Ala lalis bann anset Zezi Kris, desandan David ek Abraam. Abraam ti papa Izaak. Izaak ti papa Zakob. Zakob ti papa Zida ek so bann frer. Zida ti papa Perez ek Zera, zot mama ti apel Tamar. Perez ti papa Esron. Esron ti papa Ram. Ram ti papa Aminadab. Aminadab ti papa Nason. Nason ti papa Salma. Salma ti papa Boaz, so mama ti apel Raab. Boaz ti papa Obed, so mama ti apel Rit. Obed ti papa Zese. Zese ti papa lerwa David. David ti papa Salomon. Mama Salomon ti marye avek Iri. Salomon ti papa Roboam. Roboam ti papa Abia. Abia ti papa Asa. Asa ti papa Zozafat. Zozafat ti papa Zoram. Zoram ti papa Ozias. Ozias ti papa Yotam. Yotam ti papa Akaz. Akaz ti papa Ezekias. Ezekias ti papa Manase. Manase ti papa Amon. Amon ti papa Zozias. Zozias ti papa Yekonia ek so bann frer. Sa lepok-la, bann Izraelit ti exile dan Babilonn. Apre sa letan lexil, Yekonia ti papa Salatiel. Salatiel ti papa Zorobabel. Zorobabel ti papa Abioud. Abioud ti papa Eliakim. Eliakim ti papa Azor. Azor ti papa Sadok. Sadok ti papa Akim. Akim ti papa Elioud. Elioud ti papa Eleazer. Eleazer ti papa Matann. Matann ti papa Zakob. Zakob ti papa Zozef. Zozef ti marye avek Marie, e Marie finn donn nesans Zezi ki nou apel Lemesi. Antou ti ena katorz zenerasion depi Abraam ziska David, Katorz depi David ziska lepok lexil dan Babilonn e katorz depi lexil ziska Lekris. Ala kouma Zezi Kris ti ne. So mama Marie ti fiyanse avek Zozef. Avan ki zot ti koumans viv ansam Marie finn trouv li ansint par laksion Lespri Sin. So fiyanse, Zozef ti enn zom drwat. Li pa ti anvi fer Marie perdi loner devan dimounn, alor li desid divorse san ki personn kone. Letan Zozef pe kalkil tousala, anz Lesegner paret devan li dan enn rev. Anz la dir li, “Zozef, garson David, pa per pou pran Marie kouma to fam. Zanfan ki dan so vant li sorti depi Lespri Sin. Li pou donn nesans enn garson e to pou apel li Zezi. Avredir limem pou sov so pep ki dan pese.” Tousala ti arive pou ki parol ki nou Segner finn dir par so profet realize: “Enn zennfi pou ansint, li pou donn nesans enn garson. Li pou apel Emaniel,” ki vedir, ‘Bondie avek nou.’ Ler Zozef leve, li fer seki anz-la finn komann li. Li pran so fam kot li, me li pa ti gagn okenn relasion avek li ziska nesans so garson. E li apel li Zezi. Zezi ti ne dan Betleem dan Galile, lepok lerwa Erod. Apre so nesans, enn bann savan sorti kote soley levan, ariv dan Zerizalem. Zot dimande, “Kot lerwa bann Zwif ki finn fek ne?” “Nou finn trouv so zetwal leve dan les e nou finn vini pou ador li.” Kan lerwa Erod tann sa, so latet fatige e tou bann abitan Zerizalem osi ti trakase. Li ti apel tou bann sef pret ek bann dokter lalwa ki travay pou lepep, e li dimann zot ki kote Lemesi pou ne. Zot reponn li, “Betleem dan Zide. Ala seki profet finn ekrir: Betleem, twa ki lor later Zide to napa pli dernie parmi bann lavil prinsipal, parski kot tomem pou sorti enn berze ki pou diriz mo pep Izrael.” Alor Erod apel bann savan-la san ki personn kone e li dimann zot ki dat exak sa zetwal-la ti paret. Apre sa, li avoy zot Betleem e li dir zot: “Al rod tou linformasion lor sa zanfan-la, e kan zot trouv li, fer mwa kone pou ki mwa osi mo al ador li.” Apre ki zot finn tande seki lerwa ti ena pou dir zot, zot ale. Sa zetwal ki zot finn trouve dan les ti pe avanse devan zot, li ti aret zis lao landrwa kot zanfan-la ti ete. Zot ti dan enn gran lazwa kan zot trouv zetwal-la. Ler zot rant dan lakaz-la, zot trouv Zezi ek so mama Marie. Zot tom azenou pou ador li; zot ouver zot kof bizou e zot ofer li lor, lansan ek lamir; me dan enn rev Bondie ti averti zot pa retourn kot Erod; zot pran enn lot sime pou retourn dan zot pei. Apre ki bann savan finn fini ale, enn anz Lesegner paret devan Zozef dan enn rev e li dir li, “Leve, pran sa zanfan-la ek so mama, sove al dan Lezip; res laba ziska ki mo dir twa retourne, parski Erod pou rod sa zanfan-la pou touy li.” Dan lanwit, Zozef leve li pran zanfan-la ek so mama, li al Lezip. Li res laba ziska lamor Erod. Tousala finn arive pou ki parol ki Lesegner finn dir atraver so profet realize “Mo finn apel mo garson depi Lezip.” Ler Erod realize ki sa bann savan-la finn tronp li, li ankoler. Li donn lord touy tou bann garson ki ena de-z-an ou mwins e ki abit dan rezion Betleem. Li finn azir dapre lanket ki li finn pran avek bann savan lor dat exak ki zetwal ti paret. Alor seki profet Zeremi ti deklare ti finn realize, “Enn lavwa leve dan Rama. Ena plore, ena plengne, Rasel pe plor so bann zanfan. Li pa oule konsolasion parski zot nepli la.” Apre lamor Erod anz Lesegner paret devan Zozef dan enn rev kan li ti ankor Lezip. Li dir li, “Leve, pran zanfan-la ek so mama avek twa e retourn lor later Izrael parski bann seki ti pe rod touy li finn fini mor.” Alor Zozef leve, li pran zanfan-la ek so mama e li retourn lor later Izrael. Ler li aprann ki Arkelais ti finn ranplas so papa Erod kouma lerwa Zide, li gagn per pou al laba. Apre ki enn anz finn averti li dan enn rev, li ti al dan rezion Galile. Li instal li laba, dan enn lavil ki apel Nazaret. Tousala finn realize dapre seki bann profet ti anonse: “Li pou apel Nazareen.” Sa mem lepok-la, Zan Batis ti pe proklame dan dezer Zide. Li ti pe dir, “Sanz zot leker, Rwayom Bondie finn aprose.” Profet Izai finn koz lor Zan e li finn dir: ‘Enn lavwa pe kriye dan dezer: prepar sime Lesegner, ouver enn sime kler pou li.’ Zan ti met enn linz pwal samo ek enn sang lapo dan so lerin. Li ti manz sotrel ek dimiel sovaz. Dimounn Zerizalem, tou Zide ek rezion larivier Zourdin ti vinn kot Zan. Li ti batiz zot letan zot ti pe konfes zot pese an piblik. Ler li trouv enn kantite Farizien ek Sadiseen vinn kot li pou fer zot batize, li dir zot, “Bann espes serpan, kisann-la finn dir zot ki zot pou kapav evit koler Bondie? Prodir bon fri ki montre ki zot finn sanz zot leker. Pa nek dir dan zotmem, ‘Abraam nou papa!’ Parski les mo dir zot ki avek sa bann ros-la, Bondie kapav fer bann desandan Abraam leve. Aster-la mem laserp finn fini pare pou koup bann pie depi zot rasinn. Tou bann pie ki pa raport bon fri pou koupe zet dan dife. Mwa, mo pe batiz zot dan dilo pou zot repanti. Me Sa-Enn ki pe vini apre mwa, li pli for ki mwa; mo pa ase bon, pou mo kourbe devan li pou larg so sandalet. Li, li pou batiz zot ar Lespri Sin ek dife. Ena enn gro fours dan so lame pou separ lagrin dible ek lapay. Lagrin dible, li ramas dan stor, lapay, li bril li dan dife ki zame pou tengn.” Letan Zezi sorti Galile, li al dan Zourdin, pou resevwar batem ar Zan. Zan ti refiz li, e li dir, “Mwa ki bizin resevwar batem ar twa.” Zezi reponn li, “Les ale aster-la, parski koumsa mem ki nou pou akonpli lazistis Bondie.” Alor Zan aksepte. Zis kouma Zezi fini batize, li sorti dan dilo; lesiel fann an-de e Lespri Sin parey kouma enn kolonb desann lor li. Enn lavwa dan lesiel dir, “limem mo Garson ki mo bien kontan; li donn mwa boukou lazwa.” Zis apre sa, Lespri ti ris Zezi dan dezer kot diab ti tant li. Apre ki li finn pas karant zour ek karant nwit san manze, Zezi gagn fin. Diab vinn ar li e dir li, “Si tomem Garson Bondie, donn lord sa bann ros-la vinn dipin.” Zezi reponn, “Dan liv finn ekrir: ‘Dimounn pa viv zis ar dipin me ar tou bann parol ki sorti dan labous Bondie.’ ” Alor diab amenn li dan lavil sint e fer li dibout net lao lor Tanp e dir li, “Si tomem Garson Bondie, zet to lekor dan vid, parski dan liv finn ekrir: ‘Li pou donn lord so bann anz pou tini twa dan zot lame, pou ki okenn ros pa bles to lipie.’ ” Zezi dir li, “Finn osi ekrir: ‘Fode pa to tant Lesegner to Bondie.’ ” Apre sa, diab amenn Zezi lor enn montagn bien-bien ot, li montre li tou bann rwayom lor later e li dir li, “Mo pou donn twa tousala, si to tom azenou pou ador mwa.” Zezi reponn, “Sorti la ale Satan, parski finn ekrir: ‘To pou ador Lesegner to Bondie, li tousel to bizin servi.’ ” Alor diab kit li ale, e bann anz vinn servi li. Ler li tann dir ki bann-la finn aret Zan, Zezi ti retir li dan Galile Li kit Nazaret pou al res dan Kafarnaom, dan bor lamer, dan teritwar Zabilon ek Neftali. Sa finn arive, pou ki parol Profet Izai realize: “Teritwar Zabilon ek Neftali, lor sime lakot, lot kote Zourdin, Galile, pei payin; lepep ki ti dan teneb finn trouv enn gran lalimier e bann ki ti finn mor dan zot pese, enn lalimier finn leve pou zot.” Depi sa letan-la Zezi koumans proklame, “Sanz zot leker, parski Rwayom Bondie pe aprose.” Letan Zezi pe mars-marse dan bor lamer Galile, li trouv de peser: Simon, ki ti apel Pier ek so frer Andre; zot ti pe lapes lasenn. Zezi dir zot, “Vini, swiv mwa, mo pou montre zot lapes dimounn.” Lor vites, zot kit zot file, zot swiv Zezi Inpe pli lwin, li trouv de garson Zebede: Zak ek so frer Zan. Toule-de avek zot papa ti dan pirog pe demay zot file; li apel zot. Lor vites, zot kit zot papa anplan dan bato e zot swiv li. Zezi finn al partou dan Galile, li ti pe ansegne dan zot sinagog, li ti pe proklam Bonn Nouvel lor size Rwayom Bondie. Li ti geri bann dimounn avek tou sort kalite malad. So repitasion finn al partou dan Lasiri. Zot amenn kot li tou bann ki pe soufer ek aflize par tou kalite maladi; bann ki posede. Enn gran lafoul sorti Galile, Dekapol, Zerizalem, Zide ek lot kote larivier Zourdin ti swiv li. Ler Zezi trouv sa lafoul dimounn-la, li mont lor montagn e li asize. So bann disip rasanble otour li. Li pran laparol e li koumans ansegn zot. “Bienere zot ki pov dan zot lespri, Rwayom Bondie li pou zot. Bienere zot ki an-dey, zot pou gagn konsolasion. Bienere zot ki dou ek ranpli avek limilite, zot pou erit later promiz. Bienere zot ki fin ek swaf lazistis, zot dezir pou exose. Bienere zot ki montre konpasion pou lezot, Bondie pou pitie zot. Bienere zot ki ena leker san tas, zot pou ar Bondie e zot pou trouv li. Bienere zot ki met lape, Bondie pou apel zot so bann zanfan. Bienere zot ki dimounn pe persekite akoz zot fer dibien, Rwayom Bondie li pou zot. Zot pou Bienere kan dimounn insilte zot, persekit zot ek mal parl zot parski zot krwar dan mwa. Zot bizin dan lazwa e santi zot ere parski zot ena enn rekonpans dan lesiel; koumsa mem zot ti persekit bann ansien profet. Zotmem disel pou lemond. Me si disel perdi so gou sale, kouma pou kapav refer li vinn sale? Li nepli bon pou nanye, apar zet dan bwa e bann dimounn mars lor li. Zotmem lalimier pou lemond. Enn lavil ki finn konstrir lor enn montagn pa kapav kasiet. Nou pa alim enn lalanp pou met li anba bake. Okontrer nou met li lor enn stenn, e li donn lalimier pou tou dimounn dan lakaz. Dan samem fason, les to lalimier briye devan tou dimounn, pou ki zot kapav trouv to bann bienfe e loue to Papa dan lesiel. Pa panse ki mo finn vini pou aboli lalwa ek bann profet; mo pa finn vini pou aboli me pou akonpli zot. Laverite mo dir zot, osi lontan ki later ek lesiel existe, nanye pa pou retire dan lalwa, pa mem sa ti pwin lor i, ziska tou akonpli. Si kikenn kas enn pli tipti sa bann komannman-la ek ansegn lezot pou fer parey, li pou konsidere kouma pli piti dan lesiel, me kikenn ki pratik ek ansegn sa bann komannman-la li pou konsidere kouma gran dan lesiel. Les mo dir zot ki si zot pa montre zot pli fidel anver volonte Bondie ki sa bann Farizien ek dokter lalwa-la, zot pa pou rant dan lesiel. Zot finn tande seki finn dir ar nou bann anset, ‘Pa fer krim e si kikenn touy enn lot dimounn, li merit santans.’ Me mwa mo dir zot, si kikenn ankoler avek so frer ou so ser, li merit zizman. Kikenn ki dir so frer ou so ser ‘fatra’, li merit zize par konsey bann ansien; kikenn ki dir so frer ‘fou’ li merit dife lanfer. Akoz samem si to vinn devan lotel pou ofer enn sakrifis e to rapel ki to pa bien ar to frer, les to lofrand lamem, rekonsilie ar to frer, apre to va prezant to lofrand Bondie. Si to ena enn zafer lakour kont kikenn, tom enn laranzman ar li dan sime mem letan pe al lakour. Sa pou evit to adverser amenn twa devan mazistra, e anpes mazistra remet twa lapolis. Laverite mo dir twa, to pa pou sape tanki to pa ranbours to det ziska dernie sou. Zot finn tande ki finn dir, ‘Pa komet adilter.’ Me mwa, mo dir zot, tou dimounn ki get enn fam ek anvi li, finn deza komet adilter dan so leker. Si to lizie drwat antrenn twa dan lemal, tir li, zet li; li preferab ki to perdi enn parti to lekor, ki antie to lekor al dan lanfer. Si to lame drwat antrenn twa dan lemal, koup li, zete, li preferab ki to perdi enn parti to lekor ki antie to lekor al dan lanfer. Finn osi dir, ‘Si kikenn divors ar so fam, li bizin servi li enn papie divors.’ Me mwa, mo dir zot, ninport kisann-la divorse ar so fam, exsepte dan ka enn maryaz ilezitim, fer fam-la komet adilter, e kikenn ki marye ar enn fam divorse li osi komet adilter Zot finn osi tande ki finn dir zot gran dimounn, ‘Fode pa kas enn promes, me to bizin fer seki to finn promet Lesegner pou fer.’ Me mo dir zot, pa fer okenn serman, ni par lesiel parski samem tronn Bondie ou par later, parski samem so marspie, ou par Zerizalem parski samem lavil gran Lerwa, e pa fer serman lor to latet, parski to pa kapav fer enn sel brin to seve vinn nwar ou blan; zot ena zis pou dir wi ou non, tou seki zot dir anplis li sorti kot diab. Zot finn tande ki finn dir, ‘Enn lizie pou enn lizie, enn ledan pou enn ledan.’ Me mwa, mo dir zot pa bizin zot fer rezistans kont move dimounn. Si kikenn kalot twa lor to lazou drwat, donn li osi to lazou gos. Si kikenn pourswiv twa pou to triko, donn li osi to palto. Si kikenn fors twa pou fer enn kilomet ar li, fer de kilomet. Done kan dimounn dimann twa, e pa tourn to ledo ar dimounn ki anvi pran prete ar twa. Zot finn tande ki finn dir, ‘Kontan to prosin e ayir to lennmi.’ Me mwa, mo dir zot: kontan zot lennmi e priye pou bann ki persekit zot. E zot pou vinn zanfan zot Papa ki dan lesiel, parski li fer so soley lev lor bann bon kouma lor bann move e li fer lapli tom lor bann zis kouma lor bann inzis. Avredir, si zot kontan bann ki kontan zot, ki rekonpans zot pou gagne. Bann kolekter tax osi pa fer parey? E si zot frekant selman zotmem, ki ena extraordiner ladan? Bann payin osi pa fer parey? Zot bizin parfe parey kouma zot Papa ki dan lesiel li parfe.” “Tansion zot pratik zot devwar relizie devan lezot, zis pou lizie lezot; sinon zot pa pou gagn rekonpans ki sorti kot zot Papa dan lesiel. Kan to fer lasarite, pa bizin sonn tronpet kouma bann ipokrit fer dan bann sinagog ek dan lari, pou ki dimounn aplodi zot. Laverite, mo dir zot, zot finn fini resevwar zot rekonpans. Me twa, kan to fer lasarite fode to lame gos inior seki to lame drwat fer, fode ki to bon aksion res sekre; to Papa ki trouv tou seki to fer pou rekonpans twa. Kan zot fer lapriyer, pa fer kouma bann ipokrit ki kontan vinn devan pou priye dan sinagog e dan kat kwin lari pou ki dimounn trouv zot. Laverite mo dir zot, sa bann-la finn deza gagn zot rekonpans. Me twa, kan to priye, rant dan to lasam, ferm twa andan e priye to Papa ki la dan sekre avek twa; to Papa ki trouv tou seki to fer, li pou rekonpans twa. Kan to priye, pa bizin rabase kouma bann payin ki panse ki plis zot koze, plis zot lapriyer pou exose. Pa fer kouma bann-la, parski twa, to Papa deza fini kone ki bon pou twa avan mem ki to dimann li. Gete kouma zot bizin priye: ‘Nou Papa lao dan lesiel, ki to nom sanktifie. Fer to regn vini realiz to volonte lor later kouma dan lesiel. Donn nou zordi dipin ki nou bizin. Pardonn nou nou bann pese, parey kouma nou pardonn bann ki finn ofans nou. Pa les nou tom dan tantasion Me tir nou dan lemal.’ Si zot pardonn lezot zot fot, zot Papa dan lesiel pou pardonn zot osi, me si zot pa pardonn lezot, zot Papa osi pa pou pardonn zot fot. Kan zot fer karem, pa bizin fer lakagn, kouma bann ipokrit, zot fer long-long figir pou montre lezot ki zot pe karem. Laverite mo dir zot, zot finn fini gagn zot rekonpans; me twa, kan to zene, parfim to latet, lav to figir bien prop, pou ki lezot pa rekonet si to pe fer karem, me to Papa ki invizib, li trouv tou seki to fer an-prive e li pou rekonpans twa. Pa ramas trezor lor later, la kot lever ek larouy kapav detrir li, e kot voler kapav defonse pou kokin. Ramas zot trezor plito dan lesiel, la kot ni lever, ni larouy pa kapav detrir li, e kot voler pa kapav defonse pou kokin, parski la kot to trezor ete, to leker osi li lamem. Lizie, li lalanp nou lekor. Si to lizie li bon, tou to lekor pou eklere, me si to lizie li malad, tou to lekor pou dan teneb. Alor, si lalimier ki sipoze dan twa finn vinn teneb, be ki kalite marenwar sa! Personn pa kapav vinn servi de met. Swa li ayir enn ek kontan lot la, oubien li atas li ar enn ek mepriz lot la. Zot pa kapav servi de met. Akoz samem mo dir zot: pa fatig zot ar zot lavi, ar seki zot pou manze ou bwar, ar labiyman zot lekor. Eski lavi pa pli inportan ki manze, e lekor pa pli inportan ki linz? Get bann zwazo dan lezer, zot pa ni seme, ni rekolte, ni ramase dan grenie, e pourtan Bondie Papa ki dan lesiel nouri zot. Eski zot pena plis valer ki zwazo? E kisann-la parmi zot, dan so linkietid, kapav prolonz so lavi. E kifer zot trakase ar linz? Get bann fler lis dan karo, kouma zot pouse. Zot pa ni travay ni koud, me mo dir zot, mem Salomon dan tou so laglwar pa finn zame abiye kouma sa bann fler-la. Si Bondie abiy enn karo lerb parey, ki zordi pe pouse e dime pou brile dan dife, eski li pa pou abiy zot ankor pli zoli ki sa? Ala zot lafwa mins la! Alor, pa bizin zot trakase pou dimann zotmem, ‘Ki nou bizin manze?’ ou ‘Ki nou bizin bwar?’ oubien ‘Ki nou bizin met lor nou?’ Parski bann payin ki rod tousala; me zot Papa ki dan lesiel, li kone ki sa bann kiksoz ki neseser pou zot. Rod plito Rwayom Bondie ek so lazistis, e tou lezot kiksoz li pou donn zot anplis. Alor, pa bizin trakase pou dime, les dime vinn ar so dime. Traka enn zour li ase pou zordi.” “Pa ziz lezot e Bondie pa pou ziz zot. Parski Bondie pou ziz zot parey kouma zot ziz lezot e mezir ki zot servi pou lezot, samem li pou servi pou zot. Ki manier to trouv lapay ki dan lizie to frer, me poto ki dan to lizie to pa remarke. Kouma to kapav dir ar to frer, les mo retir lapay ki dan to lizie me poto ki dan pou twa, to pa trouve? Zot bann ipokrit, retir an premie poto ki dan zot lizie, lerla zot pou trouv bien kler pou retir lapay ki dan lizie zot frer. Pa donn lisien seki sakre, e pa zet zot perl ar koson ki kapav kraz li e revire pou atak zot. Dimande, e to pou gagne, rode e to pou trouve, tape e laport pou ouver pou twa. Parski tou dimounn ki dimande pou resevwar, seki rode pou trouve, e laport pou ouver pou seki tape. Kisann-la parmi zot, ki si so garson dimann dipin, li donn li enn ros; si li dimann pwason, pou donn li enn serpan? Move kouma zot move, zot kone kouma donn bon kado zot zanfan, alor ki kantite bon kiksoz anplis zot Papa ki dan lesiel pou donn zot kan zot dimann li. Alor tou seki zot anvi ki lezot fer pou zot, fer parey pou lezot osi, samem lansegnman lalwa ek bann profet. Pas par laport etrwat, parski laport lanfer li bien larz e sime perdision li fasil. Finn ena boukou ki prefer sa sime-la. Parski laport etrwat ek sime lavi li dir, e tigit dimounn pran sa sime-la. Fer atansion bann fos profet ki vini kouma bann mouton me ki an-verite zot bann loulou feros. Zot pou rekonet li par so fri. To pa rekolte rezin oubien fig lor pie pikan. Tou zarb ki bon raport bon fri, zarb ki pa bon raport move fri. Enn zarb bon pa kapav prodir move fri, ni enn zarb malad bann bon fri. Tou bann zarb ki pa donn bon fri, pou koupe e zet dan dife. Koumsa mem zot pou rekonet bann fos profet, par zot kondwit.” “Pa tou dimounn ki dir mwa, ‘Segner, Segner’ ki pou rant dan rwayom lesiel, me zis bann ki fer volonte mo papa ki dan lesiel. Zour zizman, pou ena boukou ki pou dir mwa ‘Segner, Segner, lor to nom nou finn azir kouma profet, lor to nom nou finn sas bann move lespri, lor to nom ki nou finn akonpli boukou mirak.’ Lerla li pou dir zot, ‘Zame mo pa finn konn zot; sorti la ale, zot ki komet lemal.’ Koumsa mem, tou dimounn ki ekout seki mo fek dir e met li an pratik, li parey enn zom ki finn ranz so lakaz lor fondasion solid. Lapli tonbe, inondasion vini, divan soufle lor lakaz-la, li pa kraze, akoz li finn konstrir lor ros. E tou dimounn ki ekout mo parol e pa met li an pratik, zot pou parey enn fou ki konstrir so lakaz lor disab. Lapli tonbe, inondasion vini, divan soufle lor lakaz-la, li kraze.” Ler Zezi fini dir sa bann zafer-la, lafoul ti etone par so lansegnman, parski li ti ansegn zot parey enn kikenn ki ena lotorite, pa parey kouma bann dokter lalwa. Ler Zezi sorti lor montagn pe desann anba, enn gran lafoul swiv li. Enn lepre vinn kot li, tom azenou devan li e dir, “Si sa to volonte, to kapav geri mwa.” Zezi poz lame lor li, tous li, e dir li, “Samem mo volonte, aster to pou pirifie.” Deswit li vinn prop. Zezi dir li, “Ekout bien, pa rakont sa personn, me al get enn pret, donn seki Moiz finn dir pou pirifikasion; sa pou enn temwaniaz pou lezot.” Kouma Zezi ariv Kafarnaom, enn ofisie Romin vinn get li e sipliy li, “Segner, mo serviter finn paralize lakaz, li dan move soufrans.” Zezi dir ofisie-la, “Mwa, mo pou al ar twa, pou geri li.” Me ofisie-la reponn, “Segner, mo pa dign pou resevwar twa kot mwa, me dir selman enn parol e mo serviter pou geri. Momem, mo anba lotorite mo bann siperyer, e mo ena enn bann solda anba mo lotorite; si mo dir enn, ‘Ale’ li ale, enn lot ‘Vini’ li vini e avek mo esklav ‘Fer sa’ e li fer li.” Zezi ti etone ler li tann sa, e li dir bann ki ti swiv li, “Laverite mo dir zot, zame mo pa finn trouv kikenn avek enn lafwa parey dan Izrael.” Ala mo dir zot: boukou pou sorti dan les ek dan lwes e pou asiz atab avek Abraam, Izaak, ek Zakob dan rwayom lesiel. Me bann ki sipoze dan rwayom, pou gagn zet deor dan nwar kot zot pou plore ek grins zot ledan. Zezi dir ofisie-la, “Ale, ki tou kiksoz ariv dapre to lafwa.” E sa mem moman-la serviter la finn geri. Zezi al dan lakaz Pier, li rantre e li trouv belmer Pier lor lili avek enn move lafiev Zezi trap so lame, lafiev la kit li, li dibout li koumans servi Zezi. Sa swar-la, zot ti amenn kot li boukou ki ti posede ar move lespri; Zezi ti sas bann lespri-la avek so parol e li geri tou seki ti malad. Tousala ti arive dapre seki profet Izai ti dir, “Li pran lor li tou nou bann infirmite ek nou bann maladi.” Ler Zezi trouv sa gran lafoul-la otour li, li donn lord pou travers lot kote larivier. Enn dokter lalwa apros ar li e dir li, “Met, mo pou swiv twa ninport ki kote to ale.” Zezi dir li, “Bann renar ena zot lakav, zwazo lesiel ena zot nik, me Garson Limanite pena okenn landrwa pou poz so latet.” Enn lot disip dir li, “Segner, les mwa al anter mo papa avan.” Zezi dir li, “Swiv mwa, e les bann mor anter zot mor.” Zezi mont dan bato, e so bann disip swiv li. Enn gro divan soufle lor lamer, zot bato ti pre pou savire, me Zezi ti pe dormi. Zot al lev li, zot dir li, “Sov nou, Segner, nou pe mor.” Li dir zot, “Kifer zot per? Ala zot lafwa feb la.” Apre li leve, li menas divan ek vag e ti ena enn gran akalmi. Tou dimounn etone, zot dir, “Kisann-la sa? Mem divan ek lamer obeir li.” Ler li ariv lot kote, lor teritwar Gadarenien, de posede vinn ar li; zot sorti dan simitier. Zot ti telman feros ki personn pa ti kapav pas dan sa sime-la. Zot kriye for-for, “Ki to oule ar nou, Garson Bondie? Eski to finn vinn isi pou fatig nou avan ler?” Ti ena enn troupo koson ki ti pe manze dan lezanviron. Bann posede-la sipliy li, “Si to sas nou, avoy nou dan sa troupo koson-la” Zezi dir zot, “Ale!” Alor zot sorti e zot rant dan troupo koson. Troupo-la degringol depi lao, tom dan lamer e zot tou nwaye. Bann gardien koson sove, zot al dan lavil e zot rakont tou seki finn pase avek sa de posede-la. Alor tou dimounn dan lavil sorti pou vinn zwenn Zezi; ler zot trouv li, zot sipliy li kit zot teritwar. Zezi mont dan bato, li travers larivier, li al dan so lavil. Zot amenn ar li enn paralize alonze lor enn brankar. Ler Zezi trouv grander zot lafwa, li dir paralize-la, “Pran kouraz mo garson; to bann pese finn pardone.” De-trwa dokter lalwa ti pe dir dan zotmem, “Sa boug-la pe blasfeme.” Me Zezi ti konn zot panse, li dir zot, “Kifer zot ena move panse dan zot leker? Ki pli fasil pou dir, ‘To pese finn pardone,’ oubien ‘Leve, marse’? Me pou zot kone ki Garson Limanite ena lotorite lor later pou pardonn pese,” Li dir paralize-la, “Leve, pran to lili retourn kot twa.” Li leve, li al kot li. Letan lafoul trouv sa, laper trap zot, e zot glorifie Bondie ki finn donn limanite enn lotorite parey. Letan Zezi kit li ale, li trouv enn boug ki ti apel Matie, li ti pe asiz dan biro tax. Zezi dir li, “Swiv mwa.” Matie leve swiv li. Letan Zezi ti atab dan lakaz, boukou komi tax ek dimounn move lavi ti vinn asiz atab avek Zezi ek so bann disip Letan bann Farizien trouv sa, zot dir ar bann disip Zezi, “Kifer zot Met, li manz avek bann komi tax ek dimounn move lavi?” Me ler Zezi tann sa li dir, “Bann dimounn ki bien pa bizin dokter, zis bann seki malad. Ale, al aprann seki sa parol-la vedir, ‘Mo dezir mizerikord, pa sakrifis zanimo. Parski mo pa finn vini pou apel bann zis me bann peser.’ ” Apre sa, bann disip Zan vinn get Zezi e dimann li, “Kifer nou ek bann Farizien, nou fer karem, me to disip pa fer karem ditou?” Zezi dir zot, “Eski zot panse ki bann invite dan maryaz kapav an-dey pandan ki nouvo marye ankor avek zot? Enn zour pou arive kot nouvo marye pou ale, lerla zot pou fer karem. Personn pa rakomod enn vie linz avek enn tisi nef; parski latwal tisi nef la pou retresi e pou desir ankor plis sa vie linz-la. E personn pa met nouvo divin dan bann vie damzann, sinon zot pou kase, divin pou fane e damzann-la pou nepli bon. Nou met nouvo divin dan damzann nef e koumsa toule-de pou konserve.” Letan li ankor pe koz ar zot, enn sef Zwif arive e tom azenou devan Zezi, li dir, “Mo tifi fek mor, me vinn poz to lame lor li e li pou viv.” Zezi leve, li swiv li avek so bann disip. Lerla enn madam ki pe soufer avek enn lemorazi pandan douz an, vinn deryer Zezi e tous bor so linz, parski li ti finn dir dan limem, “Si selman mo kapav tous so linz, mo pou geri.” Zezi vire, e ler li trouv madam-la, li dir, “Pran kouraz mo tifi, to lafwa finn geri twa.” Deswit madam-la geri. Ler Zezi ariv kot lakaz sa sef Zwif la, li trouv bann mizisien pe zwe laflit e lafoul ki pe fer enn pake tapaz. Li dir, “Sorti la tou dimounn, tifi-la pa finn mor, li pe dormi”. Zot tou zot riy li. Me ler tou dimounn finn sorti, Zezi rant dan lakaz, li pran li par so lame e tifi-la leve. Sa nouvel-la ti fane dan tou landrwa. E ler Zezi al inpe pli lwin, de aveg swiv li, zot kriye bien for, “Pitie nou, garson David” Ler li rant dan lakaz, bann aveg-la vinn kot li e Zezi dir zot, “Eski zot krwar ki mo kapav fer sa?” Zot dir, “Wi Segner.” Apre li tous zot lizie, e dir, “Sa pou arive dapre zot lafwa.” Zot lizie ouver. Zezi donn zot enn warning pou pa rakont sa personn. Me apenn zot ale, zot fann sa nouvel-la dan tou landrwa. Ler zot ti pe sorti pou ale, dimounn ti amenn devan Zezi enn boug ki pa koze e ki ti posede. Kouma li fini sas demon-la, boug-la koumans koze e lafoul ti etone, zot dir, “Zame zot finn trouv kiksoz parey dan Izrael.” Me bann Farizien ti pe dir, “Li servi prins demon pou sas demon.” Zezi ti al partou dan Galile, li ti pe ansegne dan zot sinagog, li ti pe proklam Bonn Nouvel Rwayom Bondie. Li ti geri bann dimounn ki ti ena tou sort kalite malad. Ler Zezi get lafoul, li ti ranpli ar konpasion pou zot, parski zot ti pe plengne e zot ti abat kouma bann mouton ki pena berze. Lerla li dir so bann disip, “Ena enn gran rekolt, me pena ase travayer. Alor, priye met rekolt pou avoy travayer” Zezi apel so douz disip e li donn zot pouvwar pou sas bann move lespri ek geri tou sort kalite maladi ek infirmite Ala nom bann Zapot: premie se Simon, so ti-nom Pier, so frer Andre; Zak garson Zebede, ek so frer Zan; Filip ek Bartime; Toma ek Matie ramaser tax; Zak ti garson Alfe, ek Tade, Simon ki sorti Kana, ek Zida Iskaryot, limem ki pou trayir Zezi. Zezi ti avoy Ledouz an mision avek sa bann instriksion-la, “Pa bizin al dan rezion bann payin, pa rant dan okenn lavil bann Samaritin, al plito kot bann brebi perdi dan Izrael. Lor zot sime, anons, ‘Rwayom Bondie pe aprose.’ Geri bann malad, resisit bann mor, pirifie bann lepre, sas bann demon. Zot finn resevwar tou kado, donn tou kado. Pa pran ni lor, ni larzan, ni pies kwiv dan zot pos, okenn sak vwayaz, okenn semiz resanz, pa pran sandalet ek baton, parski enn travayer merit so saler. Ninport ki lavil ou vilaz ki zot rantre, rod kisann-la ki pare pou akeyir zot, res kot li ziska zot depar. Letan zot rant dan enn lakaz, swet lape tou dimounn, si sa bann dimounn-la tret zot bien, zot lape res lor zot, me si pa bien resevwar zot, repran zot lape. Si personn pa resevwar zot oubien refiz ekout zot parol, tap zot lipie e tir tou lapousier letan zot kit lakaz-la ou lavil-la. Laverite mo dir zot, bann dimounn dan Sodom ek Gomor pou gagn pli bon tretman ki sa bann dimounn-la. Get bien, mo pe avoy zot kouma bann mouton parmi bann loulou; zot bizin bien malin kouma serpan ek inosan kouma kolonb. Fer bien atansion, akoz ena pou amenn zot devan tribinal e pou fwet zot dan zot sinagog; akoz mwa, zot pou pas devan bann gouverner ek bann lerwa, sa pou servi bann-la ek lezot kouma enn temwaniaz. Kan pou amenn zot devan tribinal, pa trakase ki zot pou dir e kouma zot pou dir sa; parol-la pou vinn par limem dan zot labous; pa zot ki pou koze, me Lespri Bondie ki pou koz atraver zot. Frer pou trayir frer, papa pou kont so zanfan, zanfan pou lev kont zot fami e pou kondann zot amor. Tou dimounn pou ayir zot akoz mwa, me seki tini ferm ziska dan bout, li pou sove. Letan zot gagn persekite dan enn lavil, sove al dan enn lot; laverite mo dir zot, avan ki zot reisi al dan tou lavil Izrael Garson Limanite pou finn fini vini. Enn disip, pa pli siperyer ki so met; ni enn esklav ki so patron; Enn disip bizin zis resanble so met ek esklav-la so patron. Si zot apel sef enn lakaz Belzeboul, mazine aster ki nom zot pou donn so fami. Pa per personn. Tou seki kasiet pou vinn dan kler, tou seki sekre pou devwale; seki mo dir zot dan marenwar, dir li dan lalimier lizour; seki zot finn tann dir dousman dan zot zorey, mont lor lakaz, dir li bien for. Pa per bann ki touy lekor imin, me ki pa kapav touy so nam; okontrer per seki kapav detrir toule-de, nam ek lekor dan lanfer. Eski zot pa vann de mwano pou enn sou? Pourtan, pa enn sel tom anba san ki Bondie nou Papa kone. Zot osi, sak brin zot seve konte. Alor, pa bizin per, zot ena plis valer ki enn mwano.” “Si kikenn rekonet mwa an piblik ki mo ete, mwa osi mo pou rekonet li devan mo Papa dan lesiel; me si kikenn dir an piblik ki li pa konn mwa, mwa osi mo pou dir ki mo pa konn li devan mo Papa dan lesiel.” “Pa panse ki mo finn vini pou amenn lape lor later; mo pa finn vini pou amenn lape, me lepe. Mo finn vinn separ enn garson avek so papa, tifi ek so mama, belfi ek belmer. To lennmi pou dan to prop fami. Seki kontan so papa oubien so mama plis ki mwa, li pa dign pou vinn mo disip. Seki pa pran so lakrwa pou swiv mwa, li pa dign pou vinn mo disip. Seki anvi sov so lavi, pou perdi li; me seki perdi so lavi akoz mwa, pou gagn li.” “Dimounn ki akeyir zot, akeyir mwa, dimounn ki akeyir mwa, pe akeyir Sa-Enn ki finn avoy mwa la. Dimounn ki akeyir enn profet akoz li enn profet pou gagn rekonpans enn profet; dimounn ki akeyir enn fidel akoz li enn fidel, li pou gagn rekonpans enn fidel. Laverite mo dir zot, si kikenn donn enn ver dilo enn sa bann pli tipti parmi zot, akoz li mo disip, les mo dir zot, li pou gagn so rekonpans.” Ler Zezi fini donn instriksion so douz disip, li kit sa landrwa-la pou al prese ek ansegne dan lavil kot zot reste. Dan prizon, ler Zan tann travay ki Zezi pe fer, li avoy de-trwa disip, pou dimann Zezi, “Eski tomem Sa-Enn ki sipoze vini la, oubien nou bizin atann enn lot?” Zezi reponn zot, “Al rakont Zan seki zot finn tande ek trouve: bann aveg pe trouv kler, bann andikape pe marse, bann lepre pe pirifie, bann sourd pe tande, bann mor pe resisite e bann pov pe tann Bonn Nouvel ki pe anonse. Bienere, sa dimounn ki pa tom dan pese akoz mwa.” Apre ki bann disip Zan finn ale, Zezi koz ar lafoul lor size Zan, e li dir: “Ki zot finn al gete dan dezer? Enn fatak balanse dan divan? Ki zot finn al gete? Enn zom bien abiye? Me bann ki met zoli linz, res dan pale lerwa. Abe ki zot finn al gete? Enn profet? Wi, les mo dir zot, li plis ki enn profet. Parski lor Zan mem ki finn ekrir: ‘Gete, mo pe avoy mo mesaze avan twa pou prepar to sime.’ Laverite mo dir zot, parmi tou dimounn ki finn ne lor later, pena enn pli gran ki Zan Batis; pourtan seki pli tipti dan rwayom lesiel, pli gran ki li. Depi lepok Zan Batis ziska zordi, rwayom lesiel finn touletan sibir violans e bann dimounn violan finn akapar li. Tou bann profet ek lalwa Moiz finn anons sa rwayom-la ziska lepok Zan. E si zot anvi kone, ala mo dir zot. Zan, limem Eli ki sipoze vini. Seki ena zorey, ava tande. Kouman mo pou konpar sa zenerasion-la? Li parey kouma bann zanfan ki pe asize lor laplas piblik ki pe koze ant zot, ‘Nou finn zwe zoli lamizik pou zot e zot pa finn danse; nou finn zwe kantik lanterman e zot pa finn plore.’ Zan finn vini, li pa finn manze ni bwar, e zot finn dir, ‘Li enn posede!’ Garson Limanite finn vini, li manze, li bwar e zot dir, ‘Li enn gourman, li soular, li frekant bann ramaser tax ek bann move dimounn.’ Pourtan li finn demontre lasazes Bondie par so bann bon aksion.” Alor Zezi koumans fer repros ar sa bann lavil kot li finn fer boukou mirak parski dimounn pa finn konverti. “Maler pou tom lor twa, lavil Korazin! Maler pou twa, lavil Betsaida! Parski si bann mirak ki finn arive kot zot, ti ariv dan Tir ek Sidon, depi lontan sa bann lavil-la ti pou finn montre piblikman ki zot finn sanz zot leker. Les mo dir zot, zour zizman, Tir ek Sidon pou gagn enn meyer tretman ki zot. Twa Kafarnaom, eski to krwar to pou mont drwat dan lesiel? To pou desann ziska dan lanfer parski si sa bann mirak ki finn arive kot twa la, ti deroul dan Sodom, ziska zordi sa lavil-la ti pou ankor existe. Akoz samem, mo dir zot, zour zizman li pou pli dir pou zot ki pou Sodom.” Sa mem lepok-la Zezi dir “Mo remersie twa, Papa, Segner lesiel ek later, parski to pa finn montre sa bann kiksoz-la bann saz ek bann intelizan, me to finn revel zot ar bann pli tipti. Wi, Papa samem ti to volonte. Mo Papa finn donn mwa tou e personn pa kapav konn so garson exsepte so Papa, personn pa kapav konn so Papa exsepte so Garson ek dimounn ar ki so garson anvi revel li. Vinn kot mwa zot tou ki fatige, ki pe sarye enn fardo bien lour, mo pou donn zot repo. Met mo fardo lor zot ledo, e vinn aprann ar mwa parski mo karakter li dou e mo leker ranpli ar limilite Mo zoug li fasil sarye ek mo fardo li leze.” Sa mem lepok-la, enn zour saba, Zezi ti pe travers enn karo dible; so bann disip ti gagn fin, e zot koumans kas bann zepi dible pou manze. Ler bann Farizien trouv sa, zot dir li, “Get sa, to bann disip pe fer kiksoz ki pena drwa fer zour saba.” Me Zezi reponn zot, li dir, “Eski zot pa finn lir seki David ti fer kan li ek so bann kamarad ti gagn fin? Kouma li ti rant dan lakaz Bondie e kouma li ti manz dipin ki ti finn ofer Bondie? Pourtan ni li, ni so bann kamarad pa ti sipoze fer sa, parski dapre lalwa, zis bann pret gagn drwa manz sa. Zot pa finn lir osi dan lalwa, ki zour saba, bann pret kas lalwa saba dan Tanp san ki zot rann zot koupab? Les mo dir zot, isi ena kiksoz pli gran ki Tanp. Me si zot ti konpran sinifikasion sa bann mo Lekritir la, ‘mo dezir mizerikord, pa sakrifis,’ zot pa ti pou kondann bann inosan. Parski Garson Limanite, limem proprieter saba.” Zezi kit sa landrwa-la e rant dan zot sinagog; ti ena la enn boug; so lame ti paralize. Bann Farizien ti anvi piez Zezi; zot dir li, “Eski lalwa permet fer gerizon zour saba?” Li dir zot, “Sipoze enn parmi zot ena enn sel mouton e zour saba mouton-la tom dan enn gran trou; eski li pa pou fer enn demars pou tir so mouton depi dan trou-la? Dimounn ena san fwa plis valer ki enn mouton. Alor lalwa li permet fer dibien zour saba.” Li dir paralize-la; “Donn to lame.” Li tann so lame, e sa revinn parey kouma lot lame-la. Bann Farizien sorti e zot koumans konplote, pou gete kouma pou fer li disparet. Ler Zezi aprann sa, li kit sa landrwa-la. Enn gran lafoul swiv li e li geri zot tou, li warning zot pou pa dir nanye lor li ar dimounn. Sa ti arive pou ki seki profet Izai ti dir akonpli: “Ala mo serviter, ki mo finn swazir, mo bieneme, dan ki mo finn met tou mo lazwa. Mo pou met mo Lespri lor li, e li pou pres lazistis ar bann payin Li pa pou lager ar personn, li pa pou kriye, pa pou tann so lavwa lor gran sime li pa pou kas okenn baton rozo ki ti finn deza pliye, li pa pou soufle lor enn lames ki deza pe al tengn. Me li pou persiste ziska li fer lazistis triyonfe, e tou dimounn pou fer li konfians.” Zot amenn ar Zezi enn aveg ki ti mie parski ti ena enn demon dan li. Zezi geri boug-la e lerla li koze ek li trouv kler. Lafoul ti etone e zot dir, “Pa limem Garson David?” Ler bann Farizien tann sa, zot dir, “Li sas demon par Belzeboul, sef demon.” Zezi ki konn zot panse dir zot, “Enn rwayom ki divize kont limem, li enn rwayom fini, e okenn lavil ou lakaz ki divize kont limem kapav tini. Si Satan sas Satan, li diviz limem; kouma so rwayom pou kapav tini? E si mwa, mo sas demon par Belzeboul, par ki zot prop disip sas demon? Bann-la mem pou ziz zot. Me si mwa, mo sas demon par Lespri Bondie, savedir ki regn Bondie finn deza vinn kot zot. Kouma kikenn kapav rant dan lakaz enn zom for pou pran so bann dibien si li pa atas li avan? Lerla li kapav kokin. Dimounn ki pa avek mwa, li kont mwa, dimounn ki pa rasanble ar mwa, fer divizion. Akoz samem mo dir zot, tou bann pese, tou bann blasfem pou pardone, me blasfem kont Lespri Sin pa pou pardone. Si kikenn koz kont Garson Limanite, li pou pardone, me si kikenn koz kont Lespri Sin, li pa pou pardone, ni lor later ni dan lemond ki pe vini. Swa fer enn pie vinn bon lerla so fri osi pou bon, swa enn pie malad lerla so fri osi pou malad, parski nou rekonet pie-la dapre so fri. Bann espes serpan! Kouma bon kiksoz kapav sorti dan zot labous, kan zotmem zot move? Parski labous exprim seki ena dan fon leker. Enn bon dimounn tir dan so bon trezor bann bon kiksoz, e enn dimounn move tir move kiksoz dan so move trezor. Les mo dir zot, zour zizman zot pou zize lor tou sa bann parol initil ki zot dir; parski pou deklar zot drwat par zot parol, e zot pou kondane par zot parol.” De-trwa dokter lalwa ek Farizien dir ar Zezi, “Met, nou ti anvi to donn nou enn sign.” Li reponn zot, “Zenerasion move ek adilter, zot pe rod enn sign, okenn sign pa pou donn zot anplis ki sign profet Zonas. Parey Zonas ti pas trwa zour ek trwa nwit dan vant enn gro pwason, koumsa mem Garson Limanite pou pas trwa zour ek trwa nwit anba later. Bann abitan Niniv pou leve zour zizman e zot pou kondann sa zenerasion-la, parski zot, zot ti konverti ler Zonas ti pres zot laparol. Ena isi pli gran ki Zonas! Larenn Seba pou leve zour zizman kont sa zenerasion-la e li pou kondann li parski li finn sorti dan finfon later pou ekout lasazes Salomon. Me ena isi pli gran ki Salomon!” “Ler enn lespri inpir sorti dan enn dimounn, li vwayaz dan bann landrwa dezer pou rod enn plas pou repoze, me li pa trouv nanye. Alor li dir dan limem, ‘Mo pou retourn dan mo lakaz, la kot mo sorti.’ Ler li retourne, li trouv lakaz-la vid, bien netwaye e bien dan lord. Lerla li al rod set lespri pli for ki li, zot rant dan lakaz-la zot tou e zot instal zot; alafin, sa dimounn-la li finn vinn pir ki avan. Li pou parey avek sa zenerasion-la.” Letan li ti ankor pe koz ar lafoul, so mama ek so bann frer vini. Zot ti pe dibout deor e zot ti pe anvi koz ar li. Kikenn dir li, “To mama ek to bann frer deor, zot anvi koz ar twa.” Zezi reponn li, “Kisann-la mo mama? Kisann-la mo bann frer?” Lerla li montre zot so bann disip e li dir, “Ala mo mama ek mo bann frer! Parski dimounn ki fer dapre volonte mo Papa ki dan lesiel, limem mo frer, mo ser ek mo mama.” Sa mem zour-la Zezi sorti deor, li al asiz dan bor lamer. Enn gran lafoul ti finn antour li; lafoul ti telman gran ki li ti finn bizin mont dan pirog e li asize; lafoul finn res ater dan bor dilo. Alor Zezi koz ar zot an parabol, li dir, “Tann sa: enn planter sorti pou al seme; letan li seme, enn parti lagrin tom dan bor sime; bann zwazo vini, manz tou. Enn lot parti tom dan landrwa inpe ros-ros kot pena boukou later; zot pouse vit-vit parski later ti bien mins. Me kan soley tape, zot griye, zot fletri parski zot pa ti ena ase rasinn. Enn lot parti tom dan pikan; pikan-la monte, grandi e touf zot. Enn lot parti tom dan bon later, zot pouse ek raport boukou fri, enn raport san, enn lot swasant, enn lot trant. Seki ena zorey pou tande, ava tande.” So bann disip vinn ar li e dimann li, “Kifer to koz an parabol?” Li reponn zot, “Parski zot, finn donn zot kapasite resevwar don pou konn sekre Rwayom Bondie, me lezot pa finn resevwar sa. Parski seki ena, pou gagn ankor plis e li pou gagn plis ki bizin; me seki pena la, mem sa tigit ki li ena, sa osi pou pran ar li. Ala kifer mo koz ar zot an parabol, parski zot pe gete san trouve e zot pe ekoute san tande e san konpran. Sa parol ki profet Izai ti dir pou zot la, pe akonpli: ‘Zot pou bon ekoute me zot pa pou konpran zot pou bon gete e zot pa pou trouve. parski leker sa pep-la finn vinn dir; zot zorey bouse, zot finn ferm zot lizie, pou ki zot pa get ar zot lizie, pou ki zot pa ekout ar zot zorey, pou ki zot pa konpran ar zot leker, e ki zot pa konverti; e mo ti pou geri zot.’ Me zot, zot bienere, parski zot lizie trouve e zot zorey tande. Laverite, mo dir zot, boukou profet ek dimounn ki viv drwat devan Bondie ti anvi trouv seki zot finn trouve, me zot pa finn trouve; e ti anvi tann seki zot finn tande, me zot pa finn tande.” “Ekout bien sinifikasion parabol planter. Kan kikenn tann koze lor Rwayom Bondie e li pa konpran, diab vini, ras tou seki finn seme dan so leker. Li resanble sa sime kot lagrin finn tonbe la. Seki finn seme dan terin ros li resanble sa dimounn letan li tann laparol, toutswit li resevwar li dan lazwa. Me pena rasinn dan li e laparol res dan li pou enn ti moman; me ler persekision ek lezot problem vini akoz laparol, so lafwa tom enn sel kout. Seki finn seme dan pikan, li resanble sa dimounn ki tann laparol, me bann problem lavi toulezour, lamour dibien materyel touf tou e li pa raport okenn fri. Me seki finn seme dan bon later, li resanble sa dimounn ki tann laparol, konpran li bien e ki raport bann fri; ena raport san, enn lot swasant e enn lot bann trant.” Zezi rakont lafoul enn lot parabol: “Kapav konpar Rwayom Bondie ar enn dimounn ki finn sem enn bon lagrin dan so karo; me ler tou dimounn pe dormi, enn lennmi vini ek sem move lerb dan karo dible la, apre li ale. Alor letan bann pie dible pouse e donn bann zepi, move lerb-la osi pouse. Bann serviter proprieter vinn dimann li, ‘Met, eski to pa finn sem bon lagrin dan to karo? Kot sa bann move lerb-la sorti alor?’ Li reponn zot, ‘Enn lennmi ki finn fer sa.’ Bann serviter dir li, ‘Eski to oule ki nou al ras zot?’ Li reponn, ‘Non, parski letan zot ras move lerb-la, zot kapav derasinn osi bann pie dible. Les toule-de grandi ansam ziska rekolt; lerla mo pou dimann bann travayer ramas move lerb avan, atas zot ansam, fer bann pake pou bril zot, me ramas dible dan mo grenie.’ ” Zezi rakont zot enn lot parabol, li dir, “Rwayom lesiel, parey kouma lagrin moutard ki kikenn pran pou sem dan so karo; limem pli tipti lagrin dan tou bann lagrin, me kan li grandi li vinn pli gran touf. Apre li vinn enn pie kot bann zwazo vinn fer zot nik dan so brans.” Li rakont zot enn lot parabol, “Rwayom Lesiel, parey kouma levin ki enn madam pran pou melanz avek trwa goble lafarinn ziska tou lapat-la monte.” Zezi ti koz an parabol avek lafoul; li pa ti dir nanye san servi parabol. Li fer sa pou ki parol profet realize: “Mo pou koz an parabol, mo pou anons bann kiksoz ki finn res kasiet depi kreasion lemond.” Zezi kit lafoul e rant lakaz. So bann disip vinn kot li, e dir li, “Explik nou parabol move lerb dan karo.” Li reponn, “Sa dimounn ki sem bon lagrin-la limem Garson Limanite. Karo-la samem lemond; e bann bon lagrin-la zotmem bann zanfan Rwayom Bondie; move lerb reprezant bann zanfan lennmi Bondie, sa lennmi ki sem move lerb limem Satan, rekolt reprezant lafin-dimond, e bann travayer zotmem bann anz. Parey kouma nou ramas bann move lerb pou brile, koumsa mem li pou ete ler lafin-dimond arive. Garson Limanite pou avoy so bann anz; zot pou ramas tou bann ki finn antrenn lezot dan lemal pou met zot andeor so rwayom e li pou fer parey ar bann ki finn komet lemal. Li pou zet zot dan enn gran dife, kot pou ena plore, kriye ek grinsman ledan. Lerla, bann ki finn res fidel pou briye kouma lalimier soley dan rwayom zot Papa. Seki ena zorey ava tande.” “Rwayom lesiel, parey kouma enn trezor ki finn kasiet dan enn karo. Ler kikenn dekouver li, li re-kasiet li; li telman kontan ki li vann tou seki li ena e li al aste sa karo-la.” “Rwayom lesiel, parey kouma enn marsan ki pe rod bann perl rar; ler li trouv enn ki ena enn bel valer, li al vann tou seki li ena pou al aste sa perl-la.” “Rwayom lesiel, parey kouma enn file ki zot avoy dan lamer. File-la may tou sort kalite pwason; kan li finn bien ranpli, zot amenn li ater, zot asize, zot met bann bon pwason dan enn panie e zet bann seki pa bon. Koumsa mem li pou ete ler lafin-dimond arive. Bann anz pou vini, pou separ bann ki move avek bann ki finn res fidel. Seki move pou zet zot dan sa gran dife-la, kot pou ena boukou plore ek kriye e grinsman ledan.” “Eski zot finn konpran tousala?” Zot reponn, “Wi.” Lerla li dir zot, “Tou dokter lalwa ki finn vinn disip rwayom lesiel, li kouma enn proprieter lakaz ki separ dan so trezor seki nef ek seki vie.” Ler Zezi fini rakont sa bann parabol-la, li kit sa landrwa-la, li ale. Li al dan vilaz kot li ti grandi e li koumans ansegn dimounn dan zot sinagog. Sa bann dimounn-la ti etone e zot dir, “Kot li finn gagn sa kalite sazes-la? Kouma li kapav fer bel-bel mirak koumsa? Pa limem garson sarpantie? So mama, pa Marie? So bann frer pa Zak, Zozef, Simon ek Zida? Tou so bann ser pa res isi avek nou? Be kot li finn gagn tou sa pouvwar-la, li?” Zot refiz aksepte li. Me Zezi dir zot tou, “Enn profet, li onore partou, exsepte dan so prop pei e dan so fami.” E li pa ti kapav fer okenn mirak dan sa landrwa-la, parski zot lafwa ti feb. Sa mem lepok-la Erod Tetrark ti tann koz Zezi. Li dir so bann serviter, “Sa Zan Batis sa; li finn leve parmi bann mor e samem li ena pouvwar pou fer bann mirak.” Parski Erod ti finn fer aret Zan, li ti fer atas li e met li dan prizon akoz Erodiad fam so frer, Filip. Ofet, Zan ti dir li, “Li pa korek ki to pran Erodiad pou fam.” Erod ti anvi touy li, me li ti per lafoul ki ti finn pran li pou enn profet. Alor, pou laniverser nesans Erod, tifi Erodiad ti dans omilie bann invite e li ti sitan pler Erod ki li ti pran langazman solanel pou donn li seki li dimande. Lor konsey so mama, li ti fer sa demann-la: “Donn mwa, aster-la mem latet Zan Batis lor enn plato.” Lerwa, ki ti finn fer serman devan tou bann invite, ti bien sagrin me li ti donn lord pou akord so demann. Li donn lord koup latet Zan dan prizon. Zot amenn so latet lor enn plato, zot donn tifi-la e li donn li so mama. Bann disip Zan ti pran so lekor e zot anter li. Apre sa zot al anons nouvel-la Zezi. Ler Zezi tann sa nouvel-la, li pran enn bato, li al dan enn landrwa retire li tousel. Me ler lafoul aprann sa, zot kit lavil e swiv li apie. Ler li debark ater, li trouv enn gran lafoul; li pitie zot e li geri tou zot bann maladi. Ler koumans fer nwar, bann disip vinn dir Zezi, “Sa landrwa-la li dezer e li deza tar, ranvway sa lafoul-la pou zot kapav al aste manze pou zotmem dan vilaz.” Me Zezi reponn zot, “Kifer zot bizin ale? Donn zot manze zotmem.” Zot dir li, “Nou ena la zis sink dipin ek de pwason.” Li dir zot, “Amenn zot kot mwa” Li ordonn lafoul pou instal zotmem lor lerb, li pran sa sink dipin ek sa de pwason-la, li lev so lizie ver lesiel e li beni zot. Apre sa li kas bann dipin-la, li donn bann disip pou distribie avek lafoul. Tou dimounn manze vant plin e zot amenn douz panie bann bout ki finn reste. Bann ki ti manze ti anviron sink-mil zom san kont bann fam ek bann zanfan. Zis apre sa, Zezi fer bann disip mont dan pirog ale pou ki zot ariv avan li lot kote lak, letan sa li fer lafoul al zot lakaz. Apre ki li finn fini fer lafoul ale, li mont lor enn montagn li tousel pou priye. Ler ariv aswar, li ti la li tousel, me pirog ti finn ariv omilie lamer. Bann gro vag ti pe fwet ar pirog parski ti ena enn divan kontrer. Boner gramatin, Zezi mars lor lamer vinn ar zot. Me ler bann disip trouv li pe mars lor dilo, zot panike e zot dir, “Enn fantom sa!” E zot kriye, zot tranble kouma fey. Me Zezi rasir zot toutswit e li dir, “Kouraz, mwa sa; pa bizin per.” Pier reponn, “Segner, si tomem sa, donn lord ki mo mars lor dilo pou vinn kot twa.” Zezi reponn, “Vini.” Alor Pier desann dan pirog e li koumans mars lor dilo dan direksion Zezi. Me letan li remark lafors divan, li gagn per e li koumans koule; li kriye “Segner, sov mwa!” Zezi nek avoy lame, trap li, tir li e dir li, “To lafwa feb, kifer to finn doute?” Ler zot rant dan pirog, divan-la tonbe. Bann ki ti dan pirog, zot tom azenou, zot loue li, zot dir, “Vremem to Garson Bondie.” Ler zot finn fini travers lak, zot ariv dan rezion Zenezaret. Letan bann dimounn dan landrwa rekonet Zezi, zot avoy nouvel partou e zot amenn tou bann malad kot li. Zot sipliy li pou ki li les zot tous omwin rebor so linz. Tou seki ti reisi touse, li ti geri. Bann Farizien ek bann dokter lalwa ki sorti depi Zerizalem koste ar Zezi e zot dir, “Kifer to disip pa respekte tradision nou bann gran-dimounn? Zot pa lav lame avan manze.” Li reponn zot, “Be zot, kifer zot kas komannman Bondie akoz zot tradision? Bondie finn dir, ‘Onor to papa ek to mama; e osi, ninport kisann-la ki modi so papa ek so mama, li merit lamor.’ Me zot, zot dir si enn dimounn dir ar so papa ou so mama, ‘Seki mo ti kapav donn twa, mo rezerv li pou Bondie’ lerla sa dimounn-la nepli bizin onor so papa ou so mama. Me zot, akoz zot tradision, zot pa respekte Parol Bondie. Ipokrit, Izai ti ena rezon kan li ti profetiz lor zot, kan li ti dir, ‘Sa pep la onor mwa zis avek so labous, me so leker lwin ar mwa; Zot lapriyer pena valer, parski zot ansegn doktrinn bann imin.’ ” Zezi apel lafoul e li dir, “Tande e konpran bien, seki enn dimounn met dan so labous pa kapav rann li inpir, me seki sorti dan so labous, samem ki rann li inpir.” Lerla so bann disip aprose e dir li, “Eski to kone ki bann Farizien ofanse kan zot tann twa koz koumsa?” Li reponn, “Tou bann plant ki mo papa pa finn plante pou derasine. Les zot trankil; zot kouma bann aveg ki pe diriz bann aveg. E si enn aveg diriz enn lot aveg, toule-de pou tom dan trou.” Me Pier dir li, “Explik nou sa parabol-la.” Li dir, “Eski zot pankor konpran zot osi? Zot pa trouve ki seki rant dan labous, li al dan vant e apre sa li sorti deor, li elimine? Me seki sorti dan labous sorti dan leker, samem ki rann nou inpir. Parski dan leker sorti bann move lintansion, kouma fer krim, adilter, move lavi, kokin, mansonz ek palab. Sa bann kiksoz-la ki rann dimounn inpir, me manz avek lame pa lave pa rann enn dimounn inpir.” Zezi kit sa landrwa-la e li al dan rezion Tir ek Sidon. Enn fam Kananeenn ki sorti dan sa rezion-la koumans kriye, “Pitie mwa Segner, Garson David! Mo tifi, li extra posede par enn demon.” Me Zezi pa dir nanye; so bann disip vinn sipliy li, zot dir li, “Pous li, li pe swiv nou, li pe fatig nou.” Zezi reponn, li dir, “Bondie finn avoy mwa zis pou bann brebi perdi pep Izrael.” Me, fam-la tom azenou devan Zezi e li dir, “Segner vinn sekour mwa!” Zezi reponn li, “Li pa bon pran dipin bann zanfan pou zet ar bann ti lisien.” Fam-la reponn, “Vremem, Segner, pourtan bann lisien manz bann bout dipin ki tom anba latab zot met.” Alor Zezi dir li, “Fam, to ena enn gran lafwa; to demann pou exose.” E deswit so tifi geri. Zezi kit sa landrwa-la, li mars dan bor lamer Galile, li mont lor montagn e li asize. Enn gran lafoul vinn kot li, zot amenn bann bwate, andikape, aveg, sour-mie ek dimounn ar boukou lezot maladi ankor. Zot depoz zot devan Zezi e li geri zot tou. Lafoul ti emerveye ler zot trouv bann mie koze, bann andikape geri, bwate marse e bann aveg trouv kler; lerla zot koumans glorifie Bondie Izrael. Zezi apel so bann disip e li dir, “Mo ranpli ar konpasion pou sa lafoul-la. Sa fer trwa zour depi zot avek mwa e zot pa finn manz nanye. Mo pa anvi ranvway zot vant vid, mo per zot gagn febles lor sime.” Bann disip dir li, “Dan sa landrwa dezer la, kot nou pou gagn ase dipin pou enn lafoul parey?” Zezi dir zot, “Komie dipin zot ena?” Zot reponn, “Set, avek de-trwa ti pwason” Alor li donn lord lafoul asiz anba. Li pran sa set dipin-la ek bann pwason-la, ler li fini remersi Bondie, li kas zot, li donn so bann disip e bann-la partaz avek lafoul. Tou dimounn manze vant plin e zot retourn set korbey ranpli avek bann bout ki reste. Ti ena kat mil zom ki ti manze, san kont bann fam ek bann zanfan. Apre ki li finn ranvway lafoul, li mont dan pirog pou al dan teritwar Magadan. Bann Farizien ek Sadiseen avans ver Zezi pou piez li. Zot dimann li enn sign depi lesiel. Li reponn zot, “Ler soley kouse, zot dir, ‘Pou ena botan parski lesiel rouz.’ Boner gramatin zot dir, ‘Lapli pou tonbe zordi parski lesiel kouver.’ Zot kone kouma pou interpret sign lesiel, me zot pa kapav interpret sign letan zordi. Zenerasion move ek adilter pe dimann enn sign, me okenn sign pa pou donn li exsepte sign Zonas.” Apre sa li kit zot li ale. Ler bann disip ariv lot kote lak, zot ti finn bliye amenn dipin avek zot. Zezi dir zot, “Get bien, fer atansion ar levin bann Farizien ek Sadiseen.” Zot dir ant zot, “Sirman parski nou pa finn amenn dipin.” Ler Zezi aprann tousala, li dir, “Get zot lafwa kouma feb, kifer zot panse ki zot pena dipin? Eski zot ankor san konpran? Zot pa rapel sa sink dipin ki ti nouri sink-mil zom-la e kantite panie plin zot ti ramase? Zot pa rapel sa set dipin ki ti nouri sa kat-mil zom-la ek sa kantite panie plin ki zot ti ramase la? Kouma zot pa konpran ki mo pa pe koz lor dipin? Fer atansion ar levin bann Farizien ek bann Sadiseen!” Lerla zot konpran ki li pa ti pe dir zot fer atansion ar levin dipin, me lansegnman ki bann Farizien ek Sadiseen ti pe done. Ler Zezi ariv dan distrik Sezare-Filip, li dir so bann disip, “Ki dimounn pe dir lor Garson Limanite?” Zot dir li, “Enn bann dir Zan Batis, enn lot bann dir Eli e enn lot bann ankor dir Zeremi oubien enn lot profet.” Li dir zot, “Me zot, ki zot dir mo ete?” Simon Pier reponn, “To Lemesi, Garson Bondie Vivan.” Zezi reponn li, “Bienere Simon, garson Zan! Pa to natir imin ki finn revel twa sa, me mo Papa ki dan lesiel. E mo dir twa Pier, to enn ros, e lor sa ros-la mo pou konstrir mo Legliz, e pwisans lamor pa pou kapav dominn li. Mo pou donn twa lakle rwayom lesiel, e tou seki to atase lor later pou atase dan lesiel e tou seki to large lor later pou large dan lesiel.” Lerla li donn lord so bann disip pou pa dir personn ki limem Lemesi. Depi sa, Zezi koumans montre so bann disip ki li bizin al Zerizalem, soufer boukou dan lame bann ansien, bann sef pret ek dokter lalwa e ki zot pou touy li me li pou resisite lor trwaziem zour. Pier amenn li enn kote e fer li bann repros; li dir, “Tou pou pas bien, Segner! Sa pa pou zame ariv twa.” Me li vire e li dir Pier, “Pas deryer mwa, Satan! To enn gro ros lor mo sime parski to pa pans kouma Bondie me kouma imin.” Apre sa Zezi dir ar so bann disip, “Si kikenn oule vinn ar mwa, fode pa li mazinn zis limem, me fode li pran so lakrwa pou swiv mwa. Seki oule sov so lavi pou perdi li, e seki perdi so lavi akoz mwa pou sov li. Ki serti enn dimounn gagn lemond antie me li perdi so lavi? Ki enn dimounn kapav done pou aste lavi? Garson Limanite pou vini avek so bann anz dan laglwar so Papa, e lerla li pou tret sak dimounn dapre seki li finn fer. Laverite mo dir zot, ena parmi zot ki pa pou konn lamor avan ki zot trouv Garson Limanite revini dan so Rwayom.” Sis zour apre, Zezi pran Pier, Zak ek so frer Zan e li amenn zot lor enn montagn bien ot. Zot ti tousel avek li. Li transfigire devan zot e so figir briye kouma soley, so linz vinn blan kouma lalimier. So trwa disip trouv Moiz ek Eli paret enn kout e zot ti pe koz ar Zezi. Alor Pier dir Zezi, “Segner, li bien bon nou la avek twa! Si to oule, mo ranz trwa latant, enn pou twa, enn pou Moiz ek enn pou Eli.” Letan li ti ankor pe koze, enn niaz bien blan kouver zot e enn lavwa dan niaz-la ti pe dir, “Samem mo Garson ki mo bien kontan, li donn mwa boukou lazwa, ekout li!” Ler bann disip tann sa lavwa-la, zot ti telman efreye ki zot tom anplan lor later. Me Zezi apros zot e tous zot, li dir, “Leve, pa gagn per.” Zot lev zot lizie e zot trouv Zezi tousel. Letan zot pe desann montagn, Zezi donn zot enn lord, “Pa rakont personn seki zot finn trouve tanki Garson Limanite pa resisite parmi bann mor.” Lerla bann disip dimann li, “Kifer bann dokter lalwa dir fode ki Eli revini avan?” Li reponn zot, “Zisteman Eli pou revini e met tou dan lord. Me les mo dir zot ki Eli finn fini vini e bann-la pa finn rekonet li, me zot finn tret li kouma zot anvi. Koumsa mem Garson Limanite pou soufer ar zot.” Lerla bann disip konpran ki li ti pe koz ar zot lor Zan Batis. Ler zot ariv kot lafoul ti ete, enn boug vini, tom azenou devan Zezi, e li dir, “Segner, pitie mo garson ki gagn kriz epilepsi e li soufer boukou. Souvan li gagn kriz e li tom dan dilo ek dan dife. Mo finn amenn li ar to bann disip me zot pa finn kapav geri li.” Zezi reponn, “Zenerasion san lafwa ranpli ar mesanste. Komie letan ankor mo pou res ar zot? Ziska kan mo bizin siport zot? Amenn li ar mwa.” Zezi menas demon-la, li sorti dan garson-la e enn sel kou li geri. Apre sa bann disip al get Zezi an prive, zot dir li, “Kifer nou pa finn kapav sas sa demon-la?” Zezi reponn zot, “Parski zot lafwa tro feb. Laverite mo dir zot, si zot ena lafwa groser enn lagrin moutard e ki zot dir montagn, ‘Bouze al laba,’ li pou bouze; nanye pa inposib pou zot. Zis ar lapriyer ki sa kalite lespri-la kapav sorti.” Letan Zezi ek so bann disip ti ansam dan Galile, li dir zot, “Zot pre pou livre Garson Limanite dan lame bann dimounn, zot pou touy li e li pou resisite lor trwaziem zour.” Bann disip ti bien sagrin kan zot tann sa parol-la. Ler zot ariv Kafarnaom, bann komi tax Tanp vinn ar Pier e zot dir li, “Zot met, pa pey tax li?” Pier reponn, “Wi, li peye.” E ler li rant lakaz, Zezi koz avek Pier e li dimann li, “Ki to panse Simon, bann lerwa lor later, kisann-la zot fer pey tax? Bann sitwayen oubien bann etranze?” Letan Pier reponn “Bann etranze,” Zezi dir li, “Savedir bann sitwayen lib, pena pou peye. Me pou nou pa ofans zot, al lamer zet lamson e premie pwason ki morde, get dan so lagel e to pou trouv enn pies larzan; pran li e pey tax pou twa ek pou mwa.” Sa letan-la, bann disip vinn ar Zezi e dimann li, “Kisann-la pli gran dan rwayom lesiel?” Li apel enn ti zanfan, li met li omilie zot, e li dir, “Laverite mo dir zot, si zot pa sanze e vinn kouma zanfan, zot pa pou rant dan rwayom lesiel. Dimounn ki pli gran dan rwayom lesiel li kikenn ki abes li e fer li vinn tipti kouma sa zanfan-la. Dimounn ki akeyir enn zanfan lor mo nom, li pe akeyir mwa osi. Si kikenn fer enn sa bann ti zanfan ki krwar dan mwa la tonbe, ti pou preferab atas enn gro ros dan so likou e zet li dan fon lamer. Maler pou lemond akoz bann kiksoz ki fer dimounn tom dan pese. Sa bann kiksoz-la zot inevitab, me malere sa dimounn ki responsab tousala. Si to lame oubien to lipie fer twa tonbe, koup li zete, preferab to rant dan lavi avek enn sel lame ek enn sel lipie ki to ena toule-de lame ek lipie dan dife lanfer. Si to lizie fer twa tonbe, aras li zete; preferab to rant dan lavi avek enn sel kote lizie ki to al dan dife lanfer avek toule-de. Fer sir ki zot pa mepriz enn sa bann ti zanfan-la; parski les mo dir zot, ki zot bann anz touletan dan prezans mo Papa dan lesiel. Ki zot panse? Sipoze enn dimounn ena san mouton, e enn parmi perdi, eski li pa pou les sa katrovin-diznef mouton-la lor montagn pou al rod sa enn ki finn perdi la? Si li retrouv li, mo sir li pou pli kontan pou sa sel mouton-la ki sa lezot katrovin-diznef ki pa finn perdi. Koumsa mem zot Papa ki dan lesiel, li pa anvi ki okenn sa bann ti-dimounn-la perdi. Si to frer krwayan ofans twa, al get li e montre li so fot kan zis zot de tousel. Si li ekoute, to pou finn regagn li kouma to frer. Me si li pa ekout twa, pran enn ou de lezot dimounn avek twa kouma temwin. Si li refiz ekout zot, dir tou ar Legliz; e si li refiz ekout Legliz, konsider li kouma enn payin oubien enn komi tax. Laverite, mo dir zot, tou seki zot atase lor later pou atase dan lesiel, e tou seki zot delarge lor later pou delarge dan lesiel. Laverite mo dir zot ankor enn fwa, si de ant zot tom dakor lor later pou dimann ninport kwa, mo Papa dan lesiel pou akord zot. Parski la kot de ou trwa finn rasanble lor mo nom mo pou la omilie zot.” Lerla Pier vinn kot Zezi e li dimann li, “Segner, si enn frer krwayan ofans mwa, komie fwa mo bizin pardonn li? Ziska set fwa?” Zezi reponn li, “Non pa set fwa, me swasann-dis fwa set fwa. Se pou sa rezon-la ki rwayom lesiel li parey enn lerwa ki deside pou regle so kont avek so bann serviter. Ler li koumans fer sa, zot amenn li kikenn ki ti dwa dis mil talan. Kouma li pa ti kapav pey so det, so met ti finn donn lord pou vann li, so fam, so bann zanfan ek tou so dibien, pou ki li ranbours so det. Serviter-la tom azenou devan lerwa, li dir, ‘Pran pasians Segner, mo pou rann twa tou seki mo dwa.’ Dan so mizerikord, lerwa-la larg li e rey tou so det. Me sa mem serviter-la, kouma li sorti deor, li zwenn enn so kamarad serviter ki ti dwa li san pies larzan. Li may li par likou, li dir li, ‘Pey mwa tou seki to dwa mwa.’ Lerla so kamarad serviter tom azenou e sipliy li, ‘Ena pasians avek mwa, mo pou rann twa to larzan.’ Me li refize; li fer met li dan prizon ziska li fini ranbours so det. Kan bann lezot kamarad serviter trouv seki pe pase, zot ti bien tris, e zot al rakont zot met tou seki ti finn pase. Alor lerwa apel li e dir li, ‘To move! Mo finn rey tou to det parski to finn sipliy mwa. To pa panse to ti bizin ena pitie pou to kamarad serviter parey kouma mo finn ena pitie pou twa?’ Dan so koler, lerwa avoy li al fer travo forse ziska li fini ranbours tou so det. Koumsa mem mo Papa ki dan lesiel pou fer avek sakenn parmi zot, si zot pa pardonn zot bann frer ek ser avek tou zot leker.” Ler Zezi fini koze, li kit Galile e li al dan rezion Zide lot kote Zourdin. Enn gran lafoul ti pe swiv li e li ti pe geri zot tou. Enn bann Farizien koste ar li pou teste li. Zot dir, “Eski lalwa permet enn mari kit so fam san okenn rezon?” Li reponn, “Zot pa finn lir ki dan koumansman Bondie Kreater finn kree dimounn zom ek fam? Bondie ti dir, ‘Akoz samem enn zom pou kit so papa ek so mama, li pou al atas li ar so fam e toule-de pou vinn enn sel.’ Alor zot nepli pou de, me enn sel. Fode pa dimounn separ seki Bondie finn met ansam.” Zot dir li, “Be pou kifer Moiz finn donn nou lord donn enn papie divors pou divorse?” Li dir zot, “Parski zot leker dir ki Moiz finn permet zot divors ar zot fam; me dan koumansman li pa ti koumsa. Mo dir zot, si kikenn divors ar so fam, exsepte dan ka infidelite, e marye avek enn lot dimounn, li komet adilter.” So bann disip dir li, “Si li koumsa ant enn zom avek so fam, vomie pa marye.” Me li dir zot, “Pa tou dimounn kapav aksepte sa lansegnman-la, me zis bann dimounn ki finn resevwar don pou konpran sa. Parski ena plizir rezon kifer zom pa marye, ena parski zot finn ne inpwisan, ena parski dimounn finn rann zot koumsa e lezot pa marye akoz Rwayom Lesiel. Seki kapav aksepte sa lansegnman-la, li ava konpran.” Alor bann dimounn amenn bann ti zanfan pou ki Zezi inpoz lame lor zot e priye pou zot; me so bann disip farous zot. Me Zezi dir, “Les bann ti zanfan vinn ar mwa, pa anpes zot parski Rwayom Lesiel pou dimounn ki parey kouma zot.” Li inpoz lame lor zot, apre li kit zot, li ale. Ala enn dimounn vinn kot Zezi e dir li, “Met, ki bon kiksoz mo bizin fer pou gagn lavi eternel?” Zezi dir li, “Kifer to poz mwa kestion lor seki bon? Zis Enn Sel ki bon. Si to anvi rant dan lavi, swiv bann komannman.” Li dir li, “Ki sa bann komannman-la?” Zezi dir li, “Pa touye, pa komet adilter, pa kokin, pa fer fos temwaniaz, onor to papa ek to mama, e kontan to prosin parey kouma tomem.” Zenes-la dir li, “Tousala mo finn swiv, ki mo manke ankor?” Zezi dir li, “Si to anvi vinn parfe, ale, vann tou to dibien, donn bann pov e to pou gagn enn trezor dan lesiel; apre sa vini, swiv mwa.” Ler zenes-la tann sa, li ale bien tris parski li ti ena boukou dibien. Lerla Zezi dir so bann disip, “Laverite, mo dir zot, bien difisil pou enn ris rant dan Rwayom lesiel. Mo redir zot, li pli fasil pou enn samo pas dan enn trou zegwi ki pou enn ris rant dan Rwayom Bondie.” Ler bann disip tann sa, zot etone e zot dir, “Kisann-la pou kapav sape alor?” Zezi get zot fran-fran e dir zot, “Pou dimounn, li inposib, me pou Bondie tou kiksoz posib.” Pier dir li, “Get nou, nou finn kit tou pou swiv twa. Alor ki pou ariv nou?” Zezi dir zot, “Laverite mo dir zot, dan sa nouvo lemond-la, kan Garson Limanite pou asiz lor so tronn dan laglwar, zot ki finn swiv mwa, zot osi zot pou asiz lor douz tronn pou ziz douz tribi Izrael. Dimounn ki finn kit lakaz, frer, ser, papa, mama, zanfan ek zot later akoz mwa, pou resevwar san fwa plis e zot pou erit lavi eternel. Boukou premie pou vinn dernie, e bann dernie pou vinn premie.” “Rwayom lesiel resanble enn proprieter ki sorti gramatin pou anplway bann travayer dan so karo rezin. Apre ki li finn tom dakor ar zot lor lapey enn zourne travay, li avoy zot dan so karo. Ver nef-er li resorti, e trouv lezot lor laplas piblik pe dibout san travay. Li dir zot, ‘Al dan mo karo e mo pou pey zot enn saler rezonab.’ E zot al travay. Ler li resorti ver midi ek ver trwa-z-er, li fer parey. Ver sink-er li sorti e trouv ankor ki pe dibout lor laplas; e li dir zot, ‘Kifer zot res la enn zourne san fer nanye?’ Zot dir li, ‘Parski personn pa finn anplway nou.’ Li dir zot, ‘Al dan mo karo zot osi.’ Kan finn ariv aswar, proprieter la dir so formenn, ‘Apel bann travayer e donn sakenn zot lapey. Koumans ar bann dernie pou fini par bann premie.’ Bann ki ti pran travay ver sink-er prezant zot, e sakenn resevwar valer enn zourne travay. Ler ariv tour bann ki finn pran travay an premie, zot ti panse ki zot ti pou gagn plis; me sakenn resevwar valer enn zourne travay. Letan zot resevwar zot lapey zot mirmire kont proprieter-la. Zot dir li, ‘Sa bann dernie-la finn travay enn-er tan selman, e to tret zot parey kouma nou ki finn trime tout lazourne anba enn soley diplon.’ Proprieter-la reponn enn ladan, ‘Kamarad, mo pa finn fer twa ditor. Eski to pa ti dakor ar mwa lor sa lapey-la? Pran to kas, ale. Mo anvi donn dernie-la parey kouma mo finn donn twa. Eski mo pena drwa fer seki mo anvi ar mo dibien? Oubien, eski to zalou parski mo zenere?’ Koumsa mem, bann dernie pou vinn premie, e bann premie pou dernie.” Ler Zezi pe mont Zerizalem, li pran Ledouz enn kote an prive e li koz avek zot ler zot pe marse. Li dir, “Ekout bien, nou pe mont Zerizalem, Garson Limanite pou livre dan lame bann sef pret ek dokter lalwa e zot pou kondann li amor, apre sa zot pou met li dan lame bann payin, zot pou boufonn li, fwet li, krisifie li, me lor trwaziem zour li pou resisite.” Lerla, mama bann garson Zebede vinn get Zezi avek so de garson, li tom azenou devan li pou dimann li enn faver. Zezi dir li, “Ki to oule?” Li reponn, “Promet mwa ki mo de garson ki la, zot pou asiz enn dan to kote drwat ek lot dan to kote gos dan to Rwayom.” Me Zezi reponn, “Zot pa kone ki zot pe dimande. Eski zot kapav bwar koup ki mo pe al bwar?” Zot dir li, “Wi, nou kapav” Li reponn zot, “Koup ki mo pou bwar, zot pou bwar, me pou kone kisann-la pou asiz dan mo kote drwat ek gos, sa li pa depann lor mwa. Bondie, mo papa finn rezerv sa bann plas-la pou sertin dimounn ki li anvi.” Kan lezot dis disip tann sa, zot ankoler avek de frer-la. Me Zezi apel zot e li dir, “Zot kone ki bann lerwa payin diriz e dominn lezot. Sa bizin pa arive parmi zot; seki anvi pran grander parmi zot, li bizin okip plas serviter, e seki anvi vinn premie, li bizin vinn esklav tou dimounn; parey kouma Garson Limanite pa finn vini pou ki dimounn servi li, me pou servi dimounn e donn so lavi kouma enn ranson pou boukou dimounn.” Letan zot pe kit Zeriko, enn gran lafoul swiv Zezi. Ti ena de aveg pe asize lor bor sime. Letan zot tande ki Zezi pe pas parla, zot kriye for-for, “Segner, Garson David, pitie nou!” Lafoul pa kontan, dir zot res trankil; me zot kriye ankor pli for, “Pitie nou, Segner, Garson David!” Zezi arete, li apel zot, li dir, “Ki zot anvi mo fer pou zot?” Zot reponn, “Segner, fer nou trouv kler.” Zezi ranpli ar konpasion, li tous zot lizie. Enn sel kout, zot retrouv kler e zot swiv li. Kan zot ariv pre ar Zerizalem, dan vilaz Betfaze, koste ar kolinn Pie Zoliv, Zezi avoy de disip, e li dir zot, “Al dan prosin vilaz; kouma zot ariv laba, zot pou trouv enn bourik ki atase e so piti avek li. Delarg zot, amenn zot kot mwa. Si kikenn dimann zot ninport kwa, zis dir, ‘Lesegner bien bizin zot.’ Toutswit, dimounn-la pou les zot ale.” Sa finn arive pou ki parol ki bann Profet ti dir realize: “Dir popilasion Zerizalem: gete, zot lerwa pe vini li lor enn ti bourik, e li ranpli ar imilite.” Bann disip ale e fer parey kouma Zezi ti finn dir zot; zot amenn bourik-la ek so piti, e zot met zot linz lor bann-la e Zezi asiz lor linz-la. Enn lafoul dimounn tal zot linz lor sime, lezot koup bann brans e fann lor sime. Lafoul ki ti devan Zezi ek bann ki ti pe swiv li par deryer, ti pe kriye; “Ozana garson David! Ki Bondie beni sa dimounn ki vinn lor nom Lesegner!” Ler li rant dan lavil Zerizalem, tou dimounn ti azite, zot pe dimande, “Kisann-la sa?” Lafoul reponn, “Limem profet Zezi ki sorti Nazaret dan Galile.” Ler Zezi rant dan Tanp, li farous tou bann ki ti pe vande ek aste, li devir anba-lao latab bann sanzer larzan ek sez bann vander pizon. Li dir zot, “Finn ekrir, ‘Pou apel mo lakaz, enn lakaz lapriyer.’ Me zot finn fer li vinn enn kavern voler.” Bann aveg ek bann bwate vinn kot li dan Tanp, e li geri zot. Me kan bann sef pret ek dokter lalwa trouv sa bann mirak-la e tann bann zanfan pe kriye, ‘Ozana Garson David,’ zot ankoler. Lerla zot dir Zezi, “To tande ki zot pe dir?” Zezi reponn, “Wi. Eski zot pa finn lir: ‘Mem bann zanfan ek bann ti-baba pou sant louanz ki finn prepare pou li.’ ” Zezi kit zot, li al andeor lavil Betani, e li pas lanwit laba. Landime gramatin, ler Zezi retourn dan lavil, li gagn fin. Li trouv enn pie fig dan bor sime e li al pre ar li, me li pa trouv okenn fri, me zis bann fey. Alor li dir pie fig-la: “To nepli pou donn fri ankor” Enn sel kou pie fig sek. Ler bann disip trouv sa, zot ti etone, e zot dir: “Kouma sa pie-la kapav sek enn sel kou?” Zezi reponn zot, “Laverite, mo dir zot, si zot ena lafwa e zot pa doute, pa zis seki mo finn fer avek pie fig ki zot pou kapav fer; me si zot dir sa montagn-la, ‘leve al zet twa dan lamer,’ sa pou arive. Tou seki zot dimande dan lafwa, zot pou resevwar.” Ler Zezi rant dan Tanp, bann sef pret ek bann ansien vinn kot li, e zot dimann li, “Par ki lotorite to pe fer sa bann kiksoz-la, kisann-la finn donn twa sa lotorite-la?” Zezi dir zot, “Mo pou poz zot enn ti kestion mwa osi; si zot dir mwa so repons, lerla mo pou dir zot par ki lotorite mo fer sa bann kiksoz-la. Eski batem Zan sorti depi dan lesiel ouswa dimounn ki finn invant sa?” Zot koumans diskit ant zot, “Si nou reponn ‘depi dan lesiel’, li pou dir, be kifer alor zot pa finn krwar dan li? Si nou reponn, ‘Dimounn,’ nou per lafoul parski tou dimounn ti konsider Zan kouma enn profet.” Alor zot reponn Zezi, “Nou pa kone.” Lerla Zezi reponn zot, “Mwa osi mo pa pou dir zot kot mo pouvwar sorti.” Zezi kontigne, li dir “Ki zot panse lor la? Enn papa ena de garson. Li al get premie-la, li dir li, ‘Mo garson, al travay dan mo lavign zordi.’ Li reponn, ‘Mo pa pou ale.’ Me plitar li sanz lide li ale. Papa-la vinn ar deziem-la e li dir li mem zafer; e li reponn ‘Wi papa,’ me li pa ale. Kisann-la ant sa de garson-la finn fer volonte so papa?” Zot dir, “Premie-la.” Alor Zezi dir zot, “Laverite, mo dir zot, bann ramaser tax ek bann prostitie pou ariv dan Rwayom Bondie avan zot tou. Ofet, Zan Batis finn vinn kot zot pou montre zot sime lazistis, zot pa finn krwar dan li, me bann ramaser tax ek bann prostitie finn krwar dan li. Me zot, mem apre zot finn trouv sa, zot pa finn sanze pou krwar dan li.” “Ekout enn lot parabol,” Zezi dir, “Ti ena enn proprieter ki ti plant enn karo rezin, li antour li avek enn baraz, li fouy enn trou pou instal enn preswar, e li aranz enn mirador. Li lwe li ar bann travayer e li al dan enn lot pei. Letan finn ariv ler pou rekolte, li avoy so bann serviter kot bann travayer-la pou al sers so par. Bann travayer trap bann serviter-la, bat enn ladan, touy enn lot e avoy kout ros lor trwaziem-la. Li avoy ankor lezot serviter, plis ki premie fwa, me bann travayer-la tret zot parey. An-dernie li avoy so garson. Li dir ar limem, ‘Zot pou respekte mo garson.’ Me ler bann travayer trouv garson-la, zot dir ant zot, ‘Ala eritie; vini, anou touy li e pran so leritaz.’ Alor zot trap li, zet li andeor karo e touy li. Aster-la kan proprieter karo rezin vini, ki li pou fer avek sa bann travayer-la?” Zot dir li, “Li pou masakre sa bann kriminel-la e lwe so karo ar enn lot bann travayer ki pou donn li so par apre rekolt.” Zezi dir zot, “Zame zot finn lir dan Lekritir ki dir: ‘Ros ki bann mason finn zete finn vinn ros ki tini tou, Sa travay Lesegner, Sa li enn gran mervey pou nou lizie. Ala, mo dir zot, pou ras Rwayom Bondie ar zot e pou donn sa enn pep ki pou prodir vre fri.” Dimounn ki tom lor sa ros-la pou kas-kase e si ros-la ki tom lor kikenn, li pou vinn lapousier. Letan bann sef pret ek bann Farizien tann sa bann parabol-la, zot konpran ki li ti pe koz kont zot. Alor zot rod trap li me selman zot ti gagn per lafoul parski bann-la ti konsider li kouma enn profet. Ankor enn fwa Zezi servi parabol pou ansegne, li dir, “Rwayom lesiel parey kouma enn lerwa ki organiz enn lanos pou maryaz so garson. Li avoy so bann serviter pou apel bann invite, me zot refiz vini. Li avoy lot serviter ankor e li donn zot sa mesaz-la: ‘Dir mo bann invite, “Ala mo repa finn pare, mo finn fini touy mo bann toro ek mo bann zanimo bien gra, tou finn pare. Vinn dan lanos.” Me bann invite pa interese, ena al dan zot karo, ena al okip zot komers, ena mem ki tom lor bann serviter, maltret zot e touy zot. Lerwa bien ankoler; li avoy so bann solda al touy sa bann asasin-la e bril zot lavil. Apre sa, li dir so bann serviter, ‘Lanos finn pare, me mo bann invite pa dign. Al dan bann lakrwaze sime e tou dimounn ki zot trouve invit zot dan lanos.’ Bann serviter sorti, al lor lari e rasanble tou seki zot trouve, bon kouma pa bon; e lasal ranpli ar invite. Me kan lerwa vini pou get bann invite, li remark kikenn ki pa ti ena kostim maryaz, e li dir li, ‘Kamarad, kouma to finn rant la san enn kostim maryaz?’ Boug-la perdi laparol. Lerla lerwa dir so bann serviter, ‘Atas so lame ek so lipie, zet li deor dan teneb, la kot pou ena boukou plore, kriye ek grinsman ledan.’ Parski boukou pou apele, me tigit pou eli.” Bann Farizien fer enn konplo pou piez Zezi lor bann parol ki li finn dir. Alor, zot avoy zot bann disip, ansam avek bann Erodien pou al get Zezi. Bann-la dir li, “Met, nou kone ki to sinser, seki to ansegne lor lalwa Bondie li vre, e to pa les twa inflianse par personn parski to tret tou dimounn parey. Dir nou alor, ki to panse: Eski nou lalwa permet nou pey tax lanperer ou non?” Me Zezi, ki konn zot mesanste, reponn zot, “Bann ipokrit, kifer zot anvi met mwa dan lak? Montre mwa enn pies avek ki zot pey tax.” Zot amenn li enn pies larzan. Apre li dir zot: “Ki figir ena lor la e ki finn ekrir?” Zot reponn, “Lanperer.” Li dir zot, “Rann lanperer seki pou lanperer e rann Bondie seki pou Bondie.” Kan zot tann sa, zot dekonserte, zot kit li, zot ale. Sa mem zour-la, de-trwa Sadiseen vinn kot Zezi pou dir ki pena rezireksion e zot poz li enn kestion: “Met, Moiz ti dir, ‘Si enn zom mor san zanfan, so frer bizin marye ar so fam pou donn li enn desandan. Enn fwa ti ena set frer ki ti viv isi. Premie-la marye e mor san zanfan e li kit vev-la ar so frer. Deziem-la fer parey, e mem zafer ariv trwaziem-la ek tou lezot. Apre sa, fam-la osi mor. Zour rezireksion, kisann-la pou vinn so mari, parski li finn pran toule-set kouma mari?” Zezi reponn li, “Zot fer erer, parski zot pa konn Lekritir ek pwisans Bondie. Kan bann mor pou releve, bann dimounn pa pou pran ni zom ni fam, me zot pou viv kouma bann anz dan lesiel. Pou seki konsern rezireksion bann mor, eski zot pa finn lir seki Bondie finn dir, ‘Momem Bondie Abraam, Bondie Izaak, ek Bondie Zakob?’ Li pa Bondie bann mor me Bondie bann vivan.” Tou dimounn letan zot tann sa, zot ti inpresione par so lansegnman. Letan bann Farizien tande ki li finn ferm labous bann Sadiseen, zot rasanble zot, e enn parmi zot ki ti enn dokter lalwa, dimann Zezi enn kestion pou piez li. “Met, ki pli gran komannman dan lalwa?” Zezi dir li, “‘To bizin kontan to Segner, to Bondie avek tou to leker, avek tou to nam e avek tou to lespri.’ Samem komannman pli gran e pli inportan. Deziem pli inportan ‘To kontan to prosin kouma tomem’ Tou bann lalwa ek bann profet depann lor sa de komannman-la.” Ler bann Farizien ti finn rasanble, Zezi dimann zot: “Ki zot panse lor Lemesi? Ki so desandan?” Zot reponn, “Desandan David”. Zezi dir zot, “Be kouma David ki ti anba gid Lespri Sin, finn kapav apel li ‘Segner’? Parski David limem finn dir: ‘Lesegner finn dir mo Segner, asiz twa dan mo kote drwat ziska mo kraz mo bann lennmi anba mo lipie.’ ” “Si David apel li Segner, kouma li kapav so garson?” Personn pa ti kapav donn li enn repons, e depi sa zour-la, personn pa ti oze poz li kestion ankor. Zezi koz ar lafoul ek so bann disip, li dir, “Bann dokter lalwa ek Farizien, asiz lor tronn Moiz; alor zot bizin pratik ek swiv tou seki zot dir; me zot, pa imit sa bann-la, parski zot pa pratik seki zot ansegne. Parski zot atas bann gro fardo difisil pou amene lor zepol lezot, me ki zot, mem zot ti ledwa, zot pa'le bouze. Me zot kontan fer kiksoz pou lizie dimounn, zot bann filakter bien-bien gran e franz zot manto bien long. Zot kontan bann premie plas dan bann fet ek bann meyer plas dan sinagog. Zot kontan kan dimounn salie zot dan bann plas piblik e dimounn apel zot Rabi. Me zot, fode pa ki zot fer apel zot Rabi, parski zot ena enn sel met e zot tou so zelev. Pa apel ninport ki lor later papa, parski Li tousel zot papa ki dan lesiel. Pa fer apel zot met parski zot ena enn sel met, Lemesi. Dimounn ki pli gran parmi zot, li pou zot serviter. Dimounn ki anvi gagn laglwar, pou imilie li, dimounn ki imilie li, pou gagn laglwar. Maler lor tou bann dokter lalwa ek Farizien ipokrit! Zot finn ferm laport lesiel pou dimounn. Zotmem zot pa rantre e kan lezot anvi rantre, zot blok laport. Maler lor zot dokter lalwa ek Farizien ipokrit, zot manz tou manze bann vev, zot fer long-long lapriyer pou lizie dimounn. Akoz samem zot pou gagn enn pli gran kondanasion. Maler lor tou bann dokter lalwa ek Farizien ipokrit. Zot vwayaz partou lor lamer ek lor later pou konverti enn sel dimounn e zot fer li al dan lanfer de fwa pli vit ki zot. Maler lor zot, bann gid aveg. Zot dir, ‘Si kikenn fer serman lor Tanp, li pa angaz nanye; me si kikenn fer serman par lor Tanp, la li bizin tini so serman.’ Bann fou ek aveg! Ki pli inportan? Lor oubien Tanp ki rann lor-la sakre? Zot dir osi: ‘Si kikenn fer serman lor lotel, li pa angaz nanye; me si li fer serman lor lofrand ki lor lotel, la li bizin tini so serman.’ Bann fou ek aveg! Ki pli inportan? Lofrand oubien lotel ki rann ofrand-la sakre? Alor dimounn ki fer serman lor lotel, fer serman lor lotel e lor tou seki lor li. Dimounn ki fer serman lor Tanp, fer li lor Tanp e lor tou seki res dan Tanp. Dimounn ki fer serman lor lesiel, fer li lor tronn Bondie e lor sa Enn ki asiz lor tronn-la. Maler lor zot, dokter lalwa ek Farizien ipokrit. Zotmem pey ladim lor bann zepis kouma lamant, ditin ek fenouy, me zot negliz seki pli inportan dan lalwa, lazistis e mizerikord ek fidelite. Bann gid aveg! Zot pas zot bwar dan paste pou tir enn moustik, me zot aval enn samo. Maler lor zot, dokter lalwa ek Farizien ipokrit! Zot netway andeor tas ek pla, me andan zot ranpli ar vis ek move dezir. Farizien aveg! Avan tou netway andan tas pou ki so andeor osi kapav prop. Maler lor zot, dokter lalwa ek Farizien ipokrit. Zot parey bann tonbo ki finn bien blansi, ki paret bien zoli, me ranpli ar lekor mor ek tou kalite salte. Koumsa mem zot paret korek e zis pou lizie dimounn, me dan zotmem zot ranpli ar ipokrizi ek malonette. Maler lor zot, dokter lalwa ek Farizien ipokrit! Zot ranz tom bann profet ek dekor moniman bann zom zis, lerla zot dir: ‘Si nou ti viv dan lepok nou bann gran-dimounn, nou pa ti pou partisip dan zot krim kont profet.’ Alor zotmem, zot rekonet ki zot desandan bann kriminel ki finn touy bann profet. Kontigne alor, fer seki zot bann gran-dimounn finn koumanse. Bann espes serpan! Zot panse zot pou kapav sov kondanasion Bondie? Akoz samem, mo pou avoy zot bann profet, bann saz ek bann vre dokter lalwa. Ena ladan zot pou touye ek krisifie, lezot zot pou trangle dan zot sinagog ek persekit lezot dan bann lavil. Alor, disan tou sa bann inosan depi Abel ziska Zakari garson Baraki ki zot ti touye devan lotel, pou tom lor zot. Laverite, mo dir zot, tousala pou tom lor sa zenerasion-la.” “Zerizalem, Zerizalem, twa ki touy to bann profet kout ros! Komie fwa mo finn anvi rasanble to bann zanfan kouma enn mama poul rasanble so bann piti anba so lezel, me to pa finn anvi! Gete, to lakaz pou abandone. Les mo dir twa, to pa pou trouv mwa ankor ziska to dir, ‘Ki Bondie beni sa dimounn ki vinn lor nom Lesegner.’ ” Letan Zezi sorti dan Tanp li pe ale, so bann disip vinn kot li pou fer li remark konstriksion Tanp. Li dimann zot, “Zot trouv tousala? Laverite, mo dir zot, pa mem enn sel ros pou reste enn lor lot; tou pou grene.” Plitar ler li pe asize lor montagn Pie Zoliv, bann disip vinn get li an prive, zot dimann li, “Dir nou kan sa pou arive, e ki sign pou ena pou anons lafin-dimond.” Zezi reponn zot, “Fer atansion ki personn pa antrenn zot dan perdision Pou ena boukou ki pou vini lor mo nom pou dir ‘Momem Lemesi!’ E zot pou tann tapaz lager; asire ki zot pa gagn per, parski tousala pou arive, me lafin pa ankor arive. Nasion pou lev kont nasion, rwayom kont rwayom, e pou ena lafaminn. Tousala zis koumansman douler lanfantman. Dimounn pou livre zot, pou touy zot e tou bann nasion pou ayir zot akoz mo nom. Boukou pou abandonn zot lafwa, dimounn pou trayir ek ayir zot kamarad. Boukou fos profet pou leve e pou anbet dimounn. E lemal pou ogmante, dimounn pou nepli kontan zot kamarad. Me dimounn ki persevere ziska lafin pou sove. Bonn Nouvel Rwayom Bondie pou anonse partou dan lemond, kouma enn temwaniaz pou tou bann nasion; lerla lafin pou vini. “Alor ler zot trouv bann sakrilez abominab parey kouma Profet Daniel ti anonse - seki lir sa pou konpran! - bann ki res dan Zide pou bizin sove al lor montagn, dimounn ki lor lakaz fode pa desann pou pran seki li ena dan lakaz, dimounn ki dan karo fode pa get deryer pou pran enn triko. Maler lor bann madam ansint e bann ki pe donn zot zanfan tete. Priye ki zot pa sove dan liver oubien zour saba. Parski dan sa letan-la pou ena pli boukou soufrans ki lemond finn deza kone depi so lexistans, e pa pou zame ena ankor parey. E si Bondie pa ti finn rakoursi sa peryod letan-la, personn pa ti pou viv. Me li finn fer sa pou bann ki li finn swazir. Si kikenn dir zot, ‘Get Lemesi, li la!’ oubien ‘Ala li la.’ Pa krwar li. Parski bann fos mesi ek fos profet pou vini; zot pou fer bann gran-gran sign ek mirak pou tronp mem bann ki Bondie finn swazir. Ekout bien! Mo finn deza averti zot davans. Alor, si zot dir, ‘Gete, li dan dezer,’ pa ale. Oubien si zot dir, ‘Gete, li pe kasiet isi,’ pa bizin krwar. Parey kouma zekler briye dan lesiel depi dan les ziska lwes, koumsa mem Garson Limanite pou vini. Kot ena lekor mor, ena osi bann votour. Vit-vit apre sa bann moman soufrans, soley pou asonbri lalinn pa pou donn lalimier zetwal pou tom depi lesiel bann pwisans lesiel pou sakouye. Lerla sign Garson Limanite pou paret dan lesiel; tou bann tribi lor later pou fer dey e zot pou trouv Garson Limanite vini dan niaz avek boukou pwisans ek laglwar. Avek son tronpet, li pou avoy so bann anz ki pou rasanble tou bann ki li finn swazir dan kat kwin later.” “Konpran bien lansegnman lor pie fig; dimoman ki so brans vinn tann e koumans donn fey, zot kone ki lete pe aprose. Letan zot trouv tousala, kone ki Garson Limanite pre pou vini e li deryer laport. Laverite mo dir zot, avan ki sa zenerasion-la disparet, tousala pou arive. Lesiel ek later pou disparet me mo parol pa pou disparet. Ki zour, ki ler, personn pa kone, ni bann anz dan lesiel, ni mem Garson Limanite, zis papa-la tousel kone. Kouma sa ti pase lepok Noe, koumsa mem sa pou ete kan Garson Limanite pou vini. Parski avan inondasion vini, dimounn ti pe manze-bwar, zot ti pe marye ek aranz maryaz, ziska ki Noe rant dan lars. Personn pa ti pe dout nanye ziska ki deliz vini ek balie zot tou. Koumsa mem pou ete kan Garson Limanite vini. La kot de zom pe travay dan karo, pou pran enn ale, lot pou res deryer. Kot de fam pe kraz dible dan moulin, pou pran enn ale, lot pou res deryer. Alor, mo dir zot pran kont, parski personn pa kone ki zour zot Segner pou vini. Zot konn bien, si enn proprieter ti kone ki ler dan lanwit voler pou pas kot li, li pa ti pou dormi pou ki so lakaz pa defonse. Ala kifer, zot osi, zot bizin pare, parski Garson Limanite pou vinn enn ler ki zot pa kone.” “Ki sa serviter fidel ek bien serye, lor ki so patron kapav konte pou servi manze tou so bann travayer dan ler ki bizin? Ere sa serviter ki so met pou trouv li pe travay kan li arive. Laverite mo dir zot, li pou met sa dimounn-la ansarz tou so dibien. Me si li enn move serviter e li dir dan limem, ‘Mo met pe tarde,’ e li koumans bat so bann kamarad serviter, ek manze, bwar avek bann soular. So met pou retourne enn zour kot li pa pe atann li e enn ler kot li pa pou kone. Li pou koup-koup li, e met li ansam avek bann ipokrit, la kot pou ena boukou plore ek kriye e boukou grinsman ledan.” “Alor rwayom lesiel pou parey kouma zistwar sa dis zennfi ki pran zot lalanp pou al zwenn nouvo marye. Sink ladan ti insousian, e sink ti bien saz. Ler bann insousian-la pran zot lalanp, zot pa pran ase delwil avek zot; me bann saz-la ti pran plizir flakon delwil anplis pou zot lalanp. Nouvo marye tarde pou arive; bann zennfi-la koumans kaskou e zot gagn somey. Ler minwi sone, kikenn kriye: ‘Gete! Ala nouvo marye! Sorti pou al zwenn li!’ Alor, bann fidoner leve e koumans prepar zot lalanp. Bann insousian-la dimann bann seki bien saz-la: ‘Fer nou gagn inpe delwil ar zot, parski nou lalanp pe tengn.’ Bann saz-la reponn: ‘Non, li pa posib, parski pa pou ena ase pou nou ek pou zot. Pli fasil zot al laboutik e aste inpe delwil pou zotmem.’ Bann insousian-la al aste delwil; zis dan sa ler-la, nouvo marye arive. Sa sink zennfi ki ti pare la rant ansam avek nouvo marye dan lasal e bann-la met lakle dan laport. Plitar, sa sink insousian-la arive, e zot kriye: ‘Misie, misie, ouver laport!’ Me li reponn zot: ‘Laverite, mo dir zot, mo pa konn zot.’ ” Zezi kontigne, li dir: “Pran kont, parski zot pa konn ni zour, ni ler.” “Rwayom lesiel parey kouma enn dimounn ki pe al an vwayaz, li apel so bann serviter pou konfie zot so dibien. Li donn enn sink talan, enn lot de talan e enn lot enn sel talan, sakenn dapre so kapasite, lerla li ale. Serviter ki ti resevwar sink talan-la, vit-vit li finn al fer komers avek sa larzan-la e sa finn raport li ankor sink talan. Serviter ki ti resevwar de talan-la fer parey li osi, e li gagn ankor de talan. Me seki ti resevwar enn sel talan-la, li fouy enn trou dan later e li kasiet larzan so patron. Enn bon letan apre, zot patron retourne e li koumans regle so kont ar zot. Seki ti resevwar sink talan-la aprose e prezant so patron sa sink talan ki li ti finn gagne anplis, e li dir li: ‘Met, ou finn donn mwa sink talan, ala mo finn gagn ankor sink.’ So met dir li: ‘To finn bien fer, bon serviter fidel. To finn fidel pou enn ti zafer, mo pou met twa ansarz pli gran zafer ankor. Vinn partaz lazwa to met.’ Serviter ki ti resevwar de talan-la aprose li osi, li dir: ‘Met, ou finn donn mwa de talan, ala mo finn gagn ankor de.’ So met dir li: ‘To finn bien fer, bon serviter fidel. To finn fidel pou enn ti zafer, mo pou met twa ansarz pli gran zafer ankor. Vinn partaz lazwa to met.’ Apre sa, serviter ki ti resevwar enn sel talan-la aprose e li dir: ‘Met, mo kone kouma enn dimounn bien ti dir: ou rekolte kot ou pa finn plante, ou ramase kot ou pa finn seme. Mo finn gagn per, e mo finn al kasiet talan-la anba later. Ala, mo rann ou li.’ Patron-la reponn li, ‘Eta move serviter pares! To bien kone ki mo rekolte kot mo pa finn plante, e mo ramas kot mo pa finn seme? Alor to ti bien kapav met mo larzan dan labank, koumsa ler mo retourne mo ti ava regagn li avek lintere. Repran sa talan-la ar li e donn li sa dimounn ki ena dis la. Parski tou dimounn ki ena, pou gagn plis ankor, e zot pou dan labondans; me dimounn ki pena nanye, mem sa tigit ki zot ena la, pou ras sa ar zot. Sa serviter ki pa vo nanye la, pran li zet li deor dan nwar, kot pou ena boukou plore, kriye ek grinsman ledan.’ ” “Kan Garson Limanite vini dan so laglwar avek tou bann anz, li pou asiz lor so tronn rwayal. Tou bann nasion pou rasanble devan li, e li pou separ bann dimounn sakenn so kote, parey enn berze separ mouton ek kabri. Li pou met bann mouton dan so kote drwat e bann kabri dan so gos. Alor lerwa pou dir ar bann ki dan kote drwat, ‘Vini, zot ki mo papa finn beni. Resevwar rwayom ki Bondie finn prepare pou zot depi kreasion lemond. Avredir mo ti fin e zot finn donn mwa manze. Mo ti swaf e zot finn donn mwa bwar. Mo ti enn etranze e zot finn akeyir mwa. Mo ti touni, e zot finn donn mwa linz. Mo ti malad, e zot finn vizit mwa. Mo ti dan prizon e zot finn vinn get mwa.’ Alor bann ki finn obeir Bondie, zot dir lerwa: ‘Segner, kan nou finn trouv twa pe mordefin e nou finn donn twa manze? Oubien to ti swaf e nou finn donn twa bwar? Kan nou finn trouv twa enn etranze e nou finn akeyir twa, oubien touni nou finn donn twa linz? E kan nou finn trouv twa malad oubien dan prizon e nou finn vizit twa?’ Lerla lerwa reponn zot: ‘Laverite, mo dir zot, sak fwa ki zot finn fer sa ar enn sa bann pli tipti-la ki dan mo fami, ar momem ki zot ti fer sa.’ Apre lerwa pou dir bann ki dan so kote gos: ‘Al lwin ar mwa zot modi! Al dan dife eternel ki pa pou zame tengn e ki finn prepare pou Satan ek so bann asosie. Parski mo ti fin e zot pa finn donn mwa manze. Mo ti swaf e zot pa finn donn mwa bwar. Mo ti enn etranze e zot pa finn akeyir mwa, touni zot pa finn donn mwa linz, malad ek dan prizon, zot pa finn pran mwa swin?’ Alor zot osi, zot pou dir lerwa: ‘Segner, kan eski nou finn trouv twa, to ti gagn fin ek swaf, etranze, touni, malad e dan prizon e nou pa finn ed twa?’ Alor li pou reponn zot: ‘Laverite mo dir zot, letan zot pa finn fer sa pou enn sa bann pli tipti parmi zot, ar mwa osi zot pa finn fer li.’ E sa bann-la pou pini pou touletan, me bann zis, zot pou gagn lavi eternel.” Kan Zezi fini so lansegnman, li dir so bann disip, “Zot kone ki fet Pak pe vini dan de zour e bann-la pou livre Garson Limanite e pou koulout li lor enn lakrwa.” Apre sa, bann sef pret ek bann ansien dan pep Zwif fer enn renion dan pale Kaif, ki ti gran pret. Zot pran desizion ansam pou aret Zezi san ki personn kone e pou al touy li. Zot ti pe dir, “Fode pa ki nou aret li letan fet pe deroule parski dimounn pou kapav revolte.” Zezi ti dan Betani kot Simon ki ti ena lalep. Enn fam vinn pre ar Zezi avek enn flakon an-albat ki ti ranpli avek enn parfin ki ti ena gran valer; li vers sa parfin-la lor latet Zezi, letan Zezi ti atab. Letan bann disip trouv sa, zot mekontan. Zot dir, “Kifer bizin fer gaspiyaz? Ti kapav vann sa parfin-la pou enn gro som larzan e donn kas-la bann pov!” Zezi ti kone ki zot ti pe dir, alor li dir zot, “Kifer zot met sa fam-la dan lanbara; li pe fer enn bon aksion pou mwa. Parski zot, zot pou touzour gagn bann pov parmi zot me mwa, mo pa pou touletan parmi zot. Li finn met sa parfin-la lor mo lekor pou prepar mo lanterman. Laverite mo dir zot, partou kot Bonn Nouvel pou anonse dan lemond antie, pou koz lor seki sa fam-la finn fer e pou gard so souvenir.” Apre sa, enn parmi Ledouz, Zida Iskaryot, al zwenn bann sef pret e li dir zot, “Ki zot pou donn mwa si mo livre zot Zezi?” Zot pey li trant pies larzan. Depi sa moman-la, Zida ti pe rod enn bon lokazion pou livre zot Zezi. Premie zour fet dipin san levin, bann disip vinn get Zezi e zot dimann li, “Kot to anvi nou prepar repa Pak pou to manze?” Li dir, “Al dan lavil kot intel, e dir li, ‘Lemet dir, mo letan pe aprose; mo pou manz Pak kot twa avek mo bann disip.’ ” Bann disip fer dapre seki Zezi finn dir zot e zot al prepar repa Pak. Aswar, li asiz omilie Ledouz, e pandan repa li dir zot, “Laverite mo dir zot, enn parmi zot pou trayir mwa.” Zot ti bien tris e sakenn so tour koumans dir li, “Mwa sa Segner?” Zezi reponn, “Dimounn ki finn tranp so dipin dan pla avek mwa, limem pou trayir mwa. Garson Limanite pe al mor dapre seki finn ekrir lor li, me maler pou sa dimounn ki pe trayir Garson Limanite! Pou limem vomie, li pa ti ne.” Zida ki ti pe trayir Zezi dimann li, “Mwa sa Met?” Zezi reponn li, “To finn dir tou tomem.” Letan pe manze, Zezi pran dipin, donn benediksion, kas dipin-la e li donn so bann disip. Li dir, “Pran, manze, samem mo lekor.” Apre Zezi pran koup divin, li rann gras e li donn so bann disip, li dir, “Bwar sa zot tou, parski samem mo disan, disan lalians ki mo verse pou tou dimounn e pou ki zot pese pardone. Mo dir zot, mo nepli pou bwar fri pie rezin ziska sa zour ki mo pou bwar divin nouvo avek zot dan Rwayom mo Papa.” Letan zot finn fini sant bann Psom, zot al lor kolinn Pie Zoliv. Zezi dir ar so bann disip, “Lanwit kot zot tou pou tonbe akoz mwa finn arive. Dan Lekritir finn ekrir, ‘Mo pou touy berze, e bann mouton pou fane partou kote.’ ” Me Zezi dir ankor, “Kan mo pou resisite, mo pou atann zot Galile.” Lerla Pier dir li, “Mem si arive ki tou dimounn abandonn twa, mwa, mo pa pou abandonn twa.” Zezi reponn li, “Laverite mo dir twa, aswar mem, avan ki kok sante, to pou renie mwa trwa fwa.” Pier dir li, “Mem si bizin mor avek twa, zame mo pou renie twa.” Lerla tou bann disip dir parey. Apre sa, Zezi al avek so bann disip dan enn landrwa ki ti apel Zetsemani e li dir zot, “Res la, mwa mo pe al inpe pli lwin pou priye.” Li pran Pier ek de garson Zebede ar li e li koumans santi enn gran tristes ek langwas. Li dir zot, “Mo ranpli ar enn gran tristes ki pe fini mwa. Res la avek mwa, pa dormi.” Li al inpe pli lwin, li tom azenou, so fron tous later e li priye, “Papa, si li posib, met sa koup-la lwin ar mwa, selman pa kouma mo oule me fer kouma twa to oule.” Apre sa, li vinn ar so trwa disip e li trouv zot pe dormi. Li dir Pier, “To pa finn gagn lafors pou res avek mwa enn-er tan selman? Veye, priye pou ki zot pa rant dan tantasion. Lespri anvi mem, me laser feb.” Enn deziem fwa, li al pli lwin e li priye, “Papa, si li pa posib ki sa koup la res lwin ar mwa e ki mo bizin bwar li, mo pou touzour fer dapre to volonte.” Li revinn ar so bann disip e li trouv zot pe dormi, somey dan lizie. Li kit zot ankor e li al priye enn trwaziem fwa. Li ti pe dir touletan mem parol. Apre sa, li revinn ar so bann disip e li dir zot, “Zot ankor pe dormi e zot pe repoze. Ala ler finn arive kot Garson Limanite pou livre dan lame bann peser. Leve, anou ale! Gete, li pe vini, sa dimounn ki pou livre mwa la.” Zezi ti pe koze, kan Zida, enn parmi Ledouz, vini avek enn lafoul dimounn ki ti arme ar lepe ek gourdin. Bann sef pret ek ansien parmi bann lepep finn avoy zot. Tret-la finn donn zot enn sign; li finn dir zot, “Dimounn ki mo pou anbrase la, limem sa, trap li.” Zida koste ar Zezi e li dir li, “Shalom Met.” E li anbras Zezi. Zezi dir li, “Kamarad, fer seki to ena pou fer.” Lerla bann-la vini trap Zezi e zot aret li. Anplas, enn dan group Zezi tir so lepe e donn serviter gran pret enn gran kou e li koup so zorey. Me Zezi dir li, “Met to lepe dan to fouro parski seki servi lepe pou mor ar lepe. Eski to pa kone ki mo kapav apel mo Papa e li ti pou avoy mwa plis ki douz larme anz? Ki manier seki finn ekrir pou realize? Eski sa pa bizin arive?” Lerla Zezi dir ar lafoul, “Eski zot ti bizin vinn ar lepe ek gourdin pou aret mwa koumadir mo enn voler? Toulezour mo ti pe asize dan Tanp e mo ti pe ansegne e zame zot finn aret mwa. Tousala finn arive pou ki parol bann profet realize.” Lerla tou disip kit li sove. Bann seki finn aret Zezi amenn li devan gran pret Kaif. Bann dokter lalwa ek bann ansien ti finn zwenn. Pier ti pe swiv enn distans e li aret devan lakour gran pret. Li rant dan lakour, li asiz avek bann gard pou gete kouma tousala pou fini. Bann sef pret ek Gran Tribinal Zwif ti pe rod met enn fos sarz lor Zezi pou kapav kondann li amor, me zot pa trouv nanye, mem si boukou fos temwin ti vinn fer zot depozision. Finalman de boug aprose e zot dir, “Li finn dir, ‘Mo kapav detrir Tanp Bondie e rekonstrir li dan trwa zour.’ ” Gran pret leve e dir, “To pa reponn? Ki to ena pou dir lor sa bann akizasion-la?” Me Zezi pa dir nanye. Alor gran pret dir li, “Fer serman lor nom Bondie Vivan e dir nou si vremem to Lekris, Garson Bondie.” Zezi reponn, “Tomem to pe dir; me mwa, mo dir zot, aster-la zot pou trouv Garson Limanite pe asiz kote drwat Bondie Toupwisan, e li pe vinn lor bann niaz dan lesiel.” Lerla gran pret desir so linz e dir, “Li finn blasfeme. Ki lot temwaniaz nou bizin ankor? Zot fek tann so blasfem. Ki zot ena pou dir?” Bann-la reponn, “Li koupab e li merit lamor.” Zot kras dan so figir, zot donn li koutpwin, ena donn li kalot. Zot dir li, “Twa ki deklar Lekris, fer to profet ar nou, kisann-la finn bat twa?” Pier ti pe asiz deor dan lakour e enn servant koste ar li e dir, “Twa osi to ti avek Zezi ki sorti Galile.” Devan zot tou, li nie ki li ti ar Zezi e li dir, “Mo pa kone ki to pe koze.” Apre sa li sorti, li al devan laport. Enn lot servant trouv li e li dir, “Li ti avek Zezi Nazaret.” Ankor enn fwa li nie e li fer serman, “Mo pa konn sa boug-la mwa.” Zis apre, bann ki ti la, vini e dir Pier, “Pena bare, twa osi to dan sa group-la; fini kone par to manier koze.” Alor li fer serman e li dir, “Bondie pini mwa si mo pe koz manti, mo pa konn sa boug-la.” Lerla mem, kok sante. Lerla Pier rapel parol Zezi, ‘Avan ki kok sante, to pou finn renie mwa trwa fwa,’ e li sorti deor, li al plore ar enn gro sagrin dan leker. Boner gramatin, tou bann sef pret ek bann ansien parmi lepep pran desizion ansam pou touy Zezi. Zot atas li, zot amenn li e zot livre li ar gouverner Pilat. Letan Zida ki ti trayir Zezi aprann ki Zezi finn kondane, li gagn remor e li retourn trant pies larzan-la bann sef pret ek bann ansien. Li dir, “Mo finn fer pese parski mo finn livre disan enn inosan.” Zot reponn, “Ki to oule nou fer? Sa to problem.” Zida zet larzan-la dan Tanp. Li sorti e li al met li pandi. Bann sef pret ramas larzan-la e dir, “Nou lalwa pa permet nou depoz sa larzan-la dan lakes Tanp parski ena disan ladan.” Zot tom dakor pou aste terin sa dimounn ki fer potri-la, pou zot fer enn simitier pou bann etranze. Akoz samem apel sa later-la “Later disan” ziska zordi. Lerla parol profet Zeremi finn realize. Li ti dir, “Zot finn pran trant pies larzan, samem valer ki bann zanfan Izrael finn estim li, e zot finn servi sa kas-la pou aste later potie kouma Lesegner finn donn lord.” Zezi konparet devan gouverner ki ti interoz li, “Tomem lerwa Zwif?” Zezi reponn, “Tomem to pe dir.” Kan bann sef pret ek bann ansien akiz li, li pa reponn nanye. Lerla Pilat dir li, “Eski to pa tann tou bann akizasion kont twa?” Zezi pa reponn lor okenn pwin e so silans ti bien inpresionn gouverner. Pou sak fet Pak, gouverner ti ena labitid larg enn prizonie ki lafoul dimande. Be, ti ena enn prizonie ki tou dimounn kone. Li ti apel Barabas. Lerla Pilat dimann lafoul, “Kisann-la zot anvi mo large, Barabas oubien Zezi ki zot apel Lekris?” Pilat ti kone ki zot finn livre Zezi par zalouzi. Letan Pilat ti pe siez dan tribinal, so fam avoy li enn mesaz, “Pa mel twa dan zizman sa inosan-la parski dan lanwit, mo finn bien azite dan mo rev akoz li.” Bann sef pret konvink lafoul pou ki liber Barabas e kondann Zezi amor. Gouverner redimann zot, “Kisann-la zot ti anvi mo large ant sa de la?” Zot reponn, “Barabas.” “Ki mo pou fer ar Zezi ki zot apel Lekris?” Zot tou reponn, “Krisifie li.” Pilat dimann zot, “Ki li finn fer demal?” Zot tou kriye, “Krisifie li.” Letan Pilat trouve ki li nepli kapav fer nanye me ki bann-la pe pli revolte, li pran dilo e li lav so lame devan lafoul; li dir, “Mo pa responsab disan sa dimounn-la; get zot zafer.” Lafoul antie reponn, “Disan sa boug-la ava tom lor nou e lor nou bann zanfan.” Apre sa, Pilat larg Barabas, li fer fwet Zezi e li livre li ar lafoul pou ki bann-la krisifie li. Bann solda amenn Zezi dan pale gouverner e boukou solda ti pe eskort li. Zot dezabiy li e zot met enn manto rouz vif lor li. Apre zot tres enn kouronn pikan, zot met sa lor so latet e zot met enn bout baton dan so lame drwat. Apre zot met zot azenou devan li e zot boufonn li, “Aksepte nou respe, Lerwa Zwif.” Zot kras lor li e zot servi sa mem baton-la pou bat li lor so latet. Kan zot finn bien boufonn li, zot tir manto-la, zot remet so linz e apre zot amenn li pou koulout li lor lakrwa. Letan zot pe ale, zot trouv Simon, enn abitan Sirenn; bann solda obliz li sarye lakrwa Zezi. Zot ariv enn landrwa ki ti apel Golgota, seki vedir, “Landrwa Krann.” Zot donn li bwar enn divin melanze avek enn kiksoz amer; letan li gout sa, li pa'le bwar. Zot krisifie li e apre zot tir osor pou partaz so linz. Apre zot asize pou vey li. Lao lor latet Zezi finn ekrir pou ki rezon finn kondann li, “Limem Zezi Lerwa bann Zwif.” De bandi ti kouloute lor lakrwa ansam ar li. Enn adrwat, lot-la agos. Bann seki ti pe pas par la ti pe insilte li e ti pe bouz zot latet pou dir li, “Pa tomem ki ti anvi detrir Tanp pou rekonstrir enn lot dan trwa zour; sov twa tomem; si vremem to Garson Bondie, desann lor sa lakrwa-la!” Bann sef pret, bann dokter lalwa ek bann ansien osi ti pe boufonn li. Zot ti pe dir, “Li finn sov lezot me li pa pe kapav sov limem! Si limem lerwa Izrael, ki li desann lor lakrwa aster-la mem, nou ava krwar dan li. Li finn met so konfians dan Bondie e li finn dir, ‘Mo Garson Bondie.’ Si vremem Bondie oule, dir li vinn delivre li aster-la mem.” Bann bandi ki ti avek li, zot osi zot ti pe insilte li. Depi midi teneb partou kote lor pei ziska trwa-z-er tanto. Ver trwa-z-er, Zezi kriye bien-bien for, “Eli, Eli, la-ma sabaktani”. Seki vedir, “Bondie, Bondie, kifer to finn abandonn mwa?” De-trwa ki ti la tann sa e zot dir, “Li pe apel Eli!” Toutswit enn parmi zot galoupe, al pran enn leponz, tranp li dan vineg, met li dan bout enn long baton e donn li pou bwar. Bann lezot dir, “Atann, nou gete si Eli pou vinn sap li.” Zezi kriye bien for enn dernie kout e li rann so dernie soupir. Sa ler-la, rido Tanp desire depi lao ziska anba; later tranble e bann ros fann an-de. Bann tom ouver e boukou lekor bann krwayan ki ti pe dormi, leve. Zot sorti dan zot tom e apre rezireksion Zezi, zot rant dan lavil sint kot boukou dimounn finn trouv zot. Santiryon Romin ek bann solda ki ti pe vey Zezi trouv later tranble e zot temwin tou seki ti pe arive. Alor zot gagn per e zot dir, “Vremem li ti Garson Bondie.” Ti ena boukou fam ki ti pe get delwin seki ti pe pase. Zot ti finn swiv Zezi depi Galile e zot ti so bann disip osi. Parmi zot, ti ena Marie-Madlenn, Marie, mama Zak ek Zozef e mama bann garson Zebede. Kan koumans fer nwar, Zozef, enn zom ris ki sorti Arimate e ki ti osi enn disip Zezi, al get Pilat pou gagn lekor Zezi. Pilat donn lord pou donn lekor-la Zozef. Zozef pran lekor-la, anvlop li dan enn dra nef an-lin. Li depoz lekor Zezi dan so prop tonbo nef ki ti finn taye dan ros. Apre sa, li pous enn ros devan lantre tonbo-la e li ale. Marie-Madlenn ek lot Marie, ti la osi. Zot ti pe asiz vizavi tonbo. Landime, enn zour apre saba, bann sef pret ek bann Farizien al get Pilat ansam. Zot dir, “Vot oner, nou rapel ki sa fos profet-la ti pe dir kan li ti ankor vivan ki li pou resisite lor trwaziem zour. Nou dimann ou permision pou ki met gard devan sa tonbo-la ziska trwaziem zour; parski kapav arive ki so bann disip vinn kokin so lekor pou fer lepep krwar, ‘Li finn resisite parmi bann mor.’ Sa mansonz-la pou pli pir ki premie-la.” Pilat dir zot, “Zot ena zot bann solda. Al vey tonbo-la kouma zot anvi.” Lerla zot sorti e zot al met zot gard devan tonbo; zot met sele lor ros ki ti blok lantre tonbo. Landime saba, premie zour lasemenn, kan soley pe leve, Marie-Madlenn ek lot Marie al kot tonbo. Enn sel kou ti ena enn gran tranbleman-de-ter parski enn anz Lesegner ki ti desann depi lesiel, ti pous sa gro ros-la e li ti asiz lor-la. Li ti kouma enn zekler e so linz ti blan kouma lanez. Bann gard ti telman per ki zot koumans tranble e zot ti vinn parey kouma dimounn mor. Anz-la dir bann madam-la, “Pa gagn per. Mo kone ki zot pe rod Zezi, limem ki bann-la finn krisifie; li nepli la, li finn resisite parey kouma li finn dir. Rantre, gete kot ti met so lekor. Degaze al dir so bann disip, ‘Li finn resisite parmi bann mor e li pe atann zot Galile.’ Zot pou trouv li laba. Ala seki mo ti ena pou dir zot.” Zot sorti toutswit dan tonbo leker ranpli ar lafreyer e zot ti dan enn gran lazwa anmemtan. Zot galoupe pou al anons sa nouvel-la bann disip. Ala ki Zezi vinn devan zot e li dir zot, “Shalom.” Zot koste ar li, zot atrap so lipie e zot ador li. Zezi dir zot, “Pa gagn per; al dir mo bann frer ek mo bann ser, al Galile; laba zot pou trouv mwa.” Letan bann fam-la ti pe ale lor sime, de-trwa gard retourn dan lavil e rakont bann sef pret tou seki finn pase. Bann sef pret-la ek bann ansien tom dakor pou donn enn gro som lamone bann gard-la, e dir zot, “Zot bizin dir ki bann disip sa boug-la finn vinn kokin so lekor dan lanwit letan zot ti pe dormi. Si gouverner aprann sa, nou pou kapav konvink li pou ki zot pa gagn problem.” Bann gard pran larzan-la e fer exakteman dapre bann instriksion ki zot finn gagne. Koumsa mem sa zistwar-la finn fane parmi bann Zwif ziska zordi. Onz disip Zezi al Galile, lor kolinn kot li finn donn zot randevou. Letan bann-la trouv li, zot ador li me enn-de parmi zot ti ankor pe doute. Zezi vinn pre ar zot e dir zot, “Finn donn mwa tou pouvwar dan lesiel ek lor later, Al dan tou bann pep ki ena e fer zot vinn mo bann disip; batiz zot lor nom mo Papa, lor nom so Garson e lor nom Lespri Sin. Montre zot met an pratik tou seki mo finn komann zot. Pa bliye, mo avek zot toulezour ziska lafin dimond.” Koumansman Bonn Nouvel Zezi Kris Garson Bondie. Dan liv profet Izai finn ekrir: “Gete, mo pe avoy mo mesaze devan twa, Limem pou tras enn sime pou twa. Enn lavwa pe kriye dan dezer, prepar sime Nou Segner, ouver enn sime kler pou li.” Zan Batis paret dan dezer; li proklam enn batem pou ki bann dimounn sanz zot leker e ki zot pese pardone. Tou dimounn ki res Zide ek Zerizalem ti pe vinn get Zan. Li ti pe batiz zot dan larivier Zourdin letan zot tou ti pe konfes zot pese an piblik. Zan ti met enn linz pwal samo ek enn sang lapo dan so lerin. Li ti manz sotrel ek dimiel sovaz. Li ti pe proklame, “Ena enn ki pli for ki mwa, li pe vinn apre mwa; mo pa ase bon, pou mo kourbe devan li, pou larg so sandalet. Mwa, mo finn batiz zot ar dilo, me li, li pou batiz zot ar Lespri Sin.” Samem lepok-la, Zezi sorti depi Nazaret, ki trouv dan Galile; lerla Zan finn batiz li dan larivier Zourdin. Zis kouma li pe sorti dan dilo, Zezi trouv lesiel fann an-de. Lespri Sin, parey kouma enn kolonb, desann lor li. Enn lavwa, dan lesiel dir, “Tomem mo Garson, ki mo bien kontan; sa fer mwa enn gran lazwa pou swazir twa.” Zis apre sa, Lespri pous li dan dezer. Dan dezer, Satan finn tant li, pandan karant zour. Li ti avek bann bebet sovaz e bann anz ti pe servi li. Letan bann-la finn aret Zan, Zezi rant dan Galile. Li koumans proklam Bonn Nouvel Bondie. Li dir: “Ler finn arive, Rwayom Bondie pe koste. Sanz zot leker, krwar dan Bonn Nouvel.” Letan li ti pe mars-marse dan bor lamer Galile, li trouv de peser, Simon, avek so frer Andre ki ti pe lapes lasenn. Zezi dir zot, “Vini, swiv mwa; mo pou montre zot lapes dimounn.” Lor vites, zot kit zot file, zot swiv Zezi. Inpe pli lwin, li trouv de garson Zebede: Zak ek so frer Zan. Toule-de ti dan pirog; zot ti pe demay zot file. Enn sel kout, li apel zot; zot kit zot papa Zebede anplan dan bato avek bann travayer. Zot swiv Zezi. Zezi ek so bann disip al Kafarnaom. Zour saba, Zezi rant dan sinagog e li koumans donn lansegnman. So parol ti inpresionn dimounn. So koze, so lansegnman ti ena pwa parski li pa ti parey kouma bann dokter lalwa. Zisteman dan zot sinagog, ti ena enn boug posede par enn move lespri. Li pe kriye for-for: “Zezi Nazaret, ki to oule, ki to vinn rode ar nou? To finn vini pou fini nou? Mo kone ki to ete: tomem Sin, tomem sorti kot Bondie.” Zezi menas li. Li dir li: “Ferm to labous; sorti la, ale.” Move lespri-la sakouy-sakouy dimounn-la. Li irle letan li larg dimounn-la. Lasistans gagn sok; sakenn dimann ar so kamarad, “Ki pe arive, ki sa vedir? Ala enn nouvo manier koze ki ena pwa. Mem move lespri-la ekout li.” Lerla mem so koze fane partou kote dan Galile. Kouma bann-la kit sinagog, zot rant dan lakaz Simon ek Andre, ansam avek Zak ek Zan. Belmer Simon ti lor lili ar enn move lafiev. Bann-la raport sa Zezi. Zezi koste, li trap so lame, li lev li. So lafiev kit li ale. Lerla belmer-la koumans servi zot. Aswar vini, soley ti pe al dormi, zot sarye devan Zezi tou seki ti malad, tou seki ti ena demon lor zot. Tou dimounn dan landrwa finn rasanble devan laport. Zezi geri boukou dimounn ki ti ena tou sort kalite maladi; Li sas demon lor bann ki ti posede. Li ferm labous bann demon parski zot ti kone ki Zezi ete. Gramatin boner, kan ti ankor fer nwar, Zezi leve, li kit lakaz, li al dan enn landrwa retire pou priye. Simon ek so bann kamarad ti pe rod li partou. Ler zot retrouv li, zot dir li, “Tou dimounn pe rod twa.” Li dir zot, “Anou al inpe pli lwin dan bann lezot landrwa; laba osi, mo bizin proklam Bonn Nouvel. Akoz samem mo finn vini.” Koumsa mem li ti al partou dan Galile, li ti pe proklam Bonn Nouvel dan zot sinagog e li ti pe sas demon. Enn dimounn ki ti ena lalep vinn get li. Li ti tom azenou devan Zezi, li sipliye li, “Si sa to volonte, to kapav pirifie mwa.” Sa fer Zezi enn gran lapenn; Zezi avans so lame e li tous li. Zezi dir li, “Samem mo volonte, aster to pou pirifie.” Deswit lalep kit li, ek li ti pirifie. Apre ki Zezi ti averti li severman, li fer li ale. Li dir li: “Sirtou pa al rakont sa personn; ale, al get enn pret; donn seki Moiz finn dir pou pirifikasion; sa pou enn temwaniaz pou lezot.” Kouma li sorti deor, li koumans rakonte, li fann nouvel partou. Akoz samem Zezi ti bizin kasiet-kasiet e pa ti kapav rant dan lavil; li ti oblize al dan bann landrwa retire; kanmem sa, dimounn ti sorti partou pou vinn get li. De-trwa zour apre, Zezi retourn dan Kafarnaom. Nouvel fane ki li dan lakaz enn dimounn. Lakaz ti telman ranpli ar dimounn, ki mem deor devan laport pa ti ena plas. Li ti pe explik laparol. Enn bann dimounn ti vinn get li. Kat parmi zot, ti pe sarye enn paralize. Kouma zot pa ti kapav koste kot Zezi, akoz ti ena enn gran lafoul, zot ti fer enn ouvertir dan twa lakaz-la. Lerla, zot ti fer paralize-la desann par trou-la avek so brankar. Letan Zezi trouve ki kantite lafwa zot ti ena, li dir paralize-la, “Mo garson, to pese finn pardone.” Ti ena de-trwa dokter lalwa ki ti la; zot ti pe asize. Zot ti pe panse dan zotmem, “Pou ki li pran li pou li koz koumsa? Zot pa trouve li pe blasfeme! Kisann-la kapav pardonn bann pese apart Bondie tousel?” Deswit dan so lespri, Zezi ti fini kone ki ti ena dan zot leker. Li dir zot, “Kifer zot pans koumsa? Ki pli fasil pou dir paralize-la, ‘To pese finn pardone’ ou bien, ‘Debout, ramas to brankar, marse’? Ala mo dir zot, pou ki zot trouve ki Garson Limanite ena lotorite pou pardonn bann pese lor later,” li dir paralize-la, “Ekout mwa, leve, ramas to brankar, al to lakaz.” Lerla paralize-la leve, li ramas so brankar, li sorti devan tou dimounn. Bann dimounn emerveye. Zot glorifie Bondie, zot dir, “Zame nou finn trouv sa kalite kiksoz-la ar nou lizie.” Zezi re-al ankor enn fwa dan bor lamer. Enn gran lafoul antour li; li ti pe ansegn zot. Letan li ti pe pase, li trouv Levi, garson Alfe. Li ti pe asize devan biro tax. Zezi dir li, “Swiv mwa.” Lerla, li leve, li swiv Zezi. Apre sa, li al lakaz Levi. Li asize atab. Ti ena enn kantite kolekter tax ek bann peser ki ti pe manze avek Zezi ek so bann disip. Ti ena boukou-boukou dimounn. Zot tou ti pe swiv li. Letan bann dokter lalwa ek bann Farizien trouv li pe manze avek bann peser ek bann ramaser tax, zot dir so bann disip, “Kifer li manz avek bann kolekter tax ek bann ki fer pese?” Letan Zezi tann sa, li dir, “Dimounn ki bien pa bizin dokter me dimounn ki malad, wi; mo pa finn vini pou dimounn korek me pou bann peser.” Bann disip Zan ek bann Farizien ti gard karem. Dimounn vini, zot poz Zezi enn kestion, “Pou kifer bann disip Zan ek disip Farizien gard karem alor ki to bann disip pa fer li?” Zezi reponn, “Eski bann invite dan maryaz kapav gard karem kan nouvo marye ankor avek zot? Tan ki nouvo marye avek zot, zot napa pou kapav gard karem. Enn zour pou arive, kot nouvo marye nepli pou la avek zot, lerla zot ava gard karem. Personn pa pran enn bout latwal ki pankor retresi pou rakomod enn vie linz; si fer sa, bout latwal nef la pou ris sa vie linz-la kat kote, li pou plis desire. Personn pa met divin ki fek fer dan vie damzann; si fer sa, divin-la pou eklat damzann-la, lerla nou pou perdi divin ansam ar damzann. Bizin met divin nouvo dan damzann nef.” Enn zour saba, Zezi ti pe travers enn karo dible. Letan zot ti pe marse, so bann disip ti pe grenn bann zepi dible. Bann Farizien dir li, “Dir nou pou kifer to bann disip fer kiksoz ki pa gagn drwa fer zour saba?” Li reponn zot, “Zame zot pa finn lir seki David avek so bann kamarad ti fer, letan zot vant ti vid e ki zot ti pe gagn fin? Zot pa rapel kouma li ti rant dan lakaz Bondie letan Abiatar ti gran pret? Zot pa rapel kouma li ti manz dipin konsakre ki personn pa ti gagn drwa manze, exsepte bann pret? Kouma li ti partaz sa dipin-la avek so bann kamarad?” Zezi kontigne ankor, “Saba finn fer pou dimounn, pa dimounn pou saba. Ala mo fer zot kone, Garson Limanite ki proprieter saba.” Ankor enn fwa, Zezi rant dan sinagog; enn boug ek lame monion ti la. Bann-la ti pe vey Zezi, pou gete si li ti pou geri sa boug-la zour saba; koumsa zot ti pou kapav met enn sarz lor li. Li dir ar sa boug lame monion-la, “Leve, vinn devan.” Lerla li dir bann-la, “Dapre lord, ki gagn drwa fer zour saba? Fer bon kiksoz, fer move kiksoz? Sov enn lavi, tir enn lavi?” Zot tou res trankil. Li get zot ar lakoler, anmemtan, li sagrin ki zot leker dir. Li dir boug-la, “Dres to lame.” Monion-la dres so lame; so lame revinn normal. Kouma bann Farizien tom deor, zot fer enn konplo avek bann Erodien pou touy Zezi. Zezi retir li dan bor lamer avek so bann disip. Enn pake dimounn ti pe swiv li. Zot sorti partou kote dan Galile, Zide, Zerizalem, Idoume, lot kote larivier Zourdin, dan rezion Tir ek Sidon. Nouvel ti finn fane komie kiksoz li ti pe fer; akoz samem zot ti pe vinn get li. Zezi ti bizin dir so bann disip pare enn pirog pou li, tansion lafoul kraz li. Li ti finn geri boukou dimounn; tou seki ti malad, ti pe pouse pou tous li. Sak fwa bann move lespri trouv li, zot tonbe, zot kriye, “Tomem Garson Bondie.” Zezi menas zot pou ki zot pa fer dimounn kone ki li ete. Li mont lor montagn. Li apel dimounn ki li ti oule. Bann-la vini. Li swazir douz parmi zot, (li donn zot nom zapot), pou bann-la res avek li e pou ki li avoy zot proklame avek lotorite sas demon. Alors li nom Ledouz. Li donn Simon enn lot nom, li apel li Pier; apre ti ena Zak ek so frer Zan, toule-de garson Zebede. Li sanz zot nom, li apel zot Boanerzes, savedir zanfan loraz ek zekler; ti ena osi Andre, Filip, Bartelmi, Matie, Toma, Zak garson Alfe, Tade, Simon ki ti res Kana ek Zida Iskaryot, limem ki ti vann Zezi. Apre sa Zezi rant dan lakaz. Lafoul rekoumans rasanble; telman dimounn ti pe ale-vini, ki zot pa ti kapav manz enn bout dipin. Kan fami Zezi aprann sa, zot ale pou trap li. Zot ti pe dir li ti finn perdi latet. Bann dokter lalwa ki ti finn desann depi Zerizalem ti pe dir ki ena Belzeboul lor Zezi, ki li sas demon par lafors sef bann demon. Li apel zot, li koz ar zot an parabol. Li dir zot, “Ki manier Satan kapav sas Satan? Si enn Rwayom divize kont limem, Rwayom-la pa kapav tini dibout. Si enn fami divize kont limem, fami-la pa pou kapav tini dibout. Si Satan lev lager ar limem, savedir li divize, li pa pou kapav tini, li pou fini limem. Ou pa kapav rant dan lakaz enn dimounn for pou kokin so bann dibien san ki ou atas li avan; lerla ou pou kapav kokin kouma ou anvi. Mo dir zot enn zafer: laverite, laverite mo dir zot, tou pese, tou blasfem, ki dimounn fer pou pardone; enn sel blasfem pa pou pardone, blasfem kont Lespri Sin. Li enn pese ki zame pou efase.” Zezi ti pe koz koumsa parski bann-la ti pe dir ki li ena enn move lespri lor li. So mama ek so bann frer vini. Zot res deor zot fer kriye li. Enn kantite dimounn ti pe asize; zot tou ti pe antour li; zot dir li, “Gete, to mama ek to bann frer inn vinn rod twa.” Li reponn zot, “Kisann-la mo mama, kisann-la mo frer?” Li lev so latet, li promne so regar lor sak dimounn ki ti pe asize. “Ala mo mama, ala mo bann frer. Dimounn ki fer volonte Bondie, limem mo frer, limem mo ser, limem mo mama.” Ankor enn fwa, Zezi ti pe ansegne dan bor lamer. Telman ti ena enn gro lafoul ki ti pe antour li, li monte, li al asiz dan enn pirog ki ti lor lamer. Lafoul ti lor laplaz dan bor dilo. Tou so koze ti an parabol; dan so lansegnman li ti pe dir, “Ekout sa. Ala zistwar enn planter ki pe al seme. Letan li pe seme, enn parti lagrin tom lor sime. Zwazo vini, manz tou. Enn lot parti tom dan enn landrwa inpe ros-ros kot pa ti ena boukou later. Lagrin-la pous vit parski later ti mins. Kouma soley tape, li griye, li mor, parski pa ti ena ase rasinn. Enn lot parti tom dan pikan. Letan pikan pouse, grandi, li touf li; li pa kapav raporte. Enn lot parti tom dan bon later. Li pouse, li vinn gran, li raport bien-bien mem: ena donn trant, ena swasant, ena donn ziska san fwa plis.” Zezi dir zot, “Seki ena zorey pou tande, ki li tande.” Letan li ti tousel, bann ki ti pros ar li ek so group Douz dimann li explikasion lor bann parabol. Li dir zot, “Zot, finn fer zot konn sekre Rwayom Bondie. Pou bann seki andeor, tou pou res enn mister. Koumsa zot kapav gete, me zot pa pou trouv nanye, Zot kapav tande me zot pa pou konpran nanye. Lerla zot pa pou kapav sanz zot leker e zot pa pou gagn okenn pardon.” Li dir zot, “Si zot pa konpran sa parabol-la, kouma zot pou konpran lezot parabol?” “Planter-la, li sem laparol. Lagrin ki tom dan bor sime, savedir bann dimounn ki tann parol Bondie. Kouma zot tande, Satan vini, aras parol ki finn seme dan zot. Lagrin ki tom dan enn landrwa inpe ros-ros, vedir bann dimounn ki resevwar laparol dan lazwa kan zot tann li. Me kouma zot rasinn lao-lao, tou zafer zis pou enn letan; kouma zot gagn difikilte, persekision akoz parol Bondie, zot tonbe. Lagrin ki tom dan pikan, vedir bann dimounn ki zot ousi tann sa parol-la. Me bann traka lavi, lanvi gagn touzour plis, tou sort kalite tantasion, tousala touf la parol. Li pa raport okenn fri. Seki tom lor bon later, vedir bann ki ekout parol Bondie, ki akey li. Zot finn raport trant, swasant ziska san fwa plis.” Li koz ar bann-la ankor. “Eski nou alim enn lalanp pou met li anba seo, anba lili ouswa nou met li anler lor enn stenn? Pena okenn sekre ki pa pou dekouver; tou seki finn kasiet pou devwale. Seki ena zorey pou tande, li pou tande.” Li dir zot ankor, “Pran kont seki zot pe tande. Mezir ki zot servi pou lezot, samem mezir pou servi pou zot; e pou zot, li pou inpe plis. Seki ena, pou gagn ankor; seki pena, mem sa tigit ki li ena la, pou repran.” Li kontigne ankor, li dir, “Rwayom Bondie li parey kouma enn dimounn ki zet enn lagrin dan later. Ki li dormi, ki li leve, lanwit, lizour, lagrin-la pou zerme, pou grandi san mem ki li kone kouma. Par limem, later fer so travay; premie dabor nou gagn lerb, apre li vinn enn zepi, anfin dible plin-plin dan zepi; letan so fri finn pare, nek pas enn sinp kout fosi kan sezon lakoup finn arive.” Li kontign koze, li dir, “Ar ki zafer nou konpar Rwayom Bondie? Ki kalite parabol nou kapav servi ankor? Li parey kouma enn lagrin moutard. Kan nou finn sem li, limem pli tipti semans ki existe lor later. Me selman, kouma ou sem li, li monte. Li vinn pli gran ki tou bann plant dan zardin. So bann brans telman gran ki bann zwazo partou kote kapav vinn fer zot nik dan so lonbraz.” Ar boukou parabol sa zar-la, li ti pe anons laparol, dapre seki zot ti pe kapav konpran. Li ti koz ar zot zis an parabol, apre kan li ti tousel ar so bann disip, li ti explik zot tou kiksoz. Sa zour-la, letan aswar finn arive, Zezi dir zot, “Anou travers lot kote.” Zot kit lafoul, zot rant dan bato kot Zezi ti ete. Lezot bato al ansam ar li. Enn gran koudvan leve; gro-gro vag vinn kraz lor bato. Enn timama, bato koumans pran dilo. Zezi limem, li ti pe dormi par deryer lor enn kousin. Zot lev li, zot dir li, “Met, sa pa fer twa nanye ki nou pe koule?” Li nek leve, li menas divan e li koz ar lamer, “Res trankil, kalme twa.” Labriz tonbe, letan kalme net. Lerla li dir zot, “Kifer zot kapon koumsa? Zot touzour pena lafwa?” Enn gran lafreyer pran zot. Sakenn dir ar so kamarad, “Kisann-la sa? Mem divan ek lamer obeir li?” Apre sa, zot ariv lot kote lamer, dan landrwa bann Zerazenien. Kouma Zezi debarke, enn boug posede par enn move lespri, sorti dan bann tom, vinn zwenn li. Simitier ti so lakaz. Personn pa ti reisi atas li, mem pa avek enn lasenn. Souvan defwa, bann-la ti atas so lipie avek rwayar ek lasenn; sak fwa li kas rwayar, li voltiz lasenn. Personn pa ti ase for pou dont li. Lanwit-lizour li irle dan simitier, lor montagn. Li ti koup-koup limem ar ros. Letan li trouv Zezi pe vini depi lwin, li galoupe, li tom azenou devan Zezi. Li koumans kriye bien-bien for, “Ki to oule ar mwa, Zezi Garson Bondie Tou Pwisan? Mo pran Bondie pou temwin, mo sipliy twa, pa fatig mwa.” Parski Zezi ti finn dir li, “Twa, move lespri, sort dan sa boug-la.” Zezi dimann li, “Twa ki to ete?” Li reponn, “Mo enn lezion parski nou boukou.” Li sipliy Zezi pa avoy zot dan enn lot landrwa. Lor flan montagn, ti ena enn gran troupo koson ki ti pe manze. Bann move lespri-la sipliy Zezi, “Avoy nou dan bann koson, permet nou rant dan zot.” Li donn bann-la permision. Zot sorti, zot rant dan bann koson-la. Troupo-la deval lapant, tom direk dan lamer. Ti ena apepre de-mil koson, zot tou ti mor nwaye. Bann gardien koson sove-ale; zot fann nouvel dan lavil ek lakanpagn lor seki finn pase. Dimounn galoupe, vinn gete seki finn arive. Ler zot ariv kot Zezi, zot trouv sa dimounn ki ti posede la. Samem boug ki ti ena enn larme lespri lor li; li ti pe asize, so linz lor li, so lespri normal; dimounn gagn per, zot gagn sok. Bann ki finn trouve, finn rakont zistwar sa posede la ek seki finn ariv bann koson. Zot sipliy Zezi kit zot landrwa. Letan li pe mont dan bato, boug ki ti posede la, inplor Zezi pou li kapav swiv li. Zezi pa les li; li dir li, “Al to lakaz kot to bann fami; rakont zot tou seki Lesegner inn fer pou twa, kouma li finn pitie twa.” Letan li ale, li koumans proklame dan Dekapol tou seki Zezi finn fer pou li. Tou dimounn ti plin ar admirasion. Ankor enn fwa, Zezi travers lamer pou al lot kote, enn gro lafoul ti antour li. Li ti dan bor lamer. Lerla enn sef sinagog ki ti apel Zair vini. Letan li trouv Zezi, li tom azenou devan li. Li sipliy Zezi, li inplor li, “Ayo, Zezi, mo tifi pre pou mor; vini, poz lame lor li, sa pou sov li, li pou viv.” Zezi al avek li. Enn gran lafoul ti pe swiv li. Dimounn ti pe pouse. Ti ena la enn fam ki ti ena enn lemorazi depi douz-an. Li finn soufer anba lame boukou dokter ki finn fer li depans tou so kas dan vid; letan sa so maladi ti vinn pli grav. Repitasion Zezi ti finn ariv ziska madam-la. Li rant dan lafoul, li pas par deryer Zezi, li tous so linz. Dan so latet li ti pe dir, “Si selman mo reisi tous so linz, mo pou geri.” Enn sel kout, so lemorazi arete. Li santi klerman dan so lekor ki so maladi finn kit li. Anmemtan Zezi santi enn lafors ki finn sort dan so lekor. Li vire, li demande, “Kisann-la finn tous mo linz?” So bann disip dir li, “To pa trouve lafoul pe pouse, to demande, kisann-la finn tous twa?” Li vire, li gete pou kone kisann-la finn fer sa? Madam-la gagn per, li tranble; li kone ki finn ariv li; li vini, li tom azenou devan Zezi, li dir li tou laverite. Zezi dir li, “Mo tifi, to lafwa finn sov twa; al anpe; to finn gagn to gerizon.” Li ti ankor pe koze, kan dimounn ki sorti lakaz sef sinagog-la vinn donn nouvel, “To tifi finn mor; pou kifer bizin kontigne deranz Met la?” Zezi pa pran kont zot koze; li dir sef sinagog, “Pa trakase, nek krwar.” Li pa les personn swiv li apart Pier, Zak ek so frer Zan. Zot rant dan lakaz sef sinagog; Zezi trouv enn gran deboulman, ena pe plore, ena pe gagn kriz. Letan li rantre, li dir bann dimounn, “Kifer zot azite koumsa? Kifer zot plore? Zanfan-la pa finn mor, li pe dormi.” Bann-la riy li. Zezi met zot tou deor; li gard zis papa ek mama zanfan-la la ek sa trwa ki ti vinn ar li la; li rant dan lasam kot zanfan-la la ti ete. Li trap lame zanfan-la, li dir li, “Talita koum,” ki vedir, “Zennfi, mo dir twa, leve.” Deswit tifi-la leve, li koumans marse (li ti ena douz-an). Tou dimounn res bet. Zezi donn zot lord pa les personn kone. Li dir zot, “Donn tifi-la manze.” Zezi kit sa landrwa-la, li retourn dan vilaz kot li ti grandi; so bann disip ti pe swiv li. Zour saba li koumans ansegne dan sinagog. Tou seki ti pe ekout li, ti inpresione. Zot dir, “Kot li finn aprann tou sa bann koze-la? Kot li finn gagn sa kalite sazes-la? Kot li finn gagn pouvwar pou fer sa kalite mirak-la ar so lame? Pa limem sarpantie, garson Marie, frer Zak, Zoze, Zid ek Simon? Pa so bann ser mem ki res isi dan landrwa?” Zot ti skandalize par so manier. Zezi dir zot, “Enn profet pou gagn rekonesans partou exsepte dan landrwa kot li finn ne, dan so fami ek dan so prop lakaz.” Akoz samem, li pa ti kapav fer okenn mirak dan sa landrwa-la; li ti zis kapav poz so lame lor de-trwa malad, e li ti geri zot. Zezi ti soke ki zot pa ti ena lafwa. Apre sa, li ti fer enn letour bann vilaz dan lezanviron, li ti kontigne ansegne. Li apel Ledouz; li koumans avoy zot de par de. Li donn zot pouvwar lor bann move lespri. Li ordonn zot pa sarye nanye kan zot ale, apar enn baton, pa pran dipin, ni sak, ni kas dan pos. Met sandalet, me pa pran okenn linz resanz. Li dir zot, “Kan zot rant dan enn lakaz, res laba mem ziska zot kit landrwa-la. Si dan enn landrwa dimounn refiz resevwar zot ek refiz ekout zot, sakouy bien lapousier anba zot lipie, kan zot kit bann-la, sa pou enn temwaniaz kont sa bann dimounn-la.” Bann disip ale, zot proklame ki dimounn bizin sanz zot leker. Zot sas boukou demon, zot fer lonksion delwil lor bann malad e bann-la ti trouv zot gerizon. Lerwa Erod finn tann koz Zezi, parski so nom ti bien popiler, bann-la ti pe dir, limem Zan Batis ki finn resisite parmi bann mor, akoz samem li ena sa bann pouvwar-la. Ena ti pe dir “Eli, sa.” Lezot ti pe dir, “Li enn profet kouma bann profet letan lontan.” Letan Erod finn tann sa, li dir, “Mo finn sot likou Zan, ala li finn resisite.” An-realite, Erod limem finn avoy dimounn trap Zan; zot atas li, zot met li dan prizon. Sa ti arive parski Erod ti finn marye avek Erodiad ki ti fam so frer Filip. Zan ti dir Erod, “To pa gagn drwa pran fam to frer.” Akoz samem Erodiad ti deteste Zan e li ti anvi touy li. Selman li pa ti gagn lokazion, parski Erod ti per Zan. Li ti kone Zan ti enn dimounn drwat e sin. Erod ti pe protez li; sak fwa kan Erod ti tann li koze, li ti anbarase me selman li ti kontan ekout li. Enn zour, enn bon lokazion prezante. Zour so laniverser, Erod ti donn enn gran festin pou so bann konseye, so bann sef militer ek bann gran misie dan Galile. Tifi Erodiad rantre, danse. Erod ek tou so bann invite ti bien kontan. Lerwa dir tifi-la, “Demann mwa seki to anvi, mo pou donn twa.” Li fer enn serman ar tifi-la, “Tou seki to demande, mo pou donn twa, mem ziska lamwatie mo rwayom.” Tifi-la ale, li dir ar so mama, “Ki mo pou demande?” So mama reponn, “Latet Zan Batis.” Li galoupe, li al get lerwa, li dir li, “Mo anvi to donn mwa aster-la mem, latet Zan Batis lor enn plato.” Lerwa bien sagrin. Akoz serman li finn fer devan so bann invite, li pa ti anvi perdi fas. Deswit, lerwa avoy enn gard. Li donn li lord amenn latet Zan Batis. Gard-la ale, li sot latet Zan Batis dan kaso, e li amenn latet la lor enn plato; li donn li tifi la; tifi la donn latet la so mama. Kan so bann disip tann sa, zot vini, zot pran so lekor, zot met li dan tonbo. Bann zapot rasanble otour Zezi. Zot rakont li tou seki zot finn fer e tou seki zot finn ansegne. Li dir zot, “Vinn avek mwa dan enn landrwa trankil kot nou pou tousel; repoz zot inpe.” Anfet, ti ena boukou dimounn ti pe ale-vini; zot pa ti mem gagn letan pou manz enn bouse manze. Zot pran bato pou al dan enn landrwa retire kot zot pou tousel. Boukou dimounn ki ti trouv zot ale, ti rekonet zot; depi boukou lavil, dimounn galoupe pou al bar zot avan zot arive. Letan Zezi debarke, li trouv enn gran lafoul; so leker kase parski zot ti kouma bann mouton san berze. Li koumans ansegn zot boukou kiksoz. Letan ti pe pase, bann disip koste pre ar Zezi, zot dir li, “Nou dan enn landrwa retire e li deza bien tar. Les zot ale, koumsa zot ava kapav al dan bann vilaz lakanpagn pou aste kiksoz pou manze.” Li reponn zot, “Donn bann-la manze, zotmem.” Zot dir li, “Kot nou pou al gagn dipin valer de-san zourne travay pou donn zot manze?” Li dir zot, “Komie dipin zot ena? Al gete.” Bann-la pran linformasion, zot reponn li, zis sink dipin ek de pwason. Apre sa li donn zot lord fer bann dimounn-la asiz an group lor gazon. Zot asiz anba par group san ek sinkant. Zezi pran sink dipin ek de pwason-la; li lev so lizie ver lesiel, li fer enn benediksion, li kas dipin-la, li donn so bann disip pou ki bann-la fer distribision dan lafoul; li partaz de pwason-la osi ar zot tou. Tou dimounn finn rasazie ar manze. Ar bout dipin ek pwason ki finn reste, zot ranpli douz panie. Antou sink-mil zom ti manze. Apre sa, Zezi obliz bann disip pran bato pou al lot kote dan Betsaida; letan sa, li pou fer lafoul ale. Kan li finn fini fer zot tou ale, li mont lor montagn, li al priye. Aswar vini, bato ti omilie lamer, Zezi ti tousel ater. Letan li trouv zot pe rame avek boukou difikilte parski divan ti kontrer, ver kat-r-er sink-er dimatin, li mars lor lamer, li vini. Li ti anvi pas devan zot. Ler bann-la trouv li pe mars lor lamer, zot ti krwar enn fantom; zot koumans kriye. Zot tou ti trouv li; enn lafreyer pran zot. Lerla li pran laparol, li dir zot, “Pa traka, momem sa, pa gagn per.” Kouma li mont dan bato avek zot, divan tonbe; zot res bet. Avredir, zot pa ti finn konpran nanye lor mirak dipin; zot leker ti kouma ros. Kan zot finn fini traverse, zot ariv pre lor rivaz Zenezaret, zot amar zot bato. Kouma zot sorti dan bato, deswit dimounn fini rekonet Zezi. Zot sorti partou kote, zot galoupe, zot koumans sarye bann malad lor brankar; zot al zwenn Zezi kot zot ti tann dir li ete. Partou kot li ale, dan vilaz, dan lavil, dan lakanpagn, zot ti amenn bann malad lor laplas piblik; zot sipliy li pou ki zot kapav tous zis bout so linz; tou dimounn ki ti tous li, ti gagn zot gerizon. Bann Farizien ek de-trwa dokter lalwa ki sorti depi Zerizalem antour Zezi. Zot remarke ki de-trwa so bann disip ti pe manz dipin avek lame sal, savedir, zot pa finn lav zot lame. An-efe, bann Farizien parey kouma tou Zwif, ti bizin bien lav lame avan manze, pou respekte tradision zot gran dimounn. Kan zot sorti dan enn landrwa piblik, zot bizin lav zot, apre zot manze. Ena enn pake tradision koumsa ki zot finn resevwar e ki zot bien respekte, par exanp zot lav bann koup, brok, deksi. Alors bann Farizien ek bann dokter lalwa dimann li, “Pou ki rezon to bann disip pa mars dapre tradision nou bann gran dimounn? Pou kifer zot manz dipin ar lame sal?” Zezi reponn zot, “Izai ti ena rezon kan li ti profetiz lor zot, bann ipokrit, kan li ti ekrir dan so liv, ‘Sa pep-la ador mwa zis ar so labous me so leker bien-bien lwin ar mwa. Pou nanye zot ador mwa parski zot fer zot lalwa pas pou lalwa Bondie.’ Zot met lalwa Bondie dan enn kwin me zot gard tradision bann imin.” Zezi kontigne, “Zot bien malin kan bizin detourn lalwa Bondie pou favoriz zot tradision. Moiz ti bien dir, ‘Respekte to papa, respekte to mama,’ e ‘Dimounn ki maltret so papa, ek so mama, li merit lamor.’ Me zot, zot dir, si enn dimounn deklar ar so papa ek so mama, koudme ki li ti pou kapav donn zot, li Korbann - savedir li enn ofrand sakre, alors li gagn drwa pa donn okenn led so papa, so mama. Zot diminie pwa Parol Bondie zis pou kapav transmet zot bann tradision; zot fer boukou kiksoz dan sa manier-la.” Li apel lafoul ankor, li dir zot, “Ekout mwa bien zot tou, sey konpran sa ki mo pe dir. Tou seki dan lanatir e ki rant dan lekor enn dimounn, pa kapav fer li vinn inpir, selman seki sorti dan so lekor, sa kapav fer li vinn inpir. Si zot ena zorey pou ekoute, ekout bien! ” Letan li kit lafoul, li rant lakaz, so bann disip pe poz li kestion lor sa parabol-la. Li dir zot, “Kouma zot ousi, zot kapav bet koumsa? Kouma zot pa konpran ki tou seki dan lanatir e rant dan enn dimounn pa kapav fer li vinn inpir, parski li pa rant dan so leker me dan so vant apre so lekor eliminn li?” Par sa parol-la Zezi ti deklare ki tou manze prop. Li kontigne, “Seki sorti depi andan, samem ki fer dimounn vinn inpir. Andan, dan leker, lamem tou sort kalite move lide sorti: move lavi, kokin, touye, adilter, groker, fer vis, zwe malin, lamizman, met lizie, zoure, vantar, divage. Tou seki move sort dan leker dimounn; samem ki fer li vinn inpir.” Kan Zezi sorti la, li al dan rezion Tir. Li rant dan enn lakaz, li pa ti anvi personn kone, me li pa ti kapav kontign kasiet. Me kouma enn madam ki so tifi ti ena move lespri lor li tann koz Zezi, li vini, li tom azenou devan li. Sa madam-la pa ti dan larelizion Zwif; li ti enn Siro-Fenisienn. Li dimann Zezi tir demon lor so tifi. Zezi reponn li, “Les bann zanfan manze avan, parski li pa bon pran dipin zanfan pou zet ar ti lisien.” Madam la reponn, “Wi Segner, me selman ti lisien anba latab, manz bout dipin ki bann zanfan les tonbe.” Alor Zezi dir li, “Akoz sa parol to finn koze-la, ale, demon finn kit to tifi.” Kan li ariv kot li, li trouv so zanfan alonze lor lili, demon finn fini kit li. Apre sa, Zezi kit rezion Tir ankor enn fwa, li pas par Sidon; li pran direksion lamer Galile, li travers Dekapol. Zot amenn enn sourd devan li, li ti osi gagn difikilte pou koze; zot sipliy Zezi poz lame lor li. Zezi pran li, amenn li dan enn kwin, lwin ar lafoul. Li met so ledwa dan so zorey; li tous so lalang ar so lakras. Li lev so lizie ver lesiel li pous enn soupir, li dir li “Efata!” savedir, “Ouver-twa!” Deswit so zorey ouver, so lalang large, li koz normal. Zezi donn zot lord pa dir nanye personn; me plis li donn zot lord, plis zot fann nouvel lor li partou. Zot ti bien-bien inpresione; zot tou ti pe dir, “Li finn fer boukou mervey! Mem bann sourd tande, bann mie koze.” Enn lot fwa, ti ena ankor enn gro lafoul. Zot pa ti ena nanye pou manze. Zezi apel so bann disip, li dir zot, “Mo leker fermal kan mo get sa lafoul-la. Sa fer trwa zour ki zot ar mwa e zot pena nanye pou manze. Si mo dir zot al zot lakaz lestoma vid, zot pou gagn febles dan sime parski ena ki sorti bien lwin.” So bann disip dir li, “Kot pou kapav gagn dipin pou ranpli zot vant dan enn landrwa dezer koumsa?” Li dimann zot, “Komie dipin zot ena?” Zot dir li, “Set.” Li fer lafoul asiz anba; li pran toule-set dipin, li rann gras, li kas bann dipin-la, li donn so bann disip pou ki bann-la fer lapartaz e bann-la partaz avek lafoul. Ti ena osi de-trwa ti pwason; li beni zot e li dimann bann-la partaz sa osi. Bann-la manze ziska zot vant plin; apre zot ti ramas set korbey ranpli ar ti-bout dipin. Ti ena apepre kat-mil dimounn. Apre li dir zot al lakaz. Zis apre li mont lor bato avek so bann disip e li al paraz Dalmanouta. Bann Farizien vini; zot koumans diskit ar Zezi; pou teste li, zot dimann li enn sign ki sorti depi lao dan lesiel. Li pous enn gran soupir, apre li reponn, “Kifer sa zenerasion-la pe rod enn sign? Laverite, laverite mo dir zot, sa zenerasion la pa pou gagn okenn sign.” Lerla li kit zot, li remont dan bato, li al lot kote. Bann disip ti bliye amenn dipin. Ti ena zis enn sel dipin avek zot dan bato. Zezi averti zot, “Get bien, fer atansion ar levin bann Farizien ek levin Erod.” Bann disip ti pe diskite ant zot parski zot pa ti ena dipin. Zezi ti remarke seki ti pe pase. Li dir zot, “Kifer zot pe diskite akoz zot pena dipin? Zot lizie pankor ouver? Zot pankor konpran? Koumsa zot leker dir? Zot ena lizie, selman zot pa trouv kler; zot ena zorey, selman zot pa tande? Zot pa rapel? Kan mo ti kas sink dipin pou sink-mil dimounn, komie panie ranpli ar bout dipin zot ti ramase?” Zot dir li, “Douz.” “Kan mo ti kas set dipin pou kat-mil dimounn, komie panie ranpli ar bout dipin zot ti ramase?” Bann-la reponn, “Set.” Li dir zot, “Zot pankor konpran mem?” Zot ariv Betsaida. Dimounn amenn enn aveg ar Zezi; zot sipliy Zezi tous li. Zezi trap so lame, li amenn li andeor vilaz. Li met inpe lakras lor so lizie, li poz lame lor li apre li dimann li, “Eski to trouv kiksoz?” Aveg-la lev so latet, li dir, “Mo trouv dimounn me zot koumadir bann pie ki pe marse.” Zezi poz lame ankor enn fwa lor so lizie. Lerla li arive trouv bien, so lizie revinn normal e li trouv tou bien kler. Zezi fer li al so lakaz, e li dir li, “Pa pas par sa vilaz-la.” Zezi pran direksion bann vilaz Sezare-Filip avek so bann disip. Dan sime, li dimann so bann disip, “Ki bann dimounn pe dir lor mwa?” Zot reponn li, “Ena dir to Zan Batis, ena dir tomem Eli, lezot pe dir to enn parmi bann profet.” Me li dir zot, “E zot, ki zot dir mo ete?” Pier reponn li, “Tomem Lemesi.” Li komann zot pa dir sa personn. Apre sa li koumans ansegn zot, fode ki Garson Limanite soufer boukou, ki bann ansien, bann pret, bann dokter lalwa rezet li, touy li, apre sa li pou resisite lor so trwaziem zour. Li ti pe koz fran-fran ar zot. Pier amenn li dan enn kwin e koumans menas li. Zezi vire, li get so bann disip, li menas Pier; li dir li, “Sorti devan mwa, Satan, parski to pena lespri Bondie me lespri dimounn.” Li apel lafoul ek so bann disip e li dir zot, “Si kikenn anvi mars lor mo sime pou swiv mwa, li bizin bliye limem, pran so lakrwa, swiv mwa. Dimounn ki anvi sov so lavi, pou perdi li; seki perdi so lavi akoz mwa ek Bonn Nouvel, pou sov li. Kiserti enn dimounn gagn lemond antie si li ariv perdi so lavi? Ki kiksoz enn dimounn pa pou fer pou sap so lavi? Si kikenn, dan sa zenerasion adilter ek peser-la, gagn onte akoz mwa ek mo parol, Garson Limanite, li osi pou ont li, kan li pou vinn dan laglwar so Papa ek bann anz ki sin.” Zezi dir zot ankor, “Laverite, laverite mo dir zot, ena de-trwa isi ki pa pou konn lamor tanki zot pa trouv Rwayom Bondie desann avek pwisans.” Sis zour apre, Zezi pran zis Pier, Zak ek Zan tousel avek li e li amenn zot lao lor montagn. Li transfigire devan zot. So linz vinn blan-blan-blan, enn kalite blan ki okenn dobi lor later pankor kapav reisi arive fer. Zot trouv Eli ek Moiz paret devan zot. Bann-la ti pe koz ar Zezi. Alor Pier rant dan konversasion, li dir ar Zezi, “Rabi, li bien bon ki nou isi avek twa; anou ranz trwa latant, enn pou twa, enn pou Moiz ek enn pou Eli.” Li pa ti kone ki pou dir telman zot ti finn sezi. Lerla enn niaz rekouver zot e enn lavwa dan niaz dir, “Samem mo Garson ki mo bien kontan, ekout li.” Enn ti moman apre, kan zot get kat kote, zot pa trouv personn, res zis Zezi tousel. Ler zot pe desann lor montagn, Zezi rekomann zot pa rakont personn seki zot finn trouve tanki Garson Limanite pa ankor resisite parmi bann mor. Zot gard sa parol-la dan zot leker, mem si zot ti pe dimann zotmem, “Ki savedir ‘Resisite parmi bann mor’?” Apre bann disip dimann li, “Kifer bann dokter lalwa dir fode Eli revini avan?” Li reponn zot, “Premie dabor, Eli pe vini pou dres tou e met tou dan lord; alor kifer finn ekrir ki Garson Limanite pou soufer boukou e pou gagn maltrete?” Li kontigne, “Eli finn vini, zot finn fer tou seki zot ti anvi avek li, dapre seki ti finn ekrir lor li.” Kan zot rezwenn lezot disip, zot trouv enn gro lafoul pe antour bann-la; bann dokter lalwa ti pe diskit ar zot. Kouma lafoul trouv Zezi, zot exsite. Zot galoupe pou akeyir li. Li dimann zot, “Ki zot pe diskite ar bann-la?” Enn boug dan lafoul reponn li, “Met, mo finn amenn mo garson ar ou, li posede par enn lespri ki anpes li koze. Sak fwa lespri-la trap li, li fwet li anba, zanfan-la kime, li grins so ledan, li redi. Mo finn dimann ou disip pous sa lespri-la, selman zot pa ase for.” Zezi reponn zot, “Sa zenerasion-la, enn zenerasion ki pena lafwa; ziska kan mo pou res ar zot? Ziska kan mo pou siport zot? Amenn li ar mwa.” Zot amenn li ar Zezi; kouma lespri-la trouv li, li fer zanfan-la rant antrans, li tom anba, li fer li roule, li kime. Zezi dimann so papa, “Depi komie letan li gagn sa?” Li reponn, “Depi li zanfan. Plizir fwa, lespri-la finn zet li dan dife ek dan dilo pou fini li; si ou kapav fer kiksoz pou nou, sap nou, pran par dan nou maler.” Zezi dir li, “To pe dir si ou kapav? Be tou kiksoz posib pou dimounn ki ena lafwa.” Deswit papa garson-la kriye, “Mo krwar; ed mwa, mo lafwa pa ase gran.” Kan Zezi trouv enn latroupman, li menas move lespri-la, li dir li, “Twa, lespri ki anpes koze, ki anpes tande, mo komann twa, sort dan sa zanfan-la, pa revinn ankor ar li.” Lespri-la kriye, li sakouy-sakouy zanfan-la, li sorti, li ale. Zanfan-la pa bouze, li ti parey kouma enn dimounn mor. Dimounn dir li finn fini mor. Zezi trap so lame, fer li leve, li deboute. Letan Zezi finn rant lakaz, bann disip ris li enn kote, zot dimann li, “Kifer nou pa finn kapav pous sa lespri-la, nou?” Li dir zot, “Zis ar lapriyer ki sa kalite lespri-la kapav sorti.” Zot sorti landrwa kot zot ti ete, zot travers Galile. Zezi pa ti anvi ki dimounn konn sa. Li ti pe kontigne ansegn so bann disip e li ti pe dir zot, “Zot pou trap Garson Limanite, zot pou livre li dan lame bann dimounn; zot pou touy li, me trwa zour apre so lamor, li pou resisite.” Zot pa ti konpran seki li ti pe rod dir; zot ti gagn per poz li kestion. Zot ariv Kafarnaom; kouma zot rant lakaz, Zezi dimann zot, “Ki zot ti pe diskite lor sime?” Zot tou, zot res trankil parski lor sime, zot ti pe diskite for-for pou kone kisann-la pli gran. Li asize, li apel Ledouz, li dir zot, “Si kikenn anvi vinn premie, fode li vinn dernie e li bizin vinn serviter tou dimounn.” Lerla li pran enn ti zanfan, li met li dan milie, li pran li dan so lebra, apre li dir zot, “Dimounn ki akey enn sa bann ti zanfan-la, lor mo nom, li pe akeyir momem; e dimounn ki akeyir mwa, pa mwa li pe akeyir me seki finn avoy mwa la.” Zan dir li, “Met, nou finn trouv kikenn servi to nom pou pous enn demon; nou finn sey anpes li parski li pa mars ar nou.” Zezi dir, “Pa anpes li; dimounn ki servi mo nom pou fer enn mirak, pa kapav mal parl mwa apre; Seki pa kont nou, ar nou. Dimounn ki donn zot enn ver dilo, lor mo nom, parski zot krwar dan Lekris, laverite, laverite mo dir zot, li pa pou perdi so rekonpans.” “Dimounn ki fer enn sa bann ti zanfan ki krwar dan mwa la tonbe, ti ava preferab atas enn gro ros otour so likou e zet li dan lamer. Si to lame fer twa tonbe, koup li; preferab to mank enn lame kan to rant dan lavi, ki to ena de lame dan lanfer, la kot dife napa tengn. lever ki detrir lekor pa mor, ek dife pa tengn zame Si to lipie fer twa tonbe, koup li; preferab to mank enn lipie kan to rant dan lavi, ki to al avek to de lipie dan lanfer kot lever ki detrir lekor pa mor, ek dife pa tengn zame Si to lizie fer twa tonbe, aras li; preferab to mank enn lizie kan to rant dan Rwayom Bondie, ki to rant avek to de lizie dan lanfer, la, kot lever pa mor e kot dife pa tengn. Nou tou, nou pou sale ar dife. Disel enn bon zafer, sa, selman si disel finn perdi so gou, ki ou pou servi pou asezone? Met disel dan zot lavi, viv dan lape avek tou dimounn.” Zezi leve, li al dan paraz Lazide, lot kote larivier Zourdin. Ankor enn fwa, lafoul ti antour li. Kouma li abitie fer, li kontign ansegn zot. Bann Farizien koste ar li. Zot ti pe rod instal li, alor zot dimann li si lalwa permet enn mari ranvway so fam. Li reponn zot, “Ki komannman Moiz finn donn zot?” Zot reponn, “Moiz permet nou servi enn papie avan met li deor.” Zezi dir zot, “Moiz finn ekrir sa lalwa-la akoz zot leker dir. Depi koumansman kreasion, Bondie finn kree zot zom ek fam. Akoz samem enn dimounn pou kit so papa ek so mama. Toule-de pou form enn sel lekor; koumsa zot nepli de, me enn sel. Fode pa dimounn separ seki Bondie finn met ansam.” Letan zot rant lakaz, bann disip dimann li enn eklersisman lor sa problem-la. Li dir zot, “Zom ki ranvway so fam pou remarye avek enn lot, li komet adilter. Tou fam ki kit so mari pou remarye avek enn lot, li ousi, li komet adilter.” Bann dimounn amenn bann ti zanfan pou ki Zezi poz lame lor zot me so bann disip farous zot. Zezi agase, li dir zot, “Les bann ti zanfan vinn ar mwa, napa anpes zot parski Rwayom Bondie pou dimounn ki parey kouma zot. Laverite, laverite mo dir zot, dimounn ki pa akeyir Rwayom Bondie parey kouma enn ti zanfan, napa pou rant dan so Rwayom.” Li may zot dan so lebra, li poz lame lor zot, e li beni zot. Letan Zezi ti pe sorti pou ale, enn dimounn galoupe, vini, tom dan so lipie e dimann li, “Met, twa ki bon, ki mo bizin fer pou gagn lavi eternel an-eritaz?” Lerla Zezi reponn li, “Kifer to dir mwa bon? Personn pa bon, zis Bondie tousel ki bon. To konn bann komannman: pa touy dimounn, pa viv dan ladilter, pa kokin, pa fer fos temwaniaz, pa fer ditor to prosin, onor to papa ek to mama.” Li dir Zezi, “Met, depi mo zenn mo viv dapre lalwa.” Zezi get li bien, li finn bien apresie li; alor li reponn li, “To mank enn sel kiksoz: ale, vann tou to dibien, donn dimounn mizer, lerla to pou gagn enn gran trezor dan lesiel, apre sa vini, swiv mwa.” Dimounn-la so figir sanze letan li tann sa parol-la, li ale leker lour parski li ti ena boukou dibien. Zezi vire, get partou, apre sa li dir so bann disip, “Bien difisil pou dimounn ki ena gran-gran dibien pou rant dan Rwayom Bondie.” Bann disip ti inpe soke avek so parol; Zezi kontign koze, li dir, “Bann zanfan, li bien difisil pou dimounn ris rant dan Rwayom Bondie; Li pli fasil pou enn samo pas par trou enn zegwi ki pou enn risar rant dan Rwayom Bondie.” Zot ankor plis soke, sakenn pe dir ar so kamarad, “Be alor, kisann-la pou reisi sove?” Zezi get zot fran dan zot lizie, li dir zot, “Pou dimounn li inposib me pa pou Bondie, parski pou Bondie tou kiksoz posib.” Pier koumans dir, “Be nou, nou finn kit tou pou swiv twa.” Zezi reponn, “Laverite, laverite mo pe dir zot, personn pa pou kit so lakaz, so frer, so ser, so mama, so papa, so zanfan, so later, akoz mwa ek Bonn Nouvel, san ki li gagn, aster-la mem, san fwa plis: lakaz, frer ek ser, mama ek zanfan, later, avek so persekision, e lavi eternel dan lot lemond. Seki premie pou vinn dernie, seki dernie pou vinn premie.” Zot ti lor sime pou mont Zerizalem; Zezi ti pe mars devan; zot ti boulverse e bann seki ti pe swiv li ti pe gagn per. Li pran Ledouz enn kote ankor enn fwa, li koumans rakont zot seki pou ariv li. “Gete! Nou pe mont Zerizalem, bann-la pou livre Garson Limanite devan bann gran pret ek bann dokter lalwa, zot pou kondann li amor e zot pou les bann payin ziz li. Zot pou boufonn li, zot pou kras lor li, zot pou fwet li, zot pou touy li, me lor trwaziem zour li pou resisite.” De garson Zebede, Zak ek Zan, koste ar li, zot dir li, “Met, nou ti pou bien kontan si to ti kapav fer nou enn faver.” Li dimann zot, “Ki zot ti anvi mo fer pou zot?” Zot reponn li, “Permet nou asiz enn dan to kote drwat, lot dan to kote gos kan to rant dan to laglwar.” Zezi dir zot, “Zot pa kone ki zot pe dimande. Eski zot kapav bwar dan koup ki mo pou bwar, batiz dan batem ki mo pou batize?” Zot dir li, “Wi nou kapav.” Zezi reponn zot, “Koup ki mo pou bwar, zot pou bwar ek batem ki mo pou batize, zot pou batize. Me pou kone kisann-la pou asiz dan mo kote drwat ek mo kote gos, sa pa depann lor mwa me li finn deza prepare pou sertin dimounn.” Letan sa dis-la tann sa, zot agase avek Zak ek Zan. Zezi apel zot tou, li dir zot, “Zot kone tou seki finn gagn pozision otorite dan bann nasion, zot fer dominer e zot bann dirizan montre zot pouvwar. Li pa parey koumsa parmi zot. Seki anvi pran grander parmi zot, li bizin okip plas serviter Seki anvi vinn premie, li bizin vinn esklav tou dimounn. Mazine ki Garson Limanite pa finn vini pou ki dimounn servi li, me pou li servi dimounn e donn so lavi kouma enn ranson pou tou dimounn.” Zot ariv dan Zeriko; zis kouma li ti pe kit Zeriko avek so bann disip ek enn gro lafoul, Bartime, garson Time, enn mandian aveg, ti pe asize dan bor sime. Letan li aprann ki Zezi ki sorti Nazaret la ti pe pase, li koumans kriye for-for, li dir, “Ayo, Zezi, Garson David, pitie mwa.” Bann-la donn li lord res trankil, me li kriye ankor pli for, “Garson David, pitie mwa.” Zezi arete, li dir “Apel li.” Zot apel aveg-la, zot dir li, “Kouraz, dibout, li pe apel twa.” Li zet so palto, li fransi, li vinn devan Zezi. Zezi dir li, “Ki to oule mo fer pou twa?” Aveg-la reponn, “Rabouni, fer mwa trouv kler.” Zezi dir li, “Ale, to lafwa finn sov twa.” Deswit li trouv kler e li swiv Zezi. Kan zot ariv pre ar Zerizalem, parti Betfaze ek Betani, akote kolinn Pie Zoliv, Zezi avoy de disip e li dir zot, “Al dan vilaz ki devan zot; kouma zot ariv laba, zot pou trouv enn ti bourik ki atase; personn pa finn deza mont li, delarg li, amenn li isi. Si kikenn dimann zot, ‘Kifer zot pe fer sa?’ nek dir, ‘Lesegner bien bizin bourik-la; kouma li fini, li pou retourn li.’ ” Zot ale e zot trouv ti bourik atase, deor lor lari, pre ar enn laport. Kouma zot pe delarg li, de-trwa dimounn ki ti dan paraz dir zot, “Ki zot pe fer, kifer zot pe delarg sa ti bourik-la?” Zot reponn bann-la parey kouma Zezi ti dir zot, lerla bann-la les zot trankil. Zot amenn ti bourik-la ar Zezi; zot zet zot linz lor li; Zezi asiz lor so ledo. Enn parti dimounn ti pe tal zot linz anba, enn lot bann ti pe tal ramo ki zot ti finn al koupe dan karo. Bann ki ti pe mars devan e bann ki ti pe swiv par deryer, ti pe kriye, “Ozana! Sa Dimounn ki pe vini lor nom nou Segner, finn beni. Regn nou papa David ki pe vini, finn beni, Ozana pli lao dan lesiel.” Zezi rant dan Zerizalem, li pran direksion Tanp, li get partou kote; me kouma ti deza tar, li sorti, li al Betani avek Ledouz. Landime, letan zot kit Betani, Zezi ti pe gagn fin. Depi lwin li trouv enn pie fig kouver ar fey; li aprose pou gete si li trouv kiksoz pou manze. Letan li vinn pre ar li, li pa trouv nanye, ti ena zis feyaz parski pa ti ankor sezon fig. Alor li dir sa pie fig-la, “Zame ankor personn pou manz to fri!” So bann disip tann sa koze-la. Letan zot ariv Zerizalem, Zezi al direk dan Tanp. Li koumans farous tou bann marsan ek tou bann kliyan ki ti pe fer komers dan Tanp, li devir latab bann sanzer-kas anba-lao e li ranvers sez bann marsan pizon. Li pa les personn mars avek okenn lartik dan Tanp. Lerla li ansegn zot, li dir, “Eski pa finn ekrir ki pou apel mo lakaz, lakaz lapriyer pou tou bann nasion? Me zot, zot finn fer li vinn enn kavern voler.” Kan sef bann pret ek bann dokter lalwa finn konn sa, zot ti pe rode kouma pou touy li, me zot ti gagn per li parski lafoul ti apresie so lansegnman. Kouma koumans fer nwar, Zezi ek so bann disip sorti andeor lavil. Boner gramatin, letan zot pe marse dan bor sime, zot trouv pie fig-la finn sek ziska so rasinn. Pier rapel seki ti finn pase e li dir, “Rabi, get pie fig ki to finn modi la; ala li finn sek.” Zezi reponn zot, “Met to lafwa dan Bondie. Laverite mo dir zot, si kikenn dir sa montagn-la, ‘Leve, al zet twa dan lamer,’ si li pena dout dan so leker, me lafwa dan seki li pe dir, samem pou arive. Akoz samem mo dir zot, tou seki zot dimande dan lapriyer, krwar ki zot finn fini gagn li, e zot pou gagn li. Kan zot vinn devan Bondie pou priye, si zot ena kiksoz kont enn dimounn, al pardonn li, pou ki zot papa dan lesiel pardonn osi zot bann fot.” Me si zot pa pardonn lezot, zot Papa ki dan lesiel pa pou pardonn fot ki zot finn fer. Ankor enn fwa Zezi ek so bann disip retourn Zerizalem. Zezi ti pe ale-vini dan Tanp; sef bann gran pret, bann dokter lalwa ek bann ansien dir li, “Seki to pe fer la, par ki lotorite to pe fer sa? Kisann-la finn donn twa lotorite pou fer tousala?” Zezi dir zot, “Mo pou poz zot enn sel kestion, reponn mwa, lerla mo pou dir zot kisann-la finn donn mwa pouvwar pou fer tousala. Eski batem Zan sorti depi dan lesiel ouswa dimounn ki finn invant sa? Reponn mwa.” Zot fer enn korom, zot kalkile, “Si nou reponn ‘Depi dan lesiel,’ li pou dir, ‘Be ki fer alors zot pa finn krwar dan li?’ Me eski nou kapav reponn, ‘Dimounn’?” Zot ti gagn per lafoul parski tou dimounn ti konsider Zan kouma enn profet. Alor zot dir Zezi, “Nou pa kone.” Lerla Zezi reponn zot, “Mo osi mo pa pou dir zot kot mo pouvwar sorti.” Li koumans koz ar zot an parabol. “Ti ena enn dimounn ki ti plant enn karo rezin; li ranz enn baraz pou antour so karo, li fouy enn trou pou instal so preswar, li ranz enn miray; apre li lwe so karo avek bann meteye e li parti, li ale. Letan sezon rekolt arive, li avoy enn serviter al get bann meteye pou rod so par dan karo rezin. Bann-la trap serviter-la, bat li e fer li retourn lame vid. Li avoy ankor enn lot serviter; sann-la osi, zot kas-kas so latet ar bate e zot zour li. Li avoy enn lot serviter ankor; li osi, zot touy li. Apre zot kontign fer parey avek enn kantite lezot serviter. Ena finn gagn bate, ena finn gagn lamor. Ti res zis so garson ki li ti bien kontan; an dernie li desid avoy li parski li ti pe dir, ‘Bann-la pou respekte mo garson.’ Bann meteye-la fer enn konplo, zot dir, ‘Limem eritie, anou touy li, lerla leritaz pou vinn pou nou.’ Zot trap garson-la, zot touy li e zot zet li andeor karo. Dapre zot, ki proprieter karo rezin pou fer? Li pou vini, li pou touy bann meteye e li pou donn so karo lezot dimounn. Zot pa finn lir dan Lekritir, ‘Ros ki bann mason finn rezete, samem finn vinn ros ki tini tou ros. Sa travay Bondie, sa, li enn gran mervey pou nou lizie.’?” Bann-la ti pe rod trap li me zot gagn per lafoul. Zot ti finn fini konpran ki Zezi ti pe koz pou zot, letan li ti pe koz an parabol. Apre sa, zot les li, zot ale. Zot avoy de-trwa Farizien ek Erodien lor Zezi pou vir so koze anba-lao. Zot vini e zot dir li, “Met, nou kone ki to koz fran, to pa les dimounn inflians twa, to pa ziz dimounn dapre so laparans me to montre sime Bondie dapre laverite; eski dapre lalwa nou bizin pey tax Sezar, wi ou non? Bizin peye, pa bizin peye?” Li kone kouma bann-la ipokrit; akoz samem li dir zot, “Pou ki fer zot rod instal mwa? Fer mwa gagn enn pies larzan mo gete.” Zot donn li pies-la; apre li dimann zot, “Ki figir ena lor la e ki finn ekrir?” Zot reponn li, “Sezar.” Zezi dir zot, “Rann Sezar seki pou Sezar e rann Bondie seki pou Bondie.” Zot dekonserte. Bann Sadiseen - enn group dimounn ki pa ti krwar dan rezireksion koste ar Zezi e dimann li, “Met, ala lalwa ki Moiz finn ekrir: si frer enn dimounn mor san ki so madam finn gagn enn zanfan, dimounn-la bizin marye ar vev-la pou donn enn desandans so frer. Ti ena set frer. Premie-la finn marye avek enn madam; finn arive li mor san les enn desandan. Deziem frer marye ar madam-la; li ousi li mor san les desandan; parey pou trwaziem-la. Okenn frer pa finn les enn desandans. An dernie, madam-la mem mor. Ler rezireksion pou vini, kisann-la pou vinn mari madam-la? Toule-set finn pran li kouma zot fam.” Zezi dir zot, “Akoz samem zot dan lerer, zot pa konn ni Lekritir, ni pwisans Bondie. Kan bann dimounn pou resisite parmi bann mor, zom pa pou marye e pa pou bizin donn tifi an-maryaz, zot pou kouma bann anz dan lesiel. Lor sa problem rezireksion bann mor-la, zot pa finn lir seki finn ekrir dan liv Moiz? Zot pa finn tande kouma Bondie ti koz ar Moiz dan zistwar bwison ardan? Bondie limem pa ti dir, ‘Momem Bondie Abraam, momem Bondie Izaak, momem Bondie Zakob’? Li pa Bondie bann mor me bann vivan, zot dan gran erer.” Enn dokter lalwa ti pe tann zot diskite e li ti trouve kouma Zezi ti pe bien reponn zot; li aprose, li poz Zezi enn kestion, “Ki premie dan tou bann komannman?” Zezi reponn li, “Ala ki premie komannman: Ekoute, Izrael! Lesegner nou Bondie li tousel Segner, To pou kontan Lesegner to Bondie avek tou to leker, tou to lam, tou to lespri ek tou to lafors. Deziem, to pou kontan to prosin kouma tomem. Pena pli gran komannman ki sa.” Dokter lalwa la dir li, “Sa enn zoli koze Met, samem laverite, ena enn sel Bondie, pena lot. Kontan li avek tou to leker, tou to lintelizans, tou to lafors ek kontan to prosin kouma to kontan tomem, samem pli inportan ki tou bann ofrand ek bann sakrifis.” Letan Zezi trouve ki li finn reponn avek sazes, li dir li, “To pa lwin ar Rwayom Bondie.” Apre sa, personn pa oze poz li kestion. Kan Zezi ti pe ansegne dan Tanp, li dir, “Kouma bann dokter lalwa kapav dir ki Lemesi, limem garson David? Avek linspirasion Lespri Sin, David limem ti pe dir, ‘Lesegner finn dir ar mo Segner, asiz dan mo kote drwat, ziska mo fini met to bann lennmi anba to lipie.’ David limem apel li, Segner; alors kouma Lesegner kapav garson David?” Enn gro lafoul ti pe gagn lagam ekout li. Dan so lansegnman Zezi ti pe dir, “Fer atansion ar bann dokter lalwa. Zot kontan pavane avek zot gran-gran rob e zot kontan kan dimounn kourbe devan zot lor plas piblik. Zot kontan pran bann premie ban dan sinagog ek bann plas-doner dan bann resepsion, Zot manz dibien bann vev e zot fer long-long lapriyer pou lizie dimounn, sa bann-la, zot kondanasion pou pli lour.” Zezi ti pe asize vizavi tron pou ofrand, e li ti pe obzerve kouma dimounn ti pe met zot kas ladan; boukou dimounn ris ti pe met gro-gro som larzan. Enn vev mizer-mizer koste, li met de kas ki pa ti ena gran valer. Zezi apel so bann disip, li dir zot, “Laverite, laverite mo dir zot, parmi tou sa bann dimounn ki finn met kas dan tron-la, sa pov vev-la, finn met plis ki zot tou. Zot tou zot finn met seki zot ti ena anplis, me li, vev-la, li finn pran lor so rasion, lor seki li ti ena pou viv.” Letan Zezi sorti andeor Tanp, enn so bann disip dir li, “Met, gete kouma sa bann ros-la zoli, get sa zoli batiman-la, enn mervey!” Zezi dir li, “To trouv sa bann gran-gran batiman-la? Pa pou res ros lor ros; tou pou grene.” Letan li finn fini asiz lor Kolinn Pie Zoliv, vizavi Tanp, Pier, Zak, Zan ek Andre ris li dan enn kwin pou poz li enn kestion, “Dir nou, kan tousala pou arive? Ki sign pou fer nou konpran ki tousala pre pou akonpli?” Lerla Zezi koumans dir zot, “Get bien pou ki personn pa anbet zot; Boukou pou vini, zot pou servi mo nom, zot pou dir ‘Momem sa.’ Koumsa mem zot pou anbet boukou dimounn. Kan zot pou tann lager ek tapaz lager, pa tranble; fode ki tousala arive, me li pankor lafin. Pou ena lager, pei kont pei, gouvernman kont gouvernman, pou ena tranbleman-de-ter dan plizir landrwa, pou ena lafaminn; tousala kouma douler enn fam ki pre pou akouse. Me zot, fer atansion; bann-la pou trenn zot devan tribinal ek dan sinagog e zot pou gagn bate; pou amenn zot devan bann gouverner ek bann lerwa akoz mwa, samem pou zot temwaniaz devan bann-la. Premie dabor, fode ki Bonn Nouvel proklame dan tou bann nasion. Kan bann-la pou aret zot, pou zot pas an zizman, pa trakase pou kone ki zot pou dir; me dan sa ler-la dir seki vinn dan zot labous; parski napa zot ki pou koze me Lespri Sin. Frer pou trayir frer ziska lamor, papa pou trayir zanfan; zanfan pou revolte kont zot fami e pou fer touy zot. Tou dimounn pou ayir zot akoz mwa; me seki tini ferm ziska lafin, Bondie pou sov li. Kan zot pou trouv enn sakrilez abominab dan landrwa ki pa ti bizin (dimounn ki pe lir, konpran seki mo pe dir), bann ki dan Zide, sove, al dan montagn. Seki lao lor so lakaz, pa kalkil desann anba, ni rant dan lakaz pou pran kiksoz; seki dan karo, pa kalkil retourn par deryer pou pran so linz. Bien malere bann fam ansint ek bann ki pe donn bwar zot ti baba sa lepok-la. Priye pou ki sa pa arive an-iver. Parski kan sa pou arive, pou ena enn gran detres, enn detres ki zame finn arive depi koumansman kreasion, depi ki Bondie finn kree lemond ziska aster, e ki zame pou trouve ankor. Si Lesegner pa ti finn rakoursi sa bann zour-la, personn napa ti pou sove; me li finn rakoursi sa bann zour-la, akoz bann dimounn ki li finn swazir. Si ninport kisann-la dir zot dan sa ler-la, ‘Gete, ala Lemesi isi! Gete ala li laba!’ Napa krwar li. Fos mesi ek fos profet pou leve; zot pou fer bann mirak pou fer dimounn tom dan lerer, e si posib, mem parmi bann seki finn swazir. Vey bien; mo finn bien prevenir zot. Kan sa pou arive, apre sa detres-la, soley pou vinn som, lalinn pa pou donn so lekleraz, zetwal pou koumans degringole e tou bann pwisans dan lesiel pou sakouye. Lerla zot pou trouv Garson Limanite desann depi dan niaz avek tou so pwisans ek tou so laglwar. Lerla li pou avoy so bann anz e li pou rasanble dimounn ki li finn swazir partou kote, depi enn bout later ziska lot bout lesiel. Konpran parabol pie fig: kan so bann brans vinn tann e ki so bann fey koumans sorti, zot kone ki lete pre pou vini. Parey pou zot osi, kan zot trouv sa bann zafer-la arive; zot kone li pre, li deryer laport. Laverite, laverite mo dir zot, avan ki sa zenerasion-la disparet, tousala pou arive. Lesiel ek later pou disparet me mo parol pa pou disparet. Personn napa kone ki zour, ki ler sa pou arive, ni bann anz, pa mem so Garson, me zis Bondie so Papa. Get bien, vey bien; parski zot pa kone kan tousala pou arive. Li parey kouma enn dimounn ki pe parti; avan li kit so lakaz, li donn bann serviter lotorite pou azir, sakenn so latas e li donn gardien lord pou veye. Akoz samem zot ousi, veye, parski zot pa kone kan proprieter lakaz pou revini: aswar, dan milie lanwit, letan kok sante, ouswa letan soley pe leve, pangar, enn kout li vini e li trouv zot pe dormi. Seki mo pe dir zot, mo pe dir li pou zot tou: Veye.” De zour avan fet Pak ek fet Dipin san levin, bann gran pret ek bann dokter lalwa ti pe fer tou sort manigans pou aret Zezi e fer touy li. Zot ti pe dir, “Pa fer sa pandan fet, sankwa lafoul kapav kree enn dezord.” Zezi ti dan Betani, dan lakaz Simon, ki finn deza gagn lalep. Letan li pas atab, enn fam vini avek enn flakon albat, ranpli ar enn parfin aromatize ki bien-bien ser. Li kas flakon albat la e li vers parfin la lor latet Zezi. De-trwa dimounn ti pe revolte e zot ti pe dir ant zotmem, “Ki serti gaspiy sa parfin-la koumsa? Ti kapav vann sa pou valer trwa-san zourne travay e ti pou kapav ed dimounn pov.” Alors zot kriy ar fam-la. Zezi dir zot, “Les li trankil; ki fer zot koz brit ar li? Li finn fer enn gran kiksoz pou mwa. Pou ena touzour dimounn pov parmi zot; ninport ki ler zot anvi, zot kapav fer dibien pou bann-la, me mwa, mo pa pou la touletan. Li, li finn fer seki li ti kapav fer; avan ler, li finn fini prepar mo lekor pou mo lanterman. Laverite, laverite mo dir zot, partou kote dan lemond antie kot Bonn Nouvel pou anonse, pou rakont so zistwar e pou gard memwar seki sa fam-la finn fer.” Apre sa, Zida Iskaryot, enn parmi Ledouz, al get bann sef pret pou vann Zezi. Letan zot finn tann li, zot finn bien kontan e zot finn promet li larzan. Depi sa, Zida ti pe rod enn bon lokazion pou vann li. Premie zour fet Dipin san levin, kan fer sakrifis agno pou fet Pak, bann disip dimann Zezi, “Kot to anvi nou ale pou fer bann preparasion pou manz repa paskal?” Li avoy de so disip e li dir zot, “Al dan lavil; enn dimounn ki pe sarye enn seo dilo pou vinn zwenn zot; swiv li. La, kot li rantre, koz ar proprieter lakaz-la, dir li, ‘Nou met dimann twa, kot mo lasal pou mo manz repa paskal avek mo bann disip?’ Li pou montre zot enn gran lasal lao lor letaz ki finn deza pare avek tou so neseser. Prepar tou pou nou laba mem.” Bann disip sorti, zot al dan lavil e zot trouv tou parey kouma li ti dir zot, e zot prepar fet Pak. Aswar, Zezi vini avek Ledouz. Kan zot finn fini asize atab e inn koumans manze, Zezi dir zot, “Laverite, laverite mo dir zot, enn parmi zot ki pe manz ansam ar mwa, pou vann mwa.” Zot koumans resanti enn gran sagrin e enn apre lot demande, “Mwa sa?” Li reponn zot, “Enn parmi Ledouz ki pe tranp so dipin avek mwa dan lasiet, limem sa. Garson Limanite pe ale parey kouma ti finn ekrir lor li; me bien malere dimounn ki pou trayir Garson Limanite. Vomie li pa ti ne sa dimounn-la.” Letan zot ti pe manze, Zezi pran dipin, li pronons enn benediksion, li kas dipin-la, li donn zot, e li dir, “Pran, samem mo lekor.” Apre sa, li pran enn koup, kan li fini rann gras, li donn zot e zot tou bwar. Li dir zot ankor, “Samem mo disan, disan lalians; mo pe vers li pou tou dimounn. Laverite, laverite mo dir zot, mo pa pou bwar ankor prodwi sa pie rezin-la, ziska sa zour kot mo pou bwar divin nouvo dan Rwayom Bondie.” Kan zot finn fini sant bann Psom, zot pran direksion Kolinn Pie Zoliv. Zezi dir zot, “Zot tou, zot pou tonbe; finn ekrir, ‘Mo pou bat berze-la, tou mouton pou fane partou kote.’ Me apre mo rezireksion, mo pou atann zot Galile.” Pier dir li, “Mem si zot tou tonbe, mwa, mo napa pou tonbe.” Zezi dir li, “Laverite, laverite mo dir twa, zordi, aswar mem, avan ki kok sant de fwa to pou finn fini renie mwa trwa fwa.” Pier reponn li, “Mem si bizin mor avek twa, mo pa pou renie twa.” Tou lezot dir mem zafer. Zot al dan enn landrwa ki ti apel Zetsemani e li dir so bann disip, “Asiz lamem, mwa, mo pe al priye.” Li pran Pier, Zak ek Zan avek li; li koumans resanti enn gran detres ek enn gran freyer. Li dir zot, “Mo telman abat ki mo santi mo lavi pe ale; res la, veye.” Li al inpe pli lwin, li tom anba e li priye pou ki si posib, li pa pas par sa moman-la. Li dir, “Abba! Pa! Pou twa tou posib; tir sa koup-la devan mwa, me fer ki tou arive dapre to volonte, pa dapre mo volonte.” Letan li revini, li trouv bann-la pe asoupi. Li dir Pier, “Simon, to pe dormi? To pa finn gagn lafors pou vey enn-er-tan ar mwa? Veye, priye pou pa rant dan tantasion; lespri for, laser feb.” Li re-ale, li al priye; li redir mem parol. Letan li revini, li trouv zot finn regagn somey ankor, parski zot lizie ti bien lour e zot pa ti kone ki pou dir li. Trwaziem fwa li revini, li dir zot, “Dormi aster-la, repoz zot, tou seki ti bizin arive, inn arive. Ler finn vini pou Garson Limanite livre dan lame bann peser. Leve, anou ale. Gete, dimounn ki pou trayir mwa pe aprose.” Letan Zezi ti ankor pe koze, Zida, enn parmi Ledouz, vini avek enn lafoul, lepe ek baton dan lame. Bann sef pret, bann dokter lalwa ek bann ansien ti avoy zot. Sa tret ki ti pou vann Zezi-la, finn donn zot enn signal, li finn dir zot, “Dimounn ki mo pou anbrase, trap li, pran li ale, sirvey li bien.” Kouma li arive, toutswit li koste ar Zezi, li dir, “Rabi,” e li anbras Zezi. Bann-la tom lor li, blok li, trap li. Enn parmi bann ki ti la, tir so lepe e donn serviter gran pret enn kout. Li koup so zorey. Zezi dir zot, “Zot finn vinn avek lepe ek baton pou aret mwa koumadir mo enn vakabon? Tou sa zour mo ti avek zot dan Tanp, pe donn zot lansegnman, zot pa finn aret mwa. Me tousala pe arive pou ki Lekritir akonpli.” Zot tou kit li, zot sove. Enn zenn garson ki ti la, ti pe swiv li. Ti ena zis enn dra lor li; zot trap li. Me li larg dra, li galoup touni. Bann-la amenn Zezi devan gran pret, kot zot tou finn rasanble: tou bann sef pret, bann ansien ek bann dokter lalwa. Pier ti pe swiv li delwin ziska li finn rant dan lakour andan, kot gran pret. Li finn asiz avek bann gard e li ti pe sof dife. Bann sef pret avek tou ti pe rod enn temwaniaz kont Zezi pou kondann li amor, me zot pa ti gagn nanye; parski boukou finn donn fos temwaniaz lor li, me zot temwaniaz pa ti korbore. De-trwa met zot debout pou donn fos temwaniaz lor li. Zot ti pe dir, “Nou finn tann li dir ‘Mo pou detrir sa Tanp ki lame dimounn finn aranze la, e dan trwa zour mo pou konstrir enn lot san koudme personn.’ ” Me mem lor sa pwin-la, zot temwaniaz pa ti korbore. Gran pret met li dibout devan zot tou, li kestionn Zezi, “To pena nanye pou dir? Ki sa bann depozision ki dimounn inn fer kont twa la?” Li res trankil, li pa dir nanye. Gran pret poz li kestion ankor enn fwa, li dir li, “Tomem Lemesi, Garson Bondie beni?” Zezi reponn, “Momem sa; zot pou trouv Garson Limanite pe asize adrwat Toupwisan e pe desann dan niaz lesiel.” Gran pret desir so linz, li dir, “Ki lot temwin nou bizin ankor? Zot finn tann sa blasfem-la? Ki zot dir aster-la?” Zot tou kondann li, zot dir li merit lamor. De-trwa koumans kras lor li, zot bous so lizie, zot donn li koutpwin e zot dir li, “Fer to profet!” Bann serviter akeyir li ar kalot. Letan Pier ti anba dan lakour, enn parmi bann servant gran pret sorti e trouv Pier pe sof dife. Li get li bien, li dir, “Twa osi to ti avek Zezi Nazaret.” Li demanti, li dir, “Mo pa kone e mo pa konpran seki ou pe dir.” Li sorti li al dan lakour deor. Letan servant-la retrouv li, li redir ar bann ki ti la, “Enn so bann sa.” Ankor enn fwa li renie. Enn timama apre, zot redir Pier, “Vremem sa, to enn so bann, twa; parski twa osi to sorti Galile.” Pier dimann malediksion lor li e li fer serman ki li pa konn sa dimounn ki zot pe koze la. Zis sa ler-la, kok sante pou deziem fwa e Pier rapel parol ki Zezi ti dir li, ‘Avan kok sant de fwa to pou fini renie mwa trwa fwa.’ Lerla li krake, li plore. Boner gramatin, bann sef pret fer enn gran renion avek bann ansien, bann dokter lalwa avek tou manb Sanedrin okonple. Zot atas Zezi, zot pran li e zot amenn li devan Pilat. Pilat dimann li, “Eski tomem lerwa Zwif?” Zezi reponn li, “Twa ki pe dir sa.” Bann sef pret akiz li, zot met enn pake sarz lor li. Pilat redimann li “To pena nanye pou reponn? Gete ki kantite sarz bann-la inn met lor twa.” Zezi pa reponn nanye. Sa ti fer Pilat res bet. Dapre koutim fet Pak, abitie larg enn prizonie ki dimounn demande. Ti ena enn prizonie ki ti apel Barabas. Li ti dan prizon avek bann lezot rebel ki ti finn komet enn krim dan emet. Lafoul monte pou dimann Pilat fer kouma li abitie fer. Pilat dimann zot, “Eski zot oule mo larg lerwa Zwif pou zot?” Li ti realize ki bann sef pret finn livre li parski zot zalou. Alors bann sef pret exsit lafoul pou ki zot dimann Pilat larg Barabas plito. Pilat redimann zot ankor enn fwa, “Be lerla, ki mo pou fer avek sa boug ki zot apel lerwa Zwif la?” Zot kriye pli for, “Krisifie li!” Pilat dir zot, “Ki li finn fer demal?” Zot kriye ankor pli for, “Krisifie li!” Kouma Pilat ti anvi donn lafoul satisfaksion, li larg Barabas pou zot; letan zot finn fini fwet Zezi, Pilat livre li pou ki bann-la krisifie li. Bann solda sarye li dan lakour pale gouverner; lerla zot invit bann lezot gard vinn avek zot. Zot met enn manto rouz fonse lor li e zot anfons enn kouronn trese ar pikan lor so latet. Zot koumans salie li, “Bienveni, lerwa Zwif.” Zot donn li enn kout zon lor so latet, zot kras lor li, zot azenou devan li e zot fer sanblan rann li omaz. Kan zot finn bien boufonn li, zot retir so manto rouz lor li e zot remet so linz; zot sarye li deor pou al koulout li lor lakrwa. Simon, papa Alexand ek Rifis, ti enn abitan Sirenn. Letan li sorti lakanpagn, li ti pe pas par la, kan bann-la obliz li sarye lakrwa Zezi. Zot amenn Zezi dan enn landrwa ki ti apel Golgota, seki vedir Landrwa Krann dimounn mor. Zot sey donn li bwar enn melanz divin ek lamir me li refize. Zot koulout li lor lakrwa; zot tir lakourtpay pou partaz so bann linz ant zot, pou gete ki sakenn pou gagne. Ti nef-er gramatin ler zot finn krisifie li. Ti ena enn plak ki explike pou ki rezon li finn kondane e lor la ti ekrir “Lerwa Zwif.” Ti ena de bandi ki ti krisifie avek li, enn ti dan so drwat, lot-la ti dan so gos. Koumsa ki Lekritir finn realize kot finn ekrir, “Li finn partaz sor bann kriminel.” Bann ki ti pe pase insilte li. Zot sakouy zot latet, zot dir, “Twa ki kraz Tanp e rekonstrir li dan trwa zour sov tomem, desann lor lakrwa!” Bann sef pret ek bann dokter lalwa fer parey. Zot boufonn li ant zotmem e zot dir, “Li finn sov lezot me li pa kapav sov limem. Si vremem to Lemesi, lerwa Izrael, desann lor lakrwa, aster-la mem, lerla nou pou krwar dan twa.” Bann ki ti krisifie ansam ar li, ti pe zour li zot osi. Ler finn ariv midi, teneb kouver later antie ziska trwa-z-er tanto. Trwa-z-er, Zezi kriy bien-bien for, “Eli, Eli, la-ma sabaktani?” - savedir, “Bondie, Bondie, kifer to finn abandonn mwa?” Letan de-trwa dimounn ki ti la, tann li, zot dir, “Tande! Li pe apel Eli.” Enn parmi zot galoupe, inbib enn leponz ar vineg, met li dan bout enn banbou e donn Zezi sa pou bwar, e li dir, “Atann, anou gete si Eli pou vini, pou fer li desann.” Apre sa Zezi kriye bien for e li rann so dernie soupir. Rido Tanp desir an-de, depi lao ziska anba. Letan santiryon ki ti pe debout vizavi li, trouv manier li finn rann so dernie soupir, li dir, “Vremem, sa dimounn la ti Garson Bondie.” Delwin, ti ena bann fam ki ti pe asiste seki ti pe pase; parmi zot ti ena Marie-Madlenn, Marie, mama ti-Zak, Zoze ek Salome, Zot ti pe swiv Zezi e zot ti pe servi li depi Galile; ti ena ankor boukou lezot fam ki ti finn mont avek li ziska Zerizalem. Kan aswar vini, kouma ti zour preparasion, savedir lavey saba, Zozef ki sorti Arimate e ki ti enn konseye bien respekte, (li osi, li ti pe atann avek inpasians Rwayom Bondie), pran so kouraz, al get Pilat e dimann li lekor Zezi. Pilat ti etone ki li ti fini mor. Li ti fer apel santiryon e li dimann li si li ti finn mor depi lontan. Kan li ti finn gagn ransegnman avek santiryon, li donn Zozef permision pran so lekor. Zozef aste enn dra, desann Zezi anba, anvlop li dan dra-la e met li dan enn tonbo ki ti finn taye dan ros; apre sa li ti roul enn gro ros devan so lantre. Marie-Madlenn ek Marie, mama Zoze ti pe bien gete kot ti finn met so lekor. Letan saba finn fini pase, Marie-Madlenn, Marie, mama Zak ek Salome aste bann aromat pou vinn anbom lekor Zezi. Gramatin boner, premie zour lasemenn, zis apre ki soley finn leve, zot vinn lor tom. Zot ti pe dir ant zotmem, “Kisann-la pou roul sa ros ki devan lantre tom-la?” Kouma zot lev latet, zot gete, zot trouv sa gro ros la finn fini roule. Letan zot rant dan tonbo, zot trouv enn zennom ki ti pe asize adrwat. Li ti ena enn linz blan lor li. Zot gagn enn sok. Li dir zot, “Pa gagn per, zot pe rod Zezi Nazaret ki ti finn krisifie; li finn fini resisite, li pa isi. Get landrwa kot bann-la ti met li. Aster, ale, al dir so bann disip ek Pier ki li pe atann zot Galile, parey kouma li ti dir zot. Zot pou trouv li laba.” Zot sorti dan tonbo, zot sove. Zot tranble, zot boulverse e zot pa ti dir personn nanye parski zot ti gagn per. Letan li finn resisite boner gramatin, premie zour lasemenn, Zezi ti aparet dabor devan Marie-Madlenn; lor limem Zezi ti pous set demon. Marie-Madlenn ti al anons tou seki ti finn ariv li, ar bann dimounn ki ti avek Zezi; bann-la ti andey e zot ti pe plore. Me letan zot finn aprann ki Zezi ti vivan e ki li ti finn aparet devan li, zot pa ti oule krwar. Apre sa, li finn aparet, dan enn lot manier, devan de parmi zot, letan zot ti pe marse dan lakanpagn. Zot ti retourne pou rakont lezot; me bann-la pa ti oule krwar zot osi. Plitar, li ti aparet devan Leonz, letan zot ti atab; li repros bann-la ki zot pena lafwa e ki zot leker dir parski zot pa ti krwar dimounn ki ti finn trouv li apre so rezireksion. Li dir zot, “Al dan lemond antie, al proklam Bonn Nouvel partou kote. Dimounn ki krwar ek resevwar batem pou sove, me dimounn ki pa krwar pou kondane. Ala bann sign ki pou fer dimounn rekonet bann ki krwar dan mwa: zot pou sas demon lor mo nom, zot pou koz bann nouvo langaz, zot pou trap serpan dan zot lame e si zot arive bwar pwazon, zot pa pou gagn nanye; zot pou inpoz lame lor bann malad, bann-la pou geri.” Apre sa, Lesegner Zezi, letan li finn fini koz ar zot, li finn mont dan lesiel e li finn asiz kote drwat Bondie. So bann disip sorti e zot al proklam Bonn Nouvel partou kote; Lesegner ti pe travay avek zot e bann mirak ki ti pe arive ti pe montre ki zot predikasion ti vre. Onorab Teofil: Boukou dimounn finn pran lapenn pou ekrir enn liv lor bann evennman ki finn pase kot nou. Zot finn baz zot zistwar lor bann temwin ki finn trouv seki finn pase, e lor parol bann seki finn gagn lord transmet sa bann evennman-la depi koumansman. Akoz samem, mwa osi, mo finn deside pou bien pran ransegnman lor seki finn pase exakteman depi koumansman. Dapre mwa, li bon ki mwa osi, mo ekrir enn liv pou twa, onorab Teofil. Mo pe fer sa pou to trouve ki sa bann lansegnman ki to finn gagne la, zot bien solid. Letan Erod ti lerwa Zide, ti ena enn pret ki ti apel Zakari, ki ti fer parti bann pret Abia; so fam Elizabet ti enn desandan gran pret Aaron. Toule-de ti pe viv drwat devan Bondie, parski zot ti pe swiv lalwa ek so bann komannman kouma bizin. Me zot pa ti ena zanfan parski Elizabet ti steril, e zot toule-de ti vie. Enn zour Zakari ti pe ofisie devan Bondie parski ti ariv tour so seksion pou servi dan Tanp. Dapre koutim bann pret, finn swazir li par tiraz osor pou bril lansan lor lotel. Enn lafoul bann fidel ti pe priye deor letan ti pe bril lansan. Enn kout, enn anz Lesegner aparet devan li. Anz-la ti pe dibout adrwat lotel kot lansan ti pe brile. Letan Zakari trouv li, li boulverse, li gagn per. Me anz-la dir li, “Pa per, Zakari, parski Bondie finn tann to lapriyer. To fam Elizabet pou donn twa enn garson e to pou apel li Zan. To pou gagn enn gran lazwa akoz li, e boukou dimounn osi pou dan lazwa par so nesans. Li pou gran devan Lesegner. Li pa pou bwar divin ni okenn lalkol. Li pou ranpli ar Lespri Sin depi dan vant so mama. Li pou fer boukou zanfan Izrael retourn ar Lesegner zot Bondie. Li pou mars devan Bondie avek lafors ek lespri profet Eli. Li pou fer bann papa retourn ansam ek zot zanfan. Li pou fer bann rebel gagn lasazes bann zis. Li pou prepar enn lepep pou resevwar Bondie.” Me Zakari dir anz-la, “Ki manier mo pou kone sa pou arive? Mo enn vie dimounn e mo fam osi vie.” Anz-la reponn li, “Mwa, mo Gabriel; mo devan Bondie pou servi li; li finn avoy mwa koz ar twa, pou anons twa sa bonn nouvel-la. To pa finn krwar mwa, e pourtan tou seki mo pe dir pou realize, kan so ler pou vini. Akoz samem to pou perdi laparol e to pa pou kapav koze tanki sa pa arive.” Deor, lepep ti pe atann Zakari. Zot ti etone parski Zakari ti pe tro tarde dan Tanp. Kan Zakari sorti, li ti finn perdi laparol. Lerla zot ti konpran ki li ti gagn enn vizion dan Tanp. Li ti pe koz ar zot ar bann sign. Zakari retourn kot li letan so tour servi dan Tanp ti fini. Inpe plitar so fam, Elizabet, tom ansint e li ti res kasiet pandan sink mwa dan so lakaz. Li ti pe dir, “Gete seki Bondie finn fer pou mwa, li finn tir laont ki ti lor mwa.” Lor siziem mwa, Bondie avoy anz Gabriel dan lavil Nazaret dan Galile, kot enn zennfi ki ti fiyanse avek Zozef, desandan David. Tifi-la ti apel Marie. Anz-la rant kot Marie, dir li, “Mo salie twa ki Bondie finn konble ar so lagras. Lesegner avek twa.” Letan li tann sa bann parol-la, li boulverse e li dimann dan so leker ki tousala oule dir. Anz-la dir li, “Pa per, Marie, parski Bondie finn swazir twa. To pou ansint, to pou gagn enn garson, e to pou apel li Zezi. Li pou bien gran e pou apel li Garson Bondie Treo. Bondie Lesegner pou donn li tronn lerwa David, so anset, e li pou regn touletan lor desandan Zakob; so regn pa pou fini zame.” Marie dir anz-la, “Kouma sa pou arive, parski mo ankor vierz?” Anz-la reponn, “Lespri Sin pou vinn lor twa, e pwisans Bondie Treo pou kouver twa; akoz samem zanfan-la pou Sin e pou apel li Garson Bondie. Get to kouzinn Elizabet, dan so vie zour, li pe atann enn garson. Sa fer sis mwa li ansint, alors ki dimounn ti pe dir ki li enn fam steril. Pou Bondie, nanye pa inposib.” Lerla Marie dir, “Wi, mo servant Bondie. Ki tou seki to finn dir, samem arive pou mwa!” Apre sa, anz-la kit li, ale. Samem lepok-la, Marie leve e li degaze li al dan enn lavil Zida ki ti lao lor kolinn. Li rant dan lakaz Zakari e li salie Elizabet. Kan Elizabet tann lavwa Marie, tibaba-la bouze dan so vant. Elizabet ti ranpli avek Lespri Sin e li dir bien for, “To beni parmi tou bann fam e zanfan ki dan to vant osi, li beni. Ki mo ete pou ki mama mo Segner vinn vizit mwa? Kan mo finn tann twa salie mwa, zanfan dan mo vant finn bouze avek enn gran lazwa. To bienerez parski to finn krwar ki Parol Bondie pou realize.” Lerla Marie dir, “Mo lam glorifie Lesegner, e mo leker ranpli ar lazwa akoz Bondie, mo Sover, parski li finn oze poz so regar lor mwa, so pov servant. Depi zordi tou bann zenerasion pou dir mwa bienerez, parski Bondie Toupwisan finn fer bann mervey pou mwa. So nom sin. Li montre so mizerikord pou dimounn ki onor li, zenerasion apre zenerasion. Li finn montre lafors so lebra; Li finn dispers bann ki ena lorgey dan zot leker. Li finn devir tronn bann gran sef anba-lao. Li met dimounn ki gagn kraze dibout; Li ranpli vant bann seki gagn fin, li finn pous bann ris e zot finn ale lame vid. Li finn vinn tir so serviter Izrael dan difikilte; li pa bliye so lamour, kouma li ti promet nou bann anset, Abraam ek so desandan ziska leternite.” Marie res kot Elizabet anviron trwa mwa, apre li retourn so lakaz. Letan ariv ler pou Elizabet akouse, li donn nesans enn garson. Letan so bann vwazin ek so fami tann sa, zot vinn partaz so lazwa parski Lesegner finn montre li so lamour. Lor witiem zour, zot fer sirkonsizion zanfan-la; zot ti pou apel li Zakari kouma so papa, me so mama dir, “Non. Pou apel li Zan.” Bann-la dir li, “Personn pena sa nom-la dan to fami.” Alors zot fer bann sign ar so papa pou kone kouma li ti oule apel li. Zakari dimann enn lardwaz e li ekrir, “Li pou apel Zan.” Zot tou etone. Toutswit so lalang large, li koumans koze, ek li loue Bondie. Enn lafreyer trap tou bann vwazin, e dan tou bann kwin Zide dimounn ti pe koz samem. Tou seki finn tann sa nouvel-la ti pe dimann zotmem, “Ki lavenir rezerve pou sa zanfan-la?” Vremem lame Lesegner ti lor li. So papa Zakari ranpli ar Lespri Sin, profetize, “Lesegner Bondie Izrael merit nou louanz parski li finn vizit so pep e li finn vinn delivre li. Pou nou, li finn lev enn Sover pwisan ki enn desandan David, so garson; parey kouma li finn dir par labous so bann sin profet depi lontan. Li finn vinn delivre nou dan lame nou bann lennmi e li finn vinn tir nou dan lame bann ki fer nou ditor. Li finn montre nou anset so mizerikord, li finn rapel so lalians ki sin, enn serman ki Bondie ti fer ar Abraam, nou anset, pou liber nou depi lame nou lennmi, pou ki nou servi li san freyer, dan lasintete ek lazistis dan so prezans tou toulezour nou lavi. E twa, ti garson, pou apel twa profet Bondie Treo, parski to pou mars devan Lesegner pou prepar so sime, pou fer so lepep kone ki li pe vinn sov zot ler li pardonn zot pese. Par so tandres ek so mizerikord, nou Bondie pou avoy enn lalimier lor nou depi lao parey kouma soley pe leve. Li pou ekler bann seki dan teneb ek dan lonbraz lamor. Li pou gid nou pa lor sime lape.” Zanfan-la ti pe grandi, so lespri ti pe fortifie. Li finn res dan dezer ziska zour ki li finn montre li an piblik devan lepep Izrael. Sa lepok-la Sezar Ogis donn lord fer resansman tou bann abitan Lanpir Romin. Ti fer sa premie resansman-la letan Kirinyis ti gouverner provins Lasiri. Tou dimounn ti bizin al dan landrwa kot li ti ne, pou inskrir so nom. Zozef kit lavil Nazaret, an Galile, pou al Lazide dan lavil Betleem, la kot lerwa David ti ne, parski Zozef ti enn desandan David. Li ti al anrezistre so nom ansam ar Marie, so fiyanse, ki ti ansint. Letan zot ti laba, zour nesans tibaba-la arive. Marie donn nesans enn garson, so premie zanfan e li anvlop li dan lanz e plas li dan enn manzwar, parski pa ti ena plas pou zot dan lasal pou vwayazer. Dan sa mem rezion-la ti ena bann berze ki ti pe pas lanwit pou vey zot troupo. Enn anz Lesegner paret devan zot e laglwar Lesegner anvlop zot ar enn lalimier. Bann-la gagn per. Me anz-la dir zot, “Pa gagn per, mo pe anons zot enn gran nouvel ki pou fer lazwa boukou dimounn: zordi dan lavil David, enn Sover, ki Lekris Lesegner, finn ne pou zot. Zot pou rekonet li par enn sign, zot pou trouv enn ti-baba anvlope dan lanz e li dan enn manzwar.” Enn sel kout enn larme bann anz arive pou zwenn ansam ar sa enn anz-la, zot loue Bondie e zot dir: “Laglwar pou Bondie lao e lape lor later ar tou seki li kontan.” Letan bann anz retourn dan lesiel, bann berze dir, “Anou al Betleem pou gete ki finn arive, ki Lesegner finn fer nou kone.” Zot degaze ale, e zot trouv Marie, Zozef, e tibaba-la ki ti dan manzwar. Apre ki bann berze finn trouv li, zot rakont seki anz ti dir zot lor zanfan-la. E tou seki ti ekout zot koze ti etone ar zot dialog. Me Marie ti gard tou sa bann kiksoz-la dan so leker. Lerla bann berze retourne; zot glorifie ek loue Bondie pou tou seki zot finn tande ek trouve parey kouma ti dir zot. Apre wit zour, letan pou sirkonsir li, zot ti apel li Zezi, sa nom lamem ki anz ti done, avan ki Marie ti ansint. Letan ariv ler pou Marie ek Zozef pirifie zotmem dapre lalwa Moiz, zot al Zerizalem pou prezant Zezi devan Lesegner, parey kouma ekrir dan lalwa Lesegner: “Bizin konsakre sak garson premie-ne pou Lesegner.” Zot ti osi al ofer enn sakrifis kouma lalwa dimande: “Enn per tourtrel ou de ti pizon.” Dan Zerizalem ti ena enn dimounn apel Simeon. Li ti viv enn lavi bien drwat, li ti devwe pou Bondie e li ti pe atann seki pou vinn sov Izrael. Lespri Sin ti ar li. Lespri ti revel li ki li pa pou mor avan ki li trouv Lekris avoye par Lesegner. Simeon ti inspire par Lespri Sin pou vinn dan Tanp. Bann paran Zezi ti amenn zot zanfan pou ki zot akonplir seki lalwa dimande. Simeon pran li dan so lebra e remersie Bondie, li dir, “Aster-la, Segner, les to serviter ale dan lape kouma to ti dir. Mo lizie finn trouv to delivrans, Seki to finn prepare devan tou bann lepep; Enn lalimier ki amenn revelasion ar bann payin e laglwar pou to pep Izrael.” So papa ek so mama ti etone ar tou seki ti dir lor li. Simeon beni zot, e li dir Marie, mama Zezi, “Sa garson-la pou abes ouswa pou relev boukou dan Izrael, li enn sign Bondie, ki ena dimounn pou konteste. Bann panse ki kasiet dan leker boukou dimounn pou sorti okler, e tomem, enn lepe pou transpers to lam.” Ti ena enn profetes osi, ki ti apel Ana, tifi Faniel, ki apartenir tribi Aser. Li ti bien vie, e ti viv set-an ar so mari. Apre sa li finn res vev ziska laz katrovin-kat-an. Li pa ti kit Tanp, me ti servi Bondie lanwit-lizour; li ti fer karem ek lapriyer. Li ti vinn dan Tanp zis sa moman-la e ti rann gras Bondie. Li ti koz sa zanfan-la ar tou bann dimounn ki pe atann ki Bondie delivre Zerizalem. Letan zot fini fer tou seki lalwa Lesegner dimande, zot retourn Galile, dan zot prop lavil Nazaret. Zanfan-la ti grandi e ti vinn for. Li ti ranpli ar sazes e lagras Bondie. Toulezan bann paran Zezi al Zerizalem pou fet Pak. Letan li ti ena douz an zot ti al laba kouma zot abitie fer. Me letan fet fini, e zot retourne, garson-la res Zerizalem, san ki so bann paran kone. Zot ti krwar li ansam dan group ki ti pe vwayaze, alor zot finn vwayaz toutenn zourne, lerla ki zot koumans rod li parmi bann fami e kamarad. Me letan zot pa trouv li zot retourn Zerizalem pou rod li. Apre trwa zour zot retrouv li dan Tanp, pe asize parmi bann ki ansegn lalwa, li pe ekout zot e li pe poz zot kestion. Tou seki ti tann li ti etone ar so lintelizans e so repons. So bann paran ti etone letan zot trouv li, e so mama dir li, “Mo garson, kifer to fer sa ar nou? To papa ek momem nou finn gagn traka ar rod twa.” Li dir zot, “Kifer zot ti bizin rod mwa? Zot pa kone ki mo bizin dan lakaz mo Papa?” Zot pa ti konpran so repons. Zezi retourn Nazaret ar so bann paran. Li ti kontign obeir zot; e so mama ti gard tousala dan so leker. Zezi ti grandi dan sazes, ti grandi fizikman, e li ti trouv lagras devan Bondie e devan dimounn. Dan kinziem lane regn Tiber Sezar, letan Pons Pilat ti gouverner Zide, Erod ti sef Galile, so frer Filip ti sef rezion Itire ek Trakonitid, Lizias ti sef Abilenn; letan Ann ek Kaif ti gran pret, Zan, garson Zakari, ti tann Parol Bondie dan dezer. Zan ti al anons dan tou bann rezion Zourdin enn batem pou ki dimounn sanz zot leker, pou ki zot pese pardone. Kouma finn ekrir dan liv profet Izai, “Enn lavwa pe kriye dan dezer, prepar sime Lesegner, dres so santie drwat. Tou vale pou konble, sak montagn ek kolinn pou aplati, seki traver pou vinn drwat, sime kabose pou vinn plat ek Bondie pou sov tou dimounn.” Alor li ti dir lafoul ki ti vini pou resevwar batem, “Bann espes serpan, kisann-la finn montre zot ki zot pou sape devan koler Bondie ki pe aprose? Prodir bon fri ki montre ki zot finn sanz zot leker. Pa nek zis dir dan zotmem, ‘Abraam nou papa!’ Parski les mo dir zot, avek sa bann ros-la, Bondie kapav fer bann desandan Abraam leve. Aster-la mem laserp finn fini pare pou koup bann pie depi zot rasinn. Tou bann pie ki pa raport bon fri pou koupe e pou zet dan dife.” Lafoul dimann li, “Ki nou bizin fer alor?” Li reponn zot, “Dimounn ki ena de palto bizin partaz ar seki pena, seki ena manze bizin fer parey.” Bann komi tax ousi ti vini pou resevwar batem ek zot dir li, “Met, ki nou bizin fer?” Li reponn zot, “Pa pran plis ki zot gagn drwa.” Bann solda ousi dimann li, “Be nou, ki nou bizin fer?” Li reponn zot, “Pa kokin personn, pa fer fos akizasion; kontant zot ar zot lapey.” Tou dimounn dan lepep ti pe atann kiksoz, ek tou dimounn ti pe poz kestion dan zot leker, sipa Zan mem ki Lemesi. Zan reponn zot tou, “Mwa, mo batiz zot ar dilo; me ena enn ki pli for ki mwa ki pe vini; mwa, mo mem pa dign pou larg so lase soulie; li pou batiz zot ar Lespri Sin ek dife. Li finn pran lapel dan so lame pou netway anba lor sali; li pou ramas lagrin dible dan so grenie, me li pou bril lapay dan enn dife ki zame pou tengn.” Koumsa mem e avek lezot parol ankor, Zan ti sakouy zot e li ti pe anons zot Bonn Nouvel. Me Zan ti repros Erod, gran sef Galile, parski li ti pran Erodiad, fam so frer, e parski li finn fer boukou move kiksoz ankor; pa fini, lor la li finn fer kiksoz pir ankor, li ferm Zan dan prizon. Letan tou bann dimounn finn fini resevwar batem, e ki Zezi ousi finn fini batize, letan li pe priye, lesiel ouver, e Lespri Sin desann lor li dan form enn vre kolonb, ek enn lavwa sorti dan lesiel, li dir, “Tomem mo Garson ki mo kontan, to fer mo boner.” Letan Zezi ti koumans so minister li ti ena apepre trant-an. Dapre bann dimounn, li garson Zozef, ki ti garson Eli, garson Matat, garson Levi, garson Melki, garson Inai, garson Zozef, garson Matatias, garson Amos, garson Naoum, garson Esli, garson Nagai, garson Maat, garson Matatias, garson Semein, garson Zozek, garson Yoda, garson Yoanan, garson Reza, garson Zeroubabel, garson Sealtiel, garson Neri, garson Melki, garson Adi, garson Kosam, garson Elmadan, garson Er, garson Zezi, garson Eliezer, garson Yorim, garson Matat, garson Levi, garson Simeon, garson Zida, garson Zozef, garson Yonam, garson Eliakim, garson Melea, garson Mena, garson Matata, garson Natan, garson David, garson Zese, garson Obed, garson Boaz, garson Sala, garson Nason, garson Aminadab, garson Admin, garson Arni, garson Esron, garson Perez, garson Zida, garson Zakob, garson Izaak, garson Abraam, garson Tara, garson Naor, garson Serig, garson Reou, garson Peleg, garson Eber, garson Sela, garson Kenan, garson Arfakzad, garson Sem, garson Noe, garson Lamek, garson Matousalem, garson Enok, garson Yared, garson Malaleel, garson Kenan, garson Enos, garson Set, garson Adam, garson Bondie. Zezi, ranpli ar Lespri Sin, kit Zourdin, e Lespri kondir li dan dezer. Laba diab ti tant li pandan karant zour. Pandan sa bann zour-la, li pa ti manz nanye; apre sa, li ti gagn fin. Diab dir li, “Si tomem Garson Bondie donn lord sa ros-la vinn dipin.” Zezi reponn li, “Dan liv finn ekrir: ‘Dimounn pa viv zis ar dipin.’ ” Diab amenn li pli lao e montre li enn sel kout tou bann rwayom lor later. Li dir Zezi, “Mo pou donn twa tou sa pouvwar-la ek tou so rises, parski tousala mo finn resevwar e mo kapav donn sa ninport kisann-la. Si to prostern twa devan mwa, tousala pou vinn pou twa.” Zezi reponn li, “Dan liv finn ekrir: ‘To pou prostern twa devan Lesegner to Bondie, e to pou ador li tousel.’ ” Diab amenn Zezi dan Zerizalem, li plas li net lao lor Tanp, e li dir li, “Si tomem Garson Bondie, zet to lekor anba, parski finn ekrir, ‘Li pou donn lord so bann anz vey lor twa,’ e ankor, ‘Zot pou sarye twa dan zot lame pou ki to lipie pa kogn ar ros.’ ” Zezi reponn li, “Finn dir: ‘Pa met Lesegner to Bondie dan enn sitiasion pou teste li.’ ” Letan diab ti fini fer tou seki li kapav pou tant Zezi, li ti kit li ziska enn prosenn lokazion. Zezi retourn Galile avek pwisans Lespri e dimounn koumans koz li partou dan larezion. Li ti pe ansegn dan zot sinagog, e zot tou ti pe glorifie li. Li vinn Nazaret, la kot li ti grandi, e li al dan sinagog zour saba, kouma li ti abitie fer. Li dibout pou lir. Zot donn li liv Izai pou lir. Li ouver liv-la e li tom lor paz kot finn ekrir: “Lespri Lesegner lor mwa, parski Li finn konsakre mwa par lonksion pou anons bann pov Bonn Nouvel. Li finn avoy mwa proklam delivrans bann seki an kaptivite, pou ki bann aveg trouv kler, pou ki bann oprime retrouv zot liberte, e anons enn lane kot Lesegner pou fer zot enn gran faver.” Li ferm liv-la, li donn li servan sinagog, e li asize. Tou dimounn ki ti dan sinagog fixe zot regar lor li. Alor li dir zot, “Zordi sa Parol ki zot finn tande la, li finn akonpli.” Zot tou ti an admirasion; zot etone par bann zoli parol ki sorti dan so labous. Zot dir, “Pa garson Zozef sa?” Lerla li dir zot, “Sirman zot pou sit mwa sa proverb ki dir, ‘Dokter, geri twa tomem. Nou okouran tou seki to finn fer dan Kafarnaom, fer parey isi dan to prop lavil.’ ” Zezi dir zot, “Laverite mo dir zot: okenn profet pa gagn enn bon lakey dan so prop pei. Me laverite mo dir zot, dan lepok Eli ti ena boukou vev dan Izrael, kan lesiel ti ferme trwa-z-an sis mwa, e kan enn gran lafaminn ti kouver pei antie; pourtan Bondie pa ti avoy Eli kot okenn parmi zot me kot enn vev ki ti viv dan Sarepta, dan rezion Sidon. Dan lepok profet Elize ti ena boukou lepre dan Izrael, pourtan okenn parmi zot pa ti gagn gerizon, exsepte Naaman, enn Syrien.” Tou seki dan sinagog ti ankoler letan zot tann sa koze-la. Zot leve, zot trenn Zezi andeor lavil, zot amenn li lao lor kolinn kot zot lavil ti konstrir, e zot rod zet li anba. Me li pas omilie zot e li ale. Zezi desann Kafarnaom, enn lavil dan Galile, e li ti pe ansegne zour saba. Bann-la ti inpresione par so lansegnman parski so parol ti ena pwa. Dan sinagog ti ena enn dimounn posede par enn move lespri ki ti pe kriye for-for, “Ayo, Zezi Nazaret, ki to oule ar nou? Mo kone ki to ete; tomem Sin, tomem sorti kot Bondie.” Zezi menas li, li dir, “Ferm to labous, sorti dan li, ale.” Move lespri zet posede-la anba, omilie bann-la, e kit li san fer li okenn ditor. Enn lafreyer trap zot tou e sakenn dir ar so kamarad, “Ala enn parol-la! Li expilse avek otorite ek pwisans bann move lespri, e zot disparet.” So renome fane partou kote. Zezi kit sinagog e li al lakaz Simon. Belmer Simon ti gagn enn move lafiev, e zot dimann Zezi fer kiksoz pou li. Zezi koste pre kot madam-la e li menas lafiev-la. Lafiev kit li, e li leve toutswit, li servi zot. Soley finn kouse, kan tou bann seki ti ena bann malad avek tou sort kalite maladi, ti amenn zot kot Zezi. Li poz lame lor sakenn e li geri zot. Bann move lespri osi sorti lor boukou dimounn malad, e zot kriye, “Tomem Garson Bondie!” Me Zezi ti menas zot e li ti anpes zot koze, parski zot ti kone ki limem Lemesi. Kouma fer lizour, Zezi sorti, li al dan enn landrwa izole. Enn lafoul dimounn rod li, e letan zot reisi zwenn li, zot fer tou pou gard li lamem, pou ki li pa kit zot. Me Zezi dir zot, “Mo bizin anons Bonn Nouvel Rwayom Bondie dan lezot lavil osi; akoz samem Bondie finn avoy mwa.” E alors li al proklam laparol dan bann sinagog dan Zide. Zezi ti pe dibout dan bor lamer Zenezaret. Lafoul ti pe pouse pou vinn pli pre ar li, pou ekout Parol Bondie. Li trouv de pirog dan bor lak, me bann peser pa ti ladan, parski zot ti pe lav zot file. Li mont dan pirog Simon, e li dir li al inpe pli lwin. Lerla li asize e li ansegn lafoul. Letan li fini koze, li dir Simon, “Al inpe dan fon e zet zot file.” Simon dir li, “Met, nou finn trime enn lanwit e nou pa finn gagn nanye! Me akoz to parol mo pou zet mo file.” Zot zet zot file. Lerla zot ramas enn kantite pwason; ti ena telman boukou pwason ki zot file ti pre pou desire. Zot signal zot kamarad dan lot pirog pou vinn donn zot enn koudme. Bann-la koste, zot ranpli toule-de pirog. Ti ena telman pwason, ki pirog ti pe koumans koule. Letan Simon Pier trouv sa, li tom azenou devan Zezi e li dir, “Segner, res lwin ar mwa, parski mo enn dimounn ranpli ar pese.” Simon ek tou bann ki ti ar li, ti etone ki finn may sa kantite pwason-la. So bann asosie Zak ek Zan, de garson Zebede ti etone osi. Zezi dir ar Simon, “Pa bizin per. Aster-la to pou al lapes dimounn.” Letan zot fini ris pirog ater, zot kit tou, zot swiv Zezi. Zezi ti dan enn lavil, kan enn boug ki ti kouver ar lalep, trouv li. Boug-la tom dan so lipie e so fron tous later. Li sipliy Zezi, “Segner, si to oule, to kapav pirifie mwa.” Lerla Zezi avoy so lame, tous li, e li dir li, “Wi, mo oule, to pou pirifie.” Toutswit so lalep kit li. Zezi donn li lord pa dir personn. Li dir li, “Ale, al get bann pret, al ofer enn sakrifis pou to pirifikasion, parey kouma Moiz ti finn komande. Sa pou enn prev pou lezot.” Lerla koze lor Zezi fann dan tou kwin lari plis ankor; lafoul dimounn ramase pou ekout li e pou gagn zot gerizon. Me li al dan bann landrwa retire pou priye. Enn zour, kan Zezi ti pe ansegne, bann Farizien ek bann dokter lalwa ti pe asize laba. Zot ti sorti dan bann vilaz Galile ek Zide e ena ki ti sorti Zerizalem. Pwisans Lesegner ti ar Zezi pou li fer gerizon. Zis lerla de-trwa dimounn vini, zot ti pe sarye enn boug ki ti paralize lor enn brankar. Zot ti pe sey amenn li andan devan Zezi. Me pa ti ena sime pou pase akoz lafoul. Zot mont lao lor lakaz, zot fouy enn trou dan twa e zot desann li ar so brankar omilie lafoul devan Zezi. Kan Zezi trouv zot lafwa, li dir, “Kamarad, to pese finn pardone.” Lerla bann dokter lalwa e bann Farizien koumans poz kestion, “Ki li krwar li ete? Li pe blasfeme. Kisann-la kapav pardonn pese apar Bondie tousel?” Zezi kone ki zot ti pe panse, li reponn zot, “Kifer zot ena bann panse koumsa dan zot leker? Ki pli fasil pou dir, ‘To pese finn pardone,’ oubien, ‘Deboute marse’? Me pou ki zot kone ki Garson Limanite ena lotorite lor later pou pardonn pese” Zezi dir ar paralize-la, “Mo dir twa, dibout, pran to brankar, al to lakaz.” Toutswit li dibout devan zot, li pran so brankar e li al so lakaz e letan li pe ale, li glorifie Bondie. Zot tou emerveye, e zot glorifie Bondie osi, zot ti an adorasion e zot dir, “Nou finn trouv kiksoz extraordiner zordi!” Apre sa li sorti deor e li trouv enn komi tax ki apel Levi, ki ti pe asiz dan biro tax; Zezi dir li, “Swiv mwa.” Li leve, li kit tou, li swiv Zezi. Levi fer enn gran fet dan so lakaz; ti ena enn gran lafoul komi tax ek bann lezot ankor ki ti pe asiz atab. Bann Farizien ek bann dokter lalwa ti pe fer repros ar so bann disip. Zot ti pe dir, “Kifer zot pe manze-bwar avek bann komi tax ek bann peser?” Zezi reponn, “Seki bien pa bizin dokter, me seki malad ki bizin; mo pa finn vinn apel bann zis me bann peser pou ki zot repanti.” Lerla zot dir Zezi, “Bann disip Zan parey kouma bann disip Farizien, souvan gard karem ek priye, me twa to bann disip nek manze-bwar.” Zezi reponn zot, “Eski bann invite kapav res karem kan nouvo marye ankor ar zot? Pou ariv enn zour kot nouvo marye pou nepli la, lerla zot ava gard karem.” Li dir zot enn parabol, “Personn pa pran enn bout linz nef pou rakomod enn vie linz. Sinon nef-la pou desire e lorla, bout nef-la pa pou al ar vie-la. Personn pa met divin nouvo dan vie barik; sinon divin nouvo pou eklat bann barik-la, tou divin pou fane, e pou perdi bann barik-la. Met divin nouvo dan barik nef. Personn pa pou anvi bwar divin nouvo, letan li finn gout vie divin parski zot dir, ‘Seki vie pli bon.’ ” Enn zour saba, Zezi ti pe pas dan karo dible, so bann disip ti pe kas zepi dible, ki zot ti pe frot dan zot lame e zot ti pe manz lagrin-la. De-trwa Farizien dir, “Kifer zour saba zot pe fer seki pa gagn drwa fer dapre lalwa?” Zezi reponn, “Eski zot pa finn lir seki David ek so bann kamarad ti fer kan zot ti pe gagn fin? Li ti rant dan lakaz Bondie, li ti pran dipin ki finn ofer Bondie, li finn manz li e li finn donn so bann kamarad osi. Dapre lalwa zis bann pret tousel gagn drwa manz sa dipin-la.” Zezi re-dir zot, “Garson Limanite limem proprieter saba.” Enn lot zour saba, letan li rant dan sinagog e ki li ti pe ansegne, ti ena enn boug prezan ki so lame drwat ti paralize. Bann dokter lalwa ek bann Farizien ti pe vey li, pou gete sipa li pou fer gerizon zour saba; koumsa zot ti pou gagn enn pwin pou met enn sarz lor li. Me Zezi ti konn zot panse, li dir sa dimounn ki ena lame paralize-la, “Leve vinn dibout devan.” Lerla dimounn-la leve, li vinn dibout devan zot. Apre sa Zezi dir ar bann-la, “Mo poz zot enn kestion: ki lalwa permet zour saba? Fer dibien oubien fer dimal? Sov lavi ou detrir lavi?” Li get bann ki ti otour li, e li dir paralize-la, “Dres to lame.” Li fer seki dir li, e so lame revinn normal. Bann-la irite e zot diskit ant zotmem pou kone ki kapav fer ar Zezi. Zezi mont lor montagn pou priye. Li pas lanwit priye Bondie. Letan barlizour leve, li apel so bann disip, e li swazir douz parmi zot, li donn zot nom zapot. Ti ena Simon ki li ti apel Pier ek so frer Andre, Zak ek Zan, Filip ek Bartelmi, Matie ek Toma, Zak garson Alfe ek Simon ki ti apel Zelot, Zida garson Zak ek Zida Iskaryot, ki ti trayir Zezi. Zezi desann ansam ar zot e li aret dan enn landrwa plat. Enn kantite disip ek enn gran lafoul dimounn ki vinn depi Zide, Zerizalem ek dan bor lakot Tir ek Sidon ti la osi. Zot ti vinn ekout li e pou gagn zot gerizon. Bann ki ti tourmante par lespri malsin ti geri. Tou dimounn ki dan lafoul ti pe sey tous li, parski enn lafors ti pe sorti dan li e ti pe geri zot tou. Apre sa Zezi get so bann disip e li dir, “Bienere zot ki bann pov, Rwayom Bondie pou zot. Bienere zot ki gagn fin aster-la, zot pou rasazie. Bienere zot ki pe plore aster-la, zot pou riye. Bienere kan dimounn ayir zot, e kan met zot deor, insilte zot, abes zot, mal parl zot akoz Garson Limanite. Rant dan lazwa sa zour-la, sot anler, parski enn gran rekonpans pe atann zot dan lesiel; parski koumsa mem zot bann gran dimounn ti maltret bann profet. Bienmalere zot ki bann ris parski zot finn deza resevwar zot konsolasion. Bienmalere zot ki viv dan labondans aster, parski zot pou gagn fin. Bienmalere zot ki pe riye aster, parski zot pou andey e zot pou plore. Bienmalere kan tou dimounn koz lor zot an-bien, parski koumsa mem zot gran dimounn ti fer ar bann fos profet. “Me mwa mo pe dir ar zot ki pe ekout mwa, kontan zot lennmi, fer dibien dimounn ki ayir zot, beni dimounn ki modi zot, priye pou seki maltret zot. Si kikenn tap twa enn kalot lor to lazou, donn li lot kote lazou; si kikenn pran to palto, pa anpes li pran to semiz osi. Donn tou dimounn ki dimann twa sarite; e si kikenn pran to dibien, pa dir li rann twa. Seki to ti'a kontan lezot fer pou twa, fer samem pou zot. Si to kontan zis bann seki kontan twa, ki rekonesans to merite ladan? Parski mem bann peser kontan seki kontan zot. Si to fer dibien zis pou dimounn ki fer dibien pou twa, ki to merite ladan? Mem bann peser fer parey. Si to pret zis dimounn ki to krwar pou rann twa, ki to merite ladan? Mem bann peser pret bann peser, pou ki zot resevwar mem som larzan. Me zot, kontan zot lennmi, fer dibien, e prete san atann nanye an-retour. Zot rekonpans pou gran, e zot pou zanfan Bondie Treo parski li bon ar bann ingra ek bann move. Montre enn leker ranpli ar mizerikord parey kouma Bondie zot Papa.” “Pa port zizman e personn pa pou ziz zot; pa kondane e personn pa pou kondann zot. Pardone, zot pou gagn pardon. Done, zot pou resevwar dan pos zot tabliye enn mezir bien ranpli, bien dame e ki pe deborde; mezir ki to servi pou lezot, samem mezir ki pou servi pou twa.” Zezi servi bann parabol ankor e li dir zot, “Eski enn aveg kapav gid enn lot aveg? Sinon eski toule-de pa pou tom dan trou? Enn disip pa pli gran ki so met, me tou seki gagn enn bon formasion pou kouma so met. Kifer to trouv lapay dan lizie to prosin, me to pa trouv poto ki dan to lizie? Oubien, kouma to kapav dir to prosin, ‘Frer, les mo retir lapay ki dan to lizie,’ kan tomem to pa trouv poto dan to prop lizie? Twa ipokrit, tir poto ki dan to lizie avan, lerla to pou trouv kler pou tir lapay dan lizie to prosin. “Okenn bon zarb fritie kapav donn fri gate, ek enn move zarb pa kapav donn bon fri; nou rekonet sak pie par so fri. Pa kapav ramas fig dan pikan, ni rezin lor raket. Enn bon dimounn prodir dibien depi bon trezor ki dan so leker, e move dimounn prodir lemal depi so move trezor; parski labous exprim seki debord dan leker. “Kifer zot apel mwa Segner, Segner, me zot pa fer seki mo dir? Mo pou montre zot kouma li ete sa dimounn ki vinn ar mwa la, ki ekout mo parol e met li an pratik. Li parey kouma enn dimounn ki pe mont so lakaz. Li fouy enn transe bien fon, li poz fondasion-la lor enn pavaz ros; letan inondasion vini, larivier deborde, bat ar lakaz-la; lakaz-la pa kraze parski li bien solid. Me dimounn ki ekout mo parol me pa met li an pratik, li kouma enn dimounn ki finn mont so lakaz san fouy fondasion. Kouma larivier desann, li balie lakaz-la, nanye pa reste.” Letan Zezi fini dir tou sa bann parol-la devan lafoul, li rant dan Kafarnaom. Laba, enn santiryon ti ena enn serviter ki li ti estim boukou. Li ti malad e ti pre pou mor. Kan santiryon-la finn tann koz Zezi, li avoy de-trwa sef Zwif al get li pou dimann li vinn geri so serviter. Kan zot ariv devan Zezi, zot sipliy li e zot dir, “Li merit ki to fer sa pou li, parski li kontan nou pep, e limem ki finn mont nou sinagog.” Zezi al ar zot. Li pa ti tro lwin ar lakaz-la kan santiryon-la avoy bann kamarad pou dir li, “Segner, pa deranze; parski mo pa dign ki to vinn dan mo lakaz; akoz samem mo pa finn oze vinn kot twa. Dir zis enn parol, lerla mo serviter pou geri. Parski momem mo enn dimounn ki anba lotorite mo bann sef, e mo ena solda anba mwa; e kan mo dir ar enn, ‘Ale,’ li ale; ar enn lot, ‘Vini,’ li vini; e ar mo serviter, ‘Fer sa,’ e li fer li.” Kan Zezi tann sa li ti emerveye par so bann parol, e li tourn ar lafoul ki ti pe swiv li, e li dir, “Mo dir zot, mem dan Izrael mo pa finn trouv enn lafwa koumsa.” Letan bann ki ti vinn get Zezi retourn lakaz, zot trouv serviter-la an-bonn-sante. Enn zour, Zezi ti al dan enn lavil ki ti apel Nainn. So bann disip ek enn gran lafoul ti pe swiv li. Letan li ariv devan laport lavil, ala ki lanterman enn zennom ti pe sorti. Li ti sel garson pou so mama, e so mama ti enn vev. Enn gran lafoul ti pe mars ar mama-la. Letan Lesegner trouv li, so leker fer mal, e li dir mama-la, “Pa plore.” Zezi koste ar serkey e tous li. Bann dimounn ki ti pe sarye serkey arete. Zezi dir, “Zennom, mo dir twa, leve.” Mor-la leve, li asize, li koumans koze. Zezi rann garson-la so mama. Lafreyer sezi bann dimounn e zot glorifie Bondie; zot dir, “Enn gran profet finn leve parmi nou e Bondie finn vizit so pep.” Sa nouvel-la fane partou dan Zide ek dan lezanviron. Bann disip Zan rakont zot met tou sa bann kiksoz-la. Alors Zan apel de disip e li avoy zot kot Lesegner pou dimann li, “Tomem ki sipoze vini la, oubien nou bizin atann enn lot?” Letan bann-la ariv kot Zezi, zot dir, “Zan Batis finn avoy nou dimann twa, ‘Eski tomem ki sipoze vini, oubien nou bizin atann enn lot?” Dan sa ler-la, Zezi ti pe geri boukou malad ki dan douler, ki ti ena lespri move; e bann aveg ti pe trouv kler. Alors li reponn zot, “Al dir Zan seki zot finn trouve ek seki zot finn tande: aveg trouv kler, paralize marse, bann lepre geri, bann sourd tande, bann mor leve, bann pov resevwar Bonn Nouvel. Bienere seki pa tonbe akoz mwa.” Letan bann mesaze Zan inn ale, Zezi koumans koz ar lafoul lor Zan: “Ki zot finn al gete dan dezer? Enn vounn ki pe balote ar divan? Ki zot finn al gete alor? Enn dimounn ki ti abiy ar kostim letof? Gete, bann ki met zoli linz, viv dan lix e res dan sato lerwa. Abe ki zot finn al gete? Enn profet? Laverite, mo dir zot, li plis ki enn profet. Lor limem Lekritir dir, ‘Mo pe avoy mo mesaze devan twa, li pou ouver enn sime devan twa.’ Mo dir zot, parmi tou seki sorti dan vant zot mama, pena personn ki pli gran ki Zan; pourtan seki pli piti dan Rwayom Bondie, pli gran ki li.” Lafoul dimounn ek bann komi tax, ki ti tann sa, ti trouve ki Bondie zis parski zot ti deza resevwar batem Zan; me bann Farizien e bann dokter lalwa ti rezet plan ki Bondie ti ena pou zot parski zot ti refiz batem Zan. “Ar ki mo pou konpar dimounn zordizour? Kouma zot ete? Zot parey kouma bann zanfan ki pe asize lor laplas piblik e zot pe kriye zot kamarad: ‘Nou ti zwe laflit pou zot, me zot pa ti danse; nou ti sant kantik lanterman, me zot pa ti plore.’ Zan Batis vini, li pa manz dipin, pa bwar divin, e zot dir, ‘Li ena enn demon lor li.’ Garson Limanite vini, li manze li bwar, e zot dir, ‘Get sa, li enn gourman, enn soular e li kamarad ar komi tax ek bann peser!’ Me tou seki finn aksepte lasazes Bondie finn rekonet ki Bondie zis.” Enn Farizien invit Zezi vinn manze kot li. Zezi ale e li asiz atab. Dan sa lavil-la, ti ena enn fam ki ti pe amenn enn move lavi. Li ti tann dir ki Zezi ti pe manze dan lakaz Farizien-la; alors, li amenn enn flakon an-albat ranpli ar parfin. Li dibout deryer Zezi, kot so lipie, li ti pe plore, li ti pe mouy lipie Zezi avek so larm e li ti pe souy li avek so seve. Li ti pe anbras lipie Zezi e vers parfin lor so lipie. Letan Farizien ki ti invit Zezi trouv sa, li dir dan limem, “Si vremem li ti enn profet li ti pou kone ki kalite fam pe tous li e ki li enn fam move lavi.” Zezi dir li, “Simon, mo ena enn kestion pou poz twa.” Li dir Zezi, “Koze Met.” Zezi dir Simon, “Ti ena de dimounn ki ti dwa enn kaser; enn ti dwa sink-san pies larzan, lot ti dwa sinkant. Letan zot pa ti kapav ranbourse, li ti rey zot det. Dir mwa, kisann-la pou plis kontan li?” Simon reponn, “Mo sipoze seki ti ena pli gro det-la.” Zezi dir li, “To ena rezon.” Zezi vire get madam-la, li dir Simon, “To trouv sa madam-la? Mo finn rant kot twa, to pa finn donn mwa dilo pou lav mo lipie, me li, li finn tranp mo lipie ar so larm e li finn souy li ar so seve. To pa finn anbras mwa, me depi ki mo finn rantre, li pa finn aret anbras mo lipie. To pa finn vers delwil lor mo latet, me li finn frot mo lipie avek parfin. Ala mo dir twa, tou so pese finn pardone parski li finn montre boukou lamour. Dimounn ki gagn tigit pardon, montre tigit lamour”. Lerla Zezi dir madam-la, “Tou to pese finn pardone.” Bann ki ti la dir ant zotmem, “Ki li ete li pou li mem oze pardonn bann pese?” Lerla Zezi dir ar madam-la, “To lafwa finn sov twa, al anpe.” Zis apre, Zezi travers bann lavil ek bann vilaz pou anons ek proklam Bonn Nouvel Rwayom Bondie. Ledouz ti avek li, ek de-trwa madam lor ki Zezi ti tir bann lespri move e ti geri zot bann maladi. Parmi ti ena Marie, ki ti apel Magdala lor ki ti ena set demon ki Zezi ti pouse, Zann, fam Souza ki ti enn administrater kot Erod, ti ena osi Sizann, e boukou lezot ankor, ki ti servi zot dibien pou ed Zezi ek bann disip. Kan enn gran lafoul dimounn sorti dan bann lavil e vinn ar Zezi, li dir zot enn parabol, “Enn planter sorti pou sem so bann lagrin; pandan ki li seme, inpe tom lor sime, dimounn mars lor la, e bann zwazo lesiel vinn manz tou. Inpe tom lor ros; letan zot grandi, zot sek parski ti mank limidite. Inpe tom dan pikan, e kan pikan-la grandi ansam avek bann lagrin-la, li touf zot. Inpe tom dan bon later, e kan zot grandi, zot prodir san fwa plis.” Letan li fini dir sa, li dir avek otorite, “Seki ena zorey pou tande, li ava tande!” So bann disip dimann li ki sa vedir sa parabol-la. Li dir, “Zot, finn donn zot konesans sekre Rwayom Bondie; me ar lezot mo koz an parabol, koumsa ‘zot pou gete san trouve, e zot pou tande san konpran.’ “Ala seki sa parabol-la vedir: lagrin-la, Parol Bondie. Seki tom dan bor sime, sa bann ki finn tande me lerla diab vini, aras parol dan zot leker pou ki zot pa krwar e zot pa sove. Seki tom lor ros, sa bann ki tann laparol e zot resevwar li dan lazwa; me zot pena rasinn, zot krwar pou enn letan e kan difikilte vini zot abandonn lafwa. Seki tom dan pikan, sa bann ki tande, me kan traka, larises ek plezir lavi vini, li touf zot; zot fri pa mir. Seki tom dan bon later, sa bann ki ekout laparol, gard li dan enn leker bon ek onet, e zot raport fri ar pasians ek perseverans. “Personn pa alim enn lalanp pou kouver li ar enn vaz, oubien met li anba lili, me li met li lor enn stenn, pou ki seki rantre kapav trouv lalimier. Tou seki kasiet pou vinn dan lalimier e tou seki sekre pou devwale e pou vinn dan kler. Alor fer atansion manier ki zot ekoute parski seki ena pou gagn plis e seki pena, mem seki li krwar li ena, pou ras tou ar li.” Lerla so mama ek so bann frer vinn zwenn li, me zot pa ti reisi koste ar li akoz lafoul. Bann-la dir li, “To mama ek to bann frer pe dibout deor, zot anvi trouv twa.” Me li reponn zot, “Seki ekout Parol Bondie ek met li an pratik samem mo mama ek mo bann frer.” Enn zour li rant dan enn pirog ar so bann disip, e li dir zot, “Anou al lot kote lak.” E zot ale. Lor bato, Zezi gagn somey. Enn koudvan leve lor lak, pirog koumans pran dilo, lerla zot lavi andanze. Bann-la al lev li, zot kriye, “Met, Met, nou pe mor!” Zezi leve, li menas divan ek vag, lerla gagn enn akalmi. Li dir zot, “Kot zot lafwa ete?” Zot gagn per e zot sezi, e sakenn dir ar so kamarad, “Kisann-la sa, li komann divan ek dilo, e bann-la obeir li?” Lerla zot ariv pei bann Zerazenien, ki vizavi ar Galile. Kouma li debarke, enn abitan lavil ki ti posede ar boukou demon vinn zwenn li. Depi lontan li ti finn aret met linz e li pa ti pe res dan lakaz me dan simitier. Kan li trouv Zezi, li zet so lekor devan Zezi e li kriye for-for, “Ki to oule ar mwa, Zezi, Garson Bondie Treo? Mo sipliy twa, pa tourmant mwa.” Zezi donn move lespri lord pou sorti lor sa dimounn-la. (Enn kantite fwa lespri-la ti akapar li; lerla zot ti atas so lame ek so lipie ar lasenn pou tini li, me li ti kas lasenn e demon ti sarye li dan dezer.) Lerla Zezi dimann li, “Ki to nom?” Li reponn, “Lezion,” parski enn pake demon ti rant dan li. Zot sipliy Zezi pou ki li pa avoy zot dan pwi-san-fon. Be ti ena enn gran troupo koson ki ti pe manze lor kolinn; bann demon-la sipliy Zezi pou les zot rant dan bann koson-la. Zezi donn zot permision. Lerla bann demon-la sorti ar li, rant dan bann koson ki ti la, ek troupo-la deval lapant, tom dan lak e zot nwaye. Letan bann gardien troupo trouv seki finn arive, zot sove zot al rakont sa dan lavil ek dan lakanpagn. Lerla bann dimounn vinn gete ki finn arive vremem; letan zot koste ar Zezi zot trouv sa dimounn ki ti posede par demon-la, pe asiz kot lipie Zezi, so linz lor li e li sindespri. Lerla zot gagn per. Bann ki ti finn trouv sa, rakont lezot kouma posede-la ti geri. Lerla tou bann abitan dan lezanviron ek bann Zerazenien dimann Zezi kit zot lavil ale parski zot ti gagn enn gran lafreyer. Alors Zezi rant dan pirog e li retourne. Sa dimounn ki demon ti finn kit li la, sipliy Zezi pou res ar li; me Zezi ranvway li. Li dir, “Retourn kot twa, e al rakonte seki Bondie finn fer pou twa.” Li ale, li proklam partou dan lavil seki Zezi inn fer pou li. Letan Zezi retourne, lafoul akeyir li parski zot tou ti pe atann li. Ala enn sef sinagog ki ti apel Zair vinn get Zezi. Sef-la tom dan so lipie e li sipliy Zezi pou vinn kot li. Zair ti ena enn sel tifi ki ti ena apepre douz-an, e li ti pe mor. Letan Zezi ale, lafoul antour li e dimounn ti pe pouse. Ti ena enn madam parmi, ki ti ena enn lemorazi ki ti pe minn li depi douz an. Li ti finn depans tou seki li ti ena ar dokter. Personn pa finn kapav geri li. Li vinn deryer Zezi e li tous rebor so linz. Toutswit li aret segne anplas. Zezi dir, “Kisann-la finn tous mwa?” Tou dimounn res trankil, lerla Pier dir li, “Met, enn gro lafoul pe antour twa e dimounn pe pouse.” Zezi dir, “Kikenn finn tous mwa. Mo kone enn lafors finn sorti dan mwa.” Letan madam-la trouve ki finn dekouver li, li gagn tranbleman, li tom dan lipie Zezi e li dir devan tou dimounn kifer li ti finn tous Zezi e kouma li finn geri toutswit. Zezi dir li, “Mo tifi, to lafwa finn sov twa; al anpe.” Letan Zezi pe dir sa, enn dimounn sorti lakaz sef sinagog e dir li, “To tifi finn mor, pa deranz Met plis ki sa.” Me letan Zezi tann sa, li dir Zair, “Pa per, zis krwar e to tifi pou sove.” Letan Zezi ariv lakaz Zair, li pa les personn rant ansam ar li, zis Pier, Zan, Zak, papa ek mama tifi-la osi. Tou dimounn ti pe plore, e kriye, akoz tifi-la. Me Zezi dir zot, “Pa plore. Tifi-la pa finn mor, li zis pe dormi.” Me zot riy li, parski zot kone ki tifi-la finn fini mor. Zezi pran lame tifi-la e dir li, “Zennfi, leve!” Lespri tifi-la retourne, e li leve deswit. Zezi dimann bann-la donn li kiksoz pou manze. Bann fami tifi-la ti etone; me Zezi donn zot lord pa dir personn ki finn arive. Zezi apel Ledouz e li donn zot pouvwar ek lotorite pou sas tou bann demon e pou geri tou bann maladi. Li avoy zot al proklam Rwayom Bondie e al geri bann malad. Li dir zot, “Pa pran nanye pou zot vwayaz, okenn baton, ni sak, ni dipin, ni larzan, mem pa enn semiz anplis. Kan zot rant dan enn lakaz, res lamem, ziska ki zot kit landrwa-la. La kot pa akeyir zot, tap zot lipie, tir tou lapousier letan zot kit lavil-la. Li pou enn temwaniaz kont bann-la. Ledouz sorti ale; zot al dan bann vilaz, zot amenn Bonn Nouvel laba e zot geri bann malad partou kot zot pase. Erod, lerwa Galile, ti pe tann tou seki ti pe pase, e li pa ti pe konpran parski ena ti pe dir ki Zan finn resisite, ena ti pe dir Eli finn aparet, e lezot ti pe dir, li enn parmi bann ansien profet ki finn releve. Erod dir, “Mo finn dekapit Zan; me ki sa dimounn lor ki mo pe tann tou sa bann koze-la?” Alor li ti pe anvi zwenn Zezi. Letan bann zapot retourne, zot rakont Zezi tou seki zot finn fer. Li pran zot, e li amenn zot apar dan lavil Betsaida. Kan lafoul ti konn sa, zot ti swiv li; li ti akeyir zot, li ti koz ar zot lor Rwayom Bondie, e li ti geri bann ki ti bizin geri. Lazourne ti pe al fini e Ledouz vinn ar Zezi, zot dir li, “Fer lafoul-la ale, pou ki zot al dan bann vilaz ek bann laferm dan landrwa, pou gagn enn plas pou manze ek dormi; parski nou lwin ar tou isi.” Me li dir zot, “Donn bann-la manze zotmem.” Zot reponn, “Nou ena zis sink dipin ek de pwason. Amwin ki nou al aste manze pou tou sa bann dimounn-la.” Ti ena apepre sink mil zom. Li dir ar so bann disip, “Fer bann-la asiz par group sinkant.” Lerla zot fer tou dimounn asize. Zezi pran sink dipin ek de pwason-la, li lev so lizie, li get lesiel, li beni zot, li kas zot, e li donn so bann disip pou distribie ar lafoul. Tou dimounn manze ziska vant plin. Zot ramas douz panie ranpli ar bout-bout dipin ki ti finn reste. Zezi ti pe priye tousel e ti ena zis so bann disip ki ti la; li dimann zot, “Ki dimounn dir mo ete?” Zot reponn, “Zan Batis; me ena dir, Eli; e lezot dir ki to enn parmi bann ansien profet ki finn resisite.” Li dir so bann disip, “Me zot, ki zot dir mo ete?” Pier reponn, “Tomem Mesi Bondie.” Lerla li donn zot lord pa dir sa personn. Li dir, “Garson Limanite bizin soufer boukou, bann ansien, bann sef pret e bann dokter lalwa pou rezet li, zot pou touy li, lor trwaziem zour li pou resisite.” Apre sa li dir zot tou, “Si kikenn anvi swiv mwa, li bizin aret pans zis limem, pran so lakrwa toulezour e swiv mwa. Seki anvi sov so lavi, pou perdi li; seki perdi so lavi akoz mwa, pou sov li. Ki serti enn dimounn gagn lemond antie pou ki apre li perdi limem oubien detrir so lavi? Seki gagn onte akoz mwa ek akoz mo parol, Garson Limanite pou ont li, kan li pou vinn dan so laglwar, dan laglwar so Papa ek bann anz ki sin. Me laverite mo dir zot, ena parmi zot ki pa pou konn lamor avan ki zot trouv Rwayom Bondie.” Wit zour apre ki Zezi ti finn dir sa bann parol-la, li ti pran Pier, Zan ek Zak e li ti mont lor montagn pou al priye. Letan li pe priye, so figir sanze e so linz vinn enn blan ki kas lizie. Enn sel kout de dimounn ti pe koz ar li: Moiz ek Eli. Zot aparet dan laglwar, e zot pe koz lor so depar ki ti pre pou realize dan Zerizalem. Pier ek so bann kamarad ti dan enn profon somey; letan zot leve, zot trouv laglwar Zezi ek sa de ki ti ar li la. Letan sa de-la kit Zezi, Pier dir li, “Met, li bon nou isi; anou dres trwa latant, enn pou twa, enn pou Moiz ek enn pou Eli.” Me li pa ti kone ki li ti pe dir. Kan li ti pe koze, enn niaz ti vinn kouver zot; zot ti gagn per letan niaz-la anvlop zot. Enn lavwa sorti dan niaz, dir, “Samem mo Garson ki mo finn swazir. Ekout li!” Letan lavwa-la aret koze, zot nek trouv Zezi tousel. Sa lepok-la, zot ti res trankil, zot pa ti rakont personn seki zot ti trouve. Landime, zot desann depi montagn, enn gran lafoul vinn zwenn Zezi. Ala ki enn boug dan lafoul kriye, “Met, mo sipliye twa vinn get mo garson, mo sel piti; enn kout lespri sezi piti-la; piti-la irle, li gagn konvilsion, li kime e lespri-la maltret li, sakouy li e larg li avek difikilte. Mo finn sipliy to bann disip pou sas sa lespri-la, me zot pa finn kapav fer nanye.” Zezi dir, “Ziska kan mo pou res ar zot, pou siport zot, zenerasion san lafwa ranpli ar mesanste? Amenn to garson isi.” Letan garson-la vini, demon-la zet li ater, sakouy-sakouy li. Me Zezi menas lespri inpir la, geri garson-la e retourn li so papa. Zot tou ti inpresione par grander inkonparab Bondie. Alor ki zot tou ti pe emerveye par tou seki li ti pe fer, li dir so bann disip, “Les sa parol-la rant bien dan zot zorey: Garson Limanite pou livre dan lame bann zom.” Me zot pa ti konpran sa parol-la; li ti res flou dan zot latet pou ki zot pa konpran. Zot ti gagn per pou poz li kestion lor sa size-la. Bann disip koumans diskite kisann-la pli gran parmi zot. Me Zezi ti konn zot panse. Alors li pran enn zanfan, li plas li pre ar li e li dir zot, “Dimounn ki akeyir sa zanfan-la lor mo nom, pe akeyir momem, e seki akeyir mwa pe akeyir Sa-Enn ki finn avoy mwa la; parski pli tipti parmi zot tou, limem pli gran.” Zan pran laparol, “Met, nou finn trouv enn dimounn pe servi to nom pou pous demon, nou finn anpes li, parski li pa dan mem group ki nou.” Me Zezi dir li, “Pa anpes li, parski seki pa kont twa, li ar twa.” Letan ler ti pe arive kot Zezi pou kit lemond, li ti met latet devan pou mont Zerizalem. Li avoy bann mesaze devan li. Bann-la rant dan enn vilaz Samaritin pou prepar so larive. Me bann abitan sa vilaz-la refiz akeyir li parski li ti pe monte pou al Zerizalem. Letan Zak ek Zan trouv sa, zot dir, “Segner, to oule nou fer dife sort dan lesiel tom lor zot pou detrir zot?” Zezi vire get zot, e li menas zot. Lerla zot al dan enn lot vilaz. Lor larout enn dimounn dir Zezi, “Mo pou swiv twa partou kot to ale.” Zezi dir li, “Renar ena lakaz pou reste, zwazo dan lesiel ena so nik, me Garson Limanite pena enn plas pou poz so latet.” Zezi dir enn lot, “Swiv mwa.” Me li reponn, “Segner, les mwa anter mo papa avan.” Me Zezi dir li, “Les bann mor anter bann mor; twa, al anons Rwayom Bondie.” Enn lot dir li, “Mo pou swiv twa, Segner, me les mo al dir orevwar mo fami avan.” Zezi dir li, “Seki pe labour later e get par deryer, li pa dign pou Rwayom Bondie.” Apre sa Lesegner swazir swasann-dis lezot disip, e li avoy zot de par de devan li dan tou lavil e tou plas kot li ti ena lintansion pou ale. Li dir zot, “Rannman boukou dan karo me zouvriye tigit; priye Proprieter karo pou ki li avoy zouvriye dan so karo. Ale! Mo avoy zot parey kouma bann ti-mouton parmi loulou. Pa pran ni kas, ni sak, ni soulie ar zot. E pa arete lor sime pou pran nouvel ar long-long konversasion. Kan zot rant dan enn lakaz, dir avan, ‘Shalom, lape dan sa lakaz-la!’ Si lape res dan enn dimounn dan sa lakaz-la, zot lape pou repoz lor li; sinon repran zot lape. Alor res dan sa lakaz-la, manze e bwar seki donn zot, parski enn zouvriye merit so saler. Kan zot rant dan enn lavil ki akeyir zot, manz seki met devan zot; geri bann malad sa lavil-la e dir so bann abitan, ‘Rwayom Bondie finn vinn pre ar zot.’ Me si zot rant dan enn lavil ki pa akeyir zot, al partou lor gran sime e dir, ‘Nou sakouy nou lipie pou tir tou lapousier zot lavil ki finn tas dan nou sandalet; me zot bizin kone ki Rwayom Bondie finn koste ar zot.’ Mo dir zot, zour zizman pou mwin dir ar Sodom ki ar sa lavil-la. Bienmalere Korazin! Bienmalere Betsaida! Si mirak ki finn fer kot zot, ti fer osi dan Tir ek Sidon, lontan so bann abitan ti pou repanti, ti pou met linz dey, e ti pou asiz dan lasann. Akoz sa, pou mwin dir ar Tir ek Sidon kan zour zizman pou vini. E twa Kafarnaom, to krwar to pou mont lao ziska dan lesiel? Non, pou desann twa ziska dan lanfer. Seki ekout zot, ekout mwa; seki rezet zot, rezet mwa, e seki rezet mwa, rezet Sa-Enn ki finn avoy mwa la.” Bann swasann-dis disip retourne dan lazwa, e zot dir Zezi, “Segner, mem bann demon soumet kan nou servi to nom!” Zezi reponn zot, “Mo finn trouv Satan tonbe kouma zekler depi lesiel. Ekoute, mo finn donn zot lotorite pou mars lor serpan, lor skorpion e lor lennmi ki bien for; nanye pa kapav fer zot dimal. Pa gagn lazwa akoz bann lespri soumet devan zot, me gagn lazwa parski zot nom finn anrezistre dan lesiel.” Lerla mem, Zezi, ranpli dan lazwa Lespri Sin dir, “Papa, Segner lesiel ek later, mo remersie twa parski to finn fer bann tipti konn kiksoz ki to finn kasiet bann saz ek bann intelizan. Wi, papa, samem to volonte. Mo Papa finn remet tou kiksoz dan mo lame. Personn pa konn so Garson, exsepte Papa-la, e personn pa konn Papa-la exsepte so Garson e dimounn ar ki Garson-la anvi revel so Papa.” Lerla Zezi koz ar so disip an-prive, “Bienere lizie ki trouv seki zot pe trouve! Krwar mwa mo dir zot, boukou profet ek lerwa finn anvi trouv seki zot pe trouve, e zot pa finn trouve, e pou tann seki zot pe tande, e zot pa finn tande.” Enn dokter lalwa vinn get Zezi pou may li dan enn piez, li dir, “Met, ki mo bizin fer pou gagn lavi eternel?” Zezi dir li, “Ki finn ekrir dan lalwa? Ki to lir?” Li reponn, “To bizin kontan Lesegner to Bondie ar tou to leker, tou to lam, tou to lafors, tou to lespri e to prosin kouma tomem.” Alors Zezi dir li, “To finn bien reponn. Fer sa, e to pou gagn lavi.” Me kouma dokter lalwa-la ti anvi montre ki li enn dimounn drwat, li dimann Zezi, “Kisann-la mo prosin?” Zezi reponn, “Enn dimounn sorti Zerizalem e li ti pe desann Zeriko. Bann voler atak li, kokin tou seki li ena, zot bat li, zot sove, e zot les li demi-mor. Par sans, enn pret pas par la me letan li trouv li, li pas lot kote. Parey pou enn Levit; letan li trouv li, li pas lot kote. Me enn Samaritin ki ti an-vwayaz, ler li ariv pre ar sa dimounn-la e kan li trouv so leta, so leker fermal. Li al get blese-la, li fer enn pansman e li vers delwil ek divin lor so dimal. Lerla li met blese-la lor so bourik, li amenn li dan enn ti lotel e li kontigne swagn li. Landime, li tir larzan dan so pos, valer de zourne travay e li donn proprieter lotel-la. Li dir li, ‘Okip li bien, e ninport ki depans to fer anplis mo pou ranbours twa letan mo retourne.’ Dapre twa, kisann-la parmi sa trwa-la finn azir kouma enn prosin pou sa dimounn ki voler finn atake la?” Dokter lalwa-la reponn Zezi, “Be dimounn ki finn pran li kont la.” Zezi dir li, “Ale, al fer parey.” Letan zot pe marse, zot rant dan enn vilaz, e enn fam ki apel Mart akeyir Zezi dan so lakaz. So ser ki ti apel Marie vinn asiz kot lipie Zezi pou ekout so parol. Me Mart ti pe ale-vini pou servi. Li al get Zezi, li dir, “Sa pa fer twa nanye ki mo ser les mwa tousel pou servi? Dir li vinn donn enn koudme.” Lesegner reponn li, “Mart, Mart, to pran traka e to azite pou enn kantite kiksoz, me enn sel neseser. Marie finn swazir meyer par, pa pou retir sa ar li.” Zezi ti pe priye kikpar. Letan li fini, enn so bann disip dir, “Segner, montre nou kouma priye, parey kouma Zan finn montre so bann disip.” Lerla li dir zot, “Kan zot priye, dir: Papa, ki to nom sanktifie; fer to regn vini. Donn nou sak zour dipin ki nou bizin. Pardonn nou nou pese, parey kouma nou pardonn bann seki ofans nou. Pa les nou tom dan tantasion.” Zezi re-dir zot, “Si enn zot kamarad vinn kot zot omilie lanwit e dir zot, ‘Kamarad, pret mwa trwa dipin ar twa.’ Mo kamarad ki sorti an vwayaz inn vinn kot mwa e mo pena nanye pou ofer li. Si seki dan lakaz-la reponn, ‘Pa deranz mwa, mo finn fini met lakle dan laport, mo bann zanfan ek mwa lor lili e mo pa kapav leve pou donn twa dipin.’ Mo dir zot, mem si li pa leve par amitie pou so kamarad, li pou leve pou donn so kamarad tou seki li bizin akoz toupe ki li ena pou insiste. Mwa, mo dir zot: dimande, zot pou gagne; rode, zot pou trouve; tape, laport pou ouver pou zot. Seki dimande pou gagne, seki rode pou trouve, e seki tape, laport pou ouver pou li. Ki papa parmi zot, si so zanfan dimann li enn pwason, pou donn li enn serpan? Oubien si li dimann enn dizef, pou donn li enn skorpion? Move kouma zot move, zot konn donn bon kiksoz zot zanfan; aster mazine komie plis ankor, zot Papa dan lesiel pou fer kado Lespri Sin seki dimann li.” Zezi ti pe sas enn demon ki ti rann enn dimounn mie. Kan demon-la kit li, mie-la koze, e bann dimounn ti emerveye. Ena parmi zot ti pe dir, “Li sas demon par Belzeboul, prins demon.” Me lezot pou teste li, dimann li enn sign ki vinn depi lesiel. Me kouma Zezi ti konn zot panse, li dir zot, “Si ena divizion dan enn rwayom, rwayom-la pou tonbe; si ena divizion dan enn lakaz, lakaz-la pou tonbe. Si Satan lager ar Satan, kouma so rwayom pou tini dibout? E zot, zot pe dir ki mo sas demon par Belzeboul. Me si mwa mo sas demon par Belzeboul, par kisann-la zot disip sas demon? Bann-la mem pou ziz zot. Me si mo sas demon par lame Bondie, savedir Rwayom Bondie finn vinn kot zot. Kan enn zom for e bien arme pe vey so prop lakaz, so dibien an sekirite. Me kan enn pli for vinn atak li e bat li, seki pli for la pran bann zarm dan ki lot-la ti ena konfians, e li partaz so bann dibien. Seki pa ar mwa, kont mwa; seki pa rasanble ar mwa, kree divizion. Kan move lespri sorti dan enn dimounn, li travers bann landrwa kot pena dilo pou rod enn plas pou repoze; si li pa trouv nanye li dir, ‘Mo retourn lakaz kot mo finn sorti.’ Kan li retourne li trouv lakaz-la bien balie e bann zafer bien ranze. Lerla li al rod set lespri pli move ki li, e zot rant dan lakaz-la e zot instal zot. Leta dimounn-la vinn pli pir ki avan.” Kouma li fini dir sa, enn fam dan lafoul kriye, “Bienerez fam ki finn sarye twa e ki finn donn twa bwar!” Me Zezi reponn li, “Bienere plito seki ekout Parol Bondie e obeir li!” Letan lafoul ti pe grosi, Zezi koumans dir, “Sa zenerasion-la, enn zenerasion move. Li dimann enn sign, me okenn sign li pa pou gagne, apar sign Zonas. Parey kouma Zonas ti enn sign pou bann abitan Niniv, parey Garson Limanite pou enn sign pou sa zenerasion-la. Zour zizman, larenn Seba ki sorti Lesid, pou lev devan dimounn sa zenerasion-la e li pou kondann zot; parski li finn sorti bien-bien lwin pou vinn ekout sazes Salomon. E isi ena pli gran ki Salomon. Bann dimounn Niniv pou leve zour zizman devan sa zenerasion-la e pou kondann li, parski bann-la ti repanti letan zot ti tann predikasion Zonas. E isi ena pli gran ki Zonas. Personn pa alim enn lalanp pou kasiet li oubien pou met li anba enn seo; okontrer li met li lor enn stenn, pou ki tou seki rantre trouv lalimier. To lizie lalimier to lekor; kan to lizie bon tou to lekor eklere; me si to lizie pa bon, tou to lekor dan marenwar. Alors, pran kont, tansion lalimier ki dan twa, an-verite teneb sa. Si tou to lekor dan lalimier, san ki enn parti dan teneb, tou to lekor pou briye parey kouma enn lalanp ki ekler twa avek so lekleraz. Kan Zezi fini koze, enn Farizien invit li pou dezene. Zezi rant kot li e asiz atab. Farizien-la ti soke parski Zezi pa ti lav so lame avan li manze. Lerla Lesegner dir li, “Ala kouma zot ete bann Farizien. Zot netway andeor zot koup ek zot lasiet bien prop, me andan zot ranpli ar lespri rapas ek mesanste. Bann ti-lespri! Eski Bondie ki finn fer andeor, li pa finn fer osi seki andan? Donn bann pov rises ki ena dan zot koup; lerla, tou pou vinn prop. Maler lor zot bann Farizien! Zot donn enn diziem prodwi zot zardin kouma lamant, kotomili e tou kalite legim; me zot bliye lazistis ek lamour Bondie; pourtan samem ki zot ti bizin fer san bliye leres. Maler lor zot bann Farizien! Zot kontan bann premie plas dan sinagog e zot kontan loner lor laplas piblik. Maler lor zot! Zot parey kouma bann tom ki dimounn pa remarke, e lor ki zot marse san kone!” Enn dokter lalwa dir li, “Met, kan to koz koumsa to pe ofans nou!” Zezi reponn li, “Maler lor zot osi bann dokter lalwa! Zot dimann dimounn sarye bann fardo bien lour, me zot, zot mem pa lev zot ti ledwa pou donn enn koudme sarye sa pwa-la. Maler lor zot! Zot konstrir tom pou bann profet ki zot anset finn touye. Savedir, zot pe montre ki zot dakor ar seki zot bann gran dimounn finn fer, parski bann-la ti touy bann profet, e zot, zot konstrir tom pou bann profet-la. Akoz samem Bondie dan so gran sazes finn dir, ‘Mo pou avoy bann profet ek bann zapot kot zot; ena zot pou touye, ena zot pou persekite.’ Akoz sa, zot pou pini pou disan bann profet ki finn koule depi kreasion lemond ziska zordi, depi lamor Abel ziska lamor Zakari ki finn perdi lavi ant lotel sakrifis ek sanktier. Vremem, mo dir zot, sa zenerasion-la pou pey tousala. Maler lor zot, dokter lalwa! Zot finn aras lakle konesans me zotmem zot pa rantre, e zot anpes lezot osi rantre. Kan Zezi sorti la ale, bann dokter lalwa e bann Farizien move ankoler e zot bonbard li ar kestion. Zot ti pe rod tou sort manier pou kwins li ar so prop parol. Ti ena telman enn gran lafoul ki dimounn ti pe mars lor lipie zot kamarad. Lerla Zezi koumans dir ar so bann disip, “Fer atansion levin bann Farizien, setadir, zot ipokrizi. Tou seki kasiet pou vinn dan kler e tou seki sekre pou devwale. Akoz samem tou seki zot dir dan nwar, dimounn pou tann li dan kler, seki zot mirmire dan zorey an-prive, dimounn pou kriye li for-for lao lor lakaz. Ala mo dir zot, mo bann kamarad, pa per seki kapav detrir lekor, e pa kapav fer plis ki sa. Mo pou montre zot kisann-la zot bizin per: gagn per Sa-Enn ki non selman kapav detrir zot me ena osi pouvwar pou zet zot dan lanfer. Wi, mo dir zot, Sa Enn-la ki zot bizin gagn per. Eski pa vann sink mwano pou de sou? Pourtan, Bondie pa bliye enn sel ladan. Me zot, tou brin seve lor zot latet inn konte. Pa per, zot ena plis valer ki tou mwano. Mo dir zot, tou seki rekonet mwa devan dimounn, Garson Limanite pou rekonet li devan bann anz Bondie. Me seki renie mwa devan dimounn, Garson Limanite pou renie li devan anz Bondie. Seki dir enn parol kont Garson Limanite pou gagn pardon; me seki blasfem kont Lespri Sin, pa pou gagn pardon. Kan amenn zot dan sinagog devan bann dirizan ek bann lotorite, pa trakase kouma zot pou defann zot e kouma zot pou reponn, parski Lespri Sin pou montre zot dan sa ler-la ki pou dir. Kikenn dan lafoul dir Zezi, “Met, dir mo frer donn mwa mo par leritaz.” Me Zezi dir li, “Kamarad, kisann-la finn nom mwa pou zize ek pou partaz zot dibien?” Lerla li dir zot, “Fer atansion! Pa galoup deryer bann dibien materyel, parski lavi enn dimounn pa depann lor so dibien, mem si li bien ris.” Zezi rakont enn parabol. “Enn dimounn ris ti ena enn plantasion ki ti raport boukou. Li dir ar limem, ‘Ki mo pou fer? Mo pena plas pou ramas mo rekolt. Be, ala seki mo pou fer: mo pou demoli mo bann grenie, mo pou mont bann pli gran kot mo pou ramas tou mo rekolt e tou mo lezot dibien. Lerla mo pou dir ar momem, Kamarad, to ena boukou dibien an rezerv pou boukou lane; repoz twa, manze, bwar, diverti.’ Me Bondie dir li, ‘Kouma to bet koumsa! Zordi swar mem to pou perdi to lavi; kisann-la pou erit tou seki to finn ramase?’ Ala seki pou ariv dimounn ki ramas dibien zis pou li, me ki pa ramas rises kot Bondie.” Li dir so bann disip, “Ala kifer mo dir zot, fode pa zot trakase ar seki bizin manze pou viv, oubien ar linz ki zot bizin pou zot lekor. Lavi pli inportan ki manze, e lekor pli inportan ki linz. Get bann korbo, zot pa seme e zot pa rekolte; zot pena ni stor ni grenie, e pourtan Bondie nouri zot. Zot, zot ena plis valer ki zwazo! Eski traka ki to pran ar to lavi, pou fer li vinn pli long? Si zot pena pouvwar lor enn ti kiksoz koumsa, kifer zot trakase pou tou leres? Get kouma bann fler dan karo pouse; zot pa travay, zot pa koud linz. Pourtan, mem Salomon dan tou so laglwar pa ti ena zoli linz kouma sa bann fler-la. Si Bondie abiy lerb ki zordi dan karo ek dime pe brile, kalkile komie li pou abiy zot. Zot lafwa vremem tipti. Pa kas latet pou rode ki pou manze, ki pou bwar. Se bann ki pa krwar dan Bondie ki rod sa bann kiksoz-la; me zot, zot Papa kone ki zot bizin. Rod plito Rwayom Bondie, e zot pou resevwar tou leres. Pa gagn per, ti troupo, parski Bondie kontan pou donn zot so Rwayom. Vann zot dibien e donn bann pov; ranpli zot kof ar rises ki pa pou fini; ramas rises ki dan lesiel e ki pa pou disparet; parski kot sa ete, voler pa kapav koste e karya pa kapav manze. La kot leker ete, lamem zot rises pou ete. Pare e gard zot lalanp alime. Zot bizin kouma bann dimounn ki pe atann zot met retourne apre enn maryaz; kouma li tap laport, zot fini pare pou ouver. Bienere bann serviter ki zot met pou trouv dibout kan li rantre. Laverite mo dir zot, li pou tir so palto, fer zot asiz atab, e li pou servi zot. Si li vini omilie lanwit, oubien boner gramatin e li trouv zot lamem, bienere sa bann serviter-la! Ala seki zot bizin kone: si proprieter lakaz ti kone ki ler voler ti pou vini, li pa ti pou les li rant dan so lakaz. Zot osi zot bizin pare, parski ler ki Garson Limanite pou vini personn pa pou atann.” Pier dir, “Segner, to pe rakont sa parabol-la pou nou tousel oubien pou tou dimounn?” Lesegner reponn, “Ki sa administrater fidel ek bien serye ki finn gagn responsabilite ar so met pou vey lor so bann serviter e gete si zot gagn zot par manze dan ler? Bienere serviter ki ankor pe travay ler so met retourne. Laverite mo dir zot, li pou donn li responsabilite lor tou so dibien. Me si serviter-la dir, ‘Mo met pe tarde pou retourne,’ e li koumans bat bann servant ek bann serviter, li manze, li bwar e li sou, ki pou arive! So met pou retourne zour ki li pa pe atann, ler ki li pa kone, pou koup-koup li e pou konsider li kouma enn dane. Serviter ki ti konn volonte so met, me ki pa finn prepar li, ni mem fer dapre volonte met-la, pou gagn enn move bate. Me, seki pa ti kone, e finn fer kiksoz ki merit enn pinision, pou gagn enn ti pinision mem. Tou seki finn resevwar boukou, pou dimann li boukou; seki finn gagn boukou responsabilite, pou reklam li ankor plis. Mo finn vini pou aport enn dife lor later; mo ti'a voudre ki li finn deza alime. Mo bizin plonz dan enn batem e mo resanti enn gran soufrans avan ki sa arive. Eski zot panse mo finn vinn lor later pou amenn lape? Non, mo dir zot; pa lape, me divizion. Depi aster-la, dan enn lakaz kot ena sink dimounn zot pou ena divizion, trwa kont de e de kont trwa, papa kont garson, garson kont papa; mama kont tifi, tifi kont mama; belmer kont belfi, belfi kont belmer. Zezi dir lafoul, “Kan zot trouv niaz leve dan lwes, deswit zot dir, ‘Lapli pou tonbe’; samem ki arive. Kan divan Lesid soufle zot dir, ‘Pou fer so,’ samem ki arive. Ipokrit! Zot konpran ki pase lor later ek dan lesiel e zot konn dir ki letan pou fer me kifer zot pa konn interpret seki pe pase zordi? Kifer zot pa servi zot prop lespri pou fer enn zizman lor meyer fason azir? Letan to pe al kot mazistra avek dimounn ki pe akiz twa la, fer manier tom enn laranzman ar li lor sime mem; sinon li pou trenn twa devan ziz, ziz pou met twa dan lame lapolis, e lapolis pou zet twa dan prizon. Ala mo dir twa, to pa pou sorti ladan tanki to pa fini pey tou to det ziska dernie sou. De-trwa dimounn vinn rakont Zezi kouma Pilat finn masakre bann Galileen ki ti pe ofer sakrifis. Zezi reponn zot, “Eski zot panse ki sa bann Galileen-la pli gran peser ki tou lezot Galileen parski zot finn soufer koumsa? Mo dir zot, pa ditou! Me si zot pa repanti, zot pou mor parey. Ki zot panse lor latour Siloe ki finn kraz lor dizwit dimounn e finn touy zot tou? Eski zot krwar ki bann-la ti pli koupab ki tou lezot abitan Zerizalem? Mo dir zot, pa ditou! Me si zot pa repanti, zot pou mor parey. Zezi rakont enn parabol, “Enn dimounn ti plant enn pie fig dan enn karo rezin. Li vinn rod fri lor so pie fig me li pa gagn nanye. Li dir ar planter rezin-la, ‘Get sa, sa fer trwa-z-an ki mo finn rod fri lor sa pie fig-la me mo pa gagn nanye. Koup li. Kifer li bar plas pou nanye?’ Me li reponn proprieter-la, ‘Misie, donn li enn sans sa lane-la ankor. Mo pou bim later-la e mo pou met fimie ar li. Lerla li pou raporte lane prosenn. Sinon nou ava koup li.’ ” Zezi ti pe ansegne dan sinagog enn zour saba. Ti ena la, enn madam ki ti ena enn infirmite pandan dizwit an akoz enn move lespri. Li ti kourbe e li pa ti kapav dres drwat. Letan Zezi trouv li, li apel madam-la e li dir li, “Fam, to finn delivre depi to maladi.” Zezi poz lame lor li, e toutswit madam-la redrese e li glorifie Bondie. Me sef sinagog ti ankoler parski Zezi ti fer sa gerizon-la enn zour saba. Alors li dir, “Ena sis zour pou travay; vinn rod gerizon dan sa bann zour-la, me pa zour saba.” Alor Zezi dir li, “Ipokrit! Eski zour saba, zot pa larg zot toro oubien zot bourik depi dan lekiri pou amenn li bwar dilo deor? Eski zour saba, pa ti bizin liber sa madam-la, ki enn tifi Abraam, e ki Satan finn atase pandan dizwit an?” Letan li dir sa, tou so bann adverser perdi lafas. Tou bann dimounn ti dan lazwa akoz bann mervey ki Zezi ti pe fer. Zezi dir, “Kouma Rwayom Bondie ete, ek ar ki mo kapav konpar li? Li parey kouma enn lagrin moutard ki enn dimounn finn pran pou plant dan so zardin. Li grandi e li vinn gran kouma enn pie. Lerla bann zwazo dan lesiel vinn fer zot nik dan so brans.” Zezi rakont ankor, “Ar ki mo pou konpar Rwayom Bondie? Li parey kouma levin ki enn fam inn pran e finn azout avek trwa goble lafarinn pou fer lapat-la monte.” Zezi ti pe travers lavil ek vilaz e li ti pe al dan direksion Zerizalem. Lor larout li ti pe ansegne. Enn dimounn dimann li, “Segner eski pou ena enn tigit dimounn mem ki pou sove?” Li reponn zot, “Fer tou zot posib pou rant par ti laport parski boukou pou rod rantre me zot pa pou kapav. Kan proprieter lakaz leve e ferm laport, zot pou deor. Zot ava bon tape e zot ava bon dir, ‘Segner, ouver laport pou nou,’ li pou reponn zot, ‘Mo pa kone kot zot sorti.’ Alors, zot pou dir li, ‘Nou finn manze-bwar ar twa; to finn ansegn nou lor laplas piblik.’ Li pou re-dir zot, ‘Zot tou ki komet lemal, mo pa kone kot zot sorti. Sorti devan mwa ale.’ Laba pou ena plore, kriye, e ledan pou grinse, letan zot pou trouv Abraam, Izaak, Zakob ek tou bann profet dan Rwayom Bondie alor ki zot, pou zet zot deor. Dimounn pou sorti depi les ek lwes, depi lenor ek Lesid, e zot pou asiz atab dan Rwayom Bondie. Marke garde, ena dernie pou vinn premie, ena premie pou vinn dernie.” Sa moman-la, de-trwa Farizien vinn get Zezi pou dir li, “Ale pa res la, parski Erod pe rod touy twa.” Zezi dir zot, “Al dir sa renar-la, ‘Gete, mo pe pous demon e mo pe fer gerizon zordi ek dime, me lor trwaziem zour, mo ava finn fini mo mision. Selman mo bizin kontign mo sime zordi, dime ek apre dime, parski li pa posib ki enn profet mor andeor Zerizalem.’ Zerizalem, Zerizalem, twa ki touy bann profet e twa ki touy kout ros seki Bondie finn avoy ar twa, komie fwa mo ti anvi rasanble to bann zanfan kouma enn mama poul ramas so ti-pousin anba so lezel, me zot pa finn oule! Krwar mwa, zot lakaz pou vid e mo pe dir zot, zot pa pou trouv mwa ankor ziska ler vini kot zot pou dir, ‘Sa-Enn ki vinn lor nom Lesegner la finn beni.’ ” Enn zour saba, Zezi ti al manze dan lakaz enn sef Farizien. Bann-la ti pe obzerv li. Ti ena la enn dimounn, so lekor ti gonfle partou. Zezi dir ar bann dokter lalwa ek bann Farizien, “Eski lalwa permet nou fer gerizon zour saba?” Zot tou res trankil, zot pa dir nanye. Lerla Zezi tous malad-la, geri li, e les li ale. Apre li dir zot, “Kisann-la isi, si so garson oubien so bef tom dan enn pwi zour saba, li pa pou tir li?” Zot res san parol. Letan Zezi trouv bann invite swazir bann plas doner, li rakont zot sa parabol-la, “Kan to invite dan enn maryaz, pa al asiz devan, tansion enn dimounn pli inportan finn gagn invitasion li osi; lerla dimounn ki finn invit twa ek li, pou vinn dir twa, ‘Donn sa dimounn-la to plas.’ Lerla to pou perdi pwin, to pou leve e to pou al asiz dan dernie ban. Me kan to invite kikpar, al asiz net par deryer; koumsa, kan dimounn ki finn invit twa la vini e dir twa, ‘Kamarad, al devan kot pli meyer.’ Lerla to pou gagn pwin devan tou bann invite ki atab ar twa. Seki rod grander pou abese, seki abese pou gagn grander.” Lerla Zezi dir ar dimounn ki finn invit li, “Kan to fer enn dezene ou enn dine, pa invit to kamarad, to frer, to fami ou enn vwazin ki ris, parski zot kapav invit twa an-retour e koumsa zot ava rann twa to invitasion. Me kan to fer enn fet invit bann pov, bann infirm, bann bwate ek bann aveg, koumsa to pou beni, parski bann-la pa kapav rann twa parey. To pou rekonpanse ler rezireksion bann zis vini.” Enn invite ki ti atab avek Zezi finn tann sa e li dir Zezi, “Bienere seki pou pran so repa dan Rwayom Bondie.” Lerla Zezi kontigne avek enn lot parabol, “Enn dimounn fer enn gran fet, e li invit enn kantite dimounn. Ler manze finn pare, li avoy so serviter al dir so bann invite, ‘Vini, manze finn pare.’ Me zot tou prezant exkiz. Premie-la dir, ‘Mo fek aste enn karo, mo bizin al dan mo karo. Dir li exkiz mwa.’ Enn lot dir, ‘Mo fek aste sink per bef pou mo karo, e mo pe al gete si zot travay bien ansam. Dir li exkiz mwa.’ Enn lot dir, ‘Mo fek marye, akoz samem mo pa kapav vini.’ Serviter-la retourn kot so met e li rakont li tou seki finn pase. Lerla proprieter lakaz-la pik enn koler e dir so serviter, ‘Degaze, al lor gran sime ek dan tou kwin lari e amenn bann pov, bann infirm, bann aveg ek bann paralize.’ Plitar serviter-la vinn dir, ‘Met, mo finn fer tou seki to finn komande, ek ena ankor plas.’ Met-la dir so serviter, ‘Al dan bann fobour, bann landrwa inpe bwa-bwa e fors dimounn vini pou ki mo lakaz ranpli. Mo dir zot, okenn sa bann dimounn ki mo ti invite la pa pou dan mo fet.’ ” Enn gran lafoul ti pe swiv Zezi. Zezi vire, dir zot, “Si kikenn vinn ar mwa e li pa kontan mwa plis ki so papa ek so mama, so fam ek so zanfan, so frer, so ser, ek so prop lavi, li pa kapav vinn mo disip. Seki pa sarye so lakrwa e swiv mwa, pa kapav vinn mo disip. Si enn parmi zot anvi mont enn miray, eski dabor li pa asize pou kalkile komie sa pou kout li, ek apre li gete si li ena ase kas pou fini travay-la? Sinon, si li koul fondasion e apre li pa kapav fini, tou dimounn ki trouv sa pou riy li. Zot pou dir, ‘Sa dimounn-la finn koumans enn travay me li pa finn kapav fini li.’ Kan enn lerwa al lager kont enn lot lerwa, eski li pa dabor asize, pran konsey pou gete si avek so dis mil zom li kapav al lager kont so lennmi ki ena vin-mil? Si li pa kapav, letan lot-la ankor lwin, li avoy enn delegasion pou fer lape. Alors, si zot pa renons tou seki zot posede, zot pa pou kapav vinn mo disip. Disel enn bon kiksoz; me si li perdi so gou, kouma pou kapav re-donn li so gou? Lerla li pa bon ni pou later, ni pou fimie e bizin zet li. Ekout bien, seki ena zorey pou tande. Boukou komi tax ek bann peser koste pre ar Zezi pou ekout li. Bann Farizien ek bann dokter lalwa mirmire e zot dir, “Li frekant bann peser, li manze-bwar ar zot.” Lerla Zezi rakont sa parabol-la, “Kisann-la parmi zot, si li ena san mouton, e ki li perdi enn ladan, li pa pou kit katrovin-diznef-la dan dezer, pou al rod sa sel mouton ki finn perdi-la, ziska ki li retrouv li? E kan li finn trouv li, li met li lor so zepol avek enn gran kontantman. E letan li rant lakaz li apel tou so bann kamarad e so bann vwazin, li dir zot, ‘Vinn partaz mo lazwa parski mo finn retrouv mo mouton ki ti perdi.’ Mo dir zot, pou ena boukou plis lazwa dan lesiel pou enn sel peser ki finn repanti, ki pou katrovin-diznef dimounn ki zis, ki pa bizin repanti.” “Si enn madam ki ena dis pies larzan perdi enn, eski li pa pou alim enn lalanp, balie lakaz e rode, rode mem, ziska ki li retrouv sa pies-la? Kan li finn retrouv li, li apel so bann kamarad ek bann vwazin, e li dir zot, ‘Vinn partaz mo lazwa parski mo finn retrouv pies ki mo ti finn perdi.’ Li pou parey pou bann anz Bondie ki pou dan lazwa akoz enn peser ki finn repanti.” Zezi dir, “Enn papa ti ena de garson. Pli zenn-la dir ar so papa, ‘Papa, donn mwa mo par leritaz.’ Li partaz so dibien ant zot de. Pli zenn-la pa perdi letan. Li ramas tou so bann zafer e li al bien-bien lwin dan enn lot pei. Laba li amenn enn lavi dezord e gaspiy tou so dibien. Letan li finn fini depans tou so kas, enn gran lafaminn tom lor pei-la antie. Lerla li koumans santi lamizer. Li al rod travay kot enn abitan landrwa, ki ti avoy li nouri koson dan park. Li ti anvi manz gous ki bann koson ti pe manze, me sa osi personn pa ti donn li. Li koumans reflesi e li dir, ‘Ki kantite manze anplis bann travayer mo papa ena, e mwa mo pe mordefin isi! Mo pou leve, mo pou al kot mo papa, mo pou dir li, ‘Papa, mo finn fer pese kont lesiel e kont twa; mo nepli dign ki to apel mwa to garson; tret mwa kouma enn to bann travayer.’ Li leve, li al kot so papa. Me letan li ti ankor bien lwin so papa trouv li pe vini. So leker fermal. Li galoupe, li ser so garson dan so lebra e li anbras li. Garson-la dir li, ‘Papa, mo finn fer pese kont lesiel e kont twa; mo nepli dign ki to apel mwa to garson.’ Me papa-la dir ar so bann serviter, ‘Degaze, amenn pli bon kostim, abiy li, met enn bag dan so ledwa, met soulie dan so lipie. Amenn enn ti toro bien gra, touy li; anou manze, anou fer fet, parski mo garson ki ti mor finn regagn lavi; li ti perdi, mo finn retrouv li.’ Fet koumanse. Pli gran garson-la ti dan karo. Letan li pe retourne e ki li finn ariv pre ar lakaz, li tann lamizik ek danse. Li apel enn serviter pou kone ki pe arive. Serviter-la reponn, ‘To frer finn retourne e to papa finn touy sa vo bien gra la, parski li finn retourne an-bonn-sante.’ Garson-la pik enn koler e li refiz rantre. So papa sorti vinn get li, e sipliy li, me li reponn so papa, ‘Get sa, komie banane mo finn servi twa, zame mo finn dezobeir to lord; e zame to finn donn mwa enn ti kabri pou mo fer fet ar mo bann kamarad. Me ler to garson retourne, apre ki li finn manz tou to dibien ar bann fam move lavi, to trouv mwayin touy sa vo bien gra la pou li.’ Alor papa-la dir li, ‘Mo piti, twa, to touzour la ar mwa, e tou seki pou mwa, pou twa; me nou ti bizin fer fet ek amize, parski to frer ki ti finn mor, li finn regagn lavi; li ti perdi, ala nou finn retrouv li.’ ” Zezi dir ar so bann disip, “Enn boug ris ti anplway enn sef kontab. Li ti gagn bann informasion ki so sef kontab ti pe gaspiy so dibien. Li ti apel li e li ti dir li, ‘Ki mo pe tande lor twa? Fer mwa enn rapor lor to administrasion parski to nepli kapav kontign travay pou mwa.’ Sef-la dir ar limem, ‘Ki mo pou fer aster? Mo patron pe donn mwa demision. Pou piose mo pena lafors, dimann sarite mo onte. Mo kone ki mo bizin fer pou ki dimounn kontign get mwa kan mo perdi mo travay.’ Enn par enn, li apel tou bann dimounn ki ti dwa so patron. Li dir ar premie-la, ‘Komie to dwa mo patron?’ Li reponn, ‘San drom delwil zoliv.’ Kontab la dir li, ‘Degaze pran to karne, asize, mark sinkant.’ Apre li dir ar enn lot, ‘Twa, komie to dwa?’ Li reponn, ‘San bal dible.’ Li dir ar sann-la, ‘Pran to karne, mark katrovin.’ Patron-la felisit sef kontab malonet la parski li ti debrouyar. Bann zanfan lemond pli debrouyar ki zanfan lalimier kan ena pou dres papie pou tras zot lavi. Mo dir zot, fer kamarad ar dibien ki ena lor later, koumsa kan dibien-la pou nepli existe, zot pou gagn plas dan lakaz eternel. Seki fidel dan ti kiksoz, pou fidel dan seki gran; e seki malonet dan ti kiksoz, pou malonet dan seki gran. Si to pa finn fidel ar dibien ki ena lor later, kisann-la pou konfie twa dibien ki dan lesiel? E si to pa finn fidel ar dibien ki pa pou twa, kisann-la pou konfie twa to prop dibien? Enn serviter pa kapav servi de met; swa li ayir enn e li kontan lot-la, swa li devwe pou enn e li mepriz lot-la. To pa kapav servi Bondie ek dibien lor later.” Letan bann Farizien ki ti bien kontan larzan tann sa, zot boufonn Zezi. Zezi dir zot, “Zot fer krwar ki zot ena lazistis zis pou lizie dimounn, me Bondie konn zot leker. Seki ena valer pou dimounn, enn abominasion pou Bondie. Lalwa ek profet finn fer lotorite ziska Zan; apre sa, pe proklam Bonn Nouvel Rwayom Bondie e sakenn pe fors limem pou rant ladan. Me li pli fasil ki later ek lesiel disparet, ki enn ti pwin dan lalwa disparet. Enn zom ki divors ar so fam e marye ar enn lot, komet adilter e seki marye ar enn fam ki finn kit so mari, komet adilter osi. Ti ena enn zom ris, ki ti met bel-bel kostim, bien-bien ser. Li ti pe viv dan lix e toulezour li ti pe fer gran-gran fet. Ti ena enn pov malere ki ti apel Lazar. Li ti pe asize devan laport ris-la, e so lekor ti kouver ar lagal. Li ti pou bien kontan manz bann restan ki tom anba latab. Pli terib ankor, bann lisien ti vinn lis so lagal. Arive ki pov malere-la mor e bann anz amenn li pre kot Abraam. Ris-la osi mor e zot anter li. Dan lemond bann mor letan li ti pe soufer, li lev so lizie, li trouv Abraam delwin e pre ar li, ti ena Lazar. Li kriye, ‘Papa Abraam, papa Abraam, pitie mwa. Avoy Lazar tranp so bout ledwa dan dilo pou rafresi mo lalang parski mo pe soufer lagoni dan sa laflam-la.’ Me Abraam dir, ‘Mo garson, rapel bien ki dan to lavi lor later to ti dan bien, alor ki Lazar ti gagn boukou maler; me aster-la li dan bien isi, e twa to dan soufrans. Anplis, ant nou finn met enn gran separasion pou anpes zot vinn kot nou e nou al kot zot.’ Ris-la dir li, ‘Mo sipliy twa, papa Abraam, avoy Lazar lakaz mo papa, parski mo ena sink frer laba. Averti zot pou ki zot osi, zot pa vinn dan sa dife-la.’ Me Abraam reponn li, ‘Zot ena Moiz e bann profet, les zot ekout bann-la.’ Li reponn, ‘Non, papa Abraam, me si enn parmi bann mor al get zot, zot pou repanti.’ Abraam dir li, ‘Si zot pa ekout Moiz e bann profet, zot pa pou sanze, mem si enn mor ki finn resisite al get zot.’ ” Zezi dir ar so bann disip, “Li normal ki ena obstak ki fer dimounn tonbe, me li bien malere pou sa dimounn ki fer lezot tonbe la! Li preferab li atas enn gro ros dan so likou e li zet li dan lamer olie ki li fer enn sel tipti tonbe. Alor, fer bien atansion. Si to frer fer pese, koriz li, e si li repanti, pardonn li. Si set fwa dan enn zourne, li finn fer pese kont twa e set fwa li revinn get twa, e li dir twa, ‘Mo rekonet mo tor’, to bizin pardonn li.” Bann zapot dir Lesegner, “Ogmant nou lafwa.” Lesegner reponn, “Si zot ena lafwa groser enn lagrin moutard, zot nek ena pou dir sa pie-la, ‘Bouze, al plant twa dan lamer,’ li pou obeir zot.” “Si enn parmi zot ena enn serviter ki pe travay dan karo oubien ki pe gardien troupo, eski kan li sorti dan karo li revini, zot pou dir li, ‘Degaze vinn atab’? Plito zot pou dir li, ‘Prepar kiksoz pou mo manze, sanz to linz, vinn servi mwa ziska ki mo fini manze; apre sa, twa, to ava manze.’ Eski nou pou remersie enn serviter parski li finn fer seki li bizin fer? Zot osi parey. Letan zot fini fer seki finn komann zot, dir, ‘Nou bann sinp serviter, nou nek finn fer seki ti bizin fer.’ ” Letan Zezi ti lor larout pou al Zerizalem, li ti pas ant Samari ek Galile. Kouma li ti rant dan enn vilaz li ti zwenn dis lepre. Zot res lwin ar li e zot kriye for-for, “Zezi! Met! Pitie nou.” Ler li trouv zot, li dir zot, “Al montre zot devan bann pret.” Zot ti ankor dan sime, ler zot finn gagn zot pirifikasion. Letan enn parmi zot finn remarke ki li finn geri, li retourne e li glorifie Bondie avek tou so leker. Li tom azenou dan lipie Zezi e li remersie li. Li ti enn Samaritin. Lerla Zezi dir, “Pa dis ki finn pirifie? Lezot nef-la kote? Apar sa etranze-la, personn pa ti pans retourne pou glorifie Bondie?” Lerla Zezi dir li, “Leve, kontign to sime, to lafwa finn sov twa.” Bann Farizien dimann Zezi, “Kan Rwayom Bondie pou vini?” Li reponn zot, “Rwayom Bondie pa pou vinn dan enn fason kler. Pa pou kapav dir, ‘Gete, ala li la!’ oubien, ‘Ala li laba!’ Krwar mwa, Rwayom Bondie parmi zot.” Lerla li dir so bann disip, “Zour pe vini kot zot pou anvi trouv Garson Limanite, e zot pa pou trouv li. Dimounn pou dir zot, ‘Isi sa! Laba sa!’ Pa ale, pa swiv zot. Parey kouma zekler eklat enn kout dan lesiel e ekler lesiel depi enn kote ziska enn lot kote, koumsa mem zour Garson Limanite pou ete. Me avan, li bizin soufer boukou e sa zenerasion-la pou rezet li. Zour Garson Limanite pou parey kouma dan lepok Noe. Dimounn ti pe manze-bwar, ti pe marye, ti pe donn zot tifi an maryaz, ziska zour ki Noe rant dan so bato; lerla inondasion vini, detrir partou kote. Mem zafer ti pase lepok Lot. Zot ti pe manze, bwar, aste, vande, plante, konstrir; me zour Lot sorti Sodom li ale, dife ek souf tom depi lesiel e detrir zot tou. Koumsa mem pou ete zour Garson Limanite pou revel limem. Sa zour-la, seki lor so teras, fode pa li desann dan so lakaz pou repran so bann zafer; parey pou seki dan karo, fode pa li retourn par deryer. Rapel seki ti ariv fam Lot. Seki rod sov so lavi pou perdi li, seki perdi so lavi pou sov li. Mo dir zot, sa lanwit la pou ena de lor mem lili; pou pran enn, pou kit enn. Pou ena de fam ki pe travay ansam; pou pran enn, pou kit enn. Pou ena de zom dan karo; pou pran enn, pou kit enn.” Zot dir li, “Kot sa pou arive?” Li dir zot, “Kot ena kadav, lamem votour rasanble.” Zezi rakont enn parabol pou montre ki bizin touletan priye san dekouraze. Li dir, “Dan enn lavil ti ena enn ziz ki pa ti per Bondie e ki pa ti ena respe pou personn. Ti ena enn vev dan sa lavil-la ki ti vinn get ziz-la souvan pou dimann li, ‘Donn mwa enn zizman favorab kont mo adverser.’ Pandan enn bon letan ziz-la refize; me apre li dir ar limem, ‘Mem si mo pa per Bondie e mo pena respe pou personn, mo pou donn sa vev-la rezon parski li fatig mo latet; sinon li pou minn mo lavi afors li vinn devan mo laport toulezour.’ ” Lesegner dir, “Ekout bien ki sa move ziz-la finn dir. Eski Bondie pa pou rann lazistis bann ki li finn swazir e ki pe sipliy li lanwit-lizour? Eski li pou tarde pou sekour zot? Mo dir zot, li pou donn zot lazistis san tarde. Kan Garson Limanite vini, eski li pou trouv lafwa lor later?” Zezi ti rakont sa parabol-la pou dimounn ki krwar zot drwat e ki ena mepri pou lezot. “De dimounn rant dan Tanp pou priye; enn ladan ti enn Farizien, lot-la ti enn komi tax. Farizien-la ti pe dibout enn kote, apar, e li ti pe priye dan so leker, ‘Bondie, mo remersie twa ki mo pa kouma bann lezot dimounn, voler, explwater, adilter, e sirtou pa kouma sa komi tax-la. Mo gard karem de fwa par semenn, mo donn enn diziem reveni ki mo gagne.’ Me komi tax-la, ti pe dibout net par deryer e li pa ti mem oze lev so lizie pou get lesiel. Li ti pe tap so pwatrinn e li ti pe dir, ‘Bondie, pitie mwa parski mo enn peser!’ Mo dir zot, kan sa dimounn-la rant so lakaz li pou gagn pardon Bondie, me pa lot-la. Seki rod grander pou abese, e seki abese pou gagn grander.” Dimounn ti pe amenn bann ti-baba pou ki Zezi beni zot. Kan bann disip trouv sa, zot koz brit ar sa bann dimounn-la. Me Zezi apel zot e li dir, “Les bann zanfan vinn ar mwa. Pa anpes zot, parski Rwayom Bondie pou tou dimounn ki parey kouma zot. Laverite, mo dir zot, seki pa resevwar Rwayom Bondie kouma enn zanfan pa pou kapav rant ladan.” Enn sef Zwif dimann Zezi, “Bon Met, ki mo bizin fer pou gagn lavi eternel?” Zezi dir li, “Kifer to apel mwa bon? Personn pa bon, zis Bondie tousel ki bon. To bien konn bann komannman: Pa komet ladilter, pa touye, pa kokin, pa fer fos temwaniaz, onor to papa ek to mama.” Sef Zwif-la dir, “Depi mo zenes mo finn gard tousala.” Letan Zezi tann sa, li dir li, “To mank enn kiksoz. Vann tou seki to ena, donn bann pov, e to pou ena enn trezor dan lesiel; apre sa vini, swiv mwa.” Me letan li tann sa, so figir sanze, parski li ti ena boukou rises. Zezi trouv li bien tris, alor li dir, “Pa fasil pou bann ris rant dan Rwayom Bondie! Li pli fasil pou enn samo pas par trou zegwi ki enn ris rant dan Rwayom Bondie.” Bann ki ti pe tann sa demande, “Abe kisann-la kapav sove?” Me li dir zot, “Seki inposib pou bann imin, li posib pou Bondie.” Lerla Pier dir li, “Nou finn kit tou seki nou posede pou swiv twa.” Zezi dir zot, “Laverite, laverite, mo dir zot, si pou Rwayom Bondie enn dimounn kit so lakaz, so fam, so bann frer, so fami, so zanfan, li pou gagn boukou plis dan sa lavi-la, dan lot lavi e li pou gagn lavi eternel.” Zezi pran Ledouz avek li e li dir zot, “Ekout mwa, nou pe al Zerizalem, e tou seki finn profetize lor Garson Limanite pou realize. Pou livre li ar bann payin, dimounn pou boufonn li, pou insilte li ek pou kras lor li. Zot pou fwet li, ek touy li, e lor trwaziem zour li pou resisite.” Me bann disip pa konpran seki li ti pe dir. So parol ti enn mister pou zot; zot pa ti pe reisi kapte seki li ti pe dir. Letan li koste pre ar Zeriko, ti ena enn aveg ki ti pe asiz dan bor sime, ti pe dimann sarite. Letan li tann lafoul pe pase, li dimann ki pe arive. Zot dir li, “Zezi Nazaret pe pase.” Li kriye bien for, “Zezi, Garson David, pitie mwa!” Bann ki devan kriy ar li pou ki li res trankil, me li kriye ankor pli for, “Garson David, pitie mwa!” Zezi arete, li donn lord pou amenn aveg-la; kan li finn koste, Zezi dimann li, “Ki to oule mo fer pou twa?” Li reponn, “Segner, fer mwa trouv kler.” Zezi dir li, “Trouv kler. To lafwa finn sov twa.” Toutswit li trouv kler, li swiv Zezi, e li glorifie Bondie. Tou dimounn ki ti trouv sa, ti glorifie Bondie. Zezi rant dan Zeriko e li travers lavil-la. Ti ena enn dimounn ki ti apel Zase; li ti enn sef komi tax e li ti bien ris. Li ti anvi trouv Zezi, me akoz lafoul li pa ti kapav parski li ti tro kourt. Alors li ti galoup devan, li ti mont lor enn gran pie sikomor pou trouv Zezi parski li ti pre pou pas par la. Letan Zezi ariv pre sa plas-la, li lev lizie, li get Zase, e li dir li, “Zase, degaze desann; mo bizin vinn res kot twa zordi.” Zase degaze desann e resevwar Zezi dan lazwa. Tou bann ki ti trouv sa mirmire e zot dir, “Ala li finn al res kot enn dimounn ki fer pese.” Zase leve e li dir ar Lesegner, “Ekout mwa, Segner. Mo pou donn lamwatie mo dibien bann pov; e si mo finn kokin dimounn, mo pou rann zot kat fwa plis.” Lerla Zezi dir li, “Zordi mem, delivrans finn rant dan sa lakaz-la parski li osi, li enn zanfan Abraam. Parski Garson Limanite inn vinn rod seki finn perdi pou sov zot.” Letan Zezi ti koste ar Zerizalem, li rakont enn lot parabol pou bann ki ti pe ekout li parski zot ti panse ki Rwayom Bondie ti pre pou manifeste limem. Alors Zezi dir zot, “Enn zom ki sorti dan enn gran fami al dan enn lot pei pou gagn tit lerwa e li ti pou retourne apre sa. Li apel dis so bann serviter, e li donn zot dis pies an-or, ki ena gran valer. Li dir zot, ‘Fer roulman ar sa ziska mo revini.’ Me bann dimounn dan so prop pei ti deteste li. Zot avoy enn delegasion dir, ‘Nou pale li vinn nou lerwa.’ Me apre ki li finn gagn so tit lerwa, li retourne. Li fer apel so bann serviter pou li kone ki profi zot ti finn fer ar larzan ki li ti finn donn zot. Premie-la vinn devan li, e li dir, ‘Segner, to pies lor finn raport dis fwa plis.’ Lerwa dir li, ‘Felisitasion, bon serviter! Parski to finn serye dan enn ti zafer, mo pou donn twa lotorite lor dis lavil.’ Deziem-la koste, li dir, ‘Segner, to pies lor finn raport sink fwa plis.’ Lerwa-la dir li osi, ‘Twa, mo pou donn twa sink lavil pou okipe.’ Enn lot vini ankor e li dir, ‘Segner, ala ou pies lor, ki mo finn kasiet dan mouswar. Mo ti per ou parski ou enn dimounn sever; ou pran la kot ou pa finn met nanye ek ou rekolte kot ou pa finn seme.’ Lerwa-la dir li, ‘Serviter move, mo pou kondann twa par to prop parol. To ti kone mo sever, mo pran kot mo pa finn met nanye e mo rekolte kot mo pa finn seme. Alors kifer to pa finn met mo larzan labank; letan mo retourne mo ti'a repran li ar so lintere?’ Apre sa li dir dimounn ki ti la, ‘Aras so larzan, donn sa lot-la ki ena dis pies lor.’ Zot dir li, ‘Segner, abe li ena deza dis pies!’ ‘Ala mo dir zot, seki ena pou gagn plis ankor, me seki pena, pou perdi tigit ki li ena. Aster-la, mo bann lennmi, ki pa ti oule mo vinn zot lerwa, amenn zot isi e eliminn zot devan mwa.’ ” Letan li fini koze, Zezi mars devan zot pou mont Zerizalem. Letan li ariv pre ar vilaz Betfaze ek Betani, kot enn kolinn ki ti apel kolinn Pie Zoliv, li avoy de disip e li dir zot, “Al dan vilaz ki lot kote. Letan zot rant laba, zot pou trouv enn ti bourik atase e ki zame personn pa finn monte. Larg li, amenn li isi. Si kikenn dimann zot, ‘Kifer zot finn larg sa ti bourik-la?’, zot va reponn, ‘Lesegner bizin li.’ ” Toule-de disip ale e zot trouv tou parey kouma Zezi finn dir zot. Letan zot pe larg ti bourik-la, so bann proprieter vinn dimande, “Kifer zot pe larg sa ti bourik-la?” Zot reponn, “Lesegner bizin li.” Zot amenn bourik-la ar Zezi; zot zet zot linz lor li e zot fer Zezi mont lor li. Lor sime, dimounn tal zot linz devan li. Letan Zezi pe koste ar Zerizalem, dan ladesant kolinn Pie Zoliv, lafoul bann disip ti ranpli ar lazwa; zot koumans sante, loue Bondie, pou bann mirak ki zot ti finn trouve. Zot ti pe dir, “Li finn beni Lerwa ki pe vinn lor nom Lesegner! Lape dan lesiel e laglwar pou Bondie Treo!” De-trwa Farizien ki ti dan lafoul dir Zezi, “Met, dir to bann disip res trankil.” Zezi reponn, “Ala mo dir zot, si bann-la res trankil, ros ki pou kriye.” Kan Zezi ariv pre ar Zerizalem, li plore kan li trouv lavil-la. Li dir, “Si selman zordizour to ti kone ki kapav donn twa lape; me aster-la, tou kasiet devan to lizie. Me bann zour pou vini kot to bann lennmi pou antour twa ar enn miray, pou anserkle twa e pou atak twa partou kote. Zot pou kraz twa ek tou to zanfan, e pa pou les enn sel ros dibout, parski to pa finn rekonet Bondie kan li ti vinn vizit twa.” Zezi rant dan Tanp e pous bann marsan. Li dir zot, “Dan liv finn ekrir, ‘Mo lakaz enn lakaz lapriyer.’ Me zot, zot finn fer li vinn enn kavern voler.” Toulezour Zezi ti pe ansegne dan Tanp. Bann sef pret, bann dokter lalwa ek dimounn bien inflian ti pe rod touy li. Me zot pa ti kone kouma pou fer sa, parski tou lepep ti pe ekout li avek boukou atansion. Enn zour, Zezi ti pe ansegn lepep dan Tanp e li ti pe anons Bonn Nouvel. Bann sef pret, bann dokter lalwa ek bann ansien vini tom lor li. Zot dimann li, “Dir nou, dapre ki lord to pe fer seki to pe fer la, kisann-la finn donn twa sa lotorite-la? Zezi reponn zot, “Mo pou poz zot enn kestion mwa osi. Dir mwa, eski batem Zan sorti depi lesiel ou bien ar bann imin?” Zot koumans diskite e zot dir ant zotmem, “Si nou dir depi lesiel, li pou dir nou, abe kifer nou pa finn krwar dan li? Me si nou dir ar bann imin, tou lepep pou avoy nou kout ros, parski zot krwar ki Zan ti enn profet.” Alor zot reponn, “Nou pa kone kot li sorti.” Zezi dir zot, “Mwa osi mo pa pou dir zot kot mo finn gagn lotorite pou fer seki mo pe fer.” Zezi rakont lepep sa parabol-la: “Enn dimounn ti plant enn karo rezin, li ti lwe li ar bann planter e li parti pou enn bon bout letan. Kan ler finn vini, li avoy so serviter al get bann planter-la pou pran so par lor seki karo rezin-la ti raporte. Bann planter-la bat li, pous li e li retourn lame vid. Proprieter karo avoy enn lot serviter; bann planter-la bat li osi, insilte li e li retourn san nanye. Li kontigne mem, li avoy enn trwaziem. Sa enn-la osi zot bien bles li e zot zet li deor. Lerla proprieter karo dir, ‘Ki mo pou fer? Mo pou avoy mo garson ki mo bien kontan; mo espere zot pou respekte li.’ Letan bann planter-la trouv garson-la vini, zot konplote e zot dir ant zotmem, ‘Limem eritie; anou touy li e so leritaz pou vinn pou nou.’ Zot pous li andeor karo e zot touy li. Ki proprieter karo-la pou fer ar zot? Limem pou vini, li pou touy zot enn par enn e li pou donn so karo lot dimounn.” Letan zot tann sa, zot dir, “Pena sime!” Li get zot, li dir zot, “Ki vedir sa parol Lekritir-la: ‘Ros ki bann mason finn rezete, Samem finn vinn lakle prinsipal’? Tou dimounn ki tom lor sa ros-la pou kas an morso e kan ros-la tom lor kikenn, ros-la pou kraz li.” Bann dokter lalwa, bann sef pret ti pe rod trap li lerla mem parski zot ti kone ki li ti finn rakont sa parabol-la kont zot; me zot pa oze akoz lafoul. Alors bann-la vey tou so mouvman; zot avoy bann espion ki deklar onet, pou trap Zezi kan li pou dir enn kiksoz ki pa korek. Koumsa zot pou kapav aret li e met li dan lame gouverner. Alors zot poz li enn kestion, “Met, nou kone ki to parol e to lansegnman zot bien drwat; to pa get dapre figir dimounn, me to ansegn sime Bondie dapre laverite. Dapre lalwa, eski nou bizin pey tax Sezar ou non?” Zezi ti konn zot lespri rize. Li dir zot, “Montre mwa enn pies larzan. Ki figir ena lor la e ki finn ekrir?” Zot reponn, “Sezar.” Zezi dir zot, “Abe rann Sezar seki pou Sezar, e Bondie seki pou Bondie.” Kouma zot pa ti kapav may li dan lak ar so prop parol devan lepep, zot ti res trankil. So bann parol ti inpresionn zot. Enn-de Sadiseen vinn get Zezi. (Zot ti dir ki pena rezireksion.) Alors zot poz Zezi enn kestion. Zot dir li, “Met, Moiz finn ekrir, ‘Si frer enn boug mor e pa les okenn zanfan e ki so fam ankor vivan, sa boug-la bizin pran fam so frer pou donn so frer enn desandans.’ Ti ena set frer. Premie-la marye. Li mor san ena okenn zanfan. Li parey pou deziem-la. Trwaziem-la osi marye ar li, e toule-set ti marye ar li enn apre lot e zot inn mor san gagn zanfan. Alafin fam-la osi ti mor. Zour larezireksion, kisann-la so mari parski toule-set ti marye ar li?” Zezi reponn zot, “Lor later dimounn marye e donn zot tifi an maryaz. Tou seki finn zize dign pou larezireksion bann mor, e pou viv dan lemond ki pou vini, pa pou marye e pa pou donn zot tifi an-maryaz. Zot pa kapav mor ankor parski zot kouma bann anz e zot finn vinn bann zanfan Bondie parski zot bann zanfan larezireksion. Moiz limem finn fer kone ki bann mor pou leve parski dan sa pasaz lor bwison ardan la, li dir, ‘Lesegner Bondie Abraam, Bondie Izaak, Bondie Zakob’. Bondie, pa Bondie bann mor me Bondie bann vivan. Pou li, tou dimounn vivan.” De-trwa dokter lalwa ki ti la dir, “Met, to finn bien koze.” Lerla zot pa oze poz li okenn kestion ankor. Zezi dir zot, “Kouma li posib ki zot dir ki Lekris Garson David? Parski David limem dir dan Liv Psom, ‘Lesegner dir ar mo Segner, asiz adrwat mo tronn, ziska ki mo servi to bann lennmi kouma enn marspie anba to lipie.’ Si David apel Lekris Segner, kouma Lekris kapav so garson?” Letan tou lepep pe ekout li, Zezi dir so bann disip, “Mefie zot bann dokter lalwa ki kontan pavane avek gran-gran rob e ki kontan kan dimounn salie zot dan bann plas piblik; dan sinagog, zot swazir bann plas kot tou dimounn pou trouv zot e dan bann dine, zot rod bann plas doner. Zot devor ti-kas ki bann vev finn ramase e zot fer long-long lapriyer pou ki tou dimounn trouv zot. Zot pou gagn pli gran kondanasion. Zezi get partou e li trouv bann dimounn ris ki ti pe met larzan dan tron. Anmemtan, li trouv enn pov vev ki met de pies larzan. Lerla li dir zot, “Laverite, mo dir zot, sa pov vev-la finn met plis ki zot tou. Zot tou zot finn met seki zot ti ena anplis me li, li finn donn tou seki li ti ena pou viv.” Devan bann dimounn ki ti pe admir bote Tanp ek so bann ros, Zezi dir, “Enn zour pou vini, kot tou seki zot pe trouve la, pou devir anba-lao. Pa pou res enn sel ros poze lor enn lot.” Lerla zot dimann Zezi, “Met, kan tousala pou arive? Ki sign pou fer nou kone ki sa pe vini?” “Pran kont, pa les dimounn anbet zot. Parski boukou dimounn pou vinn lor mo nom e zot pou dir, ‘Momem sa.’ ‘Ler finn arive’. Pa swiv zot. Kan zot pou tann bann lager ek bann revolision, pa gagn per; fode ki tousala arive dabor, me lafin pa pou toutswit.” Apre Zezi dir, “Pei pou lev kont pei, rwayom kont rwayom. Pou ena bann tranbleman-de-ter terib ek lafaminn dan boukou landrwa ek bann lepidemi; pou ena osi bann gran sign terifian dan lesiel. Me avan tousala arive, bann-la pou trap zot, pou persekit zot, pou livre zot dan sinagog e pou met zot dan prizon; zot pou pas an zizman devan bann lerwa ek bann gouverner akoz mo nom. Sa pou enn lokazion pou zot donn zot temwaniaz. Met dan zot latet ki zot pena pou prepar zot defans. Parski mo pou donn zot bann parol e enn sazes ki okenn adverser pa pou kapav reponn ek kontredir. Zot prop papa, zot prop mama, zot prop frer, zot bann konesans ek zot bann kamarad pou livre zot, e plizir parmi zot pou kondane amor. Tou dimounn pou ayir zot akoz mo nom. Me pa enn sel brin seve lor zot latet pou perdi. Tini ferm par zot perseverans, zot pou gagn lavi.” “Kan zot pou trouv bann larme anserkle Zerizalem, lerla zot pou kone ki so lafin finn arive. Lerla dimounn Zide pou bizin sove al lor montagn, dimounn dan lavil pou bizin al lwin, e seki dan lakanpagn fode pa rant dan lavil. Parski samem bann zour zizman, e tou seki deklare dan lekritir pou realize. Maler pou bann fam ansint e pou bann seki pe donn baba bwar dan sa peryod-la; pou ena enn gran detres lor later e lakoler Bondie pou abat lor lepep. Bann-la pou transpers zot ar pwint lepe, pou fer zot prizonie parmi bann lezot pep; sa bann pep-la pou pil lor Zerizalem ziska ki letan ki finn akord zot termine. Pou ena bann sign dan soley, lalinn ek zetwal; lor later bann pei pou viv dan langwas; zot pa pou kone ki pou fer letan zot tann tapaz violan lamer e fraka bann vag. Dimounn pou tom sek telman zot gagn per letan zot mazinn seki pe vinn lor later; bann pwisans dan lesiel pou tranble. Lerla zot pou trouv Garson Limanite sorti dan niaz, desann avek pwisans ek tou so laglwar. Kan tousala pou arive, drese, lev latet parski zot delivrans pe aprose.” Zezi rakont zot enn parabol, “Get enn pie fig ek lezot pie; letan so bann fey pe sorti, zot kone ki lete pe vini. Li parey kan zot pou trouv sa bann evennman-la arive; zot kone ki Rwayom Bondie pe aprose. Laverite, laverite mo dir zot, sa zenerasion-la pa pou disparet avan ki tousala arive. Lesiel ek later pou disparet me mo parol pa pou disparet.” “Pran kont pou ki zot leker pa angourdi par toutsort kalite kiksoz, par labwason ek bann difikilte lavi, sinon Gran Zour-la pou tom lor zot san ki zot atann, parey kouma enn piez; li pou tom lor tou dimounn ki lor later. Gard zot lizie ouver, priye pou ki zot gagn ase lafors pou sap dan bann maler ki pou arive, pou zot kapav dibout e prezant zot devan Garson Limanite.” Dan lazourne, Zezi ti pe ansegn dan Tanp me aswar, li kit lavil e li pas lanwit lor kolinn ki ti apel Kolinn Pie Zoliv. Antie lepep ti vinn dan Tanp boner gramatin pou ekout li koze. Fet dipin san levin, ki ti apel osi fet Pak, ti pe aprose. Bann sef pret ek bann dokter lalwa ti pe rod enn sime pou touy Zezi me zot ti per lepep. Letansa, Satan ti rant dan Zida ki ti apel Iskaryot, ki ti enn parmi Ledouz. Zida sorti pou al zwenn bann sef pret ek bann sef gard pou dir zot ki manier li pou kapav livre zot Zezi. Zot ti bien kontan e zot ti promet li enn som larzan. Zida tom dakor e li rod enn bon lokazion pou livre zot Zezi san ki lafoul kone. Fet Pak arive e sa zour-la bizin fer sakrifis agno. Alor Zezi avoy Pier ek Zan e li rekomann zot, “Al prepar nou repa Pak pou ki nou kapav manze.” Zot dir li, “Kot to ti anvi nou al prepar sa?” Li dir zot, “Get sa, kan zot pou rant dan lavil, enn boug ki pe sarye enn damzann dilo pou vinn zwenn zot. Swiv li ziska kot li pou rantre. Dir proprieter lakaz-la, ‘Nou Met dir twa, kot lasal kot mo pou kapav manz repa Pak avek mo bann disip?’ Li pou montre zot lor letaz enn gran lasal ki finn fini meble. Fer bann preparasion laba.” Zot ale e zot trouv tou dapre seki li ti finn dir e zot koumans prepar repa Pak. Kan ler ti finn arive, Zezi asiz atab avek so bann zapot. Li dir zot, “Mo finn vremem swete manz sa repa Pak la avek zot avan mo al konn lasoufrans. Mo dir zot sa parski mo pa pou pran sa repa-la ankor ziska ki tou so vre sans akonpli dan Rwayom Bondie.” Zezi pran enn koup, li rann gras e li dir, “Pran sa e partaz ant zot. Mo pe dir zot depi aster-la mem, mo pa pou bwar ankor fri karo rezin ziska ki Rwayom Bondie vini.” Apre li pran dipin, li rann gras, li kas li e li donn zot. Li dir, “Samem mo lekor, ki mo donn pou zot. Fer sa, an mo memwar.” Li fer parey ar koup-la apre ki finn fini manze, li dir, “Samem koup nouvo lalians ki mo fer par mo disan. Mo vers sa pou zot. Me gete, lame sa dimounn ki pou trayir mwa la lor latab avek mwa. Wi, Garson Limanite pe ale parey kouma finn dir, me maler sa dimounn ki pe livre li la. Lerla zot koumans poz kestion kisann-la parmi zot pou kapav fer sa. Diskision leve ant zot pou gete kisann-la pli gran parmi zot. Alors Zezi dir zot, “Lerwa bann pei diriz zot sitwayen e montre zot lotorite. Apel zot ‘bienfeter’. Pou zot, fode pa li koumsa. Pli gran parmi zot bizin azir kouma enn pli zenn, e seki komande bizin azir kouma enn serviter. Parski kisann-la pli gran? Seki atab oubien seki pe servi? Pa plito seki atab la? Me mwa mo parmi zot kouma sa kikenn ki pe servi la. Zot finn touletan ar mwa dan mo bann difikilte, akoz samem mo pou donn zot pouvwar lor Rwayom parey kouma mo Papa finn donn mwa, pou ki zot manze ek bwar lor mem latab ar mwa dan mo Rwayom e ki zot siez lor tronn pou ziz douz tribi Izrael.” Simon, Simon, gete, Satan finn demande pou pas zot tou dan tami parey kouma fer ar dible. Mo finn priye pou twa pou ki to pa perdi lafwa. Twa, kan to pou retourn ar mwa, fortifie to bann frer. Pier dir li, “Segner, mo finn pare pou al dan prizon ar twa e mor pou twa.” Zezi reponn li, “Mo dir twa, Pier, avan ki kok fini sante zordi, to pou finn renie mwa trwa fwa.” Li dir zot, “Kan mo ti avoy zot an-mision san portmone, san sak e san sandalet, eski zot ti mank kiksoz?” Zot reponn, “Nanye”. Li dir zot, “Aster, seki ena enn portmone pran li e seki ena enn sak, fer parey; seki pena lepe, vann so manto pou aste enn. Parski mo dir zot, fode ki seki finn ekrir lor mwa realize: ‘Finn kont li parmi bann malfeter’. Anfet seki finn ekrir lor mwa pou arive.” Zot dir li, “Segner, nou ena de lepe.” Li reponn zot, “Li pou ase.” Zezi sorti pou al lor kolinn Pie Zoliv kouma li abitie. So bann disip swiv li. Letan li ariv laba, li dir zot, “Priye pou pa rant dan lak tantasion.” Apre sa, li al inpe pli lwin, distans enn kout ros, li tom azenou e li koumans priye. Li dir, “Papa, si to kapav, tir sa koup-la devan mwa; me pa fer mo volonte, me to volonte.” Enn anz paret devan li pou donn li lafors. Dan so lagoni, Zezi priye avek plis ferver. So transpirasion parey kouma gout disan tom lor later. Ler li fini priye, li leve e li al get so bann disip. Li trouv zot pe dormi parski zot ti dan sagrin. Li dir zot, “Kifer zot pe dormi? Leve, priye pou ki zot pa rant dan piez tantasion.” Li ti pe ankor koze, kan enn lafoul aparet avek Zida ki ti enn parmi Ledouz e limem ti antet. Li vinn pre ar Zezi e li anbras li. Zezi dir li, “Zida, to anbras Garson Limanite pou trayir li?” Letan bann ki ti ar Zezi trouv seki pe deroule, zot dir, “Segner, eski nou donn zot enn kout lepe?” Enn parmi donn serviter gran pret enn kout lepe e li koup so zorey drwat. Zezi dir li, “Pa fer sa.” Lerla li tous zorey serviter-la, e li geri li. Apre sa, Zezi dir bann sef pret, bann sef gard dan Tanp, bann ansien ki finn vinn rod li, “Eski ti bizin lepe ek baton pou aret mwa koumadir mo enn voler? Toulezour mo ti avek zot dan Tanp e zot pa finn trap mwa pou aret mwa. Me zot ler ek ler pwisans teneb finn vini.” Alors zot trap Zezi e zot amenn li dan lakaz gran pret. Pier ti pe swiv depi enn distans. Ti ena enn dife ki ti alime dan lakour e Pier ti pe asiz avek bann ki ti la. Enn servant trouv Pier pe asiz dan bor dife; li get li bien e li dir, “Sa boug-la osi ti avek li!” Me li renie e li dir, “Fam, mo pa konn li.” Inpe letan apre, enn lot dimounn trouv li e li insiste, “Twa osi, to dan so bann.” Pier reponn, “Kamarad, pa mwa sa.” Enn-er-tan apre, enn lot ankor persiste ar li e li dir, “Pena okenn dout, sa dimounn-la ti avek li parski li enn Galileen.” Pier reponn, “Kamarad, mo pa kone ki to pe dir. Avan li fini koze, kok sante. Lesegner tourne e get li dan so lizie. Lerla Pier rapel seki Lesegner finn dir li, “Avan ki kok sante zordi, to pou finn renie mwa trwa fwa.” Li sorti deor e gro-gro larm koule dan so lizie. Bann zom ki ti pe vey Zezi, ti pe boufonn li e ti pe bat li. Zot kouver so figir e zot ti dimann li, “Fer to profet, kisann-la finn bat twa?” Zot ti pe zour li toutsort kalite. Kouma fer lizour, bann ansien dan pep Zwif, bann sef pret ek bann dokter lalwa zwenn e zot amenn li devan Gran Tribinal. Zot dimann li, “Si tomem Lemesi, dir nou.” Li dir zot, “Si mo dir zot, zot pa pou krwar. E si mwa, mo poz enn kestion, zot pa pou reponn. Me aster-la, ala seki pou arive, Garson Limanite pou asiz adrwat pwisans Bondie.” Zot tou dir, “Alors to Garson Bondie?” E li reponn zot, “Zotmem pe dir ki mwa sa.” Lerla zot dir, “Ki lot temwin ankor nou bizin? Nou finn tande noumem seki li finn dir ar so prop labous.” Lasanble ki ti prezan leve e amenn Zezi devan Pilat. Zot koumans akiz li. Zot dir, “Nou finn trouv li pe met lepep dan trou, anpes nou pey tax Sezar, e lorla li pe dir ki limem Lemesi ek lerwa.” Lerla Pilat poz li enn kestion, “Eski tomem Lerwa bann Zwif?” Zezi reponn li, “Twa ki pe dir.” Pilat dir ar bann sef pret ek lafoul, “Mo pa trouv okenn sarz kont sa boug-la.” Zot kriy pli for, “So lansegnman exsit lepep pou revolte partou dan Zide; li finn koumanse depi Galile e li finn ariv ziska isi.” Letan Pilat finn tann sa, li demande si sa boug-la sorti Galile. Kouma li aprann ki Zezi sorti sa landrwa ki Erod ti pe administre-la, li avoy li ar Erod ki ti dan Zerizalem pandan sa peryod-la. Letan Erod trouv Zezi, li ti bien kontan. Depi lontan Erod ti pe anvi zwenn Zezi parski li ti finn tann koz li e li ti espere ki li pou trouv Zezi fer de-trwa mirak. Li poz li boukou kestion me Zezi pa reponn nanye. Bann sef pret ek bann dokter lalwa ki ti pe dibout lamem akiz Zezi avek violans. Erod ek so bann solda boufonn li, maltret li koumadir li enn pouritir. Zot abiy li kouma enn lerwa e zot re-anvway li ar Pilat. Sa zour-la Erod ek Pilat ti vinn de bon kamarad; avan zot pa ti kapav santi zot kamarad. Pilat reini bann sef pret, bann dirizan ek lepep. Li dir zot, “Zot finn amenn devan mwa sa boug-la e zot finn akiz li kouma kikenn ki pe met lepep dan trou. Mwa mo finn interoz li, e mo pa pe trouv okenn sarz ki zot finn met lor li. Erod osi pa finn trouv nanye e li finn re-anvway li ar nou parski li pa finn komet enn fot ki merit lamor. Mo pou dir bann-la fwet li apre sa mo pou larg li.” Pou sak fet Pak, Pilat ti abitie larg enn prizonie. Me zot tou kriye bien for, “Fini li enn fwa, larg Barabas.” Barabas ti dan prizon parski li ti finn diriz enn emet dan lavil e li ti finn komet enn krim. Pilat ti ankor anvi liber Zezi, alors li kontigne diskit ar zot. Me zot revolte, zot kriye pli for, “Krisifie li! Krisifie li!” Trwaziem fwa, li re-dir zot, “Ki krim li finn fer? Mo pa trouv okenn sarz ki dir ki li merit lamor. Mo pou dimann bann-la fwet li apre sa mo pou relarg li.” Me zot kriye ankor pli for e zot dimann koulout li lor lakrwa. Zot lavwa dominn partou. Lerla Pilat desid donn zot seki zot pe dimande. Li larg sa boug ki zot ti dimann pou grasie la, e ki ti dan prizon akoz enn emet ek enn krim, e li livre zot Zezi dapre ki zot ti pe rode. Letan bann-la ti pe amenn Zezi, zot zwenn Simon ki enn abitan lavil Sirenn. Li ti sorti dan karo, li pe ale. Zot aret li pou li sarye lakrwa deryer Zezi. Enn gran lafoul ti pe swiv li; bann fam ti pe kriye, plore e zot ti pe sagrin li. Zezi vire, get par deryer e li dir zot, “Fam, zot ki tifi Zerizalem, pa plor pou mwa. Plor plito pou zotmem e pou zot bann zanfan. Parski zour pou vini kot zot pou dir, ‘Bienerez bann fam ki pa kapav gagn zanfan, bann seki zame finn akouse, bann ki zame finn donn bwar.’ Alor dimounn pou dir bann montagn, Tom lor nou, ek kolinn Kasiet nou, Parski si zot fer koumsa ar dibwa ver, ki zot pou fer ar dibwa sek?” Ti amenn osi ansam avek li de malfeter ki ti finn kondane amor. Ler zot ariv landrwa ki ti apel Krann, zot koulout li lor lakrwa e zot met bann malfeter-la, enn dan so drwat ek lot-la dan so gos. Zezi dir, “Papa pardonn zot parski zot pa kone ki zot pe fer.” Zot fer enn tiraz osor pou partaz so linz. Lepep ti pe dibout e ti pe gete. Bann sef Zwif ti pe kontigne boufonn li. Zot ti pe dir, “Li finn sov lezot; les li sov limem si vremem li Lekris ki Bondie finn swazir.” Bann solda boufonn li. Zot koste pre ar li e zot donn li vineg. Zot dir li, “Si to Lerwa Zwif, sov twa tomem.” Lao lor lakrwa ti finn ekrir, “Limem Lerwa Zwif.” Enn sa de kriminel ki ti lor lakrwa-la insilte li. Li dir li, “Eski to pa Lekris? Sov twa tomem ek sov nou.” Lot-la repros li, “To pa gagn per Bondie, twa ki finn kondane parey kouma li? Nou, nou pe gagn seki nou merite parski nou pe pey pou seki nou finn fer, me li, li pa finn fer nanye de mal.” E li dir Zezi, “Zezi pa bliye mwa kan to vini kouma Lerwa.” Zezi reponn li, “Laverite, laverite mo dir twa, zordi mem to pou avek mwa dan paradi.” Ti apepre midi, letan teneb tom lor antie later ziska trwa-z-er tanto. Letan soley aret briye, rido Tanp desire omilie. Zezi kriye bien for, “Papa, mo met mo lespri dan to lame.” Letan li fini dir sa, li rann so dernie soupir. Letan santiryon Romin trouv seki ti finn arive, li rann laglwar Bondie, li dir, “Vremem sa dimounn-la ti inosan.” Kan sa gran lafoul ki ti finn vini pou get spektak la trouv seki ti finn arive, zot rant kot zot latet bese. Tou bann kamarad Zezi ek bann fam ki ti akonpagn li depi Galile ti pe dibout lwin e zot ti pe get seki ti pe pase. Ti ena enn dimounn ki ti apel Zozef ki ti sorti Arimate, enn lavil Zwif. Li ti bon ek bien drwat e li ti enn manb Gran Tribinal bann Zwif. Li pa ti dakor ar zot desizion e zot aksion, e li ti pe atann Rwayom Bondie. Zozef al get Pilat e li dimann li lekor Zezi. Li desann so lekor e li anvlop li dan enn dra an-lin e li met li dan enn tom ki ti finn kreze dan ros kot personn pa ti ankor antere. Ti vandredi, zour Preparasion, e saba ti pre pou koumanse. Bann fam ki ti pe swiv Zezi depi Galile vinn avek Zozef e zot trouv tom kot ti met so lekor. Apre sa zot retourne e zot prepar bann delwil ek bann parfin. Zour saba, zot repoze dapre seki lalwa dir. Premie zour lasemenn, boner dimans gramatin, de-trwa fam vinn lor tonbo avek delwil parfime ki zot ti finn prepare. Me zot trouv ros lantre tonbo ti finn avanse. Zot rantre me zot pa trouv lekor Segner Zezi. Zot pa pe konpran seki finn arive e anmemtan de zom paret devan zot. Zot linz ti pe briye. Kouma zot ti pe gagn per e zot ti pe bes zot latet anba, sa de zom-la dir zot, “Kifer zot pe rod enn dimounn vivan parmi bann mor; li pa isi, li finn resisite. Rapel seki li ti dir zot kan li ti dan Galile. ‘Fode ki Garson Limanite livre dan lame bann peser, ki li kouloute lor lakrwa avan ki li resisite lor so trwaziem zour.’ ” Lerla zot rapel sa bann parol-la. Zot kit tonbo pou rakont sa onz disip ek bann lezot. Ti ena Marie Madlenn, Zann ek Marie, mama Zak ek de-trwa ankor ki ti avek zot. Zot rakont sa bann zapot. Me bann-la panse ki zot ti pe divage e zot pa ti krwar parol bann fam-la. Pier leve e galoupe, al dan tonbo. Li bese e li trouv zis bann bandaz an-lin; apre sa li retourn kot li. Li ti res bet par seki ti finn pase. Sa zour-la, de parmi zot, ti pe al dan zot vilaz Emais ki ti apepre de-z-er tan marse depi Zerizalem. Zot ti pe koz lor tou seki ti finn deroule. Kan zot ti pe koze ek diskite, Zezi koste ar zot e mars ar zot. Zot trouv li me zot lizie pa rekonet li. Li dir zot, “Ki zot pe dialoge letan zot pe marse?” Zot arete, figir tipti. Seki ti apel Kleopas dir li, “To tousel dan Zerizalem pa kone seki finn arive sa de-trwa zour-la isi?” E li dir zot, “Ki finn arive? “Zot reponn li, “Tou seki finn ariv Zezi Nazaret, sa profet ki ti pwisan par so aksion e par so parol devan Bondie e devan lepep; kouma bann sef pret ek nou bann dirizan finn livre li e finn kondann li amor e finn met li lor lakrwa. Nou ti panse ki limem ki ti pou kapav delivre Izrael; e sa fer trwa zour depi ki tousala finn arive. Me anplis, de-trwa fam dan nou group finn fer nou res bet parski kan zot ti finn al lor tonbo boner gramatin, zot pa ti trouv so lekor e zot finn retourne pou dir ki bann anz ti finn aparet devan zot dan enn vizion e bann-la ti finn dir ki li touzour vivan. De-trwa parmi zot finn al lor tonbo e zot finn trouv bann zafer parey kouma bann fam-la ti finn rakonte, me li, zot pa finn trouv li.” Lerla li dir zot, “Bann san konpran, kouma zot leker pran letan pou krwar tou seki bann profet finn rakonte. Eski Lekris pa ti bizin soufer avan li rant dan so laglwar?” Lerla li pran depi Moiz ek tou bann profet pou explik zot tou seki finn ekrir lor li dan Lekritir. Zot ti pre pou ariv dan vilaz kot zot ti pe ale e Zezi fer bann-la krwar ki li ti pe kontigne so larout. Bann-la pa anvi li ale, zot dir li, “Res ar nou parski soley pe al tonbe e lanwit pe aprose.” Lerla li al res kot zot. Letan li atab avek zot, li pran dipin, li beni li, li kas li e li donn zot. Lerla zot lizie ouver e zot rekonet li me li disparet devan zot. Sakenn dir so kamarad, “Eski nou leker pa ti pe brile andan kan li ti pe koz ar nou lor sime e kan li ti pe explik nou Lekritir?” Zot leve toutswit e zot retourn Zerizalem. Zot trouv bann onz disip ansam avek lezot kamarad Bann-la ti pe dir, “Vremem Lesegner finn resisite e li finn paret devan lizie Simon.” Lerla zotmem, zot rakont tou seki finn arive lor sime e kouma zot ti rekonet Zezi letan li ti finn kas dipin. Zot ti ankor pe koze kan Zezi vinn omilie zot e li dir, “Shalom, Lape avek zot.” Laper sezi zot e zot tranble parski zot ti krwar enn fantom sa. Li dir zot ankor, “Kifer zot abat koumsa e kifer ena dout dan zot leker? Get mo lame, get mo lipie, momem sa. Tous mwa, gete, parski enn fantom pena laser ek lezo kouma mwa. Gete kouma mo ete. Letan li pe dir sa, li montre zot so lame ek so lipie. Zot dan kontantman, zot emerveye e zot pa krwar seki zot pe trouve; alor Zezi dir zot, “Eski zot ena kiksoz isi pou manze?” Zot donn li enn bout pwason griye; li pran li e li manz li devan zot. Li dir zot, “Samem parol ki mo ti dir zot kan mo ti avek zot parski tou seki finn ekrir lor mwa dan Lalwa Moiz, Liv bann Profet e bann Psom, ti bizin realize.” Lerla li ouver zot lintelizans pou ki zot konpran Lekritir. Li dir zot, “Ala seki finn ekrir: Lekris pou soufer e li pou resisite parmi bann mor lor trwaziem zour e bizin proklam Parol Bondie lor so nom, repantans e pardon bann pese devan tou bann nasion depi Zerizalem. Zotmem mo bann temwin. Aster-la mo avoy lor zot seki mo Papa finn promet. Res Zerizalem ziska ki zot resevwar pwisans ki sorti lao.” Apre sa Zezi amenn zot ziska Betani; la, li lev so lame e li beni zot. Letan li pe beni zot, li separe ar zot e li mont dan lesiel. Zot ador li e zot retourn Zerizalem avek gran lazwa dan leker. Zot ti al souvan dan Tanp pou loue Bondie. Dan koumansman ti ena Laparol, Laparol ti ar Bondie e Laparol ti Bondie. Dan koumansman li ti ar Bondie. Tou finn kree par Laparol e tou seki finn existe, finn existe par li. Limem ti lavi e lavi ti lalimier tou dimounn. Lalimier ti ekler teneb, e teneb pa finn aret li. Bondie ti avoy enn dimounn; li ti apel Zan. Li ti vini kouma temwin pou donn so temwaniaz lor lalimier e pou ki tou dimounn krwar. Li pa ti lalimier li, me li ti vini pou donn enn temwaniaz lor lalimier. Veritab lalimier finn vinn dan lemond, li finn ekler tou dimounn. Li ti dan lemond e lemond finn kree par li, selman lemond pa ti rekonet li. Li ti vinn kot li me so prop fami pa finn resevwar li. Li finn donn tou dimounn ki finn resevwar li e ki krwar dan so nom pouvwar pou vinn zanfan Bondie. Zot pa vinn zanfan Bondie par nesans natirel, par volonte bann imin, par dezir enn papa ek enn mama, me zot finn pran nesans kot Bondie. Laparol finn vinn enn imin e li finn res kot nou. Li ti ranpli ar lamour ek laverite. Nou finn kontanple so laglwar, laglwar sel Garson Bondie Papa. Zan ti pe donn enn temwaniaz lor li e ti pe kriye, “Limem Sa-Enn lor ki mo ti pe dir, ‘Sa dimounn ki vinn apre mwa la, li ti la avan, parski li ti existe an-premie.’ ” Nou tou finn resevwar benediksion enn lor lot ki sorti depi so grander infini. Si par Moiz nou finn resevwar lalwa, par Zezi Kris nou finn resevwar enn lamour infini. Zame personn finn trouv Bondie apar so sel Garson. Li ti enn sel ar so Papa. Limem finn fer nou konn Bondie. Ala temwaniaz ki Zan finn donn bann pret ek bann Levit, kan bann Zwif Zerizalem ti avoy zot pou demann li, “Ki to ete, twa?” Li ti deklar anpiblik san kasiet nanye; wi, li finn dir an piblik, “Mo pa Lekris mwa.” Alors zot demann li, “Kisann-la to ete? Tomem Eli?” Li reponn, “Non, pa mwa sa.” Tomem sa profet ki nou ti pe atann la? Li reponn, “Non.” Zot dir li ankor, “Kisann-la to ete? Rann enn repons pou nou al inform bann dimounn ki finn avoy nou. Twa, ki to ena pou dir lor tomem?” Lerla li reponn, “Kouma profet Izai finn dir, ‘Momem lavwa ki pe kriye dan dezer, ouver enn sime drwat pou Lesegner.’ ” Sa bann dimounn ki bann Farizien ti avoye la kontign poz Zan kestion. Zot demann li, “Abe ki fer to pe batize si to pa ni Lekris, ni Eli, ni sa profet-la?” Zan reponn zot, “Mwa, mo batiz dan dilo me parmi zot ena kikenn ki zot pa kone. Li pe vinn apre mwa, e mo mem pa ase bon pou delarg so sandalet.” Tousala finn deroule dan Betani lot kote Zourdin, kot Zan ti pe batize. Landime, Zan trouv Zezi pe vini e li dir, “Get Agno Bondie ki tir pese lemond; Pou limem mo ti pe dir, ‘Apre mwa kikenn pe vini, li ti la avan parski li ti existe an premie.’ Momem mo pa ti konn li; mo finn vinn batiz dan dilo pou fer Izrael konn li.” Zan ti pe donn so temwaniaz, li ti pe dir, “Mo finn trouv Lespri desann kouma enn kolonb ki sorti dan lesiel e res lao lor so latet. Mwa, mo pa ti konn li, me seki finn avoy mwa batiz dan dilo la, finn dir mwa, dimounn lor ki to pou trouv Lespri desann e res lao lor so latet, limem pou batiz ar Lespri Sin. Mwa mo finn trouve ar mo lizie e mo pe rann temwaniaz, limem Garson Bondie.” Landime, Zan ti pe debout ankor avek de so bann disip. So regar swiv Zezi ki pe pase; li dir, “Get Agno Bondie.” Kan so de disip finn tann sa, zot koumans swiv Zezi. Ler Zezi vire, li trouv zot pe swiv li; li demann zot: “Ki zot pe rode?” Zot dir, “Rabi, (seki vedir Met), kot to reste?” Zezi reponn zot, “Vini zot va trouve.” Zot finn ale, zot finn trouve kot li pe reste, zot res ar li sa zour-la. Ti anviron kat-r-er tanto. Andre, frer Simon Pier, ti enn parmi sa de disip ki ti tann Zan koze e ki finn swiv Zezi. Andre finn koumans par al rod so frer Simon, e li dir li, “Nou finn trouv Lemesi,” (seki vedir Lekris). Apre, li amenn Simon ar Zezi. Zezi get li fran dan so lizie e li dir li, “Twa, to apel Simon, garson Zan, aster-la to pou apel Kefas,” (seki vedir ros). Landime, Zezi desid pou al Galile. Ler li trouv Filip, li dir li, “Swiv mwa.” Parey kouma Andre ek Pier, Filip ti osi enn abitan lavil Betsaida. Filip al get Natanael e li dir li, “Nou finn trouv li, lor limem ki Moiz finn ekrir dan liv lalwa ek bann profet. Li apel Zezi, li garson Zozef e li sorti Nazaret.” Natanael dir li, “Eski kiksoz de bon kapav sorti Nazaret?” Filip dir li, “Vinn gete.” Ler Zezi trouv Natanael pe vini, li dir, “Sa enn vre Izraelit, sa. Pena defo dan li.” Natanael demann li, “Be kouma to konn mwa?” Zezi reponn li, “Avan mem ki Filip ti apel twa anba pie fig, mo ti finn fini trouv twa.” Natanael reponn, “Met, tomem Garson Bondie, Lerwa Izrael.” Zezi reponn li, “Parski mo finn dir twa ki mo finn trouv twa anba pie fig ki to krwar dan mwa? Abe to pou trouv kiksoz ankor pli gran.” Li dir li, “Vremem, laverite mo dir zot, zot pou trouv lesiel ouver ek bann anz Bondie monte-desann lor Garson Limanite.” Trwaziem zour mision Zezi, ti ena enn maryaz dan Kana ki ti dan Galile. Mama Zezi ti la. Zezi ek so bann disip osi ti invite dan maryaz-la. Ler divin fini, mama Zezi dir li, “Zot nepli ena divin.” Zezi dir li, “Fam, ki to oule ar mwa? Mo ler pankor vini.” So mama dir bann server, “Fer tou seki li pou dir zot fer.” Ti ena la, sis resipian an-ros ki bann Zwif ti servi pou zot pirifikasion. Dan sak resipian ti kapav met apepre ant vin ek trant galon. Zezi dir zot, “Plin sa bann resipian-la ar dilo.” Zot ranpli tou ziska dan rebor. Apre sa, li dir zot, “Pran inpe, al donn responsab fet-la.” Alors, zot al donn li. Kan li finn gout dilo ki finn vinn divin la, (li pa ti kone kot sa sorti; nek server ki ti kone), responsab fet apel nouvo marye. Li dir li, “Tou dimounn servi bon divin dabor, kan invite finn bien bwar, lerla servi divin mwin bon; me twa, to finn gard bon divin ziska aster-la.” Samem premie sign Zezi ti fer. Sa ti pas dan Kana dan Galile; li finn montre so laglwar e so bann disip finn krwar dan li. Apre sa, li desann Kafarnaom ansam avek so mama, so bann frer ek so bann disip. Zot finn res laba de-trwa zour. Kouma Pak bann Zwif ti pe koste, Zezi mont Zerizalem. Dan Tanp, li trouv marsan bef, mouton ek pizon ansam avek bann ki ti pe fer zot biznes sanz larzan. Li fer enn fwet avek lakord, li pous zot tou andeor Tanp avek zot mouton, zot bef, li voltiz zot kas e li devir zot latab anba-lao. Li dir bann marsan pizon, “Tir tousala deor; pa fer lakaz mo papa vinn enn bazar.” Lerla so bann disip rapel Parol Lekritir, “Lamour pou to lakaz pou devor mwa kouma laflam.” Lerla bann Zwif kestionn li, “Ki sign to kapav montre nou, pou permet twa fer seki to pe fer?” Zezi reponn zot, “Kraz sa Tanp-la, dan trwa zour mo pou remet li debout.” Lerla bann Zwif dir li, “Finn bizin karann-sis banane pou mont sa Tanp-la. Twa, to pou remet li debout dan trwa zour?” Me li, li ti pe koz lor tanp so lekor. Akoz samem, kan li finn leve parmi bann mor, so bann disip ti rapel so parol e zot finn krwar dan Lekritir ek dan parol ki Zezi finn dir. Sa bann zour-la, Zezi ti dan Zerizalem pou fet Pak. Boukou dimounn ti krwar dan so nom, ler zot finn trouv bann sign ki li ti pe fer. Me Zezi pa ti fer zot konfians parski li ti konn leker dimounn. Zezi pa ti bizin temwaniaz personn pou kone kouma dimounn ete, parski li ti kone ki ena dan leker dimounn. Ti ena enn Farizien ki ti apel Nikodem; li ti enn sef parmi bann Zwif. Dan nwar, li vinn get Zezi, li dir li, “Rabi, nou kone ki to enn gran profeser ki sorti kot Bondie parski personn pa kapav fer bann sign kouma to fer, si Bondie pa ar li.” Zezi reponn li, “Vremem, laverite mo dir zot, krwar mwa mo dir twa, si enn dimounn pa pran nesans depi lao, li pa kapav konn Rwayom Bondie.” Nikodem dir li, “Kouma enn dimounn kapav repran nesans, kan li finn fini vinn vie? Eski li kapav rant dan vant so mama enn deziem fwa pou repran nesans?” Zezi reponn li, “Vremem, laverite krwar mwa mo dir twa, personn pa kapav rant dan Rwayom Bondie, si li pa repran nesans dan dilo ek Lespri. Dimounn ki pran nesans dan enn lekor, li enn lekor, seki pran nesans dan Lespri, li spiritiel. Pa etone parski mo dir twa ki zot bizin pran enn nouvo nesans. Divan soufle kot li anvi, to tann son so mouvman me to pa kone kot li sorti ni kot li pe ale; li parey pou dimounn ki pran nesans dan Lespri.” Nikodem dir li, “Explik mwa kouma sa bann kiksoz-la kapav arive?” Zezi reponn li, “To enn gran dokter dan Izrael, to pa konn sa bann zafer-la? Vremem, laverite mo dir twa, nou, nou koz lor seki nou kone, nou rann temwaniaz lor seki nou finn trouve, pa pou sa ki zot aksepte nou temwaniaz. Si zot pa krwar ler mo koz ar zot lor bann zafer ki pase lor later, kouma zot pou krwar ler mo pou koz ar zot lor bann zafer ki pase dan lesiel? Personn pa finn mont dan lesiel, exsepte Garson Limanite ki finn desann depi lao. Parey kouma Moiz ti met serpan an-bronz lor enn poto dan dezer, dan mem manier pou bizin lev Garson Limanite lao, pou ki tou dimounn ki krwar dan li gagn lavi eternel. Bondie finn telman kontan lemond, ki li finn donn so Sel Garson pou ki tou dimounn ki krwar dan Li, pa mor me gagn lavi eternel. Parski Bondie pa finn avoy so Garson dan lemond pou kondann lemond me pou ki so Garson sov lemond. Dimounn ki krwar dan li, pa pou kondane me dimounn ki pa krwar, finn fini kondane parski li pa krwar dan Sel Garson Bondie. Ala zizman-la: lalimier finn vinn dan lemond me bann dimounn finn pli kontan teneb ki lalimier parski zot manier pa bon. Parski tou dimounn ki fer lemal deteste lalimier e li pa vinn dan lalimier pou ki so bann move aksion pa paret okler. Me dimounn ki azir dan laverite vinn dan lalimier pou ki tou dimounn trouve ki so bann aksion koresponn ar volonte Bondie.” Apre tousala, Zezi ek so bann disip al dan rezion Zide kot li res inpe letan ek zot e li ti pe batize. Zan osi ti pe batize dan Enonn pre ar Salem parski ti ena boukou dilo laba e dimounn ti pe kontigne vini pou pran batem. (Sa lepok-la, pa ti ankor met Zan dan prizon). Akoz sa, enn diskision leve ant bann disip Zan ek enn Zwif lor kestion pirifikasion. Zot vinn get Zan e zot dir li, “Rabi, dimounn lor ki to finn temwagne-la e ki ti avek twa lot kote Zourdin, ala, li osi li pe batize e tou dimounn pe al ar li.” Zan reponn zot, “Personn pa kapav gagn okenn pouvwar si lesiel pa finn donn li. Zot temwin ki mo finn dir ki mo pa Lekris, me Bondie finn avoy mwa avan li. Nouvo marye, limem ki ena lamarye; kamarad nouvo marye nek zis debout pre ar li e ekout li; kamarad-la dan lazwa letan li tann lavwa nouvo marye. Akoz samem aster, mo lazwa li bien-bien gran. Li bizin vinn pli gran e mwa, mo bizin vinn pli tipti. Seki vinn depi lao, limem pli gran ki tou; seki finn ne lor later, li res lor later e li koz langaz dimounn lor later; seki sorti dan lesiel, limem depas tou. E li rann temwaniaz lor seki li finn trouve e ki li finn tande, me personn pa aksepte so temwaniaz. Dimounn ki aksepte so temwaniaz sertifie ki Bondie mem laverite. Dimounn ki Bondie finn avoye, koz Parol Bondie, parski Bondie finn donn li Lespri an abondans. Papa-la kontan so Garson e li finn met tou dan so lame. Dimounn ki krwar dan so Garson pou gagn lavi eternel, seki pa ekout so Garson, pa pou trouv lavi me lakoler Bondie pou res lor li.” Ler Zezi finn tann dir ki bann Farizien ti kone ki li ti pe gagn plis disip e li ti pe batiz plis ki Zan, (avredir, Zezi limem, li pa ti pe batize me se so bann disip ki ti pe fer sa) Zezi kit Zide e ankor enn fwa, li al Galile. Li ti oblize pas par Samari. Alors li ariv dan enn lavil dan Samari ki ti apel Sikar, pre ar terin ki Zakob ti donn so garson Zozef. Pwi Zakob ti trouv lor sa terin-la; Zezi finn fatige marse; li asiz lor rebor pwi; ti pre pou midi. Enn fam ki res Samari vinn sers dilo. Zezi dir li, “Donn mwa inpe dilo pou bwar.” Ofet sa ler-la so bann disip pa ti la; zot ti finn al dan lavil pou aste manze. Samaritenn-la dir li, “Kouma twa, enn Zwif, to dimann mwa, enn Samaritenn, inpe dilo pou bwar?” Bann Zwif pa ti pe gagn zafer ar bann Samaritin. Zezi reponn li, “Si to ti konn kado Bondie e si to ti kone kisann-la pe demann twa, donn mwa inpe dilo pou bwar, tomem to ti pou demann li, e li ti pou donn twa enn dilo lasours.” Fam-la dir li, “Misie, ou pena nanye pou tir dilo, e sa pwi-la bien fon, kot ou pou al gagn dilo lasours? Eski ou pli gran ki nou anset Zakob? Pa limem ki finn donn nou sa pwi-la? Pa limem ki finn bwar ladan ansam avek so bann garson ek so bann zanimo?” Zezi dir li, “Tou dimounn ki bwar sa dilo-la pou gagn swaf ankor, Me dimounn ki bwar dilo ki mwa mo pou donn li, nepli pou gagn swaf; dilo ki mwa mo pou donn li, pou vinn enn lasours lavi eternel dan li.” Fam-la dir li, “Misie, donn mwa sa dilo-la, pou ki mo nepli gagn swaf e ki mo nepli bizin vinn la pou sers dilo.” Zezi dir li, “Al apel to mari apre revini.” Fam-la reponn, “Mo pena mari.” Zezi dir li, “To ena rezon kan to dir to pena mari. To finn ena sink mari e dimounn ki pe viv ar twa zordi, li osi, li pa to mari; li vre seki to pe dir.” Fam-la dir li, “Misie, mo gagn linpresion to enn profet. Nou bann gran dimounn ti pe ador Bondie lor sa montagn-la; me dapre zot, bizin ador Bondie zis dan Zerizalem.” Zezi reponn li, “Fam, krwar mwa, ler pe arive kot nepli pou bizin mont lor sa montagn-la, ni al Zerizalem pou ador nou Papa. Zot ador seki zot pa kone, nou, nou ador seki nou kone, parski delivrans sorti kot bann Zwif. Me ler pe koste, ler finn arive, kot bann vre adorater pou ador nou Papa kouma vremem li ete, dan Lespri ek dan laverite. Koumsa mem nou Papa anvi ki nou ador Li. Bondie li Lespri; dimounn ki ador li, bizin ador li dan Lespri ek dan laverite.” Fam-la dir li, “Mo kone Lemesi pe vini, limem ki apel Kris. Kan li vini, li pou explik nou tou kiksoz.” Zezi dir li, “Mwa ki pe koz ar twa, momem Lemesi.” Zis dan sa ler-la, so bann disip retourne e zot gagn enn sok kan zot trouv li pe koz ar enn fam; me selman personn pa ti oze demann li, “Ki to pe rode ar li?” ou bien “Kifer to pe koz ar li?” Lerla fam-la kit so seo, li al dan lavil e li dir bann dimounn, “Vini, vinn gete; enn zom finn dir mwa tou seki mo finn fer; pa limem Lekris?” Bann-la kit lavil pou vinn get li. Anmemtan, bann disip ti pe sipliy Zezi, “Rabi manz inpe.” Li dir zot, “Manze ki mo bizin manze, zot pa kone.” Lerla bann disip dir ant zotmem, “Eski kikenn finn amenn manze pou li?” Zezi dir zot, “Mwa, mo manze, se fer volonte ek fini travay Sa-Enn ki finn avoy mwa la. Eski zot pa dir, ‘Dan kat mwa, lakoup pe vini?’ Ala mo pe dir zot, lev zot lizie, gete kouma bann karo finn deza anfler, zot finn pare pou lakoup. Kouper-la pe deza tous so lapey e li pe ramas so rekolt pou lavi eternel; lerla, toule-de, planter ek kouper pou fet lakoup ansam. Proverb-la bien dir, enn plante, enn lot rekolte. Mwa, mo pe avoy zot rekolte, kot zot pa finn plante; enn lot bann finn trime me zot, zot pou profit travay-la.” Boukou Samaritin sa lavil-la finn krwar dan li, akoz parol sa madam-la, ‘li finn dir mwa tou seki mo finn fer.’ Lerla bann Samaritin al get Zezi e zot demann li res kot zot; li res ankor de zour. Boukou plis dimounn finn krwar akoz so parol. Zot dir madam-la, “Nou nepli krwar akoz to parol, me nou osi, nou finn tann li e nou kone ki limem vre Sover lemond.” Apre de zour, Zezi kit landrwa kot li ti ete la e li al Galile. Zezi limem ti temwagne ki enn profet pa gagn rekonesans dan so prop pei. Kan Zezi ariv Galile, bann Galileen akeyir li parski zot finn trouv tou seki li ti fer dan fet Pak dan Zerizalem; parski zot ousi zot ti laba. Ankor enn fwa, li revinn Kana dan Galile, landrwa kot li ti fer dilo vinn divin. Dan Kafarnaom, ti ena enn ofisie lerwa; so garson ti bien malad. Kan ofisie-la finn tande ki Zezi finn kit Lazide pou vinn Galile, li al get Zezi e li sipliy li desann pou vinn geri so garson ki pre pou mor. Zezi dir li, “Tanki zot pa trouv bann sign ek bann mervey, zot pa pou krwar.” Ofisie-la dir li, “Segner, desann, vini avan ki mo zanfan mor.” Zezi dir li, “Ale, to garson pou viv.” Papa-la krwar dan parol Zezi e li ale. Li ti ankor pe desann kan bann serviter vinn zwenn li; zot dir li so zanfan ankor touzour vivan. Li demann zot ver ki ler li ti pe koumans degaze. Zot reponn li, “Lafiev finn koumans kit li yer, ver enn-er.” Papa-la kone, samem ler kan Zezi ti dir li, “To garson pou viv.” Lerla li krwar, li ek tou so fami. Samem deziem sign ki Zezi finn fer letan li sorti Zide pou vinn Galile. Apre sa bann levennman-la, ti ena enn fet Zwif. Zezi al Zerizalem. Dan Zerizalem, pre ar laport-mouton, ti ena enn basin ki ti apel Betesda an Ebre. Landrwa-la ti divize par sink arkad. E ladan, ti ena enn kantite andikape: aveg, bwate ek paralize. La, ti ena enn dimounn ki ti malad depi trantwit-an. Letan Zezi trouv li alonze anba, li kone ki li malad depi lontan e li dir li, “To anvi gagn to gerizon?” Paralize-la dir li, “Misie, pena personn pou met mwa dan basin kan dilo la brouye; letan ki mo pran pou desann, dimounn finn fini pas avan mwa.” Zezi dir li, “Debout, ramas to nat, marse aster.” Paralize-la trouv so gerizon toutswit; li ramas so nat, li marse. Sa ti pase enn zour saba. Alors bann Zwif dir ar sa dimounn ki finn geri la, “Zordi saba, to pena drwa sarye to nat.” Me li reponn zot, “Dimounn ki finn geri mwa la, finn dir mwa, ‘ramas to nat, marse’.” Zot demann li, “Kisann-la ki finn dir twa, Ramas to nat, marse?” Dimounn ki finn geri la, pa ti kone kisann-la finn dir li sa, parski Zezi finn al inpe pli lwin akoz lafoul. Inpe pli tar, Zezi trouv li dan Tanp e li dir li, “Gete, aster to finn bien, pa fer pese ankor pou ki to pa gagn problem pli grav.” Dimounn-la kit li ale e li al anons bann Zwif ki Zezi mem finn geri li. Akoz samem, bann Zwif persekit Zezi, parski li finn fer sa enn zour saba. Zezi reponn zot, “Mo Papa ankor pe travay e mwa osi mo pe travay.” Akoz samem, bann Zwif ti pe plis rod li pou touy li. Pa selman akoz li pa finn respekte saba me parski li dir ki Bondie so prop Papa. E kan li koz koumsa, li pe met li dan mem ran ki Bondie. Zezi reponn zot, “Vremem laverite mo dir zot, Garson Papa-la pa kapav azir dapre li, li fer tou seki li trouv so Papa fer; seki Papa-la fer, Garson-la fer parey. Papa-la kontan so Garson e li montre li tou seki li fer; li pou montre li pli gran travay ankor e lerla, zot pou plis etone. Parey kouma Papa-la lev dimounn mor e donn zot lavi, Garson-la osi donn lavi dimounn ki li anvi. Papa-la pa pronons okenn zizman, li finn donn so Garson tou pouvwar pou zize, pou ki tou dimounn onor so Garson, parey kouma zot onor Papa-la. Dimounn ki pa onor Garson-la, pa onor so Papa ki finn avoy Li. Vremem laverite mo dir zot, dimounn ki tann mo parol e krwar dan Sa-Enn ki finn avoy mwa la, li posed lavi eternel; li pa pou kondane me li finn pas par lamor pou gagn lavi. Vremem laverite mo dir zot, ler pe vini, ler-la finn arive, kan bann mor pou tann lavwa Garson Bondie e dimounn ki tande pou viv. Parey kouma Papa-la lasours lavi, par enn don so Papa, Garson-la osi lasours lavi. Li finn donn li pouvwar pou pronons zizman parski limem Garson Limanite. Pa etone kan zot tann sa, parski ler pe vini kot tou dimounn ki dan tom pou tann so lavwa. Ler pou sorti dan tom, tou dimounn ki finn fer dibien pou leve e pou gagn lavi; tou dimounn ki finn fer lemal pou leve e pou kondane. Mo pa kapav fer nanye par mo prop lotorite me mo pronons zizman dapre seki mo tande; mo zizman li drwat parski mo pa pe rod fer mo volonte me volonte Sa-Enn ki finn avoy mwa la.” “Si mo fer enn temwaniaz lor momem, mo temwaniaz pena valer. Ena enn lot ki pe donn so temwaniaz lor mwa e mo kone ki so temwaniaz li vre. Zot finn avoy dimounn get Zan e li finn rann temwaniaz lor seki vre. Seki mo ete pa depann lor temwaniaz dimounn, me mo dir zot sa, pou ki Bondie sov zot. Zan ti enn lalanp ki alime e ki ti pe donn so lekleraz; pou enn moman, zot leker ti dan lazwa letan zot ti pe profit so lalimier. Mo ena enn temwin dan mo faver ki dir kiksoz pli gran ki seki Zan finn dir. Travay ki mo Papa finn donn mwa pou akonpli, samem ase pou montre zot, ki vremem mo Papa finn avoy mwa. Mo Papa ki finn avoy mwa, finn donn so prop temwaniaz lor mwa; me zame zot pa finn tann so lavwa, ni trouve kouma li ete. So Parol pa res dan zot leker parski zot pa krwar dan Sa-Enn ki li finn avoye la. Zot fouy dan Lekritir parski zot mazine ki ladan ena lavi eternel; zisteman tou seki ena ladan donn enn temwaniaz lor mwa. Malgre sa, zot pa oule vinn ar mwa pou gagn lavi. Mo pa pe rod grander ar dimounn, me mo bien kone ki zot pena lamour Bondie dan zot leker. Mo finn vini par lotorite mo Papa e zot pa finn aksepte mwa; me si enn lot dimounn vini par so prop lotorite, la, zot pou aksepte li. Kouma zot kapav ena lafwa, zot ki kontan resevwar grander ant zotmem e pa pe rod grander ki sorti kot sel vre Bondie? Pa krwar ki mo pou akiz zot devan mo Papa; se Moiz limem, dan ki zot finn met zot lesperans, ki pou akiz zot. Si zot ti krwar dan Moiz, zot ti pou krwar dan mwa, parski limem ki finn ekrir lor mwa. Me si zot pa krwar dan seki li finn ekrir, kouma zot pou krwar dan mo parol?” Apre sa, Zezi travers lamer Tiberiad dan Galile pou al lot kote. Enn gran lafoul ti pe swiv li parski zot finn trouv bann mirak ki li finn fer lor bann malad. Zezi mont lor enn kolinn e li asiz lao ar so bann disip. Pak, fet bann Zwif, ti pre. Letan Zezi lev so latet, li trouv enn gran lafoul pe vinn ar li. Li dir Filip, “Kot kapav aste dipin pou donn bann-la manze?” Li finn dir sa pou teste Filip. Zezi ti kone seki li ti pou fer. Filip reponn li, “Larzan de-san zourne travay pa pou ase pou donn sakenn enn bouse manze.” Enn so bann disip, Andre, frer Simon Pier, dir li, “Ena enn ti-garson isi ki ena sink dipin lagrin lorz ek de pwason griye; me ki sa pou servi pou sa kantite dimounn-la?” Zezi dir, “Fer bann-la asize.” Ti ena boukou lerb dan sa landrwa-la. Alor zot asize; ti ena apepre sink mil zom. Zezi pran dipin, li rann gras e partaz dipin-la ar bann ki ti pe asize; li fer parey ar pwason, kot sakenn finn gagn kantite ki li ti anvi. Kan zot vant finn plin, li dir ar so bann disip ramas bann bout ki reste pou ki nanye pa perdi. Alors zot ramase. Zot ranpli douz panie ar bout dipin ki finn reste dan bann dipin ki zot ti servi pou partaze. Kan bann dimounn trouv sign ki li finn fer, zot dir, “Limem Profet ki ti pou vinn dan lemond.” Zezi kone ki zot pou vinn trap li, pou fors li vinn lerwa; lerla li kit sa landrwa-la, li re-al tousel dan montagn. Kan aswar pe vini, so bann disip desann bor lamer. Zot mont dan enn pirog, zot repran direksion Kafarnaom. Ti fer bien nwar e Zezi pa ti ankor vinn zwenn zot. Lamer ti demonte parski enn divan siklonn ti pe soufle. Bann disip ti finn ram enn distans sink-sis kilomet, letan zot trouv Zezi pe mars lor lamer; li ti pe vinn pre ar pirog. Enn laper pran zot. Li dir zot, “Mwa sa, pa bizin per.” Zot ti kontan pou donn li plas dan pirog, me enn sel kout pirog-la ariv dan landrwa kot zot ti pe ale. Landime, lafoul ki ti finn res lot kote rivaz, remarke ki enn sel pirog ti dan sa landrwa-la. Zot ti kone osi ki Zezi pa ti mont dan pirog avek so bann disip; bann-la ti al tou sel. Me bann lezot pirog sorti Tiberiad e vinn dan landrwa kot lafoul finn manz dipin apre ki Lesegner finn rann gras. Letan lafoul dekouver ki Zezi ek so bann disip nepli la, zot remont dan pirog e zot pran direksion Kafarnaom pou al rod li. Kan zot finn trouv li lot kote lamer, zot dir li, “Rabi, depi kan to finn ariv la?” Zezi reponn zot, “Vremem laverite mo dir zot, zot pa pe rod mwa parski zot finn trouv bann sign ki mo finn fer, me parski zot finn manz dipin ziska zot vant finn plin. Napa travay pou manze ki kapav gate, travay pou manze ki pa fini zame e ki donn lavi eternel. Sa manze-la, samem manze ki Garson Limanite pou donn zot parski Bondie Papa finn met mark so lotorite lor mwa.” Lerla zot demann li, “Ki nou bizin fer pou akonpli travay Bondie?” Zezi reponn zot, “Fer travay Bondie, se krwar dan Sa-Enn ki li finn avoye la.” Alors zot dir li, “Be, ki sign to pou fer, pou ki nou trouve e nou krwar dan twa? Nou bann gran dimounn finn manz lamann dan dezer kouma finn ekrir dan liv, li finn donn zot manz dipin ki sorti dan lesiel.” Zezi reponn zot, “Vremem laverite mo dir zot, se pa Moiz ki finn donn dipin ki sorti dan lesiel, me se mo Papa ki donn zot vre dipin ki sorti dan lesiel. Parski dipin ki Bondie done, samem dipin ki finn desann depi lesiel e ki donn lavi lemond antie.” Zot dir li alor, “Segner, donn nou touletan sa dipin-la.” Zezi reponn zot, “Momem dipin ki donn lavi; seki vinn ar mwa pa pou gagn fin e seki krwar dan mwa zame pou gagn swaf. Mo finn dir zot: zot finn trouv mwa, me pa pou sa ki zot krwar. Tou dimounn ki mo Papa donn mwa pou vinn ar mwa; mo pa pou pous personn. Mo finn desann depi lesiel pa pou fer mo prop volonte me pou fer volonte Sa-Enn ki finn avoy mwa la. Volonte Sa-Enn ki finn avoy mwa la, se ki mo pa perdi personn parmi tou seki li finn donn mwa, me ki mo resisit zot dan dernie zour. Samem volonte mo Papa: tou dimounn ki trouv so Garson e krwar dan li, pou gagn lavi eternel, e mwa mo pou resisit zot dan dernie zour.” Bann Zwif ti pe marmote parski Zezi ti pe dir, “Momem dipin ki finn desann depi lesiel.” Zot ti pe dir, “Pa limem Zezi, garson Zozef? Eski nou pa konn so papa ek so mama? Kot li gagn toupe pou dir mo desann depi lesiel?” Zezi reponn zot, “Aret marmote ant zot. Personn pa kapav vinn ar mwa, si mo Papa ki finn avoy mwa pa amenn li ar mwa; mwa mo pou resisit li dan dernie zour. Dan liv profet finn ekrir, ‘Bondie pou ansegn tou dimounn.’ Tou seki ekoute ek aprann ar mo Papa, pou vinn ar mwa. Personn pa finn trouv mo Papa apar Sa-Enn ki sorti ar Bondie la; Li, li finn trouv Papa-la. Vremem laverite mo dir zot, dimounn ki krwar, gagn lavi eternel. Momem dipin ki donn lavi. Zot gran dimounn finn manz lamann dan dezer, zot tou finn mor. Dimounn ki pou manz dipin ki desann depi lesiel pa pou mor. Momem dipin vivan ki finn desann depi lesiel; si kikenn manz sa dipin-la, li pou viv touletan; dipin ki mo done, se mo prop lekor pou ki lemond antie gagn lavi.” Lerla enn gran diskision leve ant bann Zwif; zot dir, “Kouma li kapav donn nou so lekor pou manze?” Zezi dir zot, “Vremem laverite mo dir zot, si zot pa manz lekor Garson Limanite e zot pa bwar so disan, zot pa pou gagn lavi dan zot. Seki manz mo lekor e bwar mo disan gagn lavi eternel, e mwa, mo pou resisit li dan dernie zour. Parski mo lekor, samem vre nouritir ek mo disan, samem vre labwason. Seki manz mo lekor e bwar mo disan, li res dan mwa e mwa dan li. Parey kouma mo Papa ki lasours lavi finn avoy mwa, e mwa mo viv par li, parey seki manz mwa, li osi pou viv par mwa. Samem dipin ki finn desann depi lesiel; li pa parey kouma dipin ki zot bann gran dimounn finn manze. Zot, zot finn fini mor; seki manz dipin ki mo done, li pou viv touletan.” Zezi finn dir tousala, letan li ti pe ansegne dan sinagog Kafarnaom. Ler boukou so bann disip tann so parol, zot dir, “Sa parol-la tro dir; kisann-la kapav aksepte sa?” Zezi ti kone dan limem ki so bann disip ti pe marmote; lerla li dir zot, “Eski seki mo pe dir ofans zot? Ki zot pou dir aster, si zot trouv Garson Limanite mont lao kot li finn sorti? Lespri donn lavi me lekor pa vo gran soz; parol ki mo finn prononse, samem Lespri, samem lavi. Me ena ki pa krwar parmi zot.” Depi koumansman, Zezi ti kone kisann-la pa krwar e kisann-la ti pou vann li. E li dir, “Akoz samem, mo dir zot, personn pa kapav vinn ar mwa, si mo Papa pa permet li.” Depi sa moman-la, boukou parmi so bann disip tourn ledo e nepli mars ar li. Zezi dir ar Ledouz, “Zot anvi ale zot osi?” Simon Pier reponn, “Segner, kot nou pou ale? Tomem ki ena Parol lavi eternel. Nou finn krwar e nou finn kone ki to tousel Sin, ki to sorti kot Bondie.” Zezi reponn zot, “Eski mo pa finn swazir zot Ledouz? Pourtan enn parmi zot enn diab.” Li ti pe koz lor Zida, garson Simon Iskaryot, parski limem parmi Ledouz ki ti pou vann Zezi. Apre sa Zezi ti pe ale-vini dan Galile; li pa ti anvi al Zide parski bann Zwif ti pe rod touy li laba. Fet bann Zwif, ki apel Fet Latant, ti pe koste. Alors so bann frer dir li, “Kit sa landrwa-la, al Zide, pou ki to bann disip kapav trouve ki kalite travay to pe fer. Personn pa travay dan kasiet, si li anvi ki dimounn konn li. Si to pe fer tou seki to pe fer, montre to figir devan tou dimounn.” Mem so bann prop frer pa ti krwar dan Li. Lerla Zezi dir zot, “Mo ler pankor vini. Nek pou zot ki ninport ki ler enn bon ler. Lemond pa kapav deteste zot, me mwa, li deteste mwa parski mo pe kontigne fer li kone ki so bann travay pa bon. Zot pe al dan fet; mwa mo pa pou ale, parski mo ler pankor arive.” Letan li fini dir sa, li res dan Galile. Me kouma so bann frer monte al dan Fet, Zezi osi monte. Li pa les dimounn trouv li, me li kasiet-kasiet. Selman bann Zwif ti pe rod li dan Fet e zot ti pe demande, “Kot li ete?” Enn vole koze ti pe fane lor li dan lafoul. Ena ti pe dir, “Li enn bon dimounn.” Ena ti pe dir, “Li anbet dimounn.” Me personn pa ti pe koz so koze partou-partou parski zot ti per bann sef Zwif. Dan plin Fet, Zezi mont dan Tanp e li ti pe ansegne. Bann Zwif ti inpresione. Zot ti pe dir, “Kouma li ena sa kantite konesans-la, pourtan zame li finn al lekol?” Zezi reponn zot, “Seki mo ansegne pa mo prop lansegnman, me li sorti kot Sa-Enn ki finn avoy mwa la. Dimounn ki anvi fer volonte Bondie pou kone si mo lansegnman sorti kot Bondie oubien si mo pe koz dapre mo prop lide. Dimounn ki koz lor so prop nom, li pe rod so prop laglwar; me dimounn ki rod laglwar Sa-Enn ki finn avoy li la, li dan laverite e pena okenn foste dan li. Eski Moiz pa finn donn zot lalwa? Pa pou sa ki zot obeir lalwa. Kifer zot pe rod touy mwa?” Lafoul reponn, “To ena enn demon lor twa. Kisann-la pe rod touy twa isi?” Zezi reponn, “Mo finn fer enn sign e zot tou, zot finn inpresione. Moiz finn donn zot sirkonsizion (an-verite, pa enn tradision Moiz me bann anset), akoz samem zot fer sirkonsizion bann garson zour saba. Si zot fer sirkonsizion lor enn garson zour saba pou ki lalwa Moiz pa kase, be, ki fer alors, zot ankoler ar mwa parski mo finn geri antie lekor enn dimounn zour saba? Pa ziz dapre laparans me ziz dapre lazistis.” Bann abitan Zerizalem ti pe dir, “Pa limem ki bann-la anvi touye? Ala li pe koz an piblik e personn pa dir li nanye. Eski bann lotorite finn rekonet ki Limem Lekris Anplis, nou bien kone kot li sorti, me kan Lekris pou vini, personn pa pou kone kot li sorti.” Zezi ti pe ansegne dan Tanp e li ti pe proklame, “Zot konn mwa; zot kone kot mo sorti e mo pa finn vinn la par mo prop lotorite. Sa-Enn ki finn avoy mwa la, Limem laverite e zot pa konn li. Mwa mo konn li parski mo sorti kot li e li finn avoy mwa.” Bann-la ti pe rod trap li me personn pa ti met lame lor li parski so ler pa ti ankor vini. Selman boukou dimounn dan lafoul ti pe krwar dan Li e zot ti pe dir, “Kan Lekris pou vini, eski li pou fer pli boukou mirak ki sa-enn-la?” Bann Farizien finn tann bann rimer lor Zezi. Bann sef pret ek bann Farizien avoy bann gard pou aret li. Alor Zezi dir zot, “Mo pou avek zot pou ankor inpe letan, apre sa mo pou al kot Sa-Enn ki finn avoy mwa la.” “Zot pou rod mwa e zot pa pou trouv mwa parski la kot mo ete, zot pa kapav vini.” Bann Zwif dir ant zotmem, “Ki kote li pe ale pou nou pa kapav trouv li? Eski li pa pou al kot bann Zwif ki finn emigre kot bann Grek, e laba li pou ansegn bann Grek osi? Ki li pe rod dir kan li dir nou, ‘Zot pou rod mwa, zot pa pou trouv mwa parski la kot mo ete, zot pa kapav vini’?” Dernie zour fet, samem zour pli inportan, Zezi ti pe debout e li ti pe proklame, “Si kikenn gagn swaf, les li vinn ar mwa, mo pou donn li bwar. Kouma finn dir dan Lekritir, ‘Seki krwar dan mwa, enn larivier dilo ki donn lavi pou sorti dan so leker.’ ” Ler li ti pe dir sa Zezi ti pe koz lor Lespri Sin pou bann krwayan ki ti pou resevwar li. Sa lepok-la, Lespri pa ti ankor desann lor zot parski Zezi pa ti ankor glorifie. Letan lafoul tann so parol, enn bann ti pe dir, “Vremem, limem Profet-la sa”, Ena ti pe dir, “Limem Lekris.” Me lezot ti pe dir, “Eski Lekris kapav sorti Galile?” Eski Lekritir pa finn dir ki Lekris enn desandan David e ki li pou sorti dan vilaz Betleem kot David ti reste? Ti ena divizion dan lafoul lor lidantite Zezi. Ena ti anvi aret li me personn pa ti oze tous li. Kan bann gard revini, bann gran pret ek bann Farizien demann zot, “Kifer zot pa finn amenn li?” Bann gard reponn, “Zame personn pa finn koz sa manier la.” Lerla bann Farizien dir, “Zot osi, zot finn les li anbet zot? Eski ena kit gran pret, kit Farizien ki krwar dan li? Me sa lafoul-la pa konn lalwa Moiz e zot finn gagn enn malediksion.” Nikodem, enn Farizien ki ti deza vinn get Zezi, dir bann-la, “Eski lalwa permet nou pas kikenn an zizman si nou pa finn ekout li dabor e si nou pa finn fer enn lanket lor li?” Bann-la reponn li, “To sort Galile, twa osi? Rode to pou trouve ki okenn profet pa sorti Galile.” Apre sa, sakenn retourn so lakaz. Zezi al lor kolinn Pie Zoliv. Boner gramatin, li retourn dan Tanp e lepep antie vinn ar li. Li asize e li koumans ansegn zot. Bann dokter lalwa ek bann Farizien amenn enn fam; zot finn trap li letan li ti pe komet ladilter. Zot met li debout dan milie e zot dir Zezi, “Met, nou finn may sa fam-la anplin pe komet ladilter. Dapre nou lalwa, Moiz komann nou touy sa bann fam-la kout ros; twa, ki to dir?” Zot ti pe dir sa pou met Zezi dan piez koumsa zot ti pou kapav met enn sarz lor li. Zezi bese e li ekrir avek so ledwa dan later. Kouma zot kontigne bonbard li ar kestion, li leve, li dir zot, “Dimounn ki pena pese parmi zot, avoy premie kout ros lor fam-la.” Li rebes anba e li ekrir dan later. Me kan zot tann sa, enn par enn zot ale; dabor bann pli vie e alafin res zis Zezi tou sel ek fam-la ki ti pe debout devan li. Zezi lev latet e dir li, “Fam, kot bann-la ete? Personn pa finn kondann twa?” Li reponn, “Personn, Segner.” Zezi dir li, “Mwa osi mo pa kondann twa. Ale, pa refer pese ankor.”] Zezi ti pe koz ar zot ankor, li dir “Momem lalimier dan lemond; seki swiv mwa pa pou mars dan teneb me li pou gagn lalimier ki donn lavi.” Lerla bann Farizien dir li, “To pe temwagn lor tomem, to temwaniaz pena okenn valer.” Zezi reponn zot, “Kanmem mo temwagn lor mwa, mo temwaniaz li vre parski mo kone kot mo sorti e kot mo pe ale; me zot, zot pa kone kot mo sorti e kot mo pe ale. Zot ziz dapre laparans me mwa, mo pa ziz personn. Me si mwa, mo rann enn zizman, mo zizman li vre parski mo pa tou sel pou zize, me mo Papa ki finn avoy mwa, li ziz ansam avek mwa. Dan zot lalwa finn ekrir ki kan de dimounn donn mem temwaniaz, zot temwaniaz vre. Mo pe rann temwaniaz lor momem e mo Papa ki finn avoy mwa, Li osi temwagn lor mwa.” Lerla bann-la dir li, “Kot to Papa ete?” Zezi reponn, “Zot pa konn ni mwa, ni mo Papa; si zot ti konn mwa, zot ti pou konn mo Papa osi.” Li ti pe dir sa bann parol-la, devan lasal kot dimounn met larzan lofrand dan tron ki ti dan Tanp; li ti pe ansegne dan Tanp e personn pa ti aret li parski so ler pa ti ankor vini. Zezi dir zot ankor enn fwa, “Mo pe ale, zot pou rod mwa e zot pou mor dan zot pese; la kot mo pe ale, zot pa pou kapav vini.” Lerla bann Zwif dir li, “Eski li pa pe dir ki li pou touy limem, kan li pe dir ‘La kot mo pe ale zot pa pou kapav vini’?” Li dir zot, “Zot finn pran zot lorizinn lor later, mwa mo lorizinn lao; zot lonbri atase ar sa lemond-la, mwa mo pa atase. Akoz samem mo pe dir zot, ki zot pou mor dan zot pese; parski si zot pa krwar ki mwa, mo seki Mo ete, zot pou mor dan zot pese.” Zot dir li, “Ki to ete twa, pou zize?” Zezi dir zot, “Ki mo finn dir zot depi koumansman? Mo ena boukou pou dir lor zot e mo ena boukou pou kondane; me Sa-Enn ki finn avoy mwa la, li koz laverite e mo finn dir dan lemond, tou seki mo finn tann li dir.” Zot pa ti konpran seki Zezi ti pe koz ar zot lor so Papa. Akoz samem Zezi dir zot, “Kan zot pou met Garson Limanite debout lor enn lakrwa, lerla zot pou kone ki Mwa, mo seki mo ete, e ki mo pa fer nanye par momem. Tou seki mo Papa finn ansegn mwa, samem mo finn ansegn zot. Sa-Enn ki finn avoy mwa la, li avek mwa, li pa les mwa tou sel, parski mo azir dapre tou seki fer li plezir.” Kan li finn fini dir tousala, boukou krwar dan li. Lerla Zezi dir ar bann Zwif ki finn krwar dan li, “Si zot gard mo Parol, zot mo bann vre disip, Zot pou konn laverite e laverite pou rann zot lib.” Zot reponn li, “Nou bann desandan Abraam; zame nou finn esklav personn; ki to pe rod dir, kan to dir, ‘Zot pou libere’?” Zezi reponn zot, “Vremem, laverite mo dir zot, tou seki fer pese, li esklav pese, Enn esklav pa fer parti enn fami, me garson-la, li touzour fer parti so fami. Si Garson-la liber zot, alors vremem zot pou lib. Mo kone ki zot bann desandan Abraam selman zot pe rod touy mwa parski mo Parol pena plas dan zot leker. Mo koze baze lor tou seki mo Papa finn dir, me zot, zot azir dapre seki zot finn tande kot zot papa.” Zot reponn li, “Abraam nou papa.” Zezi dir zot, “Si vremem zot ti zanfan Abraam, zot ti pou fer parey kouma li. Me aster-la, zot pe rod mwa, pou touy mwa parski mo finn dir zot laverite ki mo finn tande kot Bondie; zame Abraam finn fer kiksoz kouma zot. Zot pe fer seki zot papa ti fer.” Bann-la dir li, “Nou pa bann zanfan ilezitim; nou ena enn sel papa, se Bondie.” Zezi dir zot, “Si Bondie ti vremem zot Papa, zot ti pou kontan mwa, parski mwa, mo sorti kot Bondie. Mo pa finn vinn par mo prop lotorite me par lotorite Sa-Enn ki finn avoy mwa la. Kifer, zot pa konpran seki mo pe dir zot? Se parski zot pa kapav aksepte mo parol. Zot sorti ar diab. Limem zot papa; akoz samem zot ena mem santiman ki li. Depi koumansman li ti enn asasin e zame li ti dan laverite parski pena laverite dan li; kan li koz manti, li pe azir dapre so natir; li enn manter e limem papa bann manter. Zot pa krwar mwa, parski mo koz laverite. Kisann-la parmi zot kapav montre mwa ki mo pe fer pese? Si mo pe koz laverite, ki fer zot pa krwar dan mwa? Dimounn ki sorti kot Bondie, li ekout Parol Bondie; se parski zot pa sorti kot Bondie ki zot pa ekout so Parol.” Bann Zwif demann li, “Eski nou pena rezon dir ki to enn Samaritin e ki to ena enn demon lor twa?” Zezi reponn zot, “Mwa, mo pena demon lor mwa me mo onor mo Papa, me zot, zot pa onor mwa. Mo pa pe rod mo prop laglwar me ena Enn ki pe rod li pou mwa e ki pou rann zizman. Vremem, laverite mo dir zot, si kikenn gard mo parol, zame li pou mor.” Bann Zwif dir li, “Aster nou kone ki to posede par enn demon; Abraam ek bann profet osi finn mor; kouma to kapav dir ki ‘Si kikenn gard mo parol, zame li pou gout lamor.’ Eski to pli gran ki nou papa Abraam? Li finn mor e bann profet osi finn mor; pou ki to pran twa?” Zezi reponn, “Si mo rod mo prop laglwar, mo laglwar pa vo nanye; Sa-Enn zot apel zot Bondie-la, limem mo Papa e limem ki glorifie mwa. Laverite, se ki zot pa konn li me mwa mo konn li. Si mo ti dir zot mo pa konn li, mo ti pou pas pou enn manter kouma zot; me mo konn li e mo gard so Parol. Zot papa Abraam ti dan lazwa kan li ti kone ki li pou trouv mo zour. Li finn trouv li, li finn kontan.” Alor bann Zwif dir li, “To pena sinkant-an e to dir ki to finn trouv Abraam?” Zezi dir zot, “Vremem, laverite mo dir zot, avan Abraam ti ne, mwa, mo ti la.” Lerla zot ramas ros pou avoy lor li me Zezi kasiet e li sorti dan Tanp. Letan Zezi ti pe ale, li trouv enn dimounn aveg depi so nesans. Lerla so bann disip poz li enn kestion, “Kifer li aveg, akoz so pese ou bien akoz pese so fami?” Zezi reponn, “Pa akoz so pese, ni akoz pese so fami me li aveg pou ki dimounn trouv travay Bondie dan li.” Tanki ankor lizour, nou bizin fer travay Sa-Enn ki finn avoy mwa la; lanwit pe vini kot personn pa kapav travay. Tanki mo dan lemond, momem lalimier lemond.” Letan li finn fini koze, li kras anba, li fer inpe labou avek so lakras e li pas labou lor lizie aveg-la. Apre Zezi dir li, “Al lav to figir dan pisinn Siloe” (Siloe vedir anvwaye). Li ale, li lav so figir e kan li revini, li trouv kler. Bann vwazin ek bann dimounn ki ti abitie trouv li demann sarite, poz kestion, “Pa limem ki ti abitie asiz la pou demann sarite?” Ena pe dir, “Limem sa.” Enn lot bann pe dir, “Pa li sa, me kikenn ki parey kouma li.” Me li, li dir, “Momem sa.” Zot demann li, “Ki finn arive pou ki to trouv kler?” Li reponn, “Sa dimounn ki apel Zezi la, limem finn fer labou, finn pas sa lor mo lizie e finn dir mwa, ‘Al lav to figir dan pisinn Siloe.’ Alors mo finn ale e letan mo finn fini lav mo figir, mo finn trouv kler.” Zot dir li, “Kot li ete?” Li reponn, “Mo pa kone.” Zot amenn sa dimounn ki ti aveg la devan bann Farizien. Zour ki Zezi finn fer labou e finn ouver so lizie, ti enn zour saba. Ankor enn fwa, bann Farizien demann li kouma li finn arive trouv kler. Li reponn zot, “Li finn met labou lor mo lizie, mo finn al lav mo figir e aster-la mo trouve.” De-trwa Farizien dir li, “Sa dimounn ki finn fer sa la, pa posib ki li sorti kot Bondie, parski li pa respekte saba.” Enn lot bann ti pe dir, “Kouma enn peser kapav fer sa kalite mirak-la?” Lerla finn ena divizion ant zot. Ankor enn fwa zot demann aveg-la, “Ki to ena pou dir lor sa dimounn ki finn ouver to lizie la?” Li reponn zot, “Li enn Profet.” Bann Zwif pa ti pe krwar ki li ti aveg avan e ki aster-la li trouv kler. Lerla zot apel so bann fami. Zot demann bann-la, “Zot garson mem sa? Limem ki zot dir finn ne aveg? Kouma li kapav trouv kler aster-la?” Lerla so bann fami dir, “Wi, nou kone li nou garson e li finn ne aveg. Kouma li trouv kler aster-la, sa nou pa kone e nou pa kone kisann-la finn ouver so lizie; al demann li, li ase gran pou reponn par limem.” So bann fami finn reponn koumsa, parski zot ti per bann Zwif ki finn tom dakor pou met deor dan sinagog tou dimounn ki deklare ki Zezi Lemesi. Akoz samem so fami dir, “Li ase gran pou reponn par limem, al demann li.” Enn deziem fwa, zot apel aveg-la e zot demann li, “Dir laverite devan Bondie, nou kone ki sa dimounn-la enn peser.” Me li reponn, “Mo pa kone si li enn peser; me mo kone ki mo ti aveg e ki aster-la mo trouv kler.” Zot dir li, “Ki li finn fer ar twa? Kouma li finn fer pou ouver to lizie?” Li reponn zot, “Mo finn rakont zot tou, me zot pa finn ekoute; kifer zot anvi tann sa ankor? Kitfwa, zot osi, zot anvi vinn so disip?” Zot tom lor li, zot insilte li, “Si twa to enn so bann disip, nou, nou bann disip Moiz. Nou, nou kone ki Bondie finn koz ar Moiz, me li, nou pa mem kone kot li sorti.” Boug-la dir zot, “Li bien-bien drol seki zot pe dir! Zot pa kone kot li sorti alors ki li finn ouver mo lizie. Nou kone ki Bondie pa ekout bann peser me si kikenn ador Bondie e fer so volonte, Bondie ekout li. Zame depi ki lemond existe, mo finn tann kikenn ouver lizie enn dimounn ki finn ne aveg. Nek dimounn ki sorti kot Bondie ki kapav fer kiksoz parey.” Zot reponn li, “To dan pese depi to nesans e aster-la to vinn pres nou moral? Montre nou seki nou bizin fer?” Apre sa, zot met li deor. Zezi finn aprann ki zot finn pous aveg-la; letan Zezi trouv li, li demann li, “Eski to krwar dan Garson Limanite?” Li reponn, “Misie, kisann-la sa, pou mo krwar dan li?” Zezi dir li, “To finn trouv li. Sa dimounn ki pe koz ar twa la, limem sa.” Lerla li dir, “Segner, mo krwar.” E li tom azenou devan Zezi. Zezi dir li, “Mo finn vinn lor later pou rann zizman e pou ki dimounn ki pa trouv kler, trouve, e pou ki dimounn ki trouv kler, vinn aveg.” Enn-de Farizien ki ti pre ar Zezi tann sa e zot dir li, “To pe rod dir ki nou osi nou aveg?” Zezi reponn zot, “Si zot ti aveg, zot pa ti pou koupab me aster ki zot pe dir, zot trouv kler, zot res dan zot pese.” Zezi dir, “Vremem laverite mo dir zot, seki pa rant dan park mouton par laport me li sot miray, li enn voler, li enn bandi. Me seki pas par laport, limem berze bann mouton. Gardien park ouver laport pou li: bann mouton tann lavwa berze letan li kriy sakenn par so nom e li fer zot sorti. Kan li finn amenn tou so mouton deor, li mars devan zot, bann-la swiv li, parski zot konn so lavwa. Zot pa pou swiv enn etranze; kan zot tann lavwa enn etranze zot sove parski zot pa konn lavwa lezot dimounn.” Letan Zezi rakont zot sa parabol-la, zot pa ti konpran nanye lor seki li ti pe dir. Alors Zezi dir zot ankor, “Vremem laverite mo dir zot, momem laport bann mouton. Tou bann seki finn vinn avan mwa, bann voler, bann bandi e bann mouton pa finn ekout zot. Momem laport; seki pas par mwa, mo pou sov li, li pou kapav rantre sorti kouma li anvi e pou touzour ena patiraz pou li. Voler vini zis pou kokin, touye ek detrir; mwa, mo finn vini pou zot gagn lavi, e pou ki zot gagn li an abondans. Momem bon berze; enn bon berze expoz so lavi pou so bann mouton. Dimounn ki travay zis pou kas pa enn berze; bann mouton-la pa pou li. Kan li trouv loulou vini, li kit mouton, li sove, li ale. Lerla loulou trap zot e farous zot. Li sove parski li travay zis pou kas e li pa pran kont bann mouton. Momem bon berze, mo konn mo brebi e mo brebi konn mwa. Kouma mo papa konn mwa, e mwa mo konn mo papa, mo pare pou donn mo lavi pou mo bann brebi. Mo ena lezot mouton ankor me zot pa ankor dan sa park-la; mo bizin al rod zot osi e zot pou ekout mo lavwa. Lerla pou ena enn sel troupo ek enn sel berze. Akoz samem mo papa kontan mwa parski mo expoz mo lavi. Kan mo expoze, mo regagn lavi ankor. Personn pa pran mo lavi; mo donn mo lavi par momem; mo ena pouvwar donn li, parey kouma mo ena pouvwar repran li. Mo finn resevwar sa pouvwar-la ar mo papa.” Ankor enn fwa, ti ena divizion parmi bann Zwif, akoz so bann parol. Boukou parmi zot dir, “Ena enn demon lor li, li fou, ki fer zot ekout li?” Enn lot bann dir, “Sa bann parol-la pa kapav sorti ar enn dimounn ki ena demon lor li; eski demon kapav ouver lizie aveg?” Ti fet Konsekrasion Tanp Zerizalem. Ti liver. Zezi ti dan Tanp e li ti pe ale-vini anba galri Salomon. Bann Zwif antour li e zot demann li, “Ziska kan to pou gard nou dan sispans? Dir nou enn fwa si tomem Lemesi?” Zezi reponn zot, “Mo finn deza dir zot, zot pale krwar mwa; bann travay ki mo fer lor nom mo Papa rann temwaniaz lor mwa, me zot pa krwar parski zot pa form parti mo bann brebi. Mo brebi tann mo lavwa, mo konn zot e zot swiv mwa. Mo donn zot lavi eternel, e zame zot pou mor. Personn pa pou kapav tir zot dan mo lame. Mo Papa ki finn donn mwa bann brebi-la, li pli gran ki tou e personn pa pou kapav ras zot dan lame mo Papa. Mo Papa ek mwa nou enn sel.” Bann Zwif ramas ros ankor enn fwa pou avoy lor li. Zezi reponn, “Mo finn montre zot boukou bon kiksoz ki mo Papa finn montre mwa fer, pou ki zafer zot anvi bat mwa kout ros?” Bann Zwif dir li, “Nou pa pe bat twa akoz enn bon kiksoz me parski to finn blasfeme: to enn zom kouma nou e to pran twa pou Bondie.” Zezi reponn zot, “Eski pa finn ekrir dan zot lalwa ki Bondie finn dir, ‘Zot bann bondie?’ Si Bondie finn apel bondie bann seki finn resevwar Laparol (e kouma nou kone, nou pa kapav sanz sa Parol Lekritir-la), kouma zot kapav dir ki mo pe blasfeme parski mo finn dir ki mo Garson Bondie, alors ki mo papa finn swazir mwa e finn avoy mwa dan lemond? Si mo pa pe fer travay mo Papa, pa bizin krwar dan mwa, me si mo pe fer so travay, mem si zot pale krwar dan mwa, krwar omwin dan bann travay-la. Rekonet mo Papa e konpran ki li dan mwa, e mwa, mo dan li.” Ankor enn fwa, zot rod trap li me li sap dan zot lame, li ale. Zezi resot larivier Zourdin ankor pou al dan rezion kot Zan ti pe batize. Lerla li res laba mem. Boukou dimounn vinn ar Zezi e zot dir, “Zan pa finn fer okenn mirak, pourtan tou seki li finn dir lor Zezi ti vre.” Lerla boukou krwar dan Zezi dan sa landrwa-la. Enn dimounn ti finn tom malad. Li ti apel Lazar; li ti res Betani kot Marie ek so ser Mart. Marie, limem ki ti vers parfin lor lipie Zezi e ti souy li avek so seve; so frer Lazar finn tom malad. De ser la avoy nouvel Zezi, “Segner, dimounn ki to kontan la malad.” Me letan Zezi tann sa, li dir, “Sa maladi-la pa pou donn lamor, me li pou montre laglwar Bondie e pou manifeste osi laglwar Garson Bondie.” Zezi ti bien kontan Mart ek so ser, ek so frer Lazar. Kan li finn tann dir ki Lazar ti malad, li res ankor de zour dan landrwa kot li ti ete. Apre sa li dir ar so bann disip, “Anou retourn Zide ankor.” Bann disip dir li, “Rabi, bann Zwif ti pe rod bat twa kout ros laba, be to pou retourn laba ankor?” Zezi reponn, “Eski pena douz-er-tan dan enn zour? Si kikenn mars anplin lizour, li pa pou kogne, parski li pe trouv lalimier ki ekler lemond. Si kikenn mars dan nwar, li tonbe, parski pena lalimier dan li.” Apre Zezi kontigne, “Nou kamarad Lazar pe dormi, me mo pe al lev li.” So bann disip dir li, “Segner, si li pe dormi, li pou bien.” Zezi ti pe koz lor lamor Lazar me zot, zot ti krwar ki li ti pe koz lor so somey. Lerla Zezi dir zot fran, “Lazar finn mor.” “Mo kontan pou zot ki mo pa ti laba pou ki zot krwar. Anou al get li.” Toma, ki vedir zimo, dir ar so bann kamarad, “Nou al avek li, pou nou mor avek li.” Kan Zezi arive, li dekouver ki Lazar ti dan tonbo depi kat zour. Betani ti apepre enn distans de mil ar Zerizalem. Boukou Zwif ti vinn montre zot sinpati Mart ek Marie apre lamor zot frer. Ler Mart tann dir ki Zezi pe vini, li al zwenn li. Marie res lakaz. Mart dir Zezi, “Segner, si to ti la, mo frer pa ti pou mor. Me mem aster-la mo kone ki tou seki to demann Bondie, Bondie pou donn twa.” Zezi dir li, “To frer pou resisite.” Mart reponn li, “Mo kone ki li pou resisite kan pou ena rezireksion dan dernie zour.” Zezi dir li, “Momem larezireksion, momem lavi; dimounn ki krwar dan mwa pou viv mem si li finn mor. Tou dimounn ki viv e krwar dan mwa zame pou mor; eski to krwar dan seki mo pe dir?” Li reponn, “Wi Segner, mo krwar ki twa, to Lekris, Garson Bondie ki pe vinn dan lemond.” Apre sa bann parol-la, Mart al apel so ser Marie e li dir li dousma dan so zorey, “Lemet lamem, li pe apel twa.” Kouma Marie tann sa, li leve, li al zwenn Zezi. Zezi pa ti ankor rant dan vilaz me li ti ankor dan landrwa kot Mart ti vinn zwenn li. Letan bann Zwif, ki ti vinn rann vizit Marie pou konsol li, trouv li leve, sorti deor ale, zot swiv li. Zot ti panse ki li ti pe al lor tonbo pou plore. Kan Marie ariv dan landrwa kot Zezi ti ete, kouma li trouv Zezi, li tom dan so lipie e li dir li, “Segner, si to ti la, mo frer pa ti pou mor.” Letan Zezi trouve kouma li pe plore e kouma bann Zwif ki ti avek li osi pe plore, so leker sere, li boulverse. Li dir, “Kot zot finn met so lekor?” Zot reponn, “Segner, vinn gete.” Zezi plore. Bann Zwif dir, “Get kouma li ti kontan li.” Ena ti pe dir, “Eski li pa ti kapav anpes li mor alors ki li finn kapav ouver lizie enn aveg?” Zezi ti ankor boulverse, ler li al devan tonbo. Tonbo-la ti enn kavern dan ros e ti ena enn gro ros dan so lantre. Zezi dir, “Tir sa ros-la.” Mart, ser Lazar dir, “Segner, enn loder pou monte; sa fer kat zour ki li ladan.” Zezi dir li, “Mo pa finn dir twa ki si to krwar to pou trouv laglwar Bondie?” Lerla zot tir ros-la. Zezi lev so lizie lao e li dir, “Papa, mo rann twa gras parski to finn ekout mwa. Mo kone ki to exos mwa touletan me mo pe dir sa akoz sa lafoul-la, pou ki zot krwar ki to finn avoy mwa.” Letan li fini dir sa, li kriy pli for ki li kapav, “Lazar, sorti deor!” Lazar ki ti mor, sorti deor avek bandaz dan so lipie, so lame, ek enn vwal lor so figir. Zezi dir zot, “Delarg li, les li ale.” Lerla boukou Zwif, ki ti vinn kot Marie, finn krwar dan Zezi kan zot finn trouv seki li finn fer. Me de-trwa al get bann Farizien e rakont zot seki Zezi finn fer. Bann gran pret ek bann Farizien fer enn gran konsey e zot dir “Ki nou pou fer? Li pe fer boukou mirak? Si nou les li kontigne san fer nanye, boukou dimounn pou krwar dan li e bann Romin pou vini e zot pou kraz nou Tanp ek zot pou detrir nou pei.” Kaif, ki ti gran pret sa lane-la, ti avek zot. Li dir, “Zot pa konn nanye, Zot pa konpran, li dan zot lavantaz ki enn sel dimounn mor pou lepep plito ki tou dimounn.” Li pa finn dir sa par limem me kouma li ti gran pret sa lane-la, li ti pe fer enn profesi ki Zezi pou mor pou bann Zwif; Pa zis pou zot tou sel, me pou ki tou bann zanfan Bondie ki finn disperse, vinn enn sel. Depi sa zour-la, bann-la fer plan pou touy li. Zezi ti nepli kapav ale-vini dan Lazide, me li retir li dan enn landrwa pre ar dezer, dan lavil Efraim e li res laba avek so bann disip. Pak ti pe koste. Boukou dimounn kit zot landrwa e zot mont Zerizalem avan fet Pak pou pirifie zot. Zot ti pe rod Zezi; zot ti dan Tanp e zot ti pe dir ant zot, “Ki zot panse? Eski li pou vini pou fet?” Bann gran pret ek bann Farizien finn donn lord, vinn dir zot si kikenn kone kot li ete, koumsa zot pou kapav aret li. Sis zour avan fet Pak, Zezi ti vinn Betani kot Lazar, limem ki Zezi finn resisite parmi bann mor. Zot ti invit Zezi pou dine; Mart ti pe servi e Lazar ti enn parmi bann invite ki ti pe asiz lor mem latab ar Zezi. Marie pran enn flakon parfin ki ti fer ar enn plant bien rar e ki ti kout bien-bien ser; li vers parfin-la lor lipie Zezi, apre li souy li avek so seve. Lakaz-la net ranpli ek parfin-la. Me Zida Iskaryot, enn parmi bann disip, (limem ki ti pre pou vann Zezi), dir “Kifer pa ti vann sa parfin-la pou trwa-san pies larzan, koumsa ti kapav partaz kas-la avek bann dimounn pov?” Li pa ti pe dir sa parski li ti kontan bann pov me parski li ti enn trianger; limem ti kontrol finans e li ti pran kas, met dan so pos. Zezi dir, “Les sa fam-la trankil! Li finn montre seki li pou fer zour mo lanterman. Bann pov, pou ena touzour parmi zot me mwa mo pa pou touzour ar zot.” Enn gran lafoul Zwif finn aprann ki Zezi ti la. Zot pa finn vini zis akoz Zezi me osi pou get Lazar ki Zezi ti resisite parmi bann mor. Alors bann gran pret finn deside pou touy Lazar osi parski boukou parmi bann Zwif ti pe kit zot akoz Zezi, e zot ti pe met zot krwayans dan li. Landime, enn gran lafoul ki ti vini pou fet Pak, finn tann dir ki Zezi pe vinn Zerizalem. Lerla zot pran bann brans palmis e zot al akey li. Zot kriye, “Ozana, Bondie finn beni Sa-Enn ki pe vinn lor so nom la, limem lerwa Izrael.” Zezi trouv enn ti-bourik, li asiz lor li. Kouma finn ekrir dan Lekritir, “Pa gagn per, tifi Sion, ala to lerwa pe vini; li pe mont lor enn ti-bourik.” Letan sa ti pase, so bann disip pa ti pe konpran me apre, kan Zezi finn glorifie, zot ti rapel seki Lekritir finn dir e seki dimounn ti fer pou li. Lerla tou dimounn ki ti avek Zezi, rakont seki zot finn trouve kan Zezi ti kriy Lazar depi so tom e ti re-donn li lavi. Akoz sa mirak-la, lafoul ti vinn zwenn Zezi. Lerla bann Farizien dir ant zot, “Zot trouve, tou seki fer pa marse; gete, lemond pe galoup deryer li.” Ti ena de-trwa Grek ki finn mont Zerizalem pou priye pou fet Pak. Zot apros ar Filip ki ti res Betsaida, enn lavil dan Galile, e zot dir li, “Misie, nou anvi trouv Zezi.” Filip al dir sa Andre e Andre ek Filip vinn dir sa Zezi. Zezi reponn zot, “Ler finn arive pou ki Garson Limanite glorifie. Vremem, laverite mo dir zot, si enn lagrin dible pa mor kan li tom dan later, li res tou sel, me si li mor li raport boukou fri. Seki kontan so lavi pou perdi li, seki pa atase ar so lavi dan lemond kot nou pe viv, pou gard li pou touletan. Si kikenn anvi servi mwa, fode li swiv mwa; la kot mo ete, mo serviter osi pou la; si kikenn servi mwa, mo Papa pou onor li.” “Aster mo santi mwa boulverse; me ki mo pou dir, ‘Papa sap mwa ladan?’ Me akoz samem mo finn vini.” “Papa, glorifie to nom.” Lerla enn lavwa sorti dan lesiel, “Mo finn deza glorifie li e mo pou glorifie li ankor.” Lafoul ki ti prezan finn tande e zot dir, “Loraz sa!” Ena dir, “Enn anz finn koz ar li!” Me Zezi reponn, “Sa lavwa-la pa finn koze pou mwa me pou zot. Aster-la mo pou ziz lemond e so gran sef pou deor. E mwa, kan bann-la pou lev mwa lao depi lor later, mo pou atir tou dimounn ar mwa.” Li ti pe dir sa pou montre ki manier li ti pou mor. Lafoul pran laparol, “Dapre nou lalwa nou finn tande ki Lemesi zame pou mor; kouma to kapav dir bizin lev Garson Limanite lao? Kisann-la Garson Limanite?” Zezi dir zot, “Lalimier pou res ankor inpe letan avek zot; kontigne marse kan lalimier ankor ar zot, pou ki zot pa tom dan marenwar; parski dimounn ki mars dan nwar, pa kone kot li pe ale. Kan zot dan lalimier, krwar dan lalimier pou ki zot vinn bann zanfan lalimier.” Kan Zezi finn fini dir sa bann parol-la, li sorti e li al trankil dan enn kwin. Malgre tou bann sign ki li finn fer devan zot, zot kontign pa krwar dan li. Tousala finn arive pou ki parol profet Izai akonpli, “Segner kisann-la finn krwar dan parol ki nou finn anonse? Kisann-la finn dekouver lafors Lesegner?” Zot pa ti pou kapav krwar parski Izai finn dir ankor, “Bondie finn rann zot lizie aveg, zot leker dir kouma ros, pou ki zot pa trouv kler avek zot lizie, pa konpran avek zot leker, lerla zot pa pou konverti e zot pa pou gagn zot gerizon.” Izai finn koz lor Zezi parski li finn trouv so laglwar. Malgre sa, boukou responsab krwar dan li; me akoz bann Farizien, zot pa ti les dimounn kone, pou pa met zot deor dan sinagog. Laverite, seki zot ti prefer plito laglwar lor later ki laglwar Bondie. Zezi kriy for, “Dimounn ki krwar dan mwa, pa krwar zis dan mo tou sel me dan Sa-Enn ki finn avoy mwa la. Dimounn ki trouv mwa, trouv Sa-Enn ki finn avoy mwa la. Momem lalimier ki finn vinn dan lemond. Seki krwar dan mwa, pa pou res dan teneb. Si kikenn tann mo parol me pa gard zot, mo pa la pou zize. Mo pa finn vini pou kondann lemond me pou sov lemond. Seki rezet mwa e pa aksepte mo bann parol, finn fini pas zizman lor limem. Parol ki mo pe dir, samem pou ziz li dan dernie zour. Tou seki mo pe dir, pa sorti ar mwa me sorti kot mo Papa ki finn avoy mwa. Mo Papa finn komann mwa fer sa lansegnman-la. Mo kone ki so komannman donn lavi eternel; seki mo pe dir, samem mo Papa finn avoy mwa dir.” Avan fet Pak, kan Zezi trouve ki so ler finn vini pou kit sa later-la pou al rezwenn so Papa, kouma li ti kontan bann ki ti pe swiv li lor later, li kontign kontan zot ziska lafin. Letan zot ti pe pran zot repa, diab finn fini akapar lespri Zida, garson Simon Iskaryot, pou li vann Zezi. Kouma li kone ki so Papa finn met tou dan so lame, ki li sorti kot Bondie e ki li pe retourn kot Bondie, Zezi leve, kit latab, retir so manto, pran enn serviet e atas li dan so lerin. Apre sa, li vers dilo dan enn kivet e li koumans lav lipie so bann disip; li souy zot lipie avek serviet ki ti dan so lerin. Letan li ariv devan Simon Pier, Simon Pier dir, “Twa, Segner, to pou lav mo lipie?” Zezi reponn, “To pa konpran seki mo pe fer aster-la me pli tar to ava konpran.” Pier dir, “Pena sime to lav mo lipie.” Zezi reponn, “Si mo pa lav to lipie to pa pou partaz mo lavi.” Simon Pier dir, “Segner, si koumsa, pa lav zis mo lipie me mo lame ek mo latet osi.” Zezi dir, “Seki finn fini begne, pa neseser li begne ankor parski so lekor prop; li bizin lav zis so lipie. Zot, zot prop me pa zot tou selman.” (Zezi ti deza kone kisann-la ti pou vann li; akoz samem li dir, “Pa zot tou ki prop.”) Kan Zezi finn fini lav zot lipie, li remet so linz lor li e li repran so plas lor latab; apre li dir zot, “Eski zot konpran ki mo finn fer ar zot? Zot abitie apel mwa ‘Met ek Segner.’ E zot ena rezon. Momem Met ek Segner. Si mwa ki Met ek Segner, mo finn lav zot lipie, aster-la, zot osi zot bizin lav lipie zot kamarad. Mo finn donn zot sa lexanp-la pou ki zot fer parey kouma mo finn fer ar zot. Vremem, laverite mo dir zot, enn serviter pa pli gran ki so met e enn dimounn ki finn avoye pa pli gran ki dimounn ki finn avoy li la. Si aster zot finn konn tousala, zot pou bienere si zot met sa an pratik. Mo pa pe dir sa pou zot tou; mo konn bann seki mo finn swazir me fode ki Lekritir realize, ‘Seki finn manz mo dipin, finn kras dan mo lasiet.’ Mo dir zot tousala avan ki li arive, pou ki kan sa arive, zot krwar ki Mo-Mem-Mwa. Vremem, laverite mo dir zot, seki resevwar dimounn mo avoye, pe resevwar mwa e seki resevwar mwa, pe resevwar Sa-Enn ki finn avoy mwa la.” Letan Zezi finn fini koze, li ti bien boulverse e li dir devan zot tou, “Vremem, laverite mo dir zot, enn parmi zot pou trayir mwa.” Sakenn get so kamarad; zot res bet e zot pa kone pou kisann-la Zezi pe dir sa. Disip ki Zezi ti kontan la, ti pe asiz koste ar li. Simon Pier fer li enn sign pou ki Zezi dir li kisann-la sa. Lerla li vers so latet lor zepol Zezi e li demann li, “Segner, kisann-la sa?” Zezi reponn li, “Dimounn ki mo pou donn sa bout dipin ki mo tranp dan sa lasiet-la, limem sa.” Lerla Zezi tranp morso dipin-la, donn li Zida garson Simon Iskaryot. Kouma Zida pran dipin-la, Satan rant dan li. Lerla Zezi dir li, “Degaze al fer seki to ena pou fer enn fwa.” Me personn parmi bann dimounn ki ti atab, pa ti konpran ki fer Zezi finn dir sa. Ena ti krwar, kouma Zida ti kontrol finans, Zezi finn dir li, “Al aste seki nou bizin pou fet Pak ou bien donn kiksoz bann pov.” Kouma Zida pran sa bout dipin-la, li sorti, li ale. Ti fer nwar deor. Kouma Zida ale, Zezi dir, “Aster-la laglwar Garson Limanite finn manifeste e laglwar Bondie pou manifeste dan so Garson. Si laglwar Bondie manifeste dan so Garson, alors Bondie pou manifeste dan limem laglwar Garson Limanite e Bondie pou glorifie li aster-la mem. Mo bann zanfan, mo pou avek zot pou enn tigit letan ankor; zot pou rod mwa me seki mo finn dir bann Zwif, mo pe dir zot li aster-la, ‘La kot mo pe ale, zot pa kapav vini.’ Mo donn zot enn komannman nouvo: kontan zot kamarad, parey kouma mwa, mo kontan zot. Zot bizin kontan zot kamarad. Si zot ena lamour pou zot kamarad, tou dimounn pou kone ki zot mo disip.” Simon Pier demande, “Segner, kot to pe ale?” Zezi reponn li, “La kot mo pe ale, to pa pou kapav swiv mwa aster-la, pli tar to pou swiv mwa.” Pier dir, “Segner, ki fer mo pa kapav swiv twa depi aster-la mem? Mo pare pou donn twa mo lavi.” Zezi reponn, “To pou donn to lavi pou mwa? Vremem, laverite mo dir twa, avan kok sante to pou finn fini renie mwa trwa fwa.” “Pa bizin zot boulverse; krwar dan Bondie, krwar osi dan mwa. Dan lakaz mo Papa ena boukou plas, sinon mo pa ti pou dir ki mo pe al prepar enn plas pou zot? Kan mo pe ale mo pou al prepar enn plas pou zot; apre sa mo pou revini e mo pou vinn sers zot e la kot mo pou ete zot osi, zot pou ete. Zot kone sa sime kot mo pe ale la.” Lerla Toma dir, “Segner nou pa kone kot to pe ale; be kouma nou kapav kone ki sime bizin pase?” Zezi dir li, “Momem sime, laverite, lavi; personn pa kapav al kot mo Papa si li pa pas par mwa. Si zot ti konn mwa, zot ti pou konn mo Papa osi. Aster-la, zot konn mo Papa e zot finn trouv li.” Filip dir li, “Segner, montre nou to Papa, samem ase.” Zezi reponn li, “Tou sa letan mo ar zot la, to pa konn mwa Filip? Seki finn trouv mwa finn trouv mo Papa. Kouma to kapav dir, ‘Montre nou to Papa’? Eski to pa krwar ki mo dan mo Papa e ki mo Papa dan mwa? Sa bann parol ki mo pe dir zot la, pa sorti dan mwa me mo Papa ki viv dan mwa, fer mwa dir sa. Krwar mwa, mo dan mo Papa e mo Papa dan mwa; si zot pa krwar, krwar omwin dan seki mo pe fer. Vremem, laverite mo dir zot, seki krwar dan mwa pou fer seki mo fer; li pou mem fer pli gran kiksoz ki mwa, parski mwa mo pe al kot mo Papa. Tou seki zot demande lor mo nom, mo pou fer li pou ki zot trouv laglwar mo Papa dan seki mo fer. Seki zot demande lor mo nom, mo pou fer li.” “Si zot kontan mwa, zot pou obzerv mo bann komannman. Mo pou demann mo Papa, donn zot Sa-Enn ki pou defann zot la pou ki li res touletan avek zot. Limem Lespri laverite. Lemond pa kapav resevwar li parski li pa trouv li e pa konn li. Zot, zot konn li parski li res ar zot e li dan milie zot. Mo pa pou les zot orfelin; mo pou revini. Dan enn tigit letan ankor, lemond nepli pou trouv mwa me zot, zot pou kontigne trouv mwa parski mo pou viv e zot osi zot pou viv. Sa zour-la, zot pou kone ki mo dan mo Papa e ki zot dan mwa e ki mwa, mo dan zot. Seki gard mo bann komannman e met zot an pratik, mo kone ki li kontan mwa; seki kontan mwa, mo Papa pou kontan li e mwa, mo pou kontan li osi e li pou kone ki mo ete vremem.” Zida (pa Zida Iskaryot) dir, “Segner, kouma to kapav dir ki to pou fer nou konn twa vremem alors ki to pa pou fer lemond konn twa?” Zezi reponn, “Si vremem kikenn kontan mwa, li pou met mo parol an pratik, mo Papa pou kontan li, nou pou vinn kot li e nou pou fer nou lakaz kot li. Seki pa kontan mwa, pa pou met mo parol an pratik. Parol ki zot pe tande pa sorti dan mwa, me sorti kot mo Papa ki finn avoy mwa. Mo finn dir zot tousala parski mo ankor avek zot. Me Sa-Enn ki pou defann zot la, limem Lespri Sin ki mo Papa pou avoy lor mo nom. Li, li pou montre zot tou kiksoz e li pou fer zot rapel tou seki mo finn dir zot. Shalom, mo donn zot mo lape, pa manier lemond me dan mo manier. Pa boulverse, pa gagn per. Zot finn tande seki mo finn dir zot, ‘Mo pe ale me mo pe revini.’ Si zot ti kontan mwa, zot ti pou dan lazwa kan mo dir zot ki mo pe al kot mo Papa, parski mo Papa pli gran ki mwa. Mo dir zot tousala depi aster-la mem pou ki kan sa arive, zot kontigne krwar. Mo nepli pou dir zot tousala; sef demon ki diriz lemond pe vini e li pa kapav fer mwa nanye. Me lemond bizin kone ki mo kontan mo Papa, akoz samem tou seki mo Papa dir mwa fer, mo fer. Leve, nou ale.” “Mwa, mo vre pie rezin, mo Papa, proprieter karo. Tou brans ki lor sa pie-la e ki pa raporte, mo Papa tir zot zete; me tou brans ki raporte, li tay zot pou ki zot donn ankor plis. Zot finn deza pirifie par parol ki mo finn dir zot. Res ar mwa, kouma mwa mo res ar zot. Parey kouma enn brans pa kapav raport fri si li pa res lor pie rezin-la, zot osi, zot pa pou kapav fer nanye si zot pa res ar mwa. Mwa, mo pie rezin e zot, zot bann brans. Dimounn ki res ar mwa e mwa ar zot, zot pou raport enn kantite fri parski san mwa zot pa kapav fer nanye. Si kikenn pa res ar mwa, pou zet li deor parey kouma fer ek enn brans ki pa raporte; lerla li pou sek. Dimounn ramas sa bann brans-la, zet zot dan dife e zot brile. Si zot res ar mwa e mo parol res ar zot, tou seki zot demande zot pou gagne. Mo Papa glorifie, ler zot raport boukou fri e ler zot vinn mo bann disip. Kouma mo Papa kontan mwa, mwa osi mo kontan zot. Res dan mo lamour. Si zot gard mo bann komannman, zot pou res dan mo lamour parey kouma mwa, mo gard komannman mo Papa e mo res dan so lamour. Mo finn dir zot tousala pou ki mo lazwa res dan zot e ki zot lazwa konple dan enn gran lazwa. Ala mo komannman, kontan zot prosin, parey kouma mwa mo kontan zot. Pena pli gran lamour ki existe ler kikenn donn so lavi pou so bann kamarad. Zot mo bann kamarad si zot fer tou seki mo komann zot. Mo nepli apel zot serviter, parski enn serviter pa kone ki so met fer; mo apel zot kamarad, parski tou seki mo finn tande kot mo Papa, mo finn fer zot kone. Pa zot ki finn swazir mwa, me mwa ki finn swazir zot. Mo finn donn zot mision, ale, raport fri e ki zot fri dire. Lerla tou seki zot demann mo Papa lor mo nom, li pou donn zot. Mo donn zot enn komannman: kontan zot prosin. Kan lemond pou ayir zot, pa bliye ki li finn ayir mwa avan. Si zot ti viv pou lemond, lerla lemond ti pou konsider zot kouma so prop zanfan; me zot pa pou lemond; mwa, mo finn swazir zot, mo finn tir zot dan lemond. Akoz samem lemond ayir zot. Rapel parol ki mo finn dir zot, ‘Enn serviter pa pli gran ki so met.’ Si bann-la finn persekit mwa, bann-la pou persekit zot osi. Si bann-la swiv mo parol, bann-la pou swiv zot parol osi. Me bann-la pou fer tousala parski zot ar mwa e parski bann-la pa konn Sa-Enn ki finn avoy mwa la. Si mo pa ti vini e mo pa ti koz ar bann-la, zot pa ti pou ena pese me aster-la zot pena okenn exkiz pou zot pese. Dimounn ki ayir mwa, ayir mo Papa osi. Si mo pa ti fer pou zot, travay ki personn pa kapav fer, zot ti pou ena bon exkiz pou zot bann pese; me aster-la zot finn trouve e zot kontigne ayir mwa ek mo Papa. Tousala finn arive pou ki parol lalwa realize, ‘Zot pou ayir mwa san okenn rezon.’ Kan Sa-Enn ki pou defann zot la pou vini, li pou donn so temwaniaz lor mwa. Li sorti kot mo Papa; mo pou avoy li e limem Lespri laverite. Zot osi zot pou donn zot temwaniaz parski depi koumansman zot avek mwa.” “Mo finn dir zot tousala pou ki zot pa abandonn zot lafwa. Bann-la pou met zot deor dan sinagog. Me ler pe vini kot dimounn, ki pou touy zot, pou krwar ki zot pe servi Bondie kan zot pe fer sa, parski zot pa finn konn ni mo Papa, ni mwa. Me mo pe dir zot sa, pou ki kan ler vini, zot rapel seki mo finn dir zot. Mo pa finn dir zot tousala depi koumansman parski mo ti avek zot. Me aster-la mo pe al kot Sa-Enn ki finn avoy mwa la e personn pa demann mwa, ‘Kot to pe ale?’ Me zot leker fermal parski mo finn dir zot sa. Me mo pe dir zot laverite, li dan zot lavantaz ki mo ale; parski si mo pa ale, Sa-Enn ki pou defann zot la, pa pou vinn ar zot; me si mo ale, mo pou avoy li. Kan li vini, li pou prouve ki lemond pa kone ki ete pese, lazistis ek zizman. Bann-la dan pese parski zot pa krwar dan mwa; Ki ete lazistis? Mo pe al kot mo Papa e zot nepli pou trouv mwa ankor; Ki ete zizman? Sef lemond finn fini zize. Mo ena ankor boukou kiksoz pou dir zot me li tro lour pou zot, aster-la; Kan Lespri laverite vini, li pou kondir zot dan laverite. Li pa pou koz dapre so prop lide, me tou seki li finn tande, samem li pou dir; li pou anons zot tou seki pou vini. Li pou rann mwa glwar parski li pou anons zot tou seki li finn resevwar ar mwa. Tou seki mo Papa ena, li pou mwa; akoz samem mo finn dir zot, ki Lespri pou anons zot seki li finn resevwar ar mwa. Dan enn tigit letan zot nepli pou trouv mwa e dan enn tigit letan ankor, zot pou retrouv mwa.” De-trwa so bann disip ti pe demande ant zot, ki savedir “Enn tigit letan zot pa pou trouv mwa e dan enn tigit letan ankor, zot pou retrouv mwa?” E ki savedir “Mo pe al kot mo Papa?” Alors zot dir, “Ki savedir ‘enn tigit letan?’ Nou pa konpran sa koze-la.” Zezi ti kone ki zot ti pe anvi kestionn li; alors li dir zot, “Zot pe rod konpran ki savedir, ‘Enn tigit letan zot pa pou trouv mwa e dan enn tigit letan ankor zot pou retrouv mwa?’ Vremem, laverite mo dir zot: zot pou plore, zot pou kriye me lemond pou dan lazwa. Zot pou dan lapenn me zot lapenn pou vinn lazwa. Kan enn fam pre pou akouse, li dan lasoufrans parski so ler finn vini; me kan zanfan-la ne, li nepli pans so douler me li dan lazwa parski so zanfan finn vinn dan lemond. Aster-la zot dan lapenn me kan mo pou retrouv zot ankor, zot leker pou dan lazwa e personn pa pou kapav retir sa lazwa-la ar zot. Kan sa zour-la vini, zot nepli pou poz mwa okenn kestion; vremem, laverite mo dir zot, tou seki zot demann mo Papa lor mo nom, li pou donn zot. Ziska aster-la, zot pa finn demann nanye lor mo nom; demande, zot pou resevwar, lerla zot pou ranpli ar lazwa. Mo finn koz ar zot an parabol; me ler pe vini kot mo nepli pou koz an parabol me mo pou direk ar zot, ler mo koz lor mo Papa Sa zour-la, zot pou demann kiksoz mo Papa lor mo nom, san ki mo ena pou koz pou zot. Mo Papa bien kontan zot parski zot finn kontan mwa e zot finn krwar ki mo sorti kot Bondie. Mo sorti kot mo Papa e mo finn vinn dan lemond; mo pe kit lemond e mo pe retourn kot mo Papa.” So disip dir, “Aster to direk ar nou e to nepli koz an parabol. Aster nou kone ki to konn tou kiksoz e ki pa bizin poz twa kestion; akoz samem nou krwar to sorti kot Bondie.” Zezi dir, “Eski zot krwar aster-la? Gete, ler pe vini, ler finn fini vini, kot zot pou disperse e kot sakenn pou retourn kot li. Zot pou les mwa tousel, me mo pa tousel parski mo Papa touzour avek mwa. Mo finn dir zot tousala pou zot gagn lape an mwa. Lemond pou fer zot soufer; me gard kouraz, mo finn sorti vinker lor lemond.” Letan Zezi finn fini dir tousala, li lev so lizie, li get lesiel e li dir, “Papa, ler finn vini; glorifie to Garson, pou ki to Garson glorifie twa. Vremem, to finn donn li pouvwar lor tou dimounn e li finn donn lavi eternel tou seki to finn konfie li. Ki ete lavi eternel? Se dekouver ki tomem vre Bondie e ki Zezi Kris, limem ki to finn avoye. Mo finn glorifie twa lor later par tou seki mo finn fer; mo finn terminn louvraz ki to ti donn mwa pou fer. Papa, glorifie mwa aster; donn mwa laglwar ki mo ti ena kot twa depi koumansman, avan ki later ti kree. Mo finn fer tou dimounn ki to finn donn mwa lor later, konn to nom; zot ti pou twa, to finn donn mwa zot tou e zot finn gard to Parol. Aster-la zot finn konpran ki tou seki to finn donn mwa sorti kot twa. Mo finn donn zot Parol ki to finn konfie mwa, e zot finn resevwar li. Zot finn rekonet ki vremem mo finn sorti kot twa, e zot krwar ki to finn avoy mwa. Mo priye pou zot; mo pa pe priye pou lemond me mo priye pou tou seki to finn konfie mwa, parski zot tou pou twa. Tou seki pou mwa, pou twa e tou seki pou twa, pou mwa; mo laglwar reflekte lor zot figir. Mo nepli dan lemond alors ki zot ankor dan lemond; mwa mo pe vinn kot twa. Bondie sin, mo Papa! Protez zot par pouvwar ki to finn donn mwa. Lerla zot pou vinn enn sel kouma nou. Kan mo ti avek zot, mo ti gard zot tou par pouvwar to nom ki to finn donn mwa; mo finn vey lor zot, e personn pa finn perdi exsepte sa dimounn ki ti bizin perdi la pou ki Lekritir akonpli. Aster-la mo pe vinn kot twa e mo pe dir tousala dan lemond pou ki zot leker deborde ar mo lazwa. Mo finn konfie zot to Parol me lemond deteste zot parski zot pa dan lemond parey kouma mwa, mo pa dan lemond. Mo pa pe dimann twa, tir zot dan lemond me protez zot kont lemal. Zot pa dan lemond parey kouma mwa, mo pa dan lemond. Sanktifie zot dan laverite parski to Parol laverite. Parey kouma to finn avoy mwa dan lemond, mwa osi mo finn avoy zot dan lemond. Mo finn konsakre mwa antierman pou zot; aster-la, zot osi, zot pou konsakre zot dan laverite. Mo pa priye zis pou zot me mo priye pou tou seki pou krwar dan mwa, par parol ki mo disip pou anonse. Mo priye pou ki zot tou vinn enn sel e ki zot res ar nou parey kouma twa Papa, to dan mwa e mwa mo dan twa. Lerla lemond pou krwar ki to finn avoy mwa. Mo finn donn zot laglwar ki to finn donn mwa pou ki zot vinn enn sel parey kouma nou, nou enn sel. Mwa dan zot, twa dan mwa pou ki zot vinn enn sel. Lerla lemond pou kone ki to finn avoy mwa, ki mo kontan zot kouma to kontan mwa. Papa, seki to finn konfie mwa, mo anvi ki la kot mo ete zot avek mwa; pou ki zot kontanple laglwar ki to finn donn mwa e zot pou kone ki to kontan mwa depi avan koumansman kreasion. Twa Papa ki zis, lemond pa konn twa; mwa mo finn konn twa e zot kone ki to finn avoy mwa. Mo finn fer zot konn to nom e mo pe fer li ankor pou ki lamour ki to ena pou mwa res dan zot, kouma mwa mo dan zot.” Apre sa bann parol-la, Zezi sorti avek so bann disip. Li sot larivier Sedron, li rant dan enn zardin avek so bann disip. Zida, ki pou trayir Zezi, ti konn sa landrwa-la li osi parski Zezi ti vinn la souvan avek so bann disip. Zida vinn avek enn larme solda ek bann gard ki bann gran pret ek bann Farizien finn donn li; zot ti ena lalanp ek flanbo e zot ti arme ar gourdin. Zezi ti konn tou seki ti pou ariv li; li vinn devan zot e li demann zot, “Kisann-la zot pe rode?” Zot reponn, “Zezi Nazaret.” Li dir zot, “Mwa sa.” Zida, ki pou trayir Zezi, ti pe debout la avek zot. Kouma li dir zot, “Mwa sa”, bann-la kil deryer e zot tom anba. Zezi redemann zot ankor, “Kisann-la zot pe rode?” Zot dir, “Zezi Nazaret.” Zezi reponn zot, “Mo finn dir zot, mwa sa; si momem ki zot pe rode, les bann-la, ale.” Lerla parol ki finn dir realize, “Mo pa finn perdi personn ki to finn konfie mwa.” Simon Pier pran lepe ki ti ar li, donn serviter gran pret enn kout lepe e koup so zorey drwat. Serviter-la ti apel Malkis. Zezi dir Pier, “Remet to lepe dan so fouro; eski mo pa pou bwar koup ki mo Papa finn donn mwa?” Alors enn larme solda ek so komandan ek gard Zwif aret Zezi. Zot atas li. Zot amenn li devan Ann premie kout. Ann ti boper Kaif ki ti gran pret sa lane-la. Kaif mem ki finn konsey bann Zwif, “Li preferab pou zot ki enn sel dimounn mor pou tou lepep.” Simon Pier ek enn lot disip ti pe swiv Zezi. Gran Pret ti konn disip-la, akoz samem li finn les li rant avek Zezi dan lakour. Me Pier ti pe debout deor devan laport. Disip ki gran pret ti kone la sorti deor, koz ar fam ki ti pe vey laport-la e disip-la fer Pier rantre. Fam-la dir ar Pier, “Eski twa osi to pa enn disip sa boug-la?” Li reponn, “Mwa? Non.” Bann serviter ek bann gard ti pe deboute. Zot finn alim enn dife parski ti pe fer fre. Pier ti la ar zot e li osi ti pe sof dife. Alors gran pret poz Zezi kestion lor so bann disip e lor so lansegnman. Zezi reponn li, “Mo finn koz devan tou dimounn lor later; mo finn ansegn touletan dan sinagog e dan Tanp, la kot tou bann Zwif rasanble; zame mo finn kasiet pou koze. Kifer to poz mwa sa bann kestion-la? Al demann bann dimounn ki finn vinn ekout mwa; zot va dir twa ki mo finn dir zot; zot konn bien seki mo finn dir.” Letan bann-la tann sa parol-la, enn gard ki ti la donn Zezi enn kalot. Li dir Zezi, “Enn manier pou koz ar gran pret sa?” Zezi reponn li, “Si mo koze pa bon, montre mwa seki pa bon. Me si mo koze bon, kifer to bat mwa?” Alors Ann avoy Zezi devan Kaif ki ti gran pret. Zezi ti touzour atase. Letan sa, Simon Pier ti pe deboute e li ti pe sof dife. Bann-la demann li, “Eski twa osi to pa enn so bann disip?” Li renie Zezi e li dir, “Mwa? Non.” Enn serviter gran pret, fami boug ki Pier ti koup so zorey la, dir, “Eski mo pa finn trouv twa dan zardin avek li?” Ankor enn fwa, Pier renie. Lerlamem kok sante. Boner gramatin, zot pran Zezi kot Kaif e zot amenn li devan pale gouverner. Zot pa rant dan pale pou ki zot pa vinn inpir e pou ki zot kapav manz repa Pak. Akoz samem Pilat sorti deor e vinn get zot. Li demande, “Ki sarz zot ena kont sa boug-la?” Zot dir, “Nou pa ti pou amenn li devan twa, si li pa ti enn malfeter.” Pilat reponn, “Pran li zotmem, ziz li dapre zot lalwa.” Bann Zwif dir, “Dapre nou lalwa nou pa gagn drwat tir lavi dimounn.” Lerla parol Zezi realize kan li ti pe dir ki manier li ti pou mor. Ankor enn fwa, Pilat rant dan so pale, li apel Zezi e li dir, “Eski to lerwa Zwif, twa?” Zezi reponn, “Seki to pe dir lor mwa, eski to pe dir sa par to prop lide ou bien lot dimounn finn dir twa?” Pilat dir, “Eski mo enn Zwif mwa? To prop dimounn ek bann gran pret finn livre twa ar mwa; ki to finn fer koumsa?” Zezi reponn, “Mo Rwayom pa lor later; si mo Rwayom ti lor later, mo bann gard ti pou lager pou mwa, pou ki bann-la pa livre mwa ar bann Zwif. Me vremem, mo Rwayom pa isi.” Lerla Pilat dir, “Alors to enn lerwa?” Zezi reponn, “Twa ki pe dir. Mo finn ne, mo finn vinn dan lemond pou enn sel rezon: rann temwaniaz laverite. Tou dimounn ki dan laverite, ekout mo lavwa.” Pilat demann Zezi, “Ki ete laverite?” Apre sa dialog-la, Pilat sorti deor ankor enn fwa; li al get bann Zwif e li dir zot, “Mo pa trouv okenn rezon pou kondann li. Dapre zot koutim, mo abitie larg enn prizonie pou Pak; eski zot oule mo larg lerwa Zwif?” Zot tou kriye, “Non, pa li! Larg Barabas.” Barabas ti enn bandi. Apre sa, Pilat pran Zezi e li donn lord pou fwet li. Bann solda tres enn kouronn pikan e fons sa lor so latet; zot met enn manto rouz fonse lor li. Zot vinn devan li e zot salie li, “Me respe lerwa Zwif!” Lerla zot donn li kalot. Pilat sorti deor ankor enn fwa e li dir bann-la, “Gete, mo amenn li devan zot pou ki zot kone ki mo pa trouv nanye de mal ar li.” Lerla Zezi vinn deor avek so kouronn pikan lor so latet ek so manto rouz fonse lor li. Pilat dir zot, “Ala zom-la.” Kan bann gran pret ek bann gard trouv li, zot kriye bien-bien for, “Krisifie li, krisifie li.” Pilat dir, “Pran li, krisifie li zotmem parski mwa, mo pa trouv okenn rezon fer sa.” Bann Zwif reponn, “Nou ena enn lalwa e dapre sa lalwa-la, li bizin mor parski li deklar li Garson Bondie.” Ler Pilat tann sa bann parol-la, li gagn plis per ankor. Li rerant dan so pale e li demann Zezi, “Kot to sorti?” Me Zezi pa reponn. Lerla Pilat dir, “To pale reponn mwa? To pa kone mo ena pouvwar pou larg twa ek pouvwar pou krisifie twa?” Zezi reponn, “To pena pouvwar lor mwa exsepte seki to finn resevwar depi lao. Akoz samem sa dimounn ki finn livre mwa la, so pese pli gran ki pou twa.” Lerla Pilat ti pe rod tou mwayin pou larg li me bann Zwif kontigne kriye e zot dir, “Si to larg li, to pa kamarad lanperer; dimounn ki deklar li lerwa pe kont lanperer.” Letan Pilat finn tann sa bann parol-la, li amenn Zezi deor. Pilat asiz dan fotey kot ziz rann zizman, dan enn landrwa ki ti apel ‘Pavaz’ ki vedir ‘Gabata’ an Ebre. Ti lavey Pak e ti pre pou midi. Pilat dir ar bann Zwif, “Ala zot lerwa.” Me zot tou kriye, “Touy li, koulout li lor lakrwa.” Pilat dir zot, “Eski mo pou krisifie zot lerwa?” Bann gran pret reponn, “Nou pena lot lerwa apar lanperer.” Alors Pilat livre Zezi pou ki bann-la krisifie li. Zot pran Zezi. Li sorti, li ale e limem sarye so lakrwa; li ariv dan enn landrwa ki ti apel ‘Krann’, an Ebre: Golgota. Zot krisifie li lamem; ti ena de lot dimounn avek li, enn sak kote, Zezi dan milie. Pilat finn ekrir lor enn plak pou met lor lakrwa, “Zezi Nazaret Lerwa Zwif.” Boukou Zwif finn lir plak-la parski Zezi finn krisifie pre ar lavil; ti ekrir li an Ebre, Latin ek Grek. Bann gran pret dir Pilat, “Pa ekrir, ‘Lerwa Zwif’, me ‘Li finn dir mo lerwa Zwif’.” Pilat reponn, “Seki mo finn ekrir, mo finn ekrir.” Kan bann solda finn fini krisifie Zezi, zot pran so manto, zot diviz li an-kat e sak solda gagn enn par. Zot finn pran osi so rob ki ti fer avek enn sel bout latwal, san okenn koutir. Zot dir ant zot, “Pa bizin desir so rob me anou fer enn tiraz osor, seki gagne, pran li.” Tou sa la finn pase pou ki sa Parol Lekritir-la realize, ‘Zot finn partaz mo manto ant zot Zot finn fer enn tiraz osor lor mo linz.’ Ala seki bann solda finn fer. Kot lakrwa Zezi, ti ena so mama, ser so mama, Marie, fam Klopa ek Marie Madlenn ki ti pe deboute. Letan Zezi trouv so mama ek pre ar li, disip ki li ti kontan la, li dir ar so mama, “Fam, ala to garson.” Apre li dir ar disip-la, “Ala to mama.” Depi sa, disip-la pran so mama kot li. Apre tousala, letan Zezi trouve ki tou aster-la finn akonpli, e pou ki Lekritir realize ziska dan bout, li dir, “Mo swaf.” Ti ena la enn bol plin ar vineg; alors bann solda met enn leponz dan vineg, zot fons leponz-la dan enn bout baton e zot met li kot labous Zezi. Zezi pran vineg-la, apre li dir, “Tou finn fini.” Li bes so latet e li rann so dernie soupir. Kouma ti zour preparasion avan Pak, bann Zwif pa ti oule ki bann lekor res lor lakrwa zour saba, (parski sa saba-la ti enn zour spesial); alors zot demann Pilat, kas lipie bann-la pou ki kapav desann zot. Bann solda vini. Zot kas lipie premie boug-la, apre deziem-la, e kan zot vinn devan Zezi, zot konstate ki li finn fini mor. Alors zot pa kas so lipie. Enn parmi bann solda pik so lans dan kot Zezi; lerla disan ek dilo koule. Dimounn ki finn trouv sa pe donn so temwaniaz pou ki zot osi, zot kapav krwar; li kone ki li pe dir laverite. Tousala finn arive pou ki Lekritir realize, “Pa pou kas okenn so lezo.” Enn lot pasaz dir ankor, “Zot pou fixe zot regar lor Sa-Enn ki zot finn transperse la.” Apre sa, Zozef ki sorti Arimate, demann Pilat si li kapav pran lekor Zezi. (Zozef finn swiv Zezi me san ki personn kone, parski li ti gagn per bann Zwif). Pilat donn li permision pran so lekor. Alors li ale e li pran lekor Zezi. Nikodem, ki ti vinn zwenn Zezi dan nwar premie fwa ki li ti vinn get li, finn amenn enn melanz lamir ek lalwes, anviron san liv pou anbom so lekor. Zot pran lekor Zezi, zot anvlop li avek bann bandaz an-lin; dan sa bandaz-la zot met melanz-la dapre koutim Zwif kan met enn lekor dan tonbo. Dan landrwa kot Zezi ti krisifie, ti ena enn zardin e dan sa zardin-la, ti ena enn nouvo tonbo ki pa ti ankor servi. Kouma ti lavey saba e ki tonbo-la ti pre, zot met Zezi ladan. Premie zour lasemenn, boner gramatin kan ti ankor fer nwar, Marie Madlenn al dan tonbo e li konstate ki ros ki ti devan lantre tonbo, finn avanse. Lerla li galoupe, li al get Simon Pier e lot disip ki Zezi ti kontan la e li dir zot, “Zot finn kokin Lesegner dan tonbo e nou pa kone kot zot finn al met li.” Lerla Pier ek lot disip-la sorti pou al dan tonbo. Toule-de galoupe ale me lot disip-la galoup pli vit ki Pier e li ariv avan li dan tonbo. Li bese pou gete e li trouv bann bandaz an-lin anba me li pa rantre. Ler Simon Pier, ki ti pe vinn deryer li, arive, li rant dan tonbo e li trouv bann bandaz an-lin. Linz ki ti servi pou rekouver so latet, ti nepli avek bann bandaz me finn anroule apar dan enn lot plas. Apre sa, lot disip ki finn ariv premie dan tonbo, rantre li osi. Ler li trouve, li krwar. Tou sa letan-la, zot pa finn konpran ki li ti bizin resisite parmi bann mor parey kouma finn ekrir dan liv. Apre sa, bann disip-la retourn kot zot. Marie ti pe asize deor, pre ar tonbo e li ti pe plore. Letan li ti pe plore, li bese pou get dan tonbo. Li trouv de anz abiye an blan ti pe asize; zot ti la, kot ti met lekor Zezi, enn kot latet, lot kot lipie. Zot dir, “Fam, ki fer to pe plore?” Li dir zot, “Zot finn kokin mo Segner e mo pa kone kot zot finn al met li.” Letan li finn fini dir sa, li vir deryer e li trouv Zezi ki ti pe deboute, me li pa ti rekonet li. Zezi dir li, “Fam, ki fer to pe plore? Kisann-la to pe rode?” Li ti krwar zardinie e li dir, “Misie, si twa ki finn pran li, dir mwa kot to finn met li, mo pou al sers li.” Zezi dir, “Marie.” Marie vire e dir an Ebre, “Rabouni!” (Seki vedir Met). Zezi dir, “Pa tous mwa, parski mo pankor mont kot mo Papa. Al kot mo bann frer e dir zot, ‘Mo pe al kot mo Papa ek zot Papa, kot mo Bondie ek zot Bondie.’ ” Marie Madlenn sorti e al anons bann disip, “Mo finn trouv Lesegner!” E li rakont zot seki Zezi finn dir. Aswar premie zour lasemenn, bann disip ti ansam dan enn lakaz. Zot finn met lakle dan laport parski zot ti gagn per bann Zwif. Zezi vini, li debout devan zot e li dir, “Shalom”. Kan li fini salie zot, li montre zot so lame ek so kot. Bann disip ti dan enn gran lazwa kan zot finn trouv Lesegner. Zezi dir zot ankor, “Lape avek zot; parey kouma mo Papa finn avoy mwa, mwa osi mo avoy zot.” Apre sa, Zezi soufle lor zot e dir zot, “Ala Lespri Sin. Si zot pardonn pese dimounn, pese-la pou pardone, si zot tini pese dimounn, pese-la pou tini.” Toma, enn parmi Ledouz, (so nom gate Didim, ki vedir Zimo), pa ti avek zot kan Zezi ti vini. Bann lezot disip finn dir li, “Nou finn trouv Lesegner.” Me li dir zot, “Si mo pa trouv ar mo lizie bann mark koulou dan so lame, si mo pa met mo ledwa dan so ple e si mo pa met mo lame dan so kot, mo pa pou krwar.” Wit zour apre, bann disip ti ansam dan lakaz e Toma ti avek zot. Ti ena lakle dan laport e Zezi vini, li debout devan zot e li dir, “Shalom.” Apre li dir ar Toma, “Met to ledwa isi, ala mo lame; pran to lame, met li dan mo kot. Pa doute me krwar.” Toma dir, “Mo Segner, mo Bondie.” Zezi dir, “Akoz to trouve, to finn krwar? Bienere seki krwar san trouve.” Zezi finn fer devan so bann disip boukou lot sign ki pa finn ekrir dan sa liv-la. Tousala finn ekrir pou ki zot krwar ki Zezi-mem Lekris, Garson Bondie e pou ki bann seki krwar gagn lavi par so nom. Apre sa, Zezi aparet ankor devan so bann disip dan bor lamer Tiberiad. Ala kouma sa finn pase. Ti ena Simon Pier, Toma, (so nom gate Didim), Natanael (limem sorti Kana, enn vilaz dan Galile), de garson Zebede ek de disip ankor. Simon Pier dir zot, “Mo pe al lapes.” Zot dir li, “Nou osi, nou vinn ar twa.” Zot mont lor bato, zot ale. Enn nwit zot pa may nanye. Kan lizour ti pe koumans paret, Zezi ti pe debout dan bor dilo, me bann disip pa ti kone si li sa. Zezi dir zot, “Mo bann zanfan, pena pwason?” Zot reponn li, “Non, pena.” Li dir zot, “Zet zot file kote drwat zot pou trouve.” Lerla zot zete. Telman file ti ranpli ar pwason ki zot ti nepli ena lafors pou ris li. Disip ki Zezi ti kontan la dir Pier, “Lesegner sa.” Letan Simon Pier tande ki ti Lesegner sa, li pas so linz lor li, parski li ti touni, e li zete, li naze. Lezot disip vinn ater dan bato. Kouma zot pa ti lwin ar laplaz, apepre san met, zot ris zot file ranpli ar pwason deryer zot. Letan zot finn fini desann ater, zot trouv enn ti dife; lor dife-la pwason ti pe griye e ti ena dipin osi. Zezi dir zot, “Amenn inpe pwason ki zot finn lapes zordi.” Lerla Simon Pier mont lor bato e li ris ater file ki ti ranpli ar gro-gro pwason. Ti ena san sinkann-trwa e zot tou tini dan file-la san ki li defonse. Zezi dir zot, “Vinn manze.” Personn parmi bann disip pa oze demann li, “Ki to ete?” Zot ti kone limem Lesegner. Zezi vini, pran dipin e donn zot e li fer parey ar pwason. Sa fer trwaziem fwa ki Zezi aparet ar so bann disip depi ki li finn resisite parmi lemor. Kan zot finn fini manze, Zezi demann Simon Pier, “Simon garson Zan eski to kontan mwa plis ki bann-la kontan mwa?” Li reponn, “Wi Segner, to kone ki mo kontan twa.” Zezi dir li, “Donn mo bann ti-mouton manze.” Li demann li enn deziem fwa, “Simon garson Zan, eski to kontan mwa?” Simon reponn li, “Wi Segner, to kone mo kontan twa.” Zezi dir li, “Pran swin mo bann brebi.” Zezi demann li enn trwaziem fwa, “Simon garson Zan, eski to kontan mwa?” Pier sagrin ki Zezi demann li enn trwaziem fwa, “Eski to kontan mwa?” Lerla Pier reponn, “Segner, to konn tou, to kone ki mo kontan twa.” Zezi dir li, “Donn manze mo bann mouton. Vremem, laverite mo dir twa, kan to ti zenn, to ti met to sang par tomem e to ti al kot to kontan; me kan to pou vinn vie, to pou lev to lame lao e enn lot ki pou atas to sang e pou amenn twa kot to pa anvi ale.” (Li finn dir sa pou montre par ki kalite lamor Pier pou glorifie Bondie). Apre sa Zezi dir li, “Swiv mwa.” Pier vir deryer e li trouv disip ki Zezi ti kontan. Li ti pe swiv zot. Limem ti met so latet lor lestoma Zezi pandan repa e ti dir, ‘Segner, kisann-la pou vann twa?’ Letan Pier trouv disip-la, li dir Zezi, “E li, Segner, ki pou ariv li?” Zezi dir li, “Si mo le ki li res ziska mo revini, eski to problem sa? Twa, swiv mwa.” Sa parol-la finn sirkile parmi bann frer e zot ti krwar ki sa disip-la pa pou mor; me Zezi pa ti pe dir ki li pa pou mor me, “Si mo le ki li res ziska mo revini, eski to problem sa?” Sa disip-la pe donn so temwaniaz lor tousala e limem finn ekrir sa e nou kone seki li finn rakonte, li vre. Zezi finn fer boukou kiksoz ankor. Si ti ena pou ekrir tousala, mo panse ki lemond antie pa pou ase gran pou gard tou sa bann liv-la. Dan mo premie liv, Teofil, mo finn ekrir lor tou seki Zezi ti koumans fer ek ansegne ziska ki li mont dan lesiel. Avan sa, li ti donn instriksion, par Lespri Sin, bann zapot ki li ti swazir. Apre so lamor, li ti donn zot boukou prev ki li ankor vivan. Li ti aparet ar zot pandan karant zour e li ti koz ar zot lor Rwayom Bondie. Letan li ti pe manze ansam ar zot, li ti donn zot lord napa kit Zerizalem, me atann ki promes so Papa realize kouma li ti dir, “Zan finn batiz ar dilo, me zot, dan enn-de zour zot pou resevwar batem dan Lespri Sin.” Alor ler zot ti zwenn ansam, zot dimann Zezi, “Segner, eski aster-la mem ki to pou remet Rwayom Izrael dibout?” Zezi reponn, “Zot pena pou kone ki ler ki moman, mo Papa limem finn deside. Me zot pou gagn enn lafors kan Lespri Sin pou desann lor zot, lerla zot pou vinn mo temwin dan Zerizalem, dan Zide ek Samari e partou lor later.” Kouma Zezi ti fini koze, li ti mont dan ler e li disparet dan enn niaz. Zot ti ankor pe get li monte dan lesiel kan zot trouv de zom an blan kot zot ki dir zot, “Bann abitan Galile, kifer zot pe kontign get lao dan lesiel koumsa? Sa Zezi-la ki finn separe ar zot pou al dan lesiel, pou retourne parey kouma zot finn trouv li ale.” Lerla zot ti retourn Zerizalem depi Kolinn Pie Zoliv, enn distans ki ti permet pou marse zour saba, setadir enn kilomet. Kan zot ti ariv Zerizalem, zot ti mont dan lasam dan lakaz kot zot ti pe reste; la ti ena Pier, Zan, Zak ek Andre, Filip ek Toma, Bartelmi ek Matie; Zak garson Alfe, Simon Zelot e Zid, garson Zak. Zot tou ti plonze dan lapriyer ansam avek de-trwa fam. Parmi ti ena Marie, mama Zezi ek so bann frer. De-trwa zour apre, Pier debout dan milie bann frer ki ti la; ti ena anviron san-vin e li ti dir, “Mo bann frer, Lekritir ti bizin akonpli, la kot Lespri Sin ti predir par labous David konsernan Zida ki ti servi kouma gid letan bann-la ti vinn aret Zezi. Li ti parmi nou e li ti ena so par dan nou mision.” (Sa zom-la finn aste enn terin avek kas ki li ti finn resevwar pou so trayizon. Li finn tom tou so grander, so vant finn ouver e tou so trip finn sorti deor. Tou dimounn Zerizalem finn konn sa e zot finn apel sa terin-la ‘Akeldama’, seki vedir, ‘Karo disan.’) “Koumsa mem finn ekrir dan liv Psom: ‘Ki so Lakaz vinn dezer, ki personn pa res ladan.’ Finn osi ekrir: ‘Ki enn lot pran so plas.’ Parmi bann dimounn ki ti mars avek nou depi batem Zan letan Lesegner Zezi ti ale-vini parmi nou ziska ki li ti remont dan lesiel, omwin enn bizin zwenn ar nou pou fer temwaniaz lor rezireksion Zezi.” Zot ti propoz de nom: Zozef ki ti apel Barsabas (li osi apel Zistis) ek enn lot ki ti apel Matias. Lerla zot ti priye e dir, “Segner, twa ki konn leker tou dimounn, dir nou kisann-la ant sa de-la to finn swazir pou ranplas Zida ki finn abandonn so plas zapot pou al kot li finn ale.” Zot tir lakourtpay e nom Matias sorti. Li ti vinn zwenn avek lezot onz zapot. Kan zour Lapantkot ti arive, tou bann krwayan ti reini ansam dan mem landrwa. Enn sel kout enn son terib ti sorti depi lesiel parey kouma enn divan violan ki pe soufle, e sa ti ranpli lakaz kot zot ti reini. Lerla zot ti trouv seki paret kouma bann ti laflam dan form lalang, ki separe ek repoz lor sakenn parmi bann krwayan. Zot tou ti ranpli ar Lespri Sin e zot koumans koz dan lezot langaz dapre seki Lespri ti pe donn zot pou exprime. Dan Zerizalem ti ena bann Zwif ki ti bien devwe pou Bondie, e ki ti sorti partou lor later. Enn gran lafoul ti rasanble letan ti finn tann sa tapaz-la. Zot ti res bet parski sakenn ti tann bann krwayan pe koz dan langaz zot pei. Dan zot etonnman ek admirasion zot koumans dimande, “Tou sa bann dimounn ki pe koze-la, pa bann Galileen? Abe kouma sakenn parmi nou pe tann zot koz dan langaz nou prop pei? Nou sorti pei Part, Medi ek Elam. Ena bann abitan Mezopotami, Zide e Kapados, ena sorti Pon ek provins Lazi, Frizi e Panfili, Lezip ek rezion Sirenn dan Libi, ek ena ki vinn depi Rom, Kret ek Arabi; ena ki finn ne Zwif, ena ki finn konverti dan relizion Zwif, me pourtan nou tou tann zot pe rakont mervey Bondie sakenn dan nou bann langaz!” Zot ti telman etone e dan konfizion, ki zot ti pe dir ant zot, “Ki sa vedir, sa?” Me lezot ti pe boufonn bann krwayan; zot ti pe dir, “Divin ki pe koze.” Pier ti diboute avek lezot onz zapot e avek enn lavwa bien-bien for li ti koz ar lafoul, “Mo bann kamarad Zwif e zot tou ki abitan Zerizalem, les mo explik zot, ekout mo parol avek atansion. Non, sa bann dimounn-la pa finn soule zot, li zis nef-er gramatin la. Me seki profet Zoel ti anonse, samem ki pe realize aster-la: ‘Ala seki pou arive dan dernie zour, Bondie dir, Mo pou repann mo Lespri lor tou dimounn. Zot garson, zot tifi pou anons mo mesaz; zot bann zenes pou trouv vizion, zot bann vie dimounn pou fer bann rev. Wi, lor mo bann serviter, ki li zom ki li fam, mo pou vers mo Lespri sa zour-la; e zot pou profetize. Mo pou fer bann mervey dan lesiel lao e bann sign mirak anba lor later, pou ena disan, dife, ek niaz lafime, soley pou rant dan marenwar, lalinn vinn disan avan ki zour Lesegner arive dan grander, dan laglwar. Lerla, ninport ki dimounn ki kriye sekour Lesegner, li pou sove.’ Mo bann kamarad Izraelit, ekout seki mo ena pou dir zot: Zezi ki sorti Nazaret, ti enn dimounn ki ena lotorite Bondie, ki finn prouve devan zot par mirak, mervey ek sign, kouma zotmem zot kone. Dapre konesans ki Bondie ena davans, ek dapre so plan, sa zom-la finn livre dan zot lame, e zot finn touy li avek led bann move dimounn; zot finn krisifie li. Me Bondie finn resisit li, finn tir li dan douler lamor, parski li ti inposib ki lamor tini li dan so pouvwar. Ala seki David dir lor li: ‘Mo touletan trouv Lesegner devan mwa; Li pre ar mwa, koumsa mo pa tranble. Akoz sa mo ranpli ar boner, mo parol ranpli ar lazwa. Mo lekor pou repoz dan lesperans parski to pa pou abandonn mwa dan landrwa kot bann mor ale to pa pou les to serviter pouri dan tonbo. To finn montre mwa sime ki donn lavi, e to prezans ranpli mwa ar lazwa.’ Mo bann kamarad Izraelit, mo kapav dir zot avek lasirans ki nou anset David ti mor e ti anter li. So tom ankor la avek nou zordi. Parski li ti enn profet, li ti kone ki Bondie ti promet li par enn serman ki enn zour enn so desandan pou asiz lor so tronn. David ti trouve an avans seki Bondie pou fer enn zour, alor li ti koz lor rezireksion Lemesi letan li ti dir: ‘Pa ti abandonn li dan landrwa kot bann mor ale, e so lekor pa ti pouri dan tonbo.’ Bondie ti resisit Zezi depi lamor e nou bann temwin ki sa ti arive. Bondie ti plas li dan so kote drwat, e li finn resevwar promes Lespri Sin par so Papa; e Zezi finn repann seki zot pe trouve ek tande. David pa ti mont dan lesiel, me pourtan li ti dir: ‘Lesegner Bondie finn dir mo Segner: asiz la lor mo drwat, ziska ki mo fer to bann lennmi to marspie.’ Tou lepep Izrael bizin kone avek lasirans: sa Zezi ki zot finn krisifie la, limem ki Bondie finn fer Segner e Mesi!” Letan bann dimounn tann sa zot ti boulverse dan zot leker, zot dir Pier e lezot zapot, “Frer, ki nou bizin fer?” Pier reponn, “Repanti, e resevwar batem dan nom Zezi Kris pou zot gagn pardon pou zot pese; e zot pou resevwar don ki Bondie done, Lespri Sin. Sa promes-la li pou zot, zot zanfan, pou tou seki lwin e pou tou seki Lesegner nou Bondie pou apele.” Pier kontign ankouraz bann-la ar boukou lezot temwaniaz pou konvink zot; li dir zot, “Sov zotmem depi pinision ki pe vinn lor sa bann move dimounn ki dan perdision.” Boukou seki finn krwar sa mesaz-la ti resevwar batem, e sa zour-la anviron trwa-mil dimounn ti azoute ar group bann krwayan. Zot ti devwe zot letan pou ekout lansegnman bann zapot e kominion fraternel, zot ti partaz repa lakominion e lapriyer. Boukou mirak ek sign ti pe akonpli par bann zapot, e tou dimounn ti inpresione. Tou bann krwayan ti ini e ti pe partaz tou zot dibien ansam. Zot ti vann zot dibien e seki zot posede, pou zot distribie li dapre seki sakenn ti bizin. Zour apre zour zot ti rasanble kouma enn group dan Tanp, zot ti kas dipin ansam dan lakaz, e ti pran zot repa ansam avek enn leker sinser e ranpli ar lazwa. Zot ti loue Bondie e ti gagn lestim tou bann dimounn. Toulezour Lesegner ti pe sov dimounn ki li ti pe azout dan zot group. Enn zour ver trwa-z-er tanto, letan Pier ek Zan ti pe al dan Tanp dan ler lapriyer, bann dimounn ti pe amenn enn zom ki ti paralize depi so nesans. Toulezour zot ti vinn depoz li dan lantre Tanp ki ti apel ‘Zoli Laport’ pou ki li dimann sarite tou bann ki rant dan Tanp. Kouma li ti trouv Pier ek Zan pe rant dan Tanp, li ti dimann zot sarite. Pier ek Zan ti fixe li e zot ti dir li, “Get nou.” Zom-la ti get zot, li ti atann pou gagn kiksoz ar zot. Me Pier ti dir, “Mo pena ni larzan ni lor, me seki mo ena mo donn twa, lor nom Zezi Kris ki sorti Nazaret, mo donn twa lord marse.” Pier trap li par so lame drwat e fer li leve. Toutswit so lipie ek so sevi ti gagn lafors. Enn sel kout li ti diboute, li ti koumans marse, e ansam avek zot, li ti rant dan Tanp, li ti sot-sote, li ti loue Bondie. Tou dimounn ti trouv li marse e rann gras Bondie. Zot ti rekonet ki limem sa dimounn ki ti touzour pe asiz kot Zoli Laport Tanp pou dimann sarite. E zot tou ti bien emerveye e ti res bet lor seki finn ariv li. Ler sa zom-la pa ti le kit Pier ek Zan, bann dimounn dan zot etonnman ti swiv zot dan galri ki ti apel Galri Salomon. Kan Pier ti trouv sa, li ti dir bann dimounn-la, “Zot, bann Izraelit, ki fer zot etone ar seki finn arive; kifer zot get nou koumsa, koumadir par nou prop lafors ek nou lafwa ki nou finn fer sa zom-la marse. Bondie Abraam, Bondie Izaak, ek Bondie Zakob, Bondie nou bann anset finn glorifie so serviter Zezi. Limem zot ti livre ek rezete alor ki Pilat ti anvi liber li. Me zot ti rezet Sa-Enn ki Sin ek Drwat e zot ti fer Pilat larg enn kriminel Zot finn touy Sa-Enn ki donn lavi, me Bondie finn resisit li. Nou tou nou temwin sa. Sa zom ki zot trouve e ki zot kone la finn retrouv so lafors par lafwa dan nom Zezi Kris. Par sa nom lamem e so lafwa dan Zezi ki li finn regagn so lasante, kouma zot tou zot inn trouve. Aster-la, mo bann frer, mo kone zot ti azir dan liniorans parey kouma zot bann sef. Dan sa fason-la Bondie finn akonpli seki li ti anonse par bann profet, ki so Mesi pou soufer. Alors, sanz zot leker e tourn ver Bondie pou ki li efas zot pese, koumsa Lesegner pou donn enn letan rekonfor, e li pou kapav avoy Zezi, Lemesi ki li finn swazire pou zot. Aster-la li bizin res dan lesiel ziska ki seki Bondie finn anonse bien-bien lontan par so bann sin profet, realize. Moiz ti dir, ‘Lesegner zot Bondie pou lev enn profet kouma mwa parmi zot pep. Zot bizin ekout seki li dir zot. Seki pa ekout sa profet-la pou nepli trouv li parmi lepep Bondie.’ Tou bann profet ki finn koze depi Samiel, enn apre lot, ti osi predir ki seki pe arive pou arive. Zot desandan bann profet ek eritie lalians ki Bondie ti fer avek zot anset, kan li ti dir Abraam, ‘Mo pou beni tou bann fami lor later atraver to bann desandan.’ Bondie finn avoy so serviter, pou zot dabor, pou beni zot e fer zot sanz zot bann move manier.” Pier ek Zan ti ankor pe koz ar lepep, kan responsab Tanp, bann pret ek Sadiseen ti vinn ver zot, bien ankoler parski Pier ek Zan ti pe ansegn lepep lor Zezi ek rezireksion bann mor. Zot aret Pier ek Zan e ferm zot dan prizon ziska landime parski ti fini aswar. Boukou ki ti tann laparol ti krwar, e ti ena anviron sink mil dimounn. Landime gramatin, bann sef, bann ansien ek profeser lalwa ti zwenn dan Zerizalem. Gran Pret Ann ti prezan, ansam ar Kaif, Zan, Alexand e tou bann manb lafami gran pret. Ler ti amenn Pier ek Zan devan zot, zot kestionn sa de-la, “Par ki pouvwar ek ki nom zot servi pou fer sa gerizon-la?” Alor, Pier ranpli ar Lespri Sin dir zot, “Sef lepep ek ansien, si nou bizin rann kont parski nou finn fer dibien enn paralize e bizin reponn kouma li finn geri, fode zot tou kone, e osi tou lepep Izrael, ki sa dimounn-la pe dibout devan zot an-bonn-sante gras-a pouvwar nom Zezi Kris ki sorti Nazaret, ki zot finn krisifie e ki Bondie finn resisite depi bann mor. Zezi ‘Limem ros ki zot, bann mason, zot ti rezete me li finn vinn ros prinsipal.’ Pena personn kapav sov nou apar Zezi, parski pena okenn lot nom dan lemond antie ki kapav sov nou.” Kan zot trouv kouraz ki Pier ek Zan ena, zot etone parski zot kone ki sa de-la ti bann dimounn sinp e san ledikasion. Zot rekonet ki bann-la ti mars ar Zezi. Me letan zot trouv sa dimounn ki finn geri la pe dibout akote bann-la, zot pa ti kapav dir nanye. Alors zot donn lord pou bann-la sorti deor, pou ki zot kapav diskit ant zot. Zot dir, “Ki nou kapav fer ar sa bann zom-la? Tou dimounn dan Zerizalem kone ki zot finn fer enn gran mirak. Nou pa kapav dir lekontrer. Fode pa ki sa nouvel-la kontign fane parmi plis dimounn. Nou bizin anpes zot koz dan nom Zezi.” Alors zot re-apel Pier ek Zan pou defann zot koze ek ansegne dan nom Zezi. Me Pier ek Zan reponn, “Zize zotmem, eski li korek devan Bondie ki nou obeir zot olie obeir Bondie? Me nou, nou nek kapav koz zis lor seki nou finn trouve ek tande.” Bann manb konsey menas Pier ek Zan ankor; lerla ti les zot ale. Pa ti ena okenn mwayin pou pini zot, parski lepep ti pe loue Bondie pou seki finn arive. Sa dimounn ki ti geri par mirak la ti ena plis ki karant-an. Kouma larg zot, zot ti al kot bann kamarad e ti rakont tou seki sef pret e bann ansien ti dir zot. Letan bann krwayan ti tann sa, avek enn sel leker zot tou ti priye Bondie, “Segner, Kreater lesiel, later, ek lamer e tou seki viv lor later ek dan lamer, tomem ki, par Lespri Sin, finn met dan labous David, nou anset, to serviter, ‘Kifer bann nasion azite? Kifer bann pep ena panse bet? Bann lerwa lor later finn prepar zot, bann sef finn vinn ansam kont Lesegner e kont so Mesi.’ Li bien vre ki Erod e Pons Pilat finn marye-pike, ansam ar bann nasion ek Izrael, kont Zezi, to serviter sin, ki to finn konsakre. Koumsa, zot finn realiz seki to lame ek to plan ti deside depi koumansman. Aster-la, Segner, get enn kout zot menas, e donn to bann serviter boukou kouraz pou anons to parol. Fer dimounn trouv to pwisans par bann gerizon, bann mirak, ek bann sign, ki pou akonpli dan nom Zezi to serviter.” Letan zot fini priye, landrwa kot zot ti reini ansam ti tranble. Zot ti ranpli ar Lespri Sin ek zot ti anons Parol Bondie avek lasirans. Sa group krwayan la ti ena enn sel leker, enn sel lespri; personn pa ti dir ki so dibien pou li tousel sa, me zot ti met tou ansam an kominote. Bann zapot ti rann temwaniaz lor rezireksion Zezi par enn gran pwisans, ek zot ti ranpli ar lagras Bondie. Personn parmi zot pa ti res dan lamizer. Tou seki ti proprieter enn bout terin ou enn lakaz ti vann li, ti amenn larzan-la e ti remet li bann zapot, ki ti distribie resours-la selon bezwin sakenn. Zozef ti enn Levit ki ti ne an Sip, bann zapot ti donn li enn nom gate Barnabas, ki vedir ‘Garson ki ankouraz lezot.’ Zozef ti vann so karo e li ti remet tou larzan-la bann zapot. Me enn zom ki ti apel Ananias avek so fam Safira ti vann zot terin. Li ti tom dakor avek so fam pou gard enn parti larzan-la pou zot, e li ti remet leres bann zapot. Pier dimann li, “Ananias, kifer to les Satan ranpli to leker? To finn koz manti ar Lespri Sin e to finn gard enn parti larzan pou twa. Kan pa ti ankor vann terin-la, eski li pa ti pou twa? E letan to ti vann li, eski tou larzan pa ti dan to lame? Kouma to finn kapav fer enn plan koumsa dan to leker? Pa ar nou ki to finn koz manti, me ar Bondie.” Letan Ananias tann sa bann parol-la, li tonbe, li mor sek. Enn gran lafreyer ti vinn lor tou seki ti tann sa. Bann zenes vini, zot anvlop so lekor, zot al anter li. Apre trwa-z-er tan, so fam rantre; li pa ti kone ki ti finn arive. Pier dimann li, “Dir mwa, twa ek to mari finn vann sa later-la pou sa kantite kas-la?” Li reponn, “Wi, pou sa pri-la mem.” Lerla Pier dir li, “Kouma zot finn tom dakor pou tronp Lespri Bondie? Bann ki finn anter to mari pe dibout deryer laport, zot pare pou sarye twa ale.” Toutswit li tom devan Pier e li mor. Ler bann zenes rantre, zot trouv li finn mor. Zot pran li, zot al anter li koste ar so mari. Legliz antie e tou bann ki ti tann seki finn arive ti gagn enn gran lafreyer. Bann zapot ti fer enn kantite mirak ek mervey parmi lepep. Zot tou ti ansam anba galri Salomon kot ti ena bann kolonn. Leres dimounn pa ti oze zwenn ar zot, me lepep ti ena gran respe pou zot. Plis letan pase, enn lafoul dimounn, zom ek fam, ti pe krwar e ti pe swiv Lesegner. Zot ti pe mem sarye bann malad lor brankar, lor nat, e ti plas zot lor sime pou ki letan Pier pase so lonbraz kapav kouver de-trwa parmi zot. Mem dan bann lavil otour Zerizalem ti ena lafoul ki ti pe vini e ti pe sarye bann malad ek bann ki ti posede par move lespri, e zot tou ti pe geri. Lerla gran pret ek tou seki ti avek li, setadir bann manb parti Sadiseen, ti ranpli ar zalouzi. Zot ti aret bann zapot e ti zet zot dan prizon. Me dan lanwit enn anz Lesegner ti ouver laport prizon, fer zot sorti e dir zot, “Al dan Tanp e anons lepep tou sa bann parol ki donn nouvo lavi-la.” Ler bann zapot tann sa, zot al dan Tanp kouma soley leve ek zot koumans ansegne. Gran pret ansam avek tou so konpagnon ti rasanble tou bann manb konsey. Zot donn lord pou al sers bann zapot dan prizon, e amenn devan zot. Letan solda Tanp ti al laba, zot pa ti trouv bann zapot dan kaso. Alors zot ti retourne pou fer zot rapor: “Nou finn trouv prizon bien ferme, bann gard dan zot plas devan laport. Me letan nou ouver laport, nou pa finn trouv personn andan.” Kan sef Tanp ek bann sef pret tann sa, zot res bet, zot kas zot latet pou sey konpran ki ti pe arive. Lerla mem enn zom rantre e li dir zot, “Sa bann dimounn ki zot ti zet dan prizon la, zot dan Tanp zot pe ansegn lepep.” Lerla sef-la ek so bann solda ti al sers bann zapot san okenn violans, parski zot ti per ki lepep lapid zot. Kan zot ti amenn bann-la, ti pas zot devan konsey. Lerla gran pret ti kestionn zot. “Nou ti anpes zot ansegn dan sa nom-la; me ala ki zot finn ranpli Zerizalem avek zot lansegnman; e lorla zot pe rann nou responsab so lamor!” Pier avek lezot zapot reponn, “Nou bizin obeir Bondie plito ki obeir dimounn. Bondie nou bann anset finn resisit Zezi, limem ki zot finn touye kan zot finn koulout li lor lakrwa. Bondie, par so pwisans, finn lev li lao kouma Sef ek Sover pou ki li donn Izrael lokazion repanti, e ki li pardonn zot pese. Nou temwin tou seki finn arive, nou ansam avek Lespri Sin ki Bondie finn donn bann dimounn ki obeir li.” Kan bann-la ti tann sa zot ti bien ankoler e zot ti anvi touy bann zapot. Ti ena enn Farizien parmi manb konsey, ki ti apel Gamaliel. Li ti enn dokter lalwa ki lepep ti bien respekte. Li ti diboute e li ti donn lord amenn bann zapot deor enn ti mama. Lerla li ti dir zot, “Mo bann frer Izraelit, get bien ki zot pe rod fer ar bann zom-la. Parski pa tro lontan enn kikenn ki ti apel Teodas ti deklar li enn terib; kat san zom ti mars ar li. Me li ti trouv lamor, e tou seki ti pe swiv li ti disperse, e mouvman-la ti tengn. Apre li, ti ena enn lot ki ti apel Zida. Li ti Galile, lepok resansman; li osi ti rasanble enn lafoul ki ti swiv li, me li ti trouv lamor, e tou bann ki ti swiv li ti disperse. Aster-la, les mo dir zot, pa fer bann-la nanye, les zot ale. Si zot lintansion ek zot plan finn ne dan lespri zom, li pa pou marse; me si li sorti kot Bondie, zot pa pou kapav ranvers plan bann-la; lerla zot riske trouv zotmem pe lager kont Bondie!” Bann-la ti aksepte so konsey. Zot apel bann zapot, fwet zot, e donn zot lord aret koz dan nom Zezi; lerla ti les zot ale. Bann zapot ti kit lasal konsey leker kontan parski ti konsider zot dign pou gagn maltrete akoz nom Zezi. Toulezour dan Tanp e dan bann lakaz, zot ti kontign ansegne e proklam Bonn Nouvel Zezi Kris. Sa lepok-la, letan nonb bann disip ti pe ogmante, bann krwayan ki ti koz Grek ti pe grogne kont bann ki ti koz Ebre parski zot bann vev ti santi zot neglize letan ti ena distribision manze. Ledouz ti rasanble tou bann disip e ti dir zot, “Li pa korek ki nou negliz Parol Bondie pou nou servi repa. Alors, bann frer, swazir set zom parmi zot ki ena bon repitasion, ki ranpli avek Lespri Sin ek sazes pou fer sa travay-la. Koumsa nou kapav kontign lapriyer ek predikasion.” Sa parol-la ti fer kominote-la plezir. Zot ti swazir Etienn ki ti ranpli avek lafwa ek Lespri Sin, ansam avek Filip, Prokor, Nikanor, Timon, Parmenas, ek Nikola ki ti sorti Antios, ki lontan ti konverti pou vinn enn Zwif. Group disip prezant sa set-la bann zapot, ki ti priye e ti inpoz lame lor zot. Parol Bondie ti pe kontign repann; nonb disip ti ogmante dan Zerizalem, e mem enn lafoul pret ti aksepte lafwa. Etienn ki ti ranpli ar lagras ek pwisans, ti fer bann gran mervey ek mirak parmi lepep. Enn parti bann manb sinagog Esklav Libere, ki ti bann Zwif ki ti sorti Sirenn, Aleksandri, ek osi bann ki ti sorti Silisi e Lazi, ti diskit ar Etienn. Me zot ti perdi pwin parski Lespri ti donn Etienn enn gran sazes. Lerla zot ti mont latet de-trwa dimounn an kasiet pou ki bann-la dir, “Nou finn tann li blasfeme kont Moiz ek Bondie.” Zot ti eksit lepep, bann ansien ek bann dokter lalwa; lerla bann-la ti vinn aret Etienn, e ti trenn li devan konsey. Zot amenn fos temwin ki ti dir, “Sa zom-la pe touletan koz kont Tanp ek lalwa Moiz. Nou finn tann li dir ki sa Zezi ki sorti Nazaret la, pou detrir sa plas-la e pou sanz koutim ki Moiz finn donn nou.” Tou seki ti pe asiz dan konsey e ti pe fixe Etienn, ti trouv so figir parey kouma figir enn anz. Gran pret dimann li, “Vremem sa?” Etienn reponn, “Bann frer, bann gran dimounn, ekout mwa. Bondie dan so laglwar ti revel li ar nou anset Abraam letan li ti dan Mezopotami, avan ki li ti al res Aran. Li ti dir Abraam, ‘Kit to pei ek to fami, al dan pei ki mo pou montre twa.’ Lerla li kit so pei Kalde, li al res Aran. Apre lamor so papa, Bondie tir Abraam depi Aran e amenn li dan pei kot zot pe viv aster-la. Bondie pa ti donn li okenn eritaz, pa mem enn pie kare later; me ti promet ki li ti pou erit pei-la antie ek so bann desandan apre li, mem si li pa ti ankor ena zanfan. Bondie ti dir ki bann desandan Abraam pou viv dan enn pei etranze, kouma esklav, e zot pou gagn maltrete pandan kat san banane. Bondie ti dir, “Me mwa mo pou ziz sa nasion ki pou tret zot kouma esklav. Apre sa zot pou sorti laba, pou vinn ador mwa isi mem.” Bondie ti fer lalians avek Abraam. Sirkonsizion sinbol sa lalians-la. Abraam fer sirkonsizion ar so garson Izaak, wit zour apre so nesans; Izaak ti fer parey avek so garson Zakob, e Zakob osi ar so douz garson, bann patriars. Bann patriars ki ti zalou Zozef ti vann li kouma enn esklav dan pei Lezip, me Bondie ki ti ar li, ti delivre li dan so lapenn, e ti donn li lasazes ek faver Faraon, lerwa Lezip, ki ti fer li vinn gouverner Lezip ek tou so rwayom. Apre ti ena lafaminn dan antie Lezip e Kanaan; lafaminn-la ti telman for ki nou bann anset ti soufer boukou. Me kan Zakob ti tann dir ki ena manze dan Lezip, li ti avoy nou bann anset enn premie fwa laba. Lor zot deziem vizit Zozef ti fer so bann frer rekonet li, e Faraon ti fer konesans fami Zozef. Alors Zozef ti fer so papa ek tou so bann fami vinn Lezip. Ti ena swasann-kinz antou. Zakob ti desann Lezip. Li ti mor laba, ek nou bann anset osi. Ti retourn zot lekor Sikem e ti met zot dan tonbo ki Abraam ti aste pou enn som larzan ar bann garson Emor dan Sikem. Kouma letan ti pe aprose pou ki Bondie akonplir so promes ki li ti fer Abraam, nou lepep dan Lezip ti grandi e miltipliye. Lerla ti ena enn lot lerwa ki pa ti konn Zozef ki ti regne lor Lezip. Li ti maltret nou ras e fors nou bann anset anpes zot ti-baba viv. Sa lepok-la Moiz ti ne e Bondie ti trouv li enn zoli baba. Pandan so trwa premie mwa li ti grandi dan lakaz so papa. Kan zot ti abandonn li, tifi Faraon ti ramas li e ti grandi li kouma so prop garson. Alor Moiz ti gagn sazes bann Ezipsien e li ti vinn pwisan dan so parol ek so bann aksion. Letan li gagn karant-an, enn dezir vinn dan li pou vizit so bann frer Izraelit. Letan li trouv enn Ezipsien maltret enn dan so bann, li ti defann li e li ti touy Ezipsien-la. Li ti panse ki so bann frer ti pou konpran ki Bondie pe delivre zot par so lame, me zot pa finn konpran sa. Landime li finn trouv de-trwa Izraelit ki ti pe lager ant zot. Moiz ti sey rekonsilie zot. Li ti dir zot, ‘Bann frer, kifer zot lager?’ Me sa zom ki ti pe maltret so prosin la ti pous Moiz e ti dir li, ‘Kisann-la finn fer twa sef pou ziz nou? Eski to anvi touy mwa kouma yer to finn touy sa Ezipsien-la?’ Kouma Moiz tann sa, li sove; li al viv dan Madian kouma enn etranze. Laba li ti vinn papa de garson. Apre ki karant-an ti pase, enn anz ti paret devan Moiz dan laflam enn bwison ki ti pe brile dan dezer. Moiz ti etone par seki li ti trouve; alor li ti koste pli pre pou trouv pli bien. Li tann lavwa Lesegner ki dir, ‘Momem Bondie to bann anset, Bondie Abraam, Izaak ek Zakob.’ Moiz koumans tranble e li pa oze gete. Lesegner dir li, ‘Tir to sandalet; la kot to pe deboute, enn landrwa sakre. Mo finn trouv kouma pe maltret mo pep dan Lezip, mo finn tann zot plengne, mo finn desann pou liber zot. Ekout mwa, mo pe avoy twa Lezip.’ Ar Moiz mem ki bann Izraelit ti poz enn kestion, letan zot ti rezet li, zot ti dir, ‘Kisann-la finn fer twa sef ek ziz lor nou?’ Samem Moiz ki Bondie finn avoye kouma sef ek liberater so lepep avek led anz ki ti paret dan bwison ardan. Li finn sorti lepep Bondie depi Lezip par bann mervey ek bann mirak ki li ti fer laba, ek osi dan lamer rouz ek dan dezer pandan karant-an. Moiz mem ankor ki dir bann Izraelit, ‘Bondie pou avoy zot enn profet kouma mwa ki pou enn manb zot pep.’ Letan lepep ti rasanble dan dezer, Moiz ti dibout ant lepep ek anz ki ti pe koz ar li lor Montagn Sinai. Li ti resevwar mesaz vivan ki sorti kot Bondie, pou partaz sa ar nou. Me nou bann gran dimounn ti refiz obeir li, e zot ti rezet li. Dan zot leker zot ti pe re-pans Lezip. Zot dir Aaron, ‘Fer bann idol bondie ki pou al devan nou. Nou pa kone ki finn ariv sa Moiz ki finn tir nou dan Lezip la.’ Lerla zot fabrik enn idol dan form enn vo, e zot ofer li sakrifis. Zot ti fier seki zot finn fabrike ar zot lame. Me Bondie vir ledo ar zot ek li abandonn zot pou ki zot ador bann pwisans dan lesiel, kouma finn ekrir dan liv bann profet: ‘Eski zot finn ofer mwa bann zanimo ek bann sakrifis, karant lane dan dezer, lepep Izrael? Non, zot finn sarye latant Molok, ek zimaz Refan, zot bondie zetwal, sa bann idol ki zot finn fer pou zot adore. Akoz sa mo pou deport zot pli lwin ki Babilonn.’ Nou bann gran dimounn ti ena latant temwaniaz dan dezer, ki Moiz ti fer parey kouma linstriksion ki li ti gagne, parey kouma model li ti trouve. Lerla nou bann gran dimounn ti erit li; zot finn sarye li ar zot letan zot ti al ansam ar Zozwe pou pran later bann nasion ki Bondie ti deplase devan zot. Bann zafer ti roul koumsa ziska lepok David ki ti gagn faver Bondie ek ti dimann permision pou fer enn lakaz pou Bondie Zakob. Me Salomon ki ti mont enn lakaz pou Bondie. Pourtan Gran Bondie napa res dan lakaz ki fer ar lame; kouma profet dir, ‘Lesiel mo tronn, later mo marspie. Bondie dir: Ki lakaz to pou fer pou mwa? Oubien dan ki landrwa mo pou repoze? Pa mo lame ki finn fer tousala?’ Zot, bann dimounn ki ena latet dir, zot leker ek zot zorey pa ekout Bondie, zot touzour reziste Lespri Sin. Zot fer parey kouma zot bann anset. Dan tou bann profet, lekel zot gran dimounn napa finn persekite? Zot finn mem touy bann ki ti pe anonse an avans ki Lemesi pou vini. Aster-la zot ki la, ki finn trayir Lemesi ek zot finn asasinn li. Zot finn resevwar lalwa par bann anz me zot pa finn obeir li.” Letan zot tann sa bann koze-la zot araze ek zot grins zot ledan kont Etienn. Me Etienn, ranpli ar Lespri Sin, get ver lesiel ek li trouv laglwar Bondie, ek Zezi pe dibout lor so kote drwat. Etienn dir, “Gete, mo trouv lesiel ouver ek Garson Bondie pe dibout lor so kote drwat.” Me zot bous zot zorey, zot kriye for, ek zot fons lor li. Lerla zot sarye li andeor lavil ek zot pil ros lor li; ek bann temwin donn enn zennom ki apel Sol pou vey zot linz. Letan zot pe pil ros lor Etienn, li priye, “Segner Zezi, pran mo lespri.” Li tom azenou ek li kriye for, “Segner, napa pini zot pou sa pese-la.” Letan li finn fini dir sa, li mor. Sol ti dakor ar zot krim lor Etienn. Sa zour lamem enn gran persekision ti koumanse kont Legliz Zerizalem. Tou dimounn, apar bann zapot, finn fane dan rezion Zide ek Samari. Bann zom relizie ti anter Etienn e zot ti plor boukou lor so lamor. Me Sol ti pe persekit Legliz; li ti rant dan lakaz apre lakaz, li tir bann krwayan - ki li zom ki li fam - e li ti al zet zot dan prizon. Bann ki ti finn disperse partou kote, finn al proklam Bonn Nouvel. Filip desann dan enn lavil Samari e li proklam Lemesi. Tou bann abitan sa lavil-la ti ekout mesaz Filip avek boukou latansion parski zot ti temwin bann mirak ki li ti pe fer. Bann move lespri ti pe kriye kan zot ti pe sorti depi bann posede, bann paralize ek bann andikape ti geri. Ti ena enn gran lazwa dan lavil. Me ti ena enn zom ki ti apel Simon ki avan ti pe fer mazik; li ti etonn boukou dimounn dan sa lavil-la; li ti deklar li enn gran dimounn. Bann abitan, tipti kouma gran, ti ekout li, zot ti pe dir, “Sa zom-la, li pe montre pwisans Bondie ki apel ‘Gran pouvwar.’ ” Zot ti ekout li avek boukou lintere parski depi lontan li finn fer zot res bet avek so mazik. Me kan zot finn krwar dan Bonn Nouvel rwayom Bondie ek Zezi Kris ki Filip ti pe proklame, zom kouma fam, ti batize. Mem Simon ti krwar. Apre so batem li ti res avek Filip e li ti etone kan li ti trouv bann sign ek mirak ki ti pe arive. Kan bann zapot dan Zerizalem tann dir ki Samari finn aksepte Parol Bondie, zot avoy Pier ek Zan laba. Toule-de desann e priye pou bann-la resevwar Lespri Sin. Lespri Sin pa ti ankor desann lor personn parmi zot; zot ti finn zis batize dan nom Segner Zezi. Lerla Pier ek Zan poz lame lor zot e zot resevwar Lespri Sin. Letan Simon trouve ki Lespri Sin inn desann lor bann krwayan kan bann zapot inn poz lame lor zot, li ofer Pier ek Zan enn som larzan. Li dir, “Donn mwa osi sa pouvwar-la, pou ki ler mo poz lame lor enn dimounn, li kapav resevwar Lespri Sin.” Me Pier reponn, “Twa ek to kas pou fini ansam! To panse to kapav aste sa don-la ar Bondie? To pena nanye pou gagne parski to leker pa drwat devan Bondie. Sanz to move lintansion e priy Lesegner; kikfwa li va pardonn move lintansion to leker. Parski mo trouve ki to leker amer e to prizonie to pese.” Simon reponn, “Priy Bondie pou mwa tomem pou ki tou seki to pe dir la pa ariv mwa.” Apre ki Pier ek Zan finn rann temwaniaz e proklam Parol Bondie, zot retourn Zerizalem. Lor zot sime, zot ti anons Bonn Nouvel dan enn kantite vilaz Samari. Apre sa, enn anz Lesegner dir Filip, “Leve, al dan direksion Lesid, lor sime ki desann depi Zerizalem ziska Gaza. Enn sime ki pa frekante sa.” Li leve, li ale. Lor so sime ti ena enn gran ofisie Etiopien ki ti ansarz trezor larenn Kandas; li ti vinn Zerizalem pou ador Bondie. Li ti pe retourn dan so pei dan enn kales, e li ti pe lir enn pasaz liv profet Izai. Lespri Lesegner dir Filip, “Koste ar sa kales-la.” Filip galoup kot kales-la e li tann ofisie-la pe lir enn pasaz liv profet Izai. Filip dimann li, “Eski to konpran seki to pe lir?” Li reponn, “Kouma mo pou konpran, si personn pa explik mwa?” Lerla li invit Filip pou mont dan kales e asiz kot li. Ala pasaz Lekritir ki li ti pe lir: “Parey kouma enn mouton ki zot pe amenn labatwar kouma enn agno bien trankil devan bann ki pe koup so lalenn, li pa ouver so labous. Zot finn abes li e pa finn ena lazistis; kisann-la kapav dekrir so desandan? Parski zot finn pran so lavi lor later.” Ofisie Etiopien la dimann Filip, “Dir mwa, lor kisann-la profet-la pe dir sa, lor limem oubien lor enn lot?” Alors Filip koumans explike. Li koumans par sa pasaz Lekritir-la pou anons li Bonn Nouvel lor Zezi. Letan zot pe kontign zot sime, zot ariv kot ena dilo; lerla ofisie-la dir Filip, “Ala dilo, ki anpes mwa resevwar batem?” Filip dir, “Si to krwar avek tou to leker, li posib.” Li reponn, “Mo krwar ki Zezi Kris limem Garson Bondie.” Li donn lord pou aret kales, e toule-de, Filip ek ofisie-la, desann dan dilo, lerla Filip batiz li. Letan zot sorti dan dilo, Lespri Lesegner anlev Filip; ofisie-la nepli trouv Filip ankor, e li ale ranpli ar lazwa. Filip retrouv limem dan enn landrwa ki ti apel Azot, e li ti anons Bonn Nouvel dan tou bann lavil ki li finn traverse ziska li ariv Sezare. Sa lepok-la, Sol ti ankor ranpli avek menas lamor kont bann disip Lesegner. Li ti al kot gran pret pou dimann li papie arestasion pou bann sinagog dan Damas. Koumsa si li trouv ninport ki zom ou fam ki pe swiv Sime Bondie li pou aret zot ek amenn zot Zerizalem. Li ti dan sime pre ar Damas ler enn sel kout enn lalimier sorti dan lesiel, briye otour li. Li tonbe, e li tann enn lavwa ki dir li, “Sol, Sol, kifer to persekit mwa?” Li reponn, “Kisann-la to ete, Segner?” “Mwa, momem Zezi ki to pe persekite. Lev twa, rant dan lavil e zot pou dir twa seki to bizin fer.” Bann ki ti pe vwayaz ar Sol ti res san parol parski zot ti tann enn lavwa me zot pa ti trouv personn. Sol leve, me letan li ouver so lizie, li pa trouv nanye. Zot trap so lame e zot amenn li Damas. Li res trwa zour pa trouv kler. Pandan sa letan-la li pa ni manze ni bwar. Ti ena enn disip dan Damas ki ti apel Ananias. Lesegner dir li dan enn vizion, “Ananias!” Li reponn, “Ala mo-la, Segner.” Lesegner dir li, “Leve, al dan lari Drwat, dan lakaz Zida, rod enn zom ki sorti Tars ki apel Sol. Li pe fer lapriyer, e dan enn vizion li finn trouv enn dimounn apel Ananias rantre e poz lame lor so latet pou li retrouv kler.” Ananias reponn, “Segner, mo finn tann enn kantite koze lor sa zom-la, ki kantite ditor li finn fer to bann fidel dan Zerizalem. E isi mem, li finn gagn lotorite avek bann gran pret pou aret tou bann ki priye twa.” Lesegner dir li, “Ale, parski limem sa instriman ki mo finn swazir pou amenn Bonn Nouvel kot bann payin e zot lerwa, e osi kot lepep Izrael. Momem mo pou montre li ki kantite li bizin soufer pou mwa.” Ananias ale, li rant dan lakaz kot Sol ti ete, li poz lame lor li e li dir li, “Frer Sol, Lesegner Zezi ki ti aparet devan twa lor sime ler to ti pe vinn isi, finn avoy mwa pou ki to retrouv kler e ki to ranpli ar Lespri Sin.” Zis lerla, enn kiksoz kouma lekay tonbe depi so lizie. Li leve e li resevwar batem. Lerla li manze e li repran lafors. Li pas de-trwa zour ar bann disip dan Damas. Toutswit apre li koumans proklam Zezi dan sinagog, li dir, “Limem Garson Bondie.” Tou dimounn ki ti tann li ti res bet. Zot ti pe dir, “Pa limem ki dan Zerizalem ti pe persekit tou dimounn ki priye Zezi? Pa limem ki finn vinn isi pou aret zot e amenn zot prizonie devan sef pret?” Me predikasion Sol vinn pli for ankor e li fer bann Zwif dan Damas perdi pwin letan li prouve ki Zezi limem Lemesi. Apre inpe letan bann Zwif fer konplo pou touy li, me Sol ti dekouver zot plan. Lanwit-lizour zot ti pe vey lantre lavil pou zot touy li. Me so bann disip finn pran li lanwit e finn desann li par enn trou miray dan enn panie. Letan li ti ariv Zerizalem li finn sey zwenn li ar group bann disip me zot tou ti per li. Zot pa ti le krwar ki li vremem enn disip. Me Barnabas ti pran li e ti amenn li kot bann zapot. Li rakont zot kouma lor sime vwayaz Sol ti trouv Lesegner, ki finn koz ar li. Li osi rakont bann-la kouma Sol ti servi nom Lesegner pou koz avek lasirans dan Damas. Alor Sol ti res ar zot e li ti ale-vini dan Zerizalem. Li ti koz avek boukou konviksion dan nom Lesegner. Li ti osi koze ek diskite ar bann Zwif ki koz Grek, me zot ti rod touy li. Kan bann frer finn dekouver sa, zot finn amenn li Sezare e depi laba zot finn avoy li Tars. Legliz dan Zide, Galile ek Samari ti viv enn letan lape. Legliz ti vinn for e ti ena gran respe pou Lesegner e par led Lespri Sin Legliz ti pe ogmante. Dan bann vizit ki Pier ti pe fer inpe partou, li ti al get bann krwayan dan Lida. Laba li ti trouv enn dimounn ki ti apel Ene ki ti paralize depi wit-an. Pier dir li, “Ene, Zezi Kris geri twa. Leve, aranz to lili.” Toutswit Ene leve. Tou bann abitan Lida e Saron ki ti trouv sa finn met zot lafwa dan Lesegner. Dan lavil Zope ti ena parmi bann disip enn fam ki ti apel Tabita, dan langaz Grek so nom vedir Dorkas, ki vedir gazel. Li ti touzour fer dibien pou ed bann pov. Sa lepok-la li finn tom malad e li finn mor. Kan zot finn fini bengn li, zot met so lekor dan enn lasam a-letaz. Lida ti pre ar Zope. Letan bann disip ti kone ki Pier laba, zot avoy de zom pou sipliy li ar enn mesaz, “Vinn kot nou toutswit.” Lerla Pier al ar zot. Kan li ariv laba zot amenn li dan lasam lao. Tou bann vev antour li, zot ti pe plore. Zot montre li bann semiz e lezot linz ki Dorkas ti koud letan li ti ankor vivan. Pier fer tou dimounn sorti, li azenou e li fer lapriyer. Lerla, li tourn ar lekor-la e li dir, “Tabita, leve.” Tabita ouver so lizie, e letan li trouv Pier, li asize. Pier atrap so lame ek ed li diboute. Pier apel bann krwayan e bann vev e li prezant zot Dorkas ki ti vivan. Sa nouvel-la finn fane dan Zope, boukou dimounn finn krwar dan Lesegner. Pier ti res ase lontan dan Zope kot kikenn ki apel Simon, enn zouvriye ki travay lapo. Dan Sezare ti ena enn zom ki ti apel Korney. Li ti kapitenn enn divizion larme ki ti apel ‘Batayon Italien.’ Li ti bien relizie; li ansam ar tou so fami ti ador Bondie. Li ti bien ed bann pov e touletan li ti priye Bondie. Enn zour ver trwa-z-er tanto, li fer enn vizion. Li trouv enn anz Bondie ki rant kot li e ki dir li, “Korney!” Li get anz-la avek freyer e li dir, “Ki ena, Segner?” Anz-la dir li, “Bondie finn pran kont to lapriyer ek led ki to donn bann pov. Aster-la, avoy dimounn Zope pou amenn Simon, ki zot apel Pier. Li pe res kot Simon, enn zouvriye ki travay lapo e ki res dan bor lamer.” Kan anz-la finn ale, Korney apel de serviter ek enn solda ki ti bien relizie e ki ti servi li. Li rakont zot tou seki finn arive, e li avoy zot Zope. Landime ver midi letan zot ti pe vwayaze e ti pe apros Zope, Pier al lao lor twa lakaz pou priye. Li koumans gagn fin e li ti pe anvi manze. Pandan ki ti pe prepar enn repa pou li, li gagn enn vizion. Li trouv lesiel ouver ek enn kiksoz ki resanble enn nap ki pe desann par so kat kwin. Ladan ti ena toutsort kalite zanimo, reptil ek zwazo. Enn lavwa dir li, “Pier, leve; touye, manze.” Me Pier reponn, “Non, zame, Segner. Mo pa finn zame manz kiksoz ki interdi e pa finn pirifie.” Lavwa enn deziem fwa dir li, “Pa konsider kiksoz inpir si Bondie finn deklar li prop pou manze.” Sa ti arive trwa fwa, lerla lobze-la retourn dan lesiel lao. Letan Pier pe reflesi lor ki savedir sa vizion-la, bann dimounn ki sorti kot Korney ti reisi trouve ki kote lakaz Pier ete. Zot finn aret devan laport lantouraz. Zot kriye pou dimande si Pier ti res dan sa lakaz-la. Pier ti ankor pe sey konpran vizion-la letan Lespri dir li, “Gete, ena trwa zom ki pe rod twa. Leve e desann. Pa ezite pou swiv zot parski mwa ki finn avoy zot.” Pier desann e li dir bann-la, “Momem ki zot pe rode. Kifer zot finn vinn isi?” Zot reponn li, “Kapitenn Korney ki finn avoy nou isi. Li enn dimounn drwat ki ena bel respe pou Bondie, e bann Zwif bien estim li. Enn anz Bondie ki finn dir li invit twa dan so lakaz pou li ekout seki to ena pou dir.” Pier invit zot rantre pou pas lanwit kot li. Landime li prepar limem pou al ar zot. De-trwa bann frer dan Zope ti akonpagn li. Se nek zour apre ki zot ariv Sezare. Korney ti pe atann ki zot vini, alor li finn reini so bann fami e kamarad pros. Zis letan Pier pou rantre, Korney vinn zwenn li e li tom dan so lipie, li kourb devan li pou montre so respe. Me Pier fer li leve. Pier dir li, “Leve. Mo nek enn zom parey kouma twa.” Li kontign koz ar Korney pandan ki zot rant dan lakaz, e la li trouv enn kantite dimounn ki finn vinn ansam. Li dir zot, “Zot tou bien kone ki dapre lalwa, enn Zwif pa asosie limem ar enn etranze, e li pa frekant lezot ki pa Zwif. Me Bondie finn montre mwa ki fode pa mo konsider okenn dimounn inpir oubien indign pou mo frekant li. Akoz sa, kouma zot finn apel mwa pou vini, mo pa finn ena okenn obzeksion. Aster-la, mo kapav dimann zot kifer finn apel mwa isi?” Korney reponn, “Ena trwa zour letan mo ti dan mo lakaz mo pe priye, apepre sa ler-la mem, trwa-z-er lapremidi, enn sel kout enn dimounn avek enn linz bien briyan, paret devan mwa. Li dir mwa, ‘Korney, Bondie finn pran kont to lapriyer ek led ki to donn bann pov. Avoy dimounn Zope pou amenn Simon, ki zot apel Pier. Li pe res kot Simon, enn zouvriye ki travay lapo e ki res dan bor lamer.’ Alor mo finn fer apel twa toutswit, e to finn vremem bon pou aksepte vini. Nou tou la, dan prezans Bondie pou ekout seki Bondie finn komann twa pou dir nou.” Pier pran laparol, li dir, “Aster-la mo realize ki Bondie tret tou dimounn parey lor mem baz. Bondie aksepte ninport ki dimounn dan ninport ki nasion si li ador li e fer seki drwat. Zot konn mesaz ki li finn avoy lepep Izrael, enn Bonn Nouvel ki ena lape par Zezi Kris ki Lesegner tou dimounn. Zot kone ki finn arive premie dabor dan Galile, ek answit partou dan Zide, apre batem ki Zan ti anonse. Zot kone kouma Bondie ti vers pwisans Lespri Sin lor Zezi ki sorti Nazaret. Li ti al partou, li fer dibien e ti geri tou dimounn ki ti may dan pouvwar diab, parski Bondie ti avek li. E nou, nou temwin tou seki li finn fer dan pei Izrael ek dan Zerizalem. Bann-la finn koulout li lor lakrwa pou touy li. Me lor trwaziem zour Bondie finn relev li parmi bann mor, e fer li aparet. Pa tou dimounn ki finn trouv li, me bann temwin ki Bondie ti finn fini swazir, setadir nou ki finn manze-bwar ar li apre ki li ti regagn lavi. Li finn komann nou anons Bonn Nouvel e rann temwaniaz ki limem ki Bondie finn swazire kouma ziz lor bann vivan ek bann mor. Tou bann profet ti koz lor li. Zot ti dir seki krwar dan li pou resevwar pardon zot pese par pwisans so nom.” Letan Pier ti ankor pe dir sa bann parol-la, Lespri Sin ti desann lor tou seki ti pe ekout so mesaz. Bann krwayan ki lorizinn Zwif e ki ti akonpagn Pier, ti etone ki don Lespri Sin ti osi verse lor bann dimounn ki pa Zwif. Zot tann bann-la koz an lang etranz e zot pe loue grander Bondie. Lerla Pier dir, “Sa bann dimounn-la finn resevwar Lespri Sin parey kouma nou, eski zot krwar nou kapav anpes zot batize dan dilo?” Alor li donn lord ki batiz zot dan nom Lesegner Zezi Kris. Bann-la dimann Pier res kot zot ankor de-trwa zour. Bann zapot ek bann frer ki ti dan Zide ti tann dir ki bann non-Zwif osi finn resevwar Parol Bondie. Lerla, letan Pier retourn Zerizalem, bann krwayan ki an faver sirkonsizion dir, “To finn al kot bann ki pa fer sirkonsizion ek to finn mem manz avek zot.” Lerla Pier koumans explik zot an detay seki finn arive. Li dir zot, “Mo ti pe priye dan lavil Zope e mo finn gagn enn vizion. Enn kiksoz ki resanble enn gran dra ti pe desann par so kat kwin depi lesiel ziska devan mwa. Ler mo get pli pre ladan mo trouv bann zanimo, bann bebet sovaz, bann reptil e bann zwazo. Mo tann enn lavwa ki dir mwa, ‘Pier, diboute; touye manze.’ Me mo reponn, ‘Non Segner, zame mo met kiksoz ki defann ou ki inpir dan mo labous.’ Me depi lesiel lavwa-la re-dir mwa, ‘Pa apel inpir seki Bondie finn deklar pir.’ Sa finn arive trwa fwa, apre tou kiksoz finn remont dan lesiel. Lerla mem trwa zom ki sorti Sezare ti ariv dan lakaz kot nou ti ete. Lespri Sin dir mwa al ar zot san okenn ezitasion. Sa sis frer-la finn al ar mwa kot Korney e nou finn rant dan so lakaz. Korney rakont nou kouma li ti trouv enn anz pe dibout dan so lakaz, e ti dir li, ‘Avoy dimounn Zope pou al sers Simon ki apel Pier. Li pou donn twa enn mesaz ki pou sov twa ek to fami.’ Kouma mo koumans koze, Lespri Sin desann lor zot parey kouma ti desann lor nou dan koumansman. Mo finn rapel Parol Bondie ki dir, ‘Zan ti batiz ar dilo, me zot, zot pou resevwar batem dan Lespri Sin.’ Si Bondie finn donn bann-la mem don ki li finn donn nou kan nou ti krwar dan Zezi Kris, mwa ki mo ete pou reziste Bondie?” Kan bann-la tann sa zot res trankil. Zot ti glorifie Bondie. Zot dir, “Alor Bondie finn donn bann ki pa Zwif repantans ki donn vre lavi.” Bann ki ti disperse akoz persekision ki ti koumanse par lamor Etienn ti al ziska Fenisi, Sip ek Antios. Zot ti pe partaz laparol zis ar bann Zwif. Me ti ena parmi zot ki ti sorti Sip ek Sirenn. Kan zot ti vinn Antios zot finn koz ar bann Grek pou anons zot Bonn Nouvel lor Zezi Kris. Lame Bondie ti lor zot ek enn kantite ti krwar e ti tourn ver Lesegner. Sa nouvel-la ti ariv dan zorey bann ki ti dan Legliz Zerizalem. Lerla zot avoy Barnabas Antios. Letan li ariv laba li trouv lagras Bondie, li ti bien-bien kontan. Li ti ankouraz zot tou pou res fidel ar Lesegner ar tou zot leker. Barnabas ti enn bon dimounn ranpli ar Lespri Sin ek lafwa. Ti gagn enn kantite dimounn pou Lesegner. Lerla Barnabas ti al Tars pou rod Sol. Kan li finn trouv li, li finn amenn li Antios. Zot finn pas enn lane dan Legliz pou ansegn enn kantite dimounn. Dan Antios mem ki premie fwa ti apel bann disip Kretien. Sa lepok-la de-trwa profet sorti Zerizalem finn vinn Antios. Enn parmi zot, Agabis, met li dibout e par pwisans Lespri Sin li koumans anonse ki pou ena enn lafaminn lor later. (Sa ti arive lepok Klod ti Lanperer.) Bann disip deside pou avoy otan led ki zot kapav bann krwayan ki abit dan Zide. Zot finn fer samem, e finn avoy zot don kot bann ansien dan Legliz Zide par Barnabas ek Sol. Sa lepok-la lerwa Erod ti pe persekit de-trwa manb Legliz. Li fer touy Zak, frer Zan, par lepe. Letan li trouve ki sa ti fer plezir bann Zwif li fer aret Pier osi. Sa ti pase pandan fet dipin san levin. Erod fer aret Pier e met li dan prizon. Li fer kat lekip ki ena kat solda sakenn vey li, parski li ti ena lintansion ziz Pier an piblik apre fet Pak. Pandan ki Pier ti dan prizon Legliz ti priye Bondie boukou pou li. Lavey ki Erod ti pou amenn li devan lepep, Pier ti pe dormi aswar ant de solda. Zot ti finn atas li ar lasenn. Ti ena bann gard ki ti pe veye devan laport prizon. Ala ki enn sel kou enn anz Bondie paret ek enn lalimier briye dan kaso. Anz-la bouz Pier, li kas so somey, e li dir li, “Degaze-leve!” Lerla lasenn ki ti otour so lame tonbe. Anz-la dir li, “Met to sintir ek to sandalet.” Pier obeir. Li dir Pier, “Met to manto, swiv mwa.” Pier sorti swiv li. Li pa ti kone sipa seki anz-la ti pe fer, ti vre. Li ti krwar ki li pe fer enn vizion. Letan zot finn pas premie ek deziem lekip solda, zot ariv devan enn laport an-feray ki tom lor lavil. Laport-la ouver tousel. Zot sorti e zot mars ziska dan bout sime; lerla mem anz-la kit li. Lerla Pier rann li kont ki finn arive. Li dir, “Aster mo sir ki Lesegner finn avoy so anz pou tir mwa dan lame Erod. Li finn protez mwa kont tou dimal ki lepep Zwif ti pe anvi ariv mwa.” Kan li finn realize ki ti pe arive, li pran direksion lakaz Marie, mama Zan, ki ti osi apel Mark. Boukou dimounn ti reini laba pou priye. Kan Pier tap laport lantouraz, enn servant ki ti apel Roda ti vini pou ouver. Li rekonet lavwa Pier. Dan so lazwa li bliye ouver laport, li galoupe li al dir bann ki andan ki Pier pe dibout devan laport. Zot dir li, “To fol.” Me li persiste. Zot dir, “So anz sa.” Pandan sa letan-la, Pier kontign tape mem. Zot ouver, e zot res bet ler zot trouv li. Pier fer enn sign ar so lame pou dir zot res trankil. Li rakont zot kouma Lesegner finn tir li dan prizon. Li dir bann-la, “Al rakont sa Zak ek bann lezot frer.” Apre sa li sorti li al dan enn lot landrwa. Ler gramatin arive, bann solda ti bien trakase ek azite. Zot ti anvi kone kot Pier ete. Erod fer rod Pier, me pa trouv li. Li kestionn bann solda-la e li donn lord pou touy zot. Apre sa, li sorti Zide pou li al Sezare. Erod ti bien ankoler ar bann abitan Tir ek Sidon. Alor bann-la tom dakor pou al zwenn li. Zot reisi negosie ar Blastis ki ti responsab pale lerwa, pou zot dimann lape, parski zot pei ti pe depann lor lerwa Erod pou gagn manze. Zour randevou, Erod met so linz lerwa, mont lor tronn ek fer enn diskour an piblik. Lepep kriye, “Lavwa enn bondie sa, pa lavwa enn zom.” Anplas enn anz Lesegner zet Erod anba parski li pa finn glorifie Bondie, me finn pran loner-la pou li. Lever manz li e li mor. Me Parol Bondie ti kontign repann ek miltipliye. Kan Barnabas ek Sol ti fini fer zot mision dan Zerizalem, zot ti retourne e zot ti amenn ar zot Zan ki ti osi apel Mark. Dan Legliz Antios ti ena bann profet ek profeser kouma Barnabas, Simeon ki ti apel Nizer, Lisyis ki sorti Sirenn, Manaen ki ti grandi ansam ar Erod, ek Sol. Letan zot ti pe ador Lesegner e zot ti pe gard karem, Lespri Sin dir zot, “Met Barnabas ek Sol enn kote pou enn mision ki mo ena pou zot.” Alor apre ki zot fini priye ek fer karem, zot inpoz lame lor bann-la e les zot ale. Sa de-la, ki Lespri Sin ti avoye, ti al Selesi e depi laba zot ti pran bato pou al Sip. Ler zot ariv Salamis, zot anons Parol Bondie dan bann sinagog Zwif. Zan-Mark ti vini pou donn zot enn koudme. Ler zot ti fini travers lil ziska Pafos, zot zwenn enn longanis ki enn fos profet Zwif ki ti apel Barzezi. Li ti enn kamarad gouverner Serz Polis, ki ti enn dimounn bien intelizan. Li ti donn lord al rod Barnabas ek Sol parski li ti anvi tann Parol Bondie. Me longanis Elimas, samem so nom dan langaz Grek, ti kont zot e li ti sey detourn gouverner pou anpes li vinn enn krwayan. Sol, ki ti osi apel Pol, ti ranpli ar Lespri Sin. Li get Elimas drwat dan so lizie e li dir li, “Twa ki rize e ranpli ar mesanste, zanfan diab e lennmi lazistis, to pa pou aret detourn sime drwat Lesegner? Get sa! Lame Lesegner kont twa. To pou vinn aveg e to pa pou trouv lalimier soley pandan enn bon bout letan.” Enn sel kou Elimas trouv li dan marenwar, e li tourn partou-kote, pou gagn kikenn pou kondir li. Letan gouverner trouv seki finn arive, li vinn enn krwayan. Li ti bien inpresione par lansegnman Lesegner. Pol ek so bann kamarad ti pran bato depi Pafos pou al Perz dan Panfili. La, Zan-Mark kit zot pou retourn Zerizalem. Apre Perz zot kontign zot sime ziska Antios dan Pisidi. Zot rant dan sinagog enn zour saba e zot asize. Kouma fini lir liv Lalwa ek liv Profet, bann sef sinagog fer dir zot, “Mo bann frer, si zot ena kit mesaz pou ankouraz bann dimounn ki la, zot kapav koze.” Pol leve, li fer enn sign ar so lame, li dir, “Mo bann frer, ek zot tou ki ena gran respe pou Bondie, ekout mwa. Bondie lepep Izrael finn swazir nou bann anset, e li finn fer zot vinn enn gran nasion pandan lepok ki zot ti res Lezip. Apre li finn fer zot sorti laba par so aksion pwisan. Pandan karant banane li finn siport zot dan dezer. Li finn detrir set nasion dan pei Kanaan e li finn donn so lepep later bann-la kouma enn leritaz pandan kat-san-sinkant banane. Apre sa li finn donn zot bann ziz ziska profet Samiel. Lerla lepep ti dimann pou gagn enn lerwa. Bondie ti donn zot Sail, garson Kis depi tribi Benzamin, pandan karant banane. Kan Bondie ti finn rezet Sail, li ti elev David pou vinn zot lerwa. Ala temwaniaz ki li ti rann lor David: ‘Mo finn trouv dan David, garson Zese, kikenn ki mo leker bien kontan e ki pou fer mo volonte.’ Bondie finn azir dapre so promes e li finn lev enn Sover, Zezi, enn desandan David. Avan larive Zezi, Zan ti proklam enn batem repantans pou tou bann dimounn dan Izrael. Kan lepok Zan pe al fini, li dir, ‘Kisann-la zot panse mo ete? Mwa, mo pa Lemesi. Non, me Sa-Enn ki pe vini apre mwa la, mo mem pa vo pou larg so lase soulie.’ Bann frer, desandan Abraam ek zot bann non-Zwif ki ena respe pou Bondie, sa mesaz liberasion la, finn avoye pou nou sa. Bann abitan Zerizalem ek zot bann sef pa finn rekonet Zezi; letan zot finn kondann li, zot finn fer parol bann profet ki nou lir sak saba vinn vre. Zot pa finn trouv nanye kont li pou ki li merit lamor, pourtan zot finn dir Pilat touy li. Letan zot finn fer tou seki ti deza ekrir lor li, zot desann li depi lor lakrwa e zot met li dan enn tonbo. Me Bondie finn resisit li. Pandan boukou zour apre sa, li finn aparet ar dimounn ki ti mars ansam ar li depi Galile ziska Zerizalem, e ki zordi pe rann temwaniaz pou li ar lepep Izrael. E nou, nou pe anons zot sa Bonn Nouvel ki Bondie limem ti promet nou bann anset. Li fer sa vinn vre pou nou, ki zot bann desandan, letan li finn resisit Zezi; parey kouma ti ekrir dan deziem Psom: ‘Tomem mo Garson, Zordi mo finn vinn to Papa.’ Li finn resisit Zezi pou ki zame li retourn ankor dan lamor ek pouri laba, e samem ki fer sa bann parol-la vinn vre: ‘Mo pou donn zot benediksion ki sakre ki mo ti promet David.’ E dan enn lot pasaz finn ekrir: ‘To pa pou les to serviter fidel pouri dan tom.’ Me David, apre ki li finn akonpli plan Bondie dan so lepok, li finn mor e finn anter li ansam ar so bann anset. So lekor finn pouri dan tom. Me Sa-Enn ki Bondie finn resisite la, li pa finn konn sa mem sor-la. Bann frer, mo anvi ki zot kone ki atraver Zezi ki pe proklam pardon zot bann pese. Par Zezi tou dimounn ki krwar pe gagn liberasion so bann pese ki lalwa Moiz pa ti kapav fer. Pran kont ki seki bann profet finn dir pa ariv twa: ‘Gete, zot ki ranpli ar mepri, ki aster zot ranpli ar etonnman e ki zot disparet! Seki mo pe fer zordi zour enn kiksoz ki zot pa pou krwar mem si kikenn rakont zot sa.’ ” Letan Pol e Barnabas ti pe sorti sinagog, bann ki ti rasanble dimann zot retourne lot saba pou koz lor sa mem size-la. Ler renion termine, enn kantite Zwif ek bann konverti Zwif ti swiv Pol ek Barnabas. Sa de-la ti koz ar zot e ti exort zot res fidel ar lagras Bondie. Kouma lot saba arive, preske tou dimounn dan lavil ti rasanble pou ekout parol Lesegner. Me bann Zwif ti ranpli ar zalouzi letan zot trouv sa lafoul-la. Zot insilte Pol e kontredir seki li ti pe dir. Lerla, avek boukou kouraz, Pol ek Barnabas dir bann-la, “Li ti neseser ki anons Parol Bondie ar zot premie dabor. Me akoz zot finn repous li e zot pa konsider zot dign lavi eternel, abe aster-la nou pou al kot bann non-Zwif. Ala seki Lesegner finn komann nou: ‘Mo finn etablir twa kouma enn lalimier pou bann nasion, pou sov lemond antie.’ ” Kan bann non-Zwif tann sa, zot ti dan lazwa e zot ti glorifie Bondie. Tou bann ki ti destine pou lavi eternel ti vinn krwayan. Parol Bondie ti repann dan tou rezion. Me bann Zwif ti mont latet bann madam ki ti inportan dan sosiete e ki ador Bondie e osi bann gran dirizan zom lavil. Zot ti provok enn persekision kont Pol ek Barnabas, e ti pous zot depi sa rezion-la. Alors zot sakouy lapousier anba zot lipie kouma protestasion kont bann-la, e zot al Ikoniem. Bann disip ti ranpli ar lazwa e ar Lespri Sin. Dan Ikoniem, zot rant ansam dan enn sinagog Zwif. Zot ti koz telman bien ki enn gran group Zwif ek Grek ti vinn krwayan. Me bann Zwif ki ti refiz krwar ti mont latet bann non-Zwif kont bann frer. Alors zot finn res lontan laba, zot finn rann bann temwaniaz bien for pou Lesegner ki ti aprouv mesaz so lagras par bann sign ek bann mervey ki li permet zot fer. Me bann dimounn dan lavil ti divize: ena ki ti mars avek bann Zwif, ek inpe lezot ti avek bann zapot. Bann non-Zwif ek bann Zwif ansam avek zot bann sef ti mont enn plan pou atak Pol ek Barnabas ek pou pil ros lor zot; letan zot dekouver sa, zot ti sove al List ek Derb, bann site Likaoni, ek dan bann landrwa pre laba. Laba zot ti anons Bonn Nouvel. Dan List ti ena enn zom ki ti res asize parski li pa ti kapav servi so lipie; li ti paralize depi so nesans, e zame pa finn kapav marse. Li ti ekout Pol koze. Letan Pol fixe li, li trouve ki so lafwa permet li gagn gerizon. Pol kriye for, “Dibout drwat lor to lipie.” Enn sel kout li drese, li marse. Kan lafoul finn trouv seki Pol ti fer, zot elev lavwa, dan langaz Likaonien, “Bondie finn vinn lor later dan enn form imin pou nou!” Barnabas, zot ti apel Zeis ek Pol, zot ti apel Ermes parski limem ti aport laparol. Pret Zeis, ki so Tanp trouv dan lavil, ti amenn toro avek girland lor zot devan laport Tanp; li, ansam ar lepep ti anvi donn sa an sakrifis. Me kan zapot Pol ek Barnabas ti tann sa, zot desir zot linz ek zot galoup deor dan lafoul, e zot kriye, “Kamarad, kifer zot pe fer sa? Nou osi nou imin, parey kouma zot, e nou amenn zot enn Bonn Nouvel: zot bizin tourn zot ledo ar sa bann zafer initil la, pou al ver Bondie vivan ki fer lesiel, later, lamer ek tou seki existe. Dan letan lontan Bondie ti les tou bann nasion swiv zot prop sime, pourtan li finn touletan rann temwaniaz lor so lexistans par so bann bienfe. Depi lesiel li avoy lapli ek bon rekolt, koumsa li finn donn zot manze e fer zot leker kontan.” Mem ar sa bann parol-la, bann zapot pa ti kapav anpes lafoul ofer zot sakrifis. Bann Zwif ki ti sorti Antios ek Ikoniem ti vinn laba. Zot finn gagn konfians bann dimounn-la. Zot finn flank Pol kout ros, e letan zot finn krwar ki li finn mor, zot finn trenn li deor lavil. Me letan bann krwayan ti rasanble otour li, li releve e li retourn dan lavil. Landime li ek Barnabas ti al Derb. Pol ek Barnabas ti pres laparol dan Derb e zot ti fer boukou disip laba. Apre sa zot retourn List, Ikoniem ek Antios. Zot ti fortifie ek ankouraz bann disip pou res ferm dan lafwa. Zot dir, “Nou bizin pas par boukou difikilte pou nou kapav rant dan Rwayom Bondie.” Pol ek Barnabas ti nom bann ansien dan sak Legliz, ar lapriyer e apre ki zot ti gard enn peryod zenn; zot ti konfie bann-la Lesegner, dan ki zot ti met tou zot konfians. Apre sa zot ti pas dan Pisidi e zot ti ariv Panfili. Kan zot ti fini pres laparol dan Perz, zot ti al Atalia. Depi Atalia zot ti pran bato pou retourn Antios, lamem kot ti konfie zot dan lagras Bondie pou travay ki aster-la zot inn reisi akonplir. Kan zot finn ariv la, zot ti reinir bann dimounn Legliz e zot ti rakont tou seki Bondie ti fer atraver zot e kouma li finn ouver laport ar bann non krwayan. Zot ti res la lontan avek bann disip. Ti ena de-trwa zom ki ti sorti Lazide e ti vinn Antios, e zot ti ansegn bann frer, “Zot pa pou sove si zot pa fer sirkonsizion dapre lalwa Moiz.” Pol ek Barnabas pa ti dakor ar zot, e finn ena gran diskision lorla. Lerla, finn swazir Pol ek Barnabas ek de-trwa krwayan pou al get bann zapot ek bann ansien dan Zerizalem pou regle sa kestion-la. Apre ki Legliz finn ed zot pou zot vwayaz, zot ti travers Fenisi ek Samari, pou vizit bann krwayan; zot ti rakonte kouma bann payin finn krwar dan Lesegner. Sa nouvel-la ti amenn boukou lazwa parmi bann frer. Kan zot ti ariv Zerizalem, Legliz, ek bann zapot ek bann ansien ti akeyir zot. Zot ti rakont tou seki Bondie ti fer par zot. Alor, de-trwa parmi bann Farizien ki finn konverti, diboute dir, “Li neseser ki bann payin fer sirkonsizion e nou exize ki zot obeir lalwa Moiz.” Bann zapot ek bann ansien ti reini pou diskit lor sa size-la. Apre enn long diskision Pier diboute e li dir, “Mo bann frer, zot kone ki depi lontan Bondie finn swazir mwa parmi zot pou al anons Bonn Nouvel ar bann non-Zwif pou ki zot tande e ki zot krwar. Bondie konn leker tou dimounn. Pou montre ki li anvi ki bann non-Zwif osi krwar, li finn donn bann-la Lespri Sin, parey kouma li finn donn nou. Li pa finn fer okenn diferans ant zot ek nou, li finn pirifie zot leker par lafwa. Alors, kifer nou bizin inpoz enn fardo lor ledo bann-la pou ki nou defie Bondie? Enn fardo ki ni nou bann anset, ni noumem pa finn kapav sarye. Me nou krwar ki nou, osi bien ki bann-la, pou sove par lagras Lesegner Zezi.” Lasanble antie res trankil, e finn kontign ekout Barnabas ek Pol rakont bann sign ek bann mirak ki Bondie finn fer atraver zot parmi bann payin. Kan zot ti fini koze, Zak dir, “Bann frer ekout mwa. Simon finn explik nou kouma Bondie finn vizit bann non-Zwif pou swazir parmi zot enn pep ki pou port so nom. Parol bann profet dakor ar sa, parey kouma finn ekrir, ‘Apre sa mo pou retourne e mo pou re-konstrir lakaz David ki finn tom an rwinn, e mo pou redres li. Lerla leres limanite pou rod Bondie, osi bien ki bann non-Zwif ki port mo nom. Ala seki Lesegner deklare, limem ki realiz so bann proze, ki bien kler depi touletan.’ Alors dapre mwa, nou bizin pa rann lavi difisil pou bann non-Zwif ki pe tourn ver Bondie. Okontrer nou bizin ekrir zot pou dimann zot pa manz manze ki finn ofer kouma sakrifis ar bann idol, pa viv dan limoralite, e pa manz laser zanimo ki finn trangle ek pa konsom disan. Depi lontan pe lir lalwa Moiz dan bann sinagog, ek pe anons li dan tou lavil, sak zour saba.” Lerla bann zapot avek bann ansien, e Legliz antie, ti desid pou swazir de-trwa parmi zot pou avoy Antios avek Pol ek Barnabas. Zot ti swazir Zid ki ti osi apel Barsabas, ek Silas, de dimounn ki ti bien respekte parmi bann frer. Ti donn zot enn let pou amene. Dan let-la ti ekrir: “Nou, bann zapot ek bann ansien, nou salie zot bann frer parmi non-Zwif ki viv dan Antios, Siri ek Silisi. Nou finn tann dir ki de-trwa dimounn ki sorti kot nou, finn trakas zot ek boulvers zot par seki zot finn dir. Nou pa ti donn bann-la okenn instriksion. Nou finn tom dakor pou swazir de-trwa zom e avoy zot ansam avek nou bann kamarad Pol ek Barnabas, ki finn riske zot lavi pou servi Lesegner Zezi Kris. Nou pe avoy Zid ek Silas ki pou dir zot an parol seki nou finn ekrir. Lespri Sin e nou mem finn pran enn desizion pou pa met pli gran fardo lor zot ledo. Ala seki nou pe dir: Pa manz seki finn ofer bann idol, ni disan; napa manz zanimo ki finn trangle; e prezerv zot kont pratik imoral. Zot pou bien fer si zot evit tou sa-la. Orevwar.” Lerla delegasion-la ti kit bann frer e ti al Antios, kot zot ti zwenn tou Legliz ansam e zot ti donn let-la. Bann dimounn ti lir sa let-la e zot ti bien kontan par sa bann mesaz ankourazan la. Zid ek Silas, ki zotmem zot ti bann profet, ti explik boukou pou ankouraz ek ranforsi bann frer dan zot lafwa. Apre ki zot ti finn pas inpe letan la, bann frer ti donn zot benediksion ek finn retourn zot kot bann seki ti avoy zot. Silas ti desid pou res laba Me Pol ek Barnabas ti res Antios. Ansam ar boukou lezot, zot ti pe ansegn ek pres Parol Bondie. Apre enn bon letan Pol dir Barnabas, “Nou al rann vizit tou bann frer dan tou lavil kot nou finn pres Parol Bondie ek gagn inpe zot nouvel.” Barnabas ti anvi amenn Zan ki ti osi apel Mark ar zot, Me Pol pa ti dakor pou amenn li, parski Mark ti kit zot kan zot ti dan Panfili ek li pa ti kontign travay ar zot. Pol ek Barnabas ti gagn enn gran diskision e zot finn separe. Barnabas ti pran Mark ar li ek zot ti al Sip. Me Pol ti swazir Silas, e bann frer ti remet zot dan lame Bondie pou ki li pran zot swin. Li ti al Lasiri ek Sisil pou fortifie bann Legliz. Pol ti ariv Derb ek List akot ti ena enn disip ki apel Timote. So mama ti enn Zwiv e ti enn krwayan osi. So papa ti enn Grek. Bann frer dan List ek Ikoniem ti ena gran lestim pou Timote. Pol ti anvi ki Timote akonpagn li. Li pran Timote e li amenn li pou fer sirkonsizion akoz bann Zwif ki ti dan paraz, e ki ti kone ki so papa enn Grek. Dan tou lavil ki zot ti pase, zot ti dir bann frer obeir seki bann zapot ek bann ansien finn deside dan Zerizalem. Bann Legliz ti pe vinn pli for dan lafwa e zot kantite ti pe ogmante zour apre zour. Parski Lespri Sin finn anpes zot proklam laparol dan Lazi, zot finn al dan rezion Frizi ek Galasi. Kan zot ariv frontier Misi, zot sey al Bitini, me Lespri Zezi pa ti les zot ale, alors zot pas pre ar Misi zot desann pou al Troas. Aswar Pol gagn enn vizion. Enn Masedonien ti pe dibout ek ti pe sipliye, “Vinn Masedwann pou sov nou.” Deswit apre vizion Pol, nou finn prepar nou pou al Masedwann parski nou ti sir ki Bondie finn apel nou pou proklam Bonn Nouvel ar bann-la laba. Nou pran bato Troas, nou al direk Samotras e landime nou al Neapolis. Depi laba nou ti al Filip, premie lavil dan distrik Masedwann, enn koloni Romin. Nou finn pas de-trwa zour dan sa lavil-la. Zour saba nou ti kit lavil-la pou al dan bor larivier kot nou ti panse pou trouv enn plas kot dimounn abitie zwenn pou priye; laba nou asize pou koz ar bann fam ki ti rasanble. Parmi zot ti ena enn fam ki apel Lidia, enn abitan Tiatir. Li ti enn marsan letof gran valer, li ti ador Bondie. Lesegner ti prepar so leker pou li ekout Pol avek atansion. Kan li ek tou so fami ti batize, li ti invit nou pou vinn kot li. Li dir nou, “Si zot trouve ki vremem mo ena lafwa dan Lesegner, vinn res kot mwa.” Li ti telman insiste ki nou finn aksepte. Enn zour, letan nou ti pe al dan plas kot fer lapriyer, nou zwenn enn tifi esklav ki ti ena enn move lespri lor li. Li ti predir lavenir. So patron ti fer boukou profi ar so bann prediksion. Tifi-la swiv Pol ek nou, li kriye, “Sa bann zom-la, zotmem serviter pli Gran Bondie; zot pe anons nou sime delivrans.” Li fer sa pandan de-trwa zour. Pol ti agase ar sa, li tourne li dir lespri-la, “Dan nom Zezi Kris mo komann twa sorti dan sa tifi-la.” Lespri-la sorti deswit. Kan bann patron esklav-la trouve ki zot nepli fer larzan ar tifi-la, zot trap Pol ek Silas e trenn zot lor la plas piblik devan bann lotorite. Zot amenn Pol ek Silas devan mazistra, e zot dir, “Sa bann Zwif-la pe fer dezord dan nou lavil. Zot pe anons enn koutim ki nou pa kapav garde ni swiv, nou ki bann Romin.” Lafoul osi ti donn koudme atak bann-la, ek bann mazistra ti fer aras zot linz e fer bat zot kout fwet. Kan ti fini bat zot, ti zet zot dan prizon. Gard prizon ti gagn lord pou ferm zot ek vey bien lor zot. Letan li finn gagn sa lord-la, li finn zet zot dan kaso ki pli profon posib dan prizon, e li finn fixe zot lipie dan enn blok dibwa. Ver minwi, Pol ek Silas ti pe priye ek sant kantik e lezot prizonie ti pe ekout zot. Enn sel kou gagn enn gran tranbleman-de-ter, bann fondasion ti sede, tou laport prizon ti ouver e lasenn bann prizonie ti large. Letan gard prizon leve, li trouv laport ouver. Li tir so lepe, li rod touy limem parski li ti krwar ki bann prizonie ti finn sove. Me Pol kriye, “Pa fer twa ditor. Nou tou lamem.” Gard-la dimann fer li gagn lalimier e li galoup andan. Li tranble ar laper, li tom devan Pol ek Silas. Li amenn zot deor e li dimann zot, “Misie, ki mo bizin fer pou ki mo sove?” Zot reponn, “Krwar dan Lesegner Zezi, e twa ek to fami pou sove.” Lerla zot partaz parol Lesegner ar li ek tou seki dan so lakaz. E aswar lamem li amenn zot enn plas pou lav zot blesir; e toutswit li ek so fami ti resevwar batem. Li fer Pol ek Silas mont kot li e li ofer zot enn repa. Li ek tou so fami ti dan enn gran lazwa parski zot finn krwar dan Bondie. Kan soley leve, bann mazistra Romin ti avoy bann ofisie dir gard prizon, “Larg sa bann zom-la.” Gardien prizon dir Pol, “Bann mazistra finn avoy dimounn pou liber zot, alors zot kapav sorti aster-la ek al anpe.” Me Pol dir ar bann gard-la, “Zot finn bat nou an piblik san prouve ki nou koupab, nou ki bann sitwayen Romin. Zot finn zet nou dan prizon; ek aster-la zot rod liber nou an kasiet? Non! Dir bann-la vinn tir nou zotmem.” Bann ofisie-la ti raport sa ar mazistra. Kan zot aprann ki Pol ek Silas ti sitwayen Romin, zot ti gagn per. Zot al dimann Pol ek Silas exkiz. Zot ti akonpagn bann-la depi prizon e dimann zot kit lavil. Apre ki Pol ek Silas ti finn sorti prizon zot ti al dan lakaz Lidia kot zot finn zwenn bann frer ek ser, e zot finn ankouraz bann-la. Apre sa zot ti ale. Dan zot vwayaz Pol ek Silas ti pas Anfipolis ek Apoloni, e zot ti ariv Tesalonik, kot bann Zwif ti ena enn sinagog. Pol ti zwenn bann Zwif dan sinagog kouma li ti abitie. Trwa saba aswiv li ti diskit laparol ar zot. Li explik zot e montre zot ki Lekris ti bizin soufer e resisite parmi bann mor. Li dir zot, “Sa Zezi ki mo pe anons zot la, limem Lekris.” De-trwa parmi zot ti krwar e zot ti swiv Pol ek Silas, parey kouma enn kantite Grek ki ti ador Bondie ek boukou fam ki ti okip pozision inportan. Me bann Zwif ti zalou. Zot pran ar zot de-trwa taper, rasanble enn lafoul e zot fer dezord dan lavil. Zot atak lakaz Zason, zot ti pe rod tir Pol ek Silas pou amenn zot ar lafoul. Letan zot pa trouv bann-la, zot pran Zason ek de-trwa frer e trenn zot devan mazistra lavil. Zot kriye, “Sa bann dimounn ki ti pe devir lemond anba-lao la, zot finn vinn isi osi! E Zason finn resevwar zot! Zot pa pe swiv lalwa Sezar, zot dir ena enn lot lerwa ki apel Zezi.” Bann dimounn ek bann lotorite lavil ti bien trouble letan zot tann sa. Zot dimann enn kosion ar Zason ek lezot, lerla ti les zot ale. Kouma fer nwar, bann frer avoy Pol ek Silas dan lavil Bere. Kan zot ariv laba zot al dan sinagog bann Zwif. Bann Zwif Bere ti ena meyer santiman ki bann Zwif Tesalonik. Zot ti pli pare pou resevwar Bonn Nouvel ki bann-la. Toulezour zot ti pe examinn laparol pou verifie sipa seki ti pe dir la ti korek. Akoz sa boukou parmi zot ti krwar, ansam avek bann fam Grek bien respektab, ek enn kantite zom osi. Kan bann Zwif Tesalonik ti aprann ki Pol ti pe anons laparol dan Bere osi, zot al laba pou met dezord parmi lepep. Toutswit bann frer fer Pol kontign so larout pou al lor lakot. Me Silas ek Timote ti res laba. Bann ki ti akonpagn Pol ti kondir li ziska Atenn. Apre sa zot inn gagn lord pou dir Silas ek Timote rezwenn Pol pli vit posib. Letan Pol pe atann zot dan Atenn, so lespri ti bien trouble ler li trouv sa kantite stati idol ki ti ena dan lavil-la. Lerla, toulezour dan sinagog li ti diskit ar bann Zwif ek bann dimounn ki ador Bondie, ek osi dan bazar avek bann ki ti pas par la. De-trwa filozof osi ti koz ar li. Ena filozof Epikiryen, e lezot bann Stoik. Ena dir, “Ki sa ninport-la pe zaze koumsa?” Lezot ki ti pe tann li anons Zezi ek larezireksion ti fer remark, “Koumadir li pe koz lor bann bondie nou pa kone.” Zot trap li, zot amenn li devan konsey Aeropaz ek zot dir, “To kapav dir nou ki sa nouvo ansegnman ki to pe fer la? Parski nou pe tann bann zafer drol. Nou anvi kone ki savedir.” Tou bann dimounn Atenn ek bann etranze ki ti viv laba ti pas tou zot letan pa fer nanye, me nek partaz ek ekout bann nouvo lide. Lerla Pol met li dibout omilie Aeropaz e li dir, “Bann abitan Atenn! Mo trouve ki dan boukou fason zot bien relizie. Parski kan mo ti pe mars-marse inpe partou e mo get zot bann moniman sakre, mo ti trouv enn lotel kot zot ti ekrir: ‘Sa pou enn bondie inkoni.’ Aster-la, seki zot pe priye san ki zot kone, mo pou fer zot konn li. Bondie ki finn kree lemond ek tou seki lor la, limem Segner lesiel ek later e li pa res dan bann Tanp ki finn fer par bann zom. Li pa bizin ki bann zom servi li, komsi li bizin kiksoz, parski limem ki donn lavi, ki fer respire, ki donn tou kiksoz. Depi enn sel anset li finn fer tou nasion pou ki zot abit later an-antie. Depi bien avan mem li finn fixe letan ek landrwa kot sak nasion pou viv. Bondie finn fer sa pou ki zot rod li, e mem si zot pe tatone pou rode, kikfwa zot ti pou kapav trouv li, parski an realite li pa lwin ar sakenn parmi nou. Kouma kikenn ti dir: ‘Par li nou viv, nou ena mouvman, nou ena lexistans.’ Li kouma sertin zot poet finn dir: ‘Nou osi, nou so zanfan.’ Alors si nou zanfan Bondie, nou bizin pa panse ki Bondie enn idol an-or, an-arzan ou an-ros, enn prodiksion lar ek imazinasion zom. Bondie finn met deryer nou sa letan iniorans la; aster-la li dimann tou dimounn partou repanti, parski li finn fixe enn zour kot li pou ziz lemond avek zistis par enn zom ki li finn swazir; e pou sa, li finn donn lasirans tou dimounn par aksion ki li finn fer, li finn relev li parmi bann mor.” Aster kan zot finn tann rezireksion bann mor, ena ti riye; me lezot ti dir, “Nou pou ekout twa enn lot fwa lor sa size-la.” Pol sorti dan renion-la, li ale. Me inpe ti zwenn li ek zot finn krwar; parmi zot ti ena Deni, manb konsey Aeropaz, ek enn fam nome Damaris ek lezot ankor. Apre sa Pol kit Atenn e li al Korint. Laba li ti zwenn enn Zwif ki ti apel Akila, ki finn ne dan enn landrwa ki apel Pon. Li ti fek vinn Itali avek so madam Prisil, parski lanperer Klod ti donn lord tou bann Zwif pou kit Rom. Pol ti al get zot, e parski li ti fer mem metie ki zot, li ti res kot zot pou travay ansam. Zot ti bann fabrikan latant. Sak saba Pol ti pran laparol dan sinagog, li ti rod konvink bann Zwif ek bann Grek. Kan Silas ek Timote ti vinn depi Masedwann, Pol ti devwe tou so letan zis pou pres laparol ek dir bann Zwif ki Zezi limem Lemesi. Bann Zwif ti opoz Pol ek zot ti insilte li, lerla Pol sakouy so linz e li dir, “Si zot al dan perdision, zotmem antor! Mo pa responsab. Aster-la mo pou al kot bann payin.” Lerla Pol kit sinagog e li al kot Tityis Zistis enn dimounn ki ti ador Bondie, ki so lakaz ti akote sinagog. Krispis ki ti sef sinagog ek tou so fami ti krwar dan Lesegner. Boukou bann abitan Korint osi ki ti tann Pol prese, ti krwar ek zot ti batize. Enn swar dan enn vizion Lesegner dir Pol, “Pa bizin gagn per, me kontign koze, napa res trankil; parski mo ar twa e personn pa pou atak twa pou bles twa; ena boukou mo bann dimounn dan sa site-la.” Pol ti pas enn an sis-mwa dan Korint pou ansegn zot Parol Bondie. Me kan Galyon ti gouverner Akai bann Zwif ti marye-pike kont Pol ek zot ti amenn li devan lakour. Zot dir koumsa, “Sa zom-la pe fer bann dimounn ador Bondie dan enn manier ki kont lalwa.” Zis kouma Pol ti pou koze, Galyon dir bann Zwif, “Si sa ti enn ofans oubien enn krim orib mo ti pou ena enn rezon pou pran letan ekout zot, bann Zwif; me parski sa zafer-la konsern bann parol ek bann nom, ek zot prop lalwa, debrouy zot; mo refiz ziz sa bann zafer-la.” Li ranvway zot depi lakour. Zot tou trap Sostenn, sef sinagog, zot bat li devan lakour. Me Galyon pa ti pran zot kont. Pol ti kontign res Korint e apre li ti pran bato pou al Lasiri, akonpagne par Prisil ek Akila. Avan so depar Pol ti fer raz so latet dan enn lavil ki apel Sankre, parski li ti finn fer enn promes. Letan zot ariv Efez, Pol kit Akila ek Prisil, li al dan sinagog kot li koumans diskit ar bann Zwif. Kan zot ti dir li res pli lontan, li ti refize, me kan ti vinn moman pou dir orevwar, li dir zot, “Mo pou retourne si li dan volonte Bondie.” Lerla li pran bato li al Efez. Letan li ti ariv Sezare, li ti monte pou al Zerizalem pou salie bann manb Legliz, avan ki li al Antios. Pol ti pas inpe letan Antios, lerla li ti al vizit diferan landrwa dan rezion Galasi ek Frizi, pou konsolid lafwa bann krwayan. Enn Zwif ki ti apel Apolos, e ki sorti Aleksandri, ti vinn Efez. Li ti enn gran orater, e li ti ena enn gran konesans Lekritir. Li ti finn gagn instriksion konsernan Sime Lesegner, e li ti ena boukou lantouzias. Li ti ansegne ek anons laparol lor Zezi avek boukou presizion. Me selman li ti konn zis batem Zan. Li ti koumans koz avek boukou lasirans dan sinagog. Letan Prisil ek Akila ti tann li, zot finn invit li kot zot, lerla zot finn ansegn li sime Bondie dan enn fason pli korek. Letan Apolos ti le al Akai, bann frer ti ankouraz li e zot ti ekrir bann disip laba pou akeyir li bien. Kan li ariv laba, li ti enn gran sekour pou bann ki ti finn krwar par lagras Bondie. Li ti prezant bann argiman solid kont bann Zwif dan deba piblik, parski li ti prouve par Lekritir ki Zezi, limem Lekris. Letan Apolos ti Korint, Pol ti travers bann provins dan montagn pou al Efez. Laba li ti zwenn de-trwa disip. Li dimann zot, “Eski zot ti resevwar Lespri Sin kan zot ti vinn krwayan?” Zot reponn, “Non, nou pa finn mem tande ki ena enn Lespri Sin.” Lerla Pol dir, “Abe ki batem zot finn resevwar?” Zot reponn, “Batem Zan.” Pol dir, “Batem Zan enn batem repantans. Zan ti dir bann dimounn krwar dan Sa-Enn ki pe vinn apre li la, setadir, Zezi.” Apre ki zot tann sa bann koze-la, zot resevwar batem dan nom Lesegner Zezi. Letan Pol inpoz lame lor zot, Lespri Sin desann lor zot e zot koumans koz an lang e profetize. Ti ena anviron douz zom. Apre sa, Pol al dan sinagog. Pandan trwa mwa Pol diskit ar bann-la e li ti rod konvink zot lor Rwayom Bondie. Me de-trwa latet-dir pa ti le krwar e zot koz dimal lor Sime Lesegner devan lafoul. Pol kit zot, li amenn bann disip enn kote e li kontign ansegne toulezour dan lasal lekol Tiranos. Sa ti ale koumsa pandan de-z-an kot tou bann abitan Lazi, ki li Zwif ki li Grek, ti tann parol Lesegner. Par lame Pol, Bondie ti fer bann mirak extraordiner, ki mem bann malad ti geri e move lespri ti kit zot kan zot ti gagn bann mouswar ek linz ki Pol ti finn touse. Lerla de-trwa Zwif ti pe al dan plizir landrwa e zot ti pe sey tir move lespri lor bann dimounn. Zot ti servi nom Zezi lor bann posede, zot dir, “Lor nom Zezi ki Pol proklame, mo dir zot sorti ale.” Set garson enn sef pret Zwif ki ti apel Skeva ti pe fer sa. Enn zour move lespri ti reponn zot, “Zezi mo kone, e Pol osi mo kone; me zot ki zot ete?” Dimounn ki ti posede la tom lor zot e li donn zot enn koreksion ziska zot sengne, zot ti bizin sove kit lakaz, touni. Letan bann Zwif ek bann Grek ki ti res Efez tann sa, enn laper trap zot; lerla nom Lesegner Zezi ti glorifie. Boukou ki ti deza krwayan ti vinn konfese piblikman seki zot ti pratike avan. Enn kantite bann pratikan lamazi-nwar ti amenn tou zot liv e ti bril zot devan tou dimounn. Letan kalkil valer sa bann liv-la, li fer antou sinkant mil pies larzan. Koumsa mem parol Lesegner ti fann partou e ti pe grandi avek lafors. Apre tou sa bann evennman-la, Lespri Sin gid Pol pou pas par Masedwann ek Akai pou al Zerizalem. Li dir, “Kan mo sorti laba, mo bizin al Rom.” Pandan ki Pol ti res ankor inpe letan Lazi, li ti avoy Timote ek Erast, de parmi bann ki ti travay ar li, pou al Masedwann. Sa lepok-la ti ena enn gran dezord lor size Sime Lesegner. Enn bizoutie ki apel Demetri ti fabrik bann Tanp Artemis; sa ti raport boukou larzan bann artizan. Li ti rasanble bann artizan, avek lezot ki fer mem metie e li dir, “Bann kamarad, zot kone ki nou ti pe gagn boukou lamone ar sa biznes-la. Zot pe trouve ek zot pe tande kouma sa boug ki apel Pol la finn konvink ek detourn boukou dimounn, pa selman dan Efez me dan tou Lazi. Li dir ki stati fabrike ar lame, pa Bondie sa. Pou ena enn danze ki pa selman pou fer ditor nou lindistri, me osi Tanp gran dees Artemis pou perdi tou so repitasion; e dees-la limem ki adore partou dan Lazi ek dan lemond antie, pou perdi so grander.” Letan bann-la tann sa zot ankoler e zot kriye, “Artemis bann Efezien li vremem gran!” Site-la net ti ranpli ar konfizion. Bann dimounn ti trenn Gais ek Aristark, de Masedonien ki ti kamarad Pol dan so vwayaz, e zot galoupe al dan teat. Pol ti anvi prezant li devan lafoul, me so bann disip ti anpes li. De-trwa sef provins Lazi ki ti so kamarad ti avoy li enn mesaz pou konsey li pa rant dan teat. Ti ena gran konfizion dan lasanble. Sakenn ti pe kriy enn zafer. E laplipar pa ti kone mem kifer zot ti rasanble. Bann Zwif pous Alexand devan; de-trwa dan lafoul donn li konsey. Li signal dimounn pou res trankil, pou ki li defann limem devan zot. Letan zot remarke ki li enn Zwif zot tou kriye pandan de-z-er tan avek enn sel lavwa, “Artemis bann Efezien li vremem gran!” Sekreter lavil fer lepep res trankil, li dir, “Abitan Efez, tou dimounn kone ki site Efez limem gardien Tanp Artemis e ki so stati finn tom depi lesiel. Sa, pa kapav diskite sa. Alor, zot bizin gard zot kalm e pa fer nanye san bien reflesi. Zot finn amenn sa bann dimounn-la isi, ki pourtan pa ni voler Tanp, ni blasfemater ki finn koz kont nou dees. Alors, si Demetri ar so artizan ena akizasion kont enn parmi bann-la, lakour ouver e ena bann ziz; laba zot kapav met sarz ki zot anvi. Si ena ankor lot kiksoz, tou bizin regle dan lakour. Kouma sa pe deroule la, ena risk vinn akiz nou ki nou finn fer enn dezord akoz tou seki finn pase zordi. Nou pena okenn rezon ki zistifie sa atroupman-la.” Apre sa parol-la li ranvway lafoul. Apre ki tou bann dezord inn fini, Pol fer apel bann disip, li ankouraz zot, li dir zot orevwar, e li al Masedwann. Pandan so vwayaz dan sa rezion-la li ankouraz bann fidel, ziska ki li ariv Lagres. Li ti res laba trwa mwa. Li ti pe prepar li pou al Siri, me ler li tann dir ki bann Zwif pe mont enn konplo kont li, li desid pou retourn Masedwann. Sopater, garson Pyris ki sorti Bere, Aristark ek Segoundis ki sorti Tesalonik, Gais ki sorti Derb, Timote, Tisik ek Trofim ki sorti provins Lazi, zot tou ti akonpagn Pol. Sa group-la ti finn al avan pou zot atann nou Troas. Apre fet dipin san levin, nou ti pran bato depi Filip. Nou ti pran sink zour pou al zwenn zot Troas. Nou finn res set zour laba. Premie zour lasemenn nou ti rasanble pou pran lakominion. Pol ti pe koz ar bann dimounn Troas. Me parski li ti pou ale landime, li finn kontign ansegne ziska minwi. Lasam kot nou ti reini lao ti bien eklere. Ti ena enn garson, Etikis ki ti pe asiz lor rebor lafnet. Li koumans gagn somey letan ki Pol ti pe kontign koze. Letan somey bien trap li, li sap depi trwaziem letaz li tom anba. Ler zot ramas li, li ti fini mor. Pol desann e li vers lor garson-la, li ser li dan so lebra. Pol dir, “Pa trakase, li ankor vivan.” Apre li remont lao, li kas dipin, li partaz ar bann krwayan e zot tou manze. Li koze ziska gramatin, apre sa li ale. Bann dimounn ti finn bien soulaze ki garson-la ti vivan, zot pran li zot ale. Nou ti pran bato pou al Asos kot nou ti pou pran Pol ar nou, parski li ti finn deside pou al laba apie. Kan li zwenn nou Asos, nou pran li ar nou e nou al Mitilenn. Landime nou kit laba, nou navige pou al vizavi Kios. So landime nou traverse pou al Samos, ek enn zour apre nou ariv Mile. Pol ti desid pou pa arete Efez pou ki li pa perdi letan dan Lazi; li ti pe anvi ariv Zerizalem zour Lapantkot si posib. Depi Mile Pol avoy enn mesaz pou dimann bann ansien Legliz Efez vinn zwenn li. Kan zot arive, li dir, “Zot kone kouma touletan mo finn viv parmi zot, depi premie zour ki mo finn vinn Lazi. Mo finn servi Lesegner avek boukou imilite; boukou larm mo finn verse, ki kantite leprev mo finn pase akoz konplo bann Zwif. Mo finn proklam laparol; mo finn ansegne an piblik, lakaz apre lakaz; mo pa finn kasiet nanye ki ti pou benefik pou zot. Mo finn rann temwaniaz ar bann Zwif ek bann Grek ki zot bizin repanti devan Bondie e gard lafwa dan Lesegner Zezi. Aster-la Lespri Sin pe pous mwa pou al Zerizalem. Pa kone ki pou ariv mwa pli devan. Sel kiksoz ki mo kone, seki dan sak lavil ena prizon ek persekision ki pe atann mwa. Pou mwa mo lavi pena okenn valer; linportans, seki mo akonplir devwar ki mo finn resevwar ar Lesegner Zezi. Li finn konfie mwa pou rann temwaniaz Bonn Nouvel ki montre lagras Bondie. Aster-la mo kone ki personn parmi zot avek ki mo finn proklam Rwayom Bondie pa pou retrouv mo figir. Ala mo dir zot, mo pa responsab si kikenn parmi zot egare. Parski mo pa finn negliz nanye; okontrer mo finn anons zot plan Bondie an-antie. Vey lor zotmem e lor tou zot troupo kot Lespri Sin finn met zot gardien. Pran swin Legliz ki Bondie finn gagne pou limem par disan so prop Garson. Mo sir kan mo finn ale, bann loulou feros pou rant parmi zot, e zot troupo pa pou sape. Parmi zotmem ena ki pou leve, pou detourn laverite pou ki zot kapav ris bann disip pou swiv zot. Alors, pran kont! Rapel ki pandan trwa-z-an mo pa finn aret averti zot lanwit-lizour, mo finn plore pou zot tou. Aster-la mo remet zot dan lame Bondie. So parol montre so lagras ki kapav donn zot lafors. Sa lagras-la donn zot enn leritaz parmi bann ki li finn sanktifie. Mo pa finn ena okenn anvi pou: ni larzan, ni lor, ni linz personn. Zot kone ki mo finn travay ar mo prop lame pou gagn tou seki mo ti bizin, e osi pou mo bann kamarad. Dan tou seki mo finn fer, mo finn montre zot kouma avek travay dir, nou kapav pran swin bann feb. Rapel parol ki Lesegner Zezi ti dir, ‘Ena plis benediksion kan done, ki kan resevwar.’ ” Kan li ti fini koze, li ti azenou ansam ar bann-la e li ti priye. Zot tou ti pe plore, zot may Pol, zot anbras li. Seki ti plis fer zot sagrin, se letan li dir zot ki zame zot pou retrouv li ankor. Apre sa zot al kit li lor bato. Letan nou kit zot, nou pran direksion pou al Kos; landime nou al Rod, e depi laba nou al Patara. Letan nou gagn bato ki pe al Fenisi, nou mont abor e nou ale. Nou apersevwar Sip, nou pas agos ar li nou al Lasiri, e nou aret Tir parski bato ti bizin debark so marsandiz laba. Nou ti al rod bann disip e nou ti res set zour kot zot. Par lafors Lespri Sin zot dir Pol pa al Zerizalem. Letan nou sezour ti termine, nou ti repran larout. Zot tou ti akonpagn nou, ansam ek zot fam ek zot zanfan ziska andeor lavil. Laba nou ti azenou lor disab e nou ti priye. Apre nou ti dir zot orevwar. Lerla nou ti mont abor e bann-la ti retourn kot zot. Nou ti kontign nou vwayaz depi Tir ziska ki nou ariv Tolemais. Laba nou ti salie bann frer e nou ti res enn zour avek zot. Landime nou ti kit laba e nou ti ariv Sezare. Nou ti res kot Filip, enn evanzelis, enn parmi bann set ki ti swazire depi Zerizalem. Li ti ena kat tifi ki pa ti marye; zot ti ena don profesi. Letan nou finn res de-trwa zour laba, enn profet ki ti apel Agabis ti vini depi Zide. Li vinn ver nou, li pran sintir Pol li atas so prop lame ek so lipie, li dir, “Ala seki Lespri Sin deklare: ‘Ala kouma bann Zwif dan Zerizalem pou atas proprieter sa sintir-la e pou livre li dan lame bann non-Zwif.’ ” Letan nou tann sa parol-la, nou ansam ar bann abitan Sezare, nou sipliy Pol pou li pa al Zerizalem. Me Pol reponn, “Kifer zot plore? Zot fer mo leker fermal. Mo finn pare pa zis pou al dan prizon, me osi pou mor dan Zerizalem pou Lesegner Zezi.” Nou pa ti reisi konvink li, nou ti res trankil, e nou dir, “Les Bondie fer so volonte.” Apre sa nou ti prepar nou e nou ti koumans al Zerizalem. De-trwa disip depi Sezare ti akonpagn nou, e ti amenn nou kot Mnason ki sorti Sip, enn bann premie disip, kot limem nou ti pou reste. Ler nou ti ariv Zerizalem bann frer ti akeyir nou avek lazwa. Landime Pol ti vinn ar nou pou al vizit Zak kot tou bann ansien osi ti reini. Pol salie zot e li rakont zot an detay tou seki Bondie finn fer par so minister parmi bann non-Zwif. Ler zot ti tann sa, zot ti glorifie Bondie. Apre zot dir Pol, “Frer, get komie milie krwayan ena parmi bann Zwif e zot tou bien atase ar Lalwa. Ala seki bann-la rakonte lor twa: to pe ansegn bann Zwif ki viv parmi bann non-Zwif ki zot bizin abandonn lansegnman Moiz e to finn dir zot pa sirkonsir zot zanfan e pa swiv bann koutim Zwif. Alors, ki bizin fer? Sirman zot pou tande ki to finn vinn isi. Nou ena kat zom isi ki finn fer enn promes Bondie. Al ar zot, pirifie tomem ansam ar zot, pey pou zot raz zot latet. Lerla tou dimounn pou kone ki tou seki zot finn tande lor twa pa vre; me ki tomem to pe kontign viv dapre lalwa. Nou finn avoy enn let bann non-Zwif ki finn vinn krwayan pou dir ki zot bizin refiz seki finn ofer bann idol, refiz manz disan, e zanimo trangle, e prezerv zot kont pratik imoral.” Landime Pol pran bann zom-la, li pirifie limem ansam ar zot. Li al dan Tanp pou anons kan bann zour pirifikasion pou fini, e kan pou prezant ofrand pou sakenn. Letan set zour pre pou fini, bann Zwif ki sorti Lazi remark Pol dan Tanp. Zot mont latet lafoul e zot aret li. Zot kriye, “Izraelit, osekour, ala sa zom ki pe al partou e pe mont bann dimounn kont lepep Izrael, kont Lalwa Moiz e kont Tanp. Pa fini, lor la li finn amenn bann ki pa Zwif dan Tanp e li fer sa landrwa-la vinn inpir.” Zot ti finn deza trouv Trofim ki sorti Efez dan lavil avek Pol e zot panse ki Pol finn amenn li dan Tanp. Enn gran dezord ti leve dan lavil, ek dimounn ti sorti partou ti galoupe pou vinn aret Pol. Zot ti trenn li andeor Tanp e zot ferm laport. Zot ti pe rod touy Pol kan nouvel ariv kot komandan larme Romin ki ena dezord dan Zerizalem. Toutswit li pran bann solda ek zot sef ar li e li al zwenn lafoul. Kan bann ki pe fer dezord trouv li ar so bann solda, zot aret bat Pol. Komandan vinn pli pre, li fer aret Pol ek atas li ar de lasenn. Lerla li dimann li kisann-la li ete e ki li finn fer. Enn parti lafoul kriy enn zafer, lot parti kriy enn lot zafer. Komandan pa ti pe gagn konpran, alors li donn lord amenn Pol dan kazern. Kan Pol ariv kot peron, lafoul ti telman violan ki bann solda ti bizin sarye Pol pou protez li. Lafoul ti pe swiv e ti pe kriye, “Touy li! Touy li!” Zis kouma bann solda ti pou fer Pol rant dan kazern, li dimann komandan, “Mo kapav dir ou enn kiksoz?” Komandan reponn, “To konn koz Grek? To pa sa Ezipsien ki pa tro lontan finn provok enn revolt ek finn antrenn ar li kat mil teroris dan dezer-la?” Pol reponn, “Mwa mo enn Zwif ki sorti Tars dan Silisi; mo sitwayen enn site ki bien renome. Mo sipliye twa donn mwa permision koz ar lepep.” Komandan donn li permision. Li debout lao peron, li fer lepep signal ar so lame pou zot res trankil. Letan finn ena enn gran silans, li koz ar zot dan langaz Arameen. “Mo bann frer, ek zot ki mo apel mo bann papa, ekout seki mo ena pou dir pou mo defans aster-la.” Letan zot tann li koz dan langaz Arameen, zot gard enn gran silans. “Mo enn Zwif. Mo finn ne dan lavil Tars dan Silisi, me mo finn grandi isi dan Zerizalem kouma enn etidian Gamaliel. Mo finn gagn enn formasion bien serye lor lalwa nou bann anset. Mo ti enn partizan ki ti ena boukou zel pou Bondie, parey kouma zot zordi. Mo finn persekit bann zom ek bann fam ki ti pe swiv Sime Lesegner e mo finn zet zot dan prizon. Bann gran pret ek lasanble bann ansien kapav rann temwaniaz ki mo pe dir laverite. Zotmem ki ti donn mwa let pou bann frer Zwif ki dan Damas, lavil kot mo ti pe ale pou aret bann krwayan ar lide pou amenn zot Zerizalem pou pini zot. Letan mo ti lor larout pre pou ariv Damas, ti pre pou midi, enn gran lalimier sorti dan lesiel ek finn antour mwa ar so lekleraz. Mo tom anba lor later. Enn lavwa dir mwa, ‘Sol, Sol, kifer to pe persekit mwa?’ Mo dimande, ‘Kisann-la to ete, Segner?’ Lavwa-la reponn mwa, ‘Momem Zezi ki sorti Nazaret. Momem ki to pe persekite.’ Mo bann konpagnon ti trouv lalimier-la, me zot pa ti tann lavwa ki pe koz ar mwa. Lerla mo dimande, ‘Ki mo bizin fer, Segner?’ Lesegner reponn mwa, li dir ‘Leve. Al Damas. Laba to pou gagn detay lor travay ki to bizin fer.’ Akoz sa lalimier-la ti finn fer mwa aveg, mo bann konpagnon ti trap mo lame pou amenn mwa Damas. La ti ena enn nome Ananias, ki ti bien devwe, bien fidel pou gard lalwa, ki ti ena estim tou bann Zwif Damas. Li finn vinn rod mwa, e li dir mwa, ‘Sol, mo frer, regagn lizaz to lizie!’ Sa moman lamem mo retrouv kler. Lerla li azoute, ‘Bondie nou bann anset finn destinn twa pou konn so volonte, pou trouv Serviter ki drwat devan Bondie, e ki to tann so lavwa. An-efe, to pou vinn enn temwin pou li devan tou dimounn, pou anons seki to finn trouve ek seki to finn tande. Kifer to bizin tarde ankor? Ale, lev twa, resevwar batem ek priye so nom pou pirifikasion to bann pese.’ Mo finn retourn Zerizalem. Letan mo pe priye dan Tanp, mo gagn enn vizion. Mo trouv Lesegner e li dir mwa, ‘Degaze, kit Zerizalem, parski zot pa pou aksepte ki to rann temwaniaz lor mwa.’ Mo reponn, ‘Segner, zot konn trebien ki momem ki ti pe al dan bann sinagog pou bat seki krwar dan twa, ek zet zot dan prizon. Letan bann-la ti touy to temwin Etienn, mo ti la, mwa. Mo ti aprouv ki zot touy li, mo ti mem gard so linz.’ Lesegner dir mwa, ‘Ale, mo pou avoy twa lwin, kot bann lezot nasion!’ ” Lafoul ti ekout Pol ziska so dernie parol. Lerla zot kriye for-for, “Fer sa boug-la disparet do! Touy li! Li pa dign viv lor sa later-la!” Zot irle, zot aras zot linz, ek zot zet lapousier dan ler. Komandan Romin donn lord fer Pol rant dan kazern ek bat li kout fwet pou obliz li koze, pou kapav kone kifer lafoul pe kriy kont li koumsa. Me letan zot fini atas li pou kapav fwet li, Pol dir ofisie ki ti la, “Zot ena drwa fwet enn sitwayen Romin san mem ki zot ziz li?” Kouma ofisie-la tann sa, li toutswit al get komandan, li dir li, “Ki to pe fer la? Sa zom-la enn sitwayen Romin!” Komandan retourn get Pol e dimann li, “Dir mwa, vremem to enn sitwayen Romin?” Pol reponn, “Wi.” Alors komandan dir, “Mo finn pey enn kantite larzan pou ki mo vinn enn sitwayen Romin.” Pol dir li, “Mwa mo enn sitwayen par nesans.” Bann ki ti pou interoz Pol les li toutswit. Komandan mem gagn per letan li rann li kont ki Pol enn sitwayen Romin e ki li finn atas li ar lasenn. Komandan ti anvi konn exakteman ki bann Zwif ena kouma akizasion kont Pol. Akoz sa, landime, li fer detas lasenn Pol, e li konvok bann Sef Pret e Gran Konsey antie. Lerla li amenn Pol pou paret devan bann-la. Pol fixe bann manb konsey e li dir zot, “Mo bann frer, mo konsians trankil lor manier mo finn servi Bondie ziska aster-la.” Gran pret Ananias dimann bann ki ti pre ar Pol pou kalot li lor so labous. Lerla Pol dir li, “Bondie ki pou kogn twa, lespes miray ki kamoufle ar laso. To pe ziz mwa par lalwa Moiz, me to mepriz sa lalwa-la kan to donn lord dimounn pou bat mwa.” Bann ki ti pe dibout pre ar Pol dir li, “To ena toupe insilte gran pret Bondie?” Pol reponn, “Bann frer, mo pa ti kone ki li gran pret, parski li vre ki Lekritir dir fode pa insilte sef ki gouvern lepep.” Pol ti kone ki dan konsey enn parti ti Sadiseen ek enn parti ti Farizien. Akoz sa li kriye for, “Mo bann frer, mo enn Farizien mwa, garson enn Farizien. Mo pe pas lakour parski mo ena lesperans dan rezireksion bann mor.” Kouma li fini dir sa, ala ki lager leve ant bann Farizien ek bann Sadiseen, e lasanble ti divize. (Bann Sadiseen dir ki pena ni larezireksion, ni anz, ni lespri; me bann Farizien aksepte tousala.) Diskision ti kontign ogmante mem. De-trwa dokter lalwa ki ti Farizien anmemtan ti leve, zot proteste for-for, “Nou pa trouv okenn repros pou fer sa boug-la. Li posib ki enn lespri ou enn anz finn koz ar li.” Diskision ti pe telman sofe, komandan ti gagn per ki bann-la desir Pol bout-bout. Akoz sa li donn lord so solda pou ras Pol parmi bann-la ek amenn li dan kazern. Aswar Lesegner vinn dibout kot Pol e li dir li, “Pran kouraz! Parey kouma to finn rann temwaniaz lor mwa dan Zerizalem, koumsa mem to pou fer dan Rom.” Landime gramatin bann Zwif ti met enn plan dibout. Zot ti fer serman ki zot napa pou manze ni bwar ziska ki zot reisi touy Pol. Zot ti plis ki karant ki ti fer sa konplo-la. Zot ti al get sef pret ek bann ansien e zot dir, “Nou finn angaz nou par enn serman pou pa manz nanye ziska ki nou finn touy Pol. Alors, ala seki bizin fer: zot, ansam ar konsey, bizin dimann komandan amenn Pol devan zot, swadizan zot ena ankor linformasion pou dimann li. Nou, nou pou pare pou touy li avan ki li ariv isi.” Me neve Pol, garson so ser, ti okouran konplo-la; li al kazern pou dir sa Pol. Lerla Pol apel enn solda, li dir li, “Amenn sa zenes-la kot komandan, li ena enn kiksoz pou dir li.” Solda ti amenn garson-la kot komandan e li dir, “Prizonie Pol, finn dimann mwa amenn sa zenes-la ar ou, li ena kiksoz pou dir ou.” Komandan ti pran zenes-la par so lame, li ti amenn li apar, e li dimann li, “Ki to ena pou dir mwa?” Garson-la dir, “Bann Zwif finn tom dakor pou dimann ou amenn Pol devan konsey dime, swadizan zot bizin re-examinn so ka avek plis latansion. Pa ekout zot. Ena plis ki karant zom ki finn prepar enn piez pou li. Zot inn fer serman pou pa manze ek bwar ziska ki zot finn touy li. Zot finn pare, pe zis atann ou desizion.” Komandan dir zenes-la ale ek rekomann li, “Pa dir personn ki to finn vinn dir mwa sa.” Komandan ti apel de ofisie ek li dir zot, “Pare de-san solda, swasann-dis kavalie, ek de-san zom arme avek lans pou al Sezare nef-er diswar. Prepar seval pou transport Pol an sekirite ziska gouverner Felix.” Ala seki li finn ekrir dan enn let: “Exselans Gouverner Felix, Klod Lizias ki salie twa. Bann Zwif ti aret sa boug ki mo pe avoy twa la. Zot ti pre pou touy li. Me letan mo finn aprann li enn sitwayen Romin, mo finn intervenir ar mo bann solda pou sov li. Mo ti le kone kifer zot pe akiz li, alors mo finn amenn li devan zot konsey. Mo finn trouve ki akizasion-la konsern zot lalwa, me pena okenn sarz ki merit lamor ou fer prizon. Letan mo finn aprann ki ena enn konplo kont li, mo finn toutswit avoy li ar twa. Mo finn donn lord bann ki pe akiz li pou prezant zot devan twa ar sarz ki zot ena kont li.” Bann solda ti swiv lord ki zot ti gagne. Aswar zot ti pran Pol zot ti amenn li ziska Antipatris. Landime bann solda ki ti pe marse retourn kazern e zot les bann ki ti lor seval kontigne vwayaz avek Pol. Kouma zot ti ariv Sezare, bann solda-kavalie donn gouverner let e zot amenn Pol devan li. Gouverner lir let-la e li dimann Pol ki provins li sorti. Letan li aprann ki Pol sorti Silisi, li dir li, “Mo pou ekout to ka kan bann ki pe akiz twa arive.” Li donn lord gard Pol dan sato ki Erod ti konstrir. Sink zour apre, gran pret Ananias ar de-trwa ansien desann Sezare ansam ek zot avoka Tertoulous pou met enn sarz lor Pol devan gouverner. Letan Pol pas lakour, Tertoulous koumans so akizasion koumsa: “Onorab Felix, gras-a ou nou pe konn enn long peryod lape, ek par ou bon administrasion nou pe konn bann reform ki fer sa nasion-la dibien. Exselans, touletan, partou, nou akeyir ou reform avek boukou rekonesans. Me mo pale pran plis ou letan, akoz samem mo dimann ou ena labonte ekout nou de-trwa minit selman, ar latansion ki nou kone ou ena. Nou finn dekouver ki sa boug-la bien danzere. Li enn sef parti Nazareen, li provok dezord parmi bann Zwif dan lemond antie. Li finn mem rod profann Tanp, akoz sa nou finn aret li. Si ou poz li kestion, oumem ou pou trouve seki nou pe dir vre.” Pou soutenir sa sarz la, bann Zwif osi ti deklare ki tou seki finn dir li vre. Gouverner fer enn sign pou ki Pol pran laparol. Lerla Pol dir, “Mo kone ki depi boukou banane ou finn enn ziz pou sa pep-la, alors mo bien kontan pou defann mwa devan ou. Ou kapav verifie, ki pena plis ki douz zour ki mo finn al Zerizalem pou ador Bondie. Bann-la pa finn trouv mwa pe diskit ar personn dan Tanp, ou bien pe eksit lafoul ni dan sinagog, ni dan lavil. E zot pa kapav prouv tou bann sarz zot inn met lor mwa. Me mo rekonet ki dapre Vre Sime (ki bann-la pe dir fos) mo pe ador Bondie nou bann anset. Mo krwar dan lalwa ek seki bann profet finn ekrir. Parey kouma bann-la, mwa osi mo ena mem lesperans dan Bondie ki pou ena rezireksion bann move kouma bann bon. Akoz samem mo finn touletan fer tou mo posib pou ki mo konsians kler devan Bondie ek devan bann zom. Apre plizir lane, mo finn retourn Zerizalem; mo finn amenn larzan pou ed mo pep e pou prezant bann ofrand Bondie. Lerla mem ki de-trwa Zwif sorti Lazi finn trouv mwa dan Tanp apre ki mo finn fer seremoni pirifikasion. Pa ti ena okenn lafoul ni okenn tapaz. Sa bann Zwif-la ti bizin la devan ou pou akiz mwa si zot ti ena prev kont mwa. Sinon, ki bann dimounn ki la dir ki ofans zot finn trouve dan mwa letan mo ti al devan konsey. Kikfwa zot pe anvi koz lor sa deklarasion ki mo ti fer la: ‘Akoz mo krwar dan rezireksion bann mor ki mo devan ou zordi.’ ” Me Felix ki ti bien informe lor Vre Sime, ti ranvway zafer-la e li dir, “Kan komandan Lisias vini mo va pran enn desizion lor to ka.” Felix ti donn lord gard prizon pou vey Pol, me ki li donn Pol enn sertenn liberte e les so bann kamarad donn li tou seki li bizin. Apre de-trwa zour Felix ti amenn so madam Drisil, ki ti enn Zwiv. Li fer amenn Pol e li ekout li koz lor lafwa dan Zezi Kris. Kan Pol abord size lor ki manier bizin viv enn lavi zis, ki manier enn dimounn bizin kontrol limem, ek lor size zizman dernie, Felix ti malalez, alor li dir Pol, “To kapav ale aster. Kan mo gagn letan, mo pou apel twa ankor.” Anmemtan, li ti pe atann ki Pol pou donn li kas. Akoz samem li ti fer li vini souvan pou koz ar li. De-z-an finn pase koumsa, apre sa Porkyis Festis finn regne dan plas Felix. Parski Felix ti anvi gagn faver bann Zwif, li ti les Pol dan kaso. Festis ti vinn dan so provins, e apre trwa zour li ti al Zerizalem depi Sezare. Bann gran Pret ek bann Zwif inportan ti prezant Festis bann sarz kont Pol e zot ti sipliy li rann enn servis avoy Pol Zerizalem. An-verite zot ti finn fer enn konplo pou touy li lor larout. Festis reponn, “Pol ferme dan prizon dan Sezare, e momem mo pe al laba la. Alors, bann zom ki ena lotorite parmi zot kapav vinn ar mwa, ek si ena kiksoz move kont Pol les zot akiz li laba.” Festis pa finn pas plis ki wit ou dis zour laba. Li ti desann Sezare, ek so landime li ti al siez dan tribinal ek li ti fer amenn Pol devan li. Kan Pol ti vini, bann Zwif ki ti desann depi Zerizalem ti antour li e ti met enn ta sarz lor li, ki zot pa ti kapav prouve. Pou defann limem Pol dir, “Mo pa finn komet okenn ofans, ni kont lalwa bann Zwif, ni kont Tanp, ni kont Sezar.” Me Festis, ki ti anvi fer plezir bann Zwif, dimann Pol, “Eski to anvi al Zerizalem pou ki mo ziz twa laba lor sa bann akizasion-la?” Me Pol dir, “Mo pe pas an zizman devan tribinal Sezar; e kouma zot kone, mo pa finn fer nanye demal kont bann Zwif. Me si mo enn kriminel ki merit lamor, mo aksepte lamor. Si zot pa kapav prouv nanye kont mwa, personn pa kapav livre mwa ar bann Zwif. Mo fer apel Sezar.” Alors, apre ki Festis finn koz ar so bann konseye, li reponn, “To finn fer apel ar Sezar, to pou al devan Sezar.” Apre de-trwa zour lerwa Agripa ek Berenis ariv Sezare pou rann vizit Festis. Kouma zot ti pe res laba de-trwa zour, Festis ti koz ar lerwa lor Pol. Li dir lerwa Agripa, “Ena enn dimounn isi ki Felix ti met dan prizon. Letan mo ti al Zerizalem, bann gran pret ek bann ansien ti met enn sarz kont li e ti dimann mwa kondann li. Mo finn dir zot ki li pa dan koutim bann Romin pou kondann kikenn avan ki li pas devan bann ki akiz li e ki li gagn lokazion defann limem. Letan zot finn vinn isi ar mwa, mo pa finn tarde ar sa ka-la. Landime, mo finn siez dan tribinal e mo finn dimann amenn li devan mwa. Kan bann akizater dibout, zot pa finn akiz li ar okenn krim ki mo ti pe atann. Okontrer, zot ti pe diskit zot larelizion, ek lor kikenn ki apel Zezi ki zot ti dir finn mor, me ki Pol pretann li vivan. Mo pa ti kone kouma bizin ziz sa zafer-la; alors mo finn dimann Pol si li anvi al Zerizalem pou fer ziz sa ka-la. Me Pol finn fer lapel. Li finn dimande ki Lanperer ziz li. Mo finn gard li dan prizon ziska ki mo avoy li devan Sezar.” Agripa dir Festis, “Mo anvi tann sa dimounn-la momem.” Festis reponn, “Dime to ava tann li.” Landime, Agripa ek Berenis ti vinn dan lasal lodians avek gran-gran seremoni, ar bann sef larme ek bann dimounn bien inportan dan site Sezare. Festis donn lord amenn Pol. Festis dir, “Lerwa Agripa, e tou bann ki prezan isi, zot trouv sa boug-la? Kominote Zwif antie, dan Zerizalem ek isi, finn vinn get mwa avek enn sarz, ek zot kriye ki li pa merit kontign viv. Me mo pa finn trouv nanye ar li ki merit lamor. Parski li finn fer lapel Lanperer, mo finn desid pou avoy li Rom. Me mo bizin dir ki mo pena nanye pou ekrir lor so ka. Akoz sa mo prezant li devan zot, sirtou twa Agripa, pou ki apre ki zot finn examinn li, mo gagn kiksoz pou ekrir. Mo pa trouv sa korek ki avoy enn prizonie Rom san ki ena enn sarz bien kler lor li.” Agripa dir Pol, “To gagn drwa koze pou defann twa.” Lerla Pol lev so lame ek koumans defann limem, li dir, “Mo konsider mwa ere, lerwa Agripa, ki mo kapav defann mwa devan ou zordi kont tou akizasion bann Zwif, sirtou ki ou konn bann koutim Zwif ek lor ki size zot pa dakor. Alor mo sipliy ou, ekout mwa avek pasians. Tou bann Zwif konn mo manier viv depi koumansman mo lavi, dan mo prop pei, ek osi dan Zerizalem. Zot konn mwa depi lontan ek zot kapav temwagne, si zot oule, ki mo finn viv kouma enn Farizien dapre parti pli sever nou larelizion. Ek zordi mo pe pas devan tribinal parski mo ena lesperans dan promes ki Bondie finn fer nou bann anset. Samem promes ki nou douz tribi pe anvi trouv akonpli, pandan ki zot loue Bondie gramatin tanto. Lerwa Agripa, akoz sa lesperans-la ki bann Zwif pe akiz mwa. Kifer zot trouv li inkrwayab ki Bondie relev bann mor? Momem mo ti sir ki mo bizin fer tou seki posib pou konbat nom Zezi Nazaret. Samem ki mo finn fer dan Zerizalem. Avek lotorite bann sef pret mo finn fer met boukou krwayan dan prizon, ek kan finn kondann zot amor mo finn vot kont zot. Souvan mo finn al enn sinagog apre lot pou fer zot sibir pinision ek fer zot renie zot lafwa. Ek dan mo laraz kont zot, mo finn persekit zot ziska dan bann lavil etranze. Koumsa mem ki mo finn al Damas ar lotorite ek lakor bann sef pret. Gran Lerwa, midi parla, mo ti lor mo larout letan mo trouv enn lalimier sorti depi lesiel, briye plis ki soley otour nou, mwa ek bann ki ti pe akonpagn mwa. Nou tou finn tom parter; mo tann enn lavwa dir mwa dan langaz Arameen, ‘Sol, Sol, ki fer to persekit mwa? To pou fer tomem dimal si to rezinbe kouma enn zanimo ki flank koutpie kont baton so met.’ Lerla mo dimande, ‘Kisann-la ou ete, Segner?’ Lesegner reponn, ‘Momem Zezi ki to pe persekite. Aster-la lev twa, diboute. Mo finn aparet ar twa pou swazir twa kouma enn serviter ek enn temwin pou rakont seki to finn trouve zordi, ek seki mo pou montre twa ankor. Mo pou sov twa depi to prop nasion ek bann non-Zwif. Mo pe avoy twa kot zot pou ouver zot lizie, tir zot dan teneb pou met zot dan lalimier; pou sorti dan pouvwar Satan pou al ver Bondie, pou ki zot gagn pardon zot bann pese ek gagn zot plas parmi lepep Bondie ki sanktifie par lafwa dan mwa.’ Akoz samem, mazeste lerwa Agripa, mo napa finn dezobeir sa vizion ki finn vinn depi lesiel la. Mo finn anons an premie dan Damas, apre Zerizalem, answit partou dan Zide ek osi ar bann non-Zwif ki zot bizin repanti, retourn ar Bondie ek fer bann aksion ki montre ki zot finn vremem repanti. Ala kifer bann Zwif finn trap mwa dan Tanp e zot finn sey touy mwa. Ziska zordi mo finn gagn proteksion Bondie; alors mo rann temwaniaz devan bann ti dimounn kouma bann gran dimounn. Mo pe dir mem zafer ki bann profet ek Moiz ti dir pou arive: ki Lekris bizin soufer, ek parski limem premie pou resisite apre lamor, li pou proklam lalimier pou bann Zwif ek bann non-Zwif osi.” Alors ki Pol ti ankor pe defann li dan sa manier-la, Festis kriye bien for, “Pol, to fou. Tou seki to finn aprann pe rann twa fou.” Me Pol reponn, “Mo pa fou, exselans Festis, me mo pe koz langaz laverite ek parol ki ena enn bon sans. Lerwa konn laverite e mo kapav koz ar li fran-fran. Parski mo kone ki lerwa napa ignor okenn sa bann zafer-la, parski nanye napa finn fer dan kasiet. Lerwa Agripa, eski ou krwar dan bann profet? Mo kone ou krwar.” Alor lerwa Agripa dir Pol, “To krwar dan enn tigit letan koumsa to kapav fer mwa vinn enn krwayan?” Pol reponn li, “Tigit letan oubien boukou letan, mo priye Bondie ki pa zis ou me tou bann dimounn ki pe ekout mwa zordi kapav vinn kouma mwa, bien sir san ki zot atase ar lasenn.” Lerla lerwa dibout. Gouverner e Berenis e tou seki ti pe asiz ar zot, zot osi zot leve. Letan zot finn retir zot depi tribinal, setaki dir ar lot, “Sa boug-la pa finn fer nanye ki merit lamor oubien prizon.” Agripa dir ar Festis, “Ti kapav larg sa boug-la si li pa ti fer apel Sezar.” Kan desizion ti konfirme pou nou al Itali, bann-la livre Pol ek de-trwa lezot prizonie dan lame Zilious enn ofisie dan reziman Lanperer Ogis. Nou ti anbark lor enn bato ki sorti Adramit ki ti pe al ver bann por lor lakot provins Lazi. Aristark, enn Masedonien ki ti sorti Tesalonik, ti avek nou. Landime nou ti zet lank Sidon. Zilious ti tret Pol bien e li ti mem donn li permision pou al vizit so bann kamarad e pou resevwar bann kiksoz ki li ti bizin. Ler nou sorti laba pou nou ale, nou ti navig olarz lakot les Sip, kote ki pena divan kont nou. Nou ti travers lamer pre ar Silisi ek Panfili e nou ti ariv Mira dan Lisi. Laba ofisie-la ti trouv enn bato ki ti pe sorti Aleksandri pou al Itali, e li ti anbark nou lor la. Nou ti vwayaz dousma-dousma pandan plizir zour. Avek boukou difikilte nou ti ariv devan Snid e parski divan pa ti permet nou avanse, nou ti navig pre ar lakot Kret, pou kasiet divan, e nou ti al lot kote kap Salmone. Ler nou finn fer letour kap Salmone avek boukou difikilte, nou ti ariv enn landrwa ki apel Bon Por kot lavil Laseya. Nou ti perdi boukou letan. Vwayaz-la ti pe vinn bien danzere e lepok karem ti finn fini pase. Alor Pol ti averti zot, “Bann kamarad, mo trouve ki nou vwayaz pe vinn danzere e nou pou perdi bato, so marsandiz ek nou lavi osi.” Me santiryon-la ti ekout plis kapitenn ek proprieter bato, plito ki Pol. E akoz lepor pa ti bon pou liver, mazorite ti prefer kontigne avek lide pou pas liver Fenix, enn por ki donn lor Nor-es ek Sid-Es dan Kret. Kan enn divan leze sorti dan Lesid koumans soufle, zot ti panse ki zot finn gagn seki bizin pou reisi zot plan. Zot lev lank e zot pas pre ar lakot Kret. Enn ti mama apre, enn divan ki ti ena lafors siklonn ki sorti Nor-es, desann depi montagn. Nou ti perdi kontrol bato e pa ti kapav lit kont divan; nou ti les vag antrenn nou. Lerla nou pas kot enn ti lil ki apel Koda, lor so kote ki pa gagn divan; avek boukou difikilte nou finn reisi kontrol kano sovtaz pou li pa andomaze. Kan bann zom ti fini ris li abor zot ti pas lakord otour bato-la pou tini li. Parski zot ti per zot al tase lor ban disab dan leparaz lakot Libi, zot bes lavwal e zot les li swiv kouran. Telman bato-la ti pe sakouye dan divan, so landime zot finn koumans zet bann marsandiz dan lamer; lor trwaziem zour zot finn zet enn parti bann lekipman bato ar zot prop lame. Apre plizir zour ki nou pa ti trouv ni soley ni zetwal e koudvan ti pe kontigne ar violans, nou finn perdi lespwar ki nou pou sove. Zot ti res san manze pandan lontan. Alor Pol dibout devan zot e li dir, “Kamarad, zot ti bizin ekout mwa, nou pa ti bizin finn kit Kret; koumsa ti pou finn evit tou sa domaz ek lapert-la. Aster-la mo konsey zot pran kouraz parski okenn parmi zot pa pou perdi lavi; zis bato ki pou perdi. Yer swar, Bondie ki mo adore e ki mo servi, finn avoy mwa enn anz ki finn dir mwa, ‘Pa per, Pol; to bizin pas devan Sezar, ek Bondie dan so bonte finn donn twa ek tou bann ki vwayaz ar twa zot lavi sov.’ Alors gard kouraz, kamarad, parski mo ena lafwa ki seki Bondie finn dir mwa, samem pou arive. Me nou pou oblize fer nofraz lor enn lil.” Lor katorziem lanwit nou ti pe touzour derive lor lamer. Ver minwi, bann marin ti ena linpresion ki nou ti pe apros later. Zot ti zet enn lakord ki ti ena enn pwa ar li pou konn fonder lamer e li ti san-vin pie. Enn timama apre zot fer parey e zot trouve ki li katrovin-dis pie fonder. Zot ti pe per ki nou pou al kraz lor ros. Zot ti zet kat lank deryer bato, ek zot priye ki lizour leve. Bann marin ti pe rod kit bato, sove. Zot desann kano sovtaz pou fer sanblan al repar lank devan bato. Pol dir ofisie ek bann solda, “Si sa bann marin-la pa res abor, pena lespwar sov tou dimounn.” Alors bann solda ti koup lakord ki retenir kano sovtaz e les li ale. Zis avan soley leve Pol ankouraz bann-la manze. Li dir zot, “Pandan katorz zour zot ti telman trakase ki zot pa finn manz nanye. Mo sipliye zot, manz kiksoz. Zot bizin manze pou viv. Pena enn parmi zot ki pou perdi mem enn brin seve lor so latet.” Ler li fini dir sa, li pran dipin, li rann gras Bondie devan tou dimounn. Lerla li kas dipin, li koumans manze. Bann-la gagn kouraz ek zot osi zot manze. Antou nou ti de-san swasann-sez dimounn lor bato. Letan zot fini bien manze, zot finn zet dible dan lamer pou rann bato pli leze. Letan lizour arive, zot pa ti rekonet later devan zot, me zot ti trouv enn labe avek enn laplaz e zot ti desid pou fer bato-la al kraz lor disab. Zot koup bann lank e les zot tom dan lamer, anmemtan zot larg lakord ki ti atas bann ram ki ti pe servi pou gouvernay. Zot ris enn lavwal devan bato-la pou ki labriz diriz zot lor laplaz. Me bato-la ti al tas lor enn ban disab ant de kouran. Lavan bato ti tas dan disab. So parti deryer ti pe kraze par violans bann vag. Bann solda ti desid pou touy tou prizonie pou ki personn pa naze pou sove. Me ofisie-la ti anvi sov Pol. Li anpes bann solda exekit zot plan. Li donn lord pou seki konn naze sot dan lamer ek sey gagn later. Lezot ti bizin servi plans ouswa debri bato pou swiv. Koumsa zot tou ti ariv sin e sof. Letan nou ti an sekirite, nou aprann ki sa lil-la apel Malt. Bann abitan laba ti tret nou avek boukou bonte. Akoz lapli ti pe tonbe ek ti fre-fre, zot ti alim enn dife ek zot ti akeyir nou otour li. Pol ramas enn ta brans pou li zet lor dife, me akoz saler dife enn serpan sorti, li mord Pol ek li anpandan ar so lame. Kan bann abitan lil trouv serpan-la pe anpandan ar so lame, zot dir, “Sa zom-la bizin enn kriminel. Li finn sap dan lamer, me bondie ki apel Zistis pa les li viv.” Me Pol sakouy serpan-la dan dife, e li pa santi okenn douler. Zot ti pe atann ki lame Pol anfle, ki li tonbe, li mor. Zot atann mem, me nanye pa ariv li. Lerla zot sanz zot lide, zot dir li enn bondie. Dan sa landrwa-la ti ena enn proprieter ki ti pou enn gran dimounn apel Pibliyis. Li ti resevwar nou avek boukou lamitie pandan trwa zour. Papa Pibliyis ti malad lor lili, li ti gagn lafiev ek disantri. Pol al get li, poz lame lor li, priye pou li, e geri li. Apre ki sa ti arive, lezot dimounn malad lor lil ti vinn get li pou gagn zot gerizon. Zot ti tret nou avek boukou loner ek respe, e letan nou anbarke, zot finn fourni nou tou seki neseser pou nou vwayaz. Trwa mwa plitar ki nou ti pran lamer lor enn bato ki ti pas liver lor lil. Ti enn bato ki sorti Aleksandri, ki ti port nom bondie zimo Kastor ek Polix. Nou ti fer eskal Sirakiz pou trwa zour. Depi la nou ti al Regio. Landime divan Lesid ti pe soufle e enn zour apre nou ti ariv Pouzol. Laba nou finn trouv de-trwa frer ki ti invit nou pou pas enn semenn kot zot. Ala kouma nou finn ariv Rom. Bann frer ki ti la, ti kone ki nou pe vini e zot ti vwayaz depi Bazar Apyis e Trwa Tavern pou vinn zwenn nou. Kan Pol ti trouv sa bann dimounn-la, li remersie Bondie e li pran kouraz. Kan nou ti ariv Rom, Pol ti gagn drwa res tousel avek enn solda pou vey li. Trwa zour apre, Pol invit kot li bann sef Zwif ki ti dan Rom. Kan tou ti la, Pol dir zot, “Frer, mo pa finn fer nanye kont nou pep ni kont okenn bann koutim nou bann anset. Zot finn aret mwa dan Zerizalem e zot finn livre mwa dan lame bann Romin. Kan zot ti interoz mwa, zot ti oule donn mwa mo liberte, parski pa ti ena rezon pou kondann mwa amor. Me bann Zwif pa ti dakor, akoz sa mo ti oblize fer apel Sezar; pourtan mo pa ti ena lintansion akiz mo pep. Pou sa rezon-la ki mo finn dimann pou trouv zot e koz ar zot. Mo pe fer prizon pou mem lesperans ki Izrael ena.” Zot reponn li, “Nou pa finn gagn okenn let sorti Zide lor twa, e pena okenn to bann frer ki finn vinn isi pou fer rapor ou dir dimal lor twa. Me nou anvi tann twa, ki to panse. Nou kone ki partou dimounn pa dakor ar sa group ki to pe swiv la.” Zot ti tom dakor lor enn dat randevou avek Pol, e zot ti vinn kot li ar boukou lot dimounn ankor. Pol ti anons zot Rwayom Bondie. Li ti servi lalwa Moiz ek liv profet pou li konvink zot lor Zezi. Li ti fer sa depi gramatin ziska tanto. Ena ki ti dakor ar so bann parol, ena ti refiz krwar. E zot finn ale san ki zot dakor ant zotmem. Pol dir zot, “Lespri Sin ti ena rezon letan li ti koz ar zot anset par labous profet Izai, e li ti dir: ‘Al kot sa pep-la, e dir zot: Zot ena zorey pou tande, me zot pa konpran; zot ena lizie pou gete me zot pa trouve. Parski leker sa pep-la inn vinn dir, zot refize tande, zot refize trouve; tansion zot lizie ouver, tansion zot zorey tande, tansion zot leker konpran, e zot tourn ver mwa pou ki mo geri zot.’ Les mo dir zot ki Bondie finn avoy mesaz delivrans pou bann payin osi, e ki bann-la, zot pou ekoute, zot.” Apre ki zot finn tann seki Pol ti ena pou dir, zot tou ti ale e zot ti pe diskit ant zotmem. Pol ti lwe enn lakaz laba pandan de-z-an, e li ti resevwar tou dimounn ki ti vinn rann li vizit. Li ti proklam Rwayom Bondie, ek li ti ansegn lor Lesegner Zezi Kris ar boukou lasirans ek liberte. Mwa Pol, mo enn serviter Zezi Kris, enn zapot ki Bondie finn swazire ek apele pou pres so Bonn Nouvel, ki li ti promet depi bien lontan dan Lekritir sin par so bann profet, Bonn Nouvel ki konsern so Garson, ki desandan David antan ki enn imin, me dapre Lespri Sin, li deklare Garson Bondie avek enn gran pwisans kan ti resisit li depi bann mor. Par li Bondie finn fer mwa lagras pou vinn enn zapot pou al apel dimounn parmi tou bann nasion pou krwar e pou obeir, e sa glorifie so nom. E zot osi zot parmi seki Bondie ti apele pou Zezi Kris. Mo pe ekrir pou tou bann ki dan Rom ki Bondie kontan e ki li finn apele pou swiv Zezi Kris. Ki Bondie nou Papa ek Lesegner Zezi Kris donn zot lagras ek lape. Avan tou mo remersie mo Bondie, par Zezi Kris, pou zot tou, parski lemond antie pe koz zot lafwa. Bondie mo temwin. Mo servi li ar tou mo leker par Bonn Nouvel ki mo anonse ki konsern Zezi Kris. Li kone ki mo pans zot touletan, sak fwa ki mo priye. Mo demann Bondie, si sa dan so volonte, ki mo gagn lokazion vinn get zot. Mo anvi trouv zot pou ki mo kapav partaz ar zot benediksion ki Lespri Bondie done, pou fortifie zot. Seki mo oule dir, mo oule ki nou toule-de ankouraz nou kamarad par lafwa ki nou ena. Bann frer, bann ser, mo anvi ki zot konpran ki souvan mo finn fer plan pou vinn kot zot, me sak fwa kiksoz anpes mwa. Mo ti anvi ki mo travay port so fri kot zot parey kouma kot bann lezot nasion. Li mo devwar pou al kot tou dimounn, bann sivilize ek bann ki pa sivilize, bann edike, bann ki pa edike. Akoz sa mo ena sa dezir pou amenn Bonn Nouvel kot zot, bann abitan Rom. Mo ena konfians total dan Bonn Nouvel. Limem lafors ki Bondie servi pou sov tou seki krwar, bann Zwif dabor, me osi bann non-Zwif. Bonn Nouvel revel kouma Bondie amenn drwatir. Zis lafwa tousel ki fer sa, depi koumansman ziska lafin, parey kouma Lekritir deklare, “Dimounn ki drwat pou viv par lafwa.” Depi lesiel lao, Bondie montre so koler kont tou pese e tou linzistis ki dimounn komet, e par sa bann move aksion-la zot touf laverite. Pourtan Bondie limem finn montre klerman seki kapav kone lor li. Depi kreasion lemond bann kalite invizib Bondie, so pwisans eternel e so divinite, bien vizib letan nou get travay Bondie. Bann imin pena okenn exkiz. Malgre ki zot konn Bondie, zot pa glorifie li, e zot pa remersie li; okontrer zot panse finn vinn bet, e zot lespri ki vid, finn plonz dan lobskirite. Zot pretann zot saz, me ofet zot finn vinn fou letan zot sanz laglwar Bondie imortel pou bann zimaz ki resanble bann imin mortel, bann zwazo, zanimo ek reptil. Akoz sa Bondie finn abandonn zot dan zot aksion malprop, dapre dezir zot leker; samem ki zot fer seki pa bizin avek lekor zot kamarad. Zot finn ranplas laverite lor Bondie par enn mansonz, e zot finn ador ek servi seki Bondie finn kree olie zot servi Kreater limem, ki beni pou leternite! Amen. Akoz sa, Bondie finn abandonn zot dan zot dezir degradan. Mem zot bann fam finn sanz relasion natirel pou relasion ki kont natir. Dan mem manier, bann zom osi finn abandonn relasion natirel ar zot fam pou ena dezir pou lezot zom. Zom finn ena relasion indesan ar zom, e zot gagn pinision ki zot merite pou zot erer. Anplis, parski zot pa finn gard vre konesans Bondie dan zot lespri, li finn les zot lespri degringole, akoz sa zot fer seki pa bizin. Zot ranpli ar tou kalite linzistis, mesanste; zot gourman kiksoz lezot, zot ranpli ar lemal, zalouzi, lespri bagarer, fer krim, fer palab, pans dimal lor lezot, zot lennmi Bondie, zot insolan, arogan, vantar, zot invant tou kalite lide pou fer lemal, dezobeir bann paran; zot pena konsians, pena lafwa, pena leker, pena pitie. Zot konn zizman Bondie: seki viv koumsa merit lamor. Pourtan zot pa selman kontigne fer sa bann zafer-la, zot osi ankouraz lezot pou pratik sa. Zot ki fer zizman lor enn lot, zot pena okenn exkiz, parski letan zot ziz enn lot alor ki zot, zot fer mem aksion, zot pe kondann zotmem. Nou kone ki Bondie ena rezon letan li ziz dapre laverite bann ki fer sa bann kalite aksion-la. To panse ki Bondie pa pou pini twa kan to azir parey kouma bann dimounn ki to pe akize? Oubien to mepriz bonte, pasians ek tolerans Bondie, san ki to realize ki so bonte pe rod fer twa repanti? Me to pa oule konpran, to pa dispoze sanze. Akoz sa to atir enn pli gran pinision lor twa pou sa zour kot Bondie pou revel so zizman ki zis la. Sakenn pou gagn seki li merite ar Bondie. Li pou donn lavi eternel bann ki persevere pou fer dibien, bann ki pe rod laglwar, loner ek lavi imortel. Me pou ena koler ek zizman pou seki pans zis limem, ki rezet laverite e swiv lemal. Detres ek langwas pou tom lor tou seki fer lemal, ki li Zwif oubien non-Zwif. Parkont, tou seki fer dibien, Bondie pou akord zot laglwar, loner ek lape, ki li Zwif ki li non-Zwif, parski devan Bondie tou dimounn parey. Bann ki pena lalwa Moiz ek zot fer pese, zot pou sibir pinision, me san aplikasion lalwa; bann ki konn lalwa Moiz ek fer pese, zot pou zize dapre lalwa. Pa seki ekout lalwa ki drwat devan Bondie, me seki met lalwa an pratik ki Bondie deklar drwat. Kan bann non-Zwif ki pa konn lalwa Bondie met li an pratik par zotmem, li koumadir zot enn lalwa pou zotmem, mem si zot pena lalwa. Sa montre ki seki lalwa demande finn ekrir dan zot leker. Zot konsians osi prouve ki sa vre; parfwa zot lespri akiz zot, parfwa li defann zot. Samem ki pou arive zour ki Bondie pou ziz leker bann dimounn par Zezi Kris, kouma mo Bonn Nouvel anonse. Me si twa, ki dir to enn Zwif, ki met tou to konfians dan lalwa Moiz, ki fier lor to relasion ar Bondie, twa, to konn so volonte, e to finn aprann par lalwa kouma swazir seki bien; twa ki ena lasirans ki to enn gid pou bann aveg, tomem lalimier pou seki dan teneb; to enn edikater bann inioran, to enn profeser bann zanfan, parski to sir ki to posed dan lalwa tou seki neseser pou konesans ek laverite; abe, twa ki montre lezot, to pa montre tomem? Twa ki dir pa komet adilter, kifer twa to fer li? Twa ki denons bann idol, to pa fer piyaz dan zot tanp? Twa ki koz gran-gran koze lor lalwa, to pa dezonor Bondie letan to fer lekontrer ki lalwa dir? Lekritir dir, “Akoz zot, lezot nasion blasfem nom Bondie.” Sirkonsizion ena valer kan to obzerv lalwa, me si to dezobeir lalwa, li parey koumadir to pa finn fer sirkonsizion. Si enn zom pa finn fer sirkonsizion, me li obeir komannman lalwa, eski Bondie pa pou konsider sa koumadir li finn fer sirkonsizion? Seki pa finn fer sirkonsizion dan so lekor, me li obeir lalwa, li pou kondann twa ki dezobeir lalwa, mem si to ena lalwa dan form Lekritir ek to finn fer sirkonsizion. Pa seki paret andeor ki fer enn dimounn enn Zwif, ni seki vizib dan lekor ki fer sirkonsizion; non, me vre Zwif li interyer, dan leker. Sirkonsizion osi li dan leker, par Lespri Bondie, pa par seki finn ekrir. Sa, se vre Zwif, so louanz pa sorti kot bann imin, me kot Bondie. Eski kan ou Zwif ou ena kit lavantaz? Ki valer sirkonsizion ena? Dan boukou manier lavantaz-la li gran. Premie dabor Bondie finn konfie zot so mesaz. Me ki arive si ena parmi zot pa finn fidel? Ki, akoz sa Bondie pa pou fidel li? Non, zame! Bondie pou res touletan laverite, mem si bann imin manter. Dan Lekritir finn ekrir, “Bizin rekonet lazistis dan to Parol, e ki to triyonfe kan ziz twa.” Me si bann move kiksoz ki nou fer montre lazistis Bondie, ki nou pou dir? Bondie pa zis parski li pini nou? La mo koz kouma enn imin. Pena sime! Si Bondie pa zis, kouma li pou ziz lemond? Me si par mo mansonz, laverite Bondie sorti plis dan kler ek sa ogmant so laglwar, kifer bizin kondann mwa kouma enn peser? Kifer nou pa dir, “Anou fer lemal, koumsa kiksoz bien pou arive”? Ena dimounn insilte mwa, zot dir ki swadizan mo dir sa kalite parol-la. Zot merit kondanasion. Alors ki nou konklizion? Eski nou, bann Zwif, nou dan meyer kondision ki lezot devan Bondie? Pa ditou! Mo finn deza montre ki tou dimounn, Zwif oubien Grek, nou tou anba dominasion pese. Lekritir dir, “Personn pa drwat, mem pa enn sel; personn pa konpran, personn pa rod Bondie; Tou finn kit bon sime; ansam tou finn perdi sime; personn pa fer seki bien, mem pa enn sel. Zot lagorz kouma enn tonbo ouver; zot lalang servi pou tronp dimounn; menas danzere dan kwin zot lalev kouma venin serpan; zot labous ranpli ar malediksion amer; zot fini pare pou al pran lavi lezot; partou kot zot ale, zot kit maler ek destriksion; zot pa finn konn sime lape. Zot pena lakrint Bondie.” Nou kone ki seki lalwa dir, li pe adres li ar bann seki anba lalwa, pou ki tou labous ferme ek ki lemond antie rekonet ki li anba zizman Bondie. Koumsa personn pa trouv li zistifie devan Bondie parski li finn obzerv lalwa. Lalwa nek zis fer dimounn pran konsians ki pese ete. Me aster-la Bondie finn montre nou kouma li rann nou drwat devan li, san ki bizin lalwa. Liv Lalwa ek liv profet rann temwaniaz lor la. Bondie rann nou zis devan li par lafwa ki nou ena dan Zezi Kris. Li tret tou dimounn egal, parski tou finn fer pese e tou mank seki bizin pou rant dan laglwar Bondie. Me Bondie dan so bonte li zistifie dimounn gratwitman par delivrans ki Zezi Kris finn akonpli. Bondie finn ofer li kouma sakrifis pou ki par lamor Lekris dimounn gagn pardon zot pese par lafwa ki zot ena dan li. Li ti fer sa pou montre so lazistis, parski dan so pasians li ti les bann pese ki ti komet avan res san pinision; li ti fer sa pou montre so lazistis dan letan prezan, pou montre ki limem li zis e ki li zistifie bann ki ena lafwa dan Zezi. Eski ena rezon pou nou fer vantar? Non, pena okenn rezon! Kifer? Parski nou obeir lalwa? Non, me akoz lafwa. Nou mintenir ki enn dimounn zistifie par lafwa san ki li bizin fer travay lalwa. Eski Bondie, li Bondie bann Zwif tousel? Eski li pa Bondie bann non-Zwif? Wi, li osi pou bann non-Zwif parski Bondie enn sel, e li pou zistifie bann ki pratik sirkonsizion akoz zot lafwa, e li pou zistifie bann ki pa pratik sirkonsizion akoz zot lafwa. Eski savedir par sa lafwa-la nou kensel lalwa? Pa ditou! Okontrer nou donn li so vre valer. Alor, ki nou pou dir lor Abraam nou anset? Dan tousala, ki li finn gagne? Parski si Abraam ti zistifie par zefor ki li ti fer, dan sa ka-la, li ena rezon fer gran-nwar. Me pa devan Bondie. Ki Lekritir dir? Abraam ti krwar Bondie, e Bondie finn konsider li kouma enn dimounn drwat akoz sa lafwa-la. Si enn dimounn travay, so lapey pa kapav enn kado me enn kiksoz ki dwa li. Me si enn dimounn pa travay, me ena konfians ki Bondie rann bann peser zis akoz zot lafwa, sa kalite lafwa-la Bondie kont li kouma enn lavi drwat. Samem ki David dir letan li koz lor boner ki dimounn ena akoz Bondie konsider li kouma zis, san kont lor so bann aksion. Li dir, “Zot bienere, sa bann dimounn pou ki Bondie finn pardonn zot fot, zot pese finn efase! Li bienere, sa dimounn pou ki Lesegner efas so pese dan kont!” Sa boner-la, eski li existe selman pou bann ki finn fer sirkonsizion, oubien osi pou bann ki pa finn fer sirkonsizion? Samem ki nou fek dir, “Bondie konsider Abraam kouma enn dimounn drwat letan li pran kont so lafwa.” Kan sa ti pase? Apre sirkonsizion Abraam, oubien avan? Pa apre, me avan. Plitar ki Abraam ti gagn sirkonsizion kouma enn sign ki Bondie aksepte li akoz so lafwa, mem si li pa ti ankor fer sirkonsizion. Alor Abraam finn vinn papa tou dimounn ki krwar dan Bondie san ki zot fer sirkonsizion, pou ki met lazistis lor zot kont. Sa fer Abraam vinn papa tou dimounn ki finn fer sirkonsizion, pa akoz sirkonsizion-la, me parski zot ena lafwa dan Bondie, parey kouma Abraam ti fer avan so sirkonsizion. Bondie ti promet Abraam ek so bann desandan ki zot pou erit later antie. Sa promes-la pa ti fer lor baz ki Abraam ti obeir lalwa, me akoz lafwa ki li ti ena dan Bondie. Sa finn rann li zis devan Bondie. Si Abraam ek so bann desandan finn gagn sa promes-la akoz zot obeir lalwa, alor lafwa pena valer ek promes-la pena okenn pwa. An-efe, lalwa provok lakoler Bondie; me si pena lalwa, pena osi dezobeisans lalwa. Pou sa rezon-la, promes-la baze lor lafwa pou ki li enn don Bondie e li valab pou tou bann desandan Abraam; pa zis pou dimounn ki obeir lalwa, me osi pou dimounn ki krwar, parey kouma Abraam ti krwar. Pou nou tou Abraam enn papa spiritiel. Lekritir deklare: “Mo finn fer twa papa enn kantite nasion.” Li nou papa devan Bondie dan ki li finn krwar, sa Bondie ki donn lavi bann dimounn ki finn mor, e ki kree kiksoz depi nanye ditou. Abraam ti krwar e ti ena lesperans, mem letan tou ti paret san lespwar. Li finn kontign ena lafwa e li finn vinn papa enn kantite nasion dapre seki Bondie ti dir, “To bann desandan pou bien nonbre.” Li ti ena anviron sant-an; me so lafwa pa ti afebli letan li ti konsider so lekor ki ti kouma enn lekor mor, e so fam Sara pa ti dan pozision pou kapav gagn zanfan. Li pa ti perdi lafwa e li pa ti dout promes Bondie; okontrer so lafwa ti fortifie li, e li ti loue Bondie. Li ti ena lasirans ki Bondie ena pwisans pou akonpli so promes. Akoz lafwa ki Abraam ti ena, “Bondie ti konsider li kouma enn dimounn drwat.” Parol ki dir, “Bondie ti konsider li kouma enn dimounn drwat” pa finn ekrir zis pou li tousel, me pou nou osi. Pou met sa lor nou kont, nou ki krwar dan Bondie ki finn resisit Zezi nou Segner depi lamor. Li ti finn livre dan lame lamor pou nou bann pese, e li finn releve pou rann nou zis devan Bondie. Aster-la ki nou finn zistifie par lafwa, nou ena lape avek Bondie atraver nou Segner Zezi Kris. Akoz nou ena lafwa dan Lekris, li finn fer nou gagn akse ar lagras Bondie, e nou viv dan lexperyans sa lagras-la. Nou met nou fierte dan lesperans ki nou partaz laglwar Bondie. Pa selman sa, nou met nou fierte dan nou soufrans, parski nou kone ki lasoufrans li amenn perseverans, perseverans fer gagn fidelite solid, e fidelite solid donn lesperans. Sa lesperans-la li pa desevwar nou, parski Bondie finn repann so lamour dan nou leker par Lespri Sin ki li finn donn nou. Letan nou ti ankor feb, Lekris ti mor pou bann peser dan letan ki ti finn fixe. Li difisil pou kikenn donn so lavi pou enn lot ki viv drwat. Kikfwa enn par la kapav oze mor pou enn bon dimounn. Me ala ki manier Bondie prouve ki kantite lamour li ena pou nou: letan nou ti ankor peser, Lekris finn mor pou nou. Aster ki nou zistifie par so disan, ena plis rezon ankor pou ki li sap nou devan lakoler Bondie. Nou ti bann lennmi Bondie, me nou finn rekonsilie ar li par lamor so Garson; aster ki nou rekonsilie ar li, ena plis rezon ki nou pou sove par lavi so Garson. Ek ena plis ankor: nou met nou fierte dan Bondie par nou Segner Zezi Kris, par ki, aster, nou finn rekonsilie ar Bondie. Par enn zom pese finn vinn dan lemond, e lamor finn rantre par pese, e lamor finn tous tou dimounn, parski tou finn fer pese. Ti ena pese dan lemond avan ki ti donn Lalwa; me parski pa ti ena Lalwa, pese pa ti konte. Pourtan depi lepok Adam ziska lepok Moiz lamor finn manifeste so pouvwar, mem lor bann dimounn ki pa finn komet pese kouma Adam ti fer; Adam ti enn model Sa-Enn ki ti pou vinn apre li la. Me nou pa kapav konpar sa de la; parski don gratwi Bondie pa parey kouma fot ki Adam finn fer. Enn kantite finn mor akoz fot sa enn dimounn-la; panse aster ki kantite dimounn finn touse par don gratwi ki Bondie finn done par lagras enn sel dimounn, Zezi Kris. Manier ki Bondie donn so don li pa parey kouma rezilta pese ki enn sel zom finn komet. Zizman ki ti swiv sa enn pese-la, ti amenn kondanasion; me don gratwi ki ti swiv boukou pese ti amenn zistifikasion. Lamor finn manifeste so pouvwar par fot enn sel dimounn; mazine aster komie plis bann ki resevwar lagras Bondie dan labondans, ansam ar don lazistis, komie plis zot pou regne dan lavi akoz enn sel dimounn: Zezi Kris. Alor, parey kouma fot enn sel finn amenn kondanasion tou dimounn, dan mem manier aksion zis enn sel dimounn, Zezi Kris, sap tou dimounn depi zizman, rann zot lib pou viv. Par dezobeisans enn sel, boukou dimounn finn tom dan pese, dan mem manier, par lobeisans enn sel, boukou dimounn revinn zis devan Bondie. Ler Lalwa finn vini, bann pese finn ogmante. Me la kot pese ti ogmante, lagras dan so abondans ti ogmant ankor plis. Parey kouma pese ti regne dan lamor, dan mem manier lagras regne par lazistis pou amenn lavi eternel atraver Zezi Kris, nou Segner. Ki nou pou dir alor? Eski nou pou kontign fer pese pou ki lagras Bondie vinn pli abondan? Pena sime! Pou seki konsern pese, nou finn mor, li pena pouvwar lor nou; kouma nou kapav kontign viv ladan? Zot pa kone ki nou tou ki finn batize dan Lekris nou finn batize dan so lamor? Par nou batem nou finn antere avek li e nou finn partaz so lamor, pou ki nou viv enn nouvo lavi parey kouma Lekris finn resisite depi lamor par laglwar so Papa. Si nou finn ini avek li dan enn lamor parey kouma so lamor, nou pou ini avek li dan so rezireksion. Nou kone ki nou vie natir finn krisifie ansam ar li, pou ki sa lekor pese la perdi tou so pouvwar, e ki nou nepli pou esklav pese. Pou dimounn ki finn mor, pese pena okenn pouvwar lor li. Si nou finn mor avek Lekris, nou krwar avek konviksion ki nou pou viv avek li. Parski nou kone ki depi ki li finn resisite, Lekris pa pou mor ankor; lamor nepli ena pouvwar lor li. Akoz li finn mor, pese finn perdi tou pouvwar lor li. Pou samem pese li finn mor enn fwa pou tou; aster-la ki li vivan, li viv so lavi pou Bondie. Dan mem fason konsider zotmem mor par rapor ar zot pese, me vivan pou Bondie dan linion avek Zezi Kris. Alor, pa les pese dominn zot lekor mortel pou fer zot obeir so bann move dezir. Pa livre diferan parti zot lekor pou ki pese fer zot vinn instriman move kiksoz; okontrer ofer zotmem Bondie kouma bann dimounn vivan ki finn sorti depi dan lamor, e ofer zotmem an antie kouma instriman pou enn lavi drwat devan Bondie. An-efe, pese pou nepli dominn zot parski zot nepli anba lalwa, me zot pe viv dan lagras Bondie. Abe ki nou pou dir? Eski nou pou fer pese parski nou nepli anba lalwa, me dan lagras Bondie? Pena sime! Eski zot pa kone kan zot livre zotmem kouma enn esklav pou obeir enn dimounn, zot esklav sa dimounn ki zot pe obeir la? Swa zot esklav pese ki ena pou rezilta lamor ou esklav lobeisans ki ena pou rezilta lavi drwat devan Bondie. Granmersi Bondie! Zot ki ti esklav pese, zordi avek tou zot leker zot obeir laverite ki dan lansegnman ki zot ti resevwar. Bondie finn liber zot depi zot pese e zot finn vinn esklav lazistis. Mo pe explik sa dan langaz sinp parski zot natir feb. Parey kouma zot ti abitie livre zot lekor pou esklavaz inpirte ek lemal ki deplizanpli pe grandi, aster-la ofer zotmem kouma esklav lavi drwat devan Bondie ki pou amenn zot ver enn lavi sin. Kan zot ti ankor esklav pese, zot pa ti pran kont lazistis. Ki profi zot ti gagne dan enn lavi ki ti pe kondir zot ver lamor e ki zordi fer zot gagn onte? Sa bann louvraz-la amenn lamor! Aster-la zot finn lib par rapor ar pese e zot finn vinn esklav Bondie, zot ena sanktifikasion pou fri, ek so rezilta li lavi eternel. Saler pese, li lamor, me don Bondie li lavi eternel dan Zezi Kris nou Segner. Mo bann frer, mo bann ser, mo pe koz ar dimounn ki bien konn lalwa. Eski zot pa kone ki lalwa ena lotorite lor enn dimounn osi lontan ki li vivan? Par exanp, enn fam marye atase ar so mari tanki mari-la vivan; me kouma li mor, so fam pa atase par lalwa maryaz, fam-la lib. Si letan so mari ankor vivan li viv avek enn lot zom, dimounn konsider li kouma enn adilter; me si so mari mor, li lib par rapor ar lalwa, li pa enn adilter si li marye ar enn lot zom. Li parey pou zot mo bann frer, mo bann ser. Par rapor ar lalwa zot finn mor, parski zot fer parti lekor Lekris, pou ki zot apartenir ar enn lot ki finn resisite depi bann mor, koumsa nou kapav raport fri pou Bondie. Letan nou ti kontrole par nou natir imin, bann move dezir provoke par lalwa ti pe azir dan nou lekor e nou ti pe raport fri ki amenn lamor. Aster-la nou lib par rapor ar lalwa. Nou finn mor par rapor ar seki ti gard nou esklav. Koumsa nou servi dan enn nouvo fason dapre Lespri, nou pa servi dan vie fason dapre lalwa ki finn ekrir. Ki nou kapav dir alor? Eski nou pou dir ki lalwa pese? Pena sime! Mo pa ti pou kone ki savedir pese si pa ti ena lalwa. Mo pa ti pou kone ki savedir konvwatiz si lalwa pa ti dir, “Pa dezir kiksoz lezot dimounn.” Me pese finn profit lor sa komannman-la pou prodir tou sort kalite dezir dan mwa. San lalwa, pese pena pouvwar. Momem mo ti vivan letan pa ti ena lalwa, me letan komannman ti vini, pese ti gagn lavi e mwa mo ti mor. Dan mo ka, samem komannman ki ti sipoze donn lavi la, samem ki finn amenn lamor. Pese finn tronp mwa, li finn sezi lokazion e par komannman ki ti vini, li finn touy mwa. Alor, lalwa li sin, e komannman li sin, drwat ek bon. Eski savedir ki seki bon ki finn koz mo lamor? Pena sime! Pese ki lakoz. Koumsa li montre so vre natir pese; li koz mo lamor atraver seki bon, koumsa atraver komannman pese paret pli grav ankor. Nou kone ki lalwa li spiritiel; me mwa mo pa spiritiel, mo kouma enn esklav ki obeir pese. Mo pa konpran ki mo pe fer. Seki mo anvi fer, mo pa kapav fer, me seki mo pale fer, samem ki mo fer. Si mo fer seki mo pa oule fer, mo pe dakor ki lalwa bon. Me ofet, nepli mwa ki fer sa, me pese ki viv dan mwa ki fer li. Mo kone ki nanye debon pa viv dan mwa, setadir, dan mo natir imin. Mo ena dezir pou fer seki bien, me mo pena kapasite pou fer li. Mo pa reisi fer bien ki mo oule fer, me mo pratik lemal ki mo pa oule. Si mo fer seki mo pa oule, alor savedir pa mwa ki pe azir koumsa, me pese ki pe viv dan mwa. Alor mo dekouver enn prinsip ki pe azir: kan mo oule fer kiksoz bien, mo retrouv mwa pe fer lemal. Dan mo leker mo pran plezir dan lalwa Bondie. Me mo trouv enn lot lalwa ki pe fer so louvraz dan mo lekor, li pe fer lager ar lalwa mo lintelizans. Li fer mwa prizonie lalwa pese ki pe travay dan mo lekor. Mo vremem enn dimounn malere! Kisann-la pou sap mwa dan sa lekor ki pe antrenn mwa ver lamor la? Granmersi Bondie, par nou Segner Zezi Kris! Par mo lintelizans mo esklav Bondie, me par mo lekor mo esklav lalwa pese. Aster-la pena okenn kondanasion pou bann dimounn ki dan Zezi Kris. An-efe, lalwa Lespri Sin ki donn lavi par Zezi Kris finn liber twa depi lalwa pese ek lamor. Bondie finn akonpli seki inposib pou lalwa fer parski febles natir imin finn rann li inpwisan. Bondie finn kondann pese ki dan nou natir imin par so prop Garson ki li ti anvwaye dan enn natir imin parey kouma pou nou. Sa finn fer pou ki lazistis ki lalwa dimande li akonpli dan nou ki pa pe viv dapre natir imin, me dapre Lespri. Seki pe viv dapre natir pese ena tandans swiv seki natir-la dimande; me seki viv dapre Lespri swiv seki Lespri dezire. Si natir imin ki pe kontrole, sa li amenn lamor; me si Lespri ki dirize, sa li donn lavi ek lape. Bann dimounn ki preokipe par natir imin zot lennmi Bondie, parski sa natir-la li pa soumet li ar lalwa Bondie, dayer li mem pa kapav fer li. Bann seki obeir zot natir imin pa kapav fer Bondie plezir. Me zot, zot pa kontrole par natir pese, me par Lespri, si Lespri Bondie viv dan zot. Seki pena Lespri Lekris, li pa apartenir ar Lekris. Me si Lekris dan zot, mem si li vre ki zot lekor li mor akoz pese, zot lespri li vivan parski finn fer zot vinn drwat devan Bondie. Si Lespri Bondie, ki ti resisit Zezi, pe viv dan zot, Sa-Enn ki ti resisit Zezi la pou donn lavi zot lekor mortel par so Lespri ki viv dan zot. Alor, mo bann frer, mo bann ser, nou ena enn obligasion, me pa anver natir imin pou ki nou viv dapre li. Si zot viv dapre natir pese, zot pou mor. Me si par Lespri zot touy aksion natir pese, alor la, zot pou viv. Tou seki dirize par Lespri Bondie, zot zanfan Bondie. Sa Lespri ki zot finn gagne la, li pa enn lespri esklavaz, e ki replonz zot dan lafreyer, me zot finn resevwar enn Lespri ki fer zot zanfan Bondie, e ki fer nou kriye, “Abba! Papa!” Lespri Bondie zwenn li ansam ar nou lespri pou deklare ki nou zanfan Bondie. Si nou zanfan Bondie, alor nou eritie Bondie, ek nou eritie ansam ar Lekris. Si nou soufer avek Lekris nou pou osi partaz so laglwar. Mo panse seki nou pe soufer dan sa letan prezan-la, pa kapav konpare ar laglwar ki Bondie pou revel nou. Kreasion antie pe atann avek inpasians ki Bondie revel so bann zanfan. Kreasion anba enn lafors ki pena okenn aboutisman; pa par so prop swa, me par volonte seki finn met li dan sa plas-la. Me ena lesperans ki kreasion limem enn zour pou sap dan pouvwar sa esklavaz ki detrir la, e ki li pou ena par dan liberte ek laglwar bann zanfan Bondie. Nou kone ki ziska aster-la kreasion antie pe soufer douler lanfantman. Me pa zis kreasion ki pe soupire. Nou osi; nou ki ena premie fri Lespri, nou soupire dan fon noumem pandan ki nou pe atann ki Bondie adopte nou, e akord nou delivrans total. Se dan lesperans ki nou finn sove. Me si nou trouv seki nou pe espere, li nepli lesperans ditou. Kisann-la ki esper kiksoz ki li deza ena? Me si nou esper seki nou pankor ena, nou atann avek boukou pasians. Dan mem manier Lespri vinn ed nou dan nou febles, parski nou pa konn priye kouma bizin, me Lespri limem intersed pou nou par bann soupir ki pa kapav exprime par okenn parol. Bondie ki kapav lir dan nou leker, li kone ki ena dan panse Lespri, parski Lespri intersed pou bann krwayan dapre volonte Bondie. Nou kone ki Bondie pou servi tou kiksoz pou bienet bann dimounn ki kontan li, ki li finn apele dapre so plan. Bondie finn met apar bann ki li ti finn swazire davans pou vinn kouma so Garson, pou ki li premie-ne parmi enn kantite frer. Sa bann ki Bondie ti swazire davans la, li ti osi apel zot; bann ki li ti apele, li finn zistifie zot; bann ki li ti zistifie, li finn glorifie zot. Alor ki nou kapav dir lor sa size-la? Si Bondie avek nou, kisann-la kapav kont nou? Li pa finn epargn so prop Garson, me finn livre li pou nou; si li pe donn nou so prop garson, eski li pa pou donn nou tou seki bizin par so lagras? Kisann-la kapav met sarz lor seki Bondie finn swazire davans? Bondie limem deklar zot pa koupab! Kisann-la kapav kondann zot? Personn. Parski Lekris limem ki ti mor, me plis ki sa, li finn resisite e li adrwat Bondie pou intersed pou nou. Kisann-la kapav separ nou ar lamour Lekris? Eski lasoufrans kapav fer sa, oubien langwas, persekision, lafaminn, lamizer, danze, oubien lamor? Parey kouma finn ekrir: “Akoz twa nou dan danze lamor toulezour, tret nou kouma mouton ki pou egorze dan labatwar.” Me dan tousala, nou plis ki vinker par Sa-Enn ki finn kontan nou la. Wi, mo ena lasirans ki ni lamor, ni lavi, ni bann anz, ni lezot pouvwar dan lesiel, ni letan prezan, ni lavenir, ni bann lafors lao, ni bann lafors anba, ni okenn lot kiksoz dan kreasion, pa pou kapav separ nou ar lamour ki Bondie ena pou nou dan Kris Zezi nou Segner. Mo pe koz laverite dan Lekris; mo pa pe koz manti, mo konsians ki gide par Lespri Sin rann temwaniaz dan mo faver: ki mo ena enn gro sagrin dan mo leker ek enn soufrans ki pa fini. Mo ti pou swete ki malediksion lor mwa, e ki mo separe ar Lekris, pou dibien mo bann frer, ki mem ras ki mwa. Zot bann Izraelit. Bondie finn adopte zot; li finn donn zot so laglwar, bann lalians, ek bann promes; zot desandan bann patriars, e Zezi, kouma enn imin, sorti dan zot ras, limem ki lao tou. Nou beni Bondie pou leternite! Amen. Sa pa vedir ki Parol Bondie pa finn reisi; parski, pa tou desandan Izrael ki vre Izraelit. Parey, pa tou desandan Abraam ki zanfan Abraam. Bondie ti dir Abraam, “Zis bann desandan Izaak ki pou konte kouma to bann zanfan.” Savedir pa bann zanfan par nesans natir imin ki zanfan Bondie, me bann zanfan ki finn ne dapre promes Bondie ki pou konsidere kouma vre desandan. Ala seki promes-la ti dir, “Dan letan ki finn fixe mo pou retourne, e Sara pou gagn enn garson.” E pa zis sa, toule-de garson Rebeka ti ena mem papa, setadir, nou anset Izaak. E pourtan avan nesans bann zimo-la, avan mem ki enn ou lot ti fer kiksoz bon ou move, e pou ki Bondie so plan eleksion kontigne existe lor baz enn swa ki li fer pa dapre zefor travay me dapre so lapel, Bondie ti dir Rebeka, “Lene pou servi seki pli tipti.” Parey kouma finn ekrir, “Mo ti kontan Zakob, me mo ti rezet Ezai.” Ki nou kapav dir, alor? Ki Bondie inzis? Zame! Parski li dir Moiz, “Mo pou fer mizerikord pou seki mo ena mizerikord, mo pou montre konpasion pou seki mo ena konpasion.” Alor sa pa depann lor volonte dimounn ni lor so zefor me zis lor mizerikord Bondie. Dan Lekritir, Bondie dir Faraon, “Mo finn etablir twa lerwa pou ki atraver twa mo montre mo pouvwar e ki mo nom proklame partou lor later.” Bondie fer mizerikord pou seki li oule, e seki li oule li les li vinn teti. Kitfwa ena pou dir mwa, “Si sa koumsa, kifer Bondie blam nou alor? Kisann-la kapav reziste so volonte?” Me kisann-la to ete, twa ki imin, pou diskit ar Bondie? Enn po ki finn fer ar later kapav dir potie-la, “Kifer to finn fer mwa koumsa?” Eski enn potie pa kapav servi mem lapat later pou fer enn lobze ki ena gran valer, e servi mem lapat pou fer enn lot ki ordiner? Bondie ti anvi montre so koler e fer konn so pwisans. Li ti siport avek enn gran pasians bann lobze ki merit so koler, seki ti pe al ver destriksion. E li finn fer sa pou montre rises so laglwar pou bann ki finn gagn so mizerikord, bann ki li finn prepare davans pou resevwar so laglwar. Nou lepep ki li finn apele, pa selman parmi Zwif, me osi parmi non-Zwif, parey kouma ti ekrir dan liv Oze: “Lepep ki pa pou mwa mo pou apel li ‘Mo pep.’ Nasion ki mo pa ti kontan mo pou apel li, ‘Mo Bieneme.’ ” “E dan sa mem plas kot Bondie ti dir, ‘To pa mo pep,’ lamem pou apel zot, ‘Zanfan Bondie vivan.’ ” Konsernan Izrael, Izai ti kriye: “Mem si kantite ki Izrael ete li kouma lagrin disab lor laplaz, pourtan zis enn tigit mem parmi zot pou sove, parski Bondie pou realiz so Parol lor later, konpletman e avek rapidite.” E parey kouma Izai ti dir bien avan, “Si Lesegner Toupwisan pa ti les de-trwa desandan pou nou, nou ti pou fini kouma Sodom, nou ti pou parey kouma Gomor.” Ki nou kapav dir alor? Bann non-Zwif ki pa ti pe rod rann zot drwat devan Bondie, finn vinn drwat par lafwa; me Izrael ki ti pe rod rann limem drwat devan Bondie par lalwa, pa finn gagn li. Kifer? Parski zot pa ti depann lor lafwa me lor zot prop zefor ki zot ti pe fer. Zot finn kogn kont ros ki fer tonbe, kouma finn ekrir: “Gete, mo finn plas enn ros dan Sion ki pou fer dimounn kogne, enn ros ki pou fer zot tonbe. Me ninport kisann-la ki krwar dan li pa pou tom dan laont.” Mo bann frer, mo bann ser, dezir mo leker ek lapriyer ki mo fer Bondie pou bann Izraelit, se ki zot sove. Mo kapav dir ki zot ena zel pou Bondie, me li enn zel ki pa baze lor vre konesans. Zot pa ti konn lazistis Bondie, alor zot ti sey etablir zot prop drwatir; alor zot pa ti soumet zot ar lazistis Bondie. Lekris finn amenn lalwa ver so lafin, pou ki tou seki krwar Bondie, zot zistifie. Ala kouma Moiz dekrir drwatir dapre lalwa: “Dimounn ki met lalwa an pratik, li pou viv dapre lalwa.” Me drwatir ki dapre lafwa dir: “Pa dir dan to leker, ‘Kisann-la pou mont lao dan lesiel?’ Setadir, pou al demann Lekris desann kot nou. Oubien, ‘Kisann-la pou desann dan profonder lemond anba kot bann mor?’ Setadir pou demann Lekris remont depi lamor.” Me ki li dir? “Laparol pre ar twa, li dan to labous, li dan to leker, setadir parol lafwa ki nou pe proklame.” Si par to prop labous to konfese ki Zezi limem Lesegner e to krwar ki Bondie finn resisit li depi lamor, to pou sove. An-efe, enn dimounn zistifie parski li krwar dan so leker, e li sove parski li konfes ar so labous. Kouma Lekritir dir, “Seki krwar dan li pa pou konn dezoner.” Pena okenn diferans ant Zwif ek non-Zwif; toule-de ena mem Segner ki beni avek labondans tou seki invok li, parski, “Tou seki invok nom Lesegner pou sove.” Me kouma zot pou invok kikenn dan ki zot pa finn krwar? E kouma zot pou krwar dan kikenn, si zot pa finn tann koz li? E kouma zot pou tande si personn pa finn anons zot sa kikenn-la? E kouma zot pou anons sa mesaz-la, si pa anvway zot? Dapre seki finn ekrir, “Kouma li zoli letan nou trouv bann mesaze ki anons bonn nouvel arive!” Me pa tou Izraelit ki ti aksepte Bonn Nouvel. Izai mem ti dir, “Segner, kisann-la finn krwar nou mesaz?” Dimounn gagn lafwa par mesaz ki zot tande, e mesaz ki anonse li lor Lekris. Me mo dimande: Eski zot pa ti tande? Biensir zot ti tande: “Finn tann zot lavwa partou lor later, e zot parol finn ariv ziska dan bout lemond.” Ankor enn fwa mo dimande: Eski Izrael pa ti konpran? Dabor Moiz dir, “Mo pou fer zot zalou enn pep ki mem pa enn nasion, mo pou provok zot koler kont enn nasion san lintelizans.” Mem Izai oze proklame “Bann ki pa ti pe rod mwa, finn trouv mwa, Mo finn revel mwa ar bann ki pa ti pe dimann mwa nanye.” Me konsernan Izrael li dir, “Toulezour mo finn ouver mo lebra pou akeyir enn pep dezobeisan e teti.” Alor mo dimande: Eski Bondie ti rezet so pep? Pena sime! Momem mo enn Izraelit, enn desandan Abraam, mo sorti dan tribi Benzamin. Bondie pa ti rezet so pep ki li ti kone davans. Zot kone ki Lekritir dir letan Eli ti sipliye Bondie pou Izrael: “Segner, zot finn touy to profet e finn demoli to bann lotel; finn res zis mo tousel, e zot pe rod touy mwa.” Ki repons Bondie ti donn li? “Mo finn rezerv set-mil zom ki pa finn azenou devan Baal.” Dan mem manier, dan letan prezan ena enn ti group dimounn ki reste, ki Bondie finn swazire par so lagras. Si sa par lagras, alor li pa kapav par aksion ki zot ti fer, sinon lagras Bondie pa ti pou vremem lagras. Ki arive alor? Lepep Izrael pa finn gagn seki li ti pe rode; zis sa ti group ki Bondie ti swazire la ki finn trouv lagras. Leres, zot leker finn vinn dir. Lekritir dir: “Bondie ti donn zot enn lespri san-konpran, lizie ki pa trouve, zorey ki pa tande, ziska zordi.” E David dir, “Ki zot fet vinn enn latrap, enn piez, enn lokazion pou zot tonbe, pou zot gagn zot pinision. Ki zot lizie trouv som ziska zot vinn aveg, e ki zot ledo res kabose pou touzour.” Mo repoz enn kestion: Letan bann Zwif ti tonbe, eski enn tonbe ki pa kapav releve sa? Pa ditou! Me akoz zot fot bann non-Zwif finn sove, pou ki sa fer bann Zwif zalou. Si fot bann Zwif ti fer lemond vinn ris ar benediksion, si zot defet ti fer bann non-Zwif konn larises, panse aster-la ki kantite larises kapav deverse, si zot partisip totalman dan plan delivrans. Mo adres mwa ar zot, bann non-Zwif. Antan ki Zapot bann non-Zwif mo rann glwar Bondie pou mo minister dan lespwar ki mo kapav fer mo prop pep zalou, koumsa de-trwa kapav sove. Si, letan ti ekart zot, sa finn fer lemond rekonsilie li ar Bondie, kouma sa pou ete kan reintegre zot? Li koumadir seki mor pe regagn lavi! Si pran enn premie morso dipin ek prezant li Bondie, alor dipin-la antie beni. Si rasinn enn pie, li sin, alor bann brans osi parey. Si finn koup inpe brans lor pie zoliv, e twa, ki enn brans zoliv sovaz, finn gref twa lor sa pie-la ansam ar lezot brans, e to pe profit manze ki rasinn pe avoye, pa mepriz bann brans koupe la. Si to fer fezer, abe mazinn sa: pa twa ki tini rasinn, me rasinn ki pe tini twa. To kapav dir mwa, “Me finn koup sa bann brans-la zisteman pou fer plas pou gref mwa.” Sa li vre. Ti koup zot akoz zot ti mank lafwa, e twa to dan zot plas akoz lafwa ki to ena. Me pa pran enn ler arogan; okontrer montre boukou respe. Si Bondie pa finn epargne brans natirel, to krwar li pou epargne twa? Konsider bonte ek severite Bondie. Li sever ar bann ki ti tonbe, e li bon anver twa, si to kontign res dan so bonte. Sinon, pou koup twa kouma brans. Bann-la osi parey. Si zot pa kontign persiste dan zot infidelite, Bondie pou gref zot la kot zot ti ete avan. Bondie kapav donn zot plis ankor. Finn koup twa apartir enn pie zoliv ki par so natir li sovaz. Finn gref twa, kont natir, lor enn pie zoliv kiltive. Panse aster kouma Bondie pou plis replas bann brans natirel dan zot prop vre pie zoliv! Mo bann frer, mo bann ser, mo anvi ki zot konn enn mister, pou ki zot pa konsider zotmem kouma bann tro gran saz. Mister-la, seki leker enn parti Izrael finn vinn dir pou enn letan selman, ziska ki lakantite bann non-Zwif konn Bondie. Koumsa tou Izrael pou sove, parey kouma Lekritir dir: “Liberater pou vinn depi Sion; li pou anlev tou inpirte dan desandan Zakob. Sa pou mo lalians avek zot letan mo anlev zot pese.” Konsernan Bonn Nouvel, bann Zwif lennmi Bondie, e sa tom bien pou zot, bann non-Zwif; me konsernan seki Bondie finn swazire, bann-la touzour bann dimounn ki Bondie kontan akoz zot anset, parski Bondie pa sanz so panse lor kisann-la li apele e kisann-la li beni. Kanta zot, bann non-Zwif, zot ti dezobeir Bondie dan lepase, me zordi zot finn gagn konpasion Bondie parski bann Zwif finn dezobeir. Dan mem manier, aster-la bann Zwif finn dezobeir pou ki Bondie akord bann non-Zwif so konpasion; e ki bann Zwif osi aster-la gagn konpasion Bondie. Parski Bondie finn anferm tou dimounn dan dezobeisans pou ki li montre so konpasion lor tou dimounn. Konbien larises Bondie li gran! Konbien so sazes ek so konesans profon! Kisann-la kapav explik so desizion? Kisann-la kapav konpran so plan? Kouma Lekritir dir: “Kisann-la konn panse Lesegner? Kisann-la kapav donn li konsey? Kisann-la ki finn donn Lesegner kiksoz an-premie pou ki an-retour li bizin rann zot kiksoz?” Tou sorti kot Bondie, tou existe par li e pou li. Tou laglwar pou Bondie pou touzour! Amen! Alor, mo bann frer, mo bann ser, par konpasion ki Bondie ena pou nou, mo exort zot ofer zotmem kouma bann sakrifis vivan, sin e agreab, konsakre pou servi Bondie; sa vre adorasion ki zot ofer. Pa rant dan moul sa lemond-la, me les Bondie transform zot par enn intelizans nouvo, pou ki zot kapav diserne ki volonte Bondie, setadir seki bon, seki agreab, seki parfe. Par lagras ki finn donn mwa, mo dir ar sakenn parmi zot fode pa ki zot ena enn lopinion tro ot lor zotmem; okontrer ena bann panse modes, sakenn dapre lafwa ki Bondie finn donn li. Nou lekor ena plizir parti e sakenn ena so prop fonksion. Dan mem fason, nou ki plizir, nou form enn sel lekor dan linion avek Lekris e sakenn apartenir ar lezot. Nou ena diferan don dapre lagras ki finn akord nou. Si nou ena don profesi, nou bizin servi li dapre lafwa ki nou ena. Si kikenn ena don servi, ki li servi bien; si kikenn ena don pou ansegne, ki li ansegne; si kikenn ena don pou ankouraz lezot, ki li ankouraze; si li ena don pou partaz avek lezot, ki li fer sa avek zenerozite; seki dirize, bizin fer sa avek zel; seki ed bann malere, fer sa avek lazwa. Lamour bizin sinser. Deteste seki move, atas zot ar seki bon. Ena lafeksion pou zot kamarad kouma bann frer ek ser. Ena enn gran respe pou zot kamarad. Travay dir ek pa fer pares. Servi Lesegner avek enn lespri fervan. Montre lazwa dan lesperans, montre pasians dan detres, priye avek fidelite. Partaz seki zot ena ar bann frer ek ser ki pena. Pratik lospitalite touletan. Dimann benediksion Bondie lor bann dimounn ki persekit zot. Dimann li beni bann-la, pa modi zot. Partaz lazwa avek bann ki dan lazwa, partaz lapenn avek bann ki dan lapenn. Viv dan lakorite ant zotmem. Fode pa ena lorgey, me aksepte servi dan enn manier modes. Pa bizin ena enn tro gran lopinion lor zotmem. Pa rann lemal pou lemal. Fer seki bien devan tou dimounn. Otan ki posib viv dan lape ar tou dimounn. Mo bann kamarad, pa rod tir vanzans zotmem, me les Bondie regle sa dan so zizman, kouma Lekritir dir: “Mwa ki pou tir vanzans, mwa ki pou regle kont.” Lekritir dir: “Si to lennmi gagn fin, donn li manze; si li gagn swaf donn li bwar. Si to azir koumsa, li pou ena laont kouma sarbon so ki finn ramas lor so latet.” Pa les lemal ena laviktwar lor zot, okontrer zot ki bizin ena laviktwar lor lemal par seki bien. Tou dimounn bizin obeir lotorite ki dirize, parski pena okenn lotorite ki existe san permision Bondie. Savedir seki revolte kont lotorite pe fer sa kont Bondie ki finn etablir sa lotorite-la. Seki fer sa pou amenn zizman lor limem. Bann ki fer seki bien pa bizin per dirizan, me seki fer lemal ki bizin per. To pa oule gagn per lotorite? Abe fer seki bien e to pou gagn bann eloz, parski dirizan-la li enn serviter Bondie pou to prop bien. Me si to pratik lemal, la to bizin ena lafreyer; pa pou nanye ki li ena pouvwar pou pini. Li enn serviter Bondie, li montre koler Bondie lor seki pratik lemal. Akoz sa bizin obeir lotorite, pa selman pou evit pinision, me osi par devwar konsians. Akoz sa osi ki zot bizin pey tax, parski bann-la pe donn zotmem pou akonplir sa travay-la kouma bann serviter Bondie. Pey sakenn seki zot dwa: si zot ena tou kalite tax, pey bann tax-la; si zot dwa respe, donn respe; si li loner, donn loner-la. Fode pa ena okenn det anver personn, exsepte dwa zot kamarad lamour. Seki kontan lezot, li akonplir lalwa. An-efe, bann komannman: “Pa komet ladilter; pa pran lavi enn lot; pa kokin; pa dezir seki pou lezot” e tou lezot komannman ankor egal enn sel komannman: “Kontan to prosin kouma to kontan tomem.” Lamour pa fer ditor so prosin. Alor lamour akonplir tou seki lalwa demande. Pran sa bien serye, parski zot kone dan ki letan nou pe viv. Ler finn arive pou ki zot sorti dan somey. Delivrans pli pre aster-la ki letan nou ti krwar premie fwa. Lanwit pe preske fini, lizour pe aprose. Anou aret pratik bann aksion ki fer dan lobskirite e anou pran bann zarm ki servi dan lalimier. Anou konport nou onetman kouma anplin lizour; pa viv dan fiesta, soulezon, imoralite sexiel, vis, lager ek zalouzi. Plito pran lor zot tou seki Lesegner Zezi Kris pe ofer e pa les zot antrene par zot prop natir pou satisfer so dezir. Akeyir seki feb dan lafwa, pa diskit bann lopinion. Lafwa enn dimounn permet li manz tou kiksoz, me enn lot ki so lafwa feb manz zis legim. Fode pa ki dimounn ki manz tou, mepriz dimounn ki pa koumsa; e fode pa ki dimounn ki pa manz tou, kondann dimounn ki manz tou, parski Bondie aksepte li. Kisann-la to ete pou ziz serviter enn lot? Si li tini ferm ou si li tonbe, sa regard so met. Me li pou tini ferm, parski Lesegner ena pouvwar pou soutenir li. Pou enn dimounn, enn zour pli sakre ki enn lot; pou enn lot, toulezour parey. Sakenn parmi nou bizin ena so prop konviksion dan so leker. Seki trouv enn zour spesial, li fer sa pou onor Lesegner. Seki manz laviann, li manze pou onor Lesegner, parski li rann aksiondegras Bondie; e seki pa manze, li onor Lesegner, e li rann aksiondegras Bondie. Personn pa viv pou limem, e personn pa mor pou limem. Si nou viv, nou viv pou Lesegner; si nou mor, nou mor pou Lesegner. Alor ki nou viv ou ki nou mor, nou apartenir ar Lesegner. Lekris finn mor e li finn resisite pou ki li vinn Lesegner bann vivan ek bann ki finn mor. Me twa, kifer to ziz to frer ou to ser? Kifer to mepriz to frer ou to ser? Nou tou enn zour pou bizin prezant nou devan Bondie pou li ziz nou. Lekritir deklare: “Bondie dir, ‘Mwa, Lesegner vivan, tou bann imin pou azenou devan mwa e tou pou konfese ki momem Bondie.’ ” Alor sakenn parmi nou bizin rann kont devan Bondie. Anou aret ziz nou kamarad. Servi zot zizman plito pou pa fer zot frer ou ser tom dan pese. Par lafwa ki mo ena dan Lesegner Zezi, mo kone ek mo garanti ki nanye dan limem pa inpir. Me si kikenn panse ki enn kiksoz inpir, li inpir zis pou sa dimounn-la. Si to bles enn frer ou enn ser akoz enn aliman ki to manze, alor to nepli pe azir par lamour. Pa les sa aliman ki twa to manze la koz lapert pou enn lot dimounn pou ki Lekris finn donn so lavi. Pa les lezot dir move kiksoz lor seki twa to konsider bon. An-efe, rwayom Bondie pa enn zafer manze ou bwar, me li konsern drwatir, lape ek lazwa ki Lespri Sin done. Seki servi Lekris dan sa fason-la li agreab devan Bondie ek li aprouve par dimounn. Anou rod seki amenn lape e permet nou progres ansam dan lafwa. Pa akoz size manze, nou al detrir seki Bondie finn fer. Tou manze bon, me li pa bon ki akoz enn manze, enn kikenn tom dan pese. Li meyer ki evit manz laviann oubien bwar divin ou fer ninport ki kiksoz ki pou fer enn frer ou enn ser tonbe. Seki to krwar lor sa size-la, gard li ant twa ek Bondie. Bienere sa dimounn ki pa santi li koupab dan bann swa ki li fer. Me seki konsians pa kler lor size manze, li kondane letan li manze, parski li pa pe azir par lafwa. Tou seki pa baze lor lafwa, li pese. Nou ki for dan lafwa, nou bizin ed bann ki feb, e pa zis rod seki fer noumem plezir. Sakenn parmi nou bizin fer so prosin plezir pou so prop bien, pou ki li progrese dan lafwa. Lekris pa ti fer limem plezir. Okontrer, dapre seki Lekritir dir, “Insilt ki ti pe avoy lor twa, finn tom lor mwa.” Tou seki ti ekrir dan Lekritir lontan ti ekrir pou nou linstriksion, pou ki nou gagn lesperans par landirans ek rekonfor ki li donn nou. Ki Bondie ki donn landirans ek rekonfor, li osi met lakorite ant zot dapre lexanp Zezi Kris, pou ki zot tou ansam ek enn sel lavwa zot loue Bondie, Papa nou Segner Zezi Kris. Akeyir zot kamarad kouma Lekris finn akeyir zot pou laglwar Bondie. Mo dir zot, Lekris ti vinn serviter bann Zwif pou prouv laverite Bondie, pou konfirm promes ki ti fer zot bann anset, bann patriars. Li ti osi vini pou ki bann non-Zwif glorifie Bondie pou so konpasion, kouma finn ekrir: “Akoz sa mo pou loue twa devan bann nasion e mo pou sant pou to loner.” Li osi deklare: “Loue Lesegner, zot tou, bann non-Zwif, ansam avek pep Bondie!” E ankor: “Sant so louanz, tou bann pep! E ki tou bann pep aklam li!” Izai osi ekrir: “Desandan Zese pou vini li pou leve pou gouvern bann non-Zwif e zot pou met zot lesperans dan li.” Ki Bondie, lasours lesperans, ranpli zot ar lazwa ek lape par lafwa ki zot ena dan li, pou ki zot lesperans deborde par pwisans Lespri Sin. Mo bann frer, mo bann ser, mo ena konviksion ki zot ranpli ar bonte, ki zot ena tou konesans e ki zot kapav ansegn zot kamarad. Mo finn ekrir zot avek boukou lodas dan mo let pou rapel zot sertin size. Mo fer sa akoz lagras ki Bondie donn mwa pou vinn enn serviter Lekris Zezi pou bann non-Zwif. Mo akonplir travay sakre anons Bonn Nouvel Bondie pou ki lepep non-Zwif vinn enn ofrand ki fer Bondie plezir e ki sanktifie par Lespri Sin. Dan linion avek Lekris Zezi mo kapav fier travay ki mo fer pou Bondie. Mo oze koz selman lor seki Lekris finn fer atraver mwa pou amenn bann non-Zwif pou obeir Bondie. Li ti fer sa par parol ek aksion, par pwisans sign ek mirak, par pwisans Lespri Sin. Mo finn repann Bonn Nouvel Zezi Kris plennman depi Zerizalem ziska provins Iliri. Mo lanbision ti touletan pou proklam Bonn Nouvel dan bann landrwa kot dimounn pa finn tann koz Lekris, pou ki mo pa mont enn travay lor fondasion poze par enn lot. Mo azir dapre Lekritir: “Seki pa finn tann koz li, pou trouve, seki pa finn tande, pou konpran.” Samem rezon ki souvan finn anpes mwa vinn kot zot. Aster-la mo travay dan rezion isi finn termine. Depi plizir lane mo pe anvi rann zot vizit. Mo espere li pou posib letan mo lor larout pou al Lespagn, e ki zot kapav asiste mwa dan mo vwayaz apre ki mo finn pas enn bon moman avek zot. Me pou linstan mo an rout pou Zerizalem pou al servi bann krwayan laba, parski Masedwann ek Akai finn fer enn kolekt pou bann pov parmi bann krwayan dan Zerizalem. Zot ti desid sa par zotmem. An realite zot pran sa kouma enn det anver Zerizalem. Si bann non-Zwif finn gagn enn partaz dan benediksion spiritiel bann Zwif, li zis ki bann non-Zwif partaz zot benediksion materyel ar bann Zwif. Enn fwa sa travay-la termine e mo finn remet don ki finn ramase, mo pou al Lespagn, e mo pou pas kot zot. Mo kone ki letan mo vinn kot zot mo pou vinn avek benediksion Lekris an abondans. Mo fer enn lapel, mo bann frer, mo bann ser, par nou Segner Zezi Kris e par lamour ki Lespri Sin done: zwenn zot ansam ar mwa pou priye Bondie pou mwa. Priye pou ki mo sap dan lame bann non-krwayan dan Zide, e ki bann krwayan pou aksepte mo servis dan Zerizalem. Koumsa mo pou ariv kot zot ranpli ar lazwa, si li volonte Bondie, e mo pou gagn enn bon repo ki pou fer mwa dibien. Mo priye ki Bondie ki vre sours lape pou avek zot. Amen. Mo rekomann zot nou ser Febe ki enn diakones dan Legliz Sankre. Akeyir li dan nom Lesegner, kouma bann krwayan bizin fer, e asiste li dan ninport ki kiksoz ki li bizin, parski limem li finn enn gran led pou boukou dimounn, e pou mwa osi. Donn Prisil ek Akila mo salitasion, zot kolabor ar mwa dan travay ki nou ti fer pou Zezi Kris. Zot ti riske zot lavi pou mwa. Pa mo tousel ki dir zot mersi me tou Legliz dan lemond non-Zwif rekonesan anver zot. Mo salie osi Legliz ki rasanble dan zot lakaz. Dir bonzour Epaynet, ki ti premie dan provins Lazi pou krwar dan Lekris. Salie Marie ki finn travay boukou pou nou. Salie Andronikos ek Zinias ki fami ar mwa e ki ti dan prizon ansam ar mwa. Dimounn bien estim zot parmi bann zapot, e zot ti krwayan avan mwa. Salie Anpliatis ki mo bien kontan dan Lesegner. Salie Irbin, nou konpagnon travay pou servi Lekris, e mo bon kamarad Stakis. Salie Apeles, ki finn prouve ki so lafwa dan Lekris ferm. Salie Erodion, enn fami ar mwa. Salie tou krwayan dan lakaz Narsis. Donn mo salitasion Trifenn ek Trifoza, sa bann madam ki pe travay dir pou Lesegner la; e osi Persis, enn madam ki nou bien kontan, ki fer boukou pou Lesegner. Salie Rifis, ki Lesegner finn swazir, e so mama ki osi enn mama pou mwa. Salie Asinkrit, Flegon, Ermas, Patrobas, Ermas, e bann ser ek bann frer ki avek zot laba. Salie Filolog e Zili, Nere ek so ser Olinpas, e tou bann krwayan ki avek zot. Anbras zot kamarad avek enn lamour fraternel. Tou bann Legliz Lekris avoy zot salitasion. Mo sipliye zot, bann frer, bann ser, res lor zot gard kont bann dimounn ki diviz lezot pou fer bann klik, e egar zot par bann lansegnman ki kontrer ar seki zot ti aprann. Evit sa bann-la. Sa kalite dimounn-la pa pe servi Lekris nou Segner, me zot prop vant. Par zot koze dimiel e zot diskour ki flate, zot tronp leker bann ki lespri inosan. Tou dimounn kone komie zot obeisan, e sa donn mwa boukou lazwa; me mo oule ki zot saz konsernan seki bon, ek ki zot pa fer konpromi avek seki move. Biento Bondie lape pou kraz Satan anba zot lipie. Ki lagras Lesegner Zezi res avek zot. Timote, ki travay ansam ar mwa, avoy zot so salitasion; Lisyis osi, ansam ar Zason e Sosipater, mo bann fami. Mwa, Tertyis, ki finn ekrir sa let-la, mo salie zot dan Lesegner. Gais, ki bien resevwar mwa e tou Legliz kot li, avoy zot so salitasion. Erast, trezorye lavil, e nou frer Kartis avoy zot salitasion. Anou loue Bondie! Li ena pouvwar fortifie zot dan lafwa, dapre Bonn Nouvel ki mo anonse letan mo proklam Zezi Kris, e dapre revelasion enn mister ki ti gard kasiet depi koumansman letan, me ki aster-la finn revele par seki bann profet ti ekrir par komannman Bondie, pou ki tou bann pep ki pe gagn konesans krwar e obeir Bondie. Nou rann glwar Bondie. Li tousel ena tou sazes; par Zezi Kris nou glorifie li pou touzour! Amen. Mwa Pol, ki Bondie finn swazire, par so volonte, pou vinn enn Zapot, ansam avek nou frer Sostenn, Mo pe ekrir Legliz Bondie ki dan Korint, zot ki finn apele pou vinn lepep Bondie, ki li finn met apar pou li dan Zezi Kris, ansam ar lezot ki partou pe invok nom Segner Zezi Kris, zot Segner ek nou Segner. Mo swet zot lagras ek lape ki sorti kot nou Papa Bondie ek Lesegner Zezi Kris. Mo touletan dir Bondie mersi pou zot akoz sa lagras ki li finn donn zot dan Zezi Kris. Dan linion avek Lekris, zot finn vinn ris dan tou kiksoz, zot ena don laparol ek konesans. Temwaniaz ki nou finn rande lor Lekris finn bien ankre dan zot. Zot pa mank okenn don ki Lespri Bondie done pandan ki zot pe atann Lesegner Zezi Kris aparet. Li pou gard zot ferm ziska lafin, koumsa pa pou ena okenn repros kont zot sa zour kan Zezi Kris retourne la. Bondie ki finn apel zot pou viv enn kominion ar so Garson Zezi Kris, sa Bondie-la li fidel. Dan nom nou Segner Zezi Kris, mo fer enn lapel pou ki zot tou res dakor ant zot, pou ki pena okenn divizion parmi zot e ki zot bien ini dan enn sel panse ek enn sel konviksion. Bann pros fami Kloe finn inform mwa ki ena rivalite parmi zot. Ala seki mo pe rod dir zot: ena pe dir, “Mo swiv Pol”; enn lot dir, “Mo swiv Apolos”; enn lot ki dir, “Mo swiv Kefas ”; ankor lezot pe dir, “Mo swiv Lekris.” Eski Lekris divize? Eski Pol ki finn mor lor lakrwa pou zot? Eski dan nom Pol ki finn batiz zot? Granmersi Bondie mo pa finn batiz personn, apart Krispis ek Gayis, koumsa personn pa kapav dir ki zot finn resevwar batem dan mo nom. A, li vre ki mo finn osi batiz lafami Stefanas; me mo pa krwar ki mo finn batiz lezot dimounn ankor. Lekris pa finn avoy mwa pou batiz dimounn me pou proklam laparol, san servi enn langaz dapre lasazes imin, pou ki lamor Zezi lor lakrwa pa perdi so pwisans. Parski mesaz lor lamor Lekris lor lakrwa li enn foli pou seki dan perdision, me pou nou ki Bondie pe sove, sa parol-la samem pwisans Bondie. Parski finn ekrir, “Lasazes bann dimounn saz, mo pou detrir, konesans bann koneser, mo pou rezete.” Kot dimounn saz ete? Kot dokter lalwa ete? Bann ki fer gran-gran diskour zordi, kot zot? Eski Bondie pa finn rann bet lasazes sa lemond-la? Bann imin avek tou zot sazes pa finn kapav rekonet Bondie, la kot li finn manifeste so sazes. Akoz sa ki Bondie finn desid pou sov seki krwar par so mesaz swadizan fou. Bann Zwif demann sign, bann Grek rod sazes, me nou, nou proklam Lekris krisifie. Sa li enn mesaz ki kree skandal parmi bann Zwif, ek li enn foli pou bann Grek. Me pou bann dimounn ki Bondie finn apele, Lekris limem ki montre sazes Bondie ek pwisans Bondie. Foli Bondie pli saz ki sazes bann zom, ek febles Bondie pli for ki lafors bann zom. Frer ek ser, pa bliye kisann-la zot ti ete, zot ki finn gagn lapel Bondie. Dapre zizman zom, pena boukou saz parmi zot, ni boukou pwisan, pena parmi zot boukou ki sorti dan gran fami inportan. Me pou fer bann saz onte, Bondie finn swazir kiksoz ki dapre lizie dimounn pena valer. Li finn swazir seki feb dan lemond pou fer bann pwisan onte. Bondie finn swazir seki pli piti, seki meprize, seki mem pa existe, pou fer seki existe vinn nanye ditou, pou ki personn pa fer fezer devan Bondie. Limem lasours zot lavi dan Zezi Kris, ki finn vinn pou nou sazes ki sorti kot Bondie. Lekris rann nou drwat, li met nou apar pou Bondie, limem nou delivrans. Alors, parey kouma finn ekrir, “Si kikenn anvi vremem fer vantar, ki li montre laglwar Bondie.” Frer ek Ser, letan mo ti vinn kot zot pou rann temwaniaz lor Bondie, mo pa ti vinn avek enn langaz konplike ni avek enn sazes siperyer. Parski letan mo ti kot zot, mo ti deside pou pa konn okenn lezot kiksoz apart Zezi Kris, sirtou Zezi Kris ki finn krisifie. Akoz sa mo finn vinn kot zot kouma enn dimounn feb, ki pe tranble. E mo pa ti anons mo mesaz ou fer mo predikasion par bann diskour ki servi lasazes imin, me par enn demonstrasion pwisans Lespri Sin. Koumsa, zot lafwa pa repoz lor sazes imin me lor pwisans Bondie. Mo bizin dir kanmem, ki nou servi lasazes pou koz ar dimounn ki finn bien grandi dan zot lafwa. Li pa enn sazes ki sorti dan lemond, ni sazes bann ki pe regne lor sa lemond-la, zot enn bann pwisans ki pe al tengn. Sazes ki mo proklame, enn sazes ki enn sekre Bondie, enn sazes ki ti kasiet e ki ti deside pou nou avan kreasion lemond pou ki nou partisip dan so laglwar. Okenn pwisans lemond pa ti konpran sa. Si zot ti konpran, zot pa ti pou krisifie Lesegner laglwar. Me kouma Lekritir deklare, “Seki lizie pa finn trouve, seki zorey pa finn tande, seki okenn dimounn pa finn panse kapav arive, samem ki Bondie finn prepare pou dimounn ki kontan li.” Abe, samem mister ki Bondie finn revel nou par so Lespri Sin. Lespri kapav examinn tou kiksoz, mem bann plan Bondie ki pli kasiet. Kisann-la parmi bann dimounn kapav konn panse lezot dimounn? Lespri dimounn ki kone ki ena dan panse dimounn. Parey, zis Lespri Bondie ki kone ki ena dan panse Bondie. Nou pa finn resevwar lespri lemond, me Lespri ki sorti kot Bondie pou ki nou kapav rekonet bann don ki li donn nou dan so bonte. Samem kiksoz nou koze, pa par sazes ki lespri imin finn montre nou, me par bann parol ansegne par Lespri ki interpret bann verite spiritiel dan enn langaz spiritiel. Dimounn ki pena Lespri pa aksepte bann kiksoz ki Lespri Bondie done, parski li paret enn foli pou li. Li inposib konpran sa bann don-la parski bizin Lespri Bondie pou konpran sa. Dimounn ki ena Lespri kapav port zizman lor valer tou kiksoz, me personn pa kapav ziz li. Parey kouma finn ekrir, “Kisann-la konn panse Lesegner? Kisann-la kapav donn li konsey?” Me nou, nou ena panse Lekris. Frer, ser; mo pa finn kapav koz ar zot kouma bann dimounn ki ena Lespri, me kouma bann dimounn dan lemond, kouma bann ti-baba dan lafwa Kretien. Mo finn donn zot dile, ki pa enn manze solid, parski zot pa ti pare pou sa. Ofet, mem aster-la zot pa ankor pare pou siport manze solid. Zot ankor viv kouma dimounn dan lemond. Kan ena zalouzi ek rivalite ant zot, eski zot pa pe konport zot kouma bann dimounn ki dan lemond? Eski zot pa pe mars dapre tandans imin? Kan enn dir, “Mo swiv Pol,” enn lot dir, “Mo swiv Apolos,” eski sa pa montre ki zot mars kouma ninport ki imin? Apre tou, ki Apolos ete? Ki Pol ete? Nou zis bann serviter ki Bondie finn servi pou fer zot gagn lafwa. Sakenn finn servi don ki Lesegner finn konfie li. Mwa mo finn plant lagrin, Apolos finn aroze, me Bondie ki finn fer pouse. Alor dimounn ki finn plante ek dimounn ki finn aroze pena linportans, me zis Bondie ki fer tou kiksoz pouse ki konte. Seki plante ek seki aroze ena enn mem rezon travay, e Bondie pou rekonpans sakenn dapre so travay. Nou pe travay ansam avek Bondie, e zot, zotmem plantasion Bondie, zotmem konstriksion Bondie. Dapre lagras ki Bondie finn donn mwa, mo finn poz enn fondasion kouma enn arsitek intelizan, me enn lot pe konstrir lor la. Sakenn bizin fer bien atansion manier ki li pe konstrir. Personn pa kapav poz enn lot fondasion apar fondasion ki finn fini poze, setadir, Zezi Kris. Si kikenn batir lor sa fondasion-la avek lor, larzan, pier presie, dibwa, lerb sek oubien lapay, so travay pou devwale zour zizman dapre valer ki li ena, parski sa zour-la tou travay pou vizib par dife. Dife pou teste travay-la, dife pou montre seki li vo. Si kikenn finn fer enn travay ki reziste dife, li pou gagn enn rekonpans. Par kont si travay-la brile, li pou fer enn gran lapert. Dimounn-la pou sove, li, me koumadir li finn travers dife. Zot tou sirman kone ki zot lekor Tanp Bondie e ki Lespri Bondie li viv dan zot. Si kikenn detrir Tanp Bondie, Bondie pou detrir li, parski Tanp Bondie li sin, e zotmem ki sa Tanp-la. Fode ki personn pa tom dan lerer. Si ena parmi zot krwar ki li saz dapre sistem lemond, ki li vinn enn fouka dabor pou lerla li vremem vinn enn saz. Lasazes dapre sa lemond-la, li enn foli devan Bondie. Lekritir dir, “Bondie may bann saz dan zot prop riz.” Lekritir deklare osi, “Lesegner konn panse bann saz Li kone ki zot pena valer.” Alor pa batir zot fierte lor bann imin. Zot proprieter tou kiksoz. Ki li Pol, oubien Apolos, oubien Kefas, ki li lemond ou lavi ou lamor, prezan ou lavenir, tou kiksoz li pou zot. Me zot, zot apartenir ar Lekris, e Lekris li pou Bondie. Konsider nou kouma bann serviter Lekris, ki ena responsabilite mister Bondie. Enn responsab bizin montre limem fidel. Mo pa kas latet si zot ki ziz mwa oubien si lakour bann zom ki ziz mwa. Momem mo pa ziz mwa. Mo konsians kler, me sa pa fer mwa vinn inosan. Lesegner ki mo sel ziz. Akoz sa pa pronons okenn zizman avan letan fixe, avan ki Lesegner retourne. Lesegner ki pou met okler bann kiksoz ki kasiet dan nwar, ki pou revel bann lintansion ki dan leker dimounn. Lerla sakenn pou gagn louanz ki Bondie ena pou li. Bann frer, bann ser, pou zot benefis ki mo finn prezant tousala dan sa fason-la, koumadir li aplik ar Apolos ek mwa. Koumsa zot pou aprann ki savedir “Pa al andeor limit seki finn ekrir.” Fode pa ki, par lorgey, kikenn parmi zot pran par enn dimounn kont enn lot. Dan ki manier to panse to pli siperyer ki enn lot? Tou seki to ena, to pa finn gagn sa ar Bondie? Si li koumsa, kifer to fer vantar komsi seki to ena la, to pa finn gagn li an kado? Zot deza ena tou seki zot oule! Zot deza finn vinn ris! Zot finn vinn bann lerwa, alor ki nou, nou bann nanye ditou! A, si selman zot ti vremem bann lerwa! Koumsa nou ti pou kapav lerwa nou osi ansam ar zot. Mo panse ki Bondie finn met nou, ki so bann Zapot, dan dernie plas. Nou kouma bann ki finn kondane pou mor, enn spektak pou lemond antie, pou bann dimounn, kouma pou bann anz. Nou enn bann fou akoz Lekris, me zot, zot bann saz dan linion avek Lekris; nou feb, me zot, zot for; nou gagn dezoner, alor ki zot, zot gagn loner. Mem ziska ler, nou pena manze, nou pena bwar, nou pena linz, nou gagn bate, nou pena lakaz fix, nou bouz partou-partou. Nou travay dir ar nou lame. Kan dimounn insilte nou, nou pronons benediksion; kan dimounn persekit nou, nou siport sa. Kan rakont foste lor nou, nou pa reponn brit. Ziska ler, dimounn ankor konsider nou kouma bann dernie salte, kouma enn ta malpropte. Mo pa pe ekrir koumsa pou fer zot gagn onte, me mo pe averti zot, kouma mo bann zanfan ki mo bien kontan. Mem si arive zot ena dis-mil dimounn ki gid zot lavi dan Lekris, zot pena plizir papa, parski mwa ki finn vinn zot papa dan Lekris par Bonn Nouvel ki mo finn amenn zot. Alors mo sipliy zot, swiv mo lexanp. Pou sa rezon-la ki mo pe avoy Timote kot zot. Mo kontan li kouma mo garson, e li fidel dan Lesegner. Li pou rapel zot bann prinsip ki diriz mo lavi dan Lekris. Li parey kouma seki mo ansegne partou, dan tou Legliz. Ena parmi zot panse ki mo pa pou vini, zot finn vinn arogan. Me si Lesegner permet mwa, mo pou vinn kot zot biento. Lerla mo pou pran konesans, pa selman seki bann arogan-la pe dir, me mo pou gete ki zot kapav fer. Rwayom Bondie pa depann lor koze, me lor pwisans. Ki zot prefere? Ki mo vinn kot zot ar rotin, oubien avek enn leker ranpli ar lamour ek douser? Ena enn koze ki pe deroule lor imoralite sexiel parmi zot, e li enn kalite ki mem kot bann payin pa trouve sa. Ena enn zom ki finn pran fam so papa. E lorla zot arogan! Okontrer zot ti bizin dan tristes. Dimounn ki finn azir koumsa, ti bizin finn fini met li deor depi zot group. Mem si fizikman mo pa prezan, mo avek zot dan lespri. Mo finn fini donn mo zizman lor dimounn ki finn fer sa la, komsi mo prezan. Kan zot vinn ansam lor nom Lesegner Zezi e ki mo avek zot dan lespri, e pwisans nou Segner Zezi prezan, pran sa zom-la e met li dan lame Satan pou ki so natir pese konn destriksion, me ki so lespri sove zour ki Lesegner pou fer zizman. Li pa korek ki zot fier. Zot bien kone ki enn tigit levin fer lapat antie gonfle. Zot bizin retir vie levin pou ki zot vinn enn nouvo lapat ki san levin, parski samem ki zot ete; parski Lekris, nou agno paskal, finn fini sakrifie. Anou selebre nou fet, pa avek vie levin pese ek imoralite, me avek dipin ki san levin, dipin sinserite ek verite. Dan let ki mo ti ekrir avan, mo ti dir zot ki fode pa ki zot asosie zotmem ar dimounn ki viv dan imoralite. Mo pa ekrir sa lor bann dimounn dan lemond ki imoral, gourman, voler ou adorater idol. Dan sa ka-la zot ti pou bizin kit lemond sorti ale. Mo ti pe rod dir zot pa asosie zot ar kikenn ki dir li enn krwayan, me ki pe viv enn lavi debos, li enn rapas, li ador bann idol, li insilte ek abiz so prosin, li enn soular ou enn voler. Fode pa manz ansam ar enn dimounn koumsa. Eski li mo travay ziz seki andeor Legliz? Pa bann seki dan Legliz ki zot sipoze zize? Bondie pou ziz bann ki andeor. Lekritir dir, “Met deor seki move parmi zot.” Kan enn parmi zot pa dakor ar enn lot krwayan, kouma zot oze amenn sa krwayan-la devan lakour bann non-krwayan pou ziz li, olie ki zot amenn sa ka-la devan lezot manb pep Bondie ki bann krwayan? Zot pa kone ki pep Bondie ki pou ziz lemond? Si zot ki pou ziz lemond, eski zot pa kapav ziz bann ti problem? Zot pa kone ki nou ki pou ziz bann anz? Alors, sirman nou kapav ziz bann zafer toulezour. Kan zot ena bann konfli koumsa, zot etablir bann ziz ki pena lestim Legliz? Les mo demann zot enn kiksoz ki pou anbaras zot: eski pena personn parmi zot ki ena ase sazes pou ziz enn konfli ant bann krwayan? Enn frer trenn enn lot devan lakour pou ki non-krwayan fer zizman! Ofet, parski zot ena bann ka lakour ant zot, li deza enn defet pou zot. Kifer zot pa siport linzistis? Li pa meyer ki zot les zotmem depouye? Me non, okontrer zot ki fer linzistis e ki depouy lezot, e zot fer sa ar zot prop frer, zot prop ser! Zot pa kone ki seki pratik lemal pa erit Rwayom Bondie? Pa anbet zotmem. Bann ki pratik imoralite, idolatri, adilter, bann efemine ek bann omosexiel, voler, akaparer, soular, bann ki dir dimal lor Bondie ek bann eskro, pa erit Rwayom Bondie. Ala kouma sertin parmi zot ti ete. Me nou Segner Zezi ek Lespri Bondie finn pirifie zot, finn sanktifie zot, ek finn met zot drwat devan Bondie. Ena koze ki dir, “Nou kapav fer seki nou anvi,” e pourtan, pa tou kiksoz ki korek; “Nou kapav fer seki nou anvi,” me mo pa pou les mwa vinn esklav ninport kwa. Ena enn koze ki dir, “Manze finn fer pou ranpli vant, vant finn fer pou manze,” me Bondie pou detrir toule-de. Nou pa kapav fer seki nou anvi avek nou lekor. Nou lekor li pou Lesegner, e Lesegner li pou nou lekor. Par so pwisans, Bondie finn resisit Lesegner depi lamor, e li pou fer nou osi resisite. Zot pa kone ki zot lekor li form parti lekor Lekris? Eski mo pou pran enn manb lekor Lekris ek mo fer li vinn enn parti lekor enn prostitie? Zame! Zot pa kone ki enn dimounn ki inir limem ar enn prostitie li vinn enn sel ar li? Lekritir dir, “Toule-de pou vinn enn sel.” Me seki inir limem ar Lesegner li vinn enn sel lespri avek Lesegner. Zot bizin sove devan limoralite sexiel. Tou lezot pese ki enn zom fer, bann pese-la andeor so lekor. Me zom ki livre limem dan pese imoralite li fer pese kont so prop lekor. Zot pa kone ki zot lekor enn Tanp Lespri Bondie, ki li viv dan zot, e ki Bondie ki finn donn zot sa Lespri-la? Alor zot pa apartenir ar zotmem; finn pey enn gro pri pou aste zot. Alor rann glwar Bondie avek zot lekor. Lor kestion ki zot finn ekrir mwa, li bon ki enn zom pa marye. Me parski ena otan imoralite, sak zom ti bizin ena so prop fam, e sak fam ena so prop mari. Enn mari bizin akonplir devwar maryaz ar so fam, ek fam-la osi parey anver so mari. Lekor fam-la pa zis pou li, me pou so mari osi. Parey, enn mari so lekor pa zis pou li, me osi pou so fam. Pa refiz ena relasion ansam, amwin ki zot dakor pou enn timama pou zot konsakre zot pou lapriyer. Pa enn lord ki mo pe done, me mo pe fer enn konsesion. Mo ti pou kontan si tou zom ti kouma mwa. Me sak zom gagn enn don ki Bondie donn li; ena ki gagn enn kalite don, ena ki ena lot don. Me ar bann ki pa ankor marye ek bann ki vev, mo dir zot li bon ki zot res san marye kouma mwa. Me si zot pa kapav kontrol zotmem, li preferab ki zot marye. Li pli bon ki zot marye, olie ki zot brile ar dezir. Pou seki marye, mo ena enn komannman, pa mwa me Lesegner: enn fam bizin pa kit so mari. Me si li kit so mari li bizin res san marye, sinon li bizin rekonsilie ar so mari. Ek enn mari bizin pa kit so fam. Pou tou lezot (pa Lesegner ki dir sa, me mwa) mo dir: si enn frer ena enn fam ki pa krwayan me ki dispoze viv ar li, fode pa ki frer-la repous li. Parey, si enn fam ena enn mari ki pa krwayan e li dispoze viv ar fam-la, ki li pa repous mari-la. Parski enn mari non-krwayan li sanktifie par so fam e enn fam non-krwayan li sanktifie par so mari. Sinon zot zanfan ti pou inpir, tandi ki la, zot pre ar Bondie. Me, si seki pa krwayan-la desid pou kite ale, les li ale. Frer-la ou ser-la pena okenn lien. Bondie oule ki so zanfan viv dan lape. Ki kone? Apre tou, twa fam krwayan to kapav sov to mari. E twa mari krwayan to kapav sov to fam. Apar sa ka-la, sakenn parmi zot bizin kontign viv so lavi dapre seki Bondie finn donn li letan ti apel li. Samem lalwa ki mo finn etablir dan Legliz partou. Si kikenn ti finn fer sirkonsizion letan Bondie ti apel li, fode pa li rod kasiet mark sa sirkonsizion-la. Si kikenn pa ti finn pratik sirkonsizion letan Bondie ti apel li, fode pa li rod sirkonsizion. Li pa inportan si finn fer ou pa finn fer sirkonsizion. Seki inportan, bizin gard komannman Bondie. Sakenn bizin gard kondision dan lakel li ti ete letan Bondie ti apel li. To ti enn esklav letan Bondie ti apel twa? Ki sa pa trouble twa, me si lokazion prezante, profite pou gagn to liberte. Parski enn esklav ki Lesegner apele li enn zom lib ki depann lor Lesegner; parey, zom lib ki Lekris apele, li so esklav. Finn pey enn gro pri pou aste twa, alors pa vinn esklav bann zom. Bann frer ek bann ser, ki sakenn res dan mem kondision kot li ti ete letan Bondie ti apel li. Aster-la, lor size bann fam ki pa marye, mo pena okenn lord ki Lesegner finn done, me mo donn mo lopinion parski mo enn zom ki merit zot konfians akoz labonte Lesegner. Akoz sitiasion kriz ki nou pe viv zordi, li meyer ki zot res kouma zot ete. Si to marye, pa rod divors. To pa marye? Pa al rod enn fam. Si to rant dan lavi maryaz to pa pe fer pese, e si enn fam ki pa marye desid pou marye, li pa komet pese. Me seki rant dan lavi maryaz, pou fer fas enn kantite difikilte dan sa lemond-la. Samem ki mo pe rod protez zot. Seki mo pe rod dir, bann frer ek bann ser, letan ki reste bien tigit. Depi aster bann zom marye bizin viv koumadir zot pena fam; bann ki dan dey komsi zot pa tris; bann ki dan boner komsi zot pa ere; bann ki aste kiksoz, komsi zot pa posed kiksoz-la; bann ki servi seki ena dan sa lemond-la, komsi zot pa gagn profi ladan. Parski sa lemond-la, dan form ki li ete aster-la, li pa pou res lontan. Mo ti pou kontan ki zot pena enn sou traka. Enn zom ki pa marye pou konserne par travay Lesegner, li pou rod fer Lesegner plezir, me enn zom marye li preokipe ar zafer lemond, li rod fer so fam plezir. Li partaze ant sa de-la. Parey pou enn fam ki pa marye oubien enn zennfi, li pou preokipe ar travay Lesegner, parski li oule devwe li pou Lesegner dan tou seki li fer ek panse. Me enn fam marye preokipe par zafer sa lemond-la, li oule fer plezir so mari. Mo pe dir sa pou zot prop dibien, pa pou inpoz enn difikilte lor zot. Mo oule zot viv enn lavi korek ek zot bien devwe pou Lesegner. Si kikenn panse ki so fiyanse avanse dan laz e ki li pa kapav tini, les li marye dapre so lide, li pa pe fer pese. Me dimounn ki pena okenn presion lor li, dan so latet tou kiksoz bien kler, dan so leker li finn pran enn desizion bien ferm pou pa ena relasion ar so fiyanse, sa zom-la li pe bien azir. Alors, seki marye ar so fiyanse fer bien, me seki desid pou pa marye, fer pli bien ankor. Enn fam atase ar so mari tanki li vivan. Me si mari-la mor, fam-la lib pou remarye, me avek enn Kretien. Selman dapre mwa, li pli erez si li res kouma li ete. Sa mo lopinion, e mo panse ki mo ena Lespri Bondie dan mwa. Aster-la mo pou ekrir lor manze ki dimounn ofer kouma sakrifis pou bann idol. Nou kone ki “Tou dimounn ena konesans.” Konesans gonfle latet ar lorgey, me lamour fer lakominote vinn pli for. Seki krwar li konn kiksoz, li pa ankor konn tou seki bizin kone. Me dimounn ki kontan Bondie, Bondie osi kontan li. Alors, lor size manz nouritir ki finn ofer idol, nou kone ki enn idol pa reprezant nanye dan lemond, e ki ena enn sel Bondie. Mem si swadizan ena bann bondie dan lesiel ou lor later - ofet, ena boukou bondie ek segner - me pou nou ena enn sel Bondie, nou Papa, ki finn kree tou kiksoz, e par li ki nou ena lavi. Ena osi enn sel Segner, Zezi Kris; par li tou kiksoz existe e par li nou ena lavi. Me pa tou dimounn ki konn sa laverite-la. Ena ki telman abitie frekant bann idol, ki mem aster-la zot manz seki finn sakrifie komsi li vremem finn ofer bann idol. Zot konsians feb e zot santi zot sali par sa manze-la. Pourtan pa enn kiksoz ki nou manze ki pou fer nou vinn pli pre ar Bondie. Nou pa perdi nanye akoz manze, e nou pa gagn nanye akoz manze. Alor to bizin fer atansion ki sa liberte ki to servi la li pa fer enn lot ki feb dan lafwa tom dan lerer. Si kikenn ki feb trouv twa ki enn for dan konesans pe manze dan enn tanp idol, to pa panse ki sa pou ankouraz li manz seki finn ofer bann idol? Akoz to konesans enn frer ki feb pou tonbe, samem frer pou ki Lekris finn donn so lavi. Kan zot fer pese koumsa kont zot bann frer, ek bles zot konsians, zot pe fer pese kont Lekris limem. Akoz sa, si nouritir ki lakoz ki fer enn frer ou enn ser tom dan lerer, zame mo pa pou manz laviann ankor. Eski mo pa lib mwa? Eski mo pa enn Zapot, mwa? Eski mo pa finn trouv Zezi nou Segner? Eski zot pa rezilta travay ki mo finn fer dan Lesegner? Mem si lezot pa konsider mwa kouma enn Zapot, mo sir ki pou zot mo vremem enn Zapot! Zotmem laprev mo apostola, parski zot ini avek Lesegner. Ala mo defans pou bann ki pe ziz mwa. Nou pena drwa manze-bwar? Eski nou pena drwa amenn nou madam Kretienn ar nou, kouma bann lezot Zapot fer, kouma bann frer Lesegner ek Kefas fer? Oubien selman Barnabas ek mwa ki bizin travay pou gagn nou lavi? Kisann-la ki servi dan larme kouma enn solda lor so prop fre? Kisann-la ki plant pie rezin me ki li pa manz fri-la? Kisann-la ki okip enn troupo me li pa gagn dile pou bwar? Pa zis dan lavi toulezour ki mo tir bann lexanp. Lalwa Moiz osi dir sa. Dan Lalwa finn ekrir, “Pa atas lagel enn bef kan li pe kraz dible ar so lapat.” Dan sa lexanp-la, eski Bondie konserne par bann bef? An realite, eski pa pou nou ki Bondie pe dir sa? Wi, sa finn ekrir pou nou, parski kan enn planter pe travay later, ek kikenn pe kraz lafarinn, zot ena lespwar pou gagn enn par dan rekolt ki pou fer. Nou finn sem bann semans spiritiel dan zot; eski li tro demande ki nou rekolte enn par dibien materyel? Si lezot kapav gagn zot soutien, eski nou, nou pa merit li plis ankor? Me nou pa finn servi sa drwa-la. Okontrer nou finn siport tou pou ki pena okenn obstak ki blok Bonn Nouvel Lekris. Zot pa kone ki seki travay dan Tanp, gagn so manze depi sa Tanp-la? E seki servi lor lotel gagn enn par lor seki pe ofer lor lotel-la? Dan mem manier, Lesegner finn komann ki seki anons Bonn Nouvel gagn so lavi ar sa Bonn Nouvel-la. Mwa mo pa finn servi okenn sa bann drwa-la. E mo pa pe ekrir dan lespwar ki zot pou donn mwa kit privilez pou mwa. Mo ti'a prefere mor, ki mo les kikenn pran sa fierte-la ar mwa. Mo pa bizin fer vantar ki mo anons Bonn Nouvel. Enn obligasion lor mwa pou fer sa. Maler lor mwa si mo pa anons Bonn Nouvel. Si mo ti swazir sa travay-la par momem mo ti pou ena drwa enn saler. Me si sa finn inpoze lor mwa, alor mo oblize pran sa sarz-la pou nanye, san gagn lapey. Alor, ki mo rekonpans? Satisfaksion ki mo gagne pou anons gratwitman Bonn Nouvel san ki mo profit drwa ki sa Bonn Nouvel-la donn mwa. Mo enn dimounn lib, e mo pa esklav personn; pourtan mo fer mwa esklav tou dimounn pou ki mo kapav gagn pli boukou fidel posib. Kan mo parmi bann Zwif, mo viv kouma Zwif, pou gagn bann Zwif. Kan mo ar bann ki swiv lalwa, mo kouma enn ki swiv lalwa pou ki mo gagn bann-la; ofet, mwa mo pa anba lalwa. Ar bann ki inior lalwa, mo viv kouma zot pou ki mo kapav gagn zot. Sa pa vedir ki mo indiferan ar lalwa Bondie, parski mo pe viv lalwa Lekris. Ar bann feb, mo viv kouma enn feb pou gagn zot. Mo donn tou mo posib pou sov inpe dimounn par sa manier-la. Mo fer tousala pou Bonn Nouvel pou ki mo gagn enn par. Zot pa kone ki dan enn lekours boukou kourer galoupe, me pri, enn sel ki gagne? Dan lantrennman, sak atlet inpoz limem enn disiplinn bien sever. Zot fer sa pou gagn enn kouronn ki pa res pou touletan; me nou, nou fer nou travay pou gagn enn kouronn ki so valer zame gate. Mo galoupe pou terminn lekours, mo pa galoupe kouma enn aveg. Dan labox parey, mo pa tap bonavini dan ler. Mo trenn mo lekor dir, mo kontrol li kouma mo esklav, pou ki mo pa pres lezot laparol, apre mo trouv momem diskalifie. Mo bann frer ek mo bann ser Kretien, mo rapel zot ki nou bann anset ti anba proteksion niaz e zot tou ti travers lamer. Par sa lexperyans-la zot ti komsi batize dan enn lakominion avek Moiz, e zot ti manz mem manze spiritiel, e ti bwar mem labwason spiritiel, parski zot ti bwar dan mem ros spiritiel ki ti pe akonpagn zot; sa ros-la ti Lekris limem. E pourtan Bondie pa ti kontan zot manier fer, akoz sa zot ti perdi zot lavi dan dezer. Sa finn arive kouma enn lexanp pou ki nou pa gagn move dezir dan nou leker kouma bann-la. Pa koumans al ador bann idol kouma ena parmi bann-la ti fer. Kouma Lekritir dir, “Lepep ti asize pou manze-bwar, apre zot leve pou diverti.” Fode pa nou tom dan limoralite sexiel kouma bann-la, ek dan enn sel zour venntrwa-mil ant zot ti mor. Fode pa ki nou teste Lesegner kouma ena parmi bann-la ti fer, e zot finn trouv lamor par bann serpan. Fode pa ki zot grogne kouma bann-la ti fer, e finn trouv lamor par Anz Lamor. Tousa maler-la finn ariv bann-la kouma enn lexanp pou lezot, e sa finn ekrir pou averti nou parski nou pe viv dan letan kot lafin pe vini. Alors si to krwar to pe tini ferm, fer atansion ki to pa tonbe. Tou tantasion ki zot finn gagne li parey kouma seki tou dimounn gagne. Bondie fidel dan so promes ek li pa pou les zot gagn enn tantasion ki zot pa kapav tini. Kan zot pou tante, li pou donn zot enn sime pou sorti ladan. Akoz sa, mo bann kamarad, zot bizin sove devan lidolatri. Mo pe koz ar zot kouma bann dimounn rezonab. Zize zotmem seki mo pe dir. Sa koup benediksion ki nou servi dan lakominion e pou ki nou rann gras, eski li pa enn kominion avek disan Lekris, sa? E dipin ki nou kase dan lakominion, eski li pa enn partisipasion dan lekor Lekris, sa? Akoz ena enn sel dipin, nou tou nou enn sel lekor, parski nou tou nou partisip dan enn sel dipin. Anou konsider lepep Izrael; bann ki manz zanimo ki finn sakrifie, eski zot pa dan lakominion avek Bondie pou ki sa lotel-la finn konsakre? Zot panse ki par sa, mo pe dir ki enn idol oubien sakrifis ki finn ofer li ena kit valer? Non, me mo dir ki bann-la pe ofer sakrifis ar demon, pa ar Bondie. Mo pa oule ki zot ena kominion avek bann demon. Zot pa kapav bwar dan koup ki servi dan seremoni ki ofer demon, ek anmemtan bwar dan koup ki servi dan kominion avek Lesegner. Zot pa kapav partisip dan repa ki servi lor latab Lesegner ek anmemtan manz lor latab demon. Eski nou oule provok zalouzi Lesegner? Zot panse nou pli for ki li? Ena enn koze ki dir, “Nou kapav fer seki nou oule.” Wi, me pa tou kiksoz ki bon. “Nou kapav fer seki nou oule,” wi, me pa tou kiksoz ki konstriktif. Fode ki personn pa rod so prop lintere me lintere lezot. Zot lib pou manz tou seki vande dan bazar-laviann san bizin poz okenn kestion ki ena pou fer ar konsians, parski Lekritir dir, “Lesegner ki proprieter later ek tou seki ena lor la.” Si enn non-krwayan invit twa pou pran enn repa e twa to anvi ale, manz seki li servi twa san poz kestion konsians. Me si kikenn dir twa, “Sa manze-la finn ofer kouma enn sakrifis,” alor lerla to pa manze, akoz dimounn ki finn fer sa remark-la, ek akoz konsians; mo pa pe koz to konsians, me konsians lot-la. Kifer mo liberte bizin depann lor konsians enn lot? Si mo rann gras Bondie pou mo repa, kifer mo bizin gagn kritik lor size sa nouritir pou ki mo finn dir mersi Bondie? Kan zot manze, kan zot bwar, kan zot fer ninport ki kiksoz, touletan fer li pou laglwar Bondie. Viv enn fason ki zot pa kree skandal ni pou bann Zwif ni pou bann Grek ni pou Legliz Bondie. Koumsa mem mo viv pou fer plezir tou dimounn; olie mo rod mo prop lintere, mo rod lintere tou dimounn pou ki zot kapav sap dan pese. Swiv mo lexanp, parey kouma mo swiv lexanp Lekris. Mo felisit zot parski zot ankor rapel mwa dan tou kiksoz, ek zot ankor swiv tradision Kretien ki mo finn kit ar zot. Me mo oule ki zot konpran ki Lekris limem ki latet tou bann zom, e ki enn mari limem sef so fam, alor ki Bondie limem latet Lekris. Si enn zom met enn kiksoz lor so latet letan li pe priye ou profetize, li dezonor so latet. E si enn fam priye ou profetize san kouver so latet, li dezonor so latet, li exakteman koumadir so latet raze. Si enn fam pa kouver so latet, li bizin dan sa ka-la raz tou so seve lor so latet. Me si li enn dezoner ki enn fam koup so seve oubien raz so latet, alor sa montre ki li bizin kouver so latet. Fode pa ki enn zom kouver so latet parski li reflet limaz ek laglwar Bondie, me enn fam reflet laglwar zom. Bondie pa finn kree zom depi fam, me li finn kree fam depi zom. E zom pa finn kree pou fam, me finn kree fam pou zom. Pou sa rezon-la, e akoz bann anz, enn fam bizin ena enn sign lotorite lor so latet. Selman, dapre lavi ki nou amene dan Lesegner, fam pa kapav existe san zom, ni zom existe san fam. Parey kouma fam finn kree depi zom, zom pran nesans depi fam, ek tou kiksoz sorti kot Bondie. Zize zotmem, eski li korek ki enn fam kapav priye Bondie san enn vwal lor so latet? Natir mem montre nou ki li enn laont ki zom gard long seve. Tandi ki pou fam li enn laglwar, parski long seve li kouma enn vwal lor so latet. Si kikenn anvi kontigne diskite, mo dir ki ni nou, ni Legliz Bondie pena lot koutim. Lor remark ki aster mo pou fer, mo pa kapav felisit zot parski kan zot fer zot renion zot fer plis ditor ki dibien. Premie dabor, kan zot zwenn ansam kouma Legliz, mo tann dir ki ena divizion parmi zot; e mo krwar ki sa li vre, sa. San dout li bon ki ena divizion parmi zot, parski koumsa kapav kone kisann-la parmi zot ki vremem fidel. Kan zot zwenn ansam, li pa parski zot pou selebre repa Lesegner. Parski letan pou pran repa, sakenn prese pou manze. Lerla ena ki res san manze, ena lot ki finn sou. Eski zot pena lakaz pou manze ek bwar? Oubien zot mepriz lakaz Bondie e zot oule imilie bann ki pena nanye? Ki mo pou dir zot? Mo bizin felisit zot? Bliye sa, mo dir zot! Mo finn resevwar depi Lesegner tou seki mo finn transmet zot: Lesegner Zezi, lanwit ki ti trayir li, li ti pran dipin e apre ki li ti finn rann gras, li ti kas dipin-la, e li ti dir, “Samem mo lekor, ki pou zot. Manz sa pou ki zot rapel mwa.” Dan mem fason, apre repa li dir, “Sa koup-la enn nouvo lalians, garanti par mo disan. Sak fwa ki zot bwar sa, fer li pou zot rapel mwa.” Sak fwa ki zot manz sa dipin-la e ki zot bwar dan sa koup-la, zot proklam lamor Lesegner ziska ki li retourne. Akoz sa, seki manz dipin ek bwar koup Lesegner dan enn manier ki pa dign, li rann li koupab anver lekor ek disan Lesegner. Sakenn bizin examinn limem avan ki li manz dipin ek bwar dan koup Lesegner. Seki manze ek bwar san rekonet lekor Lesegner, li pe manze ek li pe bwar zizman kont limem. Akoz sa ena boukou parmi zot ki feb ek malad, ek plizir finn mor. Si nou ti examinn noumem avan, nou pa ti pou tom anba zizman Bondie. Me kan Lesegner ziz nou, li pe disiplinn nou pou ki nou pa kondane ansam ar lemond. Alors, mo bann frer ek ser, kan zot zwenn ansam pou repa Lesegner, atann lezot vini. Si kikenn gagn fin, preferab li manze so lakaz, koumsa kan zot vinn ansam pena kondanasion. Pou bann lezot zafer, mo ava okip sa kan mo vinn kot zot. Aster-la, konsernan bann don spiritiel, mo bann kamarad, mo pa'le ki zot res dan liniorans. Letan zot ti ankor payin, zot ti antrene ver bann idol ki pa koze. Mo oule zot kone ki dimounn ki gide par Lespri Bondie pa pou kapav dir, “Zezi li modi.” E personn pa kapav dir, “Zezi limem Segner,” si li pa gide par Lespri Sin. Ena enn varyete don, me enn sel Lespri Bondie ki donn sa bann don-la. Ena enn varyete fason servi, me enn sel Segner ki nou servi. Ena enn varyete aktivite, me enn sel Bondie ki donn sak dimounn kapasite pou fer bann aktivite-la. Sakenn fer lexperyans Lespri Sin dan enn fason pou ki sa fer dibien tou lezot. Lespri Bondie donn enn dimounn enn mesaz ranpli ar sazes, me pou enn lot dimounn mem Lespri donn enn mesaz ranpli ar konesans. Sa mem Lespri-la donn enn dimounn enn gran lafwa, e enn lot li donn pouvwar pou fer gerizon. Mem Lespri donn pouvwar fer mirak, li donn enn lot don profesi, enn lot li donn kapasite disteng ant fos lespri ek vre Lespri, e ankor pou enn lot Lespri Bondie donn kapasite koz diferan langaz ki ena bann son etranz, ek enn lot li gagn pouvwar pou interpret sa bann langaz-la. Tousala, aktivite enn sel e mem Lespri Bondie, e li akord sakenn enn don diferan dapre so volonte. Enn lekor, mem si ena plizir manb, li form enn sel linite. Lekris, li parey. E nou tou, ki nou Zwif ou non-Zwif, esklav ou lib, nou tou finn batize pou form enn sel lekor par mem Lespri, e Bondie finn donn nou tou mem Lespri dan nou leker. Ena boukou parti dan enn lekor. Li pa konpoze par enn sel parti. Si lipie dir, “Parski mo pa enn lame, mo pa fer parti dan lekor,” pa pou otan ki li pa fer parti lekor-la. Si zorey dir, “Akoz mo pa enn lizie, mo pa fer parti lekor,” pa pou otan ki li pa fer parti lekor-la. Si lekor an-antie ti zis lizie, kouma lekor la ti pou tande? Si lekor an antie ti zis enn zorey, kouma lekor-la ti pou santi loder? An realite, Bondie finn dispoz sak parti dan enn lekor dapre so volonte. Pa ti pou ena lekor si tou ti enn sel parti. Ena boukou parti, me enn sel lekor. Lizie pa kapav dir ar lame, “Mo pa bizin twa!” Latet pa kapav dir ar lipie, “Mo pa bizin twa!” Okontrer, parti lekor ki paret pli feb, samem ki pli neseser; e parti ki nou panse ena mwins loner, samem nou donn plis lestim. Parti ki nou plis pa anvi koze, samem nou tret avek plis respe; me parti pli respektab pa bizin sa tretman-la. Me Bondie finn dispoz nou lekor dan enn fason ki donn plis loner bann parti ki mank lestim, pou ki pena divizion dan lekor, me ki sak parti pran swin lezot. Si enn parti soufer, tou lezot soufer ar li; si enn gagn loner, tou lezot partaz so lazwa. Zot tou fer parti lekor Lekris, e sakenn parmi zot enn manb sa lekor-la. Bondie finn met tou anplas dan Legliz. Premie, li finn met Zapot, deziem bann profet, trwaziem bann ki responsab pou ansegne, apre bann ki akonplir mirak, apre bann ki kapav geri malad, bann ki ed lezot, bann ki diriz travay Legliz, e bann ki koz langaz ki ena parol etranz. Eski tou dimounn li enn Zapot? Eski tou dimounn profet? Eski tou donn lansegnman? Eski tou fer mirak? Eski tou ena don gerizon? Eski tou parl an lang? Eski tou donn enn interpretasion sa bann langaz-la? Alor, fixe zot leker lor seki pli inportan. Mo pou montre zot, aster-la, ki sime ki pli bon lor tou. Si mo koz langaz imin osi bien ki langaz bann anz, me mo pena lamour, mo zis enn ferblan vid ki fer tapaz ou enn sinbal ki fer boukou dibri. Si mo ena don profetize, mo posed kapasite plonz dan tou mister ek konesans, e si mo ena lafwa pou bouz montagn, me mo pena lamour, mo enn nanye ditou. Si mo donn bann pov tou seki mo posede e mo donn mo lekor pou brile, me mo pena lamour, li pa servi mwa nanye. Lamour bien pasian, lamour li bon. Li pa zalou, li pa arogan, li pa fer fier. Li pa mank manier, li pa egois, li pa les li irite, ou gard rankinn. Lamour pa trouv plezir dan lemal me li gagn lazwa dan laverite. Lamour touletan pe proteze, touletan pe fer konfians, touletan ena lesperans, touletan persevere. Lamour li eternel. Profesi pou ena so lafin enn zour; don koz an langaz etranz pou trouv so lafin, konesans pou disparet. An-efe, nou konesans li limite, e nou profesi li mank kiksoz, me kan seki parfe vini, seki pa parfe pou disparet. Letan mo ti enn zanfan, mo ti rezonn kouma enn zanfan. Letan mo finn vinn enn zom, mo finn met tou seki zanfan deryer mwa. Aster-la nou trouv flou kouma dan enn vie laglas, me enn zour pou arive kot nou pou trouv fasafas. Aster-la mo konesans li limite, me plitar mo pou konn Bondie dan enn fason konple, parey kouma Bondie konn mwa. Sa trwa kiksoz-la reste: lafwa, lesperans ek lamour. Me dan sa trwa-la, lamour pli gran. Zot bizin swiv sime lamour e zot bizin dezir gagn don spiritiel, sirtou don profesi pou transmet mesaz Bondie. Seki koz an lang pa koz ar dimounn me ar Bondie, parski personn pa konpran li. Li pe servi pwisans Lespri pou koz bann mister. Me tou seki profetize koz ar dimounn pou fortifie zot, pou ankouraz zot ek konsol zot. Seki koz an lang fer limem vinn pli for, me seki profetize fer Legliz vinn pli for. Mo ti pou kontan ki sakenn parmi zot ti kapav koz an lang, me mo prefer ki zot profetize. Seki profetize pli gran ki seki koz an lang, amwin ki li donn explikasion pou ki sa fortifie Legliz. Get sa, si mo vinn kot zot ek mo koz an lang, kouma sa pou profit zot si mo parol pa amenn ni revelasion, ni konesans, ni profesi, ni lansegnman? Mem si nou konsider instriman ki pena lavi, kouma laflit oubien sitar; kouma pou rekonet ki laflit-la ou sitar-la ki pe zwe, si pena bann not bien kler? Si tronpet pa sonn enn signal kler, kisann-la pou prepare pou batay? Li parey pou zot. Si parol ki to pe dir pa kler, kouma lezot pou konpran? To pou koz dan ler. Ena sipa komie langaz lor later, ek pena enn ladan ki pena so sans. Savedir, si enn dimounn pe koze, e mo pa konpran sinifikasion so bann parol, mo enn etranze pou li, e li enn etranze pou mwa. Parey pou zot. Parski zot ena enn gran dezir pou ena don ki Lespri done, ena plis dezir pou edifie Legliz par abondans don ki zot pe rode. Akoz sa, seki koz an lang bizin priye pou ena don interpretasion. Si mo priye an lang, mo lespri pe priye, me mo lintelizans li pa aktif. Alor ki mo bizin fer? Mo pou priye inspire par Lespri, me mo pou osi priye avek mo lintelizans. Mo pou sant avek mo lespri, me mo pou osi sant avek mo lintelizans. Si to pe loue Bondie avek to lespri, kouma enn sinp oditer dan lasistans pou kapav dir “Amen” pou sa remersiman-la, si li pa kone ki to pe dir? Mem si to lapriyer aksiondegras extra zoli, lot dimounn-la pa gagn nanye ladan. Mo remersie Bondie ki mo koz an lang plis ki zot tou. Me dan Legliz mo prefer koz sink parol ki dimounn konpran pou mo donn lansegnman lezot, olie ki mo pronons enn milie parol an lang. Frer ek ser, pa rezonn kouma zanfan. Kan ena pou fer avek lemal, wi, la zot kapav kouma zanfan; me kan li konsern larezon, la zot bizin adilt. Ala seki Lekritir deklare: “Lesegner dir, ‘Mo pou servi bann zom ki ena enn langaz etranz pou mo adres sa pep-la, Mo pou servi labous bann etranze pou koz ar zot, me la osi zot pa pou ekout mwa.’ ” Koz an lang li enn sign pou bann non-krwayan, pa pou bann krwayan. Parkont, profesi li pou bann krwayan e non pou bann non-krwayan. Si Legliz antie rasanble ek zot tou koz an lang, zot pa panse ki enn dimounn andeor ou enn non-krwayan pou dir ki zot fou? Okontrer si enn etranze ou enn non-krwayan rantre e li tann zot pe profetize, li pou realize ki li enn peser, ki pe zize par zot tou e sekre dan so leker pou devwale dan lalimier. Alor li pou tom azenou devan Bondie e li pou proklame, “Vremem Bondie parmi zot.” Alor la, ki nou kapav dir, bann frer ek bann ser? Kan zot zwenn ansam, ena dimounn ki pou ena enn kantik, enn lot ki pou ena enn parol pou ansegne, enn lot enn revelasion, enn lot enn mesaz an lang ek enn interpretasion sa langaz-la. Tousala bizin fer pou fortifie Legliz. Si zot pou koz dan langaz etranz, fer ki selman de ou trwa ki koze, enn apre lot; e bizin ki kikenn donn enn interpretasion seki zot pe dir. Si pena enn interpret, ki sa dimounn-la res trankil, ki li koz ar limem ek ar Bondie. Pou seki resevwar mesaz profetik, de oubien trwa profet kapav pran laparol, e lezot bizin evalie seki pe dir avek boukou swin. Si kikenn ki pe asiz dan lasistans gagn enn revelasion, sa dimounn ki pe koze la bizin arete. Zot tou kapav profetize, me sakenn so tour, pou ki tou dimounn gagn lansegnman ek ankourazman. Lespri bann profet bizin sou kontrol bann profet-la, ki metriz don ki anim zot, parski Bondie pa enn Bondie dezord, me enn Bondie lape. Li enn pratik dan tou Legliz bann pep Bondie ki bann fam res trankil dan Legliz. Zot pena permision koze, me bizin soumet, kouma lalwa dir. Si zot bizin enn ransegnman, zot bizin demann zot mari letan zot rant lakaz. Li pa korek ki enn fam koze dan lasanble. Eski Parol Bondie finn demar depi kot zot? Eski zot tousel ki finn resevwar li? Si kikenn panse ki li enn profet, oubien ki li ena enn don ki Lespri done, li bizin rekonet ki dan seki mo pe ekrir ena komannman Lesegner. Si li pa rekonet sa, Bondie pa rekonet li. Alor mo bann frer ek mo bann ser, ena dan zot sa dezir pou profetize la, e pa anpes koz an lang. Selman fer tou kiksoz bien e dan lord. Frer ek ser, mo anvi rapel zot Bonn Nouvel ki mo finn anons zot, ki zot finn resevwar, e lafwa zot ena lor sa li bien ferm. Par sa Bonn Nouvel-la ki zot sove, si zot res atase dan enn fason ferm ar parol ki mo finn anonse. Sinon, savedir zot finn krwar dan vid. Mo finn transmet zot, avan tou, seki mo finn resevwar momem: ki Lekris finn mor pou nou pese dapre seki Lekritir finn anonse; finn anter li, li finn resisite apre trwa zour, kouma bann Lekritir ti anonse. Li finn revel limem ar Kefas, apre ar Ledouz. Apre li finn paret devan plis ki sink-san dimounn anmemtan. Laplipar bann-la ankor vivan zordi, de-trwa finn mor. Apre li finn paret devan Zak, answit devan tou bann Zapot. Anfin, apre tou lezot, li finn aparet ar mwa, mem si mo kouma enn ti-baba ki finn ne dan enn fason ki pa normal. Mo pli tipti parmi bann Zapot, e mo mem pa merit ki apel mwa Zapot, parski mo ti persekit Legliz Bondie. Me par lagras Bondie mo finn vinn seki mo ete. Sa lagras ki li finn akord mwa la, li pa dan vid. Okontrer, mo finn travay plis ki tou lezot Zapot; non, pa mwa, me lagras Bondie ki avek mwa. Antouka, ki li mwa, ki li bann-la, ala seki nou proklame, ala seki zot finn krwar. Me si nou anons ki Lekris finn resisite parmi bann mor, alor kouma ena parmi zot pe dir ki pena rezireksion bann mor? Si pena rezireksion bann mor, alor dan sa ka-la mem Lekris pa finn resisite. E si Lekris pa finn resisite, nou predikasion pena sans, e zot lafwa dan vid. Plis ki sa, nou bann fos temwin Bondie, parski nou finn rann temwaniaz ki li finn resisit Lekris depi bann mor. Me li pa finn resisit li, si li vre ki pena rezireksion bann mor. Si bann mor pa resisite, alor Lekris li osi pa finn resisite. E si Lekris pa finn resisite, zot lafwa li dan vid, e zot ankor dan zot pese. Savedir bann ki finn mor dan Lekris zot osi zot perdi. Si lesperans ki nou ena dan Lekris li zis pou sa lavi-la, noumem bann dimounn pli malere ki kapav ena. Me non; Lekris finn resisite depi bann mor, limem premie resisite. Parey kouma lamor finn arive par enn zom, parey rezireksion finn arive par enn zom. Tou bann dimounn mor parski zot lie ar Adam; dan Lekris tou pou gagn lavi. Selman, sakenn ena so ran. An premie, Lekris, e apre tou seki apartenir ar li, letan li retourne. Lerla, lafin pou vini, letan li pou remet Rwayom dan lame Bondie, apre ki li finn fini detrir tou regn, otorite ek pouvwar. Li bizin regne ziska ki li met tou so bann lennmi anba so lipie. Dernie lennmi ki pou detrir, se lamor. Lekritir dir, “Li finn met tou kiksoz anba so lipie.” Kan li dir li finn met “tou” anba so lipie, li kler ki Bondie pa ladan, parski Bondie limem ki finn met tou anba Lekris. Kan li fini fer sa, lerla Garson-la limem pou soumet ar Sa-Enn ki finn met tou kiksoz anba li, koumsa Bondie pou regn lor tou. Anou pran lexanp bann ki finn fer zot batize dan plas dimounn ki finn mor; ki zot ti pe rode? Si bann mor pa resisite ditou, kifer dimounn batize dan zot plas? E noumem, kifer sak ler nou met noumem an danze? Sak zour mo riske mo lavi; li vre, sa. Mo fierte pou zot dan Lesegner Zezi Kris ki fer mwa dir sa, mo bann frer ek mo bann ser. Ki serti mo lager kont bann zanimo dan Efez, si li zis pou lizie dimounn? Si bann mor pa resisite, alor anou manze-bwar parski dime nou pou mor. Pa les dimounn anbet zot: kan frekant lisien gagn karapat. Regagn zot lespri ek bon sans, ek aret fer pese. Sertin parmi zot pena enn bon relasion avek Bondie. Mo oblize dir sa, mem si sa fer zot onte. Me li posib zot poz enn kestion: “Kouma bann mor pou resisite? Avek ki kalite lekor zot pou retourne?” Kestion bet! Twa, to bien kone kan met enn lagrin dan later, li bizin mor pou donn lavi enn nouvo plant. Seki to met dan later li enn sinp lagrin, li kapav dible ou enn lot semans; pa enn plant an antie ki to met dan later. Me Bondie donn li enn lekor ki li finn swazir; pou sak semans ki ena e ki diferan, Bondie donn sakenn lekor ki al ar li. Tou bann lekor pa parey. Bann imin ena enn kalite lekor, zanimo enn lot, zwazo enn lot, ek pwason enn lot. Ena osi bann lekor seles ek bann lekor teres, e zot pena mem ekla. Soley ena enn kalite briyans, lalinn enn lot kalite, zetwal enn lot ankor; dayer, enn zetwal so briyans pa parey kouma enn lot zetwal. Parey koumsa mem pou rezireksion bann mor. Lekor ki met dan later li mortel, lekor ki resisite li imortel; anter li dan dezoner, me li resisite dan laglwar; anter li dan febles, me li resisite dan pwisans; anter li kouma enn lekor natirel, li resisite kouma enn lekor spiritiel. Si ena enn lekor natirel, ena enn lekor spiritiel. Lekritir deklare, “Premie imin Adam ti vinn enn lespri vivan, dernie Adam enn Lespri ki donn lavi.” Pa spiritiel ki vinn avan, me materyel; spiritiel vinn apre. Premie Adam ti sorti depi lapousier later. Deziem Adam sorti depi lesiel. Bann imin ki apartenir ar later, zot parey kouma premie zom ki sorti depi later; bann ki sorti lesiel, zot parey Sa-Enn ki vinn depi lesiel. Parey kouma nou ti resanble dapre zom ki sorti dan later, parey nou pou kouma zom ki sorti lesiel. Seki mo pe rod dir, frer ek ser, seki laser ek disan pa kapav ena par dan Rwayom Bondie; seki mortel pa kapav ena par dan imortalite. Mo pou revel zot enn sekre: pa nou tou ki pou mor, me nou tou, nou pou sanze dan enn miliem segonn, pa gagn letan bat lizie, kan tronpet final sone. Letan tronpet sone bann mor pou resisite, e zame pou mor ankor; e nou, nou pou transforme. Sa lekor ki kapav pouri la, bizin abiy ar seki pa pouri zame; sa lekor ki kapav mor la, bizin anvlop li dan seki pa pou mor zame. Kan seki kapav pouri pou anvlope ar seki pa pouri zame, e letan seki kapav mor pou anvlope ar seki pa mor zame, lerla Lekritir pou realize kot finn dir: “Lamor finn anglouti dan laviktwar.” “Lamor, kot to laviktwar ete? Lamor, kot to pouvwar donn douler ete?” Douler lamor vinn depi pese ki ena pouvwar donn lamor, e pwisans pese sorti depi lalwa. Granmersi Bondie ki donn nou laviktwar atraver nou Segner Zezi Kris. Alor, mo bann frer ek ser, debout ferm. Pa les nanye destabiliz zot. Kontign progrese dan travay Lesegner, parski zot kone ki nanye pa perdi kan zot servi Lesegner. Aster-la nou vinn lor kolekt ki pe fer pou pep Bondie dan Zide. Zot bizin swiv instriksion ki mo finn donn bann Legliz dan Galasi. Premie zour lasemenn sakenn parmi zot bizin met dekote enn som larzan dapre so reveni. Fode pa atann mwa vini pou ramas sa kas-la. Letan mo vini lerla zot pou swazir dimounn ki pou al Zerizalem ar zot kontribision. Mo pou donn zot enn let pou prezant zot. Si li vo lapenn ki mo ale, lerla zot ava akonpagn mwa. Mo pou vizit zot letan mo fini pas Masedwann; mo oblize al Masedwann. Kikfwa mo pou pas enn letan kot zot, li mem posib mo pas liver net kot zot. Koumsa zot ava ed mwa kontign mo larout, la kot mo pou ale. Mo pa oule zis pas enn ti letan kot zot, mo swete li enn long letan, si Lesegner permet. Me mo pou res Efez ziska Lapantkot. Laport finn ouver an gran pou fer enn travay isi, mem si ena bann adverser. Si Timote vini, fer enn manier ki li pena okenn freyer, parski li pe travay parey kouma mwa dan travay Lesegner. Ki personn pa mepriz li. Okontrer ed li kontign so vwayaz dan lape pou li kapav retourn kot mwa. Mo pe atann li vini ansam avek bann frer e bann ser. Aster, konsernan nou frer Apolos. Mo finn ankouraz li fer zot enn vizit ansam avek lezot frer, me li pa interese vini aster-la. Kouma li gagn enn lokazion li pou vini. Res lor zot gard, ferm dan lafwa, gard kouraz ek lafors. Met lamour dan tou seki zot fer. Frer ek ser, zot kone ki Stefanas ek so fami ti bann premie konverti dan Akai. Zot finn devwe zotmem pou servi lepep Bondie. Mo sipliye zot, frer ek ser, obeir sa kalite dimounn-la e lezot seki travay ansam ar zot. Vizit Stefanas, Fortinatis ek Akais finn fer mo boner, parski sa ranplas zot labsans. Bann-la finn fer mo lespri trankil, kouma finn fer sa osi pou zot. Bizin konn apresie sa kalite dimounn-la. Bann Legliz dan provins Lazi salie zot. Akila ek Prisil ansam ar Legliz ki zwenn dan zot lakaz, avoy zot salitasion dan Lesegner. Tou bann frer-ser avoy zot bonzour. Anbras zot kamarad dan lamitie Lesegner. Mwa, Pol, mo pe ekrir sa bonzour-la avek mo prop lame. Si kikenn pa kontan Lesegner, ki li modi. Maranata. Vini Segner! Ki lagras Lesegner Zezi res ar zot. Mo avoy zot mo lamour dan lakominion avek Zezi Kris. Amen. Mwa Pol, enn Zapot Zezi Kris par volonte Bondie, ek Timote nou frer, Mo pe ekrir zot, Legliz ki dan Korint, ek tou bann krwayan ki partou dan Akai: ki Bondie nou Papa ek Zezi Kris nou Segner donn zot lagras ek lape. Anou loue Bondie ek Papa Zezi Kris, Papa ki ena mizerikord ek touletan konsol nou. Li rekonfort nou dan nou detres pou ki nou kapav rekonfort lezot ki pas par tou kalite problem, avek rekonfor ki limem li finn donn nou. Parey kouma nou ena enn gran par dan soufrans Lekris, dan mem fason nou gagn gran rekonfor atraver li. Si nou dan soufrans, li pou zot, pou ki zot gagn rekonfor ek delivrans; si nou trouv rekonfor, li pou zot, pou ki zot resevwar konsolasion letan zot siport avek pasians bann mem soufrans ki nou pe viv. Nou lespwar pou zot li tini ferm parski nou kone ki, parey kouma zot partaz nou soufrans, zot ousi partaz nou rekonfor. Nou oule ki zot kone, bann frer ek bann ser, ki kantite difikilte nou finn gagne dan provins Lazi. Nou finn akable plis ki nou lafors ti kapav tini, nou ti mem perdi tou lespwar pou res vivan. Nou ti ena linpresion ki finn kondann nou amor. Me sa finn arive pou ki nou pa depann lor noumem, me depann zis lor Bondie ki relev seki finn mor. Dan sa kalite danze lamor la ki li finn sap nou, e li pou kontigne delivre nou. Nou finn met nou lespwar dan li; nou sir ki li pou sap nou ankor. Ki zot kontign asiste nou par zot lapriyer. Bondie pou reponn lapriyer ki boukou dimounn finn fer pou nou, e li pou beni nou. Zot lapriyer pou vinn enn fason pou dir Bondie mersi. Rasinn nou fierte, se temwaniaz nou konsians: nou konportman dan lemond e avek zot li nouri par sinserite ek pirte ki Bondie donn nou. Nou pa gide par sazes imin me par lagras Bondie. Nou pa ekrir zot kiksoz ki pa kler; nou oule zot konpran bien seki zot lir. Mo espere ki zot pou konpran klerman seki ziska ler zot pe konpran an parti selman: ki zour Lesegner zot pou trouv fierte dan nou, parey kouma nou trouv fierte dan zot. Mo ti telman sir lor sa size-la, ki mo ti finn fer plan pou vizit zot pou ki zot gagn doub benediksion. Mo ti pou vizit zot lor mo larout pou al Masedwann, ek revizit zot letan mo sorti Masedwann. Lerla zot ti pou ed mwa pourswiv mo larout pou al Zide. Eski mo finn pran sa desizion-la san reflesi? Kan mo fer plan, eski li par motivasion egois? Eski mo balans ant “Wi” ek “Non” anmemtan? Bondie mo temwin: nou parol li pa ezitasion ant “Wi” ek “Non.” Zezi Kris, Garson Bondie, ki nou - momem, Silas ek Timote - nou finn anonse parmi zot, li pa finn dans-danse ant “Wi” ek “Non”; okontrer li touletan “Wi.” Li reprezant “Wi” ki konfirm tou bann promes Bondie. Pou sa rezon-la, atraver li nou dir nou “Amen” pou glorifie Bondie. Bondie limem ki finn fer nou vinn ferm ansam avek zot dan nou lavi avek Lekris. Bondie limem donn nou lonksion, li finn met enn sele lor nou pou montre ki nou so zanfan, li finn met Lespri Sin dan nou leker kouma enn garanti bann dibien ki rezerve pou nou. Mo pran Bondie kouma temwin, mo finn refiz retourn Korint pou pa donn zot tro boukou traka. Nou pa rod inpoz lor zot seki zot bizin krwar; nou kone ki zot ferm dan zot lafwa, me nou anvi kontribie pou zot boner. Alor mo finn deside ki mo pa pou retourn kot zot parski mo pa oule fer zot tris. Si mo fer zot tris, kisann-la pou donn mwa lazwa, sinon zotmem ki mo finn plonz dan latristes? Ala kifer mo finn ekrir zot sa manier-la, koumsa kan mo vini mo pa pou sibir tristes par dimounn ki ti bizin donn mwa lazwa. Mo ena lasirans ki si mo dan lazwa, zot tou pou dan lazwa. Mo finn ekrir zot avek boukou langwas, leker lour, ek boukou larm; pa pou fer zot tris, me pou ki zot kone ki kantite mo kontan zot. Si kikenn finn koz ditor, li pa finn fer sa ar mwa, me, san exazere, li finn fer sa ar zot tou. Pinision ki mazorite parmi zot finn donn sa dimounn-la, li ase. Aster-la, zot bizin pardonn li ek ankouraz li, pou ki li pa tom dan enn tristes ki fer li abandonn tou. Alor mo sipliye zot, fer li kone ki zot kontan li. Mo finn ekrir zot sa let-la pou teste sipa zot touletan pare pou obeir mo bann instriksion. Ninport kisann-la ki zot pardone, mwa osi mo pardonn li. Kan mo pardone, si ena kiksoz mem pou pardone, mo fer li pou zot devan Lekris. Nou fer sa pou ki Satan pa may nou dan lak. Nou kone ki li pe maniganse. Letan mo ti vinn Troas pou anons Bonn Nouvel Lekris mo ti dekouver ki Lesegner ti ouver enn laport pou mwa me mo lespri pa ti anpe parski mo pa ti trouv nou frer Tit. Alor mo finn dir orevwar bann kamarad Troas e mo finn al Masedwann. Nou loue Bondie parski li touletan antrenn nou dan kortez viktwar Lekris. Bondie servi nou pou fer konn Lekris partou kouma enn parfin ki fane partou. An-efe nou enn parfin ki Lekris ofer Bondie. Nou sa bon loder parfin la pou seki Bondie pe sove ek seki lor sime perdision. Pou sertin li enn loder lamor akoz zot pe mor, pou lezot ki pe viv li enn parfin lavi. Nou pa kouma boukou lezot ki fer trafik marsandiz ar Parol Bondie; okontrer parski Bondie finn avoy nou, nou koz avek sinserite dan so prezans kouma serviter Lekris. Eski ankor enn fwa nou pe flat noumem? Oubien eski nou bizin, kouma sertin lezot dimounn, enn let rekomandasion pou donn zot, oubien pran ar zot? Zotmem ki nou let, enn let ki finn ekrir lor nou leker pou ki tou dimounn kone ek lir. Li kler ki zot enn let ki sorti kot Lekris, ki transmet par nou. Li pa finn ekrir ar lank, me avek Lespri Bondie vivan; li pa grave lor bann tablet ros, me dan leker bann imin. Nou dir sa parski par Lekris nou ena sa lasirans-la devan Bondie. Pa nou ki ena konpetans pou fer sa travay-la, Bondie ki donn nou kapasite. Limem ki fer nou vinn enn minis konpetan pou servi nouvo lalians, ki pa depann lor lalwa ki ekrir me lor Lespri. Lalwa amenn lamor, me Lespri donn lavi. Si lalwa ki grave let par let lor enn tablet ros, finn vinn dan laglwar, e ki bann-la pa ti mem kapav get figir Moiz akoz li ti reflet sa laglwar-la, konbien plis travay Lespri vinn dan enn laglwar ki pli gran ankor. Si travay ki amenn kondanasion ti ena laglwar, konbien plis laglwar ena dan travay ki fer enn dimounn vinn zis. Nou mem kapav dir ki laglwar ki ti briye avan, li finn perdi so lekla devan laglwar ki aster-la prezan, enn laglwar telman siperyer. Si finn ena laglwar dan seki existe zis pou enn letan, konbien plis laglwar pou ena dan seki existe pou touzour! Akoz nou ena sa kalite lesperans-la ki nou ranpli ar lasirans. Nou pa kouma Moiz ki ti met enn vwal devan so figir pou ki bann Izraelit pa trouve ki laglwar-la pe disparet. Me zot lintelizans ti pe al dan tengn. Mem zordi letan zot lir Ansien Testaman sa vwal-la reste, parski selman par Lekris ki vwal-la tonbe. Wi, ziska zordi sak fwa ki zot lir liv Moiz enn vwal kouver zot leker. Me letan enn dimounn tourn ver Lesegner, vwal-la tonbe. Lesegner limem Lespri, ek la kot Lespri prezan, la ena liberte. Nou tou, ki nepli ena vwal lor nou figir nou reflet laglwar Lesegner. Lespri pe transform nou pou ki nou resanble Lesegner, avek enn laglwar ki kontign ogmante plis ankor. Sa, li vinn depi Lespri Lesegner. Parski par mizerikord Bondie, nou ena enn minister pou akonpli, nou pa kapav perdi kouraz. Nou finn renons bann plan ki fer dan kasiet ek dan laont; nou pena aksion ki desevwar lezot e nou pa falsifie Parol Bondie. Okontrer, nou fer konn laverite dan enn fason kler devan konsians tou dimounn dan prezans Bondie. E mem si nou Bonn Nouvel vwale, li vwale pou bann ki dan perdision. Zot pa krwar parski bondie lemal dan sa lemond-la finn fer zot lespri aveg pou ki zot pa trouv lalimier Bonn Nouvel ki revel laglwar Lekris, ki montre nou kouma Bondie ete exakteman. Dan nou predikasion, nou pa anons noumem, me nou proklam Zezi Kris kouma Segner, ek noumem nou zot serviter akoz Zezi. Bondie ki ti dir, “Omilie lobskirite lalimier pou briye,” limem ki fer so lalimier briye dan nou leker pou donn nou konesans laglwar Bondie ki reyonn lor figir Lekris. Sa trezor spiritiel la nou pe sarye li dan nou, ki kouma bann po later. Koumsa li kler ki sa pwisans extraordiner la li sorti kot Bondie, pa nou ki ena sa. Boukou afliksion tom lor nou, me nou pa kraze; ena bel-bel traka, me nou pa dezespere; ena persekision, me nou pa abandone; zet nou parter, me nou pa konn destriksion. Dan nou lekor mortel, nou touletan sarye lamor Zezi pou ki nou lekor revel osi lavi Zezi. An-efe, mem si nou vivan, nou touletan dan danze lamor akoz Zezi, pou ki so lavi revele dan nou lexistans mortel. Savedir lamor pe fer so travay dan nou, me lavi pe fer so travay dan zot. Dan Lekritir finn ekrir, “Mo finn krwar, akoz sa mo finn koze.” Avek sa mem lespri lafwa la, nou osi nou finn krwar ek nou pe koze, parski nou kone ki Bondie ki finn resisit Lesegner Zezi pou resisit nou osi avek Zezi, e pou amenn nou, ansam ar zot, dan so prezans. Tousala li pou zot benefis. E letan lagras Bondie tous plis dimounn ankor, sa pou ogmant lapriyer rekonesans ki exprim laglwar Bondie. Akoz sa nou pa perdi kouraz. Mem si nou kote fizik pe deteryore, nou kote spiritiel pe renouvle zour apre zour. Bann ti traka tanporer ki ariv nou pe prepar nou pou enn laglwar eternel ki extraordiner. Nou pa port nou latansion lor seki vizib, me lor seki invizib. Seki vizib li pou enn tan, seki invizib li eternel. Nou kone ki sa latant dan ki nou pe viv la, setadir, nou lekor letan nou lor later, si li konn destriksion, Bondie rezerv enn lakaz dan lesiel, enn lakaz ki pa fer ar lame imin. Aster-la nou soupire, telman nou ena dezir pou rekouver nou ar lakaz ki sorti dan lesiel. Koumsa nou pou retrouv nou abiye, e nou pa pou touni. Osi lontan ki nou res dan sa latant ki nou ena lor later-la, nou pou akable, parski nou pa oule res san linz lor nou, me nou anvi met enn lot linz lor nou afin ki seki mortel li anglouti par lavi. Bondie limem finn prepar nou pou sa, e finn donn nou so Lespri kouma enn garanti pou seki li rezerve pou nou. Alors nou touletan ena konfians; e nou kone ki tanki nou dan sa lekor-la, nou lwin ar Lesegner. Nou viv par lafwa, nou pa viv par seki lizie trouve. Wi, nou ena plin kouraz e nou prefer kit lanvlop dan ki nou ete pou al viv ansam ar Lesegner. Ki nou dan sa lekor-la ou andeor li, nou anvi fer nou Segner plezir. Sa nou pli gran dezir sa. Nou tou pou bizin dibout devan zizman Lekris, pou ki sakenn gagn so rekonpans dapre seki li finn fer letan li ti dan sa lekor-la, ki li bon kiksoz, ki li move kiksoz. Parski nou bien kone ki savedir ena reverans pou Lesegner, alor nou sey konvink lezot. Bondie bien konn nou, e mo espere ki dan zot leker zot osi zot konn mwa. Nou pa pe rekomann noumem ar zot ankor enn fwa. Nou zis anvi donn zot lokazion santi enn fierte pou nou, pou ki zot ena enn repons pou donn bann ki met plis linportans lor laparans deor ki lor seki ena dan leker. Si nou latet pa bon, pou Bondie ki nou koumsa; si nou lespri bien korek, li pou zot ki nou koumsa. An-efe, lamour Lekris kontrol nou, parski nou ena lasirans ki ena enn sel ki finn mor pou tou lezot; savedir ki tou lezot ena enn par dan so lamor. Li finn mor pou tou dimounn, afin ki seki viv, li nepli viv pou limem me li viv pou Sa-Enn ki finn mor pou zot-la, e ki finn resisite pou zot. Alor depi aster nou nepli konsider okenn dimounn dapre manier imin. Mem si avan nou ti konsider Lekris dan enn manier imin, nou pa get li koumsa aster-la. Si kikenn ini ar Lekris, li vinn enn nouvo kreasion; seki vie finn disparet, seki nouvo ki la. Tousala travay Bondie, ki rekonsilie nou ar limem par Lekris, e li finn donn nou sa minister rekonsiliasion la. Par Lekris, Bondie finn azir pou rekonsilie tou bann imin ar li, san pran konsiderasion zot bann fot, e li finn donn nou responsabilite pou al anons mesaz rekonsiliasion. Alor dan nom Lekris, nou vinn bann anbasader, koumadir Bondie pe fer so lapel atraver nou; dan nom Lekris nou sipliye zot: les zot rekonsilie avek Bondie. Lekris pa ti ena pese, me Bondie finn met nou pese lor li, pou ki letan nou ini ansam ar li, nou rant dan enn lavi akseptab devan Bondie. Antan ki bann travayer ki kolabor ar Bondie, nou sipliy zot: pa negliz lagras ki zot finn resevwar ar li. Bondie dir, “Ler moman favorab mo finn ekout twa, kan zour arive pou sov twa, mo finn vinn sekour twa.” Ekoute, aster-la, samem moman pou resevwar faver Bondie; zordi, zour liberasion, kot Bondie sov nou. Nou pa pe met okenn obstak pou kree skandal lor sime personn, pou ki nou minister li san repros. Okontrer, nou prezant noumem dan tou sirkonstans kouma bann serviter Bondie; nou siport bann soufrans, detres, angwas, bate, prizon, rayot, fatig travay, mank somey, res san manze. Nou montre noumem kouma serviter Bondie par lapirte, konesans, pasians, labonte, par Lespri Sin, lamour vre, par parol laverite, e par pwisans Bondie; avek zarm lazistis dan nou lame drwat e dan nou lame gos. Nou gagn laglwar e nou gagn dezoner, nou gagn insilt e nou gagn louanz. Tret nou kouma manter, pourtan nou dir laverite; tret nou etranze, mem ki bien konn nou; tret nou kouma bann ki pe mor, pourtan nou bien vivan; nou soufer boukou pinision, me nou pa mor; mem dan sagrin nou touletan zwaye; nou pov, me nou anrisi boukou dimounn; li paret ki nou pena nanye, me an-verite nou posed tou kiksoz! Nou finn koz fran ar zot, bann kamarad Korintien, nou finn ouver nou leker an gran ar zot. Pa nou ki finn ferm nou leker ki ena boukou lafeksion pou zot; zot ki finn ferm zot leker ar nou. Mo koz ar zot kouma mo bann zanfan: an retour ouver zot leker ar nou zot ousi. Pa al asosie zot avek bann non-krwayan. Kouma seki drwat kapav fer partner ar seki move? Oubien, kouma lalimier kapav asosie li ar teneb? Kouma Lekris kapav tom dakor ar diab? Ki relasion ena ant enn krwayan ek enn non-krwayan? Ki lakor ena ant Tanp Bondie ek bann idol? Parski noumem ki Tanp Bondie vivan, kouma Bondie finn dir, “Mo pou res parmi mo pep, mo pou mars avek zot, Mo pou zot Bondie, e zot pou mo pep.” Lesegner dir: “Separ zot ar sa bann-la, res alekar, pa tous nanye ki inpir, e mo pou akeyir zot. Momem, mo pou enn Papa pou zot, e zot, zot pou mo garson, zot pou mo tifi.” Mo bann kamarad, tou sa bann promes-la valab pou nou. Akoz sa nou bizin pirifie noumem, separ nou avek tou seki kapav sali nou lekor ek nou lam; e anou viv enn lavi konpletman sin, dan respe pou Bondie. Fer plas dan zot leker pou nou. Nou pa finn fer ditor personn, nou pa finn koronp personn, nou pa finn explwat personn. Mo pa pe dir sa pou kondann zot, parski mo finn fini dir depi avan: ki zot dan nou leker, nou ansam pou lavi-lamor. Mo ena gran konfians dan zot, mo get zot avek gran fierte. Dan nou detres, mo ankor ena boukou lankourazman ek mo ena lazwa. Ofet, letan nou ti ariv Masedwann nou pa ti konn okenn repo, nou ti aflize; otour nou ti ena konfli, andan nou leker ti ena lafreyer. Me Bondie ki konsol bann ki abat, ti konsol nou par vizit Tit, me pa selman par so larive, me osi par konsolasion ki zot ti donn li. Li ti rakont nou kouma zot anvi trouv mwa, komie zot tris, komie zot pare pou defann mwa; akoz sa mo lazwa li vremem gran. Mem si mo finn rann zot tris par let ki mo finn ekrir, mo pa regrete ki mo finn ekrir li. Ofet, wi, mo ti regrete letan mo ti rann mwa kont ki sa ti finn fer zot tris, pou enn letan. Aster-la mo dan lazwa, pa akoz mo finn rann zot tris, me parski tristes-la finn fer zot repanti. Bondie finn servi sa tristes-la, koumsa nou pa finn koz zot okenn ditor. Tristes ki Bondie servi li amenn enn sanzman leker ki sov nou e ki pena okenn regre; tristes dapre lemond li amenn lamor. Get enn kou rezilta tristes selon Bondie: wi, gete ki kalite bonn volonte zot ena, komie zot prese pou defann zotmem, ki indignasion zot ena, lafreyer osi, dezir pou retrouv mwa, zel ki zot ena, lanvi pou pini lemal. Zot finn prouve ki zot inosan dan sa zafer-la. Si mo finn ekrir zot, li pa akoz sa dimounn ki finn fer ditor-la, ni akoz dimounn ki finn sibir lofans-la. Me pou ki zot rann zot kont devouman ki zot ena pou nou devan Bondie. Ala seki finn ankouraz nou. Pa selman nou ankouraze, nou ankor dan plis boner letan nou trouve komie Tit ti dan lazwa lor manier zot ti konsol so lespri. Mo finn konplimant zot avek fierte ar Tit, e zot pa finn fer mwa perdi pwin. Me parey kouma tou kiksoz mo finn dir zot, li vre, dan mem fason eloz ki nou finn fer lor zot ar Tit, li vre. So lafeksion pou zot pli gran ankor letan li rapel ki zot tou ti obeisan, kouma zot ti akeyir li avek respe, avek imilite. Mo dan lazwa parski mo kapav kont lor zot dan tou kiksoz. Bann frer ek bann ser, nou anvi ki zot kone kouma lagras Bondie finn manifeste dan bann Legliz Masedwann. Zot finn pas par bann leprev bien sever, me zot lazwa telman gran ki, mem dan zot lavi pov, zot finn montre enn gran zenerozite. Mo kapav rasir zot ki bann-la finn donn otan ki zot kapav, e mem plis ki zot kapav. Bann-la finn insiste pou gagn privilez servi pep Bondie. Li ti plis ki nou ti espere. Dabor bann-la finn donn zotmem Lesegner, apre par volonte Bondie zot finn donn nou zotmem. Alor nou finn sipliy Tit ki ti koumans sa travay-la parmi zot, ki li kontign ed zot terminn zot aksion zenere. Zot ena plin lafwa, don laparol, konesans, enn zel ki pena limit ek lamour ki nou finn donn zot; alor, nou atann ki zot montre enn gran zenerozite pou lokazion prezan. Mo pa pe donn okenn lord la. Si mo pe donn lexanp lezot, mo pe zis donn zot lokazion prouve ki zot lamour li vre. Zot konn lagras Zezi Kris, mem si li ti ris, li finn fer li pov pou zot, pou ki par so povrete zot kapav vinn ris. Mo donn zot mo lopinion lor sa zafer-la: li meyer ki zot terminn seki zot finn koumanse lane pase. Zot pa ti selman premie pou azir, me zot ti premie pou dezir fer sa aksion-la. Aster-la, fini travay-la. Montre volonte pou terminn li, parey kouma zot ti ena pou koumans li. Fer li avek mwayin ki zot ena. Si zot ena bonn volonte, Bondie aksepte don ki zot done dapre seki zot ena, pa dapre seki zot pena. Mo pa pe rod met zot dan difikilte pou ki lezot soulaze, me pou etablir egalite. Aster-la zot dan labondans e zot kapav ed bann ki pena; enn lot kou, bann ki dan labondans pou ed zot kan zot pena. Koumsa mem pou ena egalite. Kouma Lekritir dir, “Seki finn ramas boukou, pa finn ena tro boukou, e seki finn ramas tigit, pa finn ena tro tigit.” Nou rann gras Bondie ki finn met dan leker Tit mem lanvi pou ed zot. Pa selman li finn bien akeyir nou reket; li telman kontan, li finn pran linisiativ pou vinn vizit zot. Nou finn avoy avek li sa frer ki tou Legliz ena enn gran respe pou travay ki li pe fer pou proklam Bonn Nouvel. Pli meyer ankor, bann Legliz finn swazir li pou akonpagn nou dan sa mouvman zenerozite la; sa enn servis ki nou fer pou laglwar Bondie e pou montre nou bann bon lintansion. Nou anvi evit tou kritik lor kouma nou pe administre sa don zenere ki finn ramase la. Nou oule fer tou kiksoz dan enn fason korek, pa zis devan Bondie, me osi devan tou dimounn. Alor nou pe avoy nou frer ar lezot delege. Souvan nou finn gagn lokazion teste li, e li finn touletan montre li ranpli ar zel, sirtou aster-la parski li ena enn gran konfians dan zot. Konsernan Tit, li mo konpagnon e li travay ansam ar mwa pou ed zot; bann lezot frer ki pe akonpagn li, zot reprezant bann Legliz e zot pe azir pou laglwar Lekris. Montre bann frer-la zot lamour, koumsa bann Legliz pou trouve ki nou ena rezon koz avek fierte lor zot. Li pa vremem neseser ki mo ekrir zot lor size led ki bizin avoy bann krwayan ki dan Zide. Mo konn zot bon lintansion, e avek fierte mo finn dir bann Masedonien ki Akai finn pare depi lane pase, ek sa finn ankouraz bann-la pou azir. Mo pe avoy bann frer ek bann ser kot zot, pou ki sa fierte ki mo ena pou zot la, li pa bann parol dan vid. Kouma mo finn dir, zot vremem finn pare. Selman, si bann Masedonien vinn avek mwa e zot dekouver ki nanye pa finn pare, nou pou vremem onte; san mansione komie zot, zot pou dan laont, telman nou ti ena lasirans letan nou ti koze. Mo panse li pli bon demann bann frer ek bann ser-la vizit zot avan mwa, pou okip sa don zenere ki zot finn promet la. Koumsa li pou finn fini pare letan mo vini e sa pou prouve ki zot done avek zenerozite e non akontreker. Mazinn sa bien: seki plant tigit pou rekolte tigit, seki plant boukou pou rekolte boukou. Sakenn bizin donn dapre seki li finn deside dan so leker, san regrete ek san presion lor li. Bondie kontan dimounn ki donn avek lazwa. Bondie ena pouvwar donn twa plis ki bizin, pou ki touletan to ena seki neseser, ek anplis pou to partaz dan bann bon aksion. Kouma Lekritir dir, “Li donn bann pov avek abondans, so bonker res gran pou touzour.” Bondie, ki fourni semans pou planter ek dipin pou manze, pou fourni zot avek semans, e pou miltipliye li pou ki zot zenerozite li donn boukou fri. Li pou touletan fer zot ena ase larises pou ki zot res zenere; koumsa atraver nou, enn kantite dimounn pou remersie Bondie pou bann don ki zot finn done. Sa kontribision-la, li pa zis konble seki pep Bondie pe manke, me li fer enn debordman aksiondegras pou dir Bondie mersi. Akoz prev ki zot montre par zot servis, enn kantite pou glorifie Bondie pou zot fidelite anver Bonn Nouvel Lekris, zot gran zenerozite pou partaz zot dibien avek bann-la, e avek tou lezot ankor. Bann-la pou priye pou zot avek enn gran lafeksion akoz lagras extraordiner ki Bondie akord zot. Anou loue Bondie pou so don inkonparab! Par douser ek bonte Lekris, mwa, Pol mo pe fer enn lapel ar zot; mwa ki dimounn dir ki mo “timid” kan mo ar zot, me ki ena “lodas” kan mo lwin. Mo sipliye zot, pa les mwa montre mo lodas kan mo vinn kot zot, parski mo pou montre fermte anver bann ki pretann ki nou azir par motivasion imin. Li vre ki nou imin, me li pa vre ki nou konbat dapre manier imin. Bann zarm ki nou servi dan nou konba, li pa sorti kot imin, me li bann zarm Bondie ki nou servi pou detrir bann fortres. Nou detrir bann argiman ki fos, nou ranvers bann pwisans ki dres avek lorgey kont konesans Bondie, e nou pran tou panse prizonie pou fer zot obeir Lekris. Enn fwa ki zot prouve ki zot obeisans li konple, nou pou pare pou pini tou dezobeisans. Pa get laparans, get seki devan zot lizie. Si kikenn konsider ki li apartenir ar Lekris, ki li rann limem kont ki nou osi, otan ki li, nou apartenir ar Lekris. Mo pa pou onte, mem si mo bizin vant enn tigit tro sa lotorite ki Lesegner finn donn nou pou edifie zot e non pa pou detrir zot. Mo pa oule zot krwar ki mo pe rod fer zot per par mo bann let. Dimounn dir, “Let Pol bien dir ek sever; me kan li parmi nou li feb ek so koze bat dan vid.” Ki sa bann dimounn-la note ki seki nou dir dan let letan nou lwin, samem pou nou aksion letan nou prezan parmi zot. Nou pena toupe pou klas noumem ou konpar noumem ar sertin ki fer zot fanor. Zot bet! Zot etablir zot prop kriter pou fer konparezon ek zizman lor zotmem. Nou pena pou fer fezer e fer krwar nou bann terib, me nou pou res dan limit ki Bondie finn etablir, dan travay ki li finn permet nou fer pou ki nou kapav vinn ziska kot zot. Letan nou ti vinn kot zot, nou pa ti pe al andeor nou limit. Nou ti bann premie pou vinn ziska kot zot pou amenn Bonn Nouvel Zezi Kris. Nou pa al andeor limit pou deklar travay ki lezot finn fer. Okontrer, nou espere ki zot lafwa pou ogmante e ki nou pou kapav akonplir enn travay pli gran ankor, me touzour dan limit ki Bondie finn fixe. Lerla nou kapav amenn Bonn Nouvel dan bann rezion pli lwin ki zot landrwa, san ki nou bizin al deklar travay ki lezot finn fer dan zot prop teritwar. “Si kikenn anvi vremem fer vantar, ki li montre laglwar Bondie.” Pa dimounn ki ena bel lopinion lor limem ki gagn rekonesans, me dimounn ki Lesegner rekomande. Mo ti pou swete ki zot kapav siport mo ti fouka. Fer sa pou mwa! Mo ena zalouzi pou zot, otan ki Bondie ena. Mo ti finn promet pou marye zot ar enn sel mari, Lekris, e mo dezir prezant zot ar li kouma enn zennfi vierz. Mo bien per ki zot panse pou gate, parey kouma Ev ti les li egare par riz serpan, e ki sa antrenn zot lwin e zot perdi zot devosion sinp pou Lekris. An-efe, zot kapav toler ninport kisann-la ki vinn pres enn Zezi diferan ar seki nou finn anons zot; zot pare pou resevwar enn lot lespri e enn lot Bonn Nouvel ki diferan ar Lespri ek Bonn Nouvel ki nou finn anons zot. Mo panse ki mo pa inferyer dan okenn fason ar zot “siper-zapot.” Li posib ki mo pena sa don pou fer gran koze an piblik, me mo ena konesans. Nou finn montre zot sa klerman touletan e dan tou kondision. Eski mo ti ena tor letan mo ti abes mwa pou ki zot gagn linportans, parski mo finn anons zot Bonn Nouvel Bondie gratis? Pandan ki mo ti pe travay parmi zot, bann lezot Legliz ki ti pe soutenir mwa. Dan enn fason koze, koumadir mo ti pe kokin bann-la pou ed zot isi. Pandan ki mo ti kot zot e mo ti mank kiksoz, mo pa ti vinn enn fardo pou zot, parski bann frer ek bann ser ki sorti Masedwann ti donn mwa tou seki mo ti bizin. Mo finn fer ansort ki mo pa enn fardo pou zot, e mo pou kontign koumsa dan lavenir. Par laverite Lekris ki dan mwa, mo kapav dir ki personn dan rezion Akai pa pou kapav aras sa fierte ki mo ena pou zot la. Kifer? Parski mo pa kontan zot? Bondie ki kone! Mo pou kontign fer seki mo pe fer pou anpes lezot “zapot” gagn enn pretex pou deklare ki zot parey kouma nou. Sa bann-la pa bann vre zapot; zot bann foser ki finn degize kouma Zapot Lekris. Nou pa etone! Satan limem degize kouma anz lalimier. Li pa etonan ki so bann serviter degiz zotmem pou paret kouma serviter lazistis. Zot pou pey seki zot merite. Mo repete, ki personn pa pran mwa pou enn fouka. Me si zot fer li, aksepte mwa kouma zot ti pou aksepte enn fou, pou ki mwa osi mo tap mo tanbour enn tigit. Dan sa zafer vantardiz la, mo pa pe koz kouma Lesegner ti pou swete, me kouma enn fou. Me parski ena boukou lezot dimounn pe fer fezer lor zot kalite pou bann rezon imin, mwa osi mo fer parey. Zot ki saz, zot aksepte seki fou. Ofet, zot siport ninport ki, ki tret zot kouma esklav, ki explwat zot, ki depouy zot, ki fer fezer, ki klak zot dan figir. Mo onte pou dir sa, me nou, nou finn tro timid pou azir koumsa! Si kikenn oze fer so vantar, e la mo pe koz kouma enn fou, mwa osi mo pou oze fer sa. Bann-la Ebre? Mwa osi. Izraelit? Mwa osi. Desandan Abraam? Mwa osi. Bann-la serviter Lekris? Mo pou dir enn foli la: mo meyer serviter ki zot. Mo finn travay plis ki zot; mo finn fer plis prizon ki zot; mo finn plis gagn bate, e mo finn pas pre ar lamor plis ki zot. Sink fwa bann Zwif finn fwet mwa trant-nef kout; trwa fwa bann Romin finn bat mwa kout dibwa; enn fwa finn lapid mwa; trwa fwa mo finn fer nofraz; mo finn pas enn zour ek enn nwit dan lamer. Dan mo bann vwayaz mo finn pas par danze larivier deborde, danze bann brigan, danze mo prop pep, ek bann non-Zwif, danze dan lavil, danze dan dezer, danze parmi bann fos kamarad. Mo finn konn travo penib ek bann leprev bien dir; souvan mo finn pas lanwit san somey; mo finn pas par lafin, par laswaf; souvan mo pa finn ena manze ditou, dan freser, san linz. Apar tou leres ki mo pa pou mansione, ena osi presion lor mwa toulezour akoz traka Legliz. Si kikenn feb, mo santi mwa feb osi; si kikenn tonbe, mo santi douler-la. Si mo bizin fer vantar, mo pou vant mo febles. Bondie ki Papa Lesegner Zezi, ki beni pou leternite, kone ki mo pa pe koz manti. Letan mo ti Damas, gouverner ki ti anba lerwa Aretas, ti plas bann gard devan laport lavil pou aret mwa. Me bann dimounn ti desann mwa dan enn panie par enn trou dan miray, e mo finn sape. Mo oblize fer vantar, mem si sa pa bon. Aster-la mo pou koz lor vizion ek revelasion ki Lesegner finn donn mwa. Mo konn enn Kretien ki, ena katorz an, ti trouv li mont ziska trwaziem lesiel. Mo pa kone si pa li ti vremem mont lao dan so lekor, oubien enn vizion selman sa, Bondie tousel kone. Mo kone ki sa zom-la, ki li dan so lekor ou andeor so lekor, nek Bondie ki kone, sa zom-la ti mont ziska paradi e laba li ti tann bann kiksoz ki pa kapav exprime, e ki okenn imin pa kapav repete. Pou sa zom-la mo kapav fer mo vantar, me pou mwa mo met mo vantardiz zis dan mo febles. Si mo anvi fer mo vantar, mo pa ti pou enn fou, parski mo ti pou dir laverite. Me mo evit tousala pou ki personn pa gagn enn lopinion siperyer lor mwa dapre seki li trouv mwa fer ou tann mwa dir. Me pou ki mo pa gonfle ar lorgey akoz sa bann revelasion extraordiner ki mo finn resevwar la, mo finn resevwar enn soufrans dan mo laser, enn mesaze Satan ki bat mwa, ki anpes mwa gonfle ar lorgey. Trwa fwa mo finn priye Lesegner lor sa size-la, pou tir sa soufrans-la. Li finn dir mwa, “Mo lagras sifizan pou twa, mo pwisans pou manifeste dan to febles.” Alor mo ere pou vant mo febles, pou ki pwisans Lekris repoz lor mwa. Akoz sa, pou Lekris, mo satisfe avek febles, insilt, detres, persekision ek langwas. Kan mo feb, lerla mem ki mo for. Mo azir kouma enn fou! Zotmem ki fors mwa vinn koumsa. Ofet, zot ki ti bizin defann mwa, parski mem si mo enn nanye ditou, mo pa inferyer ar zot bann siper-zapot. Bann sign ki prouve ki mo enn Zapot, finn realize parmi zot, avek enn pasians parfe: bann mirak, bann mervey e bann aksion pwisan. Ki manier zot pa finn gagn seki lezot Legliz finn gagne? Akoz mo finn refiz explwat zot? Si koumsa, pardonn mwa sa erer-la! Mo pare pou vinn vizit zot pou trwaziem fwa. Mo pa pou enn fardo lor zot, parski mo pa pe rod zot dibien, me zotmem. Pa bann zanfan ki ramas larzan pou zot paran, me paran ki pran swin zanfan. Mwa mo kote, mo dispoze depans tou e depans momem pou zot. Eski zot pou mwins kontan mwa, si mo kontan zot ankor plis? Zot dakor ki mo pa finn enn fardo pou zot. Me kikenn kapav dir, mo fourb e mo finn piez zot par riz. Parmi bann dimounn ki mo finn avoy zot, eski ena enn ladan ki mo finn servi pou explwat zot? Mo ti sipliy Tit pou al kot zot, e mo ti avoy frer-la ar li. Eski Tit ti explwat zot? Eski nou pa finn konport nou avek mem lintansion ek mem fason azir? Tousa letan-la zot ti pe panse ki nou pe defann noumem devan zot? A non! Nou pe koz kouma Lekris ti pou anvi nou koze devan Bondie. Tousala, mo bann kamarad, li pou ki zot progrese dan zot lafwa. Mo per ki letan mo arive, mo pa trouv zot kouma mo swete trouv zot, e ki zot osi zot pa trouv mwa kouma zot ti anvi mo ete. Mo per ki mo trouv lager, zalouzi, lakoler, rivalite, insilt, komeraz, lorgey ek dezord. Mo per ki pandan sa prosin vizit-la, Bondie imilie mwa dan zot prezans, e ki mo pou plore lor boukou parmi zot ki pe kontigne dan vie pese lontan; zot pankor repanti zot inpirte, imoralite ek debos ki zot ti pratike. Sa pou fer trwaziem fwa ki mo vinn vizit zot. “Ninport ki akizasion bizin gagn sipor de ou trwa temwin pou kapav regle.” Mo ena enn avertisman pou donn seki finn fer pese dan lepase, e osi ar tou lezot; mo ti deza dir sa dan mo deziem vizit, me mo pe dir li ankor pandan mo labsans: prosenn fwa ki mo vinn kot zot, mo pa pou les personn sape. Zot pou gagn tou prev neseser pou prouve ki Lekris koz par mwa. Lekris pa feb pou zot, me li manifeste so pwisans parmi zot. Letan ti krisifie li, li ti dan febles, me aster-la li vivan par pwisans Bondie. Dan Lekris nou osi nou feb, me par pwisans Bondie nou pou vivan avek li pou zot. Examinn zotmem pou verifie si zot pe viv dan lafwa. Teste zotmem. Eski zot pa realize ki Lekris dan zot? Amwin ki lexame ki zot fer montre ki zot finn fel. Mo espere ki zot dekouver ki nou finn pas nou leprev, nou. Nou priye Bondie pou ki zot pa fer nanye mal, pa pou ki sa montre nou sikse, me montre ki zot pratik seki bien, mem si li paret ki nou pa finn pas leprev. Nou pa kapav fer nanye kont laverite Bondie, nou nek bizin azir pou li. Nou dan lazwa kan nou, nou feb, me zot, zot for. Dan nou lapriyer, nou demann ki zot vinn parfe. Akoz sa mo ekrir tousala kouma mo lwin ar zot, pou ki letan mo vini mo pa bizin pran bann aksion sever par lotorite ki Lesegner finn donn mwa pou edifie, e non pou detrir. Finalman, bann frer ek bann ser, viv dan lazwa, fer zefor pou vinn parfe, ankouraz zot kamarad, res dakor ant zot, viv dan lape, e Bondie ki lamour ek lape pou avek zot. Anbras zot kamarad dan lamitie Lesegner. Tou bann krwayan avoy zot salitasion. Ki lagras Lesegner Zezi Kris, lamour Bondie e lakominion Lespri Sin res avek zot. Mwa Pol, zapot, pa par volonte bann imin oubien lotorite zom, me par Zezi Kris ek Bondie Papa ki finn resisit li parmi bann mor, ek tou bann frer e ser ki avek mwa, Mo avoy sa let-la bann legliz dan Galasi. Ki lagras ek lape ki sorti kot Bondie Papa ek Lesegner Zezi Kris, res ar zot. Zezi Kris, finn donn limem pou nou pese e li finn delivre nou dan sa lemond move la dapre volonte Bondie nou Papa. Laglwar pou li pou touzour ek touzour. Amen. Sa etonn mwa avek ki vites zot finn tourn zot ledo ar Bondie ki ti apel zot par lagras Lekris, pou zot al aksepte enn lot Bonn Nouvel. Sa pa vedir ki ena enn lot Bonn Nouvel, me plito ena sertin dimounn ki pe trouble zot ek anvi sanz Bonn Nouvel Zezi Kris. Me, si noumem oubien enn anz sorti dan lesiel, vinn anons zot enn Bonn Nouvel kontrer avek seki nou, nou finn anonse, li pou modi pou sa! Nou finn deza dir, e nou pe redir li ankor: si kikenn anons enn Bonn Nouvel diferan ar seki zot finn resevwar, ki li modi! Aster-la, eski mo pe rod faver bann imin oubien faver Bondie? Eski mo pe sey fer plezir bann imin? Si mo ti ankor pe fer plezir bann zom, alor mo pa ti pou enn serviter Zezi Kris. Les mo dir zot, mo bann frer ek ser, sa Bonn Nouvel ki mo finn anons zot-la, li pa sorti kot bann imin sa; e mo pa finn gagn li depi enn zom, e personn pa finn ansegn mwa sa, me li sorti atraver enn revelasion Zezi Kris. Zot finn tann koz mo ansien lavi kan mo ti ankor atase avek larelizion Zwif, kouma mo ti persekit legliz Bondie e mo ti rod detrir li. Mo ti devans tou mo bann frer Zwif ki ti dan mo laz dan pratik larelizion, sitan mo ti devwe pou tradision mo bann anset. Me Bondie dan so lagras finn swazir mwa avan mem ki mo finn ne e li finn apel mwa pou servi li. Kan li ti deside pou revel mwa so Garson, pou ki mo kapav anons li ar bann payin, mo pa ti al kot personn pou demann konsey, mo mem pa finn mont Zerizalem kot bann ki ti zapot avan mwa, me mo ti al dan Larabi, apre mo ti retourn dan Damas. Plitar, apre trwa-z-an mo ti al Zerizalem pou vizit Pier e mo ti res avek li pou kinz zour. Me mo pa ti trouv okenn lezot zapot apar Zak, frer Lesegner. Seki mo pe ekrir zot la, Bondie kone ki mo pa pe koz manti. Apre sa, mo finn al dan bann rezion Lasiri ek Silisi. Okenn manb legliz Zezi dan Lazide pa ti ankor konn mwa personelman lerla; zot finn zis tann dir, “Sa zom ki avan ti pe persekit nou, aster-la li pe anons sa mem lafwa ki li ti pe sey detrir la.” E zot ti glorifie Bondie akoz mwa. Katorz-an apre, mo ti mont Zerizalem avek Barnabas, mo ti amenn Tit osi avek mwa. Mo finn monte apre enn revelasion ki mo finn gagne. Mo finn prezant bann-la Bonn Nouvel ki mo anonse parmi bann non-Zwif. Mo ti fer sa dan enn renion prive ar bann dirizan pli inportan. Mo pa ti anvi ki travay ki mo finn fer, ek seki mo pe fer aster-la, zot initil e pa servi nanye. Tit ti avek mwa. Mem si li enn Grek, zot pa ti fors li pou fer sirkonsizion, malgre ki enn bann fos frer ti glis anba-anba pou espionn liberte ki nou ena dan Zezi Kris e pou anprizonn nou dan lalwa. Nou pa finn soumet nou ditou ar bann-la, pou ki nou prezerv laverite Bonn Nouvel pou zot, nou frer ek ser. Me pou seki konsern dimounn ki paret bann gran dirizan, seki zot ete pa fer okenn diferans pou mwa, Bondie pa ziz dapre laparans, sa bann dimounn-la pa finn inpoz nanye nouvo ar Bonn Nouvel ki mo anonse. Okontrer, zot ti trouve ki Bondie finn konfie mwa Bonn Nouvel pou anons bann non-Zwif parey kouma Pier pou bann Zwif. Bondie, par so pwisans inn fer mwa enn zapot pou bann payin, parey kouma Pier ti avoye kot bann Zwif. Letan Zak, Pier ek Zan, bann gran pilie legliz, rekonet lagras ki Bondie finn donn mwa, zot ser nou lame, Barnabas ek momem, kouma enn sign lakorite. Nou tom dakor ki nou al kot bann non-Zwif e zot kot bann Zwif. Zot ti dimann nou enn sel kiksoz, ki nou mazinn bann pov; e sa mo ti touletan vremem anvi fer. Me ler Pier retourn Antios, mo ti opoz li an piblik parski li ti dan lerer. Ofet avan ki Zak ti avoy sertin dimounn, Pier ti pe manz avek bann payin; me ler bann-la vini, li retir li, li ti per bann ki partizan sirkonsizion. Bann lezot Zwif rant dan so zwe ipokrit, e Barnabas limem ti antrene dan sa doub zwe-la. Me kan mo ti remarke ki zot pa pe konport zot dapre Bonn Nouvel, mo dir Pier devan zot tou, “Si twa, enn Zwif, to viv kouma enn payin e pa kouma enn Zwif, kouma to kapav fors bann payin pou viv kouma Zwif?” Nou, nou bann Zwif par nesans e alor nou lorizinn li pa sorti kot lot nasion, bann swadizan peser. Pourtan nou kone ki enn dimounn pa zistifie par pratik lalwa me par so lafwa dan Zezi Kris. Nou osi, nou finn krwar dan Zezi Kris, pou ki nou zistifie par Zezi Kris, e pa par pratik lalwa, parski personn pa zistifie parski li pratik lalwa. Me si dan nou zefor pou rod zistifikasion par Kris, nou retrouv noumem peser, eski savedir ki Kris pe servi lakoz nou pese? Biensir ki non! Me si mo rebatir seki mo finn detrir momem, savedir mo rann momem enn transgreser. Dapre seki konsern lalwa, mo deza enn mor, enn lamor provoke par mem lalwa, pou ki mo kapav viv pou Bondie. Mo finn krisifie lor lakrwa avek Kris; alor, li nepli mwa ki pe viv, me Kris ki pe viv dan mwa. Lavi ki mo pe viv aster-la kouma enn imin, mo viv li par lafwa dan Garson Bondie, ki kontan mwa e finn donn so lavi pou mwa. Mo pa pe rann lagras Bondie initil; me si par lalwa ki nou rann nou zis devan Bondie, savedir ki Kris finn mor pou nanye. Ayo, bann Galat, ala zot bet! Kisann-la finn zet enn sor lor zot? Pourtan, devan zot lizie, zot finn gagn enn prezantasion kler kouma Zezi Kris finn krisifie lor lakrwa. Enn sel zafer mo dimann zot: Eski zot finn resevwar Lespri parski zot pratik lalwa, oubien parski zot finn ekout mesaz lafwa? Ki kantite bet zot bet? Zot koumans avek Lespri Bondie, eski aster-la zot anvi fini avek zot prop zefor imin? Eski zot finn fer tou sa bann lexperyans-la pou nanye? Pa kapav tousala pou nanye. Bondie, kan li donn zot so Lespri e fer bann mirak parmi zot, eski li fer sa akoz zot pratik lalwa oubien parski zot finn met zot lafwa dan seki zot finn tande? Anou konsider Abraam. Li ti met tou so konfians dan Bondie, ek Bondie finn rekonet li kouma kikenn drwat akoz so lafwa. Alor, zot bizin konpran ki bann ki viv dan lafwa, zotmem ki desandan Abraam. Lekritir ti finn prevwar ki Bondie pou rann bann payin zis par zot lafwa. Lakoz samem li ti dir, “Tou pep lor later pou beni atraver twa.” Pou sa rezon-la, tou dimounn ki krwar, zot pou beni avek Abraam ki ti krwar. Dimounn ki depann lor lobeisans lalwa, li deza anba malediksion. Dan Lekritir finn dir: “Dimounn ki pa obzerv ek obeir tou seki finn ekrir dan lalwa pou modi.” Li kler ki personn pa kapav deklar limem zis devan Bondie par lalwa, parski finn ekrir: “Kikenn ki zis par lafwa, li pou viv.” Me lalwa pena nanye pou fer avek lafwa, parski finn ekrir: “Bann ki obeir lalwa pou viv par lalwa.” Kris, ki ti vinn enn malediksion pou nou, finn peye pou delivre nou depi sa malediksion-la, parski finn ekrir: “Malediksion pou dimounn ki pandi ar pie.” Sa finn arive pou ki par Zezi Kris, benediksion Abraam tom osi lor bann payin, e ki nou kapav resevwar promes Lespri dan lafwa. Mo bann frer, mo bann ser, mo pou donn zot enn lexanp ki tou dimounn servi: enn fwa ki enn testaman finn etabli, personn pa kapav kas li, oubien azout kiksoz ar li. Bondie finn fer promes ar Abraam ek so desandan. Li pa finn dir, “Ek so bann desandan,” koumadir li pe koz lor boukou desandan; me li dir, “Ek to desandan,” setadir Lekris. Ala seki mo anvi dir: Bondie finn etablir ek ratifie enn testaman; lalwa ki vinn anviger kat-san-trant-an apre sa, pa kapav anil lalians la ek siprim promes Bondie. Si leritaz ki Bondie done, depann lor lalwa, li pa enn promes; me Bondie dan so lagras ti donn sa Abraam par enn promes. Pou kifer lalwa alor? Lalwa finn azoute pou fer kone ki pese ete. Rol lalwa reste ziska larive sa desandan pou ki sa promes-la finn fer. Bann anz finn amenn lalwa par enn mediater. Enn mediater pa neseser si zis enn dimounn ki konserne, me Bondie li enn sel. Eski lalwa li kont promes Bondie? Pa ditou! Parski si donn enn lalwa ki ena pouvwar donn lavi, alor bien sir kapav vinn zis devan lizie Bondie par lalwa. Me Lekritir deklare ki lemond antie prizonie pouvwar pese, pou ki promes Bondie li realize pou bann krwayan akoz zot lafwa dan Zezi Kris. Avan ki lafwa arive, lalwa ti anferm nou kouma prizonie ziska ki lafwa revel limem. Alors lalwa ti nou gardien ziska Lekris vini, pou ki nou vinn zis par lafwa devan Bondie. Aster ki dimounn krwar, nou nepli bizin enn gardien. Zot tou bann zanfan Bondie par lafwa dan Zezi Kris. Zot tou finn batize dan Kris e zot finn abiy zot avek Kris parey kouma zot met enn linz nef. Li pa fer okenn diferans ki to enn Zwif ou enn Grek, esklav ou lib, zom ou fam, parski nou tou enn sel dan Zezi Kris. E si zot pou Kris, alor zot enn desandan Abraam, zot bann eritie dapre promes Bondie. Mo anvi dir zot ki osi lontan ki eritie-la enn zanfan, li pa diferan ar enn esklav, mem si li proprieter. Me li res anba responsabilite total bann garan ek bann administrater ki pran desizion pou li ziska ler ki finn fixe par so papa. Parey avek nou osi, letan nou ti ankor zanfan, nou ti gouverne par bann lafors ki pe azir dan sa lemond-la. Me letan ler fixe arive, Bondie ti avoy so Garson; enn fam inn donn li nesans, li ti soumet anba lalwa, pou delivre bann ki anba lalwa, pou ki Bondie adopte nou kouma so bann zanfan. E parski zotmem so bann zanfan, Bondie finn avoy Lespri so Garson dan nou leker, Lespri ki kriye “Abba, Papa!” Alor to nepli esklav me zanfan Bondie. E parski to so zanfan, to osi so eritie. Lontan letan zot pa ti konn Bondie, zot ti esklav bann bondie ki par zot natir zot fos. Me aster-la zot konn Bondie - ou plito aster-la Bondie konn zot - kouma zot kapav retourn ankor anba sa bann move lespri ki feb ek pov-la? Zot anvi revinn esklav bann-la ankor? Zot donn boukou linportans sertin zour, mwa, sezon ek lane! Zot fer mwa sagrin ki mo finn perdi mo letan travay ar zot. Mo bann frer e ser, mo sipliy zot, vinn parey kouma mwa; parski mo finn vinn parey kouma zot. Zot pa ti maltret mwa. Zot kone, akoz enn maladi ki mo finn anons zot Bonn Nouvel pou premie fwa. Mem si mo kondision lasante ti enn eprev pou zot, zot pa finn inior mwa; okontrer zot finn resevwar mwa kouma enn anz Bondie, kouma Zezi Kris limem. Kot sa lazwa-la finn pase? Mo temwin ki si zot ti kapav aras zot lizie pou donn mwa, zot ti pou fer li. Eski aster mo vinn zot lennmi parski mo dir laverite? Sa bann dimounn-la pe donn zot boukou latansion me zot lintansion pa bon. Zot anvi separ mwa avek zot, pou lerla tou latansion vinn pou zot. Aster-la, li bien bon gagn boukou latansion, si li pou enn bon rezon, pa selman letan mo avek zot. Mo bann zanfan, mo pe soufer ankor pou zot kouma enn fam ansint ki pre pou donn nesans enn baba, ziska ki Kris pran form dan zot. Komie dan mo leker mo ti pou anvi avek zot la, pou adres zot enn lot fason parski mo vremem pa kone ki pou fer pou zot. Dir mwa, zot ki anvi soumet zotmem anba lalwa, eski zot pa tande seki lalwa dir? Li dir ki Abraam ti ena de garson, enn avek enn fam esklav e lot-la avek enn fam lib. Garson fam esklav-la ti ne dapre laser, me lot-la, garson fam lib la ti ne dapre enn promes Bondie. Sa zistwar la, li osi ena enn lot sinifikasion. De fam la reprezant de lalians. Enn lalians sorti Sinai li donn nesans bann zanfan esklav: sa Agar, sa. Agar li montagn Sinai dan Larabi e li reprezant Zerizalem zordi, parski li dan lesklavaz ar so bann zanfan. Me Zerizalem ki lao dan lesiel, li lib e limem nou mama. Finn dir dan Lekritir: “To bizin kontan, fam steril ki pa gagn zanfan; kriye to lazwa for-for, twa ki pa konn douler lakousman; parski fam ki abandone pou gagn plis zanfan ki fam ki ena so mari.” Mo bann frer, mo bann ser, parey kouma Izaak, zot osi zot bann zanfan promes Bondie. Sa lepok-la garson ki finn ne dapre laser ti persekit lot ki ti ne dapre Lespri, e zordi ankor, mem zafer pe arive. Me Lekritir ki dir? Li dir, “Ranvway fam esklav avek so zanfan, parski garson fam esklav pa pou gagn par dan leritaz garson fam lib.” Alor mo bann frer ek ser, nou pa zanfan enn fam esklav me zanfan enn fam lib. Kris finn liber nou pou ki nou vinn vremem lib. Alor zot bizin tini ferm, pa les zot kraze anba fardo lesklavaz ankor. Ekout bien seki mwa Pol mo pe dir zot: si zot les zot sirkonsi, Kris pa pou ena okenn valer pou zot. Ankor enn fwa, mo dir zot; tou dimounn ki les li sirkonsi, li pou oblize pratik lalwa an-antie. Si zot sey vinn drwat devan Bondie par lobeisans lalwa, zot koup zot avek Kris, ek zot met zotmem andeor so lagras. Pou nou, par Lespri ek par lafwa, nou atann dan lesperans ki Bondie rann nou zis. Pou kikenn ki avek Zezi Kris, sirkonsizion ou pa sirkonsizion, sa pena okenn linportans; lafwa ki azir par lamour ki konte. Zot ti pe bien galoup zot lekours. Alor ki finn kas zot lelan pou anpes zot obeir laverite? Sa linflians-la pa vinn depi kot Bondie ki finn apel zot! Enn tigit levin fer lapat an-antie gonfle. Mo ena konfians dan Bondie ki zot pa pou pran enn lot direksion. Ninport kisann-la ki pe met dezord parmi zot, li pou gagn so pinision. Me si mwa mo ankor pe pres sirkonsizion, alor kifer zot pe persekit mwa? Dan sa ka-la, Lekris lor lakrwa nepli enn skandal. Mo swete ki sa bann dimounn ki pe fatig zot-la, zot al pli lwin ankor dan zot pratik sirkonsizion ziska koup li net. Me zot, mo bann frer ek ser, finn apel zot pou ki zot lib. Selman fode pa zot mal servi zot liberte e viv dapre zot prop natir imin. Okontrer, les zot gide par lamour e met zot oservis zot bann kamarad. Parski tou lalwa li kapav rezime dan enn sel parol: “Kontan to prosin kouma tomem.” Me si zot mord e devor zot kamarad, fer atansion, sinon zot pou fini par detrir zot kamarad. Mwa, mo dir zot: les zot lavi dirize par Lespri, lerla zot pa pou viv dapre dezir laser imin. Parski bann dezir laser zot kontrer Lespri e bann dezir Lespri zot kontrer laser. Zot telman opoze ki dimounn pa kapav fer seki zot anvi. Me si Lespri kondir zot, zot nepli soumet anba lalwa. Nou bien kone kouma laser li manifeste li dan limoralite, linpirte, vis, lidolatri, sorselri, mazik, laenn, dispit, zalouzi, koler, rivalite, lager, lanvi, soulezon, fiesta, ek tou sort kalite lezot move aksion. Mo averti zot parey kouma mo finn fer li avan, tou bann dimounn ki pratik sa bann kiksoz-la, zot pa pou erit Rwayom Bondie. Me bann fri ki Lespri li prodir, li lamour, lazwa, lape, pasians, bonte, konpreansion, fidelite, douser, kontrol so prop lekor, pena lalwa kont sa bann kiksoz-la e bann ki viv ini avek Kris, zot finn krisifie zot prop laser ek zot bann pasion ek dezir. Si nou viv dapre Lespri, anou osi mars dapre Lespri. Anou pa fer vantar, nou pa dispit avek kamarad, nou pa zalou kamarad. Mo bann frer, mo bann ser, si kikenn arive tom dan pese, zot ki ena Lespri Bondie, avek douser zot bizin ramenn li dan bon sime. Pran bien kont zotmem pou zot pa tom dan tantasion. Sakenn bizin ed so kamarad, lerla zot pou met an pratik lalwa Lekris, parski si kikenn panse ki li enn gran dimounn alor ki li nanye ditou, li pe anbet limem. Sakenn bizin examinn so prop travay, e si li bizin fer vantar, fode pa li fer li an konparezon avek so prosin me par rapor avek limem. Sakenn pou bizin sarye so prop fardo. Dimounn ki resevwar lansegnman, bizin vinn enn partner avek seki finn donn li lansegnman. Fode pa fer erer, nou pa kapav mok Bondie. Enn dimounn li rekolte seki li finn seme. Si li sem dapre so natir imin, li pou rekolte koripsion; si li sem dapre Lespri, li pou rekolte lavi eternel. Anou pa dekouraze fer dibien, parski ler peryod larekolt arive nou pou rekolte si nou pa bes lebra. Alor, tan ki nou ena letan, anou travay pou bien tou dimounn spesialman pou bann ki pros avek nou dan lafwa. Zot trouve, mo pe ekrir zot sa bann gro-gro let-la avek mo prop lame. Sa bann dimounn ki anvi zot fer sirkonsizion-la, zot oule zis fer remark zot dan bann zafer laser. Zot fer sa pou ki zot pa persekite akoz lakrwa Lekris. Parski mem bann ki resevwar sirkonsizion pa obeir lalwa; sa bann dimounn-la anvi ki zot sirkonsi pou zot fer vantar ki zot finn kapav inpoz sa sign-la lor zot. Abe mwa, mo pou fer vantar akoz lakrwa nou Segner Zezi Kris; par sa lakrwa-la lemond finn fini krisifie pou mwa e mo finn fini krisifie pou lemond. Ki enn dimounn sirkonsi ou pa, sa pena okenn linportans; seki inportan se enn nouvo kreasion. Tou dimounn ki mars dapre sa prinsip-la, lape ek mizerikord pou ar zot ek Izrael pep Bondie osi. Finalman, ki personn pa fatig mwa parski mo sarye mark Zezi lor mo lekor. Mo bann frer, mo bann ser, ki lagras nou Segner Zezi Kris li ar zot lespri. Amen. Mwa Pol, enn zapot Zezi Kris par volonte Bondie, mo pe ekrir bann krwayan e bann fidel dan Zezi Kris. Ki Bondie nou Papa e Lesegner Zezi Kris donn zot lagras ek lape. Anou beni Bondie ki Papa nou Segner Zezi Kris. Dan nou linion avek Zezi Kris, Bondie finn beni nou ar tou kalite benediksion spiritiel lao dan lesiel. Avan mem fondasion lemond li ti finn swazir nou pou limem par Lekris pou ki nou vinn sin ek san repros devan li. Dan lamour li finn predestinn nou pou vinn so bann zanfan adoptif par Zezi Kris, dapre so volonte ek so plezir. Anou loue Bondie pou so laglwar ek so lagras ki li finn donn nou dan so Bieneme. Dan Lekris, nou finn gagn delivrans par so disan, dan Lekris nou bann fot finn pardone dapre rises so lagras. Bondie finn partaz so lagras an abondans ar nou e li finn ouver nou lespri e nou lintelizans. Li finn fer nou konn mister so volonte, so plan ki li ti finn deside davans dapre so bon plezir pou realize par Lekris. Sa plan-la, ki Bondie pou termine dan lafin letan, li enn plan pou reinir tou seki dan lesiel ek lor later anba enn sel sef, Lekris. Dan nou linion ar li, nou finn resevwar enn leritaz ki ti promet nou, parski Bondie ti finn swazir nou davans, dapre so plan, pou nou loue so grander, nou ki ti bann premie pou met nou lesperans dan Lekris. Zot finn tann parol laverite, Bonn Nouvel ki sov zot; zot finn krwar dan Lekris, alor Bondie finn mark zot ar stanp Lespri Sin ki li ti promet. Lespri Sin, li enn lavans lor leritaz ki Bondie rezerve pou so pep. Sa donn nou lasirans ki Bondie pou akord nou delivrans final. Anou donn li laglwar! Depi ki mo finn aprann zot lafwa dan nou Segner Zezi Kris e zot lamour pou tou bann krwayan, mo pa kapav aret rann gras pou zot, e mo mansionn zot dan mo lapriyer. Mo priye Bondie Papa nou Segner Zezi Kris, Papa ki ena laglwar, ki li donn zot Lespri lasazes, e Lespri ki devwal Bondie pou ki zot konn li plis ankor. Mo priye ki li ouver zot leker ver so lalimier pou zot kone dan ki lesperans li pe apel zot, ki rises e ki mervey ena dan so leritaz ki li pe donn zot parmi pep Bondie, ki pwisans imans li ena dan nou faver, nou ki bann krwayan. Sa lafors tou pwisan lamem ki li finn met an aksion dan Lekris kan li ti resisit li parmi bann mor e li ti fer li asiz lor so drwat, lao dan lesiel. Lekris bien lao lor tou lotorite, pouvwar, pwisans ek rwayote. Tit ki li ena pli gran tit ki kapav nome, pa selman dan lemond aster me ankor dan lemond ki pe vini. Bondie finn met tou anba so lipie e li finn plas li lao tou, kouma latet Legliz ki so lekor; dan Legliz ki Lekris prezan antierman, e limem, li ranpli tou antierman. E zot, zot ti spiritielman mor akoz zot fot ek zot pese. Lontan zot ti pe viv sa lavi-la; sa lepok-la zot ti pe swiv bondie sa lemond-la, sa prins ki ant lesiel ek later, sa lespri ki pe azir aster parmi bann ki opoz Bondie. Nou osi, nou tou ti parmi sa bann-la, nou ti pe viv dapre bann dezir natir pese, nou ti pe fer volonte nou natir e swiv so bann inpilsion. Nou ti merit gagn koler Bondie kouma lezot. Me akoz Bondie ena boukou-boukou konpasion, e li ena enn gran lamour pou nou, letan nou ti spiritielman mor akoz nou bann fot, li ti donn nou lavi avek Lekris. Par lagras Bondie ki nou sove. Li finn resisit nou avek Lekris pou fer nou regne avek li lao dan lesiel. Par sa, Bondie anvi montre pou bann siek ki pe vini, rises so lagras, exprime par so bonte pou nou dan Zezi Kris. Par lagras ki zot sove, par mwayin lafwa; zot, zot pa finn fer nanye, sa enn kado Bondie sa. Li pa vinn atraver aksion imin, koumsa personn pa kapav fer fanor. Nou, nou louvraz Bondie, li finn fasonn nou, li finn kree nou dan Zezi Kris pou ki nou realiz bann bon aksion ki Bondie finn prepare davans. Rapel seki zot ti ete lontan. Zot non-Zwif par nesans. Bann ki ti konsider zotmem bann “sirkonsi”, par enn loperasion lor zot lekor, ti apel zot bann non-Zwif, bann ki “pa sirkonsi.” Rapel ki sa lepok-la zot ti separe ar Lekris, zot ti andeor lepep Bondie, zot ti bann etranze. Zot pa ti ena okenn par dan bann lalians fonde lor promes Bondie. Zot ti san lesperans e san Bondie dan lemond. Me aster dan linion avek Zezi Kris, zot ki lontan ti lwin, finn koste zot pre par disan Lekris. Lekris, limem nou lape. Dan so laser li fer de pep ki divize vinn enn sel. Li finn kraz miray ostilite ki separ bann lennmi. Li finn aboli lalwa, ek so komannman ek so bann regleman. Li ti oule apartir Zwif ek non-Zwif kree enn nouvo pep dan linion avek li, ek etablir lape. Par mwayin lakrwa li ti rekonsilie toule-de dan enn sel lekor avek Bondie. Par lakrwa li ti touy laenn. Lekris finn vinn anons lape ar zot ki ti lwin ek ar bann ki pre. Par Lekris nou tou, Zwif ek non-Zwif, nou kapav prezant nou devan Bondie Papa dan enn sel Lespri. Ala ki manier zot nepli etranze, ni imigre, me zot sitwayen ansam ar bann krwayan e manb lafami Bondie. Zot finn integre dan konstriksion ki ena bann Zapot ek bann profet pou fondasion, ek Zezi Kris limem ros ki tini tou. Limem ki solidite sa konstriksion-la an-antie; sak bout marye ansam pou mont enn Tanp ki konsakre pou Lesegner. Dan linion avek li, zot osi zot fer parti ansam avek lezot pou vinn enn lakaz kot Bondie abite par so Lespri. Pou sa rezon-la mwa, Pol, prizonie Zezi Kris pou zot ki bann non-Zwif, mo priye Bondie. Sirman zot finn tann koz lagras ki Bondie finn akord mwa pou realiz so mision pou zot dibien, setadir, ki manier par revelasion, mo finn gagn konesans so mister. Mo finn fini fer enn ti rezime lor la avan. Letan zot lir sa, zot kapav konpran konesans ki mo ena lor mister ki konsern Lekris. Bondie pa ti fer bann lezot zenerasion avan konn sa mister-la. Aster li finn revel li ar so bann Zapot ek profet par Lespri. Ala mister-la: bann non-Zwif gagn mem leritaz ki bann Zwif, zot manb mem lekor, e zot partaz mem promes dan Lekris Zezi par Bonn Nouvel. Bondie finn fer mwa serviter Bonn Nouvel par don lagras ki li ti fer mwa letan li ti azir par so pwisans. Parmi tou bann krwayan momem dernie parmi bann dernie. Malgre sa Bondie finn fer mwa enn gran faver: pou al anons bann non-Zwif larises infini ki Lekris ena, e fer tou dimounn kone ki fason Bondie, ki Kreater tou kiksoz, realiz sa mister ki li ti finn garde dan sekre depi touletan. Aster-la atraver Legliz, bann lotorite ek bann pouvwar ki lao dan lesiel kapav konn sazes Bondie dan tou so diferan form. Tousala ti dapre plan eternel ki li finn realize par Zezi Kris nou Segner. Par Lekris ek par nou lafwa dan li nou kapav ena kouraz pou rant dan prezans Bondie ar konfians. Alor mo dimann zot napa dekouraze akoz soufrans ki mo pe pase pou zot; tousala li pou zot prop laglwar. Pou sa rezon-la mo azenou devan Bondie Papa, limem Papa tou group dan lesiel ek lor later. Mo dimann li, dapre rises so laglwar, ki li fortifie zot leker par so Lespri. Mo priye ki Lekris res dan zot leker par lafwa. Mo priye ki zot bien anrasine ek bien etabli dan lamour, pou ki zot bien sezi, ansam avek lepep Bondie, ki larzer, ki longer, ki oter e ki profonder lamour ki Lekris ena; enn lamour ki sirpas tou konesans, e ki ranpli zot antierman ar Bondie. Par so pwisans ki azir dan nou, Bondie kapav fer boukou plis ki nou dimande, mem boukou plis ki nou kapav imazine, pou li tou laglwar dan Legliz e dan Lekris, zenerasion apre zenerasion e pou touletan! Amen. Mwa ki prizonie parski mo servi Lesegner, mo sipliy zot viv enn lavi ki dign sa lapel ki zot finn gagne la, ar limilite, douser ek pasians. Ki zot soutenir zot kamarad avek amour. Fer zefor pou gard linite Lespri par lape ki tini zot ansam. Ena enn sel lekor, enn sel Lespri, e Bondie ti apel zot pou enn sel lesperans. Ena enn sel Segner, enn sel lafwa, enn sel batem; enn sel Bondie, Papa tou dimounn, li Segner lor tou, li azir dan tou, li abit dan tou. Selman, sakenn parmi nou finn gagn lagras dapre zenerozite Lekris. Kouma Lekritir deklare: “Li ti mont dan oter, li ti amenn bann prizonie ar li, li ti fer don bann dimounn.” Aster, ki savedir “Li ti mont dan oter”? Savedir ki li ti finn osi desann dan bann profonder later. Alor sa dimounn ki finn desann la, limem dimounn ki finn mont pli ot ki tou lesiel ki ena, pou li ranpli liniver. Limem ki finn fer don; ena li finn fer zapot, lezot profet, evanzelis, paster ek ansegnan, pou ki bann krwayan ena kapasite akonplir zot minister, pou grandi lekor Lekris. Koumsa nou ariv ansam dan linite nou lafwa, dan nou konesans Garson Bondie; nou devlope pou vinn bann krwayan adilt ziska nivo grander Lekris. Lerla nou pa pou kouma bann zanfan, ki balote, ki sakouye dan siklonn tou kalite doktrinn ki bann dimounn rize servi pou antrenn lezot dan lerer. Okontrer, nou bizin koz laverite dan lamour pou ki dan tou domenn nou grandi dan Lekris, limem ki latet. Par li bann diferan parti lekor vinn ansam; lekor antie tini ansam par bann zwintir; alors koumsa mem li grandi e li devlope dan lamour. Dan nom Lesegner, mo averti zot: zot bizin aret viv kouma bann non-krwayan viv; bann-la zot panse pena okenn valer, zot lespri dan teneb; bann-la napa viv lavi ki Bondie oule parski zot ranpli ar liniorans ki sorti depi zot leker ros. Zot finn perdi tou santiman laont; zot viv enn lavi debos e zot ena enn dezir pou fer tou kalite inpirte. Pa koumsa ki zot ti aprann konn Lekris! Sirman antan ki Krwayan zot finn tann koz li, e zot finn gagn lansegnman lor laverite dan Zezi. Alor zot bizin abandonn zot ansien natir, manier zot ti pe viv avan e ki pouri par bann fos dezir. Fode ki zot leker ek zot lespri renouvle konpletman. Abiy zot avek enn nouvo natir, ki kree dapre resanblans Bondie dan vre lazistis e lapirte. Rezet mansonz. Koz laverite ar zot prosin, parski nou tou manb enn sel lekor. Si zot ankoler, pa fer pese. Pa les zot koler res ziska ki soley al kouse. Pa donn diab okenn sans may zot. Voler bizin aret kokin; okontrer li bizin fer travay onet ar so prop lame pou ki li kapav ena seki bizin pou partaz ar bann pov. Napa koz move koze, me servi bann parol ki fortifie e ki donn seki neseser pou dibien bann dimounn ki tann zot. Pa fer Lespri Sin Bondie vinn tris, parski Lespri enn stanp ki Bondie finn met lor zot pou montre ki limem proprieter; sa enn garanti ziska sa Zour kot Bondie pou delivre zot. Met dekote tou zot lamertim, zot koler, zot laraz, zot insilt, zot mesanste; tousala bizin disparet. Zot bizin ena bonte ek boukou lafeksion pou lezot; pardonn zot prosin kouma Bondie finn pardonn zot par Lekris. Zot, bann zanfan ki Bondie kontan, zot bizin imit li. Zot manier viv bizin inspire par lamour, parey kouma Lekris ti kontan nou e li ti donn limem pou nou, kouma enn lofrand ek enn sakrifis ki ena enn bon parfin ki fer Bondie plezir. Parski zot manb lepep Bondie, li pa korek ki zot koz lor bann size imoralite sexiel, inpirte, lanvi posed kiksoz ki pa pou zot. Fode pena langaz obsenn, koze bet, ou vilger; okontrer zot bizin dir mersi Bondie. Ala mo dir zot enn zafer ki sir: okenn dimounn imoral, indesan ou akaparer - sa enn form idolatri - pa pou gagn so par dan Rwayom Lekris ek Bondie. Napa les personn anbet zot ar bann parol vid, parski sa bann kiksoz lamem ki amenn lakoler Bondie lor bann dimounn ki dezobeir. Pa asosie zot ar sa kalite dimounn-la. Avan zot ti teneb, aster-la dan Lesegner zot lalimier; mars kouma bann zanfan lalimier. Fri lalimier li dan tou seki bon, tou seki bien, tou seki vre. Sey rod tou seki fer Bondie plezir. Pa al rant dan bann travay initil ki fer dan kasiet; okontrer denons zot. Li fer dimounn onte pou mem mansionn seki sertin fer dan kasiet. Tou kiksoz ki expoze par lalimier li vinn vizib; e seki vizib, li lalimier. Akoz sa ena enn koze ki dir, “Twa ki dan somey, lev twa, twa ki dan lamor, lev twa, e Lekris pou briy lor twa.” Alor vey bien kouma zot pou viv zot lavi; pa viv kouma bann inioran, me kouma bann saz. Servi bien tou bann lokazion ki prezant devan zot, akoz sa letan aster-la li move. Napa fer bet, me konpran bien ki volonte Bondie ete. Pa nek soul zotmem ar divin, sa pou amenn dezord dan zot lavi; me ki Lespri ranpli zot. Ankouraz zot kamarad par Psom, kantik ek sante spiritiel. Sante ek selebre Lesegner ar tou zot leker. Dan nom nou Segner Zezi Kris, dir mersi Bondie Papa touletan e pou tou kiksoz. Zot ki ena respe pou Lesegner, zot bizin viv lobeisans ant zotmem. Fam, to bizin obeir to mari, parey kouma to fer pou Lesegner; parski enn mari limem latet so fam, parey kouma Lekris sef Legliz. Lekris limem Sover Legliz ki so lekor. Alor bann madam bizin viv dan lobeisans devan zot mari, parey kouma Legliz viv dan lobeisans devan Lekris. Mari, kontan zot fam parey kouma Lekris ti kontan Legliz e li ti donn so lavi pou li pou sanktifie li; pou pirifie Legliz, li finn lav li dan dilo, e par so parol, pou ki li kapav prezant Legliz devan li dan tou so bote, san okenn tas, san okenn rid, ni defo; li anvi ki Legliz li sin e san repros. Koumsa mem bann mari bizin kontan zot fam, kouma zot prop lekor. Dimounn ki kontan so fam kontan limem. Personn pa ayir so prop lekor, me li nouri li e donn li boukou latansion, parey kouma Lekris fer pou so Legliz. Nou manb so lekor. “Akoz sa enn zom kit so papa ek so mama, e li inir li ar so fam, e toule-de zot vinn enn sel.” Sa mister-la li bien gran; mwa mo dir ki sa ena pou fer avek Lekris e so Legliz. Me li aplik ar zot osi. Ki sakenn kontan so fam kouma li kontan limem, e fam-la bizin respekte so mari. Bann zanfan zot bizin obeir zot paran dan Lesegner, parski sa li bon. “Ena respe pou to papa ek to mama.” Sa premie komannman ki ena enn promes atase ar li: “Pou ki to ena boner e enn long lavi lor later.” Bann paran, pa fer zot zanfan revolte, me bizin elve zot dan disiplinn ek lansegnman Lesegner. Bann esklav bizin obeir zot met lor later ar lakrint e tranbleman; fer sa avek enn leker sinser, koumadir zot pe servi Lekris. Pa fer sa zis kan bann-la pe vey zot, pou fer bann-la plezir; me fer volonte Bondie ar tou zot leker kouma bann esklav Lekris. Fer zot travay avek bonn volonte, koumadir zot pe servi Lesegner e non bann imin, parski zot kone ki Lesegner li pou rekonpans ninport kisann-la pou so bon travay ki li finn fer, ki li esklav ou lib. Zot, bann met, tret zot bann esklav dan mem fason. Pa menas zot. Rapel ki zot toule-de, ki li met ki li esklav, zot ena mem Met dan lesiel, e li ziz tou dimounn san okenn preferans. Pou termine, fortifie zot dan Lesegner ek dan lafors so pwisans. Met tou lekipman solda ki Bondie fourni; met li lor zot pou ki zot kapav reziste kont manigans diab. Nou pa pe lit kont pwisans imin me kont bann dirizan, bann lotorite, bann pouvwar ki dominn sa lemond teneb la, kont pwisans spiritiel lemal lao dan lesiel. Alor met tou larmir Bondie aster, koumsa kan move zour arive zot va reziste latak lennmi, e letan zot finn konbat ziska lafin, zot pou ankor pe tini dibout. Pare zot! Met sintir laverite otour zot lerin, e ladrwatir kouma enn zile proteksion; dan zot lipie, met soulie ki fer zot pare pou zot al anons Bonn Nouvel ki donn lape. Sarye lafwa touletan kouma enn boukliye, ar sa ki zot pou tengn tou fles anflame ki diab avoye. Aksepte elmet ki sov zot, e Parol Bondie kouma lepe ki Lespri done. Priye touzour dan pwisans Lespri ar tou kalite lapriyer e siplikasion dan tou sirkonstans; res lor zot gard, res fidel. Priye pou lepep Bondie. Priye pou mwa osi, pou ki mo gagn fasilite laparol, pou ki mo koz ar lasirans pou revel mister Bonn Nouvel. Pou sa Bonn Nouvel-la mo enn anbasader ki dan prizon. Priye pou ki mo gagn lodas pou koze kouma bizin. Tisik, frer ki nou bien kontan e ki fidel dan travay Lesegner, pou donn zot nouvel lor mwa, pou ki zot kone ki pe pase. Samem rezon mo pe avoy li, pou donn zot nouvel lor nou, e resof zot leker. Ki Bondie Papa ek Lesegner Zezi Kris akord lape ek lamour, ar lafwa, tou bann frer, tou bann ser. Ki lagras Bondie li res ar tou seki ena lamour eternel pou Lesegner Zezi Kris. Mwa Pol ek Timote, serviter Zezi Kris. Nou pe ekrir lepep Bondie dan Filip, zot bann levek ek bann diak. Ki lagras ek lape Bondie nou papa ek nou Segner Zezi Kris res ar zot. Sak fwa ki mo pans zot, mo remersie Bondie: sak lapriyer ki mo fer pou zot, li touzour avek lazwa ki mo priye, akoz koudme ki zot finn donn mwa pou anons Bonn Nouvel depi premie zour ziska zordi. Mo sir ki Bondie ki finn koumans enn bon travay dan zot la, pou kontigne travay-la ziska lafin, ziska zour Zezi Kris. Zot okip enn plas spesial dan mo leker. Li normal ki mo ena sa kalite santiman-la pou zot. Zot finn partisip dan lagras ki Bondie finn donn mwa ler mo ti dan prizon e kan mo ti pe defann ek konfirm Bonn Nouvel. Bondie, li temwin, ki kantite mo anvi trouv zot. Li kone mo pran zot swin parey kouma Zezi Kris. Mo priye ki zot lamour pou kontigne grandi boukou, ansam avek vre konesans ek konpreansion pou ki zot kapav disern seki bien. Lerla zot pou pir ek san repros letan Kris revini, zot pou ranpli ar fri lazistis ki sorti kot Zezi Kris pou laglwar ek louanz Bondie. Mo bann frer e ser, mo oule ki zot kone ki seki finn ariv mwa finn vremem kontribie pou fer avans Bonn Nouvel. Tou dimounn, dan pale gouverner ek partou deor, konn bien ki mo dan prizon akoz mo pe servi Kris, e mo letan dan prizon finn ankouraz boukou mo bann frer e mo bann ser dan Lesegner, e zot pli solid aster-la pou anons Parol Bondie san okenn laper. Li vre ki ena ki anons Kris par lanvi ek zalouzi, me lezot fer li avek enn bonn volonte. Sa bann-la zot azir par lamour, parski zot kone ki Bondie finn donn mwa mision pou defann Bonn Nouvel. Lezot pa pe proklam Kris par sinserite, me pe azir par rivalite. Zot zis anvi koul mwa ankor plis dan prizon. Pa fer nanye! Seki inportan, mem avek aryer panse ou dan laverite, ki zot anons Kris. Akoz samem mo dan lazwa. Mo pou kontigne rezwir ankor, parski mo kone ki tousala pou amenn mo delivrans gras-a zot lapriyer ek led Lespri Zezi Kris. Mo pli gran dezir ek lesperans, ki mo vinn laont lemond, me ki avek enn gran kouraz, aster-la e pou touzour, ki Kris pou onore dan mwa, swa par mo lavi oubien mo lamor. Pou mwa Kris limem mo lavi e lamor pou donn mwa plis ankor pou viv. Me si kontign mo lavi isi lor later pou permet mwa fer enn travay itil, la mo pa kone ki mo pou swazir. Mo dan enn dilem. Mo anvi mor pou al avek Kris, seki ti pou bon pou mwa. Me, akoz zot, li pli inportan ki mo viv isi lor later. Mo ena enn gran konviksion e mo sir ki mo pou res isi, e viv avek zot tou pou ed zot progrese dan lazwa ek lafwa. Kan mo retourn kot zot ankor, zot pou ena plis rezon pou fier akoz zot lafwa dan Zezi Kris. Me selman, amenn zot lavi dapre Bonn Nouvel Lekris. Mem si mo vinn get zot ou pa, mo espere tande ki zot pe tini ferm dan enn sel lespri pou lit ansam pou fer lafwa avanse dapre Bonn Nouvel. Zot bizin touzour brav kan zot zwenn zot adverser. Sa pou enn sign pou bann-la ki zot pe al ver zot destriksion; me pou zot, mo bann frer, mo bann ser, li enn sign zot delivrans, enn delivrans ki sorti kot Bondie. Zot finn gagn privilez pou non selman krwar dan Kris me osi soufer pou li. Zot pe amenn mem konba ki zot finn trouv mwa pe amene e kouma zot kone mo ankor pe amene. Si zot linion avek Kris ankouraz zot, so lamour rekonfort zot e so Lespri ini zot e rann zot konpatisan, alor rann mwa osi zwaye par lakorite ant zot; ena enn sel leker, enn sel lamour e rod touzour linite. Pa fer nanye par rivalite, me avek imilite, konsider lezot meyer ki zotmem. Pa rod zot prop lintere, me rod lintere lezot avan. Ena samem konportman-la parmi zot e pans parey kouma Zezi Kris finn panse. Zezi, mem si li touletan ti ena natir Bondie, li pa finn anvi vinn egal ar Bondie. Li finn limem renons tou, li finn pran kondision enn esklav, li ti vinn imin e ti rekonet li dan so form imin. Li ti abes limem, li ti obeisan ziska lamor, lamor lor lakrwa. Akoz samem Bondie finn elev li pli lao ki tou, e finn donn li enn nom ki pli gran ki tou nom pou ki devan nom Zezi tou dimounn lor later kouma dan lesiel tom azenou, e tou dimounn pou proklam ki Zezi Kris limem Segner, pou laglwar Bondie Papa. Mo bann kamarad, zot finn touletan obeisan ler mo ti avek zot, aster ki mo absan, zot bizin plis obeisan ankor. Dan imilite ek reverans, travay pou zot delivrans, parski Bondie pe fer so travay dan zot, li inspir zot pou fer zot ena volonte pou realiz tou dapre so bon plan. Fer tou san okenn konplint ou rezistans pou ki zot vinn bann zanfan Bondie san defo e san repros omilie sa lemond move ek perverti la. Zot bizin briye parmi zot kouma zetwal dan lesiel. Parski zot finn port mesaz ki donn lavi, zour Lesegner li pou enn fierte pou mwa. Mo pou kone ki mo pa finn galoupe ek travay pou nanye. Mem si mo disan bizin fane pou sakrifis ek servis zot lafwa, mo zwaye e mo rezwir avek zot tou. Zot bizin rezwir zot osi e partaz zot lazwa avek mwa. Mo swete avoy zot Timote biento; li pou enn lankourazman pou mwa pou gagn zot nouvel. Mo pena personn isi kouma li, pou pran swin zot bienet. Zot tou pe rod zot prop lintere e non pa seki konsern Zezi Kris. Me zot konn Timote bien, li finn fer so prev; kouma enn garson ki travay anba lotorite so papa, zot kone li finn touzour akote mwa pou anons Bonn Nouvel. Mo espere avoy limem kot zot dimoman ki mo kler lor mo prop sitiasion, e mo konfian dan Lesegner ki biento momem mo pou vinn kot zot. Mo finn deside ki mo bizin avoy osi nou frer Epafrodit, enn mo koleg travay, limem zot ti avoye pou ed mwa. Li ena enn gran dezir retrouv zot tou e li ti inkie ler li ti kone ki zot ti gagn nouvel so maladi. Vremem li ti bien-bien malad, me Bondie finn pitie li, pa zis pou li me pou mwa osi, pou anpes mwa vinn pli tris ankor. Pou sa rezon-la, mo prese pou avoy li kot zot. Li pou enn gran lazwa pou zot kan zot retrouv li e sa pou rann mwa mwin tris. Avek tou zot leker, akeyir li dan zot kominote. Zot bizin ena boukou lestim pou dimounn parey kouma li. Li ti manke mor akoz travay Bondie. Li finn riske so lavi pou li kapav ed mwa, kiksoz ki zot pa pe kapav fer zotmem. Aster-la mo bann frer ek ser, mo swet zot lazwa dan Lesegner. Li pa enn problem pou mwa repet seki mo finn deza dir zot, fer atansion sa bann move dimounn kouma lisien la, zot pa fer nanye e zot pratik enn fos sirkonsizion. Nou, nou bann vre sirkonsi. Nou loue Bondie par so Lespri. Nou laglwar trouv dan Zezi e nou pa met nou konfians dan okenn imin. Pourtan mo ena ase rezon pou reklam sa bann privilez-la. Si kikenn fer sa reklamasion-la mo pou ankor pli for ki li. Mo finn sirkonsi lor witiem zour, e mo sorti dan ras Izraelit, dan tribi Benzamin. Mo enn Ebre pirsan e kouma enn Farizien, mo obeir lalwa. Mo ti telman kontan pratik lalwa kouma enn Farizien, ki mo ti persekit legliz. Personn pa kapav repros nanye lor mo lavi. Tou sa bann kiksoz-la ti pou mwa kouma enn profi, me aster-la mo konsider zot kouma enn pert akoz Kris. Ler mo konpar grander dibien ki mo gagne dan konesans Zezi Kris, mo konsider tou kiksoz kouma enn lapert. Akoz li mo finn perdi boukou kiksoz ki mo konsider kouma enn bann salte pou mo kapav gagn Kris, e mo ini avek li. Mo pa kapav dir ki mo zis akoz mo pratik lalwa. Mo lazistis li baze lor lafwa dan Kris, enn lazistis ki sorti kot Bondie, baze lor lafwa. Mo ena enn dezir pou konn Kris ek pwisans so rezireksion, partisip dan so soufrans, e vinn parey kouma li dan so lamor, avek lespwar ki mwa osi mo pou kapav resisite parmi bann mor. Mo pa pe pretann ki mo finn deza rant dan bit oubien vinn parfe. Me mo pe kontign al an avan pou gagn sa pri-la, parski Zezi Kris limem finn sezi mwa. Mo galoup vit pou gagn pri ki Bondie ofer. Mo bann frer ek ser, mo pa dir ki mo finn deza gagn pri-la; mo ena enn sel sousi: bliye tou seki deryer mwa e mo fons devan pou gagn seki devan mwa. Mo galoup vit pou rant dan bit pou resevwar pri ki Bondie ofer mwa dan lesiel par Zezi Kris. Nou, bann adilt dan lafwa, nou bizin ena mem preokipasion. Me si zot ena enn lot lopinion lor ninport ki size, Bondie pou ekler zot. Me kot nou finn arive, anou kontigne tini ferm dan mem direksion. Mo bann frer, mo bann ser, zot tou bizin imit mwa. Nou finn donn bon lexanp, alor obzerv bien bann ki kondir zot dapre sa bon lexanp-la. Mo finn deza dir zot e avek larm dan mo lizie mo pe redir zot ankor ki ena boukou dimounn ki viv kouma lennmi lakrwa Kris. Zot pe al ver zot destriksion; zot vant samem zot Bondie, zot fier pou kiksoz ki ti bizin fer zot onte; zot mazinn zis bann zafer sa lemond-la. Me nou, nou bann sitwayen lesiel e nou pe atann nou Sover ek Segner Zezi Kris vini, li ki sorti depi laba. Gras-a so pwisans ki kapav kontrol tou kiksoz, li pou transform nou lekor mortel pou rann li parey kouma so lekor glorifie. Mo bann frer e ser, mo bien kontan zot, e mo pe atann zot avek inpasians. Zotmem mo lazwa; res fidel dan zot lavi avek Bondie. Mo inplor Evodi ek Sintik pou viv an-akorite dan Lesegner. Mo pe osi dimann twa, mo partner, fidel pou ed sa bann fam-la parski zot finn konbat ansam avek mwa pou propaz Bonn Nouvel parey kouma Kleman ek leres bann kolaborater finn fer. Zot nom finn ekrir dan liv lavi. Rezwir zot touletan dan Lesegner. Mo repete; rezwir zot. Les tou dimounn konn zot bonte. Lesegner pe vini biento. Napa bizin zot trakase ditou, me dan ninport ki sitiasion, avek enn leker rekonesan, ofer zot lapriyer ek siplikasion Bondie. Lape Bondie ki depas tou lintelizans, pou gard zot lekor ek zot lespri dan Zezi Kris. Finalman, mo bann frer e ser, pans bien lor tou seki vre, onorab, zis, pir, admirab ek tou seki merit nou louanz. Kontigne fer tou seki zot finn aprann ek resevwar ar mwa, seki zot finn tande e trouv mwa fer. Bondie lape pou res avek zot. Aster-la mo ena enn gran lazwa dan Lesegner ki zot finn montre lintere pou mwa. Zot tou deza ena sa lintere-la pou mwa, me zot pa ti ena lokazion pou exprim li. Pa lakoz mo dan bezwin ki mo koz koumsa, non, mo finn aprann ki dan ninport ki leta mo ete mo bizin kontan. Mo konn viv dan lamizer ek dan labondans, kan mo ena ou kan mo pena nanye pou manze. Mo kapav fer fas avek tou sa bann sitiasion-la parski Lekris li fortifie mwa. Kanmem sa, zot finn bien fer pou siport mwa dan mo bann difikilte. Zot, bann Filipien bien kone ki depi koumansman ler mo ti kit Masedwann, apart zot okenn legliz pa ti partisip dan mo bann depans, mem ler mo ti dan Tesalonik, zot ti avoy mwa led. Mo pa zis anvi rod enn donasion ki pou mo prop benefis. Mo finn resevwar tou, mem plis ki seki mo pou bizin. Epafrodit finn aport mwa zot bann don kouma enn sakrifis kifer plezir Bondie. Mo Bondie pou donn zot seki zot bizin dapre so larises dan laglwar Zezi Kris. Laglwar pou Bondie papa, aster-la e pou touzour, amen. Fer konpliman tou bann pep Bondie dan Zezi Kris. Bann kamarad ki avek mwa fer zot osi konpliman. Tou pep Bondie e spesialman bann desandan Sezar fer zot konpliman. Ki lagras sorti kot Zezi Kris, res avek zot. Mwa Pol, zapot Zezi Kris par volonte Bondie, ek frer Timote. Zot bann disip ki dan lavil Kolos, bann frer e bann ser fidel dan Lekris: Ki labonte ek lape Bondie nou Papa res lor zot. Dan lapriyer ki nou fer pou zot, nou remersie touletan Bondie, Papa nou Segner Zezi Kris, parski nou finn tann koz zot lafwa dan Zezi Kris ek zot lamour pou tou bann disip, akoz sa lesperans ki pe atann zot dan lesiel; zot finn tann lanons sa lesperans-la avan, par Bonn Nouvel, Parol laverite ki finn ariv ziska zot; mem fason ki li pe donn so fri e li pe progrese dan lemond antie, mem fason li pe azir parmi zot depi zour zot finn resevwar li e vremem zot finn konn labonte Bondie. Zot finn aprann sa par Epafras, nou kamarad e nou konpagnon dan servis. Li enn minis fidel Lekris ki finn travay dan nou plas. Li finn dekrir nou lamour ki anim zot dan Lespri. Ala kifer, depi sa zour-la, nou pa aret priye pou zot. Nou demann Bondie ki zot gagn foul konesans so volonte avek tou lasazes ek lintelizans spiritiel, pou ki zot amenn enn lavi dign Lesegner, e ki zot rod fer li plezir. Par tou seki zot pou fer de bon, zot pou prodir bann fri e zot pou progrese dan vre konesans Bondie. Lafors so laglwar pou fortifie zot par tou fason e pou amenn zot ver enn perseverans ek enn pasians ki siport tou. Dan lazwa, remersie Bondie Papa ki finn fer zot gagn zot par dan leritaz bann disip dan lalimier. Li finn aras nou dan pouvwar teneb e li finn transfer nou dan Rwayom so Garson bieneme; li finn delivre nou e li finn pardonn nou pese. Li rann vizib Bondie ki invizib, Premie-ne parmi tou bann kreatir, parski tou seki existe dan lesiel e lor later finn kree an li, bann kreatir vizib ek bann invizib, bann Lespri ek bann Lafors. Tou finn kree par li ek pou li. Li, li avan tou kiksoz e tou existe an li. Li, li latet lekor Legliz. Li koumansman, Premie-ne parmi bann mor, pou ki li tenir so premie ran dan tou. Bondie finn kontan fer tou repoz an li e rekonsilie tou par li e pou li, lor later ek dan lesiel, letan li finn etablir lape par disan so lakrwa. E zot, lontan, zot ti etranze e lennmi Bondie, letan zot ti pe komet bann move aksion, aster Bondie finn rekonsilie zot par lekor ek laser so Garson, par so lamor, pou fer zot paret devan li, sin, san repros, san fay. Me bizin ki, par lafwa, zot res solid ek ferm, san ki zot tom andeor lesperans ki vinn par Bonn Nouvel ki zot finn tande, ki finn proklame ar tou kreatir anba lesiel. Mwa Pol mo finn vinn serviter sa Bonn Nouvel-la. Aster mo trouv mo lazwa dan bann soufrans ki mo soufer pou zot e mo konplet dan mo laser seki manke dan leprev ki Lekris finn aksepte pou so lekor ki apel Legliz; mo finn vinn serviter par sarz ki Bondie finn konfie mwa pou zot: fer konn Parol Bondie, sa mister ki ti res kasiet pandan bien lontan e ki aster Bondie finn devwale ar so bann krwayan. Li finn anvi fer zot konn rises ek laglwar sa mister-la parmi bann pep: Lekris parmi zot, lesperans laglwar! Limem ki nou pe anonse; nou pe inform sakenn, nou pe instrir sakenn ek tou lasazes, pou fer li grandi spiritielman dan so relasion avek Lekris. Se pou sa ki mo travay, ki mo lite avek tou so lafors ki azir avek pwisans dan mwa. Mo oule ki zot kone ki kalite lite mo pe lite pou zot, pou bann ki Laodise, e pou tou bann lezot ki zame pa finn trouv mwa personelman. Mo anvi zot leker pran kouraz e reini dan lamour, pou ki zot gagn rises, konpreansion ek enn konesans total mister Bondie: sa mister-la se Lekris limem; tou bann trezor lasazes ek konesans, zot kasiet an li. Mo dir zot sa pou ki personn pa tronp zot avek bel-bel koze. Li vre ki mo lekor absan, me mo lespri ar zot e mo kontan trouv zot fidel e ferm dan zot lafwa pou Lekris. Kontign viv zot lavi dapre seki finn transmet zot lor Lekris Zezi Lesegner, gard zot rasinn plante an li, tini ferm dan lafwa, dan manier ki finn ansegn zot, e les zot rekonesans deborde. Pran gard ki personn pa piez zot dan bann gran lide, sa bann tronpri ki imin finn invante, anba lanpriz bann lafors ki dan liniver, e ki pena okenn lien avek Lekris. Parski totalite natir Bondie res dan li, dan so lekor, e zot trouv zot lakonplisman dan Lekris ki dominn tou bann Lespri e tou bann Lafors. Dan Lekris, zot finn resevwar enn sirkonsizion ki pa fer par bann imin e ki finn anlev pese ki ti dan zot limanite: se sa sirkonsizion-la ki dan Lekris. Zot finn plonze ar li dan batem, ar li zot finn resisite parski zot finn krwar dan lafors Bondie ki finn resisit li depi bann mor. Zot ti finn mor akoz zot bann fot ek zot leker pa sirkonsi; aster Bondie finn donn zot lavi ar Lekris; li finn pardonn tou nou bann fot, li finn rey sarz ki bann komannman ti pe fer pez lor nou; li finn fer li disparet, li finn koulout li lor lakrwa. Li finn depouy bann Lespri e bann Lafors, tou dimounn trouve ki li finn dezarm zot, li finn trenn zot dan kortez laviktwar so lakrwa. Aster-la, personn pa kapav kondann zot pou bann kestion manze-bwar, konsernan bann fet, nouvel linn oubien saba. Tousala nek lonbraz bann realite ki pou vini e ki sorti depi Lekris. Pa les personn kokin zot laviktwar par bann devosion, par lapriyer ar bann anz lor baz vizion e lintelizans imin ki gonfle ar pretansion. Pa les personn detas zot ek Lekris ki latet, ki mintenir ansam lekor antie, ki gard li ini avek bann artikilasion ek bann ligaman, pou li grandi gras-a Bondie. Zot finn mor avek Lekris, zot nepli soumi anba bann lafors sa lemond-la; kifer zot pou obeir bann regleman kouma dir zot lavi depann lor la: “Pa pran, pa goute, pa touse”? Tousala pou bann kiksoz ki pou dekonpoze letan itilize; samem ki apel komannman ek doktrinn imin sa! Zot bon rod pran laparans lasazes: relizion personel, devosion, privasion; tousala pena okenn valer pou metriz bann dezir nou prop natir. Zot finn resisite avek Lekris, rod seki lao, la kot Lekris ete, dan kote drwat Bondie; rod seki lao e pa seki lor later. Zot finn mor e zot lavi finn kasiet avek Lekris dan Bondie. Ler Lekris, ki zot vre lavi, pou manifeste, lerla zot ousi zot pou manifeste dan laglwar ar li. Tou seki fer parti lavi lor later an zot, fer li mor: limoralite, inpirte, lavi bakanal, bann move dezir ek lamour larzan ki enn form idolatri. Ala seki atir lakoler Bondie, ala seki ti zot konportman lontan, seki ti fer parti zot lavi. Aster, zot bizin debaras tousala: lakoler, iritasion, mesanste, zoure ek bann move parol ki fransi zot lalev. Fodepa ena mansonz ant zot, parski zot finn abandonn ansien natir, avek so bann pratik, e zot finn adopte enn nouvo natir, ki pe kontign renouvle so konesans antan ki zimaz Bondie; la, pena ni Grek ni Zwif, ni seki sirkonsi ni seki pa sirkonsi, etranze, tribi pa sivilize, esklav, lib, me selman Lekris ki tou, Lekris dan zot tou. Zot, zot bann ki Bondie finn swazir, finn sanktifie, finn kontan, alor met dan zot leker bann santiman konpasion, bienveyans, imilite, douser, pasians. Siport zot kamarad, e si zot ena kit repros, donn zot pardon; kouma Lesegner finn pardonn zot, zot ousi pardone. Pli inportan ki tou, viv dan lamour, samem ki fer linite dan larmoni. Ki lape Lekris regn dan zot leker, pou samem ki zot tou finn apele pou form enn sel lekor. Viv dan rekonesans. Ki Parol Lekris prezan parmi zot dan tou so rises: ansegn zot prosin, fer zot ledikasion ar lasazes; par bann Psom, bann sante e bann kantik inspire par Lespri, sant zot rekonesans pou Bondie Tou seki zot kapav dir ou fer, fer li dan nom Segner Zezi, e par li, rann gras Bondie Papa. Bann madam, viv dan lakorite ek zot misie kouma bizin viv dan Lesegner. Bann misie, kontan zot madam e zame pa maltret li. Bann zanfan, viv dan lakorite touletan ar zot paran, ala seki Lesegner atann de zot. Bann paran, pa pous zot zanfan abou atansion zot dekouraze. Bann esklav, dan tou kiksoz obeir zot bann met ki lor later. Servi zot, pa parski pe vey zot, kouma dir zot pe rod fer plezir bann imin, me ar enn leker ki sinp e ki ena lakrint pou Lesegner. Ninport ki travay zot pe fer, fer li ek enn bon leker, kouma dir pou Lesegner e non pou bann imin. Parski zot kone ki leritaz zot pou resevwar an rekonpans ar Lesegner. Se Lekris ki Lemet, e zot pe servi li. Si zot fer ditor, li pou ena so konsekans, e pa pou ena preferans pou personn. Bann met, tret zot esklav dan enn fason zis ek korek, parski zot kone ki zot ousi zot ena zot Met dan lesiel. Pa aret priye; se sa ki pou gard zot lespri vif e dan remersiman. Kan zot priye, priye ousi pou nou: ki Bondie ouver enn laport pou ki nou gagn lokazion anons mister Lekris; se pou sa ki mo dan prizon: pou temwagn mister Lekris kouma bizin. Rod meyer latitid anver bann non-Kretien; sezi tou lokazion. Ki zot parol touzour bienveyan, enn koze ki ena gou pou ekoute, e ki zot konn reponn sakenn kouma bizin. Zot pou gagn tou mo nouvel par Tisik, enn frer ki mo kontan, enn serviter fidel, mo konpagnon servis dan Lesegner. Mo avoy li expre pou donn zot nouvel e rekonfort zot. Onezim, sa frer fidel e bieneme la, pe akonpagn li; li sorti kot zotmem li. Sa de-la pou met zot okouran tou seki pe pase isi. Aristark ki dan prizon ek mwa dir zot bonzour, Mark, kouzin Barnabas, osi dir zot bonzour. Zot finn gagn bann instriksion lor li, si li vinn kot zot, akey li bien. Zezi ousi ki apel Zistis avoy zot so bonzour. Parmi bann Zwif, zot tousel travay ek mwa pou Rwayom Bondie, zot mo konsolasion. Epafras, ki enn parmi zot e enn serviter Zezi Kris, dir zot bonzour. Li touzour priy pou zot avek tou so leker, pou ki zot res ferm, avek bann konviksion for, e ki zot donn enn wi total pou fer volonte Bondie. Mo finn temwin ki li pran boukou lapenn pou zot, pou bann ki Laodise ek Ierapolis. Lik nou kamarad dokter ek Demas dir zot bonzour. Dir bonzour bann frer e bann ser ki dan Laodise; dir bonzour Ninfa ek Legliz ki reini dan so lakaz. Kan zot fini lir mo let, pas li dan Legliz Laodise. Lir ousi let ki mo finn avoy Laodise. Pa bliye dir Arsip, “Vey lor minister ki to finn resevwar dan Lesegner e fer ansort akonpli li bien.” Mwa Pol, mo ekrir sa bonzour-la ek mo lame: Pa bliye mo dan prizon. Bondie li bon pou zot! Mwa Pol, ansam avek Silas ek Timote, nou pe ekrir legliz pep Bondie Papa ek Segner Zezi Kris, dan Tesalonik. Ki lagras ek lape res ar zot. Touletan nou pe remersie Bondie pou zot tou e nou pa fini pans zot dan nou lapriyer. Devan nou Bondie ek Papa nou rapel seki zot finn fer akoz zot lafwa, kouma zot finn travay dir akoz zot lamour pou Zezi e kouma zot finn tini ferm dan lesperans pou Zezi Kris. Mo bann frer ek ser, nou kone ki Bondie kontan zot e li finn swazir zot, parski kan nou finn amenn zot mesaz Bonn Nouvel, li pa zis par laparol, me li osi avek pwisans ek led Lespri Sin e avek enn gran konviksion. Zot kone kouma nou finn viv parmi zot pou zot prop dibien. Zot finn imit nou ek Lesegner, malgre tou bann persekision, e zot finn resevwar laparol avek lazwa par Lespri Sin. Alor, zot finn vinn enn lexanp pou tou bann krwayan dan Masedwann ek Akaya. Parol Lesegner ki sorti kot zot, pa finn zis propaze dan Masedwann ek Akaya, me nouvel zot lafwa osi finn fane partou. Alor nou pena nanye pou koze. Tou dimounn pe rakonte ki kalite lakey nou ti gagne kot zot e kouma zot ti abandonn bann idol pou servi vre Bondie vivan. Zot pe atann retour so Garson Zezi ki dan lesiel, limem ki Bondie ti resisite parmi bann mor pou sov nou depi zizman Bondie ki pros. Frer ek Ser, zot bien kone ki nou pa finn vinn kot zot pou nanye. Kouma zot kone, nou finn gagn maltrete e nou finn soufer dan Filip, me nou ti ena kouraz dan nou Bondie pou anons zot Bonn Nouvel Bondie malgre tou lopozision. Ofet, lapel ki nou pe adres zot tou, li pa baze lor bann fos mesaz ouswa bann motif inpir, nou pa anvi trik personn. Okontrer, parey kouma Bondie finn konfie nou so Bonn Nouvel, nou pa koze pou fer plezir bann imin me pou fer plezir Bondie ki teste nou leker. Kouma zot kone e Bondie temwin, zame nou pa finn servi bann parol pou flat noumem oubien pou kasiet gourmandiz materyel. Nou pa finn rod okenn loner ar personn, ni ar zot ni ar lezot dimounn, pourtan, nou ti kapav inpoz lor zot nou lotorite kouma bann zapot Kris. Okontrer nou finn ena enn leker zanfan vizavi zot, parey kouma enn mama pran swin so zanfan. Nou lafeksion pou zot li telman gran ki nou ti pare pou partaz avek zot, pa zis Bonn Nouvel Bondie me osi nou prop lavi, telman zot ti finn vinn pros ar nou. Frer ek ser, zot rapel nou lapenn ek nou travay. Nou finn trime lanwit-lizour pou ki nou pa enn fardo pou zot letan ki nou pe anons zot Bonn Nouvel Bondie. Ansam avek Bondie, zot temwin, ki manier nou finn ena enn kondwit sin ek san repros vizavi zot, bann krwayan. Kouma zot kone, nou finn tret sakenn parmi zot kouma enn papa tret so bann zanfan. Nou finn ankouraz zot, rekonfort zot ek plede pou ki zot amenn enn lavi korek ki onor Bondie, ki apel zot pou partaz ar li so rwayom ek so laglwar. Nou touzour pe rann gras Bondie parski letan nou finn anons zot so Parol, zot finn ekoute e zot finn aksepte li, pa kouma enn parol imin me kouma enn parol ki vremem sorti kot Bondie e ki pe azir dan zot, bann krwayan. Ofet, mo bann frer ek ser, zot finn swiv lexanp bann dimounn ki dan legliz Bondie dan Zide ki krwar dan Zezi Kris. Zot prop pep finn persekit zot, parey kouma bann-la ti sibir ar bann Zwif, ki ti touy Zezi ek bann profet. Zot finn osi persekit nou. Zot pa fer plezir Bondie e zot lennmi tou dimounn. Zot anpes nou anons bann payin mesaz ki kapav sov zot. Tou sa letan-la zot finn kontigne fer pese e samem zot dernie pese. Me zizman Bondie finalman finn tom lor zot. Mo bann frer ek ser, mem si nou finn separe fizikman ar zot pou enn ti letan, zot touzour dan nou panse. Pandan sa letan-la zot ti mank nou boukou, me nou ti ena enn gran dezir pou retrouv zot ankor. Akoz samem nou ti anvi vinn vizit zot, sirtou mwa Pol, mo finn eseye plizir fwa, me Satan finn anpes nou. Apre tou, zotmem nou lesperans, nou lazwa. Zot pou parey kouma enn kouronn doner pou nou dan prezans nou Segner Zezi letan li retourne. Wi, zotmem nou laglwar ek nou lazwa. Finalman, ler nou ti nepli kapav tini ankor, nou finn deside pou res tousel dan Atenn; e nou finn avoy nou frer Timote, kolaborater Bondie pou anons Bonn Nouvel Zezi Kris, pou ankouraz zot pou tini ferm dan zot lafwa, pou ki personn parmi zot pa les zot abat par bann eprev ki nou pe fer fas. Zotmem, zot kone ki bann eprev parey fer parti plan Bondie pou nou. Letan nou ti ankor kot zot, nou ti prevenir zot ki nou pou gagn persekite. Kouma zot kone, samem ki finn arive. Pou sa rezon-la, letan mo ti nepli kapav siporte, mo ti avoy Timote pou pran nouvel lor zot lafwa. Mo ti per ki diab tant zot e tou sa lapenn ki nou finn fourni la, finn tom dan dilo. Me, Timote fek retourne depi kot zot avek bann bon nouvel lor zot lafwa ek zot lamour. Li finn dir nou osi ki zot pe touzour pans nou e pe anvi retrouv nou parey kouma nou osi nou anvi retrouv zot. Mo bann frer e ser, akoz samem dan tou nou detres ek soufrans nou finn gagn boukou kouraz akoz zot lafwa. Aster-la nou pe kapav viv parski zot finn tini ferm dan zot latasman avek Lesegner. Ki manier nou kapav remersie Bondie pou zot pou tou sa lazwa ki nou finn santi devan Bondie akoz zot. Lanwit-lizour, nou pe priye Bondie pou ki nou kapav trouv zot fasafas e azout seki manke dan zot lafwa. Ki Bondie nou Papa limem ek nou Segner Zezi diriz nou lor sime ki amenn nou kot zot. Ki Bondie ogmant lamour ki zot ena ant zot e pou tou dimounn, parey kouma lamour ki nou ena pou zot. E ki li fortifie zot leker, e fer li vinn sin pou ki zot kapav dibout san repros devan Bondie nou Papa ler nou Segner Zezi retourne avek tou bann sin. Amen. Finalman frer ek ser, zot finn aprann avek nou kouma zot bizin konport zot pou fer plezir Bondie, e zot pe deza fer li. Aster-la nou dimann zot e nou sipliy zot lor nom Segner Zezi, pou fer plis ankor. Parski zot kone ki linstriksion nou finn donn zot atraver Segner Zezi. Samem volonte Bondie: ki zot viv enn lavi sin, e pa enn lavi imoral. Ki sakenn kapav kontrol so prop lekor. Sak zom bizin kone kouma viv avek so fam, dan enn fason sin e respektab. Pa les zot domine par bann move dezir parey kouma bann payin ki pa konn Bondie. Dan sa zafer-la, ki personn ant zot pa fer dimal so prosin oubien abiz lor li. Nou finn deza dir zot sa avan, la nou pe averti zot ki Bondie pou pini bann ki komet sa bann fot-la. Bondie pa finn apel nou pou viv dan imoralite, me pou viv enn lavi sin. Akoz samem, dimounn ki rezet sa lansegnman-la, li pa pe rezet enn zom me Bondie ki donn osi so Lespri Sin. Aster-la, konsernan lamour pou bann frer ek ser, nou pa bizin ekrir zot lor la, parski zot finn aprann zotmem ar Bondie kouma kontan zot prosin. Biensir, zot kontan tou bann frer ek ser dan Masedwann. Me nou sipliy zot pou fer ankor plis. Zot bizin ena sa dezir pou viv trankil, pou get zot prop zafer e pou travay avek zot prop lame parey kouma nou ti rekomann zot. Par sa fason-la, zot pou gagn respe bann ki pa krwayan, e zot pa pou depann lor personn. Frer ek ser, nou pa anvi ki zot res dan liniorans konsernan bann dimounn ki finn mor, pou zot pa tris kouma bann lezot dimounn ki pena lesperans. Nou krwar ki Zezi finn mor e resisite, alor atraver Zezi, Bondie pou revey bann ki finn mor dan Lesegner. Dapre parol Bondie, ala seki nou deklare: nou ki vivan e ki pou ankor la kan Lesegner retourne, nou pa pou pas devan zot. Kan zot pou tann lavwa arkanz, tronpet pou sone, Lesegner limem pou desann; dimounn ki finn mor dan Kris pou resisite an-premie. Apre sa, nou ki ankor vivan, nou pou mont ansam ar zot dan niaz pou zwenn Lesegner anler e nou pou ar li pou touletan. Akoz samem zot bizin ankouraz sakenn ant zot avek sa bann parol-la. Li pa neseser ki nou ekrir zot, mo bann frer e ser, konsernan ler ek moman ki sa pou arive. Parski zotmem zot bien kone ki Lesegner, so zour pou arive parey kouma enn voler dan lanwit. Kan dimounn pou dir: “Ena lape ek sekirite,” lerla mem maler pou fini zot enn sel kou parey kouma douler enn madam ansint ki pe akouse. Zot pa pou kapav sove. Me zot, mo bann frer e ser, zot pa dan sa marenwar-la pou ki sa zour-la may zot antret kouma enn voler. Zot tou zanfan lalimier e zanfan lizour; nou pa apartenir ni ar lanwit ni ar marenwar. Alor anou pa dormi kouma lezot, me anou res eveye ek kalm. Bann ki dormi, zot dormi aswar, bann ki soular, zot bwar aswar, me nou ki viv dan lalimier lizour, nou bizin res kalm e kontrol noumem. Pran lafwa ek lamour kouma kwiras e lesperans ek delivrans kouma enn elmet lor nou latet. Bondie pa finn fer nou pou soufer pinision me pou gagn delivrans par nou Segner Zezi Kris, ki finn mor pou nou, pou ki nou kapav viv ini avek limem si nou eveye ou pe dormi. Alor ankouraz zotmem e fortifie zot bien, parey kouma zot deza pe fer. Mo bann frer e ser, nou pe dimann zot pou respekte bann ki pe travay parmi zot, ki instrir zot, e ki ansarz zot devan Lesegner. Ena boukou estim pou zot akoz travay ki zot fer. Ki ena lape parmi zot. Nou pe sipliy zot, frer ek ser, pou averti bann ki pares, ankouraz bann ki gagn per, ed bann feb, ena pasians pou zot tou. Asir zot ki personn pa rann lemal par lemal, me rod touzour fer seki bien ant zot e pou tou lezot dimounn. Res touzour dan lazwa. Priye touletan. Rann gras dan ninport ki sirkonstans, parski samem volonte Bondie pou zot dan zot lavi avek Zezi Kris. Pa met baryer dan travay Lespri Sin. Pa mepriz mesaz bann profet; examinn tou kiksoz avek disernman e gard seki bon. Evit tou seki asosie ar lemal. Ki Bondie lape rann zot sin limem dan tou fason, ki li gard ferm zot lespri, ek zot lekor san okenn repros letan Zezi Kris nou Segner pou retourne. Seki apel zot li fidel e li fer seki li dir. Mo bann frer e ser, priye osi pou nou. Fer konpliman tou bann frer e ser, anbras zot tou. Mo sipliy zot lor nom Lesegner, lir sa let-la avek tou zot bann frer e ser. Ki lagras Zezi Kris nou Segner res avek zot. Pol, Silvin ek Timote pe ekrir Legliz Bondie Papa ek Lesegner Zezi Kris ki dan Tesalonik: Nou swete ki Bondie nou Papa ek Segner Zezi Kris donn zot lagras ek lape. Nou bann frer ek ser, nou bizin touzour rann gras Bondie pou zot. Li bien ki nou fer sa, parski zot lafwa pe boukou grandi, e lamour ki sakenn ena ant zot pe osi grandi. Akoz samem nou koz lor zot avek boukou fierte dan Legliz Bondie. Zot pe tini ferm dan zot lafwa malgre tou bann persekision ek detres ki zot ankor pe siporte. Samem prev ki zizman Bondie li drwat, e seki zot pe siporte la, li pou rann zot dign Rwayom Bondie, pou ki zot pe soufer. Ofet, Bondie li zis; seki fer zot soufer, li pou soufer li osi. Bondie pou soulaz zot, ki pe soufer, e parey nou osi. Li pou fer sa kan Lesegner Zezi retourne depi dan lesiel avek so bann anz bien pwisan, zot pou vini avek enn laflam dife, pou vanz kont bann ki pa konn Bondie e ki pa obeir Bonn Nouvel nou Segner Zezi Kris. Zot pinision pou detrir zot pou touzour e pou separ zot avek prezans Bondie ek pwisans so laglwar. Letan li vini zour so glorifikasion parmi tou so pep, li pou admire par bann dimounn ki finn krwar dan li e zot osi zot pou parmi akoz zot temwaniaz. Akoz samem nou priye pou zot, nou dimann Bondie ki zot res fidel ar so lapel e ki so lagras permet zot realiz zot dezir pou fer seki bien e rann zot lafwa aktif. Alor, nom Segner Zezi pou glorifie dan zot, e zot dan li, dapre lagras Bondie e nou Segner Zezi Kris. Frer ek ser, konsernan retour nou Segner Zezi Kris ek nou rasanbleman avek li, nou sipliy zot, pa tro boulverse, oubien trakase, ni par bann fos let swadizan sorti kot nou, ki dir ki zour Lesegner li deza la. Dan ninport ki fason, pa les personn anbet zot parski sa zour-la pa pou arive avan ki gran rebelion kont Bondie arive e sef rebel ki finn destine pou detrir pou aparet. Li pou lev kont tou seki dimounn priye ek adore. Li pou instal so tronn dan Tanp Bondie apre sa deklar limem kouma Bondie. Zot pa rapel ki mo ti dir zot tou letan ki mo ti ankor avek zot? Aster-la zot kone ki pe tini li pou ki li paret selman ler so letan vini. Sa pwisans sekre mesanste la, li deza pe travay, me selman kan sa kikenn ki pe tini la, les li fer; lerla move rebel-la pou paret e Segner Zezi pou touy li, li pou detrir li avek lafors so retour. Move Dimounn pou vini avek lafors Satan, ki pou servi tou pouvwar, tou bann sign pou anbet dimounn. Li pou servi tou fason pou fer bann ki pe deperi perdi lespwar parski zot pe refiz aksepte lamour ki sov zot. Akoz samem Bondie avoy zot enn fos pwisans pou fer zot krwar dan seki fos. Alor, tou dimounn ki pa krwar dan laverite e pran plezir dan seki mal, li pou kondane. Nou bizin touzour pe rann gras Bondie pou zot bann frer ek ser, parski Bondie finn swazir zot depi koumansman mem pou sov zot par pouvwar Lespri e par zot krwayans dan laverite, pou fer zot vinn enn pep sin. Atraver Bonn Nouvel ki nou finn anons zot, Koumsa mem Bondie finn apel zot pou ete. Li finn apel zot pou ki zot gagn zot par dan laglwar nou Segner Zezi Kris. Mo bann frer ek ser, tini ferm avek sa tradision ki nou finn montre zot la, ki li par parol ou par let. Ki nou Segner Zezi Kris limem ek Bondie nou Papa ki kontan nou e finn donn enn rekonfor eternel ek enn bon lesperans par so lagras, li ranpli zot leker avek kouraz e li akord zot lafors pou touzour pratik seki bien, par zot aksion ek zot parol. Finalman, mo bann frer ek ser, priye pou nou pou ki Parol Lesegner kapav propaze bien vit e ki li onore partou, parey kouma sa ete parmi nou. Priye Bondie osi pou ki li delivre nou depi lame bann move dimounn; parski pa tou dimounn ki ena lafwa. Me Lesegner ki fidel, li pou fortifie zot e gard zot proteze kont diab. Nou fer zot konfians dan Lesegner; nou kone ki zot pe fer seki bien e ki zot pou kontigne fer bann kitsoz ki nou dir zot fer. Ki Lesegner diriz zot leker pou konpran lamour Bondie ek pasians ki Kris ena pou zot. Mo bann frer ek ser, lor nom nou Segner Zezi Kris, nou dimann zot pou gard zot distans avek bann krwayan ki pe viv dan dezord e pa pe swiv bann tradision ki nou finn donn zot. Zotmem, zot kone kouma zot bizin imit nou; nou pa ti pares kan nou ti kot zot, e nou pa ti manz dipin personn san ki nou ti rann gras Bondie. Avek lapenn ek kouraz nou finn travay lanwit-lizour, pou ki nou pa met okenn fardo lor zot. Nou fer sa, pa parski nou pena drwa resevwar zot led, me parski nou anvi donn zot enn lexanp pou swiv. Ofet depi ki nou ti avek zot, nou ti dir, “Kikenn ki pale travay, li bizin pa manze osi.” Parski nou finn tande ki ena parmi zot ki pe amenn enn lavi dezordone, pale fer nanye e zot pas zot letan mel zot ar zafer lezot dimounn. Nou dimann zot lor nom Segner Zezi Kris, pou ki zot les sa bann dimounn-la travay trankil pou gagn zot dipin. Frer ek ser, fode pa zot santi zot fatige pou fer seki bon. Si kikenn pa obeir mesaz ki dan sa let-la; rey so nom e pa gagn okenn kontak ar li; sa pou fer li gagn onte. Pa bizin tret li kouma enn lennmi, me averti li kouma enn frer. Ki Segner, sours lape, li donn zot limem touletan lape e dan tou sort fason. Ki Bondie res ar zot tou. Mwa, Pol, avek mo prop lame, mo pe ekrir zot sa bann mo-la. Koumsa mem ki mo sign sak let ki mo ekrir, samem mo lekritir. Ki lagras nou Segner Zezi Kris res ar zot tou. Mwa, Pol, mo finn vinn zapot Zezi Kris gras-a promes Bondie nou Sover ek Zezi Kris nou lesperans. Mo pe adres twa sa let-la Timote, twa mo zanfan lwayal dan lafwa; mo demann Bondie Papa ek Zezi Kris nou Segner akord twa so lagras, so pardon ek so lape. Kan mo ti kit Masedwann, mo ti rekomann twa res dan Efez. Ena dimounn pe propaz enn lot lansegnman. To bizin dir zot arete. Anpes zot rakont toutsort kalite zistwar ek koz gran-gran koze lor bann anset parski tousala pa servi nanye. Zis par lafwa ki plan Bondie avanse. Konpran kifer mo pe donn sa lord-la. Mo oule lamour dan enn leker prop, enn konsians drwat ek enn lafwa sinser. Ena finn perdi sime e zot lespri finn egare dan bann diskour ninport. Zot pretann ki zot bann koneser lalwa alors ki zot pa mem konpran seki zot pe dir ni seki zot pe ansegne. Nou kone ki lalwa enn bon kiksoz, si konn bien servi li. Lalwa pa konsern bann dimounn ki ena bon kondwit. Li pou bann malfeter ek bann rebel, bann move dimounn ek bann peser, bann ki pena respe ni pou Bondie ni pou bann zafer sakre; pou bann ki touy zot papa zot mama, bann asasin, bann ki amenn move lavi, bann zom ki gagn relasion ant zot; lalwa finn fer pou bann marsan esklav, bann dimounn ki manter e ki zot parol pena valer, e pou tou bann ki komet aksion ki al kont vre lansegnman. Mo tir sa lansegnman-la dan grander Bonn Nouvel ki Bondie Beni, finn konfie mwa. Mo rann gras Zezi Kris nou Segner, mo lafors, parski li finn fer mwa konfians, li finn swazir mwa kouma so serviter. Malgre mo ti pe blasfeme, mo ti enn persekiter e mo ti fer violans, zordi, Bondie finn pardonn mwa. Akoz mo liniorans, mo finn azir san lafwa. Nou Segner finn vers lor mwa ankor plis lagras e li finn akord mwa lafwa ek lamour ki dan Zezi Kris. Ala enn parol sir ki tou dimounn bizin tande: Zezi Kris finn vinn lor later pou sov bann peser. Parmi bann peser, momem premie; me mo finn gagn so pardon parski Zezi, atraver mwa, oule manifeste tou so pasians. Mwa mo enn lexanp pou tou seki krwar dan Li pou ki zot gagn lavi eternel. Tou loner, tou laglwar pou Bondie pou leternite. Li regne pou touzour, li invizib e li tousel Bondie. Amen. Timote, mo garson, kan mo pe fer tou sa bann rekomandasion-la, mo mazinn bann profesi ki konsern twa. Pran sa parol-la kouma enn gid dan sa gran komba ki to ena pou amene la. Gard to lafwa ek to konsians drwat. Ena dimounn pa finn pran mo parol an konsiderasion e zot lafwa finn fer nofraz. Parmi ena Imene ek Alexand; mo finn livre zot dan lame Satan, zot va konpran ki fode pa blasfeme. Mo fer enn lapel pou ki, avan tou, zot fer lapriyer, zot sipliy Bondie ek zot fer aksiondegras pou tou dimounn, pou bann lerwa, tou bann ki ena lotorite, pou ki lape ek trankilite regne e ki nou kapav viv dan lapiete ek dan dignite. Sa li enn gran zafer e li agreab pou Bondie nou Sover ki oule sov tou dimounn pou ki zot arive konn laverite. Kouma ena enn sel Bondie, ena osi enn sel mediater ant Bondie ek limanite, Zezi Kris limem enn imin ki finn met so lavi angaz pou liber tou dimounn. Bondie pe rann so temwaniaz dan ler ki ti fixe. Li finn swazir mwa pou proklam so mesaz e li avoy mwa kouma enn zapot pou pran sarz ek pou instrir tou bann ki pa Zwif dan lafwa ek laverite; seki mo pe dir li vre. Ala kifer, mo pe demande ki dimounn priye partou e touletan, ki zot lev zot lame lao ver lesiel, san fer koler, san lager. Lor kestion bann madam dan lasanble, fode ki zot abiy zot dan enn fason korek, abiy zot avek respe ek sinplisite; pa fer bann kwafir konplike, pa orn zot lekor ar bizou, perl, e pa met linz extravagan. Kouver zot plito ar bann bon aksion; koumsa mem enn fam fer kan li respekte Bondie. Kan pe donn lansegnman, madam bizin res trankil dan limilite. Mo pa permet enn madam donn lansegnman dan bann sesion, ni dominn zom. Li bizin gard silans. Adam ti kree an-premie, apre lerla Ev. Pa Adam ki ti rant dan piez Satan, me fam-la ki ti finn tom dan piez ek finn dezobeir Bondie, me so maternite pou sov li. Selman fode ki bann madam persevere dan lafwa, lamour ek amenn enn bon lavi ek gard enn bon zizman. Mo donn enn parol sir: si kikenn anvi vinn levek pou vey lor lafwa, li pe dezir fer enn travay nob. Levek bizin enn dimounn ki san repros, enn mari fidel, enn dimounn sinp, rezonab e respektab, ki ena lespri ouver e fode li kapav donn lansegnman. Fode pa ki li enn soular, ni kontan lager, ni fer koze vinn long ek kontan larzan. Li bizin enn dimounn trankil ki pena enn lintere personel. Li bizin konn diriz so prop fami, bien elve so zanfan ki obeir li avek respe. Ki manier enn dimounn pou kapav pran sarz Legliz Bondie si li pa kapav diriz so prop fami? Fode pa osi ki li fek konverti, ki li pa ankor fer so prev. Lorgey kapav mont dan so latet e li fini kouma diab. Bizin ki dimounn andeor ena boukou lestim pou li, pou ki li pa tom dan laont e anmemtan pa may dan lak diab. Mem zafer pou bann diak. Zot bizin respektab ek sinser, pa servi doub langaz, pa soular, ni atase ar larzan. Zot bizin gard laverite lafwa dan enn konsians kler. Bizin teste zot avan. Si pena nanye pou reprose, lerla zot kapav servi kouma diak. Zot fam osi bizin respektab, pa koz zafer dimounn, viv dan sinplisite ek azir kouma enn dimounn ki merit konfians dan tou kiksoz. Bann diak bizin fidel ar zot madam e gid bien zot zanfan ek zot fami. Seki fer so travay bien pou gagn enn bon repitasion e so lafwa dan Zezi Kris pou solid. Mo pe ekrir twa sa let-la, e mo espere zwenn twa biento. Si zame mo tarde, to kone aster-la ki fason to bizin konport twa dan lakaz Bondie, samem Legliz Bondie ki vivan, kouma enn kolonn ek enn sipor ki tini laverite. Wi, vremem, mister nou lafwa, li gran. Lekris finn paret kouma enn imin, Lespri Sin finn rann li zis, Bann anz finn kontanple li, Finn anons li kot tou bann pep lemond krwar dan li E li finn mont dan laglwar. Lespri Sin dir li klerman: dan dernie tan, ena pou abandonn lafwa. Zot prefer swiv bann lespri ki desevwar e ekout bann lansegnman demoniak. Pou ena predikater manter, bann ipokrit ki zot konsians finn nepli sansib, koumadir finn brile ar feray so. Zot pou ansegn ki fode pa marye, e zot defann manz sertenn nouritir. Pourtan Bondie finn kree sa bann nouritir-la pou ki bann krwayan ki konn laverite kapav rann li gras. Tou seki Bondie kree, li bon. Nanye pa bizin zete, me akeyir plito avek remersiman. Avek Parol Bondie ek lapriyer, nouritir vinn sin; samem fer plezir Bondie. Si to expoz tou sa bann parol-la ar bann frer ek ser, to pou vinn enn bon serviter Zezi Kris. Zot pou trouve ki to pe nouri twa avek Parol lafwa e ki to pe swiv bon lansegnman avek serye. Les dekote bann zistwar payin, bann palab e tou sort komeraz. Abitie twa viv dan latasman avek Bondie. Li pa sitan itil ki to okip to lekor, me li pli bon ki to met to latet pou swiv Bondie parski li promet twa lavi zordi ek pou leternite. Sa enn parol sir ki tou dimounn bizin aksepte dan fon zot leker. Kan nou lite, kan nou debat nou montre ki nou lesperans baze dan Bondie vivan ki Sover tou dimounn, Sover bann ki ena lafwa. Lor sa bann zafer lamem ki to bizin insiste ek ansegne. Mo pa oule ki personn souzestim twa akoz to enn zenes. Okontrer, vinn enn lexanp pou zot par to parol, to lamour, to lafwa, to manier viv. Ziska ki mo vini, konsakre to letan pou etidie Lekritir, fer bann predikasion ek donn lansegnman. Pa negliz don lagras ki to finn resevwar kan bann profet ti pronons parol dan to faver e group bann ansien ti inpoz lame lor twa. Pran tousala aker, donn twa afon dan to travay, persevere. Lerla, tou dimounn pou trouv to progre. Vey lor twa ek lansegnman ki to done. Persevere. Koumsa mem to pou sov tomem anmemtan ki to sov bann ki ekout twa. Pa koz brit ar enn vie dimounn, me koz ar li kouma to koz ar to papa. Tret bann zennzan kouma to frer. Tret bann vie madam kouma to mama, bann zennfi kouma to ser, avek respe. Pran swin bann vev, sirtou seki retrouv zot dan labandon. Si enn vev ena zanfan ou ti-zanfan, bizin montre zot kouma met an-pratik zot lafwa anver zot fami e rann zot paran ou gran paran seki zot dwa. Vremem, sa pou fer Bondie plezir. Bann vre vev, bann seki tousel, bizin met zot lesperans zis dan Bondie tousel ek priye lanwit-lizour, priye e demann Bondie ed zot. Me seki nek pans zis lamizman li deza enn kadav ki pe viv. Tousala, to bizin dir pou ki zot san repros. Si kikenn pa pran swin so fami, li finn fini renie so lafwa, e sa li pir ki enn dimounn ki pa krwar. Pou ki enn vev inskrir li lor lalis, fode ki li ena plis ki swasant-an e ki li finn marye enn sel fwa. To bizin gete si li ena bon repitasion, si li finn bien elve so bann zanfan, si li finn konn akey dimounn, si li finn met limem oservis bann frer ek ser ki vini, si li finn aport sekour bann malere, si li finn fer dibien ek bann bon aksion. Parkont, pa met bann zenn vev lor lalis. Kan zot pa kapav tini e ki zot le remarye, zot met Zezi Kris dekote e zot kas zot premie lalians. Anplis zot pena nanye pou fer, zot nek marse, al dan tou lakaz, fer palab, koz ninport. Preferab zot remarye, gagn zanfan e okip zot lakaz pou ki bann adverser pa koz nou koze. Deza lamem, ena ki finn pran move sime e pe swiv Satan. Si enn madam krwayan ena vev dan so fami, li bizin pran li ansarz e pa fie lor Legliz parski Legliz bizin okip bann vev ki tousel. Bann ansien ki diriz bien Legliz merit enn doub saler, sirtou bann ki bizin travay dir pou prese ek ansegne. Lekritir dir, “Pa met enn mizelier avek enn bef ki pe kraz dible,” e “Enn zouvriye merit so saler.” Napa les fer akizasion kont enn ansien si pena de ou trwa temwin. Si kikenn fer pese, repran li an piblik koumsa lezot pou fer atansion. Mo sipliy twa, dan prezans Bondie e Zezi Kris, devan tou bann anz beni, obzerv sa bann regleman-la dan enn fason strik, san fer faver personn. Pa inpoz lame vit-vit lor personn, sinon to pou konplis pese lezot. Pran to distans, gard twa prop. Aret bwar zis dilo, pran inpe divin pou to lestoma, sa pou evit twa gagn febles. Ena dimounn zot pese deor letan get zot; ena lekontrer, plitar ki dekouver zot pese. Mem zafer pou bann bon aksion, pou trouv zot klerman; mem seki pa tro vizib difisil pou kasiet. Bann esklav bizin ena respe pou zot met, pou ki nom Bondie ek so lansegnman pa blasfeme. Bann esklav fode pa mank respe zot met krwayan sou pretex ki bann met-la frer ar zot. Okontrer zot bizin fer plis parski zot devouman pou profit bann krwayan ek bann frer ek ser. Ala seki to bizin ansegne ek rekomande. Si kikenn donn enn lot lansegnman ki diferan ar bann vre Parol nou Segner Zezi e bann lansegnman dapre nou lafwa, li gonfle ar lorgey. Li enn inioran, li fann zizani, nek kontan diskite. Samem ki koz zalouzi, dispit, kritik, soupson e bann koze zame fini ant dimounn ti-lespri ek dan lerer. Zot panse ki ar larelizion kapav fer profi larzan. Laverite seki lafwa dan Bondie enn veritab rises pou dimounn ki kontant li avek seki li ena. Nou finn vinn lor later lame vid, nou pou ale lame vid. Alor, si nou ena manze pou nouri nou ek linz pou abiye, li ase. Me bann ki anvi vinn ris, zot tom dan tantasion. Zot bann move dezir met zot dan latrap, e samem ki amenn dimounn dan perdision. Kontan larzan samem rasinn tou lemal. Ena finn telman galoup deryer larzan ki zot finn separe ar lafwa e zot nam zame anpe. Me twa ki reprezant Bondie, evit tousala. Rod lazistis, latasman ar Bondie, lafwa, lamour, pasians ek douser. Amenn gran konba lafwa, pran posesion lavi eternel pou lekel Bondie finn apel twa parski to finn fer enn zoli konfesion to lafwa dan prezans boukou temwin. Dan prezans Bondie ki finn kree tou kiksoz e Zezi Kris ki finn proklam lafwa devan Pons Pilat, mo rekomann twa pou vey lor komannman to finn gagne pou ki to san repros kan nou Segner Zezi Kris pou manifeste li. Sa pou arive ler ki Bondie finn fixe, limem sel Souvrin, lasours tou boner, Lerwa bann lerwa, Segner tou segner, li tousel imortel, li res dan enn lalimier kot personn pa kapav aprose. Personn pa finn trouv li, ni pe trouv li. Laglwar, pwisans eternel pou li. Amen. Dir bann dimounn ris dan sa lavi-la, pa rant dan lorgey e pa met zot lesperans dan bann fos rises. Met zot lesperans plito dan Bondie ki donn nou tou seki nou bizin dan labondans. Rekomann zot fer lebien. Zot bizin ris ar bon aksion, fer bann don ek partaze. Zot va ramas enn zoli trezor bien solid pou lavenir e zot pou gout vre lavi. Timote, mo garson, vey bien lor seki Bondie finn konfie twa, evit bann koze dan vid e bann gran-gran deba, ki zot swadizan apel “konesans.” Ena dimounn sipoze posed bel-bel konesans me zot finn elwagn zot ar lafwa. Mo swet zot lagras Bondie. Mwa, Pol, mo enn zapot Zezi Kris par volonte Bondie. Mo finn resevwar mision pou proklam promes lavi ki gagne kan nou enn sel avek Lekris Zezi. Pou twa Timote, mo zanfan bieneme, Bondie Papa ek Zezi Kris nou Segner donn twa gras, mizerikord ek lape. Mo rann gras Bondie ki mo servi avek enn konsians kler, parey kouma mo bann anset. Lanwit, lizour mo pa aret pans twa dan mo lapriyer. Kan mo rapel to larm, mo anvi trouv twa, pou mo leker kontan. Mo touzour rapel lafwa sinser ki dan to leker. Samem lafwa ki to finn resevwar avek to granmer Lois ek to mama Enis. Ala kifer mo dimann twa gard vivan don spiritiel ki Bondie finn depoz dan to leker kan mo finn inpoz lame lor twa. Lespri ranpli nou avek lafors, lamour ek kontrol lor noumem. Pa per pou donn to temwaniaz lor nou Segner. Pa gagn onte pou mwa ki dan prizon akoz li. Pran to soufrans pou Bonn Nouvel avek lafors ki Bondie done. Li finn sov nou ek li apel nou, non pa akoz nou kapasite, me par so prop volonte. Li donn nou so lagras dan Lekris Zezi avan tou siek. Sa lagras-la ti manifeste par larive Lekris Zezi nou Sover ki finn detrir pouvwar lamor ek donn lavi eternel par so Bonn Nouvel. Bondie finn swazir mwa kouma enn predikater, enn zapot, enn dokter. Akoz samem zordi mo pe soufer. Me mo touzour konfian, mo napa per, mo kone dan ki mo finn met mo lafwa e mo sir e sertin ki li pou vey lor mwa ziska Gran Zour-la vini. Swiv touzour bann bon parol ki to finn tann mwa dir dan lafwa ek lamour lor Lekris Zezi. Gard bann bon lansegnman avek led Lespri Sin ki touzour prezan dan nou leker. To kone, tou bann ki dan provins Lazi, finn tourn ledo ar mwa, parmi ena Fizel ek Ermozenn. Mo dimann Bondie montre so mizerikord anver Onesifor ek so fami. Li finn touzour rekonfort mwa, zame li finn ignor mwa ki enn prizonie. Okontrer, kan li ariv dan Rom, li finn rod partou ziska li trouv mwa. Bondie beni li pou Gran Zour-la. To konn bien ki kantite servis li finn rann mwa dan Efez. Timote, mo garson, les Lekris Zezi rann twa pli for. To finn temwin mo lansegnman. Mo oule aster-la ki to transmet tousala bann dimounn sir ki pou kapav ansegn lezot. Kouma enn vre solda Zezi Kris, pran to par soufrans. Enn vre solda pa mel li ar lavi sivil. Li travay zis pou so sef. Okenn atlet pa reisi san respekte bann regleman. Planter ki finn travay dir ki resevwar premie par rekolt. Mazinn bien seki mo pe dir twa, Bondie pou fer twa trouve. Zame bliye Zezi Kris. Li finn resisite. Li finn pran nesans dan fami David, so anset. Samem Bonn Nouvel ki mo anonse. Akoz samem mo dan prizon zordi kot pe tret mwa kouma enn kriminel. Me personn pa kapav ansenn Bonn Nouvel. Mo pe siport tousala pou bann ki Bondie finn swazir. Alor Lekris Zezi pou sov zot ek zot pou gout laglwar eternel. Mo donn twa enn parol sir: si nou mor avek Lekris, nou pou viv avek li. Si nou res ferm avek li, nou pou regn avek li. Si arive nou renie li, li osi li pou renie nou. Me si nou, nou pa fidel, Lekris, li pou res fidel parski zame li renie so Parol. Pa les personn bliye tousala. Dimann zot, par nom Bondie, pa vinn diskit ninport. Tousala gaspiyaz pou zorey e li detrir dimounn ki pe ekoute. Fer tou pou ki Bondie trouv dan twa enn bon travayer ki pa per, ni onte, pou propaz Parol laverite. Evit bann diskision steril. Sa elwagn dimounn ar Bondie. Sa kalite palab-la amenn lagangrenn dan kominote. Imene ek Filet ti parmi sa bann dimounn-la. Zot finn ekart zot ar la verite ek finn amenn skandal kan zot ti pretann ki dimounn mor finn fini resisite. Me fondasion ki Bondie finn mete li solid. Finn ekrir lor la: Lesegner konn so dimounn. Tou dimounn ki priy Lesegner bizin evit lemal. Dan bann gran lakaz, pena zis bann vaz an-or, an-arzan; ena osi an-dibwa, an-later. Ena ki ena valer, ena pena valer. Koumsa mem, seki prezerv limem kont bann erer, li pou parey enn ki ena valer par so pirte. So met pou pran li bien swin ek li pou itil pou tou bann lokazion. Fer atansion bann piez kot zenes rantre san panse. Touzour viv drwat. Pratik lafwa, lasarite, lape avek bann dimounn sinser kan zot invok Lesegner. Evit bann diskision bet ek initil ki amenn lager. Enn bon serviter Lesegner li pa enn bagarer. Li bizin akeyan anver tou dimounn ek fode li kapav donn lansegnman sir kot li montre pasians. Bizin repran bann adverser avek douser ek imilite. Bondie kapav sanz zot leker ek fer zot trouv laverite. Kapav ramenn zot ver larezon ek tir zot dan file diab kot zot finn maye. To bizin kone ki pou ena bann moman difisil dan bann dernie tan. Dimounn pou konn zis zotmem ek zot larzan. Zot pou egois, gourman, vantar. Lorgey ek difamasion pou trap zot. Pou ena rebel anver paran. Dimounn pou ingra, zot pou komet sakrilez, zot pou san pitie, ek laenn pou ranpli zot leker. Zot pou ena parol blesan ek zot pa pou kontrol zot lalang. Zot pou kont tou seki bien. Zot pou azir kouma tret; zot fronte telman lorgey amar zot. Olie kontan Bondie, zot kontan plezir. Me zot pou fer sanblan zot relizie alor ki zot bann ipokrit. Pa frekant zot. Ena parmi ki rant dan bann lakaz zis pou may bann fam ki feb dan zot file, bann fam ki ansene par toutsort kalite move dezir, bann fam ki pe touzour aprann me zame kapav gout laverite. Parey kouma Zanes ek Zanbres ki ti kont Moiz, ena ki dibout kont laverite. Zot lespri malad ek zot lafwa pa vo nanye. Me zot pa pou al lwin, tou dimounn pou dekouver zot move zwe kouma ti arive pou sa de-la. Twa Timote, to konn mo lansegnman ek manier ki mo viv. To konn mo proze, mo lafwa, mo pasians, mo lamour, mo landirans dan persekision ek dan lasoufrans ki mo finn viv dan landrwa kouma Antios, Ikoniem ek List. Ki mo napa finn sibir? E partou Lesegner finn delivre mwa. Tou dimounn ki vremem oule viv dan Lekris pou gagn persekision dan zot lavi. Me tou bann fos krwayan ek bann sarlatan pou touzour fer progre dan lemal. Zot pou tronp dimounn ek zot pou tronp zotmem. Twa, to bizin res ferm dan seki mo finn montre twa ek dan seki to finn gagne par tomem. To kone kot tousala sorti. Depi to lanfans, to konn Lekritir ki kapav donn twa sazes pou ena lafwa dan Lekris Zezi ki sov nou. Tou seki dan Lekritir, samem Parol Bondie ki servi pou ansegne, repran, korize, fer grandi dan lazistis, pou ki enn serviter Bondie li kalifie ek ekipe pou fer enn bon travay. Mo dimann twa, dan prezans Bondie ek Lekris Zezi ki bizin vini pou ziz bann vivan ek bann mor par so manifestasion ek so regn, proklam laparol, insiste touletan pou konvink. Fer repros ou donn lankourazman ki bizin kan to donn lansegnman. Pa perdi pasians. Ler pou arive kot dimounn pou nepli anvi ekout bon lansegnman. Zot pou prefer swiv zot dezir ek ekout bann predikater ki pou vinn met dan zot zorey seki zot anvi tande. Zot pou tourn ledo ar laverite pou ekout toutsort kalite zistwar. Me twa, gard to lespri kler. Siport leprev, fer to travay predikasion Bonn Nouvel. Ranpli to servis. Pou mwa letan finn sone pou gran sakrifis. Mo ler finn arive pou kit sa lavi-la. Mo finn konbat bon konba. Mo finn galoup mo lekours, mo finn gard mo lafwa. Aster-la, finn ler pou mo gagn kouronn lazistis ki Lesegner, sel bon ziz, pou donn mwa zour zizman. Pa mo tousel, me tou seki finn atann so zour dan lamour. Fer enn demars vinn zwenn mwa pli vit ki to kapav. Demas finn prefer lemond prezan, li finn abandonn mwa; li finn rant dan Tesalonik. Kresenns finn al Galasi, Tit finn al Dalmasi. Selman Lik avek mwa. Pran Mark, amenn li ar twa. Li pou kapav ed mwa isi. Mo finn avoy Tisik Efez. Kan to vini, amenn mo palto ki mo finn lese dan Troas avek Karpis. Amenn bann liv osi, sirtou bann roulo papie. Alexand, ki enn forzron, finn bien bles mwa; Lesegner pou pini li selon seki li finn fer. Twa osi, fer atansion ar li, parski li enn adverser terib kont nou predikasion. Premie fwa kan mo ti ena pou prezant mo defans, pa ti ena personn pou soutenir mwa. Zot tou ti abandonn mwa. Bondie pardonn zot. Me Lesegner ti avek mwa, li ti donn mwa lafors pou proklam so mesaz devan tou bann payin. Li ti tir mwa dan zot grif. Lesegner pou delivre mwa ankor dan tou bann piez ek li pou gard mwa pou so rwayom. Laglwar pou li dan leternite. Amen. Salie Prisil ek Akila ek osi lafami Onesifor. Erast finn res dan Korint. Mo finn les Trofim ki malad dan Mile. Fer demars vini avan liver. Ebril, Pidens, Linis, Klodia ek tou bann frer e bann ser salie twa. Mo priye ki Lesegner beni to lavi e donn twa so Lagras. Mwa Pol, serviter Bondie, mo enn zapot Zezi Kris ki finn swazir pou amenn bann krwayan dan lafwa ek gid zot dan laverite. Zot pou gagn lesperans lavi eternel ki Bondie finn promet depi lontan. E Bondie zame koz manti. Kan finn ariv lemoman, Bondie nou Sover finn manifeste so parol par enn proklamasion ki finn konfie mwa par so lord. Mo adres sa let-la pou twa Tit, mo vre zanfan dan lafwa. Mo priye Bondie nou Papa ek Lekris Zezi nou Sover: ki li amenn lagras ek lape lor twa. Mo finn les twa dan Kret, pou terminn lorganizasion Legliz ek etablir bann ansien dan sak lavil. Pa bliye seki mo finn dir twa: enn pret bizin ireprosab, mari enn sel fam. So zanfan bizin krwayan ek ena bon repitasion ek bon kondwit. Enn levek, antan ki enn zeran Bondie, bizin ireprosab: fode pa ki li arogan, fer koler, biver, batayer, kontan kas. Okontrer, li bizin akeyan, fer dibien, ekilibre, enn dimounn zis, devwe, ki konn kontrol limem. Li bizin tini ferm dan mesaz ki vre, parey kouma ti finn ansegne, pou ki so lansegnman ed dimounn ek koriz bann ki opoz zot. Wi, ena boukou, sirtou parmi bann sirkonsi, ki ena lespri rebel ek tronp lezot par bann bel-bel diskour kot zot koz ninport. To bizin ferm zot labous. Sa bann dimounn-la amenn boulversman dan bann fami ek zot pran kas. Ena enn parmi, enn zot profet, ki finn dir, “Bann Kretwa enn bann manter; zot gourman ek pares kouma bebet!” Sa temwaniaz-la, li vre. Sa kalite dimounn-la fode pa tolere. Bizin fer zot grandi dan lafwa. Pa pret atansion ar tou sort kalite zistwar ki bann Zwif pe rakonte ek bann komannman imin ki fer dimounn tourn ledo ar laverite. Tou kiksoz pir pou dimounn ki gard zot pir. Me pou bann ki inpir e ki pena lafwa, nanye pa pir. Zot lespri mem e zot konsians pa prop. Zot dir ki zot konn Bondie, me par zot bann aksion, zot renie li. Zot enn bann rebel ki Bondie deteste ek zot pa vo nanye pou enn sou. Twa Tit, donn bon lansegnman. Instrir bann granper: zot bizin sinp, ena dignite, koz ar sazes, profon dan zot lafwa, ena lamour ek perseverans. Parey pou bann granmer: azir kouma bann sint fam, pa fer palab, koz dan ledo, bwar. Okontrer donn bon lexanp pou aprann bann zennfam kontan zot mari ek zot zanfan, viv de fason rezonab, pa volaz, okip lakaz, viv bien anver zot mari afin ki Parol Bondie pa blasfeme. Invit bann zenes pa exazere dan zot konportman. To pou enn lexanp pou zot dan manier ki to viv. Met serye ek sinserite dan to lansegnman. Servi parol ki personn pa pou kritike ek kot to bann adverser pa pou kapav repros twa. Zot va gagn dekonserte parski pena nanye pou dir. Esklav bizin soumet anver zot met ek donn satisfaksion san ki fronte. Fode pa zot lame long; okontrer zot bizin onet. Lerla zot pou onor lansegnman Bondie nou Sover. Lagras Bondie ki sov tou dimounn finn manifeste. Samem lagras ki ansegn nou rezet linkrwayans ek bann zwisans lemond pou amenn enn lavi sinp lor later dan lazistis ek lafwa. Nou pe atann dan lesperans sa gran zour-la kot laglwar Bondie nou Sover dan Zezi Kris pou manifeste li. Li finn donn so lavi pou nou afin ki li tir nou dan pese ek fer nou vinn so sel pep ki destine pou fer lebien. Ala seki to pou dir kan to pou prese. Dir sa san ezite avek otorite. Pa les personn mepriz twa. Rapel tou dimounn ki zot bizin respekte bann dirizan ek bann otorite sivil. Zot bizin viv dan lobeisans ek fer bann bon aksion. Pa koz bonavini lor personn, evit dispit ek montre zot bienveyan anver zot prosin san lev lavwa an piblik. Lontan nou pa ti servi nou lespri, nou ti rebel ek dan erer. Nou ti esklav tou sort kalite plezir. Nou ti viv dan lemal ek lanvi. Lezot ti ayir nou, e nou ti ayir zot. Me kan Bondie nou Sover finn montre so bonte ek so lamour pou dimounn, li finn sov nou. Pa akoz nou bann bon aksion me par so mizerikord. Li finn sov nou atraver delo ki donn enn nouvo nesans ek enn renouvelman par Lespri Sin. Bondie finn repann an abondans Lespri Sin lor nou atraver Zezi Kris nou Sover, e kan li rann nou zis par lagras, nou gagn dan lesperans leritaz lavi eternel. Sa enn parol sir. Mo oule ki to met lanfaz lor sa bann kestion-la afin ki bann ki finn met zot lafwa dan Bondie, zot ena aker pou fer lebien devan tou dimounn, seki enn bon zafer an limem. Evit bann fos largiman, bann long lalis anset, diskision ek lager konsernan Lalwa. Tousa initil. Pou seki konsern bann divizer, apre de warning, bizin koupe ar zot. Sa kalite dimounn-la, zot koronpi. Zot pese fini kondann zot. Mo pans pou avoy twa Artemas ek Tisik. Degaz twa vinn rezwenn mwa dan Nikopolis parski mo pou pas liver la. Prepar bien vwayaz avoka Zenon ek Apolos. Veye ki zot napa mank nanye. Bann Kretien bizin aprann servi zot letan fer bon kiksoz pou reponn bann vre bezwin. Koumsa zot pou raport bann fri. Tou dimounn ki avek mwa salie twa. De to kote, salie bann ki kontan nou dan lafwa. Lagras Bondie avek zot. Mwa Pol, ki dan kaso akoz mo travay pou Zezi Kris, ansam avek nou frer Timote, pe ekrir twa mo frer Filemon, twa ki enn pros kolaborater. Nou ser Apia, Arsipous nou kamarad dan lalit ek tou bann manb legliz ki reini dan to lakaz: Ki Bondie nou papa ek Segner Zezi Kris, akord zot so lagras ek so lape. Sak fwa ki mo priye, mo pans twa e mo remersi Bondie, parski mo finn tann bann bon koze lor to lamour pou tou bann frer krwayan ek to lafwa ferm dan Segner Zezi. Mo priye ki sa lafwa ki nou partaze la, fer nou konpran pli bien sak benediksion ki nou resevwar letan nou res ini avek Kris. Frer, to lamour finn donn mwa boukou lazwa ek lankourazman parski to finn rekonfort leker bann krwayan. Pou sa rezon-la, mem si mo santi mo ena ase lotorite dan Kris pou donn twa lord pou fer to travay, pourtan mo pou plito fer twa enn lapel baze lor lamour. Mwa, Pol, enn vieyar, anplis aster-la enn prizonie Zezi Kris, mo fer enn reket pou Onezim ki mo finn pran pou mo zanfan dan Kris. Enn letan li ti initil pou twa, aster-la li itil pou nou toule-de. Mo pe retourn li kot twa, li ki vinn enn parti mo leker. Mo ti pou kontan gard li ar mwa pou li kapav servi dan to plas letan ki mo dan prizon akoz Bonn Nouvel Zezi Kris. Me mo pa anvi fer kiksoz san to konsantman pou ki to bonte pa vinn enn obligasion me to prop volonte. Kikfwa, akoz samem ki li finn separe ar twa, pou ki to kapav regagn li pou touzour, pa kouma esklav, me pli meyer ki enn esklav, kouma enn frer bieneme, spesialman pou mwa, me ankor plis pou twa dan to lavi ek dan Lesegner. Alor si to konsider mwa kouma to partner, akey li osi parey kouma to ti pou fer pou mwa. Si zame li finn fer twa ditor, oubien li dwa twa kiksoz, met sa lor mo kont. Mwa, Pol pe ekrir sa avek mo prop lame, mo pou ranbours twa. Mo pa anvi rapel twa ki to dwa mwa to prop lavi. Wi, mo frer, rann mwa enn servis pou lamour Lesegner; rekonfort mo leker dan Kris. Mo sir ki letan mo pe ekrir twa to pou fer seki mo pou demann twa, e to pou fer plis ankor. Anmemtan to prepar enn lasam pou mwa, parski mo pe espere gagn mo liberte par zot lapriyer. Mo kamarad dan Zezi Kris, Epafras, li fer zot konpliman; Mark osi, Aristark, Delmas ek Lik mo bann kamarad travay. Ki lagras Segner Zezi Kris li res ar twa. Dan lepase, Bondie ti koz boukou fwa ar nou bann anset atraver bann profet, dan diferan manier ek diferan fason. Me dan dernie tan ki lor nou, li finn koz ar nou atraver so Garson. Samem Garson ki li finn swazir kouma eritie tou kiksoz. Atraver li, Bondie finn kree lemond. Li reflet laglwar Bondie e li reprezant exakteman natir Bondie ki siport liniver par pwisans so parol. Apre ki li finn pirifie pese tou bann imin, li finn asiz dan kote drwat Bondie ki nou sel gran Segner dan lesiel. Alor li finn vinn pli siperyer ki bann anz parski nom ki li finn resevwar, li depas tou lezot nom. Ofet, avek ki anz Bondie finn deza dir, “Tomem mo Garson; zordi mo finn vinn to Papa”? Oubien, ar ki anz li finn dir, “Mo pou vinn enn Papa pou li, e li pou vinn enn Garson pou mwa”? Me letan Bondie avoy so Garson premie-ne dan lemond, li ti dir, “Ki tou bann anz Bondie ador li.” E letan Bondie koz lor bann anz-la, li dir, “Li servi bann anz kouma divan e so bann serviter kouma laflam dife.” Me lor so Garson, Bondie finn dir, “Bondie, to tronn li pou res pou touzour. Dan lazistis to pou gouvern to rwayom. To kontan seki drwat e to deteste seki move. Akoz samem Bondie, to Bondie, finn konsakre twa; avek enn delwil sin li finn donn twa lonksion; li finn rann twa pli zwaye ki to bann kamarad.” Lekritir dir osi: “Tomem, Segner, ki dan koumansman finn kree later, ek lesiel, li louvraz to lame. Tou pou disparet, me twa to pou reste; lesiel ek later pou vinn vie kouma linz vinn vie; To pou roul zot kouma enn manto, e zot pou sanze kouma linz. Me twa, to pou touzour parey e to pou viv pou touzour.” Avek ki anz Bondie finn deza dir: “Vinn asiz dan mo kote drwat, mo pou fer to bann lennmi vinn to marspie”? Bann anz, eski zot pa zis bann lespri ki Bondie avoye pou servi tou seki pou sove? Akoz samem nou bizin res ferm avek seki nou finn tande, pou ki nou pa derape. Si mesaz ki bann anz ti amene lontan ti valid e tou dimounn ki pa ti respekte ek obeir mesaz-la, zot ti gagn pinision ki zot ti merite; kouma nou pou sap nou lavi si nou negliz enn gran delivrans parey? Lesegner ti koz lor la an-premie, apre lezot ti prouv li par zot temwaniaz. Bondie limem finn soutenir sa mesaz-la par bann sign extraordiner avek enn bann mirak e osi par bann don dapre volonte Lespri Sin. Ofet, sa lemond ki pe vini e ki nou pe koze la, Bondie pa finn plas li anba pouvwar bann anz. Kikenn finn dir dan Lekritir: “Ki imin ete pou to mazinn li? ki imin ete pou to pran li kont? Pou inpe letan, to finn rann li inferyer ki bann anz, to finn kouronn li avek boukou laglwar ek loner, to finn donn li lotorite lor tou.” Si Bondie finn met tou anba lotorite imin, sa vedir ki li pa finn les nanye andeor zot lotorite. Me dan letan prezan, nou pa trouve ki tou kiksoz anba lotorite imin. Me nou trouv Zezi, ki pou inpe letan finn met li pli ba ki bann anz. Nou trouv li kourone avek laglwar e loner parski li finn soufer lamor. Par lagras Bondie, li finn gout lamor pou tou dimounn. Li normal ki Bondie ki finn kree ek prezerv tou kiksoz, fer Zezi vinn parfe atraver lasoufrans, pou ki boukou dimounn partisip dan so laglwar. Zezi, limem linisiater zot delivrans. Sa Enn ki sanktifie dimounn-la, ek sa bann ki resevwar sanktifikasion-la, toule-de zot sorti dan mem rasinn. Alor Zezi pa onte pou apel zot frer e ser. Li dir, “Mo pou proklam to nom ar mo bann frer, mo bann ser, omilie lasanble, mo pou loue twa.” Li osi dir, “Mo pou met mo konfians dan Bondie.” E ankor, “Ala mo la avek bann zanfan ki Bondie finn donn mwa.” Parski sa bann zanfan-la, zot ena enn natir imin ki fer avek laser ek disan. Zezi osi partaz sa mem natir-la. Li finn mor e atraver so lamor li finn detrir Satan ki ena pouvwar touy dimounn. Li delivre tou bann ki ti pe pas tou zot lexistans dan lesklavaz, akoz zot per lamor. Ofet li pa pe vinn osekour bann anz, me plito pou ed bann desandan Abraam. Pou sa rezon-la, li bizin vinn parey kouma so bann frer e ser dan tou fason, pou li kapav vinn enn gran pret fidel ek ranpli ar mizerikord dan servis Bondie, e pou ki bann pese dimounn pardone. Aster-la, parski li finn soufer ek finn konn tantasion, li kapav ed tou bann ki soufer tantasion. Alor mo bann frer, mo bann ser Kretien, zot ki partaz enn lapel ki sorti dan lesiel, konsider Zezi kouma enn zapot e enn gran pret ki nou lafwa proklame. Li finn fidel ar Bondie ki finn nom li, parey kouma Moiz ti fidel dan lakaz Bondie. Parey kouma konstrikter enn lakaz gagn plis loner ki lakaz-la, Zezi finn gagn enn pli gran laglwar ki Moiz. Tou lakaz, li konstrir par kikenn, me Bondie limem konstrikter tou kiksoz. Moiz finn fidel dan tou lakaz Bondie kouma enn serviter, pou rann temwaniaz lor bann kiksoz ki Bondie pou dir apre. Me Lekris, finn fidel dan lakaz Bondie kouma so Garson. E noumem ki so lakaz, si nou res ferm dan nou lasirans ek fierte dan lesperans. Alor, kouma Lespri Sin dir, “Zordi, letan zot tann lavwa Bondie, pa rann zot leker dir kouma zot bann anset ki ti revolte, parey zour kot zot ti teste li dan dezer, zour kot zot anset ti rod teste mwa e pourtan zot ti trouv seki mo finn akonpli pandan karant-an. Akoz samem mo ti ankoler avek sa zenerasion-la, e mo ti dir, ‘Zot leker finn touzour egare; zot pa finn konn mo sime.’ Dan mo koler mo ti fer enn serman: ‘Zame zot pa pou kapav vini e repoz avek mwa.’ ” Pran kont, mo bann frer, mo bann ser, pou ki personn parmi zot pa ena enn leker move ek dezobeisan, ki kapav separ li avek Bondie vivan. Me ki sakenn ankouraz so kamarad zour apre zour. Zot bizin kontigne osi lontan ki ena enn letan ki apel “zordi” pou ki personn parmi zot pa les so leker vinn ros, oubien les pese anbet zot. Ofet nou enn partner avek Lekris, si nou gard sa konfians ki nou ena depi koumansman la, ziska lafin. Lekritir dir, “Zordi, kan to tann so lavwa, pa rann to leker dir kouma to bann anset ki ti revolte.” Ki sa bann dimounn ki ti tande la, e pourtan zot ti rebel kont li? Eski pa tou sa bann ki ti kit Lezip gide par Moiz? Kont kisann-la Bondie ti ankoler pandan sa karant-an-la? Pa kont bann ki ti fer pese e ki zot kadav ti tom dan dezer? Avek ki li ti fer serman ki zame zot pa pou vinn repoz avek li? Eski pa ar bann ki pa finn obeir li? Kouma nou finn trouve, sa bann-la pa ti kapav rant dan sa plas repo-la, parski zot pa ti ena lafwa. Pandan ki promes pou rant dan repo Bondie touzour valab, anou pran kont pou ki personn parmi zot pa perdi sa lokazion pou rant ladan la. Bonn Nouvel finn vinn kot nou parey kouma kot bann-la ki ti dan dezer. Me mesaz ki zot finn tande pa finn profit zot, parski zot pa finn aksepte mesaz-la avek lafwa. Nou ki finn krwar, nou finn resevwar sa repo ki Bondie ti promet la, ler li ti dir; “Dan mo koler mo ti fer serman, zame zot pa pou rant dan mo repo.” Li ti dir sa, mem si so travay ti finn konplete depi kreasion lemond. Parski konsernan setiem zour, dan Lekritir finn dir, “Bondie ti repoze setiem zour apre tou so travay.” Lor sa zafer-la, finn osi dir, “Zame zot pa pou rant dan mo repo.” Promes pou rant dan repo li touzour valab, e bann ki finn resevwar sa promes-la an-premie, pa finn reisi parski zot pa finn obeir. Alor, Bondie finn met anplas enn lot zour ki apel “zordi”. Boukou lane apre, li ti dir atraver David: “Zordi kan zot tann so lavwa pa ferm zot leker.” Ofet si Zozwe ti finn kondir lepep dan sa repo-la, Bondie pa ti pou koz lor enn lot zour. Alor ena enn repo ki parey kouma saba ki ankor rezerve pou pep Bondie; parski dimounn ki rant dan repo Bondie, li osi pran repo dan so travay parey kouma Bondie osi finn fer. Anou fer tou zefor pou rant dan sa repo-la pou ki personn ant nou pa tonbe akoz dezobeisans parey kouma nou anset ti fer. Avredir, Parol Bondie li vivan e li ena lefe. Li pli fite ki enn lepe koup de kote. Kan li perse, li al dan fon, mem ziska kot nou nam separe ar nou lespri; ziska nou zwentir ek lamwel. Li analiz seki ena dan panse ek leker imin. Dan kreasion, nanye pa invizib pou lizie Bondie. Devan li nou touni, so lizie trouv tou e zis avek limem ki nou bizin rann kont. Parski nou ena enn gran pret, Zezi Garson Bondie, ki finn travers lesiel ziska dan prezans Bondie, anou tini ferm dan lafwa ki nou konfese. Nou pena enn gran pret ki pa kapav sinpatiz ar nou dan nou febles, me nou ena enn ki finn konn tantasion dan toutsort fason, me ki pa finn fer pese. Avek konfians, anou apros tronn Bondie pou resevwar so mizerikord ek so lagras pou ed nou kan nou bizin. Sak gran pret ki finn swazire parmi bann zom, finn mandate pou azir dan faver tou bann imin dan zot relasion avek Bondie, pou ofer bann don ek sakrifis. Li pou kapav azir avek douser kont tou bann inioran ek bann peser, parski limem, li feb. Akoz sa li oblize ofer sakrifis pou so prop pese e osi pou pese tou lezot dimounn. Personn pa kapav pran sa bann loner gran pret la pou limem. Bondie ki finn apel li parey kouma li finn apel Aaron. Me Zezi Kris pa ti pran loner pou donn limem sa tit gran pret la, me, li finn resevwar sa kot Bondie ki ti dir: “Tomem mo garson, depi zordi mo to papa.” Enn lot plas, li finn osi dir: “To enn pret pou touzour kouma Melkisedek.” Pandan so lavi lor later, Zezi finn priye bien for ziska vers so larm, li finn sipliy Sa-Enn ki kapav sov li depi lamor, e so lapriyer ti exose akoz so soumision. Mem si li Garson Bondie, li finn aprann obeir par tou seki li finn soufer. E sa finn rann li parfe e li finn vinn lasours enn delivrans eternel pou tou dimounn ki obeir li. Ofet Bondie finn deklar li gran pret kouma Melkisedek. Lor sa size-la, nou ena boukou pou dir, me li difisil pou explike, parski zot pran letan pou konpran. Depi tou sa letan-la, zot ti bizin fini vinn profeser, me zot pe bizin kikenn pou ansegn zot ankor bann prinsip parol Bondie. Zot nepli kapav manz manze solid, zot bizin bwar dile. Tou dimounn ki nouri li ar dile, li pena okenn lexperyans, parski li enn ti-baba. Par kont manze solid li pou bann adilt ki konn disern seki bien ek seki mal. Alor, anou les dekote bann lansegnman elemanter lor Lekris pou nou grandi kouma bann adilt. Nou pena pou retourn lor bann premie leson, kouma: aret nou bann move aksion ki amenn lamor e krwar dan Bondie; kouma lansegnman lor batem e inpozision lame; kouma rezireksion bann mor ek zizman eternel. Ala seki nou pou fer si Bondie permet nou. Li inposib pou retablir dimounn ki finn deza resevwar lalimier, ki finn gout bann don lesiel, ki finn vinn partner avek Lespri Sin, ki finn gout labonte Parol Bondie e finn santi pwisans lemond ki pe vini, e ki pourtan finn retom dan zot vie lavi. Li inposib pou fer zot sanze ankor parski zot finn fini krisifie Garson Bondie ek insilte li an piblik. Kan enn later absorb delo lapli ki souvan tonbe e prodir bann bon plant pou dimounn ki pe plante, Bondie pou beni li. Me si later-la raport pikan ek move lerb, li pa vo nanye, li pe pas pre ar malediksion, e li pou fini dan dife. Me zot, mo bann kamarad, nou kone ki mem si nou koz koumsa, zot lor bon sime delivrans. Bondie, li pa sa kantite inzis la pou bliye zot travay ek lamour ki zot finn montre li, letan ki zot ti pe servi bann krwayan parey kouma zot ankor pe fer zordi. Me nou anvi ki zot tou montre sa mem lantouzias ziska lafin pou ki zot lesperans kapav realize. Pa vinn pares; kontigne swiv lexanp bann ki finn krwar avek perseverans e finn erit promes Bondie. Personn pa pli gran ki Bondie. Kan li finn fer promes avek Abraam, li finn fer serman dan so prop nom. Li ti dir, “Wi, vremem, mo pou beni twa e mo pou donn twa boukou desandan.” Abraam finn atann avek pasians e li finn gagn seki Bondie ti promet li. Kan dimounn pret serman, li fer li lor nom kikenn oubien enn kiksoz ki pli gran ki limem, e sa serman-la servi kouma garanti pou regle tou bann dispit. Alor kan Bondie anvi montre so bann eritie ki pou resevwar so promes ki so desizion pa kapav kase ditou, li fer enn serman. Bondie pa koz manti. Alor so promes ek so serman, se de kiksoz ki pa kapav sanze. So promes bizin ankouraz nou pou tini ferm dan lesperans ki finn propoz nou. Sa lesperans-la, li kouma enn lank solid ek stab ki tini nou lavi; lesperans-la travers rido lesiel pou rant ziska dan sanktier. Zezi finn al laba avan nou e pou nou. Li finn vinn pou touzour enn gran pret kouma Melkisedek. Melkisedek, ti lerwa Salem e pret Bondie Treo. Letan Abraam sorti batay kot li ti kraz bann lerwa, Melkisedek ti zwenn li e ti beni li. Abraam ti donn li enn diziem lor tou seki li ti ena. Dabor Melkisedek vedir “lerwa lazistis.” Me li osi lerwa Salem ki vedir “lerwa lape.” Li pena ni papa, ni mama, ni anset; li pena ni koumansman, ni lafin. Li parey kouma Garson Bondie e li pret pou touzour. Remarke kouma li gran; nou anset Abraam ti donn li enn diziem seki li ti ena. Dapre lalwa, bann desandan Levi, ki pret, ena drwa dimann lepep ladim, setadir zot bann prop frer ki osi desandan Abraam. Melkisedek, pa enn desandan Levi, me li ti kolekte ladim ar Abraam e anplis li finn beni Abraam ki finn resevwar promes Bondie. Pena okenn dout. Seki pli tipti resevwar benediksion avek seki pli gran. Bann desandan Levi ki resevwar ladim, zot bann dimounn mortel; tandi ki Melkisedek ki pa finn konn lamor, li finn resevwar ladim. Nou kapav mem dir ki Levi limem ki ti resevwar ladim, li ti osi donn ladim atraver Abraam. Kan Melkisedek ti zwenn Abraam, Levi pa ti ankor ne; dan enn fason koze, nou kapav dir ki li ti dan Abraam. Lor baz pretriz Levitik ki lepep Izrael ti gagn lalwa; si perfeksion ti posib par sa pretriz-la, kiserti atann enn lot pret dapre Melkisedek, si ena enn dapre Aaron? Kan ena sanzman dan saserdos pretriz, li osi neseser ki sanz lalwa. Sa dimounn pou ki sa tex-la finn ekrir, nou Segner, li apartenir a enn lot tribi kot zame personn pa finn servi kouma pret. Li kler ki nou Segner li enn desandan tribi Zida, me Moiz pa finn dir nanye lor sa tribi-la ler li ti koz lor bann pret. Li pli kler ankor letan enn lot pret parey Melkisedek paret, kikenn ki finn vinn pret, pa par bann regleman legal konsernan so desandans imin, me par pouvwar enn lavi ki pa kapav detrir. Ofet Lekritir dir: “To pret pou touzour dapre Melkisedek.” Dan enn kote ena labolision enn vie komannman parski li feb ek li initil, parski lalwa pa finn amenn nanye ki parfe; lot kote finn ena enn meyer lesperans, e atraver li, nou kapav apros Bondie. Anplis ena osi serman Bondie. Lezot ki finn vinn pret pa finn fer okenn serman. Me sa dimounn-la ti vinn pret par enn serman kan Bondie ti dir: “Lesegner finn fer enn serman e li pa pou sanz so lide: ‘To enn pret pou touzour.’ ” Par sa serman-la Zezi garanti pou nou enn meyer lalians. Anplis, avan ti ena enn kantite pret, me zot pa ti kapav kontign zot travay parski lamor ti anpes zot. Me Zezi viv pou touzour e so travay kouma pret li permanan. Alor, samem li kapav sov dimounn ki vinn kot Bondie atraver li, parski li touzour vivan pou pled dan zot faver. Samem sa kalite gran pret-la ki nou ti bizin. Kikenn ki sin, san okenn defo, ki pena pese, separe avek bann peser e ki plase pli ot dan lesiel. Li pa kouma lezot gran pret, li pa bizin ofer sakrifis toulezour, dabor pou so prop pese apre pou pese lepep. Sa li finn fini fer enn sel fwa pou tou, kan li finn ofer limem an sakrifis. Lalwa Moiz etablir bann dimounn ki feb kouma gran pret. Me parol serman Bondie ki finn arive apre lalwa, etabli kouma gran pret enn Garson ki finn vinn parfe pou touzour. Ala pwin ki nou ti anvi dir: nou ena enn gran pret ki pe asiz lor kote drwat tronn samazeste Bondie dan lesiel, ki exers so minister dan vre sanktier, vre latant drese par Lesegner e pa par bann imin. Sak gran pret finn etabli pou ofer don ek sakrifis; alor fode ki sa pret-la osi ena kitsoz pou ofer. Aster-la, si Kris ti lor later, li pa ti pou ditou pret, parski ena deza enn bann pret ki ofer don dapre lalwa. Seki sa bann pret-la fer, li zis enn kopi seki pe pase dan lesiel. Li resanble seki ti arive avek Moiz letan li ti pe rod konstrir latant. Bondie ti dir li, “Tansion! Fer tou dapre model ki ti montre twa lor montagn.” Me, avredir Lekris finn resevwar enn minister ankor pli siperyer, parski dan sa pozision-la, limem mediater enn meyer lalians, baze lor bann meyer promes. Si premie lalians ti san repros, pa ti pou ena okenn nesesite pou ranplas li par enn lot. Bondie ti repros lepep kan li ti dir: “Zour pe aprose kot mo pou fer enn nouvo lalians avek pep Izrael ek pep Zida. Li pa pou parey kouma lalians ki mo ti fer avek zot bann anset zour mo ti pran zot par lame pou fer zot sorti depi pei Lezip. Zot pa ti fidel ar lalians ki mo ti fer ar zot. Lesegner ti azoute: ‘Alor mo nepli trakas mwa ar zot.’ Ala lalians ki mo pou fer aster-la avek Izrael. Apre sa bann zour-la, Lesegner dir: Mo pou met mo bann lalwa dan zot panse, mo pou ekrir bann lalwa-la dan zot leker. Momem zot Bondie, e zot, zot pou vinn mo pep. E zot pa pou bizin ansegn zot kamarad, ni dir ant zot ki zot bizin konn Lesegner. Parski tou dimounn pou konn mwa, depi so pli tipti ziska so pli gran. Mo pou pardonn zot pese, e mo pou nepli mazinn ankor zot pese.” Letan li pe koz enn nouvo lalians, li ti pe fer sa premie lalians-la vinn ansien. E seki ansien e pe vinn vie pou disparet. Aster-la, mem dan premie lalians, ti ena bann rit konsernan ladorasion ek sanktier ki ti lor later. Ti mont enn doub latant. Dan so premie parti kot ena sandelie, enn latab avek dipin sakre, ti apel li landrwa sin. Deryer deziem rido, ena sa lot parti ki apel “Pli sin ki sin”. Ti ena laba enn lotel an-or kot bril lansan. Ena la osi enn kof lalians an-or. Dan kof-la ti ena enn ti vaz an-or ki kontenir lamann ek baton Aaron ki ti finn fleri ek bann komannman lalians grave lor ros. Par lao li, ti ena bann Seribin ki avek zot lonbraz ti kouver landrwa kot ti ofer disan pou pardonn pese. Me ler pankor arive pou koz tousala an detay. Kan tou kitsoz finn pare koumsa, bann pret rant regilierman dan sa premie parti-la pou fer zot servis. Me dan deziem parti, selman gran pret ki ti rant laba enn fwa par an. Li bizin amenn avek li disan ki li ofer pou limem ek pou bann fot ki lepep finn komet involonterman. Par sa, Lespri Sin pe montre ki sime ki amenn dan sanktier pa ankor ouver, osi lontan ki premie latant ankor la. Sa enn sinbol pou letan aster, pou montre ki sakrifis ki pe ofer pa pirifie dimounn ki pe ofer li. Me li konsern selman manze, bwar ek diferan seremoni pirifikasion, enn bann rit imin ki finn inpoze ziska ki tou pou sanze pou touletan. Me kan Kris, gran pret tou bann dibien fitir finn vini, li finn travers enn latant pli gran e pli parfe, ki pa finn fabrike par lame imin, setadir ki pa fer parti sa kreasion-la. Li finn rant enn fwa pou tou dan sanktier, non pa avek disan bouk oubien toro, me avek so prop disan. Koumsa mem li finn delivre nou pou touletan. Avredir si nou fann disan bouk ek toro, oubien lasann enn zenis lor dimounn pou pirifie zot, aster-la, ki kantite disan Kris pli efikas! Par Lespri eternel, li finn ofer limem ar Bondie kouma enn sakrifis parfe, pou pirifie nou konsians; nou pena pou fer bann rit initil, me nou kapav servi Bondie vivan. Ala kifer li mediater enn nouvo lalians, pou ki bann ki finn apele kapav resevwar leritaz eternel ki finn promet, parski finn ena enn lamor ki finn vinn efas fot ki zot finn komet anba ansien lalians. La kot ena enn testaman, li neseser prouv lamor sa dimounn ki finn fer sa testaman-la. Ofet enn testaman pena okenn lefe osi lontan ki dimounn konserne la ankor vivan. Li valid selman apre so lamor. Akoz samem premie lalians pa finn rant anviger san ki disan verse. Apre ki Moiz ti prezant lepep tou bann komannman dapre lalwa, li ti pran disan ti toro ek bouk, avek delo e li ti servi enn fey lizop ek enn bout lalenn rouz pou fann sa lor liv lalwa ek lor tou dimounn. Li dir, “Samem disan lalians ki Bondie finn komann zot pou respekte”. E dan mem fason avek sa disan-la, li ti aroz latant ek tou bann resipian ki servi pou lapriyer. Dapre lalwa preske tou kitsoz bizin pirifie avek disan e bann pese pa pou pardone si disan pa verse. Si bann model kitsoz dan lesiel bizin pirifie par sa bann rit-la, alor bann realite lesiel merit meyer sakrifis ki sa. Kris pa finn rant dan enn sanktier ki finn konstrir par bann imin, ki nek enn kopi, me li finn rant dan lesiel mem, pou ki aster-la mem li prezant li devan Bondie dan nou faver. Kris pena pou ofer li plizir fwa parey kouma gran pret ki rant dan sanktier lane apre lane avek disan ki pa pou li; sinon li ti pou bizin soufer ankor ek ankor depi fondasion lemond. Me la kouma li ete, li finn paret enn fwa pourtou ziska lafin pou efas pese par sakrifis so prop lekor. Parey kouma tou dimounn pou bizin mor enn sel fwa, apre sa Bondie pou ziz zot. Alor Kris, ki finn ofer limem enn sel fwa pou efas pese enn kantite dimounn, li pou paret enn deziem fwa, pa pou efas pese, me pou sov bann ki pe vremem atann so retour. Lalwa li nek enn lonbraz bann vre kitsoz ki pou vini apre e li pa enn reprezantasion exak sa bann kitsoz-la. Li pa kapav pirifie bann ki apros zot ar Bondie malgre ti pe ofer sakrifis lor sakrifis, lane apre lane. Sinon zot ti pou finn aret ofer sakrifis, parski dimounn ki finn pirifie enn fwa pourtou, pa ti pou ena move konsians. An-realite, par sa bann sakrifis-la, dimounn rapel zot pese lane apre lane; parski disan toro ek bouk pa pou zame kapav efas pese. Akoz samem kan Kris ti vinn dan lemond, li ti dir, “To pa finn anvi sakrifis ek lofrand me to finn donn mwa lekor imin. Sakrifis zanimo ek lofrand pou pardonn pese pa finn fer twa plezir Alor mo finn dir, ‘To trouve Segner, mo finn vini momem pou fer to volonte parey kouma finn ekrir lor mwa dan liv sakre.’ ” Premie dabor li ti dir, “Bann sakrifis, lofrand, sakrifis pou efas pese, li pa oule. Tousala pa fer li plezir.” Pourtan sa bann sakrifis-la ti ofer dapre lalwa. Apre sa li ti azoute “Ala mo finn vini pou fer to volonte”. Li aboli premie sakrifis pou ranplas li par enn deziem. Akoz Zezi Kris finn fer volonte Bondie, nou finn vinn sin atraver sakrifis lekor Zezi Kris enn fwa pourtou. Zour apre zour sak pret dibout pou ofer so sakrifis ankor ek ankor, pourtan zot zame kapav efas pese. Me kan Lekris finn ofer enn fwa pourtou sakrifis ki efas pese, “Li ti asiz dan kote drwat Bondie” e li pe atann “Ziska seki Bondie fer so bann lennmi vinn so marspie.” Par enn sel lofrand, li finn rann parfe tou dimounn ki li finn sanktifie. E Lespri Sin osi konfirm sa avek nou, li dir; “Samem lalians ki mo pou fer avek zot apre sa bann zour-la, Bondie deklare, Mo pou met mo bann lalwa dan zot leker, mo pou ekrir zot dan zot lespri.” Li azoute: “Mo pou nepli rapel zot pese e bann dimal ki zot finn fer”. La akot pese finn pardone, pa bizin okenn ofrand pou prezante pou efas pese-la. Mo bann frer ek ser, nou ena enn liberte aster-la pou rant dan sanktier par disan Zezi. Nou ena la enn nouvo sime vivan ki fer nou pas atraver vwal so prop lekor. Nou ena enn gran pret ki diriz lakaz Bondie. Anou apros nou kot Bondie avek enn leker sinser ek enn lafwa total, leker prop dan enn lekor lave avek dilo pir. Anou tini ferm lesperans ki nou proklame, parski Bondie gard touzour so promes. Anou panse kouma nou kapav ankouraz nou kamarad pou ena lamour ek pou fer dibien. Anou pa abandonn nou lasanble kouma de-trwa finn pran labitid; okontrer anou plis ankouraz nou kamarad parski kouma zot trouve zour Lesegner pe aprose. Si nou persiste dan pese apre ki nou finn konn laverite, pena okenn sakrifis ankor ki pou kapav efas pese; nek zis reste pou atann dan lafreyer zizman Bondie ek dife lanfer ki pou detrir tou dimounn ki kont Bondie. Dimounn ki dezobeir lalwa Moiz pou konn lamor san pitie si finn trouv li koupab par de ou trwa temwin. Ki pou ariv sa dimounn ki mepriz Garson Bondie, ki tret bonavini disan lalians Bondie ki finn pirifie li e ki insilte Lespri lagras? Zot kapav devine ki kantite sever so pinision pou ete! Nou konn bien kisann-la ti dir: “Mwa ki pou tir vanzans e mwa ki pou fer peye an-retour.” E li finn osi dir: “Lesegner pou ziz so pep.” Li enn kitsoz terib pou tom dan lame Bondie vivan. Me rapel seki zot finn viv dan lepase. Apre ki zot finn resevwar lalimier, zot finn soufer boukou, me zot finn res ferm dan lalit; parfwa dimounn finn insilte zot piblikman ek persekit zot, parfwa zot ti pre pou soutenir lezot ki pe gagn maltrete. Zot finn pran par dan soufrans bann prizonie. Dan lazwa, zot finn aksepte ki bann-la kokin tou zot dibien parski zot kone ki zot, zot posed kitsoz ankor pli meyer e ki pou reste pou touletan. Alor pa perdi kouraz. Pa perdi konfians dan zotmem. Sa pou donn zot enn gran rekonpans. Zot bizin landirans pou ki letan zot finn fer volonte Bondie, zot kapav resevwar seki li finn promet zot. Parey kouma Lekritir finn dir: “Zis inpe letan ankor Sa-Enn ki pou vini la pou arive, e li pa pou tarde.” Me dimounn ki pou krwar dan mwa pou viv par lafwa, me si li derape, mo pa pou satisfe ar li. Nou, nou pa bann dimounn ki retourn an-aryer pou ki apre pou perdi. Okontrer nou ena lafwa e nou lor sime delivrans. Lafwa vedir enn lasirans dan bann kitsoz ki to pe atann e enn konviksion dan kitsoz ki to pa trouve. Akoz zot lafwa, Bondie ti aprouv bann gran dimounn lontan. Par lafwa nou konpran ki Bondie finn kree liniver par so parol, pou sa rezon-la seki nou pe trouve finn fer apartir seki nou pa trouve. Par lafwa, Abel finn ofer Bondie enn meyer sakrifis ki Kain. Akoz so lafwa li finn gagn faver Bondie kouma enn zom zis, parski Bondie limem finn aprouv so sakrifis. Li finn mor, me par so lafwa li ankor pe koze. Par lafwa, Enok finn anleve lao dan lesiel kot Bondie e li pa finn mor. Personn pa ti kapav trouv li parski Bondie finn pran li. Lekritir dir ki avan Enok ti finn anleve, Bondie ti aprouv li kouma kikenn ki finn fer li plezir. San lafwa, personn pa kapav fer Bondie plezir. Parski kikenn ki apros Bondie bizin krwar ki li existe e ki Bondie rekonpans dimounn ki rod li. Par so lafwa, Noe finn tann warning Bondie lor kitsoz ki pou arive, ki li pa ti ankor trouve. Li finn obeir Bondie e finn aranz enn bato, e sa bato-la finn permet li sov lavi so fami. Par sa, Noe finn kondann lemond, e akoz so lafwa, Bondie finn konsider li kouma enn eritie lazistis. Par lafwa, Abraam ti obeir ler Bondie ti apel li pou al dan pei ki li ti bizin resevwar kouma eritaz. Li kit so prop pei san ki li kone kot li pe ale. Par lafwa, li finn viv dan enn pei etranze ki Bondie ti promet li. Li ti res anba latant avek Izaak ek Zakob, ki ti erit mem promes Bondie kouma li. Abraam ti pe atann sa lavil avek enn fondasion solid la, ki Bondie limem arsitek e konstrikter. Par lafwa, Sara, malgre so vieyes, ti resevwar pouvwar pou gagn zanfan parski li ti krwar dan fidelite Bondie ki ti finn fer sa promes-la. Atraver enn sel zom, Abraam ki ti pratikman mor, finn donn nesans enn kantite desandan parey bann zetwal dan lesiel, parey kouma enn kantite lagrin disab lor laplaz ki pa kapav konte. Zot tou finn mor dan lafwa san ki zot finn resevwar bann promes Bondie, me zot finn kontan parski zot finn trouv li delwin. Zot ti konfese ki zot bann etranze ek exile lor later. Dimounn ki ti koz koumsa montre ki zot ti pe ankor rod enn pei pou zot etabli. Si zot ti ena antet pei ki zot ti finn kite, zot ti pou ena lokazion pou retourn laba. Me an realite, zot ti anvi enn pei pli meyer, setadir, enn pei dan lesiel mem. Akoz samem Bondie pa onte ki zot apel li zot Bondie; parski li finn prepar enn lavil pou zot. Kan Bondie ti teste Abraam, par lafwa li ti ofer Izaak kouma sakrifis. Abraam ki finn resevwar promes Bondie, ti pre pou sakrifie so sel garson. Bondie ti dir li, “Atraver Izaak ki to pou gagn sa bann desandan ki mo finn promet twa la.” Abraam ti rekonet ki Bondie kapav re-donn lavi dimounn ki finn mor, e dan enn fason sinbolik, li vre ki Abraam ti regagn Izaak. Par lafwa Izaak ti beni Zakob ek Ezai pou zot lavenir. Par lafwa Zakob, letan li ti pre pou mor, ti beni sak garson Zozef. Li ti “apiy lor so baton pou ki li kapav ador Bondie.” Par lafwa Zozef, letan li ti pre pou mor, li ti koz lor depar bann Izraelit depi Lezip, e li ti dir ki bizin fer avek so lezo apre so lamor. Par lafwa, bann paran Moiz ti kasiet li trwa mwa apre so nesans, parski zot ti trouv zanfan-la bien zoli e zot pa ti per pou dezobeir lord lerwa. Par lafwa, Moiz, ler li finn grandi, li ti refiz apel li garson tifi Faraon. Li ti prefer gagn maltrete ansam ar pep Bondie olie ki fer so leker kontan par plezir pese, ki zis pou enn ti moman. Li ti konsidere ki soufer pou Lemesi ena boukou plis valer ki bann trezor Lezip, parski li ti gard so lizie fixe lor rekonpans ki pou vini apre. Par lafwa, Moiz ti kit Lezip, san ki li gagn per lakoler lerwa; li ti tini ferm parski li finn trouv Bondie invizib. Par lafwa, li ti selebre fet Pak e li ti donn lord pou fann disan lor laport bann lakaz pou ki anz destrikter pa touy bann ti-baba premie-ne pep Izrael. Par lafwa, bann Izraelit ti travers Lamer Rouz koumadir later sek; me kan bann Ezipsien ti sey pase, lamer ti refoule e zot tou ti mor. Par lafwa, miray Zeriko ti tonbe, apre ki bann Izraelit ti mars otour li pandan set zour. Par lafwa, Raab, ki ti enn prostitie, pa ti mor avek lezot ki ti dezobeir Bondie parski li ti akey bann espion kot li. Ki mo kapav dir ankor? Letan pa ase pou mo koz lor Zedeon, Barak, Sanson, Zefta, David ek Samiel ek lezot profet. Par lafwa, zot finn gagn laviktwar lor bann rwayom, zot finn fer seki drwat ek resevwar bann promes Bondie. Zot finn ferm lagel bann lion; zot finn tengn gran-gran dife violan, zot finn sap dan lamor par lepe, malgre zot febles zot ti repran lafors, zot ti inbatab dan lager e zot finn fer bann larme etranze sove. Par lafwa, bann fam ti retrouv zot fami ki ti lev depi lamor. Ena ti tortire e zot ti refiz zot delivrans parski zot ti anvi gagn enn lavi meyer apre zot rezireksion. Lezot ti soufer bann mokri e ti gagn bate kout fwet; lezot ti ansene e ti zet zot dan prizon. Lezot ti mor kout ros; ena, ti koup zot ar lasi; ena, ti koup zot an-de ar lepe. Lezot bouz isi, bouz laba avek zis lapo mouton ou kabri lor zot kouma linz. Zot pena nanye, zot persekite ek maltrete; lemond pa ti dign pou zot, e zot ti al viv dan bann dezer, bann montagn bann kavern ek bann lakav. Akoz zot lafwa, zot tou finn resevwar enn bon temwaniaz, me pourtan zot pa finn trouv promes Bondie realize. Ofet Bondie finn prevwar kitsoz meyer pou nou, pou ki selman ansam ar nou, zot pou vinn parfe. Alor parski nou osi nou ena enn lafoul temwin otour nou, anou debaras tou fardo ki lor nou sime ki anpes nou bouze, ek pese ki pe pez lor nou. Anou galoup lekours ki finn met devan nou avek determinasion. Anou gard nou lizie fixe lor Zezi Kris, limem ki finn fer nou lafwa komanse e ki pou rann li parfe. Pou lazwa ki ti pe atann li, li finn soufer lor lakrwa san pran kont laont ki sa fer, e li finn asiz dan kote drwat tronn Bondie. Zot bizin ena konsiderasion pou li. Li finn siport enn lopozision feros bann peser, pou ki zot pa bes lebra ek dekouraze. Dan zot konba kont pese, zot pa ankor ariv staz reziste ziska ki disan koule. Eski zot finn bliye parol lankourazman ki Bondie finn adres zot kouma so zanfan: “Mo garson, pran sa serye kan Lesegner koriz twa e pa bizin dekouraze kan li repros twa, parski Lesegner koriz dimounn ki li kontan, li disiplinn sak garson ki li akeyir.” Zot bizin siporte, kan Bondie koriz zot, sa montre ki Bondie pe tret zot kouma so bann garson. Eski enn paran pa koriz so zanfan li osi? Si zot pa gagn koreksion parey kouma tou lezot zanfan, zot ilezitim e alor zot pa so zanfan. Nou paran imin, zot ti koriz nou e nou ti respekte zot. Eski nou pa bizin ankor plis soumet nou avek nou Papa spiritiel pou ki nou gagn lavi. Nou papa lor later koriz nou pou zis enn ti bout letan dapre zot prop zizman. Me Bondie disiplinn nou pou nou prop bien, pou ki nou kapav vinn sin parey kouma li. Aster-la tou koreksion ki nou gagne, li paret touzour fer dimal plito ki donn lazwa. Plitar dimounn ki finn disipline par sa mem koreksion-la, li rekolte fri lape ek lazistis. Alor redres zot lame fatige e fortifie zot zenou afebli, e fer enn santie drwat pou zot lipie, pou ki seki bwate pa paralize me okontrer gagn gerizon. Sey viv anpe avek tou dimounn. Viv enn lavi sin, parski san sa, personn pa pou kapav trouv Lesegner. Zot bizin veye ki personn pa detourn li kont lagras Bondie; ki zot pa vinn kouma bann rasinn amer ranpli ar pwazon ki kapav anpwazonn boukou dimounn. Veye ki personn pa vinn imoral. Pa mepriz Bondie parey kouma Ezai ki ti vann so drwa nesans pou enn sinp repa. Zot kone ki plitar letan li ti rod benediksion so papa, ti rezet seki li ti pe rode. Li pa ti ena okenn sans pou sanz desizion, mem si li finn plore pou rod fer li. Zot pa finn koste ar enn kitsoz ki zot kapav trape kouma montagn Sinai avek so gran dife, marenwar, teneb, loraz, tanpet, tapaz tronpet ek son enn lavwa. Bann ki ti tann sa lavwa-la, zot ti refiz ekoute. Parski zot pa ti kapav siport lord ki ti done: “Mem si enn zanimo tous sa montagn-la, li pou mor kout ros.” An-efe, spektak-la ti telman fer per ki Moiz ti dir, “Mo pe tranble avek laper.” Me zot, zot finn apros montagn Sion, lavil Bondie vivan, zot finn apros Zerizalem ki dan lesiel, kot enn lafoul anz pe fete. Zot finn apros enn lasanble bann premie-ne Bondie, ki ti finn anrezistre dan lesiel. Zot finn apros Bondie ki ziz tou dimounn, e lespri bann zis ki finn vinn parfe. Zot finn apros Zezi ki mediater nouvo lalians, zot finn apros so disan ki finn verse e ki meyer ki disan Abel. Tansion! Pa refiz ekout dimounn ki pe koz ar zot. Bann ki ti refiz ekout seki ti pe averti zot lor later, pa ti sove. Alor ena plis rezon pou krwar ki nou pa pou kapav sape, si nou rezet seki pe averti nou depi lesiel. Dan sa letan-la, so lavwa ti fer later tranble, me aster-la li finn promet, “Ankor enn fwa, mo pou fer tranble, pa zis later me osi lesiel.” Sa bann parol-la, “ankor enn fwa,” montre klerman, ki tou kiksoz ki finn kree pou tranble ek disparet, pou ki seki solid li reste. Alor, anou montre nou rekonesans, parski nou resevwar enn rwayom ki pa tranble. Anou ador Bondie avek reverans ek lakrint; parski, ofet nou Bondie, li enn dife ki devor tou. Kontigne kontan zot kamarad kouma bann frer ek ser. Pa refiz pou akeyir bann etranze dan zot lakaz. Dimounn ki finn fer sa, zot finn akeyir bann anz kot zot san ki zot kone. Mazinn bann ki dan prizon, fer koumadir zot osi, zot ansam dan prizon e parski zot enn mem lekor, partaz soufrans bann ki pe gagn maltrete. Respekte lavi maryaz. Bann ki finn marye bizin res fidel avek zot lalians parski Bondie pou ziz bann ki azir enn fason imoral ek komet adilter. Ki lamour pou larzan pa determinn zot lavi, kontant zot avek seki zot ena, parski Bondie finn dir “Zame mo pa pou kit twa, ni abandonn twa.” Akoz samem nou kapav dir avek konfians, “Lesegner, limem mo sekour, Mo pa pou per nanye. Ki dimounn kapav fer kont mwa?” Mazinn zot bann ansien dirizan ki finn anons zot parol Bondie. Mazinn fason ki zot ti pe viv e kouma zot finn mor, e imit zot lafwa. Zezi Kris, li parey yer, zordi ek pou touzour. Pa les toutsort lansegnman etranze anbet zot. Li bon ki zot fortifie zot leker avek lagras Bondie, e non pa par bann regleman konsernan manze. Bann ki finn obzerv sa bann regleman-la pa finn tir okenn benefis ladan. Bann pret ki servi dan sanktier pena drwa manz sakrifis ki ena lor lotel. Gran pret amenn disan zanimo dan sanktier pou ofer sakrifis pou efas pese; me lekor sa bann zanimo-la ti brile andeor zot landrwa kot zot ti reste. Pou sa rezon-la, Zezi ti mor andeor lavil pou pirifie lepep avek so prop disan. Alor anou al ver li andeor kan pou partaz so imiliasion. Nou pena enn lavil permanan isi lor later; me nou pe atann sa lavil ki pe vini la. Alor anou kontign ofer Bondie nou louanz kouma enn sakrifis, setadir fri bann parol ki rekonet li kouma Segner. Pa bliye pou fer dibien ek partaz seki zot ena, parski samem bann sakrifis ki fer plezir Bondie. Obeir zot dirizan e swiv zot lord, parski bann-la pe vey lor zot nam, zot bann dimounn ki bizin rann kont Bondie. Fer zot travay avek boukou lazwa e non pa avek tristes parski sa pa pou amenn okenn lavantaz pou zot. Priye pou nou. Nou sir ki nou ena enn konsians kler ek enn volonte pou azir kouma bizin. Mo dimann zot pou priye spesialman pou ki Bondie retourn mwa pli vit ankor kot zot. Bondie, lasours lape, finn resisit nou Segner Zezi, gran Berze bann mouton, ki finn vers so disan ki garanti enn lalians eternel. Ki sa Bondie lape la, fer zot pratik tou seki bon pou zot fer so volonte; ki li realiz dan nou seki bon devan so lizie atraver Zezi Kris, pou li laglwar pou touzour. Mo bann frer ek ser, mo fer enn lapel ar zot; ekout sa mesaz lankourazman la avek pasians, parski seki mo finn ekrir; li pa tro long. Mo anvi fer zot kone ki nou frer Timote finn sorti dan prizon. Si li pa tarde pou vini, mo pou kapav amenn li avek mwa kan mo vinn get zot. Fer konpliman tou zot dirizan, ek tou pep Bondie. Bann frer e bann ser an Itali fer zot konpliman. Ki lagras Bondie res ar zot tou. Mwa, Zak, enn serviter Bondie ek Segner Zezi Kris, Mo pe salie zot tou pep Bondie disperse dan lemond antie. Mo bann kamarad, konsider li kouma enn lazwa letan zot fer fas avek bann moman eprev, parski zot kone, kan zot lafwa pas par leprev, sa fer zot gagn landirans. Zot landirans bizin kontigne mem pou ki zot vinn parfe ek san okenn defo. Si kikenn parmi zot mank lasazes, ki li demande, Bondie pou donn li. Bondie zenere e li donn tou dimounn avek enn gran leker. Me demann avek lafwa, zame doute, parski seki doute li parey kouma vag lamer dirize par divan; enn dimounn ki parey koumsa pa kapav atann pou gagn kiksoz avek Bondie, parski li indesi e instab dan so panse. Ki enn krwayan pov trouv so fierte akoz Bondie lev li lao, e enn krwayan ki ris trouv so fierte akoz Bondie abes li, parski risar-la pou disparet kouma enn fler dan karo. Soley lev avek enn saler diplon ki bril bann plant; so bann fler tonbe e so bote disparet. Li parey avek enn dimounn ris; li pou disparet pandan ki li okipe ar so aktivite. Li pou bienere sa dimounn ki tini ferm dan leprev. Bann ki prouve zot ferm pou resevwar kouronn laviktwar ki Bondie finn promet bann ki kontan li. Si dimounn tante par leprev, fode pa ki li dir, “Bondie ki tant mwa.” Bondie pa kapav tante par lemal, e limem li pa tant personn. Me enn dimounn, li tante par so prop dezir ki sedwir li, e ki antrenn li dan lemal. Lerla, kan sa dezir-la finn forme, li donn nesans pese, e kan pese grandi li donn lamor. Mo bann kamarad, pa les zot anbete. Tou don parfe ek tou bon kado sorti depi lao kot Bondie, Kreater lalimier. E Bondie pa sanze, li pa konn leklips ni lonbraz. Par so prop volonte li finn donn nou lavi par so Parol ki laverite, pou ki nou kapav vinn kouma bann premie fri kreasion. Mo bann kamarad, konpran sa bien: sakenn bizin rapid pou ekoute, me pa prese pou koze, pa ankoler vit, parski enn dimounn ankoler pa pou akonplir enn lavi ki drwat devan lizie Bondie. Alor, rezet tou zot move manier ek zot mesanste. Me dan limilite, akeyir parol ki Bondie finn plant dan zot leker, samem parol ki pou sov zot. Fode pa ki zot anbet zotmem parski zot zis ekout so parol me zot pa met li an pratik. Si kikenn ekout Laparol e pa met li an pratik, li parey enn dimounn ki get limem dan laglas, apre ki li finn get limem, li ale e li bliye kouma li ete. Me dimounn ki persevere pou examinn vre lalwa, lalwa laliberte, e li kontign ladan avek fidelite, li pa zis kontant li ekoute, me li osi met parol-la an pratik, abe sa dimounn-la li pou beni dan tou seki li fer. Si kikenn krwar li enn relizie e li pa vey so lalang, li pe tronp limem, so larelizion pena okenn valer. Ala seki Bondie Papa konsider kouma vre relizion ki pena okenn tas: pran swin bann orfelin ek vev dan zot soufrans e pa les zot kontamine par lemond. Mo bann frer ek ser, kouma bann dimounn ki met zot lafwa dan Zezi Kris, nou Segner glorie, fode pa ki zot azir avek parsialite. Sipoze enn dimounn ris avek bel-bel bizou ek zoli linz rant dan lasanble, e enn lot dimounn pov sal-sal osi rantre, si zot pran plis kont seki bien abiye-la e dir li, “Ala enn plas doner pou twa,” me zot dir lot-la, “Debout dan kwin laba,” oubien “Asiz anba kot mo lipie,” la, zot pe fer enn diskriminasion ant zot, e zot zizman finn baze lor move rezonnman. Mo bann frer ek ser bieneme, ekout mwa: Bondie finn swazir bann ki pov dapre lemond pou ki zot vinn ris dan lafwa e posed rwayom ki finn promet bann ki kontan li. Me zot finn dezonor bann pov. Kisann-la ki kraz zot e trenn zot devan tribinal? Pa bann ris? Pa bann-la mem ki finn insilte e sali sa zoli nom ki finn donn zot la? Bien sir, zot fer bien si zot vremem obeir lalwa rwayom dapre Lekritir, “To bizin kontan to prosin kouma tomem.” Me si zot montre diskriminasion, zot komet enn pese e lalwa pou kondann zot kouma enn kaser lalwa. Parski dimounn ki obzerv lalwa me fel lor enn sinp ti detay, li pou koupab fel tou lalwa. Dimounn ki dir, “To pa komet adilter,” dir osi, “To pa fer krim.” Aster-la si to pa komet adilter me fer krim, to finn kas lalwa. Zot bizin koze ek azir kouma dimounn ki lalwa pou zize, lalwa ki rann lib. Bondie pou san pitie letan li ziz dimounn ki pa finn montre pitie; pitie gagn laviktwar lor zizman. Mo bann frer ek ser, ki sa servi zot si kikenn pe dir, “Mo ena lafwa,” si li pa prouv li par bann aksion? Eski sa kalite lafwa-la kapav sov twa? Sipoze enn frer ou enn ser pena nanye pou met lor li ou nanye pou manze toulezour. Ki sa servi si to dir zot: “Orevwar, port zot bien; abiy zot bien e manze vant plin!” me to pa donn zot seki neseser pou zot viv? Li parey avek lafwa: si li pena okenn bon aksion, li enn lafwa mor. Kikenn kapav dir; “Enn dimounn ena lafwa e enn lot ena aksion.” Mo pou reponn li: “Montre mwa to lafwa san bann aksion! Abe mwa, mo pou prouv twa mo lafwa par mo bann aksion.” Zot krwar ki ena enn sel Bondie; zot fer bien. Mem bann demon osi krwar sa, e zot tranble avek laper. Zokris! To anvi kone si lafwa san bann aksion li initil? Get Abraam, par so bann aksion ki Bondie finn deklar li zis letan li ti ofer so garson Izaak lor lotel. To trouve, so lafwa ek so aksion mars ansam; so aksion prouv so lafwa dan Bondie. La, nou trouv realizasion pasaz Lekritir ki dir: “Abraam finn krwar dan Bondie ki finn rekonet li kouma zis,” e zot finn apel li kamarad Bondie. To trouve, enn dimounn li zistifie par bann aksion e pa zis par lafwa. Li parey dan ka prostitie Raab ki li osi ti zistifie par so aksion letan li ti akey bann mesaze e ti ranvway zot par enn lot sime. Parey kouma enn lekor san lespri li mor, nou lafwa osi san bann aksion, li mor. Mo bann frer ek ser, fode pa ki zot tou rod vinn ansegnan. Zot kone, nou, bann ansegnan, pou ziz nou pli severman ki lezot. Nou tou fer fot. Kikenn ki pa fer fot kan li koze, li enn dimounn parfe ki kapav kontrol tou so lekor. Si nou met labrid dan labous seval pou fer li obeir nou, nou pe osi kontrol so lekor an-antie. Sinon, get bann bato, mem si zot larz e bizin gro-gro divan pou pous zot, pourtan zot dirize par enn ti gouvernay, e kot kapitenn-la anvi fer zot ale, zot ale. Li parey avek lalang ki enn ti parti nou lekor, me li kapav fer vantar gran-gran explwa. Panse kouma enn gran lafore kapav pran dife avek zis enn ti laflam. Lalang li parey enn dife. Li reprezant dan nou lekor enn sours lemal, e li polie tou nou lekor. Bann imin kapav dont tou kalite zanimo sovaz ek zwazo, reptil ek pwason, e zot finn vinn dous. Me personn pa kapav dont lalang, li kouma enn demon inkontrolab, li enn pwazon mortel. Nou servi li pou loue Lesegner, nou Papa, e avek samem lalang nou donn malediksion dimounn ki Bondie finn kree parey kouma li. Parol louanz ou malediksion sorti dan mem labous. Sa pa sipoze koumsa, mo bann frer, mo bann ser! Pena okenn lasours kot dilo dous ek somat sorti! Mo bann frer ek ser, eski enn pie fig kapav donn zoliv, oubien enn pie rezin donn fig? Li parey, dan enn lasours dilo sale pa kapav ena dilo dous. Eski ena kikenn parmi zot ki panse li saz ek intelizan? Ki li prouv li par so bon kondwit, par so bann aksion ki li akonplir avek sazes ek limilite. Me si zot leker li ranpli ar zalouzi, move lanvi ek lanbision, fode pa ki zot fos laverite par zot vantardiz. Enn lasazes parey pa sort dan lesiel; li sorti depi later, li imin ek mem diabolik. La kot ena zalouzi, lanvi ek lanbision, pou ena osi dezord ek tout sort kalite mesanste. Me lasazes ki sorti depi lao, avan tou li pir; li osi pasifik, dou, amikal; li ranpli ar konpasion e li prodir boukou bon aksion san okenn tras partipri ou ipokrizi. Dimounn ki sem lape otour zot, rekolte lazistis. Tou sa bann dispit ek konfli ant zot la, ki kote li sorti sa? Eski li pa sorti depi zot lanvi plezir ki pe lager dan zotmem? Zot anvi enn kiksoz, me zot pa kapav gagn li, alor zot fer krim; zot ena enn gran lanvi pou enn kiksoz e zot pa kapav gagn li, alor zot lager, zot fer dezord. Zot pena parski zot pa demande. Zot demande me zot pa resevwar, parski zot mal demande, zot demande zis pou zot prop plezir. Bann infidel! Eski zot pa kone ki lamitie pou lemond vedir zot lennmi Bondie? Dimounn ki swazir kontan lemond li fer limem vinn lennmi Bondie. Eski zot panse ki pou nanye Lekritir dir, “Bondie dezir avek zalouzi lespri ki li finn met dan nou”? Me Bondie donn tou dimounn boukou plis lagras, samem Lekritir dir osi, “Bondie kont bann orgeye e li donn lagras bann ki ena limilite.” Soumet zot ar Bondie. Reziste diab e li pou sove, al lwin ar zot. Apros zot ar Bondie e li pou vinn pros ar zot. Zot, bann peser, netway zot lame ek pirifie zot leker ipokrit. Zot bizin pran konsians zot mizer. Plore. Lamante. Ki zot riye sanze vinn plore; ki zot lazwa vinn tristes. Abes zot devan Lesegner e li pou elev zot. Frer ek ser, pa koz dimal lor lezot. Ninport ki koz dimal kont enn lot ou port zizman lor li, li pe koz kont lalwa e pe ziz lalwa Bondie. Si zot ziz lalwa, zot pa enn dimounn ki obeir li me zot enn ziz lor li. Bondie tousel ki donn lalwa e ki zize; li tousel kapav sove e detrir. Ki zot krwar zot ete, pou zot ziz enn lot dimounn? Aster-la, ekout mwa, zot ki dir, “Zordi ek dime nou pou al dan tel-tel lavil, pas enn lane laba, fer biznes ek fer boukou larzan.” Pourtan, zot pa mem kone ki dime rezerv zot. Zot parey kouma enn brouyar ki paret zis pou enn ti moman, apre li disparet. Zot ti bizin plito dir, “Si Lesegner oule, nou pou viv e fer sa ek sa.” Kouma li ete la, zot pe fer vantar, e sa kalite vantar-la, li move. Alor si kikenn konn seki bizin fer dapre lalwa e li pa fer li, li komet enn pese. Aster-la, bann ris, plore e kriye akoz bann maler ki pe vinn lor zot. Zot larises finn pouri e zot linz pe fini ar lever mous. Zot lor ek zot larzan pe rouye. Sa larouy-la pou servi kouma enn temwaniaz kont zot e li pou manz zot laser kouma dife. Zot finn anpil enn ta larises dan sa bann dernie zour-la. Ekout mwa! Zot finn refiz pey saler bann travayer ki finn travay dan zot karo. Bann-la pe fer konplint e lavwa bann ki fer larekolt finn ariv dan zorey Bondie Toupwisan. Lor later zot finn viv enn lavi konfortab, dan lix ek plezir. Zot finn angres zot kouma bann zanimo pou labousri. Zot finn kondann ek touy bann dimounn inosan ki pa finn montre rezistans. Mo bann frer ek ser, zot bizin ena pasians ziska ki Lesegner vini. Fermie atann ki later donn bann bon fri. Zot atann avek boukou pasians ziska sezon lapli. Zot osi, bizin ena pasians. Tini zot leker ferm akoz Lesegner pe arive biento. Pa bizin fer konplint enn kont lot, sinon Bondie pou ziz zot, e ziz-la zis deryer laport. Bann frer ek bann ser, rapel bann profet ki ti koz dan nom Lesegner. Zot bann lexanp kouma bizin ena pasians dan moman gran soufrans. Nou deklar bann-la bienere parski zot finn ena landirans. Zot finn tann landirans Zob e zot finn trouve seki Bondie finn fer, kouma li finn montre konpasion ek mizerikord pou li. Mo bann frer e ser, sirtou, pa fer serman, ni par lesiel, ni par later, ni par okenn lot fason. Kan zot dir “Wi” ki li “Wi” e kan zot dir “Non” ki li “Non.” Koumsa zot pa pou tom dan kondanasion. Ena kikenn parmi zot ki pe soufer? Ki li priye. Ena kikenn dan lazwa? Ki li sant louanz. Eski ena parmi zot ki malad? Li bizin apel bann ansien Legliz pou priy pou li, e met lonksion delwil lor li dan nom Lesegner. Enn lapriyer ki fer avek lafwa, pou sov malad-la; Lesegner pou remet li dibout e so bann pese pou pardone. Alors, zot bizin konfes zot pese ant zot e sakenn priye pou so kamarad, pou ki zot kapav geri. Lapriyer enn dimounn ki zis, li ena enn pwisans e li efikas. Eli ti enn imin parey kouma nou. Li ti priye avek boukou ferver pou ki lapli pa tonbe; e pandan trwa-z-an sis-mwa lapli pa ti tonbe lor later. Apre sa li ti priye ankor, e lesiel finn donn lapli e later finn raport enn zoli rekolt. Mo bann frer e ser, si enn parmi zot finn egare e enn lot ramenn li, rapel bien: dimounn ki retir enn peser dan trou, li pou sov lam sa peser-la depi lamor, e enn kantite pese pou pardone. Mwa, Pier, enn Zapot Zezi Kris, mo pe ekrir zot, pep ki Bondie finn swazir e ki pe viv an exil inpe partou dan Pon, Galasi, Kapados, Lazi ek Bitini. Dapre so plan, Bondie Papa finn swazir zot, e zot finn vinn enn pep sanktifie par so Lespri, pou obeir Zezi Kris ki finn pirifie zot par so disan. Ki lagras ek lape ranpli zot tou. Ki Bondie, Papa nou Segner Zezi Kris, li beni; parski dan so gran mizerikord, li finn donn nou enn nouvo lavi ler li resisit Zezi depi bann mor, e li donn nou enn lesperans vivan; enn leritaz ki finn rezerve pou zot dan lesiel, ki pa pou disparet, ni gate oubien fletri. Ki pwisans Bondie gard zot dan lafwa, pou ki zot fer lexperyans delivrans ki pou revel li dan lafin letan. Sa bizin rann zot zwaye, mem si aster-la, pou enn tigit letan, zot bizin pas par tou sort kalite difikilte. Zot lafwa, li pli presie ki lor. Li pou pas dan leprev kouma lor ki fonn kan li pas dan dife pou prouv so vre valer. Lerla zot pou kapav dekouver lalouanz, laglwar ek loner kan Zezi Kris pou revel li. Mem si zot pa finn trouv li, zot kontan li; e mem si zot pa trouv li aster-la, zot krwar dan li e zot rezwir dan enn lazwa extraordiner ki pa kapav exprime, parski zot pe rekolte fri zot lafwa; delivrans zot lam. Bann profet finn fer resers lor sa delivrans-la, e zot finn profetiz lor size lagras ki finn rezerve pou zot. Zot finn fer zefor pou dekouver ki lepok e dan ki sirkonstans ki Lespri Kris ki dan zot, ti predir soufrans ki Kris ti pou soufer ek laglwar ki ti pou swiv apre. Bondie ti revel ar bann profet ki zot pa ti pe servi zot prop lintere, me ti pou zot ki li ti transmet sa mesaz ki ti finn deza anonse par pwisans Lespri Sin depi dan lesiel. Mem bann anz ti anvi konn sa mesaz-la. Akoz samem zot bizin pare pou azir ar enn lespri eveye; met tou zot lesperans dan lagras ki Zezi Kris pou donn zot kan li pou revel li. Parey kouma bann zanfan, zot bizin obeir Bondie e pa sviw zot bann move dezir ki zot ti ena lontan kan zot ti dan liniorans. Okontrer, parey kouma Bondie ki finn apel zot, li sin, zot osi zot bizin vinn sin dan zot konportman. Lekritir dir, “Zot bizin sin parski mo sin.” Si zot priye Bondie kouma Papa ki ziz tou dimounn parey dapre so aksion, zot bizin ena respe pou li letan ki zot lor later. Zot kone, li pa pou nanye ditou ki zot finn sove dan zot move manier viv, ki zot finn erite ar zot anset. Pa larzan ou lor ki ti sov zot, me par disan presie Zezi Kris, parey kouma enn agno ki pena okenn defo. Bondie finn swazir li davans, avan mem kreasion lemond e li finn revel li dan sa dernie letan-la pou zot prop bien. Par li, zot krwar dan Bondie ki finn resisit li parmi bann mor e finn donn li laglwar pou ki zot lafwa ek zot lesperans repoz dan Bondie. Aster ki zot finn pirifie zot lam par obeisans ki zot ena pou laverite, pratik enn lamour sinser. Kontan touzour zot kamarad ar enn leker kler. Avredir, zot finn ena enn nouvo lavi, ki pa sorti dan bann paran mortel me dan enn semans ki pa lamor ek koripsion parski li sorti dan Parol Bondie ki vivan e eternel. Parski finn ekrir: “Tou dimounn, zot kouma lerb e zot laglwar parey kouma bann fler dan karo; lerb sek e so fler tonbe, me Parol Bondie li la pou touzour. Sa Parol-la, samem Bonn Nouvel ki finn anons zot.” Alor, rezet tou bann form mesanste ek trik, ipokrizi, zalouzi ek mansonz. Parey kouma bann zanfan ki fek ne, rod dile ki pa koupe e ki spiritiel pou ki kan zot bwar li zot kapav grandi pou gagn vre lavi, si vremem zot finn gout kouma Lesegner li bon! Vinn kot li; li enn ros vivan. Mem si li finn rezete par bann zom, Bondie finn apresie li e finn swazir li. Zot osi, parey kouma bann ros vivan, pran zot plas dan konstriksion enn lakaz spiritiel. Form enn kominote pret ki konsakre pou Bondie, pou kapav ofer bann sakrifis spiritiel ki fer Bondie plezir atraver Zezi Kris. Parey kouma Lekritir dir “Ala mo met dan Sion enn ros inportan, enn ros ki ena bien gran valer; seki krwar dan li pa pou perdi sime.” Pou zot ki krwar, sa ros-la ena enn gran valer, me pa pou bann ki pa krwar, “Ros ki bann konstrikter finn rezete finn vinn ros kwin prinsipal.” Li finn osi dir: “Li enn ros ki fer dimounn kogne, e li enn ros ki fer dimounn tonbe.” Ena ki tonbe parski zot finn dezobeir laparol, e samem ki zot merite. Me zot, okontrer, zot enn ras ki Bondie finn swazire, bann pret rwayal, enn nasion sin, Bondie so prop pep ki finn swazir pou proklam bann mervey Sa Enn ki finn apel zot pou sorti dan teneb pou rant dan so lalimier merveye. Avan, zot pa ti so pep, me aster-la, zot pep Bondie; avan, zot pa ti ankor ena mizerikord, me aster-la, zot ena mizerikord. Mo bann kamarad, mo dimann zot antan ki etranze ek exile lor later, pa rant dan piez instale par bann dezir imin ki an dezakor ar zot lam. Ena enn bon kondwit parmi bann payin; lerla, mem si zot dir foste lor zot e tret zot kouma malfeter, zot pou oblize rekonet bann bon travay ki zot pe fer e glorifie Bondie kan li retourne. Akoz Lesegner, aksepte lotorite bann institision imin; mem lotorite Lanperer ki ena lotorite siprem; lotorite bann gouverner, ki li finn avoye pou pini bann malfeter e pou felisit bann ki fer bon. Sa, li volonte Bondie. Kan kikenn fer dibien, li tengn diskour bann inioran. Konport zot kouma bann dimounn lib. Pa bizin servi zot liberte kouma enn vwal pou kasiet lemal, me azir kouma serviter Bondie. Respekte tou bann imin, kontan zot bann frer ek ser dan lafwa, ador Bondie e respekte lanperer. Serviter, aksepte lotorite zot bann met avek enn gran respe; pa zis bann ki bon ek zanti, me osi bann ki fer difisil. Li enn benediksion si, par respe pou Bondie, zot siport bann soufrans ki zot pa merite. Ofet ki merit zot ena si zot siport bann kou kan zot finn fer ditor? Me si, apre ki zot finn fer dibien, zot ena pou soufer, sa li enn lagras devan Bondie. Akoz samem ki Bondie finn apel zot parski Kris limem finn soufer pou zot, li finn donn zot enn lexanp pou zot swiv li. “Li pa finn fer okenn pese, e okenn mansonz pa finn sorti dan so labous.” Kan li finn gagn insilte, li pa finn rann laparey; kan li finn soufer, li pa finn menas personn, me li finn met so konfians dan Bondie ki ziz bien. Dan so prop lekor li finn sarye nou pese lor lakrwa, pou ki nou aret viv dan pese e viv enn fason ki korek. Par so bann blesir, nou finn geri. Wi, zot ti bann brebi egare, me aster-la zot finn retourn kot berze ki gardien zot lam. Bann madam, zot osi, soumet ar zot mari. Mem si sertin mari pa krwar Parol Bondie, zot pou kapav benefisie atraver konportman zot fam, ler zot dekouver pirte ek respe ki zot ena pou zot lavi. Pa rod fer zoli ar zestaz exteryer kouma tres seve, met bizou lor ek zoli linz; me plito ena enn leker dou avek enn lespri trankil ki zame pa pou gate; e sa enn kado presie sorti depi leker Bondie. Lontan, koumsa mem bann fam piez ti ete. Zot ti met zot lesperans dan Bondie e zot ti aksepte lotorite zot mari. Koumsa mem Sara ti obeir Abraam e ti apel li Segner. Aster-la zot, so bann tifi, fer seki bon e zot pa les lafreyer paraliz zot lespri. Zot osi, bann mari, montre konsiderasion pou zot madam parski bann-la pa osi for ki zot. Tret zot avek respe parski zot osi zot eritie lagras Bondie. Lerla nanye pa pou kapav blok zot lapriyer. Finalman, zot tou, zot bizin ena mem lespri, mem konpasion ek mem santiman lamour ant zot. Ena enn bon leker e viv avek limilite. Pa rann lemal par lemal, oubien, insilt pou insilt; okontrer reponn par enn benediksion, parski Bondie finn promet zot benediksion kan li finn apel zot. Ofet “Bann ki anvi zwir lavi e anvi viv ere, ki zot aret koz dimal e aret koz manti. Zot bizin rezet lemal e fer dibien; Zot bizin lite an faver lape ar tou lafors zot leker. Parski Lesegner vey lor bann ki fidel, e li pre pou ekout zot lapriyer. Me Lesegner li kont bann ki fer ditor.” E kisann-la pou fer zot ditor si zot vremem anvi fer dibien? Me, mem si zot soufer pou fer dibien, Bondie pou beni zot. Pa bizin per personn e pa kas latet, me dan zot leker onor Kris kouma zot Segner. Touletan zot bizin pare pou defann zot lafwa kan dimounn dimann zot explik lesperans ki dan zot; alor fer li avek zantiyes ek respe. Gard zot konsians kler, pou ki letan zot gagn insilte, bann ki dir dimal lor zot bonn kondwit kouma Kretien, zot pou onte ar seki zot pe dir. Parski vomie zot soufer pou fer dibien, si samem volonte Bondie, plito ki fer ditor. Ofet, Zezi Kris limem li finn soufer pou pese tou dimounn; parey kouma enn inosan li finn mor pou bann koupab, pou li kapav amenn zot kot Bondie. Fizikman zot finn touy li, me li finn reviv spiritielman, e dan sa leta spiritiel-la, li finn al pres ar bann lespri anprizone. Sa bann lespri-la, dan letan lontan, pa ti obeir Bondie kan li ti pe atann ar boukou pasians dan lepok Noe ti pe aranz lars. Enn tigit dimounn, zis wit, ti sap dan deliz. Sa enn fason pou montre batem ki pe sov zot aster-la; pa pou lav inpirte dan zot lekor, me kouma enn langazman ar Bondie pou enn konsians prop; li sov zot par rezireksion Zezi Kris, ki finn al dan lesiel e dan kote drwat Bondie, la kot li pe regne lor bann anz ek lezot pwisans ek lotorite lesiel. Lekris finn soufer dan so lekor; zot osi, zot bizin ena mem konviksion, parski kan kikenn finn soufer dan so lekor, savedir li finn kas lasenn pese, pou kapav viv leres zot lavi lor later pa dapre bann dezir imin me dapre volonte Bondie. Zot finn deza pas enn kantite letan fer seki bann payin kontan fer: parey kouma viv dan debos, kraze par move dezir, soular ek ador bann idol. Aster-la bann payin etone parski zot refiz partisip dan sa bann move kondwit-la e bann-la insilte zot. Me zot bizin rann kont Bondie pou zot aksion, li ki touzour pare pou ziz bann vivan parey kouma bann mor. Akoz samem nou pres Bonn Nouvel ar bann mor, parski mem si zot finn zize dan zot lekor parey kouma tou dimounn, zot pou kapav viv dapre lansegnman Bondie dan zot lespri. Lafin tou kiksoz pe aprose. Zot bizin serye ek disiplinn zotmem pou zot kapav priye. Avan tou, kontan zot kamarad, parski lamour pou fer zot pardonn boukou pese lezot. Ouver zot laport ar tou dimounn san ki zot plengne. Sakenn, parey kouma enn bon serviter, servi bien bann diferan kalite lagras ki Bondie finn donn zot. Si kikenn koze, li bizin transmet mesaz Bondie; seki servi, li bizin servi avek lafors ki sorti kot Bondie, pou ki par Zezi Kris, nou kapav glorifie Bondie dan tou kiksoz. Mo bann kamarad, pa bizin ki zot etone par sa bann eprev-la koumadir kiksoz etranz pe arive. Okontrer, zot bizin kontan ki zot pe partaz soufrans Kris, pou ki zot kapav gonfle ar lazwa ek kontantman kan li revel li dan so laglwar. Sa enn benediksion pou zot si zot pe gagn insilte akoz zot disip Kris, savedir Lespri Bondie ek Lespri so laglwar res ar zot. Ki personn parmi zot pa soufer akoz li enn kriminel, enn voler, enn bandi ou akoz li finn mel dan zafer ki pa regard li. Me si kikenn soufer akoz li Kretien, fode pa ki zot konsider sa kouma enn dezoner; glorifie plito Bondie parski zot port so nom. Ler finn arive kot zizman pou koumanse lor pep Bondie; si li koumans avek nou, kouma sa pou ete avek lezot ki dezobeir Bonn Nouvel ki sorti kot Bondie? E kouma Lekritir dir nou: “Si li difisil pou enn zis sove, ki pou arive ar bann ki move e ki pe bengn dan pese?” Alor bann ki pe soufer akoz volonte Bondie, ki zot kontigne fer seki bien e zot soumet devan zot Kreater ki gard touzour so promes. Aster-la momem, kouma enn ansien ek kikenn ki temwin bann soufrans Kris e ki ena so par dan laglwar ki pou revele, mo fer enn lapel ar bann sef Legliz ki la parmi zot: pran bien swin troupo Bondie ki anba zot responsabilite; vey lor li, pa par obligasion me par amour; fer zot travay par devouman e non pa par intere. Pa fer dominer ar bann ki anba zot, me vinn enn lexanp ki zot troupo pou kapav swiv. E kan sef berze paret, zot pou resevwar enn kouronn laglwar ki pou briye pou touzour. Zot osi, bann zenn, zot bizin aksepte lotorite bann ansien. Zot tou bizin met lor zot enn tabliye ki apel limilite pou zot servi zot kamarad, parski Lekritir dir: “Bondie li kont bann ki ena lorgey, me li donn so lagras bann ki viv dan limilite.” Zot bizin kourb zot devan lame pwisan Bondie, pou ki li kapav lev zot lao-lao kan ler arive. Met tou zot traka lor li, parski li pran zot swin. Pa fer zes; veye kouma bizin! Zot lennmi diab pe fer letour kouma enn lion feros; li pe rod kikenn pou devore. Res touzour ferm dan lafwa e reziste li, parski zot kone ki zot bann frer ek ser dan lemond antie pe pas par mem kalite soufrans. Zot ena pou soufer ankor inpe letan. Bondie, ki lasours lagras, ki finn apel zot pou so laglwar eternel dan Zezi Kris, pou limem beni zot, donn zot lafors ek ranz zot lexistans lor enn baz solid. Pouvwar pou li pou touzour. Amen. Mo pe ekrir zot sa ti let-la avek led Silas, ki mo konsider kouma enn frer serye, pou ankouraz zot e pou sertifie ki samem vre lagras Bondie; zot bizin tini ferm ladan. Legliz dan Babilonn avoy zot so konpliman; Mark osi parey. Salie e anbras zot kamarad. Ki lape res ar zot tou ki pe viv dan Zezi Kris. Mwa Simon Pier, serviter ek Zapot Zezi Kris. Mo pe adres zot, bann dimounn ki finn resevwar don presie lafwa kouma nou, atraver lazistis Bondie e nou Sover Zezi Kris: Ki zot konesans Bondie ek nou Segner Zezi grandi, ki zot resevwar lagras ek lape an abondans. Pwisans Bondie finn donn nou tou seki nou bizin pou viv enn lavi sin; li fer nou konn sa kikenn ki finn apel nou par so laglwar ek lafors so aksion. Koumsa mem ki li donn nou sa bann don presie ki li finn promet, pou ki atraver sa, zot pou evit tom dan piez move dezir e zot pou kapav partisip dan so natir divinn. Pou sa rezon-la, zot bizin fer tou zefor posib pou ki avek zot lafwa zot azout enn bon konportman, e avek zot bon konportman vre konesans Bondie. Avek konesans azout kontrol lor zotmem, avek kontrol lor zotmem azout landirans, avek landirans azout latasman ar Bondie, avek latasman ar Bondie azout lafeksion ki zot ena ant zot, avek lafeksion ki zot ena ant zot azout lamour. Sa bann kalite-la, si zot ena li an abondans, pou fer zot vinn aktif e progrese dan konesans nou Segner Zezi Kris. Me dimounn ki pena sa bann kalite-la, li pa trouv lwin e li parey kouma dimounn aveg ki finn bliye ki tou so bann pese avan finn lave. Alor mo bann frer ek ser, double zot zefor pou montre vremem ki Bondie finn swazir ek apel zot; ler zot fer sa, zame zot pa pou tom dan lemal. Dan sa fason-la, zot pou gagn enn gran privilez pou rant dan rwayom eternel Zezi Kris nou Segner ek Sover. Akoz samem mo panse li normal ki mo kontigne rapel zot sa bann kitsoz-la, mem si zot deza konn li e ki zot bien atase ek laverite ki zot ena aster-la. Me mo krwar ki li normal ki mo revey zot memwar letan ki mo ankor vivan. Mo kone ki mo pou mor biento, parski Lesegner Zezi Kris finn fer mwa enn revelasion lor-la. Mo pou fer tou mo posib pou ki, zot kapav rapel tou sa lansegnman-la apre mo depar. Ofet, nou pa finn aranz enn zistwar baze lor bann kont-de-fe pou fer zot konn pouvwar Zezi Kris ek so retour, me noumem, nou finn trouv so grander ek nou prop lizie. Parski Li finn resevwar loner ek laglwar Bondie nou Papa kan ti ena enn lavwa depi laglwar siprem Bondie, ki ti dir: “Samem mo garson, mo bieneme, dan ki mo met tou mo lazwa.” Noumem, nou finn tann sa lavwa sorti dan lesiel, letan nou ti avek li lor montagn sakre. Alor nou kapav ena plis konfians dan mesaz sorti kot bann profet. Li dan zot lavantaz pou fer bien atansion parski li parey enn lalanp ki briye dan marenwar ziska lizour kan zetwal gramatin leve pou ekler zot leker. Avan tou, zot bizin konpran ki personn pa kapav par limem interpret bann profesi Lekritir, parski okenn profesi pa finn vini par volonte imin, me plito bann dimounn anba linflians Lespri Sin ki finn proklam mesaz Bondie. Me finn ena osi bann fos profet ki finn leve parmi lepep, parey kouma pou ena fos profeser parmi zot ki, dan kasiet pou donn fos lansegnman. Zot pou amenn bann fos doktrinn destriktif e zot pou mem rezet Lemet ki finn sov zot. Akoz sa, zot pou al ver zot prop destriksion. Anplis, boukou dimounn pou swiv zot move sime, e akoz sa bann profeser-la, lezot pou dir move kiksoz lor sime laverite. Akoz zot gourmandiz larzan, sa bann dimounn-la pou explwat zot par bann koze malonet. Depi lontan, zizman finn fini pase lor zot e zot destriksion pa lwin. Bondie pa finn epargne bann move anz, me finn zet zot dan lanfer, finn ansenn zot dan nwar ziska zour zizman; e li pa finn epargne sa vie lemond-la, me li finn avoy enn gran deliz lor so bann move abitan, e li finn sov lavi wit dimounn, parmi Noe, enn predikater lazistis. Apre li finn kondann lavil Sodom ek Gomor e li finn detrir li ar dife. Sa pou servi zot lexanp lor seki arive avek bann ki fer pese. Li finn delivre Lot ki ti drwat, e ki ti akable par fason imoral ki bann peser ti pe viv. Zour apre zour sa zom drwat la finn viv parmi sa bann peser; li ti tourmante par zot move aksion ki li ti trouve ek tande, alor Lesegner kone ki fason pou delivre bann dimounn drwat depi zot difikilte e kouma li gard bann peser anba so pinision ziska zour zizman; spesialman bann ki obeir dezir zot prop laser e mepriz lotorite Bondie. Sa bann fos profeser, zot arogan ek latet dir, zot pena respe pou kreatir lesiel e zot pa per pou insilte zot. Mem bann anz ki normalman pli for e pli pwisan, zot pa akiz sa bann kreatir lesiel devan Lesegner. Me sa bann dimounn-la azir dapre zot linstin kouma bann zanimo sovaz ki ne pou apre may zot e detrir zot; zot insilte ek atak bann ki zot pa konpran, zot pou gagn zot destriksion. Zot pou gagn pinision pou dimal ki zot finn fer. Zot pran plezir pou amenn move lavi dan plin lizour. Kan zot partisip dan zot fet, zot prezans degoutan, fer onte e zot pran plezir koz manti. Zot lizie zis bon pou komet adilter e zot pa fatige fer pese. Zot antrenn dimounn feb dan piez. Zot leker finn bien antrene pou kontan kas. Malediksion lor zot. Zot finn kit vre sime, zot finn perdi dan sime Balam, garson Bosor ki ti kontan larzan ki gagne par move travay, me li ti gagn enn leson pou so pese. Enn bourik ti koze ar profet-la avek enn lavwa imin e so foli ti arete. Sa bann dimounn-la, zot kouma bann lasours ki pena dilo, bann niaz dirize par divan siklonn. Enn plas dan marenwar finn fini rezerve pou zot. Zot fer bel-bel diskour ki pena sans; zot servi zot dezir obsenn pou piez lezot ki fek fini sap dan piez bann ki amenn move lavi. Zot promet liberte, kan zotmem zot esklav pouritir; parski enn dimounn li esklav seki dominn li. Ofet dimounn ki finn kapav sap dan bann move inflians lemond akoz zot finn konn Zezi Kris, nou Segner ek Sover, apre zot remay dan lak, zot sitiasion pou vinn pir ki avan. Li ti pou meyer ki zame zot ti konn sime lazistis, ki apre ki zot finn konn li, zot tourn zot ledo ar bann komannman sakre ki finn transmet zot. Seki proverb dir, samem ki finn ariv zot: “Lisien retourn dan so vomi,” “Bengn koson kouma ou anvi. Kouma larg li, li al roul dan labou.” Mo bann frer ek ser, sa fer deziem let ki mo ekrir zot. Dan toule-de, mo finn sey rapel zot bann souvenir pou stimil zot lespri avek bon panse. Zot bizin rapel bann parol ki bann sin profet ti dir, e komannman ki Lesegner ek Sover ti koze atraver bann Zapot. Premie dabor, zot bizin konpran ki dan bann dernie zour, sertin dimounn lespri traver pou mok zot, zot pou dir, “Kot li ete seki ti promet pou revini? Depi ki nou anset finn mor tou finn res parey kouma depi koumansman kreasion!” Zot bliye ki bien lontan Bondie finn kree lesiel ek later par so parol. Later li finn fer li apartir dilo e avek dilo; e li osi par dilo inondasion, ki sa vie lemond-la finn detrir. Me, sa mem parol-la finn rezerv lesiel ek later zordi pou dife. Zot finn bien prezerve pou zour zizman ek destriksion bann peser. Me, mo bann bieneme, fode pa ki zot bliye ki pou Lesegner, enn zour li parey kouma mil an, e mil an li parey kouma enn sel zour. Lesegner, li pa tarde pou realiz so promes, parey kouma sertin dimounn panse, me li pasian avek zot, parski li pa anvi ki enn parmi zot tonbe, me ki zot tou repanti. Zour Lesegner pou vini kouma enn voler dan lanwit; lerla lesiel pou disparet avek enn gran fraka e tou bann zetwal avek laflam pou dezintegre, e later ek tou seki lor li pou disparet. Si tou kiksoz pou bizin disparet dan sa fason-la, alor ki kalite dimounn nou bizin ete? Zot bizin ena enn lavi sin e respektab devan Bondie. Letan ki zot pe atann zour Lesegner, zot bizin fer tou zefor pou ki li vinn pli vit. Sa zour-la, lesiel pou pran dife ek disparet e bann zetwal pou fonn ar saler. Me, dapre promes Bondie, nou atann enn nouvo lesiel ek enn nouvo later kot pou ena lazistis. Akoz samem, mo bann bieneme, letan ki zot pe atann sa zour-la, fer tou seki zot kapav pou ki zot res san tas, san okenn pese e ki li trouv zot pe viv anpe avek li. Zot bizin konsider pasians nou Segner kouma enn lokazion pou nou akeyir delivrans Bondie, parey kouma nou frer Pol finn ekrir avek lasazes ki Bondie finn donn li. Samem ki li dir nou dan tou so bann let. Ena sertin pasaz ki difisil pou konpran, ki bann inioran oubien bann ki latet fatige pou deform so sans, kouma zot fer avek lezot pasaz dan Lekritir sin. Sa pou amenn zot destriksion. Me zot, mo bann bieneme, zot deza averti. Fer atansion, pa les zot antrene par erer bann move dimounn ki rod destabiliz zot. Kontigne progrese dan lagras ek konesans nou Segner ek Sover Zezi Kris. Laglwar pou li zordi ek dan leternite. Amen. Nou anons zot ki seki ti la depi koumansman, seki nou finn tande, seki nou finn trouve avek nou lizie, seki nou finn gete ek touse avek nou lame, samem parol lavi ki nou pe anons zot. Sa lavi-la finn manifeste li, e nou finn tann li, nou finn trouv li e temwagn lor li; e nou anons zot lavi eternel ki ti avek nou Papa e ki finn manifeste ar nou. Nou anons zot seki nou finn trouve ek tande pou ki zot osi zot res ini avek nou, ki ini avek nou Papa e so Garson Zezi Kris. Nou pe ekrir tousala pou ki nou lazwa li konple. Samem mesaz ki nou finn tande sorti kot li, ki finn anons zot ki Bondie li lalimier, dan li pena okenn teneb. Si nou dir ki nou viv ini avek li letan ki nou pe mars dan teneb, nou koz manti e nou pa pe fer seki vre. Me si nou mars dan lalimier parey kouma limem ki dan lalimier, nou pou viv ini avek nou kamarad, e disan so Garson Zezi lav tou nou pese. Si nou dir ki nou pena pese, nou tronp noumem, e laverite pa dan nou. Si nou konfes nou pese, Bondie ki fidel ek zis, pou pardonn nou pese ek lav tou seki mal dan nou. Si nou dir ki nou pa finn fer pese, nou fer li pas pou enn manter, e so parol pa dan nou. Mo bann ti zanfan, mo pe ekrir zot tousala pou ki zot pa fer pese. Me si kikenn fer pese nou ena enn avoka kot Bondie Papa: Zezi Kris ki zis. Li finn ofer limem kouma sakrifis pou nou pese, pa zis pou nou tousel me osi pou pese lemond antie. Si nou gard so komannman, lerla nou sir ki nou konn li. Dimounn ki dir, “Mo konn li,” me pa gard so komannman, li enn manter e pena laverite dan li. Me dimounn ki gard so parol, lamour Bondie pou vremem parfe dan li. Koumsa mem nou kone ki nou vremem ini avek li. Dimounn ki dir li ini avek li, bizin mars parey kouma li. Mo bann frer ek ser bieneme, mo pa pe ekrir zot enn nouvo komannman, me enn vie komannman ki zot ti deza resevwar depi koumansman. Sa vie komannman-la, limem parol ki zot finn deza tande. Ankor enn fwa, mo pe ekrir zot enn nouvo komannman ki trouv so laverite dan Lekris ek dan zot osi. Vremem, teneb pe disparet e vre lalimier pe briye. Dimounn ki dir, “Mo dan lalimier,” apre li ayir so frer ek so ser, li ankor dan teneb. Dimounn ki kontan so frer ek so ser, li pe viv dan lalimier, e pena nanye dan li ki kapav fer li ek lezot tom dan pese. Me dimounn ki ayir so frer e so ser, li dan teneb, li mars dan teneb, e li pa kone kot li pe ale, parski teneb finn fer li vinn aveg. Mo bann zanfan, mo pe ekrir zot parski zot pese finn pardone akoz nom Zezi Kris. Mo pe ekrir zot, gran dimounn, parski zot konn Sa-Enn ki existe depi koumansman. Mo pe ekrir zot, bann zenes, parski zot finn vink lemal. Bann zanfan, mo pe ekrir zot, parski zot konn Bondie Papa. Bann gran dimounn, mo pe ekrir zot parski zot konn Sa-Enn ki existe depi koumansman. Bann zenes, mo pe ekrir zot parski zot for, Parol Bondie li abit dan zot, e zot finn vink lemal. Pa bizin zot kontan lemond, ni bann kiksoz materyel lemond. Dimounn ki kontan lemond, li pena lamour Bondie Papa dan li. Tou seki sorti dan lemond, kouma move dezir natir imin, lanvi posed seki nou trouve, ek lorgey baze lor larises, pa vinn depi Bondie Papa me depi lemond. Lemond avek so bann dezir pe al fini, me bann ki fer volonte Bondie pou viv pou touzour. Mo bann zanfan, lafin pe aprose. Zot finn tande ki antikris pe vini, aster-la mem ena boukou lennmi Lekris ki finn fini vini. Koumsa mem nou kone ki lafin li pre. Sa bann zans-la finn sorti kot nou me zot pa ti vremem ar nou, lakoz samem zot inn kit nou; parski si zot ti ar nou, zot ti pou res avek nou, me zot finn fer li kler ki personn parmi zot pa ar nou. Me zot, zot finn resevwar lonksion ki sorti kot Sa-Enn ki Sin e zot ena konesans laverite. Mo pe ekrir zot, pa parski zot pa konn laverite, me parski zot bien konn li e zot kone osi ki okenn mansonz pa kapav sorti depi laverite. Kisann-la ki manter? Pa sa dimounn ki rezet Zezi kouma Lekris? Limem lennmi Lekris, li rezet toule-de, Bondie Papa ek so Garson. Kikenn ki rezet Bondie Garson li pena Bondie Papa dan li. Tou dimounn ki aksepte Bondie Garson li ena osi Bondie Papa. Gard bien mesaz ki zot finn tande depi koumansman. Si zot gard sa mesaz-la, lerla zot pou res ini avek Bondie Garson ek so Papa osi. Samem ki li finn promet nou: lavi eternel. Mo pe ekrir sa lor size bann dimounn pe rod tronp zot. Me zot, sa lonksion ki Lekris finn vers lor zot la, li kontign res ar zot. Kouma zot ena so Lespri dan zot, zot pa bizin enn lot dimounn pou ansegn zot. Anfet, Lespri ansegn zot lor tou kiksoz e tou seki li ansegn zot li vre, li pa fos. Samem zot bizin obeir lansegnman ki sorti kot Lespri: res touzour ini avek Lekris. Aster-la mo bann zanfan, res ini avek li, pou ki ler li revel li, nou kapav ranpli ar lasirans, e nou pa onte devan li zour ki li vini. Si zot kone ki Lekris zis, alor zot osi rekonet ki tou dimounn ki fer seki zis, li enn zanfan Bondie. Zot trouve ki kantite Bondie Papa kontan nou. So lamour li telman gran pou nou ki li apel nou zanfan Bondie; e vremem, samem ki nou ete. Ala kifer lemond pa konn nou, parski li pa finn konn Bondie. Mo bann kamarad, nou deza bann zanfan Bondie, me li pa kler kouma nou pou ete apre. Me nou kone kan li pou vini nou pou resanble li, parski nou pou trouv li parey kouma li ete. Dimounn ki ena sa kalite lesperans dan Kris, pou rann limem pir parey kouma li. Dimounn ki fer pese, li kas lalwa Bondie; pese vedir dezobeir lalwa Bondie. Zot kone ki Lekris finn vini pou efas nou bann pese, e limem, li pena okenn pese dan li. Seki viv ini avek Kris, pa kontign fer pese; seki fer pese, pa finn trouv li, ni finn konn li. Mo bann ti zanfan, pa les personn anbet zot! Tou seki azir avek zistis, li zis parey kouma Kris ki zis. Seki fer pese, li sorti kot diab. Depi koumansman diab dan pese, me Garson Bondie finn vini pou detrir travay diab. Enn zanfan Bondie pa kapav kontign fer pese, parski pwisans Bondie ki met lavi dan li. Li pa kapav kontign fer pese parski li finn pran nesans kot Bondie. Ala kouma nou rekonet enn zanfan Bondie ek zanfan diab: seki pa pratik lazistis, li pa sorti kot Bondie, parey kouma seki pa kontan so frer e so ser. Samem mesaz ki zot finn tande depi koumansman: ki nou bizin kontan nou prosin. Fode pa ki nou fer kouma Kain, ki ti ena diab dan li e li ti touy so frer. Kifer li finn touy li? Parski bann aksion Kain ti move e seki pou so frer ti zis. Mo bann frer, mo bann ser, pa bizin etone si lemond ayir zot. Nou kone ki nou finn pas dan lamor pou rant dan lavi, parski nou kontan nou bann frer, nou bann ser. Dimounn ki pa kontan so prosin, li ankor prizonie pwisans lamor. Seki ayir so frer ou so ser, li enn kriminel, e zot kone ki okenn kriminel pena lavi eternel dan li. Ala kouma nou kone ki vedir lamour: Zezi Kris finn donn so lavi pou nou. Nou osi nou bizin donn nou lavi pou nou bann frer ek ser. Si kikenn ena tou seki li bizin pou viv bien e li ferm so leker ar enn lot ki pena nanye, kouma li kapav dir ki li kontan Bondie? Mo bann zanfan, fode pa nou kontan zis avek zoli parol ek bel-bel diskour, me montre vre lamour par nou bann aksion. Par sa nou kone ki nou dan laverite e nou leker kler devan Bondie. Si nou leker kondann nou, nou kone ki Bondie pli gran ki nou leker e li konn tou kiksoz. Mo bann kamarad, si nou leker pa kondann nou, nou kapav apros Bondie avek lasirans e resevwar tou seki nou dimande, parski nou obeir so komannman e fer so volonte. Ala so komannman, ki nou bizin krwar dan nom so garson Zezi Kris e kontan nou prosin, parey kouma li finn komann nou. Dimounn ki obeir komannman Bondie li res ini avek Bondie e Bondie pou prezan dan li. Ala kouma nou kone ki Bondie viv dan nou, par so Lespri ki li finn donn nou. Mo bann frer ek ser bieneme, pa met zot lafwa dan tou sort kalite lespri; teste zot pou gete si lespri-la sorti kot Bondie parski ena boukou fos profet ki finn vinn dan lemond. Ala kouma zot kapav kone si Lespri-la sorti kot Bondie: tou lespri ki deklare ki Zezi finn vremem vinn enn lekor imin, li sorti kot Bondie, e tou lespri ki pa deklar sa lor Zezi, li pa sorti kot Bondie. Mo bann zanfan, zot sorti kot Bondie, e zot finn vink bann fos profet; parski Sa-Enn ki dan zot, li pli for ki lespri ki dan lemond. Bann-la sorti dan lemond, alors tou seki zot dir sorti dan lemond e lemond ekout zot. Nou, nou sorti kot Bondie. Dimounn ki konn Bondie ekout nou, e dimounn ki pa sorti kot Bondie, pa ekout nou. Koumsa mem ki nou rekonet Lespri Bondie ki vre ek lespri dimal ki fos. Mo bann frer ek ser bieneme, nou bizin kontan nou kamarad, parski lamour sorti kot Bondie. Dimounn ki kontan so kamarad, li sorti kot Bondie e li konn Bondie. Bondie limem lamour, dimounn ki pa kontan so kamarad, li pa konn Bondie. Ala kouma Bondie finn montre so lamour pou nou: Li finn avoy so sel garson dan lemond pou ki nou gagn vre lavi par li. Ala ki vedir lamour: pa nou ki finn kontan Bondie me Bondie ki finn kontan nou e li finn avoy so garson sakrifie limem pou nou pese. Mo bann frer ek ser bieneme, si Bondie finn kontan nou sa kantite-la, nou osi nou bizin kontan nou kamarad. Personn pa finn zame trouv Bondie; si nou kontan nou kamarad, Bondie viv dan nou e so lamour pou vinn parfe dan nou leker. Ala kouma nou kone ki nou ini ar Bondie e ki li dan nou: parski li finn donn nou so Lespri. Nou finn trouve e nou temwagne ki Bondie finn avoy so Garson kouma Sover lemond. Si kikenn konfese ki Zezi limem Garson Bondie, Bondie res ini avek li e li res ini ar Bondie. Nou kone e nou krwar ki Bondie kontan nou. Bondie limem lamour. Tou dimounn ki viv dan lamour, li res ini ar Bondie e Bondie viv dan li. Lamour li parfe dan nou. Alor, zour zizman, nou pou ena boukou kouraz parski dan sa lemond-la nou parey kouma li. Pena okenn lafreyer dan lamour; vre lamour repous tou freyer. Lafreyer fer nou mazinn pinision, e tou dimounn ki gagn per, li pankor viv vre lamour. Nou, nou kontan nou kamarad parski Bondie finn kontan nou an premie. Si kikenn dir, “Mo kontan Bondie”, apre li ayir so frer ek ser, li enn manter. Si li pa kontan so frer oubien so ser ki li trouve ar so lizie, li pa kapav kontan Bondie ki li pa trouve. Ala komannman ki li finn donn nou: seki kontan Bondie bizin kontan so frer ek so ser osi. Tou dimounn ki krwar ki Zezi limem Lekris, li enn zanfan Bondie; e tou dimounn ki kontan enn papa li osi kontan zanfan papa-la. Ala kouma nou kone ki nou kontan bann zanfan Bondie: kan nou kontan Bondie e nou obeir so bann komannman. Kan nou kontan Bondie, nou obeir so komannman. So komannman pa difisil pou swiv, parski tou zanfan Bondie ena laviktwar lor lemond. Nou lafwa donn nou mwayin pou gagn laviktwar lor lemond. Kisann-la ki gagn laviktwar lor lemond? Zis dimounn ki krwar ki Zezi li Garson Bondie. Zezi Kris, limem ki finn vini avek dilo so batem ek disan so lamor. Li pa finn vinn avek zis dilo, me avek dilo ek disan; e Lespri li rann temwaniaz ki sa vre, parski Lespri limem laverite. Ena trwa temwin: Lespri, dilo ek disan, e toule trwa dakor. Si nou aksepte temwaniaz bann zom, temwaniaz Bondie ena plis pwa; parski samem temwaniaz ki li finn fer lor so Garson. Dimounn ki krwar dan Garson Bondie, li ena sa temwaniaz-la dan so leker. Dimounn ki pa krwar dan Bondie, li finn fer li pas pou enn manter, parski li pa finn krwar temwaniaz ki Bondie finn done lor so Garson. Ala temwaniaz-la: Bondie finn donn nou lavi eternel, e sa lavi-la li trouv dan so Garson. Dimounn ki ena Garson Bondie ena lavi-la; dimounn ki pena Garson Bondie, pena lavi. Zot ki krwar dan nom Garson Bondie, mo pe ekrir tousala pou fer zot kone ki zot ena lavi eternel. Ala lasirans ki nou ena dan li: tou seki nou demande, li pou akord nou dapre so volonte. Si nou kone ki li ekout nou lapriyer, nou sir ki li pou donn nou seki nou demann li. Si kikenn trouv so frer oubien so ser pe komet enn pese ki pa mortel, li bizin priye e Bondie pou donn lavi sa dimounn-la. Sa li aplik pou tou pese ki pa mortel. Ena pese ki mortel; mo pa pe dir zot priye pou sa. Tou bann move aksion apel pese, me ena pese ki pa mortel. Nou kone ki dimounn ki pran nesans kot Bondie, pa fer pese, parski Sa-Enn ki finn pran nesans kot Bondie la protez li, e Lemal pa kapav tous li. Nou kone ki nou zanfan Bondie, e lemond antie li dan pouvwar Lemal. E nou kone ki Garson Bondie finn vini, li finn donn nou lintelizans pou ki nou konn vre Bondie. Nou res ini avek vre Bondie, ini avek so Garson Zezi Kris. Limem vre Bondie e lavi eternel. Mo bann ti zanfan, fer atansion bann fos bondie. Mwa, Ansien, mo pe ekrir sa Madam ki Bondie finn swazire ek so bann zanfan, ki vremem mo kontan. Pa mo tousel ki kontan zot, me tou bann dimounn ki konn laverite, parski laverite res dan nou e pou res avek nou pou touletan. Ki Bondie Papa, ek Zezi Kris, so Garson, akord nou lagras, lamizerikord ek lape dan laverite ek lamour. Sa finn fer mwa enn gran lazwa pou trouv inpe parmi to bann zanfan pe mars dan laverite parey kouma Bondie Papa inn komann nou. Aster-la Madam, mo pa pe ekrir twa enn nouvo komannman, me samem komannman ki nou finn gagne depi koumansman. Mo dimann twa ki: “Sakenn kontan so kamarad.” Lamour vedir ki nou mars dapre komannman Bondie. Komannman ki zot finn tande depi koumansman: mars dapre sime lamour. Boukou manter finn vinn dan lemond, bann ki pa aksepte ki Zezi Kris finn vinn imin; sa bann dimounn-la, zot enn bann manter, zot antikris. Zot bizin fer atansion pou zot pa perdi fri zot travay, me ki zot resevwar zot rekonpans plin-plin. Tou dimounn ki depas limit e pa gard lansegnman Kris, zot pena Bondie dan zot. Dimounn ki gard so lansegnman, zot ini avek Bondie Papa ek so Garson. Si kikenn vinn kot zot e li pa amenn sa lansegnman-la, pa bizin zot akeyir li, ni resevwar li. Seki akeyir enn dimounn koumsa, li pe partisip dan so bann move aksion. Mo pou ena ankor boukou kiksoz pou dir zot, me mo prefer pa servi papie ek lank. Mo espere vinn kot zot e koz avek zot fasafas, pou ki nou lazwa li konplet. Zanfan to ser ki Bondie finn swazir, fer zot tou konpliman. Mwa Ansien, mo pe ekrir Gayis ki mo vremem kontan. Kamarad, mo swete ki tou pas bien pou twa e ki lasante to lekor li osi bon ki lasante to lespri. Mo ti bien kontan kan enn bann frer ti vini. Zot ti fer eloz to fidelite e kouma to pe mars dan laverite. Pena nanye ki fer mwa plis plezir kan mo tann dir kouma mo bann zanfan pe mars dan laverite. Kamarad, tou seki to fer pou to bann frer ek ser mem si zot bann etranze, demontre to lafwa. Zot finn donn temwaniaz lor to lamour dan legliz. To pou bien azir, si to ed zot dan zot vwayaz dan enn fason ki fer plezir Bondie. Sa vwayaz-la, zot finn fer li pou laglwar Zezi Kris. Zot pa finn gagn okenn led avek bann non-krwayan. Se pou sa, ki nou bizin soutenir bann dimounn koumsa, pou ki nou kapav vinn bann kolaborater dan laverite. Mo finn ekrir enn ti let Legliz; me Diotref, ki kontan touzour met li an-avan, pa finn aksepte nou lotorite. Ler mo pou vini, mo pou denons so bann fos akizasion e so bann move manier; bann palab ki li pe fer lor nou. Li finn mem refiz akeyir bann frer e bann ser, li finn anpes bann lezot ki ti anvi akeyir zot e met zot deor dan legliz. Kamarad, pa bizin imit seki mal me imit seki bien. Dimounn ki fer dibien li avek Bondie; dimounn ki fer lemal li pa konn Bondie. Tou dimounn ti koz bon koze lor Demetreyis. Laverite osi ti rann temwaniaz dan so faver. Nou osi, nou temwagn dan so faver, e to kone ki sa temwaniaz-la li vre. Mo ena boukou kiksoz ankor pou ekrir twa, me mo prefer pa fer li avek plim ek lank. Mo espere trouv twa biento e nou ava koze fasafas. Ki lape res avek twa. Bann kamarad fer twa konpliman. Fer salam bann kamarad laba enn par enn. Zid, serviter Zezi Kris ek so frer Zak, pe ekrir sa let-la tou bann dimounn ki finn apele par Bondie e ki viv dan lamour Bondie Papa ek anba proteksion Zezi Kris. Ki zot resevwar boukou mizerikord, lape ek lamour. Mo bann kamarad, mo ti pe fer tou pou ekrir zot lor size ladelivrans ki nou ena an-komin, me mo finn trouv li neseser pou adres zot sa let-la, pou ankouraz zot pou lite dan lafwa ki Bondie finn donn so pep sin. Ofet ena sertin dimounn malonet ki finn infiltre parmi zot. Zot finn abiz bonte Bondie pou zistifie zot aksion imoral e zot finn osi rezet Zezi Kris nou sel Met ek Segner. Depi lontan Lekritir finn anons sa kondanasion ki pe ariv zot la. Mem si zot konn tousala, mo anvi rapel zot kouma Lesegner finn sov so pep depi later Lezip enn fwa pourtou, me pli tar li ti detrir bann ki pa ti krwar. Zot rapel bann anz ki pa ti gard zot pozision, zot ti kit zot lakaz, e zot finn res touletan ansene dan prizon teneb ziska gran zour zizman Bondie. Zot rapel Sodom ek Gomor ek lezot lavil dan lezanviron; kot bann abitan ti pe amenn enn lavi dezord e zot ti pe swiv zot prop dezir imoral. Sa se enn lexanp ki zot touletan anba pinision. Dan mem fason, sa bann dimounn ki fer vizion la, zot sali zot lekor, rezet lotorite ek insilte bann kreatir ki viv dan laglwar eternel Bondie. Mem larkanz Mikael, letan li ti pe lager avek diab pou gagn lekor Moiz, li pa ti oze kondann e insilte diab; me li ti zis kapav dir: “Ki Bondie pini twa!” Me sa bann dimounn-la denigre seki zot pa konpran, e sa bann kiksoz ki zot kone par linstin, kouma bann zanimo sovaz, samem ki fini zot. Maler lor zot parski zot finn swiv sime Kain. Akoz larzan, zot finn egare kouma Balam e zot finn mor dan zot revolt kouma rebelion Kore. Zot prezans li enn skandal dan zot bann repa fraternel, kot zot fer fet san okenn laont e zot nek okip zotmem. Zot parey bann niaz ki pena lapli e ki divan pe pouse. Zot parey bann zarb ki mem dan lotonn pa donn fri, enn fwa derasinn zot, zot mor pou touletan. Zot parey bann vag feros lamer, so lekim pe kras zot bann aksion laont. Zot parey bann zetwal ki Bondie finn rezerv enn plas pou touzour dan lanwit. Enok, setiem desandan Adam ti profetize, li ti dir: “Gete, Lesegner pe vini avek dis mil anz, pou exekit zizman lor tou dimounn, pou kondann zot pou zot move aksion ek bann zafer terib ki bann peser finn dir kont li.” Sa bann dimounn-la, zot touletan plengne, zot pa kontan zot sor; zot swiv zot prop dezir; zot dir bann parol ranpli ar lorgey e zot flat dimounn par intere. Me zot, mo bann kamarad, rapel bien predikasion bann zapot Zezi Kris nou Segner. Bann-la finn dir zot: “Dan bann dernie letan, pou ena bann dimounn ki pou mok zot e pou swiv zot move dezir” Samem bann dimounn ki fer divizion. Zot swiv zot linstin natirel, zot pena Lespri Sin. Me zot, mo bann kamarad, zot bizin kontigne ed zot kamarad pou konstrir lor mesaz ki Bondie finn donn zot. Zot bizin priye avek led Lespri Sin; gard zot touzour dan lamour Bondie; atann nou Segner Zezi Kris ki pou donn zot lavi eternel. Pran pitie pou bann ki ezite. Sov zot, tir zot dan dife; pitie lezot me fer atansion, evit tou kontak avek mem zot linz tase par zot move dezir. Pou Sa Enn ki anpes zot tonbe e fer zot tenir san okenn fot dan prezans so laglwar avek rezwisans, pou sel Bondie ek Sover, atraver Zezi Kris nou Segner, laglwar, mazeste, pwisans ek lotorite aster-la e pou touzour. Amen. Revelasion Zezi Kris, ki Bondie finn done pou montre so bann serviter seki pou arive biento. Pou fer konn so mesaz, li finn avoy so anz kot so serviter Zan. Zan pou temwagn lor tou seki li finn trouve konsernan parol Bondie ek temwaniaz Zezi Kris. Bienere dimounn ki lir, e bienere bann ki tann parol profesi, e ki gard seki finn ekrir isi; parski letan ki finn fixe pou sa bann kitsoz-la pre pou arive. Ala mesaz ki Zan pe avoy set Legliz dan provins Lazi: Lagras ek lape Bondie ki existe, ki ti existe e ki pou vini; mesaz sorti osi kot sa set lespri devan tronn, e kot Zezi Kris, temwin fidel, premie-ne parmi bann mor e dirizan bann lerwa lor later. Zezi Kris kontan nou, par so lamor li finn tir nou dan nou pese. Li finn fer nou vinn enn rwayom pret pou servi Bondie Papa. Laglwar ek pwisans pou Zezi Kris pou touzour. Amen. Gete, li pe vini dan niaz! Tou dimounn pou trouv li, mem bann ki ti transpers li. Tou bann pep lor later pou rakonte. Wi koumsa mem sa pou ete. Amen. “Mo mem Alfa ek Omega,” deklar Lesegner Bondie ki existe, ki ti existe e ki pou vini. Mwa, zot frer Zan, ansam ar Zezi mo partaz zot soufrans e rwayote, pasians ek landirans. Mo retrouv mwa lor lil Patmos akoz parol Bondie ek temwaniaz Zezi. Zour Lesegner, Lespri Sin finn sezi mwa e mo finn tann enn lavwa for deryer mwa ki rezone kouma enn tronpet; Li ti pe dir, “Ekrir dan enn liv seki to pe trouve e avoy liv-la kot sa set Legliz dan Efez, Smirn, Pergam, Tiatir, Sard, Filadelfi ek Laodise.” Mo retourne pou gete kisann-la pe koz ar mwa. Lerla mo trouv set sandelie dore. Omilie zot ti ena enn kreatir resanble enn zom ki ti finn met enn long rob ziska so lipie ek enn sang an-or dan so lerin. So latet ek so seve ti blan parey kouma lalenn blan, parey kouma lanez e so lizie parey kouma enn boul dife; so lipie ti pe briye parey kouma bronz bien poli dan four e so lavwa ti rezone parey kouma son dilo kaskad. Li ti pe tini set zetwal dan so lame drwat, e enn lepe ki koup de kote e ki bien fite ti sorti dan so labous. So figir ti briye parey kouma soley midi. Ler mo trouv li, mo tonbe kouma enn dimounn mor e mo prostern devan li parey. Me li ti poz so lame drwat lor mwa e li ti dir, “Pa per twa! Momem premie ek dernie, momem lasours lavi, mo ti finn mor, aster-la gete, mo vivan pou leternite; e mo ena pouvwar lor lamor e mo posed lakle laport Ades. Aster-la ekrir seki to finn trouve, seki pe pase aster-la e seki pou arive apre. Ala sinifikasion mister sa set zetwal ek set sandelie an-or ki zot ti trouve dan mo lame drwat. Sa set zetwal-la reprezant bann anz, e sa set lalanp-la reprezant set Legliz.” Let ki finn ekrir pou anz Legliz dan Efez: “Ala deklarasion sa-enn ki tini set zetwal dan so lame drwat e ki mars omilie set lalanp an-or. Mo konn tou seki to finn fer, mo konn to lapenn, to pasians ek landirans. Mo kone ki to pa siport bann move dimounn. To finn teste bann ki deklar zot zapot e to finn dekouver ki zot bann manter. To ena boukou pasians, to finn soufer akoz mwa e to pa finn dekouraze. Ala seki mo ena kont twa: to nepli kontan mwa parey kouma dan koumansman. Rapel bien kot to finn sorti pou tom la, sanz to konportman e azir parey kouma to ti abitie fer dan koumansman. Si to pa sanz twa, mo pou vinn tir to sandelie dan so plas. Pourtan to ena kitsoz bon dan twa. Parey kouma mwa, to deteste konportman bann Nikolait. Seki ena zorey, ekout bien seki Lespri ena pou dir bann Legliz! Mo pou akord bann ki finn ranport laviktwar drwa pou manz fri zarb lavi ki trouv dan zardin Bondie.” Let ki finn ekrir pou anz dan Legliz Smirn: “Sa-enn ki premie ek dernie ki ti finn mor e ki finn resisite la deklare: Mo konn to leprev ek to lamizer, me an realite to ris! Mo konn bann dimal ki zot dir lor twa. Zot fer krwar, zot Zwif, me pa ditou, zot plito enn sinagog Satan. Pa per si zot pou bizin soufer. Diab pou bon tant zot e pou met plizir parmi zot dan prizon pou dis zour. Res touzour fidel ziska lamor e mo pou rekonpans zot. Si zot ena zorey ekout seki Lespri ena pou dir bann Legliz. Seki ranport laviktwar lor diab pa pou konn deziem lamor.” Let ki finn ekrir pou anz dan Legliz Pergam: “Sa-enn ki ena lepe ki koup de kote la deklare: Mo kone kot to reste; la akot tronn Satan ete. Me to finn tini ferm ar mwa e to pa finn renie to lafwa, mem dan letan Antipas mo temwin fidel ki ti trouv lamor kot zot, la akot Satan reste. Me mo ena enn ti repros pou fer twa: to ena kot twa enn bann dimounn ki ankor atase ar doktrinn Balam ki ti insit Balak pou met enn piez pou blok bann Izraelit. Li ti pous zot pou manz laviann ki finn ofer kouma sakrifis pou bann idol e pou fer prostitision. Kot twa osi ena ki ankor atase avek lansegnman bann Nikolait. Alor sanz to lavi sinon mo pou desann kot twa pou konbat zot avek lepe mo labous. Si zot ena zorey, ekout seki Lespri ena pou dir bann Legliz! Seki gagn laviktwar, mo pou donn li lamann ki dan sekre. Mo pou donn li enn ros blan avek enn nouvo nom ekrir lor la. Personn pa konn sa nouvo nom-la, exsepte sa dimounn ki resevwar li la.” Let ki finn ekrir pou anz dan Legliz Tiatir: “Ala seki garson Bondie ki ena lizie kouma enn laflam dife ek lipie parey kouma bronz ki finn bien poli deklare. Mo konn tou to travay, to lamour, to lafwa, to servis ek to landirans. Mo kone ki to ankor pli aktif ki avan. Me mo ena enn repros pou fer twa. To toler Zezabel ki apel limem enn profet, ki pe ansegne e ki pe detourn mo bann serviter pou pratik imoralite ek manz manze ki finn ofer kouma sakrifis pou bann idol. Mo ti donn li letan pou repanti, me li ti refize e kontign prostitie li. Fer atansion, mo pou zet li lor enn lili douler e so bann partner osi, mo pou tret zot parey si zot pa sanz zot konportman. Mo pou touy to bann zanfan. Tou bann Legliz pou kone ki momem ki konn bann panse ek lespri tou dimounn. Mo pou tret sakenn dapre seki zot merite. Me pou leres dimounn dan Tiatir ki pa finn atas zot ar sa bann fos doktrinn-la, e ki pa finn aprann swadizan profonder lansegnman Satan, mo dir sa bann dimounn-la ki mo pa pou met lor zot okenn lezot fardo, me seki zot ena gard li bien ziska mo vini. Dimounn ki gagn laviktwar e ki fer mo volonte ziska lafin, mo pou donn li pouvwar lor tou bann nasion. Li pou diriz zot avek enn baton lasie; li pou kas zot parey kouma enn po later. Parey kouma mo finn resevwar pouvwar ek mo Papa, mo pou donn li zetwal ki leve avan lizour. Dimounn ki ena zorey, ekoute pou tande seki Lespri ena pou dir bann Legliz.” Let ki finn ekrir pou anz dan Legliz Sard: “Sa-enn ki ena set lespri Bondie ek set zetwal la deklare: Mo konn to travay, mo kone ki to ena repitasion enn bon vivan, ler gete to enn mor. Revey twa, ranforsi seki to ankor ena avan ki li mor konpletman. Parski mo finn remarke ki okenn to bann aksion pa korek dan lizie Bondie. Rapel bien lansegnman ki to finn resevwar e fason ki to finn tann li. Res touzour fidel ar Bondie e sanz to konportman. Si to pa revey twa, mo pou vinn may twa par sirpriz kouma enn voler dan lanwit san ki to kone ki ler. Ena de-trwa parmi zot dan Sard ki pa finn sali zot linz. Zot pou akonpagn mwa abiye an blan parski zot finn montre zot dign. Tou bann ki pou gagn laviktwar pou met linz blan; mo pa pou efas zot nom dan liv lavi. Mo pou rekonet zot devan mo papa ek so bann anz. Si zot ena zorey, ekout bien seki Lespri ena pou dir bann Legliz.” Let ki finn ekrir pou anz dan Legliz Filadelfi: “Sa-enn ki sin ek vre, ki ena lakle David, li ouver e personn pa kapav ferme, li ferme e personn pa kapav ouver: Mo konn to travay. Ala mo finn ouver enn laport pou twa ki personn pa kapav ferme. Mo kone ki to ena enn tigit lafors, pourtan, to finn res fidel ar mo parol e to pa finn renie mwa. Ala seki mo pou fer avek sa bann dimounn dan lasanble Satan la, sa bann manter ki pretann zot Zwif kan zot pa sa ditou. Mo pou fors zot pou vinn azenou devan twa pou onor twa. Zot pou rekonet ki mo kontan twa. Parski to finn res fidel ar mo parol, mwa osi mo pou protez twa kont maler ki pou tap lemond antie e ki pou teste bann abitan later. Mo pe vini biento. Tini ferm avek seki to ena pou ki to pa perdi to kouronn. Dimounn ki gagn laviktwar, mo pou fer li vinn enn kolonn dan Tanp mo Bondie e zame li pa pou kapav kit Tanp-la. Mo pou ekrir lor li nom mo Bondie, nom lavil Bondie, nouvo Zerizalem ki desann depi kot Bondie dan lesiel ek mo nouvo nom. Seki ena zorey, ekout bien seki Lespri ena pou dir bann Legliz.” Let ki finn ekrir pou anz dan Legliz Laodise: “Ala parol Amen, vre temwin fidel ki lasours kreasion Bondie: Mo konn to travay. Mo kone ki to pa ni fre ni so. Swazire: swa fre, swa so. Parski to tied, to pa fre, ni so, mo pou kras twa andeor mo labous. To dir, ‘Mo ris, mo pe prospere, mo pa bizin nanye.’ An verite to pa kone ki to dan lamizer, malere, pov, aveg ek touni. Alor mo konsey twa aste lor ar mwa, lor ki finn rafine dan dife, pou ki to kapav vinn ris. To kapav osi aste linz blan pou kouver twa; to nepli pou ena laont akoz to touni. Aste osi enn remed pou to lizie, to pou trouv kler. Mo koriz e reprimann tou dimounn ki mo kontan, me twa, montre boukou zel e sanz to konportman. Ekoute, mo devan laport, mo pe tape, si kikenn tann mo lavwa e ouver laport, mo pou rant kot li e manz avek li, e li pou manz avek mwa. Dimounn ki gagn laviktwar, mo pou permet li asiz lor mo tronn parey kouma mwa osi, apre ki mo ti gagn laviktwar, mo ti asiz avek mo papa lor so tronn. Dimounn ki ena zorey, ekout seki Lespri ena pou dir bann Legliz.” Apre mo fer enn lot vizion. Mo trouv enn laport ouver dan lesiel. Premie lavwa ki mo ti tande la koz ar mwa kouma enn tronpet; li dir, “Monte, vinn isi, mo pou montre twa seki pou arive apre sa.” Lespri ti sezi mwa anplas, e mo trouv enn tronn dan lesiel avek enn kikenn asize lor la. Li ti briye parey kouma bann pier presie, kwartz ek agat; e so lalimier ti for kouma enn larkansiel emrod otour tronn-la. Otour tronn-la ena vennkat tronn avek vennkat ansien ki asize lor la. Zot ti finn abiye an blan e zot ti ena enn kouronn an-or lor zot latet. Ti ena zekler, enn pake tapaz, kout toner e devan tronn-la set flanbo ti pe brile; samem set lespri Bondie. Devan tronn-la ti ena koumadir enn lamer transparan parey kouma kristal. Omilie ek otour tronn-la ti ena kat kreatir vivan avek boukou lizie devan ek deryer. Premie kreatir-la parey kouma enn lion, deziem-la parey kouma enn toro, trwaziem-la avek enn figir zom ek katriem-la parey kouma enn leg volan. Sakenn sa kat kreatir vivan la ti ena sis lezel ranpli ar lizie andan ek otour li. Lanwit lizour, zot zame aret sante: “Sin, sin, sin limem Lesegner Bondie Toupwisan ki ti existe, ankor pe existe ek ki pe vini.” Sak fwa ki bann kreatir vivan la selebre laglwar ek loner e remersi Sa-Enn ki asiz lor tronn e ki viv pou touletan la, Sa vennkat ansien-la prostern devan li, zot ador li e zot zet zot kouronn devan li, zot sante: “Segner Bondie, to merit resevwar laglwar, ek loner ek pwisans parski tomem ki finn kree tou kitsoz, to ti anvi ki zot existe alor zot finn vinn realite.” Dan lame drwat Sa-Enn ki ti pe asiz lor tronn-la, mo ti trouv enn liv dan form enn roulo. Ti finn ekrir de kote lor li e li ti ferme avek set sele. Mo ti trouv enn anz pwisan ki ti proklame avek enn lavwa for, “Kisann-la ki kapav kas sa bann sele-la e ouver liv-la?” Me personn dan lesiel ni lor later ou anba later pena pouvwar pou ouver liv-la pou gete ki ena ladan. E mo finn bien plore parski personn pa ti dign pou ouver liv-la pou get ladan. Lerla enn parmi bann ansien ti dir mwa, “Pa plore! Ala lion tribi Zida, desandan David ki finn ranport laviktwar; li kapav kas sa set sele-la, e ouver liv-la.” Lerla mo trouv enn Agno pe deboute ant tronn ek kat kreatir vivan la. Li ti parmi bann ansien, koumadir finn sakrifie li. Li ti ena set korn ek set lizie, ki ti set lespri Bondie ki ti finn anvwaye partou lor later. Li ti ale e ti pran roulo ki ti dan lame sa dimounn ki ti pe asiz lor tronn la. Ler li fini resevwar roulo-la, sa kat kreatir vivan la ek sa vennkat ansien-la prostern devan Agno-la; sakenn ti ena enn laarp ek enn bann koup dore ranpli ar parfin ki ti reprezant lapriyer bann krwayan. Zot sant enn nouvo kantik: “To merit pran liv-la e kas so bann sele parski zot finn touy twa, e avek to disan, to finn raste pou Bondie, dimounn toutsort tribi, langaz, pei ek nasion. To finn fer zot vinn enn rwayom ek enn bann pret pou Bondie, e zot pou regne lor later.” Mo ti get ankor e mo ti tann lavwa enn kantite anz otour tronn e otour bann kreatir vivan ek bann ansien. Zot ti la par milie e par milion. Zot ti pe dir bien for. “Agno imole, to dign pou resevwar pouvwar, rises, lasazes ek lafors, loner, laglwar ek louanz!” Mo tann osi bann kreatir dan lesiel ek lor later, anba later ek dan lamer, kreatir liniver antie pe sante: “Pou Sa-Enn ki pe asiz lor tronn e pou Agno louanz, loner, laglwar, ek pwisans, pou touzour ek touzour!” Sa kat kreatir vivan la ti dir, “Amen!” Lerla bann ansien tom azenou pou adore. Lerla mo ti trouv Agno ouver enn sa set sele-la, e mo tann enn parmi sa kat kreatir vivan la kriye ar lavwa loraz, “Vini”. Mo gete e mo trouv enn seval blan. Dimounn ki ti pe mont li la, ti ena enn ark; zot ti donn li enn kouronn; lerla li ti ale kouma enn vinker pou gagn ankor laviktwar. Ler li ouver deziem sele, mo tann deziem kreatir vivan la kriye, “Vini!” Lerla enn lot seval rouz vif sorti; dimounn ki ti pe mont li la, ti gagn permision pou fer retir lape lor later, koumsa dimounn pou masakre zot kamarad. Zot ti donn li enn gran lepe. Ler li ti ouver trwaziem sele, mo tann trwaziem kreatir vivan kriye, “Vini!” Mo gete e mo trouv enn seval nwar; dimounn ki ti mont li la ena enn balans dan so lame. Mo tann koumadir enn lavwa sorti kot sa kat kreatir vivan la; li ti dir, “Enn mezir dible pou enn denie e trwa mezir lorz pou enn denie, me delwil ek divin, pa touse.” Ler li ouver katriem sele, mo tann katriem kreatir vivan la kriye, “Vini!” Mo gete e mo trouv enn seval ver pal. Dimounn ki ti pe mont li la apel Lamor, e Ades ti pe swiv li. Ti donn zot lotorite lor enn kar later, pou touy avek lepe, lafaminn, lepidemi e par bann zanimo sovaz. Ler li ti ouver sinkiem sele, mo trouv anba lotel, nam bann ki ti finn masakre akoz parol Bondie ek temwaniaz ki zot ti finn done. Zot ti kriye bien for, “Segner tomem Met ki sin ek veritab. Komie letan li pou pran pou ziz bann abitan later e pran to revanz pou nou disan ki finn verse?” Alor sakenn ti gagn enn rob blan e ti dimann zot pou pran ankor pasians ziska ki konplet lalis zot bann kamarad serviter ki pou perdi lavi kouma zot. Ler li ti ouver siziem sele, mo gete e ti ena enn gran tranbleman-de-ter; soley ti vinn nwar koumadir linz dey, e laplenn linn ti vinn kouma disan. Zetwal dan lesiel tom lor later parey kouma fri fig ver, ki finn gagn bate dan tanpet. Lesiel disparet tigit-tigit kouma enn tapi ki pe anroule; tou bann montagn ek bann zil ti deplase depi kot zot ti ete. Bann lerwa later, bann dimounn inportan, bann zeneral, bann ris, bann pwisan, tou dimounn, esklav ek dimounn lib, kasiet dan bann kavern ek dan lagrot lor montagn. Zot dir ar montagn ek ros, “Tom lor nou, kasiet nou lwin ar sa dimounn ki pe asiz lor tronn-la, e lwin ar lakoler Agno. Parski gran zour zot koler finn arive, e kisann-la pou kapav reziste?” Apre sa, mo trouv kat anz pe debout dan kat kwin later, zot pe bar bann kat divan pou ki okenn parmi zot pa soufle lor later, lor lamer oubien kont okenn zarb. Mo trouv enn lot anz monte, sorti kote soley leve. Li ti ena sele Bondie vivan e li ti kriy bien for ver sa kat anz ki ti finn resevwar pouvwar pou detrir later ek lamer la. Li ti dir: “Pa bizin detrir ni later, ni lamer ou bann zarb, ziska nou fini mark bann serviter Bondie avek enn sele lor zot fron.” E mo tann ki kantite bann ki ti finn resevwar sele ti ete: ti ena san karann-kat mil parmi tou bann tribi pep Izrael. 12,000 ti sorti dan tribi Zida, 12,000 dan tribi Riben, 12,000 dan tribi Gad, 12,000 dan tribi Aser, 12,000 dan tribi Neftali, 12000 dan tribi Manase, 12,000 dan tribi Simeon, 12,000 dan tribi Levi, 12,000 dan tribi Isakar, 12,000 dan tribi Zabilon, 12,000 dan tribi Zozef ek 12,000 dan tribi Benzamin. Apre sa, mo gete e mo trouv enn gran lafoul ki personn pa kapav konte. Tousala ti bann dimounn ki ti sorti dan tou nasion, tribi, pep ek langaz e zot ti pe debout devan tronn ek devan Agno dan zot rob blan avek enn brans palmis dan zot lame. Zot kriye bien for, “Zis Bondie ek Agno ki donn liberasion, zot ki pe asiz lor tronn.” E tou bann anz ki ti rasanble otour tronn, otour bann ansien ek sa kat kreatir vivan la, zot tom azenou devan tronn, zot figir kont later, e zot ador Bondie. Zot dir, “Amen! Louanz, laglwar, lasazes, rekonesans, loner, pwisans ek lafors pou Bondie pou touzour ek touzour, Amen” Apre sa, enn parmi bann ansien adres mwa laparol, li dir, “Ki sann-la sa bann dimounn ki finn abiy an blan la, e kot zot sorti?” Mo dir li, “Mo Segner, tomem ki kone.” Lerla li dir mwa, “Sa bann-la, zot finn travers dan enn gran persekision, zot finn lav zot rob e finn fer zot vinn blan dan disan Agno. Akoz samem zot devan tronn Bondie e zot pe ador li lanwit-lizour dan so Tanp. Sa-Enn ki pe asiz lor tronn-la pou protez zot. Zame zot pa pou gagn fin ou swaf ankor. Soley pa pou tap for lor zot e so bann reyon pa pou bril zot. Parski Agno ki la omilie tronn, li pou zot berze e li pou gid zot kot lasours delo lavi e Bondie pou souy tou larm dan zot lizie.” Letan Agno ouver setiem sele, ti ena silans dan lesiel pou apepre enn demi-er. E mo trouv set anz pe dibout devan Bondie, e finn donn zot set tronpet. Enn lot anz avek enn lansanswar an-or ti vinn dibout devan lotel; zot ti donn li enn bon kantite lansan pou li ofer ansam avek lapriyer tou bann pep Bondie lor lotel an-or divan tronn. Lafime lansan ki sorti depi lame anz-la, ti monte devan Bondie ansam ar lapriyer pep Bondie. Apre anz-la pran lansanswar, li ranpli li ar dife ki sorti lor lotel e li avoy sa lor later; e ti ena kout toner, loraz, zekler ek tranbleman-de-ter. Sa set anz avek zot tronpet-la, prepar zot pou soufle. Premie anz-la ti soufle so tronpet, lerla lagrel ek dife melanze avek disan ti tom lor later. Enn tier lemond ti brile, enn tier bann zarb ti brile e enn tier lerb ver ti brile. Deziem anz-la soufle so tronpet. Enn zafer koumadir enn montagn dife ti tom dan lamer, e enn tier lamer vinn disan, enn tier bann kreatir vivan dan lamer mor, e enn tier bann bato ti detrir. Trwaziem anz-la soufle so tronpet e enn gro zetwal ti tom depi lesiel. Zetwal-la brile koumadir enn tors e li tom lor enn tier bann larivier ek lor lasours delo. Zetwal-la ti apel Absint. Enn tier delo ti vinn amer e boukou dimounn ti mor akoz delo-la ti telman amer. Katriem anz-la ti soufle so tronpet e enn tier soley, lalinn ek bann zetwal ti afekte. Zot ti vinn som e lanwit kouma lizour ti perdi enn tier so klarte. Apre sa mo gete e mo tann enn leg pe anvole bien ot dan lezer; li ti pe kriye avek enn lavwa for, “Maler, maler, maler pou zot, abitan later, letan sa trwa lezot anz-la pou soufle zot tronpet!” Alor, sinkiem anz-la ti soufle so tronpet; mo ti trouv enn zetwal sorti dan lesiel tom lor later. Zot ti donn anz-la lakle pwi-san-fon. Zetwal-la ti ouver pwi-san-fon e enn lafime parey kouma lafime enn gran fourno ti sorti ladan. Soley ek latmosfer ti vinn nwar avek sa lafime-la. Enn kantite sotrel ti sorti dan lafime-la e vinn lor later; zot ti gagn pouvwar parey kouma pouvwar bann skorpion lor later. Finn dir zot pa detrir bann lerb ni okenn verdir ou zarb lor later. Zot ena drwa detrir zis bann dimounn ki pena sele Bondie lor zot fron. Zot ena drwa tortir zot pandan sink mwa, me pa touy zot. Douler sa tortir-la li parey kouma douler kan enn skorpion pik enn dimounn. E dan sa lepok-la dimounn ti pou rod lamor me pa pou trouv li; zot pou swete mor, me lamor pou refiz koste. Bann sotrel ti parey kouma bann seval bien ekipe pou konba; lor zot latet ti ena koumadir dis kouronn an-or e zot figir ti parey kouma figir dimounn. Zot seve parey kouma seve bann madam, e zot ledan parey kouma ledan bann lion; e zot ti ena enn lakok lasie kouma enn kwiras lor zot e son zot lezel parey kouma saryo ki ti pe tire par seval ki ti pe al dan lager. Zot ti ena lake avek pikir kouma bann skorpion. Zot pouvwar pou bles dimounn pandan sink mwa ti trouv dan zot lake. Kouma lerwa, zot ti ena enn anz destrikter; an Ebre ti apel zot Abadon e an Grek Apolyon. Premie maler ti pase. Ena ankor de lezot pou vini. Apre, siziem anz-la soufle so tronpet. Lerla mo tann enn lavwa sorti dan kat kwin lotel an-or ki devan Bondie, li ti dir sa siziem anz ki ti ena tronpet-la, “Larg sa kat anz ki ti ansene kot larivier Efrat la.” Alor, kat anz-la finn libere. Zot ti finn fini pare pou ler, zour, mwa ek lane pou touy enn tier limanite. Mo tann dir ti ena de san milion solda avek zot seval. Ala kouma mo ti trouv zot dan mo vizion: bann solda ti met kwiras kouler dife, ble safir ek zonn souf; latet bann seval-la parey kouma latet lion e dan zot lagel dife, lafime ek souf ti pe sorti. Enn tier limanite ti mor avek sa trwa fleo-la: dife, lafime ek souf ki sorti dan lagel bann seval. Pouvwar bann seval-la sorti dan zot lagel ek dan zot lake; zot lake parey kouma serpan, zot ti ena latet ki zot ti servi pou bles lezot. Sa parti limanite ki ti reste la, zot pa ti mor par sa bann fleo-la; zot pa ti repanti e regret bann travay ki zot ti pe fer ar zot laenn e zot ti kontigne ador diab ek bann idol an-or, an-arzan, an-bronz, an-ros ek an-dibwa ki pa kapav ni trouve, ni tande, ni marse. Sa bann zans-la pa ti repanti pou zot bann krim, mazik, pou zot bann aksion imoral ek zot bann vol. E mo trouv enn anz bien pwisan sorti dan lesiel vini, anvlope dan niaz, avek enn larkansiel lor so latet; so figir kouma soley, so lipie kouma de kolonn dife. Li pe tini enn ti liv ouver dan so lame. Li poz so lipie drwat lor lamer ek so lipie gos lor later, li kriye bien for kouma enn lion. Letan li kriye, sa set loraz-la ti fer tapaz. E ler sa set loraz-la ti fini fer tapaz, mo ti prepare pou ekrir, me mo ti tann enn lavwa sorti depi lesiel ki ti dir, “Gard mesaz set loraz sekre, pa ekrir nanye.” Anz, ki mo ti trouv pe dibout lor lamer ek later la, lev so lame drwat anler ver lesiel e li fer enn serman lor nom Bondie vivan pou touzour, ki finn kree lesiel ek tou seki ladan, later ek tou seki ladan, ek lamer ek tou seki ladan: “Pa pou ena okenn retar ankor. Me ler setiem anz pou soufle so tronpet, mister Bondie pou akonpli kouma li ti anonse par so bann serviter profet.” Apre, sa lavwa ki mo ti tande sorti dan lesiel la, ti koz ar mwa ankor, li ti dir, “Al pran sa liv ouver ki dan lame anz ki pe dibout lor lamer ek later la.” Alor mo ti al kot anz-la, mo ti dir li donn mwa ti liv-la; lerla li ti dir mwa, “Pran li, manze; pou to lestoma li pou amer, me dan to labous li pou dou kouma dimiel.” Mo ti pran ti liv-la dan lame anz-la e mo ti manz li; li ti dou kouma dimiel dan mo labous, me ler mo ti fini manz li, mo lestoma ti brile. Lerla ti dir mwa, “To pou bizin profetiz ankor ar boukou bann lepep ek nasion, langaz ek lerwa.” Apre sa, ti donn mwa enn baton ki servi pou mizire e ti dimann mwa, “Al mizir Tanp Bondie e so lotel. Kont osi bann ki pe ador Bondie laba. Me pa bizin mizir lakour andeor Tanp; kit sa parti-la parski finn donn li bann nasion ki pou kraz sa lavil sin-la pandan karann-de-z-an. E mo pou otoriz mo de temwin abiye dan linz dey, pou profetize pandan mil de-san swasant zour.” Zotmem sa de pie zoliv ek sa de lanpader ki ti devan Lesegner later la. Si kikenn anvi fer zot ditor, dife pou sorti dan zot labous e devor zot lennmi; koumsa mem tou seki anvi fer zot ditor pou mor. Zot ena lotorite pou ferm lesiel, pou anpes lapli tonbe osi lontan ki zot pe transmet mesaz Bondie; zot ena lotorite pou sanz dilo, fer li vinn disan, e pou atak later avek toutsort kalite fleo, kan e ler zot anvi. Me kan zot fini zot temwaniaz, bebet ki sorti dan pwi-san-fon pou atak zot ek touy zot. Zot lekor mor pou res lor laplas santral sa gran lavil ki sinbolikman apel Sodom ek Lezip, akot ti krisifie zot Segner. Dimounn sorti dan boukou pei, kot boukou nasion, tribi ek langaz pou get sa bann lekor mor la pandan trwa zour edmi e pou refiz met zot dan tom. Tou dimounn lor later pou kontan, zot pou selebre e zot pou avoy zot kamarad kado, akoz lamor sa de profet ki ti finn tourmant zot la. Me apre sa trwa zour edmi-la, sa de profet-la tann enn lavwa for sorti dan lesiel: “Mont isi!” Zot mont dan lesiel dan enn niaz letan ki zot lennmi obzerv zot ale. Anmemtan ti ena enn gran tranbleman-de-ter, e enn diziem lavil ti kraze net; set mil dimounn ti mor dan tranbleman-de-ter-la. Bann sirvivan ti terifie e zot ti pe glorifie Bondie lesiel. Deziem maler ti finn pase, me fer atansion! Trwaziem maler pe vini biento. Lerla setiem anz soufle so tronpet, e ti ena bann lavwa bien for dan lesiel ki ti dir, “Aster-la rwayom lemond finn rant anba pouvwar Bondie nou Segner ek so Mesi. Li pou regne pou touzour.” Lerla sa vennkat ansien ki ti lor zot tronn devan Bondie la, tom ater devan li, figir kont later e zot ador li. Zot dir, “Nou rann twa gras Segner Bondie pli pwisan ki tou, twa ki existe e ki ti existe, parski to finn servi to gran pouvwar e koumans regne. Bann nasion ti araze, me aster-la to lakoler ki pe manifeste, enn moman zizman pou bann mor, enn moman rekonpans pou bann profet ki servi twa, pep ki konsakre pou twa, e tou bann ki respekte to nom, so gran kouma so tipti, e pou detrir bann ki detrir later.” Tanp Bondie dan lesiel ti ouver e kof lalians paret; lerla zekler eklate, loraz fer tapaz e ti ena tranbleman-de-ter ek gro-gro lagrel. Enn gran sign paret dan lesiel: enn fam ki ti abiye avek soley, lalinn anba so lipie, e lor so latet enn kouronn douz zetwal. Li ti ansint e pre pou akouse; dan so soufrans lakousman, li ti pe kriye. Lerla enn lot sign paret dan lesiel: enn gran dragon rouz, avek set latet ek dis korn, e set kouronn lor so bann latet. So lake ti balie enn tier bann zetwal dan lesiel e ti zet zot lor later. Lerla dragon-la dibout devan fam ki ti pe al akouse la, pou ki li kapav devor tibaba-la kouma li ne. Fam-la ti akous enn garson, enn ti-garson ki pou diriz bann nasion avek enn baton lasie. Me enn lafors ti pran zanfan-la, amenn li kot Bondie e kot so tronn. Fam-la ti sove al dan dezer kot Bondie ti prepar manze ek bwar pou li pandan mil de-san swasant zour. Alor, enn lager ti eklate dan lesiel; Misel ek so bann anz ti konbat kont dragon-la. Dragon-la ek so bann anz ti lite zot osi, me zot ti perdi lager, e pa ti ena plas pou zot ankor dan lesiel. Sa gro dragon-la ti perdi so plas. Sa vie serpan ki zot ti apel diab, ou Satan, sedikter lemond la, li avek so bann anz ti perdi zot plas dan lesiel. Lerla mo tann enn lavwa for dan lesiel ki dir, “Aster-la moman delivrans, pwisans regn Bondie, ek lotorite so Mesi finn arive. Akizater nou bann frer ek ser finn perdi plas, li ti pe akiz zot lanwit-lizour. Me zot, zot finn gagn batay par disan Agno Bondie e par parol zot temwaniaz, parski zot pa ti telman atase ar zot lavi pou zot refiz lamor. Alor lesiel bizin dan lazwa, ansam ek tou so bann abitan. Me maler pou later ek lamer, parski diab finn desann kot zot. Li bien-bien ankoler, parski li kone ki letan kourt!” Letan dragon-la konpran ki li ti finn tom lor later, li ti al lasas sa fam ki ti donn nesans enn ti-garson la. Me fam-la ti resevwar de lezel gran leg, e li ti kapav anvol dan dezer, lwin ar serpan, dan enn landrwa kot li ti pou gagn so manze-bwar pou trwa-z-an edmi. Alor serpan-la ti vomi koumadir enn larivier dilo deryer fam-la pou nway li. Me later ti sekour fam-la; li ti ouver so labous e aval tou dilo ki dragon-la ti vomi. Lerla dragon-la ti ankoler kont fam-la, e li ti al deklar lager avek leres so desandan, bann ki res fidel ar komannman Bondie ek ki res bann disip Zezi. Apre sa dragon-la ti al dan bor lamer. Lerla mo trouv enn bebet sorti dan lamer, li ena dis korn ek set latet; lor sak korn ti ena enn kouronn e lor bann latet-la ena enn bann nom ki insilte Bondie. Bebet-la ti resanble enn leopar, so lapat kouma lapat lours, e so lagel kouma lagel lion. Dragon ti donn li so pwisans ek so tronn avek enn gran lotorite. Enn so latet ti paret ena enn blesir mortel, me so ple ti geri. Later antie ti emerveye e ti swiv bebet-la. Zot ti ador dragon ki ti finn donn so lotorite sa bebet-la, e zot ti ador bebet-la e zot ti dir, “Kisann-la parey kouma sa bebet-la, e kapav lager kont li?” Bebet-la ti gagn lotorizasion servi labous ki pronons bann blasfem ek parol arogan. Li ti finn gagn pouvwar pou azir pandan karann-de mwa. Li ti ouver so lagel pou dir bann parol blasfem kont Bondie. Li ti insilte nom Bondie, so Tanp ek tou bann abitan lesiel. Li ti osi ena drwa fer lager ar lepep Bondie e gagn laviktwar lor zot. Li ti osi ena lotorite lor tou tribi, pep, langaz ek nasion. Tou bann abitan later pou ador li, bann abitan ki zot nom pa finn inskrir depi avan kreasion lemond dan liv lavi ki pou Agno ki finn sakrifie. Seki ena zorey pou tande, ekout bien. Si kikenn finn fer pou vinn prizonie, li pou al dan prizon; si kikenn finn fer pou mor avek lepe, li pou mor avek lepe. Ala enn lapel pou landirans ek lafwa pou lepep Bondie. Apre sa, mo trouv enn lot bebet ki sorti dan later; li ti ena de korn parey kouma enn agno e li ti koz parey kouma enn dragon. Li ti exers tou pouvwar sa premie bebet-la dan so prezans. Li ti fors later ek tou so bann abitan ador sa premie bebet ki so blesir ti finn geri la. Sa deziem bebet-la ti finn realiz gran-gran mirak; li ti mem fer dife sorti dan lesiel tom lor later devan tou dimounn. Li ti sedwir bann abitan later par pouvwar ki ti finn donn li pou fer mirak devan lot bebet-la. Li ti dimann bann abitan fer enn zimaz sa bebet ki ti finn blese ar lepe la, e ki ti ankor pe viv. Li ti gagn drwa pou anim zimaz bebet-la ziska fer li koze e fer li kapav touy tou bann ki pa ti ador li. Li ti obliz tou dimounn, ki li tipti ou gran, ris ou pov, lib ou esklav, pou resevwar enn mark, swa lor zot lame drwat swa lor zot fron. E personn pa ti kapav aste ou vande si li pa ti ena sa mark-la, nom bebet-la ou nimero so nom. La, bizin ena lasazes pou konpran nimero bebet-la, parski sif-la koresponn avek nom enn zom. Sis san swasann-sis. Apre sa mo gete e mo trouv Agno pe dibout lor montagn Sion. Avek li ti ena san karann-kat mil dimounn, e lor zot fron ti finn ekrir so nom ek nom so Papa. Lerla mo tann enn lavwa rezone dan lesiel kouma enn kaskad dilo ek son loraz. Lavwa-la resanble son bann mizisien ki ti pe zwe zot laarp. Zot ti pe sant enn kantik nouvo devan tronn e devan sa kat kreatir-la ek devan bann ansien. Personn pa ti kapav aprann sa kantik-la exsepte sa san karann-kat mil ki ti finn sove la. Sa bann-la, zot pa ti rann zot inpir ar bann fam; zot ti gard zotmem prop. Zot ti swiv Agno partou kot li ti ale. Zot ti sove parmi bann imin parey kouma bann premie fri Bondie ek Agno, e dan zot labous mansonz pa ti sorti; zot ti san defo. Apre mo ti trouv enn lot anz ki pe anvole bien ot. Li ti ena enn mesaz Bonn Nouvel eternel pou proklam ar tou bann ki vivan lor later ek tou bann nasion, tribi, langaz ek pep. Li ti dir avek enn lavwa bien for, “Soumet zot ar Bondie e donn li laglwar, letan zizman pe arive. Ador Kreater lesiel ek later, lamer ek lasours dilo dou.” Lerla enn deziem anz swiv premie-la e dir, “Li finn tonbe, li finn tonbe, gran Babilonn. Li ti fer tou dimounn bwar divin vis ek prostitision.” Apre sa, enn trwaziem anz swiv sa de premie-la e li kriye bien for, “Bann ki ador bebet ek so zimaz, e ki resevwar enn mark lor zot fron ou lor zot lame, zot osi pou bwar divin lakoler Bondie ki pou verse, san fer okenn melanz, dan koup lakoler Bondie. Zot pou tourmante avek dife ek souf dan prezans bann anz sin ek Agno. Lafime zot tourman mont lao pou touzour. Pena repo, ni lizour, ni lanwit pou bann ki ador bebet ek so zimaz e tou seki finn resevwar mark so nom.” Sa enn lapel pou lepep Bondie ena landirans, bann ki gard komannman Bondie e ki res fidel ar Zezi. Apre sa mo tann enn lavwa dan lesiel ki dir, “Ekrir sa: Beni bann ki aster-la finn mor dan linion ar Zezi Kris! Wi, ki zot repoze apre zot travay parski zot bann bon aksion swiv zot.” Mo get ankor, e mo trouv enn niaz blan. Lor niaz-la kikenn ti asize parey kouma enn imin. Li ena enn kouronn an-or lor so latet, ek enn fosi bien fite dan so lame. Enn lot anz ti sorti dan Tanp, li ti kriye ar seki ti pe asiz lor niaz-la avek enn lavwa bien for, “Servi to fosi, rekolte, ler lakoup finn arive. Parski tou bann prodwi later finn mir, sezon lakoup finn arive.” Alor seki ti asiz lor niaz-la pas so fosi e met karo plat. Enn lot anz sorti dan Tanp; li osi li ti ena enn fosi bien fite dan so lame. Lerla enn lot anz sorti lor lotel, limem ki ena lotorite lor dife; li kriye bien for ar seki ena enn fosi bien fite la, “Servi to fosi, rekolte tou bann grap rezin ki finn mir lor later.” Alor anz-la pas so fosi lor later e li ramas tou bann grap rezin, li zet zot dan gran preswar lakoler Bondie. Preswar-la ti andeor lavil, zot ti kraz rezin e ti ena disan ki ti koule. Disan-la ti inond partou, lor enn distans trwa san kilomet, ek enn oter ziska lamaswar bann seval. Apre sa, mo trouv enn lot gran sign etonan dan lesiel: set anz avek set fleo, zotmem dernie parmi bann dernie fleo. Ofet atraver zot, lakoler Bondie pou ariv so pwin final. E mo ti trouv koumadir enn lamer kristal melanze avek dife. Tou bann ki ti finn gagn laviktwar lor bebet-la, so zimaz ek nimero so nom, ti dibout dan bor lamer kristal avek dan zot lame enn bann laarp ki Bondie ti donn zot. E zot ti sant kantik Moiz, serviter Bondie ek kantik Agno: “Segner Bondie Toupwisan, to travay li gran, li enn mervey! Lerwa bann nasion, to sime li drwat, li vre! Segner, kisann-la pou oze mank twa respe, e refiz glorifie to nom? Parski to tousel ki sin, tou bann nasion pou vinn kot twa pou ador twa, parski to finn montre ki to ziz avek drwatir.” Apre sa, mo ti trouv Tanp kot ti ena tabernak temwaniaz ouver dan lesiel, e set anz avek set fleo la, sorti. Zot ti abiye dan enn rob an-lin bien blan avek bann sang otour zot lerin. Enn parmi sa kat kreatir vivan la donn sa set anz-la set koup an-or plin ar lakoler Bondie, ki viv pou touzour. Tanp ti ranpli ar lafime. Sa li enn sign laglwar ek pwisans Bondie. Personn pa ti kapav rant dan Tanp ziska ki travay sa set anz ek zot set fleo la fini. Apre sa, mo tann enn lavwa for sorti dan Tanp e ti pe dir sa set anz-la, “Al vers set koup lakoler Bondie lor later.” Premie anz ale e li vers so koup lor later. Lerla enn ilser malsin tom lor bann dimounn ki ti ena mark bebet ek ki ti ador so zimaz. Deziem anz ti vers so koup dan lamer e li ti vinn kouma disan dimounn mor e tou seki vivan dan lamer ti mor. Trwaziem anz ti vers so koup dan bann larivier ek lasours e zot ti vinn disan. Alor mo tann anz ki ena lotorite lor dilo la dir, “Twa ki exis, e ki ti existe, twa ki zis, twa ki sin, To finn touletan azir ar lazistis. Parski zot finn vers disan lepep Bondie ek profet, to finn donn zot disan pou bwar. Samem ki zot merite!” Apre sa, mo tann enn lavwa sorti kot lotel ki dir, “Wi, Segner Bondie Toupwisan, to bann zizman, zot vre ek zis.” Katriem anz vers so koup lor soley, e soley gagn permision pou bril dimounn par so saler dife. Dimounn ti pe brile par enn saler terib. Zot ti modi nom Bondie ki ena lotorite lor sa bann fleo-la, e zot pa ti sanz zot konportman pou glorifie Bondie. Sinkiem anz ti vers so koup lor tronn bebet-la, e marenwar ti anvayi so rwayom. Dan zot lagoni dimounn ti mord-mord zot lalang, e akoz zot douler ek bann ple, zot ti modi Bondie lesiel. Me zot pa ti aret zot move aksion. Siziem anz ti vers so koup lor sa gran larivier ki apel Lefrat la e larivier-la ti sek pou prepar pasaz bann lerwa ki sorti kot soley leve. Lerla mo trouv trwa move lespri koumadir krapo sorti dan lagel dragon, dan lagel bebet-la e dan labous fos profet. Sa ti bann lespri demon ki fer bann mirak. Zot al rod bann lerwa lemond antie, pou rasanble zot pou lager kan gran zour Bondie Toupwisan arive. Rapel seki Kris ti dir, “Ala, mo pe vini parey enn voler! Ere sa dimounn ki res eveye, so linz pare pou li mete, pou ki li pa mars touni, e gagn onte.” Zot rasanble zot dan enn landrwa ki apel Armagedon. Setiem anz vid so koup dan lezer e enn lavwa for sorti kot tronn ki dan Tanp. Li dir, “Tou finn fini!” Alor ti ena zekler, tapaz lavwa, loraz e enn gran tranbleman-de-ter telman violan ki zame sa pa finn arive depi kreasion bann imin lor later. Sa gran lavil-la ti divize an-trwa e bann lavil dan tou pei ti tom an-rwinn. Bondie ti rapel Gran Babilonn e ti donn li bwar koup divin so lakoler. Tou bann zil ti disparet e bann montagn ti fonn. Boul lagrel ki pez ziska san liv ti tom lor bann dimounn depi lesiel. Bann dimounn ti insilte Bondie akoz sa fleo lagrel-la ti vremem redoutab. Lerla enn parmi sa set anz ki ti ena set koup la, vinn kot mwa e dir, “Vini, mo pou montre twa pinision sa gran fam dezord ki res lor bor enn kantite larivier. Bann lerwa later finn fer prostitision ar li e tou bann abitan later finn soule avek divin so imoralite.” Avek led Lespri Sin, anz-la ti amenn mwa dan dezer. Laba mo trouv enn fam pe asiz lor enn bebet rouz avek set latet ek dis korn e li ti ena enn bann nom ki insilte Bondie. Fam-la ti abiy an mov ek rouz e li ti ena bann bizou an-or, bann pier presie ek perl lor li. Li ti pe tini enn koup an-or ranpli ar abominasion ek salte, prodwi so imoralite dan so lame. Lor so fron ti finn ekrir enn nom mister: “Gran Babilonn, mama bann prostitie ek bann abominasion lemond.” Mo trouve ki sa fam-la ti sou avek disan lepep Bondie ek disan bann temwin Zezi. Letan mo trouv li, mo ti etone. Me anz-la dir mwa, “Kifer to pe etone? Mo pou rakont twa mister sa fam-la e sa bebet set latet ek dis korn ki ti pe sarye li la. Bebet ki to ti trouve la, li ti existe me zordi li nepli la. Li pou remonte depi pwi-san-fon pou al ver so destriksion. Bann abitan later ki zot nom pa finn ekrir dan liv lavi depi kreasion lemond, pou etone kan zot pou trouv bebet-la, parski li ti existe, li nepli existe me li pou revini. La bizin ena lintelizans ek lasazes pou konpran. Sa set latet kot fam la ti pe asize la reprezant set montagn. Zot reprezant osi set lerwa. Sink ant zot finn tonbe, aster-la siziem-la ki pe regne e setiem-la pankor vini e ler li vini li pa pou res tro lontan. Bebet ki ti existe lontan la e ki nepli la, limem enn witiem lerwa, me li fer parti sa group set la, e li pa pou sape. Sa dis korn ki to finn trouve la, zot dis lerwa ki pankor resevwar enn rwayom, me zot pre pou gagn lotorite lerwa pou enn-er-tan ansam avek bebet-la. Tou sa bann lerwa-la ena enn sel lintansion: donn zot pouvwar ek zot lotorite sa bebet-la. Zot pou konbat kont Agno me Agno pou bat zot parski limem Segner tou bann segner ek Lerwa tou bann lerwa. Avek li, bann ki Bondie finn apele ek swazire, bann fidel, pou osi vinker.” Anz-la dir mwa, “Sa bann delo ki to trouve la, kot fam prostitie asize, samem bann pep, bann lafoul dimounn, bann nasion ek bann langaz. Sa dis korn ki to finn trouve, ansam avek bebet-la, zot pou ena laenn pou prostitie-la; zot pou pran tou seki li ena e met li touni, zot pou manz so laser e bril seki reste dan dife. Parski Bondie finn met dan zot leker proze pou realiz so plan. Zot pou met zot dakor pou sed zot pouvwar bebet-la ziska ki parol Bondie fini realize. Sa fam ki to ti trouve la, limem sa gran lavil ki diriz tou bann lerwa lor later la.” Apre sa, mo trouv enn lot anz sorti dan lesiel. Li ti ena enn gran lotorite e later ti eklere par so laglwar. Li kriye avek enn lavwa for, “Li finn tonbe, li finn tonbe, Gran Babilonn. Li finn vinn enn lakaz pou bann demon, enn nik pou bann move lespri, enn nik pou bann zwazo inpir, enn landrwa pou tou bann zanimo sal ek degoutan. Tou bann nasion finn bwar divin so imoralite. Tou bann lerwa later finn fer prostitision ar li e lor later, bann marsan finn vinn ris avek larises so move lavi.” Lerla mo tann enn lot lavwa sorti dan lesiel ki dir, “Kit sa lavil-la, mo pep, pou ki zot pa partisip dan so pese, e zot pa pou partaz bann fleo ki li pou sibir. Parski so pese finn anpile ziska lesiel, e Bondie finn rapel so bann aksion move. Tret li parey kouma li finn tret lezot, rann li de fwa seki li finn fer; Melanz enn labwason de fwa pli for pou li. Li finn gagn boukou laglwar e finn viv dan larises. Rann li otan soufrans ek dey! Li finn dir dan so leker ki limem larenn, li pa enn vev, e zame li pa pou konn soufrans dey. Akoz samem tou bann fleo ki finn rezerve pou li, pou tom lor li dan enn sel zour: maladi mortel, dey ek lafaminn, e dife pou detrir li. Wi Segner Bondie, li for e limem ki pou ziz li.” Alor bann lerwa lor later ki finn fer prostitision e viv dan larises avek li, pou plore ek fer dey letan zot pou trouv lavil-la brile. Zot pou dibout lwin apar, zot pou per bann tourman ki li pou sibir e zot pou dir: “Maler! Maler! Gran lavil Babilonn, lavil pwisan. Dan enn-er-tan to pou gagn to santans.” Bann marsan lor later ti plore e fer dey pou li, parski personn pa oule aste zot marsandiz: lor, larzan, pier presie, perl, latwal lin bien fin, letof rouz e pourp, laswa, tou sort kalite dibwa rar, lartik an-ivwar, dibwa presie, bronz, fer ou marb; kanel ek lezot zepis, lansan, lamir, divin, delwil-zoliv, lafarinn ek dible, bef ek mouton, seval ek kales, esklav ek prizonie. Bann marsan-la ti dir, “Bann fri ki to leker kontan finn disparet Tou seki ti larises ek bote pou twa finn fini perdi, e zame to pa pou retrouv tousala.” Bann marsan ki ti vinn ris ar sa komers-la pou bat karte parski zot per soufrans so tourman. Zot pou plore e fer dey; zot pou dir, “Maler! Maler! Sa gran lavil-la ti abiy ar lin bien rafine, enn letof pourp ek rouz, garni ar enn pake bizou an-or ek perl! Enn-er-tan ase pou detrir tou sa bann larises-la!” Tou bann pilot, kapitenn bato, tou dimounn ki ti pe vwayaz lor lamer, bann marin ek peser ti dibout bien lwin ar tousala. Ler zot trouv lafime lavil pe brile, zot ti kriye; “Zame pa pou ena enn lavil gran kouma sa lavil-la!” Lerla zot zet lapousier lor zot latet, zot plore “Maler, ki kalite maler lor sa gran lavil-la, so larises finn anrisi tou bann ki ena bato lor lamer, enn-er-tan ase pou fer disparet tousala. Lesiel, to bizin kontan seki pe arive! Zot osi, pep Bondie, bann zapot ek profet! Parski Bondie finn ziz li pou dimal ki li ti fer zot.” Apre sa, enn anz bien pwisan pran enn ros imans e li avoy li dan delo; li dir, “Ala kouma sa gran lavil Babilonn la pou sibir violans, e enn sel kou li pou disparet. Pa pou tann ankor lamizik bann zwer laarp, laflit ek tronpet depi kot twa; Pa pou trouv ankor metie artizan kot twa, tapaz moulin lafarinn pou tengn net. Lalimier lalanp pou nepli briye kot twa ankor, e pou nepli tann lavwa nouvo ek nouvel marye sorti kot twa. Parski to bann marsan ti pli pwisan lor later, e par to bann sorselri to ti anbet tou bann nasion. Anplis kot tomem ki ti trouv disan bann profet, lepep Bondie ek tou bann ki ti masakre lor later.” Apre sa mo tann koumadir enn lavwa for, bann lafoul dan lesiel ki pe dir, “Alelouya! Laglwar ek pwisans pou nou Bondie, ki sov nou. So zizman vre ek zis, li finn ziz sa gran prostitie, ki finn sali later avek so bann konportman imoral. Li finn vanz kont li akoz disan so bann serviter.” Ankor enn fwa li repete, “Alelouya! Lafime so dife pe monte pou touzour.” Sa vennkat ansien ek kat kreatir vivan la tom azenou pou ador Bondie ki pe asiz lor tronn. Zot dir; “Amen Alelouya!” Enn lavwa sorti depi tronn e dir, “Loue nou Bondie, zot ki so bann serviter, gran kouma piti, ki respekte li.” Lerla mo tann enn lavwa koumadir enn gran lafoul dimounn, ondire tapaz vag lamer ek loraz, ki pe kriye, pe dir, “Alelouya! parski nou Segner Bondie Toupwisan, li regne. Anou rezwir, anou selebre, anou rann laglwar Bondie! parski maryaz Agno finn arive, nouvel-marye finn fini prepar li. Pou so linz maryaz, zot finn donn li enn tisi fin an-lin pir, ki briye.” (Ofet tisi lin reprezant bann bon aksion pep Bondie ki sin.) Apre sa, enn anz ti dir mwa, “Ekrir sa: Zot pou ere, bann ki invite dan maryaz Agno.” Lerla li dir mwa, “Samem vre parol Bondie.” Alor mo tom azenou pou ador li, me li dir mwa, “To pa fer sa! Mo enn koleg serviter avek twa ek to bann kamarad, bann temwin fidel Zezi. Bondie ki to bizin adore parski temwaniaz Zezi, samem lespri ki inspir bann profet.” Lerla mo trouv lesiel ouver e enn seval blan paret. So kavalie ti apel Fidel ek Verite. Li drwat dan so zizman e li konbat avek lazistis. So lizie kouma laflam dife; lor so latet ti ena plizir kouronn. Lor li ti finn ekrir enn nom ki li tousel kone. Li ti met enn rob tranpe dan disan, e li ti apel “Parol Bondie.” E bann larme lesiel abiye ar lin fin ek pir, kouler blan ti pe swiv li lor bann seval blan. Enn lepe transan sorti dan so labous e tap bann nasion. Li pou diriz zot avek enn baton lasie; li pou kraz rezin dan preswar kot divin lakoler Bondie Toupwisan pe bouyone. Lor so linz ek lor so lazam ena enn nom ki finn ekrir: “Lerwa bann lerwa, Segner bann segner.” Lerla mo trouv enn anz ki pe dibout dan soley, avek enn lavwa bien for, li pe kriy ar bann zwazo ki pe anvol dan lezer, li dir, “Vini, rasanble zot pou sa gran festin Bondie la. Vini, vinn manz laser bann lerwa, laser bann zeneral, laser bann gran sef, laser seval ek kavalie, laser tou dimounn, seki lib ek esklav, tipti kouma gran.” Lerla mo trouv bebet-la ek lerwa later avek so bann larme finn rasanble pou lager kont kavalie-la ek so larme. Alor zot finn trap bebet-la anmemtan ki sa fos profet ki ti fer bann mirak dan so prezans la; ki ti sedwir tou bann ki ti ena mark bebet e ti ador so zimaz. Ti zet bebet-la ek fos profet-la dan enn landrwa ranpli ar dife ki brile kouma souf. Lezot ti mor avek lepe ki ti sorti dan labous kavalie ki ti lor seval la. Tou bann zwazo ti manz zot laser, ziska zot rasazie. Lerla mo trouv enn anz vini ki sorti dan lesiel. Dan so lame ena lakle pwi-san-fon ek enn gro lasenn lour. Li trap dragon, samem sa vie serpan-la, limem diab ek Satan, e li atas li ar lasenn pou mil an. Li zet dragon-la dan pwi-san-fon, li ferm li akle, met sele, pou ki li pa sedwir bann pep ankor ziska lafin sa mil an-la. Apre sa, zot pou bizin larg li pou enn tigit letan. Lerla mo trouv bann tronn, e bann ki ti pe asiz lor sa bann tronn-la ti ena lotorite pou zize. Mo ti trouv osi nam bann dimounn ki zot latet ti koupe akoz zot temwaniaz lor Zezi ek parol Bondie. Zot pa ti ador Bebet ni so zimaz e zot pa ti resevwar so mark lor zot fron ou zot lame. Zot ti regagn lavi e zot ti regne avek Kris pandan mil an. (Lezot mor pa ti regagn lavi avan lafin sa mil an-la.) Sa ti premie rezireksion. Bann ki ti partaz sa premie rezireksion-la, zot ti vremem ere ek sin. Deziem lamor pena okenn pouvwar lor zot. Zot pou vinn pret pou Bondie ek Kris, e zot pou regn avek li pandan mil an. Alafin sa mil an-la, Satan pou libere dan prizon, e li pou sorti pou sedwir bann nasion dan kat kwin later, Gog ek Magog. Li pou rasanble zot pou lager; zot pou boukou, kouma lagrin disab dan lamer. Zot ti rant partou lor later e zot anvayir landrwa kot bann pep Bondie ti viv e zot ti rant dan site bieneme. Me enn dife sorti dan lesiel e devor zot. Lerla, zot ti zet Satan, ki ti sedwir tou dimounn, dan landrwa kot dife ek souf ti pe brile; dan sa landrwa lamem zot ti zet bebet ek fos profet la. Lanwit-lizour zot pou tourmante pou touzour. Apre mo trouv enn gran tronn blan ek enn kikenn ki ti pe asize lor la. Later ek lesiel disparet devan li e personn pa trouv zot ankor. Lerla mo trouv bann mor, bann tipti kouma bann gran pe debout devan tronn e zot ouver enn bann liv. Enn lot liv ki apel liv lavi ti osi ouver e bann mor ti zize dapre seki zot ti fer, dan manier ki finn ekrir dan bann liv-la. Lamer ti retourn tou bann mor ki li ti kontenir; lamor ek Ades ti retourn bann kadav, e sakenn ti zize dapre seki li ti fer. Apre, ti zet lamor ek Ades dan basin dife. Basin dife, samem deziem lamor. Dimounn ki so nom pa ti ekrir dan liv lavi, ti zet li dan basin dife. Apre sa, mo ti trouv enn nouvo lesiel ek enn nouvo later; ofet premie lesiel ek premie later ti finn disparet e lamer ti nepli existe. E mo ti trouv lavil sin, nouvo Zerizalem, sorti kot Bondie e desann depi lesiel. Li ti bien abiye parey kouma nouvel-marye pe atann so bieneme. E mo tann enn lavwa for depi tronn ki pe dir, “Aster-la, lakaz Bondie li omilie so pep! Li pou res avek zot e li pou vinn zot Bondie. Li pou souy tou larm dan zot lizie. Pa pou ena ni lamor, ni dey, ni lamantasion, ni douler. Tousala parski vie lemond finn disparet.” Seki ti asiz lor tronn-la dir, “Mo pe fer tou kitsoz nef!” Apre li dir, “Ekrir sa, parski sa bann parol-la zot sir ek vre.” Lerla li ti dir mwa, “Fini aster-la! Momem Alfa ek Omega, koumansman ek lafin. Dimounn ki gagn swaf, mo pou donn zot delo lasours lavi ki pa pou kout zot nanye. Dimounn ki gagn laviktwar pou resevwar sa don-la, e mo pou vinn so Bondie e li pou vinn mo zanfan. Me bann las, bann infidel, bann deprave, bann asasin, bann ki viv lavi imoral, bann mazisien, bann ki ador zimaz, ek tou bann manter, zot plas pou dan basin dife ek souf; samem deziem lamor.” Apre sa, enn parmi sa set anz ki ti ena set koup ranpli ar set dernie fleo la, vini e li dir mwa, “Vini, mo pou montre twa fianse-la, limem ki pou marye avek Agno.” Lerla, Lespri Bondie vinn dan mwa e li sarye mwa lor enn montagn bien ot, e li montre mwa lavil sint Zerizalem ki sorti kot Bondie pe desann depi lesiel. Laglwar Bondie ekler lavil-la e li briye parey kouma enn pier presie transparan ki resanble diaman. Lavil-la ti ena bann gran miray bien ot avek douz laport. Douz anz ti pe gardien bann laport-la e lor sak laport ti ekrir nom douz tribi Izrael. Dan sak kote lavil ti ena trwa laport: trwa dan les, trwa dan Lenor, trwa dan Lesid e trwa dan Lwes. E miray lavil-la ti ena douz fondasion, e lor sak fondasion ti ena nom douz Zapot Agno Bondie. Anz ki ti pe koz ar mwa la ti ena enn golet an-or pou mizir lavil-la ek so bann laport ek miray. Lavil-la ti kare. So longer ek so larzer parey. Li mizir li avek so golet; ti ena douz mil stad. Apre li ti osi mizir miray lavil-la. Li ti ena san karann-kat bras. Miray-la ti konstrir ar pier presie e lavil lamem ti fer avek lor pir, transparan parey kouma kristal. Fondasion miray lavil-la ti orne ar bann pier presie; premie avek zasp, deziem avek safir, trwaziem avek agat, katriem avek emrod, sinkiem avek onix, siziem avek kornalinn, setiem avek krizolit, witiem avek beril, neviem avek topaz, diziem avek krisopraz, onziem avek yasint, douziem avek ametis. Sa douz laport-la, zot ti osi douz perl e sak laport ti fer avek enn sel perl. Laplas lavil ti an-or pir, kler kouma kristal. E mo pa ti trouv okenn tanp dan lavil-la parski tanp lavil ti Lesegner Bondie Toupwisan ek Agno. Lavil-la pa ti bizin soley ouswa lalinn pou ekler li. Laglwar Bondie so lalimier e Agno Bondie so flanbo. Tou bann nasion pou mars dan so lalimier; e bann lerwa later pou amenn zot laglwar. So bann laport zame pa pou ferme dan lazourne e pa pou ena lanwit laba. Lamem zot pou amenn tou laglwar ek loner bann pep. Me okenn inpirte pa pou rant dan lavil-la, ni personn ki pratik abominasion ou mansonz, me zis dimounn ki so nom finn ekrir dan liv lavi Agno. Apre sa, li montre mwa enn larivier delo lavi kler kouma kristal, ki pe desann depi kot tronn Bondie ek tronn Agno. Omilie laplas lavil, lor de kote larivier ena enn bann pie lavi avek zot douz kalite fri. Sak mwa zot donn zot fri ek zot fey servi pou geri lepep. Pa pou ena malediksion ankor. Tronn Bondie ek tronn Agno, zot pou dan lavil e so bann serviter pou ador li. Zot pou trouv so vizaz e so nom pou ekrir lor zot fron. Nepli pou ena lanwit; personn pa pou bizin lalimier flanbo ou lalimier soley; Lesegner Bondie, limem pou zot lalimier, e zot pou regne pou touzour. E li dir mwa, “Sa bann parol-la, zot vre ek sir. Lesegner Bondie ki inspir bann profet, finn avoy so anz-la pou montre so bann serviter seki pou arive biento. Ala, mo pe vini biento. Bienere dimounn ki gard parol profet ki trouv dan sa liv-la.” Mwa, Zan, mo finn tande e mo fin trouv sa bann kitsoz-la. E ler mo finn tann sa e trouv tousala, mo finn tom azenou pou ador anz ki finn montre mwa sa. Me li dir mwa, “Fode pa ki to fer sa, mo enn serviter parey kouma twa, parey kouma to bann frer profet ek tou lezot ki gard parol sa liv-la. Bondie ki to bizin adore.” Lerla li dir mwa, “Pa gard sekre bann parol profet ki trouv dan liv-la, parski letan pe aprose. Les bann ki move kontigne fer plis dimal, bann ki moralman koronpi kontign dan zot pouritir, e bann ki zis kontign pratik lazistis, e bann ki viv lavi sin kontign vinn pli sin. Ala mo pe vini biento. Mo pe amenn mo rekonpans ki mo pou donn zot tou pou seki zot finn fer. Momem Alfa ek Omega, premie ek dernie, koumansman ek lafin. Bienere dimounn ki lav so rob pou li gagn drwa manz fri pie lavi e rant dan lavil par so bann laport. Me andeor lavil ena bann lisien ek bann sorsie, bann dimounn imoral, kriminel, bann adorater idol ek tou bann ki kontan e pratik mansonz. “Mwa, Zezi, mo finn avoy mo anz kot bann Legliz ar sa temwaniaz-la: ‘Mo enn desandan David, zetwal ki briye gramatin.’ ” Lespri ek nouvel marye dir, “Vini!” Dimounn ki tann sa, zot osi dir, “Vini!” Dimounn ki swaf bizin vini, dimounn ki anvi pran delo lavi, pran li gratis. Mo pe averti zot tou ki tann parol profetik sa liv-la: si kikenn azout kitsoz dan sa liv-la, Bondie pou azout dan so lavi mem kantite fleo ki ena dan sa liv-la. E si kikenn retir kitsoz dan sa bann parol profetik la, Bondie pou retir so bout dan pie lavi e dan lavil sint ki finn dekrir dan sa liv-la. Dimounn ki garanti ki tousala vre, dir, “Wi, mo pe vini biento!” Amen. Vini, Segner Zezi! Lagras Segner Zezi res avek zot tou.