<verse number="40">काँके आज जो कई व्यो हे, वींऊँ आपीं हंगळा पे दोस लाग सके हे अन जो हुल्‍लड़ किदो हे, ईंऊँ बंचबा वाते आपाँ नके कुई बायनो कोयने हे।”</verse>
				<verse number="41">ओ केन वणा वीं सबा ने खतम किदी।</verse>
			</chapter>
			<chapter number="20">
				<verse number="1">जद्याँ वटे हुल्‍लड़ ठम ग्यो, तो पोलुस चेला ने नके बलान धिजो बन्दातो तको वाँकाऊँ हिक लिदी, अन पछे मकिदुनिया में परोग्यो।</verse>
				<verse number="2">वीं हंगळा इलाका में वेन अन चेला ने धिजो बन्दातो तको वो युनान में आयो।</verse>
				<verse number="3">वो तीन मिना वटे रियो। ईंका केड़े जाँज में सिरिया के आड़ी जाणो हो, तो वणी हुण्यो के यहूदियाँ वींका वाते जाळ बिछारिया हे, ईं वाते वणी मकिदुनिया वेन जाबा वाते धारियो।</verse>
				<verse number="4">बिरिया के पुरूस को छोरा सोपतरुस अन थिस्सुलुनिक्यों मेंऊँ अरिस्तखुस अन सिकन्दुस, अन दिरबे को गयुस अन आसिया का तुखिकुस अन तुरकियुस अन तिमुतियुस वींका हाते ग्या हा।</verse>
				<verse number="5">वीं आगे जान त्रोआस में माकाँ वाते बाट नाळरिया हा।</verse>
				<verse number="6">अन माँ बना हाज्या की रोटी का तेवाराँ का दनाँ केड़े फिल्‍लिपीऊँ जाँज में बेन पाँच दन में त्रोआस ग्या अन हात दन तईं वटे रिया।</verse>
				<verse number="7">हपता का पेले दन जद्याँ परबू ने आद करबा का जीमणा वाते भेळा व्या तो पोलुस वाँऊँ बात-बच्यार करतो रियो अन दूजे दन जाणो हो, ईं वाते आदी रात तईं बाताँ करतो रियो।</verse>
				<verse number="8">जणी घर का उपरला ओवरा पे माँ हंगळा भेळा व्या हा, वटे दिवाण्या लगा मेल्या हा,</verse>
				<verse number="9">अन युतुखुस नाम को एक मोट्यार छोरो खड़की में बेटो हो। जद्याँ पोलुस आदी रात तईं बाताँ कररियो हो तो वो मोट्यार नींद में ऊंगरियो हो अन गेरी नींद में तीसरा माळाऊँ हेठे पड़ग्यो। जद्याँ लोगाँ वींने तोक्यो तो मरियो तको देक्यो।</verse>
				<verse number="10">पण पोलुस रेटे आन वींने बाँत में लिदो अन क्यो, “घबरावो मती, काँके ईंको जीव ने निकळ्यो हे”</verse>
				<verse number="11">अन पोलुस पाछो ऊपरे जान रोटी तोड़ी अन खादी। वो अतरी देर तईं बाताँ करतो रियो के, भाग-फाट्याँ की टेम वेगी, पछे वो परोग्यो।</verse>
				<verse number="12">वीं मोट्यार छोरा ने जीवतो वे घरे लेन आया अन वणा संतोक पायो।</verse>
				<verse number="13">माँ पोलुसऊँ पेल्याई जाँज में बेन अरसुस आया, काँके माँने वटूऊँ वींने हाते लेणो हो, काँके वणी माँकाऊँ क्यो हो के वो गेले-गेले जाणो छारियो हे।</verse>
				<verse number="14">जद्याँ वीं असुस में माँने मल्यो तो माँ वींने जाँज में मितुलेन लाया।</verse>
				<verse number="15">वटूऊँ माँ जाँजऊँ वेन दूजे दन खियुस नके पोंच्या, अन आगले दन सामुस पार करन तीजे दन मिलेतुस में आया।</verse>
				<verse number="16">पोलुस इपिसुस का नके वेन जाणो छायो, काँके कटे अस्यान ने वे के आसिया में मोड़ो वेजा। वो ईं वाते आगत कररियो हो, के वे सके तो पिन्तेकुस के तेंवार के दन यरूसलेम में रेवे।</verse>
				<verse number="17">पोलुस मिलेतुसऊँ इपिसुस में संदेसो खन्दायो के, मण्डली में बुड़ा-ठाड़ा ने बलावो।</verse>
				<verse number="18">जद्याँ वे वींका नके आया, तो वणी क्यो, “थाँ जाणो हो के मूँ वीं पेलाई दनऊँ पूरो टेम थाँका हण्डे कस्यान बितायो, जीं दनऊँ मूँ आसिया में आयो।</verse>
				<verse number="19">नमरताऊँ अन आसूऊँ अन जद्याँ यहूदियाँ को जाळ भी मारा पे आ पड़्यो, तो भी मूँ ईं परक में परबू की सेवा करतो रियो।</verse>
				<verse number="20">अन जी जी बाताँ थाँके भलई की ही वणीने में हंगळा के हामे अन हरेक का घरे जा-जान हिकाबाऊँ कदी ने हपई।</verse>
				<verse number="21">यहूदियाँ अन युनानियाँ के हामे गवई देतो रियो, के पापाऊँ मन फरान परमेसर का आड़ी आवो अन परबू ईसू मसी पे विस्वास करो।</verse>
				<verse number="22">अबे देको, मूँ पुवितर आत्मा की आग्याऊँ यरूसलेम जारियो हूँ, मूँ ने जाणूँ के वटे मारा पे कई बीती।</verse>
				<verse number="23">बेस ओ के पुवितर आत्मा हरेक नगर में गवई देन मने केवे हे के, हतकड़ी अन दक-तकलिप मारा वाते वेबावाळी हे,</verse>
				<verse number="24">पण मूँ आपणाँ जीव ने कई ने हमजूँ। मूँ तो बेस वीं दोड़ अन सेवा का काम ने पूरो करणो छारियो हूँ, जिंने में परबू ईसुऊँ पाई हे, जो परमेसर की करपा का हव हमच्यार की गवई देणो हे।”</verse>
				<verse number="25">अबे देको, मूँ जाणूँ हूँ के, थाँका बचमें में परमेसर का राज को परच्यार किदो हे, पण अबे थाँकामूँ कुई भी अन कदी भी मने ने देक सकी।</verse>
				<verse number="26">ईं वाते मूँ आज थाँने गवई देन केरियो हूँ, यद्याँ ईंका केड़े भी थाँको नास वे जावे तो मूँ जिमेदार ने हूँ।</verse>
				<verse number="27">काँके मूँ परमेसर की हारी मरजी ने थाँने बताबा वाते कदी आगो-पाछो ने व्यो।</verse>
				<verse number="28">ईं वाते थाँ आपणो अन आपणी हाराई गारा को ध्यान राको जिंने पुवितर आत्मा थाँका हात में हुप्याँ हे के, थाँ परमेसर की मण्डली की रुकाळी करो, ज्याँने परमेसर आपणाँ बेटा का लुईऊँ मोल लिदी हे।</verse>
				<verse number="29">मूँ जाणूँ हे के, मारा जाबा के केड़े उगड्याँ तका बरगड़ा थाँका गाबे अई, जो थाँका गारा ने, ने छोड़ी।</verse>
				<verse number="30">अस्यो टेम आई जद्याँ थाँका मेंऊँस थोड़ाक मनक विस्वास्याँ ने जूट बोलन आपणाँ हाते लेई,</verse>
				<verse number="31">ईं वाते हूँस्यार रेवो, अन ओ ध्यान राको के, में तीन वर तईं रात-दन आसूँ का हाते थाँ हाराई ने हिकाया।</verse>
				<verse number="32">अबे मूँ थाँने परमेसर अन वींकी करपा का संदेसा में थाँने हूँप दूँ हूँ। वोईस थाँने बणाई अन वींका मनकाँ ज्याँने पुवितर किदा हे वाँका हण्डे थाँने भी बापोती देई।</verse>
				<verse number="33">में कणी भी मनक की चाँदी अन होना अन गाबा को लाळच ने किदो।</verse>
				<verse number="34">थाँ जाणो हो के, अणा हाताँईस मारी अन मारा हण्डाळ्याँ की जरुरत ने पुरी किदी ही।</verse>
				<verse number="35">में थाँने हंगळो करन दिकायो के अस्यान मेनत करता तका गरीबा ने हमाळो अन परबू का बचन ने रोज याद राकज्यो, जो वणी क्यो हो के, “लेबाऊँ देणो हव हे।”</verse>
				<verse number="36">ओ केन वणी गोडा टेकन हंगळा के लारे परातना किदी।</verse>
				<verse number="37">तद्याँ वीं हंगळा घणा रोया अन पोलुस के गळे मलबा लाग्या।</verse>
				<verse number="38">वे खासकर ईं बातऊँ दकी हा के, पोलुस वाँने क्यो हो के, थाँ अबे मने कदी ने देको। तद्याँ वीं हंगळा पोलुस ने जाँज में बेटावाने ग्या।</verse>
			</chapter>
			<chapter number="21">
				<verse number="1">जद्याँ माँ वाकाँऊँ हिक लेन जाँजऊँ हुदा कोस जा पूग्या अन पछे दूजे दन रुदुस में अन वटूऊँ पतरा में पराग्या।</verse>
				<verse number="2">वटे माने एक जाँज फीनीके जातो तको मल्यो, अन माँ वींका ऊपरे चड़न चाल पड़्या।</verse>
				<verse number="3">जद्याँ साइपरस दिक्यो, तो माँ लंकव सिरिया आड़ी चाल पड़्या अन सूर में जा पोछ्याँ, काँके वटे जाँज मूँ माल उतारनो हो अन माँ भी वटेईस उतरग्या।</verse>
				<verse number="4">वटे विस्वास्याँ ने होद्‍या अन एक हपता तईं वटे रिया, अन वणा आत्माऊँ भरन पोलुसऊँ क्यो के, यरूसलेम में पग मत मेलज्ये।</verse>
				<verse number="5">जद्याँ वीं दन पूरा वेग्या तो माँ वटूँ चाल पड़या, अन वटा का हंगळा मनक अन वाँकी लुगायाँ अन छोरा-छोरी माँने नगर का बारणे तईं मेलवा आया, अन समन्द का कनारे माँ हंगळा गोडा टेकन परातना किदी।</verse>
				<verse number="6">तद्याँ एक-दूजाऊँ हिक लेन, जाँज में बेट्या अन वीं आपणाँ-आपणाँ घरे पराग्या।</verse>
				<verse number="7">तद्याँ माँ सूरऊँ जाँज में पतुलेमियस पोंच्या, अन वटा का भायाँऊँ नमस्कार किदो अन एक दन वटे रिया।</verse>
				<verse number="8">दूजे दन माँ वटूँ केसरिया में आया, अन फिलिपुस नाम को एक मनक जो हव हमच्यार को परच्यार करतो हो, वटे यरूसलेम में चुण्या तका हात सेवा करबावाळा मूँ एक जणो हो, वींका वटे रिया।</verse>
				<verse number="9">वींके च्यार कूँवारी छोरियाँ ही, जो परमेसर के आड़ीऊँ बोलती ही।</verse>
				<verse number="10">जद्याँ माँकाणी वटे थोड़ाक दन रिया तद्याँ यहूदियाँऊँ अगबुस नाम को एक परमेसर का आड़ीऊँ बोलबावाळो वटे आयो।</verse>
				<verse number="11">वो मनक माकाँ नके आन पोलुस का बेलपट्याऊँ आपणाँ हात-पग बाँदन क्यो, “पुवितर आत्मा ओ केवे के, जिंको ओ बेलपट्यो हे, वींने यरूसलेम में यहूदी मनक अस्यानीस बांदी अन जो यहूदी ने हे वाँने हूँप देई।”</verse>
				<verse number="12">जद्याँ माँ आ बात हूणी तो माँ अन वटा का लोगाँ पोलुस ने यरूसलेम ने जाबा वाते अरज किदी।</verse>
				<verse number="13">पण पोलुस जवाब दिदो, “थाँ अस्यान रो-रोन मारी मन काँ तोड़ रिया हो। मूँ तो परबू ईसू का नाम वाते बेस बन्दवा वातेईस ने पण मरवा के वाते भी त्यार हूँ”।</verse>
				<verse number="14">माँ वींने मना ने सक्या तो ओ केन छोड़ दिदो, “जस्यान परबू की मरजी वस्यान वेवे।”</verse>
				<verse number="15">ईं दनाँ केड़े माँ त्यारी करन यरूसलेम चाल पड़्या।</verse>
				<verse number="16">केसरियाऊँ भी थोड़ाक चेला माकाँ हाते आया, अन माने मनसोन नाम को जो साइपरस देस की पेली विस्वास्याँ की मण्डली का चेला मूँ एक हो, वींका अटे लाया, काँके माँने वटे रेणो हो।</verse>
				<verse number="17">जद्याँ माँ यरूसलेम पूग्या, तो वटा का भई-बन्द माँकाऊँ घणा राजी वेन माँकी आवभगत किदी।</verse>
				<verse number="18">दूजे दन पोलुस माँके हण्डे याकूब का नके ग्यो, जटे हंगळा बुड़ा-ठाड़ा लोग भेळा वेरिया हा,</verse>
				<verse number="19">पोलुस वाँकाऊँ नमस्कार किदो अन जो यहूदी ने हा वाँका बचमें परमेसर वींकाऊँ कराया तका हंगळा कामाँ ने एक-एक करन के हुणाया।</verse>
				<verse number="20">वणा ओ हुणन परमेसर की मेमा किदी, पछे वींऊँ क्यो, “हे भई, थूँ देकरियो हे के, यहूदियाँ मूँ करतईं हजार मनकाँ विस्वास किदो, अन हंगळाईं मूसा का नेमा का नेमा ने आका मनऊँ मानबावाळा हे।</verse>
				<verse number="21">वाँकाणी थाँका बारा में हिकायो हे के, थूँ जो यहूदी ने हे वाँमें रेबावाळा यहूदियाँ ने मूसा का नेमा ने छोड़ देबा का बारा में हिकावे अन केवे के, ने आपणाँ बाळकाँ को खतनो करावो अन ने यहूदियाँ का रिति-रिवाजाँ पे चालो</verse>
				<verse number="22">तो कई कराँ? वस्यान तो लोगाँ ने नंगे पड़ जाई के थूँ अटे आयो हे।</verse>
				<verse number="23">ईं वाते जो माँ थने काँ वोईस थूँ कर, माकाँ हण्डे चार मनक हे जणा बोलमा बोली हे,</verse>
				<verse number="24">वणा ने हाते लेन थूँ खुद ने पुवितर करले, अन वाँने खरचो दे के वीं टाट कड़ावे, तद्याँ हंगळा लोग जाण जाई के जीं बाताँ वणा थाँरा बारा में की ही, वीं हाँची कोयने पण थूँ भी अणीस वेवस्ता ने माने हे।</verse>
				<verse number="25">पण जणा जो यहूदी ने हे वामूँ विस्वास किदो, माँ सला करन वाँने संदेसो लिक्यो के, वीं मूरताँ ने चड़ाया तका मासऊँ छेटी रेवे अन गळो मरोड़्या जनावर को माँस ने खावे अन लुई ने पिवे अन कूकरमऊँ छेटी रेवे।”</verse>
				<verse number="26">तद्याँ पोलुस वणा मनकाँ ने हाते लेन दूजे दन वाँका हाते पुवितर वेन मन्दर में ग्यो, अन वटे जान पूँछ्यो के, पुवितर वेबा का दन कदी पूरा वेई अन माँ हरेक का वाते चड़ावो कदी चड़ायो जाई।</verse>
				<verse number="27">जद्याँ वीं हात दन पूरा वेबा में हा, तो आसिया देस का यहूदियाँ पोलुस ने मन्दर में देकन भीड़ ने उकसाया अन वींने पकड़यो</verse>
				<verse number="28">अन हाँको करन क्यो “हो इजराएल का मनकाँ, मदत करो? ओ वोईस मनक हे, जो लोगाँ के अन मूसा का नेमा के हामे रेन लोगाँ ने हिकावे अन अटा तईं के, वो जो यहूदी ने हे वींने मन्दर में लान ईंने अबड़ा दिदो हे”</verse>
				<verse number="29">अणा अस्यान किदो, काँके वणा वींने पेल्याँ भी इपिसुस का रेबावाळा त्रुफिमुस का हाते वाँका नगर में देक्यो हो, अन हमजग्या के, वो वींने भी मन्दर में लायो हे।</verse>
				<verse number="30">तद्याँ हंगळा नगर में हाका-भार वेगी, अन लोग भेळाँ वेग्या, अन पोलुस ने पकड़न मन्दरऊँ बारणे गड़ीन लाया, अन तरत मन्दर का कमाड़ जड़ नाक्या।</verse>
				<verse number="31">जद्याँ वीं पोलुस ने मारणो छारिया हा, तो रोमी टोळी का सेनापती नके संदेसो पोछ्यो के हंगळा यरूसलेम में हाका-भार वेरी हे।</verse>
				<verse number="32">तद्याँ वो तरत अदिकारी अन सपायाँ ने लेन पोलुस पे हमलो करबावाळा मनकाँ का दयने ग्यो, तो वणा लोगाँ वींने देकन पोलुस ने कुटणो छोड़ दिदो।</verse>
				<verse number="33">तद्याँ सेनापती पोलुस नके आयो अन वींने पकड़ लिदो अन दो हाकळाऊँ बांदबा को हुकम देन पूँछ्यो के “ओ कूण हे, अन अणी कई किदो?”</verse>
				<verse number="34">पण भीड़ में कुई कई केरियो अन दूजाँ ओरुँ कई केरिया हा अन जोरकी हाका-भार में वो हाँची बात ने हमज ने सक्यो, तो वणी वींने छावणी में लेजाबा को हुकम दिदो।</verse>
				<verse number="35">जद्याँ वीं पंगत्याँ तईं ग्या, तो अस्यान व्यो के वींने ऊसे तोकन ले जाणो पड़्यो, काँके वींका पाच्छे लोगाँ की भीड़ गुस्सा में हाका-भार करती तकी आरी ही।</verse>
				<verse number="36">लोग वींके आगे-पाछे भेळा वेन केरिया हा, “ईंने मार नाको”।</verse>
				<verse number="37">जद्याँ वीं पोलुस ने ले जारिया हा, तो पोलुस सेनापतीऊँ क्यो, “कई मूँ कई के सकूँ।” जदी वणी क्यो, “कई थूँ युनानी भासा जाणे हे?”</verse>
				<verse number="38">“कई थूँ वो मिसरी तो ने हे, जो पेल्याँ का दनाँ में विरोद करन चारेक हजार हत्यारा लोगाँ ने हुन्ना काकड़ में लेग्यो हो।”</verse>
				<verse number="39">पोलुस क्यो, “मूँ तो सिलिकिया का तरसूस नगर को यहूदी मनक हूँ, मूँ थाँराऊँ हाता-जोड़ी करूँ के मने अणा लोगाऊँ बाताँ करबा दे”।</verse>
				<verse number="40">जद्याँ सेनापती आग्या दिदी, तो पोलुस पंगत्याँ पे ऊबो वेन लोगाँ ने हातऊँ हानी किदी। जद्याँ वीं छाना-माना वेग्या तो वो इबरानी भासा में बोलबा लागो।</verse>
			</chapter>
			<chapter number="22">
				<verse number="1">पोलुस क्यो, “मारा हण्डाळ्याँ यहुदियो, भायाँ अन मारा बड़ाबा, मारा बंचबा के वाते मने जो कई केणो हे, वींने हुणो।”</verse>
				<verse number="2">वीं मनक जद्याँ ओ हुण्यो के वो इबरानी भासा में बोलरियो हे, तो वीं ओरू छाना-माना वेग्या, तद्याँ पोलुस केतो ग्यो,</verse>
				<verse number="3">मूँ एक यहूदी मनक हूँ, अन किलिकिया देस का तरसूस नगर में मारो जनम व्यो, पण अणी नगर में गमलियल मारसाब का अटे भण्यो जस्यान के, बापदादा की वेवस्ता ने बड़या तरियऊँ हिक्यो, अन परमेसर का वाते अस्यी धुन लगई ही, जस्यान थाँ आज लगई मेली हे।</verse>
				<verse number="4">मूँ ईसू ने मानबावाळा लोगाँ ने अटा तईं हतातो रेतो के वीं नसंगी मर जाता हा। मूँ मनकाँ अन लुगायाँ ने बन्दी बणान जेळ में नाकतो हो।</verse>
				<verse number="5">खुद मोटा याजक अन बड़ाबा की सबा भी ईं बात ने साबत कर सके हे। में दमिसक में रेबावाळा यहूदी लोगाँ का वाते अणा लोगाऊँ कागद पायो ताँके मूँ वटे जऊँ अन ईसू ने मानबावाळा लोगाँ ने बन्दी बणान यरूसलेम लऊँ ताँके वाँने दण्ड दे सके।</verse>
				<verse number="6">“जद्याँ मूँ चालतो-चालतो दमिसक का नके पूग्यो, तो अस्यान व्यो के दपरी की टेम में अणाचेत को आकासऊँ उजितो मारे च्यारूँमेर वेग्यो।</verse>
				<verse number="7">अन मूँ रेटे पड़ग्यो अन आकासऊँ एक अवाज हूणी ज्या मने केरी ही के, ‘हे साउल, हे साउल, थूँ मने काँ हतईरो हे?’</verse>
				<verse number="8">में जवाब दिदो, ‘हो परबू, थाँ कूण हो’ वणा मने क्यो, ‘मूँ ईसू नासरी हूँ, जिंने थूँ हतारियो हे।’</verse>
				<verse number="9">मारा हण्डाळी उजितो तो देक्यो, पण वणा जो माराऊँ बात कररियो हो वा अवाज ने हुण सक्या।</verse>
				<verse number="10">तद्याँ में क्यो, ‘हो परबू, मूँ कई करूँ?’ परबू माराऊँ क्यो, ‘ऊबो वे अटूँ दमिसक में जा, अन वटे थने वो हारोई बता दिदो जाई जिंका वाते परमेसर थने चुण्यो हे।’</verse>
				<verse number="11">वीं अणाचेत का उजिताऊँ मने दिकतो बन्द वेग्यो, ईं वाते मारा हण्डाळ्याँ मारो हात पकड़न दमिसक में लेग्या।”</verse>
				<verse number="12">तद्याँ वटे हनन्या नाम को वेवस्ता ने मानबावाळो एक मनक हो, जिंकी वटे रेबावाळा हंगळा यहूदियाँ में हव पेट ही,</verse>
				<verse number="13">अन वो मारे नके आयो अन मने क्यो, “हे भई साउल पाछो देकबा लाग।” वणीस दाण मूँ वींने देकबा लागग्यो।</verse>
				<verse number="14">तद्याँ वणी क्यो, “आपणाँ बापदादा का परमेसर थने ईं वाते चुण्यो के थूँ वींकी मरजी ने जाणे, अन धरमी मनक ने देक सके वींकी मुण्डा की बात ने हुण सके।</verse>
				<verse number="15">काँके थूँ वींको हंगळा लोगाँ के हामे वणी बाताँ को गवा हे जिंने थें देकी अन हूणी हे।</verse>
				<verse number="16">अबे काँ मोड़ो कररियो हे? ऊँट अन बतिस्मो ले, अन वींका नामऊँ अरज करन आपणाँ हंगळा पापाँ ने धो नाक।”</verse>
				<verse number="17">जद्याँ मूँ पाछो यरूसलेम में आन मन्दर में परातना कररियो हो तो एक दरसावो देक्यो,</verse>
				<verse number="18">अन वींमें में परबू ने देक्या अन परबू मने कई केरिया हे, “फटाकऊँ यरूसलेमऊँ परोजा, काँके अटाका लोग मारा बारा में थारी गवई ने मानी।”</verse>
				<verse number="19">में क्यो, “हो परबू, वीं तो जाणे हे के मूँ यहूदियाँ का परातना घर में जान विस्वास करबावाळा मनकाँ ने जेळ में नाकतो हो अन कूटतो हो।</verse>
				<verse number="20">अन जद्याँ थाँरा गवा इस्तीपनुस ने माररिया हा, वीं दाण मूँ भी वटीस ऊबो हो अन में भी वींमें हात दिदो। जीं लोग वींने माररिया हा वाँका गाबा की रुकाळी कररियो हो।”</verse>
				<verse number="21">अन परबू माराऊँ क्यो, “जा, काँके मूँ थने जो यहूदी ने हे वाँका बचमें नरई छेटी-छेटी खन्दाऊँ।”</verse>
				<verse number="22">आ बात तईं वे वींकी बात हूणता रिया। तद्याँ जोरऊँ हाको करन केबा लागा, “अणी मनक ने मार नाको, यो अणी धरती पे जीवतो रेवा के जोगो ने हे।”</verse>
				<verse number="23">जद्याँ वीं हाका-भार अन गाबा फेंकरिया हा अन धूळो उड़ा रिया हा।</verse>
				<verse number="24">तो सेनापती क्यो, “ईंने छावणी में ले जावो अन चामट्याँ मेलन पूछो के, ईं लोग-बाग किंका वाते हाका-भार कररिया हे।”</verse>
				<verse number="25">जद्याँ वणा वींने बाद्यो तो पोलुस वटे ऊबा तका सपायाँ का अदिकारीऊँ क्यो, “कई ओ कानून में हे के, थाँ एक रोमी मनक के बना दोसऊँ चामट्याँ मेलो?”</verse>
				<verse number="26">सपायाँ को अदिकारी ओ हुणन सेनापती का नके जान क्यो, “थाँ ओ कई कररिया हो? ओ तो रोमी मनक हे।”</verse>
				<verse number="27">तद्याँ सेनापती पोलुस नके आन क्यो, “मने बता, कई थूँ रोमी मनक हे।” पोलुस क्यो “हाँ।”</verse>
				<verse number="28">सेनापती क्यो, “रोमी वेबा का वाते मने घणा रिप्या देणा पड़्या।” पण पोलुस क्यो, “मूँ तो जनमऊँ रोमी हूँ।”</verse>
				<verse number="29">तद्याँ जीं लोग वींने पूँछरिया हा वीं तरत वींका नकूँ पराग्या, अन सेनापती भी ओ जाणन दरपग्यो के, में एक रोमी मनक ने बन्दी बणायो हे।</verse>
				<verse number="30">दूजे दन सेनापती पूरो पतो लगाणो छायो के, यहूदी मनक वींपे काँ दोस लगावे हे, ईं वाते वींने खोल दिदो, अन हंगळा मोटा याजकाँ अन हाराई मोटी सबा का लोगाँ ने भेळा वेबा वाते हुकम दिदो अन पोलुस ने वटे लेजान हंगळा का हामे ऊबो कर दिदो।</verse>
			</chapter>
			<chapter number="23">
				<verse number="1">पोलुस मोटी सबा में ताकते तके देक्यो अन क्यो, “हो मारा भायाँ, जो जीवन में आज तईं परमेसर का हामे जिव्यो हे, वींका वाते मारो मन एकदम साप हे।”</verse>
				<verse number="2">ईं बात पे हनन्या नाम के मोटे याजक पोलुस नके ऊबा मनकाँ ने पोलुस के मुण्डा पे रेपट मेलबा की आग्या दिदी।</verse>
				<verse number="3">तद्याँ पोलुस वींऊँ क्यो, “परमेसर थने मारी, हे चुनाऊँ ढोळी तकी भींत। थूँ वेवस्ता के जस्यान मारो न्याव करबा ने बेटो हे, पण मने मारबा की आग्या देन वेवस्ता ने तोड़रियो हे?”</verse>
				<verse number="4">वटे ऊबा तका मनकाँ पोलुसऊँ क्यो, “कई थूँ परमेसर का मोटा याजक ने भलो-बुरो केरियो हे?”</verse>
				<verse number="5">पोलुस क्यो, “हो भायाँ, मूँ ने जाणूँ के ओ मोटो याजक हे, काँके सास्तर में लिक्यो हे के, ‘आपणाँ लोगाँ का हाकम ने वल ने केणो छावे।’”</verse>
				<verse number="6">तद्याँ पोलुस ओ हमजो के एक समू सदुकियाँ को अन दूजो फरीसियाँ को हे, तो सबा में जोरऊँ क्यो, “हो भायाँ, मूँ फरीसी हूँ अन फरीसी की ओलाद हूँ। मरिया केड़े पाछो जीवतो वेबा की बात पे मूँ विस्वास करूँ हूँ ईं वाते मारा पे मुकदमो चलायो जारियो हे।”</verse>
				<verse number="7">जद्याँ वणी आ बात किदी, तो फरीसियाँ अन सदुकियाँ में लड़ई वेगी, अन सबा में फुट पड़गी।</verse>
				<verse number="8">काँके सदुकी तो केता हा के, ने तो कुई मरबा केड़े पाछो जीवतो वेवे अन ने हरग-दुत हे अन ने कुई आत्मा हे पण फरीसी अणा हंगळा पे विस्वास करता हा।</verse>
				<verse number="9">तद्याँ सबा में लड़ई वेगी, अन कुई मूसा का नेमा ने हिकाबावाळा जो फरीसी हा, ऊबा वेग्या अन ओ केन लड़ई करबा लागा के, “माँ ईं मनक में कई दोस ने पावाँ, अन तद्याँ कुई आत्मा कन हरग-दुत अणीऊँ बात किदी, तो पछे ओ सई हे।”</verse>
				<verse number="10">जद्याँ सबा में घणी माता-फोड़ी वेगी तो सेनापती दरपग्यो के, कटे पोलुस का गट्टा-गट्टा ने कर नाके। वणी सपायाँ ने हुकम दिदो के, “रेटे समू में जान पोलुस ने सबा मूँ छावणी में ले जावो।”</verse>
				<verse number="11">वीं रात में परबू पोलुस के नके ऊबा रेन क्यो, “हे पोलुस, हिम्मत राक, काँके जस्यान थें यरूसलेम में मारी गवई दिदी, वस्यानीस थने रोम में भी गवई देणी हे।”</verse>
				<verse number="12">जद्याँ दन व्यो, तो थोड़ाक यहूदी भेळा वेन अटकळ लगई। वणा होगन खादा के जद्याँ तईं पोलुस ने मार ने नाका तद्याँ तईं ने खावा अन ने पिवाँ।</verse>
				<verse number="13">जणा या अटकळ लगई ही, वीं चाळी जणाऊँ हेला हा।</verse>
				<verse number="14">वणा मोटा याजकाँ अन बड़ाबा नके जान क्यो, “माँ ईं होगन खा लिदा हे के, जद्याँ तईं पोलुस ने मार ने नाका, तद्याँ तईं कई भी चीज ने ने चाकाँ।</verse>
				<verse number="15">ईं वाते अबे थाँ अन मोटी सबा का लोग सेनापती ने हमजावो के, पोलुस ने थाँका नके ईं बायनेऊँ लावे के, थाँ वींका बारा में सई तरियऊँ पतो करणो छारिया हो अन वींके आबा के पेल्याँई माँ वींने मारबा के वाते त्यार रेवा।”</verse>
				<verse number="16">पोलुस के भाणेज ओ हुण्यो के, वीं पोलुस ने मारबा का होगन खादा हे तो वो छावणी में जान पोलुस ने के दिदो।</verse>
				<verse number="17">तद्याँ पोलुस अदिकारियाँ मूँ एक जणा ने आपणाँ नके बलान क्यो, “ईं मोट्यार ने सेनापती नके ले जावो, ओ वाँने कई केणो छारियो हे।”</verse>
				<verse number="18">ईं वाते अदिकारी सेनापती का नके वीं मोट्यार ने लेजान क्यो, “जेल में बन्द पोलुस माराऊँ क्यो के, ईं मोट्यार ने सेनापती नके ले जावो, ओ वाँने कई केणो छारियो हे।”</verse>
				<verse number="19">सेनापती वीं मोट्यार को हात पकड़्यो अन छेटी लेजान पूँछ्यो, “बोल, थूँ मने कई केणो छारियो हे?”</verse>
				<verse number="20">वणी क्यो, “यहूदियाँ अटकळ लगई हे, थाकाँऊँ हाता-जोड़ी करन काले पोलुस को सई तरियऊँ पतो करबा का बायने, पोलुस ने मोटी सबा में लाई,</verse>
				<verse number="21">पण थाँ वाँको केणो मानज्यो मती, काँके वाँका मूँ चाळीऊँ हेला जणा पोलुस ने मारबा वाते वाट नाळरिया हे। वणा होगन खादा हे के, जद्याँ तईं पोलुस ने मार ने नाके तद्याँ तईं ने कई खावा अन ने पिवाँ, अबाणू वीं त्यार वेग्या हे अन थाँके फेसला की वाट नाळरिया हे।”</verse>
				<verse number="22">तद्याँ सेनापती वीं मोट्यार ने आ आग्या देन खन्दायो के, “जो कई थें मने क्यो, ओ किंने भी केज्ये मती।”</verse>
				<verse number="23">तद्याँ सेनापती अदिकारियाँ मूँ दो ने बलान क्यो, “दोस्ये सपई, हित्तर घुड़ सवारीवाळा, अन दोस्ये भाला चलाबावाळा सपायाँ ने आज रात नो बज्याँ केसरिया देस जाबा के वाते त्यार राको।</verse>
				<verse number="24">अन पोलुस के वाते घोड़ा की सवारी त्यार राको, के पोलुस ने राजपाल फेलिक्स नके राजी-खुसी पोंछा देवे”</verse>
				<verse number="25">अन वीं सेनापती ईं तरियऊँ सन्देसो खन्दायो,</verse>
				<verse number="26">“मोटाऊँ मोटा राजपाल फेलिक्स ने कलोदियुस लुमियास को नमस्कार।</verse>
				<verse number="27">अणी मनक ने यहूदियाँ पकड़न मारणो छाया, पण जदी में जाण्यो के ओ रोमी हे, तो में वटे सपायाँ का लारे जान ईंने वाकाँऊँ छुड़ा लिदो।</verse>
				<verse number="28">मूँ जाणणो छारियो हो के, वीं ईंपे कई दोस लगारिया, ईं वाते मूँ ईंने वाँकी सबा में लेग्यो।</verse>
				<verse number="29">तद्याँ में जाण्यो के, वीं आपणी वेवस्ता का विरोद में ईंपे दोस लगारिया हे, पण ईंने मारबा अन बन्दी बणाबा के जस्यो कई दोस कोयने हे।</verse>
				<verse number="30">जद्याँ मने नंगे पड़ी के, वणा यहूदियाँ पोलुस ने मारबा की अटकळ लगई हे, तो में तरत ईंने थाँरा नके खन्दा दिदो, अन दोस लगाबावाळा ने आग्या दिदी के, वीं थाँरा हामे ईंकी बात करे।”</verse>
				<verse number="31">जस्यान वणी सपायाँ ने आग्या दिदी ही, वस्यानीस वीं रातूँ-रात आन्तिपत्रिस नगर तईं लेग्या।</verse>
				<verse number="32">दूजे दन घुड़ सवारीवाळा सपायाँ ने वींका हाते आगे जाबा वाते छोड़, बाकी सपई आपणी छावणी में आग्या।</verse>
				<verse number="33">वाँकाणी केसरिया देस जान राजपाल ने कागद देन पोलुस ने हूँप दिदो।</verse>
				<verse number="34">राजपाल कागद भणन क्यो, “ओ कणी इलाका को हे?” अन जद्याँ वो जाणग्यो के ओ किलिकिया को हे,</verse>
				<verse number="35">तो वणी क्यो, “जद्याँ थाँरा पे दोस लगाबावाळा आई तद्याँ थारी बात कराँ।” अन वणी पोलुस ने हेरोदेस का मेल में राकबा को हुकम दिदो अन पेरादार ऊबा कर किदा।</verse>
			</chapter>
			<chapter number="24">
				<verse number="1">पाँच दन केड़े मोटा याजक हनन्या अन थोड़ाक मोतबीर अन तिरतुलुस नाम का वकील ने हाते लेन आयो ताँके राजपाल का हामे वो पोलुस का मुकदमा ने पेस कर सके।</verse>
				<verse number="2">जद्याँ पोलुस ने बलायो तो तिरतुलुस पोलुस पे दोस लगान राजपालऊँ केबा लागो के, “थाँराऊँ माँ घणा सान्तीऊँ रेरिया हा अन माँकी भलई का वाते थाँ ईं देस में घणा हुदार किदा हे।</verse>
				<verse number="3">मोटाऊँ मोटा राजपाल फेलिक्स ने माँ हंगळी जगाँ अन हंगळी तरियऊँ धन्नेवाद के हाते मानाँ हा।</verse>
				<verse number="4">पण ईं बात को थने दुक ने देणो छारियो हूँ, पण थाँराऊँ हात-जोड़न अरज हे के थूँ करपा करन मारी थोड़ीक बाताँ हुणले।</verse>
				<verse number="5">ईं मनक ने माँ आपत में नाकबावाळो अन हारी दनियाँ का यहूदियाँ में उतम-धड़ा करबावाळो पायो हे। ओ नासरिया का पन्त को मुक्यो हे।</verse>
				<verse number="6">अणी मन्दर ने भी अबड़ाणो छायो, पण माँ ईंने पकड़ लिदो। (माँ ईंने आपणी वेवस्ता का हस्याबूँ दण्ड देता,</verse>
				<verse number="7">पण वटा का सेनापती लुसियास अणी ने माकाँ पूँ जोरावरीऊँ कोस लिदो।</verse>
				<verse number="8">अन सपायाँ ने ईंने थाँरा अटे लाबा को हुकम दिदो।) अणी हंगळी बाताँऊँ, माँ ईंपे दोस लगायो हे, अबे थाँ ईं हारी बात की जाँच खुद कर सको हो।”</verse>
				<verse number="9">यहूदियाँ मनकाँ भी वणी वकील का हाते रेन क्यो, ईं बाताँ अस्यानीस हे।</verse>
				<verse number="10">जद्याँ राजपाल पोलुस ने बोलबा के वाते हानी किदी, तो पोलुस क्यो, “मूँ ओ जाणूँ के थाँ नरई वराऊँ अणी देस को न्याव कररिया हो, मूँ राजी वेन मारो जवाब देरियो हूँ।</verse>
				<verse number="11">थूँ खुद जाण सके हे के, मने यरूसलेम में परातना करबा ने ग्याने बारा दनईस व्या हे।</verse>
				<verse number="12">वटे मन्दर में मने ने तो किंकई हण्डे माता-फोड़ी करता देक्यो अन नेई यहूदियाँ का परातना घर में कन हाराई नगर में लोगाँ ने उकसाता तका देक्यो।</verse>
				<verse number="13">अन ने तो ईं मनक जो दोस लगारिया हे वींने साबत कर सके हे।</verse>
				<verse number="14">पण मूँ थाँरा हामे ओ मानूँ हूँ के, जिंने ईं पन्त केवे हे अन खोटो केवे हे, वींका रिति-रिवाजऊँ मूँ आपणाँ बापदादा का परमेसर की सेवा-चाकरी करूँ हूँ, अन जीं बाताँ वेवस्ता अन परमेसर का आड़ीऊँ बोलबावाळा की किताबाँ में लिकी हे, वीं हारी पे मूँ विस्वास करूँ हूँ।</verse>
				<verse number="15">अन परमेसरऊँ अस्यान आस राकूँ हूँ जस्यान ईं लोग राके हे के, धरमी अन पापी दुयाँ को पाछो जी उटणो वेई।</verse>
				<verse number="16">ईं वाते मूँ भी परमेसर अन लोगाँ के हामे हमेस्यान आपणी अंतर आत्माने पुवितर राकबा के वाते कोसीस करतो रेऊँ हूँ।</verse>
				<verse number="17">“नरई वरा केड़े मूँ आपणाँ लोगाँ ने दान देबा वाते अन भेंट चड़ावा वाते यरूसलेम में ग्यो हो।</verse>
				<verse number="18">जद्याँ मूँ यो करीस रियो हो अणा मने मन्दर में पायो, तद्याँ मूँ नेमा का हस्याबूऊँ पुवितर हो अन वटे कुई भीड़ ने ही अन ने कुई हुल्‍लड़ हो।</verse>
				<verse number="19">आसियाऊँ आया तका थोड़ाक यहूदी वटे हा, यद्याँ मारा विरोद में वाँका नके कई बात वे तो वणा ने थाँरा हामे मारा पे दोस लगाणो छावे</verse>
				<verse number="20">कन ईं लोगइस बतावे के जद्याँ मूँ राजिपो कराबावाळी सबा के हामे ऊबो हो, तो वाँकाणी मारा पे कई दोस पायो।</verse>
				<verse number="21">अणी एक बात ने छोड़न ज्या में वाँका बचमें ऊबो वेन की ही, ‘मरिया तका मूँ पाछो जी उठवा का बारा में मारा पे वीं दनऊँ मुकदमो चालरियो हे।’”</verse>
				<verse number="22">फेलिक्स राजपाल, जो अणी परमेसर का गेला का बारा में हव तरियाऊँ जाणतो हो, वणी ओ केन बात रोक दिदी के, “जद्याँ सेनापती लुसियास आई, तद्याँ थारी बात को न्याव करूँ।”</verse>
				<verse number="23">अन अदिकारी ने हुकम दिदो के पोलुस ने लेजान थोड़ीक आजादी का हाते रुकाळी करो अन ईंका हण्डाळ्याँ मूँ कुई भी ईंकी मदत करे तो रोकज्यो मती।</verse>
				<verse number="24">थोड़ाक दनाँ केड़े फेलिक्स आपणी लुगई दुरसिला ज्या यहूदी ही वींने हाते लेन आयो अन पोलुस को ईसू मसी पे विस्वास का बारा में वींऊँ हुण्यो,</verse>
				<verse number="25">जद्याँ वो परमेसर का हामे सई ठेराबावाळी, सबर अन आगे लोगाँ पे आबावाळा न्याव का बारा में केरियो हो, तो फेलिक्स दरपतो तको जवाब दिदो, “अबाणू तो थूँ जा, मोको मली तो मूँ थने पाछो बलाऊँ।”</verse>
				<verse number="26">वींने पोलुसऊँ थोड़ाक रिप्या-कोड़ी मलवा की आस ही, ईं वाते वो ओरू भी पोलुस ने बला बलान बाताँ करतो हो,</verse>
				<verse number="27">पण जद्याँ दो वर वेग्या तो फेलिक्स की जगाँ परख्युस फेसतुस आयो, अन फेलिक्स यहूदियाँ ने राजी करबा के वाते पोलुस ने जेळ मेंईस छोड़ दिदो।</verse>
			</chapter>
			<chapter number="25">
				<verse number="1">फेसतुस वीं देस में आयो अन तीन दन केड़े केसरियाऊँ यरूसलेम ग्यो,</verse>
				<verse number="2">तद्याँ मोटा याजकाँ अन यहूदियाँ का मुक्य लोगाँ वींका हामे पोलुस पे लगाया ग्या दोस बताया अन वींऊँ हाता-जोड़ी करन</verse>
				<verse number="3">अरज किदी के पोलुस ने वो यरूसलेम लावे, काँके वीं वींने गेला मेंईस मारबा की अटकळ लगा मेली ही,</verse>
				<verse number="4">फेसतुस जवाब दिदो, “पोलुस केसरिया में रुकवाळी में हे, अन मूँ खुद भी वटे जट परो जाऊँ।”</verse>
				<verse number="5">पछे क्यो, “थाँकामूँ थोड़ाक नेता मारा हण्डे चाले, अन यद्याँ पोलुस कई गुनो किदो वे, तो वीं वींपे दोस लगावे।”</verse>
				<verse number="6">वटे वो नो दस दन रेन केसरिया परोग्यो, अन दूजे दन राजिपो करबावाळी गादी पे बेटन पोलुस ने वटे लाबा को हुकम दिदो।</verse>
				<verse number="7">जद्याँ पोलुस वटे आयो तो जो यहूदी यरूसलेमऊँ आया हा, वीं वींका च्यारूँमेर ऊबा वेन जोर का घणा दोस लगाबा लागा, पण वाँने साबत ने कर सक्या।</verse>
				<verse number="8">पण पोलुस जवाब दिदो, “ने तो में यहूदियाँ की वेवस्ता का विरोद में, ने मन्दर अन नेई रोम का माराजा का हामे कई गुनो किदो हे।”</verse>
				<verse number="9">तद्याँ फेसतुस यहूदियाँ ने राजी करबा की वाते पोलुसऊँ क्यो, “कई थूँ छावे हे के, आपीं यरूसलेम चाला ताँके वटे थाँरा पे लगाया ग्या दोस को न्याव कराँ।”</verse>
				<verse number="10">पोलुस क्यो, “मूँ अबाणू रोम का राजा केसर के राजिपो करबावाळी गादी का हामे ऊबो हूँ, जटेइस मारो न्याव वेणो छावे। ईं बात ने थूँ हव तरियाऊँ जाणे हे के में यहूदियाँऊँ कई खोटो ने किदो हे।</verse>
				<verse number="11">यद्याँ में कई गुनो किदो वे अन मारबा के जस्यान काम किदो वे, तो मूँ मरवऊँ आगो-पाछो ने वेऊँ। पण जीं बाताँ को ईं मारा पे दोस लगावे हे, यद्याँ वणा मूँ कई भी बात हाँची ने वेवे तो कुई भी मने वाँका हाताँ में ने हूँप सके। मूँ केसरऊँ हाता-जोड़ी करणो छारियो हूँ।”</verse>
				<verse number="12">तद्याँ फेसतुस मोटा मुक्याऊँ बाताँ करन जवाब दिदो, “थें केसरऊँ हाता-जोड़ी किदी हे, ईं वाते थूँ केसर नकेईस लेजायो जाई।”</verse>
				<verse number="13">थोड़ाक दन व्या केड़े अग्रिपा अन बिरनीके फेसतुसऊँ मलबा ने केसरिया आया</verse>
				<verse number="14">वणा ने वटे नरई दन व्या केड़े फेसतुस पोलुस का मुकदमा का बारा में वाँने बतायो, “अटे एक मनक हे, जिंने फेलिक्स केदी का रूप में छोड़न ग्यो हो,</verse>
				<verse number="15">जद्याँ मूँ यरूसलेम में हो, तो मोटा याजकाँ अन यहूदियाँ का बुड़ा-ठाड़ा पोलुस पे दोस लगान ओ छायो के वींने दण्ड देवे।</verse>
				<verse number="16">में वाँकाऊँ क्यो, ‘रोमियाँ में अस्या रिति-रिवाज कोयने हे के, दोस लगाया तका मनक ने वाद-विवाद करन वींने बंचबा को मोको दिदा बनाई वींने दण्ड का वाते हूँप्यो जावे।’</verse>
				<verse number="17">ईं वाते जद्याँ वीं अटे भेळा व्या, तो में मोड़ो ने किदो, पण दूजे दनईस न्याव की गादी पे बेटन वीं मनक ने अटे लाबा को हुकम दिदो</verse>
				<verse number="18">जद्याँ वींपे दोस लगाबावाळा ऊबा व्या, तो वणा अस्यी खराब बाताँ को दोस ने लगायो, जस्यी मूँ हमजतो हो।</verse>
				<verse number="19">पण वीं आपणाँ धरम की एक-दो बाताँ लेन अन ईसू नाम का कणी मनक का बारा वींऊँ माता-फोड़ी करता हा, जो मरग्यो हो पण पोलुस वींने जीवतो बतावे हे।</verse>
				<verse number="20">मूँ होचरियो हो, के अणा बाताँ को पतो कस्यान लगऊँ, ईं वाते में वणी मनकऊँ पूँछ्यो, ‘कई थूँ थाँरा पे लागा तका दोस को राजिपो कराबा वाते यरूसलेम जाबा ने त्यार हे?’</verse>
				<verse number="21">पण जद्याँ पोलुस अरज किदी के मारा मुकदमा को फेसलो रोमी राजा का दरबार मेंईस वेवे, ईं वाते में हुकम दिदो के जद्याँ तईं वींने राजा का नके ने खन्दाऊँ तद्याँ तईं वींने जाप्ता में राक्यो जावे।”</verse>
				<verse number="22">तद्याँ अग्रिपा फेसतुसऊँ क्यो, “मूँ भी वीं मनक की बाताँ ने हूणणो छारियो हूँ”, वणी क्यो, “थूँ काले वींकी हूणी।”</verse>
				<verse number="23">दूजे दन जद्याँ अग्रिपा अन बिरनीके, सरदारा अन नगर का खास मनकाँ का हाते गाजा-बाजा का हाते दरबार में आया, तद्याँ फेसतुस पोलुस ने अटे लाबा को हुकम दिदो।</verse>
				<verse number="24">फेसतुस क्यो, “हो राजा अग्रिपा अन हो हंगळा लोगाँ जो अटे माँके हाते हो, थाँ ईं मनक ने देकरिया हो, जिंका बारा में यरूसलेम का अन अटे का हंगळा यहूदियाँ वींका ऊपरे दोस लगायो अन हाका-भार करन क्यो के ‘अबे ईंको जीवतो रेणो हव कोयने।’</verse>
				<verse number="25">पण में जाण लिदो के वणी अस्यो कई ने किदो के, वींने मारबा को हुकम देवाँ। वणी खुदईस रोमी राजा का दरबारऊँ अरज करबा वाते क्यो हो तो में वींने अटूँ खन्दाबा वाते ते किदो।</verse>
				<verse number="26">मने वींका बारा में अस्यी कई बात ने मली के जिंने लिकीन आपणाँ दरबार रोमी राजा केसर नके खन्दऊँ। ईं वाते में वींने थाँका हामे, खासतोरऊँ थाँका हामे राजा अग्रिपा, वींने मूँ लायो हूँ के, वणीऊँ जाँच-पूँछ करे, ईंऊँ मने कई लिकवा ने मले।</verse>
				<verse number="27">काँके कणी भी केदी ने बना पाका दोसपतर त्यार करन दरबार का हामे पेस करणो हव ने हे।”</verse>
			</chapter>
			<chapter number="26">
				<verse number="1">अग्रिपा पोलुसऊँ क्यो, “थने आपणाँ खुद का बारा में बोलवा को अदिकार हे।” तद्याँ पोलुस हातऊँ हानी करन जवाब देबा लागो,</verse>
				<verse number="2">“हो राजा अग्रिपा, जतरी बाताँ को यहूदी मारा पे दोस लगायो हे, आज थाँरे हामे जवाब देणो मूँ खुद ने धन्न हमजूँ हूँ,</verse>
				<verse number="3">खासतोरऊँ ईं वाते के थूँ यहूदियाँ का हंगळा रिति-रिवाज अन विवाद ने जाणे हे, ईं वाते मूँ हाता-जोड़ी करूँ हूँ के, थूँ मारी बाताँ ने चेतो लगान हूणज्ये।”</verse>
				<verse number="4">हाराई यहूदी जाणे हे के, सरुआतऊँ मूँ खुद आपणाँ देस में अन यरूसलेम में भी नानपणऊँ मूँ कस्यान जीवन जियो हो।</verse>
				<verse number="5">वीं मने नरई पेल्याऊँ जाणे हे, यद्याँ वीं गवई देणा छावे, तो वे आ गवई दे सके के, मूँ सरुआतऊँ एक फरीसी वेन आपणाँ धरम का हंगळाऊँ खरा पन्त के जस्यान जीवन जियो हो।</verse>
				<verse number="6">जो वादो परमेसर आपणाँ बड़ाबाऊँ किदो हो वणीस वादा की मूँ आस करूँ हूँ, ईं वाते अबे मूँ दोसी के जस्यान थाँका हामे ऊबो हूँ।</verse>
				<verse number="7">यो वोईस हे, जिंने आपणी बाराई गोताँ रात-दन पूरा भगती-भावऊँ परमेसर की सेवा-चाकरी करता तका पाणो छाता हा। हे राजा, अणीस भरोसा के वाते यहूदी मारा पे दोस लगारिया हे।</verse>
				<verse number="8">जद्याँ के परमेसर मरयाँ तका मूँ पाच्छा जीवता करे हे, तो थाँका अटे अणी बात पे विस्वास काँ ने करे हे?</verse>
				<verse number="9">“मूँ भी होचतो हो, ईसू नासरी का नाम का विरोद में नरोई करूँ।</verse>
				<verse number="10">अस्यान यरूसलेम में भी किदो हे, अन मोटा याजकाँऊँ अदिकार पान नरई ईसू ने मानबावाळा लोगाँ ने जेळ में नाक्या, अन जद्याँ वाँने मारता हा, तद्याँ भी मूँ वाँका विरोद में भेळो हो।</verse>
				<verse number="11">हारई यहूदियाँ का परातना घर में मूँ वाँने दण्ड दिया करतो अन परमेसर की नन्दयाँ करबा वाते वाँपे जोर नाकतो। वाँका पे मारो गुस्सो अतरो हो के, वाँने हताबा का वाते नरी जगाँ अन बारवास का गामाँ में जातो।</verse>
				<verse number="12">“अणी काम में मूँ जद्याँ मोटा याजकाँऊँ आग्या-पतर लेन दमिसक जारियो हो,</verse>
				<verse number="13">तद्याँ वणीस दाण दपराँ की टेम में जद्याँ माँ गेला में हाँ, तो हे राजा, हरगऊँ एक अस्यो उजितो उरतियो जिंको उजितो हूँरजऊँ भी हेलो हो, वो मारा अन मारा हण्डाळ्याँ के च्यारूँमेर वेग्यो।</verse>
				<verse number="14">अन माँ हंगळा रेटे जाई पड़्या, तो में इबरानी भासा में, ओ अवाज हूणी ज्या माराऊँ केरी ही, ‘हे साउल, हे साउल, थूँ मने काँ हतारियो हे? धारदार चिजाँ पे लात मारन थूँ खुद ने नकसाण पोछारियो हे।’</verse>
				<verse number="15">पछे में पूँछ्यो, ‘हो परबू, थाँ कूण हो?’ परबू क्यो, ‘मूँ ईसू हूँ, जिंने थूँ हतारियो हे।</verse>
				<verse number="16">पण थूँ अबे आपणाँ पगाँ पे ऊबो वे, मूँ थाँरा हामे ईं वाते परगट व्यो के, थने सेवक का रूप में थरपूँ अन अणा हंगळी बाताँ को गवा वणाऊँ, जो थें देकी हे अन आगे जो भी बताऊँ वींका वाते भी।</verse>
				<verse number="17">अन मूँ थने थाँरा लोगाऊँ अन जो यहूदी ने हे वाँकाऊँ बंचाऊँ, जणा का नके मूँ थने खन्दाऊँ के,</verse>
				<verse number="18">थूँ वाँकी आक्याँ ने खोले अन वीं अंदाराऊँ उजिता का आड़ी, अन सेतान की सगतिऊँ परमेसर का आड़ी फरे ताँके वाँने पापाऊँ मापी मले अन परमेसर का चुण्या तका लोगाँ के हाते वीं भी बापोती में भेळा वेवे।’</verse>
				<verse number="19">“हो राजा अग्रिपा, में वणी हरग का दरसावो की बात ने, ने टाळी,</verse>
				<verse number="20">पण पेल्याँ दमिसक का, पछे यरूसलेम का अन यहूदियाँ का हंगळा देसा में रेबावाळा अन जो यहूदी ने हा, वाँने हमजातो रियो, के आपणाँ मन ने फेरो अन परमेसर का आड़ी आवो अन मन फरावा जोगो काम करो।</verse>
				<verse number="21">अणा बाताँ के वाते यहूदी मने मन्दर में पकड़ लिदो अन मारबा की कोसीस करबा लागा।</verse>
				<verse number="22">पण परमेसर की मदतऊँ मूँ आज तईं रियो हो अन फोरा-मोटा हंगळा का हामे गवई देरियो हूँ, अन वणा बाताँ के छोड़न दूजी बाताँ ने केऊँ, जो परमेसर का आड़ीऊँ बोलबावाळा अन मूसे की हे जीं पुरी वेबावाळी हे,</verse>
				<verse number="23">के मसी ने दुक जेळणो पड़ी अन वोईस हंगळाऊँ पेल्याँ मरयाँ तका मूँ जीवतो वेन, आपणाँ लोगाँ में अन जो यहूदी ने हा वाँका में बंचाबा के हव हमच्यार को परच्यार किदो।”</verse>
				<verse number="24">जद्याँ पोलुस अणी तरियाऊँ जवाब दिदो, तो फेसतुस जोरऊँ हाको करन क्यो, “हे पोलुस, थूँ बेण्डो हे, हेलो ग्यान थने बेण्डो कर दिदो हे।”</verse>
				<verse number="25">पण पोलुस क्यो, “हो माटोऊँ मोटा फेसतुस, मूँ बेण्डो ने हूँ, पण हाँची अन हमज की बाताँ करूँ हूँ।</verse>
				<verse number="26">राजा अग्रिपा के हामे भी मूँ बना दरप्या बोलरियो हूँ, काँके वो अणा बाताँ ने जाणे हे अन मने विस्वास हे के, अणा बाताँ में कई हप्यो तको ने हे, काँके ईं बाताँ कस्या खुणा में ने वीं हे।</verse>
				<verse number="27">हो राजा अग्रिपा, कई थूँ परमेसर का आड़ीऊँ बोलबावाळा की बाताँ पे विस्वास करे हे? हाँ मूँ जाणूँ हूँ के, थूँ विस्वास करे हे।”</verse>
				<verse number="28">तद्याँ अग्रिपा पोलुसऊँ क्यो, “थूँ थोड़ीक टेम में मने मसी बणाबो छारियो हे?”</verse>
				<verse number="29">पोलुस क्यो, “थोड़ाक टेमऊँ कन हेला टेम में, परमेसरऊँ मारी अरज हे के, बेस थूँईस ने पण जतरा लोग आज मारी हुणरिया हे, वीं हंगळा वस्यान वे जावे जस्यान मूँ हूँ, बेस हाँकळा ने छोड़न।”</verse>
				<verse number="30">तद्याँ राजा, राजपाल, बिरनीके अन वाँके हाते जतरा बेटा हा वीं ऊबा वेग्या।</verse>
				<verse number="31">अन बारणे जान एक-दूजाऊँ केबा लागा, “अणी मनक अस्यो तो कई ने किदो के ईंने मारबा को दण्ड देवा कन जेळ में बन्द कर देवा”</verse>
				<verse number="32">अग्रिपा फेस्तुसऊँ क्यो “यद्याँ ओ मनक केसरऊँ अरज ने करतो तो ईंने छोड़ देता हा।”</verse>
			</chapter>
			<chapter number="27">
				<verse number="1">जद्याँ आ बात ते वेगी के आपीं जाँजऊँ इटली जावाँ, तो वाँकाणी पोलुस अन वींका हातेवाळा ने युलियुस नाम का हो सपायाँ का सेनापती ने हूँप दिदा, वीं फोज ने “राजा की फोज” केता हा।</verse>
				<verse number="2">अदमुतियुम को एक जाँज जो आसिया का बन्दरगा में वेन जाबावाळो हो, माँ वींपे चड़न चाल पड़्या अन थिसलुनीके को मकिदुनीवाळो अरिस्तखुस नाम को मनक माकाँ हाते हो।</verse>
				<verse number="3">दूजे दन माँकाणी सेदा का बन्दरगा का नके जाँज रोकी, युलियुस पोलुस पे दया किदी के, वो हण्डाळ्याऊँ मलबा जावे ताँके वीं जरुरत की चिजाँ आने देवे।</verse>
				<verse number="4">वटूँऊँ जाँज के हामे वइरो वेबाऊँ माँ साइपरस की आड़ में वेन चाल्या।</verse>
				<verse number="5">अन पछे किलिकिया अन पफुलिया का नके समन्द में वेन लूसिया का मूरा में पूग्या।</verse>
				<verse number="6">वटूँऊँ सेनापती ने एक सिकन्दरिया को जाँज इटली जातो तको मल्यो, अन वणी माँने वींमें बेटा दिदा।</verse>
				<verse number="7">जद्याँ माँ नरई दन तईं धीरे-धीरे चालता अन अबकीऊँ कनिदुस का नके ग्या काँके वइरा का हामे माँ टक ने सक्या ईं वाते माँ सलमोने का हामे वेन क्रेता टापू की आड़ में चाल्या।</verse>
				<verse number="8">अन अबकीऊँ वींका कनारे-कनारे चालता तका सुरकसित बन्दरगा नाम की जगाँ पोंच्या, जो लसया नगरऊँ छेटी ने हो।</verse>
				<verse number="9">नरई दन वेग्या हा अन वर का अणा दनाँ में जद्याँ वरत के तेंवार का दन पूरा वेग्या हा, पाणी की जातरा अबकी वेती ही, ईं वाते पोलुस वाँने ओ केन सला किदी के,</verse>
				<verse number="10">“हो भला मनक, मने अस्यान लागरियो हे के, अणी जातरा में घणो नकसाण वेई, बेस जाँज अन माल कोईस ने पण आपणाँ जीव को भी नकसाण वेई।”</verse>
				<verse number="11">पण सेनापती पोलुस की बाताँ ने, ने मानन जाँज का मालिक अन जाँज ने चलाबावाळा की बात मानी।</verse>
				<verse number="12">वणी बन्दरगा में हियाळा का दन काटणा हव कोयने हा, ईं वाते घणा लोगाँ तो ते किदो के, वे सके तो वटूँ कस्यान भी फिनिक्स जान हियाळा का दनाँ ने काटाँ। ओ तो क्रेता को एक बन्दरगा हो जो लंकव-आतमणो अन धरव-आतमणो का आड़ी खलतो हो।</verse>
				<verse number="13">जद्याँ थोड़ो-थोड़ो लंकव का आड़ीऊँ वइरो बाजबा लागो, तो वाँकाणी होच्यो के जस्यान वणा मन में धारियो हो वस्यानीस वे जाई, ईं वाते लंगर काड़ दिदो अन क्रेता का कनारे-कनारे जाबा लागा।</verse>
				<verse number="14">पण थोड़ीक देर केड़े वाँका आड़ी एक जोरऊँ डूँज अई, जो धरव-उगमणी डूँज केवाती ही।</verse>
				<verse number="15">जद्याँ डूँज जाँज पे आगी तो जाँज डूँज का हामे ठम ने सक्यो तो माँ जाँज ने वइरा का जस्यान चालबा वाते छोड़ दिदो।</verse>
				<verse number="16">जद्याँ जाँज रोदा नाम का एक फोराक टापू के आड़ में आयो तद्याँ माँ बंचबावाळी फोरी नाव ने घणी अबकीऊँ बंचान ठाणे किदी।</verse>
				<verse number="17">पछे वीं बंचबावाळी नावा ने उठान जाँज में मेल दिदी अन जाँज ने टूटवाऊँ बंचबा वाते जाड़ा हींदराऊँ च्यारूँमेरऊँ बांद दिदो अन कटेई सुरतिस का हेवा पाणी में ने फसन टूट ने जावे, ईं दरपऊँ पाल उतारन जाँज ने वेवा दिदो।</verse>
				<verse number="18">जद्याँ डूँजऊँ माँ धक्का खादा तो दूजे दन वे माल ने फेंकबा लागा।</verse>
				<verse number="19">अन तीजे दन वाँकाणी आपणाँ हाताऊँ जाँज की थोड़ीक चिजाँ ने फेंक दिदी।</verse>
				<verse number="20">नरई दन तईं, ने सुरज, ने तारा दिक्या अन जोरऊँ डूँज चालरी ही, तो पछे माँके बंचबा की आस जाती री।</verse>
				<verse number="21">जद्याँ वीं नरई दन तईं भूका रिया तो पोलुस वाँका बचमें ऊबो वेन क्यो, “हो लोगाँ, जद्याँ थाँ क्रेताऊँ ने निकळबा की मारी बात ने मानता, तो ने आ अबकी वेळा आती अन ने यो घाटो अन नकसाण वेतो।</verse>
				<verse number="22">पण अबे मूँ थाँने धिजो बंदान केऊँ के, हिम्मत राको, काँके थाँकामूँ कुई भी ने मरी, पण जाँज को नास वेई।</verse>
				<verse number="23">काँके जीं परमेसर को मूँ हूँ अन जिंकी भगती मूँ करूँ हूँ, वींको हरग-दुत आज राते मारा नके आन क्यो,</verse>
				<verse number="24">‘हे पोलुस, दरप मती! थने केसर का हामे ऊबो वेणो जरूरी हे। देक, परमेसर थाँरा पे भलई किदी हे, ईं वाते जो थाँरा हाते जातरा कररिया हे वे भी बंचाया जाया।’</verse>
				<verse number="25">ईं वाते राजी वे जावो, काँके मूँ परमेसर पे विस्वास करूँ हूँ के, जस्यान माराऊँ क्यो हे वस्यानीस वेई।</verse>
				<verse number="26">पण आपीं जरुर कटेई हेवा पाणी की जगाँ में एकदम फसाँगा।”</verse>
				<verse number="27">जद्याँ डूँज की चवदवी रात वी, अन माँ धक्का खाता तका अद्रिया का समन्द में पराग्या हा, जद्याँ आदीक रात का जाँजवाळा आसरो लगायो के, आपीं कणी कनारा का नके हा।</verse>
				<verse number="28">जद्याँ वटे वणा पाणी माप्यो तो बीस बाम पायो अन थोड़ाक आगे जान पाछो माप्यो तो पन्दरा बाम पायो।</verse>
				<verse number="29">तद्याँ पाणी में मोटा भाटाऊँ टकरावा की दरपऊँ माँ जाँज का पाला पाल्डे चार लंगर पाणी में नाक दिदा अन वीं दन ऊँगवा की अरज करबा लागा।</verse>
				<verse number="30">पण जाँज में काम करबावाळा जाँजऊँ भागणा छारिया हा। आगला पाल्ड़े लंगर ने फेंकबा का बायने बंचबावाळी नावा ने रेटे उतारन जाणा छारिया।</verse>
				<verse number="31">तो पोलुस सेनापती अन सपायाऊँ क्यो, “यद्याँ ईं लोग जाँज पे ने रिया तो थाँ भी ने बंच सको।”</verse>
				<verse number="32">तद्याँ सपायाँ हींदरा ने काटन फोरी नाव ने समन्द में वेवा दिदी।</verse>
				<verse number="33">अन भाग-फाट्याँ के पेल्याँ पोलुस ओ केन हंगळा ने रोट्याँ खाबा के वाते हमजाया के, “आज चवदा दन वेग्या के थाँ होच में पड़न भूका रिया, अन कई ने खादो।</verse>
				<verse number="34">ईं वाते थाँकाऊँ अरज करूँ हूँ के, कई खालो, जणीऊँ थाँ बंच सको, काँके थाँकामूँ किंको भी एक भी बाल वाको ने वेई।”</verse>
				<verse number="35">ईं बाताँ केन वणी रोटी लेन तोड़ी अन हंगळा के हामे परमेसर ने धन्नेवाद देन खावा लागो।</verse>
				<verse number="36">तद्याँ वीं हंगळा भी हिम्मत राकन रोट्याँ खाबा लागा।</verse>
				<verse number="37">माँ जो जाँज में हा, वीं दोस्ये छिय्योतर जणा हाँ।</verse>
				<verse number="38">जद्याँ वे रोट्याँ खान धापग्या, तो जाँज ने हलको करबा वाते गऊँ फेंक दिदा।</verse>
				<verse number="39">जद्याँ दन व्यो तो वाँकाणी वणी जमीन ने, ने ओळकी, पण एक रेत वाळा कनारा ने देक्यो अन वणा होच्यो के, वे सके तो जाँज उटेईस टकावाँ।</verse>
				<verse number="40">पाली रात ने जो लंगर नाक्या हाँ वाँने काट दिदा अन जीं हींदराऊँ पतवार बान्दयो हो वींने खोल दिदो अन वइरा का हामे पाल ताण दिदो अन कनारे का आड़ी चालबा लागा।</verse>
				<verse number="41">अन जाँज रेतऊँ जा टकरायो अन जाँज को आगलो हिस्सो जा फस्यो अन जाम वेग्यो अन जोरकी लेराऊँ जाँज को पालो हिस्सो टुटबा लागो।</verse>
				<verse number="42">तद्याँ सपायाँ ओ बच्यार किदो के, केदयाँ ने मार नाका, अस्यान ने वे के कुई तरन भाग जावे।</verse>
				<verse number="43">पण सेनापती पोलुस ने बंचाबा की मरजीऊँ वाँने रोक्या अन क्यो के, जो तर सके वीं, पेली कूदन कनारा पे परा जावो।</verse>
				<verse number="44">अन जिंने तरता ने आवे वीं जाँज का टूटा तका पाट्याँ-पूटी ने अन चिजाँ ने पकड़न बारणे निकळ जावे, अणी तरियाऊँ हंगळा बंचग्या।</verse>
			</chapter>
			<chapter number="28">
				<verse number="1">जद्याँ माँ बंचन कनारा पे पोंच्या तो माने नंगे पड़ी के या जगाँ माल्टा टापू केवावे हे।</verse>
				<verse number="2">वटे रेबावाळा लोग माकाँ पे दया किदी, काँके बरका वरवाऊँ ठन्ड लागरी ही, ईं वाते वणा वादी लगान माँ हारा की आवभगत किदी।</verse>
				<verse number="3">जद्याँ पोलुस टिण्डका को भारो भेळो करन वादी में मेल्यो तो वींऊँ एक हाँप निकळन वींका हात के बटको भरन पळट ग्यो।</verse>
				<verse number="4">जद्याँ वटा का रेबावाळा मनक वींका हात पे हाँप पळेट्यो तको देक्यो तो एक-दूजाऊँ क्यो, “हाँची में ओ मनक हत्यारो हे, समन्द में तो ओ बंचग्यो पण न्याव ईंने जीवतो ने रेवा देई”</verse>
				<verse number="5">तद्याँ पोलुस हाँप ने वादी में जाटक दिदो अन वींके कई नकसाण ने व्यो।</verse>
				<verse number="6">पण लोग तो वाट नाळरिया हा के, वींको हात हूजी कन वो एकदम रेटे पड़ जाई अन मर जाई। पण नरई देर तईं वींके कई ने व्यो, तो वाँको बच्यार बदलग्यो के, “ओ कुई देवता हे।”</verse>
				<verse number="7">वटा की अड़े-भड़े की जगाँ वीं टापू का हाकम पबलियुस की ही। वणी माँकी मनवार करन घरे लेजान आवभगत किदी अन माँ वटे तीन दन तईं मेमान बणन रिया।</verse>
				<verse number="8">पबलियुस का बापू ने ताव आरियो हो अन दस्ताँ लागरी ही, ईं वाते वीं माचा पे हूँता हा, पोलुस वणा का नके ग्यो अन परातना किदी अन हात मेलन वींने हव किदो।</verse>
				<verse number="9">जद्याँ अस्यान व्यो तो वीं टापू का हंगळा माँदा मनक वटे आया अन वीं हाराई हव वेग्या</verse>
				<verse number="10">वाँकाणी माने घणो दान देन माँको मान किदो, जद्याँ माँ जाबा में हा तो वणा माँके जरुरत की चिजाँ ने लान जाँज में मेली।</verse>
				<verse number="11">तीन मिना केड़े माँ सिकन्दरिया का जाँज में बेटन चाल पड़या, जो जाँज हियाळो काटबा वाते ईं टापू पे रक्यो तको हो, जिंको “जोड़ला देवता” हो।</verse>
				<verse number="12">सुरकुसा नगर का बन्दरगा पे जाँज रोकन तीन दन तईं वटे रिया।</verse>
				<verse number="13">वटूँऊँ माँ गुमता तका रेगियुम नगर में आया, वटे एक दन तईं जाँज के हामे लंकव-आतमणी आड़ी वइरो चाल्यो पछे माँ दो दन में पुतियोली सेर में आया।</verse>
				<verse number="14">वटे माँने कुई विस्वासी भई मल्या, वाँका केवाऊँ माँ हात दन तईं वटे रिया, अस्यान माँ रोम में आग्या।</verse>
				<verse number="15">वटा का विस्वासी मनक मारो हमच्यार हुणन अपियुस का बजार अन तीन-हरई तईं माने मलबा आया, जिंने देकन पोलुस परमेसर को धन्नेवाद दिदो अन खुद हिम्मत बड़गी।</verse>
				<verse number="16">जद्याँ माँ रोम में पोंच्या, तो एक सपई की रुकाळीऊँ अकेला में रेवा की इजाजत मलगी।</verse>
				<verse number="17">तीन दन केड़े वणी यहूदियाँ का मुक्य लोगाँ ने बलाया, जदी वीं भेळा व्या तो वणी क्यो, “हो भायाँ, में आपणाँ लोगाँ अन बड़ाबा का रिति-रिवाज का विरोद में कई ने किदो, पछे भी मने यरूसलेम में बन्दी बणायो अन रोमियों का हाताँ में हूँप दिदो।</verse>
				<verse number="18">वणा मने जाँच-परक करन छोड़ देणो छायो, काँके में अस्यो कई काम ने किदो जींऊँ मने मोत की सजा मले।</verse>
				<verse number="19">पण जदी यहूदी मारा हामे बोलबा लागा, तो मने रोम का राजाऊँ अरज करणी पड़ी, अस्यो व्या केड़े भी मूँ आपणाँ लोगाँ पे कई दोस ने लगारियो हूँ।</verse>
				<verse number="20">ईं वाते में थाँने बलाया हे के, थाँकाऊँ मलूँ अन बात-बच्यार करूँ, काँके इजराएल की ईं मसीहा की आस का वातेईस मूँ अणा हाँकळा में बन्दयो तको हूँ।”</verse>
				<verse number="21">यहूदी नेता पोलुसऊँ क्यो, “माँ थाँरा बारा में यहूदियाँऊँ कई चिटी ने पई, अन अटाका जो भई वटे ग्या वणा भी थाँरा बारा में कई हमच्यार लेन ने आया अन नेई कई भलो-बुरो क्यो।</verse>
				<verse number="22">पण थारो बच्यार कई हे? वो माँ थाँराऊँ हूणबो छारिया हा, काँके माँ जाणा हा के हरेक जगाँ अणी पन्त का विरोद में बाताँ वेवे हे।”</verse>
				<verse number="23">तद्याँ वणी वाँने केबा के वाते एक दन ते किदो अन नरई मनक वटे भेळा व्या जटे वो रेरियो हो। वणी हवेरूँ लगान हाँज तक परमेसर के राज का बारा में बखाण किदो अन मूसा का नेमा अन परमेसर का आड़ीऊँ बोलबावाळा की किताबाँऊँ ईसू का बारा में साबत करतो तको हमजातो रियो।</verse>
				<verse number="24">तद्याँ नरई तो वणा बाताँ ने मान लिदी अन दूजाँ विस्वास ने किदो।</verse>
				<verse number="25">जद्याँ वीं एक-दूजाऊँ राजी ने वेन जारिया हा तद्याँ पोलुस वाकाँऊँ क्यो, “पुवितर आत्मा यसाया जो परमेसर का आड़ीऊँ बोलबावाळे थाँका बापदादाऊँ बड़्याईस क्यो हो के,</verse>
				<verse number="26">“‘जान वणा लोगाँ ने किदे, थाँ हुणो तो खरी, पण हमेजो कोयने, थाँ देको तो खरी पण थाँने हूजी कोयने,</verse>
				<verse number="27">काँके अणा लोगाँ को मन गाटो अन वाँने हुणाबो बन्द वेग्यो हे, अन वणा आपणी आक्याँ ने बन्द कर नाकी, अस्यान ने वेतो तो वीं आक्याँऊँ देकता अन कान्दड़ाऊँ हूणता अन मनऊँ हमजन वीं मारा आड़ी फरता अन मूँ वाँने हव करतो।’”</verse>
				<verse number="28">पछे पोलुस क्यो, “थाँने जाणणो जरूरी हे के, परमेसर की बंचाबा की बात ने जो यहूदी ने हे वाँने भी खन्दाई हे अन वीं हूणी।”</verse>
				<verse number="29">जद्याँ वणी ओ क्यो तो यहूदी एक-दूजाऊँ लड़ई करबा लागा अन वटूँ पराग्या।</verse>
				<verse number="30">वटे वो दो वर तईं किराया का घर में रियो, जो कुई वणीऊँ मलाबा आतो वो वाँकी आवभगत करतो।</verse>
				<verse number="31">वो खुलेआम अन बना रोक-टोक परमेसर का राज को परच्यार करतो रियो अन परबू ईसू मसी की बाताँ हिकातो रियो।</verse>
			</chapter>
		</book>
		<book number="45">
			<chapter number="1">
				<verse number="1">मूँ पोलुस ज्यो ईसू मसी को दास अन थरप्यो तको चेलो हूँ, परमेसर मने चुणन आपणाँ हव हमच्यार को परच्यार करबा वाते ठेरायो। यो कागद मूँ थाँ हाराई रोम में रेबावाळा मनकाँ का नाम लिकरियो हूँ, जीं परमेसर का लाड़ला हे अन पुवितर वेबा का वाते बलाया ग्या हे। आपणाँ बापू परमेसर अन परबू ईसू मसी का आड़ीऊँ थाँने करपा अन सान्ती मले। हव हमच्यार जिंको वादो परमेसर का आड़ीऊँ बोलबावाळा पेल्याई पुवितर सास्तर में किदो हो। यो हव हमच्यार परमेसर का बेटा का बारा में हे, ज्यो देह का भावऊँ तो दाऊद का बंस में जनम्यो हो। अन पुवितर आत्मा की पवितरताऊँ वींने मरिया तकाऊँ जीवतो करन तागत का हाते परमेसर को बेटो ठेरायो ग्यो अन ईंस ईसू मसी आपणाँ परबू हे। मसी का आड़ीऊँ परमेसर मने करपा अन थरप्यो तको चेलो बणबा को अदिकार दिदो हे के, धरती का हाराई मनकाँ के वाँपे विस्वास करबा में अन वाँकी हिक में चालबा का वाते आगेवाणी करूँ, जणीऊँ वाँके नाम की मेमा वेवे। थाँ ज्यो रोम में हो थाँ भी ईंमें आवो हो, थाँने परमेसर ईसू मसी का वेबा वाते बलाया हे।</verse>
				<verse number="2"></verse>
				<verse number="3"></verse>
				<verse number="4"></verse>
				<verse number="5"></verse>
				<verse number="6"></verse>
				<verse number="7"></verse>
				<verse number="8">हाराऊँ पेली मूँ थाँका हाराई वाते ईसू मसी में परमेसर को धन्नेवाद दूँ हूँ, काँके हारी दनियाँ थाँका विस्वास का बारा में हुणरी हे।</verse>
				<verse number="9">परमेसर जिंकी सेवा मूँ मारा हरदाऊँ वाँका बेटा का हव हमच्यार को परच्यार करन करूँ हूँ, वो मारो गवा हे के, मूँ थाँने हमेस्यान आद करूँ हूँ।</verse>
				<verse number="10">मूँ हमेस्यान मारी परातना में अरज करूँ हूँ के, परमेसर की मरजीऊँ अबे मारो थाँका नके आणो पूरो वेवे।</verse>
				<verse number="11">मारी घणी मरजी हे के, मूँ थाँने देकूँ, काँके मूँ आत्मिक आसिरवाद थाँका हाते बाटणो छारियो हूँ, जणीऊँ थाँ विस्वास में गाटा बण सको।</verse>
				<verse number="12">मारे केवा को मतलब ओ हे के, जद्याँ मूँ थाँका हाते रेवूँ, तो थाँने मारा अन मने थाँका विस्वासऊँ हिम्मत मल सके।</verse>
				<verse number="13">मारा भायाँ थाँने ओ पतो वेणो जरूरी हे के, में घणी दाण थाँका नके आबा की होची, पण हरेक दाण कई ने कई अस्यान को वेता के, मूँ ने आ सक्यो। मूँ थाँका आड़ीऊँ भी वस्योईस फळ पाणो छावूँ हूँ, जस्यो ज्यो यहूदी ने हा, वाँ मनकाँऊँ पायो हो।</verse>
				<verse number="14">काँके मूँ युनानी, जंगली, ग्यानी अन अग्यानी हाराई मनकाँने हव हमच्यार हुणाबा का वाते खुद ने जिमेदार हमजूँ हूँ।</verse>
				<verse number="15">जणीऊँ मूँ थाँ रोम में रेबावाळा में भी हव हमच्यार को परच्यार करबा का वाते लळक राकूँ हूँ।</verse>
				<verse number="16">मूँ हव-हमच्यारऊँ ने हरमऊँ हूँ, काँके यो विस्वास करबावाळा हाराई मनकाँ ने बंचाबा का वाते परमेसर की तागत हे, पेल्याँ यहूदियाँ ने अन पछे ज्यो यहूदी ने हे वाँने।</verse>
				<verse number="17">काँके हव हमच्यार बतावे हे के, परमेसर मनकाँ ने कस्यान आपणाँ वाते सई करे हे। ओ सरुवातऊँ लेन आकरी तईं विस्वास पे टक्यो तको रेवे हे। जस्यान के पुवितर सास्तर में लिक्यो तको हे के, “विस्वासऊँ धरमी मनक जीवतो रेई।”</verse>
				<verse number="18">परमेसर की रीस हरगऊँ वणा मनकाँ का हरेक पाप अन बुरई का हामे परगट वेवे हे, जीं हाँच ने बुरईऊँ दबान राके हे।</verse>
				<verse number="19">परमेसर वाँने दण्ड देई, ईंकी वजे आ हे के, वीं परमेसर का बारा में जाणे हे, काँके परमेसर खुद ईंने साप साप परगट किदो हे।</verse>
				<verse number="20">काँके जद्याँ परमेसर ईं जग ने बणायो हो, तद्याँऊँ वाँका ने दिकबावाळा गुण मतलब अनंत सगती अन परमेसर का हभाव देक्या जावे हे, परमेसर ज्यो कई बणायो हे वणा चिजाँऊँ वीं परमेसर ने साप साप जाणे हे। ताँके मनकाँ का नके कई आळको ने वेवे।</verse>
				<verse number="21">परमेसर ने जाणता तका भी वणा वाँको आदर-मान ने किदो, अन ने वींने धन्नेवाद दिदो। वाँकी होच-हमज बेकार वेगी अन वाँका बना अकल को मन अंदकारऊँ भरग्यो हे।</verse>
				<verse number="22">वीं खुद ने हमजदार बतान मुरक बणग्या।</verse>
				<verse number="23">अन वणा नास ने वेबावाळा परमेसर की मेमा ने नास वेबावाळा मनकाँ की, उड़बावाळा जनावर की, रेंगन चालबावाळा जनावराँ की अन ढान्ढा-ढोर की मूरत्याँ में बदल दिदी।</verse>
				<verse number="24">ईं वाते परमेसर वाँने वाँका मन की बुरी मरजी जस्यान छोड़ दिदा के, वीं असुद वेवे अन एक-दूँजा का सरीर का हाते हरम-भरिया हूँगला काम करे।</verse>
				<verse number="25">वणा परमेसर का हाँच ने जूट में बदल दिदो अन वीं दनियाँ बणाबावाळा ने छोड़न वाँका आड़ीऊँ बणी तकी चिजाँ की आरादना अन सेवा करबा लागग्या। दनियाँ बणाबावाळा की मेमा हमेस्यान वेती रेवे। आमीन।</verse>
				<verse number="26">ईं वजेऊँ परमेसर वाँने वाँके हरमऊँ भरी बुरी मरजी में छोड़ दिदा। अन अटा तईं के, वणा की लुगायाँ भी आपणाँ धणी का हाते कुदरती वेवार छोड़न अकुदरती वेवार राकबा लागगी।</verse>
				<verse number="27">अन अस्यान मनक भी आपणी लुगायाँ ने छोड़न एक दूजाँ मनक का हाते अकुदरती वेवार करबा का वाते तड़परिया हे। अन मनक भी मनकाँ का हाते हूँगला काम करन आपणाँ बुरा करमा को फळ पाबा लागा।</verse>
				<verse number="28">वणा मनकाँ परमेसर का ग्यान ने ओळकणो किमती ने हमज्या, ईं वाते परमेसर भी वाँने वाँकी फालतू मरजी का जस्यान छोड़ दिदा। अन वीं हूँगला काम करबा लागग्या, ज्याँने करणा सई ने हे।</verse>
				<verse number="29">अन वीं हाराई तरिया का अधरम, बुरई, लोब, बुरी आदत, रिस्याँ बळणो, हत्या, लड़ई, धोको, बुरी भावना अन आमी-हामीऊँ भरग्या।</verse>
				<verse number="30">वीं गाळ्याँ-गळोच करबावाळा, परमेसरऊँ घरणा करबावाळा, दंगो करबावाळा, मेपणो करबावाळा, फोकटी बाताँ करबावाळा, बुरई करबा का वाते नुवी तरकिब होदबावाळा, बई-बापू की आग्याने ने मानबावाळा।</verse>
				<verse number="31">वीं बना बदी का, जीबान पलटबावाळा, परेम ने करबावाळा अन एक-दूँजा पे दया ने करबावाळा बणग्या।</verse>
				<verse number="32">वीं परमेसर का नेम जाणे हे के, ज्यो मनक अस्यान को जीवन जीवे हे वीं मोत का दण्ड के जोगा हे, पण पछे भी वीं खुद अस्या काम करे हे अन दूजाँ ज्यो अस्या काम करे हे वाँने भी सई बतावे हे।</verse>
			</chapter>
			<chapter number="2">
				<verse number="1">ईं वाते हे न्याव करबावाळा पलई थूँ कुई भी वे, थाँरा नके कई आळको ने हे, काँके जणी काम का वाते थूँ किंने दूजाँ ने दोसी माने हे, वणीऊँस थूँ आपणाँ खुद ने भी दोसी केवाड़े हे, काँके जणा कामाँ को थूँ न्याव करे हे वाँने थूँ खुद भी करे हे।</verse>
				<verse number="2">अन आपाँ जाणा हा के, ज्यो मनक अस्या काम करे हे वाँको परमेसर आपणाँ हाँच का हस्याबूँ न्याव करी।</verse>
				<verse number="3">पण थूँ ज्यो ईं हाराई काम करबावाळा को न्याव करे हे अन थूँ खुदई ईं काम करे हे, तो थूँ कई होचे के, थूँ परमेसर का न्यावऊँ बंच जाई?</verse>
				<verse number="4">कई थूँ वींकी दया अन वींकी सेण समता अन धिरजपणा ने बेकार हमजे हे? अन कई थूँ ओ ने जाणे हे के, परमेसर की दया थने पापऊँ मन फेरवा का आड़ी ले जावे हे।</verse>
				<verse number="5">पण थाँ आपणाँ गाटा अन कदी पछतावो ने करबावाळा मन के वजेऊँ परमेसर का गुस्सा ने आपणाँ वाते त्यार कररिया हो। वो गुस्सो थाँरा पे वीं दन पड़ी जदी परमेसर को हाँचो न्याव परगट वेई।</verse>
				<verse number="6">परमेसर एक-एक ने आपणाँ करमा जस्यान फल देई।</verse>
				<verse number="7">थोड़ाक मनक ज्यो धीरजऊँ हमेस्यान भला काम करता आरिया हे अन मेमा, मान अन अनंत जीवन की खोज में हे वाँने परमेसर अनंत जीवन देई।</verse>
				<verse number="8">पण दूजाँ ज्यो हवारती हे, हाँचने कोयने माने, पण बुरई करे हे, वाँका पे परमेसर को गुस्सो अन रीस पड़ी।</verse>
				<verse number="9">हरेक मनक पे दुक अन अबकी टेम आई ज्यो बुरई का गेला पे चाले हे। पेली यहूदी मनकाँ पे अन पछे जी यहूदी ने हे वाँका पे।</verse>
				<verse number="10">अन ज्यो कुई भला काम करे हे, वाँने मेमा, मान अन सान्ती मली। पेली यहूदी मनकाँ ने अन पछे ज्यो यहूदी ने हे वाँने।</verse>
				<verse number="11">काँके परमेसर किंको पकसपात ने करे हे।</verse>
				<verse number="12">ईं वाते जीं बना नेमाने जाणन पाप करे, वीं बना नेमा के नास वेई, अन जीं नेमा ने जाणन पाप करे, वाँको दण्ड नेमा के जस्यान वेई।</verse>
				<verse number="13">काँके परमेसर की देकणी में नेमा ने हूणबावाळा धरमी ने हे, पण नेमा के जस्यान चालबावाळाइस धरमी ठेरिया जाई।</verse>
				<verse number="14">पछे जीं यहूदी ने हे, ज्याँका नके नेम ने हे, तद्याँ भी वीं आपणाँ वेवारऊँ नेमा की बाताँ पे चाले हे, तो नेम वाँका नके ने वेबा पे भी वाँका वाते वीं खुदई नेम वेई।</verse>
				<verse number="15">वीं आपणाँ कामऊँ यो बतावे हे के, नेम वाँके काळजा की कोर पे लिक्या तका हे। अन वाँकी अंतर-आत्मा ईं बात की गवई देवे हे। अन वाँका बच्यार वाँने कदी अपरादी बतावे हे अन कदी निरदोस बतावे हे।</verse>
				<verse number="16">ईं बाताँ वणी दन वेई जद्याँ परमेसर मूँ हूँणऊँ वीं हव हमच्यार का जस्यान ईसू मसीऊँ मनकाँ के छाने की बाताँ को न्याव करी।</verse>
				<verse number="17">थूँ खुद ने यहूदी माने हे अन नेमा पे विस्वास करे हे अन परमेसर की वजेऊँ मेपणो करे हे,</verse>
				<verse number="18">अन थूँ परमेसर की मरजी जाणे हे अन हव बाताँ की हामी भरे हे, काँके नेमाऊँ थने हिकायो ग्यो हे।</verse>
				<verse number="19">थूँ ओ माने हे के, थूँ आंदा मनकाँ की आक्याँ हे अन जतरा अन्दारा में हे, वाँका वाते थूँ ज्योती हे।</verse>
				<verse number="20">अन बना हमजवाळा ने हिकाबावाळो, अन बाळकाँ को गरू, काँके नेमाऊँ थने हारोई ग्यान अन हाँच मल्यो हे।</verse>
				<verse number="21">ईं वाते थूँ ज्यो ओरा ने हिकावे हे, वो आपणाँ खुद ने काँ ने हिकावे? थूँ चोरी ने करबा को परच्यार करे हे, अन खुदई चोरी काँ करे हे?</verse>
				<verse number="22">थूँ केवे के, कुकरम ने करणो अन खुदई कुकरम काँ करे हे, थूँ ज्यो मूरत्याऊँ रिस्याँ बळे हे, खुदई मन्दर को धन काँ लुटे हे?</verse>
				<verse number="23">थूँ ज्यो नेमा का बारा में मेपणो करे हे, कई नेमाने ने तोड़न, थूँ परमेसर को अपमान काँ करे हे?</verse>
				<verse number="24">जस्यान के सास्तर में लिक्यो तको हे के, “थाँकी वजेऊँ ज्यो यहूदी ने वाँ मनकाँ में परमेसर का नाम को अपमान किदो जावे हे।”</verse>
				<verse number="25">यद्याँ थूँ नेमा पे चाले, तो थने खतनाऊँ नफो हे, पण यद्याँ थूँ नेमाने तोडे़, तो थूँ खतनावाळो वेन भी बना खतनावाळा के जस्यान मान्यो जाई।</verse>
				<verse number="26">यद्याँ किंको खतनो ने व्यो हे अन वो नेमा पे चाले हे, तो कई परमेसर वीं बना खतनावाळा ने हाँचो खतना किदा तका में ने घणी?</verse>
				<verse number="27">थूँ जिंका नके नेम लिक्या तका हे अन थाँरो खतनो भी व्यो हे। अतरो व्या केड़े भी थूँ ज्यो नेमा ने तोड़े हे। ईं वजेऊँ वो मनक जिंको देह का हस्याबूँ खतनो ने व्यो हे अन ज्यो नेमा को पालण करे हे, वो थने गुनेगार ठेराई।</verse>
				<verse number="28">ज्यो बारणे का रूपऊँ यहूदी हे, वीं हाँची में यहूदी ने हे। देह को खतनो हाँचो खतनो ने हे।</verse>
				<verse number="29">पण हाँचो यहूदी वोईस हे, ज्यो मन में हे, अन हाँचो खतनो वोईस हे, ज्यो आत्माऊँ मन को खतनो हे, ने के, लिक्या तका नेमा को। अस्या मनकाँ की बड़ई मनकाँऊँ ने पण परमेसर का आड़ीऊँ वेवे हे।</verse>
			</chapter>
			<chapter number="3">
				<verse number="1">तो पछे यहूदी वेबा को कई नफो, अन खतना को कई मोल?</verse>
				<verse number="2">हरेक तरियाऊँ नरोई हे, काँके हाराऊँ पेली बात परमेसर का बचन यहूदियाँ ने दिदा ग्या हे।</verse>
				<verse number="3">कई व्यो यद्याँ वणा मूँ थोड़ाक विस्वास जोगा ने रिया हे? तो कई वाँके विस्वास जोगा ने रेबाऊँ परमेसर विस्वास जोगो ने रेई?</verse>
				<verse number="4">कदी भी अस्यान ने वेवे, यद्याँ हाराई मनक जूटा हे, तो भी परमेसर हाँचा हे। जस्यान सास्तर में लिक्यो तको हे के, “जणीऊँ थूँ थाँरी बाताँ में धरमी वेवे अन न्याव करती टेम में थूँ जे पावे।”</verse>
				<verse number="5">पण यद्याँ आपणाँ बुरा करम परमेसर की धारमिकताने सई तरियाऊँ परगट करे हे अन अणी बात पे परमेसर आपाँ पे गुस्सो करे हे तो आपाँ कई केवा के, वीं आपणाँ हाते अन्याव करे हे। यो तो मूँ मनक का रिती पे कूँ हूँ।</verse>
				<verse number="6">कदी अस्यो ने वेई, अन यद्याँ अस्यान की बात हे, तो परमेसर दनियाँ को न्याव करबा कस्यान कर सकी।</verse>
				<verse number="7">कुई अस्यान भी के सके हे के, यद्याँ मारा जूट की वजेऊँ परमेसर को हाँच हेलो वे जावे हे अन अणीऊँ वींकी मेमा हेली परगट वेवे हे, तो पछे पापी मनक का जस्यान मूँ दण्ड के जोगो ने मान्यो जाऊँ।</verse>
				<verse number="8">तो आवो पछे आपीं बुरई करा, ताँके भलई वेवे। जस्यान माकाँ बारा में कुई बुरई करन माकाँ पे दोस लगावे हे के, आपीं अस्यान केवा हा। अस्या मनक दण्ड का जोगा हे।</verse>
				<verse number="9">तो पछे कई व्यो। कई आपाँ ज्यो यहूदी हा, ज्यो यहूदी ने हे, वणाऊँ हव हा, कदी हव ने हा। काँके आपाँ यहूदी अन जीं यहूदी ने हा, वाँ दुया पे पेल्याई ओ दोस लगा चुक्या हा के, वीं हाराई पाप का वंस में हे।</verse>
				<verse number="10">जस्यान के सास्तर लिक्यो हे के, “कुई खरो ने, एक भी ने हे!</verse>
				<verse number="11">कुई हमजदार ने हे, ज्यो परमेसर ने होदे हे!</verse>
				<verse number="12">हाराई का हाराई परमेसर का गेलाऊँ भटकग्या हे, वीं हाराई बुरा बणग्या हे, कुई भलई करबावाळो ने हे एक भी ने हे।</verse>
				<verse number="13">वाँको मुण्डा खली तकी कबर का जस्यान हे। वीं आपणी जीबऊँ छळ-कपट करे हे। वाँका होट पे हाँप को जेर भरियो तको हे।</verse>
				<verse number="14">वणा को मुण्डो हराप अन कड़वापणाऊँ भरिया तको हे।</verse>
				<verse number="15">वीं हमेस्यान मारबा का वाते त्यार रेवे हे।</verse>
				<verse number="16">वाँका गेला में नास अन कळेस हे।</verse>
				<verse number="17">वाँने सान्ती का गेला को पतो ने हे।</verse>
				<verse number="18">वाँकी आक्याँ में परमेसर की दरपणी ने हे।”</verse>
				<verse number="19">आपाँ जाणा हे के, नेम ज्यो कई केवे हे, वाँने केवे हे ज्यो नेमा का बंस में हे। अणीऊँ हाराई का मुण्डा बन्द किदा जा सके अन हारी दनियाँ परमेसर का दण्ड के जोगी वे।</verse>
				<verse number="20">काँके नेमा का कामाँऊँ कुई भी मनक परमेसर का हामे धरमी ने बण सके हे। काँके नेमाऊँ तो पाप की ओळकाण वेवे हे।</verse>
				<verse number="21">पण बना नेमा के परमेसर एक मनक के कस्यान आपणाँ वाते सई बणावे हे यो अबे बतायो ग्यो हे, जिंकी गवई नेम अन परमेसर का आड़ीऊँ बोलबावाळा देवे हे।</verse>
				<verse number="22">हाराई विस्वास्याँ का वाते ईसू मसी में विस्वास का हाते बना भेद-भाव करिया परमेसर का आड़ीऊँ मलबावाळी धारमिकता परगट किदी गी हे।</verse>
				<verse number="23">काँके हाराई पाप किदो हे अन हाराई परमेसर की मेमाऊँ छेटी हे।</verse>
				<verse number="24">पण परमेसर का अनुगरेऊँ अन छुटकाराऊँ ज्यो ईसू मसी में हे, वीं फोकट में धरमी ठेराया ग्या हे।</verse>
				<verse number="25">ईसू मसी की मोत पे विस्वास करबाऊँ पापाँ की मापी पाबा का वाते परमेसर ईसू मसी ने एक बलीदान का रूप में दे दिदो, ईं तरियाँ परमेसर आपणी धारमिकताने परगट किदी, काँके परमेसर समता खान मनकाँ का पेल्याँ का पापाँ को दण्ड ने दिदो अन छोड़ दिदा हा।</verse>
				<verse number="26">ताँके वो अणी टेम में आपणी धारमिकताने परगट करे, जणीऊँ वो खुद धरमी अन ईसू में विस्वास करबावाळा ने धरमी ठेराबावाळो बणे।</verse>
				<verse number="27">तो पछे ईंमें मेपणा की कई बात ने री। वो तो खतम वेग्यो हे। यो कस्या नेमा का मस ने अन ने कस्या कामाँ का नेमा का मस, पण यो तो विस्वास का नेमा का मस वेवे हे।</verse>
				<verse number="28">ईं वाते अबे आपाँ ईं नतीजा पे पोछ्याँ हा के, कुई भी मनक नेमा का कामाँ के जस्यान चालन ने, पण विस्वासऊँ धरमी बण सके हे।</verse>
				<verse number="29">कई परमेसर बेस यहूदी मनकाँ कोईस हे? कई वी ज्यो यहूदी ने हे, वाँ मनकाँ को ने हे? ने, वीं ज्यो यहूदी ने हे वाँका भी परमेसर हे।</verse>
				<verse number="30">काँके एकीस परमेसर हे, ज्यो यहूदी ने विस्वासऊँ अन ज्यो यहूदी ने हे वाँने भी वणीस विस्वासऊँ धरमी ठेराई।</verse>
				<verse number="31">तो कई, आपाँ विस्वासऊँ नेमा ने मानणा छोड़रिया हा। कदी अस्यान ने करा हा, पण आपीं तो नेमा ने ओरी पकड़या राका हा।</verse>
			</chapter>
			<chapter number="4">
				<verse number="1">तो आपीं कई केवा के, आपणाँ देह का पुरवज अबराम अणी धारमिकता का बारा में कई हमज्या?</verse>
				<verse number="2">काँके यद्याँ अबराम ने वींका काम की वजेऊँ धरमी गण्यो जातो तो वींमें मेपणो करबा की बात ही, पण परमेसर का हामे कोयने।</verse>
				<verse number="3">सास्तर कई केवे हे के, “अबराम परमेसर पे विस्वास किदो, जणीऊँ वो धरमी केवायो ग्यो।”</verse>
				<verse number="4">काम करबावाळा ने दानकी देणी दान ने पण वींको हक हे।</verse>
				<verse number="5">पण यद्याँ कुई मनक करम ने करे अन बेस वीं परमेसर पे विस्वास करे ज्यो पापी मनकाँ ने धरमी बणावे हे, तद्याँ वणी मनक को विस्वासईस वींका धरमीपणा का वाते मान्यो जावे हे।</verse>
				<verse number="6">अस्यानीस दाऊद भी वींने धन्न केवे हे, जिंने वींका कामाँ के बना भी परमेसर धरमी माने हे।</verse>
				<verse number="7">“धन्न हे वीं ज्याँका अधरम माप किदा ग्या। अन ज्याँका पाप ढाक्या ग्या।</verse>
				<verse number="8">धन्न हे वो मनक ज्याँका पाप परबू ने गणे हे।”</verse>
				<verse number="9">तो आ धारमिकता की बात यहूदी मनकाँ पेईस ने पण ज्यो यहूदी ने हे, वाँ मनकाँ पे भी लागू वेवे हे। काँके जस्यान माँ क्या हो के, अबराम को विस्वासईस वींका वाते धारमिकता गण्यो ग्यो।</verse>
				<verse number="10">वींको विस्वास धारमिकता में कदी गण्यो ग्यो? कई वींको खतनो व्या केड़े कन जदी खतनो ने व्यो हो। खतनो व्या केड़े ने, पण खतनाऊँ पेल्याँ गण्यो ग्यो हे।</verse>
				<verse number="11">ईंका केड़े वणी एक हेन्याण का तरिया खतनो करायो। ज्या विस्वास की वजेऊँ धारमिकता की छाप हे यो विस्वास वणी जदी दिकाया हो जद्याँ वींको खतनो ने व्यो हो। तो वो वाँ हाराई को बापू हे जीं बना खतना का वेन भी विस्वासी हे। ईं वाते ज्यो यहूदी ने हे वीं भी धरमी गण्या जावे।</verse>
				<verse number="12">यहूदी मनक खाली खतना कराबाऊँ ईंस ने, पण अबराम आपणो खतनो व्या के पेल्याँ जस्यो विस्वास किदो हो, वस्यो विस्वास करे हे, तो अबराम वणाको भी बापू हे।</verse>
				<verse number="13">अबराम अन वींकी ओलाद ने यो वादो मल्यो के, वीं दनियाँ का वारिस वेई, यो वादो नेमाऊँ ने मल्यो हो, पण वीं धारमिकता का मस मल्यो, ज्या विस्वासऊँ अई ही।</verse>
				<verse number="14">यद्याँ नेमाने मानन वीं दनियाँ का वारिस वेता, तो विस्वास को कई मतलब ने रेतो अन वादो भी बेकार वे जातो।</verse>
				<verse number="15">मनक नेमा को पालण ने करे तो परमेसर को गुस्सो भड़के हे, पण जटे नेम ईं ने हे वटे नेमा ने तोड़बा की गूंजाइसई कोयने हे?</verse>
				<verse number="16">तो आ बात साबत वेवे हे के, परमेसर को वादो विस्वास को फळ हे ज्यो वाँकी करपाऊँ में मले हे। अणीस वजेऊँ परमेसर को वादा अबराम का हाराई लोगाँ पे लागू वेवे हे, अन बेस वाँका वातेईस ने जीं नेमाने माने हे पण वाँ हाराई पे जीं अबराम का जस्यान विस्वास राके हे। वो आपणाँ हाराई को बापू हे।</verse>
				<verse number="17">सास्तर बतावे हे के, “में थने घणी जात को बापू बणायो हे।” वीं परमेसर की नजरा में अबराम आपणाँ बापू हे, जणी परमेसर पे विस्वास हे। परमेसर मरिया तका ने जीवन देवे हे अन ज्यो ने हे, वींने हामे लावे हे।</verse>
				<verse number="18">जटे आस करबा की जगाई ने ही, वटे अबराम आपणाँ मन में आस लेन वींमें विस्वास किदो। अणी मस वो वणी वादा का जस्यान नरी जात को बापू बण्यो, जस्यो सास्तर में लिक्यो तको हे के, “थाँरा घणी ओलाद वेई ज्याँने घणी ने जाई।”</verse>
				<verse number="19">अन वो ज्यो हो वर को हो, आपणाँ मरिया तका सरीर अन सारा का गरब की मरी तकी दसा ने जाणन भी वो विस्वास में कमजोर ने व्यो।</verse>
				<verse number="20">वणी परमेसर का वादा में विस्वास बणायो राक्यो। अतरोकीस ने पण विस्वास ने घणो पाका करते तके परमेसर की मेमा किदी।</verse>
				<verse number="21">वींने पूरो भरोसो हो के, ज्यो वादो परमेसर वणीऊँ किदो हे, परमेसर वींने पूरो करबा तागत राके हे।</verse>
				<verse number="22">ईंवातेइस वींको विस्वास वींकी धारमिकता गण्यो ग्यो हो।</verse>
				<verse number="23">सास्तर को ओ बचन के, विस्वास वींका वाते धारमिकता गण्यो ग्यो, बेस वींका वातेईस ने,</verse>
				<verse number="24">पण आपणाँ वाते भी के, परमेसर आपाँने ज्यो वींमें विस्वास राका हा, धरमी मानी। वणी आपणाँ परबू ईसू ने पाच्छा जिवाया हे।</verse>
				<verse number="25">ईसू ने आपणाँ पाप का वाते मरबा दिदो ग्यो अन आपाँने धरमी बणाबा का वाते मरिया तकाऊँ पाछो जिवायो ग्यो।</verse>
			</chapter>
			<chapter number="5">
				<verse number="1">ईं वाते आपाँ आपणाँ विस्वास की वजेऊँ धरमी वेग्या हा, अणीऊँ अबे आपणो परबू ईसू मसी का जरियऊँ परमेसरऊँ मेल-मिलाप हे।</verse>
				<verse number="2">विस्वास का वजेऊँ वणी आपाँने परमेसर की दया में जिंमें आपाँ बण्या तका हा, वीं तईं आपाँने पोंछा दिदा हे अन आपाँ परमेसर की मेमा की आस को गुमान करा हा।</verse>
				<verse number="3">योईस ने, आपाँ तो अबकी टेम में भी गुमान करा हा। काँके आपाँ जाणा हा के, अबकी टेम धीरज ने जनम देवे हे।</verse>
				<verse number="4">अन ईं धीरजऊँ परक्यो तको मनक खरो निकळे हे अन खराऊँ आस आवे हे।</verse>
				<verse number="5">अन आ आस आपाँने निरास ने वेबा दे, काँके पुवितर आत्मा ज्यो आपाँने ज्यो दिदी गी हे, वींकाऊँ परमेसर को परेम आपणाँ मन में उन्दायो जावे हे।</verse>
				<verse number="6">काँके आपाँ जदी कमजोर हा, तो वीं सई टेम पे मसी भगती करबावाळा ने हा का वाते बली वेग्या।</verse>
				<verse number="7">अस्यो तो वेई ने सके के, कणी धरमी मनक वाते कुई जीव देबाने त्यार वेवे हे। पण वे सके कुई भला मनक का वाते जीव देबा का वाते त्यार वे भी जावे।</verse>
				<verse number="8">पण परमेसर आपाँ पे वणी टेम आपणो परेम दिकायो के, जद्याँ आपाँ पापीईस हा, तो ईसू मसी आपणाँ वाते जीव दिदो।</verse>
				<verse number="9">काँके अबे आपाँ वाँका लुईऊँ धरमी वेग्या हा, तो पछे मसी जरियऊँ परमेसर का गुस्साऊँ काँ ने बंचाया जावा?</verse>
				<verse number="10">काँके जद्याँ आपाँ परमेसर का दसमण हा। तो परमेसर आपणाँ बेटा की मोतऊँ आपणो मेल-मिलाप खुदऊँ किदो। अन जद्याँ अबे आपणाँ मेल-मिलाप वेग्यो हे तो वाँका जीवनऊँ आपाँ काँ ने बंचाया जावा?</verse>
				<verse number="11">अतरोकीस ने पण अबे आपणो परबू ईसू मसी का मस परमेसरऊँ मेल-मिलाप व्यो हे अन भगती करन गुमान करा हा।</verse>
				<verse number="12">जस्यान के एक मनक आदम का मस धरती पे पाप अन पापऊँ मोत अई अन वस्यानीस मोत हाराई मनकाँ पे अई हे काँके हाराई पाप किदो।</verse>
				<verse number="13">नेमा के आबाऊँ पेल्याँई धरती पे पाप हो पण जटे कई नेम ने वेता, वटे पाप गण्यो ने जातो।</verse>
				<verse number="14">पण आदमऊँ लेन मूसा का टेम तईं मोत हाराई पे राज करती री। मोत वाँका पे भी ही, जणा आदम के जस्यान पाप ने किदो हे। आदम आबावाळा का जस्यान को हो।</verse>
				<verse number="15">पण परमेसर को वरदान आदम का पाप का जस्यान को ने हो। वरदान तो वणीऊँ घणी मान हे। एक मनक आदम का पाप की वजेऊँ घणा मनकाँ की मोत वीं हे, पण एक मनक ईसू मसी की दया की वजेऊँ मल्यो परमेसर की दया को वरदान घणा मनकाँ का वाते भरपूर हे।</verse>
				<verse number="16">अन परमेसर को वरदान आदम का पाप का फळ का जस्यान ने हे। काँके दण्ड का वाते न्याव को आणो एक पाप का केड़े व्यो हे। पण ओ वरदान ज्यो पाप की मापी का आड़ी ले जावे हे, वो नरई पाप का केड़े आयो हे।</verse>
				<verse number="17">काँके जद्याँ एक आदम का पाप की वजेऊँ मोत को राज आयो। तो परमेसर की भरपूर दया अन वाँका धारमिकता का वरदान ने लेबावाळा वणी एक मनक ईसू मसी का मस जीवन पे ओरी हेलो राज करी।</verse>
				<verse number="18">जस्यान एक पाप की वजेऊँ हाराई मनकाँ पे दण्ड आयो, वस्यानीस एक धरम का काम की वजेऊँ हाराई ने अनंत जीवन देबावाळी धारमिकता मले हे।</verse>
				<verse number="19">जस्यान एक मनक के आदेस ने मानबा की वजेऊँ घणा मनक पापी व्या, वस्यानीस एक मनक का आदेस मानबा की वजेऊँ घणा मनकाँ ने परमेसर सई ठेराई।</verse>
				<verse number="20">नेम ईं वाते आया हा के, पाप बड़ सके। पण जटे पाप बड़्यो, वटे परमेसर की करपा वणीऊँ ओरू भी हेली बड़ी।</verse>
				<verse number="21">ताँके जस्यान मोत का जरिये पाप राज किदो, वस्यानीस आपणाँ परबू ईसू मसी का वजेऊँ अनंत जीवन लाबा का वाते परमेसर की दया धारमिकता का जरिये राज करे।</verse>
			</chapter>
			<chapter number="6">
				<verse number="1">तो पछे आपाँ कई केवाँ? कई आपाँ पाप करता रेवा, ताँके परमेसर की दया बड़ती रेवे?</verse>
				<verse number="2">कदी ने, आपाँ ज्यो पाप का वाते मरग्या हा, तो पाप में कस्यान जीवाँ?</verse>
				<verse number="3">कई थाँ ने जाणो हो आपाँ, ज्यो ईसू मसी में बतिस्मो लिदो हे, वींकी मोत कोईस बतिस्मो लिदो हे।</verse>
				<verse number="4">तो वींकी मोत को बतिस्मो लेबाऊँ आपाँ भी वींके हातेईस गाड़्या ग्या हा, ताँके जस्यान परमेसर की मेमा की तागत का मस मसी ने मरिया तकाऊँ जिवाया हा वस्यानीस आपाँ भी एक नुवो जीवन जीवाँ।</verse>
				<verse number="5">यद्याँ आपाँ वींके जस्यान की मोत में वींके हाते एक वेग्या हा, तो वींके पाच्छा जीव उठबा में भी वींके हाते एक वे जावाँ।</verse>
				<verse number="6">काँके आपाँ ओ जाणा हा के, आपाँ आपणो पुराणो जीवन ईसू का हाते हूळी पे चढा दिदो हो, ताँके पापऊँ भरी आपणी देह नास वे जावे। अन आपाँ आगे पाप का दास ने बण्या रे सका।</verse>
				<verse number="7">काँके ज्यो मरग्यो, वींने पापऊँ छुटकारो मलग्यो हे।</verse>
				<verse number="8">अन यद्याँ आपाँ मसी का हाते मरग्या, तो आपणो विस्वास हे के, आपाँ वींके हाते जीवाँ भी।</verse>
				<verse number="9">आपाँ जाणा हा के, मसी जिंने मरिया तकाऊँ जिवायो ग्यो हो, वो पाछो कदी ने मरी हे। अन वींपे मोत को ज्योर कदी ने चाली।</verse>
				<verse number="10">ज्या मोत वो मरियो हो, वाँका पाप का वाते एक दाण हे, पण अबे जस्यान को जीवन वो जीरियो हे वो परमेसर का वाते जीरियो हे।</verse>
				<verse number="11">अस्यान थाँ थाँका वाते भी होचो के, थाँ भी पाप का वाते मर चुक्या हो, पण परबू ईसू मसी में परमेसर का वाते जीरिया हो।</verse>
				<verse number="12">ईं वाते थाँकी नास वेबावाळी देह पे पाप की मरजी ने पुरी करबा का वाते पाप को जोर मती चालबा दो। जणीऊँ थाँ पाप की मरजी में कदी ने चालो।</verse>
				<verse number="13">थाँका देह का अंग ने अधरम का सादन वेबा वाते पाप का हाताँ में मती दिज्यो, पण मरिया तका मेंऊँ जी उटबावाळा के जस्यान परमेसर का हाताँ में दिज्यो। अन थाँकी देह का अंगा ने धारमिकता का सादन वेबा वाते परमेसर ने हूँप दो।</verse>
				<verse number="14">थाँका पे पाप को राज ने वेई, काँके थाँ नेमा का टेके ने जीवो हो, पण परमेसर की दया का टेके जीवो हो।</verse>
				<verse number="15">आपाँ नेमा के टेके ने हा, पण परमेसर की दया में जीवाँ हा, तो कई आपाँ करा? कई आपाँ पाप कराँ? ने कदी भी ने कराँ।</verse>
				<verse number="16">कई थाँने ओ ने पतो कई, जद्याँ थाँ किंका हाताँ में खुद ने दास का जस्यान हूँपो हो, तो थाँ वाँकी आग्या मानबा का वाते वाँका दास हो। तो पछे पलई थाँ पाप का दास बणो ज्यो मोत का आड़ी ले जावे हे अन पलई आग्या मानबावाळा बणो, ज्याँ थाँने धारमिकता का आड़ी लेजाई।</verse>
				<verse number="17">पण परमेसर को धन्नेवाद वे के, थाँ ज्यो पाप का दास वेबा पे भी थाँ वणी हिक ने मानी, ज्या थाँने हूँपी गी ही।</verse>
				<verse number="18">थाँने पापऊँ छुटकारो मलग्यो हे अन थाँ धारमिकता का दास बणग्या हो।</verse>
				<verse number="19">थाँ थाँके देह की कमजोरी का मस हाराई बाताँ ने हमज ने सको हो, ईं वाते मूँ थाँने ईं बाताँ बोलचाल की भासा में हमजारियो हूँ। पेल्याँ थाँ थाँकी देह का अंग ने असुद अन अधरम बड़ाबा का वाते एक दास का रूप काम लेता हा। पण अबे थाँ वस्यानीस थाँका देह का अंग ने दास वेबा का वाते धारमिकता का हात में हूँप दो, ज्याँ थाँने खरईपणा में ले जावे हे।</verse>
				<verse number="20">काँके थाँ जद्याँ पाप का दास हा, तो धारमिकता को थाँका पे कुई जोर ने हो।</verse>
				<verse number="21">जणा बाताँऊँ थाँने आज हरम आवे हे वींको थाँने कई फळ मल्यो? काँके वींको आकरी फळ मोत हे।</verse>
				<verse number="22">पण अबे थाँने पापऊँ छुटकारो मलग्यो ग्यो हे अन परमेसर का दास बणा दिदा ग्या हो, तो ज्या खेती थाँ करिया हो, वाँ थाँने परमेसर का आड़ी खरईपणा में लेजाई। जिंको आकरी फळ अनंत जीवन हे।</verse>
				<verse number="23">काँके पाप को मोल तो मोत हे पण आपणाँ परबू ईसू मसी में परमेसर को वरदान अनंत जीवन हे।</verse>
			</chapter>
			<chapter number="7">
				<verse number="1">हो मारा भायाँ, थाँ तो जाणो हो के, मूँ वाँने केवूँ हूँ ज्यो नेमाने जाणे हे के, जद्याँ तईं मनक जीवतो रेवे हे तद्याँ तईं वींपे नेमा को हक रेवे हे।</verse>
				<verse number="2">जस्यान के एक ब्याव किदी तकी लुगई ब्याव का नेमा का जस्यान आपणाँ धणी का हाते वींके जीवतो रेवा तईं बन्धन में बन्दी तकी हे, यद्याँ वींको धणी मर जावे तो, वाँ ब्याव का हाराई नेमाऊँ आजाद वे जावे हे।</verse>
				<verse number="3">यद्याँ वाँ आपणाँ धणी का जीवता रेताई कणी दूजाँ मनक का हाते वेवार करले, तो वाँ कुकरमी केवावे हे पण यद्याँ वींको धणी मरी जावे तो, ब्याव का नेम वींपे लागू ने वेवे हे अन पछे यद्याँ वाँ कणी दूजो का हाते नातो करले, तद्याँ भी वाँ कुकरमी ने केवावे हे।</verse>
				<verse number="4">हो मारा भायाँ हुणो, मसी की देहऊँ थाँ भी मूसा का नेमा का वाते मरग्या हो। तो अबे थाँ कणी दूजाऊँ जुड़ सको हो, वणीऊँ जिंने मरिया तकाऊँ पाछो जीवतो किदो हे। जणीऊँ आपाँ परमेसर का वाते फला फूला।</verse>
				<verse number="5">काँके जद्याँ आपाँ मनकाँ का हाव-भाव का जस्यान जीरिया हा, तो आपणी पापऊँ भरी मरजी ज्या नेमाऊँ अई ही, वाँ आपणाँ अंगा में काम करबा लागगी। जणीऊँ आपणो अंत मोत वेवे,</verse>
				<verse number="6">पण अबे आपाँने नेमाऊँ छुटकारो मलग्यो हे। काँके जणा नेमा को आपणाँ पे हक हो, वींका वाते आपाँ मरग्या हा। ताँके पुराणा लिक्या तका नेमाऊँ ने, पण आत्मा की नुवी रितऊँ परमेसर की सेवा करा।</verse>
				<verse number="7">तो आपाँ कई केवाँ? कई नेम पाप हे? कदी ने हे। काँके यद्याँ नेम ने वेता तो मूँ जाण ने पातो के, पाप कई वेवे हे? यद्याँ नेम ने बताता के, लोब मती करो, तो हाँची में मूँ जाणीई ने पातो के, लोब कई हे?</verse>
				<verse number="8">पण मोको मलताई पाप नेमा को नफो उठान मारा मयने हरेक तरियाँ को लोब नाक दिदो। नेम ने वेबाऊँ पाप तो मरियो तको हे।</verse>
				<verse number="9">एक टेम ही, जद्याँ मूँ बना नेमा के जीवतो हो, पण जद्याँ आदेस आया तो पाप जीवग्यो अन मूँ मरग्यो।</verse>
				<verse number="10">अन मने पतो पड़ग्यो के, वो आदेस ज्यो जीवन देबा वाते हो, मारा वाते मोत लायो।</verse>
				<verse number="11">काँके पाप ने मोको मलग्यो अन वणी वीं आदेसऊँ मने भरमायो अन वणीऊँस मने मार नाक्यो।</verse>
				<verse number="12">ईं वाते वीं नेम पुवितर हे, अन आदेस पवितर, धरमी अन सई हे।</verse>
				<verse number="13">तो पछे ईंको कई मतलब व्यो के, ज्यो सई हे वोईस मारी मोत की मस व्यो? हाँची में ने। पण पाप वीं हव आदेस का जरिये मारी मोत को कारण ईं वाते बण्यो के, पाप ने ओळक्यो जा सके। ताँके नेमा का आदेस का जरिये वो पाप ओरी हेलो पाप बड़ग्यो।</verse>
				<verse number="14">काँके आपाँ जाणा हा, नेम आत्मिक हे, पण मूँ हाड़क्या माँस को मनक हूँ ज्यो पाप की गुलामी करबा का वाते वक्यो तको हे।</verse>
				<verse number="15">में ने जाणूँ हूँ के, मूँ कई कररियो हूँ काँके मूँ ज्यो करणो छावूँ हूँ वो ने करूँ पण मूँ वो करूँ हूँ, जणीऊँ मूँ घरणा करूँ हूँ।</verse>
				<verse number="16">अन यद्याँ मूँ वोईस करूँ हूँ ज्यो मूँ ने करणो छारियो हूँ। तो मूँ मान हूँ के, नेम सई हे।</verse>
				<verse number="17">पण हाँची में मूँ वो ने हूँ, ज्यो यो हारोई कररियो हूँ, पण पाप मारा में वस्यो तको हे, वोईस यो करे हे।</verse>
				<verse number="18">हाँ, मूँ जाणूँ हूँ के, मारा पापी देह में कुई भी हव चीज वास ने करे हे। भलई करबा की मरजी तो मारा मयने हे पण भला का काम माराऊँ ने वेवे हे।</verse>
				<verse number="19">काँके ज्यो हव काम मूँ करणो छावूँ हूँ वीं तो मूँ ने करूँ पण जतरा बुरा काम मूँ ने करणो छावूँ, मूँ वींइस करतो रेऊँ हूँ।</verse>
				<verse number="20">अन यद्याँ मूँ वीं काम करूँ हूँ ज्यो मूँ करणो ने छावूँ तो हाँची में वाँने करबावाळो मूँ ने हूँ, पण पाप हे, ज्यो मारा मयने वास करे हे।</verse>
				<verse number="21">ईं वाते मूँ ओ नेम पावूँ हूँ के, मूँ जद्याँ भी हव करणो छावूँ, तो मूँ मारा में बुरई पावूँ हूँ।</verse>
				<verse number="22">काँके मूँ मारी अंतर-आत्मा का मयने तो परमेसर का नेमाऊँ घणो राजी रेवूँ हूँ।</verse>
				<verse number="23">पण मूँ मारी देह में एक दूजाँ नेमा ने काम करता देकूँ हूँ जीं मारा मन का नेमाऊँ लड़े हे अन मने पाप का नेमा में बन्दी बणा लेवे हे। ईं नेम मारी देह में काम करे हे।</verse>
				<verse number="24">मूँ एक अभागो मनक हूँ। मने अणी मोत की देहऊँ कूण छुटकारो देवाड़ी?</verse>
				<verse number="25">मूँ आपणाँ परबू ईसू मसीऊँ परमेसर को धन्नेवाद करूँ हूँ। काँके मूँ ईं हाड़क्या माँस की देह में पाप को दास हूँ, पण मूँ मारी अकलऊँ परमेसर का नेमा को दास हूँ।</verse>
			</chapter>
			<chapter number="8">
				<verse number="1">तो अबे ज्यो ईसू मसी में बण्या तका हे, वाँका वाते कई दण्ड ने हे।</verse>
				<verse number="2">काँके ईसू मसी में जीवन देबावाळा आत्मा का नेम मने पाप अन मोत का नेमाऊँ छुटकारो देवे हे।</verse>
				<verse number="3">काँके ज्यो काम नेम मनकाँ का पापी हाव-भाव का मस कमजोर वेन ने कर सक्या, वो काम परमेसर किदो, मतलब ओ के, परमेसर आपणाँ बेटा ने आपणी जस्यान पाप की देह में आपणाँ पाप का वाते बली वेबा का वाते खन्दायो। जणीऊँ वो पापी देह में पाप ने दण्ड दिदो।</verse>
				<verse number="4">जणीऊँ आपणाँ में नेमा की जरूत पुरी वे, काँके आपाँ ज्यो देह जस्यान ने पण आत्मा का जस्यान जीवाँ हा।</verse>
				<verse number="5">काँके ज्यो आपणी देह जस्यान जीवन जीणो छावे हे, वाँको मन देह की मरजी में लागी तकी रेवे हे। पण ज्यो आत्मा का जस्यान जीवन जीणो छावे हे, वाँको मन जस्यान आत्मा छावे वस्यी बाताँ में लागी रेवे हे।</verse>
				<verse number="6">देह की बाताँ पे मन लगाणो तो मोत हे, पण आत्मा पे मन लगाणो जीवन अन सान्ती हे।</verse>
				<verse number="7">काँके देह पे मन लगाणो तो परमेसरऊँ दसमणी राके हे, काँके देह ने तो परमेसर का नेम पे चाले हे अन नेई कदी चाल सके हे।</verse>
				<verse number="8">अन वीं ज्यो देह का हाव-भाव में जीवे हे, वीं परमेसर ने राजी ने कर सके।</verse>
				<verse number="9">पण यद्याँ हाँची में थाँकामें परमेसर की आत्मा वास करे हे तो थाँ देह की मरजी का जस्यान ने जीवो, पण आत्मा का जस्यान जीवो। यद्याँ किंमें ईसू मसी की आत्मा ने हे तो वो मसी को ने हे।</verse>
				<verse number="10">अन यद्याँ थाँकामें मसी हे तो थाँकी देह पाप की वजेऊँ मरी तकी हे, तद्याँ भी आत्मा खरईपणा का वजेऊँ जीवती हे।</verse>
				<verse number="11">अन यद्याँ वाईस आत्मा जणी ईसू मसी ने मरिया तकाऊँ जीवतो किदो हे, थाँका मयने वास करे हे, तो वो जणी ईसू ने मरिया तकाऊँ जीवतो किदो हे, थाँकी नास वेबावाळी देह ने आपणी आत्माऊँ ज्या थाँका मयने वास करे हे, जीवाई।</verse>
				<verse number="12">हो मारा भायाँ, आपाँ पे ईं देह को करज तो हे, पण ओ जरूरी ने हे, आपाँ ईंका जस्यानीस जीवाँ।</verse>
				<verse number="13">काँके यद्याँ थाँ देह जस्यान जीवो, तो मरो, पण यद्याँ थाँ आत्मा का जस्यान देह की मरजी ने मार देवो, तो थाँ जीवता जीवो।</verse>
				<verse number="14">ज्यो परमेसर की आत्मा का जस्यान चाले हे, वीं परमेसर की ओलाद हे।</verse>
				<verse number="15">काँके ज्या आत्मा थाँने दिदी हे, वाँ थाँने पाच्छा दास बणाबा का वाते ने अन नेई दरपवा का वाते हे, पण वाँ आपाँने वींकी ओलाद बणाबा का वाते हे, जणीऊँ आपाँ “ओ बापू, ओ पापाँ” केन बलावा हा।</verse>
				<verse number="16">आ पुवितर आत्मा खुद आपणी आत्मा का हाते मलन गवई देवे हे के, आपाँ परमेसर की ओलाद हा।</verse>
				<verse number="17">अन यद्याँ आपाँ वींकी ओलाद हा, तो परमेसर का वारिस अन मसी का हाते पांतीदार भी हा। अन यद्याँ हाँची में आपाँ वींके हाते दक-सक में पांतीदार हा, तो वींके हाते आपाँने भी मेमा भी पांतीदार हा।</verse>
				<verse number="18">मूँ होचूँ हूँ के, ईं टेम ज्यो दुक आपाँ भोगरिया हा, वो वीं मेमा का आगे कईस ने हे, ज्याँ आगे आपणाँ पे आबावाळी हे।</verse>
				<verse number="19">काँके ओ जग घणी आसऊँ वीं टेम को वाट नाळरियो हे, जद्याँ परमेसर आपणी ओलाद परगट करी।</verse>
				<verse number="20">ओ जग खुद की मरजीऊँ ने पण ईंने बणाबावाळा की मरजीऊँ ने फलबा का अदिकार में ईं आसऊँ किदो ग्यो हे</verse>
				<verse number="21">के, यो भी आपणाँ नास वेबाऊँ छुटकारो पान परमेसर की ओलाद की मेमामय आजादी में पांतीदार वे।</verse>
				<verse number="22">काँके आपाँ जाणा हा के, अबाणू तईं हारी दनियाँ बाळक जणवा की पिड़ा का जस्यान तड़पन गा कररी हे।</verse>
				<verse number="23">अन आ दनियाईस ने पण आपाँ भी ज्याँने आत्मा को पेलो फळ मल्यो हो, आपाँ भी दकऊँ तड़परिया हा। काँके आपाँ ईं बात की वाट नाळरिया हे के, वो आपाँने आपणी ओलाद का जस्यान मान ले अन आपणो देहऊँ छुटकारो वे जावे।</verse>
				<verse number="24">काँके अणीस आस में आपणो छुटकारो व्यो हे। यद्याँ आपाँ जिंकी आस करा हा अन वींने देक ला, तो वाँ आस ने रेवे हे। ज्यो दिकरियो हे, वींकी आस कूण कर सके हे?</verse>
				<verse number="25">पण जिंने आपाँ कोयने देकाँ हा, वींकी आस करा हा, तो धीरज राकन वींकी वाट भी नाळा हा।</verse>
				<verse number="26">अस्यानीस पुवितर आत्मा आपणी कमजोरी में आपणी मदत करे हे, काँके आपाँ कोयने जाणा हा के, आपाँने परातना कणी रितीऊँ करणी हे। पण आत्मा खुद टेका करन आपणाँ वाते परातना करे हे, जिंने बोलन बतायो जाणो होरो कोयने हे।</verse>
				<verse number="27">पण वो मना की जाणबावाळो जाणे हे के, आत्मा की मनसा कई हे? काँके परमेसर की मरजीऊँ वाँ परमेसर का पुवितर मनकाँ वाते अरज करे हे।</verse>
				<verse number="28">अन आपाँ जाणा हा के, ज्यो मनक परमेसरऊँ परेम राके हे, वणा का वाते हारी बाताँ मलन भलई लावे हे। जीं परमेसर का मकसद का जस्यान बलाया ग्या हे।</verse>
				<verse number="29">जिंने वणा पेल्याईं चुण्या, वाँने वणी आपणो बेटा का जस्या बणाबा का वाते ते किदो, जणीऊँ नरई भायाँ मेंऊँ वो पेली पतो का बणे।</verse>
				<verse number="30">ज्याँने वणी पेल्याँईं चुण मेल्या हा, वाँने वणी बलाया अन ज्याँने वणी बलाया वाँने धरमी भी ठेराया हे, अन ज्याँने वणी धरमी ठेराया, वाँने वणी मेमा भी दिदी हे।</verse>
				<verse number="31">तो आपाँ अणा बाताँ ने देकन कई केवा? यद्याँ परमेसर आपणाँ आड़ी हे तो आपणाँ हामे कूण वे सके हे?</verse>
				<verse number="32">जणी आपणाँ बेटा ने भी राक्यो, पण आपणाँ हाराई वाते मरबा का वाते दे दिदो। तो पछे वीं वींके हाते आपाँने हारोई काँ ने देई?</verse>
				<verse number="33">परमेसर का चुण्या तका मनकाँ पे कूण दोस लगा सके हे? वो परमेसर ईं हे ज्यो वाँने निरदोस बणावे हे।</verse>
				<verse number="34">पछे कूण हे ज्यो आपाँने दोसी बतावे? काँके ईसू मसी आपणाँ वाते मरग्यो हो अन वींने पाछो जिवायो ग्यो। वोईस हे ज्यो परमेसर का जीमणा पाल्ड़े बेटो हे अन आपणाँ वाते अरज करे हे।</verse>
				<verse number="35">कूण हे ज्यो आपाँने मसी का परेमऊँ अलग करी? कई दक, कई तकलिपाँ, कई हताव, कई काळ, कई गरीबी, कई मोत की दरप टेम कन कटारी?</verse>
				<verse number="36">जस्यान सास्तर में लिक्यो हे के, “थाँरा वाते माँ हरेक टेम मोत का हाताँ में हूँप्यो जावा हा। माँने कटबावाळा गारा हमज्या जावे हे।”</verse>
				<verse number="37">अणा हारी बाताँ में माँकाऊँ परेम करबावाळा की वजेऊँ माँ जीतबावाळाऊँ भी बड़कर हा।</verse>
				<verse number="38">काँके मूँ पको जाणूँ हूँ के, ने मोत अन ने जीवन, ने हरग-दुत अन ने राज करबावाळी आत्मा, ने अबाणू की कुई चीज अन ने आबावाळा टेम की कुई चीज, ने कुई सगत्याँ,</verse>
				<verse number="39">अन ने उचाई, ने गेराई अन ने जग की कुई चीज आपाँने परमेसर का वीं परेमऊँ अलग कर सकी, ज्यो आपणाँ परबू ईसू मसी में हे।</verse>
			</chapter>
			<chapter number="9">
				<verse number="1">मूँ मसी में हाँची बोलरियो हूँ। मूँ जूट ने बोलूँ अन मारो मन ज्यो पुवितर आत्माऊँ मारी गवई देवे हे</verse>
				<verse number="2">के, मने घणो दुक हे अन मारा मन में घणी पिड़ा हे।</verse>
				<verse number="3">काँके, अस्यान वे सकतो के, मूँ यो छातो के, मूँ मारा यहूदी भई-बेन अन मारा देस का मनकाँ का वाते खुद पे हराप लेन ले मसीऊँ अलग वे जातो।</verse>
				<verse number="4">ज्यो इजराएली हे अन ज्याँने परमेसर की ओलाद वेबा को हक हे, ज्यो परमेसर की मेमा को दरसण कर चुक्या हे, ज्यो परमेसर का करार में पांतीदार हे। ज्याँने मूसा का नेमा अन हाँची भगती अन वादो दिदा तको हे।</verse>
				<verse number="5">बड़ाबा भी वाँकाऊँ सम्बधं राके हे अन मनक का रूप में मसी वाँका मेंईस जनम्याँ हा, ज्यो हाराई को परमेसर हे अन हमेस्यान धन्न हे। आमीन।</verse>
				<verse number="6">अस्यान ने के, परमेसर आपणाँ वादा ने पूरो ने किदा वे, काँके ज्यो इजराएल का बंस का हे, वीं हाराई परमेसर का मनक ने हे।</verse>
				<verse number="7">अन ने ईं अबराम का वंसज का वेबा की वजेऊँ वीं अबराम की ओलाद हे। पण जस्यान परमेसर अबरामऊँ क्यो हे के, “थाँरो बंस इसाकऊँ बड़ी।”</verse>
				<verse number="8">ईंको मतलब ओ हे के, परमेसर अबराम का पिड़ीऊँ देह का रूप में जनम्याँ मनकाँ ने आपणाँ मनक ने माने हे, पण परमेसर वाँने अबराम का बंस का माने, जीं परमेसर का वादा का जस्यान जनम्याँ हे।</verse>
				<verse number="9">वादो अस्यान किदो ग्यो हो के, “ते किदा तका टेम पे मूँ पाछो आऊँ अन सारा के बेटो वेई।”</verse>
				<verse number="10">योईस ने, पण जद्याँ रिबका भी आपणाँ बड़ाबा इसाकऊँ गरबवती वीं।</verse>
				<verse number="11">जोड़ला बाळक का जनमऊँ पेल्याँ अन वाँका कुई भी भलो-बुरो करबाऊँ पेल्याँ, परमेसर रिबकाऊँ क्यो, “मोटो बेटो फोरा की सेवा करी।” ताँके परमेसर के चुणाव को मकसद पूरो वेवे के, परमेसर को चुणाव वाँ दुयाँ के करमा का जस्यान ने हो। पण परमेसर की बुलाहट का जस्यान हे।</verse>
				<verse number="12"></verse>
				<verse number="13">सास्तर में लिक्यो तको हे के, “में याकूबऊँ परेम राक्यो, पण एसावऊँ नपरत राकी।”</verse>
				<verse number="14">तो पछे आपाँ कई केवा? कई परमेसर न्याव ने करबावाळो हे? ने अस्यान कोयने।</verse>
				<verse number="15">काँके वणा मूसाऊँ क्यो हो, “में जिंपे करपा करबा की होचूँ, वींपे करपा करूँ। अन जिंपे भी बाळ करणो छावूँ, वींपे बाळ करूँ।”</verse>
				<verse number="16">तो आ बात ने तो किंकी मरजीऊँ वेवे अन नेई कई मेनत करबाऊँ, पण आ तो परमेसर की दया की बात हे।</verse>
				<verse number="17">काँके सास्तर में परमेसर फिरोनऊँ क्यो हो के, “में थने ईं वाते राजो बणायो हे के, मूँ मारी सगती थाँरा पे बता सकूँ। अन मारा नाम को परच्यार हारी धरती पे किदो जावे।”</verse>
				<verse number="18">केवाँ को मतलब ओ हे के, परमेसर जिंपे छावे वींपे दया करे हे अन जिंने छावे, वींने गाटो बणा देवे हे।</verse>
				<verse number="19">तो वे सके, थाँकामूँ कुई मने के सके के, तो पछे परमेसर माकाँ पे दोस काँ लगावे हे? कूण हे ज्यो परमेसर की मरजी को विरोद कर सके हे?</verse>
				<verse number="20">हे मनक, थूँ कूण वेवे हे ज्यो परमेसर ने पलटन जवाब देवे? कई कुई हात की बणी तकी चीज वींके बणाबावाळा ने पूँछ सके हे, के, “थें मने अस्यान काँ बणाई?”</verse>
				<verse number="21">कई कुमार ने ओ हक ने हे के, वो गारा का एक लोदाऊँ एक ठामड़ो आदर का काम में आबा वाते अन दूजो बना आदर का काम में आबा वाते बणावे?</verse>
				<verse number="22">अस्यानीस जिंपे परमेसर आपणो गुस्सो अन तागत बताणी छावता हा, पण वणा गुस्सा का जोगा मनकाँ पे जी नास का आड़ी जारिया हा, वाँका पे खुब दया किदी।</verse>
				<verse number="23">जणीऊँ ज्याँने वणी आपणी मेमा देबा वाते त्यार कर मेल्या हा अन वींकी दया का जोगा हा, वाँपे वो आपणी मेमा को धन परगट कर सके।</verse>
				<verse number="24">आपीं वीं मनक हा, ज्याँने परमेसर बलाया हे, खाली यहूदीईस ने, पण ज्यो यहूदी ने हा, वीं भी हे।</verse>
				<verse number="25">जस्यान के होसे की किताब में लिक्यो हे के, “ज्यो मनक मारा ने हा वाँने मूँ खुद का मनक केऊँ। अन वाँ परजा ज्या लाडली ने ही वींने मूँ लाडली केऊँ।”</verse>
				<verse number="26">अन, “जणी जगाँ में वाँका वाते क्यो हो, ‘थाँ मारा मनक ने हो।’ वटेईस वीं जीवता परमेसर की ओलाद केवाई।”</verse>
				<verse number="27">अन परमेसर का आड़ीऊँ बोलबावाळो यसाया इजराएल का बारा में हेलो पाड़न केवे हे के, “इजराएल की ओलाद समन्द की रेत का जस्यान घणी ने जा सकी। तद्याँ भी वाँका मूँ थोड़ाक बंचाया जाई।</verse>
				<verse number="28">काँके परबू धरती पे आपणाँ न्याव ने पुरी तरियाऊँ आगतोई पूरो करी।”</verse>
				<verse number="29">अन जस्यान यसाया आगेवाणी किदी ही के, “यद्याँ जोरावर परबू आपणाँ वाते, वंसज ने छोड़ता तो आपाँ सदोम अन अरोमा का जस्यान पुरी तरियाऊँ नास वे जाता।”</verse>
				<verse number="30">तो पछे आपाँ कई केवाँ? माँ ईं नतीजा पे आया हा के, ज्यो यहूदी ने हा, वीं मनक धारमिकता की खोज में ने हा, वणा धारमिकता पा लिदी हे। वीं ज्यो विस्वास की वजेऊँ खरा ठेराया ग्या।</verse>
				<verse number="31">पण इजराएल का मनक नेमा पे चालणा छाता हा, ज्यो वाँने धरमी ठेराती, पण वीं वाँने पा ने सक्या।</verse>
				<verse number="32">अस्यान काँ ने वे सक्यो? काँके वीं ईंने विस्वासऊँ ने पण आपणाँ करमाऊँ पाणा छारिया हा, वीं वणी भाटाऊँ ठोकर खा ग्या, ज्यो ठोकर खवाड़तो हो।</verse>
				<verse number="33">जस्यान सास्तर केवे हे के, “हुणो, में सिय्योन में एक भाटो मेल राक्यो हूँ, ज्यो ठोकर खवाड़े हे अन एक छाँट ज्यो पाप करावे हे। पण वो ज्यो वींमें विस्वास करी, वो कदी हरमा ने मरी।”</verse>
			</chapter>
			<chapter number="10">
				<verse number="1">हो मारा भायाँ-बेना, मारी मन की मरजी हे अन मूँ परमेसरऊँ हाराई इजराएली मनकाँ का वाते परातना करूँ हूँ के, वीं बंचाया जावे।</verse>
				<verse number="2">काँके मूँ वाँकी गवई दे सकूँ के, वाँका में परमेसर की धुन हे। पण वाँ ग्यान पे ने टकी तकी हे।</verse>
				<verse number="3">काँके वीं परमेसर की धारमिकताऊँ अणजाण वेन वीं आपणी धारमिकता का थापणा करबा की कोसीस कररिया हे। ईं वाते वणा परमेसर की धारमिकताने ने मानी।</verse>
				<verse number="4">मसी नेमा को अंत हे, ताँके ज्यो भी विस्वास करी, वीं हाराई परमेसर का वाते खरा बणे।</verse>
				<verse number="5">नेमाऊँ आबावाळी धारमिकता का बारा में मूसे लिक्यो हे के, “ज्यो नेमा पे चाली, वो वींकी वजेऊँ जीवतो रेई।”</verse>
				<verse number="6">पण विस्वासऊँ मलबावाळी धारमिकता का बारा में सास्तर अस्यान केवे हे के, “थूँ खुद आपणाँ मन में यो मती केज्ये के, ‘हरग में मसी ने धरती पे लाबा का वाते कूण जाई?’”</verse>
				<verse number="7">कन “पाताळ में मसी ने मरिया तकाऊँ पाच्छा लाबा का वाते कूण जाई?”</verse>
				<verse number="8">सास्तर केवे हे के, “बचन थाँरा नके हे, थाँरा होट पे हे अन थाँरा मन में हे।” वोईस विस्वास को बचन, जिंको आपाँ परच्यार कररिया हा।</verse>
				<verse number="9">यद्याँ थूँ आपणाँ मुण्डाऊँ केवे, “ईसू परबू हे,” अन आपणाँ मन में ओ विस्वास करे के, परमेसर वींने मरिया तकाऊँ जीवतो किदो हे, तो थूँ बंचायो जाई।</verse>
				<verse number="10">काँके आपणाँ मन का विस्वासऊँ मनक धरमी बणायो जावे हे अन खुद का मुण्डाऊँ वींका विस्वास ने मानबाऊँ, वो बंचायो जावे हे।</verse>
				<verse number="11">सास्तर केवे हे के, “ज्यो कुई भी वींमें विस्वास करे हे, वींने लाजा ने मरणो पड़ी।”</verse>
				<verse number="12">यहूदी मनकाँ में अन ज्यो यहूदी ने हे वाँ मनकाँ में कई फरक ने हे, काँके वीं हाराई को एकीस परबू हे। अन वींकी मान दया वाँ हाराई वाते हे ज्यो वींको नाम लेवे हे।</verse>
				<verse number="13">काँके, “ज्यो भी परबू को नाम लेवे हे, वो बंचायो जाई।”</verse>
				<verse number="14">पण ज्यो वींपे विस्वास ने करे, वीं वींको नाम कस्यान लेई? अन जणा वींके बारा में हुण्यो भी ने हे, वीं वींपे विस्वास कस्यान करी? अन जद्याँ तईं वाँने कुई उपदेस देबावाळो ने वेवे तो वीं कस्यान हुण सकी?</verse>
				<verse number="15">अन हुणाबावाळा ने खन्दावाँ, तो वीं कस्यान हुणा सकी? जस्यान के सास्तर में लिक्यो हे, “हव हमच्यार हुणाबावाळा का पग करता हुवावणा हे।”</verse>
				<verse number="16">पण हाराई हव-हमच्यार ने ने मान्यो। यसाया केवे हे, “ओ परबू, माकाँ उपदेस पे कणी विस्वास किदो?”</verse>
				<verse number="17">हूणबाऊँ विस्वास आवे हे अन हूणणो मसी का बचनाऊँ वेवे हे।</verse>
				<verse number="18">पण मूँ बोलूँ हूँ, “कई वणा उपदेस ने हुण्यो?” हा, पकोई हुण्यो। सास्तर बोले हे, “वाँकी अवाज हारी धरती पे फेलगी, अन वाँका बचन धरती का ईं खुणाऊँ वीं खुणा तईं पोंछग्यो हे।”</verse>
				<verse number="19">पण मूँ पूँछू हूँ के, “कई इजराएली ने जाणता हा?” मूसो पेल्याँ क्यो हो के, “मूँ थाँका मना में वाँ मनकाँ का जरिये रिस्याँ पेदा करूँ। मूँ विस्वास ने करबावाळा घराणा का जरिये थाँने गुस्सा देवाड़ूँ।”</verse>
				<verse number="20">पछे यसाया हिम्मत का हाते क्यो हे के, “मूँ वाँने मल्यो जीं मने ने होदरिया हा।” “मूँ वणा वाते परगट व्यो, ज्यो मारी खोज खबर ईं कोयने ही।</verse>
				<verse number="21">“पण परमेसर इजराएल्याँ का बारा में क्यो हे, “में हाराई दन मारी ने मानबावाळा अन विरोद वाळा का आगे हात फेलायो हो।”</verse>
			</chapter>
			<chapter number="11">
				<verse number="1">तो मूँ पूँछू हूँ के, “कई परमेसर आपणी इजराएली मनकाँ ने नकार दिदा?” ने अस्यान कोयने हे। काँके मूँ भी अबराम का वंस को अन बिन्यामीन के गोत को इजराएली हूँ।</verse>
				<verse number="2">परमेसर आपणाँ इजराएली मनकाँने ने नकारिया हे, ज्याँने वीं पेल्याँई जाणता हा। कई थाँ ने जाणो हो के, एलिया का बारा में सास्तर कई केवे हे, जद्याँ एलियो इजराएल का मनकाँ का विरोद में अरज कररियो हो?</verse>
				<verse number="3">“ओ परबू, वणा थाँका आड़ीऊँ बोलबावाळा ने मार नाक्या अन थाँकी वेद्‍या ने तोड़ नाकी। अन मने छोड़न थाँरा आड़ीऊँ बोलबावाळा में कुई भी ने बच्यो अन वीं मने भी मारबा की ताक में हे।”</verse>
				<verse number="4">पण परमेसरऊँ वींने कई जवाब मल्यो, “में मारा वाते हात हजार मनकाँ ने बंचा मेल्या हे, ज्यो जूटा देवता बाल का आगे गोडा ने टेकी।”</verse>
				<verse number="5">अस्यान अबाणू भी थोड़ाक इजराएली मनक हे ज्यो परमेसर करपा की वजेऊँ चुण्या तका हे।</verse>
				<verse number="6">यद्याँ ओ परमेसर की करपा को नतीजो हे, तो ओ मनकाँ का करमा को नतीजो ने हे। ने तो करपा ने केवाती।</verse>
				<verse number="7">तो ईंको कई मतलब? इजराएल का मनकाँने वो ने मल्यो, जिंने वीं होदरिया हा, पण चुण्या तका ने वो मलग्यो। अन बाकी हाराई का मन ने गाटा कर दिदा ग्या।</verse>
				<verse number="8">सास्तर में लिक्यो तको हे, “परमेसर वाँने बना चेता की आत्मा दिदी। ‘अस्यान की आक्याँ दिदी ज्याँने दिके कोयने। अन अस्यान का कान्दड़ा दिदो ज्यो हुण ने सके।’ अन आ दसा अबाणू तईं बणी तकी हे।”</verse>
				<verse number="9">दाऊद केवे हे, “वाँके खुद का खाणो वाँका वाते फंदो, जाळ, ठोकर अन दण्ड को मस बण जावे।</verse>
				<verse number="10">वाँकी आक्याँ धूधळी वे जावे, जणीऊँ वीं देक ने सके अन वाँकी कमर हमेस्यान वाँकी नमी रेवे।”</verse>
				<verse number="11">तो पछे मूँ पूँछू हूँ के, कई वणा ईं वाते ठोकर खादी के, वीं नास वे जाई? अस्यान कोयने। पण वाँका गलती करबाऊँ ज्यो यहूदी ने हा, वाँ मनकाँ ने छुटकारो मल्यो, ताँके यहूदी मनकाँ में होड़ा-होड़ पेदा वेवे।</verse>
				<verse number="12">अस्यान यद्याँ वाँका गलती करबा को मतलब दनियाँ की भरपुरी हे अन वाँका नाकाम वेबाऊँ ज्यो यहूदी ने हा, वाँ मनकाँ की भरपुरी हे, तो वणा हाराई के एक हाते वेबाऊँ तो कतरी ओरी भरपुरी वेई।</verse>
				<verse number="13">अबे मूँ थाँ ज्यो यहूदी ने हो, थाँकाऊँ केरियो हूँ। काँके जस्यान खासतोर मूँ ज्यो यहूदी ने हे वाँ मनकाँ का वाते थरप्यो तको चेलो हूँ, अन मने मारा काम में गुमान हे काँके में मारा काम में पूरो मन लगा राक्यो हे।</verse>
				<verse number="14">अस्यानीस मूँ छावूँ हूँ के, कस्यान भी मारा मनकाँ में होड़ा-होड़ ला सकूँ, जणीऊँ वाँका मूँ थोड़ागणा ने बचा लूँ।</verse>
				<verse number="15">काँके यद्याँ परमेसरऊँ वाँको नकारियो जाणो दनियाँ में मेल-मिलाप लावे, तो वाँने अपणायो जाणो मरिया तकाऊँ जिवाया जणो कोनी वे सके हे कई?</verse>
				<verse number="16">यद्याँ आपणाँ भेंट को भोग पुवितर हे तो वा हारोई पुवितर हे? यद्याँ रूँकड़ा की जड़ा पुवितर हे, तो वींकी डाळ्याँ भी पुवितर हे।</verse>
				<verse number="17">पण जद्याँ थोड़ीक डाळ्याँ तोड़न फेंक दिदी जावे अन थाँ ज्यो एक जंगल का जेतुन रूँकड़ा का जस्यान हो अन थाँने वणा फेंकी तकी डाळ्याँ की जगाँ कलम किदा जावे, तो थाँ वीं रूँकड़ा ने जड़ाऊँ मलबावाळी चिजाँ में भागेदारी लेवो।</verse>
				<verse number="18">तद्याँ थाँने वाँ डाळ्याँ का हामे जीं तोड़न फेंकी गी हे, मेपणो ने करणो छावे। अन जद्याँ मेपणो करो, तद्याँ ध्यान राको के, ईं थाँ कोयने हो ज्यो जड़ा ने पाळरिया हो, या तो वाँ जड़ हे ज्यो थाँने पाळरी हे।</verse>
				<verse number="19">अबे थूँ बोली, “हा, पण डाळ्याँ ईं वाते तोड़ी गी, ताँके मूँ वींमें कलम चड़ायो जऊँ।”</verse>
				<verse number="20">आ बात हाँची हे। पण वीं आपणाँ विस्वास ने करबा की वजेऊँ तोड़ी गी, पण थाँ थाँका विस्वास की वजेऊँ थाँकी जगाँ टक्या तका रेवो। तो ईंको मेपणो मती करो, पण दरपता रेवो।</verse>
				<verse number="21">जद्याँ परमेसर असली डाळ्याई ने छोड़ी, तो वो थाँने भी ने छोड़ी।</verse>
				<verse number="22">तो थूँ परमेसर की दया ने देक अन वींका गाटापणा पे ध्यान दे। ओ गाटापणा वाँका वाते हे ज्यो रेटे पड़ग्या हा, पण वाँकी दया थाँरा वाते हे। यद्याँ थूँ खुद पे वींकी दया बणी तकी रेवा देई। ने तो थने भी काटन फेंक दिदो जाई।</verse>
				<verse number="23">अन जद्याँ वीं अविस्वासी ने रेई, तद्याँ वाँने वीं रूँकड़ा में जोड़ दिदा जाई, काँके परमेसर वाँने पाच्छा जोड़बा का वाते तागतवार हे।</verse>
				<verse number="24">जद्याँ थने जनमऊँ जंगल का जेतुन का रूँकड़ाऊँ एक डाळी की तरियाँ काटन नेमा का विरोद में एक हव जेतुन का रूँकड़ाऊँ जोड़ दिदो ग्यो, तो ईं ज्यो वीं रूँकड़ा के खुद की डाळ्याँ हे खुद का रूँकड़ा में पाच्छी काँ ने जोड़ी जाई?</verse>
				<verse number="25">हो मारा भायाँ, कटे अस्यान ने वे के, थाँ खुद ने घणा हूँस्यार हमजबा लागो, ईं वाते मूँ थाँने ईं छाने का हाँचऊँ अणजाण ने राकणा छावूँ हूँ, काँके इजराएल का मनक अस्यानीस गाटा बणा दिदा ग्या हे अन अस्यानीस तद्याँ तईं गाटा बण्या रेई जद्याँ तईं जी यहूदी ने हे वाँ मनकाँ मेंऊँ जीं चुण्या तका हे, वीं हाराई परमेसर का नके ने आ जावे।</verse>
				<verse number="26">अन अस्यान हाराई इजराएली बंचाया जाई। जस्यान के सास्तर केवे हे, “बंचाबावाळो सिय्योनऊँ आई, वो याकूब का घराणा मेंऊँ हाराई अधरम छेटी करी।</verse>
				<verse number="27">वाँका वाते मारो वादो योईस हे के, मूँ वींका पाप ने छेटी कर देऊँ।”</verse>
				<verse number="28">जद्याँ तईं हव हमच्यार को सवाल हे वीं थाँका नफा में परमेसर का दसमण हे, पण जद्याँ तईं परमेसर का हाताऊँ चुण्या जाबा की बात हे, तद्याँ वीं वाँका बड़ाबा का वजेऊँ परमेसर का लाड़ला हे।</verse>
				<verse number="29">काँके परमेसर बलायो जाणो अन वींका वरदान कदी ने बदल्या जा सके हे।</verse>
				<verse number="30">काँके जस्यान पेल्याँ थाँ ज्यो यहूदी ने हो, थाँ परमेसर की आग्याने ने मानता हा, पण अबे यहूदी मनकाँ के आग्याने ने मानबा की वजेऊँ थाँने परमेसर के दया मली हे।</verse>
				<verse number="31">वस्यानीस अबे वीं वींकी आग्याने ने माने, काँके परमेसर की दया थाँका पे हे। ताँके वाँने भी अबे परमेसर की दया मले।</verse>
				<verse number="32">काँके परमेसर हाराई मनकाँ ने आग्या ने मानबा की कोटड़ी में गेर मेल्या हे के, वीं वाँका पे दया करे।</verse>
				<verse number="33">परमेसर की भरपुरी, अकल अन ग्यान को कई पार ने हे। वींको न्याव कतरो गेरो अन वींका गेला कतरा भेदऊँ भरिया हे।</verse>
				<verse number="34">जस्यान सास्तर लिक्यो तको हे के, “परबू का मन ने कूण जाणे हे? अन वींने सला देबावाळो कूण वे सके हे?”</verse>
				<verse number="35">“परमेसर ने कणी कई दिदो? के वो वींने पाछो देवे।”</verse>
				<verse number="36">काँके हाराई ने रचबावाळो वोईस हे। वणीऊँस हाराई हे अन वीं वींका वातेईस हे। वींकी मेमा हमेस्यान वेती रेवे! आमीन।</verse>
			</chapter>
			<chapter number="12">
				<verse number="1">ईं वाते हो मारा भायाँ, मूँ थाँने परमेसर की दया की आद अवाड़न थाँकाऊँ अरज करूँ हूँ के, थाँ थाँकी देह ने जीवता अन पुवितर बलीदान का रूप में परमेसर ने राजी करबा का वाते दिदो। आ थाँकी आत्मा की हाँची सेवा हे, जिंने थाँने करणी हे।</verse>
				<verse number="2">अबे ओर ईं दनियाँ का गेला पे मती चालो, पण थाँका मना ने नवा करन खुद ने बदल लेवो, जणीऊँ थाँ परमेसर की मरजी ने परको अणजाण सको हे, मतलब ज्यो हव अन ज्यो वींने भावे हे अन ज्यो सिद हे।</verse>
				<verse number="3">ईं वाते वींकी दया की वजेऊँ ज्या मने मली हे। वींने ध्यान में लेन मूँ थाँने केवूँ हूँ जतरा थाँ हो वणी हेला खुद ने मती हमजो हे, पण विस्वास का जस्यान जतरी कबालियत परमेसर थाँने दिदी हे वतरोइस खुद ने हमजो।</verse>
				<verse number="4">काँके जस्यान आपणाँ एक देह में अलग अलग काम करबावाळा अलग अलग अंग हे।</verse>
				<verse number="5">वस्यानीस आपाँ घणा हा, पण मसी में आपाँ एक देह हा। अस्यान हाराई अंग एक दूजाँ का हाते जड़या तका हे।</verse>
				<verse number="6">वींकी दया जस्यान आपाँने ज्यो अलग अलग वरदान मल्या हे। जस्यान किंने परमेसर का आड़ीऊँ बोलबा को वरदान हे, तद्याँ वो आपणाँ विस्वास का जस्यान परमेसर का आड़ीऊँ बोले।</verse>
				<verse number="7">जद्याँ किंने सेवा करबा को वरदान मल्यो हे, तद्याँ वो सेवा करे, जद्याँ कणी ने हिकाबा को वरदान मल्यो हे, तद्याँ वो हिकावे।</verse>
				<verse number="8">जद्याँ किंने दूजाँ ने हिम्मत बडाबा को वरदान मल्यो हे तो वो हिम्मत बड़ावे। जद्याँ किंने दान देबा को वरदान मल्यो हे तो वो खुला मनऊँ दान देवे। जद्याँ किंने अगुवाई करबा को वरदान मल्यो हे तो वो मन लगान अगुवाई करे, अन जद्याँ किंने दया करबा को वरदान मल्यो हे तो वो राजी मनऊँ दया करे।</verse>
				<verse number="9">थाँको परेम हाँचो वेवे। बुरईऊँ नपरत राको अन खरईऊँ जुड़या तका रो।</verse>
				<verse number="10">एक दूजाँ का हाते हाँचो परेम राको। एक दूजाँ ने खुदऊँ हेलो मान दो।</verse>
				<verse number="11">मेनत करबावाळा बणो आळसी ने, आपणी आत्मा में जोस भरो अन परबू की सेवा करता रेवो।</verse>
				<verse number="12">आपणी आस में राजी रो, दुक में हिम्मत राको। हमेस्यान परातना करता रेवो।</verse>
				<verse number="13">परमेसर का मनकाँ की जरुरत में वाँकी मदत करो। मेमान की आवभगत करबा को मोको होदता रेवो।</verse>
				<verse number="14">थाँने हताबावाळा ने आसिरवाद दो। वाँने हराप मती दो, पण आसिरवाद दो।</verse>
				<verse number="15">ज्यो राजी हे वाँके हाते राजी रेवो अन ज्यो रोवे हे, वाँका हाते रोवो।</verse>
				<verse number="16">आपस में एक मन राको। मेपणो मती करो, पण दन-दक्या का हाते संगत करिया करो। अन खुद यो मती होचो के, खाली माँईस अकलवान हा।</verse>
				<verse number="17">बुरई को बदलो बुरईऊँ किंने भी मती देवो। ज्यो हाराई के नजरा ने हव लागे, बेस वोईस करो।</verse>
				<verse number="18">जटे तईं वेवे, हाराई मनकाँ का हाते सान्तीऊँ रेवो।</verse>
				<verse number="19">मारा लाड़ला, कणीऊँ खुद बदलो मती लो, पण ईंने परमेसर का गुस्सा ने मोको दो, काँके सास्तर में लिक्यो हे के, “परबू क्यो, बदलो लेणो मारो काम हे, ईंको फळ मूँ देऊँ।”</verse>
				<verse number="20">पण थूँ तो, “यद्याँ थाँरो दसमण भुको वे तो वींने खाणो खवाड़। यद्याँ वो तरियो वे, तो वींने पाणी पिबा का वाते दे। यद्याँ थूँ अस्यान करी, तो अणीऊँ वो हरमा मरी अन नानो नानो वेई।”</verse>
				<verse number="21">बुरईऊँ मती हारो, पण खरईऊँ बुरई ने हरावो।</verse>
			</chapter>
			<chapter number="13">
				<verse number="1">हाराई मनकाँ ने अदिकारियाँ का रेटे रेणो छावे। काँके परमेसर की मरजी का बना कुई राज ने कर सके, अन अदिकारियाँ ने परमेसरइस बणावे हे।</verse>
				<verse number="2">तो ज्यो भी अदिकारियाँ को विरोद करे हे, वो परमेसर की आग्या को विरोद करे हे। अन ज्यो परमेसर की आग्या को विरोद करे हे, वाँने सजा मली।</verse>
				<verse number="3">देको राज करबावाळा खरई करबावाळा ने, पण बुरा काम करबावाळा दरपाबा का वाते हे। अन यद्याँ थाँ अदिकारियाऊँ दरपणा ने छावो हो, तो हव काम करो। तो थाँने वाँकाऊँ बड़ई मली।</verse>
				<verse number="4">ज्यो अदिकारी हे, वीं थाँके भलो करबा का वाते परमेसर को दास हे। पण यद्याँ थाँ बुरो करो हो तो वणाऊँ दरपो, काँके वणा यूँई तरवार ने लिदी हे। वीं परमेसर का दास हे, ज्यो बुरई करबावाळा पे वींका न्याव ने लावे हे।</verse>
				<verse number="5">ईं वजेऊँ थाँने अदिकारियाँ की आग्या मानणी जरूरी हे। सजा की दरपऊँईस ने पण थाँका अंतर-आत्मा की वजेऊँ भी ओ जरूरी हे।</verse>
				<verse number="6">ईं वातेईस थाँ कर भी देवो हो, काँके अदिकार राकबावाळा परमेसर का दास वेवे हे ज्यो आपणाँ काम ने पूरो करबा में लाग्या रेवे हे।</verse>
				<verse number="7">किंकी भी उदारी हे तो वींने चुका दो, अन ज्यो कर थाँने देणो हे वो दिदो। किंको जद्याँ हाँसल निकळे, तो वींने दिदो। जणीऊँ दरपणो छावे, वणीऊँ दरप। जिंको आदर करणा छावे, वींको आदर कर।</verse>
				<verse number="8">एक-दूँजा का परेम का अलावा किंको करजो खुद पे मती राको, काँके एक-दूजाऊँ परेम करबावाळो नेमा ने माने हे।</verse>
				<verse number="9">जस्यान के, “थूँ कुकरम मती करज्ये, हत्या मती करज्ये, चोरी मती करज्ये, दूजाँ की चिजाँ को लोब मत करज्ये।” अस्या हाराई नेम अन ज्यो नेम बचग्या हे, वीं हाराई ईं आग्या में आ जावे हे के, “थूँ दूजाऊँ भी थाँरे जस्यानीस परेम राक।”</verse>
				<verse number="10">जद्याँ थाँ कणीऊँ परेम करो हो, तो थाँ वाँको बुरो ने छावो हो। परेम करबावाळो हाराई नेमा ने माने हे।</verse>
				<verse number="11">टेम ने देकता तका थाँ अस्यान करो, काँके थाँ जाणग्या हो के, नींदऊँ जागबा की टेम आगी हे। अन जद्याँ आपाँ विस्वास किदो हो, वीं टेमऊँ का हस्याबूँ आपणो छुटकारो अबाणू हेलो नके हो।</verse>
				<verse number="12">रात वेबावाळी हे अन दन उगबावाळो हे। ईं वाते आवो, अंदारा का काम करणा छोड़ दा अन लड़बा का वाते उजिता का हत्यार लीला।</verse>
				<verse number="13">तो काँ ने आपाँ भी वणी तरियाऊँ रेवा, जस्यान मनक दन का उजिता में रेवे हे। ने तो खा-पीन धुत रेबावाळा का जस्यान, ने कुकरम, लुचापणा करबावाळा की तरियाँ अन ने लड़बावाळा का जस्यान अन ने रिस्याँ बळबावाळा का जस्यान।</verse>
				<verse number="14">पण परबू ईसू मसी का हाव-भाव ने धारण करलो, अन आपणाँ पापी वेवार ने अन मन की मरजी ने काबू में राको।</verse>
			</chapter>
			<chapter number="14">
				<verse number="1">ज्यो विस्वास में कमजोर हे वाँने भी हाते राको, पण वाँका बच्याराँपे बेस मती करो।</verse>
				<verse number="2">थोड़ाक मनकाँ को विस्वास वाँने हारोई खाबा की इजाजत देवे हे, पण जीं विस्वास में कमजोर हे वीं साग-पातईस खावे।</verse>
				<verse number="3">ज्यो हारोई खावे हे वीं वणा मनकाँ ने बेकार ने हमजे जीं हारोई ने खावे हे। अन जीं साग-पात खावे हे, वीं वाँको न्याव ने करे, ज्यो हारोई खावे हे, वाँको काँके परमेसर वाँने अपणा लिदा हे।</verse>
				<verse number="4">किंका दूजाँ के दास को न्याव करबावाळा थाँ कूण वेवो हो? वीं सफल वेई के, ने वेई ईं बात को न्याव करबावाळो वाँका खुद को मालिक हे। अन वीं सफल वेई, काँके परबू वाँने सफल बणाबा की तागत राके हे।</verse>
				<verse number="5">कुई मनक एक खास दन ने हेलो माने हे, अन दूजाँ माने हे के, हाराई दन बराबर हे। तो हरेक मनक ने आपणे मन पे पुरी तरियाऊँ ते करणो छावे।</verse>
				<verse number="6">ज्यो मनक कणी दन ने एक खास दन माने हे वो अस्यान परबू ने आदर देबा का वाते करे हे। अन ज्यो हारोई खावे हे वो भी परबू ने आदर देबा का वाते खावे हे, काँके वीं रोटी का वाते परमेसर ने धन्नेवाद देवे हे। ज्यो थोड़ीक चिजाँने ने खावे वीं भी अस्यान परबू का आदर में करे हे अन परमेसर ने धन्नेवाद देवे हे।</verse>
				<verse number="7">आपणाँ मूँ कुई भी खुद का वाते ने जीवे अन ने खुद का वाते मरे हे।</verse>
				<verse number="8">ईं वाते यद्याँ आपाँ जीवाँ हा, वो परबू का वाते हे अन यद्याँ मरा हा वो भी परबू का वाते हे। तो पलई आपाँ जीवाँ कन मरा, आपाँ हा तो परबू काईंस हा।</verse>
				<verse number="9">काँके जीवता अन मरिया तका को परबू वेबा का वाते मसी मरियो अन पाछो जीवतो व्यो।</verse>
				<verse number="10">तो थाँ, दूजाँ को न्याव काँ करो हो? अन दूजाँ विस्वास्याँ ने नीचा काँ मानो हो? आपाँ हाराई ने परमेसर की गादी हामे न्याव का वाते ऊबा वेणो पड़ी।</verse>
				<verse number="11">जस्यान सास्तर में लिक्यो तको हे। “परबू क्यो हे, मूँ जीवतो परमेसर हूँ ‘हाराई मारी आगे गोडा टेकी, अन हाराई मानी के, मूँ परमेसर हूँ।’”</verse>
				<verse number="12">आपणाँ मेंऊँ हाराई जणा ने परमेसर का हामे खुद को लेको देणो पड़ी।</verse>
				<verse number="13">ईं वाते आपाँ एक दूजाँ में गलती काड़णी बन्द करा। ईंकी बजाय ईं बात में पाका वेवा के, दूजाँ भई ने पाप करबा का वाते ने उकसावा।</verse>
				<verse number="14">परबू ईसू का गट-जोड़ में, मूँ पको मानूँ हूँ के, कस्यी भी चीज असुद कोयने। वाँ खाली वणी वाते असुद हे ज्यो वींने असुद माने हे।</verse>
				<verse number="15">जद्याँ थाँके खाबाऊँ कणी विस्वासी भई ने ठेस लागे हे, तो थाँ हाँची में परेम को वेवार ने कररिया हो। तो थाँ खाबाऊँ वींको नास मती करो, काँके वाँका वाते भी मसी आपणो जीव दिदो हो।</verse>
				<verse number="16">तो ज्यो थाँरा वाते हव हे वणीऊँ थाँरो नाम खराब मती कर।</verse>
				<verse number="17">काँके परमेसर का राज में बेस खाणो-पिणो ने हे, पण वो तो धारमिकता, सान्ती अन पुवितर आत्माऊँ मल्यो तको आणन्द हे।</verse>
				<verse number="18">ज्यो मसी की ईं तरियाऊँ सेवा करे हे, वणीऊँ परमेसर राजी रेवे हे अन मनक वींको मान करे हे।</verse>
				<verse number="19">तो, वणा बाताँ में लाग्या रेवो, जीं सान्ती बड़ावे हे अन एक दूजाँ की आत्मिक बढोतरी में मदत मले हे।</verse>
				<verse number="20">खाबा का वाते परमेसर का काम ने मती वगाड़ो। हाराई तरियाँ को खाणो सुद हे पण जद्याँ कई खाबाऊँ कुई भई पाप में पड़े, तो वींने खाणो गलत हे।</verse>
				<verse number="21">माँस खाणो हव ने हे, दारू पिणो हव ने हे अन कस्यो भी अस्यान को काम करणो हव ने हे ज्यो थाँका भायाँ ने पाप में नाके हे।</verse>
				<verse number="22">अणा बाताँ का बारा में थाँरा विस्वास ने परमेसर अन खुद का बचमें राक। वीं धन्न हे ज्यो जणा बाताँ ने हव हमजे हे, वींमें वीं खुद दोसी ने ठेरी।</verse>
				<verse number="23">पण जद्याँ कुई अस्यान की चीज खावे हे, जिंके खाबाऊँ वो संका में वे, तो वो दोसी वेवे हे। काँके वींको खाणो वींका विस्वास का जस्यान कोयने हे अन वो हारोई ज्यो विस्वास पे ने टक्यो तको, वो पाप हे।</verse>
			</chapter>
			<chapter number="15">
				<verse number="1">आपाँ ज्यो विस्वास में गाटा हा, आपाँने वाँकी कमजोरी सेण करणी छावे ज्यो विस्वास में कमजोर हे। आपाँ बेस खुद नेईं राजी ने करा।</verse>
				<verse number="2">आपणाँ मेंऊँ हाराई जणा दूजाँ की भलई का वाते राजी करणा छावे, ताँके वीं विस्वास में गाटा वेवे।</verse>
				<verse number="3">अटा तईं के मसी भी खुद ने राजी ने किदो हो। पण जस्यान मसी का बारा में सास्तर केवे हे के, “जणा थाँरो अपमान किदो हो, वो अपमान मारा पे आ पड़्यो हे।”</verse>
				<verse number="4">हरेक बात ज्या सास्तर में लिकी गी, वाँ आपाँने हिक देबा का वाते हे। जणीऊँ ज्यो धिज्यो अन हिम्मत सास्तरऊँ मले हे, वणीऊँ आपाँने आस मले।</verse>
				<verse number="5">धिज्यो अन हिम्मत देबावाळा परमेसर थाँने ईसू मसी का जस्यान एका को मन दे।</verse>
				<verse number="6">जणीऊँ थाँ एक मन अन एक अवाज वेन आपणाँ परबू ईसू मसी का बापू परमेसर की मेमा करो।</verse>
				<verse number="7">परमेसर की बड़ई करबा का वाते एक दूजाँ ने अपणा लो, जस्यान मसी थाँने अपणाया हा।</verse>
				<verse number="8">में थाँने बताऊँ हूँ के, पुरबजाऊँ किदा तका परमेसर का वादा का हाँच ने हाँचो साबत करबा का वाते मसी परमेसर की हाँच का जस्यान यहूदी मनकाँ को दास बण्यो।</verse>
				<verse number="9">ईं वाते जीं यहूदी ने हे, वीं मनक भी परमेसर ने वींकी दया का वाते मेमा देवे हे, जस्यान के सास्तर में लिक्यो तको हे, “ईंका वाते मूँ ज्यो यहूदी ने हे, वणा मनकाँ में थाँरी बड़ई करूँ, मूँ थाँका नाम की मेमा वाँमें गाऊँ।”</verse>
				<verse number="10">अन ओ भी क्यो ग्यो हे के, “हो मनकाँ, ज्यो यहूदी ने हो, परमेसर का मनकाँ का हाते राजी वेवो।”</verse>
				<verse number="11">अन सास्तर अस्यान भी केवे हे, “हो मनकाँ ज्यो यहूदी ने हो, थाँ परबू की बड़ई करो। हाराई मनक वींकी बड़ई करो!”</verse>
				<verse number="12">ओरी पाछो, यसायो भी केवे हे, “यिसे का वंस मेंऊँ एक परगट वेई ज्यो वणा मनकाँ पे राज करी जीं यहूदी ने हे। अन वीं मनक वींपे आस लगाया राकी।”</verse>
				<verse number="13">आस देबावाळो परमेसर थाँका मना ने सान्ती अन खुसीऊँ भर देवे जस्यान वींमें थाँको विस्वास हे, जणीऊँ पुवितर आत्मा की तागतऊँ थाँ आसऊँ भरपूर वे जावो।</verse>
				<verse number="14">हो मारा भायाँ, मने पाको पतो हे के, थाँ भलईऊँ भरिया तका हो, ग्यान अन एक दूजाँ ने हिकाबा में पाको हो।</verse>
				<verse number="15">पण ईं कागद में, मूँ थाँने आद अवाड़ का वाते थोड़ीक बाताँ साप साप लिकी हे, अन अस्यान में मने मली तकी परमेसर की दया की वजेऊँ किदो हे।</verse>
				<verse number="16">काँके जी यहूदी ने हे, वाँ मनकाँ का वाते ईसू मसी को दास वेन, मूँ परमेसरऊँ मल्या तका हव हमच्यार को परच्यार करबा का वाते मूँ एक याजक की जस्यान काम करूँ हूँ, जणीऊँ वीं मनक भी परमेसर के चड़बा जोगी भेंट बण सके अन पुवितर आत्मा के जरिये परमेसर का वाते पुरी तरियाँ पुवितर बणे।</verse>
				<verse number="17">ईं वाते ईसू मसी की वजेऊँ परमेसर की सेवा ज्या मूँ करूँ हूँ वींमें मूँ मेपणो करूँ हूँ।</verse>
				<verse number="18">काँके मूँ बेस वणा बाताँ ने करबा की हिम्मत करूँ हूँ ज्याँने मसी जी यहूदी ने हे, वाँ मनकाँ ने परमेसर ने मानबा का वाते मारा बचना, मारा करम,</verse>
				<verse number="19">तागत का हेन्याण अन अचम्बा का काम अन परमेसर की आत्मा की तागतऊँ मारी जरिये पूरो किदो। अस्यान में यरूसलेम नगरऊँ लेन इल्‍लुरिकुम परदेस का च्यारूँमेर मसी का हव हमच्यार का परच्यार को काम पूरो किदो।</verse>
				<verse number="20">मारी हमेस्यान आ मनसा हे के, मूँ हव हमच्यार को परच्यार वटे करूँ, जटे कुई मसी को नाम भी ने जाणे, ईंकी वजे आ हे के, मूँ कुई दूजाँ मनक की नाकी तकी नीम पे सणई ने करूँ।</verse>
				<verse number="21">जस्यान सास्तर में लिक्यो तको हे, “ज्याँने वींके बारा में ने बतायो, वीं वींने देकी। अन जणा हूण्योई कोयने, वीं हमजी।”</verse>
				<verse number="22">मूँ नरी दाण थाँका नके आबाऊँ रोक्यो ग्यो।</verse>
				<verse number="23">पण अबे अणा परदेसाँ में मारी काम करबा की कई जगाँ ने बंची हे, अन घणा वराऊँ मूँ थाँकाऊँ मलबा का वाते तरसरियो हूँ।</verse>
				<verse number="24">मने आस हे के, स्पेन जाती दाण मूँ थाँकाऊँ मलूँ। थाँका हाते थोड़ाक दन रकबा को आणन्द लेबा केड़े मने भरोसो हे के, आगे की जातरा का वाते मने थाँकी मदत मली।</verse>
				<verse number="25">पण अबे तो मूँ परमेसर का पुवितर मनकाँ की सेवा करबा का वाते यरूसलेम जारिया हूँ।</verse>
				<verse number="26">काँके मकिदुनिया अन अखाया परदेस की मण्डळ्याँ का मनकाँने यो हव लागो के, वीं यरूसलेम में परमेसर का पुवितर मनकाँ में ज्यो गरीब हे वाँने कई हे।</verse>
				<verse number="27">हा, यो तो वणा खुद ते किदो, पण वाँका वाते वाँकी जिमेदारी भी बणे हे, काँके जद्याँ जी यहूदी ने हे, वणा मनकाँ यहूदी मनकाँ का आत्मिक आसीस में पाँती लिदी हे, तो जीं यहूदी ने हे, वाँ मनकाँ की जिमेदारी हे के, वीं आपणी चिजाँऊँ वाँकी मदत करे।</verse>
				<verse number="28">तो मूँ ओ काम करन मतलब भेळा किदा तका ईं धन ने पुरी जिमेदारी का हाते वाँने हूंपन थाँकी नगर वेतो तको स्पेन का वाते रवाना वे जाऊँ।</verse>
				<verse number="29">अन मूँ जाणूँ हूँ के, जद्याँ मूँ थाँका नके आऊँ तो मसी का हाराई आसिरवाद लेन आऊँ।</verse>
				<verse number="30">हो मारा भायाँ, मूँ परबू ईसू मसी अन आत्मा का परेमऊँ थाँकाऊँ अरज करूँ हूँ, मारा वाते परमेसरऊँ परातना करता तका, मारी आत्मिक लड़ई में मने जेलो दो।</verse>
				<verse number="31">जणीऊँ मूँ यहुदया परदेस में अविस्वास्याऊँ बच्यो रेवूँ अन यरूसलेम का पुवितर मनकाँ का वाते ज्यो दान मूँ लेन जारियो हूँ वो परमेसर का पुवितर मनक हव मनऊँ अपणावे।</verse>
				<verse number="32">अन मूँ परमेसर की मरजी जस्यान राजी मनऊँ थाँका नके आन थाँका हाते आणन्द मना सकूँ।</verse>
				<verse number="33">सान्ती का परमेसर थाँ हाराई का हाते रेवे। आमीन।</verse>
			</chapter>
			<chapter number="16">
				<verse number="1">मूँ किंकरिया की मण्डली की सेवा करबावाळी आपणी बेन फीवे का वाते थाँकाऊँ सिफारीस करूँ हूँ</verse>
				<verse number="2">के, थाँ वींकी ईं तरियाऊँ आवभगत करज्यो, जणी तरियाऊँ परमेसर का मनकाँ की किदी जावे हे। वींने थाँकाऊँ ज्या भी मदत छावे, वाँ मदत वींने दिज्यो, काँके वणी घणा मनकाँ की मदत किदी अन मारी भी मदत किदी।</verse>
				<verse number="3">ईसू मसी में मारा हाते काम करबावाळी प्रिस्किला अन अक्‍विला ने मारो नमस्कार केज्यो।</verse>
				<verse number="4">मारो पराण जीव बंचाबा का वाते वणा आपणो जीव भी दाव पे लगा दिदो हो, मूँईस ने पण जी यहूदी ने हे, वाँ मनकाँ की हारी मण्डळ्याँ भी वाँकी एसानबन्द हे।</verse>
				<verse number="5">वाँके घरे भेळी वेबावाळी मण्डली ने भी मारो नमस्कार। मारो लाड़लो भई इपनितुस ने ज्यो एसिया में मसी ने अपणाबावाळो मेंऊँ पेलो मनक हे वींने मारो नमस्कार केज्यो।</verse>
				<verse number="6">मरियम, ज्या थाँका वाते घणी मेनत किदी ही, वींने मारो नमस्कार।</verse>
				<verse number="7">मारा हण्डाळ्याँ यहूदी अन्द्रनीकुस अन युनिया ने जीं मारी हाते जेल में हा वाँने मारो नमस्कार। वीं खन्दाया तका चेला मेंऊँ जीं नामी हे अन ज्यो माराऊँ पेल्याँईं मसी में आग्या हा।</verse>
				<verse number="8">परबू में मारा लाड़ला भई अम्पलियातुस ने मारो नमस्कार।</verse>
				<verse number="9">मसी में मारी हाते काम करबावाळा उरबानुस अन मारा लाड़ला भई इस्तुखुस ने मारो नमस्कार।</verse>
				<verse number="10">मसी में खरा अपिल्‍लेस ने मारो नमस्कार। अरिस्तुबुलुस का परवार ने नमस्कार।</verse>
				<verse number="11">यहूदी हण्डाळ्याँ हिरोदियान ने मारो नमस्कार। नरकिस्सुस का परवार का वणा मनकाँ ने नमस्कार जीं परबू में हे।</verse>
				<verse number="12">त्रुफेना अन त्रुफोसा ने ज्यो परबू को काम का वाते घणी मेनती करबावाळी हे, वाँने मारो नमस्कार। मारी लाडली परसिस ने, जणी परबू में घणी मेनत किदी हे, वींने मारो नमस्कार।</verse>
				<verse number="13">परबू का चुण्यो तको रूपूस अन वींकी बई ज्या मारी भी बई का जस्यान हे, वींने मारो नमस्कार।</verse>
				<verse number="14">असुक्रितुस, फिलगोन, हिमास, पत्रुबास अन हिमास अन वाँका हण्डाळ्याँ भायाँ ने नमस्कार।</verse>
				<verse number="15">फिलुगुस, युलिया, नेर्युस अन वींकी बेन अन उलुम्पास अन वाँका हाराई हण्डाळ्याँ पुवितर मनकाँ ने मारो नमस्कार।</verse>
				<verse number="16">थाँ हात-जोड़न एक दूजाँ ने नमस्कार करिया करो। थाँने हारी मसी मण्डळ्याँ का आड़ीऊँ नमस्कार।</verse>
				<verse number="17">हो मारा भायाँ, मूँ थाँकाऊँ अरज करूँ हूँ के, थाँने ज्या हिक मली, वींके खिलाप में थाँकामें फुट नाकबावाळा अन दूजाँ का विस्वास ने बगाड़बावाळाऊँ छेटी रेज्यो।</verse>
				<verse number="18">काँके अस्या मनक आपणाँ परबू मसी की ने पण आपणाँ पेट की सेवा करे हे। अन ईं आपणी मिटी-मिटी अन चापलूसी बाताँऊँ भोळा-भाळा मनकाँ ने भरम में नाक देवे हे।</verse>
				<verse number="19">थाँकी आग्या मानबा को बखाण च्यारूँमेर वेरियो हे। ईं वाते मूँ थाँकाऊँ राजी हूँ। पण मूँ छावूँ हूँ के, थाँ भलई का वाते अकलवाळा बण्या तका रेवो अन बुरईऊँ अणजाण रेवो।</verse>
				<verse number="20">सान्ती देबावाळा परमेसर वेगोई सेतान ने थाँका पगा का रेटे नाक देई। आपणाँ परबू ईसू की दया थाँका पे वेवे।</verse>
				<verse number="21">मारो हण्डाळ्याँ तिमुतियुस अन लुकियुस, यासोन, सोसिपत्रुस अन हण्डाळ्याँ यहूदी भायाँ का आड़ीऊँ थाँने नमस्कार।</verse>
				<verse number="22">मूँ तिरतियुस, जणीऊँ यो कागद लिकवायो ग्यो हे, मूँ भी परबू में थाँने नमस्कार केवूँ हूँ।</verse>
				<verse number="23">मारी अन हारी मण्डली की खातरदारी करबावाळा गयुस को थाँने नमस्कार। इरास्तुस ज्यो नगर को भण्डारी हे अन आपणाँ भई क्कारतुस को थाँने नमस्कार।</verse>
				<verse number="24"></verse>
				<verse number="25">परमेसर की बड़ई वेवे। ईसू मसी का हव हमच्यार जिंको मूँ परच्यार करूँ हूँ, ईंके अन परमेसर को अबाणू परगट किदो ग्यो ईं भेंद जस्यान जिंको हाँच जुग-जुगऊँ हप्यो तको हे, वींके जस्यान परमेसर थाँने गाटा बणाबा में तागतवर हे।</verse>
				<verse number="26">पण जिंने हमेस्यान बण्या रेबावाळा परमेसर की आग्याऊँ परमेसर की आड़ीऊँ बोलबावाळा का लेकाँ का जरिये ज्यो यहूदी ने हे, वाँ हाराई मनकाँ में परगट करन बता दिदो ग्यो हे जणीऊँ वीं विस्वास करन आग्या माने।</verse>
				<verse number="27">ईसू मसी का जरिये बेस एकलोता ग्यान का समन्द परमेसर की मेमा जुग-जुग तईं वे। आमीन!</verse>
			</chapter>
		</book>
		<book number="46">
			<chapter number="1">
				<verse number="1">पोलुस का आड़ीऊँ जिंने परमेसर आपणी मरजीऊँ ईसू मसी को खन्दायो तको चेलो बणाबा का वाते थरप्यो, में यो कागद, विस्वास में आपणो भई सोस्तिनेस की मदतऊँ</verse>
				<verse number="2">कुरिन्तुस में परमेसर की वणा मण्डळ्याँ का नाम लिक्यो, जीं ईसू मसी में पुवितर किदी गी, ज्याँने परमेसर आपणाँ मनक बणाबा का वाते चुण्या हा, जीं हरेक जगाँ आपणाँ अन वाँका परबू ईसू मसी को नाम लेवे हे।</verse>
				<verse number="3">आपणाँ बापू परमेसर अन आपणाँ परबू ईसू मसी का आड़ीऊँ थाँ हाराई ने सान्ती अन दया मले।</verse>
				<verse number="4">परबू ईसू मसी में ज्याँ दया थाँने मली हे, वींका मस मूँ थाँका वाते परमेसर को हमेस्यान धन्नेवाद करूँ हूँ।</verse>
				<verse number="5">थाँने ईसू मसी में वेन हारी बाताँ में जस्यान बोलबा में, हाराई ग्यान में पाका किदा ग्या हे।</verse>
				<verse number="6">मसी का बारा में आपाँ ज्या गवई दिदी हे वाँ थाँकामें पाकी निकळी हे।</verse>
				<verse number="7">ईं मस थाँ जद्याँ आपणाँ परबू ईसू मसी के परगट वेबा की वाट नाळता रेवो हो, तो थाँका नके वाँके कस्यी भी आत्मिक वरदान की कमी ने हे।</verse>
				<verse number="8">परबू ईसू मसी थाँने अन्त टेम हुदी पाका राकी के, थाँ आपणाँ परबू ईसू मसी का पाच्छे आबा का दन तईं बना दोस का रे सको।</verse>
				<verse number="9">परमेसर विस्वास जोगा हे, जणा थाँने खुद का बेटा अन आपणाँ परबू ईसू मसी की संगत में बलाया हे।</verse>
				<verse number="10">हो विस्वासी भायाँ, आपणाँ परबू ईसू मसी का नाम में मारी थाँकाऊँ विनती हे के, थाँ हाराई एकीस बात केवो, थाँकामें कई भी फुट ने वेवे, एकीस मन अन एकीस मत वेन मल्या तका रेवो।</verse>
				<verse number="11">काँके खलोए का घराणा का मनक मने थाँ विस्वासी भायाँ का बारा में बतायो हे के, थाँ आपस में एक-दूजाऊँ लड़रिया हो।</verse>
				<verse number="12">मारो केणो ओ हे के, थाँकामूँ कुई तो आपणाँ खुद ने पोलुस को, कुई अपुलोस को, कुई केफा को अन कुई मसी का चेला केवो हो।</verse>
				<verse number="13">तो पछे कई मसी की पाँती वेगी हे? कई मूँ पोलुस थाँका वाते हूळी पे चड़ायो ग्यो? कन कई थाँने पोलुस का नाम में बतिस्मो मल्यो?</verse>
				<verse number="14">परमेसर को धन्नेवाद करूँ हूँ के, क्रिस्पूस अन गयुस ने छोड़न, में थाँकामूँ किंने भी बतिस्मो ने दिदो।</verse>
				<verse number="15">ताँके कुई भी ओ ने के सके के, थाँ मनकाँ ने मारा चेला वेबा का वाते मारा नाम को बतिस्मो दिदो ग्यो हे।</verse>
				<verse number="16">अन में स्तिपनूस का घराणा ने भी बतिस्मो दिदो अणाने छोड़न, मूँ ने जाणूँ हूँ के, में ओरी किंने बतिस्मो दिदो हे।</verse>
				<verse number="17">काँके मसी मने बतिस्मा देबा का वाते ने पण हव हमच्यार हुणाबा का वाते खन्दायो हे अन यो भी मनकाँ का ग्यानऊँ ने। यद्याँ मूँ अस्यान करूँ तो मसी को हूळी चड़णो बेकार वेई।</verse>
				<verse number="18">वीं ज्यो भटक रिया हे वाँका वाते मसी को हूळी पे मरबा को संदेस एक मुरकता हे, पण ज्यो बंचाया जारिया हे वाँका वाते परमेसर की तागत हे।</verse>
				<verse number="19">काँके सास्तर में लिक्यो तको हे के, मूँ ग्यानी मनकाँ की अकल को नास कर देऊँ, अन हाराई चातरोक की हमजदारी ने बेकार कर देऊँ।</verse>
				<verse number="20">कटे हे ग्यानवान? कटे हे भणाबावाळा? कटे हे अणी दनियाँ का वाद-विवाद करबावाळा? कई परमेसर दनियाँ का ग्यान ने बेकार ने ठेरायो हे?</verse>
				<verse number="21">परमेसर अस्यान होच-हमजन ते कर राक्यो हो के, अणी दनियाँ का मनक आपणाँ ग्यानऊँ परमेसर ने ने जाण पाई, तो परमेसर ने ओ बड़िया लागो के, ईं तरिया परच्यार का जरिये ज्यो आपाँ कराँ हा, ज्यो परच्यार दनियाँ का मनकाँ की नजराँ में मुरकता हे, ईंपे विस्वास करबावाळा मनकाँ ने बचावे।</verse>
				<verse number="22">यहूदी मनक तो चमत्कार की हेन्याणी छावे हे अन युनानी मनक ग्यान की खोज में रेवे हे।</verse>
				<verse number="23">पण आपाँ तो वीं हूळी पे चड़ाया तका मसी का उपदेस देवा हाँ। एक अस्यो उपदेस ज्यो यहूदी का वाते ठोकर को मस हे अन ज्यो यहूदी ने हे वाँका वाते मुरकता हे।</verse>
				<verse number="24">पण ज्याँने परमेसर बलाया हे, पछे पलई वीं यहूदी वो कन यहूदी ने वो वाँ हाराई का वाते मसी परमेसर की तागत अन परमेसर को ग्यान हे।</verse>
				<verse number="25">काँके परमेसर की मुरकता मनकाँ ग्यानऊँ ग्यानवान हे अन परमेसर की कमजोरी मनकाँ की तागतऊँ घणी बलवान हे।</verse>
				<verse number="26">हो विस्वासी भायाँ, अबे थोड़ोक होचो के, जद्याँ परमेसर थाँने बलाया हा तो थाँकामूँ नरई तो ने सांसारिक देकणी में विदवान हा अन नेई तागतवर। थाँकामूँ नरई की तो समाज में कई जगाँ भी ने ही।</verse>
				<verse number="27">पण परमेसर वणा मनकाँ ने चुण लिदा ज्याँने दनियाँ की नजराँ में मुरक हमज्या जावे हे, ताँके वीं दनियाँ का ग्यानवाळा ने लाजा मारे अन परमेसर दनियाँ की नजराँ में कमजोर हमज्या जाबावाळा ने चुण लिदा, ताँके वीं दनियाँ का तागतवराँ ने लाजा मारे।</verse>
				<verse number="28">परमेसर दनियाँ मूँ वाँनेईस चुण्या ज्याँने दनियाँ की नजराँ में नीचा हमज्या जावे हे अन ज्याँने बेकार हमज्या जावे अन ज्यो कई भी ने हे। परमेसर अणाने चुण्या ताँके दनियाँ ज्याँने खास हमजे हे, वाँने वीं बेकार ठेरा सके,</verse>
				<verse number="29">ताँके कुई भी मनक परमेसर का हामे मेपणो ने कर सके।</verse>
				<verse number="30">अन परमेसर का आड़ीऊँ थाँ ईसू मसी में हो, मसी ज्यो परमेसर का आड़ीऊँ आपणाँ वाते ग्यान ठेरियो अन वींका वजेऊँ आपाँ परमेसर का हामे सई अन पुवितर मनक बण्या अन आपाँने छुटकारो मल्यो।</verse>
				<verse number="31">जस्यान के सास्तर में लिक्यो हे, “यद्याँ कुई मेपणो करे हे तो वो परबू ज्यो किदो वींका बारा में मेपणो करे।”</verse>
			</chapter>
			<chapter number="2">
				<verse number="1">हो भायाँ-बेना, जद्याँ मूँ परमेसर का भेद को परच्यार करतो तको थाँका नके आयो, तो ने मोटी बाताँ काम में लिदी अन ग्यान ने बाँट्यो।</verse>
				<verse number="2">काँके में ओ ते कर मेल्यो हो के, थाँका बचमें रेन मूँ ईसू मसी अन हूळी पे वीं वाँकी मोत की बात ने छोड़न ओरी कस्यी बात ने ने जाणूँ।</verse>
				<verse number="3">ईं वाते मूँ कमजोरी का हाते दरपणीऊँ धूजतो तको थाँका नके आयो।</verse>
				<verse number="4">अन मारा बचन अन मारा परच्यार में ग्यान की लोब वाळी बाताँ ने ही, पण वणामें परमेसर की आत्मा की तागत को सबूत हो,</verse>
				<verse number="5">ताँके थाँको विस्वास मनकाँ की अकल पे ने पण परमेसर की तागत के भरोस्ये रेवे।</verse>
				<verse number="6">जद्याँ मूँ हमजदार मनक में ग्यान की बाताँ को परच्यार करूँ हूँ, पण यो ग्यान ईं दनियाँ को कन हाकिमा के ग्यान का जस्यान ने हे ज्यो नास वेवे हे।</verse>
				<verse number="7">पण आपाँ परमेसर का वीं भेद का ग्यान ने बतावा हा ज्यो मनकाँऊँ छाने हो, जिंने परमेसर सरुवातऊँ आपणाँ हाराई की मेमा का वाते ठेरायो हे।</verse>
				<verse number="8">जिंने ईं दनियाँ का हाकिमा मूँ कणी ने जाण्यो, काँके जाणता तो मेमावान परबू ने हूळी पे ने चड़ाता।</verse>
				<verse number="9">पण पुवितर सास्तर में लिक्यो हे, “जिंने आक्याँ ने देक्यो अन कान्दड़ा ने हुण्यो। जटा तईं मनकाँ की अकल कदी ने पोंछी अस्यी बाताँ परमेसर वणा मनकाँ का वाते बणई जीं परमेसरऊँ परेम करे हे।”</verse>
				<verse number="10">पण परमेसर वणा भेद की बाताँ ने आपणी आत्माऊँ आपाँने परगट किदा, काँके आत्मा हाराई बाताँइस ने पण परमेसर का भेद की बाताँ भी जाणे हे।</verse>
				<verse number="11">मनकाँ की आत्मा का सिवा वाँका खुद का बच्याराँ ने कुई ने जाणे, वस्यानीस परमेसर की आत्मा के सिवा परमेसर का बच्याराँ ने कुई ने जाणे हे।</verse>
				<verse number="12">पण आपाँ तो दनियाँ की आत्माने पई पण वाँ आत्मा पई हे, ज्याँ परमेसर आपाँने खुला मनऊँ दिदी हे, ताँके आपीं वणा बाताँ ने जाणा ज्यो परमेसर आपाँने दिदी हे।</verse>
				<verse number="13">वणा बाताँ ने आपाँ मनकाँ की अकलऊँ हिकाया तका सबदाऊँ ने बोला पण आत्माऊँ हिकाया तका सबदाऊँ बोला हा, आत्मिक हाँच ने वणा मनकाँ ने बतावा हा जीं आत्मिक हे।</verse>
				<verse number="14">पण देह को मनक परमेसर की आत्मा की बाताँ गरण ने करे, काँके वीं बाताँ वींकी देकणी में बेण्डापणा की बाताँ हे अन ने वो वाँने जाण सके हे काँके वाँ बाताँ की परक आत्मिक रितऊँ वेवे हे।</verse>
				<verse number="15">आत्मिक मनक हारी बाताँ को न्याव करे हे पण वींको न्याव कुई ने कर सके।</verse>
				<verse number="16">सास्तर में लिक्यो तको हे, “परबू को मन कूण जाण सके? वींने कूण सला दे सके?” पण आपाँ ईं बाताँ हमज सका हा, काँके आपाँ में मसी को मन हे।</verse>
			</chapter>
			<chapter number="3">
				<verse number="1">हो भायाँ, मूँ थाँकाऊँ वस्यान बात ने कर सक्यो जस्यान आत्मिक मनकाँऊँ करूँ हूँ, पण मने थाँकाऊँ वस्यान बात करणी पड़ी जस्यान सांसारिक मनक करे हे अन ज्यो अबाणू मसी में नवा विस्वासी हे।</verse>
				<verse number="2">में थाँने दूद पायो, अन्न ने खुवायो, काँके थाँ वींने खाबा का वाते त्यार ने हो, पण अबाणू भी ने खा सको हो।</verse>
				<verse number="3">काँके थाँ अबाणू तईं दनियाँ का मनकाँ का जस्यान हो, ईं वाते थाँकामें रिस्याँ बलणो अन कळेस मोजुद हे, तो कई थाँ दनियाँ का सांसारिक मनक ने हो अन थाँ सांसारिक मनकाँ के जस्यान वेवार करो हो?</verse>
				<verse number="4">जद्याँ थाँकामूँ कुई केवे हे के, “मूँ पोलुस को हूँ” अन दूजो केवे हे, “मूँ अपुलोस को हूँ।” तो कई थाँ दनियाँ के जस्यान वेवार ने करो हो?</verse>
				<verse number="5">ओ बतावो अपुलोस कूण अन पोलुस कूण हे? बेस माँ तो परबू का सेवक हाँ, ज्याँके वजेऊँ थाँ विस्वास किदो हो। माकाँ मूँ हाराई बेस वोईस काम कर हे ज्यो परबू माने हूँप्यो हे।</verse>
				<verse number="6">में बीज वायो अन अपुलोस वींने पाणी पायो, पण परमेसर वींने बड़ायो।</verse>
				<verse number="7">ईं तरियाँ ने तो बोवावाळा मोटो हे अन ने वींने पाणी पाबावाळो मोटो हे, पण मोटा तो परमेसर हे जणा वींने बड़ायो।</verse>
				<verse number="8">बोवावाळो अन पाणी पाबावाळो दुई एक जस्या हे, पण हरेक मनक आपणाँ मेनत के जस्यान दानकी पाई।</verse>
				<verse number="9">काँके माँ परमेसर का वाते काम करबावाळा हाँ। थाँ परमेसर का खेत हो अन परमेसर का मन्दर हो।</verse>
				<verse number="10">परमेसर की वीं दया के जस्यान, ज्यो मने दिदी गी हे, में एक हूँस्यार कारीगर के जस्यान नीम नाकी, पण वींपे सणई करबावाळो तो कुई ओरी हे। पण हरेक मनक ने ध्यान राकणो हे के, वीं कस्यान काम कररिया हे।</verse>
				<verse number="11">काँके ज्याँ नीम नाकी हे वाँ खुद ईसू मसी हे अन वींकी जगाँ पे दूजी नीम ने नाकी जा सके हे।</verse>
				<verse number="12">अन यद्याँ कुई ईं नीम में होनो, चाँदी अन हिरा-मोती, टिण्डका, चारो अन खाँकळो काम लेन सणई करे हे।</verse>
				<verse number="13">तो हाराई का काम का गुण हामे आ जाई, काँके अन्त की टेम यो वादीऊँ हामे आई अन वादी हाराई का काम की परक करी के, वणी कस्यान काम किदो।</verse>
				<verse number="14">जिंको काम वादी में, नीम पे टक्यो तको रेई, वो ईनाम पाई।</verse>
				<verse number="15">अन यद्याँ किंको काम बळ जाई तो वीं नकसाण उटाई, पण वो वादी की लपटाऊँ खुद बळतो बळतो बंच जाई।</verse>
				<verse number="16">कई थाँ ने जाणो के, थाँ परमेसर का मन्दर हो अन परमेसर की आत्मा थाँकामें वास करे हे।</verse>
				<verse number="17">यद्याँ कुई परमेसर का मन्दर ने नास करी तो परमेसर वींने नास करी, काँके परमेसर को मन्दर पुवितर हे अन वो मन्दर थाँ हो।</verse>
				<verse number="18">थाँ आपणाँ खुद ने धोका मती दो। यद्याँ थाँकामूँ कुई ईं दनियाँ में आपणाँ खुद ने ग्यानवाळो हमजे तो वींने बना अकल को बणणो छावे के, वो ग्यानवाळा वे जावे।</verse>
				<verse number="19">काँके ईं दनियाँ को ग्यान परमेसर का हामे बेण्डोपणो हे। जस्यान के सास्तर में लिक्यो हे के, “परमेसर ग्यानवाळा मनकाँ ने वाँका खुद का ग्यान में फसा देई।”</verse>
				<verse number="20">अन पछे, “परबू जाणे हे, ग्यानवाळा का हाराई बच्यार बेकार हे।”</verse>
				<verse number="21">ईं वाते मनक खुद पे मेपणो ने करे, काँके हारोई थाँकोईस हे।</verse>
				<verse number="22">पछे पलई पोलुस वे, अपुलोस वे कन केफा हो पलई दनियाँ वे, जीवन वे कन मोत, पलई ईं आज की बाताँ वे कन आबावाळा दन की वी, हारोई थाँकोईस हे।</verse>
				<verse number="23">अन थाँ मसी का हो अन मसी परमेसर को हे।</verse>
			</chapter>
			<chapter number="4">
				<verse number="1">माकाँ बारा में कणी मनक ने अस्यान होचणो छावे के, माँ मसी का दास हा। परमेसर के भेद की बाताँ का भण्डारी हा।</verse>
				<verse number="2">अन पछे जीं ईं भेद की बाताँ का भण्डारी हे, वाँकी भी आ जिमेदारी हे के, वीं विस्वास जोगा रेवे।</verse>
				<verse number="3">मने ईंकी थोड़ीक भी चन्ता ने हे के, थाँ मारो न्याव करो कन कुई पंचात करे। मूँ खुद भी आपणो न्याव ने करूँ हूँ।</verse>
				<verse number="4">काँके मारो मन साप हे, पण अणीऊँ ओ पको ने वेवे हे के, मूँ हाँची में निरदोस हूँ। वीं परबू तो एकीस हे ज्यो मारो न्याव करे हे।</verse>
				<verse number="5">ईं वाते जद्याँ तईं परबू ने आवे वणीऊँ पेल्याँ किंको भी न्याव मती करो। वीं तो अदंकार में हपी तकी बाताँ ने भी उजिता में दिकाई अन मना की बाताँ भी हामे लाई अन वणी दाण परमेसर का आड़ीऊँ हरेक की बड़ई वेई।</verse>
				<verse number="6">हो विस्वासी भायाँ में ईं बाताँ ज्यो थाँने हिकई हे वीं आपणाँ खुद अन अपुलोस का ऊपरे लागू किदी हे, ताँके थाँ अणी कावत को अरत जाणन हिक सको के, “थाँ सास्तर में लिकी तकी बाताँ ने उलाँगो कोनी” अन एक मनक को पकस लेन कणी दूजाँ का विरोद करता तका मेपणाऊँ ने भर जावो।</verse>
				<verse number="7">थाँने दूजाऊँ कणी खास बणाया हे? अन थाँका नके ज्यो कई हे वो कई थाँने परमेसर ने दिदो? तो अस्यान काँ मेपणो करे हे के, थाँ कदी कणीऊँ कई लिदोई कोयने?</verse>
				<verse number="8">अस्यान लागरिया हो के, थाँ तो धापग्या हो अन थाँ रिप्यावाळा वेग्या हो! कई थाँ माँके बना राज किदो हे? पण भलो वेतो के, थाँ राज करता, तो माँ भी थाँका हाते राज करता।</verse>
				<verse number="9">काँके मने अस्यान लागरियो हे के, परमेसर माँ खन्दाया तका ने मोत को दण्ड दिदो जा चुक्या मनकाँ का जस्यान हाराईऊँ अंत में राक्या हे, काँके आपाँ आकी दनियाँ अन हरग-दुताँ अन मनकाँ का वाते तमासो बणा हा।</verse>
				<verse number="10">माँ मसी का वाते बेण्डा बणग्या हाँ, पण थाँ मसी में ग्यानवाळा हो, माँ कमजोर हाँ पण थाँ तागतवर हो। माँको मान गटायो जावे हे पण थाँको मान किदो जावे हे।</verse>
				<verse number="11">ईं टेम तईं माँ तो भूका तरिया हा। फाटा तका गाबा पेरता हा। माकाँ हाते मार-कूट किदी जावे हे अन माँ बेघर हा।</verse>
				<verse number="12">माकाँ हाताऊँ काम करता तका माँ मेनत-मजदूरी करा हाँ। जद्याँ माँने कुई हराप देवे हे तो माँ वींने आसिरवाद देवाँ हाँ। अन जद्याँ माँने हतावे तो माँ वींने सेण करा हाँ।</verse>
				<verse number="13">माँ गाळ्याँ हुणन भी नरमाईऊँ जवाब दा हाँ। माँ अणी दनियाँ का कचरोऊँ बड़न ने हाँ। माँ अबाणू भी अणी दनियाँ का मेल हमज्या जावा हाँ।</verse>
				<verse number="14">मूँ थाँने लाजा मरबा का वाते ईं बाताँ ने लिकरियो हूँ। पण आपणाँ लाड़ला छोरा-छोरी के, जस्यान थाँने चेतावणी देरियो हूँ।</verse>
				<verse number="15">काँके यद्याँ मसी में थाँने हिकाबावाळा दस हजार भी वे, तद्याँ भी थाँका बापू नरई ने हे। काँके हव हमच्यार हुणाबाऊँ अन ईसू मसी में मूँ थाँको बापू बण्यो हूँ।</verse>
				<verse number="16">ईं वाते मूँ थाँकाऊँ अरज करूँ हूँ के, मारा जस्यान चाल चालो।</verse>
				<verse number="17">ईं वाते मूँ तिमुतियुस ने ज्यो परबू का गट-जोड़ में लाड़लो अन मारा विस्वास जोगो बेटो हे, वींने थाँका नके खन्दायो हे, वो थाँने ईसू मसी में मारा वेवार का बारा में बताई, जिंने में हरेक जगाँ अन हरेक मण्डळ्याँ में हिकऊँ हे।</verse>
				<verse number="18">थाँकामूँ कुई मनक तो यो होचन मेपणो करिया हे के, जस्यान अबे मने थाँका नके आणोईस ने हे।</verse>
				<verse number="19">पण परबू छाई तो मूँ थाँका नके फटाकऊँ आऊँ, अन पछे वणा मेपणो करिया हा वणा मनकाँ की बाताँ नेईस ने पण वाँकी तागत ने भी जाण लेऊँ।</verse>
				<verse number="20">काँके परमेसर को राज खाली बाताँ में ने, पण परमेसर की तागत में हे।</verse>
				<verse number="21">थाँ कई छावो हो के, कई मूँ थाँका नके कामड़ी लेन अऊँ कन परेम अन दया की आत्मा का हाते अऊँ।</verse>
			</chapter>
			<chapter number="5">
				<verse number="1">हाँची में मने बतायो ग्यो हे के, थाँ लोगाँ में कुकरम फेल्यो तको हे, अस्यो कुकरम ज्यो अधरम्याँ में भी ने मले हे के, एक मनक आपणी सोतेली बई का लारे कुकरम करे हे।</verse>
				<verse number="2">अणी बात पे थाँ होक भी ने करो हो, थाँने ओ छावे के, थाँ अस्यो काम करबावाळो थाँका बचमेंऊँ निकाळ दो, पण थाँ तो मेपणो करो हो।</verse>
				<verse number="3">मूँ तो देह का भावऊँ छेटी हो, पण आत्मा का भावऊँ थाँका हाते रेन, में अणा काम करबावाळा का विरोद में आपणो फेसलो अटूईस दे नाक्यो हे।</verse>
				<verse number="4">जद्याँ थाँ आपणाँ परबू ईसू मसी की तागत का हाते आपणाँ ईसू मसी का नाम में भेळा वेवो तो मारी आत्मा भी वटे मोजुद वेई</verse>
				<verse number="5">अन वणी मनक ने देह का नास का वाते सेतान ने हूँप्यो जाई, ताँके वींकी आत्मा परबू के पाच्छा आबा का दन बंचाई जाई।</verse>
				<verse number="6">थाँको मेपणो करणो हव ने हे। कई थाँ ने जाणो के, “थोड़ोक हाज्यो हाराई गुद्‍या तका आटा ने हाज्यो कर देवे हे।”</verse>
				<verse number="7">ईं वाते थाँ जूना हाज्या ने निकाळन ज्यो बुरा काम हे अणाऊँ, आपणाँ खुद ने पुवितर करो अन नुवो गुद्‍या तको आटो बण जावो, ताँके थाँ बना हाज्या का वो, काँके आपणाँ फसे को उन्यो ज्यो मसी हे, आपाँने पुवितर करबा का वाते बली व्यो हे।</verse>
				<verse number="8">ईं वाते आवो आपाँ आपणाँ फसे का तेवार ने बुरई अन हूँगळापणाऊँ छेटी वेन जूना हाज्या की रोटीऊँ ने पण खरई अन हाँच का बना हाज्या की रोटीऊँ मनावा।</verse>
				<verse number="9">में आपणाँ पेला कागद में लिक्यो हो के, थाँ कुकरमी मनकाँऊँ कई वेवार मती राकज्यो।</verse>
				<verse number="10">मारा केवा को ओ मतलब ने हो के, थाँ ईं दनियाँ का कुकरमी, लोबी मनकाँ, ठगी मनकाऊँ, मूरत्याँ पूजबावाळाऊँ कई भी वेवार मती राको, अस्यो वेबा पे तो थाँने ईं दनियाऊँ जाणो पड़ जाई।</verse>
				<verse number="11">पण में ज्यो लिक्यो हो वो ओ हे के, कणी अस्या मनकऊँ वेवार मती राको ज्यो आपणाँ खुद ने मसी को विस्वासी केन भी कुकरमी, लोबी, मूरत्याँ पूजबावाळो, जूटी खबर देबावाळो, पीबावाळो, अन ठग वेवे। अस्या मनकाँ का हाते थाँ खाणो भी मती खावो।</verse>
				<verse number="12">ज्यो अविस्वासी हे, मण्डळ्याँ का ने हे, वाँको न्याव करबा में मारो कई काम? कई थाँने वणाकोईस न्याव करणो छावे जीं मण्डळ्याँ का हे?</verse>
				<verse number="13">पण अविस्वासी मनकाँ को न्याव परमेसर करे हे। सास्तर केवे हे, “थाँ बुरा मनकाँ ने आपणाँ बचमेंऊँ बारणे निकाळ दो।”</verse>
			</chapter>
			<chapter number="6">
				<verse number="1">आपणाँ हण्डाळ्याँ का हाते लड़ई वेबा पे थाँकामूँ कूण फेसला का वाते परमेसर का मनकाँ का नके ने जान कस्यान दनियाँ का मनकाँ का नके जाबा की हिम्मत करे हे?</verse>
				<verse number="2">कई थाँ ने जाणो के, परमेसर का मनक दनियाँ को न्याव करी? जद्याँ थाँकाऊँ अणी दनियाँ को न्याव करियो जाई तद्याँ कई थाँ आपणी अतरी फोरी-फोरी बाताँ को न्याव करबा जोगा भी ने हो?</verse>
				<verse number="3">कई थाँ ने जाणो के, आपीं दुताँ को न्याव करा? तो पछे अणी जीवन की बाताँ वींका हामे कई ने हे।</verse>
				<verse number="4">यद्याँ थाँका बचमें कईन कई लड़ई-जगड़ो वेवे हे तो थाँ न्याव करबा का वाते बारला मनकाँ ने काँ चुणो ज्याँने मण्डली में कस्यी भी जगाँ ने दिदी जावे हे?</verse>
				<verse number="5">थाँने सरम आणी छावे। कई हाँची में थाँकामूँ एक भी हूँस्यार ने ज्यो आपणाँ विस्वासी भायाँ को न्याव कर सके?</verse>
				<verse number="6">कई एक भई कदी आपणाँ दूजाँ विस्वासी भई पे मुकदमो करे हे? पण थाँ तो आपणी बाताँ को फेसलो अविस्वासी मनकाँ नकूँ करारिया हो।</verse>
				<verse number="7">पण हाँची में थाँ आपस में एक-दूँजा पे मुकदमो करो हो ज्यो थाँकी हार ने बतावे हे। अणीऊँ बड़िया तो ओ हे के, थाँ अन्याव ने सेण करलो अन थाँको घाटो वे जावे।</verse>
				<verse number="8">थाँ तो खुद बुरो करो अन आपणाँइस मसी भायाँ ने लूटो हो।</verse>
				<verse number="9">कई थाँ ने जाणो हो के, बुरा मनक परमेसर का राज का वारिस ने वेई? धोको मती खावो अन ने गलत वेवार करबावाळो बण, ने मूरताँ पूजो, ने कुकरम, ने मनक मनक का हाते हुगलो काम करे,</verse>
				<verse number="10">ने चोरी करज्यो, ने लोब, ने दारुँड़ीया बणज्यो, ने खोट्याँ खाबावाळा, अन ने ठगबावाळा बणज्यो काँके अस्या परमेसर का राज का वारिस वेई।</verse>
				<verse number="11">अन थाँकामूँ करता तो अस्याईस हा, पण थाँ परबू ईसू मसी का नामऊँ अन आपणाँ परमेसर की आत्माऊँ धोया ग्या हो अन पुवितर वेन परमेसर का हामे सई ठेरिया हो।</verse>
				<verse number="12">थाँकामूँ कुई के सके हे के, “हारी चिजाँ मारा वाते सई हे।” हा, पण हारी चिजाँ नफा की ने हे। “हारी चिजाँ मारा वाते सई हे,” पण मूँ कस्यी भी बात को गुलाम ने वेऊँ।</verse>
				<verse number="13">क्यो जावे हे के, “खाणो पेट का वाते अन पेट खाणा का वाते हे।” पण परमेसर अणा दुयाँ ने खतम कर देई अन देह कुकरम का वाते ने हे, पण परबू की सेवा का वाते हे अन देह का वाते परबू वेवस्ता करे हे।</verse>
				<verse number="14">अन परमेसर आपणी तागतऊँ परबू ईसू नेईस पाछो जीवता ने किदा पण वीं आपाँने भी पाच्छा जीवता करी।</verse>
				<verse number="15">कई थाँ ने जाणो हो के, थाँकी देह खुद ईसू मसी का गट-जोड़ में हे? तो कई मूँ वाँने ज्यो मसी का अंग हे, वाँने कस्यी वेस्या का अंग बणऊँ मूँ कदी अस्यो ने करूँ।</verse>
				<verse number="16">कई थाँ ने जाणो हो के, ज्यो कुई वेस्याऊँ संगती करे हे, वो वींका हाते एक तन वे जावे हे काँके सास्तर में लिक्यो हे के, “वीं दुई एक तन वेई।”</verse>
				<verse number="17">अन ज्यो परबू की संगती में रेवे हे, वीं वींका हाते एक आत्मा वे जावे हे।</verse>
				<verse number="18">कूकरमऊँ बंचन रेवो, काँके जतरा ओरी पाप मनक करे हे, वीं देहऊँ बारणे हे, पण कुकरम करबावाळा आपणी देह का विरोद मेंईस पाप करे हे।</verse>
				<verse number="19">कई थाँ ने जाणो हो के, थाँकी देह पुवितर आत्मा को मन्दर हे, ज्यो थाँकामें बसी तकी हे अन थाँने परमेसर का आड़ीऊँ मली हे अन वाँ थाँकी खुद की ने हे। थाँ खुदऊँ ने पण परमेसर का हो।</verse>
				<verse number="20">काँके परमेसर थाँने किमत देन मोल लिदा हे। ईं वाते थाँ देहऊँ परमेसर की मेमा करो।</verse>
			</chapter>
			<chapter number="7">
				<verse number="1">वणा बाताँ का बारा में ज्यो थाँ लिकी हे, “कई ओ हव हे के, कुई मनक कणी लुगई का हाते वेवार ने राके?”</verse>
				<verse number="2">पण मूँ थाँने ओ केऊँ हूँ के, कूकरमऊँ बंचबा का वाते हरेक मनक के लुगई वेणी छावे अन हरेक लुगई के धणी वेणो छावे।</verse>
				<verse number="3">धणी आपणी लुगई की मनसा पुरी करे अन वस्यानीस लुगई ने भी आपणाँ धणी की मनसा पुरी करणी छावे।</verse>
				<verse number="4">लुगई को आपणी देह पे बेस खुद अदिकार ने हे, पण वींका धणी ने भी हे अन वस्यानीस धणी ने भी आपणी देह पे अदिकार ने हे, पण वींकी लुगई ने भी हे।</verse>
				<verse number="5">थाँ एक-दूँजा की देह की मनसा ने पुरी करबा में छेटी मती रेज्यो, पण थोड़ीक टेम तईं परातना का वाते आपस का राजीपाऊँ छेटी रो अन पाच्छा एक हाते वे जावो। कटे अस्यान ने वे के, थाँका खुद ने बंस में राकबा की कमजोरीऊँ सेतान थाँकी परक करे।</verse>
				<verse number="6">पण मूँ ज्यो केरियो हूँ वाँ अनुमती हे आग्या ने हे।</verse>
				<verse number="7">मूँ तो छावूँ हूँ के, हाराई मनक मारा जस्यान बना ब्याव करिया रेवे, पण हरेक मनक ने परमेसर का आड़ीऊँ एक खास वरदान मल्यो हे। हाराई ने अलग अलग तरिया को वरदान मल्यो हे।</verse>
				<verse number="8">अबे मूँ बना ब्याव व्या वाँकाऊँ अन विदवा का वाते केणो छारियो हूँ के, यद्याँ वीं मारे जस्यान अकेला रेवे तो ओ बड़या हे।</verse>
				<verse number="9">अन यद्याँ वीं आपणाँ खुद पे काबू ने राक सके तो वाँने ब्याव कर लेणो छावे, काँके वासना की आग में बळतो रेबाऊँ ब्याव कर लेणो हव हे।</verse>
				<verse number="10">जणा ब्याव कर लिदो हे, वाँने मूँ ने पण परबू आग्या देवे हे के, लुगई आपणाँ धणीऊँ अलग ने वेवे।</verse>
				<verse number="11">अन यद्याँ वाँ धणी ने छोड़ भी दे तो वींने दूजी दाण ब्याव ने करणो छावे कन वाँ पाच्छी आपणाँ धणीऊँ मेल-मिलाप करले अन अस्यानीस धणी ने भी आपणी लुगई ने ने छोड़णी छावे।</verse>
				<verse number="12">दूँजा मनकाऊँ परबू ने पण मूँ केऊँ हूँ के, यद्याँ कणी भई की लुगई विस्वास ने राके अन वींका हाते रेबाऊँ राजी हे तो वो वींने ने छोड़े।</verse>
				<verse number="13">अन जणी लुगई पे वींको धणी विस्वास ने राके हे अन वींका हाते रेबाऊँ राजी हे, तो वाँ आपणाँ धणी ने ने छोड़े।</verse>
				<verse number="14">काँके अस्यो धणी ज्यो विस्वास ने राके हे, वो आपणी विस्वासी लुगई का मस परमेसर ने भावे हे अन अस्यी लुगई ज्या विस्वास ने राके हे, वाँ आपणी विस्वासी धणी का मस परमेसर ने भावे हे, ने तो थाँकी ओलाद असुद वेती, पण अबे तो वीं पुवितर हे।</verse>
				<verse number="15">पण ज्यो मनक विस्वास ने राके, यद्याँ वो अलग वेणो छावे, तो अलग वेबा दो। अस्यी दसा में कुई भई कन बेन कस्याई बन्धन में ने हे, पण परमेसर तो आपाँने सान्तीऊँ रेवा का वाते बलाया हे।</verse>
				<verse number="16">काँके हे लुगई, थूँ कई जाणे हे के, थूँ आपणाँ बना विस्वासी धणी ने बंचाई? अन हे मनक, थूँ कई आपणी बना विस्वासी लुगई ने बंचाई?</verse>
				<verse number="17">परबू जिंने जस्यो वरदान दिदो हे अन जिंने जस्या रूप में चुण्यो हे, वींने वस्यानीस रेणो छावे। हारी मण्डळ्याँ में मूँ ओईस आदेस दूँ हूँ।</verse>
				<verse number="18">ज्यो खतना किदो तको बलायो ग्यो, तो वींने आपणो खतनो हपाणो ने छावे, ज्यो बना खतना बलाया ग्या हे वीं खतनो ने करावे।</verse>
				<verse number="19">खतनो तो कई ने हे, अन नेई खतनो ने वेणो कई हे, बेस परमेसर की आग्या ने मानणीस हारोई हे।</verse>
				<verse number="20">हरेक मनकाँ ने वस्यानीस रेणो छावे हे, जस्यान वीं बलाया ग्या हे।</verse>
				<verse number="21">कई थने दास का रूप में बलायो ग्यो हे? ईंकी चन्ता मती कर, पण यद्याँ थूँ आजाद वे सके, तो अस्यानीस करज्ये।</verse>
				<verse number="22">काँके ज्याँने परबू का दास का रूप में बलाया हे, वीं तो परबू का आजाद मनक हे। अणीस तरियाँ जिंने आजाद मनक का रूप में बलाया ग्या हे वीं मसी का दास हे।</verse>
				<verse number="23">परमेसर थाँने मोल लिदा हे, ईं वाते थाँ मनकाँ का दास मती बणज्यो।</verse>
				<verse number="24">हो भायाँ, जिंने भी जणी दसा में बलायो ग्यो हे, वाँने वणी मेंईस परमेसर का हाते रिस्ता में रेणो छावे।</verse>
				<verse number="25">कूँवारी लुगायाँ का बारा में परबू की कस्यी आग्या मने ने मली हे, पण विस्वास के जोगो वेबा का वाते ज्या दया परबू मारा पे किदी हे, वींके जस्यान मूँ थाँने सला दूँ हूँ।</verse>
				<verse number="26">ईं वाते मारी हमज में ओ हव हे के, अबाणू कळेस ने देकता तका एक मनक ने मारे जस्यान बना ब्याव किदो तको रेवे।</verse>
				<verse number="27">यद्याँ थारे लुगई हे, तो वणीऊँ अलग वेबा की कोसीस मत कर अन यद्याँ थारे लुगई ने हे, तो लुगई की खोज मती कर।</verse>
				<verse number="28">पण यद्याँ थूँ ब्याव भी करे तो पाप ने हे अन यद्याँ कूँवारी को ब्याव वे तो भी कई पाप ने हे, पण अस्या मनक सरीर को दुक जेली अन मूँ अणाने बंचाणो छारियो हूँ।</verse>
				<verse number="29">हो भायाँ, मूँ ओ केरियो हूँ के, टेम कम हे, ईं वाते जिंके लुगायाँ हे, वीं अस्यान रेवे के, वाँके लुगायाँ ने हे</verse>
				<verse number="30">अन रोबा वाळा अस्या वे के, मानो वीं कदी दकी ने व्याई कोयने अन आणन्द करबावाळा अस्या वे मानो आणन्द ने करे, अन मोल लेबावाळा अस्या वे मानो वाँका नके कई ने हे।</verse>
				<verse number="31">ज्यो ईं दनियाँ की चिजाँ को नफो लेरिया हे, वीं अस्यान रेवे के, वीं चिजाँ वाँके काम की ने हे, काँके दनियाँ अबे जस्यान हे वा खतम वे जाई।</verse>
				<verse number="32">मूँ छावूँ हूँ के, थाँ चन्ताऊँ छेटी रेवो। एक कुँवारो मनक परबू की बाताँ की चन्ता में रेवे हे के, कस्यान परबू ने राजी करे।</verse>
				<verse number="33">पण एक पन्यो तको मनक दनियाँ की बाताँ की चन्ता में रेवे के, वो आपणी लुगई ने कस्यान राजी कर सके हे</verse>
				<verse number="34">अन ईं तरियाँ वाँका बच्यार बट जावे हे। पनी तकी अन कूँवारी में भी फरक हे, कूँवारी तो परबू की चन्ता करे हे के, वाँ देह अन आत्मा दुयाँ में पुवितर वे, पण पनी तकी दनियाँ की चन्ता करती रेवे हे के, आपणाँ धणी ने राजी राके।</verse>
				<verse number="35">या बात थाँकी भलई का वाते केरियो हूँ ने की थाँ पाबन्द कररियो हूँ। ईं वाते मूँ छावूँ हूँ के, थाँ वोईस करो ज्यो अपणा आप में सई हे अन थाँ पूरा मनऊँ खुद परबू की सेवा में लाग जावो।</verse>
				<verse number="36">अन यद्याँ कुई हमजे के, मूँ आपणी हगई वीं तकी वीं मोट्यार कुँवारीऊँ ब्याव ने करन हव ने कररियो हूँ अन यद्याँ वाँकी वासना की भावना वेरी वे तो वाँने ब्याव कर लेणो छावे, ईंमें पाप ने हे।</verse>
				<verse number="37">पण ज्यो मन में पाको हे अन जिंपे कई दबाव ने हे अन वो आपणी मरजी ने आपणाँ अदिकार में राके अन आपणाँ मन में आ बात ते कर लिदी हे के, मूँ आपणी हगई वीं तकीऊँ ब्याव ने करूँ तो वो ओ हव करे हे।</verse>
				<verse number="38">ईं वाते ज्यो आपणी हगई वीं तकी छोरीऊँ ब्याव करे हे वो हव करे हे अन ज्यो ने करे वो भी हव करे हे।</verse>
				<verse number="39">जद्याँ तईं कणी लुगई को धणी जीवतो हे, तद्याँ तईं वाँ वींका बन्धन में बन्दी तकी हे। पण जद्याँ वींको धणी मर जावे, तो वाँ जणीऊँ छावे वणीऊँ ब्याव कर सके हे पण बेस परबू का गट-जोड़ में।</verse>
				<verse number="40">पण जस्यान वा हे वस्यानीस रेवे, तो वा मारा बच्यार में ओरी राजी रेई। मूँ होचूँ हूँ के, परमेसर की आत्मा मारा में भी हे।</verse>
			</chapter>
			<chapter number="8">
				<verse number="1">अबे मूरताँ का हामे चड़ाया तका परसाद का बारा में आपाँ जाणा हा। आपीं हारई ग्यानवाळा हाँ अन ग्यान मेपणो पेदा करे हे, पण परेमऊँ हारई को भलो वेवे हे।</verse>
				<verse number="2">यद्याँ कुई हमजे के, वो कई जाणे हे पण ज्यो वींने जाणणो छावे वो तो वो जाणे कोयने हे।</verse>
				<verse number="3">पण यद्याँ कुई परमेसरऊँ परेम करे हे तो वींने परमेसर जाणे हे।</verse>
				<verse number="4">ईं वाते मूरताँ का हामे चड़ई तकी चिजाँ ने खाबा का बारा में आपाँ जाणा हा के, मूरताँ को दनियाँ में कई वजूद ने हे अन ओ हे के, एक ने छोड़न कुई परमेसर ने हे।</verse>
				<verse number="5">धरती अन आकास में नरई देवताँ केवावे हे, अन नरई परबू अन देवताँ हे।</verse>
				<verse number="6">पण आपणाँ वाते तो एकीस परमेसर हे आपणाँ बापू। वणाईस हारी चिजाँ बणई हे अन वाँका वातेईस आपीं जीवा हाँ। परबू खाली एकीस हे, ईसू मसी। वाँकाऊँईस हारी चिजाँ वीं हे अन आपणो जीवन भी वाँकाऊँईस हे।</verse>
				<verse number="7">पण ओ ग्यान हाराई का नके ने हे। नरई तो अबाणू भी मूरताँ की पुजा करे हे अन अस्यी चिजाँ खावे हे अन होचे हे के, जस्यान वीं चिजाँ मूरत्याँ को परसाद हे। ईं वाते वाँके अस्यान करबाऊँ वाँकी अंतर-आत्मा असुद वे जावे हे काँके वीं कमजोर हे।</verse>
				<verse number="8">पण वो परसाद तो आपाँने परमेसर का नके ने लेजाई। यद्याँ आपीं ने खावा तो आपणो कई नकसाण ने वेई अन खावा तद्याँ भी आपाँने कई नफो ने वेई।</verse>
				<verse number="9">पण ध्यान राकज्यो कटे, अस्यान ने वे के, थाँकी आ आजादी कणी कमजोर विस्वासवाळा मनक का वाते ठोकर को मस वे जावे।</verse>
				<verse number="10">काँके यद्याँ कुई “थाँ ग्यानी” ने मन्दर में चड़ई तकी चिजाँ खाता देक ले अन वो कमजोर विस्वासवाळो मनक वे, तो कई वींका मन में मूरताँ का हामे चड़ई तकी चिजाँ खाबा को मन ने वे जाई?</verse>
				<verse number="11">अणी रितीऊँ थाँरा ग्यानऊँ वणी कमजोर विस्वासी मनक को नास वे जाई जिंका वाते मसी जान दिदी ही।</verse>
				<verse number="12">ईं तरियाँ आपणाँ विस्वासी भायाँ का विरोद में पाप करता तका अन वणी कमजोर विस्वासवाळा मनक का मन ने दुक देता तका थाँ मसी का विरोद में पाप कररिया हो।</verse>
				<verse number="13">ईं वाते यद्याँ वो खाणो मारा विस्वासी भई के ठोकर को मस बणे, तो मूँ कदी भी माँस ने खाऊँ अन नेई आपणाँ विस्वासी भई के पाप को मस बणूँ।</verse>
			</chapter>
			<chapter number="9">
				<verse number="1">कई मूँ आजाद ने हूँ? कई मूँ खन्दायो तको ने हूँ? कई में ईसू का दरसण ने किदा हे? कई थाँ हाराई मारा का काम का वजेऊँ परबू में ने आया हो?</verse>
				<verse number="2">पलई मूँ दूजाँ का वाते खन्दायो तको चेलो ने हूँ, पण थाँका वाते तो मूँ खन्दायो तको हूँ, काँके थाँ परबू में मारा खन्दाया तका पे एक सबूत हो।</verse>
				<verse number="3">ज्यो मनक मारी परक करणा छारिया हे, वाँका वाते मारो ओईस जवाब हे।</verse>
				<verse number="4">कई माँने थाँका अटेऊँ खाबा-पिबा को अदिकार ने हे?</verse>
				<verse number="5">यद्याँ माँ ब्याव किदो तको वेतो तो कई माँ खन्दाया तका चेला ने ओ अदिकार ने हे के, माँ माँकी लुगायाँ ने आपणाँ हाते ले जावाँ, जस्यान दूजाँ खन्दाया तका चेला पतरस अन परबू के भई किदो हो?</verse>
				<verse number="6">कई मने अन बरनबास नेईस जीवन जीबा का वाते काम करणो छावे?</verse>
				<verse number="7">कूण आपणाँ घर की कमई खान सपई को काम करे हे? कूण अंगूरा को बाग लगान वींको फळ ने खावे हे? कूण गवाळ्यो गारा की रुकाळी करन वाँको दूद ने पिवे?</verse>
				<verse number="8">मूँ ईं बाताँ मनकाँ का रिति-रिवाजऊँईस बोलूँ हूँ कई? कई अणा बाताँ का बारा में सास्तर में ने लिक्यो हे?</verse>
				<verse number="9">मूसा की वेवस्ता में ओ लिक्यो के, “खेता में काम करती दाण बळदाँ के हुण्डा मती लगावो।” कई परमेसर बेस बळदाँ का बारा मेंईस चन्ता करे हे?</verse>
				<verse number="10">ने, खासतोरऊँ आपणाँ वाते केवे हे। हाँ आपणाँ वातेईस लिक्यो ग्यो हे, काँके हव हे के, हाकबावाळा आसऊँ हाके, अन काटबावाळा पावा की आस राके।</verse>
				<verse number="11">ईं वाते जद्याँ के, माँ थाँका बंच में आत्मिक बिजड़ा वाया हे, यद्याँ माँ थाँकाऊँ माँके सरीर के जरूत की चिजाँ पाबा आस राका हाँ, तो कई आ मोटी बात हे?</verse>
				<verse number="12">जद्याँ दूजाँ को थाँका पे ओ अदिकार हे, तो कई माँको अणीऊँ हेलो कोयने? पण माँ ओ अदिकार काम में ने लिदो, पण हारोई सेण करता रिया के, माँकाऊँ मसी का हव हमच्यार में कई रोक-टोक ने वेवे।</verse>
				<verse number="13">कई थाँ ने जाणो के, ज्यो मनक मन्दर में सेवा करे हे, वीं आपणो खाणो मन्दरऊँइस खावे हे अन ज्यो वेदी पे बली चड़ाबा की सेवा करे हे, वो वीं वेदी की चड़ई तकी चिजाँ को हिस्सेदार हे।</verse>
				<verse number="14">अणीस तरियाँ परबू भी ठेरायो हे के, ज्यो मनक हव हमच्यार हुणावे हे, वाँकी दानकी भी हव-हमच्यारऊँइस पुरी वेई।</verse>
				<verse number="15">पण में अणा बाताँ ने काम में भी ने लिदी अन में ईं बाताँ अणी वाते ने लिकी के, मारा वाते अस्यान किदो जावे। जणी बात को मने मेपणो हे वींने माराऊँ कुई कोस ले अणीऊँ पेल्याँ तो मने मरणो हव हे।</verse>
				<verse number="16">अन यद्याँ मूँ हव हमच्यार हूणाऊँ, तो मारो कई मेपणो ने हे, काँके ओ तो मारा वाते हव हे अन यद्याँ मूँ हव हमच्यार ने हूँणऊँ तो ओ मारा वाते कतरो बुरो वेई।</verse>
				<verse number="17">काँके यद्याँ आपणी मरजीऊँ ओ करूँ हूँ, तो मूँ ईनाम के जोगो हूँ, पण यो काम तो मूँ मारी जिमेदारीऊँ करूँ हूँ काँके परमेसर मने यो काम हूँप्यो हे।</verse>
				<verse number="18">ईं वाते मारी दानकी कस्यी हे? के जद्याँ हव हमच्यार को परच्यार करूँ तो बना दानकी लेन करूँ हूँ, ताँके हव हमच्यार को परच्यारऊँ ज्यो पाबा को मने अदिकार हे, मूँ वींने पूरो काम में ने लूँ।</verse>
				<verse number="19">काँके में हाराऊँ आजाद वेबा पे भी आपणाँ खुद ने हारोई को दास बणा दिदो हे, ताँके नरई लोगाँ का मन ने मसी का वाते जीत सकूँ।</verse>
				<verse number="20">मूँ यहुदया का वाते यहूदी बण्यो ताँके वाँने मसी में ला सकूँ अन ज्यो मूसा का नेमा ने माने हे वाँका वाते मूँ वेवस्ता ने मानूँ हूँ, तद्याँ भी वेवस्ता ने मानी, ताँके वाँने भी मसी में ला सकूँ।</verse>
				<verse number="21">ज्यो यहूदी ने हा वाँने ईसू में बंचाबा का वाते मूँ वाँके जस्यान बण्यो वो भी नेमा का विरोद में, ईंको यो मतलब ने की मूँ परमेसर का नेमाने ने मानूँ हूँ, पण मूँ तो मसी का नेमा के जस्यान जीवूँ हूँ।</verse>
				<verse number="22">मूँ कमजोरा मनकाँ का वाते कमजोर बण्यो ताँके वाँका मन ने जीत सकूँ। मूँ हाराई मनकाँ का वाते हारोई बण्यो, कस्यान भी करन मूँ नरई ने बंचा सकूँ।</verse>
				<verse number="23">ओ हारोई मूँ हव हमच्यार का वाते करूँ हूँ, ताँके वींका वरदानाँ में मारो भी भाग वे।</verse>
				<verse number="24">कई थाँ ने जाणो हो के, दोड़ में तो हाराई दोड़बावाळा दोड़े हे, पण ईनाम तो वींनेईस मले ज्यो जीते हे, ईं वाते थाँ अस्यान दोड़ो के जीत थाँकी वे।</verse>
				<verse number="25">अन हरेक खेल में हरेक खिलाड़ी हरेक तरियाऊँ खुद ने काबू में राकणो पड़े हे, वीं तो ओ हारोई एक नास वेबावाला मुकट पाबा का वाते करे हे पण आपाँ तो वणी मुकट का वाते करा हा ज्यो कदी कमलाई कोयने।</verse>
				<verse number="26">ईं तरियाँ मूँ वीं मनक के जस्यान दोड़ूँ हूँ जिंका हामे एक मकसद वे। मूँ आक्याँ बन्द करन काम ने करूँ।</verse>
				<verse number="27">पण मूँ आपणी देह ने घणी मेनत करान खुद का क्या में राकूँ हूँ, ताँके कटे अस्यान ने वे जावे के, दूजाँ का उपदेस देयाँ केड़े मूँ परमेसर का आड़ीऊँ बेकार मान्यो जाऊँ।</verse>
			</chapter>
			<chapter number="10">
				<verse number="1">हो भायाँ, मूँ ने छाऊँ के, थाँ ईं बात भुल जावो के, आपणाँ बड़ाबा वादळा का रेटे रेन हाराई का हाराई लाल समन्द का बंच में वेन पार व्या हा।</verse>
				<verse number="2">अन वणा हाराई ने वादळा रेटे जमीं पे अन समन्द में, मूसा ने मानबावाळा का रूप में बतिस्मो दिदो ग्यो।</verse>
				<verse number="3">अन वणा हाराई एकीस आत्मिक खाणो खादो हो।</verse>
				<verse number="4">अन हाराई एकीस आत्मिक पाणी पिदो, काँके वीं वणी आत्मिक छाटऊँ पीता हा, ज्यो वाँका हाते-हाते चालती ही अन वाँ छाट मसी हे।</verse>
				<verse number="5">पण परमेसर वाँका मूँ नरईऊँ राजी ने व्या, ईं वाते वाँको काकड़ में नास वेग्यो हो।</verse>
				<verse number="6">ईं बाताँ अस्यान वी के, आपणाँ वाते एक हिक बणगी अन आपाँ अस्यी बुरी बाताँ की मनसा ने करा जस्यी वणा किदी ही।</verse>
				<verse number="7">अन ने थाँ मूरत्याँ पूजबावाळो बणो, जस्यान वाँका मूँ नरई बणग्या हा। जस्यान लिक्यो हे के, “खा-पीन लुगायाँ अन मनक भेळाई नाचबा लाग्या।”</verse>
				<verse number="8">अन ने आपीं कुकरम कराँ, जस्यान के वणा मूँ नरई किदो हो, अणीऊँस वाँका मूँ एक दन में तेईस हजार मरग्या हाँ।</verse>
				<verse number="9">अन ने आपीं मसी की परक कराँ, जस्यान वणा किदी ही अन वीं हाँप के डसबाऊँ मरग्या हा।</verse>
				<verse number="10">अन ने सिकायत कराँ जस्यान वणा मूँ नरई किदी ही अन अणीऊँस वाँको नास दण्ड देबावाळे हरग-दुतऊँ व्यो हो।</verse>
				<verse number="11">पण ईं हारी बाताँ, ज्यो वाँका पे अस्यान घटी के वाँका वाते एक हिक वीं अन आपणे चेतावणी का वाते लिकी गी काँके दनियाँ की अन्त टेम नके हे।</verse>
				<verse number="12">ईं वाते ज्यो ओ होचे के, वो विस्वास में सई ऊबो तको हे, तो वींने ध्यान राकणो छावे के, वो रेटे ने पड़ जावे।</verse>
				<verse number="13">थाँ कदी भी अस्यी परिकसा में ने नाक्या जावो ज्याँ थाँके सेण करबाऊँ बारणे हे। परमेसर तो हाँचा हे। वीं थाँने थाँकी सेण करबा की तागतऊँ हेला परकबा ने देई अन थाँने परिकसा का हाते वणीऊँ बंचबा को गेलो भी बताई ताँके थाँ वींने सेण कर सको।</verse>
				<verse number="14">ईं वाते हो मारा प्यारा भायाँ, मूरती पूँजाऊँ बंचन रो।</verse>
				<verse number="15">मूँ थाँने हमजदार हमजन ओ केरियो हूँ, ज्यो मूँ केरियो हूँ वींकी थाँ खुद परक करो।</verse>
				<verse number="16">वो धन्नेवाद को प्यालो, जिंपे आपीं धन्नेवाद कराँ हाँ, कई आपीं मसी का लुई में भेळा कोयने? वाँ रोटी जिंने आपीं तोड़ा हाँ, कई मसी की देह में आपीं भेळा कोयने?</verse>
				<verse number="17">काँके एकीस रोटी हे अन आपीं ज्यो नरई हाँ, एकीस देह हाँ, काँके आपीं हाराई वणीस रोटी में भागी वेवा हाँ।</verse>
				<verse number="18">वणा इजराएली मनकाँ का बारा में होचो, ज्यो बली किदी तकी चिजाँ खावे हे। कई वीं वणी वेदी में भेळा कोयने हे?</verse>
				<verse number="19">ईं बात ने केवा को मारो मतलब कई हे? कई मूँ ओ केणो छारियो हूँ के, मूरत्याँ पे चड़ायो ग्यो खाणो कई हे कन मूरती कई हे?</verse>
				<verse number="20">ने, मारा केवा को मतलब ओ हे के, वीं अधरमी ज्यो बली चड़ावे हे, वीं परमेसर का वाते ने, पण हुगली आत्मा का वाते चड़ावे हे। अन मूँ ने छावूँ के, थाँ हुगली आत्मा के भेळा रेवो।</verse>
				<verse number="21">थाँ परबू का प्याला मूँ अन हुगली आत्मा का प्यालो मूँ दुयाऊँ ने पीं सको हो। थाँ परबू का भोज अन हुगली आत्मा का भोज, दुयाँ में एक हाते भागी ने वे सको हो।</verse>
				<verse number="22">कई आपीं परबू ने गुस्सा देवाड़ा हा? कई जतरा तागतवर परमेसर हे वाँकाऊँ आपीं हेला तागतवर हा?</verse>
				<verse number="23">आपाँ होरोई करबा का वाते खुला हाँ, पण हारी चिजाँ हव ने हे। आपाँ हारोई करबा का वाते खुला हाँ, पण हारी चिजाँ विस्वास ने गाटो ने करे हे।</verse>
				<verse number="24">कने भी आपणाँ हवारत का बारा मेंईस ने होचणो छावे पण दूजाँ लोगाँ की जरूत का बारा में भी होचणो छावे।</verse>
				<verse number="25">माँस का बजार में ज्यो कई वके हे, वींने आपणाँ मन का हस्याबूँ खावो पण वींका बारा में कदी सवाल मती करो।</verse>
				<verse number="26">काँके सास्तर केवे हे के, “आ धरती अन ईंपे ज्यो कई हे, वो हारोई परबू को हे।”</verse>
				<verse number="27">यद्याँ विस्वास ने राकबावाळा थाँने जीम्बा का वाते बलावे अन थाँ वटे जाणा छावो हो तो, थाँके हामे ज्यो भी परोस्योग्यो वींने मनऊँ खा लिज्यो अन वणीऊँ कई सवाल मती करज्यो।</verse>
				<verse number="28">पण यद्याँ कुई थाँने ओ केवे के, “यो देवताँ के चड़ायो तको चड़ावो हे” तो जणी थाँने क्यो हे वींके मस अन अतंर-आत्मा का मस वींने मती खाज्यो।</verse>
				<verse number="29">मारो मतलब, थाँकी अतंर-आत्माने, पण वीं दूजाँ की, काँके मारी आजादी दूजाँ का बच्यारऊँ काँ परकी जावे।</verse>
				<verse number="30">यद्याँ मूँ परमेसर को धन्नेवाद देन खाणा में भाग लेऊँ तो, वींका वाते मने कुई भी कई ने केणो छावे।</verse>
				<verse number="31">ईं वाते छावे ज्यो खावो, छावो ज्यो पियो, छावो ज्यो करो, बेस हारोई परमेसर की मेमा का वाते करो।</verse>
				<verse number="32">थाँ कदी भी ने तो यहूदियाँ अन ने ज्यो यहूदी ने हा अन ने परमेसर की मण्डळ्याँ का वाते ठोकर का मस बणज्यो।</verse>
				<verse number="33">जस्यान मूँ हारी बाताँऊँ हाराई ने राजी राकूँ हूँ, अन आपणो ने पण दूजाँ को नफो देकूँ हूँ के, वीं बंचाया जावे, वस्यानीस थाँ भी करिया करो।</verse>
			</chapter>
			<chapter number="11">
				<verse number="1">थाँ मारे जस्यान चाल चालो जस्यान मूँ मसी की चाल चालूँ हूँ।</verse>
				<verse number="2">मूँ थाँकी बड़ई करूँ हूँ काँके थाँ मने हारी चिजाँ में आद करो हो अन ज्या हिक में थाँने दिदी हे, वींको पालण करो हो।</verse>
				<verse number="3">पण मूँ छावूँ हूँ के, थाँ ओ जाण लो के, लुगई को मातो वींको धणी हे, मनक को मातो मसी हे अन मसी को मातो परमेसर हे।</verse>
				<verse number="4">अस्यो मनक ज्यो आपणो मातो ढाँकन परातना करे हे कन परमेसर का आड़ीऊँ बोले हे, वो मसी को मान गटावे हे।</verse>
				<verse number="5">पण एक लुगई ज्या उगाड़े माते परातना करे कन परमेसर का आड़ीऊँ बोले हे, वाँ आपणाँ धणी को मान गटावे हे ज्यो वींको मातो हे, वाँ वणी लुगई के जस्यान हे जिंकी टाट कड़ई दिदी वे हे।</verse>
				<verse number="6">यद्याँ कुई लुगई आपणाँ मातो ने ढाँके तो वा आपणाँ बाल कटई ले, पण यद्याँ लुगई के बाल काटबा की सरम की बात हे तो वींने मातो भी ढाकणो छावे।</verse>
				<verse number="7">पण मनक का वाते आपणो मातो ढाकणो हव ने हे काँके वो परमेसर को रूप अन परमेसर की मेमा हे। पण एक लुगई आपणाँ धणी की मेमा ने बतावे हे।</verse>
				<verse number="8">मनक कणी लुगईऊँ ने पण पेली लुगई मनकऊँ बणी तकी हे।</verse>
				<verse number="9">मनक लुगई का वाते ने रच्यो ग्यो पण लुगई मनक का वाते रच्यी गी हे।</verse>
				<verse number="10">परमेसर मनक ने अदिकार दिदो हे अन वीं अदिकार ने दिकाबा का वाते, लुगई आपणो मातो ढाँके। वींने हरग-दुताँ का मस भी अस्यो करणो छावे।</verse>
				<verse number="11">पछे भी परबू का गट-जोड़ में ने तो लुगई मनकऊँ अन ने मनक लुगईऊँ आजाद हे।</verse>
				<verse number="12">काँके जस्यान लुगई मनकऊँ रची गी वस्यानीस अबे लुगईऊँ मनक पेदा वेवे हे, पण हारी चीज परमेसर का आड़ीऊँ आवे हे।</verse>
				<verse number="13">थाँ खुद बच्यार करो, कई लुगई ने उगाड़े माते परमेसरऊँ परातना करणी हव हे?</verse>
				<verse number="14">कई थाँ खुद ने जाणो हो के, यद्याँ कुई मनक आपणाँ बाल मोटा वेबा दे, तो आ वींका वाते हरम की बात हे।</verse>
				<verse number="15">पण यद्याँ एक लुगई लम्बा बाल राके तो, वींका वाते हव हे, काँके बाल वींने ओढणी का वाते दिदा ग्या हे।</verse>
				<verse number="16">पण यद्याँ कुई ईंको विरोद करणो छावे, तो मने केणो पड़ी के, आपणाँ अटे अन परमेसर की मण्डळ्याँ में अणी रिति-रिवाज ने छोड़न ओरी कई रीत ने हे।</verse>
				<verse number="17">अबे आगलो आदेस देतो तको मूँ थाँकी बड़ई ने कररियो हूँ, काँके थाँ हाराई को भेळो वेणो नफो ने हे पण नकसाण हे।</verse>
				<verse number="18">हाराऊँ पेल्याँ तो में ओ हुण्यो हो के, जद्याँ थाँ विस्वासी मनक मण्डली में भेळा वेवो, तो थाँकामें फुट पड़ जावे हे अन मूँ थोड़ो घणो ईंने हाँच भी मानूँ हूँ।</verse>
				<verse number="19">काँके फुट तो थाँकामें वेई, अणीऊँ थाँका बंच में में ज्यो खरा मनक ठेराया ग्या हा, वीं हामे आ जाई।</verse>
				<verse number="20">ईं वाते थाँ जद्याँ एक जगाँ भेळा वेवो हो तो परबू को जीमण जीम्बा का वाते भेळा ने वेवो हो।</verse>
				<verse number="21">काँके जीम्बा की टेम थाँ एक-दूजाऊँ पेल्याँई जीम लेवो हो, अणीऊँ कुई तो भुको रे जावे अन कुई हेलो खा-पीन मस्त वे जावे हे।</verse>
				<verse number="22">कई खाबा-पिबा का वाते थाँके घर ने हे? कन परमेसर की मण्डली ने बेकार हमजो हो अन जणा का नके ने हे वाँने लाजा मारो हो? मूँ थाँकाऊँ कई कूँ? कई अणी बातऊँ थाँकी बड़ई करूँ? मूँ हाँची में बड़ई ने करूँ।</verse>
				<verse number="23">काँके ज्या हिक मूँ थाँने देरियो हूँ, वाँ मने परबू का आड़ीऊँ मली हे। परबू ईसू जीं रात ने धोकाऊँ पकड़वाया ग्या हा वीं रात वणा एक रोटी लिदी,</verse>
				<verse number="24">अन धन्नेवाद देन वणा वींने तोड़ी अन क्यो, “ओ मारो डील हे, ज्यो थाँका वाते हे, मने आद करबा का वाते थाँ अस्यानीस करिया करज्यो।”</verse>
				<verse number="25">अन खाणो खाया केड़े अणीस तरियाँ वणा प्यालो लिदो अन क्यो, “यो प्यालो मारा लुई में एक नवो करार हे। जद्याँ भी थाँ ईंमेंऊँ पियो, तद्याँ मने आद करबा का वाते अस्यान करता रेज्यो।”</verse>
				<verse number="26">काँके जद्याँ कदी भी थाँ या रोटी खावो अन अणी प्यालो मूँ पियो, तो जद्याँ तईं परबू पाच्छा ने आवे तद्याँ तईं परबू की मोत को परच्यार करता रेज्यो।</verse>
				<verse number="27">ईं वाते ज्यो कुई भी परबू की रोटी कन परबू का प्याला मूँ गलत तरियाऊँ खाई-पिई, वो परबू की देह अन वाँका लुई को गुनेगार मान्यो जावे हे।</verse>
				<verse number="28">ईं वाते मनकाँ ने ओ करणो छावे के, वीं आपणाँ खुद ने परके अन तद्याँ वीं रोटी ने खावे अन वीं प्याला मूँ पिवे।</verse>
				<verse number="29">काँके ज्यो कुई परबू की देह ने बना ओळक्या खावे-पीवे हे, वीं परमेसर का दण्ड ने नुतो देवे हे।</verse>
				<verse number="30">अणीऊँ थाँकामूँ नरई कमजोर अन मान्दा हे अन कुई तो मर भी ग्या हे।</verse>
				<verse number="31">यद्याँ आपीं आपणाँ खुद ने परक लेवा तो आपीं परमेसर का दण्ड ने ने पावाँ।</verse>
				<verse number="32">पण परबू आपाँने सई राकबा का वाते दण्ड देवे हे, ताँके आपीं दनियाँ का हाते दोसी ने ठेराँ।</verse>
				<verse number="33">ईं वाते हो मारा भायाँ, जद्याँ थाँ जीम्बा का वाते भेळा वो, तो एक-दूँजा की भी बाट नाळो।</verse>
				<verse number="34">यद्याँ किंने हाँची में जोरऊँ भूक लागरी वे, तो वींने घरेइस खाणो खा लेणो छावे, ताँके थाँको वटे भेळो वेणो दण्ड को मस ने बणे अन दूजी बाताँ ने जद्याँ मूँ आऊँ तद्याँईस थाँने हमजाऊँ।</verse>
			</chapter>
			<chapter number="12">
				<verse number="1">हो भायाँ, मूँ ने छावूँ हूँ के, थाँ आत्मा का वरदानाँ का बारा में अणजाण रो।</verse>
				<verse number="2">थाँ जाणो हो के, जद्याँ थाँ परमेसर ने ने जाणता हा, तो गूंगी मूरत्याँ के पाच्छे जस्यान चलाया जाता हा, वस्यान चालता हा।</verse>
				<verse number="3">ईं वाते मूँ थाँने बतारियो हूँ के, ज्यो कुई परमेसर की आत्मा का आड़ीऊँ बोलबावाळा कुई भी ओ ने केवे के, “ईसू ने हराप लागे” अन ने कुई बना पुवितर आत्माऊँ के सके के, “ईसूइस परबू हे।”</verse>
				<verse number="4">आत्मिक वरदान तो नरी तरियाँ का हे, पण एकीस आत्मा का हे।</verse>
				<verse number="5">अन सेवा भी नरी तरियाँ की हे, पण आपाँ एकीस परबू की सेवा कराँ हाँ।</verse>
				<verse number="6">काम-काज तो नरी तरियाँ का बताया ग्या हे, पण हाराई काम करबावाळा वीं परमेसर तो एकीस हे।</verse>
				<verse number="7">हरेक विस्वासी मनकाँ में परमेसर की आत्मा कस्या न कस्यान परगट वेवे हे ज्यो हरेक की भलई का वाते वेवे हे।</verse>
				<verse number="8">अन ईं आत्माऊँ किंने तो अकलऊँ बात करबा को अन वणीइस आत्माऊँ दूजाँ ने ग्यानऊँ बात करबा को वरदान दिदो जावे हे।</verse>
				<verse number="9">अन ईं आत्माऊँ किंने तो विस्वास करबा का वाते वरदान अन किंने तो ईं आत्माऊँ हव करबा को वरदान दिदो जावे हे।</verse>
				<verse number="10">अन किंने तो अचम्बा का काम करबा को अन किंने तो परमेसर का आड़ीऊँ बोलबा को वरदान, किंने तो भली-बुरी आत्माने जाणबा को वरदान, किंने तो अलग अलग बोली बोलबा को वरदान, किंने तो वाँ बोल्याँ को मतलब बताबा को वरदान दिदो जावे हे।</verse>
				<verse number="11">पण ईं हाराई काम एकीस आत्मा करे, ज्या एकीस हे अन वाँ जिंने छावे वाँने ईं वरदान बाँट देवे हे।</verse>
				<verse number="12">जस्यान आपणी देह तो एकीस हे पण ईंमें नरई अंग हे अन ईं देह में नरई अंग अलग अलग व्या केड़े भी हाराई मलन एकीस देह हे वस्यानीस मसी भी हे।</verse>
				<verse number="13">काँके आपाँ हाराई में पलई यहूदी वो, पलई ज्यो यहूदी ने हे वीं वो, पलई दास वो, पलई आजाद वे, आपाँ हाराई ने एकीस आत्माऊँ एकीस देह वेबा का वाते बतिस्मो दिदो ग्यो हे अन आपाँने एकीस आत्मा दिदी गी हे।</verse>
				<verse number="14">जस्यान एक देह में एकीस अंग ने वेवे हे, पण नरई अंग वेवे हे।</verse>
				<verse number="15">अन यद्याँ पग केवे के, “मूँ हात ने हूँ अन मूँ देह को ने हूँ”, तो कई वींके अस्यान केबाऊँ वो देह को कोयने?</verse>
				<verse number="16">अन कान्दड़ो केवे के, “मूँ आँक ने हूँ ईं वाते मूँ देह को ने हूँ”, तो कई वींके अस्यान केबाऊँ वो देह को कोयने?</verse>
				<verse number="17">अन यद्याँ हारी देह आक्याँइस वेती तो हूणता कस्यान? अन यद्याँ हारी देह कान्दड़ाइस वेता तो हूंगता कस्यान?</verse>
				<verse number="18">पण परमेसर आपणी मरजीऊँ जस्यान छाया वस्यान आपणी देह में एक-एक अंग बणाया हे।</verse>
				<verse number="19">अन यद्याँ हाराई अंग एकीस अंग वेता तो देह कस्यान वेती?</verse>
				<verse number="20">पण अंग तो नरई हे, देह एकीस हे।</verse>
				<verse number="21">आँक हातऊँ ने के सके के, “मने थारी जरूत कोयने” अन ने मातो पगाँऊँ के सके के, “मने थाँकी जरूत कोयने।”</verse>
				<verse number="22">पण देह में अस्या भी अंग हे ज्यो दूजाँ अंगऊँ कमजोर हे पण वाँकी जरूत हेली वेवे हे।</verse>
				<verse number="23">अन आपणी देह में अस्या अंग हे ज्याँने आपाँने आदर ने देणो छावे, पण आपाँ वणा अंग की घणी परवा कराँ हाँ अन देह का वीं अंग ज्याँने आपाँ बताबा ने छारिया हा, वाँने आपाँ हिपाजतऊँ राका हाँ।</verse>
				<verse number="24">आपणाँ वणा दिकबावाळा अंग ने ढाँकबा की जरूत ने पड़े हे, पण परबू आपणी देह ने अस्यान बणई हे के, जणा अंग ने आदर की कमी हे वाँनेईस हेलो आदर मले।</verse>
				<verse number="25">जणीऊँ देह में फुट ने पड़े अन अंग एक दूजाँ में एक दूजाँ की देक-रेक करे।</verse>
				<verse number="26">ईं वाते यद्याँ देह में एक अंग दुक पावे हे तो वींके हाते हाराई अंग दुक पावे हे अन यद्याँ एक अंग की बड़ई वेवे हे तो हाराई अंग वींके हाते राजी वेवे हे।</verse>
				<verse number="27">अस्यान थाँ हाराई मलन ईसू मसी की देह हो अन थाँ हरेक वाँका अंग हो।</verse>
				<verse number="28">अन परमेसर की मण्डली में अलग अलग मनकाँ ने परमेसर अलग अलग रूप में चुण्या हे जस्यान के किंने खन्दाया तका चेला को रूप में, दूजाँ ने परमेसर का आड़ीऊँ बोलबा का रूप में, तीजा ने गरू का रूप में अन किंने तो अचम्बा का काम करबावाळा का रूप में अन किंने तो हव करबावाळा का वरदानाँ में, अन किंने मदत करबावाळा का रूप में अन किंने तो वेवस्ता करबावाळा का रूप में तो किंने तो अलग अलग बोली बोलबावाळा का रूप में चुण्या हे।</verse>
				<verse number="29">अबे थाँ बतावो के, कई हारई खन्दाया तका चेला हे? कई हारई परमेसर का आड़ीऊँ बोलबावाळा हे? कई हारई गरू हे? कई हारई अचम्बा का काम करबावाळा हे?</verse>
				<verse number="30">कई हारई ने हव करबा को वरदान मल्यो तको हे? कई हारई ने अलग अलग बोली में बोलबा को वरदान मल्यो हे? कई हारई ने अलग अलग बोली को मतलब बताबा को वरदान मल्यो हे? कदी ने!</verse>
				<verse number="31">ईं वाते थाँ मोटाऊँ मोटा वरदानाँ ने पावाँ की धुन में रो। मूँ थाँने ओरुँ भी हव गेलो बताऊँ हूँ।</verse>
			</chapter>
			<chapter number="13">
				<verse number="1">यद्याँ मूँ मनकाँ अन हरग-दुताँ की बोली बोलूँ पण लोगाऊँ परेम ने करूँ, तो मूँ टन टन करतो तको पीतळ अन फालतू में बाजतो तको ढोल हूँ।</verse>
				<verse number="2">अन यद्याँ मूँ परमेसर की बाताँ भी बता सकूँ अन मूँ हारोई भेद भी खोल सकूँ, हारोई ग्यान भी जाण जऊँ अन मने अटे तईं विस्वास भी वे के, मूँ मंगरा ने भी हरका सकूँ हूँ, पण परेम ने करूँ, तो मूँ कई भी ने हूँ।</verse>
				<verse number="3">अन यद्याँ मूँ मारी हारी धन-दोलत गरीबा ने बाँट दूँ, अन मूँ हव-हमच्यार हुणाबा का वाते मारी देह ने बाळन बली दी दूँ अन पच्छे भी परेम ने करूँ तो मने कई नफो ने हे।</verse>
				<verse number="4">काँके जिंमें परेम वेवे हे वो धिज्यो राके हे अन दया करे हे अन वो रिस्याँ ने बळे हे अन ओ खुद की बड़ई ने करे अन मेपणोऊँ मोटो ने वेवे हे।</verse>
				<verse number="5">अन वो बुरी चाल कोयने चाले, अन वो खुद की भलई भी ने छावे, नेई पगई गुस्सा करे अन नेई किंकी बुरई को लेको राके,</verse>
				<verse number="6">अन ने वो कूकरमऊँ राजी वेवे हे पण वो ओ हाँचऊँ राजी वेवे हे।</verse>
				<verse number="7">वो हारी बाताँ ने सेण करे हे, अन हारी बाताँ पे विस्वास राके हे, अन हारी बाताँ की आस राके हे अन हारी बाताँ का वाते धीरज राके हे।</verse>
				<verse number="8">परेम कदी भी टळे कोयने पण परमेसर का आड़ीऊँ बोलबावाळा को बोलणो खतम वे जाई, अलग अलग बोली में बोलबा को वरदान भी खतम वे जाई अन ग्यान भी खतम वे जाई।</verse>
				<verse number="9">काँके आपणो ग्यान पूरो ने हे अन परमेसर का आड़ीऊँ बोलबावाळा की बाताँ भी पुरी ने हे।</verse>
				<verse number="10">पण जद्याँ वो पूरो करबावाळो आई तो या कमी ने रेई।</verse>
				<verse number="11">काँके जद्याँ मूँ बाळक हो तो मूँ बाळक का जस्यान बोलतो हो, अन बाळक के जस्यान मारो मन हो, अन बाळक के जस्यान हमज ही। पण जद्याँ में मोटो वेग्यो तो में बाळक के जस्यान की बाताँ छोड़ दिदी।</verse>
				<verse number="12">अबे तो आपाँने धूँदळा काँस में धूँदळो-धूँदळो दिके हे, पण वीं टेम आपाँ आमे-हामे देकाँ। ईं टेम मारो ग्यान पूरो ने हे पण वीं टेम पूरो वे जाई, जस्यान मूँ परमेसरऊँ ओळक्यो जाऊँ।</verse>
				<verse number="13">पण अबे विस्वास, आस, अन परेम ईं तीनई टळे कोयने अन अणा हारईऊँ मोटो परेम हे।</verse>
			</chapter>
			<chapter number="14">
				<verse number="1">परेम करबा की कोसीस करो अन आत्मिक वरदान पाबा की मरजी राको अन हमेस्यान ईं कोसीस में रेवो के, परमेसर का आड़ीऊँ बोल सको।</verse>
				<verse number="2">काँके ज्यो मनक अलग अलग बोल्याँ में बात करे हे वो मनकाँऊँ बात कोयने करे पण परमेसरऊँ बात करे हे। ईं वाते वींकी बोली कुई हमज ने सके, काँके वो भेद की बाताँ ने आत्मा में वेन केवे हे।</verse>
				<verse number="3">पण ज्यो मनक परमेसर का आड़ीऊँ बाताँ करे हे, वीं मनकाँ ने गाटा करबा की, हिम्मत बड़ाबा की अन सान्ती देबावाळी बाताँ करे हे।</verse>
				<verse number="4">काँके ज्यो अलग अलग बोल्याँ में बात करे हे वो खुद ने गाटा करे हे पण ज्यो परमेसर का आड़ीऊँ बोले हे वो विस्वास्याँ की मण्डली ने गाटी करे हे।</verse>
				<verse number="5">अन मूँ ओ छावूँ हूँ के, थाँ अलग अलग बोल्याँ में बाताँ करो पण अणीऊँ भी हेलो मूँ ओ छावूँ हूँ के, थाँ परमेसर का आड़ीऊँ बाताँ करो, काँके यद्याँ कुई अलग अलग बोली बोले अन जद्याँ तईं ईंको मतलब हमजावा वाळो कुई ने जणीऊँ विस्वास्याँ की मण्डली आत्मिक रूप में गाटी वे सके, ईं वाते अणीऊँ मोटो तो परमेसर का आड़ीऊँ बोलबावाळो हे।</verse>
				<verse number="6">हो विस्वासी भायाँ यद्याँ मूँ थाँका नके आन दरसण, परमेसर का आड़ीऊँ बात, हिक देबावाळी अन ग्यान देबावाळी बाताँ ने बोलूँ पण अलग अलग बोली बोलूँ तो थाँने माराऊँ कई नफो?</verse>
				<verse number="7">अन अस्यान यद्याँ बाँसुरी अन तन्दूरा ने धूनऊँ कोयने बजायो जावे तो कस्यान पतो पड़ी के, कस्यी धुन निकळरी हे?</verse>
				<verse number="8">अन यद्याँ रणभेरीऊँ राग हुदी ने निकळे, तो कूण लड़बा का वाते त्यार वेई।</verse>
				<verse number="9">अस्यान यद्याँ थाँ थाँकी जीबऊँ हुदा ने बोलो तो थाँकी बोली कस्यान हमजी जा सके हे? तो थाँ बेकार की बाताँ करबावाळा ठेरो।</verse>
				<verse number="10">ईं दनियाँ में नरी तरियाँ की बोल्याँ हे, पण कुई भी बोली बना मतलब की कोयने हे।</verse>
				<verse number="11">अन यद्याँ मूँ कणी बोली को मतलब ने जाणूँ सकूँ तो मूँ बोलबावाळा की नजराँ में बारवासी हूँ अन वो बोलबावाळो मारी नजराँ में बारवासी हे।</verse>
				<verse number="12">ईं वाते थाँ भी ज्यो आत्मिक वरदान की मरजी राको हो, थाँ आ कोसीस करिया करो के, थाँका आत्मिक वरदानऊँ मण्डली गाटी वेवे।</verse>
				<verse number="13">अन ज्यो मनक अलग अलग बोली बोले वाँने परातना भी करणी छावे के, वो भी वीं बात को मतलब बता सके।</verse>
				<verse number="14">काँके जद्याँ मूँ अलग अलग बोली बोलन परातना करूँ हूँतो मारी आत्मा परातना करे हे पण हमजबा का वाते मारी अकल काम की कोयने।</verse>
				<verse number="15">तो कई करणो छावे? मूँ आत्माऊँ भी परातना करूँ अन अकलऊँ भी परातना करूँ अन आत्माऊँ भी भजन गाऊँ अन अकलऊँ भी भजन गाऊँ।</verse>
				<verse number="16">काँके यद्याँ थूँ आत्माऊँइस धन्नेवाद देवे तो वटे ऊबा तका अविस्वासी मनक कस्यान केई के, अस्यानीस वेवे (आमीन), काँके वीं ने जाणे के, थूँ कई केरियो हे?</verse>
				<verse number="17">थूँ तो थारी जाण में हव तरियाऊँ धन्नेवाद देरियो हे पण अणीऊँ दूजाँ की आत्मिक रूप में गाटा ने वेई।</verse>
				<verse number="18">मूँ परमेसर को धन्नेवाद करूँ हूँ के, मूँ थाँकाऊँ भी हेली दाण अलग अलग बोल्याँ बोल सकूँ हूँ।</verse>
				<verse number="19">तद्याँ भी मण्डली में अलग अलग बोली में दस हजार सबद बोलबा के बजाय हव अकल की पाँच बात बोलणी बड़िया हमजूँ हूँ, काँके जणीऊँ मूँ दूजाँ ने हिक दे सकूँ।</verse>
				<verse number="20">हो विस्वासी भायाँ थाँ थाँकी होच-हमज में बाळक मती बणो। बुरो करबा का वाते तो बाळक बण्या तका रेवो पण होच-हमज में हमजदार बणो।</verse>
				<verse number="21">काँके सास्तर में लिक्यो तको हे के, परबू केवे हे, “मूँ अलग अलग बोली बोलबावाळाऊँ अन पराया मुण्डाऊँ अणा मनकाँऊँ बात करूँ तद्याँ भी वणा मारी ने हूणी।”</verse>
				<verse number="22">ईं वाते अलग अलग बोली विस्वास्याँ का वाते कोयने हे, पण बना विस्वासवाळा का वाते हेन्याण हे। परमेसर का आड़ीऊँ आबावाळी बात बना विस्वासवाळा का वाते कोयने पण विस्वास का वाते हेन्याण हे।</verse>
				<verse number="23">ईं वाते जद्याँ मण्डली एक जगाँ भेळी वेवे अन अलग अलग बोली बोले अन अविस्वासी मनक मण्डली में आ जावे तो वीं थाँने अस्यान बोलता देकन अस्यान ने केई के, थाँ बेण्डा हो?</verse>
				<verse number="24">पण यद्याँ हाराई परमेसर का आड़ीऊँ बोलबा लाग जावे अन जद्याँ कुई मण्डली में अविस्वासी मनक आ जावे तो थाँका हारी बाताँ वींने वींका पाप का बारा में बता देई अन थाँके केबा का जस्यान वींको न्याव वेई।</verse>
				<verse number="25">अन वींके मन का हाराई भेद हामे आ जाई, तद्याँ वो मुण्डा वराणो पड़न परमेसर के धोक लागी अन वो मान लेई के, थाँकी मण्डली में परमेसर हे।</verse>
				<verse number="26">हो विस्वासी भायाँ जद्याँ थाँ भेळा वेवो तो थाँने कई करणो छावे? थाँ तो जद्याँ भी भेळा वेवो हो तद्याँ थाँ भजन अन बचन, परमेसर का दरसण का बारा मेंईस बखाण करो हो। कुई अलग अलग बोली बोले हे अन कुई वीं बोली को मतलब बतावे हे। अन ईं हारी बाताँऊँ मण्डली आत्मिक रूप में गाटी वेणी छावे।</verse>
				<verse number="27">अन यद्याँ थाँने अलग अलग बोली में बोलणो वे, तो थाँका मेंऊँ दो ने तो हेलाऊँ हेला तीन जणा नेईस बोलणो छावे अन बारी-बारीऊँ बोलणो छावे अन एक जणा ने वणा बाताँ को मतलब बताणो छावे।</verse>
				<verse number="28">अन यद्याँ मण्डली में बोली को मतलब बताबावाळो ने वेवे तो बोलबावाळा मनक ने छानो रेणो छावे। वाँने मन में परमेसरऊँ बाताँ करणी छावे।</verse>
				<verse number="29">अन जिंने परमेसर का आड़ीऊँ बोलबा को वरदान मल्यो हे वाँका मेंऊँ भी दो कन हेलाऊँ हेला तीन जणा नेईस बोलणो छावे अन दूजाँ मनकाँ ने वाँकी बाताँ ध्यान लगान हूणणी छावे।</verse>
				<verse number="30">अन यद्याँ वटे बेट्या मनकाँ मूँ किंने परबू को दरसण मल्यो वे, तो वणा मनकाँ ने ज्यो पेल्याऊँ बोलरियो हे, छानो वे जाणो छावे।</verse>
				<verse number="31">काँके यद्याँ थाँ बारी-बारीऊँ बोलो तद्याँ ईं लोगाँ का हमज में आई अन वीं परबू की बाताँ ने हीकन हिम्मत पाई।</verse>
				<verse number="32">अन परमेसर का आड़ीऊँ बोलबावाळा की आत्मा वाँका खुद का बंस में रेवे हे।</verse>
				<verse number="33">काँके परमेसर गड़बड़ी करबावाळा परमेसर कोयने पण सान्ती देबावाळा हे, जस्यान परमेसर का मनकाँ की मण्डळ्याँ में हे,</verse>
				<verse number="34">लुगायाँ ने विस्वास्याँ की मण्डळ्याँ में छानो रेणो छावे, काँके वाँने बोलबा को अदिकार कोयने, पण वाँने अदीन रेणो छावे, जस्यान मूसा का नेमा में लिक्यो ग्यो हे।</verse>
				<verse number="35">वीं कई हिकणो छावे तो आपणाँ घरे में आपणाँ धणीऊँ पूछे, काँके लुगायाँ को विस्वास्याँ की मण्डली में बोलणो हव ने हे।</verse>
				<verse number="36">परमेसर को बचन थाँकामूँ तो ने आयो हे अन नेई थाँ अकेला हो ज्याँका नके पोंछ्यो हे।</verse>
				<verse number="37">अन यद्याँ कुई खुद ने परमेसर का आड़ीऊँ बोलबावाळो जाणे अन वींने आत्मिक वरदान भी मल्यो वे तो वींने ओ जाण लेणो छावे के, मूँ थाँने ज्यो कई भी लिकरियो हूँ, ओ परबू की आग्या हे।</verse>
				<verse number="38">अन यद्याँ ज्यो ईंने ने माने तो वींने भी ने अपणायो जाई।</verse>
				<verse number="39">ईं वाते हो विस्वासी भायाँ परमेसर का आड़ीऊँ आबावाळी बात ने बोलवा वाते हरेक टेम त्यार रेवो अन ज्यो मनक अलग अलग बोली में बोले हे वींने भी रोको मती।</verse>
				<verse number="40">पण ईं हारी बाताँ हव तरीकाऊँ एक का केड़े एक वेणी छावे।</verse>
			</chapter>
			<chapter number="15">
				<verse number="1">हो विस्वासी भायाँ में थाँने ज्यो हव हमच्यार हुणायो हो वींकी आद अवाड़ूँ हूँ अन थाँ वींने मान्यो भी हो अन अबाणू तईं वींने मान भी रिया हो।</verse>
				<verse number="2">अन अणीऊँस थाँ बंचाया जावो हो, पण थाँने अणा बचना ने हूँस्यारी का हाते पकड़न राकणा हे अन यद्याँ थाँ अस्यान ने करो तो थाँको विस्वास करणो बेकार वे जाई।</verse>
				<verse number="3">अन ज्या बात मने हाराऊँ पेल्याँ पतो चाली ही वाँ बात में थाँने हुणा दिदी हे, जस्यान सास्तर में लिक्यो हे के, मसी आपणाँ पापाँ का वाते मरिया हा।</verse>
				<verse number="4">अन वींने कबर में मेल दिदो पण सास्तर में लिक्यो तको हे के, वो तीजे दन पाछो जीवतो वेग्यो।</verse>
				<verse number="5">अन वो केफा ने दिक्यो अन वींके केड़े वीं बाराई खन्दाया तका चेला ने दिक्यो।</verse>
				<verse number="6">अन वाँने दिकबा का केड़े वीं पानस्येऊँ हेला विस्वासी भायाँ ने जद्याँ वीं एक हाते हा, वाँने दिक्यो अन वणा मेंऊँ नरई तो अबाणू तईं जीवता हे, पण कुई तो सांत वेग्या।</verse>
				<verse number="7">अन वीं याकूब ने दिक्या अन वणा हाराई खन्दाया तका चेला ने भी दिक्या।</verse>
				<verse number="8">अन अणा हाराई केड़े ईसू मने भी दिकई दिदा। जद्याँ के, मूँ तो अजीब तरियाऊँ खन्दायो तको चेलो बण्यो हूँ।</verse>
				<verse number="9">अन मूँ हाराई खन्दाया तका चेला मेंऊँ फोरो हूँ अन मूँ चेलो केवाबाँ के जोगो भी ने हूँ काँके मूँ परमेसर की मण्डली का मनकाँ ने हताया करतो हो।</verse>
				<verse number="10">अन आज मूँ ज्यो कई भी हूँ परमेसर की दयाऊँ हूँ अन वींकी दया मारा वाते बेकार ने गी। काँके में दूजाऊँ हेली मेनत किदी हे, पण परमेसर की दया मारा पे हे जणीऊँ मूँ अस्यान कर सक्यो हूँ।</verse>
				<verse number="11">अन यद्याँ में थाँने हव हमच्यार हुणायो हो कन पलई वणा थाँने हुणायो हो माँ एकीस हव हमच्यार हुणाबा हा अन थाँ ईंपे विस्वास किदो हो।</verse>
				<verse number="12">जद्याँ के थाँने एकीस हमच्यार हुणायो हो के, मसी ने मरिया तका मेंऊँ जीवतो किदो ग्यो हो तो थाँका मेंऊँ कुई कस्यान के सके हे के, मरिया केड़े पाछो जीवतो ने व्यो जा सके हे?</verse>
				<verse number="13">अन यद्याँ मरिया केड़े पाछो जीवतो ने वे सके तो मसी भी पाच्छा ने जीवता किदा ग्या हे।</verse>
				<verse number="14">अन यद्याँ मसी ने जीवतो ने किदो ग्यो हे तो माँको परच्यार करणो भी बेकार हे अन थाँको विस्वास करणो भी बेकार हे।</verse>
				<verse number="15">अन माँ भी परमेसर का हामे जूटा गवा बणा हा, काँके माँ परमेसर का बारा में थाँने आ गवई दिदी हे के, वणा मसी ने मरिया तका मेंऊँ पाच्छा जीवता किदो।</verse>
				<verse number="16">अन यद्याँ मरिया तका जीवता ने किदा जाता तो, मसी ने भी जीवतो ने किदो जातो।</verse>
				<verse number="17">अन यद्याँ मसी ने पाच्छा जीवता ने किदा ग्या हे तो थाँको विस्वास करणो बेकार हे अन थाँ भी अबाणू तईं पाप में फस्या तका हो।</verse>
				<verse number="18">अन मसी में विस्वास करता तका ज्यो भी सांत वेग्या, वीं फोगट में नास वेग्या हे।</verse>
				<verse number="19">अन यद्याँ आपाँ ईं दनियाँ की चिजाँ पाबा का वाते मसीऊँ आस लगा मेली हे तो आपाँ हाराई मनकाँऊँ अभागा मनक हा।</verse>
				<verse number="20">पण हाँच ओ हे के, मसी ईसू ने मरिया तका मेंऊँ जीवता किदा ग्या हे अन वीं जीं मरग्या हे, वाँ हाराई मेंऊँ जीवतो वेबावाळो पेलो हे।</verse>
				<verse number="21">काँके जद्याँ के एक मनकऊँ मोत अई हे तो एक मनक ऊँइस मरिया तकाऊँ पाछो जीवतो वेणो भी आयो हे।</verse>
				<verse number="22">अन जस्यान आदम का करम की वजेऊँ हाराई का वाते मोत अई हे, तो वस्यानीस मसी की वजेऊँ हाराई ने पाच्छा जीवता किदा जाई।</verse>
				<verse number="23">पण आपाँ हाराई भी एक का केड़े एक जिवाया जावाँ। हाराऊँ पेल्या मसी ने जिवायो ग्यो अन वाँका केड़े वाँका दूजी दाण आबा की टेम पे वाँने ज्यो मसी का मनक हे वाँने जीवाई।</verse>
				<verse number="24">ईंका केड़े अणी दनियाँ को अंत वेई, मसी हाराई राज करबावाळा राजा ने अन अदिकारियाँ ने अन हारी सगत्याँ ने नास करन आपणो राज परमेसर बापू का हाताँ में हूँप देई।</verse>
				<verse number="25">पण जद्याँ तईं परमेसर मसी का दसमणा ने वाँका पगाँ का रेटे ने कर दे, तद्याँ तईं वाँको राज करणो ते हे।</verse>
				<verse number="26">अन आकरी दसमण मोत को नास करियो जाई।</verse>
				<verse number="27">काँके परमेसर हाराई ने मसी का पगाँ का रेटे कर मेल्या हे अन सास्तर में भी लिक्यो तको हे के, हारोई वाँका बंस में करियो ग्यो हे, परमेसर हारोई वींके पगाँ का रेटे कर दिदो हे, पण परमेसर वणा “हाराई” में ने हे।</verse>
				<verse number="28">अन परमेसर हारोई मसी का बंस में कर दिदो हे तो खुद पूत भी परमेसर का बंस में वे जाई, अटा तईं के हारोई परमेसर का बंस में कर दिदो ग्यो हे, जिंपे परमेसर राज करे हे।</verse>
				<verse number="29">अन यद्याँ मरिया तका पाच्छा जीवता ने वेवे, तो वीं मनक कई करी ज्याँने मरिया तका का वाते बतिस्मो दिदो ग्यो हो? अन वीं मरिया तका पाच्छा जीवताई ने वेई तो काँ मनक वाँका वाते बतिस्मो लेवे हे?</verse>
				<verse number="30">यद्याँ मरिया तका पाच्छा जीवता ने वेवे तो माँ काँ यो खतरो मोल लेरिया हा?</verse>
				<verse number="31">हो विस्वासी भायाँ मूँ थाँका पे मेपणो करूँ हूँ, काँके आपाँ ईसू मसी पे विस्वास करन एक गट-जोड़ में हा, ईं वाते मूँ कूँ हूँ के, मूँ हमेस्यान मोत को खतरो मोल लूँ हूँ।</verse>
				<verse number="32">जद्याँ इपिसुस नगर में मनक जंगली जनावराँ का जस्यान मारे हाते लड़्या तो मने कई मल्यो? अन यद्याँ मरिया तका पाच्छा जीवता ने वेवे, “तो आवो आपाँ खावा-पीवाँ, काँके काले आपाँने भी मरणोइस हे।”</verse>
				<verse number="33">धोको मती खाज्यो, “काँके बुरी संगती हव आदत ने भी बगाड़ देवे हे।”</verse>
				<verse number="34">थाँ होस में आन ज्यो सई हे, वींका बारा होचो अन पाप करणो छोड़ दो। काँके थाँकामूँ नरई तो अस्या हे ज्यो परमेसर का बारा में कई ने ने जाणे हे, मूँ यो थाँकी हरम का वाते केरियो हूँ।</verse>
				<verse number="35">कुई मनक तो ओ पूछे हे के “मरिया केड़े पाच्छा कस्यान जीव सके हे? अन वाँने पाच्छी कस्यी देह मली?”</verse>
				<verse number="36">थाँ तो बेण्डा हो। थाँ ओ जाणो हो के, जद्याँ थाँ बीज वायो हो वो बीज जद्याँ तईं मरी ने जावे जीवतो ने वेवे हे।</verse>
				<verse number="37">अन जिंने थाँ वायो हे वो उगबावाळो पोदो कोयने पण वो तो दाणो हे पलई वो गऊँ को वे कन ओरी किंको भी दाणो वे।</verse>
				<verse number="38">पण परमेसर वींने आपणी मरजी के जस्यो पोदो बणावे हे अन हाराई दाणा ने एक खास पोदो बणावे हे।</verse>
				<verse number="39">जतरा भी जीव हे वाँकी हाराई की देह एक जस्यान की ने वेवे हे, मनकाँ की एक तरियाँ देह हे, जनावराँ की दूजी तरियाँ की, उड़बावाळा जनावराँ की अन माछळ्याँ की अलग तरियाँ की देह हे।</verse>
				<verse number="40">काँके कुई देह तो हरग की वेवे हे अन कुई धरती की, पण हरग की देह को तेज अलग वेवे हे अन धरती की देह को अलग वेवे हे</verse>
				<verse number="41">जस्यान के सुरज, चाँद अन तारा का तेज में फरक वेवे हे अन अटा तईं के, एक ताराऊँ दूजाँ तारा का तेज में भी फरक वेवे हे।</verse>
				<verse number="42">ईं वाते जद्याँ मरिया तका पाच्छा जीवता वेई तो भी अस्यान वेई अन जणी देह ने ईं धरती पे गाड़ीगी हे, वाँ नास वेबावाळी हे, पण जणी देह ने मरिया केड़े पाच्छी मेली वाँ अमर हे।</verse>
				<verse number="43">अन जणी देह ने ईं धरती में गाड़ी जावे हे, वाँ कमजोर अन बना आदर की देह हे अन जद्याँ वाँ देह पाच्छी जीवती वेई तो वाँ मेमावान अन जोरावर वेई।</verse>
				<verse number="44">अन जणी देह ने ईं धरती में गाड़ीगी हे वाँ देह गारा की हे, पण जद्याँ वीं देह ने पाच्छी जीवती किदी गी हे, तो वाँ देह आत्मिक हे। यद्याँ गारा की देह वेवे, तो आत्मिक देह भी वेवे हे।</verse>
				<verse number="45">सास्तर में लिक्यो तको हे के, “पेलो मनक आदम हे ज्यो जीवतो प्राणी हे”, पण आकरी मनक मसी हे, ज्यो जीवन देबावाळी आत्मा हे।</verse>
				<verse number="46">काँके पेल्या आत्मिक जीवन ने आवे पण देह को जीवन आवे हे अन वाँका केड़ेईस आत्मिक जीवन आवे हे।</verse>
				<verse number="47">पेलो मनक धरती का गाराऊँ बणायो ग्यो हो पण दूज्यो मनक ज्यो मसी हे, वो हरगऊँ आयो हो।</verse>
				<verse number="48">ज्यो मनक धरती पे हे वाँकी देह पेला मनक के जस्यान गारा की हे अन हरग में हारई का नके आत्मिक देह वेई जस्यी हरगऊँ आबावाळा मसी का नके ही।</verse>
				<verse number="49">अन जस्यान आपाँ गारावाळा मनक को रूप धारण करा हाँ, वस्यानीस आपाँ हरगवाळा मनक को रूप भी धारण कराँ।</verse>
				<verse number="50">हो भायाँ, मूँ थाँने बताऊँ हूँ के, आपणी आ देह ज्यो माँस अन लुईऊँ बणी तकी हे परमेसर का राज में भेळी ने वे सके हे अन ने ज्यो नास वेबावाळी या देह हे, वाँ ज्यो अमर हे वींमें भेळी वे सके हे।</verse>
				<verse number="51">थाँ ध्यान देन हुणो मूँ थाँने एक भेद की बात बताऊँ हूँ के, आपाँ हाराई मरा कोयने, पण आपणो रूप बदल्यो जाई।</verse>
				<verse number="52">जद्याँ आकरी रणभेरी बजाई जाई वीं दाण आँक झपकाताँ तईं एकीस दाण में अस्यान वे जाई। जद्याँ रणभेरी बजाई जाई तो मरिया तका जीवता वेन अमर वे जाई अन आपाँ ज्यो जीवता हाँ बदल्या जावा।</verse>
				<verse number="53">काँके ईं नास वेबावाळी देह को नास ने वेबावाळी देह में बदलणो जरूरी हे अन आ मरबावाळी देह ने ने मरबावाळी देह में बदलणो जरूरी हे।</verse>
				<verse number="54">अन जद्याँ आ नास वेबावाळी देह बना नास की जोळी ने पेर लेई अन आ मरबावाळी देह ने मरबावाळी देह की जोळी पेर लेई जदी सास्तर में लिक्यो तको ओ बचन पूरो वेई के, “जीत मोत ने निगळगी हे”,</verse>
				<verse number="55">“हे मोत थाँरी जीत कटे हे? अन थाँरो डंक कटे हे?”</verse>
				<verse number="56">पाप एक डंक का जस्यान हे जणीऊँ आपाँ मरा हाँ अन आपणाँ नके नेम हे, जणीऊँ आपाँ जाणा हाँ के, आपीं पाप किदो हे।</verse>
				<verse number="57">पण परमेसर को धन्नेवाद वे के, वणा आपाँने परबू ईसू मसीऊँ मोत पे जीत देवाड़ी हे।</verse>
				<verse number="58">ईं वाते हो विस्वासी भायाँ विस्वास में बना आगा-पाछा व्या गाटा बण्या तका रेवो अन परबू को काम करबा वाते खुद ने त्यार राको, काँके थाँ तो जाणो हो के, परबू वाते किदो ग्यो काम बेकार ने वे जावे।</verse>
			</chapter>
			<chapter number="16">
				<verse number="1">अबे वणी भेंट का बारा में ज्यो विस्वास्याँ का वाते भेळी कररिया हो। थाँ वस्यानीस करो जस्यान में गलातिया की मण्डली ने करबा का वाते क्यो हो।</verse>
				<verse number="2">अन जद्याँ भी हपता को पेलो दन दितवार आवे थाँ थाँकी कमई मेंऊँ कईन कई थाँका घर में भेळा करता रेज्यो। जणीऊँ के, मूँ जद्याँ भी अऊँ थाँने दान भेळा करणो ने पड़े।</verse>
				<verse number="3">अन जद्याँ मूँ थाँका नके पोचूँ तो जिंने भी थाँ छावो वाँने कागद देन थाँका दान ने वींका हाते यरूसलेम पूगा देऊँ।</verse>
				<verse number="4">अन यद्याँ मारो जाणो वेई तो वीं मारा हातेईस जाई।</verse>
				<verse number="5">मूँ मकिदुनिया वेता तको थाँका नके आऊँ, काँके मारो मकिदुनिया जाणो जरूरी हे।</verse>
				<verse number="6">अन वे सके तो मूँ थाँका नकेईस ठम जाऊँ अन हियाळा में थाँका नकेईस रेऊँ, वींका केड़े जटने भी मारो जाणो वेई वटने जाबा का वाते थाँ जरूत का सामान हाते मने खन्दा दिज्यो।</verse>
				<verse number="7">काँके मूँ थाँका नके आताई जाणो ने छारियो हूँ। पण मने आस हे अन यद्याँ परबू छाई तो मूँ थोड़ाक दन थाँका नके रेऊँ।</verse>
				<verse number="8">पण मूँ पिन्तेकुस का तेवार तईं तो इपिसुस में रेऊँ।</verse>
				<verse number="9">वटे परबू को काम करबा वाते ओ हव मोको हे अन वटे मारा दसमण भी नरई हे।</verse>
				<verse number="10">जद्याँ थाँका नके तिमुतियुस आवे तो थाँ वींको ध्यान राकज्यो, ताँके वींने फिकर ने वेवे। काँके वो भी मारा जस्यानीस परबू को काम करे हे।</verse>
				<verse number="11">ईं वाते कुई भी वींने फोरो मती हमज्यो अन जद्याँ वो मारा नके आवे तो वींने गेला में जरूत की चिजाँ का हाते हिक देज्यो, काँके मूँ दूजाँ विस्वासी भायाँ का हाते वींकी आबा की बाट नाळरियो हूँ।</verse>
				<verse number="12">अबे मूँ थाँने अपुलोस का बारा में कूँ हूँ, में वींने दूजाँ विस्वासी भायाँ का हाते थाँका नके आबा वाते क्यो हे, पण अबाणू वो थाँका नके आबा का वाते त्यार ने हे, पण जद्याँ भी वींने मोको मली तद्याँ वो थाँका नके आ जाई।</verse>
				<verse number="13">थाँ ध्यानऊँ रेज्यो अन विस्वास में गाटा बण्या रेज्यो, थाँ हिम्मत राकबावाळा अन तागतवर बणज्यो।</verse>
				<verse number="14">थाँ ज्यो कई भी करो वो परेमऊँ करज्यो।</verse>
				<verse number="15">थाँ स्तिपनूस का घराणा का बारा में तो जाणो हो के, वीं अखाया में मसी पे विस्वास करबाबाळा पेला मनक हे। वणा परबू का भगताँ की सेवा करबा का वाते काम तोक्यो हे। ईं वाते ओ विस्वासी भायाँ मूँ थाँकाऊँ अरज करूँ हूँ,</verse>
				<verse number="16">थाँ खुद ने वाँका हाताँ में हूँप दिज्यो जीं परबू का काम में जुड़या तका हे अन घणी मेनत हे।</verse>
				<verse number="17">स्तिपनूस, फरतूनातूस अन अखईकूस का आबाऊँ मूँ घणो राजी हूँ, काँके ज्यो थाँ मारा वाते कर ने सक्या हो वो वणा करन बतायो हे, काँके थाँ मारा लारे ने हा।</verse>
				<verse number="18">वणा मारी अन थाँकी आत्माने राजी किदी हे, ईं वाते थाँ अस्या मनकाँ को मान करज्यो।</verse>
				<verse number="19">अन एसिया की मण्डली का आड़ीऊँ थाँने नमस्कार। अक्‍विला अन प्रिसकिल्‍ला अन वाँका घर में भेळी वेबावाळी मण्डली का आड़ीऊँ थाँने नमस्कार।</verse>
				<verse number="20">अन हाराई विस्वासी भायाँ का आड़ीऊँ भी थाँने नमस्कार एक-दूजाऊँ गळे मलन एक दूजाँ को आदर करज्यो।</verse>
				<verse number="21">अन मूँ खुद पोलुस थाँने मारा हाताऊँ कागद को आकरी नमस्कार लिकूँ हूँ।</verse>
				<verse number="22">अन ज्यो कुई परबूऊँ परेम ने करी वींने हराप लागी। आपणाँ परबू वेगा आई!</verse>
				<verse number="23">परबू ईसू की दया थाँका पे वेती रेवे।</verse>
				<verse number="24">अन ईसू मसी में मारो परेम थाँका हाते बण्यो रेई।</verse>
			</chapter>
		</book>
		<book number="47">
			<chapter number="1">
				<verse number="1">यो कागद मूँ पोलुस ज्यो परबू ईसू मसी की मरजीऊँ खन्दायो तको चेलो हूँ अन भई तिमुतियुस कुरिन्तुस नगर की मण्डली ने अन अखाया का हाराई परमेसर का मनकाँ ने लिकरिया हाँ।</verse>
				<verse number="2">आपणाँ बापू परमेसर अन परबू ईसू मसी का आड़ीऊँ थाँने दया अन सान्ती मले।</verse>
				<verse number="3">आपणाँ परबू ईसू मसी का बापू परमेसर की बड़ई वेवे, वीं दया करबावाळा अन हिम्मत देबावाळा हे।</verse>
				<verse number="4">अन जद्याँ आपाँ कळेस में वेवा हा तो परमेसरइस आपाँने हिम्मत देवे हे, ताँके आपाँ भी परमेसर की सान्तीऊँ वाँ मनकाँ ने हिम्मत दे सका ज्यो कळेस में पड़्या तका हे।</verse>
				<verse number="5">काँके जस्यान आपाँ मसी का हाते दुक में हिस्सेदार हाँ, वस्यानीस आपाँ भी मसी की वजेऊँ परमेसर की हिम्मत में हिस्सेदार हाँ।</verse>
				<verse number="6">अन यद्याँ माँ कळेस भोगा हाँ तो थाँकी हिम्मत अन थाँने बंचाबा का वाते भोगा हाँ अन माँ राजी हा काँके थाँ राजी हो अन थाँको राजी रेणोइस थाँने धीरज का हाते वणा कळेस ने भोगबा का वाते हिम्मत देवे हे ज्यो आपाँ भोगा हा।</verse>
				<verse number="7">माँ थाँकाऊँ पाकी आस राका हाँ, काँके माँ जाणा हाँ के, जस्यान थाँ माकाँ कळेस में हिस्सेदार हो वस्यानीस माँकी हिम्मत में भी थाँ हिस्सेदार हो।</verse>
				<verse number="8">हो विस्वासी भायाँ माँ ओ भी छावाँ हाँ के, ज्यो कळेस माँने एसिया में जेलणो पड़्यो हो वींके बारा में थाँ भी जाणो। वटे माँ माँकी सेनसगतीऊँ भी हेलो कळेस भोग्यो हो अन मरबा तईं की नोपत अईगी ही।</verse>
				<verse number="9">अन माँ माकाँ हरदा में आ बात होचबा लागा के, माँने तो मोत को दण्ड मलग्यो हे, जणीऊँ माँ खुद पे हेलो भरोसो ने करन परमेसर पे भरोसो राका हा, ज्यो मरिया तका ने भी पाच्छा जीवता कर देवे हे।</verse>
				<verse number="10">अन वणाईस माँने भी खतरनाक मोतऊँ बंचाया हा अन आगे भी बंचाता रेई, काँके माँ वींपेईस आस लगा मेली हे, वींइस माँने आगे भी बंचाई।</verse>
				<verse number="11">अन यद्याँ थाँ भी थाँकी परातना में माँने आद करन मदत किदी तो जीं मनक माकाँ वाते अरज करे हे के, माकाँ पे परबू की दया वे, अन परमेसर ज्यो माकाँ वाते किदो हे वींका वाते वणा मनकाँ ने भी धन्नेवाद देबा को मोको मल जाई।</verse>
				<verse number="12">माँ आ बात मेपणोऊँ अन साप हरदाऊँ के सका हाँ के, माँ ईं दनियाँ का हाते अन खासतोरऊँ थाँका हाते परमेसर की दया के जस्यान चाल्या हा अन हव तरियाऊँ अन हाँच का हाते चाल्या हा ज्यो परमेसर का आड़ीऊँ मले हे ईं दनियाँ की अकलऊँ ने मले हे।</verse>
				<verse number="13">माँ थाँने अस्यो कई ने लिकरिया हाँ ज्यो थाँ ने भण सको अन ने हमज सको। मूँ आस करूँ के, थाँ अणी कागद की हारी बाताँ ने अंत पुरी तरियाऊँ हमज लेवो।</verse>
				<verse number="14">जस्यान थोड़ागणा थाँ माँने हमज्या हो, थाँ मारा पे वस्यानीस मेपणो कर सको हो जस्यान के माँ थाँका पे वणी दन मेपणो कराँ जद्याँ आपणाँ ईसू मसी पाच्छा आई।</verse>
				<verse number="15">अन ईं भरोसा की वजेऊँ मूँ थाँका नके पाछो आबा का वाते ते किदो हो, जणीऊँ मूँ थाँने दो दाण आसिरवाद ले सको।</verse>
				<verse number="16">मूँ होचूँ हूँ के, जद्याँ मूँ मकिदुनिया जातो तको थाँकाऊँ मलूँ अन जद्याँ मकिदुनियाऊँ पाछो आऊँ तो थाँका नके अऊँ अन थाँईस मने यहूदियाँ जाबा वाते जरूत की चिजाँ देन हिक देवो।</verse>
				<verse number="17">ईं वाते जद्याँ मूँ ईं बाताँ की मरजी किदी ही वाँ यूँई तो ने किदी अन में ज्यो मरजी किदी हे वाँ ईं दनियाँ का मनकाँ का जस्यान थोड़ी किदी हे। यद्याँ अस्यान करतो तो मूँ हाँ हाँ अन ने ने केतो।</verse>
				<verse number="18">पण परमेसर विस्वास जोगा हे, ईं वाते माँ थाँने ज्यो हमच्यार हुणायो हे, वो हाँचो हे।</verse>
				<verse number="19">काँके थाँका बचमें में अन सिलवानुस, तिमुतियुस परमेसर का बेटा ईसू मसी को ज्यो परच्यार किदो हो, वो हाँ अन ने में कोयने किदो हो पण वो ईसू मसी में हाँ मेंईस हो।</verse>
				<verse number="20">काँके परमेसर ज्यो भी वादो किदो हे वो ईसू मसी में हाँ में पूरो किदो हे अन आपाँ भी ईं वजेऊँ केवाँ हाँ के, अस्यानीस वे(आमीन) अन ओ परमेसर की मेमा का वाते वेवे हे।</verse>
				<verse number="21">अन ज्यो थाँने भी मारा हाते ईसू मसी की वजेऊँ जोड़े हे अन आपाँने चुण्या हे, वीं परमेसरइस हे।</verse>
				<verse number="22">वींइस आपाँ पे छाप भी लगई हे अन आपणाँ मयने गारन्टी का रूप में पुवितर आत्मा दिदी हे, वीं आपणो वादो पूरो करी।</verse>
				<verse number="23">गवई का रूप में परमेसरऊँ अरज करतो तका अन मारा जीवन का होगन खान कूँ हूँ के, मूँ पाछो कुरिन्तुस में ईं वाते ने आयो हो काँके मूँ थाँने दकऊँ बंचाणा छातो हो।</verse>
				<verse number="24">अन ईंको ओ मतलब ने के, माँ थाँका विस्वास पे काबू पाणो छारिया हाँ। थाँ तो थाँका विस्वास में गाटा हो अन माँ तो थाँकी खुसी में थाँका हाते हाँ।</verse>
			</chapter>
			<chapter number="2">
				<verse number="1">में पेल्याइस ते कर मेल्यो हो के, मूँ थाँने तापड़न दुक देबाने पाछो थाँका नके ने आऊँ।</verse>
				<verse number="2">काँके यद्याँ मूँ थाँने दकी करूँ तो पछे मने कूण राजी करी? थाँकाणी ने, ज्याँने में दुक दिदो हे।</verse>
				<verse number="3">ईंवातेइस में थाँने आ बात पेल्या लिकी ही के, जद्याँ मूँ थाँका नके आऊँ तो वाँ मनकाँऊँ ज्यो मने राजी राके हे, वाँकी वजेऊँ मने दुक ने वेवे, काँके मूँ थाँ हारई पे विस्वास करूँ हूँ के, थाँ मारे राजी रेवाऊँइस राजी रेवो हो।</verse>
				<verse number="4">काँके में ईं बाताँ दकऊँ भरिया तका हरदा का हाते अन रोता तका थाँका वाते लिकी हे। पण थाँने दुक देबा का वाते ईं बाताँ ने लिकी हे, पण ईं वाते लिकी हे के, ज्यो परेम मूँ थाँकाऊँ करूँ हूँ, थाँ वींने जाण जावो।</verse>
				<verse number="5">अन यद्याँ कणी मने दुक दिदो हे, तो वणी बेस मनेइस ने दिदो हे, पण वणी थाँने भी दुक दिदो हे। मूँ थाँका पे कल्ड़ो ने पड़णो छारियो हूँ।</verse>
				<verse number="6">अस्या मनक ने थाँ विस्वास्याँ को समाज ज्यो दण्ड दिदो हे, वो खुब हे।</verse>
				<verse number="7">पण थाँ तो वींको उल्टो करो, वीं मनक ने माप कर दो अन वींकी हिम्मत बड़ावो के, वो भी आगे जा सके जणीऊँ वीं दुक मेंईस ने डूब्या रेवे।</verse>
				<verse number="8">ईं वाते मूँ थाँकाऊँ अरज करूँ हूँ के, थाँ ओ साबत करज्यो के, थाँ वणीऊँ परेम करो हो।</verse>
				<verse number="9">अन में ओ देकबा का वाते या बात लिकी ही के, थाँ परक में खरा निकळो के ने अन हारी बाताँ में मानबावाळा हो कन ने।</verse>
				<verse number="10">यद्याँ थाँ किंने कस्यी भी बात का वाते भी माप करो हो वींने मूँ भी माप करूँ हूँ अन ज्यो कई भी मूँ माप करूँ हूँ वो मसी का हामे थाँका वाते किदो ग्यो हे,</verse>
				<verse number="11">जणीऊँ आपाँ सेतानऊँ हारा कोयने, काँके आपाँ वींकी चाल ने जाणा हाँ।</verse>
				<verse number="12">जद्याँ मूँ मसी का हव हमच्यार को परच्यार करबा का वाते त्रोआस आयो हो, तो मारा वाते परबू गेलो खोल दिदो हो।</verse>
				<verse number="13">पण मारा विस्वासी भई तीतूस ने वटे ने देकन मारो मन घणो दकी व्यो, तो मूँ वटेऊँ हिक लेन मकिदुनिया आड़ी चाल पड़्यो।</verse>
				<verse number="14">परमेसर को धन्नेवाद वे ज्यो आपाँने मसी की वजेऊँ जीतावे हे अन खुद का ग्यान की हव बाना ने आपणाँऊँ हारी जगाँ फेलावे हे।</verse>
				<verse number="15">ज्यो नास वेरिया हे अन ज्यो बंचाया जारिया हे, वाँका बचमें आपाँ धुप की हव बाना का जस्यान हाँ, ज्या मसी परमेसर ने चड़ावे हे।</verse>
				<verse number="16">पण वाँका वाते ज्यो मोत का गेला पे नास वेबा का वाते जारिया हे वाँका वाते मोत का जस्यान की बाना हाँ ज्यो मोत का आड़ी ले जावे हे। पण वाँ मनकाँ वाते ज्यो बंचाया जाबा का गेला का आड़ी जारिया हे वाँका वाते जीवन का जस्यान की बाना हाँ ज्यो वाँने जीवन का आड़ी बड़ावे हे। पण अणी बाताँ का जोगा कूण हे?</verse>
				<verse number="17">परमेसर का बचनाँ को वोपार करबावाळा नरई मनक हे वीं आपणो नफो छावे हे पण माँ अस्यान ने हाँ। माँ तो परमेसर का आड़ीऊँ खन्दाया तका मनक का जस्यान मसी ने हाते लेन, हाँचऊँ बोला हाँ।</verse>
			</chapter>
			<chapter number="3">
				<verse number="1">कई माँ माँकी बड़ई खुदईस करबा लागा हाँ? कन माँ दूजाँ मनकाँ का जस्यान जेग को कागद लिकन थाँने देणो छावाँ कन थाँकाऊँ लेणो छावाँ हा?</verse>
				<verse number="2">मारो कागद तो थाँ खुद हो, ज्यो मारा हरदा पे लिक्यो तको हे जिंने हाराई मनक जाणे अन भणे हे।</verse>
				<verse number="3">अन थाँ भी तो अस्यानीस दिको हो जस्यान थाँ मसी को कागद हो अन जिंने माकाँ हाते खन्दायो ग्यो हे, जिंने सईऊँ ने लिक्यो ग्यो हे पण ओ परमेसर की आत्माऊँ लिक्यो ग्यो हे अन ईंने भाटा पे ने लिक्यो ग्यो हे पण ईंने मनकाँ का हरदा पे लिक्यो ग्यो हे।</verse>
				<verse number="4">माँ मसी का वजेऊँ परमेसर पे योईस भरोसो राका हाँ।</verse>
				<verse number="5">ईंको ओ अरत ने हे के, माँ माँकी तागतऊँ होच-हमजन अस्यान करा हाँ। माँ माँकी तागतऊँ कई ने कर सका हाँ पण माने तागत तो परमेसरइस देवे हे।</verse>
				<verse number="6">अन वणाईस माने नवा करार का दास वेबा का वाते बलाया हे। आ कस्यी लिकी तकी बात तो ने हे पण आ तो आत्मा को करार हे, काँके लिकी तकी बाताँ तो मनक ने मारे हे पण आत्मा वाँने जीवन देवे हे।</verse>
				<verse number="7">मूसा का नेम का जस्यान सेवा मोत लेन अई ही, वीं नेम भाटा पे लिकन दिदा ग्या हा। जद्याँ ईं नेम दिदा ग्या हा, वीं टेम परमेसर की मेमा परगट वीं। वीं दाण मूसा को मुण्डो घणो चमकिलो हो पण वाँ चमक धीरे-धीरे कम वेरी ही, तद्याँ भी इजराएल का मनक वींको मुण्डो भी ने देक सक्या।</verse>
				<verse number="8">तो पछे आत्मा का जस्यान वेबावाळी सेवा वणीऊँ हेली चमकिली काँ ने वेई?</verse>
				<verse number="9">जद्याँ दोसी ठेरबावाळी सेवा चमकिली हे, तो पछे परमेसर का हामे सई ठेरबावाळी सेवा वणीऊँ भी हेली चमकिली काँ ने वेई?</verse>
				<verse number="10">अणी नुवी सेवा की चमक अतरी हे के, वींका हामे मूसा का नेम की सेवा की चमक कई भी ने हे।</verse>
				<verse number="11">काँके वणी सेवा की चमक ज्याँ जाबावाळी हे, पण वाँ चमकिली हे तो आ चमक ज्यो जाबावाळी ने हे वाँ कतरी चमकिली वेई?</verse>
				<verse number="12">आपाँ अणी नुवी आस का वजेऊँ बेधड़क वेन परच्यार कराँ हाँ।</verse>
				<verse number="13">आपाँ वणी मूसा के जस्यान ने हाँ, ज्यो आपणाँ मुण्डा ने परदाऊँ ढाक्या राकतो हो, काँके कदी अस्यान ने वे जावे के, इजराएल का मनक आपणी आक्याँऊँ वीं चमक ने देक ले ज्या धीरे-धीरे कम वेरी ही।</verse>
				<verse number="14">पण वाँकी अकल बन्द वेगी ही अन वीं अबाणू तईं वणी जूना करार ने भणे हे। ईं वजेऊँ अबाणू भी वोईस परदो वाँकी आक्याँ पे पड़्यो तको हे अन ओ परदा बेस मसीइस छेटी कर सके हे।</verse>
				<verse number="15">अबाणू भी मूसा की नेमा ने भण्या जावे हे, तो वणा भणबावाळा का हरदा पे वोईस परदो पड़ जावे हे।</verse>
				<verse number="16">पण जिंको मन परबू का आड़ी फरे हे, वींका हरदाऊँ वो परदो छेटी कर दिदो जावे हे।</verse>
				<verse number="17">देको, परबू तो आत्मा हे अन जटे परबू की आत्मा हे वटेईस छुटकारो हे।</verse>
				<verse number="18">जद्याँ आपाँ उगाड़ा मुण्डाऊँ काँस का जस्यान परबू की चमक को चलको पाड़ा हाँ, तो आपाँ भी वींके जस्यान वेबा लागा हाँ अन वाँ चमक आपाँ में ओरू भी हेलीऊँ हेली वेबा लागे हे अन आ चमक भी परबू का आड़ीऊँइस आवे हे, मतलब आत्माऊँ।</verse>
			</chapter>
			<chapter number="4">
				<verse number="1">आपाँने परबू की दयाऊँ आ सेवा मली हे, अणीऊँ आपाँ निरास ने वेवा हाँ।</verse>
				<verse number="2">आपाँ वणा काम ने जणीऊँ हरम आवे हे, वाँने कोयने कराँ हाँ। अन ने आपाँ कपट राका हाँ अन नेई आपाँ परमेसर का बचन में गाल-गसोळ करा हाँ। पण आपाँ तो हाँच ने खुला रूपऊँ लोगाँ का हामे बतावा हाँ अन परबू का हामे खुद खरा बणा हाँ।</verse>
				<verse number="3">अन जणी हव हमच्यार को आपाँ परच्यार करा हाँ, ईंने वीं ने हमजे ज्याँकी आक्याँ पे परदा पड़्यो तको हे अन ज्यो नास वेबा का गेला पे चालरिया हे।</verse>
				<verse number="4">ईं दनियाँ को सेनापती ज्यो सेतान हे, वो वणा मनकाँ की अकल ने बन्द कर मेली हे जीं विस्वास ने करे हे। जणीऊँ वीं परमेसर का रूप में मसी ने अन वाँकी मेमावान उजिता का हव हमच्यार ने ने देक सके।</verse>
				<verse number="5">अन माँ खुद को परच्यार ने कराँ हाँ पण परबू का रूप में ईसू मसी को परच्यार कराँ हाँ अन माँ माकाँ बारा में तो अस्यान केवाँ हाँ के, माँ ईसू का मस थाँका दास हाँ।</verse>
				<verse number="6">काँके परमेसर क्यो हो के, “अन्दारा में उजितो चमकी” अन वोईस आपणाँ हरदा में चमक्यो हे, जणीऊँ आपाँने ईसू मसीऊँ परमेसर की मेमा का वाते ग्यान को उजितो मल सके।</verse>
				<verse number="7">अन आपणाँ जस्यान का गारा का कळा में ओ अनोको खजानो राक मेल्यो हे के, आ मोटी सगती आपणी ने हे, पण परमेसर की हे।</verse>
				<verse number="8">आपाँ च्यारूँमेरऊँ कळेस तो भोगरिया हाँ, पण गुन्दयाँ ने जावाँ, आपाँ घबराया तका तो हाँ पण आस ने तोड़ा।</verse>
				<verse number="9">आपाँने हताया तो जावे हे, पण तद्याँ भी त्याग्या ने जावा हाँ, आपाँने रेटे नाक दिदा हाँ, पण आपणो नास ने व्यो।</verse>
				<verse number="10">काँके आपाँ दुक जेलन ईसू की मोत में हिस्सेदार वेवा हाँ, जणीऊँ ईसू का जीवन ने आपणी देह में परगट कर सका।</verse>
				<verse number="11">ईसू की वजेऊँ आपाँ ज्यो जीवता हाँ, मोत का हाताँ में दिदा जावाँ हाँ, जणीऊँ ईसू को जीवन नास वेबावाळी देह में खुला रूप परगट कर सका।</verse>
				<verse number="12">अणीऊँ मोत माकाँ में अन जीवन थाँकामें काम करे हे।</verse>
				<verse number="13">सास्तर में लिक्यो तको हे के, “में विस्वास किदो हो, जणीऊँ तो मूँ बोल्यो।” आपाँ में भी वणीइस विस्वास की आत्मा हे, जणीऊँ आपाँ भी विस्वास करा हाँ अन बोला हाँ।</verse>
				<verse number="14">काँके आपाँ जाणा हा के, जस्यान परमेसर परबू ईसू ने मरिया तका मेंऊँ जीवता किदा हे, वस्यानीस वीं आपाँने भी ईसू का हाते जीवता करी अन माँने भी थाँका हाते परमेसर का हामे ऊबा करी।</verse>
				<verse number="15">ईं हारी चिजाँ थाँका वातेईस किदी जारी हे, जणीऊँ नरई मनकाँ पे परमेसर की दया वे अन वीं अणीऊँ परमेसर ने धन्नेवाद दे सकी अन परमेसर ने खुब मेमा मली।</verse>
				<verse number="16">जद्याँ के आपाँ देह कमजोर वेती जारी हे, तद्याँ भी आपाँ निरास ने वेवा हाँ काँके आपणी अंतर-आत्मा नुवी वेती जारी हे।</verse>
				<verse number="17">काँके ओ थोड़ाक दनाँ को दुक आपणाँ वाते जुग-जुग का वाते मेमा लेन आई, ज्या ईं दकऊँ घणी मोटी हे।</verse>
				<verse number="18">ज्यो कई दुक दिके हे वींने आपणी आक्याँ ने देके हे, पण वाँ चिजाँ दिके कोनी, वीं देके हे। काँके ज्यो चिजाँ दिके हे, वाँको नास वे जाई, पण ज्यो ने देके, वीं अमर रेई।</verse>
			</chapter>
			<chapter number="5">
				<verse number="1">आपाँ जाणा हाँ के, ईं धरती पे आपणी देह रूपी घर भगाड़ दिदो जाई पछे आपाँने परमेसर का आड़ीऊँ हरग में कदी नास ने वेबावाळो घर मली वो मनकाँ का हाताऊँ बणायो तको ने वेई।</verse>
				<verse number="2">जद्याँ तईं आपाँ ईं देह में हाँ टसका भरन हेली आस राका हाँ के, फटाकऊँ हरग की देह रूपी घर ने पेर लेवा।</verse>
				<verse number="3">अन आपाँने यो पाको पतो हे के, एक दन जरुर आपाँ वींमें जावाँ अन वींका केड़े आपाँ उगाड़ा ने रेवा।</verse>
				<verse number="4">आपाँ ईं देह में रेता तका बोजऊँ टसका लेरिया हाँ, ईंकी वजे आ हे के, आपाँ आपणी देह ने बदलणी ने छावाँ पण ईं देह में हरग को जीवन जीवणो छावाँ हाँ जणीऊँ ज्यो मरबा को जीवन हे वो जुग-जुग को जीवन वे जाई।</verse>
				<verse number="5">अन जणा आपाँने ईं बात का वाते त्यार किदा हे, वीं परमेसर हे, वणाईस आपाँने गारन्टी का रूप में आत्मा दिदी हे।</verse>
				<verse number="6">ईं वाते आपाँने हिम्मत राकणी छावे काँके आपाँ जाणा हाँ के, जद्याँ तईं आपाँ ईं देह रूपी घर में हाँ, तद्याँ तईं परबू का हाते ने हाँ।</verse>
				<verse number="7">काँके आपाँ देकन ने जीवाँ पण विस्वासऊँ जीवाँ हाँ।</verse>
				<verse number="8">ईं वाते आपाँ हिम्मत राका हाँ अन खुद की देह ने छोड़न, परबू का हाते वाँका घर में रेणो छावाँ हाँ।</verse>
				<verse number="9">ईं वाते आपणाँ हरदा की आस आ हे के, पलई हाते रेवा पलई न्यारा रेवा, पण परबू ने भाता रेवा।</verse>
				<verse number="10">काँके आपाँ ईं देह में रेन ज्यो भी भलो-बुरो काम कराँ हाँ, वींको फळ पाबा का वाते आपाँने मसी की न्याव-गादी का हामे जरुर ऊबा वेणो पेड़ी।</verse>
				<verse number="11">अणीऊँ माँ जाणा हाँ के, परबू की दरपणी कई हे, ईं वाते माँ लोगाँ ने हमजारिया हाँ के, वीं हाँच ने माने। परमेसर आपणाँ हाल-चाल जाणे हे अन मने पूरो विस्वास हे के, थाँ भी माकाँ बारा में हारोई जाणो हो।</verse>
				<verse number="12">माँ थाँका हामे पाच्छी खुद की बड़ई ने कररियाँ, पण थाँने एक मोको देरिया हाँ के, थाँ माकाँ पे मेपणो कर सको। ज्यो मनक आपणाँ हरदा की बाताँ ने छोड़न दिकावाँ की बाताँ पे मेपणो करे हे वाँने थाँ जवाब दे सको।</verse>
				<verse number="13">अन यद्याँ माँ वेण्डा का जस्यान दिका हाँ तो परमेसर ने मेमा देवा का वाते हाँ अन हूँस्यार हाँ तो थाँका नफा का वाते हाँ।</verse>
				<verse number="14">मसी को परेम माँने बंस में राके हे, काँके माँ हमजग्या हा के, जद्याँ मसी हाराई का वाते मरग्या, तो वीं हाराई भी जूना जीवन का वाते मरग्या हे।</verse>
				<verse number="15">ईसू हाराई का वाते मरिया हा, काँके ज्यो मनक जीवता हे वीं खुद का वाते ने जीवे, पण वीं वणी वाते जीवे ज्यो मरिया केड़े पाछो जीवतो कर दिदो ग्यो।</verse>
				<verse number="16">अबे आगेऊँ आपाँ कणी भी मनक को ईं दनियाँ की रीत जस्यान न्याव ने कराँ। जद्याँ एक टेम आपाँ मसी को भी दनियाँ की रीत के जस्यानीस न्याव किदो हो, पण अबे कई भी वे आपाँ वींने अस्यान ने देकाँ।</verse>
				<verse number="17">ईं वाते अबे ज्यो भी मसी में हे, वो परबू की नुवी रचना हे। पुराणी बाताँ परीगी हे अन अबे हारोई नुवो वेग्यो हे।</verse>
				<verse number="18">ईं हारी बाताँ परमेसर का आड़ीऊँ हे, जणा आपाँने मसीऊँ खुद में मेल-मिलाप करा लिदो हे अन आपाँने मनकाँ ने परमेसरऊँ मेल-मिलाप कराबा की सेवा को काम हूँप्यो हे।</verse>
				<verse number="19">ईं वाते माँको हमच्यार ओ हे के, परमेसर लोगाँ का पाप ने अनदेका करन मसी की वजेऊँ खुद में मलारिया हे अन वोईस पाछो परमेसरऊँ मनकाँ को मेल-मिलाप करबा को हमच्यार माँने हूँप्यो हे।</verse>
				<verse number="20">ईं वाते माँ मसी का राजदूत वेन ओ काम कराँ हा अन थाँ ओ मानो के परमेसर माँकाऊँ थाँने चेतारिया हे। ईं वाते माँ मसी का आड़ीऊँ थाँकाऊँ हाता-जोड़ी कराँ हाँ के, थाँ परमेसरऊँ मेल-मिलाप करो।</verse>
				<verse number="21">अन जणी कदीई पाप ने किदो वींने परमेसर आपणाँ पापाँ का वाते बली बणायो जणीऊँ आपाँ परमेसर का हामे सई मान्याँ जावाँ।</verse>
			</chapter>
			<chapter number="6">
				<verse number="1">माँ परमेसर का हाते वाँको काम करबा का मस थाँकाऊँ अरज करा हाँ के, परमेसर की दया ज्यो थाँका पे वीं हे वींने बेकार मती वेबा दिज्यो।</verse>
				<verse number="2">काँके परमेसर केवे हे के, “जद्याँ थाँकी मदत करबा को टेम आयो तो में थाँकी हुण लिदी अन मूँ बंचाबा का दन थाँकी मदत किदी।” देको “सई टेम” याईस हे अन देको “बंचाबा को दन” भी योईस हे।</verse>
				<verse number="3">माँ कणी का वाते ठोकर ने बणा, जणीऊँ किंने भी माँकी सेवा में कई कमी ने मले।</verse>
				<verse number="4">पण माँ तो परमेसर का हव दास का जस्यान खुद ने साबत करा हाँ, धीरज का हाते हारोई सेण करता तका दुक में, अबकी टेम में, परेसानी में,</verse>
				<verse number="5">मार खाता तका, जेळ में रेता तका, कळेस में रेता तका, मेनत करन, रात-दन जागन, भूका रेन भी,</verse>
				<verse number="6">खुद ने पुवितर राकन, ग्यान अन धीरजऊँ, अन दया करन अन पुवितर आत्माऊँ, हाँचा परेमऊँ</verse>
				<verse number="7">अन हाँच का हमच्यारऊँ अन परमेसर की तागतऊँ माँ माकाँ हाताँ में परमेसर का हामे सई ठेराबावाळी ढाल लेन,</verse>
				<verse number="8">माँ इजत, अपमान में अन मान पाबा में अन बेजत वेबा में आगे राका हाँ। माँने मनक ठग हमजे हे, जद्याँ के माँ हाँचा हाँ।</verse>
				<verse number="9">माँने फोगट्या हमजे हे जद्याँ के माँ तो मान्याँ तका हाँ अन माँने मरिया तका जाणे हे, जद्याँ के माँ तो जीवता हाँ। माँने दण्ड पाबावाळा का जस्यान जाणे हे, तद्याँ भी माँ मोत ने ने हुप्याँ जावाँ हाँ</verse>
				<verse number="10">अणीऊँ माँ घणा दकी हाँ, पण हमेस्यान राजी रेवा हाँ। माँ गरीब हा, पण माँ तो नरई ने धनवान बणावा हाँ। माकाँ नके कई ने हे, जद्याँ के माकाँ नके हारोई हे।</verse>
				<verse number="11">हो कुरिन्थियाँ का लोगाँ माँ थाँकाऊँ खुलन बाताँ करा हा अन माँको मन थाँका वाते खुलो हे।</verse>
				<verse number="12">ज्यो परेम माँ थाँकाऊँ करा हाँ, वो कम ने व्यो हे, पण थाँ माँकाऊँ परेम करणो छोड़ दिदो हे।</verse>
				<verse number="13">मूँ या बात थाँने मारा छोरा-छोरी जाणन केरियो हूँ के, थाँने भी मारा वाते थाँका मन ने खोलन राकणो छावे।</verse>
				<verse number="14">बना विस्वासवाळा मनकाँ का हण्डाळ्याँ मती बणो, काँके धारमिकता को पाप का हाते कई मेळ ने हे। अन्दारा की उजिता का हाते कस्यान संगती वे सके हे?</verse>
				<verse number="15">अस्यानीस मसी को सेतान बलियालऊँ कई लेणो-देणो ने हे। बना विस्वासवाळा मनक को विस्वासी का हाते कई मेळ ने हे।</verse>
				<verse number="16">परबू का मन्दर को मूरत्याऊँ कई वेवार? काँके आपाँ खुदईस जीवता परमेसर का मन्दर हा, जस्यान वणा खुदईस क्यो हो, “मूँ वाँका में वास करिया करूँ, वाँका में चालूँ-फरूँ। मूँ वाँको परमेसर वेऊँ अन वीं मारा मनक वेई।</verse>
				<verse number="17">“ईं वाते परबू केवे हे के, थाँ वणाऊँ न्यारा वेन बारणे निकळो, वणाऊँ खुद ने छेटी करो अन ज्यो खराब हे वींके कदी भी हात मती अड़ाज्यो तद्याँईस मूँ थाँने अपाणाऊँ।</verse>
				<verse number="18">मूँ थाँको बापू वेऊँ, अन थाँ मारा छोरा-छोरी वेवो। आ बात परम सगतीमान परबू केवे हे।”</verse>
			</chapter>
			<chapter number="7">
				<verse number="1">हो मारा प्यारा भायाँ, आपणाँ नके परमेसर को दिदो तको करार हे। ईं वाते थाँ आवो, अन परमेसर को मान करता तका खुद ने पुवितर करबा का वाते खुद की आत्माने अन देह ने मयनेऊँ अन बारणेऊँ हुगली चिजाँऊँ पुवितर करो।</verse>
				<verse number="2">थाँ थाँका हरदा में माँने जगाँ दिज्यो। माँ किंको भी कई ने वगाड़्यो हे, ने माँ किंका हरदा ने दुक दिदो हे अन ने माँ किंकोई कई नफो उटायो हे।</verse>
				<verse number="3">मूँ ईं बाताँ थाँने नीचा दिकाबा का वाते ने केरियो हूँ, काँके का थाँ तो जणोईस हो के, थाँ माकाँ हरदा में बस्या तका हो अन अटे तईं के, माँ थाँ हाते जीवाँ अन मरबा का वाते त्यार रेवा हाँ।</verse>
				<verse number="4">मूँ थाँका पे भरोसो करूँ हूँ। मने थाँका पे मेपणो हे। थाँ मने घणी हिम्मत दिदी अन माँकी दुक तकलिपाँ में भी मूँ थाँके वजेऊँ राजी-खुसी हूँ।</verse>
				<verse number="5">जद्याँ माँ मकिदुनिया में ग्या हा तो भी माँने आराम ने मल्यो हो, पण माँने नरी तरियाऊँ दुक जेलणो पड़्यो हो, बारणे आड़ी तो हतावऊँ अन हरदा का मयने दरपणी की वजेऊँ दुक जेलणो पड़्यो।</verse>
				<verse number="6">पण दन-दक्या मनकाँ ने सक सान्ती देबावाळा परमेसर तीतूस ने मारा नके खन्दान मारी हिम्मत बड़ई हे।</verse>
				<verse number="7">अन वींके अटे आबाऊँ थाँ वींको हव आदर मानन वींने सक दिदो जणीऊँ माँने ओरी भी हेली हिम्मत मली। वणी माँने बतायो हो के, ज्यो थाँ किदो हो वींका वाते थाँ दकी हो अन थाँ माराऊँ मलबा का वाते कतरा आकताँ हो अन थाँ मारी चन्ता करो हो अस्यान हुणन माँने ओरू भी खुसी वीं।</verse>
				<verse number="8">जद्याँ के में थाँने कागद लिकन दुक दिदो हे पण मने वींने लिकबा को नामेक भी दुक ने हे। जद्याँ के पेल्याँ मने ईं बात को दुक व्यो हो, पण अबे मने पतो हे के, वीं कागदऊँ थाँने थोड़ोकइस दुक व्यो।</verse>
				<verse number="9">पण अबे मूँ राजी हूँ। मूँ अणी वाते राजी ने हूँ पण मूँ ईं बातऊँ राजी हूँ के, वणी दुक की वजेऊँ थाँ थाँका हरदा ने बदल्यो हे, अन थाँने वो दुक परबू का आड़ीऊँ व्यो हो, ताँके माँके वजेऊँ थाँको कई नकसाण ने वे।</verse>
				<verse number="10">काँके ज्यो दुक परमेसर का आड़ीऊँ आवे हे वींको फळ मन फेरान लेन आवे हे अन जिंकी वजेऊँ दुक ने वेवे पण बंचाया जावाँ हाँ। पण ज्यो दुक दनियाँ की वजेऊँ मले हे, वो दुक मोत लेन आवे हे।</verse>
				<verse number="11">थाँ ओ देकज्यो, ज्यो दुक परमेसर की वजेऊँ थाँका पे आयो हो, वींकी वजेऊँ थाँ कतरा राजी व्या हो, अन ईंकी वजे ऊँइस थाँने अस्यी मनसा दिदी के, अबे थाँ खुद का बारा में के सको के, थाँको मन साप हे, गलत काम का विरोद में गुस्सो, परमेसर को मान करणो, माँकाऊँ मलबा की आगत अन पाप को न्याव करबा की भावना थाँकामें पेदा वीं हे। थाँ अस्यान करन ओ बता दिदो हे के, थाँ एकदम निरदोस हो।</verse>
				<verse number="12">ईं वाते मारो थाँने कागद लिकबा को ओ मतलब ने हो के, मूँ थाँने बताऊँ के, कूण दोसी हे अन वींका बारा में के, किंका खिलाप में गुनो किदो ग्यो हे, पण ईं वाते लिक्यो हो के, परमेसर का हामे थाँने खुद पतो पड़ जावे के, थाँ माँकी करती मानो हो।</verse>
				<verse number="13">अन ईं वजेऊँ माँने हिम्मत मली हे। मारी ईं हिम्मत का अलावा तीतूस को राजी वेबाऊँ माँ ओरू भी हेलो राजी व्या हा, काँके थाँकी वजेऊँ वींकी आत्माने चेन मल्यो हे।</verse>
				<verse number="14">थाँका वाते जीं बाताँ बड़-चड़न किदी ही, वणी वाते मने हरमा ने मरणो पड़्यो, पण जस्यान माँ थाँने हाँची-हाँची क्यो हो, वस्यानीस थाँका बारा में, में मारो मेपणो तीतूस का हामे हाँच का हाते परगट किदो हे।</verse>
				<verse number="15">वो जद्याँ ओ आद करे हे के, थाँ हाराई कस्यान वींकी आग्या मानी ही अन दरपऊँ धूँजता तका कस्यान वींकी आवभगत किदी ही, तो वींको परेम थाँका वाते ओरू भी हेलो बड़ जावे हे।</verse>
				<verse number="16">मूँ राजी हूँ के, थाँका पे मूँ पूरो भरोसो राक सकूँ हूँ।</verse>
			</chapter>
			<chapter number="8">
				<verse number="1">देको, हो विस्वासी भायाँ अबे माँ ओ छावाँ हाँ के, थाँ परमेसर की वीं दया का बारा में जाणो ज्यो मकिदुनिया का विस्वास्याँ की मण्डळ्याँ पे किदी गी ही।</verse>
				<verse number="2">मारा केवा को ओ मतलब हे के, वणा मण्डळ्याँ का मनकाँ ने परक्या ग्या हा, तद्याँ भी वीं राजी हा अन वीं गरीब वेता तका भी वीं देबा का मामला में खुला मनऊँ दिदो।</verse>
				<verse number="3">मूँ वाँका बारा में गवई दे सकूँ हूँ के, वीं जतरो भी वीं दे सकता हा वतरो वणा दिदो। अतरोकीस ने वणा आपणी सगतिऊँ भी बड़न आपणी मरजीऊँ हरदा ने खोलन दिदो।</verse>
				<verse number="4">वीं मोटा बोज का हाते परमेसर का पुवितर मनकाँ की मदत करबा का मोका का वाते अरज करता रिया।</verse>
				<verse number="5">अन जस्यान माँ वाँकाऊँ आस राकी ही, वणीऊँ हेलो वणा किदो। वणा पेल्याँ खुद ने परबू ने हूँप दिदा अन पछे परमेसर की मरजीऊँ वणा खुद ने माँने हूँप दिदा।</verse>
				<verse number="6">ईं वाते माँ तीतूसऊँ अरज किदी के, जस्यान वणी आपणो काम चालूँ कर दिदो हे, वस्यानीस ईं दान भेळो करबा का काम ने थाँका वाते पूरो करे।</verse>
				<verse number="7">अन थाँ हारी बाताँ धनवान हो, जस्यान के विस्वास में, बोली में, ग्यान में, नरई तरियाऊँ भलई करबा में अन जणी परेम की हिक माँ थाँने दिदी ही, वीं परेम में थाँ पाका हो वस्यानीस थाँ अणी दान देबा का काम में भी बड़ता जावो।</verse>
				<verse number="8">आ बात में आग्या देन ने की, पण दूजाँ मनकाँ के खुला मनऊँ दान देबा की भावना का बारा में केन थाँका परेम का हाँच की परक करणो छारियो हूँ।</verse>
				<verse number="9">काँके थाँ आपणाँ परबू ईसू मसी की दया ने तो जाणोइस हो अन थाँ ओ भी जाणो हो के, वीं अमीर वेता तका भी थाँका वाते गरीब बणग्या। जणीऊँ वाँकी गरीबीऊँ थाँ अमीर वे जावो।</verse>
				<verse number="10">या बात थाँका वाते हव हे, अन ईं दान का काम में एक वरऊँ करबा मेंईस ने पण ईं बात ने मानबा में भी थाँ हाराऊँ आगे हो। ईं बात में मारी सला हे के,</verse>
				<verse number="11">अबे थाँ अणी काम ने पूरो करो। ज्या मरजी थाँ किदी ही, वींने ज्यो कई थाँका नके हे वींमेंऊँ दान देन पुरी करो।</verse>
				<verse number="12">काँके जस्यान देबा को मन वेवे हे वस्यानीस वींको दान गरेण किदो जावे हे। मारो केणो हे के, जतरोक वे वतरो दे दिज्यो वणीऊँ बड़न मती देज्यो।</verse>
				<verse number="13">काँके मूँ ओ ने छावूँ हूँ के, थाँ परेसानी में पड़ जावो अन दूजाँ ने थाँकाऊँ नफो वे, पण माँ तो हाराई को भलो छावाँ हाँ।</verse>
				<verse number="14">मारी मरजी हे के, वाँकी अणी घटती में थाँकी बढोतरी वाँकी जरूत पुरी करे, जणीऊँ कणी दन थाँकी घटती में वाँकी बढोतरी थाँकी जरूत पुरी कर सके, अस्यान हाराई बराबर वे जाई।</verse>
				<verse number="15">जस्यान सास्तर में लिक्यो तको भी हे के, “जणी नरोई भेळो किदो वींके नके जरूतऊँ हेलो ने बच्यो, पण जणी थोड़ोकइस भेळा किदो वींके कईस कमी ने पड़ी।”</verse>
				<verse number="16">परबू को धन्नेवाद वे, ज्यो तीतूस का हरदा में थाँकी चन्ता करबा का वाते वस्यानीस मरजी दिदी हे, जस्यान की मरजी मारा हरदा में हे।</verse>
				<verse number="17">काँके वणी माँकी हाता-जोड़ीइस ने मानी अन वींके वाते वो मरजी भी राके हे, ईं वाते वो खुद की मरजीऊँ थाँका नके आबा वाते अटूऊँ हिक लेरियो हे।</verse>
				<verse number="18">अन माँ तीतूस का हाते वणी भई ने भी खन्दारिया हा, जिंको हव हमच्यार का परच्यार करबाऊँ हारी मण्डळ्याँ में अन हारी जगाँ में वींको नाम फेलरियो हे।</verse>
				<verse number="19">अन अतरोइस ने पण वो मण्डली का मनकाँ का क्या के, जस्यान मारा हाते जाबा का वाते वींने चुण्यो भी हे। ईं दान का काम वाते वो मारा हाते जावे अन माँ ओ सेवा को काम ईं वाते करिया हाँ जणीऊँ परबू की मेमा अन माँकी हरदा की मरजी हामे आवे।</verse>
				<verse number="20">अन माँ ईं बात को ध्यान राका हाँ के, खुला मनऊँ दिदा तका हेला दान का काम ने माँ कररिया हाँ, वींका वाते कुई दोस ने लगा सके।</verse>
				<verse number="21">काँके ज्यो बाताँ परबू की देकणी मेंईस ने पण मनकाँ की देकणी में भी सई हे, माँ वणा बाताँ की चन्ता कररिया हा।</verse>
				<verse number="22">वाँका हाते माँ माकाँ एक ओरी भई ने खन्दारिया हाँ, जिंने माँ घणी बाताँ में अन घणी दाण भलई करबा का वाते त्यार देक्यो हे अन अबे वींने थाँका पे घणो विस्वास हे, जणीऊँ वींने थाँकी मदत करबा की मरजी घणी हेली वेगी हे।</verse>
				<verse number="23">यद्याँ कुई मने तीतूस का बारा में पूछे, तो वो मारा हाते रेबावाळो अन थाँका नफा का वाते मारा हाते काम करबावाळो हे अन जटे तईं मारा भायाँ को सवाल हे तो, वीं मण्डळीऊँ खन्दाया तका अन मसी की मेमा का हे।</verse>
				<verse number="24">ईं वाते थाँ वाँने परेम करन बताज्यो, माँ थाँका पे अतरो मेपणो काँ कराँ हाँ। ईं बात ने थाँ साबत करज्यो, जणीऊँ हारी मण्डली वींने देक सके।</verse>
			</chapter>
			<chapter number="9">
				<verse number="1">परमेसर का पुवितर मनकाँ का वाते ज्यो दान खन्दायो जारियो हे, ईंका बारा में मूँ थाँने ओरी हेलो लिकबा का वाते जरूरी ने हमजूँ हूँ।</verse>
				<verse number="2">काँके मूँ जाणूँ हूँ, ईं काम ने करबा का वाते थाँ हमेस्यान त्यार रेवो हो अन ईं बात ने मकिदुनिया का मनकाँ का हामे केवाऊँ मेपणो वेई के, अखाया का मनक पालाँ साल ऊँइस त्यार वेग्या हा अन थाँका काम ने देकन नरई मनकाँ ने काम करबा की हिक मली हे।</verse>
				<verse number="3">पण मूँ भायाँ ने थाँका नके ईं वाते खन्दारियो हूँ के, माँ थाँका वाते ज्यो मेपणो कररिया हा वो बेकार ने वे जावे अन ईं वाते भी के थाँ त्यार रेवो, जस्यान मूँ केतो भी आयो हूँ।</verse>
				<verse number="4">यद्याँ अस्यान ने व्यो तो जद्याँ मकिदुनिया का मनक मारा हाते, थाँका नके आई अन वीं थाँने त्यार ने देकी तो, मारा वणी विस्वास की वजेऊँ ज्यो माँ थाँकामें बतायो हो, माँने हरमा मरणो पड़ी अन थाँने तो घणोइस हरमा मरणो पड़ी।</verse>
				<verse number="5">ईं वाते मूँ भायाँऊँ अरज कररियो हूँ के, वीं पेल्याइस थाँका नके परा जावे अन थाँका नकेऊँ वीं दान जिंका बारा में थाँ पेल्याँईं बचन दिदो हो, वींने त्यार राको अन ओ मारा जोरऊँ ने हो, पण थाँकी हरदा की खुसी जस्यान वे।</verse>
				<verse number="6">थाँने मूँ एक बात बताऊँ हूँ के, ज्यो थोड़ोक वावे हे वो थोड़ोकइस काटे हे अन ज्यो हेलो वावे हे, वो हेलो काटी।</verse>
				<verse number="7">थाँ जतरो मन में होच्यो हे वतरोइस दान दो, ने तो वो दकऊँ अन ने किंका जोरऊँ, काँके परमेसर वणीऊँ परेम करे हे ज्यो हरदा की खुस वेन दान देवे हे।</verse>
				<verse number="8">परमेसर हाराई तरियाँ का वरदान दे सके हे, जणीऊँ थाँकी हारी बाताँ अन हरेक टेम में, हारोई ज्यो थाँका वाते जरूरी हे, वो थाँका नके वेवे अन हाराई भला काम का वाते जरूतऊँ हेलो थाँका नके रेवे।</verse>
				<verse number="9">जस्यान सास्तर में लिक्यो तको हे के, “वो खुला मनऊँ गरीबा ने देवे हे, अन वींको धरम कदी नास ने वेई।”</verse>
				<verse number="10">परमेसरइस बीज बावावाळा ने बीज अन खाणो खाबावाळा ने रोटी देवे हे। वींइस थाँने बीज देई अन वींइस मोटा करी, वाँकाऊँईस थाँकी धरम की खेती फलती-फुलती रेई।</verse>
				<verse number="11">थाँने हरेक तरियाँ धनवान बणाया जाई जणीऊँ थाँ आपणाँ हात ने खोळो राकन दे सको अन ईं दानऊँ जद्याँ माँ किंकी मदत कराँ तो ईं वजेऊँ वीं मनक परबू ने धन्नेवाद देई।</verse>
				<verse number="12">दानकी पुवितर सेवाऊँ बेस परमेसर का पुवितर मनकाँ किइस जरूत पुरी ने वेवे हे पण परमेसर ने धन्नेवाद देबा को भाव भी मनकाँ में आवे हे।</verse>
				<verse number="13">काँके थाँकी ईं सेवाऊँ वीं परमेसर ने मेमा देई, अन अणीऊँ ओ दिके हे के, थाँ मसी का हव हमच्यार ने मानन वींके गलेइस चालो हो अन वाँकी अन हाराई ने मदत करबा का वाते खुला मनऊँ दान देवो हो।</verse>
				<verse number="14">वीं थाँका वाते परमेसरऊँ परातना करी, काँके वीं थाँकाऊँ गेरो परेम करे हे अन वीं जाणे हे परमेसर थाँ लोगाँ पे करती दया किदी हे।</verse>
				<verse number="15">परमेसर का वणी वरदान का वाते वींको धन्नेवाद वे, जिंको बखाण ने करियो जा सके हे।</verse>
			</chapter>
			<chapter number="10">
				<verse number="1">मूँ पोलुस, थाँका हामे मसी की नरमाई अन वींकी करपा की गवई देन थाँकाऊँ अरज करूँ हूँ। लोगाँ को केणो हे के, जद्याँ मूँ थाँका हामे रेऊँ हूँतो मूँ थाँका लारे नरमाईऊँ वेवार राकूँ हूँ, पण जद्याँ मूँ थाँका हामे ने रूँ तो मूँ नरमाई ने राकूँ हूँ।</verse>
				<verse number="2">अबे मारी थाँकाऊँ परातना हे के, जद्याँ मूँ थाँका नके अऊँ, तद्याँ मने वणा मनकाँ का विरोद में कल्ड़ो वेवार करबा की जरूत ने पड़ी जीं अस्यान होचे हे के, माँ दनियाँ को जीवन जीवाँ हाँ।</verse>
				<verse number="3">हाँची में माँ भी तो ईं दनियाँ मेंईस रेवा हाँ, पण ईं दनियाँ का मनकाँ का जस्यान ने लड़ा हाँ।</verse>
				<verse number="4">काँके जणी ओजाराँऊँ माँ लड़ा हाँ वीं दनियाँ का ओजार ने हे, पण वणा ओजार में आत्मिक गड ने हड़ाबावाळी परमेसर की तागत हे।</verse>
				<verse number="5">अन माँ वणा ओजाराँऊँ लोगाँ का गुमानऊँ भरिया तका सवाला अन बाताँ ने ज्यो परमेसर का ग्यान का विरोद में वेवे हे, वाँने बंस में करन मसी की आग्या में लावाँ हाँ।</verse>
				<verse number="6">यद्याँ थाँ हारी आग्या ने पुरी तरियाऊँ मानबावाळा बण जावो, तो माँ वाँ हाराई ने ज्यो आग्या ने माने वाँने दण्ड देबा का वाते त्यार हाँ।</verse>
				<verse number="7">थाँ वणाईस बाताँ ने देको ज्यो थाँकी आक्याँ का हामे हे। यद्याँ किंने ओ विस्वास वेवे के, मूँ मसी को हूँतो वींने ओ भी जाणणो छावे के, जस्यान वो मसी को हे वस्यानीस माँ भी मसी का हाँ।</verse>
				<verse number="8">मूँ मारा वीं हक की वजेऊँ ज्यो परबू मने दिदो हे वींपेईस मेपणो करूँ अन ओ हक परबू माँने थाँने बगाड़वा का वाते ने दिदो हे पण थाँने बणाबा का वाते दिदो हे। ईं वाते मूँ हरमा ने मरूँ।</verse>
				<verse number="9">मूँ अस्यान ने बतारियो हूँ के, ईं कागदऊँ मूँ थाँने दरपऊँ।</verse>
				<verse number="10">ज्यो मनक मारो विरोद करे हे वीं केवे हे के, “वींका कागद तो जोरदार अन नरोगा रूपऊँ लिक्या तका वेवे हे पण जद्याँ वो हामे आवे हे तो वो देह में कमजोर अन बोलबा में भी अतरो खास ने दिके हे।”</verse>
				<verse number="11">ज्यो अस्यान केवे हे, वाँने ओ भी जाणणो छावे के, जस्यान कागद में मारा बचन लिक्या तका हे वस्यानीस थाँका हामे माँ काम भी कराँ हाँ।</verse>
				<verse number="12">काँके माँ वाँ मनकाँ के जस्यान ने हा, ज्यो खुद की बड़ई करे हे अन वीं खुद का हिसाबऊँ खुद ने एक दूजाँ का हाते नाप तोल करे हे। वीं कतरा बेण्डा हे।</verse>
				<verse number="13">माँ माकाँ हक की मेर ने उलांगन मेपणो ने कराँ हाँ। वीं हक का वाते ज्यो काम की मेर परमेसर मने दिदी हे वीं मेर में माँको काम भी थाँ बंच में हे।</verse>
				<verse number="14">काँके माँ माकाँ ने हकऊँ हेला खुद ने ने बतावा हा, पण मसी को हव हमच्यार हूँणाया तका थाँका नके आबावाळा मेंऊँ पेला हाँ।</verse>
				<verse number="15">अन ने माँ दूजाँ की मेनत पे मेपणो करा हा पण आस हे के, जस्यान जस्यान थाँको विस्वास बड़तो जाई वस्यान-वस्यान माँ भी थाँकी वजेऊँ ओरू बड़ता जावा।</verse>
				<verse number="16">ईंका केड़े माँ थाँका मेरऊँ दूजाँ में हव हमच्यार हूणावाँ, ईंको ओ मतलब भी ने हे के, माँ दूजाँ का बणा बणाया काम पे मेपणो कराँ हा।</verse>
				<verse number="17">पण, “यद्याँ कुई मेपणो करे हे, तो वो परबू ज्यो किदो वींका बारा में मेपणो करे।”</verse>
				<verse number="18">काँके ज्यो आपणी खुद की बड़ई करे हे, वो मान्यो ने जावे हे पण जिंकी बड़ई परबू करे हे, वोईस मान्यो जावे हे।</verse>
			</chapter>
			<chapter number="11">
				<verse number="1">यद्याँ थाँ मारा बेण्डापणा ने सेण कर लेता तो कतरो भलो वेतो। अन थाँ वींने सेण भी करो हो।</verse>
				<verse number="2">काँके जस्यान परबू थाँकी चन्ता करे हे वस्यान मूँ भी थाँकी चन्ता करूँ हूँ। मूँ थाँकी बात एकीस मसी का हाते लगा मेली हे जणीऊँ मूँ थाँने पुवितर कूँवारी छोरी का जस्यान मसी ने हूँप दूँ।</verse>
				<verse number="3">पण मने दरपणी लागे हे, काँके कदी अस्यान ने वेजा के, जस्यान धरती की पेली लुगई ज्या हवा ही, वींने हाँप आपणी चालऊँ भटका दिदी ही, वस्यानीस ईं थाँका मन भी मसी की भगतीऊँ अन पवितरताऊँ ज्यो आपाँने मसी का वाते राकणी छावे, वणीऊँ भटका ने दिदो जावे।</verse>
				<verse number="4">काँके थाँका नके कुई आन ईसू का उपदेस माँ थाँने हुणाया हाँ, वींके अलावा यद्याँ कुई दूजाँ ईसू का उपदेस हुणावे हे, अन ज्यो पुवितर आत्मा थाँने मली हे, वींके अलावा यद्याँ थाँ दूजी आत्माने मानो हो। जणी छूटकारा का हमच्यार ने थाँने हुणाया हो, वींके अलावा यद्याँ थाँ दूजाँ हमच्यार ने हुणो हो तो ईंको मतलब ओ हे के, थाँ दूजाँ ईसू, दूजाँ हमच्यार अन दूजी आत्माने लेबा का वाते त्यार हो।</verse>
				<verse number="5">पण मूँ खुद ने वाँ लोगाऊँ फोरा ने हमजूँ हूँ, ज्याँने थाँ खन्दाया तका मोटा चेला केवो हो।</verse>
				<verse number="6">वे सके हे के, मारी बोलबा को हुनर थोड़ो कम हे पण ग्यान तो घणो हे। ईं हारी बाताँ का बारा में माँ थाँका हामे साप तरियाऊँ बताता आरिया हाँ।</verse>
				<verse number="7">में खुद ने फोरो करन थाँने ऊपरे उटाबा का वाते फोगट में परमेसर को हव हमच्यार हुणान कई पाप कर दिदो हे?</verse>
				<verse number="8">कई थाँ के सके हो के, में दूजी मण्डळ्याऊँ मदत लेन वाँने लूटी ताँके मूँ थाँकी सेवा कर सकूँ?</verse>
				<verse number="9">जद्याँ मूँ थाँका नके हो तो मने कमी वीं हे तद्याँ भी में थाँका पे कई बोज ने नाक्यो, काँके मारा भायाँ मकिदुनियाऊँ आन मारी वणी कमी ने पुरी किदी हे। में हरेक दाण खुद ने थाँका पे बोज बणाबाऊँ रोक्यो, अन आगे भी रोक्यो रेऊँ।</verse>
				<verse number="10">यद्याँ मसी को हाँच मारा में हे तो अखाया परदेस में कुई भी मने ईं बात में मेपणो करबाऊँ ने रोक सकी।</verse>
				<verse number="11">ईंको ओ मतलब ने हे के, मूँ थाँकाऊँ परेम ने करूँ हूँ? परमेसर ईं बात ने जाणे हे के, मूँ थाँकाऊँ परेम करूँ हूँ।</verse>
				<verse number="12">ईं वाते ज्यो कई मूँ करूँ हूँ, वींने करतो रेऊँ जणीऊँ ज्याँने थाँ खन्दाया तका मोटा चेला केवो हो, वाँने आपणी तरियाँ मेपणो करबा को मोको ने मले, जणी बात पे वीं मेपणो करे हे।</verse>
				<verse number="13">काँके अस्या मनक जूटा खन्दाया तका चेला हे अन धोकाऊँ काम करबावाळा हे, अन मसी का खन्दाया तका चेला को रूप धारण करबावाळा हे।</verse>
				<verse number="14">या अचम्बा की बात ने हे, काँके सेतान खुद भी उजिता का हरग-दुताँ को रूप धारण करे हे।</verse>
				<verse number="15">ईं वाते वीं सेतान का दास भी धरम का काम करबावाळा का जस्यो रूप धारण करे हे या कई मोटी बात ने हे, पण अंत में वाँको नास वाँके काम का जस्यान वेई।</verse>
				<verse number="16">मूँ पाछो कूँ हूँ, कुई मने बेण्डो मती हमज ज्यो अन ने तो मने बेण्डो हमजन मारी मानलो, जणीऊँ मूँ भी थोड़ो घणो मेपणो कर सकूँ।</verse>
				<verse number="17">मूँ ईं मेपणो की वजेऊँ ज्यो कई कूँ हूँ, वो परबू का आग्याऊँ ने कूँ पण अस्यान मानलो के, मारा बेण्डापणा ऊँइस केरियो हूँ।</verse>
				<verse number="18">काँके नरई मनक तो आपणी देह जस्यानीस मेपणो करे हे, तो पछे मूँ भी मेपणो करूँ।</verse>
				<verse number="19">थाँ हूँस्यार हो ईं वाते राजी रेन मारा बेण्डापणा की बाताँ ने सेण करो हो।</verse>
				<verse number="20">मने विस्वास ने वेरियो के, कुई थाँने दास बणावे, थाँको बुरो भी करे, यद्याँ कुई थाँने जाळ में फसावे, अन खुद ने थाँकाऊँ मोटो बणावे अन कुई थाँका मुण्डा में जापट मारे तो थाँ वींने सेण करो हो।</verse>
				<verse number="21">मूँ हरमा मरन केरियो हूँ माँ वाँकाऊँ घणा कमजोर हाँ, ज्यो थाँने अस्यान हिकावे हे, माँ वाँके जस्यान ने हिका सका हाँ। पण यद्याँ कुई कणी बात पे मेपणो करबा हिम्मत करे हे, तो मूँ बेण्डापणाऊँ कूँ हूँ के, मूँ भी हिम्मत करूँ।</verse>
				<verse number="22">कई वींइस इबरानी थोड़ी हे? मूँ भी तो हूँ। कई वींइस इजराएल का हे? मूँ भी तो हूँ। कई वींइस अबराम का घराणा का हे? मूँ भी तो हूँ।</verse>
				<verse number="23">कई वींइस मसी का दास हे? मूँ बेण्डा के जस्यान कूँ हूँ, मूँ वणाऊँ भी बड़न मसी को दास हूँ। वाँकाऊँ हेली मेनत करबा में, नरी दाण जेळ में बन्द वेबा में, कोड़ा की मार खाबा में, आकोदाण मोत का मुण्डो में जाबा में,</verse>
				<verse number="24">पाँच दाण मूँ यहूदियाँ का हाताऊँ चालीस में एक कम कोड़ाऊँ मार खादी।</verse>
				<verse number="25">तीन दाण तो में लटऊँ मार खादी अन एक दाण तो मारा पे भाटा की भी बरका किदी गी ही। तीन दाण तो जणी जाँज में चड़्यो हो, वींई टुटग्या, एक दाण तो मूँ एक रात-दन समन्द का मयने रियो।</verse>
				<verse number="26">नरी दाण तो मूँ लम्बी जातरा पे ग्यो, नरी दाण खतरनाक नन्दयाँ, जबरा डाकूँऊँ, खुद का लोगाऊँ, ज्यो यहूदी ने हा वाकाँऊँ खतरा को सामनो किदो, नरी दाण नगरा में, समन्द में, काकड़ में, दिकावटी भायाँऊँ खतरा को सामनो किदो।</verse>
				<verse number="27">में घणी मेनत किदी हे अन दुक का हाते जीवन जिदो हे। नरी दाण तो मूँ हूँ भी ने सक्यो। अन नरी दाण तो भुको-तरियो भी रियो हूँ, नरी दाण तो ठन्ड में बना गाबा के धूजतो रियो हूँ।</verse>
				<verse number="28">अन ईंका अलावा मारा पे हारी मण्डळ्या की चन्ता को बोज भी रोज पड़्यो तको हो।</verse>
				<verse number="29">जद्याँ कुई कमजोर हे तो मूँ खुद ने कमजोर मेसूस करूँ हूँ अन यद्याँ कुई पाप में हे तो मूँ वींका वाते दकी वेवूँ हूँ।</verse>
				<verse number="30">यद्याँ मने बड़न चड़न बाताँ करणीइस वेती, तो मूँ मारी वाँ बाताँ ने करतो जीं मारी कमजोरी की हे।</verse>
				<verse number="31">आपणाँ परबू ईसू मसी का बापू परमेसर की हमेस्यान मेमा वेती रेवे, वीं जाणे के, मूँ जूट ने बोलूँ हूँ।</verse>
				<verse number="32">दमिसक नगर में अरितास राजा का आड़ीऊँ ज्यो हाकम हो, वणी मने पकड़बा का वाते दमिसक नगर में पेरो लगा मेल्यो हो।</verse>
				<verse number="33">अन मने टोकरी में बेवाड़न भींत की खड़की का मयनेऊँ बारणे काड़्यो ग्यो हो, अस्यान मूँ वटूँऊँ बंच निकळ्यो हो।</verse>
			</chapter>
			<chapter number="12">
				<verse number="1">मेपणो करबा को कई नफो ने हे, तो भी मूँ करूँ हूँ, ईं वाते मूँ परबूऊँ मल्या दरसण अन परकासण को बखाण करूँ।</verse>
				<verse number="2">मूँ मसी में एक मनक ने जाणूँ हूँ, मूँ ने जाणूँ पण परमेसरइस जाणे हे। वींने चवदा वर पेल्याँ देह हमेतइस कन देह का बना हरग की तीजी ऊसी जगाँ में उठा लिदो ग्यो हो।</verse>
				<verse number="3">अन मूँ ने जाणूँ के, ईं मनक ने देह हमेत कन देह का बना हरग में उठा लिदो ग्यो हो।</verse>
				<verse number="4">अस्यान की बाताँ हूणी ज्यो आपाँने के सका हाँ। मनकाँ का वाते वीं बाताँ ने बोलणो भी मनकाँ बंस ने हे।</verse>
				<verse number="5">अस्या मनक की वजेऊँ तो मूँ मेपणो कर सकूँ हूँ। पण खुद पे मारी कमजोरियाँ ने छोड़न वींके अलावा कस्यी भी बात पे मेपणो ने करूँ।</verse>
				<verse number="6">जद्याँ मूँ मेपणो करबा की होचूँ भी हूँतो भी मूँ बेण्डो ने हूँ, काँके मूँ हाँच बोल सकूँ हूँ। पण थाँने ईं बातऊँ बंचाणा छावूँ हूँ जणीऊँ कुई मने अस्यान करतो देके कन हुणे हे तो वो अणीऊँ बड़न मने ने हमजे।</verse>
				<verse number="7">मूँ ईं दरसण की वजेऊँ मोटो ने वे जऊँ, ईं वाते मारी देह में एक रोग दिदो ग्यो हे ज्यो सेतान को एक दूत हे अन ओ मने दुक देतो रेवे हे जणीऊँ मूँ घणो मेपणो ने कर सकूँ हूँ।</verse>
				<verse number="8">अन अणी रोग का दुक की वजेऊँ में तीन दाण परबूऊँ अरज किदी अन परबू ने क्यो के, ईं काँटा ने बारणे काड़ दो।</verse>
				<verse number="9">पण वणा मने क्यो थाँरा वाते मारी दया घणी हे काँके कमजोरी मेंईस मारी तागत हेलो काम करे हे। ईं वाते मूँ मारी कमजोरी में राजी वेन मेपणो करूँ, जणीऊँ मसी की तागत मारा पे आवे।</verse>
				<verse number="10">ईं तरियाँ मूँ मसी का आड़ीऊँ मारी कमजोरियाँ में, बेजत वेन में, दुक में, हताव में, तकलिप में, अबकी टेम में मूँ राजी रूँ हूँ। जद्याँ मूँ कमजोर वेवूँ हूँ, तद्याँईस मूँ जोरावर बणूँ हूँ।</verse>
				<verse number="11">मूँ बेण्डा मनक का जस्यान बतारियो हूँ पण अस्यान करबा वाते थाँईस मारा ऊपरे जोर दिदो हे। जद्याँ के, मूँ तो कई भी ने हूँ पण थाँ तो मारी बड़ई करणा छाता हाँ, काँके मूँ थाँका वाँ “मोटाऊँ मोटा खन्दाया तका चेलाऊँ” की कणी भी बात में कम ने हूँ।</verse>
				<verse number="12">कणी खन्दाया तका का मयने ज्यो बाताँ वेवे हे वस्यानीस में हेला धीरज का हाते हेन्याण अन चमत्कार करणो, अचम्बा का काम अन जोरावर काम करन थाँने बताया हे।</verse>
				<verse number="13">थाँ कस्यी बात में दूजी मण्डळ्याऊँ न्यारा हो? बेस अणीऊँ के, में मारो बोज थाँका ऊपरे ने नाक्यो हो। मने ईं काम का वाते थाँ माप करो।</verse>
				<verse number="14">अबे मूँ तीजी दाण थाँका नके आबा वाते त्यार हूँ, पण मूँ थाँका ऊपरे बोज ने बणूँ। काँके मने थाँकी धन-दोलत को लालच ने हे पण थाँको लालच हे। अन ने बाळक ने आपणाँ बई-बापू वाते धन भेळा करबा की जरूत ने वेवे हे पण बई-बापू ने बाळक वाते धन भेळा करबा की जरूत वेवे हे।</verse>
				<verse number="15">जटा तईं मारी बात हे तो, मारा नके ज्यो कई भी हे, वींने थाँका वाते राजी वेन खरच करूँ अटे तईं के, मूँ खुद ने भी थाँका वाते दी देऊँ। यद्याँ मूँ थाँकाऊँ घणो परेम करूँ हूँतो थाँ कई माराऊँ कम परेम करो?</verse>
				<verse number="16">थाँ विस्वास करो हो के, में थाँका पे घणो मोटो बोज ने नाक्यो हो। पण थाँकामूँ कुई केवे हे के, मूँ ठग हूँ अन में थाँने मारी चाल में फसा दिदा हे।</verse>
				<verse number="17">थाँईस बतायो के, मूँ जणा मनकाँ ने थाँका नके खन्दाया हा, कई वाँका मेंऊँ कणी थाँने धोको थोड़ी दिदो हो? ने दिदो हो।</verse>
				<verse number="18">तीतूस ने अन वींका हाते मारा भायाँ ने खन्दाया हा। कई वणा थाँने धोको थोड़ी दिदो हो? ने। काँके माकाँ नके एकीस आत्मा हे, ज्याँ माकाँ में एक जस्या काम करे हे।</verse>
				<verse number="19">अबाणू तईं थाँ योईस होचरया हो के, माँ नरई दनाँऊँ खुद कोईस पकस लेरिया हाँ। पण माँ तो परमेसर का हामे मसी का दास वेन थाँने क्यो। हो मारा लाड़ला भायाँ, माँ ज्यो कई भी थाँने केरिया हाँ, वो थाँने आत्मिक रूपऊँ जोरावर बणाबा का वाते केरिया हाँ।</verse>
				<verse number="20">काँके मने दरपणी हे के, जद्याँ मूँ थाँका नके आऊँ अन जस्यान थाँने देकणा छावूँ वस्यान थाँ मने ने मलो। जस्यान थाँ मने देकणा छारिया हो, वणीऊँ अलग मूँ थाँने ने मलूँ। मने आ भी दरपणी हे के, कदी थाँका मयने आपस की लड़ई, जळन, गुस्सो, एक दूजाँ की के हुणई, थाँकी खुद की कस्यी बुरी चाल, अन बेजती, आमी-हामी अन दादागिरी अन काम बगाड़्यो तको ने मले।</verse>
				<verse number="21">मने आ भी दरपणी लागे हे के, जद्याँ मूँ थाँकाऊँ मलबा आऊँ तो थाँका हामे मारो परमेसर मने हरमा ने मारे। मने वाँका वाते ज्यो पेल्याँ पाप किदो हो जस्यान कुकरम, हूगळोपणो अन भोग-विलास में जीव जियो हो अन आ बाताँ ने करबा का केड़े भी वीं आपणाँ मन ने ने फेरिया, वाँ वाते रोणो ने पड़े।</verse>
			</chapter>
			<chapter number="13">
				<verse number="1">ओ तीजो मोको हे जद्याँ मूँ थाँका नके आरियो हूँ। “ईं हारी बाताँ को फेसलो दो कन तीन गवा की गवई का केड़ेईस वेणो छावे।”</verse>
				<verse number="2">जद्याँ मूँ दूजी दाण थाँका हाते हो, तो मूँ थाँने चेताया हाँ अन अबे जद्याँ के, मूँ थाँकाऊँ छेटी हूँ, तो भी मूँ थाँने पाच्छा चेतारियो हूँ के, यद्याँ मारो पाछो थाँका नके आणो व्यो तो जणा पाप किदो हे वाँने अन बाकी दूजाँ मनकाँ ने भी ने छोड़ूँ।</verse>
				<verse number="3">अस्यान मूँ ईं वाते केरियो हूँ के, थाँ ईं बात को परमाण छावाँ हो के, मारा मयने मसी बोले हे। वो थाँका वाते कमजोर ने हे, पण थाँका वाते तागतवर हे।</verse>
				<verse number="4">ओ हाँच हे के, वींकी कमजोरी की वजेऊँ वींने हूळी पे चड़ायो ग्यो पण वो परमेसर की तागतऊँ जीरियो हे। ओ हाँच हे के, मसी का मयने माँ भी कमजोर हाँ पण थाँकी भलई की वाते परमेसर की तागतऊँ वींके हाते जीवाँ हाँ।</verse>
				<verse number="5">ओ देकबा का वाते के, थाँ विस्वास का हाते जीरिया हो खुद ने परको। अन खुद की जाँच पड़ताल करो कई थाँ खुद ने जाणो के, ईसू मसी थाँका मयने हे। यद्याँ अस्यान ने वेतो तो थाँ जद्याँ परक्या ग्या हाँ तद्याँ खरा ने ने निकळता।</verse>
				<verse number="6">अन मूँ आस करूँ हूँ के, थाँ ओ जाण जावो के, माँ जद्याँ परक्या ग्या हाँ तो माँ नाकाम ने व्या हाँ।</verse>
				<verse number="7">अन माँ परमेसरऊँ परातना करा हा के, थाँ बुरई ने करो। ओ ईं वाते ने हे के, माँ खरा दिकई दा। पण ईं वाते के, थाँ ज्यो कई हव हे वो करो, पलई माँ नाकामइस काँ दिकई ने दा।</verse>
				<verse number="8">काँके माँ कदी भी हाँच का विरोद में कई ने कर सका। पण माँ ज्यो भी करा हाँ वो हाँच का वाते कराँ हाँ।</verse>
				<verse number="9">जद्याँ माँ कमजोर वेवा हाँ अन थाँ जोरावर वेवो हो तो माँ राजी वेवा हा, अन आ परातना भी करा हाँ के, थाँ पाकाऊँ पाका बणो।</verse>
				<verse number="10">ईं वाते थाँकाऊँ छेटी रेतो तका भी मूँ ईं बाताँ थाँका वाते लिकरियो हूँ जणीऊँ की जद्याँ मूँ थाँका नके आऊँ तो मने परबू का दिदा तका हक ने कल्डा रूप में काम ने लेणो पड़े। यो हक थाँने नाकबा का वाते ने हे, पण थाँने बणाबा का वाते हे।</verse>
				<verse number="11">हो विस्वासी भायाँ, मूँ अणा आकरी सबदा का हाते अणी कागद ने बन्द कररियो हूँ, राजी रिया करो, थाँका वेवार ने बदलो, एक-दूँजा ने हिम्मत बंदावो, सान्ती अन मेल-मिलापऊँ रो, तद्याँ परमेसर ज्यो परेम अन सान्ती का दाता हे थाँका हाते रेई।</verse>
				<verse number="12">एक-दूँजा का गळे मलन एक-दूँजा को मान करिया करो।</verse>
				<verse number="13">परमेसर का हाराई भगताँ का आड़ीऊँ थाँने नमस्कार।</verse>
				<verse number="14">थाँका पे परबू ईसू की दया अन परमेसर बापू को परेम अन पुवितर आत्मा को छतर-छाया थाँका हाराई पे वेती रेवे।</verse>
			</chapter>
		</book>
		<book number="48">
			<chapter number="1">
				<verse number="1">यो कागद पोलुस का आड़ीऊँ जिंने थरप्यो तको चेलो वेबा का वाते चुण्यो ग्यो, वो ने तो मनकाँ का आड़ीऊँ अन ने मनकाऊँ चुण्यो ग्यो, वो तो ईसू मसी अन परम बापू परमेसर की ओरुँ चुण्यो ग्यो, जणा ईसू मसी ने मरिया तकाऊँ जीवता किदा हा।</verse>
				<verse number="2">अन मारा अन हाराई भायाँ का आड़ीऊँ जीं मारे लारे हे, यो कागद गलातिया की मण्डली का नाम हे।</verse>
				<verse number="3">आपणाँ परम बापू परमेसर अन परबू ईसू मसी का आड़ीऊँ थाँने ने दया अन सान्ती मले।</verse>
				<verse number="4">ईसू मसी आपणाँ पापाँ का वाते खुद ने बली वेबा का वाते हूँप दिदो, काँके बापू परमेसर की मरजी ही के, आपाँने अणी दनियाँ का पापाऊँ छेटी राके।</verse>
				<verse number="5">परमेसर की मेमा जुग-जुग वेती रेवे। आमीन!</verse>
				<verse number="6">मने अचम्बो वेरियो हे के, परमेसर जणा थाँने मसी की दयाऊँ बलाया हे, थाँ अतरा जट वणाऊँ फरन कणी दूजाँ हव हमच्यार ने मानरिया हो।</verse>
				<verse number="7">हाँचई कुई दूज्यो हव हमच्यार कोयने हे, पण बात आ हे अस्या थोड़ाक मनक हे, ज्यो थाँने भेंम में नाके हे अन ईसू मसी का हव हमच्यार ने बगाड़णो छारिया हे।</verse>
				<verse number="8">पण पलई माकाँ मूँ वे कन पलई कुई हरग-दुत, यद्याँ थाँ माँ ज्यो हव हमच्यार हुणायो हे वींने छोड़न दूजो हमच्यार हुणावे हे तो वो दण्ड को जोगो वेई।</verse>
				<verse number="9">जस्यान मूँ पेल्याँई थाँने चेता चुक्या हूँ, वस्यानीस मूँ अबे पाछो केवूँ के, यद्याँ कुई थाँने माँ ज्यो हव हमच्यार हुणाया हे वींने छोड़न दूजो हमच्यार हुणावे हे तो वो दण्ड को जोगो वेई।</verse>
				<verse number="10">कई अणीऊँ थाँने अस्यान लागे हे के, मूँ मनकाँ ने मानूँ हूँ कन यो के मूँ परमेसर ने मानूँ हूँ? कई मूँ मनकाँ खुस करणो छावूँ हूँ? यद्याँ मूँ अबाणू तई मनकाँ ने खुस करबा को काम करतो रेतो, तो मूँ मसी को दास ने वाजतो।</verse>
				<verse number="11">हो भायाँ, मूँ थाँने बताणो छारियो हूँ, ज्यो हव हमच्यार में थाँने हुणायो हे, वो मनकाँ का आड़ीऊँ कोयने।</verse>
				<verse number="12">काँके वो मने मनकाँ की ओरुँ ने मल्यो अन ने मने हिकायो ग्यो, पण ओ हव हमच्यार मने परबू ईसू मसी की पुवितर आत्माऊँ मल्यो हे।</verse>
				<verse number="13">यहूदी समाज में ज्यो पेल्या मारो वेवार हो, थाँ वींका बारा में पेल्याँई हुण चुक्या हो के, मूँ परमेसर की मण्डळ्याँ ने हतातो अन नास करबा की कोसीस करतो हो।</verse>
				<verse number="14">अन आपणाँ यहूदी जाती भायाँऊँ ज्यो मारा जस्या हाँ वाँकाऊँ मूँ आगे हो, काँके मूँ आपणाँ बड़ाबा का रिति-रिवाज ने घणा मानतो हो।</verse>
				<verse number="15">पण परमेसर जणा मने मारी माँ का पेट मूँईस मने चुण्यो अन आपणाँ मेमा में मने बला लिदो,</verse>
				<verse number="16">जद्याँ परमेसर की मरजी वीं के, मारा में वींका पूत ने परगट करे अन मूँ ज्यो यहूदी ने हे वणामें वींको हव हमच्यार हूँणऊँ तो वणी दाण में ईं बात पे कणी मनकऊँ सला ने लिदी।</verse>
				<verse number="17">अन ने मूँ यरूसलेम नगर में वाँका नके ग्यो, ज्यो माराऊँ भी पेल्याँ परमेसर का थरप्या तका चेला हा, पण मूँ तरत अरब परदेस परोग्यो अन पछे मूँ पाछो दमिसक नगर में आग्यो।</verse>
				<verse number="18">पछे तीन वर केड़े मूँ केफाऊँ मलवा का वाते यरूसलेम नगर ग्यो अन वटे मूँ पन्दरा दनाँ तईं रियो।</verse>
				<verse number="19">पण मूँ परबू का भई याकूब ने छोड़न कणी दूजाँ थरप्या तका चेलाऊँ ने मल्यो।</verse>
				<verse number="20">अन जीं बाताँ मूँ थाँने लिकरियो, देको, वीं परमेसर का होगन खान केवूँ हूँ के, ईं बाताँ जूटी कोयने।</verse>
				<verse number="21">ईंका केड़े मूँ यरूसलेमऊँ पछे सिरिया अन किलिकिया का परदेस में आयो।</verse>
				<verse number="22">वटे यहूदियाँ परदेस में मसी की मण्डली में जीं विस्वासी हा, वाँकाणी मने कदी ने देक्यो हो।</verse>
				<verse number="23">पण वीं मारा बारा में हुण्या करता हाँ के, ज्यो पेल्याँ आपाँने हतातो हो, वो अबे मसी को हव हमच्यार हुणावे हे जिंने पेल्याँ वो नास करणो छारियो हो।</verse>
				<verse number="24">वी मण्डली का मनक मारा बारा में जाणन परमेसर की मेमा करता हा।</verse>
			</chapter>
			<chapter number="2">
				<verse number="1">पछे मूँ चवदा वर केड़े बरनबास ने हाते लेन पाछो यरूसलेम ग्यो, अन तीतूस ने भी हाते लेग्यो।</verse>
				<verse number="2">अन मारो वटे जाणो परमेसर की पुवितर आत्मा के केबाऊँ व्यो, ज्यो हव हमच्यार को परच्यार मूँ ज्यो यहूदी ने हे वाँका में करूँ, वणी हमच्यार का बारा में छानेकूँ वाँने बता दिदो जीं मण्डली में मोटा हमज्या जाता हा, मूँ वटे ईं वाते ग्यो काँके परमेसर मने दरसण दिदो हो के, मने वटे जाणो छावे, ताँके अस्यो ने वे, ज्यो काम में पेला किदो अन ज्यो अबाणू कररियो, वो फोगट को ठेरे।</verse>
				<verse number="3">वटे अस्यान व्यो के, तीतूस ज्यो मारा हाते हो, ज्यो युनानी हो, पछे भी वणा वींने खतनो करावा का वाते भी ने क्यो हो।</verse>
				<verse number="4">अन यो वणा जूटा भायाँ ज्यो छानेकूँ आपणाँ बचमें आग्या हाँ ताँके ज्यो आजादी आपाँने आपणाँ मसी ईसू की दयाऊँ मली वींको भेद लेन माँने दास बणा सके।</verse>
				<verse number="5">ईं वाते माँ एक घड़ी तईं भी वाँका गुलाम ने रिया, ताँके हव हमच्यार को हाँच थाँका पे बण्यो रेवे।</verse>
				<verse number="6">पछे ज्यो मनक कई हमज्या जाता हाँ, वाँकाऊँ मने कई ने मल्यो। वीं मनक कस्या भी हे, मने वाँकाऊँ कई लेणो-देणो कोयने, काँके परमेसर किंको भेद-भाव ने करे हे, वीं मान्याँ तका मनक मारा में कन मारे हुणाया ग्या हव हमच्यार में कई कमी ने निकाळ सक्या।</verse>
				<verse number="7">पण ईंका हामे वीं मानग्या के, जस्यान यहूदी मनकाँ में हव हमच्यार हुणाबा को काम परमेसर पतरस ने हुप्यो हे, वस्यानीस जीं यहूदी ने हे वणा मनकाँ में हव हमच्यार हुणाबा को काम मने हुप्यो ग्यो हे।</verse>
				<verse number="8">काँके जणा पतरसऊँ यहूदी मनकाँ में परच्यार को काम मोटा रूपऊँ करवायो, वस्यानीस वणा माराऊँ भी ज्यो यहूदी ने हे वणा लोगाँ में काम करवायो।</verse>
				<verse number="9">अन जदी वणा मारा में परमेसर की दया को वरदान जाणग्या, तो याकूब, केफा अन यहुन्ना जीं मण्डली का मुक्या हमज्या जाता हा, वणा मारा अन बरनबास का हाते हात मला लिदो के, माँ जी यहूदी ने हे वणा मनकाँ में हव हमच्यार ने हुणावा का वाते जावा, अन वीं यहूदी का नके जावे।</verse>
				<verse number="10">वणा माँने बेस ओ क्यो के, माँ गरीबा को ध्यान राका अन अणी काम का वाते तो मूँ खुद भी घणी कोसीस करूँ हूँ।</verse>
				<verse number="11">पछे जदी केफा अन्ताक्या का नगर में आयो तो में वींने तापड़्यो, काँके ज्यो काम वो कररियो हो वो गलत हो।</verse>
				<verse number="12">काँके वो याकूब का आड़ीऊँ खन्दाया तका मनकाँ के आबाऊँ पेल्याँ वो जीं यहूदी ने हे वाँका हाते खातो-पितो हो, पण जद्याँ वीं आग्या तो वो वणा मनकाँऊँ दरपीन जीं ज्यो यहूदी ने हे वाँको खतना करणो छावता हाँ, वणा मनकाऊँ छेटी रेवा लागो।</verse>
				<verse number="13">अन दूजाँ यहूदी मनक भी वींका हाते दिकावो किदो हो, अटा तईं बरनबास भी वींका दिकावा में आग्यो।</verse>
				<verse number="14">पछे जदी में देक्यो के, वीं हव हमच्यार का गेला पे ने चालरियो हे, तो में हाराई का हामे केफाऊँ क्यो, “जद्याँ थूँ यहूदी वेन ज्यो यहूदी ने हे वाँके जस्यान चालरियो हे अन थूँ यहूदी वेन हव हमच्यार का गेला पे ने चाले तो ज्यो यहूदी ने हे वाँने हव हमच्यार का गेला पे चालबा वाते काँ केवे हे?”</verse>
				<verse number="15">आपाँ तो जनमऊँ यहूदी हाँ, आपणो जी यहूदी ने हे वणा पाप्याऊँ कई काम ने हे।</verse>
				<verse number="16">पछे भी आपाँ यो जाणा हे के, कुई मनक मूसा का नेमाऊँ ने पण ईसू मसी पे विस्वास करबाऊँ धरमी बणे हे। आपाँ ईं वाते ईसू मसी पे विस्वास किदो के आपाँ मूसा का नेमाऊँ ने पण ईसू मसी का विस्वासऊँ धरमी बणन रेवा, काँके मूसा का नेमाऊँ कुई मनक धरमी बणन ने रे सके हे।</verse>
				<verse number="17">यद्याँ आपाँ ईसू मसी का गट-जोड़ में धरमी वेणा छावाँ अन मूसा का नेम आपाँने पापी बतावे तो कई ईंको यो मतलब के, मसी पाप को दास हे? कदी ने हे</verse>
				<verse number="18">काँके जणा नेमाँ ने में बणाया अन वाँने में छोड़ दिदा अन यद्याँ मूँ पाछो वाँको परच्यार करूँ तो मूँ आग्या का विरोद में गुनेगार ठेरूँ हूँ।</verse>
				<verse number="19">काँके मूँ तो नेमा का जस्यान नेमाँ में मरयो ताँके मूँ परमेसर की आत्मा में पाछो जीवू, मूँ मसी का हाते हूळी पे चड़ायो ग्यो हूँ।</verse>
				<verse number="20">मूँ अबे जीवतो कोयने हूँ, पण मूँ ईसू मसी में जीवतो हूँ अन मूँ अणी देह में जीवतो हूँ तो बेस ईसू पे विस्वास करबा का मस जीवतो हूँ, ज्यो परमेसर को बेटो हो अन वणी माराऊँ अतरो परेम किदो के, आपणाँ खुद ने मारा वाते दे दिदो।</verse>
				<verse number="21">मूँ परमेसर का अनुगरे ने बेकार ने जाणूँ हूँ, काँके यद्याँ मनक मूसा का नेमाऊँ धरमी वेता, तो ईसू मसी को मरणो बेकार वेतो।</verse>
			</chapter>
			<chapter number="3">
				<verse number="1">हे बना अकल का गलातिया का मनकाँ, थाँने कणी भेंम में नाक दिदा हे। में पुरो-पुरो बखाण अस्यान किदो हो के, मानो थाँकी आक्याँ का हामेईस तो ईसू मसी ने हूळी पे चड़ाया ग्या वे।</verse>
				<verse number="2">मूँ थाँकाऊँ ओ जाणणो छावूँ के, कई थाँने परमेसर की आत्मा को वरदान मूसा का नेमाऊँ कन हव हमच्यार पे विस्वास करबा का मस मल्यो?</verse>
				<verse number="3">थाँ अतरा मुरक कस्यान वे सको हो के, आत्मा की रिती चालूँ करन देह का रितीऊँ खतम कररिया हो?</verse>
				<verse number="4">कई थाँ अतरो दुक फालतू में उटायो? ओ कदी बेकार ने वेई।</verse>
				<verse number="5">परमेसर जणा थाँने आत्मा दिदी हे अन थाँका बचमें अचम्बा का काम करे हे, कई वीं यो ईं वाते करे हे के, थाँ मूसा का नेमा को पालण करो हो कन ज्यो हव हमच्यार थाँ हुण्यो अन विस्वास किदो वींके मस करे हे?</verse>
				<verse number="6">अस्यानीस अबराम का बारा में सास्तर केवे हे, “अबराम परमेसर पे विस्वास किदो, जणीऊँ वो धरमी मनक गण्यो ग्यो।”</verse>
				<verse number="7">अणीऊँ थाँ यो हमज लो के, ज्यो विस्वास करे हे वीं अबराम का बंस का हे।</verse>
				<verse number="8">सास्तर में ओ पेल्याई बतायो ग्यो हे के, परमेसर पे विस्वास करबाऊँ ज्यो यहूदी ने वीं भी धरमी ठेरी, ईं वाते परमेसर पेल्याँई अबराम ने ओ हव हमच्यार हुणा दिदो के, “थाँराऊँ हाराई मनक आसीस पई।”</verse>
				<verse number="9">ईं वाते ज्यो मनक विस्वास करे हे, वीं हाराई विस्वासी अबराम का हाते आसीस पाई।</verse>
				<verse number="10">पण ज्यो मनक मूसा का कामाँ का जस्यान चाली वीं हाराई मनक पाप का गुलाम रेई। काँके सास्तर में लिक्यो हे के, “ज्यो कुई मूसा का नेमा की किताब में लिकी तकी हारी बाताँ ने कोयने मानी, वींने हराप लागी।”</verse>
				<verse number="11">पण आ बात तो परगट हे के, मूसा का नेमाऊँ कुई परमेसर में धरमी वण्यो ने रेई, काँके सास्तर केवे हे के, “धरमी मनक परमेसर का विस्वास का भरोस्येईस जीवतो रेई।”</verse>
				<verse number="12">पण मूसा का नेमाऊँ विस्वास को कई रिस्तो कोयने, काँके सास्तर में लिक्यो तको हे के, “ज्यो नेमा ने मानी वो वींके भरोस्येईस जीवतो रेई।”</verse>
				<verse number="13">ईसू मसी ज्यो आपणाँ वाते हरापित व्यो अन आपाँने वणा मूसा का नेमाऊँ छोड़ाया, काँके सास्तर में लिक्यो हे के, “ज्यो कुई हूळी पे लटकायो जाई वो हरापित वेई।”</verse>
				<verse number="14">ईसू मसी आपाँने ईं वाते छुड़ाया के, अबराम ने ज्यो आसीस दिदी गी, वा ईसू मसीऊँ ज्यो यहूदी ने वाँने मल सके, ताँके विस्वासऊँ आपाँ वणी आत्माने लेवा, जिंका वाते वादो किदो ग्यो हे।</verse>
				<verse number="15">हो भायाँ, मूँ मनक का रिति-रिवाजऊँ केवूँ, यद्याँ दो मनकाँ का बचमें कस्यी बात पाकी वे जावे, तो वींने ने कुई टाळ सके अन ने वींमें कई कम कर सके अन ने बड़ा सके हे।</verse>
				<verse number="16">अस्यानीस परमेसर अबराम अन वींका पिड़ीऊँ वादो किदो, परमेसर अस्यान ने क्यो के, मूँ थाँरा पिड़ियाँऊँ वादो करूँ हूँ, ईंको मतलब तो घणा का वाते वेवे हे, पण वो वादो पीड़ी का वाते किदो अन यो वादो एक मनक ने बतावे हे ज्यो ईसू मसी हे।</verse>
				<verse number="17">पण मारे केबा को मतलब यो हे के, ज्यो बात परमेसर पेल्याँई पाकी कर दिदी हे, वींने चारस्ये तीस वर का केड़े मूसा का नेम आन वींने टाळ ने सके हे। अन नेई वणी वादा ने बेकार ठेरा सके हे।</verse>
				<verse number="18">काँके यद्याँ बापोती मूसा का नेमाऊँ मले तो पछे वादाऊँ ने मलती, पण परमेसर आपणी दयाऊँ अबराम ने बापोती वादाऊँ दिदी।</verse>
				<verse number="19">तद्याँ पछे मूसा का नेम काँ दिदा ग्या? यो तो मनकाँ ने पाप का बारा में बताबा का वाते दिदा ग्या, ताँके ईं नेम वणी बंस तईं रेवे जिंका बारा में परमेसर वादो किदो, अन अणा नेमा ने परमेसर हरग-दुताऊँ मूसा ने दिदा, ज्यो मनकाँ अन परमेसर का बचमें बात करबावाळो हो।</verse>
				<verse number="20">बचमें रेबावाळो तो दो मनकाँ का बचमें में वेवे हे, पण परमेसर तो एकीस हे।</verse>
				<verse number="21">तो पछे ईंको कई मतलब हे, कई नेम परमेसर का वादा का हामे हे? कदी ने हे, काँके यद्याँ अस्या नेम दिदा जाता जीं जीवन दे सके हे। तो हाँची में नेमईस परमेसर का हामे धरमी बणाबा को सादन बण जाता।</verse>
				<verse number="22">पण सास्तर हाराई मनकाँ ने पाप का हाताँ में हूँप दिदा हे, ताँके परमेसर वो वादो ज्यो ईसू मसी पे विस्वास करबा दिदो ग्यो, वो विस्वास करबावाळा का वाते पूरो वे जावे।</verse>
				<verse number="23">पण विस्वास के आबा के पेल्याँ आपाँ मूसा का नेमाँ की रुकवाळी में हा अन विस्वास के आबा पेल्याँ आपीं अणा काईंस केबा में रेता हा।</verse>
				<verse number="24">ईं वाते मसी के आबा तईं मूसा का नेम आपणाँ मारसाब हा, जणीऊँ आपाँ विस्वासऊँ धरमी बण सका।</verse>
				<verse number="25">पण अबे जद्याँ विस्वास आग्यो हे तो अबे आपाँ मूसा का नेमा का केबा ने रिया।</verse>
				<verse number="26">थाँ हाराई ईसू मसी पे विस्वास करो हो, ईं वाते अबे थाँ परमेसर का बेटा-बेटी हो।</verse>
				<verse number="27">अन थाँकामूँ जतरा ईसू मसी में बतिस्मो लिदो हे वणा हाराई ईसू मसी ने मान लिदा हे।</verse>
				<verse number="28">ईं वाते अबे ने कुई यहूदी, ने कुई युनानी, ने कुई दास ने आजाद, ने कुई मनक ने लुगई, काँके थाँ हाराई ईसू मसी में एक हो।</verse>
				<verse number="29">अन यद्याँ थाँ मसी में हो, तो अबराम की पीड़ी का अन वादा की तरियाऊँ ईसू मसी का बेटा-बेटी की बापोती में भेळा हो।</verse>
			</chapter>
			<chapter number="4">
				<verse number="1">मूँ ओ केवूँ के, मालिक जद्याँ तईं बाळक हे, तो पलई वो हारी चिजाँ को मालिक हे, पछे भी बाळक अन दास में कई ऊँच-नीच ने हे।</verse>
				<verse number="2">पण वो आपणाँ बापू का ठेराया तका टेम तईं आपणाँ घरवाळा अन वींका देक-रेक करबावाळा का केबा में रेवे हे।</verse>
				<verse number="3">वस्यानीस आपाँ भी जदी बाळक हा, तो दनियाँ का नेमाँ का केबा में रेता हा।</verse>
				<verse number="4">पण जदी ते किदो टेम पूरो वेग्यो, तो परमेसर आपणाँ छोरा ने आपणाँ नके खन्दायो, ज्यो एक कूँवारी लुगईऊँ जनम्यो अन मूसा का नेमाँ का केबा में रियो।</verse>
				<verse number="5">ताँके जीं मूसा का नेमाँ का क्या में हे वाँने मोल लेन नेमाऊँ छुड़ावे, जणीऊँ आपाँ परमेसर का गोद लिदा तका छोरा-छोरी वेबा को हक मले।</verse>
				<verse number="6">अन थाँ ज्यो परमेसर का बेटा-बेटी हो, ईं वाते परमेसर ने आपणाँ पूत की आत्माने थाँका हरदा में खन्दई, वाईस आत्मा “हो बापू, हो पीता” केन परमेसर ने हेलो पाड़े हे।</verse>
				<verse number="7">ईं वाते अबे थाँ किकाँई दास कोयने, पण परमेसर का बेटा-बेटी हो अन जद्याँ थाँ वींका बेटा-बेटी हो तो, वींकी बापोती में भी भेळा हो।</verse>
				<verse number="8">पेल्याँ जद्याँ थाँ परमेसर ने कोयने जाणता हा, तद्याँ वाँका दास हाँ, जीं हाँची में परमेसर ने हे।</verse>
				<verse number="9">पण अबे तो थाँ परमेसर ने जाणग्या हो अन परमेसर थाँने ओळक लिदा हे, तो थाँ दनियाँ की कमजोर अन हूंगळी बाताँ का आड़ी पाच्छा काँ जावो हो? अन थाँ पाच्छा काँ वींका दास बणणा छारिया हो?</verse>
				<verse number="10">थाँ कस्या खास दनाँ, मिना अन खास घड़ी अन वरा ने मानबा लागग्या हो।</verse>
				<verse number="11">मने थाँका बारा में दरपणी लागे हे के, कटे अस्यान ने वे जावे के, जीं काम मूँ थाँका वाते कररियो हूँ, वीं कटे वल ने जावे।</verse>
				<verse number="12">हो भायाँ, मूँ थाँकाऊँ हाता-जोड़ी करूँ हूँ के, थाँ हाराई मारा जस्यान वी जावो, काँके मूँ थाँका जस्यान वेग्यो हूँ, मूँ यो ईं वाते ने केरियो हूँ के, थाँ मारा विरोद में कुई बुरो काम किदो हे।</verse>
				<verse number="13">पण थाँ जाणो हो के, में आपणी देह की कमज्योरी का मस थाँने पेली दाण हव हमच्यार हुणायो हो।</verse>
				<verse number="14">मारे देह की कमज्योरी का मस मूँ थाँका पे बोज बण्यो तो भी थाँ मारो अपमान ने किदो अन ने मारा पे रिस्याँ बळ्या, पण मने परमेसर को हरग-दुत हमज मारी आवभगत किदी के, जस्यान मूँईस ईसू मसी हूँ।</verse>
				<verse number="15">वीं टेम थाँ आपणाँ खुद ने धन्न हमजता हा, पण थाँकी वणी खुसी के अबे कई वेग्यो? मूँ खुद थाँके अणी बात को गवा हूँ के, यद्याँ मूँ थाँकाऊँ केतो तो, थाँ आपणी आक्याँ काड़ीन मने दी देता।</verse>
				<verse number="16">तो कई मारे हाँच बोलवाऊँ मूँ थाँको दसमण बणग्यो हूँ?</verse>
				<verse number="17">थाँने मूसा का नेमा पे चालबावाळा दोस्त बणाणा छारिया हा, पण वाँका मन में खोट हे, वीं थाँने माराऊँ अलग करणा छारिया हे, ताँके थाँ वाँका दोस्त बण सको।</verse>
				<verse number="18">यो हव हे के, हरेक टेम दोस्त बणाया जावे, पण यो भलई का काम का वाते वेणो छावे, यो खाली वणीस दाण ने वेवे, जद्याँ मूँ थाँको वेवूँ।</verse>
				<verse number="19">हो लाड़ला बाळकाँ, जद्याँ तई थाँ मसी का रूप में ने बण जावो, वीं टेम तईं मूँ छोरा-छोरी जणवा की टेम वेबावाळी तकलिप का जस्यान दुक सेण करतो रेऊँ हूँ।</verse>
				<verse number="20">मारी मरजी तो आ हे के, अबे मूँ थाँका नके आन अलगीस तरियाऊँ बोलूँ, काँके मूँ थाँका बारा में भेंम में हूँ।</verse>
				<verse number="21">मूसा का नेमाँ का क्या में रेवणा छारिया हे वाँकाऊँ मूँ पूँछणो छारियो हूँ के, कई थाँ नेमाँ की बाताँ ने हूणी हे?</verse>
				<verse number="22">वाँमें ओ लिक्यो तको हे के, अबराम के दो बेटा व्या, एक तो दासीऊँ अन दूज्यो वींकी घरकीऊँ ज्याँ गुलामी में ने ही।</verse>
				<verse number="23">पण ज्यो दासीऊँ पेदा व्यो, वो देह का रिति-रिवाजऊँ व्यो अन ज्यो वींकी घरकीऊँ व्यो, वो परमेसर का अबरामऊँ किदा तका वादा को फळ हो।</verse>
				<verse number="24">अणा बाताँ को मतलब यो हे के, ईं दुई लुगायाँ ते किदी तकी दो बाताँ ने बतावे हे, एक लुगई हाजिरा हे ज्या ईं बात ने बतावे हे जिंने नरई पेल्याँ परमेसर सीने मंगरा पे दिदी ही। हाजिरा एक दासी ही अन वींका बाळक गुलामी में पेदा व्या।</verse>
				<verse number="25">ईं वाते हाजिरा सीने मंगरा ने बतावे हे ज्यो अरब परदेस में हे अन ज्यो यरूसलेम नगर ने बतावे हे। काँके वाँ अन वींका छोरा-छोरी गुलामी में हे।</verse>
				<verse number="26">पण दूजी लुगई आपीं विस्वास्याँ की माँ हे, ज्याँ परमेसर का खास नगर ने बतावे हे, ज्यो हरग को यरूसलेम हे अन वो गुलामी में ने हे।</verse>
				<verse number="27">काँके सास्तर में लिक्यो हे के “हे बना छोरा-छोरी वाळी लुगई थूँ राजी वे अन खुसी मना काँके थने जापा को दुक ने जेलणो पड़्यो हे। काँके पनी तकी लुगायाऊँ भी छोड़ी तकी लुगई के छोरा-छोरी हेला हे।”</verse>
				<verse number="28">ओ भायाँ, ईं वाते आपाँ भी अबराम का बेटा इसाक के जस्यान वादा का छोरा-छोरी हा।</verse>
				<verse number="29">पण वीं टेम में देहऊँ जनम्यो तको पुवितर आत्मा का वादाऊँ जनम्याँ तका ने हतातो हो, वस्यानीस अबाणू भी वेवे हे।</verse>
				<verse number="30">पण पुवितर सास्तर में लिक्यो तको हे के, “दासी अन वींका छोरा-छोरी ने बारणे काड़ दो, काँके दासी को बेटो, पनी तकी लुगई का बेटा का हाते हकदार ने वेई।”</verse>
				<verse number="31">ईं वाते ओ भायाँ, आपाँ भी दासी का ने पण पनी तकी लुगई का छोरा-छोरी हा। ज्याँ गुलामी में ने हे।</verse>
			</chapter>
			<chapter number="5">
				<verse number="1">ईसू मसी आपाँने आजादी के वाते आजाद किदा, आपाँने ईंमेंइस रेणो हे अन गुलामी का कामाँ में पाच्छा मती जावो।</verse>
				<verse number="2">देको, मूँ पोलुस खुद थाँकाऊँ केवूँ हूँ के, यद्याँ अबे थाँ विस्वास करिया केड़े खतनो करावो तो, थाँको मसी ने मानणो बेकार हे।</verse>
				<verse number="3">पछे भी मूँ हंगळा खतना करवावाळा ने चेतई दूँ के, थाँने हाराई मूसा का नेमा ने मानणा पड़ी।</verse>
				<verse number="4">जीं मूसा का नेमा को पालण करन धरमी बणणा छारिया हे, वीं मसीऊँ छेटी वेग्या हे अन परमेसर की दयाऊँ बारणे हे।</verse>
				<verse number="5">पण आपाँ तो मसी पे विस्वास करबा का मस परमेसर की आत्मा की मदतऊँ धरमी वेबा की आस राकन वाट नाळा हा।</verse>
				<verse number="6">काँके ईसू मसी ने मानबा का वाते ने तो खतनो करबा की जरूत हे अन ने खतनो ने करबा की, पण वाँमें तो बेस परेम का हाते विस्वास करबा की जरूत वेवे हे।</verse>
				<verse number="7">थाँ तो मसी में हव तरियाऊँ जीवन जीरिया हा, पण अबे थाँने कणी रोक दिदा के, हाँच ने मती मानो?</verse>
				<verse number="8">थाँने बुलाबावाळा परमेसर का आड़ीऊँ तो अस्यी हिक ने अई ही।</verse>
				<verse number="9">ध्यान राकज्यो, “थोड़ोक खमीर गुद्‍या तका आटा में नाकबाऊँ हाराई आटा ने फूलाँ देवे हे।”</verse>
				<verse number="10">परबू में मने थाँका पे पूरो भरोसो हे के, थाँ दूजी कस्याई बच्यार ने मानो, पण जीं थाँने भटकाणा छावे हे, वो पलई कुई भी वे, वींने तो परमेसर जरुर सजा देई।</verse>
				<verse number="11">हो भायाँ, मनक अबाणू भी मारा पे लांछन लगावे हे के, मूँ खतनो करबा को परच्यार करूँ हूँ, तो मने अणी बात का वाते काँ हतायो जावे हे? अन यद्याँ मूँ अबाणू भी खतनो करबा को परच्यार करूँ हूँ, तो ईसू मसी का हूळी माँ मस अई मारा वाते हारी तकलिपाँ खतम वेणी छावती।</verse>
				<verse number="12">मूँ तो अस्यान छावूँ हूँ के, जीं मनक खतनो करबा का वाते जोर देवे हे, वीं खुद आपणाँ खतना का हाते-हाते आपणो अंग भी काट नाके।</verse>
				<verse number="13">पण हो भायाँ, थाँने तो परमेसर आजाद वेवा के वाते बलाया हे, पण अणी आजादी ने थाँ आपणाँ सरीर का कामाँ ने पूरा करबा का वाते काम में मती लावो, पण परेम-भावऊँ एक दूजाँ की सेवा करो।</verse>
				<verse number="14">काँके हाराई मूसा का नेम अणी एकीस बात में पूरा वे जावे हे के, “आपणाँ पड़ोस्याऊँ वस्यानीस परेम करो, जस्यान थाँ आपणाँ खुदऊँ करो हो।”</verse>
				<verse number="15">पण थाँ तो आपस में एक-दूजाऊँ बेर राको हो, अन यद्याँ थाँ अस्यानीस करता रिया तो ध्यान राकज्यो के, एक दन आपस में एक दूजाँ ने मार ने नाको।</verse>
				<verse number="16">पण मूँ केवूँ हूँ, पवितर आत्मा का हस्याबूऊँ चालो, तो थाँ पाप करबावाळी देह की मरजी ने कदी पुरी ने करो।</verse>
				<verse number="17">काँके देह का मरजी अन पुवितर आत्मा एक-दूँजा के खिलाप हे अन आपस में बेरी हे। ईं वाते ज्यो थाँ करणा छावो हो, वो ने कर सको हो।</verse>
				<verse number="18">अन यद्याँ थाँ पुवितर आत्माऊँ का हस्याबूऊँ चालो तो मूसा का नेमा का गुलाम ने रेवो।</verse>
				<verse number="19">देह की बुरी मरजी तो परकट हे जस्यान के, कुकरम, हुगलोपणो, भोग-विलास,</verse>
				<verse number="20">मूरताँ ने पुजणी, जादु-मन्तर, बेर, लड़ायाँ, घरणा, गुस्सो, बुरी नजर, एक दूजाँ की खोट्याँ खाणी, मेपणो,</verse>
				<verse number="21">नसो करणो, मन मरजी करणी, हूँगला काम अन ओरी कई काम हे। जणी काँ बारा में पेल्याँई थाँने क्यो हो के, अस्या काम करबावाळा परमेसर के राज का वारिस ने वेई।</verse>
				<verse number="22">पण आत्मा का फळ परेम, आणन्द, मेल-मिलाप, करपा, भलई, दया, धीरज,</verse>
				<verse number="23">नमरता अन खुद ने काबू में राकणो हे अन अस्या अस्या कामाँ का विरोद में कस्याई नेम ने हे।</verse>
				<verse number="24">अन जीं मनक ईसू मसी का हे, वणा आपणाँ देह की बुरी मरजी अन कामाँ ने हूळी पे चढा दिदा हे।</verse>
				<verse number="25">यद्याँ आपीं पुवितर आत्माऊँ जीवता हा, तो आपाँने पुवितर आत्मा का जस्यानीस चालणो हे।</verse>
				<verse number="26">आपाँने ने तो मेपणो करबावाळा अन ने एक-दूँजा ने हताबावाळा, अन नेई रिस्याँ बळाबावाळा बणणा छावे।</verse>
			</chapter>
			<chapter number="6">
				<verse number="1">हो भायाँ, यद्याँ कुई मनक कस्याई पाप में पकड़यो जावे, तो ज्यो थाँ आत्मिक हो थाँने अस्यान करणो छावे के, थाँ दया-भावऊँ वींने पाछो धरम का गेला पे लाबा का वाते वींकी मदत करो, ताँके वो पाछो धरम का गेला में आ जावे। थाँ आपणाँ खुद को भी ध्यान राकज्यो के, थाँ परक में ने पड़ो।</verse>
				<verse number="2">थाँ एक-दूँजा का दुक में मदत करिया करो, अन यद्याँ अस्यान करो तो थाँ मसी का नेमा ने पूरा करो।</verse>
				<verse number="3">काँके यद्याँ किंके नके कई भी ने वेवे तोबी वो अपणे खुद ने मोटो हमजे, तो वो अपणा खुद ने खाड़ा में नाकरियो हे।</verse>
				<verse number="4">पण हाराई ने आपणाँ-आपणाँ कामाँ की जाँच करणी छावे, काँके अस्यान करबाऊँ वाँने खुद पे मेपणो करबा को मोको मली। पण वाँने दूजाऊँ खुद की तुलना ने करणी छावे।</verse>
				<verse number="5">काँके हाराई मनकाँ ने आपणोईस बोज तोकणो पड़े हे।</verse>
				<verse number="6">जणी परमेसर का बचन हुण्या हे, वाँने यो करणो छावे के, वीं आपणाँ नके की हारी हव चिजाँ ने आपणाँ हिकबावाळा का हाते बाटे।</verse>
				<verse number="7">आपणाँ खुद ने धोको मती दो, परमेसर की कुई रोळ ने कर सके हे, काँके ज्यो जस्यो वाँई, वो वस्योईस काटी।</verse>
				<verse number="8">काँके ज्यो आपणाँ सरीर की बुरी मरजी के वाते वाँई, वो सरीर के वाते आपणाँ नास की हाँक काटी, अन ज्यो पुवितर आत्मा के वाते वाँई, वो आत्मा के वाते अनंतकाल का जीवन की हाँक काटी।</verse>
				<verse number="9">ईं वाते जतरी भलई कर सको हो वतरी भलई करो, काँके यद्याँ आपाँ भलई करबा में ढिला ने पड़ा, तो हव टेम आबा पे आपाँने वींको फळ मली।</verse>
				<verse number="10">ईं वाते जटा तईं वे सके वटा तईं थाँ हाराई का हाते भलई करो अन खासतोरऊँ विस्वासी भई-बेना का हाते।</verse>
				<verse number="11">देको, अबे मूँ मारा हाताऊँ मोटा-मोटा अकरा में थाँने लिकरियो हूँ।</verse>
				<verse number="12">ज्यो मनक आपणी देह का रूप में हव दिकावो करे हे वीं थाँका पे खतनो कराबा को जोर देवे हे। वीं यो बेस ईं वाते करे हे के, वीं मसी की हूळी का परच्यार का मस हताया ने जावे।</verse>
				<verse number="13">काँके वीं ज्याको खतनो वेग्यो हे वीं खुद तो मूसा का नेमा को पालण ने करे हे, पछे भी वीं छावे हे के, थाँ भी खतनो करावो, ताँके थाँके अणी देह का रिवाज मानबा पे वीं मेपणो कर सके।</verse>
				<verse number="14">मने परबू ईसू मसी की हूळी ने छोड़न ओरी दूजी कणी बात में मेपणो ने वेवे हे। काँके मूँ दनियाँ का नजर में अन दनियाँ मारा नजर में हूळी पे चड़ई तकी हे।</verse>
				<verse number="15">काँके ने खतना करबा को नफो हे अन ने खतनो ने कराबा को नफो हे, नफो हे तो बेस नुवी रचना को हे।</verse>
				<verse number="16">ईं वाते जतरा भी अणी रिती पे चाली वणा हाराई परमेसर का मनकाँ पे दया अन सान्ती वेती रेई।</verse>
				<verse number="17">कागद ने खतम करतो तको मूँ थाँकाऊँ हाता-जोड़ी करूँ हूँ के, अबे मने ओरी दुक देवो मती, काँके मूँ तो पेल्याऊँ आपणी देह में ईसू मसी का घावा ने लेन गुमीरू हूँ।</verse>
				<verse number="18">हो भायाँ, आपणाँ परबू ईसू मसी की दया थाँकी आत्मा पे वेती रेवे। आमीन।</verse>
			</chapter>
		</book>
		<book number="49">
			<chapter number="1">
				<verse number="1">मूँ पोलुस ज्यो, परमेसर की मरजीऊँ ईसू मसीऊँ खास थरप्यो तको मनक हूँ, परमेसर का पुवितर मनक ज्यो ईसू मसी ने माने हे अन इपिसुस नगर में रेवे हे, अणाने ओ कागद लिकरियो हूँ।</verse>
				<verse number="2">आपणाँ बापू परमेसर अन परबू ईसू मसी, थाँ लोगाँ पे करपा करी अन सान्ती देई।</verse>
				<verse number="3">आपणाँ परबू ईसू मसी का बापू, परमेसर की मेमा वेवे, काँके वणा आपाँने हरग में मसीऊँ हंगळी तरियाँ की आत्मिक आसिसाँ दिदी हे।</verse>
				<verse number="4">जस्यान के, वाँकाणी अणी दनियाँ ने बणाबाऊँ पेल्याऊँ मसीऊँ गट-जोड़ करन आपाँने चुण लिदा, ताँके आपीं वणा की नजरा में पुवितर अन बना दोस का बण्या तका रेवा।</verse>
				<verse number="5">वाँकाणी परेम का हाते पेल्याँऊँ ओ ते किदो के, आपाँ ईसू मसीऊँ वाँकी गोद लिदी तकी ओलाद बणा। याईस वाँकी मरजी अन खुसी की बात ही।</verse>
				<verse number="6">वाँके मेमाऊँ भरी करपा की बड़ई वे, वाँ करपा माने वींका लाड़ला पूतऊँ मली।</verse>
				<verse number="7">मसीऊँ गट-जोड़ वेबाऊँ वणा आपाँने आपणाँ लुईऊँ छुड़ाया, ईंको मतलब गुनाऊँ मापी देवाड़े हे। ओ परमेसर की मोटी करपा का मस व्यो।</verse>
				<verse number="8">वाँ करपा परमेसर आपणाँ ऊपरे नरी ऊँदा दिदी हे। अन वणा आपणी हारी अकल अन हमज का हाते</verse>
				<verse number="9">वाँका मरजी का राज ने आपणाँ में परगट किदो, जिंने ईसू मसीऊँ पूरो करबा का वाते वणा पेल्याइस खुसीऊँ ते कर लिदो हो।</verse>
				<verse number="10">परमेसर को ओ बच्यार हो के, सई टेम आबा पे अन दन पूरा वेबा पे हरग की अन धरती की हारी चिजाँ ने मसी का अदिकार में लावे।</verse>
				<verse number="11">परमेसर ज्यो कई करी आपणी मन की मरजी अन ते किदी तकी बात के जस्यान करी अन परमेसर आपाँने खुद का मकसद के जस्यानीस वाँके खुद की परजा बणबा का वाते ईसू मसी का हाते गट-जोड़ करन चुण्या हा, जिंने वणा पेल्याई ते कर मेल्यो हो।</verse>
				<verse number="12">जणीऊँ माँ तो सबाऊँ पेल्या मसी पे आस राकी के, वाँकी मेमा की बड़ई कराँ।</verse>
				<verse number="13">थाँ लोगाँ भी हाँचा बचन हुण्या, ज्यो थाँके मुगती देबावाळो हव हमच्यार हो। ईंने हुणन थाँ मसी पे विस्वास किदो, तद्याँ परमेसर थाँका पे आपणी पुवितर आत्मा की छाप लगई, जिंको वादो परमेसर कर मेल्यो हो।</verse>
				<verse number="14">परमेसर आपणाँ लोगाँ ने ज्यो देबा वाते वादो किदो हे, ईंको पुवितर आत्मा गारन्टी का जस्यान हे, जद्याँ तईं वो आपणाँ लोगाँ ने पुरी तरियाऊँ छुटकारो ने देई। ईंका मस आपीं वींकी मेमा की बड़ई करा।</verse>
				<verse number="15">ईं वाते, जद्याँऊँ में परबू ईसू पे थाँका विस्वास अन हारई परमेसर का पुवितर मनकाँ का वाते थाँका परेम का बारा में हुण्यो हे,</verse>
				<verse number="16">तद्याँऊँ मूँ थाँका वाते परमेसर को धन्नेवाद हमेस्यान कररियो हूँ। मारी परातना में मूँ थाँने रोज आद करिया करूँ हूँ।</verse>
				<verse number="17">मूँ अरज करिया करूँ हूँ के, आपणाँ परबू ईसू मसी का परमेसर जी मेमाऊँ भरिया तका हे, थाँने अकल अन चोड़ो करबावाळी आत्मा दे देई, ताँके थाँ परमेसर ने जान सको।</verse>
				<verse number="18">अन थाँका मन की आक्याँ खुल जावे ताँके थाँने पतो चाल जावे के वा आस कई हे, जिंका वाते थाँने वणा बलाया हे। अन जणी हक ने वो आपणाँ हारई पुवितर लोगाँ ने देई, वो कतरो मोटो अन अनमोल हे।</verse>
				<verse number="19">अन थाँ ओ भी जाण सको के, आपाँ विस्वास्याँ का वाते वींकी सगती कतरी मोटी हे। अन ज्यो सगती मारा में काम कररी हे वणीस सगतिऊँ</verse>
				<verse number="20">परमेसर मसी ने मरिया तकाऊँ पाछो जीवतो करन हरग में आपणाँ जीमणा पाल्ड़े बेटायो।</verse>
				<verse number="21">मसी वटे हारई मोटा राजा, अदिकारियाँ, आत्मिक सगत्याँ, मालिकाँ पे बेस अणी जुग में ने पण आबावाळा जुग में भी हाराई पद का ऊपरे राज करी।</verse>
				<verse number="22">परमेसर हारई ने मसी का पगतळ्याँ कर दिदा अन वणाईस वींने विस्वास्याँ की मण्डली का वाते हाराऊँ मोटो मुक्यो बणायो।</verse>
				<verse number="23">विस्वास्याँ की मण्डली मसी को डील अन भरपुरी हे। अन मसी हाराई ने पूरो करे हे।</verse>
			</chapter>
			<chapter number="2">
				<verse number="1">एक टेम ही, जद्याँ थाँ आपणाँ गुना अन पापाँ का मस आत्मिक जीवन में मरिया तका हा।</verse>
				<verse number="2">थाँ पेल्याँ दनियाँ का हूँगला नेमा पे चालता हा। अन वीं वादळा की आत्मिक सगत्याँ का राजा ने मानता हा, ज्यो आत्मा लोगाँ ने अबे परमेसर को मान ने करबा का वाते मजबूर करती ही।</verse>
				<verse number="3">पेल्याँ आपाँ हारई भी वाँके जस्यान आपणाँ डील की हुगली मनसा के जस्यान दन बिताता हा, डील अन मन की मरजी पुरी करता हा अन दूजाँ लोगाँ के जस्यान परमेसर का दण्ड के जोगा हा।</verse>
				<verse number="4">परमेसर की दया घणी मोटी हे अन वाँको परेम आपणाँ वाते घणो मोटो हे।</verse>
				<verse number="5">जद्याँ आपाँ गुना का मस आत्मिक जीवन में मरिया तका हा, तो आपाँने मसी का हाते जिवाया। वाँकी करपाऊँ थाँ बंचाया ग्या हो।</verse>
				<verse number="6">आपणो ईसू मसी का हाते गट-जोड़ हो, ईं वाते परमेसर आपाँने ईसू मसी का हाते पाच्छा जीवता कर दिदा अन हरग में वाँके नके बेठाया।</verse>
				<verse number="7">अणा अस्यान किदो ताँके वो आबावाळा जुग में दया का हाते ईसू मसीऊँ ओ दिकाई के खुद की करपा ज्यो आपाँने दिकई ही वा कतरीक हेली हे।</verse>
				<verse number="8">काँके थाँ विस्वास का मस करपाऊँ बंचाया ग्या हो। अन ओ थाँके करमा को फळ कोयने पण ओ तो परमेसर को दान हे। ईं वाते अणीऊँ कुई मेपणो ने कर सके हे।</verse>
				<verse number="9"></verse>
				<verse number="10">काँके आपीं वींका बणाया ग्या हा अन ईसू मसी का गट-जोड़ऊँ वणा भला कामाँ वाते बणाया ग्या हाँ ज्याँने परमेसर पेल्याई आपणे करबा का वाते त्यार किदा।</verse>
				<verse number="11">ईं वाते आद करो के थाँ जनमऊँ यहूदी ने हो। डील में मनकाँ का हाताऊँ खतनो किदा तका यहूदी मनक आपणाँ खतना पे मेपणो करे हे अन थाँने बना खतना का केवे हे।</verse>
				<verse number="12">वीं टेम थाँ मसी ने जाणता ने हा। थाँ पराया हा मतलब परमेसर का चुण्या तका इजराएली कोयने हा। परमेसर का दिदा तका वादा के करार का भागीदार ने हा अन ईं दनियाँ में बना आस अन बना परमेसर को जीवन जीरिया हा।</verse>
				<verse number="13">पण थाँ ज्यो पेल्याँ परमेसरऊँ छेटी हा, अबे ईसू मसी का गट-जोड़ में, मसी की मोतऊँ भड़े लाया ग्या हो।</verse>
				<verse number="14">काँके वणीस यहूदी अन ज्यो यहूदी ने हा वाँने मेल-मिलाप करन एक बणा दिदा अन वाँका डीलऊँ वाँ दुयाँ ने अलग करबावाळी दसमणी की भींत ने धड़ई दिदी।</verse>
				<verse number="15">वणा मूसा का नेम अन वींका काण-कायदा का हाते मटा दिदा हे ताँके वो दुयाँ ने आपणाँ गट-जोड़ऊँ एक नुवो मनक बणावे अन मेल-मिलाप करे।</verse>
				<verse number="16">अन हूळी पे बेर ने नास करन दुया ने एक डील बणान परमेसरऊँ पाछो मेल-मिलाप कर दिदो।</verse>
				<verse number="17">वाँकाणी आन थाँने ज्यो छेटी हा अन वाँने ज्यो भड़े हा, मेल-मिलाप करबावाळो हव हमच्यार हुणायो।</verse>
				<verse number="18">काँके मसीऊँइस आपीं दुई एक पुवितर आत्माऊँ बापू परमेसर का नके पोछ सका।</verse>
				<verse number="19">ईं वाते थाँ अबे पराया अन परदेसी ने हो, पण पुवितर लोगाँ का हाते परमेसर के राज का रेवासी अन वाँके घर का वेग्या हो।</verse>
				<verse number="20">थाँ अस्यो एक मेल हो जणी की नीम थरप्या तका अन परमेसर का आड़ीऊँ बोलबावाळा हे, अन वींके नासीक को भाटो खुद ईसू मसी हे।</verse>
				<verse number="21">वणी मेंईस मेल की हारी चिजाँ एक हाते मलन परबू का वाते एक पुवितर मन्दर बणती जारी हे।</verse>
				<verse number="22">वाँके हाते गट-जोड़ऊँ आपाँ हाराई भी परमेसर का वाते पुवितर आत्माऊँ वाँके रेवा को मेल बणाया जारिया हो।</verse>
			</chapter>
			<chapter number="3">
				<verse number="1">मूँ पोलुस थाँ ज्यो यहूदी ने हा थाँका वाते ईसू मसी को दास हूँ, ईंवाते जेळ में बन्द हूँ।</verse>
				<verse number="2">परमेसर करपा करन थाँकी भलई का वाते ज्यो काम मने हुप्यो हो, वींका बारा में थाँ हुण्योईस वेई।</verse>
				<verse number="3">अन परमेसर आपणी गुप्त की बाताँ ने मारा पे परगट किदो, जिंका बारा में, में थोड़ोक पालाँ पाटाँ में लिक चुक्यो हूँ।</verse>
				<verse number="4">जणीऊँ थाँ, भणन हमज सको हो के, मूँ वीं मसी का राज ने कतरोक हव जाण हूँ।</verse>
				<verse number="5">पुराणी टेम में ईं राज ने मनकाँ पे परगट ने किदो ग्यो हो, अबाणू परमेसर पुवितर आत्माऊँ वींका पुवितर थरप्या तका अन वाँका आड़ीऊँ बोलबावाळा पे परगट किदो ग्यो।</verse>
				<verse number="6">ओ राज ओ हे के, हव-हमच्यारऊँ यहूदियाँ का हाते ज्यो यहूदी ने हे वी भी वारिस वेवे अन एकीस डील का भाग वे अन ईसू मसी का गट-जोड़ऊँ परमेसर का वादा में पाँती लेवे।</verse>
				<verse number="7">मूँ परमेसर की करपा का दानऊँ, जिंने वणा वाँके काम करबावाळी तागतऊँ दिदो, जणीऊँ मूँ हव हमच्यार को दास बण्यो।</verse>
				<verse number="8">मूँ हाराई पुवितर मनकाँऊँ फोरो हूँ, पण मारा पे आ करपा वीं के, मूँ मसी का अनमोल धन ने ज्यो हमजऊँ बारणे हे वींका हव हमच्यार ने ज्यो यहूदी ने हे वाँ लोगाँ ने हूणाऊँ</verse>
				<verse number="9">अन हाराई पे परमेसर का राज की ओजणा ने परगट करूँ, ज्यो हारई चिजाँ ने बणाबावाळा परमेसर ठेटऊँ छाने राक्यो हो,</verse>
				<verse number="10">ताँके अबे मण्डळीऊँ परमेसर को तरे-तरे को ग्यान वाँ हरग का मोटा राजा अन अदिकारियाँ पे परगट किदो जावे।</verse>
				<verse number="11">परमेसर ओ, आपणाँ अमरकाळ का मकसद के जस्यान किदो हो अन ईंने आपणाँ परबू ईसू मसीऊँ किदो हो।</verse>
				<verse number="12">मसी का गट-जोड़ऊँ अन वींपे विस्वास करबाऊँ बना दरपता तका परमेसर का हामे जाबा को भरोसो हे।</verse>
				<verse number="13">ईं वाते मूँ हात-जोड़न केवूँ के, ज्यो कळेस थाँका वाते मने जेलणो पड़रिया हे, वीं मस हिम्मत ने छोड़ो, काँके ओ थाँकी भलई का वाते हे।</verse>
				<verse number="14">ईं मस मूँ बापू परमेसर का हामे परातना करबा ने गोडा टेकूँ हूँ।</verse>
				<verse number="15">ज्याऊँ हरग अन दनियाँ में, हाराई परवाराँ ने ओळकाण मले।</verse>
				<verse number="16">परमेसर आपणी आत्माऊँ आपणाँ मेमा भरिया धनऊँ थाँकी अंतर-आत्मा जोरावर वेबा का वाते थाँने तागत देवे।</verse>
				<verse number="17">अन विस्वासऊँ मसी थाँका हरदा में बसे अन थाँकी जड़ा अन नीम परेम में धस जावे।</verse>
				<verse number="18">हारई पुवितर मनकाँ का हाते हव तरिया ओ हमजबा की तागत पावो के, मसी को परेम कतरो लम्बो, चोड़ो, ऊसो अन ऊण्डो हे।</verse>
				<verse number="19">अन मसी का वीं परेम ने जान सको, ज्यो हाराई ग्यानऊँ बारणे हे, जणीऊँ थाँ परमेसर का हारई गुणऊँ भर जावो।</verse>
				<verse number="20">अबे परमेसर आपणाँ में काम करबावाळी वाँकी तागतऊँ आपणे पूँछबाऊँ अन हमजबाऊँ भी घणो हेलो काम कर सके हे।</verse>
				<verse number="21">मण्डली में अन ईसू मसीऊँ परमेसर की मेमा जुग-जुग तईं वेती रेवे। आमीन।</verse>
			</chapter>
			<chapter number="4">
				<verse number="1">ईं वाते मूँ ज्यो परबू की सेवा का वाते बन्दयो तको हूँ, थाँकाऊँ हाता-जोड़ी करूँ हूँ के, जीं मनसाऊँ परमेसर थाँने बलाया, वींके जस्यानीस चाल चालो।</verse>
				<verse number="2">ईंको मतलब दीनता अन नरमाई का हाते सेण करबा की तागत राकन परेमऊँ एक दूजाँ ने सेण करो।</verse>
				<verse number="3">पुवितर आत्मा एकता देवे हे, वींने बणी रेवा का वाते गट-जोड़ करबावाळी सान्तीऊँ थाँ जतरो भी कर सको हो वतरो करो।</verse>
				<verse number="4">जस्यान के एकीस डील अन एकीस आत्मा हे वस्यानीस एकीस आस हे जिंका वाते परमेसर थाँने बलाया हे।</verse>
				<verse number="5">एकई परबू हे, एकई विस्वास हे अन एकीस बतिस्मो,</verse>
				<verse number="6">एकीस परमेसर हे अन वींइस हाराई का बापू हे। हाराई का मालिक भी वींइस हे, हाराई में वींइस काम करे हे अन हाराई में बसे हे।</verse>
				<verse number="7">मसी जस्यान छाया वणीस नापऊँ आपाँ हाराई ने एक खास वरदान दिदो।</verse>
				<verse number="8">ईं वाते सास्तर केवे हे के, “वो ऊँसी जगाँ में ग्यो, बन्दीया तका ने आपणाँ हाते लेग्यो, अन मनकाँ ने वरदान दिदा।”</verse>
				<verse number="9">वींको ऊँसी जगाँ में जाबा को मतलब कई हे। बेस ओ हे के, वो पेल्याँ पाताळ में उतरियो हो।</verse>
				<verse number="10">अन ज्यो रेटे उतरियो हो, वो वोईस हे ज्यो आकासऊँ ऊपरे भी चड़ग्यो के, हारी चिजाँ ने भर सके।</verse>
				<verse number="11">वाँकाणी किंनेई तो थरप्या तका वेबा का वाते, अन किंनेई परमेसर का आड़ीऊँ बोलबावाळा, किंनेई तो हव हमच्यार हुणाबावाळा, अन किंनेई तो परमेसर का मनकाँ का गवाळ अन किंनेई हिकाबावाळा बणाया।</verse>
				<verse number="12">वणा ओ ईं वाते किदो के, वी हाराई पुवितर मनकाँ ने सेवा करबा का वाते त्यार करे ताँके मसी को डील तकड़ो वेतो जावे।</verse>
				<verse number="13">ओ तद्याँ तईं वेई जद्याँ तईं आपाँ हाराई विस्वास में अन परमेसर का बेटा का ग्यान में एक कोयने वे जावाँ अन मसी का हारई गुण में पाका कोयने वे जावाँ।</verse>
				<verse number="14">जणीऊँ आपीं आगे बाळक कोयने रेवा, ज्यो ठग मनक की ठग-वद्‍याँ अन चतुराईऊँ, भेंम की बाताँ अन छळ का उपदेस का वइराऊँ ऊछाळ्यो जावे हे अन अटने-वटने भटके हे।</verse>
				<verse number="15">पण माँकाणी परेम का हाते हाँचा बोलता तका हारई तरियाऊँ मसी ज्यो मातो हे जिंको मतलब मण्डली को मुक्यो, वींमें वदता जावाँ।</verse>
				<verse number="16">मसी का केवा में हरेक टेको देबावाळा जोड़ऊँ डील का हाराई अंग जोड़्या जावे अन एक वेजावे हे। ईं वाते जद्याँ हरेक अंग आपणो आपणो काम करे तद्याँ आको डील वदतो जावे हे अन वो परेम में भी वदे हे।</verse>
				<verse number="17">मूँ ईं वाते ओ केवूँ हूँ अन परबू का नाम में थाँने हेंचेत करूँ हूँ के, ज्यो विस्वास ने करे हे वाँके जस्यान अबे कदी भी जीवन ने जीवो, जिंको बच्यार कई काम को ने हे।</verse>
				<verse number="18">वीं बना हमज का हे अन परमेसरऊँ मलबावाळा जीवनऊँ घणा छेटी हे, काँके वाँकी अकल अंदकारऊँ भरी तकी हे अन वाँका मन कल्डा वेग्या हे।</verse>
				<verse number="19">हरम की भावना वाँका में ने ही अन वाँकाणी खुद ने हूँगला कामाँ में उळजा दिदा अन अस्या अवारा कामाँ ने हमेस्यान करबा की मरजी राकता हा।</verse>
				<verse number="20">पण मसी का बारा में ज्यो थाँ हिक्यो हे, वो तो अस्यो ने हे।</verse>
				<verse number="21">थाँ पको ईसू का बारा में हुण्यो अन वींका बारा में थाँने भणाया भी ग्या हा के, हाँच ईसू में वास करे हे।</verse>
				<verse number="22">थाँके पाला जीवन को चालचलन ज्यो धोको देबावाळी मरजीऊँ बगड़ग्यो हे, वींने छोड़बा का वाते थाँने हिकायो ग्यो हो।</verse>
				<verse number="23">जणीऊँ थाँको मन अन आत्मा बदलन नुवी वेणी छावे।</verse>
				<verse number="24">अन थाँ नुवा चालचलन ने पेरलो, ज्यो परमेसर का गुण का जस्यान रच्यो ग्यो हे अन ज्यो हाँची में पुवितर अन परमेसर का हामे सई हे।</verse>
				<verse number="25">ईं वाते थाँ जूट बोलणो छोड़ दो। आपणाँ हण्डाळ्याऊँ हारई ने हाँच बोलणो छावे, काँके आपाँ हाराई एकीस डील का अंग हाँ।</verse>
				<verse number="26">रीस में आन पाप मती करो अन दन आत्याँ पेल्याइस आपणी रीस ने खतम कर दो।</verse>
				<verse number="27">सेतान ने मोको मती दो के, वो थाँने पाप में नाक दे।</verse>
				<verse number="28">ज्यो चोरी करतो आरियो हे, वो अबे कदीई चोरी ने करे, पण ईंका बदले वींने स्यवकार वेन खुद की मेनतऊँ काम करणो छावे। ईंऊँ वो जिंने जरूत हे वींने भी दे सके।</verse>
				<verse number="29">थाँका मुण्डाऊँ कई नकसाण करबावाळी बाताँ ने निकळणी छावे, पण लोगाँ के धिज्यो बंदाबा का वाते ज्याँने जरूत हे, अस्यी हव बाताँइस निकळणी छावे, ताँके ज्यो हुणे वाँको भलो वे।</verse>
				<verse number="30">परमेसर की पुवितर आत्माने दकी मती करो, काँके छुड़ाबा के दन का वाते वा खुद छाप थाँका पे लागी हे।</verse>
				<verse number="31">हारी कड़वाहट, गुस्सो अन रीस, लड़ई, गाळ्याँ देणो, अन हारी बुरई ने छोड़ दो।</verse>
				<verse number="32">एक दूजाँ का वाते करपा वाळा अन दयाळू बणो अन एक दूजाँ का गुना ने वस्यानीस माप करो जस्यान परमेसर थाँने मसीऊँ माप किदा।</verse>
			</chapter>
			<chapter number="5">
				<verse number="1">ईं वाते लाड़ला छोरा-छोरी के जस्यान ज्यो परमेसर करे वस्यानीस करो।</verse>
				<verse number="2">मसी थाँकाऊँ परेम किदो अन आपणाँ वाते परमेसर का हामे हव लागबा वाळी बली वेग्यो अन खुद ने भेंट चढा दिदो। वाँके जस्यानीस परेमऊँ रो।</verse>
				<verse number="3">थाँ तो परमेसर का मनक हो, ईं वाते थाँकामें कुकरम, कणी तरिया का हूँगला काम अन लोब-लाळच अस्सी बाताँ का बात-बच्यार भी थाँका बचमें ने वेणो छावे।</verse>
				<verse number="4">लाज अन फोगट की बाताँ अन हूँगला चुटकला की बाताँ थाँका बचमें ने वेणी छावे, पण वाँकी जगाँ पे थाँने धन्नेवाद देणो छावे।</verse>
				<verse number="5">थाँने ओ जाणणो हे के, कुकरमी, हूँगला मनक, अन लोबी मनक ज्यो मूरत पुजा करबावाळा का जस्यान हे अस्या मनकाँ का वाते मसी अन परमेसर का राज में बापोती कोयने हे।</verse>
				<verse number="6">कुई थाँने फोगट की बाताँऊँ धोको ने दे, काँके ईं कामाँ का मस परमेसर की रीस वींकी आग्या ने, ने मानबावाळा पे भड़के हे।</verse>
				<verse number="7">ईं वाते थाँ वाँका काम में भेळा मती रेज्यो।</verse>
				<verse number="8">काँके थाँ तो पेल्याँ अन्दारो हा, पण अबे परबू का गट-जोड़ में थाँ उजाळो हो, ईं वाते उजाळो का मनकाँ का जस्यान चालो।</verse>
				<verse number="9">काँके उजाळा को फळ हाराई तरियाँ की भलई, ज्यो परमेसर छावे वो करणो अन हाँच हे।</verse>
				<verse number="10">अन ओ परको के, परबू ने कई हव लागे हे।</verse>
				<verse number="11">वणा अन्दारा का कामाँ में भेळा मती वो, पण वणा कामाँ ने चोड़े करो।</verse>
				<verse number="12">काँके अस्या काम ज्याँने वीं छाने करे हे वाँ काम का बारा में बात करणी भी हरम की बात हे।</verse>
				<verse number="13">वीं हाराई काम उजाळाऊँ चोड़े वेन हारई का हामे आवे हे।</verse>
				<verse number="14">काँके उजाळोईस हे ज्यो हाराई ने चोड़े करे हे। ईं मस अस्यान केवे हे, “ओ हुबावाळा, बेटो वे अन मरिया मूँ जीवतो वेजा, तो मसी को ऊजासो थाँरा पे चमकी।”</verse>
				<verse number="15">ईं वाते ध्यानऊँ देको के, कस्यी चाल चालो हो, बना ग्यान का जस्यान ने पण अकलमन्दा का जस्यान चालो।</verse>
				<verse number="16">हाराई मोका ने हव तरियाऊँ काम में लो, काँके दन बोदा हे।</verse>
				<verse number="17">ईं मस बना अकल का मती बणो, पण ध्यानऊँ हमजो के, परबू की मरजी कई हे।</verse>
				<verse number="18">दारुँड़ीया मती बणो, काँके ईंऊँ नागाईपणो वेवे हे, पण आत्माऊँ भर जावो।</verse>
				<verse number="19">अन थाँ भजन, आत्मिक गीत अन परबू की बड़ई का गीत एक-दूँजा का वाते गावो अन आपणाँ-आपणाँ हरदाऊँ परबू का वाते भजन-भाव करता रो।</verse>
				<verse number="20">अन हरदाण हारी बाताँ का वाते आपणाँ परबू ईसू मसी का नामऊँ आपणाँ बापू परमेसर को धन्नेवाद करता रेवो।</verse>
				<verse number="21">थाँ मसी को आदर-मान राको हो, ईं वाते एक-दूँजा को केणो मानो।</verse>
				<verse number="22">ओ लुगायाँ, आपणाँ-आपणाँ धणी का केवाँ में रेवो जस्यान परबू का।</verse>
				<verse number="23">काँके जस्यान मसी मण्डली को मुक्यो हे, वस्यानीस लुगई पे धणी को अदिकार हे अन विस्वास्याँ की मण्डली मसी को डील हे अन मसी मण्डली ने बंचाबावाळो हे।</verse>
				<verse number="24">जस्यान मण्डली मसी का केवा में रेवे हे, वस्यानीस लुगायाँ भी हारी बाताँ में आपणाँ-आपणाँ धणी का केवा में रेणी छावे।</verse>
				<verse number="25">ओ धण्या, जस्यान मसी मण्डळीऊँ परेम राकन, वींने पाणी अन वसनऊँ धोन पुवितर बणाबा का वाते आपणाँ खुद ने बली कर दिदो। वस्यानीस थाँ भी आपणी-आपणी लुगायाऊँ परेम राको।</verse>
				<verse number="26"></verse>
				<verse number="27">ताँके मसी वणी मण्डली ने अस्यी पुवितर अन बना दोस की बणान सजी-धजी तकी आपणाँ हामे लावे, ज्यामें ने कळंक, ने हळ, ने कई अस्यी कमी वे।</verse>
				<verse number="28">अणीस तरिया धणी आपणी-आपणी लुगईऊँ आपणाँ डील का जस्यान परेम राकणो छावे। ज्यो आपणी लुगईऊँ परेम राके हे, वो आपणाँ खुदऊँ परेम राके हे।</verse>
				<verse number="29">काँके कणी भी कदीई आपणाँ डीलऊँ दसमणी ने राकी हे। जस्यान मसी मण्डली को पालण करन हार-हमाळ करे हे वस्यानीस थाँने भी आपणाँ डील को पालण करन हार-हमाळ करणो छावे,</verse>
				<verse number="30">काँके आपाँ वाँका डील का अंग हा।</verse>
				<verse number="31">सास्तर केवे हे के, “ईं वाते मनक आपणाँ बई-बापू ने छोड़न आपणी लुगईऊँ मल्यो रेई, अन वीं दुई एक डील रेई।”</verse>
				<verse number="32">ओ भेंद तो मोटो हे, पण मूँ ईंने मसी अन मण्डली का बारा में केवूँ हूँ।</verse>
				<verse number="33">पण थाँ मूँ हाराई आपणी लुगईऊँ आपणाँ जस्यान परेम राको अन लुगई भी आपणाँ धणी को आदर-मान करे।</verse>
			</chapter>
			<chapter number="6">
				<verse number="1">ओ छोरा-छोरी, थाँ परबू का गट-जोड़ में हो, ईं वाते आपणाँ बई-बापू को केणो मानो, काँके ओ हव हे।</verse>
				<verse number="2">“आपणी बई अन बापू को मान कर।” ओ पेलो हुकम हे जिंका हाते वादो भी हे।</verse>
				<verse number="3">“ताँके थारो भलो वेई अन थूँ धरती पे नरई दन जीवतो रेई।”</verse>
				<verse number="4">ओ बई-बापू, आपणाँ छोरा-छोरी ने रीस मती दो, पण परबू की हिक अन सई-गलत को फरक हमजाता तका वाँको पालण करो।</verse>
				<verse number="5">ओ हाळयाँ, थाँ जस्यान मसी को हुकम मानो वस्यानीस धरती का मालिक को केणो दरपता अन धूँजता तका हाँचा मनऊँ मानो।</verse>
				<verse number="6">मनकाँ ने खुस करबावाळा के जस्यान दिकाबा का वाते वाँकी सेवा-चाकरी ने करो, पण मसी का दास का जस्यान मनऊँ परमेसर की मरजी पे चालो।</verse>
				<verse number="7">अन वाँकी सेवा-चाकरी ने मनकाँ की ने पण परबू की जाणन हाँचा मनऊँ करो।</verse>
				<verse number="8">थाँ तो जाणो हो के, पलई हाळी वे कन पलई आजाद, परबू वाँने वणाके भला काम का जस्यान फळ देई।</verse>
				<verse number="9">हो मालिक, थाँ भी धमकियाँ देणी छोड़न वाँका हाते वस्यानीस वेवार करो, काँके थाँ जाणो हो के, वाँका अन थाँको मालिक हरग में हे, अन वो किंकोई पकस ने लेवे।</verse>
				<verse number="10">आकरी बात, परबू का गट-जोड़ अन वाँकी मोटी तागतऊँ ज्योरावर वेता रेवो।</verse>
				<verse number="11">परमेसर का हाराई हत्यार बांद लो, ताँके थाँ सेतान की चाल को सामनो कर सको।</verse>
				<verse number="12">काँके आपणो युद मनकाँऊँ कोयने पण आकास में रेबावाळा मोटा राजा, अदिकारियाँ, ईं अंदारा की दनियाँ में राज करबावाळी सगत्याँ अन हुगली आत्माऊँ हे।</verse>
				<verse number="13">ईं वाते परमेसर का हारई हत्यार पेरलो के, थाँ बुरा दन में वाँका हामे ऊबा रे सको अन हारई पूरो करन अटल रेवो।</verse>
				<verse number="14">ईं वाते हाँच का बेलपट्याऊँ आपणी कमर बाँदन, अन छाती को कवच पेरलो मतलब परमेसर का हामे सई करो,</verse>
				<verse number="15">अन पगाँ में मोचड्याँ पेरलो, ज्यो मेल-मिलाप का हव हमच्यार का परच्यार करबा ने त्यार वेबा के जस्यी हे</verse>
				<verse number="16">अन ईं हारई का हाते विस्वास की ढाल लेवो जणीऊँ थाँ सेतान की हारी हगलती तकी तीराँ ने बजा सको।</verse>
				<verse number="17">अन उदार को टोपो, अन आत्मा की तरवार, ज्यो परमेसर का बचन हे, लिलो।</verse>
				<verse number="18">हरेक तरियाँ की अरज अन विनती का हाते आत्माऊँ हर टेम परातना करिया करो। ईं मस जागता रेवो अन हारई पुवितर लोगाँ का वाते हरदाण अरज करता रेवो।</verse>
				<verse number="19">अन मारा वाते भी अरज करज्यो, ताँके जद्याँ मूँ बोलूँ वीं दाण परमेसर मने अस्यो बचन देवे के, मूँ हिम्मत राकन हव हमच्यार को भेंद बता सकूँ।</verse>
				<verse number="20">अणी हव हमच्यार को परच्यार करबा का वाते मूँ हाकळाऊँ बंद्‍यो तको परमेसर को दूत हूँ। मारा वाते परातना करो के, जस्यान मने परच्यार करणो छावे, वस्यानीस मूँ बना दरपणीऊँ कर सकूँ।</verse>
				<verse number="21">मूँ कस्यान हूँ अन कई कररियो हूँ ईं हारी बाताँ परबू का विस्वास जोगो दास अन लाड़लो भई तुखिकुस थाँने बताई।</verse>
				<verse number="22">माकाँ हमच्यार जाणबा का वाते अन थाँकी हिम्मत बड़ाबा का वाते मूँ वींने थाँका नके खन्दारियो हूँ।</verse>
				<verse number="23">बापू परमेसर अन परबू ईसू मसी का आड़ीऊँ भायाँ ने सान्ती अन परेम, विस्वास का हाते मले।</verse>
				<verse number="24">ज्यो आपणाँ परबू ईसू मसीऊँ अमर परेम राके हे, वणा हाराई पे परमेसर की करपा वेती रेवे।</verse>
			</chapter>
		</book>
		<book number="50">
			<chapter number="1">
				<verse number="1">ईसू मसी का दास पोलुस अन तिमुतियुस, फिलिपी नगर का हाराई मसी का गट-जोड़ में रेबावाळा परमेसर का पुवितर मनकाँ, मण्डली की देकरेक कराबावाळा अन काम में मदत करबावाळा ने ओ कागद लिकरिया हा।</verse>
				<verse number="2">आपणाँ बापू परमेसर अन परबू ईसू मसी, थाँ लोगाँ पे करपा करी अन सान्ती देई।</verse>
				<verse number="3">मूँ जद्याँ भी थाँने आद करूँ हूँ थाँका वाते आपणाँ परमेसर को धन्नेवाद करूँ हूँ</verse>
				<verse number="4">अन जद्याँ भी थाँ हाराई का वाते परातना करूँ हूँ, राजी वेन परातना करूँ हूँ,</verse>
				<verse number="5">काँके जद्याँऊँ हव हमच्यार हुण्यो हो वीं पेला दनऊँ लेन आज दन तईं हव हमच्यार फेलाबा में मारी मदत किदी हे।</verse>
				<verse number="6">अन मने ईं बात को विस्वास हे के, जीं परमेसर थाँकामें हव काम सरू किदो हे, वींइस वींने ईसू मसी का पाच्छा आबा का दन तईं पूरो करी।</verse>
				<verse number="7">थाँ हाराई का वाते मने अस्याईस बच्यार राकणा हव हे, काँके थाँ हाराई मारा मन में बस्या तका हो। अन जद्याँ मूँ हाकळाऊँ बन्दयो तको हूँ अन हव हमच्यार ने साबत करबा अन पाको बणाबा में भी लागरियो हूँ, थाँ मारा हाते परमेसर की दिदी तकी अणीस करपा में भागी हो।</verse>
				<verse number="8">ईंमें परमेसर मारा गुवा हे के, मूँ ईसू मसी का लगावऊँ थाँ हाराई का वाते वाट नाळरियो हूँ।</verse>
				<verse number="9">अन मूँ आ अरज करूँ हूँ के, थाँ परेम, हाँचा ग्यान अन हाराई तरियाँ की हमज का हाते ओरुँ भी वदता जावो,</verse>
				<verse number="10">अटा तईं के, थाँ हवऊँ हव बाताँ ने परक सको ताँके मसी के पाच्छा आबा के दन तईं ऊजळा अन बना दोस का बण्या रेवो।</verse>
				<verse number="11">परमेसर की बड़ई अन मेमा के वाते थाँको जीवन ज्यो परमेसर छावे वो करबावाळा हव गुणऊँ भर जावे ज्याँने ईसू मसी देवे हे।</verse>
				<verse number="12">अबे हो भायाँ अन बेना, मूँ छावूँ हूँ के, थाँ ओ जाण लो के, मारा पे ज्यो बीती हे, वींऊँ हकीकत में हव हमच्यार की बड़ोतरी वीं हे।</verse>
				<verse number="13">अणीऊँ रोम माराजा के मेल का हंगळा पेरादार अन हाराई लोग ओ तो हमजग्या हे के, मूँ मसी का वाते जेळ में हूँ।</verse>
				<verse number="14">मारो जेळ में रेवा का मस परबू पे विस्वास राकबावाळा नरई भायाँ की हिम्मत बड़गी अन वाँको धिज्यो हव हमच्यार ने बना दरप्या हुणाबा का वाते नरोई बड़ग्यो हे।</verse>
				<verse number="15">कतरा तो रिस्याँ बळन अन लड़ई का मस मसी को परच्यार करे हे अन कतराई भली मनसाऊँ करे हे।</verse>
				<verse number="16">भली मनसाऊँ करबावाळा परेमऊँ परच्यार करे हे काँके ओ जाणन के, हव हमच्यार ने सबूत देन साबत करबा का वाते मने चुण्यो हे।</verse>
				<verse number="17">अन कुई तो हव मनऊँ कोयने पण हवारतऊँ मसी का बारा में परच्यार करे हे ओ होचन के, मूँ जेळ में हूँ तो मने ओरी परेसान करे।</verse>
				<verse number="18">कस्यान भी वे मसी का बारा में हरेक तरियाऊँ परच्यार वेरियो हे पलई गलत मकसदऊँ, पलई हव मकसदऊँ। ईं वाते मूँ राजी हूँ अन राजी रेऊँ।</verse>
				<verse number="19">काँके मूँ होचूँ हूँ के, थाँकी अरजऊँ अन ईसू मसी की आत्मा की मदतऊँ मूँ बंचायो ग्यो हूँ।</verse>
				<verse number="20">मूँ तो याईस मरजी अन आस राकूँ हूँ के, ज्यो काम मूँ कररियो हूँ वींमें मूँ कदीई हरमाऊँ कोयने, पण पुरी हिम्मत का हाते मसी की मेमा मारा डीलऊँ हरदाण वेती ही, खासतोरऊँ अबे भी वेती रेई, पलई मूँ जीवूँ कन मर जऊँ।</verse>
				<verse number="21">काँके मारा वाते जीवतो रेणो मसी हे, अन मर जाणो नफो हे।</verse>
				<verse number="22">यद्याँ मूँ जीवतो रेऊँ तो ओरी भला काम करूँ पण मूँ ने जाणूँ के, किंने चुणू।</verse>
				<verse number="23">मूँ ईं दुया का बचमें लटक्यो तको हूँ। मारो जी तो छारियो हे के, ओ डील छोड़न मसी का नके जान रूँ, काँके ओ घणोइस हव हे,</verse>
				<verse number="24">पण डील में रेणो थाँका वाते घणो जरूरी हे।</verse>
				<verse number="25">अन अणी बात ने हव तरियाँ जाणूँ हूँ के, मूँ जीवतो रेऊँ, अन थाँ हाराई का हाते रेऊँ, ज्याऊँ थाँ विस्वास में वदता जावो अन वींमें राजी रेवो,</verse>
				<verse number="26">ताँके जद्याँ मूँ थाँका नके आऊँ तद्याँ थाँने मारा मस ईसू मसी पे बड़ई करबा को ओरी मस वेई।</verse>
				<verse number="27">थाँ थाँको जीवन मसी का हव हमच्यार के जोगो जियो, ताँके यद्याँ मूँ आन थाँने देकूँ कन ने देकूँ पण थाँका बारा में मूँ ओ हुण सकूँ के, थाँ एक मन अन एक मकसदऊँ अटल रेन हव हमच्यार का विस्वास का वाते कल्ड़ी मेनत कररिया हो।</verse>
				<verse number="28">अन कस्यी भी बात में थाँ थाँका दसमणाऊँ दरपो मती। ओ ईं बात ने साबत करे के, थाँ तो बंच जावो अन वाँको नास वे जाई, ओ परमेसर का आड़ीऊँ हे।</verse>
				<verse number="29">काँके थाँने बेस मसी पे विस्वास करबा कोईस ने पण वाँका वाते दुक जेलबा को भी मोको मल्यो हे।</verse>
				<verse number="30">थाँ भी असीस लड़ई में हो जिंमें थाँ मने देक्यो हो अन अबाणू भी थाँ हुणरिया हो के, मूँ वींमेंईस हूँ।</verse>
			</chapter>
			<chapter number="2">
				<verse number="1">यद्याँ मसी थाँकी हिम्मत बड़ावे, वाँको परेम थाँने धिज्यो देवे, पुवितर आत्मा थाँके हाते रेवे, अन थाँ एक-दूँजा का वाते दया अन बाळ राको हो</verse>
				<verse number="2">तो एकीस होच, एकीस परेम, एकीस मन अन एकीस मनसा राकन मारो आणन्द पूरो करो।</verse>
				<verse number="3">खुद का हवारतऊँ कई मती करो अन जूटो मेपणो मती करो, पण नरमाईऊँ खुदऊँ हेला एक-दूँजा ने हव हमजो।</verse>
				<verse number="4">थाँ हाराई खुद का ने पण दूजाँ का भला का बारा में होचो।</verse>
				<verse number="5">थाँको होच-बच्यार ईसू मसी के जस्यान वेणो छावे।</verse>
				<verse number="6">ईसू मसी हमेस्यान परमेसर का रूप में हा, पण परमेसर के बराबर रेवा की कदीई जिद ने किदी।</verse>
				<verse number="7">ईंके बजाय वणी हारोई छोड़ दिदो अन एक दास को रूप धारण करन मनक बणग्यो। मनक बणन</verse>
				<verse number="8">खुद ने नरम करन मोत वेबा तईं आग्या को पालण करतो रियो। अन अटा तईं के हूळी की मोत भी सेण कर लिदी।</verse>
				<verse number="9">ईं वाते परमेसर वींने घणो ऊसो उटायो अन अस्यो नाम दिदो ज्यो हाराई नामाऊँ मोटो हे।</verse>
				<verse number="10">ताँके हरग में अन धरती पे अन धरती का रेटे रेवे हे, वीं हारई ईसू का नाम ने मान देबा का वाते गोडा टेके हे।</verse>
				<verse number="11">अन बापू परमेसर की मेमा का वाते हारई ओ मान ले के, ईसू मसीइस परबू हे।</verse>
				<verse number="12">ईं वाते ओ मारा लाड़ला भायाँ, जद्याँ मूँ थाँका हाते हो वीं दाण जस्यान थाँ मारी आग्या हरदाण मानता हा वस्यानीस अबे भी जदी मूँ छेटी हूँ वणीऊँ हेली आग्या मानता रेवो। थाँकी मुगती ने पुरी करबा का वाते, दरपता अन धूँजता तका मेनत करता रो।</verse>
				<verse number="13">परमेसरइस हे ज्यो थाँका जीवन में काम कररिया हे ताँके थाँकामें वाँका मकसद ने पूरो करबा को मन अन तागत वेवे।</verse>
				<verse number="14">हारई काम बना बड़बड़ान अन बना बेस करिया करता रेवो।</verse>
				<verse number="15">ताँके थाँ ईं टेड़ी अन नसंगी हुगली पीड़ी का बचमें परमेसर का खरा, स्यवकार अन बना दोस का छोरा-छोरी वे जावो। थाँ अस्यी दनियाँ में तारा के जस्यान चमको,</verse>
				<verse number="16">जद्याँ थाँ जीवन देबावाळा परमेसर का बचन ने लेवो, तो मसी का पाच्छा आबा के दन में मने बड़ई करबा को मस वे के, हव-हमच्यार ने फेलाबा को मारो काम अन मारी मेनत वल ने वी।</verse>
				<verse number="17">थाँको विस्वास ज्यो परमेसर के चड़ी तकी बली अन सेवा के जस्यान हे, वींका वाते यद्याँ मने मारो लुई भी वेवाड़णो पड़े तद्याँ भी मूँ राजी हूँ अन थाँ हाराई का हाते खुसी मनाऊँ हूँ।</verse>
				<verse number="18">वस्यानीस थाँ भी राजी रेवो अन मारा हाते आणन्द मनाओ।</verse>
				<verse number="19">मने परबू ईसू में आस हे के, मूँ तिमुतियुस ने थाँका नके पगई खन्दाऊँ, ताँके थाँकी दसा हामळन मने सान्ती मले।</verse>
				<verse number="20">काँके माकाँ नके अस्यो कुई ने हे जिंका बच्यार मारे जस्यान का वे अन थाँकी भलई का वाते हाँचा मनऊँ चन्ता करे।</verse>
				<verse number="21">काँके हारई आपणाँ हवारत की भाळ में रेवे हे, ने के ईसू मसी की।</verse>
				<verse number="22">थाँ ईं बात ने जाणो हो के, वणी ओ साबत किदो के वो ईंका वाते जोगो हे। जस्यान एक बेटो आपणाँ बाप का हाते काम करे हे, वस्यानीस वणी हव हमच्यार ने फेलाबा में मारा हाते एक दास के जस्यान काम किदो।</verse>
				<verse number="23">ईं वाते आस हे के, जस्यानीस मने नंगे पेड़ी के, मारा हाते जेळ में कई वेबावाळो हे, वस्यानीस मूँ वींने थाँका नके पगई खन्दा देऊँ।</verse>
				<verse number="24">अन मने परबू पे विस्वास हे के, मूँ खुद भी पगई आऊँ।</verse>
				<verse number="25">मूँ ओ जरूरी हमजूँ हूँ के, आपणाँ भई इपापरदितुस, ज्यो मारे हाते काम करबा अन लड़ई करबा में मारो हण्डाळ्यो हे। अन जरूत में मारी सेवा-चाकरी करबावाळो थाँका आड़ीऊँ खन्दायो तको दूत हे, वींने थाँका नके खन्दाऊँ।</verse>
				<verse number="26">वो थाँकाऊँ मलबा की वाट नाळरियो हे अन वो ओरी चन्ता में पड़ग्यो के, थाँ वींका बारा में हुण लिदो हे के, वो मांदो हे।</verse>
				<verse number="27">हाँची में वो मांदो वेग्यो हो अटा तईं के मरबा में हो, पण परमेसर वींपे दया किदी, अन बेस वींपेईस ने पण मारा पे भी किदी ताँके मूँ ओरी दकी ने वूँ।</verse>
				<verse number="28">ईं मस मूँ वींने खन्दाबा का वाते ओरू भी छावूँ हूँ के, थाँ वणीऊँ पाच्छी भेंट करन खुस वे जावो अन मारो भी दुक खतम वे जावे।</verse>
				<verse number="29">ईं वाते थाँ परबू पे विस्वास राकबावाळा भई के जस्यान वींकी आवभगत घणा आणन्दऊँ करज्यो अन अस्या मनकाँ को मान करिया करो।</verse>
				<verse number="30">काँके वो मसी का काम वाते आपणाँ जीव ने अबकी टेम में नाकन मोत का भड़े आग्यो हो, ताँके थाँकी ओरुँ ज्या कमी सेवा में रेगी ही वींने पुरी करे।</verse>
			</chapter>
			<chapter number="3">
				<verse number="1">अबे मारा भायाँ, परबू में गट-जोड़ऊँ थाँ खुस रेवो। वणाईस बाताँ ने आकोदाण लिकबा में मने तो कई परेसानी ने हे, काँके ईं थाँकी रुकाळी करी।</verse>
				<verse number="2">वणा गण्डकड़ाऊँ हेंचेत रेवो, ज्यो हव हमच्यार ने उलट पलट करन हिकावे हे। बुरा काम करबावाळा अन खतना पे जोर देबावाळाऊँ हेंचेत रेवो।</verse>
				<verse number="3">हाँचा खतनावाळा तो आपींइस हा काँके परमेसर की आत्माऊँ वींकी भगती आपींइस करा हाँ अन आपीं आपणो भरोसो दिकबावाळा रिति-रिवाज पे ने पण ईसू मसी पे मेपणो राका हाँ।</verse>
				<verse number="4">हाँ, मूँ भी अणा चिजाँ पे भरोसो राक सकूँ हूँ। यद्याँ कुई होचे के, माँ भी अणामें अतरो भरोसो राक सका हा तो मारा नके अणीऊँ भी हेलो राकबा का वाते नरी बाताँ हे।</verse>
				<verse number="5">मूँ आट दन को व्यो अन मारो खतनो व्यो। मूँ इजराएल का बंस अन बिन्यामीन की गोत को हूँ। जनमजातऊँ इबरानी हूँ, जद्याँ मूसा का नेमा ने मानबा का बारा में केवो तो पको फरीसी हूँ।</verse>
				<verse number="6">ज्योस का वाते यद्याँ केवो तो परबू का विस्वास्याँ ने हताबावाळो हो, अन जद्याँ मूसा का नेमा के जस्यान चालबा का वाते केवो तो खरो मनक हूँ।</verse>
				<verse number="7">पण मूँ हमजूँ हूँ के, ज्यो ज्यो बाताँ मारा नफा की ही, वाँने अबे मूँ मसी का मस मारा वाते कई काम की ने हे।</verse>
				<verse number="8">बेस अणा बाताँइस ने पण हारी बाताँ ने मारा परबू ईसू मसी ने जाणणो, ज्यो घणो मोटो हे, वींका हामे वल हमजूँ हूँ। वीं मसी का वाते में हारी चिजाँ ने छोड़ दिदी अन वाँने कचरो हमजूँ हूँ, ताँके मूँ मसी ने पाबा को नफो पा सकूँ</verse>
				<verse number="9">अन मूँ वाँका हाते गट-जोड़ऊँ जी सकूँ। मूँ मूसा का नेमा को पालण करबाऊँ परमेसर का हामे सई ने हूँ, पण ईसू मसी पे विस्वास करबाऊँ परमेसर का हामे सई हूँ। अबे परमेसर केवे हे मूँ वाँका हामे सई हूँ, काँके मूँ विस्वास करूँ हूँ।</verse>
				<verse number="10">मूँ मसी ने जाणणो अन वाँकी मरन जी उठबा की सगती ने मेसूस करणो छारियो हूँ अन वाँका दुक में भागी वेन वाँकी मोत में वाँके जस्यान वेणो छारियो हूँ।</verse>
				<verse number="11">ताँके मूँ खुद मरिया केड़े पाछो जी उठ सकूँ।</verse>
				<verse number="12">ओ ने के, मूँ ईंने पा चुक्यो हूँ कन पाको वे चुक्यो हूँ, पण मूँ वीं ईनाम ने जीतबा का वाते कल्ड़ी मेनत कररियो हूँ, जीं मस ईसू मसी मने खुद का वाते जीत ग्या हा।</verse>
				<verse number="13">ओ भायाँ, मारी आ मनसा कोयने के मूँ जीत चुक्यो हूँ, पण बेस ओ एक काम करूँ हूँ के, ज्यो बाताँ पाच्छे रेगी हे वाँने भूलन, आगे का चिजाँ ने पाबा का वाते कल्ड़ी मेनत कररियो हूँ।</verse>
				<verse number="14">मूँ मकसद का आड़ी दोड़्यो जाऊँ हूँ, ताँके वो ईनाम पाऊँ ज्याँका वाते परमेसर मने ईसू मसी का गट-जोड़ में ऊपरे जीवन का वाते बलायो हे।</verse>
				<verse number="15">ईं वाते आपाँ मूँ हाराई मोतबीराँ ने अस्याईस बच्यार राकणा छावे। यद्याँ कणी बात में किंको दूज्यो बच्यार वे तो परमेसर वाँने भी हमजा देई।</verse>
				<verse number="16">पण परमेसर आपाँने ज्यो भी बतायो हे, वींके जस्यानीस आपाँ हाराई ने जीवणो छावे।</verse>
				<verse number="17">हो भायाँ, थाँ हारई मारा जस्यान चाल चालो। अन वाँपे ध्यान दो ज्यो अस्यी चाल पे चाले जस्यान की चाल थाँ माकाँ में देकी ही।</verse>
				<verse number="18">मूँ ईं बात ने पेल्याईं क्यो हो अन अबाणू भी रो-रोन केरियो हूँ के, नरई मनक आपणी रेणी-सेणीऊँ मसी की हूळी की मोत का दसमण हे।</verse>
				<verse number="19">वाँको अन्त नास हे, काँके वाँको पेटईस वाँको परमेसर हे। जणा बाताँ पे वीं मेपणो करे हे वणा बाताँ पे वाँने हरम करणी छावे अन दनियाँ की चिजाँ पे मन लगान राके हे।</verse>
				<verse number="20">पण आपणो देस तो हरग हे अन आपीं आपणाँ बंचाबावाळा परबू ईसू मसी की वटूऊँ आबा की वाट नाळरिया हा।</verse>
				<verse number="21">वो आपणी वीं ताकतऊँ हारई चिजाँ ने आपणाँ वंस में राके हे, वणीस ताकतऊँ आपणाँ कमजोर डील ने बदलन वाँकी मेमा का डील का जस्यान बणा देई।</verse>
			</chapter>
			<chapter number="4">
				<verse number="1">ईं वाते हो मारा लाड़ला भायाँ, मूँ थाँने देकणा छारियो हूँ। थाँ मारी खुसी हो अन मने थाँका पे मेपणो हे। मारा लाड़ला भायाँ, वस्यानीस परबू में अटल रो।</verse>
				<verse number="2">मूँ युदिया अन सन्तुके दुयाऊँ अरज कररियो हूँ के, परबू का गट-जोड़ का वाते एक मन रेवो।</verse>
				<verse number="3">हे हाँचा हण्डाळ्याँ, मूँ थाँराऊँ भी अरज करूँ हूँ के, थूँ वीं लुगायाँ की मदत कर, काँके वणा मारा हाते हव हमच्यार हुणाबा का काम में, क्लेमेंस अन मारा दूजाँ काम करबावाळा का हाते मेनत किदी, ज्याँको नाम जीवन की पोती में लिक्यो तको हे।</verse>
				<verse number="4">परबू का गट-जोड़ में हरदाण राजी रेवो, मूँ पाछो कूँ हूँ, राजी रेवो।</verse>
				<verse number="5">थाँकी नरमाई हाराई मनकाँ का बचमें दिके। आद राको परबू को पाछो आणो नके हे।</verse>
				<verse number="6">कणी भी बात की चन्ता मत करो पण थाँकी हारी अरज अन विनती धन्नेवाद का हाते परमेसरऊँ करता जावो।</verse>
				<verse number="7">तद्याँ परमेसर की सान्ती, ज्यो हारी हमजऊँ बारणे हे, थाँका हरदा अन थाँका बच्याराँ ने ईसू मसी का गट-जोड़ में हमाळ राकी।</verse>
				<verse number="8">आकरी में हो भायाँ, ज्यो ज्यो बाताँ हाँची हे अन ज्यो ज्यो बाताँ आदर करबा जस्यी हे अन ज्यो ज्यो बाताँ सई हे अन ज्यो ज्यो बाताँ ऊजळी हे अन ज्यो ज्यो बाताँ हुवावणी हे अन ज्यो ज्यो बाताँ हव गुण, बड़ई अन बड़िया हे वाँपे ध्यान लगाया करो।</verse>
				<verse number="9">ज्यो बाताँ थाँ माराऊँ लिदी, हिकी, हूणी अन मारा में देकी वाँने मान्याँ करो, तद्याँ सान्ती देबावाळो परमेसर थाँका हाते रेई।</verse>
				<verse number="10">मूँ परबू में घणो राजी हूँ के, अबे अतरा दनाँ केड़े थाँ मारा बारा में होच्यो हे। मूँ ओ ने कूँ के, थाँ मारा बारा में होचणो छोड़ दिदो हे। पण मूँ जाणूँ हूँ, थाँने ओ करबा को मोको ने मल्यो।</verse>
				<verse number="11">कणी कमी का मस मूँ अस्यान ने केरियो हूँ, काँके हरेक दसा में सबर राकणो में हिक लिदो हे।</verse>
				<verse number="12">कमी-पेसी में अन भरपुरी में रेणो मूँ जाणूँ हूँ। यद्याँ मूँ भुको कन धाप्यो तको हूँ अन मारा नके हेलो कन कम हे, कस्यी भी जगाँ में अन कणी भी टेम में सबर राकबा को ओ भेद में हिक लिदो हे।</verse>
				<verse number="13">मसीऊँ मली तकी तागतऊँ मूँ हारी टेम को सामनो कर सकूँ हूँ।</verse>
				<verse number="14">कई भी वे थाँ मारा कळेस में मारी मदत करन हव किदो हे।</verse>
				<verse number="15">हो फिलिपियों, थाँ खुदई जाणो हो के हव हमच्यार का परच्यार की सरुआत में मूँ जद्याँ मकिदुनिया परदेस छोड़न परोग्यो, तद्याँ थाँने छोड़न अन कणी विस्वास्याँ की मण्डली मारी रिप्या-कोड़ी में मदत ने किदी।</verse>
				<verse number="16">काँके जद्याँ मने थिसलुनीके सेर में जरूत ही, तद्याँ थाँ नरी दाण मारी मदत किदी।</verse>
				<verse number="17">ओ ने के, मूँ दानकी आस राकूँ हूँ, पण मूँ ओ छावूँ हूँ के, थाँका खाता में आसीस जुड़तो जावे।</verse>
				<verse number="18">थाँ ज्यो खन्दायो हो वो मने मल्यो हे, वो मारा वाते नरोई हे। अबे ज्यो कई छारियो हे वो मारा नके हे। थाँ ज्यो खन्दायो हो इपापरदितुस मने दिदो हे। ईं चिजाँ परमेसर ने हव लागबा वाळी बली का जस्यान हे अन अणाने वीं माने हे अन अणीऊँ वीं राजी हे।</verse>
				<verse number="19">मारा परमेसर आपणाँ मेमा भरिया धनऊँ ईसू मसीऊँ थाँकी हारी कमी ने पुरी करी।</verse>
				<verse number="20">आपणाँ बापू परमेसर की मेमा जुग-जुग तईं वेती रेवे। आमीन!</verse>
				<verse number="21">हाराई, ईसू मसी का गट-जोड़ में रेबावाळा परमेसर का पुवितर मनकाँ ने मारो नमस्कार। ज्यो भई मारा हाते हे, वीं भी थाँने आद कररिया हे।</verse>
				<verse number="22">हाराई पुवितर लोग, खासकरन रोम का माराजा का मेल में काम करबावाळा थाँने आद करे हे।</verse>
				<verse number="23">आपणाँ परबू ईसू मसी की करपा थाँ हाराई की आत्मा का हाते रेवे।</verse>
			</chapter>
		</book>
		<book number="51">
			<chapter number="1">
				<verse number="1">मूँ पोलुस ज्यो परमेसर की मरजीऊँ ईसू मसी को थरप्यो तको चेलो हूँ अन आपणाँ भई तिमुतियुस,</verse>
				<verse number="2">मसी में परमेसर का विस्वासी भायाँ ने नाम ओ कागद लिकरिया हे ज्यो कुलुस्से नगर में रेवे हे। आपणाँ बाप परमेसर का आड़ीऊँ थाँने दया अन सान्ती मले।</verse>
				<verse number="3">जद्याँ माँ थाँका वाते परातना करा हा तो हरदाण आपणाँ परबू ईसू मसी का बापू परमेसर को धन्नेवाद कराँ हा।</verse>
				<verse number="4">काँके माँ मसी ईसू पे थाँको विस्वास अन हंगळा विस्वासी लोगाऊँ थाँका परेम का बारा में हुण्यो हे।</verse>
				<verse number="5">ओ वीं आस का वाते व्यो हे ज्या चीज थाँका वाते हरग में राकी तकी हे, जिंका बारा में थाँ हव हमच्यार का हाँचा बचनाऊँ हुण चुक्या हो, ज्यो थाँका नके आवे हे। जद्याँ थाँ वींने हुण्यो हो अन परमेसर की करपा ने पुरी हाँच हमेत हमज्या हा। वीं टेमऊँ लेन अबाणू तईं जस्यान ओ हव हमच्यार थाँका जीवन में काम कररियो हे वस्यानीस आकी दनियाँ में फळ-फुल रियो हे।</verse>
				<verse number="6"></verse>
				<verse number="7">माकाँ हाते काम करबावाळो लाड़लो इपफरासऊँ थाँ आ बात हिक्या हा। ज्यो आपणाँ वाते मसी का विस्वास जोगो सेवक हे।</verse>
				<verse number="8">वणी माँने भी ज्यो परेम पुवितर आत्मा थाँने दिदो हो वींने बतायो।</verse>
				<verse number="9">ईं वाते जणी दनऊँ माँ थाँका बारा में ओ हुण्यो, वीं दनऊँ थाँका वाते परातना करणी ने छोड़ी। माँकी परमेसरऊँ याईस परातना हे के, हाराई आत्मिक ग्यान अन हमज का हाते परमेसर आपणी मनसा का ग्यानऊँ थाँने भर दे।</verse>
				<verse number="10">ताँके थाँ वाँकी मेमा भरी तागतऊँ हारी तागत हाते तकड़ा वेन हाराई कामाँ में फळता अन परमेसर का ग्यान में बड़ता तका परमेसर का जस्यान जीवन जी सको अन वाँने हरेक विसय में राजी कर सको। ताँके थाँ हारई ने सेण कर सको अन हरेक टेम में राजी रेन धीरज राक सको। अन खुस वेन बापू परमेसर को धन्नेवाद दे सको। जणा थाँने उजिता का राज में परमेसर का पुवितर मनकाँ का हाते बापोती पाबा के जस्या बणाया।</verse>
				<verse number="11"></verse>
				<verse number="12"></verse>
				<verse number="13">अन परमेसरइस आपाँने सेतान की सगतिऊँ छोड़ान आपणाँ लाड़ला बेटा का राज में ले आया।</verse>
				<verse number="14">अन वाँका बेटाऊँईस आपाँने छुटकारो मले हे, मतलब पापाऊँ मापी मले हे।</verse>
				<verse number="15">दिकबावाळा ईसू, ने दिकाबावाळा परमेसर का रूप हे। वो हारी चिजाँ में पेलो हे अन हारी दनियाऊँ घणो मोटो हे।</verse>
				<verse number="16">काँके वाँकाऊँईस परमेसर हंगळी चिजाँ बणाई पलई हरग की वो कन धरती की, दिकबावाळी कन ने दिकबावाळी, पलई सिंघासन, राज, राजा अन अदिकारी, अन हंगळी चिजाँ वींकाऊँईंस बणी अन वींका वातेईस बणी तकी हे।</verse>
				<verse number="17">हंगळी चिजाँ ने बणाबा के पेल्याई वो हो। अन हंगळी चिजाँ ने हमाळन राकबावाळो भी वोईस हे।</verse>
				<verse number="18">वोईस आपणी देह को, मतलब मण्डली को मातो हे। वोईस सरुआत हे अन वोईस पेलो हे ज्यो मरयाँ तका मूँ पाछो जी उट्यो हो। ताँके हारी बाताँ में वींनेईस पेली जगाँ मले।</verse>
				<verse number="19">परमेसर की खुसी आ हे के, वींका हाराई गुण आपणाँ बेटा में रेवे।</verse>
				<verse number="20">परमेसर हूळी पे मसी का बलीदान का लुईऊँ हारी चिजाँ ने मलान आपणाँ नके पाच्छी ले आबा को ते कर दिदो। पलई वीं धरती वे कन परमेसर का राज की।</verse>
				<verse number="21">एक टेम ही जद्याँ थाँ थाँका बच्याराँ अन हूँगला कामाँ का मस परमेसरऊँ छेटी हा अन दसमणी राकता हा।</verse>
				<verse number="22">पण अबे परमेसर सरीर में मसी की देह की मोतऊँ थाँको मेल-मिलाप खुदऊँ करा दिदो हे। ताँके वो थाँने पुवितर, बना कळंक का अन निरदोस बणान खुद का हामे लावे।</verse>
				<verse number="23">ओ तद्याँ वेवे हे जद्याँ थाँ विस्वास में अटल बण्या रेवो अन ज्यो हव हमच्यार थाँ हुण्यो हो वणीऊँ मली तकी आस में गाटा बण्या तका रेवो। अणी हव हमच्यार को परच्यार आकास का रेटे हारी दनियाँ में व्यो हे। अन मूँ पोलुस ईंको सेवक हूँ।</verse>
				<verse number="24">अबे मूँ ज्यो थाँका वाते दुक ऊटारियो हूँ वणीऊँ मूँ राजी हूँ। मसी की देह रूपी मण्डली का वाते मसी जीं दुक जेल्या हे, वाँमें मूँ हमेस्यान वींका हाते भागीदार बणरियो हूँ।</verse>
				<verse number="25">परमेसर मने आपणाँ बचनाँ को पूरो को पूरो परच्यार करबा की जिमेदारी हूँपी हे, ईं वाते वणा मने थाँकी भलई का वाते मण्डली को सेवक बणायो हे।</verse>
				<verse number="26">बित्या तका जुग की पिड़ियाँऊँ परमेसर अणी बात ने छाने राकी ही। पण अबाणू वणा वींने आपणाँ पुवितर मनकाँ ने खुलन क्यो हे।</verse>
				<verse number="27">वाँ बात परमेसर जिंका पे परगट करणो छारिया हो, वाँने ध्यान वीं जावे के, वीं परमेसर की मेमा को मोल हाराई मनकाँ में कई हे, अन वाँ बात आ हे के, मसी ज्यो मेमा की आस हे वाँ थाँकामें बणी तकी रेवे हे।</verse>
				<verse number="28">मसी का बारा में परच्यार करन आपीं मनकाँ ने चेतावा हा अन पूरा ग्यानऊँ मनकाँ ने हिकावा हाँ, ताँके हाराई मनकाँ में मसी का हाराई गुण भरन परमेसर का हामे ला सका।</verse>
				<verse number="29">ईं वाते मारा में काम करबावाळी मसी की तागतऊँ मूँ अस्यान का काम करबा का वाते घणी मेनत कररियो हूँ।</verse>
			</chapter>
			<chapter number="2">
				<verse number="1">मूँ छावूँ हूँ के, थाँकाणी जाण लो के, “थाँके अन ज्यो लोदकिया नगर में हे, अन वाँकाणी हंगळा का वाते जणा मारो मुण्डो कदी ने देक्यो के, वाँका वाते मूँ कस्यान मेनत कररियो हूँ?</verse>
				<verse number="2">मूँ यो ईं वाते करूँ हूँ, ताँके वाँका मन ने हिम्मत मले अन थाँ आपस में परेमऊँ बन्द जावो, जणीऊँ थाँ पुरी हमजऊँ हारोई धन पा लेवो अन बापू परमेसर का भेदऊँ भररियो हाँच ने, मतलब ईसू मसी ने जाण ले।</verse>
				<verse number="3">मसी में हाराई ग्यान अन हमज का भण्डार हप्या तका हे।”</verse>
				<verse number="4">यो मूँ थाँने ईं वाते केवूँ के, “कुई मनक थाँने हव हव बाताँ करन धोको ने दे देवे।”</verse>
				<verse number="5">काँके यद्याँ मूँ देहऊँ तो थाँकाऊँ छेटी हूँ, तद्याँ भी मूँ आत्माऊँ तो थाँके नके हूँ, अन थाँको वेवार अन विस्वास ज्यो मसी में गाटो हे, वणीऊँ मूँ घणो राजी वेवूँ हूँ।</verse>
				<verse number="6">जस्यान थाँकाणी ईसू मसी ने परबू मानन गरण किदा हाँ, वस्यानीस वींका विस्वास मेंईस चालता रेवो।</verse>
				<verse number="7">अन वींका मेंईस थाँ जड़ गाटी पकड़ीन बड़ता जावो अन थाँका जीवन का विस्वास की नीम वटेईस नाको अन हेलऊँ हेलो परमेसर ने धन्नेवाद करता रेवो।</verse>
				<verse number="8">हूँस्यार रेज्यो, कुई थाँने अकलऊँ अन धोकाऊँ आपणाँ गुलाम ने बणा ले, ज्यो मनकाँ का रिति-रिवाजऊँ अन दनियाँ की बाताँ के जस्यान तो हे, पण ईसू मसी के जस्यान कोयने।</verse>
				<verse number="9">काँके मसी की देह मेंईस परमेसर आपणी हाराई गुणा का हाते हमेस्या का वाते वास करे हे।</verse>
				<verse number="10">अन थाँ वींका मेंईस पाका व्या तका हो, ज्यो हाराई परदानाँ अन आत्मिक सगत्याऊँ घणो मोटो हे।</verse>
				<verse number="11">वींका मेंईस थाँको अस्यो हाँचो खतनो व्यो, ज्यो हातऊँ ने वेवे हे पण मसी को खतनो, जिंका में सारिरिक देह की हारी बुरी मरजी उतार दिदी जावे हे।</verse>
				<verse number="12">अन मसी का हाते बतिस्मा में आपीं भी गाड़या ग्या अन परमेसर की तागत पे विस्वास करबा की वजेऊँ आपाँ भी मसी का हाते जिवाया ग्या हा, जणी तागत ईसू मसी ने मरिया तकाँ मेंऊँ पाच्छा जीवता किदा हा।</verse>
				<verse number="13">मसी पे विस्वास करबा के पेल्याँ आपीं आपणाँ पापाँ की वजेऊँ आत्मा में मरिया तका अन बना खतना का हा। पण अबे परमेसर आपाँने ईसू मसी का हाते पाच्छा जिवाया अन आपणाँ हाराई पापाँ ने माप किदा हे।</verse>
				<verse number="14">अन नेमाँ का वीं लेकऊ ज्यो आपणाँ हामे अन दसमण हो, वाँने वगाड़ी नाक्या, अन वाँने ईसू हूळी पे खिला ठोकन आपणाँ हामेंऊँ छेटी कर नाक्यो।</verse>
				<verse number="15">अन हाराई बुरा आत्मिक परदानाँ अन बुरी सगत्याँ का हत्यार कोसन हूळीऊँ वाँको हाराई का हामे तमास्यो किदो अन वाँने आपणे पाच्छे कर नाक्या अन जीत को जुलस काड़्यो।</verse>
				<verse number="16">ईं वाते खाबा-पिबा अन तेवार अन नवो चाँद अन सबद का दनाँ में कुई थाँको फेसलो ने करे।</verse>
				<verse number="17">काँके ईं हाराई आबावाळी बाताँ की खाली छाया हे, पण ईं हंगळी चिजाँ में हाँच तो ईसू मसी हे।</verse>
				<verse number="18">कुई मनक दया को दिकावो करन हरग-दुताँ की पुजा करन थाँने थाँका फळऊँ छेटी ने कर दे। अस्यान मनक देकी तकी बाताँ में लाग्या तका रेवे, अन आपणी दनियादारी की हमज ने बेकार में फुलावे अन बड़ावे हे।</verse>
				<verse number="19">अन वीं आपणाँ खुद ने मसी का केबा में ने राके हे ज्यो हाराऊँ मोटो हे। मसी का वजेऊँ हारी काया ज्योड़ अन हाड़क्याऊँ मलन जस्यान परमेसर छावे हे वस्यान बड़ती जावे।</verse>
				<verse number="20">जद्याँ के, थाँ मसी का हाते दनियाँ का रिति-रिवाज के आड़ीऊँ मरग्या हो, तो पछे काँ वणाके जस्यान ईं दनियाँ का रिवाजाँ में जीवन बितारियाँ हो?</verse>
				<verse number="21">थाँ अस्या नेमा का वंस में काँ रेरिया हो? जस्यान के, “ईंने ने तोकणो, ईंने ने चाकणो अन ईंके हात भी ने लगाणो।”</verse>
				<verse number="22">ईं हंगळी चिजाँ काम में आती आती नास वे जाई, काँके ईं मनकाँ का बणाया तका नेम अन हिक हे।</verse>
				<verse number="23">हरग-दुताँ की पुजा करणी, आपणी देह ने दुक देणो, दिकावा की दया अन मनकाँ का बणाया तका जूटा नेम, ईं हाराई ग्यान की बाताँ तो लावे हे, पण देह की बुरी मरजी ने रोकबा का वाते अणाऊँ कई नफो ने वेवे हे।</verse>
			</chapter>
			<chapter number="3">
				<verse number="1">जदी थाँ हंगळा मसी के हाते आत्मा में पाच्छा जीवता व्या हो, तो थाँको मन हरग की चिजाँ पे लगावो। जटे ईसू मसी परमेसर का जीमणी पाड़े बेटा तका हे।</verse>
				<verse number="2">धरती की चिजाँ का बारा में मती होचो पण हरग की चिजाँ का बारा में होचो।</verse>
				<verse number="3">काँके थाँको पुराणो मनकपणो तो मरग्यो हे अन थाँको नुवो जीवन ईसू मसी का हाते परमेसर का नके हे।</verse>
				<verse number="4">थाँको जीवन मसी हे। जद्याँ वो मेमा का हाते परगट वेई, तद्याँ थाँ भी वींका मेमा में हाते परगट वेवो।</verse>
				<verse number="5">ईं वाते थाँ कुकरम, हूँगला पणो, बुरी वासना, हुगली मरजी, लोब-लाळच ज्यो मूरत पुजा का जस्यान को हे, अस्यान का दनियादारी का गुण ने आपणाँ मेंऊँ मार दो।</verse>
				<verse number="6">अणा हाराई कामाँ मस, परमेसर को कोप वींने ने मानबावाळा पे भड़के हे।</verse>
				<verse number="7">पेल्याँ जद्याँ अस्यी चिजाँ थाँका पे हावी ही, वीं दाण थाँ भी अस्या बुरा कामाँ मेंईस जीवन विताता हा।</verse>
				<verse number="8">पण थाँ अणा हारी चिजाँ का हाते अबे गुस्सो अन रीस, रिस्याँ बेळणो, गाळा काड़णी, हुगली बाताँ ने परी छोड़ दो।</verse>
				<verse number="9">एक-दूजाऊँ जूट मती बोलो, काँके थाँ थाँका जूना मनकपणा ने वींकी आदत का हाते छोड़ दिदो हे,</verse>
				<verse number="10">अन थाँ नुवा मनकपणा ने पेर लिदो हे, जणीऊँ थाँ आपणाँ बणाबावाळा परमेसर का जस्यान अन वाँके पाका ग्यान में हमेस्यान नुवा बणता जावो हो।</verse>
				<verse number="11">ईं वाते अबे मसी में ने कुई युनानी कन यहूदी, खतनावाळा कन बना खतनावाळा, ने जंगली हाव-भाव, ने बना अकल अन ने गुलाम कन आजाद, रियो हे। अणामें कई फरक ने रियो हे बेस मसीइस हारोई हे अन अणा हाराई में भी वींइस हे।</verse>
				<verse number="12">काँके थाँ परमेसर का चुण्या तका लाड़ला अन पवितर मनक हो, ईं वाते दया, भलई, नरमाई, सेण करणो अन हुदापणा ने धारण करो।</verse>
				<verse number="13">किंका पे थाँको ओळमो वे तो एक-दूँजा ने सेण करता तका अन एक-दूँजा ने माप कर दो। जस्यान परमेसर थाँने माप करे हे वस्यानीस थाँने भी एक-दूँजा ने माप करणा छावे।</verse>
				<verse number="14">अणा हारी बाताँ का ऊपरे परेम ने धारण करलो, काँके परेमईस हे ज्यो यो अणा हारी बाताँ ने हव तरियाऊँ भेळी करन राके हे।</verse>
				<verse number="15">अन मसीऊँ मली तकी सान्ती ने थाँका हरदा में राज करबा दो। परमेसर थाँने एक हाते एकीस देह में अणीस सान्ती में रेवा का वाते बलाया हे। अन हरदाण परमेसर को धन्नेवाद करता रेवो।</verse>
				<verse number="16">मसी का बचना ने आपणाँ हरदा में नराऊँ-नरा वसबा दो अन हाराई ग्यानऊँ एक दूजाँ ने हिकावो अन हेंचेत करता रेवो। थाँका हरदाऊँ परमेसर को धन्नेवाद करता तका भजन, बड़ई का गीत अन आत्मिक गीत गाता रेवो।</verse>
				<verse number="17">परमपिता परमेसर को धन्नेवाद करता तका ज्यो कई थाँ केवो कन करो हारोई परबू ईसू का नामऊँ करिया करो।</verse>
				<verse number="18">ओ लुगायाँ, आपणाँ-आपणाँ धणी का केवाँ में रो। काँके परबू में ओ सई हे।</verse>
				<verse number="19">ओ धण्या, आपणी-आपणी लुगायाऊँ लाड़ राको, अन वाँकाऊँ कल्डा वेवार मती राको।</verse>
				<verse number="20">ओ छोरा-छोरियाँ आपणाँ-आपणाँ बई-बापू को हारी बाताँ में केणो मानो, काँके परबू अणीऊँ राजी वेवे हे।</verse>
				<verse number="21">ओ बई-बापू आपणाँ-आपणाँ छोरा-छोरी ने तंग मती करो के, वाँको मन टूट जावे।</verse>
				<verse number="22">ओ हाळयाँ, ज्यो दनियादारी में थाँका मालिक हे, वाँकी हारई बाताँ ने मान्याँ करो, मनकाँ ने खुस करबा वाते वींका हामेईस ने, पण हाँचा मनऊँ अन परमेसर की दरपणी का हाते मान्याँ करो।</verse>
				<verse number="23">ज्यो कई थाँ करो हो, तन-मनऊँ करो, ओ हमजन के मनकाँ का वाते ने पण परबू का वाते कररिया हो।</verse>
				<verse number="24">आद राको के, परबू आपणाँ लोगाँ का वाते ज्यो ईनाम ते कर मेल्यो हे, वो थाँने देई, काँके थाँको हाँचो मालिक मसी हे।</verse>
				<verse number="25">काँके ज्यो बुरो करे हे, वो आपणी बुरई को फळ पाई अन वटे परमेसर किंकोई पकसपात ने करी।</verse>
			</chapter>
			<chapter number="4">
				<verse number="1">ओ मालिकाँ, आपणाँ-आपणाँ हाळयाँ का हाते सई वेवार राको अन हाराई ने एक हरिका राको, ओ हमजन के, हरग में थाँको भी एक मालिक हे।</verse>
				<verse number="2">थाँ हेंचेत रेन परमेसर को धन्नेवाद करता रेवो अन परातना करता रेवो।</verse>
				<verse number="3">अन ईंका हातेई हाते माकाँ वाते भी परातना करता रेवो के, परमेसर माँके परच्यार करबा को अस्यो गेला खोल देवे के, माँ मसी का वीं भेद को बखाण कर सका। अन परच्यार करबा के मस मूँ जेल में बन्द हूँ।</verse>
				<verse number="4">अन ईंका वाते भी परातना करज्यो के, मूँ वीं भेद ने अस्यान परगट करूँ, जस्यान मने करणो छावे।</verse>
				<verse number="5">हाराई मोका ने हव तरियाऊँ काम में लेता तका अविस्वासी मनकाँ का हाते हव अकलऊँ वेवार करो।</verse>
				<verse number="6">थाँकी बोली हरदाण दयाळू अन मिठी वे, ताँके थाँ जाण सको के, हाराई मनकाँ ने कस्यान जवाब देणो हे।</verse>
				<verse number="7">प्यारा भई अन विस्वासी दास, तुखिकुस ज्यो परबू में मारा हाते सेवा करबावाळो हे, वो मारी हारी बाताँ थाँने बता देई।</verse>
				<verse number="8">में वींने थाँका नके ईं वाते खन्दायो के, वो थाँने माकाँ हमच्यार देवे अन थाँकी हिम्मत बड़ावे।</verse>
				<verse number="9">वींका हाते विस्वास जोगो अन लाड़लो भई उनेसिमुस भी आरियो हे। वो थाँका मेईलोईस हे। वीं दुई अटा की हारी बाताँ थाँने बताई।</verse>
				<verse number="10">मारा हाते का केदी अरिस्तखुस भी थाँने आद कररियो हे वस्यानीस बरनबास को भई मरकुस भी थाँने आद करे हे। (जद्याँ मरकुस थाँका नके आई तो थाँ वींकी आवभगत करज्यो ईंका वाते में थाँने पेल्याँई आदेस दे दिदो हो।)</verse>
				<verse number="11">अन यसू जिंने युसतुस भी बोले हे। वो थाँने आद कररियो हे। मारा नके बेस ईं तीन ईंस यहूदी विस्वासी मनक हे ज्यो परमेसर की राज की बढोतरी का वाते मारा हाते काम करे हे। अणा मारी घणी मदत किदी हे।</verse>
				<verse number="12">इपफरास, ज्यो थाँका मेईलोईस हे अन मसी ईसू को दास हे, वो थाँने आद कररियो हे अन हरदाण थाँका वाते आका मनऊँ परातना करे हे। जणीऊँ थाँ हमजदारी अन पूरा भरोसा का हाते परमेसर की मरजी में अटल रेवो।</verse>
				<verse number="13">मूँ वींको गुवा हूँ के, वो थाँका वाते अन लोदकिया अन हियारापलिस नगर का लोगाँ का वाते घणी मेनत करे हे।</verse>
				<verse number="14">लाड़लो वेद लूको अन देमास भी थाँने आद कररिया हे।</verse>
				<verse number="15">लोदकिया का रेबावाळा भायाँ ने अन नुमफास अन वाँका घर भेळी वेबावाळी मण्डली ने भी माँ आद कराँ हाँ।</verse>
				<verse number="16">जद्याँ ओ कागद थाँका अटे भण लिदो जावे तो अस्यो करज्यो के, लोदकिया की मण्डली में भी भणाज्यो, अन ज्यो कागद लोदकियाऊँ आयो हे वींने थाँ भी भणज्यो।</verse>
				<verse number="17">अन अर्खिप्पुसऊँ केज्यो के, ज्यो सेवा परबू में वींने हूँपी हे, वींने वो जरुर पुरी करे।</verse>
				<verse number="18">मूँ ज्यो पोलुस खुद थाँने नमस्कार लिकरियो हूँ। मारी हतकड़ीया आद राकज्यो। परमेसर की दया थाँका पे वेती रेवे। आमीन।</verse>
			</chapter>
		</book>
		<book number="52">
			<chapter number="1">
				<verse number="1">मूँ पोलुस, सिलवानुस अन तिमुतियुस का हाते ओ कागद थिस्सुलुनिक्यों नगर की मण्डळ्या ने लिकरियो हूँ, जीं बापू परमेसर अन परबू ईसू मसी में हे, थाँका पे दया अन सान्ती बणी तकी रेवे।</verse>
				<verse number="2">माँ माँकी परातना में थाँने हमेस्यान आद करन बापू परमेसर ने थाँका वाते धन्नेवाद देवा हाँ।</verse>
				<verse number="3">बापू परमेसर का हामे थाँका विस्वास का काम ने, परेम का वाते घणी मेनत ने अन परबू ईसू मसी का पाच्छा आबा की थाँकी पाकी आस ने हमेस्यान आद करा हाँ।</verse>
				<verse number="4">हो विस्वासी भायाँ, माँ ईं बात ने जाणा हाँ के, परमेसर थाँकाऊँ परेम राके अन थाँने वणा आपणाँ वाते चुण्या हे।</verse>
				<verse number="5">ओ हव हमच्यार बेस बोली कोईस ने हे, पण तागत अन पुवितर आत्मा का हाते अन ईंकी हाँच की खरई का हाते थाँका नके पूग्यो हे। थाँ तो जाणोइस हो के, माँ थाँकी भलई का वाते थाँका हाते कस्यान रिया हा।</verse>
				<verse number="6">थाँ घणा कळेसाँ में भी पुवितर आत्माऊँ मलबावाळा आणन्द का हाते बचन मानन माँके अन परबू का जस्यान चालबावाळा बणग्या हो।</verse>
				<verse number="7">ईं वाते थाँ मकिदुनिया अन अखाया परदेस का हाराई विस्वास्याँ का वाते एक हिक देबावाळो नमुनो बणग्या हो।</verse>
				<verse number="8">काँके परबू का बचन थाँका नकेऊँ मकिदुनिया अन अखाया मेंईस ने हुणायो ग्यो, पण ईं वजेऊँ परमेसर पे थाँका विस्वास की चरचा हारी जगाँ में फेलगी हे। ईं वाते माँने कई केवाँ की जरुतई ने पड़ी।</verse>
				<verse number="9">काँके वटा का मनक खुद ईं माकाँ बारा में बतावे हे के, कस्यान माँ थाँका नके आया अन कस्यान थाँ मूरत्याँ ने छोड़न जीवता अन हाँचा परमेसर की सेवा करबा का वाते फरग्या हाँ।</verse>
				<verse number="10">अन परमेसर का बेटा ईसू मसी के हरगऊँ पाच्छा आबा की वाट नाळता रेवो, जिंने वणा मरिया तका मेंऊँ पाच्छा जीवतो किदो हो, अन वींइस आपाँने परमेसर की आबावाळी रीसऊँ बंचावे हे।</verse>
			</chapter>
			<chapter number="2">
				<verse number="1">हो भायाँ-बेना, आ बात थाँ खुदई जाणो हो के, माँको थाँका नके आणो बेकार ने ग्यो।</verse>
				<verse number="2">थाँ ओ भी जाणो हो के, थिस्सुलुनिक्यों आबाऊँ पेल्याँ फिलिप्पी नगर में माँ दुक उटायो अन बेजत व्या, पछे भी माँने परमेसर का आड़ीऊँ अस्यान की हिम्मत मली के, थाँने हव हमच्यार हूणावाँ।</verse>
				<verse number="3">काँके माँको उपदेस जूटो, धोको देबावाळो अन छळ-कपट करबावाळो ने हे।</verse>
				<verse number="4">पण जस्यान परमेसर माँने ईं जोगा जाणन हव हमच्यार ने हुणाबा को काम हूँप्यो हे। माँ ईंने वस्यानीस हुणावा हा अन अस्यान करन माँ मनकाँने ने, पण परमेसर ने जीं हरदा ने परके हे वाँने राजी कराँ हाँ।</verse>
				<verse number="5">थाँ ईं बात ने हव तरियाऊँ जाणो हो के, माँ कदी फोगट की बड़ाई की बाताँ ने किदी अन नेई लोब-लाळच का वाते कस्यो बानो बणायो। ईं बात का परमेसर भी गवा हे।</verse>
				<verse number="6">अन माँ ओ ने छावाँ के, थाँ अन मनक अन कुई दूजाँ माँने आदर-मान देवे।</verse>
				<verse number="7">पण जस्यान बई आपणाँ बाळकाँ को पालण करे हे वस्यानीस नरमाई को वेवार माँ थाँका हाते राक्यो हे, ने तो माँ मसी का काम का वाते थरप्या तका को हक लगान थाँका पे बोज नाक सका हाँ।</verse>
				<verse number="8">पण थाँका परेम में, माँ थाँने खाली हव-हमच्यारइस ने हुणायो, पण ईंका हाते माँ थाँका वाते जान देबा ने भी राजी हाँ, काँके थाँ माकाँ खास भई बणग्या हा।</verse>
				<verse number="9">हो भायाँ-बेना, थाँ माँकी मेनत अन दुक ने आद राको हो ज्यो थाँका बचमें व्यो हो अन माँ रात-दन काम धन्धो करन थाँने परमेसर को हव हमच्यार हुणायो जणीऊँ थाँका पे कई बोज ने पड़े।</verse>
				<verse number="10">थाँ अन परमेसर ईं बात का गवा हो के, थाँ विस्वास्याँ का बचमें माँको वेवार कस्यो पुवितर, धारमिक अन बना दोस को हो।</verse>
				<verse number="11">थाँ जाणो हो के, जस्यान बापू आपणाँ बाळक का हाते वेवार करे हे वस्यानीस माँ भी थाँने हरेक ने उपदेस देन, सान्ती देन अन हमजाता हाँ।</verse>
				<verse number="12">जणीऊँ थाँको चालचलन परमेसर जोगो वेवे, जीं थाँने आपणाँ राज अन मेमा में बलावे हे।</verse>
				<verse number="13">एक ओरी वजेऊँ माँ थाँका वाते परमेसर को धन्नेवाद करा हाँ के, जद्याँ माँ थाँने परमेसर को हव हमच्यार हुणायो हो जद्याँ थाँ ईंने मनकाँ का आड़ीऊँ ने जाण्यो पण परमेसर को जाणन ईंने मान्यो अन हाँच भी योईस हे, ईं वजेऊँ परमेसर थाँकामें जद्याँ विस्वास करो हो तो काम करे हे।</verse>
				<verse number="14">हो भायाँ-बेना, थाँका हाते भी वस्यानीस व्यो जस्यान यहूदियाँ परदेस में परमेसर की मण्डली का हाते व्यो हो, काँके वीं भी ईसू मसी ने मानता हाँ। थाँने भी थाँका मनकाँऊँ वस्योईस दुक मल्यो जस्यान वाँने यहूदी लोगाऊँ मल्यो हो।</verse>
				<verse number="15">जणा मनकाँ परबू ईसू ने अन परमेसर का आड़ीऊँ बोलबावाळा ने मारिया अन आपाँने हताया हाँ, अणीऊँ परमेसर घणा नाराज हे, काँके वीं हाराई का विरोद में हे।</verse>
				<verse number="16">वीं मनक जी यहूदी ने हे, वाँने बंचाबा को हव हमच्यार हुणाबा का वाते आपाँने रोके हे। अस्यान करबाऊँ वाँका पाप को घड़ो भरियो हे अन परमेसर को परकोप वाँका पे आग्यो हे।</verse>
				<verse number="17">हो विस्वासी भायाँ, जद्याँ माँ थाँका हरदाऊँ ने पण देहऊँ थोड़ीक देर का वाते छेटी व्या हा, तो माँने थाँकी घणी आद अई हे अन थाँकाऊँ पाच्छा मलबा की माँ घणी कोसीस कररिया हाँ।</verse>
				<verse number="18">ईं वाते माँ थाँका नके पाच्छा आणो छारिया, मूँ खुद पोलुस दो दाण थाँका नके आबा की कोसीस किदी, पण सेतान माँने ठामी राक्यो।</verse>
				<verse number="19">थाँईस बतावो, माकाँ वाते माँकी आस, खुसी अन बड़ई को मुकट कूण हे? कई आपणाँ परबू ईसू का हामे वाँका आबा की टेम में थाँईस ने वेवो?</verse>
				<verse number="20">हाँची में बड़ई अन खुसी थाँईस हो।</verse>
			</chapter>
			<chapter number="3">
				<verse number="1">ईं वाते थाँने देकबा का वाते माँ ओरी वाट ने नाळ सकता हाँ, तो माँ ओ ते किदो के, एतेंस नगर में एकला रे जावाँ,</verse>
				<verse number="2">अन तिमुती ने ज्यो मसी का हव हमच्यार में मारो विस्वासी भई अन परमेसर को दास हे वींने थाँका नके खन्दावाँ जणीऊँ वो थाँने पाका करे अन विस्वास का बारा में हमजावे अन थाँकी हिम्मत बड़ावे।</verse>
				<verse number="3">जणीऊँ दुक में थाँ पाच्छा भटक ने जावो। थाँ खुद ईं बात ने जाणो हो के, आपणाँ वाते दुक देकन भी कल्ड़ो रेणो परमेसर की मरजी कोईस एक भाग हे।</verse>
				<verse number="4">काँके जद्याँ माँ थाँका नके हाँ, तो पेल्याँई थाँने बतायो हो के, माँने दुक मली अन वस्यानीस व्यो, ओ थाँ भी जाणो हो।</verse>
				<verse number="5">ईं वाते जद्याँ माराऊँ ओरी ठमाव ने व्यो तो में थाँका विस्वास का हाल-चाल जाणबा का वाते वींने खन्दायो। परमेसर करे अस्यान ने वेणो छावे के, परकबा वाळी बाताँऊँ थाँ लाळच में आन मारो करियो-करायो काम बेकार तो ने कर दिदो।</verse>
				<verse number="6">तिमुती थाँका नकेऊँ पाछो आन ज्यो मने थाँका विस्वास अन परेम को हमच्यार हुणायो अन ओ भी बतायो के, थाँ हमेस्यान माँने परेम का हाते आद करो हो अन जस्यान मारो मन थाँने देकबा ने करे हे वस्यानीस थाँको मन भी करे हे।</verse>
				<verse number="7">ईं वाते हो भायाँ-बेना, थाँका विस्वास का हमच्यारऊँ माकाँ हाराई दुक में अन कळेस में माँने घणी हिम्मत मली हे।</verse>
				<verse number="8">अबे माँकी काया होरी रेवे हे, काँके थाँ परबू में बण्या तका रेवो हो।</verse>
				<verse number="9">अबे माँ थाँका वाते परमेसर ने धन्नेवाद दे सका हाँ। थाँकी वजेऊँ ज्यो आणन्द परमेसर हामे माँने मल्यो हे वणी वाते माँ वींको घणो धन्नेवाद देवाँ हाँ।</verse>
				<verse number="10">माँ रात-दन वणीऊँ मनऊँ अरज कररिया हाँ के, थाँने देका अन थाँका विस्वास की कमी पुरी कराँ।</verse>
				<verse number="11">अबे आपणाँ बापू परमेसर अन परबू ईसू माकाँ वाते अस्यान को गेलो खोले के, माँ थाँकाऊँ आन मला।</verse>
				<verse number="12">परबू करे, जस्यान माँको परेम थाँका वाते हे वस्यानीस थाँको परेम एक-दूँजा में अन हाराई मनकाँ का हाते रात-दन बड़तो जावे।</verse>
				<verse number="13">जणीऊँ वो थाँका हरदा ने अस्यान पाका करी के, जद्याँ आपणाँ परबू ईसू हाराई पुवितर मनकाँ का हाते आई तो थाँ बापू परमेसर का हामे निरदोस अन पुवितर वेवो।</verse>
			</chapter>
			<chapter number="4">
				<verse number="1">हो भायाँ-बेना, माँ थाँकाऊँ परबू ईसू का नाम में आ अरज करा अन थाँने हमजावा हाँ के, जस्यान थाँ माँकाऊँ परमेसर ने राजी करबावाळो जीवन जीणो हिक्यो अन वस्यानीस जीवो भी हो, वींमें ओरी बड़ता जावो।</verse>
				<verse number="2">काँके थाँ वणा आग्या ने जाणो हो ज्याँने माँ थाँने परबू ईसू का आड़ीऊँ दिदी ही।</verse>
				<verse number="3">परमेसर ओईस छावे हे के, थाँ पुवितर बणो अन कूकरमऊँ बचन रेवो।</verse>
				<verse number="4">थाँ हाराई ने आपणी-आपणी लुगई का हाते पुवितर अन आदर-मान का हाते जीवन जीणो छावे।</verse>
				<verse number="5">अन ओ काम परमेसर ने ने मानबावाळा अधरमी लोगाँ का जस्यान बुरा बच्यार राकन ने करणो छावे।</verse>
				<verse number="6">ईं बात में कुई भी आपणाँ भई नेईस ने ठगे अन ने कुई किंको नफो लेणो छावे। काँके परबू आ हारी बाताँ को बदलो लेबा में हे, अणा बाताँ का बारा में माँ थाँने पेल्याँई बता दिदो अन चेताया भी हाँ।</verse>
				<verse number="7">परमेसर आपाँने हूँगला वेबा का वाते ने पण पुवितर वेबा का वाते बलाया हे।</verse>
				<verse number="8">ईं वजेऊँ ज्यो ईं हिक ने नकारे हे वो मनकाँने ने, पण पुवितर आत्मा देबावाळा परमेसर ने भी नकारे हे।</verse>
				<verse number="9">भईचारा का परेम का बारा में मने लिकबा की कई जरूत ने हे, काँके ईंका बारा में थाँ खुद परमेसरऊँ हिक लिदो हे के, कस्यान एक-दूजाऊँ परेम राकणो छावे।</verse>
				<verse number="10">जस्यान हाराई मकिदुनिया का भायाँ का हाते थाँ परेम राको भी हो, पण माँ थाँकाऊँ अरज करा हाँ के, ईंमें ओरी भी बड़ता जावो।</verse>
				<verse number="11">जस्यान माँ थाँने क्यो हो, वस्यानीस छाना-माना रेवो अन आपणाँइस काम पे ध्यान देन आपणाँ हातऊँ कमान खाबा की कोसीस करता रेवो।</verse>
				<verse number="12">जणीऊँ थाँने बना विस्वास करबावाळाऊँ आदर-मान मले अन थाँने कणी बात की कमी ने रेवे।</verse>
				<verse number="13">हो भायाँ-बेना, माँ छावाँ हाँ के, थाँ मरिया तका विस्वासी भायाँ का पाच्छा जी उठबा का हाँच ने जाणो, जणीऊँ थाँ बना विस्वास करबावाळा के जस्यान दकी ने वेवो, ज्याँका नके आस ने हे।</verse>
				<verse number="14">काँके आपाँ ओ विस्वास करा हाँ के, ईसू मरिया अन पाच्छा जीवता वेग्या हा, तो वस्यानीस परमेसर भी वाँने ज्यो ईसू पे विस्वास करता तका मरग्या हे, वाँने पाच्छा ईसू का हाते खन्दा देई।</verse>
				<verse number="15">परबू का बचना का आड़ीऊँ माँ थाँने बतारिया हाँ के, आपाँ जतरा जीवता हा, बच्या तका रेवा अन परबू के पाच्छा आबा का दन तईं जतरा मरग्या हे, वणाऊँ आगे कुई ने वेई।</verse>
				<verse number="16">काँके परबू खुद हरगऊँ उतरी अन वीं टेम परदान हरग-दुत को जोरको आदेस हुणाई अन परमेसर को वाक्यो बजायो जाई अन मसी में विस्वास करता तका जतरा मरग्या, वीं पेल्याँ जीवता वे जाई।</verse>
				<verse number="17">ईंका केड़े आपाँने ज्यो जीवता अन बच्या तका हाँ, वाँका हाते वादळा में परबूऊँ हवा में मलबा वाते ऊपरे उठा लिदा जावा। अस्यान आपाँ हमेस्यान परबू का हाते रेवा।</verse>
				<verse number="18">ईं वाते थाँ भी आ बाताँऊँ एक दूजाँ की हिम्मत बड़ाया करो।</verse>
			</chapter>
			<chapter number="5">
				<verse number="1">हो भायाँ-बेना, परबू का पाच्छा आबा की टेम अन दनाँ का बारा में लिकबा की माँने जरूत ने हे।</verse>
				<verse number="2">काँके थाँने खुद अणी नुवी बात को हव तरियाऊँ पतो हे के, जस्यान रात में चोर अणाचेत को आ जावे हे वस्यानीस परबू के पाच्छा आबा को दन वेई।</verse>
				<verse number="3">जद्याँ मनक केरिया वेई के, “हारोई हव हे अन कई दरपणी ने हे,” वणी दाण एकदम परकोप आ पड़ी जस्यान जापा वाळी लुगई पे दुक वेवे हे। वीं कणी भी तरियाऊँ बंच ने सकी।</verse>
				<verse number="4">पण भायाँ-बेना, थाँ तो ईं अंदारा में ने हो के, परबू के पाच्छा आबा को दन थाँका पे अणाचेत को चोर की जस्यान आ जावे।</verse>
				<verse number="5">काँके थाँ रात अन अंदारा का ने हो, पण थाँ हाराई दन अन उजिता की ओलाद हो।</verse>
				<verse number="6">ईं वाते दूजाँ के जस्यान आपाँने हूतो तको ने रेणो छावे, पण हेंचेत अन खुद ने काबू में राकणो छावे।</verse>
				<verse number="7">काँके जतरा होवे हे, वीं रात मेंईस होवे हे अन जतरा पियावाळा वेवे हे वीं रात मेंईस नसो करे हे।</verse>
				<verse number="8">पण आपीं जतरा दन का हाँ, आपाँने विस्वास अन परेम को हत्यार पेरन अन बंचबा को टोपो लेन हेंचेत रेणो छावे।</verse>
				<verse number="9">काँके परमेसर आपाँने वींका गुस्सो ने भुगतबा का वाते ने, पण परबू ईसू मसीऊँ बंचाबा का वाते चुण्या हे।</verse>
				<verse number="10">ईसू मसी आपाँ वाते ईं वजेऊँ मरिया हाँ के, आपाँ पलई जीवता वा कन पलई वाँके आबाऊँ पेल्याँ मरी जावा, पण हाराई मलन वाँका हाते जीवा।</verse>
				<verse number="11">ईं वाते जस्यान थाँ करता आरिया हो वस्यानीस एक दूजाँ ने जेलो देन हिम्मत बड़ाता रेवो अन विस्वास में गाटा करता रेवो।</verse>
				<verse number="12">हो भायाँ-बेना माँ थाँकाऊँ आ अरज करा हाँ के, जतरा भी मण्डली का अगुवाँ थाँका वाते मेनत करे, परबू में थाँने गेलो बतावे हे अन आदेस देवे हे, वाँको मान करिया करो।</verse>
				<verse number="13">अन वाँका कामाँ की वजेऊँ परेम का हाते वाँने घणा आदर-मान का जोगा हमज्या करो अन एक-दूजाऊँ मेल-मिलापऊँ रेवो।</verse>
				<verse number="14">हो भायाँ-बेना, माँ थाँने हमजावा हाँ के, जी आळकातक हे वाँने हमजावो, दरपे वाँकी हिम्मत बड़ावो, कमजोरा ने हमाळो अन हाराई का हाते नरमाई राको।</verse>
				<verse number="15">कुई भी बुरई का बदले बुरई ने करे, पण एक दूजाँ को अन हाराई मनकाँ को भलो करबा का वाते आगता रेवो।</verse>
				<verse number="16">हमेस्यान राजी-खुसी रेवो।</verse>
				<verse number="17">हमेस्यान परातना करबा में लाग्या तका रेवो।</verse>
				<verse number="18">हरेक बाताँ में धन्नेवाद देता रेवो, काँके थाँका वाते ईसू मसी में परमेसर की याईस मरजी हे।</verse>
				<verse number="19">पुवितर आत्मा का कामाँ ने रोको मती।</verse>
				<verse number="20">परमेसर का आड़ीऊँ किदी तकी बाताँ ने बेकार मती जाणो।</verse>
				<verse number="21">बाताँ ने परको अन ज्यो हव हे वाँने गरण करो।</verse>
				<verse number="22">हारी तरियाँ की बुरईऊँ बचन रेवो।</verse>
				<verse number="23">सान्ती देबावाळा परमेसर खुद थाँने हव तरियाँ पुवितर करी अन थाँ थाँकी आत्मा, जीव अन देह ने आपणाँ परबू ईसू मसी का पाच्छा आबा का दन तईं पुरी तरियाऊँ निरदोस बणन हाँजाहाँतरा रेवो।</verse>
				<verse number="24">थाँने बलाबावाळा परमेसर विस्वास जोगा हे अन वो अस्यानीस करी।</verse>
				<verse number="25">हो भायाँ-बेना, मारा वाते भी अरज करिया करज्यो।</verse>
				<verse number="26">हाराई विस्वास्याँ के गळे मलन जे मसी की करिया करो।</verse>
				<verse number="27">ओ कागद हाराई भायाँ ने भणन हूणाज्यो, ईंको मूँ थाँने परबू का अदिकारऊँ हुकम दूँ हूँ।</verse>
				<verse number="28">आपणाँ परबू ईसू मसी की करपा थाँका पे वेती रेवे।</verse>
			</chapter>
		</book>
		<book number="53">
			<chapter number="1">
				<verse number="1">मूँ पोलुस, सिलवानुस अन तिमुतियुस का हाते यो कागद थिस्सुलुनिक्यों नगर की मण्डली का नाम लिकरियो हूँ, ज्या बापू परमेसर अन परबू ईसू मसी में हे।</verse>
				<verse number="2">बापू परमेसर अन परबू ईसू मसी की दया अन सान्ती थाँका पे वेती रेवे।</verse>
				<verse number="3">हो भायाँ-बेना, थाँका वाते माँने परमेसर ने धन्नेवाद देतो रेणो छावे अन ओ सई भी हे, काँके थाँको विस्वास घणो बड़तो जारियो हे, अन थाँको हाराई को परेम एक-दूँजा में घणो फल-फुलरियो हे।</verse>
				<verse number="4">ईं वाते माँ खुद ईं परमेसर की मण्डली में थाँका पे मेपणो करा हा, काँके जतरा भी दुक अन कळेस हाँ, वाँने थाँ जेल्या, ईं हारी बाताँऊँ थाँके धीरज अन विस्वास का बारा में पतो चाले हे।</verse>
				<verse number="5">ओ परमेसर का हाँचा न्याव को सई परमाण हे के, थाँ परमेसर का राज का जोगा हो, जिंका वाते थाँ दुक भी पारिया हो।</verse>
				<verse number="6">परमेसर वोईस करी ज्यो सई हे अन जतरा थाँने दुक देवे हे, ईंका बदला में परमेसर वाँने भी दुक देई।</verse>
				<verse number="7">अन परबू ईसू मसी जद्याँ आपणाँ हरग-दुत का हाते हगलती तकी वादी में हरगऊँ आई, तो थाँ जी कळेस जेलरिया हो, वो माकाँ हाते थाँने सक-चेन देई।</verse>
				<verse number="8">अन जतरा परमेसर ने ने जाणे अन आपणाँ परबू ईसू का हव-हमच्यार ने ने मानी वाँने दण्ड दिदो जाई।</verse>
				<verse number="9">वीं परबू का हामेंऊँ अन वाँकी सामरत का तेजऊँ छेटी वेन जुग-जुग का नास को दण्ड भोगी।</verse>
				<verse number="10">ओ वीं दन वेई जद्याँ वो आपणाँ हाराई पुवितर मनकाँऊँ जतरा वींपे विस्वास करी मेमा अन आदर-मान लेवा आई। तो थाँ भी वाँका में भेळा वेवो, काँके माँ ज्यो हव हमच्यार थाँने बतायो हे, वींको थाँ विस्वास किदो हे।</verse>
				<verse number="11">ईं वाते, माँ थाँका वाते हमेस्यान परातना करा हाँ के, आपणाँ परमेसर थाँने जुग-जुग के जीवन का जोगा बणावे, जणी वाते थाँने वणा बलाया हे। अन भलई की हरेक मरजी अन विस्वास का हरेक काम ने सामरत का हाते पूरा करो।</verse>
				<verse number="12">जणीऊँ आपणाँ परमेसर अन परबू ईसू मसी की दयाऊँ आपणाँ परबू ईसू को नाम थाँकामें मेमा पावे अन थाँ वींमें पावो।</verse>
			</chapter>
			<chapter number="2">
				<verse number="1">हो भायाँ-बेना, आपणाँ परबू ईसू मसी का आबा अन वाँके नके भेळा वेबा का बारा में, माँ थाँकाऊँ अरज करा हाँ के,</verse>
				<verse number="2">आत्मा का आड़ीऊँ अई तकी बात, क्या तका बचन अन लिक्या तका कागद ने देकन पलई वो केवे के, मारा आड़ीऊँ लिक्यो तको हे, वींमें ओ लिक्यो वे के, परबू के पाच्छा आबा को दन आग्यो हे, थाँ भटक मती जाज्यो अन घबरा मती जाज्यो।</verse>
				<verse number="3">काँके वो दन जद्याँ तईं ने आवे तद्याँ तईं आकरी विरोद ने जावे अन पाप को मनक परगट ने वे जावे, जिंने परमेसर नास करी, ईं वाते किंके भी अन किंकी ठग-वद्‍याँ में मती आ जाज्यो।</verse>
				<verse number="4">यो मनक हाराई ने ज्याँने ईसवर अन मूरत्याँ जोगा बोले हे, वाँका हामे वेई अन खुदाखुद ने हाराऊँ मोटो मानी, अटे तईं वो परमेसर का मन्दर में बेटन खुदाखुद ने ईसवर मानी।</verse>
				<verse number="5">कई थाँने आद ने हे के, जद्याँ मूँ थाँका नकेरिया करतो हो, तो मूँ थाँने ईं हारी बाताँ क्या करतो हो?</verse>
				<verse number="6">अन थाँ वो जाणोइस हो के, वींने कणी रोक मेल्यो हे ताँके वो आपणाँ सई मोका पे परगट किदो जाई।</verse>
				<verse number="7">काँके पाप को भेद अबाणू भी काम करतो जारियो हे, पण अबाणू तईं वींने एक रोकबावाळो हे अन ओ ईंने जद्याँ तईं रोक्यो राकी, तद्याँ तईं रोकबावाळो छेटी ने वे जावे।</verse>
				<verse number="8">ईंका केड़े ओ पाप को मनक परगट वेई, जिंने ईसू मसी आपणाँ मुण्डा की फूँकऊँ मार नाकी अन आपणाँ पाच्छा आबा का तेजऊँ वींने बाळ नाकी।</verse>
				<verse number="9">ईं पाप का मनक को आणो सेतान की सगतिऊँ वेई अन ईंका में हारी जूटी तागत, जूटा हेन्याण, अचम्बा का काम अन पापऊँ भरिया छळ-कपट वेई। अन ओ अणा सगत्याँ ने वाँ मनकाँ वाते काम में लेई जीं नास वेबावाळा हे, काँके वणा हाँच का परेम ने गरण ने किदो जणीऊँ वाँकी मुगती वे जाती।</verse>
				<verse number="10"></verse>
				<verse number="11">ईं वाते परमेसर वाँका में एक छळ करबावाळी सगती ने काम करबा का वाते खन्दाई, जणीऊँ वीं जूट पे विस्वास करबा लाग जाई।</verse>
				<verse number="12">अणीऊँ जतरा हाँच पे विस्वास ने किदो अन जूट में मजा लेता हा, वीं हाराई दण्ड पाई।</verse>
				<verse number="13">परबू का लाड़ला भायाँ-बेना, थाँका वाते माँने हमेस्यान परमेसर को धन्नेवाद करतो रेणो छावे, काँके परमेसर आपणी पुवितर आत्मा की सगतिऊँ थाँने बंचान वाँका पुवितर मनक बणाबा का वाते अन हाँच पे थाँका विस्वास की वजेऊँ बंचाबा का वाते पेल्याइस थाँने चुण्या हा।</verse>
				<verse number="14">अन ईं बंचबा का वाते जणी हव हमच्यार की, में थाँने हिक दिदी ही, वणी का आड़ीऊँ परमेसर थाँने बलाया हे, ताँके थाँ भी आपणाँ परबू ईसू मसी की मेमा में भेळा वेवो।</verse>
				<verse number="15">ईं वाते हो विस्वासी भायाँ, गाटा रेवो अन ज्या हिक माँ थाँने माकाँ मुण्डाऊँ अन कागद में लिकन दिदी हे वींने आपणाँ मन में राको।</verse>
				<verse number="16">आपणाँ परबू ईसू मसी खुदई अन आपणाँ बापू परमेसर ज्यो आपाँने परेम, जुग-जुग की सान्ती अन हव आस दिदी हे,</verse>
				<verse number="17">वो थाँने हरेक हव काम वाते अन बचना में पाका करी अन थाँका हरदा में सान्ती देई।</verse>
			</chapter>
			<chapter number="3">
				<verse number="1">हो विस्वासी भायाँ, माकाँ वाते भी परातना करता रेज्यो, जणीऊँ परबू को हव हमच्यार जस्यान थाँका बचमें फेलरियो हे, वस्यानीस हाराई लोगाँ में बना रकावटऊँ हेलो फेले अन आदर-मान पावे।</verse>
				<verse number="2">थाँ परातना करिया करो के, परबू माँने बुरा अन भटक्या तका मनकाँऊँ बंचावे, काँके हर कुई ईं हव हमच्यार पे विस्वास ने करे हे।</verse>
				<verse number="3">पण परबू विस्वास जोगा हे। वींइस थाँने तागत देई अन सेतानऊँ बंचान राकी।</verse>
				<verse number="4">परबू में माँने थाँका वाते पाको विस्वास हे अन थाँका बारा में माँने कई चन्ता ने हे के, जस्यान माँ थाँने करबा वाते क्यो हो थाँ वस्यानीस कररिया हो अन करता रेवो।</verse>
				<verse number="5">परबू थाँका मन ने परमेसर का परेम ने हमजबा अन मसी की धिरजपणा की सगती का आड़ी बड़ावे।</verse>
				<verse number="6">हो विस्वासी भायाँ, माँ थाँने परबू ईसू मसी में ओ आदेस देवा हा के, हरेक अस्या मनकाऊँ छेटी रेज्यो जीं आळकातक हे अन ज्या हिक माँ वाँने दिदी हे वींके जस्यान ने करे।</verse>
				<verse number="7">जस्यान माँकी उठक-बेठक हे वस्यानीस थाँकी भी वेणी छावे अन आ कस्यान वेणी छावे ईं बात ने थाँ तो जाणोइस हो, काँके जद्याँ माँ थाँका हाते हा तो कदी भी माँ आळकातक ने हा।</verse>
				<verse number="8">अन किंकी भी फोगट की रोटी ने खादी। पण रात-दन मेनत अन दुक उठान काम धन्धो करता हा, ताँके थाँका पे कई बोज ने पड़े।</verse>
				<verse number="9">अस्यान की बात ने के, थाँका पे मारो हक ने हे, पण माँ छावाँ हा के, थाँ माँने देकन हिको अन माँके जस्यान जीवन जीवो।</verse>
				<verse number="10">ईं वाते जद्याँ माँ थाँका नके हा तो भी थाँने याईस बात केता हाँ के, “यद्याँ कुई काम ने करणो छावे, तो वो खा भी ने सकी।”</verse>
				<verse number="11">माँ हुण्यो हो के, थाँकामूँ नरई गलत गेले चालरिया हे अन कई काम तो ने करे, पण दूजाँ का काम में टाँग अड़ावे हे।</verse>
				<verse number="12">अस्या मनकाँ ने परबू ईसू मसी में माँ आदेस देवा अन हमजावा हाँ के, छाना-माना खुद कमान खावो।</verse>
				<verse number="13">पण हो विस्वासी भायाँ, थाँ भला काम करबा वाते हिम्मत मती छोड़ज्यो।</verse>
				<verse number="14">यद्याँ कुई माकाँ ईं कागद में लिकी तकी बाताँ ने ने माने, तो वाँका पे नजर राकज्यो अन वणा हाराईऊँ छेटी रेज्यो जणीऊँ वीं हरमा मर जावे।</verse>
				<verse number="15">वाँने दसमण मती हमज ज्यो, पण वाँने भई हमजन चेताज्यो।</verse>
				<verse number="16">परबू थाँका हाराई का हाते रेवे अन परबू ज्यो खुद ईं सान्ती हरेक टेम अन हरेक तरियाऊँ देता रेवे हे थाँने हमेस्यान सान्ती देवे।</verse>
				<verse number="17">मूँ पोलुस, थाँने खुद का हातऊँ जे मसी की लिकरियो हूँ। हाराई कागद के आकरी में याईस मारी हेन्याणी हे अन मारी लिकावट की ओळकाण भी याईस हे।</verse>
				<verse number="18">आपणाँ परबू ईसू मसी की करपा थाँका हाराई पे वेती रेवे।</verse>
			</chapter>
		</book>
		<book number="54">
			<chapter number="1">
				<verse number="1">मूँ पोलुस, आपाँने बंचाबावाळा परमेसर अन आपणी आस का आदार ईसू मसी की आग्याऊँ ईसू मसी को थरप्यो तको चेलो बण्यो,</verse>
				<verse number="2">मूँ यो कागद तिमुतियुस ने लिकूँ हूँ, ज्यो विस्वास में मारो हाँचो बेटो हे। थने बापू परमेसर अन आपणाँ परबू ईसू मसीऊँ आसिरवाद, दया अन सान्ती मलती रेवे।</verse>
				<verse number="3">जद्याँ मूँ मकिदुनिया वेन जारियो हो, वीं दाण थने इपिसुस में रेवा वाते क्यो हो, जणीऊँ थूँ कुईक मनकाँ ने आदेस देवे के, वीं जूटी हिक ने देवे।</verse>
				<verse number="4">अन वाँ मनगड़त केण्याँ अन वंसावल्या पे मन ने लगावे, ज्यो लड़ई-जगड़ो करावे हे अन परमेसर की वीं मरजी ने पुरी ने वेवा देवे हे, ज्या खाली विस्वासऊँ पुरी वे सके हे।</verse>
				<verse number="5">मारी अणी हिक देबा का पाच्छे योईस मकसद हे के, हाराई विस्वासी परेमऊँ भर जावे, ज्यो हव मनऊँ, हुदी अंतर-आत्माऊँ अन बना छळ-कपट का विस्वासऊँ पेदा वेवे हे।</verse>
				<verse number="6">थोड़ाक मनक ईं गेला ने छोड़न बेकार की बाताँ में फसग्या हे।</verse>
				<verse number="7">अन वीं मूसा का नेमा ने हीकाबावाला बणणा तो छावे हे, पण वीं ज्यो सबद ने काम में लेवे हे अन जणा बाताँ पे ज्योर देवे हे वाँने वीं खुदई ने हमजे हे।</verse>
				<verse number="8">आपाँ जाणा हाँ के, यद्याँ कुई मूसा का नेमा ने सई तरियाऊँ काम में लेवे, तो वीं घणा हव हे।</verse>
				<verse number="9">ओ जाणन के, मूसा का नेम धरमी मनकाँ का वाते ने पण अधरम्याँ, केणो ने करबावाळा, परमेसर ने ने मानबावाळा, पापी, अपुवितर, असुद, बई-बापू को बुरो करबावाळा, हत्यारा,</verse>
				<verse number="10">कुकरमी, मनक मनक का हाते कुकरम करबावाळा, मनकाँ ने बेचबावाळा, जूट बोलबावाळा, अन जूटी होगन खाबावाळा, ईंके अलावा खरी हिक को विरोद करबावाळा का वाते ठेरईगी हे।</verse>
				<verse number="11">आ खरी हिक परम परदान परमेसर की मेमा का हव हमच्यार का जस्यान हे, ज्यो मने दिदो ग्यो हे।</verse>
				<verse number="12">मूँ आपणाँ परबू ईसू मसी जणा मने तागत दिदी हे वींको गुणगान करूँ हूँ, काँके वणा मने विस्वास जोगो हमजन मने आपणी सेवा वाते चुण्यो हे।</verse>
				<verse number="13">पेल्याँ मूँ परमेसर का बारामें बुरो बोलबावाळो, वींका मनकाँ ने हताबावाळो अन वाँकी मजाक करबावाळो मनक हो। ईंका केड़े भी मारा पे दया वी, काँके एक बना विस्वासवाळा का जस्यान अणजाण में ईं हाराई में काम किदा हा।</verse>
				<verse number="14">अन परबू मारा पे नरी दया किदी, हातेई हाते वो परेम अन विस्वास ज्यो ईसू मसी में हो, वो मने मल्यो।</verse>
				<verse number="15">आ बात हरेक तरियाऊँ हाँची हे अन मानबा जोगी हे के, ईसू मसी ईं दनियाँ में पाप्याँ ने बंचाबा का वाते आया हा, जणामें हाराऊँ मोटो पापी मूँ हूँ।</verse>
				<verse number="16">पण मारा पे ईं वाते दया वीं हे के, मूँ ज्यो हाराऊँ मोटो पापी हूँ। मारा में ईसू मसी आपणो धीरज दिकायो हे, अस्यान करबाऊँ ज्यो मनक वाँका पे जुग-जुग का जीवन का वाते विस्वास करी, वाँका वाते मूँ एक नमुनो बणूँ।</verse>
				<verse number="17">अन अबे हमेस्यान राज करबावाळो राजा, अनदेक्यो, बेस एकीस परमेसर को मान अन मेमा जुग-जुग वेती रेवे। आमीन।</verse>
				<verse number="18">हे मारा बेटा तिमुतियुस, वाँ बाताँ का जस्यान ज्याँने पेल्याइस थाँरा बारा में परमेसर का आड़ीऊँ किदी गी हे, मूँ वाँके जस्यानीस थने आदेस दूँ हूँ के, थूँ वाँ बाताँनेइस काम में लेन हव लड़ई लड़तो रे।</verse>
				<verse number="19">विस्वास अन सुद अंतर-आत्मा राक। थोड़ाक मनक आपणी अंतर-आत्मा की ने हूणी, जणीऊँ वीं विस्वासऊँ पाच्छा फरग्या हे।</verse>
				<verse number="20">हुमिनयुस अन सिकन्दर अस्याईस हा, ज्याँने में सेतान का हाताँ में दे दिदा हे, ताँके वाँने परमेसर की बुरई ने करबा को पाट हिकायो जा सके।</verse>
			</chapter>
			<chapter number="2">
				<verse number="1">अबे हाराऊँ पेली मूँ थाँकाऊँ हाता-जोड़ी करूँ हूँ के, अरज, परातना, विनती अन धन्नेवाद परमेसर ने हाराई मनकाँ का वाते दिदो जावे।</verse>
				<verse number="2">राजा माराजा अन हाराई अदिकारियाँ का वाते परमेसरऊँ परातना किदी जावे, ताँके आपाँ सक-चेन अन सान्ती का हाते भगती अन खरईऊँ परमेसर वाते जीवन जी सका।</verse>
				<verse number="3">अस्यान परातना करणी हव हे अन आपणाँ ने बंचाबावाळा परमेसर ने भावे हे।</verse>
				<verse number="4">अन परमेसर छावे के, धरती का हाराई मनक बंचाया जावे अन वींका हाँच ने जाणे।</verse>
				<verse number="5">काँके परमेसर एकीस हे अन परमेसर अन मनकाँ का बचमें बात करबावाळो भी एकीस हे, मतलब ईसू मसी हे, ज्यो खुद एक मनक हे।</verse>
				<verse number="6">जणा आपणाँ खुदाखुद ने हाराई मनकाँ ने बंचाबा का वाते गारन्टी का रूप में दे दिदो, ताँके सई टेम पे ईं बात की गवई वे के, परमेसर हाराई ने बंचाणा छारिया हे।</verse>
				<verse number="7">अन ईं गवई ने जी यहूदी ने हे वणामें हुणाबा का वाते मूँ एक हिक देबावाळा अन ईसू को थरप्यो तको चेलो बणायो ग्यो हूँ, ताँके विस्वास का सन्देस अन हाँच को हेलो पाड़ सकूँ। मूँ जूटो कोयने हूँ, मूँ हाँच बोलरियो हूँ।</verse>
				<verse number="8">ईं वाते अबे मूँ छावूँ हूँ के, हरेक जगाँ मनक लड़ई-जगड़ो अन बुरा काम ने करे, पण आपणाँ हात-जोड़न परातना करिया करे।</verse>
				<verse number="9">वस्यानीस मूँ लुगायाऊँ केवूँ हूँ के, हरम लाज अन धीरज का हाते हुदा-हादा गाबाऊँ खुद ने सजावे ने के फेंसी चोटी बणान होना अन मोती अन मेंगा गाबाऊँ सजावो,</verse>
				<verse number="10">अस्यान की लुगायाँ ज्यो खुद ने परमेसर की दासी माने हे, वणा वाते योईस हव हे के, वीं खुद ने भला कामाँऊँ सजावे।</verse>
				<verse number="11">एक लुगई ने छानी-मानी रेन पुरी तरियाँ क्या में चालन हिक लेणी छावे।</verse>
				<verse number="12">मूँ केवूँ हूँ, लुगायाँ आपणाँ धणी ने तो उपदेस देवे अन ने वींपे पे हक जमावे, पण छानी-मानी रेवे।</verse>
				<verse number="13">काँके पेली आदम बणायो ग्यो अन पछे हवा बणईगी ही।</verse>
				<verse number="14">आदम धोका में ने आयो, पण लुगई धोका में आन परमेसर का नेम तोड़न पापी बणगी।</verse>
				<verse number="15">पण लुगायाँ बाळक जणन बंचगी, अन वाँने छावे के, वीं धीरज का हाते विस्वास, परेम अन खरईपणा में गाटी रेवे।</verse>
			</chapter>
			<chapter number="3">
				<verse number="1">या विस्वास जोगी बात हे के, यद्याँ कुई मण्डली का परदान बणणा छावे हे, तो वीं घणी भली मरजी राके हे।</verse>
				<verse number="2">एक मण्डली को परदान बना दोसवाळो वेणो छावे, वींके एकीस लुगई वे, खुद ने बंस में राकबावाळो, धीरज करबावाळो अन मरयादा में रेबावाळो, वो आपणाँ घर में अणजाण की भी आवभगत करे, वो हिकावाबाळा वेवे।</verse>
				<verse number="3">वो दारू पियावाळो ने वेवे, लड़ई-जगड़ो करबावाळो ने वेवे, पण दयाऊँ भरियो तको अन सान्तीऊँ रेबावाळो वेणो छावे, वींको मन रिप्या-कोड़ी में ने वेवे।</verse>
				<verse number="4">वो आपणाँ परवार की हार-हमाळ करबावाळो वेवे, अन वींका बाळक वींकी पूरो मान करे अन वींका क्या में रेवे।</verse>
				<verse number="5">यद्याँ कुई मनक योई ने जाणे के, खुद का परवार की हार-हमाळ कस्यान वेवे, तो वो परमेसर की मण्डली की हार-हमाळ कस्यान कर सकी?</verse>
				<verse number="6">वो विस्वास में पाको वेणो छावे, काँके कटे अस्यान ने वेवे के, वो सेतान के जस्यान मेपणो करन दण्ड पावे।</verse>
				<verse number="7">वो अस्यान को मनक वेणो छावे जिंको मण्डली का अलावा दूजाँ मनक भी मान करे, ताँके वो बदनाम ने वेवे अन सेतान का जाळ में ने फसे।</verse>
				<verse number="8">अणीस तरियाँ मण्डली का दास भी हाँचा अन हव वेवार का वेवे, वीं रिप्या-कोड़ी का भूका अन दारू पियावाळा ने वेवे।</verse>
				<verse number="9">वीं विस्वास का हाँच ने सई मनऊँ बताबावाळा वेणा छावे।</verse>
				<verse number="10">अणाने भी पेली मण्डली का परदान का जस्यान परक्या जाणा छावे जावे, यद्याँ अणामें कई दोस ने वे, तद्याँई अणाने मण्डली में दास का जस्यान काम करबा देणो छावे।</verse>
				<verse number="11">अणीस लुगायाँ भी हव वेवार की वेवे अन थाँरी मारी करबावाळी ने वेवे, ईं हूँस्यार अन हारी बाताँ में विस्वास जोगी वेणी छावे।</verse>
				<verse number="12">मण्डली का दास के, एकीस लुगई वेवे अन वो आपणाँ बाळकाँ अन आपणाँ परवार ने सई तरियाऊँ चलाबावाळो वेवे।</verse>
				<verse number="13">वीं दास ज्यो आपणो काम सई करे हे वीं खुद का वाते हव पद पाई अन वीं आपणाँ विस्वास का बारा में ज्यो ईसू मसी पे हे, वींने खुलन हिम्मत का हाते बोल सकी।</verse>
				<verse number="14">मूँ जट थाँरा नके आन मलबा की आस राकूँ हूँ, पण अबाणू तो मूँ ओ कागद लिकरियो हूँ,</verse>
				<verse number="15">पण यद्याँ मारा आबा में टेम लागी तो, ईं कागदऊँ जाण जाज्यो के, आपणाँ परमेसर को घराणो, जीं जीवता परमेसर की मण्डली हे या हाँच की नीम अन थम्बो हे, वींके हाते आपाँने कस्यान को वेवार करणो छावे।</verse>
				<verse number="16">कुई ने नट सके के, आपणाँ धरम को भेद कस्यो मोटा हे, वो ज्यो मनक का रूप में परगट व्यो, पुवितर आत्मा जिंने धरमी बतायो, अन हरग-दुत जिंने देक्यो, देसा देसा में वींको परच्यार करियो ग्यो, दनियाँ में वींपे विस्वास करियो ग्यो, अन मेमावान हरग में उठा लिदो ग्यो।</verse>
			</chapter>
			<chapter number="4">
				<verse number="1">पुवितर आत्मा सई तरियाऊँ बोले हे के, थोड़ाक टेम का केड़े थोड़ाक मनक विस्वास करणो छोड़ देई, वीं भटकाबाळी आत्मा की जूटी हिक ने मानी अन जूटी आत्मा का क्या में रेई।</verse>
				<verse number="2">अन या हिक जूटा मनकाँ का कपट की वजेऊँ फेली, ज्याको मन मरियो तको हे।</verse>
				<verse number="3">अस्यान का मनक ब्याव करबा ने गलत अन खाबा की कई चिजाँऊँ रका राकबा की हिक देई, पण परमेसर वणा चिजाँ ने ईं वाते बणई के, विस्वास अन हाँच ने जाणबावाळा वाँने परमेसर को धन्नेवाद देन खावे।</verse>
				<verse number="4">काँके परमेसर की रची तकी हारी चिजाँ हव हे, कई भी छोड़बा जोगी ने हे, पण परातना अन धन्नेवाद करन हारोई खायो जा सके हे,</verse>
				<verse number="5">काँके परमेसर का बचन अन थाँकी परातनाऊँ वाँ हारी चिजाँ पुवितर वे जाई।</verse>
				<verse number="6">यद्याँ थूँ विस्वास्याँ ने आ सला देई, तो थूँ ईसू मसी को हव दास केवाई अन विस्वास की बाताँ अन खरी हिक का वजेऊँ ज्याँने थूँ मानतो आयो हे, वाँकाऊँ थूँ खुद को आत्मिक तरियाऊँ पालण-पोसण करी।</verse>
				<verse number="7">पण खुद ने, मनगड़त केण्याँऊँ छेटी राक, जणामें परमेसर ने हे, पण खुद ने परमेसर की सेवा में लगाया राक।</verse>
				<verse number="8">देह की सेवाऊँ तो थोड़ोक नफो वेवे, पण परमेसर की सेवा तो हारी बाताँ में नफो करे हे, काँके अबाणू अन आबावाळा जीवन को वादो ईंमेंइस हे।</verse>
				<verse number="9">आ हाँची बात हे, ज्या पुरी तरियाऊँ विस्वास करबावाळी अन मानबावाळी हे।</verse>
				<verse number="10">आपाँ ईं वाते मेनत अन कोसीस करा हाँ, काँके आपणी आस जीवता परमेसर में हे, जीं हाराई ने, खासतोरऊँ विस्वास्याँ ने बंचाबावाळो हे।</verse>
				<verse number="11">ईं वाते वाँने आ सला अन याईस हिक दे।</verse>
				<verse number="12">थने किंका भी हामे रेटे ने देकणो पड़ी, काँके थूँ मोट्यार हे, पण बोली-चाली, चालचलन, परेम-भाव, विस्वास अन खरई में थूँ विस्वास्याँ का हामे नमुनो बणजा।</verse>
				<verse number="13">जद्याँ तईं मूँ थाँका नके ने अऊँ थूँ थाँरो टेम अन थाँरी मेनत लोगाँ ने पुवितर सास्तर ने भणन हुणाबा, परच्यार अन हिकाबा में लगाया राक।</verse>
				<verse number="14">थाँरा मयने ज्यो आत्मिक वरदान हे ज्यो थने वीं टेम मल्यो हो, जद्याँ परमेसर का आड़ीऊँ बोलबावाळा थाँरा माता पे आसिरवाद देबा का वाते हात मेल्यो हो, वीं वरदान का वाते बेपरवा मती वेज्ये।</verse>
				<verse number="15">वाँ वरदान ने काम में लेतो रे अन वणामें ध्यान लगाया राक, जणीऊँ थाँरी तरकी हाराई देक सके।</verse>
				<verse number="16">खुद पे अन थाँरा उपदेसा पे ध्यान दे, अन अणामें अपणेआप पाको वे, काँके अस्यान करबाऊँ थूँ खुद ने अन थने हूणबावाळा ने बंचाबा को मस वेई।</verse>
			</chapter>
			<chapter number="5">
				<verse number="1">दाना मनकाँ ने कदी तापड़ज्ये मती, पण वाँकाऊँ आदर-मान का हाते बोलज्ये, जस्यान खुद का बापूऊँ बोले हे। मोट्यार ने खुद का भई का जस्यान हमजज्ये।</verse>
				<verse number="2">दानी लुगायाँ ने बई के जस्यान अन मोट्यार लुगायाँ ने पुरी खरई का हाते बेन हमजन हमजाज्ये।</verse>
				<verse number="3">वणा विदवा लुगायाँ को मान करज्ये, जणाकी देक-रेक करबावाळो हाँची में कुई ने हे।</verse>
				<verse number="4">पण यद्याँ कणी विदवा का छोरा-छोरी कन पोता-पोती वेवे तो, वाँने हाराऊँ पेली छावे के, वीं आपणाँ घराणा का हाते भगती-भाव को वेवार राके, अन आपणाँ बई-बापू, दादा-दादी की सेवा करन आपणो हक पूरो करे, काँके अस्यान करबाऊँ परमेसर राजी वेवे हे।</verse>
				<verse number="5">वाँ ज्यो हाँची में विदवा लुगई हे, जिंका नके वींकी देक-रेक करबावाळो कुई ने हे, अन ज्या परमेसर पे आस राके हे अन रात-दन अरज करन वींकी मदत माँगे हे।</verse>
				<verse number="6">पण ज्या विदवा लुगई मोज-मस्ती में पड़गी, वाँ जीवती तकी भी मरगी तकी हे।</verse>
				<verse number="7">हाराई विस्वास्याँ ने ईं बाताँ बता, जणीऊँ वाँका पे कुई कळंक ने लागे।</verse>
				<verse number="8">पण यद्याँ कुई आपणाँ हगा-होई की, अन खास तरियाऊँ आपणाँ परवारवाळा की देक-रेक ने करे, तो वो आपणाँ विस्वासऊँ फरग्यो हे अन वो एक बना विस्वासवाळाऊँ हेलो बुरो वेग्यो हे।</verse>
				<verse number="9">बेस वणी विदवा लुगई को नामइस सेवा करबा की पोती में लिकज्यो, ज्या हाठ वराऊँ कम ने वेवे, अन वणी एक दाणइस ब्याव किदो तको वेवे।</verse>
				<verse number="10">अन जिंको हव काम करबा में नाम मान्यो तको वे, अन ज्या आपणाँ बाळकाँ ने हव तरिया पालण किदो वे, जणी अणजाण की भी सेवा किदी वे, परमेसर का लोगाँ की आपणाँ घर में आवभगत किदी वे, दकी मनकाँ की मदत किदी वे, अन जणी खुद हाराई भला काम करबा में आपणो मन लगायो वे।</verse>
				<verse number="11">पण मोट्यार विदवा लुगायाँ को नाम सेवा करबा की पोती में मती लिकज्ये, काँके जद्याँ वीं आपणी देह की मरजी का वाते ब्याव करणी छावे, तो वीं मसी का गेलाऊँ भटक जावे हे।</verse>
				<verse number="12">अन वाँ परमेसर का हाते किदा तका आपणाँ पेल्याँ का वादाऊँ पलटन पापी बण जावे हे।</verse>
				<verse number="13">अन वाँ घर-घर फरन आपणो टेम बगाड़णो हिक जावे हे, अन अणीऊँ भी हेलो वाँ फोकट की बाताँ करणी अन दूजाँ का काम में टाँग अड़ाणी हिक जावे हे। जणा बाताँ का बारा में बात ने करणी छावे, वाँका बारा में बाताँ करे हे।</verse>
				<verse number="14">ईं वाते मूँ छावूँ हूँ के, मोट्यार विदवा लुगई ब्याव करन बाळक जनमे, अन आपणाँ घर की देक-रेक करे, जणीऊँ वाँ आपणाँ दसमणा ने आपणाँ खिलाप बुरो केवाँ को मोको ने देवे।</verse>
				<verse number="15">मूँ यो ईं वाते केरियो हूँ के, काँके थोड़ीक मोट्यार विदवा लुगायाँ पेल्याँऊँ विस्वासऊँ फरन सेतान की चाल में आन वींके पाच्छे चालबा लागगी हे।</verse>
				<verse number="16">यद्याँ कणी विस्वासी लुगई का परवार में विदवा लुगई वे, तो वीं वींकी देक-रेक करे, ताँके मण्डली पे वींको बोज ने पड़े, जणीऊँ मण्डली वणा विदवा लुगायाँ की देक-रेक कर सके, ज्याको कुई ने हे।</verse>
				<verse number="17">एक परदान का रूप में जतरा भी मोतबीर मनक हव काम करे हे, वीं दुणा आदर-मान के जस्यान हमज्या जावे, खास तरियाऊँ वीं ज्यो परच्यार अन हिकाबा में घणी मेनत करे हे।</verse>
				<verse number="18">काँके पुवितर सास्तर में लिक्यो तको हे के, “थाँ किंकाई पेट पे लात मती देज्यो” अन “दानक्याँ ने आपणी दानकी पाबा को हक हे।”</verse>
				<verse number="19">कणी भी मोतबीर मनक के खिलाप दो कन वणीऊँ हेला गवा का बना वींपे लगाया ग्या दोस मती हूणज्यो।</verse>
				<verse number="20">ज्यो पाप करे, वींने हाराई का हामे तापड़ जणीऊँ दूजाँ पाप करबाऊँ दरपे।</verse>
				<verse number="21">मूँ थने परमेसर, मसी ईसू अन पुवितर हरग-दुत की मोजुदगी में केवूँ हूँ के, थूँ खुला मनऊँ अणा आदेस ने मानज्ये अन ज्यो कई भी थूँ करे, वींने बना पकसपात के करज्ये।</verse>
				<verse number="22">लोगाँ का माता पे आसिरवाद देबा का वाते हात मेलन वाँने परमेसर की सेवा में देबा का वाते आगत मती करज्ये। दूजाँ का पाप में भेळो मती वेज्ये, खुद ने खरो बणान राकज्ये।</verse>
				<verse number="23">पाणीइस मती पिया कर, पण पेट अन आकोदाण वेबावाळी मांदकी की वजेऊँ थोड़ो दारू भी पिया कर।</verse>
				<verse number="24">थोड़ाक मनकाँ का पाप खुलातोरऊँ चोड़े वे जावे हे अन वाँका जस्यानीस वाँको न्याव भी वेई, पण किंका बुरा काम का पतो थोड़ाक टेम केड़े पड़े हे।</verse>
				<verse number="25">अस्यानीस हव काम भी हामे आवे हे अन ईं छाने भी ने रे सकी।</verse>
			</chapter>
			<chapter number="6">
				<verse number="1">यद्याँ थूँ दास हे, तो थने थाँरा मालिक की इजत अन वींको मान करणो छावे, जणीऊँ कुई भी परमेसर का नाम अन आपणी हिक का बारा में बुरो ने बोल सके।</verse>
				<verse number="2">जणा दास का मालिक विस्वासी हे, वीं ईं वजेऊँ के, वाँका मालिक विस्वासी हे, वाँको मान-समान करणो कम मती करज्यो, पण वाँने तो वाँके मालिक की हेली सेवा करे, काँके वाँका काम को नफो ज्याँने मलरियो हे वीं विस्वासी हे, ज्याँने वीं परेम करे हे। ईं बाताँ थूँ लोगाँ ने करबा का वाते के अन हिका।</verse>
				<verse number="3">यद्याँ कुई भी सई अन आपणाँ परबू ईसू मसी की हरग की हिक ने ने माने हे अन कुई तो अलग ईं हिकावे हे,</verse>
				<verse number="4">तो अस्यान का मनक मरोड़ में वाँका रेई, पण वीं कईस ने जाणे हे। वाँकी अकल मरगी हे, अन वाँने बाताँ पे नन्दयाँ करणी हव लागे हे, वाँकाऊँ मेपणो, दोस लगाणो, हुगली बाताँ, बुरा भेंम निकळे हे।</verse>
				<verse number="5">अन वणा मनकाँ में लड़ई-जगड़ा वेवे हे जणाकी अकल मरगी हे, अन जीं हाँचऊँ छेटी वेग्या हे, वीं होचे हे के, परमेसर की सेवा धन कमावा को सादन हे।</verse>
				<verse number="6">ज्याँका नके ज्यो कई भी हे यद्याँ वो वींमें सबर राके, तो परमेसर वींने आपणी सान्ती देवे हे। पण परमेसर की सेवा सान्ती के हाते करणीइस हाँचो धन हे,</verse>
				<verse number="7">काँके आपाँ धरती पे ने तो कई लेन आया हा अन ने कई लेन जावा।</verse>
				<verse number="8">यद्याँ आपणाँ नके खाणो अन गाबा हे, तो पछे आपाँने ओरी कई छावे?</verse>
				<verse number="9">पण ज्याँने धन भावे, वीं लाळच अन उजाड़ करबावाळी बुरी मरजी में पड़ी, ज्या मनक ने बरबादी अन नास का गेला में नाके हे।</verse>
				<verse number="10">काँके रिप्या-कोड़ी को लाळच हारी बुरई की जड़ हे। घणा मनक रिप्या-कोड़ी का चकर में, विस्वासऊँ मुण्डो फेरन घणा दुक मोल ले लिदो हे।</verse>
				<verse number="11">पण थूँ, ज्यो परमेसर ने मानबावाळो हे, अणा हारी बाताँऊँ छेटी रेज्ये, पण धारमिकता, भगती, विस्वास, परेम, धीरज अन दया में बण्यो तको रेज्ये।</verse>
				<verse number="12">थूँ विस्वास की दोड़ में पूरो मन लगान दोड़, अन खुद का वाते जुग-जुग को जीवन जीत, जिंका वाते थने परमेसर बलायो हो, जिंने थें मेपणा का हाते थाँरा विस्वास ने नरई गवा का हामे दिकायो हो।</verse>
				<verse number="13">परमेसर का हामे, जी हाराई ने जीवन देबावाळा हे अन पिलातुस का हामे, हिम्मत का हाते आपणाँ विस्वास ने बताबावाळा ईसू मसी में, मूँ थने आग्या दूँ हूँ के,</verse>
				<verse number="14">आपणाँ परबू ईसू मसी का परगट वेबावाळा दन तईं अणा आग्या ने मानतो रे अन विस्वास जोगो रेज्ये।</verse>
				<verse number="15">वींने परमेसर सई टेम पे परगट करी, वो धन्न हे, अन एकीस राज करबावाळा, राजा को राजा अन परबुवाँ को परबू हे।</verse>
				<verse number="16">वीं एकलाई अमर हे, वो वणी उजिता में वास करे हे, जिंमें कुई ने पोछ सके हे, ने कुई वींने कदी देक्यो हे, अन ने कुई कदी देक सकी। वींको आदर-मान अन राज हमेस्यान रेई। अस्यानीस वेवे।</verse>
				<verse number="17">जतरा मनक ईं धरती पे रिप्यावाळा हे वाँने आग्या दे के, वीं ईंपे मेपणो ने करे, पण वाँकी आस ईं नास वेबावाळा चिजाँ की बजाय परमेसर पे वेवे, ज्यो आपाँने आपणाँ आणन्द का वाते हारी चिजाँ देवे हे।</verse>
				<verse number="18">हव काम करबा वाते वाँने आदेस दे, जणीऊँ वीं हव काम करबावाळा, दान देबावाळा अन खुला मनऊँ एक-दूँजा ने मदत करबावाळा बणे।</verse>
				<verse number="19">अस्यान करन वीं खुद का वाते अस्यान को धन को भण्डार भेळा करे, ज्यो आबावाळा टेम तईं एक पाकी नीम बण जाई, तद्याँ वी हाँचा जीवन ने जीतबा का जोगा वेई।</verse>
				<verse number="20">हे तिमुतियुस, परमेसर ज्यो कई थने हूँप्यो हे वींने हमाळन राक। दनियादारी की बात अन फोगटपणाऊँ खुद ने छेटी राक जिंने थोड़ाक मनक गलतीऊँ “ग्यान” केवे हे,</verse>
				<verse number="21">काँके थोड़ाक मनक ईंपे विस्वास किदो, जिंको नतीजो ओ निकळ्यो के, वीं हाँचा विस्वास का गेलाऊँ भटकग्या। थाँ हाराई पे परमेसर की दया वेती रेवे।</verse>
			</chapter>
		</book>
		<book number="55">
			<chapter number="1">
				<verse number="1">मूँ पोलुस, ज्यो परमेसर की मरजीऊँ ईसू मसी को थरप्या तको खास चेलो हूँ, जिंने परमेसर वणी जीवन को परच्यार करबा का वाते खन्दायो, जणी जीवन ने परमेसर ईसू मसी में देबा को वादो किदो हे।</verse>
				<verse number="2">मूँ परबू में, मारा लाड़ला बेटा तिमुतियुस थने, ओ कागद लिकरियो हूँ। बापू परमेसर अन आपणाँ परबू ईसू मसी में थने करपा, दया अन सान्ती मले।</verse>
				<verse number="3">तिमुतियुस मूँ रात-दन मारी परातना में थने आद करूँ हूँ अन थाँरा वाते परमेसर ने धन्नेवाद दूँ हूँ, जिंकी सेवा मूँ मारा बड़ाबा का जस्यान हुदा मनऊँ करूँ हूँ।</verse>
				<verse number="4">थाँरा आँसूवा ने आद करन हमेस्यान मारा हरदा में आ मरजी वेवे के, मूँ थाँराऊँ वेगोई मलूँ अन राजी वे जऊँ।</verse>
				<verse number="5">मूँ थाँरा हाँचा विस्वास ने भी आद करूँ हूँ, अस्यान कोईस विस्वास थाँरी नानी लोइस अन थाँरी बई युनीके में हो, अन मूँ ईं बात वाते पाको हूँ के, वोईस विस्वास थाँरा में भी हे।</verse>
				<verse number="6">ईं वाते मूँ थने आद देवाड़ूँ के, वीं वरदान ने जीवतो राक, जिंने परमेसर थने वीं टेम दिदो हो, जद्याँ में थाँरा पे हात मेल्यो हो।</verse>
				<verse number="7">काँके परमेसर आपाँने दरपणी के बजाय तागत, परेम अन खुद ने बंस में राकबा की आत्मा दिदी हे।</verse>
				<verse number="8">ईं वाते थूँ आपणाँ परबू अन मारी गवई देबा का वाते, ज्यो मसी का वाते बन्दी हूँ, हरमाज्ये मती, पण अस्यान करबा के, बजाय परमेसर, ज्या तागत थने दिदी हे, वींने मारा हाते हव हमच्यार का वाते दुक उटाबा में लगाज्ये।</verse>
				<verse number="9">वणा आपाँने परमेसर का मनक वेबा वाते बंचाया अन बलाया हे, ओ सोभाग्य आपणाँ पे आपणाँ कामाँ का जस्यान ने मल्यो हे, पण ओ तो वाँकी दया अन वाँका मकसद वाते आपाँ पे ने मल्यो हे, ज्यो ईसू मसी में सरुवातऊँ आपणाँ वाते हो।</verse>
				<verse number="10">पण अबे आपणाँ ने बंचाबावाळा ईसू मसी का आबा का आड़ीऊँ आपणाँ पे परगट व्यो हे। जणी हव हमच्यार का आड़ीऊँ मोत को नास करन जुग-जुग का जीवन ने परगट किदो हे।</verse>
				<verse number="11">परमेसर मने हव हमच्यार ने हुणाबावाळो, एक हिकाबावाळो अन ईसू को थरप्या तका की जस्यान काम दिदो हे।</verse>
				<verse number="12">अन ईं वजेऊँ मूँ ईं हारई दुक जेलूँ हूँ, पण मूँ ईं वाते हरमा ने मरूँ हूँ, काँके मूँ जाणूँ हूँ के, मारो विस्वास किंपे हे? अन मूँ ईं बात वाते पाको हूँ के, ज्यो कई वणा मने हूँप्यो हे, वींने मसी के पाच्छा आबा का दन तईं बंचाबा में तागतवर हे।</verse>
				<verse number="13">जीं खरा बचन में थने हिकाया हे वाँने मजबुतीऊँ पकड़ राक अन वाँने भी विस्वास अन परेम का हाते, ज्यो ईसू मसी में हे, खुद का वाते नमुनो बणान राक।</verse>
				<verse number="14">अन पुवितर आत्मा का आड़ीऊँ ज्यो आपणाँ में वास करे हे, हव चिजाँ की रुकाळी कर, जीं थने हूँपी गी हे।</verse>
				<verse number="15">थूँ जाणे हे के, आसिया परदेस का रेबावाळा हाराई मने छोड़ दिदो हे, जणामें फुगिलुस अन हिरमुगीनेस भी हे।</verse>
				<verse number="16">परमेसर उनेसिफुरस का घराणा पे दया करे, काँके वणा घणी दाण मारी मदत किदी हे अन मारा बन्दी वेवा की वजेऊँ भी हरमा ने मरिया हे।</verse>
				<verse number="17">अन जद्याँ वो रोम नगर आयो तो वो मने जद्याँ तईं होदतो रिया, तद्याँ तईं मूँ वींने ने लादो।</verse>
				<verse number="18">परमेसर वींपे भी, मसी के पाच्छा आबा का दन दया करे। थूँ भी हव तरिया जाणे हे के, वणी इपिसुस में मारा वाते कई-कई किदो हो?</verse>
			</chapter>
			<chapter number="2">
				<verse number="1">परबू में मारा बेटा तिमुतियुस, ईसू मसी में परमेसर जस्यी दया थाँरा पे दिकई हे, वींके जस्यान पाको बण्यो तको रे।</verse>
				<verse number="2">परमेसर को परच्यार करती दाण नरई गवा की मोजुदगी में, जीं बाताँ थें माराऊँ हिकी हे, वाँने विस्वास जोगा मनकाँ ने हूँप दे, जीं दूजाँ ने हिकाबा को मन राकता वेवे।</verse>
				<verse number="3">ईसू मसी का वफादार सपई के, जस्यान ईं दुक में मारी लारे रे।</verse>
				<verse number="4">एक सपई जद्याँ आपणाँ काम में लाग्यो तको रेवे हे, तो वो आपणाँऊँ ऊपरे का अदिकारी ने आपणाँ कामऊँ राजी राकणो छावे हे अन ईं वजेऊँ वो खुद ने दनियादारी का कामाँ में ने नाके हे।</verse>
				<verse number="5">अन अस्यानीस कुस्ति को पेलवान बना नेमा का जस्यान दाव-पेंचऊँ लड़े, तो वो ईनाम ने जीत सके हे।</verse>
				<verse number="6">मेनत करबावाळा करसाण नेईस हाराऊँ पेल्याँ हाक को फळ मलणो छावे।</verse>
				<verse number="7">ज्यो कई मूँ बोलूँ हूँ वींपे चेतो लगा, अन परबू थने हारी बाताँ ने हमजबा की अकल देई।</verse>
				<verse number="8">जस्यान हव हमच्यार में हिकाया ग्यो हे, मूँ वस्यानीस परच्यार करूँ हूँ के, दाऊद का घराणा का ईसू मसी, जीं मरिया तका मेंऊँ जी उट्या, वींपे थाँरो मन लागे।</verse>
				<verse number="9">अन ईं हव हमच्यार ने परच्यार करबा की वजेऊँ मूँ दुक जेलरियो हूँ अन एक गुनेगार के, जस्यान हाँकळा में बन्दयो तको हूँ, पण परमेसर का बचना पे कुई बन्धन कोयने हे।</verse>
				<verse number="10">अणीऊँ मूँ चुण्या तका मनकाँ का वाते हारोई जेलूँ हूँ जणीऊँ वीं भी उदार ने ज्यो ईसू मसी में हे, अन वींका हाते कदी ने खतम वेबावाळा मेमा ने पा सके।</verse>
				<verse number="11">आ हाँची बात हे, “यद्याँ आपाँ वींके हाते मरिया हाँ, तो वींके हाते पाच्छा जीवा भी।</verse>
				<verse number="12">जद्याँ आपाँ धीरज का हाते दुक जेलरिया, तो आपाँ वींके हाते राज भी कराँ। यद्याँ आपाँ वींका आड़ीऊँ मुण्डो फेर लेवा, तो वीं भी आपाऊँ मुण्डो फेर लेई।</verse>
				<verse number="13">यद्याँ आपाँ विस्वासी ने वेवा, तो भी वीं विस्वास का जोगो बण्या तका रेवे हे, काँके वीं खुदई ने फर सके हे।”</verse>
				<verse number="14">थाँरा मनकाँ ने, ईं बाताँ आद अवाड़ अन परमेसर का हामे चेतान केज्ये के, फोगट की बाताँ पे ने लड़े। अस्यान करणो हव ने हे, काँके वीं बाताँ हूणबावाळा का वाते नास की जड़ हे।</verse>
				<verse number="15">परमेसर की देकणी में खुद ने मेनत करबावाळो अस्यान को मनक बणा, जणीऊँ थने आपणाँ कामऊँ हरमा ने मरणो पड़े, पण परमेसर का हाँच का हमच्यार ने सई तरियाऊँ हिका।</verse>
				<verse number="16">मनकाँ ने परमेसरऊँ छेटी लेजाबा वाळी दनियादारी अन फोगटपणा की बाताँऊँ छेटी रे।</verse>
				<verse number="17">अस्यी बाताँ खुला घाव का जस्यान फेले हे, हुमिनयुस अन फिलेतुस अस्याईस हाँ।</verse>
				<verse number="18">वणा अस्यान केन हाँच को गेलो छोड़ दिदो के, आपणाँ ने पाछो जीवन पेल्याँई मलग्यो हे, नरई विस्वास्याँ का विस्वास को नास कर देवे हे।</verse>
				<verse number="19">पण परमेसर की पाकी नीम हाले कोयने, जिंपे आ छाप लागरी हे के, “परबू आपणाँ मनकाँ ने जाणे हे,” अन, “ज्यो कुई परबू को नाम लेवे हे, वींने बुरा कामऊँ बच्यो तको रेणो छावे।”</verse>
				<verse number="20">एक मोटा घर में हरेक तरियाँ का ठामड़ा वेवे हे, कुई टिंढका अन चिकणा गारा का बण्या तका, कुई होना अन चाँदी का, कुई खास मोको का वाते अन कुई घर में रोज काम में लेबा का वाते वेवे हे।</verse>
				<verse number="21">ज्यो खुद ने आ हारी बुरी बाताँऊँ छेटी राकी, तो वो खास काम में काम आई, काँके वणी आपणाँ खुदाखुद ने आपणाँ मालिक परमेसर का वाते दे दिदो हे, जणीऊँ वो हरेक भला काम का वाते त्यार किदो तको वेई।</verse>
				<verse number="22">जवानी की बुरी मरजीऊँ छेटी रे अन ज्यो खरा मनऊँ परबू को नाम लेवे हे वाँका हाते खुद ने धरम, विस्वास, परेम अन सान्तीऊँ रे।</verse>
				<verse number="23">फोगट अन बना मतलब की बाताँऊँ खुद ने छेटी राक, काँके थूँ खुद जाणे हे के, अणाऊँ लड़ई-जगड़ा वेवे हे।</verse>
				<verse number="24">परमेसर को दास लड़बावाळो ने, पण हाराई पे दया दिकाबावाळो, धीरज राकबावाळो अन हिक देबा जोगो वेणो छावे।</verse>
				<verse number="25">अन ज्यो विरोद करे वाँने नरमाईऊँ हमजबा वाळो वेणो छावे, कई पतो, परमेसर वाँने भी आपणी गलती मानन मापी माँगबा को मन दे देवे अन वीं भी हाँच जाण जावे।</verse>
				<verse number="26">अन वीं चेतो लगान, सेतान का जाळऊँ बंच जावे, ज्यो वाँने आपणी मरजी मानबा का वाते पकड़न राके हे।</verse>
			</chapter>
			<chapter number="3">
				<verse number="1">ओ ध्यान राको, आकरी का दनाँ में आपणाँ पे घणो अबको टेम आई।</verse>
				<verse number="2">काँके मनक मतलबी, लोबी, मेपणा करबावाळा, फाकलेट अन बेजत करबावाळा, आपणाँ बई-बापू को क्यो ने करबावाळा, दया ने करबावाळा, अधरमी वेई।</verse>
				<verse number="3">वाँका हरदा में ने तो परेम-भाव, ने दया-धरम वेई, वीं दूजाँ की बुरई करबावाळा, लड़ई करबावाळा, कल्डा मन का अन भलईऊँ दसमणी राकबावाळा वेई।</verse>
				<verse number="4">वीं धोको देबावाळा, बेपरवा, मरोड़ में रेबावाळा, परमेसर की परेमी वेबा का बजाय मोज-मस्तीऊँ परेम करबावाळा वेई।</verse>
				<verse number="5">वीं धरमीपणा को दिकावो तो करी, पण परमेसर की तागत ने ने मानी। अस्यान हिकबावाळा मनकाँऊँ खुद ने छेटी राक।</verse>
				<verse number="6">वाँका मूँ थोड़ाक हिकबावाळा मनक लोगाँ का घरे में जान कमजोर लुगायाँ ने आपणाँ बंस में करी, ज्यो आपणाँ बुरा कामाँ में अन पाप की मरजी में फंसी तकी रेई,</verse>
				<verse number="7">ईं लुगायाँ हमेस्यान वणा हिकबावाळाऊँ हिकणो तो छाई, पण हाँच कई हे, ईंने ने जाण पाई।</verse>
				<verse number="8">ईं हिकबावाळा यन्नेस अन यमब्रेस का जस्यान हे, जणा मूसा को विरोद किदो हो, वस्यानीस ईं मनक हाँच को विरोद करी, ईं अस्यान का मनक हे जणाकी अकल मरगी हे अन ईं विस्वास में ने बण्या रे सकी।</verse>
				<verse number="9">पण अबे वीं ओरी हेला ने पनप सकी, काँके जस्यान यन्नेस अन यमब्रेस की वेडी अकल हाराई का हामे अई वस्यानीस अणाकी भी आई।</verse>
				<verse number="10">पण थूँ मारी हिक, वेवार, अन जीवन का वाते मारा मकसद ने माने हे, थूँ मारो विस्वास, मारो धीरज, मारो परेम, मारी सेण करबा की तागत, मारा पे व्या जुलम, अन मारा दुक में मारे हाते रियो हे। अन्ताक्या, इकुनियम अन लुस्त्रा में ज्यो कई व्यो हो अन कई-कई दक-भरिया जुलम ने सेण किदा हाँ, वाँमें भी थूँ मारे हाते हो। पण परबू मने वणा हाराईऊँ बंचायो हो।</verse>
				<verse number="11"></verse>
				<verse number="12">ज्यो भी मनक ईसू मसी का गट-जोड़ में खरो जीवन जीवणो छावे हे, तो वींने दुक देकणो पड़े हे।</verse>
				<verse number="13">अन बुरा अन धोको देबावाळा मनक धोको देता अन खुद धोको खाता तका हेलाऊँ हेला बुरा वेता तका परा जाई।</verse>
				<verse number="14">पण थूँ वणा बाताँ पे ज्यो थें हिकी हे अन ज्याँका बारा में थने पको विस्वास हे। ओ जाणन के, थने वीं बाताँ हिकाबावाळा कूण हाँ, वणामें बण्यो तको रे।</verse>
				<verse number="15">अन बाळकपणाऊँ थूँ तो पुवितर सास्तर ने जाणे हे ज्यो ईसू मसी में विस्वास का आड़ीऊँ थने मुगती पाबा का वाते अकल दे सके हे।</verse>
				<verse number="16">हारोई पुवितर सास्तर परमेसर की आत्मा की तागतऊँ लिक्यो ग्यो हे, ज्यो हाँच की, गलती पे फटकार की, हूदारबा की, अन सई तरियाऊँ जीवन जीववा की हिक देवे हे।</verse>
				<verse number="17">अणीऊँ परमेसर को भगत हाराई भला काम करबा वाते ताकड़े अन त्यार रेवे।</verse>
			</chapter>
			<chapter number="4">
				<verse number="1">ईसू मसी राजा का रूप में आई अन हाराई जीवता अन मरिया तका को न्याव करी, वाँने अन परमेसर ने गवा मानन मूँ थने आदेस दूँ हूँ के,</verse>
				<verse number="2">परमेसर का हव हमच्यार को परच्यार कर, पलई ईंने हाराई मनक ने माने, पण ईंका केड़े भी थूँ ईंने पूरा मनऊँ करतो रे। थूँ लोगाँ ने सई कर अन वाँका पापाँ को वाँने ध्यान करान चेता। हातेई हाते वाँने उदास मती वेबा दे, वाँने सला देती दाण हमेस्यान धीरज राकज्ये।</verse>
				<verse number="3">अस्यान को टेम आरियो हे जद्याँ मनक हव हिक ने, ने हूणी, पण ईंकी अलावा वीं आपणाँ वाते अस्यान का हिकाबावाळा होद लेई, जीं वाँने वीं बाताँइस हिकाई जस्यी हूणणी वाँने हव लागे हे।</verse>
				<verse number="4">वीं हाँचऊँ छेटी वे जाई अन बना मतलब की बाताँ पे ध्यान लगाई।</verse>
				<verse number="5">थूँ सान्तीऊँ टक्यो तको रेज्ये अन दुक भोगबा का वाते त्यार रे। हव हमच्यार को परच्यार करबा का वाते घणी मेनत कर अन थाँरी जिमेदारी ने हव तरियाऊँ पुरी करज्ये।</verse>
				<verse number="6">मूँ मारो यो जीवन परमेसर की सेवा करबा का वाते दे चुक्यो हूँ। ओ वो टेम हे जद्याँ मने यो सरीर छोड़णो पड़ी।</verse>
				<verse number="7">मूँ हव तरियाऊँ लड़्यो, में मारी दोड़ पुरी करी लिदी हे अन मूँ विस्वास जोगो रियो।</verse>
				<verse number="8">अन अबे वटे परमेसर का हाते जीत को ईनाम मारी वाट नाळरियो हे, जिंने धरमी अन खरा न्याव करबावाळा परबू आकरी दन में मने देई। मने एकला नेईस ने, पण वाँ हाराई ने भी ज्यो परेम का हाते वींके परगट वेबा की वाट नाळे हे।</verse>
				<verse number="9">थूँ जट मारा नके आबा की कोसीस कर,</verse>
				<verse number="10">काँके देमास तो ईं दनियादारी का मो-माया में पड़न मने छोड़न थिस्सुलुनिक्यों नगर परोग्यो हे। क्रेसकेस गलातिया नगर में अन तीतूस दलमतिया नगर में परोग्यो हे।</verse>
				<verse number="11">मारा हाते बेस लुकोइस रिया हे। काम में तो मरकुस जोरदार खिलाड़ी हे। वे सके तो, वींने थाँरा हाते लेतो आज्ये, ताँके मारे काम में मने जेलो देवे।</verse>
				<verse number="12">तुखिकुस ने में इपिसुस नगर खन्दायो हे।</verse>
				<verse number="13">जद्याँ थूँ आवे तो त्रोआस का रेबावाळा करपुस का घरेऊँ मारो कोट, पोत्याँ अन चामड़ा का पतर ने तो खास तरियाऊँ आद राकन लेतो आज्ये।</verse>
				<verse number="14">धातु को काम करबावाळे सिकन्दर मने घणो दुक दिदो हे। परबू वींकी करणी के जस्यान वींने फळ देवे।</verse>
				<verse number="15">थूँ भी वणीऊँ हमळन रेज्ये, काँके वो आपाँ ज्यो हमच्यार हूणावाँ हाँ, वींको घणो विरोद करे हे।</verse>
				<verse number="16">पेलकी दाण कोरट में मारा बचाव में मारी मदत कणी ने किदी, पण हाराई का हाराई मने छोड़ दिदो, भलो वे के, परमेसर वणाऊँ ईंको हस्याब ने लेवे।</verse>
				<verse number="17">पण परमेसर मारा हाते ऊबारियो अन मने तागत दिदी, जणीऊँ तो मूँ ज्यो यहूदी ने हा, वणा हाराई में हव हमच्यार हुणा सक्यो अन मूँ मोत का दण्डऊँ बंचायो ग्यो।</verse>
				<verse number="18">अन परबू मने हारी बुरी बाताँऊँ बंचाई अन बंचान हरग में लेजाई। वाँकी मेमा जुग-जुग वेती रेवे! आमीन।</verse>
				<verse number="19">प्रिसकिल्‍ला, अक्‍विला अन उनेसिफुरस का घराणा ने मारे राजी-खुसी को नमस्कार केज्ये।</verse>
				<verse number="20">इरास्तुस कुरिन्तुस नगर में रेग्यो, अन त्रुफिमुस ने, में मांदकी की वजेऊँ मिलेतुस गाम मेंईस छोड़ दिदो।</verse>
				<verse number="21">हियाळाऊँ पेल्याँ-पेल्याँ आबा की पुरी-पुरी कोसीस करज्ये। युबुलुस, पदेस, लिनुस, कलोदिया अन हाराई विस्वास्याँ थने राजी-खुसी को नमस्कार क्यो हे।</verse>
				<verse number="22">परबू थाँरी आत्मा का हाते रेवे। थाँ हाराई पे परमेसर की करपा बणी तकी रेवे।</verse>
			</chapter>
		</book>
		<book number="56">
			<chapter number="1">
				<verse number="1">मूँ ईसू मसी का नामऊँ थरप्यो तको परमेसर को दास पोलुस, ओ कागद तीतूस ने लिकरियो हूँ। मने परमेसर का चुण्या तका मनकाँ ने विस्वास में बडाबा का वाते खन्दायो हे, जणीऊँ वीं हाँच ने जाणन हाँचो जीवन जीवे।</verse>
				<verse number="2">अन ओ हाँच, वीं जीवन की आस बन्दावे हे, जो कदी खतम ने वेवे हे। परमेसर कदी जूट ने बोले अन ईंको वादो विस्वास जोगा परमेसर सरुवातऊँ कर दिदो हो।</verse>
				<verse number="3">अन सई टेम पे परमेसर वीं हमच्यार ने परच्यार में परगट किदो हे, ज्यो मने हूँप्यो ग्यो अन बंचाबावाळा परमेसर की आग्याऊँ मूँ ईंको हेलो पाड़ू हूँ।</verse>
				<verse number="4">हाराई के एक जस्या विस्वास की बजेऊँ तीतूस थूँ मारो हाँचो बेटो हे। बापू परमेसर अन आपाँने बंचाबावाळा ईसू मसी में थने दया अन सान्ती मले।</verse>
				<verse number="5">क्रेता में मूँ थने ईं वाते छोड़न आयो हो के, थूँ वटे ज्यो भी काम अदूरो रेग्यो हे वींने पूरो करज्ये अन मारी सला के जस्यान हरेक गाम में परदानाँ ने जिमेदारी हूँपे।</verse>
				<verse number="6">परदानाँ ने जिमेदारी तद्याँईस हूँपी जावे, जद्याँ वीं निरदोस वेवे अन वाँके एकीस लुगई वे, वाँका बाळक विस्वासी वेवे अन बुरा काम करबावाळा ने वेवे अन आग्या ने मानबावाळा में वाँको नाम ने वेवे।</verse>
				<verse number="7">परमेसर का काम ने आपणाँ हाताँ में लेबा का वाते एक मण्डली का परदानाँ में ओ जरूरी हे के, वींमें एक भी खोट ने वेणी छावे। वीं ने तो घमण्डी वेवे, ने फटाकऊँ गुस्सो करबावाळा वेवे, नेईं पियावाळा, ने लड़ायाँ करबावाळा अन नेई रिप्या-कोड़ी का लालची वेवे।</verse>
				<verse number="8">पण वीं तो आवभगत करबावाळा अन ज्यो सई हे वणीऊँ परेम करबावाळा वे। खुद ने बंस में राकबावाळा, हुदा-हादा न्यायी, पुवितर अन नेमाँ में रेबावाळा वेवे।</verse>
				<verse number="9">वीं भी हाँचा बचना पे टक्या तका रेवे, जीं धरम-उपदेस का जस्यान सई हे। जणीऊँ वाँने खरी हिक का उपदेस देबा में अन विरोद करबावाळा को मुण्डो बन्द करबा में मदत मले।</verse>
				<verse number="10">यो ईं वाते खास हे, काँके नरई मनक हव हमच्यार का विरोदी वेन, जूटा उपदेस देन विस्वास्याँ ने भटकावे हे। मूँ खासकरन यहूदी रिति-रिवाजवाळा का बारा में केरियो हूँ।</verse>
				<verse number="11">ओ जरूरी वेग्यो हे के, वाँको मुण्डो बन्द किदो जावे, जीं ईं गलत बाताँ हिकान विस्वास्याँ का घर ने बगाड़रिया हे अन ईं हाराई नीचपणाऊँ रिप्या-कोड़ी कमावा का चकर में अस्यान करता रेवे हे।</verse>
				<verse number="12">वाँका मूँ एक परमेसर का आड़ीऊँ बोलबावाळे खुद वाँका वाते क्यो हे के, “क्रेता का रेबावाळा हमेस्यान जूटा, जंगली जनावराँ का जस्यान, आळसी अन खवगड़्या हे।”</verse>
				<verse number="13">वीं परमेसर का आड़ीऊँ बोलबावाळा की या गवई हाँची हे, ईं वजेऊँ थूँ अस्या मनकाँ ने खुब तापड़्या कर, जणीऊँ ईं हाँचा विस्वास में पाका वे जावे।</verse>
				<verse number="14">अन अणाने आग्या दे के, ईं यहूदियाँ की मनगड़त बाताँ पे अन वाँ मनकाँ की बाताँ पे ध्यान ने देवे, जीं हाँचऊँ भटकया तका हे।</verse>
				<verse number="15">पुवितर मनकाँ का वाते हारोई पुवितर हे, पण हूँगला अन बना विस्वासवाळा का वाते कईस सुद ने हे, काँके वाँको मन अन वाँकी आत्मा दुई खराब हे।</verse>
				<verse number="16">वीं परमेसर ने जाणबा को दावो तो करे हे, पण वाँका काम वाँने नकार देवे हे। वीं हूँगला अन बात ने ने मानबावाळा हे, वीं हव काम का जोगा ने हे।</verse>
			</chapter>
			<chapter number="2">
				<verse number="1">पण तीतूस, थूँ हमेस्यान मसी की हाँची हिक का हाँचा नेम हिकाया करज्ये।</verse>
				<verse number="2">भूण्डा मनकाँ ने हिक दे, ताँके वीं धीरज राकबावाळा, हमजदार अन खुद पे काबू राकबावाळा वेवे अन वीं विस्वास, परेम अन सेवा में पाका रेवे।</verse>
				<verse number="3">अस्यानीस भूड़ी लुगायाँ ने भी खरो जीवन जीवावाळी लुगायाँ की जस्यान जीवन जीणो छावे। वीं आमी-हामी करबावाळी अन पीयावाळी ने वेवे, पण हव हिक देबावाळी वेवे,</verse>
				<verse number="4">जणीऊँ वीं मोट्यार लुगायाँ ने आपणाँ बाळक अन धणीऊँ परेम करणो हिकाबावाळी वे जावे।</verse>
				<verse number="5">वीं खुद पे काबू राकबावाळी, पुवितर, भली अन आपणाँ धणी का क्या में चालबावाळी, घर ने बणाबावाळी हव लुगई वे, जणीऊँ कुई भी परमेसर का नकेऊँ आबावाळा हमच्यार का बारा में बुरा ने बोले।</verse>
				<verse number="6">अस्यानीस थूँ मोट्यार छोरा ने हमजा के, वे खुद पे काबू राकबावाळा बण्या तका रेवे।</verse>
				<verse number="7">थूँ थाँरी हारी बाताँ में हव वेवार को नमुनो बण। थाँरी हिक का वाते खरो अन हूँस्यार रे।</verse>
				<verse number="8">अस्यी मिटी बोली बोल के, जिंपे कुई आँगळी ने तोके। थाँरा दसमण हरमा मरे जणीऊँ वाँने आपणाँ बारा में बुरो केवा को मोको ने मले।</verse>
				<verse number="9">दासा ने हमजा के, वीं हरेक बाताँ में आपणाँ मालिक की आग्या मानन वाँने राजी करता रेवे। अन वाँके हामे उलटा ने बोले।</verse>
				<verse number="10">अन वीं चोरी ने करे, पण पूरा मनऊँ विस्वास के जोगा बण्या तका रेवे, ताँके वीं हरेक तरियाऊँ आपणाँ बंचाबावाळा परमेसर का बचना की मेमा बड़ावे।</verse>
				<verse number="11">परमेसर की करपा तो हाराई मनकाँ ने बंचाबा का वाते परगट वीं हे।</verse>
				<verse number="12">या करपा आपाँने हिकावे हे के, आपीं बना भगती अन दनियादारी की मरजीऊँ फरन अणी दनियाँ में खुद पे काबू राकबावाळा, धरमी अन भगती-भावऊँ जीवन जीवा।</verse>
				<verse number="13">अन आपीं वणी धन्न दन की आसऊँ वाट नाळता रेवा, जदी आपणाँ परमेसर अन आपाँने छुटकारो देबावाळा ईसू मसी की मेमा परगट वेई।</verse>
				<verse number="14">वणा आपणाँ वाते खुद ने दे दिदो, ताँके आपाँ हाराई ने पापऊँ छुड़ावे अन आपाँने खुद का वाते खरा मनक बणावे, जीं बेस हव काम करबा का वाते आगता रेवे।</verse>
				<verse number="15">अणा बाताँ ने हिकान, पूरा हक का हाते वाँको धिज्यो बन्दा अन जटे जरूत वे वटे वाँने तापड़तो रे। पण ओ ध्यान राक के, कुई थाँरी रोळ ने करे।</verse>
			</chapter>
			<chapter number="3">
				<verse number="1">थूँ मनकाँ ने आद अवाड़ के, राज करबावाळा अन अदिकारी को क्यो माने। अन हरेक तरियाँ का भला काम करबा का वाते त्यार रेवो।</verse>
				<verse number="2">वाँने केज्ये के, वीं किंकई का बारा में बुरो ने बोले, पण हाराई का हाते हव वेवार राकन हली-मलीन सान्तीऊँ रेवे।</verse>
				<verse number="3">काँके मसी ने मानबाऊँ पेल्याँ आपाँ भी बना ग्यान का, केणो ने मानबावाळा, भटक्या तका अन हरेक तरियाँ की मो-माया का गुलाम हाँ। आपणो जीवन बुरई अन मेपणाऊँ भरियो हे। अन आपाँ एक-दूजाऊँ दसमणी राकता हाँ।</verse>
				<verse number="4">पण आपाँने बंचाबावाळा परमेसर की करपा अन परेम मनक का वाते परगट करियो ग्यो,</verse>
				<verse number="5">यो ईं वाते ने व्यो के, आपाँ धरम का काम कररिया हा, पण आ वाँकी करपाइस ही के, वो आपाँने पुवितर आत्मा का आड़ीऊँ बंचावे, ज्या आपाँने धोन नुवो जनम अन नुवो जीवन देवे हे।</verse>
				<verse number="6">परमेसर आपाँने छुड़ाबावाळा ईसू मसी का आड़ीऊँ आपणाँ पे भरपुरीऊँ पुवितर आत्मा देवे हे।</verse>
				<verse number="7">वीं करपाऊँईस आपाँ परमेसर का हामे सई ठेरा हा, जणीऊँ कदी ने खतम वेबावाळा जीवन का वारिस वेवा, जिंकी आपाँ आस राका हाँ।</verse>
				<verse number="8">आ हाँची बात हे। मूँ छावूँ हूँ के, अणी मामला में थूँ खासतोर जोर देन के, जणीऊँ परमेसर पे विस्वास करबावाळा भला काम करता रेवे। ईं बाताँ मनकाँ का वाते हव अन नफा की हे।</verse>
				<verse number="9">बेकार की बाताँऊँ, वंसावल्या की गणतीऊँ, लड़ई-जगड़ाऊँ अन नेमा का बारा में लड़बाऊँ बंचन रेवो, काँके ईं बाताँ बेकार अन बना मतलब की हे।</verse>
				<verse number="10">फुट नाकबावाळा मनकाँ ने चेता अन जद्याँ वो एक दाण में ने माने तो वाँने दूजी दाण का चेता तद्याँ वीं दूजी दाण भी ने माने, तो वाँकाऊँ अलग वेजा।</verse>
				<verse number="11">थूँ ओ जाणे हे के, अस्यान का मनक हाँचऊँ भटकग्या हे अन वाँका पाप वाँने गलत साबत करे हे।</verse>
				<verse number="12">जद्याँ मूँ अरतिमास कन तुखिकुस ने थाँरा नके खन्दाऊँ। अन वाँके पूगताई थूँ फटाकऊँ मारा नके निकुपुलिस नगर में अई जाज्ये, काँके हियाळा-हियाळा में वटेईस रेवा की मनसा किदी हे।</verse>
				<verse number="13">थूँ वकील जेनास अन अपुलोस का हाते वाँका यातरा का वाते जरूत की चिजाँ बांद दिज्ये, जणीऊँ वाँने कणी भी बात की गटी-कमी ने वेवे।</verse>
				<verse number="14">आपणाँ मनकाँ ने दूजाँ की जरूत पुरी करबा का वाते, पूरा मनऊँ हव काम करबा में टेम बिताणो छावे, अन वाँने बेकार को जीवन ने जीवणो छावे।</verse>
				<verse number="15">मारा हण्डाळ्याँ का आड़ीऊँ थने नमस्कार लिकूँ हूँ। विस्वास में वेबाऊँ जीं भई आपणाँऊँ परेम राके हे, वाँने माँकी आड़ीऊँ नमस्कार केज्ये। परमेसर की दया थाँ हाराई पे बणी तकी रेवे।</verse>
			</chapter>
		</book>
		<book number="57">
			<chapter number="1">
				<verse number="1">ईसू मसी का हव हमच्यार का वाते बन्दी बण्यो मूँ पोलुस अन भई तिमुतियुस, आपणाँ खास हण्डाळ्याँ का हाते काम करबावाळो फिलेमोन,</verse>
				<verse number="2">आपणी बेन अपपिया, आपणाँ हण्डाळ्याँ अरकीपुस अन थाँके घरे भेळी वेबावाळी मण्डली ने ओ कागद लिकरिया हाँ।</verse>
				<verse number="3">आपणाँ बाप परमेसर अन परबू ईसू मसी, थाँ लोगाँ ने दया अन सान्ती देवे।</verse>
				<verse number="4">हाराई परमेसर का पुवितर मनकाँ का हाते थाँका परेम अन परबू ईसू पे थाँका विस्वास का बारा में हुणन, मूँ हरदाण परमेसर को धन्नेवाद करूँ हूँ अन परातना में थाँने आद करूँ हूँ।</verse>
				<verse number="5"></verse>
				<verse number="6">मारी परातना या हे के, थाँ थाँका विस्वास ने हव तरियाऊँ बाटबावाळा वे जावो, ताँके ज्या भलई ईसू मसी में आपणाँ हाते हे, वींने थाँ पुरी तरियाऊँ हमज सको।</verse>
				<verse number="7">काँके हे भई फिलेमोन थाँराऊँ परमेसर का पुवितर मनक घणा राजी वेग्या हे, ईं वाते थाँरा परेमऊँ मूँ घणो राजी व्यो अन मने हिम्मत मली।</verse>
				<verse number="8">ईं वाते मसी में थाँने ज्यो करणो हे वींका बारा में मूँ आदेस दे सकूँ हूँ ईंको मने अदिकार हे।</verse>
				<verse number="9">पण परेमऊँ मूँ थाँराऊँ अरज कररियो हूँ। मूँ पोलुस ज्यो अबे दानो अन ईसू मसी का हव-हमच्यार का वाते बंदी हूँ, थाँने आपणाँ धरम का बेटा उनेसिमुस का बारा में अरज कररियो हूँ ज्यो जेळ में ईसू पे विस्वास करन मारो बेटो बणग्यो हो।</verse>
				<verse number="10"></verse>
				<verse number="11">एक टेम ही, जद्याँ वो थाँरे कणी काम को कोयने हो, पण अबे वो थाँरे ने पण मारे दुयाँ के नरोई काम को हे।</verse>
				<verse number="12">मूँ वींने थाँरा नके पाछो खन्दारियो हूँ ज्यो मारो जीव को जड़ी हे।</verse>
				<verse number="13">मूँ हव हमच्यार का वाते जेल में हूँ, मूँ वींने आपणाँ नकेईस राकणो छारियो हो, ताँके वो थाँकी जगाँ में मारी सेवा करे।</verse>
				<verse number="14">पण हे फिलेमोन थाँरी हा के बना मूँ कई ने करणो छारियो हूँ ताँके थूँ ज्यो भी हव काम करे हे, वो जबरदस्तीऊँ ने पण खुद की मरजीऊँ करे हे।</verse>
				<verse number="15">वो थोड़ीक देर का वाते थाँराऊँ छेटी वेग्यो। वे सके यो ईं वाते व्यो वेई, ताँके वो एक दास का जस्यान ने, पण वणीऊँ भी हेलो एक लाड़ला भई के जस्यान हरदाण थाँरा नकेईस रे सके। एक मनक का रूप में अन परबू में एक भई का रूप में वो मारो लाड़ला भई हे बेस मारोईस ने पण खासतोरऊँ थाँरो भी हे।</verse>
				<verse number="16"></verse>
				<verse number="17">यद्याँ थूँ मने आपणाँ हाते काम करबावाळो हण्डाळ्यो हमजे हे तो जस्यान मारी आवभगत करे वस्यानीस ईंकी भी करज्ये।</verse>
				<verse number="18">अन यद्याँ वणी थाँरो कई खोटो किदो वे कन वणी पूँ थाँरे कई लेणो वे, तो मारा खाता में लिक दिज्ये।</verse>
				<verse number="19">मूँ पोलुस खुद लिकूँ हूँ के, मूँ खुद वो नकसाण भर देऊँ। मने यो केवा की जरुरत कोयने हे के, थूँ आपणाँ जीवन तईं मारो करजदार रेई।</verse>
				<verse number="20">हे भई मूँ परबू में थाँराऊँ ओ नफो लेणो छारियो हूँ। मसी में मारा हरदा ने राजी कर दे।</verse>
				<verse number="21">मूँ विस्वास करूँ हूँ के, थूँ मारी आग्या को पालण करे हे। थाँरा पे यो विस्वास राकन ओ कागद मूँ थने लिकरियो हूँ। मूँ जाणूँ हूँ के, मूँ जतरो थाँराऊँ केरियो हूँ वणीऊँ भी थूँ हेलो करी।</verse>
				<verse number="22">एक ओरी बात हे, मारा वाते एक ओवरो त्यार राक, मने आस हे के, थाँकी परातनाऊँ मूँ थाँका नके पाछो जट आ जाऊँ।</verse>
				<verse number="23">इपफरास ज्यो मसी ईसू का वाते मारा हाते जेळ में हे। वो थाँने आद कररियो हे।</verse>
				<verse number="24">मारा हण्डाळ्याँ मरकुस, अरिस्तखुस, देमास अन लूका भी थाँने आद करे हे।</verse>
				<verse number="25">थाँ हाराई की आत्मा पे परबू ईसू मसी को अनुगरे वेतो रेवे। आमीन।</verse>
			</chapter>
		</book>
		<book number="58">
			<chapter number="1">
				<verse number="1">परमेसर पुराणा टेम में आपणाँ आड़ीऊँ बोलबावाळा का जरिये नरई मोका पे नरी तरेऊँ आपणाँ बड़ाबाऊँ बाताँ किदी ही।</verse>
				<verse number="2">पण अबे अणा आकरी दनाँ में परमेसर आपणाँ बेटा का जरिये आपाऊँ बाताँ किदी, अन वणीऊँस वणा ईं बरमाण्ड की रचना किदी। अन पछे वींने हारी चिजाँ पे अदिकारी बणायो।</verse>
				<verse number="3">वो बेटो परमेसर की मेमा को उजितो हे अन जस्यान परमेसर का लकण हे, वस्यानीस वींका भी लकण हे। वो हारी चिजाँ ने आपणाँ जबरा बचनाऊँ हमाळी राके हे। मनकाँ का पापाँ ने माप करन वो हरग में जान मेमामय परमेसर का जीमणे पाल्डे बेटग्यो हे।</verse>
				<verse number="4">वो ईं तरियाँ हरग-दुताँ मेंऊँ मोटो बणग्यो, जतरो वो वाँका नामऊँ मोटो हे, ज्यो वणी बापोती में पायो हे।</verse>
				<verse number="5">काँके परमेसर हरग-दुताँ मेंऊँ किंने भी कदी अस्यान ने क्यो के, “थूँ मारो बेटो हे, आज मूँ थाँरो बाप बण्यो हूँ।” अन ने कदी वणी कस्या हरग-दुतऊँ यो क्यो के, “मूँ वींको बापू वेऊँ, अन वो मारो बेटो वेई।”</verse>
				<verse number="6">अन पछे जदी परमेसर आपणी एकलोती ओलाद ने दनियाँ में खन्दावे तो वीं केवे हे के, “परमेसर का हाराई हरग-दुत वींकी भगती करे।”</verse>
				<verse number="7">अन हरग-दुताँ का बारा में वीं अस्यान केवे हे के, “वीं आपणाँ हरग-दुताँ ने आत्मा अन आपणाँ दासा ने हगलती तकी वादी बणावे हे।”</verse>
				<verse number="8">पण आपणाँ बेटा का बारा में केवे हे के, “हो परमेसर, थाँकी गादी हमेस्यान रेई, थाँ थाँका राज का मनकाँ पे न्याव का हाते राज करो।</verse>
				<verse number="9">थूँ धरमीऊँ परेम अन आग्याने कोयने मानबावाळाऊँ दसमणी राकी। ईं वाते परमेसर, थाँरा परमेसर थने चुण्यो हे अन थने मान-समान को खुब आणन्द दिदो। थने थाँरा हण्डाळ्याऊँ घणो हेलो दिदो।”</verse>
				<verse number="10">परमेसर यो भी केवे हे, “हो परबू, जद्याँ दनियाँ की सरुवात वेरी ही, तो थाँ धरती की नीम नाकी, अन हरग थाँका हाताँ की कारीगरी हे।</verse>
				<verse number="11">वी तो नास वे जाई, पण थूँ हमेस्यान बण्यो तको रेई। अन वीं हाराई गाबा के जस्यान जूना वे जाई।</verse>
				<verse number="12">अन थूँ वाँने चादरा के जस्यान लपेटी, अन वी गाबा के जस्यान बदल जाई, पण थूँ जस्यो हे, वोईस हमेस्यान रेई, अन थाँरा जीवन को अन्त कदी ने वेई।”</verse>
				<verse number="13">परमेसर कदी भी कणी हरग-दुत ने अस्यान ने क्यो के, “थूँ मारे जीमणे पाल्डे बेट जा, जद्याँ तईं मूँ थाँरा दसमणा ने, थाँरा पगाँ का बाजोट ने कर दूँ।”</verse>
				<verse number="14">तो पछे हरग-दुत कई हे? कई वीं हाराई हरग-दुत छुटकारो पाबावाळा मनकाँ की सेवा करबा का वाते खन्दई तकी आत्मा ने हे?</verse>
			</chapter>
			<chapter number="2">
				<verse number="1">आपाँ ज्यो भी बात हूणी हे वणा बात पे आपाँने मन लगाणो छावे, जणीऊँ आपाँ भटकाँ कोयने।</verse>
				<verse number="2">अन हरग-दुत ज्यो हमच्यार दिदो हो, वो पको हे। अन क्यो ने मानबावाळा ने अन हरेक नेम तोड़बावाळा ने ठीक-ठीक दण्ड दिदो ग्यो।</verse>
				<verse number="3">तो पछे आपाँ कस्यान बंच सका? यद्याँ आपाँ ईं मान छुटकाराऊँ बेपरवा वेवा। ईं छूटकारा को पेलो हमच्यार परबू का आड़ीऊँ दिदो ग्यो अन जणा ईं हेला ने हुण्यो, वाँने ईंने आपणाँ वाते ईंने हाँचो साबत किदो हे।</verse>
				<verse number="4">अन परमेसर भी मोटा-मोटा निसाण अन चमत्कारऊँ अन जोरावर कामाँऊँ अन आपणी मनसाऊँ दिदा तका पुवितर आत्मा का वरदानऊँ, वणा ईंने साबत भी किदो हे।</verse>
				<verse number="5">आबावाळी दनियाँ की ज्यो भी बाताँ आपाँ करा हा, वणापे राज करबा का वाते परमेसर हरग-दुताँ ने अदिकार कोयने दिदो हे।</verse>
				<verse number="6">पण सास्तर में कणी कटे अस्यान क्यो हे के, “मनक कई हे ज्यो थूँ वाँने आद करे? मनक को पूत कई हे जिंकी थूँ देकभाळ करे हे?</verse>
				<verse number="7">अन थाँ मनकने हरग-दुतऊँ थोड़ोक किइस कम बणायो हे। थूँ वींके माता पे मेमा अन आदर को मुकट पेरायो हे,</verse>
				<verse number="8">अन वींका हाताँ में आपणाँ हाराई अदिकार दे दिदा।” परमेसर हारोई वींके अदिकार में कर दिदो अन आपणाँ नके कई भी ने छोड़्यो ज्यो वींके अदिकार में ने हो। तद्याँ भी आजकालाँ आपाँ वींके अदिकार में कई ने देका हा।</verse>
				<verse number="9">पण आपाँ यो देकाँ हा के, वीं ईसू जाँने थोड़ीक टेम का वाते हरग-दुताऊँ रेटे कर नाक्या हा, अबे वींने मेमा अन आदर को मुकट पेरायो ग्यो हे, काँके वणी मोत को दुक जेल्यो हे। ताँके परमेसर की करपाऊँ हरेक मनक का वाते मोत को हवाद चाके।</verse>
				<verse number="10">हारी चिजाँ परमेसर का वाते हे अन हारोई वींका आड़ीऊँ हे। परमेसर ने वोईस हव लाग्यो के, नरई बाळकाँ ने आपणी मेमा में लेजाबा का वाते ईसू ने दक का जरिये पाको बणावे। ईसू वणा बाळकाँ को मुगतीदाता हे।</verse>
				<verse number="11">काँके पुवितर करबावाळो ईसू अन पुवितर वेबावाळा मनक हे, वीं हाराई एकीस परवार का हे। ईं वाते ईसू वाँने आपणाँ भई केता तका हरमा ने मरे हे।</verse>
				<verse number="12">अन वो केवे हे के, “मूँ थाँका नाम को हेलो आपणाँ भायाँ में पाड़ू, सबा का बंच में थाँकी मेमा गाऊँ।”</verse>
				<verse number="13">अन वणी यो भी क्यो, “मूँ वींको विस्वास करूँ।” अन वीं ओरी केवे हे के, “मूँ अटे हूँ, अन वीं ओलाद जाँने परमेसर मने दिदी हे, वीं मारा हाते हे।”</verse>
				<verse number="14">काँके ओलाद माँस अन लुई की ही। ईं वाते वो भी वाँके अणी मनकपणा में भागी वेग्यो, ताँके आपणी मोतऊँ सेतान को नास कर सके, जिंका नके मारबा की तागत हे।</verse>
				<verse number="15">जतरा मोत की दरपणी में पूरा जीवन में गुलाम हे, वाँने छूड़ई ले।</verse>
				<verse number="16">काँके हाँची में वो हरग-दुताँ की मदत ने करे हे, पण अबराम का बंस की करे हे।</verse>
				<verse number="17">ईं वाते वींने हरेक बात में मनकाँ का जस्यानीस बणायो ग्यो हो, जणीऊँ वो परमेसर की सेवा करबा का वाते दया करबावाळो अन विस्वास जोगो मायाजक बणे। ताँके मनकाँ का पापाँ का मापी वाते बली हो सके।</verse>
				<verse number="18">काँके खुद ईसू वी टेम में जद्याँ वींकी परिकसा लिदी जारी ही, दुक भोग्यो हो, ईं वाते अबे ज्याँकी परिकसा लिदी जारी हे, वो वाँकी मदत कर सके हे।</verse>
			</chapter>
			<chapter number="3">
				<verse number="1">हो पुवितर भायाँ, थाँ ज्यो हरग का बलावा में भागीदार हो, वीं थरप्या तका अन मायाजक ईसू पे ध्यान लगावो, जिंने आपीं मानाँ हा।</verse>
				<verse number="2">जस्यान परमेसर का काम में मूसो विस्वास जोगो हो, वस्यानीस ईसू भी, जिंने परमेसर थरप्यो हे, वो वाँका वाते विस्वास जोगो हे।</verse>
				<verse number="3">काँके जस्यान घर बणाबावाळा ने घरऊँ हेलो मान दिदो जावे हे, वस्यानीस ईसू ने भी मूसाऊँ हेला मान के जोगो मान्यो ग्यो हो।</verse>
				<verse number="4">हरेक घर ने कुई न कुई बणावे हे, पण परमेसर तो हारी चिजाँने बणाबावाळा हे।</verse>
				<verse number="5">परमेसर का हाराई घराणा में मूसो एक सेवा करबावाळा के जस्यान विस्वास के जोगो मान्यो ग्यो। वो वीं बात का वाते गवा हो, जीं परमेसर का आड़ीऊँ बोली जाबावाळी ही।</verse>
				<verse number="6">पण परमेसर का घराणा में मसी तो एक बेटा का रूप में विस्वास करबा के जोगो हे, अन यद्याँ आपाँ हिम्मत राका अन वीं आस पे विस्वास बण्यो तको राका हा, तो आपींइस वींको घराणो हा।</verse>
				<verse number="7">ईं वाते पुवितर आत्मा केवे हे के, “यद्याँ थाँ आज परमेसर की अवाज हुणो।</verse>
				<verse number="8">थाँ थाँका मन ने थाँका बड़ाबा का जस्यान गाटो मती करो। जस्यान थाँका बड़ाबा बगावत की टेम करता हा। जस्यान वणा परिकसा का दनाँ में जंगल में किदो हो।</verse>
				<verse number="9">जटे थाँका बड़ाबा चालीस वरा तईं मारा काम देक्याँ तद्याँ भी मारा धीरज ने तरगास्यो अन परक्यो।</verse>
				<verse number="10">ईं वाते मूँ वीं टेम की पिड़ीऊँ गुस्सा में रियो अन क्यो हो के, ‘अणाको मन हमेस्यान भटक्यो तको रेई, अन ईं मारो गेलो जाणेई कोनी।’</verse>
				<verse number="11">तद्याँ में गुस्सा में आन ईं होगन खादा हा के, ‘वीं कदी भी मारी रईम्बावाळी जगाँ में ने जा सकी।’”</verse>
				<verse number="12">हो भायाँ, हूँस्यार रो, कटे थाँकामूँ किंके मन में बुरई अन अविस्वास ने आ जावे, ज्यो थाँने जीवता परमेसरऊँ छेटी कर दे।</verse>
				<verse number="13">जद्याँ तईं यो आज को दन केवावे हे, तद्याँ तईं थाँ रोज एक दूजाँ ने धिज्यो बंदाता रेवो, ताँके थाँकामूँ कुई भी पाप का धोका में पड़न आपणो मन गाटो ने करे।</verse>
				<verse number="14">यद्याँ आपीं अंत तईं आपणाँ पेला विस्वास में मजबूत रेवा हा, तो आपीं मसी में भागीदार वे जावा हा।</verse>
				<verse number="15">जस्यान क्यो भी ग्यो हे के, “यद्याँ आज थाँ परमेसर की अवाज हुणो, तो आपणाँ मन ने गाटो मती करज्यो, जस्यान बगावत की टेम में किदो हो।”</verse>
				<verse number="16">वीं कूण हा जणा हुण्यो अन बगावत किदी, कई वी वेईस ने हा, ज्याँने मूसे मिसरऊँ बंचान बारणे काड़्या हा।</verse>
				<verse number="17">परमेसर चालीस वरा तईं कणा मनकाँ पे गुस्सा में रिया। कई वणापे ने जणा पाप किदो हो, अन वाँकी लासा काकड़ में पड़ी री ही।</verse>
				<verse number="18">परमेसर किंका वाते होगन खादा हा के, वीं रईम्बावाळी जगाँ में ने जा सकी? कई वी वे ने हा, जणा वाँकी आग्या को पाळन ने किदो हो।</verse>
				<verse number="19">ईं तरियाँ आपाँ देका हा के, वीं आपणाँ बना विस्वास के मस, रईम्बावाळी जगाँ में ने जा सक्या।</verse>
			</chapter>
			<chapter number="4">
				<verse number="1">ईं वाते जद्याँ वींके रईम्बावाळी जगाँ में आबा को वादो अबाणू तईं हे, तो आपाँने ध्यानऊँ रेणो छावे, अस्यान ने वे के, थाँकामूँ कुई भी वणीऊँ चूक जावे।</verse>
				<verse number="2">काँके आपाँने वाँके जस्यानीस हव हमच्यार हुणायो ग्यो हे, पण हुण्या तका बचनऊँ वाँने कई नफो ने व्यो, काँके वीं हूणबावाळा वींने विस्वास के हाते ने हुण्यो हो।</verse>
				<verse number="3">अबे देको, आपीं ज्यो विस्वासी हा, वीं रईम्बावाळी जगाँ में जा सक्या हा। जस्यान के परमेसर भी क्यो हो, “में गुस्सा में अणीऊँइस होगन खान क्यो हो के, ‘वीं कदी भी मारी रईम्बावाळी जगाँ में ने जा सकी।’” जद्याँ के, दनियाँ की रचना के टेमऊँइस वींको काम पूरो वेग्यो हो।</verse>
				<verse number="4">काँके हातवे दन का बारा में वणी सास्तर में कटे यो क्यो हो के, “परमेसर हातवे दन आपणाँ हाराई काम ने पूरो करन रईम्बो लिदो।”</verse>
				<verse number="5">अन वटे वणी पाछो यो क्यो हे के, “वीं कदी भी मारी रईम्बावाळी जगाँ में ने जा सकी।”</verse>
				<verse number="6">ज्याँने पेल्याँ हव-हमच्यार हुणायो ग्यो हो, वीं आग्याने ने मानन रईम्बावाळी जगामें ने जा सक्या हा, ईं वाते अबाणू भी थोड़ाक मनकाँ का वाते रईम्बावाळी जगाँ को कमाड़ खुल्यो तको हे।</verse>
				<verse number="7">ईं वाते परमेसर पछे एक खास दन ने ठेरान अन वींको नाम दिदो, “आज” थोड़ाक वरा केड़े दाऊदऊँ परमेसर वीं दन का बारा में सास्तर में बतायो हे, जिंका बारा में पेल्याँ क्यो हो के, “यद्याँ थाँ आज परमेसर की अवाज हुणो, तो आपणाँ मन ने गाटो मती करज्यो।”</verse>
				<verse number="8">अन यद्याँ यहोसु वाँने रईम्बावाळी जगाँ में लातो, तो वींका केड़े परमेसर ने कस्या दूजाँ दन का बारा में केवा की जरुतई ने वेती।</verse>
				<verse number="9">ईं वाते जाण लो, परमेसर का मनकाँ का वाते एक अस्यो रईम्बो वाट नाळरियो हे, जस्यो हातवे दन परमेसर रईम्बो लिदो हो।</verse>
				<verse number="10">काँके ज्यो भी परमेसर का रईम्बा में आयो हे, वणी आपणाँ करमाऊँ रईम्बो पायो हे। जस्यान परमेसर आपणाँ कामाँ ने पूरा करन रईम्बो लिदो हो।</verse>
				<verse number="11">ईं वाते आवो, आपाँ भी रईम्बावाळी जगाँ में जाबा का वाते कोसीस करा, कटे अस्यान वे के, कुई मनक वाँके जस्यान आग्याने ने मानन वीं रईम्बावाळी जगाऊँ चूक जावे।</verse>
				<verse number="12">परमेसर का बचन तो जीवता अन काम करबावाळा हे, वीं कस्यी तीकी तरवारऊँ भी तिका हे। अन परमेसर को बचन पराण, आत्मा, हन्ट अन गुदा ने अलग करन आर-पार वेवे हे अन मन की मनसा अन बच्यार ने जाँचे हे।</verse>
				<verse number="13">दनियाँ की कस्यी भी चीज परमेसरऊँ हपी तकी ने हे, वाँकी आक्याँ का हामे हारी चिजाँ खुली अन बना परदा की हे। वाँका हामे आपाँने आपणो लेको देणो हे।</verse>
				<verse number="14">ईं वाते परमेसर को बेटो ईसू एक अस्यो मोटो मायाजक हे, जीं हरग में ग्यो, तो ज्याँ बात आपीं मानाँ हा, वींमें आपाँने मजबूत रेणो छावे।</verse>
				<verse number="15">काँके आपणाँ नके ज्यो मायाजक हे, वो अस्यो ने हे ज्यो आपणी कमजोरी ने मेसूस ने कर सके। वो हारी बाताँ में आपणे जस्यान परक्यो ग्यो अन बना पाप को निकळ्यो।</verse>
				<verse number="16">ईं वाते आवो, आपीं हिम्मत का हाते परमेसर की दया की गादी का आड़ी चाला, ताँके आपाँ पे दया वे अन करपा पावा, ज्या जरूत की टेम में आपणी मदत करे।</verse>
			</chapter>
			<chapter number="5">
				<verse number="1">हरेक मायाजक मनकाँ मेऊँइस चुण्यो जावे हे ज्यो बाताँ परमेसर का वाते मनकाँ आड़ीऊँ किदी जावे हे, वाँ वाते वो ठेरायो जावे हे, ताँके भेंट अन पापबली चड़ाया करे।</verse>
				<verse number="2">काँके वो खुद भी कमजोरी का काबू में हे, ईं वाते वो बना हमज्या अन भटक्या तका का हाते नरमाईऊँ वेवार कर सके हे।</verse>
				<verse number="3">ईं वाते जस्यान वो लोगाँ का पापाँ का वाते बली चड़ावे हे वस्यानीस वो आपणे वाते भी चड़ावे।</verse>
				<verse number="4">अन यो मायाजक बणबा को आदर कुई भी अपणेआप ने लेवे, पण यो तो परमेसर का बलावाऊँ दिदो जावे हे जस्यान परमेसर हारून ने बलायो हो।</verse>
				<verse number="5">अणी तरियाँ मसी मायाजक बणबा की मेमा ने खुद गरण ने किदी, पण परमेसर वींने क्यो, “थूँ मारो बेटो हे, आज मूँ थाँरो बाप बण्यो हूँ।”</verse>
				<verse number="6">वो दूँजी जगाँ भी वीं केवे हे, “थूँ मलिकिसिदक के रिती का जस्यान हमेस्यान का वाते याजक हे।”</verse>
				<verse number="7">ईसू अणी धरती का जीवन में ज्यो वींने बंचा सकतो हो, वणीऊँ जोरऊँ हाको करतो तको अन रोते तके अरज अन परातना किदी ही अन नमरता अन भगती का मस वींकी हुण लिदी गी ही।</verse>
				<verse number="8">ईसू परमेसर को छोरा हो, तद्याँ भी वो दुक जेलन वींकी आग्या को पालण करणो हिक्यो।</verse>
				<verse number="9">अन एक दन पाको बणन वाँ हाराई का वाते ज्यो वींकी आग्या को पालण करे हे, वो वाँके अनंत छुटकारो को गेलो बणग्यो।</verse>
				<verse number="10">अन परमेसर वींने मलिकिसिदक की रिती के जस्यान मायाजक बणायो।</verse>
				<verse number="11">ईंका बारा में केबा का वाते माकाँ नके नरोई हे, पण ईंका बारा में केणो घणो अबको हे, काँके थाँ हमजबा में धीमा हो।</verse>
				<verse number="12">अबाणू तईं तो थाँने हिक देबावाळा बण जाणो छावतो हो, पण थाँने अबाणू भी एक अस्या मनक की जरूत हे ज्यो थाँने सरूऊँ परमेसर की हिक की सरुवात की बाताँ हिकावे। थाँके तो अबाणू रोटी ने, बेस दूद की जरूत पड़री हे।</verse>
				<verse number="13">काँके दूद पिबावाळा छोरा ने तो धारमिकता का बचन की पेचाण ने वेवे, काँके वो बाळक हे।</verse>
				<verse number="14">पण रोट्याँ तो मोठ्याराँ का वाते वेवे हे जणा नत नेम राकन खुद ने त्यार करन भला-बुरा की पेचाण करणो हिक लिदो हे।</verse>
			</chapter>
			<chapter number="6">
				<verse number="1">ईं वाते आवो, मसी की हिक की सरुआत की बाताँ ने छोड़न आपाँ पाका वेबा का वाते आगे बड़ता जावा। अन आपाँ सरुआत की हिक की नीम पाच्छी ने नाका, जस्यान के, मोत का आड़ी लेजाबावाळा कामाँऊँ मन फेरणो, अन परमेसर पे विस्वास करणो,</verse>
				<verse number="2">अन बतिस्मा की हिक, माता पे हात मेलणो, मरिया तका को पाछो जी उटणो अन अंत को न्याव।</verse>
				<verse number="3">यद्याँ परमेसर छाई, तो आपीं योईस कराँ।</verse>
				<verse number="4">काँके जणा लोगाँ एक दाण उजितो पा लिदो हे, अन जणा हरग का वरदान को हवाद चाकी लिदो हे अन जीं पुवितर आत्मा का भागीदार वेग्या हे।</verse>
				<verse number="5">अन परमेसर का हव बचन अन आबावाळा जुग की तागत को हवाद चाक लिदो हे।</verse>
				<verse number="6">यद्याँ ईं मनक भटक जावे, तो अणाको मन फेरान पाच्छा परमेसर का गेला पे लाणा घणा अबका हे। काँके ईं परमेसर का बेटा ने आपणाँ वाते पाछो हूळी पे चड़ावे हे अन वींने परगट करन वींको अपमान करे हे।</verse>
				<verse number="7">काँके वाँ जगाँ काँटा अन चारो पेदा करे हे तो बेकार हे अन वींने हराप दिदो जाबावाळो हे। आकरी में वींने बाळ दिदी जावे हे। पण परमेसर वीं जगाँ ने आसीस देवे हे ज्या बरका का पाणी ने सोक लेवे हे अन हाकबावाळा करसाण का नफा का वाते हव हाक पेदा करे हे।</verse>
				<verse number="8"></verse>
				<verse number="9">पण हो मारा भायाँ, माँ ईं बाताँ केवा हाँ, तद्याँ भी थाँका बारा में माँ अणीऊँ बड़िया बाताँ को भरोसो करा हाँ, जीं मुगती का बारा में हे।</verse>
				<verse number="10">काँके परमेसर अन्यायी ने हे, के थाँका काम अन वीं परेम ने भुल जावे, ज्यो थाँ वींका नाम का वाते बतायो हे के, थाँ पुवितर लोगाँ की सेवा-चाकरी किदी अन कररिया हो।</verse>
				<verse number="11">पण माँ घणो छावाँ हाँ के, थाँकामूँ हरेक जणो अंत तईं पूरो मन लगान अस्यान करतो रेवे, ताँके थाँकी आस पुरी वे जावे।</verse>
				<verse number="12">माँ यो ने छावाँ हाँ के, थाँ आळसी बण जावो, पण वाँके जस्यान चालो, जीं विस्वास अन धिज्या का हाते वणा चिजाँ ने पारिया हे, ज्याँको परमेसर वादो किदो हो।</verse>
				<verse number="13">जद्याँ परमेसर अबरामऊँ वादो किदो हो, तद्याँ वणा खुदऊँ मोटो ओरी कुई ने हो, जिंका होगन खई सके। ईं वाते वणा आपणाँ खुद का होगन खान क्यो,</verse>
				<verse number="14">“मूँ हाँची में थने घणी आसीस देऊँ अन थाँरा वंस ने बड़ातो जाऊँ।”</verse>
				<verse number="15">अणी तरियाँ धीरज का हाते वाट नाळन अबराम वो पायो, जिंको परमेसर वादो किदो हो।</verse>
				<verse number="16">मनक तो आपणाँऊँ कणी मोटा का होगन खावे हे अन वणीऊँ वाँके किदी तकी बात पाकी वेवे हे अन वणाके हाराई विवाद को फेसलो वेवे हे।</verse>
				<verse number="17">परमेसर खुद का होगनऊँ वादा का वारिस ने या बात ओरी साप साप करणी छाया हा के, वीं आपणो बचन कदी ने टाळी। अस्यान वणा होगनऊँ वादा ने पको किदो।</verse>
				<verse number="18">वाँको वादो अन होगन जीं कदी भी बदल ने सके हे अन ज्याँका बारा में परमेसर कदी जूट ने के सके हे। ईं वाते आपाँ ज्यो परमेसर का नके रकवाळी पाबा का वाते आया हे अन आपीं घणी हिम्मत राकन ज्यो आस आपणाँ हामें हे, वींने ठामी राका हाँ।</verse>
				<verse number="19">वाँ आस आपणाँ जीवन का वाते अस्यो लंगर हे ज्यो एक जगाँ पाको हे ज्यो हाली ने सके हे। अन आपणी आस का वजेऊँ आपाँ अस्यान का हा, मानो आपाँ परमेसर की वीं जगाँ में पराग्या, जटे मायाजकइस जा सके हे, ज्या परदाऊँ ढाकी तकी हे।</verse>
				<verse number="20">जटे ईसू आपणाँ आड़ीऊँ आपाऊँ पेली पोछ्याँ हे। वीं मलिकिसिदक की रिती के जस्यान हमेस्यान का वाते मायाजक बणग्या।</verse>
			</chapter>
			<chapter number="7">
				<verse number="1">यो मलिकिसिदक सालेम को राजा हो अन मान परमेसर को याजक हो। जद्याँ अबराम च्यार राजावाँ ने हरान पाछो आरियो हो, वीं दाण यो याजक अबरामऊँ मल्यो अन वींने आसिरवाद दिदो।</verse>
				<verse number="2">अन अबराम वींने वणा हाराई मूँ ज्यो युद में जीत्यो हो, वींको दसवो भाग दिदो। मलिकिसिदक का नाम को पेलो अरत हे के, “धारमिकता को राजा” अन वो सालेम को राजा हो, ईंको अरत हे, “सान्ती को राजा।”</verse>
				<verse number="3">वींका बापू अन वींकी माँ कन पुरवजाँ को कई लेको ने मले हे, वींके जनम अन मोत को भी कटे ने लिक्यो तको हे। परमेसर का बेटा का जस्यान वो हमेस्यान का वाते याजक बण्यो तको हे।</verse>
				<verse number="4">अबे ईं बात पे चेतो लगावो के, वो कतरो मान आदमी वेगा, जिंने आपणाँ वंस को खास पुरवज अबराम भी लड़ाई में जीतन ज्यो लायो वींको दसवो भाग दिदो हो।</verse>
				<verse number="5">अन देको मूसा का नेमा के जस्यान लेवी बंस का याजक बणे हे। अन वाँने मनकाँऊँ मतलब यहूदी भई-बन्दाऊँ वेवस्ता का जस्यान दसवो भाग लेवा की आग्या मली हे, जद्याँ के वीं खुद भी अबराम का बंस का हे।</verse>
				<verse number="6">पछे भी मलिकिसिदक ज्यो लेवी बंस को ने हो, अबरामऊँ दसवो भाग लिदो। अन वणी अबराम ने आसिरवाद दिदो, जिंका नके परमेसर का वादा हा।</verse>
				<verse number="7">ईंमें कई सक ने के, मोटो फोरा ने आसिरवाद देवे हे।</verse>
				<verse number="8">अन जटा तईं याजक की बात हे तो, दसवो भाग भेळो करबावाळा याजक मनकाँ का जस्यानीस हे जीं मरे हे। पण मलिकिसिदक का बारा में सास्तर केवे हे के, वो अबाणू भी जीवतो हे।</verse>
				<verse number="9">ईं वाते आपाँ अस्यान भी के सका हा के, जीं लेवी दसवो भाग लेवे हे, वीं आपणाँ बड़ाबा अबराम का जरिये दसवो हिस्यो मलिकिसिदक ने दिदो हो।</verse>
				<verse number="10">काँके जद्याँ मलिकिसिदक लेवी बंस का पेला मनक अबरामऊँ मल्यो, वीं दाण तईं तो लेवी बंस ने निकळ्यो हो। पण जिंमेंऊँ वो बंस निकळ्यो हो, वाँको बड़ाबा अबरामईस हो।</verse>
				<verse number="11">लेवी के याजकपणा के आदार पे पुराणा टेम में परमेसर इजराएल का मनकाँ ने मूसा का नेम दिदा। पण लेवी बंस को याजकपणो परमेसर की नजरा में मनकाँने खरा ने बणा सक्यो। ईं वाते परमेसर ने दूजाँ याजकने खन्दाबा की जरूत पड़ी, वो याजकपणो लेवी बंस का याजक हारून का याजकपणा का जस्यान ने हो। पण वींको याजकपणो मलिकिसिदक की रिती का जस्यान हो।</verse>
				<verse number="12">जद्याँ याजकपणो बदले जावे हे तद्याँ नेमा में भी बदलवा वेणो जरूरी हे।</verse>
				<verse number="13">काँके जिंका बारा में ईं बाताँ किदी गी हे, वो दूँजी गोत को हो, अन वीं गोत मेंऊँ कणी भी मनक वेदी की कदी सेवा-चाकरी ने किदी।</verse>
				<verse number="14">काँके यो तो पाको हे के, आपणाँ परबू यहूदा गोत का हा। अन मूसे ईं गोत मेंऊँ कुई याजक वेई अणी बारा में कई ने क्यो हो।</verse>
				<verse number="15">ज्यो कई आपाँ क्यो हे, वो भी पाको हे, मलिकिसिदक के जस्यो एक दूजो याजक परगट वेवे हे।</verse>
				<verse number="16">वो मनकाँ का नेमा अन आग्या का आदार पे कोयने, पण नास ने वेबावाळा जीवन की तागत के आदार पे याजक बण्यो हे।</verse>
				<verse number="17">काँके वींका बारा में सास्तर में या गवई दिदी गी हे के, “थूँ मलिकिसिदक का रिती जस्यान हमेस्यान को याजक हे।”</verse>
				<verse number="18">पुराणी आग्या ईं वाते रद वेगी ही, काँके वाँ कमजोर अन बेकार ही।</verse>
				<verse number="19">काँके मूसा का नेमा किंने भी पूरो सिद ने किदो, पण एक बड़िया आस की हेंद-पेचाण करई हे, जणीऊँ आपीं परमेसर का नके जा सका हाँ।</verse>
				<verse number="20">ईंवातेइस परमेसर ईसू ने होगन खान मायाजक बणायो हो। जद्याँ के दूजाँ ने बना होगन खान मायाजक बणाया हा।</verse>
				<verse number="21">पण ईसू तद्याँ होगन का हाते याजक बण्या हा, जद्याँ परमेसर वणीऊँ क्यो हो, “परबू होगन खादा हे, ‘थूँ हमेस्यान याजक बण्यो रेई।’ अन वो अणीऊँ आपणो मन कदी ने बदली।”</verse>
				<verse number="22">ईं होगनऊँ ईसू एक ओरी हव करार की गारन्टी देबावाळा बणग्या हे।</verse>
				<verse number="23">अस्या तो नरई याजक बण्या हा, जणा ने मोत आपणाँ पद पे ने बण्या तका रेवा दिदा।</verse>
				<verse number="24">पण ईसू हमेस्यान हे, ईं वाते वाँको याजकपणो भी हमेस्यान हमेस्यान बण्यो तको रेई।</verse>
				<verse number="25">अन ज्यो वणीऊँ परमेसर हुदी जावे हे, वीं वाँने पूरो छुटकारो देवा का वाते ताकड़े हे, काँके वो वाँका वाते अरज करबा का वाते हमेस्यान जीवे हे।</verse>
				<verse number="26">अस्या मायाजकइस आपणी जरूत ने पुरी कर सके हे, जी पुवितर हे, बना दोस का वेवे, सुद वे, पापी मनकाँऊँ अलग हे, हरगऊँ भी ऊँचे उटायाग्या वेवे।</verse>
				<verse number="27">ज्याँका वाते दूजाँ मोटा याजकाँ के जस्यान यो जरूरी ने हे के, वीं रोज पेल्याँ आपणाँ पापाँ का वाते अन पछे लोगाँ का पापाँ का वाते बली चड़ावे। वणी तो हमेस्या हमेस्या का वाते मनकाँ का पापाँ का वाते आपणाँ खुद ने बली कर दिदो।</verse>
				<verse number="28">काँके मूसा का नेम तो कमजोर मनकाँ ने मायाजक बणावे हे, पण वीं होगन जीं मूसा का नेमा के केड़े खादा ग्या हा, वणा बेटा ने मायाजक बणायो, ज्यो हमेस्या हमेस्या का वाते सिद बणग्यो।</verse>
			</chapter>
			<chapter number="8">
				<verse number="1">ज्यो कई आपाँ केरिया हा, वणा मूँ खास बात तो या हे के, आपणाँ नके एक अस्यो मायाजक हे ज्यो हरग में मेमावान परमेसर का गादी का जीमणा पाल्डे बेट्यो तको हे।</verse>
				<verse number="2">वो वीं पुवितर जगाँ में सेवा कररियो हे ज्यो हाँचा तम्बू हे, जिंने कणी मनक ने, पण परबू बणायो हे।</verse>
				<verse number="3">हरेक मायाजक ने ईं वाते चुण्यो जावे हे के, वो भेंट अन बली दुई चड़ावे। अन ईं वाते अणी मायाजक का वाते भी ओ जरूरी हे के, वींका नके भी चड़ाबा का वाते कई वेवे।</verse>
				<verse number="4">यद्याँ वो ईं धरती पे वेतो, तो वो याजक ने वेतो, काँके अटे तो पेल्याई अस्या याजक हे, जीं मूसा का नेमा के जस्यान भेंट चड़ावे हे।</verse>
				<verse number="5">जीं जगाँ पे वीं याजकपणा को काम कररिया हे, वो तो ज्यो हरग में हे वींकी नकल अन छाया हे। ईं वाते जद्याँ मूसो पुवितर तम्बू बणाबावाळो हो, तद्याँई वींने चेतावणी दिदी गी के, “ध्यान राकज्ये के, थूँ हरेक चीज वींके जस्यानीस बणाज्ये, जस्यान थने मंगरा पे बतई ही।”</verse>
				<verse number="6">पण ज्यो सेवा को काम ईसू मसी ने मल्यो हो, वो वाँकी सेवा का कामऊँ भी ओरी बड़िया हे, काँके वो जणी करार को बिचोलियो हो, वो पुराणा करारऊँ बड़िया हे। अन नवो करार ओरी बड़िया वादाऊँ ठम्यो तको हे।</verse>
				<verse number="7">यद्याँ पेला करार में कई खोट ने वेतो, तो दूँजा करार की जरुतई ने पड़ती।</verse>
				<verse number="8">पण परमेसर ने वणा लोगाँ में खोट मल्यो। वणा क्यो, “परबू घोसणा करे हे, वा टेम आरी हे जद्याँ मूँ इजराएल का घराणाऊँ अन यहूदा का घराणाऊँ एक नवो करार करूँ।</verse>
				<verse number="9">यो करार वस्यो ने वेई, जस्यो में वाँका पूरबजाँ का हाते किदो हो। जद्याँ मूँ वाँको हात पकड़न वाँने मिसर देसऊँ बारणे लायो हो। काँके परबू केवे हे, वीं मारी करार का विस्वास जोगा ने रिया। में वाँकाऊँ मुण्डो फेर लिदो हे।</verse>
				<verse number="10">अबे परबू केवे हे के, ज्यो करार मूँ इजराएल का घराणाऊँ करूँ। अन ईंका केड़े परबू घोसणा करे हे, वाँके मन में आपणाँ नेम नाकूँ, वाँके काळजा पे मूँ वाँने लिक देऊँ। मूँ वाँको परमेसर वेवूँ अन वीं मारा मनक वेई।</verse>
				<verse number="11">पछे कुई भी मनक आपणाँ पड़ोसी ने अस्यान ने हिकाई अन कुई भी मनक आपणाँ भई-बन्दऊँ ने केई के, ‘थाँ परबू ने ओळको।’ काँके वीं हाराई फोरा अन मोटा मने जाणी।</verse>
				<verse number="12">काँके मूँ वाँका बुरा कामाँ ने माप करूँ अन कदी वाँका पापाँ ने आद ने राकूँ।”</verse>
				<verse number="13">नवो करार करन वणी पेला करार ने बेकार ठेरायो हे अन ज्याँ चीज पुराणी अन बेकार वे जावे हे, वींको खतम वेणो जरूरी हे।</verse>
			</chapter>
			<chapter number="9">
				<verse number="1">देको पेलो करार ज्यो इजराएली मनकाँ अन परमेसर का बचमें हो, वींमें सेवा-चाकरी का नेम हा, अन एक सेवा करबा का वाते पुवितर जगाँ भी बणईगी ही।</verse>
				<verse number="2">एक तम्बू बणायो ग्यो हो, जिंका पेला कमरा में दिवो मेलबा को आळ्यो, टेबल अन भेंट की रोट्याँ ही, वा पुवितर जगाँ केवाती ही।</verse>
				<verse number="3">अन दूजाँ परदा का पाच्छे वो कमरो हो, ज्यो खास पुवितर जगाँ केवातो हो।</verse>
				<verse number="4">अन पछे मयने खुसबु आबा का वाते धुप-ध्यान करबा होना की वेदी अन होनाऊँ मढी तकी करार की पेटी ही। अन ईं पेटी का मयने होनाऊँ मढ्यो तको एक ठामड़ो हो, जिंमें मन्ना हो अन हारून की वाँ लाकड़ी भी जिंके कूँपळा फुटगी ही अन करार लिक्या तका भाटा हा।</verse>
				<verse number="5">करार की पेटी का ऊपरे परमेसर की मेमामय हाजरी का वाते करूब नाम का हरग-दुताँ की मूरत्याँ बणी तकी ही, जी मापी की जगाँ पे छाया कररिया हा। पण ईं टेम में माँ अणा बाताँ की हेली चरचा ने कर सका हाँ।</verse>
				<verse number="6">तम्बू को हारोई काम सई तरियाऊँ पूरो व्या केड़े याजक पेला ओवरा में रोज जान आपणी सेवा को काम करता हा।</verse>
				<verse number="7">पण मयने का ओवरा में मायाजक साल में एक दाण जातो हो। वो बना वीं लुई के कदी ने जातो हो, जिंने वो खुद अन आपणाँ मनकाँ का अणजाण में किदा ग्या पापाँ का वाते परमेसर के भेंट चड़ातो हो।</verse>
				<verse number="8">अणीऊँ पुवितर आत्मा योईस बतावे हे के, जद्याँ तईं तम्बू को पेलो ओवरो ऊबो तको हे, तद्याँ तईं खास पुवितर जगाँ को गेलो परगट ने वेई।</verse>
				<verse number="9">अन यो तम्बू अबाणू की टेम का वाते एक केणी हे, जिंमें अस्यी भेंट अन बलीदान चड़ाया जावे हे, जणीऊँ आरादना करबावाळा का मन पुरी तरियाँ सुद ने वे सके हे।</verse>
				<verse number="10">ईं हारी चिजाँ तो खाबा-पिबा, नावा-धोबा का सुद वेबा का मनकाँ का अलग अलग नेम हे। अन ईं नेम जद्याँ तईं परमेसर को आगलो क्रम लागू ने वेजावे, वतरे लागू रेई।</verse>
				<verse number="11">पण मसी अणा हव हव चिजाँ को मायाजक बणन आयो हे। तो वीं हात का बणाया तका तम्बू में ने, पण अणीऊँ भी मोटा अन सिद तम्बू में सेवा करे हे। मतलब वो तम्बू अणी दनियाँ को भाग ने हे।</verse>
				<verse number="12">अन बकरा अन पाडो का लुईऊँ ने पण आपणाँ खुद का लुईऊँ एकीस दाण पुवितर जगाँ में ग्यो अन आपणाँ वाते हमेस्यान को छुटकारो पाको कर दिदो।</verse>
				<verse number="13">काँके जद्याँ बकरा अन पाडा का लुई अन पाडी की भभूत वाँका पे छाटी जावे, ज्यो रिति-रिवाज का जस्यान असुद ने सुद बणावे हे, ताँके वीं देह का हस्याबूँ सुद वे सके।</verse>
				<verse number="14">आ बात हाँची हे तो मसी को लुई कतरो जोरावर वेई? जणी अनंत आत्माऊँ खुद ने निरदोस बली का रूप में हमेस्या वाते परमेसर के चड़ा दिदो। वींके अस्यान करबाऊँ अन वींके लुईऊँ आपाँने मोत का आड़ीऊँ लेन जाबावाळा करमाऊँ आपणाँ मन सुद कर करी, ताँके आपाँ जीवता परमेसर की सेवा कर सका।</verse>
				<verse number="15">ईं वाते मसी एक नुवा करार को बिचोलिया हे, ताँके जीं बुलाया ग्या हे, वीं अनंत उतरादिकार पा सके, जिंको वादो परमेसर किदो हो। अबे देको, जी पेला करार का जस्यान जणा पापाँ किदो हो, वाँने पापाऊँ छुड़ाबा की वाते मरन किमत चुकई अन वाँने आजाद किदा।</verse>
				<verse number="16">काँके जटे वसीयतनामो लिक्यो जावे हे वटे वसीयतनामो बणाबावाळा की मोत की मोत को सबूत मलणो जरूरी हे। तद्याँईस वो काम करे हे</verse>
				<verse number="17">काँके वसीयतनामो मरबा केड़ेईस लागू वेवे हे। अन जद्याँ तईं वसीयतनामो बणाबावाळो जीवतो रेवे हे, तद्याँ वो लागू ने वेवे हे।</verse>
				<verse number="18">ईं वाते पेलो करार भी बना लुई के, लागू ने किदो ग्यो हो?</verse>
				<verse number="19">ईं वाते जद्याँ मूसे नेमा की हारी आग्या लोगाँ ने हुणई नाकी, तो वणी पाडा-पाडी अन बकरा को लुई पाणी में मलान लाल ऊन अन जुफा की डाळ्याऊँ वीं किताब पे अन हाराई लोगाँ पे छाँट दिदो।</verse>
				<verse number="20">वणी क्यो हो, “यो वीं करार को लुई हे, जिंकी आग्या परमेसर थाँने दिदी हे।”</verse>
				<verse number="21">अन अणी तरियाँ वणी तम्बू अन सेवा का हाराई समान पे लुई छाँट्यो।</verse>
				<verse number="22">मूसा का नेमा का जस्यान हारी चिजाँ ने लुई छाटकन सुद किदी जावे हे अन बना लुई वेवाड़्याँ मापी ने मले हे।</verse>
				<verse number="23">ईं वाते ओ जरूरी हे के, जीं चिजाँ हरग का नकल का रूप में हे, वाँने जनावराँ का बलीऊँ पुवितर करणी छावे। पण हरग की चिजाँ तो अणाऊँ ओरी बड़िया बलीऊँ पुवितर किदी जावे हे।</verse>
				<verse number="24">काँके मसी हात का बणई तकी पुवितर जगाँ में ने ग्यो, ज्या जगाँ हाँची पुवितर जगाँ की नकल का जस्यान हे, पण हरग में ग्यो हे, ताँके आपणाँ वाते परमेसर का हामें पेरवई वेवे।</verse>
				<verse number="25">ईंको अरत ओ ने के, वो आपणाँ खुद ने बार-बार बली चड़ाबा का वाते हरग में ग्यो, जस्यान मायाजक हर साल दूजाँ को लुई लेन पुवितर जगाँ में बली चड़ाया करे हे।</verse>
				<verse number="26">यद्याँ अस्यान वेतो तो दनियाँ का रचनाऊँ लेन वींने आकोदाण दुक जेलणो पड़तो, पण अबे जुग का अन्त में वो एकीस दाण परगट व्यो हे, ताँके आपणाँ बलीदानऊँ पाप ने छेटी कर दे।</verse>
				<verse number="27">जस्यान मनकाँ का वाते एक दाण मरणो अन वींका केड़े न्याव वेणो पको हे।</verse>
				<verse number="28">वस्यान मसी भी एक दाणइस नरई का पापाँ ने छेटी करबा का वाते बलीदान व्यो हे। वो अबे पापाँ ने छेटी करबा का वाते ने, पण ज्यो वींकी वाट नाळरिया हे वाँका छूटकारा का वाते दूजी दाण परगट वेई।</verse>
			</chapter>
			<chapter number="10">
				<verse number="1">मूसा का नेम तो आबावाळी बड़िया बाताँ की छाया को रूप हे। पण यो वाँको असली रूप ने हे। ईं वाते बली का रूप में हरेक साल चडावो चड़ायो जातो हो। अन वो चडावो परमेसर का नके आबावाळा मनकाँने कदी सिद ने करे हे।</verse>
				<verse number="2">यद्याँ अस्यान वेतो तो वाँको चडावो चड़ाणो बन्द वे जातो। अन यद्याँ भगती करबावाळा एकीस दाण में हमेस्या का वाते पुवितर ने वे जाता, तो वाँको मन वाँने पाच्छा पापी ने ठेरातो।</verse>
				<verse number="3">पण ईं चड़ावा हर साल वाँने वाँका पाप आद करातो हो।</verse>
				<verse number="4">काँके ओ कदी ने वे सके के, बकरा को अन पाडो को लुई पापाँ ने माप कर सके।</verse>
				<verse number="5">ईं वाते जद्याँ मसी ईं दनियाँ में आया हा तद्याँ वणा क्यो हो के, “थें बली अन चडावो कोयने छायो। पण थें तो मारा वाते एक देह ने त्यार किदी हे।</verse>
				<verse number="6">थाँ ने तो होम बलीऊँ अन ने पाप बलीऊँ राजी वेवो हो</verse>
				<verse number="7">तद्याँ में क्यो के, ‘किताब में मारा वाते जस्यान लिक्यो हे वस्यान, मूँ अटे हूँ। अन हो परमेसर, थाँकी मरजी ने पुरी करबा ने आया हूँ।’”</verse>
				<verse number="8">काँके पेल्याँई के दिदो हे के, वो भेंट अन चडावो होम बली अन पापबली ने छायो अन ने वो अणाऊँ राजी वेवे हे। जद्याँ के सास्तर का नेम का हस्याबूँ तो ईं हाराई चडाया जावे हे।</verse>
				<verse number="9">अन वो ओ भी केवे हे के, “मूँ अटे हूँ। अन हो परमेसर, थाँकी मरजी ने पुरी करबा ने आया हूँ।” अस्यान तो वो मसी का दूजाँ बलीदान ने लागू करे हे अन पेला पुराणा बलीदानाँ ने रद करे हे।</verse>
				<verse number="10">ईं वाते परमेसर की वीं मरजीऊँ ईसू मसी की देह के एकीस दाण बलीऊँ आपाँ पुवितर किदा ग्या हाँ।</verse>
				<verse number="11">जद्याँ के याजक तो ऊबो वेन धारमिक सेवा करे हे अन एक अस्या बलीदान ने ज्यो पाप कदी ने माप कर सके, वींनेईस आकोदाण चड़ावे हे।</verse>
				<verse number="12">पण ईसू मसी तो एक याजक का रूप में पाप का वाते एकीस दाण हमेस्यान का वाते बली वेन परमेसर का जीमणे हात आड़ी जान बेटग्यो।</verse>
				<verse number="13">अन वो वणी टेमऊँ ईं बात की वाट नाळरिया हे के, वींका दसमण वींके पगा का बाजोट बणा दिदा जावे।</verse>
				<verse number="14">काँके वणा एकीस दाण बली वेबाऊँ वाँने जी पुवितर किदा जारिया हे, वाँने हमेस्यान का वाते सिद कर दिदा।</verse>
				<verse number="15">पुवितर आत्मा भी आपाँने याईस गवई देवे अन यो वणी पेल्याँई क्यो हे,</verse>
				<verse number="16">“परबू केवे हे के, वणा दनाँ का केड़े मूँ ज्यो करार वाँकाऊँ करबावाळो हूँ वो ओ हे के, मूँ मारा नेम वाँका काळजा पे लिकूँ अन मूँ वाँके मन में ईं बाताँ नाकूँ।”</verse>
				<verse number="17">ईंका केड़े वो अस्यान भी केवे हे के, “मूँ वाँका पाप ने अन वाँका बुरा करमा ने अबाणूऊँ लेन कदी आद ने करूँ।”</verse>
				<verse number="18">अन अबे जद्याँ ईं बाताँ माप वेगी हे तो अबे पापाँ का वाते बली चड़ाबा की कई जरूत ने हे।</verse>
				<verse number="19">हो भायाँ-बेना, अबे तो ईसू मसी का लुई वेवाड़ा की वजेऊँ आपाँने खास पुवितर जगाँ में जाबा का पूरो भरोसो वेग्यो हे।</verse>
				<verse number="20">वणी वीं परदाऊँ मतलब वींकी देहऊँ आपणाँ वाते एक नुवो जीवतो गेलो खोल दिदो हे।</verse>
				<verse number="21">अन आपणाँ नके एक अस्यो मायाजक हे ज्यो हरग में परमेसर का घराणा को अदिकारी हे।</verse>
				<verse number="22">ईं वाते आवो, आपाँ हाँचा हिया, पूरा विस्वास, अन मन का बुरा दोस पे छीड़कावऊँ सुद करवान देह ने सुद पाणीऊँ धोवान परमेसर का नके जावा।</verse>
				<verse number="23">ईं वाते आवो, आपाँ जीं आस ने मान लिदी हे, वींने मजबुती का हाते ठामी राका, काँके जणी आपाऊँ वादो किदो हे वो विस्वास जोगो हे।</verse>
				<verse number="24">आपाँने ओ भी ध्यान राकणो हे के, एक दूजाँ ने परेम अन हव कामाँ में कस्यान धिज्यो बन्दा सका हाँ।</verse>
				<verse number="25">अन थाँ भेळा वेणो मती छोड़ज्यो। जस्यान के नरई मनकाँने तो भेळो ने वेबा की आदत पड़गी हे। पण आपाँने तो एक दूजाँ ने हमजाणा हे। जस्यान के, थाँ जाणो हो अन देको भी हो के, वो परबू को दन नके आरियो, जणीऊँ थाँने तो ओरुँ भी ईंने करणो छावे।</verse>
				<verse number="26">जद्याँ आपाँ हाँचो ग्यान लेबा का केड़े भी जाणता तका पाप करता रेवा हाँ, तो पाप ने धोवा का वाते कस्योई बलीदान ने बच्यो हे।</verse>
				<verse number="27">पण ईंका केड़े तो जोरदार न्याव वेणो अन धधकती तकी वादीईस वाट नाळरी हे, आ वादी परमेसर का दसमणा ने बाळ नाकी।</verse>
				<verse number="28">जद्याँ कुई मूसा का नेमाने मानबाऊँ नटे हे, तो वींके ऊपरे दया कोनी करी जावे अन दो कन तीन गवा की गवई देबा की वजेऊँ मार दिदो जावे हे।</verse>
				<verse number="29">थाँ होचो के, वो मनक कतरो दण्ड भोगी, जणी आपणाँ पगा का रेटे परमेसर का बेटा ने गूँन्दयो हे, अन वो वणी करार का पुवितर लुई जणीऊँ वो पुवितर किदो हो वो वींने एक अपुवितर मान्यो हे अन वणी दया करबावाळी आत्मा को भी अपमान किदो हे।</verse>
				<verse number="30">आपाँ वींने जाणा हाँ, जणी अस्यान क्यो हे के, “बदलो लेणो मारो काम हे अन मूँईस बदलो लेऊँ।” अन ईंका केड़े यो भी क्यो, “परबू आपणाँ लोगाँ को न्याव करी।”</verse>
				<verse number="31">मनक को जीवता परमेसर का हात में पड़णो भयंकर बात हे।</verse>
				<verse number="32">थाँ वणा दनाँ ने आद करो, जद्याँ थाँने दकऊँ छुटकारो मल्यो हो, वीं टेम थाँ दुक जेलता तका अन घणा हताव में विस्वास में मजबूत बण्या रिया हो।</verse>
				<verse number="33">अन नरी दाण तो मनकाँ का मुण्डा आगे थाँकी बेजती कदी गी। थाँने हताया हा अन नरी दाण थाँ वणा मनकाँ की मदत किदी ज्याँका हाते अस्यान किदो ग्यो हा</verse>
				<verse number="34">थाँ केदी मनकाँ का दुक में भी दकी व्या हा। थाँ ओ जाणता हा के, थाँका नके अस्यान की दोलत हे ज्यो हव अन कदी नास ने वेई। ईं वाते थाँ थाँकी दोलत ने भी राजी वेन जब्त वेबा दिदी।</verse>
				<verse number="35">ईं वाते थाँ हिम्मत मती हारज्यो, काँके थाँने ईं बात की वजेऊँस मोटो फळ मली।</verse>
				<verse number="36">अन थाँने बरदास करणो छावे, ताँके थाँ परमेसर की मरजी ने पुरी करन मोटो फळ पा सको, जिंको परमेसर वादो किदो हो।</verse>
				<verse number="37">काँके पुवितर सास्तर में लिक्यो तको हे के, “अबे घणो कम टेम रेग्यो हे, जद्याँ वो आबावाळो परमेसर आई अन वो मोड़ो ने करे।</verse>
				<verse number="38">पण मारा धरमी मनक विस्वासऊँ जीवता रेई, अन यद्याँ वीं वणी गेलाऊँ पाच्छा फरी जाई तो मारो मन वाँकाऊँ राजी ने वेई।”</verse>
				<verse number="39">पण आपाँ वाकामूँ ने हा, ज्यो पाच्छा फर जावे हे अन नास वे जावा, पण आपाँ तो विस्वास राकबावाळा हा, ताँके आपणाँ जीव ने बंचाबा।</verse>
			</chapter>
			<chapter number="11">
				<verse number="1">विस्वास करबा को अरत हे के, जणा चिजाँ की आपाँ आस लगा राकी हे, वीं आपाँने मलगी हे ईंको भरोसो कराँ हा। अन जीं चिजाँ ने आपाँ देक ने सका, पण आपाँने वाँको मलबा को पूरो भरोसो हे।</verse>
				<verse number="2">अन अस्यान को विस्वास करबा की वजेऊँईस पुराणा टेम का मनकाँ ने परमेसर का आड़ीऊँ मान मल्यो हो।</verse>
				<verse number="3">विस्वास करबा की वजेऊँ आपाँ ओ जाण सका हा के, परमेसर की आग्याऊँईस ईं बरमाण्ड की रचना वीं हे। ईं वाते, ईं हाराई दिकबावाळी चिजाँ, दिकबावाळी चिजाँऊँ ने बणी हे।</verse>
				<verse number="4">विस्वास करबा की वजेऊँ हाबिल केनऊँ हव भेंट परमेसर के चड़ई ही। विस्वास करबा की वजेऊँ परमेसर वींकी भेंट ने मान लिदी अन वणीऊँ वींने एक धरमी मनक का रूप में मान मल्यो। वींके मरबा का केड़े आज आपाँ वणीऊँ हिका हा।</verse>
				<verse number="5">विस्वास करबा की वजेऊँ हनोक ने वींके देह हमेत परमेसर वींने आपणाँ नके बला लिदो हे अन वणी मोत ने मेसूस ने किदी। अन वींने होद्‍यो पण वींको पतो कटेई ने चाल्यो। परमेसर वींने आपणाँ नके बला लिदो हो अन वींके नके बलायो जाबाऊँ पेल्याँई आ गवई दिदो गी ही के, वणी परमेसर ने राजी किदा हे।</verse>
				<verse number="6">काँके विस्वास के बना परमेसर ने राजी ने किदा जा सके हे अन जद्याँ कुई परबू का नके आवे हे, तो वींने विस्वास करणो छावे के, वो हे, अन ज्यो वींने होदे हे, वो वींने फळ देवे हे।</verse>
				<verse number="7">विस्वास करबा की वजेऊँ नूह भी वणा बाताँ ने ज्यो वींने दिकई कोयने दिदी ही। ईं बारा में चेतावणी पान परमेसर की दरपणी का हाते आपणाँ परवार ने बंचाबा का वाते जाँज बणायो हो, अस्यान करन वणी दनियाँ ने दोसी ठेराई अन वो धारमिकता को वारिस बणग्यो, ज्यो विस्वास करबाऊँ आवे हे।</verse>
				<verse number="8">विस्वास करबा की वजेऊँ अबराम ने जद्याँ बलायो ग्यो हो तो वो आग्या मानन अस्यी जगाँ का आड़ी चाल पड़्यो, जिंको वारिस बणबावाळो हो, जद्याँ के, वो जाणतो भी ने हो, तद्याँ भी वो वटे ग्यो हो।</verse>
				<verse number="9">विस्वास करबा की वजेऊँ परमेसर अबराम ने ज्या धरती देबा को वादो किदो हो वणी धरती का ऊपरे वो एक अणजाण मनक का रूप आपणो तम्बू बणान रेवा लागो, वस्यानीस इसाक अन याकूब भी तम्बू बणान रिया हा, ईं मनक भी अबरामऊँ ज्यो वादो किदो हो वणीस परमेसर का वादा का वारिस हे।</verse>
				<verse number="10">काँके अबराम वणी नगर की वाट नाळरियो हो, जिंकी नीम मजबूत हे अन जिंने परमेसर माढ्यो अन बणायो हो।</verse>
				<verse number="11">विस्वासऊँ जद्याँ सारा बाँज ही तद्याँ भी वाँ भूड़ापाँ में गरबवती वीं, काँके वणा वादो करबावाळा परमेसर ने विस्वास जोगा मान्यो।</verse>
				<verse number="12">ईंका वजेऊँ एक मनक अबरामऊँ ज्यो मरबावाळा के जस्यान हो, वींकाऊँ आकास का तारा अन समन्द का कनारे पड़ी रेत का जस्यान अनगणत बंस पेदा व्या।</verse>
				<verse number="13">ईं हाराई मनक विस्वास करता कतराई मरग्या अन ज्यो चीज वाँने देबा को वादो किदो ग्यो हो, वाँ वाँने कोनी मली। पण वीं वाँने छेटीऊँ देकी अन वाँकी आवभगत किदी अन वीं ओ भी मानता हा के, वीं ईं धरती में बारवासी अन अणजाण हे।</verse>
				<verse number="14">अन ज्यो मनक अस्यान की बाताँ करे हे वीं यो दिकावे हे के, वीं आपणाँ खुद का देस की खोज में हे।</verse>
				<verse number="15">यद्याँ वीं वणी देस का बारा में होचता, जटे वीं रेता हा, तद्याँ वाँको वींमें पाछो जाबा को मोको रेतो।</verse>
				<verse number="16">पण वीं तो बड़िया नगर में जाबा की मरजी राके हे, ज्यो हरग हे। ईं वाते वीं परमेसर ने आपणाँ परमेसर केबाऊँ हरम कोनी करे, काँके वणी वाँका वाते एक नगर त्यार करन मेल्यो हे।</verse>
				<verse number="17">विस्वास की वजेऊँ जद्याँ परमेसर अबराम की परक कररिया हा, तद्याँ वणी इसाक की बली चड़बा की पुरी त्यारी कर लिदी। जद्याँ के परमेसर वणीऊँ क्यो हो के, “इसाकऊँ थाँरो बंस आगे बड़ी।” ईंका केड़े भी अबराम जिंने वादो मल्यो हो, वो आपणाँ एकलोता बेटी की बली देबा का वाते त्यार वेग्यो।</verse>
				<verse number="18"></verse>
				<verse number="19">पण अबराम होच्यो के, परमेसर मरिया तका ने भी जीवतो कर सके हे अन एक दूजी आड़ीऊँ क्यो जावे तो वणी इसाक ने मोतऊँ पाछो पा लिदो हो।</verse>
				<verse number="20">विस्वास की करबा की वजेऊँ इसाक, याकूब अन एसाव ने वाँके आबावाळा जीवन का वाते आसीस दिदी ही।</verse>
				<verse number="21">विस्वास करबा की वजेऊँ याकूब जद्याँ मरबावाळो हा, तद्याँ वणी युसुप का हाराई बेटा ने आसीस दिदी अन आपणी लाटी का टेके ऊबो वेन परमेसर के धोक दिदो।</verse>
				<verse number="22">विस्वास करबा की वजेऊँ जद्याँ युसुप की आकरी टेम आगी ही तद्याँ वणी इजराएल का लोगाँ ने मिसरऊँ लेन निरगमन तईं की बाताँ बतई अन वाँने आग्या दिदो ही के, वीं अटूऊँ जावे वीं दाण मारा गाड़्या तका हाड़क्या भी हाते ले जावे।</verse>
				<verse number="23">विस्वास करबा की वजेऊँ मूसा का बई-बापू वींके जनम व्या केड़े वींने तीन मिना तईं हपई राक्यो, काँके वीं जाणता हा के, ओ बाळक रुपाळो हे अन वीं राजा की आग्याऊँ भी ने दरप्या हा।</verse>
				<verse number="24">विस्वास करबा वजेऊँ जद्याँ मूसो मोटो व्यो तद्याँ वो खुद फिरोन की बेटी को बेटो केबावाऊँ नटग्यो।</verse>
				<verse number="25">अन वींने थोड़ाक दन रेबावाळा पाप का सक लेबाऊँ परमेसर का भगताँ का हाते दुक जेलणो घणो सई लागो।</verse>
				<verse number="26">वींने मिसर का धन-दोलतऊँ ज्यादा मसी का हाते बेजत वेणो घणो किमती लागो, काँके वणी परमेसरऊँ मलाबावाळा ईनाम पे ध्यान लगा मेल्यो हो।</verse>
				<verse number="27">विस्वास करबा की वजेऊँ वणी राजा की दरपणी ने राकी अन मिसर ने छोड़ दिदो। अन मानो वो ने दिकबावाळा परमेसर ने देकबा का जस्यान हारोई सेण किदो।</verse>
				<verse number="28">विस्वास करबा की वजेऊँ जद्याँ परमेसर वींने फसे का तेवार अन लुई छाटकबा का वाते हुकम दिदो हो, जद्याँ वणी वींकी हुकम को पालण किदो। ताँके इजराएल का पेली पोत का छोरा की मोत ने वेवे।</verse>
				<verse number="29">विस्वास करबा की वजेऊँ इजराएली मनक लाल समन्द ने अस्यान चालन पार किदो हो जस्यान के वीं हूँकी धरती पे चालरिया हा। पण जद्याँ मिसर का मनक अस्यान करबा लागा, तो वीं डुबग्या।</verse>
				<verse number="30">विस्वास करबा की वजेऊँ जद्याँ इजराएली मनक यरीहो नगर की भींत के हात दनाँ तईं चकर लगाया, वींके केड़े वा वटूँ धड़ी गी।</verse>
				<verse number="31">विस्वास करबा की वजेऊँ राहब नाम की वेस्याँ परमेसर की आग्या ने मानबावाळा मनकाँ का हाते नास ने वीं, काँके वणी भेदू मनकाँ की आवभगत किदी ही।</verse>
				<verse number="32">अबे आगे कई बतऊँ। गिदोन, बारक, सिमसोन, यिपतह, दाऊद, समुएल अन परमेसर का आड़ीऊँ बोलबा का बारा में बताबा को मारा नके टेम कोयने हे।</verse>
				<verse number="33">वणाके विस्वास करबा की वजेऊँ वणा राज-दरबाराँ ने जीत लिदा हा अन वणा धारमिकता का काम भी करिया हा अन ज्यो कई भी परमेसर वाँने देबा को वादो किदो हो, वो हारोई वाँने मल्यो। वणा नार का मुण्डा ने बन्द कर दिदा हा।</verse>
				<verse number="34">भभकती तकी वादी ने बजा दिदी, अन तरवार की धारऊँ बंचग्या। वीं कमजोर वेता तका भी जोरवार बणग्या अन जद्याँ वीं राजावाँ का हाते लड़्या तद्याँ भी वीं तागतऊँ जितग्या अन दूजाँ देस की फोज ने बखेर दिदी।</verse>
				<verse number="35">विस्वासऊँ लुगायाँ आपणाँ मरिया तका ने ईंका केड़े जीवता देक्या। नरई मनकाँ ने हताया ग्या, पण वीं छुटबाऊँ नटग्या ताँके वीं मरिया केड़े पाच्छा जीवता वेन ओरी बड़िया जीवन ने मेसूस करे।</verse>
				<verse number="36">घणा की मजाक किदी गी अन घणा के कोड़ा मेल्या, घणा ने हाकळाऊँ बांद्‍या अन घणा केद में नाक दिदा अन यो करन वाँने परक्या।</verse>
				<verse number="37">घणा के भाटा की ठोकन मार दिदा, घणा ने आरीऊँ चिरिया ग्या, वाँने तरवारऊँ मारिया अन बकरिया अन गारा की खाळ ओड़न अटने-वटने फरता फरिया, वीं कंगाळ की दसा में, कळेस में, दुक जेलता तका,</verse>
				<verse number="38">वीं हुन्ना काकड़ में, मंगरा में, अन गुफा में, अन धरती पे पड़्या तका खाड़ा खोसराँ में लकता फरिया। काँके या दनियाँ वाँके लायक कोयने हो।</verse>
				<verse number="39">वणाके विस्वास करबा की वजेऊँ वाँकी बड़ई किदी गी, पच्छे भी वाकामूँ किंने भी वादो किदी तकी चीज ने मली।</verse>
				<verse number="40">परमेसर का नके आपणी ओजणा का जस्यान आपणाँ का वाते ओरी हव बात ही, ताँके वाँ आपणे बना सिद ने वे सके।</verse>
			</chapter>
			<chapter number="12">
				<verse number="1">ईं वाते जद्याँ गवा की एक मोटी भीड़ आपणाँ च्यारूँमेर हे, तो आवो, आड़ी देबावाळी हारी चिजाँ ने अन उलजाबा पाप ने छेटी करा अन ज्या दोड़ आपाँने दोड़णी हे, वींने सेण करता तका दोड़ता रा।</verse>
				<verse number="2">विस्वास का मालिक अन वींने सिद करबावाळा ईसू मसी का आड़ी आपाँ देकता रा। जणी आपणाँ हामें राक्या तका आणन्द का वाते लाज-सरम की चन्ता ने किदी अन हूळी पे दुक जेल्यो अन परमेसर की गादी के जीमणे पाल्डे जान बेटग्यो।</verse>
				<verse number="3">ईं वाते वींका आड़ी चेतो देता रो, काँके वणी वींका खिलाप में किदा ग्यो, पाप्याँ को विरोद ने ईं वाते सेण किदो, ताँके आपीं चन्ता ने कराँ अन थाकन हिम्मत ने छोड़ा।</verse>
				<verse number="4">पाप का विरोद में आपणी लड़ई में थाँने अतरी मेनत ने करणी पड़ी के, थाँने आपणो लुई वेवाड़णो पड़्यो वे।</verse>
				<verse number="5">अन थाँ वीं हिम्मत बन्दाबावाळा बचन भूलग्या हो ज्यो थाँने बेटा मानन क्यो हो के, “हे मारा बेटा, परबू को तापड़णो हलको मती जाण, वींकी फटकारऊँ हतास मती वेज्ये,</verse>
				<verse number="6">काँके परबू जणीऊँ परेम करे, वींने तापड़े भी हे। अन जिंने बेटो बणा लेवे हे, वींके सजा भी देवे हे।”</verse>
				<verse number="7">थाँ दुक ने तापड़णो जाणन सेण करलो, परमेसर थाँका हाते आपणाँ बेटा के जस्यान वेवार करे हे। अस्यो कूण बेटो वेई जिंने वींका बापू ने तापड़े?</verse>
				<verse number="8">यद्याँ थाँने हाराई बाळकाँ का जस्यान ने तापड़या ग्या हे, तो थाँ थाँके बाप की ओलाद ने हो अन ने हाँची ओलाद हो।</verse>
				<verse number="9">पछे जद्याँ आपणी देह का बापू भी आपाँने तापड़े हे अन आपाँ वाँकी इजत करा हा, तो पछे आपाँने आपणाँ आत्मिक बापू का क्या में भी रेणो छावे, जणीऊँ आपाँ जीवता रेवा।</verse>
				<verse number="10">आपणाँ देह का बापू थोड़ीक देर का वाते जस्यान वाँने बड़िया लागो, आपाँने तापड़्या। पण परमेसर तो आपाँने आपणी भलई का वाते तापड़्या हे, जणीऊँ आपीं वाँकी धारमिकता में भेळा वे जावा।</verse>
				<verse number="11">जीं टेम तापड़्यो जावे हे तो आपाँने हव ने लागे, पण वणीऊँ दक वेवे हे, पण भी ज्यो वणीऊँ थोड़ाक टेम केड़े पाकाँ वेवे हे, वाँने धारमिकता की सान्ती को फळ देवे हे।</verse>
				<verse number="12">ईं वाते ढिला हाताँ अन दुबळा गोडा ने ताकड़े करो।</verse>
				<verse number="13">आपणाँ पगाँ का वाते हुदो अन हरिको गेलो बणावो, ताँके लंगड़ा अकड़े कोनी, पण हव वे जावे।</verse>
				<verse number="14">हाराई का हाते सान्ती का हाते रेवा वाते अन पुवितर वेबा का वाते हरेक तरियाऊँ कोसीस करता रेवो। काँके बना धारमिकता के कुई भी परबू का दरसण ने कर सकी।</verse>
				<verse number="15">ध्यान देता रेवो, अस्यान ने वे, कुई परमेसर की करपाऊँ छुट जावे। कन अस्यी कई फुट पड़ जावे, ज्या दुक देवे, अन वणीऊँ नरई मनक असुद बण जावे।</verse>
				<verse number="16">देको कुई भी कुकरम ने करे अन वीं एसाव के जस्यान परमेसरऊँ छेटी ने जावे ज्यो पाटवी बेटो हो अन उतरादिकार पाबा को अदिकार हो, पण वणी बेस एक दाण का खाणा का वाते वो पद बेंच दिदो।</verse>
				<verse number="17">थाँ तो जाणो हो, ईंका पछे जद्याँ वणी आसीस पाबा की आस किदी, तो वींने नकार दिदो ग्यो, अन वणी रो-रोन ज्यो वणी किदो हो वणीऊँ मन फेरवा को मोको होद्‍यो, पण वींने ने मल्यो।</verse>
				<verse number="18">थाँ इजराएली मनकाँ का जस्यान सिनाई मंगरा का नके ने आया जिंके अड़ सकता हा अन ज्यो वादीऊँ बळरियो हो, अंदारो भरियो तको हो, घोर अदंकार अन फुताळ्याऊँ भरियो तको हो।</verse>
				<verse number="19">रणभेरी का अवाज अन बोलबावाळा का सबदा की अस्यी अवाज हूणी, जणीऊँ हूणबावाळा अरज किदी ही के, अबे माँकाऊँ ईंके अलावा ओरी कई बाताँ मती करो।</verse>
				<verse number="20">काँके ज्यो आदेस दिदो ग्यो हो, वीं वींने जेल ने सक्या। काँके वाँने क्यो हो के, “यद्याँ कुई जनावर भी वीं मंगरा के अड़ी, तो वींपे भाटा भेक्या जाई।”</verse>
				<verse number="21">वो नजारो अतरो दरपाबावाळो हो के, मूसे खुद क्यो हो, “मूँ दरपऊँ धुँजरियो हूँ।”</verse>
				<verse number="22">पण थाँ सिय्योन मंगरा का नके, जीवता परमेसर का हरग का नगर यरूसलेम का नके अन हजारो हरग-दुताँ,</verse>
				<verse number="23">अन पाठव्या की आणन्द की सबा में मतलब जणा विस्वास्याँ का नाम हरग में लिक मेल्या हे अन हाराई को न्याव करबावाळा परमेसर का नके अन सिद बण्या तका धरमिया की आत्मा का नके,</verse>
				<verse number="24">अन एक नुवा वादा का बिचोलिया ईसू का नके अन छाट्याँ तका वीं लुईऊँ नके आग्या हो, ज्यो हाबिल का लुईऊँ भी बड़िया वादो करे हे।</verse>
				<verse number="25">ध्यान राकज्यो, के थाँ वणी बोलबावाळा ने मती नकार ज्यो। काँके जणी धरती पे चेतावणी दिदी ही, वींने नकारन वीं बंच ने सक्या, तो यद्याँ आपाँ वींने नकार देवा, ज्यो आपाँने हरगऊँ चेतावणी देरियो हे, तो आपाँ कदी दण्डऊँ बंच ने सका।</verse>
				<verse number="26">वीं दाण तो वणी आपणाँ बचनऊँ धरती हलई दिदी, पण अबे वणी वादो किदो हे के, “एक दाण ओरी मूँ खाली धरती नेईस ने, पण आकास ने भी हला देऊँ।”</verse>
				<verse number="27">अन या बात, “एक दाण ओरी” ईं बात ने परगट करे हे के, रचना किदी तकी चिजाँ मेंऊँ हालबावाळी चिजाँ नास किदी जाई, जणीऊँ ज्यो चिजाँ हाली कोनी, बेस वींइस अटल रेई।</verse>
				<verse number="28">अबे आपाँने एक अस्यो राज मलरियो हे, ज्यो हलायो ने जा सके हे, तो आवो, आपाँ दरपणी राकन परमेसर को आदर करता तका भगती का हाते धन्नेवाद देवा। जीं भगतीऊँ परमेसर राजी वे सके।</verse>
				<verse number="29">काँके आपणाँ परमेसर बाळ नाके अस्यी वादी हे।</verse>
			</chapter>
			<chapter number="13">
				<verse number="1">भईचारा का परेम में बण्या रो।</verse>
				<verse number="2">अणहेन्दा की आवभगत करणी मती भुलो, काँके अस्यान करता तकाईस नरई लोगाँ अणजाण में हरग-दुताँ की आवभगत किदी हे।</verse>
				<verse number="3">केदी मनकाँ का लारे अस्यान वेवार राको के, थाँ भी वाँका हाते केदी हो। जणा का हाते बुरो वेवार व्यो हे वाँने यो जाणन आद करो के, जस्यान थाँका हाते बुरो व्यो हे।</verse>
				<verse number="4">ब्याव को हाराई ने मान करणो छावे। लोग-लुगई एक-दूँजा का वाते वफादार रेवो। काँके दूजाँ का हाते गलत वेवार राकबावाळा लोग-लुगई ने अन कुकरम करबावाळा ने परमेसर सजा देई।</verse>
				<verse number="5">आपणाँ जीवन में धन का लाळचऊँ छेटी रेवो। ज्यो थाँका नके हे, वींमेंईस सबर राको, काँके परमेसर क्यो हे, “मूँ थाँने कदी ने छोड़ूँ, मूँ थाँने कदी ने त्यागूँ।”</verse>
				<verse number="6">ईं वाते आपीं विस्वास का हाते केवा हा, “परबू मारी मदत करबावाळा हे, मूँ कदी भी ने दरपूँ। मनक मारो कई ने कर सके हे।”</verse>
				<verse number="7">आपणाँ मुक्या ने आद राको, जणा थाँने परमेसर का बचन हुणाया हे, वाँके चालचलन का फळ का बारा में होचो अन वाँके विस्वास की नकल करो।</verse>
				<verse number="8">ईसू मसी काले आज अन हमेस्यान एक जस्यान रेई।</verse>
				<verse number="9">अलग अलग तरियाँ का अणजाणी हिकऊँ भटको मती, काँके थाँका मन का वाते यो हव के, वो खाबा-पिबा की नेमा का बजाए दयाऊँ मजबूत बणे। अन जणा खाबा-पिबा का नेमाने मान्याँ वणाऊँ वाँको कदी भलो कोनी व्यो।</verse>
				<verse number="10">आपणाँ नके एक अस्यी वेदी हे, जिंपूँ खाबा को अदिकार वाँने ने हे, जी तम्बू में सेवा करे हे।</verse>
				<verse number="11">मायाजक परम पुवितर जगाँ पे पापबली चड़ाबा का वाते ढान्ढा-ढोर को लुई तो ले जावे हे, पण वाँकी देह ने डेराऊँ बारणे बाळ दिदी जावे हे।</verse>
				<verse number="12">अणीस वाते ईसू भी लोगाँ ने आपणाँ खुद का लुईऊँ पुवितर करबा का वाते नगर का बारणे दुक जेल्यो हे।</verse>
				<verse number="13">ईं वाते आवो, वींका अपमान ने आपणाँ ऊपरे लेन नगर का बारणे वींका नके परा जावा।</verse>
				<verse number="14">काँके अटे आपणो कस्योई हेमस्यान रेवा वाते नगर ने हे, पण आपीं तो वणी नगर की वाट नाळरिया हे, ज्यो आबावाळो हे।</verse>
				<verse number="15">ईं वाते आपाँ ईसू का जरिये गुणगान रूपी बलीदान मतलब वणा होटा को फळ जीं वींको नाम लेवे हे, परमेसर ने हमेस्यान चड़ाया करे।</verse>
				<verse number="16">अन भलई करणी अन एक-दूँजा की मदत करणी ने भुलणी, काँके परमेसर अस्या बलीदानाऊँ राजी वेवे हे।</verse>
				<verse number="17">आपणाँ आत्मिक मुक्या को भरोसो करो अन वाँके बंस में रो। वीं परमेसर का हामें थाँको लेको देबावाळा का जस्यान वीं जागता तका थाँके जीव की रुकाळी करे हे। अन यद्याँ वस्यानीस करो, तो वीं यो काम राजी वेन करी, पण थाँ वस्यान ने करो, तो वीं यो काम दकऊँ करी। अन अणीऊँ थाँको कई नफो ने वेई।</verse>
				<verse number="18">माकाँ वाते परातना करता रेवो, काँके माँने भरोसो हे के, माँकी अंतर-आत्मा सुद हे। अन माँ हारी बाताँ में बड़िया चालचलन छावाँ हा।</verse>
				<verse number="19">मूँ खासतोरऊँ अरज करूँ हूँ के, परातना करता रेवो, ताँके परमेसर मने थाँका नके वेगो खन्दा सके।</verse>
				<verse number="20">जणी गारा का वणी मान गवाळ्याँ आपणाँ परबू ईसू ने वीं अनंतकाल का करार करबावाळा लुईऊँ मरिया तका मेंऊँ पाच्छा जीवता कर दिदा, वीं सान्तीदाता परमेसर, थाँ हाराने हव चिजाँ में धपा दे, जणीऊँ थाँ वाँकी मनसा ने पुरी कर सको। अन ज्यो कई वींने भावे हे, वींने ईसू मसीऊँ आपाँ में पूरो करे। परमेसर की मेमा हमेस्यान वेती रेवे। आमीन।</verse>
				<verse number="21"></verse>
				<verse number="22">हो भायाँ, मूँ थाँकाऊँ अरज करूँ हूँ के, अणा हिम्मत बन्दाबावाळा उपदेस पे चालो, काँके में कागद में हेली बाताँ ने लिकी हे।</verse>
				<verse number="23">मूँ छावूँ हूँ के, थाँने यो पतो पड़ जावे के, आपणो भई तिमुतियुस छुटग्यो हे, अन यद्याँ वो वेगो आग्यो तो, मूँ वींका हाते थाँकाऊँ मलूँ।</verse>
				<verse number="24">मारा आड़ीऊँ आपणाँ हाराई अगुवाँ अन हाराई पुवितर लोगाँ ने नमस्कार केज्यो, अन इटली का विस्वासी मनक थाँने नमस्कार केवे हे।</verse>
				<verse number="25">परमेसर की दया थाँ हाराई का हाते बणी तकी रेवे।</verse>
			</chapter>
		</book>
		<book number="59">
			<chapter number="1">
				<verse number="1">मूँ परमेसर अन परबू ईसू मसी को दास याकूब, इजराएल का बाराई गोताँ का विस्वास्याँ ने नमस्कार केवूँ हूँ, जीं पुरी दनियाँ वकरिया तका हे।</verse>
				<verse number="2">हो मारा भायाँ-बेना, जद्याँ थाँ तरे-तरे की बाताँऊँ परक्या जावो, तो राजी रेज्यो,</verse>
				<verse number="3">काँके थाँ अस्यान जाणो हो के, जद्याँ परक्यो जावे हे, तो थाँको विस्वास पाको वेवे हे अन थाँने सेण करबा की तागत मले हे।</verse>
				<verse number="4">पण थाँ थाँका मयने धीरज ने आपणो काम पूरो करबा दो, जणीऊँ थाँ पूरा अन पाका वे जावो, अन थाँकामें कणी बात की कमी ने रेवे।</verse>
				<verse number="5">पण जद्याँ थाँकामें किंने भी अकल की कमी वेवे तो, वो परमेसरऊँ मांगे, ज्यो बना तापड़्या खुला मनऊँ देवे हे, अन थाँने अकल दिदी जाई।</verse>
				<verse number="6">पण जद्याँ थाँ विस्वासऊँ मांगो, तो सक मती करज्यो, काँके सक करबावाळो समन्द की लेराँ के जस्यान वेवे हे, वीं बेवे अन उछळे हे।</verse>
				<verse number="7">अस्यान का मनक ने ओ ने हमजणो छावे के, वींने परबूऊँ कई मल जाई।</verse>
				<verse number="8">वो मनक दो मन वाळो हे अन आपणाँ हाराई काम में अस्थिर हे।</verse>
				<verse number="9">जी गरीब भई हे वीं मेपणा करे, काँके परमेसर वाँने ऊसे उटाया हे।</verse>
				<verse number="10">अन अमीर भई भी मेपणा करे, काँके परमेसर वाँने नरम बणाया हे। काँके वाँने चारा का जस्यान एक दन बळन नास वेणो हे।</verse>
				<verse number="11">काँके सुरज को तावड़ा चारा ने बाल देवे हे। जणीऊँ वाँका फुल पता जड़ जावे हे अन वो बड़या ने दिके। अस्यान ईं अमीर मनक भी आपणाँ दोड़भाग का जीवन में एक दन नास वे जावे हे।</verse>
				<verse number="12">वो मनक धन्न हे, ज्यो परक्यो जाबा की टेम में अटल रेवे हे, काँके वो परकबा का केड़े वो खरो मनक बणन, वो जीवन को मुकट पाई, जिंने परमेसर आपणाँ परेम करबावाळा ने देबा का वाते राक वादो कर मेल्यो हे।</verse>
				<verse number="13">जिंने परक्यो जावे हे वींने अस्यान ने केणो छावे के, “परमेसर वींने परक्यो हे।” काँके ने तो बुरी बाताँऊँ परमेसर खुद परक्या जावे हे अन ने वो किंने परके हे।</verse>
				<verse number="14">अन ज्यो भी परक्यो जावे हे वो खेचान बुरी मरजी में पड़ जाँने अन वींमें फसन परक्यो जावे हे।</verse>
				<verse number="15">अन वाँ बुरी मरजी वींके मयने बड़न पाप करावे हे, जणीऊँ वो पाप मोत ने जनम देवे हे।</verse>
				<verse number="16">ईं वाते हो मारा लाड़ला भायाँ-बेना, थाँ धोको मती खावो।</verse>
				<verse number="17">काँके हाराई दान वरदान अन हव ईनाम उपरेऊँईस मले हे अन ईं उजिता का परमेसरइस देवे हे जणी हरग ने बणाया हे, ज्यो कदी बदल कोयने, अन वींमें बदलती दसा का वजेऊँ आबावाळी काळी छाया भी कोयने हे।</verse>
				<verse number="18">वणी आपणी मरजीऊँ हाँच का बचनऊँ पेदा किदा हे जणीऊँ आपाँ वींकी बणई तकी दनियाँ में पेला फळ वेवा।</verse>
				<verse number="19">हो मारा लाड़ला भायाँ, अणा बाताँ पे ध्यान लगावो के, थाँ हाराई हुणबा का वाते त्यार रेवो। बोलबा का वाते आगत मती करज्यो अन गुस्सो करबा का वाते आगता मती वेज्यो।</verse>
				<verse number="20">काँके मनकाँ को गुस्सो करणो परमेसर की धारमिकता कोयने लावे हे।</verse>
				<verse number="21">ईं वाते हाराई असुद कामाँऊँ अन च्यारूँमेर की बुरईऊँ छेटी रेज्यो। पण धिज्यो राकबावाळा वेन परमेसर का बचन जीं थाँका मन में हे वाँने मानज्यो, ताँके वीं थाँकी आत्मा ने छुटकारो दे सके।</verse>
				<verse number="22">बचन ने खाली हूणबावाळा ईंस ने पण वींपे चालबावाळा भी बणो। जद्याँ थाँ खाली हुणबा वाळाईस हो, तो थाँ खुद ने धोको देरिया हो।</verse>
				<verse number="23">काँके जद्याँ कुई बचन हुणे हे, पण वींपे चाले कोयने, तो वो मनक वस्यान को हे, ज्यो आपणाँ मुण्डा ने हव तरियाऊँ काँस में देक हे।</verse>
				<verse number="24">अन वो हव तरियाऊँ देक्याँ केड़े वटेऊँ परो जावे हे अन वो वेगोई भुल जावे हे के, वो कस्यान को दिके हे।</verse>
				<verse number="25">पण ज्यो आजादी देबावाळी परमेसर की हिक पे ध्यान लगावे अन चाले हे, वो आपणाँ काम में आसीस पाई, काँके ज्यो वो हुणे हे वींने भूले कोयने अन जस्यान वो हुणे हे वस्यानीस वो करे हे।</verse>
				<verse number="26">जद्याँ कुई खुद ने भगत हमजे हे अन आपणी जीब ने काबू में ने राके हे तो वो खुद ने धोको देवे हे अन वींकी भगती कई काम की ने हे।</verse>
				<verse number="27">पण परमेसर का हामे खरी अन पुवितर भगती तो आ हे के, अनात अन विदवा के वाँके दुक सक में देक-रेक करे अन खुद पे दनियादारी को कळंक ने लागबा देवे।</verse>
			</chapter>
			<chapter number="2">
				<verse number="1">हो मारा भायाँ, थाँ मेमामय परबू ईसू मसी पे विस्वास राकबावाळा हो, ईं वाते थाँका बचमें भेद-भाव ने वेणो छावे।</verse>
				<verse number="2">थाँ अस्यान मती करज्यो के, यद्याँ थाँकी मण्डली में कुई मनक होना की वीटी अन मेंगा गाबा पेरन आवे अन कुई मनक फाटा गाबा में अन गरीब दसा में आवे,</verse>
				<verse number="3">तद्याँ थाँ वीं मनक ने ज्यो होना की वीटी पेरन आयो हो वींने तो हव जगाँ बेवाड़ो अन वीं गरीबऊँ केवो, थूँ अटेईस ऊबो रे कन मारा पगा का नके बेट जा।</verse>
				<verse number="4">तो अस्यान करन थाँ भेद-भाव ने करो कई, अन बुरी मनसाऊँ वेवार ने करो कई?</verse>
				<verse number="5">हो लाड़ला भायाँ, ध्यानऊँ हुणो। कई परमेसर वाँने ने चुण्या ज्यो ईं दनियाँ की देकणी में गरीब हे, जणीऊँ वीं विस्वास का धनी वेजावे अन वीं वणी राज का हकदार बणे, जिंने परमेसर आपणाँऊँ परेम करबावाळा ने देबा को वादो किदो हे।</verse>
				<verse number="6">पण थाँ तो वणी गरीब मनक को अपमान किदो हो। कई धनी मनक वीं ने हे? जीं थाँका पे जोर जुलम करे अन थाँने थाणा में गड़ीन ने ले जावे?</verse>
				<verse number="7">अन कई वीं मसी का उतम नाम की बुरई ने करे? ज्यो थाँने दिदो ग्यो हे।</verse>
				<verse number="8">सास्तर में लिक्यो हे के, “थाँ थाँका पड़ोसीऊँ थाँका जस्यानीस परेम करज्यो।” ओ हाराई हुकमाऊँ दरबारी हुकम हे। अन जद्याँ थाँ ईंने मानो हो, तो थाँ यो हव करो हो।</verse>
				<verse number="9">पण यद्याँ थाँ भेद-भाव करो हो, तो थाँ पाप करो हो। अणीऊँ नेम थाँने मूसा का नेमा ने तोड़बावाळा गुनेगार ठेरावे हे।</verse>
				<verse number="10">काँके जद्याँ कुई हाराई नेमा ने माने हे, पण वो एक बात में भुल करे हे, तो वो हाराई नेमाने ने तोड़बावाळो गुनेगार बण जावे हे।</verse>
				<verse number="11">काँके जणी यो क्यो हे के, कुकरम मती करज्यो। वणीइस ओ भी क्यो हे के, हत्या मती करज्यो। ईं वाते यद्याँ थाँ कुकरम तो ने करो, पण हत्या करो हो, तो अस्यान करन थाँ नेमाने तोड़बावाळा बणो हो।</verse>
				<verse number="12">थाँ वणा मनकाँ का जस्यान बोलो अन काम करो, ज्याको न्याव आजाद करबावाळा परमेसर का नेमा का जस्यान वेई।</verse>
				<verse number="13">अन ज्यो दया ने करे, वींको न्याव भी बना दयाऊँ वेई हे। पण दया पाप का दण्डऊँ बचावे हे।</verse>
				<verse number="14">हो मारा भायाँ, जद्याँ कुई केवे के, मने विस्वास हे, पण वो वींके जस्यान करम ने करे, तो वींने कई नफो? कई अस्यान का विस्वासऊँ वींको छुटकारो वे सकी?</verse>
				<verse number="15">अन मानो कुई विस्वासी भई-बेन भूका तरिया अन उगाड़ा वे।</verse>
				<verse number="16">अन थाँकामूँ कुई वींने केवे के, राजी खुसीऊँ रे अन धाप्यो तको अन ऊनो रे, पण वींकी देह के जरूत की चिजाँ वींने ने देवे, तो कई फायदो?</verse>
				<verse number="17">अस्यानीस विस्वास का हाते करम ने हे तो विस्वास अपणेआप में मरियो तको हे।</verse>
				<verse number="18">पण कुई के सके के, “थाँरा नके विस्वास हे अन मारा नके करम हे।” अबे थूँ मने थाँरो विस्वास बना करम के बता अन मूँ थने मारो विस्वास मारा करम का जरिये बताऊँ।</verse>
				<verse number="19">अन थूँ विस्वास करे हे के, एकीस परमेसर हे, तो ओ हव हे। पण ओ विस्वास तो हुगली आत्मा भी करे, अन वींके आगे धूजे हे।</verse>
				<verse number="20">अरे ए मुरक, थूँ ओ जाणणो छावे के करम बना विस्वास बेकार हे?</verse>
				<verse number="21">जद्याँ आपणो बापू अबराम आपणाँ बेटा इसाक ने, जद्याँ वेदी पे चड़ायो तो कई वो आपणाँ करमा ऊँइस धरमी कोयने बण्यो हो?</verse>
				<verse number="22">थूँ जाणे हे के, वींको विस्वास वींका करमाऊँ मलन काम किदो अन करम ऊइस वींको विस्वास पाको व्यो हो।</verse>
				<verse number="23">अन ईं तरियाँ सास्तर में लिक्यो तको बचन पूरो व्यो के, “अबराम परमेसर पे विस्वास किदो, जणीऊँ वो धरमी मान्यो ग्यो,” अन परमेसर को दोस्त केवायो ग्यो।</verse>
				<verse number="24">तो थाँ देक लो के, मनक खाली विस्वासईस कोयने, पण करमाऊँ भी धरमी बणे हे।</verse>
				<verse number="25">अस्यानीस राहब वेस्या भी आपणाँ करमा ऊइस धरमी बणी, काँके वणी आपणाँ घर में इजराएली भेद्‍याँ ने सरण दिदी अन वणी वाँने बंचाबा का वाते दूजाँ गेलाऊँ खन्दा दिदा।</verse>
				<verse number="26">अन जस्यान देह आत्मा के बना मरी तकी हे, वस्यानीस विस्वास भी करमा के बना मरियो तको हे।</verse>
			</chapter>
			<chapter number="3">
				<verse number="1">हो मारा भायाँ, थाँका मेंऊँ हेला मण्डली में हिकाबावाळा मती बणज्यो, काँके थाँ जाणो हो के, माँ हिकाबावाळा को न्याव ओरुँ भी कल्ड़ो किदो जाई।</verse>
				<verse number="2">काँके आपणाँऊँ नरी दाण चूक वेजावे हे, पण जो बोलवा में चूक ने करे, वोईस पाको मनक हे अन वो आपणी हारी देह पे लगाम लगा सके हे।</verse>
				<verse number="3">आपाँ घोड़ा का मुण्डा पे लगाम लगावा हा, ताँके वींने आपणाँ काबू में कर सका, अन जटे लेजाणो छावाँ हा, वटे ले जावा हा।</verse>
				<verse number="4">पाणी में चालबावाळा जाँज ने देको, वो पलई कतराई मोटा काँ ने वेवे अन जोर का बईरा का हाते परो जावे हे, पण एक फोरीक पतवारऊँ वींने चलायो जावे अन चलाबावाळा वींने काबू में करन जटे ले जाणो छावे, वटे ले जावे हे।</verse>
				<verse number="5">अस्यानीस आपणी देह में जीब फोरोक अंग हे, पण मोटी-मोटी बाताँ करे हे। थोड़ोक होचन देको एक फोरीक हळी हाराई जंगल ने बाळ देवे हे,</verse>
				<verse number="6">वस्यानीस जीब भी वादी हे, ज्या आपणाँ अंग में एक बुरई की दनियाँ हे अन हारी देह पे कळंक लगावे हे अन हाराई जीवन में वादी लगा देवे हे। अन आ जीब भी आकरी में नरक की वादीऊँ बाळ दिदी जाई।</verse>
				<verse number="7">अन देको हाराई जंगली जनावर, उड़बावाळा जनावर, जमीं पे चाळबावाळा जनावर अन पाणी में रेबावाळा जनावर मनकाँ का काबू में कररिया जा सके हे अन किदा भी ग्या हे।</verse>
				<verse number="8">पण जीब ने कुई मनक काबू में ने कर सक्यो। आ अस्यान की बुरई हे ज्या हसली कोयने रेवे अन जीव लेबावाळा जेरऊँ भरी तकी हे।</verse>
				<verse number="9">आपाँ जीबऊँईस परबू अन बापू की जे-जेकार करा हा अन अणीऊँस परमेसर का रूप में बणाया तका मनकाँ ने हराप देवा हा।</verse>
				<verse number="10">आपाँ एकीस मुण्डाऊँ परमेसर को धन्नेवाद भी करा हा अन एकीस मुण्डाऊँ मनकाँ ने हराप भी देवा हा। मारा भायाँ-बेना अस्यान तो ने वेणो छावे।</verse>
				<verse number="11">थाँईस बतावो एकीस कूण्ड़ाऊँ मिटो अन खारो पाणी निकळ सके हे कई?</verse>
				<verse number="12">अन थाँ भई बतावो, अंजीर का रूँकड़ा के जेतुन अन अंगूर का वेलड़ा के अंजीर लागे हे कई? कदीई ने लागे। अन नेई खारो पाणी निकळबावाळा कूण्ड़ाऊँ मिटो पाणी निकळ सके हे।</verse>
				<verse number="13">थाँकामें ग्यानी अन हमजदार कूण हे? ज्यो अस्यान को हे, वो अणाने आपणाँ हव जीवन, नरमई अन अकलऊँ भरिया तका कामाँऊँ बतावे।</verse>
				<verse number="14">पण यद्याँ थाँ थाँका मन में जलन अन नपरत, हवारत राको हो, तो थाँ मेपणा मती करज्यो, काँके अस्यान करन तो थाँ हाँच ने जूट बतावो हो।</verse>
				<verse number="15">अस्यान को ग्यान हरगऊँ कोयने मले, पण ओ ईं दनियाँ को, मनकाँ का हाव-भाव अन सेतान को ग्यान हे।</verse>
				<verse number="16">काँके जटे जलन अन हवारत हे, वटे विरोद अन हाराई तरियाँ का बुरा काम वेवे हे।</verse>
				<verse number="17">पण ज्यो ग्यान हरगऊँ आवे हे वो हाराऊँ पेल्याँई तो पुवितर वेवे अन वींके केड़े सान्तीऊँ भरियो तको, सेण करबावाळो, बात मानबावाळो, दयाऊँ भरियो तको, हव फळवाळो अन बना पकसपात को अन बना कपट को वेवे हे।</verse>
				<verse number="18">अन जो मेल-मिलाप करावे हे, वीं सान्ती का बीज बोवे हे अन धारमिकता को फळ पावे हे।</verse>
			</chapter>
			<chapter number="4">
				<verse number="1">थाँकामें लड़ई-जगड़ो काँ वेवे हे? ईंको मस थाँका मयने थाँकी भोग-विलास की मरजी हे ज्या थाँका मयने लड़ई-जगड़ो करीरी हे।</verse>
				<verse number="2">थाँ मनसा तो राको हो, पण थाँने मले कोयने। ईं वाते थाँ हत्या करो हो अन थाँ जलन राको हो। पछे भी थाँने कई ने मले, जणीऊँ थाँ लड़ई-जगड़ो करो हो। थाँने थाँकी मनसा की चिजाँ ईं वाते ने मले, काँके थाँ परमेसरऊँ कोयने मागो हो।</verse>
				<verse number="3">अन थाँ माँगो भी हो, पण थाँने मले कोयने, काँके थाँ बुरी मरजीऊँ माँगो हो। अन ज्यो मले वींने थाँ थाँके भोग-विलास में उड़ा देवो हो।</verse>
				<verse number="4">हो कुकरमी लोगाँ, कई थाँ ओ ने जाणो हो के, ईं दनियाऊँ भईच्यारो राकणो परमेसरऊँ दसमणी राकणी वेवे हे? ईं वाते जो दनियाऊँ भईच्यारो राके हे, वो खुद ने परमेसर को दसमण बणावे हे।</verse>
				<verse number="5">कई थाँ अस्यान होचो हो के, पुवितर सास्तर बेकार में केवे हे के, “जणी आत्माने परमेसर आपणाँ मयने राकी हे, वींका वाते वीं जलन राके हे, काँके वींने परमेसर खुब छावे हे?”</verse>
				<verse number="6">पण परमेसर आपापे घणी दया किदी हे, ईं वाते सास्तर में लिक्यो तको हे के, “परमेसर मेपणा करबावाळा का विरोद में हे अन हुदा-हादा मनकाँ पे दया करे हे।”</verse>
				<verse number="7">ईं वाते खुद ने परमेसर का बंस में कर दो। सेतान को विरोद करो, तो वो थाँका हामेऊँ भाग जाई।</verse>
				<verse number="8">परमेसर का नके आवो, तो वो भी थाँका नके आई। हो पापी मनकाँ, थाँ थाँका हाताँ ने सुद करो। हो संका करबावाळा, थाँ थाँका मन ने पुवितर करो।</verse>
				<verse number="9">होक करो, रोवो, अन दकी वेवो। थाँको दाँत काड़णो दुक में अन थाँकी खुसी उदासी में बदल जावे।</verse>
				<verse number="10">थाँ परबू का हामे हुदा-हादा बणो, जणीऊँ वो थाँने ऊसा करी।</verse>
				<verse number="11">हो भायाँ, थाँ एक दूजाँ ने बदनाम मत करो। अन ज्यो कुई आपणाँ भई ने बदनाम करे हे अन दोस लगावे हे। अस्यान करन वो नेमा का विरोद में बोले हे अन नेमा ने दोसी ठेरावे हे। अस्यान करबाऊँ थाँ नेमाने मानबावाळा ने, पण वींका न्याव करबावाळा बण जावो हो।</verse>
				<verse number="12">पण थाँ जाण लो के, नेम देबावाळा अन वींको न्याव करबावाळा तो बेस एकीस हे। अन वोईस बंचाबा की अन मारबा के तागत राक हे। तो पछे थाँ कूण हो जो थाँका पड़ोसी को न्याव करबावाळा बणो हो?</verse>
				<verse number="13">अबे थाँ हुणो, ज्यो अस्यान केवो हो के, “आपाँ आज कन काले कणी नगर में जावा अन वटे जान एक दो साल काम धन्धो करन रिप्यावाळा बण सका हा।”</verse>
				<verse number="14">पण थाँ तो यो भी ने जाणो के, काले थाँका जीवन में कई वेई। देको, थाँको जीवन कई हे? थाँ तो वीं धुंध के जस्यान हो, ज्या थोड़ीक देर का वाते दिके हे अन पाच्छी परी जावे हे।</verse>
				<verse number="15">पण थाँने तो अस्यान केणो छावे के, “यद्याँ परबू की मरजी वेई, तो आपाँ जीवता रेवा अन ओ कन वो काम कराँ।”</verse>
				<verse number="16">पण थाँ तो जुट-मुट को मेपणो करो हो। अस्यान को मेपणो बुरो हे।</verse>
				<verse number="17">अन जो मनक भलई करणो जाणे हे, पण ने करे, तो वो पाप करे हे।</verse>
			</chapter>
			<chapter number="5">
				<verse number="1">हो धनवानो, मारी हुणो, थाँ रोवो अन होक करो, काँके थाँका पे अबकी टेम आबावाळी हे।</verse>
				<verse number="2">थाँकी धन-दोलत हड़गी हे, थाँका गाबा के उदी लागगी हे।</verse>
				<verse number="3">थाँका होना-चाँदी के जंग लागग्यो। वणापे लाग्यो तको जंग थाँने दोसी ठेराई अन वादी की जस्यान थाँरी देह ने बाळी। पण थाँ तो आकरी दनाँ में रिप्या को ढेर लगायो हे।</verse>
				<verse number="4">थाँका खेत में जी दानक्याँ काम कररिया हा, वाँने थाँ दानकी ने दिदी अन वाँ दानकी हेलो पाड़े हे अन काटबावाळा दानक्याँ की हाका-भार सरव-सगतीमान परबू तईं पोंछगी हे।</verse>
				<verse number="5">थाँ ईं धरती पे आपणी मन मरजी को जीवन जिदो अन थाँ खुद ने भोग-विलास में डुबाया राक्या, थाँ थाँकी देह ने नासवाळा दन का वाते ताकड़े अन त्यार कर लिदी हे।</verse>
				<verse number="6">थाँ धरमी मनकाँ ने दोसी बतान मार दिदा, जणा थाँको सामनो ने किदो हो।</verse>
				<verse number="7">ईं वाते हो भायाँ, जद्याँ तईं परबू पाच्छा ने आवे थाँ धीरज राको। जस्यान एक करसाण आपणे वाते मायनो राकबावाळी खेत की हाक पाकबा की आस करतो तको चोमासा की पेली बरकाऊँ लेन हियाळा का मावटा तईं धीरज राके।</verse>
				<verse number="8">वस्यानीस थाँ भी धीरज राको अन आपणाँ मना ने पाको करलो, काँके परबू वेगा आबावाळा हे।</verse>
				<verse number="9">हो भायाँ, एक दूजाँ पे मती बड़बड़ावो, ताँके थाँ दोसी ने ठेरो। देको, न्याव करबावाळो बारणा आगेईस ऊबो तको हे।</verse>
				<verse number="10">हो भायाँ, थाँ परमेसर का आड़ीऊँ बोलबावाळा ने आद राको, जीं परबू का नामऊँ बोलता हा। वणा आपणाँ वाते दुक जेल्यो अन धीरज राक्यो, वीं आपणाँ वाते नमुनो हे।</verse>
				<verse number="11">देको, आपाँ धीरज राकबावाळा ने धन्न हमजा हा। थाँ अयुब का धीरज का बारा में तो हुण्योईस हे अन परबू वींने वींको ज्यो फळ दिदो हो, यो थाँ तो जाणोइस हो, काँके परबू तरस अन दया करबावाळा हे।</verse>
				<verse number="12">हो भायाँ, हाराऊँ मोटी बात तो या हे के, थाँ होगन मती खाज्यो, ने तो हरग की अन ने धरती की अन नेई कणी चीज की। पण थाँकी बाताँ हा की हा अन ने की ने वेवे, जणीऊँ थाँने परमेसर को दण्ड ने भोगणो पड़े।</verse>
				<verse number="13">थाँकामूँ कुई दकी वे, तो वो परातना करे। अन जो राजी हे वो परबू की मेमा का भजन गावे।</verse>
				<verse number="14">अन थाँकामें ज्यो कुई मांदो हे, वो मण्डली का अगुवाँ ने बलावे, जणीऊँ वीं वींके तेल मलन परबू का नामऊँ परातना करे।</verse>
				<verse number="15">विस्वासऊँ किदी तकी परातनाऊँ मांदो हव वे जाई अन परबू वींने ऊबो करी अन जद्याँ वणी पाप भी किदो हे, तो वाँने भी माप कर देई।</verse>
				<verse number="16">ईं वाते थाँ एक दूजाँ का हामे खुद का पाप ने मानलो अन एक दूजाँ का वाते परातना करता रेवो, जणीऊँ थाँ हव वे जावो। धरमी मनक की परातना घणी जोरवार अन असर करबाळी वेवे हे।</verse>
				<verse number="17">परमेसर का आड़ीऊँ बोलबावाळो एलियो आपणे जस्यानीस एक मनक हो। वणी विस्वास का हाते परातना किदी के, बरका ने वरे तो हाड़ा तीन वरा तईं धरती पे बरका ने वरी।</verse>
				<verse number="18">अन वणी पाच्छी परातना किदी अन बरका वरी अन धरती पे हाक उगबा लागी।</verse>
				<verse number="19">हो मारा भायाँ, जद्याँ कुई थाँका मेंऊँ हाँच का गेलाऊँ भटक जावे अन वींने कुई पाछो हाँच का गेला पे फेर लावे,</verse>
				<verse number="20">तो वो हमजी ले के, वो पापी मनक ने मोतऊँ फेर लाई अन वींकी आत्मा ने अनंत मोतऊँ बंचाई अन वींका नरई पापाँ की मापी को कारण बणी।</verse>
			</chapter>
		</book>
		<book number="60">
			<chapter number="1">
				<verse number="1">मूँ पतरस ज्यो परबू ईसू मसी को थरप्यो तको चेलो, यो कागद वणा मनकाँ ने लिकरियो हूँ, जी परमेसर का आड़ीऊँ चुण्या तका हे अन ईं पुन्तुस, गलातिया, कप्पदुकिया, एसिया अन बितुनिया का परदेस में बारबासी वेन वकरिया तका हे।</verse>
				<verse number="2">बापू परमेसर थाँने आपणाँ पेल्या का ग्यानऊँ पेल्याई चुण लिदा हे, अन वाँकी पुवितर आत्मा थाँने पुवितर बणाया हे, अणीऊँ थाँ ईसू मसी की आग्या को पालण करो अन वींका खुनऊँ सुद वेवो। थाँका पे परमेसर की करपा अन सान्ती वेती रेवे।</verse>
				<verse number="3">आपणाँ परबू ईसू मसी का बापू परमेसर की जे हो, काँके परमेसर आपणाँ पे घणी मोटी दया बतई जणीऊँ वणा मसी ने मरिया तका मेंऊँ जीवान आपाँने नुवा जीवन की जीवती आस राकबा वाते वणा आपाँने नुवो जीवन दिदो हे।</verse>
				<verse number="4">अबे थाँ हरग में राकी तकी बापोती का वारिस वेग्या हो, ज्या ने कदी हड़ी ने कदी नास वेई अन ने कदी खुवई।</verse>
				<verse number="5">थाँ, ज्याँने परमेसर थाँका विस्वास का जरिये आपणी तागतऊँ वीं छूटकारा का वाते बचावे हे, ज्यो आकरी टेम में परगट वेबावाळो हे।</verse>
				<verse number="6">ईं बात का वजेऊँ थाँ घणा राजी तो वेवो हो, पण थाँने थोड़ाक दनाँ का वाते तरे-तरे की परक में पड़न दुक जेलणो भी जरूरी हे।</verse>
				<verse number="7">यो ईं वाते व्यो, ताँके थाँको यो विस्वास ज्यो वादी में पाक्या तका होनाऊँ भी मुगो हे, जद्याँ परबू ईसू मसी आई, तो ईं विस्वास का वजेऊँ थाँने परमेसर का आड़ीऊँ बड़ई, मेमा अन मान मली।</verse>
				<verse number="8">अन जद्याँ थाँ वींने देक्यो ने हे, तो भी थाँ वाँकाऊँ परेम करो हो अन अबाणू भी वींने ने देक पारिया हो, तो भी थाँ वींपे विस्वास करन अस्यान राजी-खुसी वेवो हो के, जिंको बखाण ने किदो जा सके हे, जो मेमाऊँ भरियो तको हे।</verse>
				<verse number="9">थाँ वींपे विस्वास करो हो, वींको फळ योईस हे के, थाँ बंचाया जावो हो अन ईंकी थाँने ध्यान भी हे।</verse>
				<verse number="10">थाँ बंचाया जारिया हो, ईंका बारा में जाणबा का वाते परमेसर का आड़ीऊँ बोलबावाळा घणी मेनत किदी ही अन हूँस्यारी का हाते पतो किदो हो। थाँका पे वेबावाळी दया का बारा में वणा पेल्याइस आगेवाणी कर दिदी ही।</verse>
				<verse number="11">अन वीं परमेसर का आड़ीऊँ बोलबावाळा मसी की आत्माऊँ यो भी जाणे हे के, मसी पे दुक आबावाळो हे अन वणी दुक का केड़े वींकी मेमा भी वेई। वाँ आत्मा वाँने बतावे हे के, ईं बाताँ कदी वेई अन तद्याँ ईं दनियाँ को कई वेई।</verse>
				<verse number="12">वाँने यो भी दरसावो व्यो के, जीं बाताँ का बारा में वीं बताता तका सेवा किदी ही, वणीऊँ वीं खुद की सेवा ने कररिया हे, पण थाँकी सेवा कररिया हा। वीं बाताँ थाँने हरगऊँ खन्दई तकी पुवितर आत्मा के वजेऊँ हव हमच्यार ने हुणाबावाळा का जरिये पेल्याँई बता दिदी गी ही। ईं बाताँ ने जाणबा का वाते तो हरग-दुत भी तरसे हे।</verse>
				<verse number="13">ईं वाते थाँ थाँका मन ने बंस में राको अन खुद ने भी बंस में राको अन वीं वरदान की आस लगई तकी राको, ज्यो थाँने ईसू मसी परगट वेई, वीं दाण दिदो जाई।</verse>
				<verse number="14">आग्या मानबावाळा बाळक के जस्यान रेवो। पेल्याँ थाँकामें ज्या बुरी मरजी ही, वींके जस्यान मती रो, काँके तद्याँ थाँ बना ग्यान का हा।</verse>
				<verse number="15">पण जस्यान थाँने बलाबावाळा परमेसर पुवितर हे, वस्यानीस थाँ थाँका हाराई काम में पुवितर बणो।</verse>
				<verse number="16">काँके सास्तर में भी अस्यानीस लिक्यो तको हे के, “थाँ पुवितर बणो, काँके मूँ पुवितर हूँ।”</verse>
				<verse number="17">जद्याँ थाँ परमेसर ने जो हाराई मनकाँ ने वाँका काम का जस्यान अन जो पकसपात का हाते न्याव ने करे, वींने थाँ “हो बापू” केन बलावो हो, तो थाँ ईं बारवासी धरती पे रेता तका परमेसर ने आदर देता तका जीवन जीवो।</verse>
				<verse number="18">थाँ ओ भी जाणो हो के, थाँने होना अन चाँदी के चिजाँऊँ वीं बेकार जीवनऊँ छुटकारो ने मल सके, ज्यो थाँने थाँका बड़ाबाऊँ मल्यो हे।</verse>
				<verse number="19">पण थाँने ओ छुटकारो मसी का किमती लुईऊँ, जो निरदोस उन्याँ के जस्यान हे, मल सके हे।</verse>
				<verse number="20">वींने ईं धरती की रचना वेबाऊँ पेल्याँई चुण लिदो ग्यो हो, पण थाँ लोगाँ का वाते आकरी दनाँ में वींने परगट किदो ग्यो।</verse>
				<verse number="21">थाँ भी मसी का वजेऊँईस परमेसर पे विस्वास करो हो, जणा वाँने मरिया तका मेंऊँ पाछो जीवतो कर दिदो अन वींने मेमा भी दिदी। ईं वाते थाँको विस्वास अन थाँकी आस परमेसर में गाटी बणी तकी रेवे।</verse>
				<verse number="22">अबे जद्याँ थाँ हाँच ने मानता तका, हाँचा भईचारा का परेम ने बताबा का वाते आपणी आत्माने पुवितर कर लिदी हे, ईं वाते थाँ एक-दूँजा में पुवितर मनऊँ परेम करबा की मनसा बणालो।</verse>
				<verse number="23">काँके थाँ नुवो जीवन पायो हे, अन थाँको यो नुवो जीवन मनकाँ का आड़ीऊँ कोयने, जिंको अंत वेवे हे, पण यो जीवन तो परमेसरऊँ आयो हो, जिंको अंत किदी ने वेवे हे। काँके थाँ परमेसर का बचना पे विस्वास किदो हे ज्यो हमेस्यान जीवतो अन अटल रेवे हे।</verse>
				<verse number="24">काँके सास्तर में भी लिक्यो तको हे के, “हाराई मनक चारा के जस्यान हे, अन वाँको सजणो अन धजणो भी काकड़ का फुल का जस्यान हे। चारो हूक जावे हे अन फुल जड़ जावे हे।</verse>
				<verse number="25">पण परबू को वसन जुग-जुग का वाते अटल रेवे हे।” यो वोईस हव हमच्यार हे, जो थाँने हुणायो ग्यो हे।</verse>
			</chapter>
			<chapter number="2">
				<verse number="1">ईं वाते थाँ छळ, ढोग, वेर भाव, कपट, दूजाँ पे दोस लगाणो अस्यी बुरईऊँ बंचन रेज्यो।</verse>
				<verse number="2">जस्यान नुवो जनम लिदो तको बाळक माँ का खरा दूद की मनसा करे हे वस्यानीस थाँ आत्मिक दूद की मनसा राको, जणीऊँ थाँकी आत्मिक बड़ोतरी वे सके अन बंचाया जा सको।</verse>
				<verse number="3">काँके जस्यान पुवितर सास्तर में लिक्यो तको हे के, “अबे थाँने पतो लागग्यो हे परबू थाँका वाते करता दयाळू हे।”</verse>
				<verse number="4">ईं वाते थाँ परबू का नके आवो, वो जीवतो “भाटो” हे। वींने ईं दनियाँ का मनक तो नकार दिदो हो, पण वो परमेसर का वाते तो अनमोल को हे अन वणाईस वींने चुण्यो हे।</verse>
				<verse number="5">थाँ भी जीवता भाटा का जस्यान हो थाँने आत्मिक मन्दर का रूप बणाया जारिया हे, जणीऊँ थाँ पुवितर याजक का जस्यान बणन अस्यान का आत्मिक बलीदान चड़ावो, जो ईसू मसी के वजेऊँ परमेसर के चड़ाबा का जोगा वेवे।</verse>
				<verse number="6">ईं वाते पुवितर सास्तर में भी लिक्यो तको हे के, “देको, मूँ परमेसर का नगर में एक खुणा को भाटो मेलू हूँ जो घणो मुगो हे अन वो चुण्यो तको हे अन ईंपे ज्यो भी विस्वास करी, वो कदी हरमा ने मरी।”</verse>
				<verse number="7">थाँ जो वींपे विस्वास करो हो वो थाँका वाते तो बनामोल को हे, पण जो वींपे विस्वास ने करे वाँके वाते, “वोईस भाटो, जिंने राज कारीगर बेकार मान्यो हे वोईस खुणा को खास भाटो बणग्यो।”</verse>
				<verse number="8">अन वो “अस्यान को भाटो बणग्यो, जणीऊँ लोगाँ ने ठेस लागे। अन ठोकर खाबा वाते एक छाँट के जस्यान बणग्यो।” काँके वीं तो बचन ने मानन ठोकर खावे हे अन योईस वाँका वाते ठेरायो भी ग्यो हे।</verse>
				<verse number="9">पण थाँ तो अस्या मनक कोयने हो, थाँ तो परमेसर का थरप्या तका मनक हो, थाँ रजवाड़ी याजकाँ की टोळी अन पुवितर परवार का हो, परमेसर थाँने अंदारा का राज मेंऊँ अचम्बावाळा उजिता में लाया हे, जणीऊँ थाँ परबू का अचम्बावाळा काम का बारा में बता सको।</verse>
				<verse number="10">एक टेम ही, जद्याँ थाँ वाँकी परजा ने हा, पण अबाणू थाँ परमेसर की परजा हो। एक टेम ही जद्याँ थाँका पे परमेसर दया ने किदी ही, पण अबाणू वीं थाँका पे दया करे हे।</verse>
				<verse number="11">हे मारा प्यारा भायाँ-बेना, थाँ जो ईं दनियाँ का मयने बारवासी मनकाँ के जस्यान हो, थाँकाऊँ अरज करूँ हूँ के, थाँ पाप करबा की बुरी मरजीऊँ खुद ने बंचान राकज्यो, ज्या थाँकी आत्माऊँ लड़ती रेवे हे।</verse>
				<verse number="12">जीं यहूदी ने हे वीं मनक थाँने बुरा केवे हे, पण ईंका केड़े भी वाँका बचमें थाँको वेवार अन चालचलन हव वेणो छावे, जणीऊँ जणा बाताँ में वीं थाँने दोसी जाणन बदनाम करे हे, वीं थाँका भला काम ने देकन वाँकी वजेऊँ जीं दन परबू आई, वीं दन वीं परमेसर की मेमा कर सकी।</verse>
				<verse number="13">परबू वाते मनकाँ मेंऊँ बणाया ग्या, हाराई अदिकारियाँ का बंस में रेवो। राजा का बंस में ईं वाते रेवो, काँके वो हाराई पे परदान हे।</verse>
				<verse number="14">हाकम का बंस में, ईं वाते रेवो, काँके वीं कुकरमी ने दण्ड देबा वाते अन हव मनकाँ की बड़ई करबा का वाते राजा का आड़ीऊँ चुण्या तका मनक हे,</verse>
				<verse number="15">काँके परबू की आ मरजी हे के, थाँ थाँका भला काम के वजेऊँ वेण्डा मनकाँ की बुरईऊँ भरी तकी बाताँ ने करबावाळा मुण्डा ने छानो कर दो।</verse>
				<verse number="16">आजाद मनक के जस्यान जीवन जीवो अन ईं आजादी की आड़ में बुरई मती करज्यो, पण परबू का दास का जस्यान जीवन जीवो।</verse>
				<verse number="17">हाराई मनकाँ को मान करो। विस्वास्याँऊँ परेम करो, परमेसर को आदर-मान करता तका वाँकाऊँ दरपो, अन राजा की इजत करो।</verse>
				<verse number="18">हो दासाँ, आदर राकन आपणाँ-आपणाँ मालिकाँ का बंस में रेवो अन वाँकेइस बंस में मती रेवो जो भला अन हव हे, पण वाँके भी बंस में रेवो जी कल्डा हे।</verse>
				<verse number="19">काँके यद्याँ कुई परमेसर का बारा में बच्यार करन अन्याव अन दुक जेलतो तको कळेस भोगे हे, तो वो बड़ई को जोगो हे।</verse>
				<verse number="20">पण यद्याँ थाँने बुरा काम करबा का वजेऊँ कुट्या जावे अन थाँ दुक भोगो हो, तो ईंमें बड़ई की कस्यी बात हे? पण यद्याँ थाँने थाँका हव काम की वजेऊँ हताया जावे हे तो थाँ परमेसर का हामे बड़ई के जोगो हो।</verse>
				<verse number="21">परमेसर थाँने ईं वाते बलाया हे, काँके मसी आपणाँ वाते दुक जेल्यो हो अन अस्यान करन वणा आपणाँ वाते एक हिक दिदी हे के, आपाँ भी वींका जस्यानीस चाल सका।</verse>
				<verse number="22">सास्तर में लिक्यो तको हे के, “वणी कई पाप ने किदो हो अन नेई वाँका मुण्डाऊँ धोका की बाताँ निकळी।”</verse>
				<verse number="23">जद्याँ वाँकी बेजती किदी गी, तो भी वणा किंकीई बेजती ने किदी। जद्याँ वीं दुक जेलरिया हा, तो भी वणा किंने भी धमकी ने दिदी, पण वणा आपणाँ खुद ने हाँचा न्याव करबावाळा परमेसर ने हूँप दिदा।</verse>
				<verse number="24">वीं आपणाँ पापाँ ने खुद की देह पे लेन हूळी पे चड़ग्या, ताँके आपाँ पाप का वाते मरन धारमिकता का वाते जीवन जीवाँ, वींके मार खाबा के वजेऊँ थाँ हव व्या हो।</verse>
				<verse number="25">काँके पेल्याँ थाँ गम्या तका गारा का जस्यान हा, पण अबाणू थाँ थाँका गवाळ्याँ अन थाँकी आत्मा की रकबाळी करबावाळा का नके पाच्छा आग्या हो।</verse>
			</chapter>
			<chapter number="3">
				<verse number="1">हो लुगायाँ, जस्यान दास मालिक का बंस में रेवे हे, वस्यान थाँ भी थाँका धणी का बंस में रेवो, काँके यद्याँ थाँका धणी परबू का बचन ने मानबावाळा भी वेवे, तो वींने कई केवा की जरूत कोयने, पण वो आपणी लुगई का वेवार ने देकन परमेसर का बचन पे चालबा लाग जाई।</verse>
				<verse number="2">काँके वो देकी के, थाँ परमेसर को आदर-मान करो अन पुवितर चालचलन राको हो।</verse>
				<verse number="3">थाँको सजणो-धजणो दिकावटी ने वे, अन थाँ होना का गेणा पेरबा में अन बाल गुतबा में अन हव हव गाबा पेरबा मेंईस मती लागी रेज्यो।</verse>
				<verse number="4">पण थाँ थाँको मयने का मन ने परबू का वसनऊँ जो सान्ती अन हुदा भावऊँ भरियो तको हे, वणीऊँस खुद ने सजाज्यो, काँके अस्यान को सजणो-धजणो परमेसर का हामे घणो हव हे।</verse>
				<verse number="5">काँके पेला का जुग में जो पुवितर लुगायाँ ही, वीं परमेसर में आस राकबावाळी ही, वीं खुद भी परमेसर की मरजी का जस्यान सजती-धजती ही। अन आपणाँ-आपणाँ धणी का क्या में रिया करती हे।</verse>
				<verse number="6">जस्यान सारा अबराम का क्या में रिया करती ही अन अबराम ने खुद को मालिक मानती ही। अस्यान जद्याँ थाँ भी भलई करो अन कणीऊँ दरपो कोयने, तो थाँ वींकी बेट्या केवावो।</verse>
				<verse number="7">अस्यानीस हो मोठ्याराँ, थाँ भी थाँकी लुगायाँ का हाते हमजदारी का हाते जीवन जीवो। लुगायाँ ने कमजोर हमजन वाँको आदर करो, ओ जाणन के, आपीं दुई जीवन का वरदान में पांतीदार हा, ताँके थाँकी परातना में कुई ओट ने आवे।</verse>
				<verse number="8">मारी आकरी मरजी हे के, थाँ हाराई मनक एक मन रेवो अन थाँ हाराई ने मनकाँ का हाते मेल-मिलाप, भईचारा, दया करबावाळा अन भायाँ का हाते परेम-भावऊँ रेबावाळा बणणो छावे।</verse>
				<verse number="9">बुरई का बदले बुरई मती करो। जद्याँ कुई थाँकी बेजती करे, तो वींके हाते थाँ भी वींकी बेजती मती करो पण वींका बदले थाँ वींने आसिरवाद दो, काँके परमेसर थाँने आसिरवाद का वारिस वेबा का वाते बलाया हे।</verse>
				<verse number="10">जस्यान पुवितर सास्तर में लिक्यो तको हे के, “जो जीवन की आस राके हे हव दनाँ की आस राके हे, वो आपणी जीब ने बुरी बाताँ केवाऊँ अन होटा ने छळ करबा की बाताँऊँ रोकी राके।</verse>
				<verse number="11">बुरई करणी छोड़न भलई करो, मेल-मिलाप करबा की कोसीस में लाग्या रो,</verse>
				<verse number="12">काँके परबू की आक्याँ खरा मनकाँ पे लागी रेवे हे, अन वींका कान वाँकी परातना हुणबा का वाते वाँके आड़ी लाग्या रेवे हे, पण परबू वाँ मनकाँ का विरोद रेवे हे जो बुरई करे हे।”</verse>
				<verse number="13">यद्याँ थाँ भलई करबा का वाते त्यार रेवो, तो थाँकी बुरई करबावाळा कूण वेई?</verse>
				<verse number="14">यद्याँ थाँ भलई का वजेऊँ दुक जेलो हो, तो थाँ धन्न हो, ईं वाते लोगाऊँ दरपज्यो मती अन घबराज्यो मती।</verse>
				<verse number="15">पण मसी ने परबू जाणन थाँ थाँका मनऊँ वाँको आदर करो। यद्याँ कुई थाँने थाँकी आस का बारा में पूछे, तो वींने जवाब देबा का वाते हमेस्या त्यार रेज्यो।</verse>
				<verse number="16">थाँ थाँका मन ने पुवितर राकज्यो, जणीऊँ ईसू मसी में जो थाँका हव वेवार का बारा में ज्यो भी मनक बेजत करबावाळा हे, वीं हरमा मरे।</verse>
				<verse number="17">यद्याँ परमेसर की याईस मरजी हे के, थाँ भला काम करता तका दुक जेलो, तो पछे बुरई करबाऊँ तो दुक जेलणो हव हे।</verse>
				<verse number="18">काँके मसी भी आपणाँ पापाँ का वाते दुक जेल्यो हो। ईंको मतलब ओ हे के, वो निरदोस हो तो भी वो आपणाँ पाप का वाते एक दाण मरग्यो, जणीऊँ वो आपाँने परमेसर का नके ले जावे। वो देह का रूप में तो मरग्यो, पण आत्मिक रूप में जिवायो ग्यो हे।</verse>
				<verse number="19">मरबा केड़े मरिया तका मेंऊँ जीवतो वेबा के, पेल्याँ वो मरिया तका मनकाँ की आत्मा, जीं न्याव वेबा का वाते केद में ही, वाँका में हव हमच्यार को परच्यार किदो।</verse>
				<verse number="20">ईं वणा मनकाँ की आत्मा हे, जणा जद्याँ नूह नाव बणारियो हो वीं टेम परमेसर को केणो ने मान्यो, पण परमेसर धिज्या का हाते वाँकी वाट नाळरिया हा, वीं टेम भी नाव में आट मनकईस पाणीऊँ बंचाया ग्या हा।</verse>
				<verse number="21">वो पाणी भी बतिस्मा का जस्यान हे, जणीऊँ अबे थाँ बंचाया जावो हो। अणी बतिस्मा को मतलब यो कोयने के, देह को मेल धोयो जावे, पण मन ने पुवितर करन खुद ने परमेसर का आड़ी फेरणो वेवे हे, काँके ईसू मसी मरिया तका मेंऊँ पाच्छा जीवता किदा ग्या हा।</verse>
				<verse number="22">वो हरग में परमेसर का जीमणा पाल्डे बेट्यो तको हे, अन अबाणू हरग-दुत, अदिकारी अन हारी सगत्याँ वींके बंस में कर दिदी गी हे।</verse>
			</chapter>
			<chapter number="4">
				<verse number="1">जद्याँ मसी देह रूप धारण करन दुक जेल्यो हो, तो थाँ भी वाँके जस्यान मनसा राकता तका जीवन जीवो, काँके जो देह में दुक जेले हे, वो पापऊँ छुटकारो पा लेवे हे।</verse>
				<verse number="2">ईं वाते थाँ आपणाँ आगे को जीवन मनकाँ की मरजी का जस्यान ने, पण परमेसर की मरजी का जस्यान जीवो।</verse>
				<verse number="3">काँके विस्वास करबाऊँ पेल्याँ थाँ ज्यो यहूदी ने हे वाँके जस्यान लुचोपणो, बुरी मरजी, खा-पीन वेण्डा वेन, कुकरम करता तका, हरमऊँ भरिया तका काम में अन बेकार की मूरत्याँ की पुजा करता तका घणो टेम वीता नाक्यो हे।</verse>
				<verse number="4">पण अबे थाँ वाँका वणा बुरा काम में भेळा ने वेवो हो, तो वाँने अचम्बा वेवे हे, ईं वजेऊँ वीं थाँकी नन्दयाँ करे हे।</verse>
				<verse number="5">पण वाँने जीं जीवता हे कन मरी ग्या हे हाराई ने आपणाँ-आपणाँ काम को लेको-जोको परमेसर ने देणो पड़ी, जो न्याव करबावाळा हे।</verse>
				<verse number="6">ईं वाते वीं विस्वासी, जीं मरग्या हे, वाँने हव हमच्यार ईं वाते हुणायो ग्यो हो के, वीं देह में तो मनकाँ का क्या जस्यान वाँको न्याव वे, पण आत्मा में वीं परमेसर का क्या जस्यान जीवता रेवे।</verse>
				<verse number="7">वाँ टेम नके हे, जद्याँ हारोई नास वे जाई। ईं वाते थाँ हमजदार बणो अन खुद ने बंस में राको, जणीऊँ थाँने परातना करबा में मदत मले।</verse>
				<verse number="8">हाराऊँ बड़िया बात आ हे के, एक-दूजाऊँ हाँचो परेम राको, काँके परेम नरई पापाँ ने धो देवे हे।</verse>
				<verse number="9">बना बड़बड़ करिया, थाँ एक दूजाँ की आवभगत करिया करो।</verse>
				<verse number="10">जणी किंने भी परमेसर का आड़ीऊँ जो भी वरदान मल्यो हे वींने छावे के, वो परमेसर का वादा का जस्यान हव वेवस्ता करबावाळा की जस्यान, एक दूजाँ की सेवा करबा वाते वीं वरदान ने काम में लेवे।</verse>
				<verse number="11">जद्याँ कुई उपदेस हुणावे तो वींने अस्यान हूणाणो छावे जस्यान के, वो परमेसरऊँ मल्या तका बचन ने हुणारियो वेवे। यद्याँ कुई सेवा करे, तो वो वीं तागतऊँ ज्या परमेसर वींने दिदी हे वींके जस्यान सेवा करे, जणीऊँ हारी बाताँ में ईसू मसी की वजेऊँ परमेसर की मेमा वेवे। मेमा अन तागत हमेस्या वींकीइस हे। आमीन।</verse>
				<verse number="12">हो मारा प्यारा भायाँ, थाँका मयने ज्याँ दुक की घड़ी थाँने परकबा वाते थाँकामें वीती री हे, ईंके वजेऊँ थाँ ओ जाणन अचम्बा मती करो के, थाँका पे घणी अनहोणी वेरी हे।</verse>
				<verse number="13">पण राजी वेवो के, थाँने मसी का जस्यान दुक जेलबा को मोको मल्यो हे। जणीऊँ जद्याँ ईसू मसी की मेमा परगट वेई तद्याँ थाँ भी राजी अन खुसी रे सको।</verse>
				<verse number="14">यद्याँ मसी का नाम की वजेऊँ थाँने दुक जेलणो अन बेजत वेणो पड़े हे तो थाँ ईंने आसिरवाद हमजो, काँके परमेसर की आत्मा ज्या मेमा की आत्मा हे, वाँ थाँका ऊपरे बणी तकी रेवे हे।</verse>
				<verse number="15">ईं वाते थाँकामें कुई भी हत्यारो, चोर, कुकरमी अन दूजाँ का काम में ठोकर बणन दुक ने जेले।</verse>
				<verse number="16">पण यद्याँ थाँ एक मसी विस्वासी वेबा की वजेऊँ दुक जेलो हो, तो थाँने हरमा मरबा की कई जरूत ने हे, पण थाँने तो ईं काम की वजेऊँ परमेसर की मेमा करणी छावे।</verse>
				<verse number="17">काँके वाँ टेम आबावाळी हे, जद्याँ पेल्याँ परमेसर का मनकाँ को न्याव किदो जाई अन न्याव की सरुवात आपणाँ ऊँइस वेई तो वाँको कई वेई ज्यो परमेसर का हव हमच्यार ने कोयने माने हे?</verse>
				<verse number="18">अन जस्यान सास्तर में लिक्यो तको हे के, “यद्याँ धरमी मनक को भी बचणो घणो अबको हे तो पछे तो पाप्याँ अन भगतीऊँ छेटी रेबावाळा को कई वेई?”</verse>
				<verse number="19">ईं वाते जो परमेसर की मरजी का जस्यान दुक जेले हे, वीं भलई करता तका आपणाँ खुद ने विस्वास जोगा अन आपणी रचना करबावाळा परमेसर का हाताँ में हूँप देणा छावे।</verse>
			</chapter>
			<chapter number="5">
				<verse number="1">अबे मूँ वाँने जो थाँका मयने परदान मान्याँ जावे हे, वाँकाऊँ परातना करूँ हूँ, मूँ खुद एक दानो परदान हूँ अन जो दुक मसी जेल्यो हो वींको मूँ गवा हूँ अन आबावाळी मेमा को मूँ भागी हूँ।</verse>
				<verse number="2">मूँ थाँने हमजाऊँ हूँ के, परमेसर की मडळी ज्याँ थाँकी देक-रेक में हे वींकी रुकाळी करो। ओ काम किंकई दबाव में आन मती करो पण परमेसर की मरजीऊँ राजी वेन करो। धन का लाळच की वजेऊँ ओ काम मती करो, पण मन लगान यो काम करो।</verse>
				<verse number="3">ज्या विस्वासी मण्डली थाँका हक में हे वींपे जोर मती जमावो, पण लोगाँ ने हिक देबावाळा बणो,</verse>
				<verse number="4">काँके जद्याँ वो रुकाळ्यो मसी जो हाराई पे परदान हे परगट वेई, तो थाँने मेमा को मुकट दिदो जाई अन ईं मुकट की सोभा कदी कम ने पड़ी।</verse>
				<verse number="5">हो मोठ्याराँ, अणीस तरियाँ थाँ भी परदानाँ का बंस में रेवो, थाँ हाराई का हाराई सेवा करबा वाते दया का हाते त्यार रेवो, काँके “परमेसर मेपणो करबावाळा का खिलाप में हे, पण जो मनक खुद ने फोरो बणावे हे वींके ऊपरे परमेसर दया करे हे।”</verse>
				<verse number="6">ईं वाते परमेसर का जोरवार हाताँ का रेटे नरम बणन रेवो, जणीऊँ वो थाँने सई टेम आबा में ऊसा करे।</verse>
				<verse number="7">थाँ थाँकी हारी चन्ता वींके ऊपरे नाक दो, काँके वींने थाँको ध्यान हे।</verse>
				<verse number="8">थाँ हूँस्यार रेवो अन जागता रेज्यो, काँके थाँको दसमण सेतान दहाड़ करबावाळो नार की जस्यान ईं भाळ में हे के, वो थाँने फाड़न खावे।</verse>
				<verse number="9">थाँ विस्वास में पाका वेन सेतान को सामनो करो। थाँ तो यो जाणोइस हो के, थाँका भई-बेन अणी आकी दनियाँ में हे दुक जेलरिया हे।</verse>
				<verse number="10">अबे परमेसर, जीं दया करबावाळा अन दया का दाता हे, वींइस थाँने मसी में जुग-जुग का वाते खुद की मेमा करबा वाते बलाया हे। थाँने थोड़ोक दुक जेलबा केड़े, वो खुदई थाँने गाटा, जोरावर अन पाका बणाई।</verse>
				<verse number="11">परमेसर को राज जुग-जुग रेवे। आमीन।</verse>
				<verse number="12">मूँ सिलवानुस ने विस्वास जोगो भई जाणूँ हूँ अन वींकी मदतऊँ यो कागद लिकन थाँकी हिम्मत बड़ाणी छारियो हूँ अन आ गवई देरियो हूँ के, परमेसर की हाँची दया याईस हे। थाँ ईंमें पाका बण्या तका रेज्यो।</verse>
				<verse number="13">बेबीलोन की मण्डली में जीं चुण्या तका मनक हे, वीं थाँका जस्याईस हे वीं अन मरकुस ज्यो मारा बेटा का जस्यान हे, थाँने नमस्कार केवे हे।</verse>
				<verse number="14">परेमऊँ एक दूजाँ ने हात-जोड़न नमस्कार करो। मूँ परातना करूँ हूँ के, थाँने हाराई ने जो मसी का हो, परमेसर का आड़ीऊँ सान्ती मलती रेवे।</verse>
			</chapter>
		</book>
		<book number="61">
			<chapter number="1">
				<verse number="1">मूँ समोन जिंको नाम पतरस भी हे, ज्यो परबू ईसू मसी को दास अन थरप्यो तको चेलो हे, मूँ ओ कागद वाँ मनकाँ का नाम लिकरियो हूँ, जीं आपणाँ परमेसर अन छुटकारो देबावाळो ईसू की धारमिकता के वजेऊँ आपणे जस्यानीस विस्वास करे हे।</verse>
				<verse number="2">थाँ तो परमेसर अन परबू ईसू ने जाण लिदा हे, ईं वाते थाँका पे परमेसर की दया अन अनुगरे वेतो रेवे।</verse>
				<verse number="3">जीवन जीवबा का वाते अन परमेसर की सेवा करबा का वाते जो कई भी आपणे छावे हे, वो हारोई परमेसर आपणी तागतऊँ आपाँने दिदो हे। काँके आपाँ वींने जाणा हाँ, जणी आपणी धारमिकता अन मेमा की वजेऊँ आपाँने बलाया हे।</verse>
				<verse number="4">अणीऊँस वणी आपाँने मोटा अन अनमोल वरदान दिदा हे, ज्याँने देबा का वाते वणा वादो किदो, ताँके वाँकाऊँ आपाँ खुद परमेसर का जस्यान वे जावा अन वणी नासऊँ बंच जावो ज्यो मनकाँ की बुरी मनसा का मस अणी दनियाँ में हे।</verse>
				<verse number="5">थाँ हाराई हर तरियाऊँ कोसीस करता रेवो, ताँके थाँ थाँका विस्वास बड़ा सको अन विस्वास में हव गुण, हव गुण में हमज ने,</verse>
				<verse number="6">अन हमज में खुद ने काबू में राकबा में अन खुद ने काबू में राकबा में धीरज ने अन धीरज में परमेसर की भगती ने,</verse>
				<verse number="7">अन भगती का हाते भईचाराऊँ परेम अन ईं भईचारा में दयालुता का हाते परेम में बड़ो।</verse>
				<verse number="8">काँके यद्याँ थाँकामें ईं हारी बाताँ रेई अन थाँ अणा बाताँ में बड़ता रेवो, तो परबू ईसू मसी के ओळकाण में ईं थाँने बेकार ने वेबा देई।</verse>
				<verse number="9">पण जणामें ईं बाताँ ने हे वो आंदो हे अन वींने धुधळो दिके हे, वो ओ भी भुलग्यो हे के, वींका पाप पेल्याँई धोया ग्या हा।</verse>
				<verse number="10">ईं वाते हो भायाँ, थाँ यो दिकाबा का वाते घणा ताकड़े रेवो के, थाँ हाँची में परमेसर का आड़ीऊँ बलाया अन चुण्या ग्या हो, काँके यद्याँ थाँ अणा हारी बाताँने करता रेवो, तो कदी ठोकर ने खावो अन नेई कदी रेटे पड़ो।</verse>
				<verse number="11">अन यद्याँ थाँ ईं रीत का जस्यानीस चालो, तो एक दन जरुर आपणाँ परबू अन छुटकारो देबावाळा ईसू मसी की जुग-जुग का राज में जावो अन वटे थाँ आदर पावो।</verse>
				<verse number="12">ईं वाते यद्याँ थाँ अणा बाताँ ने जाणो हो, अन थाँने जो हाँच को वसन मल्यो हे अन थाँ ओ बचन मानो भी हो, तो भी मूँ थाँने ईं बाताँ आद अवाड़ातो रेऊँ हूँ।</verse>
				<verse number="13">काँके मूँ खुद का वाते आ बात हव तरियाऊँ जाणूँ हूँ के, जद्याँ तईं मूँ ईं देह में हूँ, ईं बाताँ आद अवाड़न थाँने हमजातो रेऊँ।</verse>
				<verse number="14">काँके मूँ ओ जाणूँ हूँ के, मूँ ईं देह ने वेगोई छोडबावाळो हूँ। जस्यान आपणाँ परबू ईसू मसी मने बतायो हे।</verse>
				<verse number="15">ईं वाते मूँ पुरी कोसीस करूँ हूँ के, मारे मरिया केड़े भी थाँ अणा बाताँ ने हमेस्यान आद राक सको।</verse>
				<verse number="16">माँ थाँने आपणाँ परबू ईसू मसी की तागत का बारा में अन वींके पाच्छा आबा का बारा में जो हमच्यार हुणायो हो, वो कुई हुस्यारीऊँ बणई तकी केणी ने हे, पण में खुदई वींकी मेमा ने मारी आक्याँऊँ देकी हे।</verse>
				<verse number="17">काँके जद्याँ वींने परम बापू परमेसर का आड़ीऊँ आसीस अन मेमा मली ही, वीं टेम में परमेसर का आड़ीऊँ ओ हमच्यार आयो के, “ओ मारो लाड़लो पूत हे, मूँ अणीऊँ घणो राजी हूँ।”</verse>
				<verse number="18">माँ भी वींके हाते वीं पुवितर मंगरा पे हा वीं टेम हरगऊँ ओ हमच्यार आवतो तको हुण्यो हो।</verse>
				<verse number="19">मारा नके परमेसर का आड़ीऊँ बोलबावाळो का जीं बचन हे वणीऊँ आ बात पाकी वेगी हे। थाँ भी ईंपे ध्यान देन हव करो हो, काँके वो तो उजितो हे, जो अंदारा की जगाँ में जद्याँ तईं चमकरियो हे, जतरे उजितो ने जावे अन थाँका हरदा में हवेर पेल्याँ को तारो ने उग जावे।</verse>
				<verse number="20">पण थाँने ओ जाण लेणो छावे के, पुवितर सास्तर की कुई भी आगेवाणी परमेसर की आड़ीऊँ बोलबावाळा के खुद का बच्यार पे कोयने हे।</verse>
				<verse number="21">काँके कुई भी आगेवाणी मनकाँ की मरजीऊँ कदी ने वेवे हे, पण भगत मनकईस पुवितर आत्मा की वजेऊँ परमेसर का आड़ीऊँ बोले हे।</verse>
			</chapter>
			<chapter number="2">
				<verse number="1">जस्यान वीं टेम में वणा लोगाँ में परमेसर का आड़ीऊँ जूटा बोलबावाळा हा, वस्यानीस थाँका मयने भी परमेसर की आड़ीऊँ जूटा बोलबावाळा वेई, वीं छानेऊँ नास करबावाळा कामाँ ने करी अन वीं वणी मालिक को मान ने करी, जणी वाँने आजाद किदा हा, अस्यान करन वीं खुद को फटाकऊँ नास कर देई।</verse>
				<verse number="2">घणा मनक वाँकी बाताँ मानन हूँगला काम करी, जिंकी वजेऊँ हाँच का गेला की बदनामी किदी जाई।</verse>
				<verse number="3">वीं लाळच की वजेऊँ थाँने दिकावटी बाताँ बोलन थाँकाऊँ धन कमाई। वाँको दण्ड तो पेल्याँऊँ परमेसर ते कर मेल्यो हे अन वाँको नास वाँकी वाट नाळरियो हे।</verse>
				<verse number="4">काँके परमेसर वणा हरग दुताँ ने जी पाप करिया हा, वाँने भी ने छोड़्या अन वाँने पाताळ में अंदारा की कोटड़ी में नाक दिदा हे, ताँके वीं न्याववाळा दन तईं वटे पड़्या रे।</verse>
				<verse number="5">परमेसर वीं पुराणी दनियाँ ने भी कोयने छोड़ी, पण वो नूह ज्यो धारमिकता को परच्यार करिया करतो हो, वींने अन हात ओर मनकाँ ने जद्याँ तईं बंचातो रियो, तद्याँ तईं पापी मनकाँ की दनियाँ को बाड़ऊँ नास ने वेग्यो।</verse>
				<verse number="6">परमेसर सदोम अन अमोरा जस्या नगरा ने दण्ड देन वानी का ढंगळा बणा दिदा ग्या हा, जणीऊँ पापी मनकाँ का वाते सबक बण सके के, वणा पापी मनकाँ का हाते कई व्यो हो।</verse>
				<verse number="7">पण लुत धरमी मनक हो, ईं वाते परमेसर वींने बंचा लिदो हो, काँके वो पापी मनकाँ का पाप करबा की वजेऊँ दकी वेतो हो</verse>
				<verse number="8">काँके वो धरमी मनक वणा पापी मनकाँ का हाते रेतो तको वाँके बुरा कामाँ ने देकन अन वाँके बुरा काम का बारा में हुणन रोज वींको मन घणो दकी वेतो हो।</verse>
				<verse number="9">ईं तरियाँ परबू जाणे हे भगताँ ने न्याववाळे दन तईं कस्यान बंचान राक्या जावे हे अन पाप्याँ ने दण्ड का वाते कस्यान राक्या जावे हे।</verse>
				<verse number="10">अन परमेसर खासकर वणा मनकाँ ने दण्ड देई, जीं बुरी मनसा का गेले चालन देह का जस्यान चाले हे अन परमेसर की माहनताऊँ नपरत करे हे। अस्यान का मनक बेकार अन टगीला हे अन ईं हरग की ताकता को भी अपमान करबाऊँ भी ने दरपे हे।</verse>
				<verse number="11">जद्याँ के हरग-दुत तागत अन सामरत में अणा मनकाँऊँ भी मोटा हे, तद्याँ भी वीं परमेसर का हामे अणापे कई दोस ने लगावे हे।</verse>
				<verse number="12">पण ईं मनक जनावर के जस्यान हे, ज्याको जनम ईं वाते व्यो हे के, वीं पकड़्या जावे अन मारिया जावे। ईं मनक जीं बाताँ का बारा में जाणेई कोयने वाँके बारा में दूजाँ ने भलो-बुरो केवे हे। ईं वाते जस्यान जनावर मारिया जावे हे वस्यानीस ईं मनक भी मारिया जाई।</verse>
				<verse number="13">अणाने बुरई का बदले बुरईईस मली। वाँने दन का उजिता में कुकरम करणो हव लागे हे। ईं तो मनकाँ के नाम पे कळंक हे। ईं मनक थाँका हाते तेवाराँ पे भेळा वेवे हे, तो ईं मनक अणी ताक में रेवे हे के, अणाने अस्यान की कुई लुगई मल जावे जिंका हाते ईं कुकरम कर सके। अस्यान करबाऊँ वाँकी आक्याँ पाप करबाऊँ रके कोयने। ईं मनक भोळा-भाळा मनकाँ ने पाप करबा का वाते हिकावे हे। अणाको मन पुरी तरियाऊँ लाळचऊँ भरियो तको हे। ईं मनक हराप की ओलाद हे।</verse>
				<verse number="14"></verse>
				<verse number="15">ईं हुदा गेला ने छोड़न भटग्या हे। ईं मनक बओर का बेटा बिलाम का गेला पे चालरिया हे, जिंने हराम की कमई घणी हव लागी ही।</verse>
				<verse number="16">पण वींका बुरा काम के वजेऊँ एक गदेड़ी, जो मनकाँ की बोली ने बोल पावे हे वाँ मनकाँ की बोली में बोली अन वींने तापड़्यो अन वीं परमेसर का आड़ीऊँ बोलबावाळा ने बुरो काम करबाऊँ रोक्यो।</verse>
				<verse number="17">ईं धोको देबावाळा हुक्याँ तका कूण्ड़ा अन डूँज मूँ उड़बावाळा वादळा के जस्यान हे। अणा वाते जुग-जुग को अदंकार ठेरायो ग्यो हे।</verse>
				<verse number="18">ईं मनक बेकार में मेपणा की बाताँ करन कुकरम की कामाँ के वजेऊँ वणा मनकाँ ने जीं अबे भटक्या तका मनक मेंऊँ निकाळणो छारियो हे वाँने देह की मनसा में फसा लेवे हे।</verse>
				<verse number="19">ईं जूटा हिकबावाळा, वाँने आजाद करबा को वादो तो करी, पण खुद केद में हे, काँके जो मनक कणीऊँ हार जावे हे, तो वो वींको गुलाम बण जावे हे।</verse>
				<verse number="20">अन जद्याँ ईं मनक छुटकारो देबावाळा परबू ईसू मसी का बारा में जाणबा का केड़े भी अन ईं दनियाँ की बुरई मेंऊँ निकळबा का केड़े पाच्छा वीं बुरई में जावे हे तो वणा मनकाँ के दसा पेलाँ की दसाऊँ भी हेली बुरी वेई।</verse>
				<verse number="21">अणीऊँ हव तो ओ वेतो के, वीं धारमिकता की गेला ने जाणता कोयने अन वाँने जो पुवितर आग्या दिदी गी ही, वींने जाणन वणीऊँ मुण्डो फेर लेता।</verse>
				<verse number="22">वाँके हाते तो वस्यानीस घटी जाई जस्यान के, वणा हाँची केवता में क्यो ग्या हो के “गण्डकड़ो आपणी उल्टी का नकेईस पाछो आवे हे” अन “अस्यानीस हापड़्यो तको हूर पाच्छा कादा में लोटबा का वाते कादा में जावे हे।”</verse>
			</chapter>
			<chapter number="3">
				<verse number="1">हो प्यारा भायाँ, अबे मूँ दूज्यो कागद थाँने लिकरियो हूँ। अन अणा दुई कागदऊँ मूँ थाँका पुवितर हरदा ने जगाबा की कोसीस कररियो हूँ।</verse>
				<verse number="2">जणीऊँ थाँ वीं बाताँ ने जी परमेसर का आड़ीऊँ बोलबावाळा पुवितर मनकाँ पेल्याँई क्यो हो, वाँने थाँ आद कर सको अन आपणाँ छुटकारो देबावाळा परबू ईसू मसी की आग्या ने, अन जो थाँका खासतोर थरप्या तका चेला थाँने जो आग्या दिदी ही, वाँको थाँ ध्यान कर सको।</verse>
				<verse number="3">अणीऊँ पेल्याँ थाँने ओ जाण लेणो छावे के, आकरी दनाँ में दाँत काड़बावाळा अन मजा करबावाळा आई अन आपणी बुरी मरजी का जस्यानीस करी।</verse>
				<verse number="4">अन केई के, “अरे कई व्यो ईसू मसी के पाच्छे आबा का वादा को? काँके आपणाँ बड़ाबा तो मरग्या। अन जद्याँऊँ ईं धरती की रचना वीं हे, तद्याँऊँ आ धरती वस्यान की वस्यान चालती आरी हे।”</verse>
				<verse number="5">पण ईं मनक जाणता तका भी भूलग्या हे के, परमेसर आपणाँ बचन की वजेऊँ आकास ने बणायो हो, जो सरुवातऊँ हे अन आ धरती पाणीऊँ बणी हे अन पाणी का ऊपरे ठमी तकी हे।</verse>
				<verse number="6">ईं वजेऊँ वीं टेम की दनियाँ बाड़ऊँ नास वेगी ही।</verse>
				<verse number="7">पण आज जा धरती अन आकास आपाँ देकाँ हा, वींके आग्या का वजेऊँ वादीऊँ नास वेबा वाते ठमी तकी हे। ईंने वीं टेम का वाते ठाम मेली हे, जद्याँ तईं पापी मनकाँ को न्याव ने जावे अन वाँको नास ने कर दिदो जावे।</verse>
				<verse number="8">पण हो मारा प्यारा भायाँ, थाँ ईं एक बात ने मती भुलज्यो के, परबू की नजर में एक दन हजार वरा का बराबर हे अन हजार वर एक दन का बराबर हे।</verse>
				<verse number="9">परबू आपणाँ वादा ने पूरा करबा में देर ने लगावे, जस्यान नरई मनक होचे हे। पण परमेसर आपणाँ वाते धीरज राके हे, काँके वो किंने भी नास करणो ने छावे हे। पण वो छावे हे के, हाराई मनक आपणाँ मन ने पापऊँ अलग करन मन फेरे।</verse>
				<verse number="10">परमेसर को दन चोर का जस्यान अणाचेत को आई। परबू के पाच्छा आबा का दन आकास जोरऊँ गाजी अन नास वे जाई अन आकास पिंड जो आकास में हे वाँ हेली उनी वेन पिगळ जाई अन ईं धरती पे जो कई भी हे, वो भी बळ जाई।</verse>
				<verse number="11">जद्याँ ईं हारी चिजाँ नास वेबावाळी हे तो थाँ होचो थाँने कस्यान को जीवन जीवणो छावे? थाँने पुवितर जीवन जीवणो छावे, काँके पुवितर जीवन परमेसर ने हव लागे हे।</verse>
				<verse number="12">अन वीं दन की वाट नाळणी छावे, जीं दन परमेसर न्याव करी। वीं दन ने लाबा का वाते कोसीस करणी छावे। वीं दन के आताई आकास वादी की लपटाऊँ बळन नास वे जाई अन आकास की चिजाँ वादी की तपतऊँ पिगळ जाई।</verse>
				<verse number="13">पण आपाँ तो परमेसर की वादा का जस्यान नुवो आकास अन नवी धरती की वाट नाळा हा, जटे धरमीपणो वास करे हे।</verse>
				<verse number="14">ईं वाते हो मारा लाड़ला भायाँ, थाँ अणा बाताँ की वाट नाळरिया हो, ईं वाते थाँ पुरी कोसीस करो के, परमेसर की नजरा में खरा, बना दोस का अन सान्तीऊँ रेबावाळो केवावो।</verse>
				<verse number="15">आपणाँ परमेसर का धीरज ने छुटकारो हमजो। जस्यान आपणो प्यारो भई पोलुस परमेसर की आड़ीऊँ ज्यो ग्यान वींने मल्यो हो, वणीऊँ वीं थाँने लिक्यो हो।</verse>
				<verse number="16">वणी थाँने जतरा भी कागद लिक्या हा, वस्यानीस थाँने ईं कागद में, में भी वणा बाताँ का बारा में लिक्यो हे। वणा कागद में अस्यान की बाताँ भी लिकी तकी हे जीं थाँका वाते हमजणी अबकी हे। बना हमज का अन अस्थिर मनकईस वणा कागद में लिकी तकी बाताँ को गलत अरत लगान पुवितर सास्तर में लिकी तकी बाताँ का हाते खेंचा-ताणी करन खुद आपणाँ पगा पे कराड़ी मेले हे।</verse>
				<verse number="17">ईं वाते हो भायाँ, थाँ पेल्याँऊँ अणा बाताँ ने जाणो हो, ईं वाते थाँ ध्यानऊँ रेज्यो, ताँके थाँ पापी मनकाँ की बाताँ में आन वाँकी बुरी चाला में ने फसन आपणाँ गाटापणा ने खोवो।</verse>
				<verse number="18">पण थाँ आपणाँ परमेसर अन छुटकारो देबावाळा ईसू मसी की दया अन ग्यान में आगे बड़ता जावो। वींकी मेमा अबेऊँ लेन जुग-जुग तईं वेती रेवे। आमीन।</verse>
			</chapter>
		</book>
		<book number="62">
			<chapter number="1">
				<verse number="1">आपाँ वणी जीवन का बचन की बात करा हाँ, ज्यो किंकी भी रचना वेबाऊँ पेल्याई हो, आपाँ ईंने हुण्यो, आपणी आक्याँऊँ देक्यो, ईंपे ध्यान लगायो, अन आपाँ खुद वींके हात अड़ायो।</verse>
				<verse number="2">वीं जीवन को ग्यान आपाँने करायो ग्यो। आपाँ वींने देक्यो। आपीं वींका गवा हा अन अबे थाँने भी वींके बारा में बतावा हाँ, ज्यो बापू परमेसर का हाते हे अन आपाँ पे परगट व्यो हो।</verse>
				<verse number="3">माँ वींने देक्यो अन हुण्यो हे। अन अबे थाँकामें भी वींके बारा में परच्यार करा हाँ, जणीऊँ थाँ भी मारा हाते भेळा वे जावो। काँके आपाँ परम बापू अन वींकी बेटा ईसू मसी का हाते भेळा हा।</verse>
				<verse number="4">माँ थाँने ईं बाताँ ईं वाते लिकूँ हूँ के, आपणो मन राजी रे सके।</verse>
				<verse number="5">माँ ज्यो हव हमच्यार परबू ईसुऊँ हुण्यो हे वोईस थाँने हूणावाँ हाँ के, परमेसर उजितो हे अन वींमें नामेक भी अंदारो ने हे।</verse>
				<verse number="6">यद्याँ आपाँ केवा के, आपाँ वींका हाते भेळा हा अन पछे भी पाप ना अंदारा में चाला, तो आपाँ जूटा हाँ अन हाँच पे ने चाला हाँ।</verse>
				<verse number="7">अन यद्याँ आपाँ केवा के, आपाँ वींके हाते उजिता में हा अन वींके जस्यानीस उजिता में चाला हा, तो आपाँ एक विस्वासी का जस्यान एक-दूजाऊँ मलन रेवा हा अन परमेसर का बेटा ईसू मसी को खून आपणाँ हाराई पाप ने धो देवे हे।</verse>
				<verse number="8">यद्याँ आपाँ केवा के, आपाँ में कई पाप ने हे, तो आपाँ खुद ने धोको देवा हा अन आपणाँ में हाँच ने हे।</verse>
				<verse number="9">पण यद्याँ आपाँ परमेसर का हामे खुद का पाप ने मानाँ, तो वो आपणाँ पाप ने अन आपणाँ हाराई अधरम माप कर देई, काँके वो विस्वास जोगो अन न्याव करबावाळो हे।</verse>
				<verse number="10">अन यद्याँ आपाँ केवा के, आपाँ कई पाप ने कररिया, तद्याँ आपाँ परमेसर ने जूटो बताबा हाँ अन ईं वजेऊँ वींको बचन भी आपणाँ में कोयने हे।</verse>
			</chapter>
			<chapter number="2">
				<verse number="1">हो मारा प्यारा बाळकाँ, मूँ थाँने ईं बाताँ ईं वाते लिकूँ हूँ के, थाँ पाप ने करो। पण ज्यो मनक गलतीऊँ पाप कर नाके हे, वाँका पाप धोवा का वाते आपणी मदत करबा का वाते धरमी ईसू मसी, बापू परमेसर का हाते बेट्या तका हे।</verse>
				<verse number="2">वीं एक बलीदान का रूप में बेस आपणाँइस ने, पण हाराई मनकाँ का पाप ने धोवे हे।</verse>
				<verse number="3">परमेसर ने हाँची में जाणबा का वाते एकीस गेलो हे के, आपाँ वींका आदेस ने मानाँ अन जद्याँ आपाँ अस्यान करा हाँ, तो वींने हाँची में जाण लेवा हाँ।</verse>
				<verse number="4">पण यद्याँ कुई मनक अस्यान केवे हे के, “मूँ परमेसर ने जाणूँ हूँ” पण वींका आदेस ने, ने माने, तद्याँ वो मनक जूटो हे अन वींका मन में हाँच कोयने हे।</verse>
				<verse number="5">पण ज्यो भी मनक परमेसर का बचना ने माने हे, तद्याँ वींका में परमेसर को परेम रेवे हे, काँके योईस एक गेलो हे, जणीऊँ आपाँ परमेसर में कल्डा बण्या तका रे सका हा।</verse>
				<verse number="6">ज्यो कुई भी मनक ओ केवे हे के, वो परमेसर में पाको हे, तद्याँ वींने ईसू मसी का जस्यान जीवन जीवणो छावे।</verse>
				<verse number="7">हो मारा प्यारा भायाँ, मूँ थाँने कस्योई नुवो आदेस ने देरियो हूँ, पण ज्यो मूँ थाँने बतऊँ हूँ वो दनियाँ की सरुवातऊँ थाँने हुणायो ग्यो हो। ओ वोईस पुराणो हव हमच्यार हे जिंने थाँ हुण चुक्या हो।</verse>
				<verse number="8">मूँ थाँने एक ओरुँ नुवो आदेस लिकूँ हूँ। ईंको हाँच मसी का जीवन में अन थाँका जीवन में परगट व्यो हे, काँके अंदारो खतम वेरियो हे अन हाँचा को उजितो चमकणो सरू वेग्यो हे।</verse>
				<verse number="9">ज्यो भी मनक अस्यान केवे के, वो परमेसर का उजिता में चाले हे, पण आपणाँ विस्वासी भई-बेनाऊँ दसमणी राके हे, तद्याँ वो अबाणू भी अंदारा मेंईस चालरियो हे।</verse>
				<verse number="10">ज्यो भी मनक आपणाँ विस्वासी भई-बेनाऊँ परेम करे हे, वो परमेसर का उजिता में चाले हे। अन वींके जीवन में अस्यान की कुई भी बात ने वेई, जणीऊँ वो पाप करे।</verse>
				<verse number="11">पण ज्यो भी मनक आपणाँ विस्वासी भईऊँ दसमणी राके हे, वो अबाणू भी अंदारा मेंईस भटकतो रेवे हे अन अंदारा मेंईस जीवन जीवे हे। वो यो भी ने जाणे के, ईं अंदारा का मयने कटे जारियो हे। काँके अंदारे वींने आंदो कर दिदो हे।</verse>
				<verse number="12">हो मारा प्यारा बाळकाँ, मूँ थाँने ईं वाते लिकूँ हूँ, काँके ईसू मसी का नाम की वजेऊँ थाँका पाप धोया ग्या हे।</verse>
				<verse number="13">हो मारा बापू का जस्यान का मनकाँ, मूँ थाँने ईं वाते लिकूँ हूँ, काँके थाँ परमेसर ने जाणो हो, ज्यो सरुवातऊँ हे। हो मोठ्याराँ, मूँ थाँने ईं वाते लिकूँ हूँ, काँके थाँ बुरई ने भी छेटी कररिया हो। हो मारा प्यारा बाळकाँ, मूँ थाँने ईं वाते लिकूँ हूँ, काँके थाँ बापू परमेसर ने जाण लिदा हे।</verse>
				<verse number="14">हो भूण्डा मनकाँ, मूँ थाँने ईं वाते लिकूँ हूँ, काँके थाँ परमेसर ने जाण लिदा हे, जीं सरुवातऊँ हे। हो मोठ्याराँ, मूँ थाँने ईं वाते लिकूँ हूँ, काँके थाँ जोरावर हो, थाँ परबू का बचन ने मानो हो अन बुरई ने भी छेटी कररिया हो।</verse>
				<verse number="15">थाँ ने तो ईं दनियाऊँ अन ने ईं दनियाँ की चिजाँऊँ परेम करज्यो, काँके ज्यो भी ईं दनियाऊँ परेम करे हे। वींके मन में बापू परमेसर को परेम कोयने हे।</verse>
				<verse number="16">काँके ईं दनियाँ में मन की बुरी मरजी, जीवन को मेपणो, देह की बुरी मनसा हे ईं बाताँ बापू परमेसर का आड़ीऊँ कोयने, पण ईं दनियाँ का आड़ीऊँ हे।</verse>
				<verse number="17">या दनियाँ अन ईंकी हारी बुरी मरजी को नास वेई, पण ज्यो भी मनक परमेसर की मरजी पे चाले हे, वींको कदी नास ने वेई।</verse>
				<verse number="18">हो मारा प्यारा बाळकाँ, जस्यान थाँ जाणो हो के, आकरी टेम आगी हे अन मसी को दसमण भी आबावाळो हे। ईं वाते वींकी जस्यान नरई मसी का दसमण बणग्या हे, ईं वजेऊँ आपाँ जाण सका हाँ के, आकरी टेम नके हे।</verse>
				<verse number="19">मसी का दसमण आपणाँ मेंऊँस बण्या हा, पण हाँची में वीं आपणाँ हाते कोयने हे, काँके यद्याँ वीं आपणाँ हाते वेता, तो आपाँने छोड़ता कोयने। पण वणा आपाँने छोड़ दिदा जणीऊँ वीं आपाँने ओ बता सके के, वीं हाँची में आपणाँ मेंऊँ कोयने।</verse>
				<verse number="20">पण थाँको तो पुवितर मसी अभिसेक किदा हे। ईं वाते थाँ हाँच ने जाणो हो।</verse>
				<verse number="21">कई थाँने अस्यान लाग के, मूँ ओ कागद ईं वाते लिकूँ हूँ के, थाँ हाँच ने, ने जाणो? पण थाँ तो हाँच ने जाणो हो अन यो भी जाणो हो के, हाँच में जूट ने वेवे हे।</verse>
				<verse number="22">जूटो वो हे, ज्यो अस्यान केवे हे के, ईसू, मसी कोयने हे। अस्यान केबावाळो मनक मसी को दसमण हे। वो बापू अन बेटा दुयाँ ने नकार हे।</verse>
				<verse number="23">ज्यो बेटा ने नकारे हे वींके नके बापू भी कोयने रेवे, यद्याँ कुई बेटा ने अपणावे हे, तो वो बापू ने भी अपणावे हे।</verse>
				<verse number="24">थाँ ज्यो बाताँ सरुआत में हूणी ही, वाँने मानता रेज्यो, अगर थाँ अस्यान करता रेवो, तो हमेस्या बेटो अन बापू भी थाँकामें वास करिया करी।</verse>
				<verse number="25">खुद मसी आपाँने अनंत जीवन देबा को वादो किदो हे।</verse>
				<verse number="26">में ईं बाताँ थाँने वणा मनकाँ का बारा में लिकरियो हूँ, जीं थाँने भटकावा की कोसीस करे हे।</verse>
				<verse number="27">जद्याँ तईं थाँकी बात हे, थाँको अभिसेक वणीऊँ हे ज्या पुवितर आत्मा थाँकामें वास करे हे, ईं वाते थाँने तो ओ जरूत कोयने के, कुई उपदेस देवे, पण थाँने तो ज्यो आत्मा दिदी गी हे, वाँ यो हारोई हिकावे हे। आद राको आत्मा जो हिकावे हे, वो हाँच हे जूट कोयने हे। आत्मा की हिकावण ने मानो अन मसी में बण्या तका रेवो।</verse>
				<verse number="28">हो मारा प्यारा बाळकाँ, ईं वाते थाँ ईसू मसी में बण्या तका रेवो, जणीऊँ जद्याँ वो परगट वेई तद्याँ थाँ हिम्मतऊँ भर जावो अन वींका पाच्छा आबा पे आपाँने वींका हामें हरमा ने मरणो पड़े।</verse>
				<verse number="29">अन जद्याँ थाँ ओ जाणो हो के, ईसू मसी धरमी हे, तद्याँ थाँ यो भी जाण लो के, ज्यो मनक धरम का काम करे हे, वींइस परमेसर का बेटा-बेटी हे।</verse>
			</chapter>
			<chapter number="3">
				<verse number="1">अतरोक होचन देको के, बापू परमेसर आपाऊँ कतरो परेम किदो हे, जणीऊँ आपाँ वाँका बेटा-बेटी केवाया हाँ अन हाँची में हा भी। ईं वजेऊँ आ दनियाँ आपाँने ने जाणे हे, काँके वीं परमेसर ने भी कोयने जाणे हे।</verse>
				<verse number="2">हो मारा प्यारा भायाँ, अबे आपाँ परमेसर का बेटा-बेटी हाँ, पण आबावाळी टेम में आपाँ कई वेवा, ईंका बारा में आपाँने ग्यान ने दिदो ग्यो हे, पण छावे ज्यो भी वे, आपाँ ओ जाणा हाँ के, जद्याँ मसी पाच्छा परगट वेई, तद्याँ आपाँ वींके जस्यान वे जावाँ, काँके जस्यान वो हे, वस्यानीस आपाँ वींने देकाँ।</verse>
				<verse number="3">ज्यो भी मनक मसी पे आ आस राक हे, वो खुद ने वस्यानीस पुवितर राके, जस्यान मसी पुवितर हे।</verse>
				<verse number="4">ज्यो भी मनक पाप करे हे, वो परमेसर का आदेस तोड़ हे, काँके परमेसर का आदेस ने तोड़णाइस पाप हे।</verse>
				<verse number="5">थाँ ओ तो जाणो हो के, मसी लोगाँ का पापाँ ने धोवा का वाते परगट व्या हो अन वींके मयने कई पाप कोयने हे।</verse>
				<verse number="6">ज्यो भी मनक मसी ने माने हे, वीं पाप में ने रेवे हे। पण ज्यो पाप करता रेवे हे, वाँने ने तो वींको दरसावो मल्यो हे अन नेई वणा कदी वाँने जाण्या हे।</verse>
				<verse number="7">हो मारा प्यारा बाळकाँ, थाँ किंकई छळ-कपट में मती आज्यो, काँके ज्यो मनक धरम का काम करे हे, वोईस मसी का जस्यान धरमी हे।</verse>
				<verse number="8">ज्यो भी मनक पाप करतो रेवे हे, वो सेतान को हे, काँके सेतान सरुआतऊँ पाप करतो आयो हे। ईं वाते तो परमेसर को बेटो परगट व्यो, ताँके वो सेतान का कामाँ ने नास कर देवे।</verse>
				<verse number="9">ज्यो भी मनक परमेसर को बेटा बणग्यो हे, वो पाप में रेवे हे, काँके वींके मयने मसी वास करे हे। ईं वाते वो पाप करतो ने रेवे, काँके वो परमेसर को बेटो बणग्यो हे।</verse>
				<verse number="10">थाँ कस्यान जाण सको के, कूण परमेसर को बेटा हे? कूण सेतान को बेटा हे? हरेक वीं मनक ज्यो धरम का काम ने करे अन आपणाँ विस्वासी भईऊँ परेम ने करे वीं परमेसर का आड़ीऊँ कोयने हे।</verse>
				<verse number="11">थाँने एक दूजाँ का हाते परेमऊँ रेणो छावे, काँके थाँने ओ हमच्यार सरुवातऊँ हुणायो ग्यो हे।</verse>
				<verse number="12">आपाँने केन का जस्यान ने वेणो हे, ज्यो सेतान का आड़ीऊँ हो, जणी आपणाँ भई ने मार दिदो हो। काँके वींके भई का काम धरम का हा अन केन का काम बुरा हा, ईं वजेऊँ वणी वींने मार नाक्यो।</verse>
				<verse number="13">हो भायाँ अन बेना, थाँ ईं बातऊँ अचम्बो मती करो के, या दनियाँ थाँकाऊँ दसमणी राके हे।</verse>
				<verse number="14">काँके आपाँ मोतऊँ निकळ अनंत जीवन पाबा का वाते आग्या हा। ईंके वजे आ हे के, आपाँ आपणाँ भायाँऊँ परेम करा हा। ज्यो भी मनक परेम ने करे, वो अबे भी मोत को गुलाम हे।</verse>
				<verse number="15">वीं हाराई मनक जीं खुद का भईऊँ दसमणी राके हे, वीं हत्यारा हे, थाँ ओ तो जाणोइस हो के, ज्यो मनक हत्यारो हे, वींमें अनंत जीवन की आस कोयने हे।</verse>
				<verse number="16">ईसू मसी आपाँ वाते आपणाँ जीवन त्याग कर दिदो हो, ईं वजेऊँ आपाँ जाण सका हाँ के, परेम कई हे? ईं वाते आपाँने भी आपणाँ भायाँ वाते जान भी देणी का वाते त्यार रेणो छावे।</verse>
				<verse number="17">अगर थाँकामूँ किंने कणी चीज की जरूत वेवे अन थाँकापाँ वाँ चीज वेता तकाँ भी थाँ वींकी मदत ने करो। तो आपाँ कस्यान के सका हाँ के, आपाँ में परमेसर को परेम हे।</verse>
				<verse number="18">हो प्यारा बाळकाँ, आपाँ खाली बाताँऊँ अन बोलीऊँ परेम ने किदो, पण ईंने आपाँ आपणाँ करमा अन हाँचऊँ कराँ हा।</verse>
				<verse number="19">ईं वजेऊँ आपाँ ओ जाण सका हाँ के, आपाँ हाँच मानाँ हाँ अन जद्याँ परमेसर का हामे जावा, तो आपणाँ मन में हिम्मत बड़ा सका। अन जद्याँ आपाँ परमेसर का हामे जावा तो आपाँने हरमा ने मरणो पड़े।</verse>
				<verse number="20">ईंका केड़े भी आपणो मन आपणाँ बुरा का का वजेऊँ आपणो विरोद करे हे, तो आद राको, अबाणू भी परमेसर आपणाँ मनऊँ मोटा हे अन वीं हारोई जाणो हे।</verse>
				<verse number="21">हो प्यारा भायाँ-बेना, जद्याँ कुई बुरो काम करती टेम आपणो मन आपणो दोसी ठेरावे, तो परमेसर का हामे आपाँ में विस्वास बण्यो रेवे हे।</verse>
				<verse number="22">अन आपाँ ज्यो कई भी वाँकाऊँ मांगा हा, वो आपाँने मले हे, काँके आपाँ वोईस काम करा हाँ, ज्यो परमेसर ने हव लागे हे अन आपाँ वींका आदेस ने भी मानाँ हा।</verse>
				<verse number="23">अन परमेसर को आदेस ओ हे के, आपाँ परमेसर का बेटा ईसू मसी का नाम पे विस्वास कराँ अन जस्यान ईसू आदेस दिदो हे के, आपीं एक-दूजाऊँ परेम करा।</verse>
				<verse number="24">अन ज्यो भी मनक परमेसर को आदेस माने हे वींका में परमेसर को वास रेवे हे अन वो मनक परमेसर में बण्यो तको रेवे हे। अन पुवितर आत्मा की वजेऊँ ज्या आपाँने दिदी गी, वणीऊँ ओ जाण सका हाँ के, आपणाँ मयने परमेसर को रेवास हे।</verse>
			</chapter>
			<chapter number="4">
				<verse number="1">हो मारा प्यारा भायाँ, हरेक आत्मा को विस्वास मती करो, पण हरेक आत्माने परको के, वाँ परमेसर का आड़ीऊँ हे के ने। मूँ यो थाँकाऊँ ईं वाते केरियो हूँ, काँके नरई जूटा परमेसर का आड़ीऊँ बोलबा ईं दनियाँ में हे।</verse>
				<verse number="2">आपाँ कस्यान जाण सका हाँ के, आत्मा परमेसर का आड़ीऊँ हे के कोयने? ज्या भी आत्मा आ केवे हे के, “ईसू मसी मनक का रूप में ईं धरती पे आयो।” वाँ आत्मा परमेसर का आड़ीऊँ हे।</verse>
				<verse number="3">अन ज्यो भी आत्मा ईसू का बारा में ईं बात ने कोयने माने, वो परमेसर का आड़ीऊँ ने हे। वो मसी को दसमण हे, जिंका बारामें में थाँ पेल्याँ भी हूणी लिदो हो के, वो आबावाळो हे, अबे तो ईं दनियाँ में भी हे।</verse>
				<verse number="4">हो मारा प्यारा बाळकाँ, थाँ परमेसर का हो। ईं वाते थाँ जूटा परमेसर की आड़ीऊँ बोलबावाळाऊँ जितग्या हो। काँके थाँका मयने वो परमेसर वास करे हे वीं ईं दनियाँ में रेबावाळा सेतानऊँ जोरावर हे।</verse>
				<verse number="5">वणा जूटा परमेसर का आड़ीऊँ बोलबावाळा अणी दनियाँ का बारा में बतावे हे अन या दनियाँ वाँकी हुणे हे, काँके वीं अणी दनियाँ का हे।</verse>
				<verse number="6">पण ज्यो भी आपणी बाताँ हुणे हे, वो परमेसर का आड़ीऊँ हे, काँके वो परमेसर ने जाणे हे। पण ज्यो परमेसर का आड़ीऊँ ने हे, वीं आपणी ने हुणे। अणी बात की वजेऊँ आपाँ ओ जाण सका के, कस्यी आत्मा हाँच की हे अन कस्यी आत्मा भटकबावाळी हे।</verse>
				<verse number="7">हो मारा प्यारा भायाँ, एक-दूजाऊँ परेम करो। काँके परेम परमेसर का आड़ीऊँ आवे हे अन ज्यो भी परेम करे, वो परमेसर का बेटा-बेटी बण जावे हे अन परमेसर ने जाणे हे।</verse>
				<verse number="8">ज्यो भी मनक परेम ने करे, वो परमेसर ने ने जाणे सक्यो। काँके परमेसरइस परेम हे।</verse>
				<verse number="9">परमेसर आपणाँ एकाएक बेटा ने अणी दनियाँ में खन्दान अणी परेम ने परगट किदो, जणीऊँ आपाँ वींका बेटाऊँ अनंत जीवन पा सका।</verse>
				<verse number="10">हाँचो परेम ओ ने हे के, आपाँ परमेसरऊँ परेम किदो, पण वो ओ हे के, परमेसर आपाऊँ परेम किदो अन आपणाँ पाप धोवा का वाते आपणाँ बेटा ने बलीदान वेवा का वाते खन्दा दिदो।</verse>
				<verse number="11">हो प्यारा भायाँ जद्याँ परमेसर आपाऊँ अस्यान को परेम किदो हे, तद्याँ आपाँने भी एक-दूजाऊँ परेम करणो छावे।</verse>
				<verse number="12">परमेसर ने कणी भी कदी ने देक्या, पण जद्याँ आपाँ एक-दूजाऊँ परेम कराँ, तो परमेसर आपाँ में वास करी अन वींको परेम आपाँ में पाको वे जाई।</verse>
				<verse number="13">आपाँने पूरो विस्वास भी हे के, वो आपणाँ में वास करे हे अन आपाँ भी वींके हाते चाला हाँ, काँके वणी आपाँने खुद की आत्मा दिदी हे।</verse>
				<verse number="14">बापू परमेसर आपणाँ बेटा ने ईं दनियाँ में मुगतीदाता का रूप में खन्दायो अन आपाँ वींने देक्यो अन वींका गवा भी हाँ।</verse>
				<verse number="15">ज्यो भी अणी बात ने माने हे के, “ईसू परमेसर को बेटा हे,” तद्याँ परमेसर वींके मयने वास करे हे अन वो परमेसर में वास करे हे।</verse>
				<verse number="16">जस्यान को परेम परमेसर आपाऊँ राक्यो हे वींने आपाँ जाणा हाँ अन आपाँ वींमें विस्वास भी किदो हे। परमेसरइस परेम हे। ज्यो भी मनक परेम करे हे वो वींमें बण्यो तको रेवे हे अन परमेसर वींमें वास करे हे।</verse>
				<verse number="17">अणीऊँ आपाँ में परेम पाको व्यो, ताँके न्याव का दन आपीं विस्वास में बण्या रेवा, काँके आपाँ दनियाँ में वस्यानीस जीवन जीवाँ हाँ, जस्यान को मसी जीवन जियो हो।</verse>
				<verse number="18">ज्यो मनक परेम करे हे, वो दरपे कोयने, काँके परेम दरप ने छेटी करे हे। दरप को हण्डाळ्यो दण्ड हे। ईं वाते ज्यो मनक दरपे हे, वो मनक कदी भी पाको कोयने वे सके हे।</verse>
				<verse number="19">आपाँ ईं वाते परेम करा हाँ, काँके परमेसर पेल्याँ आपणाँऊँ परेम किदो हे।</verse>
				<verse number="20">यद्याँ आपाँ केवा के, आपाँने परमेसरऊँ परेम हे, पण भईऊँ दसमणी हे तद्याँ आपाँ जूटा हाँ, काँके जणी भई ने आपाँ देक सका हा, वणीऊँ परेम कोयने कर सका, तो वीं परमेसरऊँ जिंने कदी देक्योई कोयने कस्यान परेम कर सका हाँ?</verse>
				<verse number="21">मसी आपाँने ओ आदेस दिदो हे के, आपाँ परमेसरऊँ परेम करा हा, तो आपाँने आपणाँ भायाँऊँ भी परेम करणो छावे।</verse>
			</chapter>
			<chapter number="5">
				<verse number="1">ज्यो भी मनक ओ विस्वास करे हे के, ईसूइस, मसी हे, तद्याँ वीं परमेसर को बेटा-बेटी वेई अन ज्यो भी मनक परमेसरऊँ परेम करी, वो वींका बाळकाऊँ भी परेम करी।</verse>
				<verse number="2">अन यद्याँ आपाँ परमेसर का बेटा-बेटीऊँ परेम करा हाँ तद्याँ ईं बातऊँ ओ पाको वेवे हे के, आपाँ परमेसरऊँ परेम करा हा अन वींका आदेसा ने भी मानाँ हाँ।</verse>
				<verse number="3">परमेसरऊँ परेम करबा को ओ मतलब हे के, आपाँ वींका आदेस मानाँ हा अन वींका आदेस मानणा अबका कोयने हे।</verse>
				<verse number="4">ज्यो भी मनक परमेसर को बेटा वेई, वो दनियाँ ने जीत लेवे हे अन ईंको कारण आपणो विस्वास हे।</verse>
				<verse number="5">ज्यो भी ओ विस्वास करे हे के, ईसू मसीइस परमेसर को बेटा हे, वो अणी दनियाँ ने जीत लेवे हे।</verse>
				<verse number="6">ईसू मसीइस हे, ज्यो आपणाँ नके पाणी को बतिस्मो लेबा अन आपणो लुई वेवाड़ ने आया, वीं खाली पाणी को बतिस्मो लेबा वाते ने आया, पण वो पाणी को बतिस्मो लेबा अन आपणो लुई वेवाड़ का वाते आया हाँ अन अणी बात की गवई परमेसर की आत्मा खुद देवे हे, काँके आत्माइस हाँची हे।</verse>
				<verse number="7">गवई देबावाळा तीन हे।</verse>
				<verse number="8">आत्मा, पाणी अन लुई अणा तीनाँ की गवई एकीस हे।</verse>
				<verse number="9">जद्याँ आपाँ मनकाँ की गवई ने माने हाँ, तद्याँ परमेसर की गवई का वाते कई केवा? काँके परमेसर की गवई तो मनकाँ की गवईऊँ मोटी हे। अन अणी गवई की मानता आ हे के, परमेसर आपणाँ बेटा का वाते गवई दिदी।</verse>
				<verse number="10">अन ज्यो भी मनक परमेसर का बेटा पे विस्वास करे हे, वो खुदई वींकी गवई देवे हे। जद्याँ कुई परमेसर क्यो, वणा बाताँ पे विस्वास ने करे, वो परमेसर ने जूटो ठेरावे हे। काँके परमेसर आपणाँ बेटा का वाते गवई दिदी हे।</verse>
				<verse number="11">परमेसर वींकी गवई ओ केन दिदी के, वणी आपाँने अनंत जीवन दिदो हे अन यो जीवन वींका बेटाऊँ आवे हे।</verse>
				<verse number="12">जिंका नके परमेसर को बेटा हे वींके नके अनंत जीवन भी हे अन जिंका नके परमेसर को बेटा ने हे वींके नके अनंत जीवन भी ने हे।</verse>
				<verse number="13">मूँ या बात ईं वाते थाँने लिक हूँ, काँके थाँ परमेसर का बेटा में विस्वास राकबावाळा हो अन थाँ यो भी जाण लिदो हे के, अनंत जीवन थाँनेइस मल्यो हे।</verse>
				<verse number="14">आपाँ परमेसर पे अस्यान को विस्वास करा हाँ के, यद्याँ वणीऊँ वींकी मरजी का जस्यान परातना करा हाँ, तो वो आपणी हुणे हे।</verse>
				<verse number="15">अन आपाँ यो भी जाणा हा यद्याँ वो आपणी हुणे हे अन आपाँ वणीऊँ मांगा हा तद्याँ भी आपाँ जाणा हाँ के, ज्यो कई आपाँ मांग्यो हो, वो आपाँने मलग्यो हे।</verse>
				<verse number="16">जद्याँ कुई मनक खुद का भई ने अस्यान को पाप करतो देके, जिंको फळ अनंत मोत कोयने हे, पण वो परमेसरऊँ वींके वाते परातना करे तद्याँ परबू वींने मोत को दण्ड कोयने देई पण वाँकी परातना हुणन अनंत जीवन देई। पण मूँ वणा मनकाँ का वाते परातना करबा का वाते ने केऊँ, ज्यो अस्यान का पाप करे, जिंको फळ अनंत मोत हे।</verse>
				<verse number="17">हाराई बुरा काम पाप हे पण अस्यान का पाप भी हे जिंको फळ अनंत मोत ने हे।</verse>
				<verse number="18">आपाँ जाणा हाँ के, ज्यो भी मनक परमेसर को हे वो पाप में ने रेवे हे, काँके परमेसर वींने बंचायो राके हे अन वींके सेतान हात भी कोयने अड़ा सके।</verse>
				<verse number="19">आपाँ ओ भी जाणा हा के, या हारी दनियाँ सेतान का बंस में हे, पण आपाँ परमेसर का हाँ।</verse>
				<verse number="20">अणी बात ने भी आपाँ जाणा हाँ के, परमेसर का बेटा ईसू मसी आया अन आपाँने हमज दिदी, जणीऊँ हाँचा परमेसर ने जाण सका अन आपाँ वींके हाते रेवा ज्यो हाँचो हे मतलब वींका बेटा ईसू मसी का हाते। योईस हाँचो परमेसर अन अनंत जीवन देबावाळो हे।</verse>
				<verse number="21">हो मारा भायाँ, थाँ खुद ने जूटा देवी-देवताऊँ बंचान राकज्यो।</verse>
			</chapter>
		</book>
		<book number="63">
			<chapter number="1">
				<verse number="1">मूँ मण्डली को अगुवो यहुन्ना, मारो ओ कागद वीं लुगई का नाम हे, जिंने परमेसर चुणी हे अन वींके बाळक का नाम भी लिकरियो हूँ, जणाऊँ मूँ वाँका हाँच पे चालबा की वजेऊँ परेम करूँ हूँ। मूँईस थाँकाऊँ परेम ने करूँ, पण वीं हाराई ज्यो हाँच ने जाणे हे, वीं भी थाँकाऊँ परेम करे हे।</verse>
				<verse number="2">ओ हारोई वीं हाँच की वजेऊँ व्यो हे, ज्यो आपणाँ में वास करे हे अन ज्यो हमेस्यान आपणाँ हाते रेई।</verse>
				<verse number="3">बापू परमेसर की करपा, दया अन सान्ती आपणाँ पे वेई अन वाँका बेटा ईसू मसी को परेम अन हाँच भी आपणाँ में बण्यो तको रेई।</verse>
				<verse number="4">मूँ ईं बातऊँ घणो राजी हूँ के, थाँका थोड़ाक बेटा-बेटी परबू का आदेस ने ज्यो आपाँने परमेसर दिदो हो, वीं वींने हाँचऊँ माने हे।</verse>
				<verse number="5">ईं वाते अबे हे बई, मूँ थने कस्योई नुवो आदेस ने लिकरियो हूँ, पण वोईस आदेस देरियो हूँ ज्यो सरुआत में दिदो ग्यो हो के, आपाँ विस्वास्याँ ने एक-दूजाऊँ परेम करणो छावे।</verse>
				<verse number="6">परेम करबा को अरत ओ हे के, आपाँ परमेसर का आदेसा पे चालणो छावे अन यो वोईस आदेस हे, जी आपाँने सरुआत में दिदो ग्यो हो के, आपाँने परेम का हाते जीवन जीवणो छावे।</verse>
				<verse number="7">ईं दनियाँ में नरई भटकाबावाळा मनक हे। अन ज्यो भी मनक ईं बात ने, ने माने के, ईसू मसी ईं धरती पे मनक का रूप में आया। अस्या मनक धोको देबावाळा अन मसी का दसमण हे।</verse>
				<verse number="8">ईं वाते थाँ खुद हूँस्यार रेज्यो, जणीऊँ थाँ वींने खो ने दो, जिंका का वाते, आपाँ घणी मेनत कररिया हा, काँके थाँने थाँको पुरो-पुरो फळ लेणो हे।</verse>
				<verse number="9">ज्यो मनक परबू की हिकऊँ न्यारो वे जावे हे, वो परमेसर का नके ने जा सके, पण ज्यो भी मनक मसी की हिक ने माने हे, वींके नके बापू परमेसर अन वींको बेटा दुई रेवे हे।</verse>
				<verse number="10">अन यद्याँ कुई थाँका नके आन, आ हिक ने देवे, तो थाँ वीं मनक ने थाँका घर में मती आबा दो अन ने वींकी आवभगत करज्यो। अन वणीऊँ नमस्कार भी मती करज्यो।</verse>
				<verse number="11">काँके ज्यो मनक अस्या मनकाँ आवभगत करे हे, वो वींका बुरा कामाँ में भेळो वेवे हे।</verse>
				<verse number="12">मारा नके लिकबा का वाते तो घणी बाताँ हे, पण मूँ तो ओ छावूँ के, थाँने ईं बाताँ सई अन कलमऊँ ने लिकूँ, पण मने आस हे के, थाँका हामे बेटन थाँकाऊँ बाताँ करूँ, जणीऊँ आपणो आणन्द पूरो वे सके हे।</verse>
				<verse number="13">थाँरी बेन का बेटा-बेटी भी थने नमस्कार केवे हे। ज्याँने भी परमेसर चुण्या हे।</verse>
			</chapter>
		</book>
		<book number="64">
			<chapter number="1">
				<verse number="1">मूँ मण्डली को मुक्यो यहुन्नो, यो कागद गयुस ने लिकरियो हूँ। जणीऊँ मूँ हाँच पे चालबा की वजेऊँ घणो परेम करूँ हूँ।</verse>
				<verse number="2">मारा प्यारा भई, मूँ परातना करूँ हूँ के, जस्यान थूँ आत्मिक बाताँ में आगे बड़रियो हे वस्यानीस हारी बाताँ में आगे बड़तो रे अन ताकड़े रे।</verse>
				<verse number="3">जद्याँ थाँरा बारा में आपणाँ भायाँ मेंऊँ थोड़ाक जणा मने बतायो के, थूँ हाँच पे चाले हे अन हाँच ने माने हे, तद्याँ मूँ ओ हुणन घणो राजी व्यो।</verse>
				<verse number="4">मने अणीऊँ हेली खुसी कणी भी बातऊँ ने वेवे के, मारा बाळक हाँच पे चाले हे।</verse>
				<verse number="5">हे मारा प्यारा भई, थूँ आपणाँ विस्वासी भायाँ का नफा का वाते घणो करो हे। पलई वीं थाँरा वाते अणजाण काँ ने वेवे।</verse>
				<verse number="6">ईं वाते तो वणा मण्डली का हामे थाँरा बारा में आ गवई दिदी हे के, थूँ वाँकाऊँ कस्यान को परेम राके हे। ईं वाते जद्याँ थूँ वाँने हिक देवे, तद्याँ अस्यान मदत करज्ये जस्यान परमेसर का मनक का हाते किदी जावे हे।</verse>
				<verse number="7">काँके वीं मसी की सेवा करबा का वाते जारिया हे अन वणा जो विस्वास ने करे हे, वणा मनकाँऊँ मदत ने लिदी हे।</verse>
				<verse number="8">ईं वाते आपाँ जी विस्वासी हाँ, आपाँने वाँकी मदत करणी छावे। जणीऊँ आपाँ भी वाँका हाते हाँच ने फेलाबा में भेळा वे सका।</verse>
				<verse number="9">में एक कागद मण्डली ने भी लिक्यो भी हो, पण दियुत्रिफेस ज्यो नेतो बणणो छावे हे, वो माँ ज्यो कई केवा हाँ, वींने ने माने।</verse>
				<verse number="10">ईं वाते जद्याँ मूँ आऊँ तद्याँ बताऊँ के, वो कई-कई करे हे। वो जूट बोल बोलन आपणाँ पे जूटा दोस लगावे हे अन वो योईस ने करे, पण भायाँ की आवभगत भी ने करे अन ज्यो कुई वाँकी आवभगत करणो भी छावे हे, तो वाँने वो करबा भी ने देवे अन वो वाँने मण्डली का बारणे काड़ देवे हे।</verse>
				<verse number="11">हे मारा भई, थूँ तो बुरई का ने पण भलई का गेले चालज्ये, काँके ज्यो भी मनक भलई करे हे, वो परमेसर को हे अन ज्यो बुरई करे हे, वो परमेसर ने कोयने जाणे हे।</verse>
				<verse number="12">दिमेत्रियुस का बारा में जाणबावाळा हाराई वींका बारा में हव गवई दिदी हे अन ओ हाँच भी हे। माँ खुद भी वींकी गवई देवाँ हा। थाँ तो जाणोइस हो, मारी गवई हाँची हे।</verse>
				<verse number="13">थने लिकबा का वाते तो मारा नके घणी बाताँ हे पण मूँ सई अन कलमऊँ ईं बाताँ ने लिकणो छावूँ हूँ।</verse>
				<verse number="14">पण मने तो आस हे के, मूँ थाँराऊँ वेगोई मलूँ अन आपाँ आमे-हामे बेटन बाताँ करा।</verse>
				<verse number="15">थने सक सान्ती मलती रेवे। थाँरा हाराई विस्वासी भई थने नमस्कार केवे हे अन थूँ भी वटा का हाराई विस्वासी भायाँ ने नाम ले लेन नमस्कार केज्ये।</verse>
			</chapter>
		</book>
		<book number="65">
			<chapter number="1">
				<verse number="1">यहूदो ज्यो ईसू मसी को दास अन याकूब को भई हो, वींका आड़ीऊँ ओ कागद वणा मनकाँ का नाम ज्याँने परमेसर बलाया हे अन वीं ज्याकाँऊँ परमेसर परेम राके हे अन ज्याँने ईसू मसी बंचान राक्या हे।</verse>
				<verse number="2">थाँने दया, सान्ती अन परेम खुब मलतो रेवे।</verse>
				<verse number="3">हो लाड़ला भायाँ, मूँ तो घणो छावतो हो के, थाँने वीं छूटकारा का बारा में लिकूँ, जिंका आपाँ पांतीदार हा। मने अस्यान भी लागे हे के, मूँ थाँने ईं बाताँ लिकन हिम्मत देऊँ जणीऊँ थाँ विस्वास में बड़ता रेवो, ज्यो विस्वास परमेसर का पुवितर मनकाँ ने दिदो ग्यो हो।</verse>
				<verse number="4">पण थाँकी मण्डली में छानेऊँ अस्यान का मनक आग्या हे, ज्याँका बारा में सास्तर में पेल्याँई लिक्यो हे के, वाँने दण्ड मली, काँके वीं परमेसर ने कोयने जाणे हे। अणा मनकाँ परमेसर की दया ने खुद का वाते कुकरम करबा की छुट मान लिदी हे अन आपणाँ परबू जीं आपणाँ मालिक ईसू मसी हे वाँने मानबा का वाते नट जावे हे।</verse>
				<verse number="5">थाँ तो अणा बाताँ ने जाणोइस हो, पण मूँ थाँने पाच्छी आद अवाड़णो छारियो हूँ के, परमेसर आपणाँ मनकाँ ने मिसर देसऊँ निकाळ बंचान लाया हो। पण वणा मनकाँ मेंऊँ थोड़ाक विस्वासऊँ फरग्या, ईं वाते वोईस परमेसर वणा मनकाँ ने ज्यो विस्वासऊँ फरग्या हा, वाँने नास कर दिदा हा।</verse>
				<verse number="6">वो वणा दुताँ ने जीं आपणो पद ने हमाळन राक सक्या, वाँने परमेसर हमेस्यान का वाते वादी की सुल में न्याव का दन तईं न्याव वेबा का वाते बन्द कर दिदा हे।</verse>
				<verse number="7">यो भी आद अवाड़ूँ हूँ के, सदोम अन अमोरा नगर ने अन वाँके नके का नगराँ का मनकाँ ने जीं कुकरम करता हा अन बुरा काम का गेले चालता हा। परमेसर वाँने कदी ने बजबा वाळी वादी में नाकन वाँने दण्ड दिदो अन या बात आपणाँ वाते हिक बणी।</verse>
				<verse number="8">अस्यानीस वीं मनक जी थाँकी मण्डळ्याँ में आग्या हे, जीं हूँगला काम करता रेवे हे अन आपणी देह ने बगाड़रिया हे अन केवे हे अस्यान करबा का वाते परमेसर माने हपना में क्यो हे। वीं परमेसर की तागत ने बेकार हमजे अन हरग-दुताँ का विरोद में बोले हे।</verse>
				<verse number="9">जद्याँ के हरग-दुत मीकाईल ज्यो दुताँ को मुक्यो हो, वो मूसा की लास का वाते सेतानऊँ वाद-विवाद कररियो हो, तो भी वो वींके हामे सेतान ने कई बुरी बात बोलबा की हिम्मत ने किदी, पण अतरोक बोल्यो के, “परबू थने तापड़ी।” काँके वींका नके भी न्याव करबा को अदिकार ने हो।</verse>
				<verse number="10">पण ईं मनक तो जणा बाताँ का बारा में जाणी कोयने वाँका बारा में भलो-बुरो केवे हे। ईं तो बना हमजवाळा जनावराँ का जस्यान हे, जीं आपणी मरजी का जस्यान करे हे। अस्यान करन ईं खुद को नास कररिया हे।</verse>
				<verse number="11">अणा मनक का वाते यो हराप वेई अन ईं केन के जस्यान वींके गेले चाले हे अन ईं बिलाम के जस्यान धन कमावा का वाते वींके जस्यान गलती करे हे। ईं वाते जस्यान कोरह का हाते जीं मनक विरोद कररिया हा, वाँको नास वेग्यो हे वस्यानीस अणाको भी नास वेई।</verse>
				<verse number="12">ईं मनक थाँका हाते परेम को दिकावो करे हे अन थाँका हाते खावे पिवे हे, पण ईं तो समन्द का मयने हपी तकी मंगरी का जस्यान हे। ईं वणा गवाळ्याँ का जस्यान हे, ज्याँने गाराऊँ कई मतलब ने हे, वीं तो आपणो पेट भरणो जाणे हे। ईं वीं बना पाणीवाळा वादळा का जस्यान हे जिंने बईरो उड़ान ले जावे हे, ईं जंगल का वाँ रूँकड़ा का जस्यान हे, ज्याँके फळ ने लागे हे अन ज्याँने जड़ हमेत उकाड़ नाक्या वेवे।</verse>
				<verse number="13">ईं मनक आपणाँ बुरा का जस्यान फेलाई, जस्यान तोफान की लेराऊँ समन्द जाग फेके हे। ईं अस्यान का तारा हे जी एक जस्यान ने चाले हे, ज्याँका वाते जुग-जुग तईं बळबा वाते वादी बणईगी हे।</verse>
				<verse number="14">अणा मनकाँ का वाते हनोक ज्यो आदम की हातवी पीड़ी मेंऊँ हो, वो परमेसर का आड़ीऊँ बोल्यो हो के, “देको, परबू आपणाँ हजारो हजारो हरग-दुताँ का हाते आन,</verse>
				<verse number="15">हाराई मनकाँ को न्याव करी अन जणा मनकाँ बुरा काम किदा हा अन परबू का विरोद में बोल्याँ हाँ, वाँने दण्ड देई।”</verse>
				<verse number="16">काँके ईं मनक बड़बड़ाबावाळा, दूजाँ मनकाँ पे दोस लगाबावाळा, आपणी मरजी पुरी करबावाळा, मोटी-मोटी बाताँ करबावाळा अन आपणाँ नफो करबा का वाते दूजाँ की चमचागीरी करबावाळा हे।</verse>
				<verse number="17">हो लाड़ला भायाँ, थाँ वणा बाताँ ने आद राकज्यो, ज्याँने थाँका नके परबू ईसू मसी का थरप्या तका चेला पेल्याँई बता दिदी ही।</verse>
				<verse number="18">वणा थाँने क्यो हो के, “आकरी का दनाँ में अस्यान का मनक भी आई, जी परबू अन वाँका मनकाँ की मजाक उड़ाई अन वीं आपणी बुरी मरजी का जस्यान चाली।”</verse>
				<verse number="19">ईं मनक वींइस हे, जी थाँकामें फुट नाके हे, ईं बेस अणी देह का जीवन का बारा मेंईस होचे हे अन अणामें परमेसर की आत्माने हे।</verse>
				<verse number="20">पण हो भायाँ, थाँ एक-दूँजा ने आत्मिक रूपऊँ पुवितर विस्वास का हाते आगे बड़ता रेज्यो अन पुवितर आत्मा का हाते परातना करतो रेज्यो।</verse>
				<verse number="21">आपणाँ परबू ईसू मसी की वाट नाळता रेज्यो काँके वोईस थाँने जुग-जुग को जीवन देई। ईं वाते परमेसर की भगती करबा में मन लगाज्यो।</verse>
				<verse number="22">ज्यो मनक आगा-पाछा हे वाँका ऊपरे दया करज्यो।</verse>
				<verse number="23">थाँ आगे बड़न वणा मनकाँ ने बंचा लिज्यो, जीं बंचाणा छारिया। वाँने वादी की लपटा में पड़्या तका ने बचावो हो वस्यानीस वाँने बंचा लिज्यो, वाँका पे दया बापू परबू की दरपणी राकन करज्यो। पण वाँका वणा गाबाऊँ जणापे वाँका पाप का भाव का धबा लागरिया हे, वाँकाऊँ छेटी रेज्यो, मारा केबा को मतलब ओ हे के, वाँका बुरा कामाँऊँ अलग रेज्यो।</verse>
				<verse number="24">परमेसर थाँने पापऊँ बंचान आपणाँ हामे निरदोस साबत करन अन राजी करन आपणी मेमा करबा का वाते ऊबो कर सके हे।</verse>
				<verse number="25">वोईस एकीस परमेसर ज्यो परबू ईसू मसी की वजेऊँ छुटकारो देबावाळो हे, वींकी मेमा, पराकरम, वेभव अन अदिकार दनियाँ की रचनाऊँ पेल्याऊँ अन अबाणूऊँ लेन जुग-जुग वाते वेती रेवे। अस्यानीस वेवे।</verse>
			</chapter>
		</book>
		<book number="66">
			<chapter number="1">
				<verse number="1">आ ईसू मसी की दरसावा की किताब हे परमेसर ईंने ईं वाते दिदी हे के, जीं बाताँ आबावाळा टेम में वेबावाळी हे परमेसर अणाने ईसू मसी ने दरसावा में दिदी अन वणा आपणाँ दास यहुन्ना का नके हरग-दुत ने खन्दान ईं बाताँ बतई। आ ईसू मसी की दरसावा की किताब हे, जिंने परमेसर ईसू मसी ने ईं वाते दिदी के, ज्यो बाताँ वेबावाळी हे, वाँने आपणाँ दासा ने बता दिदी जावे।</verse>
				<verse number="2">यहुन्ने जो कई भी दरसावो देक्यो हो, वींके बारा में बतायो। अन यो वो हाँच हे जो ईसू मसी बतायो हो ओ परमेसर की आड़ीऊँ आयो तको संदेस हे।</verse>
				<verse number="3">वीं मनक धन्न हे जीं परमेसर का ईं दरसावा की किताब का संदेसा ने भणे अन हुणे अन ईंका मयने जो बाताँ लिकी तकी हे, वाँके जस्यान चाले हे। काँके वाँ टेम नके हे, जद्याँ ईं बाताँ पुरी वेई।</verse>
				<verse number="4">मूँ यहुन्नो आसिया परदेस की हात मण्डळ्याँ का नाम यो लिकरियो हूँ, जी परमेसर का आड़ीऊँ अबाणू हे, जीं हमेस्यान हे अन ज्यो आबावाळो हे, वाँ हात आत्मा का आड़ीऊँ जीं वींके गाद्दी का हामे हे। अन ईसू मसी का आड़ीऊँ ज्यो विस्वास जोगो अन मरिया तका मेंऊँ जीवतो वेबावाळा मेंऊँ पेलो हे, अन ईं धरती का राजा पे हाकम हे। ज्यो आपणाँऊँ परेम करे हे। अन वणी आपणाँ खुनऊँ आपाँने पापऊँ छुटकारो दिदो हे, वीं ईसू मसी का आड़ीऊँ, थाँका पे दया, सक अन सान्ती वेती रेवे।</verse>
				<verse number="5"></verse>
				<verse number="6">वणी आपाँने राज करबावाळा अन बापू परमेसर की सेवा करबा वाते याजक बणाया हे। वाँकी मेमा अन तागत जुग-जुग वेती रेवे। आमीन।</verse>
				<verse number="7">देको, वो वादळा का हाते आबावाळो हे अन वींने हाराई आपणी आक्याँऊँ अन वीं मनक भी जणा वींने दुक दिदो हो देकी। अन धरती का हाराई मनक वाँके वजेऊँ रोई। अस्यान पाको हे के, यो वेई, आमीन।</verse>
				<verse number="8">परबू परमेसर जीं हा, अन जीं हमेस्यान हे, जीं आबावाळा हे, जीं हाराईऊँ तागतवर हे, वीं केवे हे के, “मूँईस अलफा अन ओमेगा हूँ।”</verse>
				<verse number="9">मूँ यहुन्नो ज्यो थाँको भई हूँ मूँ ईसू के दुक में, धीरज में अन राज में थाँको हण्डाळ्यो हूँ। मने देस निकाळो दिदो ग्यो, जिंकी वजेऊँ मूँ पत्तमुस नाम का टापू में हूँ। काँके मूँ परमेसर का वसन अन ईसू मसी की गवई थाँने देतो हो।</verse>
				<verse number="10">मूँ परबू का दन पुवितर आत्मा का काबू में आग्यो अन में दरसावो देक्यो, मने मारा पाच्छे रणभेरी की अवाज हुणई दिदी।</verse>
				<verse number="11">अवाज में अस्यान हमच्यार आरियो हो के, “जो कई भी थूँ देकरियो हे, वींने एक किताब का मयने लिकतो जा अन वींके केड़े वींने इपिसुस, स्मुरना, पिरगमुन, थुआतीरा, सरदीस, फिलोदेलफीया अन लिदिकिया की हातई मण्डळ्याँ ने खन्दा दिज्ये।”</verse>
				<verse number="12">तो मूँ ओ देकबा का वाते के, या अवाज किंकी हे, मूँ पाच्छे फरियो। जद्याँ मूँ पाच्छे फरियो तो मने हात होना का दिवा दिक्या,</verse>
				<verse number="13">वाँ दिवा का बचमें में मनक का पूत का जस्यान को एक मनक हो अन वणी पगाँ तईं एक चोळो पेर मेल्यो हो अन वींकी छाती पे होना को कमरपट्यो बंद्‍यो तको हो।</verse>
				<verse number="14">वींके माता का बाल बगला की फाँकऊँ हेला धोळा हा, अन वाँकी आक्याँ वादी की लपटा का जस्यान ही।</verse>
				<verse number="15">वाँका पग पकई तकी पीतळ का जस्यान चमकरिया हा अन वाँकी अवाज पाणी का जरणा का जस्यान ही।</verse>
				<verse number="16">अन वणी आपणाँ जीमणा हात में हात तारा ले राक्या हा। वाँका मुण्डाऊँ दोधारी तरवार बारणे निकळरी ही। वाँको मुण्डो दपराँ का सुरज का जस्यान चमकरियो हो।</verse>
				<verse number="17">जद्याँ में वींने देक्यो, तो वाँका पगा में मरिया तका मनक का जस्यान पड़ग्यो। पछे वणा आपणाँ जीमणो हात मारा पे राकन माराऊँ क्यो, “दरपे मती मूँ पेलो अन आकरी हूँ।</verse>
				<verse number="18">मूँ वोईस हूँ, जिंका नके जीवन हे। पेल्याँ मूँ मरग्यो हो, पण अबे देक, मूँ जुग-जुग वाते जीवतो हूँ। मोत अन पाताळ की चाब्याँ मारा नके हे।</verse>
				<verse number="19">ईं वाते जो बाताँ थें देकी हे, जो वीती री हे अन जो बाताँ वेबावाळी हे, वाँ हाराई ने लिकतो जा।”</verse>
				<verse number="20">वणा हात तारा ने जिंने थें मारा जीमणा हात में देक्या हा अन वाँ हात होना का दिवा को भेद ओ हे के, वीं हात तारा हातई मण्डळ्याँ का हात दुताँ ने दिकावे अन वीं हात दिवा हातई मण्डळ्याँ ने दिकावे हे।</verse>
			</chapter>
			<chapter number="2">
				<verse number="1">“इपिसुस की मण्डली का दुताँ ने ओ संदेस लिक। जणी हातई तारा आपणाँ जीमणा हात में ले राक्या हे अन होना का हातई दिवा का बचमें में फरे हे वो अस्यान केवे हे के,</verse>
				<verse number="2">मूँ थाँरा काम ने, थाँरी मेनत ने अन थारी सबर ने जाणूँ हूँ अन मूँ ओ भी जाणूँ हूँ के, थाँ बुरा मनकाँ ने देकणा ने छावो अन थूँ वणा मनकाँ ने जणा खुद ने खासतोर थरप्या तका चेला बोले हे पण वीं हाँची में कोयने, थें वींने परक्या अन वीं जूटा निकळ्या।</verse>
				<verse number="3">थूँ हिम्मत राके हे, अन मारा नाम की वजेऊँ दुक जेलता तका भी थाक्या कोयने हो।</verse>
				<verse number="4">पण मने थाँरा विरोद में एक बात केणी हे जस्यान थूँ पेल्याँ माराऊँ परेम करिया करतो हो, वस्यान करणो छोड़ दिदो हे।</verse>
				<verse number="5">ईं वाते होस में आ अन ओ होच के, थूँ कटेऊँ पड़्यो, थूँ आपणो मन बदल अन पेल्याँ का जस्यान काम कर अन जद्याँ थूँ अस्यान ने करी, तो मूँ थाँरा नके आन थाँरा दिवा ने वींकी जगाँऊँ छेटी कर देऊँ।</verse>
				<verse number="6">पण थाँरा में एक बात हे थूँ नीकुलइया का जस्यान जूट का कामऊँ नपरत करे हे, जणीऊँ मूँ भी नपरत करूँ हूँ।</verse>
				<verse number="7">जिंके कान्दड़ा हे वीं हुणीलो के, आत्मा मण्डळ्याऊँ कई केवे हे। ज्यो भी बुरईऊँ जिती मूँ वींने परमेसर का बाग में जीवन का रूँकड़ा का लाग्या तका फळ खाबा को हक देऊँ।</verse>
				<verse number="8">“स्मुरना की मण्डली का दुताँ ने ओ लिक। ज्यो पेलो अन आकरी हे, ज्यो मरग्यो हो, पण पाछो जीवतो वेग्यो हे, वो अस्यान केवे हे के,</verse>
				<verse number="9">थें जीं कळेस जेल्या हा, वींके बारा में अन थाँकी गरीबी ने जाणूँ हूँ, तो भी थाँ हाँची में धनी हो। जी मनक खुद ने यहूदी केवे हे पण वीं हाँची में कोयने हे, वीं तो सेतान की मण्डली हे, वीं थाँरी बुरई करे हे वींके बारा में मूँ भी जाणूँ हूँ।</verse>
				<verse number="10">जो दुक थने जेलणो हे वणीऊँ मती दरप, काँके सेतान थाँका मेंऊँ घणा ने परकबा का वाते जेल में नाक देई। थने वटे दस दनाँ तईं दुक जेलणो पड़ी, पण थूँ हाँचो रेज्ये पलई थाँरी मोत ईं कानी वे जावे। तो मूँ थने जुग-जुग का जीवन को मुकट देऊँ।</verse>
				<verse number="11">जिंके कान्दड़ा हे वीं हुणीलो के, आत्मा मण्डळ्याऊँ कई केवे हे। ज्यो भी जिती वींने दूँजी मोत कोयने जेलणी पड़ी।</verse>
				<verse number="12">“पिरगमुन की मण्डली का दुताँ ने ओ लिक। जणा तीकी दोधारी तरवार ले राकी हे वो अस्यान केवे हे के,</verse>
				<verse number="13">मूँ जाणूँ हूँ के, थूँ वटे रेवे हे जटे सेतान की गाद्दी हे। अन मारा ईं नाम पे विस्वास करे हे जद्याँ के, थाँरा नगर में मारो विस्वास जोगो दास अन्तिपास वटे मारिया ग्यो, जटे सेतान की जगाँ हे। तो भी थूँ विस्वासऊँ ने छेटी व्यो।</verse>
				<verse number="14">कई भी वे मने थाँरा विरोद में थोड़ीक बात केणी हे। थाँरी मण्डली में अस्यान का थोड़ाक मनक हे ज्यो बिलाम की हिक पे चाले हे। काँके बिलाम बालाक ने हिकायो हो के, वो इजराएली मनकाँ ने मूरत पे चड़ायो तको चड़ावो खाबा अन कुकरम करबा का वाते उकसावे।</verse>
				<verse number="15">अस्यानीस थाँरा अटे कुई अस्यान का मनक हे जीं नीकुलइया की हिक पे चाले हे।</verse>
				<verse number="16">ईं वाते आपणो मन बदलो, ने तो मूँ आन वाँके हाते वीं तरवारऊँ लड़ूँ, ज्या मारा मुण्डाऊँ निकळे हे।</verse>
				<verse number="17">जिंके कान्दड़ा हे वीं हुणीलो के, आत्मा मण्डळ्याऊँ कई केवे हे। ज्यो भी जिती, मूँ वाँने हरग में हपायो तको मन्नो देऊँ। मूँ वाँने एक धोळो भाटो भी देऊँ, जिंका ऊपरे एक नुवो नाम लिक्यो तको वेई। वो नाम वीं मनक का छोड़न कुई ने जाणी, जिंने वो दिदो जाई।</verse>
				<verse number="18">“थुआतीरा की मण्डली का दुताँ ने ओ लिक। परमेसर को बेटा जिंकी आक्याँ वादी की लपटा का जस्यान हे, अन पग पकई तकी पीतळ का जस्यान चमकरिया हे वो ओ केवे हे के,</verse>
				<verse number="19">मूँ थाँरा कामाँ ने, थाँरा परेम ने, विस्वास ने, थाँरी सेवा ने अन थाँरा धीरज ने जाणूँ हूँ, अन मूँ ओ भी जाणूँ हूँ के, अबे थूँ ईं पेल्याऊँ ज्यादा हेलो काम करे हे।</verse>
				<verse number="20">पण मने थाँरा विरोद में ओ केणो हे, थूँ इजेबेल नाम की वीं लुगई ने थाँरा बचमें में रेवा देवे हे, वाँ खुद ने परमेसर का आड़ीऊँ बोलबावाळी बतावे। वाँ आपणी हिकऊँ मारा दासाँ ने कुकरम करबा अन मूरताँ पे चड़ायो तको चड़ावो खाबा वाते उकसावे हे।</verse>
				<verse number="21">में वींने मन फेरबा को मोको दिदो हो, पण वणी आपणाँ मन ने कूकरमऊँ ने फेरयो।</verse>
				<verse number="22">ईं वाते मूँ वाँने मांदकी का माचा में नाकबावाळो हूँ। अन वणा मनकाँ ने जी वाँके हाते कुकरम करे हे जद्याँ वीं आपणो मन ने ने बदली, तो वाँका पे भी तकलिपाँ खन्दाऊँ।</verse>
				<verse number="23">मूँ वींका बाळकाँ ने मार देऊँ, तो हारी मण्डली ओ जाण जाई के, मूँ मन अन बदी जाणबावाळो हूँ। अन मूँ थाँ हाराई ने थाँका कामाँ के जस्यान बदलो देऊँ।</verse>
				<verse number="24">पण मूँ थुआतीरा मण्डली का वणा मनकाँ ने केणो छावूँ हूँ ज्यो वीं लुगई की हिक ने ने माने अन सेतान की भेद वाळी बाताँ ने ने जाणे। मूँ थाँका पे ओरुँ बोज ने नाकूँ।</verse>
				<verse number="25">पण मारी हिक जो थाँका नके हे वींपे मारे आबा तईं चालतो रेज्यो।</verse>
				<verse number="26">ज्यो भी जिती अन जणा बाताँ ने मानबा को हुकम में दिदो हो, वींने आकरी हुदी मानी, वणा मनकाँ ने मूँ जात्या पे हक चलाबा को अदिकार देऊँ।</verse>
				<verse number="27">अन वीं लोड़ा का राजदण्ड को पतर लेन वणापे राज करी। अन वीं वाँने गारा का ठामड़ा का जस्यान फोड़ देई।</verse>
				<verse number="28">ओ हक में मारा बापू परमेसरऊँ पायो हे। अन मूँ भी वाँने हवेर पेल्याँ का तारा का जस्यान चमकाऊँ।</verse>
				<verse number="29">जिंके कान्दड़ा हे वीं हुणीलो के, आत्मा मण्डळ्याऊँ कई केवे हे।</verse>
			</chapter>
			<chapter number="3">
				<verse number="1">“सरदीस की मण्डली का दुताँ ने ओ लिक। जिंका नके परमेसर की हात आत्मा अन हात तारा हे वो अस्यान केवे हे, मूँ थाँका करम जाणूँ हूँ। थाँ जीवता तो केवावो हो, पण हाँची में मरिया तका हो।</verse>
				<verse number="2">ईं वाते हेंचेत वो अन अणीऊँ पेल्याँ के, थाँ पुरी तरियाँ मर जावो वणा बाताँ ने जो बची तकी हे वाँने पाकी करो, काँके में मारा परमेसर की देकणी में, थाँरा कस्याई काम ने सई कोयने देक्या हे।</verse>
				<verse number="3">ईं वाते जणी हिक ने थाँ हूणी ही, वींने आद करो अन आपणो मन बदलो अन वीं हिक का जस्यान चाल चालो। जद्याँ थूँ अस्यान ने करी, तो मूँ चोर का जस्यान अणाचेत को थाँरा नके अई जाऊँ अन थने पतो भी ने पड़बा देऊँ।</verse>
				<verse number="4">पण सरदीस थाँरा मयने थोड़ाक मनक हे जीं खुद ने पुवितर बणान राक्या हे। वीं धोळा गाबा पेरन मारा हाते-हाते गुमी, काँके वीं खरा मनक हे।</verse>
				<verse number="5">ज्यो भी जिती, वीं अस्याईस धोळा गाबा पेरी। मूँ जीवन की किताब मेंऊँ वाँका नामने ने वगाड़ूँ, पण वाँका नाम ने बापू परमेसर अन वींका हरग दुताँ का हामे मान लेऊँ के, ईं मारा हे।</verse>
				<verse number="6">जिंके कान्दड़ा हे वीं हुणीलो के, आत्मा मण्डळ्याऊँ कई केवे हे।</verse>
				<verse number="7">“फिलोदेलफीया की मण्डली का दुताँ ने ओ लिक। वीं ज्यो पुवितर अन हाँचा हे अन जिंका नके दाऊद राजा का नगर की कुस्याँ हे अन वो जणी बारणा ने खोले हे वींने कुई भी जड़ ने सके अन जिंने वो जड़ हे वींने कुई खोल ने सके। ओ अस्यान केवे हे के,</verse>
				<verse number="8">मूँ थाँका काम ने जाणूँ हूँ। देको, में थाँका हामे एक बारणो खोल्यो हे, जिंने कुई भी जड़ ने सके। मूँ जाणूँ हूँ के, थाँरा नके थोड़ीक तागत हे, तो भी थें मारी आग्या मानी हे, अन मारो नाम लेणो भी ने छोड़्यो।</verse>
				<verse number="9">हुणो, थाँका अटे थोड़ाक अस्या मनक हे ज्यो सेतान की मण्डली का हे वीं खुद ने यहूदी बतावे जद्याँ के वीं हाँची में कोयने। वीं जूटा हे, मूँ वाँके हाते अस्यान को वेवार करूँ, जणीऊँ वीं थाँरा नके आन थाँरा पगा में धोक खाई अन ओ जाण जाई के, मूँ थाँकाऊँ परेम करूँ हूँ।</verse>
				<verse number="10">काँके थाँ धीरजऊँ मारा हुकम पे चालता रिया हो, ईं वाते जद्याँ ईं धरती का मनकाँ ने परकबा का वाते अबकी टेम आई, तो मूँ थने बंचाऊँ।</verse>
				<verse number="11">मूँ वेगोई आबावाळो हूँ। ईं वाते ज्यो कई भी थाँरा नके हे वींमें ठम्याँ तका रो, जणीऊँ कुई थाँका जुग-जुग का जीवन को मुकट कोसी ने सके।</verse>
				<verse number="12">ज्यो भी जिती वींने मूँ परमेसर का मन्दर को थम्बो बणाऊँ। अन वींके केड़े, वो कदी बारणे ने जाई। मूँ वींपे मारा परमेसर को नाम लिकूँ। मूँ वींपे नुवो यरूसलेम को नाम लिकूँ, जो परमेसर का हरगऊँ उतरबावाळो हे। मूँ वींपे मारो नुवो नाम भी लिकूँ।</verse>
				<verse number="13">जिंके कान्दड़ा हे वीं हुणीलो के, आत्मा मण्डळ्याऊँ कई केवे हे।</verse>
				<verse number="14">“लोदकिया की मण्डली का दुताँ ने ओ लिक। ज्यो आमीन हे, विस्वास जोगो, हाँचो गवा हे अन हारी रचना को मुल हे, वो अस्यान केवे हे के,</verse>
				<verse number="15">मूँ थाँरा काम ने जाणूँ हूँ अन ओ भी जाणूँ हूँ के, थूँ ने तो हिळो हे अन ने ऊनो हे। भलो वेतो के, थूँ अणा मेंऊँ एक तो वेतो।</verse>
				<verse number="16">पण थूँ नवायो हे, ने तो हिळो हे अन ने ऊनो हे, ईं वाते मूँ थने मारा मुण्डाऊँ उगळबावाळो हूँ।</verse>
				<verse number="17">काँके थूँ केवे हे के, ‘मूँ रिप्यावाळो बणग्यो हूँ मने किंकीई जरूत कोयने,’ पण मने पतो हे थूँ नीच, बना दया को, कंगाळ, आन्दो अन नांगो हे।</verse>
				<verse number="18">ईं वाते मूँ थने सला देरियो हूँ के, थूँ माराऊँ हव होनो लेन रिप्यावाळा बणजा। पेरबा वाते धोळा गाबा भी लिले, जणीऊँ थाँरो नागोपणो ढकी जावे, ताँके थाँरो तमासो ने बणे। थाँरी आक्याँ में लगाबा का वाते दवा(सुरमो) लिले, जणीऊँ थने दिकबा लाग जावे।</verse>
				<verse number="19">मूँ जणीऊँ भी परेम करूँ हूँ वाँने तापड़ूँ अन दण्ड देऊँ हूँ। ईं वाते पसतावणो कर अन पापऊँ आपणो मन ने बदलो।</verse>
				<verse number="20">हुणो, मूँ बारणा आगे ऊबो हूँ अन हेलो पाड़रियो हूँ। यद्याँ कुई मारो हेलो हुणन कमाड़ खोली, तो मूँ वींका घर आऊँ अन वींका हाते खाणो खाऊँ अन वो मारा हाते खाणो खाई।</verse>
				<verse number="21">ज्यो भी जिती मूँ वींने मारी हाते मारा गादी पे बेवाड़ऊँ। वस्यानीस जस्यान मूँ जित्या केड़े मारा बापू की गादी पे बेट्यो हूँ।</verse>
				<verse number="22">जिंके कान्दड़ा हे वीं हुणीलो के, आत्मा मण्डळ्याऊँ कई केवे हे।”</verse>
			</chapter>
			<chapter number="4">
				<verse number="1">ईंका केड़े में देक्यो के हरग को बारणो खुल्यो हे अन वाँ अवाज जो मने पेल्याँ हुणई दिदी ही, रणभेरी की अवाज में बोलरी ही के, “ऊपरे अई जा, मूँ थने वीं बाताँ बताऊँ जीं आबावाळा टेम में पकी वेबावाळी हे।”</verse>
				<verse number="2">अतराक में पुवितर आत्मा मारा पे कबजो कर लिदो। अन में देक्यो हरग में एक गाद्दी ही अन वींका ऊपरे कुई बेट्यो तको हो।</verse>
				<verse number="3">ज्यो वटे बेटो तको हो, वींको मुण्डो लाल मणी अन लाल हीरा का जस्यान चमकरियो हो, अन वींके च्यारूँमेर बादळा को धनुस हो, ज्यो हरा रंग का हीरा पन्ना का जस्यान लागरियो हो।</verse>
				<verse number="4">वीं गादी का च्यारूँमेर चोवीस गाद्‍याँ ओरी ही, वाँके ऊपरे चोवीस पुरवज बेट्या तका हा। वणा धोळा गाबा पेरन मेल्या हा अन वाँके माता पे होना का मुकट हा।</verse>
				<verse number="5">अन वीं गादी मेंऊँ विजळी अन वादळा के गाजबा की अवाज आरी ही। गाद्दी का हामे हात मसाळ चालरी ही, ईं मसाळ परमेसर की हात आत्मा हे।</verse>
				<verse number="6">अन वीं गादी का हामें बिल्‍लोर का काँस का जस्यान दिकबावाळो समन्द हो। वीं समन्द का बचमें में अन गाद्‍याँ का च्यारूँमेर च्यार जीवता जीव हा, वाँके आगे-पाछे आक्याँ ईं आक्याँ ही।</verse>
				<verse number="7">पेलो जीवतो जीव नार की जस्यान, दूजो बळद की जस्यान, तीजा को मुण्डो मनक की जस्यान हो अन चोतो उडता तका खुरसावणा का जस्यान हो।</verse>
				<verse number="8">वणा च्यारई जीवता जीव के छे छे फाकड़ा हा, वाँके च्यारूँमेर आक्याँ ईं आक्याँ हे अन वीं रात-दन एकीस बात बोलता रेता हा, “सर्वसक्‍तिमान परबू परमेसर पुवितर, पुवितर पुवितर हे, ज्यो अबाणू हे, ज्यो हमेस्यान हो, ज्यो आबावाळो हे।”</verse>
				<verse number="9">जद्याँ जीवता जीव गाद्‍याँ पे बेट्या तका, जीं अमर हे वींकी मेमा अन धन्नेवाद करता हा,</verse>
				<verse number="10">तो वीं चोवीस पुरवज ज्यो गादी पे बेट्यो तको अमर हे, वींका पगा में धोक खान भगती कररिया हा, वीं आपणाँ मुकट उतारन बोलता हा के,</verse>
				<verse number="11">“हो माकाँ परबू अन माकाँ परमेसर! थाँईस मेमा, अन मान अन सामरत जोगा हो, काँके थाँईस हारी चिजाँ ने बणई हे। थाँकी मरजीऊँईस हारी चिजाँ बणईगी हे अन जीवे हे।”</verse>
			</chapter>
			<chapter number="5">
				<verse number="1">पछे में कई देको के, ज्यो गादी पे बेट्या हो, वींके जीमणा हात में एक किताब ही अन वाँ दुई आड़ीऊँ लिकी तकी ही। वींने हात मोराँ लगान बन्द कर मेली ही।</verse>
				<verse number="2">तो में एक जोरवार हरग-दुत ने देक्यो जणी जोरऊँ अस्यान हेलो पाड़्यो हो के, “ईंकी मोराँ तोड़बा अन किताब ने खोलबा के जोगो कूण हे?”</verse>
				<verse number="3">पण ने तो हरग में, ने धरती पे अन ने धरती का रेटे वींने खोलबा अन देकबा जोगो कुई मल्यो।</verse>
				<verse number="4">ईं वाते मूँ जोर-जोरऊँ रोबा लागो, काँके वींने कुई भी खोलबा अन देकबा जोगो भी ने मल्यो हो।</verse>
				<verse number="5">तो वणा पुरवज मेंऊँ एक माराऊँ क्यो, “रोवे मती। देक, यहूदा का गोत मेंऊँ वो नार, ज्यो दाऊद को मुल हे, वो वीं किताब ने अन वींकी मोराँ खोलबा वाते जीत हासील किदी हे।”</verse>
				<verse number="6">मूँ देकूँ हूँ के, वाँ गादी, च्यारई जीवता जीव का हामे अन वणा पुरवज का बचमें एक उन्यो ऊबो तको हे। वो अस्यान लागरियो जस्यान के, वींकी बली चड़ई गी वे। वींके हात हिंगड़ा अन हात आक्याँ ही, ईं परमेसर की हात आत्मा ही, ज्याँने आकी धरती पे खन्दई गी ही।</verse>
				<verse number="7">अन वो उन्यो गादी का नके आयो अन जो वींपे बेट्यो तको हो वींके जीमणा हातऊँ वाँ किताब ले लिदी।</verse>
				<verse number="8">अन जद्याँ वणी किताब ले लिदी, तो वणा च्यारई जीवता जीव अन वीं चोवीस पुरवज वींके धोक लाग्या। वणा हाराई का नके विणा ही अन वीं वाना आबावाळी चिजाँऊँ भरिया तका होना का प्याला लेन राक मेल्या हा। यो धरमिया की परातना दिकावे हे।</verse>
				<verse number="9">वीं एक नुवो गीत गाबा लागा हा के, “थाँ ईं किताब ने अन ईंपे लागी तकी मोराँ ने खोलबा जोगो हो, काँके थाँ बली चड़न थाँका लुईऊँ हाराई कुल का मनकाँ ने, हारी बोली बोलबावाळा ने, हारी जात्या का मनकाँ ने परमेसर वाते मोल लिदो हे।</verse>
				<verse number="10">थाँ वाँने परमेसर का याजक अन एक राज करबावाळा बणाया हे अन वीं धरती पे राज करे हे।”</verse>
				<verse number="11">पछे में हरग दुताँ की अवाज हूणी, वीं गादी, वीं च्यारई जीवता जीव, पुरवज का च्यारूँमेर ऊबा हा अन वाँकी गणती लाको करोड़ो में ही।</verse>
				<verse number="12">वीं जोरऊँ हेलो पाड़रिया हा, “जो उन्यो बली चड़ायो ग्यो हो, वोईस तागत, धन, अकल, सगती, मान, मेमा अन धन्नेवाद के जोगो हो।”</verse>
				<verse number="13">वींके केड़े में हरग की, धरती की, पाताळ की, अन समन्द की हारी रचना अन बरमाण्ड का हाराई मनक की अवाज हूणी, वीं अस्यान बोलरिया हा के, “ज्यो गादी पे बेट्यो हे वींकी अन उन्याँ की मेमा, मान, अन धन्नेवाद अन वींको राज जुग-जुग रेवे।”</verse>
				<verse number="14">पछे वीं च्यारई जीवता जीव बोल्या आमीन, अन वीं पुरवज रेटे नमन वींके धोक लाग्या।</verse>
			</chapter>
			<chapter number="6">
				<verse number="1">में देक्यो के, वणी उन्ये वणा हात मोराँ मेंऊँ एक मोर खोली। तो वाँ च्यार जीवता जीव मेंऊँ एक ने में वादळा की गाजबा की अवाज का जस्यान ओ केतो तको हुण्यो, “आ।”</verse>
				<verse number="2">में देक्यो के, एक धोळो घोड़ा हे अन वींके ऊपरे जो सवार हो वणी तिर-बाण ले राक्या हा। अन वींने एक मुकट दिदो ग्यो, वो जितबावाळा का जस्यान जीतबा का वाते बारणे पराग्यो।</verse>
				<verse number="3">अन जद्याँ वणी उन्ये दूजी मोर खोली, तो में दूजाँ जीवता जीव ने अस्यान बोलते तको हुण्यो, “आ।”</verse>
				<verse number="4">तो एक ओरी घोड़ो निकळ्यो वींको लाल रंग हो अन वींके ऊपरे जो सवार हो, वींने ओ हक दिदो ग्यो हो के, वो धरती पे मनकाँ में एक-दूँजा की हत्या करावे अन वाँकी सक सान्ती लिले। वींने एक तरवार भी दिदी गी ही।</verse>
				<verse number="5">जद्याँ उन्ये तीजी मोर खोली, तो में वणी तीजा जीवता जीव ने अस्यान बोलतो हुण्यो, “आ।” पछे में एक काळा घोड़ा ने देक्यो। जो वींपे सवार हो, वींके हात में एक ताकड़ी ही।</verse>
				<verse number="6">अन में वणा च्यारई जीवता जीव का बचमें मेंऊँ ओ हेलो हुण्यो, “आबावाळा टेम में धरती पे काळ पड़ी, वीं टेम में एक दन की दानकी में एक दन का खावा अतराक गऊँ कन एक दन की दानकी में तीन दनाँ खावा अतराक जो मली, पण जेतुन का तेल अन अंगूरा को रस को भाव ने बदली।”</verse>
				<verse number="7">वींके केड़े उन्ये चोती मोर खोली, तो में चोता जीवता जीव ने अस्यान बोलतो हुण्यो, “आ।”</verse>
				<verse number="8">अन में फिका पीळा रंग को घोड़ा देक्यो। ज्यो वींपे सवार हो वींको नाम मोत हो, वींके पाछे-पाछे पाताळ हो वींने धरती का एक चोता भाग पे हक दिदो ग्यो के, वो तरवारऊँ, काळऊँ, मांदकीऊँ अन धरती का जनावराऊँ मनकाँ ने मरावे।</verse>
				<verse number="9">वींके केड़े उन्ये पाँचवी मोर खोली, तो में वेदी का रेटे वणा मनकाँ की आत्मा देकी, ज्याँने हव हमच्यार अन गवई देबा अन हुणबा की वजेऊँ मार दिदा ग्या हा।</verse>
				<verse number="10">वीं जोर-जोरऊँ हेलो पाड़रिया हा, “हो पुवितर अन हाँचा परबू, थाँ कदी न्याव करो? ईं धरती का मनकाँ को न्याव अन जणा माँने मारिया हा, वाँने कदी दण्ड देवो?”</verse>
				<verse number="11">वाँ हाराई ने धोळा चोळो पेरायो ग्यो हो अन वाँने क्यो ग्यो हो के, “थोड़ीक टेम ओरी वाट नाळो, जद्याँ तईं थाँकी हण्डाळ्याँ की गणती पुरी ने करी जावे, ज्याँने थाँकी जस्यान मारिया जाई।”</verse>
				<verse number="12">वींके केड़े जद्याँ उन्ये छटी मोर खोली, तो में जोरको भूकम आता देक्यो, जणीऊँ सुरज केलड़ी का पिदा जस्यान काळो अन चाँद लुई की जस्यान रातो वेग्यो।</verse>
				<verse number="13">आकासऊँ धरती पे तारा अस्यान पड़रिया जस्यान जोरकी डूँज का जाटकाऊँ कणी रूँकड़ा का काचा फळ जड़ जावे हे।</verse>
				<verse number="14">अन जस्यान किताब पाणी में आली व्या केड़े भेळी वे जावे हे वस्यानीस आकास वेग्यो। हाराई मंगरा, टापू आपणी जगाऊँ हालग्या।</verse>
				<verse number="15">धरती का राजा, परदान, सेनापती, रिप्यावाळा, जोरावर मनक, हाराई मनक अन आजाद अन गुलाम हाराई गुफा में लकी ग्या।</verse>
				<verse number="16">वीं मंगरा अन छाँटाऊँ केरिया हा के, “माकाँ पे पड़ जावो। ज्यो गादी पे बेट्यो तको हे वणीऊँ अन उन्याँ का गुस्साऊँ माँने हपई दो,</verse>
				<verse number="17">काँके वींके आड़ीऊँ अबकी टेम आगी हे, अबे कूण ईं अबकी टेम ने जेल सके हे?”</verse>
			</chapter>
			<chapter number="7">
				<verse number="1">ईंका केड़े में च्यार हरग दुताँ ने धरती का च्यारई खुणा में ऊबा तका देक्या, वीं च्यारई खुणाऊँ आबावाळा बईरो ने ठाम मेल्यो हो, जणीऊँ ईं धरती का रूँकड़ा के अन समन्द में बईरो ने चाल सके।</verse>
				<verse number="2">अन में एक ओरी हरग-दुत ने उगमणी दसाऊँ आवतो तको देक्यो। वणी जीवता परमेसर की मोर ले राकी हे। वणी वणा च्यारई दुताँ ने ज्याँने धरती अन समन्द को नास करबा को हक दिदो ग्या हो, वाँकाऊँ जोरऊँ क्यो,</verse>
				<verse number="3">“थाँ जद्याँ तईं धरती, समन्द अन रूँकड़ा को नास मती करज्यो, तद्याँ तईं मूँ आपणाँ परमेसर की मोर वींका दासा का माता पे ने लगई दूँ।”</verse>
				<verse number="4">पछे जिंके मोर लगई गी ही, वाँकी गणती एक लाक चमालिस हजार ही। वीं मनक इजराएल का हाराई गोताँ मेंऊँ हा।</verse>
				<verse number="5">वणा गोताँ में यहूदा, रुबेन, गाद, आसेर, नप्ताली, मनस्से, समोन, लेवी, इस्साकार, जबलुन, युसुप अन बिन्यामीन हा। वणा मेंऊँ एक-एक गोत मेंऊँ बारा बारा हजार मनक हा।</verse>
				<verse number="6"></verse>
				<verse number="7"></verse>
				<verse number="8"></verse>
				<verse number="9">ईंका केड़े में कई देक्यो के, मनकाँ का मोटी भीड़ हे जिंने कुई भी गण ने सके, वीं भीड़ में हारी जात्या का, हाराई कुल का, हारी बोली बोलबावाळा अन हाराई देसा का मनक हा, वीं वणी गादी अन उन्याँ का हामे ऊबा हा, वणा धोळा गाबा पेर मल्या हा अन हाताँ में खजुर की डाळ्याँ ले राकी ही।</verse>
				<verse number="10">अन वीं हेलो पाड़रिया हा, “आपणाँ उदार का वाते गादी पे बेट्या तका आपणाँ परमेसर की अन उन्याँ की जे-जेकार वेवे।”</verse>
				<verse number="11">वीं हाराई हरग-दुत वीं गादी के, पुरवजाँ के अन च्यारई जीवता जीव का च्यारूँमेर ऊबा हा। वणा गादी पे बेट्या तका परमेसर के धोक दिदो।</verse>
				<verse number="12">पछे वणा क्यो, “आमीन! आपणाँ परमेसर की जे-जेकार, मेमा, अकल, धन्नेवाद, मान, तागत अन सगती हमेस्यान बणी तकी रेवे। आमीन।”</verse>
				<verse number="13">तो वणा पुरवजाँ मेंऊँ एक जणे माराऊँ पूँछ्यो, “जणी धोळा गाबा पेर मल्या हा, वीं मनक कूण हे? वीं कटाऊँ आया हे?”</verse>
				<verse number="14">में वणीऊँ क्यो, “हे मालिक, थाँ तो जाणोई हो।” तो वणा माराऊँ क्यो, “ईं वीं मनक हे जी कळेस जेलन आया हे अन अणा आपणाँ गाबा ने उन्याँ का लुई ऊँ धोन धोळा किदा हे।</verse>
				<verse number="15">ईं वजेऊँ ईं परमेसर का गादी का हामे ऊबा हे अन वाँके मन्दर में रात-दन वाँकी भगती करता रेवे हे, ईं वाते ज्यो गादी पे बेट्या तका हे वो वाँका में वास करतो तको वाँने बंचाई।</verse>
				<verse number="16">वाँने ने तो भूक लागी अन नेई वाँने कदी तर लागी। सुरज की तपत अन तावड़ाऊँ भी वाँके कई ने वेई।</verse>
				<verse number="17">काँके ज्यो उन्यो गादी का बचमें में हे वो वाँकी रुकाळी करी। अन वो वाँने जीवन देबावाळा पाणी की सोता का नके लेन जाई अन परमेसर वाँकी आक्याँ का हाराई आसूँ पुछ देई।”</verse>
			</chapter>
			<chapter number="8">
				<verse number="1">वींके केड़े जद्याँ उन्ये हातवी मोर खोली, तो आदा घण्टा तईं हरग में सनाटो वेग्यो।</verse>
				<verse number="2">में परमेसर का हामे हात हरग दुताँ ने देक्या। वाँने हात रणभेरियाँ दिदी गी ही।</verse>
				<verse number="3">ईंके केड़े एक ओरी हरग-दुत होना को धुपदान लेन आयो अन वेदी का नके ऊबो वेग्यो। वींने धरमिया की परातना का हाते होना की वेदी पे जो गादी का हामे ही, वींपे चड़ाबा का वाते नरोई धुप दिदो।</verse>
				<verse number="4">अन हरग दुताँ का हाताऊँ धुप को धूवो वणा धरमी मनकाँ की परातना का हाते परमेसर का हामे ग्यो।</verse>
				<verse number="5">हरग-दुत धुपदानऊँ वेदी की वादी लेन धरती पे फेंक दिदी, तो वादळा में गाजबा लागो अन विजळी चाली अन भूकम आयो।</verse>
				<verse number="6">तो वीं हरग-दुत ज्याँका नके हात रणभेरियाँ हा, वीं वाँने बजाबा का वाते त्यार वेग्या।</verse>
				<verse number="7">पेले हरग-दुत जस्यानी रणभेरी बजई, वस्यानई लुई वाळा गड़ा अन वादी दिकई दिदी अन वाँने धरती पे फेंक दिदा। जणीऊँ धरती को एक तीहाई भाग बळग्यो। एक तीहाई रूँकड़ा बळ ग्या अन हाराई लिलो चारो भी बळग्यो।</verse>
				<verse number="8">वींके केड़े दूजे हरग-दुत रणभेरी बजई, तो मानो एक बळता तका मंगरा ने समन्द का मयने फेंक दिदो ग्यो हो, जणीऊँ समन्द को एक तीहाई पाणी लुई बणग्यो।</verse>
				<verse number="9">जिंका वजेऊँ समन्द की एक तीहाई जीव-जनावर मरग्या अन एक तीहाई जाँज भी नास वेग्या।</verse>
				<verse number="10">जद्याँ तीजे हरग-दुत रणभेरी बजई तो आकास मेंऊँ एक मसाळ की जस्यान बळतो तको तारो नंद्‍याँ अन पाणी का जरणा पे पड़्यो।</verse>
				<verse number="11">ईं तारा को नाम नागदोना हो, जिंका वजेऊँ एक तीहाई पाणी नागदोना में बदलग्यो अन कड़वो वेग्यो, जिंने पिवाऊँ घणा मनक मरग्या।</verse>
				<verse number="12">जद्याँ चोते हरग-दुत रणभेरी बजई, तो एक तीहाई सुरज, चाँद अन तारा पे विपती आई। ईं वजेऊँ वाँको एक तीहाई भाग काळो पड़ग्यो। जिंका वजेऊँ एक तीहाई दन अन रात में अन्दारो वेग्यो।</verse>
				<verse number="13">तो में आकास में एक बाज ने उड़तो तको देक्यो अन वो जोरकी अवाज में बोलरियो हा के, “आलतरे तो तीन हरग दुताँ को रणभेरी बजाणी बाकी हे, ईं वाते धरती पे रेबावाळा मनकाँ ने कतरो दुक वेई, कतरो दुक वेई।”</verse>
			</chapter>
			<chapter number="9">
				<verse number="1">पाँचवे हरग-दुत रणभेरी बजई, तो में आकासऊँ धरती पे एक तारो पड़तो तको देक्यो। वींने पाताळ खोलबा का वाते कुस्याँ दिदी गी ही।</verse>
				<verse number="2">अन वणी पाताळ ने खोल्यो, वींके मयनेऊँ भटा का जस्यान धूवो आयो, अन वीं धूवाऊँ सुरज अन आकास काळो पड़ग्यो।</verse>
				<verse number="3">तद्याँ वीं धूवा मेंऊँ टिड़्या निकळन धरती पे आगी। वाँने विच्छु का जस्यान तागत दिदी गी ही।</verse>
				<verse number="4">पण वाँने क्यो ग्यो हो धरती का लीला चारा अन लीला रूँकड़ा को नास मती करज्यो। पण वणा मनकाँ को नास करज्यो, ज्याँका माता पे परमेसर की मोर कोयने हे।</verse>
				<verse number="5">वाँने मनकाँ ने मारबा को तो हक ने दिदो ग्या हो, पण मनकाँ ने पाँच मिना तईं दुक देबा को हक दिदो हो। यो दुक अस्यान को हो, जस्यान विच्छु के बटको भरबा पे वेवे हे।</verse>
				<verse number="6">वणा पाँच मिना में मनकाँ मोत ने होदी पण वाँने मोत ने आई। वीं मोत का वाते घणा तड़प्याँ, पण मोत वाँके आगेऊँ भागगी।</verse>
				<verse number="7">वीं टिड़्या लड़ई करबावाळा घोड़ा का जस्यान दिकरी ही, वाँके माता पे होना का मुकट हा। वाँका मुण्डा मनकाँ का जस्यान का हा।</verse>
				<verse number="8">वाँका बाल लुगायाँ का जस्यान हा, अन वाँका दात नार का जस्यान हा।</verse>
				<verse number="9">वाँकी छाती अस्यान लागरी जस्यान कई लोड़ा की जिलम वे। अन वाँका फाकड़ा मेंऊँ अस्यान अवाज आरी जस्यान लड़ई में जाती दाण रत घोड़ा के पगा की अवाज आवे हे।</verse>
				<verse number="10">वाँकी पुछ अस्यान लागरिया ही, जस्यान विच्छु का डंक वे। वाँने पाँच मिना तईं मनकाँ ने दुक देबा का वाते तागत दिदी गी ही।</verse>
				<verse number="11">पाताळ को दूत वणा को राजा हो, वींको नाम इबरानी बोली में अबद्दोन अन युनानी बोली में अपुलयोन हो। अणा दुई नामा को अरत नास करबावाळो वेवे हे।</verse>
				<verse number="12">पेलो मोटी विपती तो आगी ही, पण आलतरे दो मोटी विपत्याँ आणी बाकी ही।</verse>
				<verse number="13">जद्याँ छटे हरग-दुत आपणी रणभेरी बजई, तो में परमेसर का हामे होना की वेदी के च्यारई खुणाऊँ अवाज आती तकी हूणी।</verse>
				<verse number="14">वाँ अवाज वीं रणभेरी बजाबावाळा छटा हरग-दुत ने बोलरी ही, “वणा फरात मोटी नंदी का नके बन्दीया तका च्यारई दुताँ ने खोल दो।”</verse>
				<verse number="15">तो वणा च्यारई दुताँ ने खोल दिदा ग्या, ईं वीं हरग-दुत हा, जिंने वीं टेम, वीं दन, वीं मिना अन वीं वर वाते त्यार कर मेल्या, जणीऊँ वीं एक तीहाई मनकाँ ने मार नाके।</verse>
				<verse number="16">में वाँकी गणती हूणी। वीं घुड़सवार सपई वीस करोड़ हा।</verse>
				<verse number="17">मने वीं दरसावा में वीं घोड़ा अन वणापे जो सवार हा, वीं दिकई दिदा, वाँका जिलम वादी की जस्यान लाल, तेजाब की जस्यान पिळी अन गेरा निळा रंग की ही। अन वाँका घोड़ा का माता नार का माता का जस्यान हा। अन वाँका मुण्डाऊँ वादी, धूवो अन तेजाब निकळरियो हो।</verse>
				<verse number="18">वाँके मुण्डाऊँ ज्या वादी, धूवो अन तेजाब निकळरियो हो, वणाऊँ एक तीहाई मनक मारिया ग्या।</verse>
				<verse number="19">वणा घोड़ा की तागत मुण्डा अन पुछ में ही काँके वाँकी पुछ हाँप का जस्यान ही, अन वाँकी पुछ के, मातो भी हो, जणीऊँ मनकाँ ने दुक दिदो जारियो हो।</verse>
				<verse number="20">पछे वीं मनक जो वाँकी मारऊँ बचग्या हा, वणा आपणाँ मन ने ने बदल्यो, पण वीं तो हुगली आत्मा, होना, चाँदी, पीतळ, भाटा अन कांस्या की मूरताँ के, जीं ने बोल सके हे, ने देक सके हे, अन ने चाल सके अन ने हुणन सके, वाँके धोक लागणो ने छोड़्यो।</verse>
				<verse number="21">अन वणा आपणाँ मन ने हत्या, जादु-टोना, कुकरम, चोरी जो वीं करता हा, वणीऊँ भी ने बदल्यो।</verse>
			</chapter>
			<chapter number="10">
				<verse number="1">ईंका केड़े में हरगऊँ एक जोरावर हरग-दुत ने रेटे उतरतो देक्यो। वींके च्यारूँमेर वादळा हा, वींके मातो का नके मेघ धनुस हो। वींको मुण्डा सुरज की जस्यान चमकरियो हो अन वींका पग वादी का थाम्बा का जस्यान हा।</verse>
				<verse number="2">वणी हात में एक खली तकी फोरीक किताब ले राकी ही। वणी आपणाँ जीमणा पगने समन्द पे अन डावा पगने धरती पे राक मेल्यो हो।</verse>
				<verse number="3">अन नार की जस्यान दाड़ मारी, जद्याँ वणी दाड़ मारी, तो गाजबा की हात दाण अवाज हुणई दिदा।</verse>
				<verse number="4">वाँ गाजबा की हातई अवाज हुणई देणी बन्द वेगी, तो मूँ लिकबा का वाते त्यार व्यो, अतारक में हरगऊँ अवाज अई, “जीं बाताँ हात दाण गाजबा का हाते हूणी हे वाँने छाने राक, वाँने लिक मती।”</verse>
				<verse number="5">पछे जीं हरग-दुत ने में समन्द अन धरती पे ऊबो तको देक्यो हो, वणी आपणाँ जीमणा हात ने हरग आड़ी लाम्बो किदो।</verse>
				<verse number="6">वणी हरग-दुत वीं परमेसर की जो हरग, धरती अन समन्द में अन वणाके मयने जो चिजाँ हे वणा हाराई ने बणई हे वाँकी होगन खान क्यो, अबे ओरी मोड़ो ने वेई।</verse>
				<verse number="7">पण जद्याँ हातवे हरग-दुत को रणभेरी बजाबा को टेम आई, तो परमेसर की वाँ बात जीं छाने हे पुरी वेई, जिंने वीं आपणाँ दासा अन परमेसर का आड़ीऊँ बोलबावाळा बतई ही।</verse>
				<verse number="8">ज्या अवाज में हूणी ही, वाँ मने पाच्छी हुणई दिदी, “जा अन जो हरग-दुत समन्द अन धरती पे ऊबो हे, वींके हात मेंऊँ वाँ खली तकी किताब लिले।”</verse>
				<verse number="9">तो मूँ हरग-दुत का नके ग्यो अन वणीऊँ क्यो, “मने वाँ फोरीक किताब दिदे।” वणी माराऊँ क्यो, “ले अन ईंने खई जा। अणीऊँ थाँरो मुण्डो हेंतऊँ भी घणो मिटो वेई, पण थाँरा पेट में जळन वे जाई।”</verse>
				<verse number="10">में वीं हरग-दुत का हातऊँ वाँ फोरी किताब ले लिदी अन वींने खईग्यो। वणीऊँ मारो मुण्डो तो हेंतऊँ वीं घणो मिटो वेग्यो, पण पेट में जळन वेगी।</verse>
				<verse number="11">तो पछे वणी माराऊँ क्यो के, थने परमेसर को संदेस हाराई मनकाँने, देसाने, हाराई राजा ने, हारी बोली बोलबावाळा मनकाँ ने हूणाणो पेड़ी।</verse>
			</chapter>
			<chapter number="11">
				<verse number="1">ईंका केड़े मने नाप लेबा का वाते एक पितो दिदो ग्यो। अन माराऊँ क्यो ग्यो, “ऊबो वेन परमेसर का मन्दर अन वेदी ने नापले। अन जीं मनक मन्दर में जे-जेकार कररिया हे, वाँने गणले।</verse>
				<verse number="2">पण मन्दर की चार दिवारी की जगाँ ने मती नापज्ये, काँके ओ जो यहूदी ने हे वणा मनकाँ ने दिदो ग्यो। वीं बयालिस मिना तईं आपणाँ पगाँऊँ वीं पुवितर नगर ने गूंदी।</verse>
				<verse number="3">मूँ दो गवा ने अदिकार देऊँ वीं एक हजार दोस्ये हाठ दनाँ तईं परमेसर की बाताँ बताई। वीं बोरियाँ का गाबा पेरिया तका वेई, जीं दक ने बतावे हे।”</verse>
				<verse number="4">ईं दुई गवा वणा दो जेतुन का रूँकड़ा ने अन दो दिवा ने बतावे हे जी धरती पे राज करबावाळा परबू परमेसर का हामे हरग में ऊबा रेवे हे।</verse>
				<verse number="5">अन जद्याँ कुई वाँको नास करणो छावे तो वाँका मुण्डाऊँ वादी बारणे आन वाँका दसमणा ने बाल देई। ईं वाते जद्याँ कुई वाँको नकसाण करबा का वाते होची, तो पको हे, वाँने अस्यान की मोत जेलणी पड़ी।</verse>
				<verse number="6">वाँके नके आकास पे अदिकार वेई, वीं वइरा ने रोक देई जणीऊँ वीं जद्याँ तईं परच्यार करे बरका ने वरी, अन वाँने पाणी पे अदिकार वेई जणीऊँ पाणी ने लुई बणा सके, वीं जद्याँ छावे, ईं धरती पे विपती ला सके हे।</verse>
				<verse number="7">जद्याँ वीं परच्यार हुणा देई, तो वो डरावणो जनावर, ज्यो पाताळ मेंऊँ निकळी, वो वाँकाऊँ लड़न वाँने मार देई।</verse>
				<verse number="8">वाँका लास वीं मोटा नगर का चोक में पड़ी रेई, जटे वाँका परबू ने हूळी पे लटकाया हा। ईं नगर ने ईंकी बुरई का वजेऊँ सदोम अन मिसर का नामऊँ भी बोल्यो जावे हे।</verse>
				<verse number="9">धरती का हाराई देसा का थोड़ाक मनक, हारी बोली बोलबावाळा मेंऊँ थोड़ाक मनक, हारी गोताँ का थोड़ाक मनक वाँका लास ने हाड़ा तीन दनाँ तईं देकी, वीं वाँकी लास ने कबर में ने मेलबा देई।</verse>
				<verse number="10">धरती पे रेबावाळा मनक वाँका मोत पे राजी वेन तेवार मनाई अन एक-दूँजा ने भेंट खन्दाई। काँके अणा दुयाँ परमेसर की आड़ीऊँ बोलबावाळा धरती का मनकाँ ने घणो दक दिदो हो।</verse>
				<verse number="11">पण हाड़ा तीन दनाँ का केड़े परमेसर की जीवन की आत्मा वाँके मयने परीगी, जणीऊँ वीं आपणाँ पगा पे उठा वेग्या, जणा भी वाँने देक्या, वीं घणा दरपग्या।</verse>
				<verse number="12">वणा दुया ने हरगऊँ अवाज हुणई दिदी के, “ऊपरे अई जावो।” अस्यान हुणन वीं दुई आपणाँ दसमणा ने देकता देकता हरग में पराग्या।</verse>
				<verse number="13">वीं टेम में एक जोरऊँ भूकम आयो, जणीऊँ नगर को दसमो भाग धड़ी ग्यो, अन वीं भूकमऊँ हात हजार मनक मरग्या, बाकी मनक दरपग्या अन वणा हरग का परमेसर की मेमा किदी।</verse>
				<verse number="14">अस्यान दूजी विपती बीतगी, पण तीजी विपती वेगी आबावाळी हे।</verse>
				<verse number="15">हातवे दूत जद्याँ रणभेरी बजई, तो हरगऊँ जोरकी अवाज अई के, “अबे ईं धरती पे परबू अन वींका मसी को राज हे। अन वीं जुग-जुग तईं राज करी।”</verse>
				<verse number="16">पछे वीं चोबीस पुरवज ज्यो आपणाँ गादी पे बेट्या तका हा, ऊबा वेन परमेसर के गोडा टेकन धोक लाग्या।</verse>
				<verse number="17">अन बोलबा लागा, “हाराऊँ जोरावर परबू परमेसर हे, जीं अबाणू हे अन जीं हमेस्या हा, माँ थाँको धन्नेवाद करा हा। थाँ सरूऊँ थाँकी तागतऊँ राज करणो सरू किदो हो।</verse>
				<verse number="18">जो यहूदी ने हे वीं मनक गुस्सा में हा पण अबे थाँके गुस्सा को टेम अन न्याव करबा को टेम आग्यो जणीऊँ मरिया तका को न्याव किदो जाई। अन थाँरा भगताँ को, थाँकी आड़ीऊँ बोलबावाळा को अन वाँको जी थाँका नाम की दरपणी राक्या करे हे, बदलो लिदो जाई। अन धरती ने खराब करबावाळा को नास किदो जाई।”</verse>
				<verse number="19">ईंका केड़े परमेसर का मन्दर ने जो हरग में हे वींने खोल्यो ग्यो, अन वीं मन्दर में मने वादा वाळी पेटी दिकई दिदी। वींके केड़े विजळी चकमवा लागी अन कड़कवा की अवाज हुणई देबा लागी अन वादळा गाजबा लाग्यो, अन भूकम आबा लागो अन गड़ा पड़बा लागा।</verse>
			</chapter>
			<chapter number="12">
				<verse number="1">ईंका केड़े आकास में एक मोटो हेन्याण परगट व्यो, एक लुगई दिकई दिदी वणी सुरज ने धारण कर मेल्यो हो अन चाँद वींके पगा का रेटे हो। वींके माता पे मुकट हो, जिंका ऊपरे बारा तारा जड़या तका हा।</verse>
				<verse number="2">वाँ गरबवती ही अन बाळक जनमबा वाळी ही, ईं वाते वाँ पिड़ाऊँ गा करीरी ही।</verse>
				<verse number="3">हरगऊँ एक ओरी हेन्याण परगट व्यो, मारा हामे एक लाल रंग को मोटा अजगर ऊबो हो, वींके दस हिंगड़ा अन हात माता हा अन वणापे हात मुकट हा।</verse>
				<verse number="4">वणी आपणाँ पूँछऊँ फळेटो मारन आकासऊँ एक तीहाई तारा ने रेटे फेंक दिदा। अन वो वीं लुगई का हामे ज्या बाळक जनमबा वाळी ही ऊबो वेग्यो जणीऊँ जद्याँ वाँ बाळक जनमे तो वो वींने निगळजा।</verse>
				<verse number="5">वणी एक छोरा ने जनम दिदो, वो हारी जात्या पे लोड़ा की लाटी का जोर पे राज करबावाळो हो। पण फटाफट वो छोरो परमेसर का गादी का हामे उठान लेजायो ग्यो।</verse>
				<verse number="6">अन वाँ लुगई हुन्ना काकड़ में भागगी। वाँ अस्यान की जगाँ हे जिंने परमेसर वींका वाते त्यार किदी, जटे वाँ एक हजार दोस्ये हाठ दनाँ तईं जीवती राकी जा सके।</verse>
				<verse number="7">ईंका केड़े हरग में लड़ई सरू वेगी जिंमें मुक्यो मीकाईल हरग-दुत अन वींका हरग-दुत अन वीं मोटा अजगर का बचमें लड़ई वीं अन वो अजगर भी वींके दुताँ का हाते लड़्यो।</verse>
				<verse number="8">पण वो अजगर वाँने हरा ने सक्यो, ईं वाते हरग में वींकी जगाँ ने री।</verse>
				<verse number="9">अन वीं मोटा अजगर ने धरती पे फेंक दिदा ग्यो ओ वोईस पुराणो मोटा हाँप हे जिंने दानव कन सेतान क्यो ग्यो हे। ओ हारी दनियाँ ने भरमातो रेवे। ईं अजगर ने ईंका दुताँ का हाते धरती पे फेंक दिदा ग्या।</verse>
				<verse number="10">ईंका केड़े मने हरगऊँ जोरकी अवाज हुणई दिदी, “अबे आपणाँ परमेसर को छुटकारो, तागत, अन वींको राज अन मसी को अदिकार परगट व्यो हे, काँके आपणाँ भायाँ पे दोस लगाबावाळो, ज्यो रात-दन आपणाँ परमेसर का हामे वणापे दोस लगाया करतो हो, वींने हरगऊँ रेटे फेंक दिदा ग्यो।</verse>
				<verse number="11">वणाऊँ उन्याँ का लुईऊँ अन खुद की गवई की वजेऊँ वींने हरा दिदो हो, वणी आपणो जीव को भी होच ने किदो अन मोत ने जेल लिदी।</verse>
				<verse number="12">ईं वाते, हो हरग में रेबावाळा, खुसी मनावो। पण धिकार हे धरती अन समन्द पे, थाँके हाते कतरो बुरो वेई, काँके थाँका पे सेतान उतरग्यो हे, वो गुस्साऊँ रातो-पिळो वेरियो हे। वो जाणे हे के, वींके नके थोड़ोक टेम बच्यो हे।”</verse>
				<verse number="13">जद्याँ वणी मोटे अजगर देक्यो के, मने धरती पे फेंक दिदो ग्यो हे तो वो वीं लुगई का पाच्छे पड़ग्यो, जणी छोरा ने जनम दिदो हो।</verse>
				<verse number="14">पण वीं लुगई ने गरुड़ की जस्यान का दो फाकड़ा दिदा ग्या हा जणीऊँ वीं मोटा अजगर का हामेऊँ उड़न वाँ काकड़ में परी जावे, जणीऊँ हाड़ा तीन मिना तईं वींको पालण-पोसण किदो जाबावाळो हो।</verse>
				<verse number="15">तो वो मोटो अजगर वीं लुगई का पाच्छे आपणाँ मुण्डाऊँ नंदी का जस्यान पाणी निकाळ्यो, जणीऊँ वाँ वींके मयने वेन डुबन मर जावे।</verse>
				<verse number="16">पण धरती वणी लुगई की मदत किदी, धरती आपणाँ मुण्डो फाड़न वीं नंदी का पाणी ने जिंने वणी अजगर आपणाँ मुण्डाऊँ निकाळ्यो हो, वींने पिगी।</verse>
				<verse number="17">तो वो अजगर वीं लुगई पे गुस्सा में आग्यो, अन वो वीं लुगई का वाँ मनकाँ पे जी परमेसर की आग्या मान्याँ करता हा अन ईसू मसी की गवई देता हा वाँकाऊँ लड़बा का वाते निकळग्यो।</verse>
				<verse number="18">अन वो मोटो अजगर समन्द का कनारे जान ऊबो वेग्यो।</verse>
			</chapter>
			<chapter number="13">
				<verse number="1">तद्याँ में समन्द का मयनेऊँ एक डरावणो जनावर ने बारणे निकळतो देक्यो। वींके दस तो हिंगड़ा अन हात माता हा। अन वणी आपणाँ हिंगड़ा पे दस राजमुकट पेर मल्या हा। वींका हरेक माता पे परमेसर को अपमान करबावाळा नाम लिक्या तका हा।</verse>
				<verse number="2">में जणी जनावर ने देक्यो हो, वो दिकबा में तो चीता का जस्यान को हो, पण वींका पग रिसड़ा का जस्यान का अन मुण्डो नार की जस्यान को हो। अन वणी अजगर वींने आपणी गादी अन आपणाँ हाराई अदिकार, तागत हूँप दिदी।</verse>
				<verse number="3">वीं डरावणा जनावर का एक माता में अस्यान को घाव हो, जणीऊँ अस्यान लगारियो हो के, वो अबे मर जाई। पण वींको ओ घाव भरग्यो, जणीऊँ हारी धरती का मनक अचम्बा करन वींके हाते वेग्या।</verse>
				<verse number="4">वीं मनक वीं अजगर के धोक लागबा लागग्या, काँके वणी आपणाँ हाराई अदिकार वीं डरावणा जनावर ने दे दिदा हा। पछे मनक वीं जनावर के भी धोक लागन केबा लागा, “ईं जनावर का जस्यान को कूण हे? ज्यो अणीऊँ लड़ सके?”</verse>
				<verse number="5">वीं डरावणा जनावर ने बयालिस मिना तईं परमेसर की बेजती करबा को हक दिदा ग्यो हो, जणीऊँ वो मेपणो का हाते परमेसर की बेजती करे।</verse>
				<verse number="6">ईं वाते वणी परमेसर की बेजती करणो चालूँ कर दिदो। अन वो परमेसर का नाम, वाँकी रेबावाळी जगाँ की अन हरग में रेबावाळा मनकाँ की बेजती करबा लाग्यो।</verse>
				<verse number="7">वींने ओ हक दिदा ग्यो हो के, वो हाराई कुल का मनकाँ का, हारी बोली बोलबावाळा का, हारी जात्या का मनकाँ का हाते, लड़न वाँने हरा नाके।</verse>
				<verse number="8">जणा मनकाँ को नाम वीं उन्याँ की जीवन की किताब में ने लिक्यो तको हो, वीं हाराई वी डरावणा जनावर के धोक लागी। अन यो उन्यो ज्यो ईं दनियाँ की सरुआतऊँ बली वेबा का वाते ते किदो ग्यो हो।</verse>
				<verse number="9">ज्यो भी हुणे हे वो हुणले,</verse>
				<verse number="10">जिंने जेळ में जाणो हे वो जाई, ज्यो भी तरवारऊँ मारी, पाको हे वो भी तरवारऊँस मारियो जाई। खरा अन धिज्यो राकबावाळा मनकाँ को ओईस विस्वास हे।</verse>
				<verse number="11">ईंका केड़े में धरतीऊँ एक ओरी डरावणा जनावर ने बारणे निकळते तको देक्यो। वींके गारा का जस्यान का दो हिंगड़ा हा, पण वींकी बोली अजगर की जस्यान की ही।</verse>
				<verse number="12">वो भी पेला डरावणा जनावर का हाराई अदिकार काम में लेतो हो, अन धरती पे रेबावाळा हाराई मनकाँऊँ वीं जनावर ने ज्याँका घाव हव वेग्यो धोक देवाड़तो हो।</verse>
				<verse number="13">ओ मोटा-मोटा हेन्याण चमत्कार बतातो हो, अटा तईं के, वो मनकाँ का हामे आकासऊँ धरती पे वादी वरा देतो हो।</verse>
				<verse number="14">वो पेला डरवाणा जनावर का हकऊँ चमत्कार बतातो हो। वो धरती पे रेबावाळा मनकाँ ने भरमातो अन बोलतो हो के, जीं पेला जनावर के तरवारऊँ घाव व्यो हो, वो ठीक वेग्यो हे, थाँ वींकी मूरत बणावो, ताँके वींने मान मले।</verse>
				<verse number="15">वींने दूजाँ वीं पेला डरावणा जनावर की मूरती में जीव नाकबा को हक दिदो ग्यो हो, जणीऊँ वाँ मूरती बोलबा लागे। वीं मूरत के जतरा भी मनक धोग ने लागी, वाँने वो मरवा देई।</verse>
				<verse number="16">वणी फोरा अन मोटा, पलई रिप्यावाळा, पलई गरीब, पलई मालिक पलई नोकर हाराई का माता अन जीमणा हात पे एक छाप लगाबा का वाते मजबूर कर दिदा।</verse>
				<verse number="17">अन जिंका भी माता पे वाँ छाप की संख्या ने वे, वीं डरावणा जनावर को नाम ने वे, तो वो मनक कई भी लेण-देण ने कर सके।</verse>
				<verse number="18">जिंमें अकल हे, वो वीं जनावर की संख्या ने जोड़ी ले, काँके ईं कणी मनक का नम्बर हे, ईं नम्बर 666 हे।</verse>
			</chapter>
			<chapter number="14">
				<verse number="1">तद्याँ में देक्यो के, मारी हामे सिय्योन मंगरी पे उन्यो ऊबो हे। वींके हाते एक लाक चमालिस हजार मनक हा, ज्याँका माता पे वींको अन वींका बापू को नाम लिक्यो तको हो।</verse>
				<verse number="2">अन मने हरगऊँ जोरकी अवाज हुणई दिदी वा अवाज वेता तका जरणा का अन बिजळी का कड़कवा का जस्यान की ही, ज्या अवाज में हूणी, वाँ मानो, घणा जणा रणभेरी बजाबावाळा का जस्यान की ही।</verse>
				<verse number="3">वीं मनक गादी का हामें, च्यारई जीवता जीव का हामे अन पुरवजाँ का हामे नुवो गीत गारिया हा। अन ईं गीत ने वीं एक लाक चमालिस हजार मनक ज्याँने धरती का बन्धनऊँ छुड़ाया ग्या हा, वाँने छोड़न कुई भी ओ गीत ने हिक सकतो हो।</verse>
				<verse number="4">ईं मनक कूँवारा हा अन ने ईं कणी लुगई का हाते कदी हूँता। अन जटे वीं उन्यो जातो ईं वींके हाते वे जाता। ईं परमेसर का वीं पेला फळ हे, ज्याँने मोल देन छुड़ाया ग्या हा।</verse>
				<verse number="5">वीं कदी जूट ने बोल्या, वीं बना दोस का मनक हे।</verse>
				<verse number="6">ईंका केड़े में एक ओरी हरग-दुत ने आकास का बचमें में ऊसे उड़तो तको देक्यो। वींके नके धरती पे रेबावाळा हाराई मनकाँ का वाते, हाराई देस, हारी बोली बोलबावाळा का वाते अन हाराई कुल का मनकाँ ने हुणाबा का वाते अनंत हव हमच्यार हो।</verse>
				<verse number="7">वो जोरऊँ बोलरियो हो, “परमेसरऊँ दरपो अन वाँकी जे-जेकार करो। काँके वाँके न्याव करबा को टेम आग्यो हे। वींका भजन गावो करो। ज्यो धरती, आकास, समन्द अन पाणी का हीरा ने बणई हे।”</verse>
				<verse number="8">वींके केड़े दूज्यो हरग-दुत आन केबा लागो, “वीं मोटा नगर बाबुल को नास वे चुक्यो हे, वींको नास वे चुक्यो हे। अणी नगर हाराई मनकाँ ने आपणाँ कुकरम की वासना को दाकरस पायो हो।”</verse>
				<verse number="9">वाँ दुई हरग दुताँ के आया केड़े एक ओरी हरग-दुत आयो अन केबा लागो, “जद्याँ कुई ईं डरावणो जनावर अन ईंकी मूरत के धोक लागे अन ईंकी छाप ने आपणाँ माता पे अन हात पे लगावे,</verse>
				<verse number="10">तद्याँ वो परमेसर का गुस्सा का दाकरस ज्या वाँका गुस्साऊँ प्याला में गाळ्यो ग्यो हे, वींने पीई अन पुवितर हरग-दुताँ हामे अन उन्याँ का हामे वादी अन तेजाब का दुक में पड़ी।</verse>
				<verse number="11">वीं जुग-जुग का वाते वींमें दुक भोगी, अन जी भी वीं डरावणा जनावर अन वींकी मूरत अन वींका नाम की छाप लगावे हे वाँने रात-दन आराम ने मली।”</verse>
				<verse number="12">ज्यो भी परमेसर की आग्या माने अन ईसू पे विस्वास करे हे अणा पुवितर मनकाँ को धिज्यो ईंमेंइस हे।</verse>
				<verse number="13">जद्याँ मूँ अस्यान बोलरियो हो के, तद्याँ हरगऊँ आ अवाज हुणई, “ईंने लिकी ले। ज्यो परबू की सेवा करता करता मरे हे वीं धन्न हे।” आत्मा केवे हे के, “वीं आपणाँ कामाँऊँ आराम पाई, अन वाँका काम वाँके हाते हे।”</verse>
				<verse number="14">अन मूँ कई देकूँ हूँ के, मारा हामे एक धोळो वादळा हे अन वींके ऊपरे एक मनक बेट्यो तको वो मनक का पूत का जस्यान को दिकरियो हो, वणी आपणाँ माता में होना को मुकट पेर मेल्यो हो अन वींका हात में एक धार दिदी तकी दाँतळी ही।</verse>
				<verse number="15">अतराक में एक हरग-दुत मन्दर मयनेऊँ बारणे आयो अन वो वणीऊँ ज्यो वादळा पे बेट्यो तको हो, जोरऊँ हेलो पाड़न क्यो, “दाँतळी चलान हाक भेळी कर, काँके धरती की हाक पाकगी हे अन हाक भेळी करबा की टेम आगी हे।”</verse>
				<verse number="16">तद्याँ ज्यो वादळा पे बेट्यो तको हो, वणी आपणी दाँतळी चलाई अन धरती की हाक काट लिदी गी।</verse>
				<verse number="17">वींके केड़े हरग में ज्यो मन्दर हो, वीं मेंऊँ एक ओरी हरग-दुत बारणे आयो, वींके नके भी एक धार दिदी तकी दाँतळी ही।</verse>
				<verse number="18">अतराक में एक ओरी हरग-दुत जिंने वादी पे अदिकार हो, वो वेदीऊँ निकळयो अन जिंका नके धार दिदी तकी दाँतळी ही वणीऊँ जोरऊँ हेलो पाड़न क्यो, “थाँरी धार लागी तकी दाँतळीऊँ धरती की वेलड़ीऊँ अंगूर का गुच्छा काटी ले, काँके ईंका अंगूर पाक ग्या हे।”</verse>
				<verse number="19">अन वणी हरग-दुत धरती पे आपणी दाँतळी चलाई, अन धरती का अंगूरा का गुच्छा ने काटन परमेसर का गुस्सा का मोटा कुण्ड में नाक दिदा।</verse>
				<verse number="20">जणीऊँ वणा अंगूर ने नगर का बारणे गुद्‍या ग्या, अन रस कुण्ड मयनेऊँ अतरो लुई निकळग्यो के, वो घोड़ा की लगाम तईं पोंछग्यो अन हो कोस तईं फेलग्यो।</verse>
			</chapter>
			<chapter number="15">
				<verse number="1">ईंका केड़े में हरग में एक ओरी अचम्बो करबावाळो हेन्याण देक्यो, में कई देक्यो के, हात हरग-दुत हे अन वाँके नके हात विपत्याँ ही। काँके ईं आकरी नास के पूरो व्या केड़े परमेसर को गुस्सा को भी अंत वे जाई।</verse>
				<verse number="2">ईंका केड़े मने काँस का जस्यान को समन्द नजर आयो वो अस्यान दिक्यो हो जस्यान के, वींके मयने वादी वेवे। जी मनक वीं डरावणा जनावर की मूरती अन वींका नाम का नम्बरऊँ जितग्या हा, वाँने वीं काँस का समन्द पे ऊबा तका देक्यो। वणा का नके परमेसर का आड़ीऊँ दिदी तकी रणभेरी ही।</verse>
				<verse number="3">वीं मनक परमेसर का दास मूसा अन उन्याँ का गीत गारिया हा, “वीं घणा मोटा काम हे ज्याँने थाँ करता रेवो हो। थाँका काम अचम्बा का हे अन थाँकी तागत जुग-जुग तईं हे। परबू परमेसर, थाँको गेलो हाँचो अन धरम का कामाँऊँ भरियो हे, थाँ हारी जात्या का राजा हो।</verse>
				<verse number="4">परबू थाँकाऊँ हाराई मनक दरपता रेई। हाराई मनक थाँको नाम लेन जे-जेकार करी, काँके खाली थाँईस पुवितर हो। हारी जात्या का मनक थाँका नके भेळा व्या हे वीं थाँकी भगती करी। काँके थाँका किदा तका काम हामे हे, अन हो परबू थाँ ज्या भी करो हो, वो न्याव हे।”</verse>
				<verse number="5">ईंका केड़े में कई देक्यो के हरग में ज्यो मन्दर हे वींने अन वादावाळो तम्बू ने खोल्यो ग्यो।</verse>
				<verse number="6">अन वींके मयनेऊँ वीं हातई हरग-दुत ज्याँका नके आकरी हात विपत्याँ ही, बारणे आया। वणा साप ऊजळा अन चमकता तका गाबा पेर मल्या हा अन आपणी छाती पे होना का पट्टा बांद मेल्या हा।</verse>
				<verse number="7">तद्याँ वीं च्यारई जीवता जीव मेंऊँ एक जणे वणा हातई हरग दुताँ ने अमर परमेसर का गुस्साऊँ भरिया तका होना का प्याला दिदा।</verse>
				<verse number="8">वो मन्दर परमेसर की मेमा अन वींकी तागत का धूवाऊँ भरियो हो, जणीऊँ वीं हातई हरग-दुत के हाताई विपत्याँ को काम पूरो ने वे जावे, तद्याँ तईं वीं मन्दर में कुई भी ने जा सके।</verse>
			</chapter>
			<chapter number="16">
				<verse number="1">तद्याँ में हुण्यो के, वाँ हातई हरग-दुताँ ने मन्दर मेंऊँ कुई जोरऊँ अवाज देन केरियो हो, “जावो अन अणा परमेसर का कोप का हातई प्याला ने धरती पे उँन्धई दो।”</verse>
				<verse number="2">तद्याँ पेलो हरग-दुत ग्यो अन धरती पे आपणो प्यालो उँन्धई दिदो, जणीऊँ वणा मनकाँ के जणापे वीं डरावणा जनावर की छाप ही, वाँके दक व्यो अन वाँके गुमड़ा वेग्या।</verse>
				<verse number="3">वींके केड़े दूज्यो हरग-दुत आपणाँ प्याला ने समन्द का ऊपरे उँन्धई दिदो, जणीऊँ वींको पाणी मरिया तका मनकाँ का लुई का जस्यान वेग्यो अन समन्द में जतरा भी जीव-जनावर हा, वीं हाराई मरग्या।</verse>
				<verse number="4">तीजे हरग-दुत आपणी प्यालो नंद्‍याँ अन जरणा पे उँन्धई दिदो, जणीऊँ वाँको पाणी भी लुई वेग्यो।</verse>
				<verse number="5">तद्याँ में पाणी पे अदिकार राकबावाळा हरग-दुत ने ओ बोलते तके हुण्यो, “हो पुवितर, थाँ हा अन थाँ ज्यो हमेस्यान हो थाँईस न्याव किदो हे।</verse>
				<verse number="6">काँके अणा मनकाँ थाँका दासा अन थाँका आड़ीऊँ बोलबावाळा को लुई वेवाड़्यो हे। थाँ न्याव करबावाळा हो, थाँ वाँके पिवा का पाणी ने लुई बणा दिदो, काँके वीं अणीईस जोगा हे।”</verse>
				<verse number="7">वींके केड़े में वेदीऊँ अवाज हूणी, “हो, सर्वसक्‍तिमान परबू परमेसर, थाँ हाँचो अन खरो न्याव किदो हे।”</verse>
				<verse number="8">चोते हरग-दुत आपणी प्यालो सुरज पे उँन्धई दिदो, काँके सुरज ने मनकाँ ने वादी में बाळबा वाळी तागत दिदी गी ही।</verse>
				<verse number="9">जणीऊँ वणा मनकाँ को तपतऊँ बुरो हाल वेग्यो अन वीं परमेसर की नन्दयाँ करबा लाग्या, पण वणा आपणो मन ने बदल्यो अन ने परमेसर की मेमा किदी।</verse>
				<verse number="10">वींके केड़े पाँचवे हरग-दुत आपणो प्यालो वीं डरावणा जनावर की गादी पे उँन्धई दिदो, जणीऊँ वींका राज-दरबार में अदंकार वेग्यो। घणा दुक की वजेऊँ वटा का मनक आपणी जीब के बटका भर लिदा।</verse>
				<verse number="11">वीं मनक दुक अन गुमड़ा की वजेऊँ हरग का परमेसर को अपमान करबा लागा, पण वणा आपणाँ कामाँऊँ मन ने बदल्यो।</verse>
				<verse number="12">छटे हरग-दुत आपणो प्यालो मोटी नंदी फरात पे उँन्धई दिदो, जणीऊँ वींको पाणी हुकग्यो। वींको पाणी हुकबाऊँ उगमणी देसा का राजा का वाते गेलो बणग्यो।</verse>
				<verse number="13">ईंका केड़े मूँ कई देकूँ हूँ के, वीं मोटा अजगर का मुण्डाऊँ अन वीं डरावणा जनावर का मुण्डाऊँ अन वींका परमेसर की आड़ीऊँ जूट बोलबावाळा का मुण्डाऊँ तीन हुगली आत्मा निकळी, वीं डेड़का की जस्यान दिकरी ही।</verse>
				<verse number="14">ईं सेतान की आत्मा ही, वणामें चमत्कार करबा की तागत ही। अन ईं हाराई दनियाँ का राजा ने भेळा करबा का वाते चालन पड़ी, जणीऊँ वीं हाराई राजा ने परमेसर का हामे लड़बा का वाते आकरी दन भेळा करे।</verse>
				<verse number="15">“हूँस्यार रेज्यो! काँके मूँ चोर की जस्यान अणाचेत को आऊँ हूँ। धन्न हे वीं ज्यो जागता रेवे हे, अन आपणाँ गाबा हमाळी राके हे, जणीऊँ वीं उगाड़ा ने रेई अन मनक वाँने नांगा ने देकी।”</verse>
				<verse number="16">वीं हुगळी-आत्मा वाँ हाराई राजा ने भेळा करन वीं जगाँ पे अई, जिंने इबरानी बोली में हरमगिदोन क्यो जावे हे।</verse>
				<verse number="17">ईंका केड़े हातवे हरग-दुत आपणो प्यालो बईरा में उँन्धई दिदो अन मन्दर की गादीऊँ जोरकी अवाज हुणई दिदी, “हारोई खतम वेग्यो।”</verse>
				<verse number="18">तद्याँ विजळी कड़कवा लागी, वादळा गाजबा लागा अन जोरको भूकम आयो अस्यान को जोरको भूकम आयो, जो पेल्याँ धरती पे कदी ने आयो।</verse>
				<verse number="19">अन मोटा नगर का तीन टुका वेग्या अन पापी मनकाँ का हाराई नगर नास वेग्या। परमेसर बाबुल नगर ने दण्ड देबा का वाते आद किदो, जणीऊँ वीं वींने आपणाँ गुस्साऊँ भरिया तका दाकरस का प्यालो पावे।</verse>
				<verse number="20">हाराई टापू खुवई ग्या। एक मंगरो भी नजर ने आरियो हो।</verse>
				<verse number="21">आकासऊँ मण-मण का गड़ा मनकाँ पे पड़रिया हा। अन ईं विपती की टेम की वजेऊँ मनक परमेसर को अपमान किदो, काँके या घणी जोरकी विपती ही।</verse>
			</chapter>
			<chapter number="17">
				<verse number="1">ईंका केड़े वाँ हात हरग-दुताँ मेंऊँ ज्याँका नके हात प्याला हा, एक मारी नके आन क्यो, “अटे आ, मूँ थने वीं मानी तकी वेस्याँ ने दण्ड भोगती तकी बताऊँ, ज्या घणी नंद्‍याँ का कनारे बेटी हे,</verse>
				<verse number="2">जिंका हाते धरती की राजा कुकरम किदा हा धरती पे रेबावाळा वींका कूकरमऊँ मतवाळा वेग्या हा।”</verse>
				<verse number="3">तद्याँ आत्मा मने कांकड़ में लेगी, वटे में एक लुगई ने लाल रंग का डरावणा जनावर पे बेटी तकी देकी, ओ जनावर परमेसर का विरोद में बोलबा सबदाऊँ भरियो हो। वींके हात माता अन दस हिंगड़ा हा।</verse>
				<verse number="4">वणी लुगई लाल रंग का बेगनी गाबा पेर मेल्या हा। वाँ हीरा मोत्याऊँ अन होना, चाँदीऊँ खुद को सिगार कर मेल्यो हो। वींके हात में होना को प्यालो हो, जिंका में बुरी बाताँ अन कुकरम की चिजाँ भरी तकी ही।</verse>
				<verse number="5">वींके माता पे एक भेद वाळो नाम लिक्यो हो, “मोटा नगर बाबुल, धरती की वेस्याँ अन हुगली चिजाँ की बई।”</verse>
				<verse number="6">में वीं लुगई ने पुवितर मनकाँ को लुई अन ईसू मसी की गवई देबावाळा मनकाँ की लुई पिवा की वजेऊँ मतवाळी वेती तकी देकी। अस्यान देकन मूँ अचम्बो में पड़ग्यो।</verse>
				<verse number="7">तद्याँ वीं हरग-दुत माराऊँ क्यो, “थूँ अचम्बो में काँ पड़ग्यो? मूँ थने ईं लुगई अन वीं डरावणा जनावर का बारा में जिंका हात माता अन दस हिंगड़ा हे, वींको भेद बताऊँ।</verse>
				<verse number="8">जीं डरावणा जनावर ने थें देक्यो हे, वो अबे ने, पण पेल्याँ जीवतो हो, पण वो पाताळऊँ निकळबा वाळो हे, अन तद्याँ वींको नास वे जाई। धरती पे रेबावाळा वीं मनक ज्याँका नाम सरुआतऊँ ईं जीवन की किताब में ने लिक्या हे, वीं ईं डरावणा जनावर ने देकन अचम्बो करी, काँके ओ पेला जीवतो हो पण अबे ने, तद्याँ भी वो आबावाळो हे।</verse>
				<verse number="9">“अटे हमजबावाळी अन ग्यान की बात की गी हे, ईं हात माता हात मंगरा ने बतावे हे, जिंपे वाँ लुगई बेटी हे।</verse>
				<verse number="10">ईं हात माता हात राजा ने भी बतावे हे, अणा मेंऊँ पाँच को तो नास वे चुक्यो हे, एक अबाणू भी राज करे हे, अन एक आलतरे आयो ने हे। पण जद्याँ वो आई, तद्याँ थोड़ीक टेम वाते रेई।</verse>
				<verse number="11">अन वो डरावणो जनावर ज्यो पेला जीवतो हो, पण अबे ने हे, वो खुद आटवो राजा हे ओ अणा हातई राजा मेंऊँ एक हे, वींको भी नास वेबावाळो हे।</verse>
				<verse number="12">“जी दस हिंगड़ा थें देक्या हे, वीं भी दस राजा ने दिकावे हे, पण वाँने आलतरे तईं राज-दरबार ने मल्यो। पण वाँने डरावणा जनावर का हाते थोड़ीक टेम का वाते राज करबा को हक दिदो जाई।</verse>
				<verse number="13">वीं दसई राजा एक मन वेई, अन वीं आपणी-आपणी तागत अन अदिकार वीं डरावणा जनावर ने देई।</verse>
				<verse number="14">वीं उन्याँऊँ लड़ी, पण वो उन्यो आपणाँ बलाया तका, चुण्या तका अन आपणाँ गेले चालबावाळा मनकाँ ने हाते लेन वींने हरा देई, काँके वो उन्यो राजावो को भी राजा अन परबू को भी परबू हे।”</verse>
				<verse number="15">वीं हरग-दुत माराऊँ पाछो क्यो, “थें जी नंद्‍याँ देकी हे, ज्याँका कनारे वाँ वेस्याँ बेटी ही, वीं नंद्‍याँ हाराई देसाँ का मनकाँने, जात्या ने, हारी बोली बोलबावाळा मनकाँने अन गोताँ ने बतावे हे।</verse>
				<verse number="16">अन वीं दस हिंगड़ा जिंने थें देक्या हा अन वाँके हाते वीं डरावणा जनावर वीं वेस्याऊँ नपरत करी, वीं वींको हारोई कोसन वींने उगाड़ी कर देई। अन वींको माँस खई जाई अन वींने वादी में बाल देई।</verse>
				<verse number="17">काँके परमेसर जटा तईं आपणी बात ने पुरी करबा का वाते वाँके मन में अस्यान करी अन वाँने एक मन वेन अस्यान करबा का वाते उकसाई, जणीऊँ वीं आपणी तागत अन आपणो अदिकार वीं डरावणा जनावर ने दी दे।</verse>
				<verse number="18">जीं लुगई ने थें देकी ही, या वीं मोटा नगर ने बतावे, ज्यो धरती का राजा पे राज करे हे।”</verse>
			</chapter>
			<chapter number="18">
				<verse number="1">ईंका केड़े में एक ओरी हरग-दुत ने हरगऊँ रेटे उतरतो तको देक्यो, जिंका नके मोटो अदिकार हो, वींके मयने अस्यान को उजितो हो जणीऊँ हारी धरती पे उजितो वेग्यो।</verse>
				<verse number="2">वणी जोरऊँ हेला पाड़न क्यो के, “बाबुल नगर धड़ग्यो, ओ नगर तो धड़ग्यो। ओ नगर हरेक तरियाँ की हुगली आत्मा को, हाराई असुद पकसी को अन काकड़ का बुरा जनावर को अडो बणग्यो हे।</verse>
				<verse number="3">काँके वणा हाराई मनकाँ ने कुकरम का वासना को दाकरस पायो हे। अन ईं धरती का हाराई राजा वींके हाते कुकरम किदो। अन ईं धरती की हाराई लेण-देण करबावाळा, वींका भोगन विलास की वजेऊँ रिप्यावाळा वेग्या हा।”</verse>
				<verse number="4">मने हरगऊँ एक ओरी अवाज अस्यान आती तकी हुणई दिदी के, मारा मनकाँ वटेऊँ बारणे आ जावो थाँ वाँके पापाँ का हाते भोगी मती बणो, काँके कटे अस्यान ने वेजा वे के, वींपे पड़बावाळी तकलिप थाँका पे भी पड़ जावे।</verse>
				<verse number="5">काँके वींको पाप को घड़ो भरग्यो हे अन परमेसर ने वींका किदा तका पाप आद हे।</verse>
				<verse number="6">थाँ वींके हाते वस्यानीस वेवार करो, जस्यान वणा थाँका हाते वेवार किदो हे। ज्यो वणा थाँका हाते किदो हे, वणीऊँ दो गुणा वाँका हाते करो, ज्यो प्यालो भरन थाँने दिदो ग्यो हो, वींने दो गुणा भरन पाछो वींने दो।</verse>
				<verse number="7">जतरा वणा आपणी मेमा, बड़ई अन भोग-विलास किदो हे, वतरो वींने दक अन तकलिप जेलबा दो। काँके वाँ खुदऊँ गुमानऊँ बोल्या करती हे, “मूँ विदवा ने हूँ, पण राणी हूँ। तो पछे मूँ होक काँ मनाऊँ?”</verse>
				<verse number="8">ईं वजेऊँ वींपे एक दन मेंईस विपती का जस्यान के दक, काळ, मोत आ पड़ी। अन वादी वींने बाल देई। काँके सर्वसक्‍तिमान परबू परमेसर, वींको न्याव करबावाळो हे।</verse>
				<verse number="9">वींके वादी में बळबा की वजेऊँ अन वींमेंऊँ धूवो निकळतो तको देकन धरती की राजा ज्यो वींके हाते कुकरम किदो हो अन वींके हाते भोग-विलास में भोगी व्या हा, तो वीं वींका वाते रोई अन छाती कुटी।</verse>
				<verse number="10">वीं राजा वींको ओ दण्ड देकन दरपता तका छेटी ऊबा वेन बोली के, “‘हे मोटा नगर बाबुल, थाँरा ऊपरे धिकार हे।’ ‘देको, नामेक देर में ईं थने थाँरो दण्ड मलग्यो।’”</verse>
				<verse number="11">“ईं धरती पे लेण-देण करबावाळा भी वीं वाते घणा रोई अन छाती कुटी, काँके वाँकी चिजाँ अबे कुई मोल ने लेई,</verse>
				<verse number="12">जस्यान के होनो, चाँदी, मखमल, बेगनी, रेसम अन किरमिजी का गाबा, वाना आबावाळी हारी लाकड़्या, हाती का दातऊँ बणी तकी चिजाँ, अनमोल टिंढका, पीतळ, लोड़ा, अन संगमरमरऊँ बणी तकी तरे-तरे की चिजाँ,</verse>
				<verse number="13">दाळ चीणी, मसाला, वाना आबावाळी धुप, रस गंध, लोबान, दाकरस, जेतुन को तेल, मेदो, गव, गाया, बळद, गारा, बकरी, रत घोड़ा। अन मनकाँ ने गुलाम बणाबा का वाते भी वसे हे।”</verse>
				<verse number="14">“हे बाबुल नगर! जणी चिजाँ में थाँरो मन लागरियो हो, वीं हारी थने छोड़न परीगी। अन आज थाँरा नके कई भी भोग-विलास भी ने बच्यो हे। अन ने थने पाछो कदी मली।”</verse>
				<verse number="15">“वीं लेण-देण करबावाळा, जीं अणा चिजाँ को वोपार करन रिप्यावाळा बणग्या हा, वीं वींके ओ दण्ड देकन रोता तका अन दरपता तका छेटी ऊबा वेन क्यो,</verse>
				<verse number="16">“‘धिकार हे ईं मोटा नगर पे ज्यो पेल्याँ मखमल, बेगनी, अन किरमिजी की गाबा पेरिया करतो अन होना, हीरा अन मोत्याऊँ सज्या-धज्या करतो हे।</verse>
				<verse number="17">नामेक देर मेई ईंकी हारी दोलत जाती री।’” “वीं हाराई ज्यो पाणी का जाँज चलाबावाळा अन वींपे सवार सवारी अन वीं मनक ज्यो समन्दऊँ आपणो पेट भरे हे, वीं छेटी ऊबा वेग्या।</verse>
				<verse number="18">जद्याँ वीं वणी नगर ने बळता तका अन वीं मेंऊँ धूवा उटतो तको देक्यो तद्याँ वीं जोरऊँ केबा लागा, ‘ईं मोटा नगर का जस्यान कस्यो ओरी नगर हे?’</verse>
				<verse number="19">वीं आपणाँ ऊपरे धूळो नाकता अन रोता तका बोलबा लागा, “‘धिकार हे ईं मोटा नगर पे जिंकी धन-दोलतऊँ, समन्द में जाँज चलाबावाळा रिप्यावाळा बणग्या। काँके वो नगर रिप्यावाळो नगर हे। पण देको, नामेक देर मेंईस नास वेग्यो।’”</verse>
				<verse number="20">“हे हरग, हो पुवितर मनकाँ, थरप्या तका खासतोर चेलो अन परमेसर का आड़ीऊँ बोलबावाळा राजी वेवो, काँके परमेसर वींको न्याव करन थाँको बदलो लिदो हे।</verse>
				<verse number="21">“अणा बाताँ का केड़े में एक जोरावर हरग-दुत ने चक्की का पाट की जस्यान की मोटी छाँट तोकन वींने समन्द पे फेंकते तके क्यो, “यो बाबुल नगर भी, ईं छाँट का जस्यान फेंक दिदो जाई। अन पाछो कदी ने लादी।</verse>
				<verse number="22">अन ने थाँरा में पाछो कदी, कुई रणभेरी, वाँसळी, नरसिंगा की धुन हुणई देई। अन नेई थाँरा में पाछो कदी कुई कलाकारी करबावाळो कारीगर मली! न नेई चक्की चालबा की अवाज हुणई देई।</verse>
				<verse number="23">नेई थाँरा में कदी पाछो दिवा का उजितो वेई, अन नेई बींद बिदणी की अवाज हुणई देई। काँके थाँरा लेण-देण करबावाळा वोपारी धरती का परदान हा, अन थाँरा में जी जादु-टोना टोटका व्या करता हा, वणाऊँ हारी जात्या ने भटकई गी ही।</verse>
				<verse number="24">परमेसर का आड़ीऊँ बोलबावाळा को, परमेसर का पुवितर मनकाँ को अन जतरा मनकाँ ने धरती पे मारिया ग्या हा, वाँ हाराई मनकाँ को लुई ईं नगर का माते हे।”</verse>
			</chapter>
			<chapter number="19">
				<verse number="1">ईंका केड़े मने हरग में घणा मनकाँ को एक हाते अवाज हुणई दिदी वीं जोरऊँ केरिया हा, “हलेलुय्या! परमेसर की मेमा वेवे! काँके छुटकारो, तागत अन मेमा वींइस देवे हे।</verse>
				<verse number="2">वाँका हाराई फेसला हाँचा अन न्याव करबावाळा हे, काँके वणी वीं वेस्याँ को ज्या धरती का मनकाँ ने कुकरम करवाती अन वाँने वगाड़ती ही वींको न्याव करियो ग्यो हे, अन हातेई हाते आपणाँ दासा का लुई को बदलो लिदो ग्यो हे।”</verse>
				<verse number="3">वीं पाच्छा जोरऊँ बोल्या, “हलेलुय्या! जुग-जुग तईं वीं मोटा नगरऊँ धूवो उटतो रेई।”</verse>
				<verse number="4">वीं चोवीस पुरवज अन च्यारई जीवता जीव गादी पे बेट्या तका परमेसर के धोक लागन गीत गाबा लागा। “हलेलुय्या! वींकी जेजेकार हो। आमीन।”</verse>
				<verse number="5">तद्याँ पाच्छी वीं गादीऊँ अवाज अई, “हो मनकाँ थाँ ज्यो परमेसरऊँ दरपो हो थाँ पलई फोरा वो पलई मोटा वींकी जे-जेकार करो।”</verse>
				<verse number="6">ईंका केड़े में पाछो घणा हाराई मनकाँ की भीड़ की अवाज हूणी ओ अस्यान लागरिया हो जस्यान के पाणी की जरणा वे कन जस्यान वादळा की गाजबा की अवाज वेवे। वीं मनक गारिया हा, “हलेलुय्या! आपणाँ परबू परमेसर की जे हो! काँके सर्वसक्‍तिमान परमेसर राज करे हे।</verse>
				<verse number="7">ईं वाते आवो आपाँ राजी वेन खुसी मनावा, अन वाँकी जे-जेकार करा, काँके उन्याँ की ब्याव की त्यारी पुरी वेगी हे अन वींकी बिदणी वीं सज-धज ने त्यार बेटी हे।</verse>
				<verse number="8">वींने ऊजळा अन चमकण्यो मखमल पेरबा ने दिदो ग्यो हे। ओ मखमल परमेसर का पुवितर मनकाँ की धरम का काम ने दिकावे हे।”</verse>
				<verse number="9">तद्याँ वणी हरग-दुत माराऊँ क्यो, “अस्यान लिक वीं मनक धन्न हे ज्यो उन्याँ का ब्याव का जीमणा में नुत्या ग्या हे।” वणी पाछो क्यो, “ईं बचन परमेसर का हाँचो बचन हे।”</verse>
				<verse number="10">तद्याँ मूँ वींकी जे-जेकार करतो तको वीं हरग-दुत का आगे धोक लाग्यो। पण वणी माराऊँ क्यो, “अस्यान मती करे! काँके मूँ तो थाँरो अन थाँरी हण्डाळ्याँ का हाते परमेसर को दास हूँ। जणापे ईसू मसी की गवई देबा की जिमेदारी हे। थूँ परमेसर के धोक लाग, काँके ईसू मसी की गवई आगेवाणी की आत्मा हे।”</verse>
				<verse number="11">तद्याँ में हरग ने खुल्यो देक्यो अन वटे कई देकूँ हूँ के, एक धोळो घोड़ा हे। अन वींके ऊपरे ज्या सवार हे वो विस्वास जोगो अन हाँचो हे, काँके वो हाँच का हाते न्याव को फेसलो अन लड़ई करतो हो।</verse>
				<verse number="12">वींकी आक्याँ वादी की भट्टी के जस्यान ही अन वींके माता पे घणा हारा राजमुकट हा अन वींपे एक नाम लिक्यो तको हो, जिंने वींने छोड़न कुई भी ने जाणतो हो।</verse>
				<verse number="13">वणी लुई में भिज्या तका गाबा पेर मेल्या हा। अन वींको नाम “परमेसर का वसन” हो।</verse>
				<verse number="14">धोळा घोड़ा पे सवार परमेसर की फोज वींके पाछे-पाछे वेरी ही। वणा पुवितर अन धोळा मखमल का गाबा पेर मल्या हा।</verse>
				<verse number="15">पापी ने मारबा का वाते वींके मुण्डाऊँ एक तीकी तरवारऊँ बारणे निकळरी ही। वो लोड़ा की लाटी की जोर पे वाँका पे राज करी अन सर्वसक्‍तिमान परमेसर की गुस्सा की सुल में वाँने अस्यान गूंदी जस्यान अंगूर ने कुण्ड में गुँदे।</verse>
				<verse number="16">वींकी जाँग अन वींका गाबा पे अस्यान लिक्यो तको हो, ओ राजावो को राजा अन परबू को परबू।</verse>
				<verse number="17">ईंका केड़े मूँ कई देकूँ हूँ के, एक हरग-दुत सुरज का ऊपरे ऊबो हे। वो आकास में उड़बावाळा हाराई जनावर ने जोरऊँ अवाज देन क्यो, आवो अन परमेसर की जीमणा का वाते भेळा वे जावो,</verse>
				<verse number="18">जणीऊँ थाँ राजावो को, सपायाँ को, तागतवर मनकाँ को, घोड़ा को अन वणापे सवार मनकाँ को, फोरा को मोटा को, दासा को छुटकारो पाया तका मनकाँ को माँस खा सको।</verse>
				<verse number="19">तद्याँ में वणी डरावणा जनावर ने अन धरती पे राज करबावाळा राजा ने देक्या। वाँके हाते वाँकी फोज भी ही। वीं वणी धोळा घोड़ा पे सवार अन वींकी फोजऊँ लड़बा का वाते भेळा वेग्या हा।</verse>
				<verse number="20">वीं डरावणा जनावर ने अन वींके हाते जूटी आगेवाणी करबावाळा जी हेन्याण चमत्कार बतान वणा मनकाँ ने ज्यापे वीं जनावर की मोर लगई ही अन वींकी मूरत ने पुजा करता हा, वाँने पकड़ लिदा। वणा दुया ने वीं वादी की बळता तका नरक का कुण्ड में जीवताई नाक दिदा ग्या।</verse>
				<verse number="21">धोळा घोड़ा पे सवार का मुण्डाऊँ ज्या तरवारऊँ निकळरी हे वणीऊँ वाँकी फोज मार दिदी गी। वाँकी लास का माँस ने जीव-जनावर पेट भरन खादो।</verse>
			</chapter>
			<chapter number="20">
				<verse number="1">पछे में एक हरग-दुत ने रेटे उतरतो देक्यो। वींके हात में पाताळ की चाब्याँ अन एक मोटी हाँकळ ही।</verse>
				<verse number="2">वो वीं अजगर ने ज्या पुराणो हाँप ज्यो इबलिस अन सेतान केवातो हो, वींने पकड़न एक हजार वर का वाते हाँकळऊँ बांद दिदो।</verse>
				<verse number="3">वो वींने मोटा पाताळ में नाक दिदो अन वींके ऊपरे मोर लगा दिदी के, ओ एक हजार वरा तईं मनकाँ ने ने भरमाई, पण ईंका केड़े थोड़ाक टेम का वाते ईंने छोड़ दिदो जाई।</verse>
				<verse number="4">तद्याँ में थोड़ाक गाद्‍याँ देकी, वींपे मनक बेट्या तका हा, वाँने न्याव करबा को हक दिदो ग्यो हो। अन में वणा मनकाँ की आत्मा भी देकी ज्याँका माता ईसू मसी की गवई देबा के अन परमेसर को बचन हुणाबा की वजेऊँ काट्या ग्या हा, अन वणा मनकाँ ने ज्यो भी जनावर की अन वींकी मूरत ने पूँजी अन ने वींकी मोर ने आपणाँ माता अन हात में लगई ही। वीं मनक जीवता वेन एक हजार वर का वाते मसी का हाते एक हजार वरा तईं राज करतो रियो।</verse>
				<verse number="5">जद्याँ तईं एक हजार वर पूरा ने वे जावे, बाकी की मरिया तका मनक जीवता ने व्या। ओ पेलो पुनरुत्थान हे।</verse>
				<verse number="6">वीं धन्न अन पुवितर हे ज्यो ईं पेला पुनरुत्थान का भागी बणी, अणापे दूजो मोत को कई अदिकार ने, पण ईं परमेसर अन मसी का याजक वेई, अन वींके हाते एक हजार वर तईं राज करी।</verse>
				<verse number="7">जद्याँ एक हजार वर पूरा वे जाई, तद्याँ सेतान ने खोल्यो जाई,</verse>
				<verse number="8">जणीऊँ वो वणा जात्या का नके ज्या धरती का च्यारूँमेर जाई, ज्याँने गोग अन मागोग क्यो जावे हे, जणाकी गणती समन्द की रेत की कण का बराबर वेई, वो वाँने भरमान लड़ई करबा का वाते भेळा करबा का वाते जाई।</verse>
				<verse number="9">वीं सेतान की सेना हारी धरती पे फेल जाई, वीं परमेसर की भगताँ की डेरा ने अन वींका लाड़ला नगर ने गेर लेई, पण हरगऊँ वादी वरी अन वाँने बाल देई।</verse>
				<verse number="10">अन वीं सेतान ने ज्यो वाँने भरमातो हो, वीं वादी का कुण्ड में जिंका में वीं डरावणा जनावराने अन वींका जूटी आगेवाणी करवावाळा नाक्या ग्या हा, वींने भी नाक दिदो जाई, जिंमें वीं हमेस्यान दन रात तड़पता रेई।</verse>
				<verse number="11">तद्याँ में मोटी धोळी गादी अन वींपे बेट्या तका ने देक्यो, वींके हामेऊँ धरती अन आकास भागग्या अन वाँको नामो निसाण मटग्यो।</verse>
				<verse number="12">वींके केड़े में फोराऊँ लेन मोटा तईं का हाराई मरिया तका मनकाँ ने वीं गादी का हामे ऊबा तका देक्यो, अन थोड़ीक पोत्याँ खोली गी वणाके केड़े एक ओरी पोती खोली गी, याईस “जीवन की पोती हे।” वाँके करमा का जस्यान ज्या ईं पोती में लिक्या ग्या हा, मरिया तका को न्याव किदो ग्यो हो।</verse>
				<verse number="13">ज्यो मनक समन्द में मरग्या हा वाँने समन्द दे दिदा अन मोत अन पाताळ में ज्यो मनक हा, वाँने भी वणी दे दिदा। हाराई को न्याव वाँका कामाँ का जस्यान किदो ग्यो।</verse>
				<verse number="14">ईंका केड़े मोत ने अन पाताळ ने वादी का कुण्ड में नाक दिदा ग्या। यो वादी को कुण्डईस दूँजी मोत हे।</verse>
				<verse number="15">जिंको भी नाम “जीवन की पोती” में लिक्यो तको ने मल्यो, वींने भी वादी का कुण्ड में नाक दिदो ग्यो।</verse>
			</chapter>
			<chapter number="21">
				<verse number="1">पछे में एक नुवो हरग अन नुवी धरती देकी। काँके पेलो हरग अन पेली धरती खतम वेग्या हा अन समन्द भी अबे ने रियो हो।</verse>
				<verse number="2">पछे में पुवितर नगर नुवो यरूसलेम ने हरगऊँ परमेसर का नकेऊँ उतरते देक्यो अन वो वीं लाड़ी का जस्यान हे, ज्याँ आपणाँ धणी का वाते सजे धजे।</verse>
				<verse number="3">तद्याँ में गादी में एक जोरकी अवाज हूणी। वाँ केरी ही के, “देको, अबे परमेसर को मन्दर मनकाँ का वसमें हे अन वीं वाँका वसमें घर बणान रिया करी। वीं वाँकी परजा वेई अन खुद परमेसर वाँका परमेसर वेई।</verse>
				<verse number="4">अन वो वाँकी आक्याँ का आसूँ पुछ नाकी अन ईंका केड़े मोत ने रेई, अन ने होक, ने रोणो-धोणो, ने पिड़ा रेई, काँके पेल्याँ की बाताँ जाती री ही।”</verse>
				<verse number="5">ज्यो गादी पे बेट्या तको हे वणी क्यो, “देको, मूँ हारोई नुवो कररियो हूँ।” पछे पाछो वणी क्यो, “लिकी ले, काँके यो बचन विस्वास करबा के जोगो अन हाँचो हे।”</verse>
				<verse number="6">पछे वणी माराऊँ क्यो, “ईं बाताँ पुरी वेगी हे। मूँ अलफा अन ओमेगा, सरुआत अन अन्त हूँ। मूँ तरियाँ ने जीवन का पाणी का सोताऊँ फोकट में पाणी पाऊँ।</verse>
				<verse number="7">जो जे पाई वोईस अणा हारी चिजाँ को मालिक वेई। मूँ वींको परमेसर वेऊँ अन वो मारो बेटो वेई।</verse>
				<verse number="8">पण दरपण्या अन बना विस्वासवाळा, भरस्ट, हत्यारा अन कुकरमी, जादु-टोना करबावाळा, मूरती पुजबावाळा, अन हाराई जूट बोलबावाळा को भाग वीं कुण्ड में मली ज्यो हमेस्यान बळतो रेवे हे। या दूजी मोत हे।”</verse>
				<verse number="9">पछे वणा हाताँ दुताँ का नके आकरी हात विपत्याऊँ भरिया तका हात प्याला हा, वणा मेंऊँ एक मारा नके आयो अन माराऊँ बात करन क्यो, “अटे आ, मूँ थने वणी लाड़ी ने बताऊँ, ज्याँ उन्याँ की लुगई हे।”</verse>
				<verse number="10">वो दूत मने परमेसर की आत्मा में एक मोटा अन ऊसा मंगरा पे लेग्यो, अन वणी मने पुवितर नगर नुवा यरूसलेम का दरसण कराया। वो नगर परमेसर का आड़ीऊँ रेटे उतर रियो हो।</verse>
				<verse number="11">परमेसर की मेमा वींमें ही अन वींकी ज्योती अनमोल काँस बिल्‍लोर के जस्यान चमक री ही।</verse>
				<verse number="12">नगर का च्यारूँमेर एक परकोटो हो, वींके बारा फाटक हा अन बाराई फाटकाँ पे बारा हरग-दुत हा, अन बाराई फाटकाँ पे इजराएल्याँ की बाराई गोताँ का नाम लिक मेल्या हा।</verse>
				<verse number="13">अणामूँ तीन फाटकाँ उगमणी आड़ी ही, तीन धरव का आड़ी, तीन लंकव का आड़ी अन तीन आतमणी आड़ी ही।</verse>
				<verse number="14">नगर को परकोटो बारा नीमा का भाटाऊँ बणायो ग्यो हो अन वींपे मेमना का बाराई थरप्या तका चेला का नाम लिक मेल्या हा।</verse>
				<verse number="15">ज्यो हरग-दुत माराऊँ बाताँ कररियो हो, वींका नके होनाऊँ एक नापवा की एक जरी बणी तकी हे, जणीऊँ वो वीं नगर ने अन वींकी फाटकाँ अन वींका परकोटा ने नाप सकतो हो।</verse>
				<verse number="16">वीं नगर ने हमचोरस बसायो तको हो अन वींकी लम्बाई अन चोड़ाई बराबर ही अन वणी वीं जरीऊँ नगर ने माप्यो, तो हाड़ा हात स्ये कोस को निकळ्यो, वींकी लम्बाई अन चोड़ाई अन ऊँचाई बराबर ही।</verse>
				<verse number="17">हरग-दुत पाछो वीं परकोटा ने माप्यो। वो एक होन चमालिस हात हो। हरग-दुत वींने मनकाँ का हात का नापऊँ माप्यो हो।</verse>
				<verse number="18">नगर को परकोटो यसब नाम को मण्याऊँ बण्यो तको हो अन नगर ने काँस का जस्यान चमकता तका सुद होनाऊँ बणायो ग्यो हो।</verse>
				<verse number="19">नगर का परकोटा की नीमा हरेक तरियाँ का अनमोल मण्याऊँ सजई गी ही। नीम को पेलो भाटो यसब को बण्यो हो, दूजो नीलमणी अन तीजो लालड़ी अन चोतो मरकत को हो।</verse>
				<verse number="20">पाचवो गोमेद अन छटो माणक, हातवो पीतमणी को, आटवो परोज को, नवो पुखराज को, दसवो लहसनिया को, ग्यारवो धुम्रकान्त को, बारवो चन्द्रकाँत को हो।</verse>
				<verse number="21">अन बाराई फाटकाँ बारा मोत्याऊँ बणी ही, अन हरेक फाटक एक-एक मोतीऊँ बण्यो हो, नगर का गेला हव काँस का जस्यान सुद होना बण्या तका हा।</verse>
				<verse number="22">नगर में मने कुई मन्दर ने दिकई दिदो, काँके सर्वसक्‍तिमान परबू परमेसर अन उन्योइस वाँको मन्दर हे।</verse>
				<verse number="23">अन वीं नगर ने कस्याई सुरज अन चाँद की जरुरत ने ही के, वीं वींने उजितो देवे, काँके वो तो परमेसर का तेजऊँ चमकरियो हे। उन्योइस वीं नगर को दिवो हे।</verse>
				<verse number="24">हारी जात्या का मनक वीं दिवा का उजिता के आसरे आगे बड़ी, अन धरती का राजा आपणाँ-आपणाँ वेभव का सामान वींमें लाई।</verse>
				<verse number="25">दन की टेम में वींकी फाटक कदी बन्द ने वेई अन वटे रात तो कदी वेईस ने।</verse>
				<verse number="26">अन मनक जात्या जात्या को वेभव अन धन-दोलत वटे लाई।</verse>
				<verse number="27">वींमें ने कुई हुगली चीज अन ने हूँगला काम करबावाळो, ने जूट बोलबावाळो कणी भी तरियाऊँ वटे ने आई। खाली वीं मनक आई ज्याको नाम उन्याँ की जीवन की किताब में लिक्या तका हे।</verse>
			</chapter>
			<chapter number="22">
				<verse number="1">ईंका केड़े वीं हरग-दुत मने जीवन देबावाळा पाणी की एक नंदी बतई। वाँ नंदी बिल्‍लोर का काँस जस्यान चमकती तकी पुवितर ही। वा नंदी परमेसर अन उन्याँ का वटेऊँ निकळन नगर की हड़क का वसा-वस वेती ही।</verse>
				<verse number="2">अन नंदी का ईं पाल्डे अन पेला पाल्डे, जीवन को रूँकड़ो हो, वींमें बारा तरिया का फळ लागता हा। अन वो हरेक मिने फळतो हो। वीं रूँकड़ा का पान्दड़ाऊँ हारी जात्या जात्या का मनक हव वेता हा।</verse>
				<verse number="3">वटे कणी तरियाँ को कस्यो भी हराप ने वेई। परमेसर अन उन्याँ की गाद्दी वीं नगर में बणी रेई। वींका दास वींकी भगती करता रेई।</verse>
				<verse number="4">वींको मुण्डो देकी अन वींको नाम वींका माता पे लिक्यो तको वेई।</verse>
				<verse number="5">वटे कदी रात ने वेई अन नेई वाँने सुरज अन दिवा का उजिता की जरुरत वेई। काँके वाँका पे परबू परमेसर आपणो उजितो नाकी अन वीं मनक हमेस्यान हमेस्यान राज करी।</verse>
				<verse number="6">पछे वीं हरग-दुत माराऊँ क्यो, “ईं वसन विस्वास करबा जोगा अन हाँचा हे। परबू परमेसर जी, आपणाँ आड़ीऊँ बोलबावाळा ने पुवितर आत्मा देवे हे, आपणाँ भगताँ ने, जीं अबाणू वेबावाळो हे, वींका बारा में केबा का वाते आपणो हरग-दुत खन्दावे हे।”</verse>
				<verse number="7">ईसू क्यो, “हुणो, मूँ पगई आरियो हूँ। धन्न हे वाँने जो ईं किताब में दिदा ग्या वसना को पालण करे हे। जीं परमेसर का आड़ीऊँ किदी तकी बाताँ हे।”</verse>
				<verse number="8">मूँ वो यहुन्नो हूँ, जणी ईं बाताँ हूणी अन देकी हे। जद्याँ में ईं बाताँ देकी अन हूणी, तो वीं हरग-दुत का पंगा में पड़न में वींकी भगती किदी, ज्यो मने ईं बाताँ बताया करतो हो।</verse>
				<verse number="9">पण वणी माराऊँ क्यो, “थूँ अस्यान मती कर, काँके मूँ थाँरो अन थाँरा भायाँ परमेसर का आड़ीऊँ बोलबावाळा अन ईं किताब की बाताँ ने मानबावाळा का लारे को दास हूँ। बेस थूँ परमेसर की भगती कर।”</verse>
				<verse number="10">वणी हरग-दुत पाछो मने क्यो, “ईं किताब में जीं आगेवाण्याँ दिदी गी हे, वाँने हपान मती राक, काँके अणा बाताँ के वेबा को टेम नकेईस हे।</verse>
				<verse number="11">जीं बुरो करता आरिया हे, वीं बुरा करता रेवे। जीं भरस्ट हे वीं भरस्ट बण्या रेवे। जीं धरमी हे, वीं धरमी बण्या तका रेवे। जीं पुवितर हे वीं पुवितर बण्या तका रेवे।”</verse>
				<verse number="12">ईसू क्यो, “हुणो, मूँ पगईं आबावाळो हूँ अन आपणाँ हाते थाँका वाते फळ लेन आरियो हूँ, जणी जस्या करम किदा हे वींने वींके करमा का जस्यान फळ देऊँ।</verse>
				<verse number="13">मूँईस अलफा हूँ अन मूँईस ओमेगा हूँ। मूँ पेलो अन मूँईस आकरी हूँ। मूँ सरुआत अन मूँईस अन्त हूँ।”</verse>
				<verse number="14">धन्न हे वाँने जीं आपणाँ गाबा धो लेवे हे। वाँने जीवन का रूँकड़ा का फळ खाबा को अदिकार वेई। वीं फाटकऊँ नगर में जाबा का अदिकारी वेई।</verse>
				<verse number="15">पण जादु-टोना करबावाळा, कुकरमी, हत्यारा, मूरती पुजबावाळा, अन हरेक तरियाऊँ जूट पे चालबावाळा, जूटऊँ परेम करबावाळा ईं अड़क्या गण्डकड़ा का जस्यान हे अन ईं हाराई नगरऊँ बारणे पड़्या रेई।</verse>
				<verse number="16">“मूँ, ईसू थाँका वाते, मण्डळ्याँ का वाते, अणा बाताँ की गवई देबा का वाते मारो हरग-दुत खन्दाऊँ हूँ। मूँ दाऊद के परवार को वंसज हूँ। मूँ हवेर को चमकतो तको तारो हूँ।”</verse>
				<verse number="17">पुवितर आत्मा अन लाड़ी केवे हे, “आ।” अन ज्यो ईंने हुणे हे, वीं भी केवे, “आ।” अन ज्यो तरियो हे वो भी आवे अन ज्यो कुई छाई, वो जीवन को पाणी फोकट में पिया करी।</verse>
				<verse number="18">मूँ यहुन्नो हरेक ने, ज्यो ईं किताब की आगेवाणी की बाताँ लिकी हे वाँके बारे में गवई दूँ के, यद्याँ कुई मनक अणा बाताँ में कई बड़ावे, तो परमेसर वणा विपत्याँ ने ज्यो अणी किताब में लिकी तकी हे, वींपे बड़ाई।</verse>
				<verse number="19">अन यद्याँ परमेसर का आड़ीऊँ बोलबावाळा की अणी किताब में लिक्या तका वसना मेंऊँ कई घटाई तो परमेसर ईं किताब में लिक्या तका जीवन का रूँकड़ा अन पुवितर नगर मेंऊँ वींको हिस्सो वणीऊँ कोसी लेई।</verse>
				<verse number="20">ईसू जी अणा बाताँ का गवा हे, वीं केवे हे, “हाँ! मूँ पगई आबावाळो हूँ।” आमीन। हे परबू ईसू आ।</verse>
				<verse number="21">परबू ईसू को अनुगरे हाराई परमेसर का पुवितर मनकाँ का हाते बण्यो रेवे। आमीन।</verse>
			</chapter>
		</book>
	</testament>
</bible>