Yiesu *Klistu yejɑnm sɑnɑ e nɑ: u din tie * Dɑɑfiid yɑɑbuonn e, k Dɑɑfiid mun din tie Ablɑɑhɑɑnm yɑɑbuonn. Ablɑɑhɑɑnm din mɑl Isɑɑk, k Isɑɑk din mɑl Sɑɑkɔb, k Sɑɑkɔb mun din mɑl Suudɑ nɑn u wɑɑli. Suudɑ din mɑl Fɑɑles nɑn Sɑɑlɑ, k b nɑɑ e din tie Tɑɑmɑɑl, k Fɑɑles din mɑl Eslɔnm, k Eslɔnm din mɑl Alɑɑnm. Alɑɑnm din mɑl Amiinɑɑdɑɑb, k Amiinɑɑdɑɑb din mɑl Nɑɑsɔn, k Nɑɑsɔn mun din mɑl Sɑlmɑ. Sɑlmɑ din mɑl Buos, wun nbɑ nɑɑ din tie Lɑɑhɑɑb, k Buos din mɑl Obet, wun nbɑ nɑɑ din tie Lut, k Obet mun din mɑl Sese. Sese din mɑl kpɑnbɑl Dɑɑfiid, k Dɑɑfiid mun din mɑl Sɑɑlomɔn, wun nbɑ yɑɑ nɑɑ din sint kun Uli nɑ. Sɑɑlomɔn din mɑl Luobuɑnm, k Luobuɑnm din mɑl Abiɑ, k Abiɑ mun din mɑl Asɑɑf Asɑɑf din mɑl Suosɑɑfɑ, k Suosɑɑfɑ din mɑl Suolɑɑnm, k Suolɑɑnm mun din mɑl Osiɑ. Osiɑ din mɑl Soɑtɑɑnm, k Soɑtɑɑnm din mɑl Ahɑs, k Ahɑs mun din mɑl Esekiɑ, Esekiɑ din mɑl Mɑɑnɑɑse, k Mɑɑnɑɑse din mɑl Amɔn, k Amɔn mun din mɑl Suosiɑ, k Suosiɑ din mɑl Yekuoniɑ nɑn u wɑɑli, bɑɑ din suol Islɑɑeltieb dɑɑbɑ k sɑɑn nɑn’m Bɑbiilonn yuo nbɑ nɑ. Bɑɑ din suol’b k sɑɑn nɑn’m Bɑɑbiilonn duo ni nɑ puolpo, lenŋ e k Yekuoniɑ din mɑl Sɑɑlɑɑtiel, k Sɑɑlɑɑtiel mun din mɑl Solobɑɑbel. Solobɑɑbel din mɑl Abiud, k Abiud din mɑl Eliiɑkiinm, k Eliiɑkiinm mun din mɑl Asuol. Asuol din mɑl Sɑɑdɔk, k Sɑɑdɔk din mɑl Akiinm, k Akiinm mun din mɑl Eliut. Eliut din mɑl Eleɑsɑɑl, k Eleɑsɑɑl din mɑl Mɑɑtɑn k Mɑɑtɑn mun din mɑl Sɑɑkɔb. Sɑɑkɔb din mɑl Suosiɑf, k Suosiɑf mun din tie Mɑɑli sɔlɔ, k Mɑɑli din mɑl Yiesu nbɑ k b yi’u Klistu nɑ. Dɑɑfiid din tie Ablɑɑhɑɑnm yɑɑbuonpiik nɑn ŋɑnnɑ e. K Dɑɑfiid yuo k tɑn tuu yuo nbɑ k b din suol niib mɑnŋ dɑɑbɑ k sɑɑn nɑn’m Bɑɑbiilonn nɑ mun din tie yɑɑbuonpiik nɑn ŋɑnnɑ. Lɑɑ din nyii l yuo k tɑn tuu Klistu mɑɑlu yuo mun biɑ din tie yɑɑbuonpiik nɑn ŋɑnnɑ e. Bɑɑ din mɑl Yiesu Klistu biɑnŋ nbɑ e nɑ: u nɑɑ Mɑɑli din tie Suosiɑf sɑlkpenŋ e. B dɑɑ din k kuɑn lieb, ŋɑɑn k Suosiɑf din tɑn lɑ k Mɑɑli mɔk puol, k Foŋɑnm pɑnŋ ni e k u suol puol mɑnŋ. Suosiɑf nbɑ k u din yɑɑ wun kunn’ɔ nɑ din tie Yennu nipiemɔ e. L pɑɑk, u din k luon k wun nyinn’l pɑɑnu ni k lin dinn Mɑɑli fei, ŋɑɑn u din lol u pɑl ni e nɑn u ji kɑn kuɑn’ɔ. Wɑɑ ji din duki lin nbɑ nɑ po nɑ e, k Yennu *bɑɑl u buol ni u dɑmiit ni k tɑn yet’ɔ ɑ: «Fin Suosiɑf, wun nbɑ tie Dɑɑfiid yɑɑbuonn, dɑɑ tiin ɑ sɑlkpenŋ Mɑɑli kuɑnu jɑŋmɑɑni, k mɑɑn wɑɑ mɔk puol nbɑ nɑ, Foŋɑnm pɑnŋ ni e k u suol puol mɑnŋ. U tɑn sɑɑ mɑl bonjɑk e, k ɑ sɑɑ pul u sɑnn Yiesu, k mɑɑn u tɑn sɑɑ fiel u niib b biit ni.» Lin nbɑ nɑ kul din tun ɑ lin gbien lin nbɑ k Yonmdɑɑnɔ din te k u sɔkniisuɑ yet ɑ: «Sɑpɑɑnmunn tɑn sɑɑ suol puol k mɑl bonjɑk, k b tɑn sɑɑ pul u sɑnn Emɑɑnuel.» (L pɑɑk tie ɑ: «Yennu be nɑn’t.») Suosiɑf nbɑ din tɑn fiil guɑn ni yuo nbɑ k u tun nɑn Yennu mɑlɑkɑ nɑ nbɑ yet’ɔ biɑnŋ nbɑ nɑ, k ji din gɑɑl u sɑlkpenŋ Mɑɑli u ŋɑɑk ni, ŋɑɑn u din k duɑ nɑn’ɔ mɔkmɔk nɑn wɑɑ din tɑn mɑl u sɑpɑɑnmɑl, bonjɑk nɑ. K Suosiɑf din pul u sɑnn Yiesu. Mɑɑli din mɑl Yiesu dosɑu nnɑ ni, k b yi’l Betlehenm, k l be Suude tinŋ ni. U din mɑl’ɔ kpɑnbɑl *Heluod yuo e. L yuo nɑ k bɑntesiɑb din nyii yendopo k bɑɑl Selusɑɑlenm, k tɑn boi niib ɑ: «Islɑɑeltieb kpɑnbɑl nbɑ k b mɑl’ɔ nɑ, u be lee? T dɑɑn lɑ u ŋmɑɑbil e yendopo k bɑɑl nɑ ɑ t tɑn jiɑnt’ɔ.» Kpɑnbɑl Heluod nbɑ din gbɑt nnɑ mɑnŋ, k l biil ŋuɑ nɑn Selusɑɑlenmtieb kul pɑlɑ ni. K u din yiin Yennu mɑnntieb yudɑnm nɑn *senniwɑntieb k tɑn boi’b ɑ: «Lee k b sɑɑ mɑl *Klistu nɑ?» K b jiin’ɔ ɑ: «Betlehenm duo nbɑ be Suude tinŋ ni nɑ, k mɑɑn *Yennu sɔkni nɑ din diɑn ɑ: ‹Fin Betlehenm nbɑ be Suudɑ tinŋ ni nɑ, ɑ k tie tinbik kɑɑ Suudɑ yiɑl ni, k mɑɑn Kpɑnbɑlsuɑ tɑn sɑɑ nyi ɑ ni e, k ŋuɑ e tɑn sii tie n niib Islɑɑeltieb nɑ pekpɑɑlk.›» Lin nbɑ nɑ puolpo e k kpɑnbɑl Heluod din yiin bɑntieb mɑnŋ wuol ni, k tɑn boi’b k fiit’b fɑnu ɑ wun bɑnn yuo nbɑ k ŋmɑɑbil nɑ dɑɑn nyii, k din yet’b: «Ii sɑɑ mɑn Betlehenm k sɑɑ lon bik mɑnŋ fɑnu. Yuo nbɑ k i lɑ’u, yin jen ɑ k tɑn yet’n k n mun sɑɑn k sɑɑ jiɑnt’ɔ.» Kpɑnbɑl nɑ nbɑ din pɑk nnɑ k gbenn yuo nbɑ, k b nyii k suol sɔnu. Bɑɑ din sɑɑ mɑnŋ k b lɑ ŋmɑɑbil nbɑ dɑɑn nyii yendopo nɑ, k l gɑl b tuɑnn po k sɑɑ set bik mɑnŋ nbɑ be ŋɑɑk nbɑ nɑ ni, l sɑnpɑɑpo. Bɑɑ lɑ ŋmɑɑbil mɑnŋ nɑ, k b pɑlɑ ni penn bonciɑnn. K b kuɑ ŋɑɑk mɑnŋ ni, k lɑ bik mɑnŋ nɑn u nɑɑ Mɑɑli. Ŋɑnn e k b gbɑɑn k jiɑnt bik mɑnŋ, ŋɑɑn biit b pɑkɑ k nyinn piini k tul’ɔ. Piini mɑnŋ din tie sɑlmɑ nɑn tulɑɑlnyun nɑn tulɑɑlsiɑl nnɑ k b yi’l miil. Tɔn, k Yennu din pɑk k tul’b b dɑmiit ni, ɑ b ji dɑɑ ŋmɑt kpɑnbɑl Heluod buol ni. L pɑɑk, k b ji din tɔkn sɑnjogɑɔnŋ k ŋmɑt kun b duo ni. Bɑntieb nɑ nbɑ din kun nɑ puolpo e k Yonmdɑɑnɔ Yennu *mɑlɑkɑ din bɑɑl Suosiɑf buol u dɑmiit ni, k yet’ɔ ɑ: «Fiit k jii sɑnpɑntk mɑnŋ nɑn u nɑɑ kii tiin kii sɑɑ Ejipt tinŋ ni, k sɑɑ kɑl lenŋ nɑn yuo nbɑ k n tɑn sɑɑ tul’ɑ mɔb biɑk, k mɑɑn kpɑnbɑl Heluod luon k wun lon bik mɑnŋ buol e k kpi’u.» K u din fiil nyiɑɔk k jii bik nɑ nɑn u nɑɑ k ciɑl k sɑɑn nɑn’m Ejipt tinŋ ni. U din be lenŋ e nɑn yuo nbɑ k kpɑnbɑl Heluod din tɑn kpo nɑ. Lin nbɑ nɑ kul din tun ɑ lin gbien lin nbɑ k Yonmdɑɑnɔ Yennu din te k u sɔkniisuɑ pɑk l po nɑ e ɑ: «Min, Yennu, n din yiin n Bijɑ ɑ wun nyi Ejipt tinŋ ni.» Heluod nbɑ din tɑn bɑnn nɑn bɑntieb mɑnŋ kpɑl’ɔ e nɑ, k u wutuol din duo bonciɑnn. K u din tun sejenm ɑ bin sɑɑn Betlehenm nɑn l digbɑnbis ni k sɑɑ kpi bonjɑbis kul, lɑɑ jii sɑnpɑnti k sɑɑ tuu bin nbɑ mɔk binɑ ŋɑnle, nɑn wɑɑ dɑɑn boi bɑntieb mɑnŋ k bɑnn yuo nbɑ k ŋmɑɑbil nɑ dɑɑn nyii nɑ. Nnɑ e k lin nbɑ k *Yennu sɔkni Selemi din pɑk nɑ din gbien ɑ «Lɑɑmɑ duo nuɑk ni e k b gbiɑ kunkɔl, mɔni nɑn fɑbni, k Lɑɑsiɑl mɔ u wɑɑs pɑɑk, k b bɑln’mɔ k tɑn guo, k mɑɑn u wɑɑs kul ɑ kpo wɑɑ.» Tɔn, k kpɑnbɑl Heluod tɑn kpo, k u kuun puolpo k Yonmdɑɑnɔ Yennu mɑlɑkɑ biɑ din sɑɑn Suosiɑf buol u dɑmiit ni, Ejipt tinŋ ni, k sɑɑ yet’ɔ ɑ: «Fiit k jii bik mɑnŋ nɑn u nɑɑ, k ŋmɑt sɑɑn Islɑɑel tinŋ ni, k mɑɑn bin nbɑ din lol ɑ bin kpi bik mɑnŋ nɑ kpo wɑɑ.» K Suosiɑf din fiil k jii bik mɑnŋ nɑn u nɑɑ k din ŋmɑt k sɑɑn Islɑɑel tinŋ ni. Ŋɑɑn wɑɑ din tɑn gbɑt ɑ Alkelɑus dii nɑɑn k kɑl u bɑɑ Heluod nɑɑngbɑnt pɑɑk Suude tinŋ ni nɑ, k jɑŋmɑɑni suol’ɔ nɑn wun kun lenŋ, k Yennu biɑ din kpɑɑn’ɔ u dɑmiit ni, k u din sɑɑn Gɑɑliile tinŋ ni, k din sɑɑn k sɑɑ kɑl duo nbɑ k b yi Nɑɑsɑɑlet nɑ ni. Nnɑ e k l tien gbien mɑɑn nbɑ k Yennu sɔkniinbɑ din yet ɑ: «B tɑn sii yi’u Nɑɑsɑɑlet nilɔ e.» Binɑ bonciɑnn din gɑl e wɑɑ, k Sɑn nbɑ din wuul niib Yennu nyunwulu nɑ tɑn dɔkt muuk ni, Suude tinŋ ni, k muɑntl Yennu mɑɑn k yien ɑ: «Mɔn kuɑŋɑɑn mɑn k lebt binbenŋ, k mɑɑn Yennu nɑɑn pel nɑ.» *Yennu sɔkni Esɑɑyi din ponŋ diɑn ŋuɑ Sɑn po e wɑɑ ɑ: «Suɑ be muuk ni k huot k yɑɑ ɑ: ‹Ŋɑnmt mɑn Yonmdɑɑnɔ bɑɑlu sɔnu k tul’ɔ, k te k u sɔni ii tuok.› » Sɑn din liɑ yuyouk kobt liɑtfuouk o, k biɑ buob gbɑnn u siɑk ni, u jiet din tie nɑɑsuut nɑn siɑt e. L yuo k Selusɑɑlenm duo ni tieb, nɑn Suude tinŋ kul ni tieb, nɑn digbɑnɑ nbɑ din kpiɑ *Suulden kpenu kul tieb din sɑɑn u buol ni, k fiit b biit, k u wul’b Yennu nyunwulu *Suulden kpenu mɑnŋ ni. Wɑɑ din tɑn lɑ k Fɑɑliisiɑnnbɑ nɑn *Sɑɑdiuseɑnbɑ bonciɑnn k b mun bɑɑt u buol ni ɑ wun wul’b Yennu nyunwulu nɑ, k u yet’b ɑ: «Yinm wɑɑlɑbli nɑ. Ŋmee kpɑɑn’i ɑ i tin k nyi Yennu wutuol nbɑ yɑɑ lin bɑɑl i pɑɑk nɑ ni? Ii tuun mɑn lin nbɑ sɑɑ wɑnn nɑn i set mɔ kuɑŋɑɑn k lebt binbenŋ. I dɑɑ mɔk pɑlbifɑɑnt nɑn Ablɑɑhɑɑnm tie i yejɑ. N yien’i e, Yennu sɑɑ fit k fiin tɑnɑ nbɑ nɑ k lin kpɑnt Ablɑɑhɑɑnm yɑɑbuonɑ. Pɑjɑl ponŋ tien siil ɑ, ɑ wun cuɑ tiini nɑn l jiinɑ, k tiik kul nbɑ k luon luɑnŋɑnɑ, b sɑɑ cuɑ’l e k lu’l muu ni. Min ŋɑnin wuul’i Yennu wulu nɑn nyun ɑ i mɔ kuɑŋɑɑn k lebt binbenŋ, ŋɑɑn wun nbɑ yɑɑ wun bɑɑl n puolpo nɑ cie’n, k n ponŋ k ŋɑn nɑn k n jii u tɑɑsɑɑt. Ŋuɑ e tɑn sɑɑ jii Foŋɑnm nɑn muu k wul’i Yennu wulu. U diɑ u dilenn ŋmɑni e k yɑɑ wun lenn bonŋɑnn, k nyinn u dibin k wuun u buɑl ni, ŋɑɑn juo founŋ nɑ muu nbɑ kɑn mi k kpien nɑ ni.» L yuo mɑnŋ k Yiesu din nyii Gɑɑliile k sɑɑn Suulden kpenu po, k bɑɑl Sɑn buol ni ɑ wun wul’ɔ Yennu nyunwulu. K Sɑn k sɑk, k yet’ɔ ɑ: «Min e bo sɑɑ bɑɑl ɑ buol ni k ɑ wul’n, ŋɑɑn k ɑ mun tɑn bɑɑt n buol ni ii?» Ŋɑɑn k Yiesu yet’ɔ ɑ: «Ŋɑɑnt k lin tun nnɑ mɔtɑɑnɑ, k mɑɑn nnɑ e k t sɑɑ fit tun lin nbɑ kul k Yennu luon.» L yuo nɑ k Sɑn sɑk. Wɑɑ wul Yiesu Yennu nyunwulu k gbenn yuo nbɑ, l tɑɑkpɑɑk ni k Yiesu nyii nyun nɑ ni, k sɑnpɑɑpo tɑn luot, k u lɑ k Foŋɑnm siik u pɑɑk k nɑɑn nɑn ŋmɑnn nɑ, k tɑn jɑkn u pɑɑk. K kunkɔl nyii sɑnpɑɑpo k yet ɑ: «N Bilonkɑk e nɑ, ŋuɑ e k n nunm gbuo’u.» K Foŋɑnm din sɑɑn nɑn Yiesu pɑɑnpieonŋ ni ɑ *Sɑɑtɑn n sɑɑ jɑnm’ɔ. U din be lenŋ k k dii siɑl dɑpiinnɑ yennu ni nɑn nyiɑɔk, k kon ji din tɑn suol’ɔ. K Jɑnmidɑɑnɔ bɑɑl u buol ni k tɑn yet’ɔ ɑ: «L i tie k ɑ tie Yennu Bijɑ i e, fɑn yet tɑnɑ nɑ k lin kpɑnt pɑɑnu.» K Yiesu jiin k yet’ɔ ɑ: «L diɑn Yennu lolkpel kɑdɑɑɔk ni ɑ: ‹Pɑɑnu kuukuɑ pɑɑk kɑɑ te k nilɔ fo, ŋɑɑn mɑɑn nbɑ kul nyi Yennu mɔb ni nɑ pɑɑk e te k nilɔ fo.› » L puolpo k Sɑɑtɑn jii’u k sɑɑn nɑn’ɔ Yennu duo nbɑ k b yi lenŋ Selusɑɑlenm, k sɑɑ donn’ɔ Yennu jɑɑnti ŋɑsɑɑkɑk mɔpinyelk pɑɑk, ŋɑɑn yet’ɔ ɑ: «L i tie k ɑ tie Yennu Bijɑ i e, fɑn yukl mɔb nnɑ nɑ, k mɑɑn l diɑn Yennu lolkpel kɑdɑɑɔk ni ɑ: ‹U sɑɑ te k u *mɑlɑkɑɑnbɑ i guu’ɑ. B sii diɑ’ɑ nɑn b nii k ɑ tɑɑl kɑn gbiɑt tɑnn k ɑ lɑ dɑnŋ.› » K Yiesu yet’ɔ: «L biɑ yet Yennu lolkpel kɑdɑɑɔk ni ɑ: ‹Suɑ dɑɑ biki Yonmdɑɑnɔ Yennu.› » L puolpo k Sɑɑtɑn biɑ din jii’u k duo nɑn’ɔ juɑl nbɑ fɔk bonciɑnn pɑɑk k sɑɑ wɑnn’ɔ tingbounŋ nɑ yent kul kul nɑn l ŋɑnt, ŋɑɑn yet’ɔ ɑ: «L i tie k ɑ gbɑɑn k jiɑnt’n, n sɑɑ tul’ɑ yent mɑnŋ kul ɑ.» K Yiesu yet’ɔ: «Sietl nnɑ Sɑɑtɑn. L diɑn Yennu lolkpel kɑdɑɑɔk ni ɑ: ‹Nilɔ i jiɑntl Yonmdɑɑnɔ Yennu kuukuɑ e, kii biɑ kii tuun kii tien ŋuɑ kuukuɑ.› » Ŋɑnn e k Sɑɑtɑn ji din yɑɑt ŋɑɑn nyik’ɔ, k Yennu mɑlɑkɑɑnbɑ bɑɑl k tɑn cɑnt’ɔ. Yiesu nbɑ din tɑn gbɑt nɑn *Heluod suol Sɑn kuɑn’ɔ dɑnsɑlk nɑ, k u sɑɑn Gɑɑliile. Wɑɑ din bɑɑl Nɑɑsɑɑlet nɑ u din k wei lenŋ, ŋɑɑn gɑl k sɑɑn Kɑpelnɑunm duo nbɑ be mɔk-kpinŋ, Sɑɑbuulɔn nɑn Neftɑɑli tinŋ ni nɑ. Lin nbɑ nɑ din tun ɑ lin gbien *Yennu sɔkni Esɑɑyi nbɑ din pɑk lin nbɑ nɑ po e ɑ: «Sɑɑbuulɔn tinŋ nɑn Neftɑɑli tinŋ nbɑ be *Suulden kpenpuotl po, k biɑ be mɔkgbenŋl buol, nɑn Gɑɑliile tinŋ nbɑ k bin nbɑ k tie *Suifnbɑ nɑ kɑl l ni; bin nbɑ be bunbɔnn ni nɑ lɑ yentjɑɑnn; bin nbɑ kɑl kuun bunbɔnn yent ni nɑ lɑ k yentu nɑ yentl k bɑɑt’b.» L yuo mɑnŋ k Yiesu din piin k muɑntl Yennu lɑbɑmɑnn k tien niib ɑ: «Mɔn kuɑŋɑɑn mɑn k lebt binbenŋ, k mɑɑn Yennu nɑɑn pel nɑ.» Yiesu nbɑ din sonm Gɑɑliile mɔkgbenŋl kpinŋ nɑ, k u tɑn lɑ nilɔ, wun nbɑ k b yi’u Siimɔn k biɑ yi’u Piɑl nɑ, nɑn u ninjɑ Andle, k b lubn jɑnlɑɑɔnŋ mɔkgbenŋl ni, k mɑɑn b din tie jɑnsuolɑ e. K u yet’b ɑ: «Ii wɑɑ’n mɑn, k n sɑɑ te k i so niib nɑn yɑɑ so jɑni bɑnnu nbɑ.» K b set din nyik b jɑnlɑɑnt l tɑɑkpɑɑk ni ŋɑɑn wɑɑ’u. Wɑɑ din nyii lenŋ k sɑɑn tuɑnn po, k u lɑ jɑb bɑnle, Sɑɑk nɑn u ninjɑ Sɑn k b tie Sebede wɑɑs. B din be bulgbetl ni nɑn b bɑɑ Sebede k ŋɑnmt b jɑnlɑɑnt k u yiin’m. L tɑɑkpɑɑk ni, k b nyik bulgbetl nɑ nɑn b bɑɑ, ŋɑɑn wɑɑ Yiesu. Yiesu din lin Gɑɑliile tinŋ mɑnŋ kul ɑ po, k tumi niib, Suifnbɑ jɑɑnti diet ni, k muɑntl Yennu nɑɑn lɑbɑmɑnn k tien’m, k te k bin nbɑ mɔk yiɑlbuoli buoli kul nɑn bin nbɑ mɔk gbɑnɑntont kul pɑɑkt. K niib din lin k muɑnt u sɑnn Siili tinŋ ni kul ɑ po. K b din jikt bɑɑtbuoli buoli kul ɑ, k bɑɑt nɑn’m u buol ni: bin nbɑ din yiɑl yiɑlbuolu nbɑ kul, gbɑnɑntont, bin nbɑ din gbie nɑn nɑlnbiit, bin nbɑ din bɑɑ gbitgbiɑ, nɑn gbɑnɑnkpienɑ dɑnm, k u din te k b pɑɑk. K nibulciɑɔnŋ nbɑ din nyii Gɑɑliile, nɑn Doi-piik cinciɑɔnŋ, nɑn Selusɑɑlenm, nɑn Suude, nɑn *Suulden kpenpuotl din bit k wɑɑ’u. Yiesu nbɑ din lɑ nibulciɑɔnŋ mɑnŋ nɑ, k u duo juɑl pɑɑk k sɑɑ kɑl, k u *puolpoweitieb lɑkn u buol ni. K u yɑɑt u mɔb k piin k tumi’b k yien ɑ: «Bin nbɑ mi b mɔnŋ nɑn b nɑmi, pɑlpienn tie b yɑl e, k mɑɑn Yennu nɑɑn tie b yɑl e. Bin nbɑ mɔ k fɑbn, pɑlpienn tie b yɑl e, k mɑɑn Yennu sɑɑ mɑɑn b pɑlɑ wɑɑ. Bin nbɑ sikn b mɔnŋ, pɑlpienn tie b yɑl e, k mɑɑn ŋɑnm e tɑn sii yen tingbounŋ nɑ. Bin nbɑ yɑɑ ninbinɑ mɔn ɑ bii be binbenŋ nbɑ gbuot Yennu nunm nɑ ni pɑlpienn tie b yɑl e, k mɑɑn Yennu sɑɑ gbuo’m ɑ. Bin nbɑ tiin b lieb ninbɑɑɔk nɑ, pɑlpienn tie b yɑl e, k mɑɑn ŋɑnm e k Yennu mun biɑ sɑɑ tin’m ninbɑɑɔk. Bin nbɑ yɑɑ pɑlɑ ni yien, pɑlpienn tie b yɑl e, k mɑɑn ŋɑnm e sɑɑ lɑ Yennu. Bin nbɑ tie sɑndɑntinnɑ nɑn kunkɔnpɑt-tieb, pɑlpienn tie b yɑl e, k mɑɑn ŋɑnm e k Yennu sɑɑ yii’m u wɑɑs. Bin nbɑ k b muks’b bɑɑ tuun Yennu lonm nɑ pɑɑk, pɑlpienn tie b yɑl e, k mɑɑn Yennu nɑɑn tie b yɑl e.» «Niib i suki’i k muks’i, k fɑ fɑɑk buoli buoli kul k biil’i, k mɑɑn yɑɑ tie n puolpoweitieb nɑ pɑɑk, pɑlpienn tie i yɑl e. Ii mɔk pɑlpienn mɑn bonciɑnn, k i pɑlɑ ii mɑn, k mɑɑn i nyuɑt tɑn sii yɑb *Yendɔunŋ ni. Nnɑ e k b ponŋ din muks *Yennu sɔkniinbɑ nbɑ din be yɑɑyuo ni nɑ.» «I tie nɑn yɑɑln nɑ e tingbounŋ nɑ ni. Yɑɑln i tɑnŋ i biil k ji k mɑn, nlee k b biɑ sɑɑ fit mɑnŋ’ɔ ɑ? L ji kɑɑ nyuɑt. Sie k b kpɑɑl k yɑl nɑn-yel po k niib sonm l pɑɑk. «Yinm e tie tingbounŋ nɑ yentu. Duo nbɑ k b mɑɑ k senn kunkonn pɑɑk, l kɑn fit bɔl. Suɑ mun k jokt fitl ŋɑɑn jikt bokt k cibnt l pɑɑk. Sie k u jii’l k tuɑn bonsiɑl nbɑ fɔk nɑ pɑɑk, k lin tul ŋɑɑk niib kul ɑ yentu. Yinm mun, ii be nnɑ. Ŋɑɑnt k i yentu n yent tul nifosɑɑli, ɑ bii lɑɑt i tuonŋɑnɑ kii dont i Bɑɑ nbɑ be Yendɔunŋ ni nɑ.» «I dɑɑ duki nɑn n bɑɑl mɑɑ n tɑn piin Yennu *senni nɑn u sɔkniinbɑ mɑɑn nɑ kɑɑ. N k bɑɑl mɑɑ n tɑn kpien’n kɑɑ, ŋɑɑn n bɑɑl mɑɑ n sɑk’l nɑn bɑlmɔni e. Bɑlmɔni e k n yien’i nɑ, sɑnpɑɑk nɑn tinŋ nɑ tɑn sɑɑ bot, ŋɑɑn Yennu senni kɑn mi bot nɑn bonmintk nnɑ wɑɑ, sie k l kul ɑ tɑn tun k gbenn. L pɑɑk, wun nbɑ tɑn tun k kpet Yennu senni mɑnŋ yenn kuɑ, k biɑ wɑnn lieb bonkpetl mɑnŋ, u tɑn sɑɑ juont tɑlk e Yennu nɑɑn ni, ŋɑɑn wun nbɑ wɑɑ senni mɑnŋ fɑnu, k biɑ wɑnt u lieb fɑnu, ŋuɑ e tɑn sii tie nijɑɑnn Yennu nɑɑn ni. K mɑɑn min yien’i nɑn sie k i tuun Yennu nbɑ luon bɑnnu nbɑ k cie *senniwɑntieb nɑn Fɑɑliisiɑnnbɑ yɑl, l i kii tie nnɑ i kɑɑ, i kɑn mi k kuɑ Yennu nɑɑn ni.» «I ponŋ gbɑt k b din yien yɑɑyuo ni niib ɑ: ‹Dɑɑ kpi nilɔ, k mɑɑn wun nbɑ tɑn kpii nilɔ tɑn sii be mɑɑn ni,› ŋɑɑn min ŋɑnin yien’i e lɑɑ, wun nbɑ dont wutuol u nɑɑ bik pɑɑk, u tɑn sii be mɑɑn ni, k wun nbɑ sukl u nɑɑ bik ɑ: ‹Bon-yɑnn nɑ,› u tɑn sii be mɑɑn ni, k wun nbɑ mun biɑ sukl u nɑɑ bik ɑ: ‹Bonjɑtl nɑ,› u tɑn sii be mɑɑn ni k kuɑ muu nbɑ kɑn mi kpien nɑ ni. L pɑɑk, wun nbɑ tɑn kuɑ Yennu jɑɑnti ŋɑsɑɑkɑk ni ɑ wun pi Yennu piini binbintl buol, ŋɑɑn tiɑl nɑn u mɔk biit nɑn u nɑɑ bik, wun nyik u piini mɑnŋ lenŋ, ŋɑɑn ŋmɑt sɑɑn u nɑɑ bik nɑ buol k bin sɑɑ ŋɑnm b mɑɑn k gbenn ɑ, k wun jen k tɑn pi u piini mɑnŋ k tul Yennu. «Fin nɑn suɑ i mɔk mɑɑn, k sɑɑ mɑɑn mɑnŋ buut, fɑn ŋɑɑn k yin tɑɑn mɔyenm kuɑ k ŋɑnm i mɑɑn mɑnŋ yuo nbɑ k i dɑɑ be sɔnu ni nɑ. L i kii tie nnɑ i kɑɑ, dɑɑnɔ nɑ sɑɑ jii’ɑ k sɑɑn nɑn’ɑ bɑlbuulɔ buol ni, k bɑlbuulɔ nɑ n mun jii’ɑ k tien’ɑ dɑnsɑlguulɔ nuu ni k wun kuɑn’ɑ dɑnsɑlk. Bɑlmɔni e k n yien’ɑ nɑ, ɑ kɑn mi nyi lenŋ, sie k ɑ tɑn pɑ likli kul nbɑ k b jiɑl’ɑ, k kuuk kɑn tenn.» «I ponŋ biɑ gbiɑ k b din yien ɑ: ‹I mi k ɑ tun boncuncontuonɑ,› ŋɑɑn min ŋɑnin yien’i e, nɑn wun nbɑ got puo k u niɑɔnŋ kuɑ’u, u tun * boncuncontuonn u pɑl ni wɑɑ. L i tie k ɑ diitu po ninbinn i e te k ɑ tuun biit, fɑn kpɑkl’ɔ k lu’u bɑnfɔkl ɑ, k mɑɑn l i tie k ɑ kɔnŋ siɑl buol gbɑnɑnt, l cie nɑn k Yennu n tɑn kuɑn ɑ gbɑnɑnt kul muu nbɑ kɑn mi kpien nɑ ni. L i tie k ɑ niidiitu e te k ɑ tuun biit, fɑn pot’ɔ k lu’u bɑnfɔkl ɑ, k mɑɑn l i tie k ɑ kɔnŋ ɑ nuuyenŋ kuɑ, l cie nɑn k ɑ gbɑnɑnt kul n tɑn kuɑ muu mɑnŋ ni.» «B biɑ din yien ɑ: ‹Wun nbɑ luon k wun yet u ŋɑɑpuo, wun tul’ɔ puoyetu kɑdɑɑɔk,› ŋɑɑn min ŋɑnin yien’i e, nɑn wun nbɑ kul tɑn yet u ŋɑɑpuo, k l k tie u tun boncuncontuonn kɑɑ, ŋuɑ e te k puo mɑnŋ tun boncuncontuonn, k wun nbɑ kuɑn puo nbɑ k b yet’ɔ nɑ mun biɑ tun boncuncontuonn ɑ.» «I ponŋ biɑ gbiɑ k b din yien yɑɑyuo ni niib ɑ: ‹I mi k ɑ pol mɔb nɑn fɑɑk, ŋɑɑn l i tie k ɑ pol mɔb Yennu sɑnn ni, l ŋɑn k ɑ tun k gbenn ɑ mɔpol mɑnŋ,› ŋɑɑn min ŋɑnin yien’i e, nɑn i mi k i pol mɔb. Dɑɑ yien ɑ: ‹N pol sɑnpɑɑk,› k mɑɑn l tie Yennu nɑɑngbounŋ o. Dɑɑ yien ɑ: ‹N pol tingbounŋ,› k mɑɑn l tie Yennu tɑɑpɑnŋmɑɑtl e. A biɑ dɑɑ yien ɑ: ‹N pol Selusɑɑlenm,› k mɑɑn l tie Yɑbnt Yennu duo e. A biɑ dɑɑ yien ɑ: ‹N pol n yul,› k mɑɑn ɑ kɑn fit te k ɑ yukobuk yenn kuɑ n penn ɑmi k bɔnn, ŋɑɑn ŋɑɑnt mɑn k i jiinu i tie ‹Nnn,› ɑmi ‹Aɑi,› k mɑɑn l i tie k i pɑk siɑl k pukn lin nbɑ nɑ pɑɑk, l ji nyii Biit dɑɑnɔ mɑnŋ buol e.» «I ponŋ biɑ gbiɑ k b din yien ɑ: ‹Suɑ i kpɑkl ɑ ninbinn, fɑn mun kpɑkl u yɑl k jiin pɑnn. Suɑ i fɑɑ’ɑ k fokt ɑ nyɑnn, fɑn mun fɑɑ’u k fokt u yɑl k jiin pɑnn,› ŋɑɑn min ŋɑnin yien’i e nɑn, i dɑɑ jiint lieb pɑnɑ. Suɑ i peb’ɑ tɑnpɑk ɑ niidiitu po kpiɑnu, fɑn ŋmɑnt ɑ gɑnŋ po mun k wun peb. Suɑ i yɑɑ wun sɑɑn nɑn’ɑ buut buol k sɑɑ gɑɑl ɑ suot, fɑn sɑk k wun tont ɑ liɑtfuouk biɑk kii sɑɑ. Suɑ i miɑ’ɑ ɑ, ɑ jii u jik-kpiɑtl k sɑɑn nɑn’n kiiluomiɑtl yenn, fɑn jii k sɑɑn nɑn’n kiiluomiɑtɑ ŋɑnle. Wun nbɑ miɑl’ɑ siɑl, fɑn tul’ɔ, k wun nbɑ mun biɑ luon k ɑ kpent’ɔ siɑl, fɑn kpent’ɔ k dɑɑ miin’ɔ.» «I ponŋ biɑ gbiɑ k b din yien ɑ: ‹Ii luon *ɑ luɑ ŋɑɑn kii nɑn ɑ dɑtɑɑk,› ŋɑɑn min ŋɑnin yien’i e, nɑn ii luon i dɑtɑi mɑn, kii mei Yennu kii tien niib nbɑ muks’i nɑ. Ŋɑnn e sɑɑ te k i set kii tie i Bɑɑ nbɑ be sɑnpɑɑpo nɑ wɑɑs, k mɑɑn ŋuɑ e te k yennu do nifobiit nɑn nifoŋɑnm pɑɑk, k biɑ te k sɑɑk bɑɑ nifobiit nɑn nifoŋɑnm doi ni. L i tie k i luon bin nbɑ luon’i nɑ i e, nyɔlɑnt po e k i sɑɑ lɑ Yennu buol ni? L k tie nnɑ kɑɑ k *lɑnpogɑɑltieb mun tuun ii? K l i tie k i fuont i nɑɑ wɑɑs kuukuɑ i e, tuonŋɑnlɑnn po e k i tun k gɑl lieb i? Nnɑ kɑɑ k bin nbɑ k wɑɑ Yennu sɔnu nɑ mun tuun ii? L pɑɑk, ii tuun bonŋɑnɑ kii tien niib kul nɑn i Bɑɑ nbɑ be sɑnpɑɑpo k tuun k tien niib kul nɑ.» «I dɑɑ tuun i tuonŋɑnɑ ɑ niib n lɑ k pɑk’i, k mɑɑn ii tuun nnɑ, i kɑn lɑ nyuɑt i Bɑɑ nbɑ be sɑnpɑɑpo nɑ buol ni. «L i tie k ɑ yɑɑ ɑ tul tɑlɑs-dɑnm piini e, fɑɑ dɑɑ muɑntl nɑn kpinkpɑnni dɑnm nbɑ tuun biɑnŋ nbɑ *Suifnbɑ jɑɑnti diet ni, nɑn doi ni, ɑ niib n lɑ b tuonŋɑnɑ k pɑk’b nɑ. Bɑlmɔni e k n yien’i nɑ, b ponŋ gɑɑl b nyuɑt ɑ. Ŋɑɑn l i tie k ɑ yɑɑ ɑ pi tɑlɑs-dɑɑnɔ e, fɑn pi’u, k dɑɑ te k ɑ niigɑnŋ mi ɑ niidiitu nbɑ tuun lin nbɑ, k fɑɑ tuun lin nbɑ n biɑl wuol ni, k ɑ Bɑɑ nbɑ lɑɑt wuol ni nɑ sɑɑ pɑ’ɑ pɑɑnu ni.» «L i tie k ɑ yɑɑ ɑ miɑl Yennu, fɑɑ dɑɑ tuun nɑn kpinkpɑnni dɑnm nɑ nbɑ tuun biɑnŋ nbɑ nɑ, k mɑɑn b luon bii sie Suifnbɑ jɑɑnti diet ni e, nɑn sɔnpɑɑtɑ nbɑ be doi ni, kii mei Yennu ɑ niib i lɑɑt’b. Bɑlmɔni e k n yien’i nɑ, b ponŋ gɑɑl b nyuɑt ɑ. Ŋɑɑn l i tie k ɑ yɑɑ ɑ miɑl Yennu e, fɑn kuɑ ɑ dieok ni k luon ɑ gɑnn, ŋɑɑn miɑl ɑ Bɑɑ nbɑ be wuol ni mɑnŋ, k ɑ Bɑɑ nbɑ lɑɑt lin nbɑ k ɑ tuun wuol ni nɑ sɑɑ tul’ɑ nyuɑt. «L i tie k ɑ mei Yennu e, fɑɑ dɑɑ mɑntk mei mɔbonɑ nbɑ yɑb nɑn bin nbɑ k wɑɑ Yennu sɔnu nbɑ mei biɑnŋ nbɑ nɑ. B duki nɑn b miɑlu bonciɑnn pɑɑk e k b sɑɑ lɑ bɑɑ luon lin nbɑ. I dɑɑ tie nɑn ŋɑnm nɑ, k mɑɑn i Bɑɑ mɔnŋ ponŋ mi lin nbɑ k i luon k i dɑɑ k miɑl’ɔ. Yɑɑ tuu sii mei Yennu biɑnŋ nbɑ e nɑ: ‹T Bɑɑ nbɑ be *Yendɔunŋ ni, ɑ sɑnn n lɑ dontl, ŋɑɑnt k ɑ nɑɑn n bɑɑl, ŋɑɑnt k ɑ lonm n tien *dulnyɑ nɑ ninŋ, nɑn lɑɑ tie Yendɔunŋ ni nɑ. Tul’t mɑnn dɑɑl kul. Nyikn cɑb t biit nɑn tɑɑ mun nyikt cɑbt bin nbɑ biil’t nɑ. A dɑɑ te k tin kuɑ jɑnmi ni, ŋɑɑn nyinn’t bonbiil ni.› «L i tie k i nyikt i lieb k cɑbt’b yuo nbɑ k b biil’i nɑ, i Bɑɑ nbɑ be sɑnpɑɑpo nɑ mun sɑɑ nyik k cɑb’i wɑɑ, ŋɑɑn i kii nyikt cɑbt i lieb biit, i Bɑɑ mun kɑn nyik cɑb i biit.» «L i tie k i yɑɑ i lol mɔi e, i dɑɑ biil i nuni po nɑn kpinkpɑnni dɑnm nɑ, k mɑɑn b tuu biil b nuni po, ɑ suɑ kul n lɑ k bɑnn nɑn b lol mɔi e. Bɑlmɔni e k n yien’i nɑ, b ponŋ gɑɑl b nyuɑt ɑ. Ŋɑɑn, l i tie k ɑ lol mɔb i e, fɑn yibl ɑ nunm po k sɑɑt ɑ yut fɑnu. Lin nbɑ nɑ e sɑɑ te k lieb kɑn bɑnn nɑn ɑ lol mɔb ŋɑɑn ɑ Bɑɑ nbɑ be wuol ni nɑ kuukuɑ e sii mi, k ɑ Bɑɑ nbɑ lɑɑt lin nbɑ k ɑ tuun wuol ni nɑ sɑɑ tul’ɑ nyuɑt.» «Dɑɑ kpɑɑn mɔktuk tingbounŋ nɑ ni, siɑn nbɑ k bonŋmiŋmɑbt nɑn tintɑni sɑɑ biil, k nɑn-yukb biɑ sɑɑ kuɑ k jɑn, ŋɑɑn mɑntk kpɑɑn Yendɔunŋ ni, siɑn nbɑ k bonŋmiŋmɑbt nɑn tintɑni kɑn fit k biil, k nɑn-yukb biɑ kɑn fit kuɑ k jɑn, k mɑɑn siɑn nbɑ k ɑ mɔktuk be nɑ, ɑ dudukt mun be lenŋ e.» «A ninbinɑ e tie ɑ gbɑnɑnt fitl. L pɑɑk, ɑ ninbinɑ i ŋɑn, ɑ gbɑnɑnt kul po sii be yentu ni e, ŋɑɑn ɑ ninbinɑ i kii ŋɑn, ɑ gbɑnɑnt kul sii be bunbɔnn ni e. L pɑɑk, l i tie k yentu nbɑ be ɑ ni nɑ tɑn bɔnn, bunbɔnciɑɔnŋ i nɑ.» «Suɑ kɑn fit tun k tul yonmdɑnm bɑnle. U sii nɑn yenɔ ŋɑɑn kii luon luɑ, ɑmi u sii niɑn yenɔ e, ŋɑɑn kii jɑkn luɑ nɑ. I kɑn fit wɑɑ Yennu nɑn tingbounŋ nɑ mɔktuk biɑk. «L pɑɑk e te k n yien’i, i dɑɑ fɑbn i binbenŋ po nɑn yɑɑ sɑɑ di lin nbɑ ɑmi k nyu lin nbɑ, k biɑ dɑɑ fɑbn i gbɑnɑnt pɑɑk nɑn yɑɑ sɑɑ liɑ lin nbɑ. Mɑnfuol k gɑl jiet ii? K gbɑnɑnt mun biɑ k gɑl tiɑt ii? Gotl nuɑni nbɑ yuuk k lin nɑ. B k buul. B biɑ k jɑɑn k wu sukɑ nɑn nɑɑpɑɑt ni, ŋɑɑn k i Bɑɑ nbɑ be sɑnpɑɑpo nɑ dint’b. I k mɔk nyuɑt k gɑl nuɑni ii? I ŋmee sɑɑ fit fɔkn u mɑnfuol u dudukt nbɑ muksl’ɔ nɑ pɑɑk i? «Bee k i fɑbn i mɔnŋ liɑnt pɑɑk i? Gotl mɑn tipuuk nɑn l ŋɑnt, ŋɑɑn b k tuun siɑl k fɑnŋt b mɔnŋ, ŋɑɑn n yien’i e, kpɑnbɑl Sɑɑlomɔn nbɑ lek din mɔk tɑŋɑnt biɑnŋ nbɑ, u din k mi liɑ liɑnt k l ŋɑn nɑn tipuut nɑ. Muɑt nbɑ be dinnɑ, ŋɑɑn wonn k b juo muu wɑɑ nɑ, Yennu nbɑ fɑnŋt’l biɑnŋ nbɑ nɑ, k u kɑn lɑnn yinm ii? Yinm yɑdɑ-kɑnpuɑnɑ dɑnm nɑ. «L pɑɑk, i dɑɑ fɑbn k duki ɑ: ‹T sɑɑ di bee?› ɑmi: ‹T sɑɑ nyu bee?› ɑmi: ‹T sɑɑ liɑ bee?› Bin nbɑ k wɑɑ Yennu sɔnu nɑ bɑkɑ tuu be lin nbɑ nɑ kul ni e, ŋɑɑn i Bɑɑ nbɑ be sɑnpɑɑpo nɑ set mi nɑn i luon lin nbɑ nɑ kul ɑ. Ŋɑɑnt mɑn k i ninbinɑ i mɔn Yennu nɑɑn nɑn lin nbɑ tuok k Yennu yɑɑ yii tuun nɑ pɑɑk, k u sɑɑ jii bonɑ nbɑ nɑ kul k tul’i. L pɑɑk, dɑɑ te k wonn mɑɑn muks’i ni, k mɑɑn wonn e sɑɑ muks u mɔnŋ. Dɑɑl kul mɔk u fɑlɑ k l jɑnŋt’ɔ e.» «I dɑɑ kpɑɑn lieb biit nbɑ k i sɑɑ fit tɑɑl’b l pɑɑk, k Yennu mun dɑɑ tɑɑl’i ni, k mɑɑn yɑɑ kpɑɑn lieb biit k tɑɑl’b biɑnŋ nbɑ nɑ, nnɑ e k Yennu mun sɑɑ tɑɑl’i, k biɑnŋ nbɑ k i biki k tien i lieb nɑ, nnɑ e k Yennu mun sɑɑ bikn k tul’i. Bee k ɑ goli lɑɑt muɑnu nbɑ be *ɑ luɑ ninbinn ni, ŋɑɑn k k lɑ jɑɑntɑlk nbɑ be ɑ mɔnŋ mɔnŋ ninbinn ni nɑ? Nlee k ɑ sɑɑ yet ɑ luɑ ɑ: ‹Ŋɑɑnt k n nyinn muɑnu nbɑ be ɑ ninbinn ni nɑ,› ŋɑɑn k jɑɑntɑlk e be ɑ mɔnŋ ninbinn ni? Fin kpinkpɑnni dɑɑnɔ nɑ, nyint jɑɑntɑlk nbɑ be ɑ ninbinn ni nɑ sinsinn, k ji fit lɑ fɑnu k nyinn muɑnu nbɑ be ɑ luɑ ninbinn ni nɑ. «I dɑɑ jikt lin nbɑ tie Yennu yɑl k tien bɔi, k mɑɑn l i tie k i tun nnɑ b sɑɑ fit ŋmɑt junt’i. I dɑɑ jikt lin nbɑ mɔk nyuɑt bonciɑnn k tien duoli, k mɑɑn l i tie k i tun nnɑ b sɑɑ ŋmɑt ŋmɑt nɑn tɑnt e.» «Miɑt mɑn, k b sɑɑ tul’i. Lomin mɑn, k i sɑɑ lɑ wɑɑ. Kpɑɑn gɑnn mɑn, k b sɑɑ luot k tul’i, k mɑɑn wun nbɑ kul mei gɑɑn e, k wun nbɑ mun luon, u lɑɑt e, k wun nbɑ kpɑɑn gɑnn, k b luotl tien’ɔ. Yinm, i ŋmee k u bik sɑɑ miɑl’ɔ jiet k wun jii tɑnn k tul’ɔ? Ami ŋmee k u bik sɑɑ miɑl’ɔ jɑnŋ k wun jii wɑɑɔk k tul’ɔ? L i tie k yinm nbɑ tie biitdɑnm nɑ mi biɑnŋ nbɑ k i sɑɑ tul i wɑɑs bonŋɑnɑ, i Bɑɑ nbɑ be sɑnpɑɑpo nɑ ji kɑn tul bin nbɑ mei’ɔ nɑ bonŋɑnɑ ɑɑ? «Biɑnŋ nbɑ k ɑ luon lieb ii tuun kii tien’ɑ nɑ, ii mun ii tuun nnɑ kii tien ɑ lieb, k mɑɑn Yennu *senni nɑn u sɔkniinbɑ wɑnnu nɑ ni wɑnt nnɑ e.» «Kuɑn mɑn tɑnmɔyebk nɑ ni, k mɑɑn tɑnmɔb nbɑ kuɑ muu nbɑ kɑn mi kpien nɑ ni nɑ yɑln hei, k l sɔnu biɑ mɑn nɑn sonml, k niib bonciɑnn e kuɑ tɑnmɔb mɑnŋ ni. K mɑnfuol tɑnmɔb nɑ ŋɑnin tie bon-yebk e, k l sɔnu biɑ pɑɑl nɑn sonml, k niib wɑɑnm-nnɑ e lɑɑt.» «Ii mi mɑn fɑɑk sɔkniinbɑ nɑ po, bin nbɑ bɑɑt i buol ni k nɑɑn nɑn pei nɑ, ŋɑɑn tie kinkɑtɑ nɑn bɑlmɔni nɑ. B tuonɑ ni e k i sɑɑ bɑnn bɑɑ tie bin nbɑ. B k lɑɑt luɑnɑ nbɑ k b yi *lɑɑsen penn pɑɑk k pɔ, k biɑ k lɑɑt luɑnɑ nbɑ k b yi *fiignbɑ nɑ kunkoni pɑɑk k pɔ. Nnɑ e k tiŋɑnŋ kul luon luɑnŋɑnɑ, k tibiiuk mun luon luɑnbiit. Tiŋɑnŋ kɑn lon luɑnbiit. Tibiiuk mun biɑ kɑn lon luɑnŋɑnɑ. Tiik kul nbɑ k luon luɑnŋɑnɑ, b sɑɑ cuɑ’l e k lu’l muu ni. L pɑɑk, fɑɑk sɔkniinbɑ tuonɑ ni e k i sɑɑ bɑnn’b.» «L k tie bin nbɑ yi’n ‹Yonmdɑɑnɔ, Yonmdɑɑnɔ› nɑ kul kɑɑ tɑn sɑɑ kuɑ Yennu nɑɑn ni, sie bin nbɑ sɑk n Bɑɑ nbɑ be sɑnpɑɑpo nɑ mɔb. *Dulnyɑ cɑɑtu mɑnŋ dɑɑl i tɑnŋ i bɑɑl, niib bonciɑnn e tɑn sii yi’n k yien ɑ: ‹Yonmdɑɑnɔ, Yonmdɑɑnɔ, t din k sɔknt Yennu mɑɑn ɑ sɑnn ni ii? A sɑnn ni e k t din nyint nɑlnbiit niib ni, ɑ sɑnn ni e k t biɑ tuun bɑktnɔunŋ tuonjɑɑnɑ.› L yuo k n mun tɑn sɑɑ jiin k yet’b ɑ: ‹N k mi’i ni, yinm biitdɑnm nɑ, sietl nnɑ mɑn.› » «L pɑɑk, wun nbɑ kul gbiɑ n mɑɑn nɑ k wɑɑ’l fɑnu, n sɑɑ nɑnn’ɔ nɑn yɑndɑɑnsuɑ nbɑ din mɑɑ u ŋɑɑk tɑnpiiuk pɑɑk nɑ e, k sɑɑk tɑn bɑɑ, k nyun gbie k yɑt nɑn duo, k wounŋ dɑ k tut ŋɑɑk mɑnŋ dikpinɑ, ŋɑɑn k l lek sie kenken k k bɑɑ, k mɑɑn u din mɑɑ’l tɑnpiiuk pɑɑk e. «Wun nbɑ kul gbiɑ n mɑɑn nɑ, ŋɑɑn yet l weiu, nɑɑn nɑn jɑjɑtsuɑ nbɑ din mɑɑ u ŋɑɑk tɑnbiini ni nɑ e, k sɑɑk tɑn bɑɑ, k nyun gbie k yɑt nɑn duo, k wounŋ dɑ tut ŋɑɑk mɑnŋ dikpinɑ, k l kul bet bɑɑ, k nɑn siɑl ɑ k tenn.» Yiesu nbɑ din pɑk mɔbonɑ nɑ k gbenn yuo nbɑ, k u wɑnnu mɑnŋ din bɑkt nibul nɑ bonciɑnn, k mɑɑn u din wɑnt’b nɑn minu e, k k wɑnt’b nɑn *senniwɑntieb nbɑ wɑnt’b biɑnŋ nbɑ nɑ. Yiesu nbɑ din tɑn nyii juɑl mɑnŋ pɑɑk k sik yuo nbɑ, k niib bonciɑnn wɑɑ u puolpo. K gbɑɑtsuɑ bɑɑl k tɑn gbɑɑn u tuɑnn k yien ɑ: «Yonmdɑɑnɔ, l i tie k ɑ luon, ɑ sɑɑ fit k te k n ŋɑɑɔk nɑ n gbenn.» K Yiesu tɑnt u nuu ŋɑɑn sii’u k yet’ɔ ɑ: «N luon. A ŋɑɑɔk mɑnŋ n gbenn.» L tɑɑkpɑɑk ni k u ŋɑɑɔk nɑ set gbenn. K Yiesu yet’ɔ ɑ: «Ii mi k ɑ yet suɑ mɑɑn nɑ, ŋɑɑn i sɑɑ Yennu mɑnntuɑ buol k jii ɑ mɔnŋ k wɑnn’ɔ, k biɑ mɑnn *mɑlunŋ k tul Yennu nɑn Muois nbɑ din senn bɑnnu nbɑ, ɑ suɑ kul n bɑnn nɑn ɑ ŋɑɑɔk mɑnŋ set gbenn ɑ.» Yiesu nbɑ din kuɑ Kɑpelnɑunm yuo nbɑ k Luonm tinŋ sejenm yudɑɑnsuɑ cet’ɔ sɔnu ni, k bɑln’mɔ k yien ɑ: «Yonmdɑɑnɔ, n tuontunsuɑ e yiɑl. U gbɑnɑnt kpo wɑɑ, k l muks’ɔ bonciɑnn, k u duɑ dieok ni.» K Yiesu yet’ɔ ɑ: «N sɑɑ sɑɑn k sɑɑ te wun pɑɑk.» K u jiin ɑ: «Yonmdɑɑnɔ, n k ŋɑn nɑn fɑn bɑɑl kuɑ n ŋɑɑk ni, ŋɑɑn pɑkn mɔbonn e, k n tuontunnɔ nɑ n lɑ lɑɑfiɑ. K mɑɑn n mɔk bin nbɑ gɑl’n k yen’n, k n mun diɑ sejenm k yen’m, k fit yien yenɔ ɑ: ‹Ii sɑɑ,› k u sɑɑ, k yien luɑ ɑ: ‹Bɑɑt,› k u bɑɑt, k biɑ yien n tuontunnɔ ɑ: ‹Tient nnɑ, k u tie.› » Yiesu nbɑ din gbɑt lin nbɑ nɑ, k l yɑɑl ŋɑɑn lit’ɔ, k u jiɑnt got niib nbɑ wɑɑ u puolpo nɑ k yet’b ɑ: «Bɑlmɔni e k n yien’i nɑ, n dɑɑ k mi lɑ yɑdɑ nɑ buolu suɑ buol nɑn Islɑɑeltieb sinsuuk ni wɑɑ. N yien’i e, niib bonciɑnn tɑn sɑɑ nyi yendopo nɑn yenbɑɑpo, k ŋɑnm nɑn Ablɑɑhɑɑnm, nɑn Isɑɑk, nɑn Sɑɑkɔb tɑn sɑɑ lɑkn k kɑl k di jɑɑnm Yennu nɑɑn ni, ŋɑɑn bin nbɑ k tie nɑɑn mɑnŋ ni niib nɑ, b tɑn sɑɑ jii’b k lu’b nɑn-yel po, bunbɔnn ni. Lenŋ mɑnŋ e k niib tɑn sii fɑbn mɔ k nyiitl nyɑnɑ.» K Yiesu din ŋmɑnt k yet sejenm yudɑɑnɔ mɑnŋ ɑ: «Ii kun. Fɑɑ tien yɑdɑ biɑnŋ nbɑ nɑ, l sɑɑ tun nnɑ e k tul’ɑ.» K u tuontunnɔ nɑ set din pɑɑk l yuo nɑ. Tɔn, k Yiesu din sɑɑn kuɑ Piɑl ŋɑɑk ni k lɑ k Piɑl diɑnpuok duɑ yiɑl gbɑnɑntounŋ. K Yiesu sii u nuu, k u gbɑnɑntounŋ nɑ gbenn, k u fiil k tien’ɔ sɑɑɔnŋ. L dɑɑl mɑnŋ dɑɑjuouk, k b din jii niib bonciɑnn nbɑ k nɑlnbiit be b ni nɑ, k bɑɑl nɑn’m Yiesu buol ni, k u lek pɑk mɑɑn k nɑlnbiit nɑ nyii, k biɑ tul bin nbɑ yiɑl nɑ kul ɑ lɑɑfiɑ. U din tun lin nbɑ nɑ ɑ *Yennu sɔkni Esɑɑyi nbɑ din pɑk nɑ n gbien ɑ: «U mɔnŋ mɔnŋ gɑɑl t gbɑnɑntounŋ nɑn t yiɑlbuolu buolu k jii yɑɑt.» Yiesu nbɑ din lɑ k nibulciɑɔnŋ tɑn lint’ɔ yuo nbɑ, k u yet u *puolpoweitieb ɑ bin fiil k bin puot mɔkgbenŋl puotl nɑ po. K Yennu *senniwɑntɔsuɑ din bɑɑl k tɑn yet’ɔ ɑ: «Wɑntuɑ, n sɑɑ wei’ɑ siɑn nbɑ kul po k ɑ sɑɑ.» K Yiesu yet’ɔ ɑ: «Lunlonɑ mɔk fɔli, k nuɑni mun biɑ mɔk tiɑt, ŋɑɑn *Nisɑɑlk Bijɑ k mɔk dinduɑlbuol.» Tɔn, k u puolpoweitieb yenɔ mun tɑn yet’ɔ ɑ: «Yonmdɑɑnɔ, ŋɑɑnt k n sɑɑn k sɑɑ pii n bɑɑ sinsinn ɑ.» K Yiesu jiin yet’ɔ ɑ: «Ii wɑɑ’n, ŋɑɑn nyik k kpienm ii pii b kpienlieb.» Yiesu nbɑ din kuɑ bulgbetl ni yuo nbɑ, k u puolpoweitieb mun wei k kuɑ. K wonpɑɑluk din fikt k dɑ mɔkgbenŋl mɑnŋ ni, k nyunpɑnɑ din pil k kuɑ bulgbetl nɑ ni k tɑn yɑɑ lin gbie, ŋɑɑn k Yiesu duɑ k guɑnt. K u puolpoweitieb din bɑɑl k fiin’ɔ, k yet’ɔ ɑ: «Yonmdɑɑnɔ, fiel’t. T sɑɑ kpo wɑɑ.» K Yiesu yet’b ɑ: «Yinm yɑdɑ-kɑnpuɑnɑ dɑnm, bee k i tiin jɑŋmɑɑni?» ŋɑɑn fiil k tiɑn wounŋ nɑn nyunpɑnɑ nɑ pɑɑk ɑ bin ŋmin, k b set ŋmin suon nnɑ. K l yɑɑl ŋɑɑn lit’b, k b ji boi b lieb ɑ: «Nilɔ nɑ tie nibuol bee? K wounŋ nɑn nyunpɑnɑ set sɑɑk u mɔb i?» Yiesu nbɑ din puot Gɑɑliile mɔkgbenŋl nɑ, k u kuɑ Gɑɑdɑɑlenn tinŋ ni. K jɑb bɑnle nbɑ gbie nɑn nɑlnbiit nɑ din nyii kɑɑt ni k cet’ɔ. B din mɔk jɑŋmɑɑni hei, k suɑ k fit gɑɑl bɑɑ be siɑn. K b din yikn sɑnpɑɑpo wɑɑ k yien ɑ: «Fin Yennu Bijɑ, tinm nɑn fin, nlee mɑntk i? A bɑɑl nnɑ ɑ ɑ tɑn din’t fɑlɑ e, ŋɑɑn k l yuo nɑ dɑɑ k bɑɑl ii?» Tɔn, k duoli bonciɑnn din sie kpinŋ po nnɑ wɑɑ, k di, k k fɔk nɑn’m. K nɑlnbiit mɑnŋ din bɑln Yiesu bonciɑnn k yet’ɔ ɑ: «L i tie k ɑ nyinn’t i e, fɑn tun’t k tin sɑɑn k sɑɑ kuɑ duoli nɑ ni.» K Yiesu yet’b ɑ: «Ii sɑɑ mɑn.» K b nyii jɑb mɑnŋ ni, k sɑɑn k sɑɑ kuɑ duoli nɑ ni, k duoli nɑ kul din tin billl, k sik juɑl nɑ pɑɑk k sɑɑ bɑɑ mɔkgbenŋl nɑ ni k dii nyun. K bin nbɑ guu duoli mɑnŋ fiil k ciɑl k sɑɑn duo ni, k sɑɑ muɑnt lin nbɑ kul tien mɑnŋ, nɑn biɑnŋ nbɑ k nɑlnbiit nyii wɑɑtb nɑ ni. K duo nɑ niib kul ɑ din bit k sɑɑn k sɑɑ tuok Yiesu. Bɑɑ din lɑ’u yuo nbɑ, k b piin k bɑln’mɔ ɑ wun nyi b tinŋ ni. Ŋɑnn e k Yiesu din ŋmɑt kuɑ bulgbetl nɑ ni, k puot mɔkgbenŋl nɑ gbingbɑnliel k kun u duo ni. K nisiɑb din tɑn jii jɑsuɑ nnɑ k u gbɑnɑnt kpo, k b din tien’ɔ liɑnŋ pɑɑk k bɑɑl nɑn’ɔ Yiesu buol ni. Yiesu nbɑ din lɑ bɑɑ tien’ɔ yɑdɑ biɑnŋ nbɑ nɑ, k u yet bɑɑtɔ nɑ ɑ: «N bik, ii mɔk pɑlcienn. N nyik cɑb ɑ biit ɑ.» K *senniwɑntesiɑb ji din duki b pɑlɑ ni ɑ: «Juɑ nɑ piɑk k biil Yennu e.» Yiesu ŋɑnin din bɑnn b dudukt mɑnŋ ɑ, k boi’b ɑ: «Bee tien k i duki dudukbiit i pɑlɑ ni? Mɑɑ yet bɑɑtɔ nɑ ɑ: ‹N nyik cɑb ɑ biit› ɑmi mɑɑ yɑɑ n yet’ɔ ɑ: ‹Fiit kii sonm nɑ,› mɑɑn munle nɑ sinsuuk ni lɑnn po e pɑɑl i? N ji sɑɑ wɑnn’i nɑn *Nisɑɑlk Bijɑ mɔk yiikuo tingbounŋ nɑ ni, k sɑɑ nyik cɑb niib b biit,» ŋɑɑn jiɑnt yet juɑ nbɑ k u gbɑnɑnt kpo nɑ ɑ: «Fiit k jii ɑ liɑnŋ kii kun ɑ ŋɑɑk ni.» K juɑ mɑnŋ fiil k kun. Nibul nɑ nbɑ din lɑ nnɑ mɑnŋ k jɑŋmɑɑni suol’b, k b piɑk dont Yennu nbɑ tul nisɑɑlk yiikuo nɑ buolu. K Yiesu din nyii lenŋ k sɑɑ, k sɑɑ lɑ jɑsuɑ nnɑ, k b yi’u Mɑɑtieo, k u kɑl u tuonn pɑɑk lɑnpogɑɑldieok ni, k Yiesu yet’ɔ ɑ: «Fiit kii wɑɑ’n.» K u fiil k wɑɑ’u. Yiesu nbɑ din sɑɑn Mɑɑtieo nɑ ŋɑɑk k sɑɑ kɑl k di jiet yuo nbɑ nɑ, k *lɑnpogɑɑltieb nɑn biitdɑnm bonciɑnn din kuɑ k tɑn kɑl pukn Yiesu nɑn u *puolpoweitieb po k di nɑn’m. Fɑɑliisiɑnnbɑ nɑ nbɑ din lɑ nnɑ mɑnŋ, k b boi u puolpoweitieb nɑ ɑ: «Bee k i wɑntuɑ mɑnŋ di jiet nɑn lɑnpogɑɑltieb nɑn biitdɑnm i?» K Yiesu din gbɑt b pinpɑɔk mɑnŋ k yet’b ɑ: «Bin nbɑ mɔk lɑɑfiɑ k luon tebtuɑ. Bin nbɑ yiɑl, ŋɑnm e luon tebtuɑ. Ii sɑɑ mɑn k sɑɑ tumi bɑnn lin nbɑ diɑn Yennu mɑɑn ni ɑ: ‹Min, Yennu, n luon ninbɑtinu e k gɑl *mɑlunŋ.› K mɑɑn min, Yiesu, n k bɑɑl ɑ n yiin niŋɑnm kɑɑ, ŋɑɑn n bɑɑl ɑ n yiin biitdɑnm e.» Tɔn, k Sɑn puolpoweitieb din tɑn bɑɑl Yiesu buol ni k boi’ɔ ɑ: «Tinm nɑn Fɑɑliisiɑnnbɑ loln mɔi yuo kul ɑ. Bee tien k ɑ puolpoweitieb k loln i?» K Yiesu din jiin k boi’b ɑ: «Puociɑnu i be, sɑɑnm sii mɔk pɑlbiil yuo nbɑ k puoyuokl sɔlɔ dɑɑ be b buol ni nɑ wɑɑ ɑɑ? Aɑi. Ŋɑɑn yuo bɑɑt, k b tɑn sɑɑ nyinn puoyuokl sɔlɔ nɑ b buol. L yuo e k b sɑɑ lol mɔi. «Suɑ kɑn jii cɑbpɑɑnn k lik tɑkpel. L i tie k u tien nnɑ i e, cɑbpɑɑnn nɑ sɑɑ pɑt tɑkpel nɑ e, k l pɑtmin nɑ n ŋɑnm pukn. Suɑ biɑ kɑn sɑk liɑk dɑpɑɑnin dɑlenkpel ni. Wun nbɑ tun nnɑ, dɑpɑɑnin nɑ i tɑnŋ i mɔ, l sɑɑ put dɑlenkpel nɑ e k biil, k dɑɑn n muɑn, ŋɑɑn b tuu jii dɑpɑɑnin k liɑk linlenpɑɑnn ni e, ɑ l kul dɑɑ biil.» Yiesu nbɑ din dɑɑ piɑk nɑn Sɑn puolpoweitieb nɑ, k yudɑɑnsuɑ nnɑ bɑɑl k tɑn gbɑɑn u tuɑnn po, k yet’ɔ ɑ: «N bipoyenml e kpo mɔtɑɑ mɔtɑɑnɑ. Bɑɑt nɑ k tɑn jii ɑ nuu k yii u pɑɑk, k wun lɑ mɑnfuol.» K Yiesu din fiil k jii u puolpoweitieb pukn u mɔnŋ pɑɑk, k b wei’ɔ k sɑɑn. Puosuɑ nnɑ mun din be lenŋ, k siik fɑbounŋ k tɑn jɑnŋ binɑ piik nɑn ŋɑnle, k u din tɑn bɑɑl lint Yiesu puolpo k sɑɑ sii u liɑtfuouk mɔgbɑnn, k mɑɑn u ponŋ din dukn u pɑl ni e wɑɑ ɑ: «Mi i lek i sii u liɑtfuouk, n sɑɑ lɑ lɑɑfiɑ wɑɑ.» K Yiesu din jiɑnt k lɑ puo nɑ, k yet’ɔ ɑ: «N niipuo, ii mɔk pɑlcienn. A yɑdɑ nɑ pɑɑk e te k ɑ lɑ lɑɑfiɑ.» L tɑɑkpɑɑk ni, k u set lɑ lɑɑfiɑ. Yiesu nbɑ din sɑɑ bɑɑl yudɑɑnɔ mɑnŋ ŋɑɑk ni yuo nbɑ, k u lɑ yelpeblɑ pieb yeli, k nibulciɑɔnŋ biɑ bui kumɔni k fɑbn. K u yet’b ɑ: «Ii nyi mɑn. Bonpobik nɑ k kpo kɑɑ, ŋɑɑn u guɑnt e.» Ŋɑɑn k b lɑɑ’u. Bɑɑ bel niib mɑnŋ k nyinn’b nɑ, k Yiesu kuɑ k suol bonpobik nɑ nuu, k u yient k fiil. K niib din muɑnt l lɑbɑɑl tinŋ mɑnŋ ni kul po. Yiesu nbɑ din nyii lenŋ k gɑɑl sɑɑ tuɑnn po nɑ, k jɑb nnɑ bɑnle din tie juɑni k wɑɑ u puolpo, k yikn k yien ɑ: «Fin * Dɑɑfiid yɑɑbuonn, tin’t ninbɑɑɔk.» Yiesu nbɑ din sɑɑn k sɑɑ kuɑ ŋɑsiɑk nnɑ ni yuo nbɑ, k juɑni nɑ bɑɑl k kuɑ lenŋ. Ŋɑnn e k u boi’b ɑ: «I tien yɑdɑ nɑn n sɑɑ fit k teb’i wɑɑ?» K b jiin ɑ: «Yonmdɑɑnɔ, nnn.» Ŋɑnn e k u jii u nuu k sii b ninbinɑ, ŋɑɑn yet’b ɑ: «Yɑɑ tien yɑdɑ biɑnŋ nbɑ nɑ, lin tun nnɑ e k tul’i.» K b ninbinɑ mɑnŋ nyuɑnt. K Yiesu din yet’b nɑn ninmɔnn ɑ bii mi k bin yet suɑ l po. Ŋɑɑn k b din nyii k sɑɑ muɑnt u lɑbɑɑl tinŋ mɑnŋ ni kul ɑ. Niib bɑnle nbɑ k Yiesu nyuɑnt b ninbinɑ nɑ nbɑ din fiil k nyi yuo nbɑ, k siɑb mun din bɑɑl nɑn jɑsuɑ wun nbɑ k nɑlnbimuuk be u ni nɑ, Yiesu buol ni. K Yiesu din nyinn nɑlnbimuuk nɑ juɑ nɑ ni, k u ji fit piin k piɑk l yuo. L din yɑɑl ŋɑɑn lit nibulciɑɔnŋ mɑnŋ, k b ji yien ɑ: «T dɑɑ k mi lɑ bonbuolu nɑ Islɑɑel tinŋ ni nɑ.» Ŋɑɑn k Fɑɑliisiɑnnbɑ din dɑɑn nyɑtuk ɑ: «Nɑlnbiit bɑt e tien’ɔ yiikuo ɑ wuu nyint nɑlnbiit niib ni.» Tɔn, k Yiesu din kɑk lin doi kul ni nɑn digbɑnbis ni, k kuɑ *Suifnbɑ jɑɑnti diet ni, k muɑntl Yennu nɑɑn lɑbɑmɑnn k tumi niib, k te k bin nbɑ yiɑl yiɑlbuoli buoli nɑn bin nbɑ mɔk gbɑnɑntont kul pɑɑkt. Wɑɑ din tɑn lɑ nibulciɑɔnŋ mɑnŋ nɑ k ninbɑɑɔk suol’ɔ, k mɑɑn b din bɑk e k b yɑn ŋmɑt k b kɑɑ somsiɑl, k nɑɑn nɑn pei nbɑ kɑɑ pekpɑɑlk nɑ. Ŋɑnn e k u din yet u puolpoweitieb ɑ: «Dii nɑ biel k biɑ yɑb ɑ, ŋɑɑn k dijɑɑntieb wɑɑl. L pɑɑk, ii mei mɑn dii mɑnŋ dɑɑnɔ k wun ŋɑnm pukn dijɑɑntieb k te k bin sɑɑn jɑɑn u dii mɑnŋ.» K Yiesu din tɑn yiin u tuomiinbɑ *piik nɑn bɑnle nɑ, k tɑn cɑb’b yiikuo ɑ bii nyint nɑlnbiit niib ni, k biɑ te k bin nbɑ yiɑl yiɑlbuoli buoli kul nɑn bin nbɑ mɔk gbɑnɑntont kul n pɑɑk. U tuomiinbɑ piik nɑn bɑnle mɑnŋ sɑnɑ e nɑ. Sinsinn pɑɑk Siimɔn, wun nbɑ yɑɑ sɑnn biɑ din yi Piɑl nɑ nɑn u ninjɑ Andle nɑn Sɑɑk nɑn u ninjɑ Sɑn, bin nbɑ din tie Sebede wɑɑs nɑ nɑn Fiiliip nɑn Bɑɑltelemi nɑn Tuomɑ, nɑn Mɑɑtieo wun nbɑ din tie *lɑnpogɑɑltuɑ nɑ, nɑn Sɑɑk wun nbɑ din tie Alfe bijɑ nɑ, nɑn Tɑɑde nɑn Siimɔn wun nbɑ din luon ŋɑnm *Suifnbɑ i yen b mɔnŋ nɑ, nɑn Suudɑ Iskɑɑliɑɔt wun nbɑ din tɑn nyii Yiesu puol nɑ. K Yiesu din tun u tuomiinbɑ piik nɑn bɑnle mɑnŋ, k kpɑɑn’m k yet ɑ: «I dɑɑ sɑɑ bin nbɑ k tie Islɑɑeltieb nɑ buol ni, k biɑ dɑɑ kuɑ *Sɑɑmɑɑliitieb doi ni, ŋɑɑn ii sɑɑ Islɑɑeltieb nbɑ tie nɑn pei nbɑ bot nɑ buol ni kuukuɑ e. Yɑɑ sɑɑ nɑ, ii muɑntl ɑ: ‹Yennu nɑɑn pel nɑ.› Ii te k bɑɑtb n pɑɑk, kii fiint kpienm, k biɑ te k gbɑɑtɑ ŋɑɑt n gbenn, kii biɑ kii nyint nɑlnbiit niib ni. I gɑɑl tebu yiikuo mɑnŋ yɑnn e, ii mun i biɑ kii tieb k dɑɑ gɑɑn likli. I dɑɑ jikt likli. Ii mi mɑn k yin jii kuuk k tien i likbuɑli ni. I dɑɑ jikt pɑkɑ k sɑɑ i sɔnu mɑnŋ, ɑmi liɑtfɔkt ŋɑnlele, ɑmi k jii tɑɑsɑɑliet k pukn, ɑmi kii diɑ pɑti, k mɑɑn l ŋɑn k tuontunnɔ n di u tuonɑ ni. «Digbɑngbenŋɑ ɑmi digbɑnbis nbɑ yɑɑ ni k i sɑɑ kuɑ, yin boi k lɑ nibulcimɔ ŋɑɑk ɑ, k kuɑ kii be lenŋ nɑn i fiilu dɑɑl. K yuo nbɑ k i yɑɑ i kuɑ ŋɑɑk nbɑ ni, yin fuont ŋɑɑk mɑnŋ ni tieb fɑnu. Ŋɑɑk mɑnŋ tieb i tie nibulcinm, i mɑnu n biɑl ŋɑɑk mɑnŋ tieb pɑɑk, ŋɑɑn nibulcinm i kɑɑ lenŋ, i mɑnu mɑnŋ biɑ sɑɑ jen i pɑɑk nɑ. Wun nbɑ sɑɑ yet i gɑɑlu k biɑ yet wun gbɑt i mɑɑn, yuo nbɑ k i nyii ŋɑɑk mɑnŋ ni ɑmi duo mɑnŋ ni, yin pit pit i tɑɑpɑnt ni tɑnt k lu. Bɑlmɔni e k n yien’i nɑ, dɑɑl nbɑ k Yennu tɑn sɑɑ bu niib buut nɑ, duo mɑnŋ niib tubdɑtu tɑn sɑɑ gɑl Suodonm tieb nɑn Guomuɔl tieb yɑl ɑ.» «Gotl mɑn, n tuun’i k i sii tie nɑn pei nbɑ be kinkɑtɑ sinsuuk ni nɑ e. Ii cek mɑn nɑn wɑɑlɑbli nɑ, ŋɑɑn kii be suon nnɑ nɑn ŋmɑnɑ nɑ. Ii mi mɑn niib po, k mɑɑn b tɑn sɑɑ suol’i sɑɑn nɑn’i bɑlbutieb buol ni, k biɑ buo’i lɑnbɑnɑ Suifnbɑ jɑɑnti diet ni. B tɑn sɑɑ sɑɑn nɑn’i tinŋ yudɑnm nɑn kpɑnbɑlɑ buol ni, yɑɑ wɑɑ’n nɑ pɑɑk, i sii tie n siɑlɑɑdɑnm k tul ŋɑnm nɑn bin nbɑ k tie Suifnbɑ nɑ. Ŋɑɑn b i tɑnŋ i sɑɑn nɑn’i buut dɑnm buol, i dɑɑ fɑbn yɑɑ sɑɑ pɑk biɑnŋ nbɑ ɑmi yɑɑ sɑɑ pɑk lin nbɑ yɑɑ pɑɑk. L yuo nɑ e k i sɑɑ lɑ mɔbonɑ nbɑ k i sɑɑ pɑk k jiin’m, k mɑɑn l k tie yinm kɑɑ tɑn sɑɑ pɑk, Bɑɑ Siek e tɑn sii be i ni k piɑk. «L yuo mɑnŋ, nilɔ tuu tɑn sɑɑ kuɑt u mɔnŋ mɔnŋ ninjɑ k bin kpi’u, k bɑɑnbɑ mun tɑn sɑɑ kuɑt b wɑɑs k bin kpi’b, k wɑɑs mun biɑ tɑn sɑɑ kɔn nɑn b dɑnm k cɑb’b nɑn kuun. K suɑ kul tɑn sii nɑn’i k mɑɑn yɑɑ wɑɑ’n nɑ pɑɑk, ŋɑɑn wun nbɑ tɑn gubn nɑn fɑlɑ yuo nɑ juontu tɑn sɑɑ lɑ fielu wɑɑ. B i tɑnŋ i muks’i digbɑn-yenn ni, yin nyi lenŋ k luɑl digbɑnliel ni. Bɑlmɔni e k n yien’i nɑ, i dɑɑ kɑn fit k lin k gbenn Suifnbɑ digbɑnɑ kul, k suɑ *Nisɑɑlk Bijɑ ponŋ jen ɑ. «Tɔn, wun nbɑ siɑn k cie u tumiituɑ. Tuontunnɔ mun biɑ k cie u Yonmdɑɑnɔ. L jɑnŋ nɑn wun nbɑ siɑn binbenŋ ii tie nɑn u wɑntuɑ binbenŋ nɑ, k tuontunnɔ binbenŋ ii mun ii tie nɑn u Yonmdɑɑnɔ binbenŋ nɑ. B i tɑnŋ i pul ŋɑɑdɑɑnɔ Beelsebuul, nlee k b ji sii yi u ŋɑɑtieb i?» «I dɑɑ tiin niib jɑŋmɑɑni, siɑl kɑɑ k be wuol ni k tɑn kɑn wuot k nyi pɑɑnu ni, ɑmi k bɔl k tɑn kɑn nyi pɑɑnu ni. Lin nbɑ k n yien’i bunbɔnn ni nɑ, nyint’l mɑn yienin ni, k lin nbɑ k n lɔkn’i nɑ, i do mɔpinyelk pɑɑk kii muɑntl. I dɑɑ tiin bin nbɑ sɑɑ fit kpi i gbɑnɑnt, ŋɑɑn kɑn fit k kpi i siek, ŋɑɑn ii tiin mɑn Yennu nbɑ sɑɑ fit k biil i gbɑnɑnt nɑn i siek kul ɑ muu nbɑ kɑɑ gbennu nɑ ni nɑ. B k kɔi nuɑnbit bɑnle kuuk kuukuɑ ɑɑ? Ŋɑɑn b yenɔ kuɑ kɑn bɑɑ tinŋ ni k i Bɑɑ Yennu k mi u po. Yinm ŋɑnin, i yut mɔk kɑnn. L pɑɑk, i dɑɑ tiin jɑŋmɑɑni, k mɑɑn i mɔk nyuɑt k gɑl nuɑnbit bonciɑnn.» «Wun nbɑ nyint u mɔnŋ pɑɑnu ni niib buol ni nɑn u tie n yuɑ e, nnɑ e k n mun tɑn sɑɑ nyinn’ɔ pɑɑnu ni n Bɑɑ nbɑ be sɑnpɑɑpo nɑ buol, ɑ u tie n yuɑ e. Wun nbɑ yɑɑ ɑ u k mi’n niib ni, nnɑ e k n mun tɑn sɑɑ yet ɑ n k mi’u n Bɑɑ nbɑ be sɑnpɑɑpo nɑ buol ni.» «I dɑɑ duki nɑn n bɑɑl nɑn mɑnu tingbounŋ nɑ tieb pɑɑk, n k bɑɑl nɑn mɑnu kɑɑ, ŋɑɑn n bɑɑl nɑn kunkɔnn e. N bɑɑl mɑɑ n tɑn tukn bonjɑbik e nɑn u bɑɑ, bonpobik nɑn u nɑɑ, puo nɑn u sipuok. Nilɔ mɔnŋ mɔnŋ ŋɑɑtieb e tɑn sii tie u dɑtɑi. «Wun nbɑ luon u nɑɑ ɑmi u bɑɑ k gɑl’n, u k ŋɑn nɑn wun tien n yuɑ. Wun nbɑ mun biɑ luon u bijɑ ɑmi u bipuo k gɑl’n, u k ŋɑn nɑn wun tien n yuɑ. Wun nbɑ k jii u kuun dɑpunpunn k buk k wɑɑ’n, u k ŋɑn nɑn wun tien n yuɑ. Wun nbɑ yɑɑ ŋuɑ deki u mɑnfuol tɑn sɑɑ kɔnŋ’l ɑ, ŋɑɑn wun nbɑ kɔnŋ u mɑnfuol n pɑɑk, u tɑn sɑɑ lɑ u mɑnfuol ɑ.» «Wun nbɑ gɑɑl’i sɑɑɔnŋ, u gɑɑl min e sɑɑɔnŋ, k wun nbɑ mun biɑ gɑɑl min sɑɑɔnŋ, u gɑɑl wun nbɑ tun’n nɑ e mun biɑk. Wun nbɑ gɑɑl *Yennu sɔkni sɑɑɔnŋ nɑn wɑɑ tie Yennu sɔkni nɑ pɑɑk, u tɑn sɑɑ gɑɑl Yennu sɔkni nyuɑt ɑ. Wun nbɑ gɑɑl niŋɑnɔ sɑɑɔnŋ nɑn wɑɑ tie niŋɑnɔ nɑ pɑɑk, u tɑn sɑɑ gɑɑl niŋɑnɔ nyuɑt ɑ. Wun nbɑ finn nyunmɑɑsn wɑɑnm-nnɑ kuukuɑ k tul n *puolpoweituɑ yenɔ nbɑ pɔ i ni, nɑn wɑɑ tie n puolpoweituɑ nɑ pɑɑk, bɑlmɔni e k n yien’i nɑ, u tɑn kɑn mi kɔnŋ l pɑɑɔk u.» Yiesu nbɑ din wɑnn u tuomiinbɑ *piik nɑn bɑnle nɑ wɑnnu mɑnŋ k gbenn yuo nbɑ, k u nyii lenŋ k sɑɑn b doi ni k muɑntl Yennu mɑɑn k tumi niib. Tɔn, Sɑn din be dɑnsɑlk, k tɑn gbɑt *Klistu tuonɑ lɑbɑɑl po, k tun u *puolpoweitieb u buol ni ɑ bin sɑɑ boi’ɔ ɑ: «Fin e tie wun nbɑ yɑɑ wun tɑn bɑɑl nɑ ɑmi tii dɑɑ kii guu luɑ ɑ?» K Yiesu ji yet Sɑn tuomiinbɑ mɑnŋ ɑ: «Ii ŋmɑt mɑn k sɑɑ yet Sɑn lin nbɑ k i gbɑt k biɑ lɑ nɑ. Juɑni nyuɑntl, k wɔbi tɑɑ nɑɑtl k b sonm, k gbɑɑtɑ ŋɑɑt gbent, k tuukpɑɑ ji gbiɑ, k kpienm fi kuun ni, k tɑlɑs-dɑnm gbiintl lɑbɑmɑnn muɑnti. K pɑlpienn be wun nbɑ k bils’n nɑ pɑɑk.» Tɔn, Sɑn tuomiinbɑ nɑ nbɑ din nyii lenŋ k ŋmɑt kun yuo nbɑ nɑ, k Yiesu ji din piin k piɑk Sɑn po k boi ɑ: «Yɑɑ dɑɑn sɑɑn Sɑn penŋ muuk ni nɑ, i dɑɑn duki ɑ i sɑɑ sɑɑ lɑ bee? I dɑɑn mi ɑ i sɑɑ lɑ muuk nbɑ k wounŋ dɑnm nɑ ee? I mɑntk jiɑ dɑɑn sɑɑn ɑ i sɑɑ lɑ bee? Nilɔ k u liɑ tɑŋɑnt ɑmi ii? Nnɑlɑ, bin nbɑ liɑ tɑŋɑnt be kpɑnbɑlɑ ŋei ni e. Ŋɑɑn i mɑntk jiɑ dɑɑn sɑɑn ɑ i sɑɑ lɑ bee? I dɑɑn duki ɑ i sɑɑ lɑ *Yennu sɔkni ee? Bɑlmɔni e k n yien’i nɑ, Sɑn ŋɑnin gɑl sɔkni wɑɑ. Ŋuɑ po e k Yennu lolkpel kɑdɑɑɔk ponŋ din diɑn wɑnt nɑ, ɑ: ‹Min Yennu, n sɑɑ tun n tuomu k wun liit k gɑl ŋɑnm ɑ bɑɑlu sɔnu.› » K Yiesu biɑ din yet’b ɑ: «Bɑlmɔni e k n yien’i nɑ, b dɑɑ k mi mɑl suɑ k u cie Sɑn nbɑ dɑɑn wuul niib Yennu nyunwulu nɑ, ŋɑɑn wun nbɑ juont tɑlk Yennu nɑɑn ni cie’u. Lɑɑ dɑɑn nyii Sɑn nbɑ dɑɑn wuul niib Yennu nyunwulu nɑ mɑnŋ yuo k tɑn tuu mɔtɑɑnɑ, bin nbɑ k b ninbinɑ mɔn nɑn bin tɑn kuɑ Yennu nɑɑn ni diɑ ninmɔnn ɑ bin tɑn kuɑ nɑn pɑnŋ. Yennu *senni nɑn u sɔkniinbɑ mɑɑn nɑ ponŋ din pɑk u nɑɑn po e wɑɑ, k Sɑn tɑn bɑɑl. L i tie k i luon yin tien lin nbɑ nɑ yɑdɑ i e, ŋuɑ e tie Yennu sɔkni *Elii wun nbɑ yɑɑ wun tɑn bɑɑl nɑ. Wun nbɑ mɔk tubɑ, wun gbiint.» K Yiesu biɑ yet ɑ: «Mɔtɑɑnɑ nigbounŋ nɑ, n sɑɑ bikn’m nɑn bee nɑ? B nɑɑn nɑn wɑɑs nbɑ tuu tikl k kɑl dɑɑk ni k tiɑn lieb pɑɑk nɑ e ɑ: ‹T pieb yeli k tien’i, ŋɑɑn k i k wɑɑ. T yiin kuyɑni k tien’i, ŋɑɑn k i k mɔ fɑbn.› Sɑn dɑɑn bɑɑl k k di jemɔnt, k biɑ k nyu dɑɑn, ŋɑɑn k i yɑɑ ɑ u wɑɑt e, k *Nisɑɑlk Bijɑ mun tɑn bɑɑl k di k nyu, ŋɑɑn k i biɑ yɑɑ ɑ: ‹Gotl juɑ nɑ. u tie podɑɑnɔ nɑn dɑnyuuluk o. U biɑ tie *lɑnpogɑɑltieb nɑn biitdɑnm yuɑk e.› Tɔn, Yennu nbɑ tuun biɑnŋ nbɑ e wɑnt nɑn u mɔk yɑn nbɑ ŋɑn.» L yuo nɑ k Yiesu din piin k piɑk biil doi nbɑ dɑɑn lɑ u bɑktnɔunŋ tuonjɑɑnɑ nbɑ k u dɑɑn tun lenŋ, ŋɑɑn k b yet nɑn bin mɔ kuɑŋɑɑn k lebt binbenŋ. K u din yet ɑ: «L tɑn sii bi yinm Kolɑsen tieb pɑɑk. L tɑn sii bi yinm Betsɑidɑ tieb mun yɑɑ pɑɑk, k mɑɑn mi i bo i tun bɑktnɔunŋ tuonjɑɑnɑ Tiil nɑn Siidɔn doi ni nɑn mɑɑ dɑɑn tun i doi ni nɑ, b dɑɑn bo mɔ kuɑŋɑɑn k lebt binbenŋ yiɑn ɑ, k pɑt fɑɑɔk k puk b mɔnŋ tɑnpent ɑ mɑn. Ŋɑɑn n yien’i e, dɑɑl nbɑ k Yennu tɑn sɑɑ bu niib buut nɑ, i tubdɑtu tɑn sɑɑ gɑl Tiil nɑn Siidɔn tieb yɑl ɑ. K yinm Kɑpelnɑunm tieb, Yennu tɑn sɑɑ donn’i sɑnpɑɑpo wɑɑ? Aɑi. U tɑn sɑɑ sikn’i muu nbɑ kɑɑ gbennu nɑ ni wɑɑ, k mɑɑn mi i bo i tun bɑktnɔunŋ tuonjɑɑnɑ Suodonm duo ni nɑn mɑɑ dɑɑn tun i duo mɑnŋ ni nɑ, Suodonm duo mɑnŋ din dɑɑ bo sii be nɑn dinnɑ. Ŋɑɑn n yien’i e, Yennu bɑlbunu dɑɑl mɑnŋ, i tubdɑtu tɑn sɑɑ gɑl Suodonm tieb yɑl ɑ.» L yuo mɑnŋ k Yiesu din yet ɑ: «N Bɑɑ wun nbɑ tie sɑnpɑɑpo nɑn tingbounŋ nɑ Yonmdɑɑnɔ, n piɑk’ɑ, k mɑɑn ɑ bɔl ɑ mɑɑn nɑ subndɑnm nɑn mitieb, ŋɑɑn fiit wɑnn wɑɑs e, k mɑɑn nnɑ e k ɑ tuun ɑ tuonɑ k l mɑn’ɑ. «Tɔn, n Bɑɑ e wɑnn’n mɑɑn kul ɑ, k suɑ k mi u Bijɑ nbɑ tie wun nbɑ, sie n Bɑɑ mɑnŋ, k suɑ mun biɑ k mi Bɑɑ mɑnŋ, sie u Bijɑ nɑ, nɑn bin nbɑ k u luon k wun fiit wɑnn’b nɑ. «Yinm nbɑ tuun tuonɑ k jii jik-kpiɑtɑ k bɑk nɑ, bɑɑt n buol ni mɑn, k n sɑɑ tul’i fuon. Ii sɑk n weiu mɑn, kii tumi n wɑnnu, k i sɑɑ lɑ fuon k tul i sei, k mɑɑn n tie sikn-n-mɔnŋ dɑɑnɔ e, k n pɑl mei. N weiu biɑ k pɑɑl, k n jikl mun biɑ k kpɑi.» L yuo mɑnŋ k Yiesu nɑn u *puolpoweitieb din gɑɑl dii kpɑɑnt ni *Fuondɑɑl, k kon tɑn suol u puolpoweitieb nɑ. Ŋɑnn e k b kɔni dikɑlɑ k pini k ŋmɑn. Fɑɑliisiɑnnbɑ nɑ siɑb nbɑ din lɑ nnɑ mɑnŋ, k b yet Yiesu ɑ: «Gotl, ɑ puolpoweitieb tuun lin nbɑ k t *senni k cɑb nɑn tii tuun Fuondɑɑl.» K Yiesu jiin k boi’b ɑ: «I k lii Dɑɑfiid nbɑ din tun biɑnŋ nbɑ dɑɑl nbɑ k kon din suol ŋuɑ nɑn u juɑmu uu? U din kuɑ Yennu jɑɑnti ŋɑsɑɑkɑk ni, k sɑɑ jii Yennu pɑɑnu nbɑ k b din tuu senn k l tie Yennu yɑl nɑ, k ŋuɑ nɑn u juɑmu ŋmɑn, ŋɑɑn k senni nɑ din k cɑb nɑn b nisuɑ n di pɑɑnu mɑnŋ, sie Yennu mɑnntieb kuukuɑ. Kuo i k lii Muois senni kɑdɑɑɔk ni, mɑnntieb nbɑ din tuun biɑnŋ nbɑ ɑɑ? B din tuu tun tuun tuonɑ Yennu jɑɑnti ŋɑsɑɑkɑk ni Fuondɑɑl kul ɑ k biil senni nɑ, ŋɑɑn kɑɑ biit. Ŋɑɑn n yien’i e, wun nbɑ cie Yennu jɑɑnti ŋɑsɑɑkɑk be nnɑ. L i tie k i bo bɑnn mɔbonɑ nɑ pɑɑk, ɑ: ‹Min Yennu, n luon ninbɑtinu e k gɑl *mɑlunŋ,› i bo kii piɑk k biil bin nbɑ kɑɑ biit, k mɑɑn *Nisɑɑlk Bijɑ e mun biɑ yen Fuondɑɑl.» K Yiesu din nyii lenŋ k sɑɑn kuɑ *Suifnbɑ jɑɑnti dieok ni. K jɑsuɑ nnɑ mun din be lenŋ, k u nuu kpo k guon. K siɑb din luon bin lɑ Yiesu biit ɑ k tɑɑl’ɔ. L pɑɑk, k b boi’ɔ ɑ: «T senni sɑɑk ɑ nilɔ n te k bɑɑtɔ n pɑɑk Fuondɑɑl ii?» K u mun din ŋmɑnt boi’b ɑ: «I yenɔ i mɔk peyeunŋ kuɑ, k pieok mɑnŋ tɑn bɑɑ bunbunn ni Fuondɑɑl, u kɑn donn’ɔ Fuondɑɑl nɑ ɑɑ? I k mi nɑn nisɑɑlk mɔk nyuɑt k gɑl pieok uu? L pɑɑk, senni nɑ cɑb ɑ tii tuun bonŋɑnn Fuondɑɑl.» Ŋɑnn e k u din ŋmɑnt yet niikpienn dɑɑnɔ nɑ ɑ: «Tɑntl ɑ nuu mɑnŋ.» K u tɑnt u nuu mɑnŋ, k l nɑɑt k tie nɑn liel nɑ. Ŋɑɑn k Fɑɑliisiɑnnbɑ nɑ nyii nɑn-yel po, k lol lol suol nɑn lieb bɑɑ sɑɑ tien biɑnŋ nbɑ k kpi Yiesu. K Yiesu din bɑnn b lol mɑnŋ po, k din nyii lenŋ. K niib bonciɑnn din wɑɑ u puol, k u te k bɑɑtb kul ɑ pɑɑk, ŋɑɑn yet’b nɑn ninmɔnn ɑ b dɑɑ muɑntl wɑɑ tie wun nbɑ. U din tun nnɑ e, ɑ lin nbɑ k *Yennu sɔkni Esɑɑyi din sɔkn nɑ, lin tien gbien, ɑ «Gotl, min Yennu, mɑɑ lukt n tuontunnɔ nbɑ e nɑ ŋuɑ e k n mɑntk luon’ɔ nɑ; n nunm mɑntk gbuo’u wɑɑ. N sɑɑ jii n Siek k tien u ni. U tɑn sɑɑ muɑnt buut bunu nbɑ tuok k tul niib kul ɑ. U tɑn kii mɔk mɔniɑɔk, k biɑ tɑn kii tie kpɑyɑɔk dɑɑnɔ, k biɑ tɑn kii mɔk fuut yɑnn yɑnn sɑnjot ni. U tɑn kɑn kɔnn tikuɑnn k tont, k biɑ tɑn kɑn kpien fitl nbɑ k di fɑnu. U tɑn sɑɑ te k bɑlbunu nbɑ tuok n lɑ nyɑnnu. U sɑnn ni e, k niib kul ɑ tɑn sii mɔk dindɑnn.» L yuo nɑ k nisiɑb din bɑɑl nɑn jɑsuɑ k nɑlnbiiuk be u ni k tien’ɔ muuk k biɑ tien’ɔ juɑnŋ, k Yiesu din te k u pɑɑk, k ji nyuɑn, k biɑ piɑk. K l yɑɑl ŋɑɑn lit niib nɑ kul nɑ bonciɑnn, k b boi b lieb Yiesu po ɑ: «Juɑ nɑ e nɔk tie * Dɑɑfiid yɑɑbuonn nɑ ɑɑ?» Ŋɑɑn Fɑɑliisiɑnnbɑ nɑ nbɑ din gbɑt nnɑ mɑnŋ, k b yɑɑ ɑ: «Nɑlnbiit bɑt Beelsebuul e tien juɑ mɑnŋ yiikuo ɑ wuu nyint nɑlnbiit niib ni.» Yiesu nbɑ din bɑnn bɑɑ duki lin nbɑ nɑ, k u yet’b ɑ: «Nɑɑn niib i ŋmɑt kɔn k tuokt b lieb, b nɑɑn mɑnŋ sɑɑ biil ɑ. K doyenu kuɑ niib ɑmi ŋɑyenŋ kuɑ niib i ŋmɑt kɔn nɑn lieb, l kɑn set. L i tie k *Sɑɑtɑn nyint u mɔnŋ, l wɑnt nɑn u kɔn k bɔktl u mɔnŋ e. Nlee k u nɑɑn nɑ sɑɑ set i? K l i tie k Beelsebuul tien’n yiikuo ɑ mii nyint nɑlnbiit niib ni, k yinm mun, ŋmee mun cɑb i niib ɑ bii nyint nɑlnbiit i? I mɔnŋ niib mɑnŋ tuonɑ e wɑnt nɑn i k mɔk mɔni. Ŋɑɑn min ŋɑnin, Yennu Siek pɑɑk e k n nyint nɑlnbiit niib ni. Ŋɑnn e mun biɑ wɑnt nɑn Yennu nɑɑn bɑɑl i buol ni wɑɑ.» «Suɑ kɑn fit kuɑ jɑwɑktl ŋɑɑk ni k bɑkl u bonɑ k nyi nɑn’n, l i kii tie k u dɔnŋ k lol’ɔ ŋmii kɑɑ wɑɑ, ŋɑɑn fit k kuɑ k bɑkl u bonɑ mɑnŋ. «Wun nbɑ k sie n puol, u kɔn nɑn’n e, k wun nbɑ k tɑɑnt’n k tiki niib, u yɑɑt’b e. L pɑɑk te k n yien’i nɑ, Yennu sɑɑ nyik cɑb nifosɑɑlk u biit nɑn bɑlbiit kul ɑ, ŋɑɑn wun nbɑ tɑn suki Foŋɑnm, Yennu kɑn mi k nyik cɑb l dɑɑnɔ. Wun nbɑ piɑk bɑlbiit k tien Nisɑɑlk Bijɑ, Yennu sɑɑ nyik cɑb’ɔ, ŋɑɑn wun nbɑ tɑn piɑk bɑlbiit k tien Foŋɑnm, Yennu kɑn nyik cɑb l dɑɑnɔ *dulnyɑ nɑ ni, ɑmi dulnyɑ nbɑ tɑn sɑɑ bɑɑl nɑ ni.» K Yiesu biɑ din yet ɑ: «L i tie k tiik ŋɑn, u luon tiluɑnŋɑnɑ e, ŋɑɑn l i tie k tiik k ŋɑn, u sii luon luɑnbiit e, k mɑɑn tiik luɑnɑ ni e k b bɑnt’ɔ. Yinm wɑɑlɑbli buolu nɑ, yɑɑ tie nifobiit biɑnŋ nbɑ nɑ, nlee k lɑbɑmɑnn sɑɑ fit nyi i mɔi ni? K mɑɑn lin nbɑ k nifosɑɑlk duki u pɑl ni, ŋɑnn e biɑ nyi u mɔb ni. Niŋɑnɔ nyint bonŋɑnn u mɔktuk nbɑ ŋɑn nɑ ni e, k nibiiuk nyint bonbiit u mɔktuk nbɑ bi nɑ ni. «N yien’i e nɑ, bɑlbunu dɑɑl, Yennu tɑn sɑɑ bu niib buut nɑn bɑɑ din piɑk bɑlyɑnɑ kul nbɑ nɑ pɑɑk, k mɑɑn suɑ kul pinpɑɔk o tɑn sɑɑ nyinn’ɔ dɑɑl mɑnŋ ni. Suɑ kul pinpɑɔk o mun biɑ tɑn sɑɑ biil’ɔ.» Ŋɑnn e k *senniwɑntieb nɑn Fɑɑliisiɑnnbɑ din yet Yiesu ɑ: «Wɑntuɑ, t luon k ɑ tun bɑktnɔunŋ *nyinn e k wɑnn’t.» K u din jiin k yet’b ɑ: «Mɔtɑɑnɑ nigbounŋ nbɑ tie biitdɑnm k biɑ k tuun Yennu nbɑ luon lin nbɑ nɑ luon k bin lɑ bɑktnɔunŋ nyinn, ŋɑɑn b kɑn mi lɑ nyinsiɑl. Yennu sɔkni Suonɑ nyinbuolu nɑ kuukuɑ e k b sɑɑ lɑ. K mɑɑn Suonɑ mɑnŋ nbɑ din be jɑngbenŋl puol ni yennu nɑn nyiɑɔk k sɑɑn jɑnŋ dɑɑ ŋɑntɑ nɑ, nnɑ e k min Nisɑɑlk Bijɑ mun tɑn sii be tinŋ ni yennu nɑn nyiɑɔk k sɑɑ jɑnŋ dɑɑ ŋɑntɑ. Yennu buut dɑɑl, Niiniif tieb tɑn sɑɑ set wɑnn nɑn mɔtɑɑnɑ nigbounŋ nɑ mɔk biit, k mɑɑn Suonɑ mɑnŋ nbɑ din muɑnt Yennu mɑɑn k tul’b nɑ, b din mɔ kuɑŋɑɑn k lebt binbenŋ, k gotl mɑn, min nbɑ cie Suonɑ be nnɑ. Yennu buut dɑɑl, puo nbɑ din tie kpɑnbɑl nɑ nbɑ din nyii gɑnŋ po nɑ mun biɑ tɑn sɑɑ set wɑnn nɑn mɔtɑɑnɑ nigbounŋ nɑ mɔk biit, k mɑɑn u din nyii digbɑnbɑnfɔkl e wɑɑ, k tɑn bɑɑl ɑ wun gbiint kpɑnbɑl Sɑɑlomɔn yɑnfuon nɑ pinpɑɔk, k gotl mɑn, min nbɑ cie Sɑɑlomɔn be nnɑ.» «L i tie k nɑlnbiiuk tɑn nyii nilɔ ni, u tuu yiek e k lin mɔkuounŋ ni, k luon fuon buol, ŋɑɑn k k lɑɑt. L pɑɑk, u tuu tɑn yet u mɔnŋ e ɑ: ‹N sɑɑ ŋmɑt sɑɑn ŋɑɑk nbɑ ni k n dɑɑn nyii ni e.› Yuo nbɑ k u tɑn bɑɑl, k lɑ k l duɑ yɑnn, k b piɑl k ŋɑnm ɑ, u ji sɑɑ ŋmɑt nyi e k sɑɑ yiin nɑlnbiliet bɑnlole, bin nbɑ bi k cie u pɑɑk, k bɑɑl nɑn’m, k bin kuɑ k lɑkn kii be. Nilɔ mɑnŋ binbenŋ ji sii bi bonciɑnn k gɑl wɑɑ dɑɑn tuu bi sinsinn biɑnŋ nbɑ nɑ wɑɑ. L tɑn sii tie nnɑ e mɔtɑɑnɑ biitdɑnm nɑ pɑɑk.» Yiesu nbɑ din dɑɑ piɑk k tien niib nɑ yuo nbɑ, k u nɑɑ nɑn u ninjɑnm bɑɑl k tɑn sie nɑn-yel po, k luon bin pɑk nɑn’ɔ. Ŋɑnn e k suɑ din yet’ɔ ɑ: «Gotl, ɑ nɑɑ nɑn ɑ ninjɑnm sie nɑn-yel po, k luon k bin pɑk nɑn’ɑ.» K Yiesu boi nilɔ nbɑ yet’ɔ lin nbɑ nɑ ɑ: «Ŋmee tie n nɑɑ? k lɑnm e biɑ tie n ninjɑnm i?» ŋɑɑn din tɑnt u nuu k wɑnn u puolpoweitieb ŋɑɑn yet ɑ: «Gotl ii, n nɑɑ nɑn n ninjɑnm e nɑ. K mɑɑn wun nbɑ kul tuun n Bɑɑ nbɑ be sɑnpɑɑpo nɑ lonm, ŋuɑ e tie n ninjɑ, nɑn n niipuo nɑn n nɑɑ.» L dɑɑl mɑnŋ k Yiesu din nyii ŋɑɑk nɑ ni k sɑɑn k sɑɑ kɑl mɔkgbenŋl kpinŋ. K nibulciɑɔnŋ lɑkn u buol ni. Ŋɑnn e k u sɑɑn kuɑ kɑl bulgbetl ni, k nibulciɑɔnŋ nɑ din sie gbingbɑnn. K u din yin’m bɑljokt bonciɑnn k yet ɑ: «Jɑsuɑ din duo kpɑɑb ɑ wun sɑɑ bul tɑn. Wɑɑ din buul nɑ k bonbuoli nɑ yenn-nbɑ din yɑt bɑɑ sɑnjouk ni, k nuɑni bɑɑl k tɑn dii. K liel mun din bɑɑ tɑnpuut pɑɑk, siɑn nbɑ k tɑnt k yɑb k l din piɑ k kpɑɑt yiɑn ɑ, k mɑɑn tɑnt k yɑb lenŋ, ŋɑɑn yennu nbɑ din tɑn tonŋ yuo nbɑ, k l juɑk. Lɑɑ din k fit sikn jiinɑ nɑ pɑɑk, l kul din kpo e. K liel mun biɑ din bɑɑ kunkoni ni, k tɑn lɑkn piɑ k kpɑɑt, ŋɑɑn k kunkoni ŋmɑbl’l. Ŋɑɑn k liel mun din bɑɑ tinŋɑnŋ ni, k nɑn nɑɑnŋɑɔnŋ, k siɑb nɑn kobk kobk, k siɑb piinluob luob, k siɑb mun piintɑtɑ. «Wun nbɑ mɔk tubɑ, wun gbiint.» Ŋɑnn e k Yiesu *puolpoweitieb din bɑɑl u buol ni k tɑn boi’ɔ ɑ: «Bee k ɑ piɑk bɑljokt k tien niib nɑ?» K u jiin k yet’b ɑ: «Yinm ŋɑnin, Yennu cɑb ɑ yin bɑnn wuol ni mɑɑn k jii jiin u nɑɑn po, ŋɑɑn ŋɑnm ŋɑnin, u k cɑb’b. Tɔn, wun nbɑ mɔk siɑl, ŋuɑ e sii lɑɑt k puki, k sii mɔk bonciɑnn, ŋɑɑn wun nbɑ k mɔk, u sɑɑ kɔnŋ lin nbɑ k u mɔk nɑ gbɑɑ. L pɑɑk e te k n yiin’m bɑljokt, k mɑɑn b goli e, ŋɑɑn k lɑɑt, k biɑ gbiɑ e, ŋɑɑn k bɑnt l pɑɑk. Nnɑ e k b ni, k lin nbɑ k *Yennu sɔkni Esɑɑyi din yet nɑ sɑɑ gbie ɑ: ‹I sɑɑ gbɑt, ŋɑɑn i kɑn bɑnn l pɑɑk. I sii goli, ŋɑɑn i kɑn bɑnn yɑɑ lɑ lin nbɑ nɑ. K mɑɑn niib nɑ yɑn dɔkn, b nyɑl b tubɑ, k biɑ mun b ninbinɑ e, k mɑɑn b k luon bin lɑ siɑl, k biɑ k luon bin gbɑt, k biɑ k luon ɑ b yɑn n dɔkt, k biɑ k luon bin ŋmɑt bɑɑl n buol ni, k min Yennu n tul’b lɑɑfiɑ.› «Tɔn, yinm ŋɑnin, pɑlpienn tie i yɑl e, k mɑɑn i ninbinɑ lɑɑt. Pɑlpienn biɑ tie i yɑl e, k mɑɑn i tubɑ gbiɑ mɑɑn. Ŋɑɑn bɑlmɔni e k n yien’i, Yennu sɔkniinbɑ nɑn yentinnɑ bonciɑnn din luon bin lɑ lin nbɑ k i lɑɑt nɑ, ŋɑɑn din k lɑ, k biɑ din luon bin gbɑt lɑbɑɑl nbɑ k i gbiɑ nɑ, ŋɑɑn din k gbɑt.» K Yiesu din yet u puolpoweitieb ɑ: «Gbiintl mɑn k bɑnn tɑnbultuɑ nɑ bɑljouk pɑɑk. Bin nbɑ gbiɑ Yennu nɑɑn lɑbɑɑl ŋɑɑn k k bɑnn l pɑɑk nɑ tie nɑn sɑnjokpinŋ nbɑ k bonbuoli bɑɑ lenŋ nɑ e, k *Klistu dɑtɑɑk bɑɑl k tɑn nyinn lin nbɑ bo kuɑ b pɑlɑ ni mɑnŋ. Wun nbɑ gɑɑl bonbuoli nbɑ bɑɑ tɑnpuut pɑɑk tie wun nbɑ gbiɑ Yennu mɑɑn, k gɑɑl’l yiɑn ɑ nɑn pɑlpienn, ŋɑɑn k k nyik k l bɑɑ jiinɑ u ni k biɑ kɑn wei, k yuo nbɑ fɑlɑ nɑn muksuk bɑɑl u pɑɑk nɑ, u tuu bɑɑ e. Wun nbɑ gɑɑl bonbuoli nbɑ bɑɑ kunkoni ni nɑ mun tie wun nbɑ gbiɑ Yennu mɑɑn nɑ, ŋɑɑn k tingbounŋ nɑ fɑlɑ nɑn mɔktuk lonm nyɑkn mɑɑn mɑnŋ u pɑl ni, k l kɑn nɑn. Wun nbɑ gɑɑl bonbuoli tinŋɑnŋ ni nɑ tie nɑn wun nbɑ gbɑt Yennu mɑɑn nɑ, k bɑnn l pɑɑk, k l tɑn kpɑɑt k yenn-nbɑ nɑn kobk kobk, k liel nbɑ mun nɑn piinluobluob, liel mun biɑ nɑn piintɑtɑ nɑ e.» K Yiesu biɑ din yin’m bɑljouk nɑ k pukn ɑ: «Yennu nɑɑn tie nɑn jɑsuɑ nbɑ din duo u kpɑɑb ni k sɑɑ bul dibuolŋɑni nɑ e. K niib tɑn duɑl, k u dɑtɑɑk sɑɑn sɑɑ bul dinɑtimi k kuɑn dibuolŋɑni nɑ ni, ŋɑɑn yɑɑt. Dii nɑ nbɑ din tɑn puk k ji mɑɑl yuo nbɑ, k b ji bɑnn nɑn dinɑtimi be lenŋ. Ŋɑnn e k u ŋɑɑtuontunnɑ bɑɑl k tɑn boi’ɔ ɑ: ‹Cɑnbɑɑ, dibuolŋɑni kuukuɑ kɑɑ k ɑ dɑɑn bul ɑ kpɑɑb nɑ ni ii? Ŋɑɑn l tien nlee k dinɑtimi tɑn be lenŋ i?› K u yet’b ɑ: ‹Dɑtɑsuɑ e tun nnɑ.› K b boi’ɔ ɑ: ‹K ɑ luon tin sɑɑn k sɑɑ ŋɑbl dinɑtimi mɑnŋ ii?› Ŋɑnn e k u jiin ɑ: ‹Aɑi, k mɑɑn i yɑɑ yin ŋɑbl, i tɑn sɑɑ kpet ŋɑbl dimɔni e. L pɑɑk, nyikn mɑn k lii be nɑn dijɑɑn-yuo, k dijɑɑn-yuo e k n tɑn sɑɑ yet dijɑɑntieb nɑ k bin cuɑ dinɑtimi nɑ sinsinn k puo’n k juo muu, ŋɑɑn kpen nɑn diŋɑni nɑ k tɑn wuun n dii sinsonŋ ni.› » K Yiesu biɑ din yin’m bɑljouk nɑ k pukn ɑ: «Yennu nɑɑn tie nɑn kpint tiik nbɑ k b yi’l *muutɑɑld nɑ binn nbɑ k nilɔ din jii k bul u kpɑɑb ni nɑ e. L wɑɑl k gɑl bonbuoli kul sɑɑk ɑ, ŋɑɑn k l tɑn piɑ k kpɑɑt k yɑb kpint tiini kul ɑ, k tɑn tien tiik, k nuɑni bɑɑl k tɑn tiɑ tiɑt l yiini nɑ pɑɑk.» K Yiesu biɑ din yin’m bɑljouk nɑ k pukn ɑ: «Yennu nɑɑn tie nɑn * dɑtinŋ nbɑ k puo jii k ŋmɑt nɑn pɑɑnu yon nbɑ yɑb, k lin tɑn miik k tɑn pukl nɑ e.» Yiesu din yiin bɑljokt e k piɑk lin nbɑ nɑ kul ɑ k tien nibul mɑnŋ. U din k pɑk siɑl k tul’b k l k tie bɑljokt ni kɑɑ. U din tun nnɑ, ɑ lin nbɑ k Yennu sɔkniisuɑ din sɔkn nɑ, lin tien gbien. Sɔkni nɑ din yet ɑ: «N tɑn sɑɑ yɑɑt n mɔb k yet nɑn bɑljokt e, k pɑk fiit wɑnn wuol ni bonɑ nbɑ din wuon k k nyii pɑɑnu *dulnyɑ piinu ni wɑɑ, k tɑn tuu mɔtɑɑnɑ nɑ.» Ŋɑnn e k Yiesu din nyik nibul mɑnŋ lenŋ, ŋɑɑn sɑɑn kuɑ u ŋɑduɑtk ni. K u puolpoweitieb bɑɑl u buol ni k tɑn yet’ɔ ɑ: «Yet’t dinɑtimi bɑljouk nɑ pɑɑk.» K u yet’b ɑ: « *Nisɑɑlk Bijɑ e tie wun nbɑ bul dibuolŋɑni nɑ. Tingbounŋ nɑ e tie kpɑɑb nɑ, k dibuolŋɑni nɑ tie Yennu nɑɑn ni niib, ŋɑɑn k dinɑtimi nɑ mun tie Klistu dɑtɑɑk niib. Dɑtɑɑk nbɑ bul dinɑtimi nɑ mun tie *Sɑɑtɑn, k dijɑɑn-yuo nɑ tie dulnyɑ nɑ gbennu yuo, k dijɑɑntieb nɑ mun tie Yennu *mɑlɑkɑɑnbɑ. Biɑnŋ nbɑ k b tikl dinɑtimi nɑ k juo muu nɑ, nnɑ e k l tɑn sii tie dulnyɑ gbennu dɑɑl. Nisɑɑlk Bijɑ tɑn sɑɑ tun u mɑlɑkɑɑnbɑ k bin gɑnn nibiit kul nbɑ te k lieb tuun biit, nɑn biitdɑnm kul nbɑ be u yent ni, k lu’b musɑɑkɑu ni. Lenŋ e k niib tɑn sii fɑbn mɔ k nyiitl nyɑnɑ. Ŋɑɑn l yuo mɑnŋ, bin nbɑ tuun Yennu nbɑ luon bɑnnu nbɑ nɑ kul tɑn sii be b Bɑɑ nɑɑn ni e wɑɑ k nyili nɑn yennu nɑ. Wun nbɑ mɔk tubɑ, wun gbiint.» «Yennu nɑɑn tie nɑn mɔktuk nbɑ din pii tinŋ ni suɑ kpɑɑb ni nɑ e, k jɑsuɑ tɑn bɑɑl lɑ k ŋɑnm gbiil tɑnt piin’l, ŋɑɑn sɑɑn nɑn pɑlpienn k sɑɑ kɔi wɑɑ mɔk lin nbɑ kul ɑ, k jen tɑn dɑɑ kpɑɑb mɑnŋ.» «Tɔn, Yennu nɑɑn biɑ tie nɑn dɑɑkuɑlɔ nbɑ din kɑk lin luon pelilnbɑ nbɑ ŋɑn ɑ wun dɑɑ nɑ e. U din sɑɑ lɑ yenn k l dɑɑɔk pɑɑl bonciɑnn, k u ŋmɑt sɑɑ kɔi wɑɑ mɔk lin nbɑ kul ɑ, k sɑɑn sɑɑ dɑɑ pelilnbɑ mɑnŋ.» «Yennu nɑɑn biɑ tie nɑn jɑnlɑɑɔnŋ nbɑ k b tuu jii k lu nyun ni k suol jɑnbuolu buolu nɑ e. L i gbie yuo nbɑ bin dɑt donn gbingbɑnn, k kɑl gɑnn jɑnŋɑni k tien kpɑncubt ni, ŋɑɑn lu jɑnbiit nɑ. L tɑn sii tie nnɑ e dulnyɑ nɑ gbennu dɑɑl. Yennu mɑlɑkɑɑnbɑ tɑn sɑɑ bɑɑl e k gɑnn nifoŋɑnm, ŋɑɑn nyik nibiit. B tɑn sɑɑ jii nibiit mɑnŋ k lu’b musɑɑkɑu ni. Lenŋ mɑnŋ e wɑɑ, k niib tɑn sii fɑbn mɔ k nyiitl nyɑnɑ.» Ŋɑɑn k Yiesu boi’b ɑ: «I bɑnn bɑljokt mɑnŋ kul pɑɑk ɑɑ?» K b sɑk ɑ: «Nnn.» K u yet’b ɑ: «L pɑɑk, Yennu *senniwɑntuɑ nbɑ kul tumi Yennu nɑɑn po wɑnnu nɑ, u tie nɑn ŋɑɑdɑɑnɔ nbɑ nyint bonkpelɑ nɑn bonpɑɑnɑ u mɔktuk ni nɑ e.» Yiesu nbɑ din yin bɑljokt nɑ k gbenn yuo nbɑ, k u nyii lenŋ k kun u mɔnŋ mɔnŋ duo ni Nɑɑsɑɑlet, k sɑɑ tumi niib *Suifnbɑ jɑɑnti dieok ni. U wɑnnu mɑnŋ din tien niib nɑ bɑktnɔunŋ bonciɑnn, k b boi b lieb ɑ: «Lee k juɑ nɑ lɑ yɑnbuolu nɑ? Lee k u lɑ yiikuo k tuun bɑktnɔunŋ tuonjɑɑnɑ nɑ? Kɑnpintɑ bik nɑ kɑɑ nɑ ɑɑ? U nɑɑ kɑɑ tie Mɑɑli nɑ ɑɑ? U ninjɑnm kɑɑ tie Sɑɑk nɑn Suosiɑf nɑn Siimɔn nɑn Suudɑ nɑ ɑɑ? U niipuob kɑɑ k tinm nɑn ŋɑnm lɑkn be duo nɑ nɑ ɑɑ? U lɑ lin nbɑ nɑ kul lee?» Lin nbɑ nɑ pɑɑk b din k tien’ɔ yɑdɑ. Ŋɑnn e k u din yet’b ɑ: «Yennu sɔkni k kɔnŋt nibɑɑkl, sie u mɔnŋ mɔnŋ duo ni, nɑn u ŋɑɑtieb buol ni.» L pɑɑk, u din k tun bɑktnɔunŋ tuonjɑɑnɑ bonciɑnn lenŋ, k mɑɑn niib mɑnŋ nbɑ k tien’ɔ yɑdɑ nɑ pɑɑk. L yuo mɑnŋ k Gɑɑliile kpɑnbɑl *Heluod din tɑn gbɑt k b piɑk Yiesu po, k u yet u tuontunnɑ ɑ: «Sɑn nbɑ dɑɑn wuul niib Yennu nyunwulu nɑ e nɑ. U fiil kuun ni e. L pɑɑk te k u mɔk yiikuo k tuun bɑktnɔunŋ tuonjɑɑnɑ nɑ.» Heluod ponŋ din yet u niib ɑ bin suol Sɑn nɑ, k bɑɑn’ɔ bɑnt k kuɑn’ɔ dɑnsɑlk ni. U din tun nnɑ u ninjɑ Fiiliip ŋɑɑpuo nbɑ k b yi’u Heluodiɑd nɑ pɑɑk e. K mɑɑn Sɑn din tuu yien Heluod ɑ: «Yennu *senni k cɑb’ɑ nɑn fɑn fɑt Heluodiɑd k kuɑn’ɔ.» Heluod din luon wun kpi Sɑn, ŋɑɑn tiin niib jɑŋmɑɑni, k mɑɑn suɑ kul ɑ mɑntk din tien yɑdɑ nɑn Sɑn tie *Yennu sɔkni e. K kpɑnbɑl Heluod mɑɑlu jɑɑnm dɑɑl tɑn bɑɑl, k Heluodiɑd bonpobik bɑɑl k tɑn wɑɑ siɑk jɑɑnm niib tuɑnn, k l mɑnŋ kpɑnbɑl Heluod bonciɑnn. L pɑɑk, k u pol mɔb ɑ u sɑɑ tul bonpobik nɑ lin nbɑ k u sɑɑ yet ɑ u luon nɑ kul ɑ. Ŋɑnn e k u nɑɑ Heluodiɑd wɑnn’ɔ wɑɑ sɑɑ boi lin nbɑ po, k bonpobik mɑnŋ yet kpɑnbɑl Heluod ɑ: «Potl Sɑn nbɑ wuul niib Yennu nyunwulu nɑ yul k kpien tɑtlɑɑɔk ni k tul’n.» Lin nbɑ nɑ din biil kpɑnbɑl nɑ pɑl ni hei, ŋɑɑn wɑɑ sɑt dɔnŋ pol mɔb sɑɑnm nɑ tuɑnn nɑ, k u cɑb ɑ bin sɑɑn tun nnɑ, k tun siɑb ɑ bin sɑɑn dɑnsɑlk ni, k sɑɑ pot Sɑn yul nɑ. K b sɑɑn k sɑɑ pot u yul k kpien tɑtlɑɑɔk ni, k tɑn tul bonpobik mɑnŋ, k u mun gɑɑl sɑɑn tul u nɑɑ. Ŋɑnn e k Sɑn *puolpoweitieb bɑɑl k tɑn jii u gbɑnɑnt k pii, ŋɑɑn ji sɑɑn k sɑɑ yet Yiesu. Yiesu nbɑ gbɑt Sɑn kpinu po yuo nbɑ, k u fiil lenŋ k kuɑ bulgbetl, k puot kuɑ muuk ni. Nibulciɑɔnŋ nɑ nbɑ lɑ nnɑ mɑnŋ, k b nyii b doi ni k sonm tɑɑtinŋ k wɑɑ’u. Yiesu nbɑ sɑɑ nyii bulgbetl ni k lɑ nibul mɑnŋ nɑ, k ninbɑɑɔk suol’ɔ bonciɑnn, k u te k bin nbɑ yiɑl k be lenŋ nɑ kul ɑ pɑɑk. Yennu nbɑ tɑn mɑɑkt yuo nbɑ, k u puolpoweitieb bɑɑl u buol ni, k tɑn yet’ɔ ɑ: «Nnɑ nɑ tie muuk ni e, k yennu mun yɑɑ wun bɑɑ e. L pɑɑk, ŋɑɑnt k niib nɑ n sɑɑn digbɑnbis nbɑ kpiɑ nɑ k sɑɑ lɑ jiet k dɑɑ.» Ŋɑnn e k u yet’b ɑ: «B dɑɑ sɑɑ. I mɔnŋ n tul’b jiet k bin di.» K b yet’ɔ ɑ: «Pɑɑni ŋɑnŋmu nɑn jɑnbis ŋɑnle kuukuɑ e be t buol ni.» Ŋɑnn e k u yet’b ɑ: «Jiin nɑ mɑn k tul’n.» K u yet nibul nɑ ɑ bin lɑkn kɑl kɑl muɑt pɑɑk, ŋɑɑn jii pɑɑni ŋɑnŋmu nɑ, nɑn jɑnbis ŋɑnle nɑ, k gokt u yul sɑnpɑɑpo, ŋɑɑn tul Yennu niipuouk l pɑɑk, ŋɑɑn ŋmit ŋmit pɑɑni nɑ k tul u puolpoweitieb, k b jii tol nibul nɑ. K b kul dii gbuo k tenn. K u puolpoweitieb lɑkn jiet nbɑ tenn nɑ, k l gbie kpɑncubt piik nɑn ŋɑnle. Niib nbɑ dii mɑnŋ din tie nɑn jɑb tusɑ ŋɑnŋmu nɑ, ŋɑɑn k puob nɑn wɑɑs kɑnn k pukn lenŋ. L puolpo k Yiesu din te k u puolpoweitieb kuɑ bulgbetl nɑ ni k liit k sɑɑ u tuɑnn po puotl, ŋɑɑn k u biɑl ɑ wun cɑb nibul nɑ. Wɑɑ cɑb nibul nɑ k gbenn yuo nbɑ, k u duo juɑl pɑɑk ɑ wun sɑɑ miɑl Yennu. K dɑɑjuouk tɑn bɑɑl k u biɑ dɑɑ be lenŋ u kuɑ. L yuo k u puolpoweitieb ŋɑnin ji be bulgbetl nɑ ni e, k biɑ fɔk nɑn gbingbɑnn ɑ, k nyunpɑnɑ diɑ k lɑb’m, k mɑɑn b din toki wounŋ o. L puolpo e k Yiesu tɑn sik nyun pɑɑk k sonm kojomuɑk, k sɑɑ b buol ni. U puolpoweitieb nbɑ tɑn lɑ k u sonm nyun pɑɑk k bɑɑt nɑ, k jɑŋmɑɑni suol’b bonciɑnn, k b yɑɑ ɑ: «Gotl mɑn, funfɔntuk o.» ŋɑɑn yikn jɑŋmɑɑnwuyikni. L tɑɑkpɑɑk ni k u yet’b ɑ: «Cien i pɑlɑ mɑn, l tie min e. I dɑɑ tiin jɑŋmɑɑni.» K Piɑl jiin k yet’ɔ ɑ: «Yonmdɑɑnɔ, l i set kii tie fin i e, fɑn te k n sonm nyun nɑ pɑɑk k cet’ɑ.» K u mun jiin yet Piɑl ɑ: «Bɑɑt nɑ.» K Piɑl nyii bulgbetl nɑ ni k sik nyun nɑ pɑɑk, k piin sonm ce Yiesu. Wɑɑ lɑ k wounŋ pil nyunpɑnɑ k bɑɑt yuo nbɑ, k jɑŋmɑɑni suol’ɔ, k u piint kpii l yuo, ŋɑɑn yikn ɑ: «Yonmdɑɑnɔ, fiel’n.» L tɑɑkpɑɑk ni k Yiesu tɑnt u nuu k suol’ɔ, ŋɑɑn boi’ɔ ɑ: «Fin yɑdɑ-kɑnpuɑn-dɑɑnɔ nɑ, bee k ɑ bils’n i?» Bɑɑ ŋmɑt sɑɑ kuɑ bulgbetl nɑ ni yuo nbɑ, k wounŋ nɑ nyik dɑnu. K bin nbɑ din be bulgbetl nɑ ni bɑɑl k tɑn gbɑɑn jiɑntl Yiesu ŋɑɑn yien ɑ: «Bɑlmɔni e, ɑ set tie Yennu Bijɑ e.» Yiesu nɑn u puolpoweitieb nbɑ sɑɑ bɑɑl mɔkgbenŋl nɑ puotl yuo nbɑ, k b nyii duo Genesɑɑlet. Duo mɑnŋ tieb nbɑ din bɑnn Yiesu nɑ pɑɑk, k b muɑnt lenŋ mɑnŋ niib kul ɑ, k b tikl b bɑɑtb kul k bɑɑl nɑn’m u buol ni, k tɑn bɑln’mɔ ɑ wun sɑk k bɑɑtb mɑnŋ n sii u liɑtfuouk mɔgbɑnn. K bin nbɑ sii’l nɑ kul ɑ din lɑ lɑɑfiɑ wɑɑ. L yuo nɑ k Fɑɑliisiɑnnbɑ nɑn *senniwɑntieb nyii Selusɑɑlenm k bɑɑl tɑn boi Yiesu ɑ: «Bee k ɑ *puolpoweitieb k wɑɑ t yejɑnm kɑɑl i? K mɑɑn b k nit b nii kɑɑ wɑɑ, ŋɑɑn di.» K Yiesu mun boi’b ɑ: «Bee k i mun k sɑk Yennu *senni weiu ŋɑɑn wɑɑ i yejɑnm kɑɑl i? Yennu e din yet ɑ: ‹Bɑɑk ɑ bɑɑ nɑn ɑ nɑɑ,› k biɑ yet ɑ: ‹Wun nbɑ tɑn pol u bɑɑ ɑmi u nɑɑ mɔb, bin kpi’u.› Ŋɑɑn yinm ŋɑnin yɑɑ ɑ, nilɔ i yet u bɑɑ ɑmi u nɑɑ ɑ: ‹Mɑɑ bo sɑɑ tul’i lin nbɑ nɑ, ŋɑɑn l kpɑnt Yennu yɑl ɑ,› ɑ l ji k tie miɑl kɑɑ nɑn wun tul u dɑnm siɑl. Yɑɑ tuun biɑnŋ nbɑ nɑ, i yiin Yennu senni yɑnn ɑ, i yejɑnm kɑɑl pɑɑk. Yinm kpinkpɑnni dɑnm nɑ, *Yennu sɔkni Esɑɑyi nbɑ din pɑk i po nɑ, set tie mɔni e, ɑ: ‹Niib nɑ tien’n bɑɑkl mɔi ni e, ŋɑɑn b pɑlɑ fɔk nɑn’n sɑɑn ɑ. B jiɑntl’n yɑnn e, k mɑɑn b diɑ nisɑɑli kɑɑ e k wɑnt niib nɑn l set tie min Yennu senni e nɑ.› » Ŋɑnn e k Yiesu yiin nibul nɑ k tɑn yet’b ɑ: «Gbiintl mɑn, k bɑnn lin nbɑ k n yɑɑ n yet’i nɑ pɑɑk. Lin nbɑ kuɑ nisɑɑlk mɔb ni kɑn fit tien’ɔ jɑknt u pɑl ni, ŋɑɑn lin nbɑ nyi u mɔb ni e tien’ɔ jɑknt.» Ŋɑnn e k u puolpoweitieb bɑɑl u buol ni k tɑn boi’ɔ ɑ: «A mi nɑn Fɑɑliisiɑnnbɑ nɑ nbɑ gbɑt ɑ mɑɑn mɑnŋ nɑ, b dukn nɑn ɑ sukl’b e k l k mɑnŋ’b ii?» K u jiin yet’b ɑ: «Tiik nbɑ kul k n Bɑɑ nbɑ be sɑnpɑɑpo nɑ k wuu, sie k b tɑn ŋɑbl e k lu. L pɑɑk, ŋɑɑnt’b mɑn k bii sɑɑ, k mɑɑn b tie nɑn juɑni nɑ e k dɑɑl b juɑnlei, k l i tie k juɑnŋ dɑɑl u luɑ, sie k b kul ɑ bɑɑ buotuk ni.» Ŋɑnn e k Piɑl jiin k yet’ɔ ɑ: «Wɑnt’t bɑljouk nɑ pɑɑk.» K Yiesu jiin ɑ: «I mun biɑ lek dɑɑ k fit bɑnn n mɑɑn nɑ pɑɑk ii? I k mi nɑn lin nbɑ kuɑ mɔb ni, l yɑɑ lin sik puol ni e, k kpɑnt bint k nyi ii? Ŋɑɑn bɑlbiit nbɑ k nisɑɑlk piɑk u mɔb ni, l nyii u pɑl ni e, ŋɑnn mun e tien’ɔ jɑknt. K mɑɑn nilɔ pɑl ni e k dudukbiit nyi, nɑn nikpinu, nɑn boncuncontuonɑ, nɑn nɑn-yukn, nɑn fɑɑk siɑlɑ, nɑn sɑnjɑɑɔnŋ. Lin nbɑ nɑ nbɑ e tien nisɑɑlk jɑknt, ŋɑɑn niijɑknɑ dinu k fit tien nilɔ jɑknt.» Tɔn, k Yiesu nyii lenŋ k sɑɑn Tiil nɑn Siidɔn bɔkl po. Ŋɑnn e k Kɑɑnɑɑn tinŋ ni puosuɑ nnɑ mun din be bɔkl mɑnŋ po, k tɑn bɑɑl Yiesu buol ni, k yien ɑ: «Yonmdɑɑnɔ, * Dɑɑfiid yɑɑbuonn, tin’n ninbɑɑɔk. Nɑlnbiiuk be n bipuo ni, k muks’ɔ bonciɑnn.» K Yiesu din k jiin siɑl, ŋɑɑn k u puolpoweitieb yet’ɔ ɑ wun bel puo nɑ, k mɑɑn u mɔk fuut. Ŋɑnn e k Yiesu jiin ɑ: «Islɑɑeltieb nbɑ tie nɑn pei nbɑ bot nɑ, ŋɑnm kuukuɑ e k Yennu tun’n ɑ mɑn sɑɑn b buol ni.» K puo mɑnŋ bɑɑl k tɑn gbɑɑn Yiesu tuɑnn, ŋɑɑn yet’ɔ ɑ: «Yonmdɑɑnɔ, sonmt’n» K Yiesu jiin yet’ɔ ɑ: «L k ŋɑn k nilɔ n jii wɑɑs jiet k tul bɔi.» Ŋɑnn e k puo nɑ jiin ɑ: «Yonmdɑɑnɔ, l set tie mɔni e, ŋɑɑn bɔi nbɑ duɑ b dɑɑnɔ sɑɑŋmɑni buol nɑ k kɔnŋt jebulɑ nbɑ bɑɑ tinŋ ni k tɔki di.» Ŋɑnn e k Yiesu ji yet’ɔ ɑ: «A tien’n yɑdɑ bonciɑnn. Lin nbɑ k ɑ luon nɑ, Yennu n tun nnɑ k tul’ɑ.» K u bipuo mɑnŋ lɑ lɑɑfiɑ l tɑɑkpɑɑk ni. L puolpo e k Yiesu nyii lenŋ k gɑl Gɑɑliile mɔkgbenŋl kpinŋ, k sɑɑ duo kɑl juɑl pɑɑk. K nibulciɑɔnŋ bɑɑl u buol nɑn wɔbi, nɑn juɑni, nɑn mui, nɑn diɑni, nɑn bin nbɑ yiɑl yiɑlbuolu buolu kul ɑ, k tɑn bil’b u tuɑnn, k u te k b kul ɑ pɑɑk. K nibul nɑ nbɑ lɑ k mui piɑk, k diɑni pɑɑk, k wɔbi sonm, k juɑni lɑɑt nɑ, k l yɑɑl ŋɑɑn lit’b, k b piɑk dont Islɑɑeltieb Yennu nɑ sɑnn. K Yiesu yiin u puolpoweitieb k tɑn yet’b ɑ: «Ninbɑɑɔk mɔk’n nɑn niib nɑ, k mɑɑn dɑɑ ŋɑntɑ e nɑ k b be n buol nnɑ, ŋɑɑn k mɔk jiet k di. N k luon mɑn kunn’b kon, k b tɑn sɑɑ mɑnn fib kon.» K u puolpoweitieb boi’ɔ ɑ: «Lee k t sɑɑ lɑ jiet muuk nɑ ni k tul nibulciɑɔnŋ nɑ k bin di k gbuo?» K u boi’b ɑ: «I mɔk pɑɑni ŋɑnŋɑ e?» K b jiin ɑ: «Ŋɑnlole, nɑn jɑnbis wɑɑnm-nnɑ.» K u yet niib nɑ ɑ bin kɑl tinŋ ni, ŋɑɑn jii pɑɑni ŋɑnlole nɑn jɑnbis nɑ, k tul Yennu niipuouk l pɑɑk, ŋɑɑn ŋmit ŋmit tul u puolpoweitieb, k b jii tol tol niib mɑnŋ. K niib nɑ kul dii k gbuo ŋɑɑn k l tenn. K u puolpoweitieb lɑkn jiet nbɑ tenn nɑ, k l gbie kpɑncubt ŋɑnlole. K niib nbɑ dii mɑnŋ din tie jɑb tusɑ ŋɑnnɑ, k puob nɑn wɑɑs kɑnn k pukn lenŋ. L puolpo k Yiesu cɑb niib mɑnŋ, ŋɑɑn kuɑ bulgbetl ni k puot kuɑ Mɑɑgɑɑdɑn tinŋ ni. L puolpo k Fɑɑliisiɑnnbɑ nɑn *Sɑɑdiuseɑnbɑ bɑɑl Yiesu buol ni. Bɑɑ luon k bin jɑnm’ɔ nɑ pɑɑk, k b yet’ɔ ɑ wun tien bɑktnɔunŋ *nyinn k lin wɑnn nɑn u yiikuo set nyii Yennu buol ni e. K u jiin ɑ: «Dɑɑjomɑɑsl, l i tie k sɑnpɑgbɑnt mɔn kpein, i tuu yet ɑ: ‹Wonn ŋɑnin, dɑɑl won sii yien.› Ŋɑɑn l i tie k sɑnpɑgbɑnt mɔn ŋɑɑn tɑn bɔnt sɑn-nyiɑɔk ni, i tuu yet ɑ: ‹Dinnɑ ŋɑnin, sɑɑk sɑɑ bɑɑ wɑɑ.› I fit buktl sɑnpɑgbɑnt nyinɑ, ŋɑɑn kɑn fit bukt mɔtɑɑnɑ yuo nɑ. Mɔtɑɑnɑ niib, biitdɑnm nbɑ k wɑɑ Yennu nɑ luon k bin lɑ bɑktnɔunŋ nyinɑ, ŋɑɑn b kɑn lɑ nyinsiɑl l i kii tie Suonɑ nyinbuolu nɑ kuukuɑ i kɑɑ.» L puolpo k u siet k nyik’b ŋɑɑn yɑɑt. Tɔn, Yiesu nɑn u *puolpoweitieb nbɑ din sɑɑ mɔkgbenŋl puotl nɑ, k u puolpoweitieb nɑ ji tiɑl nɑn b k jii pɑɑnu. Ŋɑnn e k u yet’b ɑ: «Ii mi mɑn Fɑɑliisiɑnnbɑ nɑn Sɑɑdiuseɑnbɑ * dɑtinŋ po.» K b ji piin k yien b lieb ɑ: «Tɑɑ k bɑɑl nɑn pɑɑnu nɑ pɑɑk e te k u yien nnɑ mɑnŋ.» K Yiesu bɑnn bɑɑ yien lin nbɑ mɑnŋ, k u boi’b ɑ: «Yinm yɑdɑ-kɑnpuɑnɑ dɑnm nɑ, bee k i yien i lieb nɑn yɑɑ k bɑɑl nɑn pɑɑnu nɑ pɑɑk e? I biɑ lek dɑɑ k bɑnn l pɑɑk ii? I k tiɑn mɑɑ dɑɑn jii pɑɑni ŋɑnŋmu k dinn jɑb tusɑ ŋɑnŋmu nɑ ɑɑ? Kpɑncubt ŋɑnŋɑ e k i dɑɑn lɑkn jiet nbɑ tenn nɑ? K i biɑ k tiɑn jɑb tusɑ ŋɑnnɑ nbɑ k n dɑɑn jii pɑɑni ŋɑnlole dinn’b nɑ po oo? I dɑɑn lɑkn jiet nbɑ tenn nɑ k gbien cubt ŋɑnŋɑ e? Bee k i k bɑnn nɑn l k tie pɑɑnu po kɑɑ k n piɑk i? Ii mi mɑn Fɑɑliisiɑnnbɑ nɑn Sɑɑdiuseɑnbɑ dɑtinŋ nɑ po.» Ŋɑnn e k u puolpoweitieb ji bɑnn nɑn l k tie dɑtinmɔnŋ po kɑɑ k u piɑk ɑ bii guu b mɔnŋ, ŋɑɑn l tie Fɑɑliisiɑnnbɑ nɑn Sɑɑdiuseɑnbɑ wɑnnu nɑ e k u piɑk l po. K Yiesu nbɑ din tɑn bɑɑl duo nbɑ k b yi Fiiliip Seesɑɑle nɑ ni yuo nbɑ, k u boi u puolpoweitieb ɑ: «Niib yɑɑ ɑ *Nisɑɑlk Bijɑ tie ŋmee?» Ŋɑnn e k b jiin ɑ: «Siɑb yɑɑ ɑ, ɑ tie Sɑn wun nbɑ dɑɑn wuul niib Yennu nyunwulu nɑ e, k siɑb yɑɑ ɑ, ɑ tie Elii e, k siɑb yɑɑ ɑ, ɑ tie Selemi e ɑmi *Yennu sɔkniisuɑ.» K u ji boi’b ɑ: «K yinm mun, i yɑɑ ɑ n tie ŋmee?» Ŋɑnn e k Siimɔn Piɑl jiin yet’ɔ ɑ: «Fin e tie mɑnfodɑɑnɔ Yennu Bijɑ *Klistu.» K Yiesu yet’ɔ ɑ: «Fin Siimɔn, Suonɑ bijɑ nɑ, pɑlpienn be ɑ pɑɑk, k mɑɑn nisɑɑlk kɑɑ fiit mɑɑn nɑ wɑnn’ɑ ni, ŋɑɑn n Bɑɑ nbɑ be sɑnpɑɑpo nɑ e fiit k wɑnn’ɑ. Fin Piɑl, min ŋɑnin yien’ɑ e, ɑ tie tɑnn e, k tɑnpiiuk nɑ pɑɑk e k n sɑɑ jii n jɑɑnti k senn, k kuun kɑn fit nyɑnn’l. N sɑɑ tul’ɑ Yennu nɑɑn tɑnmɔb gɑnn pieni. L pɑɑk, lin nbɑ k ɑ tɑn lol tingbounŋ nɑ ni, ŋɑnn e k n Bɑɑ mun biɑ sɑɑ lol *Yendɔunŋ ni, k lin nbɑ k ɑ biɑ lot, ŋɑnn e k n Bɑɑ mun biɑ sɑɑ lot Yendɔunŋ ni.» Ŋɑnn e k Yiesu yet u puolpoweitieb nɑ nɑn ninmɔnn ɑ bii mi k bin yet suɑ nɑn ŋuɑ e tie Klistu nɑ. Lɑɑ din nyii l yuo mɑnŋ k jii sɑɑ, k Yiesu piin k yien u puolpoweitieb ɑ: «Sie k n fɑbl k sɑɑn Selusɑɑlenm, ŋɑɑn t tinŋ ni sɑɑkɑb, nɑn Yennu mɑnntieb yudɑnm, nɑn *senniwɑntieb sɑɑ din’n fɑlɑ bonciɑnn, k biɑ tɑn sɑɑ kpi’n ɑ, ŋɑɑn dɑɑ ŋɑntɑ dɑɑl k n sɑɑ fiil kuun ni.» K Piɑl yiin’ɔ kpinŋ po k sɑɑ kpil’ɔ ɑ: «Yonmdɑɑnɔ, Yennu n bɔl bonbiil nɑ k l dɑɑ bɑɑt ɑ pɑɑk.» Ŋɑnn e k Yiesu jiɑnt yet Piɑl ɑ: « *Sɑɑtɑn nɑ, sietl nnɑ nɑ. A tie tɑngbiɑtkɑl e n sɔnu ni, k mɑɑn ɑ k duki lin nbɑ tie Yennu yɑl po, ŋɑɑn duki lin nbɑ tie nisɑɑli yɑl po,» ŋɑɑn yet u puolpoweitieb ɑ: «Wun nbɑ i luon wun wei’n, sie k u yit u mɔnŋ sɑlk k jii u kuun dɑpunpunn kii wɑɑ’n, k mɑɑn wun nbɑ k sɑk wun jii u mɑnfuol k tul’n, ŋuɑ e tɑn sɑɑ kɔnŋ’l, ŋɑɑn wun nbɑ yit u mɑnfuol sɑlk n pɑɑk, ŋuɑ e tɑn sɑɑ lɑ’l nɑn bɑlmɔni. L i tie k nilɔ yen tingbounŋ nɑ mɔktuk kul ɑ, ŋɑɑn tɑn kɔnŋ u mɑnfuol, nyɔlɑnt po e k u sɑɑ lɑ? Suɑ sɑɑ fit jii siɑl k dɑɑ u mɑnfuol ii? K mɑɑn Nisɑɑlk Bijɑ tɑn sɑɑ jen nɑn u Bɑɑ yiikuo, nɑn u *mɑlɑkɑɑnbɑ, k l yuo mɑnŋ u tɑn sɑɑ pɑ suɑ kul nɑn u tuonɑ nbɑ tie biɑnŋ nbɑ. Bɑlmɔni e k n yien’i nɑ, siɑb be nnɑ, k dɑɑ kɑn kpo sie k b tɑn lɑ Nisɑɑlk Bijɑ nɑɑn dinu bɑɑlu.» L puolpo e k l tɑn tien dɑɑ ŋɑnluob, k Yiesu jii Piɑl, nɑn Sɑɑk nɑn u ninjɑ Sɑn, k duo nɑn’m juɑl nbɑ fɔk bonciɑnn pɑɑk, b kuukuɑ. L yuo nɑ k b lɑ k u lebt, k u nunm po kpint nyili nɑn yennu nɑ, k u tiɑt penn k nyilk nɑn yentu nɑ. K b lɑ Muois nɑn Elii lekt yonm, k sie piɑk nɑn’ɔ. Ŋɑnn e k Piɑl yet’ɔ ɑ: «Yonmdɑɑnɔ, l ŋɑn nɑn tii be nnɑ nɑ. L i tie k ɑ bo sɑɑ sɑk, n bo sɑɑ fɑɑ lɑnbont ŋɑntɑ e, k yenn i tie ɑ yɑl, k liel i tie Muois yɑl, k liel i mun i tie Elii yɑl.» K Piɑl mɔb dɑɑ k bɑɑ tinŋ, k sɑnpɑgbɑnpieonŋ sik bɑkn b pɑɑk, k b gbɑt kunkɔsiɑl nyii sɑnpɑgbɑnn nɑ ni, k yet ɑ: «N Bilonkɑk e nɑ, wun nbɑ k n nunm gbuo’u nɑ. Gbiintl u mɔb mɑn.» K Yiesu *puolpoweitieb nɑ nbɑ gbɑt kunkɔl mɑnŋ nɑ, k jɑŋmɑɑni suol’b, k b bɑɑ wokn tinŋ ni. K Yiesu bɑɑl k tɑn yii yii’b, ŋɑɑn yet’b ɑ: «Fiit mɑn. I dɑɑ tiin jɑŋmɑɑni.» K b gokt b yulɑ, ŋɑɑn ji k lɑ suɑ b buol, sie Yiesu kuukuɑ. Bɑɑ nyii juɑl nɑ pɑɑk k sik yuo nbɑ, k Yiesu yet’b nɑn ninmɔnn ɑ: «I dɑɑ yien suɑ lin nbɑ k i lɑ nɑ, k sɑɑ tuu yuo nbɑ k *Nisɑɑlk Bijɑ nɑ tɑn sɑɑ fiil kuun ni.» Ŋɑnn e k u puolpoweitieb boi’ɔ ɑ: «Bee k *senniwɑntieb yɑɑ ɑ sie k *Yennu sɔkni Elii bɑɑl *Klistu sinsinn i?» K u jiin yet’b ɑ: «L set tie mɔni e nɑn sie k Elii mɑnŋ bɑɑl sinsinn k tɑn ŋɑnm bonsiɑl kul k senn’l l sɔnu ni. Ŋɑɑn min e yien’i nɑ, Elii ponŋ bɑɑl nɑ, ŋɑɑn b k bɑn nɑn l tie ŋuɑ e, k diɑ’u gbɑkɑ gbɑkɑ nnɑ, nɑn bɑɑ luon biɑnŋ nbɑ. Nnɑ e k b mun biɑ sɑɑ tien Nisɑɑlk Bijɑ nɑ, k din’ɔ fɑlɑ.» Ŋɑnn e k u puolpoweitieb ji bɑnn nɑn u piɑk Sɑn wun nbɑ dɑɑn wuul niib Yennu nyunwulu nɑ po e. K Yiesu nɑn u puolpoweitieb bɑntɑ mɑnŋ tɑn bɑɑl nibulciɑɔnŋ nɑ buol, k jɑsuɑ bɑɑl k tɑn gbɑɑn Yiesu tuɑnn, ŋɑɑn yet’ɔ ɑ: «Yonmdɑɑnɔ, tinin n bijɑ nɑ ninbɑɑɔk, k mɑɑn u bɑɑ gbitgbiil e. L dɑɑmi’ɔ bonciɑnn k u tun bɑɑ muu ni, k biɑ tun bɑɑ nyun ni yuo kul ɑ. K n bɑɑl nɑn’ɔ ɑ puolpoweitelieb buol ni, k b gbɑl u tebu.» K Yiesu boi’b ɑ: «Yinm mɔtɑɑnɑ niib nbɑ mɑntk kɑɑ yɑdɑ, k biɑ k wɑɑ Yennu fɑnu nɑ, n sɑɑ wei nɑn’i nlee? Yuo nlee k n sɑɑ di suklu nɑn’i mɑntk i? Bɑɑt mɑn nɑn bik mɑnŋ nnɑ.» K Yiesu tiɑn nɑlnbiiuk nɑ pɑɑk, k u ciɑl nyii ŋɑɑn nyik bik nɑ, k u pɑɑk kenken l yuo nɑ. L puolpo, k Yiesu puolpoweitieb bɑɑl u buol, b kuukuɑ, k tɑn boi’ɔ ɑ: «Bee k tinm ŋɑnin bo k fit nyinn nɑlnbiiuk mɑnŋ i?» K u jiin yet’b ɑ: «I yɑdɑ kɑɑln pɑɑk. Bɑlmɔni e k n yien’i nɑ, l i tie k i tien Yennu yɑdɑ k l yɑb nɑn junjukl binn nɑ, i sɑɑ fit yet juɑl nɑ ɑ: ‹Fiit k sɑɑ bɑɑ nɑ wɑɑ,› k l set sɑɑ fiil e. I bo sɑɑ fit tun bonsiɑl kul ɑ. Ŋɑɑn nɑlnbiiuk nɑ buolu ŋɑnin, i kɑn fit nyinn’l, sie k i lol mɔi k mei Yennu.» Tɔn, Yiesu puolpoweitieb nbɑ tɑn lɑkn lieb Gɑɑliile tinŋ ni nɑ, k u yet’b ɑ: «B tɑn sɑɑ jii Nisɑɑlk Bijɑ k kubn’ɔ niib nuu ni k b sɑɑ kpi’u, ŋɑɑn dɑɑ ŋɑntɑ dɑɑl k u biɑ sɑɑ fiil kuun ni.» K l ji biil u puolpoweitieb pɑlɑ ni bonciɑnn. K Yiesu nɑn u puolpoweitieb nbɑ tɑn bɑɑl Kɑpelnɑunm yuo nbɑ, k Yennu jɑɑnti ŋɑsɑɑkɑk likgɑɑltieb bɑɑl k tɑn boi Siimɔn Piɑl ɑ: «A wɑntuɑ k pɑ likli mɑnŋ ii?» K Piɑl jiin ɑ: «U pɑ,» ŋɑɑn kuɑ ŋɑɑk ni. L yuo nɑ k Yiesu dɔnŋ piin l mɑɑn k boi’ɔ ɑ: «Siimɔn, ɑ duki nlee? Lɑnm e tuu pɑ lɑnpo k tien tingbounŋ nɑ kpɑnbɑlɑ, b mɔnŋ buolu ni niib ɑmi sɑɑnm i?» K u jiin ɑ: «Sɑɑnm e.» K Yiesu yet’ɔ ɑ: «Tɔn, l i tie nnɑ i e, l wɑnt nɑn b mɔnŋ buolu ni nuu kɑɑ l ni. Ŋɑɑn tɑɑ k luon k tin donn b wutuol nɑ pɑɑk, i sɑɑ mɔkgbenŋl nɑ ni, k sɑɑ lu jɑnpienu k dɑt jɑnŋ nbɑ k ɑ suol’ɔ sinsinn nɑ k donn. L i tie k ɑ yɑɑt u mɔb, ɑ sɑɑ lɑ likli nbɑ sɑɑ fit pɑ min nɑn fin pɑɑk, k fɑn jii k pɑ’b.» L yuo nɑ k Yiesu *puolpoweitieb bɑɑl u buol ni k tɑn boi’ɔ ɑ: «Ŋmee tie nijɑɑnn Yennu nɑɑn ni?» K u yiin bik nnɑ k tɑn senn’ɔ b sinsuuk ni, ŋɑɑn yet’b ɑ: «Bɑlmɔni e k n yien’i nɑ, wun nbɑ k lebt u binbenŋ k l tie nɑn bik binbenŋ nɑ, u kɑn kuɑ Yennu nɑɑn ni kɑɑ wɑɑ. Wun nbɑ siknt u mɔnŋ k tie nɑn bik nɑ, ŋuɑ e tɑn sii tie sɑɑkuɑ Yennu nɑɑn ni. Wun nbɑ gɑɑl bik nɑ buolu n sɑnn pɑɑk, min e k u gɑɑl’n.» «Wɑɑs nbɑ tien’n yɑdɑ nɑ ŋɑnin, wun nbɑ te k b yenɔ kuɑ tun biit, b i bo i lɑnn nɑɑl l dɑɑnɔ tulu ni k tut’ɔ nɑn’n k lu’u mɔkgbenŋl ni gbɑɑ k u dii nyun, l bo sii sɔ k tul’ɔ. Bonbiil sii be tingbounŋ nɑ tieb nbɑ kpɑnn b lieb k b tuun tuonbiit nɑ pɑɑk. Jinjɑnmi set sɑɑ bɑɑl, ŋɑɑn l sii bi k tien wun nbɑ te k jinjɑnmi bɑɑt niib pɑɑk. «L i tie k ɑ nuu ɑmi ɑ tɑɑpɑɔnŋ te k ɑ tuun biit, fɑn pot’l k lu. L i tie k ɑ mɔk nuu yenu kuɑ, ɑmi tɑɑpɑn-yenn kuɑ, k lɑ mɑnfuol nbɑ kɑɑ gbennu, l cie nɑn fii mɔk ɑ nii kul nɑn ɑ tɑɑ kul ŋɑɑn Yennu n tɑn kuɑn’ɑ muu nbɑ kɑn mi kpien nɑ ni. A ninbinn i te k ɑ tuun biit, fɑn kpɑkl’ɔ k lu bɑnfɔkl ɑ. L i tie k ɑ mɔk ninbin-yenn k lɑ mɑnfuol mɑnŋ, l cie nɑn fii mɔk ninbinɑ ŋɑnle ŋɑɑn Yennu n tɑn kuɑn’ɑ muu mɑnŋ ni.» «Ii mi mɑn k suɑ n siɑn wɑɑs mɑnŋ ni yenɔ kuɑ. K mɑɑn n yien’i e, b *mɑlɑkɑɑnbɑ nbɑ be sɑnpɑɑpo nɑ be n Bɑɑ tuɑnn yuo kul. K mɑɑn *Nisɑɑlk Bijɑ bɑɑl ɑ wun tɑn fiel bin nbɑ bot e. «I duki nlee? L i tie k nilɔ mɔk pei kobk, k yenɔ kuɑ tɑn bot, u kɑn nyik pei piin-yiɑ nɑn bɑn-yiɑ nɑ juɑl pɑɑk, ŋɑɑn sɑɑn k sɑɑ lon pebotkɑɔk nɑ ɑɑ? U lɑ’u yuo nbɑ, bɑlmɔni e k n yien’i nɑ, u sii mɔk pɑlpienn nɑn mɔni pebotkɑɔk nbɑ k u lɑ’u nɑ pɑɑk, k gɑl pei piin-yiɑ nɑn bɑn-yiɑ nbɑ k bot nɑ pɑɑk. Nnɑ e mun k i Bɑɑ nbɑ be sɑnpɑɑpo nɑ k luon k wɑɑs nɑ ni yenɔ kuɑ n bot.» «A nɑɑ bik i tun siɑl k biil’ɑ, fɑn sɑɑn u buol ni yuo nbɑ k u dɑɑ be u kuukuɑ nɑ, k pɑk wɑnn’ɔ u biit, k l i tie k u bɑnn u biit, i biɑ ŋɑnm tien nɑɑ wɑɑs e nɑ. Ŋɑɑn l i tie k u k sɑk wun gbɑt tul’ɑ ni, fɑn yiin niyenɔ ɑmi niib bɑnle k pukn ɑ pɑɑk k yin sɑɑn u buol ni nɑn Yennu lolkpel kɑdɑɑɔk nbɑ wɑnt bɑnnu nbɑ, ɑ niib bɑnle ɑmi bɑntɑ mɑnŋ n gbɑt mɑɑn mɑnŋ k tien ɑ siɑlɑɑdɑnm. L i tie k u biɑ k sɑk wun gbɑt k tul’b, fɑn pɑk k wɑnn jɑɑnti niib kul ɑ, k l i tie k u biɑ k sɑk nɑn wun gbɑt k tul Yennu niib, yin ji ŋɑɑn k wuu tie nɑn *lɑnpogɑɑltuɑ nɑ ɑmi wun nbɑ k tie Yenweilɔ nɑ.» «Bɑlmɔni e k n yien’i nɑ, lin nbɑ k i tɑn lol tingbounŋ nɑ ni, ŋɑnn e k n Bɑɑ mun biɑ sɑɑ lol *Yendɔunŋ ni, k lin nbɑ k i biɑ lot, ŋɑnn e k n Bɑɑ mun biɑ sɑɑ lot Yendɔunŋ ni. «N biɑ yien’i e nɑ, i ni bɑnle i tɑɑn mɔb tingbounŋ nɑ ni k mei n Bɑɑ nbɑ be sɑnpɑɑpo nɑ siɑl pɑɑk, u sɑɑ tun yɑɑ luon biɑnŋ nbɑ k tul’i wɑɑ. K mɑɑn siɑn nbɑ k niib bɑnle ɑmi bɑntɑ tɑɑn lɑkn n sɑnn ni, n be b sinsuuk ni.» Ŋɑnn e k Piɑl bɑɑl Yiesu buol ni k tɑn boi’ɔ ɑ: «Yonmdɑɑnɔ, l i tie k n nɑɑ bik tun’n biit, tɑɑl munŋɑ e k n nyik cɑb’ɔ? Tɑɑl munlole ee?» K Yiesu jiin ɑ: «Aɑi, tɑɑl munlole kuukuɑ kɑɑ, ŋɑɑn tɑɑl piinlole k sɑɑ jɑnŋ tɑɑl munlole. L pɑɑk, Yennu nɑɑn tie nɑn kpɑnbɑlsuɑ nbɑ din tɑn yiin u ŋɑɑtuontunnɑ ɑ wun gɑɑl u pɑnɑ nɑ e. Wɑɑ piin kɑnu yuo nbɑ k b kuɑ nɑn jɑsuɑ nnɑ, k u diɑ kpɑnbɑl nɑ pɑnn tɑɑlɑnnbɑ tusɑ piik (10.000). K u kɑn fit lɑ k pɑ, k kpɑnbɑl nɑ tul mɔb ɑ bin kɔi ŋuɑ nɑn u ŋɑɑpuo nɑn u wɑɑs, nɑn wɑɑ mɔk lin nbɑ kul ɑ, k tɑn pɑ pɑnn mɑnŋ. Ŋɑnn e k juɑ mɑnŋ gbɑɑn kpɑnbɑl nɑ tuɑnn ni nɑn bɑlunŋ, ŋɑɑn yien ɑ: ‹Cɑnbɑɑ, n sɑɑ pɑ l kul ɑ. Lek din suklu.› K ninbɑɑɔk suol kpɑnbɑl nɑ bonciɑnn, k u cɑb’ɔ nɑn pɑnn mɑnŋ, ŋɑɑn ŋɑɑ’u. «Juɑ mɑnŋ nbɑ ŋɑnin nyii yuo nbɑ, k u cet u tuontunluɑ, k u mun diɑ u pɑnn denienbɑ kobk (100), k u cek u kunkɔl ni k ŋmɑki, ŋɑɑn yien’ɔ ɑ: ‹Pɑn n pɑnn nɑ.› K u luɑ nɑ mun gbɑɑn u tuɑnn ni nɑn bɑlunŋ, k yien ɑ: ‹Din suklu, k n sɑɑ pɑ’ɑ wɑɑ.› K juɑ nɑ ŋɑnin ji k sɑk u luɑ nɑ bɑlunŋ nɑ, ŋɑɑn te k b jii’u k kuɑn’ɔ dɑnsɑlk, ɑ sie k u tɑn pɑ pɑnn nɑ wɑɑ, k wun nyinn’ɔ. K u tuontunlieb nɑ nbɑ lɑ nnɑ yuo nbɑ, k l biil b pɑlɑ ni bonciɑnn, k b ŋmɑt k sɑɑ yet kpɑnbɑl nɑ lin nbɑ kul tun mɑnŋ. K kpɑnbɑl nɑ tun ɑ bin yiin juɑ mɑnŋ nɑ, ŋɑɑn piin u sukt ɑ: ‹Fin bon-yuonn nɑ, fɑɑ bo bɑln’n nɑ pɑɑk, k n cɑb› ɑ fɑɑ diɑ n pɑnn nbɑ kul. L mun bo ŋɑn nɑn fɑn cɑb *ɑ luɑ nɑ k tin’ɔ ninbɑɑɔk, nɑn mɑɑ bo cɑb’ɑ biɑnŋ nbɑ nɑ.› K kpɑnbɑl nɑ wutuol nbɑ duo bonciɑnn biɑnŋ nbɑ nɑ, k u jii juɑ mɑnŋ k sɑɑn kuɑn’ɔ dɑnsɑlk ɑ bin ŋmɑnn u tubl k wuu be lenŋ k sɑɑ tuu dɑɑl nbɑ k u tɑn sɑɑ pɑ pɑnn nɑ kul.» Bɑljouk nɑ puolpo k Yiesu ji yet ɑ: «L i tie k i k nyikt cɑbt i lieb nɑn i pɑlɑ kul, nnɑ e k n Bɑɑ nbɑ be sɑnpɑɑpo nɑ sɑɑ tien yinm mun.» Yiesu nbɑ pɑk mɔbonɑ nɑ k gbenn yuo nbɑ, k u nyii Gɑɑliile k sɑɑn Suude tinŋ nbɑ be *Suulden mɔk-puotl. K nibulciɑɔnŋ wɑɑ u puolpo, k u te k bin nbɑ yiɑl nɑ kul ɑ pɑɑk lenŋ. K Fɑɑliisiɑnnbɑ siɑb bɑɑl u buol ni k luon bin jɑnm’ɔ, k boi’ɔ ɑ: «Yennu *senni cɑbt nɑn juɑ n yet u ŋɑɑpuo yɑnn ii?» K u jiin ɑ: «I k lii Yennu lolkpel kɑdɑɑɔk nbɑ yet biɑnŋ nbɑ nɑ ɑɑ? ɑ: ‹Piinu ni wɑɑ, Yennu din nɑn juɑ nɑn puo e, ŋɑɑn din yet ɑ, Lin nbɑ nɑ pɑɑk e k juɑ tuu sɑɑ nyik u bɑɑ nɑn u nɑɑ, ŋɑɑn k ŋuɑ nɑn u ŋɑɑpuo n kuɑn lieb, k b niib bɑnle n tɑɑn tien gbɑnɑn-yent kuɑ.› L i tie nnɑ, b ji k tie niib bɑnle kɑɑ, ŋɑɑn b tie niyenɔ kuɑ e. L pɑɑk, bin nbɑ k Yennu jii’b k tɑɑn nɑn lieb, nisɑɑlk i mi k wun bɔkt’b.» K Fɑɑliisiɑnnbɑ nɑ boi’ɔ ɑ: «Bee k Muois ŋɑnin din tul yiikuo u senni nɑ ni, nɑn juɑ sɑɑ fit tul u ŋɑɑpuo puoyetu kɑdɑɑɔk ŋɑɑn yet’ɔ?» K Yiesu jiin k yet’b ɑ: «I tonu pɑɑk e te k Muois din tul yiikuo ɑ yii yien i ŋɑɑpuob, ŋɑɑn piinu ni l din k tie nnɑ kɑɑ. Bɑlmɔni e k n yien’i, wun nbɑ yet u ŋɑɑpuo, k l k tie u tun * boncuncontuonn kɑɑ, ŋɑɑn kuɑn puogɑnɔ, u tun boncuncontuonn ɑ.» K Yiesu *puolpoweitieb yet’ɔ ɑ: «L i tie nnɑ i e juɑ nɑn u ŋɑɑpuo sinsuuk ni, ŋɑnn ŋɑnin juɑ i kii kuɑn puo, l sɔ.» K u yet’b ɑ: «Suɑ kul kɑn fit diɑ wɑnnu mɑnŋ. Bin nbɑ k Yennu tul’b l yiikuo nɑ, ŋɑnm kuukuɑ e sɑɑ fit diɑ’l. K mɑɑn bonɑ bonciɑnn e te k jɑsiɑb k kuɑnt puob. B tuu mɑl siɑb, k b k tie jɑb. Siɑb mun, niib e tuu tien’m jɑtuɑkɑ, k siɑb mun, Yennu nɑɑn pɑɑk e tuu te bin yet puo kuɑnu, ŋɑɑn wun nbɑ sɑɑ fit diɑ wɑnnu mɑnŋ, wun diɑ’l.» Tɔn, k nisiɑb tɑn bɑɑl nɑn b wɑɑs Yiesu buol ni, ɑ wun yii u nii b pɑɑk, k miɑl Yennu b pɑɑk, ŋɑɑn k u puolpoweitieb tiɑn niib mɑnŋ pɑɑk. K Yiesu yet ɑ: «Ŋɑɑnt mɑn k wɑɑs mɑnŋ i bɑɑt n buol ni nɑ, k dɑɑ tiɑn’m, k mɑɑn b buolu e yen Yennu nɑɑn,» ŋɑɑn jii u nii k yii yii b pɑɑk, ŋɑɑn ji siet sɑɑn. L yuo mɑnŋ k nɑɑsimɔ nnɑ bɑɑl Yiesu buol ni k tɑn boi’ɔ ɑ: «Wɑntuɑ, tuonŋɑnlɑnn po e k n sɑɑ tun, k lɑ mɑnfuol nbɑ kɑɑ gbennu?» K Yiesu jiin’ɔ ɑ: «Bee k ɑ boi’n lin nbɑ ŋɑn po? Yenɔ kuɑ e ŋɑn, l i tie k ɑ luon k ɑ kuɑ mɑnfuol ni, ii diɑ Yennu senni nɑ.» K nɑɑsimɔ nɑ boi Yiesu ɑ: «Senlɑni po e?» K u yet’ɔ ɑ: «Dɑɑ kpi nilɔ. Dɑɑ tuun boncuncontuonɑ. Dɑɑ jɑɑn. Dɑɑ tie fɑɑk siɑlɑ. Ii tien ɑ bɑɑ nɑn ɑ nɑɑ nibɑɑkl, ŋɑɑn kii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.» K nɑɑsimɔ nɑ yet’ɔ ɑ: «N ponŋ wei senni nɑ kul ɑ. Lɑnn po e k n biɑ sɑɑ tun pukn lin nbɑ nɑ pɑɑk i?» K Yiesu jiin’ɔ ɑ: «L i tie k ɑ luon k ɑ binbenŋ i tie fɑnu nɑn bɑlmɔni, fii sɑɑ k sɑɑ kɔi fɑɑ mɔk lin nbɑ k jii l likli mɑnŋ k tul tɑlɑs-dɑnm, k ɑ tɑn sɑɑ lɑ mɔktuk sɑnpɑɑpo. L puolpo k ɑ jen nɑ kii wɑɑ’n.» K nɑɑsimɔ nɑ nbɑ gbɑt nnɑ yuo nbɑ, k u siet nɑn pɑlbiil, k mɑɑn u din mɔk mɔktuk bonciɑnn. Ŋɑnn e k Yiesu ji yet u puolpoweitieb ɑ: «Bɑlmɔni e k n yien’i nɑ, l sii pɑɑl bonciɑnn nɑn mɔktɔ n kuɑ Yennu nɑɑn ni. L pɑɑl nɑn yuyouk n kuɑ kpɑlpienu miɑl ni, ŋɑɑn l biɑ mɑntk pɑɑl k cie nɑn mɔktɔ n kuɑ Yennu nɑɑn ni.» K u puolpoweitieb nbɑ gbɑt nnɑ mɑnŋ, k l yɑɑl ŋɑɑn lit’b bonciɑnn, k b piin k boi b lieb ɑ: «L i tie nnɑ i e, ŋmee ji sɑɑ fit k lɑ fielu?» Ŋɑnn e k Yiesu got’b ŋɑɑn yet ɑ: «Nisɑɑlk kɑn fit tun lin nbɑ nɑ, ŋɑɑn siɑl k pɑɑl Yennu buol ni.» L yuo nɑ k Piɑl yet’ɔ ɑ: «Gotl, tinm ŋɑnin nyik t bonsiɑl kul ɑ ŋɑɑn wɑɑ’ɑ. T nyuɑt tɑn sii tie bee?» Ŋɑnn e k Yiesu jiin k yet’b ɑ: «Bɑlmɔni e k n yien’i nɑ, yuo nbɑ k *Nisɑɑlk Bijɑ nɑ tɑn kɑl u nɑɑngbɑnt pɑɑk nɑn pɑnŋ bonciɑnn *dulnyɑ pɑɑnn nɑ ni, yinm nbɑ tie u tuomiinbɑ nɑ mun tɑn sɑɑ kɑl nɑɑngbɑnt piik nɑn ŋɑnle pɑɑk e, kii bu Islɑɑeltieb buolu piik nɑn ŋɑnle nɑ buut. K wun nbɑ kul nyik u ŋɑɑk, ɑmi u yuɑlb, ɑmi u wɑɑli, ɑmi u bɑɑ, ɑmi u nɑɑ, ɑmi u wɑɑs, ɑmi u kpɑɑnt, n pɑɑk, u tɑn sɑɑ lɑ bonɑ buolu buolu tɑɑl fuunu kobk kobk, k biɑ lɑ mɑnfuol nbɑ kɑɑ gbennu. Ŋɑɑn niib bonciɑnn nbɑ dɔnŋ gɑl tuɑnn mɔtɑɑnɑ nɑ, b tɑn sɑɑ jil puol ɑ, k bonciɑnn nbɑ mun biɑ juont puol mɔtɑɑnɑ nɑ tɑn sɑɑ dɔnŋ gɑl tuɑnn ɑ.» «K mɑɑn Yennu nɑɑn tie nɑn ŋɑɑdɑɑnɔ nbɑ din nyii sɑn-nyɑpob ni k luon niib ɑ wun jii’b k bin ko u kpɑɑb nbɑ k wuu tilonti nbɑ k b yi *fiinyɑ nɑ e. K b dii l dɑɑɔk k u sɑk k sɑɑ pɑ’b dɑɑl pɑɑɔk denie denie. Ŋɑnn e k b din duo k sɑɑ jɑk konu. Lɑɑ din tɑn bɑɑl kut mun-yiɑ yuo nbɑ, k ŋɑɑdɑɑnɔ mɑnŋ fiil sɑɑn dɑɑk ni, k sɑɑ lɑ siɑb k b sie k k tuun siɑl. K u yet’b ɑ: ‹Ii do mɑn n kpɑɑb ni kii sɑɑ i ko, k n pɑ’i lin nbɑ jɑnŋ.› K b din duo. Lɑɑ din tɑn bɑɑl kut piik nɑn munle yuo nbɑ, k u biɑ ŋmɑt tien nnɑ, k kut muntɑ yuo nɑ, k u biɑ ŋmɑt k biɑ tien nnɑ. Lɑɑ din tɑn bɑɑl kut munŋmu yuo nbɑ, k u biɑ ŋmɑt sɑɑn k sɑɑ lɑ siɑb k b lɑkn sie, k u boi’b ɑ: ‹Bee k i sie nnɑ yɑnn dɑmunn k k tuun siɑl i?› K b jiin ɑ: ‹Suɑ k jii’t tuonn.› Ŋɑnn e k u yet’b ɑ: ‹Ii mun i do mɑn n kpɑɑb nɑ ni kii sɑɑ i ko.› «Lɑɑ din tɑn bɔnt yuo nbɑ, k ŋɑɑdɑɑnɔ nɑ yet u ŋɑɑtuontunnɑ sɑɑkuɑ ɑ: ‹Ii sɑɑ k sɑɑ yiin kpɑɑlɑ mɑnŋ nɑ, k tɑn pɑ’b. A yɑɑ ɑ pɑ’b yuo nbɑ, fɑn piin kii pɑ bin nbɑ bo juont k bɑɑl nɑ, k tɑn juont bin nbɑ bo dɔnŋ bɑɑl nɑ pɑnu.› K u tuontunnɑ sɑɑkuɑ mɑnŋ piin k pɑ bin nbɑ bo juont k bɑɑl nɑ, denie denie. L pɑɑk, lɑɑ din tɑn bɑɑl bin nbɑ bo bɑɑl sɑn-nyɑpob ni wɑɑ pɑɑk nɑ, k b duki mi ɑ b yɑl sii yɑb e, ŋɑɑn k u pɑ’b denie denie mun biɑk. Bɑɑ din gɑɑl b likli gbenn yuo nbɑ, k b piin k buln suki ŋɑɑdɑɑnɔ nɑ, k yien ɑ: ‹Gotl, bin nbɑ juont k duo kut munŋmu nɑ kuo yuo wɑɑnm-nnɑ e, ŋɑɑn k tinm nbɑ ŋɑnin lɑ fɑlɑ sɑn-nyiɑɔk ni wɑɑ, k yennu fɑɑ’t bonciɑnn nɑ, ŋɑɑn k tinm nɑn ŋɑnm tɑn lɑkn gɑɑl denie denie ee?› «Ŋɑnn e k ŋɑɑdɑɑnɔ nɑ yet b yenɔ ɑ: ‹N yuɑk, gbiintl, n k ŋmɑb’ɑ ni, k mɑɑn t bo dii dɑɑɔk o k ɑ sɑk denie dɑɑl. L pɑɑk, jiin ɑ yɑl kii sɑɑ. Min e luon k n pɑ fin nɑn bin nbɑ bo juont bɑɑl mɑnŋ yonm. N k mɔk yiikuo nɑn n jii n likli k tun mɑɑ luon biɑnŋ nbɑ ɑɑ? Ami ɑ mɔk *funfunn nɑn mɑɑ k wuun nɑ pɑɑk ee?› » Yiesu nbɑ din yin bɑljouk nɑ k gbenn nɑ puolpo e, k u ji yet’b ɑ: «L pɑɑk, bin nbɑ dɔnŋ gɑl tuɑnn tɑn sɑɑ jil puol, k bin nbɑ juont puol mun biɑ tɑn sɑɑ dɔnŋ gɑl tuɑnn.» Yiesu nbɑ din tɑn do Selusɑɑlenm nɑ, k u yiin u tuomiinbɑ *piik nɑn bɑnle nɑ k tɑn bɔl k yien’m ɑ: «Gotl mɑn, t do Selusɑɑlenm e nɑ, k b tɑn sɑɑ jii *Nisɑɑlk Bijɑ k tien Yennu mɑnntieb yudɑnm nɑn *senniwɑntieb nuu ni, k b sɑɑ bu u buut k yet ɑ u ŋɑn nɑn kuun e. B tɑn sɑɑ jii’u k tul bin nbɑ k tie *Suifnbɑ ɑ bin fiɑk’ɔ, k buo’u gbɑnn, k kpɑɑ tɑbn’ɔ dɑpunpunn pɑɑk k wun kpo, ŋɑɑn k l dɑɑ ŋɑntɑ dɑɑl, u biɑ sɑɑ fiil kuun ni wɑɑ.» L yuo nɑ k Sebede ŋɑɑpuo din jii u wɑɑs k bɑɑl nɑn’m Yiesu buol ni, k tɑn gbɑɑn u tuɑnn, ŋɑɑn miɑl’ɔ sonml po. K Yiesu boi’ɔ ɑ: «A luon bee?» K u jiin ɑ: «Tul’n mɔsonn nɑn n wɑɑs nɑ yenɔ tɑn sɑɑ kɑl ɑ diitu po, k luɑ nɑ mun sɑɑ kɑl ɑ gɑnŋ po, yuo nbɑ k ɑ tɑn sɑɑ di ɑ nɑɑn nɑ.» K Yiesu jiin yet’b ɑ: «I k mi yɑɑ mei lin nbɑ po. I sɑɑ fit nyu *kɔp nbɑ ni k n yɑɑ n nyu lenŋ nɑ wɑɑ ɑɑ?» K b jiin ɑ: «T sɑɑ fit ɑ.» K Yiesu yet’b ɑ: «Tɔn, i set sɑɑ nyu lenŋ ɑ. Ŋɑɑn min kɑɑ sɑɑ lukt wun nbɑ tɑn sɑɑ kɑl n diitu po ɑmi n gɑnŋ po, k mɑɑn n Bɑɑ mɔnŋ mɔnŋ e lukt bin nbɑ tɑn sɑɑ kɑl l kinkɑɑni pɑɑk.» Yiesu *puolpoweitelieb nɑ nbɑ din gbɑt nnɑ mɑnŋ yuo nbɑ, k b wutuol duo b bɑnle mɑnŋ pɑɑk. K Yiesu din yiin b kul ɑ k lɑkn’m u buol ni, k tɑn yet’b ɑ: «I mɔnŋ mi nɑn tingbounŋ nɑ ŋɑɑtieb yudɑnm dont b mɔnŋ e, k nijɑɑnɑ biɑ diɑ b niib nɑn ninmɔnn e, ŋɑɑn yinm ŋɑnin, l dɑɑ tie nnɑ kɑɑ i sinsuuk ni. L i tie k suɑ luon wuu tie nijɑɑnn i sinsuuk ni, l ŋɑn wun kpɑnt tuontunnɔ kii tuun kii tien i kul ɑ. K l i biɑ tie k suɑ luon wun tɑn gɑl sinsinn, wun kpɑnt i tuontuunɔ. K i tie nɑn Nisɑɑlk Bijɑ nbɑ tie biɑnŋ nbɑ nɑ, k mɑɑn u k bɑɑl ɑ niib n tun tul’ɔ kɑɑ, ŋɑɑn u bɑɑl ɑ wun tun k tul niib e, k biɑ kpo k te k niib bonciɑnn n lɑ fielu.» Tɔn, Yiesu nɑn u puolpoweitieb nbɑ din tɑn nyi Seliiko yuo nbɑ k nibulciɑɔnŋ wɑɑ Yiesu puolpo. K juɑni bɑnle din kɑl sɑnjokpinŋ k gbɑt ɑ Yiesu bɑɑt ɑ wun tɑn gɑl lenŋ. K b piin k yikn sɑnpɑɑpo wɑɑ ɑ: «Yonmdɑɑnɔ nbɑ tie * Dɑɑfiid yɑɑbuonn, tin’t ninbɑɑɔk.» Ŋɑnn e k nibulciɑɔnŋ nɑ din tiɑn b pɑɑk ɑ bin ŋmin. Ŋɑɑn k b ŋɑnm yikn sɑnpɑɑpo wɑɑ ɑ: «Dɑɑfiid yɑɑbuonn, tin’t ninbɑɑɔk.» K Yiesu din set ŋɑɑn yiin’m k tɑn boi’b ɑ: «I luon k n tun bee k tul’i ni?» K b jiin’ɔ ɑ: «Yonmdɑɑnɔ, t luon k ɑ nyuɑnt t ninbinɑ e.» K ninbɑɑɔk din suol’ɔ, k u sii sii b ninbinɑ mɑnŋ, k l nyuɑnt nyuɑnt, k b ji din wɑɑ’u k sɑɑ. Bɑɑ din tɑn pel Selusɑɑlenm k bɑɑl Betfɑɑje duo nbɑ biɑk jɑgbɑɑk nbɑ k b yi’l *Oliifienbɑ jɑgbɑɑk nɑ, k Yiesu tun u *puolpoweitieb nɑ ni bɑnle u tuɑnn po, ŋɑɑn yet’b ɑ: «Ii sɑɑ mɑn digbɑnbik nbɑ be i tuɑnn po nɑ ni. I sɑɑ sɑɑ lɑ k b lol bonnɑɑnŋ nɑn u bik, k yin lot’b k bɑɑl nɑn’m n buol ni nɑ. L i tie k suɑ boi’i siɑl i e, yin yet’ɔ Yonmdɑɑnɔ e luon’m, k u sɑɑ cɑb’i k yin bɑɑl nɑn’m.» Lin nbɑ nɑ din tun k tien nnɑ ɑ lin gbien lin nbɑ k *Yennu sɔkni Esɑɑyi din sɔkn nɑ po e, ɑ: «Yetl *Siiɔn duo tieb ɑ: ‹Gotl mɑn, i Kpɑnbɑl nɑ e bɑɑt i buol ni nɑ. U tie wun nbɑ siknt u mɔnŋ e k jɑk bonnɑɑnŋ nɑn bonbik.› » K Yiesu puolpoweitieb bɑnle nɑ set din sɑɑn k sɑɑ tun nɑn wɑɑ yet’b biɑnŋ nbɑ nɑ. K b din bɑɑl nɑn bonnɑɑnŋ nɑ nɑn u bik, k tɑn jii b tiɑt k pɑɑn b buɑnɑ pɑɑk k Yiesu jɑk’b. K niib nɑ bonciɑnn din lɑt b tiɑt sɑnjouk pɑɑk, k lieb mun cuɑn tiini yiini nɑn tutuut k lɑt sɑnjouk nɑ pɑɑk. K nibulciɑɔnŋ nbɑ din gɑl u tuɑnn po nɑn bin nbɑ din wɑɑ u puolpo ji din yikn k yien ɑ: «Hosɑnɑ. Ii piɑk mɑn * Dɑɑfiid yɑɑbuonn mɑnŋ. Yennu yetŋɑnm ii be wun nbɑ bɑɑt Yonmdɑɑnɔ sɑnn ni nɑ pɑɑk. Ii wuot mɑn hosɑnɑ sɑnpɑɑpo.» Wɑɑ din tɑn kuɑ Selusɑɑlenm yuo nbɑ, k duo mɑnŋ niib kul fiil, k b boi b lieb ɑ: «Ŋmee e nɑ?» Ŋɑnn e k nibul nɑ jiin ɑ: «Yiesu, wun nbɑ tie Yennu sɔkni nbɑ nyii Nɑɑsɑɑlet nbɑ be Gɑɑliile tinŋ ni nɑ.» K Yiesu din kuɑ Yennu jɑɑnti ŋɑsɑɑkɑk ni k sɑɑ bel nyinn bin nbɑ dɑɑ nɑn bin nbɑ kɔi nɑ kul ɑ, k lɑbl cibn lik-kpentɑ tiebulɑ nɑn ŋmɑnkɔitieb koki k lɑbl cibn cibn, ŋɑɑn yet’b ɑ: «L diɑn Yennu lolkpel kɑdɑɑɔk ni ɑ: ‹N ŋɑɑk nɑ sii tie Yenmiɑlu ŋɑɑk e,› ŋɑɑn yinm e kpint’l k tien nɑn-yukb kinkɑl buol.» K juɑni nɑn wɔbi din bɑɑl u buol ni Yennu jɑɑnti ŋɑsɑɑkɑk ni, k u din te k b kul ɑ pɑɑk. Ŋɑɑn Yennu mɑnntieb yudɑnm nɑn *senniwɑntieb nbɑ din lɑ bɑktnɔunŋ tuonɑ nbɑ k u tun nɑ, k biɑ gbɑt k wɑɑs yikn Yennu jɑɑnti ŋɑsɑɑkɑk ni k yien ɑ: «Hosɑnɑ. Ii piɑk mɑn Dɑɑfiid yɑɑbuonn nɑ,» k l donn b wutuol. K b boi’ɔ ɑ: «A gbɑt bɑɑ yien lin nbɑ nɑ wɑɑ ɑɑ?» K u jiin ɑ: «Nnn, ŋɑɑn l diɑn Yennu lolkpel kɑdɑɑɔk ni ɑ: ‹A te k wɑɑs nɑn sɑnpɑnti piɑk’ɑ fɑnu.› I k mi lii ii?» Ŋɑnn e k u din nyik’b ŋɑɑn nyii Selusɑɑlenm k sɑɑn Betɑɑni k sɑɑ duɑ. Lɑɑ din yent k Yiesu nyii lenŋ k ŋmɑt Selusɑɑlenm. K kon sɑɑ suol’ɔ, k u lɑ fiigie, k l sie sɑnjokpinŋ. K u sɑɑn k sɑɑ bɑɑl ɑ wun puɑl fiignbɑ, k suɑ siɑl kɑɑ fiigie nɑ pɑɑk, sie fɑɑt kuukuɑ. Ŋɑnn e k u yet tiik nɑ ɑ: «Lɑɑ nyii dinnɑ k jii sɑɑ, ɑ kɑn mi k lon luɑnɑ.» L tɑɑkpɑɑk ni nɑ, k tiik nɑ kuol. U puolpoweitieb nɑ nbɑ din lɑ nnɑ yuo nbɑ, k l bɑkt’b, k b boi b lieb ɑ: «L tien nlee k fiigie nɑ tɑɑn kuol yiɑn ɑ nɑ?» Ŋɑnn e k u jiin k yet’b ɑ: «Bɑlmɔni e k n yien’i nɑ, l i tie k i mɔk yɑdɑ nɑn bɑlmɔni k k bils, i mun sii tuun nɑn mɑɑ tun tiik nɑ biɑnŋ nbɑ nɑ e. Ŋɑɑn l k tie nnɑ kuukuɑ kɑɑ k i sɑɑ tun. L i tie k i yet juɑl nɑ ɑ wun fikt k sɑɑ bɑɑ mɔkgbenŋl nɑ ni, l sɑɑ tun ɑ. L i tie k i mɔk yɑdɑ, i sɑɑ lɑ lin nbɑ kul k i boi l po i yenmiɑlu ni wɑɑ.» Yiesu nbɑ din sɑɑn k sɑɑ kuɑ Yennu jɑɑnti ŋɑsɑɑkɑk ni k wɑnt niib Yennu mɑɑn yuo nbɑ nɑ, k Yennu mɑnntieb yudɑnm nɑn tinŋ mɑnŋ ni sɑɑkɑb bɑɑl u buol ni, k tɑn boi’ɔ ɑ: «Yiikuo lɑnn po e k ɑ mɔk k tuun lin nbɑ nɑ kul i? K ŋmee cɑb’ɑ l yiikuo?» K Yiesu jiin ɑ: «N mun mɔk buboit k sɑɑ boi’i. L i tie k i fit k jiin, n mun sɑɑ wɑnn’i yiikuo buolu nbɑ k n diɑ k tuun lin nbɑ nɑ: Sɑn wun nbɑ dɑɑn wuul niib Yennu nyunwulu nɑ, Yennu e cɑb’ɔ l yiikuo ɑmi nisɑɑlk e?» Ŋɑnn e k b ji din fɑɑ b lieb lɑbɑɑl k yien ɑ: «T i yet ɑ Yennu e cɑb’ɔ l yiikuo, u sɑɑ boi’t ɑ k bee te k t k tien u mɑɑn nɑ yɑdɑ? K t mun biɑ tiin nibulciɑɔnŋ nɑ jɑŋmɑɑni nɑn tin yet ɑ: ‹Niib e cɑb’ɔ l yiikuo,› k mɑɑn suɑ kul tien yɑdɑ nɑn Sɑn set dɑɑn tie Yennu sɔkni e.» Ŋɑnn e k b jiin k yet Yiesu ɑ: «T k mi.» K Yiesu mun yet’b ɑ: «Tɔn, n mun kɑn yet’i wun nbɑ cɑb’n l yiikuo k n tuun lin nbɑ nɑ.» L puolpo e k Yiesu din boi’b ɑ: «I duki nlee lin nbɑ nɑ po? Jɑsuɑ nnɑ mun din mɔk u wɑɑs bɑnle, k tɑn yet wun nbɑ tie sɑɑkuɑ po nɑ ɑ: ‹N bik, don kpɑɑb nbɑ k n wuu tilonti nbɑ k b yi *fiinyɑ nɑ ni k sɑɑ ko dinnɑ,› k u yet u bɑɑ ɑ u kɑn do. Ŋɑɑn l puolpo e k u ji tɑn lebt u dudukt k duo. Ŋɑnn e k u bɑɑ din nyik’ɔ ŋɑɑn yet u ninjɑ nɑ nɑn wɑɑ bo yet u yuɑlɔ biɑnŋ nbɑ nɑ, k ŋuɑ ŋɑnin sɑk k jiin ɑ: ‹N bɑɑ, min sɑɑ do wɑɑ,› ŋɑɑn k k duo.» Yiesu nbɑ din yim’m bɑljouk mɑnŋ k gbenn nɑ, k u ji boi niib nɑ ɑ: «Wɑɑs bɑnle nɑ ni, ŋmee tun u bɑɑ lonm u?» K b jiin ɑ: «Sɑɑkuɑ po nɑ.» K Yiesu yet’b ɑ: «Bɑlmɔni e k n yien’i nɑ, *lɑnpogɑɑltieb nɑn boncunconɑ tɑn sɑɑ dɔnŋ’i Yennu nɑɑn ni kuɑnu wɑɑ, k mɑɑn Sɑn dɑɑn bɑɑl i buol ni k wɑnn’i yɑɑ sii be binbenŋ nbɑ k l gbuot Yennu nunm, ŋɑɑn k i k tien u mɑɑn nɑ yɑdɑ, ŋɑɑn k lɑnpogɑɑltieb nɑn boncunconɑ tien u mɑɑn mɑnŋ yɑdɑ. Yɑɑ lek lɑ lin nbɑ nɑ nbɑ kul puolpo, ŋɑɑn i k mɔ kuɑŋɑɑn k lebt binbenŋ k tien mɑɑn mɑnŋ yɑdɑ.» K Yiesu biɑ din yet’b ɑ: «Gbiintl mɑn bɑljolieok. Ŋɑɑdɑɑnsuɑ nnɑ e din be k wuu tilonti nbɑ k b yi fiinyɑ nɑ u kpɑɑb ni, ŋɑɑn cɑɑn gungounŋ k lint tiini mɑnŋ, k biɑ gbiil buotuk nbɑ k b tuu sii ŋmɑki tilonti mɑnŋ luɑnɑ nyun lenŋ, k biɑ mɑɑ siɑl k b sii do l pɑɑk k guu kpɑɑb nɑ, ŋɑɑn jii kpɑɑb nɑ k tien kpɑɑlɑ nii ni ɑ bii goli. L i tɑnŋ i jɑnŋ nɑn puɑlu, bin puɑl k tul’ɔ, ŋɑɑn mun tɑn puɑl b yɑl. L puolpo e k u din yɑɑt k sɑɑn digbɑnsiɑl. K tiluɑnɑ mɑnŋ punpuɑlyuo tɑn bɑɑl, k ŋɑɑdɑɑnɔ nɑ tun u tuontunnɑ, ɑ bin sɑɑn kpɑɑlɑ nɑ buol ni ɑ k sɑɑ gɑɑl u tiluɑnɑ nɑ. Ŋɑɑn k kpɑɑlɑ nɑ din suol u tuontunnɑ mɑnŋ, k buo yenɔ bonciɑnn, ŋɑɑn kɔt luɑ, ŋɑɑn jɑɑt luɑ nɑ mun tɑnɑ kpii’u. Ŋɑnn e k u biɑ ŋɑnm tun tuontunlieb, k b yɑb k gɑl sinsinn yɑb nɑ, k kpɑɑlɑ nɑ biɑ tien’m nnɑ. Lin nbɑ nɑ puolpo k u ji tun u mɔnŋ mɔnŋ bijɑ, ŋɑɑn yien ɑ: ‹N mi nɑn b sɑɑ bɑɑk n bijɑ nɑ wɑɑ.› Ŋɑɑn kpɑɑlɑ nɑ nbɑ din tun ninbinn k lɑ u bijɑ nɑ k u bɑɑt nɑ, k b yet lieb ɑ: ‹U fɑdiilɔ e nɑ. Ŋɑɑnt tin kpi’u mɑn, ŋɑɑn k fɑɑl nɑ n kpɑnt t yɑl.› K b din suol’ɔ k nyii nɑn’ɔ kpɑɑb nɑ kpinŋ po k sɑɑ kpii’u.» Yiesu nbɑ yin bɑljouk nɑ k gbenn nɑ k u boi’b ɑ: «L pɑɑk, kpɑdɑɑnɔ mɑnŋ i tɑn bɑɑl, u sɑɑ tien kpɑɑlɑ mɑnŋ nlee?» Ŋɑnn e k b jiin k yet’ɔ ɑ: «U sɑɑ kpi kpɑɑyuonɑ mɑnŋ gbenn ɑ, ŋɑɑn biɑ jii u kpɑɑb mɑnŋ k tul lieb nbɑ sɑɑ sɑk kii tun kii tien’ɔ l luɑnɑ l punpuɑlyuo.» K Yiesu boi’b ɑ: «I dɑɑ k mi lii lɑɑ diɑn Yennu lolkpel kɑdɑɑɔk ni biɑnŋ nbɑ ɑɑ? L diɑn ɑ: ‹Tɑnn nbɑ k tɑnmɑɑlɑ yet’ɔ nɑ, ŋɑnn e set tien ŋɑɑk nɑ pɑnŋ, k Yonmdɑɑnɔ Yennu e tien nnɑ, k l tien’t bɑktnɔunŋ nɑ.› » K Yiesu ji yet’b ɑ: «Bɑlmɔni e k n yien’i nɑ, Yennu tɑn sɑɑ gɑɑl u nɑɑn i buol ni k tul nibuolu nbɑ sɑɑ te k wun di u nɑɑn nyuɑt. Ŋɑɑn wun nbɑ tɑn bɑɑ tɑnn mɑnŋ pɑɑk, u sɑɑ but but e, ŋɑɑn tɑnn mɑnŋ i bɑɑ wun nbɑ pɑɑk, sie k l nɑn’ɔ buk buk nɑn yon nɑ.» K Yennu mɑnntieb yudɑnm nɑn Fɑɑliisiɑnnbɑ nɑ nbɑ din gbɑt bɑljokt nɑ k gbenn, k b bɑnn nɑn Yiesu yin bɑljokt nɑ k denn ŋɑnm e. K b ji din luon bin suol’ɔ, ŋɑɑn tiin nibulciɑɔnŋ nɑ jɑŋmɑɑni, k mɑɑn suɑ kul din tien yɑdɑ nɑn u set tie Yennu sɔkni e. K Yiesu biɑ din piin k piɑk tien niib mɑnŋ nɑn bɑljokt ɑ: «Yennu nɑɑn tie nɑn kpɑnbɑlsuɑ nbɑ din tien siil ɑ wun tien puociɑnu jɑɑnm k tul u bijɑ nɑ e. K u din tɑn tun u tuontunnɑ, ɑ bin sɑɑn k yiin niib nbɑ k u dɑɑn yiin’m nɑ, ɑ bin bɑɑl nɑ, ŋɑɑn k b k luon bin bɑɑl. K u ŋɑnm tun tuontunlieb k yet’b ɑ: ‹Ii sɑɑ mɑn k yet niib nbɑ k n dɑɑn yiin’m nɑ, ɑ jɑɑnm jiet tien siil ɑ. N ponŋ kpii nɑɑjɑi nɑn bonkobkpɑnmɑ, k l kul tien siil ɑ. Ii sɑɑ nɑ mɑn k tɑn di jɑɑnm mɑnŋ.› Ŋɑɑn wɑɑ din poi bin nbɑ mɑnŋ nɑ, b din k gbiint k tul u tuontunnɑ, ŋɑɑn yɑɑt yɑɑt k sɑɑn b tuonɑ ni: k yenɔ duo u kpɑɑb ni, k luɑ mun sɑɑn u bont kɔiu dɑɑk ni. Ŋɑɑn k siɑb mun suol u tuontunnɑ nɑ k buo’b k sɑɑ kpii’b. Ŋɑnn e k kpɑnbɑl nɑ wutuol din duo bonciɑnn, k u tun u sejenm, k b sɑɑn k sɑɑ kpii nikpiilɑ mɑnŋ, ŋɑɑn juo b duo muu. L puolpo k kpɑnbɑl nɑ ji din yiin u tuontunnɑ k tɑn yet’b ɑ: ‹Puociɑnu jiet nɑ tien siil ɑ, ŋɑɑn niib nbɑ k n ponŋ dɑɑn dɔnŋ yiin’m nɑ, b ji k ŋɑn nɑn’n. L pɑɑk, ii sɑɑ mɑn sɑnjɑlɑ pɑɑk, k sɑɑ yiin bin nbɑ kul k i sɑɑ lɑ’b, ɑ bin bɑɑl nɑ k tɑn di jɑɑnm mɑnŋ.› K u tuontunnɑ nɑ nyii k sɑɑn sɑnjɑlɑ pɑɑk, k sɑɑ yiin bin nbɑ kul k b lɑ’b nɑ, nibiit nɑn niŋɑnm, k b bɑɑl tɑn gbie puociɑnu ŋɑɑk kenken. «Tɔn, k kpɑnbɑl nɑ tɑn kuɑ ɑ wun gɔn puociɑnu niib mɑnŋ, k tɑn got lɑ jɑsuɑ nnɑ k u fuo b sinsuuk ni k k liɑ puociɑnu jɑɑnm tiɑt. K kpɑnbɑl nɑ boi’ɔ ɑ: ‹N yuɑk, ɑ tien nlee k tɑn kuɑ nnɑ ŋɑɑn k k liɑ puociɑnu jɑɑnm nɑ tiɑt i?› K juɑ nɑ k jiin siɑl. K kpɑnbɑl nɑ din yet u ŋɑɑjɑb nɑ: ‹Loln mɑn u nii nɑn u tɑɑ, k nyi sɑɑ lu’u nɑn-yel po bunbɔnn ni. Lenŋ e wɑɑ k niib sii mɔ fɑbn k nyiitl nyɑnɑ.› » Yiesu din yin bɑljouk mɑnŋ k juont, k yet ɑ: «Yennu yiin niib bonciɑnn e, ŋɑɑn u tɑn sɑɑ gɑnn wɑɑnm-nnɑ e.» K Fɑɑliisiɑnnbɑ din sɑɑn k sɑɑ lol suol bɑɑ sɑɑ tien biɑnŋ nbɑ k lɑ Yiesu mɔbonkpetl. Ŋɑnn e k b din tun b *puolpoweitieb nɑn kpɑnbɑl *Heluod puolpo juɑmu Yiesu buol ni, k b din boi’ɔ ɑ: «Wɑntuɑ, t mi nɑn ɑ tie bɑlmɔnpɑklɔ e, k wɑnt niib Yennu sɔnu nɑn bɑlmɔni, ŋɑɑn k k fiin niib po, k mɑɑn ɑ bɑkɑ kɑɑ nɑn nisɑɑlk nbɑ tie wun nbɑ po. L pɑɑk, yet’t, ɑ duki nlee k jii jiin lɑnpo pɑnu po? T *senni cɑb’t nɑn tii pɑ lɑnpo kii tien Luonm tinŋ kpɑnbɑl Sesɑɑl, ɑmi t dɑɑ pɑ?» K Yiesu din mi b dudukbiit mɑnŋ. L pɑɑk, k u din jiin k yet’b ɑ: «Yinm kpinkpɑnni dɑnm nɑ, bee k i luon k yin pii’n bɑluk u? Wɑnt’n mɑn likbinn nbɑ k t sɑɑ jii pɑ lɑnpo mɑnŋ.» K b jii likbinn k tul’ɔ. K u boi’b ɑ: «Ŋmee nɑɑɔnŋ nɑn sɑnn e be likbinn nɑ pɑɑk i?» K b jiin ɑ: «Sesɑɑl nɑ yɑl e.» K Yiesu yet’b ɑ: «Tɔn, i yenn i pɑ mɑn kii tien Sesɑɑl lin nbɑ tie u yɑl, ŋɑɑn kii mun i biɑ pɑ kii tien Yennu lin nbɑ tie Yennu yɑl.» Bɑɑ gbɑt lin nbɑ nɑ k gbenn k l ji bɑkt’b, k b siet nyii, ŋɑɑn nyik’ɔ. L dɑɑl mɑnŋ k *Sɑɑdiuseɑnbɑ siɑb din bɑɑl Yiesu buol ni. (Ŋɑnm e din tuu yɑɑ ɑ kpienm tɑn kɑn fiil kuun ni.) K b din yet Yiesu ɑ: «Wɑntuɑ, Muois din wɑnn nɑn l i tie k juɑ kuɑn u puo ŋɑɑn kpo k k mɑl bik, ɑ u bɑɑ bik n fɑɑl u pɑkuɑk mɑnŋ k mɑl wɑɑs tul kpiemɔ nɑ. K jɑb bɑnlole nbɑ tie bɑɑnuɑk din be duo nɑ ni, k sɑɑkuɑ po tɑn kuɑn puo ŋɑɑn kpo k k mɑl bik, k wun nbɑ pɑɑ u pɑɑk fɑɑl puo nɑ. Nnɑ e k l jii nnɑ k tɑn bɑɑl wun nbɑ pukn bɑnle nɑ ni, nɑn wun nbɑ pukn bɑntɑ nɑ ni, k sɑɑ gbenn jɑb bɑnlole mɑnŋ kul pɑɑk. L puolpo k puo nɑ mun din tɑn juont k kpo. L pɑɑk, l i tie k kpienm fiilu dɑɑl tɑn bɑɑl, b ŋmee tɑn sii yen puo mɑnŋ i? K mɑɑn b kul ɑ din kuɑn’ɔ wɑɑ.» K Yiesu din jiin k yet’b ɑ: «I bot ɑ, k mɑɑn i k mi Yennu lolkpel kɑdɑɑɔk k biɑ k mi wɑɑ mɔk yiikuo biɑnŋ nbɑ, k mɑɑn kpienm i tɑnŋ i fiil kuun ni, b tɑn sii tie nɑn *mɑlɑkɑɑnbɑ nbɑ be *Yendɔunŋ ni nɑ e. Puokuɑnt nɑn jɑkunt tɑn sii kɑɑ. Gotl, k jii jiin kpienm fiilu po, i k mi lii lin nbɑ k Yennu pɑk k yet’i u lolkpel kɑdɑɑɔk ni nɑ ɑɑ? U din yet ɑ: ‹Min e tie Ablɑɑhɑɑnm Yennu, nɑn Isɑɑk Yennu, nɑn Sɑɑkɔb Yennu.› Yennu k tie kpienm Yennu kɑɑ, ŋɑɑn u tie fuotb Yennu e.» Niib nɑ nbɑ din gbɑt u wɑnnu mɑnŋ k l bɑkt’b. Fɑɑliisiɑnnbɑ nɑ nbɑ din gbɑt ɑ Yiesu mɑɑn nɑ nyɑnn Sɑɑdiuseɑnbɑ nɑ, k b tɑɑn lieb k bɑɑl. K b ni yenɔ wun nbɑ din tie *senniwɑntuɑ boi Yiesu buboit ɑ wun jɑnm’ɔ, ɑ: «Wɑntuɑ, sennlɑnu po e tie sennjɑɑnn k gɑl sennliɑ nɑ kul ii?» K Yiesu jiin’ɔ ɑ: «‹Ii luon Yonmdɑɑnɔ Yennu. Kii mɑntk kii luon’ɔ nɑn ɑ pɑl kul ɑ, nɑn ɑ siek kul ɑ, nɑn ɑ dudukt kul ɑ.› Sennu mɑnŋ tie sennjɑɑnn e k biɑ tie sinsinn sennu. Lin nbɑ pukn ŋɑnle ni k kpɑɑ bɑlkpɑnn mun biɑ tie nnɑ e: ‹Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.› Muois senni nɑ kul ɑ, nɑn *Yennu sɔkniinbɑ wɑnnu nɑ kul ɑ gɑɑ senni ŋɑnle nɑ pɑɑk e.» Fɑɑliisiɑnnbɑ nɑ nbɑ din lɑkn lieb yuo nbɑ k Yiesu boi’b ɑ: «I dukn nlee k jii jiin *Klistu nɑ po? U tie ŋmee yɑɑbuonn e?» K b jiin ɑ: «U tie * Dɑɑfiid yɑɑbuonn e.» K u ji boi’b ɑ: «K bee k Dɑɑfiid din yiin’ɔ ‹Yonmdɑɑnɔ?› K mɑɑn Foŋɑnm nbɑ din gbie nɑn Dɑɑfiid nɑ k u yet ɑ: ‹Yonmdɑɑnɔ Yennu din yet n Yonmdɑɑnɔ ɑ Kɑln n niidiitu po mɔk mɔk nɑn mɑɑ tɑn sɑɑ te fɑn ŋmɑɑ ɑ dɑtɑi ɑ tɑɑpɑɔnŋ ni.› L pɑɑk, Dɑɑfiid nbɑ din yiin *Klistu ‹Yonmdɑɑnɔ,› k nlee k Klistu tie ŋuɑ Dɑɑfiid yɑɑbuonn i?» K suɑ din k fit jiin u buboit mɑnŋ. L pɑɑk, lɑɑ din nyii l dɑɑl mɑnŋ k jii sɑɑ, suɑ ji din k mɔk pɑl k sɑɑ boi Yiesu buboisiɑt jik Ŋɑnn e k Yiesu din piin k piɑk tien nibulciɑɔnŋ nɑ nɑn u *puolpoweitieb ɑ: «Senni wɑntieb nɑn Fɑɑliisiɑnnbɑ nɑ e k b tul’b yiikuo nɑn bii wɑnt Muois *senni nɑ pɑɑk. L pɑɑk, l ŋɑn k i sɑɑk kii wɑɑ bɑɑ wɑnt’i lin nbɑ nɑ kul ɑ, ŋɑɑn k ii mi mɑn k yin gɑɑl b binbenŋ, k mɑɑn b k tuun bɑɑ wɑnt lin nbɑ mɑnŋ. B jint niib jik-kpiɑtɑ nbɑ pɑɑl nɑn bin jii, ŋɑɑn kɑn sɑk k bin jii b niibil k bɑbl suɑ k wun jii. Lin nbɑ kul k b tuun nɑ, b tuun ɑ niib n lɑ’b e. B tuu nyinn Yennu lolkpel kɑdɑɑɔk ni kinkɑlnboyennɑ e, k diɑn, k tien tien kunkoni ni, k lol lol b yulɑ nɑn b kpinkpɑnt pɑɑk. B biɑ tuu te k bin nyɑl b liɑtbɑɑnt mɔgbɑnɑ nɑn l kpinkpɑnt k l fɔk fɔk, k biɑ yɑln yɑln e. B i sɑɑn jɑɑnm ni, b tuu luon bii kɑl yudɑnm kinkɑɑni pɑɑk. B i kuɑ *Suifnbɑ jɑɑnti diet ni, b biɑ luon nijɑɑnɑ kɑɑni boɑ e. B biɑ tuu luon k niib n fuont’b nɑn bulcint e dɑi ni, kii yi’b ɑ: ‹Wɑntieb.› Ŋɑɑn yinm ŋɑnin, i dɑɑ te k b yi’i ‹Wɑntuɑ›, k mɑɑn i kul ɑ tie nɑɑtɑɑnn e nɑn lieb, k mɔk i Wɑntuɑ yenɔ kuɑ. I dɑɑ yi suɑ i ‹Bɑɑ› tingbounŋ nɑ ni, k mɑɑn i mɔk Bɑɑ yenɔ kuɑ e. Ŋuɑ e tie Yennu wun nbɑ be *Yendɔunŋ ni. I biɑ dɑɑ te k niib yi’i b ‹Yonmdɑnm›, k mɑɑn i mɔk Yonmdɑɑnɔ yenɔ kuɑ e. Ŋuɑ e tie *Klistu. Wun nbɑ tie nijɑɑnn i ni, wun tien u mɔnŋ i kul ɑ tuontunnɔ. Ŋɑɑn wun nbɑ dont u mɔnŋ, Yennu tɑn sɑɑ sikn’ɔ wɑɑ, ŋɑɑn wun nbɑ siknt u mɔnŋ, Yennu e tɑn sɑɑ donn’ɔ.» K Yiesu biɑ din yet ɑ: «Yinm *senniwɑntieb nɑn Fɑɑliisiɑnnbɑ nbɑ tie kpinkpɑnni dɑnm nɑ, l sii bi i pɑɑk, k mɑɑn yinm e luon Yennu nɑɑn tɑnmɔb ɑ niib dɑɑ kuɑ. I mɔnŋ mɔnŋ kɑn kuɑ, ŋɑɑn dɔk bin nbɑ luon bin kuɑ tɑnmɔb nɑ. «Yinm senniwɑntieb nɑn Fɑɑliisiɑnnbɑ nbɑ tie kpinkpɑnni dɑnm nɑ, l sii bi i pɑɑk, k mɑɑn i ŋmɑb pɑkɔi, k mei Yennu k wei k kpɑnn nɑn i tie yentinnɑ e. L pɑɑk, i tubdɑtu tɑn sii bi bonciɑnn. «Yinm senniwɑntieb nɑn Fɑɑliisiɑnnbɑ nbɑ tie kpinkpɑnni dɑnm nɑ, l sii bi i pɑɑk, k mɑɑn i kuɑ bulgbetɑ nɑn ŋɑlnt k sonm mɔkgbenŋɑ pɑɑk k puotl kpeni k sɑɑ digbɑnbɑnfɔkɑ ni, k luon wun nbɑ sɑɑ kpint u binbenŋ kii wɑɑ i puolpo e, k l i tie k i tɑn lɑ suɑ k u wɑɑ’i ni, i tuu te k u biit nbɑ jikt’ɔ sɑɑ *Sɑɑtɑn muu ni nɑ n ŋɑnm pukn tɑɑl munle e nɑn i yɑl nɑ. «Yinm nbɑ tie juɑni ŋɑɑn dɑɑl lieb nɑ, l sii bi i pɑɑk. I wɑnt niib nɑ ɑ: ‹Suɑ i pol Yennu jɑɑnti ŋɑsɑɑkɑk, l kɑɑ biit, ɑ ŋɑɑn l i tie k suɑ pol likli nbɑ be dieok mɑnŋ ni nɑ, ɑ sie k u gbien wɑɑ pol biɑnŋ nbɑ nɑ.› Yinm juɑni nbɑ k mɔk yɑn nɑ, bonɑ ŋɑnle nɑ ni, lɑnn po e kpɑɑ bɑlkpɑnn, likli nɑ ɑmi Yennu jɑɑnti ŋɑsɑɑkɑk nbɑ te k likli nɑ tie Yennu yɑl nɑ? K i biɑ yet ɑ: ‹L i tie k suɑ pol *mɑnnu binbintl, l kɑɑ biit, ɑ ŋɑɑn l i tie k suɑ pol mɑnnu bonkobuk nbɑ pɑɑ binbintl nɑ pɑɑk nɑ, sie k u gbien wɑɑ pol biɑnŋ nbɑ nɑ.› I set tie juɑni e nɑn bɑlmɔni. Bonɑ ŋɑnle nɑ ni, lɑnn po e kpɑɑ bɑlkpɑnn, mɑnnu bonkobuk nɑ ɑmi binbintl nbɑ te k l tie Yennu yɑl nɑ? L pɑɑk, l i tie k suɑ pol mɑnnu binbintl, l wɑnt nɑn u pol binbintl nɑ nɑn lin nbɑ kul pɑɑ l pɑɑk nɑ e mun. L i tie k suɑ biɑ pol Yennu jɑɑnti ŋɑsɑɑkɑk, l wɑnt nɑn u pol dieok mɑnŋ nɑn Yennu nbɑ be lenŋ nɑ e mun. L i biɑ tie k suɑ pol Yendɔunŋ, u pol Yennu nɑɑngbounŋ nɑn wun nbɑ kɑl l pɑɑk mɑnŋ e. «Yinm senniwɑntieb nɑn Fɑɑliisiɑnnbɑ nbɑ tie kpinkpɑnni dɑnm nɑ, l sii bi i pɑɑk. I jikt bɑɑli nɑn bukunŋ nɑn nɑli nɑn l bonliɑ piik nuɑk ni yenn kuɑ k tien Yennu, ŋɑɑn nyik lin nbɑ tie bɑlkpɑnɑ u senni ni. Ŋɑnn e tie bɑlbunu nbɑ tuok nɑn ninbɑtinu nɑn Yennu senni wɑɑnu nɑn bɑlmɔni. Lin nbɑ nɑ nbɑ e bo ŋɑn nɑn yii tuun, k dɑɑ nyikt l yenn-nbɑ tumu. Yinm juɑni nbɑ dɑɑl lieb nɑ, i tuu lot nɑɑyun-yuolk nyun ni k lu e, ŋɑɑn nɑk yuyouk nɑn nyun. «Yinm senniwɑntieb nɑn Fɑɑliisiɑnnbɑ nbɑ tie kpinkpɑnni dɑnm nɑ, l sii bi i pɑɑk, k mɑɑn i soki *kɔp nɑn senŋ puolpo e, ŋɑɑn k nuɑk ni gbie nɑn nɑn-yuk nɑn jɑwuuk. Yinm Fɑɑliisiɑnnbɑ nbɑ tie juɑni nɑ, sokt mɑn kɔp nɑn senŋ nɔi ni sinsinn, k l puolpo n fit nyi. «Yinm senniwɑntieb nɑn Fɑɑliisiɑnnbɑ nbɑ tie kpinkpɑnni dɑnm nɑ, l sii bi i pɑɑk. I tie nɑn kɑɑt nbɑ k b mɑɑ k pent senn, k l puolpo fɑn, ŋɑɑn k l nuɑk ni gbie nɑn kpɑbɑ nɑn pɔiu nɑ e. Nnɑ e k niib goli i nɑn-yel po k i fɑn ŋɑɑn i pɑlɑ ni gbie nɑn fɑi nɑn biit.» «Yinm senniwɑntieb nɑn Fɑɑliisiɑnnbɑ nbɑ tie kpinkpɑnni dɑnm nɑ, l sii bi i pɑɑk. I mɑɑ *Yennu sɔkniinbɑ kɑɑt, k jɑb’b, k sent, k l tie lin nbɑ sɑɑ tiɑl niib niŋɑnm kuun po, ŋɑɑn yien ɑ: ‹T ii dinŋ ii bo i be t yejɑnm yuo, t din bo kɑn tun bɑɑ din tun lin nbɑ k kpii Yennu sɔkniinbɑ nɑ.› L pɑɑk, lin nbɑ nɑ wɑnt nɑn i set sɑk nɑn i tie bin nbɑ din kpii Yennu sɔkniinbɑ nɑ yɑɑbuonɑ e. L pɑɑk, i yejɑnm nbɑ din piin k tun biit biɑnŋ nbɑ nɑ, tontl mɑn. Yinm wɑi. Yinm wɑɑlɑbli nɑ, nlee k i tɑn sɑɑ nyi tubdɑtu muu nbɑ kɑn mi kpien nɑ ni? L pɑɑk te k n yien’i nɑ, n tɑn sɑɑ tun Yennu sɔkniinbɑ nɑn yɑndɑnm nɑn wɑntieb i buol ni, ŋɑɑn i tɑn sɑɑ kpi b siɑb e, k kpɑɑ siɑb kuun dɑpunpunn pɑɑk, k buo siɑb Suifnbɑ jɑɑnti diet ni, k biɑ wei tɔki b tɑɑ k nyi doyenu ni k tuɑtl doleu ni. L pɑɑk, bɑɑ din kpii niŋɑnm nbɑ nɑ kul ɑ tubdɑtu be i yulɑ pɑɑk, lɑɑ nyii nipiemɔ Abel pɑɑk, k sɑɑ tuu Bɑɑlɑɑsi bijɑ Sɑɑkɑɑli pɑɑk, wun nbɑ k b din kpii’u Yennu jɑɑnti ŋɑsɑɑkɑk nɑn mɑnnu binbintl sinsuuk ni nɑ. Bɑlmɔni e k n yien’i nɑ, mɔtɑɑnɑ nigbounŋ nɑ tɑn sɑɑ lɑ tubdɑtu biit mɑnŋ kul pɑɑk e.» «Nbɑɑyuoo, Selusɑɑlenm tieb, yinm nbɑ kpi Yennu sɔkniinbɑ, k biɑ jɑɑt u tuomiinbɑ nbɑ k u tun’m i buol ni nɑ tɑnɑ, biknu biknu tɑɑl munŋɑ e k n gbɑɑ mɑɑ n tikl’i yonm nɑn kolk nbɑ tuu tikl u kobis u kpinkpɑnt ni nɑ, k i k sɑk. Gotl mɑn, Yennu nyik i jɑɑnti ŋɑsɑɑkɑk nɑ e nɑ, k l sɑɑ nyint ŋɑyɑnn. N yien’i e, lɑɑ nyii dinnɑ k jii sɑɑ i kɑn mi k lɑn’n k sɑɑ tuu dɑɑl nbɑ k i tɑn sɑɑ yet ɑ: ‹Yennu yetŋɑnm ii be wun nbɑ bɑɑt Yonmdɑɑnɔ sɑnn ni nɑ pɑɑk.› » Yiesu nbɑ din nyii Yennu jɑɑnti ŋɑsɑɑkɑk ni k sɑɑ nɑ, k u *puolpoweitieb din bɑɑl u buol ni k tɑn wɑnt’ɔ jɑɑnti ŋɑɑk mɑnŋ diet. Ŋɑnn e k u boi’b ɑ: «I lɑ lin nbɑ nɑ nbɑ kul ɑɑ? Bɑlmɔni e k n yien’i nɑ, b tɑn sɑɑ tut l kul, k lu tinŋ ni wɑɑ, k l tɑnn yenn kuɑ tɑn kɑn biɑl k pɑɑ liel pɑɑk.» Yiesu nbɑ din tɑn sɑɑn k sɑɑ kɑl jɑgbɑɑk nbɑ k b yi’l *Oliifienbɑ jɑgbɑɑk nɑ pɑɑk nɑ, k u puolpoweitieb tɑn bɑɑl u buol ni, b kuukuɑ, k boi’ɔ ɑ: «Yet’t, yuo nbɑ k nɑ kul ɑ tɑn sii tie. Bee tɑn sii tie ɑ bɑɑlu *nyinn nɑn *dulnyɑ gbennu nyinn i?» K u jiin k yet’b ɑ: «Ii mi mɑn k suɑ n tɑn kpɑnn’i, k mɑɑn niib bonciɑnn tɑn sɑɑ jii n sɑnn e k bɑɑl k yien ɑ ŋɑnm e tie *Klistu nɑ, k kpɑnn niib bonciɑnn. I tɑn sɑɑ gbɑt tɔb fuut i kuɑnn ni, nɑn l lɑbɑɑl bɑnfɔkl, ŋɑɑn i dɑɑ jie, k mɑɑn l kpɑɑ tɑlɑs e nɑn lin nbɑ nɑ kul n tun, ŋɑɑn l k wɑnt nɑn dulnyɑ gbennu bɑɑl e nɑ. Nibuolu nɑn nibuolu tɑn sɑɑ kɔn nɑn lieb, k kpɑnbɑlɑ nɑn kpɑnbɑlɑ mun tɑn sɑɑ tuok k kɔn nɑn lieb. K kon nɑn tinŋ jijekt tɑn sii be lokɑ kul po. Lin nbɑ nɑ nbɑ kul tɑn sii tie nɑn mɑtyiɑlu pinpiik nɑ e. «L yuo mɑnŋ k b tɑn sɑɑ suol’i k din’i fɑlɑ biɑk, k kpi’i k buolu kul tɑn sii nɑn’i k mɑɑn yɑɑ wɑɑ’n nɑ pɑɑk. L yuo mɑnŋ, niib bonciɑnn tɑn sɑɑ yet n weiu, k biɑ kuɑt lieb, k biɑ nɑn lieb. K fɑɑk sɔkniinbɑ tɑn sɑɑ nyi k kpɑnn niib bonciɑnn. Biit nbɑ tɑn sɑɑ mɑntk yɑbt tingbounŋ nɑ ni nɑ pɑɑk, k niib bonciɑnn lonm tɑn sɑɑ mɑɑk. Ŋɑɑn wun nbɑ tɑn gubn nɑn fɑlɑ yuo nɑ juontu tɑn sɑɑ lɑ fielu wɑɑ. K b tɑn sɑɑ muɑnt Yennu nɑɑn lɑbɑmɑnn muɑnti nɑ tingbounŋ nɑ kul po, ɑ lin tien *siɑlɑ k tul niib kul, k dulnyɑ gbennu n yen fit bɑɑl.» «I tɑn sɑɑ lɑ bonbilɑnkɑnt nbɑ k *Yennu sɔkni Dɑniel din yet l po nɑ, k l tɑn sii sie Yennu jɑɑnti ŋɑsɑɑkɑk ni.» (Wun nbɑ kul tɑn lii diɑni nɑ, wun bɑnn lɑɑ wɑnt lin nbɑ.) «L yuo mɑnŋ, bin nbɑ tɑn be Suude tinŋ ni, bin ciɑl kii do juɑt, k wun nbɑ tɑn be u dituɑtuk pɑɑk, u dɑɑ kuɑ u dieok ni ɑ wun sɑɑ jii u siɑl, k wun nbɑ tɑn be u kpɑɑb ni, u dɑɑ ŋmɑt ɑ wun sɑɑ jii u tiɑɔk. L yuo mɑnŋ, podɑnm nɑn bin nbɑ diɑ wɑlɑi tɑn sɑɑ di fɑlɑ bonciɑnn. Ii mei mɑn Yennu k u dɑɑ te k fɑlɑ nɑ bɑɑt wonfufuk yuo, ɑmi *Fuondɑɑl. K mɑɑn l yuo mɑnŋ, fɑlciɑɔnŋ sii be. Yennu nbɑ nɑn dulnyɑ wɑɑ nɑn dinnɑ, l fɑlɑ buolu dɑɑ k mi bɑɑl. L buolu mun biɑ ji kɑn mi k bɑɑl. Yennu i tɑnŋ i kii wɑt dɑɑ mɑnŋ yɑbnt, suɑ tɑn kɑn biɑl, ŋɑɑn u nigɑnnkɑb pɑɑk k u tɑn sɑɑ wɑt dɑɑ mɑnŋ yɑbnt. «L yuo mɑnŋ, suɑ i tɑnŋ i yet’i ɑ: ‹Gotl mɑn, Klistu be nnɑ,› ɑmi: ‹U be nɑ wɑɑ,› i dɑɑ tie’u yɑdɑ, k mɑɑn l yuo mɑnŋ, fɑɑk Klistunbɑ nɑn fɑɑk sɔkniinbɑ tɑn sɑɑ nyi k tuun nyinɑ nɑn bɑktnɔunŋ tuonjɑɑnɑ ɑ bin kpɑnn niib. K l i tɑnŋ i fit, b tɑn sɑɑ kpɑnn Yennu nigɑnnkɑb tiɑɔnŋ ɑ. Gbiintl mɑn, n ponŋ dɔnŋ yet’i e wɑɑ, k yuo mɑnŋ dɑɑ k bɑɑl. «L pɑɑk, b i tɑnŋ i yet’i ɑ: ‹Gotl mɑn, u be muuk ni,› i dɑɑ sɑɑ, ɑmi b i yet’i ɑ: ‹Gotl mɑn, u be dieok ni,› i dɑɑ tie yɑdɑ, k mɑɑn *Nisɑɑlk Bijɑ nɑ bɑɑlu tɑn sii tie nɑn sɑɑk nbɑ tuu nyiknt k nyi yendopo k sɑɑ sik yenbɑɑpo nɑ e. «Siɑn nbɑ k bonkpienn be, lenŋ e k juut tiki.» «Fɑlɑ nɑ puolpo k yennu tɑn sɑɑ bɔnn, k ŋmɑɑlk ji kɑn yent, k ŋmɑɑbilɑ tɑn sɑɑ nyi sɑnpɑɑpo k bɑɑ, k lin nbɑ kul be sɑnpɑɑpo tɑn sɑɑ dɑnm k ŋmɑt ŋmɑt. L yuo mɑnŋ k niib tɑn sɑɑ lɑ Nisɑɑlk Bijɑ nyinn sɑnpɑɑpo, k nibuolu buolu nbɑ be tingbounŋ nɑ kul tɑn sii fɑbn, k ji lɑ Nisɑɑlk Bijɑ k u be sɑnpɑgbɑnɑ ni k siik nɑn yiikuo nɑn yentsɑɑkɑl. Kɑtkɑɑk tɑn sɑɑ bui, k wun tun u *mɑlɑkɑɑnbɑ k bin sɑɑn k sɑɑ tikl u nigɑnnkɑb nbɑ be tingbounŋ nɑ lokɑ ŋɑnnɑ nɑ kul po k bɑɑl.» «I jii fiigie k tumi yɑn mɑn. Yɑɑ tuu lɑ k tiik mɑnŋ bintl yuo nbɑ, i ji tuu bɑnn nɑn siɑɔk pel e nɑ. Nnɑ e mun, yuo nbɑ k i tɑn lɑɑt k lin nbɑ nɑ nbɑ kul tuun, yin bɑnn nɑn lin nbɑ k n piɑk l po nɑ pel e nɑ. Bɑlmɔni e k n yien’i nɑ, mɔtɑɑnɑ nigbounŋ nɑ kɑn kpo k gbenn kɑɑ wɑɑ, k lin nbɑ nɑ kul n tun. Sɑnpɑɑk nɑn tinŋ tɑn sɑɑ bot ɑ, ŋɑɑn n mɑɑn ŋɑnin kɑn mi k bot fɑb ɑ.» «Suɑ k mi dɑɑl mɑnŋ ɑmi yuo nbɑ k l kul sɑɑ tien. L sɑnpɑɑpo mɑlɑkɑɑnbɑ, ɑmi Bijɑ mɔnŋ k mi, sie Bɑɑ kuukuɑ e mi. Lɑɑ din tien biɑnŋ nbɑ Noe yuo nɑ, l mun biɑ tɑn sii tie nnɑ e Nisɑɑlk Bijɑ jenu yuo. Noe yuo mɑnŋ, yuo nbɑ k nyunciɑɔnŋ din dɑɑ k bɑɑl, k niib din di jiet k nyu, k kuɑnt puob, k jikt b wɑɑs k tien’m jɑb, k tɑn tuu dɑɑl nbɑ k Noe din kuɑ ŋɑlngbenŋl ni. K niib mɑnŋ din biɑ dɑɑ k bɑnn lin nbɑ tuun, k tɑn tuu dɑɑl nbɑ k nyunsɑɑkɑn din bɑɑl k tɑn dii b kul sɑɑk ɑ. L biɑ tɑn sii tie nnɑ e yuo nbɑ k Nisɑɑlk Bijɑ tɑn sɑɑ jen. L dɑɑl mɑnŋ, jɑb bɑnle tɑn sii buɑ kpɑɑb ni k ko, k b tɑn sɑɑ jii yenɔ ŋɑɑn nyik luɑ. Puob bɑnle tɑn sii lɑkn buɑ nɑɑn dii, k b tɑn sɑɑ jii yenɔ ŋɑɑn nyik luɑ. «L pɑɑk, i cekn i mɔnŋ pɑɑk mɑn, k mɑɑn i k mi dɑɑl nbɑ k t Yonmdɑɑnɔ sɑɑ jen. Ŋɑɑn bɑnt mɑn nɑn l i tie k ŋɑɑdɑɑnɔ ponŋ mi yuo nbɑ k nɑn-yukɔ yɑɑ wun bɑɑl u ŋɑɑk ni nyiɑɔk, u sii kɑl e k guu. U kɑn sɑk k nɑn-yukɔ n tɑn kuɑ k jɑn’ɔ. L pɑɑk, l ŋɑn k i mun n tien siil yuo kul ɑ, k mɑɑn Nisɑɑlk Bijɑ mun biɑ tɑn sɑɑ jen yuo nbɑ k i k duki u jenu nɑ po nɑ e. «Tuontunlɑnɔ e tie yɑndɑɑnɔ k tuun u Yonmdɑɑnɔ nbɑ wɑnt’ɔ biɑnŋ nbɑ? Ŋuɑ e tie wun nbɑ k u Yonmdɑɑnɔ sɑɑ tien’ɔ tuontunnɑ yudɑɑnɔ ɑ wuuu goli u tuontunlieb, kii tien’m mɑnn nɑn l sɔnu. L i tie k u Yonmdɑɑnɔ tɑn kpen k lɑ k u tuun nnɑ, pɑlpienn sii tie tuontunnɔ mɑnŋ yɑl e. Bɑlmɔni e k n yien’i nɑ, ŋɑɑdɑɑnɔ mɑnŋ sɑɑ jii u mɔktuk kul k tien tuontunnɔ mɑnŋ nuu ni, ɑ wuu goli. Ŋɑɑn l i tie k tuontunnɔ mɑnŋ tie tuontun-yuonn k dukn u pɑl ni ɑ, n Yonmdɑɑnɔ kɑn kpen yiɑn, ŋɑɑn piin k buo u tuontunlieb, k ŋuɑ nɑn dɑnyuulɑ biɑ lɑkn k nyu k di, Yonmdɑɑnɔ mɑnŋ tɑn sɑɑ kpen dɑɑl nbɑ k u ŋɑɑ u kpenu tɑmɑ e, nɑn yuo nbɑ k u k mi. Yonmdɑɑnɔ nɑ sɑɑ dɑt u tubl bonbiil, k tien’ɔ nɑn bɑɑ tuu tien kpinkpɑnni dɑnm biɑnŋ nbɑ nɑ. Lenŋ mɑnŋ e k niib tɑn sii fɑbn mɔ k nyiitl nyɑnɑ.» «Yennu nɑɑn tɑn sii tie nɑn sɑpɑɑnm piik nbɑ din jii b fitɑ k sɑɑ ɑ bin sɑɑ tuok puoyuokl sɔlɔ nɑ e. Sɑpɑɑnm mɑnŋ ni bɑnŋmu din tie jɑtt e, k bɑnŋmu mun din tie subndɑnm. Sɑpɑɑnjɑtɑ nɑ din jii b fitɑ, ŋɑɑn k jii kpɑn k guun b mɔnŋ, ŋɑɑn k sɑpɑɑnsubndɑnm nɑ ŋɑnin din jii kpɑn k liɑk liɑk sɑlenɑ ni k diɑ pukn b fitɑ po. Puoyuokl sɔlɔ mɑnŋ din k bɑɑl yiɑn, k guɑn tɑn suol sɑpɑɑnm nɑ kul ɑ, k b guɑn. «K tɑnsuuni k b tɑn gbɑt wuyikinŋ ɑ: ‹Gotl, puoyuokl sɔlɔ nɑ e bɑɑt nɑ. Nyin mɑn k tin tuok’ɔ mɑn.› K sɑpɑɑnm piik nɑ kul ɑ fiil k ŋɑk ŋɑk b fitɑ nɑ. Ŋɑnn e k sɑpɑɑnjɑtɑ nɑ miɑl subndɑnm nɑ ɑ: ‹I kɑn tul’t i kpɑn nɑ wɑɑn ii? K mɑɑn t fitɑ nɑ luon lin kpien e.› K subndɑnm nɑ jiin ɑ: ‹Aɑi, t yɑlɑ mun kɑn jɑnŋ tinm nɑn yinm. Ii sɑɑ mɑn bin nbɑ kɔi kpɑn buol ni, k sɑɑ dɑɑ i mɔnŋ yɑlɑ.› Sɑpɑɑnjɑtɑ nɑ nbɑ din yɑɑt k sɑɑn ɑ bin sɑɑ dɑɑ kpɑn yuo nbɑ, k puoyuokl sɔlɔ nɑ dɔkt. Subndɑnm bɑnŋmu nɑ nbɑ din tien siil nɑ din wei puoyuokl sɔlɔ mɑnŋ e, k sɑɑn puociɑnu ŋɑɑk nɑ ni k kuɑ dieok ni, ŋɑɑn k b luon gɑnn k kpɑl. «L puolpo k sɑpɑɑnjɑtɑ nɑ nbɑ din tɑn jen yuo nbɑ, k b bɑɑl k tɑn sie tɑnmɔb nɑ buol k yi ɑ: ‹Yonmdɑɑnɔ, Yonmdɑɑnɔ, luotl gɑnn k tin kuɑ.› Ŋɑɑn puoyuokl sɔlɔ nɑ jiin k yet’b ɑ: ‹Bɑlmɔni e k n yien’i nɑ, n k mi’i ni.› » K Yiesu biɑ din yet’b ɑ: «Ii mi mɑn, k mɑɑn i k mi l dɑɑl ɑmi l yuo.» «Yennu nɑɑn lɑbɑɑl biɑ tɑn sii tie nɑn ŋɑɑdɑɑnsuɑ nbɑ din lol ɑ wun sɑɑn sɔnu lɑbɑɑl nɑ e, k din yiin u tuontunnɑ k tɑn tien u mɔktuk b nii ni nɑ. U din tul sinsinn yuɑ nɑ likli bonciɑnn, tɑɑlɑnnbɑ ŋɑnŋmu, k tul wun nbɑ pɑɑ nɑ likli k l yɑb, tɑɑlɑnnbɑ ŋɑnle, k tul wun nbɑ juont nɑ tɑɑlɑn yenn. U din tul suɑ kul nɑn wɑɑ mi l dɑɑnɔ kotl nbɑ tie biɑnŋ nbɑ e, ŋɑɑn yɑɑt k sɑɑn. K wun nbɑ din gɑɑl tɑɑlɑnnbɑ ŋɑnŋmu nɑ, nyii nɑn u likli yiɑn ɑ, k piin kpinkpounŋ, k lɑ nyuɑt tɑɑlɑnnbɑ ŋɑnŋmu k pukn l pɑɑk biɑk. Nnɑ e k wun nbɑ mun biɑ din gɑɑl tɑɑlɑnnbɑ ŋɑnle nɑ, mun din nyii k kpent k lɑ nyuɑt tɑɑlɑnnbɑ ŋɑnle k pukn l pɑɑk. Ŋɑɑn wun nbɑ din gɑɑl tɑɑlɑn yenn nɑ ŋɑnin din nyii e, k gbiil buotuk, k pii u Yonmdɑɑnɔ likli nɑ lenŋ. «L din wei bonciɑnn, k ŋɑɑdɑɑnɔ mɑnŋ din tɑn jen, k yiin u tuontunnɑ nɑ, ɑ wun kɑn b likli mɑnŋ, k lɑ bɑɑ lɑ nyuɑt biɑnŋ nbɑ. K wun nbɑ din gɑɑl tɑɑlɑnnbɑ ŋɑnŋmu nɑ nbɑ kuɑ yuo nbɑ, k u jii tɑɑlɑnnbɑ ŋɑnŋmu liel nɑ k pukn tul u Yonmdɑɑnɔ, ŋɑɑn yet ɑ: ‹Yonmdɑɑnɔ, ɑ din tul’n tɑɑlɑnnbɑ ŋɑnŋmu e, ŋɑɑn gotl n mun biɑ lɑ nyuɑt tɑɑlɑnnbɑ ŋɑnŋmu.› K u Yonmdɑɑnɔ nɑ yet’ɔ ɑ: ‹Nfɑɑn, ɑ tie tuontunŋɑnɔ e, k biɑ tuun fɑnu. Fɑɑ diɑ wɑɑnm-nnɑ fɑnu biɑnŋ nbɑ nɑ, l pɑɑk, n sɑɑ jii sɑɑn e wɑɑ k tien ɑ nuu ni. Pɑlpienn nbɑ k n mɔk nɑ, l ji tie min nɑn fin yɑl e.› «K wun nbɑ mun din gɑɑl tɑɑlɑnnbɑ ŋɑnle nɑ kuɑ k bɑɑl u Yonmdɑɑnɔ nɑ buol, k tɑn yet’ɔ ɑ: ‹Yonmdɑɑnɔ, gotl, ɑ din tul’n tɑɑlɑnnbɑ ŋɑnle e, ŋɑɑn n mun biɑ kpent k lɑ nyuɑt tɑɑlɑnnbɑ ŋɑnle.› K u Yonmdɑɑnɔ yet’ɔ ɑ: ‹Nfɑɑn, ɑ tie tuontunŋɑnɔ e, k biɑ tuun fɑnu. Fɑɑ diɑ wɑɑnm-nnɑ fɑnu biɑnŋ nbɑ nɑ, l pɑɑk, n sɑɑ jii sɑɑn e wɑɑ, k tien ɑ nuu ni. Pɑlpienn nbɑ k n mɔk nɑ, l ji tie min nɑn fin yɑl e.› «Ŋɑnn e k wun nbɑ mun din gɑɑl tɑɑlɑn yenn nɑ ŋɑnin kuɑ k bɑɑl u Yonmdɑɑnɔ buol k tɑn yet’ɔ ɑ: ‹Yonmdɑɑnɔ, n mi nɑn ɑ tie pɑɑlɔ e. Siɑn nbɑ k ɑ lek k bul, ŋɑɑn fin ŋɑnin tuu jɑɑn lenŋ e. L pɑɑk, min dɑɑn tiin’ɑ jɑŋmɑɑni e, k jii ɑ tɑɑlɑn yenn nɑ k gbiil k pii tinŋ ni. L pɑɑk, ŋɑnn e nɑ. Gɑɑt ɑ bont.› «Ŋɑnn e k u Yonmdɑɑnɔ nɑ yet’ɔ ɑ: ‹Fin tuontun-yuonn nɑ, ɑ tie gbɑn-nyɑkdɑɑnɔ e. A mi nɑn n tie pɑɑlɔ e, k biɑ mi nɑn n jɑɑn siɑn nbɑ k n k bul e, k bee k ɑ din k jii n likli mɑnŋ k kuɑn bɑnŋ ni? Mɑɑ bo tɑn jen nɑ n bo sɑɑ lɑ n bont k nyuɑt pɑɑ l pɑɑk e. L pɑɑk, gɑɑt likli mɑnŋ u buol ni mɑn, k pukn wun nbɑ mɔk tɑɑlɑnnbɑ piik nɑ, K mɑɑn wun nbɑ kul mɔk bonɑ, b sɑɑ pukn’ɔ k wun mɔkt bonciɑnn, ŋɑɑn wun nbɑ kɔnŋ bont, b biɑ sɑɑ tont bonmintk nbɑ k u mɔk nɑ. Ŋɑɑn jɑyɑnn nɑ ŋɑnin, jiin’ɔ mɑn kii nyi k sɑɑ lu’u nɑn-yel po bunbɔnn ni. Lenŋ e wɑɑ k niib tɑn sii mɔ fɑbn k nyiitl nyɑnɑ.› » «Tɔn, *Nisɑɑlk Bijɑ i tɑnŋ i jen nɑn u pɑnŋ nɑn *mɑlɑkɑɑnbɑ kul ɑ, u tɑn sɑɑ kɑl u nɑɑngbounŋ pɑɑk, k lɑ bɑɑkciɑɔnŋ, k tɑn lɑkn tingbounŋ nɑ nibuolu kul u tuɑnn po, k u tɑn sɑɑ bɔkt’b nɑn pekpɑɑlk nbɑ tuu bɔkt pei nɑn buuni biɑnŋ nbɑ nɑ. U tɑn sɑɑ jii pei k senn’b u niidiitu po, ŋɑɑn jii buuni nɑ mun k senn’b u niigɑnŋ po. K Kpɑnbɑl nɑ sɑɑ yet bin nbɑ sie u niidiitu po nɑ ɑ: ‹Yinm nbɑ k n Bɑɑ yɑt yetŋɑnm i pɑɑk nɑ, ii sɑɑ nɑ mɑn k tɑn kuɑ nɑɑn nbɑ k n Bɑɑ din ŋɑnm k guun’i *dulnyɑ piinu ni wɑɑ nɑ, k mɑɑn kon din mɔk’n k i din’n, k nyun-nyuklu din mɔk’n k i tul’n nyun. N din tie sɑɑmɔ e ŋɑɑn k i gɑɑl’n sɑɑɔnŋ i ŋei ni. N din sonm yɑnn e k i gbɑbn’n, k n din yiɑl k i sonm’n, k n din kuɑ dɑnsɑlk, k i tun gɔnt’n.› «K niŋɑnm nɑ tɑn sɑɑ jiin k boi’ɔ ɑ: ‹Yonmdɑɑnɔ, biɑ yuo e k t din lɑ’ɑ k kon mɔk’ɑ k t dinn’ɑ ni? Ami biɑ yuo e k nyun-nyuklu din mɔk’ɑ k t tul’ɑ nyun i? Ami biɑ yuo e k t din lɑ’ɑ k ɑ tie sɑɑmɔ k t gɑɑl’ɑ sɑɑɔnŋ t ŋei ni? Ami k ɑ sonm yɑnn k t gbɑbn’ɑ ni? Ami bee dɑɑl e k t din lɑ k ɑ yiɑl k t sonm’ɑ ni? Ami k ɑ kuɑ dɑnsɑlk, k t bɑɑl k tɑn gɔn’ɑ ni?› K Kpɑnbɑl nɑ mun tɑn sɑɑ jiin k yet’b ɑ: ‹Bɑlmɔni e k n yien’i nɑ, yɑɑ din tun lin nbɑ k tul wun nbɑ juont tɑlk n nɑɑ wɑɑs sinsuuk ni nɑ yenɔ kuɑ, i din tuun k tien min e.› «L puolpo, u tɑn sɑɑ jiɑnt k yet bin nbɑ sie u niigɑnŋ po nɑ ɑ: ‹Yinm nibiit nbɑ ŋɑn nɑn tubdɑtu nɑ, sietl nnɑ mɑn. Ii sɑɑ mɑn k sɑɑ kuɑ muu nbɑ di k kɑɑ kpienu nbɑ k Yennu din ŋɑnm k guun *Sɑɑtɑn nɑn u mɑlɑkɑɑnbɑ nɑ ni, k mɑɑn kon din mɔk’n, ŋɑɑn k i minn’n jiet, k nyun-nyuklu din mɔk’n, ŋɑɑn k i minn’n nyun. N din tie sɑɑmɔ e, k i k sɑk yin gɑɑl’n sɑɑɔnŋ i ŋei ni, k n din tɑn sonm yɑnn, ŋɑɑn k i minn’n tiɑt, k n din tɑn yiɑl k i k sonm’n, k n biɑ tɑn kuɑ dɑnsɑlk, k i k gɔn’n.› «L yuo k b mun tɑn sɑɑ ŋmɑt k boi’ɔ ɑ: ‹Yonmdɑɑnɔ, biɑ yuo e k t din lɑ’ɑ k kon mɔk’ɑ, ɑmi nyun-nyuklu mɔk’ɑ, ɑmi k ɑ tie sɑɑmɔ, ɑmi k ɑ sonm yɑnn, ɑmi k ɑ yiɑl, ɑmi k ɑ kuɑ dɑnsɑlk, ŋɑɑn k t yet ɑ sonml i?› L yuo mɑnŋ e k u sɑɑ jiin k yet’b ɑ: ‹Bɑlmɔni e k n yien’i nɑ, yɑɑ din yet nɑn yin tun lin nbɑ k tul wun nbɑ tie tɑlk n nɑɑ wɑɑs nɑ sinsuuk ni nɑ yenɔ kuɑ nɑ, i din yet nɑn yin tun k tul min e.› Bin nbɑ nɑ e tɑn sɑɑ sɑɑn k sɑɑ lɑ tubdɑtu nbɑ kɑɑ gbennu nɑ, ŋɑɑn k niŋɑnm n mun sɑɑn kii sɑɑ ii be mɑnfuol nbɑ kɑɑ gbennu ni.» Yiesu nbɑ din pɑk mɑɑn mɑnŋ kul k gbenn yuo nbɑ k u yet u *puolpoweitieb ɑ: «I mi nɑn dɑɑlpo e tie *yuktgɑltiɑlu jɑɑnm, k b dɑɑn sɑɑ jii *Nisɑɑlk Bijɑ k tul niib ɑ bin kpɑɑ’u dɑpunpunn pɑɑk.» L yuo mɑnŋ k Yennu mɑnntieb yudɑnm nɑn *Suifnbɑ sɑɑkɑb din tikl lieb *Kɑɑyiif ŋɑɑk ni, wun nbɑ tie Yennu mɑnntieb yudɑnm sɑɑkuɑ nɑ. B din lol bɑɑ sɑɑ tien biɑnŋ nbɑ k bɔl suol Yiesu e k kpi’u. Ŋɑɑn b din lol ɑ b kɑn suol’ɔ jɑɑnm dɑɑ ni, k mɑɑn b i tien nnɑ sie k kpikpiluk bɑɑl. Tɔn, Yiesu nbɑ din tɑn be Betɑɑni duo ni, Siimɔn nbɑ din tuu tie gbɑɑtl nɑ ŋɑɑk, k kɑl di jiet, k puosuɑ din kuɑ k diɑ sɑlenŋɑnn, k tulɑɑli nbɑ k l dɑɑɔk pɑɑl bonciɑnn din gbie lenŋ ɑ, k bɑɑl tɑn but Yiesu yul pɑɑk. K Yiesu puolpoweitieb nɑ nbɑ din lɑ nnɑ yuo nbɑ k b piɑk buln nɑn wutuol k yien ɑ: «Bee k puo nɑ biil tulɑɑli nɑ nnɑ mɑn i? K mɑɑn b bo sɑɑ fit kɔi’l k gɑɑl likli bonciɑnn k sonm tɑlɑs-dɑnm.» K Yiesu din bɑnn b bunbulmi mɑnŋ, k boi’b ɑ: «Bee tien k i buln k dɑɑmi puo nɑ? Bonŋɑnn e k u tun k tul’n mɑnŋ. Tɑlɑs-dɑnm ŋɑnin sii tun be i buol ni yuo kul e, ŋɑɑn min ŋɑnin kii tun be nnɑ kɑɑ. Tulɑɑli nbɑ k u but n pɑɑk nɑ, u tien n piinu siil e. Bɑlmɔni e k n yien’i nɑ, siɑn nbɑ kul k b sɑɑ muɑnt lɑbɑmɑnn nɑ tingbounŋ nɑ ni, b biɑ sɑɑ muɑnt puo mɑnŋ nbɑ tun lin nbɑ nɑ, k lii tie lin nbɑ k b sii tiɑn u po.» L yuo nɑ k Yiesu puolpoweitieb nɑ ni yenɔ, wun nbɑ k b yi’u Suudɑ Iskɑɑliɑɔt nɑ, nyii k sɑɑn Yennu mɑnntieb yudɑnm buol ni, k sɑɑ boi’b ɑ: «I sɑɑ tul’n bee ŋɑɑn k n lon sɔni k Yiesu n kuɑ i nuu ni?» K b kɑn likbin piintɑ k tul’ɔ. K lɑɑ din nyii l yuo mɑnŋ k jii sɑɑ k u lon sɔni nbɑ k u sɑɑ jii Yiesu k kuɑn’ɔ b nuu ni. K pɑɑnu nbɑ k b din k tie * dɑtinŋ nɑ jɑɑnm piinu dɑɑl, k Yiesu puolpoweitieb din bɑɑl u buol ni, k tɑn boi’ɔ ɑ: «A luon k tin sɑɑn lee k sɑɑ tien siil k guun’ɑ *yuktgɑltiɑlu jɑɑnm nɑ dinu?» K u yet’b ɑ: «Ii sɑɑ mɑn duo nɑ ni jɑsuɑ nnɑ ŋɑɑk ni, k sɑɑ yet’ɔ ɑ: ‹T Wɑntuɑ e tun’t ɑ t tɑn yet’ɑ ɑ u yuo pel nɑ, k u luon ŋuɑ nɑn u puolpoweitieb n di *yuktgɑltiɑlu jɑɑnm ɑ ŋɑɑk nnɑ.› » K u puolpoweitieb mun din tun nɑn wɑɑ wɑnn’b biɑnŋ nbɑ nɑ, k din tien jɑɑnm mɑnŋ jiet siil. Dɑɑjuouk nbɑ din tɑn bɑɑl, k Yiesu nɑn u tuomiinbɑ *piik nɑn bɑnle nɑ kuɑ k kɑl ɑ bin di. Bɑɑ din di yuo nbɑ k Yiesu yet’b ɑ: «Bɑlmɔni e k n yien’i nɑ, i ni yenɔ sɑɑ k kuɑt’n ɑ.» K u puolpoweitieb nɑ pɑlɑ ni din biil bonciɑnn, k b piin k boi’ɔ yenɔ yenɔ ɑ: «N Yonmdɑɑnɔ, bɑlmɔni, ɑ yien min ee?» K u jiin k yet ɑ: «Wun nbɑ k min nɑn ŋuɑ lɑkn suk kpinsenyenŋ ni nɑ e sɑɑ kuɑt’n. Nisɑɑlk Bijɑ set sɑɑ kpo nɑn Yennu lolkpel kɑdɑɑɔk nbɑ wɑnn biɑnŋ nbɑ nɑ e, ŋɑɑn bonbiil sii be wun nbɑ yɑɑ wun kuɑt’n nɑ pɑɑk. B i bo ii dinŋ ii kii mɑl l dɑɑnɔ, l bo din sɔ.» Ŋɑnn e k Suudɑ wun nbɑ yɑɑ wun kuɑt’ɔ nɑ mun din boi’ɔ ɑ: «Wɑntuɑ, ɑ yien min ee?» Ŋɑnn e k Yiesu jiin k yet’ɔ ɑ: «Nnn, fin e yɑɑ.» Bɑɑ tɑn kɑl di jiet yuo nbɑ nɑ k Yiesu jii pɑɑnu, k tul Yennu niipuouk l pɑɑk, ŋɑɑn ŋmit ŋmit, k tul u puolpoweitieb, ŋɑɑn yet’b ɑ: «Gɑɑt mɑn k ŋmɑn. Nɑ e tie n gbɑnɑnt.» K u biɑ din jii *kɔp nɑn dɑmunŋ, k tul Yennu niipuouk l pɑɑk, k jii’l k tul’b ŋɑɑn yet’b ɑ: «Gɑɑt mɑn, k i kul ɑ n nyu. Lin nbɑ nɑ e tie n sɔn nbɑ sɑɑ te k Yennu mɔsonn n set nɑn bɑlmɔni, sɔn nbɑ tɑn sɑɑ nyi n gbɑnɑnt ni, ɑ nisɑɑli bonciɑnn n lɑ nyikcɑbu b biit pɑɑk e nɑ. N yien’i e, n kɑn mi nyu dɑmunŋ mɑnŋ, sie dɑɑl nbɑ k min nɑn yinm tɑn sɑɑ lɑkn ŋɑnm nyu n Bɑɑ nɑɑn ni.» Ŋɑnn e k b din yin Suifnbɑ Yenjiɑntu *yɑni, ŋɑɑn nyii k sɑɑn *Oliifienbɑ jɑgbɑɑk pɑɑk. L yuo nɑ k Yiesu din yet’b ɑ: «Nyiɑɔk nɑ, i kul ɑ sɑɑ tin ŋɑɑn nyik’n ɑ, k mɑɑn l diɑn Yennu lolkpel kɑdɑɑɔk ni ɑ: ‹N tɑn sɑɑ kpi pekpɑɑlk nɑ, k pei nbɑ k u tuu kpɑɑl’b nɑ sɑɑ tin yɑt.› Ŋɑɑn mi i tɑnŋ i fiil kuun ni, l puolpo, n sɑɑ liit i tuɑnn k sɑɑn Gɑɑliile.» K Piɑl jiin k yet’ɔ ɑ: «N Yonmdɑɑnɔ, suɑ kul i lek i tɑnŋ i tin k nyik’ɑ, ŋɑɑn min ŋɑnin kɑn mi tin k nyik’ɑ ni.» K Yiesu jiin k yet’ɔ ɑ: «Bɑlmɔni e k n yien’ɑ nɑ, dinnɑ nyiɑɔk nɑ, nɑn kojouk n tɑn bui nɑ, k ɑ noi tɑɑl muntɑ wɑɑ ɑ ɑ k mi’n.» K Piɑl jiin ɑ: «L i lek i bɑɑl ɑ min nɑn fin n lɑkn kpo, n kɑn mi k noi ɑ n k mi’ɑ ni.» K u puolpoweitieb nɑ kul ɑ mun din yet nnɑ. Ŋɑnn e k Yiesu nɑn u puolpoweitieb din sɑɑn siɑn nbɑ k b yi Getsemɑɑne nɑ, k u sɑɑ yet’b ɑ: «Ii be nnɑ mɑn, ŋɑɑn k n gɑl i tuɑnn po nɑ k sɑɑ miɑl Yennu» K jii Piɑl nɑn Sebede wɑɑs bɑnle nɑ k pukn u mɔnŋ po. K piin k lɑ pɑlbiil nɑn yɑn-yetuk, k yet’b ɑ: «Pɑlbibuolu nbɑ suol’n nɑ pel lin kpi’n ɑ. Biɑt nnɑ mɑn kii nyɔi nɑn’n.» Ŋɑnn e k u cɑt k sɑɑn wɑɑnm-nnɑ b tuɑnn po, k gbɑɑn tinŋ ni, ŋɑɑn mei Yennu k yien ɑ: «N Bɑɑ, l i bo i sɑɑ fit, fɑn ŋɑɑn k fɑlɑ nbɑ bɑɑt n pɑɑk nɑ n yɑkl’n. Ŋɑɑn ŋɑɑnt k ɑ lonm o n tun, k l dɑɑ tie n lonm u.» K u tɑn ŋmɑt u puolpoweitieb bɑntɑ nɑ buol ni, k bɑɑl suɑ k b guɑnt, k u boi Piɑl ɑ: «I lek kɑn fit kii nyɔi nɑn’n yuo wɑɑn ii? Ii nyɔi mɑn ŋɑɑn kii mei Yennu k i tɑn dɑɑ kuɑ jinjɑnmi ni, k mɑɑn i sei ŋɑnin luon lin tun lin nbɑ ŋɑn, ŋɑɑn k i gbɑnɑnt kɑɑ pɑnŋ.» K Yiesu din ŋmɑt tɑɑl munle ni k sɑɑ mei Yennu k yien ɑ: «N Bɑɑ, l i tie k fɑlɑ nbɑ bɑɑt n pɑɑk nɑ kɑn fit gɑl’n ŋɑnn sie k n dii’l, ŋɑɑnt k ɑ lonm n tun.» K u biɑ ŋmɑt k sɑɑ bɑɑl suɑ k u puolpoweitieb nɑ biɑ guɑn ɑ, k mɑɑn guɑn din mɔk’b bonciɑnn. K u nyik’b k biɑ ŋmɑt tɑɑl muntɑ ni, k sɑɑ mei Yennu k yien l biɑnŋ nɑn wɑɑ bo miɑl sinsinn nɑ. Ŋɑnn e k u ŋmɑt k bɑɑl u puolpoweitieb mɑnŋ buol ni k tɑn boi’b ɑ: «I biɑ lek dɑɑ guɑnt e k foi ii? Gotl mɑn, yuo mɑnŋ pel nɑ. B sɑɑ jii Nisɑɑlk Bijɑ nɑ k tien’ɔ biitdɑnm nuu ni wɑɑ. Fiit mɑn k tin sɑɑn. Gotl mɑn, wun nbɑ nyii n puol nɑ pel ɑ.» U mɔb dɑɑ din k bɑɑ tinŋ, k Suudɑ wun nbɑ tie u puolpoweitieb nɑ ni yenɔ dɔkt nɑn nibulciɑɔnŋ, k siɑb diɑ juk-bɑnjɑi, k siɑb mun diɑ gbɑjɑlɑ, k nyii Yennu mɑnntieb yudɑnm nɑn Suifnbɑ sɑɑkɑb buol ni. Suudɑ wun nbɑ nyii u puol nɑ ponŋ dɑɑn wɑnn niib mɑnŋ nyinsiɑl e ɑ: «Mi i sɑɑ i fuont wun nbɑ k muɑt u tɑnkpinn, ii mi nɑn ŋuɑ e nɑ, k yin suol’ɔ kenken mɑn.» Suudɑ nbɑ tɑn bɑɑl yuo nbɑ, l tɑɑkpɑɑk ni k u sɑɑn k sɑɑ set Yiesu penŋ ŋɑɑn yet’ɔ ɑ: «Wɑntuɑ, ɑ nyiɑɔk po,» ŋɑɑn muɑt u tɑnkpinn. K Yiesu jiɑnt yet’ɔ ɑ: «N yuɑk, Fɑɑ bɑɑl ɑ tun lin nbɑ nɑ, tumn yiɑn.» L yuo nɑ k niib nɑ ji wuul bɑɑl k tɑn bib Yiesu. Ŋɑnn e k u puolpoweitieb nɑ ni yenɔ tɑɑn kɑkt nuɑt *juk -bɑnjiɑk ŋɑɑn cuɑ pot Yennu mɑnntieb yudɑɑnɔ tuontunnɔ tubl k lu. Ŋɑɑn k Yiesu yet’ɔ ɑ: «Jiint ɑ juk-bɑnjiɑk mɑnŋ k nuɑn l tuok ni, k mɑɑn wun nbɑ kɔn nɑn juk, u kpenn juk kuun e. Nnɑlɑ, n bo sɑɑ fit miɑl n Bɑɑ sonml po, k u bo sɑɑ tun *mɑlɑkɑɑnbɑ yiɑn ɑ, k bin gɑl tusɑ piik nɑn ŋɑnle. Ŋɑɑn mi i tien nnɑ, nlee k l sɑɑ tun k gbien lin nbɑ diɑn Yennu lolkpel kɑdɑɑɔk ni k yet ɑ sie k lin nbɑ nɑ n tien i?» Ŋɑnn e k u boi nibulciɑɔnŋ nɑ: «I bɑɑl nɑn juki nɑn gbɑjɑlɑ ɑ i tɑn suol’n nɑn n tie fɑt-tuɑ e nɑ ɑɑ? N dɑɑn tuu be Yennu jɑɑnti ŋɑsɑɑkɑk ni dɑɑl kul ɑ k tumi niib, ŋɑɑn k i tuu k so’n. Ŋɑɑn lin nbɑ nɑ kul tun, ɑ lin gbien *Yennu sɔkniinbɑ nbɑ din diɑn lin nbɑ nɑ e.» L yuo k u puolpoweitieb nɑ kul ciɑl ŋɑɑn nyik’ɔ. K bin nbɑ suol Yiesu nɑ jii’u k sɑɑn nɑn’ɔ Yennu jɑɑnti yudɑɑnɔ Kɑɑyiif ŋɑɑk, siɑn nbɑ k *senniwɑntieb nɑn tinŋ nɑ ni sɑɑkɑb kɑl k guu nɑ. Bɑɑ sɑɑn nɑn Yiesu nɑ, k Piɑl wɑɑ u puolpo bɑnfɔkl ɑ, k sɑɑ bɑɑl sie Yennu mɑnntieb yudɑɑnɔ mɑnŋ ŋɑɑk nɑn-yel po, k tɑn kuɑ dundounŋ ni, k sɑɑn sɑɑ kɑl tuontunnɑ buol ni, ɑ wun lɑ l juontu. K Yennu mɑnntieb yudɑnm nɑn sɑɑkɑb mɑnŋ kul yɑbl b mɔnŋ pɑɑk ɑ bin lɑ fɑɑk siɑlɑɑdɑnm mɔb ni lin nbɑ k b sɑɑ jii Yiesu biit k kpi’u. K niib bonciɑnn set dii fɑɑk siɑlɑ u pɑɑk, ŋɑɑn kɔnŋ u bisiɑt. L puolpo k jɑb bɑnle nyii set k yet ɑ: «Juɑ nɑ dɑɑn yet ɑ u mɔk yiikuo k sɑɑ fit bet Yennu jɑɑnti ŋɑsɑɑkɑk nɑ, ŋɑɑn biɑ mɑɑ’l dɑɑ ŋɑntɑ sinsuuk ni.» Ŋɑnn e k Yennu mɑnntieb yudɑɑnɔ mɑnŋ fiil set, ŋɑɑn boi Yiesu: «A k mɔk l jiinu uu? Lin nbɑ k jɑb mɑnŋ piɑk ɑ po nɑ, l pɑɑk tie bee?» Ŋɑɑn k Yiesu k jiin siɑl. K Yennu mɑnntieb yudɑɑnɔ mɑnŋ ŋɑnm boi’ɔ ɑ: «Yet’t Yennu nbɑ fo nɑ pɑɑk, fin e set tie *Klistu nɑ k biɑ tie u Bijɑ nɑ ɑɑ?» K Yiesu jiin ɑ: «Nnn, fin e yɑɑ. Ŋɑɑn n yien’i e, lɑɑ nyii mɔtɑɑnɑ k jii sɑɑ, i tɑn sɑɑ lɑ Nisɑɑlk Bijɑ k u kɑl Yiikuo Dɑɑnɔ niidiitu po, k biɑ tɑn sɑɑ lɑ’u k u be sɑnpɑgbɑnɑ ni k siik.» Ŋɑnn e k Yennu mɑnntieb yudɑɑnɔ mɑnŋ wutuol duo, k u dɑt u mɔnŋ liɑtfuouk pɑt, ŋɑɑn tiɑn ɑ: «U piɑk biil Yennu e. K t ponŋ ji luon siɑlɑɑdɑnm ɑ t tien bee? I kul ɑ nɑ gbɑt wɑɑ piɑk biil Yennu biɑnŋ nbɑ. K i lɑ nlee?» K b jiin ɑ: «U ŋɑn nɑn kuun e.» L yuo nɑ, k b ji piin k siin mɔsɑnt u pɑɑk, k buo’u, k siɑb pebt’ɔ tɑnpɑki, ŋɑɑn yien ɑ: «Fin Klistu, buntl wun nbɑ pebt’ɑ nɑ.» Piɑl nbɑ kɑl Yennu mɑnntieb yudɑɑnɔ ŋɑɑdundounŋ ni nɑ, k ŋɑɑk mɑnŋ ni bonposiɑk bɑɑl u buol ni k tɑn yet’ɔ ɑ: «A mun tuu tun be nɑn Yiesu nbɑ nyii Gɑɑliile nɑ.» K Piɑl yet niib mɑnŋ kul ɑ buol ɑ: «N k mi fɑɑ piɑk lin nbɑ nɑ pɑɑk.» L puolpo k u fiil nyii k sɑɑ kɑl nɑn-yel po. K ŋɑɑk mɑnŋ ni bonpoliek biɑ nyii lɑ’u, k yet bin nbɑ be lenŋ nɑ ɑ: «Juɑ nɑ mun tuu tun be Yiesu nbɑ nyii Nɑɑsɑɑlet nɑ buol ni.» K Piɑl noi buun nii muu ni, k pol ɑ ŋuɑ tɑɑn k mi juɑ mɑnŋ. K l yɑnn wɑɑnm-nnɑ k bin nbɑ sie lenŋ nɑ bɑɑl k tɑn yet Piɑl ɑ: «A set tie b ni yenɔ e, k mɑɑn ɑ mɑɑn nɑ e wɑnt.» K Piɑl pol ɑ: «L i tie k n fɑ i e, Yennu n dɑt n tubl. N k mi juɑ mɑnŋ.» L yuo mɑnŋ k kojouk bui. K Piɑl ji tiɑl Yiesu nbɑ bo yet’ɔ nɑ ɑ: «Kojouk dɑɑ tɑn kɑn bui sinsinn dɑɑnn, k ɑ tɑn sɑɑ noi tɑɑl muntɑ, ɑ ɑ k mi’n.» K Piɑl nyii nɑn-yel po k sɑɑ bui k fɑbn bonciɑnn. Lɑɑ yent sɑn-nyɑpob ni, k Yennu mɑnntieb yudɑnm nɑn sɑɑkɑb lol bɑɑ sɑɑ tien biɑnŋ nbɑ k kpi Yiesu. K b lol’ɔ ŋmii k jii’u k sɑɑn nɑn’ɔ tinŋ yudɑɑnɔ nbɑ k b yi’u *Piilɑɑt nɑ buol ni. Suudɑ, nbɑ nyii Yiesu puol nɑ nbɑ gbɑt k b bu juont k yɑɑ ɑ Yiesu ŋɑn nɑn kuun e nɑ, k u pɑl din biil bonciɑnn, k u jii likbin piintɑ nɑ k ŋmɑt sɑɑ jiin tul Yennu mɑnntieb yudɑnm nɑn sɑɑkɑb mɑnŋ, ŋɑɑn yet ɑ: «N tun biit ɑ, k mɑɑn n kuɑt wun nbɑ kɑɑ biit ɑ.» Ŋɑnn e k b jiin k boi’ɔ ɑ: «T bɑkɑ mun ji be lin nbɑ nɑ ni ii? L ji tie ɑ mɑɑn e.» K Suudɑ jii likli nɑ k lu Yennu jɑɑnti ŋɑsɑɑkɑk ni, ŋɑɑn nyii k sɑɑn sɑɑ jɔnn u mɔnŋ ŋmiiuk. Ŋɑnn e k Yennu mɑnntieb yudɑnm tɔkl likli mɑnŋ ŋɑɑn yet ɑ: «Lin nbɑ nɑ ji tie sɔn likli e, k t *senni nbɑ tie biɑnŋ nbɑ, t kɑn fit jii pukn Yennu jɑɑnti ŋɑsɑɑkɑk likli ni.» L pɑɑk, k b kɑl dukn likli mɑnŋ po, k tɑn jii sɑɑn sɑɑ dɑɑ yɔkmɑluɑ tinŋ ɑ bii pii sɑɑnm lenŋ. L pɑɑk e te k b lek biɑ dɑɑ yi tinŋ mɑnŋ ɑ: «Sɔn Tinŋ» k tɑn tuu dinnɑ. K l gbien *Yennu sɔkni Selemi nbɑ din pɑk lin nbɑ nɑ k l tien mɔni ɑ: «B jii likbin piintɑ nbɑ k Islɑɑeltieb siɑb din pɑ k l tie u dɑɑɔk nɑ, k dɑɑ yɔkmɑɑlɔ tinŋ, nɑn Yonmdɑɑnɔ nbɑ wɑnn biɑnŋ nbɑ nɑ.» K Yiesu sie tinŋ mɑnŋ yudɑɑnɔ Piilɑɑt tuɑnn, k Piilɑɑt boi’ɔ ɑ: «Fin e set tie *Suifnbɑ Kpɑnbɑl nɑ ɑɑ?» K u jiin’ɔ ɑ: «Nnn, fin e yɑɑ.» Ŋɑɑn Yennu mɑnntieb yudɑnm nɑn sɑɑkɑb nɑ nbɑ tɑɑl’ɔ nɑ, u k jiin’m siɑl. K Piilɑɑt biɑ boi’ɔ ɑ: «A k gbiɑ bɑɑ tɑɑl’ɑ biɑnŋ nbɑ mɑnŋ ii?» Ŋɑɑn Yiesu ji k pɑk siɑl k jiin u po, k l ji bɑkt Piilɑɑt bonciɑnn. Tɔn, l i tie k *yuktgɑltiɑlu jɑɑnm dinu dɑɑl i tɑnŋ i bɑɑl, tinŋ yudɑɑnɔ mɑnŋ tuu nyinn niyenɔ kuɑ e dɑnsɑlk ni, wun nbɑ k niib nɑ luon’ɔ, k ŋɑɑ’u. Suɑ din be dɑnsɑlk l yuo, k u sɑnn din yi Bɑɑlɑɑbɑɑs, k niib nɑ mi’u fɑnu nɑn u tuonɑ nbɑ tie biɑnŋ nbɑ. Bɑɑ tɑn lɑkn yuo nbɑ k Piilɑɑt boi’b ɑ: «Ŋmee k i luon k n nyinn’ɔ dɑnsɑlk ni k ŋɑɑ’u? Bɑɑlɑɑbɑɑs ɑmi Yiesu nbɑ k b yi’u *Klistu nɑ?» k mɑɑn Piilɑɑt mi nɑn nɑnŋ pɑɑk e te k b suol Yiesu k tien u nuu ni. Piilɑɑt nbɑ dɑɑ kɑl buut kok pɑɑk nɑ, k u ŋɑɑpuo tun *tuomi k tɑn yet’ɔ ɑ: «Nyint ɑ nuu nifopiemɔ nɑ mɑɑn ni, k mɑɑn nyiɑɔk nɑ n won lɑ dɑɑmuk bonciɑnn n dɑmiit ni u pɑɑk.» K Yennu mɑnntieb yudɑnm nɑn sɑɑkɑb mɑnŋ biil niib nɑ ɑ bin yet Piilɑɑt ɑ wun nyinn Bɑɑlɑɑbɑɑs ŋɑɑn kpi Yiesu. K Piilɑɑt biɑ ŋɑnm k boi’b ɑ: «Niib bɑnle nɑ ni, i luon k n nyinn ŋmee ŋɑɑ’u?» K b jiin ɑ: «Bɑɑlɑɑbɑɑs e.» K Piilɑɑt biɑ ŋɑnm boi’b ɑ: «K Yiesu nbɑ k b yi’u Klistu nɑ ŋɑnin, i luon k n tien’ɔ nlee?» K b kul ɑ jiin ɑ: «Kpɑɑn’mɔ k tɑbn’ɔ dɑpunpunn pɑɑk.» K Piilɑɑt boi’b ɑ: «Bee pɑɑk e? U biit mɑntk tie lɑnn po e?» K b ŋɑnm tien guoluk, ŋɑɑn jiin sɑnpɑɑpo wɑɑ ɑ: «Kpɑɑn’mɔ tɑbn dɑpunpunn pɑɑk.» Piilɑɑt nbɑ bɑnn nɑn wuu piɑk l kɑɑ nyuɑt, k biɑ sɑɑ pukn guoluk nɑ, k u jii nyun k wuul wuul u nii, niib nɑ ninbinɑ ni, ŋɑɑn yet ɑ: «N nuu kɑɑ juɑ nbɑ kɑɑ biit nɑ sɔn nyinu ni. I mɑɑn e nɑ.» K niib nɑ jiin ɑ: «Nnn, u sɔn n jii tinm nɑn t wɑɑs yulɑ pɑɑk.» Ŋɑnn e k Piilɑɑt nyinn Bɑɑlɑɑbɑɑs ŋɑɑ’u, ŋɑɑn te k b buo Yiesu gbɑnn, k jii’u tul’b ɑ bin sɑɑ kpɑɑ’u dɑpunpunn pɑɑk. K tinŋ yudɑɑnɔ Piilɑɑt nɑ sejenm jii Yiesu k kuɑ nɑn’ɔ dundounŋ ni, k b sejenm mɑnŋ kul ɑ tikl k lint’ɔ. B din liɑt u liɑnt nɑ e, ŋɑɑn jii liɑtfomunŋ nnɑ k lɑnn’ɔ, ŋɑɑn luu kunkoni foklk k yiln’mɔ, k jii pɑtu k kubn’ɔ u niidiitu ni, k gbɑɑn u tuɑnn, k sɑlkt’ɔ k yien ɑ: «Suifnbɑ Kpɑnbɑl, t fuont’ɑ.» K b piin k siin mɔsɑnt u pɑɑk, ŋɑɑn gɑɑn pɑtu nbɑ k b bo kubn’ɔ nɑ k fɑɑ u yul pɑɑk. Bɑɑ tɑn sɑlk’ɔ gbenn yuo nbɑ, k b liɑt liɑtfomunŋ nɑ, ŋɑɑn jii u mɔnŋ liɑnt nɑ k lɑnn’ɔ, ɑ bin ji sɑɑn k sɑɑ kpɑɑ’u k tɑbn’ɔ dɑpunpunn pɑɑk. Bɑɑ din sɑɑ nɑ, k b cet Siilenn tinŋ ni jɑsuɑ nbɑ k u sɑnn yi Siimɔn, k suol’ɔ, k miɑ’u jinn’ɔ Yiesu kuun dɑpunpunn nɑ. Bɑɑ sɑɑ bɑɑl siɑn nbɑ k b yi’l Golgotɑ nɑ, k l pɑɑk tie ɑ: «Yukpɑbuk buol,» k b jii dɑɑn nbɑ ŋmɑt nɑn bonkobuk yɑn k tul’ɔ ɑ wun nyu, ŋɑɑn wɑɑ lenm yuo nbɑ k u yet nyunu. Bɑɑ kpɑɑ’u k tɑbn’ɔ dɑpunpunn pɑɑk gbenn yuo nbɑ, k b tɔ tiɑtiɑ k cent cent u tiɑt nɑ, ŋɑɑn ji kɑl lenŋ k guu’u. K b diɑn bɑɑ yɑɑ ɑ u tun biit nbɑ nɑ, k tɑbn u dɑpunpunn nɑ yul pɑɑk. Bɑɑ din diɑn lin nbɑ e nɑ, k l wɑnt ɑ: «Yiesu nbɑ tie Suifnbɑ Kpɑnbɑl nɑ e nɑ.» B mun biɑ din kpɑɑ fɑt-tieb bɑnle dɑpunpunɑ pɑɑk lenŋ, k pukn Yiesu po, k yenɔ din be u niidiitu po, k luɑ mun din be u niigɑnŋ po. Bin nbɑ din sonm gɑɑl lenŋ nɑ pɑkn b yulɑ e ŋɑɑn suki’ɔ, k yien ɑ: «Fin nbɑ yɑɑ ɑ ɑ sɑɑ fit bet Yennu jɑɑnti ŋɑsɑɑkɑk nɑ ŋɑɑn biɑ mɑɑ’l dɑɑ ŋɑntɑ sinsuuk ni nɑ, fin e nɑ, fiet ɑ mɔnŋ. L i tie k ɑ set tie Yennu Bijɑ i e, fɑn nyi dɑpunpunn nɑ pɑɑk k sik nɑ.» Nnɑ e biɑk k Yennu mɑnntieb yudɑnm nɑn *senniwɑntieb nɑn sɑɑkɑb kul ɑ mun din sɑlkt’ɔ k yien ɑ: «U tuu fie lieb e, ŋɑɑn kɑn fit k fiel u mɔnŋ. Tɔn, u tie Islɑɑeltieb Kpɑnbɑl e. Wun sikn u mɔnŋ dɑpunpunn nɑ pɑɑk nɑ, k tin fit tien’ɔ yɑdɑ mɑntk. U tien Yennu yɑdɑ wɑɑ, k yɑɑ ɑ u tie Yennu Bijɑ e. Tɔn, l i tie k Yennu set luon’ɔ, ŋɑɑnt tii goli mɑn k lɑɑn u sɑɑ fiel’ɔ mɔtɑɑnɑ wɑɑ.» Nnɑ e mun fɑt-tieb bɑnle nbɑ k b kpɑɑ’b k pukn u po nɑ mun biɑ sɑlkt’ɔ. Lɑɑ tɑn bɑɑl yensuuk ni, k tinŋ nɑ kul ji din bɔnn k sɑɑ bɑɑl yenlekl kut muntɑ. Kut muntɑ yuo po e, k Yiesu yikn sɑnpɑɑpo wɑɑ ɑ: «Elii Elii lemɑ sɑɑbɑɑktɑɑni?» (L pɑɑk tie ɑ: «N Yennu, n Yennu, bee k ɑ nyik’n i?») K bin nbɑ sie lenŋ nɑ nbɑ gbɑt u yiini mɑnŋ k b siɑb yet ɑ: «U yi Elii e nɑ.» K b ni yenɔ tin sɑɑ jii sɑɑpo k suunt dɑmiituk nnɑ ni, k jii sɑkn dɑɑɔk pɑɑk, k donn tul’ɔ ɑ wun nyu. K u lieb nɑ yien’ɔ ɑ wun nyik’ɔ, ɑ k lɑɑn Elii sɑɑ bɑɑl k tɑn fiel’ɔ wɑɑ ɑɑ? K Yiesu ŋɑnm yikn sɑnpɑɑpo wɑɑ ŋɑɑn ji kpo. L yuo nɑ k cincenn nbɑ tuu juɑn k puun Yennu jɑɑnti ŋɑsɑɑkɑk ni nɑ ji bɔkt l yul pɑɑk k tɑn sik tinŋ ni, k tinŋ dɑnm, k tɑnpiit bɔktl, k kɑɑt biɑ luotl, k kpienm nbɑ din kpo k din tie Yennu niib nɑ bonciɑnn fiil kuun ni, k nyii b kɑɑt ni, k Yiesu kuun fiilu puolpo k b kuɑ Selusɑɑlenm, k niib bonciɑnn lɑ’b nɑn b ninbinɑ. K sejenm yudɑɑnɔ nɑ, nɑn u sejenm nbɑ pukn u pɑɑk k b guu Yiesu nɑ nbɑ lɑ nnɑ yuo nbɑ, nɑn tinŋ dɑnmu nɑ, k jɑŋmɑɑni suol’b bonciɑnn, k b yien ɑ: «Bɑlmɔni e, juɑ nɑ set tie Yennu Bijɑ e.» Puob nbɑ din tuu wɑɑ Yiesu k nyii Gɑɑliile k sonmt’ɔ nɑ ji wokl k sie bɑnfɔkl ɑ ŋɑɑn goli lin nbɑ tuun mɑnŋ. B yenm e din tie Mɑgdɑɑlɑ puo Mɑɑli, nɑn Sebede wɑɑs nɑɑ nɑ, nɑn Mɑɑli nbɑ din tie Sɑɑk nɑn Suosiɑf nɑɑ nɑ. Lɑɑ tɑn bɔnt yuo nbɑ k Aliimɑɑte duo mɔktsuɑ bɑɑl, k u sɑnn din tie Suosiɑf. U mun biɑ din tie Yiesu puolpo juɑ e. K u sɑɑn yudɑɑnɔ Piilɑɑt buol ni, k sɑɑ miɑl’ɔ ɑ wun cɑb’ɔ k wun kpɑɑt Yiesu gbɑnɑnt k pii. K Piilɑɑt tul yiikuo ɑ bin sɑɑn k sɑɑ jii Yiesu k tul’ɔ. K Suosiɑf sɑɑn k sɑɑ jii Yiesu gbɑnɑnt k pɔbn’ɔ kɑtin-yienŋ ni, k jii’u sɑɑn sɑɑ pii’u u mɔnŋ mɔnŋ kɑpɑɑɔnŋ nbɑ k u din gbiil’l tɑnpiiuk lokl ni nɑ, ŋɑɑn bilnt kɑtɑngbenŋl k tɑn biin kɑmɔb, ŋɑɑn ji ŋmɑt kun. K Mɑgdɑɑlɑ puo Mɑɑli, nɑn luɑ nbɑ k b mun yii’u Mɑɑli nɑ ji kɑl kpiɑ lenŋ k goli kɑɑɔk mɑnŋ. Lɑɑ yent sɑn-nyiɑɔk, dɑɑl nbɑ tie ŋɑnm Suifnbɑ *Fuondɑɑl nɑ, k Yennu mɑnntieb yudɑnm nɑn Fɑɑliisiɑnnbɑ sɑɑn Piilɑɑt buol ni, k sɑɑ yet’ɔ ɑ: «Cɑnbɑɑ, t tiɑn nɑn fɑɑk dɑɑnɔ mɑnŋ nbɑ dɑɑn be nɑ, u dɑɑn yet ɑ l i tie k u tɑn kpo, ɑ ŋɑɑn dɑɑ ŋɑntɑ dɑɑl u biɑ sɑɑ fiil kuun ni wɑɑ. L pɑɑk, tuln sejenm mɔb k bin sɑɑn kii sɑɑ i guu u kɑɑɔk mɑnŋ bonŋɑnn k sɑɑ tuu dɑɑ ŋɑntɑ mɑnŋ dɑɑl. L i kii tie nnɑ i kɑɑ, u *puolpoweitieb tɑn sɑɑ bɑɑl k jɑn’ɔ e, ŋɑɑn yet niib ɑ u fiil kuun ni e. K kpinkpɑnni mɑnŋ tɑn sɑɑ gɑl sinsinn yɑl nɑ pɑɑk ɑ.» K Piilɑɑt yet’b ɑ: «Jiin guutieb mɑn k bin sɑɑn kii sɑɑ i guu kɑɑɔk mɑnŋ nɑn yɑɑ sɑɑ fit guul biɑnŋ nbɑ.» K b jii guutieb k b sɑɑn sɑɑ guu kɑɑɔk nɑ, ŋɑɑn buun tɑnt k pɔl’l fɑnu. K *Suifnbɑ *Fuondɑɑl nɑ gɑl, ŋɑɑn k lɑsl dɑɑl sɑn-nyɑfɑɑl k Mɑgdɑɑlɑ puo Mɑɑli nɑn luɑ nbɑ k b mun yii’u Mɑɑli nɑ nyii sɑɑn, ɑ bin sɑɑ gɔn kɑɑɔk nɑ. K tinŋ din dɑnm bonciɑnn, k mɑɑn Yennu *mɑlɑkɑ nyii sɑnpɑɑpo sik, k tɑn bikt kɑtɑngbenŋl nɑ kɑmɔb nɑ pɑɑk, k kɑl l pɑɑk. K u gbɑnɑnt din nyili nɑn sɑnyiknti nɑ, k u liɑnt pien nɑn sɑnpɑgbɑnpieonŋ nɑ. K jɑŋmɑɑni din suol guutieb nɑ bonciɑnn, k b ji jekl k tɑn bɑɑ k duɑ duɑ nɑn kpienm nɑ. K mɑlɑkɑ nɑ yet puob mɑnŋ ɑ: «I dɑɑ tiin jɑŋmɑɑni mɑn. N mi nɑn i luon Yiesu nbɑ k b kpɑɑ’u dɑpunpunn pɑɑk nɑ e. U kɑɑ nnɑ, u fiil kuun ni nɑn wɑɑ dɑɑn yet biɑnŋ nbɑ nɑ. Ii sɑɑ nɑ mɑn k tɑn got wɑɑ dɑɑn duɑ siɑn nbɑ nɑ. Ii sɑɑ mɑn yiɑn yiɑn, k sɑɑ yet u *puolpoweitieb ɑ, u fiil kuun ni k gɑl sɑɑn Gɑɑliile wɑɑ. Lenŋ e wɑɑ k i sɑɑ lɑ’u. Bɑlmɔni e k n yien’i nɑ.» K puob nɑ nyii kɑɑɔk mɑnŋ penŋ k ciɑl sɑɑ ɑ bin sɑɑ yet u puolpoweitieb, k jɑŋmɑɑni lek mɔk’b, ŋɑɑn k b biɑ mɔk pɑlpienn bonciɑnn. Bɑɑ din sɑɑ nɑ, k Yiesu cet’b sɔnu pɑɑk k fuont’b, k b gbɑɑn u tuɑnn k suol u tɑɑ k jiɑnt’ɔ. K u yet’b ɑ: «I dɑɑ tiin jɑŋmɑɑni. Ii sɑɑ mɑn k sɑɑ yet n nɑɑ wɑɑs mɑnŋ ɑ bin sɑɑn Gɑɑliile. Lenŋ e wɑɑ k b sɑɑ lɑ’n.» Puob mɑnŋ nbɑ din sɑɑ nɑ, k guutieb nbɑ guu kɑɑɔk nɑ siɑb ŋmɑt sɑɑn duo ni, k sɑɑ wɑnn Yennu mɑnntieb yudɑnm nɑ lin nbɑ tien mɑnŋ kul ɑ. Yennu mɑnntieb yudɑnm mɑnŋ nɑn sɑɑkɑb nbɑ lɑkn kɑl k lol lol nɑ, k b tul guutieb nɑ likli bonciɑnn, ŋɑɑn yet’b ɑ: «I yet ɑ Yiesu puolpoweitieb e bɑɑl tɑnsuuni, yuo nbɑ k i duɑl k guɑnt nɑ, k tɑn jɑn piit u gbɑnɑnt. k l i tie k tinŋ yudɑɑnɔ nɑ gbɑt nnɑ i e, tinm sɑɑ dɔkn i pɑɑk u buol ni k nyinn’i.» K guutieb mɑnŋ gɑɑl likli nɑ, ŋɑɑn ŋmɑt k sɑɑ yet niib nɑn bɑɑ wɑnn’b biɑnŋ nbɑ nɑ. K Suifnbɑ gɑɑl mɑɑn nɑ k l tien bɑlmɔni mɔkmɔk nɑn dinnɑ. K Yiesu tuomiinbɑ piik nɑn yenɔ kuɑ nɑ sɑɑn Gɑɑliile jɔsiɑl pɑɑk, siɑn nbɑ k Yiesu din wɑnn’b ɑ bin sɑɑn nɑ. Bɑɑ tɑn lɑ’u yuo nbɑ k b gbɑɑn k jiɑnt’ɔ, ŋɑɑn b siɑb din bils u pɑɑk. Ŋɑnn e k u cɑt k nɑkn’m, ŋɑɑn yet ɑ: «Yennu tul’n sɑnpɑɑpo nɑn tinŋ ni yiikuo kul ɑ wɑɑ. L pɑɑk, ii sɑɑ mɑn tingbounŋ nɑ ni, nibuolu kul ɑ buol ni, k sɑɑ tien’m n puolpoweitieb, k wul’b Yennu nyunwulu, Bɑɑ, nɑn Bijɑ, nɑn Foŋɑnm sɑnn ni, k wɑnn’b k bin sɑk lin nbɑ k n wɑnn’i nɑ kul. Ii tiɑn mɑn nɑn n be nɑn’i yuo kul ɑ, mɔkmɔk nɑn *dulnyɑ gbennu.» Yiesu *Klistu Yennu Bijɑ lɑbɑmɑnn piinu e nɑ. Yennu Sɔkni Esɑɑyi kɑdɑɑɔk ni l diɑn ɑ Yennu yet ɑ: «N tuomu e nɑ, k n yɑɑ n tun’ɔ ɑ wun dɔnŋ k gɑl ɑ tuɑnn, k ŋɑnm ɑ sɔnu k tul’ɑ. Suɑ be muuk ni k huot k yɑɑ ɑ: ‹Ŋɑnmt mɑn Yonmdɑɑnɔ sɔnu k tul’ɔ k te k sɔni i tuok.› » Sɑn din be muuk ni, k muɑntl k tien niib ɑ bin mɔ kuɑŋɑɑn k lebt binbenŋ k wun wul’b Yennu nyunwulu k Yennu n nyik cɑb b biit. Suude tinŋ ni nɑn Selusɑɑlenm duo ni niib kul din bɑɑl Sɑn buol ni, k fiit b biit, k Sɑn wul’b Yennu nyunwulu, *Suulden kpenu ni. Sɑn din liɑ yuyouk kobt liɑtfuouk o, k biɑ buob gbɑnn u siɑk ni, k u jiet din tie nɑɑsuut nɑn siɑt. k u muɑntl k tien niib ɑ: «Nilɔ nbɑ yɑɑ wun tɑn wei n puol k bɑɑl nɑ cie’n, k n ponŋ k ŋɑn nɑn k n buɑn u tuɑnn ni k lot u tɑɑsɑɑŋmi. Min wuul’i nɑn nyun e, ŋɑɑn ŋuɑ ŋɑnin tɑn sɑɑ wul’i nɑn Foŋɑnm.» L yuo nɑ k Yiesu din nyii Nɑɑsɑɑlet duo nbɑ be Gɑɑliile tinŋ ni nɑ, k bɑɑl Sɑn buol, k Sɑn wul’ɔ Yennu nyunwulu *Suulden kpenu mɑnŋ ni. Yiesu nbɑ din nyii nyun mɑnŋ ni k duo yuo nbɑ, l tɑɑkpɑɑk ni k u lɑ k sɑnpɑɑk luot, k Foŋɑnm sik tuɑn u pɑɑk k nɑɑn nɑn ŋmɑnn nɑ k u gbɑt kunkɔl sɑnpɑɑpo nɑ, k kunkɔl nɑ yet ɑ: «Fin e tie n Bilonkɑk. Fin e k n nunm gbuo.» L tɑɑkpɑɑk ni k Foŋɑnm din te k Yiesu kuɑ muuk ni, u din be muuk mɑnŋ ni k sɑɑ jɑnŋ dɑɑ piinnɑ, k *Sɑɑtɑn sɑɑ jɑnm’ɔ. Yiesu nɑn muuk ni bonkobt e din be, k Yennu *mɑlɑkɑɑnbɑ cɑntl’ɔ. Tɔn, k b din tɑn suol Sɑn k kuɑn’ɔ dɑnsɑlk, k l puolpo k Yiesu sɑɑn Gɑɑliile tinŋ ni, k muɑntl Yennu lɑbɑmɑnn, k yien ɑ: «Yuo bɑɑl ɑ, k Yennu nɑɑn pel nɑ. L pɑɑk i mɔ kuɑŋɑɑn k lebt binbenŋ mɑn k tien lɑbɑmɑnn mɑnŋ yɑdɑ.» Yiesu nbɑ din sonm Gɑɑliile mɔkgbenŋl kpinŋ nɑ, k tɑn lɑ Siimɔn nɑn u ninjɑ Andle, k b lubn jɑnlɑɑɔnŋ mɔkgbenŋl nɑ ni, k mɑɑn b din tie jɑnsuolɑ e K u yet’b ɑ: «Ii wɑɑ’n mɑn, k n sɑɑ te k yii so niib nɑn yɑɑ so jɑni nɑ.» L tɑɑkpɑɑk ni k b nyik b jɑnlɑɑɔnŋ nɑ, ŋɑɑn k wɑɑ’u. K u biɑ ji din sɑɑn tuɑnn po wɑɑnm-nnɑ k lɑ Sɑɑk nɑn u ninjɑ Sɑn, bin nbɑ din tie Sebede wɑɑs nɑ, k b din be b bulgbetl ni k ŋɑnmt b jɑnlɑɑnt. Yiesu nbɑ lɑ’b yuo nbɑ k u yiin’m, k b nyik b bɑɑ Sebede nɑn u tuontunnɑ bulgbetl mɑnŋ ni, ŋɑɑn wɑɑ’u. K Yiesu nɑn ŋɑnm din sɑɑn kuɑ digbɑnsiɑl ni k l sɑnn yi Kɑpelnɑunm, k *Fuondɑɑl tɑn bɑɑl, k b kuɑ *Suifnbɑ jɑɑnti dieok ni, k u piin k tumi niib. K u tumiu mɑnŋ bɑkt’b bonciɑnn, k mɑɑn u din k tie nɑn *senniwɑntieb nɑ kɑɑ ŋɑɑn u din tumi’b nɑn minu e. K l yuo nɑ k juɑ nbɑ k nɑlnbiiuk be u ni nɑ be Suifnbɑ jɑɑnti dieok nɑ ni k yikn sɑnpɑɑpo k yien ɑ: «Fin Yiesu, Nɑɑsɑɑlet nilɔ nɑ, tinm nɑn fin nlee mɑntk i? A bɑɑl ɑ ɑ tɑn biil’t ee? N mi fɑɑ tie wun nbɑ. A tie Yennu Niŋɑnɔ nɑ e.» K Yiesu tiɑn u pɑɑk, k yet ɑ: «Ŋminin fuut, ŋɑɑn nyi u ni.» K nɑlnbiiuk nɑ fuun juɑ nɑ k tɑn lu’u k wɑɑ nyi u ni yuo nbɑ k u yikn sɑnpɑɑpo wɑɑ. K l din tien b kul yɑɑl-lituk, k b boi b lieb ɑ: «Bee nɑ? U wɑnn wɑnnsɑɑnn nɑn yiikuo e, k biɑ tien nɑlnbiit mɔb, k b sɑɑk.» L yuo ni k u sɑnn din muɑnt yiɑn ɑ k lin Gɑɑliile tinŋ ni kul ɑ. Yiesu nbɑ din nyii Suifnbɑ jɑɑnti dieok mɑnŋ ni nɑ, k ŋuɑ nɑn Sɑɑk nɑn Sɑn din sɑɑn kuɑ Siimɔn nɑn Andle ŋɑɑk ni. K Siimɔn diɑnpuok din duɑ k yiɑl k u gbɑnɑnt ton, k b yet Yiesu u yiɑlu mɑnŋ po. K Yiesu din sɑɑn suol u nuu k fiin’ɔ, k u yiɑlu mɑnŋ gbenn, k u fiil k cɑnt’b. L dɑɑl mɑnŋ dɑɑjonyiɑɔk, k niib din jii bɑɑtb nɑn bin nbɑ k nɑlnbiit be b ni nɑ, k bɑɑt nɑn’m Yiesu buol ni. K duo mɑnŋ ni niib kul ɑ din lɑkn k tɑn yiɑ dieok nɑ tɑnmɔb. K u te k nisiɑb bonciɑnn bin nbɑ yiɑl yiɑlbuolu kul ɑ nɑ pɑɑk, k biɑ nyint nɑlnbiit niib bonciɑnn ni, k k sɑk nɑlnbiit mɑnŋ n yet siɑl, k mɑɑn b din mi wɑɑ tie wun nbɑ. K Yiesu din dɔnŋ nyii k kojouk dɑɑ k mɔ, k kuɑ muuk ni k sɑɑ mei Yennu. K Siimɔn nɑn u lieb nɑ ji din lin k luon u buol, k bɑɑ sɑɑ lɑ’u yuo nbɑ k b yet’ɔ ɑ: «Suɑ kul luon fin e.» K Yiesu yet’b ɑ: «Ŋɑɑnt mɑn k tin sɑɑn digbɑnɑ nbɑ kpiɑt nɑ ni nɑ, k n sɑɑ muɑnt lɑbɑmɑnn nɑ lenŋ mun, k mɑɑn l pɑɑk e te k n bɑɑl.» K nnɑ e k u din lin Gɑɑliile tingbounŋ ni kul po, k muɑntl lɑbɑmɑnn mɑnŋ Suifnbɑ jɑɑnti diet ni, k biɑ nyint nɑlnbiit niib ni. Tɔn, k gbɑɑtsuɑ din bɑɑl Yiesu buol ni, k tɑn gbɑɑn u tuɑnn ni, k bɑln’mɔ ɑ: «L i tie k ɑ luon, ɑ sɑɑ fit te k n ŋɑɑɔk nɑ n gbenn.» K ninbɑɑɔk din suol Yiesu k u tɑnt u nuu k sii’u, ŋɑɑn yet’ɔ ɑ: «N sɑk ɑ. A ŋɑɑɔk mɑnŋ n gbenn.» L tɑɑkpɑɑk ni k juɑ mɑnŋ ŋɑɑɔk nɑ gbenn, k u gbɑnɑnt ji jen l bɑnnu ni. K Yiesu din yɑki nɑn’ɔ fɑnu wɑɑ, ŋɑɑn ji bel’ɔ k u sɑɑn ŋɑɑn yet’ɔ ɑ: «Ii mi k ɑ yet suɑ l mɑɑn. Ii sɑɑ k jii ɑ mɔnŋ k wɑnn Yennu mɑnntuɑ nɑ, k mɑnn mɑnnu nbɑ k *Yennu sɔkni Muois din senn k jiin gbɑɑtɑ pɑɑku po nɑ, k suɑ kul n bɑnn nɑn ɑ ŋɑɑɔk mɑnŋ set gbenn ɑ.» Ŋɑɑn k juɑ nɑ sɑɑn k muɑnt u pɑɑku mɑnŋ lɑbɑɑl lokl kul ɑ po. Ŋɑnn e din te k Yiesu k fit nyi pɑɑnu ni k kuɑ digbɑnsiɑl ni. U din tuu be digbɑnkpini e, ŋɑɑn k niib bonciɑnn din nyi lokl kul po k bɑɑt u buol ni. K l din tɑn tien dɑɑ ŋɑnle nnɑ e, k Yiesu biɑ ŋmɑt Kɑpelnɑunm, k niib bonciɑnn gbɑt nɑn u ŋmɑt ŋɑɑpo wɑɑ. K b din tikl hɑli nɑn yiɑl bonmintk nnɑ wɑɑ tɑn kɑɑ ŋɑɑk mɑnŋ ni k suɑ sɑɑ fit bɑɑl tɑnmɔb buol ni, k u muɑntl Yennu mɑɑn k tien’m. K niib bɑnnɑ din tɑn jii bɑɑtsuɑ k u gbɑnɑnt kpo. Bɑɑ din k fit bɑɑl Yiesu buol k mɑɑn niib nbɑ din yɑbt nɑ pɑɑk, k b cuɑ luot mɔpinn yul pɑɑk, k sikn bɑɑtɔ nɑ k u duɑ u liɑnŋ pɑɑk k tɑn bil’ɔ Yiesu tuɑnn ni. Yiesu nbɑ din lɑ bɑɑ tien’ɔ yɑdɑ biɑnŋ nbɑ nɑ, k u yet bɑɑtɔ nɑ ɑ: «N bik, n nyik cɑb ɑ biit ɑ.» L yuo nɑ k Yennu *senniwɑntesiɑb din kɑl lenŋ mɑnŋ k boi b pɑlɑ ni ɑ: «Bee tien k juɑ nɑ piɑk nnɑ? U biil Yennu sɑnn. Ŋmee dɑɑ sɑɑ fit nyik cɑb nilɔ biit, k l k tie Yennu kuukuɑ kɑɑ?» K Yiesu din bɑnn dudukt nbɑ be b pɑlɑ ni, k u boi’b ɑ: «Bee k i mɔk dudukt nɑ buolu? Mi i yet bɑɑtɔ nɑ ɑ: ‹N nyik cɑb ɑ biit› ɑmi mi i yet’ɔ ɑ: ‹Fiit k jii ɑ liɑnŋ kii sonm,› mɑɑn munle nɑ sinsuuk ni lɑnn po e pɑɑl i? Ŋɑɑn n luon k yin bɑnn nɑn *Nisɑɑlk Bijɑ mɔk yiikuo tingbounŋ nnɑ, k sɑɑ fit nyik cɑb nilɔ biit.» Ŋɑnn e k u jiɑnt yet wun nbɑ k u gbɑnɑnt kpo nɑ ɑ: «N yien’ɑ e fiit, k jii ɑ liɑnŋ kii kun ɑ ŋɑɑk ni.» L tɑɑkpɑɑk ni k gbɑnɑnkpienn dɑɑnɔ nɑ fiil, k jii u liɑnŋ k nyii b kul ɑ ninbinɑ ni, k l bɑkt b kul ɑ, k b piɑk dont Yennu sɑnn k yien ɑ: «T k mi lɑ l buolu.» L puolpo e k Yiesu biɑ din ŋmɑt mɔkgbenŋl nɑ kpinŋ, k niib bonciɑnn tikl u buol ni k lint’ɔ wɑɑ, k u din wɑnt’b Yennu mɑɑn. Ŋɑnn e k u din gɑl tuɑnn po k sɑɑ lɑ jɑsuɑ nnɑ k u sɑnn din tie Liefi, wun nbɑ din tie Alfe bijɑ nɑ, k u kɑl u tuonn pɑɑk lɑnpogɑɑldieok ni, k Yiesu yet’ɔ ɑ: «Fiit kii wɑɑ’n.» K u fiil k wɑɑ’u. L puolpo e k Yiesu din be Liefi ŋɑɑk k di jiet, k *lɑnpogɑɑltieb bonciɑnn nɑn biitdɑnm bonciɑnn lɑkn kɑl nɑn Yiesu nɑn u *puolpoweitieb k di jiet. Bin nbɑ din wɑɑ’u din yɑb bonciɑnn. K senniwɑntieb, bin nbɑ din tie Fɑɑliisiɑnnbɑ nɑ, lɑ k Yiesu di jiet nɑn biitdɑnm nɑn lɑnpogɑɑltieb nɑ, k b boi u puolpoweitieb nɑ ɑ: «Bee k u lɑkn di nɑn lɑnpogɑɑltieb nɑn biitdɑnm i?» Yiesu nbɑ gbɑt nnɑ k u yet’b ɑ: «Bin nbɑ mɔk lɑɑfiɑ k luon tebtuɑ, ŋɑɑn bin nbɑ yiɑl, ŋɑnm e luon tebtuɑ. L k tie bin nbɑ tie niŋɑnm Yennu buol nɑ pɑɑk kɑɑ te k n bɑɑl, biitdɑnm pɑɑk e k n bɑɑl.» Dɑsiɑl k Sɑn puolpoweitieb nɑn Fɑɑliisiɑnnbɑ din loln mɔi. K nisiɑb din bɑɑl k boi Yiesu ɑ: «Sɑn puolpoweitieb nɑn Fɑɑliisiɑnnbɑ puolpoweitieb loln mɔi. Bee tien k ɑ puolpoweitieb k loln i?» K Yiesu boi’b ɑ: «Puociɑnu i be, sɑɑnm sɑɑ fit lol mɔi yuo nbɑ k puoyuokl sɔlɔ dɑɑ be b buol ni nɑ wɑɑ ɑɑ? Aɑi. Puoyuokl sɔlɔ nbɑ dɑɑ be b buol ni nɑ, b kɑn fit lol mɔi. Ŋɑɑn siɑn-yuo bɑɑt nɑ k b tɑn sɑɑ jii puoyuokl sɔlɔ nɑ b buol. L yuo mɑnŋ e k b sɑɑ lol mɔi. «Suɑ kɑn sɑk jii cɑbpɑɑnn k lik tɑkpel. L i tie k u tien nnɑ i e, cɑbpɑɑnn nɑ sɑɑ pɑt tɑkpel nɑ e, k l pɑtmin nɑ sɑɑ ŋɑnm pukn. Nnɑ e mun k suɑ kɑn jii dɑpɑɑnin k liɑk dɑlenkpel ni. L i tie k u tien nnɑ i e, k dɑpɑɑnin nɑ tɑn mɔ yuo nbɑ l sɑɑ yiel dɑlenkpel nɑ e, k dɑɑn mɑnŋ n muɑn yɑnn k *linlenn nɑ n mun yiel. L pɑɑk b tuu jikt dɑpɑɑnin k liɑkt linlenpɑɑnn ni e.» Tɔn, Suifnbɑ fuondɑsiɑl, k Yiesu nɑn u puolpoweitieb din gɑɑl dii kpɑɑnt ni. Bɑɑ din sɑɑ mɑnŋ k u puolpoweitieb nɑ toktl dikɑlɑ k pini k ŋmɑn ŋɑɑn sɑɑ. Ŋɑnn e k Fɑɑliisiɑnnbɑ nɑ boi’ɔ ɑ: «Gotl, bee k b tuun lin nbɑ k t *senni k cɑb ɑ bii tuun *Fuondɑɑl i?» K Yiesu yet’b ɑ: «I k mi lii Yennu lolkpel kɑdɑɑɔk ni Dɑɑfiid nbɑ din tun biɑnŋ nbɑ yuo nbɑ k kon din gbɑt ŋuɑ nɑn u juɑmu, k b din k mɔk jiet nɑ ɑɑ? U din kuɑ Yennu ŋɑɑk ni, k sɑɑ jii pɑɑnu nbɑ k b bil Yennu tuɑnn k ŋmɑn yuo nbɑ k Abiɑtɑ din tie mɑnntieb yudɑɑnɔ nɑ. K senni nɑ din k cɑb nɑn suɑ n di pɑɑnu mɑnŋ sie Yennu mɑnntieb kuukuɑ e. Ŋɑɑn Dɑɑfiid mɑnŋ din ŋmɑn e, k biɑ tul u juɑmu nɑ gbɑɑ k b mun ŋmɑn.» Ŋɑɑn k Yiesu ŋɑnm k yet’b ɑ: «Nisɑɑlk sonml pɑɑk e k Yennu senn Fuondɑɑl. L k tie Fuondɑɑl pɑɑk kɑɑ k u din nɑn niib. L pɑɑk Nisɑɑlk Bijɑ e tie Fuondɑɑl Yonmdɑɑnɔ biɑk.» Yiesu din biɑ kuɑ *Suifnbɑ jɑɑnti dieok ni, k jɑsuɑ din be lenŋ k u nuu kpo. K nisiɑb din be lenŋ k goli Yiesu, ɑ bin lɑɑn u sɑɑ te k niikpienn dɑɑnɔ mɑnŋ n pɑɑk *Fuondɑɑl, k bin tɑɑl’ɔ l po oo? Ŋɑnn e k Yiesu yiin niikpienn dɑɑnɔ nɑ ɑ: «Fiit k set niib nɑ sinsuuk ni,» ŋɑɑn boi niib nɑ ɑ: «T *senni cɑb ɑ tii tuun bonŋɑnn Fuondɑɑl ɑmi bonbiil i? A t fɑt nilɔ k lu ɑmi t kpi’u u?» Ŋɑɑn k b ji din ŋmin ɑ. K u got k lint’b nɑn wutuol, k mɑɑn u pɑl din biil bonciɑnn nɑn bɑɑ tie kɑngbɑtɑ nɑ pɑɑk, k u ŋmɑnt k yet juɑ mɑnŋ ɑ: «Tɑntl ɑ nuu mɑnŋ.» K u tɑnt u nuu mɑnŋ k l lɑ lɑɑfiɑ. L yuo nɑ k Fɑɑliisiɑnnbɑ din ŋmɑt nyii, k ŋɑnm nɑn kpɑnbɑl *Heluod puolpo juɑmu din lol suol nɑn lieb bɑɑ sɑɑ tien biɑnŋ nbɑ k kpi Yiesu. K Yiesu nɑn u *puolpoweitieb din fiil k sik mɔkgbenŋl nɑ kpinŋ, k nibulciɑɔnŋ din wɑɑ u puolpo, bin nbɑ din nyii Gɑɑliile nɑn Suude nɑn Selusɑɑlenm nɑn Idume nɑn *Suulden mɔk-puotl, nɑn Tiil nɑn Siidɔn tingbounŋ ni, k b yɑb bonciɑnn k tikl u buol. Bɑɑ din gbɑt wɑɑ din tuun lin nbɑ nɑ pɑɑk, k b din bɑɑl u buol ni. K u yet u puolpoweitieb ɑ bin lɑ bulgbetl tul’ɔ, ɑ k nibul nɑ tɑn dɑɑ tut’ɔ, k mɑɑn wɑɑ din te k bɑɑtb bonciɑnn pɑɑk nɑ pɑɑk e din te k bin nbɑ kul yiɑl ji din nɑki ɑ bin sii’u. Nɑlnbiit nbɑ din tuu lɑ’u yuo nbɑ kul ɑ b din tuu bɑɑ u tuɑnn e k fɑɑ wuyikinŋ k yien ɑ: «Fin e tie Yennu Bijɑ.» K u din kpɑɑn’m nɑn ninmɔnn ɑ b dɑɑ muɑntl wɑɑ tie wun nbɑ. L puolpo k Yiesu duo juɑl pɑɑk ŋɑɑn yiin bin nbɑ k u luon bin bɑɑl nɑ, k b bɑɑl u buol ni. K u gɑnn niib piik nɑn bɑnle, k yi’b tuomiinbɑ, ɑ bii be u buol ni, ɑ wuu tuun’m k bii muɑntl u lɑbɑmɑnn, kii biɑ kii mɔk yiikuo kii fit kii nyint nɑlnbiit niib ni. Wɑɑ din gɑnn niib nbɑ piik nɑn bɑnle nɑ, b sɑnɑ e nɑ: Siimɔn, wun nbɑ k Yiesu din pul’ɔ Piɑl nɑ, nɑn Sɑɑk nɑn u nɑɑ bik Sɑn, bin nbɑ din tie Sebede wɑɑs nɑ, bin nbɑ k Yiesu din pul’b Boɑneljes, k l pɑɑk tie sɑtiɑni wɑɑs, nɑn Andle nɑn Fiiliip, nɑn Bɑɑltelemi, nɑn Mɑɑtieo, nɑn Tuomɑ, nɑn Sɑɑk wun nbɑ din tie Alfe bik, nɑn Tɑɑde, nɑn Siimɔn wun nbɑ din luon ŋɑnm *Suifnbɑ i yenn b mɔnŋ, nɑn Suudɑ wun nbɑ din tɑn nyii Yiesu puol nɑ. L puolpo k Yiesu kun, k nibulciɑɔnŋ din tikl ŋuɑ nɑn u puolpoweitieb buol ni, k b tɑn kɔnŋ yɑɑk nɑn jiet dinu. U ŋɑɑtieb nbɑ din gbɑt nnɑ, k b bɑɑl ɑ bin suol’ɔ, k mɑɑn b din yien ɑ u wɑɑt e. K Yennu *senniwɑntieb nbɑ din nyii Selusɑɑlenm nɑ mun din yet ɑ: «Nɑlnbiit bɑt Beelsebuul nɑ e be u ni, k u nyint nɑlnbiit niib ni, ŋuɑ Beelsebuul yiikuo ni.» K Yiesu din yiin wɑntieb mɑnŋ ɑ bii bɑɑt nɑ, ŋɑɑn yin’m bɑljokt k boi’b ɑ: « *Sɑɑtɑn sɑɑ sɑk nyinn u mɔnŋ ii? Nɑɑn niib i ŋmɑt k kɔn tuokt b lieb, b nɑɑn mɑnŋ kɑn fit set. K ŋɑɑk niib i ŋmɑt kɔn nɑn lieb, b ŋɑɑk mɑnŋ kɑn fit set. K Sɑɑtɑn i ŋmɑt kɔn nɑn u mɔnŋ, u kɑn fit set, u juontu telk e nɑ. «Suɑ kɑn fit kuɑ pɑnŋ dɑɑnɔ ŋɑɑk ni k sɑɑ jɑn u mɔktuk, sie k u dɔnŋ k lol’ɔ ŋɑɑn yen ji fit k jɑn u mɔktuk mɑnŋ.» K Yiesu ŋɑnm yet’b ɑ: «Bɑlmɔni e k n yien’i nɑ, Yennu sɑɑ nyik cɑb nifosɑɑli b biit nɑn b bɑlbiit kul ɑ, ŋɑɑn wun nbɑ kul suki Foŋɑnm, Yennu kɑn mi k nyik cɑb l dɑɑnɔ fɑb ɑ nɑn yuo nbɑ kɑɑ gbennu.» Yiesu din pɑk nnɑ mɑnŋ, k mɑɑn bɑɑ din yet ɑ: «Nɑlnbiiuk be u ni nɑ.» L yuo nɑ k Yiesu nɑɑ nɑn u ninjɑnm din bɑɑl k sie nɑn-yel po, ŋɑɑn tun suɑ ɑ wun yiin’ɔ nɑ. K nibulciɑɔnŋ din kɑl k lint’ɔ wɑɑ, k u be sinsuuk ni, k b yet’ɔ ɑ: «Gɑfɑlɑ, ɑ nɑɑ nɑn ɑ ninjɑnm [nɑn ɑ niipuob] be nɑn-yel po k luon’ɑ.» K Yiesu boi’b ɑ: «Ŋmee dɑɑ tie n nɑɑ, k lɑnm e mun tie n ninjɑnm i?» ŋɑɑn got bin nbɑ kɑl k lint’ɔ nɑ k yet ɑ: «N nɑɑ nɑn n ninjɑnm e be nnɑ nɑ. Wun nbɑ kul tuun Yennu lonm, ŋuɑ e tie n ninjɑ nɑn n niipuo nɑn n nɑɑ.» Yiesu yɑɑn din piin k tumi niib Gɑɑliile mɔkgbenŋl kpinŋ, k nibulciɑɔnŋ bɑɑl u buol ni. Wɑɑ din lɑ k nigbɑnu nɑ yɑbt nɑ, k u kuɑ bulgbetsiɑl ni, k sik nyun ni, ŋɑɑn k niib nɑ biɑl k sie gbingbɑnn U din yiin’m bɑljokt k wɑnt’b mɑɑn bonciɑnn. U din yin ɑ: «Gbiintl mɑn, jɑsuɑ din duo u kpɑɑb ɑ wun sɑɑ bul tɑn. Wɑɑ din buul nɑ, k bonbuoli nɑ yenn-nbɑ yɑt k bɑɑ sɑnjouk pɑɑk k nuɑni wei k tɔkl. K liel mun din bɑɑ tɑnpuut pɑɑk siɑn nbɑ k tɑnt k yɑb. Tɑnt nbɑ k yɑb nɑ, k l piɑ k kpɑɑt yiɑn ɑ, ŋɑɑn yennu nbɑ tɑn tonŋ yuo nbɑ, k l juɑk. Lɑɑ din k fit sikn jiinɑ nɑ pɑɑk, l kul din kpo e. K liel mun din bɑɑ kunkoni ni, k tɑn lɑkn piɑ k kpɑɑt nɑn’m, ŋɑɑn k kunkoni ŋmɑbl’l k l k fit nɑn. Ŋɑɑn k liel mun din bɑɑ tinŋɑnŋ ni k piɑ, k kpɑɑt fɑnu, k nɑn nɑɑnŋɑɔnŋ, k yenn-nbɑ nɑn dibin piintɑtɑ, k lielnbɑ mun nɑn piinluobluob, k siɑb mun nɑn kobk kobk.» Yiesu yet ɑ: «Wun nbɑ mɔk tubɑ k sɑɑ gbɑt, wun gbiint» L puolpo e k nisiɑb nbɑ din be Yiesu penŋ, nɑn u tuomiinbɑ *piik nɑn bɑnle nɑ, tɑn boi’ɔ bɑljokt nɑ pɑɑk. K u yet’b ɑ: «Yinm ŋɑnin, Yennu fiit wuol ni mɑɑn k jii jiin u nɑɑn po k wɑnn’i wɑɑ, ŋɑɑn bin nbɑ k be i ni nɑ ŋɑnin gbiɑ bonsiɑl kul ɑ nɑn bɑljokt e ɑ: ‹Bin got ŋɑɑn dɑɑ lɑɑt k biɑ gbiint ŋɑɑn dɑɑ bɑnt l pɑɑk, k mɑɑn b i lɑ k bɑnn b sɑɑ jen k bɑɑl Yennu buol ni k wun nyik cɑb b biit ɑ.› » Ŋɑnn e k Yiesu boi niib nɑn u tuomiinbɑ piik nɑn bɑnle nɑ: «I k bɑnn bɑljouk nɑ pɑɑk ii? K nlee k i sɑɑ mi bɑnn bɑljokt kul ɑ pɑɑk i? Tɑnbultuɑ buul Yennu mɑɑn nɑ e. K nisiɑb nɑɑn nɑn sɑnjouk nbɑ k Yennu mɑɑn bɑɑ l pɑɑk nɑ e, k yuo nbɑ k b gbɑt mɑɑn mɑnŋ, *Sɑɑtɑn tuu bɑɑl e k nyinn’l b pɑlɑ ni yiɑn ɑ. Nisiɑb mun gɑɑl bonbuoli tɑnpuut pɑɑk e. B tie bin nbɑ gɑɑl Yennu mɑɑn nɑn pɑlpienn yiɑn ɑ, ŋɑɑn mɑɑn mɑnŋ k mɔk jiinɑ b ni k b k diɑ’l k l wei. Yuo nbɑ k niib dint’b fɑlɑ, ɑmi muksuk tɑn bɑɑl’b mɑɑn mɑnŋ pɑɑk, b tuu lu e yiɑn ɑ. Lieb mun gɑɑl bonbuoli mɑnŋ kunkoni sinsuuk ni. B gbiɑ mɑɑn mɑnŋ, ŋɑɑn tingbounŋ nɑ fɑlɑ, nɑn mɔktuk lonm, nɑn niɑnbuolu buolu tuu kuɑ k nyɑkn mɑɑn mɑnŋ k l kɑn nɑn. Lieb mun gɑɑl bonbuoli tinŋɑnŋ ni. Ŋɑnm e tie bin nbɑ gbiɑ mɑɑn mɑnŋ k gɑɑn. Siɑb nɑɑn fuunu piintɑtɑ, k siɑb nɑɑn fuunu piinluobluob, k siɑb mun biɑ nɑɑn fuunu kobk kobk.» Yiesu biɑ din boi’b ɑ: «Suɑ mi k kuɑ ŋɑɑk ni nɑn fitl k cibn bokt l pɑɑk, ɑmi k gul’l gɑdo lɔunŋ ni ii? Aɑi. Sie k u jii’l k tuɑnn bonsiɑl nbɑ fɔk nɑ pɑɑk. Mɑɑn nbɑ kul wuo, sie k l tɑn wuot nyii pɑɑnu ni, k lin nbɑ kul mun be bunbɔnn ni tɑn sɑɑ nyi yentu ni. Suɑ i mɔk tubɑ k sɑɑ gbɑt, wun gbiint.» «Gotl mɑn, ŋɑɑn kii mi yɑɑ gbiintl lin nbɑ. Yɑɑ gɑɑl Yennu piini k tuun nɑn’n biɑnŋ nbɑ, Yennu tɑn sɑɑ pɑ’i l biɑnŋ k biɑ pukn’i siɑl l pɑɑk. K mɑɑn wun nbɑ mɔk, b biɑ sɑɑ pukn’ɔ, ŋɑɑn wun nbɑ k mɔk nɑ, b biɑ sɑɑ gɑɑl lin nbɑ k u yɑɑ ɑ u mɔk wɑɑn nɑ.» K Yiesu biɑ ŋɑnm yet ɑ: «Yennu nɑɑn nɑɑn nnɑ e: l tie nɑn nilɔ nbɑ tuu bul tɑn u kpɑɑb ni. Wuu lek i guɑnt nyiɑɔk kuo u fiil yennu ni, bonbuoli nɑ tuu pɑ k kpɑɑtl, ŋɑɑn k u k mi lɑɑ tuun biɑnŋ nbɑ k pɑ k kpɑɑtl. Tinŋ nɑ e tuu te k bonbuoli mɑnŋ n pɑ k kpɑɑtl k biɑ nɑɑn. L tuu put kpɑnn e sinsinn, l puolpo k fɑɑt n nyi, k dipukɑ n nyi k wei. Dii mɑnŋ i biel yuo nbɑ, kpɑɑlɔ nɑ ji sɑɑ piin jɑnu e nɑn u dijɑɑnjuk, k mɑɑn jɑɑmu yuo ji bɑɑl e nɑ.» Lin nbɑ nɑ puolpo k Yiesu boi’b ɑ: «T dɑɑ sɑɑ bikn Yennu nɑɑn nɑn lɑnn po e? T sɑɑ yin bɑljolɑnn e k wɑnn lɑɑ tie bɑnnu nbɑ? L tie nɑn kpint tiik nbɑ k b yi’l *muutɑɑld nɑ e. B i jii k bul tinŋ ni, k l wɑɑl k gɑl tingbounŋ nɑ bonbuoli kul ɑ, ŋɑɑn l i tɑn piɑ k kpɑɑt l ji tuu yɑb kpint tiini kul ɑ, k mɔk yiingbenŋɑ, k nuɑni ji tuu tɑn tiɑ tiɑt l yiini nɑ pɑɑk.» Yiesu din yiin bɑljokt bonciɑnn nɑn nɑ nɑ e, k nyint Yennu mɑɑn k tien niib nɑn bɑɑ sɑɑ fit bɑnn biɑnŋ nbɑ. U k mi k pɑk nɑn’m mɑɑn sie bɑljokt kuukuɑ. Ŋɑɑn u din tuu tɑn ŋɑnm wɑnn u *puolpoweitieb bɑljokt mɑnŋ kul pɑɑk yuo nbɑ k b tɑn biɑl be b kuukuɑ e. L dɑɑl mɑnŋ dɑɑjuouk k Yiesu yet u puolpoweitieb k yɑɑ ɑ: «Ŋɑɑnt mɑn k tin puot mɔkgbenŋl nɑ puotl mɑn » L yuo e k b nyik nibul nɑ, k kuɑ wɑɑ kɑl bulgbetl nbɑ ni nɑ, k ŋɑnm nɑn ŋuɑ lɑkn sɑɑn, k bulgbetliɑ biɑ din be nɑn’ɔ. Bɑɑ be bulgbetl mɑnŋ ni k suɑ wonpɑɑluk fikt, k nyunpɑnɑ piin liɑt kuɑ bulgbetl mɑnŋ ni, k l tɑn yɑɑ lin gbie. L yuo Yiesu din duɑ bulgbetl mɑnŋ puolpo k kpɑɑk yukpɑktl pɑɑk k guɑnt. Ŋɑnn e k u puolpoweitieb fiin’ɔ k yɑɑ ɑ: «Cɑnbɑɑ, tɑɑ yɑɑ t kpo nɑ, ɑ bɑkɑ kɑɑ t po oo?» K u fiil set k tiɑn wonpɑɑluk nɑ pɑɑk k biɑ yet nyunpɑnɑ nɑ mun ɑ: «Duɑt suon nnɑ.» K wonpɑɑluk mɑnŋ gbenn, k nyun nɑ mun ji duɑ k muu dik dik. Ŋɑnn e k u boi u puolpoweitieb mɑnŋ ɑ: «Bee k i mɔk gbɑnɑnjeknt i? I biɑ dɑɑ k mɔk yɑdɑ ɑɑ?» K jɑŋmɑɑni din suol’b bonciɑnn, k b boi b lieb ɑ: «Jɑbuol bee e nɑ? K wounŋ nɑn nyunpɑnɑ wɑɑ sɑɑk u mɔb i?» L puolpo Yiesu nɑn u *puolpoweitieb din puot Gɑɑliile mɔkgbenŋl nɑ gbingbɑnliel po, Gelɑsetieb tinŋ ni. Yiesu nbɑ nyii bulgbetl nɑ ni yuo nbɑ, l tɑɑkpɑɑk ni k jɑsuɑ nyii kɑɑt ni k cet’ɔ. Nɑlnbiiuk din be juɑ nɑ ni, k u duɑ kɑɑt nɑ ni. Suɑ ji din kɑɑ k sɑɑ fit bɑɑn’ɔ bɑnt, k biɑ kɑn fit lol’ɔ nɑn jɑluk gbɑɑ, k mɑɑn b i bɑɑn u nii nɑn u tɑɑ bɑnt, ŋɑɑn u din tuu yɑn bɑnt nɑ kul ɑ k biɑ ciel kut nɑ u tɑɑ ni. Suɑ din k mɔk pɑnŋ nbɑ sɑɑ fit diɑ’u. Nyiɑɔk nɑn yennu ni kul k u lin kɑɑt nɑn juɑt ni k yikn ŋɑɑn diɑ tɑnɑ k ŋmɑ u mɔnŋ. Wɑɑ din dɑɑ be bɑnfɔkl ɑ ŋɑɑn lɑ Yiesu yuo nbɑ, k u tin k tɑn gbɑɑn Yiesu tuɑnn ni, ŋɑɑn yikn sɑnpɑɑpo wɑɑ k yet ɑ: «Yiesu fin nbɑ tie Yɑbnt Yennu Bijɑ, min nɑn fin nlee mɑntk i? Yennu pɑɑk k n bɑln’mɑ, ɑ dɑɑ muksl’n.» U yet nnɑ e, k mɑɑn Yiesu ponŋ yɑki nɑn nɑlnbiiuk nɑ ɑ: «Fin nɑlnbiiuk nɑ, nyin juɑ nɑ ni.» L puolpo k Yiesu boi’ɔ ɑ: «A sɑnn ii?» K u jiin ɑ: «N sɑnn yi Bul e, k mɑɑn t yɑb bonciɑnn.» K u bɑln’mɔ ɑ u dɑɑ nyint’b tinŋ nɑ ni. L yuo mɑnŋ k duoli bonciɑnn din k fɔk nɑn juɑl k di jiet. K nɑlnbiit nɑ bɑln Yiesu ɑ: «Cɑb’t k tin sɑɑn kuɑ duoli nɑ ni.» K Yiesu cɑb’b sɔnu, k b nyii juɑ nɑ ni, k kuɑ duoli nɑ ni. K duoli nɑ nyii juɑl nɑ pɑɑk k tin sik mɔkgbenŋl nɑ ni k sɑɑ dii nyun b kul ɑ. Duoli nɑ kɑnn din tie nɑn tusɑ ŋɑnle nɑ e. K bin nbɑ guu duoli nɑ fiil k ciɑl k sɑɑ muɑnt l lɑbɑɑl duo ni nɑn kpɑɑnt ni. K niib bɑɑl ɑ bin lɑ lin nbɑ tun mɑnŋ kul ɑ. Bɑɑ bɑɑl Yiesu buol ni yuo nbɑ k lɑ juɑ nbɑ k nɑlnbul bo be u ni nɑ, k u ji kɑl lenŋ nɑn lɑɑfiɑ nɑn u dudukt kul ɑ fɑnu k ji liɑ tiɑt, k jɑŋmɑɑni suol’b. K bin nbɑ lɑ’l nɑn b nuni nɑ yet’b lin nbɑ tun k tul juɑ nbɑ k nɑlnbiit din be u ni nɑ, k biɑ yet’b duoli nɑ lɑbɑɑl. Ŋɑnn e k niib nɑ din piin k bɑln Yiesu ɑ wun nyi b tinŋ ni. Yiesu nbɑ din tie siil ɑ wun kuɑ bulgbetl nɑ yuo nbɑ, k juɑ nbɑ k Yiesu nyinn nɑlnbiit u ni nɑ bɑln’mɔ ɑ: «Ŋɑɑnt k min nɑn fin n lɑkn sɑɑn » Ŋɑɑn k Yiesu k sɑk, ŋɑɑn yet’ɔ ɑ: «Ii ŋmɑt kii kun ɑ ŋɑɑk ni ɑ niib buol k sɑɑ wɑnn’b Yonmdɑɑnɔ nbɑ tin’ɑ ninbɑɑɔk k tun lin nbɑ k tul’ɑ.» Ŋɑnn e k juɑ nɑ ji lin tingbounŋ nbɑ k b yil Doi-piik nɑ ni, k muɑntl lin nbɑ kul k Yiesu tun tul’ɔ mɑnŋ, k l tien suɑ kul yɑɑl-lituk. L puolpo k Yiesu biɑ ŋmɑt puot mɔkgbenŋl nɑ gbingbɑnliel. Wɑɑ sɑɑ bɑɑl mɔkgbenŋl gbingbɑnn pɑɑk nɑ, k nibulciɑɔnŋ tikl k lint’ɔ. K jɑsuɑ bɑɑl lenŋ, k u sɑnn yi Sɑilus. U din tie *Suifnbɑ jɑɑnti dieok ni sɑɑkɑsuɑ e. Juɑ nɑ nbɑ lɑ Yiesu yuo nbɑ k u gbɑɑn Yiesu tuɑnn ni, k bɑln’mɔ nɑn u pɑl kul ɑ ɑ: «N bonpobik e yiɑl k pel kuun ɑ. N bɑln’mɑ e. Bɑɑt k tɑn yii ɑ nii u pɑɑk k wun lek lɑ lɑɑfiɑ k biɑl u mɑnfuol ni.» Ŋɑnn e Yiesu ji ciɑn’ɔ. K nibulciɑɔnŋ mun biɑ wɑɑ k muk k tut Yiesu Puosuɑ nnɑ mun din be k siik fɑbounŋ k tɑn jɑnŋ binɑ piik nɑn ŋɑnle. U din lɑ fɑlɑ bonciɑnn wɑɑ tuu lin tebtieb bonciɑnn buol ni ɑ wun teb u mɔnŋ, k tɑn gbenn u likli, ŋɑɑn k yiɑlu nɑ biɑ puki yuo kul. Wɑɑ din tɑn gbɑt Yiesu po nɑ, k u bɑɑl nibul nɑ ni, k wei u puolpo k sii u liɑtfuouk, k mɑɑn u din duki u pɑl ni ɑ: «Mi i lek i sɑt sii u liɑtfuouk kuukuɑ i e, ŋɑɑn n sɑɑ lɑ lɑɑfiɑ wɑɑ.» L tɑɑkpɑɑk ni k u fɑbounŋ nɑ ji din jit, k u bɑnn nɑn u lɑ lɑɑfiɑ wɑɑ. L tɑɑkpɑɑk ni k Yiesu bɑnn nɑn pɑnŋ nyii u ni wɑɑ. K u gbiɑ boi niib nɑ ɑ: «Ŋmee sii n liɑtfuouk u?» K u puolpoweitieb mun ŋmɑnt boi’ɔ ɑ: «Fin lɑ k nibulciɑɔnŋ nɑ muk’ɑ nnɑ, ŋɑɑn k ɑ boi ɑ ŋmee siit’ɑ ni i?» Ŋɑɑn k u lek biɑ goli lintl, ɑ wun lɑ nisuɑ nbɑ e sii’u. Ŋɑɑn puo nɑ nbɑ bɑnn lin nbɑ tun u gbɑnɑnt ni nɑ pɑɑk, k jɑŋmɑɑni suol’ɔ, k u jekl yɔl yɔl, k bɑɑl tɑn gbɑɑn Yiesu tuɑnn ni, ŋɑɑn yet’ɔ bɑlmɔni kul. Ŋɑnn e k Yiesu yet’ɔ ɑ: «N bipuo, fɑɑ tien’n yɑdɑ nɑ pɑɑk e te k ɑ lɑ lɑɑfiɑ. Ii sɑɑ nɑn mɑnu k ɑ yiɑlu kul gbenn ɑ.» Yiesu nbɑ dɑɑ be piɑk lin nbɑ nɑ k siɑb nyii Suifnbɑ jɑɑnti dieok sɑɑkuɑ nɑ ŋɑɑk ni k bɑɑl k tɑn yet’ɔ ɑ: «A bonpobik nɑ tɑɑn kpo wɑɑ. Bee k ɑ ji muks Wɑntuɑ nɑ?» K Yiesu lek k fiin bɑɑ yet lin nbɑ nɑ, ŋɑɑn yet sɑɑkuɑ nɑ ɑ: «Dɑɑ tiin jɑŋmɑɑni. Tient’n yɑdɑ kuukuɑ.» Yiesu din k sɑk k suɑ n ciɑn’ɔ, sie Piɑl nɑn Sɑɑk nɑn u ninjɑ Sɑn. Bɑɑ din bɑɑl ŋɑɑk nɑ ni yuo nbɑ k Yiesu gbɑt fuut nɑn kumɔni. Ŋɑnn e k u kuɑ k boi’b ɑ: «Bee fuut e nnɑ mɑn i? Bee k i bui? Bik nɑ k kpo kɑɑ, ŋɑɑn u guɑnt e.» Bɑɑ gbɑt u mɑɑn nɑ k b lɑɑ’u. Ŋɑnn e k u bel’b nyinn’b, ŋɑɑn jii bik nɑ bɑɑ nɑn u nɑɑ k pukn bin nbɑ ciɑn’ɔ nɑ po, k b kuɑ siɑn nbɑ k bik nɑ duɑ. Bɑɑ kuɑ yuo nbɑ, k u suol bik nɑ nuu ŋɑɑn yet’ɔ ɑ: «Tɑɑliitɑ kuunm.» (L pɑɑk tie: «Bonpobik, mi i yet’ɑ, fiit.») L tɑɑkpɑɑk ni k bonpobik nɑ fiil set kɑkbi, k sonm lin, (U din tie binɑ piik nɑn ŋɑnle bik e.). K l yɑɑl ŋɑɑn lit’b bonciɑnn. Ŋɑɑn k Yiesu kpɑɑn’m, ɑ bii mi k bin yet suɑ, k biɑ yet’b ɑ bin tul bik nɑ jiet k wun di. L puolpo e k Yiesu nyii lenŋ k ŋmɑt kun u mɔnŋ duo ni, k u *puolpoweitieb din wɑɑ’u. K *Fuondɑɑl k u tɑn kuɑ *Suifnbɑ jɑɑnti dieok ni k wɑnt niib Yennu mɑɑn k l tien nibul nɑ kul yɑɑl-lituk, k b boi b lieb ɑ: «U lɑ dudukt nɑ lee? Yɑnbuol-lɑnn po e k u mɔk mɑn i? K nlee k u tuun bɑktnɔunŋ tuonjɑɑnɑ nɑ? Kɑnpintɑ nɑ kɑɑ nɑ ɑɑ? Mɑɑli bijɑ nɑ kɑɑ ɑɑ? Ŋuɑ kɑɑ tie Sɑɑk nɑn Suosiɑf nɑn Suudɑ nɑn Siimɔn ninjɑ nɑ ɑɑ? U niipuob kɑɑ be nnɑ nɑ ɑɑ?» L pɑɑk e te k b ji k tien’ɔ yɑdɑ. Ŋɑnn e k u yet’b ɑ: « *Yennu sɔkni k kɔnŋt nibɑɑkl sie u mɔnŋ mɔnŋ duo ni nɑn u tiɑɔnŋ niib buol ni, nɑn u mɔnŋ mɔnŋ ŋɑɑk ni.» U din k fit tun bɑktnɔunŋ tuonjɑɑnɑ lenŋ, sie bɑɑtb bɑnŋɑ nnɑ e k u din yii u nii b pɑɑk, k b lɑ lɑɑfiɑ. U niib nɑ nbɑ din k tien’ɔ yɑdɑ nɑ pɑɑk, k l yɑɑl ŋɑɑn lit’ɔ bonciɑnn. L puolpo e k Yiesu lin digbɑnbis ni k tumi niib, k din tɑn lɑkn u tuomiinbɑ piik nɑn bɑnle k tul’b pɑnŋ ɑ bii nyint nɑlnbiit niib ni, k yɑɑ wun tun’m bɑnlele, k u yet’b ɑ: «I dɑɑ jikt siɑl k sɑɑ, sie pɑtdiɑkɑi kuukuɑ. I dɑɑ diɑ pɑɑnu, i biɑ dɑɑ diɑ sunsonmpɑkɑ, i biɑ dɑɑ wuu likli i jɑfɑɑnbɑ ni. I pil tɑɑsɑɑt, ŋɑɑn suɑ dɑɑ jikt liɑtfuouk k puki ŋɑnle.» K u biɑ yet’b ɑ: «L i tie k i bɑɑl ŋɑɑk nbɑ ni, k b gɑɑl’i, yii be lenŋ nɑn dɑɑl nbɑ k i tɑn sɑɑ nyi duo nɑ ni. L i tie k i bɑɑl duo nbɑ ni, k niib nɑ k gɑɑl’i, k biɑ k gbiintl i mɑɑn, yin nyi duo mɑnŋ ni, k pit i tɑɑpɑnt ni tɑnt bil l duo ni, k lin wɑnn nɑn bin suol b mɔnŋ.» K u puolpoweitieb fiil sɑɑn muɑntl k yien niib ɑ bin mɔ kuɑŋɑɑn k lebt binbenŋ, k biɑ nyint nɑlnbiit niib bonciɑnn ni, k biɑ jikt kpɑn k sɔ bɑɑtb bonciɑnn pɑɑk k b pɑɑkt. Tɔn, kpɑnbɑl *Heluod din gbɑt Yiesu lɑbɑɑl k mɑɑn u sɑnn din duo bonciɑnn, k nisiɑb yien ɑ: «Sɑn wun nbɑ dɑɑn wuul niib Yennu nyunwulu nɑ fiil kuun ni. Ŋɑnn e te k u mɔk yiikuo k fit tuun bɑktnɔunŋ tuonɑ nɑ.» K siɑb mun yɑɑ ɑ: «U tie Yennu sɔkni Elii e,» k lieb mun biɑ yɑɑ ɑ: «U tie Yennu sɔkni nɑn yɑɑyuo ni sɔkniinbɑ nbɑ yenɔ nɑ e.» Kpɑnbɑl Heluod ŋɑnin nbɑ gbɑt yuo nbɑ nɑ, k u yet ɑ: «U tie Sɑn wun nbɑ k n dɑɑn te k b pot u yul nɑ e, ŋɑɑn k u jen be u mɑnfuol ni.» Heluod tiɑɔnŋ o din te k b suol Sɑn k bɑɑn’ɔ bɑnt k kuɑn’ɔ dɑnsɑlk. Heluod mɑnŋ din tun nnɑ k mɑɑn wɑɑ din fɑt u ninjɑ Fiiliip ŋɑɑpuo Heluodiɑd k kuɑn’ɔ nɑ pɑɑk. K Sɑn din tuu yien Heluod ɑ Yennu *senni k cɑb’ɔ nɑn wun fɑt u ninjɑ ŋɑɑpuo k kuɑn. Lin nbɑ nɑ pɑɑk Heluodiɑd ji din nɑn Sɑn, k luon wun kpi’u, ŋɑɑn k k fit, k mɑɑn Heluod din tiin Sɑn, k biɑ diɑ’u fɑnu k mɑɑn u mi nɑn Sɑn tie niŋɑnɔ k tiin Yennu. Yuo nbɑ k Heluod din gbiintl Sɑn mɑɑn nɑ, fei tuu mɔk’ɔ k l ŋmɑt u yɑn, ŋɑɑn k u lek luon mɑɑn mɑnŋ gbiintu. L puolpo siɑl din tɑn tien k luot sɔnu tul Heluodiɑd. Heluod mɑɑlu jɑɑnm dɑɑl tɑn bɑɑl, k u yiin u nɑɑn kpɑɑkɑ, nɑn sejenm yudɑnm, nɑn Gɑɑliile tinŋ ni sɑɑkɑb kul. Ŋɑnn e k Heluodiɑd sɑpɑɑnbik bɑɑl k wɑɑ siɑk, k kpɑnbɑl Heluod nɑn u sɑɑnm pɑlɑ penn, k u yet sɑpɑɑnbik mɑnŋ ɑ: «Boi’n lin nbɑ kul k ɑ luon po, k n sɑɑ tul’ɑ.» K Heluod pol ɑ: «N sɑɑ tul’ɑ lin nbɑ kul k ɑ luon, hɑli l i lek i bɑɑl k n tul’ɑ n yent ni bɔkl gbɑɑ.» Ŋɑnn e k sɑpɑɑnbik nɑ nyii, k sɑɑ boi u nɑɑ ɑ: «N tɑɑn sɑɑ yet’ɔ ɑ n luon bee nɑ?» K u nɑɑ jiin ɑ: «Yetl’ɔ ɑ ɑ luon Sɑn wun nbɑ wuul niib Yennu nyunwulu nɑ yul e.» L yuo nɑ k bonpobik nɑ ŋmɑt yiɑn ɑ k sɑɑn kpɑnbɑl Heluod buol ni k yet’ɔ ɑ: «N luon Sɑn wun nbɑ wuul niib Yennu nyunwulu nɑ yul e k ɑ kpien tɑtlɑɑɔk ni k tul’n mɔtɑɑmɔtɑɑnɑ.» K lin nbɑ nɑ tul kpɑnbɑl Heluod pɑlbiil bonciɑnn, ŋɑɑn u ji din k luon wun yet bik mɑnŋ nbɑ luon lin nbɑ nɑ, k mɑɑn wɑɑ pol lin nbɑ sɑɑnm mɑnŋ buol ni nɑ pɑɑk. Ŋɑnn e k u tun yupot-tuɑ l tɑɑkpɑɑk ni, k yet’ɔ ɑ wun jen nɑn Sɑn yul tul’ɔ. K yupot-tuɑ nɑ sɑɑn dɑnsɑlk ni k sɑɑ pot Sɑn yul, k kpien tɑtlɑɑɔk ni, k jen nɑn’n k tɑn tul bonpobik mɑnŋ, k u mun jii’l k tul u nɑɑ. Sɑn puolpoweitieb nbɑ gbɑt nnɑ yuo nbɑ nɑ, k b bɑɑl k tɑn jii u gbɑnɑnt k pii. L puolpo e k Yiesu tuomiinbɑ mɑnŋ ŋmɑt jen u buol ni k tɑn yet’ɔ lin nbɑ kul k b tun k biɑ wɑnn niib. Nigbounŋ lek din tut, k siɑb bɑɑt k siɑb ŋmɑt, k Yiesu nɑn u puolpoweitieb kɔnŋ yɑɑk nɑn bin di jiet. L pɑɑk k u yet’b ɑ: «Ŋɑɑnt k t yɑɑt sɑɑn muuk ni t kuukuɑ, k foi wɑɑn.» Ŋɑnn e k b kuɑ bulgbetl ni k puot sɑɑn muuk ni, b kuukuɑ. Ŋɑɑn bɑɑ din sɑɑn yuo nbɑ k niib bonciɑnn lɑ’b k bɑnn’b, k nyii doi kul ni k tin k kokn mɔkgbenŋl kpinŋ k dɔnŋ cet’b. K Yiesu nbɑ tɑn nyii bulgbetl nɑ ni, k u lɑ k nigbɑnu nɑ ponŋ tikl k muk, k ninbɑɑɔk suol’ɔ bonciɑnn, k mɑɑn b nɑɑn nɑn pei nbɑ k mɔk pekpɑɑlk nɑ e. K u piin l yuo k wɑnt’b bonɑ bonciɑnn. K yuo din tɑn gɑl bonciɑnn k u puolpoweitieb tɑn bɑɑl u buol ni k yet’ɔ ɑ: «Yuo gɑl ɑ, k nnɑ nɑ mun tie muuk ni e. Nyikn niib mɑnŋ k bin sɑɑn duo ni nɑn digbɑnbis nbɑ kpiɑ nɑ ni k lɑ jiet k dɑɑ k di.» Ŋɑɑn k u mun jiin yet’b ɑ: «I mɔnŋ n tul’b jiet k bin di.» K b ŋmɑnt boi’ɔ: «A luon k t jii denienbɑ kobiinle (200) k sɑɑn dɑɑ pɑɑnu k tɑn tul’b ɑ bin di ii?» K u boi’b ɑ: «I mɔk pɑɑni ŋɑnŋɑ e? Ii sɑɑn got mɑn.» Bɑɑ sɑɑn got k bɑnn yuo nbɑ k b jen k tɑn yet’ɔ ɑ: «L tie pɑɑni ŋɑnŋmu e nɑn jɑni ŋɑnle.» L puolpo k Yiesu yet u puolpoweitieb ɑ bin te k nibul mɑnŋ n bɔkt kɑl mɔpɑɑɔnŋ pɑɑk wolɑ wolɑ nnɑ. K b bɔkt kobk kobk, nɑn piinŋmuŋmu, k kɑl pɑɑbu pɑɑbu. K u jii pɑɑni ŋɑnŋmu nɑ, nɑn jɑni ŋɑnle nɑ, ŋɑɑn yɑɑt got sɑnpɑɑpo, k tul Yennu niipuouk, ŋɑɑn ŋmit ŋmit pɑɑni nɑ k tul u puolpoweitieb ɑ bin tol niib mɑnŋ, k u biɑ ŋmit ŋmit jɑni ŋɑnle nɑ, k b tol suɑ kul ɑ. K suɑ kul dii gbuo k biɑ tenn. K u puolpoweitieb lɑkn pɑɑnbulɑ nɑn jɑni nbɑ tenn nɑ, k l gbie kpɑncubt piik nɑn ŋɑnle. Jɑb nbɑ din dii jiet mɑnŋ din tie tusɑ ŋɑnŋmu e (5 000). Lin nbɑ nɑ puolpo, l tɑɑkpɑɑk ni k Yiesu miɑ u puolpoweitieb k b kuɑ bulgbetl nɑ ni k gɑl u tuɑnn po k puot mɔk-puotliel po, k sɑɑn Betsɑidɑ, ŋɑɑn k ŋuɑ biɑl ɑ wun cɑb nibul mɑnŋ. Wɑɑ cɑb’b gbenn yuo nbɑ k u duo jɔsiɑl pɑɑk k mei Yennu. Nyiɑɔk nbɑ din tɑn bɑɑl yuo nbɑ, k bulgbetl nɑ dɑɑ be mɔkgbenŋl sinsuuk ni, ŋɑɑn k u mun tɑn dɑɑ be juɑl mɑnŋ pɑɑk u kuukuɑ, k tɑn lɑ k u puolpoweitieb gbɑɑ nɑn bulgbetl kɑnnu, k mɑɑn b din kɑn k tuokt wounŋ o. Ŋɑnn e k u din cet’b kojomuɑk sɑn-nyɑfɑɑl k sonm nyun pɑɑk k bɑɑl b buol ni k yɑɑ wun gɑl’b. Wɑɑ tɑn bɑɑl yuo nbɑ, k u tien nɑn u yɑɑ wun gɑl’b nɑ. K b lɑ k u sonm nyun pɑɑk k b mi ɑ l tie funfɔntuk o, k b yikn sɑnpɑɑpo wɑɑ, k mɑɑn b kul lɑ’u wɑɑ, k jɑŋmɑɑni suol’b bonciɑnn. L tɑɑkpɑɑk ni k u yet’b ɑ: «Cien i pɑlɑ mɑn. Min e. I dɑɑ tiin jɑŋmɑɑni mɑn.» Ŋɑnn e k u kuɑ k pukn’m bulgbetl mɑnŋ ni, k wounŋ nɑ ji ŋmin suon nnɑ. K l bɑkt’b bonciɑnn, k mɑɑn b dɑɑ din k bɑnn wɑɑ dɑɑn jii pɑɑnu nɑ k tun bɑktnɔunŋ tuonn biɑnŋ nbɑ nɑ pɑɑk. B dudukt dɑɑ din k fit suol’l fɑnu. Bɑɑ tɑn nyii mɔkgbenŋl nɑ ni k duo kunkonn pɑɑk Genesɑɑlet tinŋ nnɑ, k b lol b bulgbetl k senn. Bɑɑ nyi bulgbetl ni yuo nbɑ nɑ, k l tɑɑkpɑɑk ni k niib bɑnn Yiesu, k tiin sɑɑ tingbounŋ mɑnŋ lokɑ kul po k jikt b bɑɑtb liɑni pɑɑk k bɑɑt nɑn’m u buol ni, siɑn nbɑ kul k b din tuu gbɑt nɑn u be lenŋ. Wɑɑ tuu dɔkt doi nɑn digbɑnbis nbɑ kul ɑ ni, k niib bonciɑnn diɑ b bɑɑtb k bil’m dɑi ni, k bɑln’mɔ ɑ wun ŋɑɑn k bin lek sii u tiɑt mɔgbɑnɑ, k bin nbɑ siin nɑ kul tuu lɑ lɑɑfiɑ. Tɔn, k Fɑɑliisiɑnnbɑ nɑn *senniwɑntieb din tɑn nyii Selusɑɑlenm k bɑɑl Yiesu buol, k b lɑ k u *puolpoweitesiɑb jɑk jiet di, ŋɑɑn dɑɑ k nit b nii. (Fɑɑliisiɑnnbɑ nɑn *Suifnbɑ nilieb kul tuu k gbiɑ b di jiet sie k b nit b nii fɑnu nɑn b yejɑnm kɑɑl nbɑ din wɑnt biɑnŋ nbɑ nɑ. L i tie k b nyii dɑɑk ni, b tuu k di sie k b tɑn wul sinsinn. B biɑ din tuu diɑ kɑɑ bonciɑnn k pukn l po. B din tuu diɑ kɑɑl nbɑ senn nyun-nyuŋmɑni soklu nɑn b bobɑ soklu nɑn b dunduɑni wuulu po e.) K Fɑɑliisiɑnnbɑ nɑn senniwɑntieb mɑnŋ boi Yiesu ɑ: «Bee k ɑ puolpoweitieb nɑ k diɑ t yejɑnm kɑɑl, ŋɑɑn kpɑn gbiɑ b di jiet k k nit b nii?» K Yiesu jiin yet’b ɑ: « *Yennu sɔkni Esɑɑyi din pɑk i po fɑnu, ɑ Yennu yet ɑ: yinm kpinkpɑnni dɑnm nɑ, nɑn lɑɑ diɑn biɑnŋ nbɑ nɑ ɑ: ‹Niib nɑ tien’n nibɑɑkl b mɔi ni kuukuɑ e, ŋɑɑn b pɑlɑ set fɔk nɑn’n bonciɑnn. B jiɑntl’n yɑnn e, k mɑɑn b jii nisɑɑlk kɑɑ k wɑnn niib, k l nɑɑn nɑn min Yennu *senni nɑ.› » K Yiesu ŋɑnm yet ɑ: «I bɑkn Yennu senni e k bil siɑl po wɑɑ, ŋɑɑn sɑk nisɑɑli kɑɑl nbɑ wɑnt lin nbɑ nɑ. Yinm, i lek yet Yennu senni weiu ɑ yin diɑ i mɔnŋ mɔnŋ kɑɑl e, k mɑɑn Muois din senn k yet ɑ: ‹Suɑ kul n tien u bɑɑ nɑn u nɑɑ nibɑɑkl, k wun nbɑ sukl u bɑɑ ɑmi u nɑɑ, bin kpɑn kpi’u.› Ŋɑɑn yinm ŋɑnin yɑɑ ɑ nilɔ i yet u bɑɑ ɑmi u nɑɑ ɑ: ‹Mɑɑ bo sɑɑ tul’i sonml nbɑ nɑ tie Kolbɑnn k l wɑnt nɑn l tie Yennu yɑl e,› ɑ u ji mɔk yiikuo k kɑn sonm u bɑɑ ɑmi u nɑɑ. Kɑɑl nbɑ k i din gɑɑl nɑ te Yennu mɑɑn tie yɑnn. I biɑ tie bonsiɑ bonciɑnn k l nɑɑn nɑn lin nbɑ nɑ buolu.» Ŋɑnn e k Yiesu ŋɑnm din yiin nibulciɑɔnŋ nɑ u buol ni, k tɑn yet’b ɑ: «Yinm nbɑ kul be nnɑ nɑ, gbiintl mɑn k bɑnn mɑɑ yɑɑ n pɑk lin nbɑ nɑ pɑɑk. Bonsiɑl kɑɑ k sɑɑ kuɑ nisɑɑlk mɔb ni k fit tien’ɔ jɑknt u pɑl ni. Ŋɑɑn lin nbɑ nyi nisɑɑlk pɑl ni e fit tien’ɔ jɑknt. Wun nbɑ kul mɔk tubɑ, wun gbiint» Wɑɑ yet’b nnɑ gbenn yuo nbɑ k u nyik niib mɑnŋ, ŋɑɑn sɑɑn kuɑ ŋɑsiɑk nnɑ ni. K u puolpoweitieb boi’ɔ ɑ wun wɑnn’b mɑɑn mɑnŋ pɑɑk. Ŋɑnn e k u boi’b ɑ: «I mun biɑ lek dɑɑ tie yɑnkpienɑ ee? I k mi nɑn lin nbɑ kul kuɑ nisɑɑlk mɔb ni k tien’ɔ jɑknt ii? K mɑɑn l k kuɑ u pɑl ni kɑɑ, ŋɑɑn u puol ni e k l kuɑ, k biɑ kpɑntl bint k nyi.» Wɑɑ yet biɑnŋ nbɑ mɑnŋ wɑnt nɑn jiet kul ɑ k kuɑ. K u biɑ ŋɑnm yet pukn ɑ: «Lin nbɑ set nyi nisɑɑlk pɑl ni e tien’ɔ jɑknt, k mɑɑn u pɑl ni e k dudukbiit bɑɑt nɑn puoweiu nɑn jɑweiu, nɑn nɑn-yuk, nɑn nikpinu, nɑn boncuncontuonɑ, nɑn niɑnciɑɔnŋ nɑn biitbuolu buolu nɑn fɑɑk fɑɑlu, nɑn tuon-yɑnɑ, nɑn *funfunn, nɑn sɑnjɑɑɔnŋ, nɑn kɑlnbɑɑni, nɑn jɑt-tuonɑ. Lin nbɑ nɑ kul e nyi nilɔ pɑl ni k tien’ɔ jɑknt.» Lin nbɑ nɑ puolpo k Yiesu nyii lenŋ k sɑɑn Tiil bɔkl po, k kuɑ ŋɑsiɑk nnɑ ni, k k luon suɑ n bɑnn nɑn u be lenŋ, ŋɑɑn u din kɑn fit bɔl u mɔnŋ. K puosuɑ nbɑ k nɑlnbiiuk din be u bonpobik ni nɑ gbɑt u po, k u bɑɑl u buol ni k tɑn gbɑɑn u tuɑnn ni. Puo mɑnŋ din tie Glek nilɔ e. B din mɑl’ɔ Feniisi tinŋ ni e, Siili tingbounŋ ni. K puo nɑ bɑln Yiesu ɑ wun nyinn nɑlnbiiuk nɑ u bonpobik mɑnŋ ni. Ŋɑnn e k Yiesu yet’ɔ ɑ: «Ŋɑɑnt k wɑɑs n di sinsinn ɑ, k mɑɑn l k ŋɑn k nilɔ n jii wɑɑs jiet k tul bɔi.» K puo nɑ jiin ɑ: «N Yonmdɑɑnɔ, l set tie mɔni e, ŋɑɑn bɔi nbɑ tuu duɑ tiebul lɔunŋ ni nɑ mun gɑni wɑɑs jebulɑ nbɑ bɑɑ nɑ.» K Yiesu yet’ɔ ɑ: «A jiinu nbɑ nɑ pɑɑk, n ji cɑb’ɑ, ii kun. Nɑlnbiiuk mɑnŋ ponŋ nyii ɑ bonpobik nɑ ni wɑɑ.» K puo mɑnŋ set din fiil yɑɑt kun k sɑɑ bɑɑl k lɑ k u bik nɑ duɑ u dunduɑnu pɑɑk, k nɑlnbiiuk nɑ set nyii wɑɑ. Tɔn, k Yiesu ji din nyik Tiil yɑkl nɑ, ŋɑɑn tɔkn nyii Siidɔn yɑkl, nɑn tinŋ nbɑ k b din yi Doi-piik nɑ mɔkmɔk k sɑɑ bɑɑl Gɑɑliile mɔkgbenŋl ni. K nisiɑb din bɑɑl nɑn jɑsuɑ k u tie tuukpɑɑl k biɑ k fit k piɑk fɑnu, k b bɑln’mɔ ɑ wun yii u nuu juɑ mɑnŋ pɑɑk. K Yiesu gɑɑl’ɔ k b nyii kpinŋ po, b kuukuɑ, k u jii u niibilɑ k tun juɑ mɑnŋ tubɑ ni, ŋɑɑn siil mɔsɑnt ŋɑɑn sii juɑ mɑnŋ jeln, k got sɑnpɑɑpo ŋɑɑn kulnt sikn, k yet juɑ mɑnŋ ɑ: «Efɑtɑ,» k l pɑɑk tie: «Lotl ɑ mɔnŋ.» L tɑɑkpɑɑk ni nɑ k juɑ nɑ ji gbiɑ, k u jeln biɑ tɑbt k u ji fit piɑk mɑɑn fɑnu. Ŋɑnn e k Yiesu yɑki nɑn niib nɑ ɑ b i mi k bin yet suɑ lin nbɑ k u tun mɑnŋ po, ŋɑɑn nɑn kpɑyɑɔk mɑnŋ kul b lek din ŋɑmi k yɑln mɑɑn mɑnŋ. K bin nbɑ kul gbɑt lɑbɑɑl mɑnŋ, k l tien’m bɑktnɔunŋ bonciɑnn, k b yet ɑ: «Lin nbɑ kul k u tuu tuun ŋɑn bonciɑnn. U te k tuukpɑɑ gbɑɑ tɑn fit gbiɑ, k te k mui biɑ fit piɑk.» L yuo nɑ, k nibulciɑɔnŋ yɑɑn lɑkn lieb Yiesu buol ni. Bɑɑ k mɔk jiet nɑ, k Yiesu yiin u *puolpoweitieb nɑ u buol ni, k tɑn yet’b ɑ: «Ninbɑɑɔk suol’n bonciɑnn nibul nɑ pɑɑk, k mɑɑn dɑɑ ŋɑntɑ e nɑ k b be nɑn’n, ŋɑɑn k ji k mɔk jiet nbɑ k b sɑɑ di. Mi i mun i cɑb’b nɑn kon, b sɑɑ sɑɑ fib sɔnu ni wɑɑ, k mɑɑn b siɑb sɔnu fɔk ɑ.» K u puolpoweitieb nɑ boi’ɔ ɑ: «T sɑɑ lɑ jiet lee muuk nɑ ni k lin jɑnŋ nibul nɑ kul i?» K u boi’b ɑ: «Pɑɑnu kunɑ ŋɑnŋɑ e be i buol ni nnɑ nɑ?» K b yet’ɔ ɑ: «Ŋɑnlole.» Ŋɑnn e k u te k nibul nɑ kul kɑl tinŋ ni. L puolpo k u jii pɑɑni ŋɑnlole nɑ, k tul Yennu niipuouk l pɑɑk, ŋɑɑn ŋmit ŋmit k tul u puolpoweitieb nɑ ɑ bin tol nibul mɑnŋ. B biɑ din mɔk jɑnbis wɑɑn b buol ni, k u biɑ tul Yennu niipuouk l pɑɑk, ŋɑɑn yet u puolpoweitieb mɑnŋ ɑ bin jii tol’b biɑk. ŋɑɑn k ŋuɑ nɑn u puolpoweitieb kɑkt k kuɑ bulgbetl ni, k sɑɑn Dɑlmɑnutɑ tinŋ ni. L puolpo e k Fɑɑliisiɑnnbɑ siɑb bɑɑl Yiesu buol ni k tɑn tie selmi, ɑ bin bikn’ɔ k lɑ u mɔbonkpetl, k tɑn yet’ɔ ɑ wun tien *nyinn k lin wɑnn nɑn u yiikuo mɑnŋ nyii Yennu buol e. L yuo k u kulnt ŋɑɑn boi’b ɑ: «Bee tien k mɔtɑɑnɑ niib nɑ luon nyinn i? Bɑlmɔni e k n yien’i ɑ n kɑn tun nyinn k tul’b.» L puolpo k u nyik’b, ŋɑɑn ŋmɑt kuɑ bulgbetl nɑ ni, k puot mɔkgbenŋl puotl nɑ po. Tɔn, Yiesu puolpoweitieb din tɑnm k k diɑ jiet k l yɑb. B din diɑ pɑɑn-yenn kuɑ e bulgbetl nɑ ni. K Yiesu yet’b nɑn ninmɔnn ɑ: «Ii mi mɑn, kii guu i mɔnŋ nɑn Fɑɑliisiɑnnbɑ nɑn Heluod * dɑtinŋ nɑ mɑn.» Ŋɑnn e k b ji piɑk b lieb sinsuuk ni ɑ: «Tɑɑ k diɑ pɑɑnu nɑ e k u piɑk lin nbɑ nɑ.» Ŋɑɑn k u bɑnn bɑɑ piɑk lin nbɑ nɑ, k boi’b ɑ: «Bee k i piɑk k yɑɑ ɑ i k diɑ pɑɑnu? I dɑɑ k bɑnn siɑl biɑk ii? I dudukt ni biɑ dɑɑ k yent ii? I mɔk ninbinɑ, ŋɑɑn bee k i k lɑɑt i? I biɑ mɔk tubɑ, ŋɑɑn biɑ k gbiɑ ɑɑ? I k tiɑn yuo nbɑ k n ŋmit ŋmit pɑɑni ŋɑnŋmu k tul niib tusɑ ŋɑnŋmu nɑ ɑɑ? Kpɑncubt ŋɑnŋɑ e k i tikl pɑɑnbulɑ nbɑ tenn i?» K b jiin ɑ: «Piik nɑn ŋɑnle.» K u boi’b biɑk ɑ: «K yuo nbɑ k n ŋmit ŋmit pɑɑni ŋɑnlole k tul niib tusɑ ŋɑnnɑ nɑ, kpɑncubt ŋɑnŋɑ k i tikl pɑɑnbulɑ nbɑ tenn i?» K b jiin ɑ: «Ŋɑnlole.» Ŋɑnn e k u boi’b ɑ: «Ŋɑɑn k i biɑ lek dɑɑ k gbɑt l pɑɑk ii?» K b din tɑn bɑɑl Betsɑidɑ, k nisiɑb din jii jɑjuɑnsuɑ nnɑ k bɑɑl nɑn’ɔ Yiesu buol ni, k tɑn bɑln’mɔ ɑ wun sii’u. K Yiesu suol u nuu k nyii nɑn’ɔ duo kpinŋ po, k siil mɔsɑnt juɑ nɑ ninbinɑ ni, k jii u nii k yii u pɑɑk, ŋɑɑn boi’ɔ ɑ: «A lɑɑt siɑl ii?» Ŋɑnn e k juɑ mɑnŋ gokt got, ŋɑɑn yet ɑ: «Nnn, n lɑɑt niib, ŋɑɑn b nɑɑn nɑn tiini nɑ e k sonm.» K Yiesu biɑ jii u nii k yii juɑ mɑnŋ ninbinɑ pɑɑk, l yuo nɑ k juɑ mɑnŋ ji got silll, k suɑ k u ninbinɑ mɔk lɑɑfiɑ, k u ji lɑɑt bonsiɑl kul pul pul pul. K Yiesu te k juɑ mɑnŋ kun u ŋɑɑk ni, ŋɑɑn yet’ɔ nɑn ninmɔnn ɑ: «Ii mi k ɑ ŋmɑt duo mɑnŋ ni jik.» Ŋɑnn e k Yiesu nɑn u puolpoweitieb din yɑɑt k sɑɑ Sesɑɑle Fiiliip tingbounŋ ni. Bɑɑ dɑɑ be sɔnu pɑɑk k sɑɑ nɑ k u boi’b ɑ: «Niib yɑɑ ɑ n tie ŋmee?» K b yet’ɔ ɑ: «Nisiɑb yien ɑ ɑ tie Sɑn, wun nbɑ dɑɑn wuul niib Yennu nyunwulu nɑ e, k nilieb mun yɑɑ ɑ tie Elii e k nilieb mun biɑ yɑɑ ɑ tie *Yennu sɔkniinbɑ yenɔ e.» Ŋɑnn e k u boi’b ɑ: «Ŋɑɑn k yinm ŋɑnin yɑɑ ɑ n tie ŋmee?» K Piɑl jiin k yet’ɔ ɑ: «Fin e tie *Klistu nɑ.» Ŋɑnn e k Yiesu yɑki nɑn’m ɑ bii mi k bin yet suɑ lɑbɑɑl mɑnŋ. L puolpo k Yiesu ji din piin k wɑnt u puolpoweitieb ɑ: «Sie k *Nisɑɑlk Bijɑ dii fɑlɑ bonciɑnn, k sɑɑkɑb nɑn Yennu jɑɑnti yudɑnm nɑn *senniwɑntieb n tɑn yet’ɔ, k biɑ kpi’u, ŋɑɑn l dɑɑ ŋɑntɑ dɑɑl k u sɑɑ fiil kuun ni biɑk.» U din pɑk lin nbɑ nɑ k k bɔl siɑl. Ŋɑnn e k Piɑl yiin’ɔ k nyii nɑn’ɔ kpinŋ po k sɑɑ yɑki nɑn’ɔ. Ŋɑɑn Yiesu nbɑ gbiɑ jiɑnt got u puolpoweitieb nɑ, k ji mun yɑki nɑn Piɑl ɑ: «Fin *Sɑɑtɑn nbɑ nɑ, sietl nnɑ nɑ. A k mɔk Yennu dudukt kɑɑ, ŋɑɑn ɑ mɔk nisɑɑlk dudukt e.» Ŋɑnn e k Yiesu yiin u puolpoweitieb nɑn nibul nbɑ wɑɑ’u nɑ, k tɑn yet’b ɑ: «Wun nbɑ i luon wun wei’n, sie k u likn u sɑɑŋmɑnŋ, k jii u kuun dɑpunpunn kii wɑɑ’n, k mɑɑn wun nbɑ k sɑɑk wun jii u mɑnfuol k tul’n, ŋuɑ e tɑn sɑɑ kɔnŋ’l, ŋɑɑn wun nbɑ likn u sɑɑŋmɑnŋ, min nɑn lɑbɑmɑnn nɑ pɑɑk, ŋuɑ e tɑn sɑɑ lɑ u mɑnfuol. Nilɔ i lɑ tingbounŋ nɑ mɔktuk kul ɑ ŋɑɑn kɔnŋ u mɑnfuol, nyɔlɑnt po e k u sɑɑ lɑ? Ami nilɔ sɑɑ fit jii bee k kpent u mɑnfuol i? K wun nbɑ i tiin fei k jiin min nɑn n mɑɑn nɑ po biitdɑnm nɑn tubkɑngbɑtɑ dɑnm sinsuuk ni, Nisɑɑlk Bijɑ mun sɑɑ tin fei k jiin u po yuo nbɑ k u tɑn sɑɑ jen nɑn u Bɑɑ *yudɑnt nɑn *mɑlɑkɑɑnbɑ nɑ.» Tɔn, k Yiesu biɑ yet’b ɑ: «Bɑlmɔni e k n yɑɑ n yet’i, siɑb be nnɑ k dɑɑ kɑn kpo sie k b tɑn lɑ Yennu nɑɑn bɑɑlu nɑn pɑnŋ.» L puolpo e k l tɑn tien dɑɑ ŋɑnluob, k Yiesu jii Piɑl nɑn Sɑɑk nɑn Sɑn k duo nɑn’m juɑl nbɑ fɔk bonciɑnn pɑɑk, k b be b kuɑ. L yuo k b lɑ k u lebt b nunm ni, k u tiɑt nyilk k pien pɑl pɑl. K suɑ kɑɑ tingbounŋ nɑ ni k sɑɑ fit penn tiɑt nɑn ŋɑnn nɑ. K b lɑ k *Elii nɑn Muois lekt yonm k piɑk nɑn Yiesu. Ŋɑnn e k Piɑl yet Yiesu ɑ: «Cɑnbɑɑ, l ŋɑn nɑn tii be nnɑ nɑ. Ŋɑɑnt k tin fɑɑ lɑnbont ŋɑntɑ, k yenn i tie ɑ yɑl, k liel i tie Muois yɑl k liel mun i tie Elii yɑl.» Jɑŋmɑɑni nbɑ din suol Piɑl nɑn u lieb mɑnŋ bonciɑnn nɑ pɑɑk din te k u din k mi wɑɑ sɑɑ pɑk lin nbɑ. L yuo k sɑnpɑgbounŋ dɔkt k tɑn piin’m, k b gbɑt kunkɔl sɑnpɑgbounŋ nɑ ni, k l yet ɑ: «N Bilonkɑk e nɑ. Gbiintl u mɔb mɑn » K b jiɑnt got, ŋɑɑn ji k lɑ suɑ b buol, sie Yiesu kuukuɑ. Bɑɑ nyii juɑl mɑnŋ pɑɑk k siik, k Yiesu yet’b nɑn ninmɔnn ɑ b dɑɑ yien suɑ lin nbɑ k b lɑ nɑ nɑn yuo nbɑ k *Nisɑɑlk Bijɑ tɑn sɑɑ fiil kuun ni. K b sɑk u mɑɑn mɑnŋ, k diɑ lɑbɑɑl mɑnŋ b sinsuuk ni, k biɑ boi b lieb ɑ: «‹Kuun fiilu› nɑ pɑɑk tie bee?» K b tɑn boi’ɔ ɑ: «Bee te k *senniwɑntieb yɑɑ ɑ sie k Elii e bɑɑl sinsinn i?» K Yiesu yet’b ɑ: «Elii set bɑɑt sinsinn, ɑ wun tɑn ŋɑnm bonsiɑl kul fɑnu e. Ŋɑɑn, bee te k l biɑ diɑn ɑ l tie k Nisɑɑlk Bijɑ n di fɑlɑ bonciɑnn k niib n yet’ɔ? N yien’i e, Elii ponŋ bɑɑl nɑ, k niib diɑ’u gbɑkɑ gbɑkɑ nnɑ bɑɑ luon biɑnŋ nbɑ, nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ.» Yuo nbɑ k Yiesu din tɑn bɑɑl nɑn u *puolpoweitieb Piɑl, Sɑɑk nɑn Sɑn u puolpoweitelieb buol ni yuo nbɑ k b lɑ nibulciɑɔnŋ lɑkn, k senniwɑntieb biɑ noi nɑn’m mɔniɑɔk. Nibul mɑnŋ nbɑ lɑ Yiesu yuo nbɑ k l tien’m bɑktnɔunŋ, k b tin bɑɑl fuont’ɔ. Ŋɑnn e k u boi u puolpoweitieb nɑ ɑ: «I noi nɑn’m lɑnn po pɑɑk e?» K jɑsuɑ nnɑ nyii nibul mɑnŋ ni k jiin ɑ: «Cɑnbɑɑ, min e bo bɑɑt nɑn n bijɑ ɑ buol ni, k mɑɑn nɑlnbiiuk be u ni k l te k u k fit piɑk. Siɑn nbɑ kul ɑ k nɑlnbiiuk mɑnŋ fiil, l tuu lu’u tinŋ ni e, k mɔsɑnkunkuounŋ nyi u mɔb ni, k u ŋmɑn u nyɑnɑ, k u gbɑnɑnt kul n wɑkl kenken. N bɑln ɑ puolpoweitieb nɑ ɑ bin nyinn nɑlnbiiuk mɑnŋ, ŋɑɑn k b gbɑl.» Ŋɑnn e k Yiesu jiin k yet ɑ: «Yinm mɔtɑɑnɑ niib yɑdɑ mɑntk puɑl hei. N sɑɑ wei nɑn’i nlee? L sɑɑ wei nlee k n mɔk suklu nɑn’i ni? Bɑɑt nɑn bik mɑnŋ nnɑ.» K b bɑɑl nɑn’ɔ Yiesu buol. Nɑlnbiiuk nɑ nbɑ lɑ Yiesu yuo nbɑ k u fiil bik nɑ ni k lu’u tinŋ ni, k u duɑ k biln, k mɔsɑnkunkuounŋ nyi u mɔb ni. K Yiesu boi u bɑɑ ɑ: «Nlee yuo e k l piin k tie’u nnɑ?» K u jiin ɑ: «L piin’ɔ u bisn ni e wɑɑ. Yuo bonciɑnn e k nɑlnbiiuk nɑ tuu te k u bɑɑ muu ni, nɑn nyun ni, ɑ wun lek kpi’u. Ŋɑɑn l i tie k ɑ sɑɑ fit tien siɑl, ɑ lek tin’t ninbɑɑɔk k sonm’t.» K Yiesu yet ɑ: «A yet ɑ l i tie k n fit i e. Bonsiɑl kul k pɑɑl k tul wun nbɑ tien yɑdɑ nɑ buol ni.» K juɑ nɑ yikn sɑnpɑɑpo wɑɑ ɑ: «N tien yɑdɑ wɑɑ, ŋɑɑn puknt n yɑdɑ pɑnŋ.» Yiesu nbɑ lɑ k nibul nɑ ŋɑnmt tut bɑɑt b pɑɑk nɑ, k u tiɑn nɑlnbiiuk nɑ pɑɑk ɑ: «Fin nɑlnmutuukpɑɑl nɑ, min e tul’ɑ mɔb, nyimin u ni k ji dɑɑ mi jent u ni.» K nɑlnbiiuk nɑ yikn k tɔkl bik mɑnŋ k lu’u tinŋ ni gbɑb, ŋɑɑn nyii u ni, k bik mɑnŋ ji nɑɑn nɑn u kpo e nɑ, k niib nɑ ni bonciɑnn yet ɑ: «U kpo e nɑ.» Ŋɑɑn k Yiesu suol bik mɑnŋ nuu k sonm’ɔ k u fiil set. Yiesu nbɑ din tɑn kuɑ ŋɑɑk ni yuo nbɑ, k u puolpoweitieb nbɑ bo biɑl nɑ boi’ɔ ɑ: «Bee k tinm ŋɑnin bo k fit nyinn nɑlnbiiuk nɑ?» K u yet’b ɑ: «I kɑn fit nyinn nɑlnbiiuk nɑ buolu sie k i mei Yennu.» K Yiesu nɑn u puolpoweitieb mɑnŋ nyii lenŋ k tɔkn Gɑɑliile tingbounŋ po. Ŋɑɑn u din k luon suɑ n bɑnn wɑɑ be siɑn nbɑ, k mɑɑn u din wɑnt u puolpoweitieb nɑ k yien’m ɑ: «B tɑn sɑɑ jii Nisɑɑlk Bijɑ k tien’ɔ niib nuu ni k bin kpi’u, ŋɑɑn l dɑɑ ŋɑntɑ dɑɑl u tɑn sɑɑ fiil kuun ni.» Ŋɑɑn u puolpoweitieb mɑnŋ din k bɑnn mɑɑn mɑnŋ pɑɑk, ŋɑɑn mun tiin jɑŋmɑɑni nɑn bin boi’ɔ. Tɔn, k Yiesu nɑn u puolpoweitieb nbɑ din bɑɑl Kɑpelnɑunm k tɑn kuɑ ŋɑɑk ni yuo nbɑ k u boi’b ɑ: «I bo diɑ lɑbɑlɑnn po e sɔnu ni nɑ?» Ŋɑɑn k b ŋmin ɑ, k mɑɑn sɔnu ni b noi nɑn b lieb *yudɑnt pɑɑk e b sinsuuk ni. Ŋɑnn e k u ŋmɑnt k kɑl, ŋɑɑn yiin u tuomiinbɑ *piik nɑn bɑnle nɑ, k yet’b ɑ: «Wun nbɑ kul luon wun tien yudɑɑnɔ, sie k wun kpint u mɔnŋ k tien bik i kul ni, k biɑ tien i kul tuontunnɔ,» ŋɑɑn jii bik nnɑ k senn’ɔ b sinsuuk ni, k puul u nii k wɔb bik mɑnŋ, ŋɑɑn yet’b ɑ: «Wun nbɑ kul gɑɑl bik nɑ buolu n sɑnn pɑɑk, min e k u gɑɑl’n, k wun nbɑ gɑɑl’n k gɑɑl min kɑɑ, ŋɑɑn u gɑɑl wun nbɑ tun’n nɑ e nɑ mun biɑk.» Tɔn, k Sɑn yet Yiesu ɑ: «Wɑntuɑ, t lɑ k jɑsuɑ nnɑ mun tɑɑn ɑ sɑnn k nyint nɑlnbiit niib ni, k t yɑki nɑn’ɔ ɑ wun nyik, k mɑɑn u k tie t ni yenɔ.» K Yiesu yet’b ɑ: «I dɑɑ biel’ɔ mɑn, k mɑɑn wun nbɑ sɑɑ tɑɑ n sɑnn k tun bɑktnɔunŋ tuonn, l puolpo u ji kɑn fit pɑk siɑl k biil’n. K mɑɑn wun nbɑ kul k kɔn nɑn’t, u sie t puol e. Bɑlmɔni e k n yien’i nɑ, wun nbɑ kul got lɑ’i k tul’i nyun, ɑ yɑɑ tie Klistuyɑb nɑ pɑɑk, l dɑɑnɔ tɑn kɑn mi kɔnŋ u nyuɑt.» K Yiesu biɑ ŋɑnm k yet ɑ: «Wun nbɑ te k wɑɑs mɑnŋ nbɑ tien’n yɑdɑ nɑ yenɔ kuɑ bɑɑ biit ni, b i bo i lɑnn nɑɑl l dɑɑnɔ tulu ni k tut’ɔ nɑn’n k lu’u mɔkgbenŋl ni gbɑɑ, l bo sii sɔ k tul’ɔ. A ninbinn i te k ɑ yɑɑ ɑ tun biit, fɑn kpɑkl k lu. L sɔ k fɑn tɑn kuɑ Yennu nɑɑn ni nɑn ninbin-yenn kuɑ k gɑl fɑn tɑn kuɑ muu mɑnŋ ni nɑn ninbinɑ ŋɑnle. Lenŋ e k ‹nɑnwubɑ nbɑ k kpenn nɑ be k di’b k muu nbɑ biɑ k kpient nɑ be k di’b.› «B tɑn sɑɑ ŋɑnm suɑ kul nɑn muu nɑn yɑɑln e.» «Yɑɑln mɑn, ŋɑɑn yɑɑln mɑnu i nyii, nlee k ɑ ji sɑɑ jiin l mɑnu? «Ii mɑn nɑn yɑɑln nɑ mɑn, k mɑnu ii be yinm nɑn i lieb sinsuuk ni.» K Yiesu nyii lenŋ k sɑɑn Suude tinŋ ni nɑn *Suulden kpenpuotl po, k nigbounŋ bonciɑnn ji lɑkn u buol ni, k u yɑɑn wɑnt’b Yennu mɑɑn nɑn wɑɑ ponŋ tuu wɑnt’b biɑnŋ nbɑ nɑ. K Fɑɑliisiɑnnbɑ bɑɑl u buol ni, k luon bin bikn’ɔ, k boi’ɔ ɑ: «Senni nɑ cɑb nɑn juɑ n yet u ŋɑɑpuo ɑmi ii?» Ŋɑnn e k u mun jiin k boi’b ɑ: «Muois din tul’i *senni nlee k jiin l po?» K b jiin ɑ: «Muois din cɑb yiikuo ɑ juɑ sɑɑ fit diɑn puoyetu kɑdɑɑɔk ŋɑɑn yet u ŋɑɑpuo.» K Yiesu yet’b ɑ: «I tubkɑngbɑtɑ pɑɑk e din te k Muois diɑn senni mɑnŋ k tul’i. Ŋɑɑn Yennu nbɑ din nɑn *dulnyɑ pinpiik ni: ‹U din nɑn juɑ nɑn puo e.› Lin nbɑ nɑ pɑɑk k juɑ tuu sɑɑ nyi u bɑɑ nɑn u nɑɑ buol ni, ŋɑɑn k ŋuɑ nɑn puo n tɑɑn lieb, k b bɑnle sɑɑ tɑɑn kii tie niyenɔ kuɑ. Ŋɑnn e sɑɑ te k b ji k tie niib bɑnle, ŋɑɑn b ji tie gbɑnɑn-yent kuɑ e. L pɑɑk, lin nbɑ k Yennu jii k tɑɑn nɑn liel, nisɑɑlk i mi k wun bɔkt’l.» Yiesu nɑn u *puolpoweitieb nbɑ din tɑn jen ŋɑɑk ni yuo nbɑ, k u puolpoweitieb boi’ɔ mɑɑn mɑnŋ pɑɑk nbɑ tie biɑnŋ nbɑ. K u jiin yet’b ɑ: «Juɑ nbɑ yet u ŋɑɑpuo ŋɑɑn kuɑn puogɑnɔ, u tun * boncuncontuonn k jiin puo nbɑ k u bel’ɔ nɑ po e nɑ. Nnɑ e mun biɑk, puosuɑ i yet u sɔlɔ ŋɑɑn sɑɑn kun jɑgɑnɔ, u mun tun boncuncontuonn ɑ.» Tɔn, k nisiɑb din tɑn bɑɑt nɑn b wɑɑs Yiesu buol ni ɑ wun tɑn yii u nii b pɑɑk, ŋɑɑn k u puolpoweitieb tiɑn b pɑɑk. Ŋɑɑn wɑɑ bɑnn bɑɑ tiɑn b pɑɑk biɑnŋ nbɑ nɑ k u wutuol duo, k u yet’b ɑ: «Ŋɑɑnt mɑn k wɑɑs mɑnŋ i bɑɑt n buol ni nɑ, k dɑɑ tiɑn’m, k mɑɑn b buolu e yen Yennu nɑɑn. Bɑlmɔni e k n yien’i nɑ, wun nbɑ k gɑɑl Yennu nɑɑn nɑn bik nɑ, u kɑn mi kuɑ l ni fɑb ɑ.» K u gɑɑl wɑɑs mɑnŋ u nii ni, k yii u nii b pɑɑk, ŋɑɑn yɑt yetŋɑnm b pɑɑk Yiesu nbɑ din nyii lenŋ k sɑɑ mɑnŋ, k jɑsuɑ tin k cet’ɔ k tɑn gbɑɑn u tuɑnn, ŋɑɑn boi’ɔ ɑ: «Wɑntɔŋɑnɔ, n sɑɑ tien nlee k tɑn lɑ mɑnfuol nbɑ kɑɑ gbennu?» K Yiesu jiin boi’ɔ ɑ: «Bee k ɑ yi’n niŋɑnɔ? Niŋɑnsuɑ kɑɑ sie Yennu kuukuɑ. A ponŋ mi Yennu senni nbɑ wɑnt biɑnŋ nbɑ, ɑ: ‹Dɑɑ kpi nilɔ. Dɑɑ tuun boncuncontuonɑ. Dɑɑ jɑɑn. Dɑɑ fɑ fɑɑk suɑ pɑɑk. Dɑɑ ŋmɑb nilɔ. Ii bɑɑkt ɑ bɑɑ nɑn ɑ nɑɑ.› » K juɑ nɑ yet’ɔ ɑ: «Wɑntuɑ, n ponŋ sɑk lin nbɑ nɑ kul n bisn ni e wɑɑ.» K Yiesu got’ɔ silll nɑn lonm, ŋɑɑn yet’ɔ ɑ: «Ŋɑɑn bon-yenn kuɑ e pɔt’ɑ. Ii kun k sɑɑ kɔi lin nbɑ k ɑ mɔk nɑ kul, k jii l likli mɑnŋ k tul tɑlɑs-dɑnm, k ɑ tɑn sɑɑ lɑ mɔktuk sɑnpɑɑpo. L puolpo k ɑ jen ɑ kii wɑɑ’n.» Juɑ nɑ nbɑ din gbɑt lin nbɑ nɑ k u pɑl ni biil bonciɑnn, k u ŋmɑt kun nɑn pɑlbiil, k mɑɑn u din mɔk mɔktuk bonciɑnn. K Yiesu ŋmɑnt got u puolpoweitieb nɑ k lint, ŋɑɑn yet’b ɑ: «L sii pɑɑl bonciɑnn nɑn mɔktɑ n kuɑ Yennu nɑɑn ni.» K u mɑɑn mɑnŋ yɑɑl ŋɑɑn lit’b, k u biɑ ŋɑnm yet’b ɑ: «N wɑɑs, l lek pɑɑl nɑn nilɔ n kuɑ Yennu nɑɑn ni. L pɑɑl nɑn mɔktɔ n kuɑ Yennu nɑɑn ni k cie lɑɑ pɑɑl nɑn yuyouk n kuɑ kpɑlpienu miɑl ni nɑ.» K mɑɑn mɑnŋ yɑɑl ŋɑɑn lit’b bonciɑnn, k b boi b lieb ɑ: «L i tie nnɑ i e, ŋmee ji sɑɑ fit k lɑ fielu?» K u kpɑɑ u nuni b pɑɑk, ŋɑɑn tɑn yet’b ɑ: «Lin nbɑ nɑ pɑɑl k tul nisɑɑlk e, ŋɑɑn l k pɑɑl Yennu yɑɑ buol ni, k mɑɑn Yennu sɑɑ fit tun bonsiɑl kul ɑ.» Ŋɑnn e k Piɑl tɔl yet’ɔ ɑ: «Gotl, tinm ŋɑnin nyik t bonsiɑl kul e ŋɑɑn wɑɑ’ɑ.» K Yiesu yet’b ɑ: «Bɑlmɔni e k n yien’i nɑ, wun nbɑ kul nyik u ŋɑɑk, ɑmi u ninjɑnm, ɑmi u niipuob, ɑmi u nɑɑ, ɑmi u bɑɑ, ɑmi u wɑɑs, ɑmi u kpɑɑnt, n sɑnn pɑɑk nɑn lɑbɑmɑnn nɑ pɑɑk u tɑn sɑɑ biɑ lɑ bonɑ k lin gɑl wɑɑ nyik lin nbɑ nɑ. U tɑn sɑɑ lɑ ŋei, nɑn ninjɑnm, nɑn niipuob, nɑn nɑɑnbɑ, nɑn wɑɑs, nɑn kpɑɑnt, kobi kobi e tingbounŋ nɑ ni, l i lek i tie k b muks’ɔ, k yuo nbɑ bɑɑt nɑ k u biɑ tɑn sɑɑ lɑ mɑnfuol nbɑ kɑɑ gbennu. Niib bonciɑnn nbɑ dɔnŋ tuɑnn mɔtɑɑnɑ nɑ, b tɑn sɑɑ jil puol ɑ, ŋɑɑn bonciɑnn nbɑ mun biɑ juont puol mɔtɑɑnɑ nɑ tɑn sɑɑ dɔnŋ gɑl tuɑnn nɑ.» L yuo nɑ k Yiesu nɑn u puolpoweitieb din nyii sɔnu ni k do Selusɑɑlenm, k u gɑl b tuɑnn po, k b yɑn put k jɑŋmɑɑni biɑ suol nibul nbɑ wɑɑ nɑ kul ɑ. Ŋɑnn e k u yɑɑn nyii nɑn u tuomiinbɑ *piik nɑn bɑnle nɑ kpinŋ po, k yet’b lin nbɑ sɑɑ tien’ɔ, ɑ: «Nnɑlɑ, t do Selusɑɑlenm e, siɑn nbɑ k b sɑɑ jii *Nisɑɑlk Bijɑ k kuɑn Yennu jɑɑnti yudɑnm nɑn *senniwɑntieb nii ni ɑ bin bu u buut ŋɑɑn kpi’u, k jii’u tul bin nbɑ k tie *Suifnbɑ nɑ, k b sɑɑ sɑlk’ɔ, k siin mɔsɑnt u pɑɑk, k buo’u gbɑnn, k biɑ tɑn kpi’u, ŋɑɑn l dɑɑ ŋɑntɑ dɑɑl k u sɑɑ fiil kuun ni.» L yuo k Sɑɑk nɑn Sɑn, bin nbɑ din tie Sebede wɑɑs nɑ, bɑɑl Yiesu buol ni k tɑn yet’ɔ ɑ: «Wɑntuɑ, t luon k ɑ tun lin nbɑ k t sɑɑ boi’ɑ nɑ po k tul’t.» K u boi’b ɑ: «I luon k n tun bee k tul’i ni?» K b jiin ɑ: «Yuo nbɑ k ɑ tɑn sɑɑ lɑ ɑ nɑɑn yudɑnt nɑ, ɑ tɑn ŋɑɑn k t yenɔ n kɑl ɑ niidiitu po, k luɑ mun n kɑl ɑ niigɑnŋ po.» K u jiin yet’b ɑ: «I k mi yɑɑ mei lin nbɑ po. I tɑn sɑɑ fit nyu n wɑhɑlɑ *kɔp nɑ ni wɑɑ ɑɑ? Kuo i sɑɑ fit gɑɑl n fɑlɑ Yennu nyunwulu nɑ wɑɑ ɑɑ?» K b jiin ɑ: «T sɑɑ fit ɑ.» K u yet’b ɑ: «I set tɑn sɑɑ nyu kɔp nbɑ k n tɑn sɑɑ nyu lenŋ nɑ wɑɑ, k biɑ tɑn sɑɑ gɑɑl Yennu nyunwulu nbɑ k n tɑn sɑɑ gɑɑl nɑ wɑɑ. Ŋɑɑn n k mɔk yiikuo nbɑ sɑɑ gɑnn wun nbɑ tɑn sɑɑ kɑl n niidiitu po nɑn n niigɑnŋ po. Yennu e gɑnn bin nbɑ tɑn sɑɑ kɑl l kinkɑɑni pɑɑk » K Yiesu puolpoweitelieb piik nɑ nbɑ gbɑt nnɑ yuo nbɑ, k b wutuol duo Sɑɑk nɑn Sɑn pɑɑk. K Yiesu yiin b kul ɑ k lɑk’m u buol, ŋɑɑn yet’b ɑ: «I mɔnŋ mi nɑn bin nbɑ k b goli’b k b tie tingbounŋ nɑ ni yudɑnm nɑ diɑ’b nɑn ninmɔnn e, k nijɑɑnɑ mun gɑɑnt nɑn b yiikuo. Ŋɑɑn yinm ŋɑnin, l dɑɑ tie nnɑ kɑɑ i sinsuuk ni. I suɑ i luon wun tien nijɑɑnn, sie k wun tien u mɔnŋ suɑ kul ɑ tuontunnɔ, k wun nbɑ mun luon wun tien yudɑɑnɔ, sie k wun tien suɑ kul ɑ dɑɑbl, k mɑɑn Nisɑɑlk Bijɑ, k bɑɑl ɑ niib n tun tul’ɔ kɑɑ, ŋɑɑn u bɑɑl ɑ wun tun k tul niib e, k biɑ kpo ɑ wun fiel niib bonciɑnn.» Tɔn, k Yiesu nɑn u puolpoweitieb din bɑɑl Seliiko k tɑn nyii, k ŋɑnm nɑn nibulciɑɔnŋ tɔk sɑɑ, k juɑnsuɑ din be k tie miɑtɔ, k kɑl sɔnjokpinŋ, k u sɑnn yi Bɑɑltiime, wun nbɑ tie Tiime bijɑ nɑ. Wɑɑ tɑn gbɑt ɑ Yiesu wun nbɑ tie Nɑɑsɑɑlet nilɔ nɑ be yuo nbɑ, k u yikn sɑnpɑɑpo wɑɑ ɑ: «Yiesu, * Dɑɑfiid yɑɑbuonn, tin’n ninbɑɑɔk.» K niib bonciɑnn tiɑn u pɑɑk ɑ wun ŋmin, ŋɑɑn k u biɑ ŋɑnm yikn sɑnpɑɑpo wɑɑ ɑ: «Dɑɑfiid yɑɑbuonn, tin’n ninbɑɑɔk.» K Yiesu set k yet ɑ: «Yiint’ɔ nɑ mɑn » K b yiin’ɔ, k yet’ɔ ɑ: «Cien ɑ pɑl. U yi’ɑ. Fiit k set.» Ŋɑnn e k juɑnŋ mɑnŋ lu u liɑtfuouk, ŋɑɑn fiil k set, k bɑɑl Yiesu buol ni. K Yiesu boi’ɔ ɑ: «A luon k n tun bee k tul’ɑ ni?» K juɑnŋ mɑnŋ jiin ɑ: «Cɑnbɑɑ, n luon k ɑ munt’n e.» K Yiesu yet’ɔ ɑ: «Tɔn, ii sɑɑ. A yɑdɑ te k ɑ lɑ lɑɑfiɑ.» L tɑɑkpɑɑk ni k u ninbinɑ nyuɑnt, k u ji lɑɑt k wɑɑ Yiesu, k b sɑɑ. Tɔn, k Yiesu nɑn u *puolpoweitieb nbɑ din tɑn pel Selusɑɑlenm k bɑɑl doi nbɑ k b yi Betfɑɑje nɑn Betɑɑni nɑ, k doi mɑnŋ biɑk jɑgbɑɑk nbɑ k b yi’l *Oliifienbɑ jɑgbɑɑk nɑ, k u tun u puolpoweitieb nɑ ni bɑnle, k yet’b ɑ: «Ii sɑɑ duo nbɑ be tuɑnn po nɑ ni mɑn. Ii sɑɑ i bɑɑl, i sɑɑ lɑ bonbik nbɑ k suɑ dɑɑ k mi k jɑk’ɔ, k u lol ŋɑsiɑk nnɑ nɑn-yel po tɑnmɔb ni. Yin lot’ɔ k bɑɑl nɑn’ɔ n buol nnɑ. Suɑ i boi’i ɑ bee k i lot bonŋ mɑnŋ, yin yet’ɔ Yonmdɑɑnɔ e luon’ɔ, ɑ ŋɑɑn u sɑɑ jiin’ɔ mɔtɑɑnɑ.» Ŋɑnn e k b din sɑɑn k set sɑɑ lɑ k bonbik lol ŋɑsiɑk nnɑ nɑn-yel po. Bɑɑ set lot’ɔ yuo nbɑ k nisiɑb nnɑ sie lenŋ k boi’b ɑ: «Bee k i lot bonbik mɑnŋ i?» K b yet’b nɑn Yiesu nbɑ bo yɑɑ bin yet biɑnŋ nbɑ nɑ, k b cɑb’b k b sɑɑn. Bɑɑ din bɑɑl nɑn bonbik mɑnŋ Yiesu buol ni yuo nbɑ, k b jikt b tiɑt k pɑɑ bonŋ mɑnŋ buɑnn pɑɑk, k Yiesu jɑk. K niib bonciɑnn jikt b tiɑt k lɑt sɔnu ni, k siɑb mun ŋɑt fɑɑmɑɑsɑɑ k lɑt sɔnu ni. Bin nbɑ din gɑl Yiesu tuɑnn po, nɑn bin nbɑ din wɑɑ u puolpo kul ɑ din yikn k yien ɑ: «Hosɑnɑ. Yennu yetŋɑnm ii be wun nbɑ bɑɑt Yonmdɑɑnɔ Yennu sɑnn ni nɑ pɑɑk. Yennu yetŋɑnm i biɑ kii be t yejɑ Dɑɑfiid nɑɑn nbɑ bɑɑt nɑ pɑɑk. Hosɑnɑ. Yudɑnt tie *Yendɔunŋ ni yɑl e.» K Yiesu bɑɑl Selusɑɑlenm k kuɑ Yennu jɑɑnti ŋɑsɑɑkɑk ni, k lin got bonsiɑl kul ɑ, ŋɑɑn nyiɑɔk nbɑ din tɑn bɔnt nɑ pɑɑk, k ŋuɑ nɑn u tuomiinbɑ *piik nɑn bɑnle nɑ nyii k ŋmɑt sɑɑn Betɑɑni. L sɑn-nyɑfɑnnuk o k Yiesu nɑn u puolpoweitieb nyii Betɑɑni k jent Selusɑɑlenm, k kon tɑn suol’ɔ. K u lɑ fiigie nbɑ mɔk fɑɑmɑɑsɑ, k l sie bɑnfɔkl ɑ. K u sɑɑn tiik mɑnŋ nyɑkl ni ɑ wun sɑɑ lɑ luɑnɑ l pɑɑk, ŋɑɑn wɑɑ bɑɑl lenŋ k u k lɑ siɑl, sie fɑɑt kuukuɑ, k mɑɑn fiignbɑ yuo dɑɑ k bɑɑl. Ŋɑnn e k u pol tiik nɑ mɔb ɑ: «Suɑ ji kɑn mi di ɑ luɑnɑ lɑɑ nyii dinnɑ k sɑɑ.» K u puolpoweitieb gbɑt u mɑɑn mɑnŋ. Tɔn, k Yiesu nɑn u puolpoweitieb tɑn bɑɑl Selusɑɑlenm, k Yiesu sɑɑn kuɑ Yennu jɑɑnti ŋɑsɑɑkɑk ni, k bel kɔitieb nɑn dɑɑtieb kul k nyint’b, k tut lik-kpentɑ tiebulɑ k lubn, k tut bin nbɑ kɔi ŋmɑnɑ nɑ koki k lubn, k lek k sɑk k suɑ n jii bonsiɑl gɑl nɑn’n Yennu jɑɑnti ŋɑsɑɑkɑk nɑ ni. Ŋɑnn e k u tumi niib nɑ k yet’b ɑ: «L diɑn Yennu lolkpel kɑdɑɑɔk ni ɑ: ‹B sii yi n ŋɑɑk Yenmiɑlu ŋɑɑk e k tul nibuolu kul ɑ.› Ŋɑɑn yinm e kpintl k tien nɑn-yukb kinkɑl buol.» K Yennu jɑɑnti yudɑnm nɑn *senniwɑntieb gbɑt wɑɑ tun biɑnŋ nbɑ nɑ, k b ji luon sɔnu nbɑ k b sɑɑ kpi’u, ŋɑɑn dɑɑ tiin’ɔ jɑŋmɑɑni, k mɑɑn u wɑnnu din tien nibul nɑ kul ɑ yɑɑl-lituk bonciɑnn. Dɑɑjuouk nbɑ tɑn bɑɑl yuo nbɑ k ŋuɑ nɑn u puolpoweitieb nyii Selusɑɑlenm. L sɑn-nyɑfɑnnuk o biɑk k b sonm sɔnu ni k gɑɑl, k lɑ k fiigie nɑ kuol nɑn jiinɑ ni wɑɑ k sie. Piɑl nbɑ tiɑl Yiesu nbɑ won yet lin nbɑ nɑ, k u yet’ɔ ɑ: «Cɑnbɑɑ, gotl, fɑɑ won pol fiigie nbɑ mɔb nɑ kuol ɑ.» K Yiesu yet u puolpoweitieb ɑ: «Bɑlmɔni e k n yien’i nɑ, tient Yennu yɑdɑ mɑn. Wun nbɑ kul yet juɑl nɑ ɑ lin fikt k sɑɑ bɑɑ mɔkgbenŋl ni, ŋɑɑn k k mɔk bilsuk u pɑl ni, k tien yɑdɑ nɑn wɑɑ yet lin nbɑ mɑnŋ sɑɑ tun ɑ, l set sɑɑ tun tul’ɔ wɑɑ. L pɑɑk e k n yien’i, l i tie k i mei Yennu k boi’ɔ siɑl po, yii mɔk yɑdɑ i pɑlɑ ni nɑn i ponŋ gɑɑl bont mɑnŋ ɑ, k i set sɑɑ lɑ wɑɑ. L i tie k i fiil k set ɑ yin miɑl Yennu, ŋɑɑn tiɑl nɑn suɑ tun biit k biil’i, yin nyik cɑb’ɔ, k i Bɑɑ Yennu nbɑ be sɑnpɑɑpo nɑ mun sɑɑ nyik i biit k cɑb’i wɑɑ. (Ŋɑɑn l i tie k i k nyikt cɑbt i lieb b biit, i Bɑɑ Yennu nbɑ be sɑnpɑɑpo nɑ mun kɑn nyik cɑb i biit.)» Tɔn, k Yiesu nɑn u puolpoweitieb mɑnŋ yɑɑn din tɑn jen Selusɑɑlenm, k u kuɑ Yennu jɑɑnti ŋɑsɑɑkɑk ni k sonm lin. K jɑɑnti yudɑnm, nɑn senniwɑntieb, nɑn tinŋ mɑnŋ ni sɑɑkɑb, bɑɑl u buol ni, k tɑn boi’ɔ ɑ: «Yiikuo lɑnn po e k ɑ mɔk k tuun lin nbɑ nɑ kul i? Ŋmee cɑb’ɑ l yiikuo?» K u jiin yet’b ɑ: «Ŋɑɑnt k n boi’i buboiyent kuɑ sinsinn. L i tie k i sɑɑ fit tul’n l jiinu, tɔn, n sɑɑ wɑnn’i yiikuo buolu nbɑ k n mɔk k tuun lin nbɑ nɑ kul ɑ. Sɑn wun nbɑ dɑɑn wuul niib Yennu nyunwulu nɑ, Yennu e cɑb’ɔ l yiikuo ɑmi nisɑɑlk e? Yetl’n mɑn.» K b ŋmɑnt fɑɑ b lieb lɑbɑɑl k yien ɑ: «T i yet ɑ Yennu e cɑb’ɔ l yiikuo, u sɑɑ boi’t ɑ k bee te k t k tien u mɑɑn nɑ yɑdɑ? K t sɑɑ fit yet ɑ nisɑɑli e cɑb’ɔ ɑɑ?» (B tiin niib nɑ, k mɑɑn b kul din duki nɑn Sɑn mɑnŋ set dɑɑn tie *Yennu sɔkni e nɑn bɑlmɔni.) L pɑɑk, k b jiin k yet Yiesu ɑ: «T k mi.» K Yiesu mun yet’b ɑ: «Tɔn, n mun kɑn yet’i wun nbɑ cɑb’n l yiikuo k n tuun lin nbɑ nɑ.» L yuo k Yiesu jɑk bɑljokt yinu ɑ: «Jɑsuɑ din wuu tilonti nbɑ k b yi *fiinyɑ nɑ u kpɑɑb ni, k cɑɑn gungounŋ lint’l, ŋɑɑn gbiil buotuk nbɑ k b tuu sii ŋmɑki tilonti mɑnŋ luɑnɑ nyun lenŋ, k biɑ mɑɑ siɑl k b sii do l pɑɑk k guu kpɑɑb nɑ, k jii kpɑɑb nɑ k tien kpɑɑlɑ nii ni ɑ bii goli, ŋɑɑn yɑɑt sɑɑn duo. K luɑnɑ nɑ punpuɑlyuo tɑn bɑɑl, k u tun tuontunnɔ ɑ wun sɑɑn gɑɑl tiluɑnɑ u kpɑɑlɑ nɑ buol ni, k u sɑɑn. K kpɑɑlɑ nɑ suol’ɔ k buo’u fɑnu, ŋɑɑn bel’ɔ, k u kun yɑnn. K kpɑdɑɑnɔ mɑnŋ biɑ tun tuontunluɑ, ŋɑɑn k kpɑɑlɑ nɑ biɑ fɑɑ u yul k suki’ɔ. K kpɑdɑɑnɔ nɑ biɑ ŋɑnm tun tuontunluɑ b buol ni, ŋɑɑn k b kpii ŋuɑ. L puolpo k u biɑ ŋɑnm tun tuontunlieb bonciɑnn b buol ni, k b biɑ tun nnɑ, k buo siɑb, ŋɑɑn kpii lieb. Kpɑdɑɑnɔ mɑnŋ tiɑɔnŋ bilonkɑk kuukuɑ din tɑn biɑl, k u tun’ɔ kpɑɑlɑ mɑnŋ buol ni, k yet ɑ: ‹B sɑɑ bɑɑk n tiɑɔnŋ bijɑ nɑ wɑɑ.› Ŋɑɑn k kpɑɑlɑ mɑnŋ yet b lieb ɑ: ‹Wun nbɑ tɑn sii tie kpɑɑb nɑ dɑɑnɔ dɑsiɑl e nɑ. Ŋɑɑnt k tin kpi’u mɑn, ŋɑɑn k kpɑɑb nɑ n kpɑnt t yɑl.› K b suol’ɔ k kpii’u k nyii nɑn’ɔ kpɑkpinŋ po k lu.» K Yiesu boi’b ɑ: «I dukn k kpɑdɑɑnɔ nɑ sɑɑ tien nlee? U sɑɑ bɑɑl k tɑn kpi kpɑɑlɑ mɑnŋ e, ŋɑɑn jii kpɑɑb nɑ k tien kpɑɑlieb nii ni. Ŋɑnn e k *Suifnbɑ yudɑnm yɑbi b mɔnŋ ɑ bin suol’ɔ, k mɑɑn b mi nɑn wɑɑ yin bɑljouk mɑnŋ nɑ, l sɑɑn gɑɑn b pɑɑk e. Ŋɑɑn k b tiin nibul nɑ jɑŋmɑɑni. L pɑɑk k b nyik’ɔ ŋɑɑn yɑɑt. Ŋɑnn e k jɑɑnti yudɑnm, *senniwɑntieb nɑn tinŋ mɑnŋ sɑɑkɑb tun Fɑɑliisiɑnnbɑ siɑb nɑn kpɑnbɑl *Heluod puolpo juɑmu nɑ ni siɑb Yiesu buol ni ɑ bin tɑn boi’ɔ buboit k lɑ u mɔbonkpetl. K b tɑn bɑɑl k yet’ɔ ɑ: «Wɑntuɑ, t mi nɑn ɑ piɑk bɑlmɔni, k k mɔk jɑŋmɑɑni nɑn niib nbɑ sɑɑ dukn l po biɑnŋ nbɑ, k mɑɑn ɑ k mɔk ningɑnni niib buol ni. Ŋɑɑn ɑ wɑnt niib Yennu sɔnu nɑn bɑlmɔni. Ŋɑnn yet’t, t *senni cɑb’t nɑn tii pɑ lɑnpo kii tien Luonm tinŋ kpɑnbɑl Sesɑɑl, ɑmi t dɑɑ pɑ?» K Yiesu bɑnn b sel nbɑ k b tie nɑ, k jiin’m ɑ: «Bee k i luon k yin piin’n bɑluk u? Bɑɑt mɑn nɑn liklib k n got.» K b bɑɑl nɑn’n. Ŋɑnn e k u boi’b ɑ: «Ŋmee nɑɑɔnŋ nɑn sɑnn e be l pɑɑk nɑ?» K b yet’ɔ ɑ: «Luonm tinŋ kpɑnbɑl Sesɑɑl yɑl e.» K Yiesu yet’b ɑ: «Tɔn, ii yenn i pɑ kii tien Luonm tinŋ kpɑnbɑl Sesɑɑl lin nbɑ tie u yɑl, ŋɑɑn kii mun i pɑ kii tien Yennu lin nbɑ tie Yennu yɑl.» K l yɑɑl ŋɑɑn lit’b bonciɑnn nɑn Yiesu. *Sɑɑdiuseɑnbɑ, bin nbɑ din tuu yɑɑ ɑ niib tɑn kɑn fiil kuun ni nɑ, din bɑɑl Yiesu buol ni, k tɑn yet’ɔ ɑ: «Wɑntuɑ, Muois din diɑn senni k yet ɑ: ‹Juɑ i kpo ŋɑɑn nyik u ŋɑɑpuo, ŋɑɑn k b k mɑl wɑɑs, l ŋɑn k u ninjɑ n fɑɑl pɑkuɑk nɑ k mɑl wɑɑs k tul kpiemɔ nɑ.› Tɔn, jɑb bɑnlole din be k tie ninjɑnn, k sɑɑkuɑ po tɑn kuɑn puo, ŋɑɑn kpo k k mɑl wɑɑs. Ŋɑnn e k wun nbɑ wɑɑ u pɑɑk nɑ fɑɑl puo mɑnŋ, ŋɑɑn mun tɑn kpo k wɑɑs kɑɑ, k wun nbɑ wɑɑ bɑntɑ nɑ ni mun fɑɑl puo mɑnŋ biɑk, ŋɑɑn mun tɑn kpo, k k mɑl wɑɑs nɑn’ɔ. Nnɑ e k bin nbɑ wɑɑ nɑ kul ɑ kuɑn puo mɑnŋ, ŋɑɑn tɑn kpo, k b suɑ k mɑl bik nɑn’ɔ. L puolpo, k puo mɑnŋ mun tɑn kpo juont. Tɔn, k kpienm fiilu dɑɑl, b ŋmee tɑn sii yen puo mɑnŋ i? K mɑɑn b bɑnlole mɑnŋ kul ɑ din kuɑn’ɔ wɑɑ.» K Yiesu yet’b ɑ: «I kpɑnn i mɔnŋ e. I mi l pɑɑk ii? I k mi Yennu lolkpel kɑdɑɑɔk, k biɑ k mi u yiikuo. Kpienm i tɑnŋ i fiil kuun ni, b tɑn sii tie nɑn *mɑlɑkɑɑnbɑ nbɑ be *Yendɔunŋ ni nɑ e. Puokuɑnt nɑn jɑkunt tɑn sii kɑɑ. Nnɑlɑ, k jii jiin kpienm fiilu po, i k mi lii *Yennu sɔkni Muois diɑni ni siɑn nbɑ yien kunkonjɑgotuk tiik nɑ po nɑ ɑɑ? L diɑn k yet ɑ Yennu din yet Muois ɑ: ‹Min e tie Ablɑɑhɑɑnm Yennu, nɑn Isɑɑk Yennu, nɑn Sɑɑkɔb Yennu.› Yennu k tie kpienm Yennu kɑɑ, ŋɑɑn u tie fuotb Yennu e. I k mi e.» Tɔn, senniwɑntɔsuɑ din be lenŋ k gbɑt Yiesu nɑn Sɑɑdiuseɑnbɑ nɑ lɑbɑfɑɑnu mɑnŋ, k lɑ Yiesu nbɑ jiin b buboit mɑnŋ fɑnu biɑnŋ nbɑ. L pɑɑk k u bɑɑl Yiesu buol ni, k mun tɑn boi’ɔ ɑ: «K senlɑnu po e kpɑn tie senjɑɑnn i?» K Yiesu jiin’ɔ ɑ: «Lin nbɑ tie senjɑɑnn tie nnɑ e: ‹Islɑɑeltieb, gbiintl mɑn, Yonmdɑɑnɔ Yennu tie Yen-yenɔ kuɑ e. ‹Ii luon mɑn Yonmdɑɑnɔ Yennu nɑn i pɑlɑ kul, nɑn i sei kul, nɑn i dudukt kul, nɑn i pɑnŋ kul ɑ.› Senjɑɑnn nbɑ pukn ŋɑnle tie nnɑ e: ‹Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.› Sensɑu ji kɑɑ k gɑl senni ŋɑnle nbɑ nɑ.» K senniwɑntuɑ mɑnŋ yet Yiesu ɑ: «Wɑntuɑ, ɑ yɑbl ɑ. A yet bɑlmɔni e, Yonmdɑɑnɔ Yennu tie Yen-yenɔ kuɑ e, k yensɑu ji kɑɑ k pukn u po, ɑ nisɑɑlk i luon Yennu e nɑn u pɑl kul ɑ, nɑn u dudukt kul ɑ, nɑn u pɑnŋ kul ɑ, kii biɑ kii luon u luɑ nɑn wɑɑ luon u mɔnŋ biɑnŋ nbɑ nɑ. L kpɑɑ tɑlɑs bonciɑnn nɑn nilɔ n sɑk senni nbɑ ŋɑnle nɑ k gɑl wun jii bonkobt k mɑnn mɑnnsɑu k tul Yennu.» Yiesu nbɑ lɑ k u jiin nɑn yɑn nɑ, k u yet’ɔ ɑ: «A k fɔk nɑn Yennu nɑɑn.» Lin nbɑ nɑ puolpo k suɑ ji din k mɔk pɑl nɑn wun boi Yiesu buboisiɑt Yiesu nbɑ din tumi niib Yennu jɑɑnti ŋɑsɑɑkɑk ni, k u tɑn boi’b buboit ɑ: «Bee k senniwɑntieb yɑɑ ɑ *Klistu tie * Dɑɑfiid yɑɑbuonn i? K mɑɑn Foŋɑnm din ŋmɑktl Dɑɑfiid k u tiɑɔnŋ yet ɑ: ‹Yonmdɑɑnɔ Yennu din yet n Yonmdɑɑnɔ ɑ Kɑln n niidiitu po mɔkmɔk nɑn mɑɑ tɑn sɑɑ te fɑn ŋmɑɑ ɑ dɑtɑi ɑ tɑɑpɑɔnŋ ni.› Dɑɑfiid mɔnŋ mɔnŋ nbɑ din yiin Klistu nɑ ɑ: ‹Yonmdɑɑnɔ,› k nlee k b yien ɑ Klistu nɑ tie ŋuɑ Dɑɑfiid yɑɑbuonn i?» Nibul bonciɑnn din gbiint Yiesu wɑnnu mɑnŋ nɑn pɑlpienn. Wɑɑ wɑnn’b nɑ k u yet’b ɑ: «Ii mi senniwɑntieb nɑ po mɑn. Ŋɑnm e luon bii liɑ bɑɑnt kii lin kii sonm, kii biɑ kii gɑɑn bulcinfuonti dɑi ni nɑ. B i kuɑ Suifnbɑ jɑɑnti diet ni, b luon bii kɑɑl nijɑɑnɑ kɑɑni pɑɑk, k b i sɑɑn jɑɑnm ni, b biɑ luon yudɑnm kinkɑɑni boɑ e. Ŋɑnm e biɑ di pɑkɔi fobt, ŋɑɑn ji tuu jen ɑ k mei Yennu k wei, ɑ bin wɑnn b mɔnŋ nɑn b tie niŋɑnm e. B buolu tubdɑtu tɑn sii bi bonciɑnn.» Tɔn, k Yiesu kɑl Yennu jɑɑnti ŋɑsɑɑkɑk nɑ ni k kpiɑ nɑn Yennu piini lɑkl, ŋɑɑn goli niib nbɑ kpie b likli biɑnŋ nbɑ nɑ. K mɔktɑ bonciɑnn kpie likyulɑ bonciɑnn, ŋɑɑn k pɑkɔtɑlɑs-dɑɑnsuɑ mun tɑn bɑɑl kpien jinjennbɑ ŋɑnle. Ŋɑnn e tie kuuk nɑ. K Yiesu yiin u *puolpoweitieb k yet’b ɑ: «Bɑlmɔni e k n yien’i nɑ, pɑkɔtɑlɑs-dɑɑnɔ nɑ kpien piini nbɑ yɑb piini lɑkl nɑ ni k gɑl suɑ kul, k mɑɑn b kul pɑɑt b piini b mɔknciɑɔnŋ ni e, ŋɑɑn pɑkɔtɑlɑs-dɑɑnɔ nɑ ŋɑnin tul lin nbɑ kul k u mɔk e.» Yiesu nbɑ nyii Yennu jɑɑnti ŋɑsɑɑkɑk ni yuo nbɑ, k u *puolpoweitieb yenɔ yet’ɔ ɑ: «Wɑntuɑ, gotl tɑnŋɑnɑ nɑn digbenŋɑ nɑ jiɑk.» K u jiin ɑ: «A lɑ digbenŋɑ mɑnŋ ɑɑ? Ŋɑɑn b tɑn sɑɑ tut l kul k lu tinŋ ni wɑɑ, k nɑn fiɑkl tɑn kɑn tenn.» K Yiesu din tɑn sɑɑn kɑl *Oliifienbɑ jɑgbɑɑk pɑɑk Yennu jɑɑnti ŋɑsɑɑkɑk tuɑnn po, k Piɑl nɑn Sɑɑk nɑn Sɑn nɑn Andle tɑn bɑɑl u buol ni, b kuukuɑ, k boi’ɔ ɑ: «Yet’t, biɑ yuo e k nɑn fiɑkl ɑ tɑn kɑn tenn i? K bee tɑn sɑɑ tun k wɑnn nɑn l yuo mɑnŋ pel nɑ k l kul ɑ n tɑn tien’i?» K u yet’b ɑ: «Ii cek mɑn, k dɑɑ te k suɑ n kpɑnn’i mɑn. Niib bonciɑnn tɑn sɑɑ bɑɑl k tɑɑn n sɑnn k yien ɑ: ‹N tie *Klistu e›, k kpɑnn niib bonciɑnn. I tɑn sii gbiɑ tɔbi dɑnml nnɑ, nɑn bɑnfɔkl, ŋɑɑn i dɑɑ tiin jɑŋmɑɑni. L bonbuolu tɑn sɑɑ fɑbl ɑ l tun, ŋɑɑn l kɑn wɑnn ɑ l juontu e nɑ. «Nibuolu nɑn nibuolu tɑn sɑɑ kɔn nɑn lieb, k kpɑnbɑl nɑn kpɑnbɑl mun tɑn sɑɑ tuok k kɔn nɑn lieb. Tinŋ jijekt tɑn sii be tingbounŋ nɑ lokɑ kul po. K kon tɑn sii bɑɑ. Lin nbɑ nɑ tɑn sii tie nɑn mɑtyiɑlu pinpiik nɑ e. «Ii cek i mɔnŋ pɑɑk mɑn. B tɑn sɑɑ suol’i k sɑɑn nɑn’i buut-dɑnm buol ni, k buo’i *Suifnbɑ jɑɑnti diet ni. I tɑn sɑɑ set tini yudɑnm nɑn kpɑnbɑlɑ tuɑnn ni, n sɑnn pɑɑk, k di n *siɑlɑ b buol ni. L kpɑɑ tɑlɑs k tingbounŋ nibuolu kul ɑ n gbɑt n lɑbɑmɑnn nɑ e wɑɑ. B i tɑnŋ i suol’i k sɑɑn nɑn’i buut buol ni yuo nbɑ, i dɑɑ te k l dɑɑmi’i nɑn yɑɑ sɑɑ pɑk lin nbɑ nɑ. L yuo i tɑnŋ i bɑɑl, yin pɑk mɑɑn nbɑ sɑɑ bɑɑl i mɔi ni, k mɑɑn l kii tie yinm kɑɑ piɑk, ŋɑɑn l sii tie Foŋɑnm. L yuo mɑnŋ, nilɔ tuu tɑn sɑɑ kuɑt u mɔnŋ mɔnŋ ninjɑ k bin kpi’u, k bɑɑnbɑ mun tɑn sɑɑ tun nnɑ e k tul b mɔnŋ mɔnŋ wɑɑs, k wɑɑs mun biɑ tɑn sɑɑ kɔn nɑn b dɑnm, k cɑb’b nɑn kuun. K suɑ kul ɑ tɑn sii nɑn’i k mɑɑn yɑɑ wɑɑ’n nɑ pɑɑk, ŋɑɑn wun nbɑ tɑn gubn nɑn fɑlɑ yuo mɑnŋ juontu, tɑn sɑɑ lɑ fielu wɑɑ.» «I tɑn sɑɑ lɑ k bonbilɑnkɑnt nbɑ biil bonɑ bonciɑnn sie lɑ bo kii ŋɑn nɑn lii sie siɑn nbɑ. (Wun nbɑ tɑn lii diɑni nɑ, wun bɑnn lɑɑ wɑnt lin nbɑ.) L yuo mɑnŋ, bin nbɑ tɑn be Suude tinŋ ni, bin ciɑl k do juɑt. Nisuɑ nbɑ i tɑnŋ i be u dituɑtuk pɑɑk, u ji tɑn dɑɑ siik kuɑ u dieok ni ɑ wun jii siɑl. K nisuɑ nbɑ tɑn sii be kpɑɑb ni, u dɑɑ ŋmɑt ɑ wun jii u liɑtfuouk. L yuo mɑnŋ, tinpunmɑ nɑn bin nbɑ diɑ wɑlɑi tɑn sɑɑ di fɑlɑ bonciɑnn. Ii mei Yennu mɑn k u dɑɑ te k fɑlɑ nɑ bɑɑt wonfufuk yuo, k mɑɑn Yennu nbɑ din nɑn dulnyɑ nɑ pinpiik ni wɑɑ mɔkmɔk nɑn mɔtɑɑnɑ, suɑ dɑɑ k mi lɑ ninbɔnŋ k l bi k bɑɑl ninbɔnŋ nbɑ tɑn sii be dɑɑ mɑnŋ ni biɑnŋ nbɑ. K nunbɔnsiɑk mun ji kɑn mi be nɑn ŋɑnn nɑ. Yonmdɑɑnɔ i bo i kii wɑt dɑɑ mɑnŋ yɑbnt, suɑ bo tɑn kɑn biɑl u mɑnfuol ni, ŋɑɑn u nigɑnnkɑb pɑɑk k u wɑt dɑɑ mɑnŋ yɑbnt. «L yuo mɑnŋ, suɑ i tɑnŋ i yet’i ɑ: ‹Gotl mɑn Klistu be nnɑ,› ɑmi nɑ wɑɑ, i dɑɑ tie’u yɑdɑ, k mɑɑn fɑɑk Klistunbɑ nɑn fɑɑk sɔkniinbɑ tɑn sɑɑ bɑɑl k tuun nyinɑ nɑn bɑktnɔunŋ tuonɑ, ɑ bin kpɑnn Yennu nigɑnnkɑb, l i bo i sɑɑ fit. N ponŋ yet’i bonsiɑl kul e sinsinn ɑ, k suɑ yuo mɑnŋ dɑɑ k bɑɑl. Ŋɑɑn i cek mɑn fɑnu.» «Fɑlɑ nɑ puolpo e, k yennu nɑ tɑn sɑɑ bɔnn, k ŋmɑɑlk ji kɑn yent, k ŋmɑɑbilɑ tɑn sɑɑ nyi sɑnpɑɑpo k bɑɑ, k lin bɑɑ kul be sɑnpɑɑpo tɑn sɑɑ jekl. L yuo mɑnŋ k niib sɑɑ lɑ k *Nisɑɑlk Bijɑ tɑn sɑɑ dɔkt sɑnpɑgbɑnɑ ni nɑn yiikuo nɑn *yudɑnt bonciɑnn. U tɑn sɑɑ tun *mɑlɑkɑɑnbɑ tingbounŋ nɑ lokɑ ŋɑnnɑ nɑ kul po k bin tikl Yennu nigɑnnkɑb k lɑk’m.» «Ii ji fiigie k tumi yɑn mɑn. Yɑɑ tuu lɑ k tiik mɑnŋ bintl yuo nbɑ nɑ, i ji tuu mi nɑn siɑɔk pel e nɑ. Nnɑ e mun yuo nbɑ k i tɑn lɑɑt k lin nbɑ nɑ nbɑ kul tuun, yin bɑnn nɑn Nisɑɑlk Bijɑ jenu mɑnŋ pel e nɑ, l ji kɑn wei. Bɑlmɔni e k n yien’i nɑ, mɔtɑɑnɑ nigbounŋ nɑ kɑn kpo k gbenn kɑɑ wɑɑ k lin nbɑ nɑ kul n tun. Sɑnpɑɑk nɑn tinŋ tɑn sɑɑ bot ɑ, ŋɑɑn n mɑɑn ŋɑnin kɑn mi k bot fɑb ɑ.» «Suɑ k mi l dɑɑl mɑnŋ ɑmi l yuo. Mɑlɑkɑɑnbɑ nbɑ be *Yendɔunŋ ni k mi, k Yennu Bijɑ biɑ k mi. Bɑɑ Yennu kuukuɑ e mi. Ii cek mɑn, k dɑɑ guɑnt, k mɑɑn i k mi dɑɑl nbɑ k yuo mɑnŋ tɑn sɑɑ bɑɑl. L tɑn sii tie nɑn jɑsuɑ nbɑ nyii u ŋɑɑk ni k yɑɑt sɑɑ sɔnbɑnfɔkl, k cɑb u ŋɑɑjɑb yiikuo ɑ bii diɑ u ŋɑɑk, k biɑ cent b kul ɑ tuonɑ, k yet u ŋɑguulɔ ɑ wuu guu, ŋɑɑn sɑɑn. Ii mun i guu mɑn, k mɑɑn i k mi yuo nbɑ k ŋɑɑdɑɑnɔ sɑɑ jen, pɑsiɑl dɑɑjuouk o, ɑmi tɑnsuuni e, ɑmi sɑn-nyɑfɑɑl e, ɑmi sɑn-nyiɑɔk ni e. L i tie k u jen yiɑn ɑ, i dɑɑ te k wun lɑ’i k i guɑnt. L pɑɑk, mɑɑ yet’i lin nbɑ nɑ, n yien suɑ kul e, ii guu mɑn.» Tɔn, dɑɑ ŋɑnle din biɑl nɑn *yuktgɑltiɑlu jɑɑnm nɑn dɑɑ nbɑ k b di pɑɑnu nbɑ k b din tuu k tie * dɑtinŋ nɑ n piin, k Yennu jɑɑnti yudɑnm nɑn *senniwɑntieb luon sɔnu ɑ bin bɔl suol Yiesu k kpi’u, k yien ɑ: «T dɑɑ so’u jɑɑnm nɑ dɑɑ nɑ ni, k mɑɑn kpikpiluk sɑɑ bɑɑl ɑ.» Tɔn, k Yiesu din be Betɑɑni, juɑ nbɑ din tuu tie gbɑɑtl, k b yi’u Siimɔn nɑ ŋɑɑk ni, k di jiet. L yuo k puosuɑ tɑn kuɑ nɑn sɑlenŋɑnn, k l gbie nɑn tulɑɑli nbɑ mɔk nublu bonciɑnn nɑ wɑɑ, k l dɑɑɔk biɑ pɑɑl bonciɑnn, k b yi’l nɑɑl nɑ. K puo mɑnŋ biit sɑlenn nɑ k but tulɑɑli mɑnŋ Yiesu yul pɑɑk. K nisiɑb nbɑ din be lenŋ nɑ piɑk nɑn wutuol k yien ɑ: «Bee tien k u biil tulɑɑli nɑ nnɑ? B bo sɑɑ fit kɔi’l k lɑ likli k lin gɑl denienbɑ kobi ŋɑntɑ (300) wɑɑ, k bo jii’l sonm tɑlɑs-dɑnm.» K b jii puo mɑnŋ nɑn mɔdunŋ bonciɑnn. K Yiesu yet’b ɑ: «Nyikn puo nɑ. Bonŋɑnn e k u tun k tul’n mɑnŋ, k bee k i kpiln’mɔ nnɑ? Tɑlɑs-dɑnm sii tun be i buol ni yuo kul ɑ, k i sɑɑ fit sonm’b yuo nbɑ kul k i luon, ŋɑɑn min ŋɑnin kii tun be nnɑ kɑɑ. Puo mɑnŋ tun wɑɑ sɑɑ fit tun lin nbɑ e k tul’n. Wɑɑ but tulɑɑli nbɑ n gbɑnɑnt pɑɑk nɑ, u tien n kuun piinu siil e. Bɑlmɔni e k n yien’i nɑ, siɑn nbɑ kul k b sɑɑ muɑnt n lɑbɑmɑnn nɑ tingbounŋ nɑ ni, b biɑ sɑɑ muɑnt puo mɑnŋ nbɑ tun lin nbɑ nɑ, k lii tie tiɑlu e k tul’ɔ.» Ŋɑnn e k Yiesu tuomiinbɑ *piik nɑn bɑnle nɑ yenɔ, wun nbɑ k b yi’u Suudɑ Iskɑɑliɑɔt nɑ, din sɑɑn Yennu jɑɑnti yudɑnm buol ni ɑ wun kɔi Yiesu. Bɑɑ gbɑt nnɑ mɑnŋ yuo nbɑ nɑ, b pɑlɑ penn, k b senn mɔsonn ɑ b sɑɑ tul’ɔ likli l pɑɑk. K u ji piin luon sɔnu nbɑ k u sɑɑ jii Yiesu k kubn’ɔ b nuu ni. Tɔn, l dɑɑl nbɑ din tie dɑsinsinn nbɑ k b tuu di pɑɑnu nbɑ k b din tuu k tie dɑtinŋ nɑ, l dɑɑl e k b din tuu kpi pebis k tien *yuktgɑltiɑlu jɑɑnm jiet nɑ, k Yiesu *puolpoweitieb boi’ɔ ɑ: «A luon k tin sɑɑn lee k sɑɑ tien jɑɑnm mɑnŋ jiet siil k tul’ɑ ni i?» K u tun b ni bɑnle k yet’b ɑ: «Ii sɑɑ duo nɑ ni mɑn, k i sɑɑ sɑɑ cet jɑsuɑ k u jii nyunsuɑl. Ii wɑɑ’u mɑn nɑn ŋɑɑk nbɑ k u sɑɑ sɑɑ kuɑ nɑ ni, k yet l ŋɑɑk dɑɑnɔ ɑ: ‹Wɑntuɑ nɑ yɑɑ ɑ tin boi’ɑ ɑ sɑɑnm dieok nbɑ k ŋuɑ nɑn u puolpoweitieb sɑɑ di *yuktgɑltiɑlu jɑɑnm jiet nɑ be lee?› K u sɑɑ wɑnn’i dituɑtuk nbɑ yɑb k ponŋ tien bonsiɑ kul siil ɑ, k yin tien jiet mɑnŋ lenŋ.» K Yiesu puolpoweitieb bɑnle mɑnŋ sɑɑn duo mɑnŋ ni, k set sɑɑ lɑ k siɑl kul ɑ tun l biɑnŋ ni nɑn wɑɑ yet’b biɑnŋ nbɑ nɑ. K b tien jɑɑnm mɑnŋ jiet siil. K Yiesu nɑn u tuomiinbɑ piik nɑn bɑnle nɑ tɑn bɑɑl dɑɑjuouk. Bɑɑ kɑl k di jiet yuo nbɑ, k u tɑn yet’b ɑ: «Bɑlmɔni e k n yien’i nɑ, min nɑn i yenɔ nbɑ di jiet nɑ, l dɑɑnɔ yɑɑ wun kuɑt’n e.» K l biil b pɑlɑ ni, k b boi’ɔ yenɔ yenɔ ɑ: «A yien min ee?» K u jiin yet’b ɑ: «L lek tie yinm tuomiinbɑ piik nɑn bɑnle nɑ ni yenɔ nbɑ k min nɑn ŋuɑ lɑki tuun senn-yienŋ ni k di jiet nɑ e. *Nisɑɑlk Bijɑ set sɑɑ kpo nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ e, ŋɑɑn bonbiil sii be dɑɑnɔ nbɑ yɑɑ wun kuɑt’n nɑ pɑɑk. B ii dinŋ ii bo i kii mɑl l dɑɑnɔ gbɑɑ, l bo din sii sɔ u po.» Bɑɑ kɑl k di jiet mɑnŋ yuo nbɑ k Yiesu jii pɑɑnu k tul Yennu niipuouk l pɑɑk, ŋɑɑn ŋmit’l k tul u puolpoweitieb, k yet’b ɑ: «Gɑɑt mɑn. Nɑ e tie n gbɑnɑnt.» Ŋɑnn e k u biɑ jii *kɔp nɑn dɑmunŋ k tul Yennu niipuouk l pɑɑk, k jii k tul’b. K b kul ɑ nyuu. K u yet’b ɑ: «Lin nbɑ nɑ e tie n sɔn nbɑ sɑɑ nyi n gbɑnɑnt ni niib bonciɑnn pɑɑk, k l wɑnn nɑn Yennu *lol lolpɑɑnn. Bɑlmɔni e k n yien’i nɑ, n ji kɑn mi k nyu dɑmunŋ nɑ sie dɑɑl nbɑ k n tɑn sɑɑ nyu l dɑmunpɑɑnn Yennu nɑɑn ni nɑ.» Ŋɑnn e k b yin Yenjiɑntu *yɑni, ŋɑɑn nyii k sɑɑn *Oliifienbɑ jɑgbɑɑk pɑɑk. K Yiesu yet’b ɑ: «I kul ɑ nɑ tɑn sɑɑ tin k nyik’n ɑ, k mɑɑn l diɑn Yennu lolkpel kɑdɑɑɔk ni ɑ: ‹N tɑn sɑɑ kpi pekpɑɑlk nɑ, k pei nɑ tɑn sɑɑ tin yɑt.› Ŋɑɑn mi i tɑnŋ i fiil kuun ni, l puolpo n sɑɑ dɔnŋ k gɑl i tuɑnn k sɑɑn Gɑɑliile.» K Piɑl jiin yet ɑ: «N lieb nɑ kul i lek i nyik’ɑ, ŋɑɑn min ŋɑnin kɑn nyik’ɑ ni.» K Yiesu yet’ɔ ɑ: «Bɑlmɔni e k n yien’ɑ nɑ, nyiɑɔk nɑ, ɑ sɑɑ noi ɑ ɑ k mi’n tɑɑl muntɑ e wɑɑ k kojouk n bui liel tɑɑl munle.» K Piɑl ŋɑnm yet nɑn ninmɔnn ɑ: «L i lek i tie ɑ min nɑn fin n lɑkn kpo gbɑɑ, ŋɑɑn n kɑn mi k noi ɑ n k mi’ɑ ni.» K u lieb nɑ mun biɑ yet nnɑ. L puolpo k Yiesu nɑn u tuomiinbɑ piik nɑn bɑnle sɑɑn siɑn nbɑ k b yi Getsemɑɑne nɑ. Lenŋ e k u yet’b ɑ: «Kɑln nnɑ mɑn ŋɑɑn k n sɑɑn k sɑɑ miɑl Yennu.» Ŋɑnn e k u jii Piɑl nɑn Sɑɑk nɑn Sɑn k sɑɑn. K u yɑn put k u pɑl biil bonciɑnn, k u yet’b ɑ: «Pɑlbiil buolu nbɑ suol’n nɑ pel lin kpi’n ɑ. Biɑt nnɑ mɑn kii nyɔi.» Ŋɑnn e k u cɑt k sɑɑn tuɑnn po wɑɑnm-nnɑ, k bɑɑ fɑbn, k mei Yennu ɑ l i bo i sɑɑ fit, Yennu n ŋɑɑn k fɑlɑ nbɑ bɑɑt u pɑɑk nɑ n yɑkl’ɔ, k yet ɑ: «Abbɑ! n Bɑɑ, ɑ sɑɑ fit tun bonsiɑl kul ɑ. Dɑɑ ŋɑɑnt k n kuɑ bonbiil nbɑ bɑɑt n pɑɑk nɑ ni, ŋɑɑn dɑɑ te k l tie mɑɑ luon biɑnŋ nbɑ kɑɑ, ŋɑɑn te k lin tien fɑɑ luon biɑnŋ nbɑ e.» Ŋɑnn e k u tunn k jen u puolpoweitieb bɑntɑ nɑ buol ni, k suɑ k b tɑɑn guɑn ɑ. K u boi Piɑl ɑ: «Siimɔn, ɑ guɑnt ee? A kɑn fit kii nyɔi wɑɑn ii?» ŋɑɑn yet’b ɑ: «Ii nyɔi mɑn ŋɑɑn kii mei Yennu k i tɑn dɑɑ kuɑ jinjɑnmi ni. I sei ŋɑnin luon lin tun lin nbɑ siɑn, ŋɑɑn k i gbɑnɑnt kɑɑ pɑnŋ.» K u biɑ sɑɑn Yenmiɑlu k sɑɑ mei nɑn wɑɑ bo miɑl biɑnŋ nbɑ sinsinn nɑ, ŋɑɑn biɑ ŋmɑt k sɑɑ bɑɑl suɑ k u puolpoweitieb nɑ biɑ guɑn ɑ, k mɑɑn guɑn mɔk’b bonciɑnn. K b k mi bɑɑ sɑɑ yet’ɔ lin nbɑ l yuo mɑnŋ. Wɑɑ tɑn jen tɑɑpɑɔnŋ muntɑ ni, k u boi’b ɑ: «I biɑ lek dɑɑ duɑ guɑnt e k foi ii? L jɑnŋ ɑ mɑn. Yuo mɑnŋ bɑɑl nɑ. Gotl mɑn, b ji kuɑt Nisɑɑlk Bijɑ nɑ k tien’ɔ biitdɑnm nuu ni wɑɑ. Fiit mɑn k tin sɑɑn. Wun nbɑ nyii n puol nɑ bɑɑt.» Yiesu nbɑ dɑɑ piɑk nɑ, k u tuomiinbɑ piik nɑn bɑnle nɑ ni yenɔ, wun nbɑ k b din yi’u Suudɑ nɑ, bɑɑl nɑn nibulciɑɔnŋ, k b siɑb diɑ juk-bɑnjɑi, k siɑb mun diɑ gbɑjɑlɑ, k Yennu jɑɑnti yudɑnm nɑn senniwɑntieb nɑn sɑɑkɑb tun’m. K mɔlɑnfikdɑɑnɔ Suudɑ mɑnŋ ponŋ wɑnn’b nyinsiɑl ɑ, ɑ: «Mi i sɑi fuont wun nbɑ k muɑt u tɑnkpinn, yi mi nɑn ŋuɑ e nɑ. Yin suol’ɔ kii guu’u kii sɑɑ nɑn’ɔ mɑn.» Suudɑ nbɑ tɑn bɑɑl yuo nbɑ, l tɑɑkpɑɑk ni k u sɑɑn Yiesu buol ni k yet’ɔ ɑ: «Cɑnbɑɑ.» ŋɑɑn muɑt u tɑnkpinn. K niib nɑ ji suol Yiesu k kub’ɔ kenken. Ŋɑnn e k u puolpoweitieb ni yenɔ nbɑ sie lenŋ tɑn nuɑt u juk-bɑnjiɑk k cuɑ Yennu jɑɑnti yudɑɑnɔ dɑɑbl tubl k lu. K Yiesu boi’b ɑ: «I bɑɑl nɑn juk-bɑnjɑi nɑn gbɑjɑlɑ nɑ ɑ i tɑn suol’n nɑn n tie fɑt-tuɑ e nɑ ɑɑ? N dɑɑn tuu be i buol Yennu jɑɑnti ŋɑsɑɑkɑk ni dɑɑl kul ɑ k wɑnt niib Yennu mɑɑn, k i tuu k so’n, ŋɑɑn l kpɑɑ tɑlɑs nɑn Yennu lolkpel kɑdɑɑɔk diɑni mɑnŋ n tien gbien.» K u puolpoweitieb nɑ kul ji ciɑl ŋɑɑn nyik’ɔ. K nɑɑsinbisuɑ nnɑ din gbɑb cincenn kuukuɑ k wɑɑ Yiesu puolpo K b tɑn bib’ɔ k suol u cincenn, k u nyik u cincenn mɑnŋ b nuu ni, ŋɑɑn ciɑl yɑnn. K b jii Yiesu k sɑɑn nɑn’ɔ Yennu jɑɑnti yudɑɑnɔ ŋɑɑk, siɑn nbɑ k jɑɑnti yudɑnm, nɑn tinŋ nɑ ni sɑɑkɑb, nɑn senniwɑntieb din lɑkn. K Piɑl din be Yiesu puolpo k wɑɑ bɑnfɔkl ɑ mɔkmɔk nɑn bɑɑ tɑn kuɑ Yennu jɑɑnti yudɑɑnɔ mɑnŋ ŋɑɑk ni. K Piɑl sɑɑn kɑl k pukn sejebit nɑ po k b nɑni muu. Ŋɑnn e k Yennu jɑɑnti yudɑnm nɑn sɑɑkɑb mɑnŋ kul yɑbl b mɔnŋ pɑɑk ɑ bin lɑ siɑlɑɑdɑnm mɔb ni lin nbɑ k b sɑɑ jii Yiesu biit k kpi’u, ŋɑɑn kɔnŋ u bisiɑt. Siɑlɑɑdɑnm bonciɑnn din fɑ fɑi k tien’ɔ, ŋɑɑn k b fɑi mɑnŋ din k wei liel. L yuo k jɑsiɑb fiil set k fɑɑl fɑɑk tul’ɔ ɑ: «T gbɑt k u yet ɑ u sɑɑ bet Yennu jɑɑnti ŋɑsɑɑkɑk nbɑ k niib din mɑɑ nɑn b nii nɑ, ŋɑɑn l dɑɑ ŋɑntɑ sinsuuk ni k u sɑɑ jii k mɑɑ’l, k l tɑn kii tie nilɔ nii kɑɑ mɑɑ’l.» Ŋɑɑn l kul yɑnn. B fɑi mɑnŋ lek biɑ din k wei liel. Ŋɑnn e k Yennu jɑɑnti yudɑɑnɔ nɑ fiil k boi Yiesu ɑ: «Bɑli nbɑ k jɑb mɑnŋ piɑk k tien’ɑ nɑ po, l pɑɑk tie bee? A k mɔk l jiinu uu?» Ŋɑɑn k Yiesu lek ŋmin ɑ, k k jiin siɑl. K u biɑ ŋɑnm boi’ɔ ɑ: «Fin e set tie *Klistu wun nbɑ tie ŋuɑ Yennu nbɑ k t dont’ɔ nɑ Bijɑ nɑ ɑɑ?» K Yiesu jiin ɑ: «Nnn, min e nɑ. K i tɑn sɑɑ lɑ Nisɑɑlk Bijɑ k u kɑl Yɑbnt Yennu niidiitu po, k biɑ tɑn sɑɑ lɑ’u k u be sɑnpɑgbɑnɑ ni k siik.» Ŋɑnn e k Yennu jɑɑnti yudɑɑnɔ mɑnŋ wutuol duo k u suol u mɔnŋ tiɑt k pɑt, ŋɑɑn yet ɑ: «Bee te k t ji luon siɑlsuɑ. I mɔnŋ gbɑt wɑɑ piɑk k biil Yennu biɑnŋ nbɑ. I duki nlee?» K b kul sɑk ɑ u biil ɑ, u kpɑn ŋɑn nɑn kuun e. K b siɑb siin mɔsɑnt u pɑɑk, k b piit u nunm po, ŋɑɑn lubn’ɔ nikulɑ k yien’ɔ ɑ: «Buntl wun nbɑ peb’ɑ nɑ.» K sejebit nɑ suol’ɔ, k jɑk’ɔ nɑn tɑnpɑki. Tɔn, Piɑl lek dɑɑ din be nɑn-yel po k nɑni muu, k Yennu jɑɑnti yudɑɑnɔ ŋɑɑsɑpɑɑntuontun-yenɔ tɑn bɑɑl lɑ’u, k got’ɔ silll, k tɑn yet’ɔ ɑ: «A mun tuu wɑɑ Nɑɑsɑɑlet nilɔ Yiesu mɑnŋ.» K Piɑl noi k yet ɑ: «N k mi. N k gbɑt fɑɑ piɑk lin nbɑ nɑ pɑɑk,» ŋɑɑn fiil nyii. K sɑpɑɑmɔ nɑ biɑ lɑ’u lenŋ k ŋɑnmt yien nisiɑb nbɑ sie lenŋ nɑ ɑ: «Juɑ nɑ mun tie u puolpoweitieb nɑ yenɔ e.» Ŋɑɑn k Piɑl biɑ ŋɑnm noi. K l biɑ yɑnn wɑɑnm-nnɑ k bin nbɑ sie lenŋ mɑnŋ ŋɑnm jɑk Piɑl ɑ: «A set tie niib nɑ ni yenɔ e, k mɑɑn ɑ mun tie Gɑɑliile nilɔ.» Ŋɑnn e k Piɑl pol ɑ: «L i tie k n fɑɑl fɑɑk i e, Yennu n dɑt n tubl, min k mi juɑ nbɑ k i piɑk u po nɑ.» L yuo mɑnŋ k kojouk bui k pukn tɑɑpɑɔnŋ munle ni, k Piɑl ji tiɑl biɑnŋ nbɑ k Yiesu yet’ɔ nɑ ɑ: «A sɑɑ yet ɑ ɑ k mi’n tɑɑl muntɑ e wɑɑ, ɑ k kojouk n tɑn bui tɑɑl munle ni.» L yuo k Piɑl mɔ. K Yennu jɑɑnti yudɑnm, nɑn tinŋ nɑ ni sɑɑkɑb, nɑn *senniwɑntieb, nɑn *Suifnbɑ sɑɑkɑb kul lɑkn sɑn-nyɑpob ni, k lol lolɑ, k bɑɑn Yiesu bɑnt k jii’u sɑɑn nɑn’ɔ tinŋ yudɑɑnɔ nbɑ k b yi’u *Piilɑɑt nɑ buol. K Piilɑɑt boi’ɔ ɑ: «Fin e set tie Suifnbɑ Kpɑnbɑl nɑ ɑɑ?» K Yiesu jiin ɑ: «Fin yɑɑ.» K Yennu jɑɑnti yudɑnm mɑnŋ tɑɑl Yiesu bonɑ bonciɑnn pɑɑk. K Piilɑɑt biɑ boi’ɔ ɑ: «A kɑn jiin siɑl ii? Gbiintl bɑɑ wɑɑ’ɑ biɑnŋ nbɑ.» Ŋɑɑn k Yiesu k jiin siɑl, k l ji bɑkt Piilɑɑt. Tɔn, *yuktgɑltiɑlu jɑɑnm dinu yuo kul, Piilɑɑt tuu nyinn niyenɔ kuɑ e dɑnsɑlk ni, wun nbɑ k niib luon bin ŋɑɑ’u. L yuo mɑnŋ k jɑsuɑ din be dɑnsɑlk, k u sɑnn yi Bɑɑlɑɑbɑɑs. Ŋuɑ nɑn nisiɑb din be dɑnsɑlk k mɑɑn b kpikpiluk nbɑ k b dɑɑn tie duo nɑ ni k kpii nilɔ nɑ pɑɑk. Ŋɑnn e k nibul mɑnŋ din lɑkn k mei Piilɑɑt ɑ wun tun wɑɑ din tuu tuun bɑnnu nbɑ yɑɑnn. K u boi’b ɑ: «I luon k n nyinn Suifnbɑ Kpɑnbɑl nɑ ee?» K mɑɑn u din mi fɑnu nɑn jɑɑnti yudɑnm *funfunn pɑɑk e te k b jii Yiesu k tien u nuu ni. Ŋɑɑn k Yennu jɑɑnti yudɑnm mɑnŋ din wɑɑ tik nibul nɑ ɑ bin yet’ɔ k wun nyinn Bɑɑlɑɑbɑɑs e k tul’b. K Piilɑɑt biɑ ŋɑnm boi’b ɑ: «K wun nbɑ k i yi’u Suifnbɑ Kpɑnbɑl nɑ, i luon k n tien’ɔ nlee?» K b tiɑn jiin sɑnpɑɑpo wɑɑ ɑ: «Kpɑɑn’mɔ dɑpunpunn pɑɑk.» K Piilɑɑt boi’b ɑ: «Bee pɑɑk i? U biit mɑntk tie lɑnn po e?» K b biɑ ŋɑnm tiɑn sɑnpɑɑpo wɑɑ ɑ: «Kpɑɑn’mɔ dɑpunpunn pɑɑk.» K Piilɑɑt luon wun penn nibul mɑnŋ pɑlɑ, l pɑɑk k u nyinn Bɑɑlɑɑbɑɑs tul’b, ŋɑɑn te k b buo Yiesu, k jii’u tul’b ɑ bin kpɑɑ’u dɑpunpunn pɑɑk. K sejenm jii Yiesu k kuɑ nɑn’ɔ tinŋ nɑ yudɑɑnɔ Piilɑɑt ŋɑɑdundounŋ ni, k yiin b tɔk-nɑn-lieb kul. K b jii bɑɑnmunŋ nnɑ k lɑnn’ɔ, ŋɑɑn jii kunkoni k luu nɑɑn foklk k yiln’mɔ, ŋɑɑn ji fuont’ɔ ɑ: «Suifnbɑ Kpɑnbɑl, fuontu wɑɑ.» ŋɑɑn jii lɑnbɑnbik k fɑɑ u yul pɑɑk, k siin mɔsɑnt u pɑɑk, k gbɑɑ b dunɑ pɑɑk u tuɑnn ni. Bɑɑ dɑɑn’ɔ nyɑtuk k gbenn yuo nbɑ, k b liɑt bɑɑnmunŋ nɑ, ŋɑɑn jii u mɔnŋ mɔnŋ tiɑt nɑ k lɑnn’ɔ, k jii’u k nyii nɑn’ɔ ɑ bin sɑɑn kpɑɑ’u dɑpunpunn pɑɑk. L yuo k Siilenn jɑsuɑ din be, k u sɑnn yi Siimɔn, wun nbɑ tie Aleksɑndl nɑn Lufus bɑɑ nɑ, k u nyii kpɑɑnt ni k gɑɑl lenŋ. K sejenm miɑ’u ɑ wun gɑɑl Yiesu kuun dɑpunpunn nɑ k jii. K b jii Yiesu k sɑɑ nɑn’ɔ siɑn nbɑ k b yi’l Golgotɑ, k l pɑɑk tie: «Yukpɑbuk buol nɑ.» Lenŋ e k nisiɑb din tul’ɔ dɑmunŋ nbɑ ŋmɑt nɑn nyɔksɑu nbɑ k b yi’l miil nɑ, ŋɑɑn k u yet l nyunu. K sejenm kpɑɑ’u dɑpunpunn nɑ pɑɑk, ŋɑɑn tol b lieb u tiɑt nɑ, ŋɑɑn tɔ tiɑtiɑ k cent u tiɑt mɑnŋ. B din kpɑɑ’u sɑn-nyiɑɔk ni e, kut mun-yiɑ yuo. K b din diɑn lin nbɑ pɑɑk te k b kpɑɑ’u k tɑbn u dɑpunpunn nɑ pɑɑk, k l yɑɑ ɑ: «Suifnbɑ Kpɑnbɑl mɑnŋ e nɑ.» B biɑ din kpɑɑ fɑt-tieb bɑnle dɑpunpunɑ pɑɑk k pukn u po, k yenɔ din be u niidiitu po, k luɑ nɑ mun din be u niigɑnŋ po. (K l gbien lin nbɑ diɑn Yennu lolkpel kɑdɑɑɔk ni ɑ: «B jii’u tien biitdɑnm sinsuuk ni.») Tɔn, k bin nbɑ sonm gɑɑl lenŋ nɑ gumi yulɑ ŋɑɑn suki’ɔ, k yien ɑ: «Fin. A tuu yɑɑ ɑ sɑɑ fit bet Yennu jɑɑnti ŋɑsɑɑkɑk nɑ ŋɑɑn biɑ mɑɑ’l dɑɑ ŋɑntɑ sinsuuk ni. Tɔn, fɑn nyi dɑpunpunn nɑ pɑɑk k sik k fɑt ɑ mɔnŋ.» Nnɑ e k Yennu jɑɑnti yudɑnm nɑn senniwɑntieb mun biɑ lɑɑ’u, ŋɑɑn yien tien b lieb ɑ: «U tuu fɑɑl lieb, ŋɑɑn tɑn kɑn fit k fɑt u mɔnŋ. Ŋɑɑnt k Suifnbɑ Kpɑnbɑl, *Klistu nɑ, n nyi dɑpunpunn nɑ pɑɑk k sik nnɑ mɔtɑɑnɑ, k tin lɑ k tien’ɔ yɑdɑ.» K bin nbɑ k b pukn u po k kpɑɑ’b nɑ mun suki’ɔ. Lɑɑ din tɑn bɑɑl yensuuk ni yuo nbɑ, k duo nɑ kul ji din bɔnn k sɑɑ bɑɑl kut muntɑ. Kut muntɑ yuo e, k Yiesu yikn sɑnpɑɑpo wɑɑ nɑn kunkɔsɑɑkɑl, k yet ɑ: «Eloi, Eloi, lemɑ sɑɑbɑɑktɑɑni?» k l pɑɑk tie ɑ: «N Yennu n Yennu, bee k ɑ lu’n i?» K bin nbɑ sie lenŋ nɑ nbɑ gbɑt u yiini mɑnŋ, k b siɑb yet ɑ: «Gbiintl mɑn. U yi Elii e.» Ŋɑnn e k b ni yenɔ tin k sɑɑ jii sɑɑpo k suunt dɑmiituk nnɑ ni, k jii sɑkn dɑɑɔk pɑɑk, ŋɑɑn donn k tul’ɔ ɑ wun nyu, k biɑ yet ɑ: «I ŋɑɑn k tii guu k lɑɑn Elii bɑɑt ɑ wun sikn’ɔ dɑpunpunn nɑ pɑɑk.» K Yiesu ŋɑnm yikn nɑn kunkɔsɑɑkɑl, ŋɑɑn nɑk l yuo. L yuo nɑ k cincenn nbɑ tuu juɑn k puun Yennu jɑɑnti ŋɑsɑɑkɑk ni nɑ ji bɔkt l yul pɑɑk k tɑn sik tinŋ ni. K sejenm yudɑɑnɔ nbɑ din sie dɑpunpunn mɑnŋ buol nɑ, wɑɑ lɑ biɑnŋ nbɑ k Yiesu kpo nɑ, k u ji yet ɑ: «Bɑlmɔni e, juɑ nɑ set tie Yennu Bijɑ e.» Tɔn, Mɑgdɑɑlɑ puo Mɑɑli nɑn Mɑɑli wun nbɑ din tie Sose nɑn Sɑɑk bik nɑɑ nɑ, nɑn Sɑɑlome din be, k b din pukn puosiɑb po k sie bɑnfɔkl ɑ ŋɑɑn goli. B ponŋ din wɑɑ Yiesu yuo nbɑ k u din be Gɑɑliile ni e wɑɑ k sonmt’ɔ. Puolieb bonciɑnn nbɑ wei Yiesu k bɑɑl Selusɑɑlenm nɑ mun biɑ din be lenŋ. Piilɑɑt nbɑ din gbɑt ɑ Yiesu ponŋ kpo wɑɑ nɑ, k l ji yɑɑl ŋɑɑn lit’ɔ, k u yiin sejenm yudɑɑnɔ nɑ k tɑn boi’ɔ ɑ wun lɑɑn Yiesu nbɑ kpo l wei wɑɑ? Yuo nbɑ k u gbɑt yudɑɑnɔ mɑnŋ mɔb ni nɑ, k u yiin Suosiɑf mɑnŋ k tɑn cɑb’ɔ ɑ wun jii Yiesu gbɑnɑnt nɑ. K Suosiɑf din dɑɑ kɑtinŋ, k kpɑɑt Yiesu gbɑnɑnt dɑpunpunn nɑ pɑɑk, k pɔbn’ɔ lenŋ, k jii’u k pii kɑɑɔk nbɑ k b ponŋ din jiɑl tɑnpiiuk, k bikt kɑtɑnu, k biin l mɔb nɑ. K Mɑgdɑɑlɑ puo Mɑɑli nɑn Mɑɑli wun nbɑ din tie Sose nɑɑ nɑ din lɑ siɑn nbɑ k b pii Yiesu gbɑnɑnt mɑnŋ ɑ. *Fuondɑɑl nbɑ din tɑn gɑl nɑ, k Mɑgdɑɑlɑ puo Mɑɑli, nɑn Sɑɑlome, nɑn Mɑɑli wun nbɑ din tie Sɑɑk nɑɑ nɑ, din sɑɑn k sɑɑ dɑɑ tulɑɑlnunubt ɑ bin sɑɑn but Yiesu gbɑnɑnt pɑɑk. *Suifnbɑ Fuondɑɑl nbɑ din gɑl k l yent sɑn-nyɑpob ni k b din sɑɑ kɑɑɔk mɑnŋ buol ni. Bɑɑ kuɑ kɑɑɔk mɑnŋ ni nɑ, b lɑ nɑɑsimɔ nnɑ, k u liɑ bɑɑnpieounŋ k kɑl niidiitu po, k l tien’m jijiet bonciɑnn. K nɑɑsimɔ mɑnŋ yet’b ɑ: «I dɑɑ jie siɑl mɑn. I luon Nɑɑsɑɑlet nilɔ Yiesu nbɑ k b kpii’u dɑpunpunn pɑɑk nɑ e. U fiil kuun ni wɑɑ. U kɑɑ nnɑ. Gotl mɑn, bɑɑ dɑɑn bilɔ siɑn nbɑ nɑ. Ŋɑɑn i ŋmɑt k sɑɑ yet Piɑl nɑn *puolpoweitelieb ɑ u gɑl i tuɑnn po k sɑɑn Gɑɑliile wɑɑ. Lenŋ e k i sɑɑ sɑɑ lɑ’u nɑn wɑɑ ponŋ dɑɑn yet’i biɑnŋ nbɑ nɑ.» K l yɑɑl ŋɑɑn lit puob mɑnŋ, k b gbɑnɑnt jek bonciɑnn, k b nyii kɑɑɔk nɑ ni, k ciɑl. B lek k fɑɑ suɑ l lɑbɑɑl, k mɑɑn jɑŋmɑɑni din suol’b bonciɑnn. [Tɔn, Yiesu nbɑ din fiil kuun ni lɑsl dɑɑl sɑn-nyiɑɔk ni nɑ, u din dɔnŋ dɔkt Mɑgdɑɑlɑ puo Mɑɑli pɑɑk e, wun nbɑ k u din nyinn nɑlnbiit bɑnlole u ni nɑ. K puo mɑnŋ sɑɑn sɑɑ yet Yiesu wei-nɑn-lieb nbɑ mɔ k fɑbn nɑ. Ŋɑɑn bɑɑ gbɑt ɑ Yiesu jen u mɑnfuol ni k u lɑ’u nɑ, b k sɑk tien’ɔ yɑdɑ. Lin nbɑ nɑ puolpo e k Yiesu puolpoweitieb bɑnle siɑb din tɑn nyii duo nɑ ni k sonm sɔnu ni k sɑɑ siɑl buol, k u lebt u mɔnŋ k dɔkt b pɑɑk. K b ŋmɑt jen duo nɑ ni k tɑn yet b lieb, ŋɑɑn k b lek k tien’m yɑdɑ. L puolpo e biɑk k Yiesu tuomiinbɑ piik nɑn yenɔ kuɑ nɑ din kɑl k di jiet, k Yiesu tɑn dɔkt b pɑɑk, k kpil’b b yɑdɑ puɑln pɑɑk nɑn b tubɑ nbɑ kpɑɑ biɑnŋ nbɑ nɑ pɑɑk, k mɑɑn b k tien bin nbɑ lɑ nɑn u fiil kuun ni nɑ yɑdɑ. K u biɑ yet’b ɑ: «Ii sɑɑ kii muɑntl lɑbɑmɑnn nɑ k tul suɑ kul tingbounŋ nɑ kul sɑɑk ɑ po. Wun nbɑ kul tien yɑdɑ, k b wul’ɔ Yennu nyunwulu, u sɑɑ lɑ fielu, ŋɑɑn wun nbɑ kul k tien yɑdɑ, Yennu sɑɑ bu u buut k biil’ɔ wɑɑ. Ŋɑɑn bin nbɑ tien yɑdɑ sɑɑ tun yɑɑl-lituk tuonɑ nɑ e: b sii tɑɑn n sɑnn k nyint nɑlnbiit niib ni, k biɑ piɑk mɑɑn nbɑ k b k mi pɑk. B i tɑnŋ i suol wɑi, ɑmi b i tɑnŋ i nyuu bonbiil, l kɑn tien’m siɑl. B biɑ sɑɑ yii b nii bɑɑtb pɑɑk k b sɑɑ lɑ lɑɑfiɑ.» Tɔn, Yonmdɑɑnɔ Yiesu nbɑ pɑk mɑɑn nɑ k gbenn yuo nbɑ, k Yennu te k u duo sɑnpɑɑpo k sɑɑ kɑl ŋuɑ Yennu niidiitu po. L puolpo k u puolpoweitieb sɑɑn k sɑɑ muɑntl u lɑbɑmɑnn lokl kul po, k Yonmdɑɑnɔ din be nɑn’m, k te k b tuun yɑɑl-lituk tuonɑ, k l tuonɑ nɑ din wɑnn *siɑlɑ ɑ b muɑnti mɑnŋ set tie bɑlmɔni e.] Cɑnbɑɑ Teofiil: Niib bonciɑnn din lɑ Yennu nbɑ din tun lin nbɑ t sinsuuk ni l pinpiik ni nɑn mɔtɑɑnɑ. Bɑɑ din lɑ lin nbɑ nɑn b ninbinɑ, b biɑ din wɑnn’t. Bin nbɑ din wɑnn’t lin nbɑ nɑ, ŋɑnm e kpɑnt Yennu tuontunnɑ. Ŋɑnn e te k n mɔnŋ boi k fiitl bonŋɑnn k lɑ l bonsiɑl kul nbɑ din piin biɑnŋ nbɑ nɑn lɑɑ din sɑɑ biɑnŋ nbɑ. Cɑnbɑɑ, n biɑ dukn nɑn l ŋɑn k n diɑn l kul k tul’ɑ k ɑ fit bɑnn nɑn lin nbɑ kul k b wɑnn’ɑ nɑ, l set tie bɑlmɔni e. Yuo nbɑ k *Heluod din tie Suude tinŋ kpɑnbɑl nɑ, k Yennu mɑnntɔsuɑ din be k u sɑnn yi Sɑɑkɑɑli, k u be Abiɑ pɑɑbu ni k tuun, k u ŋɑɑpuo mun din tie mɑnntuɑ *Aɑlɔn yɑɑbuonn e, k u sɑnn yi Eliisɑɑbet. B bɑnle din mɔk binbenŋ nbɑ gbuot Yennu nunm, k sɑɑk u mɔb *senni kul nyiknyik. B din k mɔk bik, k mɑɑn Eliisɑɑbet din tie puokɑnmɑtl e, k b bɑnle kul biɑ ponŋ din kpet ɑ. Dɑsiɑl k Sɑɑkɑɑli tuontun-yuo tɑn bɑɑl u pɑɑbu ni, k u din tɑn yɑɑ wun tun u tuonn k tul Yennu nɑn b pɑɑbu nbɑ tuu tuun biɑnŋ nbɑ nɑ. L yuo nɑ k b din tɑn tɔ tiɑtiɑ nɑn b mɑnntieb kɑɑl nbɑ din tie biɑnŋ nbɑ, k lukt’ɔ ɑ wun kuɑ Yonmdɑɑnɔ jɑɑnti ŋɑsɑɑkɑk ni k wubn bonnunubt. K nibulciɑɔnŋ nɑ kul din biɑl sie nɑn-yel k mei Yennu, yuo nbɑ k u dɑɑ din wubnt bonnunubt nɑ. L yuo nɑ k Yonmdɑɑnɔ *mɑlɑkɑ dɔkt Sɑɑkɑɑli pɑɑk k set bonnunubt binbintl nɑ diitu po. Sɑɑkɑɑli nbɑ din tɑn lɑ’u yuo nbɑ, k u yɑn put ŋmɑt, k jɑŋmɑɑni suol’ɔ. Ŋɑɑn k mɑlɑkɑ mɑnŋ yet’ɔ ɑ: «Sɑɑkɑɑli, dɑɑ tiin jɑŋmɑɑni. Yennu ponŋ dɔnŋ gbɑt ɑ miɑlu wɑɑ, k ɑ ŋɑɑpuo Eliisɑɑbet tɑn sɑɑ mɑl bonjɑk k tul’ɑ, k ɑ tɑn sɑɑ pul u sɑnn Sɑn. K l tɑn sɑɑ mɑnŋ’ɑ k ɑ pɑl n penn, k niib bonciɑnn pɑlɑ mun tɑn sɑɑ penn u mɑɑlu mɑnŋ pɑɑk, k mɑɑn u tɑn sii tie tuontunjɑɑnn e Yonmdɑɑnɔ tuɑnn. U kɑn mi k nyu dɑmunŋ ɑmi dɑbuolu kul nbɑ mɔ, k u tɑn sɑɑ gbie nɑn Foŋɑnm ŋɑɑn dɑɑ be u nɑɑ puol ni. U tɑn sɑɑ te k Islɑɑeltieb bonciɑnn n ŋmɑt k jen Yonmdɑɑnɔ Yennu buol ni. U sii mɔk siek nbɑ din be Elii ni nɑ nɑn u pɑnŋ k tɑn sɑɑ dɔnŋ liit Yonmdɑɑnɔ ɑ wun ŋɑnm bɑɑnbɑ nɑn b wɑɑs sinsuuk ni, k biɑ tunn mɔyetdɑnm yɑn k lii tie nɑn yentinu dɑnm yɑl nɑ, k biɑ te k niib n tien siil kii guu Yonmdɑɑnɔ.» K Sɑɑkɑɑli ji din boi mɑlɑkɑ mɑnŋ, «N sɑɑ tien nlee k bɑnn nɑn lin nbɑ nɑ tie mɔni? K mɑɑn n kpet ɑ, k n ŋɑɑpuo mun biɑ kpet ɑ.» K mɑlɑkɑ mɑnŋ jiin yet’ɔ ɑ: «Min e tie Gɑbliel! Min e be Yennu tuɑnn k tuun u tuonn, k u tun’n ɑ buol, ɑ n tɑn yet’ɑ ŋɑɑn wɑnn’ɑ lɑbɑmɑnn nɑ. Ŋɑɑn ɑ sɑɑ muu k kii fit piɑk i nɑn yuo nbɑ k l tɑn sɑɑ tien mɔni nɑ, k mɑɑn ɑ k tien n mɑɑn nbɑ sɑɑ tien mɔni nɑ yɑdɑ.» Tɔn, k niib nbɑ din biɑl sie nɑn-yel k guu Sɑɑkɑɑli, k l bɑkt’b k mɑɑn wɑɑ wei Yennu jɑɑnti ŋɑsɑɑkɑk ni biɑnŋ nbɑ nɑ. Wɑɑ ji din tɑn nyii yuo nbɑ, u din k fit piɑk, k b ji din bɑnn nɑn u lɑ yelntu e Yennu jɑɑnti ŋɑsɑɑkɑk nɑ ni, k u ji piɑk muutl k lɑbn nii k tien’m. Yuo nbɑ k u tuonɑ din tɑn gbenn Yennu jɑɑnti ŋɑsɑɑkɑk nnɑ k u kun ŋɑɑk ni. L puolpo e k u ŋɑɑpuo Eliisɑɑbet din tɑn suol puol, ŋɑɑn bɔli u mɔnŋ ŋɑɑk ni tɑɑtɑɑtɑ nɑn ŋmɑɑli ŋɑnŋmu, k din tɑn yet u mɔnŋ ɑ nnɑ: «Nnɑ e k Yonmdɑɑnɔ tun tul’n k tin’n ninbɑɑɔk k nyinn’n fei ni.» Tɔn, Eliisɑɑbet puol suolu ŋmɑɑli ŋɑnluob ni e, k Yennu din tun u mɑlɑkɑ Gɑbliel ɑ wun sɑɑn duo nbɑ be Gɑɑliile tinŋ ni, k b yi duo mɑnŋ Nɑɑsɑɑlet, k sɑɑ pɑk tul sɑpɑɑnmunn, wun nbɑ sɑnn tie Mɑɑli nɑ. Sɑpɑɑmɔ mɑnŋ din tie jɑsuɑ sɑlkpenŋ e, k u sɑnn din tie Suosiɑf k u tie kpɑnbɑl * Dɑɑfiid yɑɑbuonn. K mɑlɑkɑ nɑ din tɑn bɑɑl Mɑɑli buol ni k fuont’ɔ ɑ: «Fuontu lɑɑ. Yonmdɑɑnɔ pɑl mei ɑ pɑɑk, k u biɑ be nɑn’ɑ.» Wɑɑ yet biɑnŋ nbɑ nɑ, k Mɑɑli yɑn ji din put ŋmɑt bonciɑnn k sɑɑ bɑɑ nuɑk ni, k u ji duki fuonti mɑnŋ pɑɑk. K mɑlɑkɑ nɑ biɑ yet’ɔ, «Mɑɑli, dɑɑ tiin jɑŋmɑɑni, k mɑɑn Yennu pɑl mei ɑ pɑɑk. A tɑn sɑɑ suol puol k mɑl bonjɑk, k ɑ sɑɑ pul u sɑnn Yiesu. U tɑn sii tie nijɑɑnn e, k b tɑn sii yi’u Yɑbnt Yennu Bijɑ. Yonmdɑɑnɔ Yennu sɑɑ te k wun di u yejɑ Dɑɑfiid nɑɑn, k u tɑn sii tie Sɑɑkɔb yɑɑbuonɑ ni Kpɑnbɑl nɑn yuo nbɑ kɑɑ gbennu, k u nɑɑn mɑnŋ biɑ tɑn kɑn mi gbenn.» K Mɑɑli boi mɑlɑkɑ mɑnŋ ɑ: «N dɑɑ tie sɑpɑɑnmunn e, k nlee k n sɑɑ suol puol i?» K mɑlɑkɑ nɑ jiin k yet’ɔ ɑ: «Foŋɑnm sɑɑ sik ɑ pɑɑk, k Yɑbnt Yennu pɑnŋ sɑɑ sik bɑkn ɑ pɑɑk. L pɑɑk, bik nbɑ k ɑ tɑn sɑɑ mɑl’ɔ mɑnŋ tɑn sii tie niŋɑnɔ, k b sii yi’u Yennu Bijɑ. Bɑnt nɑn ɑ niipuo Eliisɑɑbet, wun nbɑ kpet ɑ nɑ, mɔtɑɑnɑ u lek suol puol ɑ k sɑɑ mɑl bonjɑk. U puol ŋmɑɑli ŋɑnluob e nɑ, ŋuɑ nbɑ k b tuu yi’u puokɑnmɑtl. K mɑɑn siɑl kɑɑ k Yennu kɑn fit tun.» K Mɑɑli yet’ɔ, «Tɔn, n tie Yennu tuontunnɔ e. Ŋɑɑnt k lin tien nɑn fɑɑ yet’n biɑnŋ nbɑ nɑ.» K mɑlɑkɑ nɑ ji din yɑɑt ŋɑɑn nyik’ɔ. L puolpo k Mɑɑli din tɑn fiil k sɑɑn yiɑn yiɑn k sɑɑ juɑt nbɑ be Suude tingbounŋ ni buol, k sɑɑ bɑɑl dosɑu ni, k kuɑ Sɑɑkɑɑli ŋɑɑk ni k fuont Eliisɑɑbet. Yuo nbɑ k Eliisɑɑbet gbɑt Mɑɑli fuonti nɑ, k bik nbɑ dɑɑ be Eliisɑɑbet puol ni mɑnŋ ji din dɑnm. L yuo nɑ k Eliisɑɑbet gbie nɑn Foŋɑnm, k yikn sɑnpɑɑpo wɑɑ, «Wui wui ɑ: Yennu yetŋɑnm be ɑ pɑɑk k gɑl puolieb kul ɑ, k u yetŋɑnm biɑ be bik nbɑ be ɑ puol ni nɑ pɑɑk. L tien’n nlee nɑ k n Yonmdɑɑnɔ nɑɑ tɑn bɑɑl n buol nnɑ? Mɑɑ gbɑt ɑ fuonti yuo nbɑ nɑ, k bik nbɑ be n puol nnɑ dɑnm nɑn pɑlpienn. Fin nbɑ tien yɑdɑ nɑn Yennu mɑɑn nbɑ k u pɑk tul’ɑ nɑ tɑn sɑɑ tien mɔni, pɑlpienn tie ɑ yɑl e.» Ŋɑnn e k Mɑɑli ji din yet ɑ «N dont Yennu sɑnn n pɑl ni, k mɔk pɑlpienn bonciɑnn Yennu wun nbɑ tie n Fietuɑ nɑ pɑɑk, k mɑɑn u tin min nbɑ tie u tuontunpuok nɑ ninbɑɑɔk, Lɑɑ jii dinnɑ k sɑɑ, nigbounŋ kul tɑn sii yien ɑ n tie pɑlpienn dɑɑnɔ e, k mɑɑn Yennu tun bɑktnɔunŋ tuonjɑɑnɑ k tul’n, k u sɑnn tie sɑn-yienŋ. U biɑ mɔk ninbɑtinu nɑn nigbounŋ kul nbɑ tiin’ɔ lɑɑ nyii yejɑnm ni k sɑɑ tuu bɑɑnbɑ nɑn yɑbuontuɑt-tuɑt ni. U tɑnt u nuu k tun pɑnŋ tuonɑ, k yɑt kɑlnbɑɑndɑnm k biil b lolɑ, k liɑt kpɑnbɑlɑ b nɑɑn ni, ŋɑɑn donn sikn-n-mɔnŋ dɑnm, k u nuɑb bonŋɑnɑ k tul tɑlɑs-dɑnm, ŋɑɑn te k mɔktɑ ŋmɑt nɑn niikuoni. U bɑɑl k sonm u tuontunnɑ Islɑɑeltieb, u k tɑnm u ninbɑtinu nbɑ k u din senn mɔsonn ɑ u sɑɑ tul Ablɑɑhɑɑnm nɑn u yejɑŋɑɑk nɑn yuo nbɑ kɑɑ gbennu, k l tie nɑn wɑɑ din senn mɔsonn k tul t yejɑnm nɑ.» Tɔn, l din tien nɑn ŋmɑɑli ŋɑntɑ nɑ k Mɑɑli dɑɑ be Eliisɑɑbet buol ni k tɑn ŋmɑt kun. Eliisɑɑbet mɑtuk yuo din tɑn bɑɑl, k u mɑl bonjɑk. K b ŋɑkpiɑsnbɑ nɑn u ninjɑnm din gbɑt biɑnŋ nbɑ k Yonmdɑɑnɔ tin’ɔ ninbɑɑɔk bonciɑnn nɑ, k b kul mɔk pɑlpienn. Tɔn, k l dɑɑ ŋɑnniin dɑɑl e k b din bɑɑl ɑ bin pot bik mɑnŋ punn, k luon bin pul u sɑnn Sɑɑkɑɑli, nɑn u bɑɑ sɑnn nɑ, ŋɑɑn k u nɑɑ jiin k tul’b ɑ: «Aɑi, u sɑnn sii yi Sɑn e.» K b yet’ɔ ɑ: «A dɑnm ni, suɑ sɑnn k yi Sɑn.» Ŋɑnn e k b pɑk muutl ni nɑn bik mɑnŋ bɑɑ, ɑ bin boi k lɑɑn u luon bii yi u bik mɑnŋ sɑnn ɑ bee, k u wɑnn muutl ni ɑ bin jii dɑpɔuk tul’ɔ. Bɑɑ jii k tul’ɔ k u diɑn ɑ: «Bik mɑnŋ sɑnn e tie Sɑn.» K l ji din bɑkt b kul ɑ. L tɑɑkpɑɑk ni nɑ k Sɑɑkɑɑli muut k ji din piin mɑɑn pɑku k piɑk Yennu. K jɑŋmɑɑni din suol b duo niib kul ɑ, k lɑbɑɑl nɑ din muɑnt yɑt digbɑnɑ kul nbɑ be Suude juɑt pɑɑk, k l tul bin nbɑ kul din gbɑt nnɑ mɑnŋ dudukt, k b boi b lieb, «Bik nɑ tɑn sii tie nibuol bee nɑ?» k mɑɑn Yennu pɑnŋ ponŋ din be nɑn’ɔ. L tɑɑkpɑɑk ni k Foŋɑnm din gbie nɑn bik mɑnŋ bɑɑ Sɑɑkɑɑli, k u sɔknt Yennu mɑɑn k yien ɑ: «Ŋɑɑnt mɑn k tin pɑk Yonmdɑɑnɔ wun nbɑ tie tinm Islɑɑeltieb Yennu nɑ, k mɑɑn u bɑɑl ɑ wun sonm u niib k fɑt’b ŋɑɑ’b. U tul’t Fietuɑ nbɑ mɔk pɑnŋ k u nyii Dɑɑfiid yɑɑbuonɑ ni. Yɑɑyuo ni k Yennu din pɑk mɑɑn u sɔknŋɑnm mɔi ni k tul’t, k yien ɑ u tɑn sɑɑ nyinn’t t dɑtɑi nii ni, k biɑ tɑn sɑɑ nyinn’t bin nbɑ kul nɑn’t nɑ nii ni. U biɑ din yet ɑ u sii mɔk ninbɑtinu nɑn t yejɑnm, k kɑn tɑnm u *lol nbɑ k u din lol k tul t yejɑ Ablɑɑhɑɑnm nɑ. U din senn ɑ u sɑɑ nyinn’t t dɑtɑi nii ni, k tin fit jiɑnt’ɔ k jɑŋmɑɑnsɑi sii kɑɑ, k t sii tie niŋɑnm nɑn niŋɑnm u buol ni nɑn t mɑnfuol gbennu. N bik nɑ, b tɑn sii yi’ɑ: ‹Yɑbnt *Yennu sɔkni e.› A sɑɑ liit Yonmdɑɑnɔ tuɑnn k sɑɑ ŋɑnm u sɔni k tul’ɔ, k wɑnn u niib k bin bɑnn nɑn u tɑn sɑɑ fiel’b wɑɑ sɑɑ nyik cɑb b biit nɑ pɑɑk, k mɑɑn t Yennu mɔk ninbɑtinu nɑn bulcint, k l pɑɑk, k u sɑɑ te k yentgbenŋl n nyi sɑɑnpɑɑpo k dɔkt t pɑɑk k tie nɑn yenduol nɑ, k l tɑn sɑɑ yent sɑnpɑɑpo k tul bin nbɑ be bunbɔnn ni nɑn bin nbɑ be kuun miɑl ni, k l biɑ tɑn sɑɑ yent t tɑɑ ni k tin tɔkn mɑnu sɑnjouk ni.» K Sɑn din kpɑɑtl k puki pɑnŋ u siek ni, k be muuk ni tɑɑtɑɑ nɑn dɑɑl nbɑ k u din tɑn dɔkt Islɑɑeltieb buol ni nɑ. L yuo nɑ k kpɑnbɑlɑ yudɑɑnɔ Ogust din tul mɔb ɑ bin diɑn suɑ kul nikɑnt Luonmtieb yent kul ni. Ŋɑnn e din tie sinsinn nikɑnt diɑnu, k Kiiliinius din tie Siili tinŋ yudɑɑnɔ l yuo. L pɑɑk, suɑ kul din kun u duo ni ɑ bin sɑɑ diɑn u sɑnn. Suosiɑf mun din nyii Nɑɑsɑɑlet nbɑ be Gɑɑliile tingbounŋ ni, k sɑɑn Suude tingbounŋ ni, k kun Dɑɑfiid duo ni, Betlehenm. Setk nɑn mɔni, Suosiɑf din tie * Dɑɑfiid yɑɑbuonn e. U din kpen ɑ bin diɑn ŋuɑ nɑn u sɑlkpenŋ Mɑɑli sɑnɑ e. L yuo nɑ, k Mɑɑli mɔk puol. Bɑɑ din dɑɑ be Betlehenm nɑ, k Mɑɑli mɑtuk yuo tɑn bɑɑl. K u ji din mɑl bonjɑk, u sɑpɑɑnmɑl. U din jii cincenn k pɔbn’ɔ, k bil’ɔ bonkobluok ni, k mɑɑn dieok nbɑ k b din guun nikɑnt niib nɑ din gbie wɑɑ. Pekpɑɑli mun din be duo mɑnŋ ni k kpɑɑl b pei nyiɑɔk muuk ni. K Yonmdɑɑnɔ mɑlɑksuɑ din tɑn dɔkt b pɑɑk, k Yonmdɑɑnɔ yentsɑɑkɑl yent lint’b, k jɑŋmɑɑni mɑntk ji din suol’b bonciɑnn. Ŋɑɑn k *mɑlɑkɑ nɑ yet’b ɑ: «Dɑɑ tiin jɑŋmɑɑni mɑn, k mɑɑn n bɑɑl nɑn lɑbɑmɑnn e mɑɑ n wɑnn’i, lin nbɑ sɑɑ tul niib kul pɑlpienn bonciɑnn. Dinnɑ nyiɑɔk nɑ, Dɑɑfiid duo ni, b mɑl i Fietuɑ wun nbɑ tie *Klistu, Yonmdɑɑnɔ nɑ. Nɑ e sii tie *nyinn k tul’i; I sɑɑ lɑ sɑnpɑntk nɑ puɑb cincenn ni k duɑ bonkobluok ni.» L yuo nɑ k *Yendɔunŋ ni mɑlɑkɑɑnbɑ bonciɑnn dɔkt k pukn mɑlɑkɑ nɑ po, k yiin dont Yennu sɑnn ɑ: «Yudɑnt tie Yennu nbɑ be sɑnpɑɑpo nɑ yɑl e, k mɑɑn mɑnu be Yennu nɑn niib sinsuuk ni, u lonm pɑɑk.» K mɑlɑkɑɑnbɑ nɑ tɑn nyik pekpɑɑli nɑ, ŋɑɑn ŋmɑt duo Yendɔunŋ ni. K pekpɑɑli yet b lieb ɑ: «Ŋɑɑnt mɑn k tin sɑɑn Betlehenm k sɑɑ got lɑ lin nbɑ tien, k Yonmdɑɑnɔ yien’t nɑ.» Ŋɑnn e k b fiil sɑɑn yiɑn yiɑn k sɑɑ bɑɑl k lɑ Mɑɑli nɑn Suosiɑf, k sɑnpɑntk mɑnŋ duɑ bonkobluok ni. Bɑɑ bɑɑl lɑ’u yuo nbɑ k b muɑnt lin nbɑ k mɑlɑkɑ nɑ yet’b bik mɑnŋ po nɑ. K bin nbɑ din gbɑt lin nbɑ k pekpɑɑli muɑnt nɑ, k l bɑkt b kul. Ŋɑɑn Mɑɑli din tiɑl lin nbɑ tien nɑ kul, k din duki l po u pɑl ni bonciɑnn. L puolpo e k pekpɑɑli nɑ ŋmɑt b pei buol muuk ni. Bɑɑ sɑɑ nɑ, k b piɑk dont Yennu sɑnn, lin nbɑ kul k b gbɑt k lɑ nɑ pɑɑk, k l set tie nɑn mɑlɑkɑ nbɑ yet’b biɑnŋ nbɑ nɑ. Yiesu mɑɑlu dɑɑ ŋɑnniin dɑɑl e, yuo nbɑ k b sɑɑ pot u punn nɑ, k b pul u sɑnn Yiesu, sɑnn nbɑ k mɑlɑkɑ din pul k suɑ u nɑɑ din dɑɑ k suol u puol nɑ. Tɔn, l din tɑn jɑnŋ nɑn Mɑɑli nɑn Suosiɑf n tun nɑn Muois *senni nbɑ senn biɑnŋ nbɑ, k mɑnn *mɑlunŋ k ŋɑnm Mɑɑli Yennu buol ni. Ŋɑnn e k b ji din jii bik nɑ k sɑɑn nɑn’ɔ Selusɑɑlenm, ɑ bin sɑɑ jii’u k tul Yonmdɑɑnɔ nɑn lɑɑ diɑn Yonmdɑɑnɔ senni ni ɑ: «Bikpelk kul nbɑ tie bonjɑk e tie Yonmdɑɑnɔ yuɑ.» K b biɑ mɑnn mɑlunŋ nɑn Yonmdɑɑnɔ nbɑ din senn biɑnŋ nbɑ nɑ ɑ: «Bin lɑ lɑnjeli bɑnle ɑmi ŋmɑnbilɑ bɑnle k mɑnn.» L yuo nɑ k jɑsuɑ nnɑ din be Selusɑɑlenm, k u sɑnn din tie Siimeɔn. U din be binbenŋ nbɑ gbuot Yennu nunm k din bɑɑkt Yennu bonciɑnn, k guu yuo nbɑ k Yennu sɑɑ fiel Islɑɑeltieb, k Foŋɑnm din be nɑn’ɔ. K Foŋɑnm mɑnŋ ponŋ din fiit k wɑnn’ɔ ɑ u kɑn kpo sie k u tɑn lɑ Klistu, nbɑ k Yonmdɑɑnɔ tun’ɔ nɑ. L yuo nɑ k Foŋɑnm mɑnŋ din te k Siimeɔn kuɑ Yennu jɑɑnti ŋɑsɑɑkɑk ni, k sɑɑ lɑ Yiesu bɑɑ nɑn u nɑɑ bɑɑl nɑn’ɔ ɑ bin tien’ɔ nɑn senni nbɑ senn biɑnŋ nbɑ. K Siimeɔn din gɑɑl bik mɑnŋ ŋɑɑn pɑk Yennu k yet ɑ: «N Yonmdɑɑnɔ, ɑ gbien ɑ mɔsonn nɑ wɑɑ. Lɑɑ tie bɑnnu nbɑ nɑ, ŋɑɑnt k ɑ dɑɑbl n kpo, k kun nɑn mɑnu, k mɑɑn n mɔnŋ mɔnŋ ninbinn lɑ fɑɑ tun lin nbɑ k fiel ɑ niib ɑ, lin nbɑ k ɑ tien niib kul ninbinɑ ni. L sii tie yentu nbɑ sɑɑ te k niib kul n bɑnn’ɑ, k l biɑ sɑɑ te k ɑ niib Islɑɑel n lɑ dontl.» Tɔn, Siimeɔn nbɑ pɑk k jikt sɑɑ bik mɑnŋ po biɑnŋ nbɑ nɑ, k l bɑkt bik nɑ nɑɑ nɑn u bɑɑ bonciɑnn. K Siimeɔn tul’b yetŋɑnm, ŋɑɑn yet bik nɑ nɑɑ Mɑɑli ɑ: «Nnɑlɑ, Yennu nyinn bik nɑ k senn’ɔ ɑ Islɑɑeltieb bonciɑnn n bɑɑ yɑnn u pɑɑk, k lieb bonciɑnn mun biɑ tɑn sɑɑ lɑ fielu u pɑɑk e. Ŋuɑ e tɑn sii tie nyinn nbɑ k niib bonciɑnn tɑn kɑn sɑk l mɑɑn. Lin nbɑ nɑ sɑɑ te k b wuol ni dudukt n nyi pɑɑnu. Ŋɑɑn bonsiɑl tɑn sɑɑ tun k pint ɑ pɑl pɑɑk bonciɑnn.» Tɔn, k *Yennu sɔkniiluɑ mun din be lenŋ k tie puo, k u sɑnn yi Aɑnn, wun nbɑ tie Fɑɑnuel bipuo, k biɑ tie Aɑsel buolu ni nilɔ, k din tie puokpelcɑɑnwonŋ, wun nbɑ din yuo binɑ ŋɑnlole. K l puolpo k u sɔlɔ tɑn kpo ŋɑɑn nyik’ɔ pɑkuɑk, k u ji mɔk binɑ piiniin nɑn ŋɑnnɑ. U din tuu k nyi Yennu jɑɑnti ŋɑsɑɑkɑk ni yennu nɑn nyiɑɔk, k jiɑntl Yennu k loln mɔb k mei’ɔ. L yuo nɑ k u bɑɑl k tul Yennu niipuouk, k din piɑk bik nɑ po k tien bin nbɑ kul din guu yuo nbɑ k Yennu yɑɑ wun fiel Selusɑɑlenm tieb. Yuo nbɑ k Mɑɑli nɑn Suosiɑf nbɑ din tun gbenn Yonmdɑɑnɔ senni nbɑ senn biɑnŋ nbɑ nɑ, k b ŋmɑt kun b duo Nɑɑsɑɑlet nbɑ be Gɑɑliile tinŋ ni. K Yiesu tɑn kpɑɑt nɑn pɑnŋ nɑn subni bonciɑnn, k Yennu yetŋɑnm din be u pɑɑk. Tɔn, binn kul k Yiesu nɑɑ nɑn u bɑɑ din tuu do Selusɑɑlenm k sɑɑ di *yuktgɑltiɑlu jɑɑnm. Yuo nbɑ k Yiesu din tɑn bɑɑl binɑ piik nɑn ŋɑnle, k b din duo ɑ bin sɑɑ di jɑɑnm mɑnŋ nɑn biɑnŋ nbɑ k b din tuu tie nɑ. Jɑɑnm dɑɑ mɑnŋ nbɑ din tɑn gbenn yuo nbɑ, k b ji piin kunu, ŋɑɑn k bik nɑ, Yiesu, din biɑl k be Selusɑɑlenm, ŋɑɑn k Mɑɑli nɑn Suosiɑf k mi nɑn u biɑl. B din duki mi ɑ u be nibul nɑ ni e, k b sonm dɑɑl mɑnŋ kul. L puolpo k b luon’ɔ b niib ni nɑn b lieb ni. Bɑɑ k lɑ’u nɑ, k b din ŋmɑt sɑɑn Selusɑɑlenm k sɑɑ luon’ɔ lenŋ. K dɑɑ ŋɑntɑ dɑɑl k b tɑn lɑ’u Yennu jɑɑnti ŋɑsɑɑkɑk ni, k u lɑkn kɑl nɑn wɑntieb k gbiintl b mɑɑn ŋɑɑn biɑ boi’b buboit. K bin nbɑ kul din gbiintl u mɑɑn, l din bɑkt’b nɑn wɑɑ tien biɑnŋ nbɑ k mɔk bɑnnu k piɑk k jiint’b. K u nɑɑ nɑn u bɑɑ nbɑ din lɑ’u lenŋ, k l bɑkt’b bonciɑnn, k u nɑɑ ji boi’ɔ ɑ: «N bik, bee k ɑ tien’t nnɑ? A k mi ɑ min nɑn ɑ bɑɑ lɑ pɑlbiil hei k luon’ɑ ni ii?» K u jiin k boi’b ɑ: «Bee k i dɑɑn luon’n i? I k mi ɑ sie k n fɑbl kii be n Bɑɑ ŋɑɑk ni ii?» Ŋɑɑn b din k gbɑt u mɑɑn mɑnŋ pɑɑk. Ŋɑnn e k b din ŋmɑt nɑn Yiesu k sik Nɑɑsɑɑlet, k u din sɑɑk b mɔb. K u nɑɑ din tiɑn lin nbɑ tien nɑ kul u pɑl ni. K Yiesu kpɑɑtl k u yɑn puki, k Yennu nɑn nisɑɑli pɑlɑ din mei u pɑɑk. Yuo nbɑ k kpɑnbɑlɑ yudɑɑnɔ Tiibel Sesɑɑl din dii nɑɑn binɑ piik nɑn ŋɑnŋmu, Pɔns *Piilɑɑt mun din tie Suude yudɑɑnɔ. *Heluod mun din tie Gɑɑliile kpɑnbɑl, k u ninjɑ Fiiliip mun din tie Ituule nɑn Tlɑɑkoniit kpɑnbɑl. Liisɑniɑs din tie Abiilenn kpɑnbɑl. * Ann nɑn *Kɑɑyiif mun din tie Yennu mɑnntieb yudɑnm. L yuo nɑ k Yennu din jii u mɑɑn k tul Sɑn nbɑ tie Sɑɑkɑɑli bik nɑ, k u din be muuk ni. Ŋɑnn e k Sɑn din tuu lin *Suulden kpenu po kul, k muɑntl k tien niib ɑ bin mɔ kuɑŋɑɑn k lebt binbenŋ k wun wul’b Yennu nyunwulu k Yennu n nyik cɑb b biit. Lin nbɑ nɑ tie nɑn *Yennu sɔkni Esɑɑyi nbɑ din diɑn u kɑdɑɑɔk ni biɑnŋ nbɑ nɑ ɑ «Nisuɑ tɑn sii be muuk ni k huot k yɑɑ ɑ: ‹Ŋɑnmt mɑn Yonmdɑɑnɔ bɑɑlu sɔnu k tul’ɔ, ŋɑɑn ŋɑnm u sɔni k lii tuok. Bɑɑt kul sɑɑ gbie k nɑɑ; juɑt nɑn kunkonɑ kul sɑɑ bit k nɑɑ. Sɔnu nbɑ ŋmɑl siɑn nbɑ buol, l sɑɑ sont fɑnu; sɔnbuotɑ sɑɑ piin k lɑt nɑɑ, k tingbounŋ niib kul sɑɑ lɑ biɑnŋ nbɑ k Yennu sɑɑ fiel’b nɑ.› » Niib bonciɑnn din bɑɑl Sɑn buol ɑ wun wul’b Yennu nyunwulu, k u yet’b ɑ: «Yinm wɑɑlɑbli nɑ. Ŋmee kpɑɑn’i ɑ i tin k nyi Yennu wutuol nbɑ yɑɑ lin bɑɑl i pɑɑk nɑ ni? Ii tuun mɑn lin nbɑ sɑɑ wɑnn nɑn i set mɔ kuɑŋɑɑn k lebt binbenŋ. I dɑɑ yien i pɑlɑ ni nɑn Ablɑɑhɑɑnm tie i yejɑ. N yien’i e, Yennu sɑɑ fit k fiin tɑnɑ nbɑ nɑ k lin kpɑnt Ablɑɑhɑɑnm yɑɑbuonɑ. Pɑjɑl ponŋ tien siil ɑ, ɑ wun cuɑ tiini nɑn b jiinɑ, k tiik kul nbɑ k luon luɑnŋɑnɑ, b sɑɑ cuɑ’l e k lu’l muu ni.» K nibulciɑɔnŋ mɑnŋ din boi’ɔ ɑ: «K t ji sɑɑ tien nlee?» K u jiin yet’b ɑ: «Wun nbɑ mɔk liɑtfɔkt ŋɑnle, sie k wun pɑɑt yenn k tul wun nbɑ k mɔk, k wun nbɑ mɔk jiet, sie k wun wɑt tul wun nbɑ k mɔk.» Ŋɑnn e k lɑnpogɑɑltesiɑb mun din bɑɑl ɑ wun wul’b Yennu nyunwulu, ŋɑɑn boi’ɔ ɑ: «Cɑnbɑɑ, tinm sɑɑ tien nlee?» K u yet’b ɑ: «I dɑɑ gɑɑn likli k gɑɑl bɑɑ senn’i *senni biɑnŋ nbɑ.» L puolpo k sejesiɑb mun boi’ɔ ɑ: «K tinm mun, t sɑɑ tien nlee?» K u yet’b ɑ: «I dɑɑ muksl suɑ k gɑɑn siɑl i ɑmi k fɑ fɑɑk niib po. Ii mɔk pɑlpienn i pɑɑɔk nbɑ k i gɑɑn nɑ pɑɑk.» Tɔn, k niib nbɑ din guu *Klistu bɑɑlu nɑ, ji din piin k boi b mɔnŋ, ɑ pɑsiɑl Sɑn sii tie Klistu e. L yuo mɑnŋ k Sɑn yet b kul ɑ: «Min ŋɑnin wuul’i Yennu wulu nɑn nyun e, ŋɑɑn wun nbɑ cie’n bɑɑt. N ponŋ k ŋɑn nɑn k n lot u tɑɑsɑɑŋmi. Ŋuɑ e tɑn sɑɑ jii Foŋɑnm nɑn muu k wul’i Yennu wulu. U diɑ u dilenn ŋmɑni ɑ wun lenn bonŋɑnn, k nyinn dibin k wuun u buɑl ni, ŋɑɑn juo founŋ nɑ muu nbɑ kɑn mi k kpien nɑ ni.» Sɑn nbɑ din muɑntl lɑbɑmɑnn mɑnŋ k tien niib nɑ, k u pɑk mɑɑn bonciɑnn k kpɑɑn’m, ŋɑɑn k biɑ din tɑɑl kpɑnbɑl Heluod, k mɑɑn u din fɑt u mɔnŋ ninjɑ ŋɑɑpuo Heluodiɑd k kuɑn’ɔ wɑɑ, k biɑ tun biit bonciɑnn. L puolpo e, k Heluod din tɑn tun bonbiil mɑntk k biɑ pukn l pɑɑk, k kuɑn Sɑn dɑnsɑlk. Yuo nbɑ k Sɑn din wul niib kul Yennu nyunwulu nɑ, k Yiesu tɑn bɑɑl u buol k u wul’ɔ Yennu nyunwulu mun. Lenŋ mɑnŋ e k Yiesu din mei Yennu, k sɑnpɑɑpo tɑn luot, k Foŋɑnm sik u pɑɑk nɑn gbɑnɑnt nbɑ nɑɑn nɑn ŋmɑnn nɑ, k kunkɔl nyii sɑnpɑɑpo k yet ɑ: «Fin e tie n Bilonkɑk. Fin e k n nunm gbuo.» Yuo nbɑ k Yiesu din piin u tuonn nɑ, k u din mɔk nɑn binɑ piintɑ nɑ. Niib din duki nɑn u tie Suosiɑf bijɑ e, k Suosiɑf bɑɑ din tie Heli, k Heli bɑɑ din tie Mɑɑtɑ, k Mɑɑtɑ bɑɑ din tie Liefi, k Liefi bɑɑ din tie Melki, k Melki bɑɑ din tie Sɑɑnɑi, k Sɑɑnɑi bɑɑ din tie Suosiɑf, k Suosiɑf bɑɑ din tie Mɑɑtɑɑtiɑs, k Mɑɑtɑɑtiɑs bɑɑ din tie Amos, k Amos bɑɑ din tie Nɑɑhunm, k Nɑɑhunm bɑɑ din tie Esli, k Esli bɑɑ din tie Nɑɑkɑi, k Nɑɑkɑi bɑɑ din tie Mɑɑt, k Mɑɑt bɑɑ din tie Mɑɑtɑɑtiɑs, k Mɑɑtɑɑtiɑs bɑɑ din tie Semeɑn, k Semeɑn bɑɑ din tie Suosek, k Suosek bɑɑ din tie Juodɑ, k Juodɑ bɑɑ din tie Suɑnɑn, k Suɑnɑn bɑɑ din tie Lesɑ, k Lesɑ bɑɑ din tie Solobɑɑbel, k Solobɑɑbel bɑɑ din tie Sɑɑlɑɑtiel, k Sɑɑlɑɑtiel bɑɑ din tie Neli, k Neli bɑɑ din tie Melki, k Melki bɑɑ din tie Adi, k Adi bɑɑ din tie Kuosɑɑnm, k Kuosɑɑnm bɑɑ din tie Elmɑɑdɑnm, k Elmɑɑdɑnm bɑɑ din tie El, k El bɑɑ din tie Yiesu, k Yiesu bɑɑ din tie Eliesel, k Eliesel bɑɑ din tie Suoliinm, k Suoliinm bɑɑ din tie Mɑɑtɑ, k Mɑɑtɑ bɑɑ din tie Liefi, k Liefi bɑɑ din tie Siimeɔn, k Siimeɔn bɑɑ din tie Suudɑ, k Suudɑ bɑɑ din tie Suosiɑf, k Suosiɑf bɑɑ din tie Suonɑɑnm, k Suonɑɑnm bɑɑ din tie Eliiɑkiinm, k Eliiɑkiinm bɑɑ din tie Meleɑ, k Meleɑ bɑɑ din tie Menɑ, k Menɑ bɑɑ din tie Mɑɑtɑɑtɑ, k Mɑɑtɑɑtɑ bɑɑ din tie Nɑɑtɑn, k Nɑɑtɑn bɑɑ din tie Dɑɑfiid, k Dɑɑfiid bɑɑ din tie Jese, k Jese bɑɑ din tie Suobet, k Suobet bɑɑ din tie Buos, k Buos bɑɑ din tie Sɑɑlɑ, k Sɑɑlɑ bɑɑ din tie Nɑɑsɔn, k Nɑɑsɔn bɑɑ din tie Amiinɑɑdɑɑb, k Amiinɑɑdɑɑb bɑɑ din tie Admin, k Admin bɑɑ din tie Alni, k Alni bɑɑ din tie Eslɔnm, k Eslɔnm bɑɑ din tie Fɑɑles, k Fɑɑles bɑɑ din tie Suudɑ, k Suudɑ bɑɑ din tie Sɑɑkɔb, k Sɑɑkɔb bɑɑ din tie Isɑɑk, k Isɑɑk bɑɑ din tɑn tie Ablɑɑhɑɑnm, k Ablɑɑhɑɑnm bɑɑ din tie Telɑ, k Telɑ bɑɑ din tie Nɑɑkɔl, k Nɑɑkɔl bɑɑ din tie Seluk, k Seluk bɑɑ din tie Lɑɑgo, k Lɑɑgo bɑɑ din tie Fɑɑlek, k Fɑɑlek bɑɑ din tie Ebel, k Ebel bɑɑ din tie Sɑɑlɑ, k Sɑɑlɑ bɑɑ din tie Kɑinɑɑnm, k Kɑinɑɑnm, bɑɑ din tie Alfɑɑksɑɑt, k Alfɑɑksɑɑt bɑɑ din tie Senm, k Senm bɑɑ din tie Noe, k Noe bɑɑ din tie Lɑɑmek, k Lɑɑmek bɑɑ din tie Mɑɑtuusɑɑlɑ, k Mɑɑtuusɑɑlɑ bɑɑ din tie Henɔk, k Henɔk bɑɑ din tie Jɑɑlet, k Jɑɑlet bɑɑ din tie Mɑɑleliɑl, k Mɑɑleliɑl bɑɑ din tie Kɑinɑn, k Kɑinɑn bɑɑ din tie Enos, k Enos bɑɑ din tie Set, k Set bɑɑ din tie Adɑn, k Adɑn bɑɑ din tie Yennu. L yuo nɑ k Yiesu din nyii *Suulden kpenu po, k gbie nɑn Foŋɑnm, k Foŋɑnm mɑnŋ sɑɑn nɑn’ɔ k u kuɑ muuk ni, k lenŋ e k *Sɑɑtɑn din sɑɑ jɑnm’ɔ dɑɑ piinnɑ. K u k dii siɑl i yuo mɑnŋ ni, k l yuo nɑ dɑɑ tɑn gɑl k kon ji din suol’ɔ. K Sɑɑtɑn yet’ɔ ɑ: «L i tie k ɑ set tie Yennu Bijɑ i e, fɑn yet tɑnn nɑ k lin kpɑnt pɑɑnu.» K Yiesu jiin k yet’ɔ ɑ: «L diɑn Yennu lolkpel kɑdɑɑɔk ni ɑ: ‹Pɑɑnu kuukuɑ kɑɑ te k nilɔ be.› » L puolpo e k Sɑɑtɑn ji din jii’u k duo nɑn’ɔ sɑnpɑɑpo k sɑɑ wɑnn’ɔ tingbounŋ yent kul kul l tɑɑkpɑɑk ni, ŋɑɑn yet’ɔ ɑ: «N sɑɑ tul’ɑ yiikuo l kul pɑɑk nɑn l mɔktuk kul, k mɑɑn b tul’n ɑ, k n mun sɑɑ fit tul wun nbɑ k n luon. Ŋɑnn, l i tie k ɑ gbɑɑn k jiɑnt’n, l kul sii tie ɑ yɑl e.» K Yiesu jiin k yet’ɔ ɑ: «L diɑn Yennu lolkpel kɑdɑɑɔk ni ɑ: ‹Nilɔ i jiɑntl Yonmdɑɑnɔ Yennu kuukuɑ e, kii biɑ kii tuun kii tien ŋuɑ kuukuɑ.› » Ŋɑnn e k Sɑɑtɑn biɑ jii’u k sɑɑn nɑn’ɔ Selusɑɑlenm, k sɑɑ donn’ɔ Yennu jɑɑnti ŋɑsɑɑkɑk mɔpinyelk pɑɑk, ŋɑɑn yet’ɔ ɑ: «L i tie k ɑ tie Yennu Bijɑ i e, fɑn yukl mɔb nnɑ nɑ, k mɑɑn l diɑn Yennu lolkpel kɑdɑɑɔk ni ɑ: ‹U sɑɑ te k u *mɑlɑkɑɑnbɑ i guu’ɑ.› L biɑ diɑn ɑ: ‹B sii diɑ’ɑ nɑn b nii k ɑ tɑɑl dɑɑ fɑɑ tɑnn k ɑ lɑɑt dɑnŋ.› » K Yiesu jiin k yet’ɔ ɑ: «L yet Yennu kɑdɑɑɔk ni ɑ: ‹A dɑɑ biki Yonmdɑɑnɔ Yennu.› » K Sɑɑtɑn nbɑ din jɑnm Yiesu k tɑn guo nɑ, k u dɑɑ nyik’ɔ sie yuo nbɑ k u ji tɑn sɑɑ lɑ yɑɑk. K Yiesu din gbie nɑn Foŋɑnm pɑnŋ k tɑn ŋmɑt sɑɑn Gɑɑliile. K b din muɑnt u lɑbɑɑl k l yɑt tinŋ mɑnŋ kul kul po. K u din wɑnt’b Yennu mɑɑn b *Suifnbɑ jɑɑnti diet ni, k niib kul piɑk’ɔ. L puolpo e k Yiesu din sɑɑn Nɑɑsɑɑlet, siɑn nbɑ k b din wubi’ɔ. K *Fuondɑɑl k u din tɑn kuɑ Suifnbɑ jɑɑnti dieok ni nɑn wɑɑ ponŋ din tuu kuɑ biɑnŋ nbɑ nɑ, k tɑn fiil ɑ wun lii Yennu lolkpel kɑdɑɑɔk. K b jii kɑdɑɑɔk nbɑ k *Yennu sɔkni Esɑɑyi din diɑn nɑ k tul’ɔ, k u pint kɑdɑɑɔk nɑ k lɑ siɑn nbɑ k l diɑn k yet ɑ «Yonmdɑɑnɔ Siek be n ni, k u lukt’n ɑ n muɑnt lɑbɑmɑnn k tul nɑndɑnm nɑ. U tun’n ɑ n tɑn yet yonmi ɑ n sɑɑ nyinn’b yɑnn, k biɑ yet juɑni ɑ b sɑɑ nyuɑnt ɑ, k biɑ fɑt bin nbɑ be fɑlɑ ni k lu’b yɑnn, k biɑ muɑnt ɑ l jɑnŋ nɑn Yonmdɑɑnɔ n fiel u niib ɑ.» Yiesu nbɑ lii gbenn yuo nbɑ k u pin kɑdɑɑɔk nɑ k jiin tul Suifnbɑ jɑɑnti dieok tuontunnɔ, ŋɑɑn kɑl. K niib kul nbɑ be dieok nɑ ni ji din goli’ɔ. K u piin piɑk k tien’m ɑ: «Mɑɑn nbɑ k n lii Yennu lolkpel kɑdɑɑɔk ni nɑ, l tɑn tien bɑlmɔni dinnɑ, yuo nbɑ k l bɑɑ i tubɑ ni nɑ.» K b kul ji din piɑk’ɔ, k l bɑkt’b nɑn mɑɑn nbɑ k u pɑk nɑ, k b ji boi b lieb ɑ: «Suosiɑf bijɑ nɑ kɑɑ nɑ ɑɑ?» L yuo nɑ k u yet’b ɑ: «Bilsuk kɑɑ nɑn i tɑn sɑɑ yet’n bɑljouk nɑ e ɑ: ‹Fin tebtuɑ, tebn ɑ mɔnŋ mɔnŋ,› k i biɑ tɑn sɑɑ yet’n ɑ: ‹Tient bɑktnɔunŋ tuonjɑɑnɑ duo nɑ nɑn tɑɑ gbɑt nɑn fɑɑ dɑɑn tun Kɑpelnɑunm nɑ.› Bɑlmɔni e k n yien’i nɑ, niib k cɔln Yennu sɔkni u mɔnŋ mɔnŋ duo ni. Bɑlmɔni e, pɑkɔi bonciɑnn din be Islɑɑel tinŋ ni, yuo nbɑ k Elii dɑɑ din be nɑ. L yuo mɑnŋ, sɑɑk din k bɑɑ binɑ ŋɑntɑ nɑn ŋmɑɑli ŋɑnluob, k kon din tɑn bɑɑ bonciɑnn tinŋ mɑnŋ ni kul, ŋɑɑn Yennu din k tun Elii suɑ buol fɑb ɑ, tinŋ mɑnŋ ni. U din tun’ɔ pɑkuɑk nbɑ din be Sɑɑleptɑ nbɑ be Siidɔn tinŋ ni nɑ buol e. Yuo nbɑ k Eliise dɑɑ din be nɑ, gbɑɑtɑ bonciɑnn din be Islɑɑel tinŋ ni, ŋɑɑn b suɑ din k lɑ pɑɑku tinŋ mɑnŋ ni. Nɑɑmɑn nbɑ din tie Siili juɑ nɑ, ŋuɑ kuukuɑ e din lɑ pɑɑku.» K niib kul nbɑ din be Suifnbɑ jɑɑnti dieok mɑnŋ ni nbɑ gbɑt Yiesu mɑɑn mɑnŋ nɑ, k b ji din donn wutuol bonciɑnn u pɑɑk. K b fiil bel’ɔ k nyinn’ɔ duo nɑ ni, k sɑɑ donn’ɔ kunkonn nbɑ k b din mɑɑ b duo nɑ pɑɑk, ɑ bin lu’u bɑɑɔk ni, ŋɑɑn k u buut b ni k yɑɑt. L puolpo k Yiesu din sik Kɑpelnɑunm nbɑ be Gɑɑliile tinŋ ni. Fuondɑɑl k u din tumi niib. Wɑɑ din wɑnt’b bɑnnu nbɑ din bɑkt’b, k mɑɑn u din piɑk nɑn yiikuo. K jɑsuɑ nbɑ k nɑlnbiiuk be u ni nɑ din be Suifnbɑ jɑɑnti dieok nɑ ni k tiɑn sɑnpɑɑpo ɑ «Fin Yiesu nbɑ tie Nɑɑsɑɑlet nilɔ nɑ, tinm nɑn fin, nlee mɑntk i? A bɑɑl ɑ ɑ tɑn biil’t ee? N mi fɑɑ tie wun nbɑ. A tie Yennu niŋɑnɔ nɑ e.» K Yiesu din yɑki nɑn nɑlnbiiuk mɑnŋ ɑ: «Ŋminin fuut, ŋɑɑn nyi juɑ mɑnŋ ni.» K nɑlnbiiuk nɑ lu juɑ nɑ tinŋ ni b nunm ni, k nyii u ni, ŋɑɑn k k tien’ɔ dɑnŋ. K l din tien suɑ kul yɑɑl-lituk, k b boi b lieb ɑ: «Mɑbuol bee nɑ? U mɔk yiikuo nɑn pɑnŋ k tien nɑlnbiit mɔb, k b nyi niib ni.» L pɑɑk, k b din muɑnt Yiesu sɑnn tinŋ mɑnŋ ni kul. L yuo nɑ k Yiesu din nyii Suifnbɑ jɑɑnti dieok nɑ ni k sɑɑn Siimɔn ŋɑɑk. K b sɑɑ lɑ Siimɔn diɑnpuok k u yiɑl k u gbɑnɑnt ton bonciɑnn, k b bɑln Yiesu, puo nɑ po. K Yiesu buɑn k got’ɔ, ŋɑɑn yɑki nɑn yiɑlu nɑ, k l gbenn, k puo nɑ fiil yiɑn ɑ k tien’m sɑɑɔnŋ. Yuo nbɑ k yennu din tɑn bɑɑ, k bin nbɑ kul mɔk bɑɑtb b ŋei ni din jii’b k bɑɑl nɑn’m Yiesu buol, k b din yiɑl yiɑlbuolu buolu, k u yii u nii bɑɑtb nɑ kul pɑɑk yenɔ yenɔ k te k b pɑɑk. Nɑlnbiit bonciɑnn din nyii niib ni. Bɑɑ nyii yuo nbɑ k b tiɑn sɑnpɑɑpo k yien ɑ: «A tie Yennu Bijɑ e.» Ŋɑɑn Yiesu din k cɑb’b k b pɑk jik, k mɑɑn b mi nɑn u tie *Klistu e. Lɑɑ din yent k Yiesu nyii duo nɑ ni k sɑɑn muuk ni, k niib nɑ din tɑn lin luon’ɔ k sɑɑ lɑ’u. Bɑɑ din tɑn lɑ’u yuo nbɑ k b ji guɑl’ɔ ɑ u dɑɑ yɑɑtl ŋɑɑn nyikt’b. Ŋɑɑn k u yet’b ɑ: «Sie k n sɑɑn digbɑnliɑ biɑk kii sɑɑ i muɑntl Yennu nɑɑn lɑbɑmɑnn po, k mɑɑn l pɑɑk e te k Yennu tun’n.» Ŋɑnn e k u din lin Suude digbɑnɑ k kuɑ Suifnbɑ jɑɑnti diet ni k wɑnt niib mɑɑn mɑnŋ. Dɑsiɑl k Yiesu din sɑɑn sɑɑ sie Genesɑɑlet mɔkgbenŋl gbingbɑnn pɑɑk, k nibulciɑɔnŋ din tut gbin ɑ bin gbiint Yennu mɑɑn. K u lɑ bulgbetɑ ŋɑnle din be mɔkgbenŋl mɑnŋ gbingbɑnn, k jɑnsuoltieb din nyik’l ŋɑɑn cɑt sɑɑn ɑ bin wuul b jɑnlɑɑnt. K u kuɑ bulgbetl nbɑ tie Siimɔn yɑl ni nɑ, ŋɑɑn miɑl’ɔ ɑ wun cɑt wɑɑn k fɔkt nɑn gbingbɑnn. K Yiesu kɑl bulgbetl nɑ ni, ŋɑɑn wɑnt nibulciɑɔnŋ nɑ Yennu mɑɑn. Wɑɑ din wɑnn niib k gbenn yuo nbɑ k u biɑ yet Siimɔn ɑ: «Jiln nyun sunsunŋ po k lu i jɑnlɑɑnt k suol jɑni.» Ŋɑɑn k Siimɔn jiin k yet’ɔ ɑ: «Cɑnbɑɑ, wonn nyiɑɔk munn ɑ, t won yɑbl ɑ t suol jɑni, ŋɑɑn k fit suol siɑl. Tɔn, fɑɑ pɑk lin nbɑ nɑ, ŋɑnn ŋɑnin n sɑɑ lu k got.» K Siimɔn nɑn u lieb nɑ ji din lu b jɑnlɑɑnt nɑ k suol jɑni bonciɑnn, k b jɑnlɑɑnt ji yɑɑ lin pɑt. L pɑɑk, k b kɑbnt b lieb bulgbetliel nɑ ni ɑ bin bɑɑl k tɑn sonm’b. Bɑɑ bɑɑl yuo nbɑ k b din donn jɑni k tɑn gbien b bulgbetɑ ŋɑnle kul ɑ, k l din kpiɑk k b ji yɑɑ bin kpii nyun ni. K Siimɔn Piɑl nbɑ din lɑ lin nbɑ tien nɑ, k u gbɑɑn Yiesu tuɑnn ŋɑɑn yet’ɔ ɑ: «N Yonmdɑɑnɔ, nyikn’min ŋɑɑn kii sɑɑ k mɑɑn n tie biitdɑɑnɔ e,» k mɑɑn bɑɑ suol jɑni bonciɑnn biɑnŋ nbɑ nɑ, k l bɑkt Siimɔn Piɑl nɑn bin nbɑ din be nɑn’ɔ kul, k l biɑ tie nnɑ e k tul Siimɔn lieb, Sɑɑk nɑn Sɑn nbɑ din tie Sebede wɑɑs nɑ. Ŋɑɑn k Yiesu yet Siimɔn ɑ: «Dɑɑ tiin jɑŋmɑɑni. Lɑɑ jii dinnɑ k sɑɑ, ɑ sɑɑ sɑɑn kii so niib.» Ŋɑnn e k b ji din tut b bulgbetɑ mɑnŋ k donn gbingbɑnn, ŋɑɑn nyik b bonɑ kul lenŋ ŋɑɑn wɑɑ Yiesu. Siɑn yuo k Yiesu din be dosɑu, k gbɑɑtl din be lenŋ k ŋɑɑɔk be u pɑɑk bonciɑnn. Wɑɑ din tɑn lɑ Yiesu yuo nbɑ, k u bɑɑl k gbɑɑn finfɑbl u tuɑnn k miɑl’ɔ ɑ: «N Yonmdɑɑnɔ, l i tie k ɑ luon ɑ sɑɑ fit te k n ŋɑɑɔk nɑ n gbenn.» K Yiesu tɑnt u nuu ŋɑɑn sii’u k yet’ɔ ɑ: «N luon. A ŋɑɑɔk mɑnŋ n gbenn.» L tɑɑkpɑɑk ni k u ŋɑɑɔk nɑ set gbenn. Ŋɑnn e k Yiesu yet’ɔ ɑ: «Dɑɑ piɑk suɑ mɑɑn nɑ, ŋɑɑn i sɑɑ Yennu mɑnntuɑ buol k jii ɑ mɔnŋ k wɑnn’ɔ, k biɑ mɑnn *mɑlunŋ k tul Yennu nɑn Muois nbɑ din senn k jiin gbɑɑtɑ pɑɑku po nɑ, k suɑ kul n bɑnn nɑn ɑ ŋɑɑɔk mɑnŋ set gbenn ɑ.» Ŋɑɑn Yiesu sɑnn set din duo bonciɑnn k gɑl sinsinn yuo nɑ, k nibulciɑɔnŋ din lɑkn u buol ɑ bii gbiintl u mɑɑn k biɑ lɑ pɑɑku b yiɑli pɑɑk. Ŋɑɑn u din tuu tun nyi k sɑɑ muuk ni k sɑɑ mei Yennu. Siɑn yuo, Yiesu din tumi niib k Fɑɑliisiɑnnbɑ nɑn *senniwɑntieb mun din nyii Gɑɑliile doi kul ni, nɑn Suude doi kul ni, nɑn Selusɑɑlenm, k bɑɑl Yiesu buol k kɑl. L yuo k Yonmdɑɑnɔ Yennu pɑnŋ din be Yiesu ni ɑ wun te k niib n pɑɑk. K nisiɑb din tɑn bɑɑt k jii gbɑnɑnkpienn dɑɑnɔ liɑnŋ pɑɑk, k b din kol ɑ bin jii’u k kuɑ nɑn’ɔ ŋɑɑk mɑnŋ ni k bil’ɔ Yiesu tuɑnn, ŋɑɑn b din k lɑ yiɑl nbɑ sɑɑ kuɑ, k mɑɑn niib din yɑbt bonciɑnn. L pɑɑk k b din jii’u k duo nɑn’ɔ mɔpinn pɑɑk, k cuɑ luot mɔpinn yul pɑɑk, k sikn’ɔ nɑn liɑnŋ nɑ k tɑn bil’ɔ Yiesu tuɑnn, niib nɑ sinsuuk ni. Yiesu nbɑ din lɑ b yɑdɑ nbɑ tie bɑnnu nbɑ nɑ, k u yet juɑ nɑ ɑ: «N yuɑk, n nyik cɑb ɑ biit ɑ.» K *senniwɑntieb nɑn Fɑɑliisiɑnnbɑ nɑ ji din duki b pɑlɑ ni ɑ: «Nilɑnɔpo e mun piɑk nnɑ k piɑk biil Yennu? Ŋmee dɑɑ sɑɑ fit nyik cɑb nilɔ biit, k l k tie Yennu kuukuɑ kɑɑ?» Yiesu ŋɑnin din mi bɑɑ duki biɑnŋ nbɑ, k u boi’b ɑ: «Bee k i duki nnɑ i pɑlɑ ni? Mi i yet ɑ: ‹N nyik cɑb ɑ biit,› ɑmi mi i yet ɑ: ‹Fiit kii sonm,› mɑɑn munle nɑ sinsuuk ni lɑnn po e pɑɑl i? Ŋɑɑn n luon k yin bɑnn nɑn *Nisɑɑlk Bijɑ mɔk yiikuo tingbounŋ nɑ ni k sɑɑ nyik cɑb niib b biit.» Ŋɑnn e k u yet gbɑnɑnkpienn dɑɑnɔ nɑ ɑ: «Fin, fiit k jii ɑ liɑnŋ kii kun ɑ ŋɑɑk ni.» L tɑɑkpɑɑk ni k juɑ mɑnŋ din fiil k set b nunm po, k jii u liɑnŋ mɑnŋ, k kun. Wɑɑ sɑɑ nɑ k u piɑk dont Yennu. K l yɑɑl ŋɑɑn lit b kul ɑ, k b piɑk dont Yennu k yien ɑ: «Dinnɑ t jiɑ lɑ *dulnyɑ.» L puolpo e k Yiesu din nyii ŋɑɑk mɑnŋ ni k sɑɑ, k sɑɑ lɑ *lɑnpogɑɑltuɑ, k u sɑnn din tie Liefi, k u kɑl u tuonn pɑɑk lɑnpogɑɑldieok ni, k Yiesu yet’ɔ ɑ: «Fiit kii wɑɑ’n.» K u nyik u bonɑ kul ŋɑɑn fiil k wɑɑ’u. Ŋɑnn e k u tɑn tien jɑɑngbenŋl u ŋɑɑk ni k tul Yiesu, k *lɑnpogɑɑltieb nɑn niib bonciɑnn din bɑɑl k lɑkn di nɑn’m. K Fɑɑliisiɑnnbɑ siɑb nɑn b *senniwɑntieb din bɑɑl k tɑn buln nɑn Yiesu *puolpoweitieb k boi’b ɑ: «Bee k i di k nyu nɑn lɑnpogɑɑltieb nɑn biitdɑnm i?» K Yiesu din jiɑnt k yet’b ɑ: «Bin nbɑ mɔk lɑɑfiɑ k luon tebtuɑ, ŋɑɑn bin nbɑ yiɑl luon’ɔ. N k bɑɑl ɑ n yet bin nbɑ be binbenŋɑnŋ ni kɑɑ ɑ bin mɔ kuɑŋɑɑn k lebt binbenŋ, ŋɑɑn n bɑɑl mɑɑ n yet biitdɑnm e ɑ bin mɔ kuɑŋɑɑn k lebt binbenŋ.» Ŋɑnn e k nisiɑb din yet Yiesu ɑ: «Sɑn puolpoweitieb tun loln mɔi k mei Yennu, k t puolpoweitieb mun tie nnɑ, ŋɑɑn ɑ puolpoweitieb ŋɑnin di k nyu.» K u jiin k boi’b ɑ: «Puociɑnu i i be, suɑ sɑɑ fit k te k sɑɑnm n lol mɔi yuo nbɑ k puoyuokl sɔlɔ dɑɑ be b buol ni wɑɑ ɑɑ? Aɑi. Ŋɑɑn yuo sɑɑ bɑɑl k b tɑn sɑɑ nyinn puoyuokl sɔlɔ nɑ b buol, k l yuo mɑnŋ e k b sɑɑ lol mɔi.» K Yiesu din yin’m bɑljouk biɑk ɑ: «Suɑ kɑn pɑt tɑpɑɑnn cɑbl k lik tɑkpel. L i tie k u tien nnɑ i e, u sɑɑ biil tɑpɑɑnn mɑnŋ, ŋɑɑn cɑbpɑɑnn nɑn tɑkpel mɑnŋ biɑ lek kii jɑn. Nnɑ e mun k suɑ kɑn jii dɑpɑɑnin k liɑk dɑlenkpel ni. L i tie k u tien nnɑ i e, k dɑpɑɑnin nɑ tɑn mɔ yuo nbɑ, l sɑɑ yiel dɑlenkpel nɑ e, k dɑɑn mɑnŋ n muɑn yɑnn, k *linlenn nɑ mun n yiel. Sie k ɑ jii dɑpɑɑnin k liɑk linlenpɑɑnn ni. Tɔn, l i tie k wun nbɑ nyu dɑkpel i e, u i lɑ dɑpɑɑnin, u k fɑɑt’l, u sɑɑ yet ɑ: ‹Dɑkpel e mɑn.› » Tɔn, fuondɑsiɑl k Yiesu din gɑɑl dii kpɑɑnt ni, k u *puolpoweitieb nɑ din sonm kɔni dikɑlɑ k pini k ŋmɑn. K Fɑɑliisiɑnnbɑ siɑb din boi’b ɑ: «Bee k i tuun lin nbɑ k t *senni wɑnt nɑn t dɑɑ tuun *Fuondɑɑl i?» K Yiesu jiin k boi’b ɑ: «I k mi lii Yennu lolkpel kɑdɑɑɔk ni Dɑɑfiid nbɑ din tun biɑnŋ nbɑ yuo nbɑ k kon din mɔk ŋuɑ nɑn u juɑmu nɑ ɑɑ? U din kuɑ Yennu ŋɑɑk ni k sɑɑ jii pɑɑnu nbɑ k b din tuu senn k l tie Yennu yɑl nɑ, k biɑ tul u juɑmu nɑ. K senni nɑ din k cɑb nɑn suɑ n di pɑɑnu mɑnŋ sie mɑnntieb kuukuɑ e.» K Yiesu biɑ yet’b ɑ: « *Nisɑɑlk Bijɑ e yen Fuondɑɑl.» Fuondɑliel k Yiesu din kuɑ *Suifnbɑ jɑɑnti dieok ni k tul niib wɑnnu, k jɑsuɑ din be lenŋ k u niidiitu kpo k guon. K *senniwɑntieb nɑn Fɑɑliisiɑnnbɑ siɑb mun din be lenŋ, k goli Yiesu ɑ bin lɑɑn u sɑɑ te k wun pɑɑk Fuondɑɑl ii? K mɑɑn b din luon bin lɑ lin nbɑ k b sɑɑ tɑɑl’ɔ l po. Ŋɑɑn Yiesu din mi b dudukt ni, k yet juɑ nbɑ k u nuu kpo nɑ ɑ: «Fiit k set suɑ kul tuɑnn po.» K juɑ mɑnŋ fiil k set. K Yiesu yet’b ɑ: «N boi’i e, t senni sɑk ɑ t tun lɑnn e? T tun bonŋɑnn Fuondɑɑl ɑmi t tun bonbiil i? T fit fɑt nilɔ mɑnfuol ɑmi tin kpi’u u?» Ŋɑnn e k u got lint niib mɑnŋ kul ɑ, ŋɑɑn yet niikpienn dɑɑnɔ mɑnŋ, «Tɑntl ɑ nuu mɑnŋ.» K u tɑnt, k u nuu mɑnŋ nɑɑt. K *senniwɑntieb nɑn Fɑɑliisiɑnnbɑ nɑ ji din yɑɑ bin put nɑn wutuol, k b ji piin k piɑk yien lieb bɑɑ sɑɑ tien Yiesu biɑnŋ nbɑ. L puolpo k Yiesu duo juɑl pɑɑk ɑ wun sɑɑ miɑl Yennu, k din sɑɑ mei Yennu nyiɑɔk nɑn lɑɑ tɑn yent. K sɑn-nyiɑɔk ni k u din yiin u puolpoweitieb k tɑn lukt piik nɑn bɑnle k yi’b tuomiinbɑ. U din gɑnn Siimɔn (wun nbɑ k u din pul’ɔ Piɑl nɑ) nɑn Siimɔn ninjɑ Andle, nɑn Sɑɑk nɑn Sɑn, nɑn Fiiliip nɑn Bɑɑltelemi, nɑn Mɑɑtieo nɑn Tuomɑ, nɑn Sɑɑk nbɑ din tie Alfe bijɑ nɑ, nɑn Siimɔn (wun nbɑ din luon k Suifnbɑ ii yen b mɔnŋ nɑ), nɑn Suudɑ nbɑ din tie Sɑɑk bik, nɑn Suudɑ Iskɑɑliɑɔt (wun nbɑ din tɑn nyii Yiesu puol nɑ). Yiesu nbɑ din nyii juɑl nɑ pɑɑk k sik nɑn’m yuo nbɑ, k u din sɑɑn set pɑɑnu ni, k u puolpo juɑmu lɑkn bonciɑnn, k niib bonciɑnn mun dɔnŋ nyii Suude po nɑn Selusɑɑlenm nɑn Tiil nɑn Siidɔn nbɑ kpiɑ mɔkgbenŋl nɑ, k din bɑɑl ɑ bin tɑn gbiint u mɑɑn, k biɑ luon wun te k bin pɑɑk. Bin nbɑ k nɑlnbiit dɑɑmi’b mun din bɑɑl k u te k b pɑɑk. K suɑ kul luon wun sii’u, k mɑɑn pɑnŋ din nyi u ni k te k suɑ kul pɑɑkt. L yuo nɑ k Yiesu got u puolpoweitieb ŋɑɑn yet ɑ «Yinm nɑndɑnm, pɑlpienn tie i yɑl e, k mɑɑn Yennu nɑɑn tie i yɑl e. Yinm nbɑ k kon mɔk’i mɔtɑɑnɑ, pɑlpienn tie i yɑl e, k mɑɑn i tɑn sɑɑ gbuo. Yinm nbɑ mɔ mɔtɑɑnɑ, pɑlpienn tie i yɑl e, k mɑɑn i tɑn sii lɑɑ. «Niib i nɑn’i k bɔktl’i k suki’i k biil i sɑnɑ, k mɑɑn yɑɑ wɑɑ Nisɑɑlk Bijɑ nɑ pɑɑk, pɑlpienn tie i yɑl e. Ii yikn mɑn kii kpɑnm nɑn pɑlpienn mɑn l dɑɑl, k mɑɑn i nyuɑt tɑn sii yɑb *Yendɔunŋ ni. B yejɑnm mun din tie *Yennu sɔkniinbɑ nnɑ e. «Yinm mɔktɑ, l tɑn sii bi i pɑɑk, k mɑɑn i dɔnŋ lɑ i yɑnbuɑbonɑ wɑɑ. «Yinm nbɑ gbuo mɔtɑɑnɑ, l tɑn sii bi i pɑɑk, k mɑɑn kon tɑn sɑɑ gbɑt’i. Yinm nbɑ lɑɑ mɔtɑɑnɑ, l tɑn sii bi i pɑɑk, k mɑɑn i tɑn sii fɑbn k mɔ.» «L tɑn sii bi i pɑɑk yuo nbɑ k niib kul piɑk’i k mɑɑn b yejɑnm mun din tie nnɑ e k tien fɑɑk sɔkniinbɑ.» «Yinm nbɑ gbiintl n mɑɑn nɑ, n yien’i e, ii mɔk lonm nɑn i dɑtɑi mɑn, kii tuun lin nbɑ ŋɑn kii tien bin nbɑ nɑn’i. Bin nbɑ polntl’i mɔpolɑ, yin yɑt yetŋɑnm b pɑɑk. Bin nbɑ sɑlkt’i, ii mei Yennu kii tien’m. Wun nbɑ peb ɑ tɑnpɑk, fɑn ŋmɑnt liel po mun k wun peb. Wun nbɑ jii ɑ liɑtfuouk nbɑ tie gbɑktl, fɑn sɑk k wun gɑɑl ɑ suot mun biɑk. Wun nbɑ kul miɑl’ɑ siɑl, fɑn tul’ɔ. Wun nbɑ fɑt ɑ bonɑ, ɑ ji dɑɑ wɑɑ gɑɑn. Biɑnŋ nbɑ k i luon niib ii tuun kii tien’i nɑ, ii mun ii tuun nnɑ kii tien i lieb. «L i tie k i luon bin nbɑ luon’i nɑ kuukuɑ i e, nlee k i sii guu nyuɑt i? Biit dɑnm mun luon bin nbɑ luon’m nɑ. L i tie k i tuun bonŋɑnn k tien bin nbɑ tuun bonŋɑnn k tien’i nɑ, nlee k i sii guu nyuɑt i? Biit dɑnm mun tuun lin nbɑ nɑ. L i tie k i kpentl k tien bin nbɑ k i dɑɑn nɑn b sɑɑ jiin ɑ, nlee k i sii guu nyuɑt i? Biit dɑnm mun kpentl nnɑ, k tien b lieb k biɑ tuu tɑn gɑɑl b bont biɑnŋ jinŋ. «L pɑɑk, ii mɔk lonm nɑn i dɑtɑi mɑn, kii tuun bonŋɑnn kii tien’m, kii biɑ kii kpentl kii tien’m k dɑɑ dɑɑn nɑn b sɑɑ jiin ɑ. Nnɑ e k i nyuɑt sii yɑb k i biɑ sii tie Yennu wɑɑs, k mɑɑn ŋuɑ e tuun bonŋɑnn k tien bin nbɑ k tien’ɔ niipuouk, nɑn biitdɑnm. Ii mɔk ninbɑtinu mɑn nɑn i Bɑɑ Yennu nbɑ mɔk ninbɑtinu biɑnŋ nbɑ nɑ. «I dɑɑ kpɑɑn lieb biit nbɑ k i sɑɑ fit tɑɑl’b l pɑɑk, k Yennu mun dɑɑ tɑɑl’i ni. Dɑɑ piɑk nilɔ biil k gbent’ɔ, k Yennu kɑn biil k gben’ɑ ni. Nyikn cɑb niib k Yennu sɑɑ nyik cɑb’ɑ mun. Ii tien niib mɑn, k Yennu mun sii tien’i. Yennu sɑɑ cɑɑt bonŋɑnn nɑn ŋmɑnbɑnŋ nbɑ gbie nɑn mɔgbɑnɑ k tul’i k mɑɑn Yennu sɑɑ cɑɑt k tul’i biɑnŋ nbɑ k i cɑɑtl k tien i lieb nɑ e.» L puolpo k Yiesu din yin’m bɑljouk ɑ: «Juɑnŋ sɑɑ fit dɑɑl u luɑ wɑɑ? Aɑi, b kul tɑn sɑɑ bɑɑ buotuk ni wɑɑ. Tumiituɑ k gɑl u wɑntuɑ, k tumiituɑ mun i bɑnn gbenn, ŋuɑ nɑn u wɑntuɑ sii jɑn e. «Bee k ɑ goli lɑɑt muɑnu nbɑ be *ɑ luɑ ninbinn ni, ŋɑɑn k k lɑ jɑɑntɑlk nbɑ be ɑ mɔnŋ mɔnŋ ninbinn ni? Nlee k ɑ sɑɑ yet ɑ luɑ ɑ: ‹N yuɑk, ŋɑɑnt k n nyinn muɑnu nbɑ be ɑ ninbinn ni,› ŋɑɑn k k lɑɑt jɑɑntɑlk nbɑ be ɑ mɔnŋ ninbinn ni? Fin, kpinkpɑnni dɑɑnɔ nɑ, nyint jɑɑntɑlk nbɑ be ɑ ninbinn ni nɑ sinsinn, k ji fit lɑ fɑnu k nyinn muɑnu nbɑ be ɑ luɑ ninbinn ni nɑ. «Tiŋɑnŋ k luon luɑnbiit, k tibiiuk mun k luon luɑnŋɑnɑ. Tiik luɑnɑ ni e k b bɑnt’ɔ. B k lɑɑt luɑnɑ nbɑ k b yi *fiig kunkonŋ pɑɑk k pɔ, k biɑ k lɑɑt *lɑɑsen penn pɑɑk k pɔ. Niŋɑnɔ e tuun bonŋɑnn k mɑɑn u pɑl ni gbie nɑn bonŋɑnn mɑnŋ, k nibiiuk mun tuun bonbiil k mɑɑn u pɑl ni gbie nɑn bonbiil mɑnŋ. Lin nbɑ be nilɔ pɑl ni, ŋɑnn e nyi u mɔb ni. «Bee k i yi’n Yonmdɑɑnɔ Yonmdɑɑnɔ ŋɑɑn k k tuun mɑɑ wɑnn’i biɑnŋ nbɑ? Wun nbɑ kul bɑɑt n buol k gbiintl n mɑɑn k sɑɑk k tuun l biɑnŋ, n sɑɑ wɑnn’i wɑɑ nɑɑn wun nbɑ. U nɑɑn nɑn juɑ nbɑ din mɑɑ u ŋɑɑk nɑ e. Sinsinn u din gbiil fiɑkl k l sunŋ, k sɑɑ tuu tɑnpiiuk, k ji fɔkn fiɑkl mɑnŋ l pɑɑk. L puolpo k sɑɑk tɑn bɑɑ bonciɑnn, k kpenu gbie nɑn nyunmɔnn k sɑɑ duo k liɑt ŋɑɑk mɑnŋ, ŋɑɑn k l k bɑɑ, k mɑɑn u din mɑɑ’l bonŋɑnn e. Ŋɑɑn wun nbɑ gbiintl n mɑɑn ŋɑɑn k k tuun l biɑnŋ, u nɑɑn nɑn juɑ nbɑ mun din mɑɑ u ŋɑɑk tɑnbiini ni, ŋɑɑn k k gbiil fiɑkl nɑ e, k nyunmɔnn din tɑn gbie k sɑɑ duo k yil ŋɑɑk mɑnŋ, k l bɑɑ yiɑn ɑ k nɑn siɑl ɑ k tenn.» Yiesu nbɑ din wɑnn niib lin nbɑ nɑ kul k gbenn nɑ, k u ji din gɑl sɑɑn Kɑpelnɑunm. K Luonm tinŋ sejenm yudɑɑnsuɑ din be lenŋ k mɔk dɑɑblonkɑk, k yiɑlu din suol’ɔ k u pel kuun ɑ. L yuo mɑnŋ k sejenm yudɑɑnɔ nɑ gbɑt Yiesu po k tun *Suifnbɑ sɑɑkɑb u buol ni ɑ bin sɑɑn k sɑɑ bɑln’mɔ k wun bɑɑl k tɑn te k u dɑɑbl nɑ n pɑɑk. K b din sɑɑn Yiesu buol k sɑɑ bɑln’mɔ bonciɑnn k yet’ɔ ɑ: «Juɑ mɑnŋ jɑnŋ nɑn fɑn sonm’ɔ wɑɑ, k mɑɑn u luon t niib k biɑ te k b mɑɑ tinm Suifnbɑ jɑɑnti dieok k tul’t ɑ.» Ŋɑnn e k Yiesu din wei’b sɑɑn. Wɑɑ din sɑɑ pel ŋɑɑk mɑnŋ yuo nbɑ, k sejenm yudɑɑnɔ mɑnŋ din tun u yuɑsnbɑ k yet’b ɑ bin yet Yiesu nnɑ ɑ: «N Yonmdɑɑnɔ, dɑɑ bɑknt ɑ mɔnŋ k bɑɑt, k mɑɑn n k ŋɑn nɑn fɑn bɑɑl kuɑ n ŋɑɑk ni. Ŋɑnn e k n bo dukn nɑn n k ŋɑn nɑn k n nɑkn ɑ buol. Ŋɑɑn fɑn lek tul mɔb k n dɑɑbl sɑɑ pɑɑk ɑ. K mɑɑn n mɔk bin nbɑ gɑl’n k yen’n, k n mun diɑ sejenm k yen’m, k fit yien yenɔ ɑ: ‹Bɑɑt,› k u bɑɑt, k yien luɑ ɑ: ‹Sɑɑnt,› k u sɑɑ, k biɑ yien n dɑɑbl: ‹Tient nnɑ,› k u tie.» Yiesu nbɑ din gbɑt lin nbɑ nɑ, k l yɑɑl lit’ɔ, k u jiɑnt k got nibulciɑɔnŋ nbɑ wɑɑ u puolpo nɑ k yet’b ɑ: «N yien’i e, n dɑɑ k mi lɑ yɑdɑ nɑ buolu nɑ, nɑn Islɑɑeltieb sinsuuk ni wɑɑ.» L yuo mɑnŋ e k tuomiinbɑ din ŋmɑt k sɑɑn sejenm yudɑɑnɔ mɑnŋ ŋɑɑk ni k sɑɑ bɑɑl suɑ dɑɑbl mɑnŋ pɑɑk ɑ. L din yent e k Yiesu din sɑɑ duo nbɑ k b yi Nɑen nɑ, k u *puolpoweitieb nɑn nibulciɑɔnŋ din wɑɑ’u. Wɑɑ din sɑɑ bɑɑl duo mɑnŋ tɑnmɔb ni yuo nbɑ, k u lɑ k b nyi duo mɑnŋ ni k jii kuun ɑ bin sɑɑn pii. Kpiemɔ mɑnŋ nɑɑ din tie pɑkuɑk e, k ŋuɑ e din tie u bijɑyenml k nibulciɑɔnŋ din ciɑnt pɑkuɑk mɑnŋ. Yiesu nbɑ din lɑ pɑkuɑk nɑ, k ninbɑɑɔk suol’ɔ, k u yet’ɔ ɑ: «Dɑɑ mɔ,» ŋɑɑn sɑɑn sii kuun liɑnŋ nɑ, k bin nbɑ jii’u nɑ set. K Yiesu yet ɑ: «Ŋɑɑjuɑ, n yien’ɑ e, fiit.» K bik nbɑ kpo mɑnŋ nɑ fiil k kɑl k piin k piɑk. K Yiesu din jii’u k kubn’ɔ u nɑɑ. K jɑŋmɑɑni ji din suol niib kul nbɑ be lenŋ nɑ, k b din dont Yennu sɑnn k yien lieb ɑ: « *Yennu sɔkniijɑɑnn be t sinsuuk ni,» k biɑ yien b lieb ɑ: «Yennu sik, ɑ wun sonm u niib.» K Yiesu lɑbɑɑl nɑ din yɑt Suude tinŋ nɑn digbɑnkpini kpini nbɑ kpiɑ lenŋ mɑnŋ kul ɑ. L puolpo e k Sɑn puolpoweitieb din sɑɑn k sɑɑ yet’ɔ l lɑbɑɑl kul, k u tɑn yiin u puolpoweitieb bɑnle b ni, k tun’m Yonmdɑɑnɔ buol, ɑ bin sɑɑ boi’ɔ ɑ: «Fin e tie wun nbɑ yɑɑ wun tɑn bɑɑl nɑ ɑmi tii dɑɑ kii guu luɑ?» Yuo nbɑ k b din bɑɑl Yiesu penŋ nɑ, k b yet’ɔ ɑ: «Sɑn, wun nbɑ wuul niib Yennu nyunwulu nɑ tun’t ɑ penŋ ɑ t tɑn boi’ɑ k lɑɑn fin e tie wun nbɑ yɑɑ wun tɑn bɑɑl nɑ ɑmi tii dɑɑ kii guu luɑ?» L yuo l yuo nɑ k Yiesu din te k bɑɑtb nɑn yiɑlpɑɑli dɑnm bonciɑnn pɑɑk, k nyinn nɑlnbiit siɑb ni, k nyuɑnt juɑni bonciɑnn. Ŋɑnn e k Yiesu jiin k yet Sɑn tuomiinbɑ nɑ: «Ii ŋmɑt mɑn k sɑɑ yet Sɑn lin nbɑ k i lɑ k biɑ gbɑt nɑ, ɑ i lɑ k juɑni nyuɑntl, k wɔbi tɑɑ nɑɑtl k b sonm, k gbɑɑtɑ ŋɑɑt gbent, k tuukpɑɑ ji gbiɑ, k kpienm fi kuun ni, k tɑlɑs-dɑnm gbiintl lɑbɑmɑnn muɑnti. Pɑlpienn tie wun nbɑ kɑn nyi u yɑdɑ ni nɑ yɑl e.» Sɑn tuomiinbɑ nbɑ din ŋmɑt nɑ puolpo e k Yiesu ji din piin k boi niib mɑnŋ buboit k jikt sɑɑ Sɑn po ɑ: «Yɑɑ dɑɑn sɑɑn muuk ni nɑ, i dɑɑn duki nɑn i sɑɑ sɑɑ lɑ bee? I dɑɑn mi ɑ i sɑɑ lɑ muuk nbɑ k wounŋ dɑnm nɑ ee? Nnɑ i kɑɑ, i mɑntk jiɑ dɑɑn sɑɑn ɑ i sɑɑ lɑ bee? Nilɔ k u liɑ tɑŋɑnt ɑmi ii? Nnɑlɑ, niib nbɑ liɑ tɑŋɑnt k be b yɑmɑ ni nɑ be kpɑnbɑlɑ ŋei ni e. I dɑɑn sɑɑn muuk nɑ ni ɑ i sɑɑ lɑ bee? Yennu sɔkni ɑmi ii? Bɑlmɔni e k n yien’i, Sɑn ŋɑnin gɑl sɔkni wɑɑ. Ŋuɑ po e k b din diɑn Yennu lolkpel kɑdɑɑɔk ni ɑ: ‹Nnɑlɑ, n sɑɑ tun n *tuomi ɑ tuɑnn po, wun nbɑ sɑɑ gɑl k ŋɑnm ɑ bɑɑlu sɔnu.› » K Yiesu biɑ din yet’b ɑ: «N yien’i e, b dɑɑ k mi mɑl suɑ k u cie Sɑn, ŋɑɑn wun nbɑ juont tɑlk Yennu nɑɑn ni cie’u.» (Niib kul nɑn *lɑnpogɑɑltieb din gbiintl Sɑn mɑɑn k bɑɑ din ŋɑɑn k Sɑn wul’b Yennu nyunwulu nɑ, din wɑnn nɑn b sɑk ɑ Yennu e ŋɑn. ŋɑɑn k Fɑɑliisiɑnnbɑ nɑn *senniwɑntieb din k gɑɑl lin nbɑ k Yennu lol tul’b, k mɑɑn b din k sɑk ɑ Sɑn n wul’b Yennu nyunwulu.) K Yiesu biɑ yet’b ɑ: «Mɔtɑɑnɑ nigbounŋ nɑ, n sɑɑ bikn’m nɑn bee? B nɑɑn nɑn bee? B nɑɑn nɑn wɑɑs nbɑ tuu tikl k kɑl dɑɑk ni k tiɑn lieb pɑɑk nɑ e ɑ: ‹T pieb yeli k tien’i, ŋɑɑn k i k wɑɑ. T yiin kuyɑni k tien’i, ŋɑɑn k i k mɔ fɑbn.› K mɑɑn Sɑn din bɑɑl k k di pɑɑnu, k biɑ k nyu dɑmunŋ, ŋɑɑn k i yɑɑ ɑ u mɔk nɑlnbiiuk, k *Nisɑɑlk Bijɑ mun tɑn bɑɑl k di k nyu, ŋɑɑn k i yɑɑ ɑ: ‹Gotl mɑn, u tie podɑɑnɔ nɑn dɑnyuuluk o. U biɑ tie lɑnpogɑɑltieb nɑn biitdɑnm yuɑk e.› Tɔn, bin nbɑ kul gɑɑl Yennu yɑn tuu yɑɑ ɑ l ŋɑn.» K Fɑɑliisiɑnsuɑ din be, k din tɑn yiin Yiesu ɑ wun bɑɑl k di jiet u ŋɑɑk ni, k Yiesu din sɑɑn juɑ nɑ ŋɑɑk ni, k b sɑɑ lɑkn kɑl k dii. K puosuɑ mun din be duo mɑnŋ ni k tie puocunconn, k wɑɑ tɑn gbɑt ɑ Yiesu di jiet ŋɑɑk mɑnŋ ni, k u bɑɑl nɑn sɑlenŋɑnn nbɑ gbie nɑn tulɑɑli, k din set Yiesu puol, u tɑɑ buol, ŋɑɑn mɔ, k u nyin-nyuut bɑɑ Yiesu tɑɑ pɑɑk k tɑn mɑɑk, k u din tɑn jii u yut k fiɑn Yiesu tɑɑ, k puul lol u tɑɑ, k tɑn but tulɑɑli nɑ u tɑɑ pɑɑk. K Fɑɑliisiɑnjuɑ nbɑ yiin Yiesu nɑ din lɑ lin nbɑ nɑ, k u dukn u pɑl ni ɑ: «Juɑ nɑ i bo i tie Yennu sɔkni e nɑn bɑlmɔni, u bo sɑɑ bɑnn puo nbɑ sii’u nɑ nbɑ tie wun nbɑ. U bo sɑɑ bɑnn nɑn u tie biitdɑɑnɔ wɑɑ.» Ŋɑnn e k Yiesu yet Fɑɑliisiɑnjuɑ mɑnŋ ɑ: «Siimɔn, n mɔk mɔbonsiɑl k yɑɑ n yet’ɑ.» K Siimɔn jiin k yet’ɔ ɑ: «Cɑnbɑɑ, yetl’n.» K Yiesu yet’ɔ ɑ: «Jɑb bɑnle din be k mɔk lik-kpent-tuɑ pɑnn. Yenɔ din mɔk u pɑnn denienbɑ kobi ŋɑnŋmu (500), k luɑ nɑ mun din mɔk u pɑnn denienbɑ piiŋmu (50). B bɑnle mɑnŋ suɑ din k fit pɑ. Ŋɑnn e k u din cɑb b kul ɑ, ɑ bii sɑɑ. Tɔn, ɑ duki nɑn ŋmee mɑntk sii luon lik-kpent-tuɑ mɑnŋ i?» K Siimɔn jiin k yet’ɔ ɑ: «N dukn nɑn l sii tie wun nbɑ k u cɑb’ɔ k u pɑnn yɑb nɑ e.» K Yiesu yet’ɔ ɑ: «A mɔk mɔni,» k din jiɑnt got puo nɑ, ŋɑɑn yet Siimɔn, «A lɑ puo nɑ wɑɑ? N kuɑ ɑ ŋɑɑk nnɑ, k ɑ k tul’n nyun k n fobt n tɑɑ, ŋɑɑn puo mɑnŋ ŋɑnin fobt n tɑɑ nɑn u nyin-nyuut, k biɑ jii u yut k fiɑl’n. Fin ŋɑnin k puul wɔbn, ŋɑɑn ŋuɑ ŋɑnin k nyik n tɑɑ bɑlmu mɑɑ bɑɑl yuo nbɑ nɑ wɑɑ teee nɑn mɔtɑɑnɑ. A biɑ lek k suɑl n yut nɑn kpɑn, ŋɑɑn puo mɑnŋ biɑ jii tulɑɑli k suɑl n tɑɑ. L pɑɑk, n yien’ɑ e, wɑɑ luon’n bonciɑnn nɑ pɑɑk e wɑnt nɑn u lɑ nyikcɑbu u biit nbɑ yɑb nɑ pɑɑk, ŋɑɑn wun nbɑ lɑ nyikcɑbu u biit nbɑ k yɑb nɑ pɑɑk nɑ, mun luon’n wɑɑnm-nnɑ e.» Ŋɑnn e k Yiesu jiɑnt k yet puo nɑ ɑ: «N nyik ɑ biit k cɑb’ɑ wɑɑ.» K nilieb nbɑ kɑl k di nɑ ji din piin yien b lieb ɑ: «Juɑ nɑ tie ŋmee k sɑɑ fit nyik cɑb nilɔ u biit i?» K Yiesu yet puo nɑ: «A yɑdɑ nɑ pɑɑk, ɑ lɑ fielu wɑɑ. L pɑɑk, i sɑɑ nɑn mɑnu.» L puolpo k Yiesu din lin digbɑnsɑɑkɑlɑ ni nɑn digbɑnbis ni, k muɑntl Yennu nɑɑn lɑbɑmɑnn k u tuomiinbɑ *piik nɑn bɑnle din wɑɑ’u. Puob nbɑ k u din nyinn nɑlnbiit b ni, k biɑ te k b yiɑli nɑ gbenn nɑ mun din be lenŋ mɑnŋ k wɑɑ’u. Yenɔ din tie Mɑgdɑɑlɑ puo Mɑɑli, wun nbɑ k nɑlnbiit bɑnlole din nyii u ni, k lieb mun din tie Suusɑ ŋɑɑpuo Sɑɑnn (Suusɑ din tie *Heluod ŋɑɑtuontunnɑ sɑɑkuɑ), nɑn Suusɑɑnn, nɑn puolieb bonciɑnn. K b kul ɑ din jikt b mɔnŋ mɔnŋ bonɑ k tien Yiesu k sonmt ŋuɑ nɑn u *puolpoweitieb. Niib lek din nyi digbɑnn nɑn digbɑnn k bɑɑt Yiesu buol, k nibulciɑɔnŋ din lɑkn, k Yiesu yin’m bɑljouk ɑ: «Jɑsuɑ din duo u kpɑɑb ni ɑ wun sɑɑ bul tɑn. Wɑɑ din buul nɑ, k bonbuoli nɑ yenn-nbɑ din yɑt bɑɑ sɑnjouk pɑɑk, k niib gɑɑl ŋmɑɑt l pɑɑk, k nuɑni biɑ tɔki k di. K liel mun din bɑɑ tɑnpuut pɑɑk. Bonbuoli mɑnŋ nbɑ din tɑn piɑ yuo nbɑ, l tɑn kpo e, k mɑɑn l din k bɑɑ mɑɑtuk ni. K liel mun din bɑɑ kunkoni ni, k tɑn lɑkn piɑ k kpɑɑt nɑn’m, ŋɑɑn k kunkoni ŋmɑbl’b. Ŋɑɑn k liel mun bɑɑ tinŋɑnŋ ni, k piɑ k kpɑɑt bonŋɑnn, k tɑn nɑn nyik nyik nyik.» Yiesu nbɑ yin’m bɑljouk mɑnŋ k gbenn nɑ, k u yet ɑ: «Wun nbɑ mɔk tubɑ k sɑɑ gbɑt, wun gbiint.» L puolpo e k Yiesu puolpoweitieb din boi’ɔ ɑ: «Bɑljouk nɑ pɑɑk tie bee?» K u jiin k yet’b ɑ: «Yinm ŋɑnin, Yennu cɑb ɑ yin bɑnn wuol ni mɑɑn k jii jiin u nɑɑn po, ŋɑɑn nilieb ŋɑnin, n yii’m bɑljokt e, ɑ n te k: Bin got ŋɑɑn dɑɑ lɑɑt; Bin biɑ gbiint, ŋɑɑn dɑɑ bɑnt l pɑɑk.» «Bɑljouk nɑ pɑɑk tie nnɑ e: Bonbuoli nbɑ nɑ e tie Yennu mɑɑn. Bin nbɑ tie nɑn sɑnjokpinŋ nbɑ k bonbuoli bɑɑ lenŋ nɑ, tie bin nbɑ tuu gbɑt mɑɑn mɑnŋ, ŋɑɑn *Sɑɑtɑn n bɑɑl k nyinn’l b pɑlɑ ni ɑ b dɑɑ tie yɑdɑ k lɑ fielu. K lieb mun nɑɑn nɑn tɑnpuut nɑ e. B tuu gbɑt mɑɑn mɑnŋ k gɑɑl’l nɑn pɑlpienn; ŋɑɑn b k ŋɑɑnt k l bɑɑ jiinɑ. B tuu tien yɑdɑ yuo wɑɑnm-nnɑ, ŋɑɑn nyik yɑdɑ mɑnŋ yuo nbɑ k jinjɑnmi bɑɑl b pɑɑk. Bonbuoli nbɑ bɑɑ kunkoni ni nɑ nɑɑn nɑn bin nbɑ gbɑt mɑɑn mɑnŋ ŋɑɑn binbenŋ dɑɑmiu nɑn mɔktuk lonm nɑn niɑnbiiuk nbɑ be tingbounŋ nɑ ni tuu nyɑkn mɑɑn mɑnŋ b pɑlɑ ni, k lin ŋɑkt. K lin nbɑ mun bɑɑ tinŋɑnŋ ni nɑ ŋɑnin nɑɑn nɑn bin nbɑ gbiint n mɑɑn k diɑ’l kenken nɑn bɑlmɔni b pɑlɑ ni, k b pɑlcienn ni b biɑ luon luɑnɑ. «Suɑ k jokt fitl ŋɑɑn liknt bokt l pɑɑk, ɑmi k gul’l u gɑdo lɔunŋ ni. Sie k u jii’l k tuɑn bonsiɑl nbɑ fɔk pɑɑk, k niib i jik i kuɑ yuo nbɑ, bii lɑɑt yentu nɑ. Bɑli nbɑ kul wuo, sie k l tɑn wuot nyii pɑɑnu ni, k lin nbɑ mun liik, sie k l tɑn likt k nyii. «L pɑɑk, ii mi mɑn yɑɑ gbiintl Yennu mɑɑn biɑnŋ nbɑ. Wun nbɑ mɔk, u biɑ sɑɑ lɑ k pukn, ŋɑɑn wun nbɑ k mɔk, b sɑɑ jii bonmintk nbɑ k u mɔk nɑ e.» L yuo nɑ k Yiesu nɑɑ nɑn u ninjɑnm din bɑɑl, ŋɑɑn k k fit lɑ sɔnu nbɑ k b sɑɑ nɑkn’ɔ, k mɑɑn niib nɑ din yɑbt ɑ. K suɑ tɑn yet’ɔ ɑ: «A nɑɑ nɑn ɑ ninjɑnm be nɑn-yel po k luon bin lɑ’ɑ.» Ŋɑnn e k u yet’b ɑ: «Bin nbɑ gbiɑ Yennu mɑɑn k sɑɑk k biɑ tuun l biɑnŋ, ŋɑnm e tie n nɑɑ nɑn n ninjɑnm.» Dɑsiɑl k Yiesu nɑn u puolpoweitieb din kuɑ bulgbetl ni, k u yet’b ɑ: «Ŋɑɑnt mɑn k t puot k sɑɑn mɔkgbenŋl nɑ gbingbɑnliel po.» K b sɑɑn. Bɑɑ sɑɑ yuo nbɑ k Yiesu duɑl guɑn. K wonpɑɑluk tɑn fikt k dɑ mɔkgbenŋl mɑnŋ ni, k nyunpɑnɑ pil k kuɑ bulgbetl nɑ ni k tɑn yɑɑ lin gbie, k b ji din kuɑ ninbɔnŋ ni. K u puolpoweitieb din bɑɑl k fiin’ɔ k yi ɑ: «Cɑnbɑɑ, cɑnbɑɑ, t be kuun ni e.» K u fiil k tiɑn wounŋ nɑn nyunpɑnɑ nɑ pɑɑk ɑ bin ŋmin, k l ji din fuɑ k ŋmin suon nnɑ. K u jiɑnt boi u puolpoweitieb ɑ: «I yɑdɑ be lee?» K jɑŋmɑɑni din suol’b, k l biɑ yɑɑl lit’b, k b boi b lieb ɑ: «Jɑbuolbee e nɑ, k u tɑn yet mɔb k tul wounŋ nɑn nyunpɑnɑ k b sɑk u mɔb u?» Yiesu nɑn u puolpoweitieb din puot mɔkgbenŋl k bɑɑl Gelɑɑsɑ tinŋ ni, k set, ŋɑɑn k Gɑɑliile tinŋ biɑl puolpo. K Yiesu nbɑ din nyii bulgbetl nɑ ni, k Gelɑɑsɑ jɑsuɑ din cet’ɔ, k nɑlnbiit din be juɑ mɑnŋ ni, k u din k liɑ siɑl i k l wei hei. U biɑ din k sɑɑk kɑɑl ŋɑɑk ni, ŋɑɑn duɑ kɑɑt ni. Wɑɑ din lɑ Yiesu yuo nbɑ, k u yikn sɑnpɑɑpo wɑɑ, ŋɑɑn gbɑɑn Yiesu tuɑnn k tiɑn yet ɑ: «Yiesu, fin nbɑ tie Yɑbnt Yennu Bijɑ, min nɑn fin, nlee mɑntk i? N bɑln’mɑ e, dɑɑ muksl’n.» U din yet nnɑ k mɑɑn Yiesu ponŋ tiɑn u pɑɑk k yet’ɔ ɑ wun nyi juɑ mɑnŋ ni. Yuo kul, nɑlnbiiuk mɑnŋ din tuu fiil e, k b din tuu bɑɑn u nii nɑn u tɑɑ nɑn jɑlt k guu’u, ŋɑɑn k u tuu yɑn jɑlt nɑ, k nɑlnbiiuk mɑnŋ biel’ɔ k kuɑnt’ɔ muuk ni. K Yiesu boi’ɔ, «A sɑnn ii?» K u jiin ɑ: «N sɑnn yi bul e,» k mɑɑn nɑlnbiit bonciɑnn din kuɑ juɑ mɑnŋ ni. L yuo nɑ k nɑlnbiit mɑnŋ ji din bɑln Yiesu hei ɑ, u dɑɑ te k b sɑɑ buotsunsunŋ ni. K duoli bonciɑnn din be kunkonn nɑ pɑɑk k di, k nɑlnbiit nɑ bɑln Yiesu ɑ wun cɑb’b bin sɑɑn kuɑ duoli mɑnŋ ni, k Yiesu cɑb’b sɔnu. Ŋɑnn e k nɑlnbiit nɑ nyii juɑ nɑ ni k sɑɑn sɑɑ kuɑ duoli nɑ ni, k duoli nɑ kul din tin bulbulbul k nyii kunkonn nɑ pɑɑk k sik k sɑɑ bɑɑ mɔkgbenŋl nɑ ni, k dii nyun. Duokpɑɑli nɑ nbɑ din lɑ lin nbɑ tien mɑnŋ, k b ciɑl l yuo nɑ, k sɑɑ muɑnt l lɑbɑɑl duo ni nɑn kpɑɑnt ni. K niib bɑɑl ɑ bin lɑ lin nbɑ tun nɑ, k sɑɑ bɑɑl Yiesu buol, k suɑ juɑ nbɑ k nɑlnbiit ponŋ nyii u ni nɑ, k u kɑl Yiesu buol nɑn lɑɑfiɑ nɑn u dudukt kul ɑ fɑnu, k ji liɑ tiɑt, k jɑŋmɑɑni suol niib nɑ. K bin nbɑ lɑ’l nɑn b nuni nɑ yet’b biɑnŋ nbɑ k Yiesu te k juɑ nbɑ mɔk nɑlnbiit nɑ pɑɑk. Ŋɑnn e k Gelɑɑsɑ tinŋ tieb kul din bɑɑl Yiesu buol k bɑln’mɔ ɑ wun siet nnɑ kii sɑɑ, k mɑɑn jɑŋmɑɑni suol’b hei. K Yiesu ji din kuɑ bulgbetl nɑ ni ɑ wun ŋmɑt. Juɑ nbɑ k nɑlnbiit nyii u ni nɑ bɑln’mɔ ɑ wun ŋɑɑn k wun ciɑn’ɔ. Ŋɑɑn Yiesu din te k u nyik ŋɑɑn yet’ɔ ɑ «I ŋmɑt kii kun k sɑɑ muɑnt bɑktnɔunŋ tuonjɑɑnn nbɑ k Yennu tun k tul’ɑ nɑ.» K u ŋmɑt k lin duo nɑ kul k muɑntl bɑktnɔunŋ tuonjɑɑnn nbɑ k Yiesu tun k tul’ɔ nɑ. Yuo nbɑ k Yiesu din ŋmɑt k sɑɑ puot mɔkgbenŋl nɑ, k suɑ k nibulciɑɔnŋ din tuok’ɔ nɑn pɑlpienn, k mɑɑn b kul ponŋ din guu u bɑɑlu e. Jɑsuɑ nnɑ din bɑɑl lenŋ k b din yi’u Sɑilus, k u din tie *Suifnbɑ jɑɑnti dieok sɑɑkuɑ, k u tɑn bɑɑl k gbɑɑn Yiesu tuɑnn k bɑln’mɔ ɑ wun bɑɑl u ŋɑɑk ni, ɑ k mɑɑn u bonpoyenml nbɑ mɔk nɑn binɑ piik nɑn ŋɑnle nɑ yiɑl, k pel kuun ɑ. Yiesu nbɑ din sɑɑ nɑ k nibulciɑɔnŋ nɑ mun wɑɑ’u k gbin muk k tɑn tut’ɔ. K puosuɑ nnɑ mun biɑ din be lenŋ, k siik fɑbounŋ k tɑn jɑnŋ binɑ piik nɑn ŋɑnle, k u din tɑn yɑt u bonɑ kul k tul tebtieb, ŋɑɑn b suɑ din k fit teb’ɔ k u pɑɑk, k u tɑn bɑɑl Yiesu puol k sii u liɑtfuouk mɔgbɑnn k l tɑɑkpɑɑk ni, k u fɑbounŋ nɑ ji din jit. K Yiesu boi ɑ: «Ŋmee sii’n i?» Suɑ kul nbɑ be lenŋ nɑ din noi, k Piɑl tɑn boi’ɔ ɑ: «Cɑnbɑɑ, ɑ k lɑ nibulciɑɔnŋ nbɑ muk’ɑ ni ii?» Ŋɑɑn k Yiesu yet ɑ: «Suɑ sii’n ɑ, k mɑɑn n bɑnn nɑn pɑnsiɑk nyii n ni wɑɑ.» Ŋɑnn e k puo nɑ ji din bɑnn nɑn u kɑn fit bɔl u mɔnŋ, k ji din nyii pɑɑnu ni k jekl, k tɑn gbɑɑn Yiesu tuɑnn, ŋɑɑn yet’ɔ suɑ kul nunm ni lin nbɑ pɑɑk k u sii’u, nɑn biɑnŋ nbɑ k u pɑɑk l tɑɑkpɑɑk ni. K Yiesu yet’ɔ ɑ: «N bipuo, ɑ yɑdɑ nɑ pɑɑk e k ɑ pɑɑk. Ii sɑɑ nɑn mɑnu.» Yuo nbɑ k Yiesu dɑɑ din sie k piɑk nɑ, k *tuomi nyii Suifnbɑ jɑɑnti dieok sɑɑkuɑ mɑnŋ ŋɑɑk ni k tɑn bɑɑl yet’ɔ ɑ: «A bonpobik nɑ tɑɑn kpo wɑɑ, k ɑ ji dɑɑ bɑknt Wɑntuɑ nɑ.» K Yiesu gbɑt nnɑ mɑnŋ k jiɑnt yet Yennu jɑɑnti dieok sɑɑkuɑ nɑ ɑ: «Dɑɑ tiin jɑŋmɑɑni. Tient yɑdɑ kuukuɑ, k u sɑɑ fiil ɑ.» Yiesu nbɑ din bɑɑl ŋɑɑk mɑnŋ nɑn-yel ni yuo nbɑ, u din k sɑk k suɑ n kuɑ, l i kii tie Piɑl nɑn Sɑn nɑn Sɑɑk k pukn bik nɑ bɑɑ nɑn u nɑɑ. K bin nbɑ kul be lenŋ mɔ kumɔni k fɑbn bik mɑnŋ pɑɑk. Ŋɑnn e k Yiesu yet’b ɑ: «I dɑɑ mɔ mɑn. Bik nɑ k kpo kɑɑ, ŋɑɑn u guɑnt e.» K niib nɑ lɑɑ’u; k mɑɑn b mi nɑn bik nɑ set kpo wɑɑ. K Yiesu suol bik nɑ nuu ŋɑɑn yiin ɑ: «N bik, fiit.» K u jen u mɑnfuol ni k fiil yiɑn ɑ, k Yiesu yet’b ɑ bin tul bik nɑ jiet k wun di. L din bɑkt bik nɑ bɑɑ nɑn u nɑɑ bonciɑnn; ŋɑɑn Yiesu din yet’b nɑn ninmɔnn ɑ bii mi k bin yet suɑ lin nbɑ tien nɑ. L puolpo k Yiesu din tɑn yiin u tuomiinbɑ *piik nɑn bɑnle nɑ k lɑkn’m, k tul’b pɑnŋ nɑn yiikuo nbɑ k b sii nyint nɑlnbiit nbɑ kul be niib ni, kii biɑ kii te k bɑɑtb i pɑɑkt, k ji din te k b yɑt ɑ bii lin kii muɑntl Yennu nɑɑn po, k biɑ te k bɑɑtb i pɑɑkt. K u yet’b ɑ: «I dɑɑ jikt siɑl k sɑɑ nɑn’n. I dɑɑ diɑ pɑti, ɑmi pɑkɑ, ɑmi pɑɑnu, ɑmi likli, ɑmi liɑtfɔkt ŋɑnlele. Ŋɑɑk nbɑ k i sɑɑ kuɑ, yin biɑl lenŋ nɑn yɑɑ tɑn sɑɑ nyi duo mɑnŋ ni. Siɑn nbɑ kul k niib k tuok’i nɑn pɑlpienn, yin pit i tɑɑpɑnt ni tɑnt bil l duo ni yuo nbɑ k i nyi lenŋ, k l sii tie *siɑlɑ nbɑ wɑnt nɑn b mɔk biit.» Ŋɑnn e k u *puolpoweitieb nɑ din nyii k lin digbɑnɑ ni k muɑntl Yennu lɑbɑmɑnn, k biɑ te k bɑɑtb pɑɑk l digbɑnɑ kul ni. K Gɑɑliile kpɑnbɑl *Heluod din tɑn gbɑt lɑbɑɑl nbɑ din tun nɑ kul, k l ŋmɑt u yɑn ni, k mɑɑn yenm din yɑɑ ɑ Sɑn e fiil kuun ni, k lieb yɑɑ ɑ yɑɑyuo ni sɔkni Elii e dɔkt, k lieb mun yɑɑ ɑ yɑɑyuo ni sɔkniinbɑ yenɔ e fiil kuun ni, ŋɑɑn k Heluod yet ɑ: «N dɑɑn te k b pot Sɑn yul ɑ, ŋɑɑn ŋmee k n jin gbiɑ u po nɑ mun i?» K u ji din kol l yuo nɑ ɑ wun lɑ Yiesu. Tuomiinbɑ piik nɑn bɑnle mɑnŋ nbɑ din tɑn jen k yet Yiesu lin nbɑ k b dɑɑn sɑɑn sɑɑ tun. K u ji din jii’b k b sɑɑn dosɑu nbɑ k b yi Betsɑidɑ, b kuukuɑ. Ŋɑɑn nibul nɑ nbɑ din gbɑt nnɑ mɑnŋ, k b wei Yiesu k sɑɑn, k u tuok’b nɑn pɑlpienn, k wɑnn’b Yennu nɑɑn po, k biɑ te k bin nbɑ luon pɑɑku nɑ pɑɑk. Yuo nbɑ k yennu din tɑn mɑɑkt nɑ, k u tuomiinbɑ *piik nɑn bɑnle nɑ bɑɑl u buol k tɑn yet’ɔ ɑ: «Ŋɑɑnt k nibul nɑ n sɑɑn doi nɑn digbɑnbis nbɑ kpiɑ nɑ ni k lɑ jiet nɑn dunduɑnbuol, k mɑɑn nnɑ nɑ tie muuk ni e.» K u jiin yet’b ɑ: «I mɔnŋ n tul’b jiet k bin di.» K b yet’ɔ ɑ: «T k mɔk siɑl k pukn pɑɑni ŋɑnŋmu nɑn jɑni ŋɑnle nɑ po, k t nɔk sɑɑ sɑɑn dɑɑ jiet k tɑn dinn nibul nɑ kul ɑmi ii?» (Jɑb nbɑ din be lenŋ nɑ din tie nɑn tusɑ ŋɑnŋmu nɑ.) K Yiesu yet u puolpoweitieb ɑ: «Ŋɑɑnt k niib nɑ n bɔkt kɑl piinŋmuŋmu.» K u puolpoweitieb ŋɑɑn k b kul bɔkt kɑl kɑl. K u jii pɑɑni ŋɑnŋmu nɑn jɑni ŋɑnle nɑ, ŋɑɑn yɑɑt got sɑnpɑɑpo, k tul Yennu niipuouk jiet nɑ pɑɑk, k ji din ŋmit ŋmit k tul u puolpoweitieb nɑ ɑ bii tuol nibul nɑ, k b kul dii k jɑnŋ. K u puolpoweitieb lɑkn jiet nbɑ k niib nɑ dii k tɑn tenn nɑ, k l gbie kpɑncubt piik nɑn ŋɑnle. Dɑsiɑl k Yiesu din mei Yennu u kuukuɑ, k u puolpoweitieb din tɑn bɑɑl u buol ni l yuo nɑ, k u boi’b ɑ: «Nibul nɑ yɑɑ ɑ n tie ŋmee?» K b jiin k yet’ɔ ɑ: «Yenm yɑɑ ɑ ɑ tie Sɑn wun nbɑ din wuul niib Yennu nyunwulu nɑ e, k lieb mun yɑɑ ɑ ɑ tie Elii, k siɑb mun yɑɑ ɑ yɑɑyuo ni sɔkniinbɑ yenɔ e tɑn fiil kuun ni.» K u boi’b ɑ: «K yinm ŋɑnin yɑɑ ɑ n tie ŋmee?» K Piɑl jiin k yet’ɔ ɑ: «Fin e tie Yennu *Klistu nɑ.» Ŋɑnn e k Yiesu yet’b nɑn ninmɔnn ɑ b dɑɑ yien suɑ lɑbɑɑl mɑnŋ, k biɑ yet’b ɑ: «L kpɑɑ tɑlɑs nɑn *Nisɑɑlk Bijɑ n di fɑlɑ bonciɑnn, k t tinŋ ni sɑɑkɑb nɑn Yennu mɑnntieb yudɑnm nɑn *senniwɑntieb sɑɑ yet’ɔ, k biɑ kpi’u wɑɑ, ŋɑɑn l dɑɑ ŋɑntɑ dɑɑl k u sɑɑ fiil kuun ni.» Ŋɑnn e k u yet b kul ɑ: «Wun nbɑ i luon wun wei’n, sie k u yit u mɔnŋ sɑlk k jii u kuun dɑpunpunn dɑɑl kul kii wɑɑ’n, k mɑɑn wun nbɑ luon wun kɔn u mɑnfuol pɑɑk, ŋuɑ e tɑn sɑɑ kɔnŋ’l, ŋɑɑn wun nbɑ yit u mɔnŋ sɑlk n pɑɑk, ŋuɑ e tɑn sɑɑ lɑ u mɑnfuol nɑn bɑlmɔni. Nilɔ i lɑ tingbounŋ nɑ mɔktuk kul, ŋɑɑn biil u mɔnŋ binbenŋ k kɔnŋ u mɑnfuol, nyɔlɑnt po e k u sɑɑ lɑ? Wun nbɑ tiin fei k jiin min nɑn n wɑnnu nɑ po, Nisɑɑlk Bijɑ i tɑnŋ i jen nɑn u *yudɑnt, nɑn u Bɑɑ yudɑnt nɑn u *mɑlɑkɑɑnbɑ yudɑnt, l yuo mɑnŋ u tɑn sɑɑ tin’ɔ fei mun. Bɑlmɔni e k n yɑɑ n yien’i nɑ, siɑb be nnɑ k dɑɑ kɑn kpo sie k b tɑn lɑ Yennu nɑɑn sinsinn.» Yiesu nbɑ din pɑk nnɑ k gbenn yuo nbɑ, l puolpo e k l tien nɑn dɑɑ ŋɑnniin nɑ, k u jii Piɑl nɑn Sɑn nɑn Sɑɑk, k duo nɑn’m juɑl pɑɑk ɑ bin sɑɑ miɑl Yennu. Wɑɑ din mei Yennu nɑ k u nunm po tɑn kpint, k u tiɑt penn k nyilk. L yuo nɑ k jɑb bɑnle nnɑ lekt lenŋ. L din tie Muois nɑn Elii e, k b tiɑt nɑn b gbɑnɑnt nyili. B din piɑk nɑn Yiesu k jikt sɑɑ bɑnnu nbɑ k u sɑɑ kpo Selusɑɑlenm k tun u tuonn k gbenn. Guɑn din suol Piɑl nɑn u lieb bonciɑnn, k b guɑn k tɑn kpil yelk k fiil, k lɑ k yentsɑɑkɑl yent k lint Yiesu, k b biɑ lɑ jɑb bɑnle nbɑ din sie u buol nnɑ. Jɑb mɑnŋ nbɑ din tɑn nyikt Yiesu nɑ, k Piɑl yet’ɔ ɑ: «Cɑnbɑɑ, l ŋɑn nɑn tii be nnɑ nɑ. T sɑɑ fɑɑ lɑnbont ŋɑntɑ e, k yenn i tie ɑ yɑl, k liel i tie Muois yɑl, k liel mun i tie Elii yɑl.» Piɑl nbɑ din piɑk lin nbɑ mɑnŋ, u din gbiɑ ɑ u piɑk e. Wɑɑ din dɑɑ piɑk nnɑ mɑnŋ, k sɑnpɑgbɑnn dɔkt k tɑn piin’m, k jɑŋmɑɑni din suol u puolpoweitieb nɑ nɑn sɑnpɑgbɑnn nbɑ dɔkt k piin’m nɑ. K b din gbɑt kunkɔl sɑnpɑgbɑnn nɑ ni, k l yet ɑ: «N Bijɑ wun nbɑ k n lukt’ɔ e nɑ. Ii sɑɑk u mɔb mɑn.» Kunkɔl nɑ nbɑ din pɑk gbenn yuo nbɑ, k b ji lɑ k Yiesu kuɑ e biɑl sie. L puolpo e k b ji din biɑl ŋmin k jikt sɑɑ lin nbɑ k b lɑ nɑ po, ŋɑɑn k k kumi suɑ lɑbɑɑl mɑnŋ l yuo nɑ. L din tɑn yent k Yiesu nɑn u puolpoweitieb nyii juɑl nɑ pɑɑk k sik, k nibulciɑɔnŋ din tuok’ɔ. K jɑsuɑ din be nibul nɑ ni, k din tɑn tiɑn yiin Yiesu ɑ: «Wɑntuɑ, n bɑln’mɑ e, tɑn gotl n bijɑ nɑ, k mɑɑn ŋuɑ e kpɑn tie n biyenml, k nɑlnbiiuk tuu te k wun kpil yikn k lu’u, k u tɑbt, k mɔsɑnkunkuounŋ nyi u mɔb ni, k u dint’ɔ wɑhɑlɑ k l gbiɑ’u k tuu tɑn wolk’ɔ wɑɑnm-nnɑ, ŋɑɑn k k nyikt’ɔ. N bɑln ɑ puolpoweitieb ɑ bin nyinn nɑlnbiiuk mɑnŋ, k b gbɑl.» K Yiesu jiin k yet’b ɑ: «Yinm biitdɑnm, yinm nbɑ kɑɑ yɑdɑ. N sɑɑ wei nɑn’i nlee k di suklu nɑn’i mɑntk i?» K u biɑ yet juɑ mɑnŋ ɑ: «Bɑɑt nɑn ɑ bijɑ nɑ.» K bik nɑ nbɑ din bɑɑt Yiesu buol ni yuo nbɑ k nɑlnbiiuk nɑ libl’ɔ nɑn tinŋ gbɑb, k u bɑɑ duɑ k tɑbt. Ŋɑɑn k Yiesu tiɑn nɑlnbiiuk nɑ pɑɑk, k te k bik nɑ pɑɑk, k jii’u k tul’ɔ u bɑɑ. Ŋɑnn e k l yɑɑl lit niib nɑ kul nɑn Yennu nbɑ mɔk pɑnŋ biɑnŋ nbɑ nɑ. L dɑɑ din bɑkt nibul nɑ nɑn wɑɑ tuun biɑnŋ nbɑ kul nɑ pɑɑk, k Yiesu ŋmɑt yet u puolpoweitieb nɑ ɑ «Luotl i tubɑ mɑn k gbɑt fɑnu lin nbɑ k n yɑɑ n pɑk k tul’i nɑ. B tɑn sɑɑ jii Nisɑɑlk Bijɑ k kubn’ɔ niib nuu ni.» Ŋɑɑn b lek din k bɑnn l pɑɑk, k mɑɑn siɑl din dɔkn b yɑn e, ɑ b dɑɑ bɑnt, k b biɑ tiin jɑŋmɑɑni nɑn bin boi Yiesu l mɑɑn pɑɑk. L puolpo e k mɔniɑɔk din tɑn bɑɑl Yiesu puolpoweitieb nɑ sinsuuk ni, k b noi ɑ bin lɑɑn ŋmee tie nijɑɑnn b sinsuuk ni. K Yiesu bɑnn bɑɑ duki biɑnŋ nbɑ. L pɑɑk k u jii bik nnɑ k senn’ɔ u nunm ni, ŋɑɑn yet’b ɑ: «Wun nbɑ gɑɑl bik nbɑ nɑ n sɑnn pɑɑk, u gɑɑl min e, k wun nbɑ mun sɑk k gɑɑl’n, u gɑɑl wun nbɑ tun’n nɑ e mun biɑk. K mɑɑn wun nbɑ tie tɑlk i ni, ŋuɑ e tie nijɑɑnn k gɑl i kul ɑ.» Ŋɑnn e k Sɑn din yet’ɔ ɑ: «Cɑnbɑɑ, t dɑɑn lɑ k jɑsuɑ mun tɑɑn ɑ sɑnn k nyint nɑlnbiit niib ni, k t yet’ɔ ɑ wun nyik, k mɑɑn u k tie t ni yenɔ.» K Yiesu jiin k yet’ɔ ɑ: «I dɑɑ tɑb’ɔ mɑn, k mɑɑn wun nbɑ kul k kɔn nɑn’i ni, u sie i puol e.» Tɔn, yuo nbɑ k l din tɑn pel nɑn Yiesu n do *Yendɔunŋ ni, k u din tɑn fɑɑ pɑl k suol sɔnu ɑ wun sɑɑn Selusɑɑlenm, k u tun tuomiinbɑ ɑ bin gɑl *Sɑɑmɑɑli niib digbɑnbik nbɑ be liik ɑ bin tien siil nɑn u bɑɑlu, ŋɑɑn lenŋ niib din k luon bin gɑɑl’ɔ, k mɑɑn b din mi nɑn u sɑɑ Selusɑɑlenm e. K u puolpoweitieb Sɑɑk nɑn Sɑn nbɑ gbɑt nnɑ mɑnŋ k b boi’ɔ ɑ: «Yonmdɑɑnɔ, ɑ luon k t te k muu n nyi sɑnpɑɑpo k sik di biil’b ii?» Ŋɑɑn Yiesu jiɑnt gɑɑl jɑt b pɑɑk ɑ bin nyik ɑ, [k yet ɑ: «I k mi siek nbɑ te k i mɔk l dudukt. K mɑɑn Nisɑɑlk Bijɑ k bɑɑl ɑ wun buon niib sei kɑɑ, ŋɑɑn u bɑɑl ɑ wun fiel’b e,»] k b nyik, ŋɑɑn sɑɑn digbɑnliel po. Yuo nbɑ k b din sɑɑ mɑnŋ k jɑsuɑ tɑn yet Yiesu ɑ: «N sɑɑ wei’ɑ siɑn nbɑ kul po k ɑ sɑɑ.» K Yiesu yet’ɔ ɑ: «Lunlonɑ mɔk fɔli, k nuɑni mun biɑ mɔk tiɑt, ŋɑɑn Nisɑɑlk Bijɑ k mɔk dunduɑnbuol.» K u biɑ tɑn yet jɑluɑ ɑ: «I wɑɑ’n.» K juɑ mɑnŋ yet’ɔ ɑ: «N Yonmdɑɑnɔ, ŋɑɑnt k n sɑɑn k sɑɑ pii n bɑɑ sinsinn ɑ.» K Yiesu jiin yet’ɔ ɑ: «Ŋɑɑnt k kpienm i pii b kpienlieb. Fin, i sɑɑ wɑɑ, kii sɑi muɑntl niib Yennu nɑɑn po.» K luɑ mun yet’ɔ ɑ: «N Yonmdɑɑnɔ, n sɑɑ wei’ɑ wɑɑ, ŋɑɑn ŋɑɑnt k n kun k sɑɑ cɑb n ŋɑɑtieb sinsinn ɑ k ji fit wei’ɑ.» K Yiesu yet’ɔ ɑ: «Wun nbɑ diɑ nɑɑsɔk k ko ŋɑɑn goli puolpo, l dɑɑnɔ k ŋɑn nɑn Yennu nɑɑn tuontumu.» L puolpo e k Yonmdɑɑnɔ din lukt nilieb piinlole nɑn bɑnle k tun’m bɑnlele ɑ bin dɔnŋ gɑl doi ni, siɑn nbɑ po kul k u sɑɑ bɑɑl. Ŋɑnn e k u yet’b ɑ: «Dii nɑ biel k yɑb ɑ, ŋɑɑn k dijɑɑntieb wɑɑl. L pɑɑk, ii mei mɑn dii nɑ dɑɑnɔ k wun ŋɑnm pukn dijɑɑntieb k te k bin sɑɑn jɑɑn u dii mɑnŋ. Ii sɑɑ mɑn. Gotl, n tuun’i, k i sii tie nɑn pebis nbɑ be kinkɑtɑ sinsuuk ni nɑ. Ŋɑɑn i dɑɑ jikt likbuɑli ɑmi pɑkɑ ɑmi tɑɑsɑliɑ. I biɑ dɑɑ sie sɔnu ni k fuont niib k kpɑmi. Ŋɑɑk nbɑ yɑɑ ni k i sɑɑ kuɑ, yin fuont k yet ɑ: ‹Mɑnu ii be ŋɑɑk nɑ niib pɑɑk.› K ŋɑɑdɑɑnɔ i luon mɑnu, u sɑɑ gɑɑl. L i kii tie nnɑ, mɑnu mɑnŋ biɑ sɑɑ jen i pɑɑk nɑ. L i tie k i kuɑ ŋɑɑk nbɑ yɑɑ ni, ii be lenŋ kii di kii nyu lin nbɑ k b tien’i, k mɑɑn tuontunnɔ ŋɑn k wun gɑɑl u pɑɑɔk o. I dɑɑ lin k luɑn ŋei k duɑ. L i tie k i bɑɑl duo nbɑ yɑɑ ni k b tuok’i nɑn pɑlpienn, ŋɑɑn tɑn tul’i jiet nbɑ, yin di. I te k bɑɑtb n pɑɑk lenŋ ŋɑɑn kii yien niib mɑnŋ ɑ: ‹Yennu nɑɑn nɑkn’i wɑɑ.› Ŋɑɑn l i tie k i bɑɑl duo nbɑ ni k niib nɑ k gɑɑl’i, yin nyi sɔni pɑɑk ŋɑɑn kii yien ɑ: ‹T tɑɑ nbɑ tɑb i duo nɑ tɑnbiini nɑ, t pit ŋɑnn e k lubn k cɑbt’i. Ŋɑɑn ii mi mɑn nɑn Yennu nɑɑn ponŋ nɑkn’i wɑɑ.› N yien’i e nɑn buut bunu dɑɑl, duo mɑnŋ niib tubdɑtu tɑn sɑɑ gɑl Suodonmtieb yɑl ɑ.» «L sii bi yinm Kolɑsentieb pɑɑk. L sii bi yinm Betsɑidɑtieb mun yɑɑ pɑɑk. K mɑɑn mi i bo i tun bɑktnɔunŋ tuonjɑɑnɑ Tiil nɑn Siidɔn doi ni nɑn mɑɑ dɑɑn tun i doi ni nɑ, b bo sɑɑ mɔ kuɑŋɑɑn yiɑn ɑ k jii bɔtuot k liɑ liɑ k puk b mɔnŋ tɑnpen k wɑnn nɑn b luon k bin lebt binbenŋ. Dɑɑl nbɑ k Yennu tɑn sɑɑ bu niib buut nɑ, i tubdɑtu tɑn sɑɑ gɑl Tiil nɑn Siidɔn tieb yɑl ɑ. Yinm Kɑpelnɑunmtieb, i duki nɑn i tɑn sɑɑ do sɑnpɑɑpo wɑɑ? Aɑi, i tɑn sɑɑ sik muu nbɑ kɑɑ gbennu ni e.» L yuo nɑ k Yiesu din yet u *puolpoweitieb ɑ: «Wun nbɑ gbiin i mɑɑn, u gbiin min e, ŋɑɑn wun nbɑ yet’i, u yet min e, ŋɑɑn wun nbɑ yet’n, u yet Yennu nbɑ tun’n nɑ e mun biɑk.» Ŋɑnn e k jɑb piinlole nɑn bɑnle mɑnŋ din tɑn jen nɑn pɑlpienn k yet’ɔ ɑ: «Yonmdɑɑnɔ, ɑ sɑnn ni e k nɑlnbiit tɑn sɑɑk t mɔi.» K Yiesu yet’b ɑ: «N lɑ k *Sɑɑtɑn nyii sɑnpɑɑpo k tɑn bɑɑ nɑn sɑnyiknti nɑ. Gbiintl mɑn, n ponŋ tul’i yiikuo k i sii ŋmɑɑt wɑi nɑn nɑni pɑɑk, kii nyɑni i dɑtɑɑk pɑnŋ kul, k siɑl kɑn tien’i ni. Ŋɑɑn i dɑɑ mɔk pɑlpienn nɑn nɑlnbiit nbɑ sɑk i mɔi nɑ pɑɑk, ŋɑɑn kii jik i mɔk pɑlpienn mɑn nɑn Yennu ponŋ diɑn i sɑnɑ *Yendɔunŋ ni nɑ.» L yuo mɑnŋ k Foŋɑnm din te k Yiesu mɔk pɑlpienn hei, k yet ɑ: «N Bɑɑ wun nbɑ tie sɑnpɑɑpo nɑn tingbounŋ nɑ Yonmdɑɑnɔ, n piɑk’ɑ, k mɑɑn ɑ bɔl lɑbɑɑl mɑnŋ subndɑnm nɑn mitieb buol e, ŋɑɑn fiit wɑnn wɑɑs. Nnn Cɑnbɑɑ, nnɑ e k ɑ luon k ɑ tun, k l mɑn’ɑ.» Yiesu biɑ din ŋɑnm yet ɑ: «N Bɑɑ e wɑnn’n mɑɑn kul ɑ. Suɑ k mi Bijɑ nɑ nbɑ tie wun nbɑ sie Bɑɑ mɑnŋ, k suɑ mun biɑ k mi Bɑɑ mɑnŋ nbɑ tie wun nbɑ, sie Bijɑ nɑ, nɑn bin nbɑ k Bijɑ luon wun fiit Bɑɑ mɑnŋ wɑnn’b nɑ.» L yuo nɑ k Yiesu ji din ŋmɑt got u puolpoweitieb ŋɑɑn yet’b b kuukuɑ ɑ: «Pɑlpienn tie i yɑl e, k mɑɑn i ninbinɑ nbɑ lɑ lin nbɑ k i lɑɑt nɑ. N yien’i e nɑn *Yennu sɔkniinbɑ nɑn kpɑnbɑlɑ bonciɑnn din luon bin lɑ lin nbɑ k i lɑɑt nɑ, ŋɑɑn din k lɑ, k biɑ din luon bin gbɑt lɑbɑɑl nbɑ k i gbiɑ nɑ, ŋɑɑn din k gbɑt.» Dɑsiɑl k *senniwɑntɔsuɑ din fiil k set k luon wun bikn Yiesu k boi’ɔ ɑ: «Wɑntuɑ, n sɑɑ tien nlee k lɑ mɑnfuol nbɑ kɑɑ gbennu?» K Yiesu jiin k boi’ɔ ɑ: «L diɑn nlee Yennu *senni ni? A lii k lɑɑt nlee?» K juɑ nɑ jiin ɑ: «Fii mɑntk kii luon Yonmdɑɑnɔ Yennu nɑn ɑ pɑl kul ɑ, kii biɑ kii luon’ɔ nɑn ɑ siek kul ɑ, nɑn ɑ pɑnŋ kul ɑ, nɑn ɑ dudukt kul ɑ, kii biɑ kii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.» K Yiesu yet’ɔ ɑ: «A jiinu ŋɑn. Ii tuun nnɑ k tɑn lɑ mɑnfuol mɑnŋ.» Ŋɑɑn k *senniwɑntuɑ nɑ lek din luon wun wɑnn nɑn u tie niŋɑnɔ Yennu buol ni, k boi Yiesu ɑ: «Tɔn, k ŋmee tie n luɑ?» K Yiesu jiin k yet’ɔ ɑ: «Jɑsuɑ din nyii Selusɑɑlenm k siik Seliiko, k fɑt-tieb tɑn pikn’ɔ k liɑt u tiɑt k fɑt, ŋɑɑn buo’u bonciɑnn, k tɑn tenn u kuun dɑlk dɑlk nnɑ, ŋɑɑn nyik’ɔ. L puolpo e k tɑn suɑ k Yennu mɑnntɔsuɑ nnɑ mun tɔk l sɔnu k siik bɑɑt k tɑn lɑ juɑ nɑ k u duɑ, k u lɔk gɑl ŋɑɑn nyik’ɔ. L biɑnŋ e nɑ biɑk, k Liefi buolu ni jɑsuɑ mun din bɑɑt lenŋ k tɑn lɑ juɑ mɑnŋ, k mun biɑ lɔk k gɑl ŋɑɑn nyik’ɔ. Ŋɑɑn *Sɑɑmɑɑli jɑsuɑ mun din tɔk l sɔnu k bɑɑt k tɑn dɔkt juɑ mɑnŋ pɑɑk k lɑ’u, k ninbɑɑɔk suol’ɔ bonciɑnn, k u bɑɑl k jii kpɑn nɑn dɑɑn k wuul u fiɑt nɑ ŋɑɑn fin tɑnɑ, k jii’u k pɑɑn’ɔ u bonŋ pɑɑk k sɑɑn nɑn’ɔ sɑɑnm dieok ni k sɑɑ got’ɔ. Lɑɑ din tɑn yent yuo nbɑ k u jii denienbɑ ŋɑnle k tul wun nbɑ din goli sɑɑnm dieok nɑ, ŋɑɑn yet’ɔ: ‹Ii goli juɑ nɑ, k mi i tɑnŋ i jen dɑɑl nbɑ, n sɑɑ pukn’ɑ lin nbɑ k ɑ din’ɔ k pukn nɑ pɑɑk.› » Yiesu nbɑ pɑk nnɑ k gbenn, k u boi *senniwɑntuɑ nɑ ɑ: «Jɑb bɑntɑ nɑ ni, ŋmee wɑnt nɑn u tie wun nbɑ k fɑt-tieb fɑt’ɔ nɑ luɑ?» K u jiin ɑ: «Wun nbɑ din tin’ɔ ninbɑɑɔk nɑ.» K Yiesu yet’ɔ ɑ: «Tɔn, fin, i sɑɑ kii tuun l biɑnŋ mun.» Yiesu nɑn u puolpoweitieb din sɑɑ b sɔnu, k b sɑɑ bɑɑl digbɑnbisiɑk nnɑ ni, k puosuɑ din be lenŋ k b yi’u Mɑɑlt, k u din gɑɑl Yiesu nɑn pɑlpienn u ŋɑɑk ni. U din mɔk niipuo k u sɑnn tie Mɑɑli, k Mɑɑli nɑ din bɑɑl k tɑn kɑl tinŋ ni k nɑkn Yonmdɑɑnɔ tɑɑ po k gbiintl u mɑɑn. Ŋɑɑn k Mɑɑlt mun din gbɑɑ nɑn sɑɑncɑntuk kul kul, k u tɑn bɑɑl yet Yiesu ɑ: «N Yonmdɑɑnɔ, mɑɑ gbɑɑ nɑn sɑɑɔnŋ cɑntuk n kuukuɑ, ŋɑɑn k n niipuo nɑ k sonmt’n, ɑ bɑkɑ kɑɑ l po oo? Yet’ɔ k wun bɑɑl k tɑn sonm’n.» K Yonmdɑɑnɔ jiin k yet’ɔ ɑ: «Mɑɑlt, Mɑɑlt, n mi nɑn ɑ gbɑɑ nɑn bonɑ bonciɑnn, k l muks’ɑ hei, ŋɑɑn bon-yenn kuukuɑ e kpɑɑ tɑlɑs. Mɑɑli gɑnn lin nbɑ ŋɑn, k suɑ kɑn fɑt’l.» Dɑɑsiɑl k Yiesu din be siɑl po k mei Yennu. Wɑɑ miɑl gbenn yuo nbɑ, k u *puolpoweitieb yenɔ tɑn yet’ɔ ɑ: «Yonmdɑɑnɔ, wɑnt’t tɑɑ sii mei Yennu biɑnŋ nbɑ nɑn Sɑn nbɑ mun din wɑnn u puolpoweitieb biɑnŋ nbɑ nɑ.» K Yiesu yet’b ɑ: «Yɑɑ tuu sii mei Yennu biɑnŋ nbɑ e nɑ: Bɑɑ, ɑ sɑnn n lɑ dontl. Ŋɑɑnt k ɑ nɑɑn n bɑɑl. Tul’t mɑnn dɑɑl kul Nyikn cɑb t biit nɑn tɑɑ mun nyikt k cɑbt bin nbɑ biil’t nɑ. A dɑɑ te k t kuɑ jɑnmi ni.» Yiesu biɑ yet’b ɑ: «T sɑɑ yet ɑ i yenɔ mɔk u yuɑk k sɑɑn u ŋɑɑk ni nyiɑɔk tɑnsuuni k yet’ɔ ɑ: ‹N yuɑk, kpentl’n pɑɑni ŋɑntɑ, k mɑɑn n yuɑs nbɑ ni yenɔ nyii sɔnu k bɑɑl n ŋɑɑk ni, ŋɑɑn k n k mɔk siɑl k sɑɑ tul’ɔ.› K wun nbɑ be ŋɑɑk ni jiin ɑ: ‹Dɑɑ muks’n. N ponŋ kpɑl gɑnn ɑ, k min nɑn n wɑɑs biɑ duɑl ɑ. N kɑn fit fiil k tul’ɑ pɑɑnu.› Gotl, n yien’i e, u kɑn sɑk fiil k tul’ɔ jiet mɑnŋ, wɑɑ tie u yuɑk nɑ pɑɑk, ŋɑɑn wɑɑ k tiin fei k biɑ mei’ɔ nɑ, sie k u tɑn tɑt fiil k tul’ɔ biɑnŋ nbɑ k u luon. «L pɑɑk, n biɑ yien’i, miɑt mɑn, k b sɑɑ tul’i. Lomin mɑn, k i sɑɑ lɑ wɑɑ. Kpɑɑn gɑnn mɑn, k b sɑɑ luot k tul’i, k mɑɑn wun nbɑ kul mei, gɑɑn e, k wun nbɑ mun luon, u lɑɑt e, k wun nbɑ kpɑɑn gɑnn, b luotl tien’ɔ. Yinm bɑɑnbɑ, i ŋmee k u bijɑ sɑɑ miɑl’ɔ jɑnŋ k wun jii wɑɑɔk k tul’ɔ? Ami ŋmee k u sɑɑ miɑl’ɔ jenn k wun jii nɑnŋ k tul’ɔ? K l i tie k yinm nbɑ tie biitdɑnm nɑ mi biɑnŋ nbɑ k i sɑɑ tul i wɑɑs bonŋɑnɑ, k i Bɑɑ Yennu nbɑ be sɑnpɑɑpo nɑ ŋɑnin kɑn jii Foŋɑnm k tul bin nbɑ mei’ɔ l po nɑ ɑɑ?» Yiesu din nyint nɑlnbiiuk nbɑ din be jɑsuɑ ni k tien’ɔ muuk nɑ. Yuo nbɑ k nɑlnbiiuk nɑ nyii u ni k gbenn, k juɑ nɑ muut k piin k piɑk. K l bɑkt nibul nɑ bonciɑnn. Ŋɑɑn k yenm din yet ɑ: «Nɑlnbiit bɑt Beelsebuul e tien’ɔ yiikuo k u nyint nɑlnbiit niib ni.» Ŋɑɑn k yenm mun din luon k bin bikn Yiesu, k yɑɑ ɑ wun wɑnn’b *nyinn nbɑ nyii *Yendɔunŋ ni. K Yiesu bɑnn bɑɑ duki lin nbɑ, k yet’b ɑ: «Nɑɑn niib i ŋmɑt k kɔn tuokt b lieb, b nɑɑn mɑnŋ sɑɑ biil ɑ, k ŋɑɑk niib i mun i ŋmɑt kɔn nɑn lieb, l kɑn set. Tɔn, l i tie k *Sɑɑtɑn ŋmɑt kɔn nɑn u lieb, nlee k u nɑɑn sɑɑ set i? N yet nnɑ k mɑɑn i yɑɑ ɑ Beelsebuul e tien’n yiikuo ɑ mii nyint nɑlnbiit niib ni. L i tie k n nyint nɑlnbiit niib ni nɑn Beelsebuul yiikuo nɑ, ŋmee yiikuo ni e k i mɔnŋ mɔnŋ wɑɑs nyint nɑlnbiit niib ni i? Ŋɑnn e k b tuonɑ wɑnt nɑn i k mɔk mɔni. Ŋɑɑn l i tie k l tie Yennu yiikuo ni k n nyint nɑlnbiit niib ni, l wɑnt nɑn Yennu nɑɑn ponŋ bɑɑl i buol ni wɑɑ. «Jɑwɑktl nbɑ tien siil nɑn u jɑtiɑt k guu u ŋɑɑk, u bonsiɑl kul kɑn sii, ŋɑɑn u pɑɑlɔ mun i tɑnŋ i pikn’ɔ k pɑɑk’ɔ, u sɑɑ fɑt u jɑtiɑt nbɑ k u dɑɑn l pɑɑk nɑ e, k biɑ jii u mɔktuk k tol niib. «Wun nbɑ k sie n puol, u kɔn nɑn’n e, k wun nbɑ mun k tiki niib k tien’n, u yɑt’b e.» «L i tie k nɑlnbiiuk tɑn nyii nilɔ ni, u tuu yiek e k lin mɔkuounŋ ni, k luon fuonbuol, ŋɑɑn k k lɑɑt. L pɑɑk, u tuu tɑn yet u mɔnŋ e ɑ: ‹N sɑɑ ŋmɑt sɑɑn ŋɑɑk nbɑ ni k n dɑɑn nyii nɑ ni e.› U ji kii ŋmɑt tɑn bɑɑl, wun lɑ k b piɑl k ŋɑnm ɑ, u ji sɑɑ ŋmɑt nyi e k sɑɑ yiin nɑlnbilieb bɑnlole, bin nbɑ bi k cie u pɑɑk, k bɑɑl nɑn’m, k bin kuɑ k lɑkn be, k nilɔ mɑnŋ binbenŋ ji sii bi bonciɑnn k gɑl wɑɑ dɑɑn tuu be sinsinn biɑnŋ nbɑ nɑ wɑɑ.» Yiesu nbɑ din dɑɑ yien nnɑ mɑnŋ, k puosuɑ nnɑ be nibul nɑ ni, k yet sɑnpɑɑpo wɑɑ ɑ: «Puo nbɑ mɑl’ɑ k muɑn’ɑ nɑ, pɑlpienn tie u yɑl e.» K Yiesu jiin yet’ɔ ɑ: «Bin nbɑ gbiɑ Yennu mɑɑn k sɑɑk’l, ŋɑnm e k pɑlpienn tie b yɑl.» Nibul nbɑ din gbin Yiesu buol ni yuo nbɑ nɑ, k u yet’b ɑ: «Mɔtɑɑnɑ nigbounŋ nɑ tie biitdɑnm e, k mɑɑn b luon bin lɑ nyinn, ŋɑɑn b kɑn lɑ nyinsiɑl, l i kii tie Suonɑ nyinn nɑ i kɑɑ. Biɑnŋ nbɑ k Suonɑ din tien nyinn k tul Niiniif tieb nɑ, l biɑnŋ e mun k *Nisɑɑlk Bijɑ mun sɑɑ tien nyinn k tul mɔtɑɑnɑ nigbounŋ nɑ. Buut dɑɑl, puosuɑ nbɑ din tie kpɑnbɑl nbɑ din nyii gɑnŋ po nɑ tɑn sɑɑ set wɑnn nɑn mɔtɑɑnɑ tingbounŋ nɑ niib mɔk biit, k mɑɑn u din nyii digbɑnbɑnfɔkl e wɑɑ k tɑn bɑɑl ɑ wun gbiint kpɑnbɑl Sɑɑlomɔn yɑnfuon nɑ pinpɑɔk, k gotl mɑn, wun nbɑ cie Sɑɑlomɔn nɑ be nnɑ. Buut dɑɑl, Niiniiftieb tɑn sɑɑ set wɑnn nɑn mɔtɑɑnɑ nigbounŋ nɑ mɔk biit, k mɑɑn Suonɑ muɑnti pɑɑk k b din mɔ kuɑŋɑɑn k lebt binbenŋ, k gotl mɑn, wun nbɑ cie Suonɑ be nnɑ.» «B k jokt fitl ŋɑɑn jikt k tie wuol ni, ɑmi k liknt bokt l pɑɑk. Sie k b jii’l k tuɑnn bonsiɑl nbɑ fɔk nɑ pɑɑk k lin yent, k niib i jik i kuɑ yuo nbɑ, bii lɑɑt yentu nɑ. A ninbinɑ e tie ɑ gbɑnɑnt fitl. A ninbinɑ i ŋɑn, ɑ gbɑnɑnt kul sii mɔk yentu, ŋɑɑn ɑ ninbinɑ i kii ŋɑn, ɑ gbɑnɑnt kul sii be bunbɔnn ni e. Ii mi mɑn k yentu nbɑ be i ni nɑ dɑɑ kpɑntl tie bunbɔnn. Tɔn, ɑ gbɑnɑnt kul i yien bonŋɑnn k siɑl po k be bunbɔnn ni, l sii yien e k nyili pilpilpil, k nɑɑn nɑn fitl nbɑ yien k tien’ɑ yienŋɑnu nɑ.» Yuo nbɑ k Yiesu pɑk gbenn nɑ, k Fɑɑliisiɑnsuɑ din yet’ɔ ɑ wun wei’ɔ k bin sɑɑ di jiet. K u din wei sɑɑn k sɑɑ kuɑ k kɑl ɑ wun di. K l din tien Fɑɑliisiɑn mɑnŋ bɑktnɔunŋ wɑɑ lɑ k Yiesu k fobt nɑn b kɑɑl nbɑ tie bɑnnu nbɑ nɑ, ŋɑɑn yɑɑ wun di nɑ. K Yonmdɑɑnɔ yet’ɔ ɑ: «Yinm Fɑɑliisiɑnnbɑ nɑ, i tuu soki ŋmɑni nɑn seni puolpo kuukuɑ e, ŋɑɑn k i pɑlɑ ni gbie nɑn fɑtu nɑn bonbiil. Yinm jɑtt nɑ. Wun nbɑ din nɑn puolpo nɑ, ŋuɑ kɑɑ din nɑn nuɑk ni mun ii? Tuln tɑlɑs-dɑnm lin nbɑ be i ŋmɑni ni nɑn i seni ni, k i nɑn-yel po nɑn nuɑk ni kul sii yien. «Yinm Fɑɑliisiɑnnbɑ, l sii bi i pɑɑk. I jikt ment nɑn luu nɑn kpinliet nbɑ k b buul gungounŋ ni l buolu kul ni bɔktu piik ni bɔkyenn kuɑ, k tien Yennu, ŋɑɑn bɑkn lin nbɑ tuok, k biɑ k luon Yennu. L bo sii ŋɑn k yii tuun ŋɑnn, k dɑɑ nyikt lin nbɑ tenn. «Yinm Fɑɑliisiɑnnbɑ, l sii bi i pɑɑk, k mɑɑn i luon nijɑɑnɑ kinkɑɑni boɑ *Suifnbɑ jɑɑnti diet ni, k biɑ luon niib i fuont’i nɑn nibɑɑkl fuonti dɑi ni. L sii bi i pɑɑk. I tie nɑn kɑɑt nbɑ k niib tuu ŋmɑɑ k do l pɑɑk ŋɑɑn kɑn bɑnn’l nɑ e.» Ŋɑnn e k *senniwɑntɔyenɔ yet’ɔ ɑ: «Wɑntuɑ, fɑɑ yet nnɑ nɑ, ŋɑnn ɑ sukl’t e nɑ mun.» K Yiesu jiin yet’ɔ ɑ: «Yinm *senniwɑntieb, l sii bi i pɑɑk mun, k mɑɑn i jint niib jik-kpiɑtɑ nbɑ pɑɑl nɑn bin jii, ŋɑɑn i mɔnŋ k sɑɑk k yii siin jikɑ mɑnŋ kii sonmt’b. L sii bi i pɑɑk, k mɑɑn i mɑɑ sɔkniinbɑ kɑɑt k sent bonŋɑnn. Ŋɑnm mɑnŋ e tie sɔkniinbɑ nbɑ k i yejɑnm din kpii’b mɑnŋ. Yɑɑ tuun lin nbɑ mɑnŋ, ŋɑnn e wɑnt niib nɑn i set sɑk i yejɑnm nbɑ din tun biɑnŋ nbɑ nɑ wɑɑ. Ŋɑnm e din kpii sɔkniinbɑ mɑnŋ, k i mun sɑɑn sɑɑ mɑɑ b kɑɑt mɑnŋ. L pɑɑk, k Yɑndɑɑnɔ Yennu din yet ɑ: ‹N sɑɑ tun sɔkniinbɑ nɑn tuomiinbɑ b buol ni, k b sɑɑ kpi siɑb ŋɑɑn muks lieb,› ɑ mɔtɑɑnɑ nigbounŋ n tɑn lɑ tubdɑtu sɔkniinbɑ kul kpinu nɑ pɑɑk. Kpinu mɑnŋ din piin *dulnyɑ nɑmu yuo e wɑɑ, Kɑɑen nbɑ din kpii Abel yuo nbɑ nɑ, k l jii k tɑn bɑɑl Sɑɑkɑɑli kpinu, wun nbɑ k b din kpii’u Yennu *mɑnnu binbintl nɑn Yennu jɑɑnti ŋɑsɑɑkɑk sinsuuk ni nɑ. N yien’i nɑn bɑlmɔni e, mɔtɑɑnɑ nigbounŋ nɑ tɑn sɑɑ lɑ tubdɑtu lin nbɑ nɑ kul pɑɑk. «Yinm *senniwɑntieb, l sii bi i pɑɑk, k mɑɑn i mɔk pienu nbɑ sɑɑ fit luot minu gɑnn. I k kuɑ lenŋ k i biɑ k cɑb bin nbɑ luon bin kuɑ.» Yiesu nbɑ siet lenŋ mɑnŋ, k senniwɑntieb nɑn Fɑɑliisiɑnnbɑ wutuol ji din duo bonciɑnn, k b ji din piin boi’ɔ buboit k jikt sɑɑ lɑbɑɑl bonciɑnn po, k b lek din kol ɑ bin lɑ u mɔbonkpetl k fit tɑɑl’ɔ. L yuo mɑnŋ k niib tusɑ tusɑ din muk lɑkn lieb, k tɑn ŋmɑɑt lieb tɑɑgbinɑ, k Yiesu din pɑk nɑn u *puolpoweitieb sinsinn k yɑɑ ɑ: «Ii lɔktl mɑn Fɑɑliisiɑnnbɑ tumiiu nbɑ k tuok nɑ, b tie kpinkpɑnni dɑnm e. Bɑlsɑi kɑɑ k duɑk k tɑn kɑn nyi pɑɑnu ni. Siɑl mun k be wuol ni k b tɑn kɑn bɑnn’l. L pɑɑk, lɑbɑɑl nbɑ k i pɑk bunbɔnn ni nɑ tɑn sɑɑ nyi yentu ni. Lin nbɑ k i lek lɔkn diet ni, ŋɑɑn l tɑn sɑɑ wuot k muɑnt nyi wɑɑ.» «N yuɑsnbɑ, n yien’i e, i dɑɑ tiin bin nbɑ kpi gbɑnɑnt kuukuɑ nɑ jɑŋmɑɑni mɑn, k mɑɑn b kpi i gbɑnɑnt kuukuɑ e, k l puolpo b kɑn fit tien’i siɑl. N sɑɑ wɑnn’i wun nbɑ k i sii tiin’ɔ. Tinin wun nbɑ fit kpi i gbɑnɑnt k biɑ mɔk yiikuo nbɑ k sɑɑ fit lu’i muu nbɑ kɑn mi kpien nɑ ni. N yien’i e, tinin ŋuɑ e mɑn.» «B k kɔi nuɑnbit bɑnŋmu kujɑ ŋɑnle ee? Ŋɑɑn Yennu k mi tɑnm nɑn b yenɔ kuɑ po wɑɑ. Setk nɑn mɔni Yennu ponŋ mi i yulɑ pɑɑk yut kɑnn. I dɑɑ tiin jɑŋmɑɑni, k mɑɑn i mɔk nyuɑt k gɑl nuɑnbit bonciɑnn.» «N yien’i e, wun nbɑ nyint u mɔnŋ pɑɑnu ni niib ni nɑn u tie n weilɔ e, *Nisɑɑlk Bijɑ mun tɑn sɑɑ nyinn’ɔ pɑɑnu ni Yennu *mɑlɑkɑɑnbɑ buol ni, nɑn u tie u yuɑ e, ŋɑɑn wun nbɑ yɑɑ ɑ u k tie n weilɔ, niib ni, Nisɑɑlk Bijɑ mun tɑn sɑɑ yet ɑ u k mi’u, Yennu mɑlɑkɑɑnbɑ mɑnŋ buol ni. «Wun nbɑ kul pɑk mɔbonn k biil Nisɑɑlk Bijɑ nɑ, Yennu sɑɑ nyik cɑb’ɔ wɑɑ, ŋɑɑn wun nbɑ pɑk biil Foŋɑnm nɑ, Yennu kɑn nyik cɑb’ɔ. «B i suol’i k bɑɑl nɑn’i *Suifnbɑ jɑɑnti diet ni ɑmi kpɑnbɑlɑ buol ɑmi tinŋ yudɑnm buol, i dɑɑ te k l dɑɑnm’i nɑn yɑɑ sɑɑ pɑk jiin biɑnŋ nbɑ, ɑmi yɑɑ sɑɑ pɑk lin nbɑ, k mɑɑn l yuo nɑ e k Foŋɑnm tɑn sɑɑ wɑnn’i biɑnŋ nbɑ k i sɑɑ pɑk.» L yuo mɑnŋ k jɑsuɑ din yet Yiesu nibul nɑ ni ɑ: «Wɑntuɑ, yetl n yuɑlɔ nɑ k wun bɔkt t bɑɑ fɑɑl k tul’n.» K Yiesu yet’ɔ ɑ: «N yuɑk, ŋmee tien’n bɑlbuulɔ ɑ n bu k bɔkt i fɑɑl mɑnŋ i?» Ŋɑnn e k Yiesu ŋɑnm pɑk nibul nɑ ɑ: «Ii mi mɑn mɔktuk lonm po. K mɑɑn mɔktuk bonciɑnn kɑɑ sɑɑ te k nilɔ i mɔk mɑnfuol.» Ŋɑnn e k Yiesu yin’m bɑljouk ɑ: «Mɔktsuɑ din be k mɔk u kpɑɑb, k u kpɑɑb nɑ din tien’ɔ jiet bonciɑnn, k u tɑn dukn dudukt ɑ: ‹N sɑɑ tien nlee, k mɑɑn n k mɔk yiɑl nbɑ k ji sɑɑ tien n jiet nɑ kul lenŋ.› K u yet u mɔnŋ ɑ: ‹N sɑɑ tien nnɑ e. N sɑɑ yiel n bɔkpelɑ nɑ e ŋɑɑn ŋɑnm mɑɑ bɔpɑɑnɑ nbɑ yɑb. Lenŋ e k n ji sɑɑ tien n dii nɑn n bonkokuot kul ɑ, k n biɑ sɑɑ yet n mɔnŋ ɑ: N mɔk jiet nbɑ sɑɑ jɑnŋ nɑn binɑ sɑɑn ɑ. N ji sii foi k di k nyu kii mɔk pɑlpienn.› Ŋɑnn e k Yennu yet’ɔ ɑ, ‹Jɑjɑtuk nɑ. Nyiɑɔk nɑ, ɑ mɑnfuol sɑɑ kɑt. Ŋɑɑn lɑɑn, ɑ mɔktuk nbɑ k ɑ mɔk nɑ, ŋmee sɑɑ yent i?› «Tɔn, wun nbɑ kul tiki mɔktuk k tien u mɔnŋ, ŋɑɑn k mɔk mɔktuk Yennu buol, l mun sii tie nnɑ e k tul’ɔ.» Ŋɑnn e k Yiesu yet u puolpoweitieb biɑk, «L pɑɑk k n yien’i, i dɑɑ te k l muks’i i binbenŋ po nɑn yɑɑ sɑɑ di lin nbɑ, k biɑ dɑɑ te k l muks’i i gbɑnɑnt po nɑn yɑɑ sɑɑ liɑ lin nbɑ, k mɑɑn mɑnfuol gɑl dinu wɑɑ, k gbɑnɑnt mun gɑl tiɑt ɑ. Gotl kinkɑɑt, b k buul. B biɑ k jɑɑn. B biɑ k mɔk dii nɑɑpɑɑt ɑmi sukɑ, ŋɑɑn Yennu dint’b. I k mɔk nyuɑt bonciɑnn k gɑl kinkɑɑt ii? I ŋmee sɑɑ fit fɔkn u mɑnfuol u dudukt ni nbɑ muks’ɔ nɑ pɑɑk i? Yɑɑ k fit tun bonbik nɑ, bee k l sii dɑɑmi’i nɑn bongbenŋl tumu? Gotl mɑn tipuuk nɑn l ŋɑnt, ŋɑɑn b k tuun k luu b mɔnŋ cincenɑ, ŋɑɑn n yien’i nɑ, kpɑnbɑl Sɑɑlomɔn nbɑ din lek mɔk tɑŋɑnɑ biɑnŋ nbɑ, u din k mi liɑ tiɑt k l ŋɑn nɑn tipuuk nɑ. Muɑt nbɑ be dinnɑ, ŋɑɑn wonn k b sɑɑ juo muu nɑ, Yennu nbɑ te k l fɑn biɑnŋ nbɑ nɑ, k u kɑn lɑnn yinm ii? Yinm yɑdɑ-kɑnpuɑnɑ dɑnm nɑ. «I biɑ dɑɑ gbɑɑ nɑn yɑɑ sɑɑ di lin nbɑ ɑmi yɑɑ sɑɑ nyu lin nbɑ, k biɑ dɑɑ muks i dudukt, k mɑɑn niib nbɑ k wɑɑ Yennu nɑ tuu muks b dudukt lin nbɑ nɑ pɑɑk e. Ŋɑɑn yinm ŋɑnin, i Bɑɑ ponŋ mi nɑn i luon lin nbɑ nɑ. L pɑɑk, ŋɑɑnt k i bɑkɑ ii be Yennu nɑɑn ni, k u sɑɑ jii bonɑ nbɑ nɑ k tul’i. «N niib nbɑ k yɑb nɑ, i dɑɑ tiin jɑŋmɑɑni, k mɑɑn i Bɑɑ lɑ nɑn l ŋɑn wun tul’i nɑɑn mɑnŋ ɑ. Kɔin i bonɑ nbɑ k i mɔk k jii l likli k tul tɑlɑs-dɑnm. Lomin mɑn likbuɑli nbɑ kɑn biil, kii biɑ kii mɔk mɔktuk *Yendɔunŋ ni, siɑn nbɑ k l kɑn wɑt, k nɑn-yukɔ kɑn kpiɑn lenŋ, k bonŋmiŋmɑbt biɑ kɑn muɑ’l. Siɑn nbɑ k ɑ mɔktuk be nɑ, ɑ dudukt mun be lenŋ e. «Siknt gbounŋ siɑk ni mɑn, k ŋɑɑn k i fitɑ ii di, kii tie nɑn niib nbɑ tuu guu b cɑnbɑɑ nbɑ tuu nyi puociɑnu k kpen k tɑn bɑɑl yiin ɑ bin luot gɑnn tul’ɔ, k bin luot gɑnn yiɑn ɑ nɑ. Tuontunnɑ nbɑ k b cɑnbɑɑ kpen k lɑ’b k b guu u kpenu nɑ, pɑlpienn tie b yɑl e. Bɑlmɔni e k n yien’i nɑ, b cɑnbɑɑ nɑ sɑɑ te k u dɑɑbɑ n kɑl k wun bɑɑl nɑn jiet k tul’b k bin di. L i tie k b cɑnbɑɑ tɑn kpen tɑnsuuni ɑmi kojomuɑk, k lɑ k b guu’u, pɑlpienn sii tie tuontunnɑ mɑnŋ yɑl e. «Nnɑlɑ, l i tie k ŋɑɑdɑɑnɔ ponŋ mi yuo nbɑ k nɑn-yukɔ sɑɑ bɑɑl i e, u kɑn ŋɑɑn k wun bɑɑl kuɑ. Yinm mun n tien siil kii guu, k mɑɑn Nisɑɑlk Bijɑ tɑn sɑɑ jen yuo nbɑ k i k duki ɑ u sɑɑ jen e.» Ŋɑnn e k Piɑl boi Yiesu ɑ: «N Yonmdɑɑnɔ, ɑ yiin tinm e bɑljouk nɑ ɑmi suɑ kul ee?» K Yonmdɑɑnɔ jiin k yet’ɔ ɑ: «Tuontunlɑnɔ e tie yɑndɑɑnɔ k tuun u cɑnbɑɑ nbɑ wɑnt’ɔ biɑnŋ nbɑ? Ŋuɑ e tie wun nbɑ k u cɑnbɑɑ sɑɑ tien’ɔ tuontun-yudɑɑnɔ ɑ u goli tuontunnɑ kul nbɑ be u ŋɑɑk ni, kii tien’m mɑnn yuo kul nbɑ jɑnŋ. L i tie k u cɑnbɑɑ tɑn kpen k lɑ k u tuun nnɑ, pɑlpienn sii tie tuontunnɔ mɑnŋ yɑl e. Bɑlmɔni e k n yien’i nɑ, ŋɑɑdɑɑnɔ mɑnŋ sɑɑ jii u mɔktuk kul k tien tuontunnɔ mɑnŋ nuu ni ɑ wuu goli’l. Ŋɑɑn l i tie k tuontunnɔ mɑnŋ yet u mɔnŋ ɑ u cɑnbɑɑ kɑn jen yiɑn, k ji piin k buo u tuontunliɑ nɑ, jɑb, puob, k u buo’b, k biɑ di k nyu dɑɑn k tɑn yib, u cɑnbɑɑ tɑn sɑɑ jen dɑɑl nbɑ nɑn yuo nbɑ k tuontunnɔ mɑnŋ k duki ɑ u sɑɑ jen, k tɑn sɑɑ dɑt u tubl bonbiil, k tien’ɔ nɑn wɑɑ tuu tien mɔyetdɑnm biɑnŋ nbɑ nɑ. «Tuontunnɔ i mi lin nbɑ k u cɑnbɑɑ luon wun tun, ŋɑɑn k tien u mɔnŋ siil, k biɑ k tun, b sɑɑ buo’u gbɑnn bonbiil. Tuontunnɔ nbɑ k mi lin nbɑ k u cɑnbɑɑ luon wun tun, ŋɑɑn kpet tun bonkpetl nbɑ jɑnŋ nɑn buot, b sɑɑ buo’u wɑɑnm-nnɑ. «Wun nbɑ k b tul’ɔ sɑɑn, ŋuɑ e k b tɑn sɑɑ boi gɑɑl sɑɑn. Wun nbɑ k b kubn’ɔ sɑɑn ɑ, ŋuɑ e k b tɑn sɑɑ boi k gɑɑl bonciɑnn mun.» «Min Yiesu, n bɑɑl mɑɑ n lu muu e tingbounŋ nɑ ni, ŋɑɑn n sunmɑn k l ponŋ yinn ɑ mɑn. Wulsɑu be k n sɑɑ wul, ŋɑɑn l muks n dudukt e mɔkmɔk nɑn lɑɑ tɑn sɑɑ gbenn. I duki mi ɑ n bɑɑl nɑn mɑnu tingbounŋ nɑ ni ee? Aɑi. N yien’i e, n bɑɑl nɑn bɔktu e. Lɑɑ jii dinnɑ k sɑɑ, niib bɑnŋmu tɑn sii be ŋɑɑk ni, k b tɑn sɑɑ bɔkt. Bɑntɑ sɑɑ kɔn nɑn bɑnle, k bɑnle mun sɑɑ kɔn nɑn bɑntɑ. Bɑɑ tɑn sɑɑ kɔn nɑn u bijɑ, k bijɑ mun tɑn sɑɑ kɔn nɑn u bɑɑ. Nɑɑ tɑn sɑɑ kɔn nɑn u bipuo, k bipuo mun tɑn sɑɑ kɔn nɑn u nɑɑ. Siponɑɑ tɑn sɑɑ kɔn nɑn u sipopuok, k sipopuok nɑ mun tɑn sɑɑ kɔn nɑn u siponɑɑ.» L yuo mɑnŋ k Yiesu pɑk tul nibul nɑ k yet ɑ: «Yuo nbɑ k i tuu tɑn lɑ sɑnpɑgbɑnt k lin do yenbɑɑpo, k i tuu yet yiɑn ɑ, ɑ sɑɑk sɑɑ bɑɑ wɑɑ, k u set tɑn bɑɑ. Yuo nbɑ k i lɑɑt k gɑnŋ po wounŋ dɑ, i tuu yɑɑ ɑ nɑɑɔk sii be, k l set tɑn ton. Yinm kpinkpɑnni dɑnm nɑ, i fit gbɑt lin nbɑ tien tingbounŋ ni nɑn sɑnpɑɑpo nɑ pɑɑk ɑ, ŋɑɑn bee tien k i kɑn fit bɑnn mɔtɑɑnɑ yuo nɑ pɑɑk i? «Bee tien k i kɑn fit dukn i mɔnŋ k senn lin nbɑ tuok i? L i tie k fin nɑn suɑ mɔk mɑɑn k sɑɑ bɑlbuulɔ buol, yɑɑ dɑɑ be sɔnu pɑɑk k sɑɑ nɑ, l ŋɑn k ɑ kot ɑ mɔnŋ k ŋɑnm fin nɑn ŋuɑ sinsuuk ni. L i kii tie nnɑ i kɑɑ, u sɑɑ dɑt’ɑ bɑɑl nɑn’ɑ bɑlbuulɔ buol, k bɑlbuulɔ nɑ mun sɑɑ jii’ɑ k tien’ɑ dɑnsɑlguulɔ nuu ni, k dɑnsɑlguulɔ nɑ mun sɑɑ kuɑn’ɑ dɑnsɑlk. N yien’ɑ e, b kɑn mi ŋɑɑ’ɑ ni, sie k ɑ tɑn pɑ likli kul nbɑ k b jiɑl’ɑ nɑ, k kuuk kɑn tenn.» L yuo nɑ k nisiɑb din bɑɑl k yet Yiesu k jikt sɑɑ Gɑɑliile tieb nbɑ k *Piilɑɑt din kpii’b yuo nbɑ k b din mɑnn *mɑlunŋ k tien Yennu nɑ. K Yiesu boi’b ɑ: «Bɑɑ din kpii Gɑɑliile tieb mɑnŋ biɑnŋ nbɑ nɑ, i duki ɑ b mɑntk din tie biitdɑnm k gɑl b lieb kul nɑ ee? Aɑi, ŋɑɑn n yien’i e, l i tie k i k mɔ kuɑŋɑɑn k lebt binbenŋ i kɑɑ, i kul mun tɑn sɑɑ kpo nnɑ e. Dɔnfuouk nbɑ din be Siiloe k tɑn bɑɑ k nyɑk niib piik nɑn bɑnniin k kpii’b nɑ, i duki ɑ niib mɑnŋ din jiɑ mɑntk tie biitdɑnm k gɑl lieb kul nbɑ be Selusɑɑlenm nuɑk ni ɑmi? Aɑi, ŋɑɑn n yien’i e, l i tie k i k mɔ kuɑŋɑɑn k lebt binbenŋ i kɑɑ, b mun tɑn sɑɑ kpi’i nnɑ e.» Ŋɑnn e k Yiesu din yin’m bɑljouk k yet ɑ: «Jɑsuɑ din wuu fiigie u kpɑɑb nbɑ k u wuu tilonti nbɑ k b yi *fiinyɑ nɑ ni, k tɑn bɑɑl ɑ wun puɑl fiignbɑ, ŋɑɑn k k lɑ siɑl. Ŋɑnn e k u yet u kpɑguulɔ nɑ ɑ: ‹Nnɑlɑ, binɑ ŋɑntɑ e nɑ k n tun bɑɑt fiigie nɑ buol mɑɑ n tuu puɑl fiignbɑ, ŋɑɑn k k lɑɑt siɑl. Cuɑn’mɔ lu. Bee k l sii sie biil tinŋ yɑnn i?› K u kpɑguulɔ nɑ jiin yet’ɔ ɑ: ‹Cɑnbɑɑ, dɑɑ nyikn binn nɑ dɑɑnn k n gbiil l nyɑkl ni k pii luln. Pɑsiɑl binn nbɑ wɑɑ nɑ u sɑɑ lon luɑnɑ. L i tie k l k lon i e, fɑn ji tɑn ŋɑɑn k bin cuɑ’u.›» Fuondɑsiɑl k Yiesu din tumi niib *Suifnbɑ jɑɑnti dieok ni, k puosuɑ din be dieok mɑnŋ ni, k nɑlnbiiuk din be u ni k tien’ɔ wɑɑgolk binɑ piik nɑn ŋɑnniin, k u k fit nɑɑtl u mɔnŋ fɑb ɑ. Yiesu nbɑ tɑn lɑ’u, k u yiin’ɔ ɑ wun bɑɑl, k yet’ɔ ɑ: «A yiɑlu mɑnŋ ŋɑɑ’ɑ wɑɑ,» ŋɑɑn jii u nii k yii puo mɑnŋ pɑɑk, k l tɑɑkpɑɑk ni k u fiil set nɑɑt u mɔnŋ k ji piɑk Yennu. Ŋɑnn e k Suifnbɑ jɑɑnti dieok yudɑɑnɔ wutuol din duo, k mɑɑn Yiesu nbɑ te k puo nɑ pɑɑk *Fuondɑɑl nɑ pɑɑk, k u yet niib nɑ ɑ: «Dɑɑ ŋɑnluob k t sii tuun tuonn. I tuu bɑɑl l dɑɑ ni kii lɑɑt pɑɑku, ŋɑɑn i dɑɑ bɑɑt Fuondɑɑl ɑ wun te k i pɑɑk.» K Yonmdɑɑnɔ jiin yet’ɔ ɑ: «Yinm kpinkpɑnni dɑnm, i kul nɑ tuu k luotl i nei nɑn i boni bonkobloi ni k dɑɑl sɑɑ nɑn’m k sɑɑ nyunt’b Fuondɑɑl ii? K puo nɑ nbɑ tie Ablɑɑhɑɑnm yɑɑbuonn nɑ, ŋuɑ e k *Sɑɑtɑn din tien’ɔ yonmk binɑ piik nɑn ŋɑnniin, l bo k jɑnŋ nɑn k n nyinn’ɔ yomsn nɑ ni Fuondɑɑl ii?» Yiesu nbɑ din pɑk lin nbɑ mɑnŋ, k mɔnɔnoilɑ nɑ kul ɑ ji din dii fei, ŋɑɑn nibul nɑ kul ji din mɔk pɑlpienn nɑn wɑɑ tuun bɑktnɔunŋ tuonɑ kul mɑnŋ. L puolpo k Yiesu boi niib mɑnŋ ɑ: «N sɑɑ bikn Yennu nɑɑn nɑn lɑnn po e? N sɑɑ nɑn’l nɑn biɑ? L nɑɑn nɑn kpint tiik nbɑ k b yi’l *muutɑɑld nɑ binn nbɑ k nilɔ jii k bul u gungounŋ ni, k l kpɑɑt k tien tiik, k nuɑni bɑɑt k tiɑ tiɑt l yiini pɑɑk nɑ e.» K Yiesu biɑ ŋɑnm boi’b ɑ: «N sɑɑ bikn Yennu nɑɑn nɑn lɑnn po e? Yennu nɑɑn tie nɑn * dɑtinŋ nbɑ k puo jii k ŋmɑt nɑn pɑɑnu yon nbɑ yɑb, k lin tɑn miik mɔkmɔk nɑn lɑɑ tuu tɑn pukl nɑ e.» Yuo nbɑ k Yiesu din be sɔnu pɑɑk k sɑɑ Selusɑɑlenm nɑ, u din gɑl digbɑngbenŋɑ nɑn digbɑnbis ni, k tumi niib, k suɑ tɑn boi’ɔ ɑ: «Cɑnbɑɑ, niib nbɑ tɑn sɑɑ lɑ fielu nɑ, b tɑn sii tie wɑɑnm-nnɑ ɑmi ii?» K u yet’b ɑ «Sie k i muks i mɔnŋ k yebn k kuɑ tɑnmɔyebk nɑ ni. K mɑɑn n yien’i e, niib bonciɑnn tɑn sii luon bin kuɑ lenŋ, ŋɑɑn tɑn gbɑl l kuɑnu. Ŋɑɑdɑɑnɔ i tɑnŋ i fiil k luon tɑnmɔb nɑ, i sɑɑ biɑl sie nɑn-yel po, k kpɑɑn tɑnmɔb k yi k yɑɑ: ‹Cɑnbɑɑ, luotl tul’t,› ŋɑɑn l yuo, u tɑn sɑɑ jiin yet’i ɑ: ‹N k mi yɑɑ nyii siɑn nbɑ.› K i tɑn sɑɑ jiin yet’ɔ ɑ: ‹T din tuu di k nyu nɑn’ɑ, k ɑ tuu tumi’t t doi ni.› K u biɑ tɑn sɑɑ jiin k yet’i ɑ: ‹N k mi yɑɑ nyii siɑn. Yinm biitdɑnm kul nɑ, sietl n buol ni nɑ mɑn.› Lenŋ e k i tɑn sii fɑbn mɔ k nyiitl nyɑnɑ yuo nbɑ k i sɑɑ lɑ Ablɑɑhɑɑnm nɑn Isɑɑk nɑn Sɑɑkɔb nɑn sɔkniinbɑ kul ɑ Yennu nɑɑn ni, ŋɑɑn b tɑn sɑɑ jii’i k lu’i nɑn-yel. K niib tɑn sɑɑ nyi yendopo nɑn yenbɑɑpo nɑn diitu po nɑn gɑnŋ po k tɑn kuɑ Yennu nɑɑn ni k kɑl k di jiet. L yuo nɑ, nisiɑb nbɑ juont tɑn sɑɑ dɔnŋ sɑɑn liik, k siɑb nbɑ mun dɔnŋ sɑɑn liik tɑn sɑɑ juont.» L yuo nɑ k Fɑɑliisiɑnnbɑ siɑb din bɑɑl Yiesu buol k yet’ɔ ɑ: «Sie k ɑ nyii nnɑ k sɑɑn siɑl po, k mɑɑn *Heluod luon k wun kpi’ɑ.» K Yiesu yet’b ɑ: «Ŋuɑ wonŋ nɑɑnɑɑt nɑ, ii sɑɑ mɑn, k sɑɑ yet’ɔ ɑ: ‹Gotl, dinnɑ nɑn wonn e k n sii biel nɑlnbiit niib ni ŋɑɑn biɑ kii te k bii pɑɑkt, k dɑɑ ŋɑntɑ dɑɑl k n sɑɑ gbenn n tuonn.› Lɑɑ jii dinnɑ nɑn wonn nɑn dɑɑlpo, sie k n lek fɑbl sonm n sonm ɑ, k mɑɑn l k ŋɑn k bin kpi *Yennu sɔkni siɑl po l i kii tie Selusɑɑlenm i kɑɑ. «Selusɑɑlenm tieb, nbɑɑyuoo! Yinm nbɑ kpi Yennu sɔkniinbɑ, k biɑ jɑɑt u tuomiinbɑ nbɑ k u tun’m i buol ni nɑ tɑnɑ, biknu biknu tɑɑl munŋɑ e k n gbɑɑ mɑɑ n lɑkn’i yonm nɑn kolk nbɑ tuu lɑkn u kobis u kpinkpɑnt ni nɑ, k i k sɑk. Gotl mɑn, i ŋɑɑk sɑɑ duɑl yɑnn e. N yien’i e nɑ, lɑɑ nyii dinnɑ k jii sɑɑ, i ji kɑn mi k lɑ’n k sɑɑ tuu dɑɑl nbɑ k i tɑn sɑɑ yet ɑ: ‹Yennu yetŋɑnm ii be wun nbɑ bɑɑt Yonmdɑɑnɔ sɑnn ni nɑ pɑɑk.› » Tɔn, fuondɑsiɑl k Yiesu din tɑn kuɑ Fɑɑliisiɑnnbɑ yudɑɑnsuɑ ŋɑɑk ni ɑ wun di jiet, k bin nbɑ be ŋɑɑk mɑnŋ ni din diisl’ɔ. L yuo nɑ k bɑɑtsuɑ bɑɑl u tuɑnn, wun nbɑ k bonwuunkɑl wuun’ɔ. Ŋɑnn e k Yiesu boi *senniwɑntieb nɑn Fɑɑliisiɑnnbɑ mɑnŋ ɑ: «T *senni sɑk ɑ nilɔ n te k bɑɑtɔ n pɑɑk *Fuondɑɑl ii?» Ŋɑɑn k b ŋmin ɑ. K Yiesu gɑɑl bɑɑtɔ mɑnŋ k te k u pɑɑk. L puolpo k u cɑb’ɔ ɑ wuu sɑɑ. Ŋɑnn e k u yet’b ɑ: «I yenɔ i mɔk bijɑ ɑmi nɑɑb k u tɑn bɑɑ bunbunn ni Fuondɑɑl, u kɑn donn’ɔ Fuondɑɑl mɑnŋ i?» Ŋɑɑn k b k fit jiin’ɔ siɑl. L yuo nɑ k Yiesu lɑ k bin nbɑ k b yiin’m nɑ luon bin gɑnn yudɑnm kɑɑni buol k kɑl. L pɑɑk, k u yin’m bɑljouk ɑ «B i yiin’ɑ puociɑnu k ɑ bɑɑl, fɑɑ dɑɑ kɑɑl yudɑɑnɔ kɑɑnu buol, k mɑɑn pɑsiɑl b ponŋ bo yiin suɑ e wɑɑ, wun nbɑ cie’ɑ, k yiintuɑ mɑnŋ sɑɑ bɑɑl ɑ buol ni k tɑn yet’ɑ ɑ: ‹Fiit ŋɑɑn tul’ɔ u kɑɑnu.› L yuo nɑ, k fɑn ji di fei k ji fiil k sɑɑn kɑl kpinŋ. Tɔn, b i yiin’ɑ puociɑnu k ɑ bɑɑl, fɑn kɑl kpinŋ, k yiintuɑ n tɑn fit k bɑɑl k yiin’ɑ: ‹N yuɑk, bɑɑt nɑ k tɑn kɑl yudɑnm kɑɑni buol.› L yuo nɑ k ɑ sɑɑ lɑ nibɑɑkl ɑ lieb mɑnŋ buol ni. K mɑɑn wun nbɑ kul dont u mɔnŋ, b tɑn sɑɑ sikn’ɔ, ŋɑɑn wun nbɑ siknt u mɔnŋ, b tɑn sɑɑ donn’ɔ.» Ŋɑnn e k Yiesu biɑ yet wun nbɑ yiin’ɔ nɑ ɑ: «L i tie k ɑ yiin jɑɑnm, fɑɑ dɑɑ yi ɑ yuɑsnbɑ ɑmi ɑ yuɑlb ɑmi ɑ ninjɑnm ɑmi ɑ mɔktlieb, k mɑɑn ŋɑnm mɑnŋ tɑn sɑɑ jiin’ɑ b jiinu wɑɑ, k ɑ tɑn sɑɑ gɑɑl lin nbɑ k ɑ dɑɑn tien nɑ pɑnn. Ŋɑɑn l i tie k ɑ yiin jɑɑnm u e, fɑn yiin tɑlɑs-dɑnm nɑn wɔbi nɑn diɑni nɑn juɑni, k ɑ sii mɔk pɑlpienn. B i kii fit jiin’ɑ ŋɑɑn ɑ sɑɑ gɑɑl ɑ jiinu Yennu buol ni, dɑɑl nbɑ k Yennu tɑn sɑɑ fiin bin nbɑ tie niŋɑnm u buol ni kuun ni.» Bin nbɑ k b din yiin’m k b din di nɑn Yiesu nɑ yenɔ nbɑ gbɑt lin nbɑ k Yiesu pɑk nɑ k u yet’ɔ ɑ: «Wun nbɑ sɑɑ di jiet Yennu nɑɑn ni, pɑlpienn sii tie u yɑl e.» K Yiesu yet’ɔ ɑ: «Jɑsuɑ din be k tɑn yɑɑ wun di u jɑɑngbenŋl, k poi niib bonciɑnn. Jɑɑnm nɑ yuo nbɑ tɑn bɑɑl k u tun u tuontunnɔ ɑ wun sɑɑn yiin niib nbɑ k u dɑɑn yiin’m nɑ, ɑ bin bɑɑl nɑ, ɑ k jiet nɑ kul tien siil ɑ. K b kul tɑɑn dukn dudukyent, k mei’ɔ ɑ wun cɑb’b k b dɑɑ bɑɑt, k sinsinn yuɑ nɑ yet tuontunnɔ nɑ ɑ: ‹N dɑɑ kpɑpɑɑnŋ. L pɑɑk, cɑb min k n sɑɑn sɑɑ got,› k luɑ yet’ɔ ɑ: ‹N dɑɑ nɑɑkuoki piik. L pɑɑk, cɑb min k n sɑɑn bikn’m,› k luɑ mun biɑ yet’ɔ ɑ: ‹N dɑɑ yonn n puopɑɑnŋ e, k l pɑɑk e te k n kɑn fit bɑɑl.› «Ŋɑnn e k tuontunnɔ mɑnŋ ŋmɑt k sɑɑ yet u cɑnbɑɑ lin nbɑ nɑ kul. K u cɑnbɑɑ mɑnŋ wutuol duo bonciɑnn, k u yet u tuontunnɔ nɑ ɑ: ‹Nyimin k sɑɑn duo ni yiɑn yiɑn, k sɑɑ got sɔni ni, k yiin tɑlɑs-dɑnm nɑn wɔbi nɑn diɑni nɑn juɑni k jen nɑn’m nɑ.› L puolpo e k u tuontunnɔ nɑ yet ɑ: ‹Cɑnbɑɑ, n tien fɑɑ yet lin nbɑ nɑ wɑɑ, ŋɑɑn k yiɑl dɑɑ be.› Ŋɑnn e biɑk k u cɑnbɑɑ nɑ yet u tuontunnɔ nɑ ɑ: ‹Nyimin biɑk k sɑɑ got pɑnɑ pɑɑk nɑn sɑnjobis ni nɑn kpɑɑnt ni, k mɑbn niib k bin bɑɑl, k n ŋɑɑk n gbie. N yien’ɑ e, bin nbɑ k n dɑɑn yiin’m nɑ, b suɑ ponŋ tɑn kɑn lenm n jɑɑnm nɑ jiet nɑ kɑɑ wɑɑ.› » Nibulciɑɔnŋ din wɑɑ Yiesu, k u tɑn jiɑnt k yet’b ɑ «Wun nbɑ luon k wuu be nɑn’n, sie k u luon’n bonciɑnn k gɑl wɑɑ luon u cɑnbɑɑ, nɑn u nɑɑ, nɑn u puo, nɑn u wɑɑs, nɑn u yuɑlb, nɑn u wɑɑli, nɑn u mɔnŋ mɑnfuol biɑnŋ nbɑ nɑ. L i kii tie nnɑ i kɑɑ, u kɑn fit k tien n *puolpoweituɑ. Wun nbɑ k jii u kuun dɑpunpunn k buk k wɑɑ’n, u kɑn fit k tien n puolpoweituɑ. «Wun nbɑ luon k wun mɑɑ detuɑtuk, sie k wun kɑl sinsinn, k dukn wɑɑ sɑɑ tien biɑnŋ nbɑ k suol l mɔb, k lɑɑn u likli sɑɑ jɑnŋ ɑmi l kɑn jɑnŋ, k mɑɑn l i tie k u fɔkn fiɑkl nɑ ŋɑɑn tɑn k fit kɑɑl mɑɑlu mɑnŋ, niib ji sii lɑɑ’u e k sɑlkt’ɔ. B ji sii yien ɑ: ‹Juɑ nɑ dɑɑn fɔkn u dɔunŋ ŋɑɑn tɑn gbɑl kɑɑlu.› «Kpɑnbɑl i mɔk niib tusɑ piik (10.000) k sɑɑn nɑn’m ɑ wun tuok u kpɑnbɑl luɑ nɑn u niib tusɑ piinle (20.000) mun, nlee k kpɑnbɑl nbɑ mɔk niib tusɑ piik (10.000) nɑ sɑɑ tien i? Sie k u kɑl sinsinn k dukn k bɑnn bɑɑ sɑɑ jɑnŋ nɑn bɑɑ kɑn jɑnŋ nɑn u tuoku. B i kii jɑnŋ i e, sie k wun tun *tuomi k bin ŋɑk fɑɑɔk, wɑɑ dɑɑ be bɑnfɔkl nɑ. «Tɔn, nilɔ i kii nyik u mɔktuk kul, u kɑn fit tien n puolpoweituɑ. «Yɑɑln mɑn, ŋɑɑn l mɑnu i tɑnŋ i biil, nlee k l ji sii mɑn i? L lek k ŋɑn k ɑ jii’l k pɑk kpɑɑb ni, k biɑ k ŋɑn k ɑ pukn luln po. Sie k ɑ lu. Wun nbɑ mɔk tubɑ, wun gbiint.» Siɑn yuo k *lɑnpogɑɑltieb nɑn biitdɑnm bonciɑnn din bɑɑt Yiesu buol ni k gbiintl u mɑɑn. K Fɑɑliisiɑnnbɑ nɑn *senniwɑntieb din buln k yien ɑ: «Juɑ nɑ gɑɑl biitdɑnm k biɑ di nɑn’m.» L pɑɑk, k Yiesu yin’m bɑljouk nɑ ɑ «I yenɔ i mɔk pei kobk, k yenɔ n tɑn bot, u sɑɑ tien nlee? Sie k u nyik pei piin-yiɑ nɑn bɑn-yiɑ nɑ muuk ni, ŋɑɑn sɑɑn lon peyeunŋ mɑnŋ nbɑ bot nɑ nɑn wɑɑ tɑn sɑɑ lɑ’u. Wɑɑ ji tɑn lɑ’u yuo nbɑ k u ji mɔk pɑlpienn. L yuo k u jii’u k buk’ɔ u bɔpiɑt pɑɑk k kun ŋɑɑk ni. L yuo nɑ k u yiin u yuɑsnbɑ nɑn u ŋɑkpiɑsnbɑ k lɑkn’m k yɑɑ ɑ: ‹Ii mɔk pɑlpienn mɑn, k mɑɑn n lɑ n pebotkɑɔk mɑnŋ ɑ.› «Ŋɑnn e mun, k n yien’i biɑk, biit dɑɑn-yenɔ i mɔ kuɑŋɑɑn k lebt binbenŋ, pɑlpienn sii be *Yendɔunŋ ni l dɑɑnɔ pɑɑk, k gɑl lɑɑ sii be biɑnŋ nbɑ bin nbɑ tie niŋɑnm Yennu buol ni piin-yiɑ nɑn bɑn-yiɑ nbɑ k l k siɑn nɑn b sii mɔ kuɑŋɑɑn k lebt binbenŋ nɑ pɑɑk. «K puo mun ii mɔk likbinɑ piik, k yenn tɑn bot, u sɑɑ tien nlee? Sie k u juo fitl k piɑl u dieok k lon fɑnu nɑn wɑɑ tɑn sɑɑ lɑ’l. Wɑɑ ji tɑn lɑ’l yuo nbɑ, k u ji yiin u yuɑsnbɑ nɑn u ŋɑkpiɑsnbɑ k lɑkn’m k yet’b ɑ: ‹Ii mɔk pɑlpienn mɑn, k mɑɑn n lɑ n likbin nɑ wɑɑ.› «Nnɑ e mun k n yien’i biɑk, l i tie k biitdɑɑn-yenɔ mɔ kuɑŋɑɑn k lebt binbenŋ, Yennu *mɑlɑkɑɑnbɑ sii mɔk pɑlpienn u pɑɑk e.» Ŋɑnn e k Yiesu ŋɑnm yet ɑ: «Jɑsuɑ din mɔk bonjɑi bɑnle, k wɑɑlɔ po tɑn yet u bɑɑ ɑ: ‹N bɑɑ, n luon k ɑ jii fɑɑl nbɑ k n bo tɑn sɑɑ gɑɑl ɑ kuun puolpo nɑ e k tul’n.› L yuo mɑnŋ k u bɑɑ bɔkt b fɑɑl mɑnŋ k tul’b. Ŋɑnn e l k wei k wɑɑlɔ po nɑ jii u mɔktuk kul k yɑɑt sɑɑn digbɑnn bɑnfɔkl ɑ. Lenŋ e k u binbenŋ din k ŋɑn, k u biil u likli yiɑn yiɑn ɑ. Wɑɑ gbenn u likli yuo nbɑ nɑ, k kon bɑɑ tinŋ mɑnŋ ni bonciɑnn, k suol’ɔ hei. Ŋɑnn e k u ji sɑɑn be jɑsuɑ ŋɑɑk duo mɑnŋ ni, k u tuun’ɔ u kpɑɑb ni ɑ wuu dint u duoli. K u tuu luon wun di duoli dɑbint nɑ k gbuo, ŋɑɑn suɑ din k tien’ɔ siɑl. L puolpo k u yɑn jen, k u yet u mɔnŋ ɑ: ‹N bɑɑ tuontunnɑ kul ɑ lɑɑt jiet di k l jɑnŋt’b, k biɑ tent, ŋɑɑn k n tɑn kpenn kon nnɑ nɑ.› Lɑɑ ji be nɑ, n sɑɑ kun n bɑɑ buol e k sɑɑ yet’ɔ ɑ: «N cɑnbɑɑ, n tun bonbiil k biil Yennu nɑn’ɑ wɑɑ. N ji k ŋɑn nɑn k ɑ yiin’n ɑ bijɑ. Tient’n ɑ tuontun-yenɔ.» Ŋɑnn e k u ji fiil k ŋmɑt k kun u bɑɑ buol. «Yuo nbɑ k u dɑɑ din be bɑnfɔkl k kun nɑ, k u cɑnbɑɑ lɑ’u, k ninbɑɑɔk suol’ɔ bonciɑnn, k u ciɑl k bɑɑl suol u bik nɑ bɔpiɑt k puul wɔb’ɔ. Ŋɑnn e k bik nɑ yɑɑ ɑ: ‹N cɑnbɑɑ, n tun bonbiil k biil Yennu nɑn’ɑ wɑɑ. N ji k ŋɑn nɑn k ɑ yiin’n ɑ bijɑ.› Ŋɑɑn k u bɑɑ yiin u tuontunnɑ, ‹Tient yiɑn ɑ k jii cincenŋɑnn, nɑn bɑnŋ, nɑn tɑɑsɑɑt nɑ, k tɑn gbɑbn’ɔ, ŋɑɑn piln’mɔ bɑnŋ nɑn tɑɑsɑɑt nɑ, ŋɑɑn kii sɑɑ mɑn k sɑɑ suol nɑɑjɑkpɑnml nɑ nɑ k tɑn kpi’u k tin tien jɑɑnm. N tuu miɑ n bijɑ nɑ kpo e, ŋɑɑn k u be, k biɑ miɑ u bot e, ŋɑɑn k u tɑn jen ɑ.› Ŋɑnn e k b ji piin b jɑɑnm dinu nɑn pɑlpienn. «L yuo nɑ k u bijɑkpel nɑ dɑɑ din be kpɑɑb ni e, k ji din tɑn kpent k pel ŋɑɑk k gbɑt fuut, k siɑk wɑɑ k jinjeluk jeln. K u yiin u bɑɑ tuontun-yenɔ k tɑn boi’ɔ ɑ: ‹Bee fuut e fu ŋɑɑk nnɑ?› K tuontunnɔ nɑ yet’ɔ ɑ: ‹A wɑɑlɔ nɑ e kpen, k ɑ bɑɑ te k b kpii nɑɑjɑkpɑnml, k mɑɑn u jen nɑn lɑɑfiɑ e.› Ŋɑnn e k u yuɑlɔ mɑnŋ wutuol ji duo hei, k u yet ŋɑɑk ni kuɑnu. K u cɑnbɑɑ nyii k bɑln’mɔ ɑ wun bɑɑl kuɑ. Ŋɑɑn k u jiin u cɑnbɑɑ ɑ: ‹Nnɑlɑ, min e tuun’ɑ hei binɑ bonciɑnn. N biɑ k mi yet ɑ mɔb u, ŋɑɑn ɑ ponŋ tɑn k mi tul’n bubik k n kpii k yiin n nɑɑsin-yuɑsnbɑ k t tɑn dii k mɔk pɑlpienn. Ŋɑɑn ɑ bijɑ nɑ e mɑntk biil ɑ fɑɑl kul k wei jɑntonɑ, k wɑɑ tɑn jen yuo nbɑ, k ɑ biɑ kpii nɑɑjɑkpɑnml k tul’ɔ.› K u bɑɑ yet’ɔ ɑ: ‹N bik, fin ŋɑnin ponŋ tuu be nɑn’n yuo kul ɑ, k lin nbɑ kul k n tuu mɔk, l tuu tie ɑ yɑl e. L ponŋ ŋɑn nɑn tin tien jɑɑnm kii mɔk pɑlpienn, k mɑɑn, ɑ wɑɑlɔ dɑɑn kpo wɑɑ ŋɑɑn jen u mɑnfuol ni; u biɑ dɑɑn bot ɑ ŋɑɑn k n tɑn lɑ’u.› » K Yiesu din yet u *puolpoweitieb ɑ: «Mɔktsuɑ din be k mɔk u kɑlɑci, k b din tɑn kumi mɔktɔ nɑ ɑ u kɑlɑci nɑ biil u likli nɑn u bonɑ. Ŋɑnn e k mɔktɔ nɑ din yiin’ɔ k tɑn boi’ɔ ɑ: ‹Bee tien k n gbiɑ ɑ po nnɑ? I sɑɑ k sɑɑ diɑn fɑɑ tuu tuun nɑn n mɔktuk biɑnŋ nbɑ, k mɑɑn ɑ ji kɑn mi k tien n kɑlɑci.› K kɑlɑci mɑnŋ tɑn dukn dudukt ɑ: ‹N cɑnbɑɑ yɑɑ wun bel’n u tuonn ni e. N sɑɑ tien nlee? N k mɔk pɑnŋ nbɑ k n sɑɑ ko, k n biɑ tiin fei nɑn mii mei. N mi mɑɑ sɑɑ tien biɑnŋ nbɑ k niib n gɑɑl’n b ŋei ni yuo nbɑ k n cɑnbɑɑ nyik’n gbenn.› Ŋɑnn e k u yiin u cɑnbɑɑ pɑndɑnm kul yenɔ yenɔ, k tɑn boi sinsinn yuɑ ɑ: ‹A mɔk n cɑnbɑɑ pɑnn yinŋɑ e?› K u jiin k yet’ɔ ɑ: ‹Kpɑn ɑnkɔlɑ kobk (100).› K u yet’ɔ ɑ: ‹Jiin ɑ kɑdɑɑɔk k sɑɑn kɑl yiɑn yiɑn k diɑn ɑnkɔlɑ piinŋmu (50).› K u biɑ yiin luɑ k tɑn boi’ɔ ɑ: ‹Fin, yinŋɑ e k ɑ mɔk n cɑnbɑɑ pɑnn i?› K u jiin’ɔ ɑ: ‹Dii bɔtuot kobk (100).› K u yet’ɔ ɑ: ‹Jiin ɑ kɑdɑɑɔk k diɑn dii bɔtuot piiniin (80).› Tɔn, yuo nbɑ k cɑnbɑɑ nɑ gbɑt u kɑlɑci fobdiilɔ nɑ nbɑ tun biɑnŋ nbɑ nɑ, k u pɑk’ɔ, ɑ u tun nɑn yɑn e. Bin nbɑ wɑɑ tingbounŋ nɑ sɔnu e mɔk yɑn b mɔnŋ niib sinsuuk ni k gɑl bin nbɑ wɑɑ yentu sɔnu nbɑ mɔk biɑnŋ nbɑ. Min e yien’i nɑ, i jii tingbounŋ nɑ mɔktuk kii tuun nɑn’n kii so niib yuɑs, k mɔktuk mɑnŋ i tɑnŋ i gbenn yuo nbɑ, Yennu sɑɑ gɑɑl’i ŋei nbɑ kɑɑ gbennu nɑ ni. «Wun nbɑ tuun fɑnu bonbis ni, u biɑ sii tuun fɑnu e bonsɑɑkɑ ni, k wun nbɑ mun k tuun fɑnu bonbis ni, u mun biɑ kɑn tun fɑnu bonsɑɑkɑ ni. L i tie k ɑ tuun nɑn tingbounŋ nɑ mɔktuk k biil, ŋmee sɑɑ jii mɔmɔnm mɔktuk k tien ɑ nuu ni. L i tie k ɑ di fobt nɑn lieb yɑl, ŋmee sɑɑ tul’ɑ ɑ mɔnŋ mɔnŋ yɑl i? «Tɔn, tuontunnɔ kɑn fit tun k tul cɑnbɑɑnbɑ bɑnle. U sii luon yenɔ k gɑl luɑ, ɑmi u sii sɑɑk yenɔ mɔb ŋɑɑn kii sɑlkt luɑ nɑ. A kɑn fit wɑɑ Yennu nɑn likli biɑk.» Yuo nbɑ k Fɑɑliisiɑnnbɑ din gbɑt lin nbɑ nɑ, k b ji din dɑɑn Yiesu nyɑtuk, k mɑɑn b din tie liklonnɑ e. K Yiesu yet’b ɑ: «Yinm, i wɑnt i mɔnŋ niib ni nɑn i tie niŋɑnm e Yennu buol ni, ŋɑɑn Yennu mi i pɑlɑ ni. Lin nbɑ k nilɔ duki nɑn l tie bonjɑɑnn e, ŋɑɑn l nubl e Yennu buol. «Yennu *senni nɑn u sɔkniinbɑ diɑni din mɔk yiikuo mɔkmɔk nɑn Sɑn nbɑ din tɑn bɑɑl. Lɑɑ nyii Sɑn bɑɑlu yuo ni e wɑɑ, k b muɑntl lɑbɑmɑnn k jikt sɑɑ Yennu nɑɑn po, k suɑ kul muksl u mɔnŋ ɑ wun kuɑ Yennu nɑɑn mɑnŋ ni. Sɑnpɑɑk nɑn tinŋ tɑn sɑɑ fit bot k l k pɑɑl, ŋɑɑn Yennu senni bonmintk nnɑ kɑn mi k bot fɑb ɑ. «Wun nbɑ yet u ŋɑɑpuo ŋɑɑn kuɑn puogɑnɔ, tun * boncuncontuonn nɑ, k wun nbɑ mun kuɑn puo nbɑ k u sɔlɔ yet’ɔ nɑ, mun biɑ tun boncuncontuonn nɑ.» K Yiesu biɑ yet’b ɑ: «Mɔktsuɑ din be, k dɑɑl-yejɑŋɑɑk kul k u liɑ tɑŋɑnt, k be u yɑmɑ ni nɑn pɑlpienn. K tɑlɑs-dɑɑnsuɑ mun din be, k u sɑnn yi Lɑɑsɑɑl, k u din mɔk fiɑt hei. K b din tuu bɑɑl nɑn’ɔ k wun kɑl mɔktɔ nɑ ŋɑɑtɑmɔyɑnŋl ni, k tuu luon wun di mɔktɔ nɑ jebulɑbulɑ nbɑ tuu bɑɑ nɑ, k bɔi tuu bɑɑl k leni u fiɑt nɑ. «L puolpo e k tɑlɑs-dɑɑnɔ nɑ tɑn kpo, k Yennu *mɑlɑkɑɑnbɑ jii’u k sɑɑn nɑn’ɔ Ablɑɑhɑɑnm buol *Yendɔunŋ ni. K mɔktɔ nɑ mun tɑn kpo, k b pii’u, k u din sɑɑn fɑlɑ buol muu ni, k din di fɑlɑ bonciɑnn. K u tɑn yɑɑt got k lɑ Ablɑɑhɑɑnm bɑnfɔkl ɑ, nɑn Lɑɑsɑɑl k u be Ablɑɑhɑɑnm buol ni. Ŋɑnn e k mɔktɔ nɑ yikn yet ɑ: ‹N yejɑ Ablɑɑhɑɑnm, tin’n ninbɑɑɔk, k tun Lɑɑsɑɑl k wun pɑk u niibl nyun ni, k tɑn tien n jeln pɑɑk k lin mɑɑk, k mɑɑn n di fɑlciɑɔnŋ o muu ni nnɑ.› Ŋɑɑn Ablɑɑhɑɑnm yet’ɔ ɑ: ‹N bik, tiɑt fɑɑ din tuu be ɑ mɑnfuol ni nɑ, ɑ din tuu mɔk ɑ bonŋɑnɑ e, ŋɑɑn Lɑɑsɑɑl mun din tuu tie fɑlɑ e. Mɔtɑɑnɑ u be u yɑmɑ ni e nnɑ nɑ, ŋɑɑn fin e tɑn be fɑlciɑɔnŋ ni nɑ. K lin nbɑ pukn, buotsunsunŋ be tinm nɑn fin sinsuuk ni, k suɑ kɑn fit nyi k luɑl sɑɑn ɑ buol ni, k suɑ mun kɑn fit nyi ɑ buol ni k luɑl t buol ni nnɑ nɑ.› Ŋɑnn e k mɔktɔ nɑ yet’ɔ ɑ: ‹N yejɑ, l i tie nnɑ e i e, n bɑln’mɑ e, tumin Lɑɑsɑɑl n cɑnbɑɑ ŋɑɑk ni, k mɑɑn n ninjɑnm bɑnŋmu be. Ŋɑɑnt wun sɑɑn kpɑɑn’m, k b ji tɑn dɑɑ bɑɑt fɑlɑ buol nɑ ni jik.› K Ablɑɑhɑɑnm yet’ɔ ɑ: ‹A ninjɑnm mɔk Muois nɑn *Yennu sɔkniinbɑ mɑɑn. Bin gbiint mɑɑn mɑnŋ.› K mɔktɔ nɑ yet’ɔ ɑ: ‹N yejɑ Ablɑɑhɑɑnm, ɑɑi, ŋɑɑn suɑ i fiil kuun ni k sɑɑn b buol ni, ŋɑnn b sɑɑ mɔ kuɑŋɑɑn k lebt binbenŋ ɑ.› K Ablɑɑhɑɑnm yet’ɔ ɑ: ‹B i kii gbiint mɑɑn nbɑ diɑn Muois kɑdɑɑɔk ni nɑn *Yennu sɔkniinbɑ kɑdɑɑt ni, nilɔ i lek i fiil kuun ni, ŋɑɑn b kɑn sɑk u mɔb.› » Yiesu yet u *puolpoweitieb ɑ: «Jinjɑnmi nbɑ te k niib tuun biit nɑ sɑɑ bɑɑl, ŋɑɑn l sii bi k tien wun nbɑ te k jinjɑnmi bɑɑt niib pɑɑk. B i bo i jii nɑɑl k lɑnn u tulu ni k lu’u mɔkl ni, l bo sii sɔ nɑn wɑɑ bo sɑɑ te k wɑɑs nɑ yenɔ kuɑ n tun biit. Suot i mɔnŋ. «A nɑɑ bik i tun bonbiil, fɑn kpɑɑn’ɔ nɑn ninmɔnn, k l i tie k u yɑɑ ɑ u biil’ɑ, fɑn nyik u biit k cɑb’ɔ. L i tie k u tun k biil’ɑ tɑɑl munlole dɑɑl nuɑk ni, ŋɑɑn tuu bɑɑl ɑ buol ni tɑɑl munlole k yɑɑ ɑ u biil’ɑ k mɔ kuɑŋɑɑn, fɑn nyik cɑb’ɔ.» L yuo mɑnŋ k Yonmdɑɑnɔ tuomiinbɑ yet’ɔ ɑ: «Puknt’t yɑdɑ.» K u jiin k yet’b ɑ: «L i tie k i bo mɔk yɑdɑ k l yɑb k bɑɑl nɑn jinjuklu binn nɑ, i bo sɑɑ fit k yet tiik nbɑ k b yi siikomɔl nɑ ɑ: ‹Ŋɑbt ɑ mɔnŋ k sɑɑn wuu mɔkgbenŋl ni,› k siikomɔl mɑnŋ sɑɑ sɑk i mɔb. «Tɔn, i yenɔ i mɔk tuontunnɔ k u ko tɑnmɔnn ɑmi k kpɑɑl pei, k tuontunnɔ nɑ nyii kpɑɑb ni k kpen ŋɑɑk ni, u sɑɑ yet’ɔ ɑ bɑɑt yiɑn k tɑn kɑl k di jiet ii? U sɑɑ yet’ɔ ɑ: ‹Liɑtl ɑ kpɑkotiɑt k bil, ŋɑɑn liɑ tɑyieni, k tien n jiet k senn’n k n bɑɑl nɑ k tɑn di k nyu. L puolpo k ɑ mun sɑɑ di k nyu.› A duki nɑn cɑnbɑɑ mɑnŋ sɑɑ tul u tuontunnɔ nɑ niipuouk k mɑɑn wɑɑ sɑk u mɔb nɑ pɑɑk ii? L mun biɑ tie nnɑ e i buol ni. Yuo nbɑ k i tun tuonn nbɑ k b tul’i nɑ k gbenn, yin yet ɑ: ‹T tie dɑɑbɑ e. T kpɑn tuu tun lin nbɑ k t bo sɑɑ tun nɑ kuukuɑ e.› » Yiesu nbɑ din sɑɑ Selusɑɑlenm yuo nbɑ nɑ, k u din gɑl *Sɑɑmɑɑli nɑn Gɑɑliile sinsuuk ni, k din tɑn bɑɑl digbɑnsiɑl, k gbɑɑtɑ piik din cet’ɔ lenŋ, k din set bɑnfɔkl ɑ, ŋɑɑn yikn sɑnpɑɑpo wɑɑ, k yien ɑ: «Cɑnbɑɑ Yiesu, tin’t ninbɑɑɔk.» K Yiesu nbɑ lɑ’b yuo nbɑ k u yet’b ɑ: «Ii sɑɑ mɑn Yennu mɑnntieb buol ni k bin bikn’i got.» L yuo mɑnŋ k b ŋmɑt sɑɑ, k b ŋɑɑt mɑnŋ ji sɑɑ gbenn sɔnu ni. K b yenɔ nbɑ bɑnn nɑn u ŋɑɑɔk gbenn nɑ, k u ŋmɑt Yiesu penŋ k sɑɑ pɑk Yennu nɑn kunkɔsɑɑkɑl, ŋɑɑn bɑɑl gbɑɑn finfɑbl Yiesu tuɑnn k tul’ɔ niipuouk. Juɑ mɑnŋ din tie Sɑɑmɑɑli nilɔ e. K Yiesu din boi ɑ: «Niib piik kɑɑ bo lɑ pɑɑku uu? Ŋɑɑn k niib bɑn-yiɑ nbɑ tenn nɑ be liɑ? B suɑ k jen ɑ bin tɑn tul Yennu niipuouk sie Sɑɑmɑɑli juɑ nɑ kuukuɑ ee?» Ŋɑnn e k u yet juɑ mɑnŋ ɑ: «Fiit kii sɑɑ. A yɑdɑ nɑ pɑɑk e k ɑ lɑ pɑɑku.» Tɔn, k Fɑɑliisiɑnnbɑ din boi Yiesu ɑ: «Yennu nɑɑn sɑɑ bɑɑl nlee yuo e?» Ŋɑnn e k u din jiin k yet’b ɑ: «Yennu nɑɑn kɑn bɑɑl bɑnnu nbɑ k i sɑɑ fit lɑ’l kɑɑ. Suɑ kɑn yet ɑ: ‹Gotl, ŋɑnn i nɑ,› ɑmi: ‹L be nɑ wɑɑ,› k mɑɑn Yennu nɑɑn be i ni.» Ŋɑnn e k u yet u puolpoweitieb ɑ: «Yuo bɑɑt k i tɑn sii sunmɑn k i lɑ *Nisɑɑlk Bijɑ, ŋɑɑn kɑn lɑ. B tɑn sɑɑ yet’i: ‹Gotl, u be lenŋ,› ɑmi: ‹Gotl, u be nnɑ nɑ.› I dɑɑ sɑɑ goli, k biɑ dɑɑ wɑɑ’b, k mɑɑn Nisɑɑlk Bijɑ bɑɑlu tɑn sii tie nɑn sɑnyiknti nbɑ tuu nyiknt k yent sɑnpɑɑpo kul nɑ e. Ŋɑɑn sinsinn, u tɑn sɑɑ di fɑlɑ bonciɑnn, k mɔtɑɑnɑ nigbounŋ biɑ tɑn sɑɑ yet’ɔ. Noe yuo nbɑ din tie biɑnŋ nbɑ nɑ, l mun biɑ tɑn sii tie nnɑ e Nisɑɑlk Bijɑ bɑɑlu yuo. Noe yuo e k b din di jiet k nyu, k kuɑnt puob, k jikt b wɑɑs k tien’m jɑb, k tɑn tuu dɑɑl nbɑ k Noe din kuɑ ŋɑlngbenŋl ni ŋɑɑn nyik’b, k nyunciɑɔnŋ bɑɑl k dii b kul ɑ. Lɔt yuo nɑ mun biɑ din tie nnɑ e. B din di k nyu, k dɑɑ bonɑ k kɔi bonkukɔit, k buul tɑn, k mɑɑ ŋei, ŋɑɑn dɑɑl nbɑ k Lɔt din tɑn nyii Suodonm, k sɑlwuutɑ nyii sɑnpɑɑpo k tɑn bɑɑ nɑn muu k dii b kul ɑ. K dɑɑl nbɑ k Nisɑɑlk Bijɑ tɑn sɑɑ dɔkt, l mun tɑn sii tie nnɑ e. «L dɑɑl mɑnŋ, juɑ nbɑ be dituɑtuk pɑɑk, u dɑɑ siik k kuɑ u dieok ni ɑ wun sɑɑ jii u bonɑ, k wun nbɑ mun biɑ be kpɑɑb ni, u dɑɑ ŋmɑt lin nbɑ be puolpo nɑ buol. Tiɑtl Lɔt ŋɑɑpuo mɑɑn po mɑn. Tɔn, wun nbɑ k yit u mɔnŋ sɑlk n pɑɑk, u tɑn sɑɑ kɔnŋ u mɑnfuol, ŋɑɑn wun nbɑ yit u mɔnŋ sɑlk n pɑɑk, ŋuɑ e tɑn sɑɑ lɑ mɑnfuol nɑn bɑlmɔni. N yien’i e, yuo nbɑ k n sɑɑ bɑɑl nɑ, niib bɑnle tɑn sii duɑ dunduɑn-yenu pɑɑk, k *mɑlɑkɑɑnbɑ tɑn sɑɑ jii yenɔ ŋɑɑn nyik luɑ. Puob bɑnle tɑn sii be k nɑɑn dii, k b tɑn sɑɑ jii yenɔ ŋɑɑn nyik luɑ. Jɑb bɑnle mun tɑn sii be kpɑɑb ni, k b tɑn sɑɑ jii yenɔ ŋɑɑn nyik luɑ.» K u puolpoweitieb boi’ɔ ɑ: «Yonmdɑɑnɔ, lee?» K u jiin k yet’b ɑ: «Bonkpienn nbɑ be siɑn, lenŋ e k juut tiki.» Yiesu yin Fɑɑliisiɑnnbɑ bɑljouk ɑ wun wɑnn’b nɑn l ŋɑn k bii mei Yennu yuo kul ɑ, ŋɑɑn dɑɑ mɔk kpinkpɑngbɑtuk u, k yet’b ɑ: «Bɑlbuulɔ din be digbɑnsiɑl k din tuu k tiin Yennu k tɑn boi ɑ u bɑɑkt nilɔ. Pɑkuɑk mun biɑ din be duo mɑnŋ ni, k din tuu tun bɑɑt u buol yuo kul k yien’ɔ ɑ: ‹Min nɑn nilɔ mɔk mɑɑn, bun k tul’n.› Ŋɑɑn k u tuu yet. L puolpo k u tɑn dukn dudukt ɑ: ‹N ponŋ tɑɑn k tiin Yennu, k biɑ k bɑɑkt nilɔ, ŋɑɑn pɑkuɑk nɑ dɑɑmiu pɑɑk, n sɑɑ tɑt k bu u mɑɑn mɑnŋ nɑn l sɔnu k tul’ɔ. Nnɑ i kɑɑ u sii bɑɑt e tieee k n tɑn bɑk.› » K Yonmdɑɑnɔ ŋɑnm yet’b ɑ: «Gbiintl bɑlbutounŋ dɑɑnɔ nbɑ piɑk biɑnŋ nbɑ. K Yennu mun ii? U nigɑnnkɑb nbɑ mei’ɔ yennu nɑn nyiɑɔk nɑ, u kɑn bu k tul’b ii? N yien’i e, u sɑɑ bu b buut yiɑn yiɑn. Ŋɑɑn *Nisɑɑlk Bijɑ i bɑɑl yuo nbɑ, u sɑɑ lɑ bin nbɑ mɔk yɑdɑ tingbounŋ nɑ ni wɑɑ ɑɑ?» Ŋɑnn e k Yiesu yin bɑljouk k tul bin nbɑ duki nɑn b tie niŋɑnm, ŋɑɑn sɑlkt b lieb nɑ, ɑ «Jɑb bɑnle din sɑɑn sɑɑ kuɑ Yennu jɑɑnti ŋɑsɑɑkɑk ni ɑ bin miɑl Yennu, k yenɔ din tie Fɑɑliisiɑn, k luɑ mun din tie lɑnpogɑɑltuɑ. K Fɑɑliisiɑn nɑ set k miɑl u mɔnŋ po k yet ɑ: ‹Yennu, n tien’ɑ niipuouk nɑn mɑɑ k tie nɑn nilieb nɑ. N k tie nɑn-yukɔ, k biɑ k tie biitdɑɑnɔ, k mun biɑ k tuun boncuncontuonɑ. Niipuouk nɑn mɑɑ k tie nɑn lɑnpogɑɑltuɑ nɑ nɑ. N loln n mɔb tɑɑl munle dɑɑ ŋɑnlole nuɑk ni, k mɑɑ tuu lɑ lin nbɑ, n biɑ tien’ɑ yenn kuɑ piik nuɑk ni.› K lɑnpogɑɑltuɑ nɑ ŋɑnin din set bɑnfɔkl ɑ, k din k luon wun yɑɑt got sɑnpɑɑpo, ŋɑɑn pɑk yul k yet ɑ: ‹Yennu, tin’n ninbɑɑɔk, k mɑɑn n tie biitdɑɑnɔ e.› » K Yiesu ŋɑnm yet’b ɑ: «N yien’i e, Yennu ponŋ din nyik cɑb juɑ nɑ wɑɑ, ŋɑɑn yet Fɑɑliisiɑn nɑ miɑlu. K mɑɑn wun nbɑ kul dont u mɔnŋ, b tɑn sɑɑ sikn’ɔ, ŋɑɑn wun nbɑ mun siknt u mɔnŋ, b tɑn sɑɑ donn’ɔ.» Tɔn, k nisiɑb din bɑɑt nɑn b wɑɑs Yiesu buol ni, ɑ wun tɑn yɑt yetŋɑnm b pɑɑk, ŋɑɑn k u *puolpoweitieb nbɑ lɑ k b bɑɑt nɑn wɑɑs mɑnŋ nɑ, k b tiɑn b pɑɑk. Ŋɑɑn k Yiesu te k wɑɑs mɑnŋ bɑɑl u buol ni, ŋɑɑn yet u puolpoweitieb nɑ ɑ: «Ŋɑɑnt mɑn k wɑɑs mɑnŋ i bɑɑt n buol nɑ mɑn, k dɑɑ tiɑn’m, k mɑɑn b buolu e yen Yennu nɑɑn. Bɑlmɔni e k n yien’i nɑ, wun nbɑ k gɑɑl Yennu nɑɑn nɑn bik nɑ, u kɑn mi kuɑ l ni fɑb ɑ.» L yuo nɑ k yudɑɑnsuɑ din bɑɑl Yiesu buol ni k tɑn boi’ɔ ɑ: «Wɑntɔŋɑnɔ, n sɑɑ tien nlee k tɑn lɑ mɑnfuol nbɑ kɑɑ gbennu?» K Yiesu ŋmɑt boi’ɔ ɑ: «Bee k ɑ yi’n niŋɑnɔ? Niŋɑnsuɑ kɑɑ sie Yennu kuukuɑ. A ponŋ mi Yennu *senni: Dɑɑ tuun boncuncontuonɑ, dɑɑ kpi, dɑɑ jɑɑn, dɑɑ tie fɑɑk siɑl ɑ, bɑɑkt ɑ bɑɑ nɑn ɑ nɑɑ.» K juɑ mɑnŋ jiin k yet’ɔ ɑ: «N ponŋ sɑk lin nbɑ nɑ kul n bisn ni e wɑɑ.» Yiesu nbɑ gbɑt u jiinu nɑ k u yet’ɔ ɑ: «Bon-yenn kuɑ e pɔt’ɑ, kɔin lin nbɑ kul k ɑ mɔk k jii l likli k tul tɑlɑs-dɑnm, k ɑ tɑn sɑɑ lɑ mɔktuk *Yendɔunŋ ni. L puolpo k ɑ jen ɑ kii wɑɑ’n.» Wɑɑ gbɑt lin nbɑ nɑ k u pɑl ji biil, k mɑɑn u din mɔk mɔktuk bonciɑnn. Yiesu nbɑ bɑnn nɑn u mɔk pɑlbiil nɑ, k u yet ɑ: «L pɑɑl nɑn mɔktɑ n kuɑ Yennu nɑɑn ni. L biɑ pɑɑl nɑn mɔktɔ n kuɑ Yennu nɑɑn ni nɑn yuyouk nbɑ kɑn fit kuɑ kpɑlpienu miɑl ni nɑ.» Niib nbɑ gbɑt wɑɑ piɑk biɑnŋ nbɑ nɑ k b boi’ɔ ɑ: «L i tie nnɑ e i e, ŋmee ji sɑɑ fit k lɑ fielu?» K u yet’b ɑ: «Lin nbɑ k nilɔ kɑn fit tun, ŋɑɑn Yennu sɑɑ fit tun’l ɑ.» K Piɑl yet’ɔ ɑ: «Nnɑlɑ, t din nyik lin nbɑ k t din mɔk nɑ ŋɑɑn wɑɑ’ɑ.» K Yiesu yet’b ɑ: «Bɑlmɔni e k n yien’i, wun nbɑ kul nyik u ŋɑɑk ɑmi u bɑɑ ɑmi u nɑɑ ɑmi u puo ɑmi u wɑɑs ɑmi u yuɑlb ɑmi u wɑɑli Yennu nɑɑn pɑɑk, u biɑ sɑɑ lɑ bonɑ bonciɑnn tingbounŋ nɑ ni, k lin gɑl wɑɑ nyik lin nbɑ nɑ, k yuo nbɑ bɑɑt nɑ, u tɑn sɑɑ lɑ mɑnfuol nbɑ kɑɑ gbennu.» Yiesu yiin u puolpoweitieb k nyii nɑn’m kpinŋ k sɑɑ yet’b ɑ: «Nnɑlɑ, t sɑɑ Selusɑɑlenm e, k lenŋ e k b sɑɑ tien Nisɑɑlk Bijɑ lin nbɑ kul k *Yennu sɔkniinbɑ din diɑn u po biɑnŋ nbɑ nɑ. B tɑn sɑɑ suol’ɔ k tien’ɔ bin nbɑ k tie *Suifnbɑ nuu ni, k b tɑn sɑɑ dɑɑn’ɔ nyɑtuk k suki’ɔ k siin mɔsɑnt u pɑɑk, k biɑ buo’u gbɑnn, k biɑ tɑn kpi’u, ŋɑɑn k dɑɑ ŋɑntɑ dɑɑl k u tɑn sɑɑ fiil kuun ni.» Ŋɑɑn u puolpoweitieb nɑ din k bɑnn mɑɑn nɑ pɑɑk. Siɑl din dɔkn b yɑn ɑ, k b k bɑnn lin nbɑ k u piɑk nɑ pɑɑk. K Yiesu nbɑ din tɑn pel Seliiko nɑ, k juɑnsuɑ din be k kɑl sɑnjokpinŋ k din tuu mei, k tɑn gbɑt k nibulciɑɔnŋ gɑɑl, k u boi ɑ: «Bee tie?» K b yet’ɔ ɑ: «Yiesu nbɑ tie Nɑɑsɑɑlet nilɔ nɑ e gɑɑl.» K u yikn sɑnpɑɑpo wɑɑ ɑ: «Yiesu, * Dɑɑfiid yɑɑbuonn, tin’n ninbɑɑɔk.» K sɔnliitɑ nɑ din tiɑn u pɑɑk ɑ wun ŋmin, ŋɑɑn k u biɑ ŋɑnm yikn sɑnpɑɑpo wɑɑ ɑ: «Dɑɑfiid yɑɑbuonn, tin’n ninbɑɑɔk.» K Yiesu set, ŋɑɑn yet’b ɑ bin dɑt juɑnŋ mɑnŋ k bɑɑl nɑn’ɔ u buol. Wɑɑ din bɑɑl kpiɑn Yiesu yuo nbɑ k Yiesu boi’ɔ ɑ «A luon k n tun bee k tul’ɑ ni?» K u jiin yet’ɔ ɑ: «N Yonmdɑɑnɔ, n luon k ɑ nyuɑnt n ninbinɑ e tul’n.» K Yiesu yet’ɔ ɑ: «Nyuɑntl. A yɑdɑ pɑɑk k ɑ ninbinɑ nɑ lɑ tebuk.» L tɑɑkpɑɑk ni k u ninbinɑ nyuɑnt k u ji lɑɑt, k wɑɑ Yiesu k sɑɑ k dont Yennu sɑnn. Yuo nbɑ k niib nɑ kul lɑ nnɑ mɑnŋ, k b ji piɑk Yennu. L puolpo e k Yiesu din bɑɑl Seliiko k gɑɑl. K jɑsuɑ din be lenŋ mɑnŋ k tie *lɑnpogɑɑltieb yudɑɑnɔ, k u sɑnn din yi Sɑɑse, k u din mɔk mɔktuk bonciɑnn. K u din kol ɑ wun lɑ Yiesu nbɑ tie wun nbɑ, ŋɑɑn k fit lɑ’u. Niib din yɑbt nɑn wun lɑ’u wɑɑ, k mɑɑn u din tie jɑjinjinŋ e. L pɑɑk k u ciɑl k gɑl tuɑnn po k sɑɑ duo tiik nbɑ k b yi siikomɔl nɑ ɑ wun lɑ Yiesu gɑlu, k mɑɑn u yɑɑ wun gɑl lenŋ e. K Yiesu nbɑ tɑn bɑɑl siikomɔl mɑnŋ buol, k u yɑɑt got’ɔ k yet’ɔ ɑ: «Sɑɑse, kɑktl k sik nɑ. Sie k n duɑl ɑ ŋɑɑk ni dinnɑ.» K Sɑɑse din kɑkt k sik yiɑn ɑ k gɑɑl’ɔ nɑn pɑlpienn, k b sɑɑn u ŋɑɑk ni. K niib nbɑ din lɑ lin nbɑ nɑ mɑnŋ, k b ji din buln k yien ɑ: «Juɑ nɑ sɑɑn kuɑ biitdɑɑnɔ ŋɑɑk ni.» K Sɑɑse fiil k set k yet Yonmdɑɑnɔ ɑ: «N Yonmdɑɑnɔ, gotl, n sɑɑ bɔkt n mɔktuk kul k tul tɑlɑs-dɑnm l bonjinn. L i tie k n mi dii suɑ fobt, n sɑɑ jiin’ɔ tɑɑl munnɑ.» K Yiesu yet’ɔ ɑ: «Dinnɑ ŋɑɑk nɑ niib bɑnn nɑn Yennu fiel’b ɑ, k mɑɑn juɑ mɑnŋ mun tie Ablɑɑhɑɑnm yɑɑbuonn e. *Nisɑɑlk Bijɑ bɑɑl ɑ u lon bin nbɑ bot nɑ k lɑ’b ŋɑɑn fiel’b.» Ŋɑnn e k Yiesu yin niib nbɑ gbiintl mɑɑn mɑnŋ nɑ bɑljouk, k mɑɑn wɑɑ pel Selusɑɑlenm nɑ, k b duki ɑ l pɑɑk Yennu nɑɑn yɑɑ lin bɑɑl yiɑn e. K u yet’b ɑ: «Nijɑɑnsuɑ din be k din tɑn nyii k sɑɑn digbɑnn bɑnfɔkl ɑ, ɑ bin sɑɑ din’ɔ nɑɑn, k l puolpo k wun jen kpen ŋɑɑk ni. Wɑɑ dɑɑ din k nyii yuo nbɑ nɑ, k u yiin u tuontunnɑ piik k tul tul’b sɑlmɑ binn binn, k yet’b ɑ: ‹Ii sɑɑ mɑn k sɑɑ kpent kpinkpounŋ nɑn likli mɑnŋ nɑn mɑɑ tɑn sɑɑ jen.› Ŋɑɑn k u duo ni niib nɑ nɑn’ɔ. Wɑɑ sɑɑn yuo nbɑ k b tun *tuomi kpɑnbɑl nɑ buol ni, ɑ b k sɑk ɑ ŋuɑ n tien b kpɑnbɑl. «Tɔn, k nijɑɑnn nɑ sɑɑn sɑɑ set dii nɑɑn mɑnŋ k tɑn jen. Wɑɑ jen yuo nbɑ, k u te k b yiin u tuontunnɑ nbɑ k u dɑɑn tul’b likli nɑ, ɑ wun lɑ nyuɑt nbɑ k b lɑ likli nbɑ k u dɑɑn tul’b nɑ ni. K sinsinn yuɑ nɑ bɑɑl u buol k tɑn yet’ɔ ɑ: ‹Cɑnbɑɑ, sɑlmɑ binn nbɑ k ɑ dɑɑn tul’n nɑ, n kpent kpinkpounŋ k lɑ sɑlmɑ binɑ piik k pukn l pɑɑk.› K u cɑnbɑɑ yet’ɔ ɑ: ‹N fɑɑn, ɑ tie tuontunŋɑnɔ e. Fɑɑ diɑ bonmintk fɑnu biɑnŋ nbɑ nɑ, l pɑɑk, n sɑɑ tul’ɑ doi piik *yudɑnt.› K wun nbɑ mun pɑɑ u pɑɑk nɑ bɑɑl k tɑn yet’ɔ ɑ: ‹Cɑnbɑɑ, sɑlmɑ binn nbɑ k ɑ dɑɑn tul’n nɑ, n kpent kpinkpounŋ k lɑ sɑlmɑ binɑ ŋɑnŋmu e.› K u cɑnbɑɑ yet’ɔ ɑ: ‹N sɑɑ tul’ɑ doi ŋɑnŋmu yudɑnt e.› «K luɑ mun biɑ bɑɑl k tɑn yet’ɔ ɑ: ‹Cɑnbɑɑ, gotl ɑ sɑlmɑ binn nɑ e nɑ. N dɑɑn gbin n ninfiɑnŋ ni e k bɔl, k mɑɑn n dɑɑn tiin’ɑ ɑ tonu nɑ pɑɑk e. A tuu jikt lin nbɑ k ɑ k bil, k biɑ jɑɑn lin nbɑ k ɑ k bul.› K u cɑnbɑɑ yet’ɔ ɑ: ‹Fin tuontun-yuonn nɑ, n sɑɑ jii ɑ mɔnŋ mɔnŋ mɑɑn e k pɑk gbenn ɑ. A ponŋ mi nɑn n tuu tie nitounŋ o, k tuu jikt lin nbɑ k n k bil, k biɑ jɑɑn lin nbɑ k n k bul. Bee tien k ɑ dɑɑn k jii n likli mɑnŋ k kuɑn bɑnŋ ni k nyuɑt n tɑn pɑɑn l pɑɑk i? Mɑɑ bo tɑn jen nɑ, n bo sɑɑ lɑ n likli pɑɑtl ɑ,› k u yet bin nbɑ sie lenŋ nɑ ɑ: ‹Gɑɑt sɑlmɑ binn mɑnŋ u buol ni, k tul wun nbɑ mɔk sɑlmɑ binɑ piik nɑ.› K b yet’ɔ ɑ: ‹Cɑnbɑɑ, u ponŋ mɔk sɑlmɑ binɑ piik.› K u jiin’m ɑ: ‹N yien’i e, wun nbɑ mɔk bonɑ, b sɑɑ pukn’ɔ, ŋɑɑn wun nbɑ kɔnŋ bont, b biɑ sɑɑ tont bonmintk nbɑ k u ponŋ mɔk nɑ. Tɔn, n dɑtɑi nɑ nbɑ k luon k n tien b kpɑnbɑl nɑ, ŋɑnn bɑɑt nɑn’m nnɑ nɑ k tɑn kpi’b n nunm nnɑ.› » Yiesu nbɑ pɑk k gbenn nɑ, k ŋuɑ nɑn u *puolpoweitieb yɑɑ bin do Selusɑɑlenm, k Yiesu gɑl b tuɑnn. K b tɑn pel Betfɑɑje nɑn Betɑɑni doi nbɑ kpiɑ jɑgbɑɑk nbɑ k b yi’l *Oliifienbɑ jɑgbɑɑk nɑ, k Yiesu tun u puolpoweitieb nɑ ni bɑnle, k yet’b ɑ: «Ii sɑɑ digbɑnbik nbɑ be i tuɑnn po nɑ ni. I i sɑi bɑɑl, i sɑɑ lɑ bonsɑl k u lol, k suɑ dɑɑ k mi jɑk’ɔ. Yin lot’ɔ k bɑɑl nɑn’ɔ nɑ, k wun nbɑ i boi’i ɑ: ‹Bee tien k i lot’ɔ?› yin yet’ɔ ɑ: ‹Yonmdɑɑnɔ e luon’ɔ.› » K b sɑɑn lɑ bonn kul nɑn Yiesu nbɑ pɑk’b biɑnŋ nbɑ nɑ. Bɑɑ sɑɑn sɑɑ lot bonŋ mɑnŋ yuo nbɑ k bondɑnm lɑ’b k boi’b ɑ: «Bee k i lot bonŋ mɑnŋ i?» K b jiin yet’b ɑ: «Yonmdɑɑnɔ e luon’ɔ,» ŋɑɑn dɑt bonŋ mɑnŋ k bɑɑl nɑn’ɔ Yiesu buol ni. K u puolpoweitieb jii b cincenɑ nɑn tiɑt k pɑɑn bonŋ nɑ pɑɑk k jɑkn Yiesu. Wɑɑ jɑk bonŋ nɑ yuo nbɑ k nisiɑb jikt b cincenɑ nɑn b tiɑt k lɑt sɔnu ni. Wɑɑ tɑn pel Selusɑɑlenm k u bɑɑl sɔnsinsikl nbɑ nyi Oliifienbɑ jɑgbɑɑk pɑɑk nɑ. Lenŋ e k u puolpoweitieb kul libn piin k dont Yennu sɑnn nɑn pɑlpienn, bɑktnɔunŋ tuonjɑɑnɑ nbɑ kul nbɑ k b lɑ nɑ pɑɑk k b yien ɑ «Yennu yetŋɑnm ii be Kpɑnbɑl nbɑ bɑɑt Yonmdɑɑnɔ sɑnn ni nɑ pɑɑk. Mɑnu i be *Yendɔunŋ ni k yudɑnt i tie Yennu yɑl.» Ŋɑnn e k Fɑɑliisiɑnnbɑ siɑb nbɑ be nibul nɑ ni yet Yiesu, «Wɑntuɑ, yetl ɑ puolpoweitieb nɑ, ɑ bin ŋmin.» K Yiesu jiin yet’b ɑ: «Nnɑlɑ, niib mɑnŋ i ŋmin, ŋɑɑn tɑnɑ nbɑ duɑ sɔnu ni nɑ sii yikn e.» Wɑɑ din pel k tɑn lɑ Selusɑɑlenm k u mɔ duo nɑ pɑɑk, k yet ɑ: «L i bo i tie k ɑ bɑnn mɑnu sɔnu dinnɑ, l bo sii ŋɑn k tul’ɑ. Ŋɑɑn mɔtɑɑnɑ l liil ɑ yɑn, k ɑ kɑn fit bɑnn. Yuo bɑɑt k ɑ dɑtɑi tɑn sɑɑ bɑɑl, k mɑɑ juonjɑl k lint’ɑ ŋɑɑn luon ɑ pɑɑk lokl kul po. B tɑn sɑɑ biil’ɑ cɑin, fin nɑn niib kul. B kɑn nyik k tɑnn pɑɑ liel pɑɑk, k mɑɑn ɑ bo k bɑnn yuo nbɑ k Yennu bɑɑl ɑ buol ni.» L Puol po e k Yiesu din sɑɑn kuɑ Yennu jɑɑnti ŋɑsɑɑkɑk ni, k din sɑɑ bel bin nbɑ kɔi bonɑ, ŋɑɑn yet’b ɑ: «L diɑn Yennu lolkpel kɑdɑɑɔk ni ɑ: ‹N ŋɑɑk sii tie Yenmiɑlu ŋɑɑk e,› ŋɑɑn k yinm e kpint’l k tien’l nɑn-yukb kinkɑl buol.» Tɔn, dɑɑl kul k Yiesu din be Yennu jɑɑnti ŋɑsɑɑkɑk ni, k tumi niib. K Yennu mɑnntieb yudɑnm nɑn *senniwɑntieb nɑn tinŋ mɑnŋ yudɑnm luon bin kpi’u, ŋɑɑn k fit lɑ sɔnu nbɑ k b sɑɑ kpi’u, k mɑɑn niib nɑ kul din cɑɑn b tubɑ k gbiintl u mɑɑn. Dɑsiɑl Yiesu nbɑ din be Yennu jɑɑnti ŋɑsɑɑkɑk ni k tumi niib k biɑ muɑntl lɑbɑmɑnn, k Yennu mɑnntieb yudɑnm nɑn *senniwɑntieb nɑn sɑɑkɑb din bɑɑl u buol k tɑn yet’ɔ ɑ: «Yet’t, ŋmee yiikuo ni e k ɑ tuun lin nbɑ nɑ? Ŋmee cɑb’ɑ yiikuo mɑnŋ i?» K u jiin ɑ: «N mun mɔk buboit k sɑɑ boi’i. Yetl’n mɑn, Sɑn nbɑ din wuul niib Yennu nyunwulu nɑ, Yennu e cɑb’ɔ l yiikuo ɑmi nisɑɑli ee?» K b ŋmɑnt fɑɑ l lɑbɑɑl nɑn b lieb k yien ɑ: «T i yet ɑ Yennu e cɑb’ɔ l yiikuo, u sɑɑ boi’t ɑ bee k t k tien u mɑɑn nɑ yɑdɑ? K t i biɑ kii yet ɑ nisɑɑli e din cɑb’ɔ, niib nɑ kul ɑ sɑɑ jɑɑt’t tɑnɑ wɑɑ, k mɑɑn b tien yɑdɑ nɑn Sɑn din tie *Yennu sɔkni e.» L pɑɑk, k b jiin k yet Yiesu ɑ: «T k mi u yiikuo nbɑ nyii siɑn.» K Yiesu mun yet’b ɑ: «Tɔn, n mun kɑn yet’i bɑnnu nbɑ k n lɑ l yiikuo k tuun lin nbɑ nɑ.» L puolpo k Yiesu yin niib nɑ bɑljouk ɑ: «Jɑsuɑ din wuu tilonti nbɑ k b yi *fiinyɑ nɑ u kpɑɑb ni, ŋɑɑn ji din jii kpɑɑb nɑ k tien kpɑɑlɑ nuu ni ɑ bii goli, ŋɑɑn tɑn yɑɑt sɑɑn siɑl po k sɑɑ wei. K puɑlyuo tɑn bɑɑl k u tun u tuontunnɔ ɑ wun sɑɑn kpɑɑlɑ nɑ buol ni, ɑ bin bɔkt tiluɑnɑ nbɑ tie kpɑdɑɑnɔ yɑl k tul’ɔ. Ŋɑɑn kpɑɑlɑ nɑ sɑɑ buo tuontunnɔ nɑ k jiin’ɔ yɑnn. Ŋɑnn e k u biɑ tun tuontunluɑ, k kpɑɑlɑ nɑ biɑ sɑɑ buo’u k din’ɔ fei k biɑ jiin’ɔ yɑnn. K kpɑdɑɑnɔ mɑnŋ biɑ tun tuontunluɑ, k b sɑɑ tien’ɔ dɑnŋ k jii’u lu’u. Ŋɑnn e k kpɑdɑɑnɔ nɑ yet ɑ: ‹N sɑɑ tien nlee nɑ? Lɑɑ ji be nɑ, n sɑɑ tun n mɔnŋ mɔnŋ bilonkɑk e. Ŋuɑ ŋɑnin, pɑsiɑl b sɑɑ tul’ɔ nibɑɑkl ɑ.› Ŋɑɑn kpɑɑlɑ nɑ nbɑ din tun ninbinn k lɑ u bik nɑ k u bɑɑt nɑ, k b yet b lieb ɑ: ‹Kpɑdɑɑnɔ mɑnŋ fɑdiilɔ e nɑ. Ŋɑɑnt tin kpi’u mɑn, k u fɑɑl mɑnŋ n ji tien t yɑl.› K b suol’ɔ k nyii nɑn’ɔ kpɑɑb nɑ kpinŋ po k sɑɑ kpii’u. «Tɔn, kpɑɑlɑ mɑnŋ nbɑ tien biɑnŋ nbɑ nɑ, kpɑdɑɑnɔ nɑ sɑɑ tien’m nlee? U sɑɑ bɑɑl k kpi’b, ŋɑɑn biɑ jii kpɑɑb mɑnŋ k tul lieb.» Niib mɑnŋ nbɑ gbɑt lin nbɑ nɑ k b yet ɑ: «Yennu n bɔl ŋɑnn.» K Yiesu got’b ŋɑɑn yet’b ɑ: «Lin nbɑ diɑn Yennu lolkpel kɑdɑɑɔk nɑ ni pɑɑk tie bee? ‹Tɑnn nbɑ k tɑnmɑɑlɑ yet’ɔ nɑ, ŋɑnn e set tien ŋɑɑk nɑ pɑnŋ.› «Tɔn, wun nbɑ kul bɑɑ tɑnn mɑnŋ pɑɑk sɑɑ but but e, ŋɑɑn tɑnn mɑnŋ i bɑɑ wun nbɑ pɑɑk, binm, l sɑɑ mɑt mɑt’ɔ e.» K senniwɑntieb nɑn Yennu mɑnntieb yudɑnm bɑnn nɑn Yiesu nbɑ yin bɑljouk nɑ l sɑɑn gɑɑn b pɑɑk e. L pɑɑk, k b ji din kol ɑ bin suol’ɔ l tonton nɑ, ŋɑɑn tiin niib nɑ jɑŋmɑɑni. Senni wɑntieb nɑn Yennu mɑnntieb yudɑnm ji din wɑɑ piki Yiesu, k tun pikiitieb bin nbɑ kpɑnn ɑ b tie mɔmɔnpɑklɑ e, ɑ bin lɑ u mɔbonkpetl nbɑ tie lin nbɑ, k ji fit suol’ɔ k tien’ɔ l tinŋ yudɑɑnɔ nuu ni nɑn u yiikuo ni. K pikiitieb mɑnŋ tɑn bɑɑl boi Yiesu buboit ɑ: «Wɑntuɑ, t mi nɑn fɑɑ yien lin nbɑ k biɑ wɑnt nɑ, l ŋɑn. A biɑ k tie luktn dɑɑnɔ, ŋɑɑn fin e biɑ wɑnt Yennu sɔnu nɑn bɑlmɔni. Tɔn, t *senni cɑb’t nɑn tii pɑ lɑnpo kii tien Luonm tinŋ kpɑnbɑl Sesɑɑl ɑmi t dɑɑ pɑ?» K Yiesu bɑnn b sel nbɑ k b tie nɑ k yet’b ɑ «Wɑnt’n liklib. Tɔn, k ŋmee nɑɑɔnŋ nɑn sɑnn e be liklib nɑ pɑɑk i?» K b jiin ɑ: «Sesɑɑl yɑl e.» K Yiesu yet’b ɑ: «Tɔn, ii yen i pɑ kii tien Sesɑɑl lin nbɑ tie u yɑl, ŋɑɑn mun i pɑ kii tien Yennu lin nbɑ tie Yennu yɑl.» K pikiitieb nɑ lek k lɑ u mɔbonkpetl niib nɑ tuɑnn ni, k l tien’m yɑɑl-lituk nɑn Yiesu jiinu mɑnŋ k b ji ŋmin. K *Sɑɑdiuseɑnbɑ siɑb din bɑɑl Yiesu buol ni. Ŋɑnm e din tuu yɑɑ ɑ niib tɑn kɑn fiil kuun ni, k b boi’ɔ ɑ «Wɑntuɑ, Muois din diɑn senni k yet ɑ: ‹Nilɔ i kuɑn u ŋɑɑpuo k k mɑl wɑɑs ŋɑɑn tɑn kpo, ɑ l ŋɑn k u ninjɑ n fɑɑl pɑkuɑk nɑ k mɑl wɑɑs k tul kpiemɔ nɑ.› Tɔn, jɑb bɑnlole din be k tɑɑ bɑɑ, k sɑɑkuɑ po tɑn kuɑn puo, k k mɑl wɑɑs, ŋɑɑn kpo, k wun nbɑ mun pɑɑ u pɑɑk nɑ fɑɑl puo mɑnŋ, k mun biɑ k mɑl, ŋɑɑn kpo, k wun nbɑ wɑɑ muntɑ ni nɑ mun din fɑɑl puo mɑnŋ k bin nbɑ biɑl nɑ kul ɑ din tɑn fɑɑl puo nɑ ŋɑɑn mun tɑn kpo kpo, k k mɑl wɑɑs mun biɑk. K l juontu k puo mɑnŋ mun biɑ tɑn kpo. K lɑɑ ji be nɑ, kuun fiilu dɑɑl, b ŋmee tɑn sii yen puo mɑnŋ i? K mɑɑn b bɑnlole kul ɑ din kuɑn’ɔ wɑɑ.» K Yiesu jiin yet’b ɑ: «Tingbounŋ nɑ ŋɑɑtieb kuɑnt puob k biɑ ciɑnt b wɑɑs k tien’m jɑb, ŋɑɑn k bin nbɑ ŋɑn nɑn kuun fiilu, k biɑ ŋɑn nɑn bii be *dulnyɑ pɑɑnn ni nɑ, b kii kuɑnt puob, k b biɑ kii ciɑnt b wɑɑs k tien jɑb, k b ji kɑn mi k kpo, k mɑɑn b sii tie nɑn *mɑlɑkɑɑnbɑ nɑ e. B biɑ tie Yennu wɑɑs e k mɑɑn b fiil kuun ni wɑɑ. Tɔn, Muois e mun din ponŋ wɑnn nɑn kpienm tɑn sɑɑ fiil kuun ni. Muois nbɑ din diɑn jɑgotkunkonŋ po nɑ, u din yi Yonmdɑɑnɔ ɑ Ablɑɑhɑɑnm Yennu, nɑn Isɑɑk Yennu, nɑn Sɑɑkɔb Yennu. Ŋɑnn Yennu k tie kpienm Yennu kɑɑ, ŋɑɑn u tie fuotb Yennu e, k mɑɑn b kul tie fuotb e u tuɑnn ni.» Ŋɑnn e k senniwɑntesiɑb yet Yiesu ɑ: «Wɑntuɑ, ɑ jiin bonŋɑnn ɑ.» K b ji din jie nɑn bin boi Yiesu buboisiɑt. Ŋɑnn e k Yiesu boi’b ɑ: «Nlee k b yien ɑ *Klistu tie * Dɑɑfiid yɑɑbuonn i? K mɑɑn Dɑɑfiid mɔnŋ mɔnŋ diɑn *yɑni kɑdɑɑɔk nuɑk ni ɑ: ‹Yonmdɑɑnɔ yet n Yonmdɑɑnɔ ɑ: Kɑln n niidiitu po mɔkmɔk nɑn mɑɑ tɑn sɑɑ jii ɑ dɑtɑi k tien’m ɑ tɑɑkpɑktɑ.› Dɑɑfiid nbɑ din yiin Klistu ɑ: ‹Yonmdɑɑnɔ› nɑ, nlee k Klistu nɑ tie ŋuɑ Dɑɑfiid yɑɑbuonn i?» Niib kul nbɑ gbiintl Yiesu mɑɑn mɑnŋ nɑ, k u yet u *puolpoweitieb ɑ «Suot i mɔnŋ mɑn nɑn senniwɑntieb. Ŋɑnm e luon bii liɑ liɑtbɑɑnt, kii lin kii sonm, k biɑ gɑɑn bulcinfuonti dɑi ni. B i kuɑ *Suifnbɑ jɑɑnti diet ni, b luon bii kɑɑl nijɑɑnɑ kɑɑni pɑɑk e. B i sɑɑn jɑɑnm ni, b biɑ luon yudɑnm kinkɑɑni buɑ. Ŋɑnm e biɑ gɑɑn pɑkɔi nbɑ mɔk lin nbɑ kul, ŋɑɑn ji tuu jen ɑ k mei Yennu k wei ɑ bin kpɑnn ɑ b tie niŋɑnm e. B tubdɑtu tɑn sii bi bonciɑnn.» Ŋɑnn e k Yiesu got lint k lɑ mɔktɑ, k b kpient likli Yennu piini lɑkl ni, k u biɑ lɑ pɑkɔtɑlɑs-dɑɑnɔ k u mun kpien jinjennbɑ ŋɑnle Yennu piini lɑkl nɑ ni. K Yiesu yet ɑ: «Bɑlmɔni e k n yien’i, pɑkɔtɑlɑs-dɑɑnɔ nɑ kpien k gɑl suɑ kul ɑ, k mɑɑn b kul pɑɑt b likciɑnt nɑ ni e, ŋɑɑn pɑkɔtɑlɑs-dɑɑnɔ nɑ kpɑn jii lin nbɑ k u yɑɑ wun di nɑ e k kpien.» Ŋɑnn e k siɑb din piɑk Yennu jɑɑnti ŋɑsɑɑkɑk po, k yien bɑɑ te k l fɑn nɑn tɑnŋɑnɑ nɑn Yennu piini k l ŋɑn biɑnŋ nbɑ. Ŋɑɑn k Yiesu yet’b ɑ «Yɑɑ lɑɑt lin nbɑ nɑ kul ɑ nɑ, ŋɑɑn yuo bɑɑt k b tɑn sɑɑ tut l kul ɑ k lu tinŋ ni, k l tɑn-yenn kuɑ tɑn kɑn tenn k tuɑ liel pɑɑk.» Ŋɑnn e k Yiesu *puolpoweitieb boi’ɔ ɑ: «Wɑntuɑ, biɑ yuo e k lin nbɑ nɑ tɑn sii tie e? K l nyinn biɑ tɑn sii tie nlee, lɑɑ tɑn sii yɑɑ lin tien i?» K u jiin k yet’b ɑ: «Ii mi mɑn k bin tɑn kpɑnn’i. K mɑɑn niib bonciɑnn tɑn sɑɑ bɑɑl n sɑnn ni k yien ɑ: ‹Min e tie *Klistu,› ɑmi: ‹Yuo bɑɑl ɑ.› I dɑɑ wɑɑ l nibuolu. I sɑɑ gbɑt tɑb nɑn kunkɔnɑ po, ŋɑɑn i dɑɑ te k l mɔk’i jɑŋmɑɑni, k mɑɑn l kpɑɑ tɑlɑs nɑn lin nbɑ nɑ kul n tun sinsinn dɑɑnn ɑ, ŋɑɑn l k tie k *dulnyɑ gbennu sɑɑ bɑɑl l tonton nɑ kɑɑ.» K u ŋɑnm yet’b ɑ: «Nibuolu nɑn nibuolu tɑn sɑɑ kɔn nɑn lieb, k kpɑnbɑl nɑn kpɑnbɑl mun tɑn sɑɑ tuok k kɔn nɑn lieb. Tinŋ jijekjɑɑnɑ nɑn kon nɑn nikuuk tɑn sɑɑ bɑɑ tingbounŋ lokl kul po buol buol, k niib biɑ tɑn sii lɑɑt lin nbɑ sii mɔk’b jɑŋmɑɑni nɑn nyinsɑɑkɑlɑ nbɑ nyi sɑnpɑɑpo. Ŋɑɑn nɑn lin nbɑ nɑ kul n tɑn tien, b tɑn sɑɑ suol’i k muks’i, k kubn’i *Suifnbɑ jɑɑnti diet yudɑnm nii ni, k kuɑn’i dɑnsɑli, k b tɑn sɑɑ sɑɑn nɑn’i kpɑnbɑlɑ nɑn tinŋ yudɑnm buol ni k bin bu i buut, k mɑɑn yɑɑ wɑɑ’n nɑ pɑɑk. K ŋɑnn e tɑn sɑɑ te k i lɑ yɑɑk k lin tien *siɑlɑ k jiin n po. L pɑɑk, i tɑn suol i mɔnŋ mɑn k dɑɑ te k l dɑɑmi’i nɑn yɑɑ sɑɑ pɑk jiin biɑnŋ nbɑ l yuo, k mɑɑn l yuo nɑ, n tɑn sɑɑ tul’i yɑn nɑn mɔbonɑ nbɑ k i tɑn sɑɑ pɑk, k i dɑtɑi kɑn fit nyɑnn i mɔbonɑ ɑmi k noi’i ni. I cɑnbɑɑnbɑ nɑn i nɑɑnbɑ, nɑn i ninjɑnm, nɑn i dɑnm, nɑn i yuɑsnbɑ mɔnŋ tɑn sɑɑ kuɑt’i, k b tɑn sɑɑ kpi i siɑb. K suɑ kul tɑn sii nɑn’i, k mɑɑn yɑɑ wɑɑ’n nɑ pɑɑk. Ŋɑɑn i yul yut nɑn yenn kɑn bɑɑ yɑnn gbɑɑ. Ii diɑ mɑn fɑnu mɑn, k i tɑn sɑɑ lɑ mɑnfuol nbɑ kɑɑ gbennu. «Yuo nbɑ k i tɑn lɑ sejenm k b lint Selusɑɑlenm, yin bɑnn nɑn l yɑɑ lin biil e nɑ. L yuo mɑnŋ, bin nbɑ tɑn be Suude tinŋ ni, bin ciɑl k do juɑt, k bin nbɑ mun be Selusɑɑlenm, bin nyi duo mɑnŋ ni, k bin nbɑ mun be digbɑnkpini nɑ ji dɑɑ bɑɑt duo mɑnŋ ni, k mɑɑn l yuo nɑ tɑn sii tie yuo nbɑ k Yennu sɑɑ dɑt niib tubɑ. Lin nbɑ nɑ kul tɑn sɑɑ tien nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ e. L yuo mɑnŋ, l tɑn sii bi k tien podɑnm nɑn bin nbɑ diɑ wɑlɑi, k mɑɑn fɑlɑ bonciɑnn tɑn sɑɑ bɑɑl tinŋ nɑ pɑɑk, k Yennu wutuol tɑn sɑɑ do niib mɑnŋ pɑɑk. K sejenm tɑn sɑɑ bɑɑl k kpi niib bonciɑnn nɑn juk-bɑnjɑi, k biɑ tɑn sɑɑ suol bonciɑnn k sɑɑn nɑn’m tini kul po, k tien’m dɑɑbɑ. K bin nbɑ k tie Suifnbɑ tɑn sii cibt lin Selusɑɑlenm mɔkmɔk nɑn b yuo nbɑ tɑn sɑɑ gbenn. «K nyinɑ tɑn sii be yennu ni nɑn ŋmɑɑlk ni nɑn ŋmɑɑbilɑ ni. K tingbounŋ ni, pɑlbiil tɑn sɑɑ bɑɑl tini ni, k yɑnputuk biɑ tɑn sii be, k mɑɑn mɔkgbenŋl nyunpɑnɑ nbɑ tɑn sii fu bonciɑnn nɑ pɑɑk. Jɑŋmɑɑni tɑn sɑɑ jek niib, bɑɑ sii guu lin nbɑ yɑɑ lin tɑn bɑɑl tingbounŋ ni nɑ, k mɑɑn lin nbɑ be sɑnpɑɑpo kul ɑ nbɑ tɑn sɑɑ dɑnm k ŋmɑt nɑ. L yuo k b tɑn sɑɑ lɑ k *Nisɑɑlk Bijɑ dɔktl bɑɑt sɑnpɑgbounŋ ni nɑn pɑnŋ bonciɑnn nɑn yentsɑɑkɑl. Yuo nbɑ k lin nbɑ nɑ kul tɑn sɑɑ piin tienu, yin ŋɑnm set fɑnu k donn yulɑ k mɑɑn yuo nbɑ k Yennu sɑɑ fiel’i nɑ ŋmɑn bɑɑl ɑ.» Ŋɑnn e k Yiesu yin’m bɑljouk ɑ: «Gotl fiigie nɑn tiini kul. Yɑɑ tuu lɑ k tiini mɑnŋ fɑɑt bintl, i ji tuu bɑnn nɑn siɑɔk pel nɑ. Nnɑ e mun biɑk, yuo nbɑ k i tɑn lɑɑt k lin nbɑ nɑ nbɑ kul tuun, yin bɑnn nɑn Yennu nɑɑn pel ɑ. Bɑlmɔni e k n yien’i nɑ, mɔtɑɑnɑ nigbounŋ nɑ kɑn kpo k gbenn kɑɑ wɑɑ k lin nbɑ nɑ kul n tun. Sɑnpɑɑk nɑn tinŋ tɑn sɑɑ gɑl ɑ, ŋɑɑn n mɑɑn ŋɑnin kɑn mi k gɑl fɑb ɑ. «Ii mi mɑn, k dɑɑ kpɑkint jɑɑnm-nbɑ dinu ni, nɑn dɑnyunu ni, k dɑɑ te k i binbenŋ pɑɑk dɑɑmi’i ni. Nnɑ i kɑɑ dɑɑl nbɑ k Nisɑɑlk Bijɑ tɑn sɑɑ bu niib buut nɑ tɑn sɑɑ bɑɑl k i k mi. Dɑɑl mɑnŋ tɑn sɑɑ nyɑk niib kul ɑ nbɑ be tingbounŋ nɑ ni k suol’b nɑn tɑnbɑl nɑ e. Ii guu mɑn kii mei Yennu yuo kul, ɑ yii mɔk pɑnŋ nbɑ sɑɑ te k i nyinn i mɔnŋ fɑlɑ kul nbɑ tɑn sɑɑ bɑɑl nɑ ni, k i biɑ sɑɑ fit set Nisɑɑlk Bijɑ tuɑnn.» Tɔn, yennu ni k Yiesu din be Yennu jɑɑnti ŋɑsɑɑkɑk ni k tumi niib, k din tuu tɑn sɑɑn nyiɑɔk k sɑɑ be jɑgbɑɑk nbɑ k b yi’l *Oliifienbɑ jɑgbɑɑk nɑ pɑɑk. K sɑn-nyɑpob ni k niib kul din tuu bɑɑt u buol Yennu jɑɑnti ŋɑsɑɑkɑk ni k tɑn gbiintl u mɑɑn. Yuo nbɑ din tɑn pel nɑn bin tikl k di jɑɑnm, k ŋmɑn pɑɑnu nbɑ kɑɑ * dɑtinŋ nɑ, k b din yi jɑɑnm mɑnŋ *yuktgɑltiɑlu jɑɑnm, k Yennu mɑnntieb yudɑnm nɑn *senniwɑntieb din kol ɑ bin lɑ sɔnu nbɑ k b sɑɑ kpi Yiesu, ŋɑɑn b din tiin niib nɑ jɑŋmɑɑni. L yuo nɑ k *Sɑɑtɑn kuɑ Suudɑ ni, wun nbɑ k b din yi’u Iskɑɑliɑɔt k u biɑ din tie Yiesu tuomiinbɑ *piik nɑn bɑnle nɑ ni yenɔ. K ŋuɑ Suudɑ din sɑɑn k sɑɑ pɑk nɑn Yennu mɑnntieb yudɑnm nɑn Yennu jɑɑnti ŋɑsɑɑkɑk sejenm yudɑnm biɑnŋ nbɑ k u sɑɑ fit k kuɑt Yiesu k bin suol’ɔ. K b ji din mɔk pɑlpienn k gɑɑl ɑ b sɑɑ pɑ Suudɑ likli. K u sɑk b lol mɑnŋ k ji piin luon sɔnu nbɑ k u sɑɑ jii Yiesu k kubn’ɔ b nuu ni yuo nbɑ k niib nɑ ji kɑɑ nɑ. Pɑɑnu nbɑ kɑɑ dɑtinŋ nɑ jɑɑnm dɑɑl nbɑ k b yɑɑ bin kpi pebis k tien *yuktgɑltiɑlu jɑɑnm jiet nɑ, k Yiesu tun Piɑl nɑn Sɑn duo nɑ ni k yet’b ɑ: «Ii sɑɑ mɑn k sɑɑ tien *yuktgɑltiɑlu jiet nɑ siil k tul’t k tin di.» K b boi’ɔ ɑ: «Lee k ɑ luon k tin sɑɑn tien siil i?» K u yet’b ɑ: «Nnɑlɑ, yuo nbɑ k i bɑɑt duo nɑ ni, i sɑɑ cet jɑsuɑ k u jii nyunsuɑl. Ii wɑɑ’u nɑn ŋɑɑk nbɑ k u sɑɑ kuɑ, k yin yet ŋɑɑdɑɑnɔ ɑ: ‹Wɑntuɑ nɑ yɑɑ ɑ t boi’ɑ ɑ dieok nbɑ k ŋuɑ nɑn u *puolpoweitieb yɑɑ bin kuɑ di *yuktgɑltiɑlu jɑɑnm jiet nɑ be lee?› K u sɑɑ wɑnn’i dituɑtuk nbɑ yɑb k ponŋ tien siil, k yin tien jiet mɑnŋ lenŋ.» K b din sɑɑn k set sɑɑ lɑ bonn kul nɑn Yiesu nbɑ yet’b biɑnŋ nbɑ nɑ, k b ji din tien jɑɑnm mɑnŋ jiet siil. Jɑɑnm jiet dinu nɑ yuo nbɑ tɑn bɑɑl, k Yiesu kɑl ɑ wun di, k u tuomiinbɑ nɑ mun kɑl ɑ bin di nɑn’ɔ. K u yet’b ɑ: «L mɑntk wɑnt n pɑl ni nɑn min nɑn yinm n lɑkn di *yuktgɑltiɑlu jɑɑnm dinu dɑɑnn e wɑɑ k fɑlɑ n ji tɑn bɑɑl’n. N yien’i e, n ji kɑn mi k di jɑɑnm nɑ mɔkmɔk nɑn yuo nbɑ k bɑlmɔni jɑɑnm nɑ tɑn sɑɑ tien Yennu nɑɑn ni.» Ŋɑnn e k u jii *kɔp nɑn dɑmunŋ, k tul Yennu niipuouk l pɑɑk, ŋɑɑn yet’b ɑ: «Gɑɑt nɑ mɑn k cent i lieb k nyu. N yien’i e nɑn lɑɑ jii dinnɑ k sɑɑ, n ji kɑn mi nyu dɑmunŋ nɑ, sie k Yennu nɑɑn tɑn bɑɑl.» Ŋɑnn e k u jii pɑɑnu k tul Yennu niipuouk l pɑɑk, k ŋmit ŋmit k tul’b ŋɑɑn yet’b ɑ: «Nɑ e tie n gbɑnɑnt, k n yɑɑ n jii’l k tul’i. Ii tun kii ŋmɑn mɑn kii tiɑn n po.» K dinu nɑ puolpo e k u biɑ jii kɔp nɑ nɑn dɑmunŋ, ŋɑɑn yet’b ɑ: «Dɑmunŋ nɑ tie Yennu *lol pɑɑnn nbɑ lol nɑn n sɔn, k l muɑn i pɑɑk. «Gotl mɑn wun nbɑ yɑɑ wun kuɑt’n nɑ, ŋuɑ e kɑl k di nɑn’n nɑ. *Nisɑɑlk Bijɑ set yɑɑ wun kpo nɑn Yennu nbɑ senn biɑnŋ nbɑ nɑ e, ŋɑɑn l sii bi k tul wun nbɑ yɑɑ wun kuɑt’ɔ nɑ pɑɑk.» K b ji din piin k boi b lieb k yien ɑ: «T ŋmɑ po e yɑɑ wun tun lin nbɑ nɑ?» L yuo k mɔniɑɔk bɑɑl u puolpoweitieb mɑnŋ sinsuuk ni, k b din noi k yien ɑ lɑnm e cie lieb. K Yiesu yet’b ɑ: «Tingbounŋ nɑ ŋɑɑtieb kpɑnbɑlɑ diɑ b niib nɑn ninmɔnn, k b yudɑnm yi b mɔnŋ ‹b sonmtieb,› ŋɑɑn yinm ŋɑnin, l k tie nnɑ. Wun nbɑ tie nijɑɑnn i ni, sie k u tien nɑn bik nɑ, k yudɑɑnɔ mun n tien nɑn tuontunnɔ nɑ. Tɔn, ŋmee tie nijɑɑnn k gɑl u luɑ, wun nbɑ di jiet, ɑmi wun nbɑ tien e? L k tie wun nbɑ di nɑ kɑɑ ɑɑ? Ŋɑɑn min ŋɑnin be i sinsuuk ni nɑn tuontunnɔ nɑ e. «Yinm ponŋ tun be nɑn’n n jinjɑnmi ni yuo kul. N Bɑɑ nbɑ din’n nɑɑn biɑnŋ nbɑ nɑ, nnɑ e mun k n yɑɑ n din’i nɑɑn, k yin di k nyu nɑn’n n nɑɑn ni, k i tɑn sɑɑ kɑl nɑɑngbɑnt pɑɑk k bu Islɑɑeltieb buolu piik nɑn bɑnle nɑ buut.» «Siimɔn, Siimɔn, gbiintl, Sɑɑtɑn bɑln ɑ wun lɑ yiikuo nbɑ k u sɑɑ bikn i kul k len’i nɑn dii nbɑ k b tuu lenn founŋ nɑ. Ŋɑɑn fin Siimɔn, min e miɑl Yennu ɑ pɑɑk k ɑ yɑdɑ dɑɑ bɑɑ, k yuo nbɑ k ɑ ji jen n buol ni, ɑ tot ɑ nɑɑ wɑɑs.» K Piɑl jiin yet’ɔ ɑ: «N Yonmdɑɑnɔ, l i tie dɑnsɑlk ɑmi kuun i e, n tien siil ɑ, nɑn min nɑn fin n sɑɑn.» K Yiesu din jiin k yet’ɔ ɑ: «Piɑl, n yien’ɑ e, kojouk dɑɑ tɑn kɑn bui dinnɑ sinsinn dɑɑnn i k ɑ tɑn sɑɑ noi tɑɑl muntɑ ɑ ɑ k mi’n.» Ŋɑnn e k Yiesu boi’b ɑ: «Mɑɑ din tun’i doi ni nɑ k i din k diɑ likbuɑli nɑn pɑkɑ nɑn tɑɑsɑliɑ nɑ, i din kɔnŋ siɑl ii?» K b jiin yet’ɔ ɑ: «Aɑi.» K Yiesu yet’b ɑ: «Mɔtɑɑnɑ jik lɑɑ, wun nbɑ mɔk likbuɑlk ɑmi pɑkl, wun jii’l, k wun nbɑ mun k mɔk juk-bɑnjiɑk, wun kɔi u liɑtfuouk k dɑɑ. Min e yien’i nɑ, l tie k lin nbɑ diɑn Yennu lolkpel kɑdɑɑɔk ni nɑ n tɑn tien mɔni n ni ɑ: ‹B jii’u k pukn’ɔ biitdɑnm kɑnn ni.› Setk nɑn mɔni, lin nbɑ k b din diɑn k jiin n po yɑɑ lin bɑɑl n pɑɑk.» K b din yet’ɔ ɑ: «Yonmdɑɑnɔ, gotl, juk-bɑnjɑi ŋɑnle nɑ.» K u yet’b ɑ: «L jɑnŋ ɑ.» Yiesu din nyii lenŋ k sɑɑn *Oliifienbɑ jɑgbɑɑk pɑɑk, nɑn wɑɑ ponŋ tuu tie biɑnŋ nbɑ nɑ, k u puolpoweitieb wɑɑ’u sɑɑ. Wɑɑ sɑɑ bɑɑl lenŋ k u yet’b ɑ: «Ii mei Yennu mɑn k i tɑn dɑɑ kuɑ jinjɑnmi ni.» Ŋɑnn e k u cɑt b buol ni k sɑɑn wɑɑnm-nnɑ, k sɑɑ gbɑɑn tinŋ ni k miɑl Yennu, k yet ɑ: «N Bɑɑ, l i tie ɑ lonm, dɑɑ ŋɑɑnt k n kuɑ bonbiil nbɑ bɑɑt n pɑɑk nɑ ni, ŋɑɑn ŋɑɑnt k ɑ lonm o n tun, k l dɑɑ tie n lonm kɑɑ.» K *mɑlɑkɑ nyii sɑnpɑɑpo k tɑn dɔkt u pɑɑk k tot’ɔ. U din dii fɑlɑ bonciɑnn k miɑl Yennu nɑn u pɑnŋ kul, k nɑɑɔk tɑn pu u pɑɑk k tɑn tuot nɑɑn nɑn sɔn nɑ. K u tɑn fiil Yenmiɑlu ni k ŋmɑt u puolpoweitieb nɑ buol, k sɑɑ lɑ k b guɑnt, k mɑɑn pɑlbiil nbɑ din be b pɑlɑ ni nɑ pɑɑk. K u boi’b ɑ: «Bee tien k i guɑnt i? Fiit kii mei Yennu mɑn k i tɑn dɑɑ kuɑ jinjɑnmi ni.» Yiesu nbɑ din dɑɑ piɑk nɑn u puolpoweitieb nɑ, k nibul dɔkt. K Suudɑ, wun nbɑ tie u tuomiinbɑ piik nɑn bɑnle nɑ ni yenɔ, gɑl b tuɑnn, k tɑn bɑɑl Yiesu buol ni ɑ wun muɑt u tɑnkpinn. Ŋɑɑn k Yiesu boi’ɔ ɑ: «Suudɑ, ɑ muɑtl n tɑnkpinn ɑ ɑ kuɑt Nisɑɑlk Bijɑ ee?» L yuo nɑ k u puolpoweitieb nɑ lɑ lin nbɑ yɑɑ lin tien nɑ, k b boi Yiesu ɑ: «Yonmdɑɑnɔ, t kɔn nɑn’m nɑn juk-bɑnjɑi ii?» K b yenɔ tɑɑn kɑkt cuɑ Yennu mɑnntieb yudɑɑnɔ tuontunnɔ niidiitu tubl k pot. K Yiesu yet’b ɑ: «Nyikn mɑn,» ŋɑɑn sii juɑ nɑ tubl mɑnŋ k l lɑ lɑɑfiɑ. Ŋɑnn e k Yiesu boi Yennu mɑnntieb yudɑnm nɑn Yennu jɑɑnti ŋɑsɑɑkɑk sejenm yudɑnm nɑn sɑɑkɑb nbɑ bɑɑl ɑ bin suol’ɔ nɑ ɑ: «N tie fɑt-tuɑ e k i bɑɑl nɑn juk-bɑnjɑi nɑn gbɑjɑlɑ ɑɑ? N ponŋ tuu tun be nɑn’i dɑɑl kul Yennu jɑɑnti ŋɑsɑɑkɑk ni, ŋɑɑn k i k so’n. Tɔn, ŋɑɑn yuo nɑ lek tie i yɑl e, nɑn bunbɔnn yiikuo yɑl.» L yuo nɑ k b ji din suol Yiesu k sɑɑn nɑn’ɔ Yennu mɑnntieb yudɑɑnɔ ŋɑɑk ni, k Piɑl ji sɑɑ wɑɑ u puolpo bɑnfɔkl ɑ. Ŋɑɑk mɑnŋ ni, niib din juo muu dundonsinsuuk ni k kɑl lint ɑ, k Piɑl tɑn kuɑ k kɑl pukn’m. Wɑɑ kɑl kpiɑ muu nɑ, k tuontunbipuoyenɔ lɑ’u k got’ɔ silll, k yet ɑ: «Juɑ nɑ tuu be nɑn’ɔ.» K Piɑl noi ɑ: «Puo, n k mi’u.» Lɑɑ yɑnn wɑɑnm-nnɑ, k jɑsuɑ mun lɑ’u k yet’ɔ ɑ: «Fin, ɑ mun tie u puolpoweitieb yenɔ e.» K Piɑl yet’ɔ ɑ: «Juɑ nɑ, kɑi, l k tie min kɑɑ.» Lɑɑ biɑ yɑnn wɑɑnm-nnɑ, k jɑluɑ nnɑ mun biɑ yet ɑ: «Yɑunwɑ, bɑlmɔni e, juɑ nɑ tuu be nɑn’ɔ k mɑɑn u mun biɑ tie Gɑɑliile nilɔ e.» K Piɑl jiin yet’ɔ ɑ: «Juɑ nɑ, min tɑɑn k mi lin nbɑ k ɑ yien nɑ kɑɑ wɑɑ.» Wɑɑ dɑɑ piɑk nɑ e k kojouk fɑn bui l tonton nɑ. K Yonmdɑɑnɔ jiɑnt got lɑ Piɑl, k Piɑl ji tiɑl ŋuɑ Yiesu mɔbonɑ nɑ po, wɑɑ yet biɑnŋ nbɑ ɑ: «Kojouk dɑɑ tɑn kɑn bui dinnɑ sinsinn dɑɑnn i k ɑ tɑn sɑɑ noi tɑɑl muntɑ e ɑ ɑ k mi’n.» K Piɑl ji nyii k bui bonbiil. L puolpo e k bin nbɑ guu Yiesu nɑ dɑɑn’ɔ nyɑtuk k buo’u, ŋɑɑn jii cincenn k bobn u nunm po ŋɑɑn boi’ɔ ɑ: «Buntl wun nbɑ fɑɑ’ɑ nɑ.» K b biɑ pɑk k biil u sɑnn bonciɑnn k suki’ɔ. Lɑɑ yent sɑn-nyiɑɔk ni k *Suifnbɑ sɑɑkɑb nɑn Yennu mɑnntieb yudɑnm nɑn senniwɑntieb din tɑɑn kɑl b yudɑnm tituk kɑɑnu, k te k b bɑɑl nɑn Yiesu. K b yet’ɔ ɑ: «Fin i e set kii tie *Klistu, fɑn yet’t.» K u jiin k yet’b ɑ: «Mi i yet’i, ŋɑɑn i ponŋ tɑn kɑn tien’n yɑdɑ gbɑɑ, k mi i mun i biɑ kii boi’i buboit, i kɑn sɑk jiin’n buboit mɑnŋ. Ŋɑɑn lɑɑ nyii mɔtɑɑnɑ k jii sɑɑ Nisɑɑlk Bijɑ tɑn sii kɑl Yɑbnt Yennu niidiitu po.» K b kul ɑ boi’ɔ ɑ: «K ŋɑnn fin e tie Yennu Bijɑ ɑɑ?» K u jiin k yet’b ɑ: «Nɑn yɑɑ kpɑn yɑɑ nɑ.» K b yet b lieb ɑ: «T ponŋ ji luon siɑlɑɑdɑnm biɑ po e nɑ? T ponŋ gbɑt u mɔnŋ mɑɑn ɑ.» Ŋɑnn e k niib nɑ kul ɑ din fiil jii Yiesu k sɑɑn nɑn’ɔ Piilɑɑt buol. Lenŋ e k b ji din piin k wɑnt u biit k yien ɑ: «T lɑ nilɔ nɑ k u biil t niib k yɑɑ ɑ b dɑɑ pɑ lɑnpo k tien kpɑnbɑl Sesɑɑl, k biɑ yien ɑ ŋuɑ e tie *Klistu k biɑ tie Kpɑnbɑl.» K Piilɑɑt boi’ɔ ɑ: «Fin e tie *Suifnbɑ kpɑnbɑl nɑ ɑɑ?» K u jiin k yet ɑ: «Fin e yɑɑ.» K Piilɑɑt yet Yennu mɑnntieb yudɑnm nɑn nibul nɑ: «N k lɑ juɑ nɑ biit.» K niib nɑ din yien nɑn ninmɔnn ɑ: «U tumiiu nɑ pilnt niib cenɑ. U din piin k wɑnt Gɑɑliile niib k tɑn sɑɑn Suude doi ni kul ɑ nɑn wɑɑ tɑn bɑɑl nnɑ nɑ.» Piilɑɑt nbɑ gbɑt nnɑ nɑ k u boi’b ɑ: «Juɑ nɑ tie Gɑɑliile nilɔ ee?» Wɑɑ bɑnn nɑn Yiesu nyii Gɑɑliile tinŋ nbɑ k kpɑnbɑl Heluod yen nɑ, k u ŋɑɑn k b sɑɑn nɑn’ɔ Heluod buol, k mɑɑn ŋuɑ Heluod mun din be Selusɑɑlenm l yuo. K Heluod ponŋ din tuu gbiɑ Yiesu po, k luon wun lɑ’u k l wei wɑɑ. Wɑɑ din tɑn lɑ Yiesu yuo nbɑ k u ji mɔk pɑlpienn bonciɑnn, k luon Yiesu n tun bɑktnɔunŋ tuonn k wun lɑ. U boi Yiesu buboit bonciɑnn, ŋɑɑn k u k jiin’ɔ siɑl. K Yennu mɑnntieb yudɑnm nɑn *senniwɑntieb mun din sie lenŋ k piɑk nɑn pɑnŋ k wɑnt Yiesu biit. K Heluod nɑn u sejenm ji din sɑlkt Yiesu k dɑɑn’ɔ nyɑtuk, k gbɑbn’ɔ cincenŋɑnn k jiin’ɔ Piilɑɑt buol. L dɑɑl mɑnŋ k Piilɑɑt nɑn Heluod suol lieb yuɑs, k mɑɑn b din tuu tie dɑtɑi e sinsinn tuuk. K Piilɑɑt din yiin Yennu mɑnntieb yudɑnm nɑn Suifnbɑ yudɑnm nɑn nilieb k tɑn yet’b ɑ: «I bɑɑl nɑn nilɔ nɑ k yɑɑ ɑ u kpɑnn niib e. Gotl, n bu u buut i nunm nnɑ, k k lɑ u biit nbɑ tie lin nbɑ k i yɑɑ ɑ u tun mɑnŋ. Heluod mun biɑ k lɑ u biit. L pɑɑk te k u jiint’ɔ k tien’t nɑ. Gotl, juɑ nɑ k tun bisiɑt nbɑ k l jɑnŋ nɑn kuun. Ŋɑnn i e, n sɑɑ buo’u gbɑnn, ŋɑɑn ŋɑɑ’u k wun sɑɑn.» [K binn kul *yuktgɑltiɑlu jɑɑnm yuo nɑ, Piilɑɑt din tuu nyinn dɑnsɑlyenɔ e k ŋɑɑ’u.] K nibul nɑ din tiɑn sɑnpɑɑpo k yien ɑ: «Kpin juɑ nɑ. Nyint Bɑɑlɑɑbɑɑs yɑnn k tul’t.» (B din kuɑn Bɑɑlɑɑbɑɑs dɑnsɑlk ni k mɑɑn b din bɑɑl nɑn kpikpiluk duo ni, k u kpii nilɔ.) Ŋɑnn e k Piilɑɑt nbɑ din luon wun ŋɑɑ Yiesu nɑ, k u biɑ ŋɑnm k pɑk nɑn nibul nɑ, ŋɑɑn k niib nɑ mun biɑ tiɑn sɑnpɑɑpo k jiint Piilɑɑt ɑ: «Kpɑɑn’mɔ dɑpunpunn pɑɑk. Kpɑɑn’mɔ dɑpunpunn pɑɑk.» K Piilɑɑt boi’b tɑɑl muntɑ ni: «Bee pɑɑk e? U biit mɑntk tie lɑnn po e? N k lɑ lin nbɑ k u tun i k l jɑnŋ nɑn kukpinu. Ŋɑnn ŋɑnin, n sɑɑ buo’u gbɑnn e, ŋɑɑn ŋɑɑ’u k wun sɑɑn.» Ŋɑɑn k niib nɑ biɑ lek tiɑn tintiɑni ɑ wun kpɑɑ Yiesu k tɑbn’ɔ dɑpunpunn pɑɑk, k b tintiɑni mɑnŋ tɑn nyɑnn Piilɑɑt yɑl. K Piilɑɑt ji cɑb’b bɑɑ luon biɑnŋ nbɑ ɑ lin tien nnɑ, k u nyinn juɑ nbɑ k b luon wun nyinn’ɔ nɑ, wun nbɑ k b din kuɑn’ɔ dɑnsɑlk k mɑɑn kpikpiluk din bɑɑl duo ni k u kpii nilɔ, k u cɑb’b Yiesu nɑn bɑɑ luon biɑnŋ nbɑ lin tien mɑnŋ. L yuo nɑ k sejenm jii Yiesu k sɑɑn nɑn’ɔ, k sɑɑ tuok jɑsuɑ k u sɑnn yi Siimɔn, wun nbɑ din tie Siilenn juɑ, k u nyii kpɑɑnt ni, k b suol’ɔ k jii Yiesu dɑpunpunn nɑ k bukn’ɔ k u wɑɑ Yiesu puol. K nibulciɑɔnŋ din wɑɑ Yiesu k b tɔk sɑɑ. B ni mɑnŋ puosiɑb din wɑɑ k bui k fɑbn u pɑɑk. K Yiesu din tɑn jiɑnt b pɑɑk k yet’b ɑ: «Selusɑɑlenm puob, i dɑɑ bui n pɑɑk, ŋɑɑn kii bui mɑn i mɔnŋ pɑɑk nɑn i wɑɑs pɑɑk. K mɑɑn, yuo bɑɑt k niib tɑn sii yien ɑ: ‹Puokɑnmɑtɑ, bin nbɑ k mɑl wɑɑs k muɑn’m biil, ŋɑnm e mɔk pɑlpienn.› L yuo mɑnŋ e k niib tɑn sii yien juɑt ɑ: ‹Bɑɑn t pɑɑk.› k yien kunkonɑ ɑ: ‹Piin’t.› K mɑɑn muu i di dɑmɑɑtɑ, k dɑkuont jik ii?» Ŋɑnn e k b ji din jii doyieltieb bɑnle k pukn Yiesu pɑɑk ɑ bin kpi’b. Bɑɑ din bɑɑl siɑn nbɑ k b yi’l Yukpɑbuk nɑ, lenŋ e k b din kpɑɑ Yiesu k tɑbn’ɔ dɑpunpunn pɑɑk, k biɑ din kpɑɑ doyieltieb bɑnle nɑ dɑpunpunɑ pɑɑk, k yenɔ din be Yiesu niidiitu po, k luɑ nɑ mun din be u niigɑnŋ po. K Yiesu yet k yɑɑ ɑ: «N Bɑɑ, nyikn cɑb niib nɑ, k mɑɑn b k bɑnn bɑɑ tuun lin nbɑ nɑ pɑɑk.» K b tɔ tiɑtiɑ k cent u tiɑt. K niib nɑ sie k goli, ŋɑɑn k Suifnbɑ yudɑnm nɑ din dɑɑn’ɔ nyɑtuk k yien ɑ: «U tuu fie nilieb. L i tie k u set tie Klistu, Yennu Nigɑnntuɑ nɑ i e, wun fie u mɔnŋ.» K sejenm biɑ din dɑɑn’ɔ nyɑtuk, k tɑn bɑɑl nɑn dɑmiituk k tien’ɔ, ŋɑɑn yɑɑ ɑ: «L i tie k ɑ set tie Suifnbɑ Kpɑnbɑl i e, fɑn fiel ɑ mɔnŋ.» B biɑ diɑn diɑni k tɑbn dɑpunpunn nɑ, u yul pɑɑk, k l yet ɑ: «Suifnbɑ Kpɑnbɑl i nɑ.» L yuo nɑ k doyieltieb nbɑ tɑɑb nɑ yenɔ din suki Yiesu k yɑɑ ɑ: «A k tie Klistu kɑɑ ɑɑ? Fiel ɑ mɔnŋ ŋɑɑn mun fiel’t.» K luɑ din tiɑ’u k yet ɑ: «A k tiin Yennu uu? K mɑɑn fin nɑn ŋuɑ nbɑ be tubdɑtyenn kuɑ ni nɑ. Tinm ŋɑn nɑn l tubdɑtu, k mɑɑn b jiint’t pɑnkpelɑ nbɑ k t tuu tuun nɑ pɑɑk e, ŋɑɑn ŋuɑ ŋɑnin k biil siɑl.» ŋɑnn e k u yet Yiesu ɑ: «Yiesu, yuo nbɑ k ɑ dii ɑ nɑɑn, ɑ tɑn tiɑl n po.» K Yiesu yet’ɔ ɑ: «Bɑlmɔni e k n yien’ɑ, dinnɑ min nɑn fin sii be *Yendɔunŋ ni.» L yuo din tie yensuuk ni e, k tingbounŋ nɑ kul ji din bɔnn mɔkmɔk nɑn yenlekl, kut muntɑ yuo, k mɑɑn yennu ji din lib. Cincenn nbɑ din tuu juɑn k puun Yennu jɑɑnti ŋɑsɑɑkɑk ni, k l ji din tɑn suol sinsuuk ni k bɔkt tɑɑl munle. K Yiesu tɑn yikn sɑnpɑɑpo k yet ɑ: «N Bɑɑ Yennu, n jikt n siek k tie’l ɑ nuu ni.» Wɑɑ yet nnɑ mɑnŋ k u ji nɑk. K sejenm yudɑɑnɔ nbɑ lɑ lin nbɑ tien nɑ, k u pɑk Yennu k yet ɑ: «Bɑlmɔni e, juɑ nɑ set tie niŋɑnɔ e.» K nibulciɑɔnŋ nbɑ din lɑkn lenŋ ɑ bin lɑ lin nbɑ din tie nɑ, k b lɑ lin nbɑ tien nɑ, k b ji ŋmɑt kun nɑn pɑlbiil ŋɑɑn pɑkn yulɑ. K u yuɑsnbɑ kul nɑn puob nbɑ nyii Gɑɑliile nɑn’ɔ din be lenŋ k sie bɑnfɔkl ɑ, ŋɑɑn goli lin nbɑ tie. K jɑsuɑ din be k u sɑnn yi Suosiɑf k din nyii Suifnbɑ duo nbɑ k b yi’l Aliimɑɑte, k din tie niŋɑnɔ nbɑ tie bulcimɔ, k din guu Yennu nɑɑn bɑɑlu nɑ. U din tie Suifnbɑ yudɑɑn-yenɔ e, ŋɑɑn u din k sɑk nɑn Suifnbɑ yudɑɑnlieb nbɑ din lol b lol nbɑ k tun nɑ. K juɑ mɑnŋ sɑɑn Piilɑɑt buol k sɑɑ miɑl’ɔ ɑ wun cɑb’ɔ Yiesu gbɑnɑnt. Ŋɑnn e k u sɑɑn kpɑɑt gbɑnɑnt nɑ dɑpunpunn nɑ pɑɑk, k jii’u k pɔbn’ɔ kɑtinŋ ni, k pii’u kɑɑɔk ni, lin nbɑ k b ponŋ din jiɑl tɑnpiiuk lokl ni nɑ, k b din dɑɑ k pii suɑ kɑɑɔk mɑnŋ ni. L din tie dɑɑl nbɑ k b tie siil fuon pɑɑk e, k *Fuondɑɑl nɑ din tɑn yɑɑ lin piin. K Puob nbɑ din nyii Gɑɑliile k din wɑɑ Yiesu nɑ wei Suosiɑf, k b sɑɑ lɑ Yiesu kɑɑɔk buol nɑn bɑɑ pii’u biɑnŋ nbɑ. Ŋɑnn e k b ji din ŋmɑt kun ŋɑɑk ni, k sɑɑ tien siil k ŋɑnm kpɑnunubt nɑn tulɑɑli, ŋɑɑn Fuondɑɑl k b din foi nɑn Yennu *senni nbɑ wɑnt biɑnŋ nbɑ nɑ. Lɑsl dɑɑl sɑn-nyɑfɑɑl, k puob mɑnŋ nyii sɑɑn kɑɑɔk mɑnŋ buol nɑn b kpɑnunubt nɑn tulɑɑli nbɑ k b ponŋ ŋɑnm nɑ. Bɑɑ bɑɑl lenŋ, k b lɑ k kɑtɑngbenŋl nɑ, k l nyɑkt kɑɑɔk nɑ mɔb pɑɑk, k bilnt k sɑɑ duɑ. Ŋɑɑn bɑɑ kuɑ kɑɑɔk mɑnŋ ni, b k lɑ Yonmdɑɑnɔ Yiesu gbɑnɑnt, k b ji biɑl sie jiiɑɑ, k l tɑɑkpɑɑk ni k jɑb bɑnle sie k liɑ liɑtfɔkt nbɑ nyili. Lɑɑ tien puob nɑ jɑŋmɑɑnsuoluk, k b gbɑɑn tinŋ ni, k jɑb nɑ boi’b ɑ: «Bee k i luon fuotɔ kpienm ni? U kɑɑ nnɑ. U fiil kuun ni wɑɑ. Tiɑt mɑn wɑɑ din yet’i biɑnŋ nbɑ, yuo nbɑ k u dɑɑ din be Gɑɑliile nɑ, ɑ l tie k bin suol *Nisɑɑlk Bijɑ k jii’u tien biitdɑnm nuu ni k bin kpɑɑ’u tɑbn’ɔ dɑpunpunn pɑɑk k wun kpo, k u tɑn sɑɑ fiil kuun ni dɑɑ ŋɑntɑ dɑɑl.» Ŋɑnn e k puob nɑ ji tiɑl u mɑɑn mɑnŋ po. K puob nɑ ji siet kɑɑɔk nɑ buol k ŋmɑt kun, k sɑɑ yet lin nbɑ kul tien, k tul u tuomiinbɑ piik nɑn yenɔ kuɑ, nɑn bin nbɑ be lenŋ nɑ kul ɑ. Puob mɑnŋ sɑnɑ e din tie Mɑgdɑɑlɑ puo Mɑɑli, nɑn Sɑɑnn, nɑn Mɑɑli nbɑ din tie Sɑɑk nɑɑ nɑ, k puolieb mun din pukn b pɑɑk k be b ni k b din yet Yiesu tuomiinbɑ mɑɑn mɑnŋ. Ŋɑɑn tuomiinbɑ nɑ din duki nɑn l tie mɑyɑnɑ e, k b k tien’m yɑdɑ. Ŋɑɑn k Piɑl ŋɑnin din fiil k ciɑl sɑɑn kɑɑɔk nɑ buol, k sɑɑ tibn k got k lɑ kuun cincenn nɑ k l duɑ l kuukuɑ, k u ji ŋmɑt kun ŋɑɑk ni nɑn yɑɑl-lituk nɑn lin nbɑ tien mɑnŋ pɑɑk. L dɑɑl mɑnŋ e k Yiesu *puolpoweitieb bɑnle din sɑɑ digbɑnbik nbɑ k b yi Emɑus nɑ. Lenŋ nɑn Selusɑɑlenm din tie nɑn kiiluomiɑtɑ piik nɑn yen nɑ e. K b din sonm piɑk nɑn lieb lin nbɑ nɑ kul nbɑ tien mɑnŋ po. Bɑɑ piɑk k fɑɑ lɑbɑɑl nɑn lieb yuo nbɑ nɑ, k Yiesu mɔnŋ nɑkn’m k lɑkn nɑn’m sɑɑ, ŋɑɑn k Yiesu te k l liil’b k b k bɑnn’ɔ. K u boi’b ɑ: «I sonm piɑk ɑ bee?» K b set nɑn ninbiik. Ŋɑnn e k b yenɔ, wun nbɑ sɑnn yi Kleopɑɑs nɑ boi’ɔ ɑ: «A kuukuɑ e tie sɑɑmɔ nbɑ be Selusɑɑlenm nɑ k tɑn k gbɑt lin nbɑ tien dɑɑ ŋɑnlele nɑ ɑɑ?» K u boi’b ɑ: «Lɑnn po e tien i?» K b jiin k yet’ɔ ɑ: «K jikt sɑɑ Nɑɑsɑɑlet nilɔ Yiesu po. Juɑ nɑ dɑɑn tie *Yennu sɔkni e, u bɑktnɔunŋ tuonjɑɑnɑ nɑn u mɑɑn dɑɑn mɔk pɑnŋ, Yennu nɑn niib tuɑnn. K t yudɑnm nɑn Yennu mɑnntieb yudɑnm jii’u k tien’ɔ bɑlbuulɔ nuu ni, k yet ɑ u ŋɑn nɑn kuun e, k b tɑn kpɑɑ’u dɑpunpunn pɑɑk. Ŋɑɑn k t tuu dɑɑn nɑn ŋuɑ e tɑn sɑɑ nyinn tinm Islɑɑeltieb t dɑtɑi nuu ni, k lin nbɑ pukn, dinnɑ tie dɑɑ ŋɑntɑ e nɑ lɑɑ tien. Ŋɑnn mɑnŋ e biɑk, k t ni puosiɑb pɑk’t u po k l yɑɑl ŋɑɑn lit’t, k mɑɑn bɑɑ sɑɑn kɑɑɔk mɑnŋ buol sɑn-nyɑfɑɑl nɑ, b sɑɑ k lɑ u gbɑnɑnt. Bɑɑ jen yuo nbɑ k b yet’t ɑ ŋɑnm bo lɑ Yennu *mɑlɑkɑɑnbɑ, k mɑlɑkɑɑnbɑ mɑnŋ yet’b ɑ Yiesu jen u mɑnfuol ni wɑɑ. Ŋɑnn e k t yenm tɑn sɑɑn kɑɑɔk mɑnŋ buol k sɑɑ lɑ nɑn puob nbɑ dɔnŋ yet’t nɑ, ŋɑɑn b k lɑ Yiesu.» Ŋɑnn e k Yiesu yet’b ɑ: «Yɑnkpienɑ nɑ, bee k i tɑɑntl nɑn yin tien Yennu sɔkniinbɑ mɑɑn nɑ yɑdɑ? L k kpɑɑ tɑlɑs nɑn *Klistu n di fɑlɑ mɑnŋ, k tɑn lɑ u *yudɑnt ii?» Ŋɑnn e k u wɑnt’b u mɑɑn nbɑ diɑn Yennu lolkpel kɑdɑɑɔk kul ni nɑ pɑɑk, k piin Muois diɑni ni nɑn sɔkniinbɑ diɑni kul ɑ ni. Tɔn, k b tɑn pel digbɑnbik nbɑ k b bɑɑt nɑ, k Yiesu tɑn tien nɑn u gɑɑl e nɑ. Ŋɑɑn b guɑl’ɔ k yien ɑ: «Biɑt nɑn’t nnɑ, k mɑɑn yennu bɑɑ wɑɑ k l ji bɔnt e.» L pɑɑk, k u ji kuɑ k biɑl b buol ni. K u tɑn kɑl ɑ wun di nɑn’m, k jii pɑɑnu nɑ k tul Yennu niipuouk l pɑɑk, ŋɑɑn ŋmit ŋmit k tul’b. L yuo nɑ k b nunm po ji yent k b ji bɑnn’ɔ. L tɑɑkpɑɑk ni k u biɑ lil bot b ni. K b ji yien lieb ɑ: «Wɑɑ piɑk nɑn’t sɔnu pɑɑk k wɑnt’t lin nbɑ diɑn Yennu lolkpel kɑdɑɑɔk ni nɑ pɑɑk, l bo k tie nɑn muu nɑ kɑɑ k di t pɑlɑ ni ii?» L tɑɑkpɑɑk ni k b fiil ŋmɑt Selusɑɑlenm, k sɑɑ lɑ u tuomiinbɑ piik nɑn yenɔ kuɑ nɑ nɑn siɑb k b lɑkn lieb. Ŋɑnn e k u puolpoweitelieb nɑ yet’b ɑ: «Yonmdɑɑnɔ set fiil e nɑn bɑlmɔni. U dɔkt Siimɔn pɑɑk.» K niib bɑnle nɑ mun yet’b lin nbɑ tien sɔnu pɑɑk, nɑn biɑnŋ nbɑ k b bɑnn Yiesu yuo nbɑ k u tɑn ŋmit ŋmit pɑɑnu nɑ. Puolpoweitieb bɑnle nbɑ nyii Emɑus nɑ nbɑ yien’m lin nbɑ nɑ nɑ, l tɑɑkpɑɑk ni k Yiesu set b sinsuuk ni k yet’b ɑ: «Mɑnu ii be i pɑɑk.» K gbɑnɑnjijekt nɑn jɑŋmɑɑni kuɑ’b hei, k mɑɑn b duki mi ɑ b lɑ siɑl ɑ funfɔntuk o. Ŋɑnn e k u boi’b ɑ: «Bee k i yɑn pɑɑk put i? Bee k bilsuk be i ni? Gotl n nii nɑn n tɑɑ mɑn, k bɑnn nɑn l set tie min e. Sii’n k bɑnn nɑn min e. Funfɔntuk k mɔk gbɑnɑnt nɑn kpɑbɑ nɑn yɑɑ lɑ mɑɑ mɔk’l biɑnŋ nbɑ.» Wɑɑ yet nnɑ mɑnŋ k u wɑnn’b u nii nɑn u tɑɑ. Bɑɑ dɑɑ k fit tien yɑdɑ nɑn ŋuɑ e nɑ b pɑlpienn nɑn b yɑɑl-lituk pɑɑk nɑ, k u boi’b ɑ: «I mɔk jesiɑt nnɑ ɑɑ?» K b jii jɑnpulkjinn k tul’ɔ, k u gɑɑl k ŋmɑn b nunm ni. Ŋɑnn e k u yet’b ɑ: «Gotl mɑɑ dɑɑn wɑnn’i lin nbɑ mɑɑ dɑɑ dɑɑn be nɑn’i. Lin nbɑ kul k b diɑn Muois *senni ni nɑn Yennu sɔkniinbɑ diɑni ni nɑn Yennu *yɑni ni k jiin n po nɑ, l kpɑɑ tɑlɑs nɑn l kul n tɑn mɑntk tun k gbenn.» Ŋɑnn e k u ji yent b nunm ɑ bin bɑnn lin nbɑ diɑn Yennu lolkpel kɑdɑɑɔk ni nɑ pɑɑk, k yet’b ɑ: «L diɑn ɑ Klistu sɑɑ di fɑlɑ k kpo k tɑn fiil kuun ni dɑɑ ŋɑntɑ dɑɑl, k b sɑɑ piin Selusɑɑlenm ni k sɑɑn tuu nibuolu kul k muɑnt, u sɑnn ni, niib nbɑ sɑɑ mɔ kuɑŋɑɑn bɑnnu nbɑ nɑ nɑn biit nyikcɑbu lɑbɑɑl.» K u biɑ yet’b ɑ: «Yinm e tie lin nbɑ nɑ siɑlɑɑdɑnm. Nnɑlɑ, min e yɑɑ n tɑn tul’i lin nbɑ k n Bɑɑ senn mɔsonn ɑ u sɑɑ tul’i nɑ. Ŋɑɑn i dɑɑ biɑl kii be mɑn Selusɑɑlenm mɔkmɔk nɑn yuo nbɑ k yiikuo tɑn sɑɑ nyi sɑnpɑɑpo k sik i pɑɑk.» Ŋɑnn e k Yiesu nyii nɑn’m duo mɑnŋ ni k sɑɑn nɑn’m Betɑɑni. Lenŋ e k u sɑɑ donn u nii sɑnpɑɑpo ŋɑɑn yɑt yetŋɑnm b pɑɑk. Wɑɑ yɑt yetŋɑnm nɑ yuo nbɑ nɑ, k u yɑɑt k nyik’b ŋɑɑn duo *Yendɔunŋ ni. K b ji jiɑnt’ɔ k tɑn ŋmɑt Selusɑɑlenm nɑn pɑlpienn bonciɑnn. K b ji din jii b yuo k be Yennu jɑɑnti ŋɑsɑɑkɑk ni yuo kul ɑ, k piɑk dont Yennu sɑnn. Sintɑnsinm dinn, yuo nbɑ k Yennu din nɑn tingbounŋ nɑ, *Mɑɑn ponŋ din be. U din be nɑn Yennu e, k biɑ tie Yennu. Mɑɑn mɑnŋ e din be nɑn Yennu sinsinn. Yennu din jii Mɑɑn mɑnŋ e nɑn bont kul, k siɑl din kɑɑ k Yennu nɑn k l k nyii u ni, k u ni e biɑk k mɑnfuol be, k l mɑnfuol mɑnŋ e tie niib yentu, k yentl tingbounŋ nɑ bunbɔnn, k bunbɔnn nɑ k fit bɔnt yentu mɑnŋ. Jɑsuɑ nnɑ din be k u sɑnn yi Sɑn k Yennu din tun’ɔ. U din bɑɑl ɑ wun yet niib yentu mɑnŋ po, ɑ niib kul n tien yɑdɑ u mɑɑn nɑ pɑɑk. Sɑn tiɑɔnŋ kɑɑ din tie yentu mɑnŋ, ŋɑɑn u din bɑɑl ɑ wun tien yentu mɑnŋ siɑlɑɑdɑɑnɔ e. Bɑlmɔni yentu mɑnŋ nbɑ yentl niib kul nɑ din bɑɑl tingbounŋ ni. Mɑɑn din be tingbounŋ nɑ ni, k Yennu ponŋ din jii Mɑɑn mɑnŋ e k nɑn tingbounŋ nɑ kul, ŋɑɑn tingbounŋ nɑ ŋɑɑtieb lek tɑn k bɑnn Mɑɑn mɑnŋ. U din bɑɑl u tiɑɔnŋ duo ni, ŋɑɑn u niib din k gɑɑl’ɔ. Ŋɑɑn bin nbɑ kul gɑɑl’ɔ k tien’ɔ yɑdɑ, ŋɑnm e k u din tul’b yiikuo ɑ bii tie Yennu wɑɑs. Bɑɑ din tien Yennu wɑɑs nɑ, l k tie nɑn bɑɑ tuu mɑɑl wɑɑs biɑnŋ nbɑ nɑ kɑɑ, k biɑ k tie nilɔ nbɑ luon lin nbɑ kɑɑ, ŋɑɑn Yennu e tul’b mɑnfopɑɑnn. Mɑɑn mɑnŋ din tɑn kpɑnt nisɑɑlk, k tinm nɑn ŋuɑ din lɑkn kuɑ, k u gbie nɑn ninkpɑbɑɔnŋ nɑn bɑlmɔni. T din lɑ u *yudɑnt, k l yudɑnt tie lin nbɑ k Bijɑyenml lɑɑt u Bɑɑ buol ni. Sɑn din piɑk u po k nyinn u *siɑlɑ k yikn sɑnpɑɑpo wɑɑ ɑ: «Ŋuɑ e tie wun nbɑ k n dɑɑn yet ɑ: ‹Wun nbɑ wɑɑ n puol nɑ cie’n k mɑɑn u ponŋ din be e wɑɑ k b tɑn mɑl’n.› » Wɑɑ gbie nɑn ninkpɑbɑɔnŋ nɑ, k u tul’t yetŋɑnm k pukn yetŋɑnm pɑɑk. Muois din tul’t Yennu *senni e, ŋɑɑn Yiesu *Klistu e din bɑɑl nɑn ninkpɑbɑɔnŋ k biɑ din bɑɑl nɑn bɑlmɔni. Suɑ kɑɑ k mi lɑ Yennu. U mɔnŋ Bijɑyenml nbɑ set tie Yennu k biɑ kpiɑ’u nɑ, ŋuɑ e fiit’ɔ k wɑnn’t. Tɔn, nɑ e tie Sɑn *siɑlɑ nbɑ k u nyinn yuo nbɑ k *Suifnbɑ yudɑnm nbɑ din be Selusɑɑlenm nɑ din tun Yennu jɑɑnti yudɑnm nɑn *Liefiitnbɑ Sɑn mɑnŋ buol, ɑ bin boi’ɔ k lɑɑn u tie ŋmee? K Sɑn mun din k yet jiinu, ŋɑɑn jiin k yet yent k yɑɑ ɑ: «Min kɑɑ tie Klistu nɑ.» Ŋɑnn e k b boi’ɔ ɑ: «K ɑ tie ŋmee? A tie Elii ee?» K u jiin k yɑɑ ɑ: «N k tie Elii kɑɑ.» K b biɑ boi’ɔ ɑ: «K ɑ tie sɔkni nbɑ nɑ ee?» K u jiin ɑ: «N k tie ŋuɑ kɑɑ biɑk.» Ŋɑnn e k b boi’ɔ: «K ɑ tie ŋmee? Wɑnt’t fɑɑ tie wun nbɑ k t ŋmɑt sɑɑ yet bin nbɑ tun’t nɑ. A sɑɑ yet nlee k jikt sɑɑ ɑ mɔnŋ po?» K Sɑn jii sɔkni Esɑɑyi mɔbonɑ k jiin k yɑɑ ɑ: «Min e tie wun nbɑ be muuk ni nɑ, k huot yɑɑ ɑ: ‹Ŋɑnmt mɑn Yonmdɑɑnɔ bɑɑlu sɔnu k lii tuok.› » Niib nbɑ k b tun’m Sɑn buol nɑ din tie Fɑɑliisiɑnnbɑ e. K b biɑ boi Sɑn k yɑɑ ɑ: «L i tie k ɑ k tie Klistu, k biɑ k tie Elii, k biɑ mun k tie sɔkni nbɑ nɑ, k l tien nlee k ɑ wuul niib Yennu nyunwulu?» K Sɑn yɑɑ ɑ: «Min ŋɑnin wuul niib Yennu wulu nyun ni e, ŋɑɑn suɑ be i sinsuuk nnɑ k i k mi’u. Ŋuɑ e tie wun nbɑ yɑɑ wun wei n pɑɑk, ŋɑɑn k n k ŋɑn nɑn k n lot u tɑɑsɑɑŋmi.» Lin nbɑ nɑ kul din tien duo nbɑ sɑnn yi Betɑɑni e, k l din be *Suulden kpenu puotl. Lenŋ e k Sɑn din wuul niib Yennu nyunwulu. Lɑɑ yent sɑn-nyiɑɔk, k Sɑn mɑnŋ lɑ Yiesu k u bɑɑt, k u yet niib nɑ ɑ: «Gotl mɑn. *Yennu Pebik nbɑ nyint tingbounŋ nɑ biit e nɑ. Ŋuɑ e tie dɑɑnɔ nbɑ k n won yet’i ɑ: ‹Jɑsuɑ tɑn sɑɑ wei n pɑɑk, k cie’n nɑ, k mɑɑn u ponŋ din be e wɑɑ k b tɑn mɑl’n.› N tuu k mi nɑn ŋuɑ e nɑ, ŋɑɑn n dɑɑn bɑɑl k wuul niib Yennu nyunwulu, ɑ Islɑɑeltieb n bɑnn’ɔ.» K Sɑn biɑ yet niib nɑ ɑ: «N dɑɑ lɑ Foŋɑnm, k u nyii *Yendɔunŋ ni k siik, k nɑɑn nɑn ŋmɑnn nɑ, k tɑn tuɑn u pɑɑk k biɑl nɑn’ɔ. N dɑɑn dɑɑ k mi nɑn ŋuɑ e nɑ, ŋɑɑn wun nbɑ tun’n ɑ n wul niib Yennu nyunwulu nɑ dɑɑn yet’n ɑ: ‹Dɑɑnɔ nbɑ k ɑ tɑn lɑ k Foŋɑnm siik k tɑn tuɑn u pɑɑk k biɑl nɑn’ɔ, fɑn bɑnn nɑn ŋuɑ e tɑn sɑɑ jii Foŋɑnm k wul niib Yennu nyunwulu.› N set lɑ nnɑ, k biɑ yien’i nɑn ŋuɑ e tie Yennu Bijɑ.» Lɑɑ yent, k Sɑn sie lenŋ biɑk nɑn u *puolpoweitieb nɑ ni bɑnle, k tɑn lɑ k Yiesu gɑɑl sɑɑ, k u yet ɑ: «Gotl mɑn, *Yennu Pebik e nɑ.» K Sɑn puolpoweitieb bɑnle nɑ nbɑ gbɑt k Sɑn yet nnɑ mɑnŋ, k b nyik’ɔ, ŋɑɑn wɑɑ Yiesu. K Yiesu sɑɑ jiɑnt got k lɑ k b wɑɑ’u, k u boi’b ɑ: «I luon bee?» K b jiin ɑ: «Lɑɑbi, (l pɑɑk tie wɑntuɑ) t luon k t bɑnn fɑɑ kuɑ siɑn e.» K Yiesu yet’b ɑ: «Ii wɑɑ mɑn k sɑɑ lɑ mɑɑ kuɑ siɑn nbɑ.» L din tie nɑn kut munnɑ yuo nɑ e dɑɑjuouk, k b wei’ɔ k sɑɑn k sɑɑ lɑ wɑɑ be siɑn nbɑ, k b ji din biɑl k be nɑn’ɔ dɑɑl mɑnŋ ni. B bɑnle mɑnŋ nbɑ din dɔnŋ gbɑt Sɑn nbɑ yet lin nbɑ k wɑɑ Yiesu nɑ, b yenɔ din tie Andle, wun nbɑ din tie Siimɔn Piɑl ninjɑ nɑ. Wɑɑ din nyii Yiesu buol ni nɑ puolpo e, k u sɑɑn yiɑn ɑ k sɑɑ lon u yuɑlɔ Siimɔn buol, k tɑn yet’ɔ yɑɑ ɑ: «T lɑ Meesi nɑ wɑɑ,» (k l pɑɑk tie Klistu,) ŋɑɑn bɑɑl nɑn’ɔ Yiesu buol. K Yiesu got’ɔ silll, k tɑn yet’ɔ ɑ: «Fin e tie Siimɔn wun nbɑ tie Sɑn bijɑ, ŋɑɑn ɑ sɑnn biɑ sii yi Sefɑɑs.» (k l pɑɑk tie Piɑl Glek mɑɑn ni.) L sɑn-nyɑfɑnnuk o, k Yiesu luon wun sɑɑn Gɑɑliile k cet Fiiliip k yet’ɔ ɑ: «Ii wɑɑ’n.» Fiiliip din nyii Betsɑidɑ e. Lenŋ e tie duo nbɑ k Andle nɑn Piɑl mun din nyii nɑ. K Fiiliip mun cet Nɑɑtɑɑniɑl k yet’ɔ ɑ: «T lɑ wun nbɑ k Muois din diɑn u po Yennu senni kɑdɑɑɔk ni, k sɔkniinbɑ biɑ din diɑn u po. Ŋuɑ e tie Yiesu wun nbɑ tie Suosiɑf bik, k nyii Nɑɑsɑɑlet.» K Nɑɑtɑɑniɑl yet’ɔ ɑ: «Nɑɑsɑɑlet ii? Bonŋɑnn sɑɑ fit nyi Nɑɑsɑɑlet ɑɑ?» K Fiiliip yet’ɔ: «A mɔnŋ mɔnŋ mun n bɑɑl k tɑn lɑ.» Yiesu nbɑ lɑ Nɑɑtɑɑniɑl k u bɑɑt u penŋ nɑ, k u pɑk u po k yet ɑ: «Mɔmɔnm Islɑɑel nilɔ e nɑ k fɑɑk kɑɑ u ni.» K Nɑɑtɑɑniɑl boi’ɔ: «A tien nlee k mi’n i?» K Yiesu yet’ɔ ɑ: «Fiiliip nbɑ dɑɑ bo k bɑɑl k yiin’ɑ nɑ, ŋɑɑn suɑ k n ponŋ lɑ’ɑ wɑɑ, k ɑ kɑl *fiigie nyɑkl.» K Nɑɑtɑɑniɑl yet’ɔ ɑ: «Wɑntuɑ, ɑ tie Yennu Bijɑ e, k biɑ tie Islɑɑeltieb Kpɑnbɑl.» K Yiesu boi’ɔ: «Mɑɑ yet’ɑ ɑ n lɑ’ɑ k ɑ kɑl fiigie nyɑkl ni e, k ɑ tien’n yɑdɑ ɑɑ? ŋɑɑn ɑ sii lɑɑt bɑktnɔunŋ tuonjɑɑnɑ k lin gɑl lin nbɑ nɑ pɑɑk. Bɑlmɔni e k n yien’i nɑ, i tɑn sɑɑ lɑ *Yendɔunŋ ni luot, k Yennu *mɑlɑkɑɑnbɑ siik *Nisɑɑlk Bijɑ nɑ pɑɑk, k ŋmɑt do sɑnpɑɑpo.» L dɑɑ ŋɑntɑ dɑɑl, k puokuɑnu jɑɑnm be Kɑɑnɑ duo ni, Gɑɑliile tinŋ ni. K Yiesu nɑɑ din be lenŋ, k b biɑ yiin Yiesu nɑn u *puolpoweitieb, k b mun din be. Tɔn, dɑmunŋ nbɑ k b tuu nyu nɑ, k l tɑn gbenn, k Yiesu nɑɑ bɑɑl yet Yiesu ɑ: «Dɑmunŋ nɑ gbenn ɑ.» K Yiesu yet’ɔ ɑ: «N nɑɑ, bee te k ɑ wɑnt’n mɑɑ sɑɑ tun lin nbɑ. N yuo e dɑɑ k bɑɑl.» Ŋɑnn e k u nɑɑ mɑnŋ yet tuontunnɑ nɑ ɑ: «Lin nbɑ k u yet’i ɑ i tun, yin tun nnɑ.» Tɔn, k bui ŋɑnluob nnɑ din sie lenŋ, lin nbɑ k *Suifnbɑ tie nyun lenŋ k nit nɑn b jɑɑnti kɑɑl nbɑ wɑnt biɑnŋ nbɑ, k l bui din fit kuɑ nɑn liitɑ kobik kobik nɑ. K Yiesu yet tuontunnɑ nɑ ɑ: «Gbient bui nɑ nɑn nyun.» K b gbien nɑn mɔgbɑnɑ wɑɑ. K u ji yet’b: «Fint mɑn nyun mɑnŋ, k sɑɑn tul jɑɑnm nɑ sɑɑkuɑ.» K b finn k sɑɑn tul’ɔ, k u gɑɑl lenm nyun nbɑ kpɑnt dɑmunŋ nɑ, k k mi dɑmunŋ nɑ nbɑ nyii siɑn, ŋɑɑn tuontunnɑ nbɑ dul nyun bui nɑ ni ŋɑnin mi. Ŋɑnn e k sɑɑkuɑ nɑ yiin puo nɑ sɔlɔ k yet’ɔ ɑ: «Suɑ kul tuu tol dɑmɑnm sinsinn e wɑɑ. L i tie k b tɑn nyuu k yib ɑ, wun ji tol lin nbɑ k mɑn fɑnu nɑ, ŋɑɑn k yinm ŋɑnin ŋmin ɑ, k ji tɑn juont tuol dɑmunŋ nbɑ mɑn k gɑl siɑl kul nɑ.» Tɔn, Yiesu nbɑ din tun bɑktnɔunŋ tuonjɑɑnn mɑnŋ Kɑɑnɑ nbɑ be Gɑɑliile tinŋ ni nɑ, ŋɑnn e din tie u sinsinn nyinn, k l wɑnn niib wɑɑ mɔk *yudɑnt biɑnŋ nbɑ, k u puolpoweitieb nɑ tien’ɔ yɑdɑ l pɑɑk. L puolpo k Yiesu nɑn u nɑɑ nɑn u ninjɑnm nɑn u puolpoweitieb sik Kɑpelnɑunm, k sɑɑ be lenŋ nɑn dɑɑ ŋɑnle nnɑ nɑ. Ŋɑnn e k Islɑɑeltieb *yuktgɑltiɑlu jɑɑnm tɑn pel, k Yiesu sɑɑn Selusɑɑlenm. Wɑɑ bɑɑl Selusɑɑlenm yuo nbɑ, k u kuɑ Yennu jɑɑnti ŋɑsɑɑkɑk ni, k sɑɑ lɑ niib k b kɔi nei nɑn pei nɑn ŋmɑnɑ k lieb biɑ kɑl kpentl likli. K u jii ŋmiit k piɑn gbɑnn, k bel niib nɑn b bonkobt nɑ kul ɑ, k nyinn’b Yennu jɑɑnti ŋɑsɑɑkɑk mɑnŋ ni, ŋɑɑn tut tut lik-kpentɑ nɑ tiebulɑ k lu, k likli nɑ yɑt bɑɑ bɑɑ, ŋɑɑn biɑ yet bin nbɑ kɔi ŋmɑnɑ nɑ, ɑ bin nyinn ŋmɑnɑ mɑnŋ, ŋɑɑn biɑ yet’b ɑ: «I dɑɑ tie n Bɑɑ ŋɑɑk kpinkpent buol.» L yuo nɑ k u puolpoweitieb ji tiɑl Yennu lolkpel kɑdɑɑɔk nbɑ yet biɑnŋ nbɑ nɑ ɑ: «N Yennu, n lonm nbɑ k n mɔk k jiin ɑ ŋɑɑk po di n pɑl ni nɑn muu nɑ e.» Ŋɑnn e k Suifnbɑ yudɑnm boi Yiesu ɑ: «A sɑɑ tun *nyinn lɑnn po e k wɑnn’t ɑ ɑ mɔk yiikuo k tun fɑɑ tun lin nbɑ nɑ?» K Yiesu jiin ɑ: «Tɔn, i yiel Yennu jɑɑnti ŋɑsɑɑkɑk nɑ, ŋɑɑn dɑɑ ŋɑntɑ sinsuuk ni n sɑɑ mɑɑ’l kɑɑl.» K b yet ɑ: «Wɑɑ. T jii binɑ piinnɑ nɑn ŋɑnluob o k mɑɑ Yennu jɑɑnti ŋɑsɑɑkɑk nɑ, ŋɑɑn k fin tɑn yɑɑ ɑ sɑɑ jii dɑɑ ŋɑntɑ kuukuɑ e k mɑɑ ɑɑ?» Ŋɑɑn Yennu jɑɑnti ŋɑsɑɑkɑk nbɑ k Yiesu din pɑk l po nɑ, din tie u mɔnŋ mɔnŋ gbɑnɑnt e. Yennu nbɑ din fiin’ɔ kuun ni nɑ puolpo e, k u puolpoweitieb tiɑl lin nbɑ k u yet nɑ. K b tien yɑdɑ nɑn lin nbɑ diɑn Yennu lolkpel kɑdɑɑɔk ni nɑn lin nbɑ k Yiesu pɑk nɑ. Yiesu nbɑ din be Selusɑɑlenm *yuktgɑltiɑlu jɑɑnm mɑnŋ yuo nɑ, k niib bonciɑnn din lɑ bɑktnɔunŋ tuonjɑɑnɑ nbɑ k u tun nɑ k tien’ɔ yɑdɑ, ŋɑɑn Yiesu din k jii u mɔnŋ k cɑb’b, k mɑɑn u din mi suɑ kul nbɑ tie wun nbɑ. U din k luon suɑ n wɑnn’ɔ nifosɑɑlk po, k mɑɑn u din mi lin nbɑ be niib pɑlɑ ni nɑ. Jɑsuɑ nnɑ din be k u sɑnn yi Niikodenm. U din tie *Suifnbɑ yudɑɑnɔ e, k biɑ din tie Fɑɑliisiɑnnbɑ ni yenɔ, k nyɑsiɑɔk k u tɑn bɑɑl Yiesu buol ni, k yet’ɔ ɑ: «Wɑntuɑ, t mi nɑn Yennu tun’ɑ ɑ ɑ tɑn tumi’t e, k mɑɑn suɑ kɑn fit tun bɑktnɔunŋ tuonjɑɑnɑ nbɑ k ɑ tuun nɑ buolu, l i tie k Yennu k be nɑn’ɔ i kɑɑ.» K Yiesu yet’ɔ ɑ: «Bɑlmɔni e k n yien’ɑ nɑ, suɑ kɑn fit k kuɑ Yennu nɑɑn ni, l i kii tie k b ŋɑnm mɑl’ɔ i kɑɑ.» K Niikodenm boi’ɔ ɑ: «Nlee k b sɑɑ fit k ŋɑnm mɑl nilɔ nbɑ tie nikpel i? K mɑɑn u ji kɑn fit k ŋmɑt kuɑ u nɑɑ puol ni, k wun ŋɑnm mɑl’ɔ.» K Yiesu yet’ɔ ɑ: «Bɑlmɔni e k n yien’ɑ, suɑ kɑn fit kuɑ Yennu nɑɑn ni, sie k b mɑl’ɔ nyun nɑn Foŋɑnm ni. Nisɑɑlk mɑɑl nisɑɑlk, ŋɑɑn Foŋɑnm nɑ ŋɑnin mɑɑl Foŋɑnm yuɑ e. L pɑɑk, ɑ dɑɑ te k l tie’ɑ bɑktnɔunŋ nɑn mɑɑ yɑɑ ɑ: ‹Sie k b ŋɑnm mɑl i kul nɑ.› Wounŋ dɑ wɑɑ luon siɑn e. A gbiɑ k u dɑ e, ŋɑɑn ɑ k mi wɑɑ nyi siɑn, k biɑ k mi wɑɑ sɑɑ siɑn. L mun biɑ tie nnɑ e k tul suɑ kul nbɑ k Foŋɑnm mɑl’ɔ nɑ.» K Niikodenm boi’ɔ ɑ: «Nlee k l sɑɑ fit tien nnɑ?» K Yiesu jiin’ɔ ɑ: «A tie Islɑɑeltieb wɑntieb yudɑɑnɔ, ŋɑɑn tɑn k gbɑt lin nbɑ nɑ pɑɑk ii? Bɑlmɔni e k n yɑɑ n yet’ɑ, t piɑk lin nbɑ k t mi l po nɑ, k t muɑnt lin nbɑ k t lɑ nɑ, ŋɑɑn k i k gɑɑn t mɑɑn. L i tie k i k tien’n yɑdɑ, nɑn mɑɑ yet’i tingbounŋ nɑ bonɑ po nɑ, nlee k i ji sɑɑ tien’n yɑdɑ, l i tie k n yet’i *Yendɔunŋ ni bonɑ po? Suɑ kɑɑ k duo Yendɔunŋ ni sie *Nisɑɑlk Bijɑ nbɑ nyii Yendɔunŋ ni nɑ.» Muois nbɑ din be muuk ni k fin kut wɑɑɔk k donn’ɔ dɑɑɔk pɑɑk nɑ, l mun biɑ tie nnɑ e k b tɑn sɑɑ jii Nisɑɑlk Bijɑ nɑ, k donn’ɔ sɑnpɑɑpo, k bin nbɑ kul tien’ɔ yɑdɑ nɑ, sɑɑ lɑ mɑnfuol nbɑ kɑɑ gbennu. K mɑɑn Yennu mɑntk din luon tingbounŋ nɑ niib bonciɑnn. L pɑɑk, k u tul’b u Bijɑyenml, k wun nbɑ tien u Bijɑ mɑnŋ yɑdɑ u tɑn kɑn kpo, ŋɑɑn u sii mɔk mɑnfuol nbɑ kɑɑ gbennu, k mɑɑn Yennu nbɑ din tun u Bijɑ tingbounŋ nɑ ni, u din k tun’ɔ ɑ wun tɑn bu tingbounŋ nɑ niib buut k biil’b kɑɑ, ŋɑɑn u din yɑɑ wun fiel’b u Bijɑ mɑnŋ ni e. K dɑɑnɔ nbɑ tie Yennu Bijɑ mɑnŋ yɑdɑ, Yennu kɑn bu u buut k biil’ɔ, ŋɑɑn wun nbɑ k tie’u yɑdɑ, Yennu ponŋ bu u yɑɑ buut k biil’ɔ wɑɑ, k mɑɑn u k tien ŋuɑ Yennu Bijɑyenml mɑnŋ yɑdɑ. Lin nbɑ pɑɑk te k Yennu bu b buut k biil’b mɑnŋ tie nnɑ e: yentu din bɑɑl tingbounŋ nɑ ni ŋɑɑn k niib luon bunbɔnn k gɑl yentu mɑnŋ, k mɑɑn bɑɑ tuun biit nɑ pɑɑk. Dɑɑnɔ kul nbɑ tuun bonbiil, u nɑn yentu mɑnŋ e, k k luon wuu nɑki’ɔ, k mɑɑn u k luon u biit nɑ n tɑn nyi pɑɑnu. Ŋɑɑn wun nbɑ wɑɑ Yennu bɑlmɔni k biɑ tuun l biɑnŋ, ŋuɑ e bɑɑt yentu mɑnŋ buol, ɑ suɑ kul n bɑnn nɑn u tuonɑ kul, Yennu be l ni. L puolpo e k Yiesu nɑn u *puolpoweitieb din nyii lenŋ k sɑɑn Suude siɑl po, k sɑɑ be lenŋ nɑn dɑɑ ŋɑnŋɑ nnɑ, k u din wuul niib Yennu nyunwulu. L yuo nɑ k suɑ k Sɑn din wuul niib Yennu nyunwulu Ainɔn duo ni k l k fɔk nɑn Sɑɑliim k mɑɑn nyun din yɑb lenŋ. Niib din bɑɑt u buol ni k u wuul’b Yennu nyunwulu. (L yuo nɑ k suɑ b dɑɑ din k kuɑn Sɑn dɑnsɑlk ni.) Ŋɑnn e k mɔniɑɔk tɑn fiil Sɑn mɑnŋ puolpoweitieb nɑn Suifsuɑ nnɑ sinsuuk ni k jikt sɑɑ Suifnbɑ nbɑ tuu nit b nii nɑn b jɑɑnti nbɑ tie biɑnŋ nbɑ nɑ po. K b sɑɑn Sɑn buol ni k sɑɑ yet’ɔ: «Cɑnbɑɑ, wun nbɑ dɑɑn be nɑn’ɑ *Suulden kpenpuotl, k ɑ dɑɑ wɑnn’t u po nɑ, tɔn, u ji wuul niib Yennu nyunwulu k suɑ kul sɑɑ u buol ni.» K Sɑn yet’b ɑ: «Nilɔ kɑn fit lɑ siɑl, l i kii tie k Yennu cɑb’ɔ. I mɔnŋ gbɑt k n yet mɑɑ min kɑɑ tie *Klistu, ŋɑɑn Yennu tun’n u tuɑnn. Puosɔlɔ e tie wun nbɑ yen puoyuokl nɑ. Wun nbɑ tie puosɔlɔ nɑ yuɑk tuu be u buol k gbiin u mɑɑn k mɔk pɑlpienn nɑn wun gbɑt puosɔlɔ nɑ kunkɔl. Pɑlpienn mɑnŋ tie n yɑl k yɑb bonciɑnn k siɑl ji k tenn. L kpɑɑ tɑlɑs nɑn ŋuɑ Klistu ii yɑbtl, ŋɑɑn k min ii wɑɑbt.» Wun nbɑ nyii sɑnpɑɑpo, ŋuɑ e cie suɑ kul ɑ; wun nbɑ nyii tingbounŋ nɑ ni tie tingbounŋ nɑ nilɔ, k biɑ piɑk tingbounŋ bonɑ nɑ po. Wun nbɑ nyii Yendɔunŋ ni, ŋuɑ e cie suɑ kul. U yien niib lin nbɑ k u lɑ k biɑ gbɑt, ŋɑɑn suɑ k gɑɑl u mɑɑn. Wun nbɑ gɑɑl u mɑɑn mɑnŋ, l wɑnt nɑn ŋuɑ e sɑɑk nɑn Yennu mɑɑn mɑnŋ tie bɑlmɔni. Wun nbɑ k Yennu tun’ɔ nɑ, u piɑk Yennu mɑɑn e, k mɑɑn Yennu tul’ɔ Foŋɑnm nbɑ yɑb k kɑɑ biknu. Bɑɑ luon u Bijɑ, k kubn bonɑ kul u nuu ni. Dɑɑnɔ nbɑ tien Bijɑ mɑnŋ yɑdɑ mɔk mɑnfuol nbɑ kɑɑ gbennu, ŋɑɑn dɑɑnɔ nbɑ yet Bijɑ mɑnŋ, Yennu wutuol be u pɑɑk k u kɑn lɑ mɑnfuol mɑnŋ. Tɔn, k Fɑɑliisiɑnnbɑ din gbɑt ɑ Yiesu dɑɑk niib k wuul’b Yennu nyunwulu k b tie u *puolpoweitieb, k b yɑb gɑl Sɑn yɑb ɑ. Bɑlmɔni ŋɑnin e Yiesu din k wuul niib u mɔnŋ, ŋɑɑn u puolpoweitieb e din wuul’b. Yiesu nbɑ gbɑt nnɑ, k u nyii Suude tinŋ ni k ŋmɑt sɑɑ Gɑɑliile tinŋ ni. K u sɔnu mɑnŋ ni, k l tie tɑlɑs e nɑn wun gɑl *Sɑɑmɑɑli tinŋ ni. K yensuuk ni, wɑɑ din tɑn pel Sɑɑmɑɑliitieb digbɑnsiɑl ni, k b yi’l Siisɑɑl, k u bɑɑl nɑkn Sɑɑkɔb bunbunn buol. Lenŋ din k fɔk nɑn kpɑɑb nbɑ k Sɑɑkɔb din tul u bik Suosiɑf nɑ. Wɑɑ din tɑn pel bunbunn nɑ, k bɑknt ji din suol’ɔ k u bɑk k mɑɑn sonml nɑ pɑɑk, k u biɑl kɑl bunbunn nɑ nyɑkl. Ŋɑnn e k Sɑɑmɑɑli puosuɑ tɑn bɑɑl bunbunn mɑnŋ buol, ɑ wun luun nyun. K Yiesu miɑl’ɔ ɑ: «Tul’n nyun k n nyu.» (L yuo nɑ ɑmi k suɑ k u puolpoweitieb ponŋ sɑɑn duo ni wɑɑ, ɑ bin sɑɑ dɑɑ jiet.) K puo nɑ ji boi’ɔ ɑ: «A tie *Suif nilɔ e, k n mun tie Sɑɑmɑɑli puo e, k l tien nlee wɑɑ k ɑ tɑn mei’n nyun i?» (Suifnbɑ nɑ din tuu sinŋ Sɑɑmɑɑli niib e, k k luon bii tɑɑnt nɑn’m.) K Yiesu din jiin’ɔ ɑ: «L i tie k ɑ bo mi piini nbɑ k Yennu luon wun pi’ɑ nɑ, k biɑ mi mɑɑ tie wun nbɑ k mei’ɑ nyun nɑ, fin e bo sɑɑ boi’n nyun po k n sɑɑ tul’ɑ nyun nbɑ tien mɑnfuol.» K puo nɑ yet’ɔ ɑ: «Cɑnbɑɑ, bunbunn nɑ sumi hei, k ɑ mun biɑ k mɔk guokɑ. Lee k ɑ sɑɑ luun mɑnfuol nyun mɑnŋ i? T yejɑ Sɑɑkɔb din lukl bunbunn nɑ, k ŋuɑ nɑn u wɑɑs nɑn u bonkobt kul ɑ din nyu lenŋ e. A duki nɑn ɑ gɑl Sɑɑkɔb ɑmi?» K Yiesu yet’ɔ ɑ: «Wun nbɑ nyuu bunbunn nɑ nyun, nyun-nyuklu tɑn sɑɑ ŋɑnm suol’ɔ wɑɑ, ŋɑɑn mi i tul wun nbɑ n nyun nɑ k u nyuu, nyun-nyuklu kɑn mi k suol’ɔ jik, k mɑɑn mi i tul suɑ n nyun nɑ, l sii buni mɑnfuol nyun e u ni, k biɑ sɑɑ tul’ɔ mɑnfuol nbɑ kɑɑ gbennu.» K puo nɑ yet’ɔ ɑ: «Cɑnbɑɑ, tul’n l nyun, k nyun-nyuklu ji dɑɑ mi k so’n, k n biɑ ji dɑɑ mi k bɑɑt nnɑ k tɑn lu nyun.» K Yiesu yet’ɔ ɑ: «I sɑɑ k sɑɑ yiin ɑ sɔlɔ k jen nɑn’ɔ nɑ.» K u yet’ɔ ɑ: «N k mɔk sɔlɔ.» K Yiesu jiin’ɔ ɑ: «Fɑɑ yɑɑ ɑ ɑ k mɔk sɔlɔ nɑ, ŋɑnn ɑ mɔk mɔni, k mɑɑn ɑ ponŋ kun jɑb bɑnŋmu ɑ, k juɑ nbɑ k ɑ dɑɑ be nɑn’ɔ mɔtɑɑnɑ nɑ, u k tie ɑ sɔlɔ nɑn mɔni kɑɑ. A set pɑk mɔni e.» K puo nɑ yet’ɔ ɑ: «Cɑnbɑɑ, n ji bɑnn nɑn ɑ tie *Yennu sɔkni e. T yejɑnm din jiɑntl Yennu juɑl nɑ pɑɑk e, ŋɑɑn k yinm Suifnbɑ ŋɑnin yɑɑ ɑ Selusɑɑlenm e tie *siɑn nbɑ ŋɑn nɑn Yenjiɑntu.» K Yiesu yet’ɔ ɑ: «Cɑnnɑɑ, tient’n yɑdɑ, yuo bɑɑt k niib tɑn kii jiɑntl Bɑɑ Yennu juɑl nɑ pɑɑk, k biɑ tɑn kii jiɑntl’ɔ Selusɑɑlenm mun biɑk. Yinm Sɑɑmɑɑliitieb k mi yɑɑ jiɑntl wun nbɑ, ŋɑɑn tinm Suifnbɑ ŋɑnin mi tɑɑ jiɑntl wun nbɑ, k mɑɑn niib fielu nyii Suifnbɑ ni e. Ŋɑɑn yuo bɑɑt, k l ponŋ set bɑɑl nɑ, k bin nbɑ jiɑntl Bɑɑ Yennu nɑn bɑlmɔni nɑ sii jiɑntl’ɔ b pɑlɑ ni nɑn mɔni, k mɑɑn l nibuolu e k Yennu luon bii jiɑntl’ɔ nnɑ. Yennu tie siek e, k bin nbɑ jiɑntl’ɔ nɑ, l tie tɑlɑs e bii jiɑntl’ɔ b sei ni nɑn mɔni.» K puo nɑ yet’ɔ ɑ: «N mi nɑn Meesi (wun nbɑ k b yi’u *Klistu nɑ) tɑn sɑɑ bɑɑl nɑ. U i tɑnŋ i bɑɑl yuo nbɑ, u sɑɑ wɑnn’t mɑɑn kul ɑ.» K Yiesu jiin’ɔ ɑ: «Min e nɑ, min nbɑ piɑk nɑn’ɑ nɑ.» L yuo mɑnŋ e k Yiesu puolpoweitieb jen, k l tien’m bɑktnɔunŋ nɑn Yiesu nbɑ tɑn piɑk nɑn puo, ŋɑɑn b suɑ k boi ɑ: «A luon bee?» kuo: «Bee k ɑ tɑn piɑk nɑn puo o?». Ŋɑnn e k puo nɑ nyik u nyunsuɑl nɑ, ŋɑɑn ŋmɑt sɑɑn duo nɑ ni, k sɑɑ yiin niib ɑ: «I bɑɑl mɑn, k tɑn got juɑ nbɑ yet’n bonsiɑl kul nbɑ k n ponŋ mi tun. Pɑsiɑl u k tie Klistu kɑɑ ɑɑ?» Ŋɑnn e, k b nyii duo nɑ ni k sɑɑn Yiesu penŋ. Yuo nbɑ k puo nɑ dɑɑ din piɑk nɑn niib duo nɑ ni nɑ, k Yiesu puolpoweitieb bɑln’mɔ, k yɑɑ ɑ: «Cɑnbɑɑ, dimin jiet.» K Yiesu jiin’m yɑɑ ɑ: «Min mɔk jiet nbɑ k n sɑɑ di, ŋɑɑn k i k mi l po.» K u puolpoweitieb ji boi b lieb ɑ: «I mi suɑ tɑn sii tul’ɔ jiet i?» K Yiesu jiin’m: «Min yɑɑ jiet tie mɑn cɔln wun nbɑ tun’n nɑ lonm e, k biɑ tun tuonn nbɑ k u tul’n nɑ gbenn.» «B tuu k yet ɑ: ‹L tenn ŋmɑɑli ŋɑnnɑ e nɑn bin jɑɑn dii ii?› Ŋɑɑn min ŋɑnin yien’i e, gotl mɑn. Dii biel ɑ; k l jɑnŋ nɑn bin jɑɑn ɑ. Dijɑɑntieb lɑɑt b pɑɑɔk o, k tiki dibin nbɑ sɑɑ lɑ mɑnfuol nbɑ kɑɑ gbennu k ŋɑnn e sɑɑ te k wun nbɑ buul nɑn wun nbɑ jɑɑn dii mɑnŋ sii mɔk pɑlpienn. T mɔk bɑljouk, k l yiin ɑ: ‹Yenɔ e buul, k luɑ mun jɑɑn,› k l set tie mɔni. Min tun’i ɑ yin jɑɑn dii siɑn nbɑ k i k kuo. Siɑb e ponŋ kuo wɑɑ, k i mun lɑɑt nyuɑt b tuonn pɑɑk.» Sɑɑmɑɑli duo mɑnŋ ni niib bonciɑnn gbɑt puo nɑ nbɑ yien’m yɑɑ ɑ: «U yet’n bonsiɑl kul nbɑ k n ponŋ mi k tun,» k b tien Yiesu yɑdɑ. Ŋɑnn e, bɑɑ bɑɑl bunbunn nɑ buol ni Yiesu penŋ, k b bɑln’mɔ ɑ wun biɑl kii be nɑn’m. K Yiesu sɑk k biɑl be nɑn’m dɑɑ ŋɑnle, k u mɑɑn nɑ pɑɑk k b bonciɑnn din tien’ɔ yɑdɑ k pukn. L yuo nɑ k b yet puo nɑ: «Tɑɑ tien’ɔ yɑdɑ mɔtɑɑnɑ nɑ, l k tie fɑɑ yien’t u po nɑ kuukuɑ kɑɑ, ŋɑɑn tɑɑ gbɑt u mɔnŋ mɔnŋ mɑɑn nɑ pɑɑk e k t tien’ɔ yɑdɑ, k bɑnn nɑn ŋuɑ e set tie tingbounŋ nɑ ŋɑɑtieb Fietuɑ.» L dɑɑ ŋɑnle puolpo e, k Yiesu nyii lenŋ k sɑɑn Gɑɑliile tinŋ ni. (U mɔnŋ mɔnŋ ponŋ yet ɑ: «Yennu sɔkni kɑn lɑ nibɑɑkl u mɔnŋ mɔnŋ duo ni.») Ŋɑɑn wɑɑ din bɑɑl Gɑɑliile yuo nbɑ, niib nɑ din gɑɑl’ɔ, k mɑɑn b mun dɑɑn sɑɑn *yuktgɑltiɑlu jɑɑnm Selusɑɑlenm, k lɑ lin nbɑ kul k u ponŋ tun Selusɑɑlenm ni jɑɑnm mɑnŋ yuo nɑ. Wɑɑ din lin Gɑɑliile tinŋ ni nɑ, k u din sɑɑn Kɑɑnɑ, siɑn nbɑ k u din te k nyun kpɑnt dɑmunŋ nɑ. K yudɑɑnsuɑ din be Kɑpelnɑunm, k u bijɑ din yiɑl. K wɑɑ din gbɑt ɑ Yiesu nyii Suude k bɑɑl Gɑɑliile tinŋ ni nɑ, k u bɑɑl u penŋ, k bɑln’mɔ ɑ wun bɑɑl Kɑpelnɑunm, ɑ k tɑn te k u bijɑ n pɑɑk, k mɑɑn u yɑɑ wun kpo e. K Yiesu yet’ɔ ɑ: «L i tie k i k lɑ nyinɑ nɑn bɑktnɔunŋ tuonjɑɑnɑ ii kɑɑ, i kɑn tien’n yɑdɑ.» K yudɑɑnɔ nɑ jiin yet’ɔ ɑ: «Cɑnbɑɑ, ŋɑɑnt tin sɑɑn, k n bik dɑɑ k kpo nɑ.» K Yiesu yet’ɔ ɑ: «I kun. A bijɑ nɑ pɑɑk ɑ.» Ŋɑnn e k yudɑɑnɔ nɑ tien yɑdɑ nɑn Yiesu nbɑ pɑk’ɔ lin nbɑ mɑnŋ, k ji ŋmɑt kun. U sɔnu ni e k u tuontunnɑ cet’ɔ nɑn lɑbɑɑl ɑ: «A bik nɑ pɑɑk ɑ.» K u boi’b ɑ: «Nlee yuo e k bik mɑnŋ pɑɑk i?» K b yet’ɔ ɑ: «Wonn, kut yonm yenlekl, k bik nɑ gbɑnu won mɑɑk.» K juɑ nɑ tiɑl nɑn l yuo e tie yuo nbɑ k Yiesu won yet’ɔ ɑ: «A bijɑ nɑ pɑɑk ɑ,» nɑ. L pɑɑk k ŋuɑ nɑn u ŋɑɑtieb kul ɑ tien Yiesu yɑdɑ. Nɑ e tie bɑktnɔunŋ tuonjɑɑnn nbɑ pukn munle, yuo nbɑ k Yiesu nyii Suude tinŋ ni k bɑɑl Gɑɑliile. L puolpo e k *Suifnbɑ jɑɑnsiɑb tɑn bɑɑl, k Yiesu sɑɑn Selusɑɑlenm. Lenŋ e k biɑɔnŋ nɑn nyun din be, k bɑkt ŋɑnŋmu din cɑɑn lint ɑ, k Suifnbɑ mɑɑn ni, b din yi’l Betesdɑ, k l kpiɑ nɑn Pei Tɑnmɔb. K bɑɑtb bonciɑnn din tuu duɑ lenŋ, k siɑb tie juɑni, k siɑb mun tie diɑni, k siɑb mun tie gbɑnɑnkpienɑ dɑnm. (B tuu duɑ k guu nyun nɑ e, ɑ lin dɑnm. Yosɑu tuuk Yennu mɑlɑksuɑ tuu sik e k dɑnm nyun mɑnŋ. Yuo nbɑ k u dɑnm nyun mɑnŋ, k bɑɑtɔ nbɑ sint sik nyun nɑ ni, u yiɑlu tuu gbenn e.) Tɔn, k jɑsuɑ din be l buol, k din yiɑl binɑ piintɑ nɑn ŋɑnniin. K Yiesu tɑn bɑɑl lɑ k u duɑ l buol, k bɑnn nɑn juɑ mɑnŋ yiɑlu wei wɑɑ, k u boi’ɔ: «A luon k ɑ lɑ lɑɑfiɑ ɑɑ?» K bɑɑtɔ nɑ jiin ɑ: «Cɑnbɑɑ, nyun nɑ ii dɑnm yuo nbɑ, n k mɔk suɑ nbɑ sɑɑ jii’n sikn’n l ni. K mi i tuu yɑɑ n sik, suɑ tuu dɔnŋ k sik e, ŋɑɑn nyik’n.» K Yiesu yet’ɔ: «Fiit, k jii ɑ duɑnu kii sonm.» L tɑɑkpɑɑk ni k juɑ nɑ pɑɑk, k fiil k jii u duɑnu k sonm sɑɑ. Dɑɑl nbɑ k juɑ nɑ din lɑ lɑɑfiɑ nɑ din tie *Fuondɑɑl e. L pɑɑk e tien k Suifnbɑ yudɑnm din yet’ɔ ɑ: «Dinnɑ tie Fuondɑɑl e. T *senni k cɑb nɑn fɑn jii ɑ duɑnu kii sonm nɑn’n.» K u jiin ɑ: «Juɑ nbɑ te k n pɑɑk nɑ, ŋuɑ e yet’n ɑ n jii n duɑnu mɑnŋ kii sɑɑ nɑn’n.» K b boi’ɔ ɑ: «Jɑlɑnɔ po e yet’ɑ ɑ ɑ jii ɑ duɑnu mɑnŋ kii sɑɑ nɑn’n i?» Ŋɑɑn juɑ nɑ ji din k mi wun nbɑ din te k u pɑɑk jik, k mɑɑn Yiesu ji din ponŋ kuɑ nibul nɑ ni k juɑ nɑ ji k lɑ’u. L puolpo e k Yiesu ji lon juɑ nɑ, k tɑn lɑ’u Yennu jɑɑnti ŋɑsɑɑkɑk ni, k yet’ɔ ɑ: «Gotl, ɑ ji pɑɑk ɑ. A ji dɑɑ mi k tuun biit, nnɑ i kɑɑ siɑl ɑ bonbisiɑl tɑn sɑɑ bɑɑl’ɑ k gɑl nnɑ.» Yiesu nbɑ pɑk nɑn juɑ nɑ, k juɑ nɑ nyii k sɑɑn Suifnbɑ yudɑnm nɑ buol k sɑɑ yet’b ɑ: «Yiesu e te k n pɑɑk.» L pɑɑk te k yudɑnm mɑnŋ ji piin Yiesu muksuk, k mɑɑn wɑɑ te k juɑ nɑ pɑɑk Fuondɑɑl nɑ pɑɑk. Ŋɑɑn k Yiesu din yet’b ɑ: «N Bɑɑ tun tuun e, k n mun tuun nnɑ e.» L pɑɑk e k Suifnbɑ mɑnŋ ŋɑnm donn wutuol k luon bin kpi’u k gɑl sinsinn nɑ. B dukn nɑn l k tie wɑɑ biil Fuondɑɑl senni nɑ pɑɑk kuukuɑ kɑɑ, ŋɑɑn wɑɑ biɑ jii u mɔnŋ k yekn nɑn Yennu, k yɑɑ ɑ Yennu tie u Bɑɑ nɑ pɑɑk. Ŋɑnn e k Yiesu jiin k yet’b ɑ: «Bɑlmɔni e k n yien’i nɑ, Yennu Bijɑ k fit tuun siɑl u kuukuɑ. U lɑɑt u Bɑɑ nbɑ tuun lin nbɑ e, k mun tuun. Lin nbɑ kul k Bɑɑ mɑnŋ tuun nɑ, u Bijɑ mun tuun ŋɑnn e. K mɑɑn Bɑɑ mɑnŋ luon u Bijɑ, k wɑnt’ɔ lin nbɑ kul k u mɔnŋ mɔnŋ tuun. K u biɑ sɑɑ wɑnn’ɔ bɑktnɔunŋ tuonjɑɑnɑ wuu tuun, k lin gɑl lin nbɑ k i lɑ nɑ, k l sɑɑ tien’i bɑktnɔunŋ. Bɑɑ mɑnŋ nbɑ fiint kpienm k tien’m mɑnfuol nɑ, nnɑ e mun, k u Bijɑ nɑ mun sɑɑ tul bin nbɑ k u lukt’b nɑ mɑnfuol. «Bɑɑ mɑnŋ k bu suɑ buut, ŋɑɑn u cɑb u Bijɑ e, ɑ wuu bu niib buut, ɑ k suɑ kul i tien u Bijɑ bɑɑkl nɑn bɑɑ tien Bɑɑ mɑnŋ bɑɑkl biɑnŋ nbɑ. Wun nbɑ k tie u Bijɑ nɑ bɑɑkl, u biɑ k tien u Bɑɑ nbɑ tun’ɔ nɑ bɑɑkl. «Bɑlmɔni e k n yien’i nɑ, dɑɑnɔ nbɑ gbɑt n mɑɑn nɑ, k biɑ tien wun nbɑ tun’n nɑ yɑdɑ, ŋuɑ e mɔk mɑnfuol nbɑ kɑɑ gbennu, k Yennu kɑn bu u buut k biil’ɔ. U biɑ ponŋ nyii kuun nuu ni wɑɑ, k be mɑnfuol mɑnŋ ni e. «Bɑlmɔni e k n yien’i nɑ, yuo bɑɑt, k l ponŋ bɑɑl ɑ, k kpienm tɑn sɑɑ gbɑt Yennu Bijɑ kunkɔl, k bin nbɑ gbɑt kunkɔl mɑnŋ sii be mɑnfuol ni. Bɑɑ mɑnŋ nbɑ yen mɑnfuol k tien niib nɑ, nnɑ e mun k u cɑb ɑ u Bijɑ mun i yen mɑnfuol kii tien niib, k u biɑ cɑb’ɔ yiikuo ɑ wuu bu niib buut, k mɑɑn u Bijɑ tie *Nisɑɑlk Bijɑ e. I dɑɑ te k l tie’i yɑɑl-lituk u. Yuo bɑɑt k kpienm kul tɑn sɑɑ gbɑt Yennu Bijɑ kunkɔl, k fiil. Bin nbɑ tun bonŋɑnn, b tɑn sɑɑ fiil k be b mɑnfuol ni, ŋɑɑn bin nbɑ mun tun bonbiil nɑ mun tɑn sɑɑ fiil, k u sɑɑ bu b buut k biil’b. «N kɑn fit tun siɑl n mɔnŋ. Mi i bu nilɔ buut biɑnŋ nbɑ, Yennu e tuu yet’n ɑ n bu. L pɑɑk e tien k n buut ŋɑn, k mɑɑn n k luon k n tun n mɔnŋ yɑnbuɑtuonɑ kɑɑ, ŋɑɑn n tuun Yennu nbɑ tun’n nɑ yɑnbuɑtuonɑ e.» «N pinpɑɔk nɑ e wɑnt mɑɑ tie wun nbɑ, ŋɑɑn l k mɔk nyuɑt. Ŋɑɑn suɑ e be wɑɑ, k piɑk wɑnt niib mɑɑ tie wun nbɑ, k n mi nɑn wɑɑ piɑk n po mɑnŋ, l tie bɑlmɔni e. «Tɔn, i tun i niib Sɑn buol, k u jii l bɑlmɔni k tul’i. L k kpɑɑ tɑlɑs kɑɑ nɑn nilɔ n pɑk n po, ŋɑɑn n yien’i lin nbɑ nɑ e ɑ yin lɑ fielu. Sɑn mɑnŋ dɑɑn tie nɑn fitl nbɑ k b tuu juo, k l yentu nyɔkt nɑ e, k i dɑɑn jii yuo wɑɑnm-nnɑ k niɑn u yentu mɑnŋ. «Ŋɑɑn siɑl be k wɑnt n *siɑlɑ k cie Sɑn *siɑlɑ nɑ k mɑɑn bɑktnɔunŋ tuonjɑɑnɑ nbɑ k n Bɑɑ mɑnŋ yɑɑ mii tuun, k n biɑ tuun nɑ, ŋɑnn e wɑnt nɑn Bɑɑ mɑnŋ tun’n. Bɑɑ mɑnŋ wɑnt n *siɑlɑ. I k mi gbɑt u kunkɔl, k biɑ k mi lɑ’u nɑn i ninbinɑ, k u mɑɑn biɑ kɑɑ i pɑlɑ ni, k mɑɑn i k tien wun nbɑ k u tun’ɔ nɑ yɑdɑ. «Tɔn, i lek tuu lii Yennu lolkpel kɑdɑɑɔk nɑ, k mɑɑn i tuu duki mi ɑ mɑnfuol nbɑ kɑɑ gbennu be lenŋ e, k Yennu lolkpel kɑdɑɑɔk mɑnŋ wɑnt n po, ŋɑɑn k i lek yet nɑn k i bɑɑl n penŋ k n tul’i mɑnfuol mɑnŋ. «N k luon nisɑɑlk pɑku, ŋɑɑn n mi i po nɑn i k luon Yennu i pɑlɑ ni fɑb ɑ. N bɑɑl n Bɑɑ sɑnn ni e, k i k gɑɑl’n. Ŋɑɑn l i tie k suɑ bɑɑl u mɔnŋ sɑnn ni, i tuu gɑɑl’ɔ e. I tuu luon k i gɑɑl i lieb pɑku e, ŋɑɑn i tuu k luon bɑnnu nbɑ k i sɑɑ lɑ Yennu nbɑ tie Yen-yenml nɑ pɑku. Nlee k i mun sɑɑ fit tien’n yɑdɑ? I dɑɑ duki nɑn n sɑɑ tɑɑl’i n Bɑɑ buol. Muois tie wun nbɑ sɑɑ tɑɑl’i. Ŋuɑ e tie wun nbɑ k i dɑɑn u po nɑ. I setk i bo i tien Muois diɑni yɑdɑ, i bo sɑɑ tien’n yɑdɑ wɑɑ mun, k mɑɑn u din diɑn pɑk n po e. Ŋɑɑn yɑɑ k tien wɑɑ din diɑn lin nbɑ mɑnŋ yɑdɑ nɑ, nlee k i ji sɑɑ tien n mɑɑn yɑdɑ?» L puolpo k Yiesu ŋmɑt puot Gɑɑliile mɔkgbenŋl nbɑ k b biɑ yi’l Tiibeliɑt mɔkgbenŋl nɑ puotl. K nibulciɑɔnŋ din wɑɑ u puolpo, k mɑɑn b din lɑ u bɑktnɔunŋ tuonjɑɑnɑ nbɑ k u din tuun k te k bɑɑtb pɑɑk nɑ. K Yiesu din duo juɑl pɑɑk k sɑɑ kɑl nɑn u *puolpoweitieb. L yuo k suɑ k Juifnbɑ *yuktgɑltiɑlu jɑɑnm pel nɑ. Yiesu nbɑ din kɑl mɑnŋ nɑ, k u tɑn got lɑ k nibulciɑɔnŋ bɑɑt u penŋ. K u tɑn boi Fiiliip ɑ: «T sɑɑ lɑ jiet lee k dɑɑ, k dinn niib nɑ kul i?» U din boi nnɑ mɑnŋ k luon wun bikn Fiiliip e, ŋɑɑn ŋuɑ ŋɑnin ponŋ din mi wɑɑ sɑɑ tun lin nbɑ e wɑɑ. K Fiiliip jiin ɑ: «T i yɑɑ t dɑɑ pɑɑnu k tul niib nɑ, l sɑɑ fit di nɑn denienbɑ kobi ŋɑnle (200) nɑ wɑɑ, k suɑ kul n fit lɑ wɑɑn.» K u puolpoweitelieb ni yenɔ nbɑ k b yi u sɑnn Andle, wun nbɑ din tie Siimɔn Piɑl ninjɑ nɑ, yet Yiesu ɑ: «Bisiɑk e be nnɑ k mɔk pɑɑni ŋɑnŋmu nɑn jɑni ŋɑnle. Ŋɑɑn l sɑɑ tien nlee k jɑnŋ nɑn nibul nɑ kul i?» K Yiesu yet’b ɑ: «Ŋɑɑnt mɑn k niib mɑnŋ n kɑl.» Pɑɑnu din be k mɔk mɔpɑɑɔnŋ lenŋ, k jɑb nɑ din kɑl, k b din tie nɑn tusɑ ŋɑnŋmu nɑ. K Yiesu jii pɑɑnu nɑ, k tul Yennu niipuouk, ŋɑɑn te k b tol niib nbɑ kɑl mɑnŋ, k u biɑ jii jɑni nɑ k tien nnɑ, k b kul ɑ din dii k sɑɑ jɑnŋ bɑɑ luon biɑnŋ nbɑ. Bɑɑ gbuo yuo nbɑ, k u yet u puolpoweitieb ɑ bin lɑkn jiet nbɑ tenn nɑ, ɑ k l dɑɑ biil. K b lɑkn pɑɑni ŋɑnŋmu bulɑ nbɑ k nibul nɑ dii ŋɑɑn tenn nɑ, k gbien kpɑncubt piik nɑn ŋɑnle. Niib mɑnŋ nbɑ lɑ bɑktnɔunŋ tuonjɑɑnn nbɑ k Yiesu tun nɑ, k b yet ɑ: «Bɑlmɔni e setk, nilɔ nɑ e tie *Yennu sɔkni nbɑ din tɑn sɑɑ bɑɑl tingbounŋ nɑ ni nɑ.» K Yiesu ji bɑnn nɑn b yɑɑ bin suol’ɔ k din’ɔ nɑɑn e. L pɑɑk e te k u nyik’b ŋɑɑn ŋmɑt juɑl pɑɑk u kuukuɑ, k sɑɑ be. Dɑɑjuouk nbɑ tɑn bɑɑl, k Yiesu puolpoweitieb sik sɑɑn mɔkgbenŋl ni, k sɑɑn kuɑ bulgbetl k kɑn sɑɑ, k sɑɑ puotl mɔkgbenŋl nɑ, k tuok Kɑpelnɑunm. L yuo nɑ din tie nyiɑɔk o, k Yiesu dɑɑ k bɑɑl b buol. K wonpɑɑluk tɑn fikt k dɑ nyun nɑ pɑɑk. Yuo nbɑ k u puolpoweitieb kɑn sɑɑn nɑn kiiluomiɑtɑ ŋɑnŋmu ɑmi ŋɑnluob nɑ, k b lɑ Yiesu sonm nyun pɑɑk k tuokt bulgbetl mɑnŋ, k jɑŋmɑɑni ji suol’b. K Yiesu yet’b: «I dɑɑ tiin jɑŋmɑɑni mɑn. Min e.» Ŋɑnn e, k b luon bin jii’u k kuɑn’ɔ bulgbetl nɑ ni, ŋɑɑn k l tɑɑkpɑɑk ni k bulgbetl sie bɑɑ sɑɑ siɑn nbɑ nɑ gbingbɑnn. Lɑɑ yent yuo nbɑ nɑ, niib nbɑ din biɑl mɔk-puotl po nɑ, lɑ nɑn bulgbetyenn kuɑ won be. B mi nɑn Yiesu won k kuɑ bulgbetl nɑn u puolpoweitieb ŋɑɑn k ŋɑnm e won fiil k sɑɑn b kuukuɑ. Bulgbetliɑ biɑ nyii Tiibeliɑt k bɑɑt k pel siɑn nbɑ niib won dii jiet nbɑ k Yonmdɑɑnɔ won tul Yennu niipuouk l pɑɑk nɑ. Nibulciɑɔnŋ nɑ nbɑ lɑ nɑn Yiesu kɑɑ lenŋ nɑ, k u puolpoweitieb biɑ kɑɑ nɑ, k b sɑɑn kuɑ bulgbetɑ nɑ ni, k sɑɑn Kɑpelnɑunm, ɑ bin sɑɑ lon’mɔ. Niib nɑ nbɑ din puot mɔkgbenŋl mɑnŋ nɑ, k b lɑ Yiesu, k boi’ɔ ɑ: «Cɑnbɑɑ, ɑ bɑɑl nnɑ nlee yuo e?» K Yiesu yet’b: «Bɑlmɔni e k n yien’i nɑ, mɑɑ won tul’i jiet k i dii k gbuo nɑ e, ŋɑnn e te k i luon’n mɑnŋ, ŋɑɑn l k tie yɑɑ lɑ n bɑktnɔunŋ tuonjɑɑnɑ nɑ kɑɑ. I dɑɑ tuun tuonn jiet nbɑ sɑɑ fit biil pɑɑk, ŋɑɑn ii tuun tuonn jiet nbɑ tien niib mɑnfuol nbɑ kɑɑ gbennu pɑɑk. *Nisɑɑlk Bijɑ sɑɑ tul’i l jebuolu, k mɑɑn u Bɑɑ Yennu dɔk’ɔ u dɔuk k l wɑnn nɑn Bijɑ mɑnŋ mɔk u Bɑɑ yiikuo.» Ŋɑnn e k b boi’ɔ ɑ: «T sɑɑ tien nlee k fit tun tuonɑ nbɑ k Yennu luon nɑ?» K Yiesu jiin’m ɑ: «Tuonn nɑ e k Yennu luon k yii tuun, ɑ yin tien wun nbɑ k u tun’ɔ nɑ yɑdɑ.» K b biɑ boi’ɔ ɑ: «Bɑktnɔunŋ tuonjɑɑnlɑnn po e k ɑ sɑɑ tun k wɑnn’t, k tin lɑ k tien’ɑ yɑdɑ? Tuonlɑnn po e k ɑ sɑɑ tun i? T yejɑnm nbɑ din be muuk ni yuo nbɑ nɑ, b din tuu di jiet nbɑ k b yi’l mɑnn nɑ, nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ, ɑ: ‹U din tien’m pɑɑnu nbɑ nyi *Yendɔunŋ ni nɑ ɑ bii di.› » K Yiesu yet’b ɑ: «Bɑlmɔni e k n yien’i nɑ, l k tie Muois kɑɑ tul’i pɑɑnu mɑnŋ, ŋɑɑn n Bɑɑ e tie wun nbɑ tul’i mɔmɔnm pɑɑnu nbɑ nyi Yendɔunŋ ni nɑ. Pɑɑnu nbɑ k Yennu jii tien’i mɑnŋ, ŋɑnn e tie wun nbɑ nyii Yendɔunŋ ni k tien tingbounŋ nɑ ŋɑɑtieb mɑnfuol.» K b yet’ɔ ɑ: «Cɑnbɑɑ, ii tien’t pɑɑnu nɑ dɑɑl kul.» K u yet’b ɑ: «Min e tie mɑnfuol pɑɑnu mɑnŋ. Dɑɑnɔ nbɑ bɑɑl n buol ni, kon kɑn mi k suol l dɑɑnɔ, k wun nbɑ mun tien’n yɑdɑ, nyun-nyuklu kɑn mi k suol’ɔ. «Ŋɑɑn n ponŋ yet’i nɑn i lɑ’n ɑ, ŋɑɑn k k tien’n yɑdɑ. Wun nbɑ kul k n Bɑɑ mɑnŋ jii’u k tul’n nɑ, sɑɑ bɑɑl n buol ni, k n kɑn mi bel wun nbɑ bɑɑl n buol ni, k mɑɑn n nyii Yendɔunŋ ni k sik nɑ mɑɑ n tun wun nbɑ tun’n nɑ yɑnbuɑtuonn e, ŋɑɑn l k tie n mɔnŋ mɔnŋ yɑnbuɑt kɑɑ. Wun nbɑ tun’n nɑ lonm tie nnɑ e, ɑ n dɑɑ buont bin nbɑ k u tul’n nɑ nɑn yenɔ kuukuɑ wɑɑ, ŋɑɑn tɑn fiin’m kuun ni tingbounŋ cincɑɑtdɑɑl. Nnɑ e k n Bɑɑ Yennu luon, ɑ wun nbɑ lɑ u Bijɑ k tien’ɔ yɑdɑ, u sɑɑ lɑ mɑnfuol nbɑ kɑɑ gbennu, k n tɑn sɑɑ fiin’m kuun ni tingbounŋ cincɑɑtdɑɑl.» Ŋɑnn e k *Suifnbɑ mɑnŋ ji buln buln nɑn lieb, ɑ k mɑɑn wɑɑ yɑɑ ɑ ŋuɑ e tie pɑɑnu nbɑ nyii Yendɔunŋ ni nɑ pɑɑk. K b boi lieb ɑ: «U k tie Yiesu wun nbɑ tie Suosiɑf bijɑ nɑ kɑɑ nɑ ɑɑ? T mi u bɑɑ nɑn u nɑɑ. Nlee k u yɑɑ ɑ u nyii Yendɔunŋ ni?» K Yiesu jiin k yet’b ɑ: «I dɑɑ buln nɑn lieb mɑn. Suɑ kɑn fit k bɑɑl n buol ni k tien n yuɑ, k l k tie k Bɑɑ mɑnŋ nbɑ tun’n nɑ kɑɑ te k u bɑɑl, k n tɑn sɑɑ fiin l dɑɑnɔ kuun ni tingbounŋ cincɑɑtdɑɑl. *Yennu sɔkniinbɑ din diɑn ɑ: ‹Yennu sɑɑ tumi suɑ kul.› Bin nbɑ kul gbiintl Bɑɑ mɑnŋ k biɑ gbiɑ, ŋɑnm e sɑɑ bɑɑl n penŋ. L k tie suɑ mi lɑ Bɑɑ mɑnŋ sie wun nbɑ nyii u buol ni, ŋuɑ kuukuɑ e lɑ’u. «Bɑlmɔni e k n yien’i nɑ, dɑɑnɔ nbɑ tien’n yɑdɑ, ŋuɑ e mɔk mɑnfuol nbɑ kɑɑ gbennu. Min e tie mɑnfuol pɑɑnu nɑ. Yuo nbɑ k i yejɑnm din tuu be muuk ni nɑ, b din tuu di mɑnn mɑnŋ, ŋɑɑn b kpo wɑɑ. Ŋɑɑn pɑɑnu nbɑ nyi Yendɔunŋ ni nɑ be nnɑ, k wun nbɑ dii’l, u kɑn kpo. Min e tie mɑnfuol pɑɑnu mɑnŋ nbɑ nyii Yendɔunŋ ni nɑ k sik. L i tie k suɑ dii pɑɑnu mɑnŋ, u sii be nɑn yuo nbɑ kɑɑ gbennu. Pɑɑnu nbɑ k n sɑɑ tul tie n gbɑnɑnt e, k n tɑn sɑɑ tul’l ɑ tingbounŋ ŋɑɑtieb n lɑ mɑnfuol.» Ŋɑnn e k mɔniɑɔk fiil Suifnbɑ mɑnŋ sinsuuk ni, k b boi b lieb: «Nlee k juɑ nɑ sɑɑ tul’t u gbɑnɑnt k tin di i?» K Yiesu yet’b ɑ: «Bɑlmɔni e k n yien’i nɑ, sie k i ŋmɑn Nisɑɑlk Bijɑ gbɑnɑnt, k biɑ nyuu u sɔn. Nnɑ e kɑɑ, i kii mɔk mɑnfuol mɑnŋ i ni. K dɑɑnɔ nbɑ ŋmɑn n gbɑnɑnt k biɑ nyuu n sɔn, u mɔk mɑnfuol nbɑ kɑɑ gbennu, k n tɑn sɑɑ fiin’ɔ kuun ni tingbounŋ cincɑɑtdɑɑl. K mɑɑn n gbɑnɑnt tie jiet nɑn bɑlmɔni, k n sɔn mun tie dɑɑn nɑn bɑlmɔni. Dɑɑnɔ nbɑ ŋmɑn n gbɑnɑnt, k biɑ nyuu n sɔn, ŋuɑ e be n ni, k n mun be u ni. «Bɑɑ mɑnŋ nbɑ yen mɑnfuol nɑ tun’n, k l pɑɑk k n mun mɔk mɑnfuol, nnɑ e mun, wun nbɑ ŋmɑn n gbɑnɑnt nɑ, n pɑɑk k u sii mɔk mɑnfuol mɑnŋ. Nɑ e tie pɑɑnu nbɑ nyii Yendɔunŋ ni k sik. L k nɑɑn nɑn lin nbɑ k i yejɑnm din di muuk ni k biɑ kpo nɑ kɑɑ, ŋɑɑn wun nbɑ di pɑɑnu mɑnŋ sii be nɑn yuo nbɑ kɑɑ gbennu.» Yiesu e din pɑk lin nbɑ nɑ, wɑɑ dɑɑ din be Kɑpelnɑunm, Suifnbɑ jɑɑnti dieok ni, k tumi niib nɑ. Yiesu puolpoweitieb bonciɑnn nbɑ din gbɑt u wɑnnu mɑnŋ, k b yien b lieb ɑ: «Wɑnnu nɑ pɑɑl bonciɑnn. Ŋmee sɑɑ fit gɑɑl’l i?» Yiesu din bɑnn nɑn u puolpoweitieb nɑ mɔk bunbulmi u wɑnnu mɑnŋ pɑɑk. L pɑɑk, k u boi’b ɑ: «Mɑɑn mɑnŋ kpɑɑ i kpiɑni ee? L i tie k i lɑ Nisɑɑlk Bijɑ do Yendɔunŋ ni siɑn nbɑ k u din tuu be nɑ, i ji sii duki nlee? Foŋɑnm e tien niib mɑnfuol. Gbɑnɑnt nɑ tie yɑnn e. Mɑɑn nbɑ k n pɑk’i nɑ e tie Foŋɑnm nɑn mɑnfuol. Ŋɑɑn i siɑb lek k tien’n yɑdɑ.» Yiesu din pɑk’b lin nbɑ nɑ, k mɑɑn u ponŋ mi sinsinn bin nbɑ tɑn kɑn tien’ɔ yɑdɑ, nɑn wun nbɑ mun tɑn sɑɑ kuɑt’ɔ. K u biɑ ŋɑnm yet ɑ: «L pɑɑk e te k n yien’i ɑ suɑ kɑn fit bɑɑl n buol ni, sie k Bɑɑ mɑnŋ e cɑb’ɔ.» L yuo nɑ k ji sɑɑ, k u puolpoweitieb bonciɑnn ji din ŋmɑt puol, k ji k tɔki nɑn’ɔ. Ŋɑnn e k u din boi u tuomiinbɑ *piik nɑn bɑnle nbɑ nɑ ɑ: «K i mun sɑɑ nyik’n ɑɑ?» K Siimɔn Piɑl jiin yet’ɔ ɑ: «Yonmdɑɑnɔ, k t mun ji sɑɑ nyik’ɑ ŋɑɑn sɑɑn ŋmee buol i? Fin e mɔk mɑɑn nbɑ tien niib mɑnfuol nbɑ kɑɑ gbennu. T tien’ɑ yɑdɑ wɑɑ k mi nɑn fin e tie Yennu niŋɑnɔ.» K Yiesu yet’b ɑ: «Yinm jɑb piik nɑn bɑnle nɑ, min kɑɑ lukt’i ni ii? Ŋɑɑn k i ni yenɔ tie *Sɑɑtɑn yuɑ.» (U din yien Suudɑ wun nbɑ tie Siimɔn Iskɑɑliɑɔt bijɑ nɑ po e. Ŋuɑ e din tie u tuomiinbɑ piik nɑn bɑnle nɑ ni yenɔ, ŋɑɑn lek yɑɑ wun kuɑt’ɔ.) L kul nɑ puolpo e k Yiesu ji din be Gɑɑliile tinŋ ni, ŋɑɑn lin lenŋ digbɑnɑ ni. U din k luon wuu lin Suude tinŋ ni, k mɑɑn *Suifnbɑ yudɑnm din luon bin kpi’u. Suifnbɑ jɑɑnm nbɑ k b yi’l lɑnbont jɑɑnm nɑ tɑn pel. K Yiesu ninjɑnm yet’ɔ ɑ: «Nyikn nnɑ, ŋɑɑn sɑɑn Suude tinŋ ni, k ɑ *puolpoweitieb n lɑ tuonɑ nbɑ k ɑ tuun nɑ. L i tie k suɑ luon wun wɑnn niib wɑɑ tie wun nbɑ, l k ŋɑn k wun bɔl tuonɑ nbɑ k u tuun. K mɑɑn fɑɑ tuun tuonɑ mɑnŋ nɑ, l ŋɑn fɑn wɑnn niib tuonɑ mɑnŋ pɑɑnu ni.» (U ninjɑnm nɑ lek din k tien’ɔ yɑdɑ.) K Yiesu jiin’m ɑ: «N yuo dɑɑ k bɑɑl, ŋɑɑn yinm ŋɑnin sɑɑ fit sɑɑn yuo nbɑ kul k i luon. Tingbounŋ nɑ ŋɑɑtieb kɑn fit nɑn’i, ŋɑɑn min ŋɑnin b nɑn’n, k mɑɑn n yien’m nɑn b tuonɑ bi. Tɔn, yinm i sɑɑ jɑɑnm mɑnŋ, ŋɑɑn min ŋɑnin dɑɑ k sɑɑ, k mɑɑn n sinsɑɑn-yuo dɑɑ k bɑɑl.» Wɑɑ wɑnn’b nnɑ k gbenn yuo nbɑ, k u biɑl Gɑɑliile. Yiesu ninjɑnm nɑ nbɑ din sɑɑn jɑɑnm nɑ, k l puolpo k Yiesu mun tɑn wei k sɑɑn. U din k sɑɑn pieee pieee kɑɑ, ŋɑɑn u din bɔl e k sɑɑn. K Suifnbɑ yudɑnm din lin k luon’ɔ jɑɑnm mɑnŋ ni, k boi niib ɑ: «U be lee?» K niib bonciɑnn nbɑ be lenŋ nɑ lɔkn k piɑk bonciɑnn k jikt sɑɑ u po, k siɑb yɑɑ ɑ: «U tie niŋɑnɔ e,» k lieb yɑɑ ɑ: «Aɑi, u kpɑnn niib nɑ e,» ŋɑɑn suɑ din k pɑk u po pɑɑnu ni, k mɑɑn b tiin Suifnbɑ yudɑnm jɑŋmɑɑni e. K jɑɑnm nɑ yuo sinsuuk ni, k Yiesu sɑɑn kuɑ Yennu jɑɑnti ŋɑsɑɑkɑk ni, k piin k tumi niib. K l tien Suifnbɑ bɑktnɔunŋ, k b boi ɑ: «Nlee k nilɔ nɑ mɑntk mɔk yɑn nnɑ, ŋɑɑn k k kuɑ t sɑkul i?» K Yiesu yet’b ɑ: «Mɑɑ wɑnt wɑnnu nbɑ nɑ, l k tie n mɔnŋ mɔnŋ wɑnnu kɑɑ, ŋɑɑn l nyii Yennu wun nbɑ tun’n nɑ buol e. Wun nbɑ luon wun tun Yennu yɑnbuɑtuonɑ, ŋuɑ e sɑɑ bɑnn nɑn lin nbɑ k n piɑk k wɑnt nɑ nyii Yennu buol ɑmi n buol e. Dɑɑnɔ nbɑ piɑk u mɔnŋ mɔnŋ wɑnnu, ŋuɑ luon *yudɑnt k tien u mɔnŋ e. Ŋɑɑn wun nbɑ luon ɑ wun nbɑ tun’ɔ nɑ n lɑ yudɑnt, ŋuɑ e tie dɑɑnɔ nbɑ piɑk mɔmɔnm k fɑɑk kɑɑ u ni. «Muois kɑɑ din tul’i t *senni ii? Ŋɑɑn i suɑ k diɑ l *senni mɑnŋ. K bee k i luon k i kpi’n i?» K niib nbɑ nɑ yet’ɔ ɑ: «Nɑlnbiiuk be ɑ ni. Ŋmee yɑɑ wun kpi’ɑ ni?» K Yiesu jiin yet’b ɑ: «N tun bɑktnɔunŋ tuonjɑɑnyenn k l tien’i kul ɑ bɑktnɔunŋ. K mɑɑn Muois nbɑ din tul’i *punpotu sennu nɑ pɑɑk (ŋɑɑn Muois kɑɑ din piin, i yejɑnm e din piin) k i sɑɑk k poli punɑ *Fuondɑɑl. Tɔn, l i tie k i pot bonjɑbik Fuondɑɑl, ɑ i dɑɑ biil Muois *senni e, nlee k i donn wutuol n pɑɑk ɑ mɑɑ te k bɑɑtɔ pɑɑk Fuondɑɑl nɑ? Dɑɑ goli nilɔ nɑn-yel po k bu u buut, ŋɑɑn i tuu bu nɑn senni nbɑ wɑnt biɑnŋ nbɑ nɑ.» Ŋɑnn e k Selusɑɑlenm nisiɑb boi b lieb ɑ: «Juɑ nbɑ nɑ kɑɑ, k b yɑbi ɑ bin kpi’u nɑ ɑɑ? Gotl mɑn, u piɑk pɑɑnu ni, k suɑ mun biɑ k piɑk siɑl. T yudɑnm nɔk sii bɑnn ɑ ŋuɑ e tie *Klistu nɑ ɑmi? Ŋɑɑn t mi juɑ nɑ nbɑ nyii siɑn nbɑ. Klistu nɑ i tɑnŋ i bɑɑl, suɑ kɑn fit bɑnn wɑɑ nyii siɑn.» Yiesu nbɑ tumi niib nɑ Yennu jɑɑnti ŋɑsɑɑkɑk ni nɑ, k u tɑn pɑk sɑnpɑɑpo k yet’b ɑ: «I mi min k biɑ mi mɑɑ nyii siɑn. N k bɑɑl n mɔnŋ bɑɑlu kɑɑ. Ŋɑɑn dɑɑnɔ nbɑ tun’n nɑ, ŋuɑ e mɔk bɑlmɔni kul, k i k mi’u, ŋɑɑn min mi’u, k mɑɑn n tuu be u buol ni e, k ŋuɑ e tɑn tun’n nnɑ.» Ŋɑnn e k b din yɑbi ɑ bin suol’ɔ, ŋɑɑn k suɑ k suol’ɔ, k mɑɑn u suolu yuo dɑɑ din k bɑɑl. Ŋɑɑn k nibul nɑ ni niib bonciɑnn din tien’ɔ yɑdɑ, k boi b lieb ɑ: «Klistu nɑ i tɑnŋ i bɑɑl, u sii tuun bɑktnɔunŋ tuonjɑɑnɑ bonciɑnn k gɑl juɑ nɑ yɑl ɑɑ?» K Fɑɑliisiɑnnbɑ nbɑ din gbɑt niib nbɑ lɔkn lɔkn k piɑk nnɑ mɑnŋ Yiesu po nɑ, k ŋɑnm nɑn Yennu jɑɑnti yudɑnm din tun Yennu jɑɑnti ŋɑsɑɑkɑk sejenm ɑ bin sɑɑn k sɑɑ suol Yiesu. K Yiesu din yet nibul nɑ ɑ: «N sii be nɑn’i yuo wɑɑnm-nnɑ e, k l puolpo k n ŋmɑt k sɑɑn wun nbɑ tun’n nɑ penŋ. I tɑn sɑɑ lon n buol, ŋɑɑn i kɑn lɑ’n, k mɑɑn siɑn nbɑ k n tɑn sii be nɑ, i kɑn fit bɑɑl lenŋ.» K Suifnbɑ nɑ boi b lieb ɑ: «U yɑɑ wun tɑn sɑɑn lee, k t kɑn lɑ’u? U yɑɑ wun tɑn sɑɑn Glek doi ni siɑn nbɑ k Suifnbɑ be nɑ, kii sɑɑ kii wɑnt Glek tieb nɑ ɑmi ii? Wɑɑ yet ɑ t tɑn sɑɑ lon u buol ŋɑɑn kɑn lɑ’u, ɑ k biɑ tɑn kɑn fit sɑɑn siɑn nbɑ k u sii be nɑ, l pɑɑk tie bee?» Tɔn, k jɑɑnm mɑnŋ gbennu dɑɑl din tie dɑjɑɑnn e. L dɑɑl mɑnŋ e k Yiesu fiil set k pɑk sɑnpɑɑpo wɑɑ ɑ: «Wun nbɑ k nyun-nyuklu gbɑt’ɔ, wun bɑɑl n buol ni k tɑn nyu, k mɑɑn l diɑn Yennu lolkpel kɑdɑɑɔk ni ɑ: ‹Wun nbɑ tien’n yɑdɑ nɑ, mɑnfuol nyun sii tɔ nyunkpɑnɑ e k nyi u pɑl ni.› » Yiesu nbɑ din piɑk nɑ, l din wɑnt Foŋɑnm po e, k bin nbɑ din tien Yiesu yɑdɑ nɑ din tɑn sɑɑ lɑ Foŋɑnm mɑnŋ. L yuo nɑ dinn, Yennu dɑɑ din k tul niib Foŋɑnm mɑnŋ, k mɑɑn u dɑɑ din k donn Yiesu k tul’ɔ u yentsɑɑkɑl. Niib bonciɑnn nbɑ din be nigbounŋ nɑ ni k gbɑt k u yet nnɑ mɑnŋ, k b yet ɑ: «Juɑ nɑ set tie *Yennu sɔkni nɑn bɑlmɔni e,» k siɑb yɑɑ ɑ: «U tie Klistu e,» k lieb mun boi ɑ: «Nlee k Klistu sɑɑ nyi Gɑɑliile? Yennu lolkpel kɑdɑɑɔk k wɑnn ɑ Klistu nɑ tɑn sii tie * Dɑɑfiid yɑɑbuonn ee? K b biɑ tɑn sɑɑ mɑl’ɔ Betlehenm duo nbɑ din tie ŋuɑ Dɑɑfiid duo nɑ ni ee?» K niib nɑ ji suol bɔkt k mɑɑn Yiesu pɑɑk. K siɑb biɑ luon bin suol’ɔ, ŋɑɑn b ni suɑ k suol’ɔ. L puolpo e k sejenm nɑ ji ŋmɑt Yennu jɑɑnti yudɑnm nɑn Fɑɑliisiɑnnbɑ nɑ buol ni, k b boi’b ɑ: «Bee tien k i k jen nɑn’ɔ?» K sejenm nɑ jiin yet’b ɑ: «Suɑ dɑɑ k mi k pɑk mɑɑn nɑn juɑ nɑ mɑbuolu nbɑ k u piɑk nɑ.» K Fɑɑliisiɑnnbɑ nɑ boi’b ɑ: «K i mun biɑ nyik k u kpɑnn’i ni ii? I tɑn mi lɑ k t yudɑnm nɑn Fɑɑliisiɑnnbɑ suɑ tien’ɔ yɑdɑ ɑɑ? Ŋɑɑn nigbounŋ nɑ nbɑ k mi Yennu senni nɑ, mɔpol be b pɑɑk.» K yudɑnm mɑnŋ ni yenɔ e din tie Niikodenm, wun din sɑɑn ɑ wun sɑɑ lɑ Yiesu nɑ, k u yet’b ɑ: «T senni k cɑb’t ɑ tin bu nilɔ buut k biil’ɔ, ŋɑɑn dɑɑ k gbɑt u mɔb ni k bɑnn u biit.» K b boi’ɔ: «A mun tie Gɑɑliile nilɔ ee? Gotl Yennu lolkpel kɑdɑɑɔk ni. A sɑɑ lɑ nɑn Yennu sɔkni k mi nyii Gɑɑliile tinŋ ni.» L puolpo e k suɑ kul kun. Ŋɑɑn k Yiesu din duo *Oliifienbɑ jɑgbɑɑk pɑɑk. K l yent sɑn-nyɑpob ni, k u ŋmɑt kuɑ Yennu jɑɑnti ŋɑsɑɑkɑk ni, k niib bonciɑnn tikl bɑɑl kuɑ lint’ɔ, k u kɑl k tumi’b. Ŋɑnn e k *senniwɑntieb nɑn Fɑɑliisiɑnnbɑ bɑɑl nɑn puo nbɑ tun * boncuncontuonn, k te k u set Yiesu tuɑnn po, ŋɑɑn yet Yiesu ɑ: «Wɑntuɑ, t lɑ puo nɑ, k u tuun boncuncontuonn e, k t suol’ɔ l yuo nɑ. T *senni ni, Muois din senn ɑ l puobuolu ŋɑn k bin jɑɑt’ɔ tɑnɑ e k kpi’u. Fin ŋɑnin sɑɑ yet ɑ bee?» B din yet nnɑ, k luon bin kpɑl Yiesu e, k ji fit tɑɑl’ɔ. K Yiesu tibn ŋɑɑn jii u niibil k diɑn tinŋ ni. Bɑɑ biɑ lek sie k boi’ɔ buboit yuo nbɑ nɑ, k u tibt k yet’b ɑ: «Wun nbɑ k mi k tun biit, l dɑɑnɔ n sint jɑɑ’u tɑnsinsinn,» ŋɑɑn ŋɑnm tibn k diɑn tinŋ ni. Bɑɑ gbɑt k u yet nnɑ mɑnŋ, k b piin yɑt yenɔ yenɔ, k nikpelɑ nɑ dɔnŋ yɑt, ŋɑɑn k Yiesu biɑl, ŋuɑ nɑn puo nɑ, k u biɑ dɑɑ sie u tuɑnn po. K u tibt boi’ɔ: «Puo, b sɑɑn lee? Suɑ k biɑl ɑ wun bu ɑ buut biil’ɑ ni ii?» K u jiin ɑ: «Cɑnbɑɑ, suɑ k biɑl.» K Yiesu yet’ɔ ɑ: «N mun kɑn bu ɑ buut k biil’ɑ. Ii kun. A ji dɑɑ mi k tuun biit.» Yiesu biɑ ŋɑnm piɑk nɑn niib Yennu jɑɑnti ŋɑsɑɑkɑk ni, ɑ: «Min e tie tingbounŋ nɑ yentu, k dɑɑnɔ nbɑ wɑɑ’n, ŋuɑ ji kɑn mi sonm bunbɔnn ni ŋɑɑn u sii mɔk yentu nbɑ tien niib mɑnfuol.» K Fɑɑliisiɑnnbɑ nɑ biɑ yet’ɔ ɑ: «Fɑɑ piɑk k wɑnt ɑ mɔnŋ po nɑ, l tie yɑnn e.» K Yiesu jiin yet’b: «Mi i lek i piɑk k wɑnt n mɔnŋ po i e, ŋɑɑn mɑɑ yet lin nbɑ, l tie mɔni e, k mɑɑn min mi mɑɑ nyii siɑn nbɑ, k biɑ mi mɑɑ sɑɑ siɑn nbɑ. Yinm ŋɑnin k mi mɑɑ nyii siɑn. I biɑ k mi mɑɑ sɑɑ siɑn. Yinm goli nilɔ nɑn-yel po e k bu u buut, ŋɑɑn min ŋɑnin k bu suɑ buut. Mi i ponŋ i yɑɑ n bu nilɔ buut i e, n sɑɑ bu u buut nɑn bɑlmɔni e, k mɑɑn n k bu buut n kuukuɑ kɑɑ, ŋɑɑn n Bɑɑ nbɑ tun’n nɑ e be nɑn’n. Tɔn, l ponŋ diɑn i senni ni ɑ niib bɑnle *siɑlɑ i jɑnŋ nɑn liel, ŋɑnn i tie bɑlmɔni. N piɑk wɑnt n mɔnŋ po, k n Bɑɑ wun nbɑ tun’n nɑ mun biɑ piɑk wɑnt n po nnɑ e.» K b boi’ɔ ɑ: «A Bɑɑ mɑnŋ be lee?» K Yiesu pɑk jiin’m ɑ: «I k mi’n, k tɑn boi n Bɑɑ. I i bo i mi’n i e, i mun biɑ bo sii mi n Bɑɑ mɑnŋ.» Yiesu din pɑk mɑɑn nɑ yuo nbɑ k u din tumi niib, k b din be Yennu jɑɑnti ŋɑsɑɑkɑk ni siɑn nbɑ k b sent Yennu piini likli lɑkl nɑ, ŋɑɑn suɑ k suol’ɔ, k mɑɑn u suolu yuo dɑɑ k bɑɑl. K Yiesu biɑ ŋɑnm pɑk yet’b ɑ: «N sɑɑ yɑɑt ɑ, k i tɑn sɑɑ lon’n, ŋɑɑn i tɑn sɑɑ kpo i biit ni. I biɑ tɑn kɑn fit sɑɑn mɑɑ sɑɑ siɑn.» Ŋɑnn e k *Suifnbɑ nɑ yet ɑ: «U yɑɑ wun kpi u mɔnŋ ee? Ŋɑnn e te k u yɑɑ ɑ t kɑn fit sɑɑn wɑɑ sɑɑ siɑn ii?» K Yiesu jiin ɑ: «Yinm tie tinŋ nnɑ yɑb e, ŋɑɑn min tie sɑnpɑɑpo yuɑ e. Yinm nyii tingbounŋ nɑ ni e, ŋɑɑn min k nyii tingbounŋ nɑ ni kɑɑ. L pɑɑk e te k n yet’i mɑɑ i sɑɑ kpo i biit ni. L i tie k i k tien yɑdɑ nɑn n tie mɑɑ tie wun nbɑ nɑ, i set sɑɑ kpo i biit ni.» K b boi’ɔ ɑ: «Fin ŋmee?» K u jiin’m ɑ: «Pinpiik ni n din yet’i mɑɑ tie wun nbɑ wɑɑ. N bo sii fit piɑk mɑɑn bonciɑnn k biil’i, ŋɑɑn wun nbɑ tun’n nɑ e tie bɑlmɔni dɑɑnɔ, k n piɑk yien tingbounŋ nɑ niib lin nbɑ k n gbiɑ u buol nɑ.» Niib nɑ din k mi nɑn u piɑk u Bɑɑ po e. L pɑɑk k Yiesu yet’b ɑ: «Yuo nbɑ k i sɑɑ jii *Nisɑɑlk Bijɑ k donn’ɔ sɑnpɑɑpo nɑ, l yuo e k i tɑn sɑɑ bɑnn nɑn n tie mɑɑ tie wun nbɑ, k i biɑ sɑɑ bɑnn nɑn n k tuun siɑl nɑn n mɔnŋ mɔnŋ yiikuo, ŋɑɑn n biɑ yien lin nbɑ k n Bɑɑ wɑnn’n ɑ n tɑn yet e. K wun nbɑ tun’n nɑ e be nɑn’n. U k nyikt n kuukuɑ, k mɑɑn yuo kul n tuun lin nbɑ gbuot u nunm e.» Niib bonciɑnn nbɑ din gbɑt Yiesu nbɑ pɑk nnɑ mɑnŋ, k b tien’ɔ yɑdɑ. Ŋɑnn e k Yiesu yet Suifnbɑ nbɑ tien’ɔ yɑdɑ nɑ: «L i tie k i sɑɑk n mɑɑn, i set tie n *puolpoweitieb nɑn bɑlmɔni e, k i biɑ sɑɑ bɑnn bɑlmɔni, k bɑlmɔni mɑnŋ sɑɑ nyinn’i dɑɑbs ni.» K b yet’ɔ ɑ: «T tie Ablɑɑhɑɑnm yɑɑbuonɑ e, k t k mi k tien suɑ dɑɑbɑ. Nlee k ɑ yɑɑ ɑ t tɑn sɑɑ nyi dɑɑbs ni?» K Yiesu jiin k yet’b ɑ: «Bɑlmɔni e k n yien’i nɑ, suɑ kul nbɑ tuun biit, u tie biit dɑɑbl e. Dɑɑbl k tie ŋɑɑk yuɑ kɑɑ, ŋɑɑn ŋɑɑk bik ŋɑnin tie ŋɑɑk yuɑ e yuo kul. L i tie Bijɑ nɑ nyint’i dɑɑbs ni e, i set sɑɑ nyi dɑɑbs ni nɑn bɑlmɔni wɑɑ. N mi nɑn i tie Ablɑɑhɑɑnm yɑɑbuonɑ e, ŋɑɑn k i lek yɑbi ɑ i kpi’n, k mɑɑn n mɑɑn mɑnŋ k kuɑ i tubɑ ni. Mɑɑ tuu be n Bɑɑ penŋ k lɑɑt lin nbɑ, ŋɑnn e k n piɑk, ŋɑɑn yinm tuun lin nbɑ k i bɑɑ yet’i ɑ yii tuun nɑ e.» K b jiin’ɔ yɑɑ ɑ: «T bɑɑ tie Ablɑɑhɑɑnm e.» K Yiesu yet’b ɑ: «L i tie k i bo tie Ablɑɑhɑɑnm wɑɑs nɑn mɔni e, i bo sii tuun Ablɑɑhɑɑnm tuonbuolu nɑ e, ŋɑɑn k mɔtɑɑnɑ k i yɑbi ɑ i kpi’n, nɑn mɑɑ tie nilɔ nbɑ yien’i bɑlmɔni nbɑ k n gbɑt Yennu penŋ nɑ. Ablɑɑhɑɑnm din k tien nnɑ. Ŋɑɑn yinm tuun i bɑɑ nbɑ tuun biɑnŋ nbɑ e.» K b jiin yet’ɔ ɑ: «Tinm k tie kpen-k-ŋmiɑ kɑɑ. T mɔk bɑɑ yenɔ kuɑ e, k ŋuɑ e tie Yennu.» K Yiesu yet’b: «L i bo i tie k Yennu mɔnŋ tie i bɑɑ, i bo sii luon’n ɑ, k mɑɑn n nyii ŋuɑ Yennu penŋ e k bɑɑl nnɑ. N biɑ k bɑɑl nɑn n mɔnŋ mɔnŋ yiikuo kɑɑ, ŋɑɑn ŋuɑ e tun’n. Bee tien k i k bɑnn n mɑɑn nɑ pɑɑk i? K mɑɑn yɑɑ k fit gbɑt n mɑɑn mɑnŋ nɑ. I tie i bɑɑ *Sɑɑtɑn wɑɑs e, k luon k i tuun i bɑɑ mɑnŋ yɑnbuɑtuonɑ. Sinsinn u ponŋ din tie nikpiiluk o, k biɑ fɔk nɑn bɑlmɔni, k mɑɑn bɑlmɔni kɑɑ u ni nɑn wɑɑn ɑ. U i fɑɑl fɑɑk yuo nbɑ, l ponŋ tie u binbenŋ e, k mɑɑn wɑɑ tie fɑɑk dɑɑnɔ nɑ. Fɑi kul nyi u buol e. Ŋɑɑn mɑɑ yien’i bɑlmɔni nɑ e te k i k tien’n yɑdɑ. I ŋmee sɑɑ fit wɑnn n biit i? Mi i yet’i bɑlmɔni i e, bee tien k i k tien’n yɑdɑ? Wun nbɑ tie Yennu yuɑ, ŋuɑ e gbiintl lin nbɑ k Yennu piɑk, ŋɑɑn i k tie Yennu yɑb. Ŋɑnn e tien k i k gbiintl’l.» Ŋɑnn e k Suifnbɑ nɑ jiin k yet Yiesu ɑ: «Tɑɑ yet k yɑɑ ɑ tie *Sɑɑmɑɑli nilɔ, k nɑlnbiiuk biɑ be ɑ ni nɑ, l k tokn ii?» K Yiesu jiin ɑ: «Nɑlnbiiuk kɑɑ n ni. Min bɑɑkt n Bɑɑ, ŋɑɑn k yinm ŋɑnin siɑn’n. Ŋɑɑn n k luon nibɑɑkl k tien n mɔnŋ. Yenɔ e be k u luon bin tien’n nibɑɑkl, k ŋuɑ e tie buut dɑɑnɔ. Bɑlmɔni e k n yien’i nɑ, dɑɑnɔ nbɑ sɑɑk n mɑɑn, u kɑn mi k kpo.» K Suifnbɑ nɑ yet’ɔ ɑ: «Mɔtɑɑnɑ t set bɑnn nɑn nɑlnbiiuk be ɑ ni. Ablɑɑhɑɑnm din kpo wɑɑ, k *Yennu sɔkniinbɑ mun din kpo wɑɑ, ŋɑɑn k ɑ yɑɑ ɑ dɑɑnɔ nbɑ sɑɑk ɑ mɑɑn kɑn mi k kpo. T cɑnbɑɑ Ablɑɑhɑɑnm nbɑ din kpo nɑ, ɑ duki mi ɑ ɑ cie’u ee? Yennu sɔkniinbɑ mun biɑ din kpo wɑɑ. Fin duki mi ɑ ɑ tie ŋmee?» K Yiesu jiin’m ɑ: «Mi i bo i dontl n mɔnŋ i e, l bo sii tie yɑnn e. Wun nbɑ dontl’n tie n Bɑɑ e. ŋuɑ e tie dɑɑnɔ nbɑ k i yɑɑ ɑ u tie i Yennu nɑ. I k mi’u, ŋɑɑn min ŋɑnin mi’u. L i bo i tie k n yɑɑ ɑ n k mi’u, n bo sɑɑ tien fɑɑk dɑɑnɔ nɑn yinm nɑ wɑɑ. Ŋɑɑn n mi’u, k biɑ sɑɑk u mɑɑn. I cɑnbɑɑ Ablɑɑhɑɑnm din mɔk pɑlpienn bonciɑnn, k mɑɑn u yɑɑ wun tɑn lɑ yuo nbɑ k n sɑɑ sik tingbounŋ nɑ ni, k u set tɑn lɑ l yuo mɑnŋ ɑ, k l mɑnŋ’ɔ.» K Suifnbɑ nɑ boi’ɔ: «A dɑɑ k bɑɑl binɑ piinŋmu, ŋɑɑn tɑn lɑ Ablɑɑhɑɑnm ii?» K Yiesu jiin yet’b ɑ: «Bɑlmɔni e k n yien’i nɑ, bɑɑ din tɑn mɑɑl Ablɑɑhɑɑnm nɑ, ŋɑɑn suɑ k N Tie e.» Ŋɑnn e k b ji tɔki tɑnɑ ɑ bin jɑɑt’ɔ k kpi’u, k u bɔl k nyii Yennu jɑɑnti ŋɑsɑɑkɑk ni. L puolpo e k Yiesu din gɑɑl sɑɑ k tɑn lɑ juɑnŋ nnɑ, k u tie juɑnŋ u mɑɑlu ni wɑɑ. K u *puolpoweitieb boi’ɔ ɑ: «Cɑnbɑɑ, ŋmee biit e te k b mɑl juɑ nɑ juɑnŋ i? L dɑɑ tie u mɔnŋ biit ɑmi u dɑnm e?» K u jiin’m ɑ: «U biit pɑɑk kɑɑ te k u juɑn. L mun biɑ k tie u dɑnm biit pɑɑk kɑɑ. U juɑn ɑ niib n lɑ Yennu tuonɑ u ni e. Yuo nbɑ k yentu dɑɑ be nɑ, l kpɑɑ tɑlɑs e k tii tuun wun nbɑ tun’n nɑ tuonɑ nɑ, k mɑɑn nyiɑɔk bɑɑt, yuo nbɑ k suɑ kɑn fit tun tuonn. Mɑɑ dɑɑ be tingbounŋ nnɑ, n tie tingbounŋ nɑ niib yentu e.» Wɑɑ yet nnɑ mɑnŋ puolpo e k u siil mɔsɑnt tinŋ ni, ŋɑɑn buun tɑnt, k pɔl juɑnŋ nɑ ninbinɑ pɑɑk, K yet’ɔ ɑ: «Ii sɑɑ Siiloe biɑɔnŋ ni k sɑɑ yibl.» (Siiloe pɑɑk tie «t tun suɑ.») Ŋɑnn e k u sɑɑn k sɑɑ yibl, k nyuɑnt k kun. Ŋɑnn e k u kuɑnɑnlieb nɑn niib nbɑ tuu lɑɑt’ɔ k u mei likli nɑ boi b lieb ɑ: «Jɑjuɑnŋ nbɑ tuu mei nɑ kɑɑ nɑ ɑɑ?» K siɑb yɑɑ ɑ: «Ŋuɑ e,» k lieb yɑɑ ɑ: «Aɑi, l k tie ŋuɑ kɑɑ. U nɑɑn’ɔ e.» K juɑ mɑnŋ tiɑɔnŋ yet ɑ: «Min e nɑ.» K b boi’ɔ ɑ: «L tien nlee k ɑ ninbinɑ tɑn nyuɑnt i?» K u jiin’m ɑ: «Juɑ nbɑ k b yi’u Yiesu nɑ, ŋuɑ e buun tɑnt k jii k pɔl n ninbinɑ pɑɑk, ŋɑɑn yet’n ɑ mii sɑɑ Siiloe biɑɔnŋ ni k sɑɑ yibl. Ŋɑnn e k n sɑɑn k sɑɑ yibl k nyuɑnt.» K b boi’ɔ ɑ: «U be lee?» K u jiin k yet’b ɑ: «N k mi.» Jɑjuɑnŋ nɑ kuɑnɑnlieb nɑn niib nbɑ tuu lɑɑt’ɔ nɑ jii’u k sɑɑn nɑn’ɔ Fɑɑliisiɑnnbɑ buol. Dɑɑl nbɑ k Yiesu din buun tɑnt k nyuɑnt juɑnŋ nɑ, l dɑɑl din tie *Fuondɑɑl e. K Fɑɑliisiɑnnbɑ nɑ biɑ ŋɑnm boi juɑ nɑ, ɑ u tien nlee k nyuɑnt i? K u yet’b ɑ: «Yiesu e buun tɑnt, k jii k pɔl n ninbinɑ pɑɑk, k n yibl k nyuɑnt.» K Fɑɑliisiɑnnbɑ siɑb yet ɑ: «Yiesu k nyii Yennu buol ni kɑɑ, k mɑɑn u k sɑk Fuondɑɑl sennu.» K b siɑb mun boi ɑ: «Nlee k biitdɑɑnɔ sii fit tuun bɑktnɔunŋ tuonjɑɑnɑ nɑ buolu?» K bɔktu bɑɑl Fɑɑliisiɑnnbɑ nɑ sinsuuk ni. L pɑɑk k b biɑ boi juɑ nɑ ɑ: «A sɑɑ pɑk ɑ bee k jiin wun nbɑ nyuɑnt ɑ ninbinɑ nɑ po?» K u biɑ pɑk jiin’m ɑ: «U tie *Yennu sɔkni e.» Ŋɑɑn k l pɑɑl nɑn *Suifnbɑ yudɑnm n tien yɑdɑ nɑn b mɑl’ɔ juɑnŋ e ŋɑɑn k u tɑn nyuɑnt. K b yɑɑ sie k b yiin juɑnŋ nɑ dɑnm, k tɑn boi’b ɑ: «U tie i bijɑ ee? I set yɑɑ ɑ i mɑl’ɔ juɑnŋ ee? K l tien nlee k u ji nyuɑnt mɔtɑɑnɑ nɑ?» K b jiin yet’b ɑ: «T mi nɑn u tie t bijɑ ŋɑnin e, k t biɑ mi nɑn t mɑl’ɔ juɑnŋ e. Ŋɑɑn t k mi lɑɑ tien biɑnŋ nbɑ k u tɑn nyuɑnt, k t biɑ k mi wun nbɑ nyuɑnt’ɔ. U mɔnŋ ji k tie bik kɑɑ. Boin’mɔ mɑn. U sɑɑ fit pɑk u mɔnŋ pɑɑk ɑ.» U dɑnm din yet nnɑ mɑnŋ, k mɑɑn b tiin Suifnbɑ yudɑnm nɑ jɑŋmɑɑni, k mɑɑn yudɑnm mɑnŋ ponŋ tɑɑn mɔb k yet ɑ wun nbɑ yɑɑ ɑ Yiesu e tie *Klistu nɑ, sie k b nyinn’ɔ b Suifnbɑ jɑɑnti dieok ni. L pɑɑk te k u dɑnm din yɑɑ ɑ u k tie bik kɑɑ, ɑ b mɔnŋ n boi’ɔ. K l tɑɑl munle ni e k b biɑ ŋɑnm yiin juɑ nbɑ tuu tie juɑnŋ ŋɑɑn tɑn nyuɑnt nɑ, k tɑn yet’ɔ ɑ: «Yennu tuɑnn, pɑkn mɔni e. T mi nɑn Yiesu tie biitdɑɑnɔ e.» K juɑ nɑ yet’b ɑ: «Wɑɑ tie biitdɑɑnɔ, ɑmi wɑɑ k tie, n k mi. Ŋɑɑn min ŋɑnin mi bon-yenn e: n tuu tie juɑnŋ e, ŋɑɑn mɔtɑɑnɑ n ji nyuɑnt ɑ.» K b ŋɑnm biɑ boi’ɔ ɑ: «U tien nlee k nyuɑnt’ɑ ni?» K u jiin’m ɑ: «N ponŋ yet’i wɑɑ, ŋɑɑn k i k gbɑt. Bee k i jin luon k n yet’i ni? I mun luon k i tien u puolpoweitieb ee?» Ŋɑnn e k b suki’ɔ, ŋɑɑn yet’ɔ ɑ: «Fin e tie nilɔ mɑnŋ puolpoweituɑ, ŋɑɑn tinm ŋɑnin tie Muois puolpoweitieb e. T mi nɑn Yennu din pɑk nɑn Muois, ŋɑɑn nilɔ nɑ ŋɑnin, t k mi wɑɑ nyii siɑn.» K juɑ nɑ yet’b ɑ: «lin nbɑ tie pɑluk o nɑ: i k mi wɑɑ nyii siɑn, ŋɑɑn k u yen nyuɑnt n ninbinɑ wɑɑ. T mi nɑn Yennu k gbiin biitdɑnm, ŋɑɑn u gbiɑ dɑnm nbɑ jiɑntl’ɔ k tuun wɑɑ luon biɑnŋ nbɑ e. Lɑɑ nyii *dulnyɑ piinu ni wɑɑ, t dɑɑ k mi gbɑt ɑ suɑ nyuɑnt wun nbɑ k b mɑl’ɔ juɑnŋ. L i bo i tie k juɑ mɑnŋ k nyii Yennu penŋ, u bo kɑn fit tun siɑl.» K b jiin k yet’ɔ ɑ: «Fin nbɑ k b mɑl’ɑ nɑn biit nɑ po, ɑ tie ŋmee k wɑnt tinm i?» ŋɑɑn bel nyinn’ɔ nɑn-yel. Yiesu nbɑ gbɑt ɑ b bel’ɔ nɑ, k u tɑn lon’mɔ k lɑ’u, k boi’ɔ ɑ: «A tien *Nisɑɑlk Bijɑ nɑ yɑdɑ ɑɑ?» K u jiin boi’ɔ ɑ: «Cɑnbɑɑ, ŋmee tie nisɑɑlk Bijɑ nɑ? Yetl’n wɑɑ tie wun nbɑ, k n tien’ɔ yɑdɑ.» K Yiesu yet’ɔ ɑ: «A ponŋ lɑ’u wɑɑ. Ŋuɑ e tie wun nbɑ piɑk nɑn’ɑ nɑ.» K juɑ nɑ yet’ɔ ɑ: «N Yonmdɑɑnɔ, n tien’ɑ yɑdɑ wɑɑ,» ŋɑɑn gbɑɑn u tuɑnn k puki’ɔ. K Yiesu yet ɑ: «N bɑɑl tingbounŋ nɑ ni ɑ n bu niib buut, ɑ k juɑni n nyuɑnt k bin nbɑ nyuɑn n juɑn.» K Fɑɑliisiɑnnbɑ siɑb nbɑ be lenŋ nɑ gbɑt k u yet nnɑ, k b boi’ɔ ɑ: «A yɑɑ ɑ t mun tie juɑni ee?» K u jiin’m ɑ: «L i bo i tie k i tie juɑni e, i bo kii mɔk biit, ŋɑɑn yɑɑ yɑɑ ɑ i nyuɑn nɑ, i mɔk biit.» K Yiesu biɑ yet’b ɑ: «Bɑlmɔni e k n yien’i nɑ, nilɔ nbɑ k tɔkn peluok tɑnmɔb k kuɑ, ŋɑɑn duo juonn k kuɑ, l dɑɑnɔ e tie nɑn-yukɔ nɑn fɑt-tuɑ. Ŋɑɑn nilɔ nbɑ tɔkn peluok nɑ tɑnmɔb k kuɑ, l dɑɑnɔ e tie pei mɑnŋ kpɑɑlk. U i tɑnŋ i bɑɑt ɑ wun kuɑ, tɑnmɔguulɔ nɑ sɑɑ luot e, wun kuɑ, k u yi u mɔnŋ mɔnŋ pei nɑ sɑnɑ, k b gbiɑ u mɔb, k u nyint’b. U i nyinn u mɔnŋ pei kul yuo nbɑ, u tuu gɑl b tuɑnn e, k b wɑɑ u puol, k mɑɑn b mi u kunkɔl. Ŋɑɑn b kɑn wei sɑɑmɔ ŋɑnin. B sɑɑ ciɑl, k mɑɑn b k mi u kunkɔl.» Yiesu din puɑ’b kpɑnjɑn nɑ, ŋɑɑn k b k bɑnn l pɑɑk. L pɑɑk, k u biɑ ŋɑnm k yet’b ɑ: «Bɑlmɔni e k n yien’i nɑ, min e tie peluok nɑ tɑnmɔb. Bin nbɑ kul liit’n k bɑɑl nɑ tie nɑn-yukb e nɑn fɑt-tieb, ŋɑɑn pei nɑ k gbiɑ b mɔb. Min e tie tɑnmɔb nɑ, k dɑɑnɔ nbɑ wei’n k kuɑ, ŋuɑ e sɑɑ lɑ fielu, k sii tun gɑɑl kuɑ, k ŋmɑt nyi, k lɑɑt jeŋɑnt. Nɑn-yukɔ bɑɑt ɑ wun jɑn k kpi k biil kuukuɑ e. Min e bɑɑl ɑ niib n lɑ mɑnfuol nbɑ tie mɑnfuol nɑn bɑlmɔni. «Min e tie pekpɑɑŋɑnŋ, k pekpɑɑŋɑnŋ e kpenn u pei pɑɑk. Ŋɑɑn wun nbɑ kpɑɑl pei likli pɑɑk, ŋɑɑn k k tie pekpɑɑlk nɑn mɔni, k biɑ k yen pei nɑ, l i tie k u lɑ k *kinkɑtl tɑn bɑɑt yuo nbɑ, sie k u ciɑl ŋɑɑn nyik pei nɑ, k kinkɑtl n ji bɑɑl k suol’b, k pelei nɑ n yɑt. U tuu ciɑl e, k mɑɑn u kpɑɑl pei nɑ likli pɑɑk e, k u bɑkɑ kɑɑ pei nɑ ni. Min e tie pekpɑɑŋɑnŋ. N Bɑɑ nbɑ mi’n, k n mun mi’u nɑ, l mun biɑ tie nnɑ e k n mi n pei, k b mun mi’n, k n sɑɑ yit n mɑnfuol sɑlk b pɑɑk. Pelei be k tie n yɑb, ŋɑɑn ŋɑnm k tie peluok mɑnŋ ni yɑb. Sie k n bɑɑl nɑn ŋɑnm mun biɑk, k b sɑɑ gbɑt n kunkɔl, k b kul ji sii tie pebuolyenŋ, k mɔk pekpɑɑyenŋ kuɑ. «Ŋɑnn e k n Bɑɑ luon’n, k mɑɑn n yɑɑ n nyinn n mɑnfuol, k l puolpo k n biɑ sɑɑ ŋɑnm lɑ n mɑnfuol mɑnŋ. Suɑ kɑɑ k sɑɑ nyinn n mɑnfuol mɑnŋ, ŋɑɑn n mɔnŋ mɔnŋ e yɑɑ n nyinn’l, k mɑɑn n mɔk yiikuo k sɑɑ nyinn’l, k biɑ mɔk yiikuo k tɑn sɑɑ lɑ’l. Nnɑ e k n Bɑɑ yet’n ɑ n tun.» Wɑɑ yet nnɑ yuo nbɑ, k *Suifnbɑ yudɑnm biɑ ŋɑnm bɔkt, k b bonciɑnn yɑɑ ɑ: «Nɑlnbiiuk be u ni, k wɑɑtuk biɑ mɔk’ɔ. Bee tien k i gbiintl u mɑɑn i?» K lieb mun yɑɑ ɑ: «Nilɔ nbɑ k nɑlnbiiuk be u ni nɑ kii piɑk nnɑ. Nɑlnbiiuk sɑɑ fit nyuɑnt juɑnŋ ii?» L puolpo e wɑɑ k b tɑn mɔk b jɑɑnm nbɑ k b tien Yennu niipuouk b jɑɑnti ŋɑsɑɑkɑk nbɑ be Selusɑɑlenm nɑ pɑɑk nɑ. Jɑɑnm mɑnŋ din be Selusɑɑlenm e. L yuo din tie wonfufuk yuo e, k Yiesu din sonm lin bɑlntl nbɑ k b yi’l Sɑɑlomɔn bɑlntl nɑ ni, k l din be Yennu jɑɑnti ŋɑsɑɑkɑk ni. K Suifnbɑ yudɑnm din bɑɑl k tikl k lint’ɔ, ŋɑɑn boi’ɔ ɑ: «A yɑɑ lin wei nlee wɑɑ, k tin tɑn bɑnn nɑn ɑ tie *Klistu? L i tie k ɑ tie ŋuɑ i e, fɑn yet’t bɑlmɔni.» K Yiesu jiin’m ɑ: «N ponŋ dɑɑn yet’i wɑɑ, ŋɑɑn k i k tien’n yɑdɑ. Tuonɑ nbɑ k n tuun nɑn n Bɑɑ yiikuo nɑ ni, ŋɑnn i wɑnt mɑɑ tie wun nbɑ. I k tien’n yɑdɑ, k mɑɑn yɑɑ k tie n pei nɑ pɑɑk. N pei gbiintl n kunkɔl, k n mi’b, k b wɑɑ’n, k n tien’m mɑnfuol nbɑ kɑɑ gbennu, k b kɑn mi k kpo, k suɑ biɑ kɑɑ k sɑɑ fit fɑt’b n nuu ni. N Bɑɑ nbɑ jii’b k tien’m n nuu ni nɑ, ŋuɑ e cie suɑ kul k suɑ kɑɑ k sɑɑ fit fɑt’b n Bɑɑ mɑnŋ nuu ni. Min nɑn n Bɑɑ mɑnŋ tie yonm e.» L yuo nɑ k Suifnbɑ yudɑnm nɑ tɔki tɑnɑ biɑk, ɑ bin jɑɑt’ɔ k kpi’u. K Yiesu yet’b ɑ: «I ponŋ lɑ k n tun tuonŋɑnɑ bonciɑnn, nbɑ k n Bɑɑ yɑɑ ɑ n tun nɑ, k tuonŋɑnɑ mɑnŋ ni, lɑnn pɑɑk e te k i ji yɑɑ i jɑɑt’n tɑnɑ ɑ?» K b jiin k yet’ɔ ɑ: «T k luon k tin jɑɑt’ɑ tɑnɑ tuonŋɑnsiɑl pɑɑk kɑɑ, ŋɑɑn fɑɑ piɑk k biil Yennu nɑ pɑɑk. A kpɑn tie nilɔ e, ŋɑɑn yi ɑ mɔnŋ Yennu.» K Yiesu jiin boi’b ɑ: «L k diɑn i *senni ni ɑ Yennu yet ɑ: ‹I tie yenni ee? (k t mi nɑn Yennu kɑn fɑɑl fɑɑk fɑb ɑ, k mɑɑn Yennu yi bin nbɑ k u tul’b u mɑɑn nɑ yenni e).› Ŋɑɑn min ŋɑnin, Yennu lukt’n k tun’n tingbounŋ nɑ ni, k nlee k i sɑɑ fit yet ɑ n piɑk biil Yennu e mɑɑ yet ɑ n tie Yennu Bijɑ e nɑ? L i tie k n k tuun n Bɑɑ nɑ tuonɑ i e, ŋɑnn i dɑɑ tie’n yɑdɑ. Ŋɑɑn l i tie k n tuun ŋuɑ Yennu tuonɑ mɑnŋ i e, l i lek i tie k i k tien’n yɑdɑ, ŋɑɑn yin tien n tuonɑ mɑnŋ yɑdɑ. Ŋɑnn e, k i sɑɑ bɑnn nɑn bɑlmɔni nɑn n Bɑɑ be n ni, k n mun biɑ be u ni.» Ŋɑnn e k Suifnbɑ nɑ tɑn yɑɑ bin suol’ɔ biɑk, k u buut nyii, k ŋmɑt puot *Suulden kpenpuotl, k sɑɑ be siɑn nbɑ k Sɑn din tuu wuul niib Yennu nyunwulu nɑ. K niib bonciɑnn din bɑɑl Yiesu penŋ, k din piɑk nɑn b lieb ɑ: «Sɑn ŋɑnin din k tun bɑktnɔunŋ tuonjɑɑnsiɑl, ŋɑɑn lin nbɑ kul k u din piɑk k jikt sɑɑ juɑ mɑnŋ po, l tie bɑlmɔni e.» K niib bonciɑnn din tien Yiesu yɑdɑ lenŋ. Tɔn, jɑsuɑ nnɑ din be Betɑɑni, k u sɑnn yi Lɑɑsɑɑl, k u din tɑn yiɑl. Betɑɑni din tie Mɑɑli nɑn u niipuo Mɑɑlt duo e. Mɑɑli e din tie dɑɑnɔ nbɑ but tulɑɑli Yonmdɑɑnɔ Yiesu tɑɑ pɑɑk, ŋɑɑn jii u yut k fiɑl fiɑl nɑ. Ŋuɑ Mɑɑli ninjɑ Lɑɑsɑɑl e din yiɑl. Wɑɑ din tɑn yiɑl nɑ, k u niipuob tun *tuomi ɑ wun sɑɑn k sɑɑ yet Yiesu ɑ: «Yonmdɑɑnɔ, ɑ nɑɑsin-yuɑk nbɑ k ɑ mɑntk luon’ɔ nɑ yiɑl e.» Yiesu nbɑ gbɑt nnɑ yuo nbɑ k u yet u *puolpoweitieb nɑ ɑ: «Lɑɑsɑɑl nbɑ yiɑl nɑ, yiɑlu mɑnŋ k tie u mɑnfuol telk kɑɑ nɑ, ŋɑɑn l tie lin nbɑ k niib sɑɑ dont Yennu sɑnn l pɑɑk e, ɑ Yennu Bijɑ mun n lɑ dontl biɑk.» Tɔn, Yiesu din luon Mɑɑlt nɑn Mɑɑli nɑn Lɑɑsɑɑl. Wɑɑ gbɑt ɑ Lɑɑsɑɑl yiɑl nɑ, ŋɑɑn u din tien dɑɑ ŋɑnle k dɑɑ be lenŋ. L puolpo e k u din tɑn yet u puolpoweitieb nɑ ɑ: «Ŋɑɑnt mɑn k tin ŋmɑt sɑɑn Suude.» K b yet’ɔ ɑ: «Cɑnbɑɑ, dɑɑ ŋɑnlele nɑ, k *Suifnbɑ yudɑnm nɑ dɑɑn yɑɑ bin jɑɑt’ɑ tɑnɑ, k ɑ biɑ yɑɑ ɑ t ŋmɑt lenŋ ii?» K Yiesu yet’b ɑ: «Yentu tuu be yendopo mɔkmɔk nɑn yenbɑɑpo e. L i tie k nilɔ sonm yennu ni, u kɑn gbiɑt, k mɑɑn u lɑɑt tingbounŋ nɑ yentu nɑ. Ŋɑɑn u i sonm nyiɑɔk, u gbiɑtl e, k mɑɑn yentu kɑɑ u ni.» Yiesu din yet nnɑ e, ŋɑɑn biɑ yet ɑ: «T yuɑk Lɑɑsɑɑl guɑnt e, ŋɑɑn n sɑɑ sɑɑn fiin’ɔ wɑɑ.» K u puolpoweitieb nɑ yet’ɔ ɑ: «Yonmdɑɑnɔ, l i tie k u guɑnt i e, u sɑɑ lɑ lɑɑfiɑ wɑɑ.» Yiesu din wɑnt k l tie ɑ Lɑɑsɑɑl kpo e, ŋɑɑn ŋɑnm din mi ɑ u wɑnt ɑ Lɑɑsɑɑl guɑnt e. L pɑɑk din te k u yet’b gbenn ɑ: «Lɑɑsɑɑl kpo wɑɑ, ŋɑɑn i pɑɑk n mɔk pɑlpienn nɑn mɑɑ dɑɑn kɑɑ u buol ni nɑ, k mɑɑn ŋɑnn e sɑɑ te k i ji fit tien’n yɑdɑ. Ŋɑɑnt tin sɑɑn u penŋ mɑn.» K Tuomɑ, wun nbɑ k b yi’u Jɑɑk nɑ, yet u lieb ɑ: «Ŋɑɑnt k t mun n sɑɑn mɑn. L i sii tie kuun, tinm nɑn ŋuɑ n kpo.» Yiesu nbɑ din tɑn bɑɑl lenŋ yuo nbɑ k suɑ bɑɑ pii Lɑɑsɑɑl, l dɑɑ ŋɑnnɑ e nɑ. Betɑɑni din k fɔk nɑn Selusɑɑlenm. L fɔknt din tie nɑn kiiluomiɑtɑ ŋɑntɑ nɑ e. L pɑɑk din tien k Suifnbɑ bonciɑnn din bɑɑl Mɑɑlt nɑn Mɑɑli penŋ, ɑ bin mɑɑn b pɑlɑ, k mɑɑn b ninjɑ nɑ kuun pɑɑk. Mɑɑlt nbɑ tɑn gbɑt ɑ Yiesu bɑɑt yuo nbɑ, k u nyii cet’ɔ, ŋɑɑn k Mɑɑli ŋɑnin biɑl be ŋɑɑk ni. K Mɑɑlt yet Yiesu: «N Yonmdɑɑnɔ, l i tie k ɑ dɑɑn bo be nnɑ nɑ, n ninjɑ nɑ dɑɑn bo kɑn kpo. Ŋɑɑn n mi nɑn mɔtɑɑnɑ, l i tie k ɑ miɑl Yennu lin nbɑ kul po, u sɑɑ tul’ɑ wɑɑ.» K u yet’ɔ: «A ninjɑ sɑɑ fiil kuun ni wɑɑ.» K Mɑɑlt jiin’ɔ: «N mi nɑn u tɑn sɑɑ fiil kuun ni *dulnyɑ cincɑɑtdɑɑl, dɑɑl nbɑ k kpienm tɑn sɑɑ fiil kuun ni nɑ.» K Yiesu yet’ɔ: «Min e tie kuun fiilu k tie mɑnfuol. Dɑɑnɔ nbɑ tien’n yɑdɑ, ŋuɑ e sii mɔk mɑnfuol, u lek i kpo, k dɑɑnɔ kul nbɑ mɔk mɑnfuol k tien’n yɑdɑ, u kɑn mi k kpo. A tien yɑdɑ nɑn lin nbɑ nɑ ɑɑ?» K u jiin ɑ: «Cɑnbɑɑ, nnn, n tien yɑdɑ nɑn fin e tie *Klistu nɑ, Yennu Bijɑ nbɑ bɑɑt tingbounŋ nɑ ni nɑ.» Mɑɑlt nbɑ yet nnɑ mɑnŋ, ŋɑɑn ŋmɑt k sɑɑ yiin u niipuo Mɑɑli suon nnɑ, k yet’ɔ ɑ: «Wɑntuɑ nɑ be nnɑ wɑɑ, k yi’ɑ.» Mɑɑli nbɑ gbɑt nnɑ yuo nbɑ, k u fiil yiɑn yiɑn, k sɑɑn u buol ni. K Yiesu din dɑɑ k bɑɑl digbɑnbik mɑnŋ, ŋɑɑn dɑɑ be siɑn nbɑ k Mɑɑlt cet’ɔ nɑ e. K Suifnbɑ nbɑ be nɑn Mɑɑli ŋɑɑk ni k mɑɑnt u pɑl nɑ, bɑɑ lɑ k u nyii yiɑn yiɑn nɑ, k b mun wei nyii, k mɑɑn b mi ɑ u sɑɑ kɑɑɔk buol e ɑ wun sɑɑ bui kumɔni. Mɑɑli nbɑ bɑɑl Yiesu buol k lɑ’u yuo nbɑ, k u gbɑɑn u tuɑnn, ŋɑɑn yet’ɔ ɑ: «N Yonmdɑɑnɔ, l i tie k ɑ dɑɑn bo be nnɑ nɑ, n ninjɑ nɑ dɑɑn bo kɑn kpo.» K Yiesu lɑ k u mɔ, k Suifnbɑ nbɑ wei’ɔ k bɑɑl nɑ, k b mun mɔ, k ninbɑɑɔk suol’ɔ bonciɑnn, k u kuli u pɑl ni. K u boi’b «I pii’u liɑ po e?» K b yet’ɔ: «Yonmdɑɑnɔ, bɑɑt k tɑn got.» K Yiesu sikn nyin-nyuut. K Suifnbɑ nɑ yet ɑ: «Gotl mɑn, wɑɑ jiɑ luon Lɑɑsɑɑl biɑnŋ nbɑ.» K siɑb yɑɑ ɑ: «Dɑɑnɔ nbɑ nyuɑnt juɑnŋ nɑ, u dɑɑn bo kɑn fit te k Lɑɑsɑɑl dɑɑ kpenn ii?» K Yiesu pɑl biɑ ŋɑnm biil bonciɑnn, k u bɑɑl kɑɑɔk nɑ buol ni. Kɑɑɔk nɑ din tie tɑnfiɑɔk o, k kɑtɑnu bii l mɔb. K Yiesu yet’b ɑ: «Biitl kɑɑɔk mɑnŋ mɑn.» K Mɑɑlt wun nbɑ tie kpiemɔ nɑ niipuo, yet’ɔ ɑ: «N Yonmdɑɑnɔ, l sii pɔi hei, k mɑɑn bɑɑ pii’u, l dɑɑ ŋɑnnɑ e nɑ.» K Yiesu boi’ɔ: «N bo k yet’ɑ ɑ l i tie k ɑ tien’n yɑdɑ, ɑ sɑɑ lɑ Yennu *yudɑnt ɑɑ?» Ŋɑnn e k b biit kɑɑɔk nɑ. K Yiesu gokt sɑnpɑɑpo, ŋɑɑn yet ɑ: «N Bɑɑ, n tien’ɑ niipuouk nɑn fɑɑ sɑk n miɑlu nɑ. N mi nɑn yuo kul ɑ sɑɑk n miɑlu, ŋɑɑn mɑɑ yet nnɑ nɑ, k mɑɑn n luon k nibul nbɑ be nnɑ nɑ n gbɑt k tien yɑdɑ nɑn fin e tun’n.» Wɑɑ yet nnɑ mɑnŋ, ŋɑɑn yiin sɑnpɑɑpo wɑɑ ɑ: «Lɑɑsɑɑl, nyimin nɑ.» K kpiemɔ nɑ nyii, k u tɑɑ nɑn u nii k l fin fin nɑn kɑtinŋ, k cincenn buob u nunm po. K Yiesu yet’b ɑ: «Fintl kɑtinŋ mɑnŋ k ŋɑɑ’u.» Ŋɑnn e k Suifnbɑ bonciɑnn nbɑ din bɑɑl ɑ bin fuont Mɑɑli nɑ, lɑ lin nbɑ k Yiesu tun, k b tien’ɔ yɑdɑ. Ŋɑɑn b siɑb sɑɑn Fɑɑliisiɑnnbɑ penŋ, k sɑɑ yet’b lin nbɑ k Yiesu tun. L pɑɑk k Fɑɑliisiɑnnbɑ mɑnŋ nɑn Yennu jɑɑnti yudɑnm yiin tintɑɑnkɑɑnu, k b tikl, k b boi b lieb ɑ: «T sɑɑ tien nlee? K mɑɑn juɑ mɑnŋ tuun bɑktnɔunŋ tuonjɑɑnɑ bonciɑnn. T i ŋɑɑn k u ŋɑnmt k tuun nnɑ k puki, suɑ kul sɑɑ tien’ɔ yɑdɑ wɑɑ, k Luonm tieb n bɑɑl k yiel Yennu jɑɑnti ŋɑsɑɑkɑk nɑ, ŋɑɑn biɑ buont t niib.» K b yenɔ, wun nbɑ yi *Kɑɑyiif, k tie Yennu jɑɑnti yudɑɑnɔ l binn ni nɑ, yet’b ɑ: «Yinm ŋɑnin k mi siɑl. I k mi nɑn l ŋɑn k niyenɔ kuɑ n gɑɑl niib nɑ kul ɑ pɑɑk k kpo, k gɑl k t niib kul n buont ii?» U din k pɑk lin nbɑ nɑ nɑn u mɔnŋ kɑɑ, ŋɑɑn wɑɑ din tie Yennu jɑɑnti yudɑɑnɔ binn mɑnŋ ni nɑ, k Yennu te k u pɑk bunt buntl, ɑ Yiesu tɑn sɑɑ gɑɑl Suifnbɑ nɑ pɑɑk k kpo, k l k tie Suifnbɑ kuukuɑ kɑɑ k u tɑn sɑɑ gɑɑl b pɑɑk k kpo, ŋɑɑn nɑn bin nbɑ kul tie Yennu niib k yɑt be tingbounŋ nɑ ni nɑ e k u sɑɑ gɑɑl b pɑɑk k kpo, ɑ bin tɑɑn nɑn lieb yonm. K l dɑɑl mɑnŋ k jii sɑɑ k Suifnbɑ yudɑnm nɑ lol suol ɑ bin kpi Yiesu. L pɑɑk k u ji din k sonm pɑɑnu ni Suifnbɑ sinsuuk ni, ŋɑɑn k tɑn yɑɑt sɑɑn duo nbɑ k b yi Eflɑiinm, k l kpiɑ nɑn pɑɑnpieonŋ nɑ, k ŋuɑ nɑn u puolpoweitieb ji be lenŋ. Suifnbɑ *yuktgɑltiɑlu jɑɑnm nbɑ tɑn pel nɑ, k niib bonciɑnn nyii digbɑnɑ k bɑɑl Selusɑɑlenm, ɑ bin sɑɑ mɑnn *mɑlunŋ k ŋɑnm b mɔnŋ. K niib nɑ din luon Yiesu. Bɑɑ tikl Yennu jɑɑnti ŋɑsɑɑkɑk ni yuo nbɑ, k b boi b lieb ɑ: «I duki nlee? U mɑntk kɑn bɑɑl jɑɑnm nɑ ɑmi?» K Yennu jɑɑnti yudɑnm nɑn Fɑɑliisiɑnnbɑ nɑ tul mɔb ɑ: «Wun nbɑ mi u buol, wun bɑɑl k tɑn ŋmɑɑ t tɑɑl k tin suol’ɔ.» Tɔn, dɑɑ ŋɑnluob din tɑn biɑl nɑn *yuktgɑltiɑlu jɑɑnm n di, k Yiesu bɑɑl Betɑɑni, duo nbɑ k Lɑɑsɑɑl be nɑ. Ŋuɑ e k Yiesu din fiin’ɔ kuun ni nɑ. Lenŋ e k b din tien jiet, k Mɑɑlt jii k tul’b, k Lɑɑsɑɑl din tie b ni yenɔ nbɑ din kɑl k di nɑn’m. K Mɑɑli jii tulɑɑli liitjinn, lin nbɑ yɑɑ dɑɑɔk pɑɑl bonciɑnn. B din jii fɑɑt nbɑ k b yi’l nɑlt e k tien tulɑɑli mɑnŋ, k u jii’l k but Yiesu tɑɑ pɑɑk, ŋɑɑn suol u mɔnŋ yut k fiɑl fiɑl, k ŋɑɑk nɑ ji nubl nɑn tulɑɑli nɑ gbinm. K Yiesu *puolpoweitɔyenɔ, wun nbɑ k b yi’u Suudɑ Iskɑɑliɑɔt, (ŋuɑ e din tie wun nbɑ yɑɑ wun tɑn kuɑt Yiesu nɑ,) k u yet ɑ: «Bee tien k b bo k kɔi tulɑɑli mɑnŋ denienbɑ kobi ŋɑntɑ (300) k jii l likli k tul tɑlɑs-dɑnm i?» Wɑɑ din yet nnɑ mɑnŋ, l din k tie ɑ u bɑkɑ be tɑlɑs-dɑnm nɑ ni kɑɑ, ŋɑɑn u din tie nɑn-yukɔ e. ŋuɑ e din tie wun nbɑ diɑ likli pɑkl k tuu jɑɑn. K Yiesu yet’ɔ ɑ: «Ŋɑɑnt’ɔ. U tien nnɑ k l tie n kuun siil tienu e. Tɑlɑs-dɑnm e sii tun be nɑn’i yuo kul ɑ, ŋɑɑn min ŋɑnin kii tun be nnɑ kɑɑ.» Ŋɑnn e k *Suifnbɑ bonciɑnn gbɑt ɑ Yiesu be Betɑɑni, k b sɑɑn lenŋ. B din k sɑɑn Yiesu pɑɑk kuukuɑ kɑɑ, ŋɑɑn b din luon k bin sɑɑ lɑ Lɑɑsɑɑl e mun, wun nbɑ k Yiesu fiin’ɔ kuun ni nɑ. L pɑɑk e tien k Yennu jɑɑnti yudɑnm din loln lolɑ ɑ bin kpi Lɑɑsɑɑl mun biɑk, k mɑɑn u kuun fiilu pɑɑk e k *Suifnbɑ bonciɑnn din nyik Yennu jɑɑnti yudɑnm mɑnŋ, ŋɑɑn wei Yiesu k tien’ɔ yɑdɑ. L yent sɑn-nyiɑɔk o k nibulciɑɔnŋ nbɑ bɑɑl Selusɑɑlenm ɑ bin di *yuktgɑltiɑlu jɑɑnm nɑ gbɑt ɑ Yiesu bɑɑt. K b ji ŋɑt biɑbfɑɑt k cet ɑ bin tuok’ɔ, k yikn wuyikni sɑnpɑɑpo wɑɑ k yɑɑ ɑ: «Hosɑnɑ, Yennu yetŋɑnm ii be dɑɑnɔ nbɑ bɑɑt nɑn Yonmdɑɑnɔ Yennu sɑnn ni nɑ pɑɑk. Yennu n yɑt u yetŋɑnm Islɑɑeltieb Kpɑnbɑl pɑɑk.» K Yiesu din lɑ bonbik e k jɑk k bɑɑt, nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ ɑ: « *Siiɔn duo tieb, i dɑɑ tiin jɑŋmɑɑni. Gotl mɑn, i Kpɑnbɑl e jɑk bonbik k bɑɑt nɑ.» K u puolpoweitieb din dɑɑ k bɑnn lin nbɑ nɑ pɑɑk l yuo mɑnŋ. Ŋɑɑn Yiesu nbɑ din tɑn lɑ dontl nɑ, l yuo e k b ji din tiɑl nɑn lin nbɑ nɑ diɑn Yennu lolkpel kɑdɑɑɔk ni k jikt sɑɑ u po e, k biɑ tiɑl nɑn niib nɑ mun set din tien’ɔ nnɑ e. Nibulciɑɔnŋ nbɑ din be nɑn Yiesu yuo nbɑ k u yiin Lɑɑsɑɑl ɑ wun nyi kɑɑɔk ni ŋɑɑn fiin’ɔ kuun ni nɑ, k din muɑntl lin nbɑ k b lɑ nɑ. L pɑɑk e te k niib bonciɑnn din cet’ɔ, k mɑɑn bɑɑ gbɑt k u tun bɑktnɔunŋ tuonjɑɑnn mɑnŋ nɑ pɑɑk. Ŋɑnn e k Fɑɑliisiɑnnbɑ nɑ yien b lieb ɑ: «Gotl mɑn. T ji kɑn fit tun siɑl. I k lɑ ɑɑ? Tingbounŋ nɑ niib kul ɑ wɑɑ’u e.» Niib nbɑ din sɑɑn Selusɑɑlenm ɑ bin sɑɑ di *yuktgɑltiɑlu jɑɑnm nɑ, k Glek siɑb din be b ni, k b tɑn sɑɑn Fiiliip penŋ, wun nbɑ nyii Betsɑidɑ nbɑ be Gɑɑliile tinŋ ni nɑ, k b yet’ɔ ɑ: «Cɑnbɑɑ, t luon k t lɑ Yiesu.» K Fiiliip sɑɑn k sɑɑ yet Andle, k Andle nɑn Fiiliip ji sɑɑn k yet Yiesu. K Yiesu yet’b ɑ: «Yuo nbɑ k Yennu sɑɑ donn *Nisɑɑlk Bijɑ nɑ sɑnpɑɑpo nɑ bɑɑl nɑ. Bɑlmɔni e k n yien’i nɑ, l i tie k b k bul dibinn tinŋ ni, l kɑn kpo. L sii tie dibin-yenml e. Ŋɑɑn l i tie k b bul’l k l kpo, l sɑɑ pɑ e k nɑn dii bonciɑnn. Dɑɑnɔ nbɑ deki u mɑnfuol tɑn sɑɑ kɔnŋ’l e, ŋɑɑn wun nbɑ yit u mɑnfuol sɑlk tingbounŋ nɑ ni, u sii diɑ’l k l tɑn sii tie mɑnfuol nbɑ kɑɑ gbennu e. Dɑɑnɔ nbɑ luon wuu tuun n tuonn, sie k u wɑɑ’n, k mɑɑ tɑn sii be siɑn nbɑ, k n tuontunnɔ mun tɑn sii be lenŋ. N Bɑɑ sɑɑ donn dɑɑnɔ nbɑ tuun n tuonn.» Ŋɑnn e k Yiesu yet ɑ: «N mɔk pɑlbiil bonciɑnn. N sɑɑ pɑk bee? N sɑɑ yet ɑ: ‹N Bɑɑ, nyint’n lin nbɑ bɑɑt n pɑɑk nɑ ni ɑmi ii?› Aɑi, k mɑɑn ŋɑnn e te k n bɑɑl tingbounŋ nɑ ni k di fɑlɑ mɑnŋ. N Bɑɑ, ŋɑɑnt k ɑ sɑnn n lɑ dontl.» Ŋɑnn e k kunkɔl pɑk sɑnpɑɑpo ɑ: «N sɑnn ponŋ lɑ dontl ɑ, k biɑ sɑɑ ŋɑnm lɑ dontl k pukn.» Niib bonciɑnn nbɑ din sie lenŋ nɑ din gbɑt kunkɔl mɑnŋ, k b yɑɑ ɑ: «L tie sɑtiɑni e,» k siɑb yɑɑ ɑ: « *Mɑlɑkɑ e piɑk nɑn’ɔ.» Ŋɑɑn k Yiesu yet’b ɑ: «L k tie n mɔnŋ mɔnŋ pɑɑk kɑɑ k kunkɔl mɑnŋ pɑk nɑ, ŋɑɑn l tie i tiɑɔnŋ pɑɑk e. Yuo nbɑ k Yennu yɑɑ wun tɑn bu tingbounŋ nɑ ŋɑɑtieb buut nɑ, l yuo bɑɑt, k u biɑ sɑɑ bel wun nbɑ tie tingbounŋ nɑ bɑt. B i tɑnŋ i jii’n k donn’n sɑnpɑɑpo yuo nbɑ, n sɑɑ te k niib kul n bɑɑl n buol.» U mɑɑn nɑ din wɑnt wɑɑ tɑn sɑɑ kpo biɑnŋ nbɑ e. K nibul nɑ yet’ɔ ɑ: «T *senni ni wɑnt’t ɑ *Klistu nɑ sii mɔk mɑnfuol nbɑ kɑɑ gbennu. Nlee k ɑ yet ɑ b sɑɑ jii Nisɑɑlk Bijɑ nɑ k donn’ɔ? Ŋmee tie Nisɑɑlk Bijɑ mɑnŋ i?» K u jiin yet’b ɑ: «Yentu nɑ sii be i buol wɑɑnm-nnɑ e. L pɑɑk, ii sonm mɑn yentu mɑnŋ ni, lɑɑ dɑɑ be nɑ, k bunbɔnn dɑɑ bɑɑt’i, k mɑɑn wun nbɑ sonm bunbɔnn ni, u k mi wɑɑ sɑɑ siɑn nbɑ po. Tient yentu nɑ yɑdɑ mɑn, lɑɑ dɑɑ be i sinsuuk ni nɑ k kpɑnt yentu wɑɑs e.» Yiesu nbɑ din yet nnɑ mɑnŋ puolpo e, ŋɑɑn k u nyii niib nɑ ni, k sɑɑn bɔl. U lek din tun bɑktnɔunŋ tuonjɑɑnɑ bonciɑnn b nunm ni, ŋɑɑn b din k tien’ɔ yɑdɑ, ɑ *Yennu sɔkni Esɑɑyi mɑɑn nɑ n ji fit gbie nɑn lɑɑ yɑɑ ɑ: «Yonmdɑɑnɔ, ŋmee gɑɑl t mɑɑn i? ŋmee k Yennu jii u pɑnŋ k fiit wɑnn’ɔ?» B din k fit tien yɑdɑ, k mɑɑn Esɑɑyi biɑ din yet ɑ: «Yennu e tien’m juɑni, k biɑ te k b gbɑl bɑnnu, ɑ k b ninbinɑ dɑɑ lɑɑt, k b yɑn ni dɑɑ bɑnt l pɑɑk, k b dɑɑ fit bɑɑt n buol ni, k mɑn teb’b.» Esɑɑyi din yet nnɑ, k mɑɑn u din lɑ Yiesu *yudɑnt e, k din piɑk u po. Ŋɑɑn k Suifnbɑ yudɑnm bonciɑnn gbɑɑ din tien Yiesu yɑdɑ, ŋɑɑn b k nyinn b mɔnŋ pɑɑnu ni ɑ b tien’ɔ yɑdɑ, k mɑɑn b tiin jɑŋmɑɑni ɑ Fɑɑliisiɑnnbɑ nɑ sɑɑ nyinn’b Suifnbɑ jɑɑnti dieok ni, k mɑɑn b din luon niib n pɑk’b e, k gɑl Yennu n pɑk’b. Ŋɑnn e k Yiesu tɑn pɑk sɑnpɑɑpo wɑɑ ɑ: «Dɑɑnɔ nbɑ tien’n yɑdɑ, u k tien min kuukuɑ kɑɑ yɑdɑ, ŋɑɑn u mun tien wun nbɑ tun’n nɑ e yɑdɑ. Wun nbɑ lɑɑt’n, u lɑɑt wun nbɑ tun’n nɑ e mun. N bɑɑl tingbounŋ ni nɑ mɑɑ mii tei yentl niib e, k dɑɑnɔ nbɑ tien’n yɑdɑ, u kɑn biɑl bunbɔnn ni. K biɑ jen ɑ, wun nbɑ gbɑt n mɑɑn nɑ, ŋɑɑn k k sɑk, min kɑɑ sɑɑ bu u buut k biil’ɔ, k mɑɑn n k bɑɑl tingbounŋ nɑ ni mɑɑ n tɑn bu u buut k biil’ɔ kɑɑ, ŋɑɑn n bɑɑl mɑɑ n tɑn fiel *dulnyɑ e. K wun nbɑ yien’n k k sɑɑk n mɑɑn nɑ, lenŋ e k u sɑɑ lɑ lin nbɑ sɑɑ bu k biil’ɔ. Mɑɑn nbɑ k n pɑk nɑ tɑn sɑɑ bu nɑn’ɔ dulnyɑ cincɑɑtdɑɑl. N k piɑk nɑn n tiɑɔnŋ yiikuo kɑɑ, ŋɑɑn n Bɑɑ nbɑ tun’n nɑ yet’n mɑɑ sɑɑ pɑk lin nbɑ nɑn mɑɑ sɑɑ wɑnn lin nbɑ. N mi nɑn lin nbɑ k u wɑnn’n tien niib mɑnfuol nbɑ kɑɑ gbennu e. Ŋɑnn, lin nbɑ k n piɑk nɑ, l tie lin nbɑ k n Bɑɑ wɑnn’n e.» Yuo nbɑ k *yuktgɑltiɑlu jɑɑnm ji din k fɔk, k Yiesu din mi nɑn yuo nɑ e k u sɑɑ nyi tingbounŋ nɑ ni, k ŋmɑt u Bɑɑ penŋ. U din luon u tiɑɔnŋ *puolpoweitieb nbɑ be tingbounŋ nɑ ni, k biɑ din luon’m nɑn wɑɑ tɑn gbenn u tuonɑ. L yuo nɑ k ŋuɑ nɑn u puolpoweitieb din di jiet, k *Sɑɑtɑn ponŋ din dɔnŋ k te k Suudɑ Iskɑɑliɑɔt wun nbɑ tie Siimɔn bik nɑ dukn ɑ u sɑɑ kuɑt Yiesu. Ŋɑɑn Yiesu ŋɑnin din mi nɑn u Bɑɑ tul’ɔ bont kul u nuu ni wɑɑ, k biɑ din mi nɑn u nyii u Bɑɑ penŋ e, k biɑ sɑɑ ŋmɑt u penŋ ɑ. Ŋɑnn e k u fiil jiet pɑɑk, k liɑt u liɑtfuouk k bil, ŋɑɑn jii nunfiɑnŋ, k gbɑb u siɑk ni, ŋɑɑn jii nyun k wɑt tien tɑtlɑɑɔk ni, k piin fobtl u puolpoweitieb tɑɑ, ŋɑɑn tuu suol nunfiɑnŋ nbɑ k u gbɑb nɑ k fiɑl b tɑɑ. K u tɑn bɑɑl Siimɔn Piɑl penŋ. K Piɑl boi’ɔ: «N Yonmdɑɑnɔ, ɑ yɑɑ ɑ fobt n tɑɑ e mun ii?» K Yiesu yet’ɔ: «Mɔtɑɑnɑ, ɑ dɑɑ k bɑnn mɑɑ tuun lin nbɑ nɑ pɑɑk, ŋɑɑn l i yɑnn wɑɑnm-nnɑ, ɑ sɑɑ bɑnn ɑ.» K Piɑl yet’ɔ: «Min ŋɑnin ponŋ, ɑ kɑn mi k fobt n tɑɑ fɑb ɑ.» K Yiesu yet’ɔ ɑ: «Mi i kii fobt ɑ tɑɑ, min nɑn fin sɑɑ jiɑl muɑnu e.» Ŋɑnn e jik k Siimɔn Piɑl yet’ɔ ɑ: «N Yonmdɑɑnɔ, dɑɑ fobtl n tɑɑ kuukuɑ kɑɑ, ŋɑɑn fobtl n nii nɑn n yul kul ɑ.» K Yiesu yet’ɔ: «Dɑɑnɔ nbɑ ponŋ wul nyun, l dɑɑnɔ ji k mɔk jɑknt. L pɑɑk, l k kpɑɑ tɑlɑs nɑn wun ŋɑnm k wul biɑk, sie k wun fobt u tɑɑ e. I ji k mɔk jɑknt, ŋɑɑn l k tie i kul ɑ kɑɑ.» Yiesu ponŋ din mi wun nbɑ sɑɑ kuɑt’ɔ nɑ. L pɑɑk e te k u din yet yɑɑ ɑ: «L k tie i kul ɑ kɑɑ k mɔk jɑknt.» Yiesu nbɑ fobt b tɑɑ k gbenn yuo nbɑ nɑ, k u ji jii u liɑtfuouk nɑ k liɑ, ŋɑɑn jen kɑl jiet nɑ buol, ŋɑɑn boi’b ɑ: «I mi mɑɑ tun lin nbɑ k tul’i nɑ pɑɑk ii? I yi’n ɑ n tie i Wɑntuɑ e, ɑ nɑn Yonmdɑɑnɔ, k i mɔk mɔni, k mɑɑn n set tie nnɑ e. Tɔn, k min nbɑ tie Yonmdɑɑnɔ nɑn Wɑntuɑ, ŋɑɑn tɑn fobt i tɑɑ nɑ, l mun ŋɑn k ii fobtl i lieb tɑɑ, k mɑɑn n wɑnn’i nyinn e nɑ, k ii mun i tuun nnɑ mɑn nɑn mɑɑ tun biɑnŋ nbɑ k tul’i nɑ. Bɑlmɔni e k n yien’i nɑ, tuontunnɔ k cie u dɑɑnɔ, k tuomu mun k cie wun nbɑ tun’ɔ nɑ. Mɔtɑɑnɑ l i tie k i ji mi lin nbɑ nɑ, pɑlpienn tie i yɑl e l i tie k i tuun nnɑ.» «N k piɑk i kul ɑ po kɑɑ. N mi yinm nbɑ k n gɑnn’i nɑ pɑlɑ ni. Ŋɑɑn l tie k lin nbɑ diɑn Yennu lolkpel kɑdɑɑɔk ni n gbie ɑ: ‹Dɑɑnɔ nbɑ k min nɑn ŋuɑ lɑkn di pɑɑnu nɑ, ŋuɑ e yɑɑ wun kuɑt’n.› Sie k diɑni nɑ fɑbl tien mɔni k gbien. N yien’i lɑbɑɑl mɑnŋ mɔtɑɑnɑ nɑ, k suɑ l dɑɑ k tien, k l i tei tien gbenn yuo nbɑ, k yin tien yɑdɑ nɑn n set tie mɑɑ tie wun nbɑ e. «Bɑlmɔni e k n yien’i nɑ, dɑɑnɔ nbɑ gɑɑl n tuomu, u gɑɑl min e, k wun nbɑ gɑɑl min nɑ, u gɑɑl wun nbɑ tun’n nɑ mun e.» Yiesu nbɑ din yet nnɑ puolpo e, k pɑlbiil bɑɑl’ɔ bonciɑnn, k u yet’b ɑ: «Bɑlmɔni e k n yien’i nɑ, i ni yenɔ sɑɑ kuɑt’n ɑ.» K l ŋmɑt b yɑn, nɑn wɑɑ yien wun nbɑ i e, k b jiɑntl goli b lieb. B ni yenɔ nbɑ k Yiesu mɑntk din luon’ɔ nɑ kɑl kpiɑ’u. K Siimɔn Piɑl kɑbint’ɔ, k yet’ɔ ɑ: «Boin’mɔ k lɑɑn u yien ŋmɑ po e.» K u puolpoweituɑ mɑnŋ dɔnn nɑkn’ɔ, k boi’ɔ ɑ: «N Yonmdɑɑnɔ, l tie ŋmee?» K Yiesu jiin ɑ: «Mi i tei ŋmit pɑɑnu k tun suk kpint ni k tul wun nbɑ, yin bɑnn nɑn l dɑɑnɔ e nɑ.» Ŋɑnn e k u ŋmit pɑɑnu nɑ k suk kpint ni, k jii k tul Suudɑ wun nbɑ tie Siimɔn Iskɑɑliɑɔt bijɑ nɑ. Suudɑ nbɑ din gɑɑl pɑɑnu mɑnŋ yuo nbɑ nɑ, k Sɑɑtɑn kuɑ u ni. K Yiesu ji yet’ɔ: «Tient fɑɑ yɑɑ ɑ tien lin nbɑ yiɑn yiɑn.» Ŋɑɑn b suɑ din k bɑnn lin nbɑ k Yiesu pɑk’ɔ nɑ pɑɑk. K mɑɑn Suudɑ nbɑ din tuu diɑ likli pɑkl nɑ, b siɑb din duki mi ɑ Yiesu tun’ɔ ɑ wun sɑɑn sɑɑ dɑɑ jɑɑnm nɑ jiet e, ɑmi u yet’ɔ ɑ wun sɑɑn tul tɑlɑs-dɑnm e likli. Suudɑ nbɑ din gɑɑl pɑɑnu nɑ yuo nbɑ nɑ, l tonton nɑ k u fiil nyii. L din tie nyiɑɔk o. Suudɑ nbɑ din nyii nɑ puolpo, k Yiesu yet u puolpoweitieb ɑ: «Mɔtɑɑnɑ e k *Nisɑɑlk Bijɑ sɑɑ lɑ dontl, k n ni e Yennu mun sɑɑ lɑ dontl biɑk. L i tie k Yennu lɑ dontl u ni, l kɑn wei i k u mun sɑɑ te k Nisɑɑlk Bijɑ n lɑ dontl u ni. «N wɑɑs, n ji kɑn wei nɑn’i bonciɑnn. I tɑn sɑɑ lon’n, ŋɑɑn n sɑɑ wɑnn’i nɑn mɑɑ yet *Suifnbɑ yudɑnm biɑnŋ nbɑ nɑ, ɑ i kɑn fit bɑɑl siɑn nbɑ k n sɑɑ nɑ.» «Mɔtɑɑnɑ n tien’i senpɑɑnu e, ɑ ii luon i lieb mɑn. Mɑɑ luon’i biɑnŋ nbɑ nɑ, ii mun i luon i lieb nnɑ. L i tie k i luon i lieb, suɑ kul sɑɑ bɑnn nɑn i tie n puolpoweitieb e.» Ŋɑnn e k Siimɔn Piɑl boi’ɔ ɑ: «N Yonmdɑɑnɔ, ɑ yɑɑ ɑ tɑn sɑɑn lee?» K Yiesu jiin yet’ɔ ɑ: «Mɑɑ tɑn sɑɑ sɑɑn siɑn nbɑ, i kɑn fit wei mɔtɑɑnɑ, ŋɑɑn l puolpo i sɑɑ wei’n ɑ.» K Piɑl biɑ boi’ɔ: «N Yonmdɑɑnɔ, bee tien k n kɑn fit wei’ɑ mɔtɑɑnɑ? Min ŋɑnin ponŋ tien siil nɑn k n gɑɑl ɑ pɑɑk k kpo.» K Yiesu boi’ɔ ɑ: «A set tien siil nɑn mɔni nɑn k ɑ gɑɑl n pɑɑk k kpo oo? Bɑlmɔni e k n yien’ɑ nɑ, kojouk dɑɑ tɑn kɑn bui dɑɑnn, k ɑ tɑn sɑɑ noi tɑɑl muntɑ ɑ ɑ k mi’n.» «I dɑɑ te k i yɑn put. Tient Yennu yɑdɑ, k mun tien’n yɑdɑ. Diet bonciɑnn be n Bɑɑ ŋɑɑk ni. L i bo i kii tie bɑlmɔni, n bo kɑn yet’i ni, k mɑɑn n kun ɑ sɑɑ tien i diet mɑnŋ siil e. K mi i kun k sɑɑ tien i diet nɑ siil k gbenn, n biɑ sɑɑ jen ɑ k tɑn jii’i, k i mun tɑn sii be siɑn nbɑ k n tɑn sii be nɑ. I mi mɑɑ sɑɑ siɑn nbɑ, k biɑ mi l sɔnu.» K Tuomɑ boi’ɔ: «N Yonmdɑɑnɔ, t k mi fɑɑ sɑɑ siɑn. Nlee k t sɑɑ bɑnn l sɔnu?» K Yiesu jiin k yet’ɔ ɑ: «Min e tie sɔnu nɑ, k biɑ tie mɔmɔnm, k biɑ tie mɑnfuol. Suɑ kɑɑ k sɑɑ bɑɑl n Bɑɑ buol ni, k l k tie k u sint bɑɑl’n. L i bo i tie k i mi’n, i biɑ bo sii mi n Bɑɑ nɑ wɑɑ, ŋɑɑn mɔtɑɑnɑ k jikt sɑɑ, i ji mi’u k biɑ lɑɑt’ɔ.» K Fiiliip yet’ɔ ɑ: «N Yonmdɑɑnɔ, wɑnt’t ɑ Bɑɑ mɑnŋ, k t pɑlɑ n pɑɑk.» K Yiesu jiin ɑ: «Fiiliip, n ponŋ be nɑn’i k l wei wɑɑ, ŋɑɑn k ɑ dɑɑ k mi’n ii? Wun nbɑ lɑ’n, u set lɑ n Bɑɑ mɑnŋ e nɑ. K bee k ɑ yɑɑ ɑ n wɑnn’i n Bɑɑ mɑnŋ i? A k tien yɑdɑ nɑn n be n Bɑɑ ni e, k n Bɑɑ mun be n ni ii? Mɑɑn nbɑ k n pɑk k tul’i nɑ, l k nyii n ni kɑɑ, ŋɑɑn l nyii n Bɑɑ Yennu buol e. Ŋuɑ e be n ni k tuun u tuonɑ mɑnŋ. Tient’n yɑdɑ nɑn n be n Bɑɑ ni, k n Bɑɑ mun be n ni. L i kii tie nnɑ biɑk, yin tien yɑdɑ tuonɑ mɑnŋ pɑɑk. «Bɑlmɔni e k n yien’i nɑ, dɑɑnɔ nbɑ tien’n yɑdɑ, u sii tuun bɑktnɔunŋ tuonjɑɑnɑ nɑn mɑɑ tuun biɑnŋ nbɑ nɑ, k u bɑktnɔunŋ tuonjɑɑnɑ mɑnŋ gbɑɑ sɑɑ gɑl n yɑl ɑ, k mɑɑn n sɑɑ n Bɑɑ buol e. K lin nbɑ kul k i sii mei’ɔ l po n sɑnn ni, n sɑɑ tun’ɑ, ɑ k ŋuɑ Yennu n lɑ dontl n pɑɑk. K l i tie k i mei’ɔ lin nbɑ kul po n sɑnn ni, n sɑɑ tun ɑ.» «L i tie k i luon’n, i sii sɑɑk n mɔb, k n sɑɑ miɑl n Bɑɑ k u sɑɑ tul’i sonmtɔluɑ, k u sii be nɑn’i yuo nbɑ kɑɑ gbennu. Ŋuɑ e tie Foŋɑnm nbɑ wɑnt bɑlmɔni. Tingbounŋ nɑ ŋɑɑtieb k fit gɑɑl’ɔ, k mɑɑn b k lɑɑt’ɔ, k biɑ k mi’u, ŋɑɑn yinm ŋɑnin mi’u, k mɑɑn u be nɑn’i, k biɑ sii be i ni. «N kɑn nyik’i, k i tie kpiebi. N sɑɑ jen i penŋ nɑ. K l i yɑnn wɑɑnm-nnɑ, tingbounŋ nɑ ŋɑɑtieb ji kɑn lɑ’n, ŋɑɑn yinm ŋɑnin biɑ sɑɑ lɑ’n ɑ. Mɑɑ mɔk mɑnfuol nɑ, k i mun sii mɔk mɑnfuol. L dɑɑl i bɑɑl, i tɑn sɑɑ bɑnn nɑn n be n Bɑɑ ni e, k i mun biɑ be n ni, k n mun be i ni. «Dɑɑnɔ nbɑ mɔk n *senni k biɑ sɑɑk’l, l dɑɑnɔ e luon’n. N Bɑɑ Yennu sii luon wun nbɑ luon’n, k n mun sii luon’ɔ, k sɑɑ fiit n mɔnŋ k wɑnn’ɔ.» K Suudɑ, (l k tie Suudɑ Iskɑɑliɑɔt kɑɑ) boi’ɔ ɑ: «N Yonmdɑɑnɔ, bee tien k ɑ sɑɑ fiit ɑ mɔnŋ k wɑnn’t, ŋɑɑn kɑn fiit ɑ mɔnŋ k tul tingbounŋ nɑ ŋɑɑtieb i?» K Yiesu jiin yet’ɔ ɑ: «Dɑɑnɔ nbɑ luon’n, u sii sɑɑk n mɑɑn, k n Bɑɑ sii luon’ɔ, k min nɑn n Bɑɑ sɑɑ bɑɑl u buol k sii tun be u ni. Dɑɑnɔ nbɑ k luon’n, u k sɑɑk n mɑɑn, k yɑɑ gbɑt mɑɑn nbɑ nɑ, l k tie n yɑl kɑɑ, ŋɑɑn l tie n Bɑɑ nbɑ tun’n nɑ yɑl e. «N yien’i mɑɑn nbɑ nɑ, mɑɑ dɑɑ be nɑn’i nɑ, ŋɑɑn k n Bɑɑ sɑɑ tun sonmtuɑ i buol, n sɑnn ni. L sonmtuɑ e tie Foŋɑnm nɑ. Ŋuɑ e sɑɑ wɑnn’i mɑɑn kul, k biɑ sɑɑ tiɑl’i lin nbɑ kul k n ponŋ yet’i. «N tien’i mɑnu e. N pi’i piini nbɑ tie n mɑnu e. N k tul’i nɑn tingbounŋ ŋɑɑtieb nbɑ tuu tul b lieb bɑnnu nbɑ nɑ kɑɑ. I dɑɑ mɔk pɑlbiil. I biɑ dɑɑ tiin jɑŋmɑɑni. I ponŋ gbɑt k n yet’i ɑ: ‹N yɑɑtl e, ŋɑɑn n biɑ sɑɑ jen i buol ni nɑ.› L i tie k i luon’n i e, i sii mɔk pɑlpienn nɑn mɑɑ sɑɑ n Bɑɑ Yennu buol ni nɑ, k mɑɑn n Bɑɑ cie’n. «N yien’i lin nbɑ nɑ mɔtɑɑnɑ, k suɑ l dɑɑ k tien, k yuo nbɑ k l tɑn sɑɑ tien e wɑɑ, k yin tien yɑdɑ. N kɑn pɑk nɑn’i k wei, k mɑɑn tingbounŋ nɑ yudɑɑnɔ bɑɑt. U k mɔk n yiikuo, ŋɑɑn l tie k tingbounŋ nɑ ŋɑɑtieb n bɑnn nɑn n luon n Bɑɑ nɑn mɔni, k n mun tuun lin nbɑ k u yet’n ɑ n tun. «Fiit mɑn k tin yɑɑt mɑn.» «Min e tie bɑlmɔni tiik nbɑ k b yi *fiinyɑ nɑ, k n Bɑɑ Yennu tie l ŋɑnmtuɑ, k u tuu cuɑ yiini kul nbɑ gɑɑ n pɑɑk ŋɑɑn k k luon luɑnɑ nɑ. Ŋɑɑn yiini kul nbɑ ŋɑnin luon luɑnɑ nɑ, u tuu gbɑt gbɑt ŋɑnn e, k lin ŋɑnm k lon luɑnɑ bonciɑnn. Mɔtɑɑnɑ, yinm e tie niŋɑnm, mɑɑn nbɑ k n pɑk k tul’i nɑ pɑɑk. Ii gɑɑ n pɑɑk mɑn, k n sii be i ni. Tiik yiinu kɑn fit lon luɑnɑ u kuukuɑ, sie k u gɑɑ tiik pɑɑk. I mun kɑn fit lon luɑnɑ, sie k i gɑɑ n pɑɑk. «Min e tie tiik mɑnŋ, k yinm e tie l yiini. Wun nbɑ gɑɑ n pɑɑk, k n mun be u ni, ŋuɑ e sii luon luɑnɑ bonciɑnn, k mɑɑn mi i kɑɑ i ni, i kɑn fit tun siɑl. Wun nbɑ k gɑɑ n pɑɑk, u nɑɑn nɑn tiik yiinu nbɑ k b cuɑ’l k lu k l kuol nɑ e. L tiik yiinbuolu e k b tuu tikl k juo muu nɑ. L i tie k i tun gɑɑ n pɑɑk, k n mɑɑn nɑ be i ni, miɑt lin nbɑ kul k i luon, k i sɑɑ lɑ wɑɑ. L i tie k i luon luɑnɑ bonciɑnn, ŋɑnn e sɑɑ wɑnn nɑn i set tie n *puolpoweitieb nɑn bɑlmɔni, k n Bɑɑ sɑɑ lɑ dontl. «N Bɑɑ nbɑ luon’n biɑnŋ nbɑ nɑ, n mun luon’i l biɑnŋ e. Ii gɑɑ n pɑɑk, k n lonm sii be i ni. L i tie k i sɑɑk n mɔb, n lonm sii be i ni, nɑn mɑɑ sɑɑk n Bɑɑ mɔb, k u lonm mun be n ni nɑ.» «N pɑk nɑ k tul’i, ɑ n pɑlpienn i be i ni e, k i pɑlpienn n gbie. Nɑ e tie n *senni k n senn k tul’i, mɑɑ ii luon i lieb nɑn mɑɑ luon yinm biɑnŋ nbɑ nɑ. Lonjɑɑnsiɑl kɑɑ k gɑl nilɔ n sɑk k gɑɑl u yuɑsnbɑ pɑɑk k kpo. «L i tie k i tuun mɑɑ yien’i biɑnŋ nbɑ nɑ, i tie n yuɑsnbɑ e. N ji kɑn yiin’i tuontunnɑ, k mɑɑn tuontunnɔ k mi u Yonmdɑɑnɔ dudukt. Mɑɑ yi’i n yuɑsnbɑ nɑ, k mɑɑn lɑbɑɑl kul nbɑ k n gbɑt n Bɑɑ penŋ nɑ, ŋɑnn e k n wɑnn’i. Yinm kɑɑ gɑnn’n, ŋɑɑn min e gɑnn’i, k tul’i tuonɑ mɑɑ ii sɑɑ kii luon luɑnɑ bonciɑnn, luɑnɑ nbɑ sii be mɔkmɔk nɑn mɔkmɔk, ɑ n Bɑɑ Yennu n tul’i lin nbɑ k i miɑl’ɔ n sɑnn ni. Lin nbɑ nɑ e k n pɑk senn k tul’i, mɑɑ ii luon i lieb mɑn. «Tɔn, l i tɑnŋ i tie k tingbounŋ nɑ ŋɑɑtieb nɑn’i, yin bɑnn nɑn b ponŋ nɑn min e wɑɑ. L i bo i tie k i tie tingbounŋ nɑ ŋɑɑk niib i e, tingbounŋ nɑ ŋɑɑtieb bo sii luon’i nɑn bɑɑ luon b mɔnŋ niib biɑnŋ nbɑ nɑ e. Ŋɑɑn n gɑnn’i k nyinn’i tingbounŋ nɑ niib ni wɑɑ, k i ji k tie tingbounŋ nɑ ŋɑɑtieb yɑb. L pɑɑk e tien k b nɑn’i. Ii tiɑn mɑɑn nbɑ k n pɑk’i nɑ mɑn, ɑ: ‹Tuontunnɔ kɑɑ k cie u cɑnbɑɑ.› B i muks’n, b mun sɑɑ muks’i wɑɑ, k b i sɑk n mɑɑn, b mun biɑ sɑɑ sɑk i mɑɑn ɑ. B set sɑɑ muks’i n sɑnn pɑɑk k mɑɑn b k mi wun nbɑ tun’n nɑ. «Mi ii dinŋ ii kii sik k tɑn pɑk k tul’b, b bo kii mɔk biit, ŋɑɑn mɔtɑɑnɑ sɔnsɑu ji kɑɑ k b sɑɑ fit bɔl b biit. Ŋɑɑn wun nbɑ nɑn’n, u nɑn n Bɑɑ e mun. Mi i bo kii tuun bɑktnɔunŋ tuonjɑɑnɑ nbɑ k suɑ dɑɑ k mi tun nɑ b buol ni, b biɑ bo kii mɔk biit, ŋɑɑn mɔtɑɑnɑ b lɑ bɑktnɔunŋ tuonjɑɑnɑ nɑ wɑɑ, ŋɑɑn nɑn min nɑn n Bɑɑ. Ŋɑɑn lin nbɑ nɑ tien ɑ lin gbie lin nbɑ diɑn b senni ni ɑ: ‹B nɑn’n, ŋɑɑn k l k mɔk pɑɑk.› «N sɑɑ tun sonmtuɑ i penŋ, wun nbɑ tie Foŋɑnm k wɑnt bɑlmɔni nɑ. U nyi n Bɑɑ buol e k sii piɑk n po. K i mun sii tie n *siɑlɑ, k mɑɑn i ponŋ tun be nɑn’n, lɑɑ din nyii yuo nbɑ k n din piin k tuun n tuonn nɑ. «N wɑnt’i lin nbɑ nɑ ɑ i dɑɑ buol i yɑdɑ ni e. B tɑn sɑɑ yuɑ nyinn’i *Suifnbɑ jɑɑnti diet ni. K yuo bɑɑt k wun nbɑ tɑn kpi’i, u sii duki mi ɑ u tuun nnɑ k tien Yennu e. B tɑn sɑɑ tun lin nbɑ nɑ k tul’i wɑɑ, k mɑɑn b din k mi n Bɑɑ k biɑ k mi’n. Ŋɑɑn n yien’i lin nbɑ nɑ mɔtɑɑnɑ, ɑ l yuo i tɑnŋ i bɑɑl, k yin ji fit tiɑl n mɑɑn nbɑ k n pɑk’i nɑ.» «N din k yet’i lin nbɑ nɑ sinsinn, k mɑɑn min nɑn yinm e tuu be. Ŋɑɑn mɔtɑɑnɑ n sɑɑ wun nbɑ tun’n nɑ penŋ e. Ŋɑɑn i suɑ k boi’n k lɑɑn n sɑɑ lee. Ŋɑɑn mɑɑ yien’i lin nbɑ mɔtɑɑnɑ pɑɑk, k i ji mɔk pɑlbiil bonciɑnn. N yien’i bɑlmɔni e, nɑn l ŋɑn i po nɑn k n yɑɑt sɑɑn, k mɑɑn mi i kii sɑɑn, sonmtuɑ nɑ kɑn bɑɑl i penŋ. Ŋɑɑn mi i tɑnŋ i sɑɑn, n sɑɑ tun’ɔ i penŋ nɑ. «U i tɑnŋ i bɑɑl yuo nbɑ, u sɑɑ wɑnn tingbounŋ nɑ ŋɑɑtieb ɑ b kpɑnn b mɔnŋ e k jiin biit po, k biɑ kpɑnn b mɔnŋ k jiin lin nbɑ ŋɑn po, k biɑ kpɑnn b mɔnŋ k jiin Yennu bɑlbunu po. U sɑɑ wɑnn’b ɑ b kpɑnn b mɔnŋ e k jiin biit po, k mɑɑn b k tien’n yɑdɑ. U sɑɑ wɑnn’b ɑ b kpɑnn b mɔnŋ k jiin lin nbɑ ŋɑn po, k mɑɑn n ji sɑɑ n Bɑɑ penŋ e k i ji kɑn lɑ’n. U sɑɑ wɑnn’b ɑ b kpɑnn b mɔnŋ e k jiin Yennu bɑlbunu po, k mɑɑn u ponŋ bu tingbounŋ nɑ yudɑɑnɔ buut k biil’ɔ wɑɑ. «Mɑɑn be bonciɑnn k n bo sɑɑ pɑk’i, ŋɑɑn i kɑn fit gɑɑl’l mɔtɑɑnɑ. Foŋɑnm nbɑ wɑnt bɑlmɔni nɑ, u i tɑnŋ i bɑɑl yuo nbɑ, u sɑɑ wɑnn’i bɑlmɔni kul wɑnnu wɑɑ. K mɑɑn u tɑn kii piɑk u mɔnŋ mɔnŋ po kɑɑ, ŋɑɑn u tɑn sii wɑnt’i lin nbɑ k u gbiɑ, k biɑ sii yien’i lin nbɑ tɑn sɑɑ tien nɑ. U sii dont n sɑnn, k mɑɑn u tɑn sii jikt lin nbɑ kul tie n yɑl e k wɑnt’i. Lin nbɑ kul k n Bɑɑ mɔk tie n yɑl e. Ŋɑnn e te k n yet ɑ u sii jikt lin nbɑ tie n yɑl e k wɑnt’i.» «L i yɑnn wɑɑnm-nnɑ i ji kɑn lɑ’n, ŋɑɑn l i biɑ kii yɑnn wɑɑnm-nnɑ, i biɑ sɑɑ lɑ’n ɑ.» K u *puolpoweitesiɑb boi b lieb ɑ: «Lin nbɑ nɑ pɑɑk tie bee? K u yɑɑ ɑ l i yɑnn wɑɑnm-nnɑ, ɑ t kɑn lɑ’u, ɑ ŋɑɑn l i biɑ kii yɑnn wɑɑnm-nnɑ, ɑ t sɑɑ lɑ’u wɑɑ. K u biɑ yɑɑ ɑ k mɑɑn u sɑɑ u Bɑɑ penŋ e. ‹L i yɑnn wɑɑnm-nnɑ› pɑɑk tie bee? T k mi wɑɑ piɑk lin nbɑ nɑ pɑɑk.» K Yiesu bɑnn nɑn b yɑɑ bin boi’ɔ buboit e. L pɑɑk e te k u boi’b ɑ: «Mɑɑ yɑɑ ɑ l i yɑnn wɑɑnm-nnɑ i kɑn lɑ’n, k biɑ yɑɑ ɑ l i biɑ yɑnn wɑɑnm-nnɑ i sɑɑ lɑ’n ɑ nɑ, i boi i lieb e ɑ i bɑnn l pɑɑk ii? Bɑlmɔni e k n yien’i nɑ, i tɑn sii fɑbn k mɔ, ŋɑɑn tingbounŋ nɑ ŋɑɑtieb ŋɑnin tɑn sii mɔk pɑlpienn e. I sii mɔk pɑlbiil, ŋɑɑn l puolpo k i pɑlbiil mɑnŋ tɑn sɑɑ tunn k tien pɑlpienn. «L tie nɑn puo nbɑ tuu yɑɑ wun mɑl, k mɔk pɑlbiil nɑ e, k mɑɑn u fɑlɑ yuo bɑɑl ɑ, ŋɑɑn u i tɑnŋ i mɑl bik yuo nbɑ, u ji tuu tɑnm u fɑlɑ nɑ po e, ŋɑɑn ji mɔk pɑlpienn nɑn wɑɑ mɑl bik tingbounŋ ni nɑ pɑɑk. L tɑn sii tie i mun nnɑ e. Mɔtɑɑnɑ yɑɑ mɔk pɑlbiil nɑ, ŋɑɑn n biɑ tɑn sɑɑ lɑ’i wɑɑ, k i pɑlɑ tɑn sɑɑ penn bonciɑnn, k suɑ kɑɑ k tɑn sɑɑ nyinn pɑlpienn mɑnŋ i ni. «L yuo i tɑnŋ i bɑɑl, i tɑn kɑn boi’n buboit. Bɑlmɔni e k n yien’i nɑ, lin nbɑ kul k i mei n Bɑɑ nɑn n sɑnn ni, u sɑɑ tul’i wɑɑ. Ŋɑɑn nɑn mɔtɑɑnɑ, i dɑɑ k mi miɑl’ɔ bonsiɑl nɑn n sɑnn ni. Ii mei’ɔ mɑn, k i sɑɑ lɑ, k ji fit lɑ pɑlpienn k sɑɑ yɑkl.» «N ponŋ tuu puɑn’i kpɑnjɑn e, ŋɑɑn yuo bɑɑt k n ji tɑn kii puɑn’i kpɑnjɑn, ŋɑɑn n tɑn sii piɑk k yentl i nunm po e k jikt sɑɑ n Bɑɑ Yennu po. Ŋɑɑn l yuo i tɑnŋ i bɑɑl, i tuu sii mei’ɔ n sɑnn ni. N k yɑɑ ɑ n tɑn sii mei’ɔ k tien’i kɑɑ, k mɑɑn n Bɑɑ mɔnŋ mɔnŋ luon’i, yɑɑ mun luon’n k tien yɑdɑ nɑn n nyii n Bɑɑ mɑnŋ buol ni nɑ pɑɑk. N din nyii n Bɑɑ mɑnŋ penŋ e k sik tingbounŋ nɑ ni, k mɔtɑɑnɑ n ji nyikt tingbounŋ mɑnŋ e nɑ, ŋɑɑn ŋmɑt u penŋ.» Ŋɑnn e k u puolpoweitieb nɑ yet’ɔ ɑ: «Mɔtɑɑnɑ ɑ ji kpɑn piɑk yentl t nunm po e nɑ. A ji k puɑn’t kpɑnjɑn kɑɑ. Mɔtɑɑnɑ t ji bɑnn nɑn ɑ mi bonsiɑl kul, k l k tie k suɑ n boi’ɑ buboit kɑɑ wɑɑ. K l pɑɑk e tien k t tien yɑdɑ nɑn ɑ nyii Yennu penŋ e.» K Yiesu jiin’m ɑ: «I ji tien’n yɑdɑ mɔtɑɑnɑ wɑɑ ɑɑ? Tɔn, yuo bɑɑt, k l ponŋ bɑɑl ɑ, k i kul tɑn sɑɑ yɑt kun. I tɑn sɑɑ nyik’n, k n be n kuukuɑ, ŋɑɑn n kii be n kuukuɑ kɑɑ, k mɑɑn n Bɑɑ be nɑn’n. N yien’i lin nbɑ nɑ ɑ yin lɑ mɑnu e, yɑɑ gɑɑ n pɑɑk nɑ. I tɑn sii di fɑlɑ tingbounŋ nɑ ni. Ŋɑɑn ii mɔk pɑlcienn mɑn. N nyɑnn tingbounŋ nɑ wɑɑ.» Yiesu nbɑ din pɑk nnɑ mɑnŋ, ŋɑɑn gokt got sɑnpɑɑpo, k yet ɑ: «N Bɑɑ, yuo mɑnŋ bɑɑl nɑ. Ŋɑɑnt k ɑ Bijɑ n lɑ dontl, k ji fit te k ɑ mun n lɑ dontl, k mɑɑn fin e tul’ɔ yiikuo niib kul pɑɑk, ɑ wun ji fit tul niib kul nbɑ k ɑ tul’ɔ mɑnŋ mɑnfuol nbɑ kɑɑ gbennu. K mɑnfuol mɑnŋ e tie lin nbɑ sɑɑ te k niib n bɑnn fin nbɑ tie Yennu nɑn bɑlmɔni, k suɑ kɑɑ, nɑn Yiesu *Klistu nbɑ k ɑ tun’ɔ nɑ. Tuonɑ nbɑ k ɑ tul’n, ɑ n tun nɑ, n ji tun k gbenn ɑ, k donn ɑ sɑnn tingbounŋ nɑ ni. N Bɑɑ, tuln’min *yudɑnt mɔtɑɑnɑ, yudɑnt nbɑ k n din mɔk, yuo nbɑ k n din be ɑ buol ni k suɑ k ɑ dɑɑ din k nɑn *dulnyɑ nɑ. «Niib nbɑ k ɑ din gɑnn’b tingbounŋ nɑ ni k tul’n nɑ, n te k b bɑnn’ɑ wɑɑ. B din tie ɑ yɑb e, k ɑ din jii’b k tul’n, k b mun sɑk ɑ mɑɑn ɑ. K mɔtɑɑnɑ b mi nɑn bonsiɑl kul nbɑ k ɑ tul’n nɑ, l nyii ɑ buol e, k mɑɑn n pɑk’b mɑɑn nbɑ k ɑ tul’n nɑ wɑɑ, k b mun gɑɑl ɑ. B mi nɑn n set nyii ɑ penŋ e nɑn mɔni, k b tien yɑdɑ nɑn fin e tun’n. «Tɔn, mɔtɑɑnɑ n ji mei’ɑ b pɑɑk e nɑ. N k mei’ɑ tingbounŋ nɑ niib kul pɑɑk kɑɑ, ŋɑɑn mɔtɑɑnɑ n mei’ɑ bin nbɑ k ɑ tul’n nɑ pɑɑk e, k mɑɑn b tie ɑ yɑb e. N yɑb kul tie ɑ yɑb e, k ɑ yɑb kul mun tie n yɑb, k b ni e k n lɑɑt yudɑnt. N ji k be tingbounŋ nɑ ni, ŋɑɑn ŋɑnm ŋɑnin dɑɑ be tingbounŋ nɑ ni e. N bɑɑt ɑ buol ni e. N Bɑɑ, *Ŋɑnɔ nɑ, i diɑ’b fɑnu nɑn ɑ sɑnn ni, sɑnn nbɑ k ɑ din pul’n nɑ, ɑ bin ji fit tɑɑn yonm nɑn min nɑn fin nbɑ kpɑn tie yonm nɑ. Mɑɑ dɑɑ be nɑn’m nɑ, n diɑ’b fɑnu nɑn ɑ sɑnn nbɑ k ɑ din pul’n nɑ ni. N guu’b k b ni suɑ k bot, sie wun nbɑ din sɑɑ bot ɑ k lin nbɑ diɑn Yennu lolkpel kɑdɑɑɔk ni nɑ n gbie e. Ŋɑɑn mɔtɑɑnɑ n bɑɑt ɑ penŋ e, k mɑɑ dɑɑ be tingbounŋ nɑ ni nɑ, n piɑk lin nbɑ nɑ k tien’m, ɑ bin ji fit lɑ n pɑlpienn nɑ k sɑɑ yɑkl. «N pɑk ɑ mɑɑn nɑ tul’b ɑ, k tingbounŋ nɑ ŋɑɑtieb nɑn’m, k mɑɑn b k tie tingbounŋ nɑ ni yɑb, nɑn mɑɑ mun k tie tingbounŋ nɑ ni yuɑ nɑ. N k mei’ɑ mɑɑ ɑ nyinn’b tingbounŋ nɑ ni kɑɑ, ŋɑɑn n mei’ɑ fɑn guul’b fɑnu, k Klistu dɑtɑɑk dɑɑ bɑɑt k biil’b. B k tie tingbounŋ nɑ yɑb, nɑn mɑɑ mun k tie tingbounŋ nɑ yuɑ nɑ. «Ŋɑɑnt k bii tie ɑ yɑb nɑn bɑlmɔni, k mɑɑn ɑ mɑɑn tie bɑlmɔni e. Fɑɑ din tun’n tingbounŋ nɑ ni biɑnŋ nbɑ nɑ, nnɑ e k n mun tun’m tingbounŋ nɑ ni. K b pɑɑk e k n jikt n mɔnŋ k tien’ɑ nɑ, ɑ bin ji fit tien ɑ tiɑɔnŋ yɑb nɑn bɑlmɔni. «N k mei’ɑ k tien ŋɑnm kuukuɑ kɑɑ, ŋɑɑn n biɑ mei’ɑ k tien bin nbɑ tɑn sɑɑ tien’n yɑdɑ b muɑnti pɑɑk e wɑɑ, ɑ b kul n tɑɑn yonm. N Bɑɑ, ŋɑɑnt k bii be t ni, nɑn fɑɑ be n ni k n mun be ɑ ni nɑ, ɑ k tingbounŋ nɑ ŋɑɑtieb n tien yɑdɑ nɑn fin e tun’n. N tul’b yudɑnt nbɑ k ɑ tul’n nɑ, ɑ b kul n tɑɑn yonm nɑn min nɑn fin nbɑ tɑɑn yonm biɑnŋ nbɑ nɑ. N be b ni, k ɑ mun be n ni, ɑ k bin tɑɑn yonm dede k tingbounŋ ŋɑɑtieb n fit bɑnn nɑn fin e tun’n, k ɑ mun luon’m nɑn fɑɑ luon’n biɑnŋ nbɑ nɑ. «N luon k bin nbɑ k ɑ tul’n nɑ i be mɑɑ tɑn sii be siɑn nbɑ k bin lɑ n yudɑnt nbɑ k ɑ din tul’n k suɑ k ɑ dɑɑ k nɑn dulnyɑ nɑ. N Bɑɑ, fin nbɑ tie Ŋɑnɔ nɑ, tingbounŋ nɑ ŋɑɑtieb k mi’ɑ ni, ŋɑɑn n mi’ɑ, k bin nbɑ be nɑn’n mi nɑn fin e tun’n. N te k b bɑnn’ɑ k n biɑ sɑɑ te k b ŋɑnm bɑnn’ɑ, ɑ k lonm nbɑ k ɑ mɔk nɑn’n nɑ ii be b ni k n mun sii be b ni.» Yiesu nbɑ din pɑk k gbenn nɑ puolpo, k ŋuɑ nɑn u *puolpoweitieb yɑɑt sɑɑ, k sɑɑ puot kpenu nbɑ k b yi Seedlɔn nɑ. Gungounŋ nnɑ din be lenŋ, k b din be gungounŋ mɑnŋ ni. Tɔn, Suudɑ wun nbɑ kuɑt Yiesu nɑ din tuu mi gungounŋ mɑnŋ buol, k mɑɑn yuo kul Yiesu din tuu sɑɑ nɑn u puolpoweitieb lenŋ e. Ŋɑnn e k Suudɑ tɑn bɑɑl gungounŋ mɑnŋ ni nɑn sejenm bonciɑnn, nɑn Yennu jɑɑnti yudɑnm nɑn Fɑɑliisiɑnnbɑ tuontunnɑ, k b din diɑ jɑtiɑt nɑn fitɑ nɑn mulɑnbɑɑbi. Yiesu ŋɑnin din mi bonsiɑl kul nbɑ yɑɑ lin tien’ɔ, ŋɑnn e k u nyii tuɑnn, k boi’b ɑ: «I luon ŋmee?» K b jiin ɑ: «Yiesu nbɑ tie Nɑɑsɑɑlet nilɔ nɑ.» K u yet’b ɑ: «Min e nɑ.» K Suudɑ, wun nbɑ nyii u puol nɑ, k u sie lenŋ nɑn’m. Yiesu nbɑ ŋɑnin yɑɑ ɑ: «Min e nɑ» yuo nbɑ, k b ji ŋmɑt potuntunɑ, k bɑɑ bɑɑ tinŋ ni. K Yiesu ŋɑnm boi’b ɑ: «I luon ŋmee?» K b biɑ yɑɑ ɑ: «Yiesu nbɑ tie Nɑɑsɑɑlet nilɔ nɑ.» K Yiesu yet’b ɑ: «N ponŋ yet’i ɑ min e nɑ. L i tie k i luon’n i e, yin ŋɑɑn k bin nbɑ be nnɑ nɑ k bin yɑɑt ɑ.» Nnɑ e k lin nbɑ k u yet ɑ: «Fɑɑ tul’n bin nbɑ kul nɑ, b suɑ k bot,» k lin fit tien mɔni. L yuo mɑnŋ k Siimɔn Piɑl din diɑ juk-bɑnjiɑk k nuɑt, k cuɑ Yennu jɑɑnti yudɑɑnɔ tuontunnɔ niidiitu po tubl k pot. Tuontunnɔ mɑnŋ sɑnn din yi Mɑɑlkus. K Yiesu yet Piɑl ɑ: «Jiin ɑ juk-bɑnjiɑk mɑnŋ k jiin nuɑn. A duki nɑn wɑhɑlɑ *kɔp nbɑ k n Bɑɑ tul’n nɑ, n kɑn nyu lenŋ ii?» Ŋɑnn e jik k sejenm nɑn b yudɑɑnɔ nɑn *Suifnbɑ yudɑnm tuontunnɑ nɑ suol Yiesu, k lol’ɔ, k jii’u k dɑɑ sɑɑn nɑn’ɔ Ann buol sinsinn. Ann din tie *Kɑɑyiif diɑnjuɑ e, k Kɑɑyiif din tie Yennu jɑɑnti yudɑɑnɔ e l binn ni. Kɑɑyiif mɑnŋ e dɑɑn yet Suifnbɑ yudɑnm ɑ l i tie k niyenɔ kuɑ gɑɑl niib kul pɑɑk k kpo, l sɔ. Bɑɑ din sɑɑn nɑn Yiesu yuo nbɑ, k Siimɔn Piɑl nɑn Yiesu puolpoweitɔluɑ wɑɑ. K puolpoweituɑ mɑnŋ din tie suɑ nbɑ k Yennu jɑɑnti yudɑɑnɔ mi’u e. L pɑɑk, k u din fit kuɑ Yennu jɑɑnti yudɑɑnɔ nɑ ŋɑɑdundounŋ ni, siɑn nbɑ k Yiesu be nɑ. Ŋɑɑn k Piɑl ŋɑnin biɑl sie nɑn-yel po yɑnŋl tɑnmɔb ni, k puolpoweitɔluɑ mɑnŋ nbɑ k Yennu jɑɑnti yudɑɑnɔ din mi’u nɑ, k u ŋmɑt yɑnŋl tɑnmɔb nɑ ni, k pɑk nɑn sɑpɑɑmɔ nbɑ guu tɑnmɔb nɑ, k kuɑn Piɑl dundounŋ ni. K sɑpɑɑmɔ mɑnŋ boi Piɑl: «A k tie juɑ nɑ puolpoweitɔyenɔ kɑɑ ɑɑ?» K Piɑl jiin’ɔ ɑ: «Aɑi. N k tie u puolpoweitɔyenɔ kɑɑ.» Wɑɑt din be l yuo, k tuontunnɑ nɑ nɑn sejenm nɑ juo sɑnkuɑnɑ muu, k sie k nɑni, k Piɑl tɑn sɑɑn tɑɑn’m k b nɑni. Ŋɑnn e k Yennu jɑɑnti yudɑɑnɔ nɑ boi Yiesu u puolpoweitieb nɑn u wɑnnu nɑ po. K Yiesu jiin yet’ɔ ɑ: «N ponŋ tuu piɑk yienin ni k tien suɑ kul. Yuo kul n tuu wɑnt niib Yennu mɑɑn Suifnbɑ jɑɑnti diet ni nɑn Yennu jɑɑnti ŋɑsɑɑkɑk ni, siɑn nbɑ k Suifnbɑ kul tuu bɑɑt lɑknt nɑ. N k pɑk siɑl wuol ni. Bee tien k ɑ boi’n nnɑ? Boin bin nbɑ gbɑt lin nbɑ k n tuu yien’m nɑ. Ŋɑnm mi mɑɑ tuu yien lin nbɑ.» Yiesu nbɑ yet nnɑ mɑnŋ, k sejenm nɑ yenɔ peb’ɔ tɑnpɑk, ŋɑɑn boi’ɔ ɑ: «Nnɑ e k ɑ sɑɑ pɑk jiin Yennu jɑɑnti yudɑɑnɔ?» K Yiesu yet’ɔ: «Mi i pɑk bonbisiɑl i e, fɑn yet suɑ kul lɑɑ tie lin nbɑ. Ŋɑɑn mi i pɑk lin nbɑ tokn i e, bee tien k ɑ ji peb’n i?» L yuo e k Ann te k b jii Yiesu k sɑɑn nɑn’ɔ Kɑɑyiif wun nbɑ tie Yennu jɑɑnti yudɑɑnɔ nɑ penŋ, k Yiesu biɑ lek dɑɑ lol nɑn ŋmiit. Piɑl nbɑ din sie k nɑni muu nɑ, lenŋ mɑnŋ k b boi’ɔ ɑ: «A k tie u puolpoweitɔyenɔ kɑɑ ɑɑ?» K Piɑl noi, k yet’b ɑ: «Aɑi, n k tie u puolpoweitɔyenɔ kɑɑ.» K Yennu jɑɑnti yudɑɑnɔ tuontun-yenɔ nbɑ k u ninjɑ tie wun nbɑ k Piɑl cuɑ u tubl k pot nɑ, k u boi’ɔ ɑ: «N k lɑ’ɑ nɑn Yiesu, gungounŋ nɑ ni ii?» K Piɑl biɑ noi. L tɑɑkpɑɑk ni nɑ k kojouk bui. L puolpo k Suifnbɑ yudɑnm nyii nɑn Yiesu Kɑɑyiif ŋɑɑk ni k sɑɑn nɑn’ɔ Luonmtieb kpɑnbɑl ŋɑɑk ni. L din tie sɑn-nyɑpob ni e. Ŋɑɑn Suifnbɑ yudɑnm mɑnŋ k luon bin kuɑ ŋɑɑk mɑnŋ ni k mɑɑn b din k luon bin kuɑn b mɔnŋ jɑknt ni ɑ bin fit k di *yuktgɑltiɑlu jɑɑnm jiet. L pɑɑk k *Piilɑɑt nyii nɑn-yel k tuok’b, k boi’b ɑ: «I tɑɑl juɑ nɑ biɑ pɑɑk e?» K b yɑɑ ɑ: «Wuu bo i kii tun bonbiil, t bo kɑn bɑɑl nɑn’ɔ ɑ buol nnɑ.» K Piilɑɑt yet’b: «I mɔnŋ mɔnŋ n jii’u k bu nɑn’ɔ i *senni nbɑ wɑnt biɑnŋ nbɑ.» K Suifnbɑ yudɑnm mɑnŋ yɑɑ ɑ: «T k mɔk yiikuo nɑn tin kpi nilɔ.» L din set tɑn tie nnɑ e, ɑ Yiesu nbɑ din yɑɑ ɑ kubuolu nbɑ k u tɑn sɑɑ kpo nɑ, n ji fit gbie. K Piilɑɑt ŋmɑt k kuɑ ŋɑɑk nɑ ni, ŋɑɑn yiin Yiesu, k boi’ɔ ɑ: «A tie Suifnbɑ Kpɑnbɑl ee?» K Yiesu jiin k boi’ɔ ɑ: «Fin e dɑɑ boi’n buboit nɑ ɑmi siɑb e yet’ɑ n po oo?» K Piilɑɑt yet’ɔ: «N mun tie Suifnbɑ buolu ni nilɔ ee? A mɔnŋ mɔnŋ niib nɑn Yennu jɑɑnti yudɑnm e jii’ɑ k tɑn tul’n. A jiɑ biil bee?» K Yiesu yet’ɔ ɑ: «N nɑɑn k tie tingbounŋ nɑ ni yɑl kɑɑ. N nɑɑn i bo i tie tingbounŋ nnɑ yɑl i e, n sejenm bo sɑɑ kɔn n pɑɑk, k Suifnbɑ yudɑnm bo kɑn suol’n. Aɑi, n nɑɑn k tie tingbounŋ nnɑ nɑɑn.» K Piilɑɑt boi’ɔ ɑ: «A set tie Kpɑnbɑl e ŋɑnin ii?» K Yiesu jiin ɑ: «Nnn, fin e yien ɑ n tie Kpɑnbɑl. B din mɑl’n ɑ n wɑnn niib bɑlmɔni e. K l pɑɑk e, k n din bɑɑl *dulnyɑ nɑ ni k suɑ kul nbɑ wɑɑ bɑlmɔni mɑnŋ gbiɑ n mɑɑn.» K Piilɑɑt boi’ɔ ɑ: «Bɑlmɔni tie bee?» Wɑɑ yet nnɑ puolpo k u ŋmɑt nyii nɑn-yel Suifnbɑ yudɑnm nɑ buol k yet’b ɑ: «N k lɑ juɑ nɑ biit k sɑɑ biil’ɔ. Ŋɑɑn i mɔk siɑl k tuu tie binn kul ni, k n tuu nyinn dɑnsɑlyenɔ *yuktgɑltiɑlu jɑɑnm yuo k tul’i. I luon k n nyinn Suifnbɑ Kpɑnbɑl nɑ k tul’i ni ii?» K b tiɑn tintiɑni k yɑɑ ɑ: «T k luon juɑ nɑ kɑɑ. T luon Bɑɑlɑɑbɑɑs e, k ɑ nyinn’ɔ k tul’t.» Ŋɑɑn k Bɑɑlɑɑbɑɑs mɑnŋ din tie fɑt-tuɑ e. L yuo nɑ k *Piilɑɑt te k b buo Yiesu gbɑnn. K sejenm nɑ luu kunkoni foklk k yiln’mɔ, ŋɑɑn lɑnn’ɔ bɑɑnmunŋ nnɑ, k nyi bɑɑt k gbɑɑ u tuɑnn, k yien ɑ: « *Suifnbɑ Kpɑnbɑl, t fuont’ɑ,» ŋɑɑn pebt’ɔ tɑnpɑki. Ŋɑnn e k Piilɑɑt biɑ ŋɑnm k dɑɑ nyii nɑn-yel k yet yudɑnm nɑ: «Gotl mɑn, n bɑɑt nɑn’ɔ i buol, k yin bɑnn nɑn n k lɑ u biit.» Ŋɑnn e, k Yiesu bɑɑl nɑn-yel po, k yil kunkoni foklk nɑ nɑn bɑɑnmunŋ nɑ, k Piilɑɑt yet’b ɑ: «Gotl mɑn, juɑ mɑnŋ e nɑ.» Yennu jɑɑnti yudɑnm nɑn b sejenm nbɑ lɑ’u nɑ, k b tiɑn tintiɑni, k yɑɑ ɑ: «Kpɑɑn’mɔ dɑpunpunn pɑɑk. Kpɑɑn’mɔ dɑpunpunn pɑɑk.» K Piilɑɑt yet’b ɑ: «Yinm jii’mɔ mɑn k kpɑɑ’u dɑpunpunn pɑɑk i mɔnŋ, k mɑɑn min k lɑ u biit.» K Suifnbɑ yudɑnm nɑ jiin yɑɑ ɑ: «T mɔk sensɑu, k *senni mɑnŋ wɑnt nɑn u kpɑn lek tie wun kpo e, k mɑɑn u yɑɑ ɑ u tie Yennu Bijɑ e.» Piilɑɑt nbɑ din gbɑt nnɑ, k jɑŋmɑɑni biɑ ŋɑnm suol’ɔ bonciɑnn, k u ŋmɑt kuɑ ŋɑɑn yiin Yiesu, k tɑn boi’ɔ ɑ: «A nyii lee?» Ŋɑɑn Yiesu din k jiin’ɔ siɑl. Ŋɑnn e, k Piilɑɑt boi’ɔ ɑ: «A kɑn pɑk jiin’n ii? A k mi nɑn n mɔk yiikuo k sɑɑ ŋɑɑ’ɑ, k biɑ mɔk yiikuo k sɑɑ kpɑɑ’ɑ dɑpunpunn pɑɑk ii?» K Yiesu ji jiin’ɔ ɑ: «Yennu i bo i kii cɑb’ɑ yiikuo, ɑ bo kii mɔk n yiikuo. L pɑɑk, dɑɑnɔ nbɑ suol’n k jiin kubn’ɑ nɑ, u biit yɑb bonciɑnn k gɑl ɑ yɑl ɑ.» L yuo k ji sɑɑ, Piilɑɑt din yiɑb luon wun ŋɑɑ Yiesu, ŋɑɑn k Suifnbɑ yudɑnm nɑ yɑki kpɑyɑkt k yɑɑ ɑ: «L i tie k ɑ ŋɑɑ’u, ŋɑnn ɑ ji k tie Luonm kpɑnbɑlɑ yudɑɑnɔ Sesɑɑl yuɑk kɑɑ, k mɑɑn dɑɑnɔ nbɑ pul u mɔnŋ Kpɑnbɑl, u tie kpɑnbɑlɑ yudɑɑnɔ nɑ dɑtɑɑk e.» Piilɑɑt nbɑ gbɑt nnɑ, k u nyii nɑn Yiesu nɑn-yel po, k kɑl u buut kɑɑnu pɑɑk, k b yi’l Binbintl. (Suifnbɑ mɑɑn ni, b yi’l Gɑɑbɑɑtɑ nɑ.) L din tie yensuuk po e, k l sɑɑ yent k *yuktgɑltiɑlu jɑɑnm n di. K Piilɑɑt yet Suifnbɑ yudɑnm nɑ ɑ: «I Kpɑnbɑl i nɑ.» K b yɑki kpɑyɑkt k yɑɑ ɑ: «Kpin’mɔ. Kpin’mɔ. Kpɑɑn’mɔ dɑpunpunn pɑɑk.» K Piilɑɑt boi’b: «I luon k n kpɑɑ i Kpɑnbɑl dɑpunpunn pɑɑk ii?» K Yennu jɑɑnti yudɑnm nɑ jiin ɑ: «T k mɔk kpɑnbɑlsuɑ sie Luonm kpɑnbɑlɑ yudɑɑnɔ Sesɑɑl kuukuɑ.» K Piilɑɑt ji cɑb ɑ bin kpɑɑ Yiesu dɑpunpunn pɑɑk. Ŋɑnn e k sejenm ji gɑɑl Yiesu, k u jii u tiɑɔnŋ kuun dɑpunpunn k nyii duo nɑ kpinŋ, k sɑɑn siɑn nbɑ k b yi’l «Yukpɑbuk» nɑ. (Suifnbɑ mɑɑn ni, b yi ŋɑnn e «Golgotɑ» nɑ.) Lenŋ e k b kpɑɑ’u dɑpunpunn pɑɑk, k biɑ kpɑɑ niib bɑnle dɑpunpunɑ pɑɑk k pukn Yiesu po, k yenɔ be u ciɑnu k luɑ mun be u ciɑnu, ŋɑɑn k Yiesu be sinsuuk ni. K Piilɑɑt diɑn diɑni k b tɑbn Yiesu dɑpunpunn nɑ yul pɑɑk, k l yɑɑ ɑ: «Nɑɑsɑɑlet nilɔ Yiesu wun nbɑ tie Suifnbɑ Kpɑnbɑl i nɑ.» K Suifnbɑ bonciɑnn din lii diɑni mɑnŋ ɑ, k mɑɑn siɑn nbɑ k b din kpɑɑ Yiesu dɑpunpunn pɑɑk nɑ, l din k fɔk nɑn Selusɑɑlenm. Diɑni nɑ, l din diɑn Suifnbɑ nɑn Luonm tieb nɑn Glek tieb mɑɑn ni e. Ŋɑnn e k Suifnbɑ Yennu jɑɑnti yudɑnm sɑɑn k yet Piilɑɑt ɑ: «Dɑɑ dɑ ɑ: ‹Suifnbɑ Kpɑnbɑl i nɑ,› ŋɑɑn diɑnt ɑ: ‹Juɑ nɑ yɑɑ ɑ u tie Suifnbɑ Kpɑnbɑl e.› » K Piilɑɑt jiin ɑ: «Mɑɑ sɑt diɑn lin nbɑ, n diɑn e.» Sejenm nbɑ kpɑɑ Yiesu nɑ puolpo e, k b jii u tiɑt k cent’l tɑɑl munnɑ, k sejenm nɑ kul din gɑɑl tol. L puolpo e biɑk k b jii u liɑtfuouk, lin nbɑ k b luu’l bonmunn, k l k mɔk nyɑlmu nɑ, k b yet b lieb ɑ: «I dɑɑ pɑt. Ŋɑɑnt k t tɔ tiɑtiɑ k lɑɑn wun nbɑ sɑɑ yent’l.» L din tien nnɑ, ɑ Yennu lolkpel kɑdɑɑɔk nbɑ din yet nnɑ, lin ji fit gbie ɑ: «B cent n tiɑt, k biɑ tɔ tiɑtiɑ n liɑtfuouk pɑɑk.» Nnɑ e k sejenm nɑ set din tun. K Yiesu nɑɑ din sie kpiɑ u dɑpunpunn nɑ, ŋuɑ nɑn u niipuo, k b yi’u Mɑɑli wun nbɑ tie Klopɑs ŋɑɑpuo, nɑn Mɑgdɑɑlɑ puo Mɑɑli, k b lɑkn sie lenŋ. K Yiesu lɑ u nɑɑ, k biɑ lɑ u *puolpoweituɑ nbɑ k u mɑntk luon’ɔ nɑ, k u mun sie lenŋ, k Yiesu yet u nɑɑ ɑ: «N nɑɑ, ɑ bijɑ i nɑ jik,» k biɑ yet u puolpoweituɑ mɑnŋ ɑ: «A mun, ɑ nɑɑ i nɑ jik.» Lɑɑ din nyii l yuo nɑ k u puolpoweituɑ nɑ ji din jii Yiesu nɑɑ k kun nɑn’ɔ u ŋɑɑk ni. L puolpo e, Yiesu din mi nɑn bonsiɑl kul nbɑ k u din tuun nɑ, l ji gbenn ɑ, k u yet ɑ: «Nyun-nyuklu mɔk’n,» ɑ lin gbien lin nbɑ diɑn Yennu lolkpel kɑdɑɑɔk ni nɑ. Ŋmɑnŋ din sie nɑn dɑmiituk lenŋ, k b jii sɑɑpo k tun dɑmiituk mɑnŋ ni, k jii tiik nbɑ k b yi iisɔp nɑ dɑɑɔk k fin sɑɑpo nɑ, k tien u mɔb ni, k u fuɑnt k nɑk, k yet ɑ: «L gbenn ɑ,» ŋɑɑn tibn k jii u siek k tul Yennu ŋɑɑn kpo. L din tie ɑlsumɑ dɑɑl e, k Suifnbɑ din k luon niib nɑ i be dɑpunpunɑ pɑɑk *Fuondɑɑl, k mɑɑn Fuondɑɑl mɑnŋ din tie dɑjɑɑnn e. Ŋɑnn e k b din boi Piilɑɑt ɑ wun cɑb’b k bin kɔnn kɔnn b tɑɑ k kpɑɑt’b. L pɑɑk, k sejenm nɑ sɑɑn k sɑɑ kɔnn bin nbɑ k b libn kpɑɑ’b nɑn Yiesu nɑ tɑɑ, ŋɑɑn bɑɑ bɑɑl Yiesu buol ni, k suɑ k u ponŋ kpo nɑ, b din k kɔnn u tɑɑ. Ŋɑɑn k sejenm yenɔ jii kpɑnn k ŋmuu Yiesu lokl ni. L tɑɑkpɑɑk ni k sɔn nɑn nyun ji nyi. Wun nbɑ diɑn lin nbɑ nɑ tie *siɑlɑ e k u *siɑlɑ tie mɔni, k u mun mi nɑn u piɑk mɔni e ɑ yin mun tien yɑdɑ. Lin nbɑ nɑ kul din tien ɑ lin nbɑ diɑn Yennu lolkpel kɑdɑɑɔk ni n gbie ɑ: «B kɑn yiel u kpɑbɑ nɑn yenn kuɑ wɑɑ.» K l biɑ diɑn Yennu lolkpel kɑdɑɑɔk ni ɑ: «Niib tɑn sii goli bɑɑ ŋmuu wun nbɑ kpɑnn nɑ.» L puolpo e k Suosiɑf, wun nbɑ tie Aliimɑɑte nilɔ nɑ, sɑɑn Piilɑɑt buol ni, k sɑɑ miɑl’ɔ Yiesu gbɑnɑnt. Suosiɑf din tie Yiesu puolpoweituɑ e, ŋɑɑn u din wɑɑ’u wuol ni e, k mɑɑn u din tiin Suifnbɑ yudɑnm e jɑŋmɑɑni. K Piilɑɑt cɑb’ɔ, k u sɑɑn k sɑɑ kpɑɑt Yiesu k jii’u. K Niikodenm mun bɑɑl, wun nbɑ din ponŋ mi k bɑɑl Yiesu penŋ nyiɑɔk nɑ, k diɑ tulɑɑli k l tie nɑn cilu piintɑ nɑ. (B din jii bonsiɑl nbɑ k b yi’l miil nɑn bonsiɑl nbɑ k b yi’l ɑlos k ŋmɑt k tien tulɑɑli mɑnŋ.) Ŋɑnn e, k b jii Yiesu k pɔbn’ɔ cincenŋɑnɑ ni nɑn tulɑɑli nɑ, nɑn Suifnbɑ kupiinu kɑɑl nbɑ tie biɑnŋ nbɑ nɑ. Bɑɑ din kpɑɑ Yiesu siɑn nbɑ nɑ, kpɑɑb din be lenŋ, k kɑpɑɑɔnŋ ponŋ be lenŋ, k b dɑɑ din k pii suɑ kɑɑɔk mɑnŋ ni. Suifnbɑ Fuondɑɑl nbɑ pel nɑ, k kɑɑɔk nɑ biɑ k fɔk nɑ, k b bil Yiesu lenŋ. K *Suifnbɑ *Fuondɑɑl tɑn gɑl, ŋɑɑn k lɑsl dɑɑl sɑn-nyɑpob ni e k suɑ l yuo dɑɑ bɔn, k Mɑgdɑɑlɑ puo Mɑɑli sɑɑn Yiesu kɑɑɔk buol, k lɑ k b bilnt kɑtɑnu kɑɑɔk mɑnŋ mɔb buol ɑ, k u ciɑl sɑɑn Siimɔn Piɑl nɑn Yiesu *puolpoweitɔluɑ nbɑ k Yiesu mɑntk luon’ɔ nɑ penŋ, k yet’b ɑ: «B piit Yonmdɑɑnɔ kɑɑɔk nɑ ni wɑɑ, k t k mi bɑɑ bil’ɔ siɑn nbɑ.» Ŋɑnn e k Piɑl nɑn Yiesu puolpoweitɔluɑ nɑ nyii k ciɑl sɑɑn kɑɑɔk mɑnŋ buol ni, k b bɑnle tiin k sɑɑ ŋɑɑn Yiesu puolpoweitɔluɑ nɑ ciɑl pɑɑk Piɑl, k sɑɑ dɔnŋ bɑɑl kɑɑɔk mɑnŋ buol sinsinn, ŋɑɑn k k kuɑ. U din tibn e k lɑ kɑtinŋ. K Siimɔn Piɑl tɑn yuɑnt k bɑɑl k kuɑ, k lɑ k kɑtinŋ nɑ duɑ lenŋ, k biɑ lɑ cincenbik nbɑ k b dɑɑn fin Yiesu yul nɑ, k ŋɑnn fin l biɑnŋ k duɑ l kuukuɑ. Ŋɑnn e k Yiesu puolpoweitɔluɑ nbɑ din dɔnŋ k bɑɑl nɑ, mun kuɑ k ji lɑ k biɑ tien puo nɑ mɑɑn mɑnŋ yɑdɑ. (Ŋɑɑn b dɑɑ din k gbɑt lin nbɑ diɑn Yennu lolkpel kɑdɑɑɔk ni nɑ pɑɑk, ɑ l tie k Yiesu n fiil kuun ni.) K Yiesu puolpoweitieb bɑnle mɑnŋ ŋmɑt k kun. Ŋɑɑn Mɑɑli din biɑl e sie kɑɑɔk mɑnŋ nɑn-yel po k mɔ, k tɑn tibn k got kɑɑɔk nɑ ni, k lɑ *mɑlɑkɑɑnbɑ bɑnle, k b liɑ tɑpieni, k yenɔ kɑl siɑn nbɑ po k b dɑɑn bil Yiesu nɑ l yul po, k luɑ nɑ mun kɑl l tɑɑ po. K b boi’ɔ ɑ: «Puo nɑ, bee k ɑ mɔ?» K u jiin ɑ: «B piit n Yonmdɑɑnɔ e, k n k mi bɑɑ bil’ɔ siɑn.» Wɑɑ yet nnɑ, ŋɑɑn ŋmɑnt lɑ k Yiesu sie, ŋɑɑn k u k mi ɑ Yiesu e nɑ. K Yiesu boi’ɔ: «Puo nɑ, bee k ɑ mɔ? A goli luon ŋmee?» Mɑɑli ŋɑnin din mi ɑ u tie gungounŋ nɑ tuontunnɔ e, k u yet’ɔ ɑ: «Cɑnbɑɑ, l i tie k fin i e i jii’u, fɑn yet’n fɑɑ bil’ɔ siɑn, k n sɑɑn k sɑɑ jii’u.» K Yiesu yet’ɔ ɑ: «Mɑɑli.» K u ŋmɑnt k tokn’ɔ, k jiin’ɔ Suifnbɑ mɑɑn ni ɑ: «Lɑɑbuuni.» (L pɑɑk tie ɑ: «Wɑntuɑ.») K Yiesu yet’ɔ: «Ji dɑɑ diɑ’n, k mɑɑn n dɑɑ k duo n Bɑɑ buol ni. Ŋɑɑn i sɑɑ n nɑɑ wɑɑs penŋ, k sɑɑ yet’b ɑ, n sɑɑ do wun nbɑ tie n Bɑɑ nɑn i Bɑɑ nɑ penŋ ɑ, wun nbɑ tie n Yennu nɑn i Yennu nɑ.» K Mɑgdɑɑlɑ puo Mɑɑli, ŋmɑt Yiesu puolpoweitieb penŋ k sɑɑ yet’b ɑ: «N lɑ Yonmdɑɑnɔ nɑ wɑɑ,» ŋɑɑn yet’b wɑɑ yet’ɔ lin nbɑ nɑ. Lɑsl dɑɑl mɑnŋ dɑɑjuouk o, k Yiesu puolpoweitieb nɑ tɑn lɑkn lieb k be dieok ni, ŋɑɑn kpɑl gɑnn, k mɑɑn b tiin Suifnbɑ yudɑnm jɑŋmɑɑni e, k tɑn suɑ k Yiesu sie b sinsuuk ni, k fuont’b ɑ: «Mɑnu i be i pɑɑk.» Wɑɑ yet nnɑ puolpo e, k u wɑnn’b u niipɑnt ni fɔnɑ nɑn u lokl ni fɔnn nɑ. U puolpoweitieb nbɑ lɑ Yonmdɑɑnɔ mɑnŋ, k b ji mɔk pɑlpienn bonciɑnn. K Yiesu biɑ ŋɑnm fuont’b ɑ: «Mɑnu i be i pɑɑk. N Bɑɑ nbɑ tun’n biɑnŋ nbɑ nɑ, n mun yɑɑ n tun’i l biɑnŋ e.» L puolpo e k u pebl wɑn b pɑɑk k yet’b ɑ: «Gɑɑt Foŋɑnm mɑn. L i tie k i nyik cɑb suɑ biit, u set lɑ nyikcɑbu biit mɑnŋ pɑɑk ɑ, ŋɑɑn l i tie k i k nyik cɑb suɑ biit, u k lɑ nyikcɑbu.» Tɔn, k u puolpoweitɔyenɔ Tuomɑ, wun nbɑ k b din yi’u Jɑɑk nɑ, ŋuɑ din kɑɑ yuo nbɑ k Yiesu bɑɑl b ni nɑ. Ŋɑnn e, k u puolpoweitelieb nɑ yet’ɔ ɑ: «T lɑ Yonmdɑɑnɔ.» K Tuomɑ yet’b ɑ: «Min ŋɑnin, l i kii tie k n tɑn lɑ’u nɑn u niipɑnt ni fɔnɑ nɑ, k jii n niibil k tun siɑn nbɑ k b kpɑɑ kpɑi nɑ, k biɑ jii n nuu k tun u lokl nɑ ni i kɑɑ, n kɑn tien yɑdɑ.» L dɑɑ ŋɑnniin puolpo e k Yiesu puolpoweitieb nɑ biɑ tɑn lɑkn lieb k be dieok ni, k Tuomɑ ji be b ni. B lek kpɑl gɑnn, ŋɑɑn k Yiesu tɑn bɑɑl sie b sinsuuk ni, k fuont’b ɑ: «Mɑnu i be i pɑɑk,» ŋɑɑn yet Tuomɑ ɑ: «Jiin ɑ niibil k tun n niipɑnt ni, ŋɑɑn biɑ tɑnt ɑ nuu k tun n lokl ni, k ji dɑɑ bils, ŋɑɑn tien’n yɑdɑ.» K Tuomɑ yet’ɔ ɑ: «Fin e tie n Yonmdɑɑnɔ k biɑ tie n Yennu.» K Yiesu boi’ɔ ɑ: «Fɑɑ ji lɑ’n nɑ pɑɑk e k ɑ tien’n yɑdɑ ɑɑ? Bin nbɑ k lɑɑt’n ŋɑɑn tien’n yɑdɑ nɑ, pɑlpienn tie b yɑl e.» K Yiesu din tun bɑktnɔunŋ tuonjɑɑnɑ bonciɑnn k pukn u puolpoweitieb penŋ, ŋɑɑn ŋɑnn k diɑn kɑdɑɑɔk nɑ ni. Ŋɑɑn bɑktnɔunŋ tuonjɑɑnɑ nbɑ diɑn k be nnɑ nɑ, b diɑn ɑ yin tien yɑdɑ nɑn Yiesu e tie *Klistu, Yennu Bijɑ nɑ, ɑ l i tie k i tien yɑdɑ yin lɑ mɑnfuol u sɑnn ni. L puolpo e k Yiesu ŋɑnm dɔkt k wɑnn u mɔnŋ k tul u *puolpoweitieb, mɔkgbenŋl nbɑ k b yi’l Tiibeliɑt nɑ kpinŋ. Wɑɑ dɔkt biɑnŋ nbɑ e nɑ: Siimɔn Piɑl nɑn Tuomɑ (wun nbɑ k b din yi’u Jɑɑk nɑ) nɑn Nɑɑtɑɑniɑl (ŋuɑ e din nyii Kɑɑnɑ nbɑ be Gɑɑliile tinŋ ni nɑ), nɑn Sebede wɑɑs, nɑn Yiesu puolpoweitelieb bɑnle din lɑkn be lenŋ. K Siimɔn Piɑl tɑn yet u lieb ɑ: «N sɑɑ sik k suol jɑni wɑɑ.» K b yet’ɔ: «T sɑɑ ciɑn’ɑ.» K b sɑɑn kuɑ bulgbetl ni, ŋɑɑn l nyiɑɔk mɑnŋ b din k fit suol siɑl. L din tɑn yent sɑn-nyɑpob ni e k Yiesu sie nyunkpinŋ, ŋɑɑn k u puolpoweitieb k mi ɑ ŋuɑ e. K u yiin’m boi’b ɑ: «Ŋɑɑjɑb, i suol siɑl ii?» K b jiin ɑ: «Aɑi.» K u yet’b: «Lun i jɑnlɑɑɔnŋ i niidiitu po, k i sɑɑ suol jɑni.» K b lu b jɑnlɑɑɔnŋ nɑ, k ji gbɑl donnu, k mɑɑn jɑni nbɑ k b suol nɑ kpiɑtu din pɑɑk ɑ. Ŋɑnn e k Yiesu puolpoweituɑ nbɑ k u mɑntk luon’ɔ nɑ yet Piɑl ɑ: «Yonmdɑɑnɔ e.» Siimɔn Piɑl nbɑ gbɑt ɑ u tie Yonmdɑɑnɔ e nɑ, k u liɑ u liɑtfuouk nbɑ k u ponŋ liɑt bil nɑ, ŋɑɑn yukl sik nyun ni. Lenŋ din k fɔk nɑn nyunkpinŋ nɑ, k l fɔknt din tie nɑn miɑtɑ kobk nɑ, k Yiesu puolpoweitelieb ji kɑn bulgbetl nɑ k l dɑɑl jɑnlɑɑɔnŋ nɑ, k l gbie nɑn jɑni, k bɑɑl nyunkpinŋ nɑ. Bɑɑ nyii bulgbetl nɑ ni yuo nbɑ k b lɑ sɑnkuɑnɑ muu, k jɑnŋ nɑn pɑɑnu pɑɑ l pɑɑk k biet. K Yiesu yet’b ɑ: «Jiin jɑni nbɑ k i suol nɑ siɑl, k bɑɑl nɑn’n nnɑ.» K Siimɔn Piɑl kuɑ bulgbetl nɑ ni, k dɑt jɑnlɑɑɔnŋ nɑ k duo nɑn’n kunkonn, k l gbie nɑn jɑngbenŋɑ, k b kɑn, k l tie jɑni kobk nɑn piinŋmu nɑn ŋɑntɑ. L din yɑb bonciɑnn, ŋɑɑn jɑnlɑɑɔnŋ nɑ lek k pɑt. Ŋɑnn e k Yiesu yet’b ɑ: «Sɑɑ nɑ mɑn k tɑn ŋmɑn.» Ŋɑɑn nɑn b yenɔ kuɑ wɑɑ lek k mɔk pɑl nɑn wun boi’ɔ ɑ u tie ŋmee, k mɑɑn b mi nɑn u tie Yonmdɑɑnɔ e. K Yiesu jii pɑɑnu nɑ k tul’b, k biɑ jii jɑnŋ nɑ k tul’b. Lin nbɑ nɑ e din tie tɑɑl muntɑ ni k Yiesu jii u mɔnŋ k wɑnn u puolpoweitieb, Yennu nbɑ din fiin’ɔ kuun ni nɑ puolpo. Bɑɑ din dii jiet mɑnŋ puolpo e, k Yiesu boi Siimɔn Piɑl ɑ: «Siimɔn, fin nbɑ tie Sɑn bik, ɑ luon’n k gɑl bin nbɑ nɑ wɑɑ ɑɑ?» K u jiin ɑ: «Nnn, Yonmdɑɑnɔ, ɑ mi nɑn n luon’ɑ.» K u yet’ɔ ɑ: «Ii goli n pebis.» K tɑɑl munle ni k Yiesu boi Siimɔn Piɑl ɑ: «Siimɔn, fin nbɑ tie Sɑn bik, ɑ luon’n ii?» K u jiin ɑ: «Nnn, Yonmdɑɑnɔ, ɑ mi nɑn n luon’ɑ.» K u yet’ɔ ɑ: «Ii kpɑɑl n pei.» K tɑɑl muntɑ ni biɑk k Yiesu boi’ɔ ɑ: «Siimɔn, fin nbɑ tie Sɑn bik, ɑ luon’n ii?» K Piɑl pɑl ni ji biil, k mɑɑn Yiesu nbɑ boi’ɔ tɑɑl muntɑ ni ɑ: «A luon’n ii?» nɑ. K u yet’ɔ ɑ: «N Yonmdɑɑnɔ, ɑ mi bonsiɑl kul. A mi nɑn n luon’ɑ.» K Yiesu yet’ɔ: «Ii goli n pei. Bɑlmɔni e k n yien’ɑ nɑ, fɑɑ din dɑɑ tie nɑɑsimɔ nɑ, ɑ din tuu liɑ ɑ tiɑt ɑ tiɑɔnŋ o, k sɑɑ siɑn nbɑ po k ɑ luon, ŋɑɑn ɑ i tɑnŋ i kpet yuo nbɑ, ɑ sɑɑ tɑnt ɑ nii, k suɑ sɑɑ lɑnn’ɑ tiɑt, k jii’ɑ k ɑ sɑɑn siɑn nbɑ po k ɑ k luon.» Yiesu nbɑ yet lin nbɑ mɑnŋ, l din wɑnt biɑnŋ nbɑ k Piɑl tɑn sɑɑ kpo k te k Yennu sɑnn n lɑ dontl. L puolpo k Yiesu yet’ɔ ɑ: «Ii wɑɑ’n.» K Piɑl tɑn jiɑnt k lɑ Yiesu puolpoweitɔluɑ nbɑ k u mɑntk luon’ɔ nɑ, k u wɑɑ. (Ŋuɑ e tie wun nbɑ din kɑl k kpiɑ Yiesu yuo nbɑ k b din lɑkn di jiet nɑ, k u din dɔnn k nɑkn’ɔ k boi’ɔ ɑ: «Ŋmee yɑɑ wun tɑn kuɑt’ɑ mɑnŋ nɑ?») Piɑl nbɑ lɑ’u yuo nbɑ nɑ, k u boi Yiesu ɑ: «N Yonmdɑɑnɔ, ŋɑɑn k juɑ nɑ ŋɑnin i? Bee tɑn sɑɑ bɑɑl’ɔ?» K Yiesu jiin yet’ɔ ɑ: «Mi i luon k wuu be nɑn mɑɑ tɑn sɑɑ jen, l k lɑ’ɑ ni. Fin, ii wɑɑ’n.» L pɑɑk e tien k Yiesu puolpoweitieb din yien ɑ Yiesu puolpoweituɑ mɑnŋ kɑn kpo. Ŋɑɑn Yiesu ŋɑnin din k pɑk yɑɑ ɑ u kɑn kpo kɑɑ. U din yet ɑ: «Mi i luon wuu be nɑn mɑɑ tɑn sɑɑ jen, l k lɑ’ɑ ni.» Tɔn, Yiesu puolpoweituɑ mɑnŋ e tie wun nbɑ tie *siɑlɑ mɑnŋ, k jiin lin nbɑ nɑ po, k biɑ diɑn kɑdɑɑɔk ni, k t mi nɑn u *siɑlɑ mɑnŋ tie bɑlmɔni e. Bonɑ bonciɑnn din be k Yiesu din tun k pukn. B i bo i diɑn lin nbɑ kul k u din tun mɑnŋ, n dukn nɑn kɑdɑɑt nbɑ k b bo sɑɑ diɑn nɑ bo kɑn lɑ yiɑl tingbounŋ nɑ ni kii be. Cɑnbɑɑ Teofiil: N sinsinn diɑni nɑ ni, n din diɑn lin nbɑ kul k Yiesu din piin k tuun nɑn lin nbɑ k u din wɑnt niib nɑ, u tuonn pinpiin-yuo nɑ ni, mɔkmɔk nɑn Yennu nbɑ din tɑn donn’ɔ *Yendɔunŋ ni. Ŋɑɑn sinsinn dɑɑnn, wɑɑ din dɑɑ k duo nɑ, Foŋɑnm yiikuo ni e k u din wɑnn wɑɑ din gɑnn bin nbɑ k tien’m u tuomiinbɑ nɑ, bɑɑ sii tuun biɑnŋ nbɑ. U kuun puolpo e k u din jii dɑɑ piinnɑ k wɑnt’b nɑn u set be, bɑnnu nbɑ k bilsuk kɑɑ nɑn u set jen u mɑnfuol ni wɑɑ, k b din tuu tun lɑɑt’ɔ, k u piɑk nɑn’m k jikt sɑɑ Yennu nɑɑn po. Yosɑu yɑɑnn k u din tɑn lɑkn be nɑn’m k di jiet, k din tɑn tul’b mɔb ɑ: «I dɑɑ nyi Selusɑɑlenm, ŋɑɑn kii be kii guu piini nbɑ k n Bɑɑ senn mɔsonn ɑ u sɑɑ tul’i nɑ, mɑɑ din ponŋ yet’i lin nbɑ po nɑ. Sɑn din wuul niib nɑn nyun e, ŋɑɑn dɑɑ ŋɑnlele nɑ ni Yennu sɑɑ wuul’i Foŋɑnm ni.» Tuomiinbɑ nbɑ din lɑkn nɑn Yiesu yuo nbɑ, k b din tɑn boi’ɔ ɑ: «Yonmdɑɑnɔ, yuo nbɑ nɑ e k ɑ yɑɑ ɑ fɑt tinm Islɑɑeltieb yent k jiin’t ɑmi nlee?» K Yiesu yet’b ɑ: «L k lɑ’i nɑn k i bɑnn jinjɑnŋyuo nbɑ k n Bɑɑ senn yɑɑ lin tɑn tien. Ŋuɑ e mɔk u mɔnŋ yiikuo k senn l yuo. Ŋɑɑn yuo nbɑ k Foŋɑnm sɑɑ sik i pɑɑk, i sɑɑ lɑ yiikuo, k tɑn sii tie n siɑlɑɑdɑnm Selusɑɑlenm, nɑn Suude tinŋ kul ni, nɑn *Sɑɑmɑɑli tinŋ ni, nɑn tingbounŋ nɑ lokl kul po.» Wɑɑ pɑk mɑɑn mɑnŋ k gbenn yuo nbɑ, k b lɑ k u do sɑnpɑɑpo, k b goli’ɔ, k sɑnpɑgbɑnn sɑɑ dɔkn u pɑɑk k u bot, k b ji k lɑ’u. Bɑɑ lek biɑ sie k kpɑɑ b ninbinɑ k goli sɑnpɑɑpo nɑ, l tɑɑkpɑɑk ni k suɑ jɑb bɑnle sie k liɑ tɑpieni, k boi’b ɑ: «Yinm Gɑɑliile tieb, bee k i sie nnɑ k goli sɑnpɑɑpo nnɑ? Yiesu nɑ nbɑ nyii i buol ni k duo Yendɔunŋ ni biɑnŋ nbɑ nɑ, u biɑ tɑn sɑɑ nyi Yendɔunŋ mɑnŋ ni k jen sik nɑn yɑɑ goli’ɔ k u do sɑnpɑɑpo biɑnŋ nbɑ nɑ e.» L yuo nɑ k Yiesu tuomiinbɑ nɑ nyii *Oliifienbɑ jɑgbɑɑk nɑ pɑɑk k ŋmɑt Selusɑɑlenm. Lenŋ mɑnŋ nɑn Selusɑɑlenm din fɔk nɑn *Fuondɑɑl sɔnu nɑ e. Bɑɑ bɑɑl Selusɑɑlenm yuo nbɑ k b sɑɑn kuɑ ŋɑɑk nbɑ k b tuu be nɑ ni k duo dituɑtuk pɑɑk. Bin nbɑ din kuɑ mɑnŋ din tie Piɑl nɑn Sɑn nɑn Sɑɑk nɑn Andle nɑn Fiiliip nɑn Tuomɑ nɑn Bɑɑltelemi nɑn Mɑɑtieo nɑn Sɑɑk wun nbɑ din tie Alfe bijɑ, nɑn Siimɔn wun nbɑ yɑɑ ninbinn din mɔn nɑn k Suifnbɑ n yent b mɔnŋ nɑ, nɑn Suud wun nbɑ tie suɑ nnɑ k b yi’u Sɑɑk nɑ bijɑ, k b kul ɑ tuu tun lɑknt nɑn b lieb k din pukn puosiɑb nɑn Yiesu nɑɑ, Mɑɑli, nɑn Yiesu ninjɑnm, k b mei Yennu nɑn dudukyent kuukuɑ k k nɑk. Ŋɑnn e k dɑsiɑl nnɑ, k bin nbɑ din tien Yiesu yɑdɑ nɑ nɑn kobk nɑn piinle nɑ tɑɑn tikl kɑl, k Piɑl tɑn fiil k set k yet ɑ: «N nɑɑ wɑɑs, lin nbɑ k Foŋɑnm din te k Dɑɑfiid din sint yet k jikt sɑɑ Suudɑ nbɑ dɑɑn wɑnn niib k b suol Yiesu nɑ po, k l diɑn Yennu lolkpel kɑdɑɑɔk ni nɑ, l kpɑɑ tɑlɑs e k lin tɑn tun nnɑ k gbie. Suudɑ din tie t ni yenɔ k biɑ tuun tuonn nbɑ k t tuun.» (Suudɑ nbɑ din kɔi Yiesu k gɑɑl likli nbɑ nɑ e, k u jii k dɑɑ kpɑɑb, l kpɑɑb ni e k u din jɔnn u mɔnŋ k bɑɑ k put puol, k u nuɑt kul nyii. K Selusɑɑlenmtieb kul gbɑt nnɑ mɑnŋ, k pul kpɑɑb mɑnŋ sɑnn b mɔnŋ mɑɑn ni ɑ Akeldɑmɑ, k l pɑɑk tie «Sɔn Kpɑɑb.») «Tɔn, l diɑn *yɑni kɑdɑɑɔk ni ɑ: ‹Ŋɑɑnt k u ŋɑɑk n set lɑngbounŋ k suɑ dɑɑ kuɑ lenŋ.› K l biɑ diɑn ɑ: ‹L ŋɑn k suɑ n gɑɑl u tuonn yiɑl nɑ.› «L pɑɑk ɑmi l tie k tin gɑnn niyenɔ e k pukn’ɔ t po, ɑ wuu mun i tie Yiesu kuun fiilu siɑlɑɑdɑɑnɔ, k l ŋɑn k wuu tie tinm nbɑ din tuu tun lin nɑn Yonmdɑɑnɔ Yiesu yuo nbɑ k Sɑn din wul’ɔ Yennu nyunwulu mɔkmɔk k tɑn bɑɑl yuo nbɑ k Yiesu nyii t buol ni k duo Yendɔunŋ ni nɑ ni yenɔ.» Ŋɑnn e k b gɑnn jɑb bɑnle k b tie Suosiɑf wun nbɑ k b din yi’u Bɑɑlsɑɑbɑɑs nɑ (b biɑ din yi ŋuɑ e Sustus nɑ), nɑn Mɑɑtiɑs, ŋɑɑn ji miɑl Yennu ɑ: «Yonmdɑɑnɔ, fin nbɑ mi suɑ kul pɑl ni, wɑnt’t jɑb bɑnle nɑ ni, wun nbɑ k ɑ gɑnn, k wun tien *tuomi k gɑɑl tuonn nɑ yiɑl nbɑ k Suudɑ nyik ŋɑɑn sɑɑn sɑɑ be *siɑn nbɑ ŋɑn nɑn’ɔ nɑ.» L puolpo k b tɔ tiɑtiɑ, ɑ bin gɑnn b bɑnle mɑnŋ ni yenɔ, k Mɑɑtiɑs dii, k b jii’u k pukn’ɔ tuomiinbɑ piik nɑn yenɔ kuɑ nɑ ni. Tɔn, jɑɑnm nbɑ k b yi’l *Pɑntekuot dɑɑl e bɑɑl, k dɑɑl mɑnŋ e k Yiesuweilɑ kul ɑ lɑkn tɑɑn lieb boyenn kuɑ ni. L tɑɑkpɑɑk ni k fuut nyii sɑnpɑɑpo k fu nɑɑn nɑn wonpɑɑluk o dɑ nɑ, k bɑɑl sik k gbie ŋɑɑk nbɑ k b kɑl nɑ ni. K b lɑ k siɑl nɑɑn nɑn mupieunŋ nɑ, k yɑt k tuɑ tuɑ suɑ kul pɑɑk k Foŋɑnm gbie k yent suɑ kul ni, k b piin piɑk mɑbuolu buolu nbɑ k Foŋɑnm yɑɑ bii piɑk nɑ. K *Suifnbɑ nbɑ tie yentinnɑ mun din be Selusɑɑlenm l yuo, bin nbɑ nyii tini kul po tingbounŋ nɑ ni k bɑɑl lenŋ. Bɑɑ gbɑt fuut mɑnŋ yuo nbɑ, k nibul tikl lenŋ, k l tien’m yɑɑl-lituk, k mɑɑn Yiesuweilɑ mɑnŋ piɑk bɑlgɑni suɑ kul mɑɑn ni k u gbiɑ. K l tien’m bɑktnɔunŋ nɑn yɑɑl-lituk, k b boi b lieb ɑ: «Niib nɑ kul nbɑ piɑk nɑ k tie Gɑɑliile tieb kɑɑ ɑɑ? K l tien nlee k t kul ɑ tɑn jiɑ gbiɑ k b piɑk t mɔnŋ mɔnŋ mɑɑn nnɑ? T siɑb nyii Pɑlt nɑn Medi nɑn Elɑnm nɑn Mesopotɑɑmi nɑn Suude nɑn Kɑɑpɑɑdos nɑn Pɔn nɑn Asii, nɑn Fliiji nɑn Pɑnfiili nɑn Ejipt, nɑn Liibi yɑkɑ po siɑn nbɑ kpiɑ nɑn Siilenn, duo nbɑ kpiɑ nɑn Liibi nɑ, k t ni yenm mun biɑ nyii Luonm, k t siɑb tie Suifnbɑ, k lieb mun tie buolgɑnu nbɑ din lebt b jɑɑnti k wɑɑ Suifnbɑ Yennu, k t yenm mun biɑ nyii Klet nɑn Alɑɑbi, ŋɑɑn k t kul ɑ lek gbiɑ k b piɑk t mɔnŋ mɔnŋ mɑɑn ni, k piɑk dont Yennu sɑnn nɑn u bɑktnɔunŋ tuonjɑɑnɑ nbɑ k u tun.» K l bɑkt ŋɑɑn yɑɑl lit’b k ŋmɑt b yɑn k b boi b lieb ɑ: «Lin nbɑ nɑ pɑɑk tie bee?» Ŋɑɑn k siɑb mun biɑ lɑɑ k sɑlkt Yiesuweilɑ mɑnŋ ɑ: «B nyuu dɑɑn e k yib.» Ŋɑnn e k Piɑl nɑn u tuomiinbɑ lieb piik nɑn yenɔ kuɑ nɑ fiil k set nibul nɑ tuɑnn po, k Piɑl pɑk sɑnpɑɑpo wɑɑ ɑ: «Yinm Suifnbɑ, nɑn yinm nbɑ kul be Selusɑɑlenm nɑ, gbiintl mɑn fɑnu mɑɑ yɑɑ n pɑk’i lin nbɑ nɑ, k gbɑt l pɑɑk. Yɑɑ duki nɑn jɑb nɑ yib e nɑ, ŋɑɑn b k yib kɑɑ, k mɑɑn l dɑɑ tie sɑn-nyɑyendɑnn e. Lin nbɑ tien nɑ tie lin nbɑ k *Yennu sɔkni Suoel din yet k yɑɑ l tɑn sɑɑ tien nɑ e nɑ, ɑ: ‹Yennu yet ɑ: *Dulnyɑ juontu yuo n tɑn sɑɑ tun nnɑ e: n tɑn sii siknt n Siek suɑ kul pɑɑk k i bonjɑbis nɑn i sɑpɑɑnbis tɑn sii sɔknt n mɑɑn k i nɑɑsinm mun tɑn sii lɑɑt yelntu, k i jɑkpelɑ tɑn sii dɑmi dɑmiit. K l yuo mɑnŋ n tɑn sii siknt n Siek mɑnŋ n tuontunnɑ nbɑ tie jɑb nɑn bin nbɑ tie puob pɑɑk k b mun biɑ tɑn sii sɔknt n mɑɑn. N tɑn sii tuun bɑktnɔunŋ tuonjɑɑnɑ sɑnpɑɑpo, nɑn bɑktnɔunŋ nyinɑ tingbounŋ nɑ ni, k sɔn nɑn muu nɑn munyuuk tɑn sii be, k yennu tɑn sɑɑ kpint k bɔnn, k ŋmɑɑlk mun tɑn sɑɑ kpint k mɔnn nɑn sɔn nɑ, k l puolpo n dɑɑl sɑɑ bɑɑl k l sii tie dɑjɑɑnn e, k suɑ kul nbɑ tɑn boi min Yonmdɑɑnɔ po, n sɑɑ fiel’ɔ wɑɑ.› » Ŋɑnn e k Piɑl biɑ ŋɑnm yet ɑ: «Yinm Islɑɑeltieb, gbiintl mɑn lin nbɑ k n yɑɑ n yet’i k jikt sɑɑ Yiesu nbɑ tie Nɑɑsɑɑlet nilɔ nɑ po. I mɔnŋ mɔnŋ mi nɑn Yennu te k u tuun bɑktnɔunŋ tuonjɑɑnɑ nɑn nyinɑ i ni, k l set wɑnt nɑn mɔni nɑn Yennu e tun’ɔ. Yennu mi lin nbɑ yɑɑ lin tɑn tien, k l pɑɑk k u dɔnŋ lol lol k kubn’ɔ i nuu ni, k i te k biitdɑnm kpɑɑ tɑbn’ɔ dɑpunpunn pɑɑk k kpii’u, k l wɑnt nɑn yinm e set kpii’u. «Wɑɑ dɑɑn kpo k dɑɑ be kuun nii ni nɑ, k Yennu fɑt’ɔ k fiin’ɔ kuun ni, k mɑɑn kuun k fit diɑ’u. K mɑɑn Dɑɑfiid din yet k jikt sɑɑ Yiesu po k yɑɑ ɑ: ‹N din tun lɑɑt Yonmdɑɑnɔ n tuɑnn ni, k mɑɑn u be n niidiitu po, ɑ n dɑɑ jekl. L pɑɑk, n mɔk pɑlpienn k piɑk pɑlpienn mɑɑn. Mi i lek i tɑnŋ i kpo gbɑɑ, ŋɑɑn n sii mɔk dindɑnn, k mɑɑn ɑ tɑn kɑn nyik n siek k lin kpɑkn kpientinŋ ni. A kɑn ŋɑɑ k min ɑ Niŋɑnɔ gbɑnɑnt n tɑn bɑt, k ɑ biɑ te k n bɑnn sɔni nbɑ bɑɑt mɑnfuol ni, k mɑɑ sii be ɑ tuɑnn ni n sii mɔk pɑlpienn nbɑ kɑɑ pɑɑk.› » K Piɑl biɑ ŋɑnm yet yɑɑ ɑ: «N nɑɑ wɑɑs, n sɑɑ fit wɑnn’i nɑn bɑlmɔni k jikt sɑɑ t yejɑsɑɑkuɑ Dɑɑfiid po. U din kpo k b pii’u, k u kɑɑɔk dɑɑ be t buol nnɑ nɑ. Ŋɑɑn u din tie Yennu sɔkni e, k din mi nɑn Yennu senn mɔsonn k tul’ɔ, k yet yɑɑ ɑ, u tɑn sɑɑ jii u yɑɑbuonn yenɔ kuɑ k din’ɔ u mɔnŋ nɑɑn. Dɑɑfiid din mi lin nbɑ k Yennu yɑɑ wun tɑn tien. L pɑɑk, k u din pɑk *Klistu kuun fiilu po, k yet ɑ Yennu Nigɑnntuɑ tɑn kɑn kpɑkn kpientinŋ, k u gbɑnɑnt biɑ kɑn bɑt.» «Yiesu nbɑ nɑ e k Yennu dɑɑn fiin’ɔ kuun ni, k t kul ɑ nɑ mun tie u kuun fiilu mɑnŋ siɑlɑɑdɑnm. K Yennu biɑ donn’ɔ ɑ wun kɑl u niidiitu po. Wɑɑ kɑl nɑ k u gɑɑl Foŋɑnm nbɑ k u Bɑɑ din senn mɔsonn ɑ u sɑɑ tul’ɔ nɑ, k mɔtɑɑnɑ k u yɑt Foŋɑnm mɑnŋ t pɑɑk k ŋɑnn e k i gbiɑ k biɑ lɑɑt lin nbɑ tuun t ni nɑ. K mɑɑn Dɑɑfiid din k duo *Yendɔunŋ ni u tiɑɔnŋ, ŋɑɑn u din yet ɑ: ‹Yonmdɑɑnɔ Yennu yet n Yonmdɑɑnɔ ɑ Kɑln n niidiitu po mɔkmɔk nɑn mɑɑ tɑn sɑɑ jii ɑ dɑtɑi k tien’m ɑ tɑɑkpɑktɑ.› » K Piɑl biɑ yet ɑ: «Tɔn, l ŋɑn k Islɑɑeltieb kul n bɑnn nɑn l tie Yiesu nɑ e, wun nbɑ k i dɑɑn te k b kpɑɑ’u dɑpunpunn pɑɑk k kpii’u nɑ, ŋuɑ e k Yennu wɑnn nɑn u tie Klistu k biɑ tie Yonmdɑɑnɔ biɑk.» Niib nɑ nbɑ gbɑt nnɑ mɑnŋ, k b pɑlɑ ni biil bonciɑnn, k b boi Piɑl nɑn u lieb nɑ ɑ: «T nɑɑ wɑɑs, k t sɑɑ tien nlee?» K Piɑl yet’b ɑ: «Sie k i kul ɑ n mɔ kuɑŋɑɑn k lebt binbenŋ, k tin wul’i Yennu nyunwulu Yiesu Klistu sɑnn ni, k Yennu n nyik i biit k cɑb’i, k sɑɑ tul’i u piini nbɑ tie Foŋɑnm nɑ, k mɑɑn u ponŋ din senn mɔsonn k tul yinm nɑn i wɑɑs nɑn bin nbɑ kul be bɑnfɔkl k yɑb bonciɑnn k Yonmdɑɑnɔ Yennu tɑn sɑɑ yiin’m nɑ.» L puolpo e k Piɑl pɑk mɑɑn bonciɑnn k kpɑɑn’m k biɑ cie b pɑlɑ ɑ: «Nyint i mɔnŋ mɑn mɔtɑɑnɑ nibiit nɑ sinsuuk ni.» Bin nbɑ din sɑk u mɑɑn mɑnŋ k b wul’b Yennu nyunwulu l dɑɑl nɑ, din tie nɑn niib tusɑ ŋɑntɑ nɑ k pukn Klistuweilɑ po. K b ŋɑnmt k lek tumi k bɑnt tuomiinbɑ mɑnŋ wɑnnu, k jii b yuo k tɑɑn diɑ lieb nɑn mɔtɑɑɔk, k lɑknt k centl pɑɑnu, k biɑ tiki mei Yennu K jijiet ji din mɔk suɑ kul, k mɑɑn tuomiinbɑ nɑ tuun bɑktnɔunŋ tuonjɑɑnɑ bonciɑnn. K Yiesuweilɑ mɑnŋ kul ɑ biɑ lek diɑ lieb nɑn mɔtɑɑɔk, k centl b bonɑ kul k tien b lieb, k tuu kɔi bɑɑ mɔk lin nbɑ k jikt l likli k tuol b lieb, k jɑnŋt nɑn suɑ kul nbɑ luon biɑnŋ nbɑ. Dɑɑl kul b biɑ lek tuu tɑɑn lieb e Yennu jɑɑnti ŋɑsɑɑkɑk ni, k b lɑknt bɑɑ jedikpɑguul b mɔnŋ ŋei ni, k sɑɑ di jiet nɑn lieb nɑn pɑlpienn, k ninfɔksɑi kɑɑ nɑn b lieb. K yuo kul k b pɑk Yennu, k suɑ kul pɑl mei b pɑɑk. K dɑɑl kul k Yonmdɑɑnɔ biɑ ŋɑnmt k te k niib lɑɑt fielu k puki b pɑɑk. Dɑsiɑl yenlekl dinn k Piɑl nɑn Sɑn din tɑn sɑɑ Yennu jɑɑnti ŋɑsɑɑkɑk ni Yenmiɑlyuo. Ŋɑnn e k b sɑɑ yɑɑ bin kuɑ Yennu jɑɑnti ŋɑsɑɑkɑk tɑnmɔb nbɑ k b din yi Tɑnmɔŋɑnŋ nɑ, k lɑ jɑsuɑ nnɑ k u kɑl lenŋ, k ponŋ tie wɔbk u mɑɑlu ni wɑɑ, k dɑɑl yejɑ ŋɑɑk kul k b din tuu jii’u k bɑɑl nɑn’ɔ tɑnmɔb mɑnŋ buol ni, ɑ wuu mei likli niib nbɑ bɑɑt Yennu jɑɑnti ŋɑsɑɑkɑk mɑnŋ ni nɑ. Yuo nbɑ k u lɑ Piɑl nɑn Sɑn k b yɑɑ bin kuɑ nɑ, k u miɑl’b likli. K b jiɑnt k goli’ɔ silll, k Piɑl tɑn yet’ɔ ɑ: «Ii goli’t.» Ŋɑnn e k u ji nul u ninbinɑ k goli’b, k dɑɑn nɑn u sɑɑ gɑɑl siɑl e b penŋ. Ŋɑɑn k Piɑl yet’ɔ ɑ: «N lek k mɔk likli k biɑ k mɔk sɑlmɑ k sɑɑ tul’ɑ ni, ŋɑɑn mɑɑ mɔk lin nbɑ e k n yɑɑ n tul’ɑ. Mi i tul’ɑ mɔb Yiesu *Klistu nbɑ tie Nɑɑsɑɑlet nilɔ nɑ sɑnn ni, fiit kii sonm,» ŋɑɑn suol u niidiitu k fiin’ɔ. L tɑɑkpɑɑk ni k juɑ nɑ tɑɑ kɑkt yiɑn ɑ, k u tɑb k fiil set, k ji piin sonm k lin, k tɑn wei’b k kuɑ Yennu jɑɑnti ŋɑsɑɑkɑk mɑnŋ ni, k yuuk k mobt nɑn pɑlpienn, k pɑk Yennu. K niib kul lɑ’u k u sonm k pɑk Yennu. Bɑɑ ji din bɑnn nɑn ŋuɑ e tie miɑtɔ nbɑ tuu kɑɑl k mei niib likli Yennu jɑɑnti ŋɑsɑɑkɑk tɑnmɔb nbɑ k b yi’l Tɑnmɔŋɑnŋ nnɑ, k l ji yɑɑl ŋɑɑn lit’b nɑn lin nbɑ tien k tul’ɔ nɑ pɑɑk. K wɔbk mɑnŋ puul wɔb Piɑl nɑn Sɑn, k l tien niib nɑ kul ɑ bɑktnɔunŋ bonciɑnn, k b ciɑl sɑɑn lɑkn b buol ni. Bɑɑ lɑkn siɑn nɑ k b yi’l Sɑɑlomɔn bɑlntl. Piɑl nbɑ lɑ niib nɑ yuo nbɑ k u yet ɑ: «Yinm Islɑɑeltieb, bee k l yɑɑl ŋɑɑn lit’i ni i? K bee k i bɑli tinm nnɑ ɑ? Tɑɑ te k jɑwɔbk nɑ fiil sonm nɑ, i duki mi ɑ l tie t mɔnŋ yiikuo ɑmi t mɔnŋ yentinu pɑɑk e? Yennu nbɑ tie Ablɑɑhɑɑnm nɑn Isɑɑk nɑn Sɑɑkɔb nɑn t yejɑlieb Yennu nɑ, ŋuɑ e tie dɑɑnɔ nbɑ donn u tuontunnɔ Yiesu k tul’ɔ u mɔnŋ *yudɑnt. Yiesu mɑnŋ e k i jii’u k tien’ɔ t yudɑnm nii ni ɑ bin kpi’u nɑ, k *Piilɑɑt din ponŋ bikn sinsinn ɑ wun ŋɑɑ’u, ŋɑɑn k i yet’ɔ Piilɑɑt buol ni. Ŋuɑ e lek tie Yennu nilɔ, k biɑ jen ɑ tie Niŋɑnɔ, ŋɑɑn k i lek yet’ɔ, ŋɑɑn biɑ miɑl Piilɑɑt ɑ wun nyinn nikpiiluk k tul’i. Yinm e te k b kpii Mɑnfotultuɑ mɑnŋ, ŋɑɑn k Yennu fiin’ɔ kuun ni, k tinm e tie lin nbɑ nɑ siɑlɑɑdɑnm. Wɔbk nɑ tie wun nbɑ k i ponŋ tuu mi’u k biɑ lɑɑt’ɔ e, ŋɑɑn k u tɑn pɑɑk nɑ, k mɑɑn wɑɑ tien Yiesu mɑnŋ sɑnn yɑdɑ nɑ pɑɑk. Wɑɑ tien Yiesu yɑdɑ nɑ pɑɑk e te k u pɑɑk cɑin k sie i nunm nnɑ. «Tɔn, n nɑɑ wɑɑs, n mi nɑn yinm nɑn i yudɑnm nbɑ dɑɑn te k b kpii Yiesu nɑ, i dɑɑn k bɑnn yɑɑ tun lin nbɑ mɑnŋ pɑɑk. Ŋɑɑn nnɑ e k Yennu tɑn te k lin nbɑ k u din pɑk k tul u sɔkniinbɑ kul, k b mun pɑk tul niib nɑ n tɑn tien mɔni, ɑ l kpɑɑ tɑlɑs e k u Klistu n lek di fɑlɑ. «L pɑɑk, i mɔ kuɑŋɑɑn k lebt binbenŋ mɑn kii wɑɑ Yennu sɔnu, k wun nyik cɑb i biit, k u sɑɑ tul’i fuon k biɑ tɑn sɑɑ tun Yiesu Klistu i buol ni, wun nbɑ k u ponŋ lukt’ɔ k tul’i nɑ, ŋɑɑn mɔtɑɑnɑ Yiesu mɑnŋ lek dɑɑ sii be *Yendɔunŋ ni, nɑn Yennu nbɑ tɑn sɑɑ ŋɑnm bonɑ kul ɑ, nɑn wɑɑ din te k u sɔknŋɑnm nbɑ din be yɑɑyuo ni nɑ nbɑ din yet biɑnŋ nbɑ nɑ. «Muois mun din yet ɑ: ‹Yonmdɑɑnɔ Yennu sɑɑ tul’i u sɔkniisuɑ, nɑn mɑɑ tie sɔkni biɑnŋ nbɑ k u sii tie i mɔnŋ nilɔ. Gbiintl’ɔ mɑn k tun lin nbɑ kul k u sɑɑ pɑk tul’i. Dɑɑnɔ nbɑ k gbɑt sɔkni mɑnŋ mɑɑn, Yennu sɑɑ nyinn l dɑɑnɔ i sinsuuk ni k wun kpo.› « *Yennu sɔkni Sɑɑmuel nɑn sɔkniinbɑ kul nbɑ din wei u pɑɑk nɑ, din piɑk k jikt sɑɑ lin nbɑ yɑɑ lin tɑn tien t yuo nɑ ni po. Yennu mɔsonn nbɑ k u din senn k tul u sɔkniinbɑ mɑnŋ, l mɔsonn tie i yɑl e, k *lol nbɑ k u din lol nɑn t yejɑnm nɑ, yuo nbɑ k u din yet Ablɑɑhɑɑnm ɑ: ‹A yɑɑbuonyenɔ ni e k tingbounŋ nɑ tieb kul ɑ tɑn sɑɑ lɑ n yetŋɑnm,› k l lol mun biɑ tie i yɑl e. Yennu nbɑ din lukt u Tuontunnɔ mɑnŋ nɑ, k u tun’ɔ i buol ni sinsinn, ɑ yin lɑ yetŋɑnm k mɑɑn wɑɑ nyinn’i biit sɔni ni nɑ pɑɑk.» Yuo nbɑ k Piɑl nɑn Sɑn dɑɑ din sie k piɑk tien niib mɑnŋ nɑ, k Yennu mɑnntieb nɑn Yennu jɑɑnti ŋɑsɑɑkɑk sejenm yudɑɑnɔ nɑn *Sɑɑdiuseɑnbɑ kpil bɑɑl Piɑlnbɑ buol ni. B wutuol duo nɑn Piɑl nɑn Sɑn, ɑ b wɑnt niib ɑ Yiesu dɑɑn fiil kuun ni k l wɑnt nɑn kpienm tɑn sɑɑ fiil kuun ni k jen b mɑnfuol ni biɑk. Ŋɑnn e k b suol’b k kuɑn’m dɑnsɑlk ɑ lin yent ɑ, k mɑɑn yuo ponŋ gɑl ɑ. Ŋɑɑn k niib bonciɑnn nbɑ din gbɑt Piɑl mɑɑn mɑnŋ tien Yiesu yɑdɑ, k jɑb nbɑ tien u weilɑ nɑ din tien nɑn tusɑ ŋɑnŋmu nɑ. Lɑɑ tɑn yent sɑn-nyiɑɔk ni, k *Suifnbɑ yudɑnm nɑn sɑɑkɑb nɑn *senniwɑntieb lɑkn b tituk kɑɑnu ni Selusɑɑlenm, k b lɑkn nɑn juɑ nbɑ tie Yennu mɑnntieb yudɑɑnɔ k b yi’u * Ann nɑ, nɑn *Kɑɑyiif, nɑn Sɑn nɑn Aleksɑndl nɑn mɑnntieb yudɑɑnɔ mɑnŋ ŋɑɑtelieb, k te k Piɑl nɑn Sɑn fiil k set b sinsuuk ni, ŋɑɑn k b boi’b ɑ: «Pɑnbuolbee k i mɔk i? K ŋmee sɑnn ni e k i fiin wɔbk nbɑ nɑ?» Ŋɑnn e k Foŋɑnm fiil Piɑl ni, k u yet’b ɑ: «Yinm cɑnbɑɑnbɑ nɑn sɑɑkɑb, gbiintl mɑn. L i tie k i boi’t dinnɑ nɑ k jikt sɑɑ tuonŋɑnn nbɑ k t tun k tul wɔbk nɑ nɑn wɑɑ lɑ lɑɑfiɑ nɑ pɑɑk i e, ŋɑnn l ŋɑn k i kul ɑ n bɑnn, k Islɑɑeltieb kul n mun bɑnn nɑn Nɑɑsɑɑlet nilɔ Yiesu *Klistu sɑnn pɑɑk e, k juɑ mɑnŋ lɑ lɑɑfiɑ, k sie i nunm ni nɑ. L Yiesu e k i dɑɑn kpɑɑ’u dɑpunpunn pɑɑk k kpii’u nɑ, ŋɑɑn k Yennu fiin’ɔ kuun ni nɑ. Ŋuɑ e tie dɑɑnɔ nbɑ k Yennu lolkpel kɑdɑɑɔk piɑk u po nɑ, ɑ: ‹Tɑnn nbɑ k yinm tɑnmɑɑlɑ yet’ɔ nɑ, ŋɑnn e set tie tɑnn nbɑ te k ŋɑɑk mɔk pɑnŋ.› K suɑ sɑnn ji kɑɑ tingbounŋ nɑ ni k Yennu tul niib ɑ bin lɑ fielu, sie Yiesu kuukuɑ.» Tituk niib mɑnŋ nbɑ din lɑ Piɑl nɑn Sɑn pɑlcienn nbɑ k b mɔk nɑ, k biɑ bɑnn nɑn Piɑl nɑn Sɑn tie dɑnm nbɑ k mi kɑdɑɑɔk bonŋɑnn k k tie nijɑɑnɑ nɑ, l din yɑɑl ŋɑɑn lit’b e, k b ji bɑnn nɑn b tuu tie Yiesu wei-nɑn-lieb e. Ŋɑɑn bɑɑ lɑ juɑ nbɑ k b won te k u pɑɑk nɑ, k u sie Piɑl nɑn Sɑn buol ni nɑ, b ji din k mɔk mɔb nbɑ sɑɑ pɑk k jiin. Ŋɑnn e k tituk niib din ŋɑɑn k b nyii b lɑknu dieok mɑnŋ ni dɑɑnn, ŋɑɑn k b biɑl fɑɑ nɑn b lieb lɑbɑɑl, k boi b lieb, ɑ: «T sɑɑ tien jɑb nɑ nlee nɑ? K mɑɑn suɑ kul nbɑ be Selusɑɑlenm ponŋ mi yɑɑl-lituk tuonn nbɑ k b tun mɑnŋ nɑ. L pɑɑk nnɑ t ji kɑn fit noi, ŋɑɑn ŋɑɑnt mɑn k tin potn k tul’b, k b ji dɑɑ mi k yi Yiesu sɑnn k tien niib ni, k lɑbɑɑl mɑnŋ ji dɑɑ biɑ yɑt k sɑɑ niib ni.» Ŋɑnn e k b yiin’m, ɑ bin ŋɑnm kuɑ, k tɑn potn k tul’b ɑ b dɑɑ mi k piɑk ɑmi k tumi niib Yiesu sɑnn ni jik. K Piɑl nɑn Sɑn jiin k yet’b ɑ: «I mɔnŋ mɔnŋ n got lɑɑn lɑnn e tokn Yennu buol ni. L ŋɑn k t ji sɑk i mɔb ŋɑɑn nyik Yennu mɔb ɑmi nlee? k mɑɑn tinm kɑn fit k nyik pinpɑɔk lin nbɑ po k t lɑ k biɑ gbɑt.» K tituk niib mɑnŋ lek potn k tul’b nɑn ninmɔnjɑl, ŋɑɑn ŋɑɑ’b yɑnn ɑ bii sɑɑ, k mɑɑn b k lɑ sɔnsɑu nbɑ k b sɑɑ dɑt b tubɑ, k mɑɑn niib nɑ din piɑk Yennu lin nbɑ din tien nɑ pɑɑk, k mɑɑn juɑ nbɑ lɑ lɑɑfiɑ bɑktnɔunŋ tuonn nɑ pɑɑk nɑ binɑ din gɑl nɑn binɑ piinnɑ nɑ wɑɑ. Bɑɑ ŋɑɑ Piɑl nɑn Sɑn yuo nbɑ, k b ŋmɑt b lieb penŋ, k sɑɑ yet’b lin nbɑ k Yennu mɑnntieb yudɑnm nɑn sɑɑkɑb mɑnŋ pɑk’b. Bɑɑ mun gbɑt nnɑ mɑnŋ k b kul tɑɑn lieb nɑn dudukyent kuukuɑ, k mei Yennu ɑ: «T Yonmdɑɑnɔ, fin e din nɑn sɑnpɑɑk nɑn tinŋ nɑ, nɑn mɔkgbenŋɑ nɑn lin nbɑ kul be lenŋ, k Foŋɑnm mɑnŋ ni e k ɑ din pɑk ɑ tuontunnɔ Dɑɑfiid nbɑ tie t yejɑ nɑ mɔb ni ɑ: ‹Bee te k bin nbɑ k tie Islɑɑeltieb nɑ tuun nɑn jɑpɑɑt i? Bee te k b loln lol yɑnɑ ɑ? Tingbounŋ nɑ kpɑnbɑlɑ nɑn yudɑnm tɑɑn lieb k tuok ɑ bin kɔn nɑn Yonmdɑɑnɔ Yennu nɑn u Klistu nɑ.› «L tie bɑlmɔni e nɑn *Heluod nɑn Pɔns *Piilɑɑt nɑn bin nbɑ k tie Islɑɑeltieb nɑ nɑn Islɑɑeltieb dɑɑn set lɑkn duo nɑ ni, k lol lolɑ ɑ bin kpi ɑ tuontunŋɑnɔ Yiesu, wun nbɑ k ɑ din gɑnn k senn’ɔ nɑ. Ŋɑnn e k b lɑkn, ɑ bin tun lin nbɑ kul k ɑ ponŋ din dukn ɑ yiikuo nɑn ɑ yɑnbuɑt, k yɑɑ l tɑn sɑɑ tien nɑ. Tɔn, mɔtɑɑnɑ, Yonmdɑɑnɔ, gbiintl niib nɑ nbɑ fuɑ kɔnfuɑt nɑn ninmɔnn t pɑɑk nɑ, k ŋɑɑn k tinm nbɑ tie ɑ tuontunnɑ nɑ i piɑk ɑ mɑɑn nɑn pɑlcienn bonciɑnn. Tɑntl ɑ nuu k te k bɑɑtb n pɑɑk k bɑktnɔunŋ tuonjɑɑnɑ i tuun ɑ tuontunŋɑnɔ Yiesu sɑnn ni.» K bin nbɑ tien Yiesu yɑdɑ nɑ nbɑ gbenn Yenmiɑlu nɑ yuo nbɑ, k siɑn nbɑ po k b tikl nɑ ji jek, k b kul ɑ gbie nɑn Foŋɑnm, k ji piin piɑk Yennu mɑɑn nɑn pɑlcienn. L yuo nɑ k Yiesuweilɑ mɑnŋ kul ɑ tɑɑn lieb nɑn dudukyent kuukuɑ. B suɑ din k yɑɑ ɑ u yen siɑl u mɔnŋ, ŋɑɑn b din centl b bonɑ k tien b lieb e. L yuo nɑ jik k tuomiinbɑ mɑnŋ din nyint Yonmdɑɑnɔ Yiesu kuun fiilu *siɑlɑ nɑn yiikuo bonciɑnn, k Yennu yetŋɑnm bonciɑnn din be b kul ni. K lin nbɑ nɑ suɑ din kɑɑ b ni k pɔt siɑl, k mɑɑn bin nbɑ din mɔk b mɔnŋ mɔnŋ kpɑɑnt nɑn b ŋei din tuu kɔi e, k gɑɑl l likli k bɑɑl nɑn’n, k tɑn tien tuomiinbɑ nɑ, k b centl k tien b lieb nɑn bɑɑ luon biɑnŋ nbɑ. K jɑsuɑ din be lenŋ k u sɑnn yi Suosiɑf, k u din tie Liefi buolu ni nilɔ, k b din mɑl’ɔ Siipl, k tuomiinbɑ nɑ din yi’u Bɑɑlnɑɑbɑɑs (k l pɑɑk tie wun nbɑ cien pɑlɑ nɑ), k u din tɑn kɔi u kpɑɑb, k gɑɑl l likli k bɑɑl nɑn’n, k tɑn tul tuomiinbɑ nɑ. Jɑsuɑ nnɑ din be k u sɑnn yi Anɑɑniɑs, k u ŋɑɑpuo sɑnn mun din yi Sɑɑfiilɑ, k u mun din tɑn kɔi u kpɑɑb k gɑɑl l likli, ŋɑɑn pɑɑt likli mɑnŋ pɑɑk k bɔl k u ŋɑɑpuo mi l po, ŋɑɑn jii lin nbɑ tenn nɑ, k bɑɑl nɑn’n k tɑn tul tuomiinbɑ mɑnŋ. K Piɑl boi’ɔ ɑ: «Anɑɑniɑs, ɑ tien nlee k *Sɑɑtɑn kuɑ yent’ɑ, k ɑ fɑɑl fɑɑk k luon k ɑ kpɑnn Foŋɑnm, k pɑɑt likli nbɑ k ɑ dɑɑn kɔi ɑ kpɑɑb nɑ pɑɑk i? Fɑɑ dɑɑn dɑɑ k kɔi ɑ kpɑɑb mɑnŋ nɑ, l dɑɑn k tie ɑ yɑl kɑɑ ɑɑ? K fɑɑ biɑ dɑɑn kɔi’l nɑ, l likli mɑnŋ biɑ dɑɑn k be ɑ yent ni kɑɑ ɑɑ? K bee tien k ɑ dukn ɑ pɑl ni k tun lin nbɑ nɑ? A k fɑɑl fɑɑk mɑnŋ k pɑɑn nilɔ kɑɑ, ŋɑɑn ɑ fɑɑl k pɑɑn Yennu e.» Anɑɑniɑs nbɑ gbɑt nnɑ mɑnŋ yuo nbɑ, k u bɑɑ k kpo l yuo nɑ. K jɑŋmɑɑnciɑɔnŋ kuɑ bin nbɑ kul gbɑt u kuun mɑnŋ po. K nɑɑsinm fiil k jii’u k pɔbn’ɔ cincenn ni, k nyii nɑn’ɔ k sɑɑ pii’u. Ŋɑnn e k l yɑnn nɑn kut muntɑ nnɑ nɑ, k u ŋɑɑpuo bɑɑl k kuɑ, ŋɑɑn dɑɑ k bɑnn lin nbɑ tien. K Piɑl biɑ boi’ɔ ɑ: «Yetl’n, l set tie bɑlmɔni e nɑn fin nɑn ɑ sɔlɔ kpɑɑb likli nbɑ k i gɑɑl nɑ kul i nɑ ɑɑ?» K u jiin ɑ: «Nnn, l kul i nɑ.» K Piɑl boi’ɔ ɑ: «Bee k fin nɑn ɑ sɔlɔ tɑɑn mɔb, k lol lol ɑ i bikn Yonmdɑɑnɔ Foŋɑnm i? Tɔn, nɑɑsinm nbɑ jii ɑ sɔlɔ k sɑɑn k sɑɑ pii’u nɑ, ŋɑnm e kuɑ tɑnmɔb nnɑ, k b mun biɑ sɑɑ jii’ɑ nnɑ e.» L tɑɑkpɑɑk ni, k u bɑɑ k kpo, k nɑɑsinm nɑ kuɑ k lɑ k u kpo wɑɑ, k b biɑ jii’u k nyii nɑn’ɔ k sɑɑ pii’u k kpiɑn’ɔ nɑn u sɔlɔ. L yuo nɑ k jɑŋmɑɑnciɑɔnŋ suol Yiesuweilɑ kul nɑn bin nbɑ kul gbɑt mɑɑn mɑnŋ po. L yuo nɑ k tuomiinbɑ nɑ tuun bɑktnɔunŋ tuonjɑɑnɑ niib nɑ ni bonciɑnn. K Yiesuweilɑ kul ɑ tuu tɑɑn lieb Sɑɑlomɔn bɑlntl buol. Bin nbɑ k tie Yiesuweilɑ nɑ din k mɔk pɑl nbɑ k b sɑɑ lɑkn nɑn’m, ŋɑɑn niib din piɑk dont Yiesuweilɑ nɑ bonciɑnn. Jɑb nɑn puob bonciɑnn din tien Yonmdɑɑnɔ yɑdɑ k pukn Yiesuweilɑ nɑ po. Ŋɑnn e k niib din nyi nɑn bɑɑtb, k duɑnt’b liɑni nɑn dunduɑni pɑɑk sɑnjokpini ni, ɑ Piɑl i tɑnŋ i bɑɑl k gɑɑl yuo nbɑ, k u yun-yunŋ n lek bɑɑ b pɑɑk. K niib nbɑ din be Selusɑɑlenm digbɑnbis ni mun jikt bɑɑtb, nɑn bin nbɑ k nɑlnbiit dɑɑmi’b nɑ, k bɑɑt nɑn’m, k b kul ɑ din lɑɑt lɑɑfiɑ. L pɑɑk, k Yennu mɑnntieb yudɑɑnɔ nɑn u wei-nɑn-lieb kul, bin nbɑ tie *Sɑɑdiuseɑnbɑ nɑ, din fiin punponn bonciɑnn nɑn tuomiinbɑ nɑ, k din te k b sɑɑn k sɑɑ suol tuomiinbɑ mɑnŋ k kuɑn’m dɑnsɑlk. Ŋɑɑn l nyiɑɔk mɑnŋ e k Yennu *mɑlɑkɑ sik k luot dɑnsɑlk tɑnmɔi, k nyinn tuomiinbɑ mɑnŋ, ŋɑɑn yet’b ɑ: «Ii sɑɑ mɑn Yennu jɑɑnti ŋɑsɑɑkɑk ni, k sɑɑ set, ŋɑɑn muɑnt k tul niib mɑɑn nbɑ tien niib mɑnfuol nɑ kul ɑ.» Bɑɑ gbɑt u mɑɑn mɑnŋ, k b sɑɑn k sɑɑ kuɑ Yennu jɑɑnti ŋɑsɑɑkɑk mɑnŋ ni, sɑn-nyɑpob ni, k ji piin k wɑnt niib mɑɑn mɑnŋ. K Yennu mɑnntieb yudɑɑnɔ nɑn u wei-nɑn-lieb nɑ din yiin Islɑɑeltieb yudɑnm kul ɑ, k lɑk’m tituk kɑɑnu, k b tɑn tun sejenm ɑ bin nyinn tuomiinbɑ mɑnŋ dɑnsɑlk ni k bɑɑl nɑn’m nɑ. Ŋɑɑn b sɑɑn dɑnsɑlk mɑnŋ ni k sɑɑ got k k lɑ’b k ŋmɑt tituk mɑnŋ ni k sɑɑ yet’b ɑ: «Tɑɑ bɑɑl dɑnsɑlk ni yuo nbɑ, t lɑ k tɑnmɔi kpɑl e kenkenken ɑ, k dɑnsɑlguulɑ nɑ be tɑnmɔi ni k guu, k t luot tɑnmɔi nɑ, ŋɑɑn k k lɑ suɑ dɑnsɑldieok mɑnŋ ni.» Yennu jɑɑnti ŋɑsɑɑkɑk sejenm yudɑɑnɔ nɑn Yennu mɑnntieb yudɑnm nbɑ gbɑt nnɑ mɑnŋ, k l tien’m yɑɑl-lituk nɑn tuomiinbɑ nɑ botu mɑnŋ pɑɑk k b ji bils lin nbɑ sɑɑ tien, k tɑn suɑ k jɑsuɑ nnɑ kuɑ, k yet’b ɑ: «Gotl mɑn, jɑb nbɑ k i won kuɑn’m dɑnsɑlk wonn nɑ, b sie Yennu jɑɑnti ŋɑsɑɑkɑk ni k tumi niib.» L yuo nɑ k sejenm yudɑɑnɔ nɑ jii u jɑb, k b sɑɑn k sɑɑ nyinn tuomiinbɑ mɑnŋ k jen nɑn’m, ŋɑɑn b k nyinn’b nɑn pɑnŋ kɑɑ, k mɑɑn b tiin jɑŋmɑɑni ɑ niib nɑ tɑn sɑɑ mɑnn jɑɑt’b tɑnɑ. Bɑɑ bɑɑl nɑn’m yuo nbɑ, k b te k b sɑɑn set tituk niib nɑ sinsuuk ni, k Yennu mɑnntieb yudɑɑnɔ piin k boi’b buboit, k yet’b ɑ: «T dɑɑn tul’i mɔb nɑn ninmɔnn, k yɑɑ ɑ i dɑɑ wɑnt niib wɑnnu juɑ mɑnŋ sɑnn ni, ŋɑɑn i tun bee nɑ? I jii i wɑnnu mɑnŋ k yɑt Selusɑɑlenm kul po, k ji luon ɑ i tien’t Yiesu kpiilɑ.» K Piɑl nɑn tuomiinbɑ lieb nɑ jiin k yet’b ɑ: «Sie k tii lek ii sɑɑk Yennu mɔb k gɑl nilɔ mɔb. Yiesu mɑnŋ e k i dɑɑn ponŋ kpɑɑ tɑbn’ɔ dɑpunpunn pɑɑk k kpii’u nɑ, ŋɑɑn Yennu nbɑ tie t yejɑnm Yennu nɑ, ŋuɑ e fiin Yiesu kuun ni, k jii’u donn’ɔ k kɑɑn’ɔ u niidiitu po, k tien’ɔ Yudɑɑnɔ nɑn Fietuɑ, ɑ k Islɑɑeltieb n lɑ yɑɑk k fit mɔ kuɑŋɑɑn k lebt binbenŋ, k biɑ fit lɑ nyikcɑbu. Tinm nɑn Foŋɑnm e tie Yiesu kuun fiilu mɑnŋ siɑlɑɑdɑnm, k Yennu jii u Siek mɑnŋ k tul wun nbɑ sɑɑk u mɔb.» Yudɑnm mɑnŋ nbɑ gbɑt nnɑ mɑnŋ, k b wutuol fiil bonciɑnn, k b ji yɑɑ bin kpi tuomiinbɑ mɑnŋ. Ŋɑɑn Fɑɑliisiɑnsuɑ nnɑ din be, k u sɑnn yi Gɑɑmɑɑliɑl, k u din tie *senniwɑntuɑ e, k niib kul din tie’u nibɑɑkl, k u din fiil k set tituk kɑɑnu dɑnm sinsuuk ni k yet ɑ bin nyinn tuomiinbɑ mɑnŋ nɑn-yel po wɑɑn. Ŋɑnn e k u yet’b ɑ: «Islɑɑeltieb, ii mi mɑn nɑn yɑɑ yɑɑ i tien niib nɑ lin nbɑ nɑ fɑn. Siɑn yuo nbɑ din gɑl, k Teudɑɑs din wɑnt u mɔnŋ nɑn u tie nijɑɑnsuɑ e k niib nɑn kobi ŋɑnnɑ nɑ din tie u puolpo juɑmu, ŋɑɑn niib nbɑ din tɑn kpii’u nɑ, u juɑmu nɑ kul ɑ din yɑt e, k u jɑgbeln nɑ gbenn. Ŋɑnn tɑn gɑl nnɑ, k Suudɑ, wun nbɑ din tie Gɑɑliile nilɔ mun din nyii k set nikɑnt yuo nɑ, k wɑnt u mɔnŋ, k din tunn niib bonciɑnn yɑn k b wɑɑ’u, k b mun din tɑn kpii’u, k u juɑmu nɑ kul yɑt. Mɔtɑɑnɑ lɑɑ, kpɑn ŋɑɑnt jɑb mɑnŋ mɑn k dɑɑ tie’b siɑl, k l i tie k b dudukt nɑn b tuonɑ nɑ i tie nisɑɑlk yɑl i e, l tɑn sɑɑ gbenn ɑ. Ŋɑɑn l i tie k l tie Yennu yɑl i e, i kɑn fit k nyɑnn’b. I sɑɑ lɑ k i mɑnn kpet k kɔn nɑn Yennu e gbɑɑ.» Ŋɑnn e k tituk niib mɑnŋ ji sɑk Gɑɑmɑɑliɑl mɔb nɑ, k yiin tuomiinbɑ mɑnŋ k kuɑn’m, k te k b buo’b gbɑnn, ŋɑɑn ŋɑɑ’b, ŋɑɑn tul’b mɔb ɑ: «Ii mi mɑn k i ji kii piɑk Yiesu sɑnn mɑnŋ ni.» Ŋɑnn mɑnŋ e k tuomiinbɑ mɑnŋ nyii tituk kɑɑnu nɑ ni nɑn pɑlpienn, Yennu nbɑ lɑ k b jɑnŋ nɑn fei dinu, Yiesu sɑnn pɑɑk nɑ. K dɑɑl kul k b sɑɑ Yennu jɑɑnti ŋɑsɑɑkɑk ni, ŋɑɑn biɑ lin niib ŋei ni, k wɑnt niib ɑ Yiesu tie *Klistu e k biɑ muɑntl u lɑbɑmɑnn nɑ, k k nyikt. L yuo nɑ k Yiesuweilɑ nbɑ ŋɑnmt yɑbtl k puki nɑ, k bunbulmi tɑn bɑɑl *Suifnbɑ nbɑ piɑk Glek mɑɑn nɑn Suifnbɑ nbɑ piɑk b mɔnŋ mɑɑn nɑ sinsuuk ni, k mɑɑn bin nbɑ piɑk Glek mɑɑn nɑ din yet ɑ b i tuol jiet dɑɑl kul, b pɑkɔi k lɑɑt b tolɑ nɑn lieb nɑ. Ŋɑnn e k tuomiinbɑ *piik nɑn bɑnle nɑ yiin Yiesuweilɑ mɑnŋ kul ɑ, k tɑn yet’b ɑ: «L k ŋɑn k tin nyik Yennu mɑɑn muɑntu ŋɑɑn biɑl jiet tolu ni. L pɑɑk, n nɑɑ wɑɑs, gotl k gɑnn jɑb bɑnlole i sinsuuk ni, bin nbɑ k i mi nɑn b gbie nɑn Foŋɑnm nɑn yɑnfɑntl, k tin tien’m tuonɑ nɑ yudɑnm, ŋɑɑn k tinm n jii t mɔnŋ yuo k tien Yenmiɑlu ni, nɑn Yennu mɑɑn wɑnnu ni, k dɑɑ nɑk.» K mɔtɑɑɔk niib nɑ kul ji din mɔk pɑlpienn tuomiinbɑ mɑɑn mɑnŋ pɑɑk. Ŋɑnn e k b gɑnn Etiɑnn, wun nbɑ mɑntk gbie nɑn Foŋɑnm nɑn yɑdɑ nɑ, nɑn Fiiliip, nɑn Pluokɔl, nɑn Niikɑɑnɔl, nɑn Tiimɔn, nɑn Pɑɑlmenɑɑs, nɑn Niikolɑ, wun nbɑ din nyii Antiɑɔs. Sinsinn u din k tie Suif nilɔ, ŋɑɑn siɑn yuo u din kpint u jɑɑnti k wɑɑ Suifnbɑ jɑɑnti, ŋɑɑn k mɔtɑɑnɑ k u ji tie Yiesuweilɔ. Mɔtɑɑɔk niib nɑ nbɑ lukt’b yuo nbɑ, k b te k b sɑɑn set tuomiinbɑ nɑ tuɑnn po, k tuomiinbɑ mɑnŋ miɑl Yennu k tul’b ŋɑɑn jii b nii k yii b pɑɑk. L puolpo e k Yennu mɑɑn ŋɑnmt k yɑt kuɑ niib ni, k Yiesuweilɑ mun biɑ yɑbtl k puki bonciɑnn Selusɑɑlenm, k Yennu mɑnntieb bonciɑnn sɑk Yiesu lɑbɑmɑnn k tien’ɔ yɑdɑ. Etiɑnn nbɑ din gbie nɑn Yennu yetŋɑnm nɑn u yiikuo bonciɑnn nɑ, din tuun bɑktnɔunŋ tuonjɑɑnɑ niib nɑ sinsuuk ni. Ŋɑɑn nisiɑb din k sɑk’ɔ. Bin nbɑ din noi nɑn Etiɑnn mɑnŋ din tie Suifnbɑ nbɑ din tie dɑɑbɑ, k b ŋɑɑ’b b dɑɑbs ni, k b nyii Siilenn nɑn Aleksɑndli nɑn Siiliisi nɑn Asii ni e. B mun din mɔk b mɔnŋ Suifnbɑ jɑɑnti dieok o. Ŋɑɑn Foŋɑnm din tul Etiɑnn yɑnfɑntl bonciɑnn, k b k fit nyɑnn’ɔ nɑn u mɑɑn mɑnŋ. Bɑɑ din k fit nyɑnn’ɔ nɑ, k b din kuɑ nisiɑb ɑ bin yet ɑ nnɑ: «T gbɑt k u piɑk bonbilɑnkɑnt k biil Muois nɑn Yennu.» Bɑɑ yet nnɑ mɑnŋ yuo nbɑ, k niib nɑ nɑn sɑɑkɑb nɑn *senniwɑntieb wutuol duo, k b fiil k suol’ɔ, k sɑɑn nɑn’ɔ b yudɑnm tituk buol ni, k b tɑn bɑɑl nɑn nisiɑb nnɑ biɑk ɑ bin fɑɑl fɑɑk, k yet ɑ: «Yuo kul juɑ nɑ tun piɑk k biil Yennu jɑɑnti ŋɑsɑɑkɑk mɑnŋ, nɑn Muois *senni nɑ e, k mɑɑn t gbɑt k u yet ɑ Yiesu nbɑ tie Nɑɑsɑɑlet nilɔ nɑ sɑɑ bet Yennu jɑɑnti ŋɑsɑɑkɑk nɑ, ɑ ŋɑɑn lebt Muois kɑɑl nbɑ k u din senn nɑ.» Bin nbɑ kul din lɑkn kɑl tituk mɑnŋ ni din kpɑɑ b ninbinɑ k goli Etiɑnn, k tɑn lɑ k u nunpo lebt k ji nɑɑn nɑn *mɑlɑkɑ nunpo nɑ. Ŋɑnn e k Yennu mɑnntieb yudɑɑnɔ boi Etiɑnn ɑ: «L set tie mɔni ee?» K Etiɑnn yɑɑ ɑ: «Cɑnbɑɑnbɑ nɑn n nɑɑ wɑɑs, gbiintl mɑn. Yuo nbɑ k t yejɑ Ablɑɑhɑɑnm din be Mesopotɑɑmi yɑkl po, l yuo k u din dɑɑ k sɑɑn Hɑlɑn nɑ, k Yennu nbɑ be *yudɑnt ni nɑ dɔkt u pɑɑk k yet’ɔ ɑ: ‹Fiit k nyik ɑ tinŋ nɑn ɑ niib, ŋɑɑn sɑɑn siɑn nbɑ k n sɑɑ wɑnn’ɑ nɑ.› Ŋɑnn e k u fiil k nyik Sɑldeen tinŋ mɑnŋ, ŋɑɑn sɑɑn k sɑɑ kɑl Hɑlɑn duo ni. U bɑɑ kuun puolpo e, k Yennu biɑ te k u fiil, k bɑɑl tinŋ nbɑ k i be nɑ ni. Ŋɑɑn Yennu dɑɑ din k tul’ɔ tinŋ nɑ nɑn bonmintk ɑ, ɑ wun yent ŋɑɑn senn mɔsonn ɑ u tɑn sɑɑ tul’ɔ tinŋ nnɑ, k ŋuɑ nɑn u yɑɑbuonɑ i yen. Ŋɑɑn l yuo nɑ Ablɑɑhɑɑnm dɑɑ din k mɔk bik. Nnɑ e k Yennu din yet’ɔ ɑ: ‹A yɑɑbuonɑ tɑn sɑɑ sɑɑn k be tingɑnŋ ni e wɑɑ, k tɑn sii tie dɑɑbɑ lenŋ, k b tɑn sɑɑ lɑ muksuk lenŋ bonciɑnn, k tɑn jɑnŋ binɑ kobiinnɑ. Ŋɑɑn tinŋ mɑnŋ niib nbɑ k b sii tuun k tien’m nɑ, n tɑn sɑɑ dɑt b tubɑ, k l puolpo, ɑ yɑɑbuonɑ mɑnŋ tɑn sɑɑ nyi tinŋ mɑnŋ ni, k bɑɑl tinŋ nɑ ni, k jiɑnt’n.› «L puolpo k Yennu *lol lol k tul Ablɑɑhɑɑnm, k biɑ din wɑnn’ɔ lol mɑnŋ nyinn, ɑ ŋuɑ nɑn u yɑɑbuonɑ i poli punɑ. K Ablɑɑhɑɑnm din tɑn mɑl Isɑɑk, k l dɑɑ ŋɑnniin dɑɑl k u pot’ɔ, k Isɑɑk mun din tɑn pot u bijɑ Sɑɑkɔb, k Sɑɑkɔb mun din tɑn pot u bonjɑi piik nɑn bɑnle bin nbɑ tie t yejɑsɑɑkɑb. K Sɑɑkɔb wɑɑs mɑnŋ din tɑn mɔk punponn nɑn b wɑɑlɔ Suosiɑf, k din tɑn suol’ɔ k kɔi’ɔ, k nisiɑb dɑɑ’u k sɑɑn nɑn’ɔ Ejipt tinŋ ni, ŋɑɑn Yennu din be nɑn’ɔ, k din nyinn’ɔ fɑlɑ kul ɑ ni, k biɑ tul’ɔ yɑn k te k Ejipt kpɑnbɑl Fɑɑlɑɑɔn niɑn’ɔ k jii’u tien’ɔ yudɑɑnɔ Ejipt tinŋ ni, k biɑ te k u tie yudɑɑnɔ u ŋɑɑk ni. «L puolpo k kon tɑn bɑɑ Ejipt tinŋ nɑn Kɑɑnɑɑn tinŋ ni kul ɑ, k kon suol niib bonbiil, k t yejɑnm kɔnŋ jiet. Sɑɑkɔb nbɑ din gbɑt ɑ dii be Ejipt yuo nbɑ, k u tun u wɑɑs nbɑ tie t yejɑnm lenŋ. Ŋɑnn i din tie b sinsinn sɑɑnu. «B sɑɑnu tɑɑl munle ni e, k Suosiɑf ji din te k u nɑɑ wɑɑs nɑ bɑnn’ɔ. Ŋɑnn e k Fɑɑlɑɑɔn ji din bɑnn Suosiɑf buolu. K Suosiɑf ji din tun’m ɑ bin ŋmɑt kun u cɑnbɑɑ Sɑɑkɔb buol, k sɑɑ jii ŋuɑ nɑn u ŋɑɑtieb kul k jen nɑn’m Ejipt nɑ, k b din tie niib piinlole nɑn bɑnŋmu. «Ŋɑnn e k Sɑɑkɔb nɑn u ŋɑɑtieb mɑnŋ fiil sɑɑn Ejipt k sɑɑ kɑl, k l puolpo, ŋuɑ nɑn u wɑɑs din tɑn kpo gbenn lenŋ k b jii b gbɑnɑnt k sɑɑn nɑn’m Siisenm k sɑɑ pii’b kɑɑɔk nbɑ k Ablɑɑhɑɑnm ponŋ din dɑɑ nɑn likli Hemɔl nibuolu buol ni nɑ. «Yuo nbɑ din tɑn pel nɑn Yennu n gbien u mɔsonn nbɑ k u din senn Ablɑɑhɑɑnm nɑ, l yuo mɑnŋ, t niib nbɑ be Ejipt nɑ ji yɑbt bonciɑnn. L puolpo e k suɑ din dii Ejipt nɑɑn, ŋɑɑn ŋuɑ din k mi Suosiɑf. K kpɑnbɑl mɑnŋ din diɑ t bɑɑ nbɑ diɑbiiuk, k din tuu ton nɑn’m bonciɑnn, k biɑ din tuu miɑ’b ɑ bin nyinn b sɑnpɑnti b ŋei ni k lu’b k bin kpo. «Ŋɑnn e k b din mɑl Muois, k u fɑn bonciɑnn, k Yennu biɑ din luon’ɔ, k u be u bɑɑ ŋɑɑk ŋmɑɑli ŋɑntɑ. U bɑɑ nɑn u nɑɑ nbɑ din tɑn nyinn’ɔ ŋɑɑk ni yuo nbɑ, k kpɑnbɑl nɑ sɑpɑɑmɔ din lɑ’u, k gɑɑl’ɔ k jii’u k wubi’ɔ, k u ji tie nɑn u mɔnŋ bik nɑ. Nnɑ e k b din tumi ŋuɑ Muois, yɑn kul nbɑ k Ejipt-tieb mɔk, k u mɑɑn nɑn tuonɑ din mɔk pɑnŋ. «Muois nbɑ din tɑn lɑ binɑ piinnɑ yuo nbɑ, k dɑsiɑl k u tɑn dukn ɑ wun gɔn u mɔnŋ mɔnŋ buolu Islɑɑeltieb, k tɑn lɑ k Ejipt nilɔ buo Islɑɑeltieb ni yenɔ, k u bɑɑl ɑ wun fɑt’ɔ, k tɑn kpii Ejipt nilɔ mɑnŋ. U din mi ɑ u nɑɑ wɑɑs nɑ sɑɑ bɑnn ɑ Yennu tɑn sɑɑ te k ŋuɑ e n nyinn’b dɑɑbs ni, ŋɑɑn b din k bɑnn nnɑ. K l yent sɑn-nyiɑɔk, k u biɑ lɑ Islɑɑeltieb bɑnle k b kɔn k u luon k wun tɑɑn’m k bin mɑnŋ nɑn b lieb, k yet’b ɑ: ‹Gotl mɑn i tie nɑɑ wɑɑs e, k bee tien k i buo i lieb k tien i lieb dɑni i?› K wun nbɑ tul u luɑ dɑnŋ nɑ pii Muois, ŋɑɑn yet’ɔ yɑɑ ɑ: ‹Ŋmee lukt’ɑ ɑ ɑ tien t yudɑɑnɔ ɑmi t bɑlbuulɔ. A yɑɑn luon k ɑ kpi’n nɑn fɑɑ won kpii Ejipt nilɔ nɑ ɑmi ii?› Muois nbɑ gbɑt nnɑ yuo nbɑ, k u ciɑl nyii Ejipt tinŋ ni, k bɑɑl Mɑɑdiɑn tinŋ ni k be lenŋ, k mɑl bonjɑi bɑnle. «Binɑ piinnɑ nbɑ din tɑn gɑl, k u din tɑn sɑɑn muuk ni dɑsiɑl k sɑɑ bɑɑl Siinɑi juɑl buol ni, k lɑ mupieunŋ, k l di k leni kunkonjɑgotuk pɑɑk k *mɑlɑkɑ dɔkt muu mɑnŋ ni. «Muois nbɑ din lɑ nnɑ mɑnŋ k l tien’ɔ yɑɑl-lituk, k u cɑt nɑkn ɑ wun ŋɑnm got k ji gbɑt k Yonmdɑɑnɔ kunkɔl k u yien’ɔ k yɑɑ ɑ: ‹Min e tie ɑ yejɑnm Yennu, Ablɑɑhɑɑnm nɑn Isɑɑk nɑn Sɑɑkɔb Yennu.› Muois nbɑ gbɑt nnɑ yuo nbɑ, k jɑŋmɑɑni ji kuɑ’u, k u ji sie k jekl k ji k mɔk pɑl nɑn wun got. K Yonmdɑɑnɔ yet’ɔ ɑ: ‹Pitl ɑ tɑɑsɑɑt nbɑ k ɑ pil nɑ, k mɑɑn siɑn nbɑ k ɑ sie nɑ tie tinŋɑnŋ e. Tɔn, n got k lɑ Ejipt-tieb nbɑ dint n mɔnŋ niib fɑlciɑɔnŋ Ejipt tinŋ ni biɑnŋ nbɑ, k n gbiɑ b fɑbni. Ŋɑnn e k n sik mɑɑ n fɑt nyinn’b. Bɑɑt mɔtɑɑnɑ k n sɑɑ tun’ɑ Ejipt tinŋ ni.› » «Muois nbɑ nɑ e k Islɑɑeltieb din yet’ɔ nɑ, k b din yet’ɔ k yɑɑ ɑ: ‹Ŋmee lukt’ɑ ɑ ɑ tien t yudɑɑnɔ ɑmi t bɑlbuulɔ?› ŋɑɑn ŋuɑ nɑ e k Yennu mun din lukt’ɔ ɑ wuu tie b yudɑɑnɔ nɑn b fɑt-tuɑ biɑk, k ŋuɑ Yennu din te k mɑlɑkɑ pɑk nɑn’ɔ ŋɑɑn tun’ɔ. Mɑlɑkɑ mɑnŋ e k Muois din lɑ’u kunkonjɑgotuk pɑɑk muu nɑ ni nɑ. Ŋuɑ Muois e din tie dɑɑnɔ nbɑ din nyinn’b Ejipt tinŋ nnɑ, k din biɑ tuun bɑktnɔunŋ tuonjɑɑnɑ Ejipt tinŋ ni, nɑn bɑɑ biɑ din sɑɑ puot Mɔkmunŋ nɑ, nɑn bɑɑ biɑ din be pɑɑnpieonŋ ni binɑ piinnɑ nɑ. «L Muois e din yet Islɑɑeltieb ɑ: ‹Yennu tɑn sɑɑ tun sɔkniisuɑ i buol ni nɑn wɑɑ tun’n biɑnŋ nbɑ nɑ, k u sii tie i buolu ni yenɔ.› Muois mɑnŋ e din be nɑn t niib lɑknu ni, pɑɑnpieonŋ ni nɑ. Lenŋ e k u din tɑn duo Siinɑi juɑl pɑɑk k sɑɑ be nɑn Yennu mɑlɑkɑ, k mɑlɑkɑ mɑnŋ din piɑk k tien Muois, ɑ Muois n sɔkn tul t yejɑnm. L yuo e k Muois din gɑɑl Yennu mɑnfuol mɑɑn k tul t yejɑnm nɑn tinm. «Ŋɑɑn t yejɑnm din k luon k bin sɑk’ɔ. L pɑɑk, k b din yet’ɔ, k mɑɑn b yɑn tunn Ejipt ɑ. B din yet *Aɑlɔn ɑ wun mɑɑ pɑtɑ, k b i tie b ŋmɑkt dɑnm k bii wɑɑ’b, k biɑ yet’ɔ ɑ: ‹Ŋɑɑn Muois ŋɑnin, wun nbɑ nyinn’t Ejipt nɑ, t k mi lin nbɑ tien’ɔ.› Ŋɑnn e k b mɑɑ pɑtl k nɑn’ɔ nɑɑjɑbik, k mɑnn *mɑlunŋ l pɑɑk k tien jɑɑnm lin nbɑ k b mɑɑ nɑn b mɔnŋ nii nɑ pɑɑk. «L pɑɑk, k Yennu ji k goli’b ŋɑɑn cɑb’b, k b ji jiɑntl ŋmɑɑbilɑ, nɑn lɑɑ diɑn biɑnŋ nbɑ *Yennu sɔkniinbɑ kɑdɑɑɔk ni nɑ, ɑ Yennu yet ɑ: ‹Islɑɑeltieb, yɑɑ din kpi bonkobt k mɑnn mɑlunŋ muuk ni binɑ piinnɑ nɑ, i din mɑnn mɑlunŋ mɑnŋ k tien min ee? I din tuu jikt pɑtl Molɔk lɑnbounŋ o, k biɑ din tuu jikt ŋmɑɑbil Liefɑn nɑɔnŋ o, k l tie pɑtl, k i jiɑntl’l. L pɑɑk, n sɑɑ bel’i i tinŋ ni k sɑɑn nɑn’i siɑn nbɑ fɔk k gɑl Bɑɑbiilonn.› » Etiɑnn biɑ piɑk k yɑɑ ɑ: «T yejɑnm din fɑɑ Yennu lɑnbounŋ muuk ni, k l tie *siɑlɑ nɑn Yennu din lol lol nɑn b yejɑnm k l lɑnbounŋ ni, Yennu nbɑ din diɑn u *senni nbɑ tɑnpɑtlɑi ŋɑnle pɑɑk nɑ din be l ni. Yennu e din wɑnn Muois, bɑɑ sii fɑɑ lɑnbounŋ mɑnŋ biɑnŋ nbɑ, k b fɑɑ. L din tie nɑn Muois nbɑ din lɑ lin nbɑ nɑ e. L puolpo, k t yejɑnm ji din tɑn jii lɑnbounŋ mɑnŋ k tul b wɑɑs, k b gɑɑl k mun jikt k sɑɑ nɑn’n, yuo nbɑ k Suosue din tie b yudɑɑnɔ nɑ, k din bɑɑl nnɑ yuo nbɑ k b din fɑt tinŋ k Yennu din bel nibuolgɑni nbɑ din yen’n l yuo nɑ, k l din biɑl tinŋ nɑ ni dik dik nɑn Dɑɑfiid yuo mun. Dɑɑfiid mɑnŋ din gbuot Yennu nunm, k din tɑn miɑl Yennu ɑ wun cɑb’ɔ k wun mɑɑ ŋɑɑk k tul Sɑɑkɔb Yennu nɑ. Ŋɑɑn Sɑɑlomɔn e din tɑn mɑɑ ŋɑɑk mɑnŋ. «Ŋɑɑn t mi nɑn Yɑbnt Yennu k kɑɑl ŋei nbɑ k niib mɑɑ ni kɑɑ. L tie nɑn Yennu sɔkni nbɑ din yet ɑ: ‹Yonmdɑɑnɔ yet ɑ Sɑnpɑɑk tie n nɑɑngbounŋ o, k tingbounŋ nɑ mun tie n tɑɑkpɑktl. Ŋɑbuolbee k i sɑɑ fit mɑɑ k tul’n i? Liɑ buol e k n sɑɑ fit kuɑ lenŋ i? Min kɑɑ din nɑn bonɑ nɑ kul ii?› » Etiɑnn biɑ piɑk k yɑɑ ɑ: «I mɑntk tie nigbɑbɑ hei, k i dudukt biɑ fɔk nɑn Yennu bonciɑnn, k i tubɑ k gbiɑ Yennu mɑɑn i k i yet Foŋɑnm tuonɑ. I nɑɑn nɑn i yejɑnm nɑ e. Yennu sɔkni lɑnɔ po e k i yejɑnm din k muks’ɔ? B biɑ din kpii bin nbɑ din ponŋ sɔknt ɑ Niŋɑnɔ tɑn sɑɑ bɑɑl nɑ wɑɑ. Tɔn, k mɔtɑɑnɑ yinm e tie dɑnm nbɑ nyii u puol k biɑ tie u kpiilɑ. Yinm e biɑ tie dɑnm nbɑ din gɑɑl Yennu senni nbɑ k i din gɑɑl mɑlɑkɑɑnbɑ nuu ni, ŋɑɑn biɑ lek k sɑk’l nɑ.» K *Suifnbɑ yudɑnm, sɑɑkɑb nɑn *senniwɑntieb nɑ nbɑ gbiint Etiɑnn mɑɑn mɑnŋ k b donn wutuol bonbiil ŋɑɑn gbɑb mɔgbɑbɑ. Ŋɑɑn Foŋɑnm fiil Etiɑnn ni, k u yɑɑt k got *Yendɔunŋ ni, k lɑ Yennu yentsɑɑkɑl, k Yiesu sie ŋuɑ Yennu niidiitu po, k u yet ɑ: «Gotl, n lɑ k sɑnpɑɑpo luot k *Nisɑɑlk Bijɑ sie Yennu niidiitu po.» Ŋɑnn e k Suifnbɑ yudɑnm, sɑɑkɑb nɑn senniwɑntieb nɑ yikn sɑnpɑɑpo, ŋɑɑn pii b tubɑ, k b kul ɑ tɑn lɑkn wuul bɑɑl k kpil’ɔ, k bel’ɔ k nyinn’ɔ duo mɑnŋ ni, k piin k jɑɑt Etiɑnn tɑnɑ ɑ bin kpi’u, k siɑlɑɑdɑnm jii bin nbɑ jɑɑt tɑnɑ nɑ liɑtfɔkt k bil nɑɑsimɔ nbɑ k b yi’u Sɔul nɑ buol ni, ɑ wuu guu. B din jɑɑt’ɔ e dik dik dik, k u din tɑn miɑl ɑ: «N Yonmdɑɑnɔ Yiesu, gɑɑt n siek nɑ,» ŋɑɑn gbɑɑn k yikn sɑnpɑɑpo wɑɑ ɑ: «N Yonmdɑɑnɔ, dɑɑ jikt b biit nɑ k biil’b.» U yet nnɑ e ŋɑɑn ji kpo. K Sɔul din sɑk bɑɑ din sɑk ɑ bin kpi’u. L dɑɑl mɑnŋ e k muksbiil din bɑɑl *Klistu mɔtɑɑɔk niib nbɑ din be Selusɑɑlenm nɑ pɑɑk k b kul ɑ din nyii yɑt k sɑɑn Suude nɑn *Sɑɑmɑɑli yɑkɑ po, ŋɑɑn nyik tuomiinbɑ nɑ kuukuɑ lenŋ. K yentinsiɑb din jii Etiɑnn, k sɑɑn sɑɑ pii’u, ŋɑɑn mɔ yikn k fɑbn bonciɑnn u pɑɑk. K Sɔul ŋɑnin din luon wun biil Klistu mɔtɑɑɔk niib e, k din lin kuɑ ŋɑɑk ŋɑɑk, k so Yiesuweilɑ, jɑb nɑn puob, k nyint’b k sɑɑ kuɑnt’b dɑnsɑli. Yiesuweilɑ nbɑ din nyii k yɑt nɑ ji din sɑɑ lokl kul po e k muɑntl Yiesu mɑɑn mɑnŋ, k Fiiliip nyii k sik Sɑɑmɑɑli tinŋ digbɑnsɑɑkɑl ni, k sɑɑ muɑnt Klistu po k tul lenŋ niib. Nibulciɑɔnŋ nbɑ gbɑt Fiiliip mɑɑn k biɑ lɑ bɑktnɔunŋ tuonɑ nbɑ k u tuun nɑ, k b mɑntk gbiintl u mɑɑn mɑnŋ fɑnu nɑn dudukyent. Nɑlnbiit din nyii bɑɑtb bonciɑnn ni k yikn sɑnpɑɑpo, k gbɑnɑnkpienɑ nɑn wɔbi bonciɑnn biɑ din pɑɑk. K nigbounŋ nɑ mun din tikl k gbiint Fiiliip muɑnti mɑnŋ, k biɑ lɑ nɑn u bɑktnɔunŋ tuonɑ nbɑ k u tuun. U din nyinn nɑlnbiit niib bonciɑnn ni, k b yikn sɑnpɑɑpo k nyi, k u biɑ te k gbɑnɑnkpienɑ dɑnm nɑn wɔbi bonciɑnn pɑɑk. L pɑɑk din tien k b mɑntk gbiintl u mɑɑn fɑnu nɑn dudukyent. K pɑlpienn din be duo mɑnŋ ni bonciɑnn. Jɑsuɑ nnɑ ponŋ din be duo mɑnŋ ni, k u sɑnn din yi Siimɔn, k u tuu tɑn diɑ u linŋin k tuun bɑktnɔunŋ tuonɑ, k l din bɑktl niib kul nbɑ be duo mɑnŋ yɑkl po, k u din yi u mɔnŋ ɑ u tie nijɑɑnn e. Niib kul nbɑ din tie nijɑɑnɑ nɑn tɑli din bɑɑkt’ɔ, k b din tuu yɑɑ ɑ: «Juɑ nɑ tie Yennu yiikuo e, lin nbɑ k b yi’l Yiikuociɑɔnŋ nɑ.» B din gbiintl u mɑɑn mɑnŋ fɑnu fɑnu k mɑɑn u din tuu te k l bɑktl’b nɑn u bɑktnɔunŋ k l wei wɑɑ. Ŋɑɑn bɑɑ din tien yɑdɑ nɑn lɑbɑmɑnn nbɑ k Fiiliip din muɑntl k jikt sɑɑ Yennu nɑɑn nɑn Yiesu sɑnn po nɑ, k jɑb nɑn puob din te k b wul’b Yennu nyunwulu. Siimɔn mɔnŋ mun din tien Fiiliip mɑɑn yɑdɑ, k u wul’ɔ. K u tien Fiiliip wei-nɑn-luɑ, k lɑɑt bɑktnɔunŋ tuonjɑɑnɑ nbɑ k u tuun nɑ, k l tuu yɑɑl ŋɑɑn lit’ɔ. K tuomiinbɑ nbɑ din be Selusɑɑlenm gbɑt ɑ Sɑɑmɑɑliitieb gɑɑl Yennu mɑɑn mɑnŋ, k b din tun Piɑl nɑn Sɑn. Bɑɑ bɑɑl Sɑɑmɑɑli yuo nbɑ nɑ, k b miɑl Yennu bin nbɑ tien Yiesu yɑdɑ nɑ pɑɑk, ɑ bin gɑɑl Foŋɑnm, k mɑɑn Foŋɑnm mɑnŋ dɑɑ din k sik b suɑ ni. B kpɑn din gɑɑl Yennu nyunwulu Yonmdɑɑnɔ Yiesu sɑnn ni kuukuɑ e. Ŋɑnn e k Piɑl nɑn Sɑn yii b nii b pɑɑk k b gɑɑl Foŋɑnm. Siimɔn nbɑ din lɑ k tuomiinbɑ nɑ nbɑ yiin b nii niib pɑɑk k Yennu tul’b Foŋɑnm nɑ, k u yɑɑ ɑ wun tul tuomiinbɑ nɑ likli, ŋɑɑn yet’b ɑ: «Cɑbn’n mun yiikuo nɑ mɑn k n mun tuu yii n nii suɑ pɑɑk k wun gɑɑl Foŋɑnm mɑnŋ.» Ŋɑɑn k Piɑl yet’ɔ yɑɑ ɑ: «A sɑɑ kpo yiɑk e nɑn ɑ likli mɑnŋ, k mɑɑn ɑ duki mi ɑ ɑ sɑɑ gɑɑl Yennu piini nɑn likli e. A lek kɑn tun siɑl t tuonn nɑ ni, k mɑɑn ɑ pɑl k be fɑnu nɑn Yennu Mɔ kuɑŋɑɑn k lebt binbenŋ kii mei Yonmdɑɑnɔ k pɑsiɑl i u sɑɑ nyik cɑb’ɑ nɑn ɑ dudukbiit mɑnŋ, k mɑɑn n lɑ nɑn ɑ gbie nɑn nuɑntont e, k biit kun’ɑ wɑɑ.» Ŋɑnn e k Siimɔn jiin k yet’b ɑ: «Miɑt Yonmdɑɑnɔ k tul’n mɑn k lin nbɑ k i yet nɑ dɑɑ bɑɑt n pɑɑk.» Piɑl nɑn Sɑn din pɑk *siɑlɑ Yonmdɑɑnɔ po k tul niib, k biɑ muɑnt u mɑɑn ŋɑɑn ŋmɑt k sɑɑn Selusɑɑlenm. Bɑɑ din sɑɑ nɑ e, k b din muɑntl Yiesu lɑbɑmɑnn Sɑɑmɑɑli digbɑnbis bonciɑnn ni. Ŋɑnn e k Yonmdɑɑnɔ *mɑlɑkɑ tɑn bɑɑl yet Fiiliip ɑ: «Fiit sɑɑn gɑnŋ po k tɔkn sɔnu nbɑ nyi Selusɑɑlenm k siik Gɑɑsɑ nɑ.» L sɔnu pɑɑk din k pɑ siɑl. K Fiiliip fiil k sɑɑ k sɑɑ cet Etiopi kɑlɑcijɑɑnn nnɑ k u din tie nijɑɑnn k biɑ tie likli kɑlɑcinbɑ yudɑɑnɔ Etiopi puo nbɑ din tie kpɑnbɑl k b yi’u Kɑndɑɑs nɑ buol ni. Kɑlɑcijɑɑnn nɑ ponŋ din sɑɑn Selusɑɑlenm k sɑɑ jiɑnt Yennu, k ji kun k kɑl u toluk ni k tɑɑni dɑɑl’ɔ, k u lii *Yennu sɔkni Esɑɑyi kɑdɑɑɔk ni. Wɑɑ din kɑl k sɑɑ yuo nbɑ, k u lii *Yennu sɔkni Esɑɑyi kɑdɑɑɔk ni. Foŋɑnm yet Fiiliip ɑ: «Ii sɑɑ nɑkn toluk nɑ.» K u ciɑl sɑɑn nɑkn lenŋ, k gbɑt k juɑ nɑ lii Yennu sɔkni Esɑɑyi kɑdɑɑɔk ni, k u boi’ɔ ɑ: «Cɑnbɑɑ, ɑ bɑnn lin nbɑ k ɑ lii nɑ pɑɑk ii?» K u jiin ɑ: «Nlee k n sɑɑ bɑnn l pɑɑk, k l k tie k suɑ wɑnn’n kɑɑ?» K u bɑln Fiiliip ɑ wun kuɑ toluk nɑ k kɑl nɑn’ɔ. Yennu lolkpel kɑdɑɑɔk mɑɑn nbɑ k kɑlɑcijɑɑnn mɑnŋ din lii nɑ, ŋɑnn i nɑ ɑ: «U din tie nɑn pieok nbɑ k b sɑɑ ɑ bin sɑɑ kpi’u nɑ e, k u ŋmin nɑn pebik nbɑ k b tuu pot pot u kobt k u ŋmin nɑ, k u k yɑɑt u mɔb U din sikn u mɔnŋ, k b yet bin bu u buut bonŋɑnn. Ŋmee sɑɑ fit pɑk siɑl k jiin u yɑɑbuonɑ po? K mɑɑn b gbenn u mɑnfuol tingbounŋ nnɑ wɑɑ.» K kɑlɑcijɑɑnn nɑ boi Fiiliip ɑ: «Yetl’n, ŋmee k sɔkni nɑ yien nɑ? U yien u mɔnŋ ɑmi suɑ ee?» K Fiiliip piin siɑn nbɑ k kɑlɑcijɑɑnn mɑnŋ lii nɑ k sɑɑ, k piɑk Yiesu lɑbɑmɑnn. Bɑɑ tɔk sɔnu mɑnŋ yuo nbɑ, k b lɑ nyun nnɑ duɑ, k kɑlɑcijɑɑnn nɑ yet’ɔ ɑ: «Gotl, nyun e nɑ. Bee yɑɑ lin tien k ɑ kɑn wul’n Yennu nyunwulu?» K Fiiliip yet’ɔ ɑ: «L i tie k ɑ tien Yiesu yɑdɑ nɑn ɑ pɑl kul ɑ, n sɑɑ wul’ɑ wɑɑ.» K u jiin ɑ: «N tien yɑdɑ nɑn Yiesu Klistu tie Yennu Bijɑ e.» K kɑlɑcijɑɑnn mɑnŋ te k tɑɑni nɑ set, k ŋuɑ nɑn Fiiliip sik nyun nɑ ni, k Fiiliip wul’ɔ Yennu nyunwulu. B tɑn nyii nyun nɑ ni k duo, k Foŋɑnm jii Fiiliip k yɑɑt nɑn’ɔ, k kɑlɑcijɑɑnn nɑ ji k lɑ’u, ŋɑɑn ŋɑnm suol u sɔnu k kun nɑn pɑlpienn. K Fiiliip ji din sɑɑ be Asot ɑ, k din lin digbɑnɑ kul k muɑntl Yiesu lɑbɑmɑnn mɔkmɔk nɑn wɑɑ din tɑn bɑɑl Sesɑɑle. Tɔn, Sɔul lek biɑ din fuɑ kɔnfuɑt, k yien ɑ u sii dint Yonmdɑɑnɔ *puolpoweitieb biɑk nɑn u yɑɑ wun kpi’b nɑ e, k tɑn sɑɑn Yennu mɑnntieb yudɑɑnɔ buol ni, ɑ wun gɑɑl kɑdɑɑt, ɑ k sɑɑn Dɑɑmɑɑs k sɑɑ wɑnn *Suifnbɑ jɑɑnti diet yudɑnm, ɑ u sɑɑ lɑ wun nbɑ wɑɑ Yiesu sɔnu mɑnŋ, juɑ ɑmi puo, sie wun suol’b k lol’b k jen nɑn’m Selusɑɑlenm. Tɔn, wɑɑ ji din sɑɑ yuo nbɑ e k sɑɑ pel Dɑɑmɑɑs, k yentu nyii sɑnpɑɑpo, k sik yent lint’ɔ. K u bɑɑ tinŋ ni, k gbɑt k kunkɔl yi’u ɑ: «Sɔul, Sɔul, bee k ɑ muksl’n i?» K u boi ɑ: «A tie ŋmee e?» K kunkɔl nɑ jiin ɑ: «Min Yiesu e, k ɑ muksl’n. Ŋɑɑn fiit k sɑɑn duo nɑ ni, k b sɑɑ sɑɑ yet’ɑ fɑɑ ji sɑɑ tien biɑnŋ nbɑ.» L yuo nɑ, jɑb nbɑ din ciɑnt Sɔul nɑ ji biɑl set silinmm. B din gbiɑ kunkɔl nɑ ŋɑnin, ŋɑɑn k lɑɑt suɑ. K Sɔul tɑn fiil tinŋ ni, k munt u nuni, ŋɑɑn k k lɑɑt. Ŋɑnn e k b dɑt u nuu k sɑɑn nɑn’ɔ Dɑɑmɑɑs. Dɑmunjɑɑ ŋɑntɑ k u k fit lɑɑt. L dɑɑ mɑnŋ ni u din k dii ɑmi k nyuu siɑl. K Yiesuweisuɑ din be Dɑɑmɑɑs mɑnŋ, k u sɑnn yi Anɑɑniɑs, k Yonmdɑɑnɔ yiin’ɔ yelntu ni ɑ: «Anɑɑniɑs.» K u jiin ɑ: «Min e nɑ, Yonmdɑɑnɔ.» K Yonmdɑɑnɔ yet’ɔ ɑ: «Fiit k sɑɑn tɔkn sɔnu nbɑ yi Sɔnsunsonn nɑ k sɑɑ kuɑ Suudɑ ŋɑɑk ni, k boi juɑ nbɑ nyii Tɑɑls k u sɑnn yi Sɔul nɑ po. U mei Yennu e mɔtɑɑnɑ, k u lɑ jɑsuɑ yelntu ni, k u sɑnn yi Anɑɑniɑs, k u kuɑ k jii u nii k yii u pɑɑk ɑ wuu jik ii lɑɑt.» K Anɑɑniɑs jiin ɑ: «N Yonmdɑɑnɔ, niib bonciɑnn e piɑk juɑ nɑ po, k jikt sɑɑ biɑnŋ nbɑ kul k u tuun bonbiil k tien ɑ mɔnŋ niib Selusɑɑlenm. U dɑɑn gɑɑl yiikuo mɑnntieb yudɑnm buol ni, k bɑɑl nnɑ, ɑ wun suol wun nbɑ kul yi ɑ sɑnn.» Ŋɑɑn Yonmdɑɑnɔ yet’ɔ ɑ: «Fin i sɑɑ wɑɑ. Ŋuɑ e tie wun nbɑ k n lukt’ɔ ɑ wuu tuun n tuonn, k te k buolgɑnu nɑn b kpɑnbɑlɑ nɑn Islɑɑeltieb n bɑnn n sɑnn, k n mɔnŋ sɑɑ wɑnn’ɔ muksuk nbɑ kul k u sɑɑ di n pɑɑk.» Ŋɑnn e k Anɑɑniɑs sɑɑn kuɑ ŋɑɑk nɑ ni, k yii u nii Sɔul pɑɑk ŋɑɑn yet’ɔ ɑ: «N nɑɑ bik Sɔul, Yonmdɑɑnɔ Yiesu e tun’n. Ŋuɑ e tie dɑɑnɔ nbɑ k ɑ dɑɑn bɑɑt nnɑ k tɑn lɑ’u sɔnu pɑɑk nɑ, k u tun’n ɑ n tɑn te k ɑ i jik i lɑɑt k biɑ gbie yent nɑn Foŋɑnm.» L tɑɑkpɑɑk ni k siɑl tɑbt u ninbinɑ ni k bɑɑ, k nɑɑn nɑn jɑnwɔkɑ nɑ, k u ji lɑɑt jik, k fiil set, k b wul’ɔ Yennu nyunwulu. Ŋɑnn e k u dii jiet k pɑnŋ jen. Sɔul din lɑkn be nɑn Yiesuweilɑ nɑn dɑɑ ŋɑnle nɑ Dɑɑmɑɑs, k din sɑɑn yiɑn ɑ, Suifnbɑ jɑɑnti diet ni, k muɑntl Yiesu po, ɑ Yiesu kpɑn set tie Yennu Bijɑ e. Bin nbɑ kul din gbɑt u muɑnti mɑnŋ, l din tien’m yɑɑl-lituk o, k b boi ɑ: «Juɑ nɑ kɑɑ dɑɑn muks bin nbɑ yi Yiesu sɑnn Selusɑɑlenm nɑ ɑɑ? U yɑɑn k bɑɑl ɑ wun suol k lol Yiesuweilɑ, k ŋmɑt nɑn’m k sɑɑ tul’b Yennu mɑnntieb yudɑnm kɑɑ nɑ ɑɑ?» Ŋɑɑn k Sɔul muɑnti mɑnŋ biɑ lek ŋɑnmt k puki nɑn yiikuo, k Suifnbɑ nbɑ be Dɑɑmɑɑs nɑ k fit jiin’ɔ siɑl, yuo nbɑ k u wɑnt nɑn Yiesu e set tie *Klistu k bilsuk kɑɑ nɑ. K dɑɑ bonciɑnn tɑn gɑl, k Suifnbɑ nɑ lɑkn lieb k lol lol ɑ bin kpi Sɔul, ŋɑɑn suɑ tɑn kumi’ɔ bɑɑ loln u pɑɑk biɑnŋ nbɑ. Yennu nɑn nyiɑɔk k b din guu duo mɑnŋ tɑnmɔi e bonŋɑnn ɑ bin kpi’u, K suɑ tɑn kumi’ɔ bɑɑ loln u pɑɑk biɑnŋ nbɑ, ŋɑɑn nyɑyeunŋ k u wei-nɑn-lieb tɑn jii’u k tien’ɔ cibuk ni, k nyinn’ɔ duo mɑnŋ juonfɔnn ni, k sikn’ɔ tinŋ ni. Sɔul nbɑ din bɑɑl Selusɑɑlenm, u din yɑbl u mɔnŋ pɑɑk ɑ wun lɑkn nɑn Yiesuweilɑ nɑ, ŋɑɑn k b k tien yɑdɑ nɑn u ji tie Yiesuweilɔ e, k tiin’ɔ jɑŋmɑɑni. K Bɑɑlnɑɑbɑɑs din tɑn bɑɑl u sonml, k jii’u k bɑɑl nɑn’ɔ tuomiinbɑ nɑ buol ni, k kɑt wɑnn’b biɑnŋ nbɑ k Sɔul dɑɑn lɑ Yonmdɑɑnɔ sɔnu ni, nɑn wɑɑ pɑk nɑn’ɔ biɑnŋ nbɑ. U biɑ din ŋɑnm k wɑnn’b Sɔul nbɑ din muɑntl Yiesu po nɑn pɑlcienn Dɑɑmɑɑs biɑnŋ nbɑ. Ŋɑnn e k Sɔul din lɑkn be nɑn’m, k b din kɑk k lin Selusɑɑlenm kul po, k muɑntl Yonmdɑɑnɔ sɑnn ni nɑn pɑlcienn. U biɑ din piɑk nɑn Suifnbɑ nbɑ piɑk Glek mɑɑn nɑ k jikt sɑɑ Yiesu po, ŋɑɑn b din noi nɑn’ɔ, k kol ɑ bin kpi’u. Ŋɑɑn yuo nbɑ k Yiesuweilɑ bɑnn nnɑ mɑnŋ, k b jii Sɔul k sik nɑn’ɔ Sesɑɑle, k te k u sɑɑn Tɑɑls. Ŋɑnn e k Klistu mɔtɑɑɔk niib nbɑ be Suude nɑn Gɑɑliile nɑn *Sɑɑmɑɑli nɑ ji k lɑɑt muksuk u, k ŋɑnmt k tumi Yonmdɑɑnɔ mɑɑn, k tie yentinnɑ, k Foŋɑnm sonml ni k b puki. L puolpo e k Piɑl din yek lin siɑl kul po, k biɑ din tɑn sik ɑ wun gɔn Yennu niib nbɑ be Liidɑ nɑ. Lenŋ e k u din sɑɑ lɑ jɑsuɑ nnɑ, k u sɑnn yi Ene, k u din ponŋ tie gbɑnɑnkpienn dɑɑnɔ e, k din k fit fi u duɑnu ni teee nɑn binɑ ŋɑnniin. K Piɑl tɑn yet’ɔ ɑ: «Ene, Yiesu Klistu te k ɑ pɑɑk ɑ. Fiit k ŋɑnm ɑ duɑnu.» L tɑɑkpɑɑk ni k u fiil. Liidɑ nɑn Sɑɑlɔn doi niib kul nbɑ din lɑ’u k u pɑɑk nɑ, k b kpɑnt tien Yonmdɑɑnɔ yɑb. Puosuɑ mun din be Sope, k u sɑnn yi Tɑɑbiitɑ, ŋɑɑn Glek mɑɑn ni, b din yi’u Dɔlkɑɑs, k l pɑɑk tie pɑmɔnɔ. U din tie Yiesuweilɔ e, k din tuun tuonŋɑnɑ bonciɑnn k tien niib, k biɑ din sonmt tɑlɑs-dɑnm. L yuo nɑ dinn k yiɑlu din suol’ɔ k u kpo, k b din jii’u k wul’ɔ, ŋɑɑn jii’u duo nɑn’ɔ dituɑtuk ni k bil’ɔ. Sope mun din k fɔk nɑn Liidɑ sɑɑn, k Yiesuweilɑ nbɑ din be Sope din gbɑt nɑn Piɑl be Liidɑ, k b tun jɑb bɑnle u buol ni ɑ bin yet’ɔ ɑ: «T bɑln’mɑ. Kɑkt bɑɑl yiɑn yiɑn nɑ.» K u fiil k b jen nɑn’ɔ. Wɑɑ bɑɑl yuo nbɑ, k b jii’u k duo nɑn’ɔ dituɑtuk mɑnŋ ni. K pɑkɔi din be dieok nɑ ni, k b kul ŋɑɑ lint Piɑl ɑ, ŋɑɑn mɔ, k jikt b liɑtɑ nɑn b cincenɑ k wɑnt’ɔ, k yien ɑ: «Dɔlkɑɑs nbɑ tuu be u mɑnfuol ni k nyɑl lin nbɑ k tien’t e nɑ.» Ŋɑnn e k Piɑl nyinn b kul ɑ dieok nɑ ni, ŋɑɑn gbɑɑn tinŋ ni, k miɑl Yennu ŋɑɑn tɑn ŋmɑnt kpiemɔ nɑ pɑɑk k yiin ɑ: «Tɑɑbiitɑ, fiit.» K u munt u nuni k lɑ Piɑl, k ji fiil k kɑl. K Piɑl dɔnn k suol u nuu k fiin senn’ɔ, ŋɑɑn yiin Yennu niib nɑn pɑkɔi nɑ, k tɑn jii’u k wɑnn’b nɑn u jen u mɑnfuol ni wɑɑ. K l lɑbɑɑl din yɑt sɑɑn Sope kul po, k niib bonciɑnn din tien Yonmdɑɑnɔ yɑdɑ. K Piɑl ji din biɑl be Sope dɑɑ bonciɑnn, k din be jɑsuɑ nbɑ tie gbɑnfebltuɑ nɑ ŋɑɑk ni e, k b yi’u Siimɔn. Tɔn, jɑsuɑ nnɑ din be Sesɑɑle, k u sɑnn yi Kɔlnɑi. U din tie sejenm yudɑɑnsuɑ e u pɑɑbu ni. K l pɑɑbu k b yi Itɑɑli pɑɑbu. U din tie Yenjiɑnt-tuɑ e, k ŋuɑ nɑn u ŋɑɑtieb kul ɑ din jiɑntl Yennu. U din sonmt Suifnbɑ ni tɑlɑs-dɑnm bonciɑnn, k biɑ din mei Yennu yuo kul. L din tɑn tie nɑn yenlekl kut muntɑ yuo nɑ e, k u lɑ Yennu *mɑlɑkɑ yelntu ni pieee, k u kuɑ u dieok ni k tɑn yiin ɑ: «Kɔlnɑi.» Kɔlnɑi nbɑ din got lɑ mɑlɑkɑ mɑnŋ nɑ, k jɑŋmɑɑni suol’ɔ, k u yet ɑ: «N Yonmdɑɑnɔ, bee?» K mɑlɑkɑ mɑnŋ jiin ɑ: «Yennu gɑɑl ɑ miɑlu wɑɑ, k biɑ gɑɑl ɑ ninkpɑbɑɔnŋ tuonɑ nbɑ k ɑ tuun k tien tɑlɑs-dɑnm, k biɑ tiɑn ɑ po. Mɔtɑɑnɑ, tumn nisiɑb Sope, k bin sɑɑ yiin jɑsuɑ nbɑ k b yi’u Siimɔn, k u sɑnn biɑ tie Piɑl nɑ. U tie sɑɑmɔ e k be gbɑnfebltuɑ nbɑ k b yi’u Siimɔn nɑ ŋɑɑk ni, k u ŋɑɑk mɑnŋ kpiɑ nɑn mɔkgbenŋl nɑ.» Mɑlɑkɑ mɑnŋ nbɑ din pɑk nɑn’ɔ nɑ ji din yɑɑt, k Kɔlnɑi ji yiin u ŋɑɑtuontunnɑ bɑnle nɑn sejesuɑ nnɑ, wun nbɑ din tie Yenjiɑnt-tuɑ, k tie u kpɑɑkyenɔ nɑ. Wɑɑ yet’b lin nbɑ kul tien mɑnŋ puolpo e, k u tun’m Sope. Lɑɑ yent, k b sɑɑ, k sɑɑ pel Sope. L yuo nɑ k Piɑl mun duo dituɑtuk pɑɑk yensuuk ni, ɑ wun miɑl Yennu K kon din tɑn gbɑt’ɔ, k u ji luon wun di jiet, k b dɑɑ tie jiet siil, k u lɑ yelntu. U lɑ k sɑnpɑɑpo luot k bonsiɑl nnɑ nɑɑn cincenn k nyii sɑnpɑɑpo, k siɑl diɑ l mɔgbɑnɑ ŋɑnnɑ k siknt tinŋ ni, k u lɑ bonkobt, bonfulinkɑ, nɑn bon-yuyukt buolu kul, k u gbɑt kunkɔl yiin ɑ: «Piɑl, fiit k kpi’b k ŋmɑn.» Ŋɑɑn k Piɑl jiin ɑ: «O, O, O, Yonmdɑɑnɔ, nnɑ kɑɑ. N k mi dii t kuɑt.» K kunkɔl nɑ biɑ ŋɑnm yet’ɔ ɑ: «Lin nbɑ k Yennu kpint’l ɑ l k kuɑ, dɑɑ yien ɑ l kuɑ.» L din tien nnɑ k sɑɑ jɑnŋ tɑɑl muntɑ, k b jiin bont mɑnŋ sɑnpɑɑpo. Piɑl nbɑ duki yelntu nɑ pɑɑk po nɑ, k suɑ Kɔlnɑi *tuomi nɑ boi Siimɔn ŋɑɑk nbɑ be siɑn nbɑ po, k b bɑɑl ŋɑɑk mɑnŋ tɑnmɔb ni, k set, ŋɑɑn yiin k boi ɑ: «Suɑ be nnɑ, k u sɑnn tie Siimɔn k b biɑ yi’u Piɑl ii?» Piɑl nbɑ lek kol ɑ wun bɑnn yelntu mɑnŋ pɑɑk nɑ, k Foŋɑnm yet’ɔ ɑ: «Gotl, jɑb bɑntɑ be nnɑ k luon’ɑ. L pɑɑk, fiit k sik, k dɑɑ bils nɑn ɑ sɑɑn nɑn’m, k mɑɑn min e tun’m.» Ŋɑnn e k Piɑl sik, k yet jɑb nɑ ɑ: «Min e k i luon nɑ. Bee tien k i bɑɑl i?» K b jiin ɑ: «Cɑnbɑɑ Kɔlnɑi e tun’t. U tie sejenm yudɑɑnɔ e, k u tie nibulcimɔ e biɑk, k jiɑntl Yennu k Suifnbɑ kul tien’ɔ nibɑɑkl. Tɔn, Yennu mɑlɑkɑ won bɑɑl yet’ɔ ɑ wun yiin’ɑ k ɑ bɑɑl u ŋɑɑk ni, k wun tɑn gbɑt lin nbɑ k ɑ sɑɑ pɑk k tul’ɔ.» K Piɑl fɑn yiin jɑb nɑ k kuɑn’m, ɑ bii be k sɑn-nyiɑɔk n yent ɑ. K l tɑn yent k u tien siil, k b sɑɑ, k Yiesuweilɑ nbɑ din be Sope nɑ, k b siɑb ciɑn’ɔ. L dɑɑl din tɑn bɔnn yent e, k b bɑɑl Sesɑɑle, ŋɑɑn suɑ k Kɔlnɑi ponŋ yiin u nɑɑtɑɑni nɑn u yuɑsnbɑ, k b kul ji kɑl guu Piɑl bɑɑlu. Piɑl nbɑ din tɑn bɑɑl ɑ wun kuɑ yuo nbɑ, k Kɔlnɑi cet’ɔ tɑnmɔb ni, k gbɑɑn, k puki’ɔ. Ŋɑɑn Piɑl yet’ɔ ɑ: «Fiit, k mɑɑn n tie nifosɑɑlk e,» ŋɑɑn fiin’ɔ senn’ɔ. Wɑɑ din piɑk nɑn Kɔlnɑi ŋɑɑn kuɑ ŋɑɑk mɑnŋ ni nɑ, k u lɑ niib bonciɑnn tikl k guu’u. K u yet’b ɑ: «I mɔnŋ mɔnŋ mun mi nɑn tinm Suifnbɑ sennu k cɑb’t nɑn tin sɑɑn gɔn bin nbɑ k tie Suifnbɑ, ɑmi k tɑɑn nɑn’m, ŋɑɑn Yennu wɑnn’n ɑ n dɑɑ yien nisuɑ, wɑɑ k tie Suif nɑ pɑɑk. L pɑɑk, fɑɑ yiin’n nɑ, n bɑɑl, k k bils. Ŋɑnn e k n boi’ɑ mɑɑ n lɑɑn bee tien k ɑ tun k yiin’n i?» K Kɔlnɑi yet’ɔ ɑ: «L dɑɑn tie nnɑ yuo e dinnɑ dɑɑl, k n dɑɑn mei Yennu n ŋɑɑk ni kut muntɑ yuo yenlekl. L yuo nɑ k n lɑ k nisuɑ nnɑ sie k liɑ liɑtfuouk nbɑ nyili n tuɑnn po, k yet ɑ: ‹Kɔlnɑi, Yennu gbɑt ɑ miɑlu wɑɑ, k biɑ tiɑn ɑ ninkpɑbɑɔnŋ tuonɑ po. L pɑɑk, tumn suɑ Sope, k wun sɑɑ yiin wun nbɑ k b yi’u Siimɔn, k u sɑnn biɑ tie Piɑl nɑ. U tie sɑɑmɔ e, k be gbɑnfebltuɑ Siimɔn ŋɑɑk nbɑ kpiɑ nɑn mɔkgbenŋl nɑ.› K l pɑɑk e, k n dɑɑn tun ɑ po yiɑn ɑ nɑ, k ɑ mun tien bonŋɑnn k bɑɑl nɑ. Mɔtɑɑnɑ, t kul ɑ be Yennu tuɑnn, k ji guu ɑ t gbɑt lin nbɑ kul k Yonmdɑɑnɔ tul’ɑ mɔb ɑ ɑ pɑk tul’t nɑ.» Ŋɑnn e k Piɑl piin pɑku k yɑɑ ɑ: «N ji bɑnn nɑn l tie mɔni e nɑn Yennu set k mɔk luktn, ŋɑɑn nibuolu kul ni, dɑɑnsuɑ nbɑ tien’ɔ bɑɑkl, k biɑ tuun wɑɑ luon bɑnnu nbɑ, ŋuɑ e gbuot Yennu nunm. I mi nɑn Yennu din tul Islɑɑeltieb u mɑɑn nbɑ wɑnt lɑbɑmɑnn nɑ po, ɑ Yiesu *Klistu ni e k tinm nɑn Yennu mɑnŋ nɑn lieb. Ŋuɑ Yiesu Klistu e tie t kul Yonmdɑɑnɔ. I ponŋ mi lin nbɑ din tien Gɑɑliile nɑn Suude tini kul ni, Sɑn nbɑ din muɑnt Yennu mɑɑn k wuul niib Yennu nyunwulu nɑ puolpo. I mi biɑnŋ nbɑ k Yennu din tul Yiesu, Nɑɑsɑɑlet nilɔ nɑ, Foŋɑnm nɑn yiikuo nɑ. I biɑ mi biɑnŋ nbɑ k u din lin k tuun tuonŋɑnɑ, k biɑ te k bin nbɑ kul be pol yiikuo k yiɑl nɑ lɑ pɑɑku, k mɑɑn Yennu be nɑn’ɔ. K t lɑ tuonɑ kul nbɑ k u tun Suifnbɑ tingbounŋ ni nɑn Selusɑɑlenm, k t tie u siɑlɑɑdɑnm. K b kpɑɑ’u dɑpunpunn pɑɑk k u kpo, ŋɑɑn k Yennu din fiin’ɔ kuun ni dɑɑ ŋɑntɑ dɑɑl, k te k t lɑɑt’ɔ. Ŋɑɑn niib kul kɑɑ wɑɑ din lɑɑt’ɔ. L din tie tinm nbɑ k Yennu ponŋ din lukt’t ɑ tii tie u siɑlɑɑdɑnm nɑ e din lɑɑt’ɔ, k biɑ din tuu di k nyu nɑn’ɔ u kuun fiilu puolpo mɑnŋ. K u tul’t mɔb ɑ tii muɑntl kii tien niib ɑ Yiesu e tie dɑɑnɔ nbɑ k Yennu nyinn senn’ɔ ɑ u tie fuotb nɑn kpienm bɑlbuulɔ. *Yennu sɔkniinbɑ kul din tuu piɑk u po, k yien ɑ suɑ kul nbɑ tien’ɔ yɑdɑ nɑ, sɑɑ lɑ nyikcɑbu Yiesu mɑnŋ sɑnn ni.» Piɑl nbɑ din dɑɑ piɑk nɑ, k Foŋɑnm sik kuɑ bin nbɑ kul din gbiintl mɑɑn mɑnŋ ni. K Yiesuweilɑ nbɑ tie Suifnbɑ k nyii Sope k ciɑn Piɑl nɑ, k l tien’m bɑktnɔunŋ nɑn Yennu nbɑ jii u piini nbɑ tie u Foŋɑnm, k tul bin nbɑ k tie Suifnbɑ mun nɑ, k mɑɑn b gbiɑ k b piɑk bɑlgɑni k dont Yennu sɑnn. Ŋɑnn e k Piɑl yet ɑ: «Niib nɑ gɑɑl Foŋɑnm, nɑn tɑɑ mun din gɑɑl nɑ e. Suɑ be nnɑ k sɑɑ bel’t ɑ t dɑɑ wuul’b Yennu nyunwulu uu?» ŋɑɑn tul mɔb ɑ bin wul’b Yennu nyunwulu Yiesu Klistu sɑnn ni. Ŋɑnn e k b din guɑl Piɑl ɑ wun biɑl nɑn’m nɑn dɑɑ ŋɑnle nnɑ, k u biɑl. L yuo nɑ k tuomiinbɑ nɑn Yiesuweilɑ nbɑ be Suude lokl kul po nɑ din gbɑt ɑ bin nbɑ k tie *Suifnbɑ mun tɑn gɑɑl Yennu mɑɑn. L pɑɑk, Piɑl nbɑ din tɑn duo Selusɑɑlenm nɑ, k Yiesuweilɑ nbɑ pot punɑ nɑ yɑki nɑn’ɔ, k yien’ɔ ɑ: «A dɑɑn sɑɑn bin nbɑ tie punjuot ŋɑɑk ni, k biɑ tɑɑn dii nɑn’m ɑ gbɑɑ.» Ŋɑnn e k Piɑl piin l pinpiik, k kɑt wɑnn’b lin nbɑ kul din tien ɑ: «N dɑɑn be Sope k mei Yennu e k tɑn lɑ yelntu, k bonsiɑl nnɑ nɑɑn nɑn cincengbenŋl k l nyii sɑnpɑɑpo, k siɑl diɑ l mɔgbɑnɑ ŋɑnnɑ k siknt n buol ni. K n duɑnt l nuɑk ni, k lɑ bonkobt, bonsusuot, bonfulnkɑ nɑn bon-yuyukt buolu kul ɑ. Ŋɑnn e k n gbɑt k kunkɔl yet ɑ: ‹Piɑl, fiit, k kpi’b k ŋmɑn.› Mɑɑ: ‹O, O, O, Yonmdɑɑnɔ, nnɑ kɑɑ. N ponŋ k mi dii t kuɑt.› K kunkɔl nɑ biɑ ŋɑnm k yet *Yendɔunŋ ni ɑ: ‹Lin nbɑ k Yennu kpint’l ɑ l k kuɑ, dɑɑ yien ɑ l kuɑ.› L dɑɑn tien nnɑ k sɑɑ jɑnŋ tɑɑl muntɑ, k l ŋmɑt duo sɑnpɑɑpo. «L tonton nɑ k Sesɑɑle jɑb bɑntɑ nbɑ k b dɑɑn tun’m n penŋ nɑ bɑɑl ŋɑɑk nbɑ k n be nɑ ni. Ŋɑnn e k Foŋɑnm yet’n ɑ n sɑɑn nɑn’m k dɑɑ bils. K Yiesuweilɑ nbɑ be Sope nɑ, b ni bɑnluob nbɑ be nnɑ nɑ mun ciɑn’n k sɑɑn Sesɑɑle, k t kul ɑ bɑɑl kuɑ Kɔlnɑi ŋɑɑk ni. K u yet’t biɑnŋ nbɑ k u lɑ k *mɑlɑkɑ bɑɑl set u ŋɑɑk ni k yet’ɔ ɑ: ‹Tumn suɑ Sope, k wun sɑɑ yiin juɑ nbɑ k b yi’u Siimɔn, k u sɑnn biɑ tie Piɑl nɑ, k u sɑɑ pɑk mɑɑn k tul’ɑ, k fin nɑn ɑ ŋɑɑtieb kul ɑ n lɑ fielu.› «Tɔn, mɑɑ piin mɑɑn pɑku yuo nbɑ, k Foŋɑnm sik kuɑ b ni nɑn wɑɑ din sik kuɑ t ni l pinpiik ni biɑnŋ nbɑ nɑ. Ŋɑnn e k n tiɑl Yonmdɑɑnɔ nbɑ din yet ɑ: ‹Sɑn ŋɑnin din wuul niib nɑn nyun e, ŋɑɑn yinm ŋɑnin sɑɑ gbie yent nɑn Foŋɑnm e.› Tɔn, l i tie k Yennu set pi’b u Foŋɑnm mɑnŋ nɑn wɑɑ mun din pi tinm nbɑ tien Yonmdɑɑnɔ Yiesu *Klistu yɑdɑ nɑ i e, k ŋɑnn, n tie ŋmee k sɑɑ yet Yennu nbɑ luon wun tun lin nbɑ?» Bɑɑ din gbɑt nnɑ mɑnŋ yuo nbɑ, k b ji nyik b kpɑyɑkt nɑ, ŋɑɑn donn Yennu sɑnn, k yien ɑ: «Yennu te bin nbɑ k tie Suifnbɑ mun fit mɔ kuɑŋɑɑn k lebt binbenŋ k lɑ mɑnfuol nbɑ kɑɑ gbennu.» Tɔn, muksuk nbɑ din bɑɑl Etiɑnn kpinu puolpo nɑ din te k Yiesuweilɑ fiil Selusɑɑlenm k yɑt, k b siɑb din yɑɑt k sɑɑn Feniisi, nɑn Siipl, nɑn Antiɑɔs, k din muɑntl Yiesu mɑɑn k tien Suifnbɑ kuukuɑ. Ŋɑɑn Yiesuweilɑ siɑb nbɑ din tie Siipltieb, nɑn Siilenntieb nɑ, sɑɑn Antiɑɔs, k sɑɑ muɑntl Yonmdɑɑnɔ Yiesu lɑbɑmɑnn k tien bin nbɑ k tie Suifnbɑ, k Yonmdɑɑnɔ yiikuo din be nɑn’m, k niib bonciɑnn din tien Yonmdɑɑnɔ yɑdɑ k wɑɑ’u. K Klistu mɔtɑɑɔk niib nbɑ din be Selusɑɑlenm nɑ gbɑt lɑbɑɑl mɑnŋ, k tun Bɑɑlnɑɑbɑɑs ɑ wun sɑɑn Antiɑɔs. Wɑɑ din sɑɑ bɑɑl lenŋ yuo nbɑ k lɑ Yennu nbɑ tul’b yetŋɑnm biɑnŋ nbɑ, k u lɑ pɑlpienn bonciɑnn, k din cie b pɑlɑ, k kpɑɑn b kul kpɑɑni ɑ bin jii b mɔnŋ k tul Yonmdɑɑnɔ fɑnnu. Bɑɑlnɑɑbɑɑs din tie niŋɑnɔ e, k mɑntk gbie nɑn Foŋɑnm nɑn yɑdɑ, k nigbounŋ bonciɑnn din tien Yonmdɑɑnɔ Yiesu yɑdɑ k tien u weilɑ. Ŋɑnn e k Bɑɑlnɑɑbɑɑs din sɑɑn Tɑɑls, ɑ wun sɑɑ lon Sɔul. Wɑɑ sɑɑ lɑ’u yuo nbɑ k u jen nɑn’ɔ Antiɑɔs, k b din jii binn munn k tɑɑn nɑn Klistu mɔtɑɑɔk niib, k wɑnt niib bonciɑnn Yennu mɑɑn. L din tie Antiɑɔs e k b din sint k pul Yiesuweilɑ ɑ: «Klistuyɑb.» L yuo dinn e k *Yennu sɔkniinbɑ siɑb din nyii Selusɑɑlenm k sik Antiɑɔs. B yenɔ sɑnn din yi Agɑɑbuus, k Foŋɑnm ni e k u din fiil k set, k yet ɑ kon bonciɑnn tɑn sɑɑ bɑɑ tingbounŋ nɑ kul po, k kon mɑnŋ din set tɑn bɑɑ yuo nbɑ k Kluod din tie kpɑnbɑlɑ yudɑɑnɔ nɑ. Yuo nbɑ k Yiesuweilɑ din gbɑt ɑ kon yɑɑ lin bɑɑ nɑ, k b din dukn dudukt ɑ b sɑɑ tul sonml, k wun nbɑ fit nyɑnn biɑnŋ nbɑ lek, wun tul Yiesuweilɑ nbɑ be Suude nɑ. K b din tien nnɑ, k tun Bɑɑlnɑɑbɑɑs nɑn Sɔul nɑn likli nɑ, ɑ bin sɑɑ tul Yiesuweilɑ sɑɑkɑb Suude tinŋ ni. L yuo nɑ dinn k kpɑnbɑl *Heluod din jɑk Yiesuweilɑ siɑb nɑn muksuk, k din te k b kpii Sɑn ninjɑ Sɑɑk nɑn juk-bɑnjiɑk. Kpɑnbɑl Heluod nbɑ bɑnn nɑn wɑɑ tien biɑnŋ nbɑ te k *Suifnbɑ pɑlɑ penn nɑ, k u biɑ lek ŋɑnmt k tie nnɑ, k tɑn suol Piɑl, yosɑu nbɑ k b din mɔk jɑɑnm k di pɑɑnu nbɑ kɑɑ * dɑtinŋ nɑ. Wɑɑ suol Piɑl yuo nbɑ k u kuɑn’ɔ dɑnsɑlk, k tul’ɔ dɑnsɑlguulɑ. B din tie pɑɑbu munnɑ e k guu’u, k pɑɑbyenn kul ni guulɑ bɑnɑ e guu’u, k Heluod din duki ɑ jɑɑnm mɑnŋ puolpo e wɑɑ, k u sɑɑ nyinn Piɑl ɑ bin n bu u buut niib ni. K Piɑl dɑɑ be dɑnsɑlk ni, ŋɑɑn k Yiesuweilɑ pɑɑ Yenmiɑlu pɑɑk u po nɑn ninmɔnn. Tɔn, k Heluod din duki nɑn l i yent sɑn-nyiɑɔk, u sɑɑ nyinn Piɑl k kpi’u, k l dɑɑl nyiɑɔk mɑnŋ k Piɑl lol nɑn jɑlt ŋɑnle, k guɑnt guulɑ bɑnle nɑ sinsuuk ni, k guulɑ mɑnŋ siɑb mun din guu dɑnsɑlk dieok nɑ tɑnmɔb. L tɑɑkpɑɑk ni k Yonmdɑɑnɔ *mɑlɑkɑ dɔkt, k yentu yent dɑnsɑlk dieok nɑ ni, k u sik k pɑɑpɑɑ Piɑl lokl ni k fiin’ɔ, ŋɑɑn yet’ɔ ɑ: «Fiit yiɑn yiɑn.» K u fiil. Wɑɑ fiil yuo nbɑ, k jɑlt nɑ pit u nii ni k bɑɑ. K mɑlɑkɑ nɑ yet’ɔ: «Bobnt ɑ gbɑnn, k pil ɑ tɑɑsɑɑt.» K Piɑl tien nnɑ. K u biɑ yet’ɔ ɑ: «Gbɑbn ɑ cincenn kii wɑɑ’n.» K u bobn u gbɑnn k wɑɑ’u, k b nyii dɑnsɑlk dieok nɑ ni, ŋɑɑn Piɑl din k bɑnn nɑn mɑlɑkɑ nbɑ tuun biɑnŋ nbɑ mɑnŋ, ɑ l tie mɔni e. U din mi ɑ u lɑɑt yelntu e. K b din bɑɑl gɑl sinsinn guulɑ nɑ buol ni, k biɑ tɑn bɑɑl gɑl lieb nɑ buol, k ji sɑɑ bɑɑl kutgɑnjuontk nɑ ni, k gɑnn mɑnŋ luot l tiɑɔnŋ k tul’b, k b nyii nɑn-yel, k tɔkn sɔnu k sɑɑ, k mɑlɑkɑ nɑ tɑɑn lil bot ŋɑɑn nyik’ɔ. Ŋɑnn e k Piɑl ji yelnt bɑnn, k yet ɑ: «Mɔtɑɑnɑ e k n ji dɑɑ bɑnn nɑn l set tie mɔni e nɑn Yennu tun u mɑlɑkɑ k u bɑɑl nyinn’n Heluod nuu ni, k biɑ nyinn’n nɑn *Suifnbɑ nbɑ duki ɑ bin tun’n biɑnŋ nbɑ nɑ ni.» Wɑɑ bɑnn u mɔnŋ po nbɑ tie biɑnŋ nbɑ, k u sɑɑn Sɑn, wun nbɑ k b yi’u Mɑɑlk nɑ, nɑɑ Mɑɑli ŋɑɑk ni, k niib bonciɑnn ponŋ tikl lenŋ k mei Yennu. K Piɑl kpɑɑ kpɑɑ nɑn-yel po gɑnn, k sɑpɑɑntuontunnɔ, wun nbɑ sɑnn yi Luodɑ nɑ, bɑɑl gɑnn mɑnŋ penŋ ɑ wun gbiint, k ji bɑnn Piɑl kunkɔl, k ciɑl ŋmɑt nɑn pɑlpienn niib nɑ ni, ŋɑɑn tɑɑn ji k luot gɑnn nɑ, k yet’b ɑ: «Piɑl be nɑn-yel po.» K b yet’ɔ ɑ: «Wɑɑtuk o mɔk’ɑ.» Ŋɑɑn k u biɑ ŋɑnmt lek yien ɑ u be, k b yɑɑ ɑ: «L tie u mɑlɑkɑ e.» K Piɑl biɑ lek sie k kpɑɑn gɑnn nɑ, k b tɑn luot gɑnn mɑnŋ k lɑ’u, k l ji yɑɑl ŋɑɑn lit’b. K u donn nuu ɑ bin ŋmin, ŋɑɑn wɑnn’b biɑnŋ nbɑ k Yonmdɑɑnɔ nyinn’ɔ dɑnsɑlk ni, k yet’b ɑ: «Ii sɑɑ mɑn k sɑɑ yet Sɑɑk nɑn Yiesuweilɑ lieb lin nbɑ nɑ po.» L puolpo k u nyik’b ŋɑɑn yɑɑt sɑɑn siɑl po. Ŋɑnn e k l yent sɑn-nyiɑɔk, k mukl muk dɑnsɑlguulɑ nɑ k l k jeln, k mɑɑn b k mi Piɑl nbɑ ji be siɑn. K Heluod tul mɔb ɑ bin lon u buol, k b lon’ɔ k k lɑ’u, k u boi guulɑ mɑnŋ buboit, ŋɑɑn tul mɔb ɑ bin kpi’b. L puolpo e k Heluod din nyii Suude k sik Sesɑɑle, k yɑnn lenŋ wɑɑn ɑ. Heluod wutuol din duo bonciɑnn Tiil nɑn Siidɔn tieb pɑɑk. B din tuu lɑɑt jiet Heluod yent ni. L pɑɑk, k b lɑkn lieb ɑ bin sɑɑn lɑ’u. Sinsinn bɑɑ bɑɑl k lɑ Blɑstus, wun nbɑ tie Heluod kɑlɑcigbenŋl nbɑ goli kpɑnbɑl nɑ dieok pɑɑk nɑ, k b mɑlk b mɔb k mɑnŋ nɑn’ɔ, k b tɑn sɑɑn Heluod buol ni k sɑɑ duo’u sindɑnt. Ŋɑnn e k Heluod din tɑn senn dɑɑl, k tɑn liɑ u kpɑnbɑl liɑtgbenŋɑ, k nyii kɑl u nɑɑngbounŋ pɑɑk ŋɑɑn pɑk tul niib nɑ, k niib nɑ wuus ɑ: «Nilɔ kunkɔl kɑɑ nɑ. U tie yensuɑ e.» L tɑɑkpɑɑk ni k Yonmdɑɑnɔ Yennu mɑlɑkɑ fɑɑ’u k mɑɑn u din k tien Yennu dontl mɑnŋ, k nɑnwubɑ kuɑ muɑ’u k u kpo. K Yennu mɑɑn ŋɑnmt yɑt k kuɑ niib ni. Yuo nbɑ k Bɑɑlnɑɑbɑɑs nɑn Sɔul din gbenn b tuonɑ nbɑ k b sɑɑn k tun nɑ, k b ji jii Sɑn, wun nbɑ k b biɑ yi’u Mɑɑlk nɑ, k nyii Selusɑɑlenm k ŋmɑt k kun Antiɑɔs. Antiɑɔs duo ni e k *Yennu sɔkniinbɑ siɑb nɑn wɑntesiɑb din be *Klistu mɔtɑɑɔk niib nɑ ni. Ŋɑnm e din tie Bɑɑlnɑɑbɑɑs nɑn Siimeɔn (wun nbɑ k b din yi’u Jɑbɔnŋ nɑ), nɑn Lusius, wun nbɑ din nyii Siilenn nɑ, nɑn Mɑɑnɑenn (b din lɑkn wubi Mɑɑnɑenn nɑn kpɑnbɑl *Heluod e b bisn ni), nɑn Sɔul. K dɑsiɑl k b dɑɑ din be k jiɑntl Yonmdɑɑnɔ k loln mɔi, k Foŋɑnm tɑn yet’b ɑ: «Nyint Bɑɑlnɑɑbɑɑs nɑn Sɔul, k bin tun tuonn nbɑ k n yiin’m ɑ bin tun nɑ.» K b nyinn’b. L puolpo k b biɑ lol mɔi k miɑl Yennu k yii nii b pɑɑk ŋɑɑn cɑb’b. Yuo nbɑ k Foŋɑnm din tun Bɑɑlnɑɑbɑɑs nɑn Sɔul k b din sik Selusi k kuɑ ŋɑlunŋ, k sɑɑ bɑɑl Sɑɑlɑɑmiinn nbɑ din be Siipl tinŋ ni nɑ, k nyii ŋɑlunŋ ni lenŋ, k sɑɑ *Suifnbɑ jɑɑnti diet ni, k muɑntl Yennu mɑɑn k tien’m. K Sɑn-Mɑɑlk din tie b kpɑɑkl k be nɑn’m. L puolpo e k b din nyii Sɑɑlɑɑmiinn, k gɑɑl tinŋ mɑnŋ doi kul ni, k sɑɑ bɑɑl Pɑɑfuos. Lenŋ e k b din lɑ nyɔkluulsuɑ, k u sɑnn yi Bɑɑl-yiesu, k u din tie Suif nilɔ nbɑ kpɑnn ɑ u tie Yennu sɔkni U din be Siipl tinŋ ni yudɑɑnɔ buol e, k yudɑɑnɔ mɑnŋ sɑnn din yi Seljius Pɔulus, k u din tie yɑndɑɑnɔ e, k din yiin Bɑɑlnɑɑbɑɑs nɑn Sɔul ɑ bin tɑn pɑk Yennu mɑɑn k wun gbɑt. Ŋɑɑn k nyɔkluulɔ mɑnŋ, wun nbɑ sɑnn din yi Eliimɑɑs, Glek mɑɑn ni nɑ, k u k sɑk’b ŋɑɑn kol ɑ wun tiɑ yudɑɑnɔ mɑnŋ k u dɑɑ tie Yiesu yɑdɑ. Ŋɑnn e k Foŋɑnm fiil Sɔul ni, wun nbɑ sɑnn mun din yi Pɔul nɑ, k u got nyɔkluulɔ nɑ silll, k tɑn yet’ɔ ɑ: «Fin e tie pol bijɑ, k biɑ tie tuonŋɑnɑ kul dɑtɑɑk. Fin nibiiuk nbɑ gbie nɑn kpinkpɑnni nɑ. A kɑn bɑn nyik fɑɑ tuu jii Yennu bɑlmɔni k kpintl’l fɑɑk nɑ ɑɑ? Tɔn, Yennu nuu sɑɑ pɑɑ’ɑ k ɑ juɑn k kɑn lɑ yentu k lin yɑnn ɑ.» L tɑɑkpɑɑk ni, k wunn nbɑ bɔn bɑɑ u ninbinɑ ni, k u ji sonm k tuln, k luon suɑ n suol u nuu k dɑt’ɔ. K yudɑɑnɔ nɑ nbɑ lɑ lin nbɑ tien nɑ, k u tien Yiesu yɑdɑ, k mɑɑn u yɑn din kuɑ nɑn lin nbɑ k u ji bɑnn k jikt sɑɑ Yonmdɑɑnɔ po nɑ. L puolpo e jik k Pɔul nɑn u wei-nɑn-lieb kuɑ ŋɑlunŋ, k nyii Pɑɑfuos k sɑɑn Pelj nbɑ din be Pɑnfiili tinŋ ni nɑ. Lenŋ e k Sɑn-Mɑɑlk din nyik’b ŋɑɑn ŋmɑt sɑɑn Selusɑɑlenm. K b sɑɑ tuɑt k nyii Pelj, k bɑɑl Antiɑɔs nbɑ din be Piisiidi tinŋ ni nɑ. K *Fuondɑɑl k b sɑɑn kuɑ Suifnbɑ jɑɑnti dieok ni k kɑl, k lɑ k b lii Muois *senni ni nɑn Yennu sɔkniinbɑ diɑni ni, k Suifnbɑ jɑɑnti dieok mɑnŋ ni sɑɑkɑb yet’b ɑ bin yet Pɔul nɑn Bɑɑlnɑɑbɑɑs ɑ: «T nɑɑ wɑɑs, l i tie k i mɔk lɑbɑŋɑnn nbɑ i e k sɑɑ pɑk k tul’t, yin pɑk.» K Pɔul fiil k set k donn nuu ŋɑɑn piin pɑku, k yɑɑ ɑ: «Yinm Islɑɑeltieb nɑn yinm nbɑ kul be k jiɑntl Yennu nɑ, gbiintl mɑn. Islɑɑeltieb Yennu din lukt t yejɑnm k te k b yɑbt bonciɑnn, yuo nbɑ k b dɑɑ din tie sɑɑnm k be Ejipt tinŋ nnɑ, k ŋuɑ Yennu din jii u yiikuo k nyinn’b lenŋ. K bɑɑ din be muuk ni binɑ piinnɑ k u lek suol u yɑn nɑn’m. Ŋɑɑn l puolpo k u biil nibuolu munlole nbɑ din be Kɑɑnɑɑn tinŋ nnɑ, ŋɑɑn te k u mɔnŋ niib Islɑɑeltieb yent tinŋ mɑnŋ. K lin nbɑ nɑ kul din wei binɑ kobiinnɑ nɑn piinŋmu. «Yuo nbɑ k b din yent tinŋ mɑnŋ nɑ, k u din tul’b yudɑnm ɑ bii bu b mɑɑn dɑɑnn nɑn yuo nbɑ k Yennu sɔkni Sɑɑmuel tɑn sɑɑ bɑɑl. K l puolpo, b biɑ din tɑn boi Yennu ɑ wun tul’b kpɑnbɑl. Ŋɑnn e k Yennu din lukt Sɔul, wun nbɑ din tie Kiis bijɑ, Bensɑɑmen buolu ni nilɔ nɑ, ɑ wuu tie b kpɑnbɑl, k u din dii nɑɑn mɑnŋ binɑ piinnɑ. K Yennu din tɑn liɑt’ɔ u nɑɑn ni, ŋɑɑn dinn Dɑɑfiid ɑ wuu tie b kpɑnbɑl jik. Nnɑ e k Yennu din pɑk Dɑɑfiid po ɑ: ‹N bɑnn nɑn Dɑɑfiid, wun nbɑ tie Sese bijɑ nɑ, mɑntk gbuot n nunm, k u sɑɑ tun lin nbɑ kul k n luon nɑ.› «Juɑ nɑ yɑɑbuonɑ ni e, k Yennu din nyinn t Fietuɑ Yiesu, k tien’ɔ Islɑɑeltieb ni, nɑn wɑɑ din senn mɔsonn biɑnŋ nbɑ nɑ. Ŋɑɑn Sɑn wun nbɑ din wuul niib Yennu nyunwulu nɑ e din dɔnŋ bɑɑlu k din muɑntl tien Islɑɑeltieb kul ɑ, ɑ bin mɔ kuɑŋɑɑn k lebt binbenŋ, k wun wul’b Yennu nyunwulu. U tuonn nbɑ ji din tɑn gbent nɑ, k u boi’b ɑ: ‹I duki mi ɑ n tie ŋmee? N k tie wun nbɑ k i guu’u k u sɑɑ bɑɑl nɑ kɑɑ. Gotl mɑn, ŋuɑ e yɑɑ wun tɑn bɑɑl n puolpo, k n kii ŋɑn nɑn k n pit u tɑɑsɑɑt.› » Ŋɑnn e k Pɔul biɑ yɑɑ ɑ: «N nɑɑ wɑɑs, yinm nbɑ tie Ablɑɑhɑɑnm yɑɑbuonɑ, nɑn i kul nbɑ be nnɑ k jiɑntl Yennu nɑ, mɑɑn nbɑ k Yennu tul’t k l wɑnt fielu mɑnŋ po nɑ, l bɑɑl t buol ɑ. Niib nɑ nbɑ din be Selusɑɑlenm, nɑn b yudɑnm nɑ, b din k mi Yiesu nbɑ tie wun nbɑ, k biɑ k bɑnn Yennu sɔkniinbɑ mɑɑn nbɑ k b tuu lii Fuondɑɑl kul nɑ pɑɑk, ŋɑɑn bɑɑ din bu u buut k yɑɑ u ŋɑn nɑn kuun e nɑ, b din gbien Yennu sɔkniinbɑ mɔi mɑnŋ ɑ. B din k lɑ u bisiɑt nbɑ tie lin nbɑ k b yɑɑ bin kpi’u, ŋɑɑn lek biɑ yɑɑ ɑ *Piilɑɑt n kpi’u. Bɑɑ din tien Yiesu lin nbɑ nɑ kul gbenn nɑn Yennu lolkpel kɑdɑɑɔk nbɑ din wɑnt biɑnŋ nbɑ nɑ, l yuo k b kpɑɑt’ɔ dɑpunpunn nɑ pɑɑk k sikn’ɔ k pii’u kɑɑɔk ni, ŋɑɑn k Yennu fiin’ɔ kuun ni. Dɑɑ bonciɑnn ni k Yiesu din jii u mɔnŋ k wɑnn nɑn u be mɑnfuol ni k tul bin nbɑ din tuu tɔki nɑn’ɔ k nyi Gɑɑliile, k lin tieee k tɑn gbenn k bɑɑl Selusɑɑlenm nɑ. B ji tie u siɑlɑɑdɑnm mɔtɑɑnɑ k tien t niib. «T mɔnŋ mɔnŋ e bɑɑl nɑn lɑbɑmɑnn mɑnŋ. Mɔsonn nbɑ k Yennu din senn k tul t yejɑnm nɑ, wɑɑ din fiin Yiesu kuun ni nɑ, u ji gbien mɔsonn mɑnŋ. Nnɑ e k l diɑn Yennu lolkpel kɑdɑɑɔk ni, *yɑni nbɑ tie munle nɑ kɑdɑɑɔk nuɑk ni, ɑ ŋuɑ Yennu yet’ɔ ɑ: ‹Fin e tie n Bijɑ, k lɑɑ jii dinnɑ k sɑɑ n tie ɑ Bɑɑ e.› Yennu din yet ɑ u sɑɑ fiin’ɔ kuun ni k u gbɑnɑnt dɑɑ bɑt, k yet ɑ: ‹Mɔsonɑ nbɑ k n mɔnŋ mɔnŋ din senn, k yɑɑ ɑ n sɑɑ tul Dɑɑfiid nɑ, sie k n set gbenn tul’ɑ.› Yennu lolkpel kɑdɑɑɔk ni siɑl buol l yet ɑ: ‹A kɑn sɑk k ɑ Niŋɑnɔ gbɑnɑnt n kpɑkn kɑɑɔk ni k bɑt.› Tɔn, Dɑɑfiid din tun lin nbɑ k Yennu din luon nɑ, k l puolpo k u din tɑn kpo, k b pii’u u yejɑnm kɑɑɔk ni, k u gbɑnɑnt bɑt. Ŋɑɑn Yennu nbɑ din fiin Yiesu kuun ni nɑ, ŋuɑ yɑɑ gbɑnɑnt k bɑt kɑɑɔk ni. «L pɑɑk ɑmi, n nɑɑ wɑɑs, n luon k i bɑnn nɑn Yiesu nbɑ din tun lin nbɑ nɑ pɑɑk e k Yennu nyikt cɑbt i biit. Yiesu pɑɑk e k Yennu ji yet ɑ wun nbɑ kul tien yɑdɑ nɑ tie niŋɑnɔ bonɑ kul ni bɑnnu nbɑ k Muois senni din k fit tun k tul’i ni. «L pɑɑk, suot i mɔnŋ mɑn k dɑɑ te k Yennu sɔkniinbɑ nbɑ din yet lin nbɑ nɑ k lin tɑn di’i ni. Nnɑ e k Yennu din yet ɑ: ‹Gotl mɑn yinm jɑpɑdɑnm nɑ, ŋɑɑnt k lin bɑkt’i k yin bot. K mɑɑn n sɑɑ tun siɑl i yuo nɑ gbɑɑ, k suɑ i lek i yet’i l po i e, i kɑn mi k tien yɑdɑ.› » Bɑɑ gbenn lɑknu yuo nbɑ, k Pɔul nɑn Bɑɑlnɑɑbɑɑs din nyii Suifnbɑ jɑɑnti dieok nɑ ni, k niib nɑ bɑln’m ɑ bin ŋɑnm jen Fuondɑɑl nbɑ bɑɑt nɑ, k tɑn wɑnn’b lɑbɑɑl mɑnŋ biɑk. K Suifnbɑ bonciɑnn, nɑn buolgɑnu bonciɑnn, bin nbɑ din lebt b jɑɑnti k wɑɑ Suifnbɑ jɑɑnti nɑ, k b kul ɑ ji din wɑɑ Pɔul nɑn Bɑɑlnɑɑbɑɑs, k b piɑk nɑn’m k kpɑɑn’m ɑ bin yɑbl k biɑl fɑnu Yennu ninkpɑbɑɔnŋ ni. K fuondɑliel nbɑ din tɑn bɑɑl, l din biɑl wɑɑnm-nnɑ e nɑn duo nɑ ni suɑ kul n lɑkn k gbɑt Yonmdɑɑnɔ mɑɑn. Suifnbɑ nbɑ din lɑ nigbounŋ tiki nɑ, k b fiin punponn, k piɑk biil Pɔul wɑnnu, k biɑ suki’ɔ. Ŋɑɑn k Pɔul nɑn Bɑɑlnɑɑbɑɑs lek biɑ yien nɑn pɑlcienn ɑ: «L kpɑɑ tɑlɑs e nɑn k tin sint pɑk Yennu mɑɑn k tul yinm. Ŋɑɑn yɑɑ yet mɑɑn mɑnŋ, k biɑ dukn nɑn i k ŋɑn nɑn i lɑ mɑnfuol nbɑ kɑɑ gbennu nɑ, l pɑɑk e te k t ji sɑɑ bin nbɑ k tie Suifnbɑ ni nɑ, k mɑɑn Yonmdɑɑnɔ tul’t mɔb ɑ nnɑ: ‹Min e lukt’ɑ ɑ fii tie yentu, k tul bin nbɑ k tie Suifnbɑ, ɑ fii bɑɑt nɑn fielu kii tien tingbounŋ nɑ lokl kul po.› » Tɔn, bin nbɑ k tie Suifnbɑ mɑnŋ nbɑ din gbɑt nnɑ mɑnŋ, k b ji mɔk pɑlpienn, k piɑk Yonmdɑɑnɔ mɑɑn K bin nbɑ k Yennu lukt’b ɑ bin lɑ mɑnfuol nbɑ kɑɑ gbennu nɑ tien yɑdɑ. K Yonmdɑɑnɔ mɑɑn mɑnŋ yɑt tinŋ nɑ lokl kul po. L yuo nɑ k Suifnbɑ nɑ din fiin Antiɑɔs nɑ yudɑnm, nɑn puojɑɑnɑ nbɑ din tie yentinnɑ nɑ, wutuol, k b jɑk Pɔul nɑn Bɑɑlnɑɑbɑɑs muksuk, k bel’b nyinn’b b yent ni. Ŋɑnn e k tuomiinbɑ nɑ din pit pit tɑɑpɑnt ni tɑnt k lu ŋɑɑn yɑɑt sɑɑn Ikoniunm. K Yiesuweilɑ nbɑ din biɑl Antiɑɔs nɑ mɑntk din gbie nɑn pɑlpienn nɑn Foŋɑnm. Pɔul nɑn Bɑɑlnɑɑbɑɑs nbɑ din bɑɑl Ikoniunm, k b sɑɑn *Suifnbɑ jɑɑnti dieok ni, k pɑk bɑnnu nbɑ te k Suifnbɑ bonciɑnn nɑn bin nbɑ k tie Suifnbɑ bonciɑnn tien yɑdɑ. Ŋɑɑn k Suifnbɑ nbɑ din tie nikɑngbɑtɑ din te k bin nbɑ k tie Suifnbɑ nɑ mɔk dudukbiit k jikt sɑɑ Yiesuweilɑ po. K Pɔul nɑn Bɑɑlnɑɑbɑɑs nɑ ji din jii yuo bonciɑnn k be lenŋ, k ŋɑnmt piɑk nɑn pɑlcienn k jikt sɑɑ Yonmdɑɑnɔ po, k u cɑb’b ɑ bii fit kii tuun bɑktnɔunŋ tuonjɑɑnɑ, k l din wɑnt nɑn bɑɑ piɑk u ninkpɑbɑɔnŋ po nɑ, l mɑɑn mɑnŋ set nyii u buol e. K duo nɑ niib din bɔkt, k siɑb din sie Suifnbɑ puol, k lieb nɑ mun sie tuomiinbɑ nɑ puol. Ŋɑnn e k Suifnbɑ nɑn buolgɑnu nɑ lɑkn lieb nɑn b duo mɑnŋ yudɑnm, k duki ɑ bin tien tuomiinbɑ biɑsn k jɑɑt’b tɑnɑ, k bɑɑ ji tɑn bɑnn nɑn b yɑɑ bin jɑɑt’b tɑnɑ nɑ, k b ciɑl sɑɑn Liistl nɑn Delb, nɑn digbɑnbis nbɑ kpiɑ kpiɑ, Liikɑoni yent ni. Bɑɑ din sɑɑ bɑɑl lenŋ yuo nbɑ mɑnŋ, k b muɑntl lɑbɑmɑnn. K jɑsuɑ nnɑ din be Liistl k tie wɔbk. B din mɑl’ɔ k u tie wɔbk e, k k mi sonm, k u gbiintl Pɔul muɑnti nɑ. K Pɔul got’ɔ silll, k tɑn bɑnn nɑn u mɔk yɑdɑ nbɑ sɑɑ lɑ lɑɑfiɑ wɑɑ, k u yet’ɔ sɑnpɑɑpo wɑɑ ɑ: «Fiit k set ɑ tɑɑ pɑɑk.» K u tɑb nɑɑt k fiil k ji sonm. Nibulciɑɔnŋ nɑ nbɑ din lɑ Pɔul nbɑ tun lin nbɑ mɑnŋ nɑ, k b ji piin yikn b mɔnŋ mɔnŋ mɑɑn ni ɑ: «T yenni sik t buol ni k kpint k nɑɑn nɑn nisɑɑli nɑ.» K b tɑɑn yi Bɑɑlnɑɑbɑɑs sɑnn ɑ Suus, k Pɔul mun k b yi’u ɑ Helmes, k mɑɑn ŋuɑ din tie bɑlpɑklɔ. K b yennu Suus mɑnntuɑ nyii pociɑnfiek ni, (puociɑnfiek mɑnŋ din sie duo nɑ tuɑnn po e,) k u tɑn bɑɑl nɑn nɑɑjɑi nɑn tipuut duo nɑ tɑnmɔb ni, k ŋuɑ nɑn nibul nɑ tikl ɑ bin mɑnn *mɑlunŋ k tul tuomiinbɑ mɑnŋ. Bɑɑlnɑɑbɑɑs nɑn Pɔul nbɑ din gbɑt nnɑ, k b pɑlɑ biil, k b pɑt pɑt b liɑtfɔkt, k ciɑl kuɑ nibul nɑ ni, ŋɑɑn yikn ɑ: «Bee k i tie nnɑ? T mun tie nisɑɑli e nɑn yinm nɑ. T muɑntl lɑbɑmɑnn, k yien’i ɑ yin nyik bon-yɑnɑ mɑnŋ, ŋɑɑn kii wɑɑ Yennu nbɑ fo nɑ wun nbɑ din nɑn sɑnpɑɑk nɑn tinŋ nɑn mɔkgbenŋl nɑn lin nbɑ kul be l ni. Yɑɑyuo ni e wɑɑ k u din ŋɑɑn k nibuolu kul din tuun b yɑmɑ ni mɔkmɔk nɑn mɔtɑɑnɑ. Ŋɑɑn yuo kul u tuun bonŋɑnɑ. U te k sɑɑk nyi sɑnpɑɑpo k bɑɑ k tien’i, k biɑ tien’i dii dijɑɑn-yuo, k gbuont’i jiet, k i lɑɑt pɑlpienn.» Tuomiinbɑ mɑnŋ nbɑ din pɑk nnɑ mɑnŋ, ŋɑɑn l lek din pɑɑl nɑn bin tiɑ nigbounŋ mɑnŋ k b dɑɑ mɑnn mɑlunŋ k tien’m. L puolpo e k Suifnbɑ siɑb din nyii Antiɑɔs nbɑ be Piisiidi tinŋ ni, nɑn Ikoniunm, k bɑɑl k pɑk tunn nigbounŋ nɑ yɑn. Ŋɑnn e k nibul nɑ jɑɑt Pɔul tɑnɑ, k ji fuul’ɔ nyinn’ɔ duo nɑ ni, k mɑɑn b mi ɑ u kpo e. Ŋɑɑn Yiesuweilɑ nbɑ bɑɑl k set lint’ɔ, k u tɑn fiil, k ŋɑnm nɑn ŋuɑ ŋmɑt duo nɑ ni biɑk. K l yent sɑn-nyiɑɔk, k Pɔul nɑn Bɑɑlnɑɑbɑɑs fiil k sɑɑn Delb. K b sɑɑn k sɑɑ muɑnt Yiesu bɑlŋɑnni Delb, k dɑk niib bonciɑnn, k b tien Yiesuweilɑ. L puolpo k b ŋmɑt sɑɑ Liistl nɑn Ikoniunm nɑn Antiɑɔs nbɑ be Piisiidi tinŋ ni nɑ. B cien Yiesuweilɑ pɑlɑ doi mɑnŋ ni, k yien’m ɑ bii kpɑnŋ i diɑ b yɑdɑ mɑnŋ nnɑ, k wɑnt’b ɑ: «Sie k t fɑbl k dii fɑlɑ bonciɑnn ɑ k tɑn kuɑ Yennu nɑɑn ni.» K jiɑnti kul ni k b tuu lukt *Klistu mɔtɑɑɔk niib *sɑɑkɑb, k din mei Yennu k loln mɔi, k jikt Yiesuweilɑ nɑn b sɑɑkɑb nɑ k kubnt’b Yonmdɑɑnɔ nuu ni, wun nbɑ k b ponŋ tien’ɔ yɑdɑ nɑ. Bɑɑ din gɑl Piisiidi tinŋ ni nɑ puolpo e, k b bɑɑl Pelj nbɑ be Pɑnfiili tinŋ ni nɑ, k din pɑk Yiesu mɑɑn lenŋ k ji fit yen sik Atɑɑli. Lenŋ e k b din kuɑ ŋɑlunŋ ni, k ŋmɑt sɑɑn Antiɑɔs, siɑn nbɑ k Yiesuweilɑ din miɑl Yennu ninbɑtinu po ɑ wun sonm’b b tuonn ni. K mɔtɑɑnɑ b tun tuonn mɑnŋ k gbenn ɑ. Bɑɑ bɑɑl Antiɑɔs mɑnŋ ni nɑ, k b tikl Klistu mɔtɑɑɔk niib nɑ, k tɑn yet’b lin nbɑ kul k Yennu tun nɑn’m, nɑn wɑɑ luot sɔnu biɑnŋ nbɑ k tul bin nbɑ k tie Suifnbɑ ɑ bin tien Yiesu yɑdɑ k tien u weilɑ. Ŋɑɑn k b ji din biɑl lenŋ k wei bonciɑnn nɑn Yiesuweilɑ mɑnŋ. L yuo nɑ k nisiɑb nnɑ din nyii Suude k sik Antiɑɔs, k tɑn wɑnt Yiesuweilɑ nɑ ɑ: «L kpɑɑ tɑlɑs e k i pot i punɑ, nɑn Muois *senni nbɑ senn biɑnŋ nbɑ nɑ. Ŋɑnn i kɑɑ, Yennu kɑn fiel’i.» K Pɔul nɑn Bɑɑlnɑɑbɑɑs nɑn ŋɑnm noi nɑn lieb bonciɑnn nɑn ninmɔnn, k Yiesuweilɑ nɑ tɑn dukn k nyinn Pɔul nɑn Bɑɑlnɑɑbɑɑs nɑn b ni siɑb, ɑ bin sɑɑn Selusɑɑlenm, k sɑɑ lɑ tuomiinbɑ nɑ nɑn Yiesuweilɑ *sɑɑkɑb, mɑɑn mɑnŋ po. Tɔn, k Antiɑɔs Klistuyɑb nɑ tul’b sɔnu k biɑ cɑb’b sɔnu, k b sɑɑ k sɑɑ gɑl Feniisi nɑn *Sɑɑmɑɑli yɑkɑ po, k muɑntl bɑnnu nbɑ k bin nbɑ k tie *Suifnbɑ nɑ siɑb nyik b bonkpelɑ ŋɑɑn tien Yiesu yɑdɑ, k lɑbɑɑl mɑnŋ din tul Yiesuweilɑ kul pɑlpienn k sɑɑ yɑkl. Bɑɑ bɑɑl Selusɑɑlenm yuo nbɑ, k *Klistu mɔtɑɑɔk niib nɑn b sɑɑkɑb nɑn tuomiinbɑ nɑ din gɑɑl’b sɑɑɔnŋ. Ŋɑnn e k Pɔul nɑn Bɑɑlnɑɑbɑɑs yet’b lin nbɑ kul k Yennu tun nɑn’m. Ŋɑɑn k Yiesuweilɑ nɑ siɑb nbɑ tie Fɑɑliisiɑnnbɑ nɑ fiil set, k yet ɑ: «L kpɑɑ tɑlɑs e k bin nbɑ k tie Suifnbɑ nɑ n pot b punɑ, ŋɑɑn biɑ diɑ Muois senni.» L pɑɑk, k tuomiinbɑ nɑn sɑɑkɑb nɑ lɑkn lieb, ɑ bin dukn mɑɑn mɑnŋ po. Ŋɑnn e k b din pɑk wei nɑn lieb, k Piɑl tɑn fiil k yet ɑ: «N nɑɑ wɑɑs, i mi nɑn yuo nbɑ din gɑl nɑ, Yennu din lukt’n ɑ n muɑnt Yiesu lɑbɑmɑnn k tul bin nbɑ k tie Suifnbɑ, ɑ bin gbɑt’l k biɑ tien yɑdɑ. K Yennu nbɑ mi nisɑɑlk pɑl ni nɑ, ŋuɑ e din tul’b Foŋɑnm nɑn wɑɑ kpɑn din tul’t nɑ, k l wɑnn nɑn u mun gɑɑl’b. U k mɔk luktn tinm nɑn ŋɑnm sinsuuk ni k mɑɑn u wuul b pɑlɑ ni, bɑɑ tien yɑdɑ nɑ pɑɑk. L pɑɑk, bee k i luon k i bikn Yennu, yɑɑ luon k i te k buolgɑnu nbɑ tie Yiesuweilɑ nɑ n diɑ senni nbɑ k tinm nɑn t yejɑnm din k fit diɑ gbɑɑ? Ŋɑɑn t tien yɑdɑ nɑn t lɑ fielu Yonmdɑɑnɔ Yiesu ninkpɑbɑɔnŋ pɑɑk nɑn bɑɑ mun lɑ’l bɑnnu nbɑ nɑ.» Ŋɑnn e k Yiesuweilɑ nɑ kul ɑ din ŋmin, ŋɑɑn ji gbiintl Bɑɑlnɑɑbɑɑs nɑn Pɔul, k b yien’m bɑktnɔunŋ tuonjɑɑnɑ nbɑ k Yennu din tun nɑn’m bin nbɑ k tie Suifnbɑ nɑ sinsuuk ni. Bɑɑ yet’b gbenn yuo nbɑ, k Sɑɑk yet’b ɑ: «N nɑɑ wɑɑs, gbiintl’n mɑn. Siimɔn yet’t biɑnŋ nbɑ k Yennu sint tin bin nbɑ k tie Suifnbɑ ninbɑtinu, k nyinn niib b ni ɑ bii tie u mɔnŋ niib. K *Yennu sɔkniinbɑ mɑɑn mun biɑ din pɑk nnɑ e, k mɑɑn l diɑn Yennu lolkpel kɑdɑɑɔk ni ɑ: ‹L puolpo, n sɑɑ jen k ŋɑnm mɑɑ Dɑɑfiid ŋɑɑk nbɑ din bɑɑ nɑ, n sɑɑ ŋɑnm mɑɑ l dikpinɑ k fiin senn’l, ɑ niib kul nbɑ tenn n fit got Yonmdɑɑnɔ, nnn, bin nbɑ kul k n yiin’m ɑ bii tie n yɑb. Nnɑ e k Yonmdɑɑnɔ, wun nbɑ te k b bɑnn lin nbɑ nɑ yɑɑyuo ni wɑɑ yet.› » K Sɑɑk biɑ yet k pukn ɑ: «L tien n dudukt ni nɑn t dɑɑ jikt lin nbɑ pɑɑl k tien bin nbɑ k tie Suifnbɑ nɑ nbɑ nyik b bonkpelɑ k wɑɑ Yennu sɔnu nɑ pɑɑk. Ŋɑɑn l ŋɑn k tin diɑn kɑdɑɑɔk o, k yet’b k b dɑɑ di lin nbɑ k b ponŋ mɑnn pɑtɑ, k biɑ yet’b ɑ bii so b mɔnŋ nɑn boncuncontuonɑ, k puob nɑn jɑb dɑɑ duɑ nɑn lieb yɑnɑ yɑnɑ k biɑ dɑɑ ŋmɑn bonkobuk nbɑ k b ŋmɑkl kpii, k biɑ dɑɑ di sɔn. K mɑɑn yɑɑyuo ni k tɑn tuu dinnɑ b muɑntl Muois senni digbɑnɑ kul ni, k *Fuondɑɑl kul b tuu lii senni mɑnŋ Suifnbɑ jɑɑnti diet ni.» Ŋɑnn e k tuomiinbɑ mɑnŋ nɑn sɑɑkɑb nɑ nɑn Yiesuweilɑ nɑ kul ɑ dukn k nyinn nisiɑb b ni, ɑ bin tun ŋɑnm nɑn Pɔul nɑn Bɑɑlnɑɑbɑɑs, ɑ bin sɑɑn Antiɑɔs. Ŋɑnm e din tie Suud, wun nbɑ sɑnn din yi Bɑɑlsɑɑbɑɑs nɑ, nɑn Siilɑɑs. Jɑb bɑnle mɑnŋ din tie Yiesuweilɑ yudɑnm nɑ yenm e. K b din tun’m nɑn kɑdɑɑɔk k diɑn ɑ: «Tinm tuomiinbɑ nɑn Yiesuweilɑ sɑɑkɑb nbɑ tie i nɑɑ wɑɑs nɑ, dɑ kɑdɑɑɔk nɑ k fuont yinm t nɑɑ wɑɑs nbɑ k tie Suifnbɑ k be Antiɑɔs nɑn Siili nɑn Siiliisi. T gbɑt k t nisiɑb bɑɑl i penŋ, k piɑk’i bɑlsɑi k l dɑɑmi’i k ŋmɑt i yɑn ŋɑɑn t mun k wɑnn’b siɑl ɑ bin tɑn tien nnɑ, k l pɑɑk e te k t tɑɑn lieb k suol k lukt nisiɑb t sinsuuk ni, k tuun’m i buol nnɑ, k ŋɑnm nɑn t yuɑsnbɑ, Bɑɑlnɑɑbɑɑs nɑn Pɔul e sɑɑ, bin nbɑ yit b mɔnŋ sɑlk Yonmdɑɑnɔ Yiesu Klistu pɑɑk. L pɑɑk k t tun Suud nɑn Siilɑɑs ɑ bin wɑnn’i b mɔb ni ɑ lin nbɑ k t diɑn nɑ tie bɑlmɔni. K mɑɑn Foŋɑnm nɑn tinm kul dukn nɑn l k ŋɑn k t jinn’i jik-kpiɑsl k gɑl lin nbɑ kpɑɑ tɑlɑs k t diɑn t kɑdɑɑɔk ni, ɑ i dɑɑ di jiet nbɑ k b mɑnn pɑtɑ, k biɑ dɑɑ di sɔn, k biɑ dɑɑ ŋmɑn bonkobuk nbɑ k b ŋmɑkl kpii, ŋɑɑn kii so i mɔnŋ nɑn boncuncontuonɑ, k puob nɑn jɑb dɑɑ duɑ nɑn lieb yɑnɑ yɑnɑ. L i tie k i diɑ i mɔnŋ nnɑ, l sii ŋɑn i po. L kul i nɑ.» Ŋɑnn e k b tun’m, k b sik Antiɑɔs, k sɑɑ lɑkn tɑɑn Klistu mɔtɑɑɔk niib nɑ kul ɑ, k tul’b kɑdɑɑɔk nɑ. Niib nɑ nbɑ lii kɑdɑɑɔk mɑnŋ yuo nbɑ, k b lɑ pɑlpienn nɑn b kpɑɑni mɑnŋ pɑɑk. K Suud nɑn Siilɑɑs, bin nbɑ din tie sɔkniinbɑ nɑ, din wei nɑn’m k yet’b Yennu mɑɑn bonciɑnn k cien Yiesuweilɑ mɑnŋ pɑlɑ k tot’b. B weiu mɑnŋ puolpo e, k Yiesuweilɑ nɑ cɑb’b ɑ bii ŋmɑt bin nbɑ tun’m nɑ buol ni nɑn mɑnu. (Ŋɑɑn Siilɑɑs ŋɑnin din dukn ɑ wun biɑl Antiɑɔs e.) Ŋɑɑn Pɔul nɑn Bɑɑlnɑɑbɑɑs biɑ din wei Antiɑɔs, k ŋɑnm nɑn lieb tumi niib k muɑntl Yonmdɑɑnɔ mɑɑn. L din yɑnn wɑɑn k Pɔul yet Bɑlnɑɑbɑɑs ɑ: «Ŋɑɑnt k tin ŋmɑt k sɑɑn gɔn t nɑɑ wɑɑs nbɑ be digbɑnɑ kul nbɑ k t din sɑɑn k sɑɑ muɑnt Yonmdɑɑnɔ mɑɑn nɑ, k lɑɑn bɑɑ be biɑnŋ nbɑ.» K Bɑɑlnɑɑbɑɑs luon bin jii Sɑn-Mɑɑlk, ŋɑɑn Pɔul din k sɑk ɑ bin jii’u, k mɑɑn u din tɑn nyik k k tuun nɑn’m yuo nbɑ k b din tɑn bɑɑl Pɑnfiili yiɑl ni. K mɔniɑɔk din fiil Pɔul nɑn Bɑɑlnɑɑbɑɑs sinsuuk ni, k b bɔkt lieb. K Bɑɑlnɑɑbɑɑs din jii Sɑn-Mɑɑlk, k b kuɑ ŋɑlunŋ k sɑɑn Siipl. K Pɔul mun din lukt Siilɑɑs, k Yiesuweilɑ nɑ din jii’b k tien’m Yonmdɑɑnɔ ninkpɑbɑɔnŋ ni. Pɔul din sɑɑn, k sɑɑ gɑl Siili nɑn Siiliisi yɑkɑ po, k cien Klistu mɔtɑɑɔk niib pɑlɑ doi nɑ ni. L puolpo e k Pɔul nɑn Siilɑɑs din tɑn bɑɑl Delb nɑn Liistl, k lɑ Yiesuweitɔsuɑ, k u sɑnn yi Tiimuote, k u be lenŋ. U nɑɑ din tie *Suif nilɔ nbɑ tie Klistuyuɑ e, k u bɑɑ din tie Glek nilɔ. Yiesuweilɑ kul nbɑ din be Liistl nɑn Ikoniunm nɑ din pɑk Tiimuote po bonŋɑnn. K Pɔul din luon wun jii’u k bii sɑɑ sɔni. Ŋɑɑn Suifnbɑ nbɑ din be digbɑnn kul yɑkl nɑ ni kul din mi nɑn Tiimuote bɑɑ tie Glek nilɔ e. L pɑɑk, k Pɔul din pot Tiimuote punn. K b din sɑɑ doi ni, k muɑntl kpɑɑni nbɑ k tuomiinbɑ nɑ nɑn sɑɑkɑb din diɑn Selusɑɑlenm nɑ. K lin nbɑ nɑ cie *Klistu mɔtɑɑɔk niib mɑnŋ pɑlɑ b yɑdɑ ni, k b kɑnn puki dɑɑl kul. B din luon bin sɑɑn muɑnt Yennu mɑɑn Asii tinŋ ni e, ŋɑɑn Foŋɑnm din k sɑk. Ŋɑnn e k b gɑl sɑɑn Fliiji nɑn Gɑɑlɑɑti yɑkɑ po. Bɑɑ din tɑn bɑɑl Miisi yɑkl telk pɑɑk k b kot ɑ bin sɑɑn Biitiini yɑkl po, ŋɑɑn k Yiesu Siek din k sɑk ɑ bin sɑɑn. Ŋɑnn e k b din gɑl Miisi yɑkl po, k sik Tloɑs. Lenŋ e k Pɔul din lɑ yelntu nyiɑɔk, k u lɑ k Mɑɑseduɑnn juɑ, k u bɑɑl sie k bɑln’mɔ ɑ: «Puotl mɔkgbenŋl nɑ k bɑɑl Mɑɑseduɑnn yɑkl po nɑ, k tɑn sonm’t.» Pɔul nbɑ lɑ yelntu mɑnŋ nɑ, l tɑɑkpɑɑk ni k t tien siil ɑ tin sɑɑn Mɑɑseduɑnn, k mɑɑn t ji din lɑ nɑn Yennu yien’t ɑ tin sɑɑn kii sɑɑ i muɑntl Yiesu lɑbɑmɑnn kii tien niib nɑ lenŋ. Ŋɑnn e k t biɑ kuɑ ŋɑlunŋ, k nyii Tloɑs, k tɔkn bɑɑl Sɑɑmuotlɑɑs, k l yent k t bɑɑl Neɑpoliis. Lenŋ e k t nyik ŋɑlunŋ nɑ, ŋɑɑn tuɑt k gɑl bɑɑl Fiiliip, duo nbɑ tie digbɑnsɑɑkɑl Mɑɑseduɑnn yent ni nɑ. Duo mɑnŋ din tie Luonmtieb yent e. T din be duo mɑnŋ ni k l mɑnn nɑn dɑɑ ŋɑnŋɑ nɑ wɑɑ. K *Fuondɑɑl k t nyii sik duo mɑnŋ kpenu ni. T din mi ɑ Suifnbɑ Yenmiɑlu buol tie lenŋ e, k t bɑɑl kɑl k pɑk nɑn puob nbɑ tikl lenŋ nɑ. Puob nbɑ din gbɑt t mɑɑn mɑnŋ, b yenɔ sɑnn din tie Liidi. U din nyii Tiɑtiil e k din tie cincenmunŋ nbɑ k l dɑɑɔk pɑɑl nɑ kuɑt-tuɑ, k biɑ din jiɑntl Yennu. K Yonmdɑɑnɔ din luot u pɑl ni ɑ wun gbiint Pɔul mɑɑn nbɑ k u piɑk nɑ fɑnu. K t din wul ŋuɑ nɑn u ŋɑɑtieb Yennu nyunwulu, k u din guɑl’t, k yet ɑ: «L i tie k i gɑɑl ɑ n set tien Yonmdɑɑnɔ yɑdɑ nɑn bɑlmɔni e, yin bɑɑl kii be n ŋɑɑk ni.» Ŋɑnn e k u mɑbn’t k t bɑɑl kuɑ be. Dɑsiɑl k t tɑn ŋmɑt sɑɑ Yenmiɑlu buol nɑ, k sɑpɑɑndɑɑbl nnɑ din mɔk u yonmdɑnm, k tɑn cet’t. K nɑlnbiiuk din be u ni k yent’ɔ, k nɑlnbiiuk mɑnŋ din tien’ɔ nin-nyuɑntuɑ. U nin-nyuɑnsn mɑnŋ ni, u din lɑɑt likli bonciɑnn k tien u dɑnm nɑ. K u din wɑɑ tinm nɑn Pɔul k tiɑn sɑnpɑɑpo ɑ: «Jɑb nɑ tie Yɑbnt Yennu tuontunnɑ e. B muɑntl k wɑnt’i fielu sɔnu.» U din tiɑn k yikn nnɑ k l mɑnn nɑn dɑɑ ŋɑnŋɑ nɑ wɑɑ. Ŋɑnn e k Pɔul ji din tɑn miɑt nɑn u yikni mɑnŋ, k jiɑnt k yet nɑlnbiiuk nbɑ be sɑpɑɑmɔ mɑnŋ ni nɑ ɑ: «Yiesu Klistu sɑnn ni, n tul’ɑ mɔb, nyin u ni.» L tɑɑkpɑɑk ni k nɑlnbiiuk nɑ nyii u ni. U yonmdɑnm nbɑ bɑnn nɑn b liklomu sɔnu nɑ gbenn i nɑ, k b suol Pɔul nɑn Siilɑɑs, k dɑt’b bɑɑl nɑn’m b yudɑnm linlɑknbuol ni. Bɑɑ bɑɑl nɑn’m Luonmtieb bɑlbuulɑ buol ni yuo nbɑ, k b yet ɑ: «Niib nɑ tie Suifnbɑ e, k bɑɑt nɑn ŋmɑtl bonciɑnn t duo pɑɑk k wɑnt’t b kɑɑ nbɑ k t *senni k cɑb’t ɑ tin gɑɑl, k mɑɑn t tie Luonmtieb e.» Ŋɑnn e k nibul nbɑ be lenŋ nɑ mun jɑk’b k kpil’b. K bɑlbuulɑ nɑ te k b suol Pɔul nɑn Siilɑɑs tiɑt k fɔb k liɑt liɑt, ŋɑɑn k buo’b lɑnbɑnn. Bɑɑ buo’b bonciɑnn k gbenn yuo nbɑ, k b ji jii’b sɑɑn kuɑn’m dɑnsɑlk, ŋɑɑn yet dɑnsɑlguulɔ nɑ ɑ wun kpɑl’b kenkenken ɑ. Wɑɑ gbɑt b mɔb mɑnŋ, k u mun jii’b k kuɑn’m dɑnsɑlk dieok mɑnŋ ni pib pib ɑ, ŋɑɑn bɑɑn’m dɑɑt bɑɑnɑ. K l din tɑn tie nɑn tɑnsuuni nɑ, k Pɔul nɑn Siilɑɑs din tɑn mei Yennu k yiin *yɑni k piɑk’ɔ, k dɑnsɑl-lei nɑ ji gbiintl’b. Yiɑn ɑ k tinŋ jek bonciɑnn k ŋɑk dɑnsɑlk nɑ fiɑkɑ. L tɑɑkpɑɑk ni k tɑnmɔi luot, k jɑlt nɑn bɑɑnɑ yɑbt dɑnsɑli nɑ kul nii nɑn b tɑɑ ni, k bɑɑ bɑɑ. L yuo nɑ k dɑnsɑlguulɔ nɑ fiil guɑn ni, k lɑ dɑnsɑlk dieok tɑnmɔi k l luot yɑɑ yɑɑ, k u dukn mi ɑ dɑnsɑli mɑnŋ kul nyii e, k l pɑɑk k u nuɑt u juk-bɑnjiɑk k luon wun kpi u mɔnŋ. K Pɔul tiɑn sɑnpɑɑpo wɑɑ ɑ: «Dɑɑ tie ɑ mɔnŋ dɑnŋ, k mɑɑn t kul be.» Ŋɑnn e k guulɔ nɑ yɑɑ ɑ bin tuo muu, ŋɑɑn fɑɑl kuɑ dɑnsɑli dieok mɑnŋ ni, k gbɑɑn wuok k jekl Pɔul nɑn Siilɑɑs tuɑnn, k tɑn fiil nyinn’b, ŋɑɑn boi’b ɑ: «Cɑnbɑɑnbɑ, n sɑɑ tien nlee k Yennu n fiel’n i?» K b jiin ɑ: «Tient Yonmdɑɑnɔ Yiesu yɑdɑ, k fin nɑn ŋɑɑtieb kul ɑ sɑɑ lɑ fielu,» ŋɑɑn pɑk Yennu mɑɑn k tul ŋuɑ nɑn u ŋɑɑtieb kul ɑ. L yuo mɑnŋ nyiɑɔk nɑ, k u jii’b k wuul b fiɑt nɑ. L puolpo e k b wul ŋuɑ nɑn u ŋɑɑtieb nɑ kul ɑ Yennu nyunwulu. K u biɑ tɑn jii Pɔul nɑn Siilɑɑs k sɑɑn nɑn’m u ŋɑɑk ni, k sɑɑ tul’b jiet k b dii. K ŋuɑ nɑn u ŋɑɑtieb ji mɔk pɑlpienn k l sɑɑ yɑkl, k mɑɑn bɑɑ tien Yennu yɑdɑ k kpint k tien Yiesuweilɑ nɑ pɑɑk L din yent sɑn-nyiɑɔk o, k Luonmtieb bɑlbuulɑ nɑ din tun sejenm dɑnsɑlguulɔ nɑ buol ni ɑ bin yet’ɔ ɑ: «Ŋɑɑn jɑb mɑnŋ k bin sɑɑn.» K dɑnsɑlguulɔ nɑ yet Pɔul ɑ: «Bɑlbuulɑ nɑ tun sejenm ɑ n te k fin nɑn Siilɑɑs n nyi. L pɑɑk nɑ, ii nyi mɑn kii sɑɑ nɑn lɑɑfiɑ.» K Pɔul jiɑnt yet sejenm nɑ: «B dɑɑ k bu t buut, ŋɑɑn won buo’t lɑnbɑnn niwol ni, ŋɑɑn k t tie Luonmtieb e, k i bɑlbuulɑ biɑ won tɑɑn jii’t k lu’t dɑnsɑlk ni, k mɔtɑɑnɑ k b ji luon bin bɔl nyinn’t ii? Wɑɑ. L kɑn tien. Ŋɑɑnt k bɑlbuulɑ mɑnŋ n bɑɑl b mɔnŋ k tɑn nyinn’t.» K sejenm nɑ ŋmɑt k sɑɑ yet bɑlbuulɑ mɑnŋ Pɔul nbɑ pɑk biɑnŋ nbɑ nɑ. Bɑlbuulɑ mɑnŋ nbɑ ji bɑnn nɑn Pɔul nɑn Siilɑɑs tie bin nbɑ k Luonmtieb cɑb’b b yiikuo nɑ, k jɑŋmɑɑni ji suol’b. L pɑɑk, k b bɑɑl Pɔul nɑn Siilɑɑs penŋ, k tɑn tien’m gɑfɑlɑ, ŋɑɑn nyinn’b dɑnsɑlk nɑ ni, k bɑln’m ɑ bin lek nyi b duo ni. K Pɔul nɑn Siilɑɑs nbɑ siet lenŋ nɑ, k b sɑɑn Liidi ŋɑɑk. Bɑɑ din sɑɑ lɑ Yiesuweilɑ lenŋ nɑ, k b cie b pɑlɑ, ŋɑɑn yɑɑt. Tɔn, k b ji din sɑɑ k sɑɑ gɑl Amfiipoliis nɑn Apoloni, k bɑɑl Tesɑɑluoniik. Lenŋ e k *Suifnbɑ jɑɑnti dieok din be. K Pɔul din tɑn sɑɑn kuɑ lenŋ, nɑn wɑɑ din tuu kuɑ k tuun biɑnŋ nbɑ nɑ. U din jii fuondɑɑ ŋɑntɑ e k kuɑ lenŋ, k piɑk Yennu mɑɑn nɑn niib nbɑ be nɑ, k wɑnn’b ɑ Yennu mɑɑn nbɑ wɑnt bɑnnu nbɑ nɑ pɑɑk e nɑ, *Klistu din sɑɑ bɑɑl k di fɑlɑ, k kpo, k biɑ fiil kuun ni k jen u mɑnfuol ni. Pɔul din yet’b ɑ: «Yiesu nbɑ nɑ e k n piɑk’i u po, ŋuɑ e tie Klistu mɑnŋ.» K u din tɑn pɑk tunn b siɑb yɑn k b ji bɑɑl tɑɑn ŋuɑ nɑn Siilɑɑs po k wɑɑ’b. K Gleknbɑ bonciɑnn nbɑ jiɑntl Yennu nɑ, nɑn puojɑɑnɑ bonciɑnn, k b mun pukn b po k wɑɑ Pɔul nɑn Siilɑɑs. Ŋɑɑn Suifnbɑ donn punponn, k lin k tikl niyin-yekɑ nbɑ be nɑ, k tɑɑnm, k te k b muk duo nɑ, k tɑn bɑɑl kpil Sɑɑsɔn ŋɑɑk, k luon Pɔul nɑn Siilɑɑs buol, ɑ bin nyinn’b niib ni. Bɑɑ k lɑ’b yuo nbɑ, k b suol Sɑɑsɔn nɑn Yiesuweisiɑb, k dɑt’b bɑɑl nɑn’m duo nɑ yudɑnm buol, ŋɑɑn tiɑn yien ɑ: «Niib nɑ lin lɑbi tingbounŋ nɑ k te k mukl muk niib, k mɔtɑɑnɑ k b tɑn bɑɑl t duo nɑ, k Sɑɑsɔn gɑɑl’b u ŋɑɑk ni, k b lin k wɑnt niib bɑlsɑɑni k biil t kpɑnbɑlɑ yudɑɑnɔ *senni, k yɑɑ ɑ Kpɑnbɑl-luɑ e mun be, ɑ k b yi’u Yiesu.» Bɑɑ yet nnɑ yuo nbɑ, k l dɑɑmi nibul nɑ nɑn yudɑnm nɑ pɑlɑ ni bonciɑnn. K yudɑnm nɑ te k Sɑɑsɔn-nbɑ pɑ likli ŋɑɑn k b ŋɑɑ’b. Nyiɑɔk nbɑ tɑn bɔnn yuo nbɑ, k Yiesuweilɑ tun Pɔul nɑn Siilɑɑs ɑ bin sɑɑn Beele. Bɑɑ bɑɑl lenŋ yuo nbɑ k b kuɑ Suifnbɑ jɑɑnti dieok ni. Lenŋ niib din mɑn k gɑl Tesɑɑluoniiktieb. B din gɑɑl Yennu mɑɑn nɑ nɑn b pɑlɑ kul, k lii Yennu lolkpel kɑdɑɑɔk dɑɑl kul, ɑ bin lɑɑn Pɔul nbɑ piɑk lin nbɑ mɑnŋ, ɑ l set tie mɔni ɑmi nlee. Ŋɑnn e k siɑb bonciɑnn tien yɑdɑ, k Glek puojɑɑnɑ bonciɑnn nɑn Glek jɑb bonciɑnn mun din tien yɑdɑ. Ŋɑɑn Suifnbɑ mɑnŋ nbɑ din be Tesɑɑluoniik nɑ din gbɑt ɑ Pɔul biɑ muɑntl Yennu mɑɑn Beele, k b bɑɑl lenŋ, k fiin nibul nɑ wutuol, ɑ bin kpil’ɔ. L tɑɑkpɑɑk ni k Yiesuweilɑ nɑ te k Pɔul nɑn bin nbɑ ciɑnt’ɔ nɑ nyii k tɔkn sɔnu k bɑɑl mɔkgbenŋl nɑ ni, ŋɑɑn k Siilɑɑs nɑn Tiimuote ŋɑnin din biɑl Beele. Niib nbɑ din ciɑnt Pɔul nɑ din sɑɑn nɑn’ɔ nɑn Atenn e wɑɑ, k b tɑn yɑɑ bin ŋmɑt kun, k Pɔul yet’b ɑ bin sɑɑ yet Siilɑɑs nɑn Tiimuote ɑ bin yɑbl k bɑɑl yiɑn yiɑn nɑ. K niib nɑ ji din ŋmɑt kun Beele. Pɔul nbɑ din dɑɑ be Atenn k guu Siilɑɑs nɑn Tiimuote nɑ, k u lɑ k pɑtɑ gbie nɑn duo nɑ, k l din biil u pɑl ni bonciɑnn. K u tuu kuɑ Suifnbɑ jɑɑnti dieok ni k fɑɑ lɑbɑɑl nɑn Suifnbɑ nɑn buolgɑnu nbɑ jiɑntl Yennu nɑ. K u biɑ din tuu sɑɑn b linlɑknbuol ni dɑɑ kul, k sɑɑ fɑɑ nɑn bin nbɑ bɑɑt lenŋ nɑ lɑbɑɑl. K sɑɑkɑyɑndɑɑnsiɑb nnɑ din be, k b yi b yenm Epiikuuliɑnbɑ, k lieb mun Stoisiɑnbɑ, k b mun tɑn bɑɑl k fɑɑ lɑbɑɑl nɑn Pɔul. K b siɑb tɑn pɑk nɑn b lieb ɑ: «Bɑlfuouk dɑɑnɔ nbɑ wɑnt u mɔnŋ nɑ mun yien bee nɑ?» K b yenm mun yɑɑ ɑ: «L tɑɑn tie nɑn u piɑk digbɑngɑnɑ yenni po e nɑ.» B din yet nnɑ mɑnŋ, k mɑɑn Pɔul muɑntl Yiesu po nɑn u kuun fiilu po. Ŋɑnn e k b jii Pɔul k bɑɑl nɑn’ɔ b sɑɑkɑb tintɑɑnkɑɑnu buol nbɑ k b din yi Aleopɑɑj nɑ, ŋɑɑn din boi Pɔul ɑ: «T sɑɑ fit bɑnn tumiipɑɑnu nbɑ k ɑ wɑnt nɑ ɑɑ? K mɑɑn ɑ piɑk bɑlyeni, k l tie bɑlsɑɑni e t penŋ, k t luon k tin bɑnn l pɑɑk.» (Atenn niib kul nɑn bin nbɑ din nyii tingɑni k bɑɑl k be nɑ, k b tuu jii b yuo k fɑɑ lɑbɑɑl, k biɑ gbiintl bɑlsɑɑni nbɑ juont bɑɑl nɑ.) Tɔn, k Pɔul fiil b tintɑɑnkɑɑnu mɑnŋ ni, k set b tuɑnn, ŋɑɑn yet’b ɑ: «Atenntieb, n lɑ i benu kul ni k i luon i pɑtɑ bonciɑnn, k mɑɑn mɑɑ kɑk k lin i duo nɑ, n got i pɑtɑ, k biɑ lɑ binbintl k l diɑn l pɑɑk ɑ: ‹Yennu nbɑ k t k mi’u.› N luon k n wɑnn’i wun nbɑ k i puki k tien’ɔ ŋɑɑn k mi’u nɑ. Yennu mɑnŋ, ŋuɑ e din nɑn *dulnyɑ nɑn bont kul nbɑ be l ni. Ŋuɑ e tie sɑnpɑɑk nɑn tinŋ Yonmdɑɑnɔ, k k tie dɑɑnɔ nbɑ be puociɑnfei nbɑ k niib mɑɑ ni kɑɑ. K nisɑɑlk kɑn fit tun siɑl nɑn u nuu k tul’ɔ k lin pukn’ɔ siɑl, k mɑɑn ŋuɑ e tie dɑɑnɔ nbɑ tien nisɑɑli kul mɑnfuol nɑn bonɑ kul. Ŋuɑ e mun te k nibuolu kul nyii yejɑ yenɔ kuɑ ni, k biɑ te k b be tingbounŋ nɑ kul ni, k u mɔnŋ mɔnŋ din senn yuo nbɑ k nibuolu kul sii be, k biɑ tien b binbeboɑ teli. U din tien nnɑ mɑnŋ ɑ bin lon’mɔ, ɑ k pɑsiɑl i bin tuln k tɑn nɑkn bɑnn’ɔ, ŋɑɑn ŋuɑ Yennu set k fɔk nɑn t suɑ. Nisuɑ din yet ɑ: ‹L tie Yennu pɑɑk e k t be k fo k tuun.› I yɑndɑnm pinpɑkt mun biɑ lek wɑnt nnɑ mɑnŋ e ɑ: ‹T biɑ tie Yennu wɑɑs e.› Tɔn, tinm nbɑ tie Yennu wɑɑs nɑ, l k ŋɑn k tin dukn nɑn Yennu tie nɑn *siɑl ɑ bonninnɑɔnŋ nbɑ tie sɑlmɑ ɑmi tɑnn nbɑ k nilɔ ŋɑnm’l nɑn u yɑn ɑmi u dudukt ni. Yuo nbɑ gɑl nɑ, Yennu din k ŋmɑnn niib tubɑ nɑn bɑɑ din jɑnŋ nɑn tubdɑtu bɑnnu nbɑ, ŋɑɑn mɔtɑɑnɑ u yet suɑ kul, ɑ wun mɔ kuɑŋɑɑn k lebt binbenŋ, k mɑɑn ŋuɑ Yennu ponŋ senn dɑɑl nbɑ k u sɑɑ bu tingbounŋ nɑ ŋɑɑtieb kul buut cib cib. U sɑɑ te k suɑ nbɑ k u lukt’ɔ nɑ n bu buut mɑnŋ, k u set fiin’ɔ kuun ni, k l tie nyinn k tul suɑ kul, ɑ u set sɑɑ tun wɑɑ senn lin nbɑ nɑ.» Bɑɑ gbɑt k Pɔul pɑk kuun fiilu po nɑ, k siɑb lɑɑ k sɑlkt’ɔ, ŋɑɑn k siɑb mun yɑɑ ɑ: «T luon k tin ŋɑnm gbiint lin nbɑ k ɑ sɑɑ pɑk nɑ e.» Ŋɑnn e k Pɔul din nyii ŋɑɑn nyik’b. Ŋɑɑn siɑb mun din tɑɑ u po k tien yɑdɑ. K b ni mɑnŋ, Deniis din be. Ŋuɑ e din tie dɑɑnɔ nbɑ din tuu be Aleopɑɑj tintɑɑnkɑɑnu ni. K puosuɑ mun din be b ni, k u sɑnn yi Dɑmɑlis. K lieb mun din be k pukn’m. L puolpo e k Pɔul din nyii Atenn k sɑɑn Kuolent. Lenŋ e k u din sɑɑ lɑ *Suif nisuɑ, k u sɑnn yi Akiilɑɑs, wun nbɑ k b din mɑl’ɔ Pɔn, k ŋuɑ nɑn u ŋɑɑpuo Pliisiil nyii Itɑɑli k bɑɑl Kuolent, k mɑɑn kpɑnbɑlɑ yudɑɑnɔ Kluod din tul mɔb ɑ Suifnbɑ kul n nyi Luonm. Bɑɑ be Kuolent nɑ, l dɑɑ k wei, k Pɔul din tɑn bɑɑl b ŋɑɑk ni, ɑ wuu be nɑn’m, k mɑɑn b kul din jikit bonkobt gbɑnt e tie ŋei. K *Fuondɑɑl kul, u tuu kuɑ yenjiɑntu dieok ni, k gbɑɑ ɑ Suifnbɑ nɑn Gleknbɑ n gbɑt l pɑɑk kii wɑɑ Yiesu lɑbɑmɑnn. Siilɑɑs nɑn Tiimuote nbɑ din tɑn nyii Mɑɑseduɑnn k bɑɑl yuo nbɑ nɑ, k Pɔul ji din jii u yuo kul k muɑntl Yiesu mɑɑn k tien Suifnbɑ nɑ, k din wɑnt nɑn ninmɔnn ɑ Yiesu e tie *Klistu nɑ. Ŋɑɑn k b lek din k sɑk mɑɑn mɑnŋ, k suki’ɔ. Ŋɑnn e k u din pit pit u nii nɑn u tɑɑ, ŋɑɑn yet’b ɑ: «L i tie k i tɑn kɔnŋ i mɑnfuol i e, l jii i mɔnŋ mɔnŋ yulɑ pɑɑk e. N nuu kɑɑ jik. Lɑɑ jii dinnɑ k sɑɑ, sie k n nyik ŋɑɑn wɑnn bin nbɑ k tie Suifnbɑ nɑ Yiesu mɑɑn mɑnŋ.» Ŋɑnn e k u nyik’b ŋɑɑn sɑɑn sɑɑ be suɑ ŋɑɑk ni, k b yi’u Tiitius Sustus. K u din jiɑntl Yennu. U ŋɑɑk mɑnŋ din kpiɑ nɑn Suifnbɑ jɑɑnti dieok o. K Suifnbɑ jɑɑnti dieok mɑnŋ yudɑɑnɔ Kliispus nɑn u ŋɑɑtieb kul tien Yonmdɑɑnɔ yɑdɑ, k Kuolent-tieb bonciɑnn mun din gbiintl Pɔul mɑɑn k tien yɑdɑ k b wul’b Yennu nyunwulu. Nyɑyeunŋ o dinn k Pɔul din tɑn lɑ yelntu. K u yelntu mɑnŋ ni k Yonmdɑɑnɔ yet’ɔ ɑ: «Dɑɑ tiin jɑŋmɑɑni, ŋɑɑn kii muɑntl n mɑɑn mɑnŋ k dɑɑ nyikt, k mɑɑn n be nɑn’ɑ, k suɑ kɑɑ k sɑɑ kpil’ɑ k tien’ɑ dɑnŋ, k mɑɑn niib bonciɑnn be duo nɑ ni k tie n yɑb.» L pɑɑk, Pɔul din be lenŋ binn nɑn ŋmɑɑli ŋɑnluob, k din wɑnt niib Yennu mɑɑn. Tɔn, yuo nbɑ k Gɑɑliɔn din tie Akɑɑyi tinŋ nɑ yudɑɑnɔ, k Suifnbɑ din tɑn tɑɑn lieb k lek Pɔul k suol’ɔ, k sɑɑn nɑn’ɔ buut buol, k sɑɑ yet ɑ: «Juɑ nɑ tumi niib biɑnŋ nbɑ k b sii jiɑntl Yennu k l k tɑɑ nɑn t *senni.» Pɔul nbɑ din yɑɑ wun pɑk yuo nbɑ, k Gɑɑliɔn yet Suifnbɑ mɑnŋ ɑ: «Yinm Suifnbɑ, l i tie k u kpii nilɔ kuo u tun biit nbɑ gbenŋ, l bo sii ŋɑn k i di suklu k gbiint, ŋɑɑn lɑɑ tie mɑɑn nbɑ jii k jiin i mɔnŋ mɑɑn nɑn i sɑnɑ, nɑn i mɔnŋ senni nɑ i e, i mɔnŋ mɔnŋ n got l ni. N k sɑk ɑ n sɑɑ bu l mɑbuolu.» Ŋɑnn e k u bel nyinn’b buut buol mɑnŋ. K b suol Sositenn wun nbɑ tie Suifnbɑ jɑɑnti dieok yudɑɑnɔ k tɑn buo’u buut mɑnŋ buol ni, ŋɑɑn k Gɑɑliɔn bɑkɑ tɑɑn kɑɑ b po. K Pɔul din dɑɑ biɑl Kuolent ŋmɑɑli bonciɑnn. Ŋɑnn e k u din tɑn cɑb Yiesuweilɑ, ŋɑɑn kuɑ ŋɑlunŋ k sɑɑn Siili tinŋ ni k Pliisiil nɑn u sɔlɔ Akiilɑɑs din ciɑn’ɔ. Wɑɑ din tɑn yɑɑ wun kuɑ ŋɑlunŋ nɑ, u din be Senkle k te k b kuol u yut mɔsonn nbɑ k u din senn nɑ pɑɑk. Ŋɑnn e k b din bɑɑl Efes. Lenŋ e k Pɔul din nyik Pliisiil nɑn Akiilɑɑs ŋɑɑn gɑl sɑɑn Suifnbɑ jɑɑnti dieok ni, k fɑɑ lɑbɑɑl nɑn Suifnbɑ, k b tɑn miɑl’ɔ ɑ wun biɑl nɑn’m k wei ŋɑɑn k u k sɑk. Wɑɑ din yɑɑ wun cɑb’b k sɑɑn nɑ, k u yet’b ɑ: «L i tie k Yennu sɑk i e, n biɑ sɑɑ jen i buol nnɑ,» ŋɑɑn biɑ jin kuɑ ŋɑlunŋ k sɑɑn. Wɑɑ tɑn bɑɑl Sesɑɑle yuo nbɑ k u tuɑt gɑl Selusɑɑlenm k sɑɑ fuont Klistu mɔtɑɑɔk niib ŋɑɑn gɑl sik Antiɑɔs biɑk, k sɑɑ wei lenŋ, k biɑ tɑn nyii lenŋ k sɑɑ Gɑɑlɑɑti nɑn Fliiji yɑkɑ po, k sɑɑ cien Yiesuweilɑ kul pɑlɑ. Ŋɑnn e k Suif jɑsuɑ nnɑ din be, k u sɑnn yi Apuoluos, k b din mɑl’ɔ Aleksɑndli, k u din tɑn bɑɑl Efes. U din tie wun nbɑ mi mɑɑn e, k din mi Yennu lolkpel kɑdɑɑɔk fɑnu. B din ponŋ wɑnn’ɔ Yonmdɑɑnɔ sɔnu e wɑɑ, k u tɑn bɑɑl k din piɑk wɑnt Yiesu po bonŋɑnn nɑn ninmɔnn, ŋɑɑn u din mi Sɑn nbɑ din wuul niib Yennu nyunwulu biɑnŋ nbɑ kuukuɑ e. K u din piin piɑk Yennu mɑɑn nɑn pɑlcienn, Suifnbɑ jɑɑnti dieok ni, k Pliisiil nɑn u sɔlɔ Akiilɑɑs nbɑ gbɑt u mɑɑn mɑnŋ nɑ, k b tɑn jii’u k fiit Yennu sɔnu bonciɑnn fɑnu k wɑnn’ɔ. L puolpo e k Apuoluos dukn ɑ wun sɑɑn Akɑɑyi. K Yiesuweilɑ nbɑ din be Efes nɑ sonm’ɔ, k diɑn kɑdɑɑɔk k tul Yiesuweilɑ nbɑ be Akɑɑyi nɑ, ɑ u i tɑnŋ i bɑɑl, bin gɑɑl’ɔ sɑɑɔnŋ. Wɑɑ tɑn bɑɑl lenŋ yuo nbɑ, k u set tot bin nbɑ tien yɑdɑ Yennu ninkpɑbɑɔnŋ pɑɑk, k mɑɑn ŋuɑ nɑn Suifnbɑ nbɑ din tɑn noi nɑn lieb, k u din jikt Yennu lolkpel kɑdɑɑɔk, k wɑnt’b ɑ Yiesu e set tie Klistu k din pɑk nɑn pɑnŋ k nyɑnn’b niwol ni. Apuoluos nbɑ din dɑɑ be Kuolent nɑ, k Pɔul ŋɑnin din gɑl yɑkl nbɑ mɔk juɑt nɑ k sɑɑn Efes. Lenŋ e k u din sɑɑ lɑ Yiesuweisiɑb, k boi’b ɑ: «Yɑɑ tien Yiesu yɑdɑ k wɑɑ’u nɑ, i mi k gɑɑl Foŋɑnm ii?» K b jiin ɑ: «Aɑi. T ponŋ tɑɑn k mi k gbɑt ɑ Foŋɑnm be kɑɑ wɑɑ gbɑɑ.» K Pɔul boi’b ɑ: «K ŋɑnn, b wul’i wulbuol-lɑnu po e?» K b jiin ɑ: «B wul’t nɑn Sɑn nbɑ din wuul niib biɑnŋ nbɑ nɑ e.» K Pɔul yet’b ɑ: «Sɑn din wuul niib Yennu nyunwulu, k l wɑnt ɑ bin mɔ kuɑŋɑɑn k lebt binbenŋ, ŋɑɑn yien’m ɑ bin tien wun nbɑ tɑn sɑɑ bɑɑl nɑ yɑdɑ, k ŋuɑ e tie Yiesu.» Bɑɑ gbɑt nnɑ yuo nbɑ, k b ji wul’b Yennu nyunwulu Yonmdɑɑnɔ Yiesu sɑnn ni. K Pɔul jii u nii ŋɑɑn yii b pɑɑk k Foŋɑnm sik kuɑ b ni, k b ji piɑk bɑlgɑni, k biɑ piɑk sɔknt Yennu mɑɑn. Jɑb mɑnŋ din tie nɑn piik nɑn bɑnle nɑ e. L din tie ŋmɑɑli ŋɑntɑ e k Pɔul ji din sɑɑn Suifnbɑ jɑɑnti dieok ni, k fɑɑ lɑbɑɑl nɑn niib nɑn pɑlcienn, k yɑbi u mɔnŋ ɑ wun kpint b yɑn k jikt sɑɑ Yennu nɑɑn po. Ŋɑɑn niib nɑ siɑb din tie tubkɑngbɑtɑ dɑnm e, k din k sɑk mɑɑn nɑ, ŋɑɑn piɑk bɑlbiit nibul nɑ ni, k biil Yonmdɑɑnɔ weiu sɔnu. Ŋɑnn e k Pɔul nyik’b, ŋɑɑn jii Yiesuweilɑ nɑ k sɑɑn nɑn’m Tiilɑɑnus sɑkul dieok ni, k dɑɑl kul jik k u fɑɑ lɑbɑɑl nɑn niib lenŋ. L din jii nnɑ k bɑɑl binɑ ŋɑnle. K niib kul ɑ nbɑ din be Asii tinŋ ni k tie *Suifnbɑ, nɑn nilieb kul ɑ, din gbɑt Yonmdɑɑnɔ mɑɑn mɑnŋ ɑ. L yuo nɑ k Yennu din te k Pɔul tuun bɑktnɔunŋ tuonjɑɑnɑ nbɑ be l kuɑ. Nnɑ e k niib din tuu jii cincenɑ nɑn nunfiɑni nbɑ sii Pɔul gbɑnɑnt nɑ, k sɑɑn tul b bɑɑtb k b yiɑli nɑ nyik’b k nɑlnbiit nyi b ni. L yuo nɑ k Suif nisiɑb din be, k din tuu lin k nyint nɑlnbiit niib ni, k b biɑ din tuu bikn ɑ bin jii Yonmdɑɑnɔ Yiesu sɑnn kii nyint nɑlnbiit, k b din biel nɑlnbiit nɑ ɑ: «Min e tul’i mɔb Yiesu sɑnn ni, wun nbɑ k Pɔul muɑntl u mɑɑn nɑ, nyimin mɑn.» Bin nbɑ din tuun nnɑ mɑnŋ din tie jɑb bɑnlole nbɑ din tie *Suifnbɑ Yennu mɑnntieb yudɑɑnsuɑ Sefɑ wɑɑs e. Ŋɑɑn nɑlnbiiuk jiin k yet’b ɑ: «N mi Yiesu, k biɑ mi Pɔul po, ŋɑɑn k yinm mun, i tie ŋmee?» K juɑ nbɑ k nɑlnbiiuk nɑ din be u ni nɑ yukl k tɑn cib’b bii, nɑn pɑnŋ, k nyɑnn’b, k tul’b dɑni, k biɑ pɑt pɑt b tiɑt, k b kul ɑ ciɑl gbɑnɑnbilɑ, k nyii u ŋɑɑk ni. Yuo nbɑ k Suifnbɑ nɑn bin nbɑ k tie Suifnbɑ kul ɑ nbɑ be Efes nɑ gbɑt nnɑ, k jɑŋmɑɑni ji suol b kul ɑ, k b bɑɑk Yonmdɑɑnɔ Yiesu sɑnn bonciɑnn. Ŋɑnn e k bin nbɑ din tɑn tien yɑdɑ nɑ bonciɑnn pɑk kɑt b nɔi ni biit, niib ni, k wɑnn lin nbɑ k b tuu tuun. K linŋin dɑnm bonciɑnn ji tikl b kɑdɑɑt nɑn b sɑbɑ k bɑɑl nɑn’n, k tɑn juo muu niib kul nuni ni, k b kɑn kɑdɑɑt nɑ yɑbnt likli, k l tie likli kut binɑ tusɑ piinŋmu. Ŋɑnn e din te k Yonmdɑɑnɔ mɑɑn ji din ŋɑnmt yɑt k kuɑ niib ni, k puki nɑn pɑnŋ. L puolpo k Pɔul dukn ɑ u sɑɑ gɑɑl Mɑɑseduɑnn nɑn Akɑɑyi po e, k sɑɑn Selusɑɑlenm, k yet ɑ: «L puolpo, l tie k n sɑɑn Luonm.» L pɑɑk, k u tun Tiimuote nɑn Elɑst, u sonmtieb ni bɑnle, ɑ bin gɑl u tuɑnn po k sɑɑn Mɑɑseduɑnn, ŋɑɑn k u din biɑl Asii tinŋ ni. L yuo mɑnŋ dɑɑmuk bonbiil din fiil k jikt sɑɑ Yonmdɑɑnɔ weiu po. K jɑsuɑ nnɑ mun din be k u sɑnn yi Demetlius, k u tuu jikt likli kut k din mɑɑ b yennu nbɑ k b yi’u *Altemiis nɑ puociɑnfei, l bonninnɑnɑ, k l tie pɑtɑ, k u kɔi, k din jii niib k b tuun u tuonɑ, k b lɑɑt likli bonciɑnn. Ŋɑnn e k u tɑn yiin’m k tɑɑn b kul ɑ, k biɑ tɑɑn bin nbɑ kul kul tuun l tuonbuolu nɑ, k tɑn yet’b ɑ: «N ninjɑnm, i mi nɑn t nyuɑt nyi t tuonɑ nɑ ni e. I mɔnŋ mɔnŋ mun ponŋ gbɑt k biɑ lɑ Pɔul nbɑ yien lin nbɑ nɑ. U yɑɑ ɑ nilɔ nbɑ mɑɑ yenni nɑn u nii, ɑ ŋɑnn k tie yenni kɑɑ, k u mɑɑn nɑ tunn niib bonciɑnn yɑn Efes nnɑ k sɑɑn pel lin gbenn Asii doi kul ɑ. Pɑsiɑl k t tuonɑ nɑ sɑnn tɑn sɑɑ kpet mɑnn biil, k biɑ jen ɑ, k t yɑbnt yennu Altemiis puociɑnfiek tɑn sɑɑ kpet mɑnn k tien yɑnn, k biɑ jen ɑ, k t yennu Altemiis nibɑɑkl tɑn sɑɑ mɑnn k wɑɑb, dɑɑnɔ nbɑ k suɑ kul nbɑ be Asii tinŋ ni nɑn tingbounŋ nɑ kul ɑ jiɑntl’ɔ nɑ.» Nibul nɑ nbɑ gbɑt nnɑ yuo nbɑ, k b wutuol fiil, k b tiɑn tintiɑni, k yɑɑ ɑ: «Tinm Efestieb yennu Altemiis tie yɑbnt yennu e.» K duo nɑ kul muk. K b suol Gɑius nɑn Aliistɑɑlk k ciɑl sɑɑn kuɑ nɑn’m nibul ni. Jɑb bɑnle mɑnŋ din tie Mɑɑseduɑnn niib, bin nbɑ k Pɔul tuu tɔki nɑn’m nɑ. K Pɔul luon k wun kuɑ niib nɑ ni, ŋɑɑn k Yiesuweilɑ k sɑk ɑ wun kuɑ. K duo nɑ yudɑnm ni siɑb nbɑ din tie Pɔul yuɑsnbɑ din tun *tuomi ɑ Pɔul n di suklu, k dɑɑ kuɑ nibul mɑnŋ ni. L yuo nɑ, nibul mɑnŋ ni, siɑb din tiɑn tintiɑni, k yɑki kpɑyɑkt jiɑk jiɑk, k niib nbɑ tikl nɑ yɑn ŋmɑt sɑɑ gɑl, k mɑɑn b bonciɑnn din k bɑnn b lɑknu mɑnŋ pɑɑk. Tɔn, k Suifnbɑ nyinn jɑsuɑ nbɑ k b yi’u Aleksɑndl, k senn’ɔ b tuɑnn, ɑ wun pɑk b pɑɑk k tul’b. K Aleksɑndl donn nuu sɑnpɑɑpo, ŋɑɑn ji luon wun pɑk tul nibul nɑ k nyinn Suifnbɑ mɔniɑɔk mɑnŋ ni. Ŋɑɑn bɑɑ tɑn bɑnn nɑn u tie Suif nilɔ nɑ, k b kul ji tiɑn tintiɑni, k yien ɑ: «Tinm Efestieb yennu Altemiis tie yɑbnt yennu e.» K b kul tiɑn nnɑ k wei bonciɑnn. L juontu k duo mɑnŋ sɑɑkuɑ te k nibul nɑ ŋmin, ŋɑɑn k u yet’b ɑ: «Yinm Efestieb, suɑ kɑɑ tingbounŋ nɑ ni k k mi nɑn Efestieb e guu k goli yɑbnt Altemiis puociɑnfiek, ŋɑɑn mun guu k goli Altemiis ninnɑɔnŋ nbɑ nyii sɑnpɑɑpo k tɑn bɑɑ nɑ. Suɑ biɑ kɑɑ k sɑɑ fit noi lin nbɑ nɑ. L pɑɑk, l ŋɑn k i di suklu, k dɑɑ tie jɑti. I bɑɑl nɑn niib nɑ nnɑ nɑ, ŋɑɑn k b k jɑn t pɑtɑ bont. B biɑ k piɑk k suki’i biil t yennu. L i tie k Demetlius nɑn u tuontunlieb mɔk mɑɑn nɑn suɑ i e, ŋɑnn buut buol ponŋ be k mɔk l dɑɑ, k buut dɑnm mun biɑ be. Ŋɑɑnt bin sɑɑn kii sɑɑ i puotl b lieb lenŋ. L i tie k i mɔk bɑlsɑi k sɑɑ pukn, l ŋɑn k yin sɑɑn yudɑnm buol. Setk nɑn mɔni, pɑsiɑl Luonmtieb tɑn sɑɑ mɑnn lɑ t biit, k yet ɑ t tie doyieltieb e, k jikt sɑɑ lin nbɑ tien dinnɑ nɑ po, k l k mɔk pɑɑk, k t mun biɑ kɑn fit wɑnn l pɑɑk k jikt sɑɑ dɑɑmuk nɑ po.» U yet nnɑ e, ŋɑɑn ji yɑt niib nɑ. L kpikpiluk puolpo e, k Pɔul ji din yiin Yiesuweilɑ nɑ, k tɑn cie b pɑlɑ, ŋɑɑn ji cɑb’b, k yɑɑt k sɑɑn Mɑɑseduɑnn tinŋ ni, k din lin Mɑɑseduɑnn tinŋ yɑkɑ po, k biɑ pɑk Yiesuweilɑ nbɑ be lenŋ nɑ Yennu mɑɑn bonciɑnn k kuɑnt’b pɑlɑ, ŋɑɑn gɑl sɑɑn Gleknbɑ tinŋ ni. U ji be lenŋ k sɑɑ jɑnŋ ŋmɑɑli ŋɑntɑ, k l puolpo, k u ji tie siil ɑ wun kuɑ ŋɑlunŋ k sɑɑn Siili, ŋɑɑn tɑn bɑnn nɑn *Suifnbɑ loln lolɑ k guu’u. L pɑɑk k u dukn ɑ l ŋɑn wun ŋmɑt k sɑɑn gɑl Mɑɑseduɑnn tinŋ ni. Piilus bik Suopɑɑtel, wun nbɑ nyii Beele nɑ, nɑn Aliistɑɑlk nɑn Sekundus, bin nbɑ nyii Tesɑɑluoniik nɑ, nɑn Gɑius, wun nbɑ nyii Delb nɑ, nɑn Tiikiik nɑn Tlofiinm, bin nbɑ nyii Asii tinŋ ni nɑ, nɑn Tiimuote, ŋɑnm e din sɑɑn nɑn Pɔul. K b gɑl tuɑnn k ji sɑɑ guu’t Tloɑs. Jɑɑnm nbɑ k b din tuu di pɑɑnu nbɑ kɑɑ * dɑtinŋ nɑ dinu puolpo e, k t ji din kuɑ ŋɑlunŋ, k nyii Fiiliip, k sɑɑ Tloɑs. K dɑɑ ŋɑnŋmu dɑɑl k t bɑɑl b buol Tloɑs, k biɑl lenŋ k jɑnŋ dɑɑ ŋɑnlole. Tɔn, k *Fuondɑɑl dɑɑjuouk k t tikl lieb, k tɑɑn nɑn Yiesuweilɑ nbɑ be lenŋ nɑ, ɑ t di Yiesu mɔtɑɑɔk dinu. K Pɔul piɑk nɑn niib nɑ dik dik dik nɑn tɑnsuuni, k mɑɑn lɑɑ sɑɑ yent k wun gɑl nɑ pɑɑk. T din tikl dituɑtuk nnɑ ni e, k b din juo fitɑ bonciɑnn lenŋ. Nɑɑsinsuɑ nnɑ mun din be k u sɑnn yi Eotiik, k u din kɑl dituɑtuk nɑ tɑkɑlbonn pɑɑk, k Pɔul piɑk mɔkmɔk, k u kɑl tikntl, k ji tɑn guɑn k libt nyii dituɑtuk muntɑ nɑ ni, k tɑn bɑɑ tinŋ ni, k b sik jii’u, k suɑ k u kpo wɑɑ. K Pɔul nyii dituɑtuk nɑ ni, k sonm sik tɑn fɑbn u pɑɑk k diɑ’u, ŋɑɑn yet ɑ: «I dɑɑ te k i pɑlɑ biil. U fo.» L puolpo k u ŋmɑt k duo dituɑtuk nɑ ni, k sɑɑ dii jiet. L puolpo biɑk k u piɑk nɑn lɑɑ tɑn yent k u ji nyik’b, ŋɑɑn yɑɑn yɑɑt gɑl. Ŋɑɑn k b ji jii nɑɑsimɔ nɑ ŋɑnin, k u mɔk mɑnfuol, k b kun nɑn’ɔ nɑn pɑlpienn, k l k tie wɑɑnm-nnɑ. L puolpo k t biɑ kuɑ ŋɑlunŋ, k dɔnŋ gɑl sɑɑn Asuos. Lenŋ e k t din yɑɑ t jii Pɔul, k mɑɑn ŋuɑ din yet’t ɑ tin cet’ɔ, k mɑɑn u din luon wun sonm tɑɑtinŋ e k bɑɑl lenŋ. Wɑɑ din bɑɑl Asuos yuo nbɑ, k u lɑ’t, k t ji jii’u k kuɑn’ɔ ŋɑlunŋ nɑ ni, k sɑɑn Miitiilenn. K t biɑ tɑn tuɑt lenŋ k l yent k t bɑɑl Kio. K l biɑ yent k t bɑɑl Sɑɑmuos, k dɑɑl nbɑ wɑɑ nɑ k t bɑɑl Miile. Pɔul din k luon ɑ wun sɑɑn Efes, k mɑɑn u din k luon k wun wei Asii tinŋ ni, ŋɑɑn u din luon yiɑn yiɑn, k mɑɑn u din luon ɑ l i sɑɑ fit, wun bɑɑl Selusɑɑlenm dɑjɑɑnn nbɑ k b yi *Pɑntekuot nɑ. Ŋɑnn e k Pɔul din tun *tuomi ɑ bin nyi Miile duo ni, ɑ k sɑɑn Efes k sɑɑ yiin *Klistu mɔtɑɑɔk niib sɑɑkɑb nɑ. Bɑɑ bɑɑl yuo nbɑ, k u yet’b ɑ: «I mi n binbenŋ nbɑ tuu be biɑnŋ nbɑ, mɑɑ din sint bɑɑl Asii tinŋ nnɑ k jikt sɑɑ. N din tuun Yennu tuonɑ nɑn sikn-n-mɔnŋ bonciɑnn, nɑn nyin-nyuut, k biɑ lɑ biknu Suifnbɑ lolɑ pɑɑk. I biɑ mi nɑn mɑɑ din muɑntl Yennu mɑɑn k biɑ wɑnt niib ni nɑn i ŋei ni nɑ, n din pɑk’i lin nbɑ kul sɑɑ sonm’i, k k nyik k biɑ k tenn siɑl. N kpɑɑn Suifnbɑ nɑn bin nbɑ k tie Suifnbɑ kul ɑ bin mɔ kuɑŋɑɑn k lebt binbenŋ kii wɑɑ Yennu sɔnu, k tien t Yonmdɑɑnɔ Yiesu yɑdɑ. «Tɔn, k mɔtɑɑnɑ Foŋɑnm e mɑb’n k n yɑɑ n sɑɑn Selusɑɑlenm, ŋɑɑn n k mi lin nbɑ sɑɑ sɑɑ tien’n lenŋ. Ŋɑɑn mɑɑ mi lin nbɑ kuukuɑ tie nnɑ e. Mɑɑ lin duo kul nɑ ni, Foŋɑnm e tuu wɑnt’n nɑn ninmɔnn ɑ dɑnsɑlk nɑn fɑlɑ tɑn sii tie n yɑl e. Ŋɑɑn n k yi n mɑnfuol k l tie siɑl, k mɑɑn min ŋɑnin luon k n tun tuonɑ nbɑ k Yonmdɑɑnɔ Yiesu tul’n nɑ e k gbenn k l tuonɑ tie k mii muɑntl lɑbɑmɑnn nbɑ wɑnt Yennu ninkpɑbɑɔnŋ po e. «N din lin i kul ɑ sinsuuk ni, k muɑntl Yennu nɑɑn lɑbɑɑl. Tɔn, k mɔtɑɑnɑ, n mi nɑn i ji kɑn mi k lɑ’n biɑk. L pɑɑk e te k n yet’i dinnɑ dɑɑl nɑ, ɑhuo, wun nbɑ kɔnŋ mɑnfuol nbɑ kɑɑ gbennu nɑ, n nuu kɑɑ lenŋ jik, k mɑɑn n k mi k fɔlnt k ŋmɑt puolpo nɑn k n muɑnt Yennu nbɑ luon lin nbɑ nɑ kul k wɑnn’i. L pɑɑk, i diɑ i mɔnŋ mɑn bonŋɑnn, nɑn Yiesuweilɑ nbɑ k Foŋɑnm kubn i nuu ni ɑ yii tie b yudɑnm kii goli’b. Ii guu Klistu mɔtɑɑɔk niib nbɑ k Yennu te k b tie u yɑb u Bijɑ kuun pɑɑk. N mi nɑn mi i kɑɑ, nibiit tɑn sɑɑ bɑɑl i sinsuuk ni, k biil Yiesuweilɑ siɑb, nɑn kinkɑtɑ nbɑ tuu so pei biɑnŋ nbɑ nɑ. Nisiɑb tɑn sɑɑ nyi i mɔnŋ mɔnŋ sinsuuk ni gbɑɑ, k fɑ fɑi k jiin bɑlmɔni wɑnnu po, ɑ bin tunn Yiesuweilɑ yɑn k te k bii wɑɑ’b. L pɑɑk, ii guu mɑn k dɑɑ tɑnmt mɑɑ din kpɑɑn i kul nɑn nyin-nyuut, k k nyik yennu nɑn nyiɑɔk, k tɑn jɑnŋ binɑ ŋɑntɑ nɑ ni. «Mɔtɑɑnɑ, n jikt’i k tie’i Yennu nuu ni, k biɑ mi nɑn yɑɑ bɑnn u mɑɑn nbɑ wɑnt u ninkpɑbɑɔnŋ po, l mɑɑn mɑnŋ sɑɑ fit cie i pɑlɑ, k biɑ tul’i fɑɑl nbɑ tie bin nbɑ kul tie u yɑb nɑ yɑl. N din k luon suɑ likli ɑmi u sɑlmɑ ɑmi u tiɑt. I mɔnŋ biɑ mi nɑn n din diɑ n nii nɑ e k tuun, k min nɑn n wei-nɑn-lieb di k biɑ gbɑb. Mɑɑ din tuun nnɑ mɑnŋ pɑɑk e wɑnt nɑn sie k tii tuun bonciɑnn k fit k sonm tɑlɑs-dɑnm, k dɑɑ tɑnmt Yonmdɑɑnɔ nbɑ din yet lin nbɑ nɑ ɑ: ‹Pɑlpienn sii tie dɑɑnɔ nbɑ piin piini yɑl e, k gɑl wun nbɑ gɑɑn.› » Pɔul nbɑ gbenn mɑɑn mɑnŋ yuo nbɑ, k b kul ɑ lɑkn gbɑɑn k miɑl Yennu. Mɔni suol’b, k b kul ɑ mɔ, ŋɑɑn jii b nii k kokn kokn Pɔul. B pɑlɑ mɑntk din biil nɑn wɑɑ yɑɑ ɑ b ji kɑn lɑ’u nɑ pɑɑk. Ŋɑnn e k b din ciɑn’ɔ k u kuɑ ŋɑlunŋ. Tɑɑ din tɑt nyik Yiesuweilɑ sɑɑkɑb mɑnŋ nɑ, k t tɔkn bɑɑl Kuos, k l yent k t bɑɑl Luod, k biɑ nyii lenŋ k sɑɑn Pɑɑtɑɑlɑ. Lenŋ e k t din lɑ ŋɑlunŋ nbɑ sɑɑ Feniisi tinŋ ni. Ŋɑnn e k t kuɑ ŋɑlunŋ mɑnŋ k sɑɑ. Tɑɑ tɑn lɑ duo nbɑ k nyun lint k b yi Siipl yuo nbɑ nɑ, k t gɑɑl t gɑnŋ po, k tɑn bɑɑl Siili tinŋ ni, k nyii ŋɑlunŋ nɑ ni, duo nbɑ k b yi Tiil nɑ ni, k ŋɑlunŋ mɑnŋ dɑnm din yɑɑ bin nyinn tiɑt lenŋ. Lenŋ e k t din lɑ Yiesuweilɑ, k ji biɑl be b buol ni k sɑɑ jɑnŋ dɑɑ ŋɑnlole, k Foŋɑnm din te k b yet Pɔul ɑ u ji dɑɑ sɑɑ Selusɑɑlenm. Dɑɑ ŋɑnlole nbɑ tɑn gɑl yuo nbɑ nɑ, k ŋɑnm nɑn b puob nɑn b wɑɑs din ciɑn’t, k sɑɑ nyii duo nɑ ni, k diɑn’t, k t kul ɑ gbɑɑn mɔk-kpinŋ k miɑl Yennu. L puolpo k t cɑb lieb, ŋɑɑn yɑɑn kuɑ ŋɑlunŋ k sɑɑ, k b mun ŋmɑt k kun. Ŋɑnn e k t nyii Tiil k bɑɑl Tolemɑiis. Lenŋ e k t sɑɑn fuont Yiesuweilɑ, ŋɑɑn biɑl b buol ni dɑyenn kuukuɑ. L yent sɑn-nyiɑɔk k t nyii Tolemɑiis k bɑɑl Sesɑɑle k sɑɑn kuɑ Fiiliip ŋɑɑk ni, wun nbɑ muɑntl Yiesu lɑbɑmɑnn nɑ, k be. U din tie jɑb bɑnlole nbɑ k b din lukt’b Selusɑɑlenm nɑ yenɔ e. U din mɔk sɑpɑɑnmunɑ bɑnnɑ, k b mun din tie bin nbɑ sɔknt Yennu mɑɑn. T din be lenŋ k tien nɑn dɑɑ ŋɑnŋɑ nɑ wɑɑ, k *Yennu sɔkni, wun nbɑ k b yi’u Agɑɑbuus, nɑ din nyii Suude k sik, k bɑɑl t buol ni, k tɑn jii Pɔul gbɑnn, k lol u mɔnŋ mɔnŋ tɑɑ nɑn u nii, ŋɑɑn yet ɑ: «Foŋɑnm nbɑ yɑɑ biɑnŋ nbɑ e nɑ, ɑ *Suifnbɑ nbɑ be Selusɑɑlenm nɑ tɑn sɑɑ lol gbɑnn nɑ dɑɑnɔ nɑ nnɑ e, ŋɑɑn jii’u k kubn’ɔ bin nbɑ k tie Suifnbɑ nɑ nuu ni.» Tɑɑ ji din gbɑt nnɑ mɑnŋ, k tinm nɑn Sesɑɑle duo ni Yiesuweilɑ kul ɑ bɑln Pɔul ɑ u ji dɑɑ sɑɑ Selusɑɑlenm. Ŋɑɑn k u ji din jiin ɑ: «Bee tien k i mɔ k luon k i biil n pɑl i? N k tien siil nɑn bɑɑ sɑɑ lol’n Selusɑɑlenm nɑ pɑɑk kuukuɑ kɑɑ, ŋɑɑn n ponŋ tien siil nɑn k n kpo Yonmdɑɑnɔ Yiesu sɑnn pɑɑk.» Tɑɑ gbɑl nɑn tin tunn u yɑn nɑ, k t ji nyik ŋɑɑn yet ɑ: «T Yonmdɑɑnɔ nbɑ luon lin nbɑ nɑ, n tun.» T weiu mɑnŋ puolpo e, k t ji din tien siil k sɑɑ Selusɑɑlenm. K Yiesuweilɑ nbɑ be Sesɑɑle nɑ, k b siɑb mun din wei’t k sɑɑn. Ŋɑnn e k b din jii’t, k t sɑɑn Minɑɑsɔn ŋɑɑk ni. Minɑɑsɔn mɑnŋ ponŋ din tie Yiesuweikpel e k din tie Siipl nilɔ. Tɑɑ din bɑɑl Selusɑɑlenm yuo nbɑ, k lenŋ Yiesuweilɑ gɑɑl’t nɑn pɑlpienn bonciɑnn. K l yent sɑn-nyiɑɔk, k tinm nɑn Pɔul sɑɑn ɑ t sɑɑ fuont Sɑɑk. Yiesuweilɑ sɑɑkɑb kul ɑ mun din be lenŋ l yuo. Ŋɑnn e k Pɔul fuont’b, ŋɑɑn kɑt wɑnn’b lin nbɑ kul k Yennu tun k tul bin nbɑ k tie Suifnbɑ nɑ, ŋuɑ Pɔul nbɑ din tun lin nbɑ kul Yiesu sɑnn ni nɑ pɑɑk. Bɑɑ ji din gbɑt u mɑɑn mɑnŋ nɑ, k b kul ɑ pɑk Yennu k yet Pɔul ɑ: «T nɑɑ bik, ɑ mi Suifnbɑ nbɑ tie tusɑ tusɑ biɑnŋ nbɑ k tien Yiesu yɑdɑ, k b kul ɑ biɑ diɑ Muois *senni kenkenken. Siɑb kumi’b ɑ ɑ wɑnt Suifnbɑ kul ɑ nbɑ be buolgɑnu tini ni ɑ bin yet Muois *senni, k biɑ yien’m ɑ b dɑɑ poli b wɑɑs punɑ, k biɑ yet’b ɑ b dɑɑ wɑɑ Suifnbɑ kɑɑl. K t sɑɑ tien nlee nɑ? K mɑɑn b lek sɑɑ gbɑt nɑn ɑ bɑɑl nɑ. L pɑɑk, t i yet’ɑ biɑnŋ nbɑ, fɑn tun l biɑnŋ. Jɑb bɑnnɑ e be nnɑ k pol pol nɑn Yennu. Tɔn, fin nɑn ŋɑnm i sɑɑ k sɑɑ ŋɑnm i mɔnŋ, k fɑn pɑ b likli ɑ bin fit kuol b yut, k suɑ kul n fit ŋɑnm bɑnn nɑn mɑɑn nbɑ k b tuu piɑk ɑ po nɑ, l set k tie mɔni kɑɑ, ŋɑɑn ɑ mɔnŋ ponŋ wɑɑ Muois senni mɑnŋ nɑn l sɔnu. Bin nbɑ k tie Suifnbɑ ŋɑɑn tien Yiesu yɑdɑ nɑ ŋɑnin, t ponŋ diɑn kɑdɑɑɔk k tul’b, k wɑnn’b tɑɑ din juont bɑnnu nbɑ ɑ b dɑɑ mi k di jiet nbɑ k b mɑnn pɑtl, ɑmi k ŋmɑn sɔn, ɑmi bonkobuk nbɑ k b ŋmɑkl k kpii, ŋɑɑn biɑ suol b mɔnŋ nɑn boncuncontuonɑ.» Ŋɑnn e k Pɔul din jii jɑb mɑnŋ, k l tɑn yent, k ŋuɑ nɑn ŋɑnm din ŋɑnm b mɔnŋ. L puolpo k Pɔul din sɑɑn Yennu jɑɑnti ŋɑsɑɑkɑk ni k wɑnn dɑɑl nbɑ k ŋɑnmu mɑnŋ sɑɑ gbenn k suɑ kul sɑɑ nɑn piini k pi u mɔnŋ pɑɑk. Dɑɑ ŋɑnlole dɑɑl nbɑ tɑn pel yuo nbɑ, k Suifnbɑ nbɑ nyii Asii k bɑɑl Selusɑɑlenm k be Yennu jɑɑnti ŋɑsɑɑkɑk ni nɑ, k b tɑn lɑ Pɔul, k te k niib nɑ kul fiil jil jil jil, k suol’ɔ, ŋɑɑn biɑ tiɑn tintiɑni ɑ: «Suifnbɑ, sonm’t mɑn. Ŋuɑ e tie nilɔ nbɑ lin lokl kul po, k wɑnt niib k biil’b nɑn Suifnbɑ nɑn Muois senni nɑn Yennu jɑɑnti ŋɑsɑɑkɑk nɑ, k biɑ tɑn bɑɑl nɑn bin nbɑ k tie Suifnbɑ gbɑɑ Yennu jɑɑnti ŋɑsɑɑkɑk nɑ ni, k tɑn biil buol nbɑ tie Yennu tiɑɔnŋ yɑl nɑ.» (B yet nnɑ k mɑɑn b din dɔnŋ lɑ Pɔul nɑn Tlofiinm, wun nbɑ din tie Efes nilɔ nɑ, k b be duo nɑ ni, k b dukn k mi ɑ Pɔul kuɑ nɑn’ɔ Yennu jɑɑnti ŋɑsɑɑkɑk nɑ ni e.) L pɑɑk, k duo nɑ niib kul din fiil, k niib kul ɑ ciɑl, k bɑɑl kpil Pɔul, k suol’ɔ k piit nyinn’ɔ Yennu jɑɑnti ŋɑsɑɑkɑk nɑ ni. L tɑɑkpɑɑk ni nɑ, k siɑb luon ŋɑɑk nɑ tɑnmɔi. B ji yɑɑ bin kpi Pɔul. L yuo nɑ k Luonmtieb sejenm yudɑɑnɔ ji gbɑt ɑ Selusɑɑlenmtieb kul ɑ fiil jil jil jil. K u kɑkt yiɑn ɑ, k jii sejenm nɑn b sɑɑkɑb, k b fɑɑl sik nibul nɑ ni. Niib nɑ nbɑ lɑ’u nɑn sejenm nɑ yuo nbɑ, k b ji nyik Pɔul buot. K sejenm yudɑɑnɔ nɑ sɑɑn suol Pɔul, ŋɑɑn tul mɔb ɑ bin bɑɑn’ɔ jɑlt ŋɑnle, ŋɑɑn boi Pɔul nbɑ tie wun nbɑ nɑn wɑɑ biil lin nbɑ nɑ. K nibul nɑ ni, siɑb tiɑn Pɔul pɑɑk jiɑk jiɑk. B bɑlŋmɑtuk mɑnŋ pɑɑk k sejenm yudɑɑnɔ nɑ k fit bɑnn l pɑɑk bonŋɑnn. L pɑɑk, k u tul mɔb ɑ bin jii’u k sɑɑn nɑn’ɔ kɑnŋ ni. Bɑɑ bɑɑl kɑnŋ nɑ tɑnmɔb tɑɑŋmɑɑtɑ pɑɑk nɑ, k sejenm nɑ jii’u sɑnpɑɑpo, k mɑɑn nigbounŋ nbɑ din luon bin kpi’u nɑ pɑɑk. B ji din wɑɑ b puol k tiɑn tintiɑni ɑ: «Kpin’mɔ mɑn.» Sejenm mɑnŋ nbɑ ji din yɑɑ bin kuɑ nɑn’ɔ kɑnŋ ni nɑ, k u boi sejenm yudɑɑnɔ nɑ ɑ: «A sɑɑ sɑk k n pɑk siɑl k tul’ɑ nii?» K u jiin boi’ɔ ɑ: «A gbiɑ Glek mɑɑn ii? Fin kɑɑ tie Ejipt nilɔ nbɑ k dɑɑ ŋɑnle nnɑ nbɑ gɑl nɑ ni k u te k niib bɑɑl nɑn kunkɔnn duo nɑ pɑɑk, k u jii nifokpiilt tusɑ ŋɑnnɑ, k sɑɑn nɑn’m k dɑɑn be muuk ni nɑ ɑɑ?» K Pɔul jiin ɑ: «N tie Suif nilɔ e, k b mɑl’n Tɑɑls nbɑ be Siiliisi yɑkl ni e, k n tie digbɑngbenŋl ni nilɔ e. N bɑln’mɑ e, ŋɑɑnt k n pɑk k tul niib nɑ.» Sejenm yudɑɑnɔ nɑ cɑb’ɔ mɔb, k Pɔul ŋmɑnt k set tɑnmɔb tɑɑŋmɑɑtɑ nɑ pɑɑk ŋɑɑn ŋɑk u nuu k tul niib nɑ, ɑ bin ŋmin. Bɑɑ ŋmin yuo nbɑ, k u pɑk nɑn’m Suifnbɑ mɑɑn ni, k yet ɑ: «Cɑnbɑɑnbɑ nɑn n nɑɑ wɑɑs, gbiintl mɑn lin nbɑ k n yɑɑ n wɑnn’i k jiin n mɔnŋ po.» Bɑɑ gbɑt k u piɑk *Suifnbɑ mɑɑn ni nɑ, k b ji ŋmin suon nnɑ. K u piɑk k sɑɑ ɑ: «N tie Suif nilɔ e, ŋɑɑn k b mɑl’n Tɑɑls nbɑ be Siiliisi yɑkl ni, ŋɑɑn k n tɑn ŋmɑnt nilɔ Selusɑɑlenm nnɑ. K n wɑntuɑ din tie Gɑɑmɑɑliɑl e, k u din wɑnt’n t yejɑnm *senni cib cib, k n lek din wɑɑ Yennu nɑn ninmɔnn, nɑn i kul nbɑ wɑɑ’u dinnɑ biɑnŋ nbɑ nɑ. N din muksl bin nbɑ wɑɑ Yonmdɑɑnɔ sɔnu, k biɑ din kpi’b gbɑɑ. N din so jɑb nɑn puob k kuɑnt’b dɑnsɑli. Yennu mɑnntieb yudɑɑnɔ nɑn t yudɑnm kul sɑɑ fit k tien n *siɑlɑ lin nbɑ k n piɑk nɑ pɑɑk nɑn l set tie bɑlmɔni e. N din tɑn sɑɑn gɑɑl kɑdɑɑt b penŋ k tul Suifnbɑ nbɑ be Dɑɑmɑɑs nɑ, ŋɑɑn sɑɑn lenŋ mɑɑ n sɑɑ suol niib nbɑ wɑɑ Yiesu sɔnu nɑ, k jen nɑn’m Selusɑɑlenm nnɑ, k bin dɑt b tubɑ. «Tɔn, k dɑɑsiɑl k n din tɑn sɑɑ k sɑɑ pel Dɑɑmɑɑs yensuuk ni, min tɑɑn tɑɑntl suɑ k yentsɑɑkɑl nyiknt sɑnpɑgbɑnn ni, k sik yent k lint’n ɑ. K n bɑɑ tinŋ ni, k gbɑt kunkɔl yi ɑ: ‹Sɔul, Sɔul, bee k ɑ muksl’n i?› K n jiin k boi mɑɑ: ‹A tie ŋmee?› K u yet’n ɑ: ‹Min, Nɑɑsɑɑlet nilɔ Yiesu e, k ɑ muksl’n mɑnŋ.› Niib nbɑ din ciɑnt’n nɑ ŋɑnin din lɑ yentu nɑ wɑɑ, ŋɑɑn ŋɑnm din k gbɑt kunkɔl nbɑ piɑk nɑn’n nɑ ŋɑnin. «Ŋɑnn e k n boi’ɔ: ‹N Yonmdɑɑnɔ, n sɑɑ tien nlee?› K Yonmdɑɑnɔ yet’n ɑ: ‹Fiit kii sɑɑ Dɑɑmɑɑs, k b sɑɑ sɑɑ wɑnn’ɑ lin nbɑ kul k Yennu nyinn ɑ ɑ tun.› Tɔn, n din juɑn ɑ, k mɑɑn yentu nbɑ din yent k nyɔkt n ninbinɑ ni nɑ pɑɑk, k n tɔk-nɑn-lieb nɑ ji din dɑt n nuu k sɑɑn nɑn’n Dɑɑmɑɑs. «Lenŋ e k jɑsuɑ din be k b yi’u Anɑɑniɑs, k u din tie nipiemɔ, k biɑ din diɑ Muois senni fɑnu, k Suifnbɑ kul ɑ nbɑ be Dɑɑmɑɑs nɑ din tien’ɔ nibɑɑkl bonciɑnn. U din bɑɑl n penŋ k set, k yet’n ɑ: ‹N nɑɑ bik Sɔul, nyuɑntl.› L tɑɑkpɑɑk ni nɑ k n nyuɑnt k lɑ’u. K u yet’n ɑ: ‹Yennu nbɑ tie t yejɑnm Yennu nɑ ponŋ din lukt’ɑ, ɑ fɑn bɑnn u yɑnbuɑtuonɑ, k biɑ lɑ niŋɑnɔ *Klistu, k biɑ gbɑt mɔbonɑ u tiɑɔnŋ mɔb ni, k mɑɑn u luon fin e n tien u siɑlɑɑdɑɑnɔ, kii piɑk kii tien suɑ kul fɑɑ lɑ lin nbɑ k biɑ gbɑt lin nbɑ. L pɑɑk, k ɑ ji kɑl k guu biɑ? Fiit, k wul Yennu nyunwulu k wuul ɑ biit kii yi u sɑnn.› «Tɔn, k n ji din ŋmɑt Selusɑɑlenm, k mɑɑ din be Yennu jɑɑnti ŋɑsɑɑkɑk ni k mei Yennu nɑ k n lɑ yelntu. K n yelntu mɑnŋ ni, k n lɑ Yonmdɑɑnɔ, k u yet’n ɑ: ‹Kɑktl k nyi Selusɑɑlenm yiɑn yiɑn, k mɑɑn Selusɑɑlenmtieb kɑn gɑɑl lin nbɑ k ɑ piɑk k jiin n po nɑ.› K n jiin ɑ: ‹N Yonmdɑɑnɔ, b ponŋ tuu mi nɑn min e tuu lin kuɑ Suifnbɑ jɑɑnti diet ni, k so niib nbɑ tien’ɑ yɑdɑ nɑ, k buo’b kuɑnt’b dɑnsɑli. K biɑ jen ɑ, bɑɑ din yɑɑ bin kpi ɑ siɑlɑɑdɑɑnɔ Etiɑnn nɑ, n mɔnŋ mɔnŋ mun din be lenŋ, k din tɑɑ b po. Min e biɑ din diɑ niib nbɑ din kpii’u nɑ tiɑt.› K Yonmdɑɑnɔ yet’n ɑ: ‹Fin i sɑɑ wɑɑ, min e yɑɑ n tun’ɑ niib nbɑ be bɑnfɔkl k k tie Suifnbɑ nɑ tini ni.› » Tɔn, Pɔul nbɑ piɑk nnɑ mɑnŋ, k niib nɑ lek k gbiint wɑɑ pɑk lin nbɑ mɑnŋ, ŋɑɑn wɑɑ tɑn pɑk juont k b ji k sɑk, k tiɑn tintiɑni sɑnpɑɑpo wɑɑ ɑ: «Juɑ nɑ k ŋɑn nɑn wuu be tingbounŋ nɑ ni. Yinm tɑɑn lek kpin’mɔ mɑn.» K b yikn wuyikni k tiɑn, ŋɑɑn liɑtl b tiɑt k pɑt ŋɑkn, ŋɑɑn wo tɑnt k yɑln sɑnpɑɑpo, b wutuol nbɑ duo nɑ pɑɑk Ŋɑnn e k Luonmtieb sejenm yudɑɑnɔ nɑ tul mɔb ɑ bin jii Pɔul k kuɑ nɑn’ɔ kɑnŋ nɑ ni, ŋɑɑn biɑ yet’b ɑ bin buo’u, k wun bɑnn biit nbɑ k u tun k Suifnbɑ tiɑn tintiɑni mɑnŋ. K b lol’ɔ, ŋɑɑn ji yɑɑ bin buo’u. Ŋɑnn e k u boi sejenm sɑɑkɑbik nbɑ sie lenŋ nɑ ɑ: «Senni cɑb ɑ ɑ buo Luonm nilɔ k suɑ i dɑɑ k bu u buut ii?» Sejenm sɑɑkuɑ mɑnŋ nbɑ gbɑt nnɑ yuo nbɑ, k u sɑɑn b yudɑɑnɔ nɑ penŋ, k sɑɑ yet’ɔ ɑ: «A sɑɑ tien nlee? U mɔk yiikuo nɑn Luonm nilɔ nɑ e.» K sejenm yudɑɑnɔ nɑ mun fiil, k tɑn bɑɑl boi Pɔul ɑ: «Yetl’n, Luonmtieb set tul’ɑ b yiikuo ee?» K Pɔul jiin ɑ: «Nnn.» K sejenm yudɑɑnɔ nɑ yet’ɔ ɑ: «Min ŋɑnin din pɑ likli sɑɑn e wɑɑ k b cɑb’n yiikuo mɑnŋ.» K Pɔul yet’ɔ ɑ: «Ŋɑɑn min ŋɑnin, bɑɑ mɑl’n, b ponŋ cɑb’n yiikuo mɑnŋ ɑ.» L tɑɑkpɑɑk ni nɑ, k sejenm nbɑ bo luon k bin boi Pɔul buot buboit nɑ, ji fuln, k ŋmɑt potuntunɑ jik, k jɑŋmɑɑni ji suol sejenm yudɑɑnɔ nɑ, nɑn wɑɑ lɑ k u lol Pɔul nbɑ k Luonmtieb cɑb’ɔ b yiikuo nɑ jɑlt. Ŋɑnn e k sejenm yudɑɑnɔ mɑnŋ lek yɑbi ɑ wun bɑnn mɑɑn nbɑ k Suifnbɑ tɑɑl Pɔul nɑ pɑɑk cib cib. K l ji tɑn yent sɑn-nyiɑɔk, k u te k b lot’ɔ, ŋɑɑn biɑ tul mɔb ɑ Suifnbɑ mɑnntieb yudɑnm nɑ nɑn b tituk kɑɑnu dɑnm kul ɑ n tikl nɑ, ŋɑɑn te k Pɔul bɑɑl set b tuɑnn po. Ŋɑnn e k Pɔul got tituk kɑɑnu dɑnm mɑnŋ silll, k tɑn yet ɑ: «N nɑɑ wɑɑs, mɑɑ din be biɑnŋ nbɑ k tɑn tuu mɔtɑɑnɑ, n mi nɑn l fɑn nɑn Yennu.» Wɑɑ yet nnɑ, k mɑnntieb yudɑɑnɔ Anɑɑniɑs yet bin nbɑ sie k kpiɑ Pɔul nɑ ɑ bin fɑɑ Pɔul mɔb pɑɑk. K Pɔul yet’ɔ ɑ: «Yennu sɑɑ fɑɑ fin kpinkpɑnni dɑɑnɔ nɑ wɑɑ. A kɑl lenŋ k bu n buut nɑn t *senni nbɑ wɑnt biɑnŋ nbɑ nɑ, ŋɑɑn fɑɑ yɑɑ bin buo’n nɑ, ɑ mɔnŋ biil *senni mɑnŋ ɑ.» K bin nbɑ sie k kpiɑ Pɔul nɑ yet’ɔ ɑ: «A tɑn suki Yennu mɑnntieb yudɑɑnɔ ɔɔ?» K u jiin ɑ: «N nɑɑ wɑɑs, n k mi nɑn u tie mɑnntieb yudɑɑnɔ e. L diɑn Yennu lolkpel kɑdɑɑɔk ni ɑ: ‹L k ŋɑn k ɑ pɑk bɑlbiiuk k jiin ɑ yudɑɑnɔ po.› » Tɔn, Pɔul nbɑ ji bɑnn nɑn tituk kɑɑnu mɑnŋ siɑb tie *Sɑɑdiuseɑnbɑ, k lieb mun tie Fɑɑliisiɑnnbɑ nɑ, k u yet sɑnpɑɑpo wɑɑ niib nɑ ni ɑ: «N nɑɑ wɑɑs, n tie Fɑɑliisiɑn e, Fɑɑliisiɑn bik e tie’n. K n mɔk dindɑnn nɑn kpienm tɑn sɑɑ fiil ɑ. L pɑɑk e te k b bu n buut nɑ.» Wɑɑ pɑk nnɑ mɑnŋ yuo nbɑ, k mɔniɑɔk ji fiil Fɑɑliisiɑnnbɑ nɑn Sɑɑdiuseɑnbɑ mɑnŋ sinsuuk ni, k tintɑɑnu tɑn bɔkt. (Sɑɑdiuseɑnbɑ nɑ yɑɑ ɑ kpienm fiilu kɑɑ, k *mɑlɑkɑɑnbɑ kɑɑ, k sei biɑ kɑɑ, ŋɑɑn Fɑɑliisiɑnnbɑ ŋɑnin tien l kul ɑ yɑdɑ wɑɑ.) Ŋɑnn e k b tintiɑni nɑ ŋɑnmt k do k puki, k *senniwɑntieb nɑ siɑb, bin nbɑ tie Fɑɑliisiɑnnbɑ nɑ, fiil pɑk nɑn ninmɔnn ɑ: «T k lɑ juɑ nɑ biit. Pɑsiɑl siek ɑmi mɑlɑkɑ e pɑk tul’ɔ.» K mɔniɑɔk nɑ din ŋɑnm k fiil bonciɑnn, k sejenm yudɑɑnɔ nɑ mi ɑ b tɑn sɑɑ mɑnn kpet k dɑt Pɔul k pɑt pɑt’ɔ. L pɑɑk, k u tul mɔb ɑ sejenm n sɑɑn k sɑɑ nyinn Pɔul tituk kɑɑnu dɑnm mɑnŋ ni, k sɑɑn nɑn’ɔ kɑnŋ nɑ ni. L puolpo k nyiɑɔk tɑn bɔnn, k Yonmdɑɑnɔ bɑɑl Pɔul penŋ, k tɑn yet’ɔ ɑ: «Ii mɔk pɑlcienn. A ponŋ tul’n *siɑlɑ Selusɑɑlenm ɑ, k l biɑ kpɑɑ tɑlɑs e nɑn k ɑ biɑ tun Luonm duo ni nnɑ.» L din tɑn yent sɑn-nyiɑɔk, k Suifnbɑ tikl, k kɑl lol lol, ŋɑɑn biɑ pol pol, ɑ b kɑn di siɑl i ɑmi k nyu siɑl, sie k bin tɑn kpi Pɔul ɑ. Bin nbɑ din lol lol mɑnŋ din yɑb gɑl nɑn niib piinnɑ nɑ. Ŋɑnn e k b fiil sɑɑn Yennu mɑnntieb yudɑnm nɑn sɑɑkɑb buol k yet’b ɑ: «T pol pol nbɑ pɑɑl e, ɑ t kɑn di siɑl ɑmi k nyu siɑl, sie k tin tɑn kpii Pɔul ɑ. L pɑɑk, yinm nɑn tituk kɑɑnu dɑnm nɑ n tun *tuomi Luonmtieb sejenm yudɑɑnɔ nɑ penŋ, k wun nyinn Pɔul k bɑɑl nɑn’ɔ i buol nnɑ, k lii tie nɑn i luon k i boi’ɔ buboit e, k bɑnn u mɑɑn mɑnŋ po cib cib nɑ. T dɑɑn tien siil, ɑ tin kpi’u k suɑ u dɑɑ k bɑɑl nnɑ» Ŋɑɑn k Pɔul niipuo bijɑ mun gbɑt b lolɑ mɑnŋ, k sɑɑn kɑnŋ nɑ ni, k sɑɑ yet Pɔul l bɑnnu. Pɔul nbɑ gbɑt nnɑ mɑnŋ, k u yiin sejenm sɑɑkɑyenɔ, k tɑn yet’ɔ ɑ: «Jiin nɑɑsimɔ nɑ, k sɑɑn nɑn’ɔ ɑ yudɑɑnɔ penŋ, k mɑɑn u mɔk siɑl e k yɑɑ wun yet’ɔ.» K sejenm sɑɑkɑyenɔ nɑ jii’u k sɑɑn nɑn’ɔ b yudɑɑnɔ nɑ penŋ, k yet’ɔ ɑ: «Pɔul, wun nbɑ k t diɑ’u dɑnsɑlk nɑ, yet ɑ n bɑɑl nɑn nɑɑsimɔ nɑ ɑ penŋ, k mɑɑn u mɔk siɑl e k luon k wun yet’ɑ.» K sejenm yudɑɑnɔ nɑ suol u nuu suon nnɑ, k sɑɑn nɑn’ɔ kpinŋ, k sɑɑ boi’ɔ: «A mɔk bɑl-lɑni e k luon k ɑ yet’n ii?» K u yet’ɔ ɑ: « *Suifnbɑ tɑɑn mɔb k luon k bin won boi’ɑ wonn k ɑ nyinn Pɔul k sik nɑn’ɔ b tituk ni, k lii tie nɑn b luon k bin bo boi’ɔ buboit e, k bɑnn u po cib cib nɑ. Ŋɑɑn ɑ dɑɑ fiin b po, k mɑɑn Suifnbɑ siɑb yɑb, k gɑl nɑn jɑb piinnɑ nɑ wɑɑ, bin nbɑ sɑɑ bɔl k guu ɑ bin kpi’u. B kul ɑ pol pol e, k yɑɑ ɑ b kɑn di jiet ɑmi k nyu siɑl, sie k bin tɑn kpi’u wɑɑ. B kpɑn tien siil e wɑɑ ŋɑɑn ji guu ɑ mɔb.» Ŋɑnn e k sejenm yudɑɑnɔ nɑ yet nɑɑsimɔ nɑ ɑ: «I mi k ɑ yet suɑ nɑn ɑ kumi’n l lɑbɑɑl,» ŋɑɑn te k u ŋmɑt. Ŋɑnn e k sejenm yudɑɑnɔ nɑ yiin u sɑɑkɑb nɑ ni bɑnle k tɑn yet’b ɑ: «Jiin mɑn sejenm kobiinle, nɑn tɑnjɑklɑ piinlole, ŋɑɑn jii kpɑntuɑlɑ kobiinle mun k tien siil k sɑɑn Sesɑɑle. Ii nyi gɔtonm yuo nyiɑɔk nɑ, k sɑɑn. Jiin tɑɑnm k tul Pɔul k wun jɑk, ŋɑɑn tenn tɑɑnlei kii diɑ, kii sɑɑ nɑn’ɔ suon nnɑ, k sɑɑ bɑɑl yudɑɑnɔ Feliiks penŋ, k u dɑɑ lɑɑt dɑnŋ,» k u diɑn kɑdɑɑɔk k tul’b, k l wɑnt ɑ nnɑ: «Min Kluod Liisiɑs e diɑn kɑdɑɑɔk nɑ, k tien Cɑnbɑɑ yudɑɑnɔ Feliiks, n fuont’ɑ. «Suifnbɑ e dɑɑn suol juɑ nɑ, k dɑɑn bo sɑɑ kpi’u wɑɑ, ŋɑɑn k n gbɑt ɑ u tie Luonm nilɔ e. L pɑɑk, k n jii sejenm, k sɑɑn k sɑɑ fɑt’ɔ. N dɑɑn luon k n bɑnn lin nbɑ pɑɑk e k b tɑɑl’ɔ mɑnŋ. L pɑɑk, k n jii’u k bɑɑl nɑn’ɔ b tituk kɑɑnu dɑnm buol, k tɑn bɑnn nɑn l tie b mɔnŋ senni pɑɑk e k b tɑɑl’ɔ mɑnŋ. Ŋɑɑn l k tie bisiɑt kɑɑ k l bo jɑnŋ nɑn u kuun, ɑmi dɑnsɑlkuɑnu. «Ŋɑnn e k b bo kumi’n ɑ Suifnbɑ loln lolɑ ɑ bin kpi’u. L pɑɑk, k n yɑɑ ɑ sejenm n jii’u k bɑɑl ɑ penŋ yiɑn yiɑn, ŋɑɑn k n biɑ yet bin nbɑ tɑɑl’ɔ mɑnŋ, ɑ bin bɑɑl ɑ buol, k tɑn wɑnn’ɑ lin nbɑ k b tɑɑl’ɔ l pɑɑk nɑ.» Ŋɑnn e k sejenm nɑ jii Pɔul nɑn b yudɑɑnɔ nbɑ tul’b mɔb biɑnŋ nbɑ nɑ, k sɑɑ nɑn’ɔ, k sɑɑ bɑɑl duo nbɑ yi Antiipɑɑtliis nɑ, l nyiɑɔk mɑnŋ. K l yent sɑn-nyiɑɔk, k sejenm nbɑ sonm tɑɑtinŋ nɑ ji ŋmɑt kun Selusɑɑlenm, kɑnŋ nɑ ni, ŋɑɑn cɑb tɑnjɑklɑ nɑ ɑ bin sɑɑn nɑn’ɔ. K b jii’u k sɑɑn nɑn’ɔ Sesɑɑle, k sɑɑ jii kɑdɑɑɔk nɑ k tul yudɑɑnɔ Feliiks nɑ, ŋɑɑn biɑ jii Pɔul k kubn’ɔ. K yudɑɑnɔ mɑnŋ gɑɑl kɑdɑɑɔk nɑ k lii, ŋɑɑn boi Pɔul ɑ u nyii tinlɑnŋ e? Wɑɑ bɑnn nɑn Pɔul nyii Siiliisi nɑ, k u yet’ɔ ɑ: «Bin nbɑ tɑɑl’ɔ mɑnŋ i bɑɑl yuo nbɑ, n sɑɑ bu ɑ buut.» Ŋɑnn e k u tul mɔb ɑ guutieb ii diɑ’u kpɑnbɑl *Heluod ŋɑɑk ni. Tɔn, k dɑɑ ŋɑnŋmu tɑn gɑl, k Yennu mɑnntieb yudɑɑnɔ Anɑɑniɑs, nɑn sɑɑkɑb, nɑn lɔyɑ wun nbɑ k b yi’u Teltulus nɑ, tɑn bɑɑl Sesɑɑle k sɑɑn yudɑɑnɔ Feliiks buol ni, k wɑnn’ɔ bɑɑ tɑɑl Pɔul lin nbɑ nɑ pɑɑk. B yiin Pɔul k u bɑɑl b tuɑnn k Teltulus piin k tɑɑl’ɔ k yien ɑ: «Cɑnbɑɑ Feliiks, ɑ pɑɑk e te k t tinŋ nɑ mei, nɑn ɑ minu pɑɑk te k duo nɑ ŋɑn. Siɑl kul po t mɔk pɑlpienn nɑn lin nbɑ nɑ yuo kul ɑ, k t tien’ɑ niipuouk bonciɑnn. N k mɑntk luon k n biil ɑ yuo, ŋɑɑn n bɑln’mɑ e k ɑ di suklu k gbiint t mɑɑn nɑ wɑɑn. «T lɑ k juɑ nɑ biil bonɑ bonciɑnn, k biɑ jen ɑ, k u tuk *Suifnbɑ b sinsuuk ni, tingbounŋ nɑ kul ni. Ŋuɑ e biɑ tie Nɑɑsɑɑlienbɑ yudɑɑnɔ gbɑɑ, k u dɑɑn luon k wun kuɑn jɑknt Yennu jɑɑnti ŋɑsɑɑkɑk ni. Ŋɑnn e te k t suol’ɔ k t dɑɑn bo luon ɑ tin bu u buut e nɑn t *senni nbɑ wɑnt biɑnŋ nbɑ nɑ, ŋɑɑn k sejenm yudɑɑnɔ Liisiɑs bɑɑl, k tɑn kpil t niib nɑn pɑnŋ k fɑt’ɔ t penŋ. L puolpo e k Cɑnbɑɑ Liisiɑs mɑnŋ biɑ tul mɔb ɑ bin nbɑ tɑɑl’ɔ mɑnŋ n bɑɑl ɑ buol nnɑ. A mɔnŋ sɑɑ fit boi’ɔ buboit k lɑ nɑn tɑɑ tɑɑl’ɔ lin nbɑ nɑ pɑɑk, l tie bɑlmɔni e.» Ŋɑnn e k Suifnbɑ wɑnn bɑɑ tɑɑl’ɔ lin nbɑ nɑ pɑɑk nɑ k yɑɑ ɑ l tie mɔni. L yuo nɑ k yudɑɑnɔ nɑ wɑnn Pɔul nuu ɑ wun pɑk. K Pɔul yet ɑ: «N mi nɑn fɑɑ tien tinm Suifnbɑ nɑ bɑlbuulɔ, l dii binɑ bonciɑnn. L pɑɑk, l tien’n pɑlpienn nɑn mɑɑ yɑɑ n pɑk n mɔnŋ mɔnŋ pɑɑk ɑ buol nnɑ. «L i tie k ɑ luon, ɑ sɑɑ boi k bɑnn nɑn l k gɑl nɑn dɑɑ piik nɑn ŋɑnle nnɑ k n dɑɑn duo Selusɑɑlenm, mɑɑ n sɑɑ jiɑnt Yennu. K Suifnbɑ dɑɑn k lɑ k n noi mɔnɔsiɑɔk nɑn suɑ Yennu jɑɑnti ŋɑsɑɑkɑk ni, ɑmi k tiki niib k fiint b wutuol Suifnbɑ jɑɑnti diet ni, ɑmi duo mɑnŋ ni biɑk. B biɑ kɑn fit k wɑnn lin nbɑ k bilsuk kɑɑ, k b tɑɑl’n mɑnŋ. «Min yien’ɑ e nɑn mɑɑ wɑɑ sɔnu nbɑ k Suifnbɑ yien ɑ l sɔnu tie fɑɑk sɔnu nɑ, ŋɑɑn min lek jiɑntl t yejɑnm Yennu e. Lin nbɑ diɑn Muois senni kɑdɑɑt nɑn *Yennu sɔkniinbɑ kɑdɑɑt ni nɑ, n tien l kul ɑ yɑdɑ, k mɔk dindɑnn nɑn niib nɑ mun biɑ mɔk l dindɑnn buolu nnɑ e, nɑn Yennu tɑn sɑɑ fiin bin nbɑ tie niŋɑnm nɑn bin nbɑ tie nibiit kul kuun ni. K l pɑɑk, n yɑbi n mɔnŋ yuo kul, mɑɑ n tun lin nbɑ tuok sɔnu, Yennu nɑn nisɑɑlk buol ni. «Tɔn, mɑɑ din nyii Selusɑɑlenm, l din wei bonciɑnn nɑ, k n ji tɑn ŋmɑt lenŋ mɑɑ n tul n niib likli, ŋɑɑn biɑ pi Yennu piini. Tɔn, sinsinn, mɑɑ dɑɑn ŋɑnm n mɔnŋ k gbenn nɑ, k n dɑɑ be Yennu jɑɑnti ŋɑsɑɑkɑk ni, k dɑɑ pi piini mɑnŋ, k b kuɑ k lɑ’n lenŋ. Niib bonciɑnn kɑɑ dɑɑn ciɑn’n, k fuut mun biɑ dɑɑn kɑɑ. Ŋɑɑn k Suifnbɑ nbɑ dɑɑn nyii Asii tinŋ ni nɑ ŋɑnin dɑɑn be Yennu jɑɑnti ŋɑsɑɑkɑk nɑ ni. L i bo i tie k b lɑ n biit, l bo kpɑɑ tɑlɑs k bin bo bɑɑl k tɑɑl’n. Ŋɑnn i kɑɑ, fɑn ŋɑɑn k niib nbɑ be nnɑ nɑ n wɑnn biit nbɑ k b dɑɑn lɑ k n tun, mɑɑ dɑɑn sie b tituk kɑɑnu ni yuo nbɑ nɑ. B dɑɑn k lɑ n biit, sie bon-yenn kuukuɑ nbɑ k n dɑɑn yet b sinsuuk ni, lin nbɑ k b k luon, k n yɑɑ ɑ: ‹Buut nbɑ k i bu nɑn’n nɑ tie mɑɑ yet yɑɑ ɑ kpienm fiilu be nɑ pɑɑk e.› » Feliiks nbɑ ŋɑnin mi Yiesu weiu po bonŋɑnn nɑ, k u nyik mɑɑn nɑ, ŋɑɑn yɑɑ ɑ: «Sejenm yudɑɑnɔ Liisiɑs i tɑnŋ i bɑɑl yuo nbɑ, n sɑɑ got i mɑɑn mɑnŋ po,» ŋɑɑn yet u sejenm sɑɑkɑyenɔ ɑ u guu Pɔul, k wuu be u yɑmɑ ni, k biɑ cɑb Pɔul yuɑsnbɑ ɑ b i tien’ɔ lin nbɑ k u luon. Ŋɑnn e k dɑɑ ŋɑnŋɑ nnɑ tɑn gɑl, k Feliiks tɑn bɑɑl u buut buol nɑn u ŋɑɑpuo Dlusiil, k u tie Suif, k Feliiks te k b yiin Pɔul k bɑɑl nɑn’ɔ. K ŋuɑ Feliiks gbiintl, k Pɔul piɑk biɑnŋ nbɑ k nilɔ sɑɑ tien Yiesu *Klistu yɑdɑ. Tɔn, Pɔul nbɑ piɑk k wɑnt yentinu nɑn mɔnŋdiɑnu nɑn buut dɑɑl bɑɑlu po yuo nbɑ, k jɑŋmɑɑni ji suol Feliiks, k u yet ɑ: «Mɔtɑɑnɑ, ii dɑɑ kii sɑɑ, ŋɑɑn l i tie k n lɑ yɑɑk, n biɑ sɑɑ ŋɑnm yiin’ɑ.» Feliiks biɑ lek din luon nɑn Pɔul tɑn sɑɑ tul’ɔ likli e. L pɑɑk e te k u din tuu tun k yi Pɔul k piɑk nɑn’ɔ. Tɔn, l din tie nnɑ e k sɑɑ jɑnŋ binɑ ŋɑnle k l puolpo k Polsius Festus mun gɑɑl Feliiks setu k gɑɑl *yudɑnt mɑnŋ. Feliiks din yɑɑ wun penn Suifnbɑ pɑlɑ, k ŋɑɑn k Pɔul be dɑnsɑlk ni. Yudɑɑnɔ Festus nbɑ bɑɑl Sesɑɑle, l dɑɑ ŋɑntɑ dɑɑl k u nyii lenŋ k duo Selusɑɑlenm. Lenŋ e k Yennu mɑnntieb yudɑnm nɑn *Suifnbɑ yudɑnm bɑɑl Festus penŋ k pɑk pɑɑn Pɔul mɑɑn nɑ, ŋɑɑn miɑl Festus ɑ wun te k b pɑlɑ i mei, k te k Pɔul n bɑɑl Selusɑɑlenm, k mɑɑn b din lol lol ɑ bin bɔl k lɑɑ k tɑn kpi Pɔul sɔnu ni. Ŋɑɑn Festus jiin ɑ: «Pɔul be dɑnsɑlk ni Sesɑɑle, k n mɔnŋ mɔnŋ lek sɑɑ ŋmɑt k sɑɑn lenŋ dɑɑ ŋɑnlele nɑ wɑɑ. L pɑɑk, ŋɑɑnt mɑn k i yudɑnm n wei’n, k tin sik Sesɑɑle. L i tie k juɑ nɑ tun bonbiil i e, bin tɑɑl’ɔ.» Festus din dii nɑn dɑɑ ŋɑnniin ɑmi dɑɑ piik nɑ k be nɑn’m, k tɑn fit k ŋmɑt Sesɑɑle, k l yent sɑn-nyiɑɔk ni, k u ji kɑl u buut pɑɑk k te k b nyinn Pɔul k bɑɑl nɑn’ɔ. Pɔul nbɑ bɑɑl yuo nbɑ nɑ, k Suifnbɑ nbɑ nyii Selusɑɑlenm nɑ, fiil k ŋɑɑ lint Pɔul k tɑɑl’ɔ bonbiil, ŋɑɑn biɑ lek k fit wɑnn nɑn l tie mɔni e. Ŋɑnn e k Pɔul pɑk u mɔnŋ mɔnŋ pɑɑk k yet ɑ: «N k tun k biil Suifnbɑ *senni ni. N biɑ k tun k biil Yennu jɑɑnti ŋɑsɑɑkɑk siɑl, ɑmi Luonmtieb kpɑnbɑlɑ yudɑɑnɔ Sesɑɑl.» Ŋɑɑn k Festus luon k wun penn Suifnbɑ pɑlɑ. L pɑɑk, k u boi Pɔul ɑ: «A sɑɑ sɑk k ɑ sɑɑn Selusɑɑlenm, k n sɑɑ bu ɑ buut lenŋ ii?» K Pɔul jiin k yet’ɔ ɑ: «N kpɑn dɑɑ sie Luonm yent kul ni kpɑnbɑlɑ yudɑɑnɔ buut bunbubuol e nɑ. Ŋɑnn i ŋɑn nɑn k ɑ bu n buut. N k tun Suifnbɑ bisiɑt, k ɑ mɔnŋ mɔnŋ mun biɑ mi nnɑ. Mi i bo i mɔk biit i e, k tun lin nbɑ jɑnŋ nɑn kuun, n kɑn yet ɑ n fit nyi kuun ni. Ŋɑɑn l i tie k b tɑɑl’n yɑnn i e, suɑ kɑn fit jii’n k kubn’n b nuu ni. Ŋɑɑn sie k n gɑɑn n mɑɑn mɑnŋ Luonm yent kul kpɑnbɑlɑ yudɑɑnɔ Sesɑɑl buol.» Ŋɑnn e k Festus pɑk nɑn u sɑɑkɑb mɑɑn mɑnŋ po, ŋɑɑn yet Pɔul ɑ: «A gɑɑn ɑ mɑɑn Luonm yent kul kpɑnbɑlɑ yudɑɑnɔ Sesɑɑl buol ɑ. L pɑɑk, ɑ set sɑɑ sɑɑn ɑ.» Dɑɑ ŋɑnle nnɑ nbɑ gɑl, k kpɑnbɑl Agliipɑ nɑn u ŋɑɑpuo Beleniis tɑn bɑɑl Sesɑɑle ɑ bin fuont yudɑɑnɔ Festus. Bɑɑ din sɑɑ tien lenŋ dɑɑ ŋɑnŋɑ nɑ, k Festus tɑn wɑnn kpɑnbɑl nɑ, Pɔul mɑɑn nbɑ tie biɑnŋ nbɑ, k yet ɑ: «Feliiks dɑɑn yɑɑt, ŋɑɑn ŋɑɑn suɑ dɑnsɑlk ni. Mɑɑ dɑɑn sɑɑn Selusɑɑlenm yuo nbɑ nɑ, k Suifnbɑ sɑɑkɑb nɑn jɑɑnti yudɑnm dɑɑn puot’ɔ, k yɑɑ ɑ n bu u mɑɑn mɑnŋ k kpi’u. K n mun jiin k yet’b ɑ: ‹Tinm Luonmtieb yɑɑ buol ni ŋɑnin, l k tie t kɑɑl kɑɑ k tin cɑb ɑ bin kpi wun nbɑ k b tɑɑl’ɔ nɑ k suɑ ŋuɑ nɑn bin nbɑ tɑɑl’ɔ nɑ dɑɑ k tuok lieb k u lɑ yɑɑk k pɑk u mɔnŋ pɑɑk.› «L pɑɑk, b kul ɑ nbɑ dɑɑn tɑn bɑɑl nnɑ yuo nbɑ, n k tɑɑntl, k l yent sɑn-nyiɑɔk ni k n kɑl n buut pɑɑk ŋɑɑn tul mɔb k b kuɑ nɑn Pɔul. «Bin nbɑ tɑɑl’ɔ nɑ fiil k set, ŋɑɑn b k tɑɑl’ɔ nɑn mɑɑ dɑɑn bo duki mi ɑ b sɑɑ tɑɑl’ɔ biɑnŋ nbɑ nɑ. Ŋɑɑn b kpɑn noi mɔniɑɔk k jikt sɑɑ b mɔnŋ mɔnŋ Yenjiɑntu po, nɑn jɑsuɑ nbɑ din kpo, k u sɑnn yi Yiesu nɑ, wun nbɑ k Pɔul lek yien yɑɑ ɑ u be u mɑnfuol ni nɑ. «K l mɑɑn jɑl’n. L pɑɑk, k n boi Pɔul ɑ u sii luon wun sɑɑn Selusɑɑlenm k n sɑɑ bu u mɑɑn lenŋ ii? K u yet ɑ bii diɑ’u dɑnsɑlk ni mɔkmɔk nɑn yuo nbɑ k b tɑn sɑɑ sɑɑn nɑn’ɔ kpɑnbɑlɑ yudɑɑnɔ buol, k wun sɑɑ jiɑl u mɑɑn mɑnŋ. Ŋɑnn e k n tul mɔb mɑɑ bii guu’u, mɔkmɔk nɑn yuo nbɑ k n tɑn sɑɑ fit tun’ɔ kpɑnbɑlɑ yudɑɑnɔ penŋ.» K kpɑnbɑl Agliipɑ yet Festus ɑ: «N mɔnŋ mɔnŋ luon k n gbɑt nilɔ mɑnŋ mɔb ni.» K Festus jiin’ɔ ɑ: «Wonn e wɑɑ k ɑ won sɑɑ gbɑt u mɔb ni.» K l yent sɑn-nyiɑɔk ni, k kpɑnbɑl Agliipɑ nɑn u ŋɑɑpuo Beleniis muk mukt bonciɑnn, k sejenm yudɑnm nɑn duo nɑ yudɑnm wei b puol k bɑɑl kuɑ buut dieok nɑ ni, k yudɑɑnɔ Festus ji tun *tuomi ɑ bin jii Pɔul k bɑɑl nɑn’ɔ nɑ. Ŋɑnn e k Festus yet ɑ: «Kpɑnbɑl Agliipɑ nɑn yinm nbɑ kul be nnɑ nɑ, i lɑ juɑ nɑ nbɑ nɑ wɑɑ! Suifnbɑ nbɑ be nnɑ nɑ nɑn bin nbɑ kul be Selusɑɑlenm bɑɑl n buol nnɑ k tɑɑl’ɔ, k yɑki kpɑyɑkt nɑn’n, k yɑɑ ɑ l k ŋɑn k wuu be. Min ŋɑnin lɑ k u k tun bisiɑt nbɑ k l jɑnŋ nɑn kuun, ŋɑɑn wɑɑ ponŋ yɑɑ ɑ u luon k wun gɑɑn u mɑɑn mɑnŋ kpɑnbɑlɑ yudɑɑnɔ penŋ nɑ e, k n dukn mɑɑ n te k wun sɑɑn. Ŋɑɑn n k mi mɑɑ sɑɑ diɑn kɑdɑɑɔk k tul kpɑnbɑlɑ yudɑɑnɔ nɑ k pɑk’ɔ lin nbɑ k sɑɑn gɑɑn u po. Ŋɑnn e te k n bɑɑl nɑn’ɔ i kul nunm nnɑ, ŋɑɑn l mɑntk kpɑɑ fin kpɑnbɑl Agliipɑ e. L pɑɑk, u buboit fiitu puolpo, n sii mɔk mɑɑn nbɑ k n sɑɑ fit k diɑn, k mɑɑn l kɑɑ pɑɑk nɑn k n te k dɑnsɑlk n sɑɑn kpɑnbɑlɑ yudɑɑnɔ penŋ, ŋɑɑn k n kɑn fit wɑnn wɑɑ biil lin nbɑ.» L yuo nɑ k kpɑnbɑl Agliipɑ yet Pɔul ɑ: «N cɑb’ɑ mɔb. Pɑkn nyinn ɑ mɔnŋ.» K Pɔul tɑnt u nuu sɑnpɑɑpo ɑ wun pɑk k nyinn u mɔnŋ, k yet ɑ: «Kpɑnbɑl Agliipɑ, l mɑnŋ’n bonciɑnn nɑn mɑɑ sie ɑ tuɑnn ni dinnɑ, k yɑɑ n pɑk k nyinn n mɔnŋ, k jikt sɑɑ lin nbɑ kul k *Suifnbɑ tɑɑl’n nɑ po. K biɑ jen ɑ, n mɔk pɑlpienn bonciɑnn nɑn mɑɑ sie ɑ tuɑnn ni nɑ, nɑn fɑɑ tie bɑntuɑ, k mi Suifnbɑ kɑɑl nɑn b mɔniɑɔk nbɑ tie biɑnŋ nbɑ kul nɑ. L pɑɑk, cɑnbɑɑ, n bɑln’mɑ e, di’n suklu k gbiint mɑɑ yɑɑ n pɑk lin nbɑ nɑ. «Mɑɑ fiil n bisn ni wɑɑ nɑn mɔtɑɑnɑ, Suifnbɑ kul ɑ mi mɑɑ din tuu be biɑnŋ nbɑ n tinŋ ni nɑn Selusɑɑlenm biɑk. B ponŋ mi’n k l fɔk. L i tie k b luon, b sɑɑ fit wɑnn nɑn n tuu wɑɑ Fɑɑliisiɑnnbɑ Yenjiɑntu sɔnu nbɑ mɑntk pɑɑl nɑ e. K mɔtɑɑnɑ n ji sie k b bu n buut nɑ, mɑɑ mɔk dindɑnn nɑn mɔsonn nbɑ k Yennu din senn k tul t yejɑnm nɑ. L mɔsonn mɑnŋ pɑɑk e k tinm Suifnbɑ buolu piik nɑn munle tuu mɔk dindɑnn k duki nɑn t tɑn sɑɑ lɑ. L pɑɑk te k b jiɑntl Yennu nɑn ninmɔnn yennu nɑn nyiɑɔk nɑ. Cɑnbɑɑ Agliipɑ, l dindɑnn mɑnŋ pɑɑk e lɑɑ, k Suifnbɑ tɑɑl’n nɑ. Bee k l pɑɑl i pɑɑk nɑn k i tien yɑdɑ ɑ Yennu fiint kpienm i? «Sinsinn, n mɔnŋ mɔnŋ din dukn nɑn l kpɑɑ tɑlɑs e nɑn k n tun bonsiɑl kul k biil Nɑɑsɑɑlet nilɔ Yiesu sɑnn. Nnɑ e k n din tuun Selusɑɑlenm. Yennu mɑnntieb yudɑnm din tuu cɑb’n yiikuo k n so Yennu niib k kuɑnt’b dɑnsɑli. Bɑɑ din tuu bu b mɑɑn k tɑn gbenn k cɑb ɑ bin kpi’b nɑ, n mɔnŋ mun din tuu be bin nbɑ din tuu cɑb ɑ bin kpi’b nɑ kɑnn ni. «Yuo kul n din tuu tun k muksl’b Suifnbɑ jɑɑnti diet kul ni, k din tuu luon k bii noi ɑ b k wɑɑ Yiesu. N din mɑntk donn wutuol bonciɑnn b pɑɑk k l sɑɑ yɑkl ɑ. L pɑɑk, k n biɑ lek din tuu sɑɑ doi nbɑ be tingɑni ni, k sɑɑ muksl’b biɑk.» «Nnɑ e k n din sɑɑ Dɑɑmɑɑs siɑn yuo. Yennu mɑnntieb yudɑnm e din ponŋ cɑb’n yiikuo, k biɑ tul’n mɔb ɑ n tun nnɑ. «Tɔn, Cɑnbɑɑ Agliipɑ, l din tie yensuuk ni e k n be sɔnu pɑɑk k sɑɑ, k tɑn lɑ k yentu nyii sɑnpɑɑpo k yien gɑl yennu k yent nyɔkt k lint min nɑn n tɔk-nɑn-lieb nɑ. K t kul ɑ bɑɑ tinŋ ni, k n gbɑt k kunkɔl pɑk Suifnbɑ mɑɑn ni, k yin ɑ: ‹Sɔul, Sɔul, bee k ɑ muksl’n i? Fɑɑ tuu yien’n nɑ, l pɑɑk e te k l pɑɑl ɑ pɑɑk nɑn bonkobuk nbɑ tuu yien u dɑɑnɔ mɔb k u buo’u lɑnbɑnn nɑ.› «K n jiin k boi ɑ: ‹A tie ŋmee?› K Yonmdɑɑnɔ jiin ɑ: ‹Min, Yiesu e, k ɑ muksl’n mɑnŋ. Ŋɑɑn fiit k set. N nyinn fin e, ɑ ɑ tien n tuontunnɔ. L pɑɑk te k n dɔkt ɑ pɑɑk. Tient niib *siɑlɑ k wɑnn’b fɑɑ lɑ’n biɑnŋ nbɑ dinnɑ, nɑn lin nbɑ k n sii fiitl wɑnt’ɑ yuo nbɑ tɑn sɑɑ bɑɑl. Mɑɑ tɑn sɑɑ tun’ɑ siɑn nbɑ nɑ, n biɑ tɑn sɑɑ nyinn’ɑ dɑɑl ni Suifnbɑ nɑn nilieb nii ni. Fin e tie wun nbɑ sɑɑ yent b nunm po, k bin nyi bunbɔnn ni k kuɑ yentu ni, k biɑ nyinn’b *Sɑɑtɑn yiikuo ni k bin kuɑ Yennu yiikuo ni, ɑ bin lɑ nyikcɑbu k biɑ lɑ yiɑl bin nbɑ tie Yennu niib b yɑdɑ pɑɑk nɑ sinsuuk ni.› » «L pɑɑk, Cɑnbɑɑ Agliipɑ, n din k yet *Yendɔunŋ ni yelntu mɑnŋ. Sinsinn n din sɑɑn Dɑɑmɑɑstieb penŋ e, k l puolpo k n din sɑɑn Selusɑɑlenmtieb nɑn bin nbɑ be Suude tinŋ ni doi kul po nɑn bin nbɑ k tie Suifnbɑ nɑ buol. N din muɑnt ɑ b kul n mɔ kuɑŋɑɑn k lebt binbenŋ kii wɑɑ Yennu sɔnu, kii tuun lin nbɑ wɑnn nɑn b set mɔ kuɑŋɑɑn k lebt binbenŋ nɑn mɔni. «L din tie lin nbɑ nɑ pɑɑk e, k Suifnbɑ din suol’n, mɑɑ dɑɑ din be Yennu jɑɑnti ŋɑsɑɑkɑk ni nɑ, k b din luon k bin kpi’n. Ŋɑɑn lɑɑ jii sɑɑ k tɑn tuu dinnɑ, k Yennu guu’n, k n ji be k sie k muɑntl u mɑɑn k tien tɑli nɑn pɑɑlb kul ɑ nɑ. N k pukn siɑl Muois nɑn *Yennu sɔkniinbɑ nbɑ din wɑnn lin nbɑ k l sɑɑ tien nɑ pɑɑk ɑ *Klistu tɑn sɑɑ fɑbl k kpo, k ŋuɑ e biɑ tɑn sii tie sinsinn dɑɑnɔ nbɑ tɑn sɑɑ fiil kuun ni, k l pɑɑk, k u biɑ tɑn sɑɑ muɑnt k tul Suifnbɑ nɑn bin nbɑ k tie Suifnbɑ mun biɑk, k yien’m mɑɑn nbɑ tɑn sii yentl b nunm po.» Pɔul nbɑ din piɑk ɑ wun nyinn u mɔnŋ nɑ, ŋɑnn e k Festus tiɑn u pɑɑk ŋɑɑn yet ɑ: «Pɔul, ɑ wɑɑt ɑ. A bɑnciɑɔnŋ pɑɑk e te k ɑ wɑɑt.» K Pɔul jiin ɑ: «Cɑnbɑɑ Festus, n k wɑɑt kɑɑ. Mɑɑn nbɑ k n piɑk nɑ, l tie bɑlmɔni e, k biɑ mɔk pɑɑk. Cɑnbɑɑ Agliipɑ, n mɔk pɑlcienn k sɑɑ pɑk k tul’ɑ, k mɑɑn ɑ mɔnŋ mi lin nbɑ nɑ po. N biɑ tien yɑdɑ nɑn mɑɑn mɑnŋ k bɔl ɑ buol, k mɑɑn lin nbɑ din tien mɑnŋ, l din k bɔl kɑɑ. Cɑnbɑɑ Agliipɑ, ɑ tien Yennu sɔkniinbɑ mɑɑn yɑdɑ wɑɑ ɑɑ? N lek mi nɑn ɑ tien yɑdɑ wɑɑ.» K kpɑnbɑl Agliipɑ jiin Pɔul ɑ: «Fin duki mi ɑ ɑ pinpɑɔk mintk nɑ sɑɑ fit dɑk’n k n tien Klistuweilɔ wɑɑ ɑɑ?» K Pɔul jiin ɑ: «N pinpɑɔk i fɔk ɑmi lɑɑ k fɔk, min yɑɑ Yenmiɑlu tie k fin nɑn niib kul ɑ nbɑ gbiintl n mɑɑn nɑ dinnɑ nɑ, n tien Yiesuweilɑ nɑn mɑɑ tie biɑnŋ nbɑ nɑ, ŋɑɑn jɑlt nbɑ nɑ kuukuɑ e k i kii mɔk.» Ŋɑnn e k kpɑnbɑl nɑ nɑn yudɑɑnɔ nɑ nɑn Beleniis, nɑn bin nbɑ kul kɑl lenŋ nɑ kul fiil k nyii. Bɑɑ yɑɑ bin ji yɑt yuo nbɑ, k b ji yien b lieb ɑ: «Juɑ nɑ tɑɑn k tun biit k l jɑnŋ nɑn bin kpi’u, ɑmi k kuɑn’ɔ dɑnsɑlk.» K kpɑnbɑl Agliipɑ yet Festus ɑ: «Juɑ nɑ i dɑɑn bo i kii miɑl ɑ u sɑɑ gɑɑn u mɑɑn nɑ kpɑnbɑlɑ yudɑɑnɔ Sesɑɑl penŋ, t bo sɑɑ fit ŋɑɑ’u wɑɑ.» Bɑɑ ji din tɑn senn ɑ tin sɑɑn Luonm, Itɑɑli tinŋ ni, k b jii Pɔul nɑn dɑnsɑl-lei, k tul’b Luonmtieb sejenm sɑɑkuɑ nnɑ, k u sɑnn yi Sulius, k u be sejenm pɑɑbu nbɑ k b yi Kpɑnbɑlɑ Yudɑɑnɔ Pɑɑbu nɑ. T kuɑ ŋɑlunŋ nbɑ nyii Adlɑmiit, k mɑɑn ŋɑlunŋ mɑnŋ ponŋ tien siil nɑn wun nyi Sesɑɑle k sɑɑn Asii tinŋ ni digbɑnɑ nbɑ kuok mɔkl nɑ kpinŋ. Mɑɑseduɑnn nilɔ Aliistɑɑlk nbɑ nyii Tesɑɑluoniik nɑ din ciɑn’t. L tɑn yent sɑn-nyiɑɔk ni, k t bɑɑl Siidɔn, k sejenm sɑɑkuɑ Sulius din diɑ Pɔul fɑnu, k din cɑb’ɔ ɑ wun sɑɑn k sɑɑ cɑn u yuɑsnbɑ nbɑ be duo mɑnŋ ninŋ nɑ sɑɑɔnŋ. K t tɑn nyii lenŋ k yɑɑt sɑɑ, k wounŋ fukt k dɑ tuokt’t, k t pek kpiɑn Siipl tinŋ po k sɑɑ, k tinŋ mɑnŋ tiɑ wounŋ nɑ k tul’t. Tɑɑ puot mɔkgbenŋl nɑ yuo nbɑ nɑ, k t tɑn pel Siiliisi nɑn Pɑnfiili tini po, k ji bɑɑl Miilɑ, Liisi tinŋ ni nɑ. Lenŋ e k sejenm sɑɑkuɑ nɑ lɑ ŋɑlunŋ nbɑ nyii Aleksɑndli k sɑɑ Itɑɑli tinŋ ni, k u te k t luɑl k kuɑ ŋɑlunŋ mɑnŋ. T din jii dɑɑ bonciɑnn k k fit sɑɑ yiɑn yiɑn, k t din lɑ fɑlɑ k tɑn bɑɑl Siniit duo nɑ tuɑnn. Wounŋ nɑ biɑ lek k nyik k tin sɑɑn tɑɑ sɑɑ siɑn nbɑ po nɑ. L pɑɑk, t din bɔkn, k gɑɑl Klet tinŋ mɑnŋ po e. L po mɑnŋ e k wounŋ din k pɑɑl, k t tɑn kpiɑn nɑn Sɑlmɔne, Klet tinŋ ni, k gɑl. Tɑɑ din sɑɑ nɑ, l din pɑɑl bonciɑnn nɑn tɑɑ tɑn bɑɑl Klet duo nbɑ k b yi Setŋɑnu nɑ. Lenŋ din k fɔk nɑn Lɑɑse duo. T ponŋ din biil yuo bonciɑnn. *Suifnbɑ *mɔlolu dɑgbenŋl ji din ponŋ gɑl ɑ, k yuo nbɑ k ninbɔnŋ tuu tɑn bɑɑl mɔkgbenŋl pɑɑk nɑ tɑn bɑɑl. L pɑɑk, k Pɔul kpɑɑn’m k yet’b ɑ: «N yuɑsnbɑ, n mi nɑn t sɔnu nɑ ni, ninbɔnŋ sɑɑ dɑɑmi’t bonciɑnn, k l k tie tiɑt nbɑ be ŋɑlunŋ nɑ ni, ɑmi ŋɑlunŋ nɑ kuukuɑ pɑɑk kɑɑ, ŋɑɑn nɑn t mɔnŋ mɔnŋ mɑnfuol gbɑɑ sii be ninbɔnŋ mɑnŋ ni.» Ŋɑɑn sejenm sɑɑkuɑ nɑ bɑkɑ din tɑɑn kɑɑ nɑn lin nbɑ k Pɔul pɑk nɑ po, ŋɑɑn fiin wun nbɑ kɑn ŋɑlunŋ nɑn l dɑɑnɔ nɑ po e. Ŋɑɑn ŋɑlunŋ mɑnŋ nbɑ din set duo nbɑ nɑ din k fɑn nɑn tin set lenŋ wonfufuk yuo. L pɑɑk, k b bonciɑnn ji din yɑɑ ɑ bin ŋɑɑn k bin fiil lenŋ k sɑɑn, ɑ pɑsiɑl b tɑn sɑɑ bɑɑl Feniigs. Lenŋ din tie Klet tinŋ duo e, k ŋɑlunŋ sinsetbuol be lenŋ k tuok yenbɑɑpo, k b luon bii be lenŋ wonfufuk yuo. L yuo nɑ k b lɑ gɑnŋ po nɑ wounŋ ji dɑ wɑɑn wɑɑnm-nnɑ, k b ji dukn ɑ pɑsiɑl l sii tie wonŋɑnŋ o, lin nbɑ sɑɑ te k bin fit nyɑnn bɑɑ duki biɑnŋ nbɑ, k l yuo nɑ, k b ji fiil k dɑt kutkpiɑtl nbɑ so ŋɑlunŋ k sent nɑ, k yɑɑn jɑk b sɔnu k sɑɑ, k buɑk Klet mɔk-kpinŋ. L k wei k wonpɑɑluk nbɑ nyi yendopo nɑ fikt tinŋ nɑ ni, k dɑ siik mɔkgbenŋl nɑ ni, k fuɑn ŋɑlunŋ nɑ k l din pɑɑl bonciɑnn nɑn tin fit kɑn’n wounŋ nɑ ni, k t goli k l sɑɑ, k l jii’t, k t sɑɑ bɑɑl k gɑl tinŋ nbɑ k nyun lint’l k b yi’l Kuodɑ nɑ. Tɑɑ gɑɑl kpiɑnt yuo nbɑ k tinbik mɑnŋ guɑl wounŋ nɑ k u bɑlk, k t ji gbɑɑ gbɑɑ sɑɑ guɑl bulgbetl nbɑ tuuk ŋɑlunŋ nɑ pɑɑk nɑ, k b ji dɑt bulgbetl nɑ k kuɑn’n ŋɑlunŋ nɑ ni, ŋɑɑn biɑ lol ŋɑlunŋ nɑ nɑn ŋmiit kenken k lint. B din tiin jɑŋmɑɑni, k mi ɑ b tɑn sɑɑ mɑnn kpet k kpiɑn Liibi tinŋ ni, siɑn nbɑ k nyun k sumi nɑ. Lenŋ din tie ninbɔnŋ buol e. Ŋɑnn e k b sikn ŋɑlunŋ nɑ cincenn k ji ŋɑɑn k wounŋ nɑ yɑɑn jii’b k sɑɑ nɑn’m. Wonpɑɑluk nbɑ mɑntk din dɑ nɑ, k l yent sɑn-nyiɑɔk ni, k b piin k nyinn bonkuɑdkɑlɑ ŋɑlunŋ mɑnŋ ni, k l sɑn-nyɑfɑnnuk jik, k b jii b mɔnŋ nii k nyinn nyinn ŋɑlunŋ tiɑt nbɑ be ŋɑlunŋ mɑnŋ ni nɑ, k lu lu mɔkgbenŋl nɑ ni. L din jii dɑɑ bonciɑnn k sɑnpɑgbɑnɑ dɔkn sɑnpɑɑpo, k t k fit lɑ yennu ɑmi ŋmɑɑbilɑ gbɑɑ, k wounŋ nɑ lek biɑ dɑ nɑn pɑnŋ. Tɑɑ din mɔk dindɑnn k duki mi ɑ t sɑɑ lɑ fielu nɑ, k l kul nyii peb. L din wei bonciɑnn k b k dii, k Pɔul tɑn fiil set k yet ɑ: «N yuɑsnbɑ, i dɑɑn i bo i sɑk n mɔb k biɑl Klet tinŋ ni, l dɑɑn bo sii ŋɑn. I bo tɑn kii lɑɑt ninbɔnŋ k di fɑlɑ nɑ buolu. Ŋɑɑn mɔtɑɑnɑ, ii sɑɑk n mɔb kii mɔk pɑlcienn mɑn. I suɑ nɑn yenɔ kuukuɑ wɑɑ kɑn kpo gbɑɑ, ŋɑlunŋ mɑnŋ e nɔk sɑɑ biil. K mɑɑn Yennu nbɑ k n tie u yuɑ k jiɑntl’ɔ nɑ, u *mɑlɑkɑ won sik n pɑɑk nyiɑɔk nɑ, k tɑn yet’n ɑ: ‹Pɔul, dɑɑ tiin jɑŋmɑɑni. Sie k b tɑn jii’ɑ k sɑɑn nɑn’ɑ kpɑnbɑlɑ yudɑɑnɔ Sesɑɑl nɑ penŋ. A pɑɑk k Yennu yɑɑ wun fiel niib kul nbɑ be nɑn’ɑ ŋɑlunŋ nɑ ni.› L pɑɑk, n yuɑsnbɑ, ii mɔk pɑlcienn mɑn k mɑɑn n tien Yennu yɑdɑ nɑn l kpɑn sii tie nɑn wɑɑ yet’n nɑ e. Ŋɑɑn wounŋ lek sɑɑ tut’t nɑn pɑnŋ, k dɑɑmi’t, k te k tin bɑɑl tinbisiɑk pɑɑk » Lɑɑ din tɑn tien nyɑtunmunɑ piik nɑn ŋɑnnɑ yuo nbɑ, k wounŋ nɑ biɑ lek dɑ k sɑɑ nɑn’t mɔkgbenŋl nbɑ k b yi’l Adliɑtiik nɑ pɑɑk k tɑnsuuni k ŋɑlnkɑnnɑ nɑ ji duki mi ɑ t pel tinŋ e. Ŋɑnn e k b jii bonbikn-kɑl, ɑ bin bikn k lɑɑn l sumi ɑmi l k sumi, k b ji bikn k suɑ k l sunmiu tie miɑtɑ piintɑ nɑn ŋɑnlole. K l yɑnn wɑɑnm-nnɑ, k b yɑɑn bikn, k suɑ k l sunmiu ji tie miɑtɑ piinle nɑn ŋɑnniin. K jɑŋmɑɑni kuɑ’b, k mɑɑn b duki mi ɑ b ŋɑlunŋ nɑ tɑn sɑɑ mɑnn kpet k do tɑnɑ pɑɑk. L pɑɑk, k b ji jii kutkpiɑtɑ ŋɑnnɑ nbɑ so ŋɑlunŋ k sent nɑ, k lu nyun ni, k gɑɑn gɑɑn ŋɑlunŋ mɑnŋ puolpo, ŋɑɑn lek ji miɑl Yennu ɑ lin yent sɑn-nyiɑɔk. Ŋɑnn e k ŋɑlnkɑnnɑ nɑ ji luon bin bot ŋɑɑn nyik ŋɑlunŋ nɑ. K b siknt bulgbetl nɑ nyun pɑɑk ŋɑɑn ji tie sel k l tie nɑn b yɑɑ bin sikn kutkpiɑtɑ ŋɑlunŋ mɑnŋ tuɑnn po e nɑ. Ŋɑɑn k Pɔul yet sejenm sɑɑkuɑ nɑ nɑn sejenm mɑnŋ ɑ: «Ŋɑlunŋ kɑnnɑ nɑ i kɑɑ ŋɑlunŋ nɑ ni, i suɑ kɑn lɑ fielu.» Ŋɑnn e k sejenm nɑ pot pot ŋmiit nbɑ k b lol lol bulgbetl mɑnŋ, ŋɑɑn te k l bɑɑ nyun ni. Tɔn, k l yɑɑn tɑn pel yentu, k Pɔul yet b kul ɑ ɑ bin di jiet, k yet ɑ: «Dinnɑ l puki dɑɑ piik nɑn ŋɑnnɑ e nɑ k i mɔk jɑŋmɑɑni k dɑɑ k dii siɑl. L pɑɑk, n bɑln’mi e k yi lek di jiet, k mɑɑn l tie lin nbɑ sɑɑ te k i fɑt i mɔnŋ e. Nɑn suɑ yukobuk ɑ kɑn bot.» Pɔul nbɑ pɑk nnɑ mɑnŋ, ŋɑɑn jii pɑɑnu k tul Yennu niipuouk b nuni ni, ŋɑɑn ji ŋmit dii. Ŋɑnn e k b pɑlɑ ji cie, k b kul ɑ jɑk jiet nɑ k di. T kul ɑ kɑnn din tie niib kobiinle nɑn piinlole nɑn bɑnluob o. Suɑ kul nbɑ din dii jiet nɑ k jɑnŋ yuo nbɑ, k b jii * ble nbɑ din tenn ŋɑlunŋ mɑnŋ ni nɑ k lu mɔkgbenŋl nɑ ni ɑ ŋɑlunŋ nɑ n fukt. Lɑɑ tɑn yent sɑn-nyiɑɔk, k ŋɑlnkɑnnɑ nɑ lɑ tinŋ nɑ, k ji k bɑnn, ŋɑɑn lɑ lɔtuk nnɑ mɔkgbenŋl nɑ kpinŋ, k l mɔk gbingbɑnŋɑnn k b bikn ɑ l i sɑɑ fit, bin te k ŋɑlunŋ nɑ n sɑɑn kuɑ lenŋ k do gbingbɑnn nɑ. Ŋɑnn e k b ji din pot ŋmiit nɑ, k kutkpiɑtɑ mɑnŋ bɑɑ nyun ni, ŋɑɑn biɑ lot ŋmiit nbɑ lol dɑɑt nbɑ k b diɑ k kɑn ŋɑlunŋ nɑ, k ji fit donn cincenn ŋɑlunŋ nunm po, ɑ wounŋ i dɑ kii sɑɑ nɑn’m. Ŋɑnn e k b tɑn pel gbingbɑnn, k ŋɑlunŋ nɑ tuɑnn po fel tinŋ ni. L tuɑnn po nɑ nbɑ fel tinŋ ni biɑnŋ nbɑ nɑ, k ŋɑlunŋ nɑ gbɑl sɑɑnu, k nyunpɑnɑ ji liɑ l puolpo nɑn pɑnŋ k jint’l. Tɔn, k sejenm nɑ ji luon bin kpi dɑnsɑlkuɑlɑ nɑ kul, ɑ nnɑ e kɑɑ, pɑsiɑl b tɑn sɑɑ mɑnn k duk puot k ciɑl. Ŋɑɑn sejenm mɑnŋ sɑɑkuɑ nɑ ŋɑnin luon k wun fiel Pɔul. L pɑɑk, k u tiɑ’b ɑ b dɑɑ kpi’b, ŋɑɑn tul mɔb ɑ suɑ kul nbɑ mi nyunduku, bin yukl bɑɑ nyun nɑ ni sinsinn k duk puot. Ŋɑɑn bin nbɑ biɑl k k mi duku nɑ n mun suol suol dɑɑt ɑmi ŋɑln-yɑkɑ k wɔb k duk puot. B kul ɑ ji din tien nnɑ e k fiel b mɔnŋ. Tɑɑ din tɑn nyii ninbɔnŋ ni nɑ, k t bɑnn nɑn tinŋ nbɑ k nyun lint nɑ sɑnn yi Mɑɑlt. Lenŋ niib din gɑɑl’t bonŋɑnn. Sɑɑk nbɑ din bɑɑ nɑ, k wɑɑt be bonciɑnn, k b juo mugɑnn k tul’t ɑ t nɑni. K Pɔul tɑn tikl dɑgingɑni bonciɑnn k kpɑb nɑn wɑɑɔk, k tien muu nɑ ni, k muu nɑ tonu tɑn gbɑt wɑɑɔk nɑ, k u nyii k jokl Pɔul nuu. Lenŋ niib nbɑ lɑ k wɑɑɔk nɑ juɑn Pɔul nuu pɑɑk nɑ, k b ji yien b lieb ɑ: «Juɑ nɑ kpɑn tie nikpiiluk o. Wɑɑ lek fɑt u mɔnŋ mɔkgbenŋl nnɑ, ŋɑɑn yennu ŋɑnin kɑn nyik’ɔ k wuu be u mɑnfuol ni.» K Pɔul ŋɑk u nuu, k wɑɑɔk nɑ bɑɑ muu nɑ ni, ŋɑɑn k Pɔul k lɑ dɑnŋ nɑn wɑɑn ɑ. B ji dɑɑn ɑ bin lɑɑn u siɑl po sɑɑ mɔl, ɑmi u tɑn sɑɑ kpil bɑɑ k kpo. Bɑɑ ji dɑɑn dɑɑn k tɑn guo k k lɑ siɑl tien’ɔ nɑ, k b lebt b dudukt mɑnŋ, ŋɑɑn yɑɑ ɑ u tie yensɑu e. Lenŋ biɑ din k fɔk nɑn Publius kpɑɑnt nbɑ be nɑ. Ŋuɑ e biɑ din tie tinŋ mɑnŋ ni bɑt, k u din gɑɑl’t sɑɑɔnŋ k sɑɑ jɑnŋ dɑmunjɑɑ ŋɑntɑ. K Publius bɑɑ mun din duɑ yiɑl gbɑnɑntounŋ nɑn nɔniikɑk ni, k Pɔul tɑn kuɑ u dieok ni, k miɑl Yennu k yii u nii u pɑɑk k te k juɑ nɑ pɑɑk. Wɑɑ din te k u pɑɑk nɑ, k bɑɑt-lieb nbɑ be lenŋ nɑ kul ɑ din bɑɑl, k u tɑn te k b mun pɑɑk. B cɔln’t bonciɑnn, tɑɑ biɑ din tɑn fi ɑ tin kuɑ ŋɑlunŋ yuo nbɑ, k b bɑɑl nɑn lin nbɑ k t tɑn sii luon sɔnu ni, k kuɑn ŋɑlunŋ ni k tul’t. T benu lenŋ ŋmɑɑli ŋɑntɑ puolpo e wɑɑ, k t din kuɑ ŋɑlunŋ nbɑ din nyii Aleksɑndli k din bɑɑl Mɑɑlt k be wonfufuk piinu nɑn gbennu, k b yi ŋɑlunŋ mɑnŋ Yenjɑɑsnbɑ. K l fiil sɑɑ, k yɑɑn tɑn bɑɑl duo nbɑ k b yi Siilɑɑkuus nɑ, k biɑl lenŋ dɑɑ ŋɑntɑ, k tɑn tuɑt gɑl bɑɑl Legio duo ni, k l tɑn yent k wounŋ yɑɑn jɑk dɑnu, k nyii gɑnŋ po k tut’t, k t jii dɑɑ ŋɑnle k yɑɑn bɑɑl Puusɔl duo ni. Lenŋ e k t lɑ Yiesuweisiɑb, k b guɑl’t ɑ tii be nɑn’m k jɑnŋ dɑɑ ŋɑnlole, k t be nɑn’m, k tɑn nyii lenŋ k sɑɑ Luonm duo ni. Yiesuweilɑ nbɑ be Luonm duo ni nɑ nbɑ gbɑt t po nɑ, k b fiil bɑɑl cet’t digbɑnbik nbɑ k b yi’l Apius dɑɑk ni, k siɑb mun cet’t digbɑnbik nbɑ k b yi’l Sɑɑnm-ŋei-Ŋɑntɑ nbɑ kpiɑ Luonm duo nɑ. Pɔul nbɑ lɑ’b yuo nbɑ, k l tul’ɔ pɑlcienn, k u tul Yennu niipuouk. Tɑɑ din bɑɑl Luonm nɑ, k b sɑk cɑb Pɔul k u be u yul po ŋɑɑk, k b te k seje guu’u. Tɔn, l dɑɑ ŋɑntɑ dɑɑl e k Pɔul yiin *Suifnbɑ yudɑnm lɑknu. Bɑɑ tikl lieb yuo nbɑ, k u yet’b ɑ: «N nɑɑ wɑɑs, n lek k tun bonbisiɑl k biil t niib ɑmi t yejɑnm kɑɑl, ŋɑɑn b din suol’n Selusɑɑlenm e k kubn’n Luonmtieb nuu ni. B boi’n buboit, k tɑn luon k bin nyik’n, k mɑɑn b k lɑ mɑɑ tun bonbisiɑl nbɑ jɑnŋ nɑn bin kpi’n. Ŋɑɑn Suifnbɑ nbɑ din k sɑk ɑ bin nyik’n nɑ, l din tie k n gɑɑl mɑɑn Luonm yent kul kpɑnbɑlɑ yudɑɑnɔ penŋ e, ŋɑɑn l din k tie ɑ n luon k n tɑɑl n buolu kɑɑ. «L pɑɑk e te k n yiin’i mɑɑ n tɑn lɑ’i ŋɑɑn yet’i lɑbɑɑl nɑ po. Mɑɑ muɑntl wun nbɑ k Suifnbɑ dɑɑn dindɑnn nɑ po e, ŋɑnn e te k b bɑɑn’n jɑlt nɑ.» K b yet’ɔ yɑɑ: «T k lɑ kɑdɑɑt k l nyii Suude k bɑɑl k l wɑnt ɑ po, ɑmi t suɑ biɑ k nyii lenŋ k bɑɑl nɑn lɑbɑsiɑl, ɑmi suɑ mun biɑ k pɑk bonbisiɑl k sɑɑn gɑɑn ɑ po biɑk. Ŋɑɑn t sii luon k tin bɑnn ɑ dudukt, k mɑɑn t ponŋ mi nɑn siɑl po kul ɑ, niib bonciɑnn piɑk k biil jɑɑnti nbɑ k ɑ jiɑntl nɑ.» L pɑɑk, k b senn dɑɑl, k bin nbɑ bɑɑl din yɑb k cie bin nbɑ din bɑɑl sinsinn nɑ, k b bɑɑl siɑn nbɑ k Pɔul din be nɑ k u kɑt wɑnn’b Yennu nɑɑn po, sɑn-nyiɑɔk ni mɔkmɔk nɑn dɑɑjuouk, k wɑnt’b Yiesu mɑɑn nbɑ be Muois *senni ni nɑn *Yennu sɔkniinbɑ diɑni ni biɑnŋ nbɑ, k yɑbi ɑ wun tunn niib nɑ yɑn k jiin Yiesu po. B siɑb yɑn din tunn k kuɑ Yiesu po, u mɑɑn mɑnŋ pɑɑk ɑ, ŋɑɑn k lieb mun k tien yɑdɑ. K b jɑk lieb nɑn mɔniɑɔk, ŋɑɑn yɑɑ bin yɑt sɑɑn, k mɑɑn Pɔul din ŋɑnm yet mɔbon-yenn kuɑ ɑ: «Yuo nbɑ k Foŋɑnm nbɑ din te k u sɔkni Esɑɑyi nbɑ din pɑk tul t yejɑnm nɑ, u din pɑk mɔni e, k din yet yɑɑ nnɑ: ‹I sɑɑ k sɑɑ yet niib nɑ ɑ i tɑn sɑɑ gbiint k gbiint, ŋɑɑn lek kɑn gbɑt l pɑɑk. ɑ k biɑ tɑn sɑɑ got k got ŋɑɑn biɑ lek kɑn lɑ, k mɑɑn niib nɑ ji tie yɑnkpienɑ e, k kpɑɑ b tubɑ k biɑ mun b ninbinɑ b i kii tien nnɑ, b sɑɑ gbɑt e k bɑnn l pɑɑk k gɑɑl n mɑɑn k wei’n k mɑn fiel’b.› » K Pɔul biɑ ŋɑnm yet ɑ: «Yennu tul u lɑbɑmɑnn ɑ niib nbɑ k tie Suifnbɑ n lɑ fielu e.» Pɔul nbɑ din pɑk nnɑ yuo nbɑ, k Suifnbɑ ji din yɑt sɑɑ, ŋɑɑn jɑk lieb nɑn mɔniɑɔk bonciɑnn. Pɔul nbɑ din be ŋɑɑk nbɑ nɑ ni, u din pɑ likli ŋɑɑk mɑnŋ pɑɑk ŋɑɑn din be lenŋ binɑ ŋɑnle. Nilɔ nbɑ kul tɑn bɑɑl u buol, u tuu gɑɑl’ɔ bonŋɑnn. K u biɑ din tuu muɑntl Yennu nɑɑn po, k biɑ wɑnt niib Yonmdɑɑnɔ Yiesu *Klistu po, k din tuu piɑk u yɑmɑ ni nɑn pɑlcienn. Min Pɔul, wun nbɑ tie Yiesu *Klistu tuontunnɔ, k u yiin’n ɑ n tien u *tuomi k Yennu lukt’n ɑ n muɑnt u lɑbɑmɑnn. Yennu ponŋ din dɔnŋ senn u mɔsonn lɑbɑmɑnn mɑnŋ po e wɑɑ, k u sɔkniinbɑ din muɑntl u mɔsonn mɑnŋ, k l diɑn u tiɑɔnŋ lolkpel kɑdɑɑɔk ni. Lɑbɑmɑnn mɑnŋ wɑnt u Bijɑ po e. Wɑɑ tien nisɑɑlk nɑ, b din mɑl’ɔ k u tie * Dɑɑfiid yɑɑbuonn e. Foŋɑnm din wɑnn nɑn yiikuo nɑn u set tie Yennu Bijɑ u kuun fiilu ni. Ŋuɑ e tie Yonmdɑɑnɔ Yiesu Klistu. Ŋuɑ pɑɑk e k Yennu ninbɑtinu be t pɑɑk k te k t tie u tuomiinbɑ ɑ tin jii u sɑnn k sɑɑn nibuolu kul buol ni, k te k bii sɑɑk u mɔb kii tie’u yɑdɑ, k i mun be dɑɑnsiɑb nbɑ k Yennu yiin’m ɑ bii tie Yiesu Klistuyɑb nɑ kɑnn ni. N dɑ kɑdɑɑɔk nɑ k tien yinm nbɑ be Luonm duo ni, yinm nbɑ k Yennu luon’i k yiin’i ɑ i tien u mɔnŋ niib nɑ. T Bɑɑ Yennu nɑn Yonmdɑɑnɔ Yiesu Klistu i mɔk ninkpɑbɑɔnŋ nɑn’i k biɑ tul’i mɑnu. Sinsinn, n tien Yennu niipuouk, Yiesu Klistu sɑnn ni, i kul ɑ pɑɑk, k mɑɑn tingbounŋ nɑ tieb kul gbiɑ i yɑdɑ po. N wɑɑ Yennu nɑn n pɑl kul, k muɑntl u Bijɑ lɑbɑmɑnn nɑ. Ŋuɑ e tie n siɑlɑɑdɑɑnɔ k mi nɑn yuo kul n duki i kul ɑ po, k mei’ɔ i pɑɑk yuo kul. N mei’ɔ ɑ l i tie u lonm i e l ji kɑn wei k n sɑɑ bɑɑl i buol, k mɑɑn n mɑntk luon k n lɑ’i k fit sonm’i k yin gɑɑl Foŋɑnm piinsiɑl nbɑ sɑɑ te k i mɔk pɑnŋ u sɔnu ni. K biɑ jen ɑ, n luon k mii be i sinsuuk ni ɑ tin cie lieb pɑlɑ, tɑɑ tien yɑdɑ nɑ pɑɑk. N nɑɑ wɑɑs, n luon yin bɑnn nɑn n yɑbl nɑn tɑɑl munŋɑ nɑ wɑɑ, ɑ n bɑɑl k tɑn gɔn’i, ŋɑɑn k siɑl guɑl’n mɔkmɔk nɑn mɔtɑɑnɑ k n k fit gɔn’i ni. N luon k n tuonn n tun siɑl i sinsuuk ni nɑn lɑɑ din tun biɑnŋ nbɑ nilieb sinsuuk ni nɑ. L kpɑɑ tɑlɑs k n sɑɑn niib kul buol ni, bin nbɑ mɔk nin-yentl nɑn bin nbɑ k mɔk nin-yentl, bin nbɑ mi kɑdɑɑɔk nɑn bin nbɑ k mi kɑdɑɑɔk. L pɑɑk, k n ninbinn mɔn bonciɑnn ɑ n muɑnt lɑbɑmɑnn mɑnŋ k tul yinm nbɑ be Luonm duo ni nɑ. Fei k mɔk’n nɑn k n muɑnt lɑbɑmɑnn mɑnŋ, k mɑɑn l tie Yennu yiikuo nbɑ fiel wun nbɑ kul tien yɑdɑ nɑ e. Sinsinn l tie *Suifnbɑ yɑl e, k mun biɑ tie bin nbɑ k tie Suifnbɑ nɑ kul yɑl. Lɑbɑmɑnn mɑnŋ wɑnt biɑnŋ nbɑ k Yennu yet ɑ nilɔ tie niŋɑnɔ u tuɑnn e. L tie yɑdɑ nɑ pɑɑk e. L kul e nɑ, nɑn lɑɑ diɑn Yennu lolkpel kɑdɑɑɔk ni ɑ: «Wun nbɑ tien niŋɑnɔ Yennu buol, u yɑdɑ nɑ pɑɑk, l dɑɑnɔ sii mɔk mɔmɔnm mɑnfuol.» Yennu wɑnn nifosɑɑli ɑ u donn wutuol b pɑɑk, k mɑɑn b tuun biit k k wɑɑ u sɔnu, k b biit sɔni mɑnŋ te k niib k bɑnt u bɑlmɔni. Yennu donn wutuol, k mɑɑn nifosɑɑlk nbɑ sii fit mi lin nbɑ k jiin u po nɑ, ŋɑnn e fiit k be pɑɑnu ni, k mɑɑn ŋuɑ Yennu mɔnŋ mɔnŋ e fiit’l k wɑnn’b. Yuo nbɑ k Yennu din nɑn *dulnyɑ mɔkmɔk nɑn mɔtɑɑnɑ, u nɑɑmi mɑnŋ ni k b bɑnn u ŋɑnt nbɑ k nifosɑɑlk ninbinn k fit lɑɑt nɑ: ŋɑnn e tie u yiikuo nbɑ kɑɑ gbennu, nɑn wɑɑ tie Yennu bɑnnu nbɑ nɑ. L pɑɑk, k b ji k mɔk leku Yennu tuɑnn k sɑɑ yet ɑ b k mi b biit. B mi Yennu, ŋɑɑn b k tien’ɔ bɑɑkl nbɑ k u yen nɑ, k biɑ k tien’ɔ niipuouk. B mɔk jɑt-dudukt, k b dudukt be bunbɔnn ni. B yɑɑ ɑ b mɔk yɑn e, ŋɑɑn tie wɑɑtb. Bɑɑ bo sii jiɑntl Yennu nbɑ kɑɑ gbennu nɑ, b k sɑk, ŋɑɑn jiɑntl pɑtɑ nbɑ k niib nɑn’m k l nɑɑn nifosɑɑli nbɑ sɑɑ fit kpo nɑ, ɑmi nuɑni, ɑmi bonkobt, ɑmi bonfulinkɑ nbɑ fuln tinŋ ni. L pɑɑk, k Yennu nyik’b, ɑ bii tuun biit nbɑ k b pɑlɑ luon, k b dint b mɔnŋ fei b gbɑnɑnt tuonɑ ni nɑn b lieb. B jii lin nbɑ tie bɑlmɔni k jikt sɑɑ Yennu po nɑ k lu, ŋɑɑn sɑk fɑɑk, k lebt k jiɑntl lin nbɑ k Yennu nɑn, ŋɑɑn nyik Yennu mɔnŋ mɔnŋ, wun nbɑ yen pɑku kul mɔkmɔk nɑn yuo nbɑ kɑɑ gbennu. * Amenn. L pɑɑk, k Yennu nyik’b ɑ bii tuun b mɔnŋ lonbiiuk nbɑ mɔk fei, k b puob nyik bii duɑ nɑn jɑb ŋɑɑn ŋmɑt k duɑ nɑn b lieb. Nnɑ e mun k jɑb nyik bii duɑ nɑn puob ŋɑɑn k b niɑɔnŋ be b lieb ni bonciɑnn. Jɑb tie bonsiɑ nbɑ mɔk fei nɑn jɑlieb. L pɑɑk, k b lɑ tubdɑtu b gbɑnɑnt ni k l jɑnŋ nɑn b biit. Nifosɑɑli nbɑ din k luon k bin bɑnn Yennu, l pɑɑk e k Yennu nyik’b nɑn b dudukbiit, k b tuun tuonɑ nbɑ bi bonciɑnn. K biit kul be b ni, k b gbie nɑn biit nɑn niɑnciɑɔnŋ nɑn tonu nɑn nikpinu nɑn kunkɔnɑ nɑn fɑi nɑn dudukbiit, k biɑ tie sɑnjɑɑnjɑnnɑ, k piɑk biil b lieb, k tie Yennu dɑtɑi, k suki b lieb k mɔk gɑluk k dont b mɔnŋ, k biɑ ŋɑmi duki dudukbiit sɔni, k k sɑɑk b bɑɑnbɑ nɑn b nɑɑnbɑ mɔi. B biɑ k mɔk yɑnsiɑn b ni. B k wɑɑ b mɔsonɑ biɑk. B k mɔk lonm nɑn b lieb k biɑ k tiin lieb ninbɑɑɔk. B mi nɑn Yennu sennu wɑnn nɑn bin nbɑ tuun lin nbɑ nɑ buolu, b nyuɑt tie kuun e, ŋɑɑn b lek kpɑn tuun ŋɑnn e, k biɑ tɑɑ bin nbɑ tuun l tuonbuolu nɑ po. L pɑɑk, fin nbɑ bu *ɑ luɑ buut nɑ, suklu kɑɑ ɑ pɑɑk, k mɑɑn fɑɑ bu ɑ luɑ buut nɑ, ɑ mun bu ɑ mɔnŋ mɔnŋ buut e k mɑɑn ɑ mun tuun nnɑ e. T mi nɑn Yennu nbɑ bu bin nbɑ tuun nnɑ nɑ buut nɑ, u buut bunu nɑ tuok. Fin nbɑ tie nifosɑɑlk k wɑnt lieb biit, bɑɑ tuun biɑnŋ nbɑ, ŋɑɑn mun tuun nnɑ nɑ, ɑ duki nɑn Yennu kɑn dɑt ɑ tubl ii? Ami ɑ sɑlkt lonciɑɔnŋ nɑn suklu bonciɑnn nbɑ k Yennu mɔk nɑn’t nɑ ɑmi nlee? A k mi nɑn Yennu mɔk bulcint nɑn’ɑ ɑ wun te k ɑ mɔ kuɑŋɑɑn k lebt binbenŋ ee? Ŋɑɑn ɑ pɑl wɑki k ɑ lek k sɑk nɑn fɑn mɔ kuɑŋɑɑn k lebt binbenŋ nɑ, l pɑɑk, ɑ puki ɑ mɔnŋ fɑlɑ nbɑ k ɑ tɑn sɑɑ lɑ dɑɑl nbɑ k Yennu wutuol nɑ tɑn sɑɑ nyi pɑɑnu, k u tɑn sɑɑ bu niib buut nɑn bɑlmɔni, k tul suɑ kul u tuonɑ nyuɑt nbɑ tie biɑnŋ nbɑ. Bin nbɑ ninbinɑ mɔn nɑn bii tuun tuonŋɑnɑ k lɑ pɑku nɑn bɑɑkl nɑn mɑnfuol nbɑ kɑɑ gbennu nɑ, ŋɑnm e k Yennu sɑɑ tul’b mɑnfuol nbɑ kɑɑ gbennu mɑnŋ. Ŋɑɑn bin nbɑ mɔk kunkɔnɑ, k k sɑk lin nbɑ tie bɑlmɔni nɑ, ŋɑɑn wɑɑ bonbiil sɔnu, ŋɑnm e k Yennu wutuol sɑɑ do b pɑɑk k wun bu b buut. U sɑɑ jii fɑlɑ nɑn muksuk k tul nisɑɑli kul nbɑ tuun biit nɑ. *Suifnbɑ nɑ e sɑɑ lɑ l tubdɑtu sinsinn, k bin nbɑ k tie Suifnbɑ nɑ n juont. Ŋɑɑn Yennu sɑɑ jii pɑku nɑn bɑɑkl nɑn mɑnu k tul bin nbɑ kul tuun bonŋɑnn nɑ. Suifnbɑ sɑɑ gɑl sinsinn, k bin nbɑ k tie Suifnbɑ nɑ n juont, k mɑɑn Yennu k mɔk ningɑnni. Bin nbɑ kul k mi Yennu *senni k tuun biit, b lek sɑɑ kpo b biit tumu nɑ pɑɑk ɑ, ŋɑɑn l k tie bɑɑ k diɑ senni nɑ pɑɑk nɑ kɑɑ. Bin nbɑ kul mɔk Yennu senni nɑ, ŋɑɑn tuun biit, Yennu tɑn sɑɑ jii senni mɑnŋ e k bu nɑn’m. K mɑɑn l k tie ɑ bin nbɑ gbiɑ senni nɑ kɑɑ tie niŋɑnm Yennu buol, ŋɑɑn bin nbɑ set tuun biɑnŋ nbɑ k senni nɑ wɑnn nɑ, ŋɑnm e tie niŋɑnm u buol. Bin nbɑ k tie Suifnbɑ nɑ, b k mɔk senni nɑ, ŋɑɑn b i tuun senni nɑ nbɑ wɑnn biɑnŋ nbɑ nɑn b tiɑɔnŋ yɑn i e, b mɔk b tiɑɔnŋ senni b pɑlɑ ni, nɑn bɑɑ lek k mɔk senni mɑnŋ nɑ. Ŋɑnn e wɑnt nɑn senni nbɑ senn biɑnŋ nbɑ nɑ diɑn b pɑlɑ ni, k b yɑngɑnm mun wɑnt’b lin nbɑ ŋɑn nɑn lin nbɑ k ŋɑn, k mɑɑn yuo nɑn yuo b dudukt tuu tɑn sɑk b tuon-yenɑ nɑn l ŋɑn, ŋɑɑn yosɑu mun b dudukt n biɑ yet b tuonliɑ pɑɑk nɑn l k ŋɑn. Tɔn, l tɑn sii tie nnɑ e dɑɑl mɑnŋ dɑɑl nbɑ k Yennu tɑn sɑɑ te k Yiesu *Klistu n bu nisɑɑli wuol ni dudukt buut, nɑn mɑɑ muɑntl lɑbɑmɑnn mɑnŋ biɑnŋ nbɑ nɑ. Gotl, ɑ yi ɑ mɔnŋ Suif e k mɔk pɑlbifɑɑnu fɑɑ mɔk senni nɑ pɑɑk k yi ɑ mɔnŋ Yennu yuɑ. A mi lin nbɑ k Yennu luon fii tuun k senni wɑnn’ɑ biɑnŋ nbɑ k ɑ sɑɑ lukt lin nbɑ ŋɑn. A tien yɑdɑ nɑn ɑ fit wɑnt juɑni sɔnu, k biɑ tie yentu k tul bin nbɑ be bunbɔnn ni nɑ. A dukn nɑn ɑ fit kpɑɑn jɑtt nɑ kpɑɑni k biɑ tumi wɑɑs k mɑɑn ɑ mi nɑn ɑ mɔk minu kul nɑn bɑlmɔni kul, senni mɑnŋ ni. A wɑnt lieb wɑnnu, ŋɑɑn bee k ɑ k wɑnt ɑ mɔnŋ i? A wɑnt lieb ɑ nɑn-yuk k ŋɑn, ŋɑɑn bee te k fin jɑɑn i? Fin nbɑ wɑnt niib ɑ b dɑɑ tuun boncuncontuonɑ nɑ, ŋɑɑn, ɑ biɑ conm ii? Fin nbɑ sɑlkt pɑtɑ mɑɑn nɑ, ŋɑɑn bee te k ɑ jɑɑn puokpeli ni bonɑ? Fin nbɑ fuɑ bɑlɑ senni mɑnŋ pɑɑk nɑ, ɑ yien senni mɑnŋ k dint Yennu fei, nɑn lɑɑ diɑn Yennu lolkpel kɑdɑɑɔk ni ɑ: «Yinm Suifnbɑ pɑɑk e k bin nbɑ k tie Suifnbɑ nɑ piɑk k suki Yennu.» L i tie k ɑ sɑk Yennu senni, ɑ *punpotu mɔk nyuɑt, ŋɑɑn l i tie k ɑ k sɑk senni nɑ, l nɑɑn nɑn ɑ k pot nɑ e. L pɑɑk, l i tie k wun nbɑ k pot nɑ sɑk senni e, Yennu kɑn gɑɑl’ɔ nɑn wun nbɑ pot nɑ ɑɑ? Wun nbɑ *k pot punn, ŋɑɑn wɑɑ senni nɑ, ŋuɑ e tɑn sɑɑ bu fin nbɑ k sɑɑk senni ŋɑɑn biɑ mɔk senni k l diɑn senni kɑdɑɑɔk ni k biɑ pot punn nɑ buut. Nilɔ nbɑ tie Suif pɑɑnu ni kuukuɑ, u k tie Suif nɑn mɔni. Punpotu nɑn mɔni mun k tie punpotu nbɑ niib goli nɑ kɑɑ. Bɑlmɔni Suif tie wun nbɑ tie Suif u pɑl ni e. Punpotu nɑn mɔni mun be pɑl ni e, k l punpotu tie Foŋɑnm tuonn e k k tie senni nbɑ diɑn senni kɑdɑɑɔk ni nɑ pɑɑk kɑɑ. L dɑɑnɔ pɑku k nyii nisɑɑli buol kɑɑ, l nyii Yennu buol e. L i tie k nilɔ i tie *Suif, l mɔk nyɔlɑnt e? *Punpotu mɔk nyuɑt ii? L mɔk nyuɑt bonciɑnn. Sinsinn tie Yennu din jii u mɔbonɑ nɑ k guun Suifnbɑ e. B siɑb ii dinŋ ii kii wɑɑ Yennu sɔnu nɑn bɑlmɔni e, l wɑnt nɑn Yennu ji kii tie bɑlmɔni dɑɑnɔ bɑɑ k wɑɑ’u nɑ pɑɑk ii? Aɑi, l k wɑnt nnɑ kɑɑ. Niib kul i bo i tie fɑi dɑnm, ŋɑɑn Yennu ŋɑnin tie bɑlmɔnpɑklɔ e, nɑn lɑɑ diɑn Yennu lolkpel kɑdɑɑɔk ni ɑ: «L i tie k ɑ piɑk, b sɑɑ lɑ k ɑ mɔk mɔni, k b i bu ɑ buut, ɑ biɑ di mɔni e.» Ŋɑɑn t biit i fiit wɑnn nɑn Yennu mɔk mɔni, bee k t sɑɑ yet i? Wɑɑ dɑt t tubɑ nɑ pɑɑk, k t ji sɑɑ yet ɑ u k mɔk mɔni ii? (Nisɑɑlk dudukt e k n yet nnɑ.) Aɑi, n kɑn yet nnɑ kɑɑ. Yennu i kii mɔk mɔni, u bo kɑn fit kii bu tingbounŋ nɑ niib buut. Tɔn, n fɑɑk nɑ i wɑnt nɑn Yennu mɔk mɔni k biɑ pukn’ɔ dontl, bee tien k u sɑɑ dɑt n tubl ɑ n tie biitdɑɑnɔ? Bee k t ji kɑn yet ɑ: «Ŋɑɑnt k tin tun biit ɑ bonŋɑnn n tɑn bɑɑl,» ii? Setk nɑn mɔni, nisiɑb luon bin pɑk bonbiil k jiin n po k b tɑɑl’n ɑ n yet nnɑ. Yennu sɑɑ dɑt b tubɑ nɑn lɑɑ jɑnŋ nɑn’m biɑnŋ nbɑ e. K l tie nlee? Tinm nbɑ tie Suifnbɑ nɑ, t binbenŋ cie bin nbɑ k tie Suifnbɑ binbenŋ ɑmi? Aɑi, nɑn wɑɑn ɑ. N ponŋ dɔnŋ wɑnn biɑnŋ nbɑ k Suifnbɑ nɑn bin nbɑ k tie Suifnbɑ nɑ kul be biit yiikuo ni, nɑn lɑɑ diɑn Yennu lolkpel kɑdɑɑɔk ni ɑ: «Suɑ kɑɑ k tie niŋɑnɔ, ɑɑi, nɑn yenɔ kuɑ wɑɑ. Suɑ kɑɑ k mɔk minu, suɑ kɑɑ k kpɑɑn Yennu. Suɑ kul kpet sɔnu nbɑ ŋɑn nɑ wɑɑ, k b kul bot ɑ. Suɑ kɑɑ k tuun bonŋɑnn, suɑ kɑɑ nɑn yenɔ kuɑ wɑɑ gbɑɑ. B mɔi yɑɑ nɑn kɑyɑɑnt nɑ e, k fɑi nyi b jelmɑ ni, k lin nbɑ nyi b mɔi ni tie wɑɑɔk lɔbi e. Mɔpolɑ nɑn mɑbiit kuukuɑ e nyi b mɔi ni. K b tien siil nɑn nikpinu, k siɑn nbɑ kul k b gɑl, pɑlbiil tuu tɑn bɑɑl lenŋ e. B k mi sɔnu nbɑ k b sɑɑ tɔkn k lin bɑɑl nɑn mɑnu. B binbenŋ ni, b k tiin Yennu.» Tɔn, t mi nɑn Yennu *senni i yet lin nbɑ, l yien k tien bin nbɑ be l yiikuo ni. L pɑɑk e k niib kul sii muu b mɔi, k tingbounŋ nɑ tieb kul be Yennu buut ni, k u tuɑnn suɑ kɑɑ k mɔk mɔni. Suɑ kɑɑ k sɑɑ fit tien niŋɑnɔ Yennu tuɑnn, wɑɑ wei senni nɑ nbɑ senn biɑnŋ nbɑ nɑ pɑɑk, ŋɑɑn senni nɑ pɑɑk e te k nifosɑɑlk bɑnn nɑn u tuun biit. Ŋɑɑn mɔtɑɑnɑ, Yennu wɑnn’t bɑnnu nbɑ k u tien’t niŋɑnm u buol ni, k l k tie senni nɑ pɑɑk kɑɑ. Muois senni nɑ nɑn sɔkniinbɑ mɑɑn nɑ wɑnt ŋɑnn e. Yennu te k nisɑɑli kul nbɑ tien Yiesu *Klistu yɑdɑ nɑ e tie niŋɑnm u tuɑnn. L tie nɑ e k tul bin nbɑ kul nbɑ tien Yiesu Klistu yɑdɑ nɑ, k mɑɑn nifosɑɑli kul tun biit k fɔk nɑn dontl nbɑ k Yennu luon wun tul’b nɑ. Yennu ninkpɑbɑɔnŋ pɑɑk e k u yet ɑ b tie niŋɑnm u tuɑnn. L tie piini e, k mɑɑn Yiesu Klistu pɑ b pɑɑk k nyinn’b biit dɑɑbs ni. Yennu e din luon k Yiesu n muɑn u sɔn k lii tie *mɑlunŋ, k mɑlunŋ pɑɑk, k Yiesu n gɑɑl biit nyikcɑbu k tul bin nbɑ kul tien’ɔ yɑdɑ. Nnɑ e k Yennu din luon wun wɑnn bɑnnu nbɑ k u tie bɑlmɔni dɑɑnɔ: siɑn yuo u din mɔk suklu. U din k dɑt nisɑɑli tubɑ b biit pɑɑk. Ŋɑɑn mɔtɑɑnɑ u wɑnn bɑnnu nbɑ k u te k nisɑɑli tie niŋɑnm u tuɑnn k mɑɑn u luon wuu tie bɑlmɔni dɑɑnɔ kii biɑ kii te k nisɑɑli i tie niŋɑnm u tuɑnn bɑɑ tien Yiesu yɑdɑ nɑ pɑɑk. L pɑɑk, siɑl be k t mɔk pɑlbifɑɑnt nɑn’n ii? Aɑi, siɑl kɑɑ. Bee pɑɑk e? L tie bɑɑ wɑɑ senni nbɑ wɑnn lin nbɑ nɑ pɑɑk ee? Aɑi, ŋɑɑn bɑɑ tien yɑdɑ nɑ pɑɑk e k pɑlbifɑɑnt kɑɑ. T duki k yien ɑ nisɑɑlk yɑdɑ tienu pɑɑk e k Yennu yet ɑ u tie niŋɑnɔ, k l k tie ɑ wɑɑ wɑɑ senni nɑ pɑɑk kɑɑ. Yennu tie Suifnbɑ kuukuɑ Yennu ee? U k tie bin nbɑ k tie Suifnbɑ Yennu mun ii? Nnn, u biɑ tie bin nbɑ k tie Suifnbɑ Yennu e, k mɑɑn Yen-yenɔ kuɑ e be k sɑɑ yet ɑ Suifnbɑ nɑn bin nbɑ k tie Suifnbɑ nɑ, k b kul n tien niŋɑnm u tuɑnn b yɑdɑ tienu pɑɑk. Tɔn, tɑɑ yet ɑ nifosɑɑlk lɑɑt fielu u yɑdɑ tienu ni e nɑ, ŋɑnn e te k senni nɑ tie yɑnn ii? Aɑi, l k tie nnɑ kɑɑ. T lek sie senni nɑ po e. Tɔn, t sɑɑ yet ɑ bee k jikt sɑɑ t yejɑ Ablɑɑhɑɑnm po? U din lɑ bee? Wɑɑ din wɑɑ *senni nɑ ii dinŋ ii te k Yennu yet ɑ u tie niŋɑnɔ u tuɑnn, u bo sii mɔk pɑlbifɑɑnt, ŋɑɑn u kii mɔk pɑlbifɑɑnt Yennu tuɑnn. L diɑn nlee Yennu lolkpel kɑdɑɑɔk ni? L yet ɑ: «Ablɑɑhɑɑnm din tien Yennu yɑdɑ e, k u yɑdɑ mɑnŋ pɑɑk e k Yennu tien’ɔ niŋɑnɔ u tuɑnn.» L i tie k nilɔ tuun tuonɑ, u nyuɑt kii tie piini kɑɑ, ŋɑɑn l sii tie pɑɑɔk o. Ŋɑɑn nilɔ nbɑ k tien senni weiu nɑ yɑdɑ, ŋɑɑn tien Yennu yɑdɑ, Yennu sɑɑ jii l dɑɑnɔ k u tie niŋɑnɔ u tuɑnn. L dɑɑnɔ yɑdɑ pɑɑk e k Yennu sɑɑ jii’u. Nnɑ e k Dɑɑfiid din yet ɑ dɑɑnɔ nbɑ k Yennu jii’u k u tie niŋɑnɔ u tuɑnn k l k tie ɑ u tuonɑ pɑɑk kɑɑ, l dɑɑnɔ mɔk pɑlpienn bonciɑnn. Dɑɑfiid din yet ɑ: «Dɑnm nbɑ k Yennu nyik b biit k cɑb’b k piin b biit nɑ, pɑlpienn tie b yɑl e. Dɑɑnɔ nbɑ k Yennu k tiɑn u biit po, pɑlpienn tie u yɑl e.» L pɑlpienn mɑnŋ tie bin nbɑ pot nɑ kuukuɑ yɑl ɑmi ii? Kuo l mun biɑ tie bin nbɑ k pot nɑ yɑl e? T ponŋ bo yet ɑ Ablɑɑhɑɑnm din tien Yennu yɑdɑ e, k u yɑdɑ mɑnŋ pɑɑk e k Yennu jii’u k u tie niŋɑnɔ u tuɑnn. Nlee yuo e k Yennu din jii’u nnɑ? Yennu ponŋ din yi’u niŋɑnɔ e wɑɑ, k u tɑn pot ɑmi u din pot e wɑɑ, k Yennu yi’u niŋɑnɔ? Aɑi, Yennu ponŋ din yi’u niŋɑnɔ e wɑɑ, k u tɑn pot. U din pot ɑ, ŋɑɑn u potu mɑnŋ tie *siɑlɑ nbɑ wɑnt nɑn u yɑdɑ mɑnŋ pɑɑk e k Yennu ponŋ din jii’u k u tie niŋɑnɔ. L puolpo e wɑɑ, k u ji tɑn pot. L pɑɑk, bin nbɑ kul tie Yennu yɑdɑ ŋɑɑn k k pot nɑ, Ablɑɑhɑɑnm tie b bɑɑ e. Bɑɑ tie Yennu yɑdɑ pɑɑk e, k Yennu yi’b niŋɑnm. Ablɑɑhɑɑnm tie bin nbɑ pot nɑ mun yɑɑ bɑɑ e. L k tie ɑ bɑɑ pot nɑ pɑɑk kɑɑ, ŋɑɑn bɑɑ biɑ wɑɑ biɑnŋ nbɑ k t bɑɑ Ablɑɑhɑɑnm din tien Yennu yɑdɑ nɑ, l puolpo e wɑɑ k u din tɑn pot. B yɑdɑ pɑɑk e k Ablɑɑhɑɑnm tie b bɑɑ. Yennu din senn mɔsonn k tul Ablɑɑhɑɑnm nɑn u yɑɑbuonɑ ɑ tingbounŋ nɑ tɑn sii tie b yɑl e. L din k tie nɑn Ablɑɑhɑɑnm nbɑ wɑɑ senni nɑ pɑɑk kɑɑ k Yennu senn mɔsonn mɑnŋ, ŋɑɑn Yennu nbɑ din jii Ablɑɑhɑɑnm k u tie niŋɑnɔ ŋuɑ Yennu tuɑnn u yɑdɑ pɑɑk nɑ, pɑɑk e k Yennu din senn mɔsonn mɑnŋ. L i bo i tie k Yennu mɔsonn nɑ tie bin nbɑ diɑ senni mɑnŋ yɑl i e, ŋɑnn ŋɑnin, nilɔ yɑdɑ bo sii tie yɑnn e, k Yennu mɔsonn bo kii mɔk nyuɑt, k mɑɑn senni e bɑɑt nɑn Yennu wutuol ŋɑɑn senni i kɑɑ, mɔyetuk biɑ sii kɑɑ. L pɑɑk, Yennu mɔsonn sie yɑdɑ nɑ pɑɑk e, ɑ lii tie piini nbɑ nyii Yennu buol kii biɑ kii tie Ablɑɑhɑɑnm yɑɑbuonɑ kul yɑl. L k tie bin nbɑ wɑɑ senni nɑ kuukuɑ yɑl kɑɑ, ŋɑɑn bin nbɑ kul tien Yennu yɑdɑ nɑn Ablɑɑhɑɑnm nbɑ din tien biɑnŋ nbɑ. Ablɑɑhɑɑnm e tie t kul ɑ bɑɑ, nɑn lɑɑ diɑn Yennu lolkpel kɑdɑɑɔk ni k u yet Ablɑɑhɑɑnm ɑ: «N tien’ɑ nibuolu bonciɑnn bɑɑ e.» L pɑɑk, Ablɑɑhɑɑnm tie t bɑɑ e Yennu buol, wun nbɑ k Ablɑɑhɑɑnm tien’ɔ yɑdɑ nɑ. Ŋuɑ e te k kpienm lɑɑt mɑnfuol, k biɑ piɑk lin nbɑ dɑɑ k be po nɑn l set be. Siɑl din k wɑnt nɑn Ablɑɑhɑɑnm ii mɔk dindɑnn ŋɑɑn Ablɑɑhɑɑnm lek ji din mɔk dindɑnn k biɑ tien yɑdɑ, k u din tien nibuolu bonciɑnn bɑɑ, nɑn Yennu nbɑ yet’ɔ ɑ: «A yɑɑbuonɑ tɑn sɑɑ pɔt bonciɑnn.» Ablɑɑhɑɑnm din lɑ nɑn binɑ kobk nɑ, k din mi nɑn u gbɑnɑnt kpet ɑ, k u ŋɑɑpuo Sɑɑlɑ biɑ din tie puokɑnmɑtl e, ŋɑɑn nɑn l kul ɑ gbɑɑ, Ablɑɑhɑɑnm yɑdɑ din k wɑt. U mɑntk din tien Yennu yɑdɑ, u din k mɔk bilsuk nɑn Yennu mɔsonn nɑ, u yɑdɑ e din te k u pɑl cie, k u din piɑk Yennu. U mɑntk din mi k k bils nɑn Yennu mɔk yiikuo k set sɑɑ fit tun lin nbɑ k u senn nɑ. L pɑɑk, k: «Yennu jii’u k u tie niŋɑnɔ,» k mɑɑn u tien Yennu yɑdɑ. Ŋɑɑn Ablɑɑhɑɑnm kuukuɑ pɑɑk kɑɑ k l diɑn Yennu lolkpel kɑdɑɑɔk ni ɑ: «Yennu jii’u k u tie niŋɑnɔ,» ŋɑɑn l diɑn k tien tinm nbɑ k Yennu sɑɑ gɑɑl’t mun k t tie niŋɑnm u tuɑnn, k mɑɑn tɑɑ tien’ɔ yɑdɑ, ŋuɑ Yennu wun nbɑ fiin t Yonmdɑɑnɔ Yiesu kuun ni nɑ. Ŋuɑ e din jii Yiesu k cɑb k u kpo t biit pɑɑk, ŋɑɑn biɑ fiin’ɔ kuun ni, ɑ wun te k tii tie niŋɑnm u tuɑnn. L pɑɑk, Yennu nbɑ jii’t k t tie niŋɑnm u tuɑnn t yɑdɑ pɑɑk nɑ e, k mɑnu ji be tinm nɑn Yennu sinsuuk ni t Yonmdɑɑnɔ Yiesu *Klistu pɑɑk. Yiesu ni e k t fit cɑt nɑkn Yennu k lɑ u ninkpɑbɑɔnŋ t yɑdɑ nɑ pɑɑk k ninkpɑbɑɔnŋ mɑnŋ ni k t be k wɑki. T ji mɔk pɑlpienn nbɑ kɑɑ pɑɑk k mɑɑn t mɔk dindɑnn nɑn t tɑn sii mɔk Yennu *yudɑnt. Nɑn l kul nɑ, t biɑ mɔk pɑlpienn t fɑldinu ni, k mɑɑn t mi nɑn fɑldinu bɑɑt nɑn gbɑnkul e, k gbɑnkul mun bɑɑt nɑn pɑlcienn, k pɑlcienn mɑnŋ mun bɑɑt nɑn dindɑnn, k dindɑnn mɑnŋ ni t tɑn kɑn di fei, k mɑɑn Yennu jii lonm nbɑ k u mɔk nɑ k tien t pɑlɑ ni, Foŋɑnm nbɑ k u tul’t nɑ ni. Setk nɑn mɔni, yuo nbɑ k t dɑɑ din k mɔk sonml nɑ, Klistu din gɑɑl biitdɑnm pɑɑk k kpo, k l tie yuo nbɑ k Yennu din senn e. L pɑɑl nɑn nilɔ n gɑɑl nipiemɔ pɑɑk k kpo, ŋɑɑn pɑsiɑl ɑ sɑɑ lɑ suɑ wun gɑɑl niŋɑnɔ pɑɑk k kpo, ŋɑɑn Yennu wɑnn nɑn u set luon’t bonciɑnn k mɑɑn tɑɑ din tie biitdɑnm nɑ Klistu din gɑɑl t pɑɑk k kpo. L i tie k Yennu yet ɑ t tie niŋɑnm u tuɑnn, Yiesu sɔn pɑɑk i e, nnɑ e mun k Yiesu mun sɑɑ fɑt’t Yennu wutociɑɔnŋ nɑ ni wɑɑ. T din tuu tie Yennu dɑtɑi e, ŋɑɑn mɔtɑɑnɑ jik, l ji ŋɑnm tinm nɑn ŋuɑ sinsuuk ni, bilsuk ji kɑɑ nɑn u sɑɑ fiel’t, k mɑɑn u Bijɑ nɑ kuun pɑɑk, k mɔtɑɑnɑ lɑɑ ŋɑnm tinm nɑn Yennu sinsuuk ni nɑ, u ji sɑɑ fiel’t Yiesu mɑnfuol pɑɑk ɑ. Ŋɑɑn l kul kɑɑ nɑ. T biɑ mɔk pɑlpienn Yennu nbɑ sonm’t bonciɑnn biɑnŋ nbɑ nɑ, k mɑɑn t Yonmdɑɑnɔ Yiesu Klistu ŋɑnm tinm nɑn ŋuɑ sinsuuk ni. Tɔn, niyenɔ kuɑ e din te k biit bɑɑl tingbounŋ nɑ ni, k u biit nɑ pɑɑk e te k kuun be. L pɑɑk e te k kuun kpi niib kul, k mɑɑn nisɑɑlk kul tun biit ɑ. Biit din be tingbounŋ nɑ ni e wɑɑ k Yennu din tɑn tul Muois *senni nɑ, ŋɑɑn senni i kɑɑ, suɑ kɑn tɑɑl nilɔ k yet ɑ u biil senni mɑnŋ. Lɑɑ nyii Adɑn yuo ni k tɑn tuu Muois yuo, k kuun mɔk yiikuo suɑ kul pɑɑk, k kpi dɑnm kul nɑn bin nbɑ din k biil Yennu sennu nɑn Adɑn nbɑ din biil bɑnnu nbɑ nɑ. Tɔn, Adɑn din tie wun nbɑ din yɑɑ wun wei puol nɑ ninnɑɔnŋ o. Ŋɑɑn b bɑnle nɑ k jɑn, k mɑɑn Yennu piini nbɑ k u pi’t yɑnn nɑ k tie nɑn Adɑn biit nɑ kɑɑ. L tie mɔni e nɑn niib bonciɑnn kpo niyenɔ kuɑ biit pɑɑk e, ŋɑɑn Yennu ninkpɑbɑɔnŋ yɑb, k u piini nbɑ k u tien niib bonciɑnn yɑnn k l nyii niyenɔ kuɑ ni, wun nbɑ tie Yiesu Klistu nɑ mun biɑ cie nnɑ. Bɔktu be Yennu piini nɑn niyenɔ kuɑ Adɑn biit sinsuuk ni, k mɑɑn niyenɔ kuɑ Adɑn biit mɑnŋ puolpo e k Yennu din bu u buut k yet ɑ u biit mɑnŋ ŋɑn nɑn tubdɑtu, ŋɑɑn ŋuɑ Yiesu piini nbɑ k u pi’t yɑnn nɑ tie nyikcɑbu, biit bonciɑnn puolpo e. Niyenɔ kuɑ mɑnŋ biit pɑɑk e k kuun kpi suɑ kul, k l nyii niyenɔ mɑnŋ buol e, ŋɑɑn lin nbɑ wei niyenɔ kuɑ Yiesu Klistu tuonn nɑ gɑl nnɑ wɑɑ. Niib kul nbɑ lɑ Yennu ninkpɑbɑɔnŋ nbɑ yɑb, nɑn u piini nbɑ tie nyikcɑbu piini nɑ, b sɑɑ di nɑɑn kii mɔk mɑnfuol Yiesu Klistu pɑɑk. Ŋɑnn e k niyenɔ kuɑ mɑnŋ biit pɑɑk e te k suɑ kul ŋɑn nɑn tubdɑtu, nnɑ e mun, niyenɔ kuɑ tuonŋɑnn pɑɑk e te k Yennu yi niib niŋɑnm k b lɑ mɑnfuol. Niyenɔ kuɑ nbɑ k b yi’u Adɑn nɑ mɔyetuk pɑɑk e te k niib bonciɑnn tien biitdɑnm. L mun tie nnɑ e nɑn niyenɔ kuɑ nbɑ k b yi’u Klistu nɑ mɔsɑku pɑɑk k niib bonciɑnn tien niŋɑnm Yennu buol. Senni nɑ bɑɑl ɑ lin te k biit n yɑbt, ŋɑɑn k biit nbɑ din yɑbt nɑ, Yennu ninkpɑbɑɔnŋ mun din yɑbt k gɑl nnɑ. L pɑɑk, biit nbɑ din te k nisɑɑli kpenn biɑnŋ nbɑ nɑ, nnɑ e mun k Yennu ninkpɑbɑɔnŋ pɑɑk te k u yet ɑ b tie niŋɑnm u buol, k tul’b mɑnfuol nbɑ kɑɑ gbennu, t Yonmdɑɑnɔ Yiesu Klistu pɑɑk. L pɑɑk, t sɑɑ yet nlee? T biɑ sii be t biit tumu ni e k Yennu ninkpɑbɑɔnŋ nɑ n pukn ɑmi ii? Aɑi, ŋɑnn kɑɑ. L tie nɑn t kpo nɑ e, k l pɑɑk biit k mɔk t yiikuo. Nlee k t sɑɑ biɑl biit tumu ni? I k bɑn nɑn bɑɑ din wul’t Yennu nyunwulu, ɑ lin tɑɑn tinm nɑn Yiesu *Klistu nɑ, l wulu biɑ din tɑɑn tinm nɑn Yiesu Klistu u kuun ni ee? L pɑɑk, t din kpo e nɑn Klistu k b lɑkn pii’t nɑn’ɔ Yennu nyunwulu ni, k u Bɑɑ nbɑ din jii u bɑktnɔunŋ yiikuo k fiin’ɔ kuun ni nɑ, nnɑ e k t mun fiil ɑ tii be mɑnfopɑɑnn ni. L i tie k tinm nɑn Klistu lɑkn kpo, nnɑ e biɑk k t biɑ sɑɑ lɑkn k fiil kuun ni nɑn wɑɑ din fiil biɑnŋ nbɑ nɑ. T mi nɑn t binbenkpelk nɑ lɑkn k kpo nɑn Yiesu u dɑpunpunn pɑɑk, ɑ t biit binbenŋ nɑ ji dɑɑ mɔk yiikuo, k t ji kii be biit dɑbs ni, k mɑɑn wun nbɑ kpo nɑ ji k be biit dɑbs ni. L i tie k t kpo nɑn Klistu nɑ, t tien yɑdɑ nɑn t sii be mɑnfuol ni nɑn’ɔ. T mi nɑn Yennu nbɑ din fiin Klistu kuun ni nɑ, k u ji kɑn mi kpo. Kuun k mɔk u yiikuo. Yiesu nbɑ din kpo nɑ, u din kpo t biit pɑɑk e tɑɑl yonm kuɑ, ŋɑɑn wɑɑ ji be u mɑnfuol ni nɑ, u be k tien Yennu e. Nnɑ e mun, i jii i mɔnŋ k lii nɑɑn nɑn i kpo nɑ k biit ji k mɔk i yiikuo, ŋɑɑn, Yiesu Klistu pɑɑk, i ji be i mɑnfuol ni k tien Yennu. L pɑɑk, i dɑɑ cɑbt k biit n yent i gbɑnɑnt nbɑ tɑn sɑɑ kpo wɑɑ nɑ, k te k i tuun gbɑnɑnt mɑnŋ lonm. Dɑɑ cɑbt biit k l mɔk i gbɑnɑnt yɑɑk k tuun nɑn’n bonbiil, ŋɑɑn jiin i mɔnŋ k tul Yennu, ŋɑɑn kii tie nɑn i nyii kuun ni e k kuɑ mɑnfuol ni nɑ. Jiin i gbɑnɑnt kul k tul Yennu ɑ lii tuun lin nbɑ tuok. K mɑɑn, *senni nbɑ ji k yen’i, ŋɑɑn Yennu ninkpɑbɑɔnŋ nɑ e yen’i nɑ, l k ŋɑn k biit i mɔk i yɑɑk. Tɔn, senni nɑ nbɑ k yen’t nɑ, i ŋɑɑn k Yennu ninkpɑbɑɔnŋ nɑ e i yen’t, t sɑɑ biɑl biit tumu ni ɑmi ii? Aɑi, t kɑn tien nnɑ kɑɑ. I mi nɑn l i tie k i jii i mɔnŋ k tul suɑ ɑ yin sɑk u mɔb i e, i set tie wun nbɑ k sɑɑk u mɔb nɑ dɑɑbɑ e. I i sɑk k tuun biit, i tie biit dɑɑbɑ e, k l juontu tie kuun e. Ŋɑɑn i i sɑk Yennu mɔb, i tie mɔsɑkdɑnm e, k ŋɑnn e sɑɑ te k i tie niŋɑnm Yennu buol. Siɑn yuo, biit din mɔk i yiikuo, ŋɑɑn mɔtɑɑnɑ i mɑntk sɑɑk bɑlmɔni wɑnnu nbɑ k b din wɑnt’i nɑ nɑn i pɑlɑ kul. L pɑɑk, k n tien Yennu niipuouk. Mɔtɑɑnɑ i ji k tie biit dɑɑbɑ, ŋɑɑn i ji tie dɑɑbɑ k tul lin nbɑ tuok nɑ tumu e. Yinm nisɑɑli nbɑ k fit bɑnt Yennu mɑɑn yiɑn nɑ pɑɑk e k n yɑɑ n pɑk nisɑɑlk yɑn k wɑnn’i u lɑbɑɑl. Yɑɑ din jii i mɔnŋ k tien biit dɑɑbɑ k l nɔb nɑ, mɔtɑɑnɑ jiin mɑn i mɔnŋ kii tuun yentinu tuonɑ kii tie niŋɑnm. Yɑɑ din tuu tie biit dɑɑbɑ nɑ, i din k tie lin nbɑ tuok nɑ dɑɑbɑ. Tuonɑ nbɑ k i din tuun k l mɔk’i fei mɔtɑɑnɑ nɑ, l din mɔk nyɔlɑnt e k tul’i ni? L tuonbuolu bɑɑt nɑn kuun e. Ŋɑɑn mɔtɑɑnɑ i ji nyii biit dɑɑbs ni wɑɑ k ji tie Yennu dɑɑbɑ e. L pɑɑk, yɑɑ tuun lin nbɑ kul, i gbuot Yennu nunm e k mɔk mɑnfuol nbɑ kɑɑ gbennu. Ŋɑnn e tie i nyuɑt. K mɑɑn biit nyuɑt tie kuun e, ŋɑɑn Yennu piini nbɑ k u tien’t yɑnn nɑ tie mɑnfuol nbɑ kɑɑ gbennu e, t Yonmdɑɑnɔ Yiesu Klistu pɑɑk. N nɑɑ wɑɑs, i kul mi *senni nɑ po, l pɑɑk, i sɑɑ fit suol mɑɑ yɑɑ n yet lin nbɑ nɑ pɑɑk ɑ. Senni nɑ mɔk wun nbɑ be u mɑnfuol ni nɑ kuukuɑ yiikuo e. L tie nɑn puo nɑn u sɔlɔ sinsuuk ni nɑ e. Senni nɑ nuɑk ni, l kpɑɑ tɑlɑs nɑn puo n tɑɑn nɑn u sɔlɔ yuo nbɑ k u sɔlɔ dɑɑ be u mɑnfuol ni, ŋɑɑn u sɔlɔ nɑ i tɑnŋ i kpo yuo nbɑ, senni nɑ ji k mɔk puo nɑ yiikuo. L pɑɑk, l i tie k u kun jɑluɑ k suɑ u sɔlɔ dɑɑ be u mɑnfuol ni, b sii yi’u puocunconn e. Ŋɑɑn l i tie k u sɔlɔ kpo i e, Yennu senni ji k mɔk u yiikuo, k u sɑɑ fit kun jɑluɑ ŋɑɑn k b kɑn fit k yiin’ɔ puocunconn. N nɑɑ wɑɑs, l mun tie nnɑ e k tul’i. I kpo e k senni ji k mɔk i yiikuo, k yɑɑ tie *Klistu gbɑnɑnt bɔkl nɑ, i tie suɑ yɑb e. Mɔtɑɑnɑ, i gɑɑ nɑn nisuɑ e, wun nbɑ fiil kuun ni nɑ, ɑ yii tuun lin nbɑ mɔk nyuɑt k tul Yennu. Yuo nbɑ k t din tuun t gbɑnɑnt lonm nɑ e, senni nɑ te k t mɔk niɑnbiiuk k l tuun t gbɑnɑnt ni. Niɑnbiiuk mɑnŋ e din te k t tuonɑ juontl nɑn kuun. Mɔtɑɑnɑ ŋɑnin, senni nɑ k diɑ’t k mɑɑn t din kpo e k senni nɑ ji k mɔk t yiikuo. L pɑɑk, t ji fit tuun k tien Yennu nɑn binbenpɑɑnŋ nbɑ nyii Foŋɑnm buol ni. T ji k tuun nɑn binbenkpelk nbɑ k senni nbɑ diɑn lolkpel kɑdɑɑɔk ni mɔk l yiikuo nɑ kɑɑ. L pɑɑk, t sɑɑ yet ɑ nlee? T sɑɑ yet ɑ senni tie lin nbɑ bɑɑt nɑn biit ɑmi? T kɑn yet nnɑ kɑɑ. Senni nɑ i bo i kɑɑ, n bo kɑn bɑnn biit nbɑ tie lin nbɑ. Senni nɑ i bo i kii wɑnn’n ɑ: ɑ dɑɑ mɔk niɑɔnŋ nɑn *ɑ luɑ bonɑ, n bo kɑn bɑnn niɑɔnŋ nbɑ tie lin nbɑ, ŋɑɑn k biit lɑ yiikuo sennu mɑnŋ nɑ ni, k te k niɑnbuolu buolu bonciɑnn fiil n pɑl ni. Senni nɑ i bo i kɑɑ, biit bo sii tie bonkpienn e. Yuo nbɑ k n din k mi senni mɑnŋ nɑ, n din mɔk mɑnfuol e, ŋɑɑn mɑɑ tɑn bɑnn sennu mɑnŋ, k biit fiil, k n kpo. Sennu nbɑ bo sɑɑ bɑɑl nɑn mɑnfuol nɑ, k l bɑɑl nɑn kuun, k mɑɑn biit lɑ u sɔnu senni nɑ ni e k kpɑnn’n, k lenŋ e k l kpii’n. Senni nɑ tiɑɔnŋ nyii Yennu buol k sennu mɑnŋ mun nyii Yennu buol e, k tuok k biɑ ŋɑn. Tɔn, l wɑnt nɑn lin nbɑ ŋɑn e kpɑnt tien lin nbɑ bɑɑl nɑn kuun k tul’n ɑmi? Aɑi, l k wɑnt nnɑ kɑɑ. Biit nɑ e jii lin nbɑ ŋɑn nɑ k bɑɑl nɑn kuun tul’n, ɑ lin wɑnn biit nbɑ tie lin nbɑ. Ŋɑnn e, sennu mɑnŋ ni k t ji bɑnn nɑn biit tie bonbilɑnkɑnt e. T mi nɑn senni nyii Yennu buol e, ŋɑɑn min ŋɑnin tie nisɑɑlk e, k b kɔi’n k n tie nɑn biit dɑɑbl nɑ. Lin nbɑ k n tuun nɑ, n k mi l pɑɑk, k mɑɑn n k tuun lin nbɑ k n luon, ŋɑɑn lin nbɑ k n nɑn nɑ, ŋɑnn e k n tuun. Mi i tun lin nbɑ k n bo k luon k n tun nɑ, l wɑnt nɑn n sɑk nɑn senni mɑnŋ ŋɑn e. L pɑɑk, l k tie n mɔnŋ kɑɑ tuun’l, ŋɑɑn l tie biit nbɑ be n ni nɑ. N mi nɑn bonŋɑnsiɑl kɑɑ n ni, k l wɑnt nɑn n biit binbenŋ ni, k mɑɑn n luon k n tun lin nbɑ ŋɑn, ŋɑɑn n kɑn fit k tuun’l. Mɑɑ luon k n tun bonŋɑnn nbɑ nɑ, n k tuun’l, ŋɑɑn bonbiil nbɑ k n k luon k n tun nɑ, ŋɑnn e k n tuun. L i tie k n tuun lin nbɑ k n k luon mii tuun, l ji k tie min kɑɑ tuun, ŋɑɑn l tie biit nbɑ be n ni nɑ e tuun. N lɑ k sennsiɑl be n ni yuo kul ɑ. Mi i yɑɑ n tun lin nbɑ ŋɑn, ŋɑɑn bonbiil biɑ lek tuu be nɑn’n. K mɑɑn n ni, n pɑl pien Yennu senni nɑ pɑɑk, ŋɑɑn k n lɑɑt sennsiɑl nbɑ tuun n gbɑnɑnt ni, k l kɔn nɑn senni nbɑ k n yɑn luon nɑ. Sennliel nbɑ bɑɑt nɑn biit nɑ tuun n gbɑnɑnt ni k lol’n nɑn dɑnsɑlk nɑ. Abɑ, n tie yɑnbɔndɑɑnɔ e. Ŋmee sɑɑ fɑt’n k nyinn’n gbɑnɑnt nbɑ sɑɑ nɑn’n kuun ni nɑ? Yennu yien niipuouk t Yonmdɑɑnɔ Yiesu Klistu ni. L pɑɑk, n mɔnŋ wɑɑ Yennu senni nɑ n yɑn ni, ŋɑɑn k n nifosɑɑlk binbenŋ ni n tie sennliel nbɑ bɑɑt nɑn biit nɑ dɑɑbl e. Tɔn, mɔtɑɑnɑ Yennu kɑn bu k biil bin nbɑ be Yiesu *Klistu ni, k mɑɑn mɑɑ tɑɑn nɑn Yiesu Klistu nɑ, Foŋɑnm *senni nbɑ tien mɑnfuol nɑ, fɑt’n biit nɑn kuun senni ni wɑɑ. Senni nɑ k fit tun nnɑ, k mɑɑn tinm nisɑɑli k fit diɑ’l fɑnu. Ŋɑnn e k Yennu din tun u mɔnŋ Bijɑ tingbounŋ nɑ ni, ɑ wun gɑɑl binbenŋ nbɑ nɑɑn nɑn tinm biitdɑnm binbenŋ nɑ, k tɑn gɑɑl t pɑɑk k kpo t biit pɑɑk. K u kuun mɑnŋ pɑɑk, Yennu biil biit nbɑ be tinm nisɑɑli pɑlɑ ni nɑ pɑnŋ. Yennu din tun nnɑ, ɑ senni nbɑ boi’t lin nbɑ nɑ, n tun t ni, tinm nbɑ ji k tuun t tiɑɔnŋ gbɑnɑnt lonm, ŋɑɑn tuun Foŋɑnm nbɑ luon bɑnnu nbɑ nɑ. Bin nbɑ wɑɑ b tiɑɔnŋ nisɑɑlk binbenŋ nɑ jiit b dudukt k tie binbenŋ mɑnŋ ni, ŋɑɑn bin nbɑ wɑɑ Foŋɑnm nɑ jiit b dudukt k tie lin nbɑ k Foŋɑnm luon nɑ ni e. Dudukt nbɑ wɑɑ nisɑɑlk binbenŋ nbɑ luon lin nbɑ nɑ, juontl nɑn kuun e, ŋɑɑn dudukt nbɑ wɑɑ Foŋɑnm nbɑ luon lin nbɑ nɑ, juontl nɑn mɑnfuol nɑn mɑnu e. Wun nbɑ yɑɑ dudukt be nisɑɑlk binbenŋ yiikuo ni, l dɑɑnɔ tie Yennu dɑtɑɑk, k k sɑɑk Yennu senni, k set kɑn fit k sɑk’l. Bin nbɑ be b nisɑɑlk binbenŋ ni nɑ kɑn fit penn Yennu pɑl. Foŋɑnm i set be i ni, i k wɑɑ nisɑɑlk binbenŋ kɑɑ, ŋɑɑn i wɑɑ Foŋɑnm nbɑ luon lin nbɑ nɑ e. Wun nbɑ k mɔk Klistu Siek mɑnŋ u ni, l dɑɑnɔ k tie Klistuyuɑ. I gbɑnɑnt nbɑ lek sɑɑ kpo biit pɑɑk nɑ, ŋɑɑn Yiesu i be i ni, Foŋɑnm tien’i mɑnfuol, k mɑɑn Yennu yet ɑ i tie niŋɑnm e u buol. L i tie k Yennu Siek nbɑ fiin Yiesu kuun ni nɑ be i ni, ŋuɑ nbɑ fiin Yiesu Klistu kuun ni nɑ sɑɑ tul i gbɑnɑnt nbɑ tɑn sɑɑ kpo wɑɑ nɑ mɑnfuol, Siek nbɑ be i ni nɑ pɑɑk. L pɑɑk, n nɑɑ wɑɑs, l luon k t mɑbn t mɔnŋ k dɑɑ wɑɑ nisɑɑlk binbenŋ nbɑ luon bɑnnu nbɑ. K mɑɑn, l i tie k i wɑɑ nisɑɑlk binbenŋ, i sɑɑ kpo wɑɑ, ŋɑɑn l i tie k i jii Foŋɑnm yiikuo k kpi i gbɑnɑnt biit, i sɑɑ lɑ mɑnfuol ɑ. Bin nbɑ k Foŋɑnm ŋmɑktl’b sɔnu nɑ, ŋɑnm e tie Yennu wɑɑs. K mɑɑn Foŋɑnm nbɑ k u tul’i nɑ, u k te k i tie dɑɑbɑ nɑn jɑŋmɑɑndɑnm kɑɑ, ŋɑɑn u te k i tie Yennu wɑɑs e, k yi Yennu ɑ: «Abbɑ! n Bɑɑ.» Foŋɑnm mɑnŋ e te k t mɔnŋ sei mi bonŋɑnn nɑn t tie Yennu wɑɑs. Tɑɑ set tie u wɑɑs nɑ pɑɑk, t sɑɑ lɑ u bonŋɑnɑ nbɑ k u bil k guun u niib nɑ wɑɑ. T biɑ sɑɑ lɑkn nɑn Klistu k gɑɑl’l ɑ, k mɑɑn l i tie k tinm nɑn Klistu libn dii fɑlɑ, tinm nɑn ŋuɑ mun tɑn sɑɑ libn lɑ *yudɑnt ɑ. N mi nɑn fɑlɑ nbɑ k t di mɔtɑɑnɑ nɑ, l kɑn fit yekn nɑn yudɑnt nbɑ k Yennu sɑɑ wɑnn’t nɑ. *Dulnyɑ bonɑ kul nbɑ k Yennu nɑn nɑ, guu nɑn ninmɔnn e nɑn yuo nbɑ k Yennu tɑn sɑɑ nyinn u wɑɑs yienin ni, k mɑɑn dulnyɑ bonɑ kul din biil ɑ, k ji k mɔk nyuɑt, l din k tun l tiɑɔnŋ kɑɑ, l din tie Yennu lonm e k l tien nnɑ, ŋɑɑn k dindɑnn biɑ lek be dulnyɑ mɑnŋ pɑɑk. Dɑsiɑl be k dulnyɑ bonɑ mɑnŋ tɑn sɑɑ nyi kuun dɑɑbs ni, k kuun ji kɑn diɑ’l, k l mun tɑn sii yen l mɔnŋ nɑn Yennu wɑɑs nbɑ sii yen b mɔnŋ nɑn yudɑnt bɑnnu nbɑ nɑ e. T mi nɑn l yiɑl dulnyɑ bonɑ mɑnŋ k tɑn tuu mɔtɑɑnɑ nɑn puo nbɑ tuu mɔ mɑtyiɑlu k kuli biɑnŋ nbɑ nɑ. L k tie dulnyɑ bonɑ nɑ kuukuɑ kɑɑ k l yiɑl, ŋɑɑn tinm nbɑ mɔk Foŋɑnm nbɑ tie Yennu sinsinn piini nɑ mun kuli e t pɑlɑ ni, k guu yuo nbɑ k Yennu tɑn sɑɑ te k t tien u wɑɑs, k te k t gbɑnɑnt n nyi dɑɑbs ni. Tɑɑ lɑ fielu nɑ e k t mɔk dindɑnn nɑ. Tɔn, nilɔ i lɑ lin nbɑ k u bo mɔk dindɑnn l pɑɑk nɑ, ŋɑnn ŋɑnin, l ji k tie dindɑnn. Ŋmee ji sii mɔk dindɑnn nɑn lin nbɑ k u ponŋ lɑ’l pɑɑk i? Ŋɑɑn t i mɔk dindɑnn nɑn lin nbɑ k t k lɑɑt pɑɑk, ŋɑnn ŋɑnin, t ji tuu guu nɑn suklu e. Nnɑ e mun k Foŋɑnm nɑ bɑɑl ɑ wun sonm tinm nbɑ k mɔk pɑnŋ nɑ k mɑɑn t k mi biɑnŋ nbɑ k t sii mei Yennu. Ŋɑɑn Foŋɑnm mɔnŋ e mei Yennu k tien’t k kuli bɑnnu nbɑ k t mɔbonɑ kɑn fit wɑnn l pɑɑk. K Yennu nbɑ lɑɑt nisɑɑlk pɑl ni mi Foŋɑnm nɑ dudukt nbɑ tie, k mɑɑn Foŋɑnm nɑ mei Yennu u tiɑɔnŋ niib pɑɑk, k l wɑɑ nɑn ŋuɑ Yennu nbɑ luon biɑnŋ nbɑ nɑ. Bin nbɑ k Yennu yiin’m nɑ, u mɔk lin nbɑ pɑɑk k u yinm e, k b mɔk lonm nɑn’ɔ, k t mi nɑn lin nbɑ kul tuun nɑ, u te k l tien bonŋɑnn k tien ŋɑnm e. U ponŋ din senn nɑn bin nbɑ k u lukt’b nɑ, ɑ bii tie nɑn u Bijɑ nɑ, k u Bijɑ nɑ n tien Bikpelk, wɑɑs bonciɑnn sinsuuk ni. K Yennu yiin bin nbɑ k u senn nɑ, k bin nbɑ k u yiin’m nɑ k u yet ɑ b tie niŋɑnm u buol, k bin nbɑ k u yet ɑ b tie niŋɑnm u buol nɑ, k u donn’b. T i got lin nbɑ nɑ kul, t sɑɑ yet ɑ nlee? L i tie k Yennu be t po, ŋmee ji be k sɑɑ biil’t i? Yennu nbɑ k minn’t u mɔnŋ Bijɑ nɑ, ŋɑɑn jii’u k tul t kul nɑ, nlee k u ji kɑn tul’t lin nbɑ kul biɑl i? Ŋmee sɑɑ tɑɑl bin nbɑ k Yennu lukt’b nɑ? Ŋuɑ Yennu e yet ɑ b tie niŋɑnm u buol. Ŋmee be k sɑɑ bu b buut k biil’b i? Suɑ kɑɑ, k mɑɑn Yiesu Klistu nbɑ din kpo k fiil kuun ni k biɑ be Yennu niidiitu po k tie t sindɑntinnɔ nɑ. Ŋmee sɑɑ fit nyinn’t Yiesu Klistu lonm ni? T fɑlɑ ɑmi mɑɑn ɑmi muksuk ɑmi kon ɑmi nɑmu ɑmi bonbiil ɑmi kuun e? Aɑi. L tie nɑn lɑɑ diɑn biɑnŋ nbɑ Yennu lolkpel kɑdɑɑɔk ni nɑ ɑ: «A pɑɑk e k t be kuun fɑlɑ ni sɑn-nyiɑɔk ni wɑɑ k tɑn tuu dɑɑjuouk, k t tie nɑn pei nbɑ k b tuu tie siil ɑ bin kpi’b nɑ e.» Ŋɑɑn bonɑ kul ni t mɔk nyɑnnu kul, wun nbɑ mɔk lonm nɑn’t nɑ pɑɑk. K mɑɑn, n mi fɑnu nɑn siɑl kɑɑ k sɑɑ fit bɔkt tinm nɑn Klistu lonm, kuun ɑmi mɑnfuol ɑmi *mɑlɑkɑɑnbɑ ɑmi nɑlnbiit ɑmi lin nbɑ tie mɔtɑɑnɑ ɑmi lin nbɑ tɑn sɑɑ tien ɑmi lin nbɑ be sɑnpɑɑpo ɑmi tinpuɑl ni ɑmi. Siɑl kɑɑ nɑɔnŋ kul ni k sɑɑ fit bɔkt tinm nɑn Yennu lonm nbɑ k t lɑ t Yonmdɑɑnɔ Yiesu Klistu ni nɑ. N piɑk bɑlmɔni e. N tie Klistuyuɑ e, n k fɑ fɑɑk. Foŋɑnm e ŋmɑktl n *dudukt k u tie *siɑlɑ nɑn n piɑk mɔni. N mɔk pɑlbiil bonciɑnn k l yiɑl’n yuo kul, n mɔnŋ nɑɑ wɑɑs nbɑ tie n buolu nɑ pɑɑk. L i bo i sɑɑ fit k n set n niib pɑɑk k Yennu n biil’n k bɔkt min nɑn *Klistu, n bo sɑɑ sɑk nnɑ wɑɑ. Ŋɑnm e tie Islɑɑeltieb, k Yennu din tien’m u wɑɑs, k din be nɑn’m nɑn *yudɑnt, k tul’b lolɑ, k tul’b *senni, k tul’b jɑɑnti, k biɑ tul’b mɔsonɑ. B yejɑnm din tie nijɑɑnɑ e k Klistu nbɑ din kpɑnt nisɑɑlk nɑ, u din tie b buolu ni yenɔ e. Ŋuɑ e tie Yennu nbɑ yen bont kul nɑ, u sɑɑ lɑ pɑku k l kii mɔk gbennu. * Amenn. N k yien ɑ Yennu mɔsonn nɑ ji kɑn tun kɑɑ, k mɑɑn Islɑɑel yɑɑbuonɑ kul kɑɑ tie Islɑɑeltieb nɑn bɑlmɔni. Ablɑɑhɑɑnm yɑɑbuonɑ kul kɑɑ mun tie u yɑɑbuonɑ nɑn mɔni, k mɑɑn Yennu din yet Ablɑɑhɑɑnm ɑ: «Isɑɑk buolu tɑn sii tie ɑ yɑɑbuonɑ e.» L pɑɑk, bin nbɑ k Ablɑɑhɑɑnm mɑl’b nifosɑɑlk mɑɑlu nɑ k tie Yennu wɑɑs, ŋɑɑn bin nbɑ tie Yennu mɔsonn mɑɑlu wɑɑs nɑ, ŋɑnm e set tie Ablɑɑhɑɑnm wɑɑs nɑn mɔni. Yennu mɔsonn nɑ din tie ɑ: «Yuo nbɑ k n tɑn sɑɑ jen nɑ, l yuo e k Sɑɑlɑ sɑɑ mɑl bonjɑk.» Ŋɑɑn l kul kɑɑ nɑ. T yɑɑ Lebekɑ din mɑl wɑɑs bɑnle k b tɑɑ bɑɑ, wun nbɑ tie t yejɑ Isɑɑk. L tie nɑn lɑɑ diɑn Yennu lolkpel kɑdɑɑɔk ni ɑ: «N din mɔk lonm nɑn Sɑɑkɔb ŋɑɑn nɑn Esɑɑu.» K t ji sɑɑ yet ɑ bee? T sɑɑ yet ɑ Yennu k tun lin nbɑ tuok ɑmi? Aɑi, t kɑn yet nnɑ kɑɑ. Yennu din yet Muois ɑ: «Bin nbɑ k n luon k n tin’m ninbɑɑɔk nɑ, ŋɑnm e k n sɑɑ tin’m ninbɑɑɔk. Bin nbɑ k n luon k mii mɔk lonm nɑn suklu b pɑɑk nɑ, ŋɑnm e k n sii mɔk lonm nɑn suklu b pɑɑk.» L pɑɑk, l k tie nisɑɑlk nbɑ luon lin nbɑ ɑmi u tuonɑ pɑɑk kɑɑ, ŋɑɑn l tie Yennu ninbɑɑɔk pɑɑk e. L diɑn Yennu lolkpel kɑdɑɑɔk ni k tul Fɑɑlɑɑɔn ɑ: «Min Yennu dinn’ɑ nɑɑn lin nbɑ nɑ pɑɑk e, ɑ n jii’ɑ k wɑnn’ɑ n yiikuo, k te k n sɑnn n muɑnt lin tingbounŋ nɑ kul.» L pɑɑk, bin nbɑ k Yennu luon k wun tin’m ninbɑɑɔk nɑ, ŋɑnm e k u tiin’m ninbɑɑɔk, k biɑ tien siɑb nikɑngbɑtɑ nɑn wɑɑ luon biɑnŋ nbɑ. Tɔn, pɑsiɑl k i yenɔ n boi’n ɑ: «L i tie nnɑ i e, nlee k Yennu lɑɑt nisɑɑlk biit i? Ŋmee sɑɑ fit k yet lin nbɑ k Yennu senn i?» Ŋɑɑn n yuɑk, ɑ tie ŋmee k sɑɑ pɑk jiin Yennu? Bobl kɑn fit boi bobmɑɑlɔ ɑ: «Bee k ɑ mɑɑ’n k n tie nnɑ?» Bobmɑɑlɔ mɔk yiikuo k sɑɑ jii yɔuk bul k mɑɑ bobl nbɑ ŋɑn k tul kpɑnbɑl nɑn bobl nbɑ tie tɑlɑs-dɑnm yɑl. Tɔn, Yennu din tun k luon wun wɑnn u wutuol k niib kul ɑ n bɑnn u yiikuo. Ŋɑɑn u din mɔk suklu nɑn bin nbɑ k u wutuol sɑɑ bɑɑl b pɑɑk k l bo jɑnŋ nɑn wun biil’b nɑ. Yennu din luon wun wɑnn’t u yudɑnt nbɑ yɑb bɑnnu nbɑ, tinm nbɑ k u tin’t ninbɑɑɔk nɑ, tinm nbɑ k u ponŋ din lukt’t ɑ tin gɑɑl u yudɑnt nɑ. Tinm e tie bin nbɑ k u din yiin’t nɑ, k u k yiin’t *Suifnbɑ sinsuuk ni kuukuɑ kɑɑ, ŋɑɑn bin nbɑ k tie Suifnbɑ mun biɑ pukn lenŋ. L tie nɑn Ose nbɑ din diɑn Yennu lolkpel kɑdɑɑɔk ni biɑnŋ nbɑ, ɑ Yennu yet ɑ: «Niib nbɑ din k tie n niib nɑ, ŋɑnm e k n sɑɑ jii’b k bii tie n niib, k buolu nbɑ k n din k luon nɑ, ŋɑnm e k n sɑɑ yiin’m buolu nbɑ k n luon’m. k siɑn nbɑ k b din yet’b ɑ b k tie n niib nɑ, lenŋ e biɑk k b sɑɑ yiin’m: ‹Yennu nbɑ fo nɑ wɑɑs.› » *Yennu sɔkni Esɑɑyi din yikn sɑnpɑɑpo k wɑnn Islɑɑeltieb po k yet ɑ: «Islɑɑeltieb i lek i yɑb nɑn mɔkgbenŋl tɑnbiini nɑ, ŋɑɑn b wɑɑnm-nnɑ e sɑɑ lɑ fielu, k mɑɑn Yonmdɑɑnɔ sɑɑ tien k tul tingbounŋ nɑ niib nɑn wɑɑ yet biɑnŋ nbɑ nɑ yiɑn yiɑn k gbenn.» L tie nɑn Esɑɑyi nbɑ ponŋ din yet nɑ e ɑ: «T Yɑbnt Yonmdɑɑnɔ i bo i kii ten’t wɑɑs, l bo tɑn sɑɑ tun k tul’t nɑn lɑɑ din tun k tul Suodonm duo ni niib biɑnŋ nbɑ nɑ, k t bo sii tie nɑn Guomuɔl duo ni niib nɑ e.» Tɔn, t sɑɑ yet nlee? Bin nbɑ k tie Suifnbɑ nɑ din k kol ɑ bin tien niŋɑnm Yennu buol, ŋɑɑn k Yennu yet ɑ b tie niŋɑnm u tuɑnn, b yɑdɑ nɑ pɑɑk, ŋɑɑn Islɑɑeltieb nbɑ din kol ɑ bin lɑ senni nbɑ sɑɑ te k Yennu yet ɑ b tie niŋɑnm u tuɑnn nɑ, k b ji kɔnŋ’l. Bee k b din kɔnŋ i? B din k kol ɑ Yennu n yet ɑ b tie niŋɑnm u tuɑnn b yɑdɑ pɑɑk, ŋɑɑn b din kol ɑ wun yet ɑ b tie niŋɑnm u tuɑnn b tuonɑ pɑɑk e. B gbiɑt tɑngbiɑtkɑl e k bɑɑ, tɑnn nbɑ k b diɑn l po Yennu lolkpel kɑdɑɑɔk ni ɑ: «Gotl, min Yennu bil tɑnn *Siiɔn duo ni, lin nbɑ sɑɑ te k niib n gbiɑt k bɑɑ. L tie tɑnjɑgbounŋ o, k b sɑɑ bilnt l pɑɑk k bɑɑ, ŋɑɑn wun nbɑ tien’ɔ yɑdɑ, u kɑn di fei.» N nɑɑ wɑɑs, n luon nɑn n pɑl kul k mei Yennu ɑ wun fiel n mɔnŋ buolu, *Suifnbɑ. N mi k tien *siɑlɑ nɑn b wɑɑ Yennu nɑn ninmɔnn, ŋɑɑn b ninmɔnn mɑnŋ k yent. B k mi sɔnu nbɑ te k Yennu yet ɑ niib tie niŋɑnm u buol, ŋɑɑn luon b mɔnŋ sɔnu, k l pɑɑk, b k jii b mɔnŋ k lol nɑn Yennu sɔnu nɑ. K mɑɑn, Yiesu tun k gbien Muois *senni nɑ wɑɑ. K mɔtɑɑnɑ, Yennu yi bin nbɑ tien *Klistu yɑdɑ nɑ niŋɑnm u buol ni. Muois din diɑn k jiin bɑnnu nbɑ k nilɔ sii tie niŋɑnɔ senni weiu ni ɑ: «Wun nbɑ tuun lin nbɑ k senni nɑ senn nɑ, u sɑɑ lɑ mɑnfuol l pɑɑk ɑ.» Ŋɑɑn nɑ e tie bɑɑ yet lin nbɑ k jikt sɑɑ bɑnnu nbɑ k Yennu yet ɑ niib tie niŋɑnm u tuɑnn b yɑdɑ nɑ pɑɑk nɑ ɑ: «A dɑɑ duki ɑ pɑl ni ɑ: ‹Ŋmee tɑn sɑɑ do *Yendɔunŋ ni?› » (L pɑɑk tie ɑ: «Ŋmee sɑɑ do Yendɔunŋ ni k te k Klistu n sik i?») «A biɑ dɑɑ boi ɑ: ‹Ŋmee tɑn sɑɑ sik tinpuɑl ni?› » (L pɑɑk tie ɑ: «Ŋmee sɑɑ sik k te k Klistu n fiil kuun ni?») Yennu yet ɑ bee? L yet ɑ: «Mɑɑn nɑ kpiɑ’ɑ. L be ɑ mɔb ni nɑn ɑ pɑl ni.» Lɑbɑmɑnn mɑnŋ tie yɑdɑ lɑbɑɑl nbɑ k t muɑntl nɑ. L i tie k ɑ set pɑk k sɑt nyinn ɑ mɔb ni k yet ɑ: «Yiesu tie Yonmdɑɑnɔ,» k biɑ tien yɑdɑ ɑ pɑl ni nɑn Yennu set fiin’ɔ kuun ni, ɑ sɑɑ lɑ fielu wɑɑ. K mɑɑn nilɔ set tien Yiesu yɑdɑ e u pɑl ni, k Yennu yet ɑ u tie niŋɑnɔ u tuɑnn, k l set nyii u mɔb ni e k u yet nnɑ, k l pɑɑk e k u lɑ fielu. L diɑn Yennu lolkpel kɑdɑɑɔk ni ɑ: «Dɑɑnɔ nbɑ tien’ɔ yɑdɑ, u kɑn mi di fei.» Bɔktu kɑɑ Suifnbɑ nɑn bin nbɑ k tie Suifnbɑ sinsuuk ni, Yennu kuukuɑ nɑ e tie b kul Yonmdɑɑnɔ, k bin nbɑ kul mei’ɔ, u sonmt’b nɑn bulcintuk. K mɑɑn, l diɑn Yennu lolkpel kɑdɑɑɔk ni ɑ: «Wun nbɑ kul mei Yonmdɑɑnɔ sonml po, u sɑɑ lɑ fielu.» Tɔn, niib i kii tien’ɔ yɑdɑ, b sɑɑ tien nlee k miɑl’ɔ sonml po? K b i kii gbɑt lɑbɑmɑnn mɑnŋ, b sɑɑ tien nlee k tien’ɔ yɑdɑ? K b i kii muɑnt u lɑbɑmɑnn mɑnŋ, nlee k niib sɑɑ gbɑt u po? K b i kii tun tuomiinbɑ, nlee k lɑbɑmɑnn mɑnŋ sɑɑ muɑnt i? L diɑn Yennu lolkpel kɑdɑɑɔk ni ɑ: «Bin nbɑ lin k muɑntl lɑbɑmɑnn mɑnŋ, b bɑɑlu ŋɑn bonciɑnn.» Ŋɑɑn niib kul kɑɑ sɑk lɑbɑmɑnn mɑnŋ, k mɑɑn Esɑɑyi yet ɑ: «N Yonmdɑɑnɔ, ŋmee tien yɑdɑ nɑn t lɑbɑmɑnn nɑ?» L pɑɑk, nilɔ i gbiɑ lɑbɑmɑnn mɑnŋ, l bɑɑt nɑn yɑdɑ e, k lɑbɑmɑnn nyi niib nbɑ muɑntl Klistu mɑɑn nɑ ni e. Ŋɑɑn n boi k lɑɑn niib k gbɑt lɑbɑmɑnn mɑnŋ ɑmi? Mɔmɔnm, b gbɑt ɑ. L diɑn Yennu lolkpel kɑdɑɑɔk ni ɑ: «Niib gbɑt b kunkɔlɑ tingbounŋ lokl kul po, k b mɑɑn yɑt nɑn *dulnyɑ kul.» N yɑɑ n ŋɑnm k boi e k lɑɑn Islɑɑeltieb din k bɑnn l pɑɑk ɑmi? Muois tiɑɔnŋ o din dɔnŋ jiin sinsinn, ɑ Yennu din yet Islɑɑeltieb ɑ: «N sɑɑ te k i mɔk *funfunn nɑn niib nbɑ k mɔk buolu nɑ pɑɑk, k te k i wutuol n do buolu nbɑ tie jɑtt nɑ pɑɑk.» K Esɑɑyi mɔk pɑl k yet ɑ Yennu yɑɑ ɑ: «Niib nbɑ k fiin n po nɑ, b tɑn lɑ’n ɑ, k niib nbɑ k boi n po nɑ, k n jii n mɔnŋ k fiit wɑnn’b.» Ŋɑɑn k u yet Islɑɑeltieb po ɑ: «N tɑnt n nuu yennu ni nɑn nyiɑɔk ɑ n gɑɑl’b, ŋɑɑn k b tie tubkɑngbɑtɑ k k sɑɑk n mɔb.» L pɑɑk, n luon k n boi k lɑɑn i duki ɑ Yennu yet u mɔnŋ niib ɑmi? Aɑi, u k yet’b kɑɑ. N mɔnŋ tie Islɑɑel nilɔ e, k tie Ablɑɑhɑɑnm yɑɑbuonn, k nyii Bensɑɑmen nɑɑkuuk ni. Yennu k lu u niib nbɑ k u dɔnŋ lukt’b nɑ. I mi lɑɑ diɑn Yennu lolkpel kɑdɑɑɔk ni k wɑnt *Elii nbɑ din yien Yennu, Islɑɑeltieb biit po biɑnŋ nbɑ ɑ: «N Yonmdɑɑnɔ, b kpii ɑ sɔkniinbɑ kul ɑ, k biil ɑ binbintɑ nɑ. N kuukuɑ e biɑl, k b kol ɑ bin kpi’n.» Yennu din jiin ɑ biɑ? Yennu din jiin ɑ: «N mɔk niib tusɑ ŋɑnlole bin nbɑ dɑɑ k mi gbɑɑn jiɑnt Bɑɑl nɑ.» L tie nnɑ e mɔtɑɑnɑ. Niib wɑɑnm-nnɑ e dɑɑ be k Yennu lukt’b u ninkpɑbɑɔnŋ pɑɑk. Yennu i lukt niib, u ninkpɑbɑɔnŋ pɑɑk e, k u lukt’b, k l k tie b tuonɑ pɑɑk kɑɑ. Yennu i bo i lukt niib b tuonɑ pɑɑk i e, u ninkpɑbɑɔnŋ nɑ bo kii tie bɑlmɔni ninkpɑbɑɔnŋ kɑɑ. Tɔn, t sɑɑ yet ɑ biɑ? L wɑnt nɑn Islɑɑeltieb k lɑ bɑɑ luon lin nbɑ. Bin nbɑ k Yennu lukt’b nɑ kuukuɑ nɑ lɑ’l, ŋɑɑn bin nbɑ biɑl nɑ tien tubkɑngbɑtɑ dɑnm e. L tie nɑn lɑɑ diɑn Yennu lolkpel kɑdɑɑɔk ni ɑ: «Yennu din te k b yɑn lib, k te k b ninbinɑ k lɑɑt, k te k b tubɑ k gbiɑ k tɑn tuu dinnɑ.» K Dɑɑfiid yet Yennu lolkpel kɑdɑɑɔk ni ɑ: «Yennu n te k b jɑɑnm i tie bɑluk k tul’b, ɑ bii bɑɑ kii lɑɑt tubdɑtu, k te k b ninbinɑ n juɑn, k b dɑɑ lɑɑt, k b sii buɑ k b sɑi ni kɑn nɑɑt i » N boi biɑk k lɑɑn Islɑɑeltieb din gbiɑt k bɑɑ k ji k fit fiil ɑmi? Aɑi, l k tie nnɑ kɑɑ. Bɑɑ tun biit nɑ pɑɑk, k Yennu fiel bin nbɑ k tie *Suifnbɑ nɑ. Yennu tun nnɑ ɑ ŋɑnm Suifnbɑ nɑ i mɔk *funfunn bin nbɑ k tie Suifnbɑ nɑ pɑɑk. L i tie k Suifnbɑ biit te k tingbounŋ tieb lɑ piisn, k bɑɑ k tien yɑdɑ nɑ te k bin nbɑ k tie Suifnbɑ lɑ bonŋɑnn, nlee k bonŋɑnn kɑn yɑbt *dulnyɑ ni l i tie k b ŋmɑt k lebt b binbenŋ i? N piɑk k tien yinm nbɑ k tie Suifnbɑ nɑ e: Yennu nbɑ te k n tie *tuomi i buol ni nɑ, n sii mɔk yugontl n tuonn mɑnŋ pɑɑk. Mi i bo i sɑɑ fit te k n mɔnŋ buolu niib i mɔk funfunn bin nbɑ k tie Suifnbɑ nɑ pɑɑk, pɑsiɑl ŋɑnn e sɑɑ te k b siɑb n lɑ fielu. Yennu nbɑ din yet Suifnbɑ nɑ, l din te k l ji mɑn tingbounŋ nɑ niib nɑn Yennu sinsuuk ni. Yennu i ŋmɑnt k gɑɑl’b k b tie u niib, l ji sii tie nlee? L set sii tie bɑlmɔni e nɑn bi fiil kuun ni k jen mɑnfuol ni wɑɑ. L i tie k b buun pɑɑnu yon, k bɔkt sinsinn yɑl k tien pɑɑnu k l tie Yennu yɑl, lin nbɑ ten nɑ mun biɑ tie Yennu yɑl e. L i tie k tiik jiinɑ tie Yennu yɑl i e, l yiini nɑ mun biɑ tie u yɑl e. Suifnbɑ nɑ tie nɑn ŋɑɑk ni tiik nbɑ k b yi oliifie nbɑ ŋɑn nɑ e, k b kɔnn tiik nɑ yiinsiɑ. Fin nbɑ k tie Suif nɑ, ɑ tie nɑn muuk ni oliifie yiinu nɑ e k b tukn’ɑ b yiɑl ni ŋɑɑk ni oliifie pɑɑk, k mɔtɑɑnɑ ɑ gɑɑn bonŋɑnn nbɑ nyi ŋɑɑk ni oliifie nɑ jiinɑ nɑ ni e. L pɑɑk, ɑ dɑɑ mɔk pɑlbifɑɑnt nɑn sinsinn yiini nɑ. Dɑɑ mɔk pɑlbifɑɑnt, k mɑɑn ɑ tie yiinu kuukuɑ e. Jiinɑ nɑ e diɑ’ɑ, fin kɑɑ diɑ jiinɑ. A sɑɑ jiin k yet ɑ: «Mɔni e, b kɔnn yiini nɑ ɑ bin tukn’n yiini nɑ yiɑl ni e.» L set tie mɔni e. Bɑɑ k tien yɑdɑ nɑ pɑɑk e k b kɔnn’b, k fin nbɑ tien yɑdɑ nɑ pɑɑk e k b jii’ɑ tukn’ɑ l pɑɑk. Ŋɑnn, ɑ ji dɑɑ mɔk pɑlbifɑɑnt dudukt l pɑɑk, ŋɑɑn kii mɔk jɑŋmɑɑni. L i tie k Yennu k ŋɑɑn k tiik nɑ tiɑɔnŋ yiini nbɑ tie Suifnbɑ nɑ n biɑl, i dɑɑ duki nɑn u sɑɑ ŋɑɑn k i biɑl. Gotl Yennu nbɑ mɔk bulcint ŋɑɑn biɑ mɔk ninkuoni biɑnŋ nbɑ. U mɔk ninkuoni k tul bin nbɑ bɑɑ nɑ, ŋɑɑn u wɑnn’ɑ u bulcint. Ŋɑɑn l kpɑɑ tɑlɑs k ɑ biɑl u bulcint ni. Nnɑ i kɑɑ, u sɑɑ kɔnn’ɑ nɑn yiinu nɑ e. Suifnbɑ i nyik bɑɑ k tien yɑdɑ bɑnnu nbɑ nɑ, Yennu sɑɑ jiin tukn’m siɑn k b din tuu be, k mɑɑn u sɑɑ fit k tun nnɑ. Fin nbɑ k tie Suif nɑ tie nɑn muuk ni oliifie yiinu nɑ e, k Yennu kɔnn’l k tukn nɑn ŋɑɑk ni oliifie nɑ, ŋɑɑn b tuu k tie nnɑ. L k pɑɑl k wun jii yiini nbɑ k u kɔnn ŋɑɑk ni oliifie nɑ ni, k biɑ tukn nɑn l mɔnŋ oliifie nɑ biɑk. N nɑɑ wɑɑs, n luon k yin bɑnn wuol ni lɑbɑɑl, ɑ i dɑɑ duki nɑn i tie yɑndɑnm e. L tie ɑ Suifnbɑ siɑb tie kɑngbɑtɑ e, k l sii be nnɑ e k tɑn bɑɑl yuo nbɑ k bin nbɑ k tie Suifnbɑ kul nbɑ k Yennu lukt’b nɑ, bin tɑn tien Yiesu yɑb. Nnɑ e k Islɑɑel kul sɑɑ lɑ fielu, nɑn lɑɑ diɑn Yennu lolkpel kɑdɑɑɔk ni ɑ Yennu yet ɑ: «Fietuɑ sɑɑ nyi *Siiɔn duo ni e, k bɑɑl k tɑn nyinn mɔyetuk Sɑɑkɔb yɑɑbuonɑ sinsuuk ni. Ŋɑnn e tie *lol nbɑ k n sɑɑ lol k tul’b, yuo nbɑ k n sɑɑ nyinn b biit.» L i tie k t got Suifnbɑ nbɑ yet Yiesu lɑbɑmɑnn bɑnnu nbɑ, b tie Yennu dɑtɑi, ɑ lin bɑɑl nɑn bonŋɑnn k tul’i. Ŋɑɑn l i tie k t biɑ got Yennu nbɑ din lukt’b bɑnnu nbɑ, b tie bin nbɑ k Yennu luon’m, b yejɑnm pɑɑk e, k mɑɑn Yennu k gɑɑn lin nbɑ k u tul k biɑ k lebtl u dudukt bin nbɑ k u yiin’m nɑ pɑɑk. Siɑn-yuo ni, i din k cɔln Yennu, ŋɑɑn mɔtɑɑnɑ i bɑnn Yennu ninbɑtinu k mɑɑn Suifnbɑ din k cɔln’mɔ. Nnɑ e biɑk k mɔtɑɑnɑ k b k cɔln ɑ yin fit k lɑ Yennu ninbɑtinu mɑnŋ, ŋɑɑn bɑɑ k cɔln nɑ biɑ sɑɑ te k bin lɑ ninbɑtinu mɑnŋ. K mɑɑn Yennu tien niib kul mɔyetuk dɑɑbɑ ɑ wun fit k wɑnn b kul u ninbɑtinu. Yennu mɔktuk set k mɔk gbennu! K u yɑn nɑn u bɑnnu sumi hɑli! Ŋmee sɑɑ fit bɑnn Yennu nbɑ lol lin nbɑ? Ŋmee sɑɑ fit bɑnn u sɔni? L diɑn Yennu lolkpel kɑdɑɑɔk ni ɑ: «Ŋmee mi Yennu dudukt i? Ŋmee sɑɑ kpɑɑn’ɔ? Ŋmee mi k tul Yennu siɑl sinsinn ɑ, ŋɑɑn ji tɑn luon wun pɑ l pɑɑk i?» Yennu e din nɑn bonsiɑl kul, k u pɑɑk e k l kul be k tie u yɑl. Yudɑnt tie Yennu yɑl e nɑn yuo nbɑ kɑɑ gbennu. * Amenn. L pɑɑk, n nɑɑ wɑɑs, Yennu ninbɑtinu pɑɑk e te k n boi’i ɑ yin jii i gbɑnɑnt k tul’ɔ, k lii tie mɑnnu nbɑ fo, kii wɑɑ ŋuɑ kuukuɑ, k l sɑɑ mɑnŋ’ɔ. Ŋɑnn e tie Yenjiɑntu nɑn bɑlmɔni. I dɑɑ te k i binbenŋ tie nɑn tingbounŋ nɑ niib binbenŋ nɑ, ŋɑɑn ŋɑɑnt k Yennu n lebt i dudukt nɑn bɑlmɔni, kii ŋɑnm i binbenŋ fɑnu. Ŋɑnn e k i sɑɑ bɑnn Yennu yɑnbuɑt nbɑ tie bɑnnu nbɑ, k ŋɑnn e tie lin nbɑ ŋɑn, lin nbɑ gbuot u nunm nɑn lin nbɑ tie dede. Yennu nbɑ tin’n ninbɑɑɔk nɑ pɑɑk e, k n yien i kul, ɑ i dɑɑ duki i mɔnŋ po k l gɑl yɑɑ set tie bɑnnu nbɑ, ŋɑɑn ii duki i mɔnŋ po nɑn sikn-n-mɔnŋ, k i ni suɑ kul i duki u mɔnŋ po nɑn Yennu nbɑ tul’ɔ yɑdɑ bɑnnu nbɑ nɑ. Tɔn, nilɔ gbɑnɑnt mɔk pɑɑk pɑɑk e, ŋɑɑn k bɔkl kul mɔk u tuonn, ŋɑɑn tɑɑn k tie gbɑnɑn-yent kuɑ. L mun biɑ tie nnɑ e, nɑn tɑɑ yɑb bonciɑnn nɑ, t kul tɑɑn k tie gbɑnɑn-yent e tɑɑ be *Klistu ni nɑ, k t kul ɑ nɑ gbɑnɑnt tɑɑn tɑɑn k tukn k ji tien gbɑnɑn-yent ɑ. T kul ɑ mɔk piini nɑn Yennu nbɑ tin’t ninbɑɑɔk bɑnnu nbɑ nɑ e, k l k tɑɑ tɑɑ. Yenɔ piini i tie wuu sɔknt Yennu mɑɑn nɑ i e, l ŋɑn wun tun nɑn wɑɑ mɔk yɑdɑ bɑnnu nbɑ nɑ. Luɑ piini i tie wun sonm lieb i e, l ŋɑn wun sonm’b. Luɑ i tie wɑntuɑ, l ŋɑn wun wɑnn lieb tumiu. Luɑ piini i tie wuu kpɑɑn u lieb kpɑɑni e, wuu kpɑɑn’m. Luɑ piini i tie wuu pi piini, wuu pi piini nɑn bulcint. Luɑ piini i tie wuu mɔk yiikuo, wuu tuun yiikuo tuonn mɑnŋ bonŋɑnn. Luɑ piini i tie wuu tiin niib ninbɑɑɔk u e, wuu tiin’m ninbɑɑɔk nɑn pɑlpienn. Ŋɑɑnt k lonm i tie bɑlmɔni lonm. Ii nɑn biit mɑn, ŋɑɑn suol lin nbɑ ŋɑn. Ii luon lieb mɑn bonŋɑnn nɑn nilɔ nɑn u nɑɑ bik nbɑ tuu luon lieb biɑnŋ nbɑ nɑ, k kot kii bɑɑkt lieb, kii tie nikɑkti, k dɑɑ tiin gbɑn-nyɑkl, ŋɑɑn kii tuun Yonmdɑɑnɔ tuonɑ nɑn i pɑlɑ kul ɑ. Ii mɔk pɑlpienn i dindɑnn pɑɑk mɑn, kii mɔk mintl i fɑldinu sinsuuk ni, ŋɑɑn kii mei Yennu yuo kul. Pɑɑtl mɑn lin nbɑ k i mɔk nɑ k tul Yennu niib nbɑ k mɔk, kii gɑɑn sɑɑnm kii cɑntl’b i ŋei ni. Bin nbɑ muks’i, yin jiin’m ɑ: «Yennu yetŋɑnm ii be i pɑɑk.» Mɔmɔnm, ii jiin’m nnɑ. I dɑɑ tien’m mɔpol gbɑɑ. Wun nbɑ mɔk pɑlpienn, ii mun i mɔk pɑlpienn nɑn’ɔ mun, k wun nbɑ mun mɔk pɑlbiil, ii mun i mɔk pɑlbiil nɑn’ɔ mun. Ii mɔk mɑn dudukyenn kuɑ k dɑɑ mɔk dont-n-mɔnŋ, ŋɑɑn kii sɑɑk tuonɑ nbɑ k mɔk dont-n-mɔnŋ, k dɑɑ duki nɑn i mɔk nin-yentl. I dɑɑ tuun biit k jiint biit pɑɑk. Kotl i mɔnŋ kii tuun lin nbɑ k niib kul sɑɑ lɑ k l ŋɑn. I yɑbl i mɔnŋ pɑɑk mɑn l i tie k l sɑɑ fit kii be bɑnnu nbɑ k mɑnu sii be yinm nɑn niib sinsuuk ni. N yɔnimɔni, i kpɑn dɑɑ tuun biit k jiint biit pɑɑk, ŋɑɑn ŋɑɑnt k Yennu wutuol n tun, k mɑɑn l diɑn Yennu lolkpel kɑdɑɑɔk ni, ɑ Yonmdɑɑnɔ yet ɑ: «Min kuukuɑ e mɔk yiikuo nbɑ sɑɑ dɑt niib tubɑ. Min e sɑɑ pɑ biit mɑnŋ pɑnn.» L biɑ diɑn ɑ: «A dɑtɑɑk i mɔ kon, fɑn din’ɔ, nyun-nyuklu i suol’ɔ, fɑn tul’ɔ nyun wun nyu, k fi i tie nnɑ, ɑ dint’ɔ fei e.» Dɑɑ ŋɑɑnt k biit n nyɑnn’ɑ ni, ŋɑɑn jii tuonŋɑnɑ k nyɑnn biit. L tie k nilɔ kul n sɑk yudɑnm mɔi, k mɑɑn suɑ k mɔk u mɔnŋ yiikuo k l k nyii Yennu buol. Yennu e te k bin nbɑ mɔk yiikuo nɑ mɔk yiikuo. Wun nbɑ k sɑɑk yudɑnm *senni nɑ, l wɑnt nɑn u biɑ k sɑɑk lin nbɑ k Yennu senn nɑ, bin nbɑ kul tuun nnɑ, b bɑɑt nɑn tubdɑtu e b mɔnŋ pɑɑk. Bin nbɑ tuun tuonbiit nɑ e tiin yudɑnm jɑŋmɑɑni, ŋɑɑn bin nbɑ tuun lin nbɑ ŋɑn, b k tiin yudɑnm jɑŋmɑɑni. Fi i kii luon fii tiin yudɑɑnɔ, l ŋɑn fii tuun lin nbɑ ŋɑn, k wun pɑk’ɑ, K mɑɑn u tie Yennu tuontunnɔ e k tuun lin nbɑ ŋɑn k tien’ɑ. Ŋɑɑn fi i tuun bonbiil, fii tiin’ɔ, k mɑɑn u k mɔk yiikuo nbɑ k u sɑɑ dɑt ɑ tubl yɑnn. U tie Yennu tuontunnɔ e k sie Yennu pɑɑk k dɑɑl wun nbɑ tuun biit nɑ tubɑ. L pɑɑk, l kpɑɑ tɑlɑs k ɑ gɑɑl yudɑnm mɔi, k l k tie ɑ mɑntk tiin tubdɑtu nɑ kuukuɑ kɑɑ, ŋɑɑn ɑ mi ɑ pɑl ni nɑn l tie lin nbɑ ŋɑn e. L pɑɑk e te k t pɑ lɑnpo, k mɑɑn Yennu e senn yudɑnm nɑ, ɑ yuo kul bin jii’l k diɑ tingbounŋ nɑ bonŋɑnn. L pɑɑk, tuln’m lin nbɑ tie b yɑl. L i jɑnŋ nɑn bin gɑɑl niib lɑnpo, ɑmi lin nbɑ k i mɔk pɑɑk lɑnpo, yin pɑ k tul’b. L i jɑnŋ nɑn k i bɑɑk nilɔ, yin bɑɑk’ɔ. L i biɑ kii jɑnŋ nɑn i cɔln nilɔ, yin cɔln’mɔ. Dɑɑ mɔk suɑ pɑnn. Yɑɑ sii mɔk pɑnn nbɑ tie ii luon mɑn i lieb. Wun nbɑ luon u luɑ, l dɑɑnɔ gbien Yennu senni nɑ kul ɑ. Yennu senni nɑ yet ɑ: «Dɑɑ conm. Dɑɑ kpi *ɑ luɑ. Dɑɑ jɑɑn. Dɑɑ mɔk niɑɔnŋ ɑ luɑ bont pɑɑk.» Senni nbɑ nɑ nɑn lin nbɑ biɑl nɑ kul tɑɑn k wɑnt nɑn: «I luon ɑ luɑ nɑn fɑɑ luon ɑ mɔnŋ biɑnŋ nbɑ nɑ.» K fi i luon ɑ luɑ, ɑ kɑn tun bonbiil k tul’ɔ. Ŋɑnn e niib lomu tie Yennu senni gbienu. Ii tie nnɑ mɑn k mɑɑn yɑɑ mi yuo nɑ nbɑ tie biɑnŋ nbɑ nɑ. Yuo nɑ bɑɑl ɑ, k i sɑɑ fiil i guɑn ni, k mɑɑn t fielu dɑɑl pel ɑ, k k fɔk nɑn lɑɑ din fɔk biɑnŋ nbɑ yuo nbɑ k t din sint tien yɑdɑ nɑ. Nyiɑɔk gɑl ɑ, k yennu ni e bɑɑt. Ŋɑɑnt mɑn k tin lu tuonɑ nbɑ tuun bunbɔnn ni ŋɑɑn jii jɑtiɑt nbɑ k t sɑɑ fit kɔn nɑn’n yieonŋ ni. L luon k tin diɑ t mɔnŋ fɑnu nɑn lɑɑ luon tii be yieonŋ ni yennu ni bɑnnu nbɑ nɑ. T suol t mɔnŋ nɑn boncuncontuonɑ, nɑn dɑyibu, nɑn kunkɔnɑ nɑn *funfunn. I jii Yonmdɑɑnɔ Yiesu *Klistu binbenŋ k lii tie i yɑl, k dɑɑ ŋɑɑnt k gbɑnɑnt lonbiit n te k i tuun biit. Gɑɑt mɑn yɑdɑ-kɑnpuɑnɑ dɑnm nɑ, ŋɑɑn dɑɑ noi nɑn’m mɔniɑɔk b dudukt po. Suɑ yɑdɑ e te k u di jiet kul, ŋɑɑn k wun nbɑ yɑdɑ k pɑɑl nɑ mun kuɑ nɑnt ŋmɑmu. Wun nbɑ di jiet kul ɑ nɑ dɑɑ goli wun nbɑ kuɑ jesiɑt nɑ yɑnn, k wun nbɑ mun kuɑ jesiɑt nɑ dɑɑ biil wun nbɑ di jiet kul nɑ sɑnn, k mɑɑn Yennu gɑɑl’ɔ wɑɑ. A tie ŋmee k sɑɑ biil suɑ tuontunnɔ? U mɔnŋ yudɑɑnɔ nɑ e sɑɑ yet wɑɑ dii nɑn wɑɑ bɑɑ, k u set sɑɑ di wɑɑ k mɑɑn Yonmdɑɑnɔ mɔk pɑnŋ nbɑ sɑɑ te k wun di. Tɔn, nisiɑb mun duki ɑ dɑyenɑ cie dɑliɑ, k siɑb mun jii dɑɑ kul k l jɑn e. Suɑ kul yɑn ii pɑɑl nɑn wɑɑ tien lin nbɑ yɑdɑ. Wun nbɑ duki ɑ dɑyenɑ cie dɑliɑ nɑ, u tie nnɑ k tien Yonmdɑɑnɔ bɑɑkl e, k wun nbɑ mun di jiet kul nɑ, u tie nnɑ e k tien Yonmdɑɑnɔ bɑɑkl mun, k mɑɑn u tien Yennu niipuouk jiet nɑ pɑɑk, k wun nbɑ mun kuɑ jesiɑt nɑ mun tie nnɑ e k tien Yonmdɑɑnɔ bɑɑkl, k mun biɑ tien Yennu niipuouk. Suɑ kɑɑ k be k fo u yul pɑɑk, ɑmi k kpenn u mɔnŋ lonm kuun. T i fo, t fo k dont Yonmdɑɑnɔ sɑnn e. T i mun i biɑ kii kpo, t kpo Yonmdɑɑnɔ sɑnn ni e. Tɔn, t i fo ɑmi t i sɑɑ kpo i e, t tie Yonmdɑɑnɔ yɑb e. K mɑɑn *Klistu din kpo k biɑ fiil kuun ni ɑ wun tien fuotb nɑn kpienm Yonmdɑɑnɔ. Fin, ɑ mun tie ŋmee k sɑɑ wɑnn ɑ nɑɑbik nɑn wɑɑ tien lin nbɑ ŋɑn kuo l k ŋɑn i? Bee tien k ɑ sɑlkt ɑ nɑɑ bik i? T kul tɑn sɑɑ set Yennu tuɑnn k wun bu t buut. L diɑn Yennu lolkpel kɑdɑɑɔk ni ɑ: «Min, Yonmdɑɑnɔ nbɑ fo nɑ, n yien’i nɑn buolu kul sɑɑ gbɑɑn n tuɑnn, k suɑ kul sɑɑ yet u mɔb ni, ɑ n set tie Yennu.» L pɑɑk, suɑ kul tɑn sɑɑ fiit u mɔnŋ k tul Yennu. L pɑɑk, t dɑɑ duki nɑn t sɑɑ fit yet nɑn lin nbɑ k t lieb tuun nɑ ŋɑn kuo l k ŋɑn. Lin nbɑ ŋɑn tie k i lol i mɔnŋ pɑl ni, nɑn i kɑn te k i nɑɑ bik n gbiɑt kuo k bɑɑ. Mɑɑ tien Yiesu yɑdɑ nɑ pɑɑk e te k n bɑnn nɑn jiet kɑɑ k kuɑ. Ŋɑɑn suɑ i dukn nɑn jesiɑt kuɑ l kuɑ u buol e. Fi i te k ɑ nɑɑ bik pɑl biil jiet nbɑ k ɑ di nɑ pɑɑk, ŋɑnn ŋɑnin ɑ ji k tuun lonm tuonɑ kɑɑ. Nilɔ nbɑ k Klistu din gɑɑl u pɑɑk k kpo nɑ, ɑ dɑɑ te k wun nyik Yennu sɔnu ɑ jiet dinu pɑɑk. A dɑɑ te k niib n pɑk k biil lin nbɑ k ɑ duki nɑn l ŋɑn. K mɑɑn Yennu nɑɑn lɑbɑɑl k tie jiet-dinu ɑmi nyunu lɑbɑɑl kɑɑ, ŋɑɑn l tie Yennu nbɑ luon k tii tuun bɑnnu nbɑ, nɑn mɑnu nɑn pɑlpienn nbɑ k Foŋɑnm tul’t nɑ lɑbɑɑl. K mɑɑn wun nbɑ wɑɑ Klistu nnɑ, Yennu sii mɔk pɑlpienn nɑn l dɑɑnɔ, k niib biɑ sii tie’u bɑɑkl. L pɑɑk, ŋɑɑnt mɑn k tin yɑbl k tun lin nbɑ bɑɑt nɑn mɑnu, nɑn lin nbɑ sɑɑ sonm t kul t yɑdɑ ni. Ii mi k ɑ biil Yennu tuonɑ, jiet pɑɑk. Jiet kul ŋɑn e, ŋɑɑn l k ŋɑn k ɑ di jiet nbɑ sɑɑ te k ɑ nɑɑ bik yɑdɑ n bɑɑ. Lin nbɑ ŋɑn tie k ɑ nyik lin nbɑ kul sɑɑ te k ɑ nɑɑ bik n bɑɑ, l i lek i tie nɑnt ŋmɑmu ɑmi dɑɑn nyunu. Fɑɑ tien yɑdɑ k jikt sɑɑ jiet dinu po biɑnŋ nbɑ nɑ, ŋɑɑnt k lii be fin nɑn Yennu sinsuuk ni. Wun nbɑ tun lin nbɑ k u dukn nɑn l ŋɑn, k k mɔk bilsuk l pɑɑk, pɑlpienn tie u yɑl e. Ŋɑɑn wun nbɑ mɔk bilsuk lin nbɑ k u di nɑ pɑɑk, ŋɑɑn dii, u mɔk biit, k mɑɑn u k di’l nɑn yɑdɑ. Nilɔ i kii tien yɑdɑ nɑn tuonsiɑl ŋɑn, ŋɑɑn tɑn tuun tuonn mɑnŋ, l tie biit e. Tinm nbɑ k t yɑdɑ cie nɑ, l ŋɑn k tii mɔk suklu k sonm t lieb nbɑ yɑdɑ dɑɑ k cie nɑ, k dɑɑ tuun t mɔnŋ lonm kuukuɑ kɑɑ. Ŋɑɑnt mɑn k t kul n yɑbl kii tuun lin nbɑ sɑɑ penn t luɑ pɑl, k lii tie bonŋɑnn k tul’ɔ, k wun fit kii wɑɑ Yiesu *Klistu sɔnu fɑnu. K mɑɑn ŋuɑ Klistu din k luon wun tun u mɔnŋ lonm kuukuɑ kɑɑ, nɑn lɑɑ diɑn Yennu lolkpel kɑdɑɑɔk ni ɑ: «Bin nbɑ suki fin nɑ, b sukt mɑnŋ bɑɑ n pɑɑk e.» Lin nbɑ kul diɑn Yennu lolkpel kɑdɑɑɔk ni nɑ, l diɑn k tul’t ɑ tii tumi e. U mɑɑn mɑnŋ tien’t suklu, k biɑ kuɑnt’t pɑlɑ, ɑ tii mɔk dindɑnn. Yennu, wun nbɑ k suklu nɑn pɑlcienn nyi u ni, n te k i fit kii be nɑn lieb nɑn mɑnu nɑn Yiesu Klistu nbɑ luon bɑnnu nbɑ nɑ, k i kul ɑ sii mɔk dudukyenn kuɑ nɑn moyenm k dont Yennu nbɑ tie t Yonmdɑɑnɔ Yiesu Klistu Bɑɑ nɑ. Ii gɑɑn lieb mɑn nɑn Klistu nbɑ gɑɑl’i nɑ, k Yennu sɑnn n lɑ pɑku. K mɑɑn n yien’i ɑ Klistu din kpint u mɔnŋ k tie Suifnbɑ nɑ tuontunnɔ e, ɑ wun gbien mɔsonɑ nbɑ k Yennu senn k tul b yejɑnm nbɑ din tie nijɑɑnɑ nɑ k nnɑ e k u wɑnn nɑn Yennu set tie mɔmɔnm dɑɑnɔ e, k te k bin nbɑ k tie Suifnbɑ nɑ ii dont Yennu sɑnn u ninbɑtinu pɑɑk, nɑn lɑɑ diɑn Yennu lolkpel kɑdɑɑɔk ni ɑ: «N sɑɑ dont ɑ sɑnn bin nbɑ k tie Suifnbɑ nɑ buol, k yin *yɑni k pɑk’ɑ.» L biɑ diɑn k yet ɑ: «Yinm nbɑ k tie Suifnbɑ nɑ, ii mɔk mɑn pɑlpienn, yinm nɑn Yennu niib.» L biɑ diɑn ɑ: «Yinm nbɑ k tie Suifnbɑ nɑ, pɑkn mɑn Yonmdɑɑnɔ Yennu. Nibuolu kul, ii pɑk’ɔ mɑn.» Esɑɑyi mun din diɑn Yennu lolkpel kɑdɑɑɔk ni ɑ: «Jese yɑɑbuonn tɑn sɑɑ bɑɑl, k u sii mɔk yiikuo, k tɑn sii tie bin nbɑ k tie Suifnbɑ nɑ yudɑɑnɔ, k b dindɑnn sii be u ni.» Yennu nbɑ tul’i dindɑnn nɑ, n tul’i mɑnu nɑn pɑlpienn bonciɑnn yɑɑ tien’ɔ yɑdɑ nɑ pɑɑk k Foŋɑnm n te k i dindɑnn nɑ n ŋɑnm yɑbt. N nɑɑ wɑɑs, n mi n pɑl ni nɑn i pɑlɑ gbien nɑn dudukŋɑnt, k i mɔk minu k sɑɑ fit k kpɑɑn i lieb. Mɑɑ dɑ bon-yenɑ kɑdɑɑɔk nɑ ni nɑ, n dɑ nɑn pɑlcienn ɑ n tiɑl’i lin nbɑ k i ponŋ mi l po nɑ. N dɑ nnɑ k mɑɑn Yennu tin’n ninbɑɑɔk k te k n tie Yiesu Klistu tuontunnɔ, k tul bin nbɑ k tie Suifnbɑ nɑ. Mɑɑ muɑntl Yennu lɑbɑmɑnn nɑ, n tuun Yennu tuonn e, ɑ bin nbɑ k tie Suif nbɑ i tie mɑnnu nbɑ pent Yennu pɑl, k Foŋɑnm ni b jɑnŋ nɑn bii tie Yennu tiɑɔnŋ niib. Mɑɑ tɑɑ nɑn Yiesu Klistu nɑ, n sɑɑ fit kii mɔk yugontl tuonn nbɑ k n tuun k tien Yennu nɑ pɑɑk. K mɑɑn l i tie k n luon mɑn pɑk siɑl po i e, l tie lin nbɑ k Klistu te k n tun, k fit te bin nbɑ k tie Suifnbɑ n sɑk Yennu mɔb. N mɑɑn nɑn n bontitiet nɑn bɑktnɔunŋ tuonɑ nɑn nyinɑ nɑn Foŋɑnm pɑnŋ e te k b sɑk Yennu mɔb. Nnɑ e k n muɑnt Klistu lɑbɑmɑnn siɑn nbɑ kul, lɑɑ nyii Selusɑɑlenm k sɑɑ tuu Iiliili. Ŋɑnn e k n lol mɑɑ n muɑnt Klistu lɑbɑmɑnn k tul bin nbɑ k mi gbɑt nɑ kuukuɑ e, k dɑɑ wɑk luɑ fiɑkl pɑɑk, k mɑɑn Yennu lolkpel kɑdɑɑɔk wɑnt nɑn: «Bin nbɑ k b k muɑnt u mɑɑn k tul’b nɑ, b sɑɑ lɑ’l, k bin nbɑ mun biɑ k gbɑt’l tɑn sɑɑ gbɑt l pɑɑk.» L pɑɑk, bonɑ bonciɑnn tuu guɑl n sɔnu k n k fit bɑɑt k gɔnt’i ni. Ŋɑɑn mɔtɑɑnɑ e k n ji dɑɑ gbenn n tuonɑ nbɑ be yɑkɑ nɑ ni, k mɑɑ ponŋ setk tuu luon binɑ bonciɑnn k n gɔn’i nɑ, mɔtɑɑnɑ n sɑɑ gɔn’i wɑɑ, k n gɔnu mɑnŋ puolpo wɑɑnm-nnɑ, n sii luon k yin sonm’n k n sɑɑn Espɑnyɑ tinŋ ni. Ŋɑɑn sinsinn n sɑɑ sɑɑn Selusɑɑlenm, Yennu niib nbɑ be lenŋ nɑ sonml pɑɑk e wɑɑ, k mɑɑn Yiesuweilɑ nbɑ be Mɑɑseduɑnn nɑn Akɑɑyi tini ni nɑ, lol ɑ bin lɑkn likli k tul Yennu niib nbɑ tie nɑndɑnm k be Selusɑɑlenm nɑ. L tie mɔni e nɑn b mɔnŋ lonm e k b tul’b piini nɑ. Setk nɑn mɔni, ŋɑnm nbɑ k tie Suifnbɑ ŋɑɑn din lɑ siek jiet Suifnbɑ buol ni nɑ, l ŋɑn k bin nbɑ k tie Suifnbɑ nɑ n sonm Suifnbɑ b gbɑnɑnt ni nɑn b piini ni mun. Mi i gbenn tuonn mɑnŋ k tul’b piini mɑnŋ, n sɑɑ nyi lenŋ k tuɑt gɑl i buol k sɑɑn Espɑnyɑ tinŋ ni wɑɑ. N mi nɑn mi i bɑɑl i buol, n sɑɑ bɑɑl nɑn Klistu yetŋɑnm k tul’i Tɔn, n nɑɑ wɑɑs, t Yonmdɑɑnɔ Yiesu Klistu sɑnn pɑɑk nɑn Foŋɑnm lonm pɑɑk, n mei’i, ii mei Yennu nɑn ninmɔnn n pɑɑk k sonm’n, k wuu guun k Suude tinŋ ni niib nbɑ k tien Yiesu Klistu yɑdɑ nɑ, k b dɑɑ tie’n bonbiil, kii biɑ kii mei’ɔ k tuonn nbɑ k n sɑɑ tun k tul Yennu niib nbɑ be Selusɑɑlenm ni n penn b pɑlɑ. Nnɑ e mun, l i tie k Yennu sɑk, n sɑɑ bɑɑl nɑn pɑlpienn, k tɑn foi wɑɑn i buol. Yennu nbɑ tien’t mɑnu nɑ ii be nɑn’i. * Amenn. Tɔn, n luon k n wɑnn’i t niipuo Fiebe po. U be Senkle duo ni k sonmt *Klistu mɔtɑɑɔk niib lenŋ. Yin gɑɑl’ɔ Yonmdɑɑnɔ Klistu sɑnn pɑɑk nɑn Yennu niib nbɑ bo sii gɑɑn b lieb biɑnŋ nbɑ nɑ, k sonm’ɔ nɑn wɑɑ luon lin nbɑ i buol, k mɑɑn u mun tuu sonmt niib bonciɑnn, nɑn n mɔnŋ. Fuont Pliisiil nɑn Akiilɑɑs bin nbɑ tie n tuontunlieb Yiesu Klistu tuonɑ ni nɑ. B yit b mɔnŋ sɑlk k fit fɑt n mɑnfuol. L k tie n kuukuɑ kɑɑ tien’m niipuouk, ŋɑɑn min nɑn Klistu mɔtɑɑɔk niib nbɑ k tie *Suifnbɑ nɑ, b mun biɑ tien’m niipuouk bonciɑnn. I biɑ sɑɑ fuont Klistu mɔtɑɑɔk niib nbɑ lɑki k jiɑntl Yennu b ŋɑɑk ni nɑ. Fuont n yɔŋɑnŋ Epɑinet wun nbɑ din tie sinsinn nilɔ nbɑ be Asii tinŋ ni k din tie Klistuyuɑ nɑ. Fuont Mɑɑli wun nbɑ din tuu tuun bonciɑnn k tien’i nɑ. Fuont Antloniikus nɑn Juniɑs bin nbɑ tie n ninjɑnm, k min nɑn ŋɑnm din lɑkn kuɑ dɑnsɑlk nɑ. Tuomiinbɑ bɑɑk’b bonciɑnn, k b din sint tien Klistuyɑb k n tɑn wei nɑ. Fuont n yɔŋɑnŋ Anpliɑtus wun nbɑ k n luon’ɔ Yonmdɑɑnɔ ni nɑ. Fuont Ulben wun nbɑ tie t tuontunluɑ Klistu tuonɑ ni nɑ, k fuont n yɔŋɑnŋ Sitɑɑkiis mun biɑk. Fuont Apeles wun nbɑ din lɑ biknu ŋɑɑn lek biɑ dɑɑ wɑɑ Klistu nɑn bɑlmɔni nɑ, k fuont Aliistuobuul ŋɑɑtieb. Fuont n ninjɑ nbɑ k b yi’u *Heluodiɔn nɑ, k fuont Nɑlsiis ŋɑɑtieb nbɑ tien Yonmdɑɑnɔ yɑdɑ nɑ. Fuont Tliifenn nɑn Tliifos puob nbɑ tuun Yonmdɑɑnɔ tuonɑ nɑ. Fuont n yɔŋɑnŋ Pelsiit puo nbɑ mun biɑ tun Yonmdɑɑnɔ tuonɑ bonciɑnn nɑ. Fuont Lufus wun nbɑ mɑntk wɑɑ Yonmdɑɑnɔ sɔnu bonŋɑnn nɑ, k biɑ fuont u nɑɑ wun nbɑ luon’n nɑn wɑɑ luon u mɔnŋ bik biɑnŋ nbɑ nɑ. Fuont Asinkliit nɑn Flegɔn nɑn Helmes nɑn Pɑɑtluobɑɑs nɑn Helmɑɑs nɑn Klistu niib kul nbɑ be nɑn’m nɑ. Fuont Fiilolok nɑn Suli nɑn Nele nɑn u niipuo, nɑn Oliinpɑs nɑn Yennu niib kul nbɑ be nɑn’m nɑ. Ii fuont lieb kii kpɑmi mɑn. Klistu mɔtɑɑɔk niib nbɑ be siɑl kul po fuont’i. N nɑɑ wɑɑs, n kpɑɑn’i e, ii mi mɑn bin nbɑ bɔktl Yiesu niib ŋɑɑn dɔk’b u sɔnu ni k sɑɑk wɑnnu nbɑ k i gɑɑl nɑ. Lɔktl’b mɑn. L nibuolu k wɑɑ t Yonmdɑɑnɔ Klistu, ŋɑɑn b wɑɑ b mɔnŋ puol e. B jikt mɔmɑnt e k kpɑnn bin nbɑ yɑɑ dudukt k cie nɑ. Suɑ kul gbɑt i mɔsɑku po, k lin nbɑ nɑ pɑɑk e k n mɔk pɑlpienn nɑn’i. Ŋɑɑn n luon k yii mɔk yɑn k sɑɑn jiin lin nbɑ ŋɑn nɑn lin nbɑ k mɔk jɑknt nɑ po, k dɑɑ sɑɑk bonbiil. L kɑn wei k Yennu nbɑ tien’t mɑnu nɑ sɑɑ te k yin fiil ŋmɑɑ *Sɑɑtɑn yul pɑɑk. T Yonmdɑɑnɔ Yiesu Klistu ii mɔk ninkpɑbɑɔnŋ nɑn’i. N tuontunluɑ Tiimuote fuont’i, k n ninjɑnm Lusius nɑn Sɑɑsɔn nɑn Suosiipɑɑtl mun biɑ fuont’i. Min Teltius nbɑ dɑ lin nbɑ k Pɔul pɑk kɑdɑɑɔk nɑ ni nɑ fuont’i Yonmdɑɑnɔ sɑnn ni. Gɑius wun nbɑ gɑɑl min Pɔul nɑn Klistuyɑb kul u ŋɑɑk ni nɑ, u mun fuont’i. Elɑst, wun nbɑ tie duo nɑ likguutuɑ nɑ, ŋuɑ nɑn t nɑɑ bik Kɑltus mun fuont’i. T Yonmdɑɑnɔ Yiesu Klistu i mɔk ninkpɑbɑɔnŋ nɑn’i. Ŋɑɑnt mɑn k tin dont Yennu sɑnn. Ŋuɑ e te k i set wɑɑ’u fɑnu nɑn mɑɑ muɑnt lɑbɑmɑnn k jiin Yiesu Klistu po nɑ pɑɑk. Ŋuɑ e fiit wuol ni mɑɑn nbɑ din bɔl binɑ binɑ nɑ. Ŋuɑ *Yennu sɔkniinbɑ gɑɑl k diɑn lolkpel kɑdɑɑɔk ni k l fiit wuol ni, k Yennu nbɑ kɑɑ gbennu nɑ tul mɔb ɑ buolu kul nbɑ k tie Suifnbɑ nɑ n bɑnn’l, k niib kul n fit k tien yɑdɑ k sɑk u mɔb. Ŋuɑ Yennu kuukuɑ e tie yɑndɑɑnɔ nɑ. Niib kul n pɑk’ɔ mɔkmɔk nɑn yuo nbɑ kɑɑ gbennu, Yiesu Klistu sɑnn ni. * Amenn. Min Pɔul nbɑ k Yennu yiin’n u tiɑɔnŋ lonm pɑɑk ɑ n tien Yiesu *Klistu *tuomi nɑ, nɑn t nɑɑ bik Sositenn dɑ kɑdɑɑɔk nɑ k tien Yennu mɔtɑɑɔk niib nbɑ be Kuolent duo ni. T dɑ kɑdɑɑɔk mɑnŋ k tien yinm nbɑ kul k Yennu yiin’i Yiesu Klistu ni, ɑ i tien u tiɑɔnŋ niib k tɑɑn nɑn bin nbɑ kul jiɑntl t Yonmdɑɑnɔ Yiesu Klistu. Ŋuɑ e tie b Yonmdɑɑnɔ nɑn t Yonmdɑɑnɔ. T Bɑɑ Yennu nɑn Yonmdɑɑnɔ Yiesu Klistu nɑ ii mɔk ninkpɑbɑɔnŋ nɑn’i k biɑ tul’i mɑnu. N tien Yennu niipuouk yuo kul i pɑɑk nɑn wɑɑ tin’i ninbɑɑɔk Yiesu Klistu ni nɑ. Yɑɑ tɑɑn nɑn Klistu nɑ pɑɑk, i lɑ piini kul mɑntk mɑɑn nɑn minu piini. Klistu *siɑlɑ nbɑ k t din tien nɑ, i gɑɑl’l fɑnu wɑɑ. L pɑɑk Yennu piini nɑn yenn kuɑ dɑɑ puɑl’i, yinm nbɑ guu yuo nbɑ k t Yonmdɑɑnɔ Yiesu Klistu tɑn sɑɑ jen nɑ. Ŋuɑ e sɑɑ tul’i pɑnŋ nɑn Yonmdɑɑnɔ Yiesu Klistu jenu dɑɑl mɑnŋ k suɑ tɑn dɑɑ fit tɑɑl’i. Yennu i yɑɑ u sɑɑ tun lin nbɑ, u tuun ŋɑnn e. Ŋuɑ e yiin’i ɑ yinm nɑn u Bijɑ t Yonmdɑɑnɔ Yiesu Klistu i mɔk mɔtɑɑɔk nɑn lieb. N nɑɑ wɑɑs, n bɑln’mi e, t Yonmdɑɑnɔ Yiesu Klistu sɑnn ni, ɑ yin tɑɑn mɔb, k bɔktu dɑɑ be i sinsuuk ni, k yii tɑɑ mɔyenm kuɑ nɑn dudukyenn kuɑ. N nɑɑ wɑɑs, Kloe ŋɑɑtesiɑb yet’n ɑ i mɔk mɔniɑɔk nɑn lieb i sinsuuk ni. Lin nbɑ k n yien nɑ tie ɑ i yenɔ yɑɑ ɑ u tie Pɔul yuɑ e, k luɑ mun yɑɑ ɑ u tie Apuoluos yuɑ e, k luɑ mun biɑ yɑɑ ɑ u tie Piɑl yuɑ e, k luɑ mun biɑ yɑɑ ɑ u tie Klistuyuɑ e. Klistu mɑnŋ bɔkt bɔkt ee? B din kpɑɑ Pɔul dɑpunpunn pɑɑk i pɑɑk ii? B wul’i Yennu nyunwulu Pɔul sɑnn ni ee? N tien Yennu niipuouk nɑn mɑɑ k wul i suɑ Yennu nyunwulu nɑ, sie Kliispus nɑn Gɑius. L pɑɑk, suɑ kɑn fit yet ɑ b wul’ɔ Yennu nyunwulu n sɑnn ni. (L tie mɔni e, n biɑ wul Sitefɑɑnɑɑs ŋɑɑtieb Yennu nyunwulu e, ŋɑɑn n ji k tiɑn mɑɑ wul wun nbɑ k pukn.) K mɑɑn Klistu k tun’n ɑ n tɑn wul niib Yennu nyunwulu kɑɑ, ŋɑɑn u tun’n ɑ n tɑn muɑnt u lɑbɑmɑnn nɑ e k tul niib. L k tie ɑ n jikt nisɑɑlk minu kɑɑ k yien’m. Mi i bo i tuun nnɑ, l bo sɑɑ te k Klistu dɑpunpunn pɑɑk kuun nɑ ji k mɔk yiikuo. Klistu kuun dɑpunpunn pɑɑk lɑbɑɑl nɑ tie jɑtmɑɑn k tul bin nbɑ buol Yennu sɔnu ni, ŋɑɑn l tie Yennu yiikuo k tul tinm nbɑ wɑɑ fielu sɔnu nɑ. L diɑn Yennu lolkpel kɑdɑɑɔk ni ɑ u yet ɑ: «N sɑɑ biil yɑndɑnm minu nɑ k te k bɑntieb bɑnnu nɑ n biɑl yɑnn.» Tɔn, k tingbounŋ nɑ yɑndɑnm nɑn bin nbɑ mi kɑdɑɑɔk fɑnu nɑn mɔnɔdɑnm nɑ sɑɑ pɑɑk bee? Yennu sɑɑ wɑnn nɑn tingbounŋ nɑ ni yɑn tie jɑti e. K mɑɑn Yennu nbɑ mɔk yɑn nɑ te k tingbounŋ nɑ tieb yɑn kɑn fit te k niib n bɑnn’ɔ. L pɑɑk, k u te k bin nbɑ tien yɑdɑ nɑ lɑɑt fielu, lɑbɑɑl nbɑ k t muɑntl k tien niib, k niib duki nɑn l tie jɑti lɑbɑɑl nɑ pɑɑk. *Suifnbɑ luon bin lɑ bɑktnɔunŋ tuonɑ e wɑɑ, k Gleknbɑ mun luon yɑn, ŋɑɑn tinm ŋɑnin muɑntl k wɑnt’b ɑ Klistu din kpo dɑpunpunn pɑɑk e, k mɑɑn mɑnŋ mɔk fei Suifnbɑ nunm ni, k biɑ tie jɑtmɑɑn k tien bin nbɑ k tie Suifnbɑ. Ŋɑɑn Suifnbɑ nɑn bin nbɑ k tie Suifnbɑ nbɑ k Yennu lukt’b nɑ ŋɑnin mi nɑn Klistu kuun lɑbɑɑl nɑ tie Yennu yiikuo nɑn u yɑn e. Lin nbɑ k Yennu tun k nisɑɑlk jii’l k l tie jɑti nɑ, l mɔk yɑn k gɑl nisɑɑlk yɑn, k lin nbɑ k Yennu tien k nisɑɑlk duki ɑ l k mɔk pɑnŋ nɑ, ŋɑɑn l mɔk pɑnŋ k gɑl nisɑɑlk yɑl. N nɑɑ wɑɑs, duknt mɑn yɑɑ din tie biɑnŋ nbɑ yuo nbɑ k Yennu din yiin’i nɑ. I sinsuuk ni, i wɑɑnm-nnɑ e din mɔk yɑn, k i wɑɑnm-nnɑ e din mɔk yiikuo, k i wɑɑnm-nnɑ e din tie nijɑɑnɑ wɑɑs. Ŋɑɑn Yennu e lukt jɑtbont tingbounŋ nɑ ni, ɑ wun te k yɑndɑnm n di fei, k biɑ lukt lin nbɑ k mɔk pɑnŋ tingbounŋ nɑ ni, ɑ wun te k pɑnŋ dɑnm n di fei. Yennu e lukt lin nbɑ k tingbounŋ nɑ ni niib duki nɑn l k mɔk nyuɑt nɑ, lin nbɑ k b duki nɑn l k ŋɑn nɑ, k biɑ k tie siɑl nɑ, ɑ wun biil lin nbɑ k tingbounŋ nɑ ni niib duki nɑn l mɔk nyuɑt nɑ. U tien nnɑ e ɑ suɑ dɑɑ fuɑ bɑlɑ u buol. Ŋuɑ Yennu e tɑɑn’i nɑn Yiesu Klistu k Klistu mɑnŋ tien’t yɑn. U pɑɑk e k Yennu yet ɑ t tie niŋɑnm u buol k te k t tie u tiɑɔnŋ niib k biɑ nyinn’t t biit dɑɑbs ni. L pɑɑk, nɑn lɑɑ diɑn Yennu lolkpel kɑdɑɑɔk ni ɑ: «Wun nbɑ fuɑ bɑlɑ, wuu fuɑ bɑlɑ mɑnŋ Yonmdɑɑnɔ pɑɑk » N nɑɑ wɑɑs, mɑɑ din bɑɑl i buol ni nɑ, n din k muɑntl Yennu mɑɑn nɑ k tien’i nɑn mɔbonpɑɑlɑ ɑmi minu nbɑ gɑl’i kɑɑ. K mɑɑn, mɑɑ din be nɑn’i nɑ, n din k lol k n bɑnn siɑl sie Yiesu *Klistu, wun nbɑ k b din kpɑɑ’u dɑpunpunn pɑɑk nɑ kuɑ. L pɑɑk, k n din bɑɑl i buol ni k tie tɑtmɔ, k jɑŋmɑɑni suol’n k n jekl. N din k tumi’i k biɑ din k muɑntl lɑbɑmɑnn nɑn minu nbɑ sɑɑ mɑnŋ niib kɑɑ wɑɑ k bin sɑk’l, ŋɑɑn n din pɑk e k Foŋɑnm nɑ wɑnn u yiikuo, ɑ yɑɑ tien yɑdɑ nɑ, l k tie nisɑɑlk yɑn pɑɑk kɑɑ, ŋɑɑn l tie Yennu yiikuo pɑɑk e. Mɔmɔnm, n muɑntl nɑn yɑn e k tien bin nbɑ k b yɑdɑ cie Klistuyɑb ni nɑ. Ŋɑɑn l k tie tingbounŋ nɑ niib yɑn ɑmi tingbounŋ nɑ pɑnŋ dɑnm nbɑ k b pɑni sɑɑ tien yɑnn nɑ kɑɑ. Yɑn nbɑ k n piɑk l po nɑ tie Yennu wuol ni yɑn nbɑ wuon k nilɔ k mi, lin nbɑ k Yennu din ponŋ dɔnŋ lukt ɑ wun don’t, k suɑ k *dulnyɑ dɑɑ din k nɑn nɑ. Tingbounŋ nɑ ŋɑɑyudɑnm ni suɑ kɑɑ k mi yɑn nɑ. B i din i bo i mi’l, b din bo kɑn kpɑɑ Yonmdɑɑnɔ wun nbɑ yen *yudɑnt kul ɑ nɑ dɑpunpunn pɑɑk, ŋɑɑn l diɑn Yennu lolkpel kɑdɑɑɔk ni ɑ: «Lin nbɑ k nilɔ k lɑ, k biɑ k gbɑt, k biɑ k dukn l po nɑ, ŋɑnn e k Yennu tien siil k guun bin nbɑ luon’ɔ nɑ.» Ŋɑɑn k Yennu te k t bɑnn’l Foŋɑnm ni, k mɑɑn Foŋɑnm nɑ mi bont kul nɑn Yennu wuol ni mɑɑn gbɑɑ. Nifosɑɑlk siek nbɑ be u ni nɑ kuukuɑ e mi nifosɑɑlk dudukt. Nnɑ e mun suɑ k mi Yennu dudukt sie u Siek nɑ kuukuɑ. Siek nbɑ k t gɑɑl nɑ, l k tie tingbounŋ nɑ siek kɑɑ, ŋɑɑn l tie Yennu Siek nbɑ sɑɑ te k tin bɑnn piini nbɑ k u tul’t e. L pɑɑk e k t piɑk nɑn mɔbonɑ nbɑ k tie nisɑɑlk yɑn wɑnnu, ŋɑɑn t piɑk mɔbonɑ nbɑ k Yennu Siek wɑnt’t, k biɑ wɑnt Yennu bɑlmɔni nɑ k tien niib nbɑ k u Siek be b ni nɑ, ŋɑɑn wun nbɑ k mɔk Yennu Siek mɑnŋ, l dɑɑnɔ k gɑɑn lin nbɑ nyii Siek mɑnŋ buol, k mɑɑn l sii tie jɑti e k tul’ɔ, k u kɑn fit bɑnn l pɑɑk, k mɑɑn l bɑnnu nyi Siek mɑnŋ buol ni e. Wun nbɑ mɔk Yennu Siek nɑ sɑɑ fit bu bonn kul buut, ŋɑɑn ŋuɑ ŋɑnin suɑ kɑn fit bu u buut. nɑn lɑɑ diɑn Yennu lolkpel kɑdɑɑɔk ni ɑ: «Ŋmee sɑɑ fit bɑnn Yonmdɑɑnɔ dudukt i? Ŋmee sɑɑ fit kpɑɑn’ɔ?» Ŋɑɑn tinm ŋɑnin mɔk Klistu dudukt. N nɑɑ wɑɑs, l tie mɔni e, n din k fit pɑk k tul’i nɑn mɑɑ din bo sɑɑ pɑk k tul niib nbɑ mɔk Siek nɑ. N din pɑk k tul’i nɑn mɑɑ bo sɑɑ pɑk k tul tingbounŋ nɑ tieb nɑ e, k i binbenŋ biɑ tie nɑn wɑɑs binbenŋ nɑ e *Klistu sɔnu ni. N muɑnt’i biin e, k l k tie jekpɑklɑ kɑɑ, k mɑɑn i k jɑnŋ nɑn’n. Nɑn mɔtɑɑnɑ i biɑ lek dɑɑ k jɑnŋ nɑn’n, k mɑɑn i binbenŋ biɑ dɑɑ tie nɑn tingbounŋ nɑ niib binbenŋ nɑ e. *Funfunn nɑn mɔniɑɔk i be i sinsuuk ni, i k wɑɑ tingbounŋ nɑ tieb binbenŋ kɑɑ ɑɑ? Suɑ i yet ɑ u tie Pɔul yuɑ e, k luɑ mun yet ɑ u tie Apuoluos yuɑ e, ŋɑnn i k tuun nɑn tingbounŋ nɑ tieb binbenŋ nɑ kɑɑ ɑɑ? Setk nɑn mɔni, ŋmee tie Apuoluos k ŋmee mun tie Pɔul i? T kpɑn tie Yennu tuontunnɑ nbɑ din wɑnn’i bɑnnu nbɑ k i sɑɑ tɔkn k tien Yiesu yɑdɑ e. T kul nɑ tuun tuonɑ nbɑ k Yonmdɑɑnɔ tul’t ɑ tii tuun e. Min din bul bonbuoli e k Apuoluos mun mɑɑnt nyun, ŋɑɑn Yennu e te k l piɑ k kpɑɑt. Wun nbɑ bul nɑn wun nbɑ mɑɑnt nyun ŋɑnin tie yɑnn e, ŋɑɑn Yennu k tie yɑnn, k mɑɑn ŋuɑ e te k l kpɑɑt. Bɔktu kɑɑ wun nbɑ buul nɑn wun nbɑ mɑɑnt nyun nɑ sinsuuk ni. Yennu e sɑɑ tul’b nyuɑt bɑɑ tun lin nbɑ nɑ pɑɑk. T lɑkn tie Yennu tuontunnɑ e. I tie Yennu kpɑɑb nɑ e, k biɑ tie Yennu ŋɑɑk nɑ. Yennu nbɑ mɔk ninkpɑbɑɔnŋ nɑn’n nɑ, k n tie nɑn tɑnmɑɑŋɑnɔ nɑ, k fɔkn fiɑkl, k suɑ mun mɑɑ k tuɑnt l pɑɑk. Ŋɑɑn wun nbɑ kul mɑɑ k tuɑnt l pɑɑk wun suol u mɔnŋ. K mɑɑn fiɑkl ponŋ be. Ŋɑnn e tie Yiesu Klistu, k fiɑksiɑl ji kɑɑ k suɑ ji sɑɑ fit piin. Siɑb sɑɑ jii sɑlmɑ e, ɑmi likli kut, ɑmi tɑncincienɑ, k mɑɑ fiɑkl mɑnŋ pɑɑk. k siɑb mun sɑɑ jii dɑɑt e, ɑmi muɑt, ɑmi kɑkɑ, k cɑɑn fiɑkl mɑnŋ pɑɑk. Ŋɑɑn *dulnyɑ cincɑɑtdɑɑl mɑnŋ ni e, k suɑ kul tuonɑ nbɑ tie biɑnŋ nbɑ tɑn sɑɑ nyi pɑɑnu. Muu e tɑn sɑɑ fiit wɑnn’l, k bikn suɑ kul tuonɑ k wɑnn lɑɑ tɑn sii tie biɑnŋ nbɑ. L i kii dii lin nbɑ k nilɔ mɑɑ tuɑn fiɑkl mɑnŋ pɑɑk nɑ, ŋɑnn ŋɑnin u sɑɑ lɑ nyuɑt ɑ. Ŋɑɑn wun nbɑ yɑl dii muu, u sɑɑ kɔnŋ l nyuɑt ɑ, ŋɑɑn u mɔnŋ ŋɑnin sɑɑ lɑ fielu wɑɑ, k l sii tie nɑn u ciɑl e k nyii muu ni nɑ. I k mi nɑn i tie Yennu jɑɑnti ŋɑsɑɑkɑk e, k Foŋɑnm be i ni ii? L pɑɑk, wun nbɑ biil Yennu jɑɑnti ŋɑsɑɑkɑk, Yennu mun sɑɑ biil l dɑɑnɔ wɑɑ, k mɑɑn Yennu jɑɑnti ŋɑsɑɑkɑk tie u tiɑɔnŋ tiɑɔnŋ yɑl e, k yinm e tie u jɑɑnti ŋɑsɑɑkɑk mɑnŋ. Suɑ dɑɑ kpɑnn u mɔnŋ. Suɑ i be i sinsuuk ni k duki nɑn u mɔk yɑn tingbounŋ niib nunm ni, l ŋɑn wun kpɑnt u mɔnŋ wɑɑtɔ kii mɔk yɑn nɑn bɑlmɔni. Lin nbɑ k tingbounŋ nɑ tieb dukn k l tie yɑn nɑ, l tie jɑti e Yennu buol nɑn lɑɑ diɑn Yennu lolkpel kɑdɑɑɔk ni ɑ: «Yennu so yɑndɑnm b yɑn nbɑ tie bɑluk nɑ ni,» k biɑ diɑn liel buol ɑ: «T Yonmdɑɑnɔ mi nɑn yɑndɑnm dudukt tie yɑnn e.» L pɑɑk, suɑ dɑɑ mɔk dont-n-mɔnŋ nisɑɑlk pɑɑk. Bonsiɑl kul tie i yɑl e. Min Pɔul nɑn Apuoluos nɑn Piɑl nɑn tingbounŋ nɑ, nɑn mɑnfuol nɑn kuun, nɑn mɔtɑɑnɑ nɑn yuo nbɑ bɑɑt nɑ, yinm e yen lin nbɑ nɑ kul ɑ, k Klistu mun yen’i, k Yennu mun yen Klistu. Ŋɑnn ɑmi, i jii’t k tii tie *Klistu tuontunnɑ nbɑ k Yennu jii’t k guun’t u wuol ni mɑɑn nɑ. Tɔn, lin nbɑ tie mɑjɑɑnn k tul tuontunnɔ tie nnɑ e, l ŋɑn k tuontunnɔ i tuun nɑn bɑlmɔni. L i tie k i bu n buut nɑn nifosɑɑli nbɑ tuu bu b lieb buut nɑ, n bɑkɑ kɑɑ. N mɔnŋ gbɑɑ k bu n mɔnŋ buut. N nuɑk ni yien e, ŋɑɑn l k wɑnt ɑ n k tuun biit. Yonmdɑɑnɔ e tie wun nbɑ bu n buut. L pɑɑk, i dɑɑ bu suɑ buut, k suɑ yuo nbɑ k Yennu senn nɑ dɑɑ k bɑɑl. Ii guu mɑn Yonmdɑɑnɔ bɑɑlu, k ŋuɑ e tɑn sɑɑ jii lin nbɑ be bunbɔnn ni k fiit wɑnn’l pɑɑnu ni, k tɑn sɑɑ fiit pɑlɑ ni mɑɑn k wɑnn pɑɑnu ni, k l yuo nɑ k suɑ kul tɑn sɑɑ lɑ u pɑku nbɑ tie biɑnŋ nbɑ Yennu buol. N nɑɑ wɑɑs, i pɑɑk e k n bikn lin nbɑ nɑ kul k tul n mɔnŋ nɑn Apuoluos, ɑ i tumi t buol k gbɑt bɑljouk pɑɑk nbɑ yet ɑ: «A dɑɑ gɑɑl lin nbɑ k b diɑn.» Nnɑ e mun k i kɑn dont i mɔnŋ yenɔ kuɑ pɑɑk k gɑl u luɑ. Ŋmee tul’ɑ sɑɑkɑt ɑ lieb ni? Yennu kɑɑ tul’ɑ lin nbɑ kul k ɑ mɔk nɑ ɑɑ? Tɔn, lɑɑ tie bɑnnu nbɑ, bee tien k ɑ dont ɑ mɔnŋ, k l tie nɑn lin nbɑ k ɑ mɔk mɑnŋ k tie piini kɑɑ nɑ? I ponŋ mɔk lin nbɑ kul k i luon. I ponŋ tie mɔktɑ e. I tie kpɑnbɑlɑ e, ŋɑɑn tinm k tie’l kɑɑ. N ponŋ luon yin set tien kpɑnbɑlɑ nɑn bɑlmɔni, k tinm nɑn yinm n tɑɑn tien kpɑnbɑlɑ. Min yɑɑ buol n dukn nɑn Yennu lukt tinm nbɑ tie tuomiinbɑ nɑ k t tie tɑli e, k tie nɑn niib nbɑ k b sɑɑ bu b buut k yɑɑ b ŋɑn nɑn kuun e nɑ. Mɔni e t ji tie *dulnyɑ ni ninbɑlsin e, k tul niib nɑn *mɑlɑkɑɑnbɑ. T tie wɑɑtb e Klistu pɑɑk, ŋɑɑn yɑɑ tɑɑn nɑn Klistu nɑ pɑɑk, i tie yɑndɑnm e. T k mɔk pɑnŋ, ŋɑɑn yinm ŋɑnin mɔk pɑnŋ. Niib sɑlkt tinm ŋɑɑn tien’i nibɑɑkl. Lɑɑ nyii siɑn-yuo wɑɑ mɔkmɔk nɑn mɔtɑɑnɑ, t lin nɑn kon e nɑn nyun-nyuklu, k liɑ tɑciɑt, k b buo’t, k t lin yilb k kɑɑ binbebuol. T ninŋi e k t tuun k di k tɑn bɑk. Bii sukl’t, t tuu yɑt yetŋɑnm e. Bii dinn’t biɑk, t tuu gɑɑl e. B i pɑk biil t sɑnɑ, t tuu pɑk jiin’m nɑn lonm e. T kpɑnt tɑli e, k tie nɑn tingbounŋ nɑ tɑnpenn pɑɑk muɑt nɑ, k biɑ tie nɑn tingbounŋ nɑ jɑknt nɑ k tɑn tuu mɔtɑɑnɑ. N k dɑ nɑ k tien’i ɑ n dinn’i fei kɑɑ, ŋɑɑn n kpɑɑn’i e, nɑn yɑɑ tie n wɑlonkɑi nɑ, k mɑɑn l i tie k i lek mɔk wɑntieb tusɑ piik Klistu ni, i k mɔk bɑɑnbɑ bonciɑnn, k mɑɑn Yiesu Klistu ni e k n mɑl’i lɑbɑmɑnn nbɑ k n wɑnn’i nɑ pɑɑk. Ŋɑnn, n bɑln’mi e, ii wɑɑ n binbenŋ mɑn. Lin nbɑ nɑ pɑɑk e k n tuun Tiimuote i buol, wun nbɑ tie n bilonkɑk k tie bɑlmɔni dɑɑnɔ Yonmdɑɑnɔ ni. U sɑɑ tiɑl’i mɑɑ be biɑnŋ nbɑ Klistu ni, k l tɑɑ nɑn mɑɑ lin k wɑnt Klistu mɔtɑɑɔk niib biɑnŋ nbɑ, siɑn nbɑ kul. Siɑb mɔk dont-n-mɔnŋ e i sinsuuk ni, k duki ɑ n kɑn bɑɑl k gɔn’i ni. Ŋɑɑn l i tie k Yonmdɑɑnɔ luon, l kɑn wei k n sɑɑ gɔn’i. L yuo nɑ, n kɑn bɑnn dont-n-mɔnŋ dɑnm nɑ nbɑ pɑk lin nbɑ nɑ kuukuɑ kɑɑ, ŋɑɑn n sɑɑ bɑnn nɑn b set mɔk pɑnŋ ɑmi b k mɔk. K mɑɑn Yennu nɑɑn k tie mɔbonɑ kɑɑ, ŋɑɑn l tie yiikuo e. I luon lɑnn e? I luon k n bɑɑl nɑn lɑnbɑnn ɑmi n bɑɑl suon nnɑ e nɑn lonm u? L set tie mɔni e k b yien ɑ boncunconsn be i sinsuuk ni, k l tie lin nbɑ k bin nbɑ k wɑɑ Yiesu *Klistu nɑ mɔnŋ set kɑn tun. N gbɑt ɑ suɑ be i sinsuuk ni k duɑ nɑn u bɑɑ puo, K i biɑ mɔk jɑpɑɑt l pɑɑk. Ŋɑɑn l bo ŋɑn k i pɑlɑ n biil k yin nyinn l dɑɑnɔ i sinsuuk ni. Mɑɑ lek be bɑnfɔkl nɑn’i nɑ, ŋɑɑn n be nɑn’i n dudukt ni, k n ponŋ bu dɑɑnɔ mɑnŋ buut nɑn mɑɑ bo sii be nɑn’i bɑnnu nbɑ nɑ e. Yuo nbɑ k i tɑn lɑkn be t Yonmdɑɑnɔ Yiesu sɑnn ni, k n mun be nɑn’i n dudukt ni, k t Yonmdɑɑnɔ Yiesu yiikuo be t pɑɑk nɑ, yin jii dɑɑnɔ mɑnŋ k tien’ɔ *Sɑɑtɑn nuu ni ɑ k dɑɑnɔ mɑnŋ nisɑɑlk binbenŋ n kpo, k Yonmdɑɑnɔ bɑɑlu dɑɑl mɑnŋ u siek tɑn sɑɑ lɑ fielu. I dont-n-mɔnŋ mɑnŋ k ŋɑn. I k mi ɑ * dɑtinŋ wɑɑnm-nnɑ e te k pɑɑnu yon kul fuutl piil ii? Ŋɑnn yin lu dɑtinkpel nbɑ tie i biit, k ji dɑɑ mɔk jɑknt. I ji sii tie nɑn yon nbɑ k dɑtinŋ kɑɑ lenŋ nɑn yɑɑ set be bɑnnu nbɑ, k mɑɑn b ponŋ kpii t Yuktgɑltiɑlu jɑɑnm pebik nbɑ tie Klistu nɑ wɑɑ. L pɑɑk, ŋɑɑnt tin di jɑɑnm nɑn pɑɑnu nbɑ k mɔk dɑtinŋ, pɑɑnu nbɑ k mɔk jɑknt k biɑ tie bɑlmɔni yɑl nɑ, ŋɑɑn nyik dɑtinkpel nbɑ tie biit nɑn bonbiil yɑl nɑ. N ponŋ diɑn kɑdɑɑɔk k tul’i k yet ɑ i dɑɑ wɑɑ boncunconɑ nɑ. L k tie ɑ n yɑɑ ɑ i nyinn i mɔnŋ tingbounŋ nɑ boncunconɑ, ɑmi niɑnciɑɔnŋ dɑnm, ɑmi nɑn-yuki, ɑmi pɑtmɑnnɑ ni kɑɑ. L i tie k i luon k yin lɔkt’b, sie k i nyii tingbounŋ nɑ ni. N diɑn k yet’i ɑ i dɑɑ tɔk nɑn dɑɑnɔ nbɑ yɑɑ ɑ ŋuɑ wɑɑ Klistu e ŋɑɑn tuun boncuncontuonɑ, ɑmi k mɔk niɑnciɑɔnŋ, ɑmi k mɑnn pɑtɑ, ɑmi k mɔk sɑnjɑɑɔnŋ, ɑmi k tie dɑnyuyukpienn, ɑmi k tie nɑn-yukɔ nɑ. I dɑɑ kɑɑl nɑn l nilɔ k di jiet gbɑɑ. L k tie n tuonn kɑɑ k n sii bu bin nbɑ k tie Klistuyɑb nɑ buut. Yennu e sɑɑ bu b buut, ŋɑɑn k i lieb nbɑ tie Klistuyɑb nɑ mun, i kɑn bu b buut ii? L ponŋ diɑn Yennu lolkpel kɑdɑɑɔk ni ɑ: «I bel biitdɑɑnɔ nɑ k nyinn’ɔ i sinsuuk ni.» L i tie k i yenɔ mɔk mɑɑn nɑn u luɑ nbɑ wɑɑ *Klistu, nlee k u sɑɑ jii’l k sɑɑn nɑn’n bin nbɑ k wɑɑ Klistu nɑ buut dɑɑnɔ buol, ŋɑɑn kɑn sɑɑn nɑn’n Yennu niib buol i? I k mi ɑ Yennu niib tɑn sɑɑ bu tingbounŋ nɑ tieb buut ii? K l i tie k i tɑn sɑɑ bu tingbounŋ nɑ tieb buut, ŋɑnn i kɑn fit k bu bɑlbisbis mɔtɑɑnɑ ɑɑ? I k mi nɑn t tɑn sɑɑ bu *mɑlɑkɑɑnbɑ buut ii? Nlee k i kɑn fit bu mɔtɑɑnɑ binbenŋ nɑ mɑɑn i? L pɑɑk, l i tie k i mɔk mɑɑn nɑ buolu, bee k i jikt k sɑɑ nɑn’n bin nbɑ k tie siɑl i Klistu mɔtɑɑɔk niib ni nɑ buol i? N yet nnɑ ɑ n din’i fei e. Mɔniɑɔk i bɑɑl yinm Klistu niib sinsuuk ni, suɑ kɑɑ i sinsuuk ni k mɔk yɑn nbɑ sɑɑ fit ŋɑnm mɑɑn mɑnŋ ii? Ŋɑɑn k i nɑɑwɑyenɔ sɑɑ nɑn u luɑ k b bu b buut bɑlbuulɔ nbɑ k tien Klistu yɑdɑ nɑ buol ii? Yɑɑ lek mɔk mɑɑn nɑn i nɑɑ wɑɑs nɑ gbɑɑ, l wɑnn nɑn i ji bot e Yiesu sɔnu ni cɑin. A nɑɑ bik i tun k biil’ɑ, k dii suklu, l k sɔ ɑɑ? A nɑɑ bik i jɑn’ɑ, k ɑ nyik’ɔ, l k sɔ ɑɑ? Ŋɑɑn yinm e tuun lieb biit k jɑɑn lieb, k biɑ lek tie nnɑ k tien i lieb nbɑ tie Klistuweilɑ nɑ gbɑɑ. I k mi nɑn bin nbɑ tuun bonbiil nɑ tɑn kɑn lɑ yiɑl Yennu nɑɑn ni ii? I dɑɑ kpɑnn i mɔnŋ. Bin nbɑ tie juonbɑɑlt ɑmi pɑtmɑnnɑ ɑmi boncunconɑ ɑmi jɑb nbɑ mɔk niɑɔnŋ k duɑ nɑn b jɑlieb ɑmi nɑn-yuki ɑmi niɑnciɑɔnŋ dɑnm ɑmi dɑnyuyukpienɑ ɑmi sɑnjɑɑnjɑnnɑ ɑmi fɑt-tieb, bin nbɑ nɑ kul tɑn kɑn lɑ yiɑl Yennu nɑɑn ni. I siɑb din tie nnɑ e, ŋɑɑn k Yennu wuul i biit nɑ k senn’i k i tie u niib k u biɑ yet ɑ i tie niŋɑnm Yonmdɑɑnɔ Yiesu Klistu sɑnn ni nɑn t Yennu Siek yiikuo ni. I siɑb yien ɑ: «Bont kul ɑ k kuɑ n buol ni.» L tie mɔni e, ŋɑɑn bont kul kɑɑ ŋɑn k tul’ɑ ni. N sɑɑ fit yɑɑ ɑ bont kul k kuɑ n buol ni, ŋɑɑn min ŋɑnin kɑn sɑk k tie bonsiɑl dɑɑbl. I siɑb yien ɑ: «Jiet tie puol yɑl e, k puol mun tie jiet yɑl.» Mɔni e, ŋɑɑn Yennu sɑɑ biil l ŋɑnle nɑ kul. Yennu k nɑn t gbɑnɑnt ɑ t jii’l kii conm, ŋɑɑn ɑ t jii’l k lii tie Yonmdɑɑnɔ yɑl, k Yonmdɑɑnɔ e yen t gbɑnɑnt nɑ. Yennu e din fiin Yonmdɑɑnɔ kuun ni, k mun biɑ tɑn sɑɑ jii u yiikuo k fiin’t. I k mi nɑn i gbɑnɑnt nɑ gɑɑ nɑn Klistu gbɑnɑnt e? Ŋɑnn, nlee k n sɑɑ jii Klistu gbɑnɑnbɔkyenn k gɑɑn nɑn puocunconnɑ? Aɑi, l kɑn fit. Ami, i k mi nɑn wun nbɑ jii u mɔnŋ k tɑɑn nɑn puocunconn, ŋuɑ nɑn l puo ŋɑnin tɑɑn gbɑnɑn-yent kuɑ wɑɑ ɑɑ? K mɑɑn l diɑn Yennu lolkpel kɑdɑɑɔk ni ɑ: «Juɑ nɑn u puo sɑɑ tɑɑn k tie gbɑnɑn-yent kuɑ e.» Ŋɑɑn wun nbɑ tɑɑn u mɔnŋ nɑn Yonmdɑɑnɔ nɑ, Yonmdɑɑnɔ nɑn l dɑɑnɔ tɑɑn k tie seyenŋ kuɑ e. Lɔktl mɑn boncuncontuonɑ. Tuonbiit kul nbɑ biɑl, l k tuun gbɑnɑnt ni, ŋɑɑn wun nbɑ conm ŋɑnin biil u mɔnŋ gbɑnɑnt e. I k mi nɑn i gbɑnɑnt nɑ tie Foŋɑnm nbɑ k i gɑɑl Yennu buol nɑ dieok o, k u be i ni ii? I k yen i mɔnŋ i tiɑɔnŋ kɑɑ. Yennu e dɑɑ’i, k u pɑ i pɑɑk ɑ. L pɑɑk, i jii i gbɑnɑnt kii tuun lin nbɑ sii dont u sɑnn. N yɑɑ n jiin i buboit nbɑ k i dɑɑn diɑn tul’n nɑ e. L i tie k juɑ k kuɑn puo, l ŋɑn. Ŋɑɑn boncuncontuonɑ nbɑ yɑbt nɑ pɑɑk, l ŋɑn k juɑ kul ii mɔk u mɔnŋ puo, k puo kul ii mun i mɔk u mɔnŋ sɔlɔ. L ŋɑn k juɑ n jii u mɔnŋ k cɑb u puo, k puo mun n jii u mɔnŋ k cɑb u sɔlɔ. Puo k yen u mɔnŋ gbɑnɑnt, u sɔlɔ e yen’n. Juɑ mun k yen u mɔnŋ gbɑnɑnt, u puo e yen’n. I dɑɑ wuun lieb i gbɑnɑnt lonm, l i kii tie yuo nbɑ k i tɑn tɑɑn mɔyenm kuɑ k yɑɑ yin miɑl Yennu yuo wɑɑnm-nnɑ i kɑɑ. Ŋɑɑn k l puolpo k yin biɑ tɑɑn lieb, k *Sɑɑtɑn dɑɑ biknt’i k nyɑni’i, yɑɑ kɑn fit suol i mɔnŋ nɑ pɑɑk. N yien’i lin nbɑ nɑ, ŋɑɑn l k tie sennu kɑɑ. Setk nɑn mɔni n bo luon k suɑ kul i be, nɑn mɑɑ be biɑnŋ nbɑ nɑ e, ŋɑɑn suɑ kul nɑn u piini e k l nyii Yennu buol jiɑk jiɑk. Gotl lin nbɑ k n yien k tien jɑkpɑkɑ nɑn pɑkɔi. L bo sii ŋɑn k i be i kuɑ, nɑn mɑɑ be biɑnŋ nbɑ nɑ. Ŋɑɑn b i kii fit so b mɔnŋ, ŋɑnn bin kuɑn puob, k puob mun n kun jɑb, k mɑɑn l sɔ nɑn yɑɑ sii mɔk l niɑɔnŋ k i pɑlɑ kɑb ŋɑɑn k i kɑn lɑ nɑ. Jɑb nɑn puob nbɑ be nɑn lieb nɑ, n sent *senni e k tien’i, l k tie min kɑɑ sent, ŋɑɑn Yonmdɑɑnɔ e sent, ɑ puo dɑɑ mi nyikt u sɔlɔ. Ŋɑɑn, l i tie k u nyik u sɔlɔ, wun biɑl u kuukuɑ ɑmi wun di sindɑnt k ŋmɑt ɑ sɔlkpelɔ nɑ buol. Juɑ i mun i mi wun yet u ŋɑɑpuo. Bin nbɑ biɑl nɑ e, k min yien, Yonmdɑɑnɔ kɑɑ yet ɑ Klistuweilɔ i mɔk puo, k puo nɑ k tie Klistuweilɔ, ŋɑɑn k l tie puo mɑnŋ lonm u e, ɑ wuu be u buol ni, juɑ nɑ dɑɑ yien’ɔ. Puo nbɑ tie Klistuweilɔ mun i mɔk sɔlɔ nbɑ k tie Klistuweilɔ, ŋɑɑn k l tie juɑ mɑnŋ lonm u e ɑ wuu diɑ’u, puo mɑnŋ dɑɑ yɑɑtl ŋɑɑn nyikt u sɔlɔ nɑ. Juɑ nbɑ k tie Klistuweilɔ, ŋɑɑn k u ŋɑɑpuo tie Klistuweilɔ nɑ, puo mɑnŋ pɑɑk e tien k juɑ nɑ tɑn sii tie Yennu yuɑ, k puo nbɑ k tie Klistuweilɔ nɑ mun, ŋɑɑn k u sɔlɔ tie Klistuweilɔ nɑ, juɑ mɑnŋ pɑɑk e tien k puo nɑ tɑn sii tie Yennu yuɑ. L i bo i kii tie nnɑ, b wɑɑs bo kii tie Yennu yɑb, ŋɑɑn lɑɑ tie nnɑ nɑ pɑɑk, b wɑɑs mɑnŋ mun tɑn sii tie Yennu yɑb e. Ŋɑɑn wun nbɑ k tie Klistuweilɔ i luon wun yet u luɑ, Klistuweilɔ n ŋɑɑn’ɔ k wuu sɑɑ. Ŋɑnn ŋɑnin, senni ji k so wun nbɑ tie Klistuweilɔ mɑnŋ. Yennu e yiin’t ɑ tii be nɑn mɑnu. Fin puo, ɑ tien nlee bɑnn nɑn ɑ sɑɑ fiel ɑ sɔlɔ? K fin puodɑɑnɔ, ɑ tien nlee bɑnn nɑn ɑ sɑɑ fiel ɑ puo? Ŋɑnn ŋɑnin, suɑ kul ii tuun nɑn Yonmdɑɑnɔ nbɑ tul’ɔ piini bɑnnu nbɑ kii biɑ kii be bɑnnu nbɑ k u din be yuo nbɑ k Yennu din yiin’ɔ nɑ. Wun nbɑ dɔnŋ pot u punn ɑ k Yennu tɑn yiin’ɔ, ŋɑɑnt k wun diɑ nnɑ, k wun nbɑ mun k pot yuo nbɑ k Yennu yiin’ɔ nɑ, u dɑɑ poli. Wun nbɑ pot nɑn wun nbɑ k pot, l k tie lin nbɑ siɑn. Lin nbɑ mɑntk tie bɑlkpɑnn tie i diɑ Yennu senni. Suɑ kul ii be binbenŋ nbɑ ni k u ponŋ tuu be wɑɑ, k Yennu tɑn yiin’ɔ nɑ. A ii dinŋ ii tie dɑɑbl i e yuo nbɑ k Yennu din yiin’ɑ nɑ ɑɑ? A dɑɑ te k l dɑɑmi’ɑ ni, ŋɑɑn fi i sɑɑ lɑ yɑɑk k nyinn ɑ mɔnŋ dɑɑbs ni, fɑn tien nnɑ. Wun nbɑ ponŋ tie dɑɑbl yuo nbɑ k Yonmdɑɑnɔ yiin’ɔ nɑ, u ji tie Yonmdɑɑnɔ yuɑ e k ji k tie dɑɑbl u buol ni. Nnɑ e mun, l i tie k wun nbɑ tuu yen u mɔnŋ ɑ, k Yonmdɑɑnɔ tɑn yiin’ɔ, u ji tie *Klistu dɑɑbl e. Yennu dɑɑ’i e. L pɑɑk, i dɑɑ tie niib dɑɑbɑ. N nɑɑ wɑɑs, l ŋɑn k suɑ kul ii be Yennu buol nɑn wɑɑ din tuu be binbenŋ nbɑ ni yuo nbɑ k Yennu yiin’ɔ nɑ. Mɔtɑɑnɑ, n ji piɑk k tien bin nbɑ dɑɑ k kuɑn puob ɑmi k dɑɑ k kun jɑb nɑ e. N k mɔk sennu nbɑ k Yonmdɑɑnɔ senn, ŋɑɑn n wɑnt’i n dudukt e, mɑɑ tie nilɔ nbɑ k i sɑɑ fit gɑɑl u mɔb Yonmdɑɑnɔ ninbɑtinu pɑɑk nɑ. Mɔtɑɑnɑ cicɑkn nɑ pɑɑk, n dukn nɑn l ŋɑn k nilɔ i be biɑnŋ nbɑ k u tuu be nɑ. A mɔk puo oo? A dɑɑ luon sɔnu nbɑ k ɑ sɑɑ bel’ɔ. A dɑɑ k kuɑn puo oo? A ji dɑɑ luon sɔnu nbɑ k ɑ sɑɑ kuɑn puo. Ŋɑɑn l i tie k ɑ kuɑn puo, ɑ k mɔk biit. Sɑpɑɑmɔ i mun i kun juɑ, u k tun biit. Ŋɑɑn n luon k n nyinn’i muksuk nbɑ k bin nbɑ mɔk puob nɑn bin nbɑ mɔk sɔlb sɑɑ lɑ tingbounŋ nɑ ni e. N nɑɑ wɑɑs, n luon k n wɑnn’i nɑn yuo nɑ k yɑb. L pɑɑk, mɔtɑɑnɑ l ŋɑn k bin nbɑ mɔk puob ii be nɑn b k kuɑn puob nɑ, k bin nbɑ mɔ, bii be nɑn b k mɔk pɑlbiil nɑ, k bin nbɑ mɔk pɑlpienn bii be nɑn b k mɔk pɑlpienn nɑ, k bin nbɑ dɑɑ siɑl, bii be nɑn lin nbɑ k b dɑɑ nɑ k tie b yɑl. k bin nbɑ di tingbounŋ nɑ mɑnu, l ŋɑn k bii be nɑn b bɑkɑ kɑɑ lenŋ nɑ. K mɑɑn tingbounŋ nɑ nbɑ tie biɑnŋ nbɑ mɔtɑɑnɑ, l sɑɑ gɑl ɑ. N k luon k siɑl n dɑɑmi’i ni. Jɑkpɑkl bɑkɑ be Yonmdɑɑnɔ tuonɑ ni e, k u goli wɑɑ sɑɑ tun lin nbɑ k penn Yonmdɑɑnɔ pɑl, ŋɑɑn puokuɑntuɑ ŋɑnin bɑkɑ be tingbounŋ nɑ bonɑ ni e, k u goli wɑɑ sɑɑ tun biɑnŋ nbɑ k penn u ŋɑɑpuo pɑl. L pɑɑk, u niɑɔnŋ bɔkt munle e. Puokɑlɑnkɑɑnn ɑmi sɑpɑɑmɔ bɑkɑ mun be Yonmdɑɑnɔ tuonɑ ni e nɑn wɑɑ sɑɑ tien biɑnŋ nbɑ k u gbɑnɑnt nɑn u siek ii tɑnŋ ii tie Yennu yɑl fɑnu, ŋɑɑn puo nbɑ kun juɑ ŋɑnin bɑkɑ be tingbounŋ nɑ bonɑ ni e, k u goli wɑɑ sɑɑ tun lin nbɑ k penn u sɔlɔ pɑl. N piɑk lin nbɑ nɑ i mɔnŋ sonml pɑɑk e, k l k tie ɑ n yɑɑ n mɑb’i kɑɑ, ŋɑɑn n luon yii be fɑnu, k jii i mɔnŋ kul k pet tul Yonmdɑɑnɔ. Juɑ i mɔk sɑlkpenŋ k u tɑn biel puo, k juɑ nɑ mɔk dudukt u po k kɑn fit suol u mɔnŋ, k duki nɑn l ŋɑn k wun kuɑn’ɔ, ŋɑɑnt k wun tun biɑnŋ nbɑ k u luon. L ŋɑn k wun kuɑn’ɔ. U k mɔk biit. Ŋɑɑn wun nbɑ pɑl cie, k u mi nɑn siɑl kɑn dɑɑmi’ɔ, k u sɑɑ fit suol u mɔnŋ niɑɔnŋ, k dukn u pɑl ni ɑ u kɑn kuɑn u sɑlkpenŋ, ŋɑnn mun ŋɑn. Ŋɑnn, wun nbɑ kuɑn u sɑlkpenŋ, l ŋɑn, ŋɑɑn wun nbɑ mun k kuɑn u sɑlkpenŋ, u tun lin nbɑ ŋɑn k gɑl wun nbɑ kuɑn nɑ wɑɑ. Puo nbɑ mɔk u sɔlɔ k u dɑɑ be u mɑnfuol ni, u k yen u mɔnŋ, ŋɑɑn u sɔlɔ i kpo, u ji mɔk yiikuo nbɑ k sɑɑ kun wun nbɑ k u luon, ŋɑɑn l ŋɑn k u juɑ mɑnŋ ii tie Yonmdɑɑnɔ yuɑ. Ŋɑɑn min yɑɑ buol ŋɑnin n dukn nɑn l i tie k u be k k kun juɑ, l sii mɑn’ɔ k gɑl nɑn wɑɑ bo sɑɑ kun juɑ. Nnɑ e k n dukn, k n mun mi nɑn n mɔnŋ mɔk Yennu Siek. Tɔn, ŋɑɑnt tin got pɑtɑ nɑnt lɑbɑɑl. L tie mɔni nɑn t kul mɔk minu, ŋɑɑn minu te k nilɔ dont u mɔnŋ, ŋɑɑn lonm ŋɑnin sonmt nilɔ e *Klistu wɑɑnu ni. Wun nbɑ duki nɑn u mi siɑl, l dɑɑnɔ dɑɑ k mi nɑn wɑɑ bo sii mi nɑ. Ŋɑɑn dɑɑnɔ nbɑ luon Yennu, ŋuɑ e k Yennu mi’u. Tɔn, k jikt sɑɑ pɑtɑ nɑnt ŋmɑmu po, t mi nɑn pɑtl tie bont nbɑ k fo, k biɑ mi nɑn Yen-yenɔ kuɑ e be. Pɑtɑ i lek i ji kii be gbɑɑ, k be sɑnpɑɑpo ɑmi tingbounŋ nnɑ, (k mɑɑn pɑtɑ bonciɑnn nɑn yonmdɑnm nbɑ k niib jiɑntl nɑ bonciɑnn be), ŋɑɑn tinm yɑɑ buol ni ŋɑnin, Yen-yenɔ kuɑ e be, k ŋuɑ e tie Bɑɑ nbɑ din nɑn bonsiɑl kul, k u pɑɑk e k t fo, k Yomdɑɑn-yenɔ kuɑ e be, wun nbɑ tie Yiesu Klistu. Ŋuɑ e te k bonsiɑl kul be, k u pɑɑk e biɑk k t fo. Ŋɑɑn suɑ kul kɑɑ mi l bɑlmɔni. Nisiɑb mɑntk mɑɑn pɑtmɑnnu bonciɑnn. L pɑɑk te k nɑn mɔtɑɑnɑ, b i ŋmɑn nɑnt mɑnŋ i e, b duki ɑ l tie pɑtɑ nɑnt e. B dudukt k pɑɑl, k b duki ɑ l mɔk biit. Ŋɑɑn jiet kɑɑ sɑɑ te k t nɑki Yennu. T i kii dii, siɑl k puɑl’t. T i biɑ kii dii, l biɑ k pukn’t siɑl. Ii mi mɑn, pɑsiɑl yin tɑn jii i yiikuo nɑ k lin kpɑnt lin nbɑ te k bin nbɑ yɑɑ yɑdɑ wɑɑl nɑ n gbiɑt k bɑɑ. K wun nbɑ yɑdɑ wɑɑl i lɑ fin nbɑ mɔk bɑnnu nɑ, k ɑ be puociɑnfiek ni k di, l kɑn te k ŋuɑ mun n di pɑtɑ jiet ii? Fin nbɑ tie bɑntuɑ nɑ, ɑ bɑnnu nɑ sɑɑ biil ɑ nɑɑ bik nbɑ yɑdɑ k pɑɑl nɑ, wun nbɑ k Klistu din gɑɑl u pɑɑk k kpo nɑ. Fi i tie nnɑ k tuun biit k tien ɑ nɑɑ wɑɑs, k biil b dudukt nbɑ k cie nɑ, l wɑnt nɑn ɑ tuun biit k tien Klistu e. Ŋɑnn, l i tie lin nbɑ k n di nɑ pɑɑk i e te k n nɑɑ bik bɑɑ biit ni, ŋɑnn n ji kɑn bɑn ŋmɑn pɑtl nɑnt, k nnɑ e k n kɑn te k wun bɑɑ. N k yen n mɔnŋ ii? N k tie *tuomi kɑɑ ɑɑ? N din k lɑ t Yonmdɑɑnɔ Yiesu uu? N tuonɑ nbɑ k n tuun k tien Yonmdɑɑnɔ nɑ pɑɑk kɑɑ k i mun tie Klistuyɑb ii? Siɑb i kii sɑk ɑ n tie tuomi, ŋɑɑn yinm ŋɑnin, l kpɑɑ tɑlɑs yin sɑk, k mɑɑn yɑɑ tɑɑn nɑn *Klistu nɑ, ŋɑnn e tie nyinn nɑn n set tie tuomi e. Niib i piɑk k biil n sɑnn, n sɑɑ jiin nnɑ e k nyi lenŋ. T k mɔk yiikuo nbɑ k t sii di k nyu t tuonn nɑ pɑɑk ii? T biɑ k mɔk yiikuo nbɑ k sɑɑ jii puo nbɑ tie Klistuyuɑ kii lin nɑn’ɔ, nɑn tuomiinbɑ siɑb nɑn Yonmdɑɑnɔ ninjɑnm nɑn Piɑl nbɑ tie biɑnŋ nbɑ nɑ ɑɑ? Kuo, i duki ɑ l tie min nɑn Bɑɑlnɑɑbɑɑs kuukuɑ e sii tuun tuonn k dint t mɔnŋ ii? Seje lɑnnɔ e tuun tuonn ŋɑɑn pɑ u mɔnŋ i? K ŋmee sii ko tilonti nbɑ k b yi *fiinyɑnbɑ nɑ ni ŋɑɑn kɑn di l luɑnɑ? Ami ŋmee sii kpɑɑl bonkobt ŋɑɑn kɑn nyu b biin i? I dɑɑ duki nɑn n bikn nɑn nisɑɑlk binbenŋ kɑɑ k yet nnɑ. K mɑɑn Muois *senni nɑ mun biɑ yet ŋɑnn e. L diɑn Muois senni nɑ ni ɑ: «Nɑɑb i ŋmɑɑn dii k pini dibin, fɑɑ dɑɑ bobnt u mɔb » Yennu bɑkɑ be nei ni ee? Ami u k mɑntk yien tinm kɑɑ ɑɑ? Mɔmɔnm, l diɑn k tien tinm e. Wun nbɑ ko nɑn wun nbɑ buo tun nnɑ e k mɔk dindɑnn, k tɑn sɑɑ cent dii mɑnŋ. T din bul lin nbɑ tie siek yɑl i sinsuuk ni, k mɔtɑɑnɑ t i luon tin jɑɑn lin nbɑ k i mɔk nɑ siɑl i e, l k ŋɑn ii? Siɑb i mɔk yiikuo k sɑɑ gɑɑl bonɑ i buol, k tinm ŋɑnin k mɔk l yiikuo k cie ŋɑnm ii? Ŋɑɑn t k jii yiikuo nɑ k tun nɑn’n tuonn, ŋɑɑn t di fɑlɑ bonsiɑl kul ni, k mɑɑn t k luon k tin te k Klistu lɑbɑmɑnn nɑ n jil puol. I ponŋ mi nɑn bin nbɑ tuun Yennu jɑɑnti ŋɑsɑɑkɑk ni nɑ, b jiet nyi b tuonn mɑnŋ ni e, k bin nbɑ mɑnn *mɑlunŋ k tien Yennu, binbintl pɑɑk nɑ mun gɑɑn b yɑl lenŋ e. Nnɑ e mun k Yonmdɑɑnɔ tul mɔb ɑ bin nbɑ muɑntl u lɑbɑmɑnn nɑ, b jiet mun sii nyi lenŋ e. Ŋɑɑn n k jii yiikuo nɑ k tun nɑn tuonn, k biɑ k dɑ nɑ ɑ i tul’n siɑl. Mi i kpo, l sɔ nɑn suɑ n te k n *yudɑnt n ŋmɑt puol. L k tie ɑ n mɔk pɑlbifɑɑnt mɑɑ muɑntl lɑbɑmɑnn nɑ pɑɑk kɑɑ, k mɑɑn l kpɑɑ tɑlɑs k n muɑnt’l. Mi i kii muɑnt lɑbɑmɑnn nɑ, bonbiil sii tie n yɑl e. Mi i bo i lukt tuonn mɑnŋ n tiɑɔnŋ u e, n bo sɑɑ lɑ nyuɑt, ŋɑɑn min kɑɑ lukt n mɔnŋ, l tie Yennu e guun’n tuonn mɑnŋ. Lɑnn e tie n nyuɑt i? N nyuɑt tie mɑɑ fit k muɑntl lɑbɑmɑnn nɑ yɑnn nɑ e, k k jii yiikuo nbɑ k n mɔk’l lɑbɑmɑnn muɑntu ni nɑ k gɑɑn siɑl. N yen n mɔnŋ e, n k tie suɑ dɑɑbl kɑɑ, ŋɑɑn n jii n mɔnŋ k kpɑnt dɑɑbl k tul suɑ kul, ɑ niib bonciɑnn n lɑ fielu. *Suifnbɑ buol ni, n jii n mɔnŋ k tien nɑn ŋɑnm nɑ e ɑ bin lɑ fielu. Bin nbɑ mun wɑɑ senni nɑ, n jii n mɔnŋ k tien nɑn b yenɔ nɑ e, ɑ k bin nbɑ wɑɑ senni nɑ n lɑ fielu, ŋɑɑn n mɔnŋ k be senni nɑ yiikuo ni. Bin nbɑ k mɔk senni nɑ, n jii n mɔnŋ k tien nɑn b yenɔ nɑ e, ɑ bin lɑ fielu. Nɑ k wɑnn nɑn n k sɑɑk Yennu senni nɑ, ŋɑɑn n be Klistu senni yiikuo nɑ ni. Bin nbɑ yɑdɑ wɑɑl nɑ k n kpint n mɔnŋ k tien nɑn b yenɔ nɑ e ɑ bin lɑ fielu. N lebt n mɔnŋ bonsiɑl kul ni k tul niib kul, k luon b siɑb n lɑ fielu. Lɑbɑmɑnn nɑ pɑɑk e k n tie lin nbɑ nɑ kul ɑ n tɑn lɑ nyuɑt. I k mi nɑn l i tie nɑntɑɑl, nɑntɑtinnɑ kul tuu tiin e, ŋɑɑn yenɔ kuɑ e tuu tɑn di k gɑɑl piini ii? L pɑɑk, yɑbt mɑn k tin bɑnnu nbɑ k i sɑɑ di k gɑɑl piini mɑnŋ. Nɑntɑtinnɑ kul so b mɔnŋ e bont kul ni, ɑ bin gɑɑl piini nbɑ k wɑ nɑn lin gbenn, ŋɑɑn tinm so t mɔnŋ ɑ t tɑn gɑɑl piini nbɑ kɑɑ gbennu. Ŋɑnn e tien k n tiin ɑ n sɑɑ bɑɑl l pɑɑk. Ŋɑnn e tien k n k gbɑɑ yɑnn. N muks n gbɑnɑnt k u sɑɑk’n, k mɑɑn n k luon min nbɑ muɑntl lɑbɑmɑnn nɑ k tien niib nɑ n tɑn kɔnŋ piini nɑ. N nɑɑ wɑɑs, n luon k yin bɑnn nɑn sɑnpɑgbounŋ din tuu bɑɑk t yejɑnm kul pɑɑk e, k b tɑn gɑl puot mɔkmunŋ. Sɑnpɑgbounŋ nɑn mɔkmunŋ nɑ ni, b din wul’b Yennu nyunwulu k ŋɑnm nɑn Muois lɑkn tien yonm. B kul din lɑkn dii bɑktnɔunŋ jiet nbɑ k Yennu tul’b nɑ, k biɑ lɑkn nyuu bɑktnɔunŋ nyun nbɑ din nyi tɑnpiiuk ni. Tɑnpiiuk mɑnŋ din tie *Klistu e k ciɑn’m. Ŋɑɑn lin nbɑ nɑ kul ɑ, Yennu din k mɔk pɑlpienn nɑn b bonciɑnn, k te k b kpo kpo, k b gbɑnɑnt yɑt duɑ duɑ pɑɑnpieonŋ ni. L pɑɑk, l tie wɑnnu e k kpɑɑn’t ɑ t dɑɑ luon biit nɑn bɑɑ din luon biɑnŋ nbɑ nɑ. Dɑɑ mɑnn pɑtɑ nɑn b siɑb nbɑ din tuun, k l diɑn Yennu lolkpel kɑdɑɑɔk ni ɑ: «K niib nɑ kɑl k di k nyu, ŋɑɑn ji fiil lenŋ k conm.» T dɑɑ tuun boncunconsn nɑn b siɑb nbɑ din tuun, k dɑyenn kuɑ k niib tusɑ piinle nɑn ŋɑntɑ kpo nɑ. T dɑɑ biki Yonmdɑɑnɔ nɑn b siɑb nbɑ din tun, k wɑi kpii’b nɑ. T dɑɑ mɔk bunbulmi nɑn b siɑb nbɑ din mɔk, k kuun *mɑlɑkɑ kpii’b nɑ. Lin nbɑ nɑ kul tun k tul’b k l tie nyinn k tul lieb, k l diɑn Yennu lolkpel kɑdɑɑɔk ni k tie kpɑɑni k tul tinm nbɑ be yuo nbɑ k *dulnyɑ luon gbennu nɑ. L pɑɑk, wun nbɑ mi nɑn u be fɑnu, wun suol u mɔnŋ k dɑɑ bɑɑ. Biknu nbɑ kul bɑɑl i buol ni, l tie lin nbɑ tun bɑɑt niib buol e. Yennu tie bɑlmɔni dɑɑnɔ k kɑn te k biknu n bɑɑl i buol k gɑl i pɑnŋ telk, ŋɑɑn yuo nbɑ k biknu bɑɑl i buol, u sɑɑ tul’i pɑnŋ nbɑ k i sɑɑ nyɑnn’l k nyi lenŋ. N nɑɑ wɑɑs, l pɑɑk, i nyinn i mɔnŋ pɑtmɑnnu ni. N piɑk k tien yinm yɑndɑnm e. I mun dukn lin nbɑ k n pɑk k tul’i nɑ po. T tien Yennu niipuouk yetŋɑnm *kɔp nɑ pɑɑk. Yuo nbɑ k t nyu tinm nɑn Klistu sɔn k tɑɑn yonm kɑɑ nɑ ɑɑ? K pɑɑnu nbɑ k t tuu ŋmit ŋmit k ŋmɑn nɑ, ŋɑnn e mun biɑ sie Klistu gbɑnɑnt ni ii? Lɑɑ tie pɑɑnu yenn nɑ, tinm nbɑ yɑb nɑ tɑɑn tie gbɑnɑn-yent, k mɑɑn t kul lɑkn ŋmɑn pɑɑnu yenn nɑ e. Gotl Islɑɑeltieb. Bin nbɑ di jiet nbɑ k b jii k mɑnn *mɑlunŋ binbintl pɑɑk nɑ, b k tɑɑn nɑn Yennu nbɑ yen binbintl mɑnŋ ii? Mɑɑ yien lin nbɑ nɑ, l wɑnn nɑn pɑtl nɑn l nɑnt nbɑ k b mɑnn nɑ, l tie siɑl ii? Aɑi, l k tie siɑl. N yien ɑ bin nbɑ mɑnn mɑlunŋ k tien pɑtɑ nɑ, ŋɑɑn b set mɑnn k tien nɑlnbiit e. L k tie Yennu kɑɑ. N k luon k yin tɑɑn nɑn nɑlnbiit. I kɑn fit lɑkn kɑl k nyu Yonmdɑɑnɔ kɔp ni, k biɑ lɑkn kɑl k nyu nɑlnbiit kɔb ni. I kɑn fit lɑkn kɑl k di Yonmdɑɑnɔ jiet k biɑ lɑkn kɑl k di nɑlnbiit yɑl. T luon k Yonmdɑɑnɔ i mɔk *funfunn nɑn tinm ee? Tinm e pɑɑl’ɔ ɑɑ? B yien ɑ: «Sɔnu be k t sɑɑ fit tun lin nbɑ kul.» Nnn, ŋɑɑn bont kul kɑɑ ŋɑn. «Sɔnu be k t sɑɑ fit tun lin nbɑ kul.» Nnn, ŋɑɑn bont kul kɑɑ mɔk nyuɑt k tul Klistuyɑb. I suɑ dɑɑ luon u mɔnŋ nyuɑt kɑɑ, ŋɑɑn kii luon lieb nyuɑt. Ii ŋmɑn nɑnt nbɑ k b kɔi dɑɑk ni, ŋɑɑn dɑɑ boi buboit nbɑ sii dɑɑmi i dudukt ni, k mɑɑn l diɑn Yennu lolkpel kɑdɑɑɔk ni ɑ: «Tingbounŋ nɑ nɑn l bont kul tie Yennu yɑl e.» L i tie k wun nbɑ k tie Klistuweilɔ yiin’ɑ ɑ i sɑɑ di jiet u ŋɑɑk ni k ɑ sɑk, fii sɑɑ k sɑɑ di lin nbɑ kul k u tul’ɑ, k dɑɑ boi buboit nbɑ sɑɑ dɑɑmi ɑ dudukt. Ŋɑɑn suɑ i wɑnn’i ɑ: «Nɑnt nɑ tie pɑtl nɑnt e,» i dɑɑ ŋmɑn, k mɑɑn i bɑkɑ sii be wun nbɑ yien nnɑ ni, k biɑ jen ɑ, l tie lin nbɑ dɑɑmi dudukt. N k yien i dudukt kɑɑ, ŋɑɑn wun nbɑ yien nnɑ nɑ dudukt. Ŋɑɑn suɑ sɑɑ boi ɑ: «Nlee k n sɑɑ ŋɑɑn k luɑ dudukt n wɑnn’n mɑɑ sɑɑ tun lin nbɑ ɑmi mɑɑ sɑɑ nyik lin nbɑ? L i tie k n tul Yennu niipuouk n jiet nɑ pɑɑk, nlee k suɑ sɑɑ tɑɑl’n jiet nbɑ k n tul Yennu niipuouk l pɑɑk nɑ pɑɑk i?» Tɔn, l i tie k i di, ɑmi k i nyu bon-nyu-nyuut, ɑmi k i tuun lin nbɑ kul, ii tie mɑn lin nbɑ sɑɑ donn Yennu sɑnn. I dɑɑ tuun lin nbɑ sɑɑ te k niib i tuun biit, l i tie *Suifnbɑ ɑmi Gleknbɑ ɑmi Yennu mɔtɑɑɔk niib. Ii tuun nɑn min nɑ mɑn. N tuu luon k min tun k penn suɑ kul pɑl bont kul ni. N k luon min kuukuɑ ŋɑnm kɑɑ, ŋɑɑn n luon suɑ kul ŋɑnm e, k suɑ kul n fit lɑ fielu. L pɑɑk, ii wɑɑ n binbenŋ nɑn mɑɑ wɑɑ *Klistu binbenŋ biɑnŋ nbɑ nɑ. N nɑɑ wɑɑs, n pɑk’i nɑn yɑɑ tiɑn n po yuo kul, k biɑ wɑɑ wɑnnu nbɑ k n din wɑnn’i nɑ. Ŋɑɑn bon-yenn kuɑ e be k n luon k i gbɑt l pɑɑk. Klistu tie juɑ kul yudɑɑnɔ, k juɑ kul mun tie u puo yudɑɑnɔ, k Yennu mun tie Klistu yudɑɑnɔ. L pɑɑk, juɑ nbɑ yɑɑ wun miɑl Yennu ɑmi k sɔkn Yennu mɑɑn nɑ jɑɑnti ni, ŋɑɑn yil siɑl k dɔkn u yul, u k tul Klistu bɑɑkl. Ŋɑɑn puo nbɑ yɑɑ wun miɑl Yennu, ɑmi k sɔkn Yennu mɑɑn nɑ ŋɑɑn k k yil siɑl, u dinn u sɔlɔ fei e, k l tie nɑn u kuol u yul nɑ e. L i tie k puo k yil siɑl k dɔkn u yul, l ŋɑn wun puɑ u yut. Ŋɑɑn lɑɑ tie fei k puo n kuol u yut, ɑmi k puɑ u yut nɑ, l ŋɑn wun yil siɑl k dɔkn u yul. L k ŋɑn k juɑ n yil siɑl, k mɑɑn u tie Yennu ninnɑɔnŋ k biɑ wɑnt u *yudɑnt, ŋɑɑn puo ŋɑnin wɑnt juɑ nɑ yudɑnt e. K mɑɑn juɑ nɑmu k nyii puo ni kɑɑ, ŋɑɑn puo nɑmu nyii juɑ ni e. Yennu din k nɑn juɑ k tul puo kɑɑ, ŋɑɑn u nɑn puo e k tul juɑ. L pɑɑk, *mɑlɑkɑɑnbɑ pɑɑk, l ŋɑn k puo n yil siɑl k dɔkn u yul, k lin wɑnn nɑn juɑ nɑ mɔk puo nɑ yiikuo. Ŋɑɑn Yonmdɑɑnɔ buol ni ŋɑnin, puo kɑn fit kii be k juɑ kɑɑ, k juɑ mun kɑn fit kii be k puo kɑɑ, puo nbɑ din nyii juɑ gbɑnɑnt ni nɑ, nnɑ e mun k puo mɑl juɑ, ŋɑɑn bont kul nyi Yennu buol e. I boi i mɔnŋ k lɑɑn l ŋɑn k puo i mei Yennu jɑɑnti ni k kɑn dɔkn u yul siɑl ii? A i got bonɑ kul nbɑ k Yennu din nɑn nɑ ni, l ponŋ wɑnn nɑn juɑ ii mɔk yumunt l tie fei e k tul’ɔ, ŋɑɑn puo yut i tie yumunt, l tien’ɔ fɑnt e, k mɑɑn puo yumunt tie u yuliiuk o. Ŋɑɑn suɑ i luon wun noi mɔniɑɔk k jiin l po, n sɑɑ yet ɑ tinm ɑmi Yennu mɔtɑɑɔk niib kul k mɔk kɑɑl k pukn nɑ po. Mɑɑ lɑ lin nbɑ, n k pɑk’i ni, k mɑɑn i tintɑɑnɑ nbɑ biil’i bɑnnu nbɑ e cie lɑ ŋɑnmt’i bɑnnu nbɑ. Sinsinn, n gbiɑ k b yien ɑ yɑɑ tuu lɑkn lieb nɑ, bɔktu be i sinsuuk ni, k n set gɑɑl yenn-nbɑ k l tie mɔmɔnm e. L set tie mɔni e nɑn luktn kpɑn be i sinsuuk ni, ɑ bin fit bɑnn bin nbɑ wɑɑ bɑlmɔni sɔnu i sinsuuk ni. L i tie k i lɑkn lieb k di, l k tie Yonmdɑɑnɔ mɔtɑɑɔk dinu kɑɑ k i di, k mɑɑn yii lɑkn lieb yuo nbɑ nɑ, suɑ kul tuu nyɑ e, k siɑb mɔ kon, k lieb yib. I k mɔk i mɔnŋ ŋei nbɑ k i sii be k di k nyu uu? Ami i luon yin siɑn Yennu mɔtɑɑɔk niib e k dinn tɑli fei i? N sɑɑ yet’i ɑ bee? N sɑɑ dont’i lin nbɑ nɑ pɑɑk ii? Aɑi, n kɑn dont’i ni. K mɑɑn wɑnnu nbɑ k n din gɑɑl Yonmdɑɑnɔ buol k tuɑt k tul’i e nɑ, nyiɑɔk nbɑ k b din kuɑt Yonmdɑɑnɔ nɑ, k u jii pɑɑnu k wɑɑ tul Yennu niipuouk gbenn yuo nbɑ, k u ŋmit ŋmit ŋɑɑn yet ɑ: «Nɑ e tie n gbɑnɑnt nbɑ k n yɑɑ n tul’i, k bin kpi i pɑɑk nɑ. Ii tun kii tie nnɑ mɑn kii tiɑn n po.» Nnɑ e mun, k jiet nɑ dinu puolpo, k u biɑ jii kɔb, ŋɑɑn yet’b ɑ: «Dɑmunŋ nɑ tie n sɔn nbɑ wɑnt nɑn Yennu *lol lolpɑɑnn k tul niib, k yuo nbɑ kul k i yɑɑ i nyu, nyun mɑn kii tiɑn n po.» Yuo nbɑ kul k i tɑn ŋmɑn pɑɑnu mɑnŋ k nyuu dɑmunŋ mɑnŋ, i muɑnt Yonmdɑɑnɔ kuun e mɔkmɔk nɑn yuo nbɑ k u tɑn sɑɑ jen. L pɑɑk, wun nbɑ kul ŋmɑn Yonmdɑɑnɔ pɑɑnu nɑ, k nyuu u *kɔp ni nɑ, bɑnnu nbɑ k l k tien Yonmdɑɑnɔ bɑɑkl nɑ, l dɑɑnɔ tun biit k tul Yonmdɑɑnɔ gbɑnɑnt nɑn u sɔn nɑ wɑɑ. L pɑɑk, suɑ kul n got u dudukt ni fɑnu wɑɑ, ŋɑɑn fit ŋmɑn pɑɑnu nɑ k biɑ nyu dɑmunŋ nɑ. K mɑɑn wun nbɑ ŋmɑn k nyuu ŋɑɑn k k bɑnn nɑn l tie Yonmdɑɑnɔ gbɑnɑnt e, u nyunu nɑn ŋmɑmu nɑ sɑɑ bɑɑl nɑn tubdɑtu u pɑɑk e. Ŋɑnn i tien k i bonciɑnn cɔk k yiɑl, k siɑb mun kpo. Ŋɑɑn l i bo i tie k t got t dudukt fɑnu sinsinn, Yennu kɑn bu t buut. Ŋɑɑn Yonmdɑɑnɔ bu t buut k ŋmɑnn t tubɑ, ɑ u tɑn dɑɑ biil tinm nɑn tingbounŋ nɑ ni nilieb, *dulnyɑ cincɑɑtdɑɑl. L pɑɑk n nɑɑ wɑɑs, l i tie k i lɑkn lieb ɑ i di Yonmdɑɑnɔ mɔtɑɑɔk dinu, yin guul lieb Suɑ i be k kon mɔk’ɔ, wun di u ŋɑɑk ni wɑɑ, ɑ k l dɑɑ te k i bɑni Yennu buut i mɔnŋ pɑɑk yuo nbɑ k i tɑɑnt lieb. Mɑɑn nbɑ biɑl nɑ, mi i tɑnŋ i bɑɑl, n sɑɑ pɑk k tul’i N nɑɑ wɑɑs, n luon k yin bɑnn Foŋɑnm piini nbɑ tie biɑnŋ nbɑ e nɑn bɑlmɔni. I mi nɑn yuo nbɑ k i dɑɑ din k tie Klistuyɑb nɑ, i din tuu tiin k sɑɑ pɑtɑ buol e, k b yen’i. L pɑɑk, k n luon k yin bɑnn nɑn Foŋɑnm nɑ i be wun nbɑ ni, l dɑɑnɔ kɑn fit pol Yiesu mɔb, k suɑ mun kɑn fit yet ɑ: «Yiesu e tie Yonmdɑɑnɔ,» sie k Foŋɑnm nɑ be u ni k te k u yet nnɑ. Foŋɑnm piinbuolu buolu be, ŋɑɑn Foŋɑnm yenɔ kuɑ e be. Bɑnnu nbɑ k t sɑɑ fit tun Yonmdɑɑnɔ tuonn mɔk buolu buolu, ŋɑɑn Yomdɑɑn-yenɔ kuɑ e be. Tuonbuolu buolu mun be, ŋɑɑn Yen-yenɔ kuɑ e tuun l kul niib kul ni. Suɑ kul ni, Foŋɑnm tuu tun siɑl k l tie piini k sonmt suɑ kul. Foŋɑnm tuu te k suɑ piɑk nɑn yɑn e, Foŋɑnm mɑnŋ e biɑ tuu te k nilɔ piɑk nɑn minu. Foŋɑn-yenml mɑnŋ e te k suɑ mɔk yɑdɑ nbɑ kɑɑ pɑɑk, k biɑ tien nilɔ mun yiikuo nbɑ k u sii te k bɑɑtb pɑɑkt. Foŋɑnm tien suɑ yiikuo nbɑ k u sɑɑ fit kii tuun bɑktnɔunŋ tuonɑ. K luɑ biɑ sɔknt mɑɑn nbɑ nyi Yennu buol nɑ. K tul luɑ minu nbɑ k u sɑɑ fit bɑnn nɑlnbiit nɑn nɑlnŋɑni. Lin nbɑ nɑ kul tie Foŋɑnm mɑnŋ tuonɑ e, k u pi suɑ kul piini nɑn ŋuɑ Foŋɑnm nbɑ luon biɑnŋ nbɑ. *Klistu tie nɑn gbɑnɑn-yent nɑ e ŋɑɑn mɔk bɔkl bɔkl. Gbɑnɑnt mɑnŋ nbɑ lek bɔkt bɔkt nɑ ŋɑɑn l biɑ tie gbɑnɑn-yent e. Nnɑ e k t kul ɑ, *Suifnbɑ ɑmi bin nbɑ k tie Suifnbɑ, dɑɑbɑ ɑmi bin nbɑ yen b mɔnŋ, Foŋɑnm kuɑ wul t kul Yennu nyunwulu ɑ tii tie gbɑnɑn-yent k t kul ɑ biɑ nyuu Foŋɑnm mɑnŋ e. Gbɑnɑnt k mɔk bɔkyenn kuɑ kɑɑ ŋɑɑn l bɔkɑ yɑb ɑ. L i tie k tɑɑl yet ɑ: «N k tie gbɑnɑnt bɔkl kɑɑ k mɑɑn n k tie nuu,» ŋɑnn kɑɑ sɑɑ te k u k tie gbɑnɑnt mɑnŋ bɔkl. K tubl mun i yet ɑ: «N k tie gbɑnɑnbɔkl kɑɑ k mɑɑn n k tie ninbinn,» ŋɑnn kɑɑ sɑɑ te k u k tie gbɑnɑnt mɑnŋ bɔkl. Gbɑnɑnt nɑ kul i tɑɑn tie ninbinn i e, l sɑɑ tien nlee kii gbiɑ? k l i tɑɑn tie tubl, nlee k l sɑɑ gbɑt nublu? Ŋɑɑn Yennu tɑɑn gbɑnɑnt bɔkɑ kul k tien gbɑnɑn-yent kuɑ ni nɑn wɑɑ luon biɑnŋ nbɑ. Bɔkɑ kul i tie yenn i e, gbɑnɑnt sii be lee? Lɑɑ tie biɑnŋ nbɑ nɑ, gbɑnɑnt mɔk bɔkɑ buolu buolu bonciɑnn, ŋɑɑn l tie gbɑnɑn-yent kuɑ e. Ninbinn kɑn fit yet nuu ɑ: «N k luon’ɑ,» k yul mun kɑn fit yet tɑɑ ɑ: «N k luon’i ni.» Ŋɑɑn gbɑnɑnbɔkɑ nbɑ tie nɑn l k mɔk pɑnŋ nɑ i kɑɑ, gbɑnɑnt kɑn fit tun, k gbɑnɑnbɔkyenɑ nbɑ k t duki nɑn l k mɔk nyuɑt bonciɑnn nɑ, ŋɑnm e k t diɑ’l fɑnu k cie lielnbɑ, k gbɑnɑnbɔkliɑ nbɑ k t duki nɑn l k ŋɑn nɑn tii piɑk l po nɑ, t tuu jii tiɑt e k dɔkn. Gbɑnɑnbɔkyenn yenn-nbɑ gɑɑ k ŋɑn nɑ, l k luon sonml. Yennu te k gbɑnɑnbɔkɑ be nɑn lielnbɑ, ɑ bɔkɑ nbɑ k mɔk bɑɑkl nɑ i lɑɑt bɑɑkl mun. L pɑɑk, gbɑnɑnt k mɔk bɔktu. Gbɑnɑnbɔkɑ kul nbɑ gɑɑ gɑɑ nɑ, fiin b lieb po. Gbɑnɑnbɔkyenn kuɑ i di fɑlɑ, gbɑnɑnbɔkliɑ nɑ mun tuu di l fɑlɑ e. Gbɑnɑnbɔkyenn kuɑ i lɑ bɑɑkl, liɑ nɑ mun tuu mɔk pɑlpienn e. Yinm e lɑkn tie Klistu gbɑnɑnt, k suɑ kul tie gbɑnɑnbɔkɑ nbɑ gɑɑ nɑ yenn e. Ŋɑnn e k Yennu lukt tuomiinbɑ u niib sinsuuk ni k b tie sɑɑkɑb, k wei lukt sɔkniinbɑ, k wei lukt wɑntieb, k wei lukt bin nbɑ tuun bɑktnɔunŋ tuonɑ, k wei lukt bin nbɑ mɔk yiikuo k sɑɑ te k bɑɑtb pɑɑkt k wei lukt bin nbɑ sonmt lieb, k wei lukt bin nbɑ fit goli lieb tuonɑ k biɑ wɑnt’b bɑɑ sii tuun lin nbɑ nɑ, k wei lukt bin nbɑ piɑk mɑbuolu buolu. T kul kɑɑ tie tuomiinbɑ, ɑmi sɔkniinbɑ, ɑmi wɑntieb. T kul kɑɑ sii mɔk yiikuo k sɑɑ tun bɑktnɔunŋ tuonɑ. T kul kɑɑ biɑ mɔk yiikuo k sɑɑ te k bɑɑtb n pɑɑk, ɑmi k pɑk mɑbuolu buolu, ɑmi k kpintl mɑbuolu buolu. Ii luon mɑn piini nbɑ tie piinjɑɑnɑ nɑn ninmɔnn. Ŋɑɑn mɔtɑɑnɑ n sɑɑ wɑnn’i sɔnu nbɑ gɑl l kul. Tɔn, mi i lek i fit piɑk nisɑɑli nɑn *mɑlɑkɑɑnbɑ mɑbuolu kul, ŋɑɑn k k mɔk lonm, n tie nɑn gingɑnn ɑmi gbeklu fuut nɑ e. Mi i fit sɔknt Yennu mɑɑn, k bɑnt wuol ni mɑɑn kul, k mɔk bɑnnu, k mɔk yɑdɑ nbɑ sɑɑ fit te k juɑl n fikt k sɑɑn boliel po, ŋɑɑn k k mɔk lonm, n tie yɑnn e. Mi i jii n mɔktuk kul k tul nɑndɑnm, k lek jii n gbɑnɑnt cɑb k b juo muu gbɑɑ, ŋɑɑn k k mɔk lonm, n k mɔk nyuɑt. Wun nbɑ mɔk lonm nɑ, u mɔk suklu e nɑn bulcint niib pɑɑk. U k mɔk *funfunn, k biɑ k mɔk wɑnt-n-mɔnŋ, k biɑ k mɔk dont-n-mɔnŋ. U k tuun fei tuonn. U mɑntk k luon u mɔnŋ nyuɑt kuukuɑ kɑɑ. U k dont wutuol yiɑn yiɑn. U biɑ k duki bonbiil k jiint biit, biit pɑɑk. Wun nbɑ mɔk lonm k mɔk pɑlpienn nɑn bonbiil, ŋɑɑn mɔk pɑlpienn nɑn bɑlmɔni. Wun nbɑ mɔk lonm nyikt cɑbt bont kul, k mɔk yɑdɑ nɑn bont kul, k dɑɑn bont kul, k tuot bont kul. Lonm k mɔk gbennu. Bɑlsɔknu tɑn sɑɑ tɑb ɑ, k mɑbuolu pɑku n gbenn, k bɑnnu mun n bot. Setk nɑn mɔni t k mi bonsiɑl kul, k biɑ k sɔkn Yennu mɑɑn nɑ kul, ŋɑɑn yuo nbɑ k lin nbɑ ŋɑn nɑ i tɑnŋ i bɑɑl, lin nbɑ k ŋɑn nɑ sɑɑ gɑl e. Mɑɑ din tie bik, n pinpɑkt nɑn n bɑnnu nɑn n dudukt din tie bisuk o, ŋɑɑn mɑɑ ji tɑn biel nilɔ, n ji nyik bisn ni bonɑ e. Tɑɑ lɑɑt bonɑ bɑnnu nbɑ mɔtɑɑnɑ tie nɑn t goli miɑnu ni nɑ e, ŋɑɑn k k lɑɑt fɑnu, ŋɑɑn t tɑn sɑɑ lɑ’l ninpieee e. Mɑɑ mi lin nbɑ nɑ, l dɑɑ wɑɑl, ŋɑɑn n tɑn sii mi’l fɑnu, nɑn Yennu nbɑ mi’n fɑnu biɑnŋ nbɑ nɑ. Tɔn, yɑdɑ nɑn dindɑnn nɑn lonm, l bonɑ ŋɑntɑ dɑɑ be mɔtɑɑnɑ, ŋɑɑn lonm e gɑl l kul. Ii luon lonm k gɑl bont kul, ŋɑɑn kii biɑ kii luon Foŋɑnm piini nɑn ninmɔnjɑl, ŋɑɑn kii mɑntk i luon piini nbɑ tie bɑlsɔknu. Wun nbɑ piɑk mɑbuolu buolu nbɑ k Foŋɑnm wɑnn’ɔ nɑ, u piɑk tien Yennu e, u k piɑk tien niib kɑɑ, k mɑɑn suɑ k gbiɑ l pɑɑk. U piɑk bɑlmɔni nbɑ k nilɔ kɑn fit k gbɑt l pɑɑk nɑ e, Foŋɑnm pɑnŋ ni. Ŋɑɑn wun nbɑ sɔknt Yennu mɑɑn k tien niib, u tien’m pɑnŋ e, k kuɑnt’b pɑlɑ, k biɑ tien’m pɑlmɑɑsl. Wun nbɑ piɑk mɑbuolu buolu, u cien u mɔnŋ yɑdɑ kuukuɑ e, ŋɑɑn wun nbɑ sɔknt Yennu mɑɑn, u cien *Klistu mɔtɑɑɔk niib kul yɑdɑ. N luon k suɑ kul ii piɑk mɑbuolu buolu, ŋɑɑn n biɑ mɑntk luon k i kul ɑ i sɔknt Yennu mɑɑn. Wun nbɑ sɔknt Yennu mɑɑn mɔk nyuɑt k gɑl wun nbɑ piɑk mɑbuolu buolu, sie k suɑ be k fit kpintl mɑbuolu buolu mɑnŋ k wɑnn Klistu mɔtɑɑɔk niib k lin cie b yɑdɑ. N nɑɑ wɑɑs, mi i bɑɑl i buol k tɑn piɑk mɑbuolu buolu, sonm lɑnn e k n sonmt’i ni? Sonml kɑɑ, sie k n bɑɑl k fiit bonɑ nbɑ nyii Yennu buol k wɑnn’i, ɑmi n pukn’i bɑnnu, ɑmi k sɔkn Yennu mɑɑn k tul’i, ɑmi n tul’i wɑnnu. L mun biɑ tie nnɑ e nɑn jeluk bonɑ, lɑɑ tie yelk kuo biɑɔk, k l libn k mɔ, ɑ sɑɑ tien nlee k lukt yelk mɔni kuo biɑɔk mɔni i? Wun nbɑ fɑɑ tinpɑni ŋɑɑn k k mi fɑɑnu, ŋmee sɑɑ bobn k tuok tɑb u? Nnɑ e mun, l i tie k i piɑk mɑbuolu buolu, nlee k b sɑɑ gbɑt lin nbɑ k i piɑk nɑ pɑɑk i? I piɑk wɑn ni e. Mɑbuolu bonciɑnn be tingbounŋ nɑ ni, ŋɑɑn l kul mɔk pɑɑk e. Ŋɑnn k mi i kii mi mɑɑn pɑɑk, n tie sɑɑmɔ e k tul wun nbɑ piɑk nɑn’n nɑ, k wun nbɑ mun piɑk tien’n nɑ mun tie sɑɑmɔ e n buol. Yɑɑ set luon Foŋɑnm piini nɑ, ii luon piini nbɑ sɑɑ sonm Klistu mɔtɑɑɔk niib nɑn b yɑdɑ. Lɑɑ tie bɑnnu nbɑ, wun nbɑ piɑk mɑbuolu, l ŋɑn wun miɑl Yennu k wun te k wun fit sɔkn lin nbɑ k u piɑk mɑnŋ. L i tie k n mei Yennu mɑbuolgɑni ni, n pɑl be yenmiɑlu pɑɑk e, ŋɑɑn n subni nɑ k tuun siɑl. Ŋɑnn n sɑɑ tien nlee? N sɑɑ miɑl Yennu n pɑl ni, k biɑ miɑl’ɔ nɑn n subni nɑ. Fi i jii mɑbuolu buolu k tul Yennu niipuouk ɑ siek ni kuukuɑ, k nilɔ nbɑ k ɑ be nɑn’ɔ nɑ k mi fɑɑ yien lin nbɑ, u sɑɑ tien nlee k fit jiin ɑ: « * Amenn» ɑ niipuouk tulu nɑ pɑɑk, wɑɑ k gbɑt fɑɑ piɑk lin nbɑ nɑ pɑɑk i? A Yenmiɑlu nɑ i lek i ŋɑn, ŋɑɑn l k mɔk sonml k tul suɑ u yɑdɑ ni. N tul Yennu niipuouk nɑn mɑɑ piɑk mɑbuolu buolu k gɑl i kul nɑ, ŋɑɑn mi i be Klistu mɔtɑɑɔk niib sinsuuk ni, n sii luon k n pɑk mɔbonɑ ŋɑnŋmu nbɑ mɔk pɑɑk k wɑnn’b siɑl nɑ, k gɑl mɑɑ sɑɑ pɑk mɔbonɑ tusɑ piik mɑbuolu buolu ni. N nɑɑ wɑɑs, yuo nbɑ k i duki, i dɑɑ tie wɑɑs. L i tie k l tie, k tun bonbiil i e, yii tie nɑn sɑnpɑnti nɑ mɑn, ŋɑɑn l i tie k i yɑɑ yin dukn dudukt yii tie sɑɑkɑb. L diɑn Yennu lolkpel kɑdɑɑɔk ni ɑ u yet ɑ: «N tɑn sɑɑ tun nisiɑb bin nyi siɑl po k tie sɑɑnm k tɑn pɑk n mɑɑn bɑlgɑni ni k tul n niib, ŋɑɑn b lek kɑn gbiint’l.» L pɑɑk, mɑbuolu buolu tie nyinn e k tul bin nbɑ k tien Klistu yɑdɑ nɑ, ŋɑɑn l k tie nyinn k tul bin nbɑ tien yɑdɑ nɑ kɑɑ. Ŋɑɑn Yennu mɑɑn sɔknu tie nyinn k tul bin nbɑ tien yɑdɑ, k k tie nyinn k tul bin nbɑ k tien Klistu yɑdɑ nɑ. Klistu mɔtɑɑɔk niib kul ii lɑkn lieb, k suɑ kul piin piɑk mɑbuolu buolu, k bin nbɑ k bɑn l po ɑmi bin nbɑ k tie Klistuweilɑ tɑn kuɑ, b kɑn yet ɑ i wɑɑt ee? Ŋɑɑn Klistuweilɑ ii lɑkn lieb, k b gɑɑn Yennu mɑɑn k sɔknt tien niib, k wun nbɑ k tie Klistuweilɔ ɑmi wun nbɑ k bɑn l po tɑn kuɑ k gbɑt bɑɑ sɔknt lin nbɑ nɑ, ŋɑnn e sɑɑ te k wun bɑnn u biit k bu u mɔnŋ buut, k u sɑɑ bɑnn u wuol ni dudukt k l duɑ yienin ni, k u sɑɑ gbɑɑn k puki Yennu k yet ɑ: «Mɔmɔnm. Yennu be nɑn’i.» N nɑɑ wɑɑs, n ji sɑɑ yet ɑ biɑ? L i tie k i lɑkn lieb ɑ i jiɑnt Yennu, k suɑ mɔk yɑnŋ, k suɑ mɔk wɑnnu, k suɑ mɔk mɑfiitkɑl k sɑɑ wɑnn k suɑ mɔk mɑbuolu buolu pɑku, k suɑ mun mɔk mɑbuolu buolu mɑnŋ kpintu, yin tien lin nbɑ nɑ kul k lin sonm Klistuweilɑ. B i luon bin pɑk bɑlgɑni, b dɑɑ gɑɑl niib bɑnle ɑmi bɑntɑ, bii piɑk yenɔ yenɔ ŋɑɑn k suɑ mun ii be kii kpintl yenn yenn. Wun nbɑ sɑɑ fit kpint l pɑɑk nɑ i kɑɑ, wun nbɑ piɑk mɑbuolu buolu nɑ n ŋmin Klistu mɔtɑɑɔk niib nɑ sinsuuk ni, ŋɑɑn pɑk k tul u mɔnŋ nɑn Yennu. L ŋɑn k sɔkniinbɑ bɑnle ɑmi bɑntɑ n pɑk, k bin nbɑ biɑl nɑ n got mɑɑn nɑ ni. Ŋɑɑn l i tie k suɑ be i sinsuuk ni k Yennu fiit mɑɑn k tul’ɔ, wun nbɑ bo piɑk nɑ n ŋmin. I kul sɑɑ fit k sɔkn Yennu mɑɑn yenɔ yenɔ, ɑ i kul n lɑ wɑnnu k lii kuɑnt’i pɑlɑ. L ŋɑn k bin nbɑ sɔknt Yennu mɑɑn ii diɑ b mɔnŋ fɑnu piini mɑnŋ ni. Bɑlmɔni e, Yennu k tie wun nbɑ tɑɑ bon-yɑnɑ yɑnɑ po kɑɑ, ŋɑɑn u tɑɑ mɑnu po e. Nɑn lɑɑ tie bɑnnu nbɑ Klistu mɔtɑɑɔk niib kul sinsuuk ni, l mun sii tie nnɑ e i sinsuuk ni. Puob n ŋmin b mɔi suon nnɑ yuo nbɑ k i lɑkn lieb ɑ yin jiɑnt Yennu. Yɑɑk kɑɑ k b sɑɑ pɑk nɑn Yennu *senni nbɑ wɑnn bɑnnu nbɑ nɑ. L ŋɑn k bii sɑɑk yudɑnm mɔi. Siɑl i be k b luon bin boi bɑnn, bin boi b sɔlb ŋei ni. L tie fei e k puo n pɑk Klistu mɔtɑɑɔk niib tintɑɑnkɑɑnu sinsuuk ni. Lɑbɑɑl ii? Yennu mɑɑn nɑ nyii i buol ee? L bɑɑl i kuukuɑ buol ee? Wun nbɑ mi nɑn u tie *Yennu sɔkni ɑmi k mɔk Foŋɑnm piini, wun bɑnn nɑn lin nbɑ k n dɑ k tien’i nɑ tie lin nbɑ k Yonmdɑɑnɔ din senn nɑ e. Ŋɑɑn wun nbɑ k gbɑt, i mun dɑɑ gbiɑ u yɑl. L pɑɑk, n nɑɑ wɑɑs, ii luon k yii sɔknt Yennu mɑɑn, k dɑɑ yien mɑbuolu buolu pɑku. Ŋɑɑn bont kul luon k lin tien suo nɑ e, kii biɑ kii wɑɑ liel. N nɑɑ wɑɑs, n luon k n tiɑl’i lɑbɑmɑnn nbɑ k n din muɑnt k tul’i, k i din gɑɑl k diɑ’l fɑnu nɑ po e. L i tie k i diɑ’l fɑnu nɑn mɑɑ din wɑnn’i bɑnnu nbɑ nɑ, i sɑɑ lɑ fielu, ŋɑɑn nnɑ e kɑɑ, i yɑdɑ nɑ sii tie yɑnn e. K mɑɑn n din yet’i lɑbɑɑl nbɑ k n mun din gɑɑl nɑ, k l tie bɑljɑɑnn k gɑl mɑɑn kul ɑ. *Klistu din gɑɑl tinm biitdɑnm pɑɑk k kpo, nɑn lɑɑ ponŋ din diɑn Yennu lolkpel kɑdɑɑɔk ni biɑnŋ nbɑ nɑ, k b din pii’u, k u fiil kuun ni dɑɑ ŋɑntɑ dɑɑl nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ, k u din dɔkt Piɑl pɑɑk, k biɑ dɔkt tuomiinbɑ *piik nɑn bɑnle nɑ pɑɑk. L puolpo biɑk k u dɔkt yonm k wɑnn u *puolpoweitieb nbɑ yɑb gɑl niib kobi ŋɑnŋmu nɑ. B siɑb bonciɑnn dɑɑ be b mɑnfuol ni, k b siɑb mun kpo wɑɑ. L puolpo e k u biɑ tɑn dɔkt Sɑɑk pɑɑk, k ji tɑn dɔkt tuomiinbɑ kul ɑ pɑɑk. Lin nbɑ nɑ kul puolpo, k u biɑ dɔkt n pɑɑk, min nbɑ tie nɑn wun nbɑ k b mɑl’ɔ k u k bɑɑl dɑɑl nɑ. Tuomiinbɑ nɑ kul ŋɑɑn min e tɑn juont, k n bo k jɑnŋ nɑn bii yi’n *tuomi, k mɑɑn mɑɑ din tuu muks Yennu mɔtɑɑɔk niib nɑ pɑɑk. Ŋɑɑn Yennu ninkpɑbɑɔnŋ pɑɑk e k n tie mɑɑ tie lin nbɑ, k wɑɑ din mɔk ninkpɑbɑɔnŋ nɑn’n nɑ, l k tie yɑnn. N tun k gɑl tuomiinbɑ nɑ kul ɑ, ŋɑɑn l k tie ɑ min kɑɑ tun, Yennu ninkpɑbɑɔnŋ nbɑ be n ni nɑ e tun. L i tie min i e, ɑmi l i biɑ tie ŋɑnm i e, lin nbɑ k t muɑntl k tien niib nɑ, ŋɑnn e k i mun tien yɑdɑ. Ŋɑɑn, tii muɑntl mɑɑn nɑ k yɑɑ ɑ Klistu din fiil kuun ni, k nlee k i siɑb sii yien ɑ bin nbɑ kpo nɑ tɑn kɑn fiil i? L i tie k kuun fiilu kɑɑ i e, l wɑnt nɑn Klistu mun din k fiil kuun ni, k Klistu ii dinŋ ii kii fiil kuun ni e, ŋɑnn ŋɑnin t k mɔk lɑbɑɑl nbɑ k t ji sɑɑ muɑnt, k i mun k mɔk lin nbɑ k i sɑɑ tien yɑdɑ. K biɑ jen ɑ, t tien fɑɑk siɑlɑɑdɑnm e nɑ k tul Yennu, k mɑɑn t ponŋ tien Yennu siɑlɑɑdɑnm ɑ u din fiin Klistu kuun ni, ŋɑɑn kuun fiilu i kɑɑ, u set din k fiin’ɔ kuun ni. K mɑɑn kpienm fiilu i kɑɑ, ŋɑnn ŋɑnin Yennu mun din k fiin Klistu kuun ni. Klistu ii dinŋ ii bo i kii fiil kuun ni, i yɑdɑ tie yɑnn e, k i biɑ dɑɑ be i biit ni. L bo biɑ wɑnt nɑn bin nbɑ tien Klistu yɑdɑ ŋɑɑn kpo nɑ, b bot e. Tɑɑ mɔk dindɑnn nɑn Klistu nɑ, l i tie k l mɔk nyuɑt tingbounŋ nɑ benu ni kuukuɑ i e, ŋɑnn ŋɑnin t bo sii mɔk ninbɑɑɔk k gɑl suɑ kul ɑ. Ŋɑɑn l tie bɑlmɔni e, Yennu set din fiin Klistu kuun ni wɑɑ. Ŋuɑ Klistu e tie sinsinn dɑɑnɔ nbɑ fiil kuun ni, k l wɑnt nɑn bin nbɑ kul kpo nɑ mun tɑn sɑɑ fiil kuun ni. Nilɔ nbɑ din bɑɑl nɑn kuun tingbounŋ nɑ ni nɑ. Nnɑ e mun k nilɔ biɑ bɑɑl nɑn kuun fiilu. K mɑɑn Adɑn pɑɑk e k nifosɑɑli kul kpenn, k nnɑ e mun Klistu pɑɑk nifosɑɑli sɑɑ lɑ mɑnfuol. Suɑ kul nɑn u kuun fiilu yuo. Klistu e fiil sinsinn, k bin nbɑ tie u niib mun tɑn sɑɑ fiil u bɑɑlu dɑɑl mɑnŋ. L puolpo k l juontu tɑn sɑɑ bɑɑl, k u tɑn sɑɑ nyɑnn nɑɑndinu kul, nɑn yent nɑn yiikuo kul, ŋɑɑn jii nɑɑn nɑ k tul u Bɑɑ Yennu. Klistu tɑn sii yen yent kul mɔkmɔk k tɑn bɑɑl yuo nbɑ k u sɑɑ nyɑnn u dɑtɑi kul k ŋmɑɑ’b tɑɑl. Dɑtɑɑk nbɑ k u tɑn sɑɑ juont k biil tie kuun e. L diɑn Yennu lolkpel kɑdɑɑɔk ni ɑ: «U jii bont kul k tien u tɑɑpɑɔnŋ ni.» Ŋɑɑn lɑɑ yet ɑ: «bont kul» nɑ, Yennu nbɑ tien bont kul Klistu tɑɑpɑɔnŋ ni nɑ kɑɑ lenŋ. K bont kul i tɑnŋ i be Klistu nuu ni, ŋɑnn ŋɑnin u mɔnŋ tɑn sɑɑ tien u mɔnŋ Yennu, wun nbɑ te k bont kul be Klistu nuu ni nɑ, nuu ni. Nnɑ e k Yennu sii tie bont kul sɑɑk ɑ Kpɑnbɑl. Nisiɑb te k b wuul’b Yennu nyunwulu kpienm pɑɑk. L nyuɑt tie bee? Mɔni, l i tie k kpienm kɑɑ fiilu i e, bee pɑɑk e k niib mɑnŋ te k b wuul’b Yennu nyunwulu kpienm pɑɑk i? K t mun ii? Bee k t kuɑnt t mɔnŋ ninbɔnŋ ni yuo kul i? N nɑɑ wɑɑs, n tuokt kuun dɑɑl kul. Yudɑnt nbɑ k n mɔk nɑ, tɑɑ be nɑn t Yonmdɑɑnɔ Klistu bɑnnu nbɑ nɑ pɑɑk e te k n piɑk nnɑ. K min nɑn Efes duo ni bonkob-biit kɔn, k mi i tie nifosɑɑlk nbɑ kɑn fiil kuun ni e, l nyuɑt tie lɑnn e k tul’n i? Kpienm i kii fi kuun ni, «Ŋɑɑnt mɑn k tii di kii nyu ŋɑɑn kii mi nɑn t won sɑɑ kpo.» I dɑɑ sɑɑk k suɑ n kpɑnn’i ni. «Niŋɑnm nɑn nibiit i tɔki nɑn lieb l sɑɑ biil niŋɑnm mɑnŋ binbenŋɑnŋ.» Ŋɑɑnt k i yɑɑn jen, k ji dɑɑ tuun biit. I siɑb k mi Yennu. Ŋɑnn e k n dɑ nɑ k yɑɑ n din’i fei. Suɑ sɑɑ boi ɑ: «Nlee k bin nbɑ kpo nɑ tɑn sɑɑ fiil kuun ni? B gbɑnɑnt tɑn sii tie nlee?» Jɑtuk nɑ, lin nbɑ k ɑ bul, l kɑn fit piɑ l yuo, sie k l kpo dɑɑnn k tɑn ji fit piɑ. Fi i yɑɑ ɑ bul bonbuolk, l kii tie nɑn lin nbɑ sɑɑ piɑ nɑ kɑɑ. L i tie dii ɑmi lin nbɑ kul, ɑ buul bonbuolk nɑ e. Ŋɑɑn Yennu e sɑɑ te k bonbuolk mɑnŋ n kpɑɑt nɑn wɑɑ luon lii tie biɑnŋ nbɑ nɑ, k bonbuolk kul mɔk l mɔnŋ nɑɑɔnŋ o. Gbɑnɑnt bont kul k tɑɑ nɑɑɔnŋ, nifosɑɑli gbɑnɑnt tie yonm e, k bonkobt yɑl mun tie yonm k nuɑni yɑl mun tie yonm k jɑni yɑl tie yonm. Sɑnpɑɑpo bonɑ mɔk b gbɑnɑnt b kuɑ e, k tingbounŋ nɑ ni bonɑ mun mɔk l gbɑnɑnt l kuɑ. Sɑnpɑɑpo bonɑ gbɑnɑnt fɑnt be l kuɑ e, k tingbounŋ nɑ bonɑ gbɑnɑnt fɑnt mun be l kuɑ, yennu fɑnt be l kuɑ e, k ŋmɑɑlk mun mɔk fɑnt l kuɑ, k ŋmɑɑbilɑ mɔk fɑnt l kuɑ, k ŋmɑɑbilɑ sinsuuk ni mɔk fɑnt kuɑt kuɑt. L sii tie nnɑ e kuun fiilu ni. Gbɑnɑnt nbɑ k b pii tinŋ ni tuu tɑn puɑk e, ŋɑɑn gbɑnɑnt nbɑ fiil kuun ni kɑn mi puɑk. Gbɑnɑnt nbɑ k b pii’l nɑ tie gbɑnɑnbiiuk k k mɔk pɑnŋ, ŋɑɑn l tɑn sɑɑ fiil nɑn fɑnt e nɑn pɑnŋ. Gbɑnɑnt nbɑ k b pii’l nɑ tie tingbounŋ nɑ yɑl e, ŋɑɑn gbɑnɑnt nbɑ sɑɑ fiil nɑ tie Foŋɑnm nbɑ tien mɑnfuol nɑ yɑl e. Gbɑnɑnt nbɑ tie tingbounŋ nɑ yɑl be, k l pɑɑk k Foŋɑnm nbɑ tien mɑnfuol nɑ gbɑnɑnt mun be. Setk nɑn mɔni, l diɑn Yennu lolkpel kɑdɑɑɔk ni ɑ: «Sinsinn nilɔ Adɑn nɑ din kpɑnt nilɔ nbɑ fo,» ŋɑɑn Adɑn nbɑ juont k bɑɑl nɑ tie Foŋɑnm nbɑ tien’t mɑnfuol e. Gbɑnɑnt nbɑ k Foŋɑnm tien’l mɑnfuol nɑ kɑɑ bɑɑl sinsinn, ŋɑɑn lin nbɑ tie tingbounŋ yɑl nɑ e bɑɑl sinsinn, k l puolpo k gbɑnɑnt nbɑ k Foŋɑnm tien mɑnfuol nɑ tɑn wei. Sinsinn nilɔ nɑ din nyii tɑnt ni e, k nilɔ nbɑ wei nɑ nyii *Yendɔunŋ ni. Tingbounŋ nɑ tieb tie nɑn juɑ nbɑ nyii tɑnt ni nɑ e, k bin nbɑ tie Yendɔunŋ ni yɑb tie nɑn juɑ nbɑ nyii Yendɔunŋ ni nɑ. T kul ɑ mɔk wun nbɑ din nyii tɑnt ni nɑ nɑɑɔnŋ o, nnɑ e mun k t sii mɔk juɑ nbɑ nyii Yendɔunŋ ni nɑɑɔnŋ. N nɑɑ wɑɑs, n yien’i e nɑn lin nbɑ tie nɑnt nɑn sɔn nɑ kɑn fit kuɑ Yendɔunŋ ni, k lin nbɑ kpenn kɑn fit lɑ mɑnfuol nbɑ kɑɑ gbennu. N yɑɑ n yet’i wuol ni mɑɑn e. T siɑb kɑn kpo, ŋɑɑn t kul sɑɑ lebt ɑ. L dɑɑl mɑnŋ, kɑtkɑɑk i tɑnŋ i bui, t kul sɑɑ lebt yonm e yiɑn yiɑn ɑ nɑn ninbinn kɑbintu nɑ. Kɑtkɑɑk sɑɑ bui, k kpienm n fiil nɑn gbɑnɑnt nbɑ kɑn mi kpo, k t kul sɑɑ lebt ɑ. K mɑɑn l kpɑɑ tɑlɑs nɑn gbɑnɑnt nbɑ puɑkt nɑ tɑn sɑɑ kpɑnt gbɑnɑnt nbɑ k puɑkt e, k gbɑnɑnt nbɑ kpenn nɑ tɑn sɑɑ kpɑnt gbɑnɑnt nbɑ k kpenn e. Yuo nbɑ k lin nbɑ puɑkt nɑ kpɑnt lin nbɑ k puɑkt, k lin nbɑ kpenn kpɑnt lin nbɑ k kpenn, l yuo nɑ lin nbɑ diɑn Yennu lolkpel kɑdɑɑɔk ni nɑ n gbie ɑ: «Kuun ji bot ɑ, u nyɑnn kuun gbenn ɑ.» L biɑ diɑn ɑ: «Kuun, ɑ nyɑnnu nɑ be lee? Kuun, ɑ juol nbɑ tie nɑn nɑnŋ juol nɑ, juol nbɑ k ɑ diɑ k dint niib fɑlɑ nɑ be lee?» Kuun lɑɑt u pɑnŋ biit buol e, k biit mun lɑɑt u pɑnŋ *senni buol. Ŋɑɑn Yennu yen niipuouk. Ŋuɑ e tul’t nyɑnnu t Yonmdɑɑnɔ Yiesu Klistu ni. L pɑɑk, n nɑɑ wɑɑs, ii be mɑn nɑn pɑnŋ k dɑɑ bɑɑ i yɑdɑ ni. I jii i mɔnŋ kii tuun Yonmdɑɑnɔ tuonɑ nɑn ninmɔnn, k mɑɑn i mi nɑn tuonɑ nbɑ k i tuun k tien Yonmdɑɑnɔ nɑ, l tɑn kɑn bɑɑ yɑnn. Tɔn, n luon k n pɑk likli nbɑ k i lɑkn k yɑɑ ɑ i sonm Yennu niib nbɑ be Selusɑɑlenm duo ni nɑ po. Ii tuun biɑnŋ nbɑ k n wɑnn *Klistu mɔtɑɑɔk niib nbɑ be Gɑɑlɑɑti tinŋ ni nɑ. Lɑsl dɑɑl kul, suɑ kul n tuu nyinn likli, wɑɑ tun k lɑ biɑnŋ nbɑ k bil, k l k tie mɑn tɑn bɑɑl kɑɑ wɑɑ k yin lɑkn. Mi i tɑnŋ i bɑɑl, n tɑn sɑɑ diɑn kɑdɑɑɔk k tun bin nbɑ k i lukt’b nɑ k bin sɑɑn Selusɑɑlenm nɑn i piini nɑ. L i tɑnŋ i ŋɑn nɑn mɑn sɑɑn n mɔnŋ, tin tɔk k sɑɑn. N lol suol k luon k n tɔkn nyi Mɑɑseduɑnn tinŋ ni. L puolpo k n sɑɑ bɑɑl k gɔn’i. Pɑsiɑl n sɑɑ di yuo bonciɑnn i buol ni, kuo pɑsiɑl k n sɑɑ biɑl piɑl kul, k l puolpo yin sonm’n k n gɑl sɑɑn siɑn nbɑ kul k n sɑɑ. N k luon k n bɑɑl i buol k gɔn’i yuo wɑɑnm-nnɑ ŋɑɑn gɑl kɑɑ, ŋɑɑn Yonmdɑɑnɔ i sɑk, n luon k n jii yuo bonciɑnn i buol. N sii be Efes duo ni nnɑ mɔkmɔk nɑn yuo nbɑ k *Pɑntekuot jɑɑnm tɑn sɑɑ bɑɑl, k mɑɑn dɑtɑi bonciɑnn i lek i be ŋɑɑn sɔnu luot k yɑɑ bonciɑnn k tul’n k n fit tuun tuonn nbɑ mɔk nyuɑt bonciɑnn. Tiimuote i tɑnŋ i bɑɑl i buol, i gɑɑl’ɔ sɑɑɔnŋ, k mɑɑn u tuun Yonmdɑɑnɔ tuonɑ e, nɑn mɑɑ mun tuun biɑnŋ nbɑ nɑ. Ii mi mɑn k suɑ n siɑn’ɔ, ŋɑɑn te k wun nyi i buol nɑn mɑnu k bɑɑl n buol, k mɑɑn n goli ŋuɑ nɑn t nɑɑ wɑɑs sɔnu po. T nɑɑ bik Apuoluos ŋɑnin, n bɑln’mɔ e k luon ŋuɑ nɑn t nɑɑ wɑɑs nɑ n tɔk k bɑɑl i buol, ŋɑɑn u k luon wun bɑɑl mɔtɑɑnɑ. L i tie k u tɑn sɑɑ lɑ yuo, u sɑɑ bɑɑl ɑ. Ii guu mɑn kii be fɑnu i yɑdɑ ni, kii mɔk pɑl nɑn pɑnŋ. Ii tuun mɑn bont kul nɑn lonm. I ponŋ mi Sitefɑɑnɑɑs nɑn u ŋɑɑtieb po, ŋɑnm e din tie sinsinn niib nbɑ be Akɑɑyi tinŋ ni k din tien Klistuweilɑ, k b jii b mɔnŋ k tuun k tien Yennu niib. N nɑɑ wɑɑs, n bɑln’mi e, ii toki nibuolu nɑ binbenŋ nɑn b tuontunlieb kul nbɑ tɑɑn b po k tuun fɑnu nɑ. N dɑɑn mɔk pɑlpienn Sitefɑɑnɑɑs nɑn Foltunɑtus nɑn Akɑikus bɑɑlu nɑ pɑɑk k mɑɑn yɑɑ dɑɑn kɑɑ n buol nnɑ, n dɑɑn mɔk pɑlbiil, ŋɑɑn bɑɑ bɑɑl nɑ, n ji k mɔk pɑlbiil, k mɑɑn b cie min nɑn yinm pɑlɑ. L pɑɑk, i tul l nibuolu nibɑɑkl. Klistu mɔtɑɑɔk niib nbɑ be Asii tinŋ ni nɑ fuont’i. Akiilɑɑs nɑn Pliisiil nɑn Klistu mɔtɑɑɔk niib nbɑ lɑki k jiɑntl Yennu b ŋɑɑk ni nɑ fuont’i fɑnu Yonmdɑɑnɔ sɑnn ni. T nɑɑ wɑɑs nbɑ be nnɑ kul fuont’i. Ii fuont lieb kii kpɑnmi mɑn. Min Pɔul e jii n mɔnŋ nuu k dɑ fuont’i mɑnŋ. Wun nbɑ kul k luon Yonmdɑɑnɔ, mɔpol ii be u pɑɑk. T Yonmdɑɑnɔ, bɑɑt. Yonmdɑɑnɔ Yiesu ii mɔk ninkpɑbɑɔnŋ nɑn’i. N luon i kul nɑn bɑlmɔni Yiesu Klistu sɑnn pɑɑk. * Amenn. Min Pɔul wun nbɑ k Yennu lonm pɑɑk k u tien’n Yiesu *Klistu *tuomi nɑ, min nɑn t nɑɑ bik Tiimuote dɑ kɑdɑɑɔk nɑ k tien Klistu mɔtɑɑɔk niib nbɑ be Kuolent, nɑn Yennu niib kul nbɑ be Akɑɑyi tingbounŋ ni nɑ. T Bɑɑ Yennu nɑn Yonmdɑɑnɔ Yiesu Klistu ii mɔk ninkpɑbɑɔnŋ nɑn’i k biɑ tul’i mɑnu. Ŋɑɑnt k tin pɑk Yennu nbɑ tie Yiesu Klistu Bɑɑ nɑ, Bɑɑ nbɑ tin’t ninbɑɑɔk k biɑ tien’t pɑlpɑɑll yuo kul nɑ. Ŋuɑ e mɑɑn t pɑlɑ t fɑlɑ kul ni, ɑ tin mun fit mɑɑn bin nbɑ be fɑlɑ buolu buolu ni nɑ pɑlɑ, nɑn Yennu nbɑ mɑɑn t pɑlɑ biɑnŋ nbɑ nɑ. K mɑɑn tɑɑ lɑɑt fɑlɑ nɑn Klistu nbɑ din lɑ fɑlɑ bɑnnu nbɑ nɑ, nnɑ e mun k t lɑɑt pɑlpɑɑll Klistu ni. T i di fɑlɑ, l tie ɑ yin lɑ pɑlcienn e nɑn fielu. T i lɑ pɑlcienn, l tie ɑ yin lɑ pɑlcienn nbɑ sɑɑ te k i fit di fɑlɑ nbɑ k t mun di nɑ, nɑn suklu. Ŋɑnn e k t mɔk dindɑnn k jii jiin i po, k mɑɑn t mi nɑn yɑɑ di fɑlɑ, nɑn tɑɑ di biɑnŋ nbɑ nɑ, nnɑ e k i mun biɑ lɑɑt pɑlmɑɑnn, nɑn tɑɑ lɑɑt biɑnŋ nbɑ nɑ. N nɑɑ wɑɑs, t luon k yii mi fɑlɑ nbɑ k t din dii Asii yent ni po. Fɑlɑ mɑnŋ din mɑntk gɑl t pɑnŋ telk hɑli k t din tɑn duki nɑn t sɑɑ kpo wɑɑ. Setk nɑn mɔni, t ji din tɑn duki nɑn kuun k fɔk nɑn’t, ŋɑɑn lin nbɑ nɑ din tun ɑ lin wɑnn’t nɑn l k ŋɑn nɑn tii dɑɑn t mɔnŋ pɑɑk, ŋɑɑn kii dɑɑn Yennu nbɑ fiint kpienm nɑ pɑɑk e. Ŋuɑ e din nyinn’t kuun dɑngbenŋl nɑ ni, k u mun sɑɑ nyinn’i. L tie mɔni, t mɔk dindɑnn nɑn u tɑn sɑɑ nyinn’t dɑngbeŋɑ ni, k mɑɑn i mun sonm’t nɑn Yenmiɑlu e. Ŋɑnn e sɑɑ te k niib bonciɑnn n tul niipuouk, Yennu nbɑ gbɑt niib bonciɑnn miɑlu, k sonm’t bɑnnu nbɑ nɑ pɑɑk. Lin nbɑ te k t mɔk yugontl nɑ tie nnɑ e: t * dudukt e wɑnt’t nɑn t binbenŋ tingbounŋ nɑ niib buol, nɑn i mɔnŋ sinsuuk ni, nyii bɑlmɔnpɑku nɑn yentinu nbɑ k t lɑɑt Yennu buol nɑ ni e. Yennu ninkpɑbɑɔnŋ o wɑnt’t bɑnnu nbɑ k t sɑɑ tɔkn k l k tie nisɑɑli yɑn kɑɑ. Bɑlmɔni, t kɑdɑɑt nɑ ni, t dɑ lin nbɑ k i lii kuukuɑ e, nɑn lin nbɑ k i sɑɑ fit gbɑt l pɑɑk, k siɑl k pukn. Bonsiɑl be, k i gbɑt l pɑɑk wɑɑnm-nnɑ e, ŋɑɑn n mi nɑn i tɑn sɑɑ gbɑt l pɑɑk fɑnu wɑɑ. L bonn tie nɑ e: i sɑɑ fit kii mɔk pɑlmɑnn t pɑɑk, nɑn tɑɑ mun sii mɔk pɑlmɑnn i pɑɑk dɑɑl nbɑ k Yonmdɑɑnɔ Yiesu sɑɑ jen nɑ. Mɑɑ bɑnn lin nbɑ nɑ pɑɑk e te k n dɑɑn lol ɑ n sɑɑ gɔn’i sinsinn, ɑ k yin lɑ sonml tɑɑl munle, k mɑɑn n dɑɑn lol nɑn mi i tɑnŋ i gɑɑl sɑɑ Mɑɑseduɑnn mɑn bot gɔn’i e, k mi i tɑnŋ i jent mɑn biɑ bot gɔn’i, k lɑ sonml i buol ni, lin nbɑ sɑɑ sonm’n k n ŋmɑt sɑɑn Suude. Mɑɑ dɑɑn lol nnɑ nɑ, l tie bɑnnu nbɑ k n dɑɑn lol k k dukn ee? Kuo mii lol siɑl, l tie mɑɑ luon bɑnnu nbɑ ee? K yet l tɑɑkpɑɑk ni ɑ: «Nnn» nɑn «Aɑi?» Yennu nbɑ tie bɑlmɔni dɑɑnɔ nɑ pɑɑk, lin nbɑ k n dɑɑn wɑnn’i nɑ dɑɑn k tie: «Nnn» nɑn: «Aɑi» kɑɑ. K mɑɑn Yiesu Klistu nbɑ tie Yennu Bijɑ nɑ, wun nbɑ k min nɑn Siilɑɑs nɑn Tiimuote din muɑnt u po k tul’i nɑ, u k tie: «Nnn» nɑn: «Aɑi» kɑɑ, ŋɑɑn u tie Yennu «Nnn» e. K mɑɑn ŋuɑ e tie: «Nnn» Yennu mɔsonɑ kul ni. Lin nbɑ nɑ pɑɑk e te k t yet ɑ: « * Amenn» Yiesu Klistu ni, k l dont Yennu sɑnn. Yennu tiɑɔnŋ o cie tinm nɑn yinm pɑlɑ tɑɑ mɔk mɔtɑɑɔk nɑn Klistu nɑ. Yennu tiɑɔnŋ senn’t ɑ tii be t kuɑ, k dɔk’t u dɔuk t pɑɑk, k tien Foŋɑnm t pɑlɑ ni, k l wɑnt nɑn u tɑn sɑɑ tul lin nbɑ kul k u senn mɔsonn nɑ wɑɑ. Yennu e tie n siɑlɑɑdɑɑnɔ nɑn lin nbɑ te k n k bɑɑl Kuolent i buol ni nɑ, tie n tɑn dɑɑ te k i lɑɑt tubdɑtu. Mi i fɑɑl fɑɑk i e, Yennu n kpi’n. T kɑn fit muks’i k wɑnn’i yɑɑ sɑɑ tien yɑdɑ biɑnŋ nbɑ, k mɑɑn t mi nɑn i ponŋ mɔk yɑdɑ k sie fɑnu, ŋɑɑn t tuun nɑn’i ɑ tii wɑnt yɑɑ sɑɑ tien biɑnŋ nbɑ e kii mɔk pɑlpienn. Ŋɑnn e te k n ji dɑɑn lol n mɔnŋ pɑl ni nɑn n kɑn bɑɑl i buol ni, k tɑn tul’i pɑlbiil biɑk. L i tie k n bɑɑl k tɑn biil i pɑlɑ ni, ŋmee ji sɑɑ penn n pɑl i? Sie yinm nbɑ k n biil i pɑlɑ ni nɑ. Gotl lin nbɑ te k n din diɑn kɑdɑɑɔk nɑn mɑɑ din diɑn bɑnnu nbɑ nɑ, n k luon k n bɑɑl k tɑn lɑ pɑlbiil yinm nbɑ bo sɑɑ penn n pɑl ni nɑ buol ni. Setk nɑn mɔni, n tien yɑdɑ nɑn mi i mɔk pɑlpienn, i mun mɔk pɑlpienn. Mɑɑ din diɑn kɑdɑɑɔk nɑ k tul’i, n din diɑn nɑn pɑlbiil nɑn yɑnputuk nɑn nyin-nyuut bonciɑnn. L din k tie ɑ n luon k n biil i pɑlɑ ni kɑɑ, ŋɑɑn n din luon k yin bɑnn lonm nbɑ k n mɔk k jii jiin i po e. L i tie k suɑ bɑɑl nɑn pɑlbiil, u k biil n pɑl ni kuukuɑ kɑɑ, ŋɑɑn u biil i kul ɑ pɑl ni. Kuo n sɑɑ fit yet i yenm nbɑ k mɑɑn n k luon k n mɑntk pɑk nɑn ninmɔnn. Yɑɑ ŋmɑnn u tubl bɑnnu nbɑ nɑ, l ji jɑnŋ ɑ. Ŋɑɑn mɔtɑɑnɑ l ŋɑn yin nyik k cɑb’ɔ, ŋɑɑn kii mɑɑnt u pɑl, k dɑɑ te k wun bɑɑ tɑlll. N bɑln’mi e, ŋɑɑnt k wun bɑnn nɑn i biɑ dɑɑ luon’ɔ bonciɑnn. Lin nbɑ yɑɑ pɑɑk te k n diɑn tie nɑ e. L din tie biknu nbɑ k n sɑɑ lɑɑn i set sɑɑk n mɔb bonsiɑl kul ni ii? L i tie k i nyik cɑb wun nbɑ, n mun nyik cɑb’ɔ e nɑ, k mɑɑn mi i nyik cɑb’ɔ lin nbɑ nɑ pɑɑk, i pɑɑk e te k n nyik cɑb’ɔ *Klistu nunm ni. Nnɑ e k *Sɑɑtɑn kɑn lɑ yɑɑk k kpɑnn’t, k mɑɑn t mi u sɔni nbɑ tie biɑnŋ nbɑ. Tɔn mɑɑ din tɑn bɑɑl Tloɑs digbɑnn ni, ɑ n muɑnt Klistu lɑbɑmɑnn muɑnti nɑ, k n bɑnn nɑn Yennu set luot u tuonɑ sɑnjouk lenŋ ɑ. Ŋɑɑn mɑɑ din k lɑ n nɑɑ bik Tiit lenŋ nɑ pɑɑk, k n k lɑ pɑlduɑnn. L pɑɑk k n cɑb lenŋ tieb, ŋɑɑn gɑl sɑɑn Mɑɑseduɑnn. Ŋɑɑn Yennu yen niipuouk, k mɑɑn t tie Klistu dɑɑbɑ k wɑɑ u puolpo yuo kul, k u lin k wɑnt nɑn nyɑnnu tie u yɑl e. Yennu jii’t ɑ tin fiit Klistu k wɑnn suɑ kul mun, k u lɑbɑmɑnn tie nɑn tulɑɑli nbɑ nubl mɑn l kul po biɑnŋ nbɑ nɑ e. T tie nɑn bonnunubmɑnɑ nɑ e k Klistu jii’t k wubnt k tien Yennu, k l yɑt kuɑ bin nbɑ lɑ fielu nɑn bin nbɑ k lɑ fielu kul ɑ. Bin nbɑ k lɑ fielu nɑ buol ni, t tie nɑn nublbiiuk nbɑ bɑɑt nɑn kuun nɑ e, ŋɑɑn bin nbɑ lɑ fielu buol ni ŋɑnin i e, t tie nɑn nublmɑnn nbɑ bɑɑt nɑn mɑnfuol nɑ e. Ŋmee jɑnŋ nɑn tuonɑ mɑnŋ i? Tɔn, t k tie nɑn bin nbɑ diɑ Yennu mɑɑn mɑnŋ k l tie kpinkpounŋ tul’b nɑ kɑɑ, ŋɑɑn Yennu nbɑ tun’t nɑ pɑɑk e te k t mɔk bɑlmɔnpɑku k be u tuɑnn nɑn tɑɑ tie Klistu tuontunnɑ nɑ. Lin nbɑ nɑ wɑnt nɑn t biɑ wɑnn t mɔnŋ biɑk ee? L kpɑ tɑlɑs e nɑn suɑ n diɑn t *siɑlɑ kɑdɑɑɔk k tul’i ni ii? Ami t gɑɑl t siɑlɑ kɑdɑɑɔk i buol ni, nɑn siɑb nbɑ tuun biɑnŋ nbɑ nɑ ɑɑ? Aɑi. Yinm e tie t *siɑlɑ kɑdɑɑɔk k tɑɑb t pɑlɑ ni ɑ suɑ kul n lii k bɑnn. L duɑ pɑɑnu ni nɑn yinm e tie *Klistu kɑdɑɑɔk mɑnŋ k u din diɑn k tun’t nɑn’n. L k diɑn nɑn mɑkmuɑnu kɑɑ ŋɑɑn l diɑn nɑn Yennu nbɑ fo nɑ Siek e. L k diɑn tɑnpɑtlɑi pɑɑk kɑɑ, ŋɑɑn l diɑn nisɑɑli pɑlɑ ni e. Lin nbɑ pɑɑk te k t piɑk nnɑ nɑ tie pɑlcienn nbɑ k t mɔk nɑn Yennu, Klistu sɑnn pɑɑk nɑ e. T k wɑnt t mɔnŋ nɑn t sɑɑ fit tun siɑl nɑn t mɔnŋ mɔnŋ pɑnŋ kɑɑ, ŋɑɑn tɑɑ fit tuun siɑl nɑ nyii Yennu buol e. K mɑɑn ŋuɑ e te k t tie tuontunnɑ nbɑ fit muɑntl lolpɑɑnn nɑ, k lolpɑɑnn mɑnŋ k nyii *senni nbɑ diɑn kɑdɑɑɔk ni nɑ kɑɑ, ŋɑɑn l tie Foŋɑnm yɑl e. Senni nbɑ diɑn kɑdɑɑɔk ni bɑɑt nɑn kuun e, ŋɑɑn Foŋɑnm tien mɑnfuol e. Yuo nbɑ k b din diɑn senni mɑnŋ tɑnn pɑɑk nɑ, l yuo e k Yennu *yudɑnt din sik k nyili Muois nunm po, k l nyilku set din wɑɑl ŋɑɑn k Islɑɑeltieb biɑ din k fit goli’ɔ. K l i tie k senni mɑnŋ nbɑ din bɑɑt nɑn kuun nɑ din bɑɑl nɑn yentsɑɑkɑl, i mi ɑ nlee k Foŋɑnm sɔnu kɑn bɑɑl nɑn yudɑnt k gɑl’l i? L i tie k senni nbɑ biil niib pɑɑk e din bɑɑl nɑn yudɑnt, tuonn nbɑ te k niib tie niŋɑnm Yennu tuɑnn nɑ be nɑn yudɑnt k gɑl’l. T sɑɑ fit yet nɑn yudɑnt nbɑ din tuu be nɑ, ji k tie siɑl, l i tie k t bikn’ɔ nɑn yentsɑɑkɑl nbɑ be mɔtɑɑnɑ nɑ. L i tie k lin nbɑ din biɑl wɑɑnm-nnɑ din mɔk yudɑnt, lin nbɑ sii be nɑn yuo nbɑ kɑɑ gbennu, l yudɑnt sii yɑb bonciɑnn k gɑl nnɑ. Tɑɑ mɔk dindɑnn mɑnŋ nbɑ nɑ pɑɑk e te k t mɔk pɑlcienn. T k tie nɑn Muois nbɑ din jii cincenn k pin u nunpo ɑ Islɑɑeltieb dɑɑ lɑɑt yudɑnt nbɑ yɑɑ lin gɑl nɑ pɑɑk kɑɑ. Ŋɑɑn k b dudukt din k yent. B i lii Yennu lolkpel kɑdɑɑɔk ni yuo nbɑ, cincenn mɑnŋ biɑ dɑɑ duɑk b dudukt nɑn dinnɑ gbɑɑ. Cincenn mɑnŋ tuu dɔkt nilɔ dudukt ni yuo nbɑ k u be Klistu ni kuukuɑ e. Hɑli nɑn dinnɑ, b i tɑnŋ i lii Muois kɑdɑɑt nɑ, cincenn nɑ biɑ dɑɑ duɑk b pɑlɑ ni. Ŋɑɑn l i tie k nilɔ ŋmɑt k wɑɑ Yonmdɑɑnɔ, cincenn mɑnŋ tuu dɔkt e. Tɔn, Yonmdɑɑnɔ tie Siek nɑ e, k siɑn nbɑ k Yonmdɑɑnɔ Siek nɑ be nɑ, yent-n-mɔnŋ be lenŋ e. Ŋɑnn e, t kul nbɑ k cincenn k duɑk t nuni po wɑnt Yonmdɑɑnɔ yudɑnt. Nnɑ e k t kpint k tie nɑn Yonmdɑɑnɔ nɑ, k nyii yudɑn-yent ni, ŋɑɑn kuɑ yudɑnt nbɑ yɑb k gɑl sinsinn yɑl nɑ ni. Nɑ tie tuonn nbɑ k Yonmdɑɑnɔ Siek tun e. Yennu nbɑ tin’t ninbɑɑɔk nɑ, k u jii tuonɑ nɑ k tien t nii ni, l pɑɑk e te k t k mɔk kpinkpɑngbɑtuk. T yet bunbɔnn ni tuonɑ nbɑ tie kpeli kpeli tuonɑ nɑ e. T tuun bonɑ kul, nɑn lɑɑ buɑl bɑnnu nbɑ nɑ e. T k lebt Yennu mɑɑn. Ŋɑɑn t wɑnt bɑlmɔni nɑ e fɑnu fɑnu, l pɑɑk e te k t yɑɑ suɑ kul n dukn u pɑl ni, k lɑ lɑɑ tie bɑnnu nbɑ Yennu tuɑnn. Ŋɑɑn, l i tie k Yennu lɑbɑmɑnn pɑɑk bɔl’i e, l bɔl bin nbɑ kpet Yennu sɔnu ni nɑ buol ni e, k te k b k tien *Klistu yɑdɑ, k yennu nbɑ tie yenbiiuk tingbounŋ nɑ ni nɑ, te k b subni nɑ k lɑɑt. Ŋɑnn e te k b k lɑɑt yentu nbɑ nyi Yiesu lɑbɑmɑnn nɑ ni nɑ. L yentu tie Klistu *yudɑnt yentu e, ŋuɑ nbɑ tie Yennu nɑɑɔnŋ nɑ. T k muɑntl t mɔnŋ mɔnŋ po kɑɑ, ŋɑɑn t muɑntl Yiesu Klistu po e, ɑ ŋuɑ e tie Yonmdɑɑnɔ nɑ, ŋɑɑn wɑnt nɑn tinm e tie u tuontunnɑ k tien’i Yiesu pɑɑk. Yennu nbɑ din yet ɑ: «Yentu n yent bunbɔnn ni,» ŋuɑ e te k u yentu nɑ yentl t pɑlɑ ni, ɑ tin bɑnn u yudɑnt nbɑ tie bɑnnu nbɑ, l yudɑnt e yien Yiesu Klistu nunpo nɑ. Ŋɑɑn tinm nbɑ mɔk l gol nɑ tie nɑn yɑɔk bobɑ nɑ e, k l wɑnt nɑn pɑnŋ nbɑ gɑl pɑnŋ kul tie Yennu yɑl e, k l k tie t yɑl. T lɑɑt fɑlɑ buolu buolu kul, ŋɑɑn l kɑn fit k nyɑnn’t. Yɑnputuk be, ŋɑɑn t k kɔnŋ dindɑnn. B te k t lɑɑt fɑlɑ bonciɑnn, ŋɑɑn Yennu k nyikt’t. B lu’t tinŋ ni, ŋɑɑn kɑn fit kpi’t. Yiesu kuun nɑ be t gbɑnɑnt ni yuo kul, ɑ lin te k u mɑnfuol nɑ n mun nyi pɑɑnu t gbɑnɑnt ni. Tinm nbɑ fo nɑ, be kuun nuu ni e yuo kul Yiesu pɑɑk, ɑ u mɑnfuol nbɑ be t gbɑnɑnt nbɑ sɑɑ kpo nɑ n nyi pɑɑnu ni. Ŋɑnn e, kuun mɑnŋ be k tuun t ni ŋɑɑn mɑnfuol be i ni. L diɑn Yennu lolkpel kɑdɑɑɔk ni ɑ: «Mɑɑ tien yɑdɑ nɑ pɑɑk te k n pɑk nnɑ.» Dudukt mɑnŋ mun be t ni, k l pɑɑk, t mun tien yɑdɑ k piɑk. K mɑɑn t mi nɑn Yennu nbɑ din fiin Yonmdɑɑnɔ Yiesu kuun ni nɑ, ŋuɑ e tɑn sɑɑ fiin tinm nɑn yinm nbɑ wɑɑ Yiesu mun kuun ni, k sɑɑ bɑɑl nɑn’t u mɔnŋ buol ni. Lin nbɑ nɑ kul be ɑ lin sonm yinm e, k yuo kul niib bonciɑnn ji lɑɑt Yennu ninkpɑbɑɔnŋ k puki, k b tien’ɔ niipuouk bonciɑnn k b niipuouk bɑɑt nɑn dontl k tien’ɔ. L pɑɑk e te k t k mɔk kpinkpɑngbɑtuk. L i lek i tie k t gbɑnɑnt biil wɑɑn wɑɑn, ŋɑɑn Yennu pɑntl t siek dɑɑl n tuu dɑɑl. L pɑɑk, fɑlmintk nbɑ k t di k l kɑn wei nɑ, l tɑn sɑɑ bɑɑl nɑn dontl nbɑ yɑb k kɑɑ gbennu k tul’t, k dontl mɑnŋ biɑ tɑn sii yɑb k gɑl t fɑldinu nɑ bonciɑnn. Ŋɑnn t k kpɑɑ t ninbinɑ lin nbɑ k t lɑɑt nɑ pɑɑk ŋɑɑn lin nbɑ k t k lɑɑt nɑ pɑɑk e, k mɑɑn lin nbɑ k t lɑɑt nɑ kɑn wei k l tɑn sɑɑ gɑl, ŋɑɑn lin nbɑ k t k lɑɑt nɑ ŋɑnin tɑn sii be nɑn yuo nbɑ kɑɑ gbennu. K mɑɑn t mi nɑn lɑnbounŋ nbɑ k t be nɑ ni (l wɑnt nɑn t tinŋ nnɑ gbɑnɑnt) i biil, ŋɑɑn Yennu lon ŋei k guun’t sɑnpɑɑpo wɑɑ, k l k tie nifosɑɑlk kɑɑ mɑɑ ŋei mɑnŋ, k l biɑ tɑn sii be nɑn yuo nbɑ kɑɑ gbennu. L pɑɑk, t ji kɑl kpiin e k mɑɑn t luon k tin kuɑ sɑnpɑɑpo ŋɑɑk mɑnŋ ni e. Setk nɑn mɔni, t i tɑnŋ i kuɑ ŋɑɑk mɑnŋ ni, t tɑn kɑn kɔnŋ tiɑt. Tɑɑ biɑl lɑnbounŋ nɑ ni, t kuli e nɑn t jii jik-kpiɑtl nɑ. L k tie ɑ t ji k luon gbɑnɑnt nɑ benu kɑɑ, ŋɑɑn t luon sɑnpɑɑpo gbɑnɑnt nɑ, ɑ l dɑɑl k mɑnfuol nɑ n tɑn nɑk lin nbɑ sɑɑ kpo. Yennu e ŋɑnm’t k t tien siil lebtu nɑ po, k tul’t u Foŋɑnm, k l tie nyinn k wɑnt’t lin nbɑ k u tɑn sɑɑ tul’t nɑ. L pɑɑk, t mɔk pɑlcienn yuo kul ɑ, k bɑnn nɑn t i be tingbounŋ nɑ gbɑnɑnt nɑ ni, t fɔk nɑn Yonmdɑɑnɔ buol, k mɑɑn t wɑɑ yɑdɑ sɔnu e. T k wɑɑ lin nbɑ k t ninbinn lɑ’l nɑ kɑɑ. T mɔk pɑlcienn k sunmɑn tin nyi gbɑnɑnt nɑ ni e, k kun Yonmdɑɑnɔ buol ni. L pɑɑk, tii biɑl gbɑnɑnt mɑnŋ ni, ɑmi tii nyik’l, t ninbinn mɔn ɑ t penn u pɑl ni e. K mɑɑn t kul binbenŋ tɑn sɑɑ nyi pɑɑnu *Klistu tuɑnn po bɑlbudɑɑl, k suɑ kul tɑn sɑɑ gɑɑl lin nbɑ tie u yɑl e, nɑn u tuonɑ nbɑ din tie biɑnŋ nbɑ, yuo nbɑ k u din be u tingbounŋ nɑ gbɑnɑnt ni nɑ. Ŋɑɑnt mɑn k tii cɔln Yennu nɑn t pɑl kul, k mɑɑn t mi l pɑɑk nbɑ tie lin nbɑ. L pɑɑk e te k t luon k niib n gbɑt l pɑɑk: Yennu mi t binbenŋ nbɑ tie biɑnŋ nbɑ, k t mun mɔk dindɑnn nɑn i mi i pɑlɑ ni t binbenŋ nbɑ tie biɑnŋ nbɑ. T k dont t mɔnŋ kɑɑ i buol ni biɑk, ŋɑɑn t luon k tin tul’i yɑɑk k yin fit fɑɑ pɑlbiɑ t pɑɑk, k fit pɑk tul bin nbɑ goli nifosɑɑlk nɑn-yel po k mɔk yugontl l pɑɑk, ŋɑɑn k goli u pɑl ni nɑ. T i tie ninkɑnmɑnŋt dɑnm i e, Yennu pɑɑk e te k t tie nnɑ, ŋɑɑn t yulɑ i sonm i e, i pɑɑk e te k t tie nnɑ. K mɑɑn Klistu lonm yet’t ɑ. Tinm nbɑ k bils nɑn yenɔ kuɑ e din gɑɑl suɑ kul pɑɑk k kpo, k l wɑnt nɑn suɑ kul din kpo nɑn’ɔ nɑ. Ŋuɑ e din gɑɑl suɑ kul pɑɑk k kpo, ɑ bin nbɑ fo nɑ, b dɑɑ be k tien b mɔnŋ kɑɑ, ŋɑɑn k bii be k tul wun nbɑ din gɑɑl b pɑɑk k kpo k biɑ fiil kuun ni nɑ e. Ŋɑnn, t ji k goli nisuɑ nɑn tingbounŋ nɑ niib nbɑ goli’ɔ bɑnnu nbɑ nɑ kɑɑ. L i tie k t din got Klistu nnɑ, ŋɑɑn t ji k goli’ɔ nnɑ kɑɑ. L pɑɑk, nilɔ nbɑ be Klistu ni, l dɑɑnɔ ji tie nipɑɑmɔ e. Bonkpel kul ji bot e, k bonpɑɑnn ji be u ni. Lin nbɑ nɑ kul nyi Yennu buol e. Ŋuɑ e ŋɑnm tinm nɑn ŋuɑ sinsuuk ni Klistu pɑɑk, k yɑɑ tin te k lin ŋɑnm lieb nɑn ŋuɑ sinsuuk ni. K mɑɑn Klistu ni e k Yennu tun k ŋɑnm ŋuɑ nɑn tingbounŋ niib sinsuuk ni, k k goli b biit, k yɑɑ tin muɑnt lin nbɑ k u tun k ŋɑnm ŋuɑ nɑn niib sinsuuk ni nɑ. L pɑɑk k t ji tie Klistu tɑɑtɑlɑ k Yennu te k t yi niib. Klistu pɑɑk k t bɑln’mi, ɑ yin tunn k mɑnŋ nɑn Yennu. Klistu k mi tun biit, ŋɑɑn Yennu e din jinn’ɔ ɑ u tie biitdɑɑnɔ t tiɑɔnŋ biit pɑɑk. U din tun ŋɑnn e ɑ tin lɑ yentinu binbenŋ ŋuɑ Klistu ni. Tinm nbɑ tuun Yennu tuonɑ u sonml pɑɑk nɑ, t bɑln’mi e, i dɑɑ te k u ninkpɑbɑɔnŋ nɑ tie yɑnn. K mɑɑn Yennu yet ɑ: «Yuo nbɑ din tɑn jɑnŋ nɑn mɑn wɑnn n lonm nɑ, n din gbiint ɑ miɑlu nɑ. K yuo nbɑ din tɑn jɑnŋ nɑn niib n lɑ fielu nɑ, n din sonm’ɑ wɑɑ.» Gbiintl mɑn, yuo jɑnŋ nɑn yin gɑɑl Yennu lonm o nɑ. Dinnɑ e tie dɑɑl nbɑ k niib sɑɑ lɑ fielu Yennu buol ni. Tinm k tuun bonsiɑl k sɑɑ guɑl suɑ Yiesu *Klistu sɔnu ni, ɑ k suɑ n tɑn mɑnn yet ɑ t tuonɑ nɑ mɔk biit. Tinm ŋɑnin, t binbenŋ kul nbɑ tie biɑnŋ nbɑ nɑ e wɑnt niib nɑn t set tie Yennu tuontunnɑ e. T lɑɑt fɑlɑ, nɑn muksuk, nɑn mɑɑn, ŋɑɑn lek di suklu l kul nɑ ni, k b buo’t lɑnbɑnɑ, k kuɑnt’t dɑnsɑli, k nibul tuu wol’t. K t lek gubn k gɑɑl wɑhɑlɑ kul: k k lɑɑt yɑɑk k guɑnt, nɑn kon. Tɑɑ tie niŋɑnm k mɔk bɑnnu nɑn suklu nɑn bulcint, k gbie nɑn Foŋɑnm, k luon niib nɑ e wɑnt nɑn t tie Yennu tuontunnɑ. T yien niib Yennu mɑɑn nbɑ tie bɑlmɔni nɑ, k mɔk ŋuɑ Yennu pɑnŋ, k biɑ mɔk yentinu binbenŋ nbɑ tie jɑtiɑt nbɑ be t niidiitu ni nɑn niigɑnŋ ni nɑ. Nisiɑb tien’t nibɑɑkl, k nisiɑb mun suki’t. Nisiɑb biil t sɑnɑ, k nisiɑb mun piɑk’t. Nisiɑb yien ɑ t lin kpɑnn niib e, ŋɑɑn k t piɑk bɑlmɔni e. Niib yɑɑ ɑ b k mi’t ŋɑɑn niib kul mi’t, k yɑɑ ɑ t tie kpienm e ŋɑɑn k t fo, k ŋmɑni t tubɑ ŋɑɑn k k kpi’t. Niib tien’t pɑlbiil, ŋɑɑn k t mɔk pɑlpienn nbɑ kɑɑ pɑɑk e yuo kul ɑ. T tie tɑli e, ŋɑɑn tinm e te k niib bonciɑnn tie mɔktɑ. T k mɔk siɑl, ŋɑɑn t set mɔk mɔktuk kul ɑ. Yinm Kuolent duo tieb, t ponŋ yet’i t nuɑk ni mɑɑn kul ɑ. L k tie tinm kɑɑ k luon’i ni, ŋɑɑn yinm e k luon’t. N piɑk tien’i nɑn nilɔ nbɑ bo sɑɑ pɑk u tiɑɔnŋ wɑɑs biɑnŋ nbɑ nɑ e. Ii luon’t mɑn nɑn tɑɑ luon’i biɑnŋ nbɑ nɑ. I dɑɑ yuɑkt nɑn niib nbɑ k tien Yiesu yɑdɑ nɑ, k mɑɑn b k tie i yuɑsnbɑ kɑɑ. Lin nbɑ ŋɑn Yennu buol nɑn lin nbɑ bi sɑɑ fit lɑkn k be nɑn lieb ɑɑ? Yentu sɑɑ fit tɑɑn nɑn bunbɔnn ɑɑ? Klistu nɑn *Sɑɑtɑn sɑɑ fit tɑɑn mɔb ɑɑ? Nisuɑ nbɑ wɑɑ Yiesu sɔnu nɑn wun nbɑ k wɑɑ’l, b sɑɑ fit tɑɑn binbenyenŋ ɑɑ? Yennu jɑɑnti ŋɑsɑɑkɑk nɑn puociɑnfiek tie yonm oo? Aɑi. Tinm e tie jɑɑnti ŋɑsɑɑkɑk k tul mɑnfodɑɑnɔ Yennu, nɑn Yennu nbɑ din yet nɑ ɑ: «N sii be nɑn’m, kii sonm b sinsuuk ni. N sii tie b Yennu e, k b mun sii tie n niib.» L pɑɑk k Yonmdɑɑnɔ Yennu biɑ yet ɑ: «Bɔktl i mɔnŋ mɑn k nyi b sinsuuk ni mɑn. I dɑɑ tuun nɑn lin nbɑ mɔk jɑknt, k n sɑɑ gɑɑl’i. N sii tie i Bɑɑ e, k i tie n bonjɑbis nɑn n sɑpɑɑnbis. Min, Yonmdɑɑnɔ Yennu nbɑ mɔk yiikuo kul nɑ yien’i nnɑ.» N yɔnimɔni, Yennu nbɑ senn mɔsonɑ k tul’t nɑ pɑɑk, ŋɑɑnt mɑn k t nyik lin nbɑ kul bɑɑt nɑn jɑknt t gbɑnɑnt nɑn t sei ni ŋɑɑn kii tie Yennu niib cɑin kii bɑɑkt’ɔ. Wɑnt’t mɑn nɑn i luon’t. T k mi tun suɑ bonbiil, ɑmi k tun siɑl k biil suɑ, ɑmi k ŋmɑb suɑ. N k diɑn nnɑ ɑ n yet ɑ i k mɔk mɔni kɑɑ. T lek luon’i, nɑn mɑɑ ponŋ yet’i biɑnŋ nbɑ nɑ. T i lek i kpo ɑmi tɑɑ be mɑnfuol ni, ŋɑɑn t lek sii luon’i. N k mɔk bilsuk i pɑɑk. N mɔk yugontl nɑn’i. T fɑldinu kul ni, n mɔk pɑlcienn yuo kul k n pɑl biɑ pien bonciɑnn. Tɑɑ din bɑɑl Mɑɑseduɑnn t din k fit foi. T din lɑ muksuk lokl kul po. Nisiɑb din kɔn nɑn’t, k jɑŋmɑɑni din be t pɑlɑ ni, ŋɑɑn Yennu nbɑ mɑɑnt bin nbɑ mɔk pɑlbiil nɑ pɑlɑ dɑɑn te k Tiit bɑɑl t buol ni, k u bɑɑlu mɑnŋ dɑɑn mɑɑn t pɑlɑ wɑɑ. U bɑɑlu kuukuɑ kɑɑ dɑɑn mɑɑk t pɑlɑ, ŋɑɑn u biɑ dɑɑn yet’t biɑnŋ nbɑ k i dɑɑn cie u pɑl. U dɑɑn yet’t ɑ i ninbinn mɔn nɑn k i biɑ lɑ’n, ɑ i mɔk pɑlbiil, k i ninbinn biɑ mɔn nɑn yin kɔn n pɑɑk. Lin nbɑ nɑ e te k n mɑntk mɔk pɑlpienn. Kɑdɑɑɔk nbɑ k n din diɑn k tul’i nɑ ii dinŋ ii tul’i pɑlbiil i e, n din k pɑbi l pɑɑk. N din pɑbi l pɑɑk sinsinn, mɑɑ din lɑ nɑn l tul’i pɑlbiil, ŋɑɑn pɑlbiil mɑnŋ din k wei. Mɔtɑɑnɑ n ji mɔk pɑlpienn e. I pɑlbiil mɑnŋ pɑɑk kɑɑ te k n mɔk pɑlpienn, ŋɑɑn i pɑlbiil nbɑ te k i mɔ kuɑŋɑɑn k lebt binbenŋ nɑ pɑɑk e te k n mɔk pɑlpienn. Yennu e din te k i pɑlɑ biil i biit pɑɑk, t kɑdɑɑɔk k biil’i siɑl. Pɑlbiil nbɑ nyii Yennu buol nɑ te k nilɔ mɔ kuɑŋɑɑn k lebtl binbenŋ k lɑɑt fielu, k nilɔ kɑn fit pɑbi l pɑɑk. Ŋɑɑn tingbounŋ nɑ pɑlbiil ŋɑnin bɑɑt nɑn kuun e. Gotl mɑn k lɑ biɑnŋ nbɑ k pɑlbiil nbɑ nyi Yennu buol nɑ nbɑ juontl biɑnŋ nbɑ. L te k i set din luon k yii tuun nɑn ninmɔnn k wɑnn nɑn i k mɔk biit. I wutuol din duo lin nbɑ kul nbɑ tien nɑ pɑɑk, k i biɑ din tiin lin nbɑ din sɑɑ fit tien nɑ. Pɑlbiil mɑnŋ din te k i set luon k i lɑ’n. L din te k i mɔk ninmɔnn k luon k i ŋmɑnn biitdɑɑnɔ tubl. Yɑɑ tuun nnɑ mɑnŋ nɑ, l set wɑnt nɑn i k mɔk bisiɑt lɑbɑɑl mɑnŋ ni. Mɑɑ din diɑn kɑdɑɑɔk mɑnŋ k tul’i nɑ, l k tie nisuɑ nbɑ tun biit nɑ pɑɑk kɑɑ, k l biɑ din k tie nisuɑ nbɑ k u biil’ɔ nɑ pɑɑk kɑɑ din te k n diɑn. Ŋɑɑn n din luon k yin bɑnn nɑn Yennu mi biɑnŋ nbɑ k i bɑkɑ be t ni. Ŋɑnn e te k t pɑlɑ cie. T pɑlɑ din cie bonciɑnn, ŋɑɑn bɑnnu nbɑ Tiit din mɔk pɑlpienn biɑ din pukn tinm pɑlpienn bonciɑnn. U din wɑnn’t bɑnnu nbɑ k i te k u yɑnputuk gbenn. U buol ni, n din yet nɑn n mɔk pɑlpienn i pɑɑk, ŋɑɑn l k mɔk’n fei. T tun k piɑk’i bɑlmɔni e, k lin nbɑ wɑnt e nɑ: n mɔk mɔni nɑn mii fɑɑ pɑlbiil i pɑɑk Tiit buol. Wɑɑ luon’i biɑnŋ nbɑ mɑntk puki yuo nbɑ k u tiɑl bɑnnu nbɑ k i din tien siil ɑ yin sɑk u mɔb, k biɑ din gɑɑl’ɔ sɑɑɔnŋ nɑn jɑŋmɑɑni nɑn gbɑnɑnjijekt nɑ. N set mɔk pɑlpienn bonciɑnn nɑn mɑɑ sɑɑ fit kii duu i pɑɑk nɑ. T nɑɑ wɑɑs, t luon k i bɑnn lin nbɑ k Yennu ninkpɑbɑɔnŋ tun *Klistu mɔtɑɑɔk niib nbɑ be Mɑɑseduɑnn nɑ sinsuuk ni nɑ po e. B din lɑ fɑlɑ bonciɑnn b biknu ni, b pɑlpienn din yɑb hɑli nɑn bin wɑnn b bulcint nɑn bɑɑ lek tie tɑlɑs-dɑnm nɑ wɑɑ. N sɑɑ fit tien b *siɑlɑ nɑn bɑɑ din mɔk lin nbɑ, b din tul nɑn b pɑnŋ telk e, k ponŋ din sɑɑ gɑl bɑɑ bo sɑɑ tul biɑnŋ nbɑ gbɑɑ. B yɑnbuɑt ni, b din bɑln’t ɑ tin cɑb’b k bin sonm Yennu niib. B din tul k l gɑl tɑɑ ponŋ din duki ɑ b sɑɑ tul biɑnŋ nbɑ. Sinsinn b jii b mɔnŋ e k tul Yonmdɑɑnɔ, k ji fit jii b mɔnŋ k tul tinm, Yennu lonm ni. Ŋɑnn e k t din bɑln Tiit ɑ wun sɑɑn i buol ni kii sɑɑ kii tuun tuonn mɑnŋ nɑn wɑɑ din piin nɑ, ɑ wun fit sonm’i ɑ yin tun bulcint tuonn mɑnŋ k gbenn. Tɔn, i mɔk bont kul ɑ. I tien Yiesu yɑdɑ, k biɑ fit piɑk fɑnu k biɑ mi bonciɑnn, k biɑ tuun tuonn nɑn ninmɔnn k biɑ luon’t bonciɑnn. Yɑɑ tuun lin nbɑ nɑ kul bonciɑnn nɑ, t luon k yii tuun bulcint tuonn mɑnŋ mun bonciɑnn. N k senn sennu kɑɑ k tul’i, ŋɑɑn n wɑnt’i i lieb nbɑ tuun nɑn ninmɔnn bɑnnu nbɑ e, ɑ lin wɑnn’i sɔnu nbɑ k i sɑɑ tɔkn k wɑnn i lonm nbɑ yɑb bɑnnu nbɑ. K mɑɑn, i mi t Yonmdɑɑnɔ Yiesu Klistu ninkpɑbɑɔnŋ nbɑ tie bɑnnu nbɑ. U din tie mɔktɔ e, ŋɑɑn k i pɑɑk k u din kpɑnt tɑlk, ɑ u tɑlɑs mɑnŋ n te k yin tien mɔktɑ. Dudukt nbɑ k n sɑɑ tul’i k jiin l po tie nnɑ e. L ŋɑn k yin tukn kii tuun yɑɑ din piin lin nbɑ binn po nɑ. Yinm e din dɔnŋ lieb k l k tie yɑɑ din tun nnɑ kuukuɑ pɑɑk kɑɑ, ŋɑɑn yɑɑ din mɔk dudukt nbɑ sɑɑ fit tun nnɑ nɑ pɑɑk. Mɔtɑɑnɑ i tun tuonn mɑnŋ k tont mɑn. Tumn mɑn l tuonn k tont nɑn lonm nɑn yɑɑ din piin nɑn lonm bɑnnu nbɑ nɑ. I tun nnɑ mɑnŋ nɑn yɑɑ mɔk lin nbɑ. L i tie k suɑ luon wun tul siɑl i e, Yennu sɑɑ gɑɑl’l k mɑɑn u goli lin nbɑ k l dɑɑnɔ mɔk e, ŋɑɑn k k goli lin nbɑ k u k mɔk. N k luon k yin tul lieb ŋɑɑn di fɑlɑ l pɑɑk. N luon k i kul i jɑn e. Yɑɑ mɔk k l yɑb mɔtɑɑnɑ nɑ, l ŋɑn k yin sonm bin nbɑ k mɔk nɑ, k l i tie k i mun tɑn k mɔk yuo nbɑ, b mun sɑɑ fit sonm’i wɑɑ. Ŋɑnn e sɑɑ te k i kul i jɑn nɑn lieb nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ ɑ: «Wun nbɑ din tɔkl bonciɑnn nɑ, u din k dii k tenn, k wun nbɑ tɔkl wɑɑnm-nnɑ nɑ, l din k pɔt’ɔ.» Yennu yen niipuouk nɑn wɑɑ te k Tiit bɑkɑ be i ni nɑn t bɑkɑ nbɑ mun be i ni biɑnŋ nbɑ nɑ, k mɑɑn tɑɑ bɑln’mɔ ɑ wun sɑɑn i buol ni nɑ, u sɑk ɑ, ŋɑɑn u mɔnŋ mɔnŋ nunm mɔn nɑn wun sɑɑn i buol ni, k u dɑɑn yɑɑ wun sɑɑn nɑn u mɔnŋ lonm. T tɑn sɑɑ te k t nɑɑ bisiɑk n wei’ɔ k sɑɑn i buol ni. T nɑɑ bik nɑ nbɑ muɑntl Klistu lɑbɑmɑnn biɑnŋ nbɑ nɑ pɑɑk te k Klistu mɔtɑɑɔk niib nbɑ be nɑ kul piɑk’ɔ bonciɑnn. B biɑ lukt t nɑɑ bik mɑnŋ ɑ wun ciɑn’t k tii tuun bulcint tuonn nɑ k l sɑɑ pukn Yonmdɑɑnɔ *yudɑnt, k biɑ wɑnn nɑn t luon k tin sonm t lieb. T luon tin lɔkt bɑnnu nbɑ k niib sɑɑ tɑɑl’t tɑɑ tun nɑn piini nɑ bɑnnu nbɑ nɑ e. T k yɑbi t mɔnŋ pɑɑk, ɑ t tun lin nbɑ ŋɑn Yennu nunm ni kuukuɑ kɑɑ, ŋɑɑn t luon k tin tun lin nbɑ ŋɑn e niib nuni ni mun. T sɑɑ tun t nɑɑ biliek mun k wun ciɑn’m i buol ni. Yuo kul, t lɑɑt t nɑɑ bik mɑnŋ binbenŋ nbɑ tie biɑnŋ nbɑ, k bɑnn nɑn u nunm set mɔn Yennu tuonɑ pɑɑk, ŋɑɑn mɔtɑɑnɑ u ji mɑntk luon k wun sɑɑn i buol ni, k mɑɑn wɑɑ duu i pɑɑk nɑ pɑɑk. Lin nbɑ be k jiin Tiit po tie nnɑ e, u tie n tuontunluɑ e k tuun tien’i. Ŋɑɑn t nɑɑ wɑliet nbɑ ciɑnt’ɔ nɑ ŋɑnin, b tie Klistu mɔtɑɑɔk niib tuomiinbɑ e k tuun lin nbɑ sɑɑ dont Klistu sɑnn. L pɑɑk, i wɑnn t nɑɑ wɑɑs nɑn i luon’m nɑn bɑlmɔni, ɑ k Klistu mɔtɑɑɔk niib n set bɑnn nɑn tɑɑ piɑk’i biɑnŋ nbɑ nɑ, t mɔk mɔni. L ji k kpɑɑ tɑlɑs k n biɑ diɑn kɑdɑɑɔk k yet’i biɑnŋ nbɑ k b sonmt Yennu niib nbɑ be Suude. N mi nɑn i luon k yin sonm’b. N dɑɑn pɑk’i Mɑɑseduɑnntieb buol ni, k yet’b biɑnŋ nbɑ k yinm nbɑ be Akɑɑyi tinŋ ni nɑ din luon, k yin sonm Yennu niib binn po nɑ k sɑɑ tuu dinnɑ. I nunm nbɑ din mɔn Yennu niib sonml pɑɑk nɑ, l din te k b mun luon k bin sonm’b. Ŋɑɑn n tuun t nɑɑ wɑɑs i buol ni e, ɑ k lin te tɑɑ piɑk’i biɑnŋ nbɑ nɑ dɑɑ tie yɑnn. N luon k i set tien siil nɑn mɑɑ ponŋ yet biɑnŋ nbɑ nɑ. Nnɑ i kɑɑ, k Mɑɑseduɑnn tinŋ ni niib mɑnŋ tɑn ciɑn’n k bɑɑl i buol ni, k suɑ k i dɑɑ k tien siil, l sɑɑ din’n fei wɑɑ, k l kii tie min kuukuɑ kɑɑ sɑɑ di fei, t kul ɑ e sɑɑ di fei, k mɑɑn t dɑɑn pɑk’i b buol ni wɑɑ. L pɑɑk n dukn ɑ l ŋɑn k n bɑln t nɑɑ wɑɑs nɑ, k bin dɔnŋ gɑl n tuɑnn po k sɑɑn i buol ni k sɑɑ sonm’i k yin tien bulcinpiini nɑ siil nɑn yɑɑ dɑɑn senn i mɔsonn biɑnŋ nbɑ nɑ. Mi i tɑnŋ i bɑɑl yuo nbɑ n sɑɑ lɑ nɑn l ponŋ tien siil ɑ. Ŋɑnn e sɑɑ wɑnn nɑn i gɑɑl’l nɑn i mɔnŋ lonm nɑ e, ŋɑɑn k suɑ kɑɑ miɑ’i k i gɑɑl. N yien’i e, wun nbɑ bul dii wɑɑnm-nnɑ tɑn sɑɑ jɑɑn wɑɑnm-nnɑ e, k wun nbɑ mun bul dii sɑɑn ɑ, mun tɑn sɑɑ jɑɑn sɑɑn ɑ e. Wun nbɑ kul dukn u pɑl ni, ɑ wun pi piini biɑnŋ nbɑ, l dɑɑnɔ n pi nnɑ, k dɑɑ piin nɑn pɑlbiil, k suɑ dɑɑ mɑb’ɔ, k mɑɑn Yennu luon nisuɑ nbɑ piin piini nɑn pɑlpienn e. Yennu mɔk yiikuo nbɑ sɑɑ tul’i bonsiɑl kul k l yɑb, k i sii mɔk lin nbɑ kul siɑn k l biɑ sɑɑ tenn k jɑnŋ nɑn yii tuun tuonŋɑnɑ kul ɑ, nɑn lɑɑ diɑn Yennu lolkpel kɑdɑɑɔk ni ɑ: «U nuu ŋɑnin tiɑn k tien tɑli e, k u bulcintuk mɑnŋ kɑn mi k gbenn.» Yennu nbɑ tien niib dibuoli k b buul, ŋɑɑn biɑ tien’m jiet k b di nɑ, ŋuɑ e sɑɑ tul’i dibuoli kul nbɑ k i sɑɑ fit bul k u biɑ sɑɑ te k lin pɑ k kpɑɑt. Nnɑ e k u sɑɑ te k i bulcint n lon luɑnɑ bonciɑnn. Yennu sɑɑ tien’i mɔktɑ bɑnnu nbɑ k i sii fit tuun nɑn bulcint yuo kul. Ŋɑnn e, niib bonciɑnn sii piɑk Yennu piini nbɑ nyii i buol ni k t tul’b nɑ pɑɑk. Yɑɑ sonmt Yennu niib bɑnnu nbɑ nɑ, l k tie nyuɑt k tul’b nɑn bɑɑ k mɔk lin nbɑ nɑ kuukuɑ kɑɑ, ŋɑɑn l biɑ te k niib sɑɑ tul Yennu niipuouk bonciɑnn. Yɑɑ sonmt’b bɑnnu nbɑ nɑ sɑɑ wɑnn’b yɑɑ tie nibuolu nbɑ. L pɑɑk, niib bonciɑnn sɑɑ pɑk Yennu yɑɑ gɑɑl *Klistu lɑbɑmɑnn k sɑk’l nɑ pɑɑk. B biɑ sɑɑ pɑk Yennu, i nuu nbɑ tiɑn k i centl nɑn’m nɑn niib kul yɑɑ mɔk lin nbɑ nɑ pɑɑk. B sɑɑ miɑl Yennu k tul’i nɑn lonciɑɔnŋ, Yennu nbɑ tul’i u yetŋɑnm bonciɑnn nɑ pɑɑk. Ŋɑɑnt mɑn k tin tul Yennu niipuouk u piini nbɑ kɑɑ liel nɑ pɑɑk. Min Pɔul tiɑɔnŋ o tien’i mɔb nɑ, min nbɑ k b yien ɑ n mɔk sikn-n-mɔnŋ, l i tie k n be i buol ni, ŋɑɑn mɔk pɑnŋ yuo nbɑ k n fɔk nɑn’i nɑ. *Klistu nbɑ din mɑn k din k tie wutodɑɑnɔ nɑ pɑɑk, n bɑln’mi e, ɑ i dɑɑ te k n yɑki nɑn’i k mɑɑn n ponŋ mi nɑn mi i bɑɑl i buol ni yuo nbɑ, n kɑn dɑt i siɑb tubɑ. N mi nɑn mi i bɑɑl i buol ni yuo nbɑ sie k n dɑt nisiɑb nbɑ yɑɑ ɑ t wɑɑ tingbounŋ nɑ niib nbɑ wɑɑ lin nbɑ e nɑ tubɑ. L tie bɑlmɔni e nɑn t mun lek be nifosɑɑli gbɑnɑnt ni, ŋɑɑn t k kɔn kunkɔnn nɑn nisɑɑli nbɑ kɔn bɑnnu nbɑ nɑ kɑɑ. T k jikt nisɑɑlk jɑtiɑt kɑɑ, ŋɑɑn t jikt Yennu tiɑɔnŋ jɑtiɑt nbɑ mɔk pɑnŋ k sɑɑ fit biil t dɑtɑi binbeboɑ nɑ e. T nyɑni fɑɑk mɑɑn e, k biɑ nyɑni lin nbɑ kul nyii kɑlnbɑɑni dɑnm nbɑ yet ɑ b mɔk yɑn k cie Yennu nɑ. T nyɑni dudukt kul, k te k l sɑɑk Klistu mɔb. Ii wɑnn nɑn i sɑk Yennu mɔb gbenn yuo nbɑ nɑ, t tie siil nɑn tin dɑt bin nbɑ k sɑk nɑ tubɑ e. I goli lin nbɑ k nilɔ fit lɑ nɑn u ninbinɑ kuukuɑ e. Nisuɑ i be i sinsuuk ni k yɑɑ ɑ u tie Klistuyuɑ e, wun tiɑl nɑn t mun tie Klistuyɑb e, nɑn wɑɑ tie biɑnŋ nbɑ nɑ. Fei k mɔk’n, l i tie k n fuɑ bɑlɑ k l yɑb, yiikuo nbɑ k Yonmdɑɑnɔ tul’t nɑ pɑɑk. U din tul’t yiikuo nɑ ɑ tin sonm’i k dɑɑ biil’i ni. I dɑɑ duki nɑn n luon k n diɑn kɑdɑɑɔk nbɑ sɑɑ jien’i ni. Nisiɑb yien ɑ: «Pɔul kɑdɑɑt nɑɑn nɑn pɑndɑɑnsuɑ yɑl nɑ e, ŋɑɑn k u i tɑnŋ i bɑɑl t buol ni yuo nbɑ, u tuu tie tɑlk e, k u mɔbonɑ nɑ ji k mɔk pɑnŋ.» L ŋɑn k l niib n bɑnn nɑn tɑɑ dɑ t kɑdɑɑt ni ɑ t sɑɑ tun biɑnŋ nbɑ nɑ, t i tɑnŋ i bɑɑl yuo nbɑ nɑ, l biɑnŋ e k t set sɑɑ tun. Mɔmɔnm, t k luon k t jii t mɔnŋ k bikn nɑn nisiɑb nbɑ dont b mɔnŋ, k biɑ k luon k tii tie nɑn b yenm nɑ. B k mɔk yɑn. B senn b mɔnŋ biknu e, k biki b mɔnŋ k yeknt b mɔnŋ nɑn b lieb. Ŋɑɑn tinm ŋɑnin t jɑpɑɑt kɑn gɑl telk nbɑ k Yennu wɑnn tinm. Yennu tiɑɔnŋ senn tɑɑ sɑɑ tun lin nbɑ wɑɑ, k cɑb’t ɑ tin bɑɑl i buol ni. T ii dinŋ ii kii bɑɑl i buol ni, t bo sɑɑ fit yet ɑ t gɑl t telk, k mɑɑn t set din bɑɑl i buol ni nɑn Klistu lɑbɑmɑnn nɑ wɑɑ. Ŋɑnn, t k gɑl t telk. T k wɑnt t mɔnŋ lieb tuonn pɑɑk. Ŋɑɑn t set mɔk dindɑnn nɑn i yɑdɑ sii puki k t sii fit tuun tuonn i sinsuuk ni k cie tɑɑ ponŋ tun lin nbɑ, ŋɑɑn k k gɑl telk nbɑ k Yennu senn nɑ. Ŋɑnn e, t sɑɑ fit k sɑɑn dosɑi nbɑ gɑl i duo nɑ, k muɑnt lɑbɑmɑnn. T kɑn sɑɑn siɑn nbɑ k siɑb ponŋ din tun nɑ, t k luon pinpɑkt nisiɑb tuonɑ pɑɑk. L diɑn Yennu lolkpel kɑdɑɑɔk ni ɑ: «Nilɔ nbɑ luon pɑlbifɑɑnt, l ŋɑn k wun fɑɑ pɑlbiil lin nbɑ k Yonmdɑɑnɔ tun nɑ pɑɑk e.» Setk nɑn mɔni nisuɑ nbɑ piɑk u mɔnŋ, l k wɑnt nɑn Yennu nunm gbuo’u kɑɑ, ŋɑɑn Yonmdɑɑnɔ i piɑk wun nbɑ, ŋɑnn e wɑnt nɑn Yennu nunm gbuo’u. Mi i piɑk jɑti e, ŋɑɑn yinm n lek yɑbl i mɔnŋ k di suklu n pɑɑk. N mi nɑn i ponŋ tie nnɑ. N mɔk *funfunn i pɑɑk k funfunn mɑnŋ nyi Yennu buol ni. I tie nɑn sɑpɑɑmɔ nbɑ k mi juɑ k biɑ k mɔk bisiɑt, k n jii’u k tien’ɔ *Klistu kuukuɑ sɑlkpenŋ. Ŋɑɑn n mɔk jijiet i pɑɑk k mɑɑn n mi nɑn niib tɑn sɑɑ fit mɑnn kpɑnn’i k biil i dudukt, ɑ i ji dɑɑ wɑɑ Klistu fɑnu, nɑn wɑɑɔk nbɑ din kpɑnn Ef biɑnŋ nbɑ nɑ. K mɑɑn i tuu mɔk suklu nɑn wun nbɑ bɑɑl i buol ni k yet’i lɑbɑliɑ nbɑ k tie Yiesu lɑbɑɑl nbɑ k t din yet’i nɑ. I gɑɑn siek nbɑ k tie Foŋɑnm, k biɑ gɑɑn lɑbɑɑl nbɑ k tie Yiesu lɑbɑmɑnn. Niib nbɑ kpɑnn’i ɑ b tie Yiesu tuomiinbɑ nɑ, n k dukn nɑn b gɑl’n. L i lek i tie k n k mi mɑɑn pɑku fɑnu, ŋɑɑn n set mɔk minu. Yuo kul, t biɑ din wɑnn’i nnɑ pɑɑnu ni. Yuo nbɑ k n din muɑntl Yennu lɑbɑmɑnn k tien’i nɑ, n din k gɑɑl i bonsiɑl l pɑɑk. N din sikn n mɔnŋ e ɑ n donn’i. Mɑɑ din tun nnɑ mɑnŋ, n mɔk biit e l pɑɑk ii? N din tuo e, k Klistu mɔtɑɑɔk nisiɑb pɑ’n, k goli’n k n tuun k tien’i. Mɑɑ din be i buol ni yuo nbɑ k k mɔk siɑl nɑ, ŋɑɑn n lek din k muks’i ɑ yin sonm’n nɑn siɑl. T nɑɑ wɑɑs nbɑ din nyii Mɑɑseduɑnn din bɑɑl nɑn bonsiɑl nbɑ k n din luon nɑ. Mɑɑ lek din be biɑnŋ nbɑ l yuo nɑ, n biɑ lek sii be nnɑ e. N kɑn muks’i ɑ yin sonm’n nɑn bonsiɑl. Klistu bɑlmɔni nbɑ be n ni nɑ pɑɑk e, k n yet ɑ suɑ kɑn mi bɔl n yugontl Akɑɑyi tingbounŋ ni lokl kul po. Biɑ pɑɑk e? Lin nbɑ nɑ wɑnt ɑ n k luon’i ee? Yennu ŋɑnin mi nɑn n luon’i. N lek biɑ sii tuun nɑn mɑɑ tuun mɔtɑɑnɑ biɑnŋ nbɑ nɑ e. Ŋɑnn e sɑɑ te k dɑnm nbɑ luon k bin wɑnn b mɔnŋ nɑn b mun tuun nɑn tinm nɑ, dɑɑ lɑɑt yɑɑk. L nibuolu tie fɑɑk tuomiinbɑ e, k kpɑnn’i b tuonɑ ni, k nɑnt b mɔnŋ nɑn Klistu tuomiinbɑ ŋɑɑn b k tie u tuomiinbɑ kɑɑ. L k tie lin nbɑ mɔk yɑɑl-lituk kɑɑ. Nnɑ e k *Sɑɑtɑn tiɑɔnŋ nɑnt u mɔnŋ nɑn yentu *mɑlɑkɑ nɑ. L pɑɑk, Sɑɑtɑn tuontunnɑ i nɑnt b mɔnŋ nɑn Yennu nbɑ ŋɑn nɑ tuontunnɑ, l k mɔk yɑɑl-lituk. Ŋɑɑn b juontu e tɑn sɑɑ jɑnŋ nɑn b tuonɑ nbɑ tie bɑnnu nbɑ. N biɑ sɑɑ ŋɑnm yet’i wɑɑ, i dɑɑ duki nɑn n tie wɑɑtɔ e. Ŋɑɑn l i tie k i lek i duki nnɑ i e, yin gɑɑl’n nɑn yɑɑ sɑɑ gɑɑl wɑɑtɔ bɑnnu nbɑ, k n fit wɑnn n mɔnŋ wɑɑnm-nnɑ. Mɑɑ yien’i lin nbɑ nɑ k tie lin nbɑ k Yonmdɑɑnɔ wɑnn’n ŋɑɑn mɑɑ piɑk n mɔnŋ bɑnnu nbɑ, n set piɑk nɑn wɑɑtɔ nɑ e. Niib bonciɑnn nbɑ wɑnt b mɔnŋ tingbounŋ nɑ bonɑ pɑɑk nɑ, n mun sɑɑ wɑnn n mɔnŋ ɑ. Yinm nbɑ mɔk yɑn bonciɑnn nɑ, i tuu di suklu nɑn wɑɑtb k biɑ mɔk pɑlpienn l pɑɑk. Nisuɑ i suol’i k jii’i tien’i u dɑɑbɑ, k ŋmɑb’i bont, k kpɑnn’i, k mɔk kɑlnbɑɑni, k pebt’i tɑnpɑki, ŋɑɑn i tuu di suklu nɑn l dɑɑnɔ e. N tiin fei ŋɑɑn tɑɑ din be i buol nɑ, t din k mɔk pɑɑlu k sɑɑ fit tun nnɑ. Nisuɑ i mɔk pɑl k wɑnt u mɔnŋ siɑl pɑɑk, n mun sɑɑ wɑnn n mɔnŋ l pɑɑk. N set piɑk nɑn wɑɑtɔ nɑ e. B i tie *Suifnbɑ i e, n mun tie *Suif nilɔ e. B i tie Islɑɑeltieb i e, n mun tie ŋɑnn e. B i tie Ablɑɑhɑɑnm yɑɑbuonɑ i e, n mun biɑ tie yenɔ e. B i tie Klistu tuontunnɑ i e, min e set tie Klistu tuontunnɔ k cie’b (n pɑk nɑn wɑɑtɔ nɑ e). N tuun tuonn k cie’b. B kuɑn’n dɑnsɑlk k cie’b. B buo’n gbɑnn k cie’b. N biɑ lɑ ninbɔnŋ bonciɑnn k k fɔk nɑn kuun k cie’b. Tɑɑl munŋmu k Suifnbɑ yudɑnm din buo’n kpɑɑsɑ piintɑ nɑn ŋɑn-yiɑ. Luonmtieb din buo’n lɑnbɑnɑ tɑɑl muntɑ. Niib din tɑn jɑɑt’n tɑnɑ siɑn-yuo. Ŋɑlnt din libt cɑɑn nɑn’n nyun ni tɑɑl muntɑ, k yentunmunn nɑn nyɑmunn k n din be mɔkgbenŋl nyun pɑɑk. N din tuu sonm yuo kul k sɑɑ n sɔni, k lɑɑt nyun ni ninbɔnŋ, k biɑ tuu lɑɑt ninbɔnŋ fɑt-tieb buol ni, nɑn n tiɑɔnŋ niib buol ni, nɑn nibuolgɑnu buol ni, k biɑ lɑɑt ninbɔnŋ digbɑngbenŋɑ ni, nɑn muuk ni, nɑn mɔkgbenŋl ni, nɑn nisiɑb nbɑ kpɑnn ɑ b tie Klistuweilɑ nɑ buol ni. N din set tuun tuonɑ nɑn ninmɔnn, k lɑɑt fɑlɑ, k k guɑnt nyiɑɔk yuo nɑn yuo. Kon nɑn nyun-nyuklu din tuu suol’n, k n kɔnŋt jiet, k wɑɑt so’n, k n bongbɑbkɑl k jɑnŋt’n. L k tie l kul kɑɑ. Dɑɑl kul n mɔk yɑnputuk yuo nbɑ k n duki Klistu mɔtɑɑɔk niib nbɑ be l kul po nɑ. Nisuɑ i kii mɔk pɑnŋ i e, n mun tuu bɑnŋ e. Nisuɑ i bɑɑ biit ni, n pɑl ni tuu biil bonciɑnn. L i bɑɑl nɑn mɑn wɑnn n mɔnŋ, n sɑɑ wɑnn n mɔnŋ k jiin n tɑtunŋ po e. Yonmdɑɑnɔ Yiesu Bɑɑ Yennu, wun nbɑ yen *yudɑnt nɑn yuo nbɑ kɑɑ gbennu nɑ, ŋuɑ e mi nɑn n k fɑ fɑɑk kɑɑ. Mɑɑ din be Dɑɑmɑɑs duo ni yuo nbɑ, kpɑnbɑl Alietɑɑs yuo nɑ, duo mɑnŋ ni gobnɑ din luon wun suol’n e, k din te k sejenm sie duo mɑnŋ tɑnmɔb ni k goli ɑ bin suol’n. Ŋɑnn e k b din jii’n k kpien’n kpɑncubgbenŋl ni, k din duɑnt sikn’n tɑkɑlbonn nbɑ be duo mɑnŋ juonn ni nɑ, k n din nyii juɑ mɑnŋ nuu ni. L kpɑɑ tɑlɑs k mii lek i mɔk pɑlbifɑɑnt, ŋɑɑn l k mɔk nyuɑt. Mɔtɑɑnɑ n sɑɑ wɑnn’i yelntu nɑn lɑbɑɑl nbɑ k Yonmdɑɑnɔ fiit wɑnn’n. N mi jɑsuɑ nbɑ tie Klistuyuɑ k Yennu din jii’u k donn’ɔ *Yendɔunŋ ni sɑnpɑɑpo. L binɑ piik nɑn ŋɑnnɑ e nɑ. Wɑɑ set din duo nɑn mɔni ɑmi wɑɑ din lɑ yelntu e, n k mi, Yennu kuɑ e mi. N mi nɑn u din duo Yendɔunŋ ni wɑɑ, ŋɑɑn nɑn mɑɑ ponŋ yet bɑnnu nbɑ nɑ, n k mi wɑɑ set din duo nɑn mɔni ɑmi wɑɑ din lɑ yelntu e, Yennu kuɑ e mi. Lenŋ, u din gbɑt mɔbonɑ nbɑ k nilɔ k fit ŋɑnm piɑk, k Yennu biɑ k cɑb ɑ nilɔ i piɑk. N sii mɔk yugontl juɑ nɑ pɑɑk ŋɑɑn n kii mɔk yugontl n mɔnŋ pɑɑk. K mɑɑn n tie tɑlk e. Mi i bo i luon k n fuɑ bɑlɑ i e, n bo kii tie wɑɑtɔ kɑɑ, k mɑɑn mɔmɔnm kuukuɑ e k n bo sii piɑk. Ŋɑɑn n kɑn fuɑ bɑlɑ, k mɑɑn n k luon k suɑ n pɑk’n, l i kii tie lin nbɑ k u lɑ n binbenŋ ni ɑmi k u gbɑt n mɔb ni. Yonmdɑɑnɔ nbɑ te k n bɑnn lin nbɑ nɑ tie bɑktnɔunŋ o, l pɑɑk, ɑ k n dɑɑ fuɑ bɑlɑ, n din lɑ dɑnŋ n gbɑnu ni. B din tun *Sɑɑtɑn tuomu e k u tul’n dɑnŋ mɑnŋ. N miɑl Yonmdɑɑnɔ tɑɑl muntɑ ɑ wun nyinn l muksuk mɑnŋ n ni, ŋɑɑn Yonmdɑɑnɔ yet’n ɑ: N lonm jɑnŋ’ɑ wɑɑ. N pɑnŋ sɑɑ tun fɑnu yuo nbɑ k ɑ k mɔk pɑnŋ e. Ŋɑnn ɑmi, n sii fuɑ bɑlɑ, k mɑɑn n tie tɑtmɔ e. Ŋɑnn e tie k *Klistu pɑnŋ i be n ni. L i tie Klistu pɑɑk k n di butunŋ, k lɑɑt sukt, k di fɑlɑ nɑn muksuk, k lɑɑt mɑɑn, n mɔk pɑlpienn, k mɑɑn n butunŋ ni n set mɔk pɑnŋ. N piɑk nɑn wɑɑtɔ nɑ e ŋɑɑn yinm e te k n tie nnɑ. Yinm e bo sɑɑ pɑk’n, k mɑɑn mi i lek i kii tie siɑl, ŋɑɑn bin nbɑ kpɑnn ɑ b mɑntk tie Klistu tuomiinbɑ nɑ k gɑl’n. Mɑɑ din be i buol ni k tuun bɑktnɔunŋ nyinɑ nɑn tuonjɑɑnɑ, k di suklu yuo kul nɑ, ŋɑnn e wɑnt nɑn n set tie *tuomi e. Nlee k Klistu mɔtɑɑɔk niib nbɑ be cɑkl cɑkl nɑ cie’i ni i? Mɑɑ k boi’i bonsiɑl sonml po nɑ, ŋɑnn e te k b cie’n ii? L i tie ŋɑnn i e te k n mɔk biit, yin tien’n gɑfɑlɑ mɑn. L tɑɑl muntɑ e nɑ k n tuu tie siil mɑɑ n bɑɑl i buol ni. N k yɑɑ n bɑɑl k luon siɑl kɑɑ i buol ni, ŋɑɑn n luon yinm e, k l k tie n luon i likli kɑɑ. Wɑɑs k luon bont k tien b dɑnm, ŋɑɑn wɑdɑnm e luon bont k tien wɑɑs. L sii mɑn’n bonciɑnn mi i jii n mɔktuk kul nɑn n pɑnŋ kul sonm’i. Mi i luon’i bonciɑnn ɑ, yinm sii luon’n wɑɑnm-nnɑ ee? I mi nɑn n din k tie jik-kpiɑtl k tul’i, ŋɑɑn k suɑ sɑɑ yet ɑ n din tie kpelikpeli dɑɑnɔ k kpɑnn’i k suol’i bɑluk. Mɑɑ din tun nisiɑb i buol ni nɑ, b suɑ din mi k ŋmɑb i bonsiɑl k dii ŋɑɑn tenn k tɑn tul’n i? N din bɑln Tiit ɑ wun sɑɑn i buol ni, k biɑ din te k t nɑɑ bisiɑk mun ciɑn’ɔ. Tiit din mi k ŋmɑb i bont ii? Min nɑn ŋuɑ k tɑɑ dudukt ii? T k tɑɑ binbenŋ ii? I duki ɑ tɑɑ piɑk nɑ, t luon k t nyinn t mɔnŋ mɑɑn ni ee? L k tie nnɑ kɑɑ. T be Yennu tuɑnn po e, k piɑk Klistu nbɑ luon biɑnŋ nbɑ. T yɔnimɔni, t luon k t sonm’i e k i wei Yennu sɔnu fɑnu. Ŋɑnn e te k t yien’i. N yɑn put i pɑɑk e nɑn mɑɑ tɑn sɑɑ bɑɑl i buol ni k kɑn lɑ’i k i be nɑn mɑɑ luon yii be biɑnŋ nbɑ nɑ, k i mun kɑn lɑ’n k n be nɑn yɑɑ luon mii be biɑnŋ nbɑ nɑ. N mɔk jijiet nɑn n sɑɑ lɑ’i k i kɔn nɑn i lieb, k mɔk *funfunn nɑn i lieb, k dont wutuol i lieb pɑɑk, k mɔk nɑɑniɑɔk nɑn lieb, k suki i lieb, k biil i lieb, k mɔk jɑpɑɑt k tie kɑlnbɑɑni k tie kpilkpil. N biɑ mɔk jijiet nɑn mi i bɑɑl i buol biɑk, Yennu sɑɑ te k n di fei i pɑɑk, k n pɑl sɑɑ biil i siɑb bonciɑnn pɑɑk, k mɑɑn b ponŋ tun biit, k mɔk niɑnbiiuk nɑn boncuncontuonɑ nɑn dɑyibu, k biɑ k mɔ kuɑŋɑɑn l pɑɑk k lebt binbenŋ. N sɑɑ bɑɑl i buol k pukn tɑɑl muntɑ e nɑ. L tie nɑn lɑɑ diɑn Yennu lolkpel kɑdɑɑɔk ni: «L i tie k i sɑɑ tɑɑl suɑ, sie k siɑlɑɑdɑnm tie bɑnle ɑmi bɑntɑ.» Mɑɑ din bɑɑl i buol tɑɑl munle ni nɑ, n din kpɑɑn’i kul nbɑ ponŋ tun biit nɑ, nɑn i lieb kul ɑ. Mɑɑ ji k be i buol ni nɑ, ŋɑɑn n lek kpɑɑn’i nɑn mɑɑ din ponŋ kpɑɑn’i biɑnŋ nbɑ sinsinn nɑ. Mi i tɑnŋ i bɑɑl, n sɑɑ dɑt b tubɑ wɑɑ. Ŋɑnn e sɑɑ wɑnn nɑn *Klistu e te k n piɑk. U k tie butmɔ kɑɑ i sinsuuk ni, ŋɑɑn u mɔk pɑnŋ i buol ni. L tie mɔni nɑn u din jii u pɑnŋ mɑnŋ e k bɑkn bil ŋɑɑn din sɑk k b kpɑɑ’u dɑpunpunn pɑɑk. Mɔtɑɑnɑ, Yennu pɑnŋ pɑɑk k u be u mɑnfuol ni. Tɑɑ tɑɑn nɑn’ɔ nɑ pɑɑk k t mun k mɔk pɑnŋ, ŋɑɑn tɑɑ tuun nɑn’i bɑnnu nbɑ nɑ pɑɑk k t mun tɑɑn nɑn’ɔ k lɑ mɑnfuol Yennu yiikuo ni. Gotl i mɔnŋ mɔnŋ k bikn i mɔnŋ k lɑɑn i set wɑɑ yɑdɑ sɔnu uu? I k mi nɑn Yiesu Klistu be i ni ee? Ami siɑl kɑɑ k wɑnn nɑn i tien yɑdɑ ɑɑ? N mɔk dindɑnn nɑn i sɑɑ bɑnn nɑn tinm ŋɑnin mɔk lin nbɑ wɑnn nɑn t tien yɑdɑ. T mei Yennu k tien’i ɑ i dɑɑ tuun biit. T k luon tin wɑnn lin nbɑ k t fit tuun kɑɑ, ŋɑɑn t luon k yii tuun bonŋɑnn e, l i lek i tie k t mɔnŋ k fit tuun. K mɑɑn t k fit tuun lin nbɑ sɑɑ jiin Yennu mɑɑn nbɑ tie bɑlmɔni nɑ puol, ŋɑɑn t sɑɑ tun lin nbɑ sɑɑ te k mɑɑn mɑnŋ n sɑɑn tuɑnn po kuukuɑ e. L i tie k t tie tɑtm ŋɑɑn k i mɔk pɑnŋ, t mɔk pɑlpienn e. Ŋɑnn e k t mei Yennu k tien’i ɑ ii mɔk binbenŋ nbɑ gbuot u nunm. L pɑɑk, mɑɑ k be i buol ni nɑ, k n dɑ kɑdɑɑɔk nɑ k tien’i ɑ mi i tɑnŋ i bɑɑl i buol ni yuo nbɑ, l kii kpɑɑ tɑlɑs k n wɑnn’i n yiikuo. Yonmdɑɑnɔ e din tul’n yiikuo mɑnŋ, ɑ n sonm’i k yin wei u sɔnu fɑnu. U din k tul’n yiikuo mɑnŋ ɑ n biil’i kɑɑ. Mɔtɑɑnɑ lɑɑ, n nɑɑ wɑɑs, yinm nbɑ tie Klistuweilɑ nɑ, ii be mɑn pɑlmɑnn ni. Ii luon mɑn bɑnnu nbɑ sɑɑ te k i dɑɑ mɔk biit, kii cien i lieb pɑlɑ, kii biɑ kii gbiɑ i lieb mɑɑn pɑɑk. Ii be mɑn mɑnu ni, k Yennu nbɑ tie lonm nɑn mɑnu Yennu nɑ ii be nɑn’i. Ii fuont i lieb kii kpɑnmi mɑn. Yennu niib kul nbɑ be nnɑ nɑ fuont’i. Yonmdɑɑnɔ Yiesu Klistu ninkpɑbɑɔnŋ, nɑn Yennu lonm, nɑn u Foŋɑnm mɔtɑɑɔk nɑ i be nɑn i kul ɑ. Min Pɔul nbɑ tie *Klistu *tuomi nɑ, nisɑɑli kɑɑ tun’n, nisɑɑlk kɑɑ biɑ tien’n Klistu tuomi, ŋɑɑn Bɑɑ Yennu nɑn Yiesu Klistu nbɑ k u din fiin’ɔ kuun ni nɑ e din lukt’n. Min Pɔul nɑn t nɑɑ wɑɑs nbɑ be nnɑ nɑ kul fuont Klistuweilɑ nbɑ be Gɑɑlɑɑti tinŋ ni. T Bɑɑ Yennu nɑn Yonmdɑɑnɔ Yiesu Klistu ii mɔk ninkpɑbɑɔnŋ nɑn’i, k biɑ tul’i mɑnu. Yiesu Klistu e din cɑb u mɔnŋ t biit pɑɑk, ɑ wun fɑt’t tingbounŋ nbɑ mɔk biit nɑ ni nɑn t Bɑɑ Yennu nbɑ luon bɑnnu nbɑ. Ŋuɑ Yennu kuukuɑ e yen dontl nɑn yuo nbɑ kɑɑ gbennu. * Amenn. L bɑkt’n e nɑn yɑɑ nyik Yennu yiɑn ɑ, wun nbɑ din yiin’i Klistu ninkpɑbɑɔnŋ ni, ŋɑɑn gɑɑn lɑbɑmɑnliɑ. Setk nɑn mɔni, lɑbɑmɑnliɑ kɑɑ, ŋɑɑn nisiɑb be k yɑbi b mɔnŋ pɑɑk ɑ bin ŋmɑt i dudukt, k biɑ lebt k biil Klistu lɑbɑmɑnn nɑ. L i lek i tie *Yendɔunŋ ni *mɑlɑkɑ ɑmi tinm i muɑnt lɑbɑmɑnsiɑl k l be l kuukuɑ k k tie tɑɑ ponŋ din muɑnt lin nbɑ tul’i nɑ, mɔpol ii be t kul ɑ pɑɑk! T ponŋ din yet’i e wɑɑ, ŋɑɑn n biɑ ŋɑnmt yien’i e mɔtɑɑnɑ: nisuɑ i muɑnt lɑbɑmɑnsiɑl k tul’i k l k tie lin nbɑ k i din gɑɑl nɑ, mɔpol ii be u pɑɑk. N yiɑb mɑɑ n gɑɑl nisɑɑlk pɑku kuo Yennu yɑl e? N luon k mii tun lin nbɑ k niib luon ɑmi ii? L i tie k n luon k mii tuun lin nbɑ k niib luon nɑ, n ji kii tie Klistu tuontunnɔ. N nɑɑ wɑɑs, n yɑɑ n tiɑl’i nɑn lɑbɑmɑnn nbɑ k n muɑnt nɑ k nyii nisɑɑlk buol ni kɑɑ, k mɑɑn n din k gɑɑl’l nisɑɑlk buol ni kɑɑ, ŋɑɑn Yiesu Klistu mɔnŋ mɔnŋ e din fiit wɑnn’n. I ponŋ gbɑt mɑɑ din tuun biɑnŋ nbɑ yuo nbɑ k n din wɑɑ *Suifnbɑ jɑɑnti nɑ. L yuo nɑ n din tuu muksl Yennu mɔtɑɑɔk niib bonciɑnn, k yɑbi n mɔnŋ mɑɑ n biil’b k gbenn. Tinm Suifnbɑ sinsuuk ni, min e din gɑl tuɑnn n wɑɑkl ni t jɑɑnti sɔnu ni, k mɑɑn n din jii n pɑl kul ɑ k wɑɑ t yejɑnm kɑɑl nbɑ wɑnt lin nbɑ e. Ŋɑɑn Yennu din lukt’n u ninkpɑbɑɔnŋ pɑɑk, k b dɑɑ din k mɑln, k yiin’n ɑ mɑn tun u tuonɑ. Yuo nbɑ k u din dukn nɑn l ŋɑn, k u din nyinn u Bik mɑnŋ pɑɑnu ni k wɑnn’n ɑ n muɑnt u lɑbɑmɑnn k tul bin nbɑ k tie Suifnbɑ. L yuo mɑnŋ, n din k sɑɑn nisɑɑlk buol ni k sɑɑ fɑɑ suɑ bɑɑnn. N biɑ din k sɑɑn Selusɑɑlenm k sɑɑ lɑ bin nbɑ din dɔnŋ tien tuomiinbɑ nɑn’n nɑ, ŋɑɑn n din fiil e l tɑɑkpɑɑk ni k sɑɑn Alɑɑbi tinŋ ni. L puolpo e k n ŋmɑt sɑɑn Dɑɑmɑɑs duo ni. Binɑ ŋɑntɑ puolpo e k n din tɑn sɑɑn Selusɑɑlenm mɑɑ n bɑnn Piɑl, k din biɑl u buol ni dɑɑ piik nɑn ŋɑnŋmu. N ji din k lɑ tuomiinbɑ nɑ ni suɑ k pukn, sie Sɑɑk, Yonmdɑɑnɔ ninjɑ nɑ. Yennu mɔnŋ mi nɑn mɑɑ diɑn lin nbɑ nɑ tie bɑlmɔni e k fɑɑk kɑɑ lenŋ. L puolpo e k n din sɑɑn Siili nɑn Siiliisi cinciɑɔnŋ po. L yuo nɑ k Klistuweilɑ nbɑ be Suude tinŋ ni nɑ din k mi’n. Bɑɑ din mi lin nbɑ din tie b lieb nbɑ din yien ɑ: «Juɑ nbɑ din tuu muks tinm nɑ, mun ji diɑ lɑbɑmɑnn nbɑ k u din yɑɑ wun biil nɑ e, k muɑntl tien niib.» K b din piɑk Yennu n pɑɑk lin nbɑ nɑ po. Tɔn, l binɑ piik nɑn ŋɑnnɑ puolpo e, k min nɑn Bɑɑlnɑɑbɑɑs din ŋmɑt sɑɑn Selusɑɑlenm, k n jii Tiit mun. Yennu e din fiit l sɔnu sɑɑnu pɑɑnu ni k wɑnn’n, l pɑɑk e te k n sɑɑn. Lenŋ e k n yiin Klistuyɑb sɑɑkɑb nɑ, t kuukuɑ, k wɑnn’b lɑbɑmɑnn muɑnti nbɑ k n muɑntl k tien bin nbɑ k tie *Suifnbɑ nɑ, k mɑɑn n din k luon mɑɑ ponŋ tun lin nbɑ, kuo mɑɑ tuun lin nbɑ nɑ n tɑn biɑl yɑnn k nyuɑt kɑɑ. Tɔn, n tɔk-nɑn-luɑ Tiit tie Gles nilɔ e, ŋɑɑn suɑ din k miɑ’u ɑ wun pot u punn. L mɑɑn din kɑn bɑɑl, ŋɑɑn nisiɑb nbɑ fɑ fɑɑk b mɔnŋ pɑɑk, ɑ b mun tie Klistuweilɑ nɑ din kuɑ t sinsuuk ni wuol ni, ɑ bin piki k bɑnn tɑɑ mɔk yent-n-mɔnŋ Yiesu *Klistu ni biɑnŋ nbɑ k biɑ luon tii tie Muois *senni dɑɑbɑ nɑ. Ŋɑɑn tɑɑ mun luon tin diɑ lɑbɑmɑnn nɑn l bɑlmɔni sɔnu k tul’i nɑ pɑɑk, t k sɑk tul’b nɑn wɑɑnm-nnɑ wɑɑ. Bin nbɑ k b yi’b sɑɑkɑb nɑ, b i tie nijɑɑnɑ ɑmi b i kii tie i e, l k kpɑɑ tɑlɑs min yɑɑ buol, k mɑɑn Yennu k biki nɑn ningɑnni. Ŋɑnm nbɑ k b yi’b sɑɑkɑb nɑ din k pukn’n sennsɑi. Ŋɑɑn bɑɑ set lɑ lin nbɑ n buol ni tie Yennu nbɑ lukt’n, ɑ n muɑnt u lɑbɑmɑnn k tul bin nbɑ k tie Suifnbɑ nɑ, nɑn biɑnŋ nbɑ k u din lukt Piɑl, ɑ wun muɑnt l lɑbɑmɑnn k tul Suifnbɑ nɑ. K mɑɑn Yennu nbɑ din tien Piɑl *tuomi k tul Suifnbɑ nɑ e, mun din tien’n *tuomi k tul bin nbɑ k tie Suifnbɑ nɑ. Sɑɑk nɑn Piɑl nɑn Sɑn nbɑ din tie nɑn jɑɑntɑli nɑ, din bɑnn nɑn Yennu e tul’n tuongɑnkɑl nɑ, k b din fuont min nɑn Bɑɑlnɑɑbɑɑs k t yok lieb nii ni k ŋɑnn e din wɑnt ɑ t kul ɑ mɔk mɔtɑɑɔk nɑn t lieb. Tinm nɑn ŋɑnm din sɑk e ɑ min nɑn Bɑɑlnɑɑbɑɑs i muɑntl lɑbɑmɑnn kii tien bin nbɑ k tie Suifnbɑ nɑ, k b mun i muɑntl kii tien Suifnbɑ. Bon-yenn nbɑ k b din yet’t din tie: ɑ t dɑɑ tɑnmt tɑlɑs-dɑnm nbɑ be b sinsuuk ni nɑ po. L mun e k n set ponŋ din luon tumu. Ŋɑɑn yuo nbɑ k Piɑl bɑɑl Antiɑɔs nɑ, n din yɑki nɑn’ɔ niib ni, k mɑɑn u din mɔk biit. Sɑɑk din tun nisiɑb Antiɑɔs duo ni, k bɑɑ din dɑɑ k bɑɑl yuo nbɑ nɑ, Piɑl din lɑkn di jiet nɑn bin nbɑ k tie Suifnbɑ. Ŋɑɑn bɑɑ tɑn bɑɑl yuo nbɑ, k u ji kpɑt kpinŋ k k sɑk wun di nɑn’m, k mɑɑn u din tiin niib nbɑ tien *punpotu yɑdɑ nɑ e. L pɑɑk, k Suifnbɑ lieb nɑ mun piin tuun nɑn Piɑl nɑ, k Bɑɑlnɑɑbɑɑs mɔnŋ mun ŋmɑt k wɑɑ b bontitiet mɑnŋ. Mɑɑ lɑ k b k tɔkn lɑbɑmɑnn sɔnu nɑn bɑlmɔni yuo nbɑ, k n yet Piɑl, b kul nunm ni, mɑɑ: «Fɑɑ bɑɑl nnɑ, ɑ binbenŋ tie nɑn wun nbɑ k tie Suif nilɔ nɑ e. Ŋɑɑn mɔtɑɑnɑ, bee k ɑ muks bin nbɑ k tie Suifnbɑ, ɑ bii be nɑn Suifnbɑ nɑ?» Tɔn, t tie Suifnbɑ mɑti e, t k tie nibuolgɑnm nbɑ k b yi’b biitdɑnm nɑ kɑɑ, k t mi nɑn sie k nilɔ n tien Yiesu Klistu yɑdɑ, ŋɑnn e sɑɑ te k Yennu n yet ɑ u tie niŋɑnɔ u buol. L k tie tɑɑ tuun senni nbɑ yɑɑ tii tuun lin nbɑ pɑɑk kɑɑ. L pɑɑk, t mɔnŋ mun tien Yiesu Klistu yɑdɑ, ɑ Yennu n yet ɑ t tie niŋɑnm u buol yɑdɑ mɑnŋ pɑɑk e, ŋɑɑn l k tie senni tuonɑ tumu pɑɑk kɑɑ. K mɑɑn Yennu kɑn yet ɑ suɑ tie niŋɑnɔ u buol senni mɑnŋ tuonɑ tumu pɑɑk. L i tie k t yɑbi ɑ Yennu n yet ɑ t tie niŋɑnm u buol Klistu pɑɑk, ŋɑɑn t biɑ lɑ nɑn t mun tie biitdɑnm e, ŋɑnn e wɑnt nɑn Klistu e te k niib tuun biit ɑmi ii? Aɑi, l k wɑnt nnɑ kɑɑ. Tɔn, mi i jinŋ i ŋɑnmt mɑɑ lin nbɑ k n din yet nɑ i e, Ŋɑnn n wɑnt nɑn n mɔnŋ tie biitdɑɑnɔ e nɑ. K mɑɑn senni te k n kpo senni mɑnŋ buol, ɑ mii mɔk mɑnfuol Yennu buol. L tie nɑn senni mɑnŋ din tɑɑn kpɑɑ min nɑn Klistu dɑpunpunn pɑɑk nɑ e. L pɑɑk, mɑnfuol nbɑ k n mɔk n gbɑnɑnt ni mɔtɑɑnɑ, n mɔk l mɑnfuol mɑɑ tien Yennu Bijɑ yɑdɑ nɑ e. Ŋuɑ din luon’n k din cɑb u mɑnfuol n pɑɑk. N k nyik Yennu ninkpɑbɑɔnŋ kɑɑ. L i tie k Yennu bo sɑɑ yet ɑ nilɔ nbɑ sɑk senni nɑ e tie niŋɑnɔ u buol, l bo wɑnt nɑn Klistu kuun mɑnŋ tie yɑnn e. Yinm Gɑɑlɑɑtitieb, bonjɑtɑ nɑ! Yinm nbɑ k t ponŋ din wɑnn’i Yiesu *Klistu dɑpunpunn pɑɑk kuun po nyik nyik nɑ, ŋmee jin tɑn lol’i ni? I yet’n bon-yenn kuɑ mɑn. Yɑɑ din cɔln *senni nɑ pɑɑk e din te k i gɑɑl Foŋɑnm ɑmi yɑɑ din gbɑt lɑbɑmɑnn nɑ, k tien yɑdɑ nɑ pɑɑk e din te k i gɑɑl’ɔ? Bee te k i k mɔk yɑn i? I din piin Klistuweiu nɑn Foŋɑnm e. I ji tɑn luon yin juont nɑn i mɔnŋ mɔnŋ pɑnŋ ee? I din gɑɑl Foŋɑnm k biɑ lɑ bɑktnɔunŋ tuonjɑɑnɑ nɑ yɑnn ee? Aɑi l din k tien yɑnn kɑɑ. Yɑɑ tun senni tuonɑ nɑ pɑɑk e te k Yennu tul’i Foŋɑnm k tuun yɑɑl-lituk tuonɑ i sinsuuk ni ɑmi yɑɑ gbɑt lɑbɑmɑnn k tien yɑdɑ nɑ pɑɑk e? L diɑn Yennu lolkpel kɑdɑɑɔk ni ɑ: «Ablɑɑhɑɑnm din tien Yennu yɑdɑ, l pɑɑk, k Yennu din yet ɑ u tie niŋɑnɔ u buol.» Ŋɑnn e k l ŋɑn yin bɑnn nɑn niib nbɑ tien Yennu yɑdɑ nɑ, ŋɑnm e tie Ablɑɑhɑɑnm yɑɑbuonɑ. K l biɑ din diɑn Yennu lolkpel kɑdɑɑɔk ni, ɑ Yennu tɑn sɑɑ yet ɑ bin nbɑ k tie *Suifnbɑ mun tie niŋɑnm u buol b yɑdɑ pɑɑk. L pɑɑk e k lɑbɑmɑnn mɑnŋ diɑn Yennu lolkpel kɑdɑɑɔk ni k tul Ablɑɑhɑɑnm ɑ: «A pɑɑk e k nisɑɑli buolu buolu kul ɑ sɑɑ lɑ yetŋɑnm.» L pɑɑk, Yennu yɑt yetŋɑnm bin nbɑ tien’ɔ yɑdɑ nɑ pɑɑk, nɑn wɑɑ din yɑt yetŋɑnm Ablɑɑhɑɑnm nbɑ din tien’ɔ yɑdɑ nɑ pɑɑk. Ŋɑɑn bin nbɑ duki nɑn b tie niŋɑnm b senni weiu nɑ pɑɑk nɑ, Yennu mɔpol be b pɑɑk, k mɑɑn l diɑn Yennu lolkpel kɑdɑɑɔk ni ɑ: «Wun nbɑ k wɑɑ senni kul nbɑ diɑn kɑdɑɑɔk mɑnŋ ni nɑ, Yennu mɔpol be u pɑɑk.» Ŋɑnn e wɑnt fɑnu nɑn senni diɑnu kɑn fit te k nilɔ i tie niŋɑnɔ Yennu buol ni, k mɑɑn l diɑn Yennu lolkpel kɑdɑɑɔk ni ɑ: «Wun nbɑ k Yennu yien ɑ u tie niŋɑnɔ u buol u yɑdɑ nɑ pɑɑk, l dɑɑnɔ sii mɔk mɑnfuol.» Ŋɑɑn senni diɑnu nɑn yɑdɑ tienu bɔkt ɑ, k mɑɑn l diɑn Yennu lolkpel kɑdɑɑɔk ni ɑ: «Dɑɑnɔ nbɑ wɑɑ senni kul fɑnu sii mɔk mɑnfuol.» Klistu tiɑɔnŋ o din gɑɑl t pɑɑk, k din be mɔtonm mɑnŋ ni k nyinn’t l mɔtonm ni, k mɑɑn l diɑn Yennu lolkpel kɑdɑɑɔk ni ɑ: «Wun nbɑ k b kpɑɑ’u dɑpunpunn pɑɑk nɑ, Yennu mɔtonm be u pɑɑk.» L din tie nnɑ e Yiesu Klistu ni, ɑ bin nbɑ k tie Suifnbɑ n lɑ yetŋɑnm nbɑ k Yennu din yɑt Ablɑɑhɑɑnm pɑɑk nɑ. K t i tien yɑdɑ tin gɑɑl Foŋɑnm nbɑ k Yennu din senn mɔsonn ɑ wun tul’t nɑ. N nɑɑ wɑɑs, ŋɑɑnt k n jii nisɑɑli binbenŋ k bikn k yin bɑnn lin nbɑ k n yien’i nɑ pɑɑk: niib bɑnle i sɑk lol ɑ bin tun siɑl k pot muɑnu nɑn lieb, b yenɔ kuɑ ji kɑn fit nyi u luɑ nɑ puolpo nɑn wɑɑn ɑ. Tɔn, Yennu din tul Ablɑɑhɑɑnm nɑn u yɑɑbuonn e u mɔsonɑ mɑnŋ. L k diɑn Yennu lolkpel kɑdɑɑɔk ni ɑ: «nɑn u yɑɑbuonɑ» kɑɑ, k l pɑɑk sii tie niib bonciɑnn. Ŋɑɑn l diɑn ɑ: «nɑn yɑɑbuonn e,» k l pɑɑk tie yɑɑbuonyenɔ kuɑ, k ŋuɑ e tie Klistu. Mɑɑ wɑnt lin nbɑ tie nnɑ e: Yennu din senn mɔsonn, k senni nbɑ din tɑn bɑɑl binɑ kobi ŋɑnnɑ nɑn piintɑ puolpo nɑ, l din kɑn fit kpien lin nbɑ k Yennu din *lol k senn nɑ, k biɑ kɑn fit k kpien u mɔsonn mɑnŋ. Ŋɑɑn l i tie k niib sɑɑ cɔln senni e wɑɑ, k fit lɑ Yennu nbɑ sɑɑ tul’b piini nbɑ, ŋɑnn piini nbɑ k b gɑɑl nɑ k nyii mɔsonn nɑ ni kɑɑ. L i bo i tie nnɑ i e, senni nɑ nyuɑt tie bee? Biit pɑɑk e, k Yennu din tul nifosɑɑli senni nɑ k pukn u mɔsonn nɑ pɑɑk, k din luon ɑ senni mɑnŋ i diɑ’b mɔkmɔk nɑn yuo nbɑ k Ablɑɑhɑɑnm yɑɑbuonn nbɑ k Yennu din senn mɔsonn k tul’ɔ nɑ n tɑn bɑɑl. K *mɑlɑkɑɑnbɑ din jii senni mɑnŋ k tien nisɑɑlk nuu ni ɑ wuu tie bɑlŋɑnmtuɑ, k mɑɑn l i tie k nilɔ tie u kuukuɑ, bɑlŋɑnmtuɑ k siɑn, ŋɑɑn Yennu tie u kuɑ e. Tɔn, ŋɑnn e wɑnt nɑn senni nɑ kɔn nɑn Yennu mɔsonɑ ɑɑ? Aɑi, l k wɑnt nnɑ nɑn wɑɑn ɑ. K mɑɑn Yennu i bo i senn senni nbɑ sɑɑ fit tien nilɔ mɑnfuol, u bo sɑɑ yet ɑ niib tie niŋɑnm u buol senni mɑnŋ weiu pɑɑk ɑ. Ŋɑɑn l diɑn Yennu lolkpel kɑdɑɑɔk ni ɑ tingbounŋ kul sɑɑk be biit yiikuo ni e, ɑ Yennu n tul bin nbɑ tien yɑdɑ nɑ piini nbɑ k u din senn mɔsonn ɑ u sɑɑ tul’b nɑ. B yɑdɑ nɑn Yiesu Klistu nɑ pɑɑk e k u sɑɑ tul’b. Senni nɑ din tuu diɑ’t nɑn dɑnsɑli nɑ e k tɑn bɑɑl yuo nbɑ k Yennu fiit yɑdɑ tienu lɑbɑɑl k wɑnn’t nɑ. L pɑɑk, senni nɑ din ŋmɑn t guutuɑ nbɑ diɑ’t mɔkmɔk nɑn yuo nbɑ k Klistu tɑn bɑɑl ɑ tin tien’ɔ yɑdɑ, k Yennu n yet ɑ t tie niŋɑnm u buol t yɑdɑ nɑ pɑɑk. Mɔtɑɑnɑ, yɑdɑ tienu lɑbɑɑl nbɑ bɑɑl nɑ, senni ji k tie t guutuɑ. Yɑɑ tien Klistu yɑdɑ nɑ, ŋɑnn pɑɑk e k i tie Yennu wɑɑs, k mɑɑn yinm nbɑ kul k b din wul’i Yennu nyunwulu Klistu sɑnn ni nɑ, yinm e gɑɑl u mɔnŋ mɔnŋ binbenŋ. L pɑɑk, bɔktu ji k be bin nbɑ tie Suifnbɑ nɑn bin nbɑ k tie Suifnbɑ sinsuuk ni, l biɑ k be bin nbɑ tie dɑɑbɑ nɑn yent-n-mɔnŋ dɑnm sinsuuk ni. Bɔktu biɑ k be puob nɑn jɑb sinsuuk ni. Yɑɑ be Yiesu Klistu ni nɑ pɑɑk e te k i kul ɑ tie yenɔ kuɑ. K i tie Klistuyɑb i e, ŋɑnn i tie Ablɑɑhɑɑnm yɑɑbuonɑ e, k tɑn sɑɑ gɑɑl piini nbɑ k Yennu din senn mɔsonn nɑn u sɑɑ tul’b nɑ. Tɔn, mɑɑ biɑ yɑɑ n ŋɑnm yet lin nbɑ e nɑ: ŋɑɑk bik nbɑ lek tuu tɑn sɑɑ di u bɑɑ fɑɑl nɑ, ŋɑɑn yuo nbɑ k u dɑɑ tie bonbunn nɑ, u dɑɑ tuu tie nɑn dɑɑbl nɑ e, ŋɑɑn u bɑɑ fɑɑl mɑnŋ lek tie u yɑl. Wɑɑ dɑɑ tie bonbunn yuo nbɑ nɑ, nisiɑb e tuu diɑ k wubi’ɔ mɔkmɔk nɑn lɑɑ tɑn sɑɑ jɑnŋ yuo nbɑ k u bɑɑ senn nɑ. T mun din tie nnɑ e. Yuo nbɑ k t din tie nɑn bonbunɑ t din tie *dulnyɑ nnɑ sei dɑɑbɑ. Ŋɑɑn yuo nbɑ din tɑn jɑnŋ nɑ, k Yennu tun u mɔnŋ mɔnŋ Bijɑ, k puo din mɑl’ɔ, k u din be *Suifnbɑ *senni ni, ɑ wun fiel bin nbɑ din tuu be senni mɑnŋ ni nɑ, ɑ tin kpɑnt Yennu wɑɑs. Yɑɑ tie u wɑɑs nɑ pɑɑk e, k u tun u Bijɑ mɑnŋ Siek t pɑlɑ ni, k u yikn ɑ: «Abbɑ! n Bɑɑ.» Ŋɑnn, ɑ ji k tie dɑɑbl kɑɑ, ŋɑɑn ɑ ji tie Yennu bik e, k fɑɑ tie u bik nɑ pɑɑk, u mun sɑɑ tul’ɑ lin nbɑ kul k u mɔk k tien u wɑɑs. Siɑn-yuo i din tuu k mi Yennu, k l yuo i din tuu tie dɑɑbɑ k tul bin nbɑ set k tie yenni kɑɑ, ŋɑɑn mɔtɑɑnɑ i bɑnn Yennu wɑɑ, kuo n sɑɑ yet ɑ Yennu e bɑnn’i, k l jin tien nlee k i luon k yin biɑ ŋmɑt tunn k wei sei nbɑ k mɔk yiikuo k biɑ k mɔk nyuɑt i? Bee tien k i luon k yin ŋɑnm kpɑnt b dɑɑbɑ? I mɑntk ŋɑɑn k i bɑkɑ be dɑyenɑ ni, nɑn ŋmɑɑyeni ni, nɑn sɑkyenɑ ni, nɑn bin-yenɑ ni bonciɑnn! N mɔk jijiet i pɑɑk. Mɑɑ tun tuonn nbɑ k tul’i nɑ tien yɑnn e nɑ ɑɑ? N nɑɑ wɑɑs, n bɑln’mi e, ii nɑɑn nɑn min nɑ mɑn, nɑn mɑɑ nɑnn n mɔnŋ nɑn yinm nɑ. I k tun siɑl biil’n. I ponŋ tiɑn lin nbɑ pɑɑk te k n din sint k muɑnt lɑbɑmɑnn nɑ k tul’i: k mɑɑn mɑɑ din yiɑl nɑ pɑɑk e. N gbɑnɑnt nbɑ din k mɑnŋ nɑ, l din tie biknu e k tul’i, ŋɑɑn i din k yet’n k biɑ k lu’n. I lek din gɑɑl’n nɑn Yennu *mɑlɑkɑ kuo nɑn Yiesu *Klistu nɑ e. I din mɔk pɑlpienn bonciɑnn. Bee ji tien i? N mɔnŋ bo sɑɑ di i *siɑlɑ nɑn l ii dinŋ ii bo i sɑɑ fit, i din bo sɑɑ sɑk k nyinn i mɔnŋ ninbinɑ k tul’n ɑ. K mɔtɑɑnɑ, mɑɑ yet’i bɑlmɔni nɑ, n ji kpɑnt i dɑtɑɑk ee? Niib mɑnŋ dɑɑk’i, nɑn ninmɔnn e ŋɑɑn b dudukt k ŋɑn. B loln ɑ bin bɔkt min nɑn yinm e, k yin tunn kii wɑɑ ŋɑnm kuukuɑ. Nilɔ bɑkɑ i be sɔnŋɑnu ni yuo sɑɑk ɑ, l ŋɑn, mi i lek i be i buol ni ɑmi mi i kɑɑ. N wɑɑs, l yiɑl’n nɑn lɑɑ tuu yiɑl puo nbɑ luon wun mɑl bik nɑ e mɔkmɔk nɑn yuo nbɑ k Klistu binbenŋ nɑ tɑn sɑɑ gbie i ni. N yɑn ni ŋmɑt i pɑɑk e. N bo sunmɑn k n be i buol ni mɔtɑɑnɑ k lek fit pɑk nɑn’i k wutuol kɑɑ. Yetl’n mɑn, yinm nbɑ luon k yii wɑɑ senni nɑ, i k gbɑt senni mɑnŋ nbɑ yet lin nbɑ ɑɑ? L diɑn nɑn Ablɑɑhɑɑnm din mɔk bonjɑi bɑnle, k yenɔ tie u dɑɑbl Agɑɑl bik, k luɑ mun din tie u puo nbɑ din k tie dɑɑbl k b yi’u Sɑɑlɑ nɑ bik. K dɑɑbl nɑ din mɑl u bonjɑk nɑn niib nbɑ mɑɑl biɑnŋ nbɑ nɑ e, ŋɑɑn k puokuul puo nɑ mɑl u bonjɑk nɑn biɑnŋ nbɑ k Yennu din senn mɔsonn tul’ɔ nɑ. Lɑbɑɑl mɑnŋ fit wɑnn’t siɑl. B puob bɑnle nɑ sie Yennu mɔsonɑ ŋɑnle nɑ setu nɑ ni e. Dɑɑbl mɑnŋ sɑnn din tie Agɑɑl, k u sie *lol nbɑ k Yennu senn Siinɑi juɑl pɑɑk nɑ setu ni, k mɑl u wɑɑs dɑɑbs ni. Tɔn, Agɑɑl tie Siinɑi juɑl nbɑ be Alɑɑbi tinŋ ni nɑ e, k sie tingbounŋ nɑ Selusɑɑlenm setu mɔtɑɑnɑ, k ŋuɑ nɑn u niib tie dɑɑbɑ. Ŋɑɑn sɑnpɑɑpo Selusɑɑlenm nɑ tie yent-n-mɔnŋ duo, k biɑ tie t nɑɑ. K mɑɑn l diɑn Yennu lolkpel kɑdɑɑɔk ni ɑ: «Fin puokɑnmɑtl, mɔk pɑlpienn! Ii yikn sɑnpɑɑpo nɑn pɑlpienn, Fin nbɑ k mi mɑtyiɑlu tonu nɑ. K mɑɑn puo nbɑ be k b nyik’ɔ tɑn sii mɔk wɑɑs bonciɑnn k gɑl puo nbɑ sɔlɔ luon’ɔ nɑ.» Tɔn, n nɑɑ wɑɑs, yinm e mun tie Yennu mɔsonn wɑɑs nɑn Isɑɑk nbɑ din tie biɑnŋ nbɑ nɑ. Yɑɑyuo ni, bɑɑ din mɑl bonjɑk nbɑ nɑn bɑɑ mɑɑl nisɑɑli bɑnnu nbɑ, nɑ din tuu muks wun nbɑ k b din mɑl’ɔ nɑn Foŋɑnm yiikuo ni nɑ e, k l mun biɑ tie nɑn mɔtɑɑnɑ wɑɑ. Ŋɑɑn l diɑn nlee Yennu lolkpel kɑdɑɑɔk ni? L diɑn ɑ: «Beln puo nbɑ tie dɑɑbl nɑ nɑn u bonjɑk nɑ, k mɑɑn dɑɑbl bonjɑk nɑ dɑɑ mi lɑkn di b bɑɑ mɑnŋ fɑɑl nɑn puokuul puo bonjɑk nɑ.» N nɑɑ wɑɑs, mɑɑ yien lin nbɑ tie ɑ t k tie puo nbɑ tie dɑɑbl nɑ wɑɑs kɑɑ, ŋɑɑn t tie puokuul puo nɑ wɑɑs e. Yiesu *Klistu ponŋ fɑt tinm ɑ, k tii mɔk yent-n-mɔnŋ e. L pɑɑk, i dɑɑ te k siɑl ji diɑ’i k i tie l dɑɑbl. Gbiintl mɑn! Min Pɔul n yien’i ɑ l i tie k i pot i punɑ, l wɑnt nɑn Klistu k mɔk nyɔsiɑt tul’i ni. N ŋɑnmt yien nifosuɑ nbɑ wɑɑ *punpotu sɔnu nɑ e, nɑn l kpɑɑ tɑlɑs e k wun wei *senni kul ɑ. Yinm nbɑ yɑbi ɑ Yennu n yet ɑ i tie niŋɑnm u buol senni weiu pɑɑk nɑ, i bɔkt i mɔnŋ nɑn Klistu, k biɑ nyinn i mɔnŋ Yennu ninkpɑbɑɔnŋ ni. Ŋɑɑn tinm ŋɑnin i e, Foŋɑnm nbɑ be t ni tien tinm yɑdɑ. T mɔk dindɑnn k guu yuo nbɑ k Yennu tɑn sɑɑ yet, ɑ t tie niŋɑnm. K mɑɑn t i be Yiesu Klistu ni, t i lek i pot t punɑ ɑmi t i kii pot, l k siɑn. Lin nbɑ siɑn tie t yɑdɑ nɑn Klistu nbɑ te k b lɑɑt nɑn t mɔk lonm nɑn lieb nɑ e. Ŋɑɑn i din sɑɑ fɑnu nɑ, k ŋmee tɑn luon’i sɔnu k i nyik bɑlmɔni sɑku? Yennu nbɑ yiin’i nɑ kɑɑ tun lin nbɑ nɑ. Kpɑnjɑnsiɑn be k yien ɑ: « * Dɑtinŋ wɑɑnm-nnɑ e te k pɑɑnu fiktl piil.» Ŋɑɑn Yonmdɑɑnɔ pɑɑk, n biɑ mɔk yɑdɑ ɑ i sii mɔk dudukyent nɑn’n, ŋɑɑn Yennu sɑɑ dɑt dɑɑnɔ nbɑ ŋmɑt i dudukt nɑ tubl ɑ, wɑɑ lek tie wun nbɑ kul. N nɑɑ wɑɑs, l i tie mɔni nɑn n muɑntl ɑ niib ii poli b punɑ, bee te k b biɑ sii muks’n i? L i bo i tie bɑlmɔni e k n muɑntl punpotu po nɑn mɑɑ muɑntl dɑpunpunn po nɑ, ŋɑnn l bo kii mɔk muksuk. Min bo sunmɑn k bin nbɑ ŋmɑt i dudukt nɑ n nyik punpotu e, ŋɑɑn tuɑ b mɔnŋ lɑnɑ. N nɑɑ wɑɑs, Yennu yiin’i ɑ yii mɔk yent-n-mɔnŋ e, ŋɑɑn i dɑɑ te k i yent-n-mɔnŋ n ŋɑɑn k i nisɑɑlk lonm n nyɑnn’i. Ŋɑɑn i ŋɑɑn k i lonm n te k i sonm i lieb mɑn. K mɑɑn senni kul be sennu yenn kuɑ nɑ ni e: «Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.» Suot i mɔnŋ mɑn, l i tie k i tie nɑn muuk ni bonkobt nɑ k tien lieb dɑni k biɑ tie lieb tonu, i set sɑɑ biil i lieb ɑ. Ŋɑɑn n yien’i e, ŋɑɑnt k Foŋɑnm ii diɑ i binbenŋ mɑn, k dɑɑ te k i niɑɔnŋ tuun nisɑɑlk lonm. Nisɑɑlk lonm kɔn nɑn Foŋɑnm yɑl, k Foŋɑnm lonm mun kɔn nɑn nisɑɑlk yɑl. L pɑɑk, i kɑn fit tun yɑɑ luon lin nbɑ. L i tie k Foŋɑnm ŋmɑktl’i sɔnu ni, senni ji k diɑ’i ni. Nisɑɑlk lonm nbɑ wɑnt l mɔnŋ lin nbɑ ni tie boncuncontuonɑ e, nɑn jɑknt tuonɑ, nɑn puoweiu nɑn jɑweiu, nɑn pɑtmɑnnu, nɑn nyɔkdinu, nɑn dɑtɑɑl, nɑn kunkɔnɑ, nɑn funfunbiiuk, nɑn wutuol, nɑn nɑɑniɑɔk, nɑn bɔktu, nɑn kɑn gbɑt lieb mɑɑn nɑn niɑnbiiuk, nɑn dɑyibu, nɑn jedicɑɑɔnŋ, k biɑ jii bonliɑ nbɑ nɑɑn nnɑ k pukn. N ponŋ yet’i e nɑn mɑɑ din yet’i biɑnŋ nbɑ nɑ, bin nbɑ tuun lin nbɑ nɑ kɑn mi di Yennu nɑɑn. Ŋɑɑn Foŋɑnm te k nilɔ mɔk lonm, nɑn pɑlpienn, nɑn mɑnu, nɑn suklu, nɑn bulcint, nɑn ŋɑnm, nɑn yɑdɑ, nɑn sikn-n-mɔnŋ, nɑn mɔnŋdiɑnu. Sennsɑu kɑɑ k yɑɑ bonɑ nɑ kuɑ. Bin nbɑ tie Klistuyɑb kpɑɑ b nisɑɑlk lonm nɑn l lonbiit kul ɑ dɑpunpunn pɑɑk ɑ. L i tie k t be Foŋɑnm ni, ŋɑɑnt mɑn k wuu ŋmɑktl’t t binbenŋ ni. T dɑɑ mɔk jɑpɑɑt, ɑmi k fiint t lieb wutuol, ɑmi k mɔk funfunbiit nɑn t lieb. N nɑɑ wɑɑs, l i tie k i lɑ k suɑ tun tuonbiit, yinm nbɑ be nɑn Foŋɑnm nɑ, l ŋɑn k yin sonm’ɔ nɑn sikn-n-mɔnŋ, k wun ŋɑnm set fɑnu. Ŋɑɑn ii mi mɑn k mɑɑn biknu mun sɑɑ fit te k i bot. I jii i lieb jik-kpiɑtɑ mɑn, k nnɑ e k i sɑɑ sɑk *Klistu sennu. Suɑ i kii tie siɑl, ŋɑɑn biki ɑ u mun tie suɑ e, u kpɑnn u mɔnŋ e. L ŋɑn k suɑ kul n bikn u mɔnŋ binbenŋ ɑ, k fit kii mɔk yugontl u mɔnŋ mɔnŋ tuonŋɑnɑ pɑɑk, k dɑɑ biki wɑɑ tun lin nbɑ nɑn u luɑ tuonɑ, k mɑɑn l ŋɑn k suɑ kul n jii u tiɑɔnŋ jikl. Nisuɑ nbɑ k b wɑnt’ɔ Yiesu Klistu lɑbɑmɑnn nɑ, l ŋɑn k l dɑɑnɔ n mun jii lin nbɑ k u mɔk kul k cent nɑn u wɑntuɑ mɑnŋ. I dɑɑ kpɑnn i mɔnŋ mɑn, b k lɑɑ Yennu. Nisɑɑlk nbɑ bul lin nbɑ, ŋɑnn e k u tɑn sɑɑ jɑɑn kpɑnŋ. Wun nbɑ bul u mɔnŋ gbɑnɑnt lonm, u tɑn sɑɑ jɑɑn kuun e, u gbɑnɑnt lonbiit mɑnŋ pɑɑk. Ŋɑɑn wun nbɑ bul Foŋɑnm nbɑ luon biɑnŋ nbɑ nɑ, u tɑn sɑɑ jɑɑn mɑnfuol nbɑ kɑɑ gbennu, Foŋɑnm mɑnŋ pɑɑk. T dɑɑ bɑkt nɑn tuonŋɑnɑ tumu mɑn, k mɑɑn t i kii nyik tuonŋɑnɑ, yuo nbɑ jɑnŋ nɑ, t tɑn sɑɑ gɑɑl nyuɑt. L pɑɑk, l i tie k l bɑɑl nɑn t fit tun siɑl, ŋɑɑnt k tin tun lin nbɑ ŋɑn k tul suɑ kul ɑ, ŋɑɑn mɑntk kii tuun kii tien bin nbɑ tie Klistuyɑb. Tɔn, gotl mɑn mɑɑ diɑn nɑnmgbenŋɑ nɑn n mɔnŋ mɔnŋ nuu bɑnnu nbɑ. Niib nbɑ luon bin penn *Suifnbɑ pɑlɑ nɑ, ŋɑnm e mɑb’i ɑ yin pot i punɑ, ɑ k b dɑɑ lɑɑt muksuk Klistu dɑpunpunn nɑ pɑɑk. Bin nbɑ poli b punɑ nɑ mɔnŋ k wɑɑ Yennu *senni, ŋɑɑn b luon k yin pot e k bii fɑɑ jɑpɑɑt i *punpotu mɑnŋ pɑɑk. Min ŋɑnin kɑn mi fɑɑ jɑpɑɑt sie t Yonmdɑɑnɔ Yiesu Klistu dɑpunpunn nɑ kuukuɑ pɑɑk. K mɑɑn u dɑpunpunn pɑɑk e te k tingbounŋ lonm kpo n buol ni k n mun kpo tingbounŋ lonm buol ni. Suɑ i pot u punn kuo wuu kii pot u punn, l k tie siɑl. Lin nbɑ siɑn tie bii tie nipɑɑnm e. N mei Yennu mɑɑ mɑnu nɑn ninbɑtinu i be bin nbɑ kul wɑɑ wɑnnu mɑnŋ nɑn Yennu niib kul ɑ nɑ pɑɑk. Ii mi mɑn k suɑ n muks’n, k mɑɑn n mɔk Yiesu dɔkt n gbɑnɑnt pɑɑk. N nɑɑ wɑɑs, t Yonmdɑɑnɔ Yiesu Klistu ii mɔk ninkpɑbɑɔnŋ nɑn i kul ɑ. * Amenn. Min Pɔul wun nbɑ k Yennu gɑnn’n ɑ n tien Yiesu *Klistu *tuomi nɑ, fuont bin nbɑ tie Yennu yɑb k be Efes duo ni, k tien Yiesu Klistu yɑdɑ nɑ. T Bɑɑ Yennu nɑn Yonmdɑɑnɔ Yiesu Klistu ii mɔk ninkpɑbɑɔnŋ nɑn’i, k biɑ tul’i mɑnu. Ŋɑɑnt k tin dont wun nbɑ tie t Yonmdɑɑnɔ Yiesu Klistu Bɑɑ nɑn u Yennu. Ŋuɑ e tul’t yetŋɑnm kul nbɑ nyii sɑnpɑɑpo t sei ni tɑɑ be Klistu ni nɑ pɑɑk. Yennu nbɑ ponŋ dɑɑ din k nɑn tingbounŋ yuo nbɑ nɑ wɑɑ k u din gɑnn’t ɑ tii tie u yɑb Yiesu Klistu pɑɑk, kii tie niŋɑnm k dɑɑ mɔk biit u buol ni. Yennu nbɑ din luon’t nɑ pɑɑk, u din lol ɑ Yiesu Klistu ni e k u sɑɑ tien’t u wɑɑs. Lin nbɑ k u din luon k biɑ din senn e nɑ. Ŋɑɑnt k tin pɑk Yennu k mɑɑn u ninkpɑbɑɔnŋ nbɑ yɑb bonciɑnn, k u mɔk nɑn’t u Bilonkɑk ni nɑ pɑɑk. Yennu nyinn’t biit dɑɑbs ni u Bilonkɑk mɑnŋ sɔn pɑɑk e, k nyik cɑb t biit u ninkpɑbɑɔnŋ nbɑ yɑb nɑ pɑɑk. Ŋuɑ Yennu e tul’t yɑnŋɑnm nɑn bɑnnu bonciɑnn ɑ t fit gɑɑl ninbɑtinu mɑnŋ. K u din wɑnn’t wuol ni lolɑ nbɑ k u din senn nɑn wɑɑ luon bɑnnu nbɑ Klistu ni nɑ. Yuo mɑnŋ i tɑnŋ i jɑnŋ cib, u sɑɑ tun gbenn u lolɑ mɑnŋ, ɑ u nɑɑmi kul nbɑ be sɑnpɑɑpo nɑn tinŋ ni ii mɔk yudɑɑnɔ yenɔ kuɑ k ŋuɑ e tie Klistu. Yennu tun siɑl kul u dudukt nɑn u lolɑ ni e. Nnɑ e mun k u din lukt tinm, wɑɑ ponŋ din senn lin nbɑ nɑ pɑɑk nɑ. U din tun lin nbɑ nɑ ɑ tinm nbɑ din sint mɔk dindɑnn Klistu ni nɑ, n pɑk k dont Yennu e. I mun din kpɑnt tien Klistuyɑb yuo nbɑ k i din gbɑt lɑbɑmɑnn nbɑ tie bɑlmɔni k biɑ tien’i fielu nɑ. Yɑɑ din tien Klistu yɑdɑ nɑ, k Yennu din tul’i dɔuk nbɑ tie Foŋɑnm nɑn wɑɑ din senn mɔsonn biɑnŋ nbɑ nɑ. Foŋɑnm mɑnŋ e tie *siɑlɑ nɑn t sɑɑ lɑ yetŋɑnm nbɑ k Yennu sɑɑ tul u niib nɑn yuo nbɑ k u sɑɑ nyinn’b b dɑɑbs ni gbenn. Ŋɑɑnt mɑn k tin pɑk k dont Yennu. L pɑɑk, yuo nbɑ k n din gbɑt i yɑdɑ nɑn Yonmdɑɑnɔ Yiesu po nɑ, nɑn yɑɑ luon Yennu niib biɑnŋ nbɑ nɑ po mɔkmɔk nɑn dinnɑ, n tien Yennu niipuouk i pɑɑk k k nyik. N tiɑn i po e n miɑlu ni, k lek mei t Yonmdɑɑnɔ Yiesu Klistu Yennu, wun nbɑ tie Bɑɑ nbɑ ŋɑn nɑn dontl, ɑ wun tul’i Foŋɑnm nbɑ sɑɑ tul’i yɑn k fiit Yennu k tul’i, k yin bɑnn’ɔ fɑnu. N biɑ mei’ɔ mɑɑ wun yent i pɑlɑ ni ɑ yin bɑnn dindɑnn nbɑ pɑɑk k u yiin’i nɑ, k biɑ bɑnn nɑn bonɑ nbɑ k u tɑn sɑɑ tul u niib nɑ nbɑ yɑb k biɑ ŋɑn bonciɑnn biɑnŋ nbɑ, k yin bɑnn u yiikuo nbɑ k u tun nɑn’n k tul bin nbɑ tien yɑdɑ nɑ nɑn lɑɑ gbenŋ bonciɑnn bɑnnu nbɑ. Yiikuo mɑnŋ tie lin nbɑ k u din wɑnn yuo nbɑ k u din fiin Klistu kuun ni k kɑɑn’ɔ *Yendɔunŋ ni u niidiitu po nɑ e. Lenŋ e k Klistu kɑl k yen bin nbɑ kul nbɑ mɔk yɑɑk, nɑn yiikuo dɑnm kul nɑn yonmdɑnm kul ɑ. Ŋuɑ e mɔk sɑnn nbɑ gɑl yiikuo kul sɑnɑ nbɑ be mɔtɑɑnɑ nɑn yuo nbɑ bɑɑt. Yennu jii bonsiɑl kul ɑ yiikuo k tien Klistu nuu ni e. U jii ŋuɑ e ɑ wuu tie Klistu mɔtɑɑɔk niib kul ɑ Yonmdɑɑnɔ. Klistu mɔtɑɑɔk niib tie u gbɑnɑnt e k u be b ni cɑin, wɑɑ gbie Yennu nɑɑmi kul ni nɑ. Yuo nbɑ din gɑl nɑ, i din tie kpienm e, i mɔyetuk nɑn biit pɑɑk. I wɑɑ tingbounŋ nɑ binbenŋ nɑn nɑlnbiit yudɑɑnɔ, wun nbɑ diɑ niib nbɑ yet Yennu mɔb nɑ mɔnŋ ɑ. Bɑlmɔni, t kul ɑ mun din nɑɑn nɑn l nibuolu nɑ e, k wɑɑ t gbɑnɑnt niɑɔnŋ, k tuun t gbɑnɑnt nɑn t dudukt lonm. Tinm nɑn ŋɑnm biit binbenŋ din jɑnŋ nɑn lin bɑɑl nɑn Yennu wutuol t kul ɑ pɑɑk ɑ. Ŋɑɑn Yennu luon’t bonciɑnn, k biɑ tin’t ninbɑɑɔk. L pɑɑk, tɑɑ din tie kpienm t biit pɑɑk nɑ, u din te k t lɑ mɑnfuol *Klistu ni. Yennu ninkpɑbɑɔnŋ pɑɑk e k i lɑ fielu. Tɑɑ be Yiesu Klistu ni nɑ pɑɑk k Yennu din lɑkn fiin tinm nɑn ŋuɑ kuun ni, ɑ t tɑn lɑkn kii tie nɑɑn *Yendɔunŋ ni. U din tun lin nbɑ nɑ, ɑ yuo nbɑ bɑɑt wun fit wɑnn suɑ kul u ninkpɑbɑɔnŋ nbɑ yɑb biɑnŋ nbɑ e, wɑɑ din tun bulcint k tul’t Yiesu Klistu ni nɑ pɑɑk. Yennu ninkpɑbɑɔnŋ nɑ pɑɑk e k i lɑ fielu i yɑdɑ nɑ pɑɑk. Fielu mɑnŋ k nyii i buol ni kɑɑ, ŋɑɑn l tie Yennu piini e. Suɑ kɑn fit fuɑ bɑlɑ fielu mɑnŋ pɑɑk, k mɑɑn l k tie i tiɑɔnŋ tuonɑ nyuɑt kɑɑ, ŋɑɑn Yennu e tien’t nnɑ, k t tie u nɑɑmi Klistu ni ɑ tin tun tuonŋɑnɑ nbɑ k u din dɔnŋ tien l siil ɑ tii tuun nɑ. Ŋɑnn tiɑtl mɑn i binbenkpelk po, yinm nbɑ k tie *Suifnbɑ i mɑɑlu ni nɑ, Suifnbɑ yi yinm e punjuot, ŋɑɑn yi b mɔnŋ sɑnkpɑnnɑ. B piɑk nyinn nbɑ k jɑb tien b gbɑnɑnt ni nɑ po e. L yuo nɑ i din fɔk nɑn Klistu. I din tie sɑɑnm e k b k kɑɑn’i k puki’i Yennu nigɑnnkɑb ni. I din k pukn mɔsonn nbɑ k Yennu din senn k tul u niib nɑ ni. I din k mɔk dindɑnn k biɑ din k mɔk Yennu. Ŋɑɑn mɔtɑɑnɑ, Yiesu Klistu ni e, k yinm nbɑ din fɔk nɑn’ɔ nɑ, ji nyɑt nɑkn’ɔ wɑɑ yit u mɔnŋ sɑlk nɑ pɑɑk. K mɑɑn ŋuɑ Klistu tiɑɔnŋ o tul’t mɑnu. U din yiel dɑtɑɑl nbɑ din bɔkt Suifnbɑ nɑn bin nbɑ k tie Suifnbɑ k b ji tie niyenɔ kuɑ. U gbɑnɑnt ni e k u din kpien Suifnbɑ *senni nɑn l kuɑt kul ɑ, ɑ nibuolu bɑnle nɑ n tɑɑn k tien niyenɔ kuɑ u ni. Nnɑ e k u din bɑɑl nɑn mɑnu. U kuun dɑpunpunn pɑɑk te k mɑnu ji be ŋɑnm nɑn Yennu sinsuuk ni, k u jii’b k tien’m buolyenŋ kuɑ Yennu buol ni. Klistu din bɑɑl muɑnt mɑnu lɑbɑmɑnn muɑnti k tul yinm nbɑ k tie Suifnbɑ, k din tuu fɔk nɑn Yennu nɑ, k mun biɑ bɑɑl nɑn’n k tul Suifnbɑ nbɑ din tuu kpiɑ nɑn’ɔ nɑ. Klistu pɑɑk e k Suifnbɑ nɑn bin nbɑ k tie Suifnbɑ nɑ kul ɑ fit bɑɑl Bɑɑ buol ni, u Foŋɑn-yenɔ ni. Mɔtɑɑnɑ, yinm nbɑ k tie Suifnbɑ ji k tie nibuolgɑnu kuo sɑɑnm kɑɑ, ŋɑɑn yinm nɑn Yennu niib tie tin-yenŋ kuɑ wɑɑs e, k ji tie Yennu ŋɑɑtieb. Fiɑkyenn kuɑ nbɑ k sɔkniinbɑ nɑn tuomiinbɑ din fɔkn nɑ pɑɑk e, k i mun tuɑn k Yiesu Klistu mɔnŋ tie tɑnn nbɑ tien fiɑkl pɑnŋ. Ŋuɑ e te k ŋɑɑk nɑ wɑki k kpɑɑtl tien Yennu jɑɑnti ŋɑsɑɑkɑk Yonmdɑɑnɔ ni. Yinm nɑn ŋuɑ nbɑ tɑɑn nɑn lieb nɑ pɑɑk, k yinm nɑn ŋɑnm kul ɑ mun biɑ tɑɑn tien ŋɑɑk nbɑ k Yennu be lenŋ Foŋɑnm ni. Lin nbɑ nɑ pɑɑk e k min Pɔul wun nbɑ be dɑnsɑlk mɑɑ tuun *Klistu tuonn k tien yinm nbɑ k tie *Suifnbɑ nɑ pɑɑk, n mei Yennu. N k bils nɑn i ponŋ gbɑt ɑ Yennu tul’n tuonsiɑl u ninkpɑbɑɔnŋ pɑɑk ɑ n tun k tul’i. U din fiit u wuol ni lɑbɑɑl k wɑnn’n nɑn mɑɑ ponŋ diɑn l po wɑɑnm-nnɑ nɑ. L i tie k i lii mɑɑ diɑn lin nbɑ, i sɑɑ bɑnn nɑn n mi siɑl k jiin Klistu wuol ni lɑbɑɑl po, lin nbɑ k u din k wɑnn niib siɑn yuo, ŋɑɑn mɔtɑɑnɑ Foŋɑnm ni e k Yennu wɑnn u tiɑɔnŋ tuomiinbɑ nɑn sɔkniinbɑ. U wuol ni lɑbɑɑl tie nɑ e: lɑbɑmɑnn pɑɑk e k bin nbɑ k tie Suifnbɑ nɑn Suifnbɑ nɑ ji fit tɑɑn lɑ bonŋɑnɑ nbɑ k Yennu senn k tul u niib nɑ. B bɑnle ji tɑɑn tie gbɑnɑn-yent kuɑ k mɔsonn nbɑ k Yennu din senn Yiesu Klistu ni ji tie b yɑl. Yennu ninkpɑbɑɔnŋ pɑɑk k u din tul’n yɑɑk, ɑ n tien u tuontunnɔ, kii muɑntl u lɑbɑmɑnn u yiikuo ni. Yennu niib sinsuuk ni, min e tɑn juont wun nbɑ k be kɑnn ni, ŋɑɑn u ninkpɑbɑɔnŋ pɑɑk, k Yennu cɑb’n ɑ n muɑnt muɑnti k tul bin nbɑ k tie Suifnbɑ k wɑnn’b bɑnnu nbɑ k Klistu luon wun tul’t bonŋɑnɑ nbɑ kɑɑ pɑɑk, k biɑ te k niib kul nuni n yent k bin bɑnn biɑnŋ nbɑ k Yennu wuol ni lol mɑnŋ tuun k gbient. Yɑɑyuo ni e wɑɑ, k Yennu nbɑ din nɑn bonsiɑl kul nɑ, din diɑ’l wuol ni, ɑ k Klistu mɔtɑɑɔk niib pɑɑk bonɑ nbɑ kul mɔk yiikuo k be sɑnpɑɑpo n tɑn bɑnn u yɑnciɑɔnŋ nbɑ tie bɑnnu nbɑ. T Yonmdɑɑnɔ Yiesu Klistu ni e, k u din tun lin nbɑ nɑ nɑn u lol nbɑ kɑɑ piinu nɑn gbennu nɑ nbɑ tie biɑnŋ nbɑ. Tɑɑ tien Klistu yɑdɑ k be u ni nɑ pɑɑk, sɔnu ji be k t sɑɑ fit bɑɑl Yennu buol ni nɑn pɑlcienn. L pɑɑk, n bɑln’mi e ɑ i dɑɑ te k i pɑlɑ n biil nɑn mɑɑ di fɑlɑ i pɑɑk nɑ, k mɑɑn l kul tie i nyuɑt pɑɑk e. Lin nbɑ nɑ pɑɑk, k n gbɑɑ n dunɑ pɑɑk Bɑɑ tuɑnn po, wun nbɑ yɑɑ buol ni, k *Yendɔunŋ ni, nɑn tingbounŋ nɑ ni nibuolu kul gɑɑn b yejɑnm mɑɑlu ni sɑnɑ. N mei’ɔ ɑ u dontl nbɑ yɑb bonciɑnn nɑ, ɑ wun nuɑb u yiikuo Foŋɑnm ni k pukn’i pɑnŋ i pɑlɑ ni, ɑ k Klistu n jii i pɑlɑ k tien u binbebuol i yɑdɑ pɑɑk. N biɑ mei’ɔ ɑ wun te k i fit set cib, k bɑɑ jiinɑ k fɔkn fiɑkl, lonm ni, ɑ k yinm nɑn Yennu niib kul n fit bɑnn Klistu lonm yɑlimu, nɑn l fɔknt, nɑn l sumiu nbɑ jɑn biɑnŋ nbɑ, k i fit bɑnn Klistu lonm nbɑ gɑl siɑl kul k nilɔ sɑɑ fit gbɑt l pɑɑk, k biɑ gbie nɑn Yennu benu nɑ. Yennu wun nbɑ yɑɑ yiikuo tuun t ni nɑ pɑɑk, sɑɑ fit tun bonsiɑl kul nbɑ kɑɑ pɑɑk yuo nbɑ k t mei Yennu kuo yuo nbɑ k t duki siɑl pɑɑk. Ŋuɑ e yen dontl Klistu mɔtɑɑɔk niib sinsuuk ni nɑn Yiesu Klistu ni yuo kul nɑn yuo nbɑ kɑɑ gbennu. * Amenn. Min nbɑ be dɑnsɑlk tuonɑ nbɑ k n tuun k tien Yonmdɑɑnɔ pɑɑk, n bɑln’mi e ɑ i ŋɑɑn k i binbenŋ i tie fɑnu nɑn Yennu nbɑ din luon k lii tie biɑnŋ nbɑ nɑ yuo nbɑ k u din yiin’i nɑ. I siknt i mɔnŋ, kii mɔk pɑlmɑɑsl nɑn suklu, kii di suklu nɑn lieb lonm pɑɑk. Yɑɑ mɔk mɑnu nɑ pɑɑk, i yɑbl i mɔnŋ k biɑl mɔtɑɑɔk nbɑ k Foŋɑnm tul’i nɑ ni. Gbɑnɑn-yent kuɑ e be, k Foŋɑn-yenɔ kuɑ mun be, nnɑ e k dindɑn-yenn kuɑ mun be k Yennu yiin’i l ni. Yomdɑɑn-yenɔ kuɑ e be, k yɑdɑ yenn kuɑ be, k Yennu nyunwulu tie yenn kuɑ. Yen-yenɔ be k tie nisɑɑli kul ɑ Bɑɑ, k biɑ tie suɑ kul ɑ Yonmdɑɑnɔ nbɑ tuun suɑ kul ni, k biɑ be siɑl kul ni. *Klistu nbɑ tul’t lin nbɑ nɑ pɑɑk, suɑ kul ɑ gɑɑl u piini k l be l kuɑ, nɑn lɑɑ ponŋ diɑn Yennu lolkpel kɑdɑɑɔk ni biɑnŋ nbɑ k yet ɑ: «Wɑɑ din duo sɑnpɑɑpo yuo nbɑ k u suol dɑnsɑli k duo nɑn’m, k tul nifosɑɑli piini.» Tɔn, «U din duo sɑnpɑɑpo,» pɑɑk tie bee? L wɑnt nɑn sinsinn u din sik tingbounŋ nɑ ni e. Ŋuɑ nbɑ din sik nɑ mɑnŋ e biɑ din duo sɑnpɑnɑɑgbenŋ nɑ, ɑ wun gbien Yennu nɑɑmi kul sɑɑk. Ŋuɑ e tul nisɑɑli piini, k gɑnn nisiɑb k tien’m tuomiinbɑ, k lieb mun tie sɔkniinbɑ, k yenm mun biɑ tien lɑbɑmɑnn muɑnt-tieb, k siɑb mun lek tie Klistu pɑstɑɑnbɑ nɑn wɑntieb. U tun lin nbɑ nɑ ɑ bin nbɑ tie Yennu niib kul ɑ n fit jɑnŋ u tuonɑ mɑnŋ e, k te k Klistu gbɑnɑnt n tɑnt, nɑn yuo nbɑ k t sɑɑ tɑɑn tien yonm t yɑdɑ ni nɑn tɑɑ bɑnn Yennu Bijɑ biɑnŋ nbɑ, k t sɑɑ nyik t bisn k tien nikpelɑ, k gɑɑl Klistu binbenŋ nbɑ tie dede. Ŋɑɑn t ji kii tie wɑɑs kɑɑ, k niib kpinkpɑnni wɑnnu sii diɑ’t lɑnŋ’t nɑn wounŋ nbɑ tuu lɑnŋ bulgbetl biɑnŋ nbɑ nɑ, k b fɑɑk wɑnnu te k lieb bɑɑ biit ni. Ŋɑɑn t sii piɑk bɑlmɔni e nɑn lonm kii kpɑɑtl wun nbɑ tie gbɑnɑnt mɑnŋ yul nɑ ni, k ŋuɑ e tie Klistu. Ŋuɑ e te k gbɑnɑnt bɔkɑ kul diɑ b lieb, k gbɑnɑnt mɑnŋ tuktɑ diɑ nɑn lieb. L kul ɑ i bo i tuun nɑn lieb cib cib, gbɑnɑnt mɑnŋ bo sii kpɑɑtl e nɑn lieb lonm ni. Gotl mɑn, lin nbɑ k n yien’i k biɑ wɑnt’i Yonmdɑɑnɔ sɑnn ni. I ji dɑɑ be nɑn bin nbɑ k mi Yennu, k b dudukt k mɔk nyuɑt nɑ. B dudukt be bunbɔnn ni k b k pukn mɑnfuol nbɑ k Yennu yɑɑ wun tul niib nɑ ni, k mɑɑn b k mi siɑl i k biɑ k luon bin bɑnn siɑl. B ji k tiin fei, k jii b mɔnŋ k tuun jɑknt tuonbuolu buolu kul, k k diɑ b mɔnŋ nɑn wɑɑnm-nnɑ wɑɑ. Ŋɑɑn yinm din k tumi ŋɑnn kɑɑ, k tɑn bɑnn Klistu. I set din gbɑt u po wɑɑ, k yɑɑ tie u weilɑ nɑ, b din wɑnn’i bɑlmɔni nbɑ be u ni wɑɑ. L pɑɑk, yɑbt i mɔnŋ mɑn k nyik i binbenkpelk nbɑ din te k i tuun lin nbɑ k i din tuu tuun nɑ. Binbenkpelk mɑnŋ nɑn niɑnbiiuk din te k i tɔkn sɔnu nbɑ sɑɑ biil’i. Ŋɑɑnt k i dudukt nɑn i pɑlɑ n ŋɑnm k pɑnt, kii mɔk binbenpɑɑnŋ nbɑ k Yennu tul’i nɑ, kii nɑɑn Yennu, kii be fɑnu, k yii tie niŋɑnm nɑn bɑlmɔni. L pɑɑk, ŋɑɑnt k i nyik fɑɑk, ŋɑɑn suɑ kul i piɑk bɑlmɔni kii tien u luɑ, k mɑɑn t tie gbɑnɑn-yent kuɑ e. L i tie k ɑ donn wutuol, ŋɑɑn ɑ dɑɑ tuun tuonbiit. A dɑɑ te k l do nɑn yenbɑɑk. k dɑɑ tien *Sɑɑtɑn yɑɑk. Wun nbɑ tuu jɑɑn, wun ji nyik jɑmu, ŋɑɑn tun tuonn nɑn u nii, k fit u mɔnŋ kii mɔk lin nbɑ k u sɑɑ sonm tɑlɑs-dɑnm. I dɑɑ te k mɔbonbiit nyi i mɔi ni, ŋɑɑn i te k i mɔbonɑ i mɔk nyuɑt, lin nbɑ sɑɑ sonm i lieb b yɑdɑ ni k sonm’b nɑn lin nbɑ siɑn, k biɑ ŋɑnm bin nbɑ gbiɑ i mɑɑn nɑ. I dɑɑ te k Foŋɑnm n lɑ pɑlbiil, k mɑɑn ŋuɑ e tie Yennu dɔuk i pɑɑk mɔkmɔk nɑn dɑɑl nbɑ k Yennu sɑɑ nyinn’i bonbiil kul ni. I nyik tonu binbenŋ kul, nɑn wutuol. Suɑ ji dɑɑ mɔk kunkɔnciɑɔnŋ nɑn u luɑ, suɑ dɑɑ suki u luɑ, k biɑ nyik nɑnŋ dudukt kul ɑ i ni. Ii tie bulcinm nɑn ninkpɑbɑɔnŋ dɑnm mɑn i lieb buol. Ii nyikt lieb biit kii cɑbt’b nɑn Yennu nbɑ nyikt i yɑlɑ k cɑbt’i biɑnŋ nbɑ Klistu pɑɑk nɑ. Yɑɑ tie Yennu wɑlonkɑi nɑ, i yɑbl i mɔnŋ pɑɑk kii tuun nɑn ŋuɑ nɑ, k ŋɑɑn k lonm i diɑ’i nɑn *Klistu nbɑ din luon’t bonciɑnn k gɑɑl t pɑɑk k kpo k l nɑɑn nɑn mɑnnu nbɑ k l nublu mɑn k tul Yennu nɑ. Yɑɑ tie Yennu wɑɑs nɑ pɑɑk, l ponŋ k ŋɑn niib ii gbiɑ boncuncontuonɑ mɑɑn, ɑmi jɑknt mɑɑn, ɑmi niɑnciɑɔnŋ mɑɑn i sinsuuk ni. L biɑ k ŋɑn k boncuncontuonɑ mɑɑn ɑmi jɑknt mɑɑn ɑmi bɑlyɑnɑ ii nyi i mɔi ni, ŋɑɑn ii tien Yennu niipuouk mɑn. L ŋɑn yii mi nɑn wun nbɑ tie boncunconn ɑmi jɑknt dɑɑnɔ ɑmi niɑnciɑɔnŋ dɑɑnɔ, ŋuɑ e kɑn lɑ yiɑl Klistu nɑn Yennu nɑɑn ni, k mɑɑn niɑnciɑɔnŋ tie pɑtmɑnnu nɑ e. I dɑɑ te k suɑ n jii jɑt-wɑnnu k kpɑnn’i ni, k mɑɑn l tuonbiit tumu pɑɑk e te k Yennu wutuol bɑɑt mɔyetdɑnm pɑɑk. I dɑɑ tɑɑ b po. I din be bunbɔnn ni e, ŋɑɑn yɑɑ be Klistu ni mɔtɑɑnɑ nɑ, i ji be yentu ni e. L pɑɑk, i ji kii be kii nɑɑn bin nbɑ tie yentu yɑb nɑ, k mɑɑn yentu bɑɑt nɑn tuonŋɑnɑ buolu kul ɑ nɑn yentinu nɑn bɑlmɔni. I yɑbl i mɔnŋ k tumi lin nbɑ sɑɑ penn Yonmdɑɑnɔ pɑl ni, k dɑɑ toki bin nbɑ tuun bunbɔnn ni tuonɑ k nyuɑt kɑɑ l ni, ŋɑɑn te k b bunbɔnn ni tuonɑ mɑnŋ n nyi pɑɑnu. Lin nbɑ k b tuun bunbɔnn ni nɑ mɔk fei bonciɑnn nɑn tii piɑk l po. Tuonɑ mɑnŋ kul ɑ i nyii pɑɑnu, b sɑɑ lɑ lɑɑ tie bɑnnu nbɑ nɑn bɑlmɔni. K mɑɑn lin nbɑ kul fiit nyii pɑɑnu, l ji tuu tie yin-yienm e. L pɑɑk e k b yet ɑ: «Fin nbɑ guɑnt, fɑn fiil guɑn ni, fɑn fiil kuun ni, k Klistu sɑɑ tul’ɑ u yentu.» Ii goli i binbenŋ mɑn. I dɑɑ be jɑtbenu, ŋɑɑn kii mɔk subndɑnm binbenŋ e. I jii i yuo kii tuun nɑn’n fɑnu, k mɑɑn yuo nɑ ni tie yobiiuk o. L pɑɑk, i dɑɑ tie jɑtt kɑɑ, ŋɑɑn kii tuun bɑnnu nbɑ k Yonmdɑɑnɔ luon. I dɑɑ nyu dɑɑn k yib. Ŋɑnn sɑɑ te k i mɔk mɑlnbiit e, ŋɑɑn ii yɑbl i mɔnŋ pɑɑk kii gbie nɑn Foŋɑnm. Ii yiin Yennu lolkpel kɑdɑɑɔk ni *yɑni nɑn jɑɑnti yɑni nɑn yɑni nbɑ nyi Foŋɑnm buol ni mɑn, k cie i lieb pɑlɑ, kii biɑ kii yiin Yennu lolkpel kɑdɑɑɔk ni yɑni nɑn jɑɑnti yɑni kii piɑk Yonmdɑɑnɔ nɑn i pɑlɑ kul ɑ. Yuo kul ii tien Bɑɑ Yennu niipuouk bonsiɑl kul pɑɑk, t Yonmdɑɑnɔ Yiesu Klistu sɑnn ni. Yɑɑ bɑɑkt Klistu nɑ, i sikn i mɔnŋ k tul i lieb mɑn. Puob, i sikn i mɔnŋ k tul i sɔlb, nɑn yɑɑ sikn i mɔnŋ k tul Yonmdɑɑnɔ nɑ, k mɑɑn juɑ mɔk yiikuo u puo pɑɑk nɑn Klistu nbɑ mɔk yiikuo u mɔtɑɑɔk niib pɑɑk nɑ e. Klistu e tie u mɔtɑɑɔk niib nbɑ tie u gbɑnɑnt nɑ Fietuɑ. Ŋɑnn, l ŋɑn k puob n sikn b mɔnŋ k tul b sɔlb mɔbonɑ kul ni, nɑn Klistu mɔtɑɑɔk niib nbɑ sikn b mɔnŋ k tul’ɔ nɑ. Jɑb, ii luon i puob nɑn Klistu nbɑ luon u mɔtɑɑɔk niib k gɑɑl b pɑɑk k kpo biɑnŋ nbɑ nɑ. U din tun lin nbɑ nɑ, k biɑ jii Yennu mɑɑn nɑn nyun k wul’b, ɑ wun ŋɑnm’b k bii ŋɑn nɑn bii tie Yennu yɑb, k jii’b tien’m u mɔnŋ nuu ni nɑn fɑnt, ɑ b fɑnt nɑ dɑɑ mɔk dɑnsiɑk, k biɑ kii tie niŋɑnm k dɑɑ mɔk biit nɑn wɑɑnm-nnɑ wɑɑ. L ŋɑn k jɑb i luon b puob nɑn bɑɑ luon b mɔnŋ gbɑnɑnt biɑnŋ nbɑ nɑ e. Wun nbɑ luon u puo, luon u mɔnŋ e. Suɑ k mi yet u mɔnŋ gbɑnɑnt, ŋɑɑn u goli u gbɑnɑnt e fɑnu k dint u mɔnŋ nɑn Klistu nbɑ tuun biɑnŋ nbɑ tien u mɔtɑɑɔk niib nɑ. Tinm e tie u gbɑnɑnt mɑnŋ, nɑn Yennu lolkpel kɑdɑɑɔk nbɑ yet biɑnŋ nbɑ nɑ ɑ: «Lin nbɑ nɑ pɑɑk k l ŋɑn k juɑ n nyik u bɑɑ nɑn u nɑɑ, ŋɑɑn jii u mɔnŋ k tɑɑn nɑn u ŋɑɑpuo k bin ji tien yonm.» Yennu mɑɑn nɑ sumi bonciɑnn, ŋɑɑn min mi nɑn l wɑnt Klistu nɑn u mɔtɑɑɔk niib po e. Ŋɑɑn l biɑ wɑnt yinm e ɑ l ŋɑn k juɑ kul ɑ i luon u puo nɑn wɑɑ luon u mɔnŋ biɑnŋ nbɑ nɑ, k puo kul ɑ i mun i bɑɑkt u sɔlɔ. Wɑɑs, yɑɑ wɑɑ *Klistu nɑ pɑɑk nɑ, ii sɑɑk i dɑnm mɔi, k mɑɑn ŋɑnn e tuok nɑn yin tun. Sinsinn sennu nbɑ k Yennu mɔsonn pukn l pɑɑk tie ɑ: «Bɑɑk ɑ bɑɑ nɑn ɑ nɑɑ, k ɑ bont kul n sonm fɑnu, k ɑ mɑnfuol n fɔkt tingbounŋ nɑ ni.» Bɑɑnbɑ, i dɑɑ diɑ i wɑɑs diɑbiiuk k dont b wutuol, ŋɑɑn kii wɑnt’b kii kpɑɑn’m Yonmdɑɑnɔ nbɑ luon biɑnŋ nbɑ. Dɑɑbɑ, ii sɑɑk i cɑnbɑɑnbɑ mɔi mɑn, kii tiin’m jɑŋmɑɑni, kii tuun tuonn kii tien’m nɑn i pɑlɑ kul ɑ nɑn yɑɑ bo sii tuun k tien Klistu biɑnŋ nbɑ nɑ. I dɑɑ tuun lin nbɑ nɑ yuo nbɑ k b goli’i ɑ bin pɑk’i kuukuɑ kɑɑ, ŋɑɑn i jii i mɔnŋ tien Klistu dɑɑbɑ kii tuun lin nbɑ tie Yennu lonm nɑn i pɑlɑ kul ɑ. I tuun i tuonɑ nɑn i pɑlɑ kul ɑ k lii tie nɑn i tuun k tien Yonmdɑɑnɔ tiɑɔnŋ o nɑ, k l k tie nisɑɑli kɑɑ, kii tiɑn nɑn, l i tie dɑɑbl kuo wun nbɑ yen u mɔnŋ, suɑ kul sɑɑ lɑ u tuonŋɑnɑ pɑɑɔk Yonmdɑɑnɔ buol ni. Cɑnbɑɑnbɑ, ii mun ii diɑ i dɑɑbɑ bonŋɑnn k dɑɑ diɑ’b nɑn ninmɔnn. Ii mun ii tiɑn nɑn yinm nɑn i dɑɑbɑ mɑnŋ kul ɑ tɑɑn mɔk Yonmdɑɑnɔ yenɔ kuɑ e *Yendɔunŋ ni, k u k mɔk luktn. Lin nbɑ juont tie nnɑ e, i cie i pɑlɑ Yonmdɑɑnɔ ni, kii mɔk yɑbint pɑnŋ nbɑ k u tul’i nɑ. I jii Yennu jɑtiɑt kul nɑ k liɑ, k lin te k yin fit nyɑnn *Sɑɑtɑn kpinkpɑnni. K mɑɑn t k kɔn nɑn wun nbɑ mɔk gbɑnɑnt nɑn sɔn kɑɑ, ŋɑɑn t kɔn nɑn nɑlnbiit e nɑn b yiikuo dɑnm, nɑn mɔtɑɑnɑ *dulnyɑ bunbɔnn ni yudɑnm, nɑn sɑnpɑɑpo nɑlnbiit. L pɑɑk, i jii Yennu jɑtiɑt kul ɑ, nnɑ e k dɑbiil nbɑ tɑn sɑɑ bɑɑl nɑ dɑɑl, k i tɑn sɑɑ fit k kɔn k nyɑnn i dɑtɑɑk, k i tɑnŋ i kɔn k gbenn yuo nbɑ k yii sie fɑnu. I set mɑn, k jii bɑlmɔni k bobn i sɑi ni, kii mɔk yentinu nbɑ tie nɑn *nɑɑgbɑnkɔnŋl nɑ, k i tɑɑsɑɑt i tie lɑbɑmɑnn nbɑ tien niib mɑnu. Lin nbɑ pukn nɑ pɑɑk, i jii i yɑdɑ k lii tie nɑɑgbɑnkɔnŋl nbɑ k i sɑɑ fit kii kpient Klistu dɑtɑɑk pieni nbɑ mɔk muu nɑ. I jii i fielu k lii tie kut foklk, k Yennu mɑɑn mun i tie juk-bɑnjiɑk nbɑ k Foŋɑnm tien’i nɑ. Ii tuun lin nbɑ nɑ kul miɑlu ni kii boi Yennu u sonml po. Ii mei Yennu mɑn yuo kul nɑn Foŋɑnm nbɑ wɑnn’i bɑnnu nbɑ. I cekn i mɔnŋ nɑn gbɑnkul kii mei Yennu yuo kul u niib kul pɑɑk. I mun i mei Yennu kii tien’n k wun tul’n mɔbonɑ nbɑ ŋɑn yuo nbɑ k n sii piɑk, k n fit pɑk nɑn pɑlcienn k fit wɑnn niib lɑbɑmɑnn nɑ wuol ni lɑbɑɑl. Mɑɑ lek be dɑnsɑlk ni nɑ, ŋɑɑn n biɑ tie lɑbɑmɑnn mɑnŋ muɑnt-tuɑ e, ɑ mɑn fit k wɑnn niib lɑbɑmɑnn mɑnŋ. Ii mei Yennu mɑn k mii piɑk lɑbɑmɑnn mɑnŋ nɑn pɑlcienn nɑn lɑɑ kpɑɑ tɑlɑs biɑnŋ nbɑ nɑ. Mɔtɑɑnɑ, t nɑɑ bilonkɑk Tiikiik, wun nbɑ tie Yonmdɑɑnɔ tuontunnɔ nɑn bɑlmɔni nɑ, sɑɑ yet’i mɑɑ be biɑnŋ nbɑ nɑn lin nbɑ k n tuun. L pɑɑk e k n tuun’ɔ i buol ni, ɑ wun wɑnn’i tɑɑ be biɑnŋ nbɑ k biɑ cie i pɑlɑ. Bɑɑ nɑn Yonmdɑɑnɔ Yiesu Klistu n tul t nɑɑ wɑɑs kul ɑ mɑnu nɑn lonm nbɑ nyii b yɑdɑ ni. Yennu ii mɔk ninkpɑbɑɔnŋ nɑn bin nbɑ kul luon t Yonmdɑɑnɔ Yiesu Klistu nɑn lonm nbɑ kɑɑ gbennu nɑ. Min Pɔul nɑn Tiimuote, tinm nbɑ tie Yiesu *Klistu tuontunnɑ nɑ e diɑn kɑdɑɑɔk nɑ k tien bin nbɑ tie Yennu niib Yiesu Klistu ni k be Fiiliip nɑ, nɑn b jɑɑnti ni yudɑnm nɑn b * sonmtieb. T Bɑɑ Yennu nɑn Yonmdɑɑnɔ Yiesu Klistu ii mɔk ninkpɑbɑɔnŋ nɑn’i, k biɑ tul’i mɑnu. N tien Yennu niipuouk yuo nbɑ kul k n tuu tiɑl i po. Yuo kul ɑ, mi i mei Yennu tien’i, n tuu mei nɑn pɑlpienn e, k mɑɑn yɑɑ sonmt’n biɑnŋ nbɑ lɑbɑmɑnn tuonɑ mɑnŋ pinpiik ni wɑɑ nɑn mɔtɑɑnɑ nɑ pɑɑk. L pɑɑk, n k mɔk bilsuk nɑn Yennu nbɑ din piin tuonŋɑnn i ni nɑ, u sii diɑ’l nnɑ mɔkmɔk nɑn yuo nbɑ k u tɑn sɑɑ gbenn tuonŋɑnn mɑnŋ Yiesu Klistu jennu dɑɑl. Mi i duki i po nnɑ, l ŋɑn, k mɑɑn n yɑn be i ni, yinm nbɑ k Yennu tin’i ninbɑɑɔk nɑn wɑɑ tin’n biɑnŋ nbɑ, mɑɑ dɑɑn yen n mɔnŋ k gbɑɑ lɑbɑmɑnn mɑnŋ pɑɑk, ɑ n senn’l nɑ wɑɑ, k tɑn bɑɑl yuo nbɑ k n ji be dɑnsɑlk ni nɑ. Yennu e tie n siɑlɑɑdɑɑnɔ nɑn n yɑn set be i ni nɑn Yiesu Klistu tiɑɔnŋ nbɑ luon’i biɑnŋ nbɑ nɑ. N mei Yennu mɑɑ i lonm ii tun kii puki yuo kul, k yii biɑ kii mɔk bɑlmɔni bɑnnu nɑn subni, ɑ yin fit gɑnn lin nbɑ ŋɑn kii be k dɑɑ mɔk jɑknt k biɑ dɑɑ mɔk biit mɔkmɔk nɑn Klistu dɑɑl mɑnŋ, k i binbenŋ n gbie nɑn yentinu luɑnɑ nbɑ nyii Yiesu Klistu buol ni nɑ, ɑ Yennu n lɑ dontl nɑn pɑku. N nɑɑ wɑɑs, n luon k yin bɑnn nɑn lin nbɑ kul nbɑ tien’n nɑ, sonm lɑbɑmɑnn mɑnŋ ɑ lin sɑɑn tuɑnn e nɑn bɑlmɔni. L pɑɑk, kpɑnbɑl ŋɑguulɑ nɑn nilieb nbɑ be nnɑ nɑ kul bɑnn nɑn mɑɑ tie Klistu tuontunnɔ nɑ pɑɑk e k n be dɑnsɑlk nɑ. N sɑlk ni benu nɑ tul t nɑɑ wɑɑs bonciɑnn yugontl Yonmdɑɑnɔ sɔnu ni, k l puki yuo kul, k b muɑntl Yennu mɑɑn nɑn pɑlcienn, k jɑŋmɑɑni ji kɑɑ. Siɑb muɑntl Klistu mɑɑn mɑnŋ k mɑɑn b tie punpondɑnm nɑn kunkɔnkɔnnɑ e, ŋɑɑn k siɑb mun muɑntl nɑn b pɑlɑ ni nɑn bɑlmɔni lonm. Bin nbɑ tuun nɑn lonm nɑ, b mi nɑn Yennu lukt’n ɑ n wɑnn nɑn lɑbɑmɑnn tie bɑlmɔni e. Nisiɑb k muɑntl Klistu po nɑn b pɑlɑ kul, ŋɑɑn b tuun nɑn *funfunn e, k b duki nɑn b sɑɑ pukn min e fɑlɑ mɑɑ dɑɑ be dɑnsɑlk nnɑ. Ŋɑɑn ŋɑnn k biil. Lin nbɑ siɑn tie nnɑ e. B i muɑntl b dudukŋɑnt ni ɑmi b dudukbiit ni, ŋɑɑn niib sɑɑ gbɑt Klistu po, k n mɔk pɑlpienn. Bɑlmɔni, n mi l juontu, i Yenmiɑlu nɑn Foŋɑnm nbɑ nyi Yiesu Klistu buol ni nɑ, sɑɑ te k n lɑ fielu wɑɑ. N pɑl ni lonm nɑn n dindɑnn tie k n dɑɑ dint n mɔnŋ fei e, ŋɑɑn n sii mɔk pɑlcienn mɔtɑɑnɑ nɑn lɑɑ tuu tie bɑnnu nbɑ nɑ, k mi i lek i kpo ɑmi mɑɑ be, ŋɑɑn n binbenŋ kul sɑɑ dont Klistu sɑnn. K mɑɑn n buol ni, mɑnfuol tie Klistu e, k kuun tie nyuɑt. L i tie k n sii be n mɑnfuol ni, n sii tuun tuonɑ nbɑ mɔk nyuɑt e. Ŋɑɑn n k mi lin nbɑ k n sɑɑ gɑnn. L bonɑ ŋɑnle nɑ e dɑɑl’n. N luon k n nyik n mɑnfuol kii be Klistu buol ni. Ŋɑnn e sii cie. Ŋɑɑn i pɑɑk e te k l mɑntk kpɑɑ tɑlɑs bonciɑnn nɑn mii be n mɑnfuol ni. N mi nɑn ŋɑnn e sɔ k bilsuk kɑɑ. L pɑɑk te k n mi nɑn n sii be e wɑɑ. N sii be i kul ɑ buol ni, k i sɑɑ sɑɑn tuɑnn kii mɔk pɑlpienn i yɑdɑ ni, ɑ mi i tɑnŋ i jen i buol ni yuo nbɑ, i pɑlpienn sii yɑb bonciɑnn nɑn yɑɑ be Yiesu Klistu ni nɑ, n mɑnfuol pɑɑk. Ŋɑɑn lin nbɑ yɑɑ kul ni, ŋɑɑnt k i binbenŋ sɔnu ii tie nɑn Klistu lɑbɑmɑnn nbɑ luon lii tie bɑnnu nbɑ nɑ. K mi i lek i fit sɑɑn lɑ’i ɑmi mi i kii fit lɑ’i ni, ŋɑɑn n sɑɑ gbɑt ɑ i sie fɑnu nɑn dudukyent kuɑ, k tɑɑn mɔtɑɑɔk k yɑbi i mɔnŋ k yɑdɑ nbɑ nyi lɑbɑmɑnn nɑ ni n sɑɑn tuɑnn. I dɑɑ tiin i dɑtɑi mɑn. Ŋɑnn e sii tie nyinn k tul’b nɑn b tɑn sɑɑ bɑɑ k l mun biɑ sii tie nyinn k tul’i nɑn i be fielu sɔnu ni, k ŋɑnn e nyi Yennu buol ni. K mɑɑn Yennu cɑb’i ɑ yin tun k tul Klistu k l k tie yɑɑ tien’ɔ yɑdɑ nɑ kuukuɑ pɑɑk kɑɑ, ŋɑɑn l biɑ tie yɑɑ di fɑlɑ u pɑɑk nɑ. Mɔtɑɑnɑ i gbɑɑ nɑn yɑɑ ponŋ din lɑ mɑɑ gbɑɑ k biɑ gbɑɑ mɔtɑɑnɑ biɑnŋ nbɑ nɑ. L i tie k yɑɑ be *Klistu ni biɑnŋ nbɑ nɑ e pukn i pɑnŋ, k l i tie k i lɑ pɑlcienn u lonm ni, k l i tie k i mɔk mɔtɑɑɔk nɑn Foŋɑnm, l i tie k i mɔk bulcint k biɑ mɔk lonm nɑn lieb, ŋɑnn, i sɑɑ te k n mɔk pɑlpienn cɑin, l i tie k i mɔk dudukyenn kuɑ, k biɑ mɔk lonm yenn kuɑ k biɑ tɑɑ i lieb po i pɑlɑ ni nɑn i dudukt ni. I dɑɑ tuun bonsiɑl k l nyi *funfunn nɑn kɑlnbɑɑni ni, ŋɑɑn ii mɔk sikn-n-mɔnŋ nɑn i lieb, kii duki i lieb po k gɑl yɑɑ duki i mɔnŋ po biɑnŋ nbɑ. I dɑɑ te k i bɑkɑ be i kuukuɑ bonɑ ni, ŋɑɑn te k i bɑkɑ i be i lieb bonɑ ni biɑk. I ŋɑɑn k dudukt buolu nbɑ k Yiesu Klistu din mɔk nɑ mun ii be i ni: Wɑɑ lek din tuu mɔk binbenŋ nbɑ tie Yennu tiɑɔnŋ yɑl nɑ, u din k mi dukn ɑ u sɑɑ jii u mɔnŋ k yekn nɑn Yennu, ŋɑɑn din sɑk u mɔnŋ mɔnŋ lonm ni k nyik wɑɑ din mɔk lin nbɑ nɑ, k din jii dɑɑbl binbenŋ, k din tie nisɑɑlk ninnɑɔnŋ, k b din tɑn lɑ nɑn u tie nisɑɑlk, k u din sikn u mɔnŋ, k kpo, k set sɑk k kpo dɑpunpunn pɑɑk. Lin nbɑ nɑ pɑɑk e k Yennu din donn’ɔ gɑl suɑ kul ɑ, ŋɑɑn tul’ɔ sɑnsiɑl nbɑ tie sɑnjɑɑnn k gɑl sɑnɑ kul ɑ, ɑ k b i gbɑt Yiesu sɑnn yuo nbɑ nɑ, bin nbɑ kul nbɑ be sɑnpɑɑpo, nɑn tingbounŋ nɑ ni, nɑn tingbounŋ nɑ tinŋ po, n gbɑɑn b dunɑ pɑɑk, k suɑ kul ɑ n muɑnt ɑ ŋuɑ Yiesu Klistu tie Yonmdɑɑnɔ k tul Bɑɑ Yennu dontl. N yɔnimɔni, mɑɑ din be i buol ni k i din sɑk n mɔb yuo kul nɑ, k mi i lek i kɑɑ i buol ni, l biɑ kpɑɑ tɑlɑs k yin sɑk n mɔb. I yɑbl k tont i fielu tuonn nɑn yentinu nɑn gbɑnɑnjijekt mɑn. k mɑɑn Yennu yuɑ tuun nɑn’i e, ɑ yin fit kii luon kii biɑk kii tuun u lonm tuonɑ. Ii tuun siɑl kul ɑ k dɑɑ buln, ɑmi k noi mɔniɑɔk, ɑ i dɑɑ mɔk biit k biɑ dɑɑ mɔk jɑknt, kii tie Yennu wɑɑs nbɑ k mɔk dɑnŋ, k be nijɑknɑ nɑn biitdɑnm sinsuuk ni nɑ, kii nyili b sinsuuk ni nɑn ŋmɑɑjɑlɑ nbɑ nyili sɑnpɑɑpo biɑnŋ nbɑ nɑ, ŋɑɑn yet’b mɑnfuol lɑbɑɑl. L i tie k i tuun nnɑ, n tɑn sii mɔk yɑɑk nɑn mii mɔk yugontl i pɑɑk Klistu jennu dɑɑl mɑnŋ, k mɑɑn l tɑn sɑɑ wɑnn nɑn n fɑlɑ nɑn n tuonɑ din k tie yɑnn. L i tie k n yit n mɑnfuol sɑlk k pukn fɑlɑ nbɑ k n ponŋ dii k l nɑɑn *mɑlunŋ nɑ, nɑn tuonɑ nbɑ k n tuun pɑɑnu ni ɑ yin tien yɑdɑ, n pɑl bo sii pien k n biɑ sii mɔk pɑlpienn nɑn i kul ɑ. L biɑ ŋɑn k i pɑlɑ n penn k yii biɑ kii mɔk pɑlpienn nɑn’n. N mɔk dindɑnn Yonmdɑɑnɔ Yiesu ni nɑn mɑn tun Tiimuote i buol ni mɔtɑɑnɑ, k gbɑt i lɑbɑɑl k n pɑl ni n duɑl. Ŋuɑ kuukuɑ e fiin i po nɑn bɑlmɔni nɑn mɑɑ fiin i po biɑnŋ nbɑ nɑ. Suɑ kul nbɑ ji biɑl gbɑɑ nɑn b mɔnŋ mɔnŋ yɑlɑ e jiɑk jiɑk, b k goli lin nbɑ tie Yiesu Klistu yɑl nɑ po. I mɔnŋ mi wɑɑ tun biɑnŋ nbɑ k wɑnn u kotl biɑnŋ nbɑ nɑ, k i biɑ mi nɑn u din tuun nɑn’n nɑn bik nbɑ tuun nɑn u bɑɑ biɑnŋ nbɑ nɑ lɑbɑmɑnn tuonɑ nɑ ni. Mi i lɑ bont nbɑ yɑɑ lin ŋmɑkt n po biɑnŋ nbɑ, n mɔk dindɑnn nɑn mɑn tun’ɔ e yiɑn ɑ. Yonmdɑɑnɔ pɑɑk, n mɔk yɑdɑ nɑn l ji kɑn wei k n mɔnŋ sɑɑ bɑɑl i buol ni. N dukn nɑn l kpɑɑ tɑlɑs nɑn mɑn ŋɑnm tun t nɑɑ bik Epɑɑflodiit i buol ni. Ŋuɑ e tie wun nbɑ tuun nɑn ninmɔnn k gbɑɑ ɑ wun sonm’n nɑn Klistu tuonn, k i dɑɑn tun’ɔ ɑ wun sonm’n nɑn lin nbɑ k n dɑɑn luon nɑ. U set luon wun lɑ i kul ɑ. U pɑl dɑɑn biil bonciɑnn, k mɑɑn i dɑɑn ponŋ gbɑt nɑn u yiɑl e. L set tie bɑlmɔni e, u dɑɑn yiɑl e k pel kuun ɑ, ŋɑɑn Yennu dɑɑn tin’ɔ ninbɑɑɔk, k l k tie u kuukuɑ kɑɑ, ŋɑɑn u biɑ tin n mɔnŋ ninbɑɑɔk, ɑ u dɑɑ ŋɑnmt k puki’n pɑlbiil. L pɑɑk, n jekl e nɑn mɑn tun’ɔ i buol ni, k i i lɑ’u yuo nbɑ k yin yɑɑn lɑ pɑlpienn, k n mɔnŋ pɑlbiil n wɑɑb. I gɑɑl’ɔ nɑn pɑlpienn mɑn nɑn i nɑɑ bik nɑ Yonmdɑɑnɔ ni. I tul nibuolu nbɑ tie nɑn ŋuɑ nɑ nibɑɑkl mɑn, k mɑɑn u dɑɑn pel kuun ɑ, tuonɑ nbɑ k u tuun k tien Klistu nɑ pɑɑk, k u biɑ dɑɑn yit u mɔnŋ sɑlk, ɑ wun tul’n sonml nbɑ k i dɑɑn k fit tul’n nɑ. L gbennu ni lɑɑ, n nɑɑ wɑɑs, ii mɔk pɑlpienn yinm nɑn Yonmdɑɑnɔ benu ni. L k yiɑl’n kɑɑ nɑn mɑɑ ŋɑnm diɑn lin nbɑ k n ponŋ dɑɑn diɑn tul’i sinsinn nɑ. Mi i tuun nnɑ, l sɑɑ fit nyinn’i muksuk ni. Ii mi mɑn biitdɑnm nɑ, nisiɑb nbɑ nɑɑn nɑn bɔi nɑ, k b pot b punɑ fɑɑk potu nɑ. Tinm e mɔk mɔmɔnm *punpotu, k mɑɑn Foŋɑnm ni e k t jiɑntl Yennu k mɔk yugontl tɑɑ be *Klistu ni nɑ, k k tien lin nbɑ k b tien nilɔ gbɑnɑnt ni nɑ yɑdɑ. Ŋɑɑn min ŋɑnin, mi i luon, n sɑɑ fit tien l buolu yɑdɑ. L i tie k suɑ duki ɑ ŋuɑ fit tien lin nbɑ k nisɑɑlk tuun nɑ yɑdɑ, n mɔnŋ mɔk lin nbɑ te k n sɑɑ fit tien nisɑɑlk yɑl nɑ yɑdɑ k cie’u. N din tie dɑɑ ŋɑnniin bik e k b pot n punn. B mɑl’n k n tie Islɑɑel nilɔ, Bensɑɑmen buolu ni, k tie Suif nilɔ nɑn bɑlmɔni. L i tie Suifnbɑ *senni diɑnu po i e, n tie Fɑɑliisiɑn e. N din diɑ Suifnbɑ senni nɑn ninmɔnn hɑli nɑn k n muks Klistu mɔtɑɑɔk niib. Nilɔ i sɑɑ sɑk senni e k fit kii tie niŋɑnɔ Yennu buol ni, min din be k kɑɑ bisiɑt jiin l po. Lin nbɑ nɑ kul nbɑ k n din goli k l mɔk nyuɑt nɑ, mɔtɑɑnɑ n ji lɑ lin nbɑ nɑ k l k mɔk nyuɑt Klistu pɑɑk. K biɑ jen ɑ, n yet ɑ nifosɑɑlk nbɑ kpɑɑn lin nbɑ kul, l kɑɑ nyuɑt, k mɑɑn mɑɑ bɑnn n Yonmdɑɑnɔ Yiesu Klistu k l bɑnnu nyuɑt yɑb k cie bonsiɑl kul, k u pɑɑk k n fok bonsiɑl kul k lu. N yi l kul tɑnpenn pɑɑk muɑt e, ɑ n fit lɑ Klistu nɑ, kii be u ni. N k tie niŋɑnɔ Yennu buol ni senni weiu nɑ pɑɑk kɑɑ, ŋɑɑn n tie niŋɑnɔ Yennu buol ni n yɑdɑ nɑn Klistu nɑ pɑɑk e. Yennu te k nilɔ tie niŋɑnɔ u buol ni wɑɑ tien yɑdɑ nɑ pɑɑk e. Lin nbɑ kul k n ji luon tie k n bɑnn Klistu, k bɑnn u kuun fiilu yiikuo, k di fɑlɑ nɑn’ɔ. N luon k n binbenkpelk n gbenn nɑn wɑɑ din kpo biɑnŋ nbɑ nɑ. N luon, l i tie k l fit, k n lɑ kuun fiilu. N k yɑɑ ɑ n ponŋ nyɑnn k yent binbenŋ mɑnŋ ɑmi n ji k mɔk biit kɑɑ, ŋɑɑn n gbɑɑ e mɑɑ n nyɑnn k yent binbenŋ mɑnŋ, k mɑɑn Yiesu Klistu ponŋ din fɑt’n ɑ. N nɑɑ wɑɑs, n k duki ɑ n ponŋ nyɑnn’l k l tie n yɑl kɑɑ, ŋɑɑn bon-yenn kuɑ e k n tuun. N tɑnmt lin nbɑ be n puolpo e, ŋɑɑn gbɑɑ mɑɑ n bɑɑl lin nbɑ be n tuɑnn po nɑ. N tiin nɑn pɑnŋ mɑɑ n gɑɑl nyuɑt nbɑ be sɑnpɑɑpo k Yennu yiin’t ɑ tin gɑɑl Klistu ni. L kpɑɑ tɑlɑs e k tinm nbɑ kul tie subltieb Foŋɑnm ni nɑ ii mɔk dudukt mɑnŋ buolu, ŋɑɑn i siɑb ii mɔk dudukgɑnt i e, Yennu sɑɑ te lin yent l dɑnm nuni po wɑɑ. L i tie lin nbɑ kul, ŋɑɑn ŋɑɑnt mɑn k tin wei sɔnu nbɑ k t din wɑɑ mɔkmɔk nɑn mɔtɑɑnɑ. N nɑɑ wɑɑs, ii biɑ kii toki min mɑn. I kpɑɑ i ninbinɑ bin nbɑ wɑɑ siɑlŋɑnɑ nbɑ k t din senn tul’i nɑ pɑɑk. N ponŋ din yet’i lin nbɑ nɑ po nɑn tɑɑl munŋɑ nɑ yuo nbɑ gɑl nɑ wɑɑ, ŋɑɑn n biɑ ŋɑnmt yien’i e mɔtɑɑnɑ nɑn nyin-nyuut, nisiɑb be k b binbenŋ jii’b tien’m Klistu dɑpunpunn pɑɑk kuun nɑ dɑtɑi e. B tɑn sɑɑ juont nɑn tubdɑtu nbɑ kɑɑ gbennu e. B puol e tie b yennu. B mɔk yugontl nɑn lin nbɑ dint’b fei nɑ e. B duki lin nbɑ tie tingbounŋ nɑ bonɑ kuukuɑ po e. Ŋɑɑn tinm ŋɑnin tie *Yendɔunŋ ni wɑɑs e, k jekl k guu t Fietuɑ, wun nbɑ tie Yonmdɑɑnɔ Yiesu Klistu, ɑ wun nyi Yendɔunŋ ni bɑɑl. U tɑn sɑɑ lebt t tingbounŋ nɑ gbɑnɑnt k lii nɑɑn nɑn u bɑktnɔunŋ gbɑnɑnt nɑ e Yendɔunŋ ni. U tɑn sɑɑ jii pɑnŋ nbɑ te k u yen bonsiɑl kul nɑ e k tun nnɑ. L pɑɑk, n nɑɑ wɑɑs, yinm nbɑ k n luon’i, k luon k n lɑ’i nɑ, yinm e te k n mɔk pɑlpienn nɑn yugontl. N nɑɑ wɑlonkɑi, setl fɑnu mɑn Yennu sɔnu ni, Yonmdɑɑnɔ tuɑnn. Efodi nɑn Sintiik, n bɑln’mi e, i yɑbl k tɑɑn mɔb kii be nɑn nɑɑtɑɑnn Yonmdɑɑnɔ ni. K fin nbɑ mun tie n wei-nɑn-luɑ nɑn bɑlmɔni, n luon k fin sonm puob bɑnle mɑnŋ, k mɑɑn ŋɑnm nɑn Klemɑn nɑn bin nbɑ kul tie n tuontunlieb k b sɑnɑ be mɑnfuol kɑdɑɑɔk ni nɑ din lɑkn tun nɑn’n bonciɑnn lɑbɑmɑnn mɑnŋ muɑntu ni. Ii mɔk pɑlpienn yuo kul yɑɑ be Yonmdɑɑnɔ ni nɑ. N biɑ ŋɑnmt yien’i ɑ ii mɔk pɑlpienn mɑn. I ŋɑɑn k suɑ kul n bɑnn i niŋɑntn po. Yonmdɑɑnɔ bɑɑt e mɔtɑɑnɑ. I dɑɑ biil i pɑlɑ bonsiɑl pɑɑk. Yinm i mei Yennu lin nbɑ kpɑɑ tɑlɑs tul’i pɑɑk. Ii mei Yennu, kii tien’ɔ niipuouk i pɑlɑ ni yuo kul ɑ kii yien’ɔ i lonm nbɑ tie lin nbɑ. K Yennu mɑnu nbɑ gɑl nilɔ bɑnnu telk nɑ sɑɑ diɑ i pɑlɑ nɑn i dudukt Yiesu *Klistu ni. N nɑɑ wɑɑs, lin nbɑ juont tie nnɑ e. I ŋɑɑn k i dudukt n gbie nɑn lin nbɑ ŋɑn nɑn lin nbɑ ŋɑn nɑn dontl nɑn lin nbɑ tie bɑlmɔni, nɑn lin nbɑ ŋɑn nɑn bɑɑkl, nɑn lin nbɑ tuok, nɑn lin nbɑ k mɔk jɑknt nɑn lin nbɑ mɑn k biɑ mɔk sɑnn. Jiin mɑn lin nbɑ k i tumi k gɑɑl n buol ni nɑn n mɔbonɑ nɑn n tuonɑ nɑ kii tuun nɑn’n l biɑnŋ, k Yennu nbɑ tien’t mɑnu nɑ sii be nɑn’i. N mɔk pɑlpienn bonciɑnn Yonmdɑɑnɔ ni, nɑn yɑɑ ŋɑnm fiin n po nɑ pɑɑk. I set dɑɑn luon’n, ŋɑɑn i dɑɑn k mɔk yɑɑk e nɑn yin wɑnn yɑɑ luon’n biɑnŋ nbɑ nɑ. N k yien lin nbɑ nɑ k yɑɑ n luon siɑl kɑɑ, k mɑɑn n tumi k mi, bɑnnu nbɑ k lin nbɑ k n mɔk sɑɑ jɑnŋ’n ɑ. N mi kɔnŋl ni binbenŋ nɑn jɑnŋl ni binbenŋ. N ponŋ tumi l kul ɑ. L pɑɑk, mi i be siɑn nbɑ kul k l tie kon, ɑmi gbuol, l i lek i yɑb ɑmi l i kii yɑb, ŋɑɑn n nunm gbuot lin nbɑ k n mɔk e yuo kul ɑ. Klistu nbɑ tien’n pɑnŋ nɑ pɑɑk, n sɑɑ fit set binbenŋ kul ni. Ŋɑɑn i dɑɑn tun fɑnu bonciɑnn nɑn yɑɑ dɑɑn sonm’n n fɑlɑ dinu ni nɑ. Yinm Fiiliiptieb mi fɑnu nɑn mɑɑ din nyii Mɑɑseduɑnn yuo nbɑ k b din piin k muɑnt lɑbɑmɑnn nɑ, i jɑɑnti kuukuɑ e din sonmt’n, yinm kuukuɑ e din tɑɑ n po k lɑɑt n nyuɑt nɑn n bɑɑk. Mɑɑ din tɑn be fɑlɑ ni Tesɑɑluoniik duo ni nɑ, yinm e din tun k tien’n sonml, k l din k tie tɑɑl yenm kuɑ kɑɑ. L k tie ɑ n luon mii gɑɑn piini kɑɑ, ŋɑɑn n luon k yin lɑ nyuɑt i tuonŋɑnɑ pɑɑk. N gɑɑl i piini nɑ munn ɑ k l cul ɑ. Epɑɑflodiit nbɑ tul’n i piini mɑnŋ nɑ, n ji mɔk lin nbɑ kul k n luon. I piini tie nɑn mɑnnu nbɑ k l nublu mɑn k tul Yennu k u gɑɑl’l nɑ e. N Yennu mɔktuk nbɑ nyuɑn Yiesu Klistu ni sɑɑ tul’i lin nbɑ kul k i luon Yennu nbɑ tie t kul ɑ Bɑɑ nɑ, n lɑ dontl mɔtɑɑnɑ nɑn yuo nbɑ kɑɑ gbennu. * Amenn. I fuont bin nbɑ kul nbɑ tie Yennu niib Yiesu Klistu ni. T nɑɑ wɑɑs nbɑ be nɑn’n nɑ fuont’i mun. Yennu niib kul ɑ fuont’i, k bin nbɑ tie kpɑnbɑl Sesɑɑl ŋɑɑtuontunnɑ nɑ mɑntk fuont’i. Yonmdɑɑnɔ Yiesu Klistu ii mɔk ninkpɑbɑɔnŋ nɑn’i kul. Min Pɔul, n tie Yiesu *Klistu *tuomi e k mɑɑn Yennu e din luon nnɑ. Min nɑn t nɑɑ bik Tiimuote, dɑ kɑdɑɑɔk nɑ, k tien yinm nbɑ tie Yennu niib k be Kuoluos duo ni, k tie t nɑɑ wɑɑs nbɑ tien Klistu yɑdɑ nɑ. T Bɑɑ Yennu ii mɔk ninkpɑbɑɔnŋ nɑn’i k biɑ tul’i mɑnu. T tien Yennu nbɑ tie t Yonmdɑɑnɔ Yiesu Klistu Bɑɑ nɑ niipuouk. T tien’ɔ niipuouk yuo kul nbɑ k t mei Yennu i pɑɑk. K mɑɑn t gbɑt yɑɑ tien Yiesu Klistu yɑdɑ biɑnŋ nbɑ nɑ wɑɑ. T biɑ gbɑt yɑɑ luon Yennu niib biɑnŋ nbɑ wɑɑ. Yuo nbɑ k bɑlmɔni nbɑ tie lɑbɑmɑnn din sint k bɑɑl i buol nɑ, i din gbɑt dindɑnn nbɑ be l lɑbɑmɑnn ni wɑɑ. I din jii i yɑdɑ nɑn i lonm k tien l dindɑnn ni. Yennu bekl l dindɑnn *Yendɔunŋ ni k guun’i. L lɑbɑmɑnn luon luɑnɑ k yɑbtl tingbounŋ nɑ ni. L yɑbtl nnɑ e lɑɑ jii yuo nbɑ k l din bɑɑl i buol ni nɑ k tɑn tuu mɔtɑɑnɑ. Lɑɑ nyii dɑsinsinn nbɑ k i din gbɑt k b piɑk Yennu ninkpɑbɑɔnŋ po, k i ŋɑnm gbɑt l pɑɑk fɑnu nɑ. I din tumi Yennu ninkpɑbɑɔnŋ mɑnŋ po t tuontunluɑ Epɑɑflɑɑs wun nbɑ k t luon’ɔ nɑ buol ni. U tie Klistu tuontunnɔ nbɑ tuun nɑn bɑlmɔni i buol ni t pɑɑk, k u biɑ yet’t lonm nbɑ k Foŋɑnm tul’i nɑ. Lin nbɑ nɑ pɑɑk, tɑɑ dɑɑn gbɑt i po, t k nyik Yenmiɑlu i pɑɑk. T mei Yennu ɑ wun te k i bɑnn wɑɑ luon biɑnŋ nbɑ. Foŋɑnm yɑn nɑn u subni nbɑ k u tul’i nɑ pɑɑk e, sɑɑ te k i set bɑnn Yennu ninkpɑbɑɔnŋ nɑn bɑlmɔni. Nnɑ e k i sɑɑ fit kii be binbenŋ nbɑ k Yonmdɑɑnɔ luon. Ii tuun mɑn yuo kul lin nbɑ ŋɑn u po, kii tuun tuonŋɑnɑ buolu buolu kul. I i tuun nnɑ i tɑn sɑɑ ŋɑnm bɑnn Yennu fɑnu wɑɑ. T mei Yennu ɑ wun jii u yiikuo nbɑ yɑb nɑ k tul’i pɑnŋ. K yin fit kii mɔk pɑlmɑɑsl yuo nbɑ k fɑlɑ bɑɑl’i. T biɑ mei Yennu ɑ yin fit k tul’ɔ niipuouk, k mɑɑn u te k i mun biɑ lɑ bonɑ nbɑ k ŋuɑ Yennu din senn mɔsonn, ɑ u sɑɑ tul u niib u yentu nɑɑn ni nɑ. U fɑt’t bunbɔnn yiikuo ni, ŋɑɑn jii’t k kuɑn’t u Bilonkɑk nɑɑn ni. U Bijɑ mɑnŋ pɑɑk e k t nyii dɑɑbs ni k biɑ lɑ biit nyikcɑbu. Klistu e tie Yennu ninnɑɔnŋ. T sɑɑ fit lɑ’u nɑn t ninbinɑ, ŋɑɑn Yennu ŋɑnin, t kɑn fit lɑ’u. Klistu e tie Yennu Bijɑkpel. Ŋuɑ e mɔk yiikuo lin nbɑ kul k Yennu nɑn nɑ pɑɑk, lin nbɑ kul k u nɑn tinŋ nɑ pɑɑk, nɑn lin nbɑ kul k u nɑn sɑnpɑɑpo, lin nbɑ kul k t sɑɑ fit lɑ, nɑn lin nbɑ kul k t kɑn fit lɑ, nɑlnbiit yiikuonbɑ nbɑ be sɑnpɑɑpo, nɑlnbiit kpɑnbɑlɑ, nɑlnbiit bɑtnbɑ, nɑlnbiit kpɑɑkɑ, niib nbɑ mɔk nɑlnbiit pɑnŋ. Yennu din te k Klistu nɑn bont kul k bont kul tie u yɑl. U din be k bont kul dɑɑ kɑɑ, k u pɑɑk e k bonn kul be l yiɑl ni. Ŋuɑ e tie gbɑnɑnt nɑ yul. U mɔtɑɑɔk niib e tie l gbɑnɑnt. Ŋuɑ e din piin bonn kul. Ŋuɑ e din sint fiil kuun ni, ɑ k bonn kul ni wuu tie sinsinn yuɑ. Yennu pɑl din mɑn u pɑɑk. L pɑɑk k u din jii u binbenŋ kul, k tien u Bijɑ ni. Yennu jii ŋuɑ e k te k mɑnu bɑɑl ŋuɑ nɑn *dulnyɑ ŋɑɑtieb sinsuuk ni. U Bijɑ nbɑ din kpo dɑpunpunn pɑɑk nɑ, Yennu tien dulnyɑ ŋɑɑtieb mɑnu: bin nbɑ be tinŋ pɑɑk, nɑn bin nbɑ be sɑnpɑɑpo. Siɑn-yuo, i din fɔk nɑn Yennu k din tie u dɑtɑi e i dudukbiit nɑn i tuonbiit pɑɑk. Ŋɑɑn mɔtɑɑnɑ, u Bijɑ nbɑ din kpɑnt nilɔ k tɑn kpo nɑ pɑɑk, u ji te k l mɑn yinm nɑn ŋuɑ sinsuuk ni ɑ wun jii’i k yii tie niŋɑnm, k dɑɑ mɔk jɑknt nɑn biit u buol ni. L sii tie nnɑ e l i tie k i biɑl i yɑdɑ ni k sie cib, k k fɔli nyi dindɑnn nbɑ k i lɑ lɑbɑmɑnn nbɑ k i din gbɑt nɑ ni. B din muɑntl lɑbɑmɑnn mɑnŋ k tien niib kul nbɑ be tingbounŋ nɑ ni e. Min Pɔul, n tie l tuontunnɔ e. K mɔtɑɑnɑ n mɔk pɑlpienn fɑlɑ nbɑ k n di i pɑɑk nɑ ni, k mɑɑn mɑɑ di fɑlɑ mɑnŋ biɑnŋ nbɑ, n tontl Klistu fɑlɑ dinu nbɑ tenn u gbɑnɑnt pɑɑk nɑ e. Gbɑnɑnt mɑnŋ e tie u mɔtɑɑɔk niib nɑ. K Yennu nbɑ tul’n tuonn mɑnŋ ɑ n tun nɑ, ŋuɑ e tien’n Klistu gbɑnɑnt nbɑ tie u mɔtɑɑɔk niib nɑ tuontunnɔ, ɑ n muɑnt Yennu mɑɑn munn k tul’i. Bɑli mɑnŋ e tie wuol ni mɑɑn nbɑ k Yennu din wuon siɑn-yuo, k nibuolu kul k bɑnn’l, ŋɑɑn k u tɑn fiit wɑnn u niib mɔtɑɑnɑ. Yennu din tun nnɑ, k mɑɑn u lol, ɑ wun wɑnn u niib nɑ, bɑnnu nbɑ k l wuol ni mɑɑn nɑ mɔktuk nbɑ yɑb bonciɑnn k tul niib kul ɑ. L wuol ni mɑɑn tie ɑ Klistu be i ni k i mun mɔk dindɑnn nɑn i sɑɑ lɑ Yennu *yudɑnt nɑ. Klistu mɑnŋ po e k t muɑntl, k kpɑɑn suɑ kul ɑ, k wɑnt suɑ kul nɑn yɑn buolu kul, ɑ bii kpɑɑtl k cie Klistu ni k bɑɑl Yennu buol ni. Lin nbɑ nɑ pɑɑk k n lek yɑbi k tuun nɑn pɑnciɑɔnŋ nbɑ nyi Klistu buol k tuun n ni nɑ. N luon k yin bɑnn mɑɑ gbɑɑ yinm nɑn Lɑodiise tieb pɑɑk biɑnŋ nbɑ e, nɑn bin nbɑ dɑɑ k mi k lɑ’n nɑn b ninbinɑ nɑ. N yɑɑ i pɑlɑ n cie e, k yin lɑkn tɑɑn lieb nɑn lonm, kii mɔk dindɑnn kul nbɑ bɑɑt nɑn bɑlmɔni minu. Nnɑ e kii sii mi Yennu wuol ni lɑbɑɑl nbɑ tie *Klistu tiɑɔnŋ nɑ. Klistu ni e k Yennu din bɔl yɑn nɑn minu mɔktuk nbɑ nyii Yennu mɑnŋ buol ni nɑ. L pɑɑk e te k n yien’i, i dɑɑ te k suɑ n jii mɔmɑnt k kpɑnn’i, k mɑɑn mɑɑ lek k be i penŋ nɑn n gbɑnɑnt nɑ, ŋɑɑn n be nɑn’i n dudukt ni, k n pɑl pien i pɑɑk mɑɑ lɑ yɑɑ tuun nɑn lieb fɑnu biɑnŋ nbɑ nɑ, nɑn yɑɑ tien Klistu yɑdɑ nɑn bɑlmɔni, k i yɑdɑ mɔk pɑnŋ biɑnŋ nbɑ nɑ. Biɑnŋ nbɑ k i ponŋ din gɑɑl Yiesu Klistu nɑn u tie Yonmdɑɑnɔ nɑ, ii be u ni nnɑ mɑn, k sikn i yɑdɑ jiinɑ Yennu ni, k jii i binbenŋ kul k gɑɑn u pɑɑk, k i yɑdɑ ii be u ni, k i yɑdɑ ii mɔk pɑnŋ nɑn Epɑflɑɑs nbɑ din wɑnn’i biɑnŋ nbɑ nɑ, kii tien Yennu niipuouk yuo kul ɑ. I dɑɑ te k suɑ diɑ nisɑɑlk yɑn nɑn kpinkpɑnn-yɑnɑ k kpɑnn’i. L dudukt nyii nisɑɑli tuonɑ ni nɑn tingbounŋ nnɑ nɑlnbiit buol e. L k nyii Klistu buol ni kɑɑ, k mɑɑn Klistu gbɑnɑnt ni e k Yennu be nɑn u yiikuo kul, k i mun gɑɑl u binbenŋ kul. Ŋuɑ e mɔk yiikuo nɑlnbiit kul nbɑ be, k mɔk yiikuo nɑn pɑnŋ, nɑ pɑɑk. Yɑɑ be u ni nɑ pɑɑk, k b pot’i, ŋɑɑn l k tie nisɑɑlk nuu kɑɑ pot’i. Klistu e pot’i, ɑ wun nyinn nisɑɑli dudukt nbɑ be i ni, k niɑn biit tumu nɑ. k mɑɑn i Yennu nyunwulu ni nɑ, b din pii’i nɑn Klistu e, k i biɑ fiil kuun ni nɑn’ɔ. Lin nbɑ nɑ kul din tien k mɑɑn i din tien yɑdɑ Yennu pɑnŋ nbɑ din fiin’ɔ kuun ni nɑ ni e. I din tie kpienm e siɑn-yuo, i biit nɑn yɑɑ din k mɔk *punpotu k k tie Yennu niib nɑ pɑɑk. Ŋɑɑn mɔtɑɑnɑ Yennu nyik cɑb t biit e, k i ji mɔk mɑnfuol Klistu ni. Yennu yet ɑ u ji kɑn jii kɑdɑɑɔk nbɑ k t biit din diɑn l ni nɑ, k tun nɑn’n tuonn. L kɑdɑɑɔk din tie t biit kɑdɑɑɔk o, k u din te k l tien yɑnn, wɑɑ din kpɑɑ Yiesu dɑpunpunn pɑɑk nɑ Klistu din nyɑnn nɑlnbiit sɑɑkɑb nɑn nɑlnbiit bɑtnbɑ nbɑ mɔk yiikuo nɑn pɑnŋ nɑ. U din nyinn b kul pɑɑnu ni k te k b sonm ɑ niib n lɑ’b wɑɑ nyɑnn nyɑnnu dɑpunpunn pɑɑk nɑ pɑɑk. L pɑɑk, i dɑɑ te k suɑ n bu i buut yɑɑ di lin nbɑ ɑmi yɑɑ nyu lin nbɑ nɑ pɑɑk, ɑmi jɑɑnti jɑɑnm, ɑmi ŋmɑɑpɑɑnŋ dɑɑ, ɑmi fuondɑɑ pɑɑk. L *senni tie yun-yunŋ o k wɑnt nɑn siɑl bɑɑt, ŋɑɑn bɑlmɔni lin nbɑ bɑɑt tie Klistu e. I yɑbl k dɑɑ te k suɑ n bɑɑl k kpɑnn’i k fɑt i nyɑnnu nɑ: bin nbɑ mɔk fɑɑk sikn-n-mɔnŋ nɑn bin nbɑ jiɑntl mɑlɑkɑɑnbɑ, nɑn bin nbɑ duu yelnti pɑɑk nɑ. Ŋɑnm e dont b mɔnŋ nɑn nisɑɑli dudukt. L dɑnm k gɑɑl nɑn Klistu nbɑ tie yul nɑ kɑɑ. Ŋɑɑn Klistu mun e te k gbɑnɑnt lɑɑt jiet, k tɑɑnt jiinɑ nɑn tuktɑ k l kpɑɑtl nɑn Yennu nbɑ luon biɑnŋ nbɑ nɑ. I libn k kpo nɑn Klistu wɑɑ, k ji k be tingbounŋ nɑ yiikuo ni. Ŋɑnn, bee te k i be k l nɑɑn nɑn i tie tingbounŋ nɑ yɑb e nɑ? Bee te k i wɑɑ nisɑɑli senni nbɑ yɑɑ ɑ: «A dɑɑ jikt nɑ,» ɑmi: «A dɑɑ lemi lin nbɑ nɑ,» ɑmi: «A dɑɑ siit lin nbɑ nɑ.» Senni mɑnŋ piɑk lin nbɑ k nilɔ sɑɑ sii k lin biil ɑmi lin nbɑ k nilɔ sɑɑ di k tenn k lin biil nɑ po e. Senni nɑn l tumiiu mɑnŋ nyii nisɑɑli buol ni e. Setk nɑn mɔni, l senni nɑɑn nɑn l nyii mɔmɔnm minu ni nɑ e k wɑnt nɑn niib i jiɑntl mɑlɑkɑɑnbɑ, kii mɔk sikn-n-mɔnŋ binbenŋ nɑn niib nbɑ sii mɑbnt b gbɑnɑnt biɑnŋ nbɑ. Ŋɑɑn l k mɔk pɑnŋ nbɑ sɑɑ te k tin nyɑnn t dudukbiit nbɑ be t gbɑnɑnt ni nɑ. I din fiil nɑn *Klistu kuun ni, l pɑɑk i jii i pɑlɑ k gɑɑn nɑn *Yendɔunŋ ni bonɑ, siɑn nbɑ k Klistu kɑl Yennu niidiitu po nɑ. I lol i dudukt nɑn lenŋ bonɑ nɑ, ŋɑɑn dɑɑ loln nɑn tingbounŋ nɑ bonɑ kɑɑ, k mɑɑn i ponŋ din kpo wɑɑ, k i mɑnfuol bɔl Yennu buol ni nɑn Klistu yɑl nbɑ bɔl biɑnŋ nbɑ nɑ. Klistu e tie i mɑnfuol. Yuo nbɑ k u sɑɑ jen nɑ, i mun tɑn sii be nɑn’ɔ u *yudɑnt ni. L pɑɑk, yin kpi lin nbɑ tie tingbounŋ nɑ binbenŋ i ni, lin nbɑ tie boncunconsn nɑn jɑknt tuonɑ nɑn niɑnciɑɔnŋ nɑn dudukbiit nɑn niijeu (k mɑɑn niijeu tie pɑtmɑnnu buolu yenn). K mɑɑn biit nɑ buolu pɑɑk e k Yennu wutuol tɑn sɑɑ do bin nbɑ k sɑk u mɔb nɑ pɑɑk. Siɑn-yuo i din tuun l buolu, yuo nbɑ k i din tie biit mɑnŋ dɑɑbɑ nɑ. Ŋɑɑn mɔtɑɑnɑ i ji fiɑn lin nbɑ kul tie wutuol nɑn lin nbɑ sɑɑ bien nilɔ pɑl nɑn tonu k lu. I dɑɑ te k siɑl ɑ sukt nɑn mɔbonbiit nyi i mɔi ni. I dɑɑ fɑ fɑɑk k tien i lieb, k mɑɑn i ponŋ liɑt i binbenkpelk nɑ nɑn l tuonɑ wɑɑ, k ji liɑ binbenpɑɑnŋ e. Binbenpɑɑnŋ nɑ e k Yennu nbɑ tie l nɑntuɑ nɑ pɑntl yuo kul ɑ, k l nɑɑn u mɔnŋ binbenŋ, ɑ wun te k yin bɑnn’ɔ setk nɑn mɔni. L pɑɑk, bɔktu ji kɑɑ bin nbɑ tie *Suifnbɑ nɑn bin nbɑ k tie Suifnbɑ sinsuuk ni. Bin nbɑ pot punɑ nɑn bin nbɑ k pot kul ɑ ji k mɔk bɔktu nɑn lieb. Bɔktu ji kɑɑ muuk ni niib nɑn duo ni yɑb sinsuuk ni. Bɔktu biɑ kɑɑ dɑɑbɑ nɑn yent-n-mɔnŋ dɑnm sinsuuk ni, ŋɑɑn Klistu kuukuɑ siɑn, k u be i kul ni. I tie Yennu nigɑnnkɑb e. U din luon’i k din lukt’i, ɑ ii tie u tiɑɔnŋ niib. L pɑɑk, ii tiin lieb ninbɑɑɔk bonciɑnn mɑn, kii mɔk bulcint, kii centl lin nbɑ k i mɔk nɑ nɑn’m kii tie sikn-n-mɔnŋ dɑnm, kii luon mɑnu, kii mɔk pɑlmɑɑsl. Kii di i lieb suklu. K suɑ i mɔk bunbulmi u luɑ pɑɑk, wun nyik cɑb’ɔ. L kpɑɑ tɑlɑs k yin mun nyik cɑb i lieb nɑn Yonmdɑɑnɔ nbɑ ponŋ nyik cɑb’i biɑnŋ nbɑ nɑ. Lin nbɑ mɑntk siɑn tie yii mɔk lonm e. Ŋɑnn e sɑɑ te k yii mɔk mɔtɑɑɔk fɑnu nɑn lieb. I ŋɑɑn k Klistu mɑnu ii diɑ i pɑlɑ kii ŋmɑktl’i. Yennu lɑkn yiin’i gbɑnɑn-yent kuɑ ni ɑ yii mɔk mɑnu mɑnŋ e. Ii tien Yennu niipuouk mɑn. I ŋɑɑn k Klistu mɑɑn nɑn l mɔktuk kul ii be i pɑlɑ ni, k yii wɑnt i lieb, kii biɑ kii kpɑɑn i lieb nɑn i yɑn kul. I jii *yɑni nbɑ tie Yennu mɑɑn ni *yɑni, yɑni nbɑ piɑk Klistu po, nɑn yɑni nbɑ k Foŋɑnm tien’i ɑ yin tumi i mɔnŋ k biɑ kpɑɑn lieb nɑ. Ii yiin l yɑni kii tien Yennu nipuouk nɑn i pɑlɑ kul ɑ. Lin nbɑ kul k i tie, ii tie mɑn Yonmdɑɑnɔ Yiesu Klistu sɑnn ni. Lin nbɑ kul k i yien, ii yien mɑn Yonmdɑɑnɔ Yiesu Klistu sɑnn ni, kii tien Bɑɑ Yennu niipuouk Yiesu tuonɑ pɑɑk. Puob, i sikn i mɔnŋ k tul i sɔlb, nɑn lɑɑ nɑɑn Yonmdɑɑnɔ niib i tuun u tuɑnn ni bɑnnu nbɑ nɑ. Puosɔlb, ii luon i puob mɑn, k dɑɑ diɑ nibisn benu k be nɑn’m. Wɑɑs, ii sɑɑk i dɑnm mɔi bonsiɑl kul ni, k mɑɑn ŋɑnn e pent Yennu pɑl ni. Bɑɑnbɑ, i dɑɑ dont i wɑɑs wutuol, k b yɑn nyi. Dɑɑbɑ, ii sɑɑk i yonmdɑnm mɔi bonsiɑl kul ni, k l dɑɑ tie yuo nbɑ k b goli’i nɑ kuukuɑ kɑɑ, ɑ yin penn b pɑlɑ k gɑɑl pɑku, ŋɑɑn kii tuun nnɑ nɑn ninmɔnn yɑɑ bɑɑkt Yonmdɑɑnɔ biɑnŋ nbɑ nɑ pɑɑk. Yɑɑ tuun lin nbɑ kul, yin tun nɑn ninmɔnn nɑn i tuun tien Yonmdɑɑnɔ e, k k tuun tien nisɑɑli kɑɑ. Ii tiɑn mɑn nɑn Yonmdɑɑnɔ mɑnŋ tɑn sɑɑ tul’i nyuɑt nbɑ tie u niib yɑl. K mɑɑn Klistu e tie bɑlmɔni Yonmdɑɑnɔ, k i tuun tien’ɔ. Wun nbɑ tuun bonbiil tɑn sɑɑ gɑɑl u nyuɑt, wɑɑ tuun bonbiil nɑ pɑɑk, k mɑɑn Yennu k mɔk luktn. Yonmdɑnm, ii diɑ i dɑɑbɑ fɑnu mɑn, kii biɑ kii diɑ’b bɑnnu nbɑ tuok, k mɑɑn i mi nɑn i mɔnŋ mun mɔk Yonmdɑɑnɔ *Yendɔunŋ ni. Ii yɑbi nɑn Yenmiɑlu nɑn ninmɔnn mɑn, k dɑɑ nyikt, kii tien Yennu niipuouk. kii biɑ kii mei’ɔ kii tien’t ɑ wun luot gɑnn k tul’t k tin fit fiit *Klistu wuol ni mɑɑn nbɑ te k n be dɑnsɑlk nɑ. Ŋɑnn ii mei Yennu kii tien’n k n fit pɑk nɑn lɑɑ kpɑɑ tɑlɑs nɑn min pɑk fɑnu biɑnŋ nbɑ nɑ. Ii mi mɑn i binbenŋ nbɑ tie biɑnŋ nbɑ k tul bin nbɑ k tie Klistu niib nɑ, k jii i yuo kii tuun fɑnu yuo kul nbɑ k Yennu luot sɔnu k tul’i. Ŋɑɑnt k i mɑɑn i mɑn yuo kul, k niib i niɑn i mɑɑn, k yii mi yɑɑ sɑɑ jiin suɑ kul buboit biɑnŋ nbɑ. T nɑɑ bilonkɑk Tiikiik, wun nbɑ tuun nɑn mɔmɔnm yuo kul, k biɑ tie t tuontunluɑ Yonmdɑɑnɔ pɑɑk nɑ sɑɑ yet’i t lɑbɑɑl. N tuun’ɔ i buol ni, ɑ wun yet’i t kul nbɑ be biɑnŋ nbɑ, k i pɑlɑ n cie. U tɔk nɑn Onesiinm, wun nbɑ tie t nɑɑ bik nbɑ tie mɔmɔnm dɑɑnɔ k biɑ tie i yuɑ nɑ. B sɑɑ yet’i bonsiɑl kul ɑ nbɑ tuun nnɑ nɑ. Aliistɑɑlk, wun nbɑ be nɑn’n dɑnsɑlk ni nɑ fuont’i, k Bɑɑlnɑɑbɑɑs puolɔ bijɑ Mɑɑlk mun biɑ fuont’i. (I dɑɑn ponŋ gɑɑl n kpɑɑni, ɑ Mɑɑlk ii tɑnŋ i bɑɑl i buol ni, yin gɑɑl’ɔ.) Yiesu, wun nbɑ k b yi’u Sustus nɑ mun tien’i u fuonti. B bɑntɑ nbɑ nɑ kuukuɑ e tie *Suifnbɑ nbɑ ji wɑɑ Klistu k tuun nɑn’n Yennu nɑɑn tuonɑ mɑnŋ ni. K b mɑɑk n pɑl. Epɑɑflɑɑs, wun nbɑ mun biɑ tie i duo ni nilɔ k biɑ tie Yiesu Klistu tuontunnɔ nɑ, fuont’i. U mei Yennu nɑn ninmɔnn yuo kul k tien’i, ɑ Yennu n te k yin set kenken, kii tie nisubltieb nbɑ tuun Yennu lonm nɑ. N dii u *siɑlɑ nɑn u set tun bonciɑnn k sonm yinm nɑn Lɑodiise duo ni niib nɑn Hielɑpoliis duo ni niib. T yuɑk Luk, wun nbɑ tie bɑɑt-teblɔ nɑ, ŋuɑ nɑn Demɑɑs fuont’i. I fuont t nɑɑ wɑɑs nbɑ be Lɑodiise nɑ, k biɑ fuont t niipuo Ninfɑ nɑn Klistu mɔtɑɑɔk niib nbɑ lɑkn lieb u ŋɑɑk ni ɑ bii jiɑntl Yennu nɑ. I lii kɑdɑɑɔk nɑ gbenn yuo nbɑ, yin yɑbl k bin lii k tul Klistu mɔtɑɑɔk niib nbɑ be Lɑodiise nɑ, k biɑ mun lii kɑdɑɑɔk nbɑ sɑɑ nyi Lɑodiise nɑ. I yet Alkiip ɑ wun yɑbl u mɔnŋ kii tuun tuonn nbɑ k u tun Yonmdɑɑnɔ sɑnn ni nɑ k gbenn. N diɑn lin nbɑ nɑ nɑn n tiɑɔnŋ nuu e: Min Pɔul fuont’i. I dɑɑ tɑnmt nɑn n be dɑnsɑlk e. Yennu ii mɔk ninkpɑbɑɔnŋ nɑn’i. Min Pɔul nɑn Siilɑɑs nɑn Tiimuote dɑ kɑdɑɑɔk nɑ k tien Yiesu mɔtɑɑɔk niib nbɑ be Tesɑɑluoniik k tie Bɑɑ Yennu nɑn Yiesu Klistuyɑb nɑ. Yennu ii mɔk ninkpɑbɑɔnŋ nɑn’i k biɑ tul’i mɑnu. T tien Yennu niipuouk i kul ɑ pɑɑk, k tiɑn i po yuo kul t Yenmiɑlu ni. T Bɑɑ Yennu tuɑnn po, t tiɑn biɑnŋ nbɑ k i tien yɑdɑ k tuun tuonɑ, nɑn i lonm nbɑ te k i tuun lin nbɑ nɑn biɑnŋ nbɑ k i dindɑnn cie nɑn t Yonmdɑɑnɔ Yiesu *Klistu. T nɑɑ wɑɑs, t mi nɑn Yennu e luon’i k ponŋ lukt’i ɑ yii tie u yɑb, k mɑɑn t lɑbɑmɑnn din k bɑɑl i buol ni nɑn mɔbonɑ kuukuɑ kɑɑ, ŋɑɑn l din bɑɑl nɑn yiikuo nɑn Foŋɑnm, k i din fit bɑnn nɑn l tie mɔni e k bilsuk kɑɑ. I mi tɑɑ din tuu be i penŋ biɑnŋ nbɑ, k luon tin fit sonm’i. I din toki tinm nɑn Yonmdɑɑnɔ. I lek din lɑ fɑlciɑɔnŋ, ŋɑɑn i din gɑɑl lɑbɑmɑnn mɑnŋ nɑn pɑlpienn nbɑ nyii Foŋɑnm buol ni nɑ e. K yɑɑ din tuun biɑnŋ nbɑ nɑ, din wɑnn bin nbɑ kul tie Klistuweilɑ k be Mɑɑseduɑnn nɑn Akɑɑyi tini ni nɑ, bɑɑ sii tuun biɑnŋ nbɑ. Yonmdɑɑnɔ lɑbɑmɑnn mɑnŋ din nyii i buol e, k lin Mɑɑseduɑnn nɑn Akɑɑyi tini ni, k lin nbɑ biɑ pukn, yɑɑ tien Yennu yɑdɑ biɑnŋ nbɑ ponŋ lin lokɑ kul po wɑɑ. L pɑɑk, t ponŋ ji kɑn fit pɑk siɑl k pukn. Niib nɑ kul piɑk jiint yɑɑ din gɑɑl’t biɑnŋ nbɑ nɑ, nɑn yɑɑ nyik pɑtɑ ŋɑɑn tunn bɑɑl Yennu buol, ɑ yii tuun kii tien bɑlmɔni Yennu nbɑ fo nɑ. I guu u Bijɑ Yiesu nbɑ sɑɑ nyi *Yendɔunŋ ni nɑ jennu e, wun nbɑ k u din fiin’ɔ kuun ni, wun nbɑ fɑt’t Yennu wutuol nbɑ tɑn sɑɑ bɑɑl nɑ ni nɑ. T nɑɑ wɑɑs, i mɔnŋ mi nɑn tɑɑ din bɑɑl i buol ni nɑ, l tɑn k tien yɑnn. I mi nɑn tɑɑ din be Fiiliip duo ni nɑ, b din dint’t fɑlɑ k suki’t. Nɑn nisiɑb nbɑ lek din k tɑɑ t po cɑin nɑ, ŋɑɑn Yennu din cie t pɑlɑ k t muɑnt lɑbɑmɑnn tul’i. K mɑɑn tɑɑ din yet’i lin nbɑ nɑ, t din k kpɑnn t mɔnŋ ɑ t bɔnt suɑ kɑɑ, l biɑ din k tie lin nbɑ nyii dudukbiit ni kɑɑ, k t biɑ din k kpɑnn suɑ. Ŋɑɑn t piɑk yuo kul nɑn Yennu nbɑ luon bɑnnu nbɑ nɑ e, k mɑɑn ŋuɑ e bikn’t k biɑ tien lɑbɑmɑnn nɑ t nii ni. T k luon k tin penn nisɑɑli pɑlɑ kɑɑ, ŋɑɑn t luon tin penn Yennu nbɑ goli t pɑlɑ ni dudukt nɑ pɑl e. I mɔnŋ mi fɑnu nɑn Yennu tie t siɑlɑɑdɑɑnɔ nɑn t din k bɑɑl i buol ni nɑn mɔmɑnt, ɑmi mɑɑn nbɑ dɔkn t niɑnciɑɔnŋ kɑɑ. T din k kpɑɑn, ɑ suɑ n pɑk’t kɑɑ, yinm ɑmi i lieb buol. Tɑɑ tie *Klistu tuomiinbɑ nɑ, t din mɔk yiikuo nbɑ k t din bo sɑɑ fit wɑnn’i yɑɑ sɑɑ tun lin nbɑ. Ŋɑɑn t din be i sinsuuk ni suon nnɑ e nɑn puo nbɑ tuu diɑ u wɑɑs biɑnŋ nbɑ nɑ. Tɑɑ din luon’i bonciɑnn nɑ, t din k tien siil ɑ t tul’i lɑbɑmɑnn nbɑ nyii Yennu buol nɑ kuukuɑ kɑɑ, ŋɑɑn t biɑ din luon k tin tul’i t mɔnŋ mɔnŋ mɑnfuol e, k mɑɑn i mɑntk tien t nilonkɑb k l yɑbt ɑ. T nɑɑ wɑɑs, setk nɑn mɔni e, i tiɑn tɑɑ din tuun tuonɑ nbɑ pɑɑl k lɑɑt fɑlɑ biɑnŋ nbɑ. T din tuun tuonn yennu nɑn nyiɑɔk ɑ tin fit muɑnt Yennu lɑbɑmɑnn k tul’i, ɑ t dɑɑ tie jikl i pɑɑk. Yinm nɑn Yennu e tie t siɑlɑɑdɑnm k jiin tɑɑ din be nɑn’i nɑn binbeyienŋ nɑn yentinu, k suɑ k fit tɑɑl’t. I mi nɑn t din be nɑn i suɑ kul, nɑn bɑɑ nɑn u wɑɑs binbenŋ nɑ e, k cien k biɑ mɑɑnt i pɑlɑ, k tun kpɑɑn’i ɑ ii mɔk binbensiɑk nbɑ sɑɑ gbuo Yennu nunm, wun nbɑ yiin’i ɑ yin kuɑ u tiɑɔnŋ nɑɑn ni k gɑɑl u dontl. T biɑ tien Yennu niipuouk yuo kul ɑ, k mɑɑn tɑɑ din bɑɑl nɑn Yennu mɑɑn i buol ni, i din k gbɑt’l k gɑɑl’l nɑn nisɑɑlk yɑl nɑ kɑɑ, ŋɑɑn i din gɑɑl’l nɑn l tie Yennu yɑl nɑ e. K l set tie ŋɑnn e nɑn bɑlmɔni, k tuun yinm nbɑ tie Klistuweilɑ nɑ pɑlɑ ni. T nɑɑ wɑɑs, muksbuolu nbɑ bɑɑl’i nɑ, l muksbuolu mun din bɑɑl Klistu mɔtɑɑɔk niib nbɑ be Suude tinŋ ni, k tie Yennu yɑb k biɑ tien Yiesu Klistu yɑdɑ nɑ nnɑ e. I mɔnŋ mɔnŋ niib nbɑ muks’i biɑnŋ nbɑ nɑ, *Suifnbɑ mun din muks Yiesu mɔtɑɑɔk niib mɑnŋ nnɑ e. Ŋɑnm Suifnbɑ e din kpii Yonmdɑɑnɔ Yiesu nɑn *Yennu sɔkniinbɑ, k biɑ muks tinm nɑ. B k penn Yennu pɑl ni, k biɑ tie niib kul dɑtɑi e. B yɑbi b mɔnŋ pɑɑk, ɑ bin guɑl’t k t dɑɑ muɑntl Yennu lɑbɑmɑnn k tien bin nbɑ k tie Suifnbɑ nɑ, ɑ bin lɑ fielu. B ji tun b biit nbɑ k b tuu tuun nɑ gbenn ɑ, k mɔtɑɑnɑ Yennu wutuol bɑɑl b pɑɑk. T nɑɑ wɑɑs, t yɑt lieb k l wei wɑɑn ɑ. Setk nɑn mɔni, t k yɑt lieb dudukt ni kɑɑ, ŋɑɑn t k lɑɑt lieb e, t mɔnŋ mɔnŋ siɑn k tin ŋɑnm lɑ’i. L pɑɑk t ŋɑnm yɑbl ɑ t fit bɑɑl i buol ni. T set din luon tin bɑɑl i buol ni. Min Pɔul, n mɔnŋ dɑɑn yɑbl ɑ n bɑɑl i buol ni nɑn tɑɑl munŋɑ nɑ wɑɑ, ŋɑɑn *Sɑɑtɑn guɑl’t sɔnu. Ŋmee tie t dindɑnn nɑn t pɑlpienn nɑn t dontl i? Dɑɑl nbɑ k t Yonmdɑɑnɔ Yiesu tɑn sɑɑ jen nɑ, yinm kɑɑ sii be u tuɑnn ni ii? Setk nɑn mɔni, i pɑɑk e k t mɔk dontl nɑn pɑlpienn. L pɑɑk, lɑɑ ji dɑɑn tɑn pɑɑk t nii yuo nbɑ, t dɑɑn sɑk biɑl Atenn duo ni e t kuukuɑ, k dɑɑn tun t nɑɑ bik Tiimuote, wun nbɑ k tinm nɑn ŋuɑ tɑɑn tuun k tien Yennu, k muɑntl *Klistu lɑbɑmɑnn ɑ wun cie i yɑdɑ k kuɑn’i pɑlɑ, k lin te k i suɑ dɑɑ ŋmɑt puol muksuk nɑ pɑɑk. I mɔnŋ mi nɑn Yennu e din te k l muksuk bɑɑl’t, k mɑɑn tɑɑ din dɑɑ be i buol ni yuo nbɑ nɑ, t din yet’i ɑ b tɑn sɑɑ muks’t, k mɔtɑɑnɑ i mɔnŋ mi fɑnu nɑn l set tɑn bɑɑl tie nnɑ e cib cib. L pɑɑk, lɑɑ dɑɑn tɑn pɑɑk n nii yuo nbɑ, k n dɑɑn tun Tiimuote, ɑ wun sɑɑ lɑ i yɑdɑ nbɑ tie bɑnnu nbɑ. N dɑɑn tiin nɑn pɑsiɑl *Sɑɑtɑn bikn’i k t tuonn nɑ n tien yɑnn e. Mɔtɑɑnɑ Tiimuote ponŋ jen ɑ, k tul’t lɑbɑɑl nbɑ penn t pɑlɑ ni k jikt sɑɑ i yɑdɑ nɑn i lonm po. U yet’t ɑ i kpɑn tun tiɑn t po e fɑnu, k luon yin lɑ’t nɑn tɑɑ luon tin lɑ’i biɑnŋ nbɑ nɑ. T nɑɑ wɑɑs, t be fɑlɑ nɑn pɑlbiil kul ni, ŋɑɑn tɑɑ gbɑt i yɑdɑ po, l te k t lɑ pɑlcienn. Mɔtɑɑnɑ, t ŋɑnm be t mɑnfuol ni nɑn yɑɑ set cib Yonmdɑɑnɔ ni nɑ pɑɑk. Tɑɑ mɔk pɑlpienn Yennu tuɑnn i pɑɑk nɑ, nlee k t sɑɑ fit tul’ɔ niipuouk k lin jɑnŋ i? Nyiɑɔk nɑn yennu kul t mei’ɔ nɑn t pɑlɑ kul ɑ, ɑ wun te k tin fit pukn’i lin nbɑ tenn i yɑdɑ ni. T Bɑɑ Yennu tiɑɔnŋ nɑn t Yonmdɑɑnɔ Yiesu n ŋɑnm sɔnu tul’t k tin fit bɑɑl i buol ni. Yonmdɑɑnɔ n te k yɑɑ luon i lieb nɑn suɑ kul biɑnŋ nbɑ n yɑbt bonciɑnn nɑn tɑɑ mun luon’i biɑnŋ nbɑ nɑ. Nnɑ e k u sɑɑ cie i pɑlɑ k yii tie niŋɑnm, k suɑ kɑɑ k sɑɑ fit tɑɑl’i t Bɑɑ Yennu tuɑnn ni, yuo nbɑ k t Yonmdɑɑnɔ Yiesu tɑn sɑɑ jen nɑn u yɑb kul ɑ nɑ. Tɔn, t nɑɑ wɑɑs, i din tumi t penŋ biɑnŋ nbɑ k i sii tuun k pent Yennu pɑl ni, k nnɑ e k i ji tuun. Mɔtɑɑnɑ, t bɑln’mi e k kpɑɑn’i Yonmdɑɑnɔ Yiesu sɑnn ni, ɑ ii ŋɑnmt kii tuun nnɑ mɑn, k mɑɑn i mi kpɑɑni nbɑ k t din tul’i Yonmdɑɑnɔ Yiesu sɑnn ni nɑ. K mɑɑn Yennu luon k yii tie niŋɑnm k dɑɑ tuun boncuncontuonɑ. I suɑ kul n bɑnn bɑnnu nbɑ k u sɑɑ kuɑn puo nɑn Yennu nbɑ luon bɑnnu nbɑ nɑ, k lii biɑ kii mɔk bɑɑkl, k dɑɑ tuun nnɑ nɑn niɑnbiiuk binbenŋ nɑn bin nbɑ k mi Yennu nbɑ tuun biɑnŋ nbɑ nɑ. Suɑ dɑɑ tuun biil u luɑ nbɑ wɑɑ *Klistu nɑn l biit buolu ni, ɑmi kii ŋmɑb u luɑ. T ponŋ din yet’i l po wɑɑ, ŋɑɑn biɑ kpɑɑn’i nɑn ninmɔnn ɑ Yennu tɑn sɑɑ dɑt bin nbɑ tuun l biit buolu nɑ tubɑ. Yennu k yiin’t ɑ tii tie biitdɑnm kɑɑ, ŋɑɑn u yɑɑ tii be bɑnnu nbɑ k u tiɑɔnŋ yɑb be nɑ e. L pɑɑk, wun nbɑ yet wɑnnu nbɑ nɑ, l k tie nisɑɑlk yɑl kɑɑ k u yien, ŋɑɑn u yien Yennu nbɑ tien’i u Foŋɑnm nɑ mɔnŋ mɔnŋ e. L k kpɑɑ tɑlɑs k tin diɑn kɑdɑɑɔk k tiɑl’i yɑɑ sii luon i lieb biɑnŋ nbɑ. Yennu mɔnŋ e ponŋ wɑnn’i biɑnŋ nbɑ k i sii luon i lieb. K i ponŋ set tuun l biɑnŋ e nɑ, k luon t nɑɑ wɑɑs kul nbɑ be Mɑɑseduɑnn tinŋ ni nɑ. Ŋɑɑn, t nɑɑ wɑɑs, t ŋɑnm k bɑln’mi e ɑ i ŋɑnm kot. I yɑbl i mɔnŋ kii be suon nnɑ, k i bɑkɑ i be i mɔnŋ tuonɑ ni, kii tuun i tiɑɔnŋ tuonɑ kii di, nɑn tɑɑ ponŋ din yet’i biɑnŋ nbɑ sinsinn nɑ. Ŋɑnn e sɑɑ te k bin nbɑ k tie Klistuweilɑ nɑ n tul’i nibɑɑkl, k l ji kii kpɑɑ tɑlɑs k yin juɑb i mɔnŋ k denn suɑ i bonlonkɑ pɑɑk. T nɑɑ wɑɑs, t luon k yin bɑnn bɑlmɔni e k jikt sɑɑ Klistuweilɑ nbɑ kpo nɑ po, k dɑɑ mɔk pɑlbiil nɑn bin nbɑ k mɔk dindɑnn nɑ. T tien yɑdɑ nɑn Yiesu din kpo ŋɑɑn biɑ fiil kuun ni wɑɑ, k t biɑ tien yɑdɑ nɑn Yennu tɑn sɑɑ fiin Yiesu nɑn bin nbɑ tien’ɔ yɑdɑ ŋɑɑn kpo nɑ kuun ni wɑɑ. Yonmdɑɑnɔ mɑɑn nbɑ wɑnt biɑnŋ nbɑ nɑ, t wɑnn’i nɑn Yonmdɑɑnɔ mɑnŋ jenu dɑɑl, tinm nbɑ tɑn sii be t mɑnfuol ni nɑ kɑn dɔnŋ bin nbɑ din kpo nɑ. k mɑɑn Yonmdɑɑnɔ tiɑɔnŋ tɑn sɑɑ nyi *Yendɔunŋ ni k sik nɑn tintiɑnpɑɑli, nɑn mɑlɑkɑ sɑɑkuɑ kunkɔl e, nɑn Yennu kɑtkɑɑk mɔni, k Klistuweilɑ nbɑ din kpo nɑ tɑn sɑɑ fiil sinsinn. L puolpo k tinm nbɑ tɑn sii be t mɑnfuol ni nɑ nɑn ŋɑnm tɑn sɑɑ cet Yonmdɑɑnɔ sɑnpɑɑpo sɑnpɑgbɑnt ni k t kul tɑn sɑɑ tɑɑn nɑn Yonmdɑɑnɔ kii be nɑn yuo nbɑ kɑɑ gbennu. L pɑɑk, ii diɑ mɑɑn nɑ kii cien i lieb pɑlɑ mɑn. T nɑɑ wɑɑs, l k kpɑɑ tɑlɑs k tin diɑn wɑnn’i yuo nbɑ k lin nbɑ nɑ tɑn sɑɑ tun, k mɑɑn i mɔnŋ ponŋ mi fɑnu nɑn Yonmdɑɑnɔ jenu dɑɑl mɑnŋ tɑn sii tie nɑn nɑn-yukɔ nbɑ tuu bɑɑt nyiɑɔk biɑnŋ nbɑ nɑ e. Yuo nbɑ k niib tɑn sii yien ɑ: «Mɑnu nɑn lɑɑfiɑ be nɑ,» l yuo mɑnŋ e k biilu tɑn sɑɑ bɑɑl’b yiɑn ɑ nɑn mɑtyiɑlu nbɑ bɑɑt puo biɑnŋ nbɑ nɑ, ŋɑɑn b tɑn kɑn fit fɑt b mɔnŋ l bɑlbiiuk ni. T nɑɑ wɑɑs, yinm k be bunbɔnn ni kɑɑ. L pɑɑk, l dɑɑl tɑn kii tie nɑn nɑn-yukɔ bɑɑlu nɑ kɑɑ i buol ni, k mɑɑn i kul tie yentu wɑɑs e. T k tie nyiɑɔk yɑb kɑɑ, k biɑ k tie bunbɔnn yɑb kɑɑ. L pɑɑk, t dɑɑ duɑ guɑnt nɑn nisiɑb nbɑ tuun biɑnŋ nbɑ nɑ, ŋɑɑn tii nyɔi kii diɑ t mɔnŋ, k mɑɑn bin nbɑ guɑnt nɑ guɑnt nyiɑɔk o, k bin nbɑ nyu dɑɑn yib nɑ mun yib nyiɑɔk. Ŋɑɑn tinm nbɑ tie yennu ni yɑb nɑ, tii diɑ t mɔnŋ, k jii yɑdɑ nɑn lonm liɑ nɑn *nɑɑgbɑnkɔnŋl nɑ, k biɑ jii fielu dindɑnn k yi’l nɑn kut-foklk nɑ. K mɑɑn Yennu k gɑnn’t ɑ wun tɑn dɑt t tubɑ kɑɑ, ŋɑɑn u gɑnn’t ɑ tin lɑ fielu t Yonmdɑɑnɔ Yiesu *Klistu pɑɑk e. Ŋuɑ e din gɑɑl t pɑɑk k kpo, ɑ t i lek i kpo ɑmi t i be u jenu yuo mɑnŋ, tinm nɑn ŋuɑ n tɑn tɑɑn kii be. L pɑɑk, ii kuɑnt i lieb pɑlɑ k tul i lieb pɑlcienn nɑn yɑɑ tuun biɑnŋ nbɑ mɔtɑɑnɑ nɑ. T nɑɑ wɑɑs, ii bɑɑkt bin nbɑ tuun tuonn i sinsuuk ni, bin nbɑ k Yonmdɑɑnɔ cɑb’b yiikuo, ɑ bii tie i yudɑnm u sɔnu ni, kii tien’i kpɑɑni nɑ. Ii tien’m nibɑɑkl nɑn lonm nbɑ yɑb, k mɑɑn b tuonɑ nbɑ k b tuun nɑ pɑɑk. I mɔnŋ i be nɑn i lieb nɑn mɑnu mɑn. T nɑɑ wɑɑs, i kpɑɑn gbɑn-nyɑkdɑnm, kii cien jɑŋmɑɑndɑnm pɑlɑ, kii sonmt tɑli, kii di suklu nɑn suɑ kul ɑ. I kpɑn dɑɑ tuun biit k jiint biit pɑɑk, ŋɑɑn i te k lii tie i lol yuo kul nɑn yin tun lin nbɑ ŋɑn k tul i lieb nɑn suɑ kul mɑn. Ii mɔk pɑlpienn yuo kul mɑn, kii mei Yennu yuo kul mɑn, kii tien Yennu niipuouk bonsiɑl kul ni, k mɑɑn ŋɑnn e tie Yennu nbɑ luon biɑnŋ nbɑ, yɑɑ be Yiesu Klistu ni nɑ. I dɑɑ biil Foŋɑnm tuonn. I dɑɑ sɑlkt *Yennu sɔkniinbɑ mɑɑn, ŋɑɑn i tuu mint ɑ k bikn bonsiɑl kul, k gɑɑl lin nbɑ ŋɑn, k lɔkt biit buolu kul ɑ. Yennu nbɑ tien’t mɑnu nɑ tiɑɔnŋ n te k yii tie u yɑb cɑin, kii diɑ i sei nɑn i mɑnfuol nɑn i gbɑnɑnt mun, k l dɑɑ mɔk biit t Yonmdɑɑnɔ Yiesu Klistu jenu mɑnŋ po. Wun nbɑ yiin’i nɑ sɑɑ sɑk tun nnɑ, k mɑɑn u tie bɑlmɔni dɑɑnɔ e. T nɑɑ wɑɑs, ii mei Yennu k tul’t mɑn. I fuont Klistuweilɑ nɑ kul ɑ k kpɑmi nɑn nɑɑtɑɑnn. Yonmdɑɑnɔ sɑnn ni k n kpɑɑn’i, i lii kɑdɑɑɔk nɑ tul Klistuweilɑ kul. T Yonmdɑɑnɔ Yiesu Klistu ii mɔk ninkpɑbɑɔnŋ nɑn’i. Min Pɔul nɑn Siilɑɑs nɑn Tiimuote dɑ kɑdɑɑɔk nɑ, k tien Yiesu mɔtɑɑɔk niib nbɑ be Tesɑɑluoniik, k biɑ tie t Bɑɑ Yennu nɑn Yonmdɑɑnɔ Yiesu Klistuyɑb nɑ. Bɑɑ Yennu nɑn Yonmdɑɑnɔ Yiesu *Klistu ii mɔk ninkpɑbɑɔnŋ nɑn’i, k biɑ tul’i mɑnu. T nɑɑ wɑɑs, l kpɑɑ tɑlɑs e nɑn tii tien Yennu niipuouk yuo kul i pɑɑk. T i tuun nnɑ, l ŋɑn, k mɑɑn i yɑdɑ mɑntk puki bonciɑnn, k yɑɑ mɔk lonm nbɑ k tien i lieb nɑ puki. L pɑɑk te k t mɔk yugontl i pɑɑk Yiesu mɔtɑɑɔk niib sinsuuk ni, nɑn yɑɑ lɑɑt muksuk nɑn fɑlɑ ŋɑɑn mɔk gbɑnkul nɑn yɑdɑ nɑ. Nɑ kul wɑnt nɑn Yennu nbɑ din senn nɑn wɑɑ sɑɑ tun bɑnnu nbɑ nɑ ŋɑn, k l pɑɑk i sɑɑ jɑnŋ nɑn yin kuɑ u nɑɑn nbɑ k i di fɑlɑ l pɑɑk nɑ ni. Yennu e tuun lin nbɑ tuok, k tɑn sɑɑ te k bin nbɑ dint’i fɑlɑ mɑnŋ nɑ n mun di fɑlɑ nnɑ, k fɑt yinm nbɑ di fɑlɑ nɑ k tul’i fuon, k mun biɑ fɑt’t k tul’t fuon. Nɑ kul sɑɑ tien yuo nbɑ k Yonmdɑɑnɔ Yiesu tɑn sɑɑ dɔkt nɑn u yɑbnt mɑlɑkɑɑnbɑ. U tɑn sɑɑ bɑɑl muu nbɑ yɑb sinsuuk ni k dɑt bin nbɑ yet bin bɑnn Yennu nɑn bin nbɑ k sɑk t Yonmdɑɑnɔ lɑbɑmɑnn nɑ tubɑ. U sɑɑ dɑt b tubɑ k biil’b yuo nbɑ kɑɑ gbennu k b sii fɔk nɑn Yonmdɑɑnɔ nɑn u yiikuo nbɑ yɑb, dɑɑl nbɑ k u tɑn sɑɑ bɑɑl k gɑɑl dontl nɑn pɑku u weilɑ kul nbɑ tien’ɔ yɑdɑ k tie u tiɑɔnŋ yɑb nɑ buol ni. I mun tɑn sii be b sinsuuk ni e, k mɑɑn i ponŋ tien mɑɑn nbɑ k t din tul’i nɑ yɑdɑ wɑɑ. L pɑɑk e k t mei Yennu yuo kul k tien’i. T mei’ɔ, ɑ wun te k yin jɑnŋ nɑn binbenŋ nbɑ k u yiin’i, ɑ i be lenŋ nɑ ni e. T mei’ɔ, ɑ wun jii u yiikuo k te k yii tuun tuonŋɑnɑ kul nbɑ k i luon, ɑ yii tuun nɑ, k gbenn tuonɑ kul nbɑ k i tuun i yɑdɑ pɑɑk nɑ. Ŋɑnn e sɑɑ te k t Yonmdɑɑnɔ Yiesu sɑnn nɑ n lɑ dontl i sinsuuk ni, k yin mun lɑ dontl u buol ni. Yennu nɑn Yonmdɑɑnɔ Yiesu Klistu ninkpɑbɑɔnŋ o nɑ. N nɑɑ wɑɑs, k jikt sɑɑ t Yonmdɑɑnɔ jenu mɑnŋ nɑn tinm nɑn ŋuɑ nbɑ tɑn sɑɑ cet lieb k tɑɑn be nɑ po, t bɑln’mi e, i dɑɑ mɔk jijiet i pɑlɑ ni ɑmi gbɑnɑnjijekt nɑn nisiɑb nbɑ yɑɑ ɑ Yomdɑɑnɔ dɑɑl mɑnŋ ponŋ bɑɑl ɑ nɑ. L pɑsiɑl b yien’i ɑ tinm din yet nnɑ sɔkni mɑɑn wɑnnu ni, ɑmi muɑnti ni, ɑmi kɑdɑɑɔk ni. I dɑɑ te k suɑ kpɑnn’i nɑn wɑɑn ɑ, k mɑɑn l dɑɑl kɑn bɑɑl sie k mɔyetuk yuo bɑɑl sinsinn, k *Klistu dɑtɑɑk nbɑ k Yennu sɑɑ biil’ɔ muu ni nɑ, n nyi pɑɑnu. U tɑn sɑɑ kɔn nɑn lin nbɑ kul k niib jiɑntl’l, nɑn lin nbɑ kul k niib duki nɑn l tie Yennu. U tɑn sɑɑ kɔn nɑn lin nbɑ nɑ kul k biɑ tɑn sɑɑ kuɑ Yennu jɑɑnti ŋɑsɑɑkɑk ni, k kɑl k pul u mɔnŋ Yennu. Mɑɑ din be i buol ni yuo nbɑ nɑ, n din yet’i lin nbɑ nɑ kul ɑ. I k tiɑn ii? Ŋɑɑn siɑl e lek dɑɑ diɑ’u, k i mi lɑɑ tie lin nbɑ, ŋɑɑn k u tɑn sɑɑ nyi pɑɑnu yuo nbɑ k Yennu tiɑɔnŋ din senn nɑ e. Bonbiil wuol ni yiikuo ponŋ tuun u tuonn, ŋɑɑn lin nbɑ tɑn sɑɑ tien, dɑɑ kɑn tien, sie k wun nbɑ dɑɑ te k l k fit tie nɑ tɑn bot sinsinn. L yuo mɑnŋ k Klistu dɑtɑɑk sɑɑ nyi pɑɑnu ni, k Yonmdɑɑnɔ Yiesu n kpi’u nɑn u mɔb ni wɑn, k biil’ɔ nɑn u bɑɑlu yentciɑɔnŋ. Klistu dɑtɑɑk mɑnŋ tɑn sɑɑ bɑɑl nɑn *Sɑɑtɑn yiikuo e k tun fɑɑk bɑktnɔunŋ tuonɑ nɑn yɑɑl-lituk tuonɑ, nɑn tuonbiit buolu kul nbɑ kpɑnn bin nbɑ k Yennu tɑn sɑɑ biil’b nɑ. B tɑn sɑɑ lɑ biilu, k mɑɑn b k gɑɑl, k biɑ k luon bɑlmɔni nbɑ bo sɑɑ fiel’b nɑ. L pɑɑk e te k Yennu te k fɑɑk yiikuo tuun b ni, ɑ bin tien lin nbɑ tie fɑɑk nɑ yɑdɑ. L pɑɑk, Yennu tɑn sɑɑ biil bin nbɑ kul k tien bɑlmɔni mɑnŋ yɑdɑ ŋɑɑn luon bonbiil tumu nɑ. T nɑɑ wɑɑs, yinm nbɑ k Yonmdɑɑnɔ luon’i nɑ, l kpɑɑ tɑlɑs k t pɑk Yennu yuo kul i pɑɑk, k mɑɑn Yennu din lukt’i pinpiik ni e wɑɑ, ɑ yin lɑ fielu Foŋɑnm nbɑ tien’i Yennu tiɑɔnŋ yɑb nɑn yɑɑ tien lɑbɑmɑnn yɑdɑ nɑ pɑɑk. Tɑɑ din muɑnt lɑbɑmɑnn nbɑ k tul’i nɑ, Yennu din yiin’i, ɑ yin lɑ dontl nbɑ tie t Yonmdɑɑnɔ Yiesu Klistu tiɑɔnŋ yɑl e. T nɑɑ wɑɑs, l pɑɑk, setl mɑn cib, k diɑ wɑnnu nbɑ k t din wɑnn’i t mɑɑn ni, nɑn t kɑdɑɑɔk ni nɑ. T Yonmdɑɑnɔ Yiesu Klistu tiɑɔnŋ nɑn t Bɑɑ Yennu nbɑ luon’t, k tul’t pɑlcienn nbɑ kɑɑ gbennu nɑn dindɑnn nbɑ ŋɑn, u ninkpɑbɑɔnŋ nɑ pɑɑk nɑ, n cie i pɑlɑ k tul’i pɑnŋ k yin fit tun lin nbɑ kul ŋɑn i bontitiet nɑn i mɑɑn ni. T nɑɑ wɑɑs, lin nbɑ juont tie nnɑ e, ii mei Yennu mɑn k Yonmdɑɑnɔ lɑbɑmɑnn mɑnŋ n lin yiɑn yiɑn k niib n gɑɑl’l nɑn bɑɑkl, nɑn lɑɑ din tie biɑnŋ nbɑ i buol ni nɑ. Ii biɑ kii mei Yennu k wun nyinn’t nifobiit nɑn biitdɑnm nuu ni, k mɑɑn l k tie suɑ kul kɑɑ tien lɑbɑmɑnn mɑnŋ yɑdɑ. Ŋɑɑn Yonmdɑɑnɔ tie bɑlmɔni dɑɑnɔ e, k sɑɑ tul’i pɑnŋ kii guu’i k *Klistu dɑtɑɑk kɑn fit tien’i siɑl. Yonmdɑɑnɔ pɑɑk, k t mi nɑn i tuun tɑɑ din yet’i lin nbɑ nɑ, kii biɑ sii tuun nnɑ yuo kul ɑ. Yonmdɑɑnɔ mɑnŋ n sonm’i k yin bɑnn Yennu nbɑ luon’t biɑnŋ nbɑ, k biɑ sonm’i k yin bɑnn suklu nbɑ k Klistu tien’t nɑ. T nɑɑ wɑɑs, Yonmdɑɑnɔ Yiesu Klistu sɑnn ni e k t yien’i, i nyinn i mɔnŋ t nɑɑ wɑsiɑt nbɑ tie gbɑn-nyɑkdɑnm, k biɑ k wɑɑ wɑnnu nbɑ k t din tul’i nɑ sinsuuk ni. I mɔnŋ ponŋ mi fɑnu nɑn l kpɑɑ tɑlɑs e k yii tuun nɑn tɑɑ din tuun biɑnŋ nbɑ nɑ. Tɑɑ din be i buol ni nɑ, t din k tiin gbɑn-nyɑkl. T din k mi dii suɑ jiet k k pɑ l pɑɑk. Ŋɑɑn t kpɑn din tuun e k nyi nɑɑɔk yennu nɑn nyiɑɔk, ɑ t dɑɑ tie jikl i pɑɑk. Tɑɑ din tuun nnɑ mɑnŋ nɑ, l k wɑnt nɑn t k mɔk yiikuo nbɑ sɑɑ boi sonml po kɑɑ, ŋɑɑn t din tun nnɑ ɑ tin wɑnn’i lɑɑ mun sii ŋɑn k yin tun biɑnŋ nbɑ e. Setk nɑn mɔni, tɑɑ din be i buol ni nɑ, t din tuu tun yien’i ɑ: «Wun nbɑ kul k tuun tuonn, l dɑɑnɔ k jɑnŋ nɑn wun di jiet.» T yien’i lin nbɑ nɑ, k mɑɑn t gbiɑ, ɑ nisiɑb be i sinsuuk ni k k luon tuonɑ, ŋɑɑn k lin kuɑ b lieb mɑɑn ni e. Yonmdɑɑnɔ Yiesu Klistu sɑnn ni e k t yien niib mɑnŋ k kpɑɑn’m ɑ bii tuun tuonn yuo kul ɑ, k fit b mɔnŋ. T nɑɑ wɑɑs, ii mi k i bɑk nɑn tuonŋɑnɑ tumu mɑn. L i tie k suɑ k sɑɑk kpɑɑni nbɑ be kɑdɑɑɔk nɑ ni, yin bɑnn l dɑɑnɔ k dɑɑ nɑki’ɔ k wun tɑn di fei. I dɑɑ tie’u nɑn u tie i dɑtɑɑk e nɑ, ŋɑɑn i kpɑɑn’ɔ nɑn i nɑɑ bik nɑ. Yonmdɑɑnɔ wun nbɑ tien’t mɑnu nɑ n tul’i mɑnu yuo kul, siɑl kul ɑ ni. Yonmdɑɑnɔ i be nɑn i kul. Min Pɔul dɑ fuonti mɑnŋ nɑn n mɔnŋ mɔnŋ nuu e, k ŋɑnn e tie n kɑdɑɑt kul *siɑlɑ. Mɑɑ tuu dɑ bɑnnu nbɑ e nɑ. T Yonmdɑɑnɔ Yiesu Klistu ii mɔk ninkpɑbɑɔnŋ nɑn’i kul. Min Pɔul tie Yiesu *Klistu *tuomi, k mɑɑn t Fietuɑ Yennu nɑn Yiesu Klistu wun nbɑ tie t dindɑnn nɑ tul’n mɔb. Min e dɑ kɑdɑɑɔk nɑ k tien fin Tiimuote, wun nbɑ tie n bimɔnŋ, yɑdɑ tienu ni nɑ. Yennu wun nbɑ tie Bɑɑ nɑn t Yonmdɑɑnɔ Yiesu Klistu ii mɔk ninkpɑbɑɔnŋ nɑn nyikcɑbu nɑn’ɑ, k biɑ tul’ɑ mɑnu. Ii be Efes nɑn mɑɑ ponŋ din yet’ɑ biɑnŋ nbɑ yuo nbɑ k n din sɑɑ Mɑɑseduɑnn nɑ, ɑ ɑ te k nisiɑb nbɑ wɑnt wɑnbuolgɑnu nɑ n nyik’l k dɑɑ fiin b yejɑnm ni bɑlkpelɑ nbɑ tie fɑɑk nɑ po nɑn b yejɑnm sɑnɑ kɑnu po. Ŋɑnn e bɑɑt nɑn mɔniɑɔk k k sonmt nilɔ k u bɑnt Yennu nbɑ lol, ɑ niib n lɑ fielu bɑnnu nbɑ nɑ. Yɑdɑ pɑɑk e te k b bɑnn’l. N kpɑɑni mɑnŋ pɑɑk tie lin fiin nilɔ pɑl ni lonm nbɑ nyuɑn bon-yenn kuɑ, nɑn *dudukŋɑnt nɑn mɔmɔnm yɑdɑ. Nisiɑb nyik lin nbɑ nɑ wɑɑ, ŋɑɑn bot kuɑ jɑt-lɑbɑfɑɑnu ni. B luon bii tie Yennu *senniwɑntieb e, ŋɑɑn k k mi b mɔnŋ mɔnŋ mɔbonɑ pɑɑk, k biɑ k mi bɑɑ piɑk lin nbɑ po mɑnŋ pɑɑk, ŋɑɑn b yien ɑ l tie bɑlmɔni e. T mi nɑn *senni mɑnŋ ŋɑn, l i tie k nilɔ tuun nɑn’n Yennu nbɑ luon bɑnnu nbɑ nɑ. I tiɑn nɑn senni k sie bin nbɑ tie niŋɑnm Yennu buol ni nɑ pɑɑk kɑɑ, ŋɑɑn l sie bin nbɑ tie mɔyetdɑnm nɑ pɑɑk e, nɑn bin nbɑ k tiin Yennu, nɑn biitdɑnm pɑɑk, nɑn jɑknt dɑnm, nɑn bin nbɑ k tien Yennu nibɑɑkl pɑɑk, nɑn bin nbɑ kpi b bɑɑnbɑ nɑn b nɑɑnbɑ, nɑn nikpiilɑ, nɑn boncunconɑ pɑɑk, nɑn bin nbɑ mɔk niɑɔnŋ k duɑ nɑn b jɑlieb, nɑn bin nbɑ tie dɑɑbɑ kpinkpounŋ, nɑn bin nbɑ tie fɑɑk dɑnm, nɑn bin nbɑ tuu senn mɔsonɑ ŋɑɑn tɑn kɑn gbien nɑ, nɑn lin nbɑ kul k wɑɑ bɑlmɔni wɑnnu pɑɑk. Bɑlmɔni wɑnnu mɑnŋ nyii Klistu lɑbɑmɑnn nbɑ k Yennu din tul’n ɑ n muɑnt nɑ ni e, lɑbɑmɑnn mɑnŋ piɑk Yennu nbɑ ŋɑn nɑn dontl kul, k tie wun nbɑ tul’t bonŋɑnɑ kul nɑ po. N tien t Yonmdɑɑnɔ Yiesu Klistu wun nbɑ tul’n pɑnŋ, ɑ mɑn tun u tuonɑ niipuouk, k mɑɑn ŋuɑ e yet ɑ n jɑnŋ nɑn u tuonɑ mɑnŋ, k te k n tuun tien’ɔ, mɑɑ lek din piɑk bonbiil k jiin u po k muks’ɔ k suki’ɔ nɑ, ŋɑɑn u din tin’n ninbɑɑɔk k mɑɑn n din k tien yɑdɑ k biɑ k mi mɑɑ din tuun lin nbɑ. T Yonmdɑɑnɔ din tɑn tin’n ninbɑɑɔk nbɑ yɑb k kɑɑ biknu, k tul’n yɑdɑ nɑn lonm nbɑ k t mɔk Yiesu Klistu ni nɑ pɑɑk. Gotl mɑn, lɑbɑɑl nbɑ tie bɑlmɔni k ŋɑn nɑn niib kul n gɑɑl’l e nɑ: Yiesu Klistu din bɑɑl tingbounŋ nɑ ni, ɑ wun tɑn fiel biitdɑnm e, k min e bi k gɑl b kul ɑ. Ŋɑɑn lin nbɑ nɑ pɑɑk k Yennu din tin’n ninbɑɑɔk, ɑ min nbɑ tie biitdɑnm yudɑɑnɔ nɑ ni, Yiesu Klistu n fit wɑnn u suklu nbɑ kɑɑ pɑɑk k tul bin nbɑ sii tie’u yɑdɑ bii mɔk mɑnfuol nbɑ kɑɑ gbennu. Tɔn, k mɔtɑɑnɑ Kpɑnbɑl nbɑ kɑɑ gbennu, k kɑn mi kpo, k suɑ k lɑɑt’ɔ, k u kuukuɑ tie Yennu, ŋuɑ e ŋɑn nɑn sɑnn nɑn dontl nɑn yuo nbɑ kɑɑ gbennu. * Amenn. N bik Tiimuote, n jikt kpɑɑni mɑnŋ k tie ɑ nuu ni, k l tɑɑ nɑn sɔkniinbɑ nbɑ din pɑk ɑ po siɑn yuo nbɑ gɑl nɑ. Jiin mɑɑn mɑnŋ k tien’l ɑ jɑtiɑt k kɔn kunkɔnŋɑnn, kii diɑ ɑ yɑdɑ nɑn tuntŋɑnn nbɑ k suɑ k fit tɑɑl’ɑ l pɑɑk. Nisiɑb yet lin nbɑ nɑ, k ŋɑɑn k b yɑdɑ biil. B siɑb e tie Hiimene nɑn Aleksɑndl, k n dɑɑn jii’b tien’m *Sɑɑtɑn nuu ni, ɑ bin bɑnn nɑn l ŋɑn bin nyik bɑɑ tuu piɑk biil bɑnnu nbɑ k jiin Yennu po. L pɑɑk, sinsinn n wɑnn’ɑ nɑn l ŋɑn k niib ii mei Yennu, kii boi’ɔ bonɑ po, kii tien’ɔ niipuouk niib kul ɑ pɑɑk. Ii mei Yennu kpɑnbɑlɑ nɑn bin nbɑ kul tie yiikuo dɑnm nɑ pɑɑk, ɑ tin fit kii be nɑn lɑɑfiɑ nɑn mɑnu, kii tie Yennu yɑb cɑin, kii mɔk binbenŋ nbɑ k niib k fit tɑɑl’t l pɑɑk. Ŋɑnn e ŋɑn k pent t Fietuɑ Yennu pɑl ni, wun nbɑ luon k suɑ kul n lɑ fielu k tɑn bɑnn bɑlmɔni nbɑ tie lin nbɑ, k mɑɑn Yen-yenɔ kuɑ e be, k sindɑntinnɔ tie yenɔ kuɑ k be Yennu nɑn nisɑɑlk sinsuuk ni. L dɑɑnɔ e tie juɑ nbɑ tie Yiesu *Klistu wun nbɑ din jii u mɔnŋ k pɑ suɑ kul pɑɑk, ɑ wun nyinn’b dɑɑbs ni. Ŋɑnn e din tie *siɑlɑ yuo nbɑ k Yennu luon. L pɑɑk k Yennu lukt’n k n tien Klistu tiɑɔnŋ *tuomi k wɑnn bin nbɑ k tie *Suifnbɑ lin nbɑ tie yɑdɑ nɑn lin nbɑ tie bɑlmɔni. N k fɑ fɑɑk kɑɑ. L tie bɑlmɔni e. N luon k jɑb ii mei Yennu siɑn nbɑ kul k bin donn b nii kii mei Yennu k siɑl ɑ jɑknt dɑɑ be b pɑlɑ ni k mɔniɑɔk nɑn wutuol biɑ dɑɑ be b sinsuuk ni. N biɑ luon k puob ii liɑ tiɑt nɑn sikn-n-mɔnŋ nɑn bɑnnu nbɑ k niib kɑn fit tɑɑl’b l pɑɑk nɑ. B dɑɑ loln yut nɑn jɑpɑɑt, k dɑɑ piil sɑlnbɑnɑ k biɑ dɑɑ tuu sɑlmɑ tuutuutɑ k biɑ dɑɑ liɑ liɑnt nbɑ dɑɑɔk pɑɑl, ŋɑɑn kii tuun tuonŋɑnɑ nɑn puob nbɑ wɑnn b mɔnŋ nɑn b cɔln Yennu nɑ. Puob ii ŋmin kii gɑɑn wɑnnu nɑn cɔlnt kul ɑ. N k cɑb puo ɑ wun jii wɑnnu k tul juɑ ɑmi wuu mɔk yiikuo juɑ pɑɑk. Sie k wuu ŋmin. K mɑɑn Yennu din dɔnŋ nɑn Adɑn e sinsinn, k l puolpo wɑɑ, k u nɑn Ef. L din k tie Adɑn kɑɑ k *Sɑɑtɑn kpɑnn’ɔ, ŋɑɑn u din kpɑnn puo e k u din biil Yennu *senni. Ŋɑɑn puo sɑɑ lɑ fielu, wɑɑ mɑl wɑɑs bɑnnu nbɑ nɑ ni, l i tie k u tien Yiesu yɑdɑ, k luon niib, k be binbenŋ nbɑ k niib k fit tɑɑl’ɔ l pɑɑk nɑ ni. Bɑli nbɑ nɑ tie bɑlmɔni e, k jɑsuɑ nbɑ luon k wun tien *Klistu mɔtɑɑɔk niib yudɑɑnɔ, l tie tuonŋɑnn e k u luon. L k ŋɑn k yudɑɑnɔ mɑnŋ ii tuun lin nbɑ k niib sɑɑ fit tɑɑl’ɔ l pɑɑk. L kpɑɑ tɑlɑs e k wuu mɔk puo yenɔ kuɑ, kii tie wun nbɑ fit diɑ u mɔnŋ, kii tie wun nbɑ k niib tien’ɔ nibɑɑkl, kii gɑɑn sɑɑnm u ŋɑɑk ni kii cɑntl’b, kii tie wun nbɑ sɑɑ fit tumi niib fɑnu, k dɑɑ yib dɑɑn, k dɑɑ tie kunkɔnkɔnnuk ŋɑɑn kii be suon nnɑ, k dɑɑ luon mɔniɑɔk, k biɑ dɑɑ mɔk niɑnciɑɔnŋ nɑn likli. L kpɑɑ tɑlɑs e k wun fit kii diɑ u mɔnŋ ŋɑɑtieb fɑnu, k te k u wɑɑs n sɑk u mɔb nɑn cɔlnt. Ŋɑɑdɑɑnɔ i kii mi wɑɑ sɑɑ diɑ u ŋɑɑk niib biɑnŋ nbɑ, nlee k u sɑɑ fit diɑ Yennu mɔtɑɑɔk niib i? L kpɑɑ tɑlɑs k u dɑɑ tie dɑɑnɔ nbɑ gɑɑl Klistu k l dɑɑ k wei. Nnɑ e i kɑɑ, u tɑn sii mɔk kɑlnbɑɑni k wɑnt u mɔnŋ k tɑn lɑ tubdɑtu nbɑ k *Sɑɑtɑn lɑ nɑ. L kpɑɑ tɑlɑs k wuu tie dɑɑnɔ nbɑ k bin nbɑ k wɑɑ Klistu nɑ n yet ɑ u binbenŋ ŋɑn, k u dɑɑ mi di fei k *Sɑɑtɑn bɑluk tɑn sɑɑ mɑnn k suol’ɔ. L biɑ kpɑɑ tɑlɑs k jɑɑnti ni * sonmtieb ii mun ii tie jɑb nbɑ jɑnŋ nɑn niib n bɑɑk’b e, kii tie mɔmɔnm dɑnm, k dɑɑ nyu dɑɑn bonciɑnn, k biɑ dɑɑ luon bin lɑ nyuɑt fɑɑk tuonɑ pɑɑk. L kpɑɑ tɑlɑs k bii diɑ bɑlmɔni nbɑ k t yɑdɑ wɑnn’t nɑ, k dɑɑ mɔk bilsuk. L kpɑɑ tɑlɑs k Yiesu mɔtɑɑɔk niib n bik’m, k b i kii lɑ lin nbɑ b sɑɑ fit tɑɑl’b l pɑɑk, b sɑɑ fit kii tuun nɑn jɑɑnti niib sonmtieb nɑ. Nnɑ e mun, b puob sii tie bin nbɑ jɑnŋ nɑn niib n bɑɑk’b, k dɑɑ tie bonbiil-pɑklɑ, ŋɑɑn kii be suon nnɑ kii tie bin nbɑ luon bɑlmɔni e. L kpɑɑ tɑlɑs k jɑɑnti niib * sonmtuɑ i mɔk puo yenɔ kuɑ, k biɑ fit diɑ u wɑɑs nɑn u ŋɑɑk niib fɑnu. B i tuun b tuonɑ fɑnu b sii mɔk nibɑɑkl k biɑ k mɔk bilsuk yuo nbɑ k b wɑnt niib bɑɑ tien Yiesu yɑdɑ bɑnnu nbɑ nɑ. Mɑɑ dɑ kɑdɑɑɔk nbɑ tien’ɑ nɑ, n mɔk dindɑnn nɑn mɑn bɑɑl mɔtɑɑnɑ k lɑ’ɑ, ŋɑɑn l i wei k n k bɑɑl, kɑdɑɑɔk nɑ sɑɑ te k ɑ sii mi niib nbɑ sii diɑ b mɔnŋ bɑnnu nbɑ Yennu ŋɑɑtieb sinsuuk ni. N piɑk mɑnfodɑɑnɔ Yennu mɔtɑɑɔk niib po e. Ŋuɑ guu’b k biɑ tie fiɑkl nbɑ k bɑlmɔni set l pɑɑk nɑ. Nn, l tie mɔni e, bɑktnɔunŋ minu nbɑ k yɑdɑ tien tinm nɑ yɑb: Klistu din bɑɑl k tie nisɑɑlk e, k tie bɑlmɔndɑɑnɔ, Foŋɑnm e din wɑnn nnɑ. Mɑlɑkɑɑnbɑ din lɑ’u wɑɑ, k niib din muɑnt u lɑbɑɑl k tul nibuolu kul, k b tien’ɔ yɑdɑ tingbounŋ nɑ ni, k * *Yendɔunŋ ni k Yennu tul’ɔ *yudɑnt. Tɔn, Foŋɑnm pɑk k yent’t ɑ: dɑjuonti dɑɑ ni, nisiɑb sɑɑ nyik b yɑdɑ nɑn *Klistu nɑ wɑɑ, ŋɑɑn sɑk wɑɑ nɑlnbiit nbɑ kpɑnn’b nɑ, k biɑ wɑɑ nɑlnbiit wɑnnu. L dɑnm bot kpinkpɑni dɑnm mɑnŋ pɑɑk ɑ. K kpinkpɑni dɑnm mɑnŋ yɑn ni ji kpo k kɑb nɑn bɑɑ tuu jii kut-tont k fiɑ bonn nɑ. L nibuolu wɑnt, ɑ jɑkunt nɑn puokuɑnt k ŋɑn, ɑ k jesiɑt biɑ k ŋɑn nɑn dinu. Ŋɑɑn tinm nbɑ tien Klistu yɑdɑ k biɑ mi l bɑlmɔni nɑ, mi nɑn Yennu din nɑn jebuolu kul ɑ, ɑ niib n tuu tul’ɔ niipuouk l pɑɑk e ŋɑɑn di. Bonsiɑl kul nbɑ k Yennu din nɑn nɑ ŋɑn. T tuu tul’ɔ niipuouk l pɑɑk ŋɑɑn gɑɑl’l, k dɑɑ yien siɑl, k mɑɑn Yennu mɑɑn nɑn yenmiɑlu pɑɑk e te k l ŋɑn Yennu buol ni. L i tie k ɑ jii wɑnnu nbɑ nɑ k tul t nɑɑ wɑɑs nɑ, ɑ sii tie Klistu tuontunŋɑnɔ nbɑ dint u mɔnŋ nɑn Klistu lɑbɑmɑnn mɔbonɑ nɑn bɑlmɔni wɑnnu nbɑ k ɑ wɑɑ fɑnu nɑ e. Ŋɑɑn yet fɑɑk lɑbɑɑl nbɑ sɑɑ te k ɑ yɑdɑ n bɑɑ. Yɑbt ɑ mɔnŋ pɑɑk kii be bɑnnu nbɑ sii gbuot Yennu nunm. Lin nbɑ k nilɔ tuun k be lɑɑfiɑ ni mɔk nyuɑt wɑɑnm-nnɑ e, ŋɑɑn lin nbɑ k u tuun k be binbenŋ nbɑ gbuo Yennu nunm nɑ mɔk nyuɑt bonɑ kul ni, k sonmt’ɔ mɔtɑɑnɑ nɑn yuo nbɑ bɑɑt nɑ. Lin nbɑ nɑ tie bɑlmɔni e, k l ŋɑn nɑn niib kul n gɑɑl’l. L pɑɑk e te k t gbɑɑ k tuun nɑn ninmɔnn k mɑɑn t mɔk dindɑnn Yennu nbɑ fo ni, wun nbɑ tie suɑ kul Fietuɑ, k u set sɑɑ tul bin nbɑ tien’ɔ yɑdɑ nɑ fielu wɑɑ. Wɑnt’b k kpɑɑn’m lin nbɑ nɑ kul ɑ. Dɑɑ te k suɑ n siɑn’ɑ k mɑɑn fɑɑ pɔ nɑ pɑɑk, ŋɑɑn te k ɑ pinpɑɔk nɑn ɑ binbenŋɑnŋ, nɑn ɑ lonm, nɑn ɑ yɑdɑ, nɑn fɑɑ wei Yennu *senni bɑnnu nbɑ nɑ, n wɑnn Klistuweilɑ bɑɑ bo sii be biɑnŋ nbɑ. Jiin ɑ yuo k lii Yennu lolkpel kɑdɑɑɔk k tul’b k biɑ wɑnn’b l pɑɑk, kii muɑntl Klistu mɑɑn mɔkmɔk nɑn yuo nbɑ k n tɑn sɑɑ bɑɑl. Dɑɑ tɑnmt Foŋɑnm piini nbɑ be ɑ ni k ɑ din gɑɑl’l sɔkniinbɑ mɑɑn pɑɑk yuo nbɑ k *sɑɑkɑb din yii b nii ɑ pɑɑk nɑ. Ii tuun lin nbɑ nɑ nɑn ninmɔnn, k suɑ kul n lɑ ɑ puknu. Ii mi ɑ mɔnŋ nɑn ɑ wɑnnu po. Ii wɑki l kul ni. Setk nɑn mɔni, ɑ i tuun nnɑ ɑ sɑɑ lɑ fielu ɑ mɔnŋ k bin nbɑ gbiintl ɑ mɑɑn nɑ mun sɑɑ lɑ fielu wɑɑ. L i tie k ɑ yɑɑ ɑ tɑɑl jɑkpelsuɑ, ɑ dɑɑ yɑki nɑn’ɔ, ŋɑɑn pɑk tul’ɔ nɑn ɑ mɔnŋ mɔnŋ bɑɑ nɑ. Ii be nɑn nɑɑsinm nɑn ɑ mɔnŋ mɔnŋ nɑɑ wɑɑs nɑ, kii be nɑn puokpelɑ nɑn b tie ɑ nɑɑnbɑ e nɑ, kii be nɑn puopɑɑni nɑn b tie ɑ niipuob e nɑ, kii be nɑn b kul ɑ bɑnnu nbɑ k suɑ kɑn fit tɑɑl’ɑ nɑn wɑɑn ɑ. Ii tien pɑkɔi nbɑ be b kuukuɑ nɑ nibɑɑkl, ŋɑɑn pɑkɔsuɑ nbɑ mɔk wɑɑs ɑmi yɑɑbuonɑ, u wɑɑs ɑmi u yɑɑbuonɑ n tun tuonŋɑnɑ nbɑ k b yɑdɑ nɑn *Klistu wɑnn’b nɑ sinsinn k tul b mɔnŋ ŋei ni. Nnɑ e k b dɑnm mun sɑɑ di b niwubt nyuɑt, k mɑɑn lin nbɑ k Yennu luon e nɑ. Ŋɑɑn mɔmɔnm pɑkuɑk nbɑ kɑɑ suɑ nɑ, u dindɑnn be Yennu ni, k u mei Yennu sonml po yennu ni nɑn nyiɑɔk. Ŋɑɑn pɑkuɑk nbɑ tuun gbɑnɑnt lonm, u ponŋ kpo e wɑɑ ŋɑɑn dɑɑ be mɑnŋ. Tuln niib wɑnnu nɑ; k suɑ dɑɑ fit tɑɑl’b. Wun nbɑ k goli u nikpiinm, ɑmi lin nbɑ mɑntk gɑl tie u kii fiin u mɔnŋ mɔnŋ ŋɑɑk niib po, l dɑɑnɔ ji yet u yɑdɑ wɑɑ, k wun nbɑ k tien Klistu yɑdɑ sɔ’u. A dɑɑ kɑɑn pɑkuɑk nbɑ dɑɑ k kpet gɑl binɑ piinluob nɑ k kuɑnt pɑkɔi kɑnn ni. K biɑ jen ɑ, l ŋɑn k wuu tie puo nbɑ mi k kun jɑyenɔ kuɑ e, kii mɔk sɑnŋɑnn u tuonŋɑnɑ pɑɑk, kii tie wun nbɑ wubl u wɑɑs fɑnu, k tuu gɑɑn sɑɑnm u ŋɑɑk ni, k tuu wu Klistuyɑb tɑɑ, k tuu sonmt tɑlɑs-dɑnm, k tuu tuun tuonŋɑnɑ buolu kul. Ŋɑɑn ɑ dɑɑ puki puopɑɑni nbɑ tie pɑkɔi b kɑnn ni, k mɑɑn b gbɑnɑnt lonm i nyɑnn b Klistuweiu, b tuu luon bin kun jɑb e, k ji pot b mɔsonn nbɑ k b din senn tul’ɔ sinsinn nɑ, k ji kuɑ biit ni l pɑɑk. Lin nbɑ pukn, bɑɑ k mɔk tuonn nɑ, k b lin k luɑn ŋei, l k tie bɑɑ k mɔk tuonn kuukuɑ pɑɑk kɑɑ, ŋɑɑn b biɑ lin k piɑk mɑyɑnɑ k kuɑ lin nbɑ k lɑ’b ni, k piɑk bɑlkpiennɑ. L pɑɑk, min bo sii luon k puopɑɑni nbɑ tie pɑkɔi nɑ n kun jɑb e k mɑl wɑɑs, k got b ŋei fɑnu, k t dɑtɑi dɑɑ lɑɑt yɑɑk k piɑk biit jiint t po, k mɑɑn pɑkɔsiɑb ponŋ tunn wɑɑ *Sɑɑtɑn e. Ŋɑɑn puosuɑ nbɑ tie Klistuweilɔ k pɑkɔi be u ŋɑɑk ni, l kpɑɑ tɑlɑs e nɑn wun got’b fɑnu, k dɑɑ jikt’b k jint Klistu mɔtɑɑɔk niib, k Klistu mɔtɑɑɔk niib n fit got pɑkɔi nbɑ be k k mɔk dɑnm nɑ. Klistu mɔtɑɑɔk niib *sɑɑkɑb nbɑ diɑ’b fɑnu nɑ ŋɑn nɑn nibɑɑkl bonciɑnn, k bin nbɑ muɑntl Klistu lɑbɑɑl k wɑnt’b l pɑɑk, ŋɑnm e mɑntk ŋɑn nɑn nibɑɑkl, k mɑɑn l diɑn Yennu lolkpel kɑdɑɑɔk ni ɑ: «Nɑɑb i tuun dijɑɑn-yuo, fɑɑ dɑɑ bobnt u mɔb,» k biɑ diɑn ɑ: «Tuontunnɔ ŋɑn k wun gɑɑl u pɑɑɔk.» A dɑɑ ŋɑɑnt k b tɑɑl sɑɑkɑsuɑ, sie k b tie niib bɑnle ɑmi bɑntɑ. Bin nbɑ tuun biit nɑ, ii yɑki nɑn’m, niib ni, k bin nbɑ biɑl nɑ n tin jɑŋmɑɑni. Yennu tuɑnn nɑn Yiesu Klistu tuɑnn nɑn mɑlɑkɑɑnbɑ tuɑnn po k n yien’ɑ nɑn ninmɔnn, ɑ fɑn sɑk wɑnnu nɑ k dɑɑ mɔk ningɑnsɑi ɑmi luktn k tien nisuɑ bonsiɑl kul ni. A dɑɑ yiin ɑ nii suɑ pɑɑk yiɑn yiɑn, ɑ wuu tuun tuonsiɑl Klistu mɔtɑɑɔk niib sinsuuk ni. A dɑɑ kuɑnt ɑ nuu niib tuonbiit tumu ni, ŋɑɑn i diɑ ɑ mɔnŋ bɑnnu nbɑ k b k fit tɑɑl’ɑ l pɑɑk. A lɑɑfiɑ nbɑ k jɑnŋt’ɑ nɑ pɑɑk, ɑ dɑɑ nyu nyun kuukuɑ, ŋɑɑn ɑ tuu nyu dɑmunŋ wɑɑn k lin sonm ɑ nuɑk ni. Nisiɑb tuonbiit ponŋ duɑ pɑɑnu ni e yuo nbɑ k b dɑɑ k bu b buut, ŋɑɑn k nisiɑb tuonbiit mun sɑɑ nyi pɑɑnu b buut bunu puolpo e. Tuonŋɑnɑ mun biɑ tie nnɑ e, l yenn-nbɑ nyii pɑɑnu wɑɑ, k lin nbɑ lek k nyii pɑɑnu ni, ŋɑɑn l kɑn fit bɔl. L kpɑɑ tɑlɑs ɑ bin nbɑ kul tie dɑɑbɑ nɑ ii tien b yonmdɑnm bɑɑkciɑɔnŋ, k suɑ dɑɑ piɑk biil Yennu sɑnn nɑn t tuntl. Bin nbɑ k b yonmdɑnm tie Klistuweilɑ nɑ dɑɑ fiɑkt b yonmdɑnm mɑnŋ, bɑɑ yi’b b nɑɑ wɑɑs nɑ pɑɑk, ŋɑɑn l kpɑɑ tɑlɑs k ŋɑnm e n mɑntk tun fɑnu, k mɑɑn b yonmdɑnm nbɑ gɑɑn b tuonɑ nyuɑt nɑ tien *Klistu yɑdɑ, k Yennu luon’m. I wɑnt’b kii kpɑɑn’m lɑbɑɑl nɑ po. Suɑ i wɑnt wɑngɑnu k k wei t Yonmdɑɑnɔ Yiesu Klistu mɔbonɑ nɑn Yennu sɔnu wɑnnu nɑ, u mɔk jɑpɑɑt bonciɑnn e k k bɑn siɑl. K mɔniɑɔk nɑn kunkɔnɑ tie nɑn yiɑlu nɑ k wɑɑ’u, k l bɑɑt nɑn *funfunn, nɑn kunkɔnɑ, nɑn nisukt, nɑn mɑbiit, nɑn mɔniɑɔk yuo kul, ɑ nibiit nbɑ k b dudukt k sonm fɑnu k b k mɔk bɑlmɔni nɑ sinsuuk ni nɑ. B duki nɑn Yennu sɔnu tie sɔnu nbɑ sɑɑ te k nilɔ n tien mɔktɔ e. L i tie k nilɔ nunm gbuo wɑɑ mɔk lin nbɑ, u yɑdɑ nɑn Yennu set tie mɔktuk k tul’ɔ. T din k bɑɑl nɑn siɑl tingbounŋ nɑ ni, k t biɑ tɑn kɑn nyi nɑn bonsiɑl tingbounŋ nɑ ni, ŋɑɑn t i mɔk jiet nɑn tiɑt, l ŋɑn k t nunm n gbuo’l. Bin nbɑ luon b i tie mɔktɑ, ŋɑnm e bɑɑ jinjɑnmi ni, nɑn bɑlt ni, nɑn jɑti nɑn dudukbiit nbɑ biil niib k bɑɑnt’b yɑnn nɑ ni, k mɑɑn likli lonm e tie bonbiil kul jiinn. Nisiɑb ponŋ jii b mɔnŋ k tien liklonbiiuk nɑ ni. L pɑɑk, k b ji k tien Klistu yɑdɑ. Ŋɑnn e te k b lɑɑt pɑlbibuolu buolu. Ŋɑɑn fin nbɑ tie Yennu nilɔ nɑ, l ŋɑn k ɑ ciɑl nyi lin nbɑ nɑ nbɑ kul ɑ ni, ŋɑɑn kii luon fii tie niŋɑnɔ Yennu buol ni, kii be binbenŋ nbɑ gbuot Yennu nunm nɑ ni, kii mɔk yɑdɑ nɑn lonm nɑn suklu, kii be suon nnɑ. A yɑdɑ pɑɑk kɔnin kunkɔnŋɑnn, k suol mɑnfuol nbɑ kɑɑ gbennu nbɑ k Yennu din yiin’ɑ ɑ fɑn gɑɑl yuo nbɑ k ɑ din nyinn ɑ mɔnŋ siɑlŋɑnn niib bonciɑnn nunm ni nɑ. Mɑɑ be Yennu nbɑ tien bonsiɑl kul mɑnfuol nɑ tuɑnn, k be Yiesu Klistu nbɑ din nyinn u mɔnŋ yɑdɑ siɑlŋɑnn, Pɔns *Piilɑɑt nunm ni nɑ tuɑnn, n kpɑɑn’ɑ ɑ fii diɑ wɑnnu nɑ bɑnnu nbɑ k suɑ k fit tɑɑl’ɑ l pɑɑk mɔkmɔk nɑn dɑɑl nbɑ k t Yonmdɑɑnɔ Yiesu Klistu nɑ tɑn sɑɑ dɔkt. Yennu nbɑ k t piɑk’ɔ nɑ, wun nbɑ tie Yudɑɑnɔ, k biɑ tie kpɑnbɑlɑ kul Kpɑnbɑl, k biɑ tie yonmdɑnm kul Yonmdɑɑnɔ. Ŋuɑ e tɑn sɑɑ te k wun dɔkt yuo nbɑ jɑnŋ. Ŋuɑ kuukuɑ e kɑn kpo. U be yentciɑɔnŋ nbɑ k nilɔ kɑn fit nɑkn ni. Ŋuɑ e k nisuɑ dɑɑ k mi lɑ’u ɑmi k sɑɑ fit lɑ’u. Ŋuɑ e yen bɑɑkl nɑn yiikuo yuo nbɑ kɑɑ gbennu. * Amenn. A kpɑɑn tingbounŋ nɑ mɔktɑ nɑ, ɑ b dɑɑ mɔk dont-n-mɔnŋ ɑmi bin tien b dindɑnn mɔktuk nbɑ tie wounŋ nɑ ni, ŋɑɑn bin tien b dindɑnn kul Yennu ni, wun nbɑ tul’t bonsiɑl kul, ɑ t gɑɑl kii mɔk pɑlpienn. A kpɑɑn’m, ɑ bii tuun tuonŋɑnɑ, k b tuonŋɑnɑ mɑnŋ ii yɑb, k b nii i yɑɑ nɑn piini tulu. Nnɑ e k b sii mɔk mɔktuk yuo nbɑ bɑɑt k sɑɑ fit lɑ mɑnfuol nbɑ tie bɑlmɔni mɑnfuol. Tiimuote, ii guu lin nbɑ k b tien ɑ nuu ni nɑ. A nyik lɑbɑfɑɑnu nbɑ k mɔk nyuɑt k biɑ k tɑɑ nɑn lɑbɑmɑnn wɑnnu nɑ, k biɑ dɑɑ gbiin lin nbɑ k b yi’l bɑnnu ŋɑɑn k l k tie bɑnnu kɑɑ. Nisiɑb yet ɑ b mɔk bɑnnu mɑnŋ, ŋɑɑn k l pɑɑk k b nyik lɑbɑmɑnn wɑnnu. Yennu ninkpɑbɑɔnŋ ii be nɑn’i. Min Pɔul wun nbɑ tie Yiesu *Klistu *tuomi Yennu nbɑ luon bɑnnu nbɑ nɑ pɑɑk, ɑ n muɑnt mɑnfuol nbɑ k Yennu din senn mɔsonn ɑ u sɑɑ tul’t nɑ Yiesu Klistu ni, n diɑn kɑdɑɑɔk nɑ k tien n bilonkɑk Tiimuote. Bɑɑ Yennu nɑn t Yonmdɑɑnɔ Yiesu Klistu ii mɔk ninkpɑbɑɔnŋ nɑn’ɑ k biɑ tul’ɑ nyikcɑbu nɑn mɑnu. N tien Yennu niipuouk nɑn mɑɑ tuun nɑn dudukŋɑnt nɑn n yejɑnm nbɑ din tuun bɑnnu nbɑ nɑ. N tien’ɔ niipuouk yuo kul nbɑ k n mei Yennu, yennu nɑn nyiɑɔk k biɑ tiɑn ɑ po. N tiɑn ɑ nyin-nyuut po, k lek luon k n lɑ’ɑ kii mɔk pɑlpienn bonciɑnn. N tiɑn ɑ mɔmɔnm yɑdɑ po, yɑdɑ nbɑ din sint be ɑ yɑɑ Loiis nɑn ɑ nɑɑ Euniis pɑlɑ ni nɑ, k n mi nɑn l ji be ɑ pɑl ni mɔtɑɑnɑ. L pɑɑk, k n tiɑtl’ɑ mɑɑ ɑ dɑɑ te k piini nbɑ k Yennu din tul’ɑ yuo nbɑ k n din yii n nii ɑ pɑɑk nɑ n kpo, k mɑɑn Foŋɑnm nbɑ k Yennu tul’t nɑ k tien’t jɑŋmɑɑndɑnm, ŋɑɑn Foŋɑnm mɑnŋ tien’t pɑnŋ nɑn lonm, nɑn diɑ-n-mɔnŋ e. L pɑɑk, din t Yonmdɑɑnɔ *siɑlɑ k dɑɑ tiin fei. A biɑ dɑɑ tiin fei nɑn mɑɑ be dɑnsɑlk u pɑɑk nɑ, ŋɑɑn sɑk fɑldinu nɑn’n u lɑbɑmɑnn mɑnŋ pɑɑk, nɑn Yennu nbɑ tul’ɑ pɑnŋ biɑnŋ nbɑ nɑ. Ŋuɑ e fiel’t k yiin’t ɑ tii tie u yɑb, k l k tie t tuonɑ pɑɑk kɑɑ ŋɑɑn u din lol k fiel’t u ninkpɑbɑɔnŋ pɑɑk e. U din tul’t ninkpɑbɑɔnŋ mɑnŋ Yiesu Klistu ni, yuo nbɑ k u dɑɑ din k nɑn *dulnyɑ nɑ. Ŋɑɑn t Fietuɑ Yiesu Klistu bɑɑlu ni e k u fiit wɑnn’t l po, k mɑɑn Yiesu Klistu din biil kuun yiikuo, ŋɑɑn biɑ wɑnn’t ɑ lɑbɑmɑnn ni, ɑ t sɑɑ lɑ mɑnfuol nbɑ kɑɑ gbennu. Yennu ponŋ din yiin’n, ɑ n tien tuomi nɑn wɑntuɑ k muɑnt lɑbɑmɑnn mɑnŋ. L pɑɑk e te k n di fɑlɑ mɑnŋ, ŋɑɑn k n k tiin fei, k mɑɑn n mi wun nbɑ k n tien’ɔ yɑdɑ, k n biɑ mi k bilsuk kɑɑ nɑn u sɑɑ fit diɑ lin nbɑ k n jii k tien u nuu ni nɑ fɑnu mɔkmɔk nɑn buut dɑɑl. Jiin mɔmɔnm nbɑ k n din tul’ɑ nɑ, k fit bɑnn wɑnnu nbɑ ŋɑn k cie lin nbɑ nɑ, kii diɑ’l nɑn yɑdɑ nɑn lonm nbɑ k t mɔk Yiesu Klistu ni. Foŋɑnm pɑnŋ nbɑ be t ni nɑ pɑɑk, ii diɑ lɑbɑmɑnn nbɑ k u jii k tien ɑ nuu ni nɑ. A ponŋ mi nɑn suɑ kul nbɑ be Asii nɑ nyik’n ɑ, k b siɑb e tie Fiijel nɑn Helmojenn. Yonmdɑɑnɔ n tin Onesiifuol ŋɑɑtieb ninbɑɑɔk, k mɑɑn u dɑɑn yuɑ cien n pɑl. U dɑɑn k tin fei nɑn mɑɑ be dɑnsɑlk nɑ pɑɑk, ŋɑɑn wɑɑ dɑɑn tɑn bɑɑl Luonm yuo nbɑ, u dɑɑn piin luon mɑɑ be siɑn e nɑn ninmɔnn nɑn wɑɑ dɑɑn tɑn lɑ n buol. Yonmdɑɑnɔ n tin’ɔ ninbɑɑɔk dɑɑl mɑnŋ dɑɑl. A mɔnŋ mi fɑnu wɑɑ din sonm’n bonciɑnn biɑnŋ nbɑ Efes duo ni. N bik, fin ŋɑnin n jii ninkpɑbɑɔnŋ nbɑ k t lɑ Yiesu *Klistu buol ni nɑ kii cien ɑ pɑl. Fɑɑ ponŋ din gbɑt wɑnnu nbɑ n penŋ niib bonciɑnn buol ni nɑ, ɑ jii’l k wɑnn nisiɑb nbɑ tie yɑdɑ dɑnm, bin nbɑ mun sɑɑ fit wɑnn nilieb mun. A sɑk k gɑɑl fɑldinu nɑn Yiesu Klistu sejeŋɑnɔ nɑ. Seje nbɑ luon wun penn u sɑɑkuɑ pɑl tuonn ni, ji k ŋmɑt u binbenŋ nɑn lin nbɑ k tie sejenm tuonɑ ni. Wun nbɑ tiin puot nɑntɑɑl kɑn fit nyɑnn k gɑɑl l nyuɑt, sie k u sɑk wei puot *senni kul. L kpɑɑ tɑlɑs k kpɑɑlɔ nbɑ tun nɑn ninmɔnn n gɑɑl jiet sinsinn. Ii duki lin nbɑ k n yien’ɑ nɑ po, k mɑɑn Yonmdɑɑnɔ sɑɑ te k fɑn fit bɑnn l kul ɑ pɑɑk. Ii tiɑn Yiesu Klistu po. U din fiil kuun ni, k din tie * Dɑɑfiid yɑɑbuonn, nɑn mɑɑ muɑnt lɑbɑmɑnn nɑ. Lɑbɑmɑnn mɑnŋ pɑɑk, k n be nɑn jɑlt k di fɑlɑ nɑn biitdɑɑnɔ nɑ. Yennu mɑɑn mɑnŋ ŋɑnin k be jɑlt ni. Ŋɑɑn Yennu nigɑnnkɑb nɑ pɑɑk k n lek di suklu fɑlɑ kul ɑ ni, ɑ bin mun lɑ fielu nbɑ be Yiesu Klistu ni, kii mɔk dontl nbɑ kɑɑ gbennu nɑ. Bɑli nɑ e tie mɔmɔnm: «T i kpo nɑn’ɔ, t mun tɑn sii mɔk mɑnfuol nɑn’ɔ e. T i ŋɑnmt yɑbi, t mun tɑn sɑɑ di nɑɑn nɑn’ɔ e, ŋɑɑn t i yɑɑ ɑ t k mi’u, u mun tɑn sii yɑɑ ɑ u k mi’t. L i tie k t k cɔln u mɑɑn, ŋɑɑn ŋuɑ k lebtl u mɑɑn, k mɑɑn u kɑn fit noi u mɔnŋ.» A tiɑl ɑ niib lin nbɑ nɑ, k tul’b kpɑɑni Yennu tuɑnn ni ɑ b dɑɑ kɔn mɔbonɑ pɑɑk. Ŋɑnn k mɔk nyuɑt, ŋɑɑn l biil bin nbɑ gbiin nɑ e. Yɑbt ɑ mɔnŋ pɑɑk k jɑnŋ nɑn Yennu n pɑk’ɑ, kii tie nɑn tuontunnɔ nbɑ k tiin fei u tuonn pɑɑk nɑ, k muɑnt bɑlmɔni mɑɑn dede. A nyinn ɑ mɔnŋ lɑbɑfɑɑnu nbɑ k tɑɑ nɑn Yennu mɑɑn k biɑ k mɔk nyuɑt nɑ ni, k mɑɑn bin nbɑ tuun l buolu sii ŋɑnmt fɔknt b mɔnŋ nɑn Yennu e. B wɑnnu nɑɑn nɑn nɑl-fiɑɔk nbɑ tuu di gbɑnɑnt nɑ e. B siɑb tie Hiimene nɑn Fiilet, k b fɔknt b mɔnŋ nɑn bɑlmɔni k biɑ tuni nisiɑb yɑdɑ k yɑɑ ɑ t kuun fiilu nɑ ponŋ gɑl ɑ. Ŋɑɑn fiɑkl nbɑ k Yennu tien dɑɑ be k biɑ k dɑnm i, k u tien dɑɔk l pɑɑk ɑ: «T Yonmdɑɑnɔ mi bin nbɑ tie u yɑb,» k biɑ jen ɑ ɑ: «Wun nbɑ kul yet ɑ u tie Yonmdɑɑnɔ yuɑ n nyik bonbiil tumu.» Jetienbonɑ buolu bonciɑnn be ŋɑsɑɑkɑk ni k l kul k tie kutsɔnt kuukuɑ kɑɑ, ŋɑɑn ŋmɑnmɔni nɑn senni mun biɑ be. L yenn-nbɑ tie jɑɑnm yɑl k liel nbɑ k b tuun nɑn’n dɑɑ kul ɑ. L i tie k suɑ ji nyik bonbiil tumu nbɑ k n piɑk l po nɑ, ŋɑɑn be binbenŋ nbɑ gbuot Yennu nunm nɑ, u ji nɑɑn nɑn ŋmɑnŋ nbɑ tie jɑɑnm yɑl nɑ e, k mɑɑn u tie Yonmdɑɑnɔ kuukuɑ yuɑ e k mɔk nyuɑt u buol ni, k ji ŋɑn nɑn tuonŋɑnɑ kul tumu. Nyint ɑ mɔnŋ nipɑɑɔnŋ niɑnbiit ni, ŋɑɑn kii wɑɑ bin nbɑ k Yennu yet, ɑ b tie niŋɑnm u buol ni nɑ sɔnu, nɑn yɑdɑ sɔnu, nɑn lonm sɔnu, nɑn mɑnu. Ii tuun nnɑ nɑn bin nbɑ mei Yonmdɑɑnɔ nɑn pɑlpienn nɑ. A lɔkt jɑtmɔniɑt, k mɑɑn ɑ mi nɑn l juontl nɑn kunkɔnɑ e. L k ŋɑn k Yonmdɑɑnɔ tuontunnɔ ii kɔn nɑn niib. L ŋɑn k wuu tie bulcimɔ e suɑ kul buol ni, kii tie wun nbɑ sɑɑ fit k tumi, kii tie suon nnɑ yuo nbɑ k u tumi bin nbɑ noi’ɔ nɑ, k mɑɑn pɑsiɑl Yennu n tɑn tul’b yɑɑk k bin mɔ kuɑŋɑɑn k tɑn bɑnn bɑlmɔni, k ŋɑnm jen bɑlmɔni sɔnu ni k lɔkt *Sɑɑtɑn bɑlt, k mɑɑn b ji tie u dɑɑbɑ k tuun wɑɑ luon bɑnnu nbɑ. A mi nɑn tingbounŋ nɑ dɑjuonti yuo tɑn sii pɑɑl. Niib tɑn sii tie jɑwudɑnm e, nɑn liklonnɑ, k wɑnt b mɔnŋ, k tie jɑpɑdɑnm nɑn bin nbɑ suki Yennu, nɑn bin nbɑ k sɑɑk b dɑnm mɔi, nɑn bin nbɑ k tiɑn ŋɑnm po, nɑn bin nbɑ k tiin Yennu. B tɑn kii mɔk lonm nɑn niib, b tɑn kii tiin niib ninbɑɑɔk, k piɑk mɑbiit k tien lieb, k b binbenŋ tie yɑnɑ yɑnɑ nnɑ, k b nɑɑn bonsusuot, k nɑn tuonŋɑnɑ. B tɑn sii nyi lieb puoɑ e, k tie kɑɑtkɑɑtdɑnm, k dont b mɔnŋ. B tɑn sii luon bii tuun lin nbɑ mɑn k tul’b k kii mɔk lonm nɑn Yennu. B tɑn sii diɑ Yenjiɑntu sɑnn e, ŋɑɑn k sɑɑk l yiikuo. Nyint ɑ mɔnŋ l nibuolu ni. B siɑb e lin k doi ŋei k kpɑnn puoliini nbɑ tuu tuun tuonbiit bonciɑnn k wɑɑ b pɑlɑ niɑnbiit buolu buolu, k nyint b yɑn. Yuo kul ɑ, l puob gbiintl niib kpɑɑni, ŋɑɑn b k mi k bɑnn bɑlmɔni. Sɑɑnes nɑn Sɑnbles nbɑ din kɔn nɑn Muois biɑnŋ nbɑ nɑ, l jɑbuolu mun tie nnɑ e. B kɔn nɑn bɑlmɔni, k b yɑn gbie nɑn dudukbiit, k b yɑdɑ k wɑ lɑn bɑɑ biknu ni. Ŋɑɑn b kɑn fit kpɑnn niib k wei, k mɑɑn suɑ kul tɑn sɑɑ lɑ b jɑti nbɑ tie biɑnŋ nbɑ, nɑn bɑɑ din lɑ Sɑnes nɑn Sɑnbles jɑti nbɑ din tie biɑnŋ nbɑ nɑ. Ŋɑɑn fin ŋɑnin ponŋ mi n wɑnnu po, nɑn n binbenŋ po, nɑn n dudukt po, nɑn n yɑdɑ po, nɑn n suklu po, nɑn n lonm nɑn niib po, nɑn n gbɑnkul po. A mi niib nbɑ muks’n biɑnŋ nbɑ, nɑn n fɑldinu. A mi lin nbɑ kul nbɑ din tien’n Antiɑɔs, nɑn Ikoniunm nɑn Liistl. A mi mɑɑ din lɑ muksbiit biɑnŋ nbɑ, ŋɑɑn Yonmdɑɑnɔ e din fɑt’n l kul ni. Bɑlmɔni e, niib kul nbɑ luon k bii be binbenŋ nbɑ gbuot Yennu nunm Yiesu *Klistu ni nɑ, sɑɑ lɑ muksuk. k nitont nɑn kpinkpɑnni dɑnm lek tɑn sii ŋɑnmt puki b biit e, k kpɑnn lieb, k b lieb mun sɑɑ kpɑnn’b. Ŋɑɑn fin ŋɑnin, fii diɑ mɑɑn nbɑ k ɑ din tumi k gɑɑl k tien’l yɑdɑ nɑ, k mɑɑn ɑ ponŋ mi bin nbɑ din tie ɑ wɑntieb nɑ nbɑ tie biɑnŋ nbɑ. A bisn ni wɑɑ ɑ ponŋ mi Yennu lolkpel kɑdɑɑɔk. L kɑdɑɑɔk sɑɑ fit tul’ɑ yɑn k wɑnn’ɑ fɑɑ sɑɑ lɑ fielu ɑ yɑdɑ nɑn Klistu pɑɑk biɑnŋ nbɑ nɑ. Yennu lolkpel kɑdɑɑɔk munn tie mɑɑn nbɑ nyii Yennu mɔb ni, k l kul ɑ mɔk nyuɑt e, k wɑnt’t u po, k kpɑɑn’t, k ŋɑnmt t benu, k wɑnt’t binbenŋ nbɑ gbuot Yennu nunm nɑ sɔnu, ɑ nisuɑ kul nbɑ tie Yennu yuɑ nɑ binbenŋ ii ŋɑn, k wun tien siil kii fit kii tuun tuonŋɑnɑ buolu kul ɑ. Yiesu *Klistu nbɑ tɑn sɑɑ bu fuont’b nɑn kpienm buut, wun nbɑ tɑn sɑɑ jen k di nɑɑn nɑ, ŋuɑ nɑn Yennu tuɑnn po, k n yien’ɑ nɑn ninmɔnn, ɑ fii muɑntl Yennu mɑɑn kii wɑnt niib l po, yuo ii ŋɑn kuo l kii ŋɑn i e. Fii muɑntl, kii piɑk niib b tuonbiit po, kii kpɑɑn’m, kii kuɑnt’b pɑlɑ, kii wɑnt’b mɑɑn mɑnŋ dede nɑn suklu yuo kul ɑ, k mɑɑn yuo bɑɑt k nisiɑb tɑn kii luon bii gbiintl bɑlmɔni wɑnnu, ŋɑɑn b tɑn sii wɑɑ b tiɑɔnŋ lonm e, k tikl wɑntieb k b tɑn wɑnt’b lin nbɑ k b luon l gbiintu. B tɑn kɑn gbiint bɑlmɔni mɑnŋ, ŋɑɑn b tɑn sii luon bii gbiin lɑbɑgɑnɑ e. Ŋɑɑn fin ŋɑnin n yɑbl k suol ɑ mɔnŋ l kul ni. Sɑkn fɑldinu. Ii tuun ɑ tuonn nbɑ tie Yennu lɑbɑmɑnn muɑntu nɑ, k tun ɑ tuonn nbɑ tie Yennu tuontunnɔ yɑl nɑ fɑnu. Ŋɑɑn min ŋɑnin, yuo bɑɑl nɑn bin jii’n k tien *mɑlunŋ ɑ. N kuun yuo bɑɑl ɑ. N gbɑɑ gbigbɑɑŋɑnɑ wɑɑ. N tin n nɑntɑɑl nɑ k gbenn ɑ. N lek diɑ bɑlmɔni wɑnnu. Yuo nbɑ bɑɑt, n tɑn sɑɑ gɑɑl nyɑnnu nyuɑt ɑ. L nyuɑt tie fielu nɑɑn foklk nbɑ k Yonmdɑɑnɔ nbɑ tie bɑlbuŋɑnɔ nɑ tɑn sɑɑ tul’n bɑlbudɑɑl, k u kɑn tul min kuukuɑ, ŋɑɑn u tɑn sɑɑ tul bin nbɑ kul nbɑ luon bin lɑ u jennu nɑ. Yɑbt k bɑɑl n penŋ yiɑn yiɑn nɑ, k mɑɑn Demɑɑs nyik’n ɑ. U mɔk lonm nɑn tingbounŋ bonɑ, k u sɑɑn Tesɑɑluoniik ɑ. Klesens sɑɑn Gɑɑlɑɑti wɑɑ, k Tiit mun sɑɑn Dɑɑlmɑɑti wɑɑ. Luk kuukuɑ e ji be nɑn’n. Jiin Mɑɑlk k bɑɑl nɑn’ɔ nɑ, k mɑɑn u sɑɑ fit sonm’n bonciɑnn n tuonɑ ni. N tun Tiikiik ɑ wun sɑɑn Efes. Fi i bɑɑt yuo nbɑ, fɑn jii n liɑtfuouk nbɑ k n dɑɑn nyik Tloɑs, k l be Kɑlpus buol ni nɑ nɑ. A biɑ jii n kɑdɑpinkɑlɑ nɑn n kɑdɑgbɑnt nɑ. Aleksɑndl wun nbɑ kul sɑɑɔk nɑ din tun’n lin nbɑ bi bonciɑnn. Yennu sɑɑ pɑ’u l pɑɑk. Suot ɑ mɔnŋ nɑn’ɔ, k mɑɑn u kɔn nɑn lɑbɑmɑnn nbɑ k t muɑntl nɑ bonciɑnn. Sinsinn mɑɑ dɑɑn kɔn n mɔnŋ pɑɑk nɑ, suɑ dɑɑn k set n puol. B kul dɑɑn nyik’n ɑ, Yennu dɑɑ jikt’b tɑɑli. Ŋɑɑn Yonmdɑɑnɔ dɑɑn be nɑn’n k tul’n pɑnŋ k n dɑɑn fit muɑnt lɑbɑmɑnn mɑnŋ kul k tul bin nbɑ k tie *Suifnbɑ nɑ kul ɑ, ɑ bin gbɑt. Ŋuɑ e dɑɑn fɑt’n yɑnbɔl mɔb ni. ŋuɑ e biɑ sɑɑ nyinn’n bonbiit kul ɑ ni, k kunn’n k kuɑn’n u nɑɑn nbɑ be sɑnpɑɑpo nɑn lɑɑfiɑ. Ŋuɑ e yen dontl nɑn yuo nbɑ kɑɑ gbennu. * Amenn. N jikt n fuonti k tien Pliisiil nɑn Akiilɑɑs, nɑn Onesiifuol ŋɑɑtieb. Elɑst dɑɑn biɑl Kuolent. Tlofiinm dɑɑn kɑɑ lɑɑfiɑ k n dɑɑn nyik’ɔ Miile. Yɑbt k bɑɑl nnɑ wɑɑ, k gbintɑnkɑɑnŋ n bɑɑl. Eobuuluus nɑn Pludɑns nɑn Liinus nɑn Kluodiɑ tien’ɑ b fuonti, k Klistuweilɑ kul ɑ biɑ fuont’ɑ. Yonmdɑɑnɔ ii be nɑn’ɑ. Yennu ii mɔk ninkpɑbɑɔnŋ nɑn’i. Min Pɔul, wun nbɑ tie Yennu tuontunnɔ nɑn Yiesu *Klistu *tuomi nɑ, min e k Yennu lukt’n k tun’n u nigɑnnkɑb buol ɑ n cie b yɑdɑ, k te bin bɑnn u bɑlmɔni lɑbɑɑl nbɑ wɑnt’t bɑnnu nbɑ k t sii mɔk binbenŋ nbɑ gbuot Yennu nunm. Lin nbɑ nɑ nyii dindɑnn nbɑ k t mɔk nɑn t sii mɔk mɑnfuol nbɑ kɑɑ gbennu nɑ ni e. Yuo nbɑ k u dɑɑ din k nɑn dulnyɑ nɑ, Yennu nbɑ k fɑɑ fɑɑk nɑ din senn mɔsonn ɑ u sɑɑ tul’t mɑnfuol mɑnŋ. Yuo nbɑ k u din senn nɑ nbɑ tɑn bɑɑl, k Yennu t Fietuɑ te k n bɑnn u mɑɑn. L mɑɑn e tie mɑɑn nbɑ k u yɑɑ mii muɑntl nɑ. N dɑ kɑdɑɑɔk nɑ k tien fin Tiit wun nbɑ tie n bimɔnŋ k t tɑɑ yɑdɑ yenn kuɑ nɑ. Bɑɑ Yennu nɑn t Fietuɑ Yiesu Klistu ii mɔk ninkpɑbɑɔnŋ nɑn’ɑ k biɑ tul’ɑ mɑnu. N din te k ɑ biɑl Klet tinŋ ni mɑɑ ɑ ŋɑnm bonsiɑl kul nbɑ dɑɑn tenn, k biɑ kɑɑn kɑɑn Klistu mɔtɑɑɔk niib *sɑɑkɑb duo kul ni, nɑn mɑɑ din wɑnn’ɑ biɑnŋ nbɑ nɑ. L kpɑɑ tɑlɑs e nɑn sɑɑkuɑ i tie wun nbɑ k b k fit tɑɑl’ɔ. L kpɑɑ tɑlɑs nɑn wuu mɔk puo yenɔ kuɑ. L kpɑɑ tɑlɑs nɑn u wɑɑs n tien Klistu yɑdɑ, k dɑɑ tie wɑɑbiit nɑn tubkɑngbɑtɑ, k mɑɑn Klistu mɔtɑɑɔk niib yudɑɑnɔ sii tuun Yennu tuonɑ e. L pɑɑk, l kpɑɑ tɑlɑs nɑn u dɑɑ tie dɑɑnɔ nbɑ k b fit tɑɑl’ɔ, k dɑɑ mɔk jɑpɑɑt, ɑmi wun nbɑ dont wutuol yiɑn yiɑn, ɑmi wun nbɑ nyu dɑɑn k yib, ɑmi wun nbɑ luon kunkɔnɑ, ɑmi wun nbɑ luon likli fɑɑk sɔni ni. Ŋɑɑn l kpɑɑ tɑlɑs k wuu mi sɑɑnm gɑɑlu, kii luon lin nbɑ ŋɑn, kii mi u mɔnŋ diɑnu, kii be fɑnu, kii tie Yennu yuɑ, kii mi mɔnŋdiɑnu. L kpɑɑ tɑlɑs k wuu diɑ bɑlmɔni lɑbɑɑl nbɑ k t din wɑnn’i nɑ fɑnu. Ŋɑn e sɑɑ te k wun fit cie niib pɑlɑ nɑn wɑnnu nbɑ tuok, k biɑ te k wun fit k wɑnn bin nbɑ k sɑɑk u wɑnnu mɑnŋ nɑ bɑlmɔni. K mɑɑn mɔyetdɑnm bonciɑnn be, k b mɑntk be *Suifnbɑ nbɑ lebt b binbenŋ nɑ sinsuuk ni e, k diɑ b jɑtmɑɑn k kpɑnn niib. L kpɑɑ tɑlɑs k fin guɑl b mɑɑn, k mɑɑn b liklonbiiuk pɑɑk k b lin wɑnt niib lin nbɑ k ŋɑn nɑn bii wɑnt, k ŋmɑt ŋɑsɑi niib kul dudukt. Klet jɑsuɑ, wun nbɑ din tie b tiɑɔnŋ sɔkni din yet ɑ: «Klet-tieb fɑ fɑɑk yuo kul ɑ, k b nɑɑn nɑn bonkob-biit, k biɑ tie gbɑn-nyɑkdɑnm nbɑ luon diinɑ kuukuɑ.» Wɑɑ din yet biɑnŋ nbɑ nɑ, l tie bɑlmɔni e. L pɑɑk, l kpɑɑ tɑlɑs nɑn k ɑ yɑki nɑn’m fɑnu, k bii mɔk bɑlmɔni yɑdɑ, k ji dɑɑ gbiintl Suifnbɑ fɑɑk lɑbɑɑl, k biɑ dɑɑ gbiintl niib nbɑ k sɑɑk bɑlmɔni lɑbɑɑl nɑ *senni. Bonsiɑl kɑɑ k mɔk jɑknt bin nbɑ be binbenŋ nbɑ gbuot Yennu nunm nɑ buol ni, ŋɑɑn bonɑ kul mɔk jɑknt e k tul bin nbɑ tie jɑknt-dɑnm k k tien Klistu yɑdɑ nɑ, k mɑɑn b dudukt nɑn b yɑn ni kul tie jɑknt e. B yi b mɔnŋ Yenmiilɑ e, ŋɑɑn k b tuonɑ wɑnt nɑn b k sɑk bɑnn Yennu. B tie mɔyetdɑnm nɑn nibiit e, k kɑn fit tun tuonŋɑnsiɑl. Ŋɑɑn fin ii wɑnt lin nbɑ tɑɑ nɑn bɑlmɔni wɑnnu. A kpɑɑn jɑkpelɑ, ɑ bii be suon nnɑ, kii be bɑnnu nbɑ k b jɑnŋ nɑn nibɑɑkl, kii diɑ b mɔnŋ, kii diɑ lɑbɑmɑnn wɑnnu fɑnu, kii mɔk lonm nɑn niib, kii mɔk gbɑnkul. A biɑ kpɑɑn puokpelɑ, ɑ bii be bɑnnu nbɑ k niib ii mi nɑn b tie Yennu yɑb e, k dɑɑ tie sɑnjɑɑnjɑnnɑ, k biɑ dɑɑ nyu dɑɑn k yib, ŋɑɑn bii wɑnt kpɑɑni nbɑ ŋɑn. Nnɑ e k b sɑɑ fit wɑnn puobis ɑ bii luon b sɔlb nɑn b wɑɑs, kii piɑk bɑlmɔni, kii be binbenŋ nbɑ gbuot Yennu nunm nɑ ni, kii tuun tuonn fɑnu ŋɑɑk ni, kii mɔk bulcint, kii sɑɑk b sɔlb mɔi, ɑ suɑ dɑɑ fit piɑk bonbiil k jiint Yennu mɑɑn po. A biɑ kpɑɑn nɑɑsinm k bii diɑ b mɔnŋ fɑnu. Bonsiɑl kul ni, fii tuun tuonŋɑnɑ nbɑ sii wɑnt niib bɑɑ sii be biɑnŋ nbɑ. Fii wɑnt niib *Klistu lɑbɑɑl nɑn ninmɔnn nɑn bɑlmɔni, nɑn mɔbonɑ nbɑ k niib kɑn fit pɑk bonbiil k jiin l po, k bin nbɑ kɔn nɑn’ɑ nɑ ii di fei k mɑɑn b kɑn fit tɑɑl’t siɑl pɑɑk. L ŋɑn k dɑɑbɑ ii sɑɑk b yonmdɑnm mɔi, kii pent b pɑlɑ bonsiɑl kul ni. B dɑɑ noi nɑn b yonmdɑnm mɔniɑt, k dɑɑ jɑɑn b siɑl, ŋɑɑn kii tie dɑnm nbɑ sɑɑk b yonmdɑnm mɔi yuo kul k ŋɑn e sɑɑ te k niib n tul wɑnnu nbɑ piɑk t Fietuɑ Yennu po nɑ bɑɑkl. K mɑɑn Yennu wɑnn u ninkpɑbɑɔnŋ nbɑ k niib kul fielu nyii lenŋ nɑ wɑɑ. L ninkpɑbɑɔnŋ e wɑnn’t nɑn tin nyik binbenŋ nbɑ k gbuot Yennu nunm nɑn tingbounŋ nɑ lonbiiuk, ŋɑɑn kii be binbenŋ nbɑ wɑnt nɑn t tie bɑlmɔnpɑklɑ, k biɑ tuɑk bɑlmɔni sɔnu, k biɑ tie Yennu yɑb e. Nnɑ e k t sii guu mɑnu nbɑ k t dɑɑn nɑ, dɑɑl nbɑ k Yiesu Klistu, wun nbɑ tie t Yenjɑɑnn nɑn t Fietuɑ nɑ, tɑn sɑɑ dɔkt yentsɑɑkɑl ni nɑ. Ŋuɑ e din gɑɑl t pɑɑk k kpo, ɑ wun fɑt’t biit kul dɑɑbs ni, k te k tii tie niib nbɑ be binbenŋ nbɑ gbuot Yennu nunm nɑ ni, k biɑ kii tie u tiɑɔnŋ yɑb, k biɑ kii tie niib nbɑ nunm mɔn nɑn tuonŋɑnɑ tumu. Lin nbɑ nɑ e tie lin nbɑ k ɑ sii wɑnt’b nɑ. Ii cien b pɑlɑ, kii biɑ kii kpɑɑn’m nɑn Yennu nbɑ tul’ɑ yiikuo nɑ. A dɑɑ ŋɑɑnt k b suɑ goli’ɑ yɑnn. A tiɑl’b k bin tul b tinŋ yudɑnm nɑn yiikuo-dɑnm bɑɑkl, k sɑk b mɔi, k tien siil k tun tuonŋɑnɑ kul ɑ. Yetl’b ɑ b dɑɑ piɑk bɑlbiit suɑ pɑɑk, ŋɑɑn kii luon pɑlmɑɑsl, kii mɔk bulcint, kii mɔk sikn-n-mɔnŋ niib sinsuuk ni. K mɑɑn siɑn-yuo t mɔnŋ din k mɔk yɑn, t din tie mɔyetdɑnm e, k wɑɑ sɔnu nbɑ k tuok. T din tie niɑnbiit nɑn gbɑnɑnt lonm buolu buolu dɑɑbɑ e. T binbenŋ kul din tie bonbiil nɑn niɑnbiiuk o. T din nɑn t lieb k b mun biɑ nɑn’t. Ŋɑɑn t Fietuɑ Yennu lonm nɑn u bulcint nbɑ din tɑn fiit nyii pɑɑnu yuo nbɑ, k u din fiel’t. L din k tie t tiɑɔnŋ tuonŋɑnɑ pɑɑk kɑɑ, ŋɑɑn u mɔnŋ ninbɑtinu pɑɑk e. U din jii nyun e k wul’t, k l nyun pɑɑk, k Foŋɑnm te k b ŋɑnm k mɑl’t, k tul’t mɑnfopɑɑnn. Yennu din yɑt Foŋɑnm t pɑɑk bonciɑnn Yiesu *Klistu ni. Yennu ninkpɑbɑɔnŋ pɑɑk k u din tun nnɑ ɑ wun tien’t niŋɑnm u buol, k biɑ tien’t u wɑɑs nbɑ mɔk dindɑnn k t sɑɑ lɑ mɑnfuol nbɑ kɑɑ gbennu. Bɑli nɑ tie bɑlmɔni e. N luon k ɑ jii ɑ dudukt kul kii wɑnt’b lin nbɑ nɑ, k bin nbɑ tien Yennu yɑdɑ nɑ n jii b yuo kii tuun tuonŋɑnɑ nɑn ninmɔnn. Ŋɑnn e ŋɑn k mɔk nyuɑt k tul suɑ kul ɑ. Ŋɑɑn nyik mɔnɔyɑnnɑ, nɑn yejɑnm sɑnɑ kɑnu, k dɑɑ kɔn nɑn lieb, k noi mɔniɑɔk *senni pɑɑk, k mɑɑn lin nbɑ nɑ kul k mɔk nyuɑt k biɑ tie bon-yɑnɑ e. Nilɔ i tie tuknɑ dɑɑnɔ, fɑn pɑk’ɔ yonm, k biɑ pɑk’ɔ munle pɑɑk, ŋɑɑn l puolpo fɑn nyik’ɔ. A mi nɑn l nibuolu nyik sɔnu nbɑ tuok ɑ, k wɑɑ kpɑɑ tubɑ nɑ pɑɑk, k u kuɑnt u mɔnŋ muu ni. Mi i tun Altemɑɑs ɑmi Tiikiik ɑ buol ni yuo nbɑ, fɑn yɑbl k cet’n Niikopoliis duo ni, k mɑɑn n sii be lenŋ e gbintɑnkɑɑnŋ yuo. Yɑbt ɑ mɔnŋ k sonm Senɑɑs, wun nbɑ tie bɑlbuulɔ nɑ, nɑn Apuoluos, k bin lɑ bɑɑ luon lin nbɑ kul k fit piin b sɔnu nɑ. L kpɑɑ tɑlɑs k t niib ii mi bɑɑ sii tuun tuonŋɑnɑ bonciɑnn bɑnnu nbɑ, kii sonmt niib b fɑlɑ ni, k dɑɑ be binbenŋ nbɑ kɑɑ nyuɑt. Bin nbɑ be n buol ni nɑ kul ɑ fuont’ɑ. A fuont bin nbɑ tien Klistu yɑdɑ k luon’t b yɑdɑ pɑɑk nɑ. Yennu ninkpɑbɑɔnŋ ii be nɑn i kul ɑ. Min Pɔul wun nbɑ be dɑnsɑlk Yiesu *Klistu sɑnn pɑɑk nɑ, nɑn t nɑɑ bik Tiimuote dɑ kɑdɑɑɔk nɑ k tien t tuontunluɑ Fiilemɔn wun nbɑ k t luon’ɔ nɑ, nɑn Yiesu mɔtɑɑɔk niib nbɑ lɑki lieb ɑ ŋɑɑk ni nɑ; k biɑ tien t niipuo Apiɑ nɑn t tuontunluɑ Alkiip nbɑ mun lɑɑt muksuk u tuonn nɑ pɑɑk. T Bɑɑ Yennu nɑn Yonmdɑɑnɔ Yiesu Klistu n yɑt yetŋɑnm i pɑɑk k biɑ tul’i mɑnu. N nɑɑ bik, yuo kul, n Yenmiɑlu kul ni n tiɑn ɑ po k tien Yennu niipuouk, k mɑɑn n ponŋ gbiɑ fɑɑ tien Yonmdɑɑnɔ Yiesu yɑdɑ k luon u yɑb kul biɑnŋ nbɑ. N mei Yennu ɑ tinm nɑn fin nbɑ tɑɑn k tien Klistu yɑdɑ nɑ pɑɑk sɑɑ te k tin bɑnn fɑnu piisn nbɑ k t mɔk tɑɑ tɑɑ Klistu po nɑ pɑɑk. N nɑɑ bik, ɑ lonm mɑnŋ tul’n pɑlpienn nɑn pɑlcienn k ŋɑnm cie n pɑl bonciɑnn, k mɑɑn ɑ cie Yennu niib kul pɑlɑ. L pɑɑk, Klistu pɑɑk n bo kii mɔk jɑŋmɑɑni nɑn mɑn yet’ɑ fɑɑ sɑɑ tun lin nbɑ tuok, ŋɑɑn lonm pɑɑk k n bɑln’mɑ, min Pɔul nbɑ tie sɑɑkuɑ k biɑ be dɑnsɑlk ni mɔtɑɑnɑ Yiesu Klistu pɑɑk nɑ, n bɑln’mɑ k jiin Onesiinm po. U ji kpɑnt k tie n bik Klistu ni tɑɑ be dɑnsɑlk ni nɑ. Sinsinn nɑ, u dɑɑn tuu k mɔk nyuɑt k tul’ɑ ni, ŋɑɑn mɔtɑɑnɑ u ji mɔk nyuɑt bonciɑnn k tien min nɑn fin kul ɑ. Mɔtɑɑnɑ, n tuun’ɔ ɑ wun ŋmɑt ɑ buol ni; k n pɑl lonm kul ɑ be u ni. N bo sii luon k mii diɑ’u n buol ni nnɑ nɑ k wuu tuun ɑ sienu ni kii sonmt’n mɑɑ be dɑnsɑlk ni Klistu lɑbɑmɑnn pɑɑk nɑ. Ŋɑɑn n dɑɑn k luon k n tun siɑl k ɑ k tɑɑ n po. N k luon k n mɑb’ɑ kɑɑ, ŋɑɑn n luon k lin nbɑ kul k ɑ sɑɑ tun n nyi ɑ mɔnŋ lonm ni e. Pɑsiɑl, Onesiinm siet ɑ buol yuo wɑɑnm-nnɑ e, ŋɑɑn ɑ sɑɑ lɑ’u k wuu be ɑ buol yuo kul. K mɑɑn mɔtɑɑnɑ u ji k tie dɑɑbl kɑɑ, ŋɑɑn u gɑl dɑɑbl ɑ, u tie t nɑɑ bilonkɑk e. N luon’ɔ bonciɑnn, ŋɑɑn ɑ sii luon’ɔ k gɑl nnɑ, k mɑɑn u tie nisɑɑlk e k biɑ tie Klistuyuɑ. L pɑɑk, l i tie k ɑ duki ɑ n tie ɑ yuɑk i e, fɑn gɑɑl’ɔ nɑn fɑɑ bo sɑɑ gɑɑl’n biɑnŋ nbɑ nɑ. L i tie k u biil ɑ siɑl ɑmi u diɑ ɑ pɑnsiɑl i e, fɑn te k mɑn pɑ l pɑnn. Nɑnn nɑ, n dɑ nɑn n mɔnŋ mɔnŋ nuu e; min Pɔul sɑɑ pɑ’ɑ. Ŋɑɑn min kɑɑ sɑɑ yet’ɑ, ɑ mɔnŋ mi nɑn ɑ diɑ n pɑnn ɑ mɑnfuol pɑɑk. L pɑɑk, n ninjɑ, tun nnɑ Yonmdɑɑnɔ pɑɑk, k duɑn n pɑl, k mɑɑn t set tie wei-nɑn-lieb e Klistu ni. Mɑɑ dɑ kɑdɑɑɔk mɑnŋ k tien’ɑ nɑ, n k mɔk bilsuk nɑn ɑ sɑɑ sɑk tun k lin gɑl mɑɑ bɑln’mɑ lin nbɑ nɑ kul nɑ. A biɑ sɑɑ tien dieok siil k guun’n, k mɑɑn i Yenmiɑlu pɑɑk, n mɔk dindɑnn nɑn Yennu sɑɑ te k n bɑɑl fuont’i. Epɑɑflɑɑs wun nbɑ k min nɑn ŋuɑ be dɑnsɑlk Yiesu Klistu pɑɑk nɑ tien’ɑ u fuonti, k n tuontunlieb, Mɑɑlk, nɑn Aliistɑɑlk, nɑn Demɑɑs, nɑn Luk, mun biɑ tien’ɑ b fuonti. Yonmdɑɑnɔ Yiesu Klistu n yɑt yetŋɑnm i pɑɑk. Siɑn-yuo, Yennu din jii sɔni bonciɑnn k te k sɔkniinbɑ pɑk tul t yejɑnm k l tien tɑɑl munŋɑ wɑɑ, ŋɑɑn mɔtɑɑnɑ u jii mɑɑn k tul u Bijɑ e k u pɑk nɑn tinm. Yennu din lukt’ɔ ɑ wuu yen bonsiɑl kul k biɑ din te k u nɑn *dulnyɑ kul. Bijɑ mɑnŋ ni e k t lɑ yentsɑɑkɑl nbɑ nyii Yennu *yudɑnt ni, k ŋuɑ mɑnŋ e tie Yennu mɔnŋ mɔnŋ ninnɑɔnŋ, k diɑ dulnyɑ kul nɑn u mɑɑn nbɑ mɔk yiikuo nɑ. Wɑɑ din tun lin nbɑ te k niib mɔk nyikcɑbu b biit pɑɑk nɑ puolpo, k u ji kɑl Yɑbnt Yennu niidiitu po *Yendɔunŋ ni. Bijɑ mɑnŋ nbɑ din cie mɑlɑkɑɑnbɑ nɑ, Yennu din pul’ɔ sɑnn nbɑ gbenŋ bonciɑnn k cie b yɑl. Setk nɑn mɔni Yennu k mi yet mɑlɑksuɑ ɑ: «Fin e tie n Bijɑ, k lɑɑ nyii dinnɑ min e tie ɑ Bɑɑ.» Yennu biɑ k mi yet mɑlɑksuɑ po ɑ: «N tɑn sii tie ɑ Bɑɑ, k ɑ mun tie n Bijɑ.» K Yennu nbɑ din tɑn yɑɑ wun tun u Bijɑkpel tingbounŋ nɑ ni yuo nbɑ, k u yet ɑ: «L kpɑɑ tɑlɑs k Yennu mɑlɑkɑɑnbɑ kul ɑ n jiɑnt’ɔ.» Mɑlɑkɑɑnbɑ po, Yennu din yet ɑ: «U te k u mɑlɑkɑɑnbɑ tie wounŋ, k biɑ te k u tuontunnɑ tie mupienu.» Ŋɑɑn l yet u Bijɑ nɑ po ŋɑnin ɑ: «Yennu, ɑ nɑɑn nɑ sii be nɑn yuo nbɑ kɑɑ gbennu. K ɑ nɑɑn dɑnml nɑ tie bɑlmɔni dɑnml e. A luon lin nbɑ tuok, ŋɑɑn nɑn biit, l pɑɑk te k Yennu, wunbɑ tie ɑ Yennu, nɑ lukt’ɑ, k muɑn pɑlpienn kpɑn ɑ yul pɑɑk, k nyik ɑ tɔk-nɑn-lieb ŋɑɑn lukt’ɑ.» U biɑ yet ɑ: «N Yonmdɑɑnɔ, fin e din nɑn tingbounŋ nɑ pinpiik ni wɑɑ, k nɑn sɑnpɑɑk nɑn ɑ mɔnŋ nii. Lin nbɑ nɑ kul tɑn sɑɑ gɑl ɑ, ŋɑɑn fin lek sii tun be e. Sɑnpɑɑk nɑn tinŋ tɑn sɑɑ kpet e k cɑt cɑt nɑn cincenn nɑ. A tɑn sɑɑ pɔbn’m nɑn bɑɑɔnŋ nɑ e, k b tɑn sɑɑ lebt nɑɑn nɑn tiɑt nɑ. Ŋɑɑn fin ŋɑnin kpɑn sii tun tie yonm e k ɑ mɑnfuol nɑ kɑɑ juontu.» Tɔn, Yennu dɑɑ k mi yet mɑlɑksuɑ ɑ: «Kɑln n niidiitu po nnɑ nɑ mɔkmɔk k mɑn tɑn jii ɑ dɑtɑi nɑ k tien’m ɑ tɑɑkpɑktɑ.» L pɑɑk, mɑlɑkɑɑnbɑ tie bee? B kul tie sei nbɑ jiɑntl Yennu e, k ŋuɑ Yennu tuun’m ɑ bii sonmt niib nbɑ sɑɑ lɑ fielu nɑ. L pɑɑk, l kpɑɑ tɑlɑs e k tin gbiint bɑlmɔni nbɑ k t din gbɑt nɑ fɑnu k tɑn dɑɑ buol. Lɑbɑɑl nbɑ k mɑlɑkɑɑnbɑ din muɑnt k tul t yejɑnm nɑ din tie bɑlmɔni e, k wun nbɑ din tuu k sɑk k wei’l din tuu lɑ tubdɑtu nbɑ jɑnŋ’ɔ e. L pɑɑk, t i kii sɑk k gbiint fieljɑɑnn mɑnŋ lɑbɑɑl fɑnu, t sɑɑ tien nlee k nyi tubdɑtu ni? Yonmdɑɑnɔ tiɑɔnŋ o din dɔnŋ muɑnt fielu mɑnŋ lɑbɑɑl nɑ po, k bin nbɑ din gbɑt nɑ din wɑnn’t ɑ l set tie bɑlmɔni e. Yennu tiɑɔnŋ din wɑnn nɑn mɑɑn mɑnŋ tie bɑlmɔni e, k din tuun bɑktnɔunŋ nɑn yɑɑl-lituk tuonɑ, k biɑ tien’m Foŋɑnm piini nɑn wɑɑ luon biɑnŋ nbɑ nɑ. *Dulnyɑ nbɑ bɑɑt k t pɑk l po nɑ, Yennu din k yɑɑ ɑ mɑlɑkɑɑnbɑ e tie l yudɑnm. L diɑn siɑl po Yennu lolkpel kɑdɑɑɔk ni ɑ: «Yennu, nisɑɑlk tie bee k ɑ duki u po, k nilɔ bik tie bee k ɑ bɑkɑ be u ni? A din sikn’ɔ yuo wɑɑnm-nnɑ mɑlɑkɑɑnbɑ buol, k biɑ te k u lɑ dontl nɑn pɑku, k ɑ te k u mɔk yiikuo bonsiɑl kul pɑɑk.» L i tie k b yet ɑ Yennu tul nilɔ yiikuo «bonsiɑl kul pɑɑk,» l wɑnt nɑn u set mɔk yiikuo bonsiɑl kul pɑɑk k siɑl k tenn. Ŋɑɑn mɔtɑɑnɑ t dɑɑ k lɑ nɑn u mɔk yiikuo bonsiɑl kul pɑɑk. Ŋɑɑn t lɑ nɑn Yennu din sikn Yiesu yuo wɑɑnm-nnɑ mɑlɑkɑɑnbɑ buol, ɑ k Yennu ninkpɑbɑɔnŋ pɑɑk, wun kpo niib kul pɑɑk, k mɔtɑɑnɑ k t lɑ k u mɔk *yudɑnt nɑn sɑnn u kuun mɑnŋ pɑɑk. K mɑɑn Yennu nbɑ din nɑn bonsiɑl kul k biɑ diɑ l kul nɑ, wɑɑ jii u wɑɑs bonciɑnn k kuɑn’m u nɑɑn ni nɑ, l din tokn u buol ni, ɑ wun te k b fielu dɑɑnɔ Yiesu n tien b Fietuɑ nɑn bɑlmɔni u fɑlɑ dinu ni. Yiesu, wun nbɑ wu nisɑɑli biit nɑ, nɑn bin nbɑ kul k u wuul b biit nɑ tɑɑ Bɑɑ e. L pɑɑk e k Yiesu k tiin fei nɑn wun yiin’m u nɑɑ wɑɑs. U yet Yennu ɑ: «N tɑn sɑɑ muɑnt ɑ sɑnn n nɑɑ wɑɑs buol ni; n tɑn sɑɑ pɑk’ɑ ɑ niib tintɑɑnu ni.» U biɑ yet ɑ: «N tɑn sii duu Yennu pɑɑk,» k biɑ yet ɑ: «Min nɑn wɑɑs nbɑ k Yennu din tul’n nɑ e be nɑ.» Tɔn, wɑɑs mɑnŋ nbɑ tie nisɑɑli nɑ pɑɑk, Yiesu mun din tie nisɑɑlk e nɑn ŋɑnm nɑ, ɑ u kuun ni wun tɑn biil *Sɑɑtɑn nbɑ diɑ kuun yiikuo nɑ, k biɑ fɑt bin nbɑ be dɑɑbs ni b mɑnfuol kul ni, bɑɑ tiin kuun jɑŋmɑɑni nɑ pɑɑk nɑ. Bɑlmɔni e, l k tie mɑlɑkɑɑnbɑ kɑɑ k u sonmt, ŋɑɑn Ablɑɑhɑɑnm yɑɑbuonɑ e k u sonmt. Ŋɑnn e l din kpɑɑ tɑlɑs nɑn wuu tie wɑɑs mɑnŋ ninnɑɔnŋ dede, k fit tien b *mɑnntɔyudɑɑnɔ nbɑ mɔk ninbɑtinu k biɑ tie bɑlmɔni dɑɑnɔ, k fit jii u mɔnŋ k tien *mɑlunŋ k tul Yennu, k wɑɑs nɑ n lɑ nyikcɑbu b biit pɑɑk. K mɔtɑɑnɑ, u sɑɑ fit k sonm bin nbɑ lɑ jinjɑnmi, k mɑɑn u tiɑɔnŋ din lɑ jinjɑnmi k biɑ dii fɑlɑ wɑɑ. N nɑɑ wɑɑs nbɑ tie Yennu yɑb k biɑ be bin nbɑ k Yennu lukt’b nɑ ni, ii goli mɑn Yiesu, wun nbɑ k Yennu din tun’ɔ ɑ wun tɑn tien *mɑnntɔyudɑɑnɔ t Yenjiɑntu sɔnu ni nɑ. Muois nbɑ din tie kɑn ŋmɑt puol, k tul Yennu ŋɑɑtieb biɑnŋ nbɑ nɑ, nnɑ e mun k Yiesu din tie kɑn ŋmɑt puol k tul Yennu nbɑ din lukt’ɔ nɑ. Setk nɑn mɔni, Yiesu jɑnŋ nɑn *yudɑnt k gɑl Muois nɑn ŋɑmɑɑlɔ nbɑ jɑnŋ nɑn dontl k gɑl ŋɑɑk tiɑɔnŋ nɑ. Ŋɑɑk i tɑnŋ i sie, suɑ e senn’l, k Yennu e mɑɑ bonsiɑl kul. Muois din tie tuontunnɔ nbɑ kɑn ŋmɑt puol e Yennu ŋɑɑtieb sinsuuk ni, k din wɑnn lin nbɑ po k Yennu din yɑɑ wun tɑn pɑk siɑn-yuo nɑ. *Klistu nbɑ tie Yennu Bijɑ nɑ, u tie wun nbɑ kɑn ŋmɑt puol e k yen Yennu ŋɑɑtieb. L i tie k t mɔk pɑlcienn nɑn yugontl t dindɑnn pɑɑk, l wɑnn nɑn tinm e tie Yennu ŋɑɑtieb mɑnŋ. L pɑɑk, Foŋɑnm nbɑ yet biɑnŋ nbɑ nɑ: «I i gbɑt Yennu kunkɔl dinnɑ, i dɑɑ nyɑl i tubɑ nɑn yɑɑ din kɔn nɑn’ɔ dɑɑl nbɑ k i din bikn’ɔ pɑɑnpieonŋ ni nɑ. Yennu yet ɑ: ‹B din lɑ mɑɑ din tun lin nbɑ kul k sɑɑ jɑnŋ binɑ piinnɑ nɑ, ŋɑɑn lenŋ e k b din bikn’n. Ŋɑnn e te k n donn wutuol niib mɑnŋ pɑɑk,› k din yet ɑ: ‹B bot b dudukt ni wɑɑ, k k mi mɑɑ luon bii tuun lin nbɑ.› ‹N din donn wutuol k pol’b mɔb ɑ B kɑn mi bɑɑl mɑɑ bo yɑɑ n tul’b fuon tinŋ nbɑ nɑ ni.› » Tɔn, n nɑɑ wɑɑs, i mi k i suɑ n tien biitdɑɑnɔ k kɔnŋ yɑdɑ u pɑl ni k tɑn ŋmɑt puol k nyik Yennu nbɑ fo nɑ. Ŋɑɑn ii cien i lieb pɑlɑ dɑɑl n tuu dɑɑl, yuo kul nbɑ k Yennu mɑɑn be i sinsuuk ni k «dinnɑ» i suɑ dɑɑ nyɑl u tubɑ biit nbɑ tuu kpɑnn nilɔ nɑ pɑɑk. K mɑɑn t tie Klistu tɔk-nɑn-lieb e, l i tie k t duu u pɑɑk nɑn tɑɑ din duu u pɑɑk sinsinn biɑnŋ nbɑ nɑ. Nnɑ e k b din diɑn Yennu lolkpel kɑdɑɑɔk ni ɑ: «I i gbɑt Yennu kunkɔl dinnɑ, i dɑɑ nyɑl i tubɑ nɑn yɑɑ din yet u mɔb yuo nbɑ nɑ. K lɑnm e din gbɑt u kunkɔl ŋɑɑn yet u mɔb i? Ŋɑnm kɑɑ din tie bin nbɑ nyii Ejipt k Muois din tie tuɑnndɑɑnɔ nɑ ɑɑ? K lɑnm e biɑk k Yennu wutuol din duo b pɑɑk k sɑɑ jɑnŋ binɑ piinnɑ nɑ? L k tie bin nbɑ din tun biit, k b gbɑnɑnt tɑn biɑl pɑɑnpieonŋ ni nɑ kɑɑ ɑɑ? Yennu dɑɑ din pol lɑnm e mɔb ɑ: «B kɑn mi bɑɑl mɑɑ bo yɑɑ n tul’b fuon tinŋ nbɑ nɑ ni.» L din tie bin nbɑ din kɔn nɑn’ɔ nɑ e. Ŋɑnn t lɑ nɑn b din k fit kuɑ k mɑɑn b yɑdɑkɑɑln pɑɑk. Yennu din senn mɔsonn k tul’t, ɑ t sɑɑ fit k kuɑ siɑn nbɑ k u tien t fuon siil nɑ wɑɑ. Ŋɑnn ii mi k i suɑ tɑn sɑɑ kɔnŋ fuon mɑnŋ. K mɑɑn t gbɑt lɑbɑmɑnn nɑn bɑɑ mun din gbɑt’l biɑnŋ nbɑ pɑɑnpieonŋ ni, ŋɑɑn l din k tul’b nyuɑt, k mɑɑn bɑɑ din gbɑt lɑbɑmɑnn mɑnŋ, b din k gɑɑl’l nɑn yɑdɑ. L pɑɑk, tinm nbɑ tien yɑdɑ nɑ, t sɑɑ lɑɑ fuon mɑnŋ nbɑ k Yennu din pɑk l po k yet ɑ: «N wutuol e duo, k n pol mɔb ɑ: ‹B kɑn mi bɑɑl mɑɑ bo yɑɑ n tul’b fuon tinŋ nbɑ nɑ ni.› » U din tɑn yet lin nbɑ nɑ nɑ, k suɑ k u ponŋ tun u nɑɑmi tuonɑ gbenn pinpiik ni wɑɑ. K mɑɑn Yennu lolkpel kɑdɑɑɔk ni siɑl po l yet l dɑɑŋɑnlole dɑɑl mɑnŋ po ɑ: «K Yennu din nyik u tuonɑ kul ɑ k foi dɑɑŋɑnlole dɑɑl.» U biɑ yet diɑni nbɑ gɑl nɑ ni ɑ: «B kɑn mi bɑɑl mɑɑ bo yɑɑ n tul’b fuon tinŋ nbɑ nɑ ni.» Bin nbɑ din gbɑt lɑbɑmɑnn nɑ sinsinn nɑ din k lɑ l fuon mɑnŋ, k mɑɑn b din yet Yennu mɔb. L pɑɑk, nisiɑb be k tɑn sɑɑ lɑ fuon mɑnŋ. L pɑɑk, k Yennu biɑ senn dɑliel k yi dɑɑl mɑnŋ «dinnɑ.» K binɑ bonciɑnn din gɑl, k Yennu din te k Dɑɑfiid yet l po nɑn tɑɑ ponŋ piɑk biɑnŋ nbɑ nɑ ɑ: «I i gbɑt Yennu kunkɔl dinnɑ, i dɑɑ nyɑl i tubɑ.» K mɑɑn Suosue i bo ii dinŋ ii tul’b fuon mɑnŋ, l puolpo Yennu ji din bo kɑn pɑk dɑliel po. L pɑɑk, fuondɑsiɑl biɑ dɑɑ be k tie Yennu niib yɑl, k nɑɑn wɑɑ din foi dɑɑŋɑnlole dɑɑl biɑnŋ nbɑ nɑ. K mɑɑn wun nbɑ lɑ Yennu fuon mɑnŋ nɑ, mun nyik u tuonɑ e k foi nɑn Yennu nbɑ din nyik u tuonɑ k foi biɑnŋ nbɑ nɑ. L pɑɑk, ŋɑɑnt mɑn k tin yɑbl t mɔnŋ k lɑ fuon mɑnŋ, k t suɑ tɑn dɑɑ bɑɑ nɑn bɑɑ din yet Yennu mɔb k tɑn bɑɑ biɑnŋ nbɑ nɑ. K mɑɑn Yennu mɑɑn mɑnŋ tie mɑɑn nbɑ fo e, k mɔk pɑnŋ k tuun tuonn, k biɑ di k gɑl juk-bɑnjiɑk nbɑ di mɔliemi nɑ. Yennu mɑɑn fit ŋmɑ k kuɑ bɑɑt nisɑɑlk siek nɑn u mɑnfuol buol ni, k kuɑ bɑɑt u tuktɑ nɑn u kpɑbɑ biesn ni, k kuɑ bɔktl u dudukt nɑn u pɑl ni bibikt. Bonnɑnkɑl kul ni siɑl kɑɑ k Yennu k lɑɑt. Bonsiɑl kul duɑ yienin ni e Yennu tuɑnn k ŋuɑ e tie wun nbɑ k t tɑn sɑɑ wɑnn tɑɑ biil lin nbɑ. L pɑɑk, ŋɑɑnt mɑn k tii diɑ t yɑdɑ nbɑ k t fiit wɑnn nɑ kenken, k mɑɑn t mɔk mɑnntɔ-yudɑɑn-jɑɑnn, k ŋuɑ e tie Yennu Bijɑ Yiesu, wun nbɑ ponŋ gɑl sɑɑn Yennu tiɑɔnŋ buol ni nɑ. T mɑnntɔyudɑɑnɔ mɑnŋ k tie wun nbɑ kɑn fit di fɑlɑ nɑn tinm t butunŋ ni kɑɑ, ŋɑɑn u mɔnŋ din lɑ biknu sɔni buolu kul ni nɑn tɑɑ mun lɑɑt biɑnŋ nbɑ nɑ, ŋɑɑn u lek din k tun biit. L pɑɑk, ŋɑɑnt mɑn k tii mɔk pɑlpɑɑll k bɑɑl Yennu nbɑ mɔk ninkpɑbɑɔnŋ nɑ nɑɑngbounŋ buol ni. Lenŋ e k t sɑɑ lɑ nyikcɑbu nɑn ninbɑtinu yuo nbɑ k l sɑɑ sonmt’t nɑ. Tɔn, b lukt *mɑnntɔyudɑɑnɔ kul niib sinsuuk ni ɑ wuu tuun Yennu tuonn k sonm niib k biɑ gɑɑl b pɑɑk k mɑnn *mɑlunŋ k tul Yennu b biit pɑɑk. Wɑɑ mun tie butmɔ nɑ, u fit gbiɑ bin nbɑ puɑl yɑn nɑn bin nbɑ kpet sɔnu ni nɑ dudukt pɑɑk, k u mɔnŋ nbɑ tie butmɔ nɑ pɑɑk, l kpɑɑ tɑlɑs k wun mɑnn mɑlunŋ u mɔnŋ biit pɑɑk nɑn wɑɑ mɑnn mɑlunŋ niib nɑ biit pɑɑk biɑnŋ nbɑ nɑ. Suɑ kɑn fit pɑk u mɔnŋ k yet, ɑ u tie mɑnntɔyudɑɑnɔ k k gɑɑl l nibɑɑkl, sie k Yennu n lukt’ɔ nɑn wɑɑ din lukt *Aɑlɔn k tien’ɔ mɑnntɔyudɑɑnɔ biɑnŋ nbɑ nɑ. Nnɑ e mun k *Klistu din k lukt u mɔnŋ k yet, ɑ u tie mɑnntɔyudɑɑnɔ k gɑɑl l nibɑɑkl, ŋɑɑn Yennu e din yet’ɔ ɑ: «A tie n Bijɑ e, k dinnɑ n tie ɑ Bɑɑ.» K biɑ yet siɑl buol ɑ: «A sii tie mɑnntuɑ nɑn yuo nbɑ kɑɑ gbennu, kii tie Melkiisedek pɑɑbu ni mɑnntuɑ.» Tɔn, Yiesu nbɑ din be tingbounŋ nɑ ni yuo nbɑ nɑ u din mei Yennu k bɑln’mɔ, k bui nɑn nyin-nyuut Yennu nbɑ sɑɑ fit fɑt’ɔ kuun ni nɑ buol ni. K wɑɑ din bɑɑkt Yennu nɑ pɑɑk k Yennu din gbɑt u miɑlu mɑnŋ. Wɑɑ lek din tie Yennu Bijɑ nɑ, ŋɑɑn u tumi cɔlnt u fɑldinu ni. Wɑɑ din tɑn dii fɑlɑ gbenn yuo nbɑ, bin nbɑ kul cɔln’mɔ ji din fit lɑ fielu nbɑ kɑɑ gbennu u buol ni, k Yennu yiin’ɔ mɑnntɔyudɑɑnɔ, Melkiisedek pɑɑbu ni. T bo sɑɑ pɑk bonciɑnn lin nbɑ nɑ po, ŋɑɑn l pɑɑl nɑn k t wɑnn’i, k mɑɑn i k bɑnt l pɑɑk yiɑn. Nnɑ yuo l ji bo kpɑɑ tɑlɑs e k yii tie wɑntieb, ŋɑɑn i biɑ luon k suɑ n wɑnn’i Yennu mɑɑn pinpiik ni sɔni nɑ. I luon biin e, k k luon jeŋmɑnkɑt. Wun nbɑ dɑɑ muɑl biin tie bibunn e, k dɑɑ k mi fɑnu lin nbɑ ŋɑn nɑn lin nbɑ bi. Ŋɑɑn jeŋmɑnkɑt tie sɑɑkɑb yɑl e, k ŋɑnm e fit bɑnt lin nbɑ tie bonbiil nɑn lin nbɑ tie bonŋɑnn, bɑɑ tuu dukn l po b pɑlɑ ni nɑ. L pɑɑk, ŋɑɑnt mɑn k tin tumi lin nbɑ tie sɑɑkɑb yɑl *Klistu ni k sɑɑn tuɑnn po. Ŋɑɑn t ji dɑɑ goli sinsinn tumiu nɑ kɑɑ. T ji k ŋɑnm fɔkn fiɑkl nbɑ sɑɑ te k nilɔ n nyik tuonɑ nbɑ sɑɑ biil’ɔ nɑ kɑɑ, kuo wɑɑ sɑɑ tien Yennu yɑdɑ bɑnnu nbɑ nɑ kɑɑ. L ji k kpɑɑ tɑlɑs k tin ŋɑnm tumi Yennu nyunwulu po, nɑn niiyiinu niib pɑɑk, nɑn kpienm fiilu po, nɑn tubdɑtu nbɑ kɑɑ gbennu nɑ po kɑɑ. Yennu i sɑk, t sɑɑ sɑɑn tuɑnn e. Ŋɑɑnt mɑn k tin got bin nbɑ ŋmɑt bɑɑ binbenbiik ni nɑ: b din lɑ Yennu yentu nɑ wɑɑ. B din lenm **Yendɔunŋ ni piini k biɑ din gɑɑl Foŋɑnm ɑ. B din luon Yennu mɑɑn nbɑ ŋɑn nɑ, k din mi *dulnyɑ nbɑ bɑɑt nɑ yiikuo buolu buolu po. Ŋɑɑn nɑn lin nbɑ nɑ kul, k b lek tɑn ŋmɑt bɑɑ binbenbiik ninŋ. L nibuolu, suɑ ji kɑn fit te k bin ŋɑnm k mɔ kuɑŋɑɑn k lebt binbenŋ. Bɑlmɔni, b ŋɑnmt kpɑɑn Yennu Bijɑ dɑpunpunn pɑɑk e, k tien lieb yɑɑk nbɑ k b sii suki’ɔ. Tɔn, tinŋ nbɑ k sɑɑk tuu bɑɑ l pɑɑk k l mɑɑkt k tie jiet k tien bin nbɑ ŋɑnmt’l nɑ, Yennu e yɑt yetŋɑnm tinŋ mɑnŋ pɑɑk. Ŋɑɑn tinŋ mɑnŋ i tie kunkoni nɑn mɔbiit, l k mɔk nyuɑt, l kɑn wei k Yennu tɑn sɑɑ pol’l mɔb. K juontu ni lin di muu. T yɔnimɔni, tɑɑ lek piɑk lin nbɑ nɑ, ŋɑɑn t k mɔk bilsuk i po. T mi nɑn i tɔk sɔnŋɑnu e, fielu sɔnu. Yennu k tuun lin nbɑ k ŋɑn. U kɑn tɑnm i tuonn po, k biɑ kɑn tɑnm yɑɑ luon’ɔ biɑnŋ nbɑ tuonɑ nbɑ k i tun k tul’ɔ nɑn tuonɑ nbɑ k i tuun i nɑɑ wɑɑs Klistuyɑb nɑ ni. T luon k i suɑ kul n yɑbl u mɔnŋ pɑɑk nɑn ninmɔnn e nɑn yɑɑ tuu tuun bɑnnu nbɑ mɔkmɔk nɑn l juontu, k yɑɑ mɔk dindɑnn biɑnŋ nbɑ nɑ, l set sɑɑ tien mɔni k tul’i. T k luon k yii tie gbɑn-nyɑkdɑnm kɑɑ, ŋɑɑn t luon k yii wɑɑ bin nbɑ mɔk yɑdɑ nɑn suklu e. Ŋɑnm e gɑɑn bonŋɑnɑ nbɑ k Yennu din senn mɔsonn nɑ. Yennu nbɑ din senn u mɔsonn tul Ablɑɑhɑɑnm yuo nbɑ nɑ, u din lol *lol, ɑ u tɑn sɑɑ tun wɑɑ din senn mɔsonn nbɑ nɑ wɑɑ. Suɑ din k be k cie Yennu tiɑɔnŋ, k l pɑɑk, u din jii u mɔnŋ sɑnn e k lol u lol mɑnŋ. U din yet’ɔ ɑ: «L tie bɑlmɔni e, n yɑt yetŋɑnm ɑ pɑɑk k biɑ sɑɑ tul’ɑ yɑɑbuonɑ bonciɑnn.» K Ablɑɑhɑɑnm din mɔk suklu e, k tɑn gɑɑl lin nbɑ k Yennu din senn mɔsonn ɑ u sɑɑ tul’ɔ nɑ. Nilɔ i lol lol, u tuu jii wun nbɑ gɑl’ɔ sɑnn e k lol, k lol mɑnŋ tie nyinn nbɑ kpi mɔniɑɔk kul ɑ. Tɔn, bin nbɑ din yɑɑ bin gɑɑl Yennu nbɑ din senn mɔsonn nbɑ nɑ, u din luon wun wɑnn’b, ɑ u kɑn mi lebt u dudukt, k l pɑɑk k u din pukn u lol u mɔsonn mɑnŋ pɑɑk. L pɑɑk, bonɑ ŋɑnle be k kɑɑ lebtu k Yennu biɑ kɑn fit fɑɑl fɑɑk l pɑɑk. Ŋɑnn mɑnŋ pɑɑk, tinm nbɑ lɑ gungulbuol u buol ni nɑ, t mɔk pɑlcienn nbɑ sɑɑ te k tin tin k suol dindɑnn nbɑ k Yennu din senn’t mɔsonn nɑ nɑn pɑnŋ. Dindɑnn nbɑ k t mɔk nɑ tie nɑn mɑnfuol jɑɑntɑlk nbɑ diɑ t mɑnfuol fɑnu. L tie dindɑnn nbɑ gɑl Yendɔunŋ ni Yennu jɑɑnti ŋɑsɑɑkɑk cincenn nbɑ tuu juɑn k puun nɑ e, k kuɑ dieok mɑnŋ linn po. Lenŋ e k Yiesu ponŋ din gɑɑl t pɑɑk k gɑl k tie t sɔnliitɔ, k tien t *mɑnntɔyudɑɑnɔ nɑn yuo nbɑ kɑɑ gbennu, Melkiisedek pɑɑbu ni. Melkiisedek mɑnŋ din tie Sɑɑlem tinŋ kpɑnbɑl e k biɑ din tie Yɑbnt Yennu mɑnntuɑ. Ablɑɑhɑɑnm nbɑ din tɑn nyii tɔb nbɑ k u din kɔn nyɑnn kpɑnbɑlɑ nɑ, Melkiisedek din cet’ɔ k yɑt yetŋɑnm u pɑɑk, k Ablɑɑhɑɑnm din nyinn bɔktu piik ni yenn kuɑ wɑɑ din kɔn fɑt bont nbɑ nɑ kul ni k tul’ɔ. (Melkiisedek sɑnn mɑnŋ pɑɑk tie ɑ: «kpɑnbɑl nbɑ tuun lin nbɑ ŋɑn,» k biɑ jen ɑ u din tie Sɑɑlenm kpɑnbɑl e k l pɑɑk u mun tie «mɑnu kpɑnbɑl.») Lɑbɑsiɑl k be k wɑnt Melkiisedek bɑɑ po ɑmi u nɑɑ po ɑmi u yejɑnm po. Lɑbɑsiɑl kɑɑ k wɑnt u mɑlu po ɑmi u kuun po. U nɑɑn nɑn Yennu Bijɑ nɑ e. U lek biɑ tun tie Yennu mɑnntuɑ e nɑn yuo nbɑ kɑɑ gbennu. L pɑɑk, i lɑ wɑɑ din tie nijɑɑnn biɑnŋ nbɑ, k mɑɑn t yejɑsɑɑkuɑ Ablɑɑhɑɑnm lek din tɑn nyinn wɑɑ din kɔn fɑt bont nbɑ tɔb ni nɑ bɔktu piik ni yenn kuɑ k tul’ɔ. Senni din wɑnn ɑ Liefi yɑɑbuonɑ nbɑ tie mɑnntieb nɑ, ɑ bin tuu gɑɑl b niib *Suifnbɑ nbɑ mɔk lin nbɑ l bɔktu piik ni yenn kuɑ, ŋɑɑn b niib mɑnŋ mun biɑ lek din tie Ablɑɑhɑɑnm yɑɑbuonɑ e. Melkiisedek din k tie Liefi yɑɑbuonn kɑɑ, ŋɑɑn u din gɑɑl bonɑ bɔktu piik ni yenn kuɑ Ablɑɑhɑɑnm buol, k biɑ yɑt yetŋɑnm Ablɑɑhɑɑnm pɑɑk, wun nbɑ din gɑɑl Yennu mɔsonŋɑnɑ nɑ. Mɔniɑɔk kɑɑ nɑn nisuɑ nbɑ yɑt yetŋɑnm e tie nijɑɑnn k gɑl wun nbɑ gɑɑn yetŋɑnm mɑnŋ. Mɑnntieb nbɑ din tuu gɑɑn niib nbɑ mɔk lin nbɑ l bonɑ bɔktu piik ni yenn kuɑ nɑ din tie nisɑɑli k din tuu tɑn kpo, ŋɑɑn Melkiisedek wun nbɑ din gɑɑl Ablɑɑhɑɑnm bonɑ bɔktu piik ni yenn kuɑ nɑ ŋɑnin be, nɑn Yennu lolkpel kɑdɑɑɔk nbɑ wɑnn biɑnŋ nbɑ nɑ. T sɑɑ fit yet ɑ yuo nbɑ k Ablɑɑhɑɑnm din nyinn u bont ni bonɑ bɔktu piik ni yenn kuɑ nɑ, u yɑɑbuonɑ *Liefiitnbɑ, bin nbɑ din tɑn gɑɑn bonɑ bɔktu piik ni yenn kuɑ mɑnŋ, mun din tul b bonɑ bɔktu piik ni yenn kuɑ Ablɑɑhɑɑnm ni, k mɑɑn Melkiisedek nbɑ din cet Ablɑɑhɑɑnm yuo nbɑ nɑ, ŋuɑ Liefi din be Ablɑɑhɑɑnm gbɑnɑnt ni. Yennu din tul *Suifnbɑ *senni k wɑnn Liefiitnbɑ b mɑnnu tuonɑ nbɑ sii tie biɑnŋ nbɑ e. K Liefiitnbɑ mɑnntieb tuonɑ ii dinŋ ii fit te k nilɔ tie niŋɑnɔ Yennu buol ni, l din bo kɑn kpɑɑ tɑlɑs k mɑnntɔgɑnɔ wun nbɑ k set *Aɑlɔn setu ni, ŋɑɑn sie Melkiisedek setu ni nɑ n bɑɑl. K mɑɑn mɑnntieb *yudɑnt lebtu i bɑɑl, l mun tie k senni n lebt e. K t Yonmdɑɑnɔ, wun nbɑ k mɔbonɑ nɑ piɑk u po nɑ, nyii buolgɑnu nbɑ ni k b suɑ din k mi tun mɑnntuɑ tuonn binbintl buol ni e. Suɑ kul ponŋ mi nɑn Yonmdɑɑnɔ nyii Suudɑ nibuolu ni, nibuolu nbɑ k Muois din k mi pɑk siɑl b po k jikt sɑɑ mɑnntieb po. Gotl lin nbɑ te k t mɑntk bɑnn mɑɑn mɑnŋ pɑɑk nbɑ tie lin nbɑ. Mɑnntɔgɑnɔ nbɑ nɑɑn nɑn Melkiisedek, din tɑn bɑɑl. Ŋuɑ e tie mɑnntuɑ, k nisɑɑlk senni ni kɑɑ k u tien l mɑnntuɑ, ŋɑɑn l tie mɑnfuol nbɑ kɑɑ gbennu nɑ yiikuo ni e k u tien mɑnntuɑ. K mɑɑn b din diɑn u po Yennu lolkpel kɑdɑɑɔk ni ɑ: «A tɑn sii tie mɑnntuɑ e nɑn yuo nbɑ kɑɑ gbennu, kii tie Melkiisedek pɑɑbu ni mɑnntuɑ.» L pɑɑk, senkpelu nɑ ji din bɑkn e, k mɑɑn l din k mɔk pɑnŋ, k biɑ k mɔk nyuɑt, k mɑɑn Muois senni mɑnŋ din k fit te k siɑl ŋɑn. Ŋɑɑn mɔtɑɑnɑ t ji mɔk lin nbɑ tul’t dindɑnn nbɑ cie nɑ, k l ni e k t cɑt nɑkn Yennu buol ni. K Yennu pol k set k pukn l pɑɑk. Yennu din tuu k puol k tien mɑnntɔlieb nɑ. Ŋɑɑn Yiesu din tien mɑnntuɑ yuo nbɑ k Yennu din tɑn pol k yet’ɔ ɑ: «A Yonmdɑɑnɔ Yennu senn mɔsonn k ji kɑn lebt u dudukt, k yet ɑ: ‹Fin e sii tie mɑnntuɑ nɑn yuo nbɑ kɑɑ gbennu.› » L pɑɑk, nnɑ e te k Yiesu tie wun nbɑ wɑnn nɑn *lol nbɑ cie nɑ kɑɑ lotu. Tɔn, yɑɑyuo ni mɑnntieb mɑnŋ din yɑb k mɑɑn b din tuu kpo e, k ji kii be b tuonn nɑ ni yuo kul. Ŋɑɑn Yiesu ŋɑnin sii tun be k tie mɑnntuɑ nɑn yuo nbɑ kɑɑ gbennu, k u tuonɑ nɑ kɑn mi nyi u nuu ni k suɑ n gɑɑl’l. L pɑɑk, bin nbɑ cɑt nɑkn Yennu, ŋuɑ Yiesu ni, u fit fiel’b mɔtɑɑnɑ nɑn yuo nbɑ kɑɑ gbennu, k mɑɑn u lek be u mɑnfuol ni yuo kul, k mei Yennu k tien’m. L pɑɑk, Yiesu e tie t mɑnntuɑ nbɑ jɑnŋ nɑn t sonml. Ŋuɑ e tie wun nbɑ penn Yennu pɑl ni, k u k mɔk biit, k suɑ k fit tɑɑl’ɔ siɑl pɑɑk. Biit dɑnm be b kuɑ k u mun biɑ be u kuɑ, k Yennu donn’ɔ k kuɑn’ɔ *Yendɔunŋ ni. *Mɑnntɔyudɑnlieb nɑ din tuu mɑnn *mɑlunŋ dɑɑl n tuu dɑɑl b tiɑɔnŋ biit pɑɑk sinsinn, k biɑ mɑnn *mɑlunŋ niib biit pɑɑk. Ŋuɑ Yiesu k tie nnɑ kɑɑ. U din jii u mɔnŋ k mɑnn mɑlunŋ yonm kuɑ e, k l jɑnŋ nɑn niib kul ɑ. Muois senni nɑ lukt nisɑɑli k tien’m mɑnntɔyudɑnm nbɑ k tie niŋɑnm Yennu buol ni e. Ŋɑɑn, wɑɑ din tul senni mɑnŋ puolpo nɑ k Yennu din pol k yet, ɑ u Bijɑ sii tie mɑnntɔyudɑɑnɔ nbɑ ŋɑn nɑn yuo nbɑ kɑɑ gbennu. Bɑli nɑ bɑlnuɑk wɑnt nɑn t mɔk *mɑnntɔyudɑɑnɔ nbɑ tie nnɑ mun, k kɑl Yennu nbɑ mɔk pɑnŋ kul nɑ nɑɑngbounŋ niidiitu po *Yendɔunŋ ni, k tuun mɑnntɔyudɑɑnɔ tuonɑ Yennu dieok ni, k dieok mɑnŋ tie bɑlmɔni jɑɑnti lɑnbounŋ nbɑ k b tien nɑn bonkobgbɑnt nɑ, k Yonmdɑɑnɔ din tien k l k tie nisɑɑlk yɑl kɑɑ. B lukt mɑnntuɑ kul, ɑ wun jii piini k biɑ mɑnn *mɑlunŋ k tul Yennu e. Nnɑ e k l mun kpɑɑ tɑlɑs k t mɑnntɔyudɑɑnɔ ii mɔk siɑl k tul. L i bo i tie k u be tingbounŋ nɑ ni, u bo kii tie mɑnntuɑ fɑb ɑ, k mɑɑn mɑnntieb nbɑ tien Yennu piini, *Suifnbɑ *senni nbɑ senn biɑnŋ nbɑ nɑ, ponŋ be. B tuun b tuonɑ jɑɑnti dieok nbɑ nɑɑn nɑn lin nbɑ be Yendɔunŋ ni nɑ ni e. Ŋɑnn e te k Yennu din kpɑɑn Muois yuo nbɑ k u din yɑɑ wun cɑɑn jɑɑnti lɑnbounŋ nɑ, ɑ: «A tun bonsiɑl kul k lii nɑɑn nɑn lin nbɑ k n wɑnn’ɑ juɑl pɑɑk.» Yiesu mɑnnu tuonɑ nbɑ k Yennu tul’ɔ nɑ cie b mɑnnu tuonɑ k *lol nbɑ k u tuun nɑn’n nɑ cie lolkpel nɑ k u lol mɑnŋ gɑɑ nɑn mɔsonɑ nbɑ cie nɑ e. K mɑɑn sinsinn *lol nɑ ii dinŋ ii tien dede, l ji din bo kii kpɑɑ tɑlɑs k Yennu n tul lol pukn tɑɑl munle. Ŋɑɑn Yennu din lɑ nisɑɑli biit e, k u yet ɑ: «Min nbɑ tie Yonmdɑɑnɔ nɑ e yien’i ɑ yuo bɑɑt, k n tɑn sɑɑ lol lolpɑɑnn k tul Islɑɑeltieb nɑn Suudɑ niib. L tɑn kii tie nɑn lol nbɑ k n din senn k tul b yejɑnm dɑɑl nbɑ k n din kub b nii k nyinn’b Ejipt tinŋ ni nɑ. B din k wei lol nbɑ k n din tul’b nɑ nɑn bɑlmɔni, k l pɑɑk, k n bɑkɑ din kɑɑ b po. Min nbɑ tie Yonmdɑɑnɔ nɑ e yien’i nɑ. Lol nbɑ k n yɑɑ n senn k tul Islɑɑeltieb tie nɑ e. Dɑɑ nbɑ bɑɑt nɑ ni, n ji sɑɑ tɑbn n senni mɑnŋ b dudukt ni e, k diɑn tɑbn b pɑlɑ ni. N sii tie b Yennu e k b mun tie n niib. L ji kii kpɑɑ tɑlɑs k b suɑ n wɑnn u luɑ ɑmi k yet u nɑɑ bik ɑ: ‹Fin, bɑnt Yonmdɑɑnɔ,› k mɑɑn b kul ɑ tɑn sii mi min e, lɑɑ jii bonbis k sɑɑ tuu sɑɑkɑb. N tɑn sɑɑ nyik b biit k cɑb’b, k ji kii tiɑn b biit nɑ po.» Yennu nbɑ piɑk lolpɑɑnn mɑnŋ po nɑ e, k sinsinn mɔlol nɑ tien lolkpel, k bonsiɑl nbɑ kpet k kokl, l k fɔk nɑn botu. Tɔn, Yennu nbɑ din *lol sinsinn lol k tul’b nɑ, u biɑ din tul’b *senni nbɑ wɑnt’b bɑɑ sii jiɑntl’ɔ biɑnŋ nbɑ, nɑn bɑɑ sii jiɑntl’ɔ siɑn nbɑ tinŋ nɑ pɑɑk. B din fɑɑ bonkobgbɑnt lɑnbounŋ o, k cincen juɑn k bɔkt’l munle. Sinsinn yɑl nbɑ k b din yi’l *siɑn nbɑ ŋɑn nɑ, b din senn fitl e, k tiebul sie lenŋ, k pɑɑnu nbɑ k b tien k l tie Yennu yɑl nɑ tuɑ l pɑɑk. K cincen nbɑ juɑn nɑ linn po mun, k b yi lenŋ siɑn nbɑ mɑntk ŋɑn. Sɑlmɑ binbintl din be, k b jokt wubt l pɑɑk, k Yennu senni lɑkl din be k b tɑbn sɑlmɑ l kul po, k sɑlmɑ bobl din be lɑkl nɑ ni nɑn jiet nbɑ k b yi’l mɑɑnn nɑ. K *Aɑlɔn pɑtu nbɑ din yinn puuk nɑ kpie lɑkl mɑnŋ ni, k tɑnɑ ŋɑnle nbɑ k b din kuol k senni diɑn l pɑɑk nɑ kpie l ni. Selubɑnnbɑ din tuɑ lɑkl mɑnŋ pɑɑk k mɔk *yudɑnt bonciɑnn k wɑnt nɑn Yennu be, k b kpinkpɑnt bɑkn siɑn nbɑ k b din mɑnn biit nyikcɑbu *mɑlunŋ nɑ. Ŋɑɑn l k tie mɔtɑɑnɑ kɑɑ k t sɑɑ pɑk l po. Bɑɑ din senn bonɑ kul ɑ nnɑ nɑ e, k mɑnntieb din tuu kuɑ Yenjiɑntu lɑnbounŋ mɑnŋ pɑk-luolu ni yuo kul k tuun Yenjiɑntu tuonɑ. Ŋɑɑn mɑnntieb yudɑɑnɔ kuukuɑ e din tuu kuɑ lɑnbounŋ nɑ linn po yonm kuɑ binn nuɑk ni. U din tuu diɑ sɔn e k mɑnn mɑlunŋ k tul Yennu, u mɔnŋ biit pɑɑk, nɑn niib nbɑ din tuu kpet tun biit nɑ pɑɑk. Nnɑ e k Foŋɑnm din wɑnt nɑn siɑn nbɑ tie Yennu yɑl nɑn bɑlmɔni nɑ dɑɑ k luot yuo nbɑ k sinsinn lɑnbounŋ mɑnŋ dɑɑ din sie nɑ. Ŋɑnn e tie lin nbɑ wɑnn’t siɑl k jiin mɔtɑɑnɑ po. L wɑnt nɑn piini nbɑ k b din tuu tul Yennu, nɑn mɑlunŋ nbɑ k b din tuu mɑnn k tul’ɔ nɑ kul din k fit te k nilɔ nbɑ jiɑntl Yennu nnɑ nɑ tie niŋɑnɔ u buol ni. Ŋɑnn din tuu tie jiet nɑn bon-nyu-nyuut nɑn gbɑnɑnt ŋɑnmu kuukuɑ e. Lin nbɑ nɑ kul din tie gbɑnɑnt senni e, ɑ bii wɑɑ’l mɔkmɔk nɑn yuo nbɑ k Yennu tɑn sɑɑ senn u senpɑɑnu. Ŋɑɑn *Klistu bɑɑl k tie bonŋɑnɑ nbɑ ponŋ be nɑ *mɑnntɔyudɑɑnɔ e. U din kuɑ lɑnbounŋ nbɑ tie lɑnbonjɑɑnn k biɑ sie fɑnu, k biɑ ŋɑn nɑ ni, k l k tie lin nbɑ k nisɑɑlk tien k biɑ k tie tingbounŋ nɑ ni yɑl. Klistu nbɑ din kuɑ siɑn nbɑ tie Yennu yɑl nɑn bɑlmɔni nɑ ni yonm kuɑ nɑ, u din k kuɑ nɑn bujɑi nɑn nɑɑjɑi sɔn kɑɑ k mɑnn mɑlunŋ, ŋɑɑn u din jii u mɔnŋ sɔn e k pɑ k gɑɑl fielu nbɑ kɑɑ gbennu k tul’t. B din tuu jii bujɑi nɑn nɑɑjɑi sɔn e, k biɑ jii nɑɑsɑl k mɑnn k juo muu, ŋɑɑn jii l tɑnpent nɑ nɑn sɔn mɑnŋ k mii mii niib nbɑ din tuu mɔk biit k jiin b jɑɑnti senni nɑ po, ɑ lin wuul b biit nbɑ k nilɔ sɑɑ fit lɑ nɑ. L tie k l tie mɔni i e, Klistu sɔn biɑ sii mɔk yiikuo k gɑl bonkobt sɔn nɑ. Bɑlmɔni, Foŋɑnm pɑnŋ ni, Klistu din yit u mɔnŋ sɑlk k tul Yennu, k l tie mɑlunŋ nbɑ ŋɑn. Nnɑ e k u sɑɑ wuul t pɑl nbɑ gbie nɑn tuonbiit nbɑ sɑɑ nɑn’t kuun ni nɑ. Ŋɑnn e sɑɑ te k tin fit k tun Yennu nbɑ fo nɑ tuonɑ. L pɑɑk, Klistu e tie wun nbɑ te k *lolpɑɑnn gbie, ɑ bin nbɑ k Yennu yiin’m nɑ n lɑ yetŋɑnm nbɑ kɑɑ gbennu nbɑ k Yennu din senn mɔsonn k tul’b nɑ. Kuun nbɑ k Klistu din kpo nɑ fɑt niib biit nbɑ k b din tuun yuo nbɑ k b tuu wɑɑ lolkpel nɑ ni wɑɑ. Tɔn, nilɔ ii diɑn u fɑdinu kɑdɑɑɔk l kpɑɑ tɑlɑs k bin wɑnn nɑn wun nbɑ diɑn fɑdinu kɑdɑɑɔk nɑ kpo wɑɑ. Yuo nbɑ k wun nbɑ diɑn fɑdinu kɑdɑɑɔk mɑnŋ dɑɑ be u mɑnfuol ni nɑ, fɑdinu kɑdɑɑɔk mɑnŋ k mɔk nyuɑt. L nyuɑt be u kuun puolpo e wɑɑ. L pɑɑk e te k sinsinn lol nɑ din mɔk nyuɑt sɔn mɑlunŋ puolpo nɑ kuukuɑ. Yuo nbɑ k Muois din muɑnt Yennu senni kul nɑn lɑɑ diɑn biɑnŋ nbɑ nɑ k tul niib nɑ, u din jii dufɑtlɑi k lol nɑn pekobmɔnt k pɑk nɑɑjɑi nɑn bujɑi sɔn nbɑ ŋmɑt nɑn nyun nɑ, k mii mii’l senni kɑdɑɑɔk nɑn niib mɑnŋ kul pɑɑk, k yien’m ɑ: «Lol nbɑ k Yennu senn tul’i ɑ yin sɑk’l nɑ sɔn e nɑ.» Muois biɑ din tuu mii sɔn mɑnŋ Yenjiɑntu lɑnbounŋ nɑ pɑɑk e, nɑn bonsiɑl kul nbɑ k b diɑ jiɑntl Yennu nɑ pɑɑk. Bɑlmɔni e, Yennu senni wɑnnu ni, sɔn e din tuu ŋɑnm bont kul k l be fɑnu k k mɔk biit, k sɔn i kii nyii, Yennu kɑn nyik cɑb niib biit. L pɑɑk, l din tuu kpɑɑ tɑlɑs e k bin mɑnn mɑlunŋ k ŋɑnm bonɑ nbɑ tie *Yendɔunŋ ni bonɑ ninnɑɔnŋ nɑ, ŋɑɑn mɑlunŋ nbɑ cie nisɑɑlk yɑl sɑɑ ŋɑnm Yendɔunŋ ni bonɑ tiɑɔnŋ. Klistu din k kuɑ jɑɑnti buol nbɑ k nisɑɑlk ŋɑnm, k l tie Yendɔunŋ ni bont nbɑ tie l bɑlmɔni nɑ ninnɑɔnŋ nɑ ni kɑɑ. Ŋɑɑn u din sɑɑn kuɑ Yendɔunŋ mɔnŋ mɔnŋ ni e, siɑn nbɑ k u be Yennu tuɑnn t pɑɑk nɑ. Suifnbɑ mɑnntieb yudɑɑnɔ nɑ tuu kuɑ nɑn bonkobt sɔn buol nbɑ tie Yennu yɑl nɑn bɑlmɔni nɑ ni yonm kuɑ e binn kul nuɑk ni, ŋɑɑn Klistu ŋɑnin din k kuɑ lenŋ tɑɑl fuunu munŋɑ kɑɑ wɑɑ, k jii u mɔnŋ k mɑnn mɑlunŋ. L ii dinŋ ii bo i tie nnɑ i e, ŋɑnn lɑɑ din nyii *dulnyɑ nɑmu pinpiik ni wɑɑ, u din bo sɑɑ di fɑlɑ tɑɑl bonciɑnn. Ŋɑɑn mɔtɑɑnɑ, yuo nbɑ ji tɑn pel juontu nɑ k u din dɔkt ɑ wun jii u mɔnŋ k mɑnn mɑlunŋ k kpien biit. Yennu senn ɑ sie k nilɔ kul n kpo yonm kuɑ, k l puolpo Yennu n bu u buut. Nnɑ e mun, Klistu din jii u mɔnŋ k mɑnn mɑlunŋ yonm kuɑ k nyinn nifosɑɑli bonciɑnn biit nɑ. U tɑn sɑɑ jen ɑ, ŋɑɑn l k tie u tɑn sɑɑ nyinn niib biit kɑɑ, ŋɑɑn u tɑn sɑɑ tul bin nbɑ guu’u nɑ fielu. *Suifnbɑ *senni nɑ k wɑnn bonɑ nbɑ tie bɑnnu nbɑ nɑn bɑlmɔni, ŋɑɑn l tie bonŋɑnɑ nbɑ sɑɑ bɑɑl nɑ ninnɑɔnŋ o. L pɑɑk, lɑɑ wɑnt bɑɑ sii mɑnn *mɑlunŋ binn kul bɑnnu nbɑ nɑ, l kɑn bɑn te k bin nbɑ nɑkn Yennu nɑ, ii tie niŋɑnm u buol ni. L mɑlunŋ ii bo ii fit te k niib tie niŋɑnm Yennu buol ni e, b din bo sɑɑ mɑnn yonm kuɑ e ŋɑɑn ji nyik, k biit ji kii wɑɑ’b. Ŋɑɑn binn n tuu binn mɑlunŋ tuonɑ nɑ kpɑn din tiɑn niib nɑ b biit po e. K mɑɑn nɑɑjɑi nɑn bujɑi sɔn nɑ k fit nyinn biit. L pɑɑk, *Klistu nbɑ din yɑɑ wun sik tingbounŋ nɑ ni yuo nbɑ nɑ, u din yet Yennu ɑ: «A k luon bin tul’ɑ mɑlunŋ nɑn piini kɑɑ, ŋɑɑn ɑ nɑn gbɑnɑnt e k tul’n, k biɑ k mɔk pɑlpienn nɑn mɑlunŋ nbɑ k b tie biit nyikcɑbu pɑɑk nɑ. L pɑɑk e te k n din yet ɑ: ‹Yennu, min e nɑ, n sɑɑ tun ɑ lonm nɑn lɑɑ diɑn Yennu kɑdɑɑɔk ni k yet n po bɑnnu nbɑ nɑ.› » Sinsinn, u din yet ɑ: «A k luon bin tul’ɑ mɑlunŋ nɑn piini, nɑn bonkobt nbɑ k b jokt muu nɑ nɑn mɑlunŋ nbɑ k b tuu mɑnn biit pɑɑk, k ɑ biɑ k mɔk pɑlpienn l pɑɑk.» Ŋɑɑn b din mɑnn l mɑlunŋ nɑn senni nbɑ wɑnn bɑnnu nbɑ nɑ e. L puolpo k u biɑ yet ɑ: «Yennu, min e nɑ, n sɑɑ tun ɑ lonm ɑ.» L pɑɑk, k Klistu fɑɑ kpien mɑlnkpelɑ nɑ, ŋɑɑn jii u mɑlunŋ nɑ k senn l setu ni. Yiesu Klistu din tun lin nbɑ k Yennu luon wun tun nɑ, k jii u gbɑnɑnt k mɑnn mɑlunŋ yonm kuɑ k l jɑnŋ nɑn niib kul ɑ, k fɑt’t biit ni. Mɑnntuɑ kul tuu sie e dɑɑl n tuu dɑɑl k tuun u tuonn, k tun k mɑnn mɑlnbuolyenŋ, ŋɑɑn k l kɑn fit k nyinn biit. Ŋɑɑn Klistu ŋɑnin din mɑnn mɑlunŋ yonm kuɑ e, lin nbɑ mɔk yiikuo yuo kul biit pɑɑk, ŋɑɑn ŋmɑt duo *Yendɔunŋ ni k kɑl Yennu niidiitu po. Lenŋ e k u be k guu mɔkmɔk nɑn yuo nbɑ k Yennu tɑn sɑɑ te k wun ŋmɑɑ u dɑtɑi. Nnɑ e k ŋuɑ din mɑnn mɑln-yenml k te k bin nbɑ tie Yennu yɑb nɑ tien niŋɑnm Yennu buol ni nɑn yuo nbɑ kɑɑ gbennu. K Foŋɑnm mun biɑ tien’t u *siɑlɑ k yet sinsinn ɑ: «I Yonmdɑɑnɔ yet ɑ: ‹Mɑɑ yɑɑ n tul’b *lol nbɑ e nɑ dɑɑl mɑnŋ puolpo. N tɑn sɑɑ tien n senni b pɑlɑ ni, k diɑn b dudukt ni.› » L puolpo k u biɑ ŋɑnm yet ɑ: «N ji kɑn mi k tiɑl b biit nɑn b tuonbiit nɑ po jik.» Ŋɑɑn nyikcɑbu nbɑ be nɑ, l ji k kpɑɑ tɑlɑs nɑn bin mɑnn mɑlnsiɑɔk biit pɑɑk. N nɑɑ wɑɑs, Yiesu sɔn pɑɑk k t mɔk pɑlcienn nɑn tin kuɑ buol nbɑ tie Yennu yɑl nɑn bɑlmɔni nɑ ni. Yiesu e luot mɑnfuol sɔnpɑɑnu jɑɑnti dieok cincenn ni k tul’t, k ŋɑnn e tie u gbɑnɑnt. T mɑnntɔjɑɑnn nbɑ yen Yennu ŋɑɑk mɑnŋ. L pɑɑk, ŋɑɑnt mɑn k tin cɑt nɑkn Yennu nɑn pɑlɑ nbɑ gbie nɑn bɑlmɔni kuukuɑ nɑn bɑlmɔni yɑdɑ, k dɑɑ mɔk bilsuk, k dɑɑ mɔk *siɑl ɑ dudukbiit t pɑl ni, kii mɔk gbɑnɑnt nbɑ k b din wuul nɑn nyun nbɑ kɑɑ jɑknt nɑ. Ŋɑɑnt k tii diɑ dindɑnn nbɑ k t fiit wɑnn nɑ fɑnu mɑn, k dɑɑ bils, k mɑɑn wun nbɑ din senn mɔsonn k tul’t nɑ k ŋmɑt puol. Ŋɑɑnt mɑn k tii guu lieb, kii mɔk lonm nɑn lieb, kii tuun tuonŋɑnɑ, k dɑɑ nyikt lɑknɑ nɑn t lieb nɑn nisiɑb nbɑ nyikt lɑknu biɑnŋ nbɑ nɑ, ŋɑɑn tii cien t lieb pɑlɑ, k dɑɑ mɑntk yɑɑ tɑɑ ji lɑɑt k Yonmdɑɑnɔ dɑɑl mɑnŋ pel nɑ. Tɑɑ bɑnn bɑlmɔni mɑnŋ nbɑ fiit wɑnn’t nɑ, t i biɑ kii luon k tii tuun biit i e, mɑlnsiɑɔk ji kɑɑ k sɑɑ wuul t biit mɑnŋ. L i tie nnɑ i e, lin nbɑ ji biɑl tie tii tiin jɑŋmɑɑni e, kii guu lin nbɑ sɑɑ bɑɑl. Ŋɑnn e tie buut nɑn muciɑɔnŋ nbɑ tɑn sɑɑ biil Yennu dɑtɑi nɑ. Wun nbɑ din tuu yet Muois senni nɑ weiu, k niib bɑnn k tien siɑlɑɑdɑnm bɑnle ɑmi bɑntɑ, b din tuu kpi’u, k ninbɑtinu kɑɑ. L pɑɑk, nilɔ nbɑ fiɑk Yennu Bijɑ mɑnŋ k k bɑɑkt sɔn nbɑ te k Yennu *lol nɑ gbie, k biɑ te k u tie Yennu yuɑ nɑ, k suki Foŋɑnm nbɑ tien ninkpɑbɑɔnŋ nɑ, biknt l dɑɑnɔ k lɑɑn u tubdɑtbiiuk nbɑ sii tie biɑnŋ nbɑ. K mɑɑn t mi wun nbɑ din yet ɑ: «Min e sɑɑ pɑ pɑnn k jiin biit.» K u biɑ yet ɑ: «T Yonmdɑɑnɔ e tɑn sɑɑ bu u niib buut.» L tie bonbilɑnkɑnt e, k suɑ n tɑn kuɑ mɑnfodɑɑnɔ Yennu wutuol ni. Ii tiɑn mɑn yuo nbɑ gɑl nɑ lɑbɑɑl. Yennu yentu nbɑ din yent i pɑɑk yuo nbɑ, i din di fɑlɑ bonciɑnn, ŋɑɑn l fɑlsiɑl din k nyɑnn’i ni. Yenn-yuo b din tuu suki’i, k dint’i fɑlɑ biɑk niib ni, k lielyuo mun, i din tien siil nɑn yin sonm bin nbɑ k b dint’b fɑlɑ nɑ. I din mɔk ninbɑtinu nɑn bin nbɑ be dɑnsɑli ni, k siɑn-yuo bin din tɑn fɑt i fɑɑl, ŋɑɑn k i din gɑɑl l fɑlɑ nɑn pɑlpienn, k mɑɑn i din mi nɑn i mɔk mɔktuk nbɑ ŋɑn k cie tingbounŋ ni yɑl k biɑ sii be nɑn yuo nbɑ kɑɑ gbennu. L pɑɑk, i dɑɑ nyikt l dindɑnn, k mɑɑn l bɑɑt nɑn nyɔciɑɔnŋ o. L ŋɑn k yii mɔk suklu, k fit tun Yennu nbɑ luon lin nbɑ nɑ, k lɑ wɑɑ din senn mɔsonn ɑ u sɑɑ tul’t lin nbɑ nɑ. K mɑɑn lɑɑ diɑn Yennu lolkpel kɑdɑɑɔk ni nɑ ɑ: «L tenn yuo wɑɑnm-nnɑ e k wun nbɑ bɑɑt nɑ sɑɑ bɑɑl, k kɑn wei nɑn bɑɑlu. Ŋɑɑn wun nbɑ tie niŋɑnɔ n buol ni nɑ sɑɑ lɑ mɑnfuol u yɑdɑ nɑ pɑɑk, ŋɑɑn l i tie k u ŋmɑt puol, n tɑn kii mɔk pɑlpienn nɑn’ɔ.» Tinm k tie nɑn bin nbɑ ŋmɑt puol k bot nɑ kɑɑ, ŋɑɑn t tie nɑn bin nbɑ tien Klistu yɑdɑ k lɑɑt fielu nɑ e. Yɑdɑ tie, tɑɑ k mɔk bilsuk nɑn bont nbɑ k t mɔk dindɑnn l pɑɑk nɑ set be, ŋɑɑn dɑɑ k lɑ’l nɑn t ninbinn nɑ e. Yennu din pɑk yɑɑyuo ni niib nɑ b yɑdɑ pɑɑk e. T yɑdɑ pɑɑk e k t bɑnn nɑn Yennu din tul mɔb k *dulnyɑ tien, k tɑɑ lɑɑt bonɑ nbɑ nɑ u din k jii bonsiɑl nbɑ k t lɑɑt nɑ kɑɑ k nɑn. Abel yɑdɑ pɑɑk e k u din mɑnn mɑnnu tul Yennu k l mɑnnu ŋɑn k gɑl Kɑɑen yɑl. U yɑdɑ pɑɑk e k Yennu din yet ɑ u tie niŋɑnɔ ŋuɑ Yennu buol ni, k mɑɑn Yennu tiɑɔnŋ din gɑɑl u piini nɑ wɑɑ. Abel din kpo wɑɑ, ŋɑɑn u yɑdɑ pɑɑk e k u biɑ lek dɑɑ piɑk. Enɔk yɑdɑ pɑɑk e k u din tɑn k kpo, ŋɑɑn k Yennu din jii’u k duo nɑn’ɔ *Yendɔunŋ ni, k suɑ ji k lɑ’u, k mɑɑn Yennu e ponŋ din jii’u. K l diɑn Yennu lolkpel kɑdɑɑɔk ni, ɑ yuo nbɑ k Yennu dɑɑ din k jii’u nɑ, u din penn Yennu pɑl ni wɑɑ. Nilɔ i kii tien Yennu yɑdɑ, l dɑɑnɔ kɑn fit penn ŋuɑ Yennu pɑl ni, k mɑɑn wun nbɑ kul bɑɑt Yennu buol ni, l kpɑɑ tɑlɑs k l dɑɑnɔ n tien yɑdɑ nɑn Yennu set be k tien bin nbɑ kpɑɑn’ɔ nɑ nyuɑt. Noe yɑdɑ pɑɑk e din te k u gbɑt Yennu kpɑɑni nbɑ piɑk lin nbɑ k Noe dɑɑ din k fit lɑ’l nɑn u ninbinn nɑ po. U din sɑk Yennu mɔb k kpɑɑ ŋɑlngbenŋl, k ŋuɑ nɑn u ŋɑɑtieb kuɑ lenŋ k lɑ fielu wɑɑ. Ŋɑnn e din wɑnn nɑn tingbounŋ nɑ niib mɔk biit Yennu buol ni, ŋɑɑn k Noe yɑdɑ mɑnŋ pɑɑk k Yennu din yet, ɑ u tie niŋɑnɔ u buol ni. Yɑdɑ pɑɑk e din te k Ablɑɑhɑɑnm sɑk Yennu yiini, k sɑɑn tinŋ nbɑ k Yennu din senn mɔsonn k yɑɑ ɑ u sɑɑ tul’ɔ nɑ ni. U din nyik u mɔnŋ duo e, ŋɑɑn k k mi wɑɑ sɑɑ siɑn. U yɑdɑ pɑɑk e k u din dɑɑ tie sɑɑmɔ tinŋ nbɑ k Yennu din senn mɔsonn k yɑɑ ɑ u sɑɑ tul’ɔ nɑ ni. U din be bonkobgbɑnt lɑnbont ni e. U wɑɑs Isɑɑk nɑn Sɑɑkɔb nbɑ mun din tɑn gɑɑl Yennu mɔsonn nɑ din be l biɑnŋ e. K mɑɑn Ablɑɑhɑɑnm din guu, ɑ wun tɑn kuɑ duo nbɑ k Yennu din buɑn k mɑɑ k l fiɑkl wɑki hei nɑ ni e. Ablɑɑhɑɑnm din gɑl nɑn mɑtuk ɑ, k Sɑɑlɑ mun din tie puokɑnmɑtl e, ŋɑɑn k Ablɑɑhɑɑnm yɑdɑ pɑɑk k u din fit lɑ bik, k mɑɑn u din mi nɑn wun nbɑ din senn mɔsonn mɑnŋ nɑ k ŋmɑt puol. L pɑɑk, Ablɑɑhɑɑnm nbɑ din tie nilɔ nbɑ ji tɑn k fɔk nɑn kuun nɑ, ŋɑɑn u kuukuɑ yɑɑbuonɑ e tɑn yɑb nɑn ŋmɑɑbilɑ nbɑ yɑb biɑnŋ nbɑ nɑ, k biɑ yɑb nɑn mɔkgbenŋl gbingbɑnn pɑɑk tɑnbiini nbɑ yɑb k kɑɑ kɑnn biɑnŋ nbɑ nɑ. Niib nbɑ nɑ kul din tuu tɑn kpo nɑn b yɑdɑ ŋɑɑn dɑɑ k gɑɑl lin nbɑ k Yennu din senn mɔsonn, ɑ u sɑɑ tul u niib nɑ, ŋɑɑn b yɑdɑ mɑnŋ pɑɑk, b din dɔnŋ lɑ’l bɑnfɔkl e wɑɑ k biɑ gɑɑl nɑn l tie bonŋɑnn e. B din bɑnn k sɑk nɑn b tie sɑɑnm e k tie kunsɑnnɑ tingbounŋ nɑ ni. Niib nbɑ yien lin nbɑ nɑ, fiit k wɑnt nɑn b lek dɑɑ kpɑɑn b tiɑɔnŋ duo siɑl po e. Niib mɑnŋ ii dinŋ ii pɑbi bɑɑ ponŋ nyii duo nbɑ nɑ po i e, b din bo sɑɑ fit ŋmɑt ɑ. Ŋɑɑn b bɑkɑ din be Yendɔunŋ ni duo nbɑ cie nɑ po e. K l pɑɑk Yennu k tiin fei nɑn bin yiin’ɔ b Yennu, k mɑɑn u ponŋ din ŋɑnm dosɑu e k guun’m. Yuo nbɑ k Yennu din bikn’ɔ nɑ, Ablɑɑhɑɑnm yɑdɑ pɑɑk e biɑk, k u din jii u bijɑ Isɑɑk, ɑ wun mɑnn *mɑlunŋ k tul Yennu. Ŋuɑ Ablɑɑhɑɑnm e k Yennu din senn’ɔ mɔsonɑ, ŋɑɑn k u biɑ wɑnn Yennu nɑn u tien siil k sɑɑ jii u bijɑyenml k tien mɑlunŋ k tul’ɔ. Ŋɑɑn Yennu din ponŋ yet’ɔ ɑ: «Isɑɑk ni e k ɑ tɑn sɑɑ lɑ yɑɑbuonɑ nbɑ k n din senn mɔsonn, ɑ n sɑɑ tul’ɑ nɑ.» Ŋɑɑn Ablɑɑhɑɑnm din dukn nɑn Yennu mɔk yiikuo nbɑ sɑɑ fiin nilɔ kuun ni e. L pɑɑk e k Yennu din jiin u bik k tul’ɔ, k l nɑɑn nɑn u fiil kuun ni nɑ e. Isɑɑk yɑdɑ pɑɑk e din te k u yɑt yetŋɑnm Sɑɑkɔb nɑn Esɑɑu pɑɑk k jiin lin nbɑ sɑɑ bɑɑl nɑ. Yuo nbɑ k Sɑɑkɔb din yɑɑ wun kpo nɑ, u yɑdɑ pɑɑk e din te k u yɑt yetŋɑnm Suosiɑf bonjɑi nɑ pɑɑk, k din tɑn diin u pɑtu k jiɑnt Yennu. Suosiɑf mɑnfuol nbɑ din tɑn yɑɑ lin gbenn yuo nbɑ nɑ, u yɑdɑ pɑɑk e k u din pɑk Islɑɑeltieb nyinu po Ejipt tinŋ ni, k biɑ din wɑnn’b bɑɑ tɑn sɑɑ tien u kpɑbɑ biɑnŋ nbɑ. B yɑdɑ pɑɑk e k Muois bɑɑ nɑn u nɑɑ nbɑ din mɑl’ɔ yuo nbɑ nɑ, b din bɔl’ɔ k tɑn jɑnŋ ŋmɑɑli ŋɑntɑ, k mɑɑn b din lɑ k u fɑn, k b k tiin kpɑnbɑl *senni nɑ jɑŋmɑɑni. Muois nbɑ din tɑn kpɑɑt yuo nbɑ, u yɑdɑ pɑɑk e k u din k sɑk bii yi’u Fɑɑlɑɑɔn nɑ bipuo nɑ bijɑ. U din sɑk nɑn wun di fɑlɑ nɑn Yennu niib e, ŋɑɑn k k sɑk biit pɑlpienn nbɑ tuu be yuo wɑɑnm-nnɑ nɑ. U din dukn ɑ b i suki’ɔ *Klistu pɑɑk, l mɔk nyuɑt bonciɑnn k cie Ejipt tinŋ ni mɔktuk kul ɑ, k mɑɑn u ninbinn din kpɑɑ nyuɑt nbɑ bɑɑt nɑ pɑɑk e. Ŋuɑ Muois yɑdɑ pɑɑk e din te k u nyii Ejipt, k k jie kpɑnbɑl nɑ wutuol jɑŋmɑɑni, ŋɑɑn lek sɑɑ tuɑnn k mɑɑn l nɑɑn nɑn u lɑɑt Yennu nbɑ k suɑ k lɑɑt’ɔ nɑn ninbinn nɑ. U yɑdɑ pɑɑk e din te k u din piin *yuktgɑltiɑlu jɑɑnm, k din senn senni, ɑ bin mii sɔn b ŋei tɑnmɔi pɑɑk, ɑ k kuun mɑlɑkɑ nɑ tɑn dɑɑ kpi Islɑɑeltieb bijɑkpelɑ. Islɑɑeltieb yɑdɑ pɑɑk e k mɔkmunŋ nɑ din bɔkt k tien tinkuonŋ k tul’b k b puot, ŋɑɑn k Ejipt-tieb mun din bikn ɑ bin puot, k mɔkl mɑnŋ nyun nɑ jiin mubn k dii’b. Islɑɑeltieb nbɑ din tɑn bɑɑl Seliiko yuo nbɑ, b yɑdɑ pɑɑk e, k b din sonm lint l juonɑ dɑɑ ŋɑnlole, k l bɑɑ. Puocunconn nbɑ k b yi’u Lɑɑhɑɑb nɑ yɑdɑ pɑɑk e din te k Islɑɑeltieb din k kpii’u, ŋɑɑn kpii bin nbɑ din k sɑk Yennu mɔb nɑ, k mɑɑn Lɑɑhɑɑb din gɑɑl Islɑɑeltieb niib nbɑ din bɑɑl, ɑ bin diit duo mɑnŋ ni nɑ sɑɑɔnŋ. N sɑɑ pɑk bee k pukn i? Yuo sɑɑ pɔt’n nɑn k n wɑnn’i Sedeɔn lɑbɑɑl, nɑn Bɑɑlɑɑk lɑbɑɑl, nɑn Sɑnmsɔn lɑbɑɑl, nɑn Sefte lɑbɑɑl, nɑn Dɑɑfiid lɑbɑɑl, nɑn Sɑɑmuel lɑbɑɑl, nɑn *Yennu sɔkniinbɑ lɑbɑɑl. B yɑdɑ pɑɑk k b siɑb din kɔn k nyɑnn tini, k siɑb tun lin nbɑ k Yennu luon k lɑ lin nbɑ k Yennu din senn mɔsonn nɑn u sɑɑ tul’b nɑ. K siɑb suol yɑnbɔlɑ mɔi, k siɑb mun kpien mupieunŋ, k siɑb tin nyii juk-bɑnjɑi kuun ni. K siɑb mun din tie tɑli e ŋɑɑn din tɑn kpɑnt pɑɑlb, k siɑb mun din tuok tɑb nɑn pɑnŋ k kɔn nyɑnn dɑtɑi. K puosiɑb din lɑ b nikpiinm nbɑ din kpo nɑ fiil kuun ni. K siɑb din be k niib buo’b k kpii’b, k b k yet Yennu weiu ɑ bin nyi kuun mɑnŋ ni, k mɑɑn b luon bin fiil kuun ni k lɑ mɑnfuol nbɑ cie tingbounŋ nɑ yɑl. K niib din dɑɑn siɑb nyɑtuk, k biɑ buo’b gbɑnn, k b bɑɑn b siɑb jɑlt, k jii’b sɑɑn kuɑn’m dɑnsɑli ni. B din jɑɑt b siɑb tɑnɑ e, k ŋmɑ b siɑb nɑn kɑnpintɑnbɑ juki k poli’b, k b jikt juk-bɑnjɑi k kpi b siɑb, k lieb din liɑ pegbɑnt, k lieb biɑ liɑ bugbɑnt k lin nɑn nɑmu, k niib muks’b k dint’b fɑlɑ biɑk. Tingbounŋ nɑ tieb din k jɑnŋ nɑn bii be nɑn’m. K b din lin yiek kunkuot pɑɑk nɑn juɑt ni, k lin duɑ tɑnfiɑt nɑn fɔli ni. Bin nbɑ nɑ kul yɑdɑ pɑɑk e k Yennu din yet ɑ b tie niŋɑnm, ŋɑɑn k b din k gɑɑl lin nbɑ k u din senn mɔsonn, ɑ u sɑɑ tul u niib nɑ, k mɑɑn t pɑɑk e k u din mɑntk duki bonsiɑl nbɑ cie nɑ po, ŋɑnn e tie ɑ u sɑɑ te k tinm nɑn ŋɑnm n tɑn lɑkn kii be binbenŋ nbɑ k b mɔk nɑ ni. Nibul nɑ kul tie siɑlɑɑdɑnm e k lint’t. L pɑɑk, ŋɑɑnt k tin yɑbl k fok lu lin nbɑ kul sɑɑ guɑl’t *Klistu sɔnu ni, nɑn biit nbɑ sɑɑ suol’t. Ŋɑɑnt k tin di suklu k gbɑɑ gbɑɑl nbɑ yɑɑ lin bɑɑl’t nɑ. Ŋɑɑnt k tin kpɑn kpɑɑ t ninbinɑ Yiesu pɑɑk. Ŋuɑ e k t yɑdɑ gɑɑ u pɑɑk l pinpiik ni wɑɑ nɑn l juontu ni nɑ. U din dii fɑlɑ dɑpunpunn pɑɑk nɑn suklu k k tin fei, k mɑɑn u din mi pɑlpienn nbɑ guu’u nɑ po, k mɔtɑɑnɑ u ji kɑl Yennu nɑɑngbounŋ nɑ niidiitu po. Nɑ din k te k u nyik u yɑblu, k mɑɑn pɑlpienn nbɑ din bɑɑt u pɑɑk nɑ pɑɑk, u din k dukn k l mɔk’ɔ fei nɑn wun kpo l dɑpunpunn pɑɑk, ŋɑnn e te k u ji kɑl Yennu nɑɑngbounŋ pɑɑk u niidiitu po mɔtɑɑnɑ. Nn, ii duki mɑn Yiesu po, biitdɑnm din nɑn’ɔ e, ŋɑɑn u din sɑk k gɑɑl l kul nɑn suklu. L pɑɑk, i dɑɑ te k i pɑlɑ wɑt k i bɑɑ. L i tie k i kɔn nɑn biit, i dɑɑ k kɔn tieee k l sɑɑ jɑnŋ nɑn kuun. I k tiɑn Yennu nbɑ kpɑɑn’i nɑn bɑɑ nbɑ tuu kpɑɑn u wɑɑs biɑnŋ nbɑ nɑ ɑɑ? L diɑn ɑ: «N bijɑ, Yonmdɑɑnɔ ii ŋmɑnn ɑ tubl, fɑn gɑɑl’l nɑn pɑlpienn. L i tie k u yɑki nɑn’ɑ, ɑ dɑɑ te k ɑ pɑl ni n biil, k mɑɑn Yonmdɑɑnɔ ŋmɑni wun nbɑ k u luon’ɔ nɑ tubl, k buo dɑɑnsuɑ kul nbɑ, k u mi nɑn u tie u bijɑ.» Yɑbt i fɑldinu pɑɑk mɑn, nɑn bɑɑ nbɑ tuu dɑt u bijɑ tubl nɑ. Tubdɑtu mɑnŋ e wɑnn nɑn Yennu set gɑɑl’i k tien’i u wɑɑs. Bijɑsuɑ be k u bɑɑ k ŋmɑni u tubl ii? L i tie k u k dɑt i tubɑ nɑn wɑɑ tie u wɑɑs kul biɑnŋ nbɑ nɑ, ŋɑnn l wɑnt nɑn i tie kpen-k-ŋmiɑ e, i k tie u wɑɑs kɑɑ. T bɑɑnbɑ nbɑ be tingbounŋ nɑ ni, b tuu dɑɑl t tubɑ, k t tien’m nibɑɑkl. L pɑɑk, l ŋɑn k t mɑntk sikn t mɔnŋ k tul Yennu, wun nbɑ tie t *Yendɔunŋ ni Bɑɑ nɑ, k fit kii mɔk mɑnfuol. T bɑɑnbɑ nbɑ be tingbounŋ nɑ ni din jii yuo wɑɑnm-nnɑ k dɑɑl t tubɑ bɑɑ luon biɑnŋ nbɑ, ŋɑɑn Yennu ŋɑnin dɑɑl t tubɑ t mɔnŋ sonml pɑɑk e, ɑ t binbenŋ n ŋɑnm kii yien nɑn ŋuɑ Yennu binbenŋ nɑ. Tubdɑtu yuo ton e, l k mɔk pɑlpienn, ŋɑɑn l puolpo e wɑɑ, k bin nbɑ dii tubdɑtu fɑlɑ nɑ, ji tuu lɑ l nyuɑt nbɑ tie mɑnu nɑn binbenŋ nbɑ gbuot Yennu nunm. L pɑɑk, i ŋɑnm donn i nii nbɑ bɑk nɑ, k ŋɑnm wɑkl i dunɑ ni, kii tuɑk sɔnu nbɑ tuok, ɑ k wun nbɑ k u tɑɑ wɔb n lɑ lɑɑfiɑ ŋɑɑn dɑɑ kpet. I yɑbl i mɔnŋ pɑɑk kii mɔk mɑnu yinm nɑn niib kul sinsuuk ni, kii biɑ kii mɔk binbenŋ nbɑ gbuot Yennu nunm, k mɑɑn suɑ i kii mɔk ŋɑnn, l dɑɑnɔ tɑn kɑn lɑ Yonmdɑɑnɔ. Guut i mɔnŋ mɑn k tɑn dɑɑ kɔnŋt Yennu ninkpɑbɑɔnŋ nɑ. I suɑ dɑɑ tie nɑn penn nbɑ tuu piɑ k u suun tie lɑbt nbɑ sɑɑ fit biil niib bonciɑnn nɑ. I suɑ dɑɑ tuun boncuncontuonɑ ɑmi k k bɑɑkt lin nbɑ tie Yennu yɑl nɑn Esɑɑu, wun nbɑ din jii u sɑɑkɑt k dɑɑ jiet k dii tɑɑl yonm nɑ. I mi nɑn l puolpo u din tɑn luon wun gɑɑl u bɑɑ yetŋɑnm k mɔ nɑn nyin-nyuut ŋɑɑn k u bɑɑ yet, k mɑɑn Esɑɑu din k lɑ sɔnu nbɑ k u sɑɑ tien k lebt wɑɑ ponŋ din biil lin nbɑ nɑ. Tɔn, yinm k bɑɑl juɑl nbɑ k i fit sii’l nɑn Islɑɑeltieb nbɑ din bɑɑl Siinɑi juɑl buol nɑ kɑɑ, siɑn nbɑ k mupieunŋ din di k bunbɔnn bɔnn, k wonpɑɑluk dɑ, k kɑtkɑɑk bui, k kunkɔl pɑk lɑbɑɑl, k bɑɑ din gbɑt l kunkɔl mɑnŋ yuo nbɑ, b din jɑk bɑlunŋ o, k ji k luon l kunkɔl n pɑk pukn. K mɑɑn *senni nbɑ k b gbɑt nɑ, pɑɑk b nii wɑɑ. L din yet ɑ; «Nilɔ kuo bonkobsiɑɔk ii lek i sii juɑl mɑnŋ, bin jɑɑt’ɔ tɑnɑ k kpi’u.» L buol ni din mɔk jɑŋmɑɑni bonciɑnn, k Muois din yet ɑ: «Jɑŋmɑɑni mɔk’n, k n gbɑnu jekl.» Ŋɑɑn yinm ŋɑnin bɑɑl juɑl nbɑ yɑɑ sɑnn yi *Siiɔn, lin nbɑ tie Yennu nbɑ fo nɑ duo nbɑ tie Yendɔunŋ ni Selusɑɑlenm, siɑn nbɑ k mɑlɑkɑɑnbɑ tusɑ tusɑ lɑkn nɑn pɑlpienn. I bɑɑl tintɑɑnu buol nbɑ k l mɔtɑɑɔk niib tie Yennu wɑɑkpeli e k b sɑnɑ diɑn Yendɔunŋ ni. I bɑɑl Yennu nbɑ tie nisɑɑlk kul bɑlbuulɔ nɑ buol ni, nɑn bin nbɑ tie niŋɑnm Yennu tuɑnn k u te k b be binbenŋ nbɑ gbuot u nunm nɑ sei buol ni e. I bɑɑl Yiesu, wun nbɑ tie sindɑntinnɔ k bɑɑl nɑn Yennu lolpɑɑnn nɑ buol e. I bɑɑl Yiesu buol, k u sɔn nbɑ din nyii u ni nɑ wɑnt mɑɑn nbɑ ŋɑn k gɑl Abel sɔn. L pɑɑk, ii mi mɑn k i yet wun nbɑ kpɑɑn’i nɑ mɔb, k mɑɑn Islɑɑeltieb nbɑ din yet wun nbɑ din kpɑɑn’m tingbounŋ nɑ ni mɔb nɑ, k u din tɑn k nyik b tubdɑtu, k t i yet wun nbɑ nyii Yendɔunŋ ni nɑ kpɑɑni nɑ, t tɑn sɑɑ tien nlee k nyi tubdɑtu ni? L yuo nɑ, u kunkɔl din nik tingbounŋ nɑ e, ŋɑɑn mɔtɑɑnɑ u senn mɔsonn k yet ɑ: «N ji kɑn nik tingbounŋ nɑ kuukuɑ kɑɑ, ŋɑɑn n ji tɑn sɑɑ nik tingbounŋ nɑ nɑn sɑnpɑɑpo e wɑɑ tɑɑl yonm kuɑ biɑk.» Mɔbonɑ nbɑ yet ɑ: «Tɑɑl yonm kuɑ biɑk,» nɑ wɑnt nɑn bonnɑnkɑɑ kul tɑn sɑɑ nik k yɑt bot l binbebuol e, ŋɑɑn k lin nbɑ tɑn kɑn fit nik nɑ ŋɑnin n tɑn biɑl. L pɑɑk, tɑɑ gɑɑl jiɑɔnŋ nbɑ kɑn mi k nik nɑ pɑɑk, ŋɑɑnt k tii tien Yennu niipuouk mɑn, k jiɑnt’ɔ nɑn bɑɑkl nɑn jɑŋmɑɑni wɑɑ luon bɑnnu nbɑ, k mɑɑn t Yennu mɑnŋ tie nɑn mudikɑu nɑ e. Yɑɑ tie *Klistu niib nɑ pɑɑk, ii luon i lieb mɑn yuo kul. I dɑɑ tɑnmt sɑɑnm gɑɑlu po, k mɑɑn nisiɑb din tɑn gɑɑl mɑlɑkɑɑnbɑ sɑɑɔnŋ, ŋɑɑn k mi ɑ b tie mɑlɑkɑɑnbɑ e. Ii tiɑn bin nbɑ be dɑnsɑli ni nɑ po nɑn yinm nɑn ŋɑnm e lɑkn be l ni, kii tiɑn bin nbɑ lɑɑt muksuk nɑ po nɑn yinm nɑn ŋɑnm e lɑkn lɑɑt muksuk mɑnŋ nɑ. Ii bɑɑkt i puokuɑnt nɑn i jɑkunt k dɑɑ conm, k mɑɑn Yennu tɑn sɑɑ dɑt boncunconɑ tubɑ. Ii nyinn i niɑɔnŋ nɑn liklonm, ŋɑɑn te k i nunm n gbuo nɑn yɑɑ mɔk lin nbɑ, k mɑɑn Yennu yet ɑ: «N kɑn mi k nyik’ɑ ni; n biɑ kɑn mi k ŋɑɑn’ɑ ni.» L pɑɑk, k t mɔk pɑlcienn k yet ɑ: «T Yonmdɑɑnɔ tie n sonmtuɑ, n kɑn tin jɑŋmɑɑni, nisɑɑlk sɑɑ tien’n bee?» Ii tiɑn mɑn i yudɑnm nbɑ din piɑk Yennu mɑɑn k tien’i nɑ po, kii duki b mɑnfuol nbɑ din tɑn juont bɑnnu nbɑ kii toki b yɑdɑ. Yiesu Klistu nbɑ won tie biɑnŋ nbɑ wonn nɑ, u biɑ tie nnɑ e dinnɑ nɑ, k u biɑ sii tie nnɑ e nɑn yuo nbɑ kɑɑ gbennu. I dɑɑ ŋɑɑnt k wɑnnsɑɑnɑ buolu buolu n te k i bot, k i tɑn sɑɑ mɑnn tut sɔnŋɑnu mɑnŋ. L ŋɑn k Yennu ninbɑtinu n tul nilɔ pɑnŋ u pɑl ni. Jiet *senni weiu kɑn tul’ɔ pɑnŋ. Nisiɑb nbɑ diɑ jiet *senni nɑ k lɑɑt somsiɑl l ni. Tɔn, bin nbɑ mɑnn mɑnnu *Suifnbɑ Yenjiɑntu buol ni nɑ k mɔk yiikuo ɑ bii di lin nbɑ be t *mɑnnu binbintl nɑ pɑɑk. Suifnbɑ mɑnntieb yudɑɑnɔ tuu kuɑ nɑn bonkobt sɔn Yennu dieok ni, buol nbɑ tie Yennu yɑl nɑn bɑlmɔni nɑ ni, k mɑnn *mɑlunŋ biit pɑɑk, ŋɑɑn juo bonkobt mɑnŋ nɑnt muu b duo nɑ kpinŋ po. L pɑɑk, k Yiesu mun din kpo duo nɑ kpinŋ po, ɑ wun nyinn niib biit ni, u mɔnŋ sɔn pɑɑk. L pɑɑk, ŋɑɑnt k tin nyi k sɑɑn u buol ni mɑn, k sɑk fedinu nɑn wɑɑ din dii fei biɑnŋ nbɑ nɑ. K mɑɑn duo nbɑ sɑɑ biɑl kɑɑ tingbounŋ nɑ ni, dosɑu nbɑ bɑɑt nɑ e k t guu’l. Ŋɑɑnt k tii dontl Yennu sɑnn yuo kul Yiesu sɑnn ni, k lii nɑɑn nɑn mɑlunŋ nɑ k tul’ɔ, k pɑku nbɑ nyi t mɔi ni nɑ dɑɑ mɔk gbennu. I dɑɑ nyikt tuonŋɑnɑ tumu, kii centl yɑɑ mɔk lin nbɑ nɑn i lieb, k mɑɑn l mɑnbuolu e pent Yennu pɑl ni. Ii sɑɑk i yudɑnm mɔi k sikn i mɔnŋ k tul’b. B bɑkɑ be i benu ni, k mɑɑn b tɑn sɑɑ wɑnn Yennu b tuonɑ nbɑ k b din tuun nɑ. Ii sɑɑk b mɔi k bii fit kii tuun b tuonn nɑn pɑlpienn k pɑlbiil dɑɑ be lenŋ k mɑɑn nnɑ k mɔk nyuɑt k tul’i ni. Ii mei Yennu mɑn t pɑɑk. T k mɔk dudukbisiɑt t tuonɑ ni, k mɑɑn t luon k tii tuun lin nbɑ tuok e yuo kul. Ŋɑɑn n mɑntk bɑln’mi e bonciɑnn, ii mei Yennu mɑn k tul’n k wun te k n jen i buol ni mɔtɑɑnɑ. Yennu nbɑ tien mɑnu nɑ din fiin t Yonmdɑɑnɔ Yiesu kuun ni. Ŋuɑ Yiesu e tie Pekpɑɑjɑɑnn nbɑ kpɑɑl pei k mɑɑn u din kpo, k u sɔn ŋɑnm Yennu *lol nbɑ sii sie yuo nbɑ kɑɑ gbennu nɑ. Yennu nbɑ tien’t mɑnu nɑ n te k i fit kii tuun tuonŋɑnɑ kul, k fit tun lin nbɑ k u luon. K Yiesu Klistu pɑɑk, wun tun t ni lin nbɑ pent u pɑl. Ŋuɑ Yiesu e mɔk *yudɑnt nɑn yuo nbɑ kɑɑ gbennu. * Amenn. N nɑɑ wɑɑs, n bɑln’mi e, i di suklu k gbiint kpɑɑni nɑ, k mɑɑn mɑɑ diɑn kɑdɑɑɔk nbɑ tul’i nɑ k fɔk. N luon k i bɑnn nɑn b nyinn t nɑɑ bik Tiimuote dɑnsɑlk ni wɑɑ. L i tie k u sɑɑ bɑɑl n buol ni mɔtɑɑnɑ, min nɑn ŋuɑ sɑɑ tɔk bɑɑl i buol ni. I fuont i yudɑnm kul ɑ nɑn Yennu niib nɑ kul ɑ k tul’t. T nɑɑ wɑɑs nbɑ nyii Itɑɑli tinŋ ni nɑ fuont’i. Yennu ninkpɑbɑɔnŋ ii be nɑn i kul. Min Sɑɑk, wun nbɑ tie Yennu tuontunnɔ k biɑ tie Yonmdɑɑnɔ Yiesu *Klistu tuontunnɔ, n fuont Islɑɑel nibuolu piik nɑn bɑnle nbɑ yɑt k be tingbounŋ nɑ kul ni. N nɑɑ wɑɑs, ii mɔk mɑn pɑlpienn yuo nbɑ k i di fɑlɑ buolu buolu nɑ, k mɑɑn i mi nɑn l i tie k biknu bɑɑl ŋɑɑn k i lek be i yɑdɑ ni, l bɑɑt nɑn suklu e. Ŋɑɑnt mɑn k i suklu i be fɑnu k yin fit kii tie niŋɑnm k siɑl dɑɑ puɑl’i. L i tie k i suɑ pɔt yɑn, wun miɑl Yennu, wun nbɑ pi suɑ kul piini nɑn bulcint, k k dint suɑ fei nɑ, k u sɑɑ tul’ɔ wɑɑ. Fii mei Yennu, fɑn tien yɑdɑ k dɑɑ mɔk bilsuk, k mɑɑn wun nbɑ mei’ɔ nɑn bilsuk nɑ, tie nɑn mɔkgbenŋl nyunpɑnɑ nbɑ k wounŋ dɑ k l fi k bɑɑ nɑ e. L nibuolu dɑɑ duki nɑn u sɑɑ lɑ siɑl Yennu buol, k mɑɑn u k mɔk dudukcincibl, lin nbɑ kul k u tuun nɑ ni. L ŋɑn k t nɑɑ bik nbɑ tie tɑlk ii mɔk yugontl Yennu nbɑ donn’ɔ nɑ pɑɑk, k t nɑɑ bik nbɑ mun tie mɔktɔ ii mun ii mɔk yugontl Yennu nbɑ sikn’ɔ nɑ pɑɑk, k mɑɑn l kɑn wei k u sɑɑ gɑl nɑn tipuuk nbɑ tuu kuol k bɑɑ nɑ. Yennu i nyii k yekt tipuuk pɑɑk, puuk nɑ tuu kuol e k bɑɑ, k l ŋɑnt n ji biil. L mun biɑ tie nnɑ e k tul mɔktɔ. Yuo nbɑ k u duki u tuonɑ nbɑ sɑɑ sɑɑn tuɑnn biɑnŋ nbɑ nɑ, l yuo e wun kpo. Bin nbɑ nyɑnn jɑnmi nɑ, pɑlpienn tie b yɑl e, k mɑɑn wuu nyɑnn jɑnmi gbenn yuo nbɑ, u sɑɑ lɑ mɑnfuol nbɑ k Yennu din senn mɔsonn, mɑnfuol nbɑ k u din senn mɔsonn, ɑ u sɑɑ tul bin nbɑ luon’ɔ nɑ. Suɑ i lɑ jɑnmi, u dɑɑ yɑɑ ɑ Yennu e jɑnm’ɔ. Siɑl kɑɑ k sɑɑ fit jɑnm Yennu wun tun bonbiil, k Yennu mun k jɑnmt suɑ. Ŋɑɑn nilɔ lɑɑt jɑnmi yuo nbɑ k u mɔnŋ niɑnbiiuk dɑɑl’ɔ k so’u e. Niɑnbiiuk i suol nilɔ, l tuu tie puol k tɑn mɑl biit, k biit mun n suol puol k mɑl kuun. N nɑɑ wɑlonkɑi, i dɑɑ te k siɑl kpɑnn’i ni. Bonŋɑnn kul nyii sɑnpɑɑpo e Bɑɑ buol, wun nbɑ din nɑn sɑnpɑɑpo yentu kul ɑ. Ŋuɑ ŋɑnin k lebtl nɑn sɑnpɑɑpo yentu nbɑ tuu lebtl biɑnŋ nbɑ nɑ. U biɑ dɑɑ tie ŋuɑ Yennu e. U mɔnŋ lonm ni e k u tul’t mɑnfuol, u mɑɑn nbɑ tie bɑlmɔni nɑ pɑɑk, ɑ tii cie u bonninnɑnt kul ɑ. N nɑɑ wɑɑs, n luon yin bɑnn nɑ e. Ii gbiintl yiɑn, ŋɑɑn kii mi biɑnŋ nbɑ k i piɑk, k biɑ dɑɑ dont wutuol yiɑn yiɑn, k mɑɑn nifosɑɑlk wutuol k bɑɑt nɑn binbenŋɑnŋ nbɑ k Yennu luon. L pɑɑk, ii nyik i yɑnbɔnm nɑn biit kul nbɑ be i pɑlɑ ni nɑ, ŋɑɑn sikn i mɔnŋ Yennu tuɑnn, k gɑɑl u mɑɑn nbɑ k u bul i pɑlɑ ni nɑ, k mɑɑn mɑɑn mɑnŋ e sɑɑ fit fiel’i. I dɑɑ gbiintl mɑɑn mɑnŋ kuukuɑ k kpɑnn i mɔnŋ, ŋɑɑn kii tuun mɑɑn nbɑ wɑnn’i biɑnŋ nbɑ nɑ. Wun nbɑ kul gbɑt mɑɑn mɑnŋ, ŋɑɑn k k tuun biɑnŋ nbɑ k l wɑnn, u tie nɑn nilɔ nbɑ tuu got k lɑ u mɔnŋ miɑnu ni nɑ e, k mɑɑn u got k lɑ u mɔnŋ miɑnu nɑ ni, ŋɑɑn siet, k ji tuu tɑnm wɑɑ bo got k lɑ u mɔnŋ k u tie biɑnŋ nbɑ nɑ e. Ŋɑɑn wun nbɑ goli sennŋɑnn nbɑ sɑɑ fit nyinn niib biit dɑɑbs ni, k k tɑnm’l, ŋɑɑn mɔk gbɑnkul k tuun biɑnŋ nbɑ k l wɑnn nɑ, pɑlpienn sii tie l dɑɑnɔ yɑl e, u tuonɑ nɑ pɑɑk. Wun nbɑ mi nɑn u tie Yenweilɔ ŋɑɑn k k so u jeln, l dɑɑnɔ kpɑnn u mɔnŋ e, k u wɑɑnu nɑ tie yɑnn e. Gotl lin nbɑ k Bɑɑ Yennu yet ɑ l tie Yenweiu nɑn bɑlmɔni k jɑknt kɑɑ lenŋ, wun nbɑ sonmt kpiebi nɑn pɑkɔi b fɑlɑ ni, k so u mɔnŋ, ɑ tingbounŋ nɑ bonbiil dɑɑ fit kuɑnt’ɔ biit ni. N nɑɑ wɑɑs, yɑɑ tien Yonmdɑɑnɔ Yiesu *Klistu, wun nbɑ yen *yudɑnt nɑ, yɑdɑ biɑnŋ nbɑ, i dɑɑ mɔk luktn. L i tie k mɔktɔ wun nbɑ liɑ tɑŋɑnt k pil sɑlnbɑnn kuɑ i tintɑɑnu ni, k nɑndɑɑnɔ nbɑ liɑ tɑciɑt mun kuɑ, k i tul mɔktɔ nɑ nibɑɑkl, k yet’ɔ ɑ wun kɑl tuɑnn po, ŋɑɑn yet nɑndɑɑnɔ nɑ, ɑ u sie ɑmi wun kɑl tinŋ ni, n nɑɑ wɑɑs, l i tie k i tuun nnɑ, i tie niib nbɑ mɔk luktn nɑn i lieb, k biɑ tie nɑn bubuulɑ nbɑ mɔk dudukbiit nɑ e. N nɑɑ wɑlonkɑi, gbiintl mɑn, Yennu e lukt bin nbɑ tie nɑndɑnm tingbounŋ nɑ niib buol, ɑ bin tien mɔktɑ b yɑdɑ ni, k tien u wɑɑs nbɑ sɑɑ di nɑɑn nbɑ k u din senn mɔsonn, ɑ u sɑɑ tul bin nbɑ luon’ɔ nɑ. Ŋɑɑn yinm e sɑlkt nɑndɑnm. Bin nbɑ ŋmɑb’i k so’i, k sɑɑ nɑn’i buut buol nɑ, b k tie mɔktɑ kɑɑ ɑɑ? Ŋɑnm e biɑ piɑk biil sɑnŋɑnn nbɑ k Yennu tul’i nɑ. L diɑn Yennu lolkpel kɑdɑɑɔk ni ɑ: «Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.» L i tie k i wɑɑ Yennu nɑɑn sennu mɑnŋ, l ŋɑn, ŋɑɑn l i tie k i mɔk ningɑnni nɑn lieb, l tie biit e, k sennu mɑnŋ fiitl wɑnt nɑn i set tie sennu biiltieb e. Wun nbɑ sɑk k wei *senni nɑ kul, ŋɑɑn tɑn biil senni mɑnŋ yenn, l wɑnt nɑn u biil senni nɑ kul e. Wun nbɑ yet ɑ: «Dɑɑ conm nɑ,» ŋuɑ e biɑ yet ɑ: «Dɑɑ kpi nilɔ.» L pɑɑk, l i tie k ɑ k conm, ŋɑɑn kpi, ɑ tie senni biiltuɑ e. Ii piɑk ŋɑɑn kii tuun nɑn niib nbɑ k Yennu tɑn sɑɑ jii senni nbɑ nyint niib biit dɑɑbs ni nɑ e, k bu b buut, k mɑɑn bin nbɑ k tin b lieb ninbɑɑɔk, Yennu sɑɑ bu b buut k kɑn tin’m ninbɑɑɔk u, ŋɑɑn k ninbɑɑɔk e nyɑni tubdɑtu. N nɑɑ wɑɑs, dɑɑnɔ nbɑ yɑɑ, ɑ u mɔk yɑdɑ, ŋɑɑn ji k tuun tuonŋɑnɑ, l mɔk nyuɑt ii? U yɑdɑ mɑnŋ buolu sɑɑ fit fiel’ɔ wɑɑ ɑɑ? L i tie k ɑ nɑɑ bik be k k lɑɑt gbɑb, k biɑ k lɑɑt di, k ɑ ji yien’ɔ ɑ: «N nɑɑ bik, ɑ kun mɑnu wɑɑ, kii gbɑb, kii biɑ kii di,» ŋɑɑn kɑn sonm’ɔ nɑn siɑl, l mɔk nyuɑt ii? Yɑdɑ kuukuɑ i be, ŋɑɑn tuonŋɑnɑ kɑɑ, yɑdɑ mɑnŋ tie yɑdɑkpieonŋ o. Ŋɑɑn suɑ sɑɑ yet ɑ: «A mɔk yɑdɑ, k n tuun tuonŋɑnɑ.» N mun sɑɑ jiin ɑ: «L i tie k ɑ k tuun tuonŋɑnɑ, lɑnn po e wɑnt nɑn ɑ set mɔk yɑdɑ? Ŋɑɑn n tuonŋɑnɑ nɑ e wɑnt’ɑ nɑn min set mɔk yɑdɑ.» A tien yɑdɑ nɑn Yen-yenɔ kuɑ e be ee? L ŋɑn. Nɑlnbiit mun tien yɑdɑ nɑn Yen-yenɔ kuɑ e be, k biɑ jekl nɑn jɑŋmɑɑni. Fin jɑtuk nɑ. A luon k n wɑnn’ɑ bɑnnu nbɑ k ɑ sɑɑ bɑnn nɑn yɑdɑ nbɑ k mɔk tuonɑ nɑ tie yɑnn ee? T yejɑ Ablɑɑhɑɑnm nbɑ din jii u bik Isɑɑk k pɑɑn’ɔ binbintl pɑɑk ɑ wun kpi’u k mɑnn *mɑlunŋ k tul Yennu nɑ, tuonn mɑnŋ pɑɑk, kɑɑ te k Yennu din yet ɑ u tie niŋɑnɔ u buol ii? A lɑ nɑn u yɑdɑ nɑn u tuonɑ din tɑɑn k tuun k u tuonɑ ni, yɑdɑ mɑnŋ din wɑnn l mɔnŋ ɑ l tie bɑlmɔni yɑdɑ e. Nnɑ e k lin nbɑ diɑn Yennu lolkpel kɑdɑɑɔk ni din tɑn tien mɔni ɑ: «Ablɑɑhɑɑnm din tien Yennu yɑdɑ, k l pɑɑk, k Yennu yɑɑ ɑ u tie niŋɑnɔ u buol,» k b din yi’u Yennu yuɑk. I ji lɑ nɑn nilɔ tuonŋɑnɑ pɑɑk e k Yennu sɑɑ yet ɑ l dɑɑnɔ tie niŋɑnɔ u buol, k l k tie u yɑdɑ kuukuɑ pɑɑk. L din tie nnɑ e mun k tul puocunconn nbɑ sɑnn din yi Lɑɑhɑɑb nɑ. Wɑɑ din gɑɑl tuomiinbɑ nbɑ k Islɑɑeltieb din tun’m, k biɑ wɑnn’b sɔngɑnu nbɑ k b tɔkn ŋmɑt kun nɑ, u tuonn mɑnŋ pɑɑk e k Yennu din yet, ɑ u tie niŋɑnɔ u buol. L pɑɑk, gbɑnɑnt nbɑ kɑɑ siek nɑ, tie gbɑnɑnkpieonŋ o, k yɑdɑ i mun i be k tuonŋɑnɑ kɑɑ, l mun tie yɑdɑkpieonŋ o. N nɑɑ wɑɑs, i nisiɑb bonciɑnn dɑɑ luon bin tien wɑntieb, k mɑɑn i ponŋ mi nɑn bin nbɑ tie wɑntieb nɑ, b buut tɑn sii pɑɑl k gɑl bin nbɑ k tie wɑntieb. T kul tuun lin nbɑ k tuok bonciɑnn, ŋɑɑn wun nbɑ k piɑk mɑbiit, l dɑɑnɔ set tie niŋɑnɔ e k sɑɑ fit suol u gbɑnɑnt kul ɑ. T i jii gɑlkɑ k wukn tɑɑni, ɑ bii tuun tɑɑ luon biɑnŋ nbɑ, b gbɑnɑnt pɑnŋ kul be t nuu ni e. Biɑ duknt ŋɑlint lɑbɑɑl po. B gbenŋ bonciɑnn, ŋɑɑn wonpɑɑluk u dɑ, b sɑɑ e, ŋɑɑn dɑbik nnɑ e k kɑntuɑ nɑ diɑ k kɑn k b sɑɑ wɑɑ luon siɑn nbɑ. Jeln mun tie bonbik nnɑ e, ŋɑɑn l mɔk yiikuo bonciɑnn. Gotl, musɑnpuɑlk nnɑ e tuu di fɔgbenŋl. Jeln tie nɑn muu nɑ e. L be t gbɑnɑnt ni k mɔk biit buolu buolu kul ɑ, k sɑɑ fit biil nilɔ munn. L biɑ di nifosɑɑlk binbenŋ nɑn muu nɑ, k l muu nyii *Sɑɑtɑn buol e. Nisɑɑlk e mɔk bonkobt nɑn nuɑni nɑn wɑi nɑn nyun ni bonɑ kul yiikuo, ŋɑɑn nisɑɑlk kɑn fit suol jeln. L tie bonbiil, k lintl yuo kul k k foi, k gbie nɑn lɔbi nbɑ bɑɑt nɑn kuun e. Jeln nbɑ k t diɑ k piɑk dont t Bɑɑ Yennu nbɑ tie Yonmdɑɑnɔ nɑ, l jeln e k t biɑ diɑ k puol nifosɑɑli mɔi, bin nbɑ k Yennu din nɑn’m u nɑɑɔnŋ ni. Mɔb nbɑ k pɑku nyi l ni, mɔb mɑnŋ ni e k mɔpol mun nyi. N nɑɑ wɑɑs, l i tie nnɑ i e, l k ŋɑn. Bunbunyenn kuɑ sɑɑ fit buni nyunmɑnm nɑn nyuntonm ii? N nɑɑ wɑɑs, tiik nbɑ k b yi *fiigie nɑ sɑɑ fit lon luɑnɑ nbɑ k b yi oliifnbɑ nɑ wɑɑ? Ami *fiinyɑ sɑɑ fit lon fiignbɑ wɑɑ? Nnɑ e mun, bunbunn nbɑ k nyuntonm nyi lenŋ nɑ, kɑn fit tul nyunmɑnm. Ŋmee mɔk yɑn nɑn bɑnnu i sinsuuk ni? Ŋɑɑnt wun wɑnn nɑn u mɔk yɑn nɑn bɑnnu, u binbenŋɑnŋ ni nɑn tuonɑ nbɑ k u tuun, nɑn sikn-n-mɔnŋ nɑn yɑn ni. Ŋɑɑn l i tie k i mɔk funfunbiiuk nɑn dont-n-mɔnŋ i pɑlɑ ni, i dɑɑ fuɑ bɑlɑ, k dɑɑ fɑ fɑɑk, k dɑɑ noi bɑlmɔni. L yɑn k nyi Yennu buol ni kɑɑ. L tie tingbounŋ nɑ nɑn gbɑnɑnt lonm nɑn Sɑɑtɑn yɑl e, k mɑɑn *funfunn nɑn dont-n-mɔnŋ nbɑ be siɑn, dɑɑmuk nɑn biit buolu buolu kul be lenŋ e. Ŋɑɑn yɑn nbɑ nyi sɑnpɑɑpo, l k mɔk biit. Wun nbɑ mɔk yɑn mɑnŋ, u mɔk pɑlmɑɑsl k be suon nnɑ, k gbiɑ u lieb mɑɑn pɑɑk. U mɔk ninbɑtinu bonciɑnn, k biɑ tuun tuonŋɑnɑ bonciɑnn. U k mɔk luktn, k biɑ k mɔk niilɑbndinu. Bin nbɑ tie mɑnu dɑnm nɑ tuu bul mɑnu e niib sinsuuk ni, k tɑn jɑɑn binbenŋɑnŋ nbɑ gbuot Yennu nunm. Bee te k i kɔn k noi nɑn lieb i? L tie i niɑnbiiuk nbɑ be i pɑlɑ ni k kɔn nɑ e. I luon bonsiɑ, ŋɑɑn kɑn lɑ, k ji tie siil nɑn nikpinu. I mɔk *funfunn i lieb bonɑ pɑɑk, ŋɑɑn kɑn lɑ’l. L pɑɑk, k kunkɔnɑ nɑn mɔniɑt be i sinsuuk ni. I k mɔk yɑɑ luon lin nbɑ nɑ, k mɑɑn i k mei Yennu l po. I mei Yennu k k lɑɑt k mɑɑn i mei’ɔ nɑn dudukbiit k luon i mɔnŋ niɑnbiiuk yɑl. I nyik Yennu wɑɑ, k wɑɑ bonliɑ. I k mi nɑn l i tie k i suol tingbounŋ yuɑs i e, i tie Yennu dɑtɑi ee? Wun nbɑ luon wuu tie tingbounŋ nɑ yuɑk, l dɑɑnɔ tien u mɔnŋ Yennu dɑtɑɑk e. L diɑn Yennu lolkpel kɑdɑɑɔk ni ɑ: «U luon Siek nbɑ k u tien t ni nɑ bonciɑnn.» Ŋɑɑn u biɑ mɔk ninkpɑbɑɔnŋ bonciɑnn. L pɑɑk, l diɑn Yennu lolkpel kɑdɑɑɔk ni ɑ: «Yennu kɔn nɑn kɑlnbɑɑni dɑnm e, ŋɑɑn tiin sikn-n-mɔnŋ dɑnm nɑ ninbɑɑɔk.» L pɑɑk, ii sɑɑk Yennu mɔmɑɑn, ŋɑɑn yet *Sɑɑtɑn, k u sɑɑ ciɑl ŋɑɑn nyik’i. Cɑtl nɑkn Yennu buol mɑn, k u mun sɑɑ nɑkn’i. Yinm biitdɑnm, wuut i nii mɑn, k yinm dudukt ŋɑnlele dɑnm, ŋɑnmt i pɑlɑ mɑn. Ii mɔk pɑlbiil k bui nɑn nyin-nyuut i biit pɑɑk. I dɑɑ ji lɑɑ, ŋɑɑn ii mɔ mɑn, k ŋɑɑn k i pɑlpienn n kpint k tien pɑlbiil. Siknt i mɔnŋ Yonmdɑɑnɔ tuɑnn, k u sɑɑ donn’i. N nɑɑ wɑɑs, i dɑɑ piɑk mɑbiit lieb pɑɑk. Wun nbɑ piɑk mɑbiit u nɑɑ bik pɑɑk ɑmi bu u buut nɑ, l tie *senni e k u piɑk mɑbiit l pɑɑk k bu l buut. K mɑɑn l i tie k ɑ bu senni nɑ buut i e, ɑ k tie wun nbɑ sɑɑk’l kɑɑ, ŋɑɑn ɑ tie l bɑlbuulɔ e. Yennu kuukuɑ e mɔk yiikuo k sɑɑ fit senn senni, k biɑ sɑɑ fit bu nifosɑɑli buut. Ŋuɑ kuukuɑ e sɑɑ fit fiel nifosɑɑli ɑmi k biil’b. A mun tie ŋmee k bu *ɑ luɑ buut i? Gbiintl mɑn, yinm nbɑ tuu yien ɑ: «Dinnɑ ɑmi wonn, t sɑɑ sɑɑn digbɑnn nɑ wɑɑ, k sɑɑ di binn kii kpentl kpinkpounŋ k lɑ nyuɑt bonciɑnn.» I k mi lin nbɑ sɑɑ bɑɑl wonn. I mɑnfuol tie bee? L tie nɑn wunn nbɑ tuu bɑɑ sɑn-nyiɑɔk ni, ŋɑɑn l i yɑnn lin yɑnt nɑ e. L pɑɑk, l ŋɑn yin tuu yet ɑ: «L i tie k Yennu luon, t sii mɔk mɑnfuol, k tun nnɑ nɑn nnɑ.» Ŋɑɑn i mɔk kɑlnbɑɑni k fuɑ bɑlɑ. Yɑɑ fuɑ bɑlɑ biɑnŋ nbɑ nɑ, l tie bonbiil e. L pɑɑk, wun nbɑ mi tuonŋɑnɑ nbɑ k l ŋɑn nɑn wun tun, ŋɑɑn k tuun, l dɑɑnɔ mɔk biit. Yinm goldɑnm, gbiintl mɑn. Ii mɔ mɑn kii fɑbn fɑlɑ nbɑ bɑɑt i pɑɑk nɑ pɑɑk. I mɔktuk nɑ kul bɑt, k wobi muɑ i tiɑt ɑ. I sɑlmɑ nɑn i likli nɑ kuɑ tintɑni wɑɑ, k tintɑni mɑnŋ wɑnt nɑn i tie biitdɑnm k l sɑɑ di i gbɑnɑnt nɑn muu nbɑ di biɑnŋ nbɑ nɑ. I tikl i mɔktuk mɔtɑɑnɑ, ŋɑɑn k tingbounŋ nɑ gbennu ji k fɔk. I k pɑ bin nbɑ jɑɑn i dii i kpɑɑnt ni nɑ. Gbiintl mɑn b fɑbni. B mɔni mɑnŋ kuɑ Yonmdɑɑnɔ nbɑ yen bonsiɑl kul nɑ tubɑ ni wɑɑ. Yɑɑ be tingbounŋ nɑ ni, ii be i yɑmɑ ni, k wɑɑ i gbɑnɑnt niɑɔnŋ. I dint i mɔnŋ e, ŋɑɑn i lek be nɑn nɑɑjɑkpɑnmɑ nbɑ k b sɑɑ kpi’b nɑ. I din biil bin nbɑ k mɔk biit k kpi’b, ŋɑɑn b k kɔn nɑn’i. N nɑɑ wɑɑs, ii di suklu mɑn kii guu Yonmdɑɑnɔ bɑɑlu dɑɑl mɑnŋ. Gotl mɑn kpɑɑlɔ nbɑ tuu di suklu k guu kpɑfusɑɑk mɔkmɔk nɑn sɑjuontk k u jiet n ji tɑn nɑn bonŋɑnn. L pɑɑk, ii mun ii di suklu, k cie i pɑlɑ k mɑɑn Yonmdɑɑnɔ bɑɑlu dɑɑl pel nɑ. N nɑɑ wɑɑs, i dɑɑ mɔk bunbulmi i lieb pɑɑk, ɑ k Yennu dɑɑ bu i buut. Gotl mɑn, bɑlbuulɔ nɑ nɑkn k sie i tɑnmɔi ni. N nɑɑ wɑɑs, Yonmdɑɑnɔ *Yennu sɔkniinbɑ nbɑ din pɑk u sɑnn ni nɑ, gotl mɑn bɑɑ din lɑɑt fɑlɑ k mɔk suklu biɑnŋ nbɑ nɑ, k lii tie wɑnnu k tul’i. L nibuolu nbɑ mɔk gbɑnkul nɑ, t yi’b pɑlpienn dɑnm e. I ponŋ gbɑt Job nbɑ din tɑn mɔk gbɑnkul biɑnŋ nbɑ nɑ, k i mi lin nbɑ k Yonmdɑɑnɔ din tun k tul’ɔ l puolpo, k mɑɑn Yonmdɑɑnɔ gbie nɑn ninbɑtinu k biɑ goli nisɑɑli fɑnu. N nɑɑ wɑɑs, lin nbɑ kpɑɑ tɑlɑs tie nɑ e: i dɑɑ puol mɔpolɑ. I dɑɑ yi sɑnpɑɑpo ɑmi tingbounŋ ɑmi bonsiɑl kul sɑnn k puol mɔpolɑ. Ŋɑɑnt k i nnn i tie i nnn, k i ɑɑi i tie ɑɑi, k Yennu tɑn dɑɑ dɑɑl i tubɑ. Suɑ i be i ni k lɑɑt fɑlɑ, wun miɑl Yennu. Wun nbɑ mun mɔk pɑlpienn, wun yin *yɑni kii piɑk Yennu. Suɑ i be i buol k yiɑl, wun yiin *Klistu mɔtɑɑɔk niib *sɑɑkɑb k bin tɑn miɑl Yennu k suɑl’ɔ kpɑn Yonmdɑɑnɔ Klistu sɑnn ni k tul’ɔ. B i mei Yennu nɑn yɑdɑ i e, k l dɑɑnɔ sɑɑ lɑ lɑɑfiɑ, k Yonmdɑɑnɔ sɑɑ te k wun pɑɑk. L i tie k u tun biit i e, Yennu sɑɑ nyik u biit mɑnŋ k cɑb’ɔ. L pɑɑk, fiitl i biit k wɑnn lieb, k miɑl Yennu k tul lieb, ɑ yin lɑ lɑɑfiɑ. Wun nbɑ tie niŋɑnɔ Yennu tuɑnn nɑ miɑlu sii mɔk nyuɑt bonciɑnn. *Elii din tie nifosɑɑlk e nɑn tinm nɑ. U din miɑl Yennu nɑn ninmɔnn ɑ sɑɑk dɑɑ bɑɑ, k sɑɑk set din k bɑɑ tinŋ mɑnŋ ni k sɑɑ jɑnŋ binɑ ŋɑntɑ nɑn ŋmɑɑli ŋɑnluob. L puolpo k u biɑ miɑl Yennu, k sɑɑk nyi sɑnpɑɑpo k ji bɑɑ, k tinŋ nɑn jiet fɑnu. N nɑɑ wɑɑs, i yenɔ i kpet k nyii mɔmɔnm wɑnnu sɔnu ni, k suɑ jenn’ɔ sɔnu mɑnŋ ni, ii tiɑn mɑn nɑn dɑɑnɔ nbɑ nyinn biitdɑɑnɔ u sɔnbiiuk nɑ ni, u fɑt’ɔ kuun ni e k te k u lɑ nyikcɑbu biit buolu buolu pɑɑk. Min Piɑl nbɑ tie Yiesu *Klistu *tuomi nɑ e dɑ kɑdɑɑɔk nɑ k tien bin nbɑ k Yennu lukt’b k b yɑt k be Pɔn nɑn Gɑɑlɑɑti nɑn Kɑpɑdos nɑn Asii nɑn Biitiini tini ni k tie sɑɑnm nɑ. Yennu, Bɑɑ nɑ, din dɔnŋ lol k lukt’i, ɑ yii tie u yɑb Foŋɑnm yiikuo pɑɑk kii sɑɑk Yiesu Klistu mɔb k u sɔn n wuul i pɑl ni. Yennu ii mɔk ninkpɑbɑɔnŋ nɑn’i k biɑ tul’i mɑnu nbɑ kɑɑ pɑɑk. Pɑkn mɑn Yennu nbɑ tie t Yonmdɑɑnɔ Yiesu Klistu Bɑɑ nɑ, k mɑɑn u tin’t ninbɑɑɔk bonciɑnn k tul’t mɑnfopɑɑnn Yiesu Klistu kuun fiilu pɑɑk. Lin nbɑ nɑ e te k t mɔk dindɑnn nɑn t tɑn sii mɔk mɑnfuol, k lɑ lin nbɑ tie Yennu wɑɑs yɑl, k l sii be yuo nbɑ kɑɑ gbennu, k kɑn biil, k l fɑnt biɑ kɑn siil, k l be *Yendɔunŋ ni k guu yinm nbɑ k Yennu yiikuo diɑ’i i yɑdɑ pɑɑk, ɑ yin lɑ i fielu nbɑ tien siil k sɑɑ nyi pɑɑnu dɑɑjuonti nɑ. L pɑɑk, i ji mɔk pɑlpienn bonciɑnn. L i lek i tie ɑ i mɔk pɑlbiil yuo wɑɑnm-nnɑ mɔtɑɑnɑ k mɑɑn yɑɑ lɑ fɑlbuolu buolu nɑ pɑɑk, i mɔk pɑlpienn e. Fɑlɑ mɑnŋ biki’i, ɑ lin lɑɑn i tien Klistu yɑdɑ fɑnu ɑmi ii? Sɑlmɑ sɑɑ fit k biil, ŋɑɑn b tuu jii’l k tien muu ni e, ɑ bin lɑɑn l ŋɑn ɑmi l k ŋɑn. L mun biɑ tie nnɑ e nɑn i yɑdɑ. I yɑdɑ ŋɑn k cie sɑlmɑ, ŋɑɑn k Yennu biki i yɑdɑ mɑnŋ. L pɑɑk, Yiesu Klistu nbɑ tɑn sɑɑ dɔkt, i sɑɑ lɑ sɑnn nɑn dontl nɑn *yudɑnt, i yɑdɑ ŋɑnt pɑɑk. I k mi lɑ Yiesu ŋɑɑn luon’ɔ, i biɑ k lɑɑt’ɔ mɔtɑɑnɑ, ŋɑɑn k biɑ lek tien’ɔ yɑdɑ. L pɑɑk e k i gbie nɑn pɑlpienn nbɑ yɑb k kɑɑ pɑɑk k nilɔ kɑn fit k bign. K mɑɑn i lɑɑt lin nbɑ k i yɑdɑ tien’i k ŋɑnn e tie i sei fielu. Fielu nɑ e k sɔkniinbɑ din luon bin bɑnn l pɑɑk nɑn ninmɔnn, k din sɔknt ɑ l tɑn sii tie yinm e k Yennu sii mɔk ninkpɑbɑɔnŋ nɑn’i. Klistu Siek nbɑ din be b ni din wɑnn’b ɑ u tɑn sɑɑ lɑ fɑlɑ, k l puolpo k u biɑ tɑn sɑɑ lɑ dontl bonciɑnn, k b kol k luon bin bɑnn yuo nbɑ k l tɑn sɑɑ tun, k biɑ luon bin bɑnn lɑ tɑn sɑɑ tun biɑnŋ nbɑ. K Yennu fiit wɑnn’b, ɑ b k sɔknt b mɔnŋ po kɑɑ, ŋɑɑn yinm po e k b sɔknt. Foŋɑnm nbɑ k u din tun’ɔ ɑ wun nyi Yendɔunŋ ni nɑ e mun te k bin nbɑ muɑntl lɑbɑmɑnn nɑ yien’i mɑɑn mɑnŋ. Lin nbɑ nɑ e k mɑlɑkɑɑnbɑ mun luon bin bɑnn l pɑɑk. L pɑɑk, i tien i dudukt siil, k suol i mɔnŋ, kii mɔk dindɑnn nɑn bɑlmɔni, ɑ i tɑn sɑɑ lɑ ninbɑtinu nɑ yuo nbɑ k Yiesu Klistu tɑn sɑɑ nyi pɑɑnu nɑ. Ii tie mɑn nɑn wɑɑs nbɑ sɑɑk b bɑɑ mɔb nɑ, k dɑɑ wɑɑ lonbiit nbɑ k i din wɑɑ yuo nbɑ k i din k mi Yiesu Klistu nɑ. Yennu nbɑ yiin’i nɑ tie *Ŋɑnɔ e, l pɑɑk, ii mun i tie niŋɑnm mɑn, k mɑɑn l diɑn Yennu lolkpel kɑdɑɑɔk ni ɑ: «Ii tie niŋɑnm mɑn, k mɑɑn n tie Ŋɑnɔ e.» L i tie k i mei Yennu, i yi’u Bɑɑ e, k ŋuɑ e bu niib kul buut nɑn bɑɑ tun biɑnŋ nbɑ nɑ, k ningɑnni kɑɑ. L pɑɑk, yɑɑ be tingbounŋ nɑ ni, ii tiin’ɔ mɑn yuo kul. K mɑɑn i mi nɑn Yennu nbɑ nyinn’i binbenbiiuk nbɑ kɑɑ nyuɑt nbɑ k i din gɑɑl i yejɑnm buol nɑ, u k jii bont nbɑ sɑɑ biil nɑn sɑlmɑ kuo likli nɑ kɑɑ k pɑ, ŋɑɑn u din jii Klistu sɔn nbɑ ŋɑn nɑ e k dɑɑ’i, Yiesu nbɑ tie nɑn mɑnnu pebik nbɑ k mɔk dɑnŋ k biɑ k mɔk jɑknt nɑ. Yennu nbɑ dɑɑ din k nɑn *dulnyɑ yuo nbɑ nɑ, ŋɑɑn k u ponŋ din lukt Klistu, k tɑn nyinn’ɔ pɑɑnu dɑɑjuonti ni k tul’i. Klistu ni e k i tien Yennu yɑdɑ, k Yennu tie wun nbɑ din fiin’ɔ kuun ni k tul’ɔ yudɑnt. L pɑɑk, k i yɑdɑ nɑn i dindɑnn be Yennu ni. Mɔtɑɑnɑ yɑɑ sɑɑk bɑlmɔni lɑbɑɑl k i ji nyii biit sɔnu ni, ɑ yin fit kii luon i nɑɑ wɑɑs nɑn bɑlmɔni nɑ, ii luon i lieb mɑn nɑn i pɑlɑ kul ɑ. I lɑ mɑnfopɑɑnn ɑ, k l mɑnfuol k nyii bonbuolk nbɑ kpenn ni kɑɑ, ŋɑɑn l nyii bonbuolk nbɑ k kpenn nɑ buol e. Yennu mɑɑn nbɑ tien’t mɑnfuol k sii be mɔkmɔk nɑn yuo nbɑ kɑɑ gbennu nɑ e, tul’i mɑnfopɑɑnn mɑnŋ. L diɑn Yennu lolkpel kɑdɑɑɔk ni ɑ: «Nisɑɑli kul tie nɑn muɑt nɑ e, k b fɑnt tie nɑn tipuuk nɑ. Muɑt juɑkt k l puut suul bɑɑ, ŋɑɑn Yonmdɑɑnɔ mɑɑn nɑ ŋɑnin kɑɑ gbennu.» Mɑɑn mɑnŋ e tie lɑbɑmɑnn nbɑ k b din muɑntl k tien’i nɑ. L pɑɑk, i nyik bonbiil kul tumu mɑn, nɑn fɑɑk kul, nɑn kpinkpɑnni, nɑn *funfunn, nɑn sɑnjɑɑɔnŋ. Ii tie nɑn sɑnpɑnti nɑ mɑn, kii tun kii luon mɑnfuol biin nbɑ be Foŋɑnm buol ni nɑ, k l i tie k i nyu’l yii kpɑɑtl k tɑn lɑ fielu. Tɔn, l diɑn Yennu lolkpel kɑdɑɑɔk ni ɑ: «I mi bɑnnu nbɑ k Yonmdɑɑnɔ ŋɑn.» Bɑɑt Yonmdɑɑnɔ buol ni mɑn. Ŋuɑ e tie tɑnn nbɑ fo, wun nbɑ k niib yet, ɑ u k mɔk nyuɑt, ŋɑɑn k Yennu lukt’ɔ k yet, ɑ u ŋɑn k tul’ɔ nɑ. Ii mun i tie nɑn tɑnɑ nbɑ fo k bin jii’i k mɑɑ Foŋɑnm ŋɑɑk. K yii tie Yennu tiɑɔnŋ mɑnntieb, kii mɑnn *mɑlunŋ nɑn Foŋɑnm nbɑ luon bɑnnu nbɑ, k Yiesu *Klistu pɑɑk, Yennu sɑɑ gɑɑl i mɑlunŋ ɑ. K mɑɑn l diɑn Yennu lolkpel kɑdɑɑɔk ni, ɑ u yet ɑ: «Gotl, n lukt tɑnn k bil *Siiɔn duo ni, k l tie tɑnn nbɑ tien fiɑkl pɑnŋ, k l biɑ ŋɑn bonciɑnn, k wun nbɑ kul tien’ɔ yɑdɑ nɑ, u kɑn di fei.» Tɑnn mɑnŋ mɔk nyuɑt bonciɑnn k tul yinm nbɑ tien’ɔ yɑdɑ nɑ, ŋɑɑn l k tie nnɑ kɑɑ k tul bin nbɑ k tien’ɔ yɑdɑ nɑ. «Tɑnn nbɑ k tɑnmɑɑlɑ yet’ɔ nɑ, ŋɑnn e set tie tɑnn nbɑ tien fiɑkl pɑnŋ.» L biɑ diɑn ɑ: «Tɑnn mɑnŋ e k niib gbiɑtl, tɑnpiiuk mɑnŋ e lubn niib.» Bɑɑ k sɑk Yennu mɑɑn pɑɑk e k b gbiɑtl nɑn wɑɑ din senn’b biɑnŋ nbɑ nɑ. Ŋɑɑn yinm ŋɑnin tie nigɑnnkɑb e, k biɑ tie mɑnntieb nbɑ tuun k tien kpɑnbɑl, k biɑ tie nibuolu nbɑ tie Yennu yɑb, k biɑ tie u tiɑɔnŋ niib, ɑ yii muɑntl u bulcint po, ŋuɑ nbɑ nyinn’i bunbɔnn ni, k bɑɑl nɑn’i u bɑktnɔunŋ yentu ni. Siɑn-yuo i din k tie niib, ŋɑɑn mɔtɑɑnɑ i tie Yennu niib e. Siɑn-yuo u din k tin’i ninbɑɑɔk, ŋɑɑn mɔtɑɑnɑ u tin’i ninbɑɑɔk ɑ. N yuɑsnbɑ, yɑɑ tie sɑɑnm k biɑ tie kunsɑnnɑ tingbounŋ nɑ ni nɑ, n kpɑɑn’i e ɑ yi nyik gbɑnɑnt lonbiit nbɑ kɔn nɑn i sei nɑ, ŋɑɑn kii be bɑnnu nbɑ k tingbounŋ niib i lek i tɑɑl’i e, ŋɑɑn b sɑɑ lɑ i tuonŋɑnɑ k dont Yennu sɑnn, dɑɑl nbɑ k u tɑn sɑɑ bɑɑl nɑ. Yonmdɑɑnɔ pɑɑk, ii sɑɑk mɑn yiikuo-dɑnm mɔi kii sɑɑk kpɑnbɑl nbɑ mɔk yiikuo kul mɔb, nɑn *senni dɑnm nbɑ k u tun’m, ɑ bin dɑt bin nbɑ tuun bonbiil nɑ tubɑ, ŋɑɑn kii pɑk bin nbɑ tuun bonŋɑnn nɑ. K mɑɑn lin nbɑ k Yennu luon tie, ɑ i tuonŋɑnɑ n guɑl jɑtt mɑɑn nbɑ k mɔk nyuɑt nɑ e. Ii be nɑn yent-n-mɔnŋ dɑnm nɑ mɑn, ŋɑɑn i dɑɑ diɑ i yent-n-mɔnŋ binbenŋ mɑnŋ k l tien’i yɑɑk nbɑ k i sii tuun bonbiil. Ii mɔk mɑn Yennu tuontunnɑ binbenŋ mɑn. Ii tien suɑ kul nibɑɑkl, kii luon bin nbɑ tie i nɑɑ wɑɑs Klistu ni nɑ, kii tiin Yennu, kii tien kpɑnbɑl nbɑ mɔk yiikuo kul nɑ nibɑɑkl. Yinm nbɑ tie dɑɑbɑ, ii sɑɑk i yudɑnm mɔi ŋɑɑn biɑ kii tien’m nibɑɑkl, k l k tie bin nbɑ tuun bonŋɑnɑ k biɑ mɔk bulcint nɑ kuukuɑ kɑɑ, ŋɑɑn i mun biɑ sii tuun nnɑ e kii tien tondɑnm. L i tie k ɑ tuun bonŋɑnn ŋɑɑn k b biɑ dint’ɑ fɑlɑ, k ɑ lɑ fɑlɑ mɑnŋ nɑn suklu fɑɑ duki Yennu po nɑ, l wɑnn nɑn ɑ tuun l nbɑ ŋɑn e nɑ. Ŋɑɑn fi i tun biit k b dɑt ɑ tubl, k ɑ gɑɑl tubdɑtu nɑ suon nnɑ, nlee k b sɑɑ pɑk’ɑ ni? Ŋɑɑn fi i tuun bonŋɑnn, ŋɑɑn di fɑlɑ l pɑɑk suon nnɑ, l tie bonŋɑnn e Yennu tuɑnn. Ŋɑnn e tie binbenŋ nbɑ k Yennu din yiin’i, ɑ yii be lenŋ, k mɑɑn Klistu tiɑɔnŋ din dii fɑlɑ i pɑɑk, ɑ yii goli u binbenŋ kii wɑɑ u tɑɑ. U k tun biit. Suɑ biɑ k mi gbɑt k fɑɑk nyii u mɔb ni. Bɑɑ din suki’ɔ nɑ, u din k sukl jiin. Wɑɑ biɑ din be fɑlɑ ni, u k jiin suɑ, ŋɑɑn din jii u mɔnŋ k tien Yennu nbɑ bu niib buut fɑnu nɑ nuu ni. Ŋuɑ Klistu mɔnŋ mɔnŋ e din jii t biit u gbɑnɑnt ni, k b kpɑɑ’u dɑpunpunn pɑɑk, ɑ t dɑɑ tie biit tuontunnɑ ŋɑɑn kii be Yennu nbɑ luon bɑnnu nbɑ. U dɑni pɑɑk e k i lɑ lɑɑfiɑ. I din tuu tie nɑn pebotkɑi nɑ e, ŋɑɑn mɔtɑɑnɑ i jen i kpɑɑltuɑ nbɑ guu i sei nɑ buol ɑ. Puob, sɑkn mɑn i sɔlb mɔi, k b siɑb i kii tien Yennu mɑɑn nɑ yɑdɑ, ŋɑɑn pɑsiɑl b puob binbenŋɑnŋ nɑ pɑɑk, b sɑɑ tien yɑdɑ wɑɑ, l k kpɑɑ tɑlɑs nɑn puo n yet siɑl, k mɑɑn b sɑɑ lɑ i binbenŋ nbɑ ŋɑn, k biɑ mɔk cɔlnt bɑnnu nbɑ. Puob, dɑɑ luon i gbɑnɑnt pɑɑk fɑnt nɑn yulolu, nɑn sɑlmɑ lɑɑni, nɑn sɑlmɑ tutuutɑ, nɑn sɑlmɑ bɑni, ɑmi nɑn tɑŋɑnt liɑnu. Ŋɑɑn l ŋɑn k i fɑnt i be i pɑlɑ ni, k lii tie sikn-n-mɔnŋ nɑn ŋminŋminn binbenŋ nbɑ k l fɑnt kɑn biil, k biɑ mɔk nyuɑt bonciɑnn Yennu buol ni. Nnɑ e k yɑɑyuo ni puob nbɑ din tie Yennu yɑb k b dindɑnn din be u ni nɑ, din ŋɑnmt b mɔnŋ. B din sɑɑk b sɔlb mɔi, nɑn Sɑɑlɑ nbɑ din sɑk Ablɑɑhɑɑnm mɔb k din yi’u u Yonmdɑɑnɔ nɑ. Mɔtɑɑnɑ i ji tie u bonpoi e, l i tie k i tuun lin nbɑ ŋɑn, k k tiin siɑl jɑŋmɑɑni. Puosɔlb, yinm nɑn i puob binbenŋ ni, ii diɑ i puob fɑnu kii mi nɑn b tie tɑli e i buol, kii tien’m nibɑɑkl, k mɑɑn yinm nɑn ŋɑnm kul tɑn sɑɑ gɑɑl Yennu piinŋɑnn nbɑ tie mɑnfuol. Ii tuun nnɑ mɑn k siɑl dɑɑ jeni i Yenmiɑlu. Lin nbɑ biɑl nɑ tie nnɑ e: i kul ii mɔk mɑn dudukyenn, k i bɑkɑ ii be i lieb ni, kii mɔk lonm nɑn i nɑɑ wɑɑs *Klistu ni, kii tiin i lieb ninbɑɑɔk, kii siknt i mɔnŋ. I dɑɑ tuun biit k jiint biit pɑɑk. I biɑ dɑɑ suki k jiint suɑ, ŋɑɑn jiin sukt mɑnŋ nɑn yetŋɑnm, k mɑɑn Yennu din yiin’i, ɑ yin gɑɑl u yetŋɑnm e. K mɑɑn l diɑn Yennu lolkpel kɑdɑɑɔk ni ɑ: «Wun nbɑ luon k wuu be u mɑnfuol ni nɑn pɑlpienn, k biɑ luon wun tɑn lɑ dɑɑ nbɑ mɑn, sie k u nyik bonbiil pɑku, k biɑ dɑɑ fɑ fɑɑk. L ŋɑn wun nyik bonbiil, ŋɑɑn kii tuun bonŋɑnn. L ŋɑn wun lon mɑnu sɔnu kii wɑɑ’l, k mɑɑn Yonmdɑɑnɔ kpɑɑ u ninbinɑ bin nbɑ tie niŋɑnm u buol nɑ pɑɑk e, k biɑ gbiɑ b miɑlu yuo kul ɑ, ŋɑɑn kɔn nɑn bin nbɑ tuun bonbiil.» I nunm i mɔn nɑn bonŋɑnn tumu, suɑ be k sɑɑ tien’i bonbiil ii? Ŋɑɑn l i lek i tie k i di fɑlɑ i tuonŋɑnɑ pɑɑk, pɑlpienn sii mɑntk tie i yɑl e. I dɑɑ tiin nisɑɑlk jɑŋmɑɑni, i biɑ dɑɑ te k siɑl dɑɑm’i ni. Ii cɔln Yonmdɑɑnɔ Klistu i pɑlɑ ni. Yuo kul, ii tien siil k jiin wun nbɑ boi’i lin nbɑ te k i mɔk dindɑnn nɑ po. I jiin’ɔ suon nnɑ nɑn cɔlnt k dɑɑ tuun lin nbɑ k i sɑɑ fit tɑɑl i mɔnŋ l pɑɑk, ɑ k bin nbɑ tɑɑl’i i binbenŋɑnŋ Klistu ni nɑ pɑɑk nɑ, n di fei b sukt pɑɑk. L i tie Yennu ŋɑɑn k i lɑ fɑlɑ i tuonŋɑnɑ pɑɑk, ŋɑnn e sɔ nɑn k i lɑ fɑlɑ bonbiil tumu pɑɑk. K mɑɑn Klistu din gɑɑl biitdɑnm kul pɑɑk k kpo yonm kuɑ e, k ŋuɑ nbɑ din tie niŋɑnɔ nɑ e din gɑɑl biitdɑnm pɑɑk k kpo, ɑ wun te yin sɑɑn Yennu buol. B din kpi’u, ŋɑɑn Foŋɑnm din te k u fiil kuun ni. Foŋɑnm ni e k u biɑ lek din sɑɑn sei nbɑ be sɑlk nɑ buol, k sɑɑ muɑnt mɑɑn k tul’b. Ŋɑnm e din tie niib nbɑ din k sɑk Yennu mɔb yuo nbɑ k u din guu nɑn suklu k Noe ŋɑnmt ŋɑlngbenŋl nɑ. Niib bɑnniin kuukuɑ din tɑn kuɑ ŋɑlunŋ mɑnŋ ni, k nyun te k b lɑ fielu. Nyun mɑnŋ tie Yennu nyunwulu ninnɑɔnŋ nbɑ fiel’i mɔtɑɑnɑ nɑ e. L k tie bɑɑ tuu wuul gbɑnɑnt jɑknt nɑ kɑɑ, ŋɑɑn l tie mɔsonn nbɑ k i senn Yennu nbɑ wuul i pɑlɑ ni nɑ pɑɑk e. I lɑɑt fielu l ni Yiesu Klistu kuun fiilu nɑ pɑɑk e. U din sɑɑn *Yendɔunŋ ni e k be Yennu niidiitu po, k ji yen mɑlɑkɑɑnbɑ nɑn bin nbɑ kul mɔk yiikuo Yendɔunŋ ni nɑ. L pɑɑk, *Klistu nbɑ din dii fɑlɑ u gbɑnɑnt ni nɑ, ii mun ii mɔk l dudukt, k mɑɑn wun nbɑ di fɑlɑ u gbɑnɑnt ni ji k duki wɑɑ sɑɑ tun biit bɑnnu nbɑ. L pɑɑk, lɑɑ jii mɔtɑɑnɑ k ji sɑɑ, l ŋɑn k i jii yuo nbɑ tenn tingbounŋ ni kii tuun Yennu nbɑ luon lin nbɑ, ŋɑɑn nyik nisɑɑlk lonbiit. Yuo nbɑ gɑl, i din jii i yuo k tuun lin nbɑ k bin nbɑ k tie Klistuweilɑ luon bii tuun nɑ. I din tuun boncuncontuonɑ, k mɔk lonbiit, k nyu dɑɑn k yib, k mɔk jedicɑɑɔnŋ nɑn dɑnyucɑɑɔnŋ, k mɑnn pɑtɑ bonciɑnn. Ŋɑɑn mɔtɑɑnɑ, yɑɑ ji k wɑɑ bin nbɑ k tie Klistuweilɑ k k tuun l bonbiil nɑ, l bɑkt’b e, k b ji suki’i. Ŋɑɑn b sɑɑ nyinn b tuonɑ pɑɑnu ni k tul Yennu nbɑ tien siil k sɑɑ bu fuotb nɑn kpienm buut nɑ. Ŋɑnn e te k b din muɑnt lɑbɑmɑnn k tul bin nbɑ kpo nɑ. K b bu b buut suɑ kul nɑn wɑɑ tun lin nbɑ, nɑn nisɑɑli kul nɑ. Ŋɑɑn mɔtɑɑnɑ k Foŋɑnm te k b sei fit k be nɑn Yennu nbɑ luon k bii be bɑnnu nbɑ nɑ. Bont kul ɑ gbennu ji k fɔk. L pɑɑk, i suol i mɔnŋ kii sub k fit kii mei Yennu. Lin nbɑ gɑl bont kul tie, ɑ ii luon i lieb mɑn fɑnu, k mɑɑn lonm dɔknt biit bonciɑnn. Ii gɑɑn lieb sɑɑɔnŋ mɑn k dɑɑ buln. Yennu tul u niib piini buolu buolu, k suɑ kul n jii piini nbɑ k u lɑ Yennu buol nɑ, kii diɑ’l fɑnu kii tuun nɑn’n kii sonmt lieb. Wun nbɑ yɑɑ piini tie wuu muɑntl lɑbɑmɑnn nɑ, wuu muɑntl lin nbɑ k Yennu tien’ɔ nɑ e, k wun nbɑ yɑɑ piini tie wuu sonmt niib, wuu sonmt’b nɑn u pɑnŋ kul nbɑ k Yennu tien’ɔ nɑ, ɑ Yennu n lɑ pɑku bonsiɑl kul ni Yiesu Klistu pɑɑk. Ŋuɑ Yiesu yen pɑku nɑn pɑnŋ kul yuo nbɑ kɑɑ gbennu. * Amenn. N yuɑsnbɑ, yɑɑ di fɑlgbenŋɑ nbɑ biki’i nɑ, i dɑɑ te k l bɑktl’i k l tie nɑn bonsɑɑnn nɑ i buol. Yɑɑ di fɑlɑ nɑn Klistu nbɑ din dii fɑlɑ bɑnnu nbɑ nɑ, ii mɔk pɑlpienn mɑn, k yuo nbɑ k u *yudɑnt tɑn sɑɑ nyi pɑɑnu nɑ, i tɑn sɑɑ lɑ pɑlpienn nbɑ kɑɑ pɑɑk. B i suki’i Klistu sɑnn pɑɑk, pɑlpienn tie i yɑl e, k mɑɑn Foŋɑnm nbɑ mɔk pɑnŋ bonciɑnn k biɑ tie Yennu Siek nɑ be i pɑɑk. Ŋɑɑn suɑ fɑldinu i be nikpinu ɑmi nɑn-yuk ɑmi biit tumu ɑmi kpikpiluk tuonɑ pɑɑk, l k ŋɑn. Ŋɑɑn fi i di fɑlɑ fɑɑ tie Klistuyuɑ nɑ pɑɑk, ɑ dɑɑ tiin fei, ŋɑɑn dont Yennu, bɑɑ pul’ɑ Klistu sɑnn nɑ pɑɑk. Yuo bɑɑl ɑ k Yennu sɑɑ piin k bu niib buut, k u sɑɑ bu u tiɑɔnŋ niib buut e sinsinn, k l i tie k u bu tinm nbɑ tie u niib nɑ buut sinsinn nɑ, bin nbɑ k sɑk u lɑbɑmɑnn nɑ sɑɑ juont nlee? L diɑn Yennu lolkpel kɑdɑɑɔk ni ɑ: «L i pɑɑl k niŋɑnm n lɑ fielu, k biitdɑnm nɑn bin nbɑ k tiin Yennu ji sɑɑ tien nlee k lɑ fielu?» L pɑɑk, bin nbɑ di fɑlɑ Yennu nbɑ luon lin nbɑ nɑ pɑɑk nɑ, bii tuun tuonŋɑnɑ, k jii b mɔnŋ k pet tul b nɑntuɑ Yennu nbɑ tie bɑlmɔni dɑɑnɔ nɑ. *Sɑɑkɑb nbɑ be i sinsuuk ni, n kpɑɑn’i e, min nbɑ mun tie sɑɑkuɑ nɑ, k n ninbinn din lɑ *Klistu nbɑ din dii fɑlɑ biɑnŋ nbɑ, k biɑ tɑn sɑɑ lɑkn k lɑ *yudɑnt nɑn’ɔ yuo nbɑ k l tɑn sɑɑ nyi pɑɑnu nɑ. N kpɑɑn’i e, i tie Yennu niib nbɑ be i nuu ni nɑ pekpɑɑli, kii guu’b fɑnu, k l dɑɑ tie miɑl kɑɑ. Ŋɑɑn k lii tie i yɑnbuɑt e, nɑn Yennu nbɑ luon biɑnŋ nbɑ, k l biɑ dɑɑ tie likli pɑɑk kɑɑ, ŋɑɑn ii kpɑnŋ i kol kii tuun. Dɑɑ mɑntk diɑ niib nbɑ k Yennu tul’i k i guu’b nɑ nɑn ninmɔnn, ŋɑɑn te k i binbenŋɑnŋ n wɑnn’b bɑɑ sii be biɑnŋ nbɑ. K Klistu wun nbɑ tie pekpɑɑbɑt nɑ i tɑnŋ i jen, i sɑɑ lɑ bɑktnɔunŋ nɑɑn foklk nbɑ sii tun nyili. Nnɑ e mun, yinm nbɑ tie nɑɑsinm nɑn sɑpɑɑnm, ii sɑɑk sɑɑkɑb mɔi, k i kul ɑ n liɑ liɑtl nbɑ tie sikn-n-mɔnŋ, k mɑɑn l diɑn Yennu lolkpel kɑdɑɑɔk ni ɑ: «Yennu kɔn nɑn kɑlnbɑɑndɑnm e, ŋɑɑn goli bin nbɑ sikn b mɔnŋ nɑn bulcint.» L pɑɑk, siknt i mɔnŋ mɑn Yennu nuu nbɑ mɔk pɑnŋ nɑ tinŋ po, k mɑɑn u tɑn sɑɑ donn’i yuo nbɑ k u luon. Jiin mɑn lin nbɑ kul muks’i k tul’ɔ, k mɑɑn u bɑkɑ be i ni. Ii diɑ i mɔnŋ mɑn kii guu fɑnu, k mɑɑn i dɑtɑɑk *Sɑɑtɑn lin k biet nɑn yɑnbɔl nɑ e, k luon wun lɑ suɑ k suol ŋmɑn. Yetl’ɔ mɑn, ŋɑɑn kii diɑ i yɑdɑ fɑnu, k mɑɑn i mi nɑn i nɑɑ wɑɑs nbɑ be tingbounŋ lɔkl kul po mun di fɑlɑ nɑn yɑɑ di biɑnŋ nbɑ nɑ e. I fɑlɑ nɑ dinu kɑn wei, k Yennu nbɑ tin’i ninbɑɑɔk k biɑ yiin’i ɑ yin lɑ dontl nbɑ kɑɑ gbennu Klistu ni nɑ, sɑɑ ŋɑnm i binbenŋ, k cie i yɑdɑ, k pukn’i pɑnŋ, k senn’i fiɑkl nbɑ wɑki nɑ pɑɑk. Ŋuɑ e yen yiikuo kul nɑn yuo nbɑ kɑɑ gbennu. * Amenn. Siilɑɑs wun nbɑ k n mi nɑn u tie t nɑɑ bik nɑn bɑlmɔni nɑ, ŋuɑ e sonm’n k n diɑn kɑdɑɑɔk nbɑ k fɔk nɑ, ɑ n cie i pɑlɑ, k kpɑɑn’i, ɑ ŋɑnn e tie Yennu ninkpɑbɑɔnŋ nɑn bɑlmɔni. L pɑɑk, ii diɑ’l fɑnu mɑn. Yiesu mɔtɑɑɔk niib nbɑ be Bɑbiilonn k Yennu din lukt’b nɑn wɑɑ din lukt’i bɑnnu nbɑ nɑ, fuont’i. Mɑɑlk, wun nbɑ tie n bijɑ yɑdɑ pɑɑk nɑ, mun fuont’i. Ii fuont i lieb kii kpɑnmi mɑn. Mɑnu ii be yinm nbɑ kul tie Klistuyɑb nɑ pɑɑk. Min Siimɔn Piɑl, wun nbɑ tie Yiesu *Klistu tuontunnɔ nɑn u *tuomi nɑ e dɑ kɑdɑɑɔk nɑ k tien bin nbɑ lɑ yɑdɑ Yennu nbɑ tuun lin nbɑ ŋɑn nɑn t Fietuɑ Yiesu Klistu nɑ buol nɑ, k b yɑdɑ mɑnŋ mun ŋɑn k tul Yennu nɑn t yɑl nbɑ ŋɑn bɑnnu nbɑ nɑ. Yɑɑ bɑnn Yennu nɑn t Yonmdɑɑnɔ Yiesu nɑ pɑɑk, ninkpɑbɑɔnŋ nɑn mɑnu ii yɑb kii be i pɑɑk. Yennu yiikuo e tul’t lin nbɑ kul kpɑɑ tɑlɑs ɑ tii mɔk’l kii fit kii be mɑnfuol ni nɑn binbenŋ nbɑ gbuot Yennu nunm nɑ. T lɑ l kul, Yennu nbɑ te k t bɑnn wun nbɑ yiin’t ɑ t mun ii mɔk u dontl nɑn u bulcint nɑ pɑɑk e. Nnɑ e mun, k u din senn mɔsonjɑɑnɑ k tul’t ɑ t i lɑɑt lin nbɑ k u senn mɔsonn nɑn u sɑɑ tul’t nɑ, k fit nyi lonbiiuk nbɑ be tingbounŋ nɑ ni nɑn l kuun ni, ŋɑɑn kii mɔk u tiɑɔnŋ binbenŋ. Lin nbɑ nɑ pɑɑk, i yɑbl i mɔnŋ k pukn binbenŋɑnŋ i yɑdɑ pɑɑk mɑn, k biɑ pukn Yennu bɑnnu i binbenŋɑnŋ mɑnŋ pɑɑk, k biɑ pukn mɔnŋdiɑnu i bɑnnu mɑnŋ pɑɑk, k biɑ pukn suklu i mɔnŋdiɑnu mɑnŋ pɑɑk, k biɑ pukn binbenŋ nbɑ gbuot Yennu nunm i suklu pɑɑk, k biɑ pukn nɑɑtɑɑnn i binbenŋ nbɑ gbuot Yennu nunm nɑ pɑɑk, k biɑ pukn lonm i nɑɑtɑɑnn mɑnŋ pɑɑk. Ŋɑnn tie lin nbɑ k i bo sii mɔk, k l i tie k i mɔk’l k l yɑbt, i sɑɑ fit tun Yennu tuonn fɑnu k biɑ bɑnn t Yonmdɑɑnɔ Yiesu Klistu k pukn. Ŋɑɑn l i tie k suɑ k mɔk’l, u k nyuɑn bɑnfɔkl nɑn juɑnŋ nɑ e, k tɑnm nɑn Klistu din wuul u yɑɑyuo ni biit ɑ. L pɑɑk, n nɑɑ wɑɑs, i yɑbl kii be binbenŋ nbɑ k Yennu din yiin’i k biɑ lukt’i ɑ i be lenŋ nɑ. K mɑɑn l i tie k i tuun nnɑ i e, i kɑn mi bɑɑ biit ni. Nnɑ e k Yennu tɑn sɑɑ gɑɑl’i nɑn pɑlpienn t Yonmdɑɑnɔ Yiesu Klistu jiɑɔnŋ nbɑ kɑɑ gbennu nɑ ni. L pɑɑk, n sii tun k tiɑn’i lɑbɑɑl nɑ po e yuo kul, mɑɑ lek mi nɑn i ponŋ gbɑt’l ɑ, k mi’l fɑnu, k diɑ’l cinm nɑ. Ŋɑɑn n dukn nɑn l ŋɑn k n ŋɑnm tiɑl’i k fiin i dudukt mɑɑ dɑɑ be n mɑnfuol ni nɑ. K mɑɑn n mi nɑn l kɑn wei k n sɑɑ nyi n gbɑnɑnt ni nɑn t Yonmdɑɑnɔ Yiesu Klistu nbɑ din yet’n nɑ. L pɑɑk e te k n yɑɑ n yɑbl n mɔnŋ k lɑ sɔnu nbɑ k i sii tiɑn lɑbɑɑl nɑ po yuo kul ɑ n kuun puolpo. Setk nɑn mɔni, t din k jii fɑɑk sɔnu ɑmi nisɑɑlk tiɑɔnŋ yɑn ni lɑbɑɑl kɑɑ, k wɑnn’i bɑnnu nbɑ k t Yonmdɑɑnɔ tɑn sɑɑ jen nɑn yiikuo nɑ, ŋɑɑn t din lɑ u yɑbnt nɑn t ninbinɑ e. T din be nɑn’ɔ e, yuo nbɑ k Bɑɑ Yennu din tul’ɔ sɑnn nɑn dontl. L yuo mɑnŋ e k kunkɔl nyii Yennu nɑ yentsɑɑkɑl nbɑ gɑl yentsɑɑkɑlɑ kul nɑ buol ni k yet ɑ: «N Bilonkɑk e nɑ, wun nbɑ k n nunm gbuo’u nɑ e nɑ.» T mɔnŋ mɔnŋ din gbɑt kunkɔl mɑnŋ k l nyii *Yendɔunŋ ni, yuo nbɑ k t din be nɑn’ɔ Yennu tiɑɔnŋ juɑl pɑɑk. Ŋɑnn e mɑntk kɑt wɑnt’t nɑn *Yennu sɔkniinbɑ nbɑ din pɑk Yiesu lɑbɑɑl nɑ po din tie bɑlmɔni e, k l ŋɑn k yin gbiint bɑɑ din yet lin nbɑ nɑ fɑnu. K mɑɑn mɑɑn mɑnŋ tie nɑn fitl nbɑ tien yentu bunbɔnn ni nɑ e, mɔkmɔk nɑn yuo nbɑ k sɑn-nyiɑɔk sɑɑ piin yentl k sɑn-nyiɑɔk ni ŋmɑɑbil n yent i pɑlɑ ni. Ŋɑɑn lin nbɑ gɑl l kul tie nɑ e: nisɑɑlk kɑɑ k fit wɑnn Yennu sɔkniinbɑ mɑɑn nbɑ be Yennu lolkpel kɑdɑɑɔk ni nɑ pɑɑk nɑn u tiɑɔnŋ pɑnŋ, k mɑɑn sɔkniinbɑ suɑ kɑɑ k mi dukn u mɔnŋ yɑn ni k pɑk, ŋɑɑn b din piɑk Yennu tiɑɔnŋ mɑɑn e, Foŋɑnm nbɑ din wɑnt’b bɑɑ sii piɑk lin nbɑ nɑ pɑɑk. Ŋɑɑn fɑɑk sɔkniinbɑ din be *Suifnbɑ sinsuuk ni siɑn-yuo k fɑɑk wɑntieb mun biɑ sii be i sinsuuk ni. B sɑɑ lon wuol ni sɔnu k fit bɑɑl nɑn fɑɑk wɑnnu nbɑ sɑɑ buon’i. B set sɑɑ yet wɑntuɑ Yiesu, wun nbɑ din fiel’b nɑ, k b sɑɑ te k Yennu n biil’b yiɑn ɑ. Niib bonciɑnn sɑɑ wei b binbenŋ nbɑ mɔk fei nɑ. B pɑɑk k niib sɑɑ tien mɔniɑɔk nɑn bɑlmɔni sɔnu nɑ. B sii mɔk niɑnciɑɔnŋ, k sii kpɑnn’i k ŋmɑb’i nɑn lɑbɑɑl nbɑ nyi b tiɑɔnŋ dudukt ni nɑ. L pɑɑk, l ponŋ wei wɑɑ, k b Bɑlbuulɔ tien siil, ɑ wun bu b buut k l ji kɑn wei k b biilu sɑɑ bɑɑl. K mɑɑn Yennu din k nyik mɑlɑkɑɑnbɑ nbɑ din tun biit nɑ tubdɑtu. Ŋɑɑn u din lol’b jɑlt k lu’b buotuk nbɑ sumi bonciɑnn k biɑ mɔk muu nbɑ kɑn mi kpien nɑ ni, k b sii be l ni mɔkmɔk nɑn dɑɑl nbɑ k u tɑn sɑɑ bu b buut. Nnɑ e biɑk, u din k nyik yɑɑyuo ni *dulnyɑ niib nɑ. Ŋɑɑn u din te k nyungbiebiiuk o dii dulnyɑ mɑnŋ, k kpii bin nbɑ kul k tiin’ɔ nɑ. U din fiel Noe, wun nbɑ din muɑntl Yenweiu po, k din fiel u ŋɑɑtieb bɑnlole k pukn u pɑɑk. Ŋuɑ Yennu biɑ din biil doi nbɑ yi Suodonm nɑn Guomuɔl, k te k b dii muu k kɑb kpɑnt tɑnpent. Lin nbɑ nɑ e tie *siɑlɑ k wɑnt biitdɑnm wɑɑ tɑn sɑɑ dɑt b tubɑ biɑnŋ nbɑ. U biɑ din tɑn fiel Lɔt, wun nbɑ din tie niŋɑnɔ nɑ. Biit dɑnm nbɑ din tuun b gbɑnɑnt lonbiit biɑnŋ nbɑ nɑ, l din biil ŋuɑ Lɔt pɑl ni bonciɑnn. Lɔt, jɑŋɑnɔ mɑnŋ, din be b duo ni e, k lɑɑt b biit, k gbiɑ bɑɑ piɑk b mɔbonbiit biɑnŋ nbɑ dɑɑ kul, k l din dɑmi’ɔ u pɑl ni bonciɑnn, k mɑɑn u din tie niŋɑnɔ e. Ŋɑnn e k Yonmdɑɑnɔ Yennu mi biɑnŋ nbɑ k u sɑɑ fɑt niib nbɑ tiin’ɔ, k nyinn’b muksuk ni, ŋɑɑn dɑt biitdɑnm tubɑ mɔkmɔk nɑn dɑɑl nbɑ k u tɑn sɑɑ bu b buut nɑ. Bin nbɑ wɑɑ lonbiiuk nbɑ nyii b binbenbiiuk nɑ ni nɑ, k siɑn Yennu yiikuo nɑ, Yennu set sɑɑ dɑt b tubɑ. Fɑɑk wɑntieb nbɑ k n ponŋ piɑk b po nɑ, tie tubkɑngbɑtɑ dɑnm e, k b k tiin suɑ. B k cɔln bin nbɑ be *Yendɔunŋ ni k mɔk *yudɑnt nɑ, ŋɑɑn b suki’b e. Mɑlɑkɑɑnbɑ set mɔk pɑnŋ k gɑl fɑɑk wɑntieb mɑnŋ, ŋɑɑn b k tɑɑl bin nbɑ be Yendɔunŋ ni, k biɑ k suki’b Yonmdɑɑnɔ tuɑnn. Ŋɑɑn jɑb nɑ k mɔk dudukt; b nɑɑn nɑn muuk ni bonkob-biit nbɑ be, k niib tɑn sɑɑ suol’b k kpi’b nɑ e. B tuu suki lin nbɑ k b k gbiɑ l pɑɑk e. B tɑn sɑɑ kpi’b nɑn bɑɑ tuu kpi muuk ni bonkob-biit bɑnnu nbɑ nɑ e. Bɑɑ tuu te k niib n lɑ fɑlɑ nɑ, b nyuɑt mun sii tie fɑlɑ e. Lin nbɑ pent b pɑlɑ ni tie bii tuun b gbɑnɑnt lonbiit yennu ni. Bɑɑ tuu be i sinsuuk ni nɑ, l mɔk fei k biɑ tie bonbiil, k mɑɑn bɑɑ di jiet nɑn’i nɑ, b tuu wɑnt b mɔnŋ b biit pɑɑk. B goli puob e k duki * boncuncontuonn po kuukuɑ. B k fit tuun biit k l jɑnŋt’b, k dɑɑk bin nbɑ k b yɑdɑ k mɔk pɑnŋ nɑ. Yuo kul b luon nyuɑt e. Setk nɑn mɔni, Yennu mɔpol be b pɑɑk. B nyik sɔnu nbɑ tuok, ŋɑɑn bot ɑ. B wɑɑ Buosol bijɑ Bɑɑlɑɑnm nbɑ din wɑɑ sɔnu nbɑ nɑ e. U din luon biit nyuɑt e, ŋɑɑn Yennu din kpil’ɔ u mɔyetu nɑ pɑɑk. U bonŋ set din pɑk nɑn’ɔ nɑn nisɑɑlk kunkɔl k kpil’ɔ k te k sɔkni nɑ nyik u jɑti tuonn mɑnŋ. Niib mɑnŋ buolu tie nɑn bunbunn nbɑ kɑɑ nyun nɑ e, k b tie nɑn sɑyunŋ nbɑ k wounŋ tuu gɑɑn’ɔ nɑ e. Yennu tɑn sɑɑ jii’b k lu’b bunbɔnciɑɔnŋ ni. B piɑk kɑlnbɑɑni mɑɑn nbɑ k mɔk nyuɑt e, k tuun nɑn b tiɑɔnŋ lonbiiuk k pii bɑlt ɑ bin suol bin nbɑ fɑt b mɔnŋ niib nbɑ tuun biit nɑ buol ni k l dɑɑ k wei nɑ. B tuu senn mɔsonn k yet, ɑ b sii mɔk yent-n-mɔnŋ, ŋɑɑn b mɔnŋ tie b gbɑnɑnt lonm nbɑ biil’b nɑ dɑɑbɑ e k be sɔnu nbɑ sɑɑ juont nɑn kuun nɑ ni. Suɑ kul tie lin nbɑ yen’ɔ nɑ dɑɑbl. Bin nbɑ din fit fɑt b mɔnŋ tingbounŋ nɑ biit nɑ ni, k mɑɑn b din bɑnn t Yonmdɑɑnɔ Yiesu *Klistu nbɑ tie t Fietuɑ nɑ e, l biit i ŋɑnm suol’b k nyɑnn’b, b juontu tɑn sii bi k gɑl b pinpiik nbɑ din tie biɑnŋ nbɑ nɑ wɑɑ. B i bo i kii mi binbenŋ nbɑ gbuot Yennu nunm, l bo sii sɔ nɑn bɑɑ bɑnn’l ŋɑɑn ji k sɑk Yennu sennu nbɑ k b din gbɑt nɑ. Bɑɑ tuun lin nbɑ nɑ wɑnt nɑn bɑljokt tie mɔni e ɑ: «Bɔk e tuu ŋmɑt k di u mɔnŋ siit,» k: «Duolk i wul nyun ŋɑɑn u tuu ŋmɑt k gbɑl u mɔnŋ nɑn bɑkl e.» N yuɑsnbɑ, mɑɑ dɑ kɑdɑɑɔk nbɑ k tien’i nɑ ji puki kɑdɑɑt ŋɑnle e nɑ. N diɑn l kɑdɑɑt ŋɑnle kul k tiɑl’i lɑbɑɑl nbɑ k i din gbɑt nɑ po, ɑ yii mɔk dudukŋɑnt. N luon k yii tiɑn mɑɑn nbɑ k sɔknŋɑnm din pɑk yɑɑyuo ni nɑ, kii biɑ kii tiɑn sennu nbɑ k Yonmdɑɑnɔ, wun nbɑ tie t Fietuɑ nɑ din pɑk, k tinm nbɑ tie u tuomiinbɑ din yet’i nɑ po. Sinsinn, n luon k yii mi nɑn nisiɑb nbɑ wɑɑ b pɑlɑ lonbiit tɑn sii be dɑɑjuonti ni, k tɑn sii sɑlkt’i, k yien ɑ: «Yiesu *Klistu nbɑ din senn mɔsonn, ɑ u tɑn sɑɑ jen nɑ, ŋuɑ liɑ ɑɑ? T bɑɑnbɑ nbɑ ponŋ din kpo wɑɑ nɑn dinnɑ, bonsiɑl kul kpɑn tie nɑn lɑɑ ponŋ tuu tie biɑnŋ nbɑ *dulnyɑ pinpiik ni nɑ e.» L niib k sɑɑk bin tiɑl nɑn Yennu din yet mɑɑn e k nɑn sɑnpɑɑk nɑn tinŋ, k u din nyinn tinŋ nɑ nyun ni k te k l be nyun nɑ sinsuuk ni, k biɑ din te k nyungbiebiiuk din dii dulnyɑ kpel mɑnŋ k l biil. Ŋɑɑn ŋuɑ Yennu mɑɑn mɑnŋ e biɑ lek sii diɑ sɑnpɑɑk nɑn tinŋ nbɑ be mɔtɑɑnɑ nɑ mɔkmɔk nɑn yuo nbɑ k u tɑn sɑɑ te k l kul ɑ n di muu, k l dɑɑl u sɑɑ bu nitont buut k biil’b. Bon-yenn be. I dɑɑ tɑnmt l po. Yonmdɑɑnɔ buol ni ŋɑnin, dɑyenn kuɑ tie nɑn binɑ tusl nɑ e, k binɑ tusl mun tie nɑn dɑyenn nɑ. L kɑn wei, k Yonmdɑɑnɔ sɑɑ tun k gbien u mɔsonn nɑ. Ŋɑɑn nisiɑb duki nɑn u tɑɑntl e. Ŋɑɑn u mɔk suklu nɑn’i e. U k luon k nisiɑb n kpo kuun nbɑ kɑɑ gbennu, ŋɑɑn u luon k suɑ kul n mɔ kuɑŋɑɑn k lebt binbenŋ e. Ŋɑɑn Yonmdɑɑnɔ dɑɑl mɑnŋ bɑɑlu tɑn sii tie nɑn nɑn-yukɔ bɑɑlu nɑ e. L dɑɑl mɑnŋ, k sɑnpɑɑk sɑɑ bot nɑn fujɑɑnn, k muu nbɑ di bonciɑnn tɑn sɑɑ di sɑnpɑɑpo bonsiɑl kul, k tingbounŋ nɑ nɑn bonsiɑl kul nbɑ be lenŋ tɑn sɑɑ di muu e k gbenn. K bont nɑ kul nbɑ tɑn sɑɑ di muu nnɑ nɑ, i dukn suɑ l ŋɑn k yii tie nibuol bee mɑn i? L ŋɑn k yii be binbenŋ nbɑ gbuot Yennu nunm kii biɑ kii tiin’ɔ, kii guu Yennu dɑɑl mɑnŋ, k yɑbl i mɔnŋ pɑɑk k dɑɑl mɑnŋ n bɑɑl yiɑn. L dɑɑl e k sɑnpɑɑpo tɑn sɑɑ kɑb k biil, k muu nɑ tonu tɑn sɑɑ nɑnn sɑnpɑɑpo bonnɑnkɑɑ. Ŋɑɑn t guu yuo nbɑ k sɑnpɑpɑɑnn nɑn tinpɑɑnn tɑn sii be nɑn Yennu nbɑ din senn mɔsonn nbɑ nɑ, k lin nbɑ kul tuun lenŋ sii tie nɑn Yennu nbɑ luon bɑnnu nbɑ nɑ e. N yuɑsnbɑ, yɑɑ guu bonɑ mɑnŋ nɑ pɑɑk, i yɑbl i mɔnŋ pɑɑk kii be binbenŋ nbɑ k Yennu luon, k dɑɑ mɔk biit u buol, k mɑnu i be yinm nɑn ŋuɑ sinsuuk ni. T Yonmdɑɑnɔ nbɑ di suklu nɑ, u tien niib e yɑɑk, ɑ bin lɑ fielu, nɑn t nɑɑ bilonkɑk Pɔul nbɑ mun dɑɑn diɑn kɑdɑsiɑɔk k tul’i k yet’i nɑn Yennu nbɑ tul’ɔ yɑn biɑnŋ nbɑ. U kɑdɑɑt kul ni, u tuu diɑn k piɑk l lɑbɑɑl po e. Lɑbɑsiɑ be u kɑdɑɑt nɑ ni k pɑɑl nɑn nilɔ n bɑnn l pɑɑk, k nisiɑb nbɑ k mɔk yɑn k biɑ k mɔk yɑdɑ nbɑ wɑki nɑ, biɑ be. B jikt’l k kpint’l fɑɑk e, nɑn bɑɑ tuu kpint’l Yennu lolkpel kɑdɑɑɔk mɑnŋ pɑɑk boliɑ ni biɑnŋ nbɑ nɑ. Nnɑ e k b bɑɑt nɑn b tiɑɔnŋ biilu. N yuɑsnbɑ, i ji mi b po. L pɑɑk, i guu i mɔnŋ, k dɑɑ wɑɑ biitdɑnm fɑɑk sɔni mɑnŋ, k yɑbl k dɑɑ bɑɑ. I ŋɑɑn k t Yonmdɑɑnɔ Yiesu Klistu nbɑ tie t Fietuɑ nɑ, ninkpɑbɑɔnŋ ii be i binbenŋ ni kii puki, k yin mun ŋɑɑn k yɑɑ bɑnn’ɔ bɑnnu nbɑ nɑ n pukn. Ŋuɑ e yen dontl mɔtɑɑnɑ nɑn yuo nbɑ kɑɑ gbennu. * Amenn. N dɑ kɑdɑɑɔk nɑ k tien’i, ɑ n wɑnn’i wun nbɑ k b yi’u Yennu mɑɑn nbɑ tien niib mɑnfuol nɑ po e. Mɑɑn mɑnŋ ponŋ din be *dulnyɑ pinpiik ni e wɑɑ. T din gbɑt u mɑɑn, k lɑ’u nɑn t ninbinɑ, k got’ɔ nyik nyik k biɑ sii’u nɑn t nii. Yuo nbɑ k mɑnfuol mɑnŋ din bɑɑl tingbounŋ nɑ ni, t din lɑ’u, k l pɑɑk e te k t muɑntl l *siɑlɑ k tien’i, ɑ mɑnfuol nbɑ kɑɑ gbennu nbɑ din be Bɑɑ buol ni nɑ, u ji fiit’l k wɑnn’t ɑ. Lin nbɑ k t lɑ k biɑ gbɑt nɑ, t mun muɑntl k tien’i, ɑ yin ji fit tɑɑn nɑn’t mɔtɑɑɔk ni. Bɑlmɔni e setk, t mɔtɑɑɔk ni, t tɑɑnt nɑn Bɑɑ Yennu nɑn u Bijɑ Yiesu *Klistu. T dɑ lɑbɑɑl mɑnŋ, ɑ tii mɔk pɑlpienn nbɑ kɑɑ pɑɑk e. Tɔn, mɑɑn nbɑ k t din gbɑt ŋuɑ Yiesu Klistu buol ni k muɑntl k tien’i nɑ, l tie nnɑ e: Yennu tie yentu e, k bunbɔnn kɑɑ u ni. K t i yɑɑ, ɑ tinm nɑn Yennu mɔk mɔtɑɑɔk, ŋɑɑn be bunbɔnn ni, ŋɑnn t fɑ fɑɑk e, t k tuun Yennu lonm. Ŋɑɑn l i tie k t wɑɑ yentu sɔnu yuo kul, nɑn Yennu nbɑ be yentu ni biɑnŋ nbɑ nɑ, ŋɑnn t mɔk mɔtɑɑɔk nɑn t lieb, k u Bijɑ Yiesu sɔn e wu t pɑlɑ ni k t ji k mɔk biit. Tɔn, t i yɑɑ ɑ t k mɔk biit i e, ŋɑnn t kpɑnn t mɔnŋ e, k bɑlmɔni kɑɑ t ni. Ŋɑɑn t i fiit t biit k tul Yennu, t sɑɑ fit bɑnn nɑn u tie bɑlmɔni dɑɑnɔ k tuun lin nbɑ ŋɑn k sɑɑ nyik t biit k cɑb’t k biɑ sɑɑ nyinn biit buolu kul t ni. T i yɑɑ ɑ t k tuun biit i e, ŋɑnn nnɑ t tien’ɔ fɑɑk dɑɑnɔ e nɑ, k u mɑɑn mɑnŋ kɑɑ t ni. N wɑɑs, n k luon k yii tuun biit. L pɑɑk e te k n dɑ k tien’i nɑ, ŋɑɑn l i tie k suɑ tun biit, t mɔk sindɑntinnɔ Bɑɑ Yennu buol ni, k ŋuɑ e tie Yiesu *Klistu, wun nbɑ tie niŋɑnɔ nɑ. Ŋuɑ e ji din tien *mɑlunŋ Yennu buol ni, ɑ Yennu n nyikcɑb t biit. L pɑɑk, Yennu k nyiktcɑbt t biit kuukuɑ kɑɑ, ŋɑɑn u nyiktcɑbt *dulnyɑ munn biit e. T i diɑ Yennu *senni, ŋɑnn e wɑnn nɑn t set mi’u. L i tie k suɑ yet ɑ: «N mi’u,» ŋɑɑn biɑ k diɑ u senni, l dɑɑnɔ tie fɑɑk dɑɑnɔ e, k bɑlmɔni kɑɑ u ni. K biɑ jen ɑ, wun nbɑ cɔln u mɑɑn, ŋuɑ e set luon Yennu nɑn u yɑn kul. K biɑ jen ɑ, dɑɑnɔ nbɑ yɑɑ ɑ u gɑɑ u pɑɑk, sie k u binbenŋ i tie nɑn Yiesu binbenŋ nbɑ din tie biɑnŋ nbɑ nɑ. Ŋɑnn e k u sɑɑ bɑnn nɑn u gɑɑ Yennu pɑɑk. N nɑɑ wɑɑlonkɑi, n k dɑ senpɑɑnu kɑɑ k tien’i ni, ŋɑɑn l tie senkpel nbɑ k i din mɔk’l sinsinn nɑ e. Senkpel mɑnŋ tie mɑɑn nbɑ k i ponŋ mi k gbɑt nɑ e. Ŋɑɑn n set dɑ sennpɑɑnu e k tien’i, l set sennpɑɑnu Klistu ni, k biɑ sii tie sennpɑɑnu i ni. L pɑɑk nyiɑɔk gɑɑl e, k bɑlmɔni yentu ji be. Wun nbɑ yet, ɑ u be yentu ni, ŋɑɑn mɔk nɑnŋ nɑn u nɑɑ bik nɑ, l dɑɑnɔ set be bunbɔnn ni e. Dɑɑnɔ nbɑ luon u nɑɑ bik nɑ be yentu ni, k siɑl kɑɑ u ni k sɑɑ te k nilɔ n bɑɑ biit ni. Ŋɑɑn wun nbɑ nɑn u nɑɑ bik nɑ be bunbɔnn ni e, k u biɑ sonm lintl bunbɔnn ni e k k mi wɑɑ sɑɑ siɑn nbɑ k mɑɑn bunbɔnn nɑ e te k u juɑn. N wɑɑs, n dɑ tien’i k mɑɑn Yennu nyik cɑb i biit Yiesu sɑnn pɑɑk ɑ. N dɑ k tien yinm nbɑ tie wɑdɑnm k mɑɑn i mi wun nbɑ ponŋ din be pinpiik ni wɑɑ. Nipɑɑɔnŋ, n dɑ k tien’i k mɑɑn i nyɑnn Klistu dɑtɑɑk nɑ wɑɑ. Wɑɑs, n dɑ k tien’i k mɑɑn i mi Bɑɑ. Yinm nbɑ tie wɑdɑnm, n dɑ k tien’i k mɑɑn i mi wun nbɑ ponŋ din be pinpiik ni wɑɑ. Nɑɑsinm, n dɑ k tien’i k mɑɑn i mɔk pɑnŋ k Yennu mɑɑn be i ni, k i nyɑnn Klistu dɑtɑɑk nɑ wɑɑ. I dɑɑ luon tingbounŋ nɑ ŋɑɑtieb sɔnu ɑmi lin nbɑ be tingbounŋ nɑ ni. L i tie k nilɔ luon tingbounŋ nɑ ŋɑɑtieb sɔni i e, u k luon Bɑɑ Yennu. Lin nbɑ k b lɑɑt tingbounŋ nɑ ni e nɑ: lonbiiuk nbɑ be suɑ kul ni, nɑn niɑn nbɑ k niib mɔk bonɑ nbɑ k b lɑɑt nɑ pɑɑk, nɑn wɑnt-n-mɔnŋ nbɑ nyi mɔktuk ni. Lin nbɑ nɑ kul k nyii Bɑɑ buol ni kɑɑ, ŋɑɑn l tie tingbounŋ yɑl e. Tingbounŋ nɑ nɑn l lonbiit gbent e, ŋɑɑn wun nbɑ tuun lin nbɑ k Yennu luon nɑ sii tun fo e. N wɑɑs, dulnyɑ gbennu pel nɑ. I ponŋ mi gbɑt ɑ Klistu Dɑtɑɑk bɑɑt, k mɔtɑɑnɑ, u dɑtɑi bonciɑnn ponŋ bɑɑl nɑ. Ŋɑnn e te k t set mi nɑn dulnyɑ gbennu pel nɑ. Klistu dɑtɑi mɑnŋ e nyii t ni, ŋɑɑn b k tie t yɑb. B i bo i tie t yɑb i e, tinm nɑn ŋɑnm bo sii lɑkn be, ŋɑɑn b nyik’t ɑ, k l wɑnt nɑn b din k tie t yɑb. Ŋɑɑn yinm ŋɑnin, i mɔk Foŋɑnm nbɑ k Yiesu Klistu din muɑn i pɑɑk nɑ, k ŋɑnn e te k i kul ɑ mi bɑlmɔni. Tɔn, l k tie ɑ i k mi bɑlmɔni kɑɑ te k n dɑ k tien’i nɑ, ŋɑɑn l tie yɑɑ ponŋ mi bɑlmɔni mɑnŋ nɑ pɑɑk, k i mi nɑn fɑɑk k nyi l ni. K ŋmee tie fɑɑk dɑɑnɔ? L tie wun nbɑ yɑɑ, ɑ Yiesu k tie Klistu e. Ŋuɑ e tie Klistu dɑtɑɑk mɑnŋ, k yien Bɑɑ Yennu nɑn u Bijɑ. Dɑɑnɔ nbɑ yet Bijɑ mɑnŋ, biɑ yet Bɑɑ Yennu e nɑ, ŋɑɑn wun nbɑ piɑk k yien, ɑ u tien Bijɑ mɑnŋ yɑdɑ wɑɑ, Bɑɑ mun be nɑn’ɔ. Yɑɑ din sint gbɑt mɑɑn nbɑ pinpiik ni nɑ, ii diɑ nnɑ mɑn fɑnu. L i tie k i diɑ’l, i sii be Bijɑ mɑnŋ ni nɑn Bɑɑ ni. k mɔsonn nbɑ k u senn k tul’t nɑ tie ɑ, t sii be nɑn Yennu e yuo kul. N dɑ lin nbɑ nɑ k tien’i k ceknt’i k jikt sɑɑ niib nbɑ yɑɑ bin kpɑnn’i nɑ po e. Ŋɑɑn yinm ŋɑnin, Yiesu sikn Foŋɑnm mɑnŋ i pɑɑk ɑ. Foŋɑnm mɑnŋ nbɑ biɑl be i ni nɑ, i ji kii luon k suɑ n wɑnn’i. K mɑɑn Foŋɑnm mɑnŋ mɔnŋ e wɑnt’i bont kul ɑ, k u wɑnnu mɑnŋ e tie bɑlmɔni wɑnnu, k fɑɑk kɑɑ lenŋ. L pɑɑk, ii sɑɑk Foŋɑnm wɑnnu nɑ kii be Klistu ni. Tɔn, n wɑɑs, ii biɑl Klistu ni mɑn k tii mɔk pɑlcienn yuo nbɑ k u sɑɑ dɔkt t pɑɑk, k t dɑɑ di fei u buol yuo nbɑ k u tɑn sɑɑ jen nɑ. I mi nɑn Klistu tuun lin nbɑ ŋɑn, ŋɑɑn l mun biɑ ŋɑn k i bɑnn nɑn dɑɑnsuɑ nbɑ tuun lin nbɑ ŋɑn nɑ tie Yennu bik e. Lek gotl mɑn lonbuolu nbɑ k Bɑɑ Yennu mɑntk luon’t nɑ. U lonm mɑnŋ mɑntk ji sɑɑ yɑbt e, k u yi’t u wɑɑs, k t set tie u wɑɑs e. Tingbounŋ nɑ ŋɑɑtieb k mi’t, k mɑɑn b k mi ŋuɑ Yennu. N yuɑsnbɑ, mɔtɑɑnɑ t tie Yennu wɑɑs e, ŋɑɑn tɑɑ tɑn sii tie biɑnŋ nbɑ dɑɑ bɔl e. Ŋɑɑn tɑɑ mi lin nbɑ e nɑ: *Klistu i tɑnŋ i dɔkt, t tɑn sii tie nɑn ŋuɑ nɑ e, k mɑɑn t sɑɑ lɑ wɑɑ set tie biɑnŋ nbɑ. Nilɔ kul nbɑ mɔk dindɑnn nɑn u jenu nɑ, k mɔk biit nɑn Yiesu nbɑ k mɔk biit biɑnŋ nbɑ nɑ. Dɑɑnsuɑ kul nbɑ tuun biit biil Yennu *senni e. Setk nɑn mɔni, biit tie Yennu senni biilu e. I mi nɑn Yiesu Klistu din bɑɑl tingbounŋ nɑ ni, ɑ wun nyinn t biit e, k biit kɑɑ u ni. Wun nbɑ be u ni nɑ k tuun biit. Wun nbɑ tuun biit, k mi lɑ Yiesu k biɑ k mi’u. N wɑɑs, i dɑɑ sɑɑk k suɑ n kpɑnn’i ni. Dɑɑnɔ nbɑ tuun lin nbɑ ŋɑn Yennu buol ni nɑ, mun tie niŋɑnɔ Yennu buol e nɑn Yiesu nbɑ tie Ŋɑnɔ u buol nɑ. Wun nbɑ tuun biit, ŋuɑ e tie *Sɑɑtɑn yuɑ k mɑɑn Sɑɑtɑn din piin k tuun biit tingbounŋ pinpiik ninŋ e. Yennu Bijɑ Yiesu set din bɑɑl ɑ wun biil Sɑɑtɑn tuonɑ e. Wun nbɑ tie Yennu bik, u ji k tuun biit, k mɑɑn yiikuo nbɑ nyii Yennu buol nɑ be u ni, k mɑɑn Yennu tie u Bɑɑ. L pɑɑk k u ji kɑn fit kii tuun biit. Dɑɑnsuɑ nbɑ k tuun lin nbɑ ŋɑn k tie Yennu bik, k dɑɑnɔ nbɑ k luon u nɑɑ bik biɑ k tie Yennu bik kɑɑ. Nnɑ e k t mi bin nbɑ tie Yennu wɑɑs nɑn bin nbɑ tie Sɑɑtɑn wɑɑs. L ŋɑn k tii mɔk lonm nɑn t lieb. Ŋɑnn e tie mɑɑn nbɑ k i din gbɑt pinpiik ni nɑ. L k ŋɑn k tii tuun nɑn Kɑɑen nbɑ din tuun biɑnŋ nbɑ nɑ. Ŋuɑ din tie pol yuɑ e, k din kpii u wɑɑlɔ. Biɑ pɑɑk e te k u din kpii’u? U tiɑɔnŋ tuonɑ din bi ŋɑɑn k u wɑɑlɔ yɑl ŋɑn. Tɔn, n nɑɑ wɑɑs, l i tie k tingbounŋ nɑ ŋɑɑtieb nɑn’i, i dɑɑ te k l tie’i bɑktnɔunŋ. T mi nɑn t nyii kuun ni ŋɑɑn kuɑ mɑnfuol ni e, k mɑɑn t luon t nɑɑ wɑɑs. Wun nbɑ k mɔk lonm u pɑl ni nɑ be kuun ni e. Wun nbɑ mun nɑn u nɑɑ bik nɑ, tie nikpiiluk o, k i mi nɑn mɑnfuol nbɑ kɑɑ gbennu kɑɑ u ni. Gotl mɑn, Yiesu nbɑ din gɑɑl t pɑɑk k kpo nɑ e wɑnt’t lonm nbɑ tie lin nbɑ, k l kpɑɑ tɑlɑs k tii gɑɑn t nɑɑ wɑɑs pɑɑk kii kpenn. Dɑɑnɔ nbɑ mɔk, ŋɑɑn lɑ u nɑɑ bik k u k mɔk siɑl, k u bɑkɑ kɑɑ u ni, nlee k u sɑɑ yet ɑ, Yennu lonm be u ni? N wɑɑs, l k ŋɑn k t lonm i be t mɔi ni nɑn t mɔbonɑ ni kuukuɑ kɑɑ, ŋɑɑn k lii tie bɑlmɔni lonm nbɑ k nilɔ sɑɑ fit lɑ t tuonɑ ni. Gotl bɑnnu nbɑ k t sɑɑ bɑnn nɑn t wɑɑ bɑlmɔni, nɑn bɑnnu nbɑ k t mɔk pɑlmɑnn Yennu buol. L i tie k t dudukt tɑl’t, t mi nɑn Yennu cie t dudukt k biɑ mi bonsiɑl kul. Tɔn, n yuɑsnbɑ, t dudukt i kii wɑnn’t nɑn t mɔk biit, t mɔk pɑlmɑnn Yennu buol, k t lɑɑt lin nbɑ kul k t mei’ɔ l po k mɑɑn t sɑɑk u senni k tuun lin nbɑ pent u pɑl. Yennu nbɑ senn lin nbɑ e nɑ: ɑ t tien u Bijɑ Yiesu Klistu yɑdɑ kii luon t lieb nɑn wɑɑ din senn’t senni biɑnŋ nbɑ nɑ. Wun nbɑ sɑɑk Yennu senni nɑ be u ni k Yennu mun biɑ be u ni. Wɑɑ din tul’t Foŋɑnm nɑ pɑɑk k t mi nɑn u be t ni. N yuɑsnbɑ, i dɑɑ tie nisiɑb kul nbɑ yɑɑ ɑ b mɔk Foŋɑnm nɑ mɑɑn yɑdɑ, ŋɑɑn biknt’b mɑn, k got lɑɑn sei mɑnŋ nyii Yennu buol ni ɑmi siɑl buol e? K mɑɑn fɑɑk sɔkniinbɑ yɑt gbie tingbounŋ nɑ wɑɑ. Gotl mɑn bɑnnu nbɑ k i sɑɑ fit bɑnn nɑn nilɔ mɔk Foŋɑnm. Wun nbɑ kul yet, ɑ Yiesu Klistu din kpɑnt nisɑɑlk e, ŋuɑ e mɔk Siek nbɑ nyii Yennu penŋ. Ŋɑɑn wun nbɑ kul yet ɑ lin nbɑ nɑ k tie mɔni k jiin Yiesu po nɑ, k mɔk Siek nbɑ nyii Yennu penŋ. L dɑɑnɔ siek tie *Klistu Dɑtɑɑk yɑl e. I ponŋ din gbɑt nɑn Klistu Dɑtɑɑk bɑɑt, k mɔtɑɑnɑ u ponŋ set be tingbounŋ nɑ ni. N wɑɑs, yinm tie Yennu yɑb e. I kɔn k nyɑnn fɑɑk sɔkniinbɑ wɑɑ. K mɑɑn siek nbɑ be i ni nɑ mɔk pɑnŋ k gɑl siek nbɑ be niib nbɑ tie *dulnyɑ nɑ yɑb ni nɑ. Fɑɑk sɔkniinbɑ nɑ e tie tingbounŋ nɑ yɑb. L pɑɑk e te k b piɑk tingbounŋ nnɑ mɑɑn, k tingbounŋ nɑ yɑb fiin b po. Ŋɑɑn tinm ŋɑnin tie Yennu yɑb e, k bin nbɑ mi Yennu, ŋɑnm e fiin t mɑɑn po. Ŋɑɑn bin nbɑ k tie Yennu yɑb, b k fiin t mɑɑn po. Ŋɑnn e te k t bɑnt bɑlmɔni Siek nɑn fɑɑk Siek. N yuɑsnbɑ, tii luon t lieb mɑn, k mɑɑn lonm nyii Yennu penŋ e, k wun nbɑ mɔk lonm nɑ, tie Yennu bik e k biɑ mi’u. Wun nbɑ k mɔk lonm u k mi Yennu, k mɑɑn Yennu tie lonm e. Gotl bɑnnu nbɑ k Yennu wɑnn’t u lonm. U din tun u Bijɑyenml tingbounŋ nɑ ni, ɑ tin lɑ mɑnfuol u pɑɑk. Lonm nbɑ tie lonm nɑn bɑlmɔni tie nnɑ e: l k tie ɑ tinm kɑɑ din luon Yennu, ŋɑɑn ŋuɑ e din luon tinm, k tun u Bijɑ, ɑ u *mɑlunŋ pɑɑk tin lɑ t biit nyikcɑbu. N yuɑsnbɑ, Yennu nbɑ luon’t biɑnŋ nbɑ nɑ, l kpɑɑ tɑlɑs k tii mun ii luon t lieb nnɑ. Suɑ k mi lɑ Yennu, ŋɑɑn t i luon lieb i e, Yennu be t ni, k u lonm tuun t ni nɑn bɑlmɔni. Gotl bɑnnu nbɑ k t mi nɑn t be Yennu ni k u biɑ be t ni. U din tul’t Foŋɑnm e. K t din lɑ k biɑ muɑntl, ɑ Bɑɑ din tun u Bijɑ, ɑ Bijɑ mɑnŋ ii tie tingbounŋ nɑ ŋɑɑtieb Fietuɑ. L i tie k suɑ yet, ɑ Yiesu tie Yennu Bijɑ, Yennu be u ni, k u mun biɑ be Yennu ni. K t mɔnŋ mɔnŋ mun bɑnn Yennu nbɑ luon’t biɑnŋ nbɑ, k biɑ tien yɑdɑ nɑn u set luon’t. Yennu tie lonm e, k dɑɑnɔ nbɑ be lonm nɑ ni, ŋuɑ e be Yennu ni, k Yennu mun biɑ be u ni. L i tie k lonm be t ni nɑn bɑlmɔni, t sii mɔk pɑlcienn buut dɑɑl, k mɑɑn t binbenŋ dulnyɑ ni tie nɑn Yiesu yɑl nɑ e. T i mɔk lonm, jijiet sii kɑɑ. L i tie k lonm mɑntk be nɑn mɔni mɔni, jijiet kɑn lɑ yɑɑk kii be t ni. L i tie k nilɔ mɔk jijiet, u k mɔk lonm nɑn bɑlmɔni, k mɑɑn tubdɑtu pɑɑk e k t tuu jie. Ŋɑɑn tinm ŋɑnin, t mɔk lonm k mɑɑn Yennu e din sint mɔk lonm nɑn tinm. Dɑɑnɔ nbɑ yɑɑ ɑ u luon Yennu, ŋɑɑn biɑ nɑn u nɑɑ bik, u tie fɑɑk dɑɑnɔ e. L i tie k u k luon u nɑɑ bik nbɑ k u lɑɑt’ɔ nɑ, nlee k u sii luon Yennu nbɑ k u k lɑɑt’ɔ nɑ? Sennu nbɑ k Klistu senn e nɑ: wun nbɑ luon Yennu, sie k u luon u nɑɑ bik. Wun nbɑ kul tien yɑdɑ nɑn Yiesu tie *Klistu nɑ, l dɑɑnɔ tie Yennu bik e. K dɑɑnɔ nbɑ luon nisuɑ, u biɑ sii luon nilɔ mɑnŋ wɑɑs e. L i tie k t luon Yennu k tuun u *senni nbɑ wɑnt bɑnnu nbɑ, ŋɑnn e wɑnt nɑn t luon u wɑɑs, k l ii biɑ kii tie k t diɑ u senni, ŋɑnn e wɑnt nɑn t luon’ɔ, k u senni mɑnŋ k pɑɑl, k mɑɑn Yennu wɑɑs kul sɑɑ fit nyɑnn *dulnyɑ wɑɑ. Tɑɑ tien yɑdɑ nɑ pɑɑk e, k t nyɑnn dulnyɑ. K ŋmee sɑɑ fit nyɑnn dulnyɑ? Wun nbɑ tien yɑdɑ nɑn Yiesu tie Yennu Bijɑ kuukuɑ. Ŋuɑ Yiesu Klistu e tie wun nbɑ din bɑɑl nɑn nyun nɑn sɔn. U din k bɑɑl nɑn nyun kuukuɑ kɑɑ, ŋɑɑn u din bɑɑl nɑn sɔn mun biɑk. K Foŋɑnm tie siɑlɑɑdɑɑnɔ, k mɑɑn Foŋɑnm tie bɑlmɔni e. Tɔn, bonɑ ŋɑntɑ e be k tie *siɑlɑ, Foŋɑnm nɑn nyun nɑn sɔn, k l bonɑ ŋɑntɑ mɑnŋ kul tɑɑn tie *siɑlɑ mɑnŋ. T gɑɑn niib *siɑlɑ, ŋɑɑn Yennu siɑlɑ e ŋɑn k cie niib yɑl k mɑɑn l tie siɑlɑ nbɑ k Yennu tien k jiin u Bijɑ mɑnŋ po. Wun nbɑ tien Yennu Bijɑ mɑnŋ yɑdɑ, ŋuɑ e mɔk Yennu siɑlɑ mɑnŋ u pɑl ni, k wun nbɑ k tien u siɑlɑ mɑnŋ yɑdɑ, u tien’ɔ fɑɑk dɑɑnɔ e nɑ, k mɑɑn u k tien yɑdɑ nɑn siɑlɑ nbɑ k Yennu tien u Bijɑ po nɑ tie mɔni. Yennu siɑlɑ mɑnŋ tie nnɑ e, u tul’t mɑnfuol nbɑ kɑɑ gbennu, k mɑnfuol mɑnŋ nyi u Bijɑ Yiesu ni e. Wun nbɑ mɔk Yennu Bijɑ nɑ, ŋuɑ e mun mɔk mɑnfuol mɑnŋ, ŋɑɑn wun nbɑ k mɔk Yennu Bijɑ mɑnŋ, u k mɔk l mɑnfuol. N dɑ kɑdɑɑɔk nɑ k tien yinm nbɑ tien Yennu Bijɑ sɑnn yɑdɑ, k mɑɑn n luon k i bɑnn nɑn i mɔk mɑnfuol nbɑ kɑɑ gbennu. Gotl lin nbɑ te k t mɔk pɑlcienn Yennu tuɑnn. T mi nɑn t i miɑl’ɔ lin nbɑ tɑɑ nɑn wɑɑ luon lin nbɑ nɑ po, u gɑɑn t miɑlu. K t i mi nɑn u gɑɑn t miɑlu, tɑɑ miɑl’ɔ lin nbɑ kul po nɑ, t mi nɑn t ponŋ gɑɑl lin nbɑ k t mei’ɔ l po nɑ wɑɑ. Suɑ i lɑɑt u nɑɑ bik k u tuun biit nbɑ kɑn bɑɑl nɑn kuun, l dɑɑnɔ ii mei Yennu u pɑɑk, k Yennu sɑɑ tul biitdɑɑnɔ mɑnŋ mɑnfuol. Nɑ tie mɔni k tul bin nbɑ yɑɑ biit k bɑɑt nɑn kuun. Ŋɑɑn bisiɑt be, k bɑɑt nɑn kuun, k n k yɑɑ yii mei Yennu kii tien bin nbɑ tuun l biit buolu kɑɑ. Tuonɑ kul nbɑ k ŋɑn lek tie biit e, ŋɑɑn bisiɑt be k kɑn bɑɑl nɑn kuun. T mi nɑn bin nbɑ tie Yennu wɑɑs ji k tuun biit, k mɑɑn Yennu Bijɑ Yiesu guu’b, k Klistu dɑtɑɑk kɑn tien’m siɑl. K t mi nɑn tinm tie Yennu yɑb e, k tingbounŋ nɑ ŋɑɑtieb kul nɑ be Klistu dɑtɑɑk yiikuo ni. T mi nɑn Yennu Bijɑ din bɑɑl tingbounŋ nɑ ni, k tɑn tul’t yɑn, ɑ tii bɑnt bɑlmɔni Yennu. T be u ni u Bijɑ Yiesu Klistu nɑ pɑɑk e, k ŋuɑ e tie bɑlmɔni Yennu k biɑ tie mɑnfuol nbɑ kɑɑ gbennu. N wɑɑs, I dɑɑ mɑnn pɑtɑ. Min nbɑ tie jɑɑnti sɑɑkuɑ nɑ e, dɑ kɑdɑɑɔk nɑ k tien puo nbɑ k Yennu lukt’ɔ nɑ, nɑn u wɑɑs. N luon’i nɑn bɑlmɔni, k l k tie min kuukuɑ kɑɑ luon’i ni, ŋɑɑn bin nbɑ kul nbɑ mi bɑlmɔni nɑ, b mun biɑ luon’i, k mɑɑn bɑlmɔni be t ni k biɑ sii tun be nɑn yuo nbɑ kɑɑ gbennu. Bɑɑ Yennu nɑn u Bijɑ Yiesu *Klistu ii mɔk ninkpɑbɑɔnŋ nɑn nyikcɑbu nɑn’t, k biɑ tul’t mɑnu, ɑ tii mɔk lin nbɑ nɑ kul, bɑlmɔni nɑn lonm sɔnu ni. N dɑɑn mɔk pɑlpienn bonciɑnn nɑn mɑɑ dɑɑn lɑ ɑ wɑsiɑt nbɑ k b wɑɑ bɑlmɔni nbɑ k Bɑɑ Yennu senn’t nɑ. Cɑnnɑɑ, n mei’ɑ, ŋɑɑnt k t kul i luon t lieb. Lin nbɑ nɑ k tie sennpɑɑnu kɑɑ k n diɑn’ɑ ni, ŋɑɑn l tie sennu nbɑ k t din dɔnŋ gbiɑ l po pinpiik ni. Lonm tie tii sɑɑk Yennu *senni e, k sennu nbɑ k i din dɔnŋ gbiɑ l po pinpiik ni nɑ wɑɑ, tie k i wɑɑ lonm sɔnu. Kpinkpɑnni dɑnm bonciɑnn ponŋ bɑɑl k yɑt sɑɑn siɑl po kul tingbounŋ nɑ ni wɑɑ, bin nbɑ yɑɑ, ɑ ŋɑnm k tien yɑdɑ, ɑ b mɑl Yiesu nisɑɑlk e. Wun nbɑ tuun l buolu tie kpinkpɑnni dɑɑnɔ, k biɑ tie Yiesu dɑtɑɑk. L pɑɑk, ii cek mɑn, k tɑn dɑɑ kɔnŋt t tuonn nyuɑt, ŋɑɑn tɑn lɑ nyuɑt nbɑ yɑb. Dɑɑnsuɑ nbɑ k gɑɑn Yiesu Klistu wɑnnu bonŋɑnn ŋɑɑn puki u mɔnŋ yɑl, u k gɑɑl Yennu, ŋɑɑn wun nbɑ sɑɑk wɑnnu mɑnŋ k k nyikt, Bɑɑ nɑn Bijɑ kul be u ni. L i tie k dɑɑnsuɑ nbɑ bɑɑl i buol ni, k k wɑnt wɑnnu mɑnŋ, i dɑɑ gɑɑn’ɔ i ŋei ni, k biɑ tɑɑn dɑɑ yien’ɔ, ɑ u nyinu po k mɑɑn wun nbɑ fuont’ɔ, u mɔnŋ tɑɑnt dɑɑnɔ mɑnŋ biit po e nɑ. N mɔk mɔbonɑ bonciɑnn k luon k n diɑn k tul’i, ŋɑɑn n k luon k n diɑn kɑdɑɑɔk ni kɑɑ k tul’i ni, ŋɑɑn n mɔk dindɑnn nɑn n sɑɑ bɑɑl k gɔn’i, k tin pɑk nɑn lieb mɔi ni, k tii mɔk pɑlpienn nɑn mɔni. A niipuo wun nbɑ k Yennu gɑnn’ɔ nɑ, u wɑɑs fuont’ɑ. Min nbɑ tie jɑɑnti sɑɑkuɑ nɑ e, dɑ kɑdɑɑɔk nɑ k tien n yuɑk Gɑius nbɑ k n luon’ɔ bonciɑnn nɑ. N yɔmɔnŋ, n bo luon nɑn fii be lɑɑfiɑ ni, k ɑ bonɑ kul i ŋɑn nɑn lɑɑ ŋɑn bɑnnu nbɑ fin nɑn Yennu sinsuuk ni nɑ. N dɑɑn lɑ pɑlpienn bonciɑnn nɑn t nɑɑ wɑsiɑt nbɑ dɑɑn bɑɑl nnɑ, k tɑn yet’n fɑɑ wɑɑ bɑlmɔni fɑnu biɑnŋ nbɑ nɑ, nɑn fɑɑ tuu wɑɑ’l fɑnu nɑ. Siɑl k penn n pɑl ni k mɑntk bɑɑl mɑɑ gbɑt ɑ n wɑɑs wɑɑ bɑlmɔni nɑ. N yuɑk, fɑɑ sonmt t nɑɑ wɑɑs nbɑ tie sɑɑnm biɑnŋ nbɑ nɑ, ɑ tuun lin nbɑ k bɑlmɔni sɔnu wɑnt’ɑ. B dɑɑn pɑk ɑ bulcint mɑnŋ po *Klistu mɔtɑɑɔk niib sinsuuk ni. N bɑln’mɑ e, fii sonmt’b kii ŋɑnmt b sɔnu bɑnnu nbɑ sɑɑ penn Yennu pɑl. Setk nɑn mɔni, b dɑɑn sɑɑn sɔnu Yonmdɑɑnɔ sɑnn pɑɑk k k gɑɑl sonmsiɑl bin nbɑ k tie Klistuweilɑ nɑ buol ni. L pɑɑk, l kpɑɑ tɑlɑs e k tinm Klistuweilɑ ii gɑɑn l nibuolu sɑɑɔnŋ. Nnɑ e k t nuu sii be tuonn nbɑ k b tuun k tien bɑlmɔni muɑntu nɑ ni. N ponŋ mi diɑn bɑlsɑi nnɑ k tul Klistu mɔtɑɑɔk niib nbɑ be ɑ buol ni nɑ, ŋɑɑn k Diotlef nbɑ luon wun pul u mɔnŋ nijɑɑnn nɑ yien n mɔb. L pɑɑk, mi i tɑnŋ i bɑɑl, n sɑɑ fiit lin nbɑ kul k u tun, nɑn bonbisiɑl nɑn fɑɑk nbɑ k u pɑk k jiin t po nɑ. Ŋɑɑn biit mɑnŋ nbɑ k u tun nɑ, l lek k jɑnŋ’ɔ. U biɑ tuu yet wun gɑɑl t nɑɑ wɑɑs nbɑ tuu tɑn bɑɑl u buol ni, k biɑ k luon k u lieb ii gɑɑn’m, k tuu bel nyinn bin nbɑ gɑɑl sɑɑnm mɑnŋ sɑɑɔnŋ nɑ Klistu mɔtɑɑɔk niib sinsuuk ni. N yuɑk, dɑɑ toki suɑ biit, ŋɑɑn kii tuun lin nbɑ ŋɑn. Wun nbɑ tuun bonŋɑnn, u tie Yennu yuɑ e, ŋɑɑn wun nbɑ tuun biit, u k mi Yennu. Suɑ kul piɑk Demetlius, k u benu nɑ e biɑ wɑnt nɑn u wɑɑ bɑlmɔni, k t mɔnŋ mun piɑk’ɔ, k ɑ mun mi nɑn t set tie bɑlmɔni dɑnm e. N biɑ mɔk mɑɑn bonciɑnn k luon k n pɑk k tul’ɑ, ŋɑɑn n k luon k n diɑn kɑdɑɑɔk ni kɑɑ k tul’ɑ ni. Ŋɑɑn n mɔk dindɑnn nɑn l kɑn wei k n tɑn sɑɑ bɑɑl k lɑ’ɑ, k tin tɑn pɑk nɑn lieb mɔi ni. Mɑnu ii be ɑ pɑɑk. T yuɑsnbɑ fuont’ɑ. T yuɑsnbɑ nbɑ mun biɑ be ɑ buol ni nɑ, ɑ fuont b suɑ kul. Min Suud wun nbɑ tie Yiesu *Klistu tuontunnɔ, k biɑ tie Sɑɑk ninjɑ nɑ e dɑ kɑdɑɑɔk nɑ k tien niib nbɑ k Bɑɑ Yennu yiin’m k luon’m, k Yiesu Klistu guu’b nɑ. Yennu n tin’i ninbɑɑɔk k tul’i mɑnu nɑn lonm bonciɑnn. N yuɑsnbɑ, n ninbinn dɑɑn mɔn nɑn k n diɑn kɑdɑɑɔk k tul’i k sɑɑn gɑɑn fielu nbɑ tie t kul yɑl nɑ po. Ŋɑɑn mɔtɑɑnɑ l ji kpɑɑ tɑlɑs k n diɑn k cie i pɑlɑ. I yɑbl i mɔnŋ kii diɑ yɑdɑ nbɑ k Yennu din tul u niib kul tɑɑl yonm kuɑ nɑ. K mɑɑn nibiit din kuɑ i sinsuuk ni wuol ni e, k lebtl Yennu ninkpɑbɑɔnŋ lɑbɑɑl, ɑ bin bɔl b gbɑnɑnt lonbiiuk tuonɑ nɑ. B yet bin wei Yiesu Klistu, wun nbɑ kuukuɑ tie t yudɑɑnɔ nɑn Yonmdɑɑnɔ nɑ. L wei wɑɑ, k b tubdɑtu ponŋ diɑn Yennu lolkpel kɑdɑɑɔk ni. Mɑɑ yɑɑ n yet’i lin nbɑ nɑ, i ponŋ gbɑt l kul ɑ, k mi’l fɑnu, ŋɑɑn n luon k n tiɑl’i l po e. Yonmdɑɑnɔ din fɑt u niib k nyinn’b dɑɑbs ni Ejipt tinŋ ni, ŋɑɑn l puolpo u din kpii bin nbɑ din k tien’ɔ yɑdɑ nɑ wɑɑ. Ii tiɑn mɑlɑkɑɑnbɑ nbɑ din k diɑ yiikuo nbɑ k Yennu din tul’b nɑn l sɔnu, k biɑ din yɑɑt k nyik b binbebuol nɑ po. Yennu bɑɑn’m bɑnt nbɑ sii be nɑn yuo nbɑ kɑɑ gbennu nɑ k lu’b sɑlk buotsunsunŋ nbɑ bɔn ni, k guu dɑgbenŋl nbɑ k u sɑɑ bu b buut nɑ. Ii biɑk kii tiɑn doi nbɑ k b yi Suodonm nɑn Guomuɔl nɑ nɑn digbɑnɑ nbɑ kpiɑ l doi nɑ po mɑn. L doi niib din tuun tuonbiit nnɑ e. B din be yɑnɑ yɑnɑ nnɑ e, k duɑ nɑn lin nbɑ kuɑ. B tubdɑtu tie muu nbɑ di yuo nbɑ kɑɑ gbennu e mɔtɑɑnɑ, ŋɑnm e tie nyinn k tul’i. L nibuolu mun biɑ be i sinsuuk ni k tuun nɑn l doi ni niib nɑ. B duki fɑɑk bont po e, k wɑɑ b gbɑnɑnt niɑnbiit. B k cɔln Yomdɑɑnɔ yiikuo, k biɑ suki yɑbnt mɑlɑkɑɑnbɑ. Miisiɑl nbɑ din tie mɑlɑkɑɑnbɑ sɑɑkuɑ nɑ, din k tun nnɑ. Ŋɑɑn u din kɔn nɑn *Sɑɑtɑn e Muois gbɑnɑnt pɑɑk. Ŋɑɑn kɔnn mɑnŋ ni, u din k sukl’ɔ k pɑk k biil’ɔ, ŋɑɑn u din yet ɑ: «Yonmdɑɑnɔ n ŋmɑnn ɑ tubl.» Ŋɑɑn l nibiit ŋɑnin suki lin nbɑ k b k bɑn e. Bɑɑ mi lin nbɑ, nɑn muuk ni bonkobt nbɑ k mɔk dudukt nɑ, sɑɑ nɑn’m biilu e. Pɑlbiil be b pɑɑk. K mɑɑn b wei Kɑɑen sɔnu nɑ wɑɑ. Likli pɑɑk e k b k tɔkn sɔnu nbɑ tuok nɑ nɑn Bɑɑlɑɑnm nbɑ din tun biɑnŋ nbɑ nɑ. B biɑ yet Yennu mɔb nɑn Kole nbɑ din tun biɑnŋ nbɑ nɑ e k l biil’b. Ŋɑnm e jɑkn jiet nbɑ k yinm Klistuweilɑ di nɑ. B bɑkɑ be b ni kuukuɑ e, k b k tiin fei. B tie nɑn sɑnpɑgbɑnt nbɑ k wounŋ gɑɑn’n k l k bɑɑt nɑn sɑɑk nɑ e. B tie nɑn tiini nbɑ k luon luɑnɑ l lonm yuo nɑ e, b kpo e k sɑɑ tɔl, k mɑɑn b jiinɑ kul fikt, k b kuol ɑ. B tie nɑn mɔkgbenŋl nyunpɑnɑ nbɑ fi k pukl nɑn jɑknt nɑ e. B biɑ tie nɑn ŋmɑɑbilɑ nbɑ tuu ŋɑbl k lin nɑ e, k bunbɔnciɑɔnŋ nbɑ kɑɑ gbennu be k guu’b. Enɔk, wun nbɑ wɑɑ Adɑn yɑɑbuonɑ bɑnlole ni nɑ din sɔkn k yet b po ɑ: «T Yonmdɑɑnɔ nɑn u mɑlɑkŋɑnm tusɑ tusɑ bɑɑt, ɑ wun bu nifosɑɑlk kul buut, k biil bin nbɑ k tiin’ɔ nɑ b biit pɑɑk, nɑn b mɔyetu pɑɑk, nɑn bɑɑ piɑk biil Yennu nɑ pɑɑk.» B tie bunbulmi dɑnm e, k b nunm k mi gbuo. B tuun b mɔnŋ lonbiit nbɑ wɑnt’b bɑnnu nbɑ e, k piɑk nɑn pɑlbifɑɑnt, k koln niib ɑ bin lɑ siɑl. N yuɑsnbɑ, i tiɑn mɑn mɑɑn nbɑ k t Yonmdɑɑnɔ Yiesu Klistu tuomiinbɑ din yet nɑ. B din yet ɑ: «Dɑɑjuonti dɑɑ mɑnŋ ni, niib tɑn sii lɑɑ’i, k wɑɑ b mɔnŋ mɔnŋ gbɑnɑnt lonbiit.» L nibuolu e bɑɑt nɑn bɔktu i sinsuuk ni. B gbɑnɑnt lonm kuukuɑ e diɑ’b, k Foŋɑnm kɑɑ b ni. Ŋɑɑn n yuɑsnbɑ, i cie i pɑlɑ mɑn, i yɑdɑ nbɑ nyii Yennu tiɑɔnŋ buol ni nɑ pɑɑk, kii mei Yennu Foŋɑnm yiikuo ni, kii tie niib nbɑ be Yennu lonm ni, kii guu yuo nbɑ k t Yonmdɑɑnɔ Yiesu Klistu sɑɑ tul’i mɑnfuol nbɑ kɑɑ gbennu, u ninbɑtinu pɑɑk nɑ. I tin bin nbɑ k b dudukt lɑnŋ nɑ ninbɑɑɔk, k suol’b k nyinn’b muu ni. Lieb mun, i tin’m ninbɑɑɔk, k biɑ kii tiin’m jɑŋmɑɑni, ŋɑɑn kii nɑn b biit binbenŋ, kii sɑɑ kii nɑn, nɑn b tiɑt nbɑ mɔk b lonbiit dɔuk nɑ. Yennu ii guu’i k i dɑɑ bɑɑ, k bɑɑl nɑn’i u tuɑnn yentsɑɑkɑl ni, k i dɑɑ mɔk biit, ŋɑɑn kii mɔk pɑlpienn bonciɑnn. Ŋuɑ nbɑ tie Yen-yenɔ kuɑ k fiel’t t Yonmdɑɑnɔ Yiesu Klistu pɑɑk nɑ, u yen dontl nɑn yɑbnt nɑn yiikuo nɑn *yudɑnt, yuo nbɑ din gɑl nɑ, nɑn mɔtɑɑnɑ, nɑn yuo nbɑ kɑɑ gbennu. * Amenn. Mɑɑn nbɑ k Yiesu *Klistu din fiit nɑ diɑn kɑdɑɑɔk nɑ ni e. Yennu din tul’ɔ mɑɑn mɑnŋ ɑ wun wɑnn u tuontunnɑ lin nbɑ sɑɑ tien l i yɑnn wɑɑn. Klistu din tun u *mɑlɑkɑ u tuontunnɔ Sɑn buol ni, ɑ wun yet’ɔ mɑɑn mɑnŋ kul. Sɑn din muɑnt lin nbɑ k u din lɑ nɑ kul k l tie mɑɑn nbɑ nyii Yennu buol ni, nɑn bɑlmɔni nbɑ k Yiesu Klistu din fiit k wɑnn’ɔ nɑ. Wun nbɑ lii mɑɑn nbɑ nyii Yennu buol ni, k be kɑdɑɑɔk nɑ ni, pɑlpienn tie u yɑl e, k bin nbɑ gbiɑ mɑɑn mɑnŋ k sɑɑk’l, pɑlpienn tie b yɑl e mun, k mɑɑn yuo pel, ɑ k lin nbɑ sɑɑ tun nɑ n tun. Min Sɑn, min e dɑ kɑdɑɑɔk nɑ, k tien jiɑnti ŋɑnlole nbɑ be Asii tinŋ ni nɑ. Yennu n tul’i yetŋɑnm k biɑ tul’i mɑnu, ŋuɑ nbɑ be, k din be, k biɑ bɑɑt nɑ. U sei ŋɑnlole nbɑ be u nɑɑngbounŋ tuɑnn nɑ, nɑn Yiesu Klistu n tul’i l bonɑ. Ŋuɑ Yiesu e tie siɑlɑɑdɑɑnɔ nɑn mɔni. U tie bikpelk e, k biɑ din fiil kpienm sinsuuk ni. U biɑ tie tingbounŋ kpɑnbɑlɑ Kpɑnbɑl e. Yiesu Klistu luon’t k biɑ din nyinn tinm t biit ni nɑn u sɔn. U din te k t tie Yennu nɑɑn ni niib, k biɑ te k t tie mɑnntieb ɑ tii tuun kii tien u Bɑɑ Yennu. Ŋuɑ Yiesu e yen *yudɑnt nɑn yiikuo yuo kul ɑ. * Amenn. Gotl mɑn, ŋuɑ e be sɑnpɑgbɑnt ni k bɑɑt nɑ. Suɑ kul ninbinɑ tɑn sɑɑ lɑ’u nɑn bin nbɑ din ŋmuu’u nɑ, k tingbounŋ nɑ nibuolu kul tɑn sɑɑ bui u pɑɑk. L sɑɑ tien nnɑ wɑɑ. Amenn Yonmdɑɑnɔ Yennu, nbɑ mɔk yiikuo kul, k be, k din be, k biɑ tɑn sii be yuo nbɑ kɑɑ gbennu nɑ, ŋuɑ e yien ɑ: «Min e tie Alfɑ nɑn Omeegɑ.» Min e tie Sɑn, i nɑɑ bik nɑ, k mɑɑ be Klistu ni nɑ, n tɑɑ nɑn’i k di fɑlɑ, k biɑ be Yennu nɑɑn ni, k guu nɑn suklu. Mɑɑ din lin k muɑntl Yennu mɑɑn nɑn Yiesu *siɑlɑ nɑ, k b din jii’n k sɑɑn nɑn’n Pɑɑtmuos tinŋ nbɑ k nyun lint’l nɑ ni. L din tie Yonmdɑɑnɔ dɑɑl k Foŋɑnm fiil n ni, k n gbɑt kunkɔpɑɑll n puolpo k l bui nɑn kɑtkɑɑk nɑ. Kunkɔl mɑnŋ yet ɑ: «Diɑnt lin nbɑ k ɑ lɑɑt nɑ k tien kɑdɑɑɔk ni, k nɑkn k tul Klistu mɔtɑɑɔk niib nbɑ be digbɑnɑ ŋɑnlole nɑ ni. Bin nbɑ be Efes nɑn Simiilinn nɑn Pelgɑnm nɑn Tiɑtiil nɑn Sɑɑlt nɑn Fiilɑdelfi nɑn Lɑodiise nɑ.» K n ŋmɑnt k yɑɑ n got wun nbɑ piɑk k tien’n nɑ. Ŋɑnn e k n lɑ sɑlmɑ fitɑ ŋɑnlole k l sie. K suɑ be l sinsuuk ni k nɑɑn nɑn nisɑɑlk nɑ, k liɑ liɑtfuouk k l tɑn siit u tɑɑbilɑ, k sɑlmɑ gbɑnn buob u nyɑɑɔk ni, k u yut pien nɑn gungunt nɑ, k u ninbinɑ nɑɑn nɑn mupienu nɑ. K u tɑɑ nyili nɑn kut nbɑ k b tuu yɑkn muu pɑɑk k lin nɑnn k nyili biɑnŋ nbɑ nɑ. K kunkɔl guɑl nɑn kpenu ni nyunmɔnn nbɑ tuu kuon biɑnŋ nbɑ nɑ. K u tɑɑ nyili nɑn kut nbɑ k b yi’l blɔns nɑ, k u kunkɔl guɑl nɑn kpenu ni nyunmɔnn nbɑ tuu kuon biɑnŋ nbɑ nɑ. K u kub ŋmɑɑbilɑ ŋɑnlole u niidiitu ni, k juk-bɑnjiɑk nbɑ di mɔliemi tɑnt nyii u mɔb ni, k u nunpo yien nɑn yennu nbɑ tuu yien yensuuk ni nɑ. Mɑɑ lɑ’u yuo nbɑ k n bɑɑ duɑl u tuɑnn nɑn kpiemɔ nɑ. K u jii u niidiitu k yii n pɑɑk, ŋɑɑn yet ɑ: «Dɑɑ tiin jɑŋmɑɑni. Min e tie bont kul ɑ pinpiik nɑn l gbennu. N tie Fuotɔ nɑ e. N din kpo wɑɑ, k n ji fo k sii fo nɑn yuo nbɑ kɑɑ gbennu, k n mɔk yiikuo kuun nɑn kpientinŋ pɑɑk. L pɑɑk, diɑnt lin nbɑ k ɑ lɑ mɔtɑɑnɑ nɑn lin nbɑ tun mɔtɑɑnɑ nɑn lin nbɑ tɑn sɑɑ tun yuo nbɑ wɑɑ. Ŋmɑɑbilɑ ŋɑnlole nbɑ k ɑ lɑ n niidiitu ni nɑ nɑn sɑlmɑ fitɑ ŋɑnlole nɑ wuol ni pɑɑk tie nnɑ e: ŋmɑɑbilɑ ŋɑnlole nɑ e tie n mɔtɑɑɔk niib nbɑ be digbɑnɑ ŋɑnlole nɑ mɑlɑkɑɑnbɑ, k fitɑ ŋɑnlole nɑ mun tie n mɔtɑɑɔk niib nbɑ be digbɑnɑ ŋɑnlole mɑnŋ nɑ.» «Diɑnt k tul Efes jɑɑnti *mɑlɑkɑ ɑ: ‹Wun nbɑ diɑ ŋmɑɑbilɑ ŋɑnlole u niidiitu ni k biɑ sonm fitɑ ŋɑnlole sinsuuk ni nɑ lɑbɑɑl e nɑ: N mi ɑ tuonɑ po nɑn fɑɑ yɑbl k tuun tuonŋɑnɑ biɑnŋ nbɑ nɑ, k mi ɑ suklu po. N biɑ mi nɑn ɑ k luon nibiit nbɑ tuun lin nbɑ. A din bikn bin nbɑ yɑɑ ɑ b tie tuomiinbɑ ŋɑɑn k k tie nɑ, k mi nɑn b tie fɑidɑnm e. A mɔk suklu k biɑ dii fɑlɑ, ŋɑɑn ɑ k nyik’n. Ŋɑɑn gotl lin nbɑ k n tɑɑl’ɑ l pɑɑk: ɑ ji k luon’n nɑn fɑɑ din dɔnŋ luon’n sinsinn biɑnŋ nbɑ nɑ. Tiɑt fɑɑ din tuu be biɑnŋ nbɑ nɑ ŋɑɑn ji tɑn lebt k nyik’l nɑ. Mɔ kuɑŋɑɑn k lebt binbenŋ ŋɑɑn kii tuun tuonɑ nbɑ k ɑ din tuun sinsinn nɑ. L i tie k ɑ k mɔ kuɑŋɑɑn k lebt binbenŋ, n sɑɑ bɑɑl ɑ buol ni k nyinn ɑ fitl lɑɑ tuu be siɑn nbɑ nɑ. Ŋɑɑn fɑɑ tuun lin nbɑ k l ŋɑn e nɑ. A k luon Niikolɑiitnbɑ nbɑ tuun lin nbɑ nɑ, nɑn mɑɑ mun k luon biɑnŋ nbɑ nɑ e.› «Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ. «Wun nbɑ nyɑnn nyɑnnu nɑ, ŋuɑ e k n sɑɑ cɑb’ɔ wun di tiik nbɑ tien niib mɑnfuol k be Yennu gɔktuk ni nɑ luɑnɑ.» «Diɑnt k tul Simiilinn jɑɑnti mɑlɑkɑ ɑ: ‹Wun nbɑ din sint, k biɑ tɑn sɑɑ juont, k din kpo k biɑ fiil kuun ni nɑ lɑbɑɑl e nɑ: N mi ɑ fɑlɑ po, k biɑ mi nɑn ɑ tie nɑndɑɑnɔ e, ŋɑɑn mɔmɔnm, ɑ tie mɔktɔ e, k n mi nɑn nisiɑb piɑk k biil ɑ sɑnn, k biɑ yɑɑ ɑ b tie *Suifnbɑ e, ŋɑɑn k k tie nnɑ. B tie *Sɑɑtɑn mɔtɑɑɔk niib e. A dɑɑ tiin jɑŋmɑɑni nɑn fɑlɑ nbɑ bɑɑt ɑ pɑɑk nɑ. Sɑɑtɑn sɑɑ kuɑn i siɑb dɑnsɑlk ni k bikn’m. I tɑn sɑɑ lɑ muksuk fɑlɑ k sɑɑ diɑn dɑɑ piik. Ii wɑɑ n mɔb, k l i lek i tie kuun i e, k n tɑn sɑɑ pi’ɑ mɑnfuol foklk.› «Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ. «Wun nbɑ nyɑnn nyɑnnu mɑnŋ, u kɑn lɑ kuun nbɑ pukn munle nɑ.» «Diɑnt k tul Pelgɑnm jɑɑnti mɑlɑkɑ ɑ: ‹Gotl lɑbɑɑl nbɑ nyii wun nbɑ mɔk juk-bɑnjiɑk nbɑ di mɔliemi nɑ buol ni e nɑ: N mi nɑn siɑn nbɑ k ɑ kɑl nɑ tie siɑn nbɑ k Sɑɑtɑn nɑɑngbounŋ nɑ be. A set wɑɑ n mɑɑn. B din tɑn kpii Antiipɑɑs nbɑ din tie n siɑlɑɑdɑɑnɔ nɑn bɑlmɔni nɑ, ɑ mɔnŋ duo nbɑ k Sɑɑtɑn be nɑ ni e. L yuo, ɑ din k nyik yɑdɑ nbɑ k ɑ tien’n nɑ. Ŋɑɑn ɑ mɔk biit ŋɑnle nnɑ e k n sɑɑ tɑɑl’ɑ: ɑ mɔk nisiɑb nbɑ wɑɑ Bɑɑlɑɑnm wɑnnu. Ŋuɑ e din wɑnn Bɑlɑk bɑnnu nbɑ k u sɑɑ jɑnm Islɑɑeltieb ɑ bin biil Yennu *senni k di pɑtɑ nɑnt k biɑ tun boncuncontuonɑ. Nnɑ e biɑk ɑ mɔk nisiɑb nbɑ wɑɑ Niikolɑiitnbɑ wɑnnu. L pɑɑk, mɔ kuɑŋɑɑn k lebt binbenŋ. Nnɑ i kɑɑ, l i yɑnn wɑɑn, n sɑɑ bɑɑl nɑn juk-bɑnjiɑk nbɑ tɑntl k nyi n mɔb ni nɑ, k kɔn nɑn niib nɑ.› «Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ. «Wun nbɑ nyɑnn nyɑnnu nɑ, ŋuɑ e k n sɑɑ tul’ɔ jiet nbɑ k b bɔl ɑ k l sɑnn yi mɑnn nɑ, k n biɑ sɑɑ tul’ɔ tɑnpienn nbɑ k sɑnpɑɑnn diɑn l pɑɑk k suɑ k mi’l nɑ, sie fin nbɑ gɑɑl’l nɑ kuukuɑ.» «Diɑnt k tul Tiɑtiil jɑɑnti mɑlɑkɑ ɑ: ‹Lɑbɑɑl nɑ nyii Yennu Bijɑ nbɑ k u ninbinɑ nɑɑn nɑn mupienu nɑ, k u tɑɑ nyili nɑn kut nbɑ k b yi’l blɔns nɑ. N mi ɑ tuonɑ po, k biɑ mi ɑ lonm nɑn ɑ yɑdɑ nɑn tuonɑ nbɑ k ɑ tuun k tien Yennu niib, nɑn fɑɑ mɔk suklu biɑnŋ nbɑ, k biɑ mi nɑn ɑ tuonɑ nbɑ k ɑ tuun k tien lieb nɑ po. Ŋɑɑn ɑ biit nbɑ k n sɑɑ tɑɑl’ɑ l pɑɑk tie nnɑ e: fɑɑ sɑk k puo nbɑ k b yi’u Sesɑɑbel k u yi u mɔnŋ Yennu sɔkni nɑ i be i buol ni. U wɑnnu ni e k u kpɑnn n tuontunnɑ, ɑ bii tuun boncuncontuonɑ kii di jiet nbɑ tie pɑtɑ yɑl. N tul’ɔ yuo ɑ wun mɔ kuɑŋɑɑn k lebt binbenŋ k nyik u cunconsn, ŋɑɑn u k sɑɑk. L pɑɑk, n sɑɑ jii’u k lu’u fɑlɑ gɑdo pɑɑk, k l i tie k bin nbɑ conm nɑn’ɔ nɑ k mɔ kuɑŋɑɑn k lebt binbenŋ k nyi biit mɑnŋ ni, n sɑɑ kuɑn’m fɑlgbenŋl ni, k n biɑ sɑɑ kpi u wɑɑs, k nnɑ e k Yiesu mɔtɑɑɔk niib kul sii mi nɑn n tie wun nbɑ mi nisɑɑli dudukt, k biɑ mi lin nbɑ be b pɑlɑ ni, k n tɑn sɑɑ pɑ suɑ kul u tuonɑ nyuɑt nbɑ tie biɑnŋ nbɑ. ‹Ŋɑɑn yinm nbɑ be Tiɑtiil k k wɑɑ puo mɑnŋ wɑnnu, k biɑ k wɑɑ lin nbɑ k siɑb yi’l Sɑɑtɑn wuol ni lɑbɑɑl nɑ, n yien yinm e, ɑ n kɑn jinn’i jik-kpiɑtliɑ. Ŋɑɑn ii diɑ mɑn lin nbɑ k i mɔk nɑ fɑnu mɔkmɔk nɑn yuo nbɑ k n tɑn sɑɑ bɑɑl nɑ. Wun nbɑ nyɑnn nyɑnnu nɑ, k tuun mɑɑ luon lin nbɑ k kɑn nyik, n sɑɑ tul’ɔ yiikuo nbɑ k n gɑɑl n Bɑɑ buol ni nɑ buolu, u sii mɔk tingbounŋ nɑ tini kul yiikuo. U yiikuo sii tie nɑn kut pɑtu nɑ e, k u sɑɑ fɑɑ’b k bil’b nɑn bɑɑ fɑɑ bobɑ k yie biɑnŋ nbɑ nɑ. N biɑ sɑɑ cɑb l dɑɑnɔ sɑn-nyɑfɑɑl ŋmɑɑbil.› » «Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ.» «Diɑnt k tul Sɑɑlt jɑɑnti *mɑlɑkɑ ɑ: ‹Lɑbɑɑl nɑ nyii wun nbɑ mɔk Yennu Sei ŋɑnlole nɑn ŋmɑɑbilɑ ŋɑnlole nɑ buol e. N mi ɑ tuonɑ po, k biɑ mi nɑn niib duki ɑ ɑ fo, ŋɑɑn k ɑ kpo wɑɑ. Fiit k yɑbl k lin nbɑ tenn ɑ buol ni dɑɑ kpenn k gbent, k mɑɑn tuonɑ nbɑ k ɑ tuun nɑ k gbuot Yennu nunm. Ii tiɑn tumiu nbɑ k ɑ din gbɑt k biɑ din gɑɑl nɑ. Ii diɑ’l kii biɑ kii mɔ kuɑŋɑɑn kii lebtl binbenŋ. L i tie k ɑ k fiil, n sɑɑ bɑɑl ɑ buol ni nɑn nɑn-yukɔ nbɑ tuu bɑɑl biɑnŋ nbɑ nɑ e, k ɑ kɑn bɑnn n bɑɑlu yuo. Ŋɑɑn nisiɑb be Sɑɑld k b tiɑt k kuɑ jɑknt. Ŋɑnm e sɑɑ liɑ tɑpieni k ŋɑnm nɑn min ii sonm, k mɑɑn bɑɑ ŋɑn nɑn’n nɑ pɑɑk. Wun nbɑ nyɑnn nyɑnnu mɑnŋ nɑ, u tɑn sɑɑ liɑ tɑpieni nɑ, k n tɑn kɑn piin u sɑnn mɑnfopɑɑnn dɑnm kɑdɑɑɔk nɑ ni, k n tɑn sɑɑ yet n Bɑɑ nɑn u mɑlɑkɑɑnbɑ nɑ pɑɑnu ni ɑ l dɑɑnɔ tie n yuɑ e.› «Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ.» «Diɑnt k tul Fiilɑdelfi jɑɑnti mɑlɑkɑ ɑ: ‹Gotl, lɑbɑɑl nɑ nyii wun nbɑ tie Ŋɑnɔ, k biɑ tie Bɑlmɔni dɑɑnɔ nɑ buol e, k u diɑ kpɑnbɑl Dɑɑfiid pienu k lin nbɑ k u luot nɑ, suɑ kɑn fit luon, k lin nbɑ kul k u luon nɑ, suɑ kɑn fit luot. N mi ɑ tuonɑ po. Gotl, n senn gɑnn nbɑ yɑɑ e, ɑ tuɑnn k suɑ kɑn fit luon. N mi nɑn ɑ k mɔk pɑnŋ, ŋɑɑn ɑ sɑk n mɑɑn nɑ k dɑɑ kpet nɑn mɔbonn ɑ. Gotl, bin nbɑ tie *Sɑɑtɑn mɔtɑɑɔk niib, fɑidɑnm nbɑ yɑɑ ɑ b tie *Suifnbɑ ŋɑɑn k k tie nɑ, n sɑɑ te k bin bɑɑl k tɑn gbɑɑn ɑ tuɑnn po, k bɑnn nɑn n set luon’ɑ. K mɑɑn fɑɑ sɑk n mɑɑn k mɔk mintl nɑ pɑɑk, n sɑɑ diɑ’ɑ bonŋɑnn k ɑ tɑn kɑn kuɑ bonbiil nbɑ bɑɑt tingbounŋ nɑ kul pɑɑk, ɑ lin bikn tingbounŋ nɑ niib nɑ ni. N sɑɑ bɑɑl mɔtɑɑnɑ. I diɑ lin nbɑ k ɑ mɔk nɑ fɑnu k suɑ tɑn dɑɑ fiɑl ɑ nɑɑn foklk. Wun nbɑ nyɑnn nyɑnnu nɑ, n sɑɑ tien’ɔ n Yennu jɑɑnti ŋɑsɑɑkɑk ni jɑɑntɑlk, k u ji kɑn nyi lenŋ. K n biɑ sɑɑ diɑn n Yennu sɑnn u pɑɑk, k diɑn n Yennu duo sɑnn u pɑɑk, k biɑ diɑn n mɔnŋ sɑnpɑɑnn nɑ u pɑɑk. Yennu duo mɑnŋ e tie Selusɑɑlenm pɑɑnn nbɑ sɑɑ nyi *Yendɔunŋ ni Yennu buol ni nɑ, k tɑn sik tinŋ nɑ ni.› » «Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ.» «Diɑnt k tul Lɑodiise jɑɑnti mɑlɑkɑ ɑ: ‹Lɑbɑɑl nɑ nyii wun nbɑ sɑnn yi * Amenn nɑ buol e, k u tie bɑlmɔni siɑlɑɑdɑɑnɔ k ɑ fit tien u mɑɑn nɑ yɑdɑ. Ŋuɑ e tie Yennu nɑɑmi nɑ kul ɑ yudɑɑnɔ: N mi ɑ tuonɑ po. A k mei, k biɑ k ton. N bo sii luon k fii tie l yenn e. L pɑɑk, fɑɑ k ton k biɑ k mei nɑ, n sɑɑ siil’ɑ n mɔb ni. A yien ɑ, ɑ tie mɔktɔ e k mɔk lin nbɑ kul k ɑ luon, ɑ k siɑl kɑn pɔt’ɑ ni. Ŋɑɑn ɑ k mi fɑɑ mɔk pɑlbiil nɑn ninbɑɑɔk biɑnŋ nbɑ. A tie nɑndɑɑnɔ e, k sonm yɑnn, k tie juɑnŋ. L pɑɑk, n kpɑɑn’ɑ e, bɑɑt n buol k dɑɑ sɑlmɑ nbɑ k b kuɑn muu ni k nyinn l jɑknt nɑ k set lɑ mɔktuk, k biɑ dɑɑ tɑpieni k dɔkn ɑ fei nɑ, k biɑ dɑɑ kpɑn k bɑnŋ ɑ ninbinɑ nɑ kii lɑɑt. Bin nbɑ kul k n luon’m nɑ, n kpɑɑn’m kpɑɑni k dɑɑl b tubɑ. L pɑɑk, ɑ dɑɑ jeln, ŋɑɑn mɔ kuɑŋɑɑn k lebt binbenŋ. Nnɑlɑ, n sie tɑnmɔb nɑ ni k kpɑɑn gɑnn. Wun nbɑ gbɑt n kunkɔl k luot gɑnn mɑnŋ, n sɑɑ kuɑ, k min nɑn ŋuɑ sɑɑ lɑkn di. Wun nbɑ nyɑnn nyɑnnu nɑ, n sɑɑ tul’ɔ yiikuo k wun tɑn lɑkn kɑl nɑn’n n nɑɑngbounŋ nɑ pɑɑk nɑn mɑɑ nyɑnn nyɑnnu kul k lɑkn kɑl nɑn n Bɑɑ u nɑɑngbounŋ nɑ pɑɑk biɑnŋ nbɑ nɑ.’» «Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ.» L puolpo k n biɑ lɑ *Yendɔunŋ ni gɑnn k l yɑɑ, k n gbɑt kunkɔl nbɑ k n ponŋ gbɑt nɑ k l biɑ piɑk k tien’n k nɑɑn nɑn kɑtkɑɑk nbɑ tuu mɔ biɑnŋ nbɑ nɑ, k kunkɔl mɑnŋ yet ɑ: «Don nnɑ k n wɑnn’ɑ lin nbɑ sɑɑ tun l puolpo.» L tɑɑkpɑɑk ni k Foŋɑnm nɑ fiil n ni, k n lɑ k suɑ kɑl nɑɑngbounŋ pɑɑk Yendɔunŋ ni, k u nunpo nyili nɑn tɑnɑ nbɑ k b yi jɑsp nɑn sɑldoenn nɑ, k nɑɑtuoluk buɑn k lint nɑɑngbounŋ nɑ, k l nyili nɑn tɑnn nbɑ k yi’l emeluod. K nɑɑngbɑnt piinle nɑn ŋɑnnɑ duɑ k lint nɑɑngbounŋ nɑ. K sɑɑkɑb piinle nɑn bɑnnɑ liɑ tɑpieni k yil sɑlmɑ fokli k kɑl nɑɑngbɑnt piinle nɑn ŋɑnnɑ mɑnŋ pɑɑk. K sɑnyiknti nyi nɑɑngbounŋ mɑnŋ ni nɑn fuut nɑn sɑtiɑni. K fitɑ ŋɑnlole lɑkn di nɑɑngbounŋ nɑ tuɑnn. Ŋɑnn e tie Yennu Sei ŋɑnlole nɑ. K siɑl nɑɑn nɑn mɔkgbenŋl nɑ k duɑ nɑɑngbounŋ nɑ tuɑnn k tie nɑn miɑnu nbɑ nyili biɑnŋ nbɑ nɑ. K bonfuɑ bɑnnɑ be nɑɑngbounŋ nɑ sinsuuk ni k biɑ lint nɑɑngbounŋ mɑnŋ, k mɔk ninbinɑ bonciɑnn b nunpo nɑn b puolpo kul. Sinsinn bonfuol nɑ nɑɑn nɑn yɑnbɔl nɑ e, k wun nbɑ wɑɑ munle ni nɑ mun nɑɑn nɑn nɑɑjɑk nɑ, k wun nbɑ wɑɑ muntɑ ni nɑ nunpo nɑɑn nɑn nifosɑɑlk nunpo nɑ, k wun nbɑ wɑɑ munnɑ ni nɑ mun nɑɑn nɑn kɔnbɑkpel nbɑ yuuk nɑ. K bonfuɑ bɑnnɑ nɑ kul mɔk kpinkpɑnt ŋɑnluob-luob, k biɑ mɔk ninbinɑ bonciɑnn b gbɑnɑnt kul po nɑn b nuɑk ni. K yennu ni nɑn nyiɑɔk kul b k nyikt *yɑni yinu. B yiin ɑ: « *Ŋɑnɔ, Ŋɑnɔ, Ŋɑnɔ tie Yonmdɑɑnɔ Yennu nbɑ mɔk yiikuo kul ɑ, k din be, k biɑ be mɔtɑɑnɑ, k biɑ tɑn sii be nɑn yuo nbɑ kɑɑ gbennu nɑ.» Yuo kul bonfuɑ ŋɑnnɑ nɑ i tɑnŋ i yiin yɑni k dontl k jiɑntl k tien wun nbɑ kɑl nɑɑngbounŋ nɑ pɑɑk k be mɔkmɔk nɑn mɔkmɔk nɑ niipuouk, l yuo e k sɑɑkɑb piinle nɑn bɑnnɑ nɑ tuu bɑɑ k gbɑɑn wun nbɑ kɑl nɑɑngbounŋ mɑnŋ pɑɑk tuɑnn, k puki wun nbɑ be mɔkmɔk nɑn mɔkmɔk nɑ. B biɑ tuu yit b fokli nɑ e k bil nɑɑngbounŋ nɑ tuɑnn ŋɑɑn yien ɑ: «T Yonmdɑɑnɔ Yennu, l jɑnŋ nɑn tin tul’ɑ *yudɑnt, k tul’ɑ bɑɑkl nɑn yiikuo wɑɑ, k mɑɑn fin e din nɑn bont kul ɑ. A nɑɑɔnŋ mɑnŋ kul be k mɔk mɑnfuol, k mɑɑn ɑ din luon nnɑ.» Ŋɑnn e, k n biɑ lɑ k suɑ kɑl nɑɑngbounŋ nɑ pɑɑk k diɑ kɑdɑpuɑbl u niidiitu ni, k kɑdɑɑɔk mɑnŋ mɔk diɑni l nunpo nɑn l puolpo, k b tɑbn l ŋmii boɑ ŋɑnlole ni. K n lɑ *mɑlɑkɑ nbɑ mɔk pɑnŋ k u muɑntl nɑn kunkɔsɑɑkɑl ɑ: «Ŋmee jɑnŋ nɑn wun pɔbt kɑdɑpuɑbl nɑ k tɑbt’l i?» Ŋɑɑn k suɑ kɑɑ *Yendɔunŋ ni ɑmi tingbounŋ nɑ ni ɑmi kpientinŋ, k sɑɑ fit pɔbt kɑdɑpuɑbl nɑ k got l nuɑk ni. L yuo k n bui nɑn nyin-nyuut k mɑɑn suɑ nbɑ kɑɑ k jɑnŋ nɑn wun pɔbt kɑdɑpuɑbl nɑ k got l nuɑk ni nɑ. Ŋɑnn e k sɑɑkɑb nɑ yenɔ yet’n ɑ: «Dɑɑ bui. Gotl wun nbɑ tie Suudɑ buolu ni Yɑnbɔl nbɑ tie kpɑnbɑl * Dɑɑfiid yɑɑbuonn nɑ. Ŋuɑ nyɑnn nyɑnnu k fit tɑbt yiit ŋɑnlole nɑ k pɔbt kɑdɑpuɑbl mɑnŋ.» K n lɑ Pebik k u sie nɑɑngbounŋ nɑ buol k bonfuɑ bɑnnɑ nɑ nɑn sɑɑkɑb nɑ sie k lint’ɔ. Pebik nɑ tie nɑn pebik nbɑ k b kpii’u nɑ e, k mɔk yinɑ ŋɑnlole nɑn ninbinɑ ŋɑnlole nbɑ tie Yennu sei ŋɑnlole nbɑ k u tun’m tingbounŋ nɑ kul ni nɑ. K Pebik nɑ sɑɑn k sɑɑ gɑɑl kɑdɑpuɑbl nɑ dɑɑnɔ nbɑ kɑl nɑɑngbounŋ nɑ pɑɑk niidiitu ni. Wɑɑ gɑɑl kɑdɑpuɑbl nɑ yuo nbɑ k bonfuɑ bɑnnɑ nɑ nɑn sɑɑkɑb piinle nɑn bɑnnɑ nɑ gbɑɑn u tuɑnn, k b kul ɑ diɑ biɑt nɑn sɑlmɑ kɔbi, k bonnunubt nbɑ k b tuu jokt muu k l tie Yennu niib miɑlu nɑ gbie kɔbi mɑnŋ ni. K b yiin yɑnpɑɑnŋ k tien Pebik nɑ k yien ɑ: «A set jɑnŋ nɑn fɑn gɑɑl kɑdɑpuɑbl nɑ k tɑbt l yiit nɑ, k mɑɑn ɑ din kpo e k jii ɑ sɔn k dɑɑ niib k tul Yennu. Niib mɑnŋ nyii buolu kul ni, nɑn mɑbuolu kul ni, nɑn nibuolu kul ni, nɑn tini kul niib ni. A biɑ te k b tie ɑ nɑɑn ni niib, bin nbɑ tie mɑnntieb, ɑ bin tun Yennu tuonɑ, k b sii yen tingbounŋ nɑ tieb.» L puolpo biɑk k n got k lɑ mɑlɑkɑɑnbɑ tusɑ tusɑ tusɑ, k biɑ gbɑt b kunkɔlɑ, k b ŋɑɑ lint nɑɑngbounŋ nɑ nɑn bonfuɑ bɑnnɑ nɑ nɑn sɑɑkɑb nɑ. K b yien nɑn kunkɔsɑɑkɑl ɑ: «Pebik nbɑ k b din kpii’u nɑ, ŋuɑ e jɑnŋ nɑn wun gɑɑl yiikuo nɑn mɔktuk nɑn yɑn nɑn pɑnŋ nɑn bɑɑkl nɑn dontl nɑn pɑku.» K lin nbɑ kul k Yennu din nɑn nɑ, lin nbɑ be sɑnpɑɑpo nɑn lin nbɑ be tingbounŋ nɑ ni nɑn lin nbɑ be kpientinŋ nɑn lin nbɑ be mɔkgbenŋl ni, b kul yien ɑ: «Pɑku nɑn bɑɑkl nɑn dontl nɑn yiikuo kul ii be wun nbɑ kɑl nɑɑngbounŋ nɑ pɑɑk nɑ nɑn Pebik nɑ pɑɑk nɑn yuo nbɑ kɑɑ gbennu.» K bonfuɑ bɑnnɑ nɑ sɑk k yet ɑ: « * Amenn.» K sɑɑkɑb nɑ kul gbɑɑn k jiɑntl’ɔ. L puolpo k n lɑ k Pebik nɑ tɑbt yiit ŋɑnlole nɑ yenn, k n gbɑt bonfuɑ bɑnnɑ nɑ yenɔ kunkɔl k l tie nɑn sɑtiɑni nɑ k yiin ɑ: «Bɑɑt.» K n got k lɑ tɑnpienŋ, k wun nbɑ jɑk u pɑɑk nɑ diɑ tɑdɑɑɔk, k b tul’ɔ nɑɑnfoklk, k u nyii, k tie pɑnŋ dɑɑnɔ, ɑ wun kɔn k nyɑnn bonsiɑl kul. K Pebik nɑ biɑ tɑbt yiit nbɑ pukn ŋɑnle nɑ, k n gbɑt bonfuol nbɑ pukn bɑnle nɑ kunkɔl k u yiin ɑ: «Bɑɑt.» Ŋɑnn e k n lɑ tɑnmɔnŋ nyii k set, k b tul wun nbɑ jɑk’ɔ nɑ yiikuo ɑ wun bɑɑl nɑn tɑb tingbounŋ kul po k te k niib i kpi b lieb, k b biɑ kubn’ɔ juk-bɑnjɑgbenŋl. K Pebik mɑnŋ biɑ tɑbt yiit nbɑ pukn ŋɑntɑ nɑ, k n biɑ gbɑt k bonfuol nbɑ pukn bɑntɑ nɑ yiin ɑ: «Bɑɑt.» K n biɑ lɑ k tɑnbɔnŋ sie lenŋ, k wun nbɑ jɑk’ɔ nɑ diɑ lin nbɑ k b biki bonɑ kpɑiu nɑ u nuu ni. K n gbɑt fuut k l tie nɑn kunkɔl nɑ k nyii bonfuɑ bɑnnɑ nɑ ni k yien ɑ: « * Ble cilu tie denie, k ɔls cilu ŋɑntɑ mun tie denie, ŋɑɑn dɑɑ biil kpɑn nɑn dɑmunŋ nɑ.» K Pebik nɑ tɑbt yiit nbɑ pukn ŋɑnnɑ nɑ, k n gbɑt kunkɔl k l nyii bonfuol nbɑ pukn bɑnnɑ nɑ ni, k u yiin ɑ: «Bɑɑt.» Ŋɑnn e k n lɑ tɑnpienwuwul, k wun nbɑ jɑk’ɔ nɑ sɑnn tie Kuun, k Kpientinŋ mun wɑɑ u puol, k Yennu tul’b yiikuo ɑ bin kpi tingbounŋ nɑ niib bɔktu tɑɑl munnɑ ni yenn, ɑ bin kpi’b nɑn juk-bɑnjiɑk nɑn kon nɑn yiɑlu, k biɑ te k tingbounŋ nɑ bonkob-biit n kpi’b. K Pebik nɑ biɑ tɑbt yiit nbɑ pukn ŋɑnŋmu nɑ, k n lɑ k bin nbɑ k b din kpii’b Yennu mɑɑn nɑn b bɑlmɔni *siɑlɑ pɑɑk nɑ sei, k l be binbintl nɑ nyɑkl, k yikn sɑnpɑɑpo k yien ɑ: «T Yonmdɑɑnɔ, fin nbɑ tie niŋɑnɔ k biɑ tie bɑlmɔni dɑɑnɔ, l sɑɑ wei nlee wɑɑ, k ɑ tɑn bu tingbounŋ nɑ niib nɑ buut k dɑt b tubɑ, bɑɑ kpii’t nɑ pɑɑk i?» Ŋɑnn e k b tul b kul liɑtfopieni, ŋɑɑn yet’b ɑ bin guul wɑɑn nɑn yuo nbɑ k b tuontunlieb nɑn b nɑɑ wɑɑs nbɑ k niib sɑɑ kpi’b nɑ n kpo gbenn. K n lɑ k Pebik nɑ tɑbt yiit nbɑ pukn ŋɑnluob nɑ, k tinŋ jekl bonciɑnn, k yennu bɔnn cinm nɑn kuun cincenbounŋ nɑ, k ŋmɑɑlk munn mɔnn nɑn nyunmɔnt nɑ. K ŋmɑɑbilɑ nyii sɑnpɑɑpo k bɑɑ tinŋ ni nɑn wounŋ nbɑ tuu fikt k ninŋ tiik nbɑ k b yi *fiigie, k u luɑnɑ tuu bɑɑ biɑnŋ nbɑ nɑ. K sɑnpɑɑk pɔbn pɔbn nɑn puɑbt nɑ k bot, k juɑt kul nɑn gbingbɑnɑ nbɑ k nyun lint’l nɑ cɑɑt cɑɑt siɑn nbɑ k l tuu be nɑ. Ŋɑnn e k tingbounŋ nɑ kpɑnbɑlɑ nɑn nijɑɑnɑ nɑn sejenm yudɑnm nɑn mɔktɑ nɑn yiikuo dɑnm nɑn nibuolu kul, dɑɑbɑ nɑn bin nbɑ yen b mɔnŋ, k b kul ciɑl ciɑl k kuɑ tɑnkɔlt nɑn tɑnfiɑt ni, k b yien juɑt nɑn tɑnɑ ɑ: «Bɑɑn t pɑɑk k piin’t k bɔl’t k fɔkt nɑn’t wun nbɑ kɑl nɑɑngbounŋ pɑɑk nɑ nunpo k biɑ fɔkt nɑn’t nɑn Pebik nɑ wutuol nɑ. k mɑɑn wun nbɑ kɑl nɑɑngbounŋ nɑ pɑɑk nɑ nɑn Pebik nɑ wutuol dɑgbenŋl dɑɑl mɑnŋ bɑɑl nɑ, k suɑ kɑɑ k sɑɑ set b wutuol mɑnŋ tuɑnn po.» L puolpo k n lɑ *mɑlɑkɑɑnbɑ bɑnnɑ k b sie tingbounŋ nɑ lokɑ ŋɑnnɑ nɑ ni, k diɑ wounŋ nbɑ nyi lokɑ kul nɑ ni, ɑ l dɑɑ dɑ tinŋ ni ɑmi mɔkgbenŋl ni ɑmi tisiɑk pɑɑk. L yuo k n lɑ mɑlɑkluɑ k u nyii yendopo k diɑ dɔuk nbɑ tie mɑnfodɑɑnɔ Yennu yɑl nɑ, k yikn nɑn kunkɔsɑɑkɑl k yien mɑlɑkɑɑnbɑ bɑnnɑ nbɑ k Yennu tul’b yiikuo ɑ bin biil tingbounŋ nɑn mɔkgbenŋl nɑ, ɑ: «I dɑɑ biil tingbounŋ nɑn mɔkgbenŋl nɑn tiini mɑn, sie k b tɑn dɔk t Yennu niib b yugbiɑ pɑɑk sinsinn.» K n gbɑt bin nbɑ k b dɔk’b nɑn Yennu dɔuk nɑ kɑnn, k b tie niib tusɑ kobk nɑn tusɑ piinnɑ nɑn tusɑ ŋɑnnɑ (144.000), bin nbɑ nyii Islɑɑel nibuolu kul ni: k b dɔk Suudɑ buolu ni niib, tusɑ piik nɑn ŋɑnle (12.000), Luubenn buolu ni, tusɑ piik nɑn ŋɑnle (12.000), Gɑɑd buolu ni, tusɑ piik nɑn ŋɑnle (12.000), Asel buolu ni, tusɑ piik nɑn ŋɑnle (12.000), Neftɑɑli buolu ni, tusɑ piik nɑn ŋɑnle (12.000), Mɑnɑɑse buolu ni, tusɑ piik nɑn ŋɑnle (12.000), Siimeɔn buolu ni, tusɑ piik nɑn ŋɑnle (12.000), Leefi buolu ni, tusɑ piik nɑn ŋɑnle (12.000), Isɑɑkɑɑl buolu ni, tusɑ piik nɑn ŋɑnle (12.000), Sɑɑbuulɔn buolu ni, tusɑ piik nɑn ŋɑnle (12.000), Suosiɑf buolu ni, tusɑ piik nɑn ŋɑnle (12.000), Bensɑɑmen buolu ni mun k b dɔk niib tusɑ piik nɑn ŋɑnle (12.000). L puolpo e k n got k lɑ nibulciɑɔnŋ k b kɑɑ kɑnn, k nyii tini kul ni, nɑn buolu kul ni, nɑn nibuolu kul ni, nɑn mɑbuolu kul ni, k b sie nɑɑngbounŋ nɑ nɑn Pebik nɑ tuɑnn po k liɑ liɑtfopieni, k diɑ diɑ biɑbfɑɑt b nii ni, k b yikn nɑn kunkɔsɑɑkɑlɑ k yien ɑ: «T fielu nyi t Yennu nbɑ kɑl nɑɑngbounŋ nɑ pɑɑk nɑ nɑn Pebik nɑ buol e.» K mɑlɑkɑɑnbɑ nɑ kul set k lint nɑɑngbounŋ nɑ nɑn sɑɑkɑb nɑ nɑn bonfuɑ bɑnnɑ nɑ, k bɑɑ finfɑbɑ nɑɑngbounŋ nɑ tuɑnn k jiɑntl Yennu, k yien ɑ: « * Amenn, pɑku nɑn dontl nɑn yɑn nɑn niipuouk tulu nɑn bɑɑkl nɑn yiikuo nɑn pɑnŋ tie Yennu yɑl e mɔkmɔk nɑn yuo nbɑ kɑɑ gbennu. Amenn.» K sɑɑkɑb nɑ yenɔ boi’n ɑ: «K bin nbɑ liɑ liɑtfopieni nɑ tie lɑnm e, k b nyii lee?» K n jiin k yet’ɔ ɑ: «N Yonmdɑɑnɔ, fin e mi.» K u yet’n ɑ: «Niib nɑ nyii fɑlgbenŋl nɑ ni e, k b wuul b liɑtfɔkt nɑ Pebik nɑ sɔn ni k l ji pien. L pɑɑk e, k b sie Yennu nɑɑngbounŋ nɑ tuɑnn k tuun tien’ɔ nyiɑɔk nɑn yennu ni u jɑɑnti ŋɑsɑɑkɑk nɑ ni, k ŋuɑ Yennu nbɑ kɑl nɑɑngbounŋ nɑ pɑɑk nɑ sii be nɑn’m, k biɑ sii guu’b, ɑ k kon nɑn nyun-nyuklu kɑn mi suol’b, k yennu tonu ɑmi tongbeŋsiɑl kɑn mi k tonŋ b gbɑnu. K mɑɑn Pebik nbɑ be nɑɑngbounŋ nɑ buol nɑ sii tie b pekpɑɑlk, k sɑɑ ciɑn’m sɑɑn nɑn’m nyunbuul nbɑ tien mɑnfuol nɑ ni, k Yennu sɑɑ fiɑl b nyin-nyuut kul.» Pebik nɑ nbɑ tɑbt yiit nbɑ pukn ŋɑnlole nɑ, l yuo e k *Yendɔunŋ ni ŋmin sulm, k l tien nɑn miit piintɑ nɑ. L puolpo e k n lɑ *mɑlɑkɑɑnbɑ bɑnlole nbɑ sie Yennu tuɑnn nɑ, k u tul’b kɑtkɑi ŋɑnlole. Mɑlɑkluɑ nɑ diɑ sɑlmɑ senŋ nbɑ k b wubnt bonnunubt lenŋ nɑ, k sɑɑn sɑɑ set binbintl nɑ tuɑnn. K b tul’ɔ bonnunubt bonciɑnn, ɑ wun pukn Yennu niib kul miɑlu nɑ ni k jii pɑɑn sɑlmɑ binbintl nbɑ sie nɑɑngbounŋ nɑ tuɑnn po nɑ, k tul Yennu. K bonnunubt nɑ munyuut nɑn Yennu niib nɑ miɑlu nyii mɑlɑkɑ nbɑ sie Yennu tuɑnn nɑ nii ni k do sɑnpɑɑpo. K mɑlɑkɑ nɑ jii sɑlmɑ senŋ nɑ k muɑl muu binbintl nɑ pɑɑk k gbien senŋ nɑ k kpɑɑl muɑn tingbounŋ nɑ ni. K sɑɑk tiɑn, k fuut fu, k sɑnyiknti nyiki, k tinŋ dɑnm. K mɑlɑkɑɑnbɑ bɑnlole nbɑ diɑ kɑtkɑi ŋɑnlole nɑ tien siil nɑn bin peb kɑtkɑi nɑ. Sinsinn mɑlɑkɑ nɑ nbɑ pebl u kɑtkɑɑk nɑ, k sɑkɑɑnɑ nɑn muu k l ŋmɑt nɑn sɔn k mɔ tingbounŋ nɑ ni, k tingbounŋ nɑ bɔktu tɑɑl muntɑ nɑ yenn dii muu, k tiini bɔktu tɑɑl muntɑ mun dii muu, k mɔmɑɑsɑ kul dii muu. Mɑlɑkɑ nbɑ wɑɑ munle ni nɑ nbɑ pebl u kɑtkɑɑk nɑ, k b lu siɑl k l nɑɑn nɑn jɔgbenŋl nbɑ di muu nɑ, k l tɑn bɑɑ tingbounŋ mɔkgbenŋl ni, k mɔkgbenŋl nɑ bɔktu muntɑ yenn kpɑnt sɔn, k lin nbɑ be mɔkgbenŋl nyun nɑ ni bɔktu tɑɑl muntɑ nɑ yenn kpo kpo, k ŋɑlnt nbɑ pɑɑ mɔkgbenŋl nyun nɑ pɑɑk nɑ, k l bɔktu tɑɑl muntɑ ni yenn kul biil. Mɑlɑkɑ nbɑ wɑɑ muntɑ ni nɑ nbɑ pebl u kɑtkɑɑk nɑ, k ŋmɑɑbil gbenŋl nbɑ di k nɑɑn nɑn muu nɑ nyii sɑnpɑɑpo k tɑn bɑɑ kpeni nɑn nyunbuɑ nbɑ be tingbounŋ nɑ ni l bɔktu tɑɑl muntɑtɑ yenn ni. (Ŋmɑɑbil nɑ sɑnn din yi «Bontonn.») K nyun nɑ bɔktu tɑɑl muntɑ yenn kpɑnt ton, k niib bonciɑnn nbɑ nyuu nyun nɑ kpo, k mɑɑn nyun nɑ nbɑ ton nɑ pɑɑk. Mɑlɑkɑ nbɑ wɑɑ munnɑ ni nɑ nbɑ pebl u kɑtkɑɑk nɑ, k yennu nɑn ŋmɑɑlk nɑn ŋmɑɑbilɑ l ciɑn-yenni tɑɑl muntɑ nɑ ni yenn yenn bɔnn. K yennu nɑn ŋmɑɑlk nɑn ŋmɑɑbilɑ yentu nɑ l ciɑn-yenni tɑɑl muntɑ bɔnn. K yentu nbɑ tuu yien yennu ni nɑ, k l ciɑn-yenŋ tɑɑl muntɑ ni ji k yien, k l mun tie nnɑ e nɑn nyiɑɔk. L yuo k n got k lɑ kɔnbɑkpel k u yuuk sɑnpɑgbɑnt ni, k yikn nɑn kunkɔsɑɑkɑl ɑ: «Pɑlbiil be, pɑlbiil be, mɑlɑkɑɑnbɑ bɑntɑ nbɑ biɑl nɑ i tɑnŋ i pebl kɑtkɑi nɑ, k l mɔni nɑ bui, pɑlbiil tɑn sii be tingbounŋ nɑ niib pɑɑk.» *Mɑlɑkɑ nbɑ wɑɑ munŋmu ni nɑ nbɑ pebl u kɑtkɑɑk nɑ, k n lɑ ŋmɑɑbil nbɑ nyii sɑnpɑɑpo k tɑn bɑɑ tingbounŋ nɑ ni, k b tul’ɔ buotuk nbɑ sumi bonciɑnn k kɑɑ telk nɑ pienu. K ŋmɑɑbil nɑ luot buotsunsunŋ nɑ, k munyuut nyii lenŋ k tie nɑn musɑɑkɑu munyuut nɑ, k l munyuut nɑ dɔkn yennu, k tingbounŋ nɑ bɔnn. K tuɑli nyii munyuut nɑ ni k sik tingbounŋ nɑ ni, k b tul’b tonu nɑn nɑni nbɑ mɔk tonu tingbounŋ nɑ ni biɑnŋ nbɑ nɑ. K Yennu yet’b ɑ b dɑɑ biil muɑt nɑn bonbulkɑlɑ nɑn tiini, ɑ ŋɑɑn bii muks niib nbɑ k mɔk Yennu dɔkt b yugbiɑ pɑɑk nɑ, k u tul’b mɔb ɑ b dɑɑ kpi niib mɑnŋ, ɑ ŋɑɑn te k bin di fɑlɑ k sɑɑ diɑn ŋmɑɑli ŋɑnŋmu, ŋɑɑn b i jun nilɔ l tonu sii tie nɑn nɑnŋ tonu nɑ e. L yuo mɑnŋ, l nibuolu sɑɑ lon kuun ŋɑɑn kɑn lɑ. B biɑ tɑn sii luon bin kpo, ŋɑɑn kuun sɑɑ ciɑl ŋɑɑn nyik’b e. K tuɑli nɑ tie nɑn tɑɑni nbɑ tien siil ɑ bin tuok tɑb nɑ e, k yil lin nbɑ nɑɑn nɑn sɑlmɑ fokli nɑ b yulɑ pɑɑk, k b nunpo nɑɑn nɑn nifosɑɑlk nunpo nɑ, k b yut nɑɑn nɑn puob yut nɑ, k b nyɑnɑ nɑɑn nɑn yɑnbɔlɑ nyɑnɑ nɑ. K b liɑ nɑɑgbɑnkɔnŋɑ k l nɑɑn nɑn kut nɑ k dɔkn b pɑlɑ pɑɑk, k b kpinkpɑnt fu fuut nɑn tɔb tɑɑni nbɑ tuu tien siil k dɑɑl tolt k tuokt tɔb nɑ. K b mɔk juɑ k l mɔk pieni nɑn nɑni yɑl nɑ, k b juɑ mɑnŋ e k b sɑɑ jii k muks nifosɑɑli k sɑɑ diɑn ŋmɑɑli ŋɑnŋmu nɑ. K mɑlɑkɑ nbɑ guu buotsunsunŋ mɑnŋ tie b kpɑnbɑl, k Hebluonbɑ mɑɑn ni b yi’u Abɑɑdɔn, k Glek mɑɑn ni b yi’u Apoliɔn. (Sɑnn mɑnŋ pɑɑk tie «Biiltuɑ.») Sinsinn pɑlbiil nɑ gɑl ɑ, ŋɑɑn pɑlbiil munle biɑ wɑɑ puol. Mɑlɑkɑ nbɑ wɑɑ munluob ni nɑ nbɑ pebl u kɑtkɑɑk nɑ, k n gbɑt k kunkɔl nyii sɑlmɑ binbintl nbɑ sie Yennu tuɑnn po nɑ, l lɔti ŋɑnnɑ nɑ ni, k kunkɔl nɑ yet mɑlɑkɑ nbɑ wɑɑ munluob nɑ ni k diɑ kɑtkɑɑk nɑ, ɑ wun lot mɑlɑkɑɑnbɑ bɑnnɑ nbɑ k b lol’b kpengbenŋl nbɑ k b yi Eflɑɑt nɑ kpinŋ k ŋɑɑ’b, k u luot mɑlɑkɑɑnbɑ bɑnnɑ nɑ k ŋɑɑ’b. Yennu e din diɑ’b, k u ponŋ din senn l yuo nɑn l dɑɑl nɑn l ŋmɑɑlk nɑn l binn, ɑ bin fit kpi nifosɑɑli bɔktu tɑɑl muntɑ nɑ yenn, k n gbɑt k b yien sejenm nbɑ tie tɑnjɑklɑ nɑ kɑnn, k l tie tusɑ-tusl fuunu kobi ŋɑnle. K n yelntu mɑnŋ ni k n lɑ tɑɑni nɑn b tɑnjɑklɑ nɑ k b tie nnɑ e: k tɑnjɑklɑ nɑ liɑ nɑɑgbɑnkɔnŋɑ nbɑ dɔkn b pɑlɑ pɑɑk, k l mɔn nɑn muu nɑ k biɑ tie nɑn bonbɔnwuwulɑ nɑ, k biɑ mɔn nɑn sɑlwuutl nɑ, k tɑɑni nɑ yulɑ nɑɑn nɑn yɑnbɔlɑ yulɑ nɑ, k muu nɑn munyuut nɑn sɑlwuutɑ nyi b mɔi ni. L bonbiɑ ŋɑntɑ, muu nɑn munyuut nɑn sɑlwuutɑ nbɑ nyi tɑɑni nɑ mɔi ni nɑ kpii nifosɑɑli bɔktu tɑɑl muntɑ nɑ yenn. Tɑɑni mɑnŋ pɑnŋ be b mɔi ni nɑn b juɑ ni e, k b juɑ nɑ nɑɑn nɑn wɑi nɑ e, k mɔk yulɑ k b diɑ junt niib. K niib nbɑ biɑl k bonbiil mɑnŋ k kpii’b nɑ din k nyik bɑɑ jiɑntl nɑlnbiit nɑn pɑtɑ nbɑ k b tien nɑn sɑlmɑ nɑn likli kut nɑn kut nbɑ k b yi blɔns nɑn tɑnɑ nɑn ciceli nbɑ k nyɔi k biɑ k gbiɑ, k biɑ kɑn fit sonm nɑ. Niib mɑnŋ biɑ k nyik b nikpinu nɑn b jɑbɑ bunu nɑn b boncuncontuonɑ nɑn b nɑn-yuk tuonɑ. L yuo k n biɑ lɑ mɑlɑksuɑ k u mɔk yiikuo k nyii *Yendɔunŋ ni k siik, k gbɑb sɑnpɑgbounŋ nɑn cincenn nɑ, k nɑɑtuoluk buɑn k lint u yul pɑɑk, k u nunpo nɑɑn nɑn yennu nɑ, k u tɑɑ nɑɑn nɑn mupienu nɑ. K u diɑ kɑdɑbik nnɑ u nuu ni k l pɔbt, k u diitu tɑɑl tuɑ mɔkgbenŋl pɑɑk, k u gɑnŋ tɑɑl mun sie tinŋ ni, k u tiɑn nɑn kunkɔsɑɑkɑl nɑn yɑnbɔl nbɑ tuu yikn biet biɑnŋ nbɑ nɑ. Wɑɑ tiɑn gbenn yuo nbɑ nɑ, k sɑtiɑni ŋɑnlole mun tiɑn k jiin. Sɑtiɑni mɑnŋ puolpo, k n tien siil ɑ n diɑn, ŋɑɑn gbɑt kunkɔsiɑl k l nyii Yendɔunŋ ni k yet, ɑ n bɔl sɑtiɑni ŋɑnlole nbɑ yet mɑɑn nbɑ nɑ, lii be n ni, k dɑɑ dɑ. Ŋɑnn e k *mɑlɑkɑ nbɑ k n lɑ’u k u sie mɔkgbenŋl nɑ pɑɑk nɑn tinŋ ni nɑ donn u niidiitu sɑnpɑɑpo, k pol nɑn Yennu nbɑ tun be mɔkmɔk nɑn mɔkmɔk nɑ, wun nbɑ din nɑn sɑnpɑɑk nɑn bonɑ kul nbɑ be l ni, tinŋ nɑn bonɑ kul nbɑ be l ni, nɑn mɔkgbenŋl nɑn bonɑ kul nbɑ be l ni nɑ, k yet ɑ: «L biɑl yuo wɑɑnm-nnɑ e, ŋɑɑn mɑlɑkɑ nbɑ wɑɑ bɑnlole nɑ ni i tɑnŋ i pebl u kɑtkɑɑk nɑ dɑɑl nbɑ, Yennu tɑn sɑɑ tun lin nbɑ k u senn wuol ni nɑn wɑɑ din yet k tul u sɔkniinbɑ nbɑ tie u tuontunnɑ biɑnŋ nbɑ nɑ.» K kunkɔl nbɑ k n gbɑt k l nyii Yendɔunŋ ni k piɑk tien’n nɑ, biɑ piɑk k tien’n ɑ: «I sɑɑ gɑɑl kɑdɑbik nbɑ pɔbt k be mɑlɑkɑ nbɑ sie mɔkgbenŋl nɑn tinŋ ni nɑ nuu ni.» Ŋɑnn e k n sɑɑn mɑlɑkɑ nɑ buol k tɑn boi’ɔ ɑ wun tul’n kɑdɑbik mɑnŋ, k u yet ɑ: «Gɑɑt k ŋmɑn. A nuɑk ni l sii ton e, ŋɑɑn ɑ mɔb ni l sii mɑn nɑn siɑt nɑ e.» Ŋɑnn e k n gɑɑl kɑdɑbik mɑnŋ k ŋmɑn, k l mɑn nɑn siɑt nɑ n mɔb ni, ŋɑɑn lɑɑ sik n puol ni k l ji ton. Ŋɑnn e k b yet’n ɑ: «L kpɑɑ tɑlɑs nɑn fɑn ŋɑnm k sɔkn Yennu mɑɑn k jiin nibuolu bonciɑnn nɑn tingbounŋ nɑ yent bonciɑnn nɑn mɑbuolu bonciɑnn nɑn kpɑnbɑlɑ bonciɑnn po.» Ŋɑnn e k suɑ tul’n biknu pɑtu k yet’n ɑ: «Fiit k sɑɑn k sɑɑ bikn Yennu jɑɑnti ŋɑsɑɑkɑk nɑn l binbintl, k biɑ kɑn bin nbɑ jiɑntl Yennu lenŋ mɑnŋ, ŋɑɑn fɑn nyik dundounŋ k dɑɑ biki l yɑbnt, k mɑɑn n jii ŋɑnn e k tul bin nbɑ k tie *Suifnbɑ nɑ, k b tɑn sɑɑ ŋmɑɑ k lint Yennu duo ni ŋmɑɑli piinnɑ nɑn ŋɑnle. N tɑn sɑɑ te k n siɑlɑɑdɑnm bɑnle n liɑ bɔtuot, k n sɑɑ tul’b yiikuo k bii sɔknt Yennu mɑɑn kii tien niib k sɑɑ jɑnŋ dɑɑ tusl nɑn kobi ŋɑnle nɑn piinluob.» Siɑlɑ dɑnm bɑnle nɑ e tie tiini nbɑ k b yi *oliifienbɑ ŋɑnle nɑn fitɑ ŋɑnle nbɑ sie Yonmdɑɑnɔ nbɑ yen tingbounŋ nɑ tuɑnn po. K suɑ i tɑnŋ i luon wun tul’b dɑnŋ, muu nyi b mɔi ni k tɑn di b dɑtɑi mɑnŋ. Wun nbɑ kul luon wun tul’b dɑnŋ, nnɑ e k b sɑɑ kpi’u. B biɑ mɔk yiikuo k sɑɑ suol sɑɑk, k sɑɑk kɑn bɑɑ yuo nbɑ k b sɔknt Yennu mɑɑn nɑ, k biɑ mɔk yiikuo k sɑɑ te k nyun n kpɑnt sɔn, k biɑ sɑɑ fit te k fɑlbiiuk n bɑɑ tingbounŋ nɑ ni yuo kul nbɑ k b luon. Yuo nbɑ k b tɑn sɑɑ gbenn b *siɑlɑ tuonɑ nɑ, bonkobsiɑɔk nbɑ be buotsunsunŋ nbɑ kɑɑ telk nɑ sɑɑ nyi k tuok’b nɑn tɔb, k nyɑnn’b ŋɑɑn kpi’b. K b gbɑnɑnt tɑn sii duɑ dogbenŋl sɔnjok ni, siɑn nbɑ k b din kpɑɑ Yonmdɑɑnɔ dɑpunpunn pɑɑk nɑ, k duo nɑ mɔk sɑnjɔi ŋɑnle k l tie Suodonm ɑmi Ejipt. K niib nbɑ nyii nibuolu kul ni nɑn buolu kul ni nɑn mɑbuolu kul ni, nɑn tini kul niib ni nɑ, tɑn sɑɑ tikl k got b gbɑnɑnt dɑmunɑ ŋɑntɑ nɑn dɑjinn, k tɑn kɑn cɑb k bin pii b gbɑnɑnt mɑnŋ. Tingbounŋ nɑ niib sii mɔk pɑlpienn bonciɑnn niib bɑnle nɑ kuun pɑɑk, k b sɑɑ jeln k pi b lieb piini, k mɑɑn sɔkniinbɑ bɑnle nɑ dɑɑn te k tingbounŋ nɑ niib dii fɑlɑ bonciɑnn. K dɑɑ ŋɑntɑ nɑn dɑjinn nɑ nbɑ gɑl, k fuon nbɑ tien mɑnfuol nɑ nyii Yennu buol k bɑɑl kuɑ’b, k b fiil set, k jɑŋmɑɑni bonciɑnn suol bin nbɑ lɑ’b nɑ. L yuo nɑ k sɔkniinbɑ bɑnle nɑ gbɑt kunkɔsiɑl k l nyii sɑnpɑɑpo k yet’b ɑ: «Don mɑn nnɑ nɑ.» L yuo e k b duo sɑnpɑɑpo k kuɑ sɑnpɑgbounŋ ni, k b dɑtɑi nɑ sie ŋɑɑn goli. L tɑɑkpɑɑk ni k tinŋ dɑnm bonciɑnn, k dogbenŋl mɑnŋ ciɑnu tɑɑl piik ni yenn biil, k niib tusɑ ŋɑnlole kpo tinŋ mɑnŋ dɑnmu ni, k jɑŋmɑɑni suol bin nbɑ biɑl nɑ, k b donn *Yendɔunŋ ni Yennu sɑnn. Gotl mɑn, pɑlbiil nbɑ pukn munle nɑ gɑl ɑ, ŋɑɑn pɑlbiil nbɑ pukn muntɑ nɑ sɑɑ bɑɑl mɔtɑɑnɑ. *Mɑlɑkɑ nbɑ wɑɑ munlole ni nɑ pebl u kɑtkɑɑk nɑ, k kunkɔsɑɑkɑlɑ yien Yendɔunŋ ni ɑ: «Tingbounŋ nɑ nɑɑn kul kpɑnt t Yonmdɑɑnɔ Yennu nɑn u *Klistu yɑl ɑ, k u sɑɑ diɑ’b mɔkmɔk nɑn yuo nbɑ kɑɑ gbennu.» K sɑɑkɑb piinle nɑn bɑnnɑ nbɑ kɑl b nɑɑngbɑnt pɑɑk Yennu tuɑnn nɑ, k b bɑɑ finfɑbɑ k ji jiɑntl Yennu, k yien ɑ: «T Yonmdɑɑnɔ Yennu, wun nbɑ mɔk yiikuo kul, wun nbɑ biɑ be, k din tun be nɑ, t tien’ɑ niipuouk, k mɑɑn ɑ jii ɑ yiikuogbenŋl k ji piin k yen tingbounŋ nɑ. K tingbounŋ yent kul niib donn wutuol, k ɑ mɔnŋ wutuol mun duo. K yuo bɑɑl nɑn k ɑ bu bin nbɑ kpo nɑ buut, k tul ɑ tuontunnɑ nbɑ tie ɑ sɔkniinbɑ nɑ b nyuɑt, nɑn ɑ niib kul nbɑ cɔln ɑ sɑnn, bin nbɑ tie nijɑɑnɑ nɑn nitɑli kul, k yuo biɑ bɑɑl nɑn k ɑ biil bin nbɑ biil tingbounŋ nɑ.» Ŋɑnn e k Yennu jɑɑnti ŋɑsɑɑkɑk nbɑ be Yendɔunŋ ni nɑ luot, k lɑkl nbɑ k Yennu *senni be l ni nɑ be dieok nɑ ni. K sɑnyiknti nyikntl, k sɑtiɑni tiɑn nɑn fuut, k tinŋ dɑnm, k sɑkɑɑnɑ nbɑ gbenŋ bonciɑnn bɑɑ. L puolpo k nyingbenŋl dɔkt sɑnpɑɑpo, k puo gbɑb yennu nɑn cincenn nɑ, k sie ŋmɑɑlk pɑɑk, k yil ŋmɑɑbilɑ piik nɑn ŋɑnle nɑn foklk nɑ, k puo mɑnŋ mɔk puol k bui mɑtyiɑlu. Ŋɑnn e k nyinliel biɑ dɔkt sɑnpɑɑpo, k timunt nnɑ sie k mɔk yulɑ ŋɑnlole nɑn yinɑ piik, k nɑɑnfokli ŋɑnlole yil u yulɑ ŋɑnlole nɑ pɑɑk. K u jii u juol k dɑt ŋmɑɑbilɑ nɑ bɔktu ŋɑntɑ ni yenn k nyinn’l sɑnpɑɑpo k lu’l tingbounŋ nɑ ni, k ji sie puo nbɑ mɔ mɑtyiɑlu nɑ tuɑnn, k guu ɑ, wun mɑl gbenn ɑ, k wun ji ŋmɑn sɑnpɑntk nɑ. K puo mɑnŋ tɑn mɑl bonjɑk nbɑ sii diɑ kut dɑnml kii yen i buolu kul nɑn pɑnŋ, k b nyiiɑl bik nɑ k sɑɑn nɑn’ɔ Yennu buol, u nɑɑngbounŋ pɑɑk. K puo nɑ mun ciɑl k sɑɑn pɑɑnpieonŋ ni siɑn nbɑ k Yennu tien siil k guun’ɔ nɑ, k sii dint’ɔ k sɑɑ diɑn dɑɑ tusl nɑn kobi ŋɑnle nɑn piinluob. Ŋɑnn e k tɔb fiil *Yendɔunŋ ni. K *mɑlɑkɑ wun nbɑ k u sɑnn yi Miisiɑl nɑ, k ŋuɑ nɑn u mɑlɑklieb kɔn k tuokt timunt nɑ nɑn u mun yɑɑ mɑlɑkɑɑnbɑ nɑ, k b nyɑnn timunt nɑn u mɑlɑkɑɑnbɑ nɑ, k k cɑb’b ɑ bii be Yendɔunŋ ni. K b jii timunt nɑ k lu’u nɑn-yel po. U ponŋ tuu tie wɑɑɔk nbɑ tuu be e wɑɑ, k u sɑnn yi Sɑnbiiltuɑ ɑmi *Sɑɑtɑn, k tuu kpɑnn tingbounŋ nɑ tieb kul nɑ. K b nyinn ŋuɑ nɑn u mɑlɑkɑɑnbɑ k lu’b tingbounŋ nɑ ni. L yuo k n gbɑt kunkɔsɑɑkɑl sɑnpɑɑpo k l yien ɑ: «Mɔtɑɑnɑ, Yonmdɑɑnɔ Yennu fielu nɑn u yiikuo nɑn u nɑɑn nɑn u *Klistu yiikuo bɑɑl nɑ, k mɑɑn wun nbɑ tuu tɑɑl t nɑɑ wɑɑs Yennu tuɑnn, yennu nɑn nyiɑɔk nɑ, b ji nyinn’ɔ k lu’u wɑɑ. Pebik nɑ sɔn nɑn u lɑbɑmɑnn nbɑ k b muɑntl nɑ pɑɑk e k b nyɑnn nyɑnnu, k b din yit b mɑnfuol sɑlk e k gɑɑl kuun. L pɑɑk, yinm nbɑ be Yendɔunŋ ni nɑ, ii mɔk mɑn pɑlpienn. Ŋɑɑn tingbounŋ nɑ niib nɑn bin nbɑ be mɔkgbenŋl ni ŋɑnin, pɑlbiil be b pɑɑk, k mɑɑn Sɑɑtɑn sik b pɑɑk nɑn wutogbenŋl, wɑɑ mi nɑn u yuo ji k yɑb nɑ pɑɑk.» *Timunt nɑ nbɑ bɑnn nɑn b jii’u k lu tingbounŋ nɑ ni nɑ, k u ji wɑɑ puo nbɑ mɑl bonjɑk nɑ, ɑ wun suol’ɔ. K b jii kɑnbɑgbenŋl kpinkpɑnt ŋɑnle k tul puo nɑ, ɑ wun yukl k sɑɑn muuk ni kii sɑɑ kii be siɑn nbɑ k b sii dint’ɔ k jɑnŋ binɑ ŋɑntɑ nɑn binjinn k wɑɑɔk nɑ ji dɑɑ fit k so’u. K timunt nɑ puut nyunpɑnɑ puo nɑ pɑɑk k l nɑɑn nɑn mɔkl ni nyun nɑ, ɑ nyun nɑ n di’u, ŋɑɑn k tinŋ sonm puo nɑ k yɑɑt ŋɑɑn jiin mubn nyun nbɑ nyii timunt mɔb ni nɑ pɑɑk. K timunt nɑ wutuol duo nɑn puo nɑ bonciɑnn, k u sɑɑn ɑ wun sɑɑ kɔn nɑn puo nɑ yɑɑbuonɑ nbɑ biɑl k wɑɑ Yennu *senni k diɑ Yiesu lɑbɑmɑnn nɑ, ŋɑɑn sɑɑn sie mɔk-kpinŋ. K n lɑ k muuk ni bonkobuk nyii mɔkgbenŋl ni, k mɔk yinɑ piik nɑn yulɑ ŋɑnlole, k nɑɑnfokli piik yil u yinɑ piik nɑ pɑɑk, k sɑnn nbɑ suki Yennu nɑ diɑn u yulɑ nɑ pɑɑk. K muuk ni bonkobuk nbɑ k n lɑ nɑ nɑɑn nɑn nɑɑmuuk nɑ, k mɔk tɑɑnyɑlgbenŋɑ, k u mɔb nɑɑn nɑn yɑnbɔl mɔb nɑ. K timunt nɑ tul muuk ni bonkobuk nɑ u mɔnŋ pɑnŋ nɑn u nɑɑngbounŋ nɑn u yiikuo nbɑ yɑb. K n lɑ k l nɑɑn nɑn dɑnŋ nbɑ jɑnŋ nɑn kuun be bonkobuk nɑ yuyenn pɑɑk, ŋɑɑn k u lek pɑɑk ɑ, k l ji bɑkt tingbounŋ nɑ tieb kul, k b ji wɑɑ’u, b din jiɑntl timunt nɑ, k mɑɑn u jii u yiikuo k tul muuk ni bonkobuk nɑ k yien ɑ: «Ŋmee tie nɑn muuk ni bonkobuk nɑ? Ŋmee sɑɑ fit kɔn nɑn muuk ni bonkobuk mɑnŋ i?» K b cɑb muuk ni bonkobuk nɑ ɑ wuu piɑk nɑn jɑpɑɑt kii suki Yennu, k biɑ cɑb’ɔ yiikuo nbɑ k u sii tuun k sɑɑ diɑn ŋmɑɑli piinnɑ nɑn ŋɑnle. K u piin k piɑk suki Yennu nɑn u sɑnn nɑn siɑn nbɑ k u be nɑ, nɑn bin nbɑ kul be *Yendɔunŋ ni. K b biɑ cɑb’ɔ yiikuo ɑ wun kɔn nɑn Yennu niib k nyɑnn’b, k biɑ cɑb’ɔ yiikuo k u sɑɑ yent buolu kul nɑn nibuolu kul nɑn mɑbuolu kul nɑn tini kul niib. Niib kul nbɑ be tingbounŋ nɑ ni, k b sɑnɑ din k diɑn mɑnfuol kɑdɑɑɔk ni yuo nbɑ k *dulnyɑ dɑɑ din kɑɑ nɑ, b sɑɑ jiɑnt muuk ni bonkobuk nɑ. Mɑnfuol kɑdɑɑɔk nɑ tie Pebik nbɑ k b din kpii’u nɑ yɑl e. Wun nbɑ mɔk tubɑ, wun gbiint. Wun nbɑ tie sɑɑ kuɑ dɑnsɑlk, u set sɑɑ kuɑ dɑnsɑlk ɑ. K wun nbɑ mun k b sɑɑ kpi’u nɑn *juk -bɑnjiɑk, b sɑɑ kpi’u wɑɑ. L pɑɑk, l ŋɑn k Yennu niib i mɔk mintl k tien’ɔ yɑdɑ fɑnu. L puolpo k n biɑ lɑ muuk ni bonkobluɑ k u nyii tinŋ ni k mɔk yinɑ ŋɑnle nbɑ nɑɑn nɑn Pebik yinɑ nɑ, ŋɑɑn k u piɑk k u kunkɔl nɑɑn nɑn timunt kunkɔl nɑ, k u sie muuk ni bonkobsinsinn nɑ tuɑnn po, k jii muuk ni bonkobsinsinn mɑnŋ yiikuo nbɑ yɑb nɑ, k muks tingbounŋ nɑ tieb kul, ɑ bii jiɑntl muuk ni bonkobsinsinn nbɑ lɑ dɑnŋ nbɑ yɑɑ lin kpi’u k u tɑn pɑɑk nɑ. K muuk ni bonkobuk nbɑ pukn bɑnle nɑ biɑ tun bɑktnɔunŋ nyinɑ, k te k muu nɑ nyii sɑnpɑɑpo k sik tinŋ ni, k niib nɑ lɑ nɑn b ninbinɑ. K bɑɑ cɑb’ɔ k u tuun bɑktnɔunŋ nyinɑ nɑ muuk ni bonkobsinsinn tuɑnn nɑ, k u kpɑnn tingbounŋ nɑ tieb, k yet’b ɑ bin mɑɑ pɑtl k lii nɑɑn muuk ni bonkobuk nbɑ lɑ juk-bɑnjiɑk dɑnŋ ŋɑɑn tɑn k kpo nɑ. K b cɑb muuk ni bonkobuk nbɑ pukn bɑnle nɑ yiikuo k u fuont k tien pɑtl nbɑ nɑɑn nɑn muuk ni bonkobsinsinn nɑ, k pɑtl mɑnŋ tɑn fit piɑk k te k b kpi bin nbɑ k sɑk ɑ bin jiɑnt’ɔ nɑ. K muuk ni bonkobuk mɑnŋ biɑ muks niib kul, bin nbɑ tie nitɑli nɑn bin nbɑ tie nijɑɑnɑ, mɔktɑ nɑn fɑlɑ dɑnm, dɑɑbɑ nɑn yent-n-mɔnŋ dɑnm, ɑ wun dɔk b niidiitu ɑmi b yugbiɑ pɑɑk. L i tie k dɔuk nɑ kɑɑ nilɔ pɑɑk, u k fit dɑɑ siɑl ɑmi k kɔi siɑl, k dɔuk nɑ tie muuk ni bonkobuk nɑ sɑnn ɑmi u sɑnn nɑnml. Lin nbɑ nɑ tie yɑnfɑntl yɑl e. Wun nbɑ kul mɔk yɑn, wun dukn bɑnn k muuk ni bonkobuk mɑnŋ nɑnml pɑɑk, k nɑnml mɑnŋ tie jɑsuɑ sɑnn e, k l nɑnml tie kobi ŋɑnluob nɑn piinluob nɑn ŋɑnluob. Ŋɑnn e k n got k lɑ Pebik nɑ k u sie juɑl nbɑ k b yil *Siiɔn nɑ pɑɑk, k niib tusɑ kobk nɑn tusɑ piinnɑ nɑn tusɑ ŋɑnnɑ, bin nbɑ mɔk u sɑnn nɑn u Bɑɑ sɑnn b yugbiɑ pɑɑk, k b lɑkn k sie nɑn’ɔ. K n gbɑt k kunkɔl nyii *Yendɔunŋ ni k fu nɑn siɑɔk kpenu nɑ, k biɑ nɑɑn nɑn sɑtiɑnpɑɑli nbɑ tuu tiɑn biɑnŋ nbɑ nɑ, k biɑ nɑɑn nɑn bɑfɑɑlɑ nbɑ tuu fɑɑ b biɑt k l mɔ biɑnŋ nbɑ nɑ. K niib tusɑ kobk nɑn tusɑ piinnɑ nɑn tusɑ ŋɑnnɑ mɑnŋ sie nɑɑngbounŋ nɑn bonfuɑ bɑnnɑ nɑ nɑn sɑɑkɑb nɑ tuɑnn po, k yiin yɑnpɑɑni nbɑ k suɑ k fit tumi, sie niib mɑnŋ nbɑ k Yennu dɑɑ’b tingbounŋ nɑ ŋɑɑtieb ni kuukuɑ. Ŋɑnm e tie jɑb nbɑ k kuɑ boncunconsn jɑknt ni k k mi duɑ nɑn puo, ŋɑnm e wɑɑ Pebik nɑ k sɑɑ siɑn nbɑ kul k u sɑɑ. Ŋɑnm e tie bin nbɑ k Yennu dɑɑ’b nisɑɑli sinsuuk ni k tie sinsinn *mɑlunŋ k tul Yennu nɑn Pebik nɑ. Fɑɑk k nyi b mɔi ni k suɑ biɑ k fit tɑɑl’b. K n biɑ lɑ mɑlɑkluɑ k u yuuk sɑnpɑɑpo k diɑ lɑbɑmɑnn nbɑ kɑɑ gbennu ɑ wun muɑntl k tul tingbounŋ nɑ tieb: tini kul niib, nɑn buolu kul, nɑn mɑbuolu kul, nɑn nibuolu kul, k u yet nɑn kunkɔsɑɑkɑl ɑ: «Ii tiin mɑn Yennu kii biɑ kii dontl u sɑnn, k mɑɑn yuo nbɑ k u sɑɑ bu niib buut nɑ bɑɑl ɑ. Ii jiɑntl ŋuɑ Yennu nbɑ din nɑn sɑnpɑɑk nɑn tingbounŋ nɑ nɑn mɔkgbenŋl nɑn nyuntonɑ kul nɑ.» K mɑlɑkluɑ wei k pukn sinsinn yuɑ nɑ pɑɑk k yien ɑ: «Dogbenŋl Bɑbiilonn nɑ bɑɑ wɑɑ. U boncunconsn te k nibuolu kul kuɑ jɑknt ni k tul’b dɑmunŋ nbɑ pɑɑl nɑ k b nyuu k yib k wɑɑt.» K *mɑlɑkɑ nbɑ pukn bɑntɑ nɑ wɑɑ b pɑɑk k yien nɑn kunkɔsɑɑkɑl ɑ: «Wun nbɑ kul jiɑntl muuk ni bonkobuk nɑ nɑn u nɑɑɔnŋ nɑ, k mɔk b dɔuk u yugbiɑl pɑɑk ɑmi u nuu ni, l dɑɑnɔ sɑɑ nyu Yennu wutuol nbɑ tie nɑn dɑpɑɑln nbɑ k u muɑn k tien dɑŋmɑnbɑnŋ ni k nyun kɑɑ lenŋ nɑ. L dɑɑnɔ biɑ tɑn sɑɑ lɑ fɑlɑ muu nbɑ k sɑlwuutɑ di nɑn’n nɑ ni, Yennu mɑlɑkɑɑnbɑ nɑn Pebik nɑ tuɑnn po. K b muksuk mɑnŋ munyuut sɑɑ do sɑnpɑɑpo nɑn yuo nbɑ kɑɑ gbennu. Fuon kɑɑ yennu ni k boi nyiɑɔk, k tul bin nbɑ jiɑntl muuk ni bonkobuk nɑ nɑn u nɑɑɔnŋ nɑn wun nbɑ kul mɔk u dɔuk nbɑ tie u sɑnn b pɑɑk nɑ.» L pɑɑk, l ŋɑn k Yennu niib nbɑ sɑɑk u *senni k tien Yiesu yɑdɑ nɑ ii mɔk suklu. K n biɑ gbɑt kunkɔl k l nyii Yendɔunŋ ni k yien ɑ n diɑn mɑɑn nɑ, ɑ: «Mɔtɑɑnɑ k jikt sɑɑ, pɑlpienn be dɑnm nbɑ kpo Yonmdɑɑnɔ ni nɑ pɑɑk.» K Foŋɑnm nɑ sɑk ɑ: «Mɔmɔnm, b sɑɑ lɑ fuon b tuongbenŋɑ pɑɑk, k mɑɑn b tuonɑ nyuɑt e nɑ.» K n biɑ got k lɑ sɑnpɑgbɑnpieonŋ, k suɑ kɑl l pɑɑk k nɑɑn nisɑɑlk, k yil sɑlmɑ foklk, k diɑ gɔtuk nbɑ di nɑ u nuu ni. K mɑlɑkluɑ nyii Yennu jɑɑnti ŋɑsɑɑkɑk ni k yien nɑn kunkɔsɑɑkɑl k tien wun nbɑ kɑl sɑnpɑgbounŋ nɑ pɑɑk nɑ ɑ: «Jiin ɑ gɔtuk nɑ k jɑɑn tingbounŋ nɑ, l jɑɑnu mɑnŋ yuo e nɑ, k mɑɑn l kul biel ɑ.» K wun nbɑ kɑl sɑnpɑgbounŋ nɑ pɑɑk nɑ jii u gɔtuk nɑ k gɑɑn tingbounŋ pɑɑk, k jɑɑn tingbounŋ nɑ. K mɑlɑkluɑ mun nyii Yennu jɑɑnti ŋɑsɑɑkɑk nbɑ be Yendɔunŋ ni k mun diɑ gɔtuk nbɑ di. L yuo k mɑlɑkɑ nbɑ tie muu sɑɑkuɑ nɑ nyii binbintl nɑ buol ni k yien nɑn kunkɔsɑɑkɑl k tien mɑlɑkɑ nbɑ diɑ gɔtuk nbɑ di nɑ ɑ: «Jiin ɑ gɔtuk nbɑ di nɑ k siɑ tingbounŋ nɑ tilonti nbɑ k b yi *fiinyɑ nɑ luɑnɑ, k mɑɑn luɑnɑ mɑnŋ kul mɔnn ɑ.» K mɑlɑkɑ nɑ jii u gɔtuk nɑ k siɑl tingbounŋ nɑ tiluɑnɑ nɑ, k jii luɑnɑ mɑnŋ k tien gbieok nbɑ k b ŋmɑki luɑnɑ l ni k nyun nyi nɑ. Gbieok nɑ tie Yennu wutogbenŋl nyinn nɑ e. K b ŋmɑkl luɑnɑ nɑ duo nɑ kpinŋ, k sɔn nyii siɑn nbɑ k b ŋmɑki luɑnɑ nɑ k pukl kiiluomiɑtɑ kobi ŋɑntɑ k l sumiu sɑɑ bɑɑl nilɔ yiɑk ɑ. L yuo k n lɑ bɑktnɔunŋ nyinn nbɑ gbenŋ *Yendɔunŋ ni, k *mɑlɑkɑɑnbɑ bɑnlole diɑ bonbiil buolu tɑɑl munlole nbɑ tenn puol k Yennu sɑɑ wɑnn u wutuol l ni k gbenn. K n lɑ siɑl k l nɑɑn nɑn miɑnu k tie nɑn mɔkgbenŋl nɑ, k ŋmɑt nɑn muu, k n biɑ lɑ bin nbɑ kɔn k nyɑnn muuk ni bonkobuk nɑ nɑn u nɑɑɔnŋ nɑ nɑn u sɑnn kɑnn nɑ, k b sie k kpiɑ mɔkgbenŋl nbɑ nɑɑn miɑnu nɑ k diɑ biɑt nbɑ k Yennu tul’b nɑ, k b yiin yɑnŋ nbɑ k Yennu tuontunnɔ Muois din yiin nɑ nɑn Pebik nɑ yɑnŋ ɑ: «T Yonmdɑɑnɔ Yennu nbɑ mɔk yiikuo kul, ɑ tuonɑ tie bɑktnɔunŋ tuonjɑɑnɑ nbɑ yɑɑl ŋɑɑn lit’t, ɑ sɔni tuok k biɑ tie bɑlmɔni. Fin e tie nibuolu kul Kpɑnbɑl. Yonmdɑɑnɔ, ŋmee be k kɑn tin’ɑ k biɑ kɑn dont ɑ sɑnn i? K mɑɑn ɑ tuonŋɑnɑ nyii pɑɑnu ni wɑɑ. Nibuolu kul tɑn sɑɑ bɑɑl k jiɑnt’ɑ, k mɑɑn ɑ bɑlmɔni tuonɑ nyii pɑɑnu ni wɑɑ.» L puolpo e k n biɑ lɑ k Yennu jɑɑnti ŋɑsɑɑkɑk nbɑ be Yendɔunŋ ni nɑ, k l luot, k Yennu tuntuok lɑnbounŋ be lenŋ. K mɑlɑkɑɑnbɑ bɑnlole nbɑ diɑ bonbibuolu ŋɑnlole nɑ nyii Yennu jɑɑnti ŋɑsɑɑkɑk ni, k liɑ tɑpieni nbɑ kɑɑ jɑknsiɑt i k biɑ nyili, k jii cincenlolɑ k lol b nyɑɑt ni. K bonfuɑ bɑnnɑ nɑ yenɔ jii sɑlmɑ seni ŋɑnlole k tul mɑlɑkɑɑnbɑ bɑnlole nɑ, k Yennu nbɑ be nɑn yuo nbɑ kɑɑ gbennu nɑ wutuol gbie l seni ni, k Yennu yentsɑɑkɑl nɑn u yiikuo te k munyuut gbie u jɑɑnti ŋɑsɑɑkɑk nɑ, k suɑ ji k fit kuɑ lenŋ nɑn yuo nbɑ k bonbibuolu ŋɑnlole nbɑ k mɑlɑkɑɑnbɑ bɑnlole diɑ nɑ n tɑn gbenn. L puolpo k n biɑ gbɑt k kunkɔsɑɑkɑl nyii Yennu jɑɑnti ŋɑsɑɑkɑk nɑ ni, k piɑk tien *mɑlɑkɑɑnbɑ bɑnlole nɑ ɑ: «Jiin seni ŋɑnlole nbɑ gbie nɑn Yennu wutuol nɑ k kpɑɑl muɑn tingbounŋ nɑ ni.» K sinsinn mɑlɑkɑ nɑ sɑɑn k sɑɑ kpɑɑl lin nbɑ be u senŋ ni nɑ k muɑn tingbounŋ nɑ ni, k nɑlɑ nbɑ b k yiɑl bonciɑnn suol bin nbɑ mɔk bonkobuk nɑ dɔuk k biɑ jiɑntl u nɑɑɔnŋ nɑ. K mɑlɑkɑ nbɑ pukn bɑnle nɑ mun kpɑɑl lin nbɑ be u senŋ ni nɑ k muɑn mɔkgbenŋl ni, k nyun nɑ kpɑnt k nɑɑn nɑn kpiemɔ sɔn nɑ, k bonfuɑ nbɑ kul be mɔkgbenŋl nyun nɑ ni kpo. K mɑlɑkɑ nbɑ pukn bɑntɑ nɑ mun kpɑɑl lin nbɑ be u senŋ ni nɑ k muɑn kpeni nɑn nyunbuɑ ni k l nyun nɑ kpɑnt sɔn. L puolpo, k n gbɑt mɑlɑkɑ nbɑ tie nyun sɑɑkuɑ nɑ yien ɑ: «T Yonmdɑɑnɔ, *Ŋɑnɔ, wun nbɑ be, k biɑ din tun be nɑ, ɑ buut nɑ bunu tie lin nbɑ tuɑk sɔnu e, k mɑɑn niib kpii ɑ niib nɑn ɑ sɔkniinbɑ, k ɑ jii sɔn k tul’b ɑ bin nyu. Ŋɑnn e jɑnŋ nɑn’m.» K n biɑ gbɑt k kunkɔl nyii binbintl nɑ buol k yien ɑ: «T Yonmdɑɑnɔ Yennu nbɑ mɔk yiikuo kul, ɑ buutnbɑ nbɑ k ɑ bu nɑ tie mɑmɔnm e, k tie lin nbɑ tuɑk sɔnu.» K mɑlɑkɑ nbɑ pukn bɑnnɑ nɑ kpɑɑl lin nbɑ be u senŋ ni nɑ k muɑn yennu pɑɑk ŋɑɑn cɑb’ɔ yiikuo, ɑ l tonu nɑ n ŋɑnm funn niib k yekt’b nɑn muu nɑ. K yennu nɑ ŋɑnm yekt’b nɑn muu nɑ, k b ji suki Yennu nbɑ mɔk bonbiil nɑ yiikuo nɑ sɑnn, ŋɑɑn k b lek k sɑk nɑn bin mɔ kuɑŋɑɑn k lebt binbenŋ k tul’ɔ *yudɑnt. K mɑlɑkɑ nbɑ pukn bɑnŋmu nɑ kpɑɑl lin nbɑ be u senŋ ni nɑ k muɑn bonkobuk nɑ nɑɑngbounŋ pɑɑk, k nɑɑn mɑnŋ yent kul kpɑnt bunbɔnn, k niib nyiitl b nyɑnɑ tont nɑ pɑɑk, k biɑ suki Yennu nbɑ be *Yendɔunŋ ni nɑ, k mɑɑn b tont nɑn b nɑlɑ nɑ pɑɑk, ŋɑɑn biɑ k sɑk nɑn bin mɔ kuɑŋɑɑn k lebt binbenŋ b tuonɑ pɑɑk. K mɑlɑkɑ nbɑ pukn bɑnluob nɑ mun kpɑɑl lin nbɑ be u senŋ ni nɑ k muɑn kpengbenŋl nbɑ k b yi’l Eflɑɑt nɑ ni, k l nyun nɑ fuɑl k tul sɔnjok, k kpɑnbɑlɑ nbɑ be yendopo nɑ fit gɑl puot. K n lɑ nɑlnbiit bɑntɑ k b nɑɑn nɑn pɔntɑ nɑ k nyii timunt nɑ nɑn bonkobuk nɑ nɑn fɑɑk sɔkni nɑ mɔi ni. B tie pol sei nbɑ tuun bɑktnɔunŋ tuonɑ e k lin tingbounŋ nɑ ni kpɑnbɑlɑ buol, k tiki’b ɑ bin tuok tɑb nɑ, Yennu wun nbɑ mɔk yiikuo kul dɑgbenŋl dɑɑl mɑnŋ. Yonmdɑɑnɔ yet ɑ: «Gbiintl mɑn. N bɑɑt nɑn nɑn-yukɔ nbɑ tuu bɑɑl biɑnŋ nbɑ nɑ e. Pɑlpienn be dɑɑnɔ nbɑ k guɑnt ŋɑɑn nyɔi nɑ pɑɑk, k diɑ u tiɑt k kɑn sonm yɑnn, k niib kɑn lɑ u fei.» K nɑlnbiit nɑ tikl kpɑnbɑlɑ nɑ k sɑɑn nɑn’m siɑn nbɑ k Islɑɑeltieb yi Almɑɑgedɔn nɑ. K mɑlɑkɑ nbɑ pukn bɑnlole nɑ mun kpɑɑl lin nbɑ be u senŋ ni nɑ k muɑn wɑn ni, k kunkɔsɑɑkɑl nyii nɑɑngbounŋ nbɑ be Yennu jɑɑnti ŋɑsɑɑkɑk ni nɑ k yet ɑ: «L tun ɑ.» K sɑnyiknti nyikntl, k fuut bonciɑnn be, k sɑtiɑni tiɑn fu, k tinŋ jekl bonciɑnn. L tinŋ jeklu buolu k mi jekl kɑɑ wɑɑ lɑɑ nyii yuo nbɑ k Yennu din nɑn nifosɑɑli, k mɑɑn lɑɑ jekl bonciɑnn biɑnŋ nbɑ nɑ. K dogbenŋl nɑ bɔkt tɑɑl muntɑ, k nibuolu kul digbɑnɑ bɑɑ. Yennu tiɑl dogbenŋl Bɑbiilonn nɑ po, k tul’ɔ u dɑŋmɑnbɑnŋ k l gbie nɑn dɑmunŋ nbɑ tie u wutogbenŋl nɑ. Digbɑnɑ nbɑ k nyun lint’l nɑ kul ɑ ciɑl, k b ji k fit lɑ juɑt kul ɑ. K sɑkɑɑnɑ nbɑ gbenŋ k l yenn kpɑi tie nɑn nɑɑl nɑ nyii sɑnpɑɑpo k tɑn bɑɑ niib pɑɑk, k b suki Yennu sɑkɑɑngbenŋɑ nbɑ bɑɑ b pɑɑk nɑ pɑɑk k mɑɑn l din tie fɑlgbenŋl. Tɔn, k *mɑlɑkɑɑnbɑ bɑnlole nbɑ diɑ seni ŋɑnlole nɑ yenɔ bɑɑl n buol ni k yet’n ɑ: «Bɑɑt nɑ, mɑn wɑnn’ɑ puocunconbiiuk nbɑ kɑl kpeni bonciɑnn nyun pɑɑk nɑ tubdɑtu nbɑ tɑn sii tie biɑnŋ nbɑ. Tingbounŋ nɑ kpɑnbɑlɑ conm nɑn’ɔ, k tingbounŋ nɑ niib nyuu u dɑmunŋ nbɑ tie boncunconsn nɑ k yib.» K Foŋɑnm nɑ sik n pɑɑk k mɑlɑkɑ nɑ jii’n k sɑɑn nɑn’n muuk ni, k n lɑ puo k u jɑk muuk ni bonkobmɔnŋ pɑɑk, k sɑnbiit nbɑ suki Yennu sɑnn nɑ diɑn lint muuk ni bonkobuk mɑnŋ gbɑnɑnt kul po, k bonkobuk mɑnŋ mɔk yulɑ ŋɑnlole nɑn yinɑ piik. K puo nɑ liɑ tɑmɔnt k b jii sɑlmɑ, nɑn tɑnɑ nbɑ nyili, nɑn lin nbɑ yɑɑ dɑɑuk pɑɑl k b yi pelil nɑ k tien wɑɑ tuu tuutuutɑ nbɑ, nɑn wɑɑ liɑ lɑɑni nbɑ, nɑn bɑni nbɑ k u pil nɑ. K u diɑ sɑlmɑ senŋ nbɑ k u * boncuncontuonn jɑknt, nɑn lin nbɑ kul k ŋɑn nɑ gbie lenŋ. K sɑnn nbɑ k suɑ k mi l pɑɑk diɑn u yugbiɑl pɑɑk k l tie: «Dogbenŋl Bɑbiilonn, puocunconnɑ nɑn bin nbɑ tuun lin nbɑ b tingbounŋ nɑ ni nɑ nɑɑ.» K n lɑ k puo nɑ nyuu Yennu niib sɔn nɑn bin nbɑ tie Yiesu siɑlɑɑdɑnm nɑ sɔn k yib. Mɑɑ lɑ’u nnɑ mɑnŋ k l bɑkt’n bonciɑnn. K mɑlɑkɑ nɑ boi’n ɑ: «Bee k l yɑɑl ŋɑɑn lit’ɑ ni? N sɑɑ wɑnn’ɑ puo nɑ nɑn bonkobuk nbɑ k u jɑk k l mɔk yulɑ ŋɑnlole nɑn yinɑ piik nɑ pɑɑk nbɑ tie biɑnŋ nbɑ: Bonkobuk nbɑ k ɑ lɑ nɑ din fo siɑn-yuo, ŋɑɑn ji k fo, ŋɑɑn sɑɑ nyi buotsunsunŋ nbɑ kɑɑ telk nɑ ni k do, k sɑɑ sɑɑn siɑn nbɑ k b sɑɑ biil’ɔ nɑ buol. K l sɑɑ bɑkt niib nbɑ be tingbounŋ nɑ ni, k b sɑnɑ k diɑn mɑnfuol kɑdɑɑɔk ni yuo nbɑ k *dulnyɑ dɑɑ din k kɑɑ nɑ, k mɑɑn bonkobuk mɑnŋ din fo, ŋɑɑn ji k fo, ŋɑɑn biɑ tɑn sii fo. «Lin nbɑ nɑ luon yɑn nɑn bɑnnu e. Yulɑ ŋɑnlole nɑ tie juɑt ŋɑnlole nbɑ k puo nɑ kɑl l pɑɑk nɑ e, k biɑ tie kpɑnbɑlɑ bɑnlole: k bɑnŋmu ji kɑɑ, k yenɔ tie kpɑnbɑl mɔtɑɑnɑ, k luɑ dɑɑ k dii nɑɑn; ŋɑɑn u tɑnŋ i dii nɑɑn, u yuo nɑ kɑn wei. Bonkobuk nbɑ din fo k ji k fo nɑ pukn kpɑnbɑlɑ bɑnlole nɑ pɑɑk, k wɑɑ bɑnniin ni. U mun tɑn sɑɑ sɑɑn siɑn nbɑ k b sɑɑ biil’ɔ nɑ buol. «K yinɑ piik nbɑ k ɑ lɑ nɑ tie kpɑnbɑlɑ piik, ŋɑɑn b dɑɑ k dii nɑɑn nɑ, ŋɑɑn ŋɑnm nɑn bonkobuk nɑ tɑn sɑɑ lɑkn di nɑɑn k sɑɑ wei wɑɑnm-nnɑ. B piik nɑ tɑn sɑɑ tɑɑn mɔb k jii b pɑnŋ nɑn b yiikuo nɑ k tul bonkobuk nɑ, k b tɑn sɑɑ kɔn nɑn Pebik nɑ, ŋɑɑn Pebik nɑ sɑɑ nyɑnn’b, k mɑɑn u tie yonmdɑnm kul Yonmdɑɑnɔ nɑn kpɑnbɑlɑ kul Kpɑnbɑl, k u *puolpoweitieb nbɑ k u yiin’m k lukt’b, k b diɑ bɑlmɔni wɑnnu nɑ, b mun sɑɑ nyɑnn’b.» Ŋɑnn e k mɑlɑkɑ nɑ biɑ yet’n ɑ: «Nyun nbɑ k ɑ lɑ k puocunconn kɑl l pɑɑk nɑ tie nibuolu buolu nɑn nigbounŋ nɑn tingbounŋ yent nɑn mɑbuolu kul niib e. Yinɑ piik nbɑ k ɑ lɑ nɑ, ŋɑnm nɑn bonkobuk nɑ sii nɑn puocunconn nɑ, k b sɑɑ liɑt u tiɑt kul k nyik’ɔ yɑnn, k sɑɑ pɑt u gbɑnɑnt k ŋmɑn, ŋɑɑn juo’u lin nbɑ tenn nɑ muu. K mɑɑn Yennu tien dudukt b pɑlɑ ni, ɑ bii tuun wɑɑ luon lin nbɑ k b tɑɑn mɔyonm k jii b nɑɑngbounŋ yiikuo k tul bonkobuk nɑ mɔkmɔk nɑn Yennu mɑɑn mɑnŋ nbɑ tɑn sɑɑ gbie. Puo nbɑ k ɑ lɑ nɑ mun tie dogbenŋl nbɑ tie tingbounŋ nɑ kpɑnbɑlɑ yudɑɑnɔ.» L puolpo k n biɑ lɑ mɑlɑksuɑ k u nyii *Yendɔunŋ ni k siik, k mɔk yiikuo bonciɑnn, k u yentu ŋɑnm yent tingbounŋ nɑ lokl kul po. U yien nɑn kunkɔsɑɑkɑl ɑ: «Dogbenŋl Bɑbiilonn nɑ bɑɑ wɑɑ, l set bɑɑ wɑɑ. U ji kpɑnt siɑn nbɑ k polɑ kuɑ lenŋ k nɑlnbiit kul nɑn nuɑnbiit kul nbɑ mɔk sinsint bɔl b mɔnŋ lenŋ. K mɑɑn u te k nibuolu kul nyuu u boncunconsn dɑɑn k l nɑɑn nɑn u tul’b dɑmunŋ nbɑ pɑɑl k b nyuu k yib k wɑɑt, k tingbounŋ kpɑnbɑlɑ conm nɑn’ɔ, k tingbounŋ nɑ kpinkpentɑ kpɑnt mɔktɑ u niɑnbiiuk nbɑ mɑntk yɑbt nɑ pɑɑk.» Ŋɑnn e k n biɑ gbɑt kunkɔsɑɑkɑl k l nyii Yendɔunŋ ni k yien ɑ: «N niib, nyint i mɔnŋ mɑn duo nɑ ni, ɑ i dɑɑ lɑknt tuun tuonbiit nɑn’ɔ, k bonbiil nbɑ k u sɑɑ lɑ u biit pɑɑk nɑ dɑɑ tɑɑbt’i ni, k mɑɑn duo nɑ biit nɑ yɑb k duo bonciɑnn k bɑɑl sɑnpɑgbɑnt ɑ, k Yennu tiɑn u biit mɑnŋ po. Tɔn, tient k jiin’ɔ nɑn wɑɑ tuu tie biɑnŋ nbɑ nɑ, k pɑ jiin’ɔ u biit pɑnn tɑɑl munle, k gbien u senŋ nɑn dɑmunŋ nbɑ k u din tul’i, k l pɑnŋ ii yɑb tɑɑl munle. Tient’ɔ muksuk nɑn pɑlbiil k lin jɑnŋ nɑn dontl nɑn mɔktuk nbɑ k u din tul u mɔnŋ nɑ. U yien u pɑl ni ɑ: ‹N kɑl k tie puo nbɑ tie kpɑnbɑl. N k tie pɑkuɑk kɑɑ, k n kɑn mi lɑ kuun pɑlbiil.› L pɑɑk e, bonbiil nbɑ tie u yɑl nɑ, k tie kuun nɑn l pɑlbiil nɑn kon nɑ tɑn sɑɑ suol’ɔ dɑyenn kuɑ ni, k duo mɑnŋ n di muu, k mɑɑn Yonmdɑɑnɔ Yennu nbɑ bu nɑn’ɔ nɑ tie yiikuo dɑɑnɔ e.» Tingbounŋ nɑ kpɑnbɑlɑ nbɑ conm nɑn’ɔ k di u mɑnt nɑ, b i tɑnŋ i lɑ u muu dinu munyuut nɑ, b tɑn sɑɑ bui k fɑbn u pɑɑk. B tɑn sii tiin jɑŋmɑɑni u fɑlɑ nɑ pɑɑk, k sie bɑnfɔkl ɑ k ji yien ɑ: «Abɑ, dogbenŋl nɑ. Abɑ, Bɑbiilonn, duo nbɑ mɔk pɑnŋ nɑ, yuo wɑɑnm-nnɑ jɑnŋ nɑn ɑ tubdɑtu wɑɑ.» K tingbounŋ nɑ kpinkpentɑ tɑn sɑɑ bui k fɑbn u pɑɑk, k mɑɑn suɑ nbɑ k dɑɑ b tiɑt nɑ pɑɑk. Suɑ ji kɑn mi k dɑɑ b kuɑtn nbɑ tie sɑlmɑ nɑ, nɑn likli kut, nɑn tɑnɑ nbɑ nyili k l dɑɑɔk pɑɑl, nɑn pelilnbɑ, nɑn cɑbfɑlmi, nɑn tiɑt nbɑ k b mɔnt k l dɑɑɔk pɑɑl nɑ, nɑn cɑbɑ nbɑ k b yi soɑ nɑ, nɑn cɑbɑ nbɑ mɔn k nyili, nɑn tɑɑbi nbɑ k l nublu mɑn, nɑn lin nbɑ k b jii luobuk nyɑnɑ k nɑn nɑ, nɑn lin nbɑ k b jii tɑɑbi nbɑ k l dɑɑɔk pɑɑl k nɑn nɑ, nɑn lin nbɑ k b jii kut nbɑ k b yi blɔns k nɑn nɑ, nɑn lin nbɑ k b jii kut k nɑn nɑ, nɑn lin nbɑ k b jii tɑnɑ nbɑ k b yi mɑɑlbl k nɑn nɑ, nɑn kɑɑnel, nɑn bonliɑ nbɑ mɑnŋt kpint nɑ, nɑn tulɑɑli nbɑ tie nyun nɑ, nɑn tulɑɑli nbɑ tie kpɑn nɑ, nɑn tulɑɑli nbɑ k b jokt muu k l munyuut nublu mɑn nɑ, nɑn dɑmunŋ, nɑn kpɑn, nɑn yon, nɑn * ble, nɑn nei, nɑn pei, nɑn tɑɑni nɑn l tolt, nɑn dɑɑbɑ, nɑn bin nbɑ k b suol’b tɑb ni nɑ. K kpinkpentɑ nɑ yien ɑ: «Tiɑt nbɑ kul k ɑ bo luon fii mɔk nɑ, nɑn ɑ mɔktuk kul, nɑn tɑŋɑnt nɑ kul gɑl ɑ, k ɑ ji kɑn mi k lɑ.» K kpinkpentɑ nbɑ kpentl k tɑn lɑ nyuɑt bonciɑnn duo mɑnŋ ni nɑ tɑn sii sie bɑnfɔkl ɑ k mɔ ŋɑɑn fɑbn, k mɑɑn b tiin jɑŋmɑɑni u fɑlɑ nɑ pɑɑk. B sɑɑ bui k fɑbn k yien ɑ: «Abɑ, dogbenŋl nbɑ nɑɑn nɑn puo nbɑ gbɑb cɑbfɑlmi nɑn tiɑt nbɑ k b mɔnt k l dɑɑɔk pɑɑl nɑn cɑbɑ nbɑ mɔn k nyili nɑn sɑlmɑ nɑn tɑnɑ nbɑ nyili k l dɑɑɔk pɑɑl nɑn pelilnbɑ nɑ, yuo wɑɑnm-nnɑ sinsuuk ni k ɑ mɔktuk nɑ kul biil.» K bin nbɑ tie ŋɑlnt yudɑnm nɑn bin nbɑ kuɑ k sɑɑ b sɑɑnu nɑ nɑn ŋɑlnkɑnnɑ nɑn bin nbɑ kul tuun mɔkgbenŋl ni, k b ji sie bɑnfɔkl, ŋɑɑn yikn, bɑɑ lɑ k muu di’u k l munyuut do sɑnpɑɑpo nɑ, k b yien ɑ: «T k mi lɑ dogbenŋl nɑ buolu.» K b fini tɑnt k pukn b mɔnŋ pɑɑk, k bui ŋɑɑn fɑbn k yien ɑ: «Abɑ, dogbenŋl nbɑ k niib mɔk ŋɑlnt k lin mɔkgbenŋl ni k kpentl k lɑɑt gol lenŋ nɑ, k l tɑɑn bɑɑ k biil yuo wɑɑnm-nnɑ nuɑk ni.» Yendɔunŋ ni tieb nɑn Yennu niib nɑn Yiesu tuomiinbɑ nɑn *Yennu sɔkniinbɑ, ii mɔk mɑn pɑlpienn, k mɑɑn Yennu bu dogbenŋl mɑnŋ buut k biil’ɔ, wɑɑ din tuun bonbiil k tien’i nɑ pɑɑk. K mɑlɑk-pɑɑlɔ tɔkl tɑnn nbɑ gbenŋ nɑn nɑgbenŋl nɑ, k lu’l mɔkgbenŋl ni, k yet ɑ: «B tɑn sɑɑ wokt dogbenŋl Bɑbiilonn nɑ k lu’u nnɑ e wun biil, k suɑ ji kɑn mi k lɑ’u, k suɑ ji kɑn mi k gbɑt k bɑfɑɑlɑ fɑɑ biɑɔk, ɑmi k yɑn-yinnɑ yiin *yɑni, ɑmi k yelpeblɑ pieb yeli, ɑmi k kɑtkɑpeblɑ pieb kɑtkɑi duo mɑnŋ ni. Suɑ kɑn mi lɑ tuontunnɔ lenŋ, k suɑ biɑ kɑn mi k gbɑt nɑɑl fuut lenŋ. Fitl yentu ji kɑn yent duo mɑnŋ ni. Suɑ ji kɑn mi gbɑt jɑb nbɑ kuɑn puob nɑn puob nbɑ kun jɑb nɑ kunkɔlɑ. Duo mɑnŋ ni kpinkpentɑ e din tie pɑɑlb k cie tingbounŋ nɑ kpinkpentɑ kul ɑ, k duo mɑnŋ niib din tuu diɑ nyɔku k kpɑnn nibuolu kul. Bɑbiilonn lɑ tubdɑtu k mɑɑn b lɑ sɔkniinbɑ nɑn Yennu niib nɑn bin nbɑ kul k b kpii’b tingbounŋ nɑ ni nɑ sɔn e duo mɑnŋ ni.» Lin nbɑ nɑ puolpo, k n gbɑt kunkɔsɑɑkɑlɑ *Yendɔunŋ ni k l tie nibulciɑɔnŋ pɑku, k b yien ɑ: «Pɑkn Yonmdɑɑnɔ mɑn. Fielu nɑn dontl nɑn yiikuo tie t Yennu yɑl e. Wɑɑ bu buut biɑnŋ nbɑ ŋɑn k biɑ tie mɔmɔnm. U bu puocunconbiiuk nbɑ biil tingbounŋ nɑ nɑn u cunconsn nɑ buut. U dɑt u tubl, wɑɑ kpii ŋuɑ Yennu tuontunnɑ nɑ pɑɑk.» K nibulciɑɔnŋ nɑ biɑ yien ɑ: «Pɑkn Yonmdɑɑnɔ mɑn. Duo nbɑ di muu nɑ munyuut do sɑnpɑɑpo nɑn yuo nbɑ kɑɑ gbennu.» K sɑɑkɑb piinle nɑn bɑnnɑ nɑ nɑn bonfuɑ bɑnnɑ nɑ gbɑɑn tinŋ ni k puki ŋuɑ Yennu nbɑ kɑl nɑɑngbounŋ pɑɑk nɑ, k b yien ɑ: « * Amenn, pɑkn Yonmdɑɑnɔ mɑn.» Tɔn, k kunkɔsiɑl nyii nɑɑngbounŋ nɑ buol k yet ɑ: «Pɑkn t Yennu mɑn, yinm kul nbɑ tie u tuontunnɑ, yinm nbɑ tiin’ɔ, nijɑɑnɑ nɑn nitɑli.» Ŋɑnn e k n biɑ gbɑt kunkɔsiɑl k l fu nɑn nibulciɑɔnŋ nbɑ tuu piɑk k fu nɑ, k biɑ fu nɑn siɑɔk kpenu nɑ, k biɑ fu nɑn sɑtiɑngbenŋɑ fuut nɑ k yet ɑ: «Pɑkn Yonmdɑɑnɔ mɑn, k mɑɑn Yonmdɑɑnɔ Yennu nbɑ mɔk yiikuo kul nɑ dii nɑɑn ɑ. Ŋɑɑnt mɑn k tii kpɑnm kii mɔk pɑlpienn kii dont u sɑnn, k mɑɑn yuo nɑ bɑɑl ɑ k Pebik nɑ luon wun kuɑn u puo, k sɑlkpenŋ ponŋ tien siil ɑ. K b tul sɑlkpenŋ nɑ cincenŋɑnn nbɑ nyili k k mɔk jɑknt, ɑ wun gbɑb.» (Cincenŋɑnn nɑ e tie Yennu niib tuonŋɑnɑ nbɑ ŋɑn ŋuɑ Yennu buol ni.) K *mɑlɑkɑ nɑ yet’n ɑ n diɑn ɑ: «Bin nbɑ k b yiin’m k b bɑɑl Pebik mɑnŋ puokuɑnt jɑɑnm ni nɑ, pɑlpienn tie b yɑl e.» K mɑlɑkɑ mɑnŋ biɑ yet’n k pukn ɑ: «Mɑɑn nɑ tie Yennu mɑɑn e, k tie mɔmɔnm.» Ŋɑnn e k n gbɑɑn u tuɑnn ɑ n jiɑnt’ɔ. K u yet’n ɑ: «Dɑɑ tie nnɑ kɑɑ, N tie fin nɑn ɑ nɑɑ wɑɑs nbɑ diɑ Yiesu bɑlmɔni *siɑlɑ nɑ tuontunluɑ e. Jiɑntl Yennu e. K mɑɑn Yiesu bɑlmɔni siɑlɑ nɑ e te k sɔkniinbɑ muɑntl b lɑbɑɑl.» L puolpo k n lɑ k Yendɔunŋ luot, k tɑnpienŋ sie lenŋ, k wun nbɑ jɑk’ɔ nɑ sɑnɑ tie Bɑlmɔndɑɑnɔ nɑn Mɔmɔnm, k u bu buut k biɑ tuokt tɔbi bɑnnu nbɑ ŋɑn Yennu buol. U ninbinɑ nɑɑn nɑn mupienu nɑ, k u yil nɑɑnfokli k l yɑb ɑ, k sɑnn diɑn u pɑɑk, k suɑ k mi sɑnn mɑnŋ, sie ŋuɑ kuukuɑ. K tiɑɔk nbɑ k u liɑ nɑ fɑl nɑn sɔn, k sɑnn nbɑ k b yi’u nɑ tie: «Yennu Mɑɑn.» K Yendɔunŋ ni tɔb niib jɑk tɑnpieni, k liɑ cincenŋɑnɑ nbɑ pien k k mɔk jɑknt, k wɑɑ’u. K juk-bɑnjiɑk nbɑ di bonciɑnn tɑnt k nyii u mɔb ni, k u sɑɑ jii’l k kɔn nyɑnn tingbounŋ yent kul niib. U sii diɑ kut pɑtu kii yen’m. K u sɑɑ ŋmɑkl tiluɑnɑ siɑn nbɑ k b ŋmɑkl’l nɑ, k l tie Yennu nbɑ mɔk yiikuo kul wutociɑɔnŋ nɑ. K sɑnsiɑl diɑn u liɑtl nɑn u tɑɑl pɑɑk ɑ: «kpɑnbɑlɑ kul Kpɑnbɑl, yonmdɑnm kul Yonmdɑɑnɔ.» Ŋɑnn e k n lɑ mɑlɑkɑ k u sie yennu ni k tiɑn k yi nuɑni nbɑ yuuk sɑnpɑɑpo ɑ: «Tikt mɑn k bɑɑl Yennu jɑɑngbenŋl nɑ ni, k tɑn di kpɑnbɑlɑ nɑn sejenm yudɑnm nɑn pɑnŋ dɑnm nɑn tɑɑni nɑn tɑnjɑklɑ gbɑnɑnt nɑn niib kul, bin nbɑ tie dɑɑbɑ nɑn bin nbɑ tie yent-n-mɔnŋ dɑnm nɑn bin nbɑ tie nijɑɑnɑ nɑn bin nbɑ tie nitɑli kul gbɑnɑnt.» K n lɑ muuk ni bonkobuk nɑ nɑn tingbounŋ nɑ kpɑnbɑlɑ nɑn b tɔb niib, k b tikl ɑ bin kɔn nɑn wun nbɑ jɑk tɑɑnm mɑnŋ pɑɑk nɑ nɑn u mun yɑɑ tɔb niib. K b suol muuk ni bonkobuk nɑ, nɑn u fɑɑk sɔkni nbɑ dɑɑn tuu tie bɑktnɔunŋ nyinɑ u tuɑnn po nɑ. U tuun nyinɑ mɑnŋ k kpɑnn bin nbɑ mɔk muuk ni bonkobuk mɑnŋ dɔuk nɑ nɑn bin nbɑ dɑɑn jiɑntl u nɑɑɔnŋ nɑ. B suol muuk ni bonkobuk mɑnŋ nɑn u fɑɑk sɔkni mɑnŋ nɑ k b fo, k lu’b buotuk nbɑ gbie nɑn muu k sɑlwuutɑ di nɑn’n nɑ ni. K wun nbɑ jɑk tɑɑnm k juk-bɑnjiɑk tɑnt nyii u mɔb ni nɑ, k u jii juk-bɑnjiɑk mɑnŋ k kpii bin nbɑ biɑl nɑ, k nuɑni dii b gbɑnɑnt k tɑn gbuo. K n biɑ lɑ mɑlɑksuɑ k u nyii *Yendɔunŋ ni k siik, k diɑ buotsunsunŋ nbɑ kɑɑ telk nɑ pieni nɑn jɑlgbenŋl u nuu ni, k u suol timunt nbɑ din tuu be nɑ wɑɑ, k tie Sɑnbiiltuɑ ɑmi *Sɑɑtɑn nɑ, k lol’ɔ k u sii be binɑ tusl, k jii’u k lu buotsunsunŋ nɑ ni binɑ tusl, ŋɑɑn kpɑl k pɔl ɑ u ji kɑn fit k kpɑnn tingbounŋ nɑ tieb buolu kul, sie k binɑ tusl n tɑn gɑl. L puolpo b sɑɑ luot’ɔ yuo wɑɑnm-nnɑ. K n lɑ nɑɑngbɑnt k bin nbɑ k b tul’b yiikuo ɑ bin bu buut nɑ kɑl l pɑɑk. K n biɑ lɑ bin nbɑ k b din pot b yulɑ bɑɑ din tie *siɑlɑ k tul Yiesu k biɑ muɑntl Yennu mɑɑn nɑ pɑɑk. B din k jiɑnt bonkobuk nɑ, ɑmi l nɑɑɔnŋ nɑ. B biɑ din k gɑɑl bonkobuk mɑnŋ dɔk b yugbiɑ pɑɑk ɑmi b nii ni. B fiil kuun ni e k lɑkn dii nɑɑn nɑn *Klistu binɑ tusl. Nɑ e tie sinsinn kuun fiilu. (Kpienm nbɑ biɑl nɑ ŋɑnin k fiil kuun ni, sie binɑ tusl nɑ n tɑn gɑl ɑ.) Bin nbɑ dɔnŋ sinsinn kuun fiilu nɑ tie Yennu yɑb e k pɑlpienn tie b yɑl. Kuun nbɑ pukn munle nɑ k mɔk yiikuo b pɑɑk. B sii tie Yennu nɑn Klistu mɑnntieb e, k sɑɑ lɑkn k di nɑɑn nɑn Klistu binɑ tusl. Binɑ tusl nɑ i tɑnŋ i gɑl, b sɑɑ luot Sɑɑtɑn buotsunsunŋ nɑ ni k ŋɑɑ’u, k u sɑɑ nyi k kpɑnn tingbounŋ nɑ yent kul niib nbɑ k b yi’b Gɔg nɑn Mɑɑgɔg nɑ. Sɑɑtɑn sɑɑ tikl b kul ɑ k bin tuok tɑb, k b kɑnn tie nɑn mɔkgbenŋl tɑnbiini kɑnn nɑ e. K b nyii k tiɑ k lint lokl kul po, k tɑnt k sɑɑ biɑ lint Yennu niib nbɑ be siɑn nɑ nɑn duo nbɑ k Yennu mɑntk luon nɑ. Ŋɑɑn k muu nyii Yendɔunŋ ni k tɑn dii niib nbɑ k Sɑɑtɑn tikl’b nɑ. K b jii Sɑɑtɑn nbɑ kpɑnn tingbounŋ nɑ niib nɑ, k lu’u buotsunsunŋ nbɑ gbie nɑn muu k sɑlwuutɑ di nɑn’n nɑ ni, siɑn nbɑ k b dɔnŋ lu bonkobuk nɑ nɑn u fɑɑk sɔkni nɑ. Lenŋ e k l sɑɑ muks’b yennu ni nɑn nyiɑɔk mɔkmɔk nɑn yuo nbɑ kɑɑ gbennu. Ŋɑnn e k n lɑ nɑɑngbongbenŋl nbɑ pien bonciɑnn nɑn wun nbɑ kɑl l pɑɑk. Tingbounŋ nɑn sɑnpɑɑk mil bot u tuɑnn, k suɑ ji kɑn mi k lɑ’b. K n lɑ bin nbɑ din kpo nɑ, nijɑɑnɑ nɑn nitɑli nɑ, k b sie nɑɑngbounŋ nɑ tuɑnn po, k suɑ pɔbt kɑdɑɑt k biɑ pɔbt kɑdɑlieok nbɑ tie mɑnfuol kɑdɑɑɔk K b bu bin nbɑ kpo nɑ buut nɑn bɑɑ din tun biɑnŋ nbɑ nɑ, k l diɑn kɑdɑɑt mɑnŋ ni. K mɔkgbenŋl nyinn kpienm nbɑ be nyun ni, k kuun nɑn kpientinŋ mun nyinn bin nbɑ kpo k be b ni nɑ. K b bu b buut nɑn bɑɑ tun biɑnŋ nbɑ nɑ. K b jii kuun nɑn kpientinŋ k lu’b buotsunsunŋ nbɑ gbie nɑn muu nɑ ni. Kuun nbɑ pukn munle nɑ e tie mɔkl nbɑ di muu mɑnŋ. K wun nbɑ yɑɑ sɑnn kul k diɑn mɑnfuol kɑdɑɑɔk nɑ ni, b jii’u k lu mɔkl nbɑ di muu nɑ ni. K n biɑ lɑ sɑnpɑpɑɑnn nɑn tingbonpɑɑnn. K sɑnpɑkpel nɑ nɑn tingbonkpel nɑ din mil k bot, k mɔkgbenŋl ji kɑɑ. K n lɑ Yennu duo nbɑ tie Selusɑɑlenm pɑɑnn nɑ, k l nyii Yennu buol *Yendɔunŋ ni, k siik, k tie nɑn puoyuokl nbɑ tuu tien siil k fɑnŋt u mɔnŋ k tuokt u sɔlɔ nɑ. K n gbɑt k kunkɔsɑɑkɑl nyii nɑɑngbounŋ nɑ buol k yien ɑ: «Mɔtɑɑnɑ, Yennu lɑnbounŋ ji be nifosɑɑli buol e, k ŋuɑ Yennu sii be nɑn’m, k b sii tie u niib, k ŋuɑ Yennu mɔnŋ sii be b buol k sii tie b Yennu. U sɑɑ fiɑl b nyin-nyuut kul b ninbinɑ ni, k kuun nɑn pɑlbiil nɑn mɔni nɑn yiɑlu ji sii kɑɑ, k mɑɑn bonkpelɑ nɑ kul ji gɑl ɑ.» K wun nbɑ kɑl nɑɑngbounŋ mɑnŋ pɑɑk nɑ yet ɑ: «Mɔtɑɑnɑ, n tie bont kul bonpɑɑnn e.» Ŋɑnn e k u biɑ yet’n ɑ: «Diɑnt lin nbɑ nɑ, k mɑɑn mɔbonɑ nɑ tie mɔni e k niib sɑɑ fit tien’n yɑdɑ.» K u biɑ yet’n ɑ: «L ponŋ tun ɑ. Min e tie Alfɑ nɑn Omeegɑ k l pɑɑk tie piinu nɑn juontu. Wun nbɑ k nyun-nyuklu mɔk’ɔ nɑ, n sɑɑ pi’u mɑnfuol nyun nbɑ buni k nyi nyunkpɑnɑ ni nɑ k wun nyu yɑnn, k wun nbɑ nyɑnn nyɑnnu nɑ, u sɑɑ gɑɑl lin nbɑ nɑ n buol, k n sii tie u Yennu, k u mun sii tie n bik. Ŋɑɑn jɑŋmɑɑndɑnm nɑn bin nbɑ kɑɑ yɑdɑ nɑn bonbiildɑnm nɑn nikpiilt nɑn juonbɑɑlt nɑn jɑbɑɑbulɑ nɑn pɑtjiɑnt-dɑnm nɑn fɑi dɑnm kul, b binbebuol tie mɔkl nbɑ di muu k sɑlwuutɑ di nɑn’n nɑ e. Ŋɑnn e tie kuun nbɑ pukn munle nɑ.» L yuo nɑ k *mɑlɑkɑɑnbɑ bɑnlole nbɑ bo diɑ seni ŋɑnlole, k l gbie nɑn bonbiil ŋɑnlole nbɑ wɑɑ puol nɑ yenɔ yet’n, ɑ n bɑɑl k wun wɑnn’n Pebik nɑ puoyuokl nɑ. Ŋɑnn e k Foŋɑnm sik n pɑɑk k mɑlɑkɑ nɑ jii’n k duo nɑn’n juɑl nbɑ yɑb k biɑ fɔk nɑ yul pɑɑk, k wɑnn’n Selusɑɑlenm nbɑ tie Yennu duo nɑ, k l nyii Yendɔunŋ ni, Yennu buol, k siik, k nyili nɑn Yennu yentsɑɑkɑl nɑ, k biɑ nyili nɑn tɑnŋɑnn nbɑ k b yi’l jɑsp nɑ, k nyɔkt nɑn miɑnu nɑ. K duo mɑnŋ mɔk juongbenŋfuot, k Juonɑ mɑnŋ mɔk gɑnɑ piik nɑn ŋɑnle, k mɑlɑkɑɑnbɑ piik nɑn bɑnle guu gɑnɑ mɑnŋ, k Islɑɑel buolu piik nɑn bɑnle nɑ sɑnɑ diɑn gɑnɑ piik nɑn ŋɑnle mɑnŋ pɑɑk. K gɑnɑ ŋɑntɑɑtɑɑ be juonɑ ŋɑnnɑ nɑ pɑɑk, k ŋɑntɑ be yendopo, k ŋɑntɑ be diitu po, k ŋɑntɑ be gɑnŋ po, k ŋɑntɑ be yenbɑɑpo. Duo mɑnŋ juonɑ sie tɑnɑ piik nɑn ŋɑnle pɑɑk e, k Pebik nɑ tuomiinbɑ *piik nɑn bɑnle nɑ sɑnɑ diɑn tɑnɑ piik nɑn ŋɑnle nɑ pɑɑk. K mɑlɑkɑ nbɑ piɑk k tien’n nɑ diɑ sɑlmɑ pɑtu nbɑ k b diɑ k biki nɑ, ɑ wun bikn duo mɑnŋ nɑn l tɑnmɔi nɑn l juonɑ nɑ. K l mɔk juonɑ ŋɑnnɑ, k juonɑ mɑnŋ fɔknt kul tie yonm. K mɑlɑkɑ nɑ bikn duo nɑ nɑn u pɑtu, k l yɑlimu tie stɑɑdnbɑ tusɑ piik nɑn ŋɑnle (stɑɑdnbɑ 12.000), k l fɔknt nɑn l dokiu nɑn l yɑlimu kul tie yonm. K u biɑ bikn l juonɑ, k l kpɑkiu tie kuudenbɑ kobik nɑn piinnɑ nɑn ŋɑnnɑ. Mɑlɑkɑ mɑnŋ bikn k l tie nɑn nifosɑɑlk nbɑ tuu biki bonɑ biɑnŋ nbɑ nɑ e. K Juonɑ nɑ mɑɑ nɑn tɑnɑ nbɑ k b yi jɑsp, ŋɑɑn k duo nɑ mɔnŋ tie sɑlmɑ nbɑ ŋɑn k nyili nɑn miɑnu nɑ, k b jii tɑnɑ nbɑ dɑɑɔk pɑɑl bonciɑnn, l buolu buolu, k tɑbn fiɑkl tɑnɑ pɑɑk, k tɑnbuolu mɑnŋ te k l ŋɑn bonciɑnn. Sinsinn tɑnn nbɑ k b tɑbn fiɑkl pɑɑk nɑ yi jɑsp, k tɑnn nbɑ pukn munle nɑ yi sɑɑfiil, k muntɑ ni yɑl yi ɑgɑt, k munnɑ ni yɑl yi emeluod, k munŋmu ni yɑl yi oniiks, k munluob ni yɑl yi sɑldoenn, k munlole ni yɑl yi kliisoliit, k munniin ni yɑl yi beliil, k mun-yiɑ ni yɑl yi topɑɑs, k piik ni yɑl yi kliisoplɑɑs, k lin nbɑ pukn piik nɑn yenn nɑ yi tulkuɑs, k piik nɑn ŋɑnle ni yɑl mun yi ɑmetiist. K l gɑnɑ piik nɑn ŋɑnle nɑ tie pelilnbɑ nɑ, k gɑnɑ kul tie pelil mɑnŋ yenn yenn k sɑɑ diɑn piik nɑn ŋɑnle mun, k duo nɑ sɔnu tie sɑlmɑ nbɑ ŋɑn, k yien nɑn miɑnu nɑ. N k lɑ Yennu jɑɑnti ŋɑsɑɑkɑk duo mɑnŋ ni, k mɑɑn duo nɑ Yennu jɑɑnti ŋɑsɑɑkɑk tie Yonmdɑɑnɔ nbɑ mɔk yiikuo kul nɑn Pebik nɑ e. K duo mɑnŋ k luon yennu ɑmi ŋmɑɑlk yentu lenŋ, k mɑɑn Yennu *yudɑnt nɑ e tie l yentu, k Pebik nɑ mun tie l fitl. K tingbounŋ nɑ nibuolu sii be l yentu ni k sonm, k tingbounŋ nɑ kpɑnbɑlɑ sɑɑ kuɑ nɑn b mɔktuk k bil lenŋ. Duo mɑnŋ tɑnmɔi k luo, k mɑɑn nyiɑɔk kɑɑ lenŋ. K b sɑɑ bɑɑl nɑn lin nbɑ tie tingbounŋ nɑ tini kul niib dontl nɑn yudɑnt k bil duo nɑ ni. K lin nbɑ tie jɑknt nɑn wun nbɑ tuun fei tuonn nɑn fɑi dɑnm, kɑn kuɑ duo mɑnŋ ni, sie bin nbɑ yɑɑ sɑnɑ diɑn Pebik nɑ mɑnfuol kɑdɑɑɔk ni nɑ kuukuɑ e sɑɑ kuɑ duo mɑnŋ ni. L yuo k *mɑlɑkɑ nɑ wɑnn’n mɑnfuol nyun kpenu nɑ, k l puuk nyi Yennu nɑn Pebik nɑ nɑɑngbounŋ nɑ ni, k nyili nɑn miɑnu nɑ, k puuk k gɑɑl duo nɑ sɔnjosinsuuk ni, k tiik nbɑ k b yi’l mɑnfuol tiik nɑ sie kpenkpini ŋɑnle nɑ kul po k kuok sɑɑ wɑɑ, k tiik mɑnŋ lon luɑnɑ tɑɑl piik nɑn ŋɑnle binn nuɑk ni, ŋmɑɑlk kul ni l luon e, k l fɑɑt nɑ tie tebuk k tul tingbounŋ yent kul niib. K Yennu nbɑ pol mɔb k wɑnn lin nbɑ kul, l ji kii be duo mɑnŋ ni. Yennu nɑn Pebik nɑ nɑɑngbounŋ mɑnŋ sii be duo mɑnŋ ni, k u tuontunnɑ nɑ sii jiɑntl’ɔ. K b sɑɑ lɑ u nunpo, k u sɑnn sɑɑ diɑn b yugbiɑ pɑɑk. Nyiɑɔk ji tɑn sii kɑɑ, b tɑn ji kii luon fitl nɑn yennu yentu lenŋ, k mɑɑn Yonmdɑɑnɔ Yennu sii tie b yentu. K b sɑɑ di nɑɑn kii be nɑn yuo nbɑ kɑɑ gbennu. K mɑlɑkɑ nɑ biɑ yet’n ɑ: «Mɔbonɑ nɑ tie mɔni e, k niib sɑɑ fit tien’l yɑdɑ. K Yonmdɑɑnɔ Yennu nbɑ te k u sɔkniinbɑ muɑntl b lɑbɑɑl nɑ, ŋuɑ e tun u mɑlɑkɑ ɑ wun bɑɑl k wɑnn u tuontunnɑ lin nbɑ sɑɑ tun mɔtɑɑnɑ.» K Yiesu yet ɑ: «Gotl, n bɑɑt e mɔtɑɑnɑ. Tɔn, bin nbɑ sɑɑk Yennu mɑɑn nbɑ diɑn kɑdɑɑɔk nɑ ni nɑ, pɑlpienn tie b yɑl e.» Min Sɑn gbɑt k biɑ lɑ lin nbɑ nɑ. Mɑɑ gbɑt k biɑ lɑ nɑ, l yuo e k n gbɑɑn mɑlɑkɑ nbɑ wɑnn’n lin nbɑ mɑnŋ nɑ tuɑnn k yɑɑ n jiɑnt’ɔ. Ŋɑɑn k u yet’n ɑ: «Dɑɑ tie nnɑ kɑɑ. N tie fin nɑn ɑ nɑɑ wɑɑs nbɑ tie sɔkniinbɑ nɑn bin nbɑ sɑɑk mɑɑn nbɑ be kɑdɑɑɔk nɑ ni nɑ tuontunluɑ e. Jiɑntl Yennu e.» Ŋɑnn e k u biɑ yet’n ɑ: «Dɑɑ bɔli Yennu mɑɑn nbɑ be kɑdɑɑɔk nɑ ni, k mɑɑn yuo nɑ pel ɑ. Wun nbɑ tuu tuun tuonbiit, wun biɑl kii tuun nnɑ, k wun nbɑ mun tuu tuun jɑknt tuonn, wun mun biɑl kii tuun nnɑ, ŋɑɑn k wun nbɑ mun tuu tuun tuonŋɑnɑ, wun mun biɑl kii tuun nnɑ, k wun nbɑ mun be binbenŋ nbɑ gbuot Yennu nunm nɑ ni, wun mun biɑl kii tie nnɑ.» K Yiesu yet ɑ: «Gotl, n bɑɑt e mɔtɑɑnɑ nɑ, k diɑ suɑ kul nɑn u tuonɑ nyuɑt ɑ n tɑn pɑ’u. Min e tie Alfɑ nɑn Omeegɑ, sinsinn yuɑ nɑn juontu yuɑ, pinpiik nɑn gbennu.» Dɑnm nbɑ wuul b tiɑt nɑ, pɑlpienn tie b yɑl e, k l pɑɑk k b mɔk yiikuo nbɑ sɑɑ muɑ tiik nbɑ tien mɑnfuol nɑ luɑnɑ, k sɑɑ kuɑ tɑnmɔb nɑ ni k sɑɑn duo nɑ ni. Bɔi e biɑl nɑn-yel nɑ, bin nbɑ bu jɑbɑɑt nɑn bin nbɑ tuun jɑknt tuonɑ nɑn nikpiilɑ nɑn bin nbɑ mɑnn pɑtɑ nɑn bin nbɑ luon fɑɑk k biɑ fɑ fɑɑk nɑ. «Min Yiesu e tun n mɑlɑkɑ, ɑ wun tɑn fiit mɑɑn nɑ k tul’i ɑ yii tie l *siɑlɑ k tul jiɑnti nɑ. N tie kpɑnbɑl * Dɑɑfiid yɑɑbuonn e k biɑ tie sɑn-nyɑfɑɑl ŋmɑɑjɑl nbɑ nyɔkt nɑ.» Tɔn, Foŋɑnm nɑn Pebik nɑ puoyuokl nɑ yet ɑ: «Bɑɑt.» K wun nbɑ gbɑt’l mun yet ɑ: «Bɑɑt.» K wun nbɑ kul k nyun-nyuklu suol’ɔ, wun bɑɑl, k wun nbɑ luon mɑnfuol nyun, wun bɑɑl k u sɑɑ gɑɑl yɑnn. Min, Sɑn, n kpɑɑn wun nbɑ kul gbɑt Yennu mɑɑn nbɑ be kɑdɑɑɔk nɑ ni nɑn ninmɔnn: wun nbɑ pukn siɑl mɑɑn mɑnŋ ni, Yennu sɑɑ jii bonbiil buolu buolu nbɑ diɑn kɑdɑɑɔk nɑ ni nɑ, k pukn u tubdɑtu po. K wun nbɑ mun nyinn siɑl Yennu mɑɑn nbɑ be kɑdɑɑɔk nɑ ni, Yennu sɑɑ nyinn u tol mɑnfuol tiik nɑ ni nɑn Yennu duo nbɑ k b diɑn l po kɑdɑɑɔk nɑ ni nɑ. Tɔn, k wun nbɑ tul *siɑlɑ nɑ yet ɑ: «Mɔmɔnm, n bɑɑt e mɔtɑɑnɑ.» * Amenn. Yonmdɑɑnɔ Yiesu, bɑɑt nɑ. Yonmdɑɑnɔ Yiesu ii mɔk ninkpɑbɑɔnŋ nɑn u niib kul. Amenn.