ଆବ୍ରାହାମ୍ ରାଃ ସାନ୍ତାନ୍ ଏତେ, ଦାଉଦ୍ ରାଜା ରାଃ ସାନ୍ତାନ୍ ୟୀଶୁ ମାସୀହ୍ ସାନ୍ତେ ଇନ୍‍କୁୱାଃ କିଲି ରେନ୍ ଆପୁ କୋୱାଃ ନୁତୁମ୍। ଆବ୍ରାହାମ୍ ରାଃ ହୋନ୍‍କଡ଼ା ଇସାହାକ୍, ଇସାହାକ୍ ରାଃ ହୋନ୍‍କଡ଼ା ୟାକୁବ୍, ଆଡୋଃ ୟାକୁବ୍ ରାଃ ହୋନ୍‍କଡ଼ାକୋ ୟାହୁଦା ଆଡୋଃ ଇନିଜାଃ ହାଗାକୋ ଜାନାମ୍ ଲେନାକୋ। ୟାହୁଦା ରାଃ ହୋନ୍‍କଡ଼ା ଫିରିସ୍ ହାର୍ ଯେରାହ୍ ଆଡୋଃ ଇନ୍‍କୁୱାଃ ଏଙ୍ଗା ତାମାର୍ ତାଇକେନାଏ, ଆଡୋଃ ଫିରିସ୍ ରାଃ ହୋନ୍‍କଡ଼ା ହିସ୍ରୋନ୍, ଆଡୋଃ ହିସ୍ରୋନ୍ ରାଃ ହୋନ୍‍କଡ଼ା ଏରାମ୍। ଏରାମ୍ ରାଃ ହୋନ୍‍କଡ଼ା ଅମ୍ମିନାଦାବ୍, ଆଡୋଃ ଅମ୍ମିନାଦାବ୍ ରାଃ ହୋନ୍‍କଡ଼ା ନାହ୍‍ସୋନ୍, ଆଡୋଃ ନାହ୍‍ସୋନ୍ ରାଃ ହୋନ୍‍କଡ଼ା ସାଲ୍‍ମୋନ୍। ସାଲ୍‍ମୋନ୍ ରାଃ ହୋନ୍‍କଡ଼ା ବୋଆଜ୍ ଆଡୋଃ ରାହାବ୍ ବୋଆଜ୍ ରାଃ ଏଙ୍ଗା ତାଇକେନାଏ, ଆଡୋଃ ବୋଆଜ୍ ରାଃ ହୋନ୍‍କଡ଼ା ଓବେଦ୍ ଆଡୋଃ ରୁତ୍ ଇନିଜାଃ ଏଙ୍ଗା ତାଇକେନାଏ, ଆଡୋଃ ଓବେଦ୍ ରାଃ ହୋନ୍‍କଡ଼ା ଯେଶୀ, ଆଡୋଃ ଯେଶୀ ରାଃ ହୋନ୍‍କଡ଼ା ଦାଉଦ୍ ରାଜା ତାଇକେନାଏ। ଦାଉଦ୍ ରାଃ ହୋନ୍‍କଡ଼ା ସୁଲେମାନ୍ ଏନ୍ କୁଡ଼ି ଏତେ ଜାନାମ୍ ଜାନାଏ ଅକନିଃଚି ସିଦା ଉରିୟାହ୍ ରାଃ କୁଡ଼ି ତାଇକେନାଏ। ସୁଲେମାନ୍ ରାଃ ହୋନ୍‍କଡ଼ା ରାହୋବିୟାମ୍, ଆଡୋଃ ରାହୋବିୟାମ୍ ରାଃ ହୋନ୍‍କଡ଼ା ଆବିୟାହ୍, ଆଡୋଃ ଆବିୟାହ୍ ରାଃ ହୋନ୍‍କଡ଼ା ଆସା ତାଇକେନାଏ। ଆସା ରାଃ ହୋନ୍‍କଡ଼ା ଯିହୋଶାଫାତ୍, ଯିହୋଶାଫାତ୍ ରାଃ ହୋନ୍‍କଡ଼ା ଯୋରାମ୍, ଯୋରାମ୍ ରାଃ ହୋନ୍‍କଡ଼ା ଉଜିୟାହ୍, ଉଜିୟାହ୍ ରାଃ ହୋନ୍‍କଡ଼ା ଯୋଥାମ୍, ଯୋଥାମ୍ ରାଃ ହୋନ୍‍କଡ଼ା ଆହାଜ୍, ଆହାଜ୍ ରାଃ ହୋନ୍‍କଡ଼ା ହିଜେକିୟାହ୍, ହିଜେକିୟାହ୍ ରାଃ ହୋନ୍‍କଡ଼ା ମାନାଶେହ୍, ମାନାଶେହ୍ ରାଃ ହୋନ୍‍କଡ଼ା ଆମୋନ୍, ଆମୋନ୍ ରାଃ ହୋନ୍‍କଡ଼ା ୟୋଶିୟାହ୍ ତାଇକେନାଏ। ଏନା ତାୟୋମ୍ତେ ବାନ୍ଦି ହୋବାକେତେ ବେବିଲୋନ୍ କୋୱାଃ ଦିଶୁମ୍ ସେନ୍ ସାମାୟ୍ ରେ ୟୋଶିୟାହ୍ ରାଃ ହୋନ୍‍କଡ଼ା ୟୁକୁନ୍ୟାହ୍, ଆଡୋଃ ଆଜାଃ ହାଗାକୋ ଜାନାମ୍ ଜାନାକୋ। ବେବିଲୋନ୍ ତେ ବାନ୍ଦି ହୋଇ କେତେ ସେଟେର୍ ତାୟୋମ୍ତେ ୟୁକୁନ୍ୟାହ୍ ରାଃ ହୋନ୍‍କଡ଼ା ଶାଲ୍‍ତିୟେଲ୍ ଜାନାମ୍ ନାଏ, ଶାଲ୍‍ତିୟେଲ୍ ରାଃ ହୋନ୍‍କଡ଼ା ଜିରୁବାବିଲ୍, ଜିରୁବାବିଲ୍ ରାଃ ହୋନ୍‍କଡ଼ା ଅବିହୁଦ୍, ଅବିହୁଦ୍ ରାଃ ହୋନ୍‍କଡ଼ା ଏଲିୟାକିମ୍, ଏଲିୟାକିମ୍ ରାଃ ହୋନ୍‍କଡ଼ା ଆଯୋର୍, ଆଯୋର୍ ରାଃ ହୋନ୍‍କଡ଼ା ସାଦୋକ୍, ସାଦୋକ୍ ରାଃ ହୋନ୍‍କଡ଼ା ଆଖିମ୍, ଆଖିମ୍ ରାଃ ହୋନ୍‍କଡ଼ା ଏଲିହୁଦ୍ ଜାନାମ୍ ନାଏ। ଏଲିହୁଦ୍ ରାଃ ହୋନ୍‍କଡ଼ା ଏଲିୟାଜାର୍, ଏଲିୟାଜାର୍ ରାଃ ହୋନ୍‍କଡ଼ା ମାତ୍ତାନ୍, ହାର୍ ମାତ୍ତାନ୍ ରାଃ ହୋନ୍‍କଡ଼ା ୟାକୁବ୍ ଜାନାମ୍ ନାଏ। ୟାକୁବ୍ ରାଃ ହୋନ୍‍କଡ଼ା ଯୋଶେଫ୍, ଅକନିଃ ଚି ମାରିୟାମ୍ ରାଃ କଡ଼ା ତାଇଲେନାଏ, ହାର୍ ନେ ମାରିୟାମ୍ ରାଃ ଲାହେଃ ତେଗି ୟୀଶୁ ଜାନାମ୍ ନାଏ, ଅକନିଃ ମାସୀହ୍ କାଜିୟୋଃ ତାନାଏ। ନେଲେକା ଆବ୍ରାହାମ୍ ଏତେ ଦାଉଦ୍ ସାନ୍ତେ ଚାଉଦା ପିଢ଼ୀ ହୋବାଜାନା, ହାର୍ ଦାଉଦ୍ ଏତେ ବେବିଲୋନ୍ ତେ ବାନ୍ଦି କେତେ ସେଟେର୍ ସାନ୍ତେ ଚାଉଦା ପିଢ଼ୀ, ହାର୍ ବାନ୍ଦି ହୋବାକେତେ ବେବିଲୋନ୍ ସେଟେର୍ ସାମାୟ୍ ଏତେ ମାସୀହ୍ ସାନ୍ତେ ଚାଉଦା ପିଢ଼ୀ ହୋବାଜାନା। ନାଆ ଦୋ ୟୀଶୁ ମାସୀହ୍ ରାଃ ଜାନାମ୍ ନେଲେକା ହୋବାଲେନା, ଆଜାଃ ଏଙ୍ଗା ମାରିୟାମ୍ ରାଃ ଯୋଶେଫ୍ ଲୋଃ ମାଙ୍ଗ୍‍ନୀ ହୋଇଲେନା, ମେନ୍ଦୋ ହିନ୍‍କିନାଃ ମିଃତାଃ ଗିତିଃ ସିଦାରେ ମାରିୟାମ୍ ଡିଣ୍ଡା କୁଡ଼ି ତାଇନ୍ ରେଗି ପାବିତାର୍ ଆତ୍ମା ହୋରାତେ ହୋଡ଼ମୋ ରେ ମେନିଜା ମେନ୍ତେ ସାରିଜାନାଏ। ଆଡୋଃ ଆଜାଃ କଡ଼ା ଯୋଶେଫ୍ ଧାର୍ମୀ ତାଇଲେନାଏ, ହାର୍ ଆଏଃକେ ବାଦ୍‍ନାମ୍ କାଏ ସାନାଙ୍ଗ୍ ତାଇନାଏ, ଆଏଃକେ ହାପାହାପା ବାଗେ ଲାଗିନ୍ ସାନାଙ୍ଗ୍ କିଜାଏ। ଚିମ୍ତାଙ୍ଗ୍ ଇନିଃ ନେ ବାକାଣ୍ କୋକେ ପାହୋମ୍ ତାଇନାଏ ଚି, ପ୍ରାଭୁ ରାଃ ମିହୋଡ଼୍ ସିର୍ମାଦାସୀ କୁମୁ ରେ ଆଏଃକେ ନେଲ୍ ଜାନାଏ ହାର୍ କାଜିକେଦାଏ, “ହେ ଦାଉଦ୍ ରାଜା ରାଃ ସାନ୍ତାନ୍ ଯୋଶେଫ୍! ମାରିୟାମ୍ କେ ଆମାଃ କୁଡ଼ି ବାଇ ଲାଗିନ୍ ଆଲୋମ୍ ବୋରୋଏ, ଚିୟାଃଚି ଅକନିଃ ଇନିଜାଃ ହୋଡ଼ମୋ ରେ ମେନିଜା ଇନିଃ ପାବିତାର୍ ଆତ୍ମା ତେ ତାନିଃ। ମାରିୟାମ୍ କଡ଼ାହୋନ୍ ଜାନାମିୟାଏ, ହାର୍ ଆମ୍ ଇନିଜାଃ ନୁତୁମ୍ ୟୀଶୁ ମାଣ୍ଡାଅୟାମ୍, ଚିୟାଃଚି ହିନିଃ ଆଜାଃ ହୋଡ଼ୋକୋକେ ଆକୋୱାଃ ପାପ୍ ତେ ବାଞ୍ଚାଅ କୋୱାଏ।” ନେୟା ସବେନ୍ ନେୟାମେନ୍ତେ ହୋବାଜାନା ଚି ଅକନ୍ ବାଚାନ୍ ପ୍ରାଭୁ ଆଜାଃ ନାବୀ କୋୱାଃ ହୋରାତେ କାଜିଲେଦାଏ, ହେନା ପୁରାଅଃକା, “ନେଲେପେ, ମିହୋଡ଼୍ ଡିଣ୍ଡା କୁଡ଼ି ହୋଡ଼ମୋ ରେ ତାଇନାଏ, ହାର୍ ମିୟାଃ ହୋନ୍‍କଡ଼ା ଜାନାମିୟାଏ, ଆଡୋଃ ଇନିଜାଃ ନୁତୁମ୍ ଇମାନୁଏଲ୍ ମାଣ୍ଡାଅଃୱା, ଏନା ରାଃ ମାନେ, ‘ପାର୍ମେଶ୍ଵାର୍ ଆବୁୱାଃ ଲୋଃ।’ ” ଇମ୍ତାଙ୍ଗ୍ ଯୋଶେଫ୍ ଦୁଣୁମ୍ ତେ ବିରିଃ ଜାନାଏ ହାର୍ ପ୍ରାଭୁ ରାଃ ସିର୍ମାଦାସୀ ଆଃ ଆନାଚୁ ଲେକାତେ ମାରିୟାମ୍ କେ ଆଣାଦୀ କିଜାଏ ହାର୍ ଆଜାଃ କୁଡ଼ି ବାଇକେତେ ଅଡ଼୍ଆଃ ଆଉ ଲିଜାଏ। ମେନ୍ଦୋ ମାରିୟାମ୍ ହୋନ୍‍କଡ଼ା କାଏ ଜାନାମି ସାନ୍ତେ ଯୋଶେଫ୍ ଆଜାଃ ଲୋଃ କାଏ ଗିତିଃ ଜାନାଏ। ଏନ୍ତେ ଯୋଶେଫ୍ ଏନ୍ ହୋନ୍ ରାଃ ନୁତୁମ୍ ୟୀଶୁ ମାଣ୍ଡାଅ କେଦାଏ। ହେରୋଦ୍ ରାଜା ରାଃ ସାମାୟ୍ ରେ ଚିମ୍ତା ୟାହୁଦୀୟା ଜିଲ୍ଲା ରାଃ ବେଥ୍ଲେହେମ୍ ହାତୁ ରେ ୟୀଶୁ ଜାନାମ୍ ଜାନାଏ, ଇମ୍ତା ୟାହୁଦୀୟା ଜିଲ୍ଲା ରାଃ ପୂରୁବ୍ ପାଡ଼୍ ରାଃ ଦିଶୁମ୍ ରେନ୍ ଚିମିନ୍ ସେଣାନ୍ ହୋଡ଼ୋକୋ ଅକନ୍‍କୋଚି ଇପିଲ୍ କୋକେ ପାଢ଼ାଅ ସାରି ତାଇନାକୋ ୟୀରୁଶାଲେମ୍ ସାହାର୍ ରେ ହିଜୁଃକେତେ କୁଲିକେଦାକୋ, “ୟାହୁଦୀ କୋୱାଃ ରାଜା ଅକନିଜାଃ ଜାନାମ୍ ହୋବାକାନା, ହିନିଃ ଅକ୍ତାଃ ରିୟାଏ? ଚିୟାଃଚି ଆଲେ ପୂରୁବ୍ ଦିଶା ରେ ଆଜାଃ ଇପିଲ୍ କେ ନେଲ୍‍କେତେ ଆଏଃକେ ଜୋହାର୍ ଲାଗିନ୍ ହିଜୁଃ କାନାଲେ।” ନେୟା ଆୟୁମ୍‍କେତେ ହେରୋଦ୍ ରାଜା ହାର୍ ୟୀରୁଶାଲେମ୍ ସାହାର୍ ରେନ୍ ମିଃଥିମ୍ବା ହୋଡ଼ୋକୋ ଘାବ୍ରାଓ ଜାନାକୋ। ଏନ୍ତେ ହେରୋଦ୍ ରାଜା ହୋଡ଼ୋକୋୱାଃ ସବେନ୍ ପ୍ରାଧାନ୍ ୟାଜାକ୍‍କୋକେ ହାର୍ ଆଇନ୍ ଗୁରୁକୋକେ ହୁଣ୍ଡି କେତେ ଇନ୍‍କୁକେ କୁଲିକେଃକୋୱାଏ, “ମାସୀହ୍ ଅକ୍ତାଃରେ ଜାନାମୋଗାଏ?” ହିନ୍‍କୁ ଆଏଃକେ କାଜିକିଜାକୋ, “ୟାହୁଦୀୟା ଜିଲ୍ଲା ରାଃ ବେଥ୍ଲେହେମ୍ ହାତୁ ରେ, ଚିୟାଃଚି ନାବୀ ରାଃ ହୋରାତେ ନେଲେକା ଅଲାକାନା, ହେ ୟାହୁଦୀୟା ଜିଲ୍ଲା ରାଃ ବେଥ୍ଲେହେମ୍ ହାତୁ ରେନ୍ ହୋଡ଼ୋକୋ, ଆପେୟାଃ ହାତୁ ୟାହୁଦୀୟା ରାଇଜ୍ ରାଃ ଆଧିକାର୍ ରେ ଜେତାନ୍ ଏତେ ଜାଲେକାତେ ହୁଡିଙ୍ଗ୍ ନାହାଲା, ଚିୟାଃଚି ଆପେ ଏତେ ମିହୋଡ଼୍ ହୋଡ଼ ଅଡୋଙ୍ଗ୍ ଅଗାଏ ଇନିଃ ରାଇଜ୍ ରିକାନିଃ ବାଇୟୋଗାଏ, ଅକନିଃ ଇଙ୍ଗ୍ଆଃ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋକେ ଗୁପି କୋୱାଏ।” ଏନ୍ତେ ହେରୋଦ୍ ରାଜା ଏନ୍ ସେଣାନ୍ ହୋଡ଼ୋକୋକେ ଅକନ୍‍କୋ ଇପିଲ୍ କୋକେ ପାଢ଼ାଅ ସାରି ତାଇନାକୋ ହାପା ତେ କେଡ଼ାକେତେ ଇନ୍‍କୁକେ କୁଲିକେଃକୋୱାଏ, ଚି ଇପିଲ୍ ଠିକ୍ ଅକନ୍ ସାମାୟ୍ ରେ ନେଲ୍ ଲେନା। ଏନ୍ତେ ଇନିଃ ନେୟା କାଜିକେତେ ଇନ୍‍କୁକେ ବେଥ୍ଲେହେମ୍ ହାତୁ କୁଲ୍ କେଃକୋୱାଏ ଚି, “ସେନ୍‍କେତେ ହେନ୍ ବାଲେଃ ହୋନ୍ ରାଃ ବିଷାୟ୍ ରେ ଠିକ୍-ଠିକ୍ ଜାଞ୍ଚ୍ଏପେ ହାର୍ ଚିମ୍ତାଙ୍ଗ୍ ନାମ୍ କେନୋଗାଏ ଦୋ ଇଙ୍ଗ୍‍କେ ଉଦୁବାଇଙ୍ଗ୍ ପେ ଏନାତେ ଇଙ୍ଗ୍ ହଗି ସେନ୍ କେତେ ଆଏଃକେ ଜୋହାର୍ ୟାଇଙ୍ଗ୍।” ଇନ୍‍କୁ ରାଜା ରାଃ ବାକାଣ୍ ଆୟୁମ୍‍କେତେ ସେନ୍ ଜାନାକୋ, ହାର୍ ଅକନ୍ ଇପିଲ୍ କେ ଇନ୍‍କୁ ପୂରୁବ୍ ଦିଶା ରେ ନେଲ୍ ଲେଦାକୋ, ହେନା ଇନ୍‍କୁୱାଃ ଆୟୁର୍-ଆୟୁର୍-ସେନ୍ ଜାନା, ହାର୍ ଅକ୍ତାଃ ରେ ବାଲେଃ ହୋନ୍ ତାଇନ୍ କେନାଏ, ଏନ୍ ଜାଗା ରାଃ ଚେତାନ୍ ସେଟେର୍ କେତେ ତାଇନ୍ ଜାନା। ହେନ୍ ଇପିଲ୍ କେ ଚିମ୍ତା ନେଲ୍‍କେଦାକୋ ଇନ୍‍କୁ ଥିମ୍ବାଗି ରାଶିକା ଜାନାକୋ। ଇନ୍‍କୁ ଏନ୍ ଅଡ଼୍ଆଃ ରେ ସେଟେର୍ କେତେ ଏନ୍ ବାଲେଃ ହୋନ୍ କେ ଆଜାଃ ଏଙ୍ଗା ମାରିୟାମ୍ ଲୋଃ ନେଲ୍ କିଜାକୋ, ହାର୍ ଇନ୍‍କୁ ବୋଅ ତିରୁବ୍ ଇକ୍ଡ଼ୁମ୍ କେତେ ଆଏଃକେ ଜୋହାର୍ କିଜାକୋ। ଏନ୍ତେ ଆକୋ ଆକୋୱାଃ ଥାଇଲା ଖଲାଅ କେତେ ଆଏଃକେ ସୋନା, ହାର୍ ଗୋନୋଙ୍ଗାନ୍ ସୋୱାନ୍ ଧୁୱାନ୍ ଲୋବାନ୍, ହାର୍ ଗାନ୍ଧରାସ୍ ରାନୁ ରାଃ ଭେଁଟ୍ ଏମ୍ କିଜାକୋ। ଏନା ତାୟୋମ୍ତେ ପାର୍ମେଶ୍ଵାର୍ ପାଡ଼େତେ କୁମୁ ରେ ନେୟା ଚେତାୱନୀ ନାମ୍ କେଦାକୋ ଚି ହେରୋଦ୍ ରାଜା ତାଃ ଆଡୋଃ ଆଲୋପେ ରୁଆଡ଼ା, ଇନ୍‍କୁ ରାଜା କେ କାଉଦୁବ୍ କେତେ ଏଟାଃ ହୋରାତେ ହୋବାକେତେ ଆକୋୱାଃ ଦିଶୁମ୍ ତେକୋ ସେନୋଃ ଜାନାକୋ। ଇନ୍‍କୁୱାଃ ସେନ୍‍ଜାନ୍ ରାଃ ତାୟୋମ୍ତେ ପ୍ରାଭୁ ରାଃ ମିହୋଡ଼୍ ସିର୍ମାଦାସୀ କୁମୁ ରେ ଯୋଶେଫ୍ କେ ନେଲ୍ ଜାନାଏ ହାର୍ କାଜିକେଦାଏ, “ବିରିଃମେ, ଏନ୍ ବାଲେଃ ହୋନ୍ କେ ହାର୍ ଆଜାଃ ଏଙ୍ଗା କେ ଇଦିକେତେ ମିଶାର୍ ଦିଶୁମ୍ ତେ ନିର୍ କେନୋଃମେ। ଏନ୍ତେ ଚିମ୍ତାଙ୍ଗ୍ ସାନ୍ତେ ଇଙ୍ଗ୍ ଆମ୍‍କେ କାଇଙ୍ଗ୍ କାଜିୟା, ଏନ୍ ସାନ୍ତେ ହେନ୍ତାଃ ରେ ତାଇନ୍ ପେ; ଚିୟାଃଚି ହେରୋଦ୍ ରାଜା ନେ ବାଲେଃ ହୋନ୍ କେ ଗୋଏଃ ଲାଗିନ୍ ଦାଣା ବାଡ଼ା ୟାଏ।” ଏନ୍ତେ ଯୋଶେଫ୍ ହେନ୍ ନୁବାଃ ଗି ବିରିଃ କେତେ ବାଲେଃ ହୋନ୍ ହାର୍ ଆଜାଃ ଏଙ୍ଗା କେ ଇଦିକେତେ ମିଶାର୍ ଦିଶୁମ୍ ତେ ସେନ୍ ଜାନାଏ। ଏନ୍ତେ ହେରୋଦ୍ ରାଜା ଗୋଜୋଃ ସାନ୍ତେ ହେନ୍ତାଃ ରେ ତାଇନ୍ ଜାନାଏ। ନେୟାଲାଗିନ୍ତେ ଚି ଏନ୍ ବାଚାନ୍ ଅକନାଃ ପ୍ରାଭୁ ଆଜାଃ ନାବୀ ହୋରାତେ କାଜିଲେଦାଏ ଏନା ପୁରା ହୋବାଅଃ କା ଚି, “ଇଙ୍ଗ୍ ଇଙ୍ଗ୍ଆଃ ହୋନ୍‍କଡ଼ା କେ ମିଶାର୍ ଦିଶୁମ୍ ତେ କେଡ଼ା କିଜାଇଙ୍ଗ୍।” ଚିମ୍ତାଙ୍ଗ୍ ହେରୋଦ୍ ରାଜା ନେୟା ନେଲ୍‍କେଦାଏ, ଚି ସେଣାନ୍ ହୋଡ଼ୋକୋ ଅକନ୍‍କୋ ଇପିଲ୍ କୋକେ ପାଢ଼ାଅ ସାରି ତାଇନାକୋ ଆଏଃ କେ ଲୋଗୋ କିଜାକୋ, ଇମ୍ତା ଇନିଃ ଖିସ୍ ରେ ଫେରେଃ ଜାନାଏ, ହାର୍ ହୋଡ଼ୋକୋକେ କୁଲ୍ କେତେ ସେଣାନ୍ ହୋଡ଼ୋକୋ ଅକନ୍‍କୋ ଇପିଲ୍ କୋକେ ପାଢ଼ାଅ ସାରି ତାଇନାକୋ ଇନ୍‍କୁୱାଃ ଠିକ୍-ଠିକ୍ ଉଦୁବ୍‍କାନ୍ ସାମାୟ୍ ରାଃ ଲେକାତେ ବେଥ୍ଲେହେମ୍ ହାତୁ ହାର୍ ଏନାରାଃ ନାଡ଼େଏ ଜାପାଃ ସବେନ୍ ଜାଗା ରେନ୍ କୋଡ଼ାହୋନ୍ କୋକେ ଅକନ୍‍କୋ ଚି ଦୁଇ ବାରାଶ୍ ରେନ୍ କୋ, ୟାଦୋ ଇନ୍‍କୁ ଏତେ ହୁଡିଙ୍ଗ୍ ତାଇଲେନାକୋ, ଗୋଏଃ ରିକା କେଃକୋୱାଏ। ଏନାତେ ପାର୍ମେଶ୍ଵାର୍ ପାଡ଼େତେ ଅକନ୍ ବାଚାନ୍ ୟିର୍ମିୟାହ୍ ନାବୀ ରାଃ ହୋରାତେ କାଜିୟାକାନ୍ ତାଇକେନା, ହେନା ପୁରା ଜାନା, “ରାମାହ୍ ଜାଗା ରେ ମିୟାଃ ଦୁକୁ ରାଃ ଗେରାଙ୍ଗ୍ ହୋଡ଼ୋକୋ ଆୟୁମ୍ କେଦାକୋ, ରାଆ ହାର୍ ମାରାଙ୍ଗ୍ ଦୁକୁ, ରାହେଲ୍ ଆଜାଃ ହୋନ୍‍କୋ ଲାଗିନ୍ ରାଆ ତାଇକେନାଏ, ହାର୍ ହାପା ହୋବାଅଃ କାଏ ସାନାଙ୍ଗ୍ ତାଇନାଏ, ଚିୟାଃଚି ଇନ୍‍କୁ ଗୋଏଃ ଲେନାକୋ।” ଯୋଶେଫ୍, ମାରିୟାମ୍ ହାର୍ ହୋନ୍ ୟୀଶୁ ମିଶାର୍ ଦିଶୁମ୍ ରେଗି ତାଇକେନାକୋ, ଏନ୍ତେ ହେରୋଦ୍ ରାଜା ଗୋଏଃ ତାୟୋମ୍ତେ, ପ୍ରାଭୁ ରାଃ ସିର୍ମାଦାସୀ ମିଶାର୍ ଦିଶୁମ୍ ରେ ଯୋଶେଫ୍ କେ କୁମୁ ରେ ନେଲ୍ ଜାନାଏ ହାର୍ କାଜିକେଦାଏ, “ବିରିଃମେ, ବାଲେଃ ହୋନ୍ ହାର୍ ଆଜାଃ ଏଙ୍ଗା କେ ଇଦିକେତେ ଇସ୍ରାଏଲ୍ ଦିଶୁମ୍ ତେ ସେନ୍ କେନୋଃମେ। ଚିୟାଃଚି ହେରୋଦ୍ ରାଜା ହାର୍ ଇନିଜାଃ ହୋଡ଼ୋକୋ ଅକନ୍‍କୋ ବାଲେଃ ହୋନ୍ ରାଃ ଜୀଉ ଇଦି ଦାଣା ତାଇକେନାକୋ, ଇନ୍‍କୁ ଗୋଏଃ ଜାନାକୋ।” ଏନାଲାଗିନ୍ ଯୋଶେଫ୍ ବିରିଃ ଜାନାଏ, ହାର୍ ବାଲେଃ ହୋନ୍ ହାର୍ ଆଜାଃ ଏଙ୍ଗା କେ ଆଏଃ ଲୋଃ ଇଦିକେତେ ମିଶାର୍ ଦିଶୁମ୍ ବାଗେ କେତେ ଇସ୍ରାଏଲ୍ ଦିଶୁମ୍ ରେ ହିଜୁଃ ଜାନାଏ। ମେନ୍ଦୋ ଯୋଶେଫ୍ ଚିମ୍ତା ନେୟା ଆୟୁମ୍ କେଦାଏ ଚି, ଆର୍ଖିଲାଉସ୍ ଆଜାଃ ଆପୁ ହେରୋଦ୍ ରାଜା ରାଃ ଜାଗା ରେ ୟାହୁଦୀୟା ଜିଲ୍ଲା ରେ ରାଜା କାନାଏ, ଏନାଲାଗିନ୍ ହେନ୍ତାଃ ସେନ୍ ବୋରୋ କେଦାଏ। ଏନ୍ତେ ପାର୍ମେଶ୍ଵାର୍ ପାଡ଼େତେ କୁମୁ ରେ ଚେତାୱନୀ ନାମ୍ କେତେ ଗାଲିଲୀ ଜିଲ୍ଲା ତେ ସେନ୍ ଜାନାଏ, ହାର୍ ନାଜ୍ରେଥ୍ ସାହାର୍ ନୁତୁମ୍ ଜାଗା ରେ ସେନ୍ କେତେ ତାଇଜାନାଏ, ଏନାତେ ଏନ୍ ବାଚାନ୍ ପୁରା ହୋବାଜାନା, ଅକନାଃ ୟୀଶୁ ବିଷାୟ୍ ରେ ନାବୀ କୋୱାଃ ହୋରାତେ କାଜିଲେନା, “ଇନିଃ ନାଜ୍ରେଥ୍ ସାହାର୍ ରେନ୍ କାଜିୟୋଗାଏ।” ଏନ୍ ହୁଲାଙ୍ଗ୍ କୋରେ ଯୋହାନ୍ ବାପ୍ତିସ୍ମା ଏହେମ୍ ନିଈ ହିଜୁଃକେତେ ୟାହୁଦୀୟା ଜିଲ୍ଲା ରାଃ ସୁନ୍‍ସାନ୍ ଜାଗା ରେ ନେୟା ପାର୍ଚାର୍ ବାଡ଼ା ତାଇନାଏ, “ପାପ୍ କାମି ବାଗେ ତାପେ, ଚିୟାଃଚି ସିର୍ମାଦିଶୁମ୍ ରାଃ ରାଇଜ୍ ନାଡ଼େଏ ହିଜୁଃ କାନା।” ନିଈ ଏନ୍ ହୋଡ଼ ଗି ତାନିଃ ଅକନିଜାଃ ବିଷାୟ୍ ରେ ୟାଶାୟାହ୍ ନାବୀ ରାଃ ହୋରାତେ କାଜିଲେନ୍ ତାଇନା, “ସୁନ୍‍ସାନ୍ ଜାଗା ରେ ମିୟାଃ ହୋଡ଼ ହୋଡ଼ୋକୋକେ କାଜିୟାକୋ ତାନାଏ, ଚି ପ୍ରାଭୁ ହିଜୁଃ ତାନାଏ ସେକାଡ଼େନ୍ ପେ, ଇନିଜାଃ ଲାଗିନ୍ ହୋରା ବାଇୟେପେ, ଆଡୋଃ ଏନ୍ ସାଣ୍ଡାକ୍ କୋକେ ସିଧା ରିକାଏପେ ଅକଣ୍ଡେ ଇନିଃ ହୁଜୁଗାଏ।” ଏନ୍ ଯୋହାନ୍ ଉଁଟ୍ ଉବ୍ ରାଃ ଲିଜାଃ ତୁସିଙ୍ଗ୍ କାନ୍ ତାଇକେନାଏ, ହାର୍ ଆଜାଃ ମାୟାଙ୍ଗ୍ ରେ ଉହୁର୍ ରାଃ କାଶ୍ନା ଥୋଲାକାନ୍ ତାଇୟୋଃ ତାଇକେନାଏ। ଇନିଜାଃ ଜୋମେୟାଃ ସନ୍‍ସରୋଦ୍ କୋ ହାର୍ ଟୋନାଙ୍ଗ୍ ଉରୁମ୍‍ସୁକୁ ତାଇକେନା। ଏନ୍ତେ ୟୀରୁଶାଲେମ୍ ସାହାର୍ ରେନ୍ ହାର୍ ସବେନ୍ ୟାହୁଦୀୟା ଜିଲ୍ଲା ରେନ୍, ହାର୍ ଯାର୍ଦାନ୍ ନାଈ ନାଡ଼େଏ ଜାପାଃ ରାଃ ସବେନ୍ ଦିଶୁମ୍ ଜାଗାକୋ ରେନ୍ ହୋଡ଼ୋକୋ ଇନିଜାଃ ନାଡ଼େଏ ଅଡୋଙ୍ଗ୍ କେତେ ହିଜୁଃ ଲେନାକୋ। ହାର୍ ଚିମ୍ତା ଇନ୍‍କୁ ଆକୋୱାଃ-ଆକୋୱାଃ ପାପ୍ କୋକେ ମାନାତିଙ୍ଗ୍ କେଦାକୋ, ଯୋହାନ୍ ଯାର୍ଦାନ୍ ନାଈ ରେ ବାପ୍ତିସ୍ମା ଏମାଃ କୋୱାଏ। ଚିମ୍ତା ଇନିଃ ଥିମ୍ବାଗି ଫାରିସୀ ହୋଡ଼ୋକୋକେ ହାର୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ ଇନ୍‍କୁକେ ବାପ୍ତିସ୍ମା ଇଦି ଲାଗିନ୍ତେ ଆଜାଃ ତାଃ ହିଜୁଃ ତାନ୍ ନେଲ୍ କେଃକୋୱାଏ, ଦୋ ଇନ୍‍କୁକେ କାଜିକେଦାଏ, “ହେ ଆପେ ବିଷ୍ ରାକାବ୍ ବିଙ୍ଗ୍ ରାଃ ହୋନ୍ ଲେକାନ୍‍କୋ, ଆପେକେ ଅକଏ ଉଦୁବାଃ ପେୟାଏ ଚି ହିଜୁଃ ତାନ୍ ଖିସ୍ ତେ ନିରେପେ?” ଏନା ଲାଗିନ୍ତେ ଦାଣ୍ଡ୍ ଏତେ ବାଞ୍ଚାଅଃ ନାଙ୍ଗ୍ ଏନ୍‍ଲେକା କାମି କାମିପେ ଏନାତେ ସାରିଅଗା ଚି ଆପେ ପାପ୍ କାମି ବାଗେ କେଦାପେ, ହାର୍ ଆପେ-ଆପେୟାଃ ମୋନ୍ ରେ ନେୟା ଆଲୋପେ ପାହୋମେୟା ଚି, ଆଲେୟାଃ ଆପୁ ଆବ୍ରାହାମ୍ ତାନିଃ। ଚିୟାଃଚି ଇଙ୍ଗ୍ ଆପେକେ କାଜିୟାପେ ତାନାଇଙ୍ଗ୍ ଚି, ପାର୍ମେଶ୍ଵାର୍ ନେ ଦିରି କୋଏତେ ଆବ୍ରାହାମ୍ ଲାଗିନ୍ ହୋନ୍‍ଗାଣାକୋ ଜାନାମ୍ ଧାଡ଼ିୟାଏ। ଆଡୋଃ ନାଆ ହାକେ ଦାରୁ ରାଃ ରେହେଃ ତାଃ ଦୋହୋଆ କାନା, ଏନାମେନ୍ତେ ଚି ଅକନ୍-ଅକନ୍ ଦାରୁ ବୁଗିନ୍ ଯଅ କାଏ ଆଉୱେୟାଏ, ଏନା ମାଗୋଃ ୱା ହାର୍ ସେଙ୍ଗେଲ୍ ରେ ଦୁଡ଼ିଙ୍ଗ୍ଅଃ ୱା। “ଇଙ୍ଗ୍ ଦୋ ଦାଆ ତେ ଆପେକେ ମୋନ୍ ରୁଆଡ଼୍ ରାଃ ବାପ୍ତିସ୍ମା ଏମାପେ ତାନିଙ୍ଗ୍, ମେନ୍ଦୋ ଅକଏ ଇଙ୍ଗ୍ଆଃ ତାୟୋମ୍ତେ ହିଜୁଃ ରାଃ ମେନିଜା, ଇନିଃ ଇଙ୍ଗ୍ଆଃ ତେ ପେଡ଼େଜାନ୍ ତାନିଃ; ଇଙ୍ଗ୍ ଇନିଜାଃ ଖାର୍ପା ଉଠାଓ ଲେକାନିଃ ହ ନାହାଲାଇଙ୍ଗ୍। ଇନିଃ ଆପେକେ ପାବିତାର୍ ଆତ୍ମା ଆଡୋଃ ସେଙ୍ଗେଲ୍ ତେ ବାପ୍ତିସ୍ମା ଏମାପେୟାଏ। ଇନିଜାଃ ହାଟାଃ ଇନିଜାଃ ତିଈ ରେ ମେନାଃ, ହାର୍ ଇନିଃ ଆଜାଃ କୋଲୋମ୍ ବେଶ୍ ଲେକାତେ ସାଫାୟାଏ, ହାର୍ ଆଜାଃ ଗହମ୍ କୋକେ ମୋଣା ରେ ହୁଣ୍ଡିୟାଏ ମେନ୍ଦୋ ହେଡ଼େକେ ଏନ୍ ସେଙ୍ଗେଲ୍ ରେ ଜୁଲେୟାଏ ଅକନାଃ କା ଇଣିଜୋଗା।” ଏନ୍ ସାମାୟ୍ ରେ ୟୀଶୁ ଗାଲିଲୀ ଜିଲ୍ଲା ଏତେ ଯାର୍ଦାନ୍ ନାଈ ରାଃ ଗେନା ରେ ଯୋହାନ୍ ତେ ବାପ୍ତିସ୍ମା ଇଦି ଲାଗିନ୍ତେ ହିଜୁଃ ଲେନାଏ। ମେନ୍ଦୋ ଯୋହାନ୍ ନେୟା କାଜିକେତେ ଇନିଃକେ ରକାଅ ଏଟେଃ କିଜାଏ, “ଇଙ୍ଗ୍‍କେ ଦୋ ଆମାଃ ତିଈ ତେ ବାପ୍ତିସ୍ମା ଇଦି ରାଃ ମେନାଃ, ହାର୍ ଆମ୍ ଇଙ୍ଗ୍ଆଃ ତାଃ ହିଜୁଃ କାନାମ୍?” ୟୀଶୁ ଇନିଃକେ ନେୟା କାଜିରୁଆଡ଼୍ କିଜାଏ, “ନାଆ ଦୋ ନେଲେକାଗି ହୋବାଅଃ ଚା, ଚିୟାଃଚି ଆବୁକେ ନେଲେକାଗି ସବେନ୍ ଧାରାମ୍-କାମି ପୁରା ରିକା ଠାଉକା ତାନାଃ।” ଏଣ୍ଡେ ଇନିଃ ଇନିଜାଃ କାଜି ମାନାତିଙ୍ଗ୍ ଜାନାଏ। ଏନା ତାୟୋମ୍ତେ ୟୀଶୁ ବାପ୍ତିସ୍ମା ଇଦିକେତେ ଇମ୍ତାଗି ଦାଆ ଏତେ ବିରିଃ କେତେ ହିଜୁଃ ଜାନାଏ, ହାର୍ ନେଲେପେ, ଇନିଜାଃ ଲାଗିନ୍ ରିମିଲ୍‍ଦିଶୁମ୍ ଖଲାଅ ଜାନା, ହାର୍ ଇନିଃ ପାର୍ମେଶ୍ଵାର୍ ରାଃ ଆତ୍ମା କେ ଦୁଦ୍‍ମୁଲ୍ ଲେକା ଆଡ଼୍‍ଗୁତାନ୍ ହାର୍ ଆଜାଃ ଚେତାନ୍ ରେ ହିଜୁଃ ତାନ୍ ନେଲ୍‍କେଦାଏ। ହାର୍ ନେଲେପେ, ପାର୍ମେଶ୍ଵାର୍ ରିମିଲ୍‍ଦିଶୁମ୍ ତେ କାଜିକେଦାଏ, “ନିଈ ଇଙ୍ଗ୍ଆଃ ଦୁଲାଡ଼୍ ହୋନ୍ ତାନିଃ, ଅକନିଃତେ ଇଙ୍ଗ୍ ଥିମ୍ବାଗି ସୁକୁ ମେନାଇଙ୍ଗ୍‍ୟା।” ଏନ୍ତେ ପାବିତାର୍ ଆତ୍ମା ୟୀଶୁ କେ ସୁନ୍‍ସାନ୍ ଜାଗା ତେ ଇଦିକିଜାଏ ଏନାତେ ଶାଏତାନ୍ ଲୋଃ ଇନିଜାଃ ପାରୀକ୍ଷା ହୋବାଅଃ କା। ଇନିଃ ଚାଲିଶ୍ ଦିନ୍, ହାର୍ ଚାଲିଶ୍ ନିଦା, ବେଗାର୍ ଜୋମ୍ କେତେ ତାଇଲେନାଏ, ଏନ୍ତେ ଇନିଃକେ ରେଙ୍ଗେଃ କିଜା। ଏନ୍ତେ ପାର୍ଖାଅନିଃ ମାନେ ଶାଏତାନ୍ ନାଡ଼େଏ ହିଜୁଃକେତେ ଇନିଃକେ କାଜିକେଦାଏ, “ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ ରେଦୋ, ନେ ଦିରିକୋକେ ଆଚୁଏମ୍ ଚି ଏନା ହୋଲୋଙ୍ଗ୍ ବାଇ କେନୋଃୱା।” ୟୀଶୁ କାଜିରୁଆଡ଼୍ କିଜାଏ, “ପାବିତାର୍ ପୁଥି ରେ ଅଲାକାନା, ହୋଡ଼ ଖାଲି ହୋଲୋଙ୍ଗ୍ ତେ ଭାଇର୍ କାହା ମେନ୍ଦୋ ପାର୍ମେଶ୍ଵାର୍ ରାଃ ମୋଚା ଏତେ ଅଡୋଙ୍ଗ୍ ତାନ୍ ସବେନ୍ ବାଚାନ୍ କେ ମାନାତିଙ୍ଗ୍ ରେ ଜୀହିଦ୍ ତାଇନୋଗାଏ।” ଏନ୍ତେ ଶାଏତାନ୍ ଇନିଃକେ ପାବିତାର୍ ନାଗାର୍ ତେ ଇଦିକିଜାଏ ହାର୍ ମାନ୍ଦିର୍ ରାଃ ଚୁଟାରେ ତିଙ୍ଗୁ କିଜାଏ, ହାର୍ ଇନିଃକେ କାଜିକେଦାଏ, “ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ ରେଦୋ, ଆମ୍ ଲାଥାର୍ ଦୋନ୍ ତାମ୍, ଚିୟାଃଚି ପାବିତାର୍ ପୁଥି ରେ ଅଲାକାନା, ‘ଇନିଃ ଆମାଃ ବିଷାୟ୍ ରେ ଆଜାଃ ସିର୍ମାଦାସୀ କୋକେ ଆନାଚୁ ଏମାକୋୱାଏ, ହାର୍ ଇନ୍‍କୁ ଆମ୍‍କେ ତିଈ ରେ ଲୋକା କେମେୟାକୋ, ହାର୍ ଆମ୍ ଆମାଃ କାଟା ରେ ଦିରିତେ କାମ୍ ଠୋଗୋଗାମ୍।’” ୟୀଶୁ ଇନିଃକେ କାଜିକେଦାଏ, “ନେୟା ହଗି ଅଲାକାନା, ‘ଆମ୍ ପ୍ରାଭୁ ଆମାଃ ପାର୍ମେଶ୍ଵାର୍ କେ ପାରୀକ୍ଷା ଆଲୋମ୍ ରିକାୟା।’” ଆଡୋଃ ମିଶା ଶାଏତାନ୍ ଇନିଃକେ ମିୟାଃ ଥିମ୍ବାଗି ଚେତାନ୍ ବୁରୁ ତେ ଇଦିକିଜାଏ ହାର୍ ଗୋଟା ଅତେଦିଶୁମ୍ ରାଃ ରାଇଜ୍ ହାର୍ ଏଣ୍ଡେରାଃ ଧାନ୍‍ସାମ୍ପାତି ଦେଖାଅ କେତେ ଇନିଃକେ କାଜିକେଦାଏ, “ଆଗାର୍ ଆମ୍ ଇକ୍ଡ଼ୁମ୍ କେତେ ଇଙ୍ଗ୍‍କେ ଜୋହାର୍ ‍ୟାମ୍ ରେଦୋ, ଇଙ୍ଗ୍ ନେୟା ସବେନାଃ ଆମ୍‍କେ ଏମାମେୟାଇଙ୍ଗ୍।” ଏନ୍ତେ ୟୀଶୁ ଇନିଃକେ କାଜିକେଦାଏ, “ହେ ଶାଏତାନ୍! ନେତାଃ ତେ ସେନୋଃ ମେ, ଚିୟାଃଚି ଅଲାକାନା, ‘ଆମ୍ ପ୍ରାଭୁ ଆମାଃ ପାର୍ମେଶ୍ଵାର୍ କେ ଜୋହାରି ମେ, ହାର୍ ଖାଲି ଇନିଜାଃ ଭାଇର୍ ଆରାଧାନା ରିକାଏମେ।’ ” ଏନ୍ତେ ଶାଏତାନ୍ ଇନିଜାଃ ନାଡ଼େଏ ତେ ସେନୋଃ ଜାନାଏ, ହାର୍ ସିର୍ମାଦାସୀକୋ ହିଜୁଃକେତେ ଇନିଜାଃ ସେୱା କେଦାକୋ। ଚିମ୍ତା ୟୀଶୁ ନେୟା ଆୟୁମ୍ କେଦାଏ ଚି ଯୋହାନ୍ କେ ଜେଲ୍ଅଡ଼୍ଆଃ ରେ ସାବ୍ ଆଦେର୍ କିଜାକୋ, ଏଣ୍ଡେ ଇନିଃ ୟାହୁଦୀୟା ଜିଲ୍ଲା ବାଗେ କେତେ ଗାଲିଲୀ ଜିଲ୍ଲା ତେ ସେନୋଃ ଜାନାଏ। ହାର୍ ଇନିଃ ନାଜ୍ରେଥ୍ ସାହାର୍ କେ ବାଗେ କେତେ କାଫାର୍ନାହୁମ୍ ସାହାର୍ ତେ, ଅକନାଃ ଗାଲିଲୀ ସାମୁଦାର୍ ଗେନା ରାଃ ଜାଗା ରେ ଜାବୁଲୁନ୍ ଜାତି ହୋଡ଼ୋକୋୱାଃ ହାର୍ ନାପ୍ତାଲୀ ଜାତି ହୋଡ଼ୋକୋୱାଃ ଅତେ ତାନାଃ, ସେନ୍ କେତେ ତାଇନ୍ ଜାନାଏ। ଏନାତେ ଅକନାଃ ୟାଶାୟାହ୍ ନାବୀ ରାଃ ହୋରାତେ କାଜିଲେନା ଏନା ପୁରାଜାନା। “ଜାବୁଲୁନ୍ ଜାତି ହୋଡ଼ୋକୋୱାଃ ହାର୍ ନାପ୍ତାଲୀ ଜାତି ହୋଡ଼ୋକୋୱାଃ ଅତେ, ଅକନାଃ ଗାଲିଲୀ ସାମୁଦାର୍ ରାଃ ନାଡ଼େଏଃ ହୋରା ଏତେ ଯାର୍ଦାନ୍ ନାଈ ଫାରୋମ୍ ଏଟାଃଜାତି କୋୱାଃ ଅତେ ଗାଲିଲୀ ଜିଲ୍ଲା ରେନ୍ କୋ ଆୟୁମେପେ, ଅକନ୍ ହୋଡ଼ୋକୋ ପାପ୍ ରାଃ ନୁବାଃ ରେ ଦୁବ୍ ଲେନ୍ ତାଇନାକୋ ଇନ୍‍କୁ ପାର୍ମେଶ୍ଵାର୍ ରାଃ ମାରାଙ୍ଗ୍ ମାସ୍କାଲ୍ ନେଲ୍ କେଦାକୋ; ହାର୍ ଅକନ୍‍କୋ ଗୋନୋଏଃ ରାଃ ଜାଗା ହାର୍ ଉମ୍ବୁଲ୍ ରେ ଦୁବ୍‍ଲେନ୍ ତାଇକେନାକୋ, ଇନ୍‍କୁୱାଃ ରେ ପାର୍ମେଶ୍ଵାର୍ ରାଃ ମାସ୍କାଲ୍ ଚାମ୍‍କାଓ ଜାନା।” ଏନ୍ ସାମାୟ୍ ତେ ୟୀଶୁ ପାର୍ଚାର୍ ରିକା ଆଡୋଃ ନେୟା କାଜି ଏଟେଃ କେଦାଏ, “ପାପ୍ କାମି ବାଗେ ତାପେ ଚିୟାଃଚି ସିର୍ମାଦିଶୁମ୍ ରାଃ ରାଇଜ୍ ନାଡ଼େଏ ହିଜୁଃ କାନା।” ମୁଶିଙ୍ଗ୍ ୟୀଶୁ ଗାଲିଲୀ ରାଃ ସାମୁଦାର୍ ଗେନା ରେ ହୋନୋର୍ ତାନ୍ ଲୋଃ ଇନିଃ ବାରିୟା ହାଗା କିନ୍ ମାନେ ଶିମୋନ୍ କେ ଅକନିଃ ପାତ୍ରାସ୍ କାଜିଅଃ ତାଇନାଏ, ହାର୍ ଇନିଜାଃ ହାଗା ଆନ୍ଦ୍ରିୟାସ୍ କେ ସାମୁଦାର୍ ରେ ଜାଲୋମ୍ ଦୁଡ଼ିଙ୍ଗ୍ ତାନ୍ ନେଲ୍ କେଃକୋୱାଏ, ଚିୟାଃଚି ଇନ୍‍କୁ ଝୋରା ତାଇକେନାକୋ। ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ପେ, ଏଣ୍ଡେ ଇଙ୍ଗ୍ ଆପେକେ ହୋଡ଼ୋକୋକେ ବିଶ୍ଵାସ୍ ରେ ଇଙ୍ଗ୍ଆଃ ତାଃ ଆଉ ଶିଖାଅ ପେୟାଇଙ୍ଗ୍।” ଇନ୍‍କୁ ଇମ୍ତାଗି ଜାଲୋମ୍ ତେ ହାକୁ ସାବ୍ କାମି କେ ବାଗେ କେତେ ଇନିଃକେ ଅତୋଙ୍ଗ୍ କିଜାକୋ। ଆଡୋଃ ଏନ୍ତାଃ ଏତେ ଆୟୁର୍ ସେନ୍ କେତେ, ୟୀଶୁ ଆଡୋଃ ବାରିୟା ହାଗାକିନ୍ କେ ମାନେ ଯାବ୍ଦୀ ରାଃ ହୋନ୍ ୟାକୁବ୍ ହାର୍ ଇନିଜାଃ ହାଗା ଯୋହାନ୍ କେ ଆକୋୱାଃ ଆପୁ ଯାବ୍ଦୀ ଲୋଃ ଡୋଙ୍ଗା ରେ ଆକୋୱାଃ ଜାଲୋମ୍ କେ ସୁଧ୍‍ରାଓ ତାନ୍ ନେଲ୍ କେଃକୋୱାଏ; ଆଡୋଃ ଇନ୍‍କୁକେ ହଗି କେଡ଼ା କେଃକୋୱାଏ। ଇନ୍‍କୁ ଇମ୍ତାଗି ଡୋଙ୍ଗା ଆଡୋଃ ଆକିନାଃ ଆପୁ କେ ବାଗିକେତେ ଇନିଃକେ ଅତୋଙ୍ଗ୍ କିଜାକୋ। ହାର୍ ୟୀଶୁ ସବେନ୍ ଗାଲିଲୀ ଜିଲ୍ଲା ରେ ହୋନୋର୍ ତାନ୍ ଲୋଃ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ଶିଖାଅତାନ୍ ଲୋଃ ହାର୍ ରାଇଜ୍ ରାଃ ସୁସାମାଚାର୍ ପାର୍ଚାର୍ ତାନ୍ ଲୋଃ, ହାର୍ ହୋଡ଼ୋ କୋୱାଃ ସବେନ୍ ରାକାମ୍ ରାଃ ବେମାରୀ ହାର୍ ନାରାଦୁରା କୋକେ ବେଶ୍ କୋ ତାଇକେନାଏ। ହାର୍ ଗୋଟା ସିରିୟା ଜିଲ୍ଲା ରେ ଇନିଜାଃ ନୁତୁମ୍ ଫାଏଲାଓ ଜାନା, ହାର୍ ହୋଡ଼ୋକୋ ସବେନ୍ ବେମାରୀ କୋକେ, ଅକନ୍ କୋକେ ସବେନ୍ ରାକାମ୍ ରାଃ ବେମାରୀ ହାର୍ ଦୁକୁ ରେ ଦୁକୁତାନ୍ ତାଇକେନାକୋ, ହାର୍ ଅକନ୍ କୋୱାଃ ରେ ଦୁଷ୍ଟାତ୍ମାକୋ ତାଇକେନାକୋ ହାର୍ ଆପ୍‍ସାନ୍ ବେମାରୀ ହାର୍ ଏକାଙ୍ଗୀ ବେମାରୀକୋକେ ଇନିଜାଃ ତାଃ ଆଉ କେଃକୋୱାକୋ ହାର୍ ଇନିଃ ଇନ୍‍କୁକେ ବେଶ୍ କେଃକୋୱାଏ। ଆଡୋଃ ଗାଲିଲୀ ଜିଲ୍ଲା ହାର୍ ଏନ୍ ଦାଶ୍‍ଠୁ ସାହାର୍ ଅକନାଃ ଦିକାପୁଲିସ୍ ଜିଲ୍ଲା କାଜିଅଃ ତାଇନା, ହାର୍ ୟୀରୁଶାଲେମ୍ ସାହାର୍ ହାର୍ ୟାହୁଦୀୟା ଜିଲ୍ଲା ତେ ହାର୍ ଯାର୍ଦାନ୍ ନାଈ ରାଃ ଫାରୋମ୍ ଏତେ ଭିଡ଼୍ ରାଃ ଭିଡ଼୍ ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ। ଚିମ୍ତାଙ୍ଗ୍ ୟୀଶୁ ମିଃଥିମ୍ବା ହୋଡ଼ୋକୋକେ ନେଲ୍ କେଦାଏ, ଇନିଃ ବୁରୁ ଚେତାନ୍ ରେ ସେନ୍ ଜାନାଏ। ଏନ୍ତେ ଚିମ୍ତାଙ୍ଗ୍ ଶିଖାଅ ଲାଗିନ୍ ଦୁବ୍ ଜାନାଏ ଆଜାଃ ଚେଲାକୋ ନାଡ଼େଏ ହିଜୁଃ ଜାନାକୋ। ଏନ୍ତେ ଇନିଃ ଇନ୍‍କୁକେ ଶିଖାଅ ଏଟେଃ କେଃକୋୱାଏ, ହାର୍ କାଜିକେଦାଏ, ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ମୋନ୍ ରେ ସାରିଧାଡ଼ିୟାକୋ ଯେ ଇନ୍‍କୁୱାଃ ଆତ୍ମିକ୍ ଦାର୍‍କାର୍ ପାର୍ମେଶ୍ଵାର୍ ଏତେ ନାମୋଗା, ଚିୟାଃଚି ସିର୍ମାଦିଶୁମ୍ ରାଃ ରାଇଜ୍ ହିନ୍‍କୁୱାଃ ଗି ତାନାଃ। ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ମୋନ୍ ରେ ଦୁକୁୱାକୋ, ଚିୟାଃଚି ହିନ୍‍କୁ ପାର୍ମେଶ୍ଵାର୍ ଏତେ ଶାନ୍ତି ନାମେୟାକୋ। ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ମୋନ୍ ରେ ନାରାମ୍ ତାନ୍‍କୋ, ଚିୟାଃଚି ହିନ୍‍କୁ ଅତେ ରେନ୍ ଆଧିକାରୀ ହୋବାୱାକୋ। ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ଧାରାମ୍-ହୋରା ରେ ଜିହୀଦୋ ଲାଗିନ୍ ରେଙ୍ଗେଃ ଆଡୋଃ ତେତାଙ୍ଗ୍ ତାନ୍‍କୋ, ଚିୟାଃଚି ପାର୍ମେଶ୍ଵାର୍ ହିନ୍‍କୁକେ ସୁକୁ ଏମାକୋୱାଏ। ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ଦାୟା ତେ ଫେରେଃ କାନାକୋ, ଚିୟାଃଚି ପାର୍ମେଶ୍ଵାର୍ ଆକୋ କେହ ଦାୟା କୋୱାଏ। ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ମୋନ୍ ରେ ପାର୍ମେଶ୍ଵାର୍ କେ ମାନାତିଙ୍ଗ୍ ନାଙ୍ଗ୍ ସାନାଙ୍ଗାକୋ, ଚିୟାଃଚି ଆକୋ ପାର୍ମେଶ୍ଵାର୍ କେ ନେନେଲ୍ ଧାଡ଼ିୟାକୋ। ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ଶାନ୍ତି ବାଇ ତାନ୍‍କୋ, ଚିୟାଃଚି ଇନ୍‍କୁ ପାର୍ମେଶ୍ଵାର୍ ରାଃ ହୋନ୍ କାଜିଅଃୱାକୋ। ଧାନ୍ୟା ହିନ୍‍କୁ ତାନ୍‍କୋ, ଅକନ୍‍କୋ ଧାରାମ୍-ହୋରା ରେ ଜିହୀଦୋ ଲାଗିନ୍ତେ ସାତାୱାଟ୍ କୋ ନାମେୟା, ଚିୟାଃଚି ସିର୍ମାଦିଶୁମ୍ ରାଃ ରାଇଜ୍ ଆକୋ ଲାଗିନ୍ତେ ଗି ତାନାଃ। ଧାନ୍ୟା ଆପେ ତାନ୍‍ପେ, ଚିମ୍ତା ହୋଡ଼ୋକୋ ଇଙ୍ଗ୍ଆଃ ଚେଲା ତାନ୍‍ପେ ମେନ୍ତେ ଆପେକେ ନିନ୍ଦା ପେୟାକୋ ଆଡୋଃ ସାତାଅ ପେୟାକୋ ହାର୍ ଲୋଗୋ କାଜି କାଜିକେତେ ଆପେୟାଃ ବିରୋଧ୍ ରେ ସବେନ୍ ରାକାମ୍ ରାଃ ବୁରାଇ ବାକାଣ୍ କୋ କାଜିୟାକୋ। ଏଣ୍ଡେ ରାଶିକାଅଃ ପେ ଆଡୋଃ ପୁରାଗି ସୁକୁଅଃ ପେ, ଚିୟାଃଚି ଆପେଲାଗିନ୍ ସିର୍ମାଦିଶୁମ୍ ରେ ମାରାଙ୍ଗ୍ ଯଅ ଦୋହୋକାନା। ଏନାଲାଗିନ୍ ଚି ଇନ୍‍କୁ ହେନ୍ ନାବୀ କୋକେ ଅକନ୍‍କୋ ଆପେ ତେ ସିଦାରେ ତାଇନ୍ ତାଇକେନାକୋ ନେକା ଗି ସାତାଅ ଲେଃକୋୱାକୋ। ଆପେ ହୋଡ଼ୋକୋ ଲାଗିନ୍ ଆପେୟାଃ ରେ ଅତେ ରାଃ ବୁଲୁଙ୍ଗ୍ ଲେକା ଗୁନ୍ ମାଣ୍ଡାଅ ପେ; ମେନ୍ଦୋ ଆଗାର୍ ବୁଲୁଙ୍ଗ୍ ରାଃ ଶିବିଲ୍ ବାଗ୍‍ଡ଼ାଅ କେନୋଃ ରେଦୋ, ଏନା ଆଡୋଃ ଚିକାନ୍ ଜିନିଷ୍ କେ ବୁଲୁଙ୍ଗ୍ଅଗା? ଆଡୋଃ ହେନା ଜେତାନ୍ କାମି ରାଃ ହ ନାହାଲା, ବାହାରି ରେ ଦୁଡ଼ିଙ୍ଗ୍ ୱା ଭାଇର୍ ଆଡୋଃ ହୋଡ଼ୋକୋୱାଃ କାଟା ଲାଥାର୍ ରେ ତିକାୱା। ଆପେ ଅତେଦିଶୁମ୍ ରେନ୍ ହୋଡ଼ୋକୋ ଲାଗିନ୍ ମାସ୍କାଲ୍ ଲେକା ତାନ୍‍ପେ। ଅକନ୍ ନାଗାର୍ ବୁରୁ ରେ ବାଇକେତେ ମେନାଃ ଏନା କା ଲୁକୁଅଗା। ହୋଡ଼ୋକୋ ବାତୀ ଜୁଲ୍ କେତେ ପାଇଲା ଲାଥାର୍ ରେ କାହା ମେନ୍ଦୋ ପାଖା ଚେତାନ୍ ରେ ମାଣ୍ଡାଅୟାକୋ, ଏନାତେ ଏନା ଅଡ଼୍ଆଃ ରେନ୍ ସବେନ୍ କୋକେ ମାସ୍କାଲ୍ ସେଟେର୍ ୟାଏ। ଏନ୍‍ଲେକାଗି ଆପେୟାଃ ମାସ୍କାଲ୍ ହୋଡ଼ୋକୋୱାଃ ଥାଲା ରେ ଯୁନୁଲୋଃକା ଚି ଇନ୍‍କୁ ଆପେୟାଃ ବୁଗିନ୍ କାମି କୋକେ ନେଲ୍‍କେତେ ଆପେୟାଃ ଆବା କେ, ଯେ ସିର୍ମାଦିଶୁମ୍ ରେ ମେନାଇଜା, ମାନାରାଙ୍ଗ୍ ରିକା ୟାକୋ। ନେୟା ଆଲୋପେ ବୁଝାଅଃକା, ଚି ଇଙ୍ଗ୍ ମୁଶା ନାବୀ ରାଃ ଆଇନ୍ କେ ୟାଦୋ ପାର୍ମେଶ୍ଵାର୍ ରାଃ ନାବୀ କୋୱାଃ ପୁଥି କେ ମେଟାଅ ଲାଗିନ୍ ହିଜୁଃ କାନିଙ୍ଗ୍, ମେଟାଅ ଲାଗିନ୍ କାହା ମେନ୍ଦୋ ପୁରା ଲାଗିନ୍ ହିଜୁଃ କାନିଙ୍ଗ୍। ଚିୟାଃଚି ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍, ଚି ଯେ ହୁଲାଙ୍ଗ୍ ସାନ୍ ରିମିଲ୍‍ଦିଶୁମ୍ ହାର୍ ଅତେ ବାଇକେତେ ତାଇନୋଃୱାଃ, ହେନ୍ ହୁଲାଙ୍ଗ୍ ସାନ୍ ପାର୍ମେଶ୍ଵାର୍ ରାଃ ଆଇନ୍ ଏତେ ମିୟାଃ ମାତ୍ରା ୟାଦୋ ମିୟାଃ ବିନ୍ଦୁ ହ କା ମେଟାଅଃୱା। ସବେନାଃ ଅଲାକାନ୍ ପୁରାଅଗା। ଏନାମେନ୍ତେ ଜାହାଁଏ ହ ନେ ହୁଡିଙ୍ଗ୍ ହେତେ ହୁଡିଙ୍ଗ୍ ଆନାଚୁ କୋଏତେ ଜାହାନ୍ ମିୟାଃ କେହ କାଏ ମାନାତିଙ୍ଗ୍‍ୟାଏ, ହାର୍ ଏନ୍‍ଲେକାଗି ହୋଡ଼ୋକୋକେ ଶିଖାଅକୋୱାଏ, ଇନିଃ ସିର୍ମାଦିଶୁମ୍ ରାଃ ରାଇଜ୍ ରେ ସବେନ୍ ଏତେ ହୁଡିଙ୍ଗ୍ କାଜିୟୋଗାଏ, ମେନ୍ଦୋ ଜାହାଁଏ ହ ହେନ୍ ଆନାଚୁ କୋକେ ମାନାତିଙ୍ଗ୍‍ୟାଏ, ହାର୍ ହିନ୍‍କୁ କେ ଶିଖାଅକୋୱାଏ, ହିନିଃ ଗି ସିର୍ମାଦିଶୁମ୍ ରାଃ ରାଇଜ୍ ରେ ମାରାଙ୍ଗ୍ କାଜିୟୋଗାଏ। ଚିୟାଃଚି ଇଙ୍ଗ୍ ଆପେକେ କାଜିତାନିଙ୍ଗ୍, ଚି ଆଗାର୍ ଆପେୟାଃ ଧାରାମ୍-କାମି ଆଇନ୍ ଗୁରୁ କୋୱାଃ ହାର୍ ଫାରିସୀ ହୋଡ଼ୋକୋୱାଃ ଧାରାମ୍-କାମି ତେ ବାଢ଼ାଅ କେତେ କା ହୋବାଅଃ ରେ, ଏଣ୍ଡେ ଆପେ ସିର୍ମାଦିଶୁମ୍ ରାଃ ରାଇଜ୍ ରେ ଚିଉଲା ହ ବୋଲୋ କାପେ ଧାଡ଼ିୟା। “ଆପେ ଆୟୁମ୍ ଛାବା କାଦାପେ ଚି, ମୁଶା ନାବୀ ସିଦା ସାମାୟ୍ ରେନ୍ ହୋଡ଼ୋକୋକେ କାଜି ଲେଃତାଇକେନାଏ ଚି, ‘ହୋଡ଼ ଆଲୋପେ ଗୋଏଃ ୟା,’ ହାର୍ ‘ଜାହାଁଏ ହ ହୋଡ଼ ଗୋଏଃ ୟାଏ ହିନିଃ ବିଚାର୍ ଜାଗା ରେ ଦାଣ୍ଡ୍ ନାମେୟାଏ।’ ମେନ୍ଦୋ ଇଙ୍ଗ୍ ଆପେକେ କାଜିତାନିଙ୍ଗ୍, ଚି ଜାହାଁଏ ହ ଆଜାଃ ହାଗା ଚେତାନ୍ ରେ ଖିସ୍ ଦୋହୋୟାଏ, ହିନିଃ ବିଚାର୍ ଜାଗା ରେ ଦାଣ୍ଡ୍ ନାମେୟାଏ, ଆଡୋଃ ଜାହାଁଏ ହ ଆଜାଃ ହାଗା କେ ବେକାମି ହୋଡ଼ କାଜିୟାଏ, ହିନିଃ ମାରାଙ୍ଗ୍‍ସାଭା ଜାଗା ରେ ଦାଣ୍ଡ୍ ନାମେୟାଏ, ଆଡୋଃ ଜାହାଁଏ ହ କାଜିୟାଏ ‘ଆରେ ଡୋଣ୍ଡୋ’ ହିନିଃ ନାରାକ୍ ସେଙ୍ଗେଲ୍ ରେ ଦାଣ୍ଡ୍ ନାମେୟାଏ। ଏନାମେନ୍ତେ ଆଗାର୍ ଆମ୍ ଆମାଃ ଭେଁଟ୍ ବେଦୀ ସାମାନାଙ୍ଗ୍ ଆଉୱେ ରେ, ଆଡୋଃ ହେନ୍ତାଃ ଆମ୍‍କେ ମୋନେ ହିଜୁଃ ରେ, ଚି ଆମାଃ ହାଗା ମୋନ୍ ରେ ଆମାଃ ଲାଗିନ୍ ଜାହାନାଃ ବିରୋଧ୍ ତାଇନ୍ ରେଦୋ, ଏଣ୍ଡେ ଆମ୍ ଆମାଃ ଭେଁଟ୍ ହେନ୍ତାଃ ଗି ବେଦୀ ସାମାନାଙ୍ଗ୍ ରେ ବାଗିତାମେ, ହାର୍ ସେନ୍ କେତେ ସିଦା ଆମାଃ ହାଗା ଲୋଃ ବାପାଇ ଲେନ୍‍ମେ ଏନା ତାୟୋମ୍ତେ ହିଜୁଃକେତେ ଆମାଃ ଭେଁଟ୍ ରାକାବେମେ। ଚିମିନ୍ ଜାକେଦ୍ ଆମ୍ ଆମାଃ ଦୋଷ୍ ଲାଗାଅନିଃ ଲୋଃ ହୋରା ରେ ମେନାମା, ଆଜାଃ ଲୋଃ ଝାଟ୍‍ପାଟ୍ ବାପାଇ କେନୋଃମେ ନେକା ଆଲୋକା ହୋବାଅଃ ଚା ଚି ଦୋଷ୍ ଲାଗାଅନିଃ ଆମ୍‍କେ ବିଚାର୍‍ନିଃ କେ ସାବାମେୟାଏ, ହାର୍ ବିଚାର୍‍ନିଃ ଆମ୍‍କେ ସିପାହୀ କେ ସାବାମେୟାଏ, ହାର୍ ଆମ୍ ଜେଲ୍ଅଡ଼୍ଆଃ ରେ ଆଦେର୍ କେନୋଗାମ୍। ଇଙ୍ଗ୍ ଆମ୍‍କେ ସାର୍ତି କାଜିତାନିଙ୍ଗ୍ ଚି ଯେ ହୁଲାଙ୍ଗ୍ ସାନ୍ ଆମ୍ କାଟିଃ ତେ କାଟିଃ ପାଏସା କେ କାମ୍ ଫେରେଃ ରୁଆଡ଼େୟା ଏନ୍ ହୁଲାଙ୍ଗ୍ ସାନ୍ ହେନ୍ତାଃ ଏତେ କାମ୍ ରାଡ଼ା ଧାଡ଼ିୟୋଗା।” “ଆପେ ଆୟୁମ୍ ଛାବା କାଦାପେ ଚି ପାର୍ମେଶ୍ଵାର୍ ରାଃ ଆନାଚୁ ରେ କାଜିୟାକାନ୍ ତାଇକେନା, ‘ବ୍ୟାଭିଚାର୍ ଆଲୋପେ ରିକାୟା।’ ମେନ୍ଦୋ ଇଙ୍ଗ୍ ଆପେକେ ନେୟା କାଜି ତାନିଙ୍ଗ୍, ଚି ଜାହାଁଏ ହ ଜାହାନ୍ କୁଡ଼ି କେ ଏତ୍କାନ୍ ସାନାଙ୍ଗ୍ ତେ ନେଲେୟାଏ ହିନିଃ ଆଜାଃ ମୋନ୍ ରେ ଆଜାଃ ଲୋଃ ବ୍ୟାଭିଚାର୍ ରିକା କେଦାଏ। ଆଗାର୍ ଆମାଃ ଜୋମ୍ ମେଏଃ ତେ ଆମ୍‍କେ ପାପ୍ ରିକା ସାନାଙ୍ଗ୍ ରେଦୋ, ଏଣ୍ଡେ ଏନାକେ ଅଡୋଙ୍ଗ୍ ଦୁଡ଼ିଙ୍ଗେମେ, ଚିୟାଃଚି ଆମାଃ ଲାଗିନ୍ ନେୟା ବୁଗିନ୍ ତାନାଃ ଚି ଆମାଃ ହୋଡ଼ମୋ ଏତେ ମିୟାଃ ଆଙ୍ଗ୍ ନାଷ୍ଟ୍ ହୋବାଅଃଚା, ହାର୍ ଆମାଃ ପୁରା ହୋଡ଼ମୋ ନାରାକ୍ ରେ ଆଲୋ ଦୁଡ଼ିଙ୍ଗୋଃ ଚା। ଆଗାର୍ ଆମାଃ ଜୋମ୍ ତିଈ ତେ ଆମ୍‍କେ ପାପ୍ ରିକା ସାନାଙ୍ଗ୍ ରେଦୋ, ଏଣ୍ଡେ ଏନାକେ ମାଆ ଦୁଡ଼ିଙ୍ଗେମେ, ଚିୟାଃଚି ଆମାଃ ଲାଗିନ୍ ନେୟା ବେଶ୍ ତାନାଃ, ଚି ଆମାଃ ହୋଡ଼ମୋ ଏତେ ମିୟାଃ ଆଙ୍ଗ୍ ନାଷ୍ଟ୍ ହୋବାଅଃ ଚା ଆଡୋଃ ପୁରା ହୋଡ଼ମୋ ନାରାକ୍ ରେ କା ଦୁଡ଼ିଙ୍ଗୋଃ ଚା।” “ନେୟା ହଗି ମୋଶା ନାବୀ ଅଲାକାଦାଏ, ଜାହାଁଏ ହ ଆଜାଃ କୁଡ଼ି କେ ବାଗି ସାନାଙ୍ଗ୍ ରେଦୋ, ଆଏଃକେ ବାଗେ ଚିଠି ଏମେଚାଏ। ମେନ୍ଦୋ ଇଙ୍ଗ୍ ଆପେକେ ନେୟା କାଜିତାନିଙ୍ଗ୍ ଚି ଜାହାଁଏ ହ ଆଜାଃ କୁଡ଼ି କେ ବ୍ୟାଭିଚାର୍ ଭୁଲ୍ ବାଗେ କେତେ ଏଟାଃ ଆଡୋଃ କାରାନ୍ ତେ ବାଗେ ତାନାଏ, ଏଣ୍ଡେ ହିନିଃ ଆଏଃକେ ବ୍ୟାଭିଚାର୍ ରିକାୟି ତାନାଏ, ହାର୍ ଜାହାଁଏ ହ ଏନ୍ ବାଗେକାନ୍ ଏରା କେ ଆଣାଦୀ ତାନାଏ, ହିନିଃ ବ୍ୟାଭିଚାର୍ ରିକା ତାନାଏ।” ଆଡୋଃ ଗି ଆପେ ଆୟୁମ୍ ଛାବା କାଦାପେ ଚି, ମୁଶା ନାବୀ ସିଦା ସାମାୟ୍ ରେନ୍ ହୋଡ଼ୋକୋକେ କାଜି ଲେଃତାଇକେନାଏ ଚି, “ହିହିଡ଼୍ କିରିୟା ଆଲୋପେ ଜୋମେୟା, ମେନ୍ଦୋ ପ୍ରାଭୁ ଲାଗିନ୍ ଆପେୟାଃ କିରିୟା ପୁରା ରିକାଏପେ।” ମେନ୍ଦୋ ଇଙ୍ଗ୍ ଆପେକେ ନେୟା କାଜିତାନିଙ୍ଗ୍, ଚି ଚିଉଲା ହ କିରିୟା ଆଲୋପେ ଜୋମେୟା, ନାଦୋ ସିର୍ମାଦିଶୁମ୍ ରାଃ, ଚିୟାଃଚି ହେନା ପାର୍ମେଶ୍ଵାର୍ ରାଃ ସିଂହାସାନ୍ ତାନାଃ। ନା ଅତେ ରାଃ, ଚିୟାଃଚି ହେନା ଆୟାଃ କାଟା ରାଃ ଗାଣ୍ଡୁ ତାନାଃ, ନାଦୋ ୟୀରୁଶାଲେମ୍ ରାଃ, ଚିୟାଃଚି ଏନା ମାହାରାଜା ରାଃ ହାତୁ ତାନାଃ। ଆପେୟାଃ ବୋଅ ରାଃ କିରିୟା ହ ଆଲୋପେ ଜୋମେୟା ଚିୟାଃଚି ଆପେ ମିୟାଃ ଉବ୍ କେହ ପୁଣ୍ଡୀ, ନାଦୋ ହେନ୍ଦେ ରିକା କାପେ ଧାଡ଼ିୟା। ମେନ୍ଦୋ ଆପେୟାଃ ବାକାଣ୍ ହାଁ ରାଃ ହାଁ, ୟାଦୋ କାହା ରାଃ କାହା ହୋବାଅଃକା; ଚିୟାଃଚି ଅକନାଃ ନେୟାତେ ଥିମ୍ବା ହୋବାୱା ଏନା ଦୁଷ୍ଟ ଶାଏତାନ୍ ଏତେ ହୋବାୱା। ଆପେ ଆୟୁମ୍ ଛାବା କାଦାପେ, ଚି ମୁଶା ନାବୀ ରାଃ ଆଇନ୍ ରେ କାଜିକାନ୍ ତାଇକେନା, ମେଏଃ ରାଃ ବାଦ୍‍ଲି ରେ ମେଏଃ, ଆଡୋଃ ଡାଟା ରାଃ ବାଦ୍‍ଲି ରେ ଡାଟା। ମେନ୍ଦୋ ଇଙ୍ଗ୍ ଆପେକେ ନେୟା କାଜିତାନିଙ୍ଗ୍ ଚି, ଏତ୍କାନ୍ ହୋଡ଼ ରାଃ ସାମାନାଙ୍ଗ୍ ଆଲୋପେ ରିକାୟା, ମେନ୍ଦୋ ଜାହାଁଏ ହ ଆପେୟାଃ ଜୋମ୍ ଯୋୱା ରେ ଚାଟ୍‍କାନ୍ ପେ ରେଦୋ, ହୀନିଜାଃ ପାଡ଼୍ ଏଟାଃ ଯୋୱା କେହ ଦେଖାୱିପେ। ଆଗାର୍ ଜେତାଏ ହ ଆପେ ଲୋଃ ବିଚାର୍ ଜାଗା ରେ କାଜି ଏପେଗେର୍ କେତେ ଆପେୟାଃ ହୋଡ଼ମୋ ଲିଜାଃ ଇଦି ସାନାଙ୍ଗ୍ ରେଦୋ, ଇନିଃକେ ଚାଦାର୍ ହ ଇଦି ରିକାୟିପେ। ଜାହାଁଏ ହ ଆମ୍‍କେ ଜାବ୍ରାଇ ମିୟାଃ କୋଶ୍ ଇଦିକେମ୍ ରେଦୋ, ଏଣ୍ଡେ ଆୟାଃ ଲୋଃ ବାରିୟା କୋଶ୍ ସେନୋଃ କୋମେ। ଜାହାଁଏ ଆପେକେ ଆସିରେ ଦୋ, ଇନିଃକେ ଏମାଇପେ, ହାର୍ ଜାହାଁଏ ହ ଆପେକେ ଉଧାର୍ ଆସିରେ ଦୋ, ହିନିଃକେ ଆଲୋପେ କୁଣ୍ଡାମି ପେ। ଆପେ ଆୟୁମ୍ ଛାବା କାଦାପେ ଚି, ମୁଶା ନାବୀ ରାଃ ଆଇନ୍ ରେ କାଜିକାନ୍ ତାଇକେନା, “ଚି ଆପେୟାଃ ନାଡ଼େଏଜାପାଃ ରେନ୍ ହୋଡ଼ୋକୋ ଲୋଃ ଦୁଲାଡ଼୍ ଦହଏପେ, ଆଡୋଃ ଆପେୟାଃ ବାଇରୀ ଲୋଃ ଖିସ୍।” ମେନ୍ଦୋ ଇଙ୍ଗ୍ ଆପେକେ ନେୟା କାଜିତାନିଙ୍ଗ୍ ଚି, ଆପେୟାଃ ବାଇରୀ ଲୋଃ ଦୁଲାଡ଼୍ ଦହଏପେ, ହାର୍ ଆପେୟାଃ ସାତାଅ ଏହେମ୍ ନିଈ ଲାଗିନ୍ ବିନ୍ତି ରିକାଏପେ। ଏନାତେ ଆପେ ଆପେୟାଃ ସିର୍ମାଦିଶୁମ୍ ରେନ୍ ଆପୁ ରାଃ ସାନ୍ତାନ୍ ପେ ବାଇୟୋଗା। ଚିୟାଃଚି ହିନିଃ ବୁଗିନ୍ ହାର୍ ଖାରାପ୍ ବାରାନ୍ କୋ ଲାଗିନ୍ ଶିଙ୍ଗି ତୁରେୟାଏ, ଆଡୋଃ ଧାର୍ମୀ ହାର୍ ଆଧାର୍ମୀ ବାରାନ୍ କୋ ଲାଗିନ୍ ଦାଆ ଗାମାୟାଏ। ଚିୟାଃଚି ଆଗାର୍ ଆପେ ଆପେୟାଃ ଦୁଲାଡ଼୍ ମାଣ୍ଡାଅ ତାନ୍ କୋଲୋଃ ଭାଇର୍ ଦୁଲାଡ଼୍ ମାଣ୍ଡାଅ ୟାପେ, ଏଣ୍ଡେ ଆପେମାନ୍ କୋକେ ଚିକାନ୍ ଯଅ ନାମୋଗା? ଚିନାଃ ମାଲ୍ ହାରୋମ୍ କୋ ହ ନେକା କାକୋ ରିକାୟା? ଆଗାର୍ ଆପେ ଆପେୟାଃ ହାଗାକୋକେ ଭାଇର୍ ଜୋହାର୍ ପେ ରିକାୟା, ଏଣ୍ଡେ ଅକନ୍ ମାରାଙ୍ଗ୍ କାମି ପେ ରିକାୟା? ଚିନାଃ ଏଟାଃଜାତି କୋ ହ ନେକା କାକୋ ରିକାୟା? ଏନାମେନ୍ତେ ହୋବାଅଃ ଚାହି ଚି ଆପେ ସବେନ୍ ଇମ୍ତା ବୁଗିନ୍ କାମି ରିକାଏପେ, ଜେଲେକା ଆପେୟାଃ ସିର୍ମାଦିଶୁମ୍ ରେନ୍ ଆପୁ ସବେନ୍ ଇମ୍ତା ବୁଗିନ୍ କାମି ରିକାୟାଏ। ହୋସିଆର୍ ତାଇନ୍‍ପେ! ଆପେ ହୋଡ଼ୋକୋକେ ଦେଖାଅ ଲାଗିନ୍ ଆପେୟାଃ ଧାରାମ୍ ରାଃ କାମି ଆଲୋପେ ରିକାୟା, କାରେ ଦୋ ସିର୍ମାଦିଶୁମ୍ ରେନ୍ ଆପୁ ଏତେ ଜେତାନ୍ ଯଅ କାପେ ନାମେୟା। ଏନାଲାଗିନ୍ ଚିମ୍ତାଙ୍ଗ୍ ଆପେ ଦାନ୍ ପେ ଏମେୟା, ଦୋ ଆପାନାଃ ଆୟୁର୍ ରେ ତୁର୍ହୀ ବାଜା ଲେକା ସବେନ୍ କୋକେ ଆଲୋପେ ଉଦୁପ୍ ବାଡ଼ାୟା, ଜେଲେକା ବେଦାହୋଡ଼ୋକୋ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ହାର୍ ହୋରା ରେ ରିକା ୟାକୋ, ଏନାତେ ହୋଡ଼ୋକୋ ଇନ୍‍କୁୱାଃ ମାନାରାଙ୍ଗ୍ ରିକା ୟାକୋ। ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଚି ଇନ୍‍କୁ ଆକୋୱାଃ ଯଅ ନାମ୍ ଛାବା କେଦାକୋ। ମେନ୍ଦୋ ଚିମ୍ତାଙ୍ଗ୍ ଆମ୍ ଦାନ୍ ଏମେୟାମ୍, ଦୋ ଅକନାଃ ଆମାଃ ଜୋମ୍ ତିଈ ରିକା ତାନାଏ, ଏନା ଆମାଃ ଲେଙ୍ଗା ତିଈ ଆଲୋକାଏ ସାରିକା। ଏନାତେ ଆମାଃ ଦାନ୍ ଉକୁ ରେ ତାଇନୋଃୱା ଏନ୍ତେ ଆମାଃ ଆପୁ ଅକନିଃ ଉକୁକେତେ ନେଲ୍‍ମେ ତାନାଏ ଆମ୍‍କେ ଯଅ ଏମାମେୟାଏ। ଚିମ୍ତାଙ୍ଗ୍ ଆପେ ବିନ୍ତିୟାପେ, ଦୋ ବେଦାହୋଡ଼ୋ କୋ ଲେକା ଆଲୋପେ ବାଇୟୋଃୱା, ଚିୟାଃଚି ହୋଡ଼ୋକୋକେ ଦେଖାଅ ଲାଗିନ୍ ବିନ୍ତିଅଡ଼୍ଆଃ ରେ ହାର୍ ସାଣ୍ଡାକ୍ ରାଃ ଛୋକବିୟୁର୍ ତାଃ ରେ ତିଙ୍ଗୁ କେତେ ବିନ୍ତି ଲାଗିନ୍ ଇନ୍‍କୁକେ ବେଶ୍ ଆଦାକୋୱା। ଇଙ୍ଗ୍ ଆପେକେ ସାର୍ତି କାଜି ତାନିଙ୍ଗ୍ ଚି ଇନ୍‍କୁ ଆକୋୱାଃ ଯଅ ନାମ୍ ଛାବା କେଦାକୋ। ମେନ୍ଦୋ ଚିମ୍ତାଙ୍ଗ୍ ଆମ୍ ବିନ୍ତିୟାମ୍, ଦୋ ଆମ୍ କୋଠୋରୀ ରେ ସେନ୍ ମେ, ହାର୍ ଦୁହାର୍ ବାନ୍ଦ୍ କେତେ ଆମାଃ ଆପୁ କେ ବିନ୍ତି ମେ ଅକନିଃ କେ ଜେତାଏ କାକୋ ନେଲ୍ ଧାଡ଼ିୟା। ଏଣ୍ଡେ ଆମ୍‍କେ ଜେତାଏ କାକୋ ନେଲ୍ ଧାଡ଼ି ରେହ ଆମାଃ ଆପୁ ଆମ୍‍କେ ନେଲ୍ ଧାଡ଼ିୟାଏ ହାର୍ ଯଅ ଏମାମେୟାଏ। ଚିମ୍ତାଙ୍ଗ୍ ଆପେ ବିନ୍ତି ୟାପେ ଏଟାଃଜାତିକୋ ଲେକା ବାକ୍-ବାକ୍ ଆଲୋପେ ରିକାୟା ଚିୟାଃଚି ଇନ୍‍କୁ ପାହୋମ୍ ୟାକୋ ଚି ଇନ୍‍କୁ ଥିମ୍ବାଗି କାଜିଲେରେ ଇନ୍‍କୁୱାଃ ବିନ୍ତି ଆୟୁମୋଗା। ଏନାଲାଗିନ୍, ଇନ୍‍କୁୱାଃ ଲେକା ଆଲୋପେ ବାଇୟୋଃୱା, ଚିୟାଃଚି ଆପେୟାଃ ଆପୁ ଆପେୟାଃ ଆସି ରାଃ ସିଦା ତେ ସାରିୟାଏ ଚି ଆପେକେ ଚିନାଃ-ଚିନାଃ ଦାର୍‍କାର୍ ମେନାଃ। ଏନାମେନ୍ତେ, ଆପେ ନେଲେକାତେ ବିନ୍ତି ରିକାଏପେ, ହେ ଆଲେୟାଃ ଆପୁ, ଆମ୍ ଯେ ସିର୍ମାଦିଶୁମ୍ ରେ ମେନାମେୟା; ଆମାଃ ନୁତୁମ୍ ପାବିତାର୍ ମାନାତିଙ୍ଗ୍ ଅଃକା। ଆମାଃ ରାଇଜ୍ ହିଜୁଃ କା। ଆମାଃ ସାନାଙ୍ଗ୍ ଜେଲେକା ସିର୍ମାଦିଶୁମ୍ ରାଃ ରାଇଜ୍ ରେ ପୁରାଅଃ ତାନା, ଏନ୍‍ଲେକାଗି ଅତେ ରେହ ହୋବାଅଃ କା। ଆଲେୟାଃ ଦିନ୍ ଭାଇର୍ ରାଃ ହୋଲୋଙ୍ଗ୍ ଇସିଙ୍ଗ୍ ଆଲେକେ ଏମାଲେମ୍। ଆଡୋଃ ଜେଲେକା ଆଲେ ଆଲେୟାଃ ବିରୋଧ୍ ରେ ଗାଲ୍ତି କାମି କାମିକାନ୍ ହୋଡ଼ୋକୋକେ ଛାମା କାଦାଲେ, ଏନ୍‍ଲେକାଗି ଆମ୍ ହ ଆଲେୟାଃ ଗାଲ୍ତି କାମି କୋକେ ଛାମା ତାମେ। ହାର୍ ଆଲେକେ ପାରୀକ୍ଷା ରେ ଆଲୋମ୍ ଉୟୁଃ ଲେୟା, ମେନ୍ଦୋ ଦୁଷ୍ଟ ଶାଏତାନ୍ ଏତେ ବାଞ୍ଚାଅ ଲେମ୍, ଚିୟାଃଚି ରାଇଜ୍ ଆଡୋଃ ପେଡ଼େଏ ହାର୍ ମାନାରାଙ୍ଗ୍ ଜାନାଓ ଆମାଃ ଗି ତାନାଃ। ଆମୀନ୍। ଏନାଲାଗିନ୍ ଆଗାର୍ ଆପେ ହୋଡ଼ୋକୋୱାଃ ଗାଲ୍ତି କାମି କୋକେ ଛାମା ରିକାୟାପେ, ଏଣ୍ଡେ ଆପେୟାଃ ସିର୍ମାଦିଶୁମ୍ ରେନ୍ ଆପୁ ହ ଆପେକେ ଛାମା ରିକାୟାଏ। ହାର୍ ଆଗାର୍ ଆପେ ହୋଡ଼ୋକୋୱାଃ ଗାଲ୍ତି କାମି କୋକେ ଛାମା କାପେ ରିକାୟା, ଏଣ୍ଡେ ଆପେୟାଃ ଆପୁ ହ ଆପେୟାଃ ଗାଲ୍ତି କାମି କୋକେ କାଏ ଛାମା ରିକାୟାଏ। ଚିମ୍ତାଙ୍ଗ୍ ଆପେ ଉପାସ୍ ଦୋହୋୟାପେ, ଦୋ ବେଦାହୋଡ଼ୋ କୋୱାଃ ଲେକା ଆପେୟାଃ ମେଏଃମୁହାଡ଼୍ ଉଦାସ୍ ଆଲୋ ନେଲୋଃକା, ଚିୟାଃଚି ଇନ୍‍କୁ ଆକୋୱାଃ ମେଏଃମୁହାଡ଼୍ କେ ଦୁକୁ ରେ ତାଇନ୍ ଲେକା ବାଇକେତେ ତାଇନାକୋ; ଏନାତେ ହୋଡ଼ୋକୋ ଇନ୍‍କୁକେ ଉପାସ୍ ତାନାଏ ମେନ୍ତେ ସାରିୟାକୋ। ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍ ଚି ଇନ୍‍କୁ ଆକୋୱାଃ ଯଅ ନାମ୍ ଛାବା କାଦାକୋ। ମେନ୍ଦୋ ଚିମ୍ତାଙ୍ଗ୍ ଆମ୍ ଉପାସ୍ ଦୋହୋୟାମ୍, ଦୋ ଆମାଃ ବୋଅ ରେ ସୁନୁମ୍ ଗୋସୋଗେନ୍‍ମେ ହାର୍ ମେଏଃମୁହାଡ଼୍ କେ ଆବୁଙ୍ଗେନ୍‍ମେ, ଏନାତେ ହୋଡ଼ୋକୋ କାହା ମେନ୍ଦୋ ଆମାଃ ଆପୁ ଅକନିଃ କେ ଜେତାଏ କାକୋ ନେଲ୍ ଧାଡ଼ିୟା, ଆମ୍‍କେ ଉପାସ୍ ତାନାଏ ମେନ୍ତେ ସାରିୟାଏ। ନେଲେକାତେ ଆମ୍‍କେ ଜେତାଏ କାକୋ ନେଲ୍ ଧାଡ଼ି ରେହ ଆମାଃ ଆପୁ ଆମ୍‍କେ ନେଲ୍ ଧାଡ଼ିୟାଏ ହାର୍ ଯଅ ଏମାମେୟାଏ। ଆପାନାଃ ଲାଗିନ୍ ଅତେ ରେ ଧାନ୍ ଆଲୋପେ ହୁଣ୍ଡିୟା, ଅକତାଃରେ ତିଜୁକୋ ହାର୍ ନିଦିର୍ କୋ ବାଗ୍‍ଡ଼ାଅ ୟାକୋ ହାର୍ ଅକତାଃରେ ଚୋର୍ହାକୋ ଠୋଏଜେୟାକୋ ହାର୍ ଚୋର୍ହାୟାକୋ। ମେନ୍ଦୋ ଆପାନାଃ ଲାଗିନ୍ ସିର୍ମାଦିଶୁମ୍ ରେ ଧାନ୍ ହୁଣ୍ଡିପେ, ଅକତାଃରେ ନାଦୋ ତିଜୁକୋ, ହାର୍ ନାଦୋ ନିଦିର୍ କୋ ବାଗ୍‍ଡ଼ାଅ ୟାକୋ, ଆଡୋଃ ଅକତାଃରେ ନାଦୋ ଚୋର୍ହାକୋ ତାକ୍ ବାଇକେତେ ଚୋର୍ହାୟାକୋ। ଚିୟାଃଚି ଅକତାଃରେ ଆମାଃ ଧାନ୍ ମେନାଃ ଏନ୍ତାଃରେ ଆମାଃ ମୋନ୍ ଅଗି ଲାଗାଅ କାନ୍ ତାଇନୋଗା। ହୋଡ଼ମୋ ରାଃ ବାତୀ ମେଏଃ ତାନାଃ; ନେୟାଲାଗିନ୍ ଆଗାର୍ ଆମାଃ ମେଏଃ ନିରାଲ୍ ମେନାଃ ଏଣ୍ଡେ ଆମାଃ ସବେନ୍ ହୋଡ଼ମୋ ହ ମାସ୍କାଲ୍ ହୋବାୱା। ମେନ୍ଦୋ ଆଗାର୍ ଆମାଃ ମେଏଃ ଖାରାପ୍ ମେନାଃ ରେଦୋ, ଆମାଃ ସବେନ୍ ହୋଡ଼ମୋ ନୁବାଃ କେନୋଗା; ଏନାମେନ୍ତେ ଆଗାର୍ ଆମ୍ ଭୁଲ୍ ତେ ପାହୋମ୍ ତାନାମ୍ ଚି, ଆମାଃ ମୋନ୍ ମାସ୍କାଲ୍ ମେନାଃ, ମେନ୍ଦୋ ଏନାକେ ସାର୍ତି ରେ ନେଲେରେ ନୁବାଃ ତାନାଃ ଦୋ ଆମାଃ ଭିତାର୍ ରାଃ ଏନ୍ ନୁବାଃ କୁଲ୍‍କୁଲ୍ ନୁବାଃ ତାନାଃ। “ଜେତାଏ ହୋଡ଼ ମିୟାଃ ସାମାୟ୍ ରେ ବାରିୟା ଗୋମ୍‍କେ କେ ସେୱା କାଏ ଧାଡ଼ିୟା, ଚିୟାଃଚି ଇନିଃ ମିୟାଃ ଲୋଃ ଖିସ୍ ହାର୍ ଏଟାଃ ଲୋଃ ଦୁଲାଡ଼୍ ମାଣ୍ଡାଅ ୟାଏ, ୟାଦୋ ମିହୋଡ଼୍ ଲୋଃ ମେଶା କେତେ ତାଇନୋଗାଏ ହାର୍ ଏଟାଃ ନିଈ କେ ହିଲାଙ୍ଗିୟାଏ। ଆପେ ପାର୍ମେଶ୍ଵାର୍ ହାର୍ ଧାନ୍ ବାରାନାଃ କେ ସେୱା କାପେ ଧାଡ଼ିୟା।” ଏନାଲାଗିନ୍ ଇଙ୍ଗ୍ ଆପେକେ କାଜିପେ ତାନାଇଙ୍ଗ୍, ଚି ଆପାନାଃ ଜୀଉ ଲାଗିନ୍ ନେୟା ଆଲୋପେ ଚିନ୍ତା ରିକାୟା ଚି ଆଲେ ଚିନାଃ ଜୋମେୟାଲେ, ହାର୍ ଚିନାଃ ନୁୱେୟାଲେ; ହାର୍ ନା ଆପାନାଃ ହୋଡ଼ମୋ ଲାଗିନ୍ ଚି ଚିନାଃ ତୁସିଙ୍ଗ୍ ଏନାଲେ। ଚିନାଃ ଜୀଉ ଜୋମେୟାଃ ତେ ହାର୍ ହୋଡ଼ମୋ ଲିଜାଃ ତେ ବାଢ଼ାଅ କେତେ ନାହାଲା? ରିମିଲ୍‍ଦିଶୁମ୍ ରେନ୍ ଅଡ଼େ କୋକେ ନେଲ୍ କୋପେ, ଇନ୍‍କୁ ନାଦୋ ହେରେତାନାକୋ, ନାଦୋ ଇରେତାନାକୋ, ଏଣ୍ଡେ ହ ଆପେୟାଃ ସିର୍ମାଦିଶୁମ୍ ରେନ୍ ଆପୁ ଇନ୍‍କୁକେ ଆଜୋମ୍ କୋତାନାଏ। ଚିନାଃ ଆପେ ଇନ୍‍କୁ ଏତେ ଥିମ୍ବା ଗୋନୋଙ୍ଗାନ୍ ନାହାଲାପେ? ଆପେ କୋଏତେ ଅକଏ ମେନିଜା, ଅକନିଃ ପାହୋମ୍ କେତେ ଆପାନାଃ ଜୀନିଃ ରାଃ ବାରାଶ୍ କେ ମିୟାଃ ଘାଡ଼ି ହ ବାଢ଼ାଅ ଧାଡ଼ିୟାଏ? “ହାର୍ ଲିଜାଃ ଲାଗିନ୍ ଚିନାଃ ମେନେଃ ପାହୋମ୍ ତାନାପେ? ଅତେ ରେୟାଃ ବାହା କୋକେ ନେଲେପେ, ଚି ଏନାକୋ ଚିଲ୍‍କା ହାରାଅଃତାନା, ନାଦୋ ଇନ୍‍କୁ କାମିୟାକୋ, ନା ଲିଜାଃ ଗାଲାଙ୍ଗ୍ ୟାକୋ। ଏଣ୍ଡେ ହ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍, ଚି ରାଜା ସୁଲେମାନ୍ ହ, ଆଏଃ କିଶାଣ୍ ତାଇନ୍‍କାନ୍ ସାମାୟ୍ ରେ ଏନ୍ ଲେକା ଲିଜାଃ କାଏ ତୁସିଙ୍ଗ୍ ଲେନ୍ ତାଇନାଏ। ଏନାମେନ୍ତେ ଚିମ୍ତାଙ୍ଗ୍ ପାର୍ମେଶ୍ଵାର୍ ପିଡ଼ି ରାଃ ଏନ୍ ତାସାଃ କୋକେ ଅକନାଃ ଇସିଙ୍ଗ୍ ମେନାଃ ହାର୍ ଗାପା ଚୁଲ୍‍ହା ରେ ସାଜୁଅଗା, ଏନାକେ ଏନ୍‍ଲେକା ଲିଜାଃ ତୁସିଙ୍ଗ୍ ତାନାଏ, ଦୋ ହେ ହୁଡିଙ୍ଗ୍ ବିଶ୍ଵାସ୍ ମାଣ୍ଡାଅତାନ୍‍କୋ, ଆପେକେ ଇନିଃ ନେୟାଏତେ ବାଢ଼ାଅ କେତେ ଚିନାଃ ମେନ୍ତେ କାଏ ତୁସିଙ୍ଗ୍ ପେୟାଏ? ଏନାମେନ୍ତେ ଆପେ ପାହୋମ୍ କେତେ ନେୟା ଆଲୋପେ କାଜିୟା ଚି ଆବୁ ଚିନାଃ ଜୋମେୟାବୁ, ୟାଦୋ ଚିନାଃ ନୁୱେୟାବୁ, ହାର୍ ଚିନାଃ ତୁସିଙ୍ଗ୍ ଏନାବୁ? ଚିୟାଃଚି ଏଟାଃଜାତିକୋ ନେ ସବେନ୍ ଜିନିଷ୍‍କୋ ରାଃ ଦାଣା ରେ ତାଇନାକୋ, ମେନ୍ଦୋ ଆପେୟାଃ ସିର୍ମାଦିଶୁମ୍ ରେନ୍ ଆପୁ ସାରିୟାଏ ଚି ଆପେକେ ନେ ସବେନ୍ ଜିନିଷ୍‍କୋ ରାଃ ଦାର୍‍କାର୍ ମେନାଃ। ଏନାମେନ୍ତେ ସିଦା ଆପେ ପାର୍ମେଶ୍ଵାର୍ ରାଃ ରାଇଜ୍ ହାର୍ ଧାରାମ୍-ହୋରା ରାଃ ଜୀଦାନ୍ ରେ ଜିହୀଦୋ ଲାଗିନ୍ ଦାଣା ଏପେ ଦୋ ନେ ସବେନ୍ ଜିନିଷ୍‍କୋ ଅଗି ଆପେକେ ନାମ୍ କେନୋଗା। ଏନାମେନ୍ତେ ଗାପା ଲାଗିନ୍ ଆଲୋପେ ଚିନ୍ତାୟା, ଚିୟାଃଚି ଗାପା ରାଃ ହୁଲାଙ୍ଗ୍ ଆଜାଃ ଚିନ୍ତା ଆଏଃ ଗି ରିକାୟାଏ; ଇସିଙ୍ଗ୍ ଲାଗିନ୍ ଇସିଙ୍ଗ୍ ରାଃ ଦୁକୁ ଗି ଥିମ୍ବା ତାନାଃ।” ଏଟାଃକୋୱାଃ ଆଲୋପେ ବିଚାର୍ ଏୟା, ଏଣ୍ଡେ ଆପେ ହଗି କାପେ ବିଚାର୍ ଅଗା। ଚିୟାଃଚି ଜେଲେକା ଆପେ ଏଟାଃକୋୱାଃ ବିଚାର୍ ୟାପେ, ଏନ୍‍ଲେକାଗି ପାର୍ମେଶ୍ଵାର୍ ହଗି ଆପେକେ ବିଚାର୍ ପେୟାଏ; ହାର୍ ଅକନ୍ ନାପ୍ ତେ ଆପେ ସୋଙ୍ଗେୟା, ଏନ୍ ନାପ୍ ତେଗି ଆପେୟାଃ ଲାଗିନ୍ ସୋଙ୍ଗୋଗା। ଆମ୍ ଚିନାଃ ମେନେଃ ଆମାଃ ହାଗାମାଃ ହୁଡିଙ୍ଗ୍ ଭୁଲ୍ କେ ନେଲ୍‍ତାନାମ୍ ଅକନାଃ ମେଏଃ ରେ ବୋଲୋକାନ୍ ସାହାନ୍ ଗୁଣ୍ଡା ଲେକା ତାନାଃ, ହାର୍ ଆମ୍‍କେ ଗି ଆମାଃ ଗି ମାରାଙ୍ଗ୍ ଭୁଲ୍ କେ କା ଲୁରୋଃ ତାନାଃ, ଅକନାଃ ମେଏଃ ରେ ବୋଲୋକାନ୍ ସାହାନ୍ ପାଟା ଲେକା ତାନାଃ? ଯାବ୍ ଚି ଆମାଃ ଭିତାର୍ ରେ ଗି ମାରାଙ୍ଗ୍ ଭୁଲ୍‍କୋ ମେଏଃ ରେ ବୋଲୋକାନ୍ ସାହାନ୍ ପାଟା ଲେକା ମେନାଃ ଦୋ ଆମ୍ ଆମାଃ ହାଗା କେ କାକାଜି ଚାହି ଚି, ଦେଲା ଇଙ୍ଗ୍ ଆମାଃ ମେଏଃ ରେ ବୋଲୋକାନ୍ ସାହାନ୍ ଗୁଣ୍ଡା କେ ଅଡୋଙ୍ଗ୍ ତାଃଇଙ୍ଗ୍? ଆମ୍ ବେଦାହୋଡ଼! ସିଦା ଆମ୍ ଆମାଃ ମାରାଙ୍ଗ୍ ଭୁଲ୍ କୋକେ ସୁଧ୍‍ରାଓ ଲେମ୍, ଏଣ୍ଡେ ଆମ୍ ଆମାଃ ହାଗାମାଃ ହୁଡିଙ୍ଗ୍ ଭୁଲ୍ କୋକେ ସୁଧ୍ରାଏମେ ମେନ୍ତେ କାଜି ଧାଡ଼ିୟାମ୍। ପାର୍ମେଶ୍ଵାର୍ ରାଃ ସାନ୍ଦେଶ୍ ଏନ୍ ହୋଡ଼ୋକୋକେ ଆଲୋପେ ଉଦୁବାକୋୱା ଅକନ୍‍କୋ ଏନା କାକୋ ଆୟୁମ୍ ସାନାଙ୍ଗ୍ ତାନା। ଆଗାର୍ ଆପେ ନେଲେକା ରିକାଏ ରେ ଏନା ଏନ୍‍ଲେକା ହୋବାଅଃୱା ଜେଲେକା ପାବିତାର୍ ଜିନିଷ୍‍କୋକେ ସେତାକୋୱାଃ ସାମ୍‍ନାଙ୍ଗ୍ ରେ ଦୁଡ଼ିଙ୍ଗ୍ ହାର୍ ଆପେୟାଃ ମୋତି ଶୂକ୍ରୀ କୋୱାଃ ସାମ୍‍ନାଙ୍ଗ୍ ରେ ଦୁଡ଼ିଙ୍ଗ୍। ଏନ୍‍କା ଆଲୋକା ହୋବାଅଃକା ଚି ଅକନାଃ କେ ଇନ୍‍କୁ କାଟା ଲାଥାର୍ ରେ ତିକା କେୟାକୋ ହାର୍ ରୁଆଡ଼୍ କେତେ ଆମ୍ ଲୋଃ ବିପ୍ଡ଼ାଅଃ ସାନାଙ୍ଗାକୋ। ଆସିପେ, ଏନାରେ ଆପେକେ ଏମୋଗା; ଦାଣାଏପେ, ଏନାରେ ଆପେ ନାମେୟାପେ, ଟୋଃ-ଟୋଃ ଏପେ, ଏନାରେ ଆପେୟାଃ ଲାଗିନ୍ ଦୁହାର୍ ନିଜୋଗା। ଚିୟାଃଚି ଅକଏ ଆସିୟାଏ, ଇନିଃ ନାମେୟାଏ, ହାର୍ ଅକଏ ଦାଣାୟାଏ, ଇନିଃ ଦାଣା-ନାମେୟାଏ। ହାର୍ ଅକଏ ଟୋଃ-ଟୋଃ ୟାଏ ଇନିଜାଃ ଲାଗିନ୍ ଦୁହାର୍ ନିଜୋଗା। ଆପେ କୋଏତେ ଅକନ୍ ହୋଡ଼ ଏନ୍‍ଲେକା ମେନିଜା, ଚି ଆଗାର୍ ଆଜାଃ ହୋନ୍ ଇନିଃକେ ହୋଲୋଙ୍ଗ୍ ଆସିରେ, ଦୋ ଇନିଃ ଆଏଃକେ ଦିରି ଏମାଇୟାଏ, ହାର୍ ହାକୁ ଆସିରେ, ଦୋ ଇନିଃକେ ବିଙ୍ଗ୍ ଏମାଇୟାଏ? ଏନାତେ ଚିମ୍ତାଙ୍ଗ୍ ଆପେ ଖାରାପ୍ ହୋବା କେତେ, ଆପେୟାଃ ହୋନ୍‍କୋକେ ବେଶ୍ ଜିନିଷ୍‍କୋ ଏମୋଃ ପେ ସାରିୟା, ଦୋ ଆପେୟାଃ ସିର୍ମାଦିଶୁମ୍ ରେନ୍ ଆପୁ ଆଜାଃ ଆସିତାନ୍ କୋକେ ବେଶ୍ ଜିନିଷ୍‍କୋ ଚିନାଃ ମେନେଃ କାଏ ଏମାକୋୱା। ନେୟାମେନ୍ତେ ଅକନାଃ ଆପେ ସାନାଙ୍ଗ୍ ତାନାପେ, ଚି ହୋଡ଼ୋକୋ ଆପେୟାଃ ଲୋଃ ରିକା ୟାକୋ, ଆପେ ହ ଇନ୍‍କୁ ଲୋଃ ଏନ୍‍ଲେକାଗି ରିକାଏପେ; ଚିୟାଃଚି ମୁଶା ନାବୀ ରାଃ ଆଇନ୍ ହାର୍ ପାର୍ମେଶ୍ଵାର୍ ରାଃ ନାବୀ କୋୱାଃ ଶିଖାଅ ନେୟାଗି ତାନାଃ। ପାର୍ମେଶ୍ଵାର୍ ରାଃ ରାଇଜ୍ ରେ ସାକୁର୍ ଦୁହାର୍ ତେ ଭାଇର୍ ବୋଲୋ ଧାଡ଼ିୟାପେ। ଚିୟାଃଚି ଏନ୍ ଦୁହାର୍ ଚାକାର୍ ମେନାଃ ହାର୍ ଏନ୍ ହୋରା ସାହାଜ୍ ଗିଆ ଅକନାଃ ବିନାଶ୍ ତେ ସେଟେର୍ ୟାଏ, ହାର୍ ମିଃଥିମ୍ବା ହୋଡ଼ୋକୋ ମେନାକୋୱା ଏନାରେ ବୋଲୋତାନାକୋ। ମେନ୍ଦୋ ଏନ୍ ଦୁହାର୍ ସାକୁର୍ ମେନାଃ ହାର୍ ଏନ୍ ହୋରା କାଠିନ୍ ମେନାଃ ଅକନାଃ ଜାନାଓ-ଜୀଦାନ୍ ତେ ସେଟେର୍ ତାନାଏ, ହାର୍ ହୁଡିଙ୍ଗ୍ ଗି ହୋଡ଼ୋକୋ ମେନାକୋୱା ଅକନ୍ କୋ ଏନା କେ ନାମେତାନାକୋ। ହିହିଡ଼୍ ନାବୀ କୋଏତେ ହୋସିଆର୍ ତାଇନ୍‍ପେ, ଇନ୍‍କୁ ମିଣ୍ଡୀ କୋୱାଃ ରୂପ୍ ରେ ଆପେୟାଃ ତାଃ ହିଜୁଃ ୱାକୋ, ମେନ୍ଦୋ ଭିତାର୍ ରେ ଇନ୍‍କୁ ଚାଗାଡ଼୍ ଜୋମ୍‍ତାନ୍ ହୁଣ୍ଡାର୍ ତାନାକୋ। ଇନ୍‍କୁୱାଃ କାମି କୋଏତେ ଗି ଆପେ ଇନ୍‍କୁକେ ନେଲ୍ଉରୁମ୍ ଧାଡ଼ିୟାପେ। ଚିନାଃ ହୋଡ଼ୋକୋ ଜାନୁମ୍ ବୁଟା ଏତେ ଆଙ୍ଗୁର୍, ହାର୍ ଚିନାଃ ଜାନୁମ୍‍ ଦାରୁ ଏତେ ଲୋୱା ଗୋଦେୟାକୋ? ନେଲେକାଗି ସବେନ୍ ବେଶ୍ ଦାରୁ ତେ ବେଶ୍ ଯଅ ଯଅଃୱା ହାର୍ ଖାରାପ୍ ଦାରୁ ତେ ଖାରାପ୍ ଯଅ ଯଅଃୱା। ବୁଗିନ୍ ଦାରୁ ରେ ଖାରାପ୍ ଯଅ କାଯଅଃୱା, ହାର୍ ନାଦୋ ଖାରାପ୍ ଦାରୁ ରେ ବେଶ୍ ଯଅ ଯଅଃୱା। ଅକନ୍-ଅକନ୍ ଦାରୁ ବେଶ୍ ଯଅ କାଯଅଃୱା, ଏନା ମାଗୋଃୱା ହାର୍ ସେଙ୍ଗେଲ୍ ରେ ଦୋଡ଼ିଙ୍ଗ୍‍ୱାଃ। ଏନ୍‍ଲେକା ଗି ହିହିଡ଼୍ ନାବୀ କୋ ନାରାକ୍ ରାଃ ସେଙ୍ଗେଲ୍ ରେ ଦୋଡ଼ିଙ୍ଗ୍‍ଅଗାକୋ। ନେଲେକା ଇନ୍‍କୁୱାଃ କାମି କୋଏତେ ଗି ଆପେ ଇନ୍‍କୁକେ ନେଲ୍ଉରୁମ୍ ଧାଡ଼ିୟାପେ। ଅକଏ ଇଙ୍ଗ୍‍କେ, ହେ ପ୍ରାଭୁ! ହେ ପ୍ରାଭୁ! କାଜିୟାଏ, ଇନ୍‍କୁ ଏତେ ସବେନ୍‍କୋ ସିର୍ମାଦିଶୁମ୍ ରାଃ ରାଇଜ୍ ରେ ବୋଲୋ କାକୋ ଧାଡ଼ିୟା, ମେନ୍ଦୋ ଇନିଃଗି ଧାଡ଼ିୟାଏ ଅକଏ ଇଙ୍ଗ୍ଆଃ ସିର୍ମାଦିଶୁମ୍ ରେନ୍ ଆପୁ ରାଃ ସାନାଙ୍ଗ୍ ଲେକା ସେସେନ୍ ତାନାଏ। ଏନ୍ ବିଚାର୍ ହୁଲାଙ୍ଗ୍ ଥିମ୍ବାଗି ହୋଡ଼ୋକୋ ଇଙ୍ଗ୍‍କେ କାଜିୟାକୋ, ହେ ପ୍ରାଭୁ, ହେ ପ୍ରାଭୁ, ଚିନାଃ ଆଲେ ଆମାଃ ନୁତୁମ୍ ତେ ଆୟାର୍କାଜିକୋ କାଲେ କାଜିକେଦା, ହାର୍ ଆମାଃ ନୁତୁମ୍ ତେ ବୋଙ୍ଗାଆତ୍ମାକୋ କାଲେ ଅଡୋଙ୍ଗ୍ କେଃକୋୱା, ହାର୍ ଆମାଃ ନୁତୁମ୍ ତେ ଥିମ୍ବାଗି ଆକ୍‍ଦାନ୍ଦା କାମିକୋ କାଲେ କାମିକେଦା? ଇମ୍ତା ଇଙ୍ଗ୍ ଇନ୍‍କୁକେ ସାଫା-ସାଫା କାଜିୟା କୋୱାଇଙ୍ଗ୍, ଇଙ୍ଗ୍ ଆମ୍‍କେ ଚିଉଲାଅ କାଇଙ୍ଗ୍ ସାରିକାଦା, ହେ ଶିତୃ କାମି ରିକାତାନ୍‍କୋ, ଇଙ୍ଗ୍ଆଃ ନାଡ଼େଏ ତେ ସେନୋଃ କେନୋଃପେ। ଏନାଲାଗିନ୍ ଅକଏ ଇଙ୍ଗ୍ଆଃ ନେ ବାକାଣ୍ କୋକେ ଆୟୁମ୍‍କେତେ ଏନାକେ ମାନାତିଙ୍ଗ୍ ତାନାଏ, ଇନିଃ ଏନ୍ ସେଣାନ୍ ହୋଡ଼ ଲେକା ବାଇୟୋଃ ୱାଏ ଅକନିଃ ଆଜାଃ ଅଡ଼୍ଆଃ ସେରେଙ୍ଗ୍ ଚେତାନ୍ ରେ ବାଇକେଦାଏ। ହାର୍ ରିମିଲ୍ ଦାଆ କେଦାଏ, ହାର୍ ବାଇଡ଼୍ ହିଜୁଃଲେନା, ହାର୍ ହୋୟୋକୋ ହିଜୁଃଲେନା, ହାର୍ ଏନ୍ ଅଡ଼୍ଆଃ ରେ ଧାକା ଜାନା, ମେନ୍ଦୋ ଏନା କା ଉୟୁଃଜାନା, ଚିୟାଃଚି ଏନା ରାଃ ନାହି ସେରେଙ୍ଗ୍ ରେ ଏମ୍ ଲେନ୍ ତାଇକେନା। ମେନ୍ଦୋ ଅକଏ ଇଙ୍ଗ୍ଆଃ ନେ କାଜିକୋକେ ଆୟୁମ୍ ତାନାଏ ହାର୍ ଏନା ରେ କାଏ ସେସେନ୍ ତାନାଏ, ଇନିଃ ଏନ୍ ଡୋଣ୍ଡୋ ହୋଡ଼ ଲେକା ବାଇୟୋଃ ୱାଏ ଅକନିଃ ଆଜାଃ ଅଡ଼୍ଆଃ ଗିତିଲ୍ ଚେତାନ୍ ରେ ବାଇକେଦାଏ। ଆଡୋଃ ରିମିଲ୍ ଦାଆ କେଦାଏ, ହାର୍ ବାଇଡ଼୍ ହିଜୁଃଲେନା, ଆଡୋଃ ହୋୟୋକୋ ହିଜୁଃଲେନା, ହାର୍ ଏନ୍ ଅଡ଼୍ଆଃ ରେ ଧାକା ଜାନା ହାର୍ ଏନା ଉୟୁଃକେତେ ଧାଶୁଡ଼୍ ଜାନା। ଚିମ୍ତା ୟୀଶୁ ନେ କାଜିକୋ କାଜି ଛାବା କେଦାଏ, ଦୋ ନେକା ହୋବାଜାନା ଚି ମିଃଥିମ୍ବା ହୋଡ଼ୋକୋ ଇନିଜାଃ ଶିଖାଅ କାଜିତେ ଆକ୍‍ଦାନ୍ଦା ଜାନାକୋ, ଚିୟାଃଚି ଇନିଃ ଇନ୍‍କୁକେ ଆଇନ୍ ଗୁରୁକୋ ଲେକା କାହା, ମେନ୍ଦୋ ଆଧିକାରୀ କୋ ଲେକା ଶିଖାଅ କୋତାଇନାଏ। ଚିମ୍ତାଙ୍ଗ୍ ଇନିଃ ବୁରୁ ଏତେ ଆଡ଼୍‍ଗୁ ଜାନାଏ, ଦୋ ମିଃଥିମ୍ବା ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ। ହାର୍ ନେଲେପେ, ମିୟାଃ କୋଢ଼୍ ବେମାର୍ ରେନ୍ ହୋଡ଼ ଆଜାଃ ତାଃ ହିଜୁଃକେତେ ଇନିଃକେ ଜୋହାର୍ କିଜାଏ ହାର୍ କାଜିକେଦାଏ, “ହେ ପ୍ରାଭୁ, ଆମ୍ ସାନାଙ୍ଗ୍ତାନ୍ ରେଦୋମ୍, ଇଙ୍ଗ୍‍କେ ବେଶ୍ ଧାଡ଼ିୟାମ୍।” ୟୀଶୁ ତିଈ ଜିଲିଙ୍ଗ୍ କେତେ ଇନିଃକେ ଜୁଟିଃ କିଜାଏ ହାର୍ କାଜିକେଦାଏ, “ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍, ଚି ଆମ୍ ବେଶ୍ କେନୋଃମ୍।” ହାର୍ ଇମ୍ତାଗି ଇନିଃ କୋଢ଼୍ ବେମାର୍ ଏତେ ବେଶ୍ ଜାନାଏ। ୟୀଶୁ ଇନିଃକେ କାଜିକେଦାଏ, “ନେଲେମ୍! ଜେତାଏ କେ ଆଲୋମ୍ କାଜିୟା, ମେନ୍ଦୋ ସେନ୍ କେତେ ଆପାନ୍ କେ ୟାଜାକ୍ କେ ଦେଖାୱିମେ ହାର୍ ଅକନାଃ ମୁଶା ନାବୀ ଠାହ୍‍ରାଓ କାଦାଏ ଏନାକେ ଭେଁଟ୍ ରାକାବେମେ, ଏନାତେ ସବେନ୍ କୋ ସାରିୟାକୋ ଚି ଆମ୍ ବେଶ୍ ଜାନାମ୍।” ଚିମ୍ତାଙ୍ଗ୍ ଇନିଃ କାଫାର୍ନାହୁମ୍ ସାହାର୍ ତେ ହିଜୁଃ ଲେନାଏ ଦୋ ମିୟାଃ ଶାଅସିପାହୀ କୋୱାଃ ଗୋମ୍‍କେ ଇନିଃତାଃ ହିଜୁଃକେତେ ଇନିଃକେ ଆର୍ଜି କିଜାଏ। “ହେ ପ୍ରାଭୁ, ଇଙ୍ଗ୍ଆଃ ଦାସୀ ଏକାଙ୍ଗୀ ବେମାର୍ ତେ ଅଡ଼୍ଆଃ ରେ ଥିମ୍ବାଗି ଦୁକୁ ରେ ଉୟୁଃ କାନାଏ।” ୟୀଶୁ ଇନିଃକେ କାଜିକେଦାଏ, “ଇଙ୍ଗ୍ ହିଜୁଃକେତେ ଇନିଃକେ ଚାଙ୍ଗାଇ ୟାଇଙ୍ଗ୍।” ଶାଅସିପାହୀ କୋୱାଃ ଗୋମ୍‍କେ କାଜିକିଜାଏ, “ହେ ପ୍ରାଭୁ, ଇଙ୍ଗ୍ ଏନ୍ ହୋଡ଼ ଲେକାନିଃ ହ ନାହାଲାଇଙ୍ଗ୍ ଚି ଆମ୍ ଇଙ୍ଗ୍ଆଃ ଅଡ଼୍ଆଃ ହିଜୁଆମ୍, ମେନ୍ଦୋ ମୋଚା ତେ ଭାଇର୍ କାଜିତାମ୍ ଏଣ୍ଡେ ଇଙ୍ଗ୍ଆଃ ଦାସୀ ବେଶ୍ କେନୋଗାଏ। ଚିୟାଃଚି ଇଙ୍ଗ୍ ହ ଏଟାଃ କୋୱାଃ ଆଧିନ୍ ରେ ମେନାଇଙ୍ଗ୍‍ୟା, ହାର୍ ସିପାହୀକୋ ଇଙ୍ଗ୍ଆଃ ଆଧିନ୍ ରେ ମେନାକୋୱା, ହାର୍ ଚିମ୍ତାଙ୍ଗ୍ ଇନ୍‍କୁ ଏତେ ମିହୋଡ଼୍ କେ କାଜିୟାଇଙ୍ଗ୍ ଜୁ, ଏଣ୍ଡେ ଇନିଃ ସେନୋଗାଏ, ଆଡୋଃ ଏଟାଃ ନିଈ କେ ହିଜୁଃମେ, ଏଣ୍ଡେ ଇନିଃ ହିଜୁଗାଏ, ହାର୍ ଇଙ୍ଗ୍ଆଃ ଦାସୀ କେ କାଜିୟାଇଙ୍ଗ୍, ଚି ନେୟା ରିକାଏମେ, ଏଣ୍ଡେ ଇନିଃ ଏନା ରିକାୟାଏ।” ନେୟା ଆୟୁମ୍‍କେତେ ୟୀଶୁ ଆକ୍‍ଚାକାଅଃ ଜାନାଏ, ଏନ୍ତେ ଅକନ୍‍କୋ ଇନିଜାଃ ଦୋୟା ତେ ହିଜୁଃ ତାଇକେନାକୋ ଇନ୍‍କୁକେ କାଜିକେଦାଏ, “ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍, ଚି ଇଙ୍ଗ୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ରେହ ନେଲେକାନ୍ ବେଗାର୍ ୟାହୁଦୀ ହୋଡ଼ ହୋବା କେତେ ହ ଇଙ୍ଗ୍ଆଃ ରେ ବିଶ୍ଵାସ୍ ରିକାନିଃ ଲେକା ଜେତାଏ କେ କାଇଙ୍ଗ୍ ନାମାକାଦା। ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍, ଚି ମିଃଥିମ୍ବା ଏଟାଃଜାତି ହୋଡ଼ୋକୋ ପୁରାବ୍ ହାର୍ ପାଶ୍ଚିମ୍ ଏତେ ହିଜୁଃକେତେ ଆବ୍ରାହାମ୍ ହାର୍ ଇସାହାକ୍ ହାର୍ ୟାକୁବ୍ କୋଲୋଃ ସିର୍ମାଦିଶୁମ୍ ରାଃ ରାଇଜ୍ ରେ ଦୁବାକୋ। ମେନ୍ଦୋ ସିର୍ମାଦିଶୁମ୍ ରାଃ ରାଇଜ୍ ରେନ୍ ହୋନ୍‍କୋ ମାନେ ୟାହୁଦୀ ହୋଡ଼ୋକୋ ବାହ୍‍ରେ ନୁବାଃ ରେ ଦୁଡ଼ିଙ୍ଗ୍ ଅଗାକୋ: ହେନ୍ତାଃରେ ରାଆ ହାର୍ ଡାଟା କୋରାଃ ରିଦ୍ ହୋବାଅଃୱା।” ଏନ୍ତେ ୟୀଶୁ ଶାଅସିପାହୀ କୋୱାଃ ଗୋମ୍‍କେ କେ କାଜିକେଦାଏ, “ଜୁ ଅଡ଼୍ଆଃ ତେ ଚିଲ୍‍କା ଆମାଃ ବିଶ୍ଵାସ୍ ମେନାଃ, ଏନ୍‍ଲେକାଗି ଆମାଃ ଲାଗିନ୍ ହୋବାଅଃକା। ହାର୍ ଇନିଜାଃ ଦାସୀ ଏନ୍ ସାମାୟ୍ ରେଗି ବେଶ୍ ଜାନାଏ।” ୟୀଶୁ ଚିମ୍ତାଙ୍ଗ୍ ପାତ୍ରାସ୍ ରାଃ ଅଡ଼୍ଆଃ ହିଜୁଃ ଲେନାଏ, ଦୋ ଇନିଃ ଇନିଜାଃ ହାନାର୍ କିନ୍‍କେ ଉରୁୟୁ ତାନ୍ ନେଲ୍ କିଜାଏ। ୟୀଶୁ ଆକିନାଃ ତିଈ ଜୁଟିଃ କେଦାଏ ହାର୍ ଆକିନାଃ ଉରୁୟୁ ଆଡ଼୍‍ଗୁ ଜାନା; ଏନ୍ତେ ଆକିନ୍ ବିରିଃ କେତେ ଇନିଜାଃ ସେୱା କେଦାକିନ୍। ଚିମ୍ତାଙ୍ଗ୍ ଆୟୁବ୍ ହୋବାଜାନା ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଛାବା ଜାନା, ଇମ୍ତା ଇନ୍‍କୁ ଇନିଃତାଃ ଥିମ୍ବାଗି ହୋଡ଼ୋକୋକେ ଆଉକେଦାକୋ, ଅକନ୍ କୋୱାଃ ରେ ବୋଙ୍ଗାଆତ୍ମାକୋ ତାଇକେନାକୋ ହାର୍ ଇନିଃ ଏନ୍ ଆତ୍ମା କୋକେ ଆଜାଃ କାଜି ରେ ଭାଇର୍ ଅଡୋଙ୍ଗ୍ କେଃକୋୱାଏ, ହାର୍ ସବେନ୍ ବେମାରୀ କୋକେ ଚାଙ୍ଗାଇ କେଃକୋୱାଏ। ଏନାତେ ଅକନ୍ ବାଚାନ୍ ୟାଶାୟାହ୍ ନାବୀ ଗାଃ ହୋରାତେ କାଜିଲେନା ଏନା ପୁରାଜାନା: “ଇନିଃ ଆଏଃଗି ଆବୁୱାଃ ନାରାଦୁରା କୋକେ ଇଦିକେଦାଏ ହାର୍ ଆବୁୱାଃ ବେମାରୀ କୋକେ ଉଠାଓକେଦାଏ।” ୟୀଶୁ ଚିମ୍ତାଙ୍ଗ୍ ଆଜାଃ ସବେନ୍ ପାଡ଼୍ ମିଃଥିମ୍ବା ହୋଡ଼ୋକୋକେ ନେଲ୍‍କେଦାଏ, ଦୋ ଆଜାଃ ଚେଲାକୋକେ ସାମୁଦାର୍ ହାନ୍ ଫାରୋମ୍ ଦୋଲା ସେନାବୁ ମେନ୍ତେ କାଜିକେଦାଏ। ଚିମ୍ତାଙ୍ଗ୍ ଇନ୍‍କୁ ସେନ୍ ଲାଗିନ୍ ସେକାଡ଼ୋଃ ତାଇନାକୋ ଇମ୍ତା ମିୟାଃ ଆଇନ୍ ଗୁରୁ ନାଡ଼େଏ ହିଜୁଃକେତେ ଇନିଃକେ କାଜିକେଦାଏ, ହେ ଗୁରୁ କୋତାଃ-କୋତାଃ ଆମ୍ ସେନାମେ, ଇଙ୍ଗ୍ ଆମାଃ ଚେଲା ବାଇଏନ୍ ନାଙ୍ଗ୍ ଆମ୍‍କେ ଅତୋଙ୍ଗ୍ ମେୟାଇଙ୍ଗ୍। ୟୀଶୁ ଇନିଃକେ କାଜିକେଦାଏ, “ତୁୟୁ କୋୱାଃ ଦୋ ଉଣ୍ଡୁଃ ତାଇନା ଆଡୋଃ ରିମିଲ୍‍ଦିଶୁମ୍ ରେନ୍ ଅଡ଼େ କୋୱାଃ ତୂକା ତାଇନା ମେନ୍ଦୋ ଇଙ୍ଗ୍ ମାନ୍‍ୱା ରାଃ ହୋନ୍ ଲାଗିନ୍ ବୋଅ ମାଣ୍ଡାଅ ଲାଗିନ୍ ହଗି ଜାଗା ବାନୋଗା।” ଆଡୋଃ ମିୟାଃ ଚେଲା ଇନ୍‍କୁକେ କାଜିକେଦାଏ, “ହେ ପ୍ରାଭୁ, ଇଙ୍ଗ୍‍କେ ସିଦା ଅଡ଼୍ଆଃ ସେନ୍ ରିକାଇଙ୍ଗ୍ ମେ, ଇଙ୍ଗ୍ଆଃ ଆପୁ ଗୋଜୋଃ ତାୟୋମ୍ତେ ଇନିଃକେ ତୋପା ତାୟିଙ୍ଗ୍ ଏନା ତାୟୋମ୍ତେ ଇଙ୍ଗ୍ ଆମାଃ ଚେଲା ବାଇୟୋଗାଇଙ୍ଗ୍।” ୟୀଶୁ ଇନିଃକେ କାଜିକେଦାଏ, “ଆମ୍ ଇଙ୍ଗ୍ଆଃ ଚେଲା ବାଇଏନ୍ ଲାଗିନ୍ ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ, ହାର୍ ଅକନ୍‍କୋ ଆତ୍ମିକ୍ ଲେକାତେ ଗୋଜାକାନ୍ ଲେକା ମେନାକୋୱାଃ ଇନ୍‍କୁ ଆକୋୱାଃ ଗୋଜାକାନ୍ କୋକେ ତୋପା କାକୋ।” ଚିମ୍ତାଙ୍ଗ୍ ଇନିଃ ଡୋଙ୍ଗା ରେ ରାକାବ୍ ଜାନାଏ, ଦୋ ଆଜାଃ ଚେଲାକୋ ଆଏଃକେ ଅତୋଙ୍ଗ୍ କିଜାକୋ। ହାର୍ ନେଲେପେ, ସାମୁଦାର୍ ରେ ମିୟାଃ ନେକା ମାରାଙ୍ଗ୍ ହୋୟୋ-ଦାଆ ବିରିଃ ଜାନା ଚି ଡୋଙ୍ଗା ଲାହାଡ଼ି ତେ ହାରୁବୋଃ ତାଇନା, ମେନ୍ଦୋ ୟୀଶୁ ଦୁଣୁମ୍ ତାଇନାଏ। ଏନ୍ତେ ଚେଲାକୋ ନାଡ଼େଏ ହିଜୁଃକେତେ ଇନିଃକେ ବିରିଃ କିଜାକୋ, ହାର୍ କାଜିକେଦାକୋ, ହେ ପ୍ରାଭୁ, ଆଲେକେ ବାଞ୍ଚାଅ ଲେମ୍, ଆବୁ ଡୁବିଃ ଗୋଜୋଃ ତାନାବୁ! ଇନିଃ ଇନ୍‍କୁକେ କାଜିକେଦାଏ, ହେ ହୁଡିଙ୍ଗ୍ ବିଶ୍ଵାସ୍ ମାଣ୍ଡାଅତାନ୍‍କୋ, ଚିନାଃ ଲାଗିନ୍ ଆପେ ବୋରୋ ତାନାପେ? ଏନ୍ତେ ଇନିଃ ବିରିଃ କେତେ ହୋୟୋ ହାର୍ ଦାଆ କେ ଏଗେର୍ କେଦାଏ ହାର୍ ସବେନାଃ ହାପା ଜାନା। ହାର୍ ଇନ୍‍କୁ ଆକ୍‍ଦାନ୍ଦା କେତେ କାଜିକେଦାକୋ, “ନିଈ ଚିଲ୍‍କାନ୍ ହୋଡ଼ ତାନିଃ, ଚି ମାରାଙ୍ଗ୍ ହୋୟୋ ହାର୍ ଦାଆ ହ ଇନିଜାଃ ଆନାଚୁ କେ ମାନାତିଙ୍ଗ୍ ତାନାକୋ।” ଚିମ୍ତାଙ୍ଗ୍ ଇନିଃ ଗାଲିଲୀ ସାମୁଦାର୍ ଫାରୋମ୍ ଗାଦାରେନିୟା ହୋଡ଼ୋକୋ ତାଇନ୍ ତାନ୍ ଜାଗା ରେ ସେଟେର୍ ଜାନାଏ, ଏଣ୍ଡେ ବାରିୟା ହୋଡ଼କିନ୍ ଅକନ୍ କିନାଃ ରେ ବୋଙ୍ଗାଆତ୍ମାକୋ ତାଇକେନାକୋ, କାବାର୍ ଏତେ ଅଡୋଙ୍ଗ୍ କେତେ ଇନିଃ ଲୋଃ କିନ୍ ନାପାମ୍ ଜାନା, ଇନ୍‍କିନ୍ ନେଲେକା ପୁରାଃ ଗି ଖିସ୍କାନ୍ କିନ୍ ତାଇକେନା, ଯେ ଅକଏ ହ ଏନ୍ ହୋରା ରେ ସେନ୍ କାକୋ ଧାଡ଼ି ତାଇନା। ଇନ୍‍କୁ କାଉରି କେତେ କାଜିକେଦାକୋ, ହେ ପାର୍ମେଶ୍ଵାର୍ ରାଃ ହୋନ୍ ଆଲେୟାଃ ଲୋଃ ଆମାଃ ଚିକାନ୍ କାମି? ଚିନାଃ ଆମ୍ ସାମାୟ୍ ଏତେ ସିଦାରେ ଆଲେକେ ଦୁକୁ ଏମ୍ ଲାଗିନ୍ ନେତାଃ ହିଜୁଃ କାନାମ୍? ଇନ୍‍କୁ ଏତେ ହୁଡିଙ୍ଗ୍ ସାଙ୍ଗିନ୍ ରେ ମିଃଥିମ୍ବା ଶୂକ୍ରୀ କୋୱାଃ ମିୟାଃ ଗୋଟ୍ ଆତିଙ୍ଗ୍ ତାଇନାକୋ। ବୋଙ୍ଗାଆତ୍ମାକୋ ଇନିଃକେ ନେୟା କାଜିକେତେ ଆର୍ଜି କିଜାକୋ, ଆଗାର୍ ଆମ୍ ଆଲେକେ ଅଡୋଙ୍ଗ୍ ଲେ ତାନାମ୍ ରେଦୋ ଶୂକ୍ରୀ କୋୱାଃ ଗୋଟ୍ ରେ କୁଲ୍ ତାଲେମ୍। ଇନିଃ ଇନ୍‍କୁକେ କାଜିକେଦାଏ, “ସେନୋଃ ପେ” ହାର୍ ଇନ୍‍କୁ ଅଡୋଙ୍ଗ୍ କେତେ ଶୂକ୍ରୀ କୋୱାଃ ଭିତାର୍ ରେ ବୋଲୋ ଜାନାକୋ ହାର୍ ନେଲେପେ ସବେନ୍ ଗୋଟ୍ ଜୋର୍ତେ ନିର୍ କେତେ ଚାଟାନ୍ ଚେତାନ୍ ଏତେ ସାମୁଦାର୍ ଦାଆ ରେ କୋ ଉୟୁଃଜାନା ହାର୍ ଡୁବିଃ ଗୋଏଃ ଜାନାକୋ। ହାର୍ ଶୂକ୍ରୀ କୋକେ ଗୁପିତାନ୍ ହୋଡ଼ୋକୋ ନିର୍ ଜାନାକୋ, ହାର୍ ହାତୁ ରେ ସେନ୍ କେତେ ନେ ସବେନ୍ କାଜିକୋ, ହାର୍ ଅକନ୍ କୋୱାଃ ରେ ବୋଙ୍ଗାଆତ୍ମାକୋ ତାଇକେନାକୋ ଇନ୍‍କୁୱାଃ ଚିନାଃ ହୋବାନା ଏନା ଉଦୁବ୍ କେଦାକୋ। ଏନ୍ତେ ସବେନ୍ ହାତୁ ରେନ୍ ହୋଡ଼ୋକୋ ୟୀଶୁ ଲୋଃ ନାପାମ୍ ଲାଗିନ୍ ଅଡୋଙ୍ଗ୍ ଜାନାକୋ, ହାର୍ ଇନିଃକେ ନେଲ୍‍କେତେ ଆର୍ଜି କିଜାକୋ, ଚି ଆଲେୟାଃ ସୀମା ଏତେ ବାହ୍‍ରେ ନିର୍ କେନୋଃମେ। ୟୀଶୁ ଡୋଙ୍ଗା ରେ ରାକାବ୍ କେତେ ଫାରୋମ୍ ସେନୋଃ ଜାନାଏ ହାର୍ ଆଜାଃ ସାହାର୍ କାଫାର୍ନାହୁମ୍ ତେ ହିଜୁଃଲେନାଏ। ହାର୍ ନେଲେପେ, ଚିମିନାଙ୍ଗ୍ ହୋଡ଼ୋକୋ ମିୟାଃ ଏକାଙ୍ଗୀ ରୋଗୀ କେ, ଗିତିଃ-ଜାଟି ରେ ମାଣ୍ଡାଅ କେତେ ଇନିଜାଃ ନାଡ଼େଏ ଆଉକିଜାକୋ। ୟୀଶୁ ଇନ୍‍କୁୱାଃ ବିଶ୍ଵାସ୍ ନେଲ୍‍କେତେ ଏନ୍ ଏକାଙ୍ଗୀ ରୋଗୀ କେ କାଜିକେଦାଏ, “ହେ ହାଗା, ସାହାସ୍ ମାଣ୍ଡାଏମେ, ଆମାଃ ପାପ୍ ଛାମା ଜାନା।” ନେୟାତେ ଚିମିନାଙ୍ଗ୍ ଆଇନ୍ ଗୁରୁକୋ ଆକୋୱାଃ-ଆକୋୱାଃ ମୋନ୍ ରେ କାଜିଜାନାକୋ, “ନିଈ ଦୋ ପାର୍ମେଶ୍ଵାର୍ ରାଃ ନିନ୍ଦା ରିକା ତାନାଏ।” ୟୀଶୁ ଇନ୍‍କୁୱାଃ ମୋନ୍ ରାଃ କାଜିକୋ ସାରିକେତେ କାଜିୟାଃକୋୱାଏ, “ଆପେ ଆପେୟାଃ-ଆପେୟାଃ ମୋନ୍ ରେ ଏତ୍କାନ୍ ବିଚାର୍ ଚିନାଃ ପେ ରିକା ତାନା? ସାହାଜ୍ ଚିନାଃ ତାନାଃ? ନେୟା କାଜି, ‘ଆମାଃ ପାପ୍ ଛାମା ଜାନା,’ ଚି ନେୟା କାଜି, ‘ବିରିଃମେ ଆଡୋଃ ସେନେମେ।’ ମେନ୍ଦୋ ନେୟା ଲାଗିନ୍ତେ ଚି ଆପେ ସାରିକେପେ ଚି ଇଙ୍ଗ୍ ମାନ୍‍ୱା ରାଃ ହୋନ୍ କେ ଅତେ ରେ ପାପ୍ ଛାମା ରାଃ ଅଗି ଆଧିକାର୍ ମେନାଃ।” ଏନ୍ତେ ଇନିଃ ଏକାଙ୍ଗୀ ବେମାରୀ କେ କାଜିକେଦାଏ, “ବିରିଃମେ, ଆମାଃ ଗିତିଃ-ଜାଟି ଉଠାଓ ଏମେ ହାର୍ ଆମାଃ ଅଡ଼୍ଆଃ ସେନୋଃ ମେ।” ଇନିଃ ବିରିଃ କେତେ ଆଜାଃ ଅଡ଼୍ଆଃ ସେନୋଃ ଜାନାଏ। ହୋଡ଼ୋକୋ ନେୟା ନେଲ୍‍କେତେ ବୋରୋ ଜାନାକୋ ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ କେଦାକୋ ଚି ଅକନିଃ ହୋଡ଼ୋକୋକେ ନେଲେକା ଆଧିକାର୍ ଏମାକାଃ କୋୱାଏ। ଏନ୍ତାଃ ଏତେ ଆୟୁର୍ ବାଢ଼ାଅ କେତେ ୟୀଶୁ ମାତ୍ତି ନୁତୁମ୍ ମିୟାଃ ହୋଡ଼ କେ ରୋମାନ୍ ସାର୍‍କାର୍ ରାଃ ମାଲ୍‍ହାରୋମ୍ ଅଡ଼୍ଆଃ ଜାଗା ରେ ଦୁବାକାନ୍ ନେଲ୍‍କେଦାଏ, ହାର୍ ୟୀଶୁ ଇନିଃକେ କାଜିକେଦାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ!” ଇନିଃ ବିରିଃ କେତେ ଇନିଃକେ ଅତୋଙ୍ଗ୍ କିଜାଏ। ଚିମ୍ତାଙ୍ଗ୍ ଇନିଃ ମାତ୍ତି ଅଡ଼୍ଆଃ ରେ ଜୋମେ ଲାଗିନ୍ତେ ଦୁବ୍‍କାନ୍ ତାଇନାଏ, ଇମ୍ତା ମିଃଥିମ୍ବା ମାଲ୍‍ହାରୋମ୍‍କୋ ହାର୍ ପାପୀକୋ ହିଜୁଃକେତେ, ୟୀଶୁ ହାର୍ ଇନିଜାଃ ଚେଲାକୋ ଲୋଃ ଜୋମ୍ ଲାଗିନ୍ ଦୁବ୍ ଜାନାକୋ। ନେୟା ନେଲ୍‍କେତେ ଫାରିସୀ ହୋଡ଼ୋକୋ ଇନିଜାଃ ଚେଲାକୋକେ କାଜିକେଦାକୋ, “ଆପେୟାଃ ଗୁରୁ ମାଲ୍‍ହାରୋମ୍ କୋଲୋଃ ହାର୍ ପାପୀକୋ ଲୋଃ ଚିନାଃ ମେନ୍ତେ ଜୋମେୟାଏ?” ନେୟା ଆୟୁମ୍‍କେତେ ୟୀଶୁ ଇନ୍‍କୁକେ କାଜିକେଃକୋୱାଏ, “ବାଈଦ୍ ବୁଗିନ୍ ତାନ୍‍କୋ ଲାଗିନ୍ କାହା, ମେନ୍ଦୋ ବେମାରୀକୋ ଲାଗିନ୍ ଦାର୍‍କାର୍ ତାନିଃ। ଏନାଲାଗିନ୍ ଆପେ ସେନ୍ କେତେ ନେଣ୍ଡେରାଃ ମାନେ ଶିଖାଅନ୍ ପେ, ‘ଇଙ୍ଗ୍ ଦାଣେ କାହା, ମେନ୍ଦୋ ଦାୟା ସାନାଙ୍ଗ୍ ତାନାଇଙ୍ଗ୍।’ ଚିୟାଃଚି ଇଙ୍ଗ୍ ଧାର୍ମୀ କୋକେ କାହା, ମେନ୍ଦୋ ପାପୀକୋକେ କେଡ଼ା ଲାଗିନ୍ତେ ହିଜୁଃ କାନାଇଙ୍ଗ୍।” ଏନ୍ତେ ଯୋହାନ୍ ବାପ୍ତିସ୍ମା ଏହେମ୍ ନିଜାଃ ଚେଲାକୋ ଇନିଜାଃ ନାଡ଼େଏ ହିଜୁଃକେତେ କାଜିକିଜାକୋ, “ଆଲେ ହାର୍ ଫାରିସୀ ହୋଡ଼ୋକୋ ନିମିନାଙ୍ଗ୍ ଉପାସ୍ ମାଣ୍ଡାଅୟାଲେ, ମେନ୍ଦୋ ଆମାଃ ଚେଲାକୋ ଚିନାଃ ଲାଗିନ୍ ଉପାସ୍ କାକୋ ମାଣ୍ଡାଅୟା?” ୟୀଶୁ ଇନ୍‍କୁକେ କାଜିକେଃକୋୱାଏ, “ଚିମିନ୍ ଜାକେଦ୍ ଦୁଲ୍‍ହା ଇନ୍‍କୁ ଲୋଃ ତାଇନାଏ, ଚିନାଃ ବାରାତିକୋ ଉପାସ୍ କେତେ ଦୁକୁ ୱାକୋ? ମେନ୍ଦୋ ଏନ୍‍କାନ୍ ହୁଲାଙ୍ଗ୍ ହିଜୁଗା ଚିମ୍ତା ଦୁଲ୍‍ହା ଇନ୍‍କୁ ଲୋଃ ଗେନାଅଗାଏ; ଇମ୍ତା ଇନ୍‍କୁ ଉପାସ୍ ମାଣ୍ଡାଅୟାକୋ। ନାୱା ଲିଜାଃ ରାଃ ଖାଣ୍ଡା କେ ମାରି ଲିଜାଃ ଲୋଃ ଜେତାଏ କାକୋ ସିଲାଇୟା, ଚିୟାଃଚି ଏନ୍ ସିଲାଇକାନ୍ ତେୟାଃ ମାନେ ନାୱା ଲିଜାଃ ମାରି ଲିଜାଃ କେ ଆଡୋଃ ଥାଇଃ କେୟାଏ, ହାର୍ ଏନା ଥିମ୍ବାଗି ଚାଗାଡ଼୍ କେନୋଗା। ହାର୍ ହୋଡ଼ୋକୋ ନାୱା ଆଙ୍ଗୁର୍ ରାଶି କେ ମାରି ଉହୁର୍ ତୁମ୍ବା ରେ ଜେତାଏ କାକୋ ଫେରେଜେୟା, ଚିୟାଃଚି ନେଲେକା ରିକାଏ ରେ ଉହୁର୍ ତୁମ୍ବା ଚେଚାଃ କେନୋଗା, ହାର୍ ଆଙ୍ଗୁର୍ ରାଶି ଲିଙ୍ଗୀ କେନୋଗା, ହାର୍ ଉହୁର୍ ତୁମ୍ବା ନାଷ୍ଟ୍ କେନୋଗା; ମେନ୍ଦୋ ନାୱା ଆଙ୍ଗୁର୍ ରାଶି କେ ନାୱା ଉହୁର୍ ତୁମ୍ବା ରେ ଫେରେଜେୟାକୋ, ହାର୍ ଏନା ବାରାନାଃ କା ବାଗ୍‍ଡ଼ାଅଃ ୱା।” ଇନିଃ ଇନ୍‍କୁକେ ନେ ବାକାଣ୍ କାଜିକୋ ତାଇନାଏ, ଚି ନେଲେପେ, ମିୟାଃ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ହିଜୁଃକେତେ ଇନିଃକେ ଜୋହାର୍ କିଜାଏ ହାର୍ କାଜିକେଦାଏ, “ଇଙ୍ଗ୍ଆଃ ହୋନ୍‍କୁଡ଼ି ନାଆ ଗୋଏଃ କାନାଏ, ମେନ୍ଦୋ ସେନ୍ କେତେ ଆମାଃ ତିଈ ଇନିଜାଃ ରେ ମାଣ୍ଡାଅ ଏମ୍ ଦୋ ଇନିଃ ଜୀହିଃ କେନୋଗାଏ।” ୟୀଶୁ ବିରିଃ କେତେ ଆଜାଃ ଚେଲାକୋ ଲୋଃ ଇନିଜାଃ ଦୋୟାତେ ସେନ୍ ଜାନାଏ। ହାର୍ ନେଲେପେ, ମିୟାଃ କୁଡ଼ି ଅକନିଜାଃ ବାରା ବାରାଶ୍ ଏତେ ମାୟୋମ୍ ଲିଙ୍ଗୀ ରାଃ ବେମାର୍ ତାଇକେନା, ତାୟୋମ୍ ପାଡ଼େତେ ହିଜୁଃକେତେ ୟୀଶୁ ରାଃ ଲିଜାଃ ଆଚ୍ରା କେ ଜୁଟିଃ କେଦାଏ। ଚିୟାଃଚି ଇନିଃ ଆଜାଃ ମୋନ୍ ରେ କାଜି ତାଇନାଏ, “ଇଙ୍ଗ୍ ଇନିଜାଃ ଲିଜାଃ କେଗି ଜୁଟିଃ ତାଇଙ୍ଗ୍ ରେଦୋ ବେଶ୍ କେନୋ ଗାଇଙ୍ଗ୍।” ୟୀଶୁ ତାୟୋମ୍ ରୁଆଡ଼୍ କେତେ ଇନିଃକେ ନେଲ୍ କିଜାଏ ହାର୍ କାଜିକେଦାଏ, “ମାଈ ସାହାସ୍ ମାଣ୍ଡାଏମେ, ଆମାଃ ବିଶ୍ଵାସ୍ ଗି ଆମ୍‍କେ ବେଶ୍ କେଃମେୟାଏ।” ଏନ୍ତେ ଏନ୍ କୁଡ଼ି ଏନ୍ ସାମାୟ୍ ଏତେ ବେଶ୍ ଜାନାଏ। ଚିମ୍ତାଙ୍ଗ୍ ୟୀଶୁ ଏନ୍ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ରାଃ ଅଡ଼୍ଆଃ ତେ ସେଟେର୍ ଜାନାଏ, ହାର୍ ମୂର୍ଲି ସାଡିତାନ୍ କୋକେ ହାର୍ ମିଃଥିମ୍ବା ହୋଡ଼ୋକୋକେ ରାଆ ତାନ୍ ନେଲ୍‍କେଃକୋୱାଏ, ଏନ୍ତେ କାଜିକେଦାଏ, “ଆତୋମ୍ ପେ, ମାଈହୋନ୍ କାଏ ଗୋଜାକାନାଏ, ମେନ୍ଦୋ ଦୁଣୁମ୍ ତାନାଏ।” ନେୟା ରେ ଇନ୍‍କୁ ଇନିଃକେ ଲାନ୍ଦା କିଜାକୋ। ମେନ୍ଦୋ ଚିମ୍ତାଙ୍ଗ୍ ମିଃଥିମ୍ବା ହୋଡ଼ୋକୋ ଅଡୋଙ୍ଗ୍ ରିକା ଜାନାକୋ, ଇନିଃ ଭିତାର୍ ସେନ୍ କେତେ ମାଈହୋନ୍ ରାଃ ତିଈ ସାବ୍ କେଦାଏ, ହାର୍ ଇନିଃ ଜୀହିଃ ଜାନାଏ। ହାର୍ ନେ ବିଷାୟ୍ ରାଃ କାଜି ଏନ୍ ସବେନ୍ ଜାଗାକୋ ରେ ପାସ୍ରାଅ ଜାନା। ଚିମ୍ତାଙ୍ଗ୍ ୟୀଶୁ ଏନ୍ତାଃ ଏତେ ଆୟୁର୍ ସେନ୍ ଜାନାଏ, ଦୋ ବାରିୟା ଆନ୍ଧାକିନ୍ ଇନିଜାଃ ଦୋୟାତେ ନେୟା କାଜିତାନ୍ ଲୋଃ ହିଜୁଃ ଲେନାକିନ୍, “ହେ ଦାଉଦ୍ ରାଜା ରାଃ ସାନ୍ତାନ୍! ଆଲିଙ୍ଗ୍‍କେ ଦାୟା ଲିଙ୍ଗ୍‍ମେ।” ଚିମ୍ତାଙ୍ଗ୍ ଇନିଃ ଅଡ଼୍ଆଃ ତେ ସେଟେର୍ ଜାନାଏ, ଦୋ ଏନ୍ ଆନ୍ଧାକିନ୍ ଇନିଜାଃ ନାଡ଼େଏ ତେ ହିଜୁଃ ଲେନାକିନ୍ ହାର୍ ୟୀଶୁ ଇନ୍‍କିନ୍‍କେ କାଜିକେଃକିନାଏ, “ଚିନାଃ ଆବେନ୍ କେ ବିଶ୍ଵାସ୍ ମେନାଃ, ଚି ଇଙ୍ଗ୍ ନେୟା ରିକା ଧାଡ଼ିୟାଇଙ୍ଗ୍?” ଇନ୍‍କିନ୍ ଇନିଃକେ କାଜିକିଜାକିନ୍, “ହାଁ, ପ୍ରାଭୁ!” ଏନ୍ତେ ୟୀଶୁ ଇନ୍‍କିନାଃ ମେଏଃ ଜୁଟିଃ କେତେ କାଜିକେଦାଏ, “ଆବେନାଃ ବିଶ୍ଵାସ୍ ଲେକା ଆବେନ୍ ଲୋଃ ହୋବାଅଃ ଚା।” ହାର୍ ଇନ୍‍କିନାଃ ମେଏଃ ବେଶ୍ ଜାନା। ୟୀଶୁ ଇନ୍‍କିନ୍‍କେ କେଟେଃ ଆନାଚୁ ଏମ୍ କେତେ କାଜିକେଦାଏ, “ନେଲେପେ, ନେ କାଜିକେ ଅକଏ କେହ ଆଲୋପେ କାଜିକୋୱା ଚି ଇଙ୍ଗ୍ ଆପେକେ ବେଶ୍ କେଃବେନାଇଙ୍ଗ୍।” ମେନ୍ଦୋ ଇନ୍‍କିନ୍ ଅଡୋଙ୍ଗ୍ କେତେ ସବେନ୍ ଜାଗାକୋ ରେ ଇନିଜାଃ କାଜିକେ ପାସ୍ରାଅ ତାଦାକୋ। ଚିମ୍ତାଙ୍ଗ୍ ଏନ୍ ବାରିୟା ଆନ୍ଧାକିନ୍ ବେଶ୍ ହୋବାକେତେ ବାହାରି ସେନ୍ ତାଇକେନାକିନ୍, ଦୋ ନେଲେପେ, ହୋଡ଼ୋକୋ ମିୟାଃ କନ୍ଦାକେ ଅକନିଜାଃରେ ବୋଙ୍ଗାଆତ୍ମା ଏସେର୍କାନ୍ ତାଇକେନାଏ ଇନିଜାଃ ତାଃ ଆଉଲିଜାକୋ। ଚିମ୍ତାଙ୍ଗ୍ ୟୀଶୁ ଏନ୍ ବୋଙ୍ଗାଆତ୍ମା କେ ଅଡୋଙ୍ଗ୍ କିଜାଏ, ଦୋ କନ୍ଦା ବାକାଣ୍ କେଦାଏ। ନେୟା ରେ ମିଃଥିମ୍ବା ହୋଡ଼ୋକୋ ଆକ୍‍ଦାନ୍ଦା ହୋବାକେତେ କାଜିକେଦାକୋ, “ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ରେହ ନେଲେକା ଚିଉଲାଅ କାନେଲ୍ ଲେନ୍ ତାଇନା!” ମେନ୍ଦୋ ଫାରିସୀ ହୋଡ଼ୋକୋ କାଜିକେଦାକୋ, “ନିଈ ବୋଙ୍ଗାଆତ୍ମା କୋୱାଃ ମୁଖିୟା ରାଃ ଦେଙ୍ଗା ଏତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋତାନାଏ।” ୟୀଶୁ ହାର୍ ଆଜାଃ ଚେଲାକୋ ଗାଲିଲୀ ଜିଲ୍ଲା ରାଃ ସବେନ୍ ସାହାର୍ ହାର୍ ହାତୁ କୋରେ ହୋନୋର୍ ବାଡ଼ା ତାଇକେନାକୋ, ହାର୍ ୟୀଶୁ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ଶିଖାଅତାନ୍ ଲୋଃ ହାର୍ ପାର୍ମେଶ୍ଵାର୍ ରାଃ ରାଇଜ୍ ରାଃ ସୁସାମାଚାର୍ ପାର୍ଚାର୍ ତାନ୍ ଲୋଃ ହାର୍ ସବେନ୍ ରାକାମ୍ ରାଃ ବେମାର୍ ହାର୍ ଦୁକୁତାନ୍ କୋକେ ବେଶ୍ କୋ ତାଇକେନାଏ। ଚିମ୍ତାଙ୍ଗ୍ ଇନିଃ ମିଃଥିମ୍ବା ହୋଡ଼ୋକୋକେ ନେଲ୍‍କେଦାଏ ଦୋ ଇନିଃକେ ହୋଡ଼ୋକୋୱାଃ ଲାଗିନ୍ ଦାୟା ହୋବାଜାନା, ଚିୟାଃଚି ଇନ୍‍କୁ ଦୁକୁୱାକାନ୍ ହାର୍ ନେତେ-ହାନ୍ତେ ହୋବାକାନ୍ ତାଇକେନାକୋ। ଇନ୍‍କୁ ଏନ୍ ମିଣ୍ଡୀକୋ ଲେକାକୋ ତାଇକେନା, ଅକନ୍ କୋୱାଃ ଜେତାଏ ଗୁପୀନିଃ କାକୋ ତାଇନ୍ କେନା। ଏନ୍ତେ ଇନିଃ ଆଜାଃ ଚେଲାକୋକେ କାଜିକେଦାଏ, “ମାତାକାନ୍ ଅତେ ଇରୋଃ ଲାଗିନ୍ ଦୋ ମିଃଥିମ୍ବା ମେନାଃ ଏନ୍‍ଲେକା ମିଃଥିମ୍ବା ହୋଡ଼ୋକୋ ପାର୍ମେଶ୍ଵାର୍ ରାଃ ସାନ୍ଦେଶ୍ ଆୟୁମ୍ ଲାଗିନ୍ ସେକାଡ଼୍ ମେନାକୋୱା, ମେନ୍ଦୋ ନାଲାତାନ୍‍କୋ ଲେକା ପାର୍ମେଶ୍ଵାର୍ ରାଃ ରାଇଜ୍ ଉଦୁବ୍ ଲାଗିନ୍ ହୋଡ଼ୋକୋ ହୁଡିଙ୍ଗ୍ ମେନାକୋୱା। ଏନାଲାଗିନ୍ ଅତେ ରାଃ ଗୋମ୍‍କେ କେ ବିନ୍ତି ପେ, ଚି ଇନିଃ ଆଜାଃ ଅତେ ଇର୍ ଲାଗିନ୍ ନାଲାତାନ୍ କୋଲେକା ହୋଡ଼ୋକୋକେ ପାର୍ମେଶ୍ଵାର୍ ରାଃ ରାଇଜ୍ ଉଦୁବ୍ ଲାଗିନ୍ କୁଲ୍ କୋୱାଏ।” ୟୀଶୁ ଆଜାଃ ବାରାଝାନ୍ ଚେଲାକୋକେ ନାଡ଼େଏ କେଡ଼ାକେତେ, ଇନ୍‍କୁକେ ବୋଙ୍ଗାଆତ୍ମା କୋୱାଃ ଚେତାନ୍ ରେ ଆଧିକାର୍ ଏମାଃ କୋୱାଏ, ଚି ଇନ୍‍କୁକେ ଅଡୋଙ୍ଗ୍ କୋୱାକୋ ହାର୍ ସବେନ୍ ରାକାମ୍ ରାଃ ବେମାର୍ ହାର୍ ସବେନ୍ ରାକାମ୍ ରାଃ ଦୁକୁତାନ୍ କୋକେ ବେଶ୍ କୋୱାକୋ। ଏନ୍ ବାରାଝାନ୍ କୁଲାକାନ୍ ଚେଲା କୋୱାଃ ନୁତୁମ୍ ନେୟା ତାନାଃ: ସିଦାରେ ଶିମୋନ୍ ଅକନିଃ ପାତ୍ରାସ୍ କାଜିଅଃ ତାନାଏ, ହାର୍ ଇନିଜାଃ ହାଗା ଆନ୍ଦ୍ରିୟାସ୍, ଯାବ୍ଦୀ ଗାଃ ହୋନ୍ ୟାକୁବ୍, ହାର୍ ଇନିଜାଃ ହାଗା ଯୋହାନ୍, ଫିଲିପୁସ୍, ହାର୍ ବାର୍ତୁଲ୍‍ମୈ, ଥୋମା, ହାର୍ ମାଲ୍‍ହାରୋମ୍ ଇଦି ନିଈ ମାତ୍ତି, ହାଲ୍‍ଫାଇ ଗାଃ ହୋନ୍ ୟାକୁବ୍, ହାର୍ ତାଦେୟ। ହାର୍ ଶିମୋନ୍ ଦିଶୁମ୍ କେ ଦୁଲାଡ଼୍ ନିଈ ହାର୍ ୟାହୁଦା ଇସ୍କାରିୟୋତୀ, ଅକନିଃ ଚି ତାୟୋମ୍ତେ ୟୀଶୁ କେ ସାବ୍ ରିକା ତାଇଜାଏ। ନେ ବାରାଝାନ୍ କୋକେ ୟୀଶୁ ନେ ଆନାଚୁ ଏମ୍ କେତେ କୁଲ୍ କେଃକୋୱାଏ, “ଏଟାଃଜାତି କୋ ପାଡ଼୍ ଆଲୋପେ ସେନା, ହାର୍ ସାମାରୀୟା ହୋଡ଼ୋ କୋୱାଃ ଜାହାନ୍ ହାତୁ ରେ ଆଲୋପେ ବୋଲୋୱା। ମେନ୍ଦୋ ଇସ୍ରାଏଲ୍ ଦିଶୁମ୍ ରେନ୍ ଘାରାନା ରେନ୍ ଆଦାକାନ୍ ମିଣ୍ଡୀ କୋତାଃ ଗି ସେନ୍ ପେ। ହାର୍ ସେନ୍-ସେନ୍ ନେୟା ପାର୍ଚାର୍ ଏପେ, ସିର୍ମାଦିଶୁମ୍ ରାଃ ରାଇଜ୍ ନାଡ଼େଏ ହିଜୁଃ କାନା। ବେମାରୀ କୋକେ ଚାଙ୍ଗାଇ କପେ, ଗୋଜାକାନ୍ କୋକେ ଜୀହିଦ୍ କପେ, କୋଢ଼୍ ବେମାର୍ ହୋବାକାନ୍ କୋକେ ବେଶ୍ କପେ, ବୋଙ୍ଗାଆତ୍ମା କୋକେ ଅଡୋଙ୍ଗ୍ କପେ। ଆପେ ସାମାତେପେ ନାମାକାଦା, ସାମାତେ ଏମାକୋପେ। ଆପେୟାଃ ମାୟାଙ୍ଗ୍ ରାଃ ଥାଇଲା କୋରେ ନା ସୋନା, ନା ରୂପା, ହାର୍ ନା ତାମ୍ବା, ଆଲୋପେ ମାଣ୍ଡାଅୟା। ହୋରା ଲାଗିନ୍ ନାଦୋ ଥାଇଲା ମାଣ୍ଡାଏପେ, ନାଦୋ ବାବାରିୟା ଝୁଲା, ନାଦୋ ଖାର୍ପା, ହାର୍ ନାଦୋ ସଟା, ଚିୟାଃଚି କାମି ନିଈ କେ ଇନିଜାଃ ଜୋମେୟାଃ ନାମୋଃ ଚାହି। ଜାହାନ୍ ହାତୁ ହାର୍ ଟୋଲା କୋରେ ପେ ବୋଲୋୱା ଦୋ, ଏନ୍ତାଃରେ ଦାଣାୟିପେ ଅକଏ ବୁଗିନ୍ ହୋଡ଼ ମେନାଇଜା, ହାର୍ ଏନ୍ତାଃ ଏତେ ଆଉରି ଅଡୋଙ୍ଗ୍ ସାନ୍ତେ ଇନିଜାଃ ଅଡ଼୍ଆଃ ରେ ଗି ତାଇନ୍‍ପେ। ଅଡ଼୍ଆଃ ରେ ବୋଲୋ ତାନ୍ ଲୋଃ ଇନିଃକେ ଆଶିଷ୍ ଏମାଇପେ। ଆଗାର୍ ଏନ୍ ଅଡ଼୍ଆଃ ରେନ୍ ହୋଡ଼ୋକୋ ଆପେକେ ରାଶିକା ତେ ଗ୍ରାହାନ୍ ପେ ତାନ୍ ରେଦୋ, ଆପେୟାଃ ସୁକୁ ଏନ୍ ଅଡ଼୍ଆଃ ରେନ୍ ହୋଡ଼ୋକୋ ରେ ଥେବାଗୋୱା, ମେନ୍ଦୋ ଆଗାର୍ ଏନ୍ ଅଡ଼୍ଆଃ ରେନ୍ ହୋଡ଼ୋକୋ କାକୋ ଗ୍ରାହାନ୍ ପେ ରେଦୋ ଆପେୟାଃ ସୁକୁ ଆପେତାଃ ରୁଆଡ଼୍ କେନୋଗା। ଅକଏ ଆପେକେ କାକୋ ଗ୍ରାହାନ୍ ପେୟା ହାର୍ ଆପେୟାଃ କାଜି କାକୋ ଆୟୁମ୍ ଏୟା, ଏଣ୍ଡେ ଚିମ୍ତାଙ୍ଗ୍ ଏନ୍ ଅଡ଼୍ଆଃ ଏତେ ୟାଦୋ ଏନ୍ ସାହାର୍ ଏତେ ଅଡୋଙ୍ଗ୍‍ୱାପେ ଆପେୟାଃ କାଟା କୋରାଃ ଧୂଡ଼ି କଟା ତାପେ। ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍ ଚି ବିଚାର୍ ରାଃ ହୁଲାଙ୍ଗ୍ ଏନ୍ ସାହାର୍ ରାଃ ଦାଶା ଏତେ ସାଦୋମ୍ ହାର୍ ଆମୋରା ସାହାର୍ ରାଃ ଦାଶା ଥିମ୍ବା ସାହାତିଙ୍ଗ୍ ଲେକା ହୋବାୱା।” “ନେଲେପେ, ଇଙ୍ଗ୍ ଆପେକେ ମିଣ୍ଡୀ କୋ ଲେକା ହୁଣ୍ଡାର୍ କୋ ଲେକାନ୍ ହୋଡ଼ୋକୋ ଥାଲା ରେ କୁଲ୍‍ପେ ତାନାଇଙ୍ଗ୍, ଏନାଲାଗିନ୍ ବିଷ୍ ରାକାବ୍ ବିଙ୍ଗ୍ କୋଏତେ ବୁଦ୍ଧିମାନ୍ ହୋଡ଼ ଗେନାଃୱାଏ ଏନ୍‍ଲେକା ଏନ୍ ହୋଡ଼ୋକୋୱାଃ ତେ ଗେନା ରେ ତାଇନ୍‍ପେ ହାର୍ ଦୁଦ୍‍ମୁଲ୍ ଲେକା ନିର୍ଦୋଷ୍ ବାଇନ୍‍ପେ। ମେନ୍ଦୋ ହୋଡ଼ୋକୋ ଏତେ ହୋସିଆର୍ ତାଇନ୍‍ପେ ଚିୟାଃଚି ଇନ୍‍କୁ ଆପେକେ ମାରାଙ୍ଗ୍‍ସାଭା କୋରେ ଜିମା ପେୟାକୋ ହାର୍ ଆକୋୱାଃ ବିନ୍ତିଅଡ଼୍ଆଃ କୋରେ ଆପେକେ କୋଡ୍ରା ମାଉର୍ ପେୟାକୋ। ଆପେ ଇଙ୍ଗ୍ଆଃ ଲାଗିନ୍ ହାକିମ୍‍କୋ ହାର୍ ରାଜା କୋୱାଃ ନାଡ଼େଏ ଇନ୍‍କୁୱାଃ ରେ, ହାର୍ ଏଟାଃଜାତି କୋୱାଃ ରେ ଗୋୱା ହୋବାଅଃ ଲାଗିନ୍ ସେଟେର୍ ଅଗାପେ। ଚିମ୍ତାଙ୍ଗ୍ ଇନ୍‍କୁ ଆପେକେ ସାବ୍ ରିକାପେୟାକୋ ଦୋ ନେୟା ଆଲୋପେ ପାହୋମେୟା ଚି ଆଲେ ଅକଲେକାତେ ୟାଦୋ ଚିନାଃ କାଜିୟାଲେ, ଚିୟାଃଚି ଅକନାଃ ଆପେକେ କାଜି ହୋବାୱା ଏନା ଏନ୍ ସାମାୟ୍ ରେଗି ଆପେକେ ଉଦୁବୋଗା। ଚିୟାଃଚି କାଜି ନିଈ ଆପେ ନାହାଲାପେ ମେନ୍ଦୋ ଆପେୟାଃ ସିର୍ମାଦିଶୁମ୍ ଆପୁ ରାଃ ଆତ୍ମା ଆପେ ରେ କାଜିୟାଏ। ହାଗା, ହାଗା କେ ହାର୍ ଆପୁ ହୋନ୍‍କଡ଼ା କେ, ଗୋଏଃ ଲାଗିନ୍ତେ ଏମିୟାଏ ହାର୍ ହୋନ୍‍ଗାଣାକୋ ଏଙ୍ଗା-ଆପୁ କୋୱାଃ ବିରୋଧ୍ ରେ ତିଙ୍ଗୁନାକୋ ହାର୍ ଗୋଏଃ ରିକାକୋୱାକୋ। ଇଙ୍ଗ୍ଆଃ ନୁତୁମ୍ ରାଃ ଲାଗିନ୍ତେ ସବେନ୍ ହୋଡ଼ୋକୋ ଆପେକେ ଖିସ୍ ପେୟାକୋ, ମେନ୍ଦୋ ଅକଏ ଆଖ୍ରୀ ସାନ୍ତେ ସାହାତିଙ୍ଗ୍ କେତେ ତାଇନୋଗାଏ ଇନିଜାଃ ଗି ବାଞ୍ଚାଅ ହୋବାଅଃୱା। ଚିମ୍ତା ଇନ୍‍କୁ ଆପେକେ ମିୟାଃ ନାଗାର୍ ରେ ସାତାଅ ପେୟାକୋ, ଦୋ ଏଟାଃ ନାଗାର୍ ତେ ସେନୋଃପେ। ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍, ଆପେ ଇସ୍ରାଏଲ୍ ଦିଶୁମ୍ ରାଃ ସବେନ୍ ନାଗାର୍ କୋରେ କାପେ ହୋନୋର୍ ଛାବା କାରେଗି ଇଙ୍ଗ୍ ମାନ୍‍ୱା ରାଃ ହୋନ୍ ହିଜୁଃ କେନୋଗାଇଙ୍ଗ୍। ଚେଲା ଆଜାଃ ଗୁରୁ ଏତେ ମାରାଙ୍ଗ୍ କାଏ ହୋବାୱା ହାର୍ ନା ଦାସୀ ଆଜାଃ ଗୋମ୍‍କେ ଏତେ। ଚେଲା ରାଃ ଗୁରୁ ଲେକା ହାର୍ ଦାସୀ ରାଃ ଗୋମ୍‍କେ ଲେକା ବାରାବାରି ହୋବାଅଃ ତେୟାଗି ଥିମ୍ବା ତାନାଃ। ଚିମ୍ତାଙ୍ଗ୍ ଇନ୍‍କୁ ଅଡ଼୍ଆଃ ରେନ୍ ଗୋମ୍‍କେ କେ ଖାରାପ୍ ବେଓହାର୍ କେତେ ଶାଏତାନ୍ ବାଲ୍‍ଜିବୁଲ୍ କାଜିକେଦାକୋ ଦୋ ଇନିଜାଃ ଅଡ଼୍ଆଃ ରେନ୍ କୋକେ ଆଡୋଃ ଚିନାଃ କାକୋ ରିକାକୋୱାକୋ।” “ଏନାଲାଗିନ୍ ହୋଡ଼ୋକୋକେ ଆଲୋପେ ବୋରୋୟା, ଚିୟାଃଚି ଜେତ୍ନାଃ କା ଦାଲୋବ୍ କାନା ଯେ କା ଖଲାଅଗା, ହାର୍ ନା ଜେତ୍ନାଃ ଉକୁକାନ୍ ମେନାଃ, ଯେ କା ସାରିୟଗା। ଅକନାଃ ଇଙ୍ଗ୍ ଆପେକେ ନୁବାଃ ରେ କାଜିୟାପେ ତାନିଙ୍ଗ୍, ଏନାକେ ଆପେ ମାସ୍କାଲ୍ ରେ କାଜିପେ, ହାର୍ ଅକନାଃ ଲୁତୁର୍ ରେ ହାପା-ହାପା ପେ ଆୟୁମ୍ ତାନା ଏନା ଅଡ଼୍ଆଃ ରାଃ ଛାତ୍ ଚେତାନ୍ ଏତେ ସବେନ୍ କୋକେ ଉଦୁବ୍ କୋପେ। ଅକଏକୋ ହୋଡ଼ମୋ କେ ଗୋଜେୟାକୋ, ମେନ୍ଦୋ ଆତ୍ମା କେ କାକୋ ଗୋଏଃ ଧାଡ଼ିୟା, ଇନ୍‍କୁକେ ଆଲୋପେ ବୋରୋୱାକୋୱା, ମେନ୍ଦୋ ପାର୍ମେଶ୍ଵାର୍ କେ ବୋରୋୱାଇପେ, ଅକନିଃ ଆତ୍ମା ହାର୍ ହୋଡ଼ମୋ ବାରାନାଃ କେ ନାରାକ୍ ରେ ନାଷ୍ଟ୍ ରିକା ଧାଡ଼ିୟାଏ। ଚିନାଃ ହୁଡିଙ୍ଗ୍ ପାଇସା ରେ ବାରିୟା ଗେର୍‍ୱାଁ ଅଡ଼େକୋ କାକୋ ଆଖ୍ରିଙ୍ଗ୍ଅୱା? ଏନା ରେହଗି ଆପେୟାଃ ଆପୁ ରାଃ ସାନାଙ୍ଗ୍ ବେଗାର୍ ଇନ୍‍କୁ ଏତେ ମିୟାଃ ହଗି ଅତେ ରେ ଉୟୁଃକେତେ କାକୋ ଗୋଜୋଗା। ଆପେୟାଃ ବୋଅ ରାଃ ଉବ୍ ହଗି ସବେନାଃ ଲେକା କାନା। ଏନାଲାଗିନ୍ ଆଲୋପେ ବୋରୋୟା, ଆପେ ଥିମ୍ବା ଗେର୍‍ୱାଁ କୋଏତେ ଗୋନୋଙ୍ଗାନ୍ ତାନ୍‍ପେ।” “ଏନାମେନ୍ତେ ଜେତାଏ ହ ହୋଡ଼ୋକୋୱାଃ ନାଡ଼େଏ ରେ ଇଙ୍ଗ୍‍କେ ମାନାତିଙ୍ଗ୍ କେୟାକୋ ଚି ଇନ୍‍କୁ ଇଙ୍ଗ୍ଆଃ ଚେଲା ତାନ୍‍କୋ, ଇଙ୍ଗ୍ ହଗି ଇନ୍‍କୁକେ ଇଙ୍ଗ୍ଆଃ ସିର୍ମାଦିଶୁମ୍ ରେନ୍ ଆପୁ ରାଃ ନାଡ଼େଏ ରେ ଇଙ୍ଗ୍ଆଃ ଚେଲା ତାନ୍‍କୋ ମେନ୍ତେ ମାନାତିଙ୍ଗ୍ କେୟାଇଙ୍ଗ୍। ମେନ୍ଦୋ ଜେତାଏ ହ ହୋଡ଼ୋକୋୱାଃ ନାଡ଼େଏ ରେ ବୋରୋତେ ଇନିଜାଃ ଚେଲା ତାନିଙ୍ଗ୍ ମେନ୍ତେ ଇଙ୍ଗ୍‍କେ କାଏ ମାନାତିଙ୍ଗ୍‍ୟାଏ, ଇନିଃକେ ଇଙ୍ଗ୍ ହଗି ଇଙ୍ଗ୍ଆଃ ସିର୍ମାଦିଶୁମ୍ ରେନ୍ ଆପୁ ତାଃ ରେ ଇଙ୍ଗ୍ଆଃ ଚେଲା ନାହାଲାଏ ମେନ୍ତେ କାଜିୟାଇଙ୍ଗ୍। ନେୟା ଆଲୋପେ ବୁଝାଅଃୱା ଚି ଇଙ୍ଗ୍ ଅତେ ରେ ହୋଡ଼ୋକୋକେ ମେନେଶା ରିକା ଲାଗିନ୍ତେ ହିଜୁଃ କାନାଇଙ୍ଗ୍, ମେନେଶା ଲାଗିନ୍ତେ କାହା, ମେନ୍ଦୋ ଆଲାଗ୍ ରିକା ଲାଗିନ୍ତେ ଇଙ୍ଗ୍ ହିଜୁଃ କାନାଇଙ୍ଗ୍। ଇଙ୍ଗ୍ ଦୋ ହିଜୁଃ କାନାଇଙ୍ଗ୍ ଚି, ‘ହୋଡ଼କେ ଇନିଜାଃ ଆପୁ ଏତେ ହାର୍ ହୋନ୍‍କୁଡ଼ି କେ ଆଜାଃ ଏଙ୍ଗା ଏତେ ହାର୍ କିମିନ୍ କେ ଆଜାଃ ହାନାର୍ ଏତେ ଆଲାଗ୍ ତାକୋୱାଇଙ୍ଗ୍; ହୋଡ଼ ରାଃ ବାଇରୀ ଇନିଜାଃ ଅଡ଼୍ଆଃ ରେନ୍ କୋଗି ହୋବାୱାକୋ।’ ଅକଏ ଏଙ୍ଗା ହାର୍ ଆପୁ କେ ଇଙ୍ଗ୍ ଏତେ ଥିମ୍ବା ଦୁଲାଡ଼୍ ମାଣ୍ଡାଅ ୟାଏ, ଇନିଃ ଇଙ୍ଗ୍ଆଃ ଚେଲା ବାଇୟୋଃ ଲେକାନିଃ ନାହାଲାଏ ହାର୍ ଅକଏ ଆଜାଃ ହୋନ୍‍କଡ଼ା ୟାଦୋ ହୋନ୍‍କୁଡ଼ି କେ ଇଙ୍ଗ୍ ଏତେ ଥିମ୍ବା ଦୁଲାଡ଼୍ ମାଣ୍ଡାଅ ୟାଏ, ଇନିଃ ଇଙ୍ଗ୍ଆଃ ଚେଲା ବାଇୟୋଃ ଲେକାନିଃ ନାହାଲାଏ। ଅକଏ ଆଜାଃ କ୍ରୁଶ୍ ଇଦିକେତେ ଇଙ୍ଗ୍‍କେ ଅତୋଙ୍ଗିଙ୍ଗ୍ କାଏ ସାନାଙ୍ଗାଏ ଇନିଃ ଇଙ୍ଗ୍ଆଃ ଚେଲା ବାଇୟୋଃ ଲେକାନିଃ ନାହାଲାଏ। ଅକଏ ଆଜାଃ ଜୀଉ କେ ବାଚାଓ ତାନାଏ ଇନିଃ ଏନାକେ ଆଦେୟାଏ, ହାର୍ ଅକଏ ଇଙ୍ଗ୍ଆଃ ଲାଗିନ୍ ଆଜାଃ ଜୀଉ କେ ଆଦେୟାଏ ଇନିଃ ଏନାକେ ନାମେୟାଏ।” “ଅକଏ ଆପେକେ ଗ୍ରାହାନ୍ ପେ ତାନାଏ, ଇନିଃ ଇଙ୍ଗ୍‍କେ ଗ୍ରାହାନ୍ ତାନାଏ; ହାର୍ ଅକଏ ଇଙ୍ଗ୍‍କେ ଗ୍ରାହାନ୍ ତାନାଏ, ଇନିଃ ଇଙ୍ଗ୍ଆଃ କୁକୁଲ୍ ନିଃକେ ଗ୍ରାହାନ୍ ତାନାଏ। ଅକଏ ନାବୀ କେ ପାର୍ମେଶ୍ଵାର୍ ରାଃ ସାନ୍ଦେଶ୍ କାଜିୟାଏ ମେନ୍ତେ ଗ୍ରାହାନ୍ ୟାଏ ପାର୍ମେଶ୍ଵାର୍ ଇନିଃକେ ନାବୀ ରାଃ ଲେକା ଗି ଆଶିଷ୍ ଏମିୟାଏ, ହାର୍ ଅକଏ ଧାର୍ମୀ କେ ପାର୍ମେଶ୍ଵାର୍ ରାଃ ଧାର୍ମୀ ହୋଡ଼ ତାନିଃ ମେନ୍ତେ ଗ୍ରାହାନ୍ ୟାଏ ଇନିଃ ଧାର୍ମୀ ହୋଡ଼ ଲେକା ଗି ଆଶିଷ୍ ନାମେୟାଏ। ଜେତାଏ ହଗି ନେ ହୁଡିଙ୍ଗ୍ କୋଏତେ ମିହୋଡ଼୍ କେ ଇଙ୍ଗ୍ଆଃ ଚେଲା ସାରିକେତେ, ଖାଲି ମିୟାଃ ଗିଲାସ୍ ବେରେଲ୍ ଦାଆ ଆନୁଇୟାଏ, ଇଙ୍ଗ୍ ଆପେକେ ସାର୍ତେଗୀ କାଜି ତାନାଇଙ୍ଗ୍, ଇନିଃ ଅକୋ ଲେକାତେ ଆଜାଃ ଆଶିଷ୍ କାଏ ଆଦେୟାଏ।” ଚିମ୍ତାଙ୍ଗ୍ ୟୀଶୁ ଆଜାଃ ବାରାଝାନ୍ ଚେଲାକୋକେ ଆନାଚୁ ଏମ୍ ଛାବା କେଃକୋୱାଏ, ଦୋ ଇନିଃ ଗାଲିଲୀ ଜିଲ୍ଲା ରାଃ ସାହାର୍ କୋରେ ଉପ୍‍ଦେଶ୍ ହାର୍ ପାର୍ଚାର୍ ଲାଗିନ୍ତେ ଏନ୍ତାଃ ଏତେ ସେନୋଃ ଜାନାଏ। ଯୋହାନ୍ ଜେଲ୍ଅଡ଼୍ଆଃ ରେ ମାସୀହ୍ ଗାଃ କାମି ରାଃ ସାମାଚାର୍ ଆୟୁମ୍ କେଦାଏ ହାର୍ ଆଜାଃ ଚେଲାକୋକେ ଇନିଜାଃ ନାଡ଼େଏ ନେୟା କୁଲି ଲାଗିନ୍ତେ କୁଲ୍ କେଃକୋୱାଏ। ହାର୍ ଇନ୍‍କୁ ଇନିଃକେ କୁଲିକିଜାକୋ, “ଚିନାଃ ହିଜୁଃନିଃ ଆମ୍ ଗି ତାନ୍‍ମେ, ଚି ଆଲେ ଆଡୋଃ ଏଟାଃନିଃ କେ ନେଲ୍ ହୋରାଇୟାଲେ?” ୟୀଶୁ କାଜିରୁଆଡ଼୍ କେଃକୋୱାଏ, “ଅକନାଃ କୋ ଆପେ ପେ ଆୟୁମ୍ ତାନା ହାର୍ ପେ ନେଲ୍‍ତାନା ଏନା ସବେନାଃ ସେନ୍ କେତେ ଯୋହାନ୍ କେ କାଜିୟାଇପେ, ଚି ଆନ୍ଧାକୋ ନେଲ୍‍ତାନାକୋ ହାର୍ ଲାଙ୍ଗ୍ଡ଼ାକୋ ସେସେନ୍ ତାନାକୋ, କୋଢ଼୍ ବେମାର୍ ରେନ୍ ହୋଡ଼ୋକୋ ବେଶ୍ ହୋବାଅଃ ତାନାକୋ ହାର୍ ବାହିରାକୋ ଆୟୁମ୍ ତାନାକୋ, ଗୋଜାକାନ୍ କୋ ଜୀବିରିଦୋଃ ତାନାକୋ, ହାର୍ ରେଙ୍ଗେଃ ତାନ୍ କୋକେ ସୁସାମାଚାର୍ ଉଦୁବଃ ତାନା। ହାର୍ ଧାନ୍ୟା ଇନିଃ ତାନିଃ ଅକନିଃ ଇଙ୍ଗ୍ଆଃ ରେ ବିଶ୍ଵାସ୍ ରିକା କାଏ ବାଗେ ତାନାଏ।” ଚିମ୍ତାଙ୍ଗ୍ ଯୋହାନ୍ ରାଃ ଚେଲାକୋ ସେନୋଃ ଜାନାକୋ ଦୋ ୟୀଶୁ ଯୋହାନ୍ ରାଃ ବିଷାୟ୍ ରେ ହୋଡ଼ୋକୋକେ କାଜି ଏଟେଃ କେଦାଏ, ଆପେ ସୁନ୍‍ସାନ୍ ଜାଗା ରେ ଚିଲ୍‍କାନ୍ ହୋଡ଼ କେ ନେନେଲ୍ ପେ ସେନ୍ କେନା? ଚିନାଃ ହୋୟୋ ତେ ହିଲାଅଃତାନ୍ ଜିପିଲିଙ୍ଗ୍ ତାସାଃ ଲେକା ହୋଡ଼ ରାଃ କାଜିକୋ ବାଦ୍‍ଲୀ କାତୋଃୱା ଏନ୍‍କାନ୍ ନିଃକେ? ଏଣ୍ଡେ ଆପେ ଚିନାଃ ନେନେଲ୍ ପେ ସେନ୍ ଲେନ୍ ତାଇନା? ନେଲେପେ, ଅକଏ ଗୋନୋଙ୍ଗ୍ ଲିଜାଃ ତୁସିଙ୍ଗ୍ ଏନାକୋ ଇନ୍‍କୁ ରାଜ୍ ମାହାଲ୍ ରେ ତାଇନାକୋ। ଏଣ୍ଡେ ଚିନାଃ ମେନ୍ତେ ପେ ସେନ୍ ଲେନ୍ ତାଇନା? ଚିନାଃ ମିୟାଃ ନାବୀ କେ ନେନେଲ୍ ଲାଗିନ୍ତେ? ହାଁ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ନାବୀ ଏତେ ହ ମାରାଙ୍ଗ୍ ନିଃକେ। ନିଈ ଇନିଃଗି ତାନିଃ ଅକନିଜାଃ ବିଷାୟ୍ ରେ ପାବିତାର୍ ପୁଥି ରେ ଅଲାକାନା, “ନେଲେମ୍, ଇଙ୍ଗ୍ ଇଙ୍ଗ୍ଆଃ ସାନ୍ଦେଶ୍ ଏହେମ୍ ନିଈ କେ ଆମାଃ ଆୟୁର୍ ରେ କୁଲ୍ ତାନାଇଙ୍ଗ୍, ଅକନିଃ ଆମାଃ ଆୟୁର୍ ରେ ଆମାଃ ହୋରା ବାଇୟାଏ।” ଇଙ୍ଗ୍ ଆପେକେ ସାର୍ତି କାଜି ତାନିଙ୍ଗ୍ ଚି ଅକନ୍‍କୋ କୁଡ଼ି କୋଏତେ ଜାନାମ୍ କାନାକୋ ଇନ୍‍କୁ ଏତେ ଯୋହାନ୍ ବାପ୍ତିସ୍ମା ଏହେମ୍ ନିଈ ଏତେ ଜେତାଏ ମାରାଙ୍ଗ୍ କାକୋ ହୋବାକାନା, ଏଣ୍ଡେହ ଅକଏ ସିର୍ମାଦିଶୁମ୍ ରାଃ ରାଇଜ୍ ରେ ହୁଡିଙ୍ଗ୍ ଏତେ ହୁଡିଙ୍ଗ୍ ଆଏ ଇନିଃ ଇନିଜେତେ ମାରାଙ୍ଗ୍ ତାନିଃ। ଯୋହାନ୍ ବାପ୍ତିସ୍ମା ଏହେମ୍ ନିଜାଃ ପାର୍ଚାର୍ ହୁଲାଙ୍ଗ୍ ଏତେ ନାଆ ସାନ୍ତେ ସିର୍ମାଦିଶୁମ୍ ରାଃ ରାଇଜ୍ ପେଡ଼େଏ ତେ ହାରା ଇଦିଅଃ ତାନା, ହାର୍ ପେଡ଼େଜାନ୍ ହୋଡ଼ୋକୋ ଏନାକେ ରେଏଃ କେ ତାନାକୋ। ଯୋହାନ୍ ସାନ୍ତେ ସବେନ୍ ନାବୀ କୋୱାଃ କିତାବ୍ ହାର୍ ମୁଶା ନାବୀ ରାଃ ଆଇନ୍ ରେ ସିର୍ମାଦିଶୁମ୍ ରାଃ ରାଇଜ୍ ହିଜୁଃ ବିଷାୟ୍ ରେ ଆୟାର୍‍କାଜି ଅଲ୍ ଲେନ୍ ତାଇକେନା। ହାର୍ ଆପେ ମାନାତିଙ୍ଗ୍ ୟାପେ ଏଣ୍ଡେ ଦୋ ଏଲିୟା ଅକନିଜାଃ ବିଷାୟ୍ ରେ ନାବୀ କୋ କାଜିଲେଃ ତାଇକେନାକୋ ଯେ ହିଜୁଃ ରାଃ ତାଇକେନାଏ, ଇନିଃ ନିଈଗି ତାନିଃ। ଅକେୟାଃ ତାଃ ଆୟୁମ୍ ଲାଗିନ୍ ଲୁତୁର୍ ମେନାଃ ଇନିଃ ଆୟୁମେ କାଏ। “ଇଙ୍ଗ୍ ନେ ସାମାୟ୍ ରେନ୍ ହୋଡ଼ୋକୋକେ ଅକେୟାଃ ଲେକା ଜୋକା କୋୱାୟାଇଙ୍ଗ୍ ଚି ଇନ୍‍କୁ ଅକେୟାଃ ଲେକା ମେନାକୋୱା? ଇନ୍‍କୁ ଏନ୍ ହୋନ୍ କୋ ଲେକାକୋ ମେନାକୋୱା, ଅକନ୍‍କୋ ପିଟ୍ ରେ ଦୁବ୍ କେତେ ମିହୋଡ଼୍ ଏଟାଃନିଃ କେ କେଡ଼ା କେତେ କାଜିୟାକୋ। ‘ଆଲେ ଆପେୟାଃ ଲାଗିନ୍ ରାଶିକା ଦୁରାଙ୍ଗ୍ ଷାଡି କେଦାଲେ ହାର୍ ଆପେ କାପେ ସୁସୁଙ୍ଗ୍ କେଦା, ଆଲେ ଦୁକୁ ଦୁରାଙ୍ଗ୍ ରେ ରାଆ କେଦାଲେ ହାର୍ ଆପେ କୁଡ଼ାମ୍ କାପେ ବିଡ଼ା କେଦା।’ ଚିୟାଃଚି ଯୋହାନ୍ ଚିମିନାଙ୍ଗ୍ ଗି ଉପାସ୍ ଦୋହୋ କେଦାଏ ହାର୍ ଦାଖ୍‍ରାସ୍ କାଏ ନୁ କେଦାଏ ହାର୍ ଇନ୍‍କୁ କାଜିୟାକୋ, ‘ଇନିଜାଃ ରେ ବୋଙ୍ଗାଆତ୍ମା ମେନାଇଜା।’ ମେନ୍ଦୋ ଇଙ୍ଗ୍ ମାନ୍‍ୱା ରାଃ ହୋନ୍ ଜୋମ୍ ନୁ କେତେ ହିଜୁଃ ନାଇଙ୍ଗ୍ ହାର୍ ଇନ୍‍କୁ କାଜିୟାକୋ, ‘ନେଲେପେ, ପେଟୁ ହାର୍ ମାତ୍‍ୱାର୍ ହୋଡ଼, ମାଲ୍‍ଗୁଜାରୀ ହାରୋମ୍ କୋୱାଃ ହାର୍ ପାପୀକୋୱାଃ ଗାତି!’ ମେନ୍ଦୋ ହୋଡ଼ୋକୋୱାଃ କାମି ଉଦୁବ୍ ୟାଏ ଚି ଅକଏ ସେଣାନ୍ ତାନିଃ।” ଏନ୍ତେ ୟୀଶୁ ଏନ୍ ସାହାର୍ ରେନ୍ ହୋଡ଼ୋକୋକେ ଏଗେର୍ ଏଟେଃ କେଦାଏ, ଅକନାଃ କୋରେ ଇନିଃ ଥିମ୍ବାଗି ପେଡ଼େଏ ରାଃ କାମି ରିକା ଲେଃ ତାଇନାଏ, ଚିୟାଃଚି ଇନ୍‍କୁ ଆକୋୱାଃ ମୋନ୍ କାକୋ ରୁଆଡ଼୍ ଲେଃ ତାଇନା। “ହାୟ୍, ଖୁରାଜିନ୍ ସାହାର୍ ରେନ୍ ହୋଡ଼ୋକୋ! ହାୟ୍ ବେଥ୍‍ସୈଦା ସାହାର୍ ରେନ୍ ହୋଡ଼ୋକୋ! ଅକନ୍ ପେଡ଼େଏ ରାଃ କାମି ଆପେୟାଃ ରେ ରିକା ଲେନ୍ ତାଇନା, ଆଗାର୍ ଏନା ସୁର୍ ହାର୍ ସିଦୋନ୍ ସାହାର୍ କୋରେ ରିକା ଜାନ୍ତେ, ଏଣ୍ଡେ ଇନ୍‍କୁ ଦୁକୁଲିଜାଃ ଉୟୁକେତେ ହାର୍ ତରେଃ ରେ ଦୁବ୍‍କେତେ ଚିଉଲାଏତେ ଗି ପାପ୍ କାମି କେ ବାଗେ କେଃତେକୋ। ମେନ୍ଦୋ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ବିଚାର୍ ହୁଲାଙ୍ଗ୍ ଆପେ ଅକନ୍ ଦାଣ୍ଡ୍ ନାମେୟାପେ ଏନାତେ ସୁର୍ ହାର୍ ସିଦୋନ୍ ସାହାର୍ ରେନ୍ କୋ ନାମ୍ ଲେନ୍ ଦାଣ୍ଡ୍ ହୁଡିଙ୍ଗ୍ ହୋବାୱା। ହେ କାଫାର୍ନାହୁମ୍ ସାହାର୍ ରେନ୍ ହୋଡ଼ୋକୋ ଚିନାଃ ଆପେ ସିର୍ମାଦିଶୁମ୍ ସାନ୍ତେ ଚେତାନ୍ ଅଗାପେ? କାହା, ଆପେ ନାରାକ୍ ସାନ୍ତେ ଲାଥାର୍ ତେ ସେନାପେ! ଅକନ୍ ପେଡ଼େଏ ରାଃ କାମି ଆପେୟାଃ ରେ ରିକା ଲେନ୍ ତାଇନା, ଆଗାର୍ ସାଦୋମ୍ ସାହାର୍ ରେ ରିକା ଜାନ୍ତେ, ଏଣ୍ଡେ ଏନା ଇସିଙ୍ଗ୍ ସାନ୍ତେ ବାଇକେତେ ତାଇଜାନ୍ତେ। ମେନ୍ଦୋ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ବିଚାର୍ ହୁଲାଙ୍ଗ୍ ଆପେ ଅକନ୍ ଦାଣ୍ଡ୍ ନାମେୟାପେ ଏନାତେ ସାଦୋମ୍ ସାହାର୍ ରେନ୍ ହୋଡ଼ୋକୋୱାଃ ନାମ୍ ଲେନ୍ ଦାଣ୍ଡ୍ ହୁଡିଙ୍ଗ୍ ହୋବାଅଃୱା।” ଏନ୍ ସାମାୟ୍ ୟୀଶୁ କାଜିକେଦାଏ, “ହେ ଆବା, ସିର୍ମାଦିଶୁମ୍ ହାର୍ ଅତେ ରେନ୍ ପ୍ରାଭୁ, ଇଙ୍ଗ୍ ଆମାଃ ଧାନ୍ୟାବାଦ୍ ତାନିଙ୍ଗ୍ ଚି, ଆମ୍ ନେ କାଜିକୋକେ ସେଣାନ୍‍କୋ ହାର୍ ବୁଝାଅଧାଡ଼ି ଲେକାନ୍‍କୋ ଏତେ ଉକୁକେତେ ମାଣ୍ଡାଅ କେଦାମ୍, ହାର୍ ସାଧାରାନ୍ ନାୱା ବିଶ୍ଵାସୀ ହୋଡ଼ୋକୋୱାଃ ରେ ଉଦୁବ୍ କେଦାମ୍। ହାଁ, ହେ ଆବା, ଚିୟାଃଚି ଆମ୍‍କେ ନେୟାଗି ସୁକୁ ଆଦା କେଃମେୟା।” “ଇଙ୍ଗ୍ଆଃ ଆବା ଇଙ୍ଗ୍‍କେ ସବେନାଃ ଜିମା କାଦିଙ୍ଗାଏ ହାର୍ ଜେତାଏ ହୋନ୍‍କଡ଼ା କେ କାକୋ ସାରିୟା, ଖାଲି ଆପୁ, ହାର୍ ଜେତାଏ ଆପୁ କେ କାକୋ ସାରିୟା, ଖାଲି ହୋନ୍‍କଡ଼ା, ହାର୍ ଏନ୍ ହୋଡ଼ ଆପୁ କେ ସାରିୟାଏ ଅକନିଃକେ ହୋନ୍‍କଡ଼ା ଏନାକେ ଉଦୁବ୍ ସାନାଙ୍ଗାଏ।” ହେ ସବେନ୍ ଲାଗାକାନ୍‍କୋ ହାର୍ ହାମ୍ବାଲ୍ ତେ ତେନାକାନ୍ ହୋଡ଼ୋକୋ, ଇଙ୍ଗ୍ଆଃ ତାଃ ହିଜୁଃପେ, ଇଙ୍ଗ୍ ଆପେକେ ଆରାମ୍ ଏମେୟାଇଙ୍ଗ୍। ଇଙ୍ଗ୍ଆଃ ବାହାରୋମ୍ ଗୋଃଏପେ, ହାର୍ ଇଙ୍ଗ୍ ଏତେ ଶିଖାଅନ୍‍ପେ ଇଙ୍ଗ୍ ଲେବେଃ ହାର୍ ମୋନ୍ ରେ ନାରାମ୍ ମେନାଇଙ୍ଗ୍‍ୟା ହାର୍ ଆପେ ଆପେୟାଃ ମୋନ୍ ରେ ଆରାମ୍ ପେ ନାମେୟା। ଚିୟାଃଚି ଇଙ୍ଗ୍ଆଃ ବାହାରୋମ୍ ସାହାଜ୍ ହାର୍ ଇଙ୍ଗ୍ଆଃ ହାମ୍ବାଲ୍ ରାୱାଲ୍ ଗିୟାଃ। ଏନ୍ ସାମାୟ୍ ରେ ୟୀଶୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଲୋୟୋଙ୍ଗ୍ ଆଡ଼ି ରେ ସେନୋଃ ତାଇକେନାଏ; ହାର୍ ଆଜାଃ ଚେଲାକୋକେ ରେଙ୍ଗେଃ କେଃକୋୱା, ଦୋ ଇନ୍‍କୁ ଯଅ ଗେଲେ କେ ପେଟେଃ-ପେଟେଃ କେତେ ରାଗ୍ଡ଼ାଅ ଜୋମ୍ ଲାଗାଅ ଜାନାକୋ। ଫାରିସୀ ହୋଡ଼ୋକୋ ନେୟା ନେଲେ କେତେ ଇନିଃକେ କାଜିକିଜାକୋ, “ନେଲେମ୍, ଆମାଃ ଚେଲାକୋ ଏନ୍ କାମି ରିକା ତାନାକୋ ଅକନାଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ କାମି ବୁଗିନାଃ ନାହାଲା।” ୟୀଶୁ ଇନ୍‍କୁକେ କାଜିକେଦାଏ, “ଚିନାଃ ଆପେ କାପେ ପାଢ଼ାଅ କାନା ଚି, ରାଜା ଦାଉଦ୍ ଚିମ୍ତା ଇନିଃ ହାର୍ ଆଜାଃ ଗାତିକୋ ରେଙ୍ଗେଃ ଜାନାକୋ, ଦୋ ଚିନାଃ ରିକା କେଦାଏ? ଇନିଃ ଚିଲ୍‍କା ପାର୍ମେଶ୍ଵାର୍ ରାଃ ଅଡ଼୍ଆଃ ରେ ବୋଲୋ ଜାନାଏ, ହାର୍ ଭେଁଟ୍ ରାଃ ହୋଲୋଙ୍ଗ୍ କୋକେ ଜୋମ୍‍କେଦାଏ, ଅକନାଃକେ ଜୋଜୋମ୍ ନାଦୋ ଇନିଃକେ ହାର୍ ନା ଆଜାଃ ଗାତିକୋକେ ତାଇକେନା, ମେନ୍ଦୋ ୟାଜାକ୍ କୋକେ ଭାଇର୍ ଠାଉକା ତାଇକେନା?” ହାର୍ ଚିନାଃ ଆପେ ମୁଶା ନାବୀ ରାଃ ଆଇନ୍ ରେ କାପେ ପାଢ଼ାଅ କାନା ଚି, ୟାଜାକ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ମାନ୍ଦିର୍ ରେ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରାଃ ନିୟାମ୍ କେ କାକୋ ମାନାତିଙ୍ଗ୍ ରେହ ଗି ନିର୍ଦୋଷ୍ ହୋବାଅଃୱାକୋ? ମେନ୍ଦୋ ଇଙ୍ଗ୍ ଆପେ କେ କାଜିୟାପେ ତାନିଙ୍ଗ୍ ଚି, ନେତାଃ ରେ ଇନିଃ ମେନାଇଜା ଅକନିଃ ମାନ୍ଦିର୍ ଏତେ ହଗି ମାରାଙ୍ଗ୍ ତାନିଃ। ଆଗାର୍ ଆପେ ନେୟା ରାଃ ମାନେ ସାରିତେପେ, “ଇଙ୍ଗ୍ ଦାୟା ତେ ସୁକୁଃ ୱାଇଙ୍ଗ୍, ଦାଣେ ତେ କାହା,” ଦୋ ଆପେ ଇଙ୍ଗ୍ଆଃ ନିର୍ଦୋଷ୍ ଚେଲାକୋକେ ଦୋଷୀ କାପେ ବାଇତେୟାଃ। ଇଙ୍ଗ୍ ମାନ୍‍ୱା ରାଃ ହୋନ୍ ଦୋ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରାଃ ହ ପ୍ରାଭୁ ତାନିଙ୍ଗ୍। ଏନ୍ତାଃ ଏତେ ସେନ୍ କେତେ ୟୀଶୁ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ସେନ୍ ଜାନାଏ, ଏନ୍ତାଃରେ ମିୟାଃ ହୋଡ଼ ତାଇକେନାଏ, ଇନିଜାଃ ମିୟାଃ ତିଈ ରୋହଡ଼୍ ଲେନ୍ ତାଇନା। ଇନ୍‍କୁ ୟୀଶୁ କେ ଦୋଷ୍ ଲାଗାଅ ଲାଗିନ୍ ଇନିଃକେ କୁଲିକିଜାକୋ, “ଚିନାଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଚାଙ୍ଗାଇ ତେୟାଃ ଠାଉକା ତାନାଃ?” ୟୀଶୁ ଇନ୍‍କୁକେ କାଜିକେଃକୋୱାଏ, “ଆପେ କୋଏତେ ଅକଏ ଏନ୍‍କା ମେନିଜା ଅକେୟାଃ ମିୟାଃ ଗି ମିଣ୍ଡୀ ତାଇନାଏ, ହାର୍ ଇନିଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଡୋଡା ରେ ଉୟୁଃ କେନୋଃରେ, ଚିନାଃ ଇନିଃ ଏନ୍ ମିଣ୍ଡୀ କେ ସାବ୍ କେତେ କାଏ ଅଡୋଙ୍ଗିୟାଏ? ଏଣ୍ଡେ, ହୋଡ଼ ରାଃ ଗୋନୋଙ୍ଗ୍ ମିଣ୍ଡୀ ତେୟଗି ଚିମିନ୍ ମାରାଙ୍ଗ୍ ତାନାଃ! ଏନାଲାଗିନ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ହୋଡ଼ୋକୋକେ ବୁଗିନ୍ ରିକା ତେୟାଃ ଠାଉକା ତାନାଃ।” ଏନ୍ତେ ଇନିଃ ଏନ୍ ହୋଡ଼ କେ କାଜିକେଦାଏ, “ଆମାଃ ତିଈ ଜିଲିଙ୍ଗ୍ଏମ୍।” ଇନିଃ ଜିଲିଙ୍ଗ୍ କେଦାଏ, ହାର୍ ଇନିଜାଃ ତିଈ ଏଟାଃ ତିଈ ଲେକାଗି ବେଶ୍ ହୋବାଜାନା। ଏନ୍ତେ ଫାରିସୀ ହୋଡ଼ୋକୋ ବାହ୍‍ରେ ସେନ୍ କେତେ ଇନିଜାଃ ବିରୋଧ୍ ରେ ରୋଜୋଟ୍ କେଦାକୋ ଚି ଇନିଃକେ ଚିଲ୍‍କା ତେବୁ ଗୋଜିୟା? ନେୟା ସାରିକେତେ ୟୀଶୁ ଏନ୍ତାଃ ଏତେ ସେନୋଃ ଜାନାଏ। ହାର୍ ମିଃଥିମ୍ବା ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ, ହାର୍ ଇନିଃ ସବେନ୍ କୋକେ ଚାଙ୍ଗାଇ କେଃକୋୱାଏ, ହାର୍ ଇନ୍‍କୁକେ ଚେତାଓ କେଃକୋୱାଏ ଚି, “ଇଙ୍ଗ୍ ଅକଏ ତାନିଙ୍ଗ୍ ଏଟାଃ କୋକେ ଆଲୋପେ ଉଦୁବେୟା।” ଏନାତେ ଅକନ୍ ବାଚାନ୍ ୟାଶାୟାହ୍ ନାବୀ ଗାଃ ହୋରାତେ ପାର୍ମେଶ୍ଵାର୍ କାଜିଲେଦାଏ ଏନା ପୁରାଅଃ ଚା: “ନେଲେପେ, ନିଈ ଇଙ୍ଗ୍ଆଃ ଦାସୀ ତାନିଃ ଅକନିଃକେ ଇଙ୍ଗ୍ ସାଲା କାଜାଇଙ୍ଗ୍: ଇଙ୍ଗ୍ଆଃ ଦୁଲାଡ଼ାନ୍, ଇନିଃତେ ଇଙ୍ଗ୍ଆଃ ମୋନ୍ ସୁକୁ ମେନାଃ: ଇଙ୍ଗ୍ ଇଙ୍ଗ୍ଆଃ ଆତ୍ମା ଇନିଜାଃ ରେ ଦୁଲେୟାଇଙ୍ଗ୍ ହାର୍ ଇନିଃ ଏଟାଃଜାତି କୋକେ ବିଚାର୍ ରାଃ: ସାମାଚାର୍ ଏମ୍‍କୋୱାଏ। ଇନିଃ ନାଦୋ ଝାଗ୍ଡ଼ା ୟାଏ, ହାର୍ ନାଦୋ ମାରାଙ୍ଗ୍ ମୋଚା ତେ କାଜିୟାଏ, ହାର୍ ନାଦୋ ହୋରା ରେ ଜେତାଏ ଇନିଜାଃ ଆୱାଜ୍ ଆୟୁମ୍ ୟାକୋ। ଇନିଃ ସେରେଦାକାନ୍ ମାଆସୋଟା କେ କାଏ ଠୋଏଜେୟାଏ ହାର୍ ସୁକୁଲ୍ ଏମ୍‍ତାନ୍ ବାତିକେ କାଏ ଇଣିଜେୟାଏ, ଚିମିନ୍ ସାନ୍ତେ ଇନିଃ ବିଚାର୍ କାଏ ରିକା ଛାବାୟାଏ। ହାର୍ ଏଟାଃଜାତିକୋ ଇନିଜାଃ ରେ ଆଶ୍ରା ମାଣ୍ଡାଅୟାକୋ।” ଏନ୍ତେ ହୋଡ଼ୋକୋ ମିୟାଃ ଆନ୍ଧା ହାର୍ କନ୍ଦାକାନ୍ କେ ଅକନିଜାଃରେ ବୋଙ୍ଗା ଆତ୍ମା ତାଇକେନାଏ, ୟୀଶୁ ନାଡ଼େଏ ଆଉଲିଜାକୋ, ହାର୍ ଇନିଃ ଇନିଃକେ ବେଶ୍ କିଜାଏ, ହାର୍ ଇନିଃ ବାକାଣ୍ କେଦାଏ ହାର୍ ନେଲ୍‍କେଦାଏ। ନେୟା ରେ ସବେନ୍ ହୋଡ଼ୋକୋ ଆକ୍‍ଦାନ୍ଦା ହୋବାକେତେ କାଜିକେଦାକୋ, “ଚିନାଃ ନିଈ ଦାଉଦ୍ ରାଜା ରାଃ ସାନ୍ତାନ୍ ମାସୀହ୍ ହୋବା ଧାଡ଼ିୱାଃଏ ଚି?” ମେନ୍ଦୋ ଫାରିସୀ ହୋଡ଼ୋକୋ ନେୟା ଆୟୁମ୍‍କେତେ କାଜିକେଦାକୋ, “ନିଈ ବୋଙ୍ଗାଆତ୍ମା କୋୱାଃ ମୁଖିୟା ବାଲ୍‍ଜିବୁଲ୍ (ଶାଏତାନ୍) ରାଃ ଦେଙ୍ଗା ବେଗାର୍ ବୋଙ୍ଗାଆତ୍ମା କୋକେ କାଏ ଅଡୋଙ୍ଗ୍ କୋୱାଏ।” ୟୀଶୁ ଇନ୍‍କୁୱାଃ ମୋନ୍ ରାଃ କାଜି ସାରିକେତେ ଇନ୍‍କୁକେ କାଜିକେଃକୋୱାଏ, ଜାହାନ୍ ରାଇଜ୍ ରେ ହୋଡ଼ୋକୋ ଆକୋ ଆକୋରେଗି ବିପିଡ଼ା ହୋବାଅ କୋରେ, ଏନା ଉଜ୍ଡ଼ାଅ କେନୋଃୱା, ହାର୍ ଜେତାନ୍ ହାତୁ ରେ ୟାଦୋ ଘାରାନା ରେନ୍ ହୋଡ଼ୋକୋ ଆକୋ ଆକୋରେଗି ବିପିଡ଼ା ହୋବାଅ କୋରେ, ଏନା ବାଇକେତେ କା ତାଇନୋଗା। ଏନ୍‍ଲେକାଗି ଶାଏତାନ୍ ଆଗାର୍ ଆଜାଃଗି ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋୱାଏ, ଏଣ୍ଡେ ଦୋ ଇନିଃ ଆଜାଃ ଗି ବିରୋଧୀ ହୋବା କାନାଏ, ଏଣ୍ଡେ ଇନିଜାଃ ରାଇଜ୍ ଚିଲ୍‍କା ବାଇକେତେ ତାଇନୋଗା? ଆଗାର୍ ଇଙ୍ଗ୍ ବାଲ୍‍ଜିବୁଲ୍ ରାଃ ଦେଙ୍ଗା ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋତାନାଇଙ୍ଗ୍ ଦୋ ଆପେୟାଃ ବାଂଶ୍ ଅକେୟାଃ ଦେଙ୍ଗା ତେ ଅଡୋଙ୍ଗ୍ କୋତାନାକୋ? ଏନାମେନ୍ତେ ଇନ୍‍କୁ ଗି ଆପେୟାଃ ବିଚାର୍ ରିକା ୟାକୋ। ମେନ୍ଦୋ ଇଙ୍ଗ୍ ପାର୍ମେଶ୍ଵାର୍ ରାଃ ଆତ୍ମା ରାଃ ଦେଙ୍ଗା ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋତାନାଇଙ୍ଗ୍, ଦୋ ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ନାଡ଼େଏ ହିଜୁଃ ସେଟେର୍ କାନା। ୟାଦୋ ଚିଲ୍‍କା ଜେତାନ୍ ହୋଡ଼ ଜାହାନ୍ ପେଡ଼େଜାନ୍ ରାଃ ଅଡ଼୍ଆଃ ରେ ବୋଲୋ କେତେ ଇନିଜାଃ ଜିନିଷ୍ ରେଏଃ ଧାଡ଼ିୟାଏ, ଚିମିନ୍ ସାନ୍ତେ ଚି ଇନିଃ ସିଦା ଏନ୍ ପେଡ଼େଜାନ୍ କେ କାଏ ଥୋଲିୟାଏ? ଏନ୍ତେ ଇନିଃ ଇନିଜାଃ ଅଡ଼୍ଆଃ କେ ରେଏଃ ଧାଡ଼ିୟାଏ। ଅକଏ ଇଙ୍ଗ୍ଆଃ ଲୋଃ ବାଙ୍ଗୁଇଜା ଇନିଃ ଇଙ୍ଗ୍ଆଃ ବିରୋଧ୍ ରେ ମେନାଇଜା, ହାର୍ ଅକଏ ଇଙ୍ଗ୍ଆଃ ଲୋଃ କାଏ ହାଲାଙ୍ଗ୍ ହୁଣ୍ଡିୟାଏ ଇନିଃ ଛିତିଛାନେୟାଏ। ଏନାମେନ୍ତେ ଇଙ୍ଗ୍ ଆପେକେ କାଜିପେ ତାନିଙ୍ଗ୍ ଚି, ହୋଡ଼ ରାଃ ସବେନ୍ ରାକାମ୍ ରାଃ ପାପ୍ ହାର୍ ନିନ୍ଦା ଛାମା ଅଗା, ମେନ୍ଦୋ ପାବିତାର୍ ଆତ୍ମା ରାଃ ନିନ୍ଦା ତେୟାଃ କା ଛାମା ଅଗା। ଜେତାଏ ମାନ୍‍ୱା ରାଃ ହୋନ୍ ରାଃ ବିରୁଦ୍ଧ୍ ରେ ଜାହାନ୍ ବାକାଣ୍ କାଜିୟାଏ, ଇନିଜାଃ ନେ ପାପ୍ ଛାମା ଅଗା, ମେନ୍ଦୋ ଜେତାଏ ପାବିତାର୍ ଆତ୍ମା ରାଃ ବିରୁଦ୍ଧ୍ ରେ ଜାହାନାଃ କାଜିୟାଏ, ଇନିଜାଃ ପାପ୍ ନାଦୋ ନେ ଯୁଗ୍ ରେ ହାର୍ ନାଦୋ ହିଜୁଃ ଯୁଗ୍ ରେ ଛାମା ଅଗା। “ଆଗାର୍ ଦାରୁ କେ ବେଶ୍ ପେ କାଜିତାନ୍ ରେଦୋ, ଏଣ୍ଡେରାଃ ଯଅ କେ ହଗି ବେଶ୍ କାଜିପେ, ୟାଦୋ ଦାରୁ କେ ଖାରାପ୍ ପେ କାଜିତାନ୍ ରେଦୋ ଏଣ୍ଡେରାଃ ଯଅ କେ ହଗି ଖାରାପ୍ କାଜିପେ; ଚିୟାଃଚି ଦାରୁ ଆଜାଃ ଯଅ କୋତେଗି ନେଲ୍ଉରୁମୋଃ ୱା। ହେ ବିଷ୍ ରାକାବ୍ ବିଙ୍ଗ୍ ରାଃ ହୋନ୍ ଲେକାନ୍‍କୋ, ଆପେ ଖାରାପ୍ ହୋବା କେତେ ଚିଲ୍‍କା ବେଶ୍ କାଜିପେ କାଜି ଧାଡ଼ିୟା, ଚିୟାଃଚି ଅକନାଃ ମୋନ୍ ରେ ଫେରେଜା କାନା, ଏନାଗି ମୋଚା ତେ ଅଡୋଙ୍ଗୋଃ ୱା। ବେଶ୍ ହୋଡ଼ ଆଜାଃ ମୋନ୍ ରାଃ ବେଶ୍ ଭାଣ୍ଡାର୍ ଏତେ ବେଶ୍ କାଜି ଅଡୋଙ୍ଗ୍ ୟାଏ ହାର୍ ଖାରାପ୍ ହୋଡ଼ ଖାରାପ୍ ଭାଣ୍ଡାର୍ ଏତେ ଖାରାପ୍ କାଜି ଅଡୋଙ୍ଗ୍ ୟାଏ। ହାର୍ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ଅକନ୍-ଅକନ୍ ଖାରାପ୍ କାଜି ହୋଡ଼ୋକୋ କାଜିୟାକୋ, ବିଚାର୍ ହୁଲାଙ୍ଗ୍ ରେ ଇନ୍‍କୁ ଆକୋୱାଃ ସବେନ୍ କାଜି ରାଃ ହିସାବ୍ ଏମେୟାକୋ। ଚିୟାଃଚି ପାର୍ମେଶ୍ଵାର୍ ଆପେୟାଃ କାଜି ରାଃ ହୋରାତେ ଆପେକେ ନିର୍ଦୋଷ୍ ହାର୍ ଆପେୟାଃ କାଜି ରାଃ ହୋରାତେ ଗି ଆପେକେ ଦୋଷୀ ବିଚାର୍ ପେୟାଏ।” ନେୟା ରେ ଚିମିନାଙ୍ଗ୍ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଇନିଃକେ କାଜିକିଜାକୋ, “ହେ ଗୁରୁ, ଆଲେ ଆମ୍ ଏତେ ମିୟାଃ ଚିହ୍ନା ନେନେଲ୍ ଲେ ସାନାଙ୍ଗ୍ ତାନା।” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, ନେ ଯୁଗ୍ ରେନ୍ ଖାରାପ୍ ହାର୍ ବ୍ୟାଭିଚାର୍ ହୋଡ଼ୋକୋ ଚିହ୍ନା ଦାଣା ତାନାକୋ, ମେନ୍ଦୋ ଯୋନା ନାବୀ ରାଃ ଚିହ୍ନା କେ ଅକନାଃ ଚି ଇନିଜାଃ ଲୋଃ ଘାଟ୍ନା ହୋବାଲେନା ଏନାକେ ବାଗେ କେତେ ଆଡୋଃ ଜେତାନ୍ ଚିହ୍ନା ଇନ୍‍କୁକେ କା ଏମୋଗା। ଚିୟାଃଚି ଯୋନା ନାବୀ ଆପି ଶିଙ୍ଗି ହାର୍ ଆପି ନିଦା ମିୟାଃ ମାରାଙ୍ଗ୍ ହାକୁ ରାଃ ଲାହେଃ ରେ ତାଇଲେନାଏ, ଏନ୍‍ଲେକାଗି ଇଙ୍ଗ୍ ମାନ୍‍ୱା ରାଃ ହୋନ୍ ଆପି ଶିଙ୍ଗି ହାର୍ ଆପି ନିଦା ଅତେ ଭିତାର୍ ରେ ତାଇନାଇଙ୍ଗ୍। ନୀନ୍‍ୱେ ସାହାର୍ ରେନ୍ ହୋଡ଼ୋକୋ ବିଚାର୍ ହୁଲାଙ୍ଗ୍ ରେ ନେ ଯୁଗ୍ ରେନ୍ ହୋଡ଼ୋକୋ ଲୋଃ ବିରିଃ କେତେ ଇନ୍‍କୁକେ ଦୋଷୀ ଠାହ୍‍ରାଓ କୋୱାକୋ, ଚିୟାଃଚି ଇନ୍‍କୁ ଯୋନା ନାବୀ ରାଃ ପାର୍ଚାର୍ ଆୟୁମ୍‍କେତେ ମୋନ୍ ରୁଆଡ଼୍ କେଦାକୋ, ହାର୍ ନେଲେପେ, ନେତାଃ ଇନିଃ ମେନାଇଜା ମେନ୍ଦୋ ଆପେ ମୋନ୍ ରୁଆଡ଼୍ ଲାଗିନ୍ କାପେ ସାନାଙ୍ଗ୍ ତାନା ଅକନିଃ ଯୋନା ନାବୀ ତେୟଗି ମାରାଙ୍ଗ୍ ତାନିଃ। ଆଡୋଃ ଇସ୍ରାଏଲ୍ ଦିଶୁମ୍ ରାଃ ଦାକ୍ଷିଣ୍ ପାଡ଼୍ ରାଃ ଶୀବା ନୁତୁମ୍ ଜାଗା ରେନ୍ ରାନୀ ବିଚାର୍ ହୁଲାଙ୍ଗ୍ ନେ ଯୁଗ୍ ରେନ୍ ହୋଡ଼ୋକୋ ଲୋଃ ବିରିଃ କେତେ ଇନ୍‍କୁକେ ଦୋଷୀ ବାଇକୋୱାଏ, ଚିୟାଃଚି ଇନିଃ ରାଜା ସୁଲେମାନ୍ ରାଃ ସେଣାକାଜି ଆୟୁମ୍ ଲାଗିନ୍ତେ ଅତେ ରାଃ ଟୁଣ୍ଡୁ ଏତେ ହିଜୁଃନାଏ, ଆଡୋଃ ନେଲେପେ, ନେତାଃ ରେ ଇନିଃ ମେନାଇଜା ଅକନିଃ ରାଜା ସୁଲେମାନ୍ ଏତେ ହଗି ମାରାଙ୍ଗ୍ ତାନିଃ, ମେନ୍ଦୋ ଆପେ ମୋନ୍ ରୁଆଡ଼୍ ଲାଗିନ୍ କାପେ ସାନାଙ୍ଗ୍ ତାନା। “ଚିମ୍ତାଙ୍ଗ୍ ବୋଙ୍ଗାଆତ୍ମା ହୋଡ଼ ଏତେ ଅଡୋଙ୍ଗ୍ କେନୋଃ ୱାଏ, ଦୋ ସୁନ୍‍ସାନ୍ ଜାଗାକୋ ରେ ତାଇନ୍ ଲାଗିନ୍ ଜାଗା ଦାଣା ବାଡ଼ାୟାଏ, ହାର୍ କାଏ ନାମେୟାଏ। ଏନ୍ତେ ଆଏଃ ଆପାନ୍ କେଗି କାଜିୟାଏ, ‘ଇଙ୍ଗ୍ ଇଙ୍ଗ୍ଆଃ ଏନ୍ ହୋଡ଼ ତାଃ ଗି କୋତାଃ ତେ ଇଙ୍ଗ୍ ଅଡୋଙ୍ଗ୍ ଲେନ୍ ତାଇନା ରୁଆଡ଼୍ କେନୋ ଗାଇଙ୍ଗ୍।’ ହାର୍ ରୁଆଡ଼୍ କେତେ ଏନ୍ ହୋଡ଼ ରାଃ ଜୀଦାନ୍ କେ ଅଡ଼୍ଆଃ ଲେକା ଅକନାଃ ସୁନ୍‍ସାନ୍, ଜଅଃ ସାଫାକାନ୍ ହାର୍ ବାଇସେକାଡ଼୍‍କାନ୍ ନାମିୟାଏ। ଏନ୍ତେ ବୋଙ୍ଗାଆତ୍ମା ସେନ୍‍କେତେ ଆଏଃ ତେ ଥିମ୍ବା ଖାରାପ୍ ଏଟାଃ ସାତ୍‍ଠୁ ଆତ୍ମା କୋକେ ଆଜାଃ ଲୋଃ ଆଉ କୋୱାଏ, ଆଡୋଃ ଇନ୍‍କୁ ଇନିଜାଃ ରେ ବୋଲୋ କେତେ ଏନ୍ତାଃରେ ଡେରା କେୟାକୋ, ଏନ୍ତେ ଏନ୍ ହୋଡ଼ ରାଃ ତାୟୋମ୍ ଦାଶା ପାହିଲା ଦାଶା ତେ ହଗି ଥିମ୍ବା ଖାରାପ୍ କେନୋଃ ୱା। ନେ ଯୁଗ୍ ରେନ୍ ଖାରାପ୍ ହୋଡ଼ୋକୋୱାଃ ଦାଶା ହଗି ଏନ୍‍କାଗି ହୋବାଅଃୱା।” ଚିମ୍ତାଙ୍ଗ୍ ୟୀଶୁ ହୋଡ଼ୋକୋ ଲୋଃ ବାକାଣ୍ ତାଇନାଏ, ଇମ୍ତାଙ୍ଗ୍ ଇନିଜାଃ ଏଙ୍ଗାକିନ୍ ହାର୍ ହାଗାକୋ ବାହ୍‍ରେ ତିଙ୍ଗୁ ଲେନ୍ ତାଇକେନାକୋ ହାର୍ ଇନିଃ ଲୋଃ ବାକାଣ୍ ସାନାଙ୍ଗ୍ ତାଇ କେନାକୋ। ଜେତାଏ ମିହୋଡ଼୍ ଇନିଃକେ କାଜିକେଦାଏ, “ନେଲେମ୍, ଆମାଃ ଏଙ୍ଗା ହାର୍ ଆମାଃ ହାଗାକୋ ବାହାରି ତିଙ୍ଗୁ କାନାକୋ, ହାର୍ ଆମାଃ ଲୋଃ ବାକାଣ୍ ସାନାଙ୍ଗ୍ ତାନାକୋ।” ନେୟା ଆୟୁମ୍‍କେତେ ୟୀଶୁ କାଜିତାନ୍ ନିଈ କେ କାଜିରୁଆଡ଼୍ କିଜାଏ, “ଅକଏ ଇଙ୍ଗ୍ଆଃ ଏଙ୍ଗା ତାନିଃ ହାର୍ ଅକନ୍‍କୋ ଇଙ୍ଗ୍ଆଃ ହାଗାକୋ ତାନ୍‍କୋ?” ଏନ୍ତେ ଆଜାଃ ଚେଲାକୋ ପାଡ଼୍ ଚୁଣ୍ଡୁଲ୍ କେତେ କାଜିକେଦାଏ, “ନେଲେପେ, ଇଙ୍ଗ୍ଆଃ ଏଙ୍ଗା ହାର୍ ଇଙ୍ଗ୍ଆଃ ହାଗାକୋ ନିକୁ ତାନ୍‍କୋ, ଚିୟାଃଚି ଅକଏ ଇଙ୍ଗ୍ଆଃ ସିର୍ମାଦିଶୁମ୍ ରେନ୍ ଆପୁ ରାଃ ସାନାଙ୍ଗ୍ ରେ ସେସେନ୍ ତାନାଏ, ଇନିଃଗି ଇଙ୍ଗ୍ଆଃ ହାଗା ହାର୍ ଇନିଃଗି ଇଙ୍ଗ୍ଆଃ ମିଶି ହାର୍ ଇଙ୍ଗ୍ଆଃ ଏଙ୍ଗା ତାନିଃ।” ଏନ୍ ହୁଲାଙ୍ଗ୍ ଗି ୟୀଶୁ ଅଡ଼୍ଆଃ ଏତେ ଅଡୋଙ୍ଗ୍ କେତେ ଗାଲିଲୀ ସାମୁଦାର୍ ଗେନା ରେ ଦୁବ୍ ଜାନାଏ। ହାର୍ ଇନିଜାଃ ନାଡ଼େଏ ରେ ମିଃଥିମ୍ବା ହୋଡ଼ୋକୋ ହୁଣ୍ଡି ଜାନାକୋ, ଏନାମେନ୍ତେ ଇନିଃ ଡୋଙ୍ଗା ରେ ରାକାବ୍ ଜାନାଏ, ହାର୍ ସବେନ୍ ମିଃଥିମ୍ବା ହୋଡ଼ୋକୋ ଗେନା ରେ ତିଙ୍ଗୁ ଲେନ୍ ତାଇକେନାକୋ। ଏନ୍ତେ ଇନିଃ ଇନ୍‍କୁକେ ଜୋନୋକା ଲେକାତେ ବାହୁତ୍ ଗି କାଜିକୋ କାଜିକେଃକୋୱାଏ, “ନେଲେପେ, ମିୟାଃ ହେର୍‍ନିଃ ହିତା ହେର୍ ଅଡୋଙ୍ଗ୍ ଜାନାଏ। ହେର୍ ସାମାୟ୍ ଚିମିନାଙ୍ଗ୍ ହିତା ହୋରା ରାଃ ଗେନା ରେ ଉୟୁଃଜାନା ହାର୍ ଅଡ଼େକୋ ହିଜୁଃକେତେ ଏନ୍ ହିତା କୋକେ ଜୋମ୍ କେଦାକୋ। ଚିମିନାଙ୍ଗ୍ ହିତା ଦିରିଅତେ ରେ ଉୟୁଃଜାନା, ଏନ୍ତାଃରେ ଏନାକେ ଥିମ୍ବା ହାସା କାନାମ୍‍ଜାନା, ହାର୍ ଏନା ଥିମ୍ବା ହାସା କା ନାମେ ରାଃ ହୋରାତେ ଏନା ସେକାଡ଼୍ ଗି ଅମୋନ୍ ଜାନା। ମେନ୍ଦୋ ଶିଙ୍ଗି ଅଡୋଙ୍ଗ୍ ଲୋଃ ଏନା ଗୋସୋ ଜାନା ହାର୍ ରେହେଃ କା ସାବେ ରାଃ ହୋରାତେ ରୋହଡ଼୍ ଜାନା। ଚିମିନାଙ୍ଗ୍ ହିତା ଜାନୁମ୍ ବୁଟା ରେ ଉୟୁଃଜାନା ହାର୍ ଜାନୁମ୍ ବୁଟା କୋ ହାରା ଜାନା ହାର୍ ଏନାକୋକେ ତୋପା କେଦାଏ। ମେନ୍ଦୋ ଚିମିନାଙ୍ଗ୍ ହିତା ବେଶ୍ ଅତେ ରେ ଉୟୁଃଜାନା, ହାର୍ ଯଅ ଜାନା ଅକନାଃ ଶାଅ ଗୁନା ଅକନାଃ ସାଠ୍ ଗୁନା ହାର୍ ଅକନାଃ ତିସ୍ ଗୁନା। ଅକେୟାଃ ଲୁତୁର୍ ମେନାଃ ଇନିଃ ଆୟୁମେ କାଏ।” ଏନା ତାୟୋମ୍ତେ ଚେଲାକୋ ନାଡ଼େଏ ହିଜୁଃକେତେ ଇନିଃକେ କାଜିକିଜାକୋ, “ଚିନାଃ ଲାଗିନ୍ ଆମ୍ ହୋଡ଼ୋକୋ ଲୋଃ ଜୋନୋକା ଲେକାତେ ବାକାଣ୍ ୟାମ୍?” ଇନିଃ କାଜିରୁଆଡ଼୍ କେଦାଏ, “ଆପେକେ ସିର୍ମାଦିଶୁମ୍ ରାଃ ରାଇଜ୍ ରାଃ ଉକୁକାନ୍ କାଜି ରାଃ ସେଣା ଏମାକାନା, ମେନ୍ଦୋ ଇନ୍‍କୁକେ କାହା। ଚିୟାଃଚି ଅକଏ ତାଃ ରେ ଆତ୍ମିକ୍ ସେଣା ମେନାଃ ଇନିଃକେ ଥିମ୍ବା ଏମୋଗା, ହାର୍ ଇନିଃତାଃ ରେ ମିଃଥିମ୍ବା ହୋବାଅଗା, ମେନ୍ଦୋ ଅକଏ ତାଃରେ ଆତ୍ମିକ୍ ସେଣା ବାନୋଗା, ଇନିଃତାଃ ଏତେ ଅକନାଃ ଇନିଜାଃ ତାଃ ରେ ମେନାଃ ଏନା ହଗି ଇଦିୟୋଗା। ଇଙ୍ଗ୍ ଇନ୍‍କୁ ଲୋଃ ଜୋନୋକା ଲେକାତେ ଏନ୍ ଲାଗିନ୍ତେ କାଜିୟାଇଙ୍ଗ୍, ଚି ଇନ୍‍କୁ ନେଲ୍‍ତାନ୍ ରେ ହଗି କାକୋ ନେଲ୍‍ତାନା, ହାର୍ ଆୟୁମ୍‍ତାନ୍ ରେ ହଗି କାକୋ ଆୟୁମେତାନା, ହାର୍ କାକୋ ବୁଝାଅଃ ତାନା। ଇନ୍‍କୁୱାଃ ବିଷାୟ୍ ରେ ୟାଶାୟାହ୍ ନାବୀ ରାଃ ନେ ଆୟାର୍‍କାଜି ପୁରାଅଃ ତାନା, ‘ଆପେ ଲୁତୁର୍ ତେଦୋ ପେ ଆୟୁମେୟା, ମେନ୍ଦୋ କାପେ ବୁଝାଅଃୱା, ହାର୍ ମେଏଃ ତେଦୋ ପେ ନେଲେୟା ମେନ୍ଦୋ କାପେ ନେଲ୍ ଉରୁମେୟା। ଚିୟାଃଚି ନେ ହୋଡ଼ୋକୋୱାଃ ମୋନ୍ କେଟେଃ ଛାବାକାନା ହାର୍ ଇନ୍‍କୁୱାଃ ଲୁତୁର୍ ରେ ଜୋର୍ ତେ କାଜି ରେ ଆୟୁମ୍ ୟାକୋ ହାର୍ ଇନ୍‍କୁ ଆକୋୱାଃ ମେଏଃ କୋକେ ଜାପିଃ କାଦାକୋ, କାରେଦୋ ଇନ୍‍କୁ ମେଏଃ ତେ ନେଲ୍‍ତେକୋ, ହାର୍ ଲୁତୁର୍ ତେ ଆୟୁମ୍‍ତେକୋ, ହାର୍ ମୋନ୍ ତେ ବୁଝାଅଃ ତେକୋ, ହାର୍ ରୁଆଡ଼୍ କେନୋଃ ତେକୋ, ଆଡୋଃ ଇଙ୍ଗ୍ ଇନ୍‍କୁକେ ଚାଙ୍ଗାଇ କୋତେୟାଃଇଙ୍ଗ୍।’ ମେନ୍ଦୋ ଧାନ୍ୟା ତାନାଃ ଆପେୟାଃ ମେଏଃ, ଚି ଏନା ନେଲ୍‍ତାନାଏ, ହାର୍ ଆପେୟାଃ ଲୁତୁର୍ ଚି ଏନା ଆୟୁମ୍ ତାନାଏ। ଚିୟାଃଚି ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍ ଚି ଥିମ୍ବାଗି ନାବୀ କୋ ହାର୍ ଧାର୍ମୀକୋ ସାନାଙ୍ଗ୍ କେଦାକୋ ଚି ଅକନ୍ କାଜିକୋ ଆପେ ନେଲ୍ ତାନାପେ, ନେଲେୟାକୋ ମେନ୍ଦୋ କାକୋ ନେଲ୍‍କେଦା, ହାର୍ ଅକନ୍ କାଜି ଆପେପେ ଆୟୁମ୍ ତାନା, ଆୟୁମ୍ ସାନାଙ୍ଗ୍ କେନାକୋ ମେନ୍ଦୋ କାକୋ ଆୟୁମ୍‍କେଦା।” “ନାଆ ଆପେ ହେର୍‍ନିଃ ରାଃ ଜୋନୋକା ରାଃ ମାନେ ଆୟୁମ୍ ଏପେ, ଅକଏ ପାର୍ମେଶ୍ଵାର୍ ରାଃ ରାଇଜ୍ ରାଃ ବାଚାନ୍ କେ ଆୟୁମ୍‍କେତେ କାଏ ବୁଝାଅଃ ତାନାଏ, ଇନିଜାଃ ମୋନ୍ ରେ ଅକନାଃ ହେର୍ ଲେନ୍ ତାଇନା, ଏନାକେ ଏନ୍ ଦୁଷ୍ଟ ଶାଏତାନ୍ ହିଜୁଃକେତେ ରେଏଃ କେୟାଏ। ନିଈ ଇନିଃ ତାନିଃ, ଅକନାଃ ହୋରା ଗେନା ରେ ହେର୍ ଲେନ୍ ତାଇନା। ହାର୍ ଅକନାଃ ଦିରିଅତେ ରେ ହେର୍ ଲେନ୍ ତାଇନା, ଇନିଃ ନିଈ ତାନିଃ, ଅକନିଃ ବାଚାନ୍ କେ ଆୟୁମ୍‍କେତେ ଇମ୍ତାଗି ରାଶିକା ଲୋଃ ମାନାତିଙ୍ଗ୍ କେୟାଏ। ମେନ୍ଦୋ ଆଜାଃ ରେ ରେହେଃ କା ସାବେ ରାଃ ହୋରାତେ ଇନିଃ ହୁଡିଙ୍ଗ୍ ଦିନ୍ ଲାଗିନ୍ ତାନିଃ, ହାର୍ ଚିମ୍ତାଙ୍ଗ୍ ବାଚାନ୍ ରାଃ ହୋରାତେ ସାସାତି ହାର୍ ସାତାଅ ହୋବାୱା, ଦୋ ଇମ୍ତାଗି ବିଶ୍ଵାସ୍ କେ ବାଗେ କେୟାଏ। ଆଡୋଃ ଅକନାଃ ଜାନୁମ୍ ବୁଟା ରେ ହେର୍ ଲେନା, ଇନିଃ ନିଈ ତାନିଃ, ଅକଏ ବାଚାନ୍ କେ ଆୟୁମ୍ ତାନାଏ, ମେନ୍ଦୋ ନେ ଅତେଦିଶୁମ୍ ରେ ଜୀହିଃ ରାଃ ଚିନ୍ତା, ହାର୍ କିଶାଣ୍ ବାଇୟେନ୍ ଲାଗିନ୍ ଦୁଲାଡ଼୍ ବାଚାନ୍ କେ ଅତାତୋପା କେୟାଏ, ହାର୍ ଇନିଃ କାଏ ଯଅ ୱାଏ। ଅକନାଃ ବେଶ୍ ଅତେ ରେ ହେର୍ ଜାନା, ଇନିଃ ନିଈ ତାନିଃ, ଅକଏ ବାଚାନ୍ ଆୟୁମ୍‍କେତେ ବୁଝାଅଃ ତାନାଏ, ହାର୍ ଯଅ ଆଉ ତାନାଏ; ଅକଏ ଶାଅ ଗୁନା, ଅକଏ ସାଠ୍ ଗୁନା, ହାର୍ ଅକଏ ତିସ୍ ଗୁନା।” ୟୀଶୁ ଇନ୍‍କୁକେ ମିୟାଃ ଆଡୋଃ ଜୋନୋକା କାଜିକେଃକୋୱାଏ, “ସିର୍ମାଦିଶୁମ୍ ରାଃ ରାଇଜ୍ ଏନ୍ ଚାଷୀହୋଡ଼୍ ରାଃ ଲେକା ତାନାଃ ଅକନିଃ ଆଜାଃ ଅତେ ରେ ବେଶ୍ ହିତା ହେର୍ କେଦାଏ। ମେନ୍ଦୋ ଚିମ୍ତାଙ୍ଗ୍ ହୋଡ଼ୋକୋ ଦୁଣୁମ୍ ତାଇନାକୋ ଇମ୍ତାଙ୍ଗ୍ ଇନିଜାଃ ବାଇରୀ ହିଜୁଃକେତେ ଗହମ୍ ରାଃ ଥାଲା ରେ ତାସାଃ ହେର୍ କେତେ ସେନୋଃ ଜାନାଏ। ଚିମ୍ତାଙ୍ଗ୍ ଅମୋନ୍ ଜାନା ହାର୍ ଗେଲେ ଜାନା, ଦୋ ତାସାଃ ରାଃ ବୁଟାକୋ ହଗି ନେଲ୍ ଜାନା। ଏନାମେନ୍ତେ ଅତେ ରେନ୍ ମାଲିକ୍ ରାଃ ଦାସୀକୋ ହିଜୁଃକେତେ ଇନିଃକେ କାଜିକିଜାକୋ, ‘ହେ ଗୋମ୍‍କେ, ଚିନାଃ ଆମ୍ ଆମାଃ ଅତେ ରେ ବେଶ୍ ହିତା ହେର୍ ଲାଗିନ୍ତେ କାମ୍ ଏମ୍ ଲେଃ ତାଇନା? ଏଣ୍ଡେ ତାସାଃ ରାଃ ବୁଟା ଏନାରେ କୋତାଃ ଏତେ ହିଜୁଃଲେନା?’ ଇନିଃ ଇନ୍‍କୁକେ କାଜିକେଃକୋୱାଏ, ‘ନେୟା ମିୟାଃ ବାଇରୀ ରାଃ କାମି ତାନାଃ।’ ଦାସୀକୋ ଇନିଃକେ କାଜିକିଜାକୋ, ଚିନାଃ ଆମ୍ ସାନାଙ୍ଗ୍ ତାନାମ୍ ଚି ଆଲେ ସେନ୍ କେତେ ଏନାକେ ହେଡ଼େଦ୍ ହୁଣ୍ଡି ଆଲେ? ଇନିଃ କାଜିୟାଃକୋୱାଏ, ‘କାହା, ଏନ୍‍ଲେକା ଆଲୋପେ ରିକାଏ କାରେଦୋ ତାସାଃ ବୁଟା ହେଡ଼େଦ୍ ତାନ୍‍ଲୋଃ ଆପେ ଏନା ଲୋଃ ଗହମ୍ କେ ହଗି ତୁଃ ତାଃପେ। ଇରଃ ସାନ୍ତେ ବାରାନାଃ କେ ମିଶାତେ ହାରା ରିକାଏପେ, ହାର୍ ଇରଃ ସାମାୟ୍ ରେ ଇର୍‍ତାନ୍ କୋକେ କାଜିୟା କୋୱାଇଙ୍ଗ୍ ଚି ସିଦା ତାସାଃ ରାଃ ବୁଟାକେ ଥାଇଃ ହୁଣ୍ଡି କେତେ ଜୁଲ୍ ଲାଗିନ୍ତେ ଏନାକେ ମୁଠିଆ ଥୋଲେପେ, ହାର୍ ଗହମ୍ କୋକେ ଇଙ୍ଗ୍ଆଃ ପୋଟୋମ୍ ଅଡ଼୍ଆଃ ରେ ହୁଣ୍ଡି ପେ।’” ଏନ୍ତେ ୟୀଶୁ ଇନ୍‍କୁକେ ଆଡୋଃ ମିୟାଃ ଜୋନୋକା କାଜିକେଃକୋୱାଏ, ସିର୍ମାଦିଶୁମ୍ ରାଃ ରାଇଜ୍ ମାନି ରାଃ ମିୟାଃ ଯାଙ୍ଗ୍ ଲେକା ତାନାଃ, ଏନାକେ ମିୟାଃ ହୋଡ଼ ଇଦିକେତେ ଆଜାଃ ଅତେ ରେ ହେର୍ କେଦାଏ। ଏନା ସବେନ୍ ହିତା କୋଏତେ ଦୋ ହୁଡିଙ୍ଗ୍ଆ। ମେନ୍ଦୋ ଚିମ୍ତା ହାରା କେନୋଃୱା, ଇମ୍ତା ସବେନ୍ ଆଡ଼ାଆଃ-ସାକାମ୍ କୋଏତେ ମାରାଙ୍ଗ୍ ହୋବାଅଃୱା, ହାର୍ ନେକା ଦାରୁ ବାଇକେନୋଗା ଚି ରିମିଲ୍‍ଦିଶୁମ୍ ରେନ୍ ଅଡ଼େକୋ ହିଜୁଃକେତେ ଏଣ୍ଡେରାଃ କୋତୋକୋ ରେ ତୂକାକୋ ବାଇୟାକୋ। ଏନ୍ତେ ୟୀଶୁ ମିୟାଃ ଆଡୋଃ ଜୋନୋକା ଇନ୍‍କୁକେ ଉଦୁବ୍ କେଃକୋୱାଏ, “ସିର୍ମାଦିଶୁମ୍ ରାଃ ରାଇଜ୍ ଖାମୀର୍ ରାଃ ଲେକା ତାନାଃ ଅକନାଃକେ ମିୟାଃ କୁଡ଼ି ଇଦିକେତେ ଆପି ନାପ୍ ଆଟା ରେ ମେଶା କେଦାଏ ହାର୍ ଏନା ସବେନାଃ ଖାମୀର୍ ମେଶା ହୋବାଅଃ ସାନ୍ତେ ସିପୁଃ କେଦାଏ।” ୟୀଶୁ ନେ ସବେନ୍ କାଜିକୋ ଜୋନୋକା ଲେକାତେ ହୋଡ଼ୋକୋକେ କାଜିକେଃକୋୱାଏ, ହାର୍ ଜୋନୋକା କାଏ କାଜି ରେ ଇନିଃ ଇନ୍‍କୁ ଲୋଃ ଜେତ୍ନାଃ ଅଗି କାଏ କାଜି ତାଇନାଏ। ଏନାତେ ଅକନ୍ ବାଚାନ୍ ନାବୀ ରାଃ ହୋରାତେ ପାର୍ମେଶ୍ଵାର୍ କାଜିଲେଦାଏ, ଏନା ପୁରାଅଃ ଚା, “ଇଙ୍ଗ୍ ଜୋନୋକା କାଜି ଲାଗିନ୍ତେ ଇଙ୍ଗ୍ଆଃ ମୋଚା ଖଲାଅୟାଇଙ୍ଗ୍, ଇଙ୍ଗ୍ ଏନ୍ କାଜିକୋକେ ଅକନାଃ ଅତେଦିଶୁମ୍ ରାଃ ମୁନୁ ଏତେ ଉକୁକାନ୍ ମେନାଃ ଉଦୁବେୟାଇଙ୍ଗ୍।” ଏନ୍ତେ ୟୀଶୁ ମିଃଥିମ୍ବା ହୋଡ଼ୋକୋକେ ବାଗେ କେତେ ଅଡ଼୍ଆଃ ତେ ହିଜୁଃଲେନାଏ, ହାର୍ ଆଜାଃ ଚେଲାକୋ ଇନିଜାଃ ନାଡ଼େଏ ହିଜୁଃକେତେ କାଜିକେଦାକୋ, “ଅତେ ରାଃ ତାସାଃ ରାଃ ଜୋନୋକା ଆଲେକେ ବୁଝାଅ ତାଲେମ୍।” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ବେଶ୍ ହିତା କେ ହେର୍‍ତାନ୍ ଚାଷୀହୋଡ଼୍ ଇଙ୍ଗ୍ ମାନ୍‍ୱା ରାଃ ହୋନ୍ ତାନିଙ୍ଗ୍। ଅତେ ମାନେ ଅତେଦିଶୁମ୍ ରେନ୍ ହୋଡ଼ୋକୋ ତାନ୍‍କୋ, ବେଶ୍ ହିତା ମାନେ ସିର୍ମାଦିଶୁମ୍ ରାଃ ରାଇଜ୍ ରେନ୍ ହୋଡ଼ୋକୋ ହାର୍ ତାସାଃ ମାନେ ଦୁଷ୍ଟ ଶାଏତାନ୍ ରାଃ ହୋଡ଼ୋକୋ ତାନ୍‍କୋ। ଅକନ୍ ବାଇରୀ ଏନାକେ ହେର୍ କାଦାଏ ଇନିଃ ଶାଏତାନ୍ ତାନିଃ, ଇରଃ ସାମାୟ୍ ଦିଶୁମ୍ ରାଃ ଟୁଣ୍ଡୁ ତାନାଃ ହାର୍ ଇର୍‍ତାନ୍‍କୋ ସିର୍ମାଦାସୀକୋ ତାନ୍‍କୋ। ଏନାମେନ୍ତେ, ଚିଲ୍‍କା ତାସାଃ ହୁଣ୍ଡିଅଃ ୱାଃ ହାର୍ ଜୁଲୋଃ ତାନା ଏନ୍‍ଲେକାଗି ଅତେଦିଶୁମ୍ ରାଃ ଟୁଣ୍ଡୁ ରେ ହୋବାୱା। ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ସିର୍ମାଦାସୀ କୋକେ କୁଲ୍ କୋୱାଇଙ୍ଗ୍, ହାର୍ ଇନ୍‍କୁ ପାର୍ମେଶ୍ଵାର୍ ରାଃ ରାଇଜ୍ ଏତେ ଇଙ୍ଗ୍ଆଃ ରେ ବିଶ୍ଵାସ୍ ବାଗେ ତାନ୍ କୋକେ ହାର୍ ଖାରାପ୍ କାମି ରିକାତାନ୍ କୋକେ ହୁଣ୍ଡି କୋୱାକୋ, ହାର୍ ଇନ୍‍କୁ କେ ନାରାକ୍ ରାଃ ସେଙ୍ଗେଲ୍ ରେ ଦୁଡ଼ିଙ୍ଗ୍ କୋୱାକୋ ଏନ୍ତାଃରେ ରାଆ ହାର୍ ଡାଟା ରିଦ୍ ହୋବାୱା। ଏନ୍ ସାମାୟ୍ ଧାର୍ମୀ ହୋଡ଼ୋକୋ ଆକୋୱାଃ ଆପୁ ରାଃ ରାଇଜ୍ ରେ ଶିଙ୍ଗି ଲେକା ମାର୍ଶାଲ୍ ଅଗାକୋ, ଅକେୟାଃ ଲୁତୁର୍ ମେନାଃ ଇନିଃ ଆୟୁମେ କାଏ।” ସିର୍ମାଦିଶୁମ୍ ରାଃ ରାଇଜ୍ ଅତେ ରେ ଉକୁକାନ୍ ଗୋନୋଙ୍ଗାନ୍ ଜିନିଷ୍ ରାଃ ଲେକା ତାନାଃ, ଏନାକେ ମିୟାଃ ହୋଡ଼ ନାମ୍ କେଦାଏ ହାର୍ ଉକୁ ମାଣ୍ଡାଅ କେଦାଏ, ହାର୍ ରାଶିକା ତେ ସେନ୍ କେତେ ଆଜାଃ ସବେନାଃ ଆଖ୍ରିଙ୍ଗ୍ କେଦାଏ ହାର୍ ଏନ୍ ଅତେ କେ କିରିଙ୍ଗ୍ କେଦାଏ। ଆଡୋଃ ସିର୍ମାଦିଶୁମ୍ ରାଃ ରାଇଜ୍ ମିୟାଃ ବେପାରୀ ହୋଡ଼ ଲେକା ତାନାଃ ଅକନିଃ ବେଶ୍ ମୋତି ରାଃ ଦାଣା ରେ ତାଇକେନାଏ। ଚିମ୍ତାଙ୍ଗ୍ ଇନିଃକେ ମିୟାଃ ଗୋନୋଙ୍ଗାନ୍ ମୋତି ନାମ୍‍ଜାନା ଦୋ ଇନିଃ ସେନ୍ କେତେ ଆଜାଃ ସବେନାଃ ଆଖ୍ରିଙ୍ଗ୍ କେତେ ଏନାକେ କିରିଙ୍ଗ୍ କେଦାଏ। ଆଡୋଃ ସିର୍ମାଦିଶୁମ୍ ରାଃ ରାଇଜ୍ ଏନ୍ ହାକୁ ପାଶେ ମାରାଙ୍ଗ୍ ଜାଲୋମ୍ ରାଃ ଲେକା ତାନାଃ ଅକନାଃ ସାମୁଦାର୍ ରେ ଦୁଡ଼ିଙ୍ଗ୍ ଜାନା ହାର୍ ସବେନ୍ ରାକାମ୍ ରାଃ ହାକୁ କୋକେ ସାମୁଟାଅ କେତେ ଆଉ କେଃକୋୱାଏ। ହାର୍ ଚିମ୍ତାଙ୍ଗ୍ ଜାଲୋମ୍ ଫେରେଃ ଜାନା, ଦୋ ଝୋରାକୋ ଏନାକେ ଗେନା ପାଡ଼୍ ଥାଇଃ କେତେ ଆଉ ଲେଦାକୋ, ଏନ୍ତେ ଦୁବ୍ କେତେ ବେଶ୍-ବେଶ୍ ହାକୁକୋକେ ଟୁଙ୍କି କୋରେ ହୁଣ୍ଡି କେଦାକୋ ହାର୍ ଖାରାପ୍-ଖାରାପ୍ କୋକେ ଦୁଡ଼ିଙ୍ଗ୍ ତାଦାକୋ। ଅତେଦିଶୁମ୍ ରାଃ ଟୁଣ୍ଡୁ ରେ ଏନ୍‍ଲେକା ଗି ହୋବାଅଃୱା। ସିର୍ମାଦାସୀକୋ ହିଜୁଃକେତେ ଖାରାପ୍ ହୋଡ଼ୋକୋକେ ଧାର୍ମୀ ହୋଡ଼ୋ କୋଏତେ ଆଲାଗ୍ କୋୱାକୋ, ହାର୍ ଖାରାପ୍ ହୋଡ଼ୋକୋକେ ନାରାକ୍ ରାଃ ସେଙ୍ଗେଲ୍ ରେ ଦୁଡ଼ିଙ୍ଗ୍ କୋୱାକୋ। ଏନ୍ତାଃରେ ରାଆ ହାର୍ ଡାଟା ରିଦ୍ ହୋବାଅଃୱା। ଚିନାଃ ଆପେ ନେ ସବେନ୍ କାଜିକୋକେ ପେ ବୁଝାଅଜାନା? ଇନ୍‍କୁ ଇନିଃକେ କାଜିକିଜାକୋ, “ହାଁ।” ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ଏନାଲାଗିନ୍ ସବେନ୍ ଆଇନ୍ ଗୁରୁ ଅକଏ ସିର୍ମାଦିଶୁମ୍ ରାଃ ରାଇଜ୍ ରାଃ ଚେଲା ବାଇକାନାଏ, ଇନିଃ ଏନ୍ ଅଡ଼୍ଆଃ ରାଃ ମାଲିକ୍ ଲେକା ତାନିଃ ଅକନିଃ ଆଜାଃ ପୋଟୋମ୍ ଅଡ଼୍ଆଃ ଏତେ ନାୱା ହାର୍ ମାରି ଗୋନୋଙ୍ଗାନ୍ ଜିନିଷ୍‍କୋ ଅଡୋଙ୍ଗ୍ ୟାଏ।” ଚିମ୍ତାଙ୍ଗ୍ ୟୀଶୁ ନେ ସବେନ୍ ଜୋନୋକା କୋ କାଜି ଛାବା କେଦାଏ, ଦୋ ଏନ୍ତାଃ ଏତେ ସେନୋଃ ଜାନାଏ। ହାର୍ ଆଜାଃ ହାତୁ ରେ ହିଜୁଃକେତେ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଇନିଃ ଆକୋୱାଃ ବିନ୍ତିଅଡ଼୍ଆଃ ରେ ଇନ୍‍କୁକେ ଏନ୍ ଲେକା ଉପ୍‍ଦେଶ୍ ଏମ୍ କେଃକୋୱାଏ, ଚି ଇନ୍‍କୁ ଆକ୍‍ଦାନ୍ଦା ହୋବା କେତେ କାଜିକେଦାକୋ, “ନେ ହୋଡ଼ କେ ନେଲେକା ସେଣା ହାର୍ ପେଡ଼େଏ ରାଃ କାମି କୋତାଃ ଏତେ ନାମ୍‍ଜାନା? ଚିନାଃ ନିଈ ଏନ୍ ବାଢ଼ାଇ ରାଃ ହୋନ୍ତେକଡ଼ା ନାହାଲାଏ? ହାର୍ ଚିନାଃ ଇନିଜାଃ ଏଙ୍ଗା ରାଃ ନୁତୁମ୍ ମାରିୟାମ୍ ହାର୍ ଇନିଜାଃ ହାଗା କୋୱାଃ ନୁତୁମ୍ ୟାକୁବ୍, ଯୋଶେଫ୍, ଶିମୋନ୍ ହାର୍ ୟାହୁଦା ନାହାଲା? ହାର୍ ଚିନାଃ ଇନିଜାଃ ସବେନ୍ ମିଶିକୋ ଆବୁୱାଃ ଥାଲା ରେ କାକୋ ତାଇନ୍ ତାନା? ଏଣ୍ଡେ ନିଈକେ ନେ ସବେନାଃ କୋତାଃ ଏତେ ନାମ୍‍ଜାନା?” ଏନାଲାଗିନ୍ ଇନ୍‍କୁ ଇନିଃକେ ଫାସିୟାର୍ ହିଲାଙ୍ଗ୍ କିଜାକୋ, ମେନ୍ଦୋ ୟୀଶୁ ଇନ୍‍କୁକେ କାଜିକେଦାଏ, “ନାବୀ କେ ଆଜାଃ ହାତୁ ହାର୍ ଆଜାଃ ଅଡ଼୍ଆଃ ବାଗେ କେତେ ଆଡୋଃ କୋତାଃ ରେହ ଆପ୍‍ମାନ୍ କା ହୋବାଅଃୱା।” ହାର୍ ୟୀଶୁ ଏନ୍ତାଃରେ ଇନ୍‍କୁୱାଃ ଆବିଶ୍ଵାସ୍ ଚାଲ୍ତେ ଥିମ୍ବା ପେଡ଼େଏ ରାଃ କାମି କାଏ ରିକା କେଦାଏ। ଏନ୍ ସାମାୟ୍ ଚାଇର୍ ଜିଲ୍ଲା ହାନାଟିଙ୍ଗ୍ ତେ ମିୟାଃ ଜିଲ୍ଲା ରେନ୍ ରାଜା ହେରୋଦ୍ ୟୀଶୁ ରାଃ ବିଷାୟ୍ ଆୟୁମ୍ କେଦାଏ। ହାର୍ ଆଜାଃ ଦାସୀକୋକେ କାଜିକେଃକୋୱାଏ, “ନିଈ ଯୋହାନ୍ ବାପ୍ତିସ୍ମା ଏମ୍ ନିଈ ତାନିଃ! ଇନିଃ ଗୋଜାକାନ୍ କୋଏତେ ଜୀହିଃ କାନାଏ, ଏନାଲାଗିନ୍ ଇନିଜାଃ ରେ ପେଡ଼େଏ ରାଃ କାମି ଉଦୁବଃ ତାନା।” ଚିୟାଃଚି ହେରୋଦ୍ ରାଜା ଆଜାଃ ହାଗା ଫିଲିପୁସ୍ ରାଃ କୁଡ଼ି ହେରୋଦିଆସ୍ ରାଃ ଚାଲ୍ତେ ଯୋହାନ୍ କେ ସାବ୍ କେତେ ଥୋଲ୍ ଲିଜାଏ, ହାର୍ ଜେଲ୍ଅଡ଼୍ଆଃ ରେ ଆଦେର୍ ଲିଜାଏ। ଚିୟାଃଚି ଯୋହାନ୍ ଇନିଃକେ କାଜିଲେଦାଏ ଚି, ଆମାଃ ହାଗା ରାଃ କୁଡ଼ି କେ ଆମାଃ କୁଡ଼ି ବାଇକେତେ ମାଣ୍ଡାଅ ନିୟାମ୍ ଲେକାତେ ଠାଉକା ନାହାଲା। ଏନାଲାଗିନ୍ ହେରୋଦ୍ ରାଜା, ଯୋହାନ୍ କେ ଗୋଏଃ ଲାଗିନ୍ ସାନାଙ୍ଗ୍ ତାଇନାଏ, ମେନ୍ଦୋ ହୋଡ଼ୋକୋକେ ବୋରୋୱା କୋ ତାଇନାଏ, ଚିୟାଃଚି ଇନ୍‍କୁ ଯୋହାନ୍ କେ ନାବୀ ମାନାତିଙ୍ଗ୍ ତାଇନାକୋ। ମେନ୍ଦୋ ଚିମ୍ତାଙ୍ଗ୍ ହେରୋଦ୍ ରାଜା ରାଃ ଜାନାମ୍ ଦିନ୍ ହିଜୁଃଲେନା, ଦୋ ହେରୋଦିଆସ୍ ରାଃ ହୋନ୍‍କୁଡ଼ି ଜାନାମ୍ ଦିନ୍ ଭୋଜ୍ ରେ ସୁସୁଙ୍ଗ୍ କେତେ ହେରୋଦ୍ ରାଜା କେ ଖୁସ୍ କିଜାଏ। ନେୟାତେ ହେରୋଦ୍ ରାଜା କିରିୟା ଜୋମ୍ କେତେ ହେରୋଦିଆସ୍ ରାଃ ହୋନ୍‍କୁଡ଼ି କେ କାଜି ଏମାଇଜାଏ, “ଅକନାଃ ଆମ୍ ଆସିୟାମ୍, ଇଙ୍ଗ୍ ଆମ୍‍କେ ଏମା ମେୟାଇଙ୍ଗ୍।” ଇନିଃ ଆଜାଃ ଏଙ୍ଗା କିନାଃ ଉସ୍କୁର୍ ତେ କାଜିକେଦାଏ, “ଯୋହାନ୍ ବାପ୍ତିସ୍ମା ଏହେମ୍ ନିଜାଃ ହୋଟୋଃ ଗେଏଃ କେତେ ବୋଅ ମିୟାଃ ଥାଡ଼ି ରେ ନେତାଃ ଇଙ୍ଗ୍ଆଃ ଲାଗିନ୍ ଆସିତାମ୍।” ରାଜା ଦୁକୁ ଜାନାଏ, ମେନ୍ଦୋ ଆଜାଃ କିରିୟା ହାର୍ ଆଜାଃ ଲୋଃ ଦୁବାକାନ୍ ପେଡ଼ା କୋୱାଃ ଲେକାତେ, ଆନାଚୁ ଏମ୍‍କେଦାଏ ଚି ଏମୋଃକା। ହାର୍ ଇନିଃ ଜେଲ୍ଅଡ଼୍ଆଃ ରେ ହୋଡ଼ୋକୋକେ କୁଲ୍ କେତେ ଯୋହାନ୍ ରାଃ ବୋଅ ଗେଏଃ ରିକା କେଦାଏ। ଆଡୋଃ ଆଜାଃ ବୋଅ ଥାଡ଼ି ରେ ଆଉ ଜାନା, ହାର୍ କୁଡ଼ିହୋନ୍ କେ ଏମ୍‍ଜାନା, ଏନାକେ ଇନିଃ ଆଜାଃ ଏଙ୍ଗାକିନ୍ ତାଃ ଇଦିକେଦାଏ। ଏନ୍ତେ ଯୋହାନ୍ ରାଃ ଚେଲାକୋ ହିଜୁଃ ଲେନାକୋ ହାର୍ ଇନିଜାଃ ମାଣା କେ ଇଦିକେତେ ତୋପା କେଦାକୋ, ହାର୍ ସେନ୍ କେତେ ୟୀଶୁ କେ ଚିନାଃ ହୋବାଜାନା ଏନା ଉଦୁବ୍ କିଜାକୋ। ଚିମ୍ତାଙ୍ଗ୍ ୟୀଶୁ ନେୟା ଆୟୁମ୍ କେଦାଏ, ଦୋ ଇନିଃ ଡୋଙ୍ଗା ରେ ରାକାବ୍ କେତେ ଏନ୍ତାଃ ଏତେ ମିୟାଃ ସୁନ୍‍ସାନ୍ ଜାଗା ତେ ଏସ୍କାର୍ ଗି ସେନୋଃ ଜାନାଏ। ହୋଡ଼ୋକୋ ନେୟା ଆୟୁମ୍‍କେତେ ହାତୁ-ହାତୁ କୋଏତେ ସେନ୍-ସେନ୍ ଗି ଇନିଃକେ ଅତୋଙ୍ଗ୍ କିଜାକୋ। ଇନିଃ ଡୋଙ୍ଗା ଏତେ ଆଡ଼୍‍ଗୁ କେତେ ମିଃଥିମ୍ବା ହୋଡ଼ୋକୋକେ ନେଲ୍‍କେଃକୋୱାଏ ହାର୍ ଇନ୍‍କୁକେ ସୋଗାଓ କେଃକୋୱାଏ ହାର୍ ଇନ୍‍କୁୱାଃ ବେମାର୍ କୋକେ ଚାଙ୍ଗାଇ କେଦାଏ। ଚିମ୍ତାଙ୍ଗ୍ ଶିଙ୍ଗି ଡୁବିଃ ଜାନା, ଇମ୍ତା ଚେଲାକୋ ଇନିଜାଃ ନାଡ଼େଏ ହିଜୁଃକେତେ କାଜିକିଜାକୋ, “ନେୟା ସୁନ୍‍ସାନ୍ ଜାଗା ତାନାଃ ହାର୍ ସାମାୟ୍ ସେନୋଃ ତାନା, ହୋଡ଼ୋକୋ ବିଦାଅଃ ଚାକୋ ଚି ଇନ୍‍କୁ ବାସ୍ତି ରେ ସେନ୍ କେତେ ଆକୋୱାଃ ଲାଗିନ୍ ଜୋମେୟାଃ କିରିଙ୍ଗ୍ ୟାକୋ। ମେନ୍ଦୋ ୟୀଶୁ ଇନ୍‍କୁକେ କାଜିକେଃକୋୱାଏ, ଇନ୍‍କୁକେ ସେନ୍ ରାଃ ଦାର୍‍କାର୍ ବାନୋଗା! ଆପେ ଗି ନିକୁକେ ଜୋମ୍ ଲାଗିନ୍ ଏମାକୋପେ।” ଇନ୍‍କୁ ଇନିଃକେ କାଜିକିଜାକୋ, “ନେତାଃ ଆଲେୟାଃ ତାଃ ପାଞ୍ଚ୍ ଠୁ ହୋଲୋଙ୍ଗ୍ ହାର୍ ବାରିୟା ହାକୁ ବାଗେ କେତେ ଜେତ୍ନାଃ ହଗି ବାନୋଗା।” ଇନିଃ କାଜିୟାଃକୋୱାଏ, “ଏନାକୋକେ ନେତାଃ ଇଙ୍ଗ୍ଆଃ ନାଡ଼େଏ ଆଉୱେପେ।” ଏନ୍ତେ ଇନିଃ ହୋଡ଼ୋକୋକେ ତାସାଃ ରେ ଦୁବ୍ ଲାଗିନ୍ ଆଚୁକେଃକୋୱାଏ, ହାର୍ ଏନ୍ ପାଞ୍ଚ୍ ହୋଲୋଙ୍ଗ୍ ହାର୍ ବାରିୟା ହାକୁ କୋକେ ଇଦିକେଦାଏ, ହାର୍ ରିମିଲ୍‍ଦିଶୁମ୍ ପାଡ଼୍ ନେଲ୍‍କେତେ ଧାନ୍ୟାବାଦ୍ କେଦାଏ ହାର୍ ହୋଲୋଙ୍ଗ୍ କେ କେଚାଃ-କେଚାଃ କେତେ ଚେଲାକୋକେ ଏମାଃ କୋୱାଏ ହାର୍ ଚେଲାକୋ ହୋଡ଼ୋକୋକେ ଏମ୍ କେଃକୋୱାକୋ। ଚିମ୍ତାଙ୍ଗ୍ ସବେନ୍ କୋ ଜୋମ୍ କେତେ ବିଇ ଜାନାକୋ, ଦୋ ଚେଲାକୋ କେଚାଃକାନ୍ ହୋଲୋଙ୍ଗ୍ କୋଏତେ ସାରେଜାକାନ୍ ଖାଣ୍ଡା ହୋଲୋଙ୍ଗ୍ କୋକେ ଫେରେଜାକାନ୍ ବାରା ଡାଲି ଉଠାଓ କେଦାକୋ। ହାର୍ ଜୋମ୍‍କେନ୍ କୁଡ଼ିକୋକେ ହାର୍ ହୋନ୍‍କୋକେ ବାଗେ କେତେ, ପାଞ୍ଚ୍ ହାଜାର୍ କୋଡ଼ାକୋ ଲାଗ୍‍ଭାଗ୍ ତାଇକେନାକୋ। ଏନ୍ତେ ଇମ୍ତାଗି ୟୀଶୁ ଆଜାଃ ଚେଲାକୋକେ ଡୋଙ୍ଗା ରେ ରାକାବ୍ ଲାଗିନ୍ ଜାବ୍ରାଇ କେଃକୋୱାଏ ଚି ଇନ୍‍କୁ ଇନିଃତେ ସିଦା ଫାରୋମ୍ ସେନୋଃ କାକୋ, ଆଡୋଃ ଏନ୍ ସାମାୟ୍ ରେ ଇନିଃ ହୋଡ଼ୋକୋକେ ବିଦା କୋୱାଏ। ଇନିଃ ହୋଡ଼ୋକୋକେ ବିଦା ତାୟୋମ୍ତେ, ବିନ୍ତି ଲାଗିନ୍ ଏସ୍କାର୍ ବୁରୁ ତେ ସେନୋଃ ଜାନାଏ, ହାର୍ ଆୟୁବ୍‍ତାନ୍ ଇମ୍ତା ଇନିଃ ଏନ୍ତାଃରେ ଏସ୍କାର୍ ତାଇକେନାଏ। ଏନ୍ ସାମାୟ୍ ଡୋଙ୍ଗା ସାମୁଦାର୍ ରାଃ ଥାଲା ରେ ଲାହାଡ଼ି ତେ ଡାଗ୍‍ମାଗାଅଃ ତାଇନା, ଚିୟାଃଚି ହୋୟୋ ଆକୋୱାଃ ଆୟାର୍ ପାଡ଼୍ ତେଗି ହୋୟୋ ତାଇନାଏ। ହାର୍ ୟୀଶୁ ନିଦା ରାଃ ସିମ୍‍କୋ ରାଆ ସାମାୟ୍ ରେ ସାମୁଦାର୍ ରାଃ ଦାଆ ରେ ସେନ୍‍ତାନ୍ ଲୋଃ ଇନ୍‍କୁୱାଃ ନାଡ଼େଏ ତେ ହିଜୁଃଲେନାଏ। ଚେଲାକୋ ଇନିଃକେ ସାମୁଦାର୍ ରାଃ ଦାଆ ରେ ସେସେନ୍ ତାନ୍ ନେଲ୍‍କେତେ ବୋରୋ ଜାନାକୋ ହାର୍ କାଜିକେଦାକୋ, “ନିଈ ବୋଙ୍ଗା ତାନିଃ!” ହାର୍ ବୋରୋ ତାନ୍‍ଲୋଃ କାଉରି କେଦାକୋ। ଏନ୍ତେ ୟୀଶୁ ଇମ୍ତାଗି ଇନ୍‍କୁଲୋଃ ବାକାଣ୍ କେଦାଏ ହାର୍ କାଜିକେଦାଏ, “ସାହାସ୍ ମାଣ୍ଡାଏପେ! ଇଙ୍ଗ୍ ତାନିଙ୍ଗ୍, ଆଲୋପେ ବୋରୋୟା!” ପାତ୍ରାସ୍ ଇନିଃକେ କାଜିରୁଆଡ଼୍ କିଜାଏ, “ହେ ପ୍ରାଭୁ, ଆଗାର୍ ଆମ୍ ଗି ତାନ୍‍ମେ, ଦୋ ଇଙ୍ଗ୍‍କେ ଆମାଃ ନାଡ଼େଏ ଦାଆ ରେ ସେସେନ୍ କେତେ ହିଜୁଃ ଲାଗିନ୍ ଆଚୁ ଏମାଇଙ୍ଗ୍‍ମେ।” ୟୀଶୁ କାଜିକେଦାଏ, “ହିଜୁଃମେ!” ଏନ୍ତେ ପାତ୍ରାସ୍ ଡୋଙ୍ଗା ଏତେ ଆଡ଼୍‍ଗୁ କେତେ ୟୀଶୁ ରାଃ ନାଡ଼େଏ ସେନ୍ ଲାଗିନ୍ ଦାଆ ଚେତାନ୍ ରେ ସେସେନ୍ କେଦାଏ। ମେନ୍ଦୋ ହୋୟୋ କେ ନେଲ୍‍କେତେ ବୋରୋଜାନାଏ, ହାର୍ ଚିମ୍ତାଙ୍ଗ୍ ଡୁବିଜୋଃ ତାଇନାଏ ଦୋ କାଉରି କେତେ କାଜିକେଦାଏ, “ହେ ପ୍ରାଭୁ, ଇଙ୍ଗ୍‍କେ ବାଞ୍ଚାଅ ଇଙ୍ଗ୍‍ମେ!” ୟୀଶୁ ଇମ୍ତାଗି ତିଈ ଜିଲିଙ୍ଗ୍ କେତେ ଇନିଃକେ ସାବ୍ ତାଜାଏ ହାର୍ କାଜିକେଦାଏ, “ହେ ହୁଡିଙ୍ଗ୍ ବିଶ୍ଵାସ୍ ମାଣ୍ଡାଅଃ ନିଈ, ଆମ୍ ଚିନାଃ ଲାଗିନ୍ ସାନ୍ଦେହ୍ କେଦାମ୍?” ଏନ୍ତେ ଚିମ୍ତାଙ୍ଗ୍ ଇନ୍‍କିନ୍ ଡୋଙ୍ଗା ରେ ରାକାବ୍ ଜାନାକିନ୍, ଦୋ ହୋୟୋ ହୋକାଜାନା। ଏନାତେ ଇନ୍‍କୁ ଚିମିନାଙ୍ଗ୍ ଡୋଙ୍ଗା ରେ ତାଇକେନାକୋ, ଇନିଃକେ ଇକ୍ଡ଼ୁମ୍ ଜୋହାର୍ କେତେ କାଜିକିଜାକୋ, “ସାର୍ତିଗୀ, ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ।” ଇନ୍‍କୁ ସାମୁଦାର୍ ଫାରୋମ୍ ଆଡ଼୍‍ଗୁ କେତେ ଗାନ୍ନେସାରାତ୍ ସାହାର୍ ରେ ସେଟେର୍ ଜାନାକୋ। ଏନ୍ତାଃ ରେନ୍ ହୋଡ଼ୋକୋ ଇନିଃକେ ନେଲ୍ଉରୁମ୍ କିଜାକୋ, ହାର୍ ନାଡ଼େଏ ଜାପାଃ ରେନ୍ ସବେନ୍ ଜାଗାକୋ ରେ ଉଦୁବ୍ କେଦାକୋ ହାର୍ ସବେନ୍ ବେମାରୀକୋକେ ଇନିଜାଃ ନାଡ଼େଏ ଆଉ କେଃକୋୱାକୋ, ହାର୍ ଇନିଃକେ ଆର୍ଜି କିଜାକୋ, ଚି ଇନିଃ ଇନ୍‍କୁକେ ଆଜାଃ ଲିଜାଃ ରାଃ ଆଚ୍ରା କେଗି ଜୁଟିଃ ଲାଗିନ୍ତେ ଏମାକୋକାଏ; ଆଡୋଃ ଚିମିନାଙ୍ଗ୍ କୋ ଏନାକେ ଜୁଟିଃ କେଦାକୋ ଇନ୍‍କୁ ବେଶ୍ ଜାନାକୋ। ଏନ୍ତେ ୟୀରୁଶାଲେମ୍ ସାହାର୍ ଏତେ ଚିମିନାଙ୍ଗ୍ ଫାରିସୀ ହୋଡ଼ୋକୋ ହାର୍ ଆଇନ୍ ଗୁରୁକୋ ୟୀଶୁ ରାଃ ନାଡ଼େଏ ହିଜୁଃକେତେ କାଜିକେଦାକୋ, “ଆମାଃ ଚେଲାକୋ ଚିନାଃ ନାଙ୍ଗ୍ ପୁର୍ଖା କୋୱାଃ ନିୟାମ୍ କେ କାକୋ ମାନାତିଙ୍ଗ୍ ତାନା, ହାର୍ ବେଗାର୍ ତିଈ ଆବୁଙ୍ଗ୍ କେତେ ଜୋଜୋମାଃ ଜୋମ୍ ତାନାକୋ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଆପେ ହ ଦୋ ଆପେୟାଃ ନୀତିନିୟାମ୍ ରାଃ ଲେକାତେ ଚିନାଃ ମେନ୍ତେ ପାର୍ମେଶ୍ଵାର୍ ରାଃ ଆନାଚୁ କେ କାପେ ମାନାତିଙ୍ଗ୍‍ୟା? ଚିୟାଃଚି ପାର୍ମେଶ୍ଵାର୍ କାଜିକାଦାଏ, ‘ଆପେୟାଃ ଆପୁ ହାର୍ ଆପେୟାଃ ଏଙ୍ଗା କିନ୍‍କେ ମାଇନ୍ କୋପେ, ହାର୍ ଅକଏ ଆଜାଃ ଆପୁ ୟାଦୋ ଏଙ୍ଗା କିନ୍‍କେ ହିଲାଙ୍ଗ୍ କିନାଏ, ଇନିଃ ବିଡ଼ା ଗୋଜୋଃକାଏ।’ ମେନ୍ଦୋ ଆପେ କାଜିୟାପେ, ଚି ଆଗାର୍ ଅକଏ ଆଜାଃ ଆପୁ ୟାଦୋ ଏଙ୍ଗା କେ କାଜିୟାଏ, ଅକନାଃ ଅଗି ଆପେକେ ଇଙ୍ଗ୍ଆଃ ତେ ବୁଗିନାଃ ନାନାମ୍ ତାଇକେନା, ଏନା ପାର୍ମେଶ୍ଵାର୍ କେ ଭେଁଟ୍ ରାକାବ୍ ଛାବାକାନା। ଦୋ ଇନିଃ ଆଜାଃ ଆପୁ କେ ଆଲୋ ମାଇନ୍ ଚାଏ, ନେଲେକାତେ ଆପେ ଆପେୟାଃ ନୀତିନିୟାମ୍ ରାଃ ଚାଲ୍ତେ ପାର୍ମେଶ୍ଵାର୍ ରାଃ ବାଚାନ୍ କେ କାପେ ମାନାତିଙ୍ଗ୍ ତାନା। ହେ ବେଦାହୋଡ଼ୋକୋ, ୟାଶାୟାହ୍ ନାବୀ ଆପେୟାଃ ବିଷାୟ୍ ରେ ନେୟା ଆୟାର୍‍କାଜି ଠିକ୍ ଗି କାଜିକାଦାଏ, ‘ନେ ହୋଡ଼ୋକୋ ମୋଚା ତେ ଦୋ ଇଙ୍ଗ୍‍କେ ଦୁଲାଡ଼୍ ରିକା ୟାକୋ, ମେନ୍ଦୋ ଇନ୍‍କୁୱାଃ ମୋନ୍ ଇଙ୍ଗ୍ଆଃ ତେ ସାଙ୍ଗିନ୍ ରେ ତାଇନୋଃ ୱା। ନିକୁ ସାମାଗୀ ଇଙ୍ଗ୍ଆଃ ସୁସାର୍ ତାନାକୋ, ଚିୟାଃଚି ହୋଡ଼ୋକୋୱାଃ ନୀତିନିୟାମ୍ କୋକେ ଧାରାମ୍ ଆନାଚୁ ବାଇକେତେ ଶିଖାଅ କୋ ତାନାକୋ।’ ” ଏନ୍ତେ ୟୀଶୁ ହୋଡ଼ୋକୋକେ ଆଜାଃ ନାଡ଼େଏ କେଡ଼ାକେତେ ଇନ୍‍କୁକେ କାଜିକେଦାଏ, “ଆୟୁମେପେ, ହାର୍ ବୁଝାଅଃପେ। ଅକନାଃ ମୋଚା ରେ ସେନ୍ ତାନା, ଏନା ହୋଡ଼ କେ କାଏ ଶିତୃ ତାନା, ମେନ୍ଦୋ ଅକନାଃ ମୋଚା ଏତେ ଅଡୋଙ୍ଗ୍ ତାନା ଏନାଗି ହୋଡ଼ କେ ଶିତୃ ତାନାଏ।” ଏନ୍ତେ ଚେଲାକୋ ହିଜୁଃକେତେ ଇନିଃକେ କାଜିକିଜାକୋ, ଚିନାଃ ଆମ୍ ସାରିତାନାମ୍ ଚି ଫାରିସୀ ହୋଡ଼ୋକୋ ନେ କାଜିକେ ଆୟୁମ୍‍କେତେ ଦୁକୁ ଜାନାକୋ? ୟୀଶୁ କାଜିରୁଆଡ଼୍ କେଃକୋୱାଏ, “ସବେନ୍ ଦାରୁ ଅକନାଃ କେ ଇଙ୍ଗ୍ଆଃ ସିର୍ମାଦିଶୁମ୍ ରେନ୍ ଆପୁ କାଏ ରୋଏ କାଦାଏ, ଏନା ସବେନାଃ ପାଟୁବୋଗା। ଇନ୍‍କୁକେ ସେନ୍ ରିକାକୋପେ, ଇନ୍‍କୁ ଆନ୍ଧା ଆଗୁୱାକୋ ତାନାକୋ ହାର୍ ଆନ୍ଧା ଆଗାର୍ ଆନ୍ଧା କେ ହୋରା ଉଦୁବେୟାଏ ଏଣ୍ଡେ ବାରାନ୍‍କିନ୍ ଗାଡା ରେ ଉୟୁଗୋଗାକିନ୍।” ନେୟା ଆୟୁମ୍‍କେତେ ପାତ୍ରାସ୍ ଇନିଃକେ କାଜିକେଦାଏ, “ନେ ଜୋନୋକା ରାଃ ମାନେ ଆଲେକେ ବୁଝାଅ ତାଲେମ୍।” ୟୀଶୁ କାଜିକେଦାଏ, “ଚିନାଃ ଆପେ ହଗି ନାଆ ସାନ୍ତେ କାପେ ବୁଝାଅଃ ତାନା?” ଚିନାଃ ଆପେ କାପେ ସାରିତାନା ଚି ଅକନାଃ ମୋଚା ରେ ବୋଲୋଃ ୱା ଏନା ଲାହେଃ ରେ ସେନା, ହାର୍ ବାହାର୍ ହୋରାତେ ଅଡୋଙ୍ଗ୍ କେନୋଃ ୱା? ମେନ୍ଦୋ ଅକନାଃ ମୋଚା ଏତେ ଅଡୋଙ୍ଗୋଃ ୱା, ଏନା ମୋନ୍ ଏତେ ଅଡୋଙ୍ଗୋଃ ୱା, ହାର୍ ଏନାଗି ହୋଡ଼ କେ ଶିତୃ ୟାଏ। ଚିୟାଃଚି ଏତ୍କାନ୍ ପାହୋମ୍, ହୋଡ଼ ଗୋଏଃ, ଏଟାଃ ନିଜାଃ କୁଡ଼ି ଇଦି, ବ୍ୟାଭିଚାର୍, କୁମ୍ଡ଼ୁ, ହିହିଡ଼୍ ଗୋୱା, ହାର୍ ନିନ୍ଦା ମୋନ୍ ଏତେ ଗି ଅଡୋଙ୍ଗୋଃ ୱା। ନେୟା କୋଗି ତାନାଃ ଅକନାଃ ହୋଡ଼ କେ ଶିତୃ ତାନାଏ, ମେନ୍ଦୋ ତିଈ ବେଗାର୍ ଆବୁଙ୍ଗ୍ କେତେ ଜୋମେ ତେୟାଃ ହୋଡ଼ କେ କାଏ ଶିତୃ ତାନାଏ। ଏନ୍ତେ ୟୀଶୁ ଗାଲିଲୀ ଜିଲ୍ଲା ଏତେ ଅଡୋଙ୍ଗ୍ କେତେ ସୁର୍ ହାର୍ ସିଦୋନ୍ ସାହାର୍ ତେ ସେନୋଃ ଜାନାଏ। ଏନ୍ ଜାଗା ଏତେ ମିୟାଃ କାନାନୀ ଜାତି ରେନ୍ କୁଡ଼ି ଅଡୋଙ୍ଗ୍ ଜାନାଏ, ହାର୍ କାଉରି କେତେ କାଜିକେଦାଏ, “ହେ ପ୍ରାଭୁ, ଦାଉଦ୍ ରାଃ ସାନ୍ତାନ୍, ଇଙ୍ଗ୍‍କେ ଦାୟାଇଙ୍ଗ୍ ମେ, ଇଙ୍ଗ୍ଆଃ ହୋନ୍‍କୁଡ଼ି କେ ବୋଙ୍ଗାଆତ୍ମା ଥିମ୍ବାଗି ଦୁକୁ ଏମ୍ ତାନାଏ।” ମେନ୍ଦୋ ୟୀଶୁ ଇନିଃକେ ଜେତ୍ନାଃ କାଏ କାଜିରୁଆଡ଼୍ କିଜାଏ। ଏନ୍ତେ ଇନିଜାଃ ଚେଲାକୋ ହିଜୁଃକେତେ ଇନିଃକେ ଆର୍ଜି କିଜାକୋ, “ନିଈକେ ବିଦା ତାଇମେ, ଚିୟାଃଚି ନିଈ ଆବୁୱାଃ ଦୋୟା-ଦୋୟା କାଉରିତାନ୍ ଲୋଃ ହିଜୁଃ ତାନାଏ।” ମେନ୍ଦୋ ୟୀଶୁ କାଜିରୁଆଡ଼୍ କେଦାଏ, “ଇସ୍ରାଏଲ୍ ଦିଶୁମ୍ ରେନ୍ ଘାରାନା ରେନ୍ ଆଦାକାନ୍ ମିଣ୍ଡୀ କୋକେ ବାଗେ କେତେ ଇଙ୍ଗ୍ ଜେତାଏ କୋୱାଃ ନାଡ଼େଏ କାଇଙ୍ଗ୍ କୁଲାକାନା।” ମେନ୍ଦୋ ଏନ୍ କୁଡ଼ି ହିଜୁଃ ଲେନାଏ, ହାର୍ ୟୀଶୁ କେ ଜୋହାର୍ କେତେ କାଜିକେଦାଏ, “ହେ ପ୍ରାଭୁ, ଇଙ୍ଗ୍‍କେ ଦେଙ୍ଗାଇଙ୍ଗ୍ ମେ।” ଇନିଃ କାଜିରୁଆଡ଼୍ କିଜାଏ, “ହୋନ୍ କୋୱାଃ ହୋଲୋଙ୍ଗ୍ ଇଦିକେତେ ସେତା କୋୱାଃ ଆୟୁର୍ ରେ ଦୁଡ଼ିଙ୍ଗ୍ ତେୟାଃ ବୁଗିନ୍ ନାହାଲା।” ଇନିଃ କାଜିକେଦାଏ, ସାର୍ତି ତାନାଃ ପ୍ରାଭୁ, ମେନ୍ଦୋ ସେତାକୋ ହଗି ଏନ୍ ସାକ୍‍ଡ଼ି କୋକେ ଜୋମେୟାକୋ, ଅକନାଃ ଇନ୍‍କୁୱାଃ ଗୋମ୍‍କେ କୋୱାଃ ଟେବୁଲ୍ ଏତେ ଉୟୁଗୋଃ ୱା। ନେୟା ରେ ୟୀଶୁ ଇନିଃକେ କାଜିରୁଆଡ଼୍ କିଜାଏ, “ହେ କୁଡ଼ି, ଆମାଃ ବିଶ୍ଵାସ୍ ମାରାଙ୍ଗ୍ ମେନାଃ। ଚିଲ୍‍କା ଆମ୍ ସାନାଙ୍ଗ୍ ତାନାମ୍, ଆମାଃ ଲାଗିନ୍ ଏନ୍ କାଗି ହୋବାଅଃକା।” ହାର୍ ଇନିଜାଃ ହୋନ୍‍କୁଡ଼ି ଏନ୍ ସାମାୟ୍ ଏତେ ଗି ବେଶ୍ ଜାନାଏ। ୟୀଶୁ ଏନ୍ତାଃ ଏତେ ଗାଲିଲୀ ରାଃ ସାମୁଦାର୍ ନାଡ଼େଏ ହିଜୁଃଲେନାଏ, ହାର୍ ବୁରୁ ଚେତାନ୍ ରେ ରାକାବ୍ କେତେ ଦୁବ୍ ଜାନାଏ। ଏନ୍ତେ ମିଃଥିମ୍ବା ହୋଡ଼ୋକୋ ଇନିଜାଃ ନାଡ଼େଏ ହିଜୁଃ ଲେନାକୋ ଇନ୍‍କୁ ଆକୋୱାଃ ଲୋଃ ଲାଙ୍ଗ୍ଡ଼ା, ଆନ୍ଧା, କନ୍ଦା, ଠୁଠା ହାର୍ ଏଟାଃ ଥିମ୍ବାଗି ହୋଡ଼ୋକୋକେ ଇନିଜାଃ ନାଡ଼େଏ ଆଉଲେଃ କୋୱାକୋ, ହାର୍ ଇନ୍‍କୁକେ ଇନିଜାଃ କାଟା ଶୁବାରେ ମାଣ୍ଡାଅ ତାଃକୋୱାକୋ, ହାର୍ ଇନିଃ ଇନ୍‍କୁକେ ଚାଙ୍ଗାଇ କେଃକୋୱାଏ। ଚିମ୍ତାଙ୍ଗ୍ ହୋଡ଼ୋକୋ ନେଲ୍ କେଦାକୋ ଚି କନ୍ଦାକୋ ବାକାଣ୍ ତାନାକୋ, ହାର୍ ଠୁଠାକୋ ବେଶୋଃ ତାନାକୋ ହାର୍ ଲାଙ୍ଗ୍ଡ଼ାକୋ ସେସେନ୍ ତାନାକୋ ହାର୍ ଆନ୍ଧାକୋ ନେଲ୍‍ତାନାକୋ ନେୟା ନେଲ୍ କେତେ ହୋଡ଼ୋକୋ ଆକ୍‍ଦାନ୍ଦା କେତେ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋୱା ପାର୍ମେଶ୍ଵାର୍ ରାଃ ମାନାରାଙ୍ଗ୍ କେଦାକୋ। ୟୀଶୁ ଆଜାଃ ଚେଲାକୋକେ କେଡ଼ା କେଃକୋୱାଏ ହାର୍ କାଜିୟାଃକୋୱାଏ, “ଇଙ୍ଗ୍‍କେ ନେ ଥିମ୍ବା ହୋଡ଼ୋକୋ ଚେତାନ୍ ରେ ଦାୟା ହିଜୁଃ ତାନା, ଚିୟାଃଚି ଇନ୍‍କୁ ଆପି ଶିଙ୍ଗି ଏତେ ଇଙ୍ଗ୍ଆଃ ଲୋଃ ମେନାକୋୱା, ହାର୍ ଇନ୍‍କୁ ତାଃରେ ଜେତ୍ନାଃ ଅଗି ଜୋମେୟାଃ ବାନୋଗା। ଇଙ୍ଗ୍ ଇନ୍‍କୁକେ ରେଙ୍ଗେଃ ଗି କାଇଙ୍ଗ୍ କୁଲ୍ ସାନାଙ୍ଗ୍ କୋ ତାନା, କାରେଦୋ ଇନ୍‍କୁ ହୋରା ରେ ବେହୋଶ୍ ଉୟୁଃ କେନୋଗାକୋ।” ଚେଲାକୋ ଇନିଃକେ କାଜିକିଜାକୋ, “ଆଲେକେ ନେ ସୁନ୍‍ସାନ୍ ଜାଗା ରେ ନିମିନାଙ୍ଗ୍ ହୋଲୋଙ୍ଗ୍‍କୋ କୋତାଃ ଏତେ ନାମୋଗା ଚି ଆଲେ ନିମିନ୍ ମିଃଥିମ୍ବା ହୋଡ଼ୋକୋକେ ବିଇ କୋୱାଲେ?” ୟୀଶୁ ଇନ୍‍କୁକେ କୁଲିକେଃକୋୱାଏ, “ଆପେୟାଃ ତାଃ ଚିମିନାଙ୍ଗ୍ ହୋଲୋଙ୍ଗ୍‍କୋ ମେନାଃ?” ଇନ୍‍କୁ କାଜିକେଦାକୋ, “ସାତ୍‍ଠୁ ହାର୍ ହୁଡିଙ୍ଗ୍ ହାକୁକୋ ମେନାକୋୱା।” ଏନ୍ତେ ଇନିଃ ହୋଡ଼ୋକୋକେ ଅତେ ରେ ଦୁବ୍ ଲାଗିନ୍ ଆଚୁ କେଃକୋୱାଏ। ହାର୍ ଏନ୍ ସାତ୍‍ଠୁ ହୋଲୋଙ୍ଗ୍ ହାର୍ ହାକୁ କୋକେ ଇଦିକେଦାଏ, ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କେଚାଃ କେଦାଏ, ହାର୍ ଆଜାଃ ଚେଲାକୋକେ ଏମ୍ ଇଦିକେଦାଏ ହାର୍ ଚେଲାକୋ ହୋଡ଼ୋକୋକେ ଏମାଃକୋୱାକୋ। ନେଲେକା ସବେନ୍ କୋ ଜୋମ୍ କେତେ ବିଇ ଜାନାକୋ ହାର୍ ଚେଲାକୋ କେଚାଃ ସାରେଃ କାନ୍ ଖାଣ୍ଡା କୋଏତେ ସାତ୍ ଫେରେଃ ଡାଲି ଉଠାଓ କେଦାକୋ। ଜୋମ୍‍କେନ୍ କୁଡ଼ି କୋକେ ହାର୍ ହୋନ୍ କୋକେ ବାଗେ କେତେ ଚାଇର୍ ହାଜାର୍ କୋଡ଼ାକୋ ତାଇକେନାକୋ। ଏନ୍ତେ ୟୀଶୁ ହୋଡ଼ୋକୋକେ ବିଦା କେତେ ଡୋଙ୍ଗା ରେ ରାକାବ୍ ଜାନାଏ, ହାର୍ ମାଗ୍‍ଦାନ୍ ଜାଗା ରାଃ ସୀମା ପାଡ଼୍ ହିଜୁଃ ଲେନାଏ। ଫାରିସୀ ହୋଡ଼ୋକୋ ହାର୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ ନାଡ଼େଏ ହିଜୁଃକେତେ ୟୀଶୁ କେ ପାରୀକ୍ଷା ଲାଗିନ୍ତେ ଇନିଃକେ କୁଲିକିଜାକୋ, “ଆଲେକେ ରିମିଲ୍‍ଦିଶୁମ୍ ରାଃ ଜାହାନ୍ ଚିହ୍ନା ଦେଖାଏମ୍।” ମେନ୍ଦୋ ଇନିଃ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଶିଙ୍ଗି ଡୁବିଜୋଃ ରେ ଆପେ କାଜିୟାପେ, ଚି ରିମିଲ୍ ସାଫା ତାଇନା, ଚିୟାଃଚି ରିମିଲ୍‍ଦିଶୁମ୍ ଆରାଃ ମେନାଃ। ହାର୍ ସେତାଃ ଇମ୍ତା କାଜିୟାପେ, ‘ଇସିଙ୍ଗ୍ ହୋୟୋ ହିଜୁଗା,’ ଚିୟାଃଚି ରିମିଲ୍‍ଦିଶୁମ୍ ଆରାଃ ହାର୍ ରିମିଲ୍ ହେନ୍ଦେ କାନା, ଆପେ ରିମିଲ୍‍ଦିଶୁମ୍ ରାଃ ଚିହ୍ନା ନେଲ୍‍କେତେ ଏନା ଚିନାଃ ହୋବାୱା ମେନ୍ତେ ବୁଝାଅଃ ଧାଡ଼ିୟାପେ, ମେନ୍ଦୋ ସାମାୟ୍ ରାଃ ଚିହ୍ନା କୋକେ ନେଲ୍‍କେତେ ଏନା ଚିନାଃ ହୋବାୱା ମେନ୍ତେ କାପେ ବୁଝାଅଃ ଧାଡ଼ି ତାନା? ନେ ଯୁଗ୍ ରେନ୍ ଖାରାପ୍ ହାର୍ ବ୍ୟାଭିଚାର୍ ହୋଡ଼ୋକୋ ଚିହ୍ନାକୋ ଦାଣା ତାନା, ମେନ୍ଦୋ ଯୋନା ନାବୀ ରାଃ ଚିହ୍ନା କେ ବାଗିକେତେ ଇନ୍‍କୁକେ ଆଡୋଃ ଜାହାନ୍ ଚିହ୍ନା କା ଏମୋଗା।” ଆଡୋଃ ୟୀଶୁ ଇନ୍‍କୁକେ ବାଗେ କେତେ ସେନୋଃ ଜାନାଏ। ଚେଲାକୋ ସାମୁଦାର୍ ଏନ୍ ଫାରୋମ୍ ସେଟେର୍ ଜାନାକୋ ମେନ୍ଦୋ ଇନ୍‍କୁ ହୋଲୋଙ୍ଗ୍ ଇଦି ରିଡ଼ିଙ୍ଗ୍ ଲେନାକୋ। ୟୀଶୁ ଇନ୍‍କୁକେ କାଜିକେଃକୋୱାଏ, ନେଲେପେ ଫାରିସୀ ହୋଡ଼ୋକୋୱାଃ ହାର୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ ଇନ୍‍କୁୱାଃ ଖାମୀର୍ ତେ ହୁସିଆର୍ ତାଇନ୍‍ପେ। ଇନ୍‍କୁ ଆକୋ-ଆକତେଗି କୁପୁଲି ଜାନାକୋ, “ଆବୁ ହୋଲୋଙ୍ଗ୍ କାବୁ ଆଉ କାଦା ଏନାଲାଗିନ୍ ଇନିଃ ନେଲେକା କାଜି ତାନାଏ।” ନେୟା ସାରିକେତେ ୟୀଶୁ ଇନ୍‍କୁକେ କାଜିକେଃକୋୱାଏ, “ହେ ହୁଡିଙ୍ଗ୍ ବିଶ୍ଵାସ୍ ତାନ୍‍କୋ, ଆପେ ଚିନାଃ ଆପେୟାଃ ରେ କୁପୁଲିଅଃ ତାନାପେ, ଚି ଆବୁ ତାଃ ରେ ହୋଲୋଙ୍ଗ୍ ବାନୋଗା? ଚିନାଃ ନାଆ ସାନ୍ତେ କାପେ ବୁଝାଅ କାନା? ଚିନାଃ ଆପେ ଏନ୍ ପାଞ୍ଚ୍ ହାଜାର୍ ହୋଡ଼ୋକୋ ଲାଗିନ୍ ପାଞ୍ଚ୍ ହୋଲୋଙ୍ଗ୍ କେ କାପେ ପାହୋମ୍ ତାନା, ହାର୍ ଏନାଏତେ ଆପେ ଚିମିନ୍ ଡାଲି ଉଠାଓ ଲେଦାପେ? ହାର୍ ଏନ୍ ଚାଇର୍ ହାଜାର୍ ହୋଡ଼ୋକୋ ଲାଗିନ୍ ସାତ୍ ହୋଲୋଙ୍ଗ୍, ହାର୍ ଏନାଏତେ ଆପେ ଚିମିନ୍ ଡାଲି ଉଠାଓ ଲେଦାପେ? ଆପେ ଚିନାଃ ମେନ୍ତେ କାପେ ବୁଝାଅଃ ତାନା, ଚି ଇଙ୍ଗ୍ ଆପେକେ ହୋଲୋଙ୍ଗ୍ ରାଃ ବିଷାୟ୍ ରେ କାଇଙ୍ଗ୍ କାଜି, ମେନ୍ଦୋ ନେୟା ଚି ଆପେ ଫାରିସୀ ହୋଡ଼ୋକୋୱାଃ ହାର୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ ଇନ୍‍କୁୱାଃ ଖାମୀର୍ ତେ ହୁସିଆର୍ ତାଇନ୍‍ପେ।” ଏନ୍ତେ ଇନିଜାଃ କାଜିକେ ବୁଝାଅ ଧାଡ଼ିଜାନାକୋ ଚି ଇନିଃ ହୋଲୋଙ୍ଗ୍ ରାଃ ଖାମୀର୍ ଏତେ କାହା ମେନ୍ଦୋ ଫାରିସୀ ହୋଡ଼ୋକୋୱାଃ ହାର୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ ଇନ୍‍କୁୱାଃ ଶିଖାଅ ଏତେ ହୁସିଆର୍ ତାଇନୋଃ ଲାଗିନ୍ କାଜିକେଦାଏ। ୟୀଶୁ କୈସାରିୟା ଫିଲିପି ସାହାର୍ ତେ ହିଜୁଃ ଲେନାଏ, ଆଡୋଃ ଆଜାଃ ଚେଲାକୋକେ କୁଲି ଏଟେଃ କେଃକୋୱାଏ, “ହୋଡ଼ୋକୋ ଇଙ୍ଗ୍ ମାନ୍‍ୱା ରାଃ ହୋନ୍ କେ ଅକଏ ତାନିଃ ମେନ୍ତେ କାଜିୟାକୋ?” ଇନ୍‍କୁ କାଜିକେଦାକୋ, “ଚିମିନାଙ୍ଗ୍ କୋ ଯୋହାନ୍ ବାପ୍ତିସ୍ମା ଏହେମ୍ ନିଈ କାଜିୟାକୋ, ଆଡୋଃ ଚିମିନାଙ୍ଗ୍ କୋ ଏଲିୟା ନାବୀ, ଆଡୋଃ ଚିମିନାଙ୍ଗ୍ କୋ ୟିର୍ମିୟାହ୍ ନାବୀ ୟାଦୋ ନାବୀ କୋଏତେ ଜେତାଏ ମିହୋଡ଼୍ କାଜିୟାକୋ।” ଇନିଃ ଇନ୍‍କୁକେ କୁଲିକେଃକୋୱାଏ, “ମେନ୍ଦୋ ଆପେ ଇଙ୍ଗ୍‍କେ ଅକଏ ତାନିଃ ମେନ୍ତେ କାଜି ତାନାପେ?” ଶିମୋନ୍ ପାତ୍ରାସ୍ କାଜିରୁଆଡ଼୍ କିଜାଏ, “ଆମ୍ ଜୀହିଃ ପାର୍ମେଶ୍ଵାର୍ ରାଃ ହୋନ୍ ମାସୀହ୍ ତାନ୍‍ମେ।” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ହେ ଶିମୋନ୍ ୟୋନା ରାଃ ହୋନ୍, ଆମ୍ ଧାନ୍ୟା ତାନ୍‍ମେ; ଚିୟାଃଚି ମାସ୍ ଆଡୋଃ ମାୟୋମ୍ ତେ କାହା ମେନ୍ଦୋ ଇଙ୍ଗ୍ଆଃ ଆପୁ ଅକନିଃ ସିର୍ମାଦିଶୁମ୍ ରେ ମେନିଜା ନେ କାଜି ଆମାଃ ରେ ଉଦୁବ୍ କାଦାଏ। ଆଡୋଃ ଇଙ୍ଗ୍ ହଗି ଆମ୍‍କେ କାଜିମେ ତାନିଙ୍ଗ୍, ଚି ଆମ୍ ପାତ୍ରାସ୍ ତାନ୍‍ମେ, ଆଡୋଃ ଇଙ୍ଗ୍ ନେ ଦିରି ରେ ଇଙ୍ଗ୍ଆଃ କାଲିସିୟା ବାଇୟାଇଙ୍ଗ୍, ଆଡୋଃ ପାତାଲ୍ ରାଃ ଦୁହାର୍ ଏଣ୍ତେ ରେ କାଏ ଜିତାଅ ଧାଡ଼ିୟା। ଇଙ୍ଗ୍ ଆମ୍‍କେ ସିର୍ମାଦିଶୁମ୍ ରାଃ ରାଇଜ୍ ରାଃ ଚାଭିକୋ ଏମାମେୟାଇଙ୍ଗ୍; ହାର୍ ଅକନାଃ ହଗି ଆମ୍ ଅତେ ରେ ଥୋଲେୟାମ୍, ଏନା ସିର୍ମାଦିଶୁମ୍ ରେ ଥୋଲୋଗା, ଆଡୋଃ ଅକନାଃ ହଗି ଅତେ ରେ ରାଡ଼ାୟାମ୍ ଏନା ସିର୍ମାଦିଶୁମ୍ ରେ ରାଡ଼ାଅଗା।” ଏନ୍ତେ ୟୀଶୁ ଚେଲାକୋକେ କେଟେଃ ତେ ଆନାଚୁ କେଃକୋୱାଏ ଚି ଅକଏ କେହ ଆଲୋପେ କାଜିୟା ଚି ଇଙ୍ଗ୍ ମାସୀହ୍ ତାନିଙ୍ଗ୍। ଏନ୍ ସାମାୟ୍ ଏତେ ୟୀଶୁ ଆୟାଃ ଚେଲାକୋକେ ଉଦୁବ୍ ଏଟେଃ କେଦାଏ, “ଇଙ୍ଗ୍‍କେ ଲାଗାତିଙ୍ଗ୍ ମେନାଃ ଚି ୟୀରୁଶାଲେମ୍ ତେ ସେନାଇଙ୍ଗ୍, ହାର୍ ମାରିହୋଡ଼ୋକୋୱାଃ ହାର୍ ପ୍ରାଧାନ୍ ୟାଜାକ୍ କୋୱାଃ ହାର୍ ଆଇନ୍ ଗୁରୁ କୋୱାଃ ତିଈ ତେ ବାହୁତ୍ ଦୁକୁକୋ ସାହାତିଙ୍ଗ୍ ୟାଇଙ୍ଗ୍, ହାର୍ ଗୋଏଃ ରିକାୱାଇଙ୍ଗ୍, ଆଡୋଃ ତିସ୍ରା ଦିନ୍ ରେ ଜୀହିଃ ବିରିଃ କେନୋ ଗାଇଙ୍ଗ୍।” ନେୟା ରେ ପାତ୍ରାସ୍ ଇନିଃକେ ଆଲାଗ୍ ଇଦିକେତେ ଦୁକୁ ସାହାତିଙ୍ଗ୍ ୟାଇଙ୍ଗ୍ ହାର୍ ଗୋଏଃ ରିକାୱାଇଙ୍ଗ୍ କାଜିକିଜାଏ ମେନ୍ତେ ଏଗେର୍ କିଜାଏ, ହେ ପ୍ରାଭୁ, ପାର୍ମେଶ୍ଵାର୍ ଆଲୋକା ରିକାଏ! ଆମାଃ ଲୋଃ ନେଲେକା ଚିଉଲାଅ କା ହୋବାୱା। ଏନ୍ତେ ୟୀଶୁ ବିୟୁର୍ କେତେ ପାତ୍ରାସ୍ କେ କାଜିକେଦାଏ, “ହେ ଶାଏତାନ୍ ଇଙ୍ଗ୍ଆଃ ନାଡ଼େଏ ତେ ଗେନାନ୍ ମେ, ଆମ୍ ଇଙ୍ଗ୍ଆଃ ପାର୍ମେଶ୍ଵାର୍ ରାଃ କାମି କେ ଛେକାଃ ତାନାମ୍, ଚିୟାଃଚି ଆମ୍ ପାର୍ମେଶ୍ଵାର୍ ରାଃ ପାହୋମ୍ ଲେକା କାହା, ମେନ୍ଦୋ ହୋଡ଼ୋକୋୱାଃ ଲେକା ପାହୋମ୍ ତାନାମ୍।” ଏନ୍ତେ ୟୀଶୁ ଆଜାଃ ଚେଲାକୋକେ କାଜିୟାଃକୋୱାଏ “ଆଗାର୍ ଅକଏ ଇଙ୍ଗ୍‍କେ ଅତୋଙ୍ଗିଙ୍ଗ୍ ସାନାଙ୍ଗ୍ ରେଦୋ, ଇନିଃ ଆଜାଃ ସାନାଙ୍ଗ୍ କୋକେ ବାଗିକାଏ ହାର୍ ଆଜାଃ କ୍ରୁଶ୍ ଉଠାୱେକାଏ ହାର୍ ଇଙ୍ଗ୍‍କେ ଅତୋଙ୍ଗିଙ୍ଗ୍ କାଏ। ଚିୟାଃଚି ଅକଏ ଆଜାଃ ଜୀଉ କେ ବାଞ୍ଚାଅ ସାନାଙ୍ଗାଏ, ଇନିଃ ଏନାକେ ଆଦେୟାଏ, ଆଡୋଃ ଅକଏ ଇଙ୍ଗ୍ଆଃ ଲାଗିନ୍ତେ ଆଜାଃ ଜୀଉ କେ ଆଦେୟାଏ, ଇନିଃ ଏନାକେ ନାମେୟାଏ। ଆଗାର୍ ମିୟାଃ ହୋଡ଼ ସବେନ୍ ଅତେଦିଶୁମ୍ କେ ନାମ୍ କେୟାଏ ହାର୍ ଆଜାଃ ପାର୍ମେଶ୍ଵାର୍ ଏତେ ଜୀଉ କାଏ ନାମ୍ ରେଦୋ ଇନିଃକେ ଚିକାନ୍ ଲାଭ୍ ହୋବାୱା? ୟାଦୋ ହୋଡ଼ ଆଜାଃ ଜାନାଓ-ଜୀଦାନ୍ ଜୀଉ ନାମେ ଲାଗିନ୍ ଚିନାଃ ଏମେୟାଏ? ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ସିର୍ମାଦାସୀ କୋଲୋଃ ଇଙ୍ଗ୍ଆଃ ଆପୁ ରାଃ ମାନାରାଙ୍ଗ୍ ରେ ହିଜୁଗାଇଙ୍ଗ୍ ହାର୍ ଏନ୍ ସାମାୟ୍ ଇଙ୍ଗ୍ ସବେନ୍ ହୋଡ଼ୋକୋକେ ଇନ୍‍କୁୱାଃ କାମି ଲେକାତେ ଇନ୍‍କୁ କେ ନାଲା ଏମାକୋୱାଇଙ୍ଗ୍। ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍, ଚି ଅକଏକୋ ନେତାଃ ତିଙ୍ଗୁ କାନାକୋ, ଇନ୍‍କୁ ଏତେ ଚିମିନାଙ୍ଗ୍ କୋ ନେଲେକା ମେନାକୋୱା, ଚି ଇନ୍‍କୁ ଚିମିନ୍ ସାନ୍ତେ ଇଙ୍ଗ୍ ମାନ୍‍ୱା ରାଃ ହୋନ୍ କେ ଇଙ୍ଗ୍ଆଃ ରାଇଜ୍ ରେ ହିଜୁଃ ତାନ୍ କାକୋ ନେଲିଙ୍ଗ୍‍ୟା, ଏନ୍ ସାନ୍ତେ ଗୋନୋଏଃ ରାଃ ଶିବିଲ୍ ଚିଉଲାଅ କାକୋ ଚାଖାୟା।” ଛାଅ ଦିନ୍ ତାୟୋମ୍ତେ ୟୀଶୁ ପାତ୍ରାସ୍, ୟାକୁବ୍ ହାର୍ ଇନିଜାଃ ହାଗା ଯୋହାନ୍ କେ ମିଶାତେ ଇଦି କେତେ ଇନ୍‍କୁକେ ଗେନା କେତେ ମିୟାଃ ସାଲିଙ୍ଗି ବୁରୁ ଚେତାନ୍ ତେ ଇଦି କେଃକୋୱାଏ। ଏନ୍ତାଃରେ ଇନ୍‍କୁୱାଃ ସାମ୍‍ନାଙ୍ଗ୍ ରେ ଆଜାଃ ରୂପ୍ ବାଦ୍‍ଲାଅ ଜାନା, ହାର୍ ଆଜାଃ ମେଏଃମୁହାଡ଼୍ ଶିଙ୍ଗି ଲେକା ଚାମ୍‍କାଓ ଜାନା ହାର୍ ଇନିଜାଃ ଲିଜାଃ ବାତୀ ଲେକା ମାସ୍କାଲ୍ ଜାନା। ଆଡୋଃ ମୁଶା ନାବୀ ଆଡୋଃ ଏଲିୟା ନାବୀ ୟୀଶୁ ଲୋଃ ବାକାଣ୍ ତାନ୍‍ଲୋଃ ଇନ୍‍କୁକେ ନେଲ୍ ଜାନାକିନ୍। ଏନ୍ତେ ପାତ୍ରାସ୍ ୟୀଶୁ କେ କାଜିୟାଜାଏ, “ହେ ପ୍ରାଭୁ, ଆଲେୟାଃ ନେତାଃ ତାଇନ୍ ବେଶ୍ ତାନାଃ। ଆଗାର୍ ଆମ୍ ସାନାଙ୍ଗ୍ ରେଦୋ, ଇଙ୍ଗ୍ ନେତାଃ ରେ ଆପିୟା ମାଣ୍ଡ୍‍ୱା ବାଇୟାଇଙ୍ଗ୍, ମିୟାଃ ଆମାଃ ଲାଗିନ୍, ମିୟାଃ ମୁଶା ଲାଗିନ୍, ଆଡୋଃ ମିୟାଃ ଏଲିୟା ଲାଗିନ୍।” ଇନିଃ ନେ କାଜି କାଜିତାନ୍ ରେ ଗି, ନେଲେପେ, ମିୟାଃ ମାସ୍କାଲ୍ ରିମିଲ୍ ଇନ୍‍କୁକେ ଉମ୍ବୁଲ୍ କେଃକୋୱାଏ, ହାର୍ ଏନ୍ ରିମିଲ୍ ଏତେ ପାର୍ମେଶ୍ଵାର୍ ରାଃ ଆୱାଜ୍ ଆୟୁମ୍ ଜାନା, “ନିଈ ଇଙ୍ଗ୍ଆଃ ଦୁଲାଡ଼୍ ହୋନ୍ ତାନିଃ, ନିଈକେ ଇଙ୍ଗ୍ ସୁକୁକାନାଇଙ୍ଗ୍, ନିଜାଃ ଆୟୁମେପେ।” ଚେଲାକୋ ନେୟା ଆୟୁମ୍ ଲୋଃ ବୋଅ ତିରୁବ୍ କେତେ ହୋମ୍ବୋଃ ଉୟୁଃ ଜାନାକୋ ହାର୍ ଥିମ୍ବାଗି ବୋରୋଜାନାକୋ। ଏନ୍ତେ ୟୀଶୁ ନାଡ଼େଏ ହିଜୁଃକେତେ ଇନ୍‍କୁକେ ଜୁଟିଃ କେଃକୋୱାଏ, ହାର୍ କାଜିକେଃକୋୱାଏ, “ବିରିଃପେ, ଆଲୋପେ ବୋରୋୟା।” ଏନ୍ତେ ଇନ୍‍କୁ ଆକୋୱାଃ ମେଏଃ ଆରିଃ କେଦାକୋ ହାର୍ ୟୀଶୁ କେ ବାଗେ କେତେ ଆଡୋଃ ଜେତାଏ କେ କାକୋ ନେଲ୍ କେଦା। ଚିମ୍ତା ଇନ୍‍କୁ ବୁରୁ ଏତେକୋ ଆଡ଼୍‍ଗୁନ୍ ତାଇନା ଇମ୍ତାଙ୍ଗ୍ ୟୀଶୁ ଇନ୍‍କୁକେ ନେୟା ଆନାଚୁ ଏମାଃ କୋୱାଏ, “ଚିମିନ୍ ସାନ୍ ଇଙ୍ଗ୍ ମାନ୍‍ୱା ରାଃ ହୋନ୍ ଗୋଜାକାନ୍ କୋଏତେ କାଇଙ୍ଗ୍ ବୀରିଦା, ଏନ୍ ସାନ୍ତେ ଅକନାଃ ଆପେ ପେ ନେଲା କାଦା ଏନା ଅକଏ କେହ ଆଲୋପେ କାଜିୟା।” ଏନ୍ତେ ଇନିଜାଃ ଚେଲାକୋ ଇନିଃକେ କୁଲିକିଜାକୋ, “ଏଣ୍ଡେ ଆଇନ୍ ଗୁରୁକୋ ଚିନାଃ ମେନେଃ କାଜିୟାକୋ ଚି ଏଲିୟା ନାବୀ ରାଃ ସିଦା ହିଜୁଃ ଜାଲେକାତେ ମେନାଃ?” ୟୀଶୁ କାଜିରୁଆଡ଼୍ କେଃକୋୱାଏ, ଏଲିୟା ଜାଲେକାତେ ଗି ହିଜୁଗାଏ, ଆଡୋଃ ସବେନାଃ ବାଇରୁଆଡ଼୍‍ୟାଏ। ମେନ୍ଦୋ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍, ଚି ଏଲିୟା ହିଜୁଃ ଛାବାନାଏ, ଆଡୋଃ ହୋଡ଼ୋକୋ ଆଏଃକେ କାକୋ ନେଲ୍ଉରୁମ୍ କିଜା; ମେନ୍ଦୋ ଚିଲ୍‍କା କୋ ସାନାଙ୍ଗ୍ କେଦା ଏନ୍ କାଗି ଇନିଜାଃ ଲୋଃ କୋ ରିକାକେଦା। ନେଲେକାଗି ଇଙ୍ଗ୍ ମାନ୍‍ୱା ରାଃ ହୋନ୍ ହଗି ଇନ୍‍କୁୱାଃ ତିଈ ତେ ଦୁକୁ ସାହାତିଙ୍ଗ୍ ୟାଇଙ୍ଗ୍। ଏନ୍ତେ ଚେଲାକୋ ବୁଝାଅ ଜାନାକୋ ଚି ଇନିଃ ଆବୁକେ ଯୋହାନ୍ ବାପ୍ତିସ୍ମା ଏମ୍‍ନିଜାଃ ବିଷାୟ୍ ରେ କାଜିକେଦାଏ। ଚିମ୍ତାଙ୍ଗ୍ ୟୀଶୁ ଆଡୋଃ ଆଜାଃ ଆପିୟା ଚେଲାକୋ ବାକି ଚେଲା କୋତାଃ ହାର୍ ମିଃଥିମ୍ବା ହୋଡ଼ୋକୋ ତାଃ ସେଟେର୍ ଜାନାକୋ ଦୋ ମିୟାଃ ହୋଡ଼ ଇନ୍‍କୁୱାଃ ନାଡ଼େଏ ହିଜୁଃ ଲେନାଏ, ଆଡୋଃ ଇକ୍ଡ଼ୁମ୍ କେତେ କାଜିକେଦାଏ, “ହେ ପ୍ରାଭୁ, ଇଙ୍ଗ୍ଆଃ ହୋନ୍‍କଡ଼ା ଚେତାନ୍ ରେ ଦାୟା କେତେ ବେଶ୍ ତାଇମେ! ଚିୟାଃଚି ଇନିଃ ମିର୍ଗି ବେମାର୍ ଏତେ ଥିମ୍ବାଗି ଦୁକୁ ସାହାତିଙ୍ଗ୍ ତାନାଏ, ଆଡୋଃ ଘାଡ଼ି-ଘାଡ଼ି ସେଙ୍ଗେଲ୍ ରେ ଆଡୋଃ ଘାଡ଼ି-ଘାଡ଼ି ଦାଆ ରେ ଉୟୁଗୋଃ ତାନାଏ। ଇଙ୍ଗ୍ ଇନିଃକେ ଆମାଃ ଚେଲା କୋୱାଃ ନାଡ଼େଏ ଆଉଲିଜାଇଙ୍ଗ୍, ମେନ୍ଦୋ ଇନ୍‍କୁ ଇନିଃକେ କାକୋ ବେଶ୍ ଧାଡ଼ିଜାନା।” ୟୀଶୁ କାଜିରୁଆଡ଼୍ କେଃକୋୱାଏ, “ହେ ଆବିଶ୍ଵାସୀ ଆଡୋଃ ସେଠ୍ରା ହୋଡ଼ୋକୋ, ଇଙ୍ଗ୍ ଚିଉଲା ସାନ୍ତେ ଆପେୟାଃ ଲୋଃ ତାଇନାଇଙ୍ଗ୍? ଚିମିନ୍ ସାନ୍ତେ ଆପେୟାଃ ସାହାତିଙ୍ଗ୍ ୟାଇଙ୍ଗ୍? ଇନିଃକେ ନେତାଃ ଇଙ୍ଗ୍ଆଃ ନାଡ଼େଏ ଆୱିପେ।” ଏନ୍ତେ ୟୀଶୁ ବୋଙ୍ଗାଆତ୍ମା କେ ଏଗେର୍ କିଜାଏ, ଆଡୋଃ ଇନିଃ ଇନିଜେତେ ଅଡୋଙ୍ଗ୍ ଜାନାଏ, ଏନ୍ତେ କଡ଼ାହୋନ୍ ଇମ୍ତାଗି ବେଶ୍ ଜାନାଏ। ଏନ୍ତେ ଚେଲାକୋ ଏସ୍କାର୍ ଇମ୍ତାଙ୍ଗ୍ ୟୀଶୁ ତାଃ ହିଜୁଃକେତେ କାଜିକେଦାକୋ, “ଆଲେ ଇନିଃକେ ଚିନାଃ ମେନ୍ତେ କାଲେ ଅଡୋଙ୍ଗ୍ ଧାଡ଼ିଜାନା?” ଇନିଃ ଇନ୍‍କୁକେ କାଜିୟାଃକୋୱାଏ, “ଆପେୟାଃ କାଟିଃ ବିଶ୍ୱାସ୍ ରାଃ ହୋରାତେ, ଚିୟାଃଚି ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍, ଆଗାର୍ ଆପେୟାଃ ବିଶ୍ଵାସ୍ ମାନି ରାଃ ଯାଙ୍ଗ୍ ଲେକା ତାଇନ୍ ରେଦୋ, ନେ ବୁରୁ କେ କାଜି ଧାଡ଼ିୟାପେ, ନେତାଃ ଏତେ ହାନ୍ତାଃ ସେନୋଃମେ, ଦୋ ଏନା ସେନୋଃ କେନୋଗା, ଆଡୋଃ ଜେତାନ୍ କାଜି ଆପେୟାଃ ଲାଗିନ୍ତେ କାଧାଡ଼ିଲେକା କା ତାଇନା। ମେନ୍ଦୋ ନେ ଲେକାନ୍ ବୋଙ୍ଗା ବେଗାର୍ ବିନ୍ତି ଆଡୋଃ ଉପାସ୍ ତେ ଏଟାଃ ଜାହାନ୍ ଲେକାତେ କାଏ ଅଡୋଙ୍ଗୋଗା।” ଚିମ୍ତା ଇନ୍‍କୁ ଗାଲିଲୀ ଜିଲ୍ଲା ରେ ତାଇକେନାକୋ, ୟୀଶୁ ଇନ୍‍କୁକେ କାଜିୟାଃକୋୱାଏ, “ଇଙ୍ଗ୍ ମାନ୍‍ୱା ରାଃ ହୋନ୍ ହୋଡ଼ୋକୋୱାଃ ତିଈ ରେ ସାବୋଃ ଗାଇଙ୍ଗ୍। ଇନ୍‍କୁ ଇଙ୍ଗ୍‍କେ ଗୋଜିଙ୍ଗ୍‍ୟାକୋ, ହାର୍ ଇଙ୍ଗ୍ ଆପି ହୁଲାଙ୍ଗ୍ ରେ ଜୀହିଃ ବୀରିଦୋଗାଇଙ୍ଗ୍।” ନେୟାରେ ଇନ୍‍କୁ ଥିମ୍ବାଗି ଦୁକୁ ଜାନାକୋ। ଚିମ୍ତା ଇନ୍‍କୁ କାଫାର୍ନାହୁମ୍ ସାହାର୍ ସେଟେର୍ ଜାନାକୋ, ଦୋ ମାନ୍ଦିର୍ ରାଃ ମାଲ୍-ଟାକା ହାରୋମ୍ ତାନ୍‍କୋ ପାତ୍ରାସ୍ ତାଃ ହିଜୁଃକେତେ କୁଲିକିଜାକୋ, ଚି ଚିନାଃ ଆମାଃ ଗୁରୁ ମାନ୍ଦିର୍ ରାଃ ମାଲ୍-ଟାକା କାଏ ଏମ୍ ତାନାଏ? ଇନିଃ କାଜିକେଦାଏ “ହାଁ ଏମ୍ ତାନାଏ।” ଚିମ୍ତା ଇନିଃ ଅଡ଼୍ଆଃ ହିଜୁଃ ଲେନାଏ, ଦୋ ୟୀଶୁ ଇନିଜାଃ କୁଲି ସିଦାରେ ଗି ଇନିଃକେ କାଜିକେଦାଏ “ହେ ଶିମୋନ୍ ଆମ୍ ଚିନାଃ ପାହୋମ୍ ତାନାମ୍? ଅତେ ରେନ୍ ରାଜା ବାଜାର୍ ମାଲ୍ ହାରୋମ୍ ଟାକା ୟା ମାଲ୍-ଟାକା ଅକେୟାଃ ତେ ଇଦିୟାଏ? ଆପାନାଃ ହୋନ୍ କୋଏତେ ଚି ଏଟାଃ କୋଏତେ?” ପାତ୍ରାସ୍ ଇନିଃକେ କାଜିକିଜାଏ, “ଏଟାଃ କୋଏତେ।” ୟୀଶୁ ଇନିଃକେ କାଜିକିଜାଏ, “ଦୋ ହୋନ୍‍କୋ ବାଚାଓ ଜାନାକୋ। ଏଣ୍ଡେୟଗି ଏନାମେନ୍ତେ ଚି ଆବୁ ଇନ୍‍କୁ କେ କାବୁ ଖିସ୍ ଏମାକୋୱା, ଆମ୍ ସାମୁଦାର୍ ଗେନା ରେ ସେନ୍‍କେତେ ବାଣ୍‍ସୀ ଉୟୁଗେମ୍ ଆଡୋଃ ଅକନ୍ ହାକୁ ସିଦା ପାଶେ ଅଗାଏ, ଇନିଃକେ ସାବିମ୍; ଇନିଜାଃ ମୋଚା ଖଲାଅ ରେ ରୂପା ରାଃ ମିୟାଃ ଟାକା ଆମ୍‍କେ ନାମୋଗା, ଏନାକେ ଇଦିକେତେ ଇଙ୍ଗ୍ଆଃ ହାର୍ ଆମାଃ ଲାଗିନ୍ ଇନ୍‍କୁକେ ଏମାକୋମ୍।” ଏନ୍ ସାମାୟ୍ ରେ ଚେଲାକୋ ୟୀଶୁ ରାଃ ନାଡ଼େଏ ହିଜୁଃକେତେ କୁଲିକିଜାକୋ, “ସିର୍ମାଦିଶୁମ୍ ରାଃ ରାଇଜ୍ ରେ ଅକଏ ମାରାଙ୍ଗ୍ ତାନିଃ?” ନେୟା ରେ ଇନିଃ ମିୟାଃ ହୁଡିଙ୍ଗ୍ ହୋନ୍ କେ ନାଡ଼େଏ କେଡ଼ାକେତେ ଇନ୍‍କୁୱାଃ ଥାଲା ରେ ତିଙ୍ଗୁ କିଜାଏ, ହାର୍ କାଜିୟାଃକୋୱାଏ, “ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍ ଚି ଚିମିନ୍ ଜାକେଦ୍ ଆପେ କାପେ ରୁଆଡ଼ା ଆଡୋଃ ହୁଡିଙ୍ଗ୍ ହୋନ୍‍କୋ ଲେକା ନାରାମ୍ କାପେ ବାଇନା ଆପେ ସିର୍ମାଦିଶୁମ୍ ରାଃ ରାଇଜ୍ ରେ ବୋଲୋ କାପେ ଧାଡ଼ିୟା। ଏନାମେନ୍ତେ ଜେତାଏ ଆପାନ୍ କେ ନେ ହୁଡିଙ୍ଗ୍ ହୋନ୍ ଲେକା ନାରାମ୍ ରିକାୟାଏ, ଇନିଃ ସିର୍ମାଦିଶୁମ୍ ରାଃ ରାଇଜ୍ ରେ ମାରାଙ୍ଗ୍ ହୋବାୱାଏ। ଜେତାଏ ହଗି ଇଙ୍ଗ୍ଆଃ ନୁତୁମ୍ ତେ ମିୟାଃ ନେଲେକା ହୁଡିଙ୍ଗ୍ ହୋନ୍ କେ ସ୍ଵାଗାତ୍ ରିକାୟାଏ ଇନିଃ ଇଙ୍ଗ୍‍କେ ସ୍ଵାଗାତିଙ୍ଗ୍ ତାନାଏ।” ମେନ୍ଦୋ ଜେତାଏ ହଗି ନେ ହୁଡିଙ୍ଗ୍ କୋଏତେ ମାନେ ହୁଡିଙ୍ଗ୍ ହୋନ୍ ଲେକା ଅକଏ ଇଙ୍ଗ୍ଆଃ ରେ ବିଶ୍ଵାସ୍ ତାନାକୋ, ଏନ୍ ମିହୋଡ଼୍ କେ ବିଶ୍ଵାସ୍ ବାଗେ ଲାଗିନ୍ ଉସ୍କୁର୍ ରିକାୟାଏ, ଇନିଜାଃ ଲାଗିନ୍ ବେଶ୍ ହୋବାଅଃ ତେୟାଃ ଚି ମିୟାଃ ମାରାଙ୍ଗ୍ ଜାଁତା ଦିରି ଇନିଜାଃ ହୋଟୋଃ ରେ ହାକାଅଃ ତେୟାଃ, ଆଡୋଃ ଇନିଃ ଈକିର୍ ସାମୁଦାର୍ ରେ ଡୁବିଗୋଃ ତେୟାଏ। ବିଶ୍ଵାସ୍ ବାଗେ ଲାଗିନ୍ ଉସ୍କୁର୍ ରିକାନିଃ ଲାଗିନ୍ ଅତେଦିଶୁମ୍ ରେ ହାୟ୍! ବିଶ୍ଵାସ୍ ବାଗେ ଲାଗିନ୍ ଉସ୍କୁର୍ ଜାଲେକାତେ ଗି ହୋବାୱା, ମେନ୍ଦୋ ହାୟ୍ ଏନ୍ ହୋଡ଼ ଲାଗିନ୍ ଅକେୟାଃ ହୋରାତେ ବିଶ୍ଵାସ୍ ବାଗେ ଲାଗିନ୍ ଉସ୍କୁର୍ ହୋବାଅଃ ତାନା। “ଆଗାର୍ ଆମାଃ ତିଈ ତେ ହାର୍ ଆମାଃ କାଟା ତେ ଆମ୍‍କେ ପାପ୍ ରିକା ସାନାଙ୍ଗ୍ ରେଦୋ ଏନାକେ ମାଆ ଖାଣ୍ଡାଅ କେତେ ଦୁଡ଼ିଙ୍ଗ୍ ତାମେ, ଠୁଠା ୟାଦୋ ଲାଙ୍ଗ୍ଡ଼ା କେତେ ଜୀଦାନ୍ ରେ ବୋଲୋ ତେୟାଃ ଆମାଃ ଲାଗିନ୍ ନେୟାତେ ବେଶ୍ ତାନାଃ କାରେଦୋ, ବାରାନ୍ ତିଈ ୟାଦୋ ବାରାନ୍ କାଟା ତାଇନ୍ କେତେ ଆମ୍ ଜାନାଓ ରାଃ ସେଙ୍ଗେଲ୍ ରେ ଦୁଡ଼ିଙ୍ଗ୍ ଅଗାମ୍। ଆଗାର୍ ଆମାଃ ମେଏଃ ତେ ଆମ୍‍କେ ପାପ୍ ରିକା ସାନାଙ୍ଗ୍ ରେଦୋ, ଏନାକେ ଅଡୋଙ୍ଗ୍ କେତେ ଦୁଡ଼ିଙ୍ଗ୍ ତାମ୍; କାଣା ହୋବା କେତେ ଜୀଦାନ୍ ରେ ବୋଲୋ ତେୟାଃ ଆମାଃ ଲାଗିନ୍ ଏନାତେ ବେଶ୍ ତାନାଃ କାରେଦୋ, ବାରାନ୍ ମେଏଃ ତାଇନ୍ କେତେ ଆମ୍ ନାରାକ୍ ରାଃ ସେଙ୍ଗେଲ୍ ରେ ଦୁଡ଼ିଙ୍ଗ୍ଅଗାମ୍।” ନେଲେପେ, ଆପେ ନେ ହୁଡିଙ୍ଗ୍ ହୋନ୍ କୋଏତେ ଅକଏ କେହ ଆଲୋପେ ହିଲାଙ୍ଗ୍ କୋୱା ଚିୟାଃଚି ଇଙ୍ଗ୍ ଆପେକୋକେ ସାର୍ତି କାଜିୟାପେ ତାନିଙ୍ଗ୍ ଚି ସିର୍ମାଦିଶୁମ୍ ରେ ଇନ୍‍କୁୱାଃ ସିର୍ମାଦାସୀକୋ ସବେନ୍ ଇମ୍ତା ଇଙ୍ଗ୍ଆଃ ସିର୍ମାଦିଶୁମ୍ ରେନ୍ ଆପୁ ଲୋଃ ତାଇନ୍ ତାନାକୋ। ଚିୟାଃଚି ଇଙ୍ଗ୍ ମାନ୍‍ୱା ରାଃ ହୋନ୍ ଆଦାକାନ୍ କୋକେ ବାଚାଓ ଲାଗିନ୍ତେ ହିଜୁଃକାନିଙ୍ଗ୍। ଆପେ ଚିନାଃ ପାହୋମ୍ ତାନାପେ? ଆଗାର୍ ଜାହାନ୍ ହୋଡ଼ ରାଃ ଏକ୍ ଶାଅ ମିଣ୍ଡୀକୋ ମେନାକୋୱା, ଆଡୋଃ ଇନ୍‍କୁଏତେ ମିୟାଃ ହୋରା-ରିଡ଼ିଙ୍ଗ୍ କେନୋଃରେ, ଦୋ ଚିନାଃ ଇନିଃ ନିନ୍ୟାନାବେ କୋକେ ବାଗେ କେତେ, ଆଡୋଃ ବୁରୁ କୋରେ ସେନ୍‍କେତେ, ଏନ୍ ହୋରା-ରିଡ଼ିଙ୍ଗ୍‍କାନ୍ ନିଈକେ କାଏ ଦାଣାୟାଏ? ଆଡୋଃ ଆଗାର୍ ଇନିଃକେ ନାମ୍ କିୟାଏ, ଦୋ ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍, ଚି ଇନିଃ ଏନ୍ ନିନ୍ୟାନାବେ ମିଣ୍ଡୀକୋ ଲାଗିନ୍ ଅକନ୍‍କୋ ହୋରା କାକୋ ରିଡ଼ିଙ୍ଗ୍ ଲେନ୍ ତାଇନା ଇନ୍‍କୁ ଲାଗିନ୍ ଇମିନାଙ୍ଗ୍ କାଏ ରାଶିକା ୱାଏ ଚିମିନାଙ୍ଗ୍ ଚି ଏନ୍ ମିୟାଃ ମିଣ୍ଡୀ ଲାଗିନ୍ତେ ରାଶିକା ୱାଏ। ନେଲେକାଗି ଆପେୟାଃ ଆପୁ ରାଃ ଅକନିଃ ସିର୍ମାଦିଶୁମ୍ ରେ ମେନିଜା ନେୟା ସାନାଙ୍ଗ୍ ନାହାଲା ଚି, ନେ ହୁଡିଙ୍ଗ୍ ହୋନ୍ କୋଏତେ ମିହୋଡ଼୍ ହଗି ନାଷ୍ଟ୍‍ଅଃକାଏ। ଆଗାର୍ ଆମାଃ ହାଗା ଆମାଃ ବିରୁଦ୍ଧ୍ ରେ ପାପ୍ ରିକାୟାଏ, ଦୋ ସେନ୍ ମେ ହାର୍ ଏସ୍କାର୍ ଗି ବାକାଣ୍ କେତେ ଇନିଃକେ ବୁଝାୱିମେ, ଆଗାର୍ ଇନିଃ ପାପ୍ କାମି ବାଗେ ତାଦାଏ ରେଦୋ ଆମ୍ ଆମାଃ ହାଗା କେ ନାମ୍ କିଜାମ୍। ଆଗାର୍ ଇନିଃ ଆମାଃ କାଜି କାଏ ଆୟୁମ୍ ରେଦୋ, ମିହୋଡ଼୍ ୟାଦୋ ବାର୍ହୋଡ଼୍ କିନ୍‍କେ ଆମାଃ ଲୋଃ ଆଡୋଃ ଇଦି କିନ୍‍ମେ ଚି, ଏନାତେ ସବେନ୍ କାଜି ବାର୍ହୋଡ଼୍ ୟାଦୋ ଆପି ହୋଡ଼ କୋୱାଃ ଗୋୱା ଥାଲା ରେ ପୋକ୍ତା ହୋବାୱା। ଆଗାର୍ ଏଣ୍ଡେ ରେହ ଇନିଃ ଇନ୍‍କୁୱାଃ କାଜି କାଏ ଆୟୁମ୍ ରେଦୋ କାଲିସିୟା ରେନ୍ କୋକେ କାଜିମେ, ମେନ୍ଦୋ ଆଗାର୍ ଇନିଃ କାଲିସିୟା ରେନ୍ କୋକେ ହଗି କାଏ ମାନାତିଙ୍ଗ୍ ରେଦୋ ଆମ୍ ଇନିଃକେ ଏଟାଃଜାତି ହାର୍ ମାଲ୍-ଟାକା ହାରୋମ୍ ଲେକାନିଃ ଲେକା ସାରିମେ। “ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍, ଅକନାଃ ଅଗି ଆପେ ଅତେ ରେ ଥୋଲେୟାପେ, ଏନା ସିର୍ମାଦିଶୁମ୍ ରେ ଥୋଲୋଗା ହାର୍ ଅକନାଃ ଅଗି ଆପେ ଅତେ ରେ ରାଡ଼ାୟାପେ, ଏନା ସିର୍ମାଦିଶୁମ୍ ରେ ରାଡ଼ାଅଗା। ଆଡୋଃଗି ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍, ଆଗାର୍ ଆପେ ଏତେ ବାର୍ହୋଡ଼୍ ଅତେ ରେ ଜାହାନ୍ କାଜି ଲାଗିନ୍ତେ ମିୟାଃ ମୋନ୍ ହୋବାକେତେ ଏନାକେ ଆସିୟାପେ, ଦୋ ଏନା ଇଙ୍ଗ୍ଆଃ ଆପୁ ପାଡ଼େତେ ଅକନିଃ ସିର୍ମାଦିଶୁମ୍ ରେ ମେନିଜା, ଇନ୍‍କୁ ଲାଗିନ୍ ନାମୋଗା। ଚିୟାଃଚି ଅକତାଃରେ ବାର୍ହୋଡ଼୍ ୟାଦୋ ଆପିହୋଡ଼୍ ଇଙ୍ଗ୍ଆଃ ନୁତୁମ୍ ରେ ହୁଣ୍ଡି ନାକୋ, ଏନ୍ତାଃରେ ଇଙ୍ଗ୍ ଇନ୍‍କୁୱାଃ ଥାଲା ରେ ମେନାଇଙ୍ଗ୍‍ୟା।” ଏନ୍ତେ ପାତ୍ରାସ୍ ନାଡ଼େଏ ହିଜୁଃକେତେ ୟୀଶୁ କେ କାଜିକେଦାଏ, “ହେ ପ୍ରାଭୁ, ଆଗାର୍ ଇଙ୍ଗ୍ଆଃ ହାଗା ପାପ୍ କାମି କାତେୟାଏ ଦୋ ଇଙ୍ଗ୍ ଚିମିନ୍ ବେର୍ ଇନିଃକେ ଛାମାୟାଇଙ୍ଗ୍? ଚିନାଃ ସାତ୍ ବେର୍ ସାନ୍ତେ?” ୟୀଶୁ ଇନିଃକେ କାଜିକେଦାଏ, “ଇଙ୍ଗ୍ ଆମ୍‍କେ ନେୟା କାଇଙ୍ଗ୍ କାଜି ମେତାନା ଚି ସାତ୍ ବେର୍ ସାନ୍ତେ ମେନ୍ଦୋ ସାତ୍ ବେର୍ ଲାଗିନ୍ତେ ସାତାର୍ ଗୁନା ସାନ୍ତେ ଛାମାଇମେ।” “ଏନା ଲାଗିନ୍ତେ ସିର୍ମାଦିଶୁମ୍ ରାଃ ରାଇଜ୍ ଏନ୍ ରାଜା ରାଃ ଲେକା ତାନାଃ, ଅକନିଃ ଆଜାଃ ଦାସୀକୋ ତାଃଏତେ ହିସାବ୍ ଇଦି ସାନାଙ୍ଗ୍ କେଦାଏ। ଚିମ୍ତା ଇନିଃ ହିସାବ୍ ଆସି କେଦାଏ, ଦୋ ମିହୋଡ଼୍ ଆଜାଃ ନାଡ଼େଏ ଆଉଜାନାଏ ଅକନିଃ ଦାଶ୍ ହାଜାର୍ ଥାଇଲା ରେ ସୋନା ଟାକା ରିଣୀ ଇଦିଲେଦାଏ। ମେନ୍ଦୋ ଚିମ୍ତା ହାଲେ ଲାଗିନ୍ତେ ଇନିଜାଃ ତାଃ ରେ ଜେତ୍ନାଃ ହ କା ତାଇକେନା, ଦୋ ଇନିଜାଃ ଗୋମ୍‍କେ କାଜିକେଦାଏ, ନିଈକେ ଆଡୋଃ ଇନିଜାଃ କୁଡ଼ି ହାର୍ ହୋନ୍‍ଗାଣା ହାର୍ ଅକନାଃ ହଗି ଇନିଃ ତାଃରେ ମେନାଃ ସବେନାଃ ଆଖ୍ରିଙ୍ଗ୍ ଅଃକା। ଆଡୋଃ ଏନ୍ ରିଣୀ ହାଲୋଃକା।” ନେୟା ରେ ଏନ୍ ଦାସୀ ଇକ୍ଡ଼ୁମ୍ କେତେ ଜୋହାର୍ କିଜାଏ, ହାର୍ କାଜିକେଦାଏ, “ହେ ଗୋମ୍‍କେ, ଧିରାଜ୍ ସାବେମେ, ଇଙ୍ଗ୍ ସବେନାଃ ହାଲ୍‍ରୁଆଡ଼୍ ତାଃଇଙ୍ଗ୍।” ଏନ୍ତେ ଏନ୍ ଦାସୀ ରାଃ ଗୋମ୍‍କେ ଦାୟା କେତେ ଇନିଃକେ ବାଗେ ତାଜାଏ, ହାର୍ ଇନିଜାଃ ରିଣୀ ହଗି ଛାମା ତାଜାଏ। “ମେନ୍ଦୋ ଚିମ୍ତାଙ୍ଗ୍ ଏନ୍ ଦାସୀ ବାହାରି ଅଡୋଙ୍ଗ୍ ଜାନାଏ, ଦୋ ଇନିଜାଃ ଗାତି ଦାସୀ କୋଏତେ ମିହୋଡ଼୍ ଇନିଃକେ ନାମ୍‍ଜାନାଏ ଅକନିଃ ଇନିଜାଃ ଶାଅ ଦିନ୍ ରାଃ ନାଲା ଟାକା ଇମିନ୍ ରିଣୀ ଇଦି ଲେଦାଏ, ଇନିଃ ଇନିଃକେ ସାବ୍ କେତେ ହୋଟୋଃ ଲିମ୍ବୁଃ କେତେ କାଜିକିଜାଏ, ‘ଅକନାଃ ଆମ୍ ଇଙ୍ଗ୍ଆଃ ତେ ରିଣୀ ଇଦିକାଦାମ୍ ଏନା ହାଲ୍ ତାମ୍।’ ନେୟା ରେ ଇନିଜାଃ ଗାତି ଦାସୀ ଇକ୍ଡ଼ୁମ୍ କେତେ ଆର୍ଜି କିଜାଏ, ‘ଧିରାଜ୍ ସାବେମେ’ ଇଙ୍ଗ୍ ସବେନାଃ ହାଲ୍ ତାଃଇଙ୍ଗ୍। ମେନ୍ଦୋ ଇନିଃ କାଏ ମାନାତିଙ୍ଗ୍ ଜାନାଏ, ହାର୍ ସେନ୍ କେତେ ଇନିଃକେ ଜେଲ୍ଅଡ଼୍ଆଃ ରେ ଆଦେର୍ ତାଇଯାଏ; ଚିମିନ୍ ସାନ୍ତେ ରିଣୀ ଆଉରି ହାଲେୟାଏ ଏନ୍ତାଃରେ ତାଇନୋଃ ୱାଏ। ଇନିଜାଃ ଗାତି ଦାସୀ ନେୟା ଅକନାଃ ହୋବାଜାନା ନେଲ୍‍କେତେ ଥିମ୍ବାଗି ଦୁକୁ ଜାନାଏ, ହାର୍ ସେନ୍‍କେତେ ଆଜାଃ ଗୋମ୍‍କେ କେ ସବେନ୍ କାଜିକୋକେ ଉଦୁବ୍ କିଜାଏ। ଏନ୍ତେ ଇନିଜାଃ ଗୋମ୍‍କେ ଇନିଃକେ କେଡ଼ାକେତେ ଆଏଃ କେ କାଜିକିଜାଏ, ‘ହେ ବାଦ୍‍ମାସ୍ ଦାସୀ, ଆମ୍ ଜେ ଇଙ୍ଗ୍‍କେ ଆର୍ଜି କେଦିଙ୍ଗାମ୍, ଦୋ ଇଙ୍ଗ୍ ଆମାଃ ଏନ୍ ସବେନ୍ ରିଣୀ କେ ଛାମା ତାଦାଇଙ୍ଗ୍। ଏନାଲାଗିନ୍ତେ ଚିଲ୍‍କା ଇଙ୍ଗ୍ ଆମ୍‍କେ ଦାୟା କେଃ ମେୟାଇଙ୍ଗ୍ ହାର୍ ରିଣୀ କେ ଛାମା ତାଦାଇଙ୍ଗ୍, ଏନ୍‍ଲେକାଗି ଚିନାଃ ଆମ୍‍କେ ହଗି ଆମାଃ ଗାତି ଦାସୀ ଚେତାନ୍ ରେ ଦାୟା ରିକା ହାର୍ ରିଣୀ କେ ଛାମା କା ତାଇକେନା?’ ଏନ୍ତେ ଇନିଜାଃ ଗୋମ୍‍କେ ଖିସ୍ ଜାନାଏ ହାର୍ ଇନିଃକେ ଶାଜା ଏମ୍ ତାନ୍ କୋୱାଃ ତିଈ ରେ ଜିମା ତାଜାଏ, ଚି ଚିମିନ୍ ସାନ୍ତେ ଇନିଃ ସବେନ୍ ରିଣୀ ଆଉରି ହାଲେୟାଏ, ଏନ୍ ସାନ୍ତେ ଇନ୍‍କୁୱାଃ ତିଈ ରେ ତାଇନୋଃ ୱାଏ।” “ନେଲେକାଗି ଆଗାର୍ ଆପେ କୋଏତେ ଜାହାଁଏ ଆପେୟାଃ ହାଗା କେ ମୋନ୍ ଏତେ କାଏ ଛାମାଇୟା, ଦୋ ଇଙ୍ଗ୍ଆଃ ଆପୁ ଅକନିଃ ସିର୍ମାଦିଶୁମ୍ ରେ ମେନିଜା, ଆପେ କେ ହଗି ଏନ୍‍ଲେକା ରିକାପେୟାଏ।” ଚିମ୍ତା ୟୀଶୁ ନେ କାଜିକୋ ଛାବା କେଦାଏ, ଦୋ ଗାଲିଲୀ ଜିଲ୍ଲା ବାଗେ କେତେ ସେନୋଃ ଜାନାଏ: ଆଡୋଃ ଯାର୍ଦାନ୍ ନାଈ ରାଃ ଫାରୋମ୍ ୟାହୁଦୀୟା ଜିଲ୍ଲା ରେ ହିଜୁଃଲେନାଏ। ଇମ୍ତା ମିଃଥିମ୍ବା ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ, ଆଡୋଃ ଏନ୍ତାଃ ଇନିଃ ଇନ୍‍କୁ ଏତେ ବିମାରୀ କୋକେ ବେଶ୍ କେଃକୋୱାଏ। ଏନ୍ତେ ଫାରିସୀ ହୋଡ଼ୋକୋ ଇନିଃକେ ପାରୀକ୍ଷା ଲାଗିନ୍ତେ ନାଡ଼େଏ ହିଜୁଃ କେତେ କାଜିକେଦାକୋ, “ଚିନାଃ ମିୟାଃ ହୋଡ଼ ଆପାନାଃ କୁଡ଼ି କେ ଜାହାନ୍ ଗି କାରାନ୍ ଲେକାତେ ବାଗେ ଠାଉକା ତାନାଃ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଚିନାଃ ଆପେ କାପେ ପାଢ଼ାଅକାନା ଚି ଅକନିଃ ଇନ୍‍କୁକେ ବାଇକାଃକୋୱାଏ, ଇନିଃ ମୁନୁ ଏତେ ନାର୍ ହାର୍ ନାରୀ ବାଇକେତେ କାଜିକାଦାଏ, ଏନାମେନ୍ତେ ହୋଡ଼ ଆଜାଃ ଏଙ୍ଗାଆପୁ ଏତେ ଆଲାଗ୍ କେତେ ଆଜାଃ କୁଡ଼ି ଲୋଃ ତାଇନାଏ ଆଡୋଃ ଇନ୍‍କିନ୍ ବାରାନ୍‍କିନ୍ ମିୟାଃ ହୋଡ଼ମୋ କିନ୍ ହୋବାୱା। ଏନାତେ ଇନ୍‍କିନ୍ ନାଆ ବାର୍ହୋଡ଼୍ କାହା, ମେନ୍ଦୋ ମିୟାଃ ହୋଡ଼ମୋ ତାନ୍‍କିନ୍। ଏନାମେନ୍ତେ ଅକନ୍ କିନ୍‍କେ ପାର୍ମେଶ୍ଵାର୍ ଜୁଡ଼ି କାଃ କିନାଏ, ଏନାକେ ହୋଡ଼ ଆଲାଗ୍ ଆଲୋ ରିକାକାଏ।” ଇନ୍‍କୁ ଇନିଃକେ କୁଲିକିଜାକୋ, “ଏଣ୍ଡେ ମୁଶା ନାବୀ ନେୟା ଚିନାଃ ମେନ୍ତେ ଆନାଚୁ ଏମ୍‍କାଦାଏ ଚି ବାଗେ-ଚିଠି ଏମ୍ କେତେ ଇନିଃକେ ବାଗେ ତାଇପେ?” ୟୀଶୁ ଇନ୍‍କୁକେ କାଜିୟାଃକୋୱାଏ, “ମୁଶା ନାବୀ ଆପେୟାଃ ପାର୍ମେଶ୍ଵାର୍ କେ କାମାନାତିଙ୍ଗ୍ ରାଃ ହୋରାତେ ଆପେକେ ଆପାନାଃ କୁଡ଼ି କେ ବାଗି ଲାଗିନ୍ତେ ଆନାଚୁ ଏମ୍‍କାଦାଏ, ମେନ୍ଦୋ ଏନେଟେଃ ରେ ନେଲେକା କା ତାଇକେନା। ହାର୍ ଇଙ୍ଗ୍ ଆପେ କେ କାଜିତାନିଙ୍ଗ୍, ଚି ଜାହାଁଏ ହ ବ୍ୟାଭିଚାର୍ କେ ବାଗେ କେତେ ଆଡୋଃ ଏଟାଃ କାରାନ୍ ତେ ଆଜାଃ କୁଡ଼ି କେ ବାଗେ କେତେ ଏଟାଃ ନିଈ ଲୋଃ ଆଣାଦୀ ତାନାଏ, ଇନିଃ ବ୍ୟାଭିଚାର୍ ତାନାଏ। ଆଡୋଃ ଅକଏ ବାଗେକାନ୍ ଛାଡ୍ରି କୁଡ଼ି କେ ଆଣାଦୀ ତାନାଏ ହିନିଃ ହଗି ବ୍ୟାଭିଚାର୍ ତାନାଏ।” ଚେଲାକୋ ଇନିଃକେ କାଜିକିଜାକୋ, “ଆଗାର୍ କଡ଼ା ରାଃ କୁଡ଼ି ଲୋଃ ଏନ୍‍କା ସାମ୍ବାଦ୍ଧ୍ ମେନାଃ, ଦୋ ଆଣାଦୀ ଏନ୍ ତେୟାଃ ବେଶ୍ ନାହାଲା।” ମେନ୍ଦୋ ୟୀଶୁ ଇନ୍‍କୁକେ କାଜିୟାଃକୋୱାଏ, ସବେନ୍ କୋ ନେ କାଜି କାକୋ ଗ୍ରାହାନ୍ ଧାଡ଼ିୟା, ଖାଲି ଇନ୍‍କୁ ଅକନ୍ କୋକେ ନେ ଦାନ୍ ଏମାକାନା। ଚିୟାଃଚି ଚିମିନାଙ୍ଗ୍ ଚାକୁରାକୋ ଏନ୍‍ଲେକା ମେନାକୋୱା ଅକନ୍‍କୋ ଏଙ୍ଗା ରାଃ ଲାହେଃ ଏତେ ଗି ଏନ୍‍ଲେକା ଜାନାମ୍ କାନାକୋ, ହାର୍ ଚିମିନାଙ୍ଗ୍ ଚାକୁରାକୋ ନେଲେକା ମେନାକୋୱା, ଅକନ୍ କୋକେ ହୋଡ଼ୋକୋ ଚାକୁରା ବାଇକେଦାକୋ, ହାର୍ ଚିମିନାଙ୍ଗ୍ ଚାକୁରାକୋ ନେଲେକା ମେନାକୋୱା, ଅକନ୍‍କୋ ସିର୍ମାଦିଶୁମ୍ ରାଃ ରାଇଜ୍ ଲାଗିନ୍ତେ ଆପାନ୍ କେ ଚାକୁରା ବାଇକେଦାକୋ। ଅକଏ ନେୟା କୋକେ ବୁଝାଅଃ ଧାଡ଼ିତାନାକୋ ଇନ୍‍କୁ ବୁଝାଅଃ କାକୋ। ଏନ୍ତେ ହୋଡ଼ୋକୋ ହୋନ୍‍କୋକେ ୟୀଶୁ ରାଃ ନାଡ଼େଏ ଆଉ କେଃକୋୱାକୋ ଚି ଇନିଃ ଇନ୍‍କୁୱାଃ ଚେତାନ୍ ରେ ତିଈ ମାଣ୍ଡାଅୟାଏ ହାର୍ ବିନ୍ତି ୟାଏ: ମେନ୍ଦୋ ଚେଲାକୋ ଇନ୍‍କୁକେ ଏଗେର୍ କେଃକୋୱାକୋ। ମେନ୍ଦୋ ୟୀଶୁ କାଜିକେଦାଏ, “ହୋନ୍‍କୋକେ ଇଙ୍ଗ୍ଆଃ ତାଃ ହିଜୁଃ ରିକାକୋପେ, ହାର୍ ଇନ୍‍କୁକେ ଆଲୋପେ ମାନା କୋୱା, ଚିୟାଃଚି ସିର୍ମାଦିଶୁମ୍ ରାଃ ରାଇଜ୍ ଏନ୍ ହୋନ୍ କୋ ଲେକାନ୍ ହୋଡ଼ୋକୋ ଲାଗିନ୍ ତାନାଃ, ଅକଏ ବିଶ୍ଵାସ୍ ଲେକାନିଃ ହାର୍ ନାରାମ୍ ତାଇନାକୋ।” ଏନ୍ତେ ୟୀଶୁ ହୋନ୍‍କୋ ଚେତାନ୍ ରେ ତିଈ ମାଣ୍ତାଅ କେତେ ପାର୍ମେଶ୍ଵାର୍ ଏତେ ଆଶିଷ୍ ଆସିକେଦାଏ ହାର୍ ଏନ୍ତାଃ ଏତେ ସେନୋଃ ଜାନାଏ। ଆଡୋଃ ନେଲେପେ, ମିୟାଃ ହୋଡ଼ ନାଡ଼େଏ ହିଜୁଃକେତେ ଇନିଃକେ କାଜିକେଦାଏ, “ହେ ଗୁରୁ, ଇଙ୍ଗ୍ ଅକନ୍ ବୁଗିନ୍ କାମି କାମିୟାଇଙ୍ଗ୍, ଏଣ୍ଡେ ଜାନାଓ ଜୀଦାନ୍ ନାମେୟାଇଙ୍ଗ୍?” ୟୀଶୁ ଇନିଃକେ କାଜିକେଦାଏ, “ଆମ୍ ଇଙ୍ଗ୍‍କେ ବୁଗିନ୍ ରାଃ ବିଷାୟ୍ ରେ ଚିନାଃ ମେନ୍ତେ କୁଲି ତାନାମ୍? ବୁଗିନ୍ ଦୋ ମିୟାଃ ଗିୟାଏ, ଆମ୍ ଜୀଦାନ୍ ରେ ବୋଲୋମ୍ ସାନାଙ୍ଗ୍ ତାନ୍ ରେଦୋ ଆନାଚୁ କୋକେ ମାନାତିଙ୍ଗ୍ ମେ।” ଇନିଃ ଇନିଃକେ କାଜିକେଦାଏ, “ଅକନ୍ ଆନାଚୁ?” ୟୀଶୁ କାଜିକେଦାଏ, “ନେୟା ଚି ହୋଡ଼ ଆଲୋମ୍ ଗୋଏଃ କୋୱା, ବ୍ୟାଭିଚାର୍ ଆଲୋମ୍ ରିକାୟା, ଆଲୋମ୍ ଚୋର୍ହାୟା, ହିହିଡ଼୍ ଗୋୱା ଆଲୋମ୍ ଏମେୟା, ଆମାଃ ଆପୁ ହାର୍ ଆମାଃ ଏଙ୍ଗା କିନ୍‍କେ ମାଇନ୍ କୋମେ ହାର୍ ଆପାନାଃ ନାଡ଼େଏ ଜାପାଃ ରେନ୍ କୋଲୋଃ ଆପାନାଃ ଲେକା ଦୁଲାଡ଼୍ ମାଣ୍ଡାଏମ୍।” ଏନ୍ ଧାଙ୍ଗ୍ଡ଼ା ଇନିଃକେ କାଜିକେଦାଏ, “ନେ ସବେନାଃ କୋଦୋ ଇଙ୍ଗ୍ ମାନାତିଙ୍ଗ୍ ହିଜୁଃ ତାନାଇଙ୍ଗ୍, ନାଆ ଇଙ୍ଗ୍ଆଃ ରେ ଚିକାନ୍ କାଜି ରାଃ ଘାଟି ମେନାଃ?” ୟୀଶୁ କାଜିକେଦାଏ, “ଆମ୍ ପୁରାଃଗି ଠିକ୍ ହୋବାଅଃ ସାନାଙ୍ଗ୍ ତାନାମ୍ ରେଦୋ ଜୁ ଆମାଃ ସାମ୍ପାତି ଆଖ୍ରିଙ୍ଗ୍ କେତେ ଗାରିବ୍ କୋକେ ଏମାକୋମ୍ ଆଡୋଃ ଏନାରେ ଆମ୍ ସିର୍ମାଦିଶୁମ୍ ରେ କିଶାଣ୍ ବାଇୟୋଗାମ୍ ହାର୍ ହିଜୁଃକେତେ ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ।” ମେନ୍ଦୋ ଏନ୍ ଧାଙ୍ଗ୍ଡ଼ା ନେ କାଜି ଆୟୁମ୍‍କେତେ ଦୁକୁ ହୋବାକେତେ ସେନୋଃ ଜାନାଏ, ଚିୟାଃଚି ଇନିଃ ପୁରାଃଗି କିଶାଣ୍ ତାଇକେନାଏ। ୟୀଶୁ ଆଜାଃ ଚେଲାକୋକେ କାଜିୟାଃକୋୱାଏ, “ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍, ଚି କିଶାଣ୍ ହୋଡ଼ ଲାଗିନ୍ ସିର୍ମାଦିଶୁମ୍ ରାଃ ରାଇଜ୍ ରେ ବୋଲୋ ତେୟାଃ କେଟେଃ ମେନାଃ। ଆଡୋଃଗି ଆପେକେ କାଜିତାନିଙ୍ଗ୍ ଚି ପାର୍ମେଶ୍ଵାର୍ ରାଃ ରାଇଜ୍ ରେ କିଶାଣ୍ ହୋଡ଼ ଲାଗିନ୍ ବୋଲୋ ତେୟାଃ ଏତେ ସୁଇ ରାଃ ଉଣ୍ଡୁଃ ରେ ଉଁଟ୍ ରାଃ ବୋଲୋ ଫାରୋମ୍ ତେୟାଃ ସାହାଜ୍ ତାନାଃ।” ନେୟା ଆୟୁମ୍‍କେତେ ଚେଲାକୋ ଥିମ୍ବାଗି ଆକ୍‍ଦାନ୍ଦା ହୋବାକେତେ କାଜିକେଦାକୋ, “ଏଣ୍ଡେ ପାର୍ମେଶ୍ଵାର୍ ରାଃ ରାଇଜ୍ ରେ ଜାନାଓ ଜୀଦାନ୍ ନାମେ ଲାଗିନ୍ ଅକଏ ବାଞ୍ଚାଅଃ ୱାଏ?” ୟୀଶୁ ଇନ୍‍କୁୱାଃ ପାଡ଼୍ ନେଲ୍‍କେତେ କାଜିକେଦାଏ, “ହୋଡ଼ୋକୋ ଏତେ ଦୋ ନେୟା କା ହୋବା ଧାଡ଼ିୟୋଗା, ମେନ୍ଦୋ ପାର୍ମେଶ୍ଵାର୍ ଏତେ ସବେନାଃ ହୋବା ଧାଡ଼ିୟୋଗା।” ନେୟା ରେ ପାତ୍ରାସ୍ ଇନିଃକେ କାଜିକେଦାଏ, “ନେଲେମ୍, ଆଲେ ଦୋ ସବେନାଃ ବାଗେ କେତେ ଆମ୍‍କେ ଅତୋଙ୍ଗ୍ କାଃ ମେୟାଲେ ଏଣ୍ଡେ ଆଲେକେ ଚିନାଃ ନାମୋଗା?” ୟୀଶୁ ଇନ୍‍କୁକେ କାଜିୟାଃକୋୱାଏ, “ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଚି ନାୱା ସିର୍ଜାଅ ହୋବା ଇମ୍ତାରେ ଚିମ୍ତା ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ମାନାରାଙ୍ଗ୍ ରାଃ ସିଂହାସାନ୍ ରେ ଦୁବାଇଙ୍ଗ୍, ଇମ୍ତା ଆପେ ହଗି ଅକନ୍ କୋ ଇଙ୍ଗ୍‍କେ ଅତୋଙ୍ଗ୍ କାଦିଙ୍ଗାପେ, ବାରା ସିଂହାସାନ୍ ଚେତାନ୍ ରେ ଦୁବ୍ କେତେ ଇସ୍ରାଏଲ୍ ଦିଶୁମ୍ ରେନ୍ ଘାରାନା କୋୱାଃ ବାରା କିଲି କୋକେ ବିଚାର୍ କୋୱାପେ। ହାର୍ ଜେତାଏ ଆଜାଃ ଅଡ଼୍ଆଃ କୋକେ, ୟାଦୋ ହାଗାକୋକେ, ୟାଦୋ ମିଶିକୋକେ, ୟାଦୋ ଆପୁ, ୟାଦୋ ଏଙ୍ଗା, ୟାଦୋ ହୋନ୍-ଗାଣାକୋକେ, ୟାଦୋ ଅତେ-ପୀଡ଼ିକୋକେ ଇଙ୍ଗ୍ଆଃ ନୁତୁମ୍ ଲାଗିନ୍ତେ ବାଗେ କାଦାଏ, ଇନିଃକେ ଶାଅ ଗୁନା ନାମୋଗା ଆଡୋଃ ଇନିଃ ଜାନାଓ ଜୀଦାନ୍ ନାମେୟାଏ। ମେନ୍ଦୋ ସିଦାରେ ମାରାଙ୍ଗେନ୍ ହୋଡ଼ୋକୋ, ହୁଡିଙ୍ଗ୍ ଅଗାକୋ; ହାର୍ ହୁଡିଙ୍ଗେନ୍ ହୋଡ଼ୋକୋ ତାୟୋମ୍ତେ ମାରାଙ୍ଗ୍ ଅଗାକୋ।” “ସିର୍ମାଦିଶୁମ୍ ରାଃ ରାଇଜ୍ ନେଲେକା ଜୋନୋକା ତାନାଃ, ମିୟାଃ ଅତେ ରେନ୍ ଗୋମ୍‍କେ ଅକନିଃ ସେତାଃ ନାଲାକାମି ହୋଡ଼ୋକୋକେ ସାଙ୍ଗାର୍ ଲାଗିନ୍ ନାଲା ପିଟ୍ ପାଡ଼୍ ଅଡୋଙ୍ଗ୍ ଜାନାଏ ଚି ଆଜାଃ ଆଙ୍ଗୁର୍ ବାଖ୍‍ଡ଼ି ରେ ନାଲା କାମି ହୋଡ଼ୋକୋକେ ଆଚୁକୋୱାଏ। ଏନ୍ତେ ଇନିଃ ନାଲାକାମି ହୋଡ଼ୋକୋକେ ମିୟାଃ ଦିନାର୍ ସିଂଙ୍ଗ୍‍ସାଟୁବ୍ ରେ ନାମେ ୟାପେ ମେନ୍ତେ ବାକାଣ୍ ବାଇକେଦାଏ ହାର୍ ଇନ୍‍କୁକେ ଆଜାଃ ଆଙ୍ଗୁର୍ ବାଖ୍‍ଡ଼ି ରେ କୁଲ୍ କେଃକୋୱାଏ। ଏନ୍ ହୁଲାଙ୍ଗ୍ ଗି, ସେତାଃ ବେଲା ନାଅ ଷାଡି ସାମାୟ୍ ରେ ଇନିଃ ଆଡୋଃଗି ନାଲା ପିଟ୍ ପାଡ଼୍ ଅଡୋଙ୍ଗ୍ କେତେ ଏଟାଃ ନାଲାକାମି ହୋଡ଼ୋକୋକେ ଏନ୍ତାଃ ସାମାଗୀ ତିଙ୍ଗୁକାନ୍ ନେଲ୍ କେଃକୋୱାଏ। ହାର୍ ଇନ୍‍କୁକେ କାଜିୟାଃକୋୱାଏ, ‘ଆପେ ହଗି ଆଙ୍ଗୁର୍ ବାଖ୍‍ଡ଼ି ରେ ସେନ୍‍ପେ, ହାର୍ ଅକନାଃ ବୁଗିନାଃ ହୋବାୱା, ଆପେକେ ଏମାପେୟାଇଙ୍ଗ୍।’ ଏନ୍ତେ ଇନ୍‍କୁ ହଗି କାମି ଲାଗିନ୍ ସେନ୍ ଜାନାକୋ। ଆଡୋଃଗି ଇନିଃ ତିକିନ୍ ବାରା ବାଜେ ହାର୍ ଉଲ୍‍ଟି ବେଲା ତିନ୍ ବାଜେ ନାଲା ପିଟ୍ ପାଡ଼୍ ଅଡୋଙ୍ଗ୍ କେତେ ଏନ୍ ଲେକାଗି ନାଲାକାମି ହୋଡ଼ୋକୋକେ ଆଚୁ କେଃକୋୱାଏ। ଆଡୋଃଗି ଶିଙ୍ଗି ଡୁବିଃ ସାମାୟ୍ ପାଞ୍ଚ୍ ବାଜେ, ଇନିଃ ଆଡୋଃ ଅଡୋଙ୍ଗ୍ କେତେ ଏଟାଃ ନାଲାକାମି ହୋଡ଼ୋକୋକେ ତିଙ୍ଗୁକାନ୍ ନାମ୍ କେଃକୋୱାଏ, ହାର୍ ଇନ୍‍କୁକେ କାଜିକେଃକୋୱାଏ, ‘ଆପେ ଚିନାଃ ଲାଗିନ୍ତେ ନେତାଃ ସାମାଗୀ ତିଙ୍ଗୁ କାନାପେ?’ ଇନ୍‍କୁ ଇନିଃକେ କାଜିକିଜାକୋ, ‘ଚିୟାଃଚି ଆଲେକେ ଜେତାଏ ନାଲାକାମି ରେ କାକୋ ଆଚୁ କେଃଲେୟା।’ ଇନିଃ ଇନ୍‍କୁକେ କାଜିୟାଃକୋୱାଏ, ‘ଆପେ ହଗି ଆଙ୍ଗୁର୍ ବାଖ୍‍ଡ଼ି ରେ କାମି ଲାଗିନ୍ ସେନ୍‍ପେ।’ ” “ଶିଙ୍ଗି ଡୁବିଃ ଇମ୍ତାଙ୍ଗ୍ ଆଙ୍ଗୁର୍ ବାଖ୍‍ଡ଼ି ରେନ୍ ଗୋମ୍‍କେ ଆଜାଃ ମୁନ୍‍ସି କେ କାଜିକେଦାଏ, ‘ନାଲାକାମି ହୋଡ଼ୋକୋକେ କେଡ଼ାକେତେ ତାୟୋମ୍ ରେନ୍ କୋଏତେ ଇଦିକେତେ ପାହିଲା ସାନ୍ତେ ଇନ୍‍କୁକେ ମାଜାଉରୀ ଏମାକୋମ୍।’ ଚିମ୍ତାଙ୍ଗ୍ ଇନ୍‍କୁ ହିଜୁଃ ଲେନାକୋ ଅକନ୍‍କୋ ପାଞ୍ଚ୍ ବାଜେ ନାଲାକାମି ଏଟେଃ ଲେଦାକୋ, ଦୋ ଇନ୍‍କୁ ସବେନ୍‍କୋ ମିୟାଃ-ମିୟାଃ ଦିନାର୍ ସିଂଙ୍ଗ୍‍ସାଟୁବ୍ ରାଃ ମାଜାଉରୀ ହିସାବ୍ ରେ ନାମ୍ କେଦାକୋ। ଚିମ୍ତାଙ୍ଗ୍ ଅକନ୍ କୋ ସେତାଃ ବେଲା ସିଦା ରେ କାମି ନାଲା ଏଟେଃ ଲେଦାକୋ ହିଜୁଃ ଲେନାକୋ ଇନ୍‍କୁ ନେୟା ପାହୋମ୍ କେଦାକୋ ଚି ‘ଆବୁକେ ଥିମ୍ବା ନାମୋଗା’ ମେନ୍ଦୋ ଇନ୍‍କୁକେ ହଗି ମିୟାଃ-ମିୟାଃ ଦିନାର୍ ନାମ୍ କେଦାକୋ। ଚିମ୍ତାଙ୍ଗ୍ ଇନ୍‍କୁ ମାଜାଉରୀ ନାମ୍ କେଦାକୋ ଦୋ ଇନ୍‍କୁ ଅତେ ରେନ୍ ଗୋମ୍‍କେ ବିରୋଧ୍ ରେ କାଜି ଏଟେଃ କେଦାକୋ, ‘ନେ ତାୟୋମ୍ ରେନ୍‍କୋ ମିୟାଃ ଘାଣ୍ଟା ଗି କୋ କାମି କେଦାକୋ, ହାର୍ ଆମ୍ ଇନ୍‍କୁକେ ଆଲେୟାଃ ଇମିନ୍ ଗି ମାଜାଉରୀ ଏମାଃକୋୱାମ୍, ମେନ୍ଦୋ ଆଲେ ସିଂଙ୍ଗ୍‍ସାଟୁବ୍ ଲାଗାଅଃ ସାନ୍ତେ କାମି କେଦାଲେ ହାର୍ ଶିତୁମ୍ ସାହାତିଙ୍ଗ୍ କେଦାଲେ?’ ଇନିଃ ଇନ୍‍କୁଏତେ ମିହୋଡ଼୍ କେ କାଜିରୁଆଡ଼୍ କିଜାଏ, ‘ହେ ହାଗା, ଇଙ୍ଗ୍ ଆମ୍ ଲୋଃ ଜେତ୍ନାଃ ଆନ୍ୟାୟ୍ କାଇଙ୍ଗ୍ ରିକା ତାନା। ଚିନାଃ ଆମ୍ ଗି ଇଙ୍ଗ୍ଆଃ ଲୋଃ ସିଂଙ୍ଗ୍‍ସାଟୁବ୍ କାମି ରାଃ ମିୟାଃ ଦିନାର୍ ଇଦିୟାଇଙ୍ଗ୍ ମେନ୍ତେ କାମ୍ କାଜି ଲେଦା? ଅକନାଃ ଆମାଃ ମାଜାଉରୀ ତାନାଃ, ଏନାକେ ଇଦିକେମ୍ ହାର୍ ସେନୋଃମେ; ଇଙ୍ଗ୍ଆଃ ସାନାଙ୍ଗ୍ ନେୟା ତାନାଃ ଚି ଚିମିନାଙ୍ଗ୍ ଆମ୍‍କେ ଏମାମେୟାଇଙ୍ଗ୍, ଇମିନାଙ୍ଗ୍ ଗି ନେ ତାୟୋମ୍ ରେନ୍ କେ ହଗି ଏମେୟାଇଙ୍ଗ୍। ଚିନାଃ ନେୟା ଠାଉକା ନାହାଲା ଚି ଇଙ୍ଗ୍ ଇଙ୍ଗ୍ଆଃ ଟାକା କୋଏତେ ଅକନାଃ ଇଙ୍ଗ୍ ସାନାଙ୍ଗ୍‍ୟାଇଙ୍ଗ୍ ଏନା ରିକାୟାଇଙ୍ଗ୍? ଆମ୍‍କେ କା ହିଶିଙ୍ଗାଅଃ ଚାହି ଚିୟାଃଚି ଇଙ୍ଗ୍ ଏଟାଃ କୋ ଲାଗିନ୍ ହଗି ଦାନୀ ତାନିଙ୍ଗ୍।’ ନେଲେକାଗି ହୁଡିଙ୍ଗେନ୍ ହୋଡ଼ୋକୋ ସିଦାରେ ମାରାଙ୍ଗ୍ ଅଗାକୋ, ହାର୍ ମାରାଙ୍ଗେନ୍ ହୋଡ଼ୋକୋ ତାୟୋମ୍ତେ ହୁଡିଙ୍ଗ୍ ଅଗାକୋ।” ୟୀଶୁ ୟୀରୁଶାଲେମ୍ ତେ ସେନୋଃ ତାନ୍ ଲୋଃ ବାରାଝାନ୍ ଚେଲାକୋକେ ସୁନ୍‍ସାନ୍ ଜାଗା ତେ ଇଦି କେଃକୋୱାଏ, ଆଡୋଃ ହୋରା ରେ ଇନ୍‍କୁକେ କାଜି ଏଟେଃ କେଦାଏ। “ନେଲେପେ, ଆବୁ ୟୀରୁଶାଲେମ୍ ତେବୁ ସେନୋଃ ତାନା, ହାର୍ ଇଙ୍ଗ୍ ମାନ୍‍ୱା ରାଃ ହୋନ୍ ପ୍ରାଧାନ୍ ୟାଜାକ୍‍କୋୱାଃ ହାର୍ ଆଇନ୍ ଗୁରୁ କୋୱାଃ ତିଈ ରେ ସାବୋଗାଇଙ୍ଗ୍, ହାର୍ ଇନ୍‍କୁ ଇଙ୍ଗ୍‍କେ ଗୋଏଃ ଲାଗିନ୍ ଦୋଷ୍ ଏମିଙ୍ଗ୍‍ୟାକୋ। ହାର୍ ଇଙ୍ଗ୍‍କେ ଏଟାଃଜାତି କୋୱାଃ ତିଈ ରେ ଜିମାଇଙ୍ଗ୍‍ୟାକୋ, ଇନ୍‍କୁ ଇଙ୍ଗ୍‍କେ ଲାନ୍ଦାୟିଙ୍ଗ୍‍ୟାକୋ ହାର୍ କୋଡ୍ରା ରେ ବିଡ଼ାଇଙ୍ଗ୍‍ୟାକୋ, କ୍ରୁଶ୍ ରେ ରାକାବିଙ୍ଗ୍‍ୟାକୋ ହାର୍ ଇଙ୍ଗ୍ ଆପି ହୁଲାଙ୍ଗ୍ ରେ ଜୀହିଃ କେନୋଗାଇଙ୍ଗ୍।” ଏନ୍ତେ ଯାବ୍ଦୀ ରାଃ ହୋନ୍ କୋୱାଃ ଏଙ୍ଗା, ଆଜାଃ ହୋନ୍‍କୋଡ଼ା କୋଲୋଃ ୟୀଶୁ ରାଃ ନାଡ଼େଏ ହିଜୁଃକେତେ ଜୋହାର୍ କିଜାକିନ୍, ହାର୍ ଇନିଃକେ ହୁଡିଙ୍ଗ୍ ଦାୟା ଆସିକେଦାକିନ୍। ୟୀଶୁ ଆକିନ୍‍କେ କାଜିକେଦାଏ, “ଆମ୍ ଚିନାଃ ସାନାଙ୍ଗ୍ ତାନାମ୍?” ଆକିନ୍ କାଜି କେଦାକିନ୍, “ନେ କାଜି ଏମାଇଙ୍ଗ୍ ମେ ଚି ଇଙ୍ଗ୍ଆଃ ନେ ବାରିୟା ହୋନ୍ କିନ୍ ଆମାଃ ରାଇଜ୍ ରେ ମିହୋଡ଼୍ ଆମାଃ ଜୋମ୍ ପାଡ଼୍ ହାର୍ ଏଟାଃନିଃ ଆମାଃ ଲେଙ୍ଗା ପାଡ଼୍ ଦୁବାକିନ୍।” ୟୀଶୁ ଆକିନ୍ କେ ହାର୍ ଆକିନାଃ ହୋନ୍‍କୋଡ଼ା କୋକେ କାଜିରୁଆଡ଼୍ କେଃକୋୱାଏ, “ଆପେ କାପେ ସାରିତାନା ଚି ଚିନାଃ ଆସିତାନାପେ, ଅକନ୍ ଦୁକୁ ଇଙ୍ଗ୍ ସାହାତିଙ୍ଗ୍ ଲାଗିନ୍ ସେନ୍ ତାନିଙ୍ଗ୍, ଚିନାଃ ଆପେ ସାହାତିଙ୍ଗ୍ ଧାଡ଼ିୟାପେ?” ଇନ୍‍କୁ ଇନିଃକେ କାଜିକେଦାକୋ, “ସାହାତିଙ୍ଗ୍ ଧାଡ଼ିୟାଲେ।” ୟୀଶୁ ଇନ୍‍କୁକେ କାଜିୟାଃକୋୱାଏ, “ଆପେ ଇଙ୍ଗ୍ଆଃ ଦୁକୁ ଦୋ ପେ ସାହାତିଙ୍ଗ୍ ୟା, ମେନ୍ଦୋ ଇଙ୍ଗ୍ଆଃ ଜୋମ୍ ପାଡ଼୍ ହାର୍ ଇଙ୍ଗ୍ଆଃ ଲେଙ୍ଗା ପାଡ଼୍ ଦୁଦୁବ୍ ଏହେମ୍ ଇଙ୍ଗ୍ଆଃ କାମି ନାହାଲା, ମେନ୍ଦୋ ଅକେୟାଃ ଲାଗିନ୍ତେ ଇଙ୍ଗ୍ଆଃ ଆପୁ ପାଡ଼େତେ ବାଇକାନା, ଇନ୍‍କୁ ଲାଗିନ୍ତେ ଏନା ତାନାଃ।” ନେୟା ଆୟୁମ୍‍କେତେ ଦାଶ୍‍ଝାନ୍ ଚେଲାକୋ ଏନ୍ ବାର୍ହୋଡ଼୍ ହାଗାକିନାଃ ରେ ଖିସ୍ ଜାନାକୋ। ୟୀଶୁ ଇନ୍‍କୁକେ ନାଡ଼େଏ କେଡ଼ାକେତେ କାଜିୟାଃକୋୱାଏ, “ଆପେ ସାରିତାନାପେ ଚି ଏଟାଃଜାତି କୋୱାଃ ହାକିମ୍ ଇନ୍‍କୁୱାଃ ରେ ରାଇଜ୍ ତାନାକୋ ଆଡୋଃ ଅକନ୍‍କୋ ମାରାଙ୍ଗ୍ ତାନ୍‍କୋ, ଇନ୍‍କୁ ହିନ୍‍କୁୱାଃ ରେ ଆଧିକାର୍ ମାଣ୍ଡାଅୟାକୋ। ମେନ୍ଦୋ ଆପେ ରେ ନେଲେକା କା ହୋବାଅଃୱା; ମେନ୍ଦୋ ଅକଏ ଆପେ ତେ ମାରାଙ୍ଗ୍ ହୋବାଅଃ ସାନାଙ୍ଗ୍ ୟାଏ ଇନିଃ ଆପେୟାଃ ଦାସୀ ଲେକା ହୁଡିଙ୍ଗ୍ ବାଇଏନ୍ କାଏ। ହାର୍ ଅକଏ ଆପେ ରେ ମାରାଙ୍ଗେନ୍ ସାନାଙ୍ଗ୍ ତାନାଏ, ଇନିଃ ଆପେୟାଃ ଦାସୀ ବାଇଏନ୍ କାଏ; ଜେଲେକା ଚି ଇଙ୍ଗ୍ ମାନ୍‍ୱା ରାଃ ହୋନ୍ ନେୟା ଲାଗିନ୍ କାଇଙ୍ଗ୍ ହିଜୁଃ କାନା, ଚି ଇଙ୍ଗ୍ଆଃ ସେୱା-ସୁସାରଅଃ କା, ମେନ୍ଦୋ ନେୟା ଲାଗିନ୍ତେ ହିଜୁଃ କାନାଇଙ୍ଗ୍, ଚି ଇଙ୍ଗ୍ ସେୱା-ସୁସାର୍ ରିକାୟାଇଙ୍ଗ୍, ହାର୍ ମିଃଥିମ୍ବା ହୋଡ଼ୋକୋକେ ଛୋଡ଼ାଓ କୋ ଲାଗିନ୍ ଇଙ୍ଗ୍ଆଃ ଜୀଉ ଏମେୟାଇଙ୍ଗ୍।” ଚିମ୍ତାଙ୍ଗ୍ ୟୀଶୁ ଆଡୋଃ ଆଜାଃ ଚେଲାକୋ ୟାରିହୋ ସାହାର୍ ଏତେ ଅଡୋଙ୍ଗ୍ ତାଇନାକୋ ଦୋ ମିଃଥିମ୍ବା ହୋଡ଼ୋକୋ ଇନିଃକେ ଦୋୟା-ଦୋୟା ଅତୋଙ୍ଗ୍ କିଜାକୋ। ହାର୍ ବାରିୟା ଆନ୍ଧାକିନ୍ ଅକନ୍‍କିନ୍ ସାଣ୍ଡାକ୍ ଗେନା ରେ ଦୁବ୍ ଲେନ୍ ତାଇକେନାକିନ୍, ନେୟା ଆୟୁମ୍‍କେତେ ଚି ୟୀଶୁ ସେନ୍ ତାନାଏ, କାଉରି କେତେ କାଜିକେଦାକିନ୍, “ହେ ପ୍ରାଭୁ, ଦାଉଦ୍ ରାଜା ରାଃ ସାନ୍ତାନ୍, ଆଲିଙ୍ଗ୍‍କେ ଦାୟା ଲିଙ୍ଗ୍‍ମେ।” ହୋଡ଼ୋକୋ ଇନ୍‍କିନ୍ କେ ଏଗେର୍ କେଦାକୋ, ଚି ହାପା କେତେ କିନ୍ ତାଇନ୍ କା, ମେନ୍ଦୋ ଇନ୍‍କିନ୍ ଆଡୋଃଗି କାଉରି କେତେ କିନ୍ କାଜିକେଦା, “ହେ ପ୍ରାଭୁ, ଦାଉଦ୍ ରାଜା ରାଃ ସାନ୍ତାନ୍ ଆଲିଙ୍ଗ୍‍କେ ଦାୟା ଲିଙ୍ଗ୍‍ମେ।” ଏନ୍ତେ ୟୀଶୁ ତିଙ୍ଗୁ କେତେ ଇନ୍‍କିନ୍ କେ କେଡ଼ା କେଃକିନାଏ ହାର୍ କାଜିୟାଃକିନାଏ, “ଆବେନ୍ ଚିନାଃ ବେନ୍ ସାନାଙ୍ଗ୍ ତାନା ଚି ଇଙ୍ଗ୍ ଆବେନାଃ ଲାଗିନ୍ତେ ରିକାୟାଇଙ୍ଗ୍?” ଇନ୍‍କିନ୍ ଇନିଃକେ କାଜିକେଦାକିନ୍, “ହେ ପ୍ରାଭୁ, ନେୟା ଚି ଆଲିଙ୍ଗ୍ଆଃ ମେଏଃ କେ ବେଶ୍ ତାମ୍ ଚି ନେନେଲ୍ ଧାଡ଼ିୟାଲିଙ୍ଗ୍।” ୟୀଶୁ ଦାୟା କେତେ ଇନ୍‍କିନାଃ ମେଏଃ ଜୁଟିଃ କେଦାଏ, ହାର୍ ଇନ୍‍କିନ୍ ଇମ୍ତାଗି ନେଲ୍ କେଦାକିନ୍ ହାର୍ ୟୀଶୁ କେ ଅତୋଙ୍ଗ୍ କିଜାକିନ୍। ଚିମ୍ତାଙ୍ଗ୍ ୟୀଶୁ ଆଡୋଃ ଆଜାଃ ଚେଲାକୋ ୟୀରୁଶାଲେମ୍ ସାହାର୍ ନାଡ଼େଏ ସେଟେର୍ ଜାନାକୋ ଆଡୋଃ ଜାଏତୁନ୍ ଦାରୁ ବୁରୁ ରେ ବେଥ୍‍ଫାଗେ ହାତୁ ନାଡ଼େଏ ହିଜୁଃ ଲେନାକୋ, ଦୋ ୟୀଶୁ ଆଜାଃ ବାରିୟା ଚେଲାକିନ୍‍କେ ନେୟା କାଜିକେତେ କୁଲ୍ କେଃକିନାଏ, “ଆପେ ନାଡ଼େଏ ରାଃ ହାତୁ ତେ ସେନ୍ ବେନ୍। ଏନ୍ତାଃ ସେଟେର୍ ଲୋଃ ଗି ମିୟାଃ ଗାଧିଆ ଥୋଲାକାନ୍ ଆଡୋଃ ଇନିଜାଃ ଲୋଃ ଗାଧିଆ ରାଃ ହୋନ୍ ମାନେ ବାଛା ଗାଧା ଆପେକେ ନାମୋଗାଏ। ଇନିଃକେ ରାଡ଼ାକେତେ ଇଙ୍ଗ୍ଆଃ ତାଃ ଆୱିବେନ୍। ଆଗାର୍ ଆବେନ୍ କେ ଜେତାଏ ଜାହାନାଃ କାଜି ରେଦୋ, କାଜିପେ ଚି ପ୍ରାଭୁ କେ ନିଜାଃ ଦାର୍‍କାର୍ ମେନାଃ। ଏଣ୍ଡେ ଇନିଃ ଇମ୍ତାଗି ଇନ୍‍କୁକେ କୁଲ୍ ତାକୋୱାଏ।” ନେୟା ଏନାଲାଗିନ୍ ହୋବାଜାନା ଚି ଅକନ୍ ବାଚାନ୍ ନାବୀ ରାଃ ହୋରାତେ ପାର୍ମେଶ୍ଵାର୍ କାଜିଲେଦାଏ ଏନା ପୁରାଅଃ କା; “ସିୟୋନ୍ ରାଃ ହୋନ୍‍କୁଡ଼ି କେ କାଜିୟାଇମେ, ‘ନେଲେମ୍, ଆମାଃ ରାଜା ଆମାଃ ତାଃ ହିଜୁଃ ତାନାଏ, ଇନିଃ ଲେବେଃ ମୋନ୍ ମେନାଇୟାଏ, ହାର୍ ଗାଧିଆ ରାଃ ହୋନ୍ ରେ ମାନେ ବାଛା ଗାଧା ଚେତାନ୍ ରେ ଦୁବ୍ କାନାଏ।’ ” ଏନ୍ତେ ଚେଲାକୋ ସେନ୍ କେତେ, ଜେଲେକା ୟୀଶୁ ଇନ୍‍କୁକେ କାଜିଲେଦାଏ, ଏନ୍‍କାଗି ରିକା କେଦାକୋ। ହାର୍ ଗାଧିଆ ହାର୍ ଗାଧିଆ ରାଃ ହୋନ୍ କେ ଆଉକେତେ ଇନ୍‍କୁୱାଃ ଚେତାନ୍ ରେ ଆକୋୱାଃ ଲିଜାଃ ବିଲ୍ କେଦାକୋ ହାର୍ ୟୀଶୁ ଲିଜାଃ ଚେତାନ୍ ଇନ୍‍କୁୱାଃ ରେ ଦୁବ୍ ଜାନାଏ। ଏନ୍ତେ ଥିମ୍ବାଗି ହୋଡ଼ୋକୋ ଆକୋୱାଃ ଲିଜାଃ ହୋରା ରେ ବିଲ୍ କେଦାକୋ, ହାର୍ ଏଟାଃ ହୋଡ଼ୋକୋ ଦାରୁ କୋଏତେ କୋତୋକୋ ମାଆ କେତେ ହୋରା ରେ ବିଲ୍ କେଦାକୋ। ଏନ୍ତେ ମିଃଥିମ୍ବା ହୋଡ଼ୋକୋ ଅକନ୍‍କୋ ଆୟୁର୍-ଆୟୁର୍ ସେନ୍ ତାଇନାକୋ ହାର୍ ଦୋୟା-ଦୋୟା ହିଜୁଃ ତାଇନାକୋ କାଉରି-କାଉରି କେତେ କାଜି ତାଇକେନାକୋ, “ଦାଉଦ୍ ରାଜା ରାଃ ସାନ୍ତାନ୍ କେ ହୋଶାନ୍ନା, ଧାନ୍ୟା ତାନିଃ ଇନିଃ ଅକନିଃ ପ୍ରାଭୁ ଆଃ ନୁତୁମ୍ ତେ ହିଜୁଃ ତାନାଏ, ସିର୍ମାଦିଶୁମ୍ ରେ ହୋଶାନ୍ନା” ଚିମ୍ତା ଇନିଃ ୟୀରୁଶାଲେମ୍ ସାହାର୍ ରେ ବୋଲୋ ଜାନାଏ, ଦୋ ପୁରା ସାହାର୍ ରେନ୍‍କୋ ଆକ୍‍ବାକାଅ ଜାନାକୋ ହାର୍ ହୋଡ଼ୋକୋ କାଜିକେଦାକୋ, “ନିଈ ଅକଏ ତାନିଃ?” ହୋଡ଼ୋକୋ କାଜିକେଦାକୋ, “ନିଈ ଗାଲିଲୀ ଜିଲ୍ଲା ରେନ୍ ନାଜ୍ରେଥ୍ ସାହାର୍ ରେନ୍ ନାବୀ ୟୀଶୁ ତାନିଃ।” ଏନ୍ତେ ୟୀଶୁ ପାର୍ମେଶ୍ଵାର୍ ରାଃ ମାନ୍ଦିର୍ ସେନ୍‍କେତେ ଏନ୍ ସବେନ୍ କୋକେ ଅକନ୍‍କୋ ମାନ୍ଦିର୍ ରେ କିରିଙ୍ଗ୍ ଆଖ୍ରିଙ୍ଗ୍ ତାଇକେନାକୋ, ଅଡୋଙ୍ଗ୍ କେଃକୋୱାଏ, ହାର୍ ଟାକା ଭାଞ୍ଜାଅ କୋୱାଃ ମାଣ୍ଡାଅ ତେୟାଃ ଆଡୋଃ ଦୁଦ୍‍ମୁଲ୍ ଆଖ୍ରିଙ୍ଗ୍ ତାନ୍ କୋୱାଃ ଚାଉକିକୋକେ ଉଲ୍‍ଟାଅ ତାଦାଏ। ହାର୍ ୟୀଶୁ ଇନ୍‍କୁକେ କାଜିକେଃକୋୱାଏ, “ଅଲାକାନା, ‘ଇଙ୍ଗ୍ଆଃ ଅଡ଼୍ଆଃ ବିନ୍ତି ରାଃ ଅଡ଼୍ଆଃ କାଜିୟୋଗା’ ମେନ୍ଦୋ ଆପେ ଏନାକେ ଡାକୁକୋୱାଃ ଅଡ଼୍ଆଃ ବାଇତାନାପେ।” ଏନ୍ତେ ଆନ୍ଧା ହାର୍ ଲାଙ୍ଗ୍ଡ଼ା, ମାନ୍ଦିର୍ ରେ ଇନିଜାଃ ନାଡ଼େଏ ହିଜୁଃ ଲେନାକୋ ହାର୍ ଇନିଃ ଇନ୍‍କୁକେ ବେଶ୍ କେଃକୋୱାଏ। ମେନ୍ଦୋ ଚିମ୍ତା ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ନେ ଆକ୍‍ଦାନ୍ଦା କାମିକୋ, ଅକନାଃ ଇନିଃ ରିକା କେଦାଏ ହାର୍ ହୋନ୍‍କୋକେ ମାନ୍ଦିର୍ ରେ ଦାଉଦ୍ ରାଜା ରାଃ ସାନ୍ତାନ୍ କେ ହୋଶାନ୍ନା କାଉରିତାନ୍ ନେଲ୍ କେଃକୋୱାକୋ ଦୋ ଇନ୍‍କୁ ଖିସ୍ ଜାନାକୋ। ଆଡୋଃ ଇନିଃକେ କାଜିକେଦାକୋ, “ଚିନାଃ ଆମ୍ ଆୟୁମ୍ ତାନାମ୍ ଚି ନିକୁ ଚିନାଃ କାଜିତାନାକୋ?” ୟୀଶୁ ଇନ୍‍କୁକେ କାଜିୟାଃକୋୱାଏ, ହାଁ, ଚିନାଃ ଆପେ ନେୟା ଚିଉଲାଅ କାପେ ପାଢ଼ାଅ କାନା, “ହୁଡିଙ୍ଗ୍ ହୋନ୍ କୋୱାଃ ଆଡୋଃ ତୱାନୁତାନ୍ କୋୱାଃ ମୋଚା ଏତେ ଆମ୍ ପୁରାଃ ମାନାରାଙ୍ଗ୍ ରିକାକେଦାମ୍?” ଏନ୍ତେ ୟୀଶୁ ଇନ୍‍କୁକେ ବାଗିକେତେ ସାହାର୍ ରାଃ ବାହାରି ବେଥାନି ନାଗାର୍ ସେନୋଃ ଜାନାଏ ହାର୍ ଏନ୍ତାଃ ଏନ୍ ନିଦା ତାଇନ୍ ଜାନାଏ। ସେତାଃ ପାଡ଼୍ ଚିମ୍ତା ଇନିଃ ସାହାର୍ ତେ ରୁଆଡ଼୍ ତାଇନାଏ ଦୋ ଇନିଃକେ ରେଙ୍ଗେଃ କିଜା। ସାଣ୍ଡାକ୍ ଗେନା ରେ ମିୟାଃ ଲୋୱା ଦାରୁ ନେଲ୍‍କେତେ ଇନିଃ ଏନାରାଃ ନାଡ଼େଏ ତେ ସେନ୍ ଜାନାଏ, ହାର୍ ସାକାମ୍ କୋକେ ବାଗେ କେତେ ଏନାରେ ଆଡୋଃ ଜେତ୍ନାଃ ହଗି କାଏ ନାମ୍ କେତେ ଏନାକେ କାଜିକେଦାଏ, “ନାଆ ଏତେ ଆମାଃ ରେ ଆଡୋଃ ଚିଉଲାଅ କା ଯଅଃ କା।” ହାର୍ ଲୋୱା ଦାରୁ ଇମ୍ତାଗି ରୋହଡ଼୍ ଜାନା। ନେୟା ନେଲ୍‍କେତେ ଚେଲାକୋ ଆକ୍‍ଦାନ୍ଦା ଜାନାକୋ ହାର୍ ଇନ୍‍କୁ କାଜିକେଦାକୋ, “ନେ ଲୋୱା ଦାରୁ ସେକାଡ଼୍ ଚିଲ୍‍କା ରୋହଡ଼୍ ଜାନା?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍, ଆଗାର୍ ଆପେ ବିଶ୍ଵାସ୍ ମାଣ୍ଡାଅୟାପେ ହାର୍ କାପେ ସାନ୍ଦେହ୍ ୟା, ଦୋ ନେୟା ଭାଇର୍ କାହା, ଅକନାଃ ନେ ଲୋୱା ଦାରୁ ଲୋଃ ରିକା କାନା; ମେନ୍ଦୋ ଆଗାର୍ ନେ ବୁରୁ କେ ହଗି କାଜିୟାପେ ଚି, ‘ପାଟୁବ୍ କେନୋଃମେ ହାର୍ ସାମୁଦାର୍ ରେ ସେନ୍ କେତେ ଉୟୁଗୋଃମେ’ ଦୋ ନେୟା ହୋବା କେନୋଗା। ଆଡୋଃ ଅକନାଃ ଆପେ ବିନ୍ତି ରେ ବିଶ୍ଵାସ୍ ତେ ପେ ଆସିୟା ଏନା ସବେନାଃ ଆପେକେ ନାମୋଗା।” ଚିମ୍ତାଙ୍ଗ୍ ୟୀଶୁ ମାନ୍ଦିର୍ ରାଃ ରାଚା ରେ ସେନ୍ କେତେ ଶିଖାଅ ତାଇନାଏ, ଦୋ ପ୍ରାଧାନ୍ ୟାଜାକ୍‍କୋ ହାର୍ ହୋଡ଼ୋ କୋୱାଃ ମାରିହୋଡ଼ୋକୋ ଇନିଜାଃ ନାଡ଼େଏ ହିଜୁଃକେତେ କୁଲିକିଜାକୋ, “ଆମ୍ ନେ କାମି ଅକେୟାଃ ଆଧିକାର୍ ତେ ରିକାତାନାମ୍? ହାର୍ ଆମ୍‍କେ ନେ ଆଧିକାର୍ ଅକଏ ଏମ୍ କାଦାଏ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ହଗି ଆପେକେ ମିୟାଃ କାଜି କୁଲିପେୟାଇଙ୍ଗ୍, ଆଗାର୍ ଆପେ ଏନା ଇଙ୍ଗ୍‍କେ ଉଦୁବାଇଙ୍ଗ୍ ୟାପେ, ଏଣ୍ଡେ ଇଙ୍ଗ୍ ହଗି ଆପେକେ ଉଦୁବ୍ ପେୟାଇଙ୍ଗ୍ ଚି ନେ କାମି ଅକେୟାଃ ଆଧିକାର୍ ତେ ରିକା ତାନିଙ୍ଗ୍। ଯୋହାନ୍ ରାଃ ବାପ୍ତିସ୍ମା କୋତାଃ ଏତେ ତାଇକେନା? ସିର୍ମାଦିଶୁମ୍ ପାଡ଼େତେ ଚି ହୋଡ଼ୋକୋୱାଃ ପାଡ଼େତେ?” ଏନ୍ତେ ଇନ୍‍କୁ ଆକୋ ଥାଲା ରେ କୁପୁଲି ଜାନାକୋ, “ଆଗାର୍ ଆବୁ କାଜିୟାବୁ ‘ସିର୍ମାଦିଶୁମ୍ ପାଡ଼େତେ’ ଦୋ ଇନିଃ ଆବୁକେ କାଜିୟାଏ, ଏଣ୍ଡେ ଆପେ ଇନିଜାଃ ଚିନାଃ ମେନ୍ତେ କାପେ ବିଶ୍ଵାସ୍ କେଦା? ହାର୍ ଆଗାର୍ କାଜିୟାବୁ ‘ହୋଡ଼ୋକୋୱାଃ ପାଡ଼େତେ’ ଦୋ ଆବୁକେ ମିଃଥିମ୍ବା ହୋଡ଼ୋକୋ ରାଃ ବୋରୋ ମେନାଃ, ଚିୟାଃଚି ଇନ୍‍କୁ ସବେନ୍‍କୋ ଯୋହାନ୍ କେ ନାବୀ ମେନ୍ତେ ମାନାତିଙ୍ଗ୍ ୟାକୋ।” ଏନ୍ତେ ଇନ୍‍କୁ ୟୀଶୁ କେ କାଜିରୁଆଡ଼୍ କିଜାକୋ, “ଆଲେ କାଲେ ସାରିୟା।” ଇନିଃ ହଗି ଇନ୍‍କୁକେ କାଜିୟାଃକୋୱାଏ, “ଦୋ ଇଙ୍ଗ୍ ହଗି ଆପେକେ କାଇଙ୍ଗ୍ ଉଦୁବ୍ ପେୟା ଚି ନେ କାମି ଅକନ୍ ଆଧିକାର୍ ତେ ରିକା ତାନିଙ୍ଗ୍।” “ଆପେ ନେ ଜୋନୋକା ଏତେ ଚିନାଃ ବୁଝାଅଃ ତାନାପେ? ମିୟାଃ ହୋଡ଼ ରାଃ ବାରିୟା ହୋନ୍ କିନ୍ ତାଇକେନା, ଇନିଃ ପାହିଲା ତାଃ ସେନ୍ କେତେ କାଜିକେଦାଏ, ‘ହେ ହୋନ୍, ଜୁ, ଇସିଙ୍ଗ୍ ଆଙ୍ଗୁର୍ ବାଖ୍‍ଡ଼ି ରେ କାମିମେ।’ ଇନିଃ କାଜିରୁଆଡ଼୍ କେଦାଏ, ‘ଇଙ୍ଗ୍ କାଇଙ୍ଗ୍ ସେନା’ ମେନ୍ଦୋ ତାୟୋମ୍ତେ ମୋନ୍ ବାଦ୍‍ଲାଅ କେଦାଏ ହାର୍ ସେନ୍ ଜାନାଏ। ଏନ୍ତେ ଆପୁ ତେ ଏଟାଃ ହୋନ୍ ତାଃ ସେନ୍‍କେତେ ଏନ୍‍ଲେକାଗି କାଜିକେଦାଏ, ଇନିଃ କାଜିରୁଆଡ଼୍ କେଦାଏ, ‘ହାଁ ଆବା, ଇଙ୍ଗ୍ ସେନ୍ ତାନାଇଙ୍ଗ୍,’ ମେନ୍ଦୋ କାଏ ସେନ୍ ଜାନାଏ। ନେ ବାରାନ୍‍କିନ୍ ତେ ଅକଏ ଆପୁ ଆଃ ସାନାଙ୍ଗ୍ କେ ପୁରା କେଦାଏ?” ଇନ୍‍କୁ କାଜିକେଦାକୋ, “ପାହିଲା ନିଈ।” ୟୀଶୁ ଇନ୍‍କୁକେ କାଜିୟାଃକୋୱାଏ, ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଚି ମାଲ୍ ହାରୋମ୍‍କୋ ହାର୍ ବେଶ୍ୟାକୋ ଆପେ ତେ ସିଦାରେ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋ ତାନାକୋ। ଚିୟାଃଚି ଯୋହାନ୍ ବାପ୍ତିସ୍ମା ଏହେମ୍ ନିଈ ଆପେ କେ ଚିଲ୍‍କା ଧାରାମ୍ ରାଃ ହୋରା ରେ ବୁଗିନ୍ ତେ ଜୀହିଃ ତାଇନାପେ ମେନ୍ତେ ଉଦୁବ୍ ତାନ୍ ଲୋଃ ଆପେୟାଃ ନାଡ଼େଏ ହିଜୁଃଲେନାଏ, ମେନ୍ଦୋ ଆପେ ଇନିଃକେ କାପେ ବିଶ୍ଵାସ୍ କିଜା, ମେନ୍ଦୋ ମାଲ୍ ହାରୋମ୍‍କୋ ହାର୍ ବେଶ୍ୟାକୋ ଇନିଃକେ ବିଶ୍ଵାସ୍ କିଜାକୋ ହାର୍ ଆପେ ନେୟା ନେଲ୍‍କେତେ ହଗି ତାୟୋମ୍ତେ ପାପ୍ କାମି କାପେ ବାଗେ କେଦା ହାର୍ ନା ଇନିଃକେ ବିଶ୍ଵାସ୍ କେଦାପେ। “ମିୟାଃ ଆଡୋଃ ଜୋନୋକା ଆୟୁମେପେ। ମିୟାଃ ଅତେ ରେନ୍ ଗୋମ୍‍କେ ତାଇକେନାଏ, ଇନିଃ ଆଙ୍ଗୁର୍ ବାଖ୍‍ଡ଼ି ବାଇ କେଦାଏ, ହାର୍ ଏଣ୍ଡେରାଃ ସବେନ୍ ପାଡ଼୍ ଘେରା ଥୋଲ୍‍କେଦାଏ, ଆଡୋଃ ଏଣ୍ତେ ରେ ରାଶି ବାଇ ଲାଗିନ୍ ଡୋଡା ଉର୍ କେଦାଏ ଆଡୋଃ ହୋରୋ ଅଡ଼୍ଆଃ ବାଇକେଦାଏ ହାର୍ ଚାଷି କୋକେ ଏନାକେ ସାଝା ଏମ୍ କେତେ ଏଟାଃ ଦିଶୁମ୍ ସେନୋଃ ଜାନାଏ। ଚିମ୍ତାଙ୍ଗ୍ ଯଅ ସାମାୟ୍ ନାଡ଼େଏ ହିଜୁଃଲେନା, ଦୋ ଇନିଃ ଆଜାଃ ଦାସୀକୋକେ ଏଣ୍ଡେରାଃ ଯଅ ହାନାଟିଙ୍ଗ୍ ଇଦି ଲାଗିନ୍ତେ ସାଝା-ଚାଷି କୋତାଃ କୁଲ୍ କେଃକୋୱାଏ। ମେନ୍ଦୋ ସାଝା-ଚାଷିକୋ ଇନିଜାଃ ଦାସୀକୋକେ ସାବ୍ କେତେ, ମିହୋଡ଼୍ କେ ବିଡ଼ା କିଜାକୋ, ଏଟାଃନିଃକେ ଗୋଏଃ କିଜାକୋ, ଆଡୋଃ ମିହୋଡ଼୍ ନିଜାଃ ରେ ଦିରି ଥେର୍ କେଦାକୋ। ଆଡୋଃଗି ଇନିଃ ସିଦା ଏତେ ଆଡୋଃ ଥିମ୍ବାଗି ଦାସୀକୋକେ କୁଲ୍ କେଃକୋୱାଏ, ହାର୍ ଇନ୍‍କୁ ହିନ୍‍କୁକେ ହଗି ଏନ୍‍ଲେକାଗି ରିକା କେଦାକୋ। ଏନା ତାୟୋମ୍ତେ, ଆଖ୍ରୀ ରେ ଇନିଃ ଆଜାଃ ହୋନ୍‍କଡ଼ା କେ ଇନ୍‍କୁ ତାଃ ନେୟା ପାହୋମ୍ କେତେ କୁଲ‍୍‍କିଜାଏ, ଚି ଇନ୍‍କୁ ଇଙ୍ଗ୍ଆଃ ହୋନ୍‍କଡ଼ା କେ ମାଇନ୍ ୟାକୋ। ମେନ୍ଦୋ ସାଝା-ଚାଷିକୋ ହୋନ୍‍କଡ଼ା କେ ନେଲ୍‍କେତେ ଆକୋ ରେ କାଜିଜାନାକୋ, ‘ନିଈ ଦୋ ଉତ୍ତାର୍-ଆଧିକାରୀ ତାନିଃ, ଦେଲା, ନିଈ କେ ଗୋଜିୟାବୁ ହାର୍ ନିଜାଃ ଆଙ୍ଗୁର୍ ବାଖ୍‍ଡ଼ି କେ ଇଦି କେୟାବୁ।’ ଏନାମେନ୍ତେ ଇନ୍‍କୁ ଇନିଃକେ ସାବ୍ କିଜାକୋ ହାର୍ ଆଙ୍ଗୁର୍ ବାଖ୍‍ଡ଼ି ରାଃ ବାହାରି ପାଡ଼୍ ଅଡୋଙ୍ଗ୍ କେତେ ଗୋଏଃ କିଜାକୋ। ନାଆ ଦୋ ଚିମ୍ତା ଆଙ୍ଗୁର୍ ବାଖ୍‍ଡ଼ି ରେନ୍ ଗୋମ୍‍କେ ହିଜୁଗାଏ ଦୋ ଏନ୍ ସାଝା-ଚାଷି କୋଲୋଃ ଚିନାଃ ରିକାୟାଏ?” ପ୍ରାଧାନ୍ ୟାଜାକ୍‍କୋ ହାର୍ ହୋଡ଼ୋ କୋୱାଃ ମାରିହୋଡ଼ୋକୋ ଇନିଃକେ କାଜିକେଦାକୋ, “ଇନିଃ ଏନ୍ ଖାରାପ୍ ହୋଡ଼ କୋକେ ବେଗାର୍ ଦାୟାମାୟା ତେ ନାଷ୍ଟ୍ କୋୱାଏ। ହାର୍ ଆଙ୍ଗୁର୍ ବାଖ୍‍ଡ଼ି କେ ଏଟାଃ ସାଝା-ଚାଷି କୋକେ ଏମାକୋୱାଏ, ଅକନ୍‍କୋ ଇନିଃକେ ଆଙ୍ଗୁର୍ କୋ ମାତା କୋଃ ରେ ଯଅ ହାନାଟିଙ୍ଗ୍ ଏମେୟାକୋ।” ୟୀଶୁ ଇନ୍‍କୁକେ କାଜିୟାଃକୋୱାଏ, “ଚିନାଃ ଆପେ ଚିଉଲାଅ ପାବିତାର୍ ପୁଥି ରେ ନେୟା କାପେ ପାଢ଼ାଅ କାନା, ‘ଅକନ୍ ଦିରି କେ ରାଜ୍‍ମିସ୍ତ୍ରୀକୋ ବେକାମି ଆଟ୍‍କାର୍ ଲେଦାକୋ, ଏନାଗି କୋନା ରାଃ ମୁଖ୍ୟା ଦିରି ହୋବାଜାନା। ନେୟା ପ୍ରାଭୁ ପାଡ଼େତେ ହୋବାଜାନା, ହାର୍ ଆବୁୱାଃ ନେପେଲ୍ ରେ ଆକ୍‍‍ଦାନ୍ଦାନ୍ ଲେକାନ୍ କାଜି ତାନାଃ।’ ଏନା ଲାଗିନ୍ତେ ଇଙ୍ଗ୍ ଆପେକେ କାଜିୟାପେ ତାନାଇଙ୍ଗ୍ ଚି ପାର୍ମେଶ୍ଵାର୍ ରାଃ ରାଇଜ୍ ଆପେ ତେ ରେଏଃ କେନୋଗୋ ହାର୍ ଏଟାଃଜାତି କୋକେ ଅକନ୍‍କୋ ଯଅ ଆଉୱେୟାକୋ, ଇନ୍‍କୁକେ ଏମୋଗା। ଅକଏ ନେ ଦିରି ରେ ଉୟୁଗୋୱାଏ ଇନିଃ ଖାଣ୍ଡ୍-ଖାଣ୍ଡ୍ କେନୋଗାଏ ହାର୍ ଅକେୟାଃ ରେ ଏନା ଉୟୁଗୋଗା ଇନିଃକେ ଏନା ରିଦ୍ ତାଇୟାଏ।” ପ୍ରାଧାନ୍ ୟାଜାକ୍‍କୋ ହାର୍ ଫାରିସୀ ହୋଡ଼ୋକୋ ଇନିଜାଃ ଜୋନୋକା କୋକେ ଆୟୁମ୍ କେତେ ବୁଝାଅ ଜାନାକୋ ଚି ଇନିଃ ଇନ୍‍କୁୱାଃ ବିଷାୟ୍ ରେ କାଜି ତାନାଏ। ଆଡୋଃ ଇନ୍‍କୁ ଇନିଃକେ ସାବ୍ ଲାଗିନ୍ ସାନାଙ୍ଗ୍ ତାଇକେନାକୋ, ମେନ୍ଦୋ ହୋଡ଼ୋକୋକେ ବୋରୋ ଜାନାକୋ, ଚିୟାଃଚି ଇନ୍‍କୁ ଇନିଃକେ ନାବୀ ମେନ୍ତେ ମାନାତିଙ୍ଗ୍ ତାଇନାକୋ। ୟୀଶୁ ଆଡୋଃଗି ଇନ୍‍କୁକେ ଜୋନୋକା ଲେକାତେ କାଜିୟାଃକୋୱାଏ, “ସିର୍ମାଦିଶୁମ୍ ରାଃ ରାଇଜ୍ ଏନ୍ ଜୋନୋକା ଲେକା ତାନାଃ, ମିୟାଃ ରାଜା ଅକନିଃ ଆଜାଃ ହୋନ୍‍କଡ଼ା ରାଃ ଆଣାଦୀ ଭୋଜ୍ ମାଣ୍ଡାଅକେଦାଏ। ହାର୍ ଇନିଃ ଆଜାଃ ଦାସୀକୋକେ କୁଲ୍ କେଃକୋୱାଏ ଚି ନେୱତାକାନ୍ ହୋଡ଼ୋକୋକେ ଆଣାଦୀ ଭୋଜ୍ ରେ କେଡ଼ା କୋୱାକୋ, ମେନ୍ଦୋ ନେୱତାକାନ୍ କୋ ହିଜୁଃ କାକୋ ସାନାଙ୍ଗ୍ କେନା। ଆଡୋଃଗି ଇନିଃ ଏଟାଃ ଦାସୀକୋକେ ନେୟା କାଜିକେତେ କୁଲ୍ କେଃକୋୱାଏ, ‘ନେୱତାକାନ୍ ହୋଡ଼ୋକୋକେ କାଜିୟାକୋପେ, ନେଲେପେ, ଇଙ୍ଗ୍ ଭୋଜ୍ ବାଇ ସେକାଡ଼୍ କାଦିଙ୍ଗ୍, ଇଙ୍ଗ୍ଆଃ ମେରୋମ୍ ଆଡୋଃ ଆସୁଲ୍ କାନ୍ ପାଶୁକୋ ଭୋଜ୍ ଲାଗିନ୍ ଗୋଜାକାନାକୋ, ହାର୍ ସବେନାଃ ବାଇ ସେକାଡ଼୍ କାନା, ଆଣାଦୀ ଭୋଜ୍ ରେ ହିଜୁଃପେ।’ ମେନ୍ଦୋ ଇନ୍‍କୁ କାକୋ ସେନ୍ ସାନାଙ୍ଗ୍ କେଦା, ଅକଏ ଆଜାଃ ଲୋୟୋଙ୍ଗ୍ ତେ ସେନୋଃ ଜାନାଏ, ଅକଏ ଆଜାଃ ବେପାର୍ କାମି ତେ ସେନୋଃ ଜାନାଏ। ଏଟାଃ ସାରେଃକାନ୍ ହୋଡ଼ୋକୋ ଇନିଜାଃ ଦାସୀକୋକେ ସାବ୍ କେତେ ଇନ୍‍କୁକେ ସାସାତି କେଃକୋୱାକୋ ହାର୍ ଗୋଏଃ କେଃକୋୱାକୋ। ଏନ୍ତେ ରାଜା ଚିମ୍ତାଙ୍ଗ୍ ନେୟା ଆୟୁମ୍ କେଦାଏ ଦୋ ଖିସ୍ ଜାନାଏ, ହାର୍ ଇନିଃ ଆଜାଃ ସିପାହୀ କୋକେ କୁଲ୍ କେତେ ଏନ୍ ହୋଡ଼ଗୋଏଃ କୋକେ ନାଶ୍ କେଃକୋୱାଏ, ହାର୍ ଇନ୍‍କୁୱାଃ ସାହାର୍ କୋକେ ଅଣ୍ଡର୍ ତାଦାଏ। ଏନ୍ତେ ଇନିଃ ଆଜାଃ ଦାସୀକୋକେ କାଜିୟାଃକୋୱାଏ, ‘ଆଣାଦୀ ଭୋଜ୍ ସେକାଡ଼୍ ମେନାଃ ମେନ୍ଦୋ ନେୱତାକାନ୍ ହୋଡ଼ୋକୋ ଭୋଜ୍ ଜୋମେୟାଃ ଜୋମ୍ ଲେକାନ୍ ହୋଡ଼ କାକୋ ବାଇଜାନା। ଏନାଲାଗିନ୍ ଛକୋ ଜାଗାକୋ ରେ ସେନ୍‍ପେ ହାର୍ ଚିମିନାଙ୍ଗ୍ ହୋଡ଼ୋକୋ ଆପେକେ ନାମୋଗାକୋ, ସବେନ୍ କୋକେ ଆଣାଦୀ ଭୋଜ୍ ରେ କେଡ଼ା ଆଉକୋପେ।’ ଏନ୍ତେ ଏନ୍ ଦାସୀକୋ ହୋରା କୋରେ ସେନ୍‍କେତେ ଚିକାନ୍ ଖାରାପ୍ ଚିକାନ୍ ବେଶ୍, ଚିମିନାଙ୍ଗ୍ ଗି ନାମ୍ ଜାନାକୋ, ସବେନ୍ କୋକେ ହୁଣ୍ଡି କେଃକୋୱାକୋ ହାର୍ ଆଣାଦୀ ଭୋଜ୍ ଅଡ଼୍ଆଃ ପେଡ଼ାକୋଏତେ ଫେରେଃ ଜାନା। ଚିମ୍ତାଙ୍ଗ୍ ରାଜା ପେଡ଼ାକୋକେ ନେଲ୍ ଲାଗିନ୍ ଭିତାର୍ ତେ ହିଜୁଃଲେନାଏ, ଦୋ ଇନିଃ ଏନ୍ତାଃରେ ରେ ମିୟାଃ ହୋଡ଼ କେ ନେଲ୍ କିଜାଏ, ଅକନିଃ ଆଣାଦୀ ଭୋଜ୍ ରାଃ ଲିଜାଃ କାଏ ତୁସିଙ୍ଗ୍ ଲେନ୍ ତାଇନାଏ। ରାଜା ଇନିଃକେ କୁଲିକିଜାଏ, ‘ହେ ଗାତି, ଆମ୍ ଆଣାଦୀ ଭୋଜ୍ ରାଃ ଲିଜାଃ କାମ୍ ତୁସିଙ୍ଗ୍ କେତେ ନେତାଃ ଚିଲ୍‍କା ହିଜୁଃ ଜାନାମ୍?’ ମେନ୍ଦୋ ଇନିଃ ହାପା ଜାନାଏ। ଏନ୍ତେ ରାଜା ଆଜାଃ ଦାସୀକୋକେ କାଜିୟାଃକୋୱାଏ, ‘ନିଜାଃ କାଟା ତିଈ ଥୋଲ୍ କେତେ ଇନିଃକେ ବାହାରି ନୁବାଃ ରେ ଦୁଡ଼ିଙ୍ଗ୍ ତାଇପେ, ଏନ୍ତାଃରେ ରାଆ ଆଡୋଃ ଡାଟା ରିଦ୍ ହୋବାଅଃୱା।’ ଚିୟାଃଚି କେଡ଼ାକାନ୍‍କୋ ଦୋ ଥିମ୍ବା ଗିୟାକୋ ମେନ୍ଦୋ ସାଲାକାନ୍‍କୋ ହୁଡିଙ୍ଗ୍ ଗିୟାକୋ।” ଏନ୍ତେ ଫାରିସୀ ହୋଡ଼ୋକୋ ସେନ୍‍କେତେ ଆକୋ ଥାଲା ରେ ବିଚାର୍ କେଦାକୋ ଚି ୟୀଶୁ କେ ଚିକାନ୍ ଗାଲ୍ତି କାଜିକୋ ରେବୁ ସାବିୟା। ଏନ୍ତେ ଇନ୍‍କୁ ଆକୋୱାଃ ଚେଲାକୋକେ ହେରୋଦ୍ ରାଜା ରାଃ କାଜି ରେ ଏକ୍ ମୋନ୍ ହୋବାକାନ୍ କୋଲୋଃ ଇନିଃତାଃ ନେୟା କାଜି ଲାଗିନ୍ତେ କୁଲ୍ କେଃକୋୱାକୋ, “ହେ ଗୁରୁ, ଆଲେ ସାରିତାନାଲେ, ଚି ଆମ୍ ସାର୍ତି କାଜି କାଜିୟାମ୍, ହାର୍ ପାର୍ମେଶ୍ଵାର୍ ରାଃ ହୋରା ସାର୍ତି ତେ ଶିଖାଅ କୋୱାମ୍, ହାର୍ ଅକଏ ଚିନାଃ ପାହୋମ୍ ୟାଏ ଏନା କାମ୍ ଖାତିର୍ ୟା, ଚିୟାଃଚି ଆମ୍ ସବେନ୍ ହୋଡ଼ୋକୋକେ ମିଃଗି ନେଲ୍ କୋୱାମ୍। ଏନା ଲାଗିନ୍ତେ ଆଲେକେ ଉଦୁବାଲେମ୍ ଚି ଆମ୍ ଚିନାଃ ପାହୋମ୍ ତାନାମ୍? ଚିନାଃ ରୋମ୍‍ରେନ୍ ରାଜା କେ ମାଲ୍‍ହାରୋମ୍ ଟାକା ଏମ୍ ତେୟାଃ ଠାଉକା ତାନାଃ ଚି ନାହାଲା?” ୟୀଶୁ ଇନ୍‍କୁୱାଃ ବାଦ୍‍ମାସୀ କେ ସାରିକେତେ କାଜିୟାଃକୋୱାଏ, “ହେ ବେଦାହୋଡ଼ୋକୋ, ଇଙ୍ଗ୍‍କେ ଚିନାଃ ଲାଗିନ୍ ପେ ପାର୍ଖାୱଇଙ୍ଗ୍ ତାନା? ମାଲ୍‍ହାରୋମ୍ ଟାକା ରାଃ ଶିକା ଇଙ୍ଗ୍‍କେ ଦେଖାୱିଙ୍ଗ୍ ପେ।” ଏନ୍ତେ ଇନ୍‍କୁ ଇନିଜାଃ ନାଡ଼େଏ ମିୟାଃ ଦିନାର୍ ଆଉକେଦାକୋ। ଇନିଃ ଇନ୍‍କୁକେ କୁଲିକେଃକୋୱାଏ, “ନେ ଛାପା ହାର୍ ନୁତୁମ୍ ଅକେୟାଃ ତାନାଃ?” ଇନ୍‍କୁ ଇନିଃକେ କାଜିକେଦାକୋ, “ରୋମ୍‍ରେନ୍ ରାଜା ରାଃ।” ଏନ୍ତେ ଇନିଃ ଇନ୍‍କୁକେ କାଜିୟାଃକୋୱାଏ, “ଅକନାଃ ରୋମ୍‍ରେନ୍ ରାଜା ରାଃ ତାନାଃ ଏନା ରୋମ୍‍ରେନ୍ ରାଜା କେ, ହାର୍ ଅକନାଃ ପାର୍ମେଶ୍ଵାର୍ ରାଃ ତାନାଃ ଏନା ପାର୍ମେଶ୍ଵାର୍ କେ ଏମାଇପେ।” ନେୟା ଆୟୁମ୍‍କେତେ ଇନ୍‍କୁ ଆକ୍‍ଦାନ୍ଦା ଜାନାକୋ ହାର୍ ଇନିଃକେ ବାଗିକେତେ ସେନୋଃ ଜାନାକୋ। ଏନ୍ ହୁଲାଙ୍ଗ୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ, ଇନ୍‍କୁ କାଜିୟାକୋ ଚି ଗୋଜାକାନ୍ କୋୱାଃ ଜୀବିନିରିଦ୍ ଗି ବାନୋଗା ୟୀଶୁ ତାଃ ହିଜୁଃ ଲେନାକୋ, ହାର୍ ଇନିଃକେ କୁଲିକିଜାକୋ, “ହେ ଗୁରୁ, ମୁଶା ନାବୀ ଦୋ କାଜିଲେଦାଏ, ଚି ଆଗାର୍ ମିୟାଃ ହୋଡ଼ ବେଗାର୍ ହୋନ୍-ଗାଣା ଗୋଏଃ କେନୋଗାଏ, ଦୋ ଆଜାଃ ହାଗା ଇନିଜାଃ ବିଧୋବା କୁଡ଼ି କେ ଆଣାଦୀ କେତେ ଆଜାଃ ହାଗା ତେ ଲାଗିନ୍ ହୋନ୍-ଗାଣାକୋ ଜାନାମ୍ କୋକାଏ। ନାଆ ଆଲେୟାଃ ନେତାଃ ରେ ସାତ୍ ଝାନ୍ ହାଗାକୋ ତାଇକେନାକୋ, ସିଦା ନିଈ ଆଣାଦୀ କେତେ ଗୋଏଃ ଜାନାଏ, ଆଡୋଃ ହୋନ୍-ଗାଣା କାକୋ ହୋବାଜାନା ଏନା ରାଃ ଚାଲ୍ତେ ଆଜାଃ କୁଡ଼ି କେ ନିଜ୍ ହାଗା ତେ ଲାଗିନ୍ ବାଗେ କେତେ ସେନୋଃ ଜାନାଏ। ନେଲେକାଗି ଦୁସ୍‍ରା ଆଡୋଃ ତିସ୍ରା ହଗି ରିକା କେଦାଏ ହାର୍ ସାତ୍ ଝାନ୍ କୋ ସାନ୍ତେ ନେଲେକାଗି ହୋବାଜାନା। ସବେନ୍ କୋୱାଃ ତାୟୋମ୍ତେ ଏନ୍ କୁଡ଼ି ଗୋଏଃ ଜାନାଏ। ଏଣ୍ଡେ ଜୀବିନିରିଦ୍ ରେ ଇନିଃ ସାତ୍ ଝାନ୍ କୋଏତେ ଅକେୟାଃ କୁଡ଼ି ହୋବାୱାଏ? ଚିୟାଃଚି ଇନିଃ ସବେନ୍ କୋୱାଃ କୁଡ଼ି ହୋବା ଛାବା ଲେନ୍ ତାଇନାଏ।” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଆପେ ପାବିତାର୍ ପୁଥି ଆଡୋଃ ପାର୍ମେଶ୍ଵାର୍ ରାଃ ପେଡ଼େଏ କେ କାପେ ସାରିତାନା ଏନା ଲାଗିନ୍ତେ ଭୁଲ୍ ରେ ପାଶେ କାନାପେ। ଚିୟାଃଚି ଜୀବିନିରିଦ୍ ତାୟୋମ୍ତେ ନାଦୋ ଆଣାଦିନାକୋ ନାଦୋ ଗୋଙ୍ଗ୍ଅଗାକୋ; ମେନ୍ଦୋ ଇନ୍‍କୁ ସିର୍ମାଦିଶୁମ୍ ରେ ପାର୍ମେଶ୍ଵାର୍ ରାଃ ସିର୍ମାଦାସୀକୋ ଲେକା ତାଇନାକୋ। ମେନ୍ଦୋ ଗୋଜାକାନ୍ କୋୱାଃ ଜୀବିନିରିଦ୍ ରାଃ ବିଷାୟ୍ ରେ ଚିନାଃ ଆପେ ନେ ବାଚାନ୍ କାପେ ପାଢ଼ାଅକାନା ଅକନାଃ ପାର୍ମେଶ୍ଵାର୍ ଆପେକେ କାଜି କାଃପେୟାଏ: ‘ଇଙ୍ଗ୍ ଆବ୍ରାହାମ୍ ରାଃ ପାର୍ମେଶ୍ଵାର୍, ଆଡୋଃ ଇସାହାକ୍ ରାଃ ପାର୍ମେଶ୍ଵାର୍, ଆଡୋଃ ୟାକୁବ୍ ରାଃ ପାର୍ମେଶ୍ଵାର୍ ତାନିଙ୍ଗ୍?’ ଇନିଃ ଗୋଜାକାନ୍ କୋୱାଃ କାହା, ମେନ୍ଦୋ ଜୀହିଃ ହୋଡ଼ୋକୋୱାଃ ପାର୍ମେଶ୍ଵାର୍ ତାନିଃ।” ନେୟା ଆୟୁମ୍‍କେତେ ହୋଡ଼ୋକୋ ଇନିଜାଃ ଶିଖାଅ ତେ ଆକ୍‍ଦାନ୍ଦା ଜାନାକୋ। ଚିମ୍ତାଙ୍ଗ୍ ଫାରିସୀ ହୋଡ଼ୋକୋ ଆୟୁମ୍ କେଦାକୋ ଚି ୟୀଶୁ, ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ ଇନ୍‍କୁୱାଃ ମୋଚା ହାପା ତାଦାଏ, ଦୋ ଇନ୍‍କୁ ହୁଣ୍ତି ଜାନାକୋ। ଇନ୍‍କୁ ଏତେ ମିୟାଃ ଆଇନ୍ ଗୁରୁ ଇନିଃକେ ପାର୍ଖାୱୀ ଲାଗିନ୍ ଇନିଃକେ କୁଲିକିଜାଏ, “ହେ ଗୁରୁ, ମୁଶା ନାବୀ ରାଃ ଆଇନ୍ ରେ ଅକନ୍ ଆନାଚୁ ମାରାଙ୍ଗ୍ ତାନାଃ?” ୟୀଶୁ ଇନିଃକେ କାଜିକିଜାଏ, “ଆମ୍ ପାର୍ମେଶ୍ଵାର୍ ଆମାଃ ପ୍ରାଭୁ କେ ଆମାଃ ସବେନ୍ ମୋନ୍ ତେ ହାର୍ ସବେନ୍ ଜୀଉ ତେ ଆଡୋଃ ଆମାଃ ସବେନ୍ ସେଣା ଲୋଃ ଦୁଲାଡ଼ି ମେ। ମାରାଙ୍ଗ୍ ହାର୍ ପାହିଲା ଆନାଚୁ ଦୋ ନେୟାଗି ତାନାଃ। ଆଡୋଃ ଏନ୍ ଲେକାଗି ନେୟା ଏଟାଃ ହଗି ତାନାଃ ଚି, ଆମ୍ ଆମାଃ ନାଡ଼େଏ ଜାପାଃ ରେନ୍ କୋକେ ଆପାନାଃ ଲେକା ଦୁଲାଡ଼୍ କୋମେ। ନେ ବାରିୟା ଆନାଚୁ ରେଗି ପୁରା ମୁଶା ନାବୀ ରାଃ ଆଇନ୍ ହାର୍ ପାର୍ମେଶ୍ଵାର୍ ରାଃ ନାବୀ କୋୱାଃ ପୁଥି ନିର୍ଭାର୍ ୟାଏ।” ଚିମ୍ତାଙ୍ଗ୍ ଫାରିସୀ ହୋଡ଼ୋକୋ ହୁଣ୍ତି ଲେନ୍ ତାଇନାକୋ, ଦୋ ୟୀଶୁ ଇନ୍‍କୁକେ କୁଲିକେଃକୋୱାଏ, “ମାସୀହ୍ ରାଃ ବିଷାୟ୍ ରେ ଆପେ ଚିନାଃ ପାହୋମ୍ ତାନାପେ? ଇନିଃ ଅକେୟାଃ ସାନ୍ତାନ୍ ତାନିଃ?” ଇନ୍‍କୁ ଇନିଃକେ କାଜିକିଜାକୋ, “ଦାଉଦ୍ ରାଜା ରାଃ।” ୟୀଶୁ ଇନ୍‍କୁକେ କୁଲିକେଃକୋୱାଏ, “ଦୋ ଦାଉଦ୍ ଆତ୍ମା ରେ ହୋବାକେତେ ଇନିଃକେ ପ୍ରାଭୁ ଚିନାଃ ମେନ୍ତେ କାଜିୟାଏ? ‘ପ୍ରାଭୁ ଦୋ, ଇଙ୍ଗ୍ଆଃ ପ୍ରାଭୁ କେ କାଜିକେଦାଏ, ଇଙ୍ଗ୍ଆଃ ଜୋମ୍ ପାଡ଼୍ ରେ ଦୁବ୍ ମେ ଚିମିନ୍ ସାନ୍ତେ ଚି ଇଙ୍ଗ୍ ଆମାଃ ବାଇରୀ କୋକେ ଆମାଃ କାଟା ରାଃ ଲାଥାର୍ ରେ କାଇଙ୍ଗ୍ ମାଣ୍ଡାଅ କୋୱା।’ ଆଗାର୍ ଦାଉଦ୍ ମାସୀହ୍ କେ ପ୍ରାଭୁ ମେନ୍ତେ କାଜିୟାଏ ଦୋ ଇନିଃ ଇନିଜାଃ ସାନ୍ତାନ୍ ଚିଲ୍‍କା ତେ ହୋବାଃୱାଏ? ନେ କାଜି ରେ ଜେତାଏ ଜାହାନାଃ କାକୋ କାଜିରୁଆଡ଼୍ ଧାଡ଼ି ଜାନାକୋ। ଏନ୍ ହୁଲାଙ୍ଗ୍ ଏତେ ଜେତାଏ ହ ୟୀଶୁ କେ ଆଡୋଃ ଜାହାନାଃ କୁଲି ଲାଗିନ୍ ସାହାସ୍ କା ହୋବାଜାନା।” ଏନ୍ତେ ୟୀଶୁ ମିଃଥିମ୍ବା ହୋଡ଼ୋକୋକେ ହାର୍ ଆଜାଃ ଚେଲାକୋକେ କାଜିୟାଃକୋୱାଏ, “ଆଇନ୍ ଗୁରୁକୋ ଆଡୋଃ ଫାରିସୀ ହୋଡ଼ୋକୋ ମୁଶା ନାବୀ ରାଃ ଆଇନ୍ କେ ବୁଝାଅୟାକୋ ହାର୍ କାଜିୟାକୋ। ଏନାମେନ୍ତେ ଇନ୍‍କୁ ଆପେକେ ଜାହାନାଃ ଗି କାଜିୟାକୋ ଏନା ରିକାଏ ପେ ହାର୍ ମାନାତିଙ୍ଗ୍ ପେ, ମେନ୍ଦୋ ଇନ୍‍କୁୱାଃ ଲେକା ଆଲୋପେ କାମିୟା, ଚିୟାଃଚି ଇନ୍‍କୁ ଶିଖାଅ ଦୋ କୋ ଶିଖାଅୟା ମାଗାର୍ କାକୋ ମାନାତିଙ୍ଗ୍‍ୟା। ଇନ୍‍କୁ ଏନ୍‍ଲେକା ନିୟାମ୍ ହାର୍ ଆଇନ୍ ହାମ୍ବାଲ୍ ଗି ବାଇୟାକୋ ଅକନାଃ କେ ହୋଡ଼ୋକୋ ନାଙ୍ଗ୍ ମାନାତିଙ୍ଗ୍ କେଟେଃ ତାନାଃ, ଏନ୍ତେ ଏନାକେ ହୋଡ଼ୋକୋୱାଃ ତାରାଣ୍ ରେ ମାଣ୍ତାଅୟାକୋ, ମେନ୍ଦୋ ଆକଗି ଏନାକୋକେ ଆକୋୱାଃ ସାର୍ସାର୍ ତେ ଉଠାଓ ଲେକା କାଟିଜୋ ନିୟାମ୍ ମାନାତିଙ୍ଗ୍ ନାଙ୍ଗ୍ ହଗି କାକୋ ଦେଙ୍ଗା ସାନାଙ୍ଗା। ଇନ୍‍କୁ ଆକୋୱାଃ ସବେନ୍ କାମି ହୋଡ଼ୋକୋକେ ଦେଖାଅ ନାଙ୍ଗ୍ ରିକା ୟାକୋ, ଇନ୍‍କୁ ଆକୋୱାଃ ତାବିଜ୍ କେ ଚାକାର୍ ରିକା ୟାକୋ ହାର୍ ଆକୋୱାଃ ଲିଜାଃ ରାଃ ଆଚ୍ରା କେ ଜିଲିଙ୍ଗ୍ ୟାକୋ। ଭୋଜ୍ ରେ ମାପ୍‍ରାଙ୍ଗ୍ ଜାଗା ହାର୍ ବିନ୍ତିଅଡ଼୍ଆଃ ରେ ଆୟୁର୍ ଜାଗା ରେ ଦୁବ୍ ଲାଗିନ୍ ସୁକୁଅଃ ୱାକୋ, ପିଟ୍ କୋରେ ଜୋହାର୍ ହାର୍ ହୋଡ଼ୋକୋରେ ‘ଗୁରୁ’ କାଜିୟୋଃ ଇନ୍‍କୁକେ ବେଶ୍ ଆଦାକୋୱା। ମେନ୍ଦୋ ଆପେ ‘ଗୁରୁ’ ଆଲୋପେ କାଜିୟୋଗା, ଚିୟାଃଚି ଆପେୟାଃ ମିୟାଃ ଗି ଗୁରୁ ମେନାଇଜା, ହାର୍ ଆପେ ସବେନ୍ ହାଗା-ମିଶିକୋ ମିଃଲେକା ତାନ୍‍ପେ। ଅତେଦିଶୁମ୍ ରେ ଜେତାଏ କେହ ଆପେୟାଃ ଆପୁ ଆଲୋପେ କାଜିୟା, ଚିୟାଃଚି ଆପେୟାଃ ମିୟାଃ ଗି ଆପୁ ମେନାଇଜା, ଅକନିଃ ସିର୍ମାଦିଶୁମ୍ ରେ ମେନାଇଜା। ଆଡୋଃ ଗୋମ୍‍କେ ଅଗି ଆଲୋପେ କାଜିୟୋଗା ଚିୟାଃଚି ଆପେୟାଃ ମିୟାଃ ଗି ଗୋମ୍‍କେ ମେନାଇଜା, ମାନେ ମାସୀହ୍। ଅକନିଃ ଆପେ ରେ ମାରାଙ୍ଗ୍ ତାନିଃ ଇନିଃ ଆପେୟାଃ ଦାସୀ ବାଇୟୋଃକାଏ। ଚିୟାଃଚି ଅକଏ ଆପାନ୍ କେ ମାରାଙ୍ଗ୍ ବାଇୟାଏ ଇନିଃ ହୁଡିଙ୍ଗ୍ ଅଗାଏ ଆଡୋଃ ଅକଏ ଆପାନ୍ କେ ହୁଡିଙ୍ଗ୍ ବାଇୟାଏ ଇନିଃ ମାରାଙ୍ଗ୍ ଅଗାଏ।” “ହେ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଆପେ ବେଦାହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ହୋଡ଼ୋକୋୱାଃ ନାଙ୍ଗ୍ ସିର୍ମାଦିଶୁମ୍ ରାଃ ରାଇଜ୍ ରାଃ ଦୁହାର୍ ବାନ୍ଦ୍ ତାନାପେ, ନାଦୋ ଆପେ ଏଣ୍ଡେ ରେ ବୋଲୋ ତାନାପେ ହାର୍ ନାଦୋ ଏନାରେ ବୋଲୋତାନ୍ କୋକେ ବୋଲୋ ରିକାକୋ ତାନାପେ। ହେ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଆପେ ବେଦାହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ବିଧୋବା କୋକେ ହିଡ଼୍ କେତେ ଇନ୍‍କୁୱାଃ ଅଡ଼୍ଆଃ କୋକେ ରେଏଃ କେୟାପେ, ଦେଖାଅ ଲାଗିନ୍ ଥିମ୍ବା ଦେରି ସାନ୍ତେ ବିନ୍ତି ରିକାୟାପେ, ଏନା ଲାଗିନ୍ ଆପେକେ ଥିମ୍ବାଗି ଦାଣ୍ଡ୍ ନାମୋଗା।” “ହେ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଆପେ ବେଦାହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ମିୟାଃ ହୋଡ଼ କେ ଆପେୟାଃ ଶିଖାଅ ରେ ବିଶ୍ଵାସ୍ ଆୱି ଲାଗିନ୍ ସବେନ୍ ଜାଗାକୋ ରେ ହୋନୋର୍ ୟାପେ ଆଡୋଃ ଚିମ୍ତା ଇନିଃ ଆପେୟାଃ ଶିଖାଅ ରେ ବିଶ୍ଵାସ୍ କେୟାଏ, ଦୋ ଇନିଃକେ ଆପେୟାଃ ଏତେ ବାର୍ ଗୁନା ନାରାକ୍ ରେନ୍ ହୋଡ଼ ବାଇତାଃପେ। ହେ ଆନ୍ଧା ଆଗୁଆକୋ, ଆପେୟାଃ ଚେତାନ୍ ରେ ହାୟ୍! ଅକନାଃ ଆପେ କାଜିୟାପେ ଚି ଆଗାର୍ ଜେତାଏ ମାନ୍ଦିର୍ ରାଃ କିରିୟା ଜୋମେୟାଏ ଦୋ ଜେତ୍ନାଃ ନାହାଲା, ମେନ୍ଦୋ ଜେତାଏ ମାନ୍ଦିର୍ ରାଃ ସାମ୍‍ଡ଼ୋମ୍ ରାଃ କିରିୟା ଜୋମେୟାଏ ଦୋ ଏନାତେ ଥୋଲ୍ କେନୋଗାଏ। ହେ ଡୋଣ୍ଡୋ ହାର୍ ଆନ୍ଧାକୋ, ଅକନାଃ ମାରାଙ୍ଗ୍ ତାନାଃ, ସାମ୍‍ଡ଼ୋମ୍ ଚି ମାନ୍ଦିର୍ ଅକନାଃ ଏତେ ସାମ୍‍ଡ଼ୋମ୍ ପାବିତାର୍ ହୋବାଅଃ ତାନା? ହାର୍ କାଜିୟାପେ ଚି ଆଗାର୍ ଜେତାଏ ବେଦୀ ରାଃ କିରିୟା ଜୋମେୟାଏ ଦୋ ଜେତ୍ନାଃ ନାହାଲା, ମେନ୍ଦୋ ଅକନ୍ ଭେଁଟ୍ ଏନାରେ ମେନାଃ, ଆଗାର୍ ଜେତାଏ ଏନାରାଃ କିରିୟା ଜୋମେୟାଏ ଦୋ ଥୋଲ୍ କେନୋଗାଏ। ହେ ଆନ୍ଧାକୋ, ଅକନାଃ ମାରାଙ୍ଗ୍ ତାନାଃ, ଭେଁଟ୍ ଚି ବେଦୀ ଅକନାଃ ଏତେ ଭେଁଟ୍ ପାବିତାର୍ ହୋବାଅଃ ତାନା? ଏନାମେନ୍ତେ ଅକଏ ବେଦୀ ରାଃ କିରିୟା ଜୋମ୍ ତାନାଏ, ଇନିଃ ଏନାରାଃ ହାର୍ ଏନାରେ ଚିନାଃ ମେନାଃ ଏନାରାଃ ହଗି କିରିୟା ଜୋମ୍ ତାନାଏ। ଅକଏ ମାନ୍ଦିର୍ ରାଃ କିରିୟା ଜୋମ୍ ତାନାଏ, ଇନିଃ ଏନା ରାଃ ହାର୍ ଏଣ୍ଡେ ରେ ତାଇନ୍ ତାନ୍ ପାର୍ମେଶ୍ଵାର୍ ରାଃ ହଗି କିରିୟା ଜୋମ୍ ତାନାଏ। ହାର୍ ଅକଏ ସିର୍ମାଦିଶୁମ୍ ରାଃ କିରିୟା ଜୋମ୍ ତାନାଏ ଇନିଃ ପାର୍ମେଶ୍ଵାର୍ ରାଃ ସିଂହାସାନ୍ ରାଃ ଆଡୋଃ ଏନାରେ ଦୁବାକାନ୍ ନିଜାଃ ହଗି କିରିୟା ଜୋମ୍ ତାନାଏ।” “ହେ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଆପେ ବେଦାହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ପୁଦୀନା ହାର୍ ସୋମ୍ପ୍ ହାର୍ ଜିରା ରାଃ ଦାଶ୍ୱାଁ ଭାଗ୍ ଦୋ ଏମେୟାପେ, ମେନ୍ଦୋ ଆପେ ମୁଶା ନାବୀ ରାଃ ଆଇନ୍ ରାଃ ଈକିର୍ କାଜିକୋ ମାନେ ବିଚାର୍, ହାର୍ ଦାୟା ହାର୍ ବିଶ୍ଵାସେଲେକାନିଃ ତାଇନ୍ ତେୟାଃ କେ ବାଗେ କେଦାପେ। ମେନ୍ଦୋ ନେୟା ଠାଉକା ତାଇକେନା ଚି ନେୟାକୋକେ ହଗି ରିକା କାତେୟାଃପେ ହାର୍ ଏନାକୋକେ ହଗି କାପେ ବାଗେ ତେୟାଃ। ହେ ଆନ୍ଧା ଆଗୁଆକୋ, ଆପେ ଜେଲେକା ସିକିଣି କେ ଛାନାୱ କେୟାପେ ଏନ୍‍ଲେକା ହୁପୁଡିଙ୍ଗ୍ ନିୟାମ୍ କୋକେ ହୋସିଆର୍ ତେ ମାନାତିଙ୍ଗ୍ ୟାପେ, ମେନ୍ଦୋ ଉଁଟ୍ କେ ଉଃଦି ଲେକା ପାର୍ମେଶ୍ଵାର୍ ରାଃ ମାପ୍‍ରାଙ୍ଗ୍ ଆନାଚୁ କୋକେ କାପେ ମାନାତିଙ୍ଗ୍ ୟା।” “ହେ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଆପେ ବେଦାହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ଡୁଭ୍‍ନୀ ହାର୍ ଥାଡ଼ିୟା ଲେକାନ୍ ହୋଡ଼ୋକୋ ତାନ୍‍ପେ ଅକନାଃ କେ ଚେତାନ୍-ଚେତାନ୍ ଦୋପେ ଗାସାର୍ ଏୟା ମେନ୍ଦୋ ଏନା ଭିତାର୍ ରେ ମାଇଲା ତାଇନା ଏନ୍ ଲେକାଗି ଆପେ ହୋଡ଼ୋକୋୱାଃ ନେପେଲ୍ ତେଦୋ ବୁଗିନ୍ ନେଲୋଃୱାପେ ମେନ୍ଦୋ ମୋନ୍ ତେ ଲୋଭୀ ହାର୍ ସ୍ଵାର୍ଥୀ ତେ ଫେରେଃ କାନାପେ। ହେ ଆନ୍ଧା ଫାରିସୀ ହୋଡ଼ୋକୋ, ସିଦା ଡୁଭ୍‍ନୀ ହାର୍ ଥାଡ଼ିୟା କେ ଭିତାର୍ ତେ ଗାସାରେପେ ଏଣ୍ଡେ ଏନା ବାହାରି ତେ ହଗି ସାଫା ତାଇନା। ହେ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଆପେ ବେଦାହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ଚୁନା ପୋତାଅ କାନ୍ କାବାର୍ ଲେକା ତାନ୍‍ପେ ଅକନାଃ ଚେତାନ୍ ଏତେ ଦୋ ସୁନ୍ଦାର୍ ନେଲୋଗା, ମେନ୍ଦୋ ଭିତାର୍ ଗୋଜାକାନ୍ କୋୱାଃ ଜାଙ୍ଗ୍ ତେ ଆଡୋଃ ସବେନ୍ ରାକାମ୍ ରାଃ ମାଇଲା ତେ ଫେରେଜା କାନା। ନେଲେକାଗି ଆପେ ହଗି ଚେତାନ୍ ଏତେ ହୋଡ଼ୋକୋକେ ଧାର୍ମୀ ନେଲୋଃ ତାନାପେ, ମେନ୍ଦୋ ଭିତାର୍ ରେ ବେଦାମୋନ୍ ତେ ଆଡୋଃ ଆଧାର୍ମ୍ ରେ ଫେରେଜା କାନାପେ।” ହେ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ ଆପେ ବେଦାହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ନାବୀ କୋୱାଃ କାବାର୍ କୋକେ ଶିଙ୍ଗାର୍ ୟାପେ ହାର୍ ଧାର୍ମୀ କୋକେ ମାଇନ୍ ଏମ୍ ନାଙ୍ଗ୍ ଏନ୍ କାବାର୍ କୋକେ ବାଇୟାପେ। ହାର୍ କାଜିୟାପେ, ଆଗାର୍ ଆଲେ ଆଲେୟାଃ ସିଦା ସାମାୟ୍ ରେନ୍ ହୋଡ଼ୋକୋୱାଃ ହୁଲାଙ୍ଗ୍ ରେ ତାଇନ୍ ଲେନ୍ତେୟାଃଲେ ଏଣ୍ଡେ ନାବୀ କୋକେ ଗୋଗୋଏଃ ରେ ଇନ୍‍କୁ ଲୋଃ କାଲେ ମେଶା ଲେନ୍ତେୟାଃ। ନେ କାଜି ତେଦୋ ଆପେ ଆପାନ୍ ତେଗି ଗୋୱା ଏମ୍ ତାନାପେ ଚି ଆପେୟାଃ ହୋଡ଼ୋକୋ ନାବୀ କୋକେ ଗୋଏଃ ଲେଦାକୋ ଇନ୍‍କୁୱାଃ ସାନ୍ତାନ୍ ଆପେ ତାନ୍‍ପେ। ଏଣ୍ଡେ ଆପେ ଆପେୟାଃ ସିଦା ସାମାୟ୍ ରେନ୍ ହୋଡ଼ୋକୋୱାଃ ପାପ୍ ରାଃ ଚାଟୁ କେ ପୁରା ପୁରୀ ଫେରେଃ ତାପେ। ହେ ବିଙ୍ଗ୍ ଲେକାନ୍ ହୋଡ଼ୋକୋ, ହେ ବିଷ୍ ରାକାବ୍ ବିଙ୍ଗ୍ ରାଃ ହୋନ୍ ଲେକାନ୍‍କୋ, ଆପେ ନାରାକ୍ ରାଃ ଦାଣ୍ଡ୍ ଏତେ ଚିଲ୍‍କା ବାଚାଅଃ ୱାପେ? ଏନାଲାଗିନ୍ ନେଲେପେ, ଇଙ୍ଗ୍ ଆପେତାଃ ନାବୀକୋକେ ହାର୍ ସେଣାନ୍ କୋକେ ହାର୍ ଆଇନ୍ ଗୁରୁକୋକେ କୁଲ୍ କୋ ତାନାଇଙ୍ଗ୍, ହାର୍ ଆପେ ଇନ୍‍କୁ ଏତେ ଚିମିନାଙ୍ଗ୍ କୋକେ ଗୋଏଃ କୋୱାପେ ହାର୍ ଚିମିନାଙ୍ଗ୍ କୋକେ କ୍ରୁଶ୍ ରେ ରାକାବ୍ କୋୱାପେ, ହାର୍ ଚିମିନାଙ୍ଗ୍ କୋକେ ବିନ୍ତିଅଡ଼୍ଆଃ ରେ କୋଡ୍ରା ରେ ବିଡ଼ାକୋୱାପେ ହାର୍ ମିୟାଃ ସାହାର୍ ଏତେ ଏଟାଃ ସାହାର୍ ହାର୍ ବାଡ଼ା କୋୱାପେ। ଏନାମେନ୍ତେ ଧାର୍ମୀ ହାବିଲ୍ ଏତେ ବିରିକ୍ଯାହ୍ ରାଃ ହୋନ୍ ଜାକାର୍ୟାହ୍ ସାନ୍ତେ, ଅକନ୍ କୋକେ ଆପେ ମାନ୍ଦିର୍ ଆଡୋଃ ବେଦୀ ରାଃ ଥାଲା ରେ ଗୋଏଃ ଲେଦାପେ, ସବେନ୍ ଧାର୍ମୀ ହୋଡ଼ୋକୋୱାଃ ଗୋଏଃ ଅକନାଃ ଅତେ ରେ ହୋବାକାନା ଏନ୍ ସବେନାଃ ରାଃ ଦୋଷ୍ ଆପେୟାଃ ବୋଅ ରେ ଉୟୁଗୋଗା। ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍, ନେ ସବେନ୍ ଗୋଏଃ ରାଃ ଦାଣ୍ଡ୍ ନେ ସାମାୟ୍ ରେନ୍ ହୋଡ଼ୋକୋ ରେ ହିଜୁଗା। “ହେ ୟୀରୁଶାଲେମ୍ ରେନ୍ ହୋଡ଼ୋକୋ, ହେ ୟୀରୁଶାଲେମ୍ ରେନ୍ ହୋଡ଼ୋକୋ, ଆପେ ନାବୀ କୋକେ ଗୋଏଃ କୋୱାପେ, ହାର୍ ଅକନ୍‍କୋ ଆପେତାଃ କୁଲ୍ ଲେନାକୋ, ଇନ୍‍କୁୱାଃ ରେ ଦିରି ଥେର୍ ୟାପେ। ଚିମିନ୍ ଥର୍ ଇଙ୍ଗ୍ ସାନାଙ୍ଗ୍ କେଦାଇଙ୍ଗ୍ ଚି ଚିଲ୍‍କା ସିମ୍ ଆଜାଃ ହୋନ୍ କୋକେ ଆଜାଃ ଆପ୍‍ରୋବ୍ ଥାଲା ରେ ବାଞ୍ଚାଅ ୟାଏ, ଏନ୍‍ଲେକାଗି ଇଙ୍ଗ୍ ହଗି ଆପେକେ ହୁଣ୍ତି କୋୱାଇଙ୍ଗ୍, ମେନ୍ଦୋ ଆପେ କାପେ ସାନାଙ୍ଗ୍ କେଦା। ନେଲେପେ, ଆପେୟାଃ ଅଡ଼୍ଆଃ ଆପେୟାଃ ଲାଗିନ୍ ଉଜ୍ଡ଼ାଅ ବାଗିୟଃ ତାନା। ଚିୟାଃଚି ଇଙ୍ଗ୍ ଆପେକେ କାଜିତାନିଙ୍ଗ୍ ଚି ନାଆ ଏତେ ଚିମିନ୍ ସାନ୍ତେ ଆପେ କାପେ କାଜିୟା, ‘ଧାନ୍ୟା ତାନିଃ ଇନିଃ, ଅକନିଃ ପ୍ରାଭୁ ରାଃ ନୁତୁମ୍ ତେ ହିଜୁଃ ତାନାଏ’ ଏନ୍ ସାନ୍ତେ ଆପେ ଇଙ୍ଗ୍‍କେ ଆଡୋଃ ଚିଉଲା ହ କାପେ ନେଲିଙ୍ଗ୍‍ୟା।” ଚିମ୍ତାଙ୍ଗ୍ ୟୀଶୁ ମାନ୍ଦିର୍ ଏତେ ଅଡୋଙ୍ଗ୍ କେତେ ସେନୋଃ ତାଇନାଏ, ଦୋ ଇନିଜାଃ ଚେଲାକୋ ମାନ୍ଦିର୍ ଚିଲ୍‍କା ବାଇୟାକାନା ଏନାକେ ଦେଖାଅ ଲାଗିନ୍ ଇନିଜାଃ ନାଡ଼େଏ ହିଜୁଃ ଲେନାକୋ। ଇନିଃ ଇନ୍‍କୁକେ କାଜିୟାଃକୋୱାଏ, “ଆପେ ନେୟା ସବେନାଃ ନେଲ୍ ତାନାପେ ଦୋ! ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍, ନେତାଃ ଦିରି ଚେତାନ୍ ଦିରି ତିରିଙ୍ଗ୍‍କାନ୍ ହଗି କା ତାଇନୋଗା ସବେନାଃ ଧାଶୁଡ଼୍ ଅଗା।” ଚିମ୍ତାଙ୍ଗ୍ ଇନିଃ ଜାଏତୁନ୍ ଦାରୁ ବୁରୁ ଚେତାନ୍ ରେ ଦୁବ୍ ଲେନ୍ ତାଇନାଏ, ଦୋ ଚେଲାକୋ ଏସ୍କାର୍ ରେ ଇନିଃତାଃ ହିଜୁଃକେତେ କାଜିକେଦାକୋ, “ଆଲେକେ ଉଦୁବାଲେମ୍ ଚି ନେ କାଜିକୋ ଚିଉଲା ହୋବାୱା? ଆମାଃ ହିଜୁଃ ରାଃ ହାର୍ ଅତେଦିଶୁମ୍ ରାଃ ଟୁଣ୍ଡୁ ରାଃ ଚିକାନ୍ ଚିହ୍ନା ହୋବାଅଃୱା?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ହୋସିଆର୍ ତାଇନ୍‍ପେ! ଜେତାଏ ତେ ଆଲୋପେ ହିଡ଼୍ଅଃୱା। ଚିୟାଃଚି ମିଃଥିମ୍ବା ହୋଡ଼ୋକୋ ନେଲେକା ହୋବାଅଃୱାକୋ ଅକନ୍‍କୋ ଇଙ୍ଗ୍ଆଃ ନୁତୁମ୍ ତେ ହିଜୁଃ କେତେ କାଜିୟାକୋ, ‘ଇଙ୍ଗ୍ ମାସୀହ୍ ତାନିଙ୍ଗ୍,’ ହାର୍ ମିଃଥିମ୍ବା ହୋଡ଼ୋକୋକେ ହିଡ଼୍ ତାକୋୱାକୋ। ଆପେ ଲାଡ଼ାଇ ହାର୍ ଲାପ୍ଡ଼ାଇ ରାଃ ବିଷାୟ୍ ଆୟୁମ୍ ୟାପେ, ଦୋ ଆଲୋପେ ଘାବ୍ରାଅଃୱା ଚିୟାଃଚି ନେ ସବେନାଃ ଜାଲେକାତେ ଗି ହୋବାଅଃୱା, ମେନ୍ଦୋ ଏନ୍ ସାମାୟ୍ କା ଟୁଣ୍ଡୁଅଗା। ଚିୟାଃଚି ଜାତି ବିରୋଧ୍ ରେ ଜାତି ହାର୍ ରାଇଜ୍ ବିରୋଧ୍ ରେ ରାଇଜ୍ ବିରିଦୋଗା, ହାର୍ ଜାଗା ଜାଗାକୋ ରେ ଆକାଲ୍ ହୋବାଅଃୱା ହାର୍ ଅତେହିଲାଅ ହୋବାୱା। ନେ ସବେନ୍ କାଜିକୋ ଦୁକୁ କୋରାଃ ଏନେଟେଃ ହୋବାଅଃୱା। ଏନ୍ତେ ଆପେକେ ବିରୋଧ୍‍ତାନ୍ ହୋଡ଼ୋକୋ ଦୁକୁ ଏମ୍ ଲାଗିନ୍ ଆପେକେ ସାବ୍ ପେୟାକୋ, ହାର୍ ବିଡ଼ାଗୋଏଃ ପେୟାକୋ, ହାର୍ ଆପେ ଇଙ୍ଗ୍ଆଃ ରେ ବିଶ୍ଵାସ୍ ତାନାପେ ଏନାମେନ୍ତେ ସବେନ୍ ଜାତି ରେନ୍ ହୋଡ଼ୋକୋ ଖିସ୍ ପେୟାକୋ। ଏନ୍ ସାମାୟ୍ ରେ ମିଃଥିମ୍ବା ହୋଡ଼ୋକୋ ଇଙ୍ଗ୍ଆଃ ରେ ବିଶ୍ଵାସ୍ ଲାଗିନ୍ ବାଗେ ୟାକୋ ହାର୍ ମିହୋଡ଼୍ ଏଟାଃନିଃ କେ ସାବ୍ ରିକାୟିୟାକୋ ହାର୍ ମିହୋଡ଼୍ ଏଟାଃନିଃ ଲୋଃ ଖିସ୍ ମାଣ୍ଡାଅୟାକୋ। ଥିମ୍ବାଗି ହିହିଡ଼୍ ନାବୀ କୋ ଅଡୋଙ୍ଗୋୱାକୋ ହାର୍ ଥିମ୍ବାଗି ହୋଡ଼ୋକୋକେ ହିଡ଼୍ ତାକୋୱାକୋ। ଆଡୋଃ ଆଧାର୍ମ୍ ପୋଷାଅଃ ରାଃ ଚାଲ୍ତେ ମିହୋଡ଼୍ ଏଟାଃନିଃ କେ ଦୁଲାଡ଼୍ ରିକା ବାନ୍ଦ୍‍ୟାକୋ। ମେନ୍ଦୋ ଅକଏ ଆଜାଃ ଜୀଦାନ୍ ରାଃ ଟୁଣ୍ଡୁ ସାନ୍ତେ ଇଙ୍ଗ୍ଆଃ ରେ ବିଶ୍ଵାସ୍ ମାଣ୍ଡାଅ ୟାଏ, ଇନିଃ ବାଞ୍ଚାଅଃ ୱାଏ। ଆଡୋଃ ରାଇଜ୍ ରାଃ ନେ ସୁସାମାଚାର୍ ସବେନ୍ ଅତେଦିଶୁମ୍ ରେ ପାର୍ଚାର୍ ହୋବାଅଃୱା, ଏନାତେ ସବେନ୍ ଜାତି ରେନ୍ ହୋଡ଼ୋକୋ ନେୟା କେ ଗ୍ରାହାନେ ଲାଗିନ୍ ମାଉକା ନାମେୟାକୋ, ଏନ୍ତେ ଟୁଣ୍ଡୁ ହିଜୁଃ କେନୋଗା।” ଏନାମେନ୍ତେ, ଚିମ୍ତା ଆପେ ଏନ୍ ହିଲାଙ୍ଗ୍ ହୋଡ଼ କେ ୟୀରୁଶାଲେମ୍ ସାହାର୍ ରାଃ ପାବିତାର୍ ଜାଗା ରେ ତିଙ୍ଗୁକାନ୍ ନେଲିୟାପେ, ଅକନିଜାଃ ବିଷାୟ୍ ରେ ଦାନିୟେଲ୍ ନାବୀ ରାଃ ହୋରାତେ ପାର୍ମେଶ୍ଵାର୍ କାଜିଲେଦାଏ (ଅକଏ ପାଢ଼ାୱାଏ ଇନିଃ ବୁଝାଅଃ କାଏ), ଏଣ୍ଡେ ଅକନ୍‍କୋ ୟାହୁଦୀୟା ଜିଲ୍ଲା ରେ ତାଇନାକୋ ଇନ୍‍କୁ ବୁରୁ ଚେତାନ୍ ତେ ସେନୋଃ କାକୋ। ଅକଏ ଛାତ୍ ରେ ମେନାଇଜା, ଇନିଃ ଆଜାଃ ଅଡ଼୍ଆଃ ତେ ଜାହାନାଃ ଇଦି ଲାଗିନ୍ ଲାଥାର୍ ଆଲୋକାଏ ଆଡ଼୍‍ଗୁନ୍ କାଏ, ହାର୍ ଅକଏ କାମିପୀଡ଼ି ରେ ମେନାଇଜା, ଇନିଃ ଆଜାଃ ଲିଜାଃ ଇଦି ଲାଗିନ୍ ଦୋୟାତେ ଆଲୋକାଏ ରୁଆଡ଼୍ କା। “ଏନ୍ ହୁଲାଙ୍ଗ୍ କୋରେ ବୋରୋୱାନ୍ ସାମାୟ୍ ତାଇନୋଗା, ଅକନ୍ କୁଡ଼ିକୋ ହୋଡ଼ମୋ ରେ ତାଇନାକୋ ହାର୍ ଅକନ୍‍କୋ ଆକୋୱାଃ ହୋନ୍ କୋକେ ତୱା ଆନୁ କାତେୟାକୋ, ହାୟ୍! ଇନ୍‍କୁ ଲାଗିନ୍ ଜୀଦାନ୍ ବାଞ୍ଚାଅ କେଟେଃ ହୋବାଅଃୱା! ବିନ୍ତି କାତେପେ ଚି ଆପେକେ ରାବାଙ୍ଗ୍ ସାମାୟ୍ ରେ ୟାଦୋ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ନୀନିର୍ କାପାଡ଼ାଅଃକା। ଚିୟାଃଚି ଏନ୍ ସାମାୟ୍ ରେ ନେଲେକା ଥିମ୍ବାଗି ଦୁକୁ ହୋବାଅଃୱା, ଅତେଦିଶୁମ୍ ରାଃ ଏନେଟେଃ ଏତେ ହୋଡ଼ୋକୋ ନାଆ ସାନ୍ତେ ଏନ୍‍ଲେକା ଦୁକୁ ରାଃ ସାମ୍‍ନାଙ୍ଗ୍ କାକୋ ରିକା କାଦା, ହାର୍ ନା ଚିଉଲା ହ ରିକା ୟାକୋ। ଆଗାର୍ ଏନ୍ ହୁଲାଙ୍ଗ୍‍କୋ କା ହୁଡିଙ୍ଗୋଃ ତେୟାଃ ଏଣ୍ଡେ ଜେତାଏ କାକୋ ବାଞ୍ଚାଅଃ ତେୟାଃ, ମେନ୍ଦୋ ସାଲାକାନ୍ କୋୱାଃ ଚାଲ୍ତେ ଏନ୍ ହୁଲାଙ୍ଗ୍ କୋ ହୁଡିଙ୍ଗ୍ଅଗା। ଏନ୍ ସାମାୟ୍ ଆଗାର୍ ଜେତାଏ ଆପେକେ କାଜିୟାକୋ, ‘ନେଲିପେ, ମାସୀହ୍ ନିଈଗି ତାନିଃ!’ ୟାଦୋ ‘ନେଲିପେ, ହେନ୍ତାଃ ରେ ମେନିଜା!’ ଦୋ ଆଲୋପେ ବିଶ୍ୱାସେୟା।” “ଚିୟାଃଚି ହିହିଡ଼୍ ମାସୀହ୍ ହାର୍ ହିହିଡ଼୍ ନାବୀ କୋ ହିଜୁଗାକୋ ହାର୍ ମାପ୍‍ରାଙ୍ଗ୍ ଚିହ୍ନା ହାର୍ ଆକ୍‍ଦାନ୍ଦା କାମି ଦେଖାଅୟାକୋ ଚି ଆଗାର୍ ହୋବା ଧାଡ଼ିୟୋଃୱା ରେଦୋ ସାଲାକାନ୍ କୋକେ ହଗି ହିଡ଼୍ ତାକୋୱାକୋ। ନେଲେପେ, ଇଙ୍ଗ୍ ସିଦା ଏତେ ଗି ଆପେକେ ନେୟା ସବେନାଃ କାଜି ଛାବା ତାଦାଇଙ୍ଗ୍। ଏନା ଲାଗିନ୍ତେ ଆଗାର୍ ଇନ୍‍କୁ ଆପେକେ କାଜିପେୟାକୋ, ‘ନେଲେପେ, ଇନିଃ ସୁନ୍‍ସାନ୍ ଜାଗା ରେ ମେନିଜା,’ ଏଣ୍ଡେ ବାହାରି ଆଲୋପେ ଅଡୋଙ୍ଗା, ୟାଦୋ ‘ନେଲେପେ, ଇନିଃ କୋଠୋରୀ ରେ ମେନିଜା,’ ଏଣ୍ଡେ ଆଲୋପେ ବିଶ୍ୱାସେୟା।” “ଚିୟାଃଚି ଜେଲେକା ବିଜ୍‍ଲୀ ପୁରାବ୍ ତେ ଅଡୋଙ୍ଗ୍ କେତେ ପାଶ୍ଚିମ୍ ସାନ୍ତେ ଚାମ୍‍କାଅଃୱା, ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ହିଜୁଃ ଇମ୍ତା ଅଗି ଏନ୍‍ଲେକାଗି ହୋବାଅଃୱା। ଅକ୍ତାଃରେ ପାଶୁ କୋୱାଃ ମାଣା ତାଇନା ଏନ୍ତାଃରେ ଗିଦି କୋ ହୁଣ୍ଡି ଅଗାକୋ।” ଏନ୍ ହୁଲାଙ୍ଗ୍ କୋରେ ଦୁକୁ ତାୟୋମ୍ତେ ଇମ୍ତାଗି ଶିଙ୍ଗି ନୁବାଃ କେନୋଗା, ହାର୍ ଚାଣ୍ଡୁଃ ମାସ୍କାଲ୍ କାଏ ଏମେୟାଏ ହାର୍ ଇପିଲ୍ କୋ ରିମିଲ୍‍ଦିଶୁମ୍ ଏତେ ଉୟୁଗୋଗା ହାର୍ ରିମିଲ୍‍ଦିଶୁମ୍ ରାଃ ପେଡ଼େଏ କୋ ହିଲାଅଗା। ଏନ୍ତେ ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ଚିହ୍ନା ରିମିଲ୍‍ଦିଶୁମ୍ ରେ ନେଲୋଗା, ଆଡୋଃ ଇମ୍ତା ଅତେ ରେନ୍ ସବେନ୍ କିଲି ରେନ୍ ହୋଡ଼ୋକୋ ଦୁକୁ ଅଗାକୋ, ଆଡୋଃ ଇଙ୍ଗ୍ ମାନ୍‍ୱା ରାଃ ହୋନ୍ କେ ମାରାଙ୍ଗ୍ ପେଡ଼େଏ ଲୋଃ ହାର୍ ମାରାଙ୍ଗ୍ ଯୁନୁଲ୍‍ତାନ୍ ଲୋଃ ରିମିଲ୍‍ଦିଶୁମ୍ ରାଃ ରିମିଲ୍ ରେ ହିଜୁଃ ତାନ୍ ନେଲିଙ୍ଗ୍‍ୟାକୋ। ଇଙ୍ଗ୍ ତୁର୍ହୀ ରାଃ ମାରାଙ୍ଗ୍ ଷାଡି ଲୋଃ ଇଙ୍ଗ୍ଆଃ ସିର୍ମାଦାସୀ କୋକେ କୁଲ୍ କୋୱାଇଙ୍ଗ୍, ଆଡୋଃ ଇନ୍‍କୁ ରିମିଲ୍‍ଦିଶୁମ୍ ରାଃ ନେ ଟୁଣ୍ଡୁ ଏତେ ହାନ୍ ଟୁଣ୍ଡୁ ସାନ୍ତେ ଚାଇରୋ ଦିଶା ଏତେ ଆଜାଃ ସାଲାକାନ୍ କୋକେ ହୁଣ୍ତି କୋୱାକୋ। “ଲୋୱା ଦାରୁ ଏତେ ନେ ଜୋନୋକା ସିଖାୱନ୍ ପେ, ଚିମ୍ତାଙ୍ଗ୍ ଏଣ୍ଡେରାଃ କୋତୋକୋ ସାଗେନୋଃ ୱା ଆଡୋଃ ସାକାମ୍ କୋ ସୁଡ଼ାଅଃ ୱା; ଦୋ ଆପେ ସାରିକେୟାପେ ଚି ଶିତୁମ୍ ସାମାୟ୍ ନାଡ଼େଏ ଗିୟା। ନେଲେକାଗି ଚିମ୍ତାଙ୍ଗ୍ ଆପେ ଏନ୍ କାଜିକୋ ଅକନାଃ ଆପେକେ କାଜିୟାଃ ପେୟାଇଙ୍ଗ୍ ହୋବାଅଃତାନ୍ ନେଲେୟାପେ, ଦୋ ସାରିକେପେ, ଚି ଇନିଃ ନାଡ଼େଏ ରେ ଗିୟାଏ, ମେନ୍ଦୋ ଦୁହାର୍ ତାଃ ରେ ଗିୟାଏ। ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଚି ଚିମିନ୍ ସାନ୍ତେ ନେ କାଜିକୋ କାପୁରାଅଃୱା, ଏନ୍ ସାନ୍ତେ ନେ ପିଢ଼ୀ ରେନ୍ ହୋଡ଼ୋକୋ ରାଃ ଟୁଣ୍ଡୁ କା ହୋବାଅଃୱା। ରିମିଲ୍‍ଦିଶୁମ୍ ଆଡୋଃ ଅତେ ଛାବା କେନୋଗା ମେନ୍ଦୋ ଇଙ୍ଗ୍ଆଃ କାଜି ଚିଉଲା ହ କାଛାବାଅଃୱା।” ଏନ୍ ହୁଲାଙ୍ଗ୍ ହାର୍ ଏନ୍ ସାମାୟ୍ ରାଃ ବିଷାୟ୍ ରେ ଅକଏ ହଗି କାଏ ସାରିୟାଏ, ନାଦୋ ସିର୍ମାଦାସୀ ହାର୍ ନାଦୋ ଇଙ୍ଗ୍ ପାର୍ମେଶ୍ଵାର୍ ରାଃ ହୋନ୍‍କଡ଼ା ମେନ୍ଦୋ ଖାଲି ଆପୁ ଏନ୍ ହୁଲାଙ୍ଗ୍ ହାର୍ ସାମାୟ୍ କେ ସାରିୟାଏ। ଜେଲେକା ନୁହ୍ ରାଃ ହୁଲାଙ୍ଗ୍ ରେ ତାଇକେନା, ଏନ୍‍ଲେକାଗି ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ହିଜୁଃ ଇମ୍ତା ହଗି ହୋବାଅଃୱା। ଚିୟାଃଚି ଜେଲେକା ଦାଆ-ବାଇଡ଼୍ ରାଃ ସିଦା ହୁଲାଙ୍ଗ୍ ରେ, ଅକୋ ହୁଲାଙ୍ଗ୍ ସାନ୍ତେ ଚି ନୁହ୍ ଜାହାଜ୍ ରେ କାଏ ରାକାବ୍ ଲେନ୍ ତାଇନାଏ, ଏନ୍ ହୁଲାଙ୍ଗ୍ ସାନ୍ତେ ହୋଡ଼ୋକୋ ଜୋମ୍-ନୁ ତାଇକେନାକୋ, ଆଡୋଃ ଇନ୍‍କୁରେ ଆଣାଦୀ ହାର୍ ଗୋଙ୍ଗ୍‍ ହୋବାଅଃ ତାଇକେନା। ହାର୍ ଚିମ୍ତା ସାନ୍ତେ ଦାଆ-ବାଇଡ଼୍ ହିଜୁଃକେତେ ଏନ୍ ସବେନ୍ କୋକେ ଆଉରି ଆତୁ ଇଦି ସାନ୍ତେ ଇନ୍‍କୁକେ ଜେତ୍ନାଃ କା ସାରିଜାନା, ଏନ୍‍ଲେକା ଗି ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ହିଜୁଃ ଇମ୍ତା ହଗି ହୋବାଅଃୱା। ଏନ୍ ସାମାୟ୍ ରେ ବାର୍ ହୋଡ଼ କିନ୍ ଲୋୟୋଙ୍ଗ୍ ରେ ତାଇନାକିନ୍ ମେନ୍ଦୋ ମିହୋଡ଼୍ ଇଦିୟୋଗାଏ ଆଡୋଃ ଏଟାଃ ନିଈ ବାଗେ କେନୋଗାଏ। ବାର୍ହୋଡ଼୍ କୁଡ଼ିକିନ୍ ଚାକି ବିୟୁର୍ କାତେୟାକିନ୍, ମିହୋଡ଼୍ ଇଦିୟୋଗାଏ ହାର୍ ଏଟାଃ ନିଈ ବାଗିକେନୋଗାଏ। ଏନାଲାଗିନ୍ତେ ଏୟୋନ୍‍କାନ୍ ତାଇନ୍‍ପେ, ଚିୟାଃଚି ଆପେ କାପେ ସାରିତାନା ଚି ଆପେୟାଃ ପ୍ରାଭୁ ଇଙ୍ଗ୍ ଅକନ୍ ହୁଲାଙ୍ଗ୍ ହିଜୁଗାଇଙ୍ଗ୍। ମେନ୍ଦୋ ନେୟା ସାରିକେପେ ଚି ଆଗାର୍ ଅଡ଼୍ଆଃ ରେନ୍ ଗୋମ୍‍କେ ସାରିତେୟାଃଏ ଚି ଚୋର୍ହା ଅକନ୍ ସାମାୟ୍ ରେ ହିଜୁଗାଏ ଦୋ ଏୟୋନ୍‍କାନ୍ ତାଇନୋଃତେୟାଏ, ହାର୍ ଆଜାଃ ଅଡ଼୍ଆଃ ରେ ବୋଲୋ କାଏ ରିକା ତେୟାଃଏ। ଏନାଲାଗିନ୍ତେ ଆପେ ହଗି ସେକାଡ଼୍‍କାନ୍ ତାଇନୋଃପେ, ଚିୟାଃଚି ଅକନ୍ ସାମାୟ୍ ରାଃ ବିଷାୟ୍ ରେ ଆପେ କାପେ ପାହୋମ୍ କାତେୟା, ଏନ୍ ସାମାୟ୍ ରେ ଇଙ୍ଗ୍ ମାନ୍‍ୱା ରାଃ ହୋନ୍ ହିଜୁଃ କେନୋଗାଇଙ୍ଗ୍। ଏନାତେ ଏନ୍ ବିଶ୍ଵାସେଲେକାନିଃ ହାର୍ ସେଣାନ୍ ଦାସୀ ଅକଏ ତାନିଃ, ଅକନିଃକେ ଗୋମ୍‍କେ ଆଜାଃ ଅଡ଼୍ଆଃ ରେନ୍ ଦାସୀକୋୱାଃ ଚେତାନ୍ ରେ ମୁଖିୟା ତିଙ୍ଗୁ କିଜାଏ ଚି ସାମାୟ୍ ରେ ଇନ୍‍କୁକେ ଜୋମେୟାଃ ଏମାକୋୱାଏ? ଧାନ୍ୟା ଏନ୍ ଦାସୀ ତାନିଃ, ଅକନିଃକେ ଇନିଜାଃ ଗୋମ୍‍କେ ହିଜୁଃକେତେ ଏନ୍‍ଲେକାଗି ରିକାତାନ୍ ନାମିୟାଏ। ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍, ଇନିଃ ଆଏଃକେ ଆଜାଃ ସବେନ୍ ସାମ୍ପାତି ଚେତାନ୍ ରେ ଆଧିକାରୀ ବାଇୟାଏ। ମେନ୍ଦୋ ଆଗାର୍ ଏନ୍ ଦୁଷ୍ଟ ଦାସୀ ପାହୋମେ ୟାଏ ଚି ଇଙ୍ଗ୍ଆଃ ଗୋମ୍‍କେ ରାଃ ହିଜୁଃ ରେ ଦେରି ମେନାଃ, ହାର୍ ଆଜାଃ ଗାତି ଦାସୀକୋକେ ବିଡ଼ା ଏଟେଃ କୋୱାଏ, ଆଡୋଃ ବୁଲୋଃତାନ୍ ହୋଡ଼ୋ କୋଲୋଃ ଜୋମ୍ ନୁ ୟାଏ। ଏଣ୍ଡେ ଏନ୍ ଦାସୀ ରାଃ ଗୋମ୍‍କେ ଏନ୍ ଲେକା ହୁଲାଙ୍ଗ୍ ରେ ହିଜୁଃ ରୁଆଡ଼ାଏ, ଚିମ୍ତା ଇନିଃ ଇନିଜାଃ ହୋରା କାଏ ନେଲ୍ କାତେୟାଏ, ହାର୍ ଏନ୍ ଲେକାନ୍ ସାମାୟ୍ ଅକଣ୍ତେ ଇନିଃ କାଏ ସାରି କାତେୟାଏ, ଏନ୍ତେ ଇନିଃ ଏନ୍ ଦାସୀ କେ କାଠୋର୍ ଦାଣ୍ଡ୍ ଏମିୟାଏ ହାର୍ ଇନିଜାଃ ହିସା ବେଦାହୋଡ଼ୋକୋ ଲୋଃ ଏମାଇୟାଏ, ଏନ୍ତାଃରେ ରେ ରାଆ ଆଡୋଃ ଡାଟା ରିଦ୍ ହୋବାଅଃୱା। ଏନ୍ତେ ୟୀଶୁ ଆଜାଃ ଚେଲାକୋକେ କାଜିକେଃକୋୱାଏ, ଚିମ୍ତାଙ୍ଗ୍ ଇଙ୍ଗ୍ ମାନ୍‍ୱା ରାଃ ହୋନ୍ ରୁଆଡ଼୍ ହିଜୁଗାଇଙ୍ଗ୍, ଇମ୍ତାଙ୍ଗ୍ ସିର୍ମାଦିଶୁମ୍ ରାଃ ରାଇଜ୍ ଏନ୍‍ଲେକା ହୋବାଅଃୱା: ଦାଶ୍ ଡିଣ୍ଡାକୁଡ଼ିକୋ ତାଇଲେନାକୋ ଅକନ୍‍କୋ ଆକୋୱାଃ ବାତୀ କୋକେ ଇଦିକେତେ ଦୁଲ୍‍ହା କେ ଦାରୋମ୍ ଲାଗିନ୍ତେ ଆଣାଦୀ ଭୋଜ୍ ରେ ସେନ୍ ଲାଗିନ୍ ଅଡୋଙ୍ଗ୍ ଜାନାକୋ। ଇନ୍‍କୁରେ ପାଞ୍ଚ୍ ଡୋଣ୍ଡୋ ଆଡୋଃ ପାଞ୍ଚ୍ ସେଣାନ୍ ତାଇନ୍ କେନାକୋ। ଡୋଣ୍ଡୋକୋ ଆକୋୱାଃ ଲୋଃ ବାତୀ କୋକେ ଦୋ ଇଦି ଲେଦାକୋ, ମେନ୍ଦୋ ଆକୋୱାଃ ଲୋଃ ଥିମ୍ବା ସୁନୁମ୍ କାକୋ ଇଦି ଲେଦା। ମେନ୍ଦୋ ସେଣାନ୍ କୋ ଆକୋୱାଃ ବାତୀ କୋଲୋଃ ଜାର୍କିନ୍ ରେ ସୁନୁମ୍ ହଗି ଫେରେଃ ଇଦିକେଦାକୋ। ମେନ୍ଦୋ ଦୁଲ୍‍ହା କେ ହିଜୁଃ ରେ ଦେରି ହୋବାଜାନା, ଦୋ ଇନ୍‍କୁ ସବେନ୍ କୋ ଝୁପାଅଃ ଏଟେଃ ଜାନାକୋ ହାର୍ ଦୁଣୁମ୍ ଜାନାକୋ। “ଥାଲା ନିଦା ରେ ଥିମ୍ବା ହୋଡ଼ୋକୋୱାଃ କାକ୍‍ଳା ଆୟୁମ୍ ଜାନା, ନେଲେପେ, ଦୁଲ୍‍ହା ହିଜୁଃ ତାନାଏ! ଇନିଃ କେ ଦାରୋମ୍ ଲାଗିନ୍ ଦୋଲା। ଏନ୍ତେ ଇନ୍‍କୁ ସବେନ୍ ଡିଣ୍ଡାକୁଡ଼ିକୋ ବିରିଃ କେତେ ଆକୋୱାଃ ବାତୀ କୋକେ ବାଇରୁଆଡ଼୍ କେଦାକୋ। ହାର୍ ଡୋଣ୍ଡୋକୋ ସେଣାନ୍ କୋକେ କାଜିୟାଃକୋୱାକୋ, ‘ଆପେୟାଃ ସୁନୁମ୍ ଏତେ ହୁଡିଙ୍ଗ୍ ଆଲେକେ ହ ଏମାଲେପେ, ଚିୟାଃଚି ଆଲେୟାଃ ବାତୀ କୋ ଇଣିଜଃ ତାନା।’ ମେନ୍ଦୋ ସେଣାନ୍ କୋ କାଜିରୁଆଡ଼୍ କେଦାକୋ, ‘କାହା, କାହୋବା ଧାଡ଼ିୟୋଃୱା ନେୟା ଆଲେୟାଃ ହାର୍ ଆପେୟାଃ ଲାଗିନ୍ କାପୁରାଅଃୱା; ବେଶ୍ ଦୋ ନେୟା ହୋବାଅଃୱା, ଚି ଆପେ ଆଖ୍ରିଙ୍ଗ୍ ତାନ୍ କୋତାଃ ସେନ୍‍କେତେ ଆପେୟାଃ ଲାଗିନ୍ କିରିଙ୍ଗ୍ ଆଉକେପେ।’ ଚିମ୍ତାଙ୍ଗ୍ ଇନ୍‍କୁ କିରିଙ୍ଗ୍ ଲାଗିନ୍ ସେନ୍ ତାଇକେନାକୋ ଦୋ ଦୁଲ୍‍ହା ହିଜୁଃ ସେଟେର୍ ଜାନାଏ, ହାର୍ ଅକନ୍‍କୋ ସାପ୍ଡ଼ାଅ ଲେନାକୋ, ଇନ୍‍କୁ ଇନିଜାଃ ଲୋଃ ବାଲା ଅଡ଼୍ଆଃ ରେ ବୋଲୋ ଜାନାକୋ ହାର୍ ଦୁହାର୍ ବାନ୍ଦ୍ ରିକାଜାନା। ଏନା ତାୟୋମ୍ତେ ଏଟାଃ ଡିଣ୍ଡାକୁଡ଼ିକୋ ହଗି ରୁଆଡ଼୍ ହିଜୁଃକେତେ ଦୁଲ୍‍ହା କେ ରାଆ-ରାଆ କେତେ କାଜିକେଦାକୋ, ‘ହେ ଗୋମ୍‍କେ, ହେ ଗୋମ୍‍କେ, ଆଲେୟାଃ ଲାଗିନ୍ ଦୁହାର୍ ଖଲାଅ ତାମ୍।’ ଇନିଃ କାଜିରୁଆଡ଼୍ କେଃକୋୱାଏ, ‘ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍, ଇଙ୍ଗ୍ ଆପେକେ କାଇଙ୍ଗ୍ ସାରିୟା।’ ଏନାଲାଗିନ୍ତେ ଏୟୋନ୍‍କାନ୍ ତାଇନ୍‍ପେ, ଚିୟାଃଚି ଆପେ ନାଦୋ ଇଙ୍ଗ୍ଆଃ ହିଜୁଃରୁଆଡ଼୍ ରାଃ ଏନ୍ ହୁଲାଙ୍ଗ୍ କେପେ ସାରିତାନା ନାଦୋ ଏନ୍ ସାମାୟ୍ କେ।” ଆଡୋଃଗି ଚିମ୍ତାଙ୍ଗ୍ ଇଙ୍ଗ୍ ରୁଆଡ଼ାଇଙ୍ଗ୍, ଇମ୍ତା ପାର୍ମେଶ୍ଵାର୍ ରାଃ ରାଇଜ୍ ଏନ୍‍ଲେକା ହୋବାଅଃୱା: ମିୟାଃ ହୋଡ଼ ଅକନିଃ ଏଟାଃ ଦିଶୁମ୍ ସେନୋଃ ସାମାୟ୍ ଆଜାଃ ଦାସୀକୋକେ କେଡ଼ାକେତେ ଆଜାଃ ସାମ୍ପାତି ଇନ୍‍କୁକେ ଜିମା ତାଃ କୋୱାଏ। ଇନିଃ ମିହୋଡ଼୍ କେ ପାଞ୍ଚ୍ ସୋନା ରାଃ ଶିକା, ଏଟାଃନିଃକେ ବାରିୟା, ହାର୍ ତିସ୍ରା ନିଃକେ ମିୟାଃ ସୋନା ରାଃ ଶିକା, ମାନେ ସବେନ୍ କୋକେ ଇନ୍‍କୁୱାଃ ପେଡ଼େଏ ରାଃ ଲେକା ଏମାଃ କୋୱାଏ, ଏନ୍ତେ ଏଟାଃ ଦିଶୁମ୍ ସେନୋଃ ଜାନାଏ। ଏନ୍ତେ, ଅକନିଃକେ ପାଞ୍ଚ୍ ସୋନା ରାଃ ଶିକା ନାମ୍ ଲେନ୍ ତାଇନା, ଇନିଃ ସେକାଡ଼୍ ଗି ସେନ୍ କେତେ ଏନା କୋଏତେ ବେପାର୍ କେଦାଏ ହାର୍ ଆଡୋଃ ପାଞ୍ଚ୍ ସୋନା ରାଃ ଶିକା କାମି କେଦାଏ। ନେଲେକାଗି ଅକନିଃକେ ବାରିୟା ନାମ୍ ଲେନ୍ ତାଇନା, ଇନିଃ ହଗି ଏନା କୋଏତେ ଆଡୋଃ ବାରିୟା କାମି କେଦାଏ। ମେନ୍ଦୋ ଅକନିଃକେ ମିୟାଃ ନାମ୍ ଲେନ୍ ତାଇନା, ଇନିଃ ସେନ୍ କେତେ ହାସା ଉର୍ କେଦାଏ ହାର୍ ଆଜାଃ ଗୋମ୍‍କେ ରାଃ ଟାକା କେ ଉକୁ ତୋପା ତାଦାଏ। “ଚିମିନ୍ ଦିନ୍ ରାଃ ଫାରୋମ୍ ତାୟୋମ୍ତେ ଏନ୍ ଦାସୀ କୋୱାଃ ଗୋମ୍‍କେ ହିଜୁଃକେତେ ଇନ୍‍କୁ ଏତେ ହିସାବ୍ ଇଦିକେଦାଏ। ଅକନିଃକେ ପାଞ୍ଚ୍ ସୋନା ରାଃ ଶିକା ନାମ୍ ଲେନ୍ ତାଇନା ଇନିଃ ପାଞ୍ଚ୍ ସୋନା ରାଃ ଶିକା ଆଡୋଃ ଆଉକେତେ କାଜିକେଦାଏ, ‘ହେ ଗୋମ୍‍କେ, ଆମ୍ ଇଙ୍ଗ୍‍କେ ପାଞ୍ଚ୍ ସୋନା ରାଃ ଶିକା ଜିମା ଲେଦିଙ୍ଗାମ୍, ନେଲେମେ, ଇଙ୍ଗ୍ ପାଞ୍ଚ୍ ସୋନା ରାଃ ଶିକା ଆଡୋଃ କାମି କେଦାଇଙ୍ଗ୍।’ ଇନିଜାଃ ଗୋମ୍‍କେ ଇନିଃକେ କାଜିକେଦାଏ, ‘ବାହୁତ୍ ବେଶ୍, ହେ ବୁଗିନ୍ ହାର୍ ବିଶ୍ଵାସେଲେକାନିଃ ଦାସୀ ଆମ୍ ହୁଡିଙ୍ଗ୍ ଟାକା ରେ ବିଶ୍ଵାସେଲେକାନିଃ ବାଇଜାନାମ୍, ଇଙ୍ଗ୍ ଆମ୍‍କେ ଥିମ୍ବାଗି ଜିନିଷ୍‍କୋ ରାଃ ଆଧିକାରୀ ବାଇମେୟାଇଙ୍ଗ୍। ହିଜୁଃମେ ଆମାଃ ଗୋମ୍‍କେ ରାଃ ରାଶିକା ରେ ରାଶିକାନ୍ ମେ।’ ଆଡୋଃ ଅକନିଃ କେ ବାରିୟା ନାମ୍ ଲେନ୍ ତାଇନା, ଇନିଃ ହଗି ହିଜୁଃକେତେ କାଜିକେଦାଏ, ‘ହେ ଗୋମ୍‍କେ ଆମ୍ ଇଙ୍ଗ୍‍କେ ବାରିୟା ସୋନା ରାଃ ଶିକା ଜିମା ଲେଦିଙ୍ଗାମ୍, ନେଲେମ୍, ଇଙ୍ଗ୍ ବାରିୟା ସୋନା ରାଃ ଶିକା ଆଡୋଃ କାମି କେଦାଇଙ୍ଗ୍।’ ଇନିଜାଃ ଗୋମ୍‍କେ ଇନିଃକେ କାଜିକେଦାଏ, ‘ବାହୁତ୍ ବେଶ୍, ହେ ବୁଗିନ୍ ହାର୍ ବିଶ୍ଵାସେଲେକାନିଃ ଦାସୀ ଆମ୍ ହୁଡିଙ୍ଗ୍ ଟାକା ରେ ବିଶ୍ଵାସେଲେକାନିଃ ବାଇଜାନାମ୍, ଇଙ୍ଗ୍ ଆମ୍‍କେ ଥିମ୍ବାଗି ଜିନିଷ୍‍କୋ ରାଃ ଆଧିକାରୀ ବାଇମେୟାଇଙ୍ଗ୍। ହିଜୁଃମେ ଆମାଃ ଗୋମ୍‍କେ ରାଃ ରାଶିକା ରେ ରାଶିକାନ୍ ମେ।’ ଏନ୍ତେ ଅକନିଃକେ ମିୟାଃ ସୋନା ରାଃ ଶିକା ନାମ୍ ଲେନ୍ ତାଇନା, ଇନିଃ ହିଜୁଃକେତେ କାଜିକେଦାଏ, ‘ହେ ଗୋମ୍‍କେ ଆମ୍ କାଠୋର୍ ହୋଡ଼ ତାନ୍‍ମେ, ଆମ୍ ଅକତାଃରେ କାମ୍ ହେରେୟା ଏନ୍ତାଃରେ ଇରେ ୟାମ୍, ହାର୍ ଅକତାଃରେ କାମ୍ ତାସୀ କାଃ ଏନ୍ତାଃ ତେ ହୁଣ୍ତି ୟାମ୍। ଆଗାର୍ ଇଙ୍ଗ୍ ଆମାଃ ଟାକା କେ ଆଃ ତାତିଇଙ୍ଗ୍ ରେଦୋ ଆମ୍ ଇଙ୍ଗ୍ କେ ଦାଣ୍ଡ୍ ଏମାଇଙ୍ଗ୍ ତେୟାଃମ୍। ଏନାମେନ୍ତେ ଇଙ୍ଗ୍ ବୋରୋ ଜାନାଇଙ୍ଗ୍ ହାର୍ ସେନ୍ କେତେ ଆମାଃ ସୋନା ରାଃ ଶିକା କେ ହାସା ରେ ଉକୁ ତୋପା ତାଦାଇଙ୍ଗ୍। ନେଲେମ୍, ଅକନାଃ ଆମାଃ ତାନାଃ, ଏନା ନେୟା ତାନାଃ।’ ଇନିଜାଃ ଗୋମ୍‍କେ ଇନିଃକେ କାଜିରୁଆଡ଼୍ କିଜାଏ, ‘ହେ ବାଦ୍‍ମାସ୍ ହାର୍ କୋଢ଼ିୟା ଦାସୀ, ଚିମ୍ତାଙ୍ଗ୍ ଆମ୍ ନେୟା ସାରି ତାଇନାମ୍ ଚି ଅକତାଃରେ ଇଙ୍ଗ୍ କାଇଙ୍ଗ୍ ହେରେୟା ଏନ୍ତାଃ ଏତେ ଇରେ ୟାଇଙ୍ଗ୍, ହାର୍ ଅକତାଃ ରେ ଇଙ୍ଗ୍ କାଇଙ୍ଗ୍ ତାସୀୟା ଏନ୍ତାଃ ଏତେ ହୁଣ୍ତି ୟାଇଙ୍ଗ୍। ଏଣ୍ଡେ ଆମ୍‍କେ ବୁଗିନ୍ ତାଇକେନା, ଚି ଇଙ୍ଗ୍ଆଃ ପାଇସା କେ ବେଙ୍କ୍ ରେ ମାଣ୍ଡାଅ ଲେନ୍ତେୟାମ୍, ଏନ୍ତେ ଇଙ୍ଗ୍ ହିଜୁଃକେତେ ଇଙ୍ଗ୍ଆଃ ଟାକା ସୁଧ୍ ସାହିତ୍ ଇଦି ତେୟାଃଇଙ୍ଗ୍।’ ଏନ୍ତେ ଗୋମ୍‍କେ ଆଜାଃ ଏଟାଃ ଦାସୀ କୋକେ କାଜିୟାଃକୋୱାଏ, ଏନ୍ ସୋନା ରାଃ ଶିକା ଇନିଜାଃ ଏତେ ଇଦିକେପେ, ହାର୍ ଅକନିଃ ତାଃ ରେ ଦାଶ୍ ସୋନା ରାଃ ଶିକା ମେନାଃ, ଇନିଃକେ ଏମାଇପେ। ଚିୟାଃଚି ଅକଏ ତାଃ ରେ ମେନାଃ ଇନିଃକେ ଆଡୋଃ ଥିମ୍ବା ଏମୋଗା, ହାର୍ ଇନିଃତାଃ ରେ ମିଃଥିମ୍ବା ହୋବାଅଗା, ମେନ୍ଦୋ ଅକଏ ତାଃ ରେ ବାନୋଗା, ଇନିଃତେ ଏନ୍ ହୁଡିଙ୍ଗ୍ ତେୟାଃ ଅଗି ଅକନାଃ ଇନିଜାଃ ତାଃ ରେ ମେନାଃ ଇଦିୟୋଗା। ନେ କୋଢ଼ିୟା ଦାସୀ କେ ବାହାରି ରାଃ ନୁବାଃରେ ଦୁଡ଼ିଙ୍ଗ୍ ତାଇପେ, ଅକତାଃରେ ରାଆ ହାର୍ ଡାଟା ରିଦ୍ ହୋବାୱା।” “ଚିମ୍ତାଙ୍ଗ୍ ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ମାନାରାଙ୍ଗ୍ ରେ ହିଜୁଗାଇଙ୍ଗ୍ ହାର୍ ସବେନ୍ ସିର୍ମାଦାସୀକୋ ଇଙ୍ଗ୍ଆଃ ଲୋଃ ହିଜୁଗାକୋ, ଇମ୍ତା ଇଙ୍ଗ୍ ଇଙ୍ଗ୍ଆଃ ମାନାରାଙ୍ଗ୍ ରାଃ ସିଂହାସାନ୍ ରେ ସବେନ୍ ହୋଡ଼ୋକୋକେ ବିଚାର୍ ରିକା ଲାଗିନ୍ ଦୁବାଇଙ୍ଗ୍। ଏନ୍ତେ ସବେନ୍ ଜାତିକୋ ଇଙ୍ଗ୍ଆଃ ନାଡ଼େଏ ରେ ହୁଣ୍ଡିୟଗାକୋ ହାର୍ ଚିଲ୍‍କା ଗୁପୀନିଃ ମିଣ୍ଡୀ କୋକେ ମେରୋମ୍ କୋଏତେ ଆଲାଗ୍ କୋୱାଏ, ଏନ୍‍ଲେକାଗି ଇଙ୍ଗ୍ ଇନ୍‍କୁକେ, ମିହୋଡ଼୍ କେ ଏଟାଃନିଃ ତେ ଆଲାଗ୍ ତାୟିଙ୍ଗ୍। ଇଙ୍ଗ୍ ଧାର୍ମୀକୋକେ ମିଣ୍ଡୀକୋ ଲେକା ଇଙ୍ଗ୍ଆଃ ଜୋମ୍ ପାଡ଼୍ ରେ ହାର୍ ଆଧାର୍ମୀ କୋକେ ମେରୋମ୍ କୋ ଲେକା ଲେଙ୍ଗା ପାଡ଼୍ ରେ ତିଙ୍ଗୁକୋୱାଇଙ୍ଗ୍। ଏନ୍ତେ ଇଙ୍ଗ୍ ରାଜା ଇଙ୍ଗ୍ଆଃ ଜୋମ୍ ପାଡ଼୍ ରେନ୍ କୋକେ କାଜିୟା କୋୱାଇଙ୍ଗ୍, ‘ହେ ଇଙ୍ଗ୍ଆଃ ଆପୁ ଏତେ ଆଶିଷ୍ ନାମେକାନ୍ ହୋଡ଼ୋକୋ, ହିଜୁଃପେ, ଏନ୍ ରାଇଜ୍ ରାଃ ଆଧିକାରୀ ହୋବାୱାପେ, ଅକନାଃ ଅତେଦିଶୁମ୍ ରାଃ ବାଇକାନ୍ ସିଦା ଏତେ ଆପେୟାଃ ଲାଗିନ୍ତେ ବାଇକାନା। ଚିୟାଃଚି ଇଙ୍ଗ୍ ରେଙ୍ଗେଃ ତାଇକେନାଇଙ୍ଗ୍ ହାର୍ ଆପେ ଇଙ୍ଗ୍‍କେ ଜୋମ୍ ଲାଗିନ୍ ପେ ଏମ୍‍କେଦିଙ୍ଗା, ଇଙ୍ଗ୍ ତେତାଙ୍ଗ୍ ତାଇକେନାଇଙ୍ଗ୍, ହାର୍ ଆପେ ଇଙ୍ଗ୍‍କେ ଦାଆ ପେ ଆନୁକେଦିଙ୍ଗା, ଇଙ୍ଗ୍ ପାର୍ଦେଶୀ ତାଇକେନାଇଙ୍ଗ୍ ଆଡୋଃ ଆପେ ଇଙ୍ଗ୍‍କେ ଆପେୟାଃ ଅଡ଼୍ଆଃ ରେ ତାଇନ୍ ଲାଗିନ୍ ଏମ୍ କେଦିଙ୍ଗାପେ। ଇଙ୍ଗ୍ଆଃ ତାଃ ଲିଜାଃ କା ତାଇକେନା, ଆଡୋଃ ଆପେ ଇଙ୍ଗ୍‍କେ ଲିଜାଃ ତୁସିଙ୍ଗ୍ ନାଙ୍ଗ୍ ଏମ୍‍କେଦିଙ୍ଗାପେ, ଇଙ୍ଗ୍ ବେମାର୍ ରେ ତାଇକେନାଇଙ୍ଗ୍ ଆଡୋଃ ଆପେ ଇଙ୍ଗ୍‍କେ ନେନେଲ୍ ହିଜୁଃଲେନାପେ, ଇଙ୍ଗ୍ ଜେଲ୍ ଅଡ଼୍ଆଃ ରେ ତାଇକେନାଇଙ୍ଗ୍ ଆଡୋଃ ଆପେ ଇଙ୍ଗ୍ ଲୋଃ ନାପାମ୍ ଲାଗିନ୍ତେ ହିଜୁଃ ଲେନାପେ।’ ଏନ୍ତେ ଧାର୍ମୀକୋ ଇନିଃକେ କାଜିରୁଆଡ଼୍ ୟାକୋ, ‘ହେ ପ୍ରାଭୁ, ଆଲେ ଚିଉଲା ଆମ୍‍କେ ରେଙ୍ଗେଃ ନେଲ୍‍କେଦାଲେ ହାର୍ ଆଜୋମ୍ କେଃମେୟାଲେ? ହାର୍ ତେତାଙ୍ଗ୍ ନେଲ୍‍କେଦାଲେ ହାର୍ ଦାଆ ଆନୁ କେଃମେୟାଲେ? ଆଲେ ଚିଉଲା ଆମ୍‍କେ ପାର୍ଦେଶୀ ନେଲ୍‍କେଦାଲେ ହାର୍ ଆଲେୟାଃ ଅଡ଼୍ଆଃ ରେ ମାଣ୍ଡାଅ କେଃମେୟାଲେ? ୟାଦୋ ଲିଜାଃ କାତାଇନ୍ ନେଲ୍ କେଃମେୟାଲେ, ହାର୍ ଲିଜାଃ ତୁସିଙ୍ଗ୍ ଏମ୍ କେଃମେୟାଲେ? ଆଲେ ଆମ୍‍କେ ଚିଉଲା ବିମାର୍ ରେ ହାର୍ ଜେଲ୍ଅଡ଼୍ଆଃ ରେ ନେଲ୍ କେଃମେୟାଲେ ହାର୍ ଆମ୍ ଲୋଃ ନାପାମ୍ ହିଜୁଃଲେନାଲେ?’ ଇମ୍ତା ଇଙ୍ଗ୍ ରାଜା ଇନ୍‍କୁକେ କାଜିରୁଆଡ଼୍ କୋୱାଇଙ୍ଗ୍, ‘ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍, ଚି ଆପେ ଜେ ଇଙ୍ଗ୍ଆଃ ନେ ହୁଡିଙ୍ଗ୍ ଏତେ ହୁଡିଙ୍ଗ୍ ଇଙ୍ଗ୍ଆଃ ରେ ବିଶ୍ଵାସ୍‍ତାନ୍ ହାଗାକୋ ଏତେ ଜେତାଏ ମିହୋଡ଼୍ ଲୋଃ ପେ ରିକାକେଦା, ଏନା ଇଙ୍ଗ୍ଆଃ ଲୋଃ ପେ ରିକାକେଦା।’ ଏନ୍ତେ ଇନିଃ ଲେଙ୍ଗା ପାଡ଼୍ ରେନ୍ କୋକେ କାଜିୟାକୋୱାଏ, ‘ହେ ସାର୍ପାୱକାନ୍ ହୋଡ଼ୋକୋ, ଇଙ୍ଗ୍ଆଃ ନାଡ଼େଜେତେ ଏନ୍ ଜାନାଓ ରାଃ ସେଙ୍ଗେଲ୍ ତେ ସେନୋଃପେ, ଅକନାଃ ଶାଏତାନ୍ ହାର୍ ଇନିଜାଃ ଶାଏତାନ୍ ଦାସୀକୋ ଲାଗିନ୍ତେ ପାର୍ମେଶ୍ଵାର୍ ବାଇୟାକାଦାଏ। ଚିୟାଃଚି ଇଙ୍ଗ୍ ରେଙ୍ଗେଃ ତାଇକେନାଇଙ୍ଗ୍ ହାର୍ ଆପେ ଇଙ୍ଗ୍‍କେ ଜୋମ୍ ଲାଗିନ୍ କାପେ ଏମ୍‍କେଦିଙ୍ଗା, ଇଙ୍ଗ୍ ତେତାଙ୍ଗ୍ ତାଇକେନାଇଙ୍ଗ୍, ହାର୍ ଆପେ ଇଙ୍ଗ୍‍କେ ଦାଆ କାପେ ଆନୁକେଦିଙ୍ଗା, ଇଙ୍ଗ୍ ପାର୍ଦେଶୀ ତାଇକେନାଇଙ୍ଗ୍ ଆଡୋଃ ଆପେ ଇଙ୍ଗ୍‍କେ ଆପେୟାଃ ଅଡ଼୍ଆଃ ରେ ତାଇନ୍ ଲାଗିନ୍ କାପେ ଏମ୍ କେଦିଙ୍ଗା, ଇଙ୍ଗ୍ଆଃ ତାଃ ଲିଜାଃ କା ତାଇକେନା, ହାର୍ ଆପେ ଇଙ୍ଗ୍‍କେ ଲିଜାଃ ତୁସିଙ୍ଗ୍ ନାଙ୍ଗ୍ କାପେ ଏମ୍‍କେଦିଙ୍ଗା; ଇଙ୍ଗ୍ ବେମାର୍ ହାର୍ ଜେଲ୍ଅଡ଼୍ଆଃ କୋରେ ତାଇକେନାଇଙ୍ଗ୍ ଆଡୋଃ ଆପେ ଇଙ୍ଗ୍‍କେ ନେନେଲ୍ କାପେ ହିଜୁଃଜାନା।’ ଏନ୍ତେ ଇନ୍‍କୁ କାଜିରୁଆଡ଼୍ ୟାକୋ, ‘ହେ ପ୍ରାଭୁ, ଆଲେ ଆମ୍‍କେ ଚିମ୍ତାଙ୍ଗ୍ ରେଙ୍ଗେଃ, ହାର୍ ତେତାଙ୍ଗ୍, ହାର୍ ପାର୍ଦେଶୀ, ହାର୍ ଲିଜାଃ କାତାଇନ୍, ହାର୍ ବେମାର୍, ହାର୍ ଜେଲ୍ଅଡ଼୍ଆଃ ରେ ନେଲ୍‍କେଦାଲେ, ହାର୍ ଆମାଃ ସେୱା କାଲେ ରିକା କେଦାଲେ?’ ଏନ୍ତେ ଇଙ୍ଗ୍ ଇନ୍‍କୁକେ କାଜିରୁଆଡ଼୍ କୋୱାଇଙ୍ଗ୍, ‘ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍, ଚି ଆପେ ଜେ ଇଙ୍ଗ୍ଆଃ ନେ ହୁଡିଙ୍ଗ୍ ଏତେ ହୁଡିଙ୍ଗ୍ ଇଙ୍ଗ୍ଆଃ ରେ ବିଶ୍ଵାସ୍‍ତାନ୍ ହାଗାକୋ ଏତେ ଜେତାଏ ମିହୋଡ଼୍ ଲୋଃ କାପେ ରିକାକେଦା, ଏନା ଇଙ୍ଗ୍ଆଃ ଲୋଃ ହଗି କାପେ ରିକାକେଦା।’ ହାର୍ ନେ ଲେଙ୍ଗା ପାଡ଼୍ ରେନ୍ କୋ ଜାନାଓ ରାଃ ଶାଜାଇ ନାମେୟାକୋ, ମେନ୍ଦୋ ଧାର୍ମୀ ହୋଡ଼ୋକୋ ଜାନାଓ ଜୀଦାନ୍ ରେ କୋ ବୋଲୋୱା।” ଚିମ୍ତାଙ୍ଗ୍ ୟୀଶୁ ନେ ସବେନ୍ କାଜିକୋ କାଜି ଛାବା କେଦାଏ ଦୋ ଆଜାଃ ଚେଲାକୋକେ କାଜିକେଦାଏ, “ଆପେ ସାରିତାନାପେ ଚି ବାର୍‍ସିଙ୍ଗ୍ ତାୟୋମ୍ତେ ଫାସାହ୍ ପାରାବ୍ ମେନାଃ ହାର୍ ଇଙ୍ଗ୍ ମାନ୍‍ୱା ରାଃ ହୋନ୍ କ୍ରୁଶ୍ ରେ ରାକାବ୍ ଲାଗିନ୍ ସାବୋଗାଇଙ୍ଗ୍।” ଏନ୍ ସାମାୟ୍ ରେଗି ପ୍ରାଧାନ୍ ୟାଜାକ୍‍କୋ ହାର୍ ୟାହୁଦୀ ହୋଡ଼ୋକୋୱାଃ ମାରିହୋଡ଼ୋକୋ କୈଫା ନୁତୁମ୍ ମାରାଙ୍ଗ୍ ୟାଜାକ୍ ରାଃ ରାଚା ରେ ହୁଣ୍ଡି ଜାନାକୋ, ହାର୍ ଆକୋ-ଆକୋରେ ବିଚାର୍ କେଦାକୋ ଚି, ୟୀଶୁ କେ ହିଡ଼୍ କେତେ ସାବିୟାବୁ ହାର୍ ଗୋଜିୟାବୁ। ମେନ୍ଦୋ ଇନ୍‍କୁ କାଜି ତାଇନାକୋ, “ପାରାବ୍ ରାଃ ସାମାୟ୍ ରେ କାହା; କାରେ ଦୋ ହୋଡ଼ୋକୋ ରେ ହାଲାଗୁଲା ହୋବାକୋୱା।” ଚିମ୍ତା ୟୀଶୁ ଶିମୋନ୍ କୋଢ଼ି ରାଃ ଅଡ଼୍ଆଃ ବେଥାନି ହାତୁ ରେ ତାଇକେନାଏ। ଦୋ ମିୟାଃ କୁଡ଼ି ସାଙ୍ଗ୍‍ମାର୍ମାର୍ ଦିରି ରାଃ ଶିଶି ରେ ଥିମ୍ବାଗି ଗୋନୋଙ୍ଗାନ୍ ସୋୱାନ୍ ସୁନୁମ୍ ଆଉକେତେ ଇନିଃତାଃ ହିଜୁଃଲେନାଏ, ହାର୍ ଚିମ୍ତାଙ୍ଗ୍ ଇନିଃ ଜୋମ୍ ଲାଗିନ୍ ଦୁବ୍ ଲେନାଏ ଦୋ ୟୀଶୁ ରାଃ ବୋଅ ରେ ଦୁଲ୍ ତାଜାଏ। ନେୟା ନେଲ୍‍କେତେ ଆଜାଃ ଚେଲାକୋ ଖିସ୍ ଜାନାକୋ ହାର୍ କାଜିକେଦାକୋ, ନେୟାକେ ଚିନାଃ ଲାଗିନ୍ ନାଷ୍ଟ୍ ରିକା ଜାନା? ନେୟା କେ ଦୋ ଥିମ୍ବା ଗୋନୋଙ୍ଗ୍ ରେ ଆଖ୍ରିଙ୍ଗ୍ କେତେ ଗାରିବ୍ କୋକେ ଟାକା ହାଟିଙ୍ଗ୍ ଧାଡ଼ି ଜାନ୍ତେୟାଃ। ନେୟା ସାରିକେତେ ୟୀଶୁ ଇନ୍‍କୁକେ କାଜିକେଦାଏ, କୁଡ଼ି କେ ଚିନାଃ ମେନ୍ତେ ସାତାୱି ତାନାପେ? ଇନିଃ ଇଙ୍ଗ୍ଆଃ ଲୋଃ ବୁଗିନ୍ ରିକା କେଦାଏ। ଗାରିବ୍ ହୋଡ଼ୋକୋ ଦୋ ଆପେୟାଃ ଲୋଃ ସବେନ୍ ଇମ୍ତାଙ୍ଗ୍ ତାଇନ୍ ତାନାକୋ, ମେନ୍ଦୋ ଇଙ୍ଗ୍ ଆପେୟାଃ ଲୋଃ ସବେନ୍ ହୁଲାଙ୍ଗ୍ କାଇଙ୍ଗ୍ ତାଇନା। ଇନିଃ ଇଙ୍ଗ୍ଆଃ ହୋଡ଼ମୋ ରେ ଅକନ୍ ସୋୱାନ୍ ସୁନୁମ୍ ଦୁଲ୍ କେଦାଏ, ଏନା ଇଙ୍ଗ୍‍କେ କାବାର୍ ଏମ୍ ଲାଗିନ୍ ରିକା କେଦାଏ। ଇଙ୍ଗ୍ ଆପେକେ ସାର୍ତି କାଜି ତାନିଙ୍ଗ୍, ଚି ସବେନ୍ ଦିଶୁମ୍ ରେ ଅକ୍ତାଃ-ଅକ୍ତାଃ ରେ ନେ ସୁସାମାଚାର୍ ପାର୍ଚାର୍ ଅଗା, ଏନ୍ତାଃ ରେ ଇନିଜାଃ ନେ କାମି ରାଃ ବିଷାୟ୍ ରେ ହଗି ଇନିଜାଃ ପାହୋମ୍ ଲାଗିନ୍ ଉଦୁବୋଗା। ଏନ୍ତେ ୟାହୁଦା ଇସ୍କାରିୟୋତୀ ଅକନିଃ ବାରା ଚେଲାକୋ ଏତେ ମିହୋଡ଼୍ ତାଇକେନାଏ, ପ୍ରାଧାନ୍ ୟାଜାକ୍ କୋତାଃ ସେନ୍ କେତେ କାଜିକେଦାଏ, “ଆଗାର୍ ଇଙ୍ଗ୍ ଇନିଃକେ ଆପେୟାଃ ତିଈ ରେ ସାବ୍ ପେୟାଇଙ୍ଗ୍ ଦୋ ଆପେ ଇଙ୍ଗ୍‍କେ ଚିନାଃ ଏମାଇଙ୍ଗ୍‍ୟାପେ?” ଇନ୍‍କୁ ଇନିଃକେ ତିସ୍ ଠୁ ରୂପା ରାଃ ଟାକା ଲେକାକେତେ ଏମାଇଜାକୋ। ହାର୍ ଇନିଃ ଏନ୍ ସାମାୟ୍ ତେଗି ଇନିଃକେ ସାବ୍ ରିକା ଲାଗିନ୍ ମାଉକା ଦାଣାବାଡ଼ା କେଦାଏ। ଖାମୀର୍ କାମେଶାକାନ୍ ହୋଲୋଙ୍ଗ୍ ରାଃ ପାରାବ୍ ରାଃ ପାହିଲା ହୁଲାଙ୍ଗ୍, ଚେଲାକୋ ୟୀଶୁ ତାଃ ହିଜୁଃକେତେ କୁଲିକିଜାକୋ, “ଆମ୍ କୋତାଃମ୍ ସାନାଙ୍ଗ୍ ତାନା ଚି ଆଲେ ଆମାଃ ଲାଗିନ୍ ଫାସାହ୍ ପାରାବ୍ ରାଃ ଜୋମେୟାଃ ବାଇୟାଲେ?” ୟୀଶୁ କାଜିୟାଃକୋୱାଏ, “ସାହାର୍ ରେନ୍ ଫାଲ୍ନା ହୋଡ଼ ତାଃ ସେନ୍ କେତେ ଇନିଃକେ କାଜିୟାଇପେ, ‘ଗୁରୁ କାଜି ତାନାଏ ଚି ଇଙ୍ଗ୍ଆଃ ସାମାୟ୍ ନାଡ଼େଏ କାନା। ଇଙ୍ଗ୍ ଇଙ୍ଗ୍ଆଃ ଚେଲାକୋ ଲୋଃ ଆପେୟାଃ ଅଡ଼୍ଆଃ ରେ ଫାସାହ୍ ପାରାବ୍ ମାନାତିଙ୍ଗ୍‍ୟାଇଙ୍ଗ୍।’ ” ଏନ୍ତେ ଚେଲାକୋ ୟୀଶୁ ରାଃ ଆନାଚୁ କେ ମାନାତିଙ୍ଗ୍ ଜାନାକୋ ଆଡୋଃ ଫାସାହ୍ ପାରାବ୍ ରାଃ ଜୋମେୟାଃ ବାଇକେଦାକୋ। ଚିମ୍ତା ଶିଙ୍ଗି-ଡୁବିଃ ଜାନା ଦୋ ଇନିଃ ବାରାଝାନ୍ ଚେଲାକୋ ଲୋଃ ଜୋମେ ଲାଗିନ୍ ଦୁବ୍ ଜାନାଏ। ଚିମ୍ତା ଇନ୍‍କୁ ଜୋମ୍ ତାଇନାକୋ ଦୋ ଇନିଃ କାଜିକେଃକୋୱାଏ, ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍ ଚି ଆପେ ଥାଲା ଏତେ ମିହୋଡ଼୍ ଇଙ୍ଗ୍‍କେ ବାଇରୀ କୋୱାଃ ତିଈ ରେ ସାବ୍ ରିକାଇଙ୍ଗ୍ ୟାଏ। ନେୟାତେ ଇନ୍‍କୁ ଥିମ୍ବାଗି ଦୁକୁ ଜାନାକୋ, ହାର୍ ସବେନ୍ କୋ ଇନିଃକେ କୁଲିକିଜାକୋ, “ହେ ଗୁରୁ, ଚିନାଃ ଇନିଃ ଇଙ୍ଗ୍ ତାନିଙ୍ଗ୍?” ଇନିଃ କାଜିରୁଆଡ଼୍ କେଃକୋୱାଏ, ଅକନିଃ ଇଙ୍ଗ୍ଆଃ ଲୋଃ ମିୟାଃ ଥାଡ଼ିୟା ରେ ଜୋମ୍ କେଦାଏ, ଇନିଃ ଗି ଇଙ୍ଗ୍‍କେ ସାବ୍ ରିକାଇଙ୍ଗ୍ ୟାଏ। ଇଙ୍ଗ୍ ମାନ୍‍ୱା ରାଃ ହୋନ୍ ଦୋ ଜେଲେକା ଇଙ୍ଗ୍ଆଃ ବିଷାୟ୍ ରେ ଅଲାକାନା ଗୋଜୋଗାଇଙ୍ଗ୍, ମେନ୍ଦୋ ଏନ୍ ହୋଡ଼ ଲାଗିନ୍ ହାୟ୍! ବୋରୋୱାନ୍ ଦାଣ୍ଡ୍ ଇନିଜାଃ ଲାଗିନ୍ ମେନାଃ ଅକନିଜାଃ ଚାଲ୍ତେ ଇଙ୍ଗ୍ ମାନ୍‍ୱା ରାଃ ହୋନ୍ ସାବୋଃ ତାନାଏ, ଆଗାର୍ ଏନ୍ ହୋଡ଼ ରାଃ ଜାନାମ୍ ଗି କା ହୋବାଜାନ୍ତେୟାଃ ରେଦୋ, ଇନିଜାଃ ଲାଗିନ୍ ବୁଗିନ୍ ହୋବାଜାନ୍ତେ। ଏନ୍ତେ ଇନିଃକେ ସାବ୍ ରିକାନିଃ ୟାହୁଦା କାଜିକେଦାଏ, “ହେ ଗୁରୁ, ଚିନାଃ ଇନିଃ ଇଙ୍ଗ୍ ତାନିଙ୍ଗ୍?” ଇନିଃ ଆଏଃକେ କାଜିକିଜାଏ, “ଆମ୍ କାଜି ଛାବା ତାଦାମ୍।” ଚିମ୍ତାଙ୍ଗ୍ ଇନ୍‍କୁ ଜୋମ୍ ତାଇକେନାକୋ ଦୋ ୟୀଶୁ ହୋଲୋଙ୍ଗ୍ ଇଦିକେଦାଏ, ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କେଚାଃ କେଦାଏ, ହାର୍ ଚେଲାକୋକେ ଏମ୍ କେତେ କାଜିକେଦାଏ, “ନେ, ଜୋମେ ପେ, ନେୟା ଇଙ୍ଗ୍ଆଃ ହୋଡ଼ମୋ ତାନାଃ।” ଏନ୍ତେ ଇନିଃ ଗିଲାସ୍ କେ ଅକଣ୍ଡେ ଆଙ୍ଗୁର୍-ରାଶି ତାଇକେନା ଇଦିକେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ, ହାର୍ ଇନ୍‍କୁକେ ଏମ୍ କେତେ କାଜିୟାଃକୋୱାଏ, “ଆପେ ସବେନ୍ ନେୟା ଏତେ ନୁୱେପେ। ଚିୟାଃଚି ନେୟା ନିୟାମ୍‍ଥଲ୍ ରାଃ ଇଙ୍ଗ୍ଆଃ ଏନ୍ ମାୟୋମ୍ ତାନାଃ ଅକନାଃ ଥିମ୍ବାଗି ହୋଡ଼ୋକୋ ଲାଗିନ୍ ପାପ୍ କୋରାଃ ଛାମା ଲାଗିନ୍ ଲିଙ୍ଗୀଅଃ ତାନା। ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ଆଙ୍ଗୁର୍ ରାଃ ନେ ରାଶି ଏନ୍ ହୁଲାଙ୍ଗ୍ ସାନ୍ତେ ଚିଉଲାଅ କାଇଙ୍ଗ୍ ନୁୱେୟା, ଚିମ୍ତାଙ୍ଗ୍ ସାନ୍ତେ ଆପେ ଲୋଃ ଇଙ୍ଗ୍ଆଃ ଆପୁ ରାଃ ରାଇଜ୍ ରେ ନାୱା ଆଙ୍ଗୁର୍-ରାଶି କାଇଙ୍ଗ୍ ନୁୱେୟା।” ଆଡୋଃ ଇନ୍‍କୁ ଭାଜାନ୍ ଦୁରାଙ୍ଗ୍ କେତେ ଜାଏତୁନ୍ ଦାରୁ ବୁରୁ ତେ ସେନୋଃ ଜାନାକୋ। ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ଆପେ ସବେନ୍ କୋ ଇସିଙ୍ଗ୍ ନିଦା ଗି ଇଙ୍ଗ୍‍କେ ବାଗେ କେତେ ସେନୋଃ କୋୱାପେ, ଚିୟାଃଚି ଅଲାକାନା, ଇଙ୍ଗ୍ ଗୁପୀନିଃକେ ଗୋଜିୟାଇଙ୍ଗ୍ ହାର୍ ଗୋଟ୍ ରେନ୍ ମିଣ୍ଡୀକୋ ଛିତି ବିତି ଅଗାକୋ। ମେନ୍ଦୋ ଇଙ୍ଗ୍ଆଃ ଜୀବିରିଃ ତାୟୋମ୍ତେ ଆପେ ତେ ସିଦା ଗାଲିଲୀ ଜିଲ୍ଲା ତେ ସେନାଇଙ୍ଗ୍।” ନେୟା ରେ ପାତ୍ରାସ୍ ଇନିଃକେ କାଜିକେଦାଏ, “ଆଗାର୍ ସବେନ୍ କୋ ଆମ୍‍କେ ବାଗେ ତାମେୟାକୋ ରେଦୋ ବାଗେ ଚାକୋ, ମେନ୍ଦୋ ଇଙ୍ଗ୍ ଚିଉଲା ହଗି କାଇଙ୍ଗ୍ ବାଗେ ମେୟା।” ୟୀଶୁ ଇନିଃକେ କାଜିକେଦାଏ, “ଇଙ୍ଗ୍ ଆମ୍‍କେ ସାର୍ତି କାଜି ତାନିଙ୍ଗ୍ ଚି ଇସିଙ୍ଗ୍ ନିଦାଗି ସିମ୍‍କୋ ରାଆ ସିଦାରେ, ଆମ୍ ଆପିସା ଇଙ୍ଗ୍‍କେ କାଇଙ୍ଗ୍ ସାରିୟା ମେନ୍ତେ କାଜିୟାମ୍।” ପାତ୍ରାସ୍ ଇନିଃକେ କାଜିକେଦାଏ, “ଆଗାର୍ ଇଙ୍ଗ୍‍କେ ଆମ୍ ଲୋଃ ଗୋଜେନ୍ ହୋବାୱା ରେ ହଗି, ଇଙ୍ଗ୍ ଆମ୍‍କେ ଚିଉଲାଅ କାଇଙ୍ଗ୍ ସାରିୟା ମେନ୍ତେ କାଇଙ୍ଗ୍ କାଜିୟା।” ହାର୍ ଏନ୍‍ଲେକାଗି ସବେନ୍ ଚେଲାକୋ ହଗି କାଜିକେଦାକୋ। ଏନ୍ତେ ୟୀଶୁ ଆଜାଃ ଚେଲାକୋ ଲୋଃ ଗେଥ୍‍ସେମାନୀ ନୁତୁମ୍ ମିୟାଃ ଜାଗା ତେ ହିଜୁଃଲେନାଏ ହାର୍ ଆଜାଃ ଚେଲାକୋକେ କାଜିକେଃକୋୱାଏ, “ନେତାଃ ରେ ଦୁବ୍ କାନ୍‍ପେ, ଚିମ୍ତାଙ୍ଗ୍ ସାନ୍ତେ ଇଙ୍ଗ୍ ଏନ୍ତାଃ ସେନ୍ କେତେ ବିନ୍ତି ୟାଇଙ୍ଗ୍।” ଇନିଃ ପାତ୍ରାସ୍ କେ ହାର୍ ଯାବ୍ଦୀ ରାଃ ବାରାନ୍ ହୋନ୍ କିନ୍‍କେ ମିଶା ତେ ଇଦି କେଃକୋୱାଏ ହାର୍ ଥିମ୍ବାଗି ଦୁକୁ ହାର୍ ଆକ୍‍ବାକାଅ ଏଟେଃ ଜାନାଏ। ଏନ୍ତେ ଇନିଃ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ଆଃ ମୋନ୍ ଥିମ୍ବାଗି ଦୁକୁ ମେନାଃ ନେତାଃ ସାନ୍ତେ ଚି ଇଙ୍ଗ୍ଆଃ ଜୀଉ ଅଡୋଙ୍ଗ୍ କୋୱା ଲେକା ଆଟ୍‍କାରିଙ୍ଗ୍ ତାନା। ଆପେ ନେତାଃ ରେ ଗି ତାଇନ୍‍ପେ ହାର୍ ଇଙ୍ଗ୍ଆଃ ଲୋଃ ଏୟୋନ୍ କାନୋଃପେ।” ଏନ୍ତେ ଇନିଃ ହୁଡିଙ୍ଗ୍ ଆଡୋଃ ଆୟୁର୍ ତେ ସେନ୍ କେତେ ଇକ୍ଡ଼ୁମ୍ କେଦାଏ, ହାର୍ ନେୟା ବିନ୍ତି କେଦାଏ, “ହେ ଇଙ୍ଗ୍ଆଃ ଆପୁ, ଆଗାର୍ ହୋବା ଧାଡ଼ିୟୋଃ ରେଦୋ ନେ ଦୁକୁ ଇଙ୍ଗ୍ଆଃ ତାଃ ଏତେ ଆତୋମ୍ ତାମ୍, ଏନ୍ ରେହ ଚିଲ୍‍କା ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍ ଏନ୍‍ଲେକା କାହା ମେନ୍ଦୋ ଚିଲ୍‍କା ଆମ୍ ସାନାଙ୍ଗ୍ ତାନାମ୍ ଏନ୍‍ଲେକାଗି ହୋବାଅଃକା।” ଏନ୍ତେ ଇନିଃ ଚେଲା କୋତାଃ ହିଜୁଃକେତେ ଇନ୍‍କୁକେ ଦୁଣୁମ୍ ତାନ୍ ନାମ୍ କେଃକୋୱାଏ ହାର୍ ପାତ୍ରାସ୍ କେ କାଜିକେଦାଏ, “ଚିନାଃ ଆପେ ଇଙ୍ଗ୍ଆଃ ଲୋଃ ମିୟାଃ ଘାଣ୍ଟା ହଗି କାପେ ଏୟୋନ୍ ଧାଡ଼ିଜାନା? ଏୟୋନ୍ କାନ୍‍ପେ, ହାର୍ ବିନ୍ତି କାତେପେ, ଚି ଆପେ ପାରୀକ୍ଷା ରେ କାପେ ଉୟୁଗୋଗା, ଆତ୍ମା ଦୋ ସାପ୍ଡ଼ାଅ କାନ୍ ମେନାଃ, ମେନ୍ଦୋ ହୋଡ଼ମୋ ନାରାଦୁରା ମେନାଃ।” ହାର୍ ଇନିଃ ଆଡୋଃ ମିଶା ସେନ୍ କେତେ ନେୟା ବିନ୍ତି କେଦାଏ, “ହେ ଇଙ୍ଗ୍ଆଃ ଆପୁ, ଆଗାର୍ ନେୟା ଇଙ୍ଗ୍ଆଃ ବେଗାର୍ ସାହାତିଙ୍ଗ୍ କା ଆତୋମ୍ ଧାଡ଼ିୟୋଃୱା ଏଣ୍ଡେ ଆମାଃ ସାନାଙ୍ଗ୍ ପୁରାଅଃ କା।” ଏନ୍ତେ ଇନିଃ ହିଜୁଃକେତେ ଇନ୍‍କୁକେ ଆଡୋଃଗି ଦୁଣୁମ୍ ତାନ୍ ନାମ୍ କେଃକୋୱାଏ, ଚିୟାଃଚି ଇନ୍‍କୁୱାଃ ମେଏଃ ଦୁଣୁମ୍ ତେ ଫେରେଜାକାନ୍ ତାଇନ୍ କେନା। ଇନ୍‍କୁକେ ବାଗେ କେତେ ଇନିଃ ଆଡୋଃଗି ସେନୋଃ ଜାନାଏ, ହାର୍ ଏନ୍ କାଜିକୋ କାଜିକେତେ ଗି ଆଡୋଃଗି ଆପିସା ବିନ୍ତି କେଦାଏ। ଏନ୍ତେ ଇନିଃ ଚେଲା କୋତାଃ ହିଜୁଃକେତେ ଇନ୍‍କୁକେ କାଜିକେଃକୋୱାଏ, “ନାଆ ଦୁଣୁମ୍ କାତୋଃପେ, ହାର୍ ଆରାମ୍ ରିକାଏପେ, ନେଲେପେ, ସାମାୟ୍ ହିଜୁଃ ସେଟେର୍ ଜାନା, ହାର୍ ଇଙ୍ଗ୍ ମାନ୍‍ୱା ରାଃ ହୋନ୍ ପାପୀକୋୱାଃ ତିଈ ରେ ସାବୋଃ ତାନିଙ୍ଗ୍। ବିରିଃପେ! ଦୋଲା! ନେଲିପେ, ଇଙ୍ଗ୍‍କେ ବାଇରୀ କୋୱାଃ ତିଈ ରେ ସାସାବ୍ ଲାଗିନ୍ ଦେଙ୍ଗା ଏମେ ନିଈ ନାଡ଼େଏ ହିଜୁଃ ସେଟେର୍ କାନାଏ।” ଚିମ୍ତା ୟୀଶୁ ନେୟା କାଜି ତାଇନାଏ ଚି ୟାହୁଦା ଅକନିଃ ବାରାଝାନ୍ କୋଏତେ ମିହୋଡ଼୍ ତାଇକେନାଏ ହିଜୁଃ ଲେନାଏ, ହାର୍ ଇନିଃ ଲୋଃ ପ୍ରାଧାନ୍ ୟାଜାକ୍‍କୋ ହାର୍ ହୋଡ଼ୋକୋୱାଃ ମାରିହୋଡ଼ୋକୋ ପାଡ଼େତେ ମିଃଥିମ୍ବା ହୋଡ଼ୋକୋ, ତାଲ୍‍ୱାର୍ କୋକେ ହାର୍ ଲାଠି କୋକେ ସାବ୍ ଆଉକେତେ ହିଜୁଃ ଲେନାକୋ। ଇନିଃକେ ବାଇରୀ କୋୱାଃ ତିଈ ରେ ସାବ୍ ରିକାନିଃ ଇନ୍‍କୁକେ ନେୟା ଚିହ୍ନା ଏମ୍ ଲେଦାଏ, “ଅକନିଃକେ ଇଙ୍ଗ୍ ଚୁମାୟାଇଙ୍ଗ୍ ଇନିଃଗି ତାନିଃ, ଇନିଃ କେ ସାବ୍ କିୟାପେ।” ହାର୍ ଇମ୍ତାଗି ୟୀଶୁ ରାଃ ନାଡ଼େଏ ହିଜୁଃକେତେ କାଜିକେଦାଏ, “ହେ ଗୁରୁ, ଜୋହାର୍!” ଏନ୍ତେ ଇନିଃକେ ଥିମ୍ବାଗି ଚୁମା କିଜାଏ। ୟୀଶୁ ଇନିଃକେ କାଜିକେଦାଏ, “ହେ ଗାତି, ଅକନ୍ କାମି ଲାଗିନ୍ ଆମ୍ ହିଜୁଃ କାନାମ୍, ଏନାକେ ରିକା ଏମ୍।” ଏନ୍ତେ ଇନ୍‍କୁ ନାଡ଼େଏ ହିଜୁଃକେତେ ୟୀଶୁ କେ ଚୁଣ୍ଡୁଲ୍ କିଜାକୋ ହାର୍ ଇନିଃକେ ସାବ୍ କିଜାକୋ। ୟୀଶୁ ରାଃ ଗାତି କୋଏତେ ମିହୋଡ଼୍ ତିଈ ଆୟୁର୍ କେତେ ଆଜାଃ ତାଲ୍‍ୱାର୍ ଥାଇଃ କେଦାଏ ହାର୍ ମାରାଙ୍ଗ୍ ୟାଜାକ୍ ରାଃ ଦାସୀ ଚେତାନ୍ ରେ ଚାଲାଓ କେତେ ଇନିଜାଃ ଲୁତୁର୍ ଖାଣ୍ଡାଅ ତାଦାଏ। ଏନ୍ତେ ୟୀଶୁ ଇନିଃକେ କାଜିକେଦାଏ, “ଆମାଃ ତାଲ୍‍ୱାର୍ ଆମାଃ ଖାପ୍ ରେ ଦୋହୋଏମେ ଚିୟାଃଚି ଅକଏ ତାଲ୍‍ୱାର୍ ଚାଲାଓ ୟାକୋ ଇନ୍‍କୁ ସବେନ୍ ତାଲ୍‍ୱାର୍ ତେକୋ ଗୋଜୋଗା। ଚିନାଃ ଆମ୍ କାମ୍ ସାରିତାନା ଚି ଇଙ୍ଗ୍ ଇଙ୍ଗ୍ଆଃ ଆପୁ ଏତେ ବିନ୍ତି ଧାଡ଼ିୟାଇଙ୍ଗ୍, ହାର୍ ଇନିଃ ସିର୍ମାଦାସୀ କୋୱାଃ ବାରା ପାଲ୍‍ଟାନ୍ ଏତେ ଥିମ୍ବା ଇଙ୍ଗ୍ଆଃ ତାଃ ନାଆ ସେଟେର୍ ତାକୋୱାଏ? ମେନ୍ଦୋ ପାବିତାର୍ ପୁଥି ରାଃ ଏନ୍ କାଜିକୋ ଅକନାଃ ଏନ୍‍କା ଗି ହୋବା ନାଙ୍ଗ୍ ଜାଲେକାତେ ମେନାଃ, ଏନା ଚିଲ୍‍କା ପୁରାଅଗା?” ଏନ୍ ସାମାୟ୍ ୟୀଶୁ ମିଃଥିମ୍ବା ହୋଡ଼ୋକୋକେ କାଜିୟାଃକୋୱାଏ, “ଚିନାଃ ଆପେ ତାଲ୍‍ୱାର୍ କୋକେ ହାର୍ ଲାଠି କୋକେ ଆଉକେତେ ଇଙ୍ଗ୍‍କେ ଡାକୁ କୋୱାଃ ଲେକା ସାବ୍ ଲାଗିନ୍ ଅଡୋଙ୍ଗ୍ କାନାପେ? ଇଙ୍ଗ୍ ସବେନ୍ ହୁଲାଙ୍ଗ୍ ମାନ୍ଦିର୍ ରାଃ ରାଚା ରେ ଦୁବ୍ କେତେ ଶିଖାଅ କୋ ତାଇନାଇଙ୍ଗ୍, ହାର୍ ଆପେ ଇଙ୍ଗ୍‍କେ କାପେ ସାବ୍ କେଦିଙ୍ଗା। ମେନ୍ଦୋ ନେୟା ସବେନାଃ ନେୟା ଲାଗିନ୍ତେ ହୋବାଜାନା ଚି ନାବୀକୋୱାଃ ବାଚାନ୍ ପୁରାଅଃଚା।” ଏନ୍ତେ ସବେନ୍ ଚେଲାକୋ ଇନିଃକେ ବାଗିକେତେ ନିର୍ ଜାନାକୋ। ଏନ୍ତେ ଏନ୍ ହୋଡ଼ୋକୋ ଅକନ୍‍କୋ ୟୀଶୁ କେ ସାବ୍ ଲିଜାକୋ କୈଫା ନୁତୁମ୍ ମାରାଙ୍ଗ୍ ୟାଜାକ୍ ତାଃ ଇଦିକିଜାକୋ, ଅକତାଃରେ ଆଇନ୍ ଗୁରୁକୋ ହାର୍ ମାରିହୋଡ଼ୋକୋ ହୁଣ୍ଡି ଲେନ୍ ତାଇନାକୋ। ମେନ୍ଦୋ ପାତ୍ରାସ୍ ସାଙ୍ଗିନ୍-ସାଙ୍ଗିନ୍ ଇନିଜାଃ ତାୟୋମ୍-ତାୟୋମ୍ ମାରାଙ୍ଗ୍ ୟାଜାକ୍ ରାଃ ରାଚା ସାନ୍ତେ ସେନ୍ ଜାନାଏ, ହାର୍ ଭିତାର୍ ସେନ୍ କେତେ ନେ କାଜି ରାଃ ଟୁଣ୍ଡୁ ନେନେଲ୍ ଲାଗିନ୍ ମାନ୍ଦିର୍ କେ ହୋରୋତାନ୍ କୋଲୋଃ ଦୁବ୍ ଜାନାଏ। ପ୍ରାଧାନ୍ ୟାଜାକ୍‍କୋ ହାର୍ ସବେନ୍ ବିଚାର୍ ସାଭା ରେନ୍ କୋ ୟୀଶୁ କେ ଗୋଏଃ ଲାଗିନ୍ ଇନିଜାଃ ବିରୋଧ୍ ରେ ଲୋଗୋ ଗୋୱା ରାଃ ଦାଣା ରେ ତାଇକେନାକୋ, ମେନ୍ଦୋ ଥିମ୍ବାଗି ଲୋଗୋ ଗୋୱାକୋ ହିଜୁଃ ଜାନ୍ ରେ ହଗି ମିହୋଡ଼୍ ହ କାକୋ ନାମ୍ କେଦା। ଆଖ୍ରୀ ରେ ବାର୍ହୋଡ଼୍ ହିଜୁଃଲେନାକିନ୍। ହାର୍ କାଜିକେଦାକିନ୍, “ନେ ହୋଡ଼ କାଜିକାଦାଏ ଚି ଇଙ୍ଗ୍ ପାର୍ମେଶ୍ଵାର୍ ରାଃ ମାନ୍ଦିର୍ କେ ଧାଶୁଡ଼୍ ଧାଡ଼ିୟାଇଙ୍ଗ୍ ହାର୍ ତିନ୍ ଦିନ୍ ରେ ବାଇ ଧାଡ଼ିୟାଇଙ୍ଗ୍।” ଏନ୍ତେ ମାରାଙ୍ଗ୍ ୟାଜାକ୍ ତିଙ୍ଗୁ କେତେ ୟୀଶୁ କେ କାଜିକେଦାଏ, “ଚିନାଃ ଆମ୍ ଜାହାନାଃ କାମ୍ କାଜିରୁଆଡ଼୍ ତାନାମ୍? ନେ ହୋଡ଼ୋକୋ ଆମାଃ ବିରୋଧ୍ ରେ ଚିକାନ୍ ଗୋୱା ଏମ୍ ତାନାକୋ?” ମେନ୍ଦୋ ୟୀଶୁ ହାପାଗି ତାଇନ୍ ଜାନାଏ। ଏନ୍ତେ ମାରାଙ୍ଗ୍ ୟାଜାକ୍ ଇନିଃକେ କାଜିକେଦାଏ, “ଇଙ୍ଗ୍ ଆମ୍‍କେ ଜୀନିଦ୍ ପାର୍ମେଶ୍ଵାର୍ ରାଃ କିରିୟା ଏମ୍ ମେତାନିଙ୍ଗ୍ ଚି ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ମାସୀହ୍ ତାନ୍‍ମେ ଦୋ ଆଲେକେ କାଜିୟା ଲେମ୍।” ୟୀଶୁ ଇନିଃକେ କାଜିକେଦାଏ, “ଆମ୍ ଆମ୍‍ଗି କାଜିକେଦାମ୍, ମେନ୍ଦୋ ଇଙ୍ଗ୍ ଆମ୍‍କେ ନେୟା ହଗି କାଜିତାନିଙ୍ଗ୍ ଚି ନାଆ ଏତେ ଆମ୍ ଇଙ୍ଗ୍ ମାନ୍‍ୱା ରାଃ ହୋନ୍ କେ ସବେନ୍ ଏତେ ପେଡ଼େଜାନ୍ ରାଃ ଜୋମ୍ ପାଡ଼୍ ରେ ଦୁବାକାନ୍, ହାର୍ ରିମିଲ୍‍ଦିଶୁମ୍ ରାଃ ରିମିଲ୍ ରେ ହିଜୁଃ ତାନ୍ ନେଲିଙ୍ଗ୍‍ୟାପେ।” ଏନ୍ତେ ମାରାଙ୍ଗ୍ ୟାଜାକ୍ ଆଜାଃ ଲିଜାଃ ଚାଗାଡ଼୍ କେଦାଏ ହାର୍ କାଜିକେଦାଏ, “ନିଈ ପାର୍ମେଶ୍ଵାର୍ କେ ନିନ୍ଦା କିଜାଏ, ନାଆ ଆବୁକେ ଗୋୱା ରାଃ ଚିକାନ୍ ଦାର୍‍କାର୍? ନେଲେପେ, ଆପେ ନାଆଗି ନେ ନିନ୍ଦା ଆୟୁମ୍ କେଦାପେ! ଆପେ ଚିନାଃ ପାହୋମ୍ ତାନାପେ?” ଇନ୍‍କୁ କାଜିରୁଆଡ଼୍ କେଦାକୋ, “ନିଈ ଗୋନୋଏଃ ଦାଣ୍ଡ୍ ନାମେ ଲେକାନିଃ ତାନିଃ।” ଏନ୍ତେ ଇନ୍‍କୁ ଇନିଜାଃ ମେଏଃମୁହାଡ଼୍ ରେ ବେଏଃ କିଜାକୋ ହାର୍ ଇନିଃକେ ଗୁଡ଼୍‍ଦା କିଜାକୋ, ଏଟାଃକୋ ଥାପ୍ଡ଼ାଅ କିଜାକୋ ହାର୍ କାଜିକିଜାକୋ, “ହେ ମାସୀହ୍ ଆଲେକେ ଆୟାର୍‍କାଜି କାଜିକେତେ କାଜିମ୍ ଚି ଅକଏ ଆମ୍‍କେ ବିଡ଼ା କେଃମେୟାଏ?” ପାତ୍ରାସ୍ ବାହାରି ରାଚା ରେ ଦୁବ୍ ଲେନାଏ ଚି ମିୟାଃ ଦାସୀ କୁଡ଼ି ଆଜାଃ ତାଃ ହିଜୁଃ ଲେନାଏ ହାର୍ କାଜିକେଦାଏ, “ଆମ୍ ଅଗି ଗାଲିଲୀ ଜିଲ୍ଲା ରେନ୍ ୟୀଶୁ ଲୋଃ ତାଇକେନାମ୍।” ମେନ୍ଦୋ ଇନିଃ ସବେନ୍ କୋୱାଃ ଥାଲା ରେ ମାନା କେଦାଏ ହାର୍ କାଜିକେଦାଏ, “ଇଙ୍ଗ୍ କାଇଙ୍ଗ୍ ସାରିତାନା ଆମ୍ ଚିନାଃ କାଜିତାନାମ୍।” ଚିମ୍ତାଙ୍ଗ୍ ଇନିଃ ବାହାରି ଦୁହାର୍ ତାଃ ସେନ୍ ଜାନାଏ, ଦୋ ଏଟାଃ ଦାସୀ କୁଡ଼ି ଇନିଃକେ ନେଲ୍‍କେତେ ଇନ୍‍କୁକେ ଅକନ୍‍କୋ ଏନ୍ତାଃରେ ତାଇକେନାକୋ କାଜିକେଃକୋୱାଏ, ନିଜୋ ଗିଦୋ ୟୀଶୁ ନାଜ୍ରେଥିୟା ଲୋଃ ତାଇକେନାଏ। ଇନିଃ କିରିୟା ଜୋମ୍ କେତେ ଆଡୋଃ ମିଶା ମାନା କେଦାଏ, “ଇଙ୍ଗ୍ ଏନ୍ ହୋଡ଼ କେ କାଇଙ୍ଗ୍ ସାରିୟା।” ହୁଡିଙ୍ଗ୍ ସାମାୟ୍ ରାଃ ତାୟୋମ୍ତେ ହୋଡ଼ୋକୋ ଅକନ୍‍କୋ ହେନ୍ତାଃ ରେ ତିଙ୍ଗୁ ଲେନ୍ ତାଇକେନାକୋ, ପାତ୍ରାସ୍ ତାଃ ନାଡ଼େଏ ହିଜୁଃ କେତେ ଇନିଃକେ କାଜିକିଜାକୋ, “ସାର୍ତିଗୀ ଆମ୍ ହଗି ଇନ୍‍କୁଏତେ ମିହୋଡ଼୍ ତାନ୍‍ମେ, ଚିୟାଃଚି ଆମାଃ କାଜିତେ ଆମ୍ ଆଟ୍‍କାର୍ ଉରୁମଃ ତାନାମ୍।” ଇନିଃ ସାର୍ପାଅ ଆଡୋଃ କିରିୟା ଜୋମ୍ କେଦାଏ, “ଇଙ୍ଗ୍ ଏନ୍ ହୋଡ଼ କେ କାଇଙ୍ଗ୍ ସାରିୟା।” ହାର୍ ଇମ୍ତାଗି ସିମ୍ ରାଆ କେଦାଏ। ଇମ୍ତା ପାତ୍ରାସ୍ କେ ଏନ୍ କାଜିକୋ ପାହୋମ୍ ହିଜୁଃଲେନା ଅକନାଃ ୟୀଶୁ କାଜି ଲିଜାଏ, “ସିମ୍‍କୋ ରାଆ ରାଃ ସିଦାରେ ଆମ୍ ଇଙ୍ଗ୍‍କେ ଆପିସା କାଇଙ୍ଗ୍ ସାରିୟା ମେନ୍ତେ କାଜିୟାମ୍।” ହାର୍ ଇନିଃ ବାହାରି ସେନ୍ କେତେ ଥିମ୍ବାଗି ଦୁକୁ ଜାନାଏ ହାର୍ ରାଆ କେଦାଏ। ସେତାଃ-ଇଦାନ୍ ଲୋଃ ଗି ସବେନ୍ ପ୍ରାଧାନ୍ ୟାଜାକ୍‍କୋ ହାର୍ ହୋଡ଼ୋକୋୱାଃ ମାରିହୋଡ଼ୋକୋ ୟୀଶୁ କେ ଗୋଏଃ ଲାଗିନ୍ ବିଚାର୍ କେଦାକୋ। ଇନ୍‍କୁ ଇନିଃକେ ଥୋଲ୍‍କିଜାକୋ ହାର୍ ଇଦିକେତେ ପିଲାତୁସ୍ ହାକିମ୍ ରାଃ ତିଈ ରେ ଜିମା କିଜାକୋ। ଏନ୍ତେ ଚିମ୍ତା ୟାହୁଦା ଅକନିଃ ୟୀଶୁ କେ ସାବ୍ ରିକା ନିଈ ନେଲ୍‍କେଦାଏ ଚି ଇନିଃ ଦୋଷୀ ହୋବାଜାନାଏ ଦୋ ଇନିଃ ପାସ୍ତାଅ କେଦାଏ ହାର୍ ଏନ୍ ତିସ୍ ଠୁ ରୂପା ରାଃ ଶିକା କୋକେ ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ତାଃ ଆଉ ରୁଆଡ଼୍ କେଦାଏ। ହାର୍ କାଜିକେଦାଏ, “ଇଙ୍ଗ୍ ନିର୍ଦୋଷ୍ ହୋଡ଼ କେ ସାବ୍ ରିକା କେତେ ପାପ୍ କେଦାଇଙ୍ଗ୍? ଇନ୍‍କୁ କାଜିକେଦାକୋ, ଆଲେକେ ଚିନାଃ? ଆମ୍ ଗି ସାରିମ୍।” ଏନ୍ତେ ଇନିଃ ଏନ୍ ରୂପା ରାଃ ଶିକା କୋକେ ମାନ୍ଦିର୍ ରାଃ ରାଚା ରେ ଦୁଡ଼ିଙ୍ଗ୍ କେତେ ସେନୋଃ ଜାନାଏ, ହାର୍ ମାନ୍ଦିର୍ ରାଃ ବାହାରି ସେନ୍ କେତେ ଆଏଃଗି ଡୁଙ୍ଗା ଗୋଏଃ ଜାନାଏ। ପ୍ରାଧାନ୍ ୟାଜାକ୍‍କୋ ଏନ୍ ରୂପା ରାଃ ଶିକା କୋକେ ଇଦିକେତେ କାଜିକେଦାକୋ, “ନେୟାକେ, ଭାଣ୍ଡାର୍ ରେ ମାଣ୍ଡାଅ ତେୟାଃ ଆଲେୟାଃ ଆଇନ୍ ହିସାବ୍ ରେ ଠାଉକା ନାହାଲା, ଚିୟାଃଚି ନେୟା ମାୟୋମ୍ ରାଃ ଗୋନୋଙ୍ଗ୍ ତାନାଃ।” ଏନାତେ ଇନ୍‍କୁ ବିଚାର୍ କେତେ ଏନ୍ ଟାକାରେ ଏଟାଃ ଦିଶୁମ୍ ରେନ୍ କୋ ତୋପାଅଃ ଲାଗିନ୍ତେ କୁମ୍ଭାର୍ ରାଃ ଅତେ କେ କିରିଙ୍ଗ୍ କେଦାକୋ। ନେୟାଲାଗିନ୍ ଏନ୍ ଅତେ ଇସିଙ୍ଗ୍ ସାନ୍ତେ ମାୟୋମ୍ ରାଃ ଅତେ କାଜିୟୋଗା। ଏନ୍ତେ ଅକନ୍ ବାଚାନ୍ ୟିର୍ମିୟାହ୍ ନାବୀ ରାଃ ହୋରାତେ କାଜିଲେନା ଏନା ପୁରା ଜାନା, “ଇନ୍‍କୁ ଏନ୍ ତିସ୍ ଟାକା ମାନେ ଏନ୍ ଠାହ୍‍ରାଓ କାନ୍ ଗୋନୋଙ୍ଗ୍ କେ (ଅକନାଃ ଇସ୍ରାଏଲ୍ ଦିଶୁମ୍ ରେନ୍ ଘାରାନା କୋୱାଃ ହୋନ୍ କୋଏତେ ଚିମିନାଙ୍ଗ୍ କୋ ଠାହ୍‍ରାଓ ଲେଦାକୋ) ଇଦିକେଦାକୋ, ହାର୍ ଚିଲ୍‍କା ପ୍ରାଭୁ ଇଙ୍ଗ୍‍କେ ଆନାଚୁ ଏମ୍ ଲେଦିଙ୍ଗାଏ ଏନ୍‍ଲେକାଗି ଏନାକେ କୁମ୍ଭାର୍ ରାଃ ଅତେ ରାଃ ଗୋନୋଙ୍ଗ୍ ଲେକାଗି ଏମ୍ ତାଦାଇଙ୍ଗ୍।” ଚିମ୍ତା ୟୀଶୁ ପିଲାତୁସ୍ ହାକିମ୍ ରାଃ ନାଡ଼େଏ ରେ ତିଙ୍ଗୁ ଲେନ୍ ତାଇନାଏ ଦୋ ପିଲାତୁସ୍ ହାକିମ୍ ଇନିଃକେ କୁଲିକିଜାଏ, “ଚିନାଃ ଆମ୍ ୟାହୁଦୀ କୋୱାଃ ରାଜା ତାନ୍‍ମେ?” ୟୀଶୁ ଇନିଃକେ କାଜିକେଦାଏ, “ଆମ୍ ଗି କାଜି ତାନାମ୍।” ଚିମ୍ତାଙ୍ଗ୍ ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ଇନିଜାଃ ରେ ଦୋଷ୍ ଲାଗାଅ ତାଇନାକୋ, ଦୋ ଇନିଃ ଜେତ୍ନାଃ କାଏ କାଜିରୁଆଡ଼୍ କେଦାଏ। ଏନ୍ତେ ପିଲାତୁସ୍ ଇନିଃକେ କାଜିକେଦାଏ, “ଚିନାଃ ଆମ୍ କାମ୍ ଆୟୁମ୍ ତାନା ଚି ନିକୁ ଆମାଃ ବିରୋଧ୍ ରେ ଚିମିନାଙ୍ଗ୍ ଗୋୱାକୋ ଏମ୍ ତାନା?” ମେନ୍ଦୋ ଇନିଃ ହିନିଃକେ ମିୟାଃ କାଜି ରାଃ ହ କାଏ କାଜିରୁଆଡ଼୍ କିଜାଏ, ଏନାତେ ପିଲାତୁସ୍ ହାକିମ୍ ଥିମ୍ବାଗି ଆକ୍‍ଦାନ୍ଦା ଜାନାଏ। ମେନ୍ଦୋ ରୋମାନ୍ ରାଇଜ୍ ରେନ୍ ହାକିମ୍ ରାଃ ନିୟାମ୍ ତାଇକେନା ଚି ଏନ୍ ପାରାବ୍ ରେ ହୋଡ଼ୋକୋୱାଃ ଲାଗିନ୍ ଜେତାଏ ମିହୋଡ଼୍ କେ ଜେଲ୍ଅଡ଼୍ଆଃ ଏତେ ଅକନିଃକେ ଇନ୍‍କୁ ସାନାଙ୍ଗ୍ ତାଇନାକୋ ବାଗେ ତାଇନାଏ। ଏନ୍ ସାମାୟ୍ ଇନ୍‍କୁୱାଃ ଏନ୍ତାଃ ବାରାବ୍ବା ନୁତୁମ୍ ମିୟାଃ ବାଦ୍‍ନାମ୍ କୈଦୀ ତାଇକେନାଏ। ଏନାମେନ୍ତେ ଚିମ୍ତାଙ୍ଗ୍ ଇନ୍‍କୁ ହୁଣ୍ଡି ଲେନ୍ ତାଇନାକୋ, ଦୋ ପିଲାତୁସ୍ ଇନ୍‍କୁକେ କାଜିୟାଃକୋୱାଏ, “ଆପେ ଅକଏ କେ ସାନାଙ୍ଗ୍ ତାନାପେ ଚି ଇଙ୍ଗ୍ ଆପେୟାଃ ଲାଗିନ୍ ବାଗେତାଇୟାଇଙ୍ଗ୍? ବାରାବ୍ବା କେ ଚି ୟୀଶୁ କେ ଅକନିଃ କେ ମାସୀହ୍ କାଜିୟାକୋ?” ଚିୟାଃଚି ପିଲାତୁସ୍ ସାରିତାଇନାଏ ଚି ଇନ୍‍କୁ ଇନିଃକେ ହିସିଙ୍ଗା ତେ ସାବ୍ ରିକା ଲିଜାକୋ। ଚିମ୍ତା ପିଲାତୁସ୍ ବିଚାର୍ ଜାଗା ରେ ଦୁବ୍ ଲେନ୍ ତାଇକେନାଏ ଦୋ ଇନିଜାଃ କୁଡ଼ି ଇନିଃକେ କାଜିକୁଲ୍ କେଦାଏ, “ଆମ୍ ଏନ୍ ଧାର୍ମୀ ହୋଡ଼ ରାଃ ବିଷାୟ୍ ରେ ଆଲୋମ୍ ବିଚାର୍ ରିକାୟା, ଚିୟାଃଚି ଇଙ୍ଗ୍ ଇସିଙ୍ଗ୍ କୁମୁ ରେ ଇନିଜାଃ ଚାଲ୍ତେ ଥିମ୍ବାଗି ଦୁକୁ ସାହାତିଙ୍ଗ୍ କେଦାଇଙ୍ଗ୍।” ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ହୋଡ଼ୋକୋକେ ଉସ୍କୁର୍ କେଃକୋୱାକୋ ଚି ଇନ୍‍କୁ ବାରାବ୍ବା କେ ଆସିକାକୋ, ହାର୍ ୟୀଶୁ କେ ଗୋଏଃ ରିକା ୟାକୋ। ହାକିମ୍ ଇନ୍‍କୁକେ କୁଲିକେଃକୋୱାଏ, “ନେ ବାରାନ୍‍କିନ୍ ଏତେ ଅକଏ କେ ସାନାଙ୍ଗ୍ ତାନାପେ ଚି ଇଙ୍ଗ୍ ଆପେୟାଃ ଲାଗିନ୍ତେ ବାଗେ ତାଇୟାଇଙ୍ଗ୍?” ଇନ୍‍କୁ କାଜିକେଦାକୋ “ବାରାବ୍ବା କେ।” ପିଲାତୁସ୍ ଇନ୍‍କୁକେ କୁଲିକେଃକୋୱାଏ, “ଏଣ୍ଡେ ୟୀଶୁ କେ ଅକନିଃ କେ ମାସୀହ୍ କାଜିୟାକୋ, ଇନିଃକେ ଚିନାଃ ରିକାୟାଇଙ୍ଗ୍?” ସବେନ୍ କୋ ଇନିଃକେ କାଜିକିଜାକୋ, “ଇନିଃକେ କ୍ରୁଶ୍ ରେ ରାକାବିପେ!” ଏନ୍ତେ ପିଲାତୁସ୍ ହାକିମ୍ କାଜିକେଦାଏ, “ଚିନାଃ ଲାଗିନ୍, ଇନିଃ ଚିନାଃ ଗାଲ୍ତି ରିକା କାଦାଏ?” ମେନ୍ଦୋ ଇନ୍‍କୁ ଆଡୋଃଗି କାଉରି-କାଉରି କେତେ କାଜିକେଦାକୋ, “ଇନିଃକେ କ୍ରୁଶ୍ ରେ ରାକାବିପେ।” ଚିମ୍ତାଙ୍ଗ୍ ପିଲାତୁସ୍ ନେଲ୍‍କେଦାଏ ଚି ଜେତ୍ନାଃ ହଗି କା ବାଇୟୋଃତାନା ମେନ୍ଦୋ ନେୟା ରାଃ ଉଲ୍‍ଟା ହୋହାଲା ହୋବା ଇଦିଅଃ ତାନାଃ, ଦୋ ଇନିଃ ଦାଆ ଇଦିକେତେ ହୋଡ଼ୋକୋୱାଃ ସାମ୍‍ନାଙ୍ଗ୍ ରେ ଆଜାଃ ତିଈ ଆବୁଙ୍ଗ୍ ଜାନାଏ ହାର୍ କାଜିକେଦାଏ, ନେ ଧାର୍ମୀ ହୋଡ଼ ରାଃ ମାୟୋମ୍ ଲିଙ୍ଗୀ କେତେ ଇନିଃ ଗୋଜୋଃ ରେ ଇଙ୍ଗ୍ ନିର୍ଦୋଷ୍ ତାଇନାଇଙ୍ଗ୍, ଆପେ ଦୋଷୀ ବାଇୟୋଃ ୱାପେ। ସବେନ୍ ହୋଡ଼ୋକୋ କାଜିରୁଆଡ଼୍ କେଦାକୋ, “ଇନିଜାଃ ମାୟୋମ୍ ଲିଙ୍ଗୀ କେତେ ଗୋନୋଏଃ ରାଃ ଦୋଷ୍ ଆଲେୟାଃ ରେ ହାର୍ ଆଲେୟାଃ ହୋନ୍-ଗାଣା କୋୱାଃ ରେ ଉୟୁଗୋଃକା।” ଏନ୍ତେ ଇନିଃ ବାରାବ୍ବା କେ ଇନ୍‍କୁୱାଃ ଲାଗିନ୍ ବାଗେ ତାଜାଏ ହାର୍ ୟୀଶୁ କେ କୋଡ୍ରା ମାଉର୍ ଏମ୍ ରିକା କେତେ ଜିମା ତାଃକୋୱାଏ, ଚି କ୍ରୁଶ୍ ରେ ରାକାବୋଃ କାଏ। ଏନ୍ତେ ହାକିମ୍ ରାଃ ସିପାହୀକୋ ୟୀଶୁ କେ ହାକିମ୍ ରାଃ ବିଚାର୍ ଅଡ଼୍ଆଃ ରେ ଇଦିକିଜାକୋ ହାର୍ ସବେନ୍ ପାଲ୍‍ଟାନ୍ କୋକେ ଇନିଜାଃ ସବେନ୍ ପାଡ଼୍ ହୁଣ୍ଡି କେଦାକୋ। ଇନିଜାଃ ଲିଜାଃ ଆଡ଼୍‍ଗୁ କେତେ ଇନିଃକେ ଆରାଃ ଲିଜାଃ ତୁସିଙ୍ଗ୍ କିଜାକୋ। ହାର୍ ଜାନୁମ୍ ରାଃ ମୁକୁଟ୍ ଗାଲାଙ୍ଗ୍ କେତେ ଇନିଜାଃ ବୋଅ ରେ ତୁସିଙ୍ଗ୍ କିଜାକୋ, ହାର୍ ଇନିଜାଃ ଜୋମ୍ ତିଈ ରେ ମାଆସୋଟା ରାଜା ସାବେୟାଏ ଏନ୍ ଲେକା ସାବାଇଜାକୋ ହାର୍ ଇନିଜାଃ ଆୟୁର୍ ରେ ଇକ୍ଡ଼ୁମ୍ କେତେ ଇନିଃକେ ଲାନ୍ଦା ଆପ୍‍ମାନ୍ କିଜାକୋ ହାର୍ କାଜିକିଜାକୋ, “ହେ ୟାହୁଦୀ କୋୱାଃ ରାଜା, ଜୋହାର୍!” ଆଡୋଃ ଇନିଜାଃ ରେ ବେଏଃ କିଜାକୋ ହାର୍ ଏନ୍ ମାଆସୋଟା ଇଦିକେତେ ଇନିଜାଃ ବୋଅ ରେ ବିଡ଼ା ଲାଗାଅ ଜାନାକୋ। ଚିମ୍ତାଙ୍ଗ୍ ଇନ୍‍କୁ ଇନିଃକେ ଲାନ୍ଦା ଆପ୍‍ମାନ୍ ଛାବା କିଜାକୋ, ଦୋ ଏନ୍ ଲିଜାଃ କେ ଇନିଜେତେ ରାଡ଼ା ଆଡ଼୍‍ଗୁ କେତେ ଆଜାଃଗି ଲିଜାଃ ଇନିଃକେ ତୁସିଙ୍ଗ୍ କିଜାକୋ, ହାର୍ କ୍ରୁଶ୍ ରେ ରାକାବ୍ ଲାଗିନ୍ ଇଦିକିଜାକୋ। ବାହାରି ତେ ସେନ୍ ତାନ୍ ଇମ୍ତା ଇନ୍‍କୁକେ ଶିମୋନ୍ ନୁତୁମ୍ କୁରେନୀ ସାହାର୍ ରେନ୍ ମିୟାଃ ହୋଡ଼ ନାମ୍ ଜାନାଏ। ଇନ୍‍କୁ ଇନିଃକେ ଜାବ୍ରାଇ କିଜାକୋ ଚି ଇନିଜାଃ କ୍ରୁଶ୍ ଉଠାଓକେତେ ଇଦିକାଏ। ଏନ୍ ଜାଗା ରେ ଅକନାଃ ଗୋଲ୍‍ଗୋଥା ମାନେ ଖୋପ୍‍ଡ଼ି ରାଃ ଜାଗା କାଜିୟୋଃ ୱା, ସେଟେର୍ କେତେ, ଇନ୍‍କୁ ପିତ୍ତ୍ ମେଶାକାନ୍ ଆଙ୍ଗୁର୍ ରାଶି ଇନିଃକେ ନୁ ଲାଗିନ୍ତେ ଏମାଇଜାକୋ, ମେନ୍ଦୋ ଇନିଃ ଚାଖା କେତେ କାଏ ନୁ ସାନାଙ୍ଗ୍ କେଦା। ଏନ୍ତେ ଇନ୍‍କୁ ଇନିଃକେ କ୍ରୁଶ୍ ରେ ରାକାବ୍ କିଜାକୋ ହାର୍ ଖୁଡ଼୍‍ଖୁଡ଼ି ଉୟୁଃକେତେ ଇନିଜାଃ ଲିଜାଃ ହାଟିଙ୍ଗ୍ ଜାନାକୋ। ହାର୍ ଏନ୍ତାଃରେ ଦୁବ୍ କେତେ ଇନିଃକେ ହୋରୋ କିଜାକୋ। ଆଡୋଃ ଇନିଜାଃ ଦୋଷ୍-ଚିଠି ଇନିଜାଃ ବୋଅ ଚେତାନ୍ ରେ ଲାଗାଅ ତାଦାକୋ, ଚି “ନିଈ ୟାହୁଦୀ କୋୱାଃ ରାଜା ୟୀଶୁ ତାନିଃ।” ଏନ୍ତେ ଇନିଜାଃ ଲୋଃ ବାରିୟା ଡାକୁ ମିୟାଃ ଜୋମ୍ ପାଡ଼୍ ଆଡୋଃ ମିୟାଃ ଲେଙ୍ଗା ପାଡ଼୍ କ୍ରୁଶ୍ ରେ ରାକାବ୍ କେଃକିନାକୋ। ହିଜୁଃ ସେନୋଃ ତାନ୍‍କୋ ବୋଅ ହିଲାଅ-ହିଲାଅ କେତେ ଇନିଃକେ ନିନ୍ଦା ତାଇନାକୋ। ହାର୍ ନେୟା କାଜି ତାଇନାକୋ, “ହେ ମାନ୍ଦିର୍ କେ ଧାଶୁଡ଼୍ ନିଈ ହାର୍ ତିନ୍ ଦିନ୍ ରେ ବାଇ ନିଈ, ଆମ୍ ଆମ୍‍ଗି ଦୋ ବାଞ୍ଚାଅନ୍ ମେ!, ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ, ଦୋ କ୍ରୁଶ୍ ଏତେ ଆଡ଼୍‍ଗୁନ୍ ମେ।” ନେଲେକାଗି ପ୍ରାଧାନ୍ ୟାଜାକ୍‍କୋ, ଆଇନ୍ ଗୁରୁକୋ, ହାର୍ ମାରିହୋଡ଼ୋକୋ ହ ଲାନ୍ଦା କେତେ କାଜି ତାଇକେନାକୋ, “ନିଈ ଦୋ ଏଟାଃ କୋକେ ବାଚାଓ କେଃକୋୱାଏ, ହାର୍ ଆଏଃ ଆପାନ୍ କେ କାଏ ବାଞ୍ଚାଅ ଧାଡ଼ିତାନାଏ। ନିଈ ଦୋ ‘ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋୱାଃ ରାଜା’ ତାନିଃ। ନାଆ କ୍ରୁଶ୍ ଏତେ ଆଡ଼୍‍ଗୁନ୍ କାଏ, ଏଣ୍ଡେ ଆଲେ ବିଶ୍ଵାସ୍ ୟାଲେ। ଇନିଃ ପାର୍ମେଶ୍ଵାର୍ ରେ ଆଶ୍ରା ମାଣ୍ଡାଅ କାଦାଏ, ଆଗାର୍ ଇନିଃ ନିଈ କେ ସାନାଙ୍ଗ୍ ତାନାଏ, ଦୋ ନାଆ ନିଈ କେ ଛୋଡ଼ାୱିକାଏ, ଚିୟାଃଚି ନିଈ କାଜିଲେଦାଏ, ଇଙ୍ଗ୍ ପାର୍ମେଶ୍ଵାର୍ ରାଃ ହୋନ୍ ତାନିଙ୍ଗ୍।” ନେଲେକାଗି ଡାକୁକୋ ଅଗି ଅକନ୍‍କୋ ଇନିଜାଃ ଲୋଃ କ୍ରୁଶ୍ ରେ ରାକାବ୍ ଲେନ୍ ତାଇକେନାକିନ୍, ଇନିଃକେ ନିନ୍ଦା ତାଇକେନାକିନ୍। ତିକିନ୍ ଏତେ ଇଦିକେତେ ତିନ୍ ବାଜେ ସାନ୍ ଏନ୍ ସବେନ୍ ଦିଶୁମ୍ ରେ ନୁବାଃ ଲେନ୍ ତାଇନା। ତିନ୍ ବାଜେ ଲାଗ୍‍ଭାଗ୍ ୟୀଶୁ ମାରାଙ୍ଗ୍ ଆୱାଜ୍ ତେ କାଉରି କେତେ କାଜିକେଦାଏ, “ଏଲି, ଏଲି, ଲାମା ସାବାକ୍ତାନୀ?” ଏନାରାଃ ମାନେ “ହେ ଇଙ୍ଗ୍ଆଃ ପାର୍ମେଶ୍ଵାର୍, ହେ ଇଙ୍ଗ୍ଆଃ ପାର୍ମେଶ୍ଵାର୍, ଆମ୍ ଇଙ୍ଗ୍‍କେ ଚିନାଃ ଲାଗିନ୍ତେ ବାଗେ କେଦିଙ୍ଗାମ୍?” ଅକନ୍‍କୋ ହେନ୍ତାଃ ରେ ତିଙ୍ଗୁ ଲେନ୍ ତାଇନାକୋ, ଇନ୍‍କୁ ଏତେ ଚିମିନାଙ୍ଗ୍ କୋ ନେୟା ଆୟୁମ୍‍କେତେ କାଜିକେଦାକୋ, “ନିଈ ଦୋ ଏଲିୟା ନାବୀ କେ କେଡ଼ାଇ ତାନାଏ।” ଇନ୍‍କୁ ଏତେ ମିହୋଡ଼୍ ଇମ୍ତାଗି ନିର୍ କେଦାଏ, ହାର୍ ସ୍ପଞ୍ଜ ଇଦିକେତେ ଜୋଜୋ ଆଙ୍ଗୁର୍ ରାଶି ରେ ତୁପୁ କେଦାଏ, ହାର୍ ଏନାକେ ମାଆସୋଟା ରାଃ ଆଗା ରେ ମାଣ୍ଡାଅ କେତେ ଚୋପୋଃ ରିକାକିଜାଏ। ମେନ୍ଦୋ ଏଟାଃକୋ କାଜିକେଦାକୋ, “ଆଉରି ତାଇନୋଃ ପେ, ନେଲିୟାବୁ ଏଲିୟା ଇନିଃକେ ବାଞ୍ଚାଅ ଲାଗିନ୍ ହିଜୁଃ ତାନାଏ ଚି କାହା।” ଏନ୍ତେ ୟୀଶୁ ଜୋର୍ତେ କାଉରି କେତେ ଗୋଏଃ ଜାନାଏ। ହାର୍ ନେଲେପେ, ମାନ୍ଦିର୍ ରାଃ ପାର୍ଦା ଚେତାନ୍ ଏତେ ଲାଥାର୍ ସାନ୍ ଚାଗାଡ଼୍ କେତେ ବାର୍ ଖାଣ୍ଡା ହୋବାଜାନା। ହାର୍ ଅତେ ହିଲାଅ ଜାନା ହାର୍ ସେରେଙ୍ଗ୍ କୋ ଚାଟାଃ ଜାନା। ହାର୍ କାବାର୍ କୋ ଖଲାଅ ଜାନା, ହାର୍ ଗୋଜାକାନ୍ ପାବିତାର୍ ହୋଡ଼ୋକୋ ଏତେ ବାହୁତ୍ କୋୱାଃ ମାଣା ଜୀବିରିଃ ଜାନା। ହାର୍ ୟୀଶୁ ରାଃ ଜୀବିନିରିଦ୍ ତାୟୋମ୍ତେ ଇନ୍‍କୁ କାବାର୍ ଏତେ ଅଡୋଙ୍ଗ୍ କେତେ ପାବିତାର୍ ନାଗାର୍ ୟୀରୁଶାଲେମ୍ ତେ ସେନୋଃ ଜାନାକୋ, ହାର୍ ଥିମ୍ବାଗି ହୋଡ଼ୋକୋକେ ନେଲ୍ ଜାନାକୋ। ଏନ୍ତେ ସିପାହୀ କୋୱାଃ ଗୋମ୍‍କେ ହାର୍ ଅକନ୍‍କୋ ୟୀଶୁ କେ ହୋରୋ ତାଇକେନାକୋ, ଅତେହିଲାଅ ଆଡୋଃ ଅକନାଃ ହୋବାଲେନ୍ ତାଇନା ଏନା ନେଲ୍‍କେତେ ଥିମ୍ବାଗି ବୋରୋ ଜାନାକୋ ହାର୍ କାଜିକେଦାକୋ, “ସାର୍ତିଗୀ ନିଈ ପାର୍ମେଶ୍ଵାର୍ ରାଃ ହୋନ୍ ତାଇକେନାଏ!” ଏନ୍ତାଃ ରେ ଥିମ୍ବାଗି କୁଡ଼ିକୋ ଅକନ୍ କୋ ଗାଲିଲୀ ଜିଲ୍ଲା ଏତେ ୟୀଶୁ କେ ସେୱା ତାନ୍‍ଲୋଃ ଇନିଃ ଲୋଃ ହିଜୁଃ ଲେନାକୋ, ସାଙ୍ଗିନ୍ ଏତେ ନେୟା ନେଲ୍ ତାଇନାକୋ। ଇନ୍‍କୁ ଏତେ ମାରିୟାମ୍ ମାଗ୍‍ଦାଲା ସାହାର୍ ରେନ୍, ହାର୍ ୟାକୁବ୍ ହାର୍ ଯୋଶେଷ୍ ରାଃ ଏଙ୍ଗା ମାରିୟାମ୍, ହାର୍ ଯାବ୍ଦୀ ରାଃ ହୋନ୍ କୋୱାଃ ଏଙ୍ଗା ତାଇକେନାକିନ୍। ଚିମ୍ତାଙ୍ଗ୍ ଶିଙ୍ଗି ଡୁବିଃ ଜାନା ଦୋ ଯୋଶେଫ୍ ନୁତୁମ୍ ଆରିମାତିୟା ରେନ୍ ମିୟାଃ କିଶାଣ୍ ହୋଡ଼ ଅକନିଃ ଆଏଜୋଗି ୟୀଶୁ ରାଃ ଚେଲା ତାଇକେନାଏ। ଇନିଃ ପିଲାତୁସ୍ ତାଃ ସେନ୍ କେତେ ୟୀଶୁ ରାଃ ମାଣା କେ ଆସି କେଦାଏ। ଏନ୍ତେ ପିଲାତୁସ୍ ଏମ୍ ଲାଗିନ୍ ଆନାଚୁ କେଦାଏ। ଯୋଶେଫ୍ ହାର୍ ଏଟାଃକୋ ଏନ୍ ମାଣା କେ ଇଦିକେଦାକୋ, ହାର୍ ଏନାକେ ପୁଂଣ୍ଡି ଲିଜାଃ ରେ ଲାଟୁମ୍ କେଦାକୋ, ଏନ୍ତେ ଇନ୍‍କୁ ଏନାକେ ଯୋଶେଫ୍ ରାଃ ନାୱା କାବାର୍ ରେ ମାଣ୍ଡାଅ କେଦାକୋ, ଅକନାଃକେ ଯୋଶେଫ୍ ସେରେଙ୍ଗ୍ ରେ ଉର୍ ରିକା ଲେଃତାଇକେନାଏ ହାର୍ ଏନ୍ କାବାର୍ ରାଃ ଦୁହାର୍ ରେ ମାରାଙ୍ଗ୍ ଦିରି ଗୁଡ୍ରାଓ କେତେ ହାରୁବ୍ କେଦାକୋ ହାର୍ ସେନୋଃ ଜାନାକୋ। ମାରିୟାମ୍ ମାଗ୍‍ଦାଲା ସାହାର୍ ରେନ୍ ହାର୍ ଏଟାଃ ମାରିୟାମ୍ ଏନ୍ତାଃ କାବାର୍ ନାଡ଼େଏ ରେ ଦୁବ୍ ଲେନ୍ତାଇ କେନାକିନ୍। ଏଟାଃ ହୁଲାଙ୍ଗ୍ ଅକନାଃ ସେକାଡ଼େନ୍ ହୁଲାଙ୍ଗ୍ ରାଃ ତାୟୋମ୍ ହୁଲାଙ୍ଗ୍ ତାଇକେନା, ପ୍ରାଧାନ୍ ୟାଜାକ୍‍କୋ ଏତେ ମୁଖିୟା କୋ ହାର୍ ଫାରିସୀ ହୋଡ଼ୋକୋ ଏତେ ଚିମିନାଙ୍ଗ୍ କୋ ପିଲାତୁସ୍ ଲୋଃ ନାପାମ୍ ଲାଗିନ୍ତେ ସେନ୍ ଜାନାକୋ ହାର୍ କାଜିକେଦାକୋ, “ହେ ଗୋମ୍‍କେ, ଆଲେ କେ ମୋନେ ମେନାଃ ଚି ଏନ୍ ଲୋଗୋ ହୋଡ଼ ଚିମ୍ତାଙ୍ଗ୍ ଇନିଃ ଜୀହିଃ ତାଇକେନାଏ, ଇମ୍ତା କାଜିଲେଦାଏ, ‘ଇଙ୍ଗ୍ଆଃ ଗୋଜୋଃ ରାଃ ଆପି ହୁଲାଙ୍ଗ୍ ତାୟୋମ୍ତେ ଇଙ୍ଗ୍ ଆଡୋଃଗି ଜୀହିଃ କେନୋଗାଇଙ୍ଗ୍।’ ଏନା ଲାଗିନ୍ତେ ଆନାଚୁ ଏମାଲେମ୍ ଚି ଆପି ହୁଲାଙ୍ଗ୍ ସାନ୍ତେ କାବାର୍ କେ ହୋରୋ ୟୋଃକା, ଆଗାର୍ ଆମ୍ ନେକା କାମ୍ ରିକାଏ ରେଦୋ ଇନିଜାଃ ଚେଲାକୋ ହିଜୁଃକେତେ ଇନିଜାଃ ମାଣା କେ ଚୋର୍ହା ଇଦିକିୟାକୋ ହାର୍ ହୋଡ଼ୋକୋକେ କାଜିୟାକୋୱାକୋ, ‘ଇନିଃ ଗୋଜାକାନ୍ କୋଏତେ ଜୀବିରିଃ କାନାଏ।’ ଏନ୍ତେ ନେ ତାୟୋମ୍ ରାଃ ବେଦା ମାନେ ‘ୟୀଶୁ ରାଃ ଜୀବିନିରିଦ୍’ ସିଦା ରାଃ ବେଦା ମାନେ ‘ୟୀଶୁ ମାସୀହ୍ ତାଇକେନାଏ’ ଏନା ଏନାତେ ଅଗି ଥିମ୍ବା ଖାରାପ୍ କାଜି ହୋବାଃ ୱା।” ପିଲାତୁସ୍ ଇନ୍‍କୁକେ କାଜିକେଦାଏ, ଆପେ ସିପାହୀ କୋକେ ହୋରୋ ଲାଗିନ୍ ଇଦିକୋପେ। ସେନୋଃ ପେ, ଆପେ ଚିଲ୍‍କା ଧାଡ଼ି ଏନ୍‍ଲେକା କାବାର୍ କେ ହୋରୋ ଏପେ। ଏନ୍ତେ ଇନ୍‍କୁ ସିପାହୀ କୋକେ ହୋରୋ ଲାଗିନ୍ ଇଦି କେଃକୋୱାକୋ ହାର୍ ଦିରି ରେ ମୋହାର୍ ଲାଗାଅ କେତେ କାବାର୍ କେ ହୋରୋ କେଦାକୋ। ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରାଃ ତାୟୋମ୍ତେ, ହାପ୍ତା ରାଃ ପାହିଲା ହୁଲାଙ୍ଗ୍ ସେତାଃ ରେ ମାରିୟାମ୍ ମାଗ୍‍ଦାଲା ସାହାର୍ ରେନ୍ ହାର୍ ଏଟାଃ ମାରିୟାମ୍ କାବାର୍ କେ ନେଲ୍ ଲାଗିନ୍ ହିଜୁଃଲେନାକିନ୍। ହାର୍ ନେଲେପେ, ମିୟାଃ ମାରାଙ୍ଗ୍ ଅତେହିଲାଅ ହୋବାଜାନା, ଚିୟାଃଚି ପ୍ରାଭୁ ରାଃ ମିୟାଃ ସିର୍ମାଦାସୀ ରିମିଲ୍‍ଦିଶୁମ୍ ଏତେ ଆଡ଼୍‍ଗୁ ଜାନାଏ ହାର୍ ନାଡ଼େଏ ହିଜୁଃକେତେ ଏନ୍ ଦିରି କେ ଗୁଡ୍ରାଓ କେଦାଏ ହାର୍ ଏଣ୍ଡେ ରେ ଦୁବ୍ ଜାନାଏ। ଇନିଃ ବିଜ୍‍ଲୀ ଲେକା ନେଲୋଃ ତାଇକେନାଏ ହାର୍ ଇନିଜାଃ ଲିଜାଃ ବାରାଫ୍ ଲେକା ପୁଣ୍ଡୀ ତାଇକେନା। ଇନିଜାଃ ବୋରୋ ତେ ହୋରୋତାନ୍ କୋ ଥାର୍ଥାରାଅ ଜାନାକୋ, ହାର୍ ଗୋଜାକାନ୍ କୋ ଲେକା ହୋବାଜାନାକୋ। ସିର୍ମାଦାସୀ ଏନ୍ ବାରିୟା କୁଡ଼ିକିନ୍ କେ କାଜିକେଃକିନାଏ, “ଆଲୋପେ ବୋରୋଏ, ଇଙ୍ଗ୍ ସାରିୟାଇଙ୍ଗ୍ ଚି ଆପେ ୟୀଶୁ କେ ଅକନିଃ କ୍ରୁଶ୍ ରେ ରାକାବ୍ ଲେନ୍ ତାଇନାଏ ଦାଣାଇ ତାନାପେ। ଇନିଃ ନେତାଃ ରେ ବାଙ୍ଗୁଇଜା, ମେନ୍ଦୋ ଆଜାଃ କାଜି ଲେକାତେ ଆଡୋଃ ମିଶା ଜୀବିରିଃ କାନାଏ। ହିଜୁଃପେ, ନେ ଜାଗା ନେଲେପେ, ଅକ୍ତାଃରେ ପ୍ରାଭୁ ମାଣ୍ଡାଅ ଲେନ୍ ତାଇନାଏ, ନାଆ ସେକାଡ଼୍‍ଗୀ ସେନ୍ କେତେ ଇନିଜାଃ ଚେଲାକୋକେ କାଜିୟାକୋପେ ଚି ଇନିଃ ଗୋଜାକାନ୍ କୋଏତେ ଜୀବିରିଃ କାନାଏ, ହାର୍ ଇନିଃ ଆପେ ତେ ସିଦାରେ ଗାଲିଲୀ ଜିଲ୍ଲା ତେ ସେନୋଃ ତାନାଏ, ଏନ୍ତାଃ ଇନିଃକେ ନେଲିୟାପେ! ନେଲେପେ, ଇଙ୍ଗ୍ ଆପେକେ କାଜି କେଃପେୟାଇଙ୍ଗ୍।” ଇନ୍‍କୁ ବୋରୋତାନ୍ ହାର୍ ରାଶିକାତାନ୍ ଲୋଃ କାବାର୍ ଏତେ ସେକାଡ଼୍ ଗି ରୁଆଡ଼୍ କେତେ ଇନିଜାଃ ଚେଲାକୋକେ ଉଦୁବ୍ ଲାଗିନ୍ ନିର୍ କେଦାକୋ। ଇମ୍ତାଗି ୟୀଶୁ ଇନ୍‍କୁ ଲୋଃ ନାପାମ୍ ଜାନାଏ ହାର୍ କାଜିକେଦାଏ, “ଜୋହାର୍!” ଏନ୍ କୁଡ଼ିକୋ ନାଡ଼େଏ ହିଜୁଃକେତେ ହାର୍ ଇନିଜାଃ କାଟା ସାବ୍ କେତେ ଇନିଃକେ ଜୋହାର୍ କିଜାକୋ। ଏନ୍ତେ ୟୀଶୁ ଇନ୍‍କୁକେ କାଜିକେଦାଏ, “ଆଲୋପେ ବୋରୋଏ, ଇଙ୍ଗ୍ଆଃ ଚେଲାକୋକେ ସେନ୍ କେତେ କାଜିୟାକୋପେ ଚି ଗାଲିଲୀ ଜିଲ୍ଲା ତେ ସେନୋଃ କାକୋ, ଏନ୍ତାଃରେ ଇଙ୍ଗ୍‍କେ ନେଲିଙ୍ଗ୍‍ୟାକୋ।” ଚିମ୍ତା କୁଡ଼ିକୋ ଚେଲାକୋକେ ନେ ଖାବାର୍ ଉଦୁବ୍ ଲାଗିନ୍ ସେନ୍ ତାଇନାକୋ, ଇମ୍ତାରେ ଗି କାବାର୍ କେ ହୋରୋତାନ୍‍ ସିପାହୀକୋ ଏତେ ଚିମିନାଙ୍ଗ୍ କୋ ନାଗାର୍ ରେ ସେନ୍ କେତେ ସବେନ୍ ଖାବାର୍ ପ୍ରାଧାନ୍ ୟାଜାକ୍ କୋକେ କାଜି ଉଦୁବ୍ କେଃକୋୱାକୋ। ଏନ୍ତେ ପ୍ରାଧାନ୍ ୟାଜାକ୍ କୋ, ମାରିହୋଡ଼ୋକୋ ଲୋଃ ହୁଣ୍ଡି କେତେ ବିଚାର୍ କେଦାକୋ ହାର୍ ସିପାହୀ କୋକେ ଥିମ୍ବାଗି ଟାକା ଘୁସ୍ ଲେକା ଏମ୍ କେତେ କାଜି କେଃକୋୱାକୋ, “ହୋଡ଼ୋକୋକେ ନେୟା କାଜିକୋପେ ଚି ନିଦା ଚିମ୍ତାଙ୍ଗ୍ ଆଲେ ଦୁଣୁମ୍ ତାଇନାଲେ, ଦୋ ଇନିଜାଃ ଚେଲାକୋ ହିଜୁଃକେତେ ଇନିଃକେ ଚୋର୍ହା ଇଦିକିଜାକୋ। ହାର୍ ଆଗାର୍ ଆପେ ହୋରୋତାନ୍ ଇମ୍ତା ଦୁଣୁମ୍ ଜାନାପେ ମେନ୍ତେ ନେ କାଜି ହାକିମ୍ ରାଃ ଲୁତୁର୍ ସାନ୍ତେ ସେଟେର୍ ଅଗା, ଏଣ୍ଡେ ଆଲେ ଇନିଃକେ ବୁଝାଅ କିୟାଲେ ହାର୍ ଆପେକେ ଜେତ୍ନାଃ ରାଃ ଚିନ୍ତା ରିକା କା ହୋବାଅଗା।” ଏନ୍ତେ ଇନ୍‍କୁ ଘୁସ୍ ଟାକା ଇଦିକେତେ ଜେଲେକା ଶିଖାଅ ଲେନାକୋ, ଏନ୍‍ଲେକାଗି ରିକା କେଦାକୋ। ନେ କାଜି ଇସିଙ୍ଗ୍ ସାନ୍ତେ ୟାହୁଦୀ କୋୱାଃ ରେ ଚାଲାଓ କାନା। ଏନ୍ତେ ଏଗାରା ଚେଲାକୋ ଗାଲିଲୀ ଜିଲ୍ଲା ରାଃ ଏନ୍ ବୁରୁ ସେନ୍ ଜାନାକୋ, ଅକ୍ତାଃ ୟୀଶୁ ଇନ୍‍କୁକେ ଉଦୁବ୍ ଲେଃତାଇନାଏ। ଚିମ୍ତାଙ୍ଗ୍ ଇନ୍‍କୁ ଇନିଃକେ ନେଲ୍ ନାମ୍ କିଜାକୋ ଦୋ ଜୋହାର୍ କିଜାକୋ ମେନ୍ଦୋ ଚିମିନାଙ୍ଗ୍ କୋ ଇନିଃ ଜୀହିଃ ରୁଆଡ଼୍ କାନାଏ ମେନ୍ତେ ସାନ୍ଦେହ୍ କିଜାକୋ। ୟୀଶୁ ଇନ୍‍କୁ ତାଃ ହିଜୁଃକେତେ କାଜିକେଦାଏ, “ସିର୍ମାଦିଶୁମ୍ ହାର୍ ଅତେ ରାଃ ସବେନ୍ ଆଧିକାର୍ ଇଙ୍ଗ୍‍କେ ଏମାକାନା। ଏନାଲାଗିନ୍ ଆପେ ସେନୋଃପେ, ସବେନ୍ ଜାତି ରେନ୍ ହୋଡ଼ୋକୋକେ ଚେଲା ବାଇକୋପେ, ହାର୍ ଇନ୍‍କୁକେ ଆପୁ, ହାର୍ ହୋନ୍, ହାର୍ ପାବିତାର୍ ଆତ୍ମା ରାଃ ନୁତୁମ୍ ରେ ମିୟାଃ ଚିହ୍ନା ଲେକା ଇନ୍‍କୁ ଇଙ୍ଗ୍ଆଃ ଚେଲା ବାଇଜାନାକୋ ମେନ୍ତେ ବାପ୍ତିସ୍ମା ଏମାକୋପେ। ହାର୍ ଇନ୍‍କୁକେ ସବେନ୍ ଆନାଚୁ କୋକେ ଅକନାଃ ଇଙ୍ଗ୍ ଆପେକେ ଏମାକାଃ ପେୟାଇଙ୍ଗ୍, ମାନାତିଙ୍ଗ୍ ଶିଖାଅ କୋପେ, ହାର୍ ନେଲେପେ, ଇଙ୍ଗ୍ ଅତେଦିଶୁମ୍ ରାଃ ଟୁଣ୍ଡୁ ସାନ୍ତେ ଜାନାଓ ଆପେୟାଃ ଲୋଃ ମେନାଇଙ୍ଗ୍‍ୟା।” ନେୟା ପାର୍ମେଶ୍ଵାର୍ ରାଃ ହୋନ୍ ୟୀଶୁ ମାସୀହ୍ ରାଃ ସୁସାମାଚାର୍ ରାଃ ସୁରୁ ତାନାଃ। ୟାଶାୟାହ୍ ନାବୀ ଆଜାଃ କିତାବ୍ ରେ ନେଲେକା ଅଲେୟାଏ, ପାର୍ମେଶ୍ଵାର୍ ଆଜାଃ ହୋନ୍ କେ କାଜିୟାଏ, “ନେଲେମେ, ଇଙ୍ଗ୍ ଇଙ୍ଗ୍ଆଃ ସାନ୍ଦେଶ୍ ଏହେମ୍ ନିଈ କେ ଆମାଃ ଆୟୁର୍ କୁଲ୍ ତାନିଙ୍ଗ୍, ଇନିଃ ଆମାଃ ଲାଗିନ୍ ହୋରା ବାଇୟେୟାଏ। ସୁନ୍‍ସାନ୍ ଜାଗା ରେ ମିୟାଃ ହୋଡ଼ ହୋଡ଼ୋକୋକେ କାଜିୟାକୋ ତାନାଏ, ଚି ପ୍ରାଭୁ ହିଜୁଃ ତାନାଏ ସେକାଡ଼େନ୍ ପେ, ଇନିଜାଃ ଲାଗିନ୍ ହୋରା ବାଇୟେପେ, ଆଡୋଃ ଏନ୍ ସାଣ୍ଡାକ୍ କୋକେ ସିଧା ରିକାଏପେ ଅକଣ୍ଡେ ଇନିଃ ହୁଜୁଗାଏ।” ଏନ୍ ସାନ୍ଦେଶ୍ ଏହେମ୍ ନିଈ, ଯୋହାନ୍ ବାପ୍ତିସ୍ମା ଏହେମ୍ ନିଈ ତାଇକେନାଏ, ଇନିଃ ସୁନ୍‍ସାନ୍ ଜାଗା ରେ ହୋଡ଼ୋକୋକେ ପାର୍ଚାର୍ ତାଇନାଏ, ଚି ଇନ୍‍କୁ ପାର୍ମେଶ୍ଵାର୍ ଏତେ ପାପ୍ କୋରାଃ ଛାମା ଲାଗିନ୍ ପାପ୍ କାମି ବାଗେ ରାଃ ବାପ୍ତିସ୍ମା ଇଦି ଚାହି। ୟାହୁଦୀୟା ଜିଲ୍ଲା ରେନ୍, ହାର୍ ୟୀରୁଶାଲେମ୍ ସାହାର୍ ରେ ତାଇତାନ୍ ମିଃଥିମ୍ବା ହୋଡ଼ୋକୋ ଅଡୋଙ୍ଗ୍ କେତେ ଇନିଜାଃ ନାଡ଼େଏ ହିଜୁଃ ଲେନାକୋ, ହାର୍ ଚିମ୍ତା ଇନ୍‍କୁ ଆକୋୱାଃ ପାପ୍ କୋକେ ମାନାତିଙ୍ଗ୍ କେଦାକୋ, ଯୋହାନ୍ ଯାର୍ଦାନ୍ ନାଈ ରେ ବାପ୍ତିସ୍ମା ଏମାଃ କୋୱାଏ। ଯୋହାନ୍ ଉଁଟ୍ ଉବ୍ ରାଃ ଲିଜାଃ ତୁସିଙ୍ଗ୍ କାନ୍ ହାର୍ ଆଜାଃ ମାୟାଙ୍ଗ୍ ରେ ଉହୁର୍ ରାଃ କାଶ୍ନା ଥୋଲାକାନ୍ ତାଇୟୋଃ ତାଇକେନାଏ ହାର୍ ସନ୍‍ସରୋଦ୍ କୋକେ ହାର୍ ଟୋନାଙ୍ଗ୍ ଉରୁମ୍‍ସୁକୁ ଜୋମ୍ ତାଇକେନାଏ। ହାର୍ ନେୟା ପାର୍ଚାର୍ ରିକା ତାଇକେନାଏ, “ଇଙ୍ଗ୍ଆଃ ଦୋୟା ତେ ହିନିଃ ହିଜୁଃ ୱାଲା ମେନିଜା, ଅକନିଃ ଇଙ୍ଗ୍ଆଃ ତେ ପେଡ଼େଜାନ୍ ତାନିଃ; ଇଙ୍ଗ୍ ଆଜାଃ ଦାସୀ ଲେକା କୁବୁଃକେତେ ଆୟାଃ ଖାର୍ପା ରାଃ ଥୋନୋଲ୍ ଖଲାଅ ଲେକାନିଃ ହ ନାହାଲାଇଙ୍ଗ୍। ଇଙ୍ଗ୍ ଦୋ ଆପେକେ ଦାଆ ତେ ବାପ୍ତିସ୍ମା ଏମ୍‍କାଦାଇଙ୍ଗ୍, ମେନ୍ଦୋ ଇନିଃ ଆପେକେ ପାବିତାର୍ ଆତ୍ମା ତେ ବାପ୍ତିସ୍ମା ଏମାପେୟାଏ।” ଏନ୍ ହୁଲାଙ୍ଗ୍ କୋରେ ୟୀଶୁ ଗାଲିଲୀ ଜିଲ୍ଲା ରାଃ ନାଜ୍ରେଥ୍ ସାହାର୍ ଏତେ ହିଜୁଃକେତେ, ଯାର୍ଦାନ୍ ନାଈ ରେ ଯୋହାନ୍ ତେ ବାପ୍ତିସ୍ମା ଇଦିକେଦାଏ। ଆଡୋଃ ଚିମ୍ତା ଇନିଃ ଦାଆ ଏତେ ଅଡୋଙ୍ଗ୍ କେତେ ଚେତାନ୍ ହିଜୁଃ ଲେନାଏ, ଏଣ୍ଡେ ଇମ୍ତାଗି ଇନିଃ ରିମିଲ୍‍ଦିଶୁମ୍ କେ ଖୋଲାଅଃତାନ୍ ଆଡୋଃ ପାବିତାର୍ ଆତ୍ମା କେ ଦୁଦ୍‍ମୁଲ୍ ଲେକା ଆଜାଃ ଚେତାନ୍ ରେ ଆଡ଼୍‍ଗୁତାନ୍ ନେଲ୍‍କେଦାଏ। ଆଡୋଃ ପାର୍ମେଶ୍ଵାର୍ ରାଃ ଆୱାଜ୍ ରିମିଲ୍‍ଦିଶୁମ୍ ତେ କାଜିକେଦାଏ, “ଆମ୍ ଇଙ୍ଗ୍ଆଃ ଦୁଲାଡ଼ାନ୍ ହୋନ୍ ତାନ୍‍ମେ, ଆମାଃ ଲୋଃ ଇଙ୍ଗ୍ ସୁକୁ ମେନାଇଙ୍ଗ୍‍ୟା।” ଏନା ତାୟୋମ୍ତେ ପାବିତାର୍ ଆତ୍ମା ୟୀଶୁ କେ ଇମ୍ତାଗି ସୁନ୍‍ସାନ୍ ଜାଗା ପାଡ଼୍ କୁଲ‍୍‍କିଜାଏ। ସୁନ୍‍ସାନ୍ ଜାଗା ରେ ଚାଲିଶ୍ ଦିନ୍ ସାନ୍ ଶାଏତାନ୍ ଇନିଜାଃ ପାରୀକ୍ଷା କେଦାଏ; ହାର୍ ଏନ୍ ସୁନ୍‍ସାନ୍ ଜାଗା ରେ ଟୋନାଙ୍ଗ୍ ପାଶୁକୋ ତାଇକେନାକୋ, ହାର୍ ସିର୍ମାଦାସୀକୋ ଇନିଜାଃ ସେୱା ତାଇକେନାକୋ। ହୁଡିଙ୍ଗ୍ ସାମାୟ୍ ତାୟୋମ୍ତେ, ଯୋହାନ୍ କେ ଜେଲ୍ଅଡ଼୍ଆଃ ରେ ସାବ୍ ଆଦେର୍ କିଜାକୋ, ଏନ୍ତେ ୟୀଶୁ ଗାଲିଲୀ ଜିଲ୍ଲା ରେ ହିଜୁଃକେତେ ପାର୍ମେଶ୍ଵାର୍ ରାଃ ରାଇଜ୍ ରାଃ ସୁସାମାଚାର୍ ପାର୍ଚାର୍ କେଦାଏ। ଆଡୋଃ ଇନିଃ କାଜିକେଦାଏ, “ସାମାୟ୍ ପୁରା କାନା, ଆଡୋଃ ପାର୍ମେଶ୍ଵାର୍ ରାଃ ରାଇଜ୍ ନାଡ଼େଏ ସେଟେର୍ କାନା; ପାପ୍ କାମି ବାଗେ ତାପେ ଆଡୋଃ ସୁସାମାଚାର୍ ରେ ବିଶ୍ଵାସ୍ ଏପେ।” ମୁଶିଙ୍ଗ୍ ହୁଲାଙ୍ଗ୍ ୟୀଶୁ ଗାଲିଲୀ ରାଃ ସାମୁଦାର୍ ଗେନା-ଗେନା ସେନ୍ ଇମ୍ତା, ଶିମୋନ୍ ଆଡୋଃ ଇନିଜାଃ ହାଗା ଆନ୍ଦ୍ରିୟାସ୍ କେ ସାମୁଦାର୍ ରେ ଜାଲୋମ୍ ଦୁଡ଼ିଙ୍ଗ୍ ତାନ୍ ନେଲ୍ କେଃକୋୱାଏ; ଚିୟାଃଚି ଇନ୍‍କୁ ଝୋରା ତାଇକେନାକୋ। ହାର୍ ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ପେ। ନାଆ ସାନ୍ ଆପେ ହାକୁ କୋକେ ସାବ୍ ତାଇକେନାପେ, ମେନ୍ଦୋ ଇଙ୍ଗ୍ ଆପେକେ ହୋଡ଼ୋକୋକେ ଇଙ୍ଗ୍ଆଃ ତାଃ ବିଶ୍ଵାସ୍ ରେ ଆଉ ଶିଖାଅ ପେୟାଇଙ୍ଗ୍।” ଇନ୍‍କୁ ଇମ୍ତାଗି ଜାଲୋମ୍ ତେ ହାକୁ ସାବ୍ କାମି କେ ବାଗେ କେତେ ଇନିଃକେ ଅତୋଙ୍ଗ୍ କିଜାକୋ। ଚିମ୍ତା ୟୀଶୁ ହୁଡିଙ୍ଗ୍ ସାଙ୍ଗିନ୍ ଆୟୁର୍ ସେନ୍ କେତେ, ଇନିଃ ଯାବ୍ଦୀ ରାଃ ହୋନ୍ ୟାକୁବ୍, ଆଡୋଃ ଇନିଜାଃ ହାଗା ଯୋହାନ୍ କେ, ଡୋଙ୍ଗା ରେ ଜାଲୋମ୍ କେ ସୁଧ୍‍ରାଓ ତାନ୍ ନେଲ୍ କେଃକୋୱାଏ। ଚିଲ୍‍କା ଇନ୍‍କୁକେ ନେଲ୍ କେଃକୋୱାଏ ଇନିଃ ଇମ୍ତାଗି ଇନ୍‍କୁକେ କାଜିକେଃକୋୱାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ପେ।” ଆଡୋଃ ଇନ୍‍କୁ ଆକୋୱାଃ ଆପୁ ଯାବ୍ଦୀ କେ ନାଲାତାନ୍ କୋଲୋଃ ଡୋଙ୍ଗା ରେ ବାଗିକେତେ, ଇନିଃକେ ଅତୋଙ୍ଗ୍ କିଜାକୋ। ଏନ୍ତେ ଇନ୍‍କୁ କାଫାର୍ନାହୁମ୍ ସାହାର୍ ତେ ହିଜୁଃ ନାକୋ, ଆଡୋଃ ୟୀଶୁ ସେକାଡ଼୍ ଗି ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଆକୋୱାଃ ବିନ୍ତିଅଡ଼୍ଆଃ ରେ ସେନ୍ କେତେ ଶିଖାଅ ଏଟେଃ କେଦାଏ। ହାର୍ ହୋଡ଼ୋକୋ ଇନିଜାଃ ଶିଖାଅ କାଜିତେ ଆକ୍‍ଦାନ୍ଦା ଜାନାକୋ, ଚିୟାଃଚି ଇନିଃ ଇନ୍‍କୁକେ ଆଇନ୍ ଗୁରୁକୋ ଲେକା କାହା, ମେନ୍ଦୋ ଆଧିକାରୀ କୋ ଲେକା ଶିଖାଅ କୋତାଇନାଏ। ଚିମ୍ତା ୟୀଶୁ ଶିଖାଅ କୁତାଇନାଏ, ଇମ୍ତାଗି ଇନ୍‍କୁୱାଃ ବିନ୍ତିଅଡ଼୍ଆଃ ରେ ମିହୋଡ଼୍ ହୋଡ଼ ତାଇକେନାଏ, ଇନିଃକେ ମିୟାଃ ବୋଙ୍ଗାଆତ୍ମା ଏସେର୍ ଲିଜାଏ। ଇନିଃ କାଉରି କେତେ କାଜିକେଦାଏ, “ହେ ୟୀଶୁ ନାଜ୍ରେଥିୟା, ଆଲେୟାଃ ଲୋଃ ଆମ୍ ଚିନାଃ ସାନାଙ୍ଗ୍ ତାନାମ୍? ଚିନାଃ ଆଲେକେ ଆମ୍ ନାଷ୍ଟ୍ ଲାଗିନାମ୍ ହିଜୁଃ କାନା? ଇଙ୍ଗ୍ ଆମ୍‍କେ ସାରିୟାଇଙ୍ଗ୍, ଆମ୍ ଅକଏ ତାନ୍‍ମେ? ପାର୍ମେଶ୍ଵାର୍ ରାଃ ପାବିତାର୍ ହୋନ୍! ଅକନିଃ ପାର୍ମେଶ୍ଵାର୍ ଏତେ ହିଜୁଃ କାନାଏ।” ୟୀଶୁ ଇନିଃକେ ଧାମ୍‍କାଅ କେତେ କାଜିକେଦାଏ, “ହାପା ତାଇନୋଃମେ! ଆଡୋଃ ଇନିଜାଃ ତେ ଅଡୋଙ୍ଗ୍ ମେ!” ଏଣ୍ଡେ ବୋଙ୍ଗାଆତ୍ମା ଇନିଃକେ ଆଇଣ୍ଠାଅ କେତେ, ହାର୍ ମାରାଙ୍ଗ୍ ଗି କାଉରି କେତେ ଇନିଜାଃ ତେ ଅଡୋଙ୍ଗ୍ ଜାନାଏ। ଏନାତେ ହୋଡ଼ୋକୋ ଆକ୍‍ଦାନ୍ଦା ତାନ୍ ଲୋଃ ଆକୋ-ଆକୋ ରେ ବାକାଣ୍ କେଦାକୋ, “ନେୟା ଚିଲ୍‍କାନ୍ କାଜି ତାନାଃ? ନେୟା ଦୋ ମିୟାଃ ନାୱା ଶିଖାଅକାଜି ତାନାଃ! ଇନିଃ ଆଧିକାର୍ ଲୋଃ ବୋଙ୍ଗାଆତ୍ମା କୋକେ ହ ଆନାଚୁ ଏମାକୁୱାଏ, ହାର୍ ଇନ୍‍କୁ ଇନିଜାଃ ଆନାଚୁ ଆୟୁମ୍ ୟାକୋ।” ଏନ୍ତେ ଇନ୍‍କୁ ଇନିଜାଃ ବିଷାୟ୍ ରେ ଏଟାଃ କୋକେ ଉଦୁବ୍ କେଦାକୋ, ଆଡୋଃ ସେକାଡ଼୍ ଗି ଗାଲିଲୀ ଜିଲ୍ଲା ରାଃ ସବେନ୍ ଜାଗାକୋ ରେ ହୋଡ଼ୋକୋ ଇନିଜାଃ ବିଷାୟ୍ ରେ ଆୟୁମ୍ କେଦାକୋ। ଏନ୍ତେ ୟୀଶୁ ହାର୍ ଆଜାଃ ଚେଲାକୋ ୟାହୁଦୀ କୋୱାଃ ବିନ୍ତିଅଡ଼୍ଆଃ ଏତେ ଅଡୋଙ୍ଗ୍ କେତେ, ୟାକୁବ୍ ଆଡୋଃ ଯୋହାନ୍ ଲୋଃ ଶିମୋନ୍ ଆଡୋଃ ଆନ୍ଦ୍ରିୟାସ୍ ରାଃ ଅଡ଼୍ଆଃ ତେ ହିଜୁଃ ଲେନାକୋ। ଏନ୍ ସାମାୟ୍ ରେ ଶିମୋନ୍ ରାଃ ହାନାର୍ କିନ୍‍କେ ଉରୁୟୁ ସାବ୍ ଲିଜାଏ, ଆଡୋଃ ଆକିନ୍ ଗିତିଜାକାନ୍ ତାଇକେନାକିନ୍। ଆଡୋଃ ଚିମ୍ତା ୟୀଶୁ ଏନ୍ ଅଡ଼୍ଆଃ ଥେବାଃ ଜାନାଏ, ଇନ୍‍କୁ ଇମ୍ତାଗି ଆକିନାଃ ବିଷାୟ୍ ରେ ଇନିଃକେ ଉଦୁବ୍ କିଜାକୋ। ଏନ୍ତେ ୟୀଶୁ ଆକିନାଃ ନାଡ଼େଏ ସେନ୍ ଜାନାଏ, ହାର୍ ଆକିନାଃ ତିଈ ସାବ୍ କେତେ ବିରିଃ କିଜାଏ; ହାର୍ ଆକିନାଃ ଉରୁୟୁ ଆଡ଼୍‍ଗୁ ଜାନା, ଆଡୋଃ ଆକିନ୍ ଇନ୍‍କୁୱାଃ ସେୱା-ସୁସାର୍ ରିକା କେଦାକିନ୍। ଚିମ୍ତା ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଛାବାଜାନା ହାର୍ ଶିଙ୍ଗି ଡୁବିଃ ଜାନା, ଏଣ୍ଡେ ହୋଡ଼ୋକୋ ସବେନ୍ ରାକାମ୍ ରାଃ ବେମାର୍ ତାନ୍ କୋକେ, ଆଡୋଃ ଇନ୍‍କୁକେ ଅକନ୍ କୋୱାଃ ରେ ବୋଙ୍ଗାଆତ୍ମାକୋ ତାଇକେନାକୋ, ୟୀଶୁ ରାଃ ନାଡ଼େଏ ଆଉକେଃକୋୱାକୋ। ଆଡୋଃ ସାହାର୍ ଏତେ ମିଃଥିମ୍ବା ହୋଡ଼ୋକୋ ହିଜୁଃକେତେ ଦୁହାର୍ ରେ ହୁଣ୍ଡି ଜାନାକୋ। ଆଡୋଃ ଇନିଃ ଥିମ୍ବାଗି ହୋଡ଼ୋକୋକେ ଅକନ୍‍କୋ ରାକାମ୍ ରାଃ ବେମାର୍ କୋତେ ଦୁକୁ ତାଇକେନାକୋ, ଚାଙ୍ଗାଇ କେଃକୋୱାଏ; ଆଡୋଃ ଥିମ୍ବାଗି ବୋଙ୍ଗାଆତ୍ମା କୋଏତେ ଏସେର୍‍କାନ୍ ହୋଡ଼ୋକୋକେ ଛୋଡ଼ାଓ କେଃକୋୱାଏ, ଆଡୋଃ ବୋଙ୍ଗାଆତ୍ମା କୋକେ କାଜି କାଏ ଏମ୍ କେଃକୋୱାଏ, ଚିୟାଃଚି ଇନ୍‍କୁ ଇନିଃ କେ ମାସୀହ୍ ତାନିଃ ମେନ୍ତେ ନେଲ୍ଉରୁମ୍ ତାଇକେନାକୋ। ଆଡୋଃ ସେତାଃ ଶିଙ୍ଗି ତୁର୍ ସିଦାରେ, ୟୀଶୁ ବିରିଃ କେତେ ଅଡୋଙ୍ଗ୍‍ନାଏ, ଆଡୋଃ ମିୟାଃ ସୁନ୍‍ସାନ୍ ଜାଗା ରେ ସେନ୍ ଜାନାଏ ହାର୍ ଏନ୍ତାଃରେ ବିନ୍ତି କେଦାଏ। ଏନ୍ତେ ଶିମୋନ୍ ଆଡୋଃ ଇନିଜାଃ ଗାତିକୋ ନେଲ୍ କେଦାକୋ ଚି ୟୀଶୁ କାଏ ନେଲୋଃ ତାନାଏ, ଦୋ ଇନିଃକେ ଦାଣା ନାଙ୍ଗ୍ ସେନ୍ ଜାନାକୋ। ଚିମ୍ତା ଇନିଃ ନାମ୍ ଜାନାଏ, ଏଣ୍ଡେ ଇନିଃକେ କାଜିକେଦାକୋ ଚି, “ଥିମ୍ବାଗି ହୋଡ଼ୋକୋ ଆମ୍‍କେ ଦାଣାମେ ତାନାକୋ।” ଇନିଃ ଇନ୍‍କୁକେ କାଜିକେଃକୋୱାଏ, “ଦୋଲା, ଆବୁ ଆଡୋଃ ଏଟାଃ ନାଡ଼େଏ ହାତୁ କୋରେ ସେନାଃବୁ, ଚି ଇଙ୍ଗ୍ ହେନ୍ତାଃ ରେହ ସୁସାମାଚାର୍ ପାର୍ଚାର୍ ରିକାୟାଇଙ୍ଗ୍, ଚିୟାଃଚି ଇଙ୍ଗ୍ ଏନାଲାଗିନ୍ ଗି ଅତେଦିଶୁମ୍ ରେ ହିଜୁଃ କାନିଙ୍ଗ୍।” ଏନ୍ତେ ୟୀଶୁ ଆଜାଃ ଚେଲାକୋଲୋଃ ଗାଲିଲୀ ଜିଲ୍ଲା ରେ ହୋନୋର୍ ତାନ୍ ଲୋଃ ୟାହୁଦୀ କୋୱାଃ ବିନ୍ତିଅଡ଼୍ଆଃ କୋରେ ସେନ୍-ସେନ୍ କେତେ ପାର୍ଚାର୍ କେଦାଏ, ଆଡୋଃ ବୋଙ୍ଗାଆତ୍ମା କୋଏତେ ଏସେର୍‍କାନ୍ ହୋଡ଼ୋକୋକେ ଛୋଡ଼ାଓ କେଃକୋୱାଏ। ଆଡୋଃ ଏନ୍ତାଃରେ ମିୟାଃ ହୋଡ଼ କେ କୋଢ଼୍ ବିମାର୍ ହୋବାଲେନା, ଇନିଃ ୟୀଶୁ ରାଃ ନାଡ଼େଏ ହିଜୁଃକେତେ, ଇନିଃକେ ଗୁହାରି କିଜାଏ, ହାର୍ ଇନିଜାଃ ନାଡ଼େଏ ଇକ୍ଡ଼ୁମ୍ କେତେ ଇନିଃକେ କାଜିକେଦାଏ, “ଆମ୍ ସାନାଙ୍ଗ୍ତାନ୍ ରେଦୋମ୍, ଇଙ୍ଗ୍‍କେ ବେଶ୍ ଧାଡ଼ିୟାମ୍।” ୟୀଶୁ ଇନିଃକେ ଦାୟା କେତେ ଇନିଜାଃ ରେ ତିଈ ମାଣ୍ଡାଅ କେଦାଏ, ହାର୍ କାଜିକେଦାଏ, “ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍। ବେଶ୍ କେନୋଃମ୍!” ହାର୍ ଇମ୍ତାଗି ଇନିଃ କୋଢ଼୍ ବିମାର୍ ଏତେ ବେଶ୍ ଜାନାଏ। ଏନ୍ତେ ୟୀଶୁ ଇନିଃକେ କେଟେଃଗି ଆନାଚୁ କେତେ ଇମ୍ତାଗି ବିଦା କେତେ କାଜିକିଜାଏ, “ନେଲେମ୍, ଜେତାଏ କେ ଆଲୋମ୍ କାଜିୟା ଚି ଇଙ୍ଗ୍ ଆମ୍‍କେ ବେଶ୍ କାଃମେୟାଇଙ୍ଗ୍, ମେନ୍ଦୋ ସେନ୍ କେତେ ଆପାନ୍ କେ ୟାଜାକ୍ କେ ଦେଖାୱିମେ, ଆଡୋଃ ଆପେୟାଃ ବେଶ୍ ହୋବାଅଃ ବିଷାୟ୍ ରେ ଅକନାଃ ମୁଶା ନାବୀ ଠାହ୍‍ରାଓ କାଦାଏ ଏନାକେ ଭେଁଟ୍ ରାକାବେମେ, ଏନାତେ ସବେନ୍ କୋ ସାରିୟାକୋ ଚି ଆମ୍ ବେଶ୍ ଜାନାମ୍।” ମେନ୍ଦୋ ଇନିଃ ଏନ୍ ଜାଗା ତେ ଅଡୋଙ୍ଗ୍ କେତେ ନେ କାଜିକେ ଥିମ୍ବାଗି ହୋଡ଼ୋକୋକେ ଉଦୁବ୍ କେଃକୋୱାଏ। ଏନାରାଃ ଚାଲ୍ତେ, ୟୀଶୁ ଆଡୋଃ ହୋଡ଼ୋକୋୱାଃ ନେନେଲାନ୍ ରେ ଜାହାନ୍ ହାତୁ ରେ କାଏ ସେନ୍ ଧାଡ଼ିଜାନାଏ, ମେନ୍ଦୋ ସାହାର୍ ବାହାରି ସୁନ୍‍ସାନ୍ ଜାଗାକୋ ରେ ତାଇଜାନାଏ; ମେନ୍ଦୋ ହୋଡ଼ୋକୋ ସବେନ୍ ପାଡ଼୍ ତେ ଇନିଜାଃ ନାଡ଼େଏ ହିଜୁଃ ତାଇକେନାକୋ। ହୁଡିଙ୍ଗ୍ ଦିନ୍ ରାଃ ତାୟୋମ୍ତେ ୟୀଶୁ ଆଡୋଃ ମିଶା କାଫାର୍ନାହୁମ୍ ସାହାର୍ ତେ ହିଜୁଃନାଏ, ଏନ୍ତେ ହୋଡ଼ୋକୋ ଆୟୁମ୍ କେଦାକୋ ଚି ଇନିଃ ଅଡ଼୍ଆଃ ରେ ମେନିଜାଏ। ହାର୍ ନିମିନ୍ ହୋଡ଼ୋକୋ ହୁଣ୍ଡି ଜାନାକୋ ଚି ଦୁହାର୍ ନାଡ଼େଏ ରେହ ଜାଗା କା ତାଇକେନା; ଆଡୋଃ ଇନିଃ ଇନ୍‍କୁକେ ପାର୍ମେଶ୍ଵାର୍ ରାଃ ବାଚାନ୍ ଉଦୁବ୍ କୋ ତାଇକେନାଏ। ହାର୍ ହୋଡ଼ୋକୋ ମିୟାଃ ଏକାଙ୍ଗୀ ରୋଗୀ କେ ଆଉକିଜାକୋ, ଅକନିଃକେ ଚାଇର୍ ଝାନ୍ ହୋଡ଼ୋ ତେ ଗୋଃ କେତେ ଇନିଜାଃ ଜାପାଃ ତେକୋ ଆଉକିଜା। ମେନ୍ଦୋ ଭିଡ଼୍ ରାଃ ଚାଲ୍ତେ ଚିମ୍ତା ଇନିଜାଃ ନାଡ଼େଏ ସେଟେର୍ କାକୋ ଧାଡ଼ିଜାନା, ଏଣ୍ଡେ ଇନ୍‍କୁ ଏନ୍ ଅଡ଼୍ଆଃ ରାଃ ଖାପ୍ରା ଦାଲୋବ୍ କେ ଅକନାଃ ଲାଥାର୍ ରେ ଇନିଜାଏ ତାଇକେନାଏ, ଅଟାଃ କେଦାକୋ; ହାର୍ ଚିମ୍ତା ଇନ୍‍କୁ ଏନାକେ ଅଟାଃ କେଦାକୋ, ଏଣ୍ଡେ ଏନ୍ ଏକାଙ୍ଗୀ ରୋଗୀ କେ ବାୟ୍‍ହାର୍ ତେ ଗିତିଃ-ଜାଟି ଲୋଃ ଅକନାଃ ରେ ତାଇକେନାଏ, ଇନିଜାଃ ନାଡ଼େଏ ଆଡ଼୍‍ଗୁ କେଦାକୋ। ୟୀଶୁ ଇନ୍‍କୁୱାଃ ବିଶ୍ଵାସ୍ ନେଲ୍‍କେତେ ଏନ୍ ଏକାଙ୍ଗୀ ରୋଗୀ କେ କାଜିକେଦାଏ, “ହେ ହାଗା, ଆମାଃ ପାପ୍‍କୋ ଛାମା ଜାନା।” ଏନ୍ତେ ଆଇନ୍ ଗୁରୁ କୋଏତେ ଚିମିନାଙ୍ଗ୍ କୋ ଅକନ୍ କୋ ହେନ୍ତାଃ ରେ ଦୁବ୍ ଲେନାକୋ, ଆକୋୱାଃ-ଆକୋୱାଃ ମୋନ୍ ରେ ବିଚାର୍ କେଦାକୋ, “ନେ ହୋଡ଼ ଚିନାଃ ଲାଗିନ୍ ନେକା କାଜି ତାନାଏ? ନିଈ ଦୋ ପାର୍ମେଶ୍ଵାର୍ ରାଃ ନିନ୍ଦା ତାନାଏ। ପାର୍ମେଶ୍ଵାର୍ କେ ବାଗିକେତେ ଆଡୋଃ ଅକଏ ପାପ୍ ଛାମା ରିକା ଧାଡ଼ିୟାଏ?” ୟୀଶୁ ଇମ୍ତାଗି ଆୟାଃ ମୋନ୍ ରେ ସାରିକେଦାଏ, ଚି ଇନ୍‍କୁ ଆକୋ ଆକୋୱାଃ ମୋନ୍ ରେ ନେଲେକା ବିଚାର୍ ତାନାକୋ, ହାର୍ ଇନ୍‍କୁକେ କାଜିକେଦାଏ, “ଆପେ ଆପେୟାଃ ମୋନ୍ ରେ ନେୟା ଚିନାଃ ଲାଗିନ୍ ବିଚାର୍ ତାନାପେ? ସାହାଜ୍ ଚିନାଃ ତାନାଃ, ଚିନାଃ ଏକାଙ୍ଗୀ ରାଃ ରୋଗୀ କେ ନେୟା କାଜି ଚି ଆମାଃ ପାପ୍ ଛାମା ଜାନା, ଚି ନେୟା କାଜି, ବିରିଃମେ ଆମାଃ ଗିତିଃ-ଜାଟି ଉଠାଓକେତେ ସେନେମେ? ମେନ୍ଦୋ ନେୟାତେ ଆପେ ସାରିକେପେ ଚି ମାନ୍‍ୱା ରାଃ ହୋନ୍ କେ ଅତେ ରେ ପାପ୍ ଛାମା ରିକା ରାଃ ହ ଆଧିକାର୍ ମେନାଃ।” ଇନିଃ ଏନ୍ ଏକାଙ୍ଗୀ ରୋଗୀ କେ କାଜିକେଦାଏ, “ଇଙ୍ଗ୍ ଆମ୍‍କେ କାଜିମେ ତାନିଙ୍ଗ୍, ବିରିଃମେ, ଆମାଃ ଗିତିଃ-ଜାଟି ଉଠାଓକେତେ ଆମାଃ ଅଡ଼୍ଆଃ ସେନୋଃ କୋମେ।” ଇନିଃ ବିରିଃ ଜାନାଏ ହାର୍ ସେକାଡ଼୍‍ଗୀ ଗିତିଃ-ଜାଟି ଉଠାଓକେତେ ସବେନ୍ କୋୱାଃ ଥାଲା ଏତେ ଅଡୋଙ୍ଗ୍ କେତେ ସେନୋଃ ଜାନାଏ; ନେୟାତେ ସବେନ୍ କୋ ଆକ୍‍ଦାନ୍ଦା ଜାନାକୋ, ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାତାନ୍ ଲୋଃ କାଜିକେଦାକୋ, “ଆଲେ ଚିଉଲା ହ ନେକା କାଲେ ନେଲ୍ ଲେଦା।” ୟୀଶୁ ଆଡୋଃ ମିଶା ଗାଲିଲୀ ରେନ୍ ସାମୁଦାର୍ ଗେନା ସେନ୍ ଜାନାଏ, ଆଡୋଃ ମିଃଥିମ୍ବା ହୋଡ଼ୋକୋ ଇନିଜାଃ ନାଡ଼େଏ ହିଜୁଃ ଜାନାକୋ, ଆଡୋଃ ଇନିଃ ଇନ୍‍କୁକେ ପାର୍ମେଶ୍ଵାର୍ ରାଃ ସାନ୍ଦେଶ୍ ଏମ୍‍କେଦାଏ। ସେନୋଃ ତାନ୍ ସାମାୟ୍ ରେ ଇନିଃ ହାଲ୍‍ଫାଇ ରାଃ ହୋନ୍ ଲେବୀ ନୁତୁମ୍ ମିୟାଃ ହୋଡ଼ ଇନିଜାଃ ଏଟାଃ ନୁତୁମ୍ ମାତ୍ତି, କେ ରୋମାନ୍ ସାର୍‍କାର୍ ରାଃ ମାଲ୍‍ହାରୋମ୍ ଅଡ଼୍ଆଃ ଜାଗା ରେ ଦୁବାକାନ୍ ନେଲ୍‍କେଦାଏ, ଆଡୋଃ ୟୀଶୁ ଇନିଃକେ କାଜିକେଦାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ!” ହାର୍ ଇନିଃ ବିରିଃ କେତେ ଇନିଃକେ ଅତୋଙ୍ଗ୍ କିଜାଏ। ଚିମ୍ତା ଇନିଃ ଲେବୀ ଅଡ଼୍ଆଃ ରେ ଜୋମେ ଲାଗିନ୍ ଦୁବ୍ ଜାନାଏ, ଇମ୍ତା ମିଃଥିମ୍ବା ମାଲ୍‍ହାରୋମ୍‍କୋ ଆଡୋଃ ପାପୀକୋ, ୟୀଶୁ ଆଡୋଃ ଇନିଜାଃ ଚେଲାକୋ ଲୋଃ ଜୋମେ ଲାଗିନ୍ ଦୁବ୍ ଜାନାକୋ, ଚିୟାଃଚି ଇନ୍‍କୁ ମିଃଥିମ୍ବା ତାଇକେନାକୋ, ଆଡୋଃ ୟୀଶୁ କେ ଅତୋଙ୍ଗ୍ ତାଇନାକୋ। ଫାରିସୀ ହୋଡ଼ୋକୋ ଏତେ ଚିମିନାଙ୍ଗ୍ ଆଇନ୍ ଗୁରୁକୋ ନେୟା ନେଲ୍‍କେତେ ଚି ଇନିଃ ପାପୀକୋ ଆଡୋଃ ମାଲ୍‍ହାରୋମ୍ କୋଲୋଃ ଜୋମ୍ ତାନାଏ, ଇନିଜାଃ ଚେଲାକୋକେ କାଜିକେଦାକୋ, “ଇନିଃ ଦୋ ମାଲ୍‍ହାରୋମ୍‍କୋ ଆଡୋଃ ପାପୀକୋ ଲୋଃ ଜୋମେ ନୁୱେୟାଏ?” ୟୀଶୁ ନେୟା ଆୟୁମ୍‍କେତେ ଇନ୍‍କୁକେ କାଜିକେଃକୋୱାଏ, “ବୁଗିନ୍ ତାନ୍ କୋକେ ବାଈଦ୍ ରାଃ ଦାର୍‍କାର୍ ବାନୋଗା, ମେନ୍ଦୋ ବିମାରୀକୋ ନାଙ୍ଗ୍ ମେନାଃ; ଇଙ୍ଗ୍ ଧାର୍ମୀ କୋକେ କାହା, ମେନ୍ଦୋ ପାପୀକୋକେ କେଡ଼ା ନାଙ୍ଗ୍ ହିଜୁଃ କାନିଙ୍ଗ୍।” ଯୋହାନ୍ ବାପ୍ତିସ୍ମା ଏହେମ୍ ନିଜାଃ ଚେଲାକୋ, ଆଡୋଃ ଫାରିସୀ ହୋଡ଼ୋକୋ ଉପାସ୍ କୋ ଦହ ତାଇନା। ଏନାମେନ୍ତେ ଚିମିନାଙ୍ଗ୍ ହୋଡ଼ୋକୋ ହିଜୁଃକେତେ ଇନିଃକେ କୁଲିକିଜାକୋ ଚି, “ଯୋହାନ୍ ଆଃ ଚେଲାକୋ ହାର୍ ଫାରିସୀ କୋୱାଃ ଚେଲାକୋ ଚିନାଃ ଲାଗିନ୍ ଉପାସ୍ କୋ ଦହୟା, ମେନ୍ଦୋ ଆମାଃ ଚେଲାକୋ ଉପାସ୍ ଚିନାଃ ଲାଗିନ୍ କାକୋ ଦହୟା?” ୟୀଶୁ ଇନ୍‍କୁକେ କାଜିକେଃକୋୱାଏ, “ଚିମିନ୍ ଜାକେଦ୍ ଦୁଲ୍‍ହା ବାରାତିକୋ ଲୋଃ ତାଇନାଏ, ଚିନାଃ ଇନ୍‍କୁ ଉପାସ୍ କୋ ତାଇନା? ଏନାମେନ୍ତେ ଚିମିନ୍ ଜାକେଦ୍ ଦୁଲ୍‍ହା ଇନ୍‍କୁ ଲୋଃ ମେନାଇଜା, ଇମିନ୍ ସାନ୍ ଇନ୍‍କୁ ଉପାସ୍ କାକୋ ମାଣ୍ଡାଅୟା। ମେନ୍ଦୋ ଏନ୍‍କାନ୍ ସାମାୟ୍ କୋ ହିଜୁଗା, ହାର୍ ଦୁଲ୍‍ହା ଇନ୍‍କୁ ଲୋଃ ଗେନାଅଗାଏ; ଏନ୍ ହୁଲାଙ୍ଗ୍ କୋରେ ଇନ୍‍କୁ ଉପାସ୍ ମାଣ୍ଡାଅୟାକୋ। ନାୱା ଲିଜାଃ ରାଃ ଖାଣ୍ଡା କେ ମାରି ଲିଜାଃ ଲୋଃ ଜେତାଏ କାକୋ ସିଲାଇୟା। କାରେ ଦୋ, ସିଲାଇକାନ୍ ତେୟା ମାନେ ନାୱା ମାରି ଲିଜାଃ କେ ସାଫାତାନ୍ ଇମ୍ତା ଆଡୋଃ ଥାଇଃ କେୟାଏ, ଆଡୋଃ ଏନା ଥିମ୍ବାଗି ଚାଗାଡ଼୍ କେନୋଗା। ନାୱା ଆଙ୍ଗୁର୍ ରାଶି କେ ମାରି ଉହୁର୍ ତୁମ୍ବା ରେ ଜେତାଏ କାକୋ ମାଣ୍ଡାଅୟା, କାରେ ଦୋ ଆଙ୍ଗୁର୍ ରାଶି ଉହୁର୍ ତୁମ୍ବା କେ ଚାଗାଡ଼୍ କେୟାଏ, ହାର୍ ଆଙ୍ଗୁର୍ ରାଶି ଆଡୋଃ ଉହୁର୍ ତୁମ୍ବା ବାରାନାଃ ନାଷ୍ଟ୍ କେନୋଗା; ମେନ୍ଦୋ ନାୱା ଆଙ୍ଗୁର୍ ରାଶି କେ ନାୱା ଉହୁର୍ ତୁମ୍ବା ରେ କୋ ଦୁଲେୟା।” ହାର୍ ନେକା ହୋବାଜାନା ଚି ୟୀଶୁ ଆଜାଃ ଚେଲାକୋଲୋଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଲୋୟୋଙ୍ଗ୍ ଆଡ଼ି ତେ ସେନୋଃ ତାଇକେନାଏ; ହାର୍ ଇନିଜାଃ ଚେଲାକୋ ସେନ୍-ସେନ୍ ଯଅ ଗେଲେ କେ ତିଈ ତେ ପେଟେଃ କେତେ ରାଗ୍ଡ଼ାଅ ଜୋମ୍ ତାଇକେନାକୋ। ଏଣ୍ଡେ ଫାରିସୀ ହୋଡ଼ୋକୋ ଇନିଃକେ କାଜିକେଦାକୋ, “ନେଲେମ୍, ଇନ୍‍କୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଏନ୍ କାମି ଚିନାଃ ଲାଗିନ୍ ରିକା ତାନାକୋ ଅକନାଃ ବୁଗିନାଃ ନାହାଲା?” ଇନିଃ ଇନ୍‍କୁକେ କାଜିକେଦାଏ, “କାଚିପେ ପାଢ଼ାଅ କାନା, ଚି ଚିମ୍ତା ଦାଉଦ୍ କେ ଦାର୍‍କାର୍ ହୋବାଜାନା ଆଡୋଃ ଚିମ୍ତା ଇନିଃ ହାର୍ ଆଜାଃ ଗାତିକୋ ରେଙ୍ଗେଃ ଜାନାକୋ, ଇମ୍ତା ଇନିଃ ଚିନାଃ ରିକା ଲେଦାଏ? ଇନିଃ ଚିନାଃ ମେନେଃ ଆବିୟାତାର୍ ମାରାଙ୍ଗ୍ ୟାଜାକ୍ ସାମାୟ୍ ରେ, ପାର୍ମେଶ୍ଵାର୍ ରାଃ ଅଡ଼୍ଆଃ ରେ ବୋଲୋ କେତେ, ଭେଁଟ୍ ରାଃ ହୋଲୋଙ୍ଗ୍ କୋକେ ଜୋମ୍‍କେଦାଏ, ଅକନାଃକେ ଜୋଜୋମ୍ ଲାଗିନ୍ ୟାଜାକ୍ କୋକେ ବାଗେ କେତେ ଆଡୋଃ ଜେତାଏ କେହ ଠାଉକା କା ତାଇକେନା, ହାର୍ ଆଜାଃ ଗାତିକୋକେ ହ ଏମାଃ କୋୱାଏ?” ହାର୍ ୟୀଶୁ ଇନ୍‍କୁକେ କାଜିକେଦାଏ, “ୟାହୁଦୀ କୋୱାଃ ଆରାମେ ହୁଲାଙ୍ଗ୍ ହୋଡ଼ୋ କୋୱାଃ ବୁଗିନ୍ ଲାଗିନ୍ ବାଇୟାକାନା, ହୋଡ଼ୋକୋ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଦୁକୁ ନାମେ ଲାଗିନ୍ କାକୋ ବାଇୟାକାନା। ଏନାମେନ୍ତେ ମାନ୍‍ୱା ରାଃ ହୋନ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରାଃ ହଗି ପ୍ରାଭୁ ତାନିଃ।” ୟୀଶୁ ହାଡୋଃ ଗି ୟାହୁଦୀ କୋୱାଃ ବିନ୍ତିଅଡ଼୍ଆଃ ତେ ସେନ୍ ଜାନାଏ ଆଡୋଃ ଏନ୍ତାଃରେ ମିହୋଡ଼୍ ହୋଡ଼ ତାଇକେନାଏ, ଇନିଜାଃ ତିଈ ରୋହଡ଼୍ ଲେନା। ଏନ୍ତେ ଫାରିସୀ ହୋଡ଼ୋକୋ ଇନିଃକେ ଦୋଷ୍ ଲାଗାଅ ଲାଗିନ୍ ଲୋଡୋ-ବାଡ଼ା ତାଇନାକୋ, “ଚି ନେଲିୟାବୁ, ଇନିଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଇନିଃକେ ଚାଙ୍ଗାଇ ୟାଏ ଚି କାହା।” ଇନିଃ ରୋହଡ଼୍ କାନ୍ ତିଈ ହୋଡ଼ କେ କାଜିକେଦାଏ, “ଥାଲା ରେ ତିଙ୍ଗୁନ୍ ମେ।” ହାର୍ ୟୀଶୁ ଇନ୍‍କୁକେ କୁଲିକେଃକୋୱାଏ, “ଚିନାଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ବୁଗିନ୍ କାମି ରିକା ଠାଉକା ତାନାଃ ଚି ଏତ୍କାନ୍ କାମି ରିକା, ଜିୟୁ କେ ବାଞ୍ଚାଅ ତେୟାଃ ଚି ଗୋଜେନ୍ ଲାଗିନ୍ ବାଗେ ତେୟାଃ?” ମେନ୍ଦୋ ଇନ୍‍କୁ ହାପା ଜାନାକୋ। ୟୀଶୁ ଇନ୍‍କୁୱାଃ ମୋନ୍ ରାଃ କେଟେଃ ତେ ଦୁକୁ ହୋବା କେତେ ଇନ୍‍କୁକେ ଖିସ୍ ତେ ସବେନ୍ ପାଡ଼୍ ନେଲ୍‍କେଦାଏ, ହାର୍ ଏନ୍ ହୋଡ଼ କେ କାଜିକେଦାଏ, “ଆମାଃ ତିଈ ଆୟୁରେମେ।” ଇନିଃ ଆୟୁର୍ କେଦାଏ ହାର୍ ଇନିଜାଃ ତିଈ ବେଶ୍ ହୋବାଜାନା। ଏନ୍ତେ ଫାରିସୀ ହୋଡ଼ୋକୋ ବାହ୍‍ରେ ସେନ୍ କେତେ ସେକାଡ଼୍‍ଗୀ ହେରୋଦ୍ ରାଜା ରାଃ କାଜି ରେ ଏକ୍ ମୋନ୍ ହୋବାକାନ୍ କୋଲୋଃ ୟୀଶୁ ବିରୋଧ୍ ରେ ରୋଜୋଟ୍ କେଦାକୋ ଚି ଇନିଃକେ ଚିଲ୍‍କା ତେବୁ ଗୋଜିୟା। ଏନା ତାୟୋମ୍ତେ ୟୀଶୁ ଆଜାଃ ଚେଲାକୋ ଲୋଃ ଗାଲିଲୀ ରେନ୍ ସାମୁଦାର୍ ଗେନା ପାଡ଼େତେ ସେନୋଃ ଜାନାଏ, ହାର୍ ଗାଲିଲୀ ଜିଲ୍ଲା ରେନ୍ ମିଃଥିମ୍ବା ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ। ହାର୍ ୟାହୁଦୀୟା ଜିଲ୍ଲା ରେନ୍ ହାର୍ ୟୀରୁଶାଲେମ୍ ସାହାର୍ ରେନ୍ ହାର୍ ଇଦୁମିୟା ଜିଲ୍ଲା ରେନ୍ ହାର୍ ଯାର୍ଦାନ୍ ନାଈ ଫାରୋମ୍ ରେନ୍ ଆଡୋଃ ସୁର୍ ହାର୍ ସିଦୋନ୍ ସାହାର୍ ନାଡ଼େଏ ରେନ୍ ମିଃଥିମ୍ବା ହୋଡ଼ୋକୋ ନେୟା ଆୟୁମ୍‍କେତେ ଚି, ଇନିଃ ଚିଲ୍‍କା ଆକ୍‍ଦାନ୍ଦା କାମି କାମିତାନାଏ, ଇନିଜାଃ ନାଡ଼େଏ ହିଜୁଃ ଜାନାକୋ। ଇନିଃ ଆଜାଃ ଚେଲାକୋକେ କାଜିକେଦାଏ, “ମିଃଥିମ୍ବା ହୋଡ଼ୋକୋୱାଃ ଚାଲ୍ତେ ଇଙ୍ଗ୍ଆଃ ଲାଗିନ୍ତେ ମିୟାଃ ହୁଡିଙ୍ଗ୍ ଡୋଙ୍ଗା ସେକାଡ଼୍‍କାନ୍ ଚାହି, ଏନାତେ ଇନ୍‍କୁ ଇଙ୍ଗ୍ ରେ ଆଲୋକାକୋ ଉୟୁଗୋଃଚା।” ଚିୟାଃଚି ଇନିଃ ମିଃଥିମ୍ବା ହୋଡ଼ୋକୋକେ ଚାଙ୍ଗାଇ ଲେଦାଏ, ଏନାମେନ୍ତେ ଚିମିନାଙ୍ଗ୍ ବେମାରୀକୋ ତାଇକେନାକୋ ଇନିଃକେ ଜୁଟିଃ ଲାଗିନ୍ ଇନିଜାଃ ରେ ଉୟୁଗୋଃ ତାଇକେନାକୋ। ଚିମ୍ତାଙ୍ଗ୍ ବୋଙ୍ଗାଆତ୍ମା ଏସେର୍‍କାନ୍ କୋଗି ଇନିଃକେ ନେଲି ତାଇନାକୋ, ଇମ୍ତା ଇନିଜାଃ ଆୟୁର୍ ରେ ଉୟୁଗୋଃ ତାଇନାକୋ ଆଡୋଃ କାଉରି କେତେ କାଜି ତାଇକେନାକୋ ଚି, “ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ।” ମେନ୍ଦୋ ୟୀଶୁ ବୋଙ୍ଗାଆତ୍ମା କୋକେ କେଟେଃ କାଜିତେ ଚେତାଓ କେଃକୋୱାଏ ଚି, “ଇଙ୍ଗ୍ ଅକଏ ତାନିଙ୍ଗ୍ ଏଟାଃ କୋକେ ଆଲୋପେ ଉଦୁବେୟା।” ଏନା ତାୟୋମ୍ତେ ୟୀଶୁ ବୁରୁ ରେ ରାକାବ୍ ଜାନାଏ, ହାର୍ ଅକନ୍ କୋକେ ଇନିଜାଏ ସାନାଙ୍ଗ୍ କୋ ତାଇନାଏ ଇନ୍‍କୁକେ ଆଜାଃ ନାଡ଼େଏ କେଡ଼ା କେଃକୋୱାଏ; ହାର୍ ଇନ୍‍କୁ ଆଜାଃ ନାଡ଼େଏ ହିଜୁଃ ଜାନାକୋ। ଏନ୍ତେ ଇନିଃ ବାରାଝାନ୍ କୋକେ ସାଲା କେଃକୋୱାଏ, ହାର୍ ଇନ୍‍କୁକେ କୁଲାକାନ୍ ଚେଲା କାଜିକେଃକୋୱାଏ। ଚି ଇନ୍‍କୁ ଇନିଜାଃ ଲୋଃ ତାଇନାକୋ, ହାର୍ ଇନିଃ ଇନ୍‍କୁକେ କୁଲ୍ କୋୱାଏ, ଚି ଇନ୍‍କୁ ପାର୍ଚାର୍ ୟାକୋ। ହାର୍ ବୋଙ୍ଗାଆତ୍ମା କୋକେ ଅଡୋଙ୍ଗ୍ ରାଃ ଆଧିକାର୍ ମାଣ୍ଡାଅୟାକୋ। ଇନ୍‍କୁ ନିକୁ: ତାନ୍‍କୋ ଶିମୋନ୍, ଅକନିଜାଃ ନୁତୁମ୍ ଇନିଃ ପାତ୍ରାସ୍ ମାଣ୍ଡାଅ କେଦାଏ, ହାର୍ ଯାବ୍ଦୀ ଗାଃ ହୋନ୍ ୟାକୁବ୍, ହାର୍ ୟାକୁବ୍ ଗାଃ ହାଗା ଯୋହାନ୍, ଅକନିଜାଃ ନୁତୁମ୍ ଇନିଃ ବୁଆନେର୍ଗିସ୍ ମାନେ “ରିମିଲ୍‍ସାଡି ଗାଃ ହୋନ୍” ମାଣ୍ଡାଅ କେଦାଏ। ହାର୍ ଆନ୍ଦ୍ରିୟାସ୍, ହାର୍ ଫିଲିପୁସ୍, ହାର୍ ବାର୍ତୁଲ୍‍ମୈ, ହାର୍ ଲେବୀ ଇନିଜାଃ ଏଟାଃ ନୁତୁମ୍ ମାତ୍ତି, ହାର୍ ଥୋମା, ହାର୍ ହାଲ୍‍ଫାଇ ଗାଃ ହୋନ୍ ୟାକୁବ୍, ହାର୍ ତାଦେୟ, ହାର୍ ଶିମୋନ୍ ଦିଶୁମ୍ କେ ଦୁଲାଡ଼୍ ନିଈ, ହାର୍ ୟାହୁଦା ଇସ୍କାରିୟୋତୀ, ଅକନିଃ ଚି ତାୟୋମ୍ତେ ୟୀଶୁ କେ ସାବ୍ ରିକା ତାଇଜାଏ। ଏନ୍ତେ ୟୀଶୁ ଅଡ଼୍ଆଃ ତେ ହିଜୁଃ ଲେନାଏ ହାର୍ ଏନ୍‍ଲେକା ଭିଡ଼୍ ହୋଡ଼ୋକୋ ହୁଣ୍ଡି ଜାନାକୋ, ଚି ଇନିଃ ହାର୍ ଆଜାଃ ଚେଲାକୋ ହୋଲୋଙ୍ଗ୍ ଅଗି କାକୋ ଜୋମ୍ ଧାଡ଼ିଜାନା। ଚିମ୍ତାଙ୍ଗ୍ ଆଜାଃ ଅଡ଼୍ଆଃ ରେନ୍ କୋ ନେୟା ଆୟୁମ୍ କେଦାକୋ, ଦୋ ଇନ୍‍କୁ ଇନିଃକେ ସାବ୍ ଲାଗିନ୍ତେ ଅଡୋଙ୍ଗ୍ ଜାନାକୋ, ଚିୟାଃଚି ଇନ୍‍କୁ କାଜି ତାଇକେନାକୋ ଚି ଇନିଃ ବାୟ୍‍ହା ଜାନାଏ। ଆଡୋଃ ୟୀରୁଶାଲେମ୍ ସାହାର୍ ଏତେ ଅକନ୍ ଆଇନ୍ ଗୁରୁକୋ ହିଜୁଃ ଲେନାକୋ, ନେୟା କାଜି ତାଇନାକୋ, “ଇନିଜାଃ ରେ ଶାଏତାନ୍ ମେନାଇଜା ହାର୍ ଇନିଃ ବୋଙ୍ଗାଆତ୍ମା କୋୱାଃ ମୁଖିୟା ମାନେ ବାଲ୍‍ଜିବୁଲ୍ ରାଃ ଦେଙ୍ଗା ଏତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋୱାଏ।” ହାର୍ ଇନିଃ ଇନ୍‍କୁକେ ନାଡ଼େଏ କେଡ଼ାକେତେ, ଇନ୍‍କୁକେ ଜୋନୋକା କାଜିତେ କାଜିୟାଃକୋୱାଏ, “ଶାଏତାନ୍ ଚିଲ୍‍କା ଆଜାଃ ବୋଙ୍ଗାଆତ୍ମା କୋକେ ଅଡୋଙ୍ଗ୍ ଲାଗିନ୍ ଜାବ୍ରାଇ କୋୱାଏ? ଜେତାନ୍ ରାଇଜ୍ ରେନ୍ ହୋଡ଼ୋକୋ ଆକୋ ଆକୋରେଗି ବିପିଡ଼ା ହୋବାଅ କୋରେ, ଏନ୍ ରାଇଜ୍ ଚିଲ୍‍କା ବାଇକେତେ ତାଇନୋଃ ୱା। ଆଡୋଃ ଜେତାନ୍ ଅଡ଼୍ଆଃ ରେନ୍ ହୋଡ଼ୋକୋ ଆକୋ ଆକୋରେଗି ବିପିଡ଼ା ହୋବାଅ କୋରେ, ଏନ୍ ଅଡ଼୍ଆଃ ଚିଲ୍‍କା ବାଇକେତେ ତାଇନୋଃ ୱା? ଏନ୍‍ଲେକାଗି ଆଗାର୍ ଶାଏତାନ୍ ଆଜାଃ ଗି ବିରୋଧୀ ହୋବା କେତେ ଆକୋ ଆକୋରେଗି ବିପିଡ଼ା ହୋବାଅ କୋରେ, ଚିନାଃ ଇନିଃ ବାଇକେତେ ତାଇନ୍ ଧାଡ଼ିୟୋଃ ୱାଏ? ଇନିଃଦୋ ଟୁଣ୍ଡୁଅଃ ୱାଏ। ମେନ୍ଦୋ ଜେତାଏ, ଶାଏତାନ୍ ଲେକା ପେଡ଼େଜାନ୍ ଜେତାନ୍ ହୋଡ଼ ରାଃ ଅଡ଼୍ଆଃ ରେ ବୋଲୋ କେତେ ଇନିଜାଃ ଜିନିଷ୍ କାଏ ରେଏଃ ଧାଡ଼ିୟାଏ, ଚିମିନ୍ ସାନ୍ତେ ଚି ଇନିଃ ସିଦା ଏନ୍ ପେଡ଼େଜାନ୍ ନିଈକେ କାଏ ହାରାୱିୟାଏ ହାର୍ ଥୋଲିୟାଏ, ଏନ୍ତେ ଇନିଃ ଇନିଜାଃ ଅଡ଼୍ଆଃ ରେ ବୋଲୋ ହାର୍ ରେଏଃ ଧାଡ଼ିୟାଏ। ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍, ଚି ହୋଡ଼ୋକୋୱାଃ ସବେନ୍ ପାପ୍‍କୋ ହାର୍ ନିନ୍ଦାକୋ ଅକନାଃ ଇନ୍‍କୁ ରିକା ତାନାକୋ ଏନା ଛାମାୱା। ମେନ୍ଦୋ ଅକଏ ପାବିତାର୍ ଆତ୍ମା ବିରୁଦ୍ଧ୍ ରେ ନିନ୍ଦାୟାଏ, ଏନା ଚିଉଲା ଅଗି କା ଛାମାୱା, ମେନ୍ଦୋ ଇନିଃ କାଟୁଣ୍ଡୁ ପାପ୍ ରାଃ ଦୋଷୀ ହୋବାଅଃ ୱାଏ।” ଚିୟାଃଚି ଇନ୍‍କୁ ନେୟା କାଜି ତାଇନାକୋ, “ଇନିଜାଃ ରେ ବୋଙ୍ଗାଆତ୍ମା ମେନାଇଜା।” ଏନ୍ତେ ୟୀଶୁ ରାଃ ଏଙ୍ଗା ହାର୍ ଇନିଜାଃ ହୁଡିଙ୍ଗ୍ ହାଗାକୋ ହିଜୁଃ ଲେନାକୋ ହାର୍ ବାହ୍‍ରେ ତିଙ୍ଗୁ କେତେ ଇନିଃକେ କେଡ଼ା କୁଲ୍ କିଜାକୋ। ଇମ୍ତା ମିଃଥିମ୍ବା ହୋଡ଼ୋକୋ ଇନିଜାଃ ନାଡ଼େଏ ଜାପାଃ କୋରେ ଦୁବ୍‍ଲେନ୍ ତାଇନାକୋ, ହାର୍ ଇନ୍‍କୁ ଇନିଃକେ କାଜିକେଦାକୋ, “ନେଲେମ୍, ଆମାଃ ଏଙ୍ଗା ହାର୍ ଆମାଃ ହୁଡିଙ୍ଗ୍ ହାଗାକୋ ହାର୍ ମିଶିକୋ ବାହାରି ରେ ଆମ୍‍କେ ଦାଣାମେ ତାନାକୋ।” ୟୀଶୁ ଇନ୍‍କୁକେ ଉତ୍ତାର୍ ଏମାଃ କୋୱାଏ, “ଇଙ୍ଗ୍ଆଃ ଏଙ୍ଗା ହାର୍ ଇଙ୍ଗ୍ଆଃ ହାଗାକୋ ଅକଏ ତାନ୍‍କୋ?” ହାର୍ ଇନ୍‍କୁ ପାଡ଼୍ ଅକନ୍‍କୋ ଆଜାଃ ନାଡ଼େଏ ଜାପାଃ ରେ କୋ ଦୁବ୍‍ଲେନ୍ ତାଇନା ନେଲ୍‍କେତେ କାଜିକେଦାଏ, “ନେଲେପେ, ଇଙ୍ଗ୍ଆଃ ଏଙ୍ଗା ଆଡୋଃ ହାଗାକୋ ନିକୁ ତାନ୍‍କୋ। ଚିୟାଃଚି ଅକଏ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକା ସେସେନ୍ ତାନାଏ ଇନିଃ ଇଙ୍ଗ୍ଆଃ ହାଗା ହାର୍ ମିଶି ହାର୍ ଏଙ୍ଗା ତାନିଃ।” ୟୀଶୁ ଆଡୋଃ ମିଶା ଗାଲିଲୀ ସାମୁଦାର୍ ଗେନା ରେ ଉପ୍‍ଦେଶ୍ ଏମ୍ ଏଟେଃ କେଦାଏ, ଏନ୍ତେ ଏନ୍‍ଲେକା ମିଃଥିମ୍ବା ହୋଡ଼ୋକୋ ଇନିଜାଃ ନାଡ଼େଏ ହୁଣ୍ଡି ଜାନାକୋ, ଚି ଇନିଃ ସାମୁଦାର୍ ରେ ମିୟାଃ ଡୋଙ୍ଗା ରେ ରାକାବ୍ କେତେ ଦୁବ୍ ଜାନାଏ, ହାର୍ ମିଃଥିମ୍ବା ହୋଡ଼ୋକୋ ଅତେ ରେ ସାମୁଦାର୍ ରାଃ ଗେନା ରେ ତିଙ୍ଗୁ ଲେନାକୋ। ଏନ୍ତେ ଇନିଃ ଇନ୍‍କୁକେ ଜୋନୋକା ଲେକାତେ ବାହୁତ୍ ଗି କାଜିକୋ ଶିଖାଅ କେଃକୋୱାଏ, ହାର୍ ଆଜାଃ ଉପ୍‍ଦେଶ୍ ରେ ଇନ୍‍କୁକେ କାଜିକେଦାଏ, “ଆୟୁମେପେ, ମିୟାଃ ହେର୍‍ନିଃ ହିତା ହେର୍ ଅଡୋଙ୍ଗ୍ ଜାନାଏ। ଆଡୋଃ ହେର୍ ସାମାୟ୍ ରେ ଚିମିନାଙ୍ଗ୍ ହିତା ହୋରା ରାଃ ଗେନା ରେ ଉୟୁଃଜାନା ହାର୍ ଅଡ଼େକୋ ହିଜୁଃକେତେ ଏନାକେ ଜୋମ୍ ତାଦାକୋ। ଆଡୋଃ ଚିମିନାଙ୍ଗ୍ ହିତା ଦିରିଅତେ ରେ ଉୟୁଃଜାନା ଏନ୍ତାଃରେ ଏନାକେ ଥିମ୍ବା ହାସା କାନାମ୍‍ଜାନା, ହାର୍ ଥିମ୍ବା ହାସା କା ନାମ୍ ଜାନ୍ତେ ସେକାଡ଼୍ ଗି ଅମୋନ୍ ଜାନା। ହାର୍ ଚିମ୍ତା ଶିଙ୍ଗି ରାକାବ୍‍ନାଏ ଦୋ ଗୋସୋ ଜାନା ହାର୍ ରେହେଃ କା ସାବେ ରାଃ ହୋରାତେ ରୋହଡ଼୍ ଜାନା। ଆଡୋଃ ଚିମିନାଙ୍ଗ୍ ହିତା ଜାନୁମ୍ ବୁଟା ଥାଲା ରେ ଉୟୁଃଜାନା ହାର୍ ଜାନୁମ୍ ବୁଟା କୋଏତେ ହାରା ତୋପାୟାନା ଆଡୋଃ ଏନା କା ଯଅ ଜାନା। ମେନ୍ଦୋ ଚିମିନାଙ୍ଗ୍ ହିତା ବେଶ୍ ଅତେ ରେ ଉୟୁଃଜାନା, ହାର୍ ଏନା ଅମୋନ୍ ଜାନା, ଆଡୋଃ ହାରାୟାନ୍ତେ ଗେଲେ ଜାନା, ଅକନାଃ ତିସ୍ ଗୁନା, ଅକନାଃ ସାଠ୍ ଗୁନା ହାର୍ ଅକନାଃ ଶାଅ ଗୁନା ଯଅ ଜାନା।” ଏନ୍ତେ ୟୀଶୁ କାଜିକେଦାଏ, “ଅକେୟାଃ ତାଃ ଆୟୁମ୍ ଲାଗିନ୍ ଲୁତୁର୍ ମେନାଃ, ଇନିଃ ଆୟୁମେ କାଏ।” ଚିମ୍ତା ୟୀଶୁ ଏସ୍କାର୍ ତାଇଜାନାଏ, ଦୋ ଚିମିନାଙ୍ଗ୍ ହୋଡ଼ୋକୋ ଆଡୋଃ ଏନ୍ ବାରାଝାନ୍ କୁଲାକାନ୍ ଚେଲାକୋ ଇନିଃକେ ନେ ଜୋନୋକା ରାଃ ମାନେ କୁଲିକିଜାକୋ। ଇନିଃ ଇନ୍‍କୁକେ କାଜିକେଦାଏ, “ଆପେକେ ପାର୍ମେଶ୍ଵାର୍ ରାଃ ରାଇଜ୍ ରାଃ ଉକୁକାନ୍ କାଜି ରାଃ ସେଣା ଏମାକାନା, ମେନ୍ଦୋ ଇନ୍‍କୁ ଅକନ୍‍କୋ ଇଙ୍ଗ୍‍କେ କାକୋ ସାରିତାନା ଇନ୍‍କୁ ଲାଗିନ୍ ସବେନ୍ କାଜି ଜୋନୋକା ଲେକାତେ କାଜିଅଃ ୱା।” ଏନାଲାଗିନ୍ ପାବିତାର୍ ପୁଥି କାଜିୟାଏ, “ଇନ୍‍କୁ ନେଲ୍‍ତାନ୍ ରେ ହଗି ନେଲେୟା ଆଡୋଃ ଇନ୍‍କୁକେ କାନେଲୋଃୱା ଆଡୋଃ ଆୟୁମ୍‍ତାନ୍ ରେ ହଗି କାକୋ ବୁଝାଅଃ ୱା। ମେନ୍ଦୋ, ଆଗାର୍ ଇନ୍‍କୁ ବୁଝାଅ ଧାଡ଼ି କେତେ ପାପ୍ ଏତେ ରୁଆଡ଼୍ ଜାନ୍ତେକୋ ଏଣ୍ଡେ ଛାମା କୋ ନାମେତେ।” ଆଡୋଃ ୟୀଶୁ ଇନ୍‍କୁକେ କାଜିକେଦାଏ, “ଚିନାଃ ଆପେ ନେ ଜୋନୋକା କାପେ ବୁଝାଅଃ ତାନା? ଦୋ ଏଟାଃ ସବେନ୍ ଜୋନୋକା କୋକେ ଚିଲ୍‍କା ପେ ବୁଝାଅଃ ୱା? ହେର୍‍ନିଃ ପାର୍ମେଶ୍ଵାର୍ ରାଃ ବାଚାନ୍ ହେର୍ ତାନାଏ। ଚିମିନାଙ୍ଗ୍ ହୋଡ଼ୋକୋ ଏନ୍ ହୋରା ରେ ହେର୍ କାନ୍ ବାଚାନ୍ ଲେକା ତାନ୍‍କୋ, ଚିମ୍ତାଙ୍ଗ୍ ଇନ୍‍କୁ ଆୟୁମ୍ କେଦାକୋ, ଦୋ ଶାଏତାନ୍ ଇମ୍ତାଗି ହିଜୁଃକେତେ ଅକନ୍ ବାଚାନ୍ ଇନ୍‍କୁୱାଃ ରେ ହେର୍ ଲେନ୍ ତାଇନା ଉଠାଓ ଇଦି କେୟାଏ। ଏନ୍‍ଲେକାଗି ଅକନାଃ ଦିରିଅତେ ରେ ହେର୍‍ଅଃ ତାନା, ଇନ୍‍କୁ ନେକୋ ତାନ୍‍କୋ, ଚି ଅକନ୍‍କୋ ବାଚାନ୍ କେ ଆୟୁମ୍‍କେତେ ଇମ୍ତାଗି ରାଶିକା ଲୋଃ ମାନାତିଙ୍ଗ୍ କେୟାକୋ। ମେନ୍ଦୋ ଆକୋୱାଃ ଭିତାର୍ ରେ ରେହେଃ କାଏ ସାବେ ରାଃ ହୋରାତେ ଇନ୍‍କୁ ହୁଡିଙ୍ଗ୍ ଦିନ୍ ଲାଗିନ୍ କୋ ତାଇନା, ନେୟା ତାୟୋମ୍ତେ ଚିମ୍ତା ପାର୍ମେଶ୍ଵାର୍ ରାଃ ବାଚାନ୍ ରାଃ ହୋରାତେ ଇନ୍‍କୁୱାଃ ରେ ସାସାତି ୟା ସାତାଅ ହୋବାଅଃୱା, ଦୋ ଇନ୍‍କୁ ଇମ୍ତାଗି ବିଶ୍ଵାସ୍ କେ ବାଗେ ୟାକୋ। ଆଡୋଃ ଅକନାଃ ଜାନୁମ୍ ବୁଟା ରେ ହେର୍ ଲେନା, ଇନ୍‍କୁ ନେକୋ ତାନ୍‍କୋ ଅକନ୍‍କୋ ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍ କେଦାକୋ। ହାର୍ ଅତେଦିଶୁମ୍ ରେ ଜୀହିଃ ରାଃ ଚିନ୍ତା, ହାର୍ କିଶାଣ୍ ବାଇୟେନ୍ ଲାଗିନ୍ ଦୁଲାଡ଼୍ ହାର୍ ଏଟାଃ ଜିନିଷ୍‍କୋ ରାଃ ହାୟା, ଇନ୍‍କୁ ରେ ବୋଲୋ କେତେ ପାର୍ମେଶ୍ଵାର୍ ରାଃ ବାଚାନ୍ କେ ଅତାତୋପା କେୟାଏ ହାର୍ ଏନା କା ଯଅ ୱା। ହାର୍ ଅକନାଃ ବେଶ୍ ଅତେ ରେ ହେର୍ ଲେନା, ଇନ୍‍କୁ ନେକୋ ତାନ୍‍କୋ, ଅକନ୍‍କୋ ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍‍କେତେ ମାନାତିଙ୍ଗ୍ କେୟାକୋ ଆଡୋଃ ଯଅ ଆଉୱେୟାକୋ, ଅକନ୍‍କୋ ତିସ୍ ଗୁନା, ଅକନ୍‍କୋ ସାଠ୍ ଗୁନା, ହାର୍ ଅକନ୍‍କୋ ଶାଅ ଗୁନା।” ଆଡୋଃ ୟୀଶୁ ଇନ୍‍କୁକେ କାଜିକେଦାଏ, “ଚିନାଃ ବାତୀ କେ ନେୟାଲାଗିନ୍ ଆଉୱେୟାକୋ ଚି ପାଇଲା ୟାଦୋ ପାର୍କୋମ୍ ଲାଥାର୍ ରେ ମାଣ୍ଡାଅଃ ୱା? ଚିନାଃ ନେୟାଲାଗିନ୍ କାହା ଚି ପାଖା ଚେତାନ୍ ରେ ମାଣ୍ଡାଅଃ ୱା? ଚିୟାଃଚି ଜାହାନ୍ ଜିନିଷ୍ ଉକୁକାନ୍ ବାନୋଗା, ମେନ୍ଦୋ ନେୟାଲାଗିନ୍ ମେନାଃ ଚି ଉଦୁବଃ କା; ହାର୍ ନା ଜାହାନାଃ ଦାନାଙ୍ଗ୍‍କାନ୍ ମେନାଃ, ମେନ୍ଦୋ ନେୟାଲାଗିନ୍ ମେନାଃ ଚି ଏନା ଉଦୁବଃ ୱା। ଆଗାର୍ ଅକେୟାଃ ଆୟୁମ୍ ଲାଗିନ୍ ଲୁତୁର୍ ମେନାଃ ରେଦୋ ଇନିଃ ଆୟୁମେ କାଏ।” ଆଡୋଃ ଗି ୟୀଶୁ ଇନ୍‍କୁକେ କାଜିକେଦାଏ, “ଧ୍ୟାନ୍ ରେ ତାଇନ୍‍ପେ, ଚି ଚିନାଃ ପେ ଆୟୁମ୍ ତାନା। ଅକନ୍ ନାପ୍ ତେ ଆପେ ସୋଙ୍ଗେୟା, ଏନ୍ ନାପ୍ ତେଗି ଆପେୟାଃ ଲାଗିନ୍ ସୋଙ୍ଗୋଗା। ହାର୍ ଆପେକେ ଥିମ୍ବା ଏମୋଗା। ଚିୟାଃଚି ଅକେୟାଃ ତାଃ ରେ ମେନାଃ, ଇନିଃକେ ଥିମ୍ବା ଏମୋଗା, ମେନ୍ଦୋ ଅକେୟାଃ ତାଃ ରେ ବାନୋଗା, ଇନିଃତେ ଏନ୍ ହୁଡିଙ୍ଗ୍ ତେୟାଃ ଅଗି ଅକନାଃ ଇନିଜାଃ ତାଃ ରେ ମେନାଃ ଇଦିୟୋଗା।” ଆଡୋଃ ୟୀଶୁ କାଜିକେଦାଏ, “ପାର୍ମେଶ୍ଵାର୍ ରାଃ ରାଇଜ୍ ନେଲେକା ତାନାଃ, ଜେଲେକା ମିୟାଃ ଚାଷୀହୋଡ଼୍ ଅତେ ରେ ହିତା ହେରେୟାଏ। ହାର୍ ନିଦା ରେ ଗିତିଜାଏ, ହାର୍ ଶିଙ୍ଗି ରେ ଏୟୋନାଏ, ହାର୍ ଏନ୍ ହିତା ଏନ୍‍ଲେକା ଅମୋନା, ହାର୍ ହାରାଃୱା, ଏନାକେ ଇନିଃ କାଏ ସାରିଧାଡ଼ିୟାଏ। ଅତେ ଆଏଃ ତେଗି ଯଅ ଆଉୱେୟାଏ, ସିଦାତେ ଗାଜା, ଏନ୍ତେ ଗେଲେ, ହାର୍ ଗେଲେ ଏତେ ଯାଙ୍ଗ୍ ବାଇୟୋଃ ୱା। ମେନ୍ଦୋ ଚିମ୍ତା ଯାଙ୍ଗ୍ ମାତା କୋୱା, ଇମ୍ତା ଇନିଃ ହୋଡ଼ୋକୋକେ ଦାତ୍ରୋମ୍ ସାବ୍‍କେତେ କୁଲ୍ କୋୱାଏ, ଚିୟାଃଚି ଇରଃ ସାମାୟ୍ ସେଟେର୍ ଜାନା।” ଆଡୋଃ ଗି ୟୀଶୁ କାଜିକେଦାଏ, “ଆବୁ ପାର୍ମେଶ୍ଵାର୍ ରାଃ ରାଇଜ୍ କେ ଚିଲ୍‍କା ଲେକାବୁ ମେନେୟା ୟାଦୋ, ଅକୋ ଜୋନୋକା କାଜିତେ ଏନାକେବୁ ଉଦୁବେୟା? ଏନା ମାନି ଯାଙ୍ଗ୍ ଲେକା ତାନାଃ, ଚିମ୍ତା ଅତେ ରେ ହେରଅଃୱା, ଏନା ଅତେ ରାଃ ସବେନ୍ ହିତା କୋଏତେ ହୁଡିଙ୍ଗ୍ଆ। ମେନ୍ଦୋ ଚିମ୍ତା ହେର୍ କୋୱା, ଦୋ ଅମୋନ୍ କେତେ ସବେନ୍ ଆଡ଼ାଆଃ-ସାକାମ୍ କୋଏତେ ମାରାଙ୍ଗ୍ ହୋବା କେନୋଃୱା, ହାର୍ ଏଣ୍ଡେରାଃ ଏନ୍‍ଲେକା ମାପ୍‍ରାଙ୍ଗ୍ କୋତୋକୋ ଅଡୋଙ୍ଗୋଃୱା, ଚି ରିମିଲ୍‍ଦିଶୁମ୍ ରେନ୍ ଅଡ଼େକୋ ଏଣ୍ଡେରାଃ କୋତୋ ଉମ୍ବୁଲ୍ ରେ ତୂକାକୋ ବାଇ ଧାଡ଼ିୟାକୋ।” ୟୀଶୁ ଇନ୍‍କୁକେ ନେଲେକା ଚିମିନାଙ୍ଗ୍ ଗି ଜୋନୋକା ଏମ୍ କେତେ ଇନ୍‍କୁୱାଃ ବୁଝାଅ ଲେକା ପାର୍ମେଶ୍ଵାର୍ ବାଚାନ୍ ଉଦୁବ୍ କୋ ତାଇନାଏ। ଜୋନୋକା କାଏ କାଜି ରେ ଇନିଃ ଇନ୍‍କୁ ଲୋଃ ଜେତ୍ନାଃ ଅଗି କାଏ କାଜି ତାଇନାଏ, ମେନ୍ଦୋ ଏସ୍କାର୍ ତାଇନ୍ ଇମ୍ତା ଚେଲାକୋକେ ସବେନ୍ କାଜି କୋରାଃ ମାନେ ଉଦୁବ୍ କୋ ତାଇନାଏ। ଏନ୍ ହୁଲାଙ୍ଗ୍ ଗି ଶିଙ୍ଗି ଡୁବିଃ ପାଡ଼୍, ୟୀଶୁ ଚେଲାକୋକେ କାଜିକେଃକୋୱାଏ, “ଦେଲା ସାମୁଦାର୍ ହାନ୍ ଫାରୋମ୍ ବୁ ସେନା।” ଏନ୍ତେ ଆଜାଃ ଚେଲାକୋ ମିଃଥିମ୍ବା ହୋଡ଼ୋକୋକେ ବାଗେ କେତେ ୟୀଶୁ ଅକନ୍ ଡୋଙ୍ଗା ରେ ତାଇକେନାଏ, ଏନ୍‍ଲେକାଗି ଇନିଃକେ ଏନ୍ ଡୋଙ୍ଗା ରେ ଗି ମିଶାତେ ଇଦିକିଜାକୋ, ହାର୍ ଆଜାଃ ଲୋଃ ଏଟାଃ ଡୋଙ୍ଗାକୋରେ ହୋଡ଼ୋକୋ ତାଇକେନାକୋ। ଏନ୍ତେ ମାରାଙ୍ଗ୍ ହୋୟୋ-ଦାଆ ହିଜୁଃଲେନା, ହାର୍ ଲାହାଡ଼ି ଡୋଙ୍ଗା ରେ ନେକା ଠୋଅ ତାଇନା ଚି ଏନା ଦାଆ ତେ ଫେରେଜୋଃ ତାଇକେନା। ମେନ୍ଦୋ ଇନିଃ ଡୋଙ୍ଗା ରାଃ ତାୟୋମ୍ ହିସା ରେ କୁଟୁଙ୍ଗି ଏମ୍ କେତେ ଦୁଣୁମ୍ ତାଇନାଏ। ଏନ୍ତେ ଚେଲାକୋ ଇନିଃକେ ବିରିଃ କେତେ ଇନିଃକେ କାଜିକେଦାକୋ, “ହେ ଗୁରୁ, କାଚିମ୍ ପାହୋମ୍ ତାନା? ଆବୁ ଡୁବିଃ ଗୋଜୋଃ ତାନାବୁ!” ଏନ୍ତେ ଇନିଃ ବିରିଃ କେତେ ହୋୟୋ କେ ଏଗେର୍ କେଦାଏ, ହାର୍ ସାମୁଦାର୍ କେ କାଜିକେଦାଏ, “ହାପା ତାଇନୋଃମେ! ହକା କେନୋଃମେ!”, ହାର୍ ହୋୟୋ ହୋକାଜାନା, ଏନ୍ତେ ସାମୁଦାର୍ ହାପାଜାନାଏ। ହାର୍ ଇନିଃ ଚେଲାକୋକେ କାଜିକେଦାଏ, “ଆପେ ଚିନାଃ ଲାଗିନ୍ ବୋରୋ ତାନାପେ? ଚିନାଃ ଆପେକେ ନାଆ ସାନ୍ତେ ଇଙ୍ଗ୍ଆଃ ତାଃ ବିଶ୍ଵାସ୍ ବାନୋଗା?” ହାର୍ ଇନ୍‍କୁ ପୁରାଃ ଗି ବୋରୋ ଜାନାକୋ ହାର୍ ଆକୋ-ଆକୋ ରେ କାଜିଜାନାକୋ, “ନିଈ ଅକଏ ତାନିଃ? ହୋୟୋ ହାର୍ ଦାଆ ହ ଇନିଜାଃ ହୁକୁମ୍ କେ ମାନାତିଙ୍ଗ୍ ତାନାକୋ!” ୟୀଶୁ ଆଡୋଃ ଇନିଜାଃ ଚେଲାକୋ ଗାଲିଲୀ ସାମୁଦାର୍ ଫାରୋମ୍ ଗିରାସେନିୟା ହୋଡ଼ୋକୋ ତାଇନ୍ ତାନ୍ ଜାଗା ରେ ସେଟେର୍ ଜାନାକୋ, ହାର୍ ଚିମ୍ତା ୟୀଶୁ ଡୋଙ୍ଗା ଏତେ ଆଡ଼୍‍ଗୁ ଜାନାଏ ଦୋ ଇମ୍ତାଗି ମିୟାଃ ହୋଡ଼ ଅକନିଜାଃରେ ବୋଙ୍ଗାଆତ୍ମା ତାଇକେନାଏ, କାବାର୍ କୋଏତେ ଅଡୋଙ୍ଗ୍ କେତେ ଆଏଃକେ ନାପାମ୍ ଜାନାଏ। ଇନିଃ କାବାର୍ କୋରେ ତାଇନ୍ ତାଇନାଏ। ହାର୍ ଜେତାଏ ଇନିଃକେ ସିକ୍ରିକୋତେ ହ କାକୋ ଥୋଲ୍ ଧାଡ଼ି ତାଇନା, ଚିୟାଃଚି ଇନିଃ ଘାଡ଼ି-ଘାଡ଼ି ବେଡ଼ୀ ହାର୍ ସିକ୍ରିତେ ଥୋଲ୍‍ଲେନ୍ ତାଇନାଏ, ମେନ୍ଦୋ ଇନିଃ ସିକ୍ରିକୋକେ ଟଟାଃ ତାଇନାଏ, ହାର୍ ବେଡ଼ୀକୋକେ ଟୁକୁଡ଼ା-ଟୁକୁଡ଼ା କେ ତାଇନାଏ, ହାର୍ ଅକୟଗି ଇନିଃକେ କାକୋ କାବୁ ଧାଡ଼ି ତାଇନା। ଇନିଃ ସବେନ୍ ଇମ୍ତା ନିଦାଶିଙ୍ଗୀ କାବାର୍ କୋରେ ହାର୍ ବୁରୁ କୋରେ କାଉରି ତାଇନାଏ ହାର୍ ଆପାନ୍ କେଗି ଲେସେର୍ ଦିରି କୋଏତେ ହାଦେନ୍ ତାଇନାଏ। ଇନିଃ ୟୀଶୁ କେ ସାଙ୍ଗିନ୍ ଏତେ ନେଲ୍‍କେତେ ନିର୍ ହିଜୁଃନାଏ, ହାର୍ ଇନିଃକେ ବୋଅ ତିରୁବ୍ କେତେ ଇକ୍ଡ଼ୁମ୍ ଜୋହାର୍ କିଜାଏ। ହାର୍ ଜୋର୍ତେ କାଉରି କେତେ କାଜିକେଦାଏ, “ହେ ୟୀଶୁ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ହୋନ୍ ଇଙ୍ଗ୍ଆଃ ଲୋଃ ଆମାଃ ଚିକାନ୍ କାମି? ଇଙ୍ଗ୍ ଆମ୍‍କେ ପାର୍ମେଶ୍ଵାର୍ ରାଃ କିରିୟା ମେତାନିଙ୍ଗ୍ ଚି ଇଙ୍ଗ୍‍କେ ଦୁକୁ ଆଲୋମ୍ ଏମାଇଙ୍ଗ୍‍ମେ।” ଚିୟାଃଚି ୟୀଶୁ ଇନିଃକେ କାଜିଲେଦାଏ, “ହେ ବୋଙ୍ଗାଆତ୍ମା, ନେ ହୋଡ଼ ଏତେ ଅଡୋଙ୍ଗ୍ ମେ!” ୟୀଶୁ ଇନିଃକେ କୁଲିକିଜାଏ; “ଆମାଃ ଚିକାନ୍ ନୁତୁମ୍?” ଇନିଃ ୟୀଶୁ କେ କାଜିରୁଆଡ଼ିଜାଏ, “ଇଙ୍ଗ୍ଆଃ ନୁତୁମ୍ ଗୋଦେଲ୍ ତାନାଃ, ଚିୟାଃଚି ଆଲେ ଥିମ୍ବା ମେନାଲେୟା।” ହାର୍ ଇନିଃ ୟୀଶୁ କେ ଥିମ୍ବାଗି ଆର୍ଜି କିଜାଏ ଚି, “ଆଲେକେ ନେ ଜାଗା ଏତେ ବାହାରି ଆଲୋମ୍ କୁଲ୍ ଲେୟା।” ଏନ୍ତାଃରେ ବୁରୁ ଚେତାନ୍ ରେ ଶୂକ୍ରୀ କୋୱାଃ ମିୟାଃ ମାରାଙ୍ଗ୍ ଗୋଟ୍ ଆତିଙ୍ଗ୍ ତାଇନାକୋ। ହାର୍ ବୋଙ୍ଗାଆତ୍ମାକୋ ଇନିଃକେ ଆର୍ଜି କେତେ କାଜିକେଦାକୋ, “ଆଲେକେ ଏନ୍ ଶୂକ୍ରୀ କୋୱାଃ ରେ କୁଲ୍ ତାଲେମ୍, ଚି ଆଲେ ଇନ୍‍କୁୱାଃ ଭିତାର୍ ସେନାଲେ।” ଏନାତେ ଇନିଃ ଇନ୍‍କୁକେ ଆନାଚୁ ଏମାଃ କୋୱାଏ, ହାର୍ ବୋଙ୍ଗାଆତ୍ମାକୋ ଅଡୋଙ୍ଗ୍ କେତେ ଶୂକ୍ରୀ କୋୱାଃ ଭିତାର୍ ରେ ବୋଲୋ ଜାନାକୋ ହାର୍ ଗୋଟ୍, ଯେ ଚି ଦୁଇ ହାଜାର୍ ଲେକାକୋ ତାଇକେନା, ଜୋର୍ତେ ନିର୍ କେତେ ଚାଟାନ୍ ଚେତାନ୍ ଏତେ ସାମୁଦାର୍ ରେ କୋ ଉୟୁଃଜାନା ହାର୍ ଡୁବିଃ ଗୋଏଃ ଜାନାକୋ। ହାର୍ ଶୂକ୍ରୀ କୋକେ ଗୁପିତାନ୍ ହୋଡ଼ୋକୋ ନିର୍ କେତେ ହାତୁ ହାର୍ ଟୋଲା ରେ ଏନ୍ କାଜିକେ ଉଦୁବ୍ କେଦାକୋ, ଆଡୋଃ ଅକନାଃ ହୋବା ଲେନ୍ ତାଇନା ହୋଡ଼ୋକୋ ଏନାକେ ନେଲ୍ ଲାଗିନ୍ କୋ ହିଜୁଃଲେନା। ଏନ୍ତେ ୟୀଶୁ ରାଃ ନାଡ଼େଏ ହିଜୁଃକେତେ, ଇନ୍‍କୁ ଇନିଃକେ ଅକନିଜାଃରେ ବୋଙ୍ଗାଆତ୍ମାକୋ ତାଇନ୍ କେନାକୋ, ଇନିଃକେ ଲିଜାଃ ତୁସିଙ୍ଗ୍ କାନ୍ ହାର୍ ବୁଗିନ୍ ତେ ଦୁବ୍‍କାନ୍ ନେଲ୍‍କେତେ ବୋରୋ ଜାନାକୋ। ହାର୍ ନେନେଲ୍ କେନ୍‍କୋ ଇନିଜାଃ ଅକନିଜାଃରେ ବୋଙ୍ଗାଆତ୍ମାକୋ ତାଇକେନା, ହାର୍ ଶୂକ୍ରୀ କୋୱାଃ ଚିନାଃ ହୋବାନା, ହୋଡ଼ୋକୋକେ ଉଦୁବ୍ କେଦାକୋ। ଏନ୍ତେ ହିଜୁଃକାନ୍ ହୋଡ଼ୋକୋ ୟୀଶୁ କେ ଆର୍ଜି କେତେ କାଜିକିଜାକୋ, “ଆଲେୟାଃ ସୀମା ଏତେ ସେନୋଃ ମେ।” ହାର୍ ଚିମ୍ତାଙ୍ଗ୍ ୟୀଶୁ ଡୋଙ୍ଗା ରେ ରାକାବ୍ ତାଇନାଏ, ଇମ୍ତା ଅକନିଜାଃରେ ସିଦା ବୋଙ୍ଗାଆତ୍ମାକୋ ତାଇନ୍ କେନାକୋ ଏନ୍ ହୋଡ଼, ଇନିଃକେ ଆର୍ଜି କିଜାଏ, ଚି “ଇଙ୍ଗ୍‍କେ ଆମାଃ ଲୋଃ ସେନ୍ ରିକାଇଙ୍ଗ୍ ମେ।” ମେନ୍ଦୋ ୟୀଶୁ ଇନିଃକେ ଆଜାଃ ଲୋଃ ହିଜୁଃ କାଏ ଏମାଇଯାଏ, ହାର୍ ଇନିଃକେ କାଜିକେଦାଏ, “ଆମାଃ ଅଡ଼୍ଆଃ ସେନ୍ କେତେ ଆମାଃ ହୋଡ଼ୋକୋକେ ଉଦୁବାକୋମ୍, ଚି ପ୍ରାଭୁ ଆମାଃ ଲାଗିନ୍ ଆମାଃ ରେ ଦାୟା କେତେ ଚିଲ୍‍କା ମାରାଙ୍ଗ୍ କାମି ରିକା କାଦାଏ।” ଇନିଃ ସେନ୍ କେତେ ଏନ୍ ଦାଶ୍‍ଠୁ ସାହାର୍ ରେ ଅକନାଃ ଦିକାପୁଲିସ୍ ଜିଲ୍ଲା କାଜିଅଃ ତାଇନା ଏନା କୋରେ ନେ କାଜିକେ ଉଦୁବ୍ ଏଟେଃ କେଦାଏ, ୟୀଶୁ, “ଇଙ୍ଗ୍ଆଃ ଲାଗିନ୍ ଚିଲ୍‍କାନ୍ ମାରାଙ୍ଗ୍ କାମି ରିକା କେଦାଏ”, ହାର୍ ସବେନ୍ ହୋଡ଼ୋକୋ ଆକ୍‍‍ଦାନ୍ଦାଅଃ ତାଇନ୍ କେନାକୋ। ଚିମ୍ତା ୟୀଶୁ ହାର୍ ଆଜାଃ ଚେଲାକୋ ଆଡୋଃ ମିଶା ଡୋଙ୍ଗା ତେ ଫାରୋମ୍ ରୁଆଡ଼୍ ଜାନାକୋ, ଇମ୍ତା ମିଃଥିମ୍ବା ହୋଡ଼ୋକୋ ଇନିଜାଃ ନାଡ଼େଏ ହୁଣ୍ଡି ଜାନାକୋ; ହାର୍ ଇନିଃ ଗାଲିଲୀ ସାମୁଦାର୍ ଗେନା ରେ ତାଇନ୍ କେନାଏ। ଇମ୍ତା ୟାଇର୍ ନୁତୁମ୍ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା କୋଏତେ ମିହୋଡ଼୍ ହିଜୁଃ ଲେନାଏ, ହାର୍ ୟୀଶୁ କେ ନେଲ୍‍କେତେ, ଇନିଜାଃ କାଟାସୁବା ରେ ଉଙ୍ଗୁଃ କେତେ ଜୋହାର୍ କିଜାଏ। ହାର୍ ଇନିଃକେ ନେୟା କାଜିକେତେ ଥିମ୍ବାଗି ଆର୍ଜି କିଜାଏ ଚି, “ଇଙ୍ଗ୍ଆଃ ହୁଡିଙ୍ଗ୍ ହୋନ୍‍କୁଡ଼ି ଗୋଜୋଃ ଚେତାନ୍ ରେ ମେନାଇଜା, ଆମ୍ ହିଜୁଃକେତେ ଇନିଜାଃ ରେ ତିଈ ମାଣ୍ଡାଅ ଏମେ, ଏନାତେ ଇନିଃ ବେଶ୍ ହୋବାକେତେ ଜୀହିଃ ତାଇନୋଗାଏ।” ଏନ୍ତେ ଇନିଃ ଇନିଜାଃ ଲୋଃ ସେନ୍ ଜାନାଏ, ଏନ୍ତେ ମିଃଥିମ୍ବା ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ, ନେତାଃ ସାନ୍ତେ ଚି ହୋଡ଼ୋକୋ ଇନିଜାଃ ରେ ଉୟୁଗୋଃ ତାଇକେନାକୋ। ଏନ୍ତାଃରେ ମିୟାଃ କୁଡ଼ି ତାଇକେନାଏ, ଇନିଃକେ ବାରା ବାରାଶ୍ ଏତେ ମାୟୋମ୍ ଲିଙ୍ଗୀ ରାଃ ବେମାର୍ ତାଇକେନା। ହାର୍ ଇନିଃ ଢେର୍ ବାଈଦ୍ କୋଏତେ ରାନୁ ଜୋମ୍ କେତେ ଥିମ୍ବାଗି ଦୁକୁ ସାହାତିଙ୍ଗ୍ କେଦାଏ ଆଡୋଃ ଆଜାଃ ସବେନ୍ ଜିନିଷ୍‍କୋ ଖାର୍ଚା କେତେ ହଗି ଇନିଃ କାଏ ବେଶ୍ ଲେନାଏ; ମେନ୍ଦୋ ଆଡୋଃଗି ବିମାରୀ ବାଇଲେନ୍ ତାଇନାଏ। ଚିମ୍ତା ଇନିଃ ଆୟୁମ୍ କେଦାଏ ଚି ୟୀଶୁ ହୋଡ଼ୋକୋକେ ଚାଙ୍ଗାଇ କୋ ତାଇନାଏ, ଭିଡ଼୍ ରେ ଇନିଜାଃ ତାୟୋମ୍ ପାଡ଼େତେ ହିଜୁଃ ଜାନାଏ, ହାର୍ ଇନିଜାଃ ଲିଜାଃ କେ ଜୁଟିଃ ତାଦାଏ। ଚିୟାଃଚି ଇନିଃ କାଜି ତାଇନାଏ, “ଆଗାର୍ ଇଙ୍ଗ୍ ଇନିଜାଃ ଲିଜାଃ କେ ଜୁଟିଃ ତାଇଙ୍ଗ୍ ଏଣ୍ଡେ ବେଶ୍ କେନୋ ଗାଇଙ୍ଗ୍।” ହାର୍ ଇମ୍ତାଗି ଇନିଜାଃ ମାୟୋମ୍ ଲିଙ୍ଗୀ ବାନ୍ଦ୍ ଜାନା; ହାର୍ ଇନିଃ ଆଜାଃ ହୋଡ଼ମୋ ରେ ସାରିକେଦାଏ ଚି, ଇଙ୍ଗ୍ ଏନ୍ ବେମାରୀ ତେ ବେଶ୍ ଜାନିଙ୍ଗ୍। ୟୀଶୁ ଇମ୍ତାଗି ଆଜାଃ ରେ ସାରିକେଦାଏ, ଚି ଇଙ୍ଗ୍ଆଃ ଏତେ ଚାଙ୍ଗାଇ ରିକା ରାଃ ପେଡ଼େଏ ଅଡୋଙ୍ଗ୍ ଜାନା, ହାର୍ ଭିଡ଼୍ ପାଡ଼୍ ଦୋୟାତେ ରୁଆଡ଼୍ କେତେ କୁଲିକେଦାଏ, “ଇଙ୍ଗ୍ଆଃ ଲିଜାଃ ଅକଏ ଜୁଟିଃ କେଦାଏ?” ଇନିଜାଃ ଚେଲାକୋ ଇନିଃକେ କାଜିକିଜାକୋ, “ଆମ୍ ଦମ୍ ନେଲ୍‍ତାନା ଚି, ଭିଡ଼୍ ଆମାଃ ରେ କୋ ଉୟୁଗୋଃ ତାନାକୋ, ହାର୍ ଆମ୍ କାଜି ତାନାମ୍ ଚି, ‘ଅକଏ ଇଙ୍ଗ୍‍କେ ଜୁଟିଃ କେଦିଙ୍ଗାଏ?’ ” ମେନ୍ଦୋ ୟୀଶୁ ଇନିଃକେ ନେନେଲ୍ ଲାଗିନ୍ ଅକନିଃ ନେୟା ରିକା ଲେଦାଏ, ସବେନ୍ ପାଡ଼୍ ନେଲ୍‍କେଦାଏ। ଏନ୍ତେ ଏନ୍ କୁଡ଼ି ନେୟା ସାରିକେତେ ଚି ଆଜାଃ ଲୋଃ ଚିନାଃ ହୋବା କାନା, ବୋରୋତାନ୍ ହାର୍ ଥାର୍ଥାରାଅ ତାନ୍ ହିଜୁଃ ଲେନାଏ, ହାର୍ ଇନିଜାଃ କାଟାସୁବା ରେ ଇକ୍ଡ଼ୁମ୍ କେତେ, ଇନିଃକେ ସବେନ୍ କାଜି ସାର୍ତି-ସାର୍ତି କାଜିତାଦାଏ। ୟୀଶୁ ଇନିଃକେ କାଜିକେଦାଏ, “ହେ ମାଈ, ଆମାଃ ବିଶ୍ଵାସ୍ ଆମ୍‍କେ ଚାଙ୍ଗାଇ କେଃମେୟାଏ, ମାଜା ତେ ସେନୋଃ ମେ, ଆମ୍ ନେ ବେମାରୀ ତେ ଦୁକୁ କାମ୍ ନାମେୟା।” ୟୀଶୁ ଏନ୍ କୁଡ଼ି ଲୋଃ ବାକାଣ୍ ତାନ୍ ଇମ୍ତାଗି ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ୟାଇର୍ ରାଃ ଅଡ଼୍ଆଃ ଏତେ ହୋଡ଼ୋକୋ ହିଜୁଃକେତେ କାଜିକେଦାକୋ ଚି, “ଆମାଃ ହୋନ୍‍କୁଡ଼ି ଦୋ ଗୋଏଃ ଜାନାଏ। ନାଆ ଗୁରୁ କେ ଚିକାନ୍ ଲାଇ ଦୁକୁ ଏମାଇ ତାନାମ୍?” ମେନ୍ଦୋ ଅକନ୍ କାଜି ଇନ୍‍କୁ ବାକାଣ୍ ତାଇନାକୋ, ଏନାକେ ୟୀଶୁ କା ଆୟୁମ୍‍ତାନ୍ ଲେକା ବାଇଜାନାଏ, ଆଡୋଃ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା କେ କାଜିକିଜାଏ, “ଆଲୋମ୍ ବୋରୋୟା, ବିଶ୍ଵାସ୍ ଭାଇର୍ ମାଣ୍ଡାଏମ୍।” ହାର୍ ଇନିଃ ପାତ୍ରାସ୍ ହାର୍ ୟାକୁବ୍ ହାର୍ ୟାକୁବ୍ ଗାଃ ହାଗା ଯୋହାନ୍ କେ ବାଗିକେତେ ଏଟାଃ ଅକଏ କେହ ଆଜାଃ ଲୋଃ କାଏ ହିଜୁଃ ରିକା କେଦାଏ। ହାର୍ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ରାଃ ଅଡ଼୍ଆଃ ରେ ସେଟେର୍ କେତେ, ଇନିଃ ହୋଡ଼ୋକୋକେ ଥିମ୍ବାଗି ରାଆ ତାନ୍ ହାର୍ କାଉରିତାନ୍ ନେଲ୍ କେଃକୋୱାଏ। ଏନ୍ତେ ଇନିଃ ଭିତାର୍ ସେନ୍ କେତେ ଇନ୍‍କୁକେ କାଜିକେଦାଏ, “ଆପେ ଚିନାଃ ଲାଗିନ୍ କାଉରି ତାନାପେ ହାର୍ ରାଆ-ବାଡ଼ା ତାନାପେ? ମାଈହୋନ୍ କାଏ ଗୋଜାକାନାଏ ମେନ୍ଦୋ ଦୁଣୁମ୍ ତାନାଏ।” ଇନ୍‍କୁ ଇନିଃକେ ଲାନ୍ଦା କିଜାକୋ, ମେନ୍ଦୋ ଇନିଃ ସବେନ୍ କୋକେ ଅଡୋଙ୍ଗ୍ କେତେ କୁଡ଼ି ରାଃ ଏଙ୍ଗା-ଆପୁ ହାର୍ ଆଜାଃ ଗାତିକୋକେ ଇଦିକେତେ, ଭିତାର୍ ଅକତାଃରେ କୁଡ଼ି ତାଇକେନାଏ, ସେନ୍ ଜାନାଏ। ହାର୍ କୁଡ଼ିହୋନ୍ ରାଃ ତିଈ ସାବ୍ କେତେ ଇନିଃକେ କାଜିକେଦାଏ, “ତାଲିତା କୁମୀ!” ନେୟା ରାଃ ମାନେ ତାନାଃ, “ହେ ମାଈହୋନ୍, ଇଙ୍ଗ୍ ଆମ୍‍କେ କାଜିମେ ତାନିଙ୍ଗ୍, ବିରିଃମେ!” ହାର୍ କୁଡ଼ିହୋନ୍ ଇମ୍ତାଗି ବିରିଃ କେତେ ସେନ୍ ବାଡ଼ା କେଦାଏ, ଚିୟାଃଚି ଇନିଃ ବାରା ବାରାଶ୍ ରେନ୍ ତାଇକେନାଏ। ହାର୍ ନେୟା ରେ ହୋଡ଼ୋକୋ ଥିମ୍ବାଗି ଆକ୍‍ଦାନ୍ଦା ଜାନାକୋ। ଆଡୋଃ ଇନିଃ ଇନ୍‍କୁକେ ଚେତାଓ କେତେ ଆନାଚୁ ଏମାଃ କୋୱାଏ ଚି, ନେ କାଜି ଜେତାଏ ଆଲୋକାକୋ ସାରି ଚା। ହାର୍ ଏଙ୍ଗା-ଆପୁ କିନ୍‍କେ କାଜିକେଦାଏ ଚି, “ଇନିଃକେ ଜାହାନାଃ ଜୋମ୍ ଲାଗିନ୍ ଏମାଇପେ।” କାଫାର୍ନାହୁମ୍ ଏତେ ୟୀଶୁ ଅଡୋଙ୍ଗ୍ କେତେ ଇନିଃ ଆଜାଃ ଅଡ଼୍ଆଃ-ସାହାର୍ ତେ ହିଜୁଃ ଲେନାଏ, ହାର୍ ଇନିଜାଃ ଚେଲାକୋ ହଗି ଇନିଜାଃ ଲୋଃ ସେନ୍ ଜାନାକୋ। ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଇନିଃ ଆକୋୱାଃ ବିନ୍ତିଅଡ଼୍ଆଃ ରେ ପାର୍ମେଶ୍ଵାର୍ ରାଃ ବାଚାନ୍ ଉଦୁବ୍ ଏଟେଃ କେଦାଏ ହାର୍ ଥିମ୍ବାଗି ହୋଡ଼ୋକୋ ଆୟୁମ୍‍କେତେ ଆକ୍‍ଦାନ୍ଦା ଜାନାକୋ ହାର୍ କାଜିକେଦାକୋ, “ଇନିଃ ନେ କାଜିକୋ କୋତାଃ ଏତେ ଶିଖାଅ ଲେନା? କୋତାଃ ଏତେ ନେଲେକାନ୍ ସେଣା ଇନିଃ ନାମ୍ କେଦାଏ? ଆଡୋଃ ଚିଲ୍‍କା ପେଡ଼େଏ ରାଃ କାମି ଇନିଜାଃ ତିଈ ତେ ହୋବାଅଃ ତାନା? ଚିନାଃ ନିଈ ଏନ୍ ବାଢ଼ାଇ ନାହାଲାଏ, ଅକନିଃ ମାରିୟାମ୍ ରାଃ ହୋନ୍‍କଡ଼ା, ହାର୍ ୟାକୁବ୍ ହାର୍ ୟୋଶେଷ୍ ହାର୍ ୟାହୁଦା ହାର୍ ଶିମୋନ୍ ଇନିଜାଃ ହାଗାକୋ ତାନ୍‍କୋ? ଚିନାଃ ଆଜାଃ ମିଶିକୋ ଆବୁୱାଃ ଥାଲା ରେ କାକୋ ତାଇନ୍ ତାନା?” ଏନାଲାଗିନ୍ ଇନ୍‍କୁ ଇନିଃକେ ଫାସିୟାର୍ ହିଲାଙ୍ଗ୍ କିଜାକୋ। ୟୀଶୁ ଇନ୍‍କୁକେ କାଜିକେଦାଏ, “ନାବୀ କେ ଆଜାଃ ଅଡ଼୍ଆଃ-ସାହାର୍ ରେ ହାର୍ ଆଜାଃ କୁଟୁମ୍ବ୍ ହାର୍ ଆଜାଃ ଅଡ଼୍ଆଃ ରେ ବାଗେ କେତେ ହାର୍ ଜାହାନ୍ ତାଃ ରେ ହଗି କାକୋ ଆପ୍‍ମାନ୍ ଇୟା।” ଆଡୋଃ ୟୀଶୁ ଏନ୍ତାଃରେ ଜେତାନ୍ ପେଡ଼େଏ ରାଃ କାମି କାଏ ରିକା ଧାଡ଼ିଜାନା, ଖାଲି ହୁଡିଙ୍ଗ୍ ଗି ବେମାରୀ କୋୱାଃ ରେ ତିଈ ମାଣ୍ଡାଅ କେତେ ଇନ୍‍କୁକେ ଚାଙ୍ଗାଇ କେଃକୋୱାଏ। ଆଡୋଃ ଇନିଃ ଇନ୍‍କୁୱାଃ ଆବିଶ୍ଵାସ୍ ନେଲ୍‍କେତେ ଆକ୍‍ଦାନ୍ଦା ଜାନାଏ, ଏନ୍ତେ ୟୀଶୁ ମିୟାଃ ହାତୁ ଏତେ ଏଟାଃ ହାତୁ କୋରେ ପାର୍ମେଶ୍ଵାର୍ ରାଃ ସାନ୍ଦେଶ୍ ଉଦୁବ୍ ଏଟେଃ କେଦାଏ। ଏନ୍ତେ ୟୀଶୁ ବାରାଝାନ୍ କୁଲାକାନ୍ ଚେଲାକୋକେ ଆଜାଃ ନାଡ଼େଏ କେଡ଼ାକେଦାଏ ହାର୍ ଇନ୍‍କୁକେ ବାର୍ହୋଡ଼୍-ବାର୍ହୋଡ଼୍ କେତେ କୁଲ୍ ଏଟେଃ କେଃକୋୱାଏ, ହାର୍ ଇନ୍‍କୁକେ ହୋଡ଼ୋକୋ ଏତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ ଲାଗିନ୍ତେ ଆଧିକାର୍ ଏମାଃ କୋୱାଏ। ଏନ୍ତେ ଇନିଃ ଇନ୍‍କୁକେ କାଜିକେଃକୋୱାଏ ଚି, “ହୋରା ରେ ସେସେନ୍ ଇମ୍ତା ସୋଟା ବାଗେ କେତେ ଜେତ୍ନାଃ ଆଲୋପେ ଇଦିୟା, ନାଦୋ ହୋଲୋଙ୍ଗ୍ ନା ଥାଇଲା, ନା ପାଏସା। ମେନ୍ଦୋ ଖାର୍ପା କୋ ତୁସିଙ୍ଗ୍ଏନ୍ ପେ ହାର୍ ବାବାରିୟା ଲିଜାଃ ଆଲୋପେ ତୁସିଙ୍ଗ୍ ଏନା।” ହାର୍ ଇନିଃ ଇନ୍‍କୁକେ କାଜିକେଦାଏ, “ଜେତାଏ ଆପେକେ ଆକୋ ଅଡ଼୍ଆଃ ରେ ତାଇନ୍ ଲାଗିନ୍ କେଡ଼ା ରେଦୋ, ବିଦା କା ଇଦି ସାନ୍ତେ ଏନ୍ ଅଡ଼୍ଆଃ ରେ ଗି ତାଇନ୍ କାନୋଃପେ। ଜାହାନ୍ ଜାଗା ରେନ୍ ହୋଡ଼ୋକୋ ଆପେକେ କାକୋ ଗ୍ରାହାନ୍ ପେୟା, ହାର୍ ଆପେୟାଃ କାଜି କାକୋ ଆୟୁମେୟା, ଏନ୍ତାଃ ଏତେ ସେନୋଃ ତାନ୍ ଇମ୍ତା ଆପେୟାଃ କାଟା ତାଲ୍‍କା ରାଃ ଧୂଡ଼ି କଟା ତାପେ ଚି, ଏନ୍ ଜାଗା ରେନ୍ ହୋଡ଼ୋକୋକେ ପାର୍ମେଶ୍ଵାର୍ ବିଚାର୍ କୋୱାଏ।” ଏନ୍ତେ କୁଲାକାନ୍ ଚେଲାକୋ ସେନ୍ କେତେ ପାର୍ଚାର୍ କେଦାକୋ ଚି, ପାପ୍ କାମି ବାଗେ ତାପେ। ହାର୍ ଥିମ୍ବାଗି ବୋଙ୍ଗାଆତ୍ମା କୋକେ ଅଡୋଙ୍ଗ୍ କେଃକୋୱାକୋ, ହାର୍ ଥିମ୍ବାଗି ବେମାରୀ କୋୱାଃ ରେ ସୁନୁମ୍ ଲାଗାଅ କେତେ ଇନ୍‍କୁକେ ଚାଙ୍ଗାଇ କେଃକୋୱାକୋ। ନାଆ ଦୋ ହେରୋଦ୍ ରାଜା ହଗି ୟୀଶୁ ଚିନାଃ କୋ ରିକା ଲେଦାଏ ଏନ୍ କାଜିକୋ ବିଷାୟ୍ ରେ ଆୟୁମ୍ କେଦାଏ, ଚିୟାଃଚି ଇନିଜାଃ ସବେନ୍ ପାଡ଼୍ ନୁତୁମୋଃ ତାଇନା ହାର୍ ହୋଡ଼ୋକୋ କାଜି ତାଇନାକୋ ଚି, “ଯୋହାନ୍ ବାପ୍ତିସ୍ମା ଏମ୍ ନିଈ ଗୋଜାକାନ୍ କୋଏତେ ଜୀବିରିଃ କାନାଏ, ଏନାଲାଗିନ୍ ଇନିଃତେ ନେ ପେଡ଼େଏ ରାଃ କାମି ରିକା ତାନାଏ।” ମେନ୍ଦୋ ଏଟାଃ ହୋଡ଼ୋକୋ କାଜିକେଦାକୋ, “ନିଈ ସିଦା ସାମାୟ୍ ରେନ୍ ଏଲିୟା ନାବୀ ତାନିଃ, ମେନ୍ଦୋ ଏଟାଃକୋ କାଜିକେଦାକୋ, ସିଦା ସାମାୟ୍ ରେନ୍ ନାବୀ ୟାଦୋ ନାବୀ କୋଏତେ ମିହୋଡ଼୍ ଲେକା ତାନିଃ।” ମେନ୍ଦୋ ହେରୋଦ୍ ରାଜା ନେୟା ଆୟୁମ୍‍କେତେ କାଜିକେଦାଏ, “ଅକନ୍ ଯୋହାନ୍ ବାପ୍ତିସ୍ମା ଏମ୍ ନିଈ ରାଃ ବୋଅ ଇଙ୍ଗ୍ ଖାଣ୍ଡାଅ ଲେଦାଇଙ୍ଗ୍, ଇନିଃ ଜୀବିରିଃ କାନାଏ।” ଚିୟାଃଚି ହେରୋଦ୍ ରାଜା ଆଜାଃ ହାଗା ଫିଲିପୁସ୍ ରାଃ କୁଡ଼ି କେ ଆଣାଦୀ ଲେନ୍ ତାଇନାଏ। ଏନ୍ ହେରୋଦିଆସ୍ ରାନୀ ଲାଗିନ୍ ହୋଡ଼ୋକୋକେ କୁଲ୍ କେତେ ଯୋହାନ୍ ବାପ୍ତିସ୍ମା ଏମ୍ ନିଈ କେ ସାବ୍ କେତେ ଜେଲ୍ଅଡ଼୍ଆଃ ରେ ଆଦେର୍ ଲିଜାଏ। ଚିୟାଃଚି ଯୋହାନ୍ ବାପ୍ତିସ୍ମା ଏମ୍ ନିଈ ହେରୋଦ୍ ରାଜା କେ କାଜିଲେଦାଏ, “ଆମାଃ ହାଗା ରାଃ କୁଡ଼ି କେ ମାଣ୍ଡାଅ ଲାଗିନ୍ ଆମ୍‍କେ ଠାଉକା ନାହାଲା।” ଏନାଲାଗିନ୍ ହେରୋଦିଆସ୍ ରାନୀ ଇନିଃକେ ଖିସ୍ ତାଇନାଏ, ହାର୍ ନେୟା ସାନାଙ୍ଗ୍ ତାଇନାଏ ଚି, ଇନିଃକେ ଗୋଏଃ ରିକାୟିୟାଏ, ମେନ୍ଦୋ ଏନ୍‍କା କା ହୋବା ଧାଡ଼ି ଲେନା। ଚିୟାଃଚି ହେରୋଦ୍ ରାଜା ଯୋହାନ୍ ବାପ୍ତିସ୍ମା ଏମ୍ ନିଈ କେ ଧାର୍ମୀ ହାର୍ ପାବିତାର୍ ହୋଡ଼ ସାରିକେତେ ଇନିଃକେ ମାଇନ୍ ତାଇନାଏ, ହାର୍ ଇନିଃକେ ବାଞ୍ଚାଅ କେତେ ମାଣ୍ଡାଅ ତାଇନାଏ, ହାର୍ ହେରୋଦ୍ ରାଜା ଯୋହାନ୍ ବାପ୍ତିସ୍ମା ଏମ୍ ନିଜାଃ କାଜି କୋକେ ଆୟୁମ୍‍କେତେ ବାହୁତ୍ ଘାବ୍ରାଅଃ ତାଇନାଏ, ମେନ୍ଦୋ ରାଶିକା ତେ ଆୟୁମ୍ ତାଇନାଏ। ମେନ୍ଦୋ ମୁଶିଙ୍ଗ୍ ହୁଲାଙ୍ଗ୍ ଚିମ୍ତାଙ୍ଗ୍, ହେରୋଦ୍ ରାଜା ଆଜାଃ ଜାନାମ୍ ଦିନ୍ ରେ ଆଜାଃ ମୁଖିୟା ହୋଡ଼ୋକୋକେ ହାର୍ ସିପାହୀ କୋୱାଃ ମୁଖିୟା କୋକେ ହାର୍ ଗାଲିଲୀ ଜିଲ୍ଲା ରେନ୍ ମାପ୍‍ରାଙ୍ଗ୍ ହୋଡ଼ୋକୋ ଲାଗିନ୍ ଭୋଜ୍ ମାଣ୍ଡାଅ କେଦାଏ। ଏନ୍ ନୁବାଃ ଗି ହେରୋଦିଆସ୍ ରାନୀ କେ ଯୋହାନ୍ କେ ଗୋଏଃ ଲାଗିନ୍ ସାମାୟ୍ ନାମ୍ ଜାନା। ଆଡୋଃ ଏନ୍ ହେରୋଦିଆସ୍ ରାନୀ ରାଃ ହୋନ୍‍କୁଡ଼ି ଭିତାର୍ ହିଜୁଃ ଲେନାଏ, ହାର୍ ସୁସୁଙ୍ଗ୍ କେତେ ହେରୋଦ୍ ରାଜା କେ ହାର୍ ଇନିଜାଃ ଲୋଃ ଦୁବାକାନ୍ ପେଡ଼ାକୋକେ ଖୁସ୍ କେଃକୋୱାଏ। ଏନ୍ତେ ରାଜା ହୋନ୍‍କୁଡ଼ି କେ କାଜିକେଦାଏ, “ଅକନାଃ ଆମ୍ ସାନାଙ୍ଗ୍ ତାନାମ୍ ଆସିଙ୍ଗ୍‍ମେ ଇଙ୍ଗ୍ ଆମ୍‍କେ ଏମା ମେୟାଇଙ୍ଗ୍।” ହାର୍ ଇନିଃ କିରିୟା ଜୋମ୍‍କେଦାଏ, “ଇଙ୍ଗ୍ ଇଙ୍ଗ୍ଆଃ ଆଧା ରାଇଜ୍ ସାନ୍ତେ ଅକନାଃ ଆମ୍ ଇଙ୍ଗ୍‍କେ ଆସିୟାମ୍ ଇଙ୍ଗ୍ ଆମ୍‍କେ ଏମା ମେୟାଇଙ୍ଗ୍।” ଇନିଃ ବାହାରି ସେନ୍ କେତେ ଆଜାଃ ଏଙ୍ଗା କିନ୍‍କେ କୁଲିକେଃକିନାଏ, “ଇଙ୍ଗ୍ ଚିନାଃ ଆସିୟାଇଙ୍ଗ୍?” ଆକିନ୍ କାଜିକେଦାକିନ୍, “ଯୋହାନ୍ ବାପ୍ତିସ୍ମା ଏମ୍ ନିଜାଃ ହୋଟୋଃ ଗେଏଃ କେତେ ବୋଅ ଏମେକାଏ।” ଇନିଃ ଇମ୍ତାଗି ରାଜା ରାଃ ନାଡ଼େଏ, ଭିତାର୍ ତେ ବୋଲୋ ଜାନାଏ ହାର୍ ଇନିଃକେ ଆର୍ଜି କିଜାଏ, “ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍, ଚି ଆମ୍ ନାଆ, ଯୋହାନ୍ ବାପ୍ତିସ୍ମା ଏହେମ୍ ନିଜାଃ ହୋଟୋଃ ଗେଏଃ କେତେ ବୋଅ ମିୟାଃ ଥାଡ଼ି ରେ ଇଙ୍ଗ୍ ଲାଗିନ୍ ଆସିତାମ୍।” ଏନ୍ତେ ରାଜା ଥିମ୍ବାଗି ଦୁକୁ ଜାନାଏ, ମେନ୍ଦୋ ଆଜାଃ କିରିୟା ଲେକାତେ ହାର୍ ଆଜାଃ ଲୋଃ ଦୁବାକାନ୍ ପେଡ଼ା କୋୱାଃ ଲେକାତେ ଏନାକେ କାଜି କାଟାୱ କାଏ ଧାଡ଼ିଜାନାଏ। ଏନ୍ତେ ରାଜା ଇମ୍ତାଗି ମିୟାଃ ସିପାହୀ କେ ଆନାଚୁ ଏମ୍ କେତେ କୁଲ‍୍‍କିଜାଏ, ଚି ଇନିଜାଃ ହୋଟୋଃ ଗେଏଃ କେତେ ବୋଅ ଆୱେକାଏ। ଇନିଃ ଜେଲ୍ଅଡ଼୍ଆଃ ସେନ୍ କେତେ ଇନିଜାଃ ହୋଟୋଃ ଗେଏଃ କେଦାଏ, ହାର୍ ବୋଅ କେ ଆଉକେଦାଏ, ହାର୍ ମିୟାଃ ଥାଡ଼ି ରେ ମାଣ୍ଡାଅ କେତେ ଆଉଲେଦାଏ, ହାର୍ କୁଡ଼ି କେ ଏମ୍ କିଜାଏ ହାର୍ କୁଡ଼ି ଆଜାଃ ଏଙ୍ଗା କିନ୍‍କେ ଏମାଃ କିନାଏ। ନେୟା ଆୟୁମ୍‍କେତେ ଯୋହାନ୍ ରାଃ ଚେଲାକୋ ହିଜୁଃ ଲେନାକୋ, ହାର୍ ଇନିଜାଃ ମାଣା କେ ଇଦିକେଦାକୋ, ହାର୍ ଇନିଃ କେ କାବାର୍ ଏମ୍ କିଜାକୋ। ୟୀଶୁ ରାଃ କୁଲାକାନ୍ ଚେଲାକୋ ଆଜାଃ ନାଡ଼େଏ ରେ ରୁଆଡ଼୍ ହୁଣ୍ଡି କେତେ, ଅକନାଃ ଅଗି ଇନ୍‍କୁ ରିକା ଲେଦାକୋ ହାର୍ ହୋଡ଼ୋକୋକେ ଶିଖାଅ ଲେଦାକୋ ଏନା ସବେନାଃ ଇନିଃକେ ଉଦୁବ୍ କେଦାକୋ। ୟୀଶୁ ଇନ୍‍କୁକେ କାଜିକେଦାଏ, “ଦୋଲା, ଆବୁ ମିୟାଃ ଏଟାଃ ସୁନ୍‍ସାନ୍ ଜାଗା ରେ ସେନ୍ କେତେ ହୁଡିଙ୍ଗ୍ ସାଥାୱନ୍ ୱାବୁ।” ଚିୟାଃଚି ବେଶେ ହୋଡ଼ୋକୋ ହିଜୁଃ ସେନୋଃ ତାଇକେନାକୋ, ଏନାତେ ଇନ୍‍କୁକେ ଜୋମେ ଲାଗିନ୍ ହଗି ସାମାୟ୍ କାନାମୋଃ ତାଇକେନା। ଏନାଲାଗିନ୍ ଇନ୍‍କୁ ଡୋଙ୍ଗା ରେ ରାକାବ୍ କେତେ ମିୟାଃ ଏଟାଃ ସୁନ୍‍ସାନ୍ ଜାଗା ରେ ସେନୋଃ ଜାନାକୋ। ମେନ୍ଦୋ ଥିମ୍ବାଗି ହୋଡ଼ୋକୋ ଇନ୍‍କୁକେ ସେନ୍‍ତାନ୍ ନେଲ୍‍କେତେ ନେଲ୍ଉରୁମ୍ କେଃକୋୱାକୋ, ହାର୍ ହୋଡ଼ୋକୋ ସବେନ୍ ହାତୁ ଏତେ ହୁଣ୍ଡି କେତେ ଏନ୍ତାଃ ପାଏଦାଲ୍ ସେନ୍ କେଦାକୋ ହାର୍ ୟୀଶୁ ହାର୍ ଚେଲାକୋ ଏତେ ସିଦା ନିର୍ ସେଟେର୍ ଜାନାକୋ। ଚିମ୍ତା ୟୀଶୁ ଡୋଙ୍ଗା ଏତେ ଆଡ଼୍‍ଗୁ ଜାନାଏ, ଇନିଃ ମିଃଥିମ୍ବା ହୋଡ଼ୋକୋକେ ନେଲ୍‍କେଦାଏ, ହାର୍ ଇନ୍‍କୁକେ ସୋଗାଓ କେଃକୋୱାଏ, ଚିୟାଃଚି ଇନ୍‍କୁ ଏନ୍ ମିଣ୍ଡୀକୋ ଲେକାକୋ ତାଇକେନା, ଅକନ୍ କୋୱାଃ ଅକୟଗି ଗୁପୀନିଃ କାକୋ ତାଇନ୍ କେନା। ଏନାମେନ୍ତେ ଇନିଃ ଇନ୍‍କୁକେ ପାର୍ମେଶ୍ଵାର୍ ରାଃ ରାଇଜ୍ ରାଃ ବିଷାୟ୍ ରେ ଥିମ୍ବାଗି କାଜିକୋ ଶିଖାଅ କେଃକୋୱାଏ। ଶିଙ୍ଗି ଡୁବିଃ ସିଦାରେ ଆଜାଃ ଚେଲାକୋ ଆଜାଃ ନାଡ଼େଏ ହିଜୁଃକେତେ କାଜିକେଦାକୋ, “ନେୟା ସୁନ୍‍ସାନ୍ ଜାଗା ତାନାଃ ହାର୍ ଶିଙ୍ଗି ଡୁବିଃ ରାଃ ସାମାୟ୍ ହୋବାଅଃ ତାନା। ଇନ୍‍କୁକେ ବିଦାକମ୍ ଚି, ସବେନ୍ ପାଡ଼୍ ହାତୁ ହାର୍ ବାସ୍ତି ରେ ସେନ୍ କେତେ, ଆକୋ ଆକୋୱାଃ ଲାଗିନ୍ ଜାହାନାଃ ଜୋମେୟାଃ କିରିଙ୍ଗ୍ ୟାକୋ।” ମେନ୍ଦୋ ୟୀଶୁ ଇନ୍‍କୁକେ କାଜି ଉତ୍ତାର୍ କେଃକୋୱାଏ, “ଆପେ ଗି ଇନ୍‍କୁକେ ଜୋମେ ଲାଗିନ୍ ଏମାକୋପେ।” ଇନ୍‍କୁ ଇନିଃକେ କାଜିକିଜାକୋ, “ଚିନାଃ? ଆଲେ ଦୁଇ ଶୋ ଦିନାର୍ ରାଃ ହୋଲୋଙ୍ଗ୍ କିରିଙ୍ଗ୍ ୟାଲେ ହାର୍ ଇନ୍‍କୁକେ ଖିୟାଅ କୋୱାଲେ?” ୟୀଶୁ ଇନ୍‍କୁକେ କୁଲିକେଃକୋୱାଏ, “ସେନ୍ କେତେ ନେଲେପେ, ଆପେୟାଃ ତାଃ ରେ ଚିମିନାଙ୍ଗ୍ ହୋଲୋଙ୍ଗ୍‍କୋ ମେନାଃ?” ଇନ୍‍କୁ ନେଲ୍ ବାଇକେତେ କାଜିକେଦାକୋ, “ପାଞ୍ଚ୍ ଠୁ ହୋଲୋଙ୍ଗ୍‍ ହାର୍ ବାରିୟା ହାକୁ ଅଗି।” ଏନ୍ତେ ଇନିଃ ଇନ୍‍କୁକେ ଆନାଚୁ ଏମାଃ କୋୱାଏ ଚି, ହୋଡ଼ୋକୋକେ ହାରିୟାର୍ ତାସାଃ ରେ ପାନ୍ତି କେତେ ଦୁବ୍ ଲାଗିନ୍ କାଜିକୋପେ। ଏନ୍ତେ ହୋଡ଼ୋକୋ ଶାଅ-ଶାଅ ହାର୍ ପାଚାଶ୍-ପାଚାଶ୍ କେତେ ପାନ୍ତି କେତେ ଦୁବ୍ ଜାନାକୋ। ୟୀଶୁ ଏନ୍ ପାଞ୍ଚ୍ ଠୁ ହୋଲୋଙ୍ଗ୍ ହାର୍ ବାରିୟା ହାକୁ କୋକେ ଇଦିକେଦାଏ, ହାର୍ ରିମିଲ୍‍ଦିଶୁମ୍ ପାଡ଼୍ ନେଲ୍‍କେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ, ହାର୍ ହୋଲୋଙ୍ଗ୍ କୋକେ କେଚାଃ କେତେ ଚେଲାକୋକେ ଏମ୍ ଇଦି କେଃକୋୱାଏ ଚି, ଇନ୍‍କୁ ହୋଡ଼ୋକୋକେ ହାଟିଙ୍ଗ୍ କୋୱାକୋ ହାର୍ ଏନ୍ ବାରିୟା ହାକୁ କୋକେ ହଗି ଇନ୍‍କୁ କେ ହାଟିଙ୍ଗ୍ କେଃକୋୱାଏ। ଏନ୍ତେ ସବେନ୍ କୋ ଜୋମ୍ କେତେ ବିଇ ଜାନାକୋ। ଏନ୍ତେ ଚେଲାକୋ ୟୀଶୁ କେଚାଃକାନ୍ ତେୟାଃ ହୋଲୋଙ୍ଗ୍ କୋରାଃ ବାରା ଡାଲି ଫେରେଃ କେତେ ଇଦିକେଦାକୋ ହାର୍ ଚିମିନାଙ୍ଗ୍ ହାକୁ କୋଏତେ ହଗି ଇଦିକେଦାକୋ। ଅକନ୍‍କୋ ହୋଲୋଙ୍ଗ୍ ହାର୍ ହାକୁ ଜୋମ୍ କେଦାକୋ ଏନ୍ତାଃ ରେ ପାଞ୍ଚ୍ ହାଜାର୍ କଡ଼ାକୋ ବାଗେ କେତେ କୁଡ଼ିକୋ ହାର୍ ହୋନ୍‍କୋ ହଗି ତାଇକେନାକୋ। ଏନ୍ତେ ୟୀଶୁ ଇମ୍ତାଗି ଆଜାଃ ଚେଲାକୋକେ ଡୋଙ୍ଗା ରେ ରାକାବ୍ ଲାଗିନ୍ ଜାବ୍ରାଇ କେଃକୋୱାଏ ଚି, ଇନ୍‍କୁ ଇନିଃତେ ସିଦାରେ ଗାଲିଲୀ ସାମୁଦାର୍ ହାନ୍ ଫାରୋମ୍ ବେଥ୍‍ସୈଦା ସାହାର୍ ତେ ସେନୋଃ କାକୋ, ଏନ୍ତେ ଇନିଃ ଏନ୍ ଥାଲା ରେ ହୋଡ଼ୋକୋକେ ବିଦା କେଃକୋୱାଏ। ହୋଡ଼ୋକୋକେ ବିଦା ତାୟୋମ୍ତେ ଇନିଃ ବୁରୁ ଚେତାନ୍ ରେ ବିନ୍ତି ଲାଗିନ୍ତେ ସେନ୍ ଜାନାଏ। ଚିମ୍ତା ଶିଙ୍ଗି ଡୁବିଃ ଜାନା, ଡୋଙ୍ଗା ସାମୁଦାର୍ ଥାଲା ରେ ତାଇକେନା, ହାର୍ ୟୀଶୁ ଏସ୍କାର୍ ଅତେ ପାଡ଼୍ ତାଇକେନାଏ। ଇନିଃ ନେଲ୍‍କେଦାଏ ଚି, ଇନ୍‍କୁ ଡୋଙ୍ଗା ଚାଲାଓ-ଚାଲାଓ ବୋରୋ ଜାନାକୋ, ଚିୟାଃଚି ହୋୟୋ ଇନ୍‍କୁୱାଃ ଆୟୁର୍ ପାଡ଼େତେ ତାଇକେନା। ଏନାତେ ନିଦା ରାଃ ସିମ୍‍କୋ ରାଆ ସାମାୟ୍ ରେ ୟୀଶୁ ସାମୁଦାର୍ ରେ ସେସେନ୍ ତାନ୍ ଲୋଃ ଇନ୍‍କୁୱାଃ ନାଡ଼େଏ ହିଜୁଃ ଲେନାଏ, ହାର୍ ଇନ୍‍କୁ ଏତେ ଆୟୁର୍ ସେଟେର୍ ସାନାଙ୍ଗ୍ ତାଇନାଏ। ମେନ୍ଦୋ ଇନ୍‍କୁ ଇନିଃକେ ସାମୁଦାର୍ ରେ ସେସେନ୍ ନେଲ୍‍କେତେ ପାହୋମ୍ କେଦାକୋ, ଚି ବୋଙ୍ଗା ତାନିଃ, ହାର୍ କାଉରି କେଦାକୋ, ଚିୟାଃଚି ସବେନ୍ ଇନିଃକେ ନେଲ୍‍କେତେ ବୋରୋତେ ଥାର୍ଥାରାଅ ଲେନାକୋ। ମେନ୍ଦୋ ୟୀଶୁ ଇମ୍ତାଗି ଇନ୍‍କୁ ଲୋଃ ବାକାଣ୍ କେଦାଏ ହାର୍ କାଜିକେଦାଏ, “ସାହାସ୍ ମାଣ୍ଡାଏପେ! ଇଙ୍ଗ୍ ତାନିଙ୍ଗ୍। ଆଲୋପେ ବୋରୋୟା।” ଏନ୍ତେ ଇନିଃ ଇନ୍‍କୁୱାଃ ନାଡ଼େଏ ଡୋଙ୍ଗା ରେ ରାକାବ୍ ଜାନାଏ, ହାର୍ ହୋୟୋ ହୋକାଜାନା। ଆଡୋଃ ଇନ୍‍କୁ ବେଶେକୋ ଆକ୍‍ଦାନ୍ଦା ଜାନାକୋ, ଚିୟାଃଚି ଇନ୍‍କୁ ଏନ୍ ହୋଲୋଙ୍ଗ୍ କୋରାଃ ବିଷାୟ୍ ରେ କାକୋ ବୁଝାଅ ଲେନା, ମେନ୍ଦୋ ଇନ୍‍କୁୱାଃ ମୋନ୍ ରେ ଇନିଃକେ କାକୋ ବିଶ୍ଵାସ୍ ଲେଦା। ଏନ୍ତେ ଇନ୍‍କୁ ଏନ୍ ଫାରୋମ୍ ଆଡ଼୍‍ଗୁ କେତେ ଗାନ୍ନେସାରାତ୍ ସାହାର୍ ରେ ଥେବାଃ ଜାନାକୋ, ହାର୍ ଡୋଙ୍ଗା କେ ଡୋଙ୍ଗାଘାଟ୍ ରେ ଥୋଲ୍ ମାଣ୍ଡାଅ କେଦାକୋ। ଆଡୋଃ ଚିମ୍ତା ଇନ୍‍କୁ ଡୋଙ୍ଗା ଏତେ ଆଡ଼୍‍ଗୁ ଜାନାକୋ, ଦୋ ହୋଡ଼ୋକୋ ଇମ୍ତାଗି ଇନିଃକେ ନେଲ୍ଉରୁମ୍ କେତେ, ନାଡ଼େଏ ଜାପାଃ ରେନ୍ ସବେନ୍ ଜାଗାକୋ ରେ ନିର୍ କେଦାକୋ, ହାର୍ ବିମାରୀକୋକେ ପାର୍କୋମ୍ କୋରେ ମାଣ୍ଡାଅ କେତେ, ଅକନ୍-ଅକନ୍ ଜାଗା ରେ ୟୀଶୁ ସେନ୍ କାନାଏ ମେନ୍ତେ ଆୟୁମ୍ କେଦାକୋ, ଏନ୍-ଏନ୍ ଜାଗା ରେ ଇଦି କେଃକୋୱାକୋ। ଆଡୋଃ ଅକ୍ତାଃ-ଅକ୍ତାଃ ଇନିଃ ହାତୁ, ବାସ୍ତି, ସାହାର୍ କୋରେ ସେନ୍ ତାଇନାଏ, ହୋଡ଼ୋକୋ ବିମାରୀକୋକେ ପିଟ୍ କୋରେ ମାଣ୍ଡାଅ କେତେ ଇନିଃକେ ଆର୍ଜି ତାଇକେନାକୋ ଚି, ଇନିଃ ଇନ୍‍କୁକେ ଆଜାଃ ଲିଜାଃ ରାଃ ଆଚ୍ରା କେଗି ଜୁଟିଃ ରିକା ଚାଏ, ଆଡୋଃ ଚିମିନ୍ କୋ ଇନିଃକେ ଜୁଟିଃ ତାଇକେନାକୋ, ସବେନ୍ କୋ ବେଶ୍ ହୋବାଅଃ ତାଇନାକୋ। ଏନ୍ତେ ମୁଶିଙ୍ଗ୍ ହୁଲାଙ୍ଗ୍ ଫାରିସୀ ହୋଡ଼ୋକୋ ହାର୍ ଚିମିନାଙ୍ଗ୍ ଆଇନ୍ ଗୁରୁକୋ ଅକନ୍‍କୋ ୟୀରୁଶାଲେମ୍ ସାହାର୍ ଏତେ ହିଜୁଃ ଲେନ୍ ତାଇନାକୋ ୟୀଶୁ ରାଃ ବାଚାନ୍ ଆୟୁମ୍ ଲାଗିନ୍ ହୁଣ୍ଡି ଜାନାକୋ। ହାର୍ ଇନ୍‍କୁ ଇନିଜାଃ ଚିମିନାଙ୍ଗ୍ ଚେଲାକୋକେ, ମାଇଲା, ମାନେ ଇନ୍‍କୁୱାଃ ନିୟାମ୍ ହିସାବ୍ ରେ ବେଗାର୍ ତିଈ ଆବୁଙ୍ଗ୍ ଜୋଜୋମାଃ ଜୋମ୍ ତାନ୍‍କୋ ନେଲ୍ କେଃକୋୱାକୋ। ଚିୟାଃଚି ଫାରିସୀ ହୋଡ଼ୋକୋ ହାର୍ ସବେନ୍ ୟାହୁଦୀକୋ ପୁର୍ଖା କୋୱାଃ ନୀତିନିୟାମ୍ କେ ମାନାତିଙ୍ଗ୍ ତାଇନାକୋ ହାର୍ ଚିମିନ୍ ସାନ୍ତେ ବେଶ୍ ଲେକା ତିଈ କାକୋ ଆବୁଙ୍ଗ୍ ଏନା ଏନ୍ ସାନ୍ତେ କାକୋ ଜୋମ୍ ତାଇନାକୋ। ପିଟ୍ ଏତେ ହିଜୁଃକେତେ, ଚିମିନ୍ ସାନ୍ତେ କାକୋ ଉମେନା, ଏନ୍ ସାନ୍ତେ କାକୋ ଜୋମେୟା, ଏନ୍‍ଲେକା ଥିମ୍ବାଗି ଏଟାଃ କାଜିକୋ ମେନାଃ, ଅକନାଃ ଇନ୍‍କୁୱାଃ ନାଡ଼େଏ ମାନାତିଙ୍ଗ୍ ଲାଗିନ୍ ଆନାଚୁ ଏମାକାନ୍ ତାଇକେନା, ଜେଲେକା ଡୁଭ୍‍ନୀ, ହାର୍ ଲଟା, ହାର୍ ତାମ୍ବା ରାଃ ଥାଡ଼ିଡୁଭ୍‍ନୀ କୋକେ ଆବୁଙ୍ଗ୍ ଗାସାର୍। ଏନାମେନ୍ତେ ଏନ୍ ଫାରିସୀ ହୋଡ଼ୋକୋ ହାର୍ ଆଇନ୍ ଗୁରୁକୋ ଇନିଃକେ କୁଲିକିଜାକୋ, “ଆମାଃ ଚେଲାକୋ ଚିନାଃ ଲାଗିନ୍ ପୁର୍ଖା କୋୱାଃ ନିୟାମ୍ କେ କାକୋ ମାନାତିଙ୍ଗ୍ ତାନାକୋ, ହାର୍ ଚିନାଃ ଲାଗିନ୍ ବେଗାର୍ ଆବୁଙ୍ଗ୍ ତିଈ ରେ ଜୋଜୋମାଃ ଜୋମ୍ ତାନାକୋ?” ଇନିଃ ଇନ୍‍କୁକେ କାଜିକେଦାଏ, “ୟାଶାୟାହ୍ ନାବୀ ଆପେ ବେଦାହୋଡ଼ୋ କୋୱାଃ ବିଷାୟ୍ ରେ ପୁରାଃ ବୁଗିନ୍ ଆୟାର୍‍କାଜି କାଜିକାଦାଏ, ଜେଲେକା ଅଲାକାନା, ‘ନେ ହୋଡ଼ୋକୋ ମୋଚା ତେ ଦୋ ଇଙ୍ଗ୍‍କେ ଦୁଲାଡ଼୍ ରିକା ୟାକୋ ମେନ୍ଦୋ ଇନ୍‍କୁୱାଃ ମୋନ୍ ଇଙ୍ଗ୍ଆଃ ଏତେ ସାଙ୍ଗିନ୍ ରେ ତାଇନୋଃ ୱା। ହାର୍ ନିକୁ ସାମାଗୀ ଇଙ୍ଗ୍‍କେ ସୁସାର୍ ୟାକୋ, ଚିୟାଃଚି ହୋଡ଼ୋକୋୱାଃ ଆନାଚୁ କୋକେ ଧାରାମ୍ଆନାଚୁ ମେନ୍ତେ ଶିଖାଅ କୋୱାକୋ।’ ଚିୟାଃଚି ଆପେ ପାର୍ମେଶ୍ଵାର୍ ରାଃ ଆନାଚୁ କେ କାମାନାତିଙ୍ଗ୍ କେତେ ହୋଡ଼ୋକୋୱାଃ ନିୟାମ୍ କେ ମାନାତିଙ୍ଗ୍ ତାନାପେ।” ଆଡୋଃ ୟୀଶୁ ଇନ୍‍କୁକେ କାଜିକେଦାଏ, “ଆପେ ଆପେୟାଃ ନୀତିନିୟାମ୍ କେ ମାନାତିଙ୍ଗ୍ ଲାଗିନ୍ ପାର୍ମେଶ୍ଵାର୍ ରାଃ ଆନାଚୁ କେ ଚିଲ୍‍କା ମାଜା ତେ ଗେନା ତାଃପେ। ଚିୟାଃଚି ମୁଶା ନାବୀ ଆବୁୱାଃ ପୁର୍ଖା ଆପେକେ ପାର୍ମେଶ୍ଵାର୍ ଏତେ ନେ ନିୟାମ୍ କାଜିକାଦାଏ, ‘ଆପେୟାଃ ଆପୁ ହାର୍ ଆପେୟାଃ ଏଙ୍ଗା କିନ୍‍କେ ମାଇନ୍ କୋପେ,’ ହାର୍ ‘ଅକଏ ଆଜାଃ ଆପୁ ୟାଦୋ ଏଙ୍ଗା କିନ୍‍କେ ହିଲାଙ୍ଗ୍ କୋରେ, ଇନିଃ ଜାଲେକାତେ ବିଡ଼ା ଗୋଜୋଃକାଏ।’ ମେନ୍ଦୋ ଆପେ କାଜିୟାପେ ଚି, ଜେତାଏ ଆଜାଃ ଆପୁ ୟାଦୋ ଏଙ୍ଗା କେ କାଜିୟାଏ, ‘ଅକନାଃ ଅଗି ଆପେକେ ଇଙ୍ଗ୍ଆଃ ତେ ବୁଗିନାଃ ନାମ୍ ତାଇନା ଏନା କୁର୍ବାନ୍,’ ଏନାରାଃ ମାନେ ପାର୍ମେଶ୍ଵାର୍ କେ ଭେଁଟ୍ ରାକାବ୍ କାନା। ଏନ୍ତେ ଆପେ ଏନାକେ ଇନିଜାଃ ଆପୁ ୟାଦୋ ଇନିଜାଃ ଏଙ୍ଗାକିନ୍ ଲାଗିନ୍ ଜେତ୍ନାଃ ବୁଗିନାଃ ରିକା କାପେ ଏମ୍ କୋୱା। ଏନ୍‍ଲେକା ଆପେ ଆପେୟାଃ ନୀତିନିୟାମ୍ କୋଏତେ ଅକନାଃକେ ଆପେ ପେ ବାଇକାଦା, ପାର୍ମେଶ୍ଵାର୍ ରାଃ ବାଚାନ୍ କେ କାପେ ମାନାତିଙ୍ଗ୍ ତାନାପେ, ହାର୍ ନେଲେକାନ୍ ଆଡୋଃଗି କାମିକୋ କାମି ତାନାପେ।” ଏନ୍ତେ ୟୀଶୁ ଆଡୋଃ ମିଶା ହୋଡ଼ୋକୋକେ ଆଜାଃ ନାଡ଼େଏ କେଡ଼ାକେତେ ଇନ୍‍କୁକେ କାଜିକେଦାଏ, “ଆପେ ସବେନ୍ ଇଙ୍ଗ୍ଆଃ କାଜି ଆୟୁମେପେ ହାର୍ ବୁଝାଅଃପେ। ନେଲେକା ଜାହାନ୍ ଜିନିଷ୍ ବାନୋଗା ଅକନାଃ ହୋଡ଼ ରେ ବାହାରି ତେ ବୋଲୋ କେତେ ଇନିଃକେ ଶିତୃ ୟାଏ, ମେନ୍ଦୋ ଅକନ୍ ଜିନିଷ୍ ହୋଡ଼ ରାଃ ଭିତାର୍ ଏତେ ଅଡୋଙ୍ଗୋୱା, ଏନାଗି ଇନିଃକେ ଶିତୃ ତାନାଏ। ଅକେୟାଃ ଆୟୁମ୍ ରାଃ ଲୁତୁର୍ ମେନାଃ ଦୋ ଇନିଃ ଆୟୁମେ କାଏ।” ଚିମ୍ତାଙ୍ଗ୍ ଇନିଃ ଥିମ୍ବା ହୋଡ଼ୋକୋୱାଃ ନାଡ଼େଏ ତେ ଅଡ଼୍ଆଃ ସେନ୍ ଜାନାଏ, ଦୋ ଇନିଜାଃ ଚେଲାକୋ ନେ ଜୋନୋକା ରାଃ ମାନେ ଇନିଃକେ କୁଲିକିଜାକୋ। ୟୀଶୁ ଇନ୍‍କୁକେ କୁଲିକେଦାଏ, “ଚିନାଃ ଆପେ କାପେ ବୁଝାଅଃ ତାନା? ଅକନ୍ ଜୋମେୟାଃ ବାହାରି ତେ ହୋଡ଼ ରାଃ ଭିତାର୍ ସେନ୍ ତାନା, ଏନା ଇନିଃକେ କାଏ ଶିତୃ ୟାଏ। ଚିୟାଃଚି ଏନା ଇନିଜାଃ ମୋନ୍ ରେ କାହା, ମେନ୍ଦୋ ଲାହେଃ ରେ ସେନ୍ ତାନା, ହାର୍ ବାହାର୍ ହୋରାତେ ଅଡୋଙ୍ଗ୍ କେନୋଃ ତାନା।” ନେୟା କାଜିକେତେ ଇନିଃ ସବେନ୍ ଜୋମେୟାଃ ଜିନିଷ୍‍କୋକେ ଫାର୍ଚି କେଦାଏ। ଆଡୋଃ ଇନିଃ କାଜିକେଦାଏ, “ଅକନାଃ ହୋଡ଼ ରାଃ ମୋନ୍ ଏତେ ଅଡୋଙ୍ଗୋଃ ୱା, ଏନାଗି ହୋଡ଼ କେ ଶିତୃ ତାନାଏ। ଚିୟାଃଚି ଭିତାର୍ ଏତେ, ମାନେ ହୋଡ଼ ରାଃ ମୋନ୍ ଏତେ, ଏତ୍କାନ୍-ଏତ୍କାନ୍ ପାହୋମ୍, ବ୍ୟାଭିଚାର୍, କୁମ୍ଡ଼ୁ, ହୋଡ଼ ଗୋଏଃ, ଏଟାଃ ନିଜାଃ କୁଡ଼ି ଇଦି। ହାୟା, ଏତ୍କାନ୍ କାମି, ବେଦା, ଲୁଚ୍‍ପାନ୍, ହିଲାଙ୍ଗ୍ ମେଏଃ, ନିନ୍ଦା, ମାରାଙ୍ଗେନ୍ ମୋନ୍ ହାର୍ ଡୋଣ୍ଡୋ ଅଡୋଙ୍ଗୋଃ ୱା।” ନେ ସବେନ୍ ଏତ୍କାନ୍ କାଜିକୋ ମୋନ୍ ଏତେ ଗି ଅଡୋଙ୍ଗୋଃ ୱା ହାର୍ ହୋଡ଼ କେ ଶିତୃ ତାନାଏ। ଏନ୍ତେ ୟୀଶୁ ଆଜାଃ ଚେଲାକୋ ଲୋଃ ଗାଲିଲୀ ଜିଲ୍ଲା ଏତେ ସୁର୍ ହାର୍ ସିଦୋନ୍ ସାହାର୍ ରାଃ ନାଡ଼େଏ ଜାପାଃ ହାତୁ କୋରେ ସେନ୍ ଜାନାଏ, ହାର୍ ମିୟାଃ ଅଡ଼୍ଆଃ ରେ ସେନ୍ ଜାନାଏ ହାର୍ କାଏ ସାନାଙ୍ଗ୍ ତାଇନାଏ ଚି ଜେତାଏ ସାରିକାକୋ, ମେନ୍ଦୋ ଇନିଃ ଉକୁ କାଏ ଧାଡ଼ିଜାନା। ହାର୍ ଇମ୍ତାଗି ମିୟାଃ କୁଡ଼ି ଅକନିଜାଃ ହୁଡିଙ୍ଗ୍ ହୋନ୍‍କୁଡ଼ି ଭିତାର୍ ରେ ବୋଙ୍ଗାଆତ୍ମା ତାଇକେନାଏ, ଇନିଜାଃ ବିଷାୟ୍ ରେ ଆୟୁମ୍‍କେତେ ହିଜୁଃ ଲେନାଏ, ହାର୍ ଇନିଃକେ କାଟାସୁବା ରେ ଇକ୍ଡ଼ୁମ୍ କେତେ ଜୋହାର୍ କିଜାଏ। ଏନ୍ କୁଡ଼ି ୟାହୁଦୀ ଜାତି ରେନ୍ କାଏ ତାଇନ୍ କେନାଏ, ମେନ୍ଦୋ ୟୁନାନୀ ଦିଶୁମ୍ ରେନ୍ କୁଡ଼ି ହାର୍ ଇନିଃ ସିରିୟା ସାହାର୍ ରେନ୍ ଫୋଏନିକିଆ ଜାଗା ରେନ୍ ତାଇକେନାଏ। ଇନିଃ ୟୀଶୁ କେ ଆର୍ଜି କିଜାଏ ଚି, “ଇଙ୍ଗ୍ଆଃ ହୋନ୍‍କୁଡ଼ି ଏତେ ବୋଙ୍ଗାଆତ୍ମା କେ ଅଡୋଙ୍ଗ୍ ତାଇମେ।” ୟୀଶୁ ଇନିଃକେ କାଜିକେଦାଏ, “ସିଦା ହୋନ୍‍କୋକେ ଜୋମ୍ ବିଇ ଏମାକୋମ୍ ଚିୟାଃଚି ହୋନ୍‍କୋୱାଃ ହୋଲୋଙ୍ଗ୍ ଇଦିକେତେ ସେତା କୋୱାଃ ଆୟୁର୍ ରେ ଏମେ ତେୟାଃ ଠାଉକା ନାହାଲା।” ଏନ୍ କୁଡ଼ି ୟୀଶୁ କେ କାଜିରୁଆଡ଼୍ କିଜାଏ, “ସାର୍ତି ତାନାଃ ପ୍ରାଭୁ, ଏଣ୍ଡେରେ ଅଗି ସେତାକୋ ହଗି ମେଜ୍ ଏତେ ଲାଥାର୍ ଉୟୁଃକାନ୍ ହୋନ୍ କୋୱାଃ ସାକ୍‍ଡ଼ି କୋକେ ଜୋମ୍ କେୟାକୋ।” ଏନ୍ତେ ୟୀଶୁ ଏନ୍ କୁଡ଼ି କେ କାଜିକେଦାଏ, “ଆମ୍ ବିଶ୍ଵାସ୍ ତେ ନେୟା କାଜିକେଦାମ୍ ଏନାମେନ୍ତେ ସେନ୍ ମେ ବୋଙ୍ଗାଆତ୍ମା ଆମାଃ ହୋନ୍‍କୁଡ଼ି ଏତେ ଅଡୋଙ୍ଗ୍ ଜାନାଏ।” ଇନିଃ ଆଜାଃ ଅଡ଼୍ଆଃ ହିଜୁଃକେତେ ନେଲ୍ କିଜାଏ ଚି ହୋନ୍‍କୁଡ଼ି ପାର୍କୋମ୍ ରେ ଗିତିଃ କାନାଏ, ହାର୍ ବୋଙ୍ଗାଆତ୍ମା ଅଡୋଙ୍ଗ୍ ଜାନାଏ। ଏନ୍ତେ ୟୀଶୁ ହାର୍ ଆଜାଃ ଚେଲାକୋ ସୁର୍ ହାର୍ ସିଦୋନ୍ ସାହାର୍ ରାଃ ନାଡ଼େଏ ଜାପାଃ ହାତୁ କୋଏତେ ଅଡୋଙ୍ଗ୍ କେତେ ଏନ୍ ଦାଶ୍‍ଠୁ ସାହାର୍ ଅକନାଃ ଦିକାପୁଲିସ୍ ଜିଲ୍ଲା କାଜିଅଃ ତାଇନା ଏନାରାଃ ସୀମା ହୋରାତେ ଗାଲିଲୀ ରାଃ ସାମୁଦାର୍ ନାଡ଼େଏ ସେଟେର୍ ଜାନାକୋ। ଏନ୍ତେ ହୋଡ଼ୋକୋ ମିୟାଃ ବାହିରା କେ ଅକନିଃ କନ୍ଦା ହ ତାଇକେନାଏ, ଇନିଜାଃ ନାଡ଼େଏ ଆଉକେତେ ଇନିଃକେ ଆର୍ଜି କିଜାକୋ ଚି, ଆଜାଃ ତିଈ ମାଣ୍ଡାଅ କେତେ ଚାଙ୍ଗାଇ ୟାଏ। ଏନ୍ତେ ୟୀଶୁ ଇନିଃକେ ହୋଡ଼ୋକୋ ଏତେ ଏଟାଃ ପାଡ଼୍ ଇଦିକେତେ, ଆଜାଃ ସାର୍ସାର୍ କେ ଇନିଜାଃ ଲୁତୁର୍ ରେ ଆଦେର୍ କେଦାଏ। ଏନା ତାୟୋମ୍ତେ ଆଜାଃ ମିୟାଃ ସାର୍ସାର୍ ରେ ବେଏଃ ଦାଆ ଜୁଟିଃ କେତେ ଏନ୍ ହୋଡ଼ ରାଃ ଆଲାଙ୍ଗ୍ କେ ଜୁଟିଃ କେଦାଏ। ହାର୍ ରିମିଲ୍‍ଦିଶୁମ୍ ପାଡ଼୍ ନେଲ୍‍କେତେ ସାହେଃ କେଦାଏ ହାର୍ ଇନିଃକେ କାଜିକେଦାଏ, “ଇଫ୍ତାହ୍!” ମାନେ, “ଖଲାଅ କେନୋଃ କା!” ଇମ୍ତାଗି, ଇନିଜାଃ ଲୁତୁର୍ ଖଲାଅ ଜାନା ହାର୍ ଇନିଜାଃ ଆଲାଙ୍ଗ୍ ଜାଲାଃ ତେୟାଃ ଖଲାଅ ଜାନା ହାର୍ ଇନିଃ ସାଫା-ସାଫା କାଜିକେଦାଏ। ଏନ୍ତେ ୟୀଶୁ ହୋଡ଼ୋକୋକେ ନେ କାଜି ଜେତାଏ କେହ ଆଲୋପେ କାଜିୟା ମେନ୍ତେ ମେତାଃ କୋୱା, ମେନ୍ଦୋ ଚିମିନାଙ୍ଗ୍ ଇନିଃ ଇନ୍‍କୁକେ କାଜିକେଦାଏ, ଏନାତେ ହ ଥିମ୍ବା ଇନ୍‍କୁ ଏନ୍ କାଜିକେ ଉଦୁବ୍ କେଦାକୋ। ଏନ୍ତେ ଇନ୍‍କୁ ବେଶେ ଆକ୍‍ଦାନ୍ଦା ହୋବା କେତେ କାଜିକେଦାକୋ, “ଇନିଃ ଅକନାଃ ଅଗି ରିକା କାଦାଏ ସବେନାଃ ବେଶ୍ ଗି ରିକା କାଦାଏ। ଇନିଃ ବାହିରା କୋକେ ଆୟୁମ୍ ଲାଗିନ୍ ହାର୍ କନ୍ଦା କୋକେ କାଜି ଲାଗିନ୍ ପେଡ଼େଏ ଏମାକୋୱାଏ।” ଏନ୍ ହୁଲାଙ୍ଗ୍ କୋରେ, ଚିମ୍ତାଙ୍ଗ୍ ଆଡୋଃ ମିଶା ଥିମ୍ବା ହୋଡ଼ୋକୋ ହୁଣ୍ଡି ଜାନାକୋ, ଏନ୍ତେ ଇନ୍‍କୁୱାଃ ତାଃ ଜାହାନାଃ ଜୋଜୋମାଃ କା ତାଇକେନା, ଦୋ ୟୀଶୁ ଆଜାଃ ଚେଲାକୋକେ ନାଡ଼େଏ କେଡ଼ାକେତେ ଇନ୍‍କୁକେ କାଜିକେଦାଏ, “ଇଙ୍ଗ୍‍କେ ନେ ଥିମ୍ବା ହୋଡ଼ୋକୋ ଚେତାନ୍ ରେ ଦାୟା ହିଜୁଃ ତାନା, ଚିୟାଃଚି ନିକୁ ତିନ୍ ଦିନ୍ ଏତେ ଇଙ୍ଗ୍ଆଃ ଲୋଃ ମେନାକୋୱା ହାର୍ ନାଆ ଇନ୍‍କୁୱାଃ ତାଃ ଜେତ୍ନାଃ ଅଗି ଜୋମେୟାଃ ବାନୋଗା। ଇଙ୍ଗ୍ ଇନ୍‍କୁକେ ରେଙ୍ଗେଃ ଗି ଅଡ଼୍ଆଃ କୁଲ୍ ତାକୋୱାଇଙ୍ଗ୍ ରେଦୋ, ହୋରା ରେ ଲାଗା କେନୋଃ ୱାକୋ, ଚିୟାଃଚି ନିକୁଏତେ ଅକଏ-ଅକଏ ସାଙ୍ଗିନ୍ ଏତେ ହିଜୁଃ କାନାକୋ।” ଇନିଜାଃ ଚେଲାକୋ ଇନିଃକେ କାଜିରୁଆଡ଼୍ କିଜାକୋ, “ନେତାଃ ସୁନ୍‍ସାନ୍ ଜାଗା ରେ ନିମିନାଙ୍ଗ୍ ହୋଲୋଙ୍ଗ୍‍କୋ ଅକଏ କୋତାଃ ଏତେ ଆଉୱେୟାଏ ଚି ନିକୁ ବିୟୋଃ ୱାକୋ?” ୟୀଶୁ ଇନ୍‍କୁକେ କୁଲିକେଦାଏ, “ଆପେୟାଃ ତାଃ ଚିମିନାଙ୍ଗ୍ ହୋଲୋଙ୍ଗ୍‍କୋ ମେନାଃ?” ଇନ୍‍କୁ କାଜିକେଦାକୋ, “ସାତ୍‍ଠୁ।” ଏନ୍ତେ ଇନିଃ ହୋଡ଼ୋକୋକେ ଅତେ ରେ ଦୁବ୍ ଲାଗିନ୍ ଆନାଚୁ ଏମାଃ କୋୱାଏ, ଏନା ତାୟୋମ୍ତେ ସାତ୍‍ଠୁ ହୋଲୋଙ୍ଗ୍ କୋକେ ଇଦିକେଦାଏ ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କେଚାଃ କେଦାଏ, ହାର୍ ଆଜାଃ ଚେଲାକୋକେ ହାଟିଙ୍ଗ୍ ଲାଗିନ୍ ଏମ୍‍କେଦାଏ, ଆଡୋଃ ଇନ୍‍କୁ ହୋଡ଼ୋକୋକେ ହାଟିଙ୍ଗ୍ କେଦାକୋ। ଇନ୍‍କୁ ତାଃ ରେ ହୁଡିଙ୍ଗ୍ ଲେକା ହୁପୁଡିଙ୍ଗ୍ ହାକୁକୋ ହ ତାଇକେନା, ଇନିଃ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ ଏନାକେ ହଗି ହାଟିଙ୍ଗ୍ ଲାଗିନ୍ କାଜିକେଃକୋୱାଏ। ହୋଡ଼ୋକୋ ଜୋମ୍ କେତେ ବିଇ ଜାନାକୋ। ଏନା ତାୟୋମ୍ତେ ଚେଲାକୋ ୟୀଶୁ କେଚାଃକାନ୍ ସାରେଃ ହୋଲୋଙ୍ଗ୍ ଖାଣ୍ଡା କୋକେ ସାତ୍ ଡାଲି ଫେରେଃ କେତେ ଉଠାଓ କେଦାକୋ। ହାର୍ ହୋଡ଼ୋକୋ ଚାଇର୍ ହାଜାର୍ ଲେକା ତାଇକେନାକୋ, ଏନ୍ତେ ଇନିଃ ଇନ୍‍କୁକେ ବିଦା କେଃକୋୱାଏ। ହାର୍ ୟୀଶୁ ଇମ୍ତାଗି, ଆଜାଃ ଚେଲାକୋଲୋଃ ଡୋଙ୍ଗା ରେ ରାକାବ୍ କେତେ ଦଲ୍‍ମନୁତା ଜିଲ୍ଲା ତେ ସେନୋଃ ଜାନାଏ। ଆଡୋଃ ଫାରିସୀ ହୋଡ଼ୋକୋ ହିଜୁଃକେତେ ୟୀଶୁ କେ କୁଲି-ବାଡ଼ା କିଜାକୋ ହାର୍ ଇନିଃକେ ଜାଞ୍ଚି ଲାଗିନ୍ତେ ଇନିଃତାଃ ତେ ରିମିଲ୍‍ଦିଶୁମ୍ ରାଃ ମିୟାଃ ଚିହ୍ନା ଆସିକିଜାକୋ। ୟୀଶୁ ଆଜାଃ ଆତ୍ମା ରେ ଦୁକୁ ଜାନାଏ ହାର୍ ସାହେଃ କେତେ କାଜିକେଦାଏ, “ନେ ସାମାୟ୍ ରେନ୍ ହୋଡ଼ୋକୋ ଚିନାଃ ମେନ୍ତେ ଚିହ୍ନା ଦାଣା ତାନାକୋ? ଇଙ୍ଗ୍ ଆପେକେ ସାର୍ତିଗୀ କାଜିପେ ତାନିଙ୍ଗ୍, ଚି ନେ ସାମାୟ୍ ରେନ୍ ହୋଡ଼ୋକୋକେ ଜେତାନ୍ ଚିହ୍ନା କା ଏମୋଗା।” ହାର୍ ଇନିଃ ଇନ୍‍କୁକେ ବାଗେ କେତେ ଆଡୋଃଗି ଡୋଙ୍ଗା ରେ ରାକାବ୍ ଜାନାଏ, ହାର୍ ଗାଲିଲୀ ସାମୁଦାର୍ ହାନ୍ ଫାରୋମ୍ ତେ ସେନୋଃ ଜାନାଏ। ୟୀଶୁ ରାଃ ଚେଲାକୋ ହୋଲୋଙ୍ଗ୍ ଇଦି ରିଡ଼ିଙ୍ଗ୍ ଲେନାକୋ, ହାର୍ ଡୋଙ୍ଗା ରେ ଇନ୍‍କୁୱାଃ ତାଃ ରେ ମିୟାଃ ଗି ହୋଲୋଙ୍ଗ୍ ତାଇନ୍ କେନା। ୟୀଶୁ ଇନ୍‍କୁକେ କେଟେଃ ଆନାଚୁ ଏମ୍‍କେଦାଏ, “ନେଲେପେ, ଫାରିସୀ ହୋଡ଼ୋକୋୱାଃ ଖାମୀର୍ ହାର୍ ହେରୋଦ୍ ରାଜା ରାଃ ଖାମୀର୍ ଏତେ ହୁସିଆର୍ ତାଇନ୍‍ପେ।” ଇନ୍‍କୁ ଆକୋ-ଆକତେଗି କୁପୁଲି କେତେ କାଜି ବାଡ଼ା କେଦାକୋ, “ଆବୁୱାଃ ତାଃ ରେଦୋ ହୋଲୋଙ୍ଗ୍ ବାନୋଗା ଏନାମେନ୍ତେ ଇନିଃ କାଜି ତାନାଏ।” ନେୟା ସାରିକେତେ ୟୀଶୁ ଇନ୍‍କୁକେ କାଜିକେଦାଏ, “ଆପେ ଚିନାଃ ଆପେୟାଃ ରେ କୁପୁଲିଅଃ ତାନାପେ, ଚି ଆବୁୱାଃ ତାଃ ରେଦୋ ହୋଲୋଙ୍ଗ୍ ବାନୋଃ? ଚିନାଃ ନାଆ ସାନ୍ତେ କାପେ ସାରିତାନା ହାର୍ କାପେ ବୁଝାଅ ତାନା? ଚିନାଃ ଆପେ ଇଙ୍ଗ୍‍କେ କାପେ ବିଶ୍ଵାସ୍ ତାନା? ଚିନାଃ ମେଏଃ ତାଇନ୍ ରେ ହଗି କାପେ ନେଲ୍‍ତାନା, ହାର୍ ଲୁତୁର୍ ତାଇନ୍ ରେ ହଗି କାପେ ଆୟୁମ୍ ତାନା? ହାର୍ ଚିନାଃ ଆପେ ରିଡ଼ିଙ୍ଗ୍ ଜାନାପେ? ଚିମ୍ତାଙ୍ଗ୍ ଇଙ୍ଗ୍ ପାଞ୍ଚ୍ ହାଜାର୍ କୋୱାଃ ଲାଗିନ୍ ପାଞ୍ଚ୍ ହୋଲୋଙ୍ଗ୍ କୋକେ କେଚାଃ ଲେଦାଇଙ୍ଗ୍ ଦୋ ଆପେ ଖାଣ୍ଡା କୋରାଃ ଚିମିନାଙ୍ଗ୍ ଡାଲି ଫେରେଃ କେତେ ଉଠାଓ ଲେଦାପେ?” ଇନ୍‍କୁ ଇନିଃକେ କାଜିକିଜାକୋ, “ବାରା ଡାଲି।” ଇନିଃ ଇନ୍‍କୁକେ କାଜିକେଦାଏ, “ହାର୍ ଚିମ୍ତାଙ୍ଗ୍ ଚାଇର୍ ହାଜାର୍ କୋୱାଃ ଲାଗିନ୍ ସାତ୍ ଠୁ ହୋଲୋଙ୍ଗ୍ ତାଇକେନା ଦୋ ଆପେ ଖାଣ୍ଡା କୋରାଃ ଚିମିନ୍ ଡାଲି ଫେରେଃ କେତେ ଉଠାଓ ଲେଦାପେ?” ଇନ୍‍କୁ ଇନିଃକେ କାଜିକେଦାକୋ “ସାତ୍ ଡାଲି।” ୟୀଶୁ ଇନ୍‍କୁକେ କାଜିକେଦାଏ, “ଚିନାଃ ଆପେ ନାଆ ସାନ୍ତେ ଇଙ୍ଗ୍‍କେ କାପେ ବୁଝାଅଃ ତାନା?” ଏନ୍ତେ ୟୀଶୁ ବେଥ୍‍ସୈଦା ସାହାର୍ ହିଜୁଃ ଲେନାଏ, ହାର୍ ହୋଡ଼ୋକୋ ମିୟାଃ ଆନ୍ଧା କେ ଇନିଜାଃ ନାଡ଼େଏ ଆଉଲିଜାକୋ ହାର୍ ଇନିଃକେ ଆର୍ଜି କିଜାକୋ ଚି ଇନିଃକେ ଜୁଟିଃ କେତେ ଚାଙ୍ଗାଇ କାଏ। ୟୀଶୁ ଏନ୍ ଆନ୍ଧା ରାଃ ତିଈ ସାବ୍ କେତେ ଇନିଃକେ ହାତୁ ରାଃ ବାହାରି ତେ ଇଦିକିଜାଏ। ହାର୍ ଆଜାଃ ବେଏଃ ଦାଆ ତେ ଏନ୍ ହୋଡ଼ ରାଃ ମେଏଃ ରେ ଜୁଟିଃ କେଦାଏ, ହାର୍ ଇନିଃକେ କୁଲିକିଜାଏ, “ଚିନାଃ ଆମ୍‍କେ ଜାହାନାଃ ନେଲୋଃ ତାନା?” ଇନିଃ ମେଏଃ ଆରିଃ କେତେ କାଜିକେଦାଏ, “ଇଙ୍ଗ୍ ହୋଡ଼ୋକୋକେ ନେଲ୍ କୋ ତାନାଇଙ୍ଗ୍, ମେନ୍ଦୋ ଇନ୍‍କୁ ଇଙ୍ଗ୍‍କେ ଦାରୁ ଲେକା, ସେସେନ୍ ତାନ୍ ନେଲୋଃ ତାନାକୋ।” ଏନ୍ତେ ୟୀଶୁ ଆଡୋଃ ମିଶା ଇନିଜାଃ ମେଏଃ ରେ ତିଈ ମାଣ୍ଡାଅ କେଦାଏ, ହାର୍ ଆନ୍ଧା ଧ୍ୟାନ୍‍ତେ ନେଲ୍‍କେଦାଏ। ହାର୍ ବେଶ୍ ଜାନାଏ ହାର୍ ସବେନାଃ ସାଫା-ସାଫା ନେଲ୍‍କେଦାଏ। ୟୀଶୁ ଇନିଃକେ ନେୟା କାଜିକେତେ ଅଡ଼୍ଆଃ ତେ କୁଲ‍୍‍କିଜାଏ, “ନେତାଃ ରେ ଚିନାଃ ହୋବାନା ଏନାକେ ହାତୁ ରେ ଉଦୁବ୍ ଲାଗିନ୍ ଆଲୋମ୍ ସେନ୍ ମେ।” ୟୀଶୁ ହାର୍ ଇନିଜାଃ ଚେଲାକୋ ବେଥ୍‍ସୈଦା ସାହାର୍ ବାଗେ କେତେ କୈସାରିୟା ଫିଲିପି ରାଃ ସାହାର୍ ଜାପାଃ ହାତୁ କୋରେ ସେନ୍ ଜାନାକୋ। ଆଡୋଃ ହୋରା ରେ ଇନିଃ ଇନ୍‍କୁକେ କୁଲିକେଦାଏ, “ହୋଡ଼ୋକୋ ଇଙ୍ଗ୍‍କେ ଚିନାଃ ମେତାଇଙ୍ଗ୍ ତାନାକୋ?” ଚେଲାକୋ କାଜିରୁଆଡ଼୍ କିଜାକୋ, “ଯୋହାନ୍ ବାପ୍ତିସ୍ମା ଏହେମ୍ ନିଈ; ହାର୍ ଅକଏ-ଅକଏ ଏଲିୟା; ହାର୍ ଅକଏ-ଅକଏ ନାବୀ କୋଏତେ ମିୟାଃ ତାନିଃ ମେନ୍ତେ କାଜିୟାକୋ।” ୟୀଶୁ ଇନ୍‍କୁକେ କୁଲିକେଃକୋୱାଏ, “ମେନ୍ଦୋ ଆପେ ଇଙ୍ଗ୍‍କେ ଚିନାଃ ପେ କାଜିତାନା?” ପାତ୍ରାସ୍ ଆଏଃକେ କାଜିରୁଆଡ଼୍ କିଜାଏ, “ଆମ୍ ମାସୀହ୍ ତାନ୍‍ମେ ପାର୍ମେଶ୍ଵାର୍ ପାଡ଼େତେ କୁଲାକାନାମ୍।” ଏନ୍ତେ ୟୀଶୁ ଇନ୍‍କୁକେ କେଟେଃ ତେ ଆନାଚୁ ଏମାଃ କୋୱାଏ ଚି, “ଇଙ୍ଗ୍ଆଃ ବିଷାୟ୍ ରେ ନେୟା ଜେତାଏ କେହ ଆଲୋପେ କାଜିୟା।” ଏନ୍ତେ ୟୀଶୁ ଇନ୍‍କୁକେ ଶିଖାଅ କେଃକୋୱାଏ, ଚି ମାନ୍‍ୱା ରାଃ ହୋନ୍ କେ ଦୁକୁ ସାହାତିଙ୍ଗ୍ ଲାଗାତିଙ୍ଗ୍ଆ ହାର୍ ୟାହୁଦୀ ମାରିହୋଡ଼ୋକୋ ହାର୍ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ଇନିଃକେ ହିଲାଙ୍ଗ୍ କେତେ ଗୋଜିୟାକୋ ହାର୍ ଇନିଃ ତିନ୍ ଦିନ୍ ରାଃ ତାୟୋମ୍ତେ ଜୀବିରିଦାଏ। ଇନିଃ ନେ କାଜି ଇନ୍‍କୁକେ ସାଫା-ସାଫା କାଜିକେଃକୋୱାଏ। ନେୟା ରେ ପାତ୍ରାସ୍ ୟୀଶୁ କେ ଆଲାଗ୍ ଇଦିକିଜାଏ, ହାର୍ ଏଗେର୍ କିଜାଏ। ଚିୟାଃଚି ଆଏଃ ଗୋଜୋଗାଇଙ୍ଗ୍ ମେନ୍ତେ କାଜି ଲିଜାଏ। ମେନ୍ଦୋ ୟୀଶୁ ରୁଆଡ଼୍ କେତେ ଆଜାଃ ଚେଲାକୋ ପାଡ଼୍ ନେଲ୍‍କେଦାଏ, ହାର୍ ପାତ୍ରାସ୍ କେ ଏଗେର୍ କେତେ କାଜିକିଜାଏ, “ହେ ଶାଏତାନ୍! ଇଙ୍ଗ୍ଆଃ ନାଡ଼େଏ ତେ ଫାର୍କାନ୍ ମେ, ଚିୟାଃଚି ଆମାଃ ପାହୋମ୍ ପାର୍ମେଶ୍ଵାର୍ ରାଃ ପାହୋମ୍ ଲେକା କାହା, ମେନ୍ଦୋ ହୋଡ଼ୋକୋୱାଃ ଲେକା ପାହୋମ୍ ତାନାମ୍।” ଇନିଃ ମିଃଥିମ୍ବା ହୋଡ଼ୋକୋକେ ହାର୍ ଆଜାଃ ଚେଲାକୋକେ ନାଡ଼େଏ କେଡ଼ାକେତେ ଇନ୍‍କୁକେ କାଜିକେଦାଏ, “ଜେତାଏ ଇଙ୍ଗ୍‍କେ ଅତୋଙ୍ଗିଙ୍ଗ୍ ରେଦୋ, ଇନିଃ ଆଜାଃ ସାନାଙ୍ଗ୍ କୋକେ ବାଗିକାଏ ହାର୍ ଆଜାଃ କ୍ରୁଶ୍ ଉଠାଓକେତେ, ଇଙ୍ଗ୍‍କେ ଅତୋଙ୍ଗିଙ୍ଗ୍ କାଏ। ଚିୟାଃଚି ଜେତାଏ ଆଜାଃ ଜୀଉ କେ ନେ ଅତେଦିଶୁମ୍ ଲାଗିନ୍ ବାଞ୍ଚାଅ ସାନାଙ୍ଗାଏ ରେଦୋ ଇନିଃ ଏନାକେ ଆଦେୟାଏ, ମେନ୍ଦୋ ଅକଏ ଇଙ୍ଗ୍ଆଃ ହାର୍ ସୁସାମାଚାର୍ ଲାଗିନ୍ ଆଜାଃ ଜୀଉ କେ ଆଦେୟାଏ ଇନିଃ ସାର୍ତି ଜୀଦାନ୍ ନାମେୟାଏ। ମିୟାଃ ହୋଡ଼ ସବେନ୍ ଅତେଦିଶୁମ୍ କେ ନାମ୍ କେୟାଏ ହାର୍ ପାର୍ମେଶ୍ଵାର୍ ଏତେ ଜୀଉ କାଏ ନାମ୍ ରେଦୋ ଇନିଃକେ ଚିକାନ୍ ଲାଭ୍ ହୋବାୱା? ହାର୍ ହୋଡ଼ ଆଜାଃ ଜାନାଓ ଜୀଦାନ୍ ରାଃ ବାଦ୍‍ଲା ରେ ପାର୍ମେଶ୍ଵାର୍ କେ ଚିନାଃ ଏମେୟାଏ? ଜେତାଏ ହଗି ନେ ବ୍ୟାଭିଚାର୍ ହାର୍ ପାପୀ ଜାତି କୋୱାଃ ଥାଲା ରେ ଇଙ୍ଗ୍‍କେ ହାର୍ ଇଙ୍ଗ୍ଆଃ କାଜିକୋ ଏତେ ଗିୟୁଗୋୱାଏ, ଇଙ୍ଗ୍ ମାନ୍‍ୱା ରାଃ ହୋନ୍ ହଗି ଇମ୍ତାଙ୍ଗ୍ ଇନିଃକେ ହଗି ଗିୟୁଗୋୱାଇଙ୍ଗ୍, ଚିମ୍ତାଙ୍ଗ୍ ଇଙ୍ଗ୍ ପାବିତାର୍ ସିର୍ମାଦାସୀ କୋଲୋଃ ଇଙ୍ଗ୍ଆଃ ଆପୁ ରାଃ ମାନାରାଙ୍ଗ୍ ଲୋଃ ହିଜୁଗାଇଙ୍ଗ୍।” ଆଡୋଃ ମିଶା ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍, ଚି ଅକଏକୋ ନେତାଃ ତିଙ୍ଗୁ କାନାକୋ, ଇନ୍‍କୁ ଏତେ ଚିମିନାଙ୍ଗ୍ ନେଲେକା ମେନାକୋୱା, ଚି ଚିମ୍ତାଙ୍ଗ୍ ସାନ୍ତେ ପାର୍ମେଶ୍ଵାର୍ ରାଃ ରାଇଜ୍ କେ ପେଡ଼େଏ ଲୋଃ ହିଜୁଃକାନ୍ କାକୋ ନେଲେୟା ଏନ୍ ସାନ୍ତେ ଗୋଜୋଃ ରାଃ ଶିବିଲ୍ ଚିଉଲା ହ କାକୋ ଚାଖାୟା।” ଛାଅ ଦିନ୍ ତାୟୋମ୍ତେ ୟୀଶୁ ପାତ୍ରାସ୍ ହାର୍ ୟାକୁବ୍ ହାର୍ ଯୋହାନ୍ କେ ଆଜାଃ ଲୋଃ ଇଦିକେଦାଏ, ହାର୍ ସୁନ୍‍ସାନ୍ ରେ ମିୟାଃ ସାଲିଙ୍ଗି ବୁରୁ ଚେତାନ୍ ତେ ଇଦି କେଃକୋୱାଏ, ଏନ୍ତାଃ ଇନ୍‍କୁୱାଃ ନାଡ଼େଏ ରେ ଇନିଜାଃ ମେଏଃମୁହାଡ଼୍ ବାଦ୍‍ଲାଅ ଜାନା। ହାର୍ ଇନିଜାଃ ଲିଜାଃ ପୁଣ୍ଡୀ ଜାନା ହାର୍ ନେଲେକା ପୁଣ୍ଡୀ ହାର୍ ଚାମ୍‍କାଓ ଜାନା, ଚି ଅତେ ରେ ଜେତାନ୍ ଲିଜାଃ ସାଫାନିଃ ହଗି ଏନ୍‍ଲେକା ସାଫା କାଏ ଧାଡ଼ିୟାଏ। ଏନ୍ତେ ନେ ବାର୍ହୋଡ଼୍ ନାବୀ କୋ ମୁଶା ଆଡୋଃ ଏଲିୟା ଇନ୍‍କୁକେ ଦେଖାଅ ଜାନାକୋ; ହାର୍ ଇନ୍‍କୁ ୟୀଶୁ ଲୋଃ ବାକାଣ୍ ତାଇକେନାକୋ। ଏନ୍ତେ ପାତ୍ରାସ୍ ୟୀଶୁ କେ କାଜିକେଦାଏ, “ହେ ଗୁରୁ, ଆଲେୟାଃ ନେତାଃ ରେ ତାଇନ୍ ବେଶ୍ ତାନାଃ; ଏନାଲାଗିନ୍ ଆଲେକେ ଆଚୁ ଲେମ୍ ଚି, ଆପିୟା ମାଣ୍ଡ୍‍ୱା ବାଇୟାଲେ, ମିୟାଃ ଆମାଃ ଲାଗିନ୍, ହାର୍ ମିୟାଃ ମୁଶା ଲାଗିନ୍, ହାର୍ ମିୟାଃ ଏଲିୟା ଲାଗିନ୍।” ଚିୟାଃଚି ପାତ୍ରାସ୍ ହାର୍ ଏଟାଃ ବାର୍ହୋଡ଼୍ ଚେଲାକିନ୍ କାକିନ୍ ସାରି ତାଇନା ଚି ଚିନାଃ ଉତ୍ତାର୍ ଏମେୟାଲେ, ଏନାଲାଗିନ୍ ଚି ଇନ୍‍କୁ ଥିମ୍ବାଗି ବୋରୋ ଲେନ୍ ତାଇନାକୋ। ଏନ୍ତେ ମିୟାଃ ରିମିଲ୍ ଇନ୍‍କୁକେ ଉମ୍ବୁଲ୍ କେଃକୋୱାଏ, ହାର୍ ଏନ୍ ରିମିଲ୍ ଏତେ ପାର୍ମେଶ୍ଵାର୍ କାଜିକେଦାଏ, “ନିଈ ଇଙ୍ଗ୍ଆଃ ଦୁଲାଡ଼ାନ୍ ହୋନ୍ ତାନିଃ। ନିଜାଃ ଆୟୁମେପେ!” ଇମ୍ତାଗି, ଇନ୍‍କୁ ସବେନ୍ ପାଡ଼୍ ନେଲ୍ କେଦାକୋ, ହାର୍ ୟୀଶୁ କେ ବାଗେ କେତେ ଆକୋୱାଃ ଲୋଃ ଆଡୋଃ ଅକଏ କେହ କାକୋ ନେଲ୍ କେଦା। ଚିମ୍ତା ୟୀଶୁ ଆଡୋଃ ଆଜାଃ ଆପିୟା ଚେଲାକୋ ବୁରୁ ଏତେ ଆଡ଼୍‍ଗୁନ୍ ସାମାୟ୍ ରେ, ଇନିଃ ଇନ୍‍କୁକେ ଆନାଚୁ ଏମାଃ କୋୱାଏ, ଚି ଚିମିନ୍ ସାନ୍ତେ ମାନ୍‍ୱା ରାଃ ହୋନ୍ ଗୋଜାକାନ୍ କୋଏତେ କାଏ ଜୀବିରିଦା, ଏନ୍ ସାନ୍ତେ ଅକନାଃ ଆପେ ପେ ନେଲା କାଦା ଏନା ଅକଏକେ ହଗି ଆଲୋପେ କାଜିୟା। ଏନ୍ତେ ଇନ୍‍କୁ ନେ କାଜିକେ ମୋନ୍ ରେ କୋ ମାଣ୍ଡାଅ କେଦାକୋ ହାର୍ ଆକୋ-ଆକୋ ରେ କାଜି ବାକାଣ୍ କେଦାକୋ, “ଗୋଜାକାନ୍ କୋଏତେ ଜୀବିରିଃ ରାଃ ମାନେ ଚିନାଃ ତାନାଃ?” ଏନ୍ତେ ଚେଲାକୋ ଇନିଃକେ କୁଲିକିଜାକୋ, “ଆଇନ୍ ଗୁରୁକୋ ଚିନାଃ ଲାଗିନ୍ କାଜିୟାକୋ, ଚି ଏଲିୟା ରାଃ ସିଦା ହିଜୁଃ ଜାଲେକାତେ ମେନାଃ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଏଲିୟା ସାର୍ତିଗୀ ସିଦା ହିଜୁଃକେତେ ସବେନାଃ ବାଇରୁଆଡ଼୍‍ୟାଏ। ମେନ୍ଦୋ ମାନ୍‍ୱା ରାଃ ହୋନ୍ ବିଷାୟ୍ ରେ ନେୟା ଚିନାଃ ଲାଗିନ୍ ଅଲାକାନା ଚି, ଇନିଃ ଥିମ୍ବାଗି ଦୁକୁ ଉଠାଓୟାଏ, ହାର୍ ହିଲାଙ୍ଗ୍ ଅଗାଏ? ମେନ୍ଦୋ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି, ଏଲିୟା ଦୋ ହିଜୁଃ ଛାବାନାଏ, ହାର୍ ଚିଲ୍‍କା ଇନିଜାଃ ବିଷାୟ୍ ଅଲାକାନା, ଇନ୍‍କୁ ଚିକାନାଃ ସାନାଙ୍ଗ୍ କେଦାକୋ ଏନା ଇନିଜାଃ ଲୋଃ ରିକା କେଦାକୋ।” ଚିମ୍ତାଙ୍ଗ୍ ୟୀଶୁ ଆଡୋଃ ଆଜାଃ ଆପିୟା ଚେଲାକୋ ଏଟାଃ ଚେଲାକୋୱାଃ ନାଡ଼େଏ ତେ ହିଜୁଃ ଲେନାକୋ, ଦୋ ନେଲ୍ କେଦାକୋ ଚି ଆକୋୱାଃ ସବେନ୍ ପାଡ଼୍ ମିଃଥିମ୍ବା ହୋଡ଼ୋକୋ ମେନାକୋୱା ଏନ୍ତେ ଆଇନ୍ ଗୁରୁକୋ ଇନ୍‍କୁୱାଃ ଲୋଃ କୁଲିବାଡ଼ା ତାଇନାକୋ। ହାର୍ ୟୀଶୁ କେ ନେଲ୍ ତୋର୍ଷା ସବେନ୍ କୋ ଥିମ୍ବାଗି ଆକ୍‍ଦାନ୍ଦା ଜାନାକୋ, ହାର୍ ଇନିଜାଃ ପାଡ଼୍ ନିର୍ କେତେ ଇନିଃକେ ଜୋହାର୍ କିଜାକୋ। ୟୀଶୁ ଇନ୍‍କୁକେ କୁଲିକେଃକୋୱାଏ, ଆପେ ନିକୁ ଲୋଃ ଚିନାଃ କୁଲିବାଡ଼ା ତାନାପେ? ହୋଡ଼ୋକୋ ଏତେ ମିହୋଡ଼୍ ଇନିଃକେ କାଜିରୁଆଡ଼୍ କିଜାଏ, “ହେ ଗୁରୁ, ଇଙ୍ଗ୍ ଇଙ୍ଗ୍ଆଃ ହୋନ୍‍କଡ଼ା କେ ଆମାଃ ନାଡ଼େଏ ଆଉଲିଜାଇଙ୍ଗ୍, ଅକନିଜାଃରେ କୋନ୍ଦା ବାଇତେୟାଃ ବୋଙ୍ଗାଆତ୍ମା ଏସେର୍ କାନାଏ। ଚିମ୍ତାଙ୍ଗ୍ ଏନ୍ ବୋଙ୍ଗାଆତ୍ମା ଇନିଃକେ ଏସେରିୟାଏ ଇମ୍ତାଗି ଇନିଃକେ ଥାୱାଃ ଇୟାଏ, ହାର୍ ଇନିଜାଃ ମୋଚା ପାଡ଼େତେ ବୋଟୋ ଫେରେଃ କେନୋଗା, ହାର୍ ଇନିଃ ଡାଟା ହାବେୟାଏ ହାର୍ ଟାଡ଼ାଙ୍ଗା କେନୋଗାଏ। ଇଙ୍ଗ୍ ଆମାଃ ଚେଲାକୋକେ କାଜିଲେଃ କୋୱାଇଙ୍ଗ୍ ଚି ଏନ୍ ବୋଙ୍ଗାଆତ୍ମା କେ ଅଡୋଙ୍ଗ୍ ତାଇକାକୋ ମେନ୍ଦୋ ଇନ୍‍କୁ ଅଡୋଙ୍ଗ୍ କାକୋ ଧାଡ଼ିଜାନା।” ନେୟା ଆୟୁମ୍‍କେତେ ୟୀଶୁ ଇନ୍‍କୁକେ କାଜିରୁଆଡ଼୍ କେଦାଏ, “ହେ ଆବିଶ୍ଵାସୀ ହୋଡ଼ୋକୋ, ଇଙ୍ଗ୍ ଚିମିନ୍ ସାନ୍ତେ ଆପେୟାଃ ଲୋଃ ତାଇନାଇଙ୍ଗ୍? ହାର୍ ଚିମିନ୍ ସାନ୍ତେ ଆପେୟାଃ ସାହାତିଙ୍ଗ୍ ୟାଇଙ୍ଗ୍? ଏନ୍ କଡ଼ାହୋନ୍ କେ ଇଙ୍ଗ୍ଆଃ ତାଃ ଆୱିପେ।” ଏନ୍ତେ ଇନ୍‍କୁ ଏନ୍ କଡ଼ାହୋନ୍ କେ ୟୀଶୁ ତାଃ ଆଉଲିଜାକୋ ହାର୍ ଚିମ୍ତାଙ୍ଗ୍ ବୋଙ୍ଗାଆତ୍ମା ୟୀଶୁ କେ ନେଲ୍ କିଜାଏ, ଦୋ ଏନ୍ ବୋଙ୍ଗାଆତ୍ମା ଇମ୍ତାଗି ଇନିଃକେ ହଣେୟାଃ କିଜାଏ, ହାର୍ ଇନିଃ ଅତେ ରେ ଥାୱାଃ ଉୟୁଃଜାନାଏ, ହାର୍ ମୋଚା ତେ ବୋଟୋ ଅଡୋଙ୍ଗ୍ ତୋର୍ଷା ବାଟି ଇଦି ଜାନାଏ। ୟୀଶୁ କଡ଼ାହୋନ୍ ରାଃ ଆପୁ ତେକେ କୁଲିକିଜାଏ, “ନିଜାଃ ନେ ଦାଶା ଚିଉଲା ଏତେ ହୋବାଅଃ ତାନା?” ଏନ୍ତେ ଇନିଃ କାଜିକେଦାଏ, “ସିଟିୟା ଏତେ ଗି। ମିଶା-ମିଶା ବୋଙ୍ଗାଆତ୍ମା ଇନିଃକେ ଗୋଏଃ ଲାଗିନ୍ ଚିମ୍ତା ସେଙ୍ଗେଲ୍ ରେଦୋ ଚିମ୍ତା ଦାଆ ରେ ଉୟୁଃ କିଜାଏ। ମେନ୍ଦୋ ଆମ୍ ଜାହାନାଃ ରିକା ଧାଡ଼ି ରେଦୋମ୍, ଆଲେକେ ଦାୟା କେତେ ଆଲେୟାଃ ଲାଗିନ୍ ବୁଗିନାଃ ରିକାତାମ୍।” ୟୀଶୁ ଇନିଃକେ କାଜିକେଦାଏ, “ ‘ଆମ୍ ରିକା ଧାଡ଼ି ରେଦୋମ୍,’ ନେୟା ଚିକାନ୍ କାଜି? ବିଶ୍ଵାସ୍‍ତାନ୍ କୋୱାଃ ଲାଗିନ୍ ସବେନାଃ ହୋବା ଧାଡ଼ିୟୋଗା।” କଡ଼ାହୋନ୍ ରାଃ ଆପୁ ତେ ଇମ୍ତାଗି କାଉରି କେତେ କାଜିକେଦାଏ, “ହେ ପ୍ରାଭୁ, ଇଙ୍ଗ୍ ବିଶ୍ଵାସ୍ ତାନାଇଙ୍ଗ୍; ଇଙ୍ଗ୍ଆଃ ଆବିଶ୍ଵାସ୍ କେ ଆତୋମ୍ ତାମ୍।” ଚିମ୍ତାଙ୍ଗ୍ ୟୀଶୁ ନେଲ୍‍କେଦାଏ, ମିଃଥିମ୍ବା ହୋଡ଼ୋକୋ ନିର୍ ଆଉକେତେ ହୁଣ୍ଡିଅଃ ତାନାକୋ, ଦୋ ଇନିଃ ବୋଙ୍ଗାଆତ୍ମା କେ ନେୟା କାଜିକେତେ ଏଗେର୍ କିଜାଏ, “ହେ ବୋଙ୍ଗାଆତ୍ମା, ନିଈକେ କୋନ୍ଦା ହାର୍ ବାହିରା କିଜାମ୍ ଇଙ୍ଗ୍ ଆମ୍‍କେ ଆନାଚୁ ଏମାମେ ତାନିଙ୍ଗ୍, ଇନିଃକେ ବାଗି ମେ, ହାର୍ ଇନିଜାଃ ରେ ଚିଉଲା ହ ଆଲୋମ୍ ବୋଲୋୱା।” ଏନ୍ତେ ବୋଙ୍ଗାଆତ୍ମା କାଉରି କେତେ, ହାର୍ ଇନିଃକେ ପୁରାଃ ଗି ହଣେୟାଃ କେତେ ଅଡୋଙ୍ଗ୍ ଜାନାଏ; ହାର୍ କଡ଼ାହୋନ୍ ଗୋଜାକାନ୍ ଲେକା ଗିତିଃ ଜାନାଏ, ନେତାଃ ସାନ୍ତେ ଚି ଚିମିନାଙ୍ଗ୍ ହୋଡ଼ୋକୋ କାଜି ତାଇନାକୋ ଚି, “ଇନିଃ ଗୋଏଃ ଜାନାଏ।” ମେନ୍ଦୋ ୟୀଶୁ ଇନିଜାଃ ତିଈ ସାବ୍ କେତେ ଇନିଃକେ ବିରିଃ କିଜାଏ, ହାର୍ ଇନିଃ ବେଶ୍ କେତେ ତିଙ୍ଗୁ ଜାନାଏ। ଏନା ତାୟୋମ୍ତେ ୟୀଶୁ ଅଡ଼୍ଆଃ ତେ ହିଜୁଃ ଲେନାଏ, ଦୋ ଇନିଜାଃ ଚେଲାକୋ ଏସ୍କାର୍ ଗି ରେ ଇନିଃକେ କୁଲିକିଜାକୋ, “ଆଲେ ଇନିଃକେ ଚିନାଃ ମେନ୍ତେ ଅଡୋଙ୍ଗ୍ କାଲେ ଧାଡ଼ିଜାନା?” ୟୀଶୁ ଇନ୍‍କୁକେ କାଜିକେଦାଏ, “ନେଲେକାନ୍ ବୋଙ୍ଗାଆତ୍ମାକୋ କା ବିନ୍ତି ଲେରେ ଆଡୋଃ କା ଉପାସ୍ ଲେରେ ଜେତାନ୍ ଲେକାତେ କାକୋ ଅଡୋଙ୍ଗ୍ ଧାଡ଼ିୟୋଗା।” ଏନ୍ତେ ଆଡୋଃ ମିଶା ୟୀଶୁ ହାର୍ ଆଜାଃ ଚେଲାକୋ ଏନ୍ ଜାଗା କେ ବାଗି କେଦାକୋ ଆଡୋଃ ଗାଲିଲୀ ଜିଲ୍ଲା ହୋବା କେତେ ସେନ୍ ତାଇନାକୋ। ୟୀଶୁ କାଏ ସାନାଙ୍ଗ୍ ତାଇନା ଚି ଜେତାଏ ଆଲୋକାକୋ ସାରିକା, ଚିୟାଃଚି ଇନିଃ ଆଜାଃ ଚେଲାକୋକେ ଶିଖାଅକୋ ତାଇନାଏ ହାର୍ ଇନ୍‍କୁକେ କାଜିୟାକୋ ତାଇନାଏ, “ମାନ୍‍ୱା ରାଃ ହୋନ୍ ହୋଡ଼ୋକୋୱାଃ ତିଈ ତେ ସାବୋଗାଏ, ହାର୍ ଇନ୍‍କୁ ଇନିଃକେ ଗୋଜିୟାକୋ, ହାର୍ ଇନିଃ ଗୋଏଃ ଜାନ୍ ରାଃ ତିନ୍ ଦିନ୍ ତାୟୋମ୍ତେ ଜୀବିରିଦୋଗାଏ।” ମେନ୍ଦୋ ନେ କାଜି ଚେଲାକୋ କାକୋ ବୁଝାଅଜାନା, ହାର୍ ଇନ୍‍କୁ ୟୀଶୁ କେ କୁଲି ଲାଗିନ୍ ବୋରୋ ତାଇନାକୋ। ଏନ୍ତେ ୟୀଶୁ ହାର୍ ଆଜାଃ ଚେଲାକୋ କାଫାର୍ନାହୁମ୍ ସାହାର୍ ତେ ହିଜୁଃ ଲେନାକୋ, ହାର୍ ଚିମ୍ତା ଅଡ଼୍ଆଃ ଭିତାର୍ ରେ ତାଇକେନାକୋ ୟୀଶୁ ଇନ୍‍କୁକେ କୁଲିକେଃକୋୱାଏ, “ହୋରା ରେ ଆପେ ଚିନାଃ କାଜି ରେ କୁପୁଲିଅଃ ତାଇକେନାପେ?” ମେନ୍ଦୋ ଇନ୍‍କୁ ହାପାଗି ତାଇଜାନାକୋ, ଚିୟାଃଚି ହୋରା ରେ ଇନ୍‍କୁ ନେ କାଜି ରେ କୁପୁଲି ଲେନାକୋ, ଚି ଆବୁ କୋଏତେ ମାରାଙ୍ଗ୍ ଅକଏ ତାନିଃ? ଏନ୍ତେ ୟୀଶୁ ଦୁବ୍ କେତେ ବାରାଝାନ୍ କୁଲାକାନ୍ ଚେଲାକୋକେ କେଡ଼ା କେଃକୋୱାଏ ହାର୍ ଇନ୍‍କୁକେ କାଜିକେଦାଏ, “ଜେତାଏ ମାରାଙ୍ଗେନ୍ ହୋବା ସାନାଙ୍ଗେନ୍ ରେଦୋ ସବେନ୍ କୋଏତେ ହୁଡିଙ୍ଗ୍ ହାର୍ ସବେନ୍ କୋୱାଃ ଦାସୀ ବାଇଏନ୍ କାଏ।” ହାର୍ ଇନିଃ ମିୟାଃ ହୁଡିଙ୍ଗ୍ ହୋନ୍ କେ ଇଦିକେତେ ଇନ୍‍କୁୱାଃ ଥାଲା ରେ ତିଙ୍ଗୁ କିଜାଏ, ହାର୍ ଇନିଃକେ କୋୟୋଙ୍ଗ୍ ରେ ଇଦିକେତେ ଇନ୍‍କୁକେ କାଜିକେଦାଏ, “ଅକଏ ହଗି ଇଙ୍ଗ୍ଆଃ ନୁତୁମ୍ ତେ ନେଲେକାନ୍ ହୁଡିଙ୍ଗ୍ ହୋନ୍ କୋଏତେ ମିହୋଡ଼୍ କେ ହଗି ସ୍ଵାଗାତ୍ ରିକାଏ ରେ ଇନିଃ ଇଙ୍ଗ୍‍କେ ସ୍ଵାଗାତିଙ୍ଗ୍ ତାନାଏ, ଆଡୋଃ ଅକଏ ହଗି ଇଙ୍ଗ୍‍କେ ସ୍ଵାଗାତିଙ୍ଗ୍ ରେଦୋ ଇନିଃ ଇଙ୍ଗ୍‍କେ କାହା ମେନ୍ଦୋ ଇଙ୍ଗ୍ଆଃ କୁଲ୍ ନିଃକେ ପାର୍ମେଶ୍ଵାର୍ କେ ସ୍ଵାଗାତ୍ ତାନାଏ।” ଏନ୍ତେ ଯୋହାନ୍ ଇନିଃକେ କାଜିକେଦାଏ, “ହେ ଗୁରୁ, ଆଲେ ମିୟାଃ ହୋଡ଼ କେ ଆମାଃ ନୁତୁମ୍ ରାଃ ପେଡ଼େଏ ତେ ବୋଙ୍ଗାଆତ୍ମା କେ ଅଡୋଙ୍ଗ୍‍ତାନ୍ ନେଲ୍ କିଜାଲେ, ଆଡୋଃ ଆଲେ ଇନିଃକେ ମାନା କିଜାଲେ, ଚିୟାଃଚି ଇନିଃ ଆବୁୱାଃ ଚେଲାକୋ ଏତେ କାଏ ତାଇନ୍ କେନାଏ।” ୟୀଶୁ କାଜିକେଦାଏ, “ଇନିଃକେ ଆଲୋପେ ମାନାଇୟା; ଚିୟାଃଚି ଏନ୍‍ଲେକା ଜେତାଏ ହ ବାଂକୁୱା ଜେ ଇଙ୍ଗ୍ଆଃ ନୁତୁମ୍ ତେ ପେଡ଼େଏ ରାଃ କାମିୟାଏ ହାର୍ ସେକାଡ଼୍ ଗି ବାଦ୍‍ଲାଅ ୱାଏ ହାର୍ ଇଙ୍ଗ୍‍କେ ନିନ୍ଦା ଧାଡ଼ିୟାଏ। ଚିୟାଃଚି ଅକଏ ଆବୁୱାଃ ବିରୋଧ୍ ରେ ନାହାଲି, ଇନିଃ ଆବୁ ପାଡ଼୍ ମେନିଜା। ଜେତାଏ ହଗି ମିୟାଃ ଗିଲାସ୍ ଦାଆ ଆପେକେ ଏନାମେନ୍ତେ ଆନୁପେୟାଏ ଚି ଆପେ ମାସୀହ୍ ରାଃ ତାନ୍‍ପେ ଦୋ ଇଙ୍ଗ୍ ଆପେକେ ସାର୍ତିଗୀ କାଜି ତାନାଇଙ୍ଗ୍ ଚି ଇନିଃ ଆଜାଃ ନାଲା ଅକୋ ଲେକାତେ କାଏ ଆଦେୟା।” “ଜେତାଏ ହଗି ନେ ହୁଡିଙ୍ଗ୍ କୋଏତେ ଅକଏ ଇଙ୍ଗ୍ଆଃ ରେ ବିଶ୍ଵାସ୍ ତାନାକୋ, ଇନିଃକେ ବିଶ୍ଵାସ୍ ବାଗେ ଲାଗିନ୍ ଠୋକାର୍ ଏମେୟାଏ ଦୋ ଇନିଜାଃ ଲାଗିନ୍ ବୁଗିନାଃ ନେୟା ତାନାଃ ଚି ମିୟାଃ ମାରାଙ୍ଗ୍ ଜାଁତା ଦିରି ଇନିଜାଃ ହୋଟୋଃ ରେ ହାକାଅଃକା ହାର୍ ଇନିଃ ସାମୁଦାର୍ ରେ ଦୁଡ଼ିଙ୍ଗୋଃ କାଏ। ଆମାଃ ତିଈ ତେ ଆମ୍‍କେ ପାପ୍ ରିକା ସାନାଙ୍ଗ୍ ରେଦୋ, ଏନାକେ ମାଆ ଖାଣ୍ଡାଅ କେମେ, ବାରିୟା ତିଈ ତାଇନ୍ କେତେ ନାରାକ୍ ରାଃ ସେଙ୍ଗେଲ୍ ରେ ଦୁଡ଼ିଙ୍ଗେନ୍ ହାର୍ ଅକନାଃ ଚିଉଲା କା ଇଣିଜୋଗା, ଏନାତେ ଦୋ ଠୁଠା ହୋବା କେତେ ଜୀଦାନ୍ ରେ ବୋଲୋ ତେୟାଃ ଆମାଃ ଲାଗିନ୍ ବୁଗିନ୍ ତାନାଃ। ଅକ୍ତାଃ ରେ ଏଣ୍ଡେ ରେନ୍ ତିଜୁକୋ କାକୋ ଗୋଜୋଗା ହାର୍ ସେଙ୍ଗେଲ୍ କା ଇଣିଜୋଗା। ଏନ୍‍ଲେକାଗି ଆମାଃ କାଟା ତେ ଆମ୍‍କେ ପାପ୍ ରିକା ସାନାଙ୍ଗ୍ ରେଦୋ, ଏନାକେ ମାଆ ଖାଣ୍ଡାଅ ତାମ୍। ବାରିୟା କାଟା ତାଇନ୍ କେତେ ଅଗି ନାରାକ୍ ରେ ଦୁଡ଼ିଙ୍ଗେନ୍ ତେ ଦୋ ଲାଙ୍ଗ୍ଡ଼ା ହୋବା କେତେ ଜୀଦାନ୍ ରେ ବୋଲୋ ତେୟାଃ ଆମାଃ ଲାଗିନ୍ ନେୟାତେ ବୁଗିନ୍ ତାନାଃ। ଅକ୍ତାଃ ରେ ଏଣ୍ଡେ ରେନ୍ ତିଜୁକୋ କାକୋ ଗୋଜୋଗା ହାର୍ ସେଙ୍ଗେଲ୍ କା ଇଣିଜୋଗା। ଏନ୍‍ଲେକାଗି ଆମାଃ ମେଏଃ ତେ ଆମ୍‍କେ ପାପ୍ ରିକା ସାନାଙ୍ଗ୍ ରେଦୋ, ଏନାକେ ଅଡୋଙ୍ଗ୍ ତାମ୍, ବାରିୟା ମେଏଃ ତାଇନ୍ କେତେ ଅଗି ଆମ୍ ନାରାକ୍ ରେ ଦୁଡ଼ିଙ୍ଗ୍ଅଗାମ୍, ଏନାତେ ଦୋ କାଣା ହୋବା କେତେ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋ ତେୟାଃ ଆମାଃ ଲାଗିନ୍ ନେୟାତେ ବୁଗିନ୍ ତାନାଃ। ଅକ୍ତାଃ ରେ ଏଣ୍ଡେ ରେନ୍ ତିଜୁକୋ କାକୋ ଗୋଜୋଗା ହାର୍ ସେଙ୍ଗେଲ୍ କା ଇଣିଜୋଗା। ଜେଲେକା ଜୋଜୋମାଃ ରେ ବୁଲୁଙ୍ଗ୍ ଶିବିଲ୍ କେ ଆଉୱେୟାଏ ଏନ୍‍ଲେକା ଦୁକୁ ସବେନ୍ ହୋଡ଼ୋକୋ ଲାଗିନ୍ ବୁଗିନ୍ ତାନାଃ। ବୁଲୁଙ୍ଗ୍ ବେଶ୍ ତାନାଃ, ମେନ୍ଦୋ ବୁଲୁଙ୍ଗ୍ ରାଃ ଶିବିଲ୍ ବାଗ୍‍ଡ଼ାଅ କେନୋଃ ରେଦୋ, ଏନାକେ ଅକନାଃତେ ବୁଲୁଙ୍ଗ୍ ୟାପେ? ଆପେୟାଃ ରେ ବୁଲୁଙ୍ଗ୍ ଲେକା ଗୁନ୍ ମାଣ୍ଡାଅ ପେ, ହାର୍ ଆପେ-ଆପେ ରେ ମେଶା କେତେ ତାଇନ୍‍ପେ।” ୟୀଶୁ ଆଜାଃ ଚେଲାକୋ ଲୋଃ କାଫାର୍ନାହୁମ୍ ସାହାର୍ ବାଗିକେତେ ୟାହୁଦୀୟା ଜିଲ୍ଲା ରାଃ ସୀମାନ୍ ହୋରାତେ ଯାର୍ଦାନ୍ ନାଈ ରାଃ ଫାରୋମ୍ ତେ ସେନ୍ ଜାନାଏ, ଆଡୋଃ ମିଶା ମିଃଥିମ୍ବା ହୋଡ଼ୋକୋ ଇନିଜାଃ ନାଡ଼େଏ ହୁଣ୍ଡି ଜାନାକୋ, ହାର୍ ଇନିଃ ଆଜାଃ ଶିଖାଅ ଲେକାତେ ଇନ୍‍କୁକେ ଶିଖାଅ କେଃକୋୱାଏ। ଏନ୍ତେ ଫାରିସୀ ହୋଡ଼ୋକୋ ଇନିଜାଃ ନାଡ଼େଏ ହିଜୁଃକେତେ ଇନିଃକେ ପାରୀକ୍ଷା ଲାଗିନ୍ତେ ଇନିଃକେ କୁଲିକିଜାକୋ, “ଚିନାଃ ନେୟା ଠାଉକା ତାନାଃ ଚି, କଡ଼ା ଆଜାଃ କୁଡ଼ି କେ ଆଇନ୍ ଲେକାତେ ବାଗେ-ଚିଠି ଏମ୍ ଧାଡ଼ିୟାଏ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ମୁଶା ନାବୀ ଆପେକେ ଚିକାନ୍ ନିୟାମ୍ ଏମାକାଃପେୟାଏ?” ଇନ୍‍କୁ କାଜିକେଦାକୋ, “ମୁଶା ନାବୀ ଦୋ ବାଗେ-ଚିଠି ଅଲେ ଲାଗିନ୍ ହାର୍ ବାଗେ ରାଃ ଆନାଚୁ ଏମ୍ କାଦାଏ।” ୟୀଶୁ ଇନ୍‍କୁକେ କାଜିକେଦାଏ, “ଆପେ ପାର୍ମେଶ୍ଵାର୍ କେ କାମାନାତିଙ୍ଗ୍ ରାଃ ହୋରାତେ ଇନିଃ ଆପେୟାଃ ଲାଗିନ୍ ନେୟା ଆନାଚୁ ଅଲାକାଦାଏ। ମେନ୍ଦୋ ପାର୍ମେଶ୍ଵାର୍ ଚିମ୍ତା ହୋଡ଼ ସିର୍ଜାଅ କେଦାଏ ଇନିଃ ମିୟାଃ ନାର୍ ହାର୍ ମିୟାଃ ନାରୀ କେତେ ଇନ୍‍କିନ୍ କେ ବାଇ ଲେଃକିନାଏ। ଏନାରାଃ ଲାଗିନ୍ କଡ଼ା ଆଜାଃ ଏଙ୍ଗାଆପୁ ଏତେ ଆଲାଗ୍ କେତେ ଆଜାଃ କୁଡ଼ି ଲୋଃ ତେ ତାଇନାଏ, ହାର୍ ଏନ୍ ବାରାନ୍‍କିନ୍ ମିୟାଃ ହୋଡ଼ମୋ ହୋବାଅଃ ୱାକିନ୍; ଏନାଲାଗିନ୍ ଇନ୍‍କିନ୍ ନାଆ ବାର୍ହୋଡ଼୍ ନାହାଲାକିନ୍ ମେନ୍ଦୋ ମିୟାଃ ହୋଡ଼ମୋ ତାନ୍ କିନ୍। ଏନାମେନ୍ତେ ଅକନ୍ କିନ୍‍କେ ପାର୍ମେଶ୍ଵାର୍ ମେଶା କାଃ କିନାଏ, ଏନାକେ ହୋଡ଼ ଆଲାଗ୍ ଆଲୋ ରିକାକାଏ।” ତାୟୋମ୍ତେ ଚିମ୍ତା ଅଡ଼୍ଆଃ ରେ ଚେଲାକୋ ନେୟା ବିଷାୟ୍ ରେ ଇନିଃକେ ଆଡୋଃଗି କୁଲିକିଜାକୋ। ୟୀଶୁ ଇନ୍‍କୁକେ କାଜିକେଦାଏ, “ଜାହାଁଏ ଆଜାଃ କୁଡ଼ି କେ ବାଗେ କେତେ, ଏଟାଃ ନିଈ ଲୋଃ ଆଣାଦୀ ତାନାଏ, ଏଣ୍ଡେ ହିନିଃ ଏନ୍ ସିଦା ନିଜାଃ ବିରୋଧ୍ ରେ ବ୍ୟାଭିଚାର୍ ରିକା ତାନାଏ। ହାର୍ କୁଡ଼ି ଆଜାଃ କଡ଼ା କେ ବାଗେ କେତେ ଏଟାଃ ନିଈ ଲୋଃ ଆଣାଦୀ ତାନାଏ ରେଦୋ, ଇନିଃ ବ୍ୟାଭିଚାର୍ ରିକା ତାନାଏ।” ଏନ୍ତେ ହୋଡ଼ୋକୋ ହୋନ୍‍କୋକେ ୟୀଶୁ ରାଃ ନାଡ଼େଏ ଆଉ କେଃକୋୱାକୋ, ଚି ଇନିଃ ଇନ୍‍କୁୱାଃ ଚେତାନ୍ ରେ ତିଈ ମାଣ୍ଡାଅ କେତେ ଆଶିଷ୍ ଏମାକୋୱାଏ, ମେନ୍ଦୋ ଚେଲାକୋ ହୋଡ଼ୋକୋକେ ଏଗେର୍ କେଃକୋୱାକୋ। ୟୀଶୁ ନେୟା ନେଲ୍‍କେତେ ଖିସ୍ କେତେ ଇନ୍‍କୁକେ କାଜିକେଃକୋୱାଏ, “ହୋନ୍‍କୋକେ ଇଙ୍ଗ୍ଆଃ ତାଃ ହିଜୁଃ ରିକାକୋପେ ହାର୍ ଇନ୍‍କୁକେ ଆଲୋପେ ମାନାକୋୱା, ଚିୟାଃଚି ପାର୍ମେଶ୍ଵାର୍ ରାଃ ରାଇଜ୍ ଏନ୍ ହୋନ୍‍କୋ ଲେକାନ୍ ହୋଡ଼ୋକୋ ଲାଗିନ୍ ତାନାଃ। ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍, ଚି ଅକଏ ପାର୍ମେଶ୍ଵାର୍ ରାଃ ରାଇଜ୍ କେ ଜେଲେକା ହୋନ୍ ଗ୍ରାହାନ୍ ଏୟାଏ ଏନ୍‍ଲେକା ଇନିଃ କାଏ ଗ୍ରାହାନ୍ ଏୟାଏ, ଦୋ ଏଣ୍ଡେରେ ଇନିଃ ଚିଉଲା ହ ବୋଲୋ କାଏ ଧାଡ଼ିୟାଏ।” ହାର୍ ଇନିଃ ହୋନ୍‍କୋକେ କୋୟୋଙ୍ଗ୍ ରେ ଇଦି କେଃକୋୱାଏ, ହାର୍ ଇନ୍‍କୁୱାଃ ଚେତାନ୍ ରେ ତିଈ ମାଣ୍ଡାଅ କେତେ ଇନ୍‍କୁକେ ଆଶିଷ୍ ଏମାଃ କୋୱାଏ। ଚିମ୍ତାଙ୍ଗ୍ ୟୀଶୁ ହାର୍ ଆଜାଃ ଚେଲାକୋ ଆଡୋଃ ମିଶା ଏନ୍ତାଃ ଏତେ ଅଡୋଙ୍ଗ୍ କେତେ ହୋରା ରେ ସେନ୍ ତାଇନାକୋ ଦୋ, ମିୟାଃ ହୋଡ଼ ଇନିଜାଃ ନାଡ଼େଏ ନୀର୍‍ତାନ୍ ଲୋଃ ହିଜୁଃ ଲେନାଏ, ହାର୍ ଇନିଜାଃ ନାଡ଼େଏ ଆୟୁର୍ ରେ ଇକ୍ଡ଼ୁମ୍ ଜୋହାର୍ କେତେ ଇନିଃକେ କୁଲିକିଜାଏ, “ହେ ବୁଗିନ୍ ଗୁରୁ, ଜାନାଓ ଜୀଦାନ୍ ରାଃ ହାନାଟିଙ୍ଗ୍ ନାମେ ଲାଗିନ୍ତେ ଇଙ୍ଗ୍ ଚିନାଃ ରିକାୟାଇଙ୍ଗ୍।” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଆମ୍ ଇଙ୍ଗ୍‍କେ ଚିନାଃ ଲାଗିନ୍ ବୁଗିନ୍ କାଜି ତାନାମ୍? ପାର୍ମେଶ୍ଵାର୍ କେ ବାଗେ କେତେ ଜେତାଏ ହ ବୁଗିନ୍ ବାଂକୁୱା। ଆମ୍ ପାର୍ମେଶ୍ଵାର୍ ରାଃ ଆନାଚୁ କୋକେ ଦୋ ସାରି ତାନାମ୍: ‘ହୋଡ଼ ଆଲୋମ୍ ଗୋଏଃୟା, ବ୍ୟାଭିଚାର୍ ଆଲୋମ୍ ରିକାୟା, ଆଲୋମ୍ କୁମ୍ଡ଼ୁୟା, ଲୋଗୋ ଗୋୱା ଆଲୋମ୍ ଏମେୟା, ଆଲୋମ୍ ହିଡ଼୍‍ୟା, ଆମାଃ ଆପୁ ହାର୍ ଏଙ୍ଗା କିନ୍‍କେ ମାଇନ୍ କୋମ୍।’ ” ଇନିଃ ହିନିଃକେ କାଜିକେଦାଏ, “ହେ ଗୁରୁ, ନେ ସବେନ୍ ଆନାଚୁ କୋକେ ଦୋ ଇଙ୍ଗ୍ ହୁଡିଙ୍ଗ୍ ଏତେ ଗି ମାନାତିଙ୍ଗ୍ ଆଉ ତାନାଇଙ୍ଗ୍।” ୟୀଶୁ ଇନିଃକେ ଦୁଲାଡ଼୍ ତେ ନେଲ୍ କେତେ କାଜିକେଦାଏ, “ଆମାଃ ରେ ମିୟାଃ କାଜି ରାଃ ଘାଟି ମେନାଃ। ଜୁ, ଅକନାଃ କୋଗି ଆମାଃ ତାଃ ମେନାଃ, ଏନା ଆଖ୍ରିଙ୍ଗ୍ କେତେ ଗାରିବ୍ କୋକେ ଏମାକୋମ୍, ଏନାରେ ଆମ୍ ସିର୍ମାଦିଶୁମ୍ ରେ କିଶାଣ୍ ବାଇୟୋଗାମ୍ ହାର୍ ହିଜୁଃକେତେ ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ।” ନେ କାଜିତେ ଏନ୍ ହୋଡ଼ ରାଃ ମେଏଃମୁହାଡ଼୍ ଗୋସୋ ଜାନା, ହାର୍ ଦୁକୁତାନ୍ ଲୋଃ ସେନୋଃ ଜାନାଏ, ଚିୟାଃଚି ଇନିଃ ବେଶେ କିଶାଣ୍ ତାଇକେନାଏ। ୟୀଶୁ ସବେନ୍ ପାଡ଼୍ ନେଲ୍‍କେତେ ଆଜାଃ ଚେଲାକୋକେ କାଜିକେଦାଏ, “କିଶାଣ୍ କୋ ଲାଗିନ୍ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋ ତେୟାଃ ଚିମିନ୍ କାଠିନ୍ ମେନାଃ!” ଚେଲାକୋ ଆଜାଃ କାଜିକୋ ଏତେ ଆକ୍‍ଦାନ୍ଦା ଜାନାକୋ। ନେୟା ରେ ୟୀଶୁ ଆଡୋଃଗି ଇନ୍‍କୁକେ କାଜିକେଃକୋୱାଏ, “ହେ ହାଗାକୋ, ଅକଏ ଧାନ୍ ରେ ଆଶ୍ରା ମାଣ୍ଡାଅୟାକୋ, ଇନ୍‍କୁୱାଃ ଲାଗିନ୍ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋ ତେୟାଃ ଚିମିନ୍ କାଠିନ୍ ମେନାଃ। ପାର୍ମେଶ୍ଵାର୍ ରାଃ ରାଇଜ୍ ରେ କିଶାଣ୍ ହୋଡ଼ ରାଃ ବୋଲୋ ଏତେ ସୁଇ ରାଃ ଉଣ୍ଡୁଃ ରେ ଉଁଟ୍ ରାଃ ବୋଲୋ ଫାରୋମ୍ ତେୟାଃ ସାହାଜ୍ ତାନାଃ।” ଚେଲାକୋ ଥିମ୍ବାଗି ଆକ୍‍ଦାନ୍ଦା ହୋବା କେତେ ଆକୋ ରେ କାଜିଜାନାକୋ, “ଏଣ୍ଡେ ପାର୍ମେଶ୍ଵାର୍ ରାଃ ରାଇଜ୍ ରେ ଜାନାଓ ଜୀଦାନ୍ ନାମେ ଲାଗିନ୍ ଅକଏ ବାଞ୍ଚାଅଃ ୱାଏ?” ୟୀଶୁ ଇନ୍‍କୁୱାଃ ପାଡ଼୍ ନେଲ୍‍କେତେ କାଜିକେଦାଏ, “ହୋଡ଼ୋକୋ ଏତେ ଦୋ ନେୟା କା ହୋବା ଧାଡ଼ିୟୋଗା, ମେନ୍ଦୋ ପାର୍ମେଶ୍ଵାର୍ ଏତେ ହୋବା ଧାଡ଼ିୟୋଗା, ଚିୟାଃଚି ପାର୍ମେଶ୍ଵାର୍ ଏତେ ସବେନାଃ ହୋବା ଧାଡ଼ିୟୋଗା।” ପାତ୍ରାସ୍ ୟୀଶୁ କେ କାଜିକେଦାଏ, “ନେଲେମ୍!, ଆଲେ ଦୋ ସବେନାଃ ବାଗେ କେତେ ଆମ୍‍କେ ଅତୋଙ୍ଗ୍ କାଃ ମେୟାଲେ।” ୟୀଶୁ ଆଜାଃ ଚେଲାକୋକେ କାଜିୟାଃକୋୱାଏ, “ଇଙ୍ଗ୍ ଆପେକେ ସାର୍ତିଗୀ କାଜିପେ ତାନିଙ୍ଗ୍ ଚି, ନେଲେକା ଅକଏ ହ ବାଂକୁୱା ଅକଏ ଇଙ୍ଗ୍ଆଃ ଚେଲା ବାଇଏନ୍ ଲାଗିନ୍ ହାର୍ ସୁସାମାଚାର୍ ଲାଗିନ୍ ଅଡ଼୍ଆଃ କେ ୟାଦୋ ହାଗାକୋକେ ୟାଦୋ ମିଶି କୋକେ ୟାଦୋ ଏଙ୍ଗାଆପୁ କିନ୍‍କେ ୟାଦୋ ହୋନ୍‍ଗାଣା କୋକେ ୟାଦୋ ଅତେ କୋକେ ବାଗେ କାଦାଏ, ହାର୍ ନାଆ ନେ ସାମାୟ୍ ରେ ଶାଅ ଗୁନା, ଅଡ଼୍ଆଃ କୋ ହାର୍ ହାଗାକୋ ହାର୍ ମିଶିକୋ ହାର୍ ଏଙ୍ଗାକୋ ହାର୍ ହୋନ୍‍ଗାଣା କୋ ହାର୍ ଅତେକୋ କାଏ ନାମେୟାଏ, ମେନ୍ଦୋ ସାସାତି ନାମେ ରେହ ହିଜୁଃ ଯୁଗ୍ ରେ ଜାନାଓ ଜୀଦାନ୍ ନାମେୟାଏ। ମେନ୍ଦୋ ନାଆ ମାରାଙ୍ଗେନ୍ ହୋଡ଼ୋକୋ, ତାୟୋମ୍ତେ ହୁଡିଙ୍ଗ୍ ଅଗାକୋ; ହାର୍ ନାଆ ହୁଡିଙ୍ଗେନ୍ ହୋଡ଼ୋକୋ ତାୟୋମ୍ତେ ମାରାଙ୍ଗ୍ ଅଗାକୋ।” ଏନ୍ତେ ୟୀଶୁ ହାର୍ ଆଜାଃ ଚେଲାକୋ ୟୀରୁଶାଲେମ୍ ସାହାର୍ ତେ ସେନ୍ ତାଇନାକୋ ଅକ୍ତାରେ ଇନିଃକେ ସିଦା ରେ ବିରୋଧ୍ ହୋବା ଲେନ୍ ତାଇନା, ଏନା ଲାଗିନ୍ ଚେଲାକୋ ଆକ୍‍ଦାନ୍ଦା ଲେନାକୋ, ହାର୍ ଅକଏକୋ ଇନିଜାଃ ତାୟୋମ୍-ତାୟୋମ୍ ସେନ୍ ତାଇନାକୋ ଇନ୍‍କୁ ବୋରୋ ଲେନ୍ ତାଇକେନାକୋ। ହାର୍ ୟୀଶୁ ଇନ୍‍କୁୱାଃ ଆୟୁର୍-ଆୟୁର୍ ସେନ୍ ତାଇନାଏ। ୟୀଶୁ ଆଡୋଃ ମିଶା ଏନ୍ ବାରାଝାନ୍ କୋକେ ଗେନା ଇଦିକେତେ ଇନ୍‍କୁକେ ଏନ୍ କାଜିକୋ ଉଦୁବାଃ କୋୱାଏ, ଅକନାଃ ଇନିଜାଃ ରେ ହିଜୁଃ ରାଃ ତାଇକେନା। ନେଲେପେ, “ଆବୁ ୟୀରୁଶାଲେମ୍ ସାହାର୍ ତେ ସେନ୍ ତାନାବୁ, ହାର୍ ମାନ୍‍ୱା ରାଃ ହୋନ୍ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁ କୋୱାଃ ତିଈ ରେ ସାବୋଗାଏ, ହାର୍ ଇନିଃକେ ଗୋଜି ରାଃ ଆନାଚୁ ଏମ୍ କେତେ ଏଟାଃଜାତି କୋୱାଃ ତିଈ ରେ ଜିମାୟାକୋ। ହାର୍ ଇନ୍‍କୁ ଇନିଃକେ ଲାନ୍ଦାୟିୟାକୋ, ଇନିଜାଃ ଚେତାନ୍ ରେ ବେଜେୟାକୋ, ଇନିଃକେ କୋଡ୍ରା ରେ ବିଡ଼ାଇୟାକୋ, ହାର୍ ଇନିଃକେ ଗୋଏଃ କିୟାକୋ, ଆଡୋଃ ତିନ୍ ଦିନ୍ ତାୟୋମ୍ତେ ଇନିଃ ଜୀବିରିଦୋଗାଏ।” ଏନ୍ତେ ଯାବ୍ଦୀ ରାଃ ହୋନ୍ ୟାକୁବ୍ ହାର୍ ଯୋହାନ୍ ଇନିଜାଃ ନାଡ଼େଏ ହିଜୁଃକେତେ କାଜିକେଦାକୋ, “ହେ ଗୁରୁ, ଆଲେ ସାନାଙ୍ଗ୍ ତାନାଲେ ଚି, ଅକନାଃ ଅଗି ଆଲେ ଆମାଃ ତେ ଆସିୟାଲେ, ଏନାଗି ଆମ୍ ଆଲେୟାଃ ଲାଗିନ୍ ରିକାତାମ୍।” ଇନିଃ ଇନ୍‍କୁକେ କାଜିକେଦାଏ, “ଆପେ ଚିନାଃ ସାନାଙ୍ଗ୍ ତାନାପେ ଚି, ଇଙ୍ଗ୍ ଆପେୟାଃ ଲାଗିନ୍ ରିକାୟାଇଙ୍ଗ୍?” ଇନ୍‍କୁ ଇନିଃକେ କାଜିକିଜାକୋ, “ଆଲେକେ ନେୟା ଏମାଲେମ୍, ଚି ଆମାଃ ମାନାରାଙ୍ଗ୍ ରେ ଆଲେ ଏତେ ମିହୋଡ଼୍ ଆମାଃ ଜୋମ୍ ପାଡ଼୍ ହାର୍ ଏଟାଃନିଃ ଆମାଃ ଲେଙ୍ଗା ପାଡ଼୍ ଦୁବାଲେ।” ୟୀଶୁ ଇନ୍‍କୁକେ କାଜିକେଦାଏ, “ଆପେ କାପେ ସାରିତାନା ଚି, ଚିନାଃ ଆସି ତାନାପେ। ଅକନ୍ ଦୁକୁ ଇଙ୍ଗ୍ ନୁୱେ ଲାଗିନ୍ ସେନ୍ ତାନିଙ୍ଗ୍, ଚିନାଃ ଆପେ ଏନା ନୁ ଧାଡ଼ିୟାପେ? ହାର୍ ଅକନ୍ ଦୁକୁ ରାଃ ବାପ୍ତିସ୍ମା ଇଙ୍ଗ୍ ଇଦି ଲାଗିନ୍ ସେନ୍ ତାନିଙ୍ଗ୍, ଚିନାଃ ଏନା ଇଦି ଧାଡ଼ିୟାପେ?” ଇନ୍‍କୁ ଇନିଃକେ କାଜିକେଦାକୋ, “ଆଲେ ତେ ହୋବା ଧାଡ଼ିୟୋଗା।” ୟୀଶୁ ଇନ୍‍କୁକେ କାଜିକେଦାଏ, “ଅକନ୍ ଦୁକୁ ଇଙ୍ଗ୍ ନୁୱେ ଲାଗିନ୍ ସେନ୍ ତାନିଙ୍ଗ୍, ଆପେ ନୁୱେ ୟାପେ; ହାର୍ ଅକନ୍ ବାପ୍ତିସ୍ମା ଇଙ୍ଗ୍ ଇଦି ସେନ୍ ତାନିଙ୍ଗ୍ ଏନା ଇଦିୟାପେ, ମେନ୍ଦୋ ଅକଏ କେହ ଇଙ୍ଗ୍ଆଃ ଜୋମ୍ ପାଡ଼୍ ହାର୍ ଇଙ୍ଗ୍ଆଃ ଲେଙ୍ଗା ପାଡ଼୍ ଦୁଦୁବ୍ ଇଙ୍ଗ୍ଆଃ କାମି ନାହାଲା। ନେ ଜାଗା ଇନ୍‍କୁ ଲାଗିନ୍ ତାନାଃ ଅକନ୍ କୋ ଲାଗିନ୍ ବାଇକାନା।” ନେୟା ଆୟୁମ୍‍କେତେ, ଦାଶ୍‍ଝାନ୍ ଚେଲାକୋ ୟାକୁବ୍ ହାର୍ ଯୋହାନ୍ କେ ଖିସ୍ ଜାନାକୋ। ଏନ୍ତେ ୟୀଶୁ ଇନ୍‍କୁକେ ନାଡ଼େଏ କେଡ଼ାକେତେ କାଜିକେଦାଏ, “ଆପେ ସାରିୟାପେ, ଚି ଅକନ୍‍କୋ ଏଟାଃଜାତି କୋୱାଃ ହାକିମ୍ କାଜିୟୋଃ ୱାକୋ, ଇନ୍‍କୁ ହିନ୍‍କୁୱାଃ ଚେତାନ୍ ରେ ରାଇଜ୍ ତାନାକୋ, ହାର୍ ରାଇଜ୍ ତାନ୍ କୋଏତେ ଅକଏ ମାରାଙ୍ଗ୍ ତାନ୍‍କୋ, ଆକୋୱାଃ ରେ ଆଧିକାର୍ ମାଣ୍ଡାଅୟାକୋ। ମେନ୍ଦୋ ଆପେ ରେ ଏନ୍‍ଲେକା ବାନୋଃୱା। ମେନ୍ଦୋ ଅକଏ ଆପେ ତେ ମାରାଙ୍ଗ୍ ହୋବାଅଃ ସାନାଙ୍ଗ୍ ୟାଏ ଇନିଃ ଆପେୟାଃ ଦାସୀ ଲେକା ହୁଡିଙ୍ଗ୍ ବାଇଏନ୍ କାଏ, ହାର୍ ଅକଏ ଆପେ ରେ ମାରାଙ୍ଗେନ୍ ସାନାଙ୍ଗ୍ ତାନାଏ ଇନିଃ ସବେନ୍ କୋୱାଃ ଦାସୀ ଲେକା ବାଇଏନ୍ କାଏ। ଚିୟାଃଚି ଇଙ୍ଗ୍ ମାନ୍‍ୱା ରାଃ ହୋନ୍ ନେୟା ଲାଗିନ୍ତେ କାଇଙ୍ଗ୍ ହିଜୁଃ କାନା, ଚି ଇଙ୍ଗ୍ଆଃ ସେୱା-ସୁସାରଅଃକା, ମେନ୍ଦୋ ନେୟା ଲାଗିନ୍ତେ ହିଜୁଃ କାନାଇଙ୍ଗ୍, ଚି ଇଙ୍ଗ୍ ସେୱା-ସୁସାର୍ ରିକାୟାଇଙ୍ଗ୍, ହାର୍ ମିଃଥିମ୍ବା ହୋଡ଼ୋକୋକେ ଛୋଡ଼ାଓ କୋ ଲାଗିନ୍ ଇଙ୍ଗ୍ଆଃ ଜୀଉ ଏମେୟାଇଙ୍ଗ୍।” ୟୀଶୁ ଆଡୋଃ ଆଜାଃ ଚେଲାକୋ ୟୀରୁଶାଲେମ୍ ସାହାର୍ ସେନ୍ ସାମାୟ୍ ରେ, ୟାରିହୋ ସାହାର୍ ଏତେ ମିଃଥିମ୍ବା ହୋଡ଼ୋକୋ ଅଡୋଙ୍ଗ୍ ଲେନାକୋ, ଇମ୍ତା ତିମାଇ ରାଃ ହୋନ୍‍କୋଡ଼ା ବାର୍ତିମାଇ ମିହୋଡ଼୍ ଆନ୍ଧା ଭିକାରି ସାଣ୍ଡାକ୍ ଗେନା ରେ ଦୁବ୍‍କାନ୍ ତାଇକେନାଏ। ଚିମ୍ତାଙ୍ଗ୍ ଇନିଃ ନେୟା ଆୟୁମ୍ କେଦାଏ, ଚି ନାଜ୍ରେଥିୟା ୟୀଶୁ ତାନିଃ, ଇନିଃ ହୋରା ରେ ହିଜୁଃ ତାନାଏ, ଏଣ୍ଡେ କାଉରି କେତେ କାଜିକେଦାଏ, “ହେ ଦାଉଦ୍ ରାଜା ରାଃ ସାନ୍ତାନ୍, ୟୀଶୁ ଇଙ୍ଗ୍‍କେ ଦାୟାଇଙ୍ଗ୍ ମେ!” ଇନିଃକେ ଥିମ୍ବାଗି ହୋଡ଼ୋକୋ ଏଗେର୍ କିଜାକୋ ଚି ହାପା ତାଇନ୍ କାଏ, ମେନ୍ଦୋ ଇନିଃ ଆଡୋଃଗି କାଉରି କେତେ କାଜିକେଦାଏ, “ହେ ଦାଉଦ୍ ରାଜା ରାଃ ସାନ୍ତାନ୍, ୟୀଶୁ ଇଙ୍ଗ୍‍କେ ଦାୟାଇଙ୍ଗ୍ ମେ।” ଚିମ୍ତାଙ୍ଗ୍ ୟୀଶୁ ଇନିଜାଃ ବାକାଣ୍ ଆୟୁମ୍ କେଦାଏ, ଦୋ ତିଙ୍ଗୁ ଜାନାଏ, ହାର୍ କାଜିକେଦାଏ, “ଇନିଃକେ କେଡ଼ାଇପେ।” ଏନ୍ତେ ହୋଡ଼ୋକୋ ଏନ୍ ଆନ୍ଧା କେ କେଡ଼ା ଆଉକେତେ କାଜିକିଜାକୋ, ଖୁସ୍ କୋଃ ମେ!, ବିରିଃମେ!, ଆମ୍‍କେ କେଡ଼ାମେ ତାନାଏ। ଆନ୍ଧା ହୋଡ଼ ଆଜାଃ ଉୟୁକାନ୍ ଲିଜାଃ କେ ଦୁଡ଼ିଙ୍ଗ୍ କେତେ ଇମ୍ତାଗି ବିରିଃ ଜାନାଏ, ହାର୍ ୟୀଶୁ ରାଃ ନାଡ଼େଏ ସେନ୍ ଜାନାଏ। ନେୟା ରେ ୟୀଶୁ ଇନିଃକେ କାଜିକିଜାଏ, “ଆମ୍ ଚିନାଃ ସାନାଙ୍ଗ୍ ତାନାମ୍ ଚି ଇଙ୍ଗ୍ ଆମାଃ ଲାଗିନ୍ତେ ରିକାୟାଇଙ୍ଗ୍?” ଆନ୍ଧା ଇନିଃକେ କାଜିକେଦାଏ, “ହେ ଗୁରୁ, ନେୟା ଚି ଇଙ୍ଗ୍ ନେଲ୍ ଧାଡ଼ିକାଇଙ୍ଗ୍।” ୟୀଶୁ ଇନିଃକେ କାଜିକେଦାଏ, “ସେନୋଃ ମେ! ଆମ୍ ଇଙ୍ଗ୍‍କେ ବିଶ୍ଵାସ୍ କେଦାମ୍ ମେନ୍ତେ ଆମ୍‍କେ ବେଶ୍ କାଃମେୟାଇଙ୍ଗ୍।” ହାର୍ ଇନିଃ ଇମ୍ତାଗି ନେଲ୍ ଧାଡ଼ିଜାନାଏ, ହାର୍ ଏଟାଃକୋ ଲେକା ୟୀଶୁ କେ ଅତୋଙ୍ଗ୍ କିଜାଏ। ଚିମ୍ତାଙ୍ଗ୍ ୟୀଶୁ ଆଡୋଃ ଆଜାଃ ଚେଲାକୋ ୟୀରୁଶାଲେମ୍ ସାହାର୍ ରାଃ ନାଡ଼େଏ ଜାଏତୁନ୍ ଦାରୁ ବୁରୁ ରେ ବେଥ୍‍ଫାଗେ ହାର୍ ବେଥାନି ହାତୁ କୋରାଃ ନାଡ଼େଏ ହିଜୁଃ ଲେନାକୋ, ଦୋ ୟୀଶୁ ଆଜାଃ ଚେଲାକୋ ଏତେ ବାର୍ହୋଡ଼୍ କିନ୍‍କେ ନେୟା କାଜିକେତେ କୁଲ୍ କେଃକିନାଏ, “ନାଡ଼େଏ ରାଃ ହାତୁ ରେ ସେନ୍ ବେନ୍, ହାର୍ ଏନ୍ତାଃରେ ସେଟେର୍ ତୋର୍ଷା ମିୟାଃ ଗାଧିଆ ରାଃ ହୋନ୍, ଅକନିଜାଃ ରେ ଚିଉଲା ହ ଅକଏ କାକୋ ରାକାବ୍ କାନା, ଥୋଲାକାନ୍ ଆବେନ୍ କେ ନାମୋଗାଏ। ଇନିଃକେ ରାଡ଼ାକେତେ ଆୱିପେ। ଆବେନ୍ କେ ଜେତାଏ କୁଲିବେନ୍ ରେଦୋ, ‘ନେୟା ଚିନାଃ ବେନ୍ ରିକା ତାନା?’ ଦୋ କାଜିବେନ୍, ‘ଆଲେୟାଃ ପ୍ରାଭୁ କେ ନିଜାଃ ଦାର୍‍କାର୍ ମେନାଃ, ହାର୍ ଇନିଃ ଇମ୍ତାଗି ଇନିଃକେ ନେତାଃ କୁଲ୍ ତାଇୟାଏ।’ ” ଚେଲାକୋ ଏନ୍ ହାତୁ ସେନ୍ କେତେ ଏନ୍ ଗାଧିଆ ରାଃ ହୋନ୍ କେ ବାହ୍‍ରେ ଦୁହାର୍ ରାଃ ନାଡ଼େଏ ରାଚା ରେ ଥୋଲାକାନ୍ ନାମ୍ କିଜାକିନ୍, ହାର୍ ଖଲାଅ କିଜାକିନ୍। ଇନ୍‍କୁ ଏତେ ଅକନ୍‍କୋ ଏନ୍ତାଃ ତିଙ୍ଗୁ ଲେନ୍ ତାଇନାକୋ, ଅକଏ-ଅକଏ କାଜିକେଦାକୋ “ନେୟା ଚିନାଃ ବେନ୍ ରିକା ତାନା, ଗାଧିଆ ରାଃ ହୋନ୍ କେ ଚିନାଃ ଲାଗିନ୍ ରାଡ଼ାଇ ତାନାବେନ୍?” ଚିଲ୍‍କା ୟୀଶୁ କାଜିଲେଦାଏ, ଏନ୍‍ଲେକାଗି ଚେଲାକିନ୍ ଇନ୍‍କୁକେ କାଜିକେଦାକୋ, ଇମ୍ତା ହୋଡ଼ୋକୋ ଇନ୍‍କିନ୍ କେ ସେନ୍ ରିକା କେଦାକୋ। ହାର୍ ଇନ୍‍କିନ୍ ଗାଧିଆ ରାଃ ହୋନ୍ କେ ୟୀଶୁ ରାଃ ନାଡ଼େଏ ଆଉକେତେ ଆକୋୱାଃ ଉୟୁକାନ୍ ଲିଜାଃ ଇନିଜାଃ ଦୋୟା ରେ ହାରୁବ୍ କେଦାକୋ, ଏନ୍ତେ ୟୀଶୁ ଇନିଜାଃ ଚେତାନ୍ ରେ ଦୁବ୍ ଜାନାଏ। ଏନ୍ତେ ଚିମିନାଙ୍ଗ୍ କୋ ଆକୋୱାଃ ଲିଜାଃ ହୋରା ରେ ବିଲ୍‍କେଦାକୋ ହାର୍ ଏଟାଃକୋ ଅତେ ନାଡ଼େଏ ରାଃ ଦାରୁ କୋଏତେ ଡାହୁରା କୋକେ ମାଆ କେତେ ବିଲ୍‍କେତେ ମାଇନ୍ କିଜାକୋ। ଚିମିନାଙ୍ଗ୍ କୋ ଆଜାଃ ଆୟୁର୍-ଆୟୁର୍ ସେନ୍ କେଦାକୋ ହାର୍ ଚିମିନାଙ୍ଗ୍ ଦୋୟା-ଦୋୟା ହିଜୁଃ ତାଇନାକୋ, ହାର୍ କାଉରି-କାଉରି କାଜିତୋର୍ଷା ସେନ୍ ତାଇନାକୋ, “ହୋଶାନ୍ନା! ଧାନ୍ୟା ତାନିଃ ଇନିଃ ଅକନିଃ ପ୍ରାଭୁ ଆଃ ନୁତୁମ୍ ତେ ହିଜୁଃ ତାନାଏ! ଆବୁୱାଃ ପୁର୍ଖା ରାଜା ଦାଉଦ୍ ରାଃ ରାଇଜ୍ ହିଜୁଃ ତାନା, ଏନା ମାନାରାଙ୍ଗ୍ ହୋବାଅଃକା, ସିର୍ମାଦିଶୁମ୍ ରେ ହୋଶାନ୍ନା! ପାର୍ମେଶ୍ଵାର୍ ରାଃ ମାନାରାଙ୍ଗ୍।” ଏନ୍ତେ ୟୀଶୁ ୟୀରୁଶାଲେମ୍ ସାହାର୍ ସେଟେର୍ କେତେ ୟାହୁଦୀ-ମାନ୍ଦିର୍ ରେ ହିଜୁଃ ଲେନାଏ, ହାର୍ ସବେନ୍ ପାଡ଼୍ ସବେନ୍ ଜିନିଷ୍‍କୋକେ ନେଲ୍‍କେତେ ବାରାଝାନ୍ କୁଲାକାନ୍ ଚେଲାକୋ ଲୋଃ ବେଥାନି ହାତୁ ସେନ୍ ଜାନାଏ ଚିୟାଃଚି ଶିଙ୍ଗି ଡୁବିଃ ଲେନ୍ ତାଇନା। ଏଟାଃ ହୁଲାଙ୍ଗ୍ ଚିମ୍ତାଙ୍ଗ୍ ଇନ୍‍କୁ ବେଥାନି ହାତୁ ଏତେ ଅଡୋଙ୍ଗ୍ ଜାନାକୋ ଦୋ ୟୀଶୁ କେ ରେଙ୍ଗେଃ କିଜା। ହାର୍ ଇନିଃ ସାଙ୍ଗିନ୍ ଏତେ ମିୟାଃ ହାରିୟାର୍ ଲୋୱା ଦାରୁ ନେଲ୍‍କେତେ ନାଡ଼େଏ ସେନ୍ ଜାନାଏ, ଚି ଏନ୍ ଦାରୁ ରେ ଯଅ ନାମେୟାଏ, ମେନ୍ଦୋ ସାକାମ୍ କେ ବାଗେ କେତେ ଏନାରେ ଜାହାନାଃ ହ କାଏ ନାମ୍ କେଦାଏ; ଚିୟାଃଚି ଯଅ ନାମେ ରାଃ ସାମାୟ୍ କା ତାଇକେନା। ଏନ୍ତେ ୟୀଶୁ ଦାରୁ କେ କାଜିକେଦାଏ, “ନାଆ ଏତେ ଆମ୍ ଚିଉଲା ହ କାମ୍ ଯଅ ଅଗା।” ହାର୍ ଆଜାଃ ଚେଲାକୋ ନେ କାଜିକେ ଆୟୁମ୍ ତାଇନାକୋ। ଏନା ତାୟୋମ୍ତେ ୟୀଶୁ ହାର୍ ଆଜାଃ ଚେଲାକୋ ଆଡୋଃ ମିଶା ୟୀରୁଶାଲେମ୍ ସାହାର୍ ରେ ହିଜୁଃ ଲେନାକୋ ହାର୍ ଇନ୍‍କୁ ୟାହୁଦୀ-ମାନ୍ଦିର୍ ରାଃ ରାଚା ରେ ସେନ୍ ଜାନାକୋ; ହାର୍ ଏନ୍ତାଃରେ ୟୀଶୁ ଅକନ୍‍କୋ କିରିଙ୍ଗ୍-ଆଖ୍ରିଙ୍ଗ୍ ତାଇକେନାକୋ ଇନ୍‍କୁକେ ବାହାରି ଅଡୋଙ୍ଗ୍ ଏଟେଃ କେଃକୋୱାଏ, ହାର୍ ଟାକା ଭାଞ୍ଜାଅ କୋୱାଃ ମାଣ୍ଡାଅ ତେୟାଃ ହାର୍ ଦୁଦ୍‍ମୁଲ୍ ଆଖ୍ରିଙ୍ଗ୍ ତାନ୍ କୋୱାଃ ଚାଉକିକୋକେ ପାଲ୍‍ଟି ତାଦାଏ। ହାର୍ ମାନ୍ଦିର୍ ରାଃ ରାଚା ନାଡ଼େଏ ଏତେ ଜେତାଏ କେହ ଜିନିଷ୍‍କୋ ଇଦି-ଆଉ କାଏ ରିକା କେଃକୋୱାଏ। ଏନ୍ତେ ଇନିଃ ହୋଡ଼ୋକୋକେ ଶିଖାଅ କେଃକୋୱାଏ ହାର୍ ଇନ୍‍କୁକେ କାଜିକେଦାଏ, “ଚିନାଃ ନେୟା ପାବିତାର୍ ପୁଥି ରେ କା ଅଲାକାନା ଚି, ‘ଇଙ୍ଗ୍ଆଃ ଅଡ଼୍ଆଃ ସବେନ୍ ଜାତି ରେନ୍ ହୋଡ଼ୋକୋ ଲାଗିନ୍ ବିନ୍ତି ରାଃ ଅଡ଼୍ଆଃ କାଜିୟୋଗା?’ ମେନ୍ଦୋ ଆପେ ନେୟାକେ ଡାକୁ କୋୱାଃ ଅଡ଼୍ଆଃ ବାଇକାଦାପେ।” ନେୟା ଆୟୁମ୍‍କେତେ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁ ଇନିଃକେ ଗୋଜି ରାଃ ହୋରା ନାମ୍ ବାଡ଼ା କେଦାକୋ; ଚିୟାଃଚି ଇନିଃକେ ବୋରୋ ତାଇନାକୋ, ନେୟାଲାଗିନ୍ ଚି ସବେନ୍ ହୋଡ଼ୋକୋ ଇନିଜାଃ ଶିଖାଅ କେ ଆୟୁମ୍ କେତେ ଆକ୍‍‍ଦାନ୍ଦାଅଃ ତାଇନାକୋ। ଚିମ୍ତାଙ୍ଗ୍ ଶିଙ୍ଗି ଡୁବିଃ ଜାନା, ୟୀଶୁ ହାର୍ ଆଜାଃ ଚେଲାକୋ ସାହାର୍ ବାଗେ କେତେ ବେଥାନି ହାତୁ ତେ ସେନ୍ ଜାନାକୋ। ଏଟାଃ ହୁଲାଙ୍ଗ୍ ସେତାଃ ପାଡ଼୍ ୟୀଶୁ ହାର୍ ଆଜାଃ ଚେଲାକୋ ୟୀରୁଶାଲେମ୍ ସାହାର୍ ରୁଆଡ଼୍ ଇମ୍ତା ଇନ୍‍କୁ ଏନ୍ ଲୋୱା ଦାରୁ କେ ରେହେଃ ସାନ୍ତେ ରୋହଡ଼୍ କାନ୍ କୋ ନେଲ୍ କେଦାକୋ। ପାତ୍ରାସ୍ କେ ଏନ୍ କାଜି ପାହୋମ୍ ହିଜୁଃଲେନା, ହାର୍ ଇନିଃ ୟୀଶୁ କେ କାଜିକେଦାଏ, “ହେ ଗୁରୁ, ନେଲେମ୍! ନେ ଲୋୱା ଦାରୁ ଅକନାଃକେ ଆମ୍ ସାର୍ପାଅ ଲେଦାମ୍ ରୋହଡ଼୍ ଜାନା।” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ବିଶ୍ଵାସ୍ ମାଣ୍ଡାଅ ଏମେ ପାର୍ମେଶ୍ଵାର୍ କେ ଚିନାଃ ଆସିୟାପେ ଏନା ରିକାୟାଏ। ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍ ଚି ଜେତାଏ ହଗି ଏନ୍ ବୁରୁ କେ କାଜିୟାଏ, ‘ଆମ୍ ପାଟୁବ୍ କେନୋଃମେ ହାର୍ ସାମୁଦାର୍ ରେ ସେନ୍ କେତେ ଉୟୁଗୋଃମେ,’ ହାର୍ ଆଜାଃ ମୋନ୍ ରେ କାଏ ସାନ୍ଦେହ୍ ୟାଏ, ମେନ୍ଦୋ ବିଶ୍ଵାସ୍ ୟାଏ ଚି ଅକନାଃ ଇଙ୍ଗ୍ କାଜି ତାନିଙ୍ଗ୍ ଏନା ହୋବାୱା, ଦୋ ଇନିଜାଃ ଲାଗିନ୍ ଏନାଗି ହୋବାୱା। ଏନାଲାଗିନ୍ ଇଙ୍ଗ୍ ଆପେକେ କାଜିପେ ତାନିଙ୍ଗ୍ ଚି, ଅକନାଃ ଅଗି ବିନ୍ତି କେତେ ପେ ଆସିୟା ଦୋ ବିଶ୍ଵାସ୍ ଏପେ ଚି ଆପେକେ ଏନା ନାମ୍‍ଜାନା ହାର୍ ଆପେୟାଃ ଲାଗିନ୍ ପାର୍ମେଶ୍ଵାର୍ ରିକାୟାଏ। ହାର୍ ଚିମ୍ତାଙ୍ଗ୍ ଅଗି ଆପେ ତିଙ୍ଗୁ କେତେ ବିନ୍ତି ୟାପେ, ଏଣ୍ଡେ ଆପେୟାଃ ମୋନ୍ ରେ ଜେତାୟାଃ ଲାଗିନ୍ ଜାହାନାଃ ବିରୋଧ୍ କାଜି ତାଇନ୍ ରେଦୋ, ଇନିଃକେ ଛାମା ତାଇପେ: ଏନାଲାଗିନ୍ ଚି ଆପେୟାଃ ସିର୍ମାଦିଶୁମ୍ ରେନ୍ ଆପୁ ହ ଆପେୟାଃ ପାପ୍ କୋକେ ଛାମା ରିକା ପେୟାଏ। ମେନ୍ଦୋ ଆପେ କାପେ ଛାମା କୋ ରେଦୋ ଆପେୟାଃ ଆପୁ ଅଗି ଅକନିଃ ସିର୍ମାଦିଶୁମ୍ ରେ ମେନାଇଜା ଆପେୟାଃ ପାପ୍ କୋକେ କାଏ ଛାମାୟାଏ।” ୟୀଶୁ ହାର୍ ଆଜାଃ ଚେଲାକୋ ଆଡୋଃ ମିଶା ୟୀରୁଶାଲେମ୍ ସାହାର୍ ତେ ହିଜୁଃ ଲେନାକୋ, ହାର୍ ଚିମ୍ତାଙ୍ଗ୍ ଇନିଃ ୟାହୁଦୀ-ମାନ୍ଦିର୍ ରେ ହୋନୋର୍ ତାଇନାଏ ଦୋ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁ ହାର୍ ମାରିହୋଡ଼ୋକୋ ଇନିଜାଃ ନାଡ଼େଏ ହିଜୁଃକେତେ କୁଲିକିଜାକୋ, “ଆମ୍ ନେ କାମି ଅକେୟାଃ ଆଧିକାର୍ ତେ ରିକାତାନାମ୍? ହାର୍ ନେୟା ଆଧିକାର୍ ଆମ୍‍କେ ଅକଏ ଏମାଃମେୟା ଚି ଆମ୍ ନେ କାମି କାମିମେ?” ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍ ଆପେକେ ମିୟାଃ କାଜି କୁଲିପେୟାଇଙ୍ଗ୍, ଇଙ୍ଗ୍‍କେ କାଜି ରୁଆଡ଼ିଙ୍ଗ୍ ୟାପେ ହୋଲେ ଦୋ ଇଙ୍ଗ୍ ଆପେକେ ଉଦୁବ୍ ପେୟାଇଙ୍ଗ୍ ଚି ନେ କାମି ଅକେୟାଃ ଆଧିକାର୍ ତେ ରିକାତାନିଙ୍ଗ୍। ଯୋହାନ୍ ରାଃ ବାପ୍ତିସ୍ମା ସିର୍ମାଦିଶୁମ୍ ପାଡ଼େତେ ତାଇକେନା ଚି ହୋଡ଼ୋକୋୱାଃ ପାଡ଼େତେ ତାଇକେନା? ଇଙ୍ଗ୍‍କେ କାଜିଙ୍ଗ୍ ପେ।” ଏନ୍ତେ ଇନ୍‍କୁ ଆକୋ ରେ କୁପୁଲି ଜାନାକୋ ଚି, “ଆବୁ ସିର୍ମାଦିଶୁମ୍ ପାର୍ମେଶ୍ଵାର୍ ପାଡ଼େତେ କାଜି ରେଦୋ ଇନିଃ କାଜିୟାଏ, ‘ଏଣ୍ଡେ ଆପେ ଇନିଜାଃ ଚିନାଃ ଲାଗିନ୍ କାପେ ବିଶ୍ଵାସ୍ କେଦା?’ ମେନ୍ଦୋ ଆବୁ କାଜି କାବୁଧାଡ଼ିୟା ଚି, ‘ହୋଡ଼ୋକୋୱାଃ ପାଡ଼େତେ।’” ଇନ୍‍କୁ ହୋଡ଼ୋକୋକେ ବୋରୋ ତାଇନାକୋ, ଚିୟାଃଚି ସବେନ୍ କୋ ସାରି ତାନାକୋ ଚି ଯୋହାନ୍ ସାର୍ତିଗୀ ନାବୀ ତାଇକେନାଏ। ଏନ୍ତେ ଇନ୍‍କୁ ୟୀଶୁ କେ କାଜିରୁଆଡ଼୍ କିଜାକୋ, “ଯୋହାନ୍ କେ ହୋଡ଼ୋକୋକେ ବାପ୍ତିସ୍ମା ଏମ୍ ଲାଗିନ୍ ଅକଏ ଆଧିକାର୍ ଏମ୍ କେଦାଏ, ଏନା ଆଲେ କାଲେ ସାରିୟା।” ୟୀଶୁ କାଜିକେଦାଏ, “ଇଙ୍ଗ୍ ଅଗି ଆପେକେ କାଇଙ୍ଗ୍ ଉଦୁବ୍ ପେୟା ଚି, ନେ କାମି ଅକେୟାଃ ଆଧିକାର୍ ତେ ରିକା ତାନିଙ୍ଗ୍।” ଏନ୍ତେ ୟୀଶୁ ୟାହୁଦୀ କୋୱାଃ ଧାରାମ୍‍ଗୁରୁ କୋକେ ଜୋନୋକା ଲେକାତେ ଇନ୍‍କୁ ଲୋଃ ବାକାଣ୍ କେଦାଏ, “ମିୟାଃ ହୋଡ଼ ଆଙ୍ଗୁର୍ ବାଖ୍‍ଡ଼ି ଲାଗାଅ କେଦାଏ, ହାର୍ ଏନାରାଃ ସବେନ୍ ପାଡ଼୍ ଘେରା ଥୋଲ୍ କେଦାଏ, ହାର୍ ରାଶି ଅଡୋଙ୍ଗ୍ ଲାଗିନ୍ ମିୟାଃ ଜାଗା ବାଇକେଦାଏ, ହାର୍ କୁମ୍ବା ବାଇକେଦାଏ, ହାର୍ ଚାଷି କୋକେ ଏନାକେ ସାଝା ଏମ୍ କେତେ ଏଟାଃ ଦିଶୁମ୍ ସେନୋଃ ଜାନାଏ। ଚିମ୍ତା ଆଙ୍ଗୁର୍ କୋ ମାତା ଜାନା ଇନିଃ ଚାଷି କୋତାଃ ଆଜାଃ ମିୟାଃ ଦାସୀ କେ କୁଲ‍୍‍କିଜାଏ, ଚି ଚାଷି କୋଏତେ ଆଙ୍ଗୁର୍ ବାଖ୍‍ଡ଼ି ରାଃ ଯଅ କୋରାଃ ହିସା ଇଦିୟାଏ। ମେନ୍ଦୋ ସାଝା-ଚାଷିକୋ ଇନିଃକେ ସାବ୍ କେତେ ବିଡ଼ା କିଜାକୋ ହାର୍ ସାମା ତିଈ ରୁଆଡ଼୍ ତାଜାକୋ। ଏନ୍ତେ ଆଙ୍ଗୁର୍ ବାଖ୍‍ଡ଼ି ରାଃ ଗୋମ୍‍କେ ଆଡୋଃ ମିହୋଡ଼୍ ଦାସୀ କେ ସାଝା-ଚାଷି କୋତାଃ କୁଲ‍୍‍କିଜାଏ, ହାର୍ ଇନ୍‍କୁ ଇନିଜାଃ ବୋଅ ରାପୁଃ ତାଦାକୋ ହାର୍ ଇନିଃକେ ଆପ୍‍ମାନ୍ କିଜାକୋ। ଏନ୍ତେ ଆଙ୍ଗୁର୍ ବାଖ୍‍ଡ଼ି ରାଃ ଗୋମ୍‍କେ ଆଡୋଃ ମିହୋଡ଼୍ କେ କୁଲ‍୍‍କିଜାଏ, ହାର୍ ଇନ୍‍କୁ ଇନିଃକେ ଗୋଏଃ ତାଇଜାକୋ। ଏନ୍ତେ ଇନିଃ ଆଡୋଃଗି ଦାସୀକୋକେ କୁଲ୍ କେଃକୋୱାଏ, ଇନ୍‍କୁ ଏତେ ଇନ୍‍କୁ ଚିମିନାଙ୍ଗ୍ କୋକେ ବିଡ଼ା କେଦାକୋ, ହାର୍ ଚିମିନାଙ୍ଗ୍ କୋକେ ଗୋଏଃ କେଃକୋୱାକୋ। ନାଆ ଦୋ ମିହୋଡ଼୍ ଗି ତାଇଲେନାଏ, ଅକନିଃ ଇନିଜାଃ ଦୁଲାଡ଼୍ ହୋନ୍ ତାଇକେନାଏ, ଆଖିର୍ ରେ ଇନିଃକେ ହଗି ଇନ୍‍କୁୱାଃ ନାଡ଼େଏ ନେୟା ପାହୋମ୍ କେତେ କୁଲ‍୍‍କିଜାଏ ଚି, ‘ଇନ୍‍କୁ ଇଙ୍ଗ୍ଆଃ ହୋନ୍ ରାଃ କାଜି ଆୟୁମ୍ ୟାକୋ ହାର୍ ଯଅ ରାଃ ହିସା ଏମେୟାକୋ।’ ମେନ୍ଦୋ ଏନ୍ ସାଝା-ଚାଷିକୋ ଆକୋ ରେ କାଜିଜାନାକୋ, ‘ନିଈ ଦୋ ଉତ୍ତାର୍-ଆଧିକାରୀ ତାନିଃ। ହିଜୁଃପେ, ଆବୁ ନିଈ କେ ଗୋଜିୟାବୁ, ଏଣ୍ଡେ ଆଙ୍ଗୁର୍ ବାଖ୍‍ଡ଼ି ଆବୁୱାଃ ହୋବା କେନୋଗା।’ ଏନାମେନ୍ତେ ଇନ୍‍କୁ ଇନିଃକେ ସାବ୍ କେତେ ଗୋଏଃ କିଜାକୋ, ହାର୍ ଆଙ୍ଗୁର୍ ବାଖ୍‍ଡ଼ି ରାଃ ବାହାରି ରେ ଦୁଡ଼ିଙ୍ଗ୍ ତାଇଜାକୋ। ନାଆ ଦୋ ଆଙ୍ଗୁର୍ ବାଖ୍‍ଡ଼ି ରେନ୍ ଗୋମ୍‍କେ ଚିନାଃ ରିକାୟାଏ ମେନ୍ତେ ପାହୋମ୍ ତାନାପେ? ଇନିଃ ହିଜୁଃକେତେ ଏନ୍ ସାଝା-ଚାଷି କୋକେ ଗୋଏଃ କୋୱାଏ ହାର୍ ଆଙ୍ଗୁର୍ ବାଖ୍‍ଡ଼ି କେ ଏଟାଃ କୋକେ ଏମ୍ ତାକୋୱାଏ। ଚିନାଃ ଆପେ ପାବିତାର୍ ପୁଥି ରେ ନେ ବାଚାନ୍ କାପେ ପାଢ଼ାଅ କାନା? ଏନା କାଜିୟାଏ, ‘ଅକନ୍ ଦିରି କେ ରାଜ୍‍ମିସ୍ତ୍ରୀକୋ ବେକାମି ଆଟ୍‍କାର୍ ଲେଦାକୋ, ଏନାଗି କୋନା ରାଃ ମୁଖ୍ୟା ଦିରି ହୋବାଜାନା। ନେୟା ପ୍ରାଭୁ ପାଡ଼େତେ ହୋବାଜାନା, ହାର୍ ଆବୁୱାଃ ନେପେଲ୍ ରେ ଆକ୍‍‍ଦାନ୍ଦାନ୍ ଲେକାନ୍ କାଜି ତାନାଃ।’” ଏନ୍ତେ ୟାହୁଦୀ କୋୱାଃ ଧାରାମ୍‍ଗୁରୁ କୋ ଇନିଃକେ ସାସାବ୍ ସାନାଙ୍ଗ୍ କେଦାକୋ; ଚିୟାଃଚି ସାରିଲେନ୍ ତାଇନାକୋ ଚି ଇନିଃ ଆବୁୱାଃ ବିରୋଧ୍ ରେ ନେୟା ଜୋନୋକା କାଜିକେଦାଏ, ମେନ୍ଦୋ ଇନ୍‍କୁ ହୋଡ଼ୋକୋକେ ବୋରୋ କେଦାକୋ, ହାର୍ ଇନିଃକେ ବାଗେକେତେକୋ ସେନୋଃ ଜାନା। ଏନ୍ତେ ୟାହୁଦୀ ଧାରାମ୍‍ଗୁରୁ କୋ ୟୀଶୁ କେ ବାକାଣ୍ ରେ ପାଶେ ଲାଗିନ୍ ଚିମିନାଙ୍ଗ୍ ଫାରିସୀ ହୋଡ଼ୋକୋକେ ହାର୍ ହେରୋଦ୍ ରାଜା ରାଃ କାଜି ରେ ଏକ୍ ମୋନ୍ ହୋବାକାନ୍ କୋକେ ୟୀଶୁ ରାଃ ନାଡ଼େଏ କୁଲ୍‍କେଃ କୋୱାକୋ। ହାର୍ ଇନ୍‍କୁ ହିଜୁଃକେତେ ଇନିଃକେ କାଜିକିଜାକୋ, “ହେ ଗୁରୁ, ଆଲେ ସାରିତାନାଲେ, ଚି ଆମ୍ ସାର୍ତି କାଜି କାଜିୟାମ୍, ହାର୍ ଅକଏ ଚିନାଃ ପାହୋମ୍ ୟାଏ ଏନା କାମ୍ ଖାତିର୍ ୟା, ଚିୟାଃଚି ଆମ୍ ସବେନ୍ ହୋଡ଼ୋକୋକେ ମିଃଗି ନେଲ୍ କୋୱାମ୍, ମେନ୍ଦୋ ପାର୍ମେଶ୍ଵାର୍ ରାଃ ହୋରା ସାର୍ତି ତେ ଉଦୁବେୟାମ୍। ନାଆ ଆଲେକେ କାଜିଲେମ୍, ଚିନାଃ ରୋମ୍‍ରେନ୍ ରାଜା କେ ମାଲ୍‍ହାରୋମ୍ ଟାକା ଏମ୍ ତେୟାଃ ଠାଉକା ତାନାଃ ଚି ନାହାଲା? ଆଲେ ଏମେୟାଲେ ଚି କାଲେ ଏମେୟା?” ଇନିଃ ଇନ୍‍କୁୱାଃ ବେଦାମୋନ୍ କେ ସାରିକେତେ ଇନ୍‍କୁକେ କାଜିକେଦାଏ, “ଇଙ୍ଗ୍‍କେ ଚିନାଃ ଲାଗିନ୍ ପେ ପାର୍ଖାୱଇଙ୍ଗ୍ ତାନା? ମିୟାଃ ଦିନାର୍ ଇଙ୍ଗ୍ଆଃ ନାଡ଼େଏ ଆଉୱେପେ ଚି ଏନାକେ ଇଙ୍ଗ୍ ନେଲେୟା।” ଇନ୍‍କୁ ଆଉକେଦାକୋ ହାର୍ ଇନିଃ ଇନ୍‍କୁକେ କାଜିକେଦାଏ, “ନେ ଛାପା ହାର୍ ନୁତୁମ୍ ଅକେୟାଃ ତାନାଃ?” ଇନ୍‍କୁ କାଜିକେଦାକୋ, “ରୋମ୍‍ରେନ୍ ରାଜା ରାଃ।” ୟୀଶୁ ଇନ୍‍କୁକେ କାଜିକେଦାଏ, “ଅକନାଃ ରୋମ୍‍ରେନ୍ ରାଜା ରାଃ ତାନାଃ ଏନାକେ ରୋମ୍‍ରେନ୍ ରାଜା କେ ହାର୍ ଅକନାଃ ପାର୍ମେଶ୍ଵାର୍ ରାଃ ତାନାଃ ଏନାକେ ପାର୍ମେଶ୍ଵାର୍ କେ ଏମାଇପେ।” ଏନ୍ତେ ଇନ୍‍କୁ ଇନିଜାଃ କାଜି ରେ ଥିମ୍ବାଗି ଆକ୍‍ଦାନ୍ଦା ଜାନାକୋ। ଏନ୍ତେ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ, ଇନ୍‍କୁ କାକୋ ବିଶ୍ଵାସ୍ ତାଇକେନା ଚି, ଗୋଜାକାନ୍ କୋୱାଃ ଜୀବିନିରିଦ୍ ମେନାଃ। ଇନ୍‍କୁ ହଗି ୟୀଶୁ ନାଡ଼େଏ ହିଜୁଃକେତେ ଇନିଃକେ କୁଲିକିଜାକୋ, “ହେ ଗୁରୁ, ମୁଶା ନାବୀ ଦୋ ଆଲେୟାଃ ଲାଗିନ୍ ଅଲାକାଦାଏ, ଚି ଅକେୟାଃ ହାଗା ବେଗାର୍ ହୋନ୍-ଗାଣା ରେ ଗୋଏଃ କେନୋଗାଏ ହାର୍ ଇନିଜାଃ ଆଣାଦୀକାନ୍ କୁଡ଼ି ତାଇକେନୋଗାଏ ରେଦୋ, ଇନିଜାଃ ହାଗା ଏନ୍ କୁଡ଼ି କେ ଆଣାଦୀ କାଏ ହାର୍ ଆଜାଃ ହାଗା ଲାଗିନ୍ ହୋନ୍-ଗାଣାକୋ ଜାନାମ୍ କୋକାଏ। ମିୟାଃ ପାରିବାର୍ ରେ ସାତ୍ ଝାନ୍ ହାଗାକୋ ତାଇକେନାକୋ, ମାରାଙ୍ଗ୍ ହାଗା ଆଣାଦୀ କେତେ ବେଗାର୍ ହୋନ୍-ଗାଣା କେତେ ଗୋଏଃ ଜାନାଏ। ଏନ୍ତେ ଏଟାଃ ହାଗା ଏନ୍ କୁଡ଼ି କେ ଆଣାଦୀ କିଜାଏ ହାର୍ ବେଗାର୍ ହୋନ୍-ଗାଣା କେତେ ଇନିଃ ହ ଗୋଏଃ ଜାନାଏ; ଏନ୍ତେ ଏନ୍‍ଲେକାଗି ତିସ୍ରା ନିଈ ହଗି ଗୋଏଃ ଜାନାଏ। ଏନ୍‍ଲେକାତେ ସାତୋ ଝାନ୍ ବେଗାର୍ ହୋନ୍-ଗାଣା କେତେ ଗୋଏଃ ଜାନାକୋ। ଇନ୍‍କୁୱାଃ ତାୟୋମ୍ତେ ଏନ୍ କୁଡ଼ି ହଗି ଗୋଏଃ ଜାନାଏ। ଏଣ୍ଡେ ନାଆ କାଜିମେ, ଜୀବିନିରିଦ୍ ରେ ଏନ୍ କୁଡ଼ି ଇନ୍‍କୁ ଏତେ ଅକେୟାଃ କୁଡ଼ି ହୋବାୱାଏ, ଚିୟାଃଚି ଇନିଃ ସାତୋ ଝାନ୍ କୋୱାଃ କୁଡ଼ି ହୋବା ଲେନ୍ ତାଇନାଏ?” ୟୀଶୁ ଇନ୍‍କୁକେ କାଜିକେଦାଏ, “ଆପେ ନାଦୋ ପାବିତାର୍ ପୁଥି କେ ସାରିତାନାପେ, ହାର୍ ନାଦୋ ପାର୍ମେଶ୍ଵାର୍ ରାଃ ପେଡ଼େଏ କେ। ନେୟା ରାଃ ହୋରାତେ ଆପେ ଭୁଲ୍ ରେ ପାଶେ କାନାପେ। ଚିୟାଃଚି ଚିମ୍ତାଙ୍ଗ୍ ଇନ୍‍କୁ ଗୋଜାକାନ୍ କୋଏତେ ଜୀବିରିଦାକୋ, ଦୋ ଇନ୍‍କୁ ରେ ଆଣାଦୀ-ବାଲା କା ହୋବାଅଃୱା, ମେନ୍ଦୋ ସିର୍ମାଦିଶୁମ୍ ରେ ସିର୍ମାଦାସୀକୋ ଲେକା ହୋବାୱାକୋ। ଗୋଜାକାନ୍ କୋୱାଃ ଜୀବିରିଃ ରାଃ ବିଷାୟ୍ ରେ, ଚିନାଃ ଆପେ ମୁଶା ନାବୀ ରାଃ କିତାବ୍ ରେ ଜୁଲ୍‍ତାନ୍ ଚୁପାଃ ରାଃ କାହାନୀ ରେ କାପେ ପାଢ଼ାଅ କାନା? ପାର୍ମେଶ୍ଵାର୍ ଇନିଃକେ କାଜିକେଦାଏ, ‘ଆଇଙ୍ଗ୍ ଆବ୍ରାହାମ୍ ରାଃ ପାର୍ମେଶ୍ଵାର୍ ହାର୍ ଇସାହାକ୍ ରାଃ ପାର୍ମେଶ୍ଵାର୍ ହାର୍ ୟାକୁବ୍ ରାଃ ପାର୍ମେଶ୍ଵାର୍ ତାନିଙ୍ଗ୍।’ ଏନାମେନ୍ତେ ପାର୍ମେଶ୍ଵାର୍ ଗୋଜାକାନ୍ କୋୱାଃ କାହା, ମେନ୍ଦୋ ଜୀହିଃ କୋୱାଃ ପାର୍ମେଶ୍ଵାର୍ ତାନିଃ। ଆପେ ମାରାଙ୍ଗ୍ ଭୁଲ୍ ରେ ପାଶେ କାନାପେ।” ଏନ୍ତେ ଆଇନ୍ ଗୁରୁ କୋଏତେ ମିହୋଡ଼୍ ହିଜୁଃକେତେ ୟୀଶୁ ହାର୍ ଧାର୍ମୀକ୍ ସାଙ୍ଘାଟାନ୍ ସାଦୁକୀ କୋକେ କୁଲିକାପାଜିତାନ୍ ଆୟୁମ୍ କେଦାଏ, ହାର୍ ନେୟା ସାରିକେତେ ଚି ଇନିଃ ଇନ୍‍କୁକେ ବେଶ୍ ଲେକାତେ କାଜିରୁଆଡ଼୍ କେଃକୋୱାଏ, ଇନିଃ ୟୀଶୁ କେ କୁଲିକେଦାଏ, “ପାର୍ମେଶ୍ଵାର୍ ରାଃ ସବେନ୍ ଆନାଚୁ କୋଏତେ ମାରାଙ୍ଗ୍ ଆନାଚୁ ଅକନାଃ ତାନାଃ?” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ସବେନ୍ ଆନାଚୁ କୋଏତେ ନେୟା ମାରାଙ୍ଗ୍ ତାନାଃ, ‘ହେ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଆୟୁମେପେ, ପ୍ରାଭୁ ଆବୁୱାଃ ପାର୍ମେଶ୍ଵାର୍ ମିୟାଃ ଗି ପ୍ରାଭୁ ତାନିଃ। ହାର୍ ଆପେ ପ୍ରାଭୁ ଆପେୟାଃ ପାର୍ମେଶ୍ଵାର୍ କେ ଆପେୟାଃ ସବେନ୍ ମୋନ୍ ତେ, ହାର୍ ଆପେୟାଃ ସବେନ୍ ଜୀଉ ତେ, ହାର୍ ଆପେୟାଃ ସବେନ୍ ସେଣା ତେ, ହାର୍ ଆପେୟାଃ ସବେନ୍ ପେଡ଼େଏ ତେ, ଦୁଲାଡ଼ି ପେ।’ ଏଟାଃ ଆନାଚୁ ନେୟା ତାନାଃ, ଆପେ ଆପେୟାଃ ନାଡ଼େଏ-ଜାପାଃ ରେନ୍ କୋକେ ଆପେୟାଃ ଲେକା ଦୁଲାଡ଼୍ ଏପେ। ନେୟାଏତେ ମାରାଙ୍ଗ୍ ଆଡୋଃ ଜେତାନ୍ ଆନାଚୁ ବାନୋଗା।” ଆଇନ୍ ଗୁରୁ ଇନିଃକେ କାଜିକେଦାଏ, “ହେ ଗୁରୁ, ଏକ୍‍ଦାମ୍ ବୁଗିନ୍! ଆମ୍ ସାର୍ତିଗୀ କାଜିକେଦାମ୍ ଚି ପାର୍ମେଶ୍ଵାର୍ ମିୟାଃ ଗିୟାଏ ହାର୍ ଇନିଃକେ ବାଗିକେତେ ଆଡୋଃ ଜେତାଏ ପାର୍ମେଶ୍ଵାର୍ ବାଙ୍ଗୁଇଜା। ହାର୍ ଇନିଃକେ ସବେନ୍ ମୋନ୍ ତେ, ହାର୍ ସବେନ୍ ସେଣା ତେ, ହାର୍ ସବେନ୍ ଜୀଉ ତେ, ହାର୍ ସବେନ୍ ପେଡ଼େଏ ତେ ଦୁଲାଡ଼୍ ମାଣ୍ଡାଅ; ହାର୍ ନାଡ଼େଏ-ଜାପାଃ ରେନ୍ କୋକେ ଆପେୟାଃ ଲେକା ଦୁଲାଡ଼୍ ରିକା, ସବେନ୍ ପାଶୁ ଦାଣେ କୋଏତେ ହାର୍ ଭେଁଟ୍ କୋଏତେ ବାଢ଼ାଅ କେତେ ତାନାଃ।” ଚିମ୍ତାଙ୍ଗ୍ ୟୀଶୁ ନେଲ୍‍କେଦାଏ ଚି ଇନିଃ ବୁଝାଅ କେତେ କାଜିରୁଆଡ଼୍ କିଜାଏ, ଦୋ ଇନିଃକେ କାଜିକେଦାଏ, “ଆମ୍ ପାର୍ମେଶ୍ଵାର୍ ରାଃ ରାଇଜ୍ ଏତେ ସାଙ୍ଗିନ୍ ବାଙ୍ଗ୍‍ମେୟା।” ହାର୍ ଜେତାଏ କେହ ଆଡୋଃ ଇନିଃକେ ଜେତ୍ନାଃ କୁଲି ଲାଗିନ୍ ସାହାସ୍ କା ହୋବାଜାନା। ଆଡୋଃ ୟୀଶୁ ୟାହୁଦୀ-ମାନ୍ଦିର୍ ରାଃ ରାଚା ରେ ଶିଖାଅତାନ୍ ଲୋଃ ନେୟା କାଜିକେଃକୋୱାଏ, ଆଇନ୍ ଗୁରୁକୋ ଚିନାଃ ଲାଗିନ୍ କାଜିୟାକୋ, ଚି ମାସୀହ୍ ଦାଉଦ୍ ରାଜା ରାଃ ହୋନ୍ ତାନିଃ? ଚିୟାଃଚି ଦାଉଦ୍ ରାଜା ପାବିତାର୍ ଆତ୍ମା ରାଃ ପେଡ଼େଏ ତେ କାଜିକେଦାଏ, “ପାର୍ମେଶ୍ଵାର୍ ଇଙ୍ଗ୍ଆଃ ପ୍ରାଭୁ କେ କାଜିୟାଜାଏ, ‘ଇଙ୍ଗ୍ଆଃ ଜୋମ୍ ପାଡ଼୍ ରେ ଦୁବ୍ ମେ, ଚିମ୍ତାଙ୍ଗ୍ ସାନ୍ତେ ଇଙ୍ଗ୍ ଆମାଃ ବାଇରୀ କୋକେ ଆମାଃ କାଟା ଲାଥାର୍ କାଇଙ୍ଗ୍ ମାଣ୍ଡାଅ କୋୱା।’ ” “ଦାଉଦ୍ ଆଏଃ ଗି ଇନିଃକେ ପ୍ରାଭୁ କାଜି ତାନାଏ। ଏଣ୍ଡେ ମାସୀହ୍ ଇନିଜାଃ ହୋନ୍ କୋତାଃ ଏତେ ହୋବାଜାନାଏ?” ଆଡୋଃ ସବେନ୍ ହୋଡ଼ୋକୋ ଇନିଜାଃ ବାକାଣ୍ ରାଶିକା ତେ ଆୟୁମ୍ ତାଇନାକୋ। ୟୀଶୁ ଆଜାଃ ଶିଖାଅ ତେୟାଃ ରେ ଇନ୍‍କୁକେ କାଜିକେଃକୋୱାଏ, ଆଇନ୍ ଗୁରୁ କୋଏତେ ହୋସିଆର୍ ତାଇନ୍‍ପେ! ଅକନ୍‍କୋ ଜିଲିଙ୍ଗ୍ ଲିଜାଃ ତୁସିଙ୍ଗ୍ କାନ୍ ଲୋଃ ହୋନୋର୍ ହାର୍ ପିଟ୍ କୋରେ ଜୋହାର୍, ହାର୍ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ମାରାଙ୍ଗ୍-ମାରାଙ୍ଗ୍ ଜାଗା ରେ ଦୁବ୍ ହାର୍ ଭୋଜ୍ ରେ ହଗି ମାରାଙ୍ଗ୍-ମାରାଙ୍ଗ୍ ଜାଗା ରେ ଦୁବ୍ ସୁକୁଃ ୱାକୋ। ଇନ୍‍କୁ ହିଡ଼୍ କେତେ ବିଧୋବା କୋୱାଃ ଅଡ଼୍ଆଃ କୋକେ ଇଦି କେୟାକୋ ହାର୍ ହୋଡ଼ୋକୋ ବେଶ୍ ପାତି ୟାକୋ ମେନ୍ତେ ଜିଲିଙ୍ଗ୍ ବିନ୍ତି ରିକା ୟାକୋ। ଇନ୍‍କୁକେ ପାର୍ମେଶ୍ଵାର୍ ଥିମ୍ବାଗି ଦାଣ୍ଡ୍ ଏମ୍‍କୋୱାଏ। ଏନ୍ତେ ୟୀଶୁ ୟାହୁଦୀ-ମାନ୍ଦିର୍ ରାଃ ପାଏସା ବାକ୍ସା ରାଃ ନାଡ଼େଏ ଦୁବ୍ କେତେ ନେଲ୍ ତାଇନାଏ ଚି ହୋଡ଼ୋକୋ ଚିଲ୍‍କା ପାଏସା ଏମ୍ ତାନାକୋ, ହାର୍ ଚିମିନାଙ୍ଗ୍ କିଶାଣ୍ ହୋଡ଼ୋକୋ ଥିମ୍ବା ଟାକା କୋ ଏମ୍ କେଦା। ଇନ୍‍କୁ ଏତେ ମିହୋଡ଼୍ ରେଙ୍ଗେଃ ବିଧୋବା ହିଜୁଃକେତେ ବାରିୟା ହୁଡିଙ୍ଗ୍ ଗୋନୋଙ୍ଗାନ୍ ତାମ୍ବା ପାଇସା ସାଜୁକେଦାଏ। ଏନ୍ତେ ୟୀଶୁ ଆଜାଃ ଚେଲାକୋକେ କେଡ଼ାକେତେ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଆପେକେ ସାର୍ତିଗୀ କାଜିପେ ତାନିଙ୍ଗ୍ ଚି ମାନ୍ଦିର୍ ରାଃ ପାଏସା ବାକ୍ସା ରେ ପାଏସା ସାଜୁତାନ୍ କୋଏତେ ନେ ରେଙ୍ଗେଃ ବିଧୋବା ସବେନ୍ କୋଏତେ ଥିମ୍ବା ଏମ୍‍କାଦାଏ। ଚିୟାଃଚି ସବେନ୍ କୋ ଆକୋୱାଃ ଟାକା-ପାଏସା ଏତେ ହୁଡିଙ୍ଗ୍ ଗି ଏମ୍‍କେଦାକୋ, ମେନ୍ଦୋ ନିଈ ଆଜାଃ ଜୀଦାନ୍ ଆସୁଲେନ୍ ତେୟାଃ ସବେନ୍ ପାଏସା ଏମ୍‍ତାଦାଏ।” ଚିମ୍ତାଙ୍ଗ୍ ୟୀଶୁ ୟାହୁଦୀ-ମାନ୍ଦିର୍ ଏତେ ଅଡୋଙ୍ଗ୍ ତାଇନାଏ, ଦୋ ଇନିଜାଃ ଚେଲାକୋ ଏତେ ମିହୋଡ଼୍ ଇନିଃକେ କାଜିକେଦାଏ, “ହେ ଗୁରୁ, ନେଲେମ୍, ଚିଲ୍‍କାନ୍ ମାପ୍‍ରାଙ୍ଗ୍ ଦିରିକୋ ହାର୍ ଚିମିନ୍ ସୁନ୍ଦାର୍ ମାହାଲ୍।” ୟୀଶୁ ଇନିଃକେ କାଜିକେଦାଏ, “ନାଆ ଆମ୍ ନେ ମାରାଙ୍ଗ୍ ମାହାଲ୍ କେ ନେଲ୍ ତାନାମ୍, ମେନ୍ଦୋ ମୁଶିଙ୍ଗ୍ ଦିରି ଚେତାନ୍ ଦିରି ନେଲେକା କା ତାଇନା ସବେନାଃ ଧାଶୁଡ଼୍ ଅଗା।” ଏନ୍ତେ ୟୀଶୁ ଜାଏତୁନ୍ ଦାରୁ ବୁରୁ ରାଃ ଚେତାନ୍ ରେ ୟାହୁଦୀ-ମାନ୍ଦିର୍ ରାଃ ସାମ୍‍ନାଙ୍ଗ୍ ପାଡ଼୍ ଦୁବ୍ ଲେନାଏ, ଏନ୍ତେ ପାତ୍ରାସ୍ ହାର୍ ୟାକୁବ୍ ହାର୍ ଯୋହାନ୍ ହାର୍ ଆନ୍ଦ୍ରିୟାସ୍ ଇନିଃକେ ଏସ୍କାର୍ ତାଇନ୍ ଇମ୍ତା ସେନ୍ କେତେ କୁଲିକିଜାକୋ, “ଆଲେକେ ଉଦୁବା ଲେମ୍ ଚି, ନେ କାଜିକୋ ଚିଉଲା ହୋବାୱା? ହାର୍ ଚିମ୍ତାଙ୍ଗ୍ ନେ ସବେନ୍ କାଜିକୋ ପୁରା ହୋବାୱା ଏନ୍ ସାମାୟ୍ ରାଃ ଚିହ୍ନା ଚିନାଃ ହୋବାୱା?” ୟୀଶୁ ଇନ୍‍କୁକେ କାଜି ଏଟେଃ କେଦାଏ, “ହୋସିଆର୍ ତାଇନ୍‍ପେ ଚି ଜେତାଏ ଆପେକେ ଆଲୋ ହିଡ଼େ କା। ଚିମିନାଙ୍ଗ୍ କୋ ଇଙ୍ଗ୍ଆଃ ନୁତୁମ୍ ତେ ହିଜୁଃକେତେ କାଜିୟାକୋ, ‘ଇଙ୍ଗ୍ ଇନିଃଗି ତାନିଙ୍ଗ୍’ ହାର୍ ଚିମିନାଙ୍ଗ୍ କୋକେ ହିଡ଼୍ କୋୱାକୋ। ହାର୍ ଚିମ୍ତାଙ୍ଗ୍ ଆପେ ଲାଡ଼ାଇ ହାର୍ ଲାଡ଼ାଇ ରାଃ କାଜିକୋ ଆୟୁମ୍ ୟାପେ, ଦୋ ଆଲୋପେ ବୋରୋୟା; ଚିୟାଃଚି ନେୟାକୋ ଜାଲେକାତେ ଗି ହୋବାୱା, ମେନ୍ଦୋ ଏନ୍ ସାମାୟ୍ ଟୁଣ୍ଡୁ କା ହୋବାୱା। ଚିୟାଃଚି ମିୟାଃ ଜାତି ରେନ୍ ହୋଡ଼ୋକୋ ଏଟାଃଜାତି ରେନ୍ ହୋଡ଼ୋକୋ ଲୋଃ ହାର୍ ଦିଶୁମ୍ ରେନ୍ ହୋଡ଼ୋକୋ ଏଟାଃ ଦିଶୁମ୍ ରେନ୍ ହୋଡ଼ୋକୋ ଲୋଃ ଲାପାଡ଼ାଇ ଅଗାକୋ। ଆଡୋଃ ଜାଗା ଜାଗାକୋ ରେ ଭୂକାମ୍ପ୍ ହୋବାୱା ହାର୍ ଆକାଲ୍ ହୋବାୱା। ନେୟାକୋ ଦୁକୁ କୋରାଃ ଏଟେଃ ହୋବାୱା। ମେନ୍ଦୋ ଆପେ ଆପେୟାଃ ଲାଗିନ୍ ହୋସିଆର୍ ତାଇନ୍‍ପେ, ଚିୟାଃଚି ହୋଡ଼ୋକୋ ଆପେକେ ଟୋଲା ବିଚାର୍ ସାଭା କୋରେ ଜିମା ପେୟାକୋ ହାର୍ ଆପେକେ ବିନ୍ତିଅଡ଼୍ଆଃ ରେ ବିଡ଼ା ପେୟାକୋ, ହାର୍ ଆପେ ଇଙ୍ଗ୍ଆଃ ଚେଲାକୋ ତାନ୍‍ପେ ମେନ୍ତେ ହାକିମ୍ ହାର୍ ରାଜା କୋୱାଃ ଆୟୁର୍ ରେ ତିଙ୍ଗୁ ପେୟାକୋ, ଏନାତେ ଆପେ ଇନ୍‍କୁକେ ଇଙ୍ଗ୍ଆଃ ବିଷାୟ୍ ରେ ବୁଗିନ୍ କାଜି, କାଜି ଧାଡ଼ିୟାପେ। ମେନ୍ଦୋ ଜାଲେକାତେ ଗି ସିଦା ସୁସାମାଚାର୍ ସବେନ୍ ଜାତି ରେନ୍ ହୋଡ଼ୋକୋ ତାଃ ଟୁଣ୍ଡୁ ହୋବାଅଃ ସିଦାରେ ରେ ପାର୍ଚାର୍ ଅଗା। ଚିମ୍ତାଙ୍ଗ୍ ଇନ୍‍କୁ ଆପେକେ ଇଦିକେତେ ଜିମା ପେୟାକୋ, ଦୋ ସିଦା ଏତେ ଆଲୋପେ ପାହୋମ୍ ଏୟା ଚି ଆଲେ ଚିନାଃ କାଜିୟାଲେ। ମେନ୍ଦୋ ଅକନାଃ ଆପେକେ ପାର୍ମେଶ୍ଵାର୍ ଆପେୟାଃ ମୋନ୍ ରେ କାଜିୟାଏ, ଏନାଗି କାଜିପେ, ଚିୟାଃଚି କାଜିନିଃ ଆପେ ନାହାଲାପେ ମେନ୍ଦୋ ପାବିତାର୍ ଆତ୍ମା ତାନିଃ। ଏନ୍ ସାମାୟ୍ ରେ କାବିଶ୍ଵାସ୍‍ତାନ୍ ହାଗା ବିଶ୍ଵାସ୍‍ତାନ୍ ହାଗା କେ, ହାର୍ କାବିଶ୍ଵାସ୍‍ତାନ୍ ହୋନ୍‍ଗାଣା କୋ ବିଶ୍ଵାସ୍‍ତାନ୍ ଏଙ୍ଗା-ଆପୁ କେ ଗୋଏଃ ଲାଗିନ୍ ଜିମାୟାକୋ, ହାର୍ କାବିଶ୍ଵାସ୍‍ତାନ୍ ଏଙ୍ଗା-ଆପୁ କୋ ବିଶ୍ଵାସ୍‍ତାନ୍ ହୋନ୍‍ଗାଣା କୋୱାଃ ବିରୋଧ୍ ରେ ବିରିଃ କେତେ ଗୋଏଃ କୋୱାକୋ। ହାର୍ ଆପେ ଇଙ୍ଗ୍ଆଃ ଚେଲାକୋ ତାନ୍‍ପେ ମେନ୍ତେ ସବେନ୍ ହୋଡ଼ୋକୋ ଆପେକେ ହିଲାଙ୍ଗ୍ ପେୟାକୋ; ମେନ୍ଦୋ ଅକଏ ଇଙ୍ଗ୍ଆଃ ବିଶ୍ଵାସ୍ ଏୟାଏ, ହାର୍ ଟୁଣ୍ଡୁ ସାନ୍ତେ ବିଶ୍ଵାସ୍‍ତାନ୍ ଲୋଃ ଦୁକୁ ସାହାତିଙ୍ଗ୍ ୟାଏ ଇନିଃକେ ପାର୍ମେଶ୍ଵାର୍ ବାଞ୍ଚାଅ ୟାଏ।” “ଏନ୍ତେ ମୁଶିଙ୍ଗ୍ ଆପେ ଏନ୍ ହିଲାଙ୍ଗ୍ ହୋଡ଼ କେ ୟୀରୁଶାଲେମ୍ ମାନ୍ଦିର୍ ରେ ତିଙ୍ଗୁକାନ୍ ନେଲିୟାପେ ଅକତାଃ ଇନିଃକେ ତିଙ୍ଗୁନ୍ ଠାଉକା ନାହାଲା, ଅକଏ ନେୟାକେ ପାଢ଼ାଅୱାଏ ଇନିଃ ବୁଝାଅଃ କାଏ! ଚିମ୍ତାଙ୍ଗ୍ ଏନ୍ ସାମାୟ୍ ହିଜୁଗା, ଦୋ ଅକନ୍‍କୋ ୟାହୁଦୀୟା ଜିଲ୍ଲା ରେ ତାଇନାକୋ, ଇନ୍‍କୁ ବୁରୁ ଚେତାନ୍ ରେ ନିର୍ କାକୋ। ଅକଏ ଛାତ୍ ରେ ମେନାଇଜା, ଇନିଃ ଆଜାଃ ଅଡ଼୍ଆଃ ତେ ଜାହାନାଃ ଇଦି ଲାଗିନ୍ ଲାଥାର୍ ଆଲୋକାଏ ଆଡ଼୍‍ଗୁନ୍ କାଏ ହାର୍ ନା ଭିତାର୍ ସେନ୍ କାଏ। ହାର୍ ଅକଏ କାମିପୀଡ଼ି ରେ ମେନାଇଜା, ଇନିଃ ଆଜାଃ ଲିଜାଃ ଇଦି ଲାଗିନ୍ ଦୋୟାତେ ଅଡ଼୍ଆଃ ପାଡ଼୍ ଆଲୋକାଏ ରୁଆଡ଼୍ କା। ଏନ୍ ହୁଲାଙ୍ଗ୍ କୋରେ ବୋରୋୱାନ୍ ସାମାୟ୍ ତାଇନୋଗା, ଅକନ୍ କୁଡ଼ିକୋ ହୋଡ଼ମୋ ରେ ତାଇନାକୋ ହାର୍ ଅକନ୍‍କୋ ଆକୋୱାଃ ହୋନ୍ କୋକେ ତୱା ଆନୁ କାତେୟାକୋ, ହାୟ୍! ଇନ୍‍କୁ ଲାଗିନ୍ ଜୀଦାନ୍ ବାଞ୍ଚାଅ କେଟେଃ ହୋବାଅଃୱା! ବିନ୍ତି କାତେପେ ଚି ନେୟା ରାବାଙ୍ଗ୍ ସାମାୟ୍ ରେ ଆଲୋକା ହୋବାଅଃକା, ଚିୟାଃଚି ଏନ୍ ହୁଲାଙ୍ଗ୍ କୋରେ ଥିମ୍ବାଗି ଦୁକୁ ରାଃ ସାମାୟ୍ ହୋବାଅଃୱା, ପାର୍ମେଶ୍ଵାର୍ ଅତେଦିଶୁମ୍ ରାଃ ସିର୍ଜାଅକାନ୍ ହୁଲାଙ୍ଗ୍ ତେ ହୋଡ଼ୋକୋ ଚିଉଲା ହ ଏନ୍‍ଲେକା ଦୁକୁ ରାଃ ସାମ୍‍ନାଙ୍ଗ୍ କାକୋ ରିକା ଲେଦା, ଆଡୋଃ ଏନ୍‍ଲେକା ଚିଉଲା ହ କା ହୋବାଅଃୱା। ପ୍ରାଭୁ ଏନ୍ ବୋରୋୱାନ୍ ଦୁକୁ ହୁଲାଙ୍ଗ୍ କୋକେ ହୁଡିଙ୍ଗୋଃ କା ମେନ୍ତେ ପାହୋମ୍ କାଦାଏ। କାରେ ଦୋ ଜେତାଏ କାକୋ ବାଞ୍ଚାଅଃ ତେୟା; ମେନ୍ଦୋ ଏନ୍ ସାଲାକାନ୍ କୋୱାଃ ଚାଲ୍ତେ ଅକନ୍ କୋକେ ଇନିଃ ସାଲାକାଦାଏ, ଏନ୍ ହୁଲାଙ୍ଗ୍ କୋକେ ହୁଡିଙ୍ଗ୍ କେଦାଏ। ଏନ୍ ସାମାୟ୍ ରେ ଜେତାଏ ଆପେକେ କାଜିୟାପେ ରେଦୋ, ‘ନେଲିପେ, ମାସୀହ୍ ନିଈଗି ତାନିଃ!’ ୟାଦୋ, ‘ନେଲିପେ, ହେନ୍ତାଃ ରେ ମେନିଜା!’ ଏଣ୍ଡେ ଆଲୋପେ ବିଶ୍ଵାସ୍ ଏୟା। ଚିୟାଃଚି ହିହିଡ଼୍ ମାସୀହ୍ ହାର୍ ହିହିଡ଼୍ ନାବୀ କୋ ହିଜୁଗାକୋ, ହାର୍ ଚିହ୍ନା ହାର୍ ଆକ୍‍ଦାନ୍ଦା କାମିକୋ ରିକା ୟାକୋ। ହୋବା ଧାଡ଼ିୟୋଃ ରେଦୋ ପାର୍ମେଶ୍ଵାର୍ ଅକନ୍ କୋକେ ସାଲାକାଦାଏ ଇନ୍‍କୁକେ ହଗି ହିଡ଼୍ କୋୱାକୋ। ମେନ୍ଦୋ ଆପେ ହୋସିଆର୍ ତାଇନ୍‍ପେ, ନେଲେପେ, ଇଙ୍ଗ୍ ଆପେକେ ସବେନ୍ କାଜିକୋ ସିଦାରେ ଗି ଉଦୁବ୍ ତାଦାଇଙ୍ଗ୍।” “ଏନ୍ତେ ବୋରୋୱାନ୍ ଦୁକୁ ଫାରୋମ୍ ତାୟୋମ୍ତେ, ଶିଙ୍ଗି ନୁବାଃ କେନୋଗା, ହାର୍ ଚାଣ୍ଡୁଃ କାଏ ମାସ୍କାଲ୍ ଏୟା। ହାର୍ ରିମିଲ୍‍ଦିଶୁମ୍ ଏତେ ଇପିଲ୍‍କୋ ଉୟୁଗୋଃ ୱାକୋ, ହାର୍ ରିମିଲ୍‍ଦିଶୁମ୍ ରାଃ ପେଡ଼େଏ ହିଲାଅଗା। ଏନ୍ ସାମାୟ୍ ରେ ହୋଡ଼ୋକୋ ଇଙ୍ଗ୍ ମାନ୍‍ୱା ରାଃ ହୋନ୍ କେ ମାରାଙ୍ଗ୍ ପେଡ଼େଏ ହାର୍ ଯୁନୁଲ୍‍ତାନ୍ ଲୋଃ ରିମିଲ୍ ରେ ଅତେ ପାଡ଼୍ ହିଜୁଃ ତାନ୍ ନେଲିଙ୍ଗ୍ ୟାକୋ। ଏନ୍ ସାମାୟ୍ ଇଙ୍ଗ୍ ଇଙ୍ଗ୍ଆଃ ସିର୍ମାଦାସୀ କୋକେ ଆନାଚୁ ଏମ୍ କେତେ କାଜିକୁଲ୍ କୋୱାଇଙ୍ଗ୍, ଅତେ ରାଃ ନେ କୋନା ଏତେ ରିମିଲ୍‍ଦିଶୁମ୍ ରାଃ ଏନ୍ କୋନା ସାନ୍ତେ ସବେନ୍ ଦିଶୁମ୍ ଏତେ ଇଙ୍ଗ୍ଆଃ ସାଲାକାନ୍ ହୋଡ଼ୋକୋକେ ହୁଣ୍ଡି କୋପେ।” ଲୋୱା ଦାରୁ ଏତେ ନେ ଜୋନୋକା ସିଖାୱନ୍ ପେ ଚିମ୍ତାଙ୍ଗ୍ ଏଣ୍ଡେରାଃ କୋତୋକୋ ସାଗେନୋଃ ୱା ଆଡୋଃ ସାକାମ୍ କୋ ସୁଡ଼ାଅଃ ୱା; ଦୋ ଆପେ ସାରିକେୟାପେ ଚି ଶିତୁମ୍ ସାମାୟ୍ ନାଡ଼େଏ ଗିୟା। ନେଲେକାଗି ଚିମ୍ତାଙ୍ଗ୍ ଆପେ ଏନ୍ କାଜିକୋ ଅକନାଃ ଆପେକେ କାଜିୟାଃ ପେୟାଇଙ୍ଗ୍ ହୋବାଅଃତାନ୍ ନେଲେୟାପେ, ଦୋ ସାରିକେପେ, ଚି ଅତେଦିଶୁମ୍ ରାଃ ଟୁଣ୍ଡୁ ନାଡ଼େଏ ରେୟା ମେନ୍ଦୋ ଏନା ହୋବାଅଃ ୱାଲା ମେନାଃ। ଇଙ୍ଗ୍ ଆପେକେ ସାର୍ତିଗୀ କାଜିପେ ତାନିଙ୍ଗ୍, ଚି ଚିମ୍ତାଙ୍ଗ୍ ସାନ୍ତେ ନେ କାଜିକୋ କା ହୋବାଅଃୱା ଏନ୍ ସାନ୍ତେ ନେ ପିଢ଼ୀ ରେନ୍ ହୋଡ଼ୋକୋ ଏନ୍ ସାମାୟ୍ ହଗି ଜୀହିଃ ତାଇନୋଗାକୋ। ରିମିଲ୍‍ଦିଶୁମ୍ ଆଡୋଃ ଅତେ ଛାବା କେନୋଗା ମେନ୍ଦୋ ଇଙ୍ଗ୍ଆଃ କାଜି ଚିଉଲା ହ କାଛାବାଅଃୱା। “ଏନ୍ ହୁଲାଙ୍ଗ୍ ହାର୍ ଏନ୍ ସାମାୟ୍ ରାଃ ବିଷାୟ୍ ରେ ଅକଏ ହଗି କାଏ ସାରିୟାଏ, ନାଦୋ ସିର୍ମାଦାସୀ ହାର୍ ନାଦୋ ପାର୍ମେଶ୍ଵାର୍ ରାଃ ହୋନ୍ ମେନ୍ଦୋ ଖାଲି ଆପୁ ଏନ୍ ହୁଲାଙ୍ଗ୍ ହାର୍ ସାମାୟ୍ କେ ସାରିୟାଏ। ନେଲେପେ, ଏୟୋନ୍‍କାନ୍ ହାର୍ ବିନ୍ତି କାତେପେ; ଚିୟାଃଚି ଆପେ କାପେ ସାରିୟା ଚି ଏନ୍ କାଜିକୋ ଚିଉଲା ହୋବାୱା। ଇଙ୍ଗ୍ଆଃ ସେନ୍ ହାର୍ ହିଜୁଃ ଏନ୍ ହୋଡ଼ ରାଃ କାଥ୍‍ନୀ ଲେକା ତାନାଃ, ଅକନିଃ ପାର୍ଦେଶ୍ ସେନ୍‍ତାନ୍ ସାମାୟ୍ ଆଜାଃ ଅଡ଼୍ଆଃ ବାଗେ କେଦାଏ, ହାର୍ ଆଜାଃ ଦାସୀକୋକେ ଆଧିକାର୍ ଏମାଃକୁୱାଏ; ଆଡୋଃ ମିପୀୟାଃ କୋକେ ଇନ୍‍କୁୱାଃ କାମି ଉଦୁବାଃ କୋୱାଏ ହାର୍ ଦୁହାର୍ ହୋରୋ ନିଈକେ ଏୟୋନ୍‍କାନ୍ ଚାଏ ମେନ୍ତେ ଆନାଚୁ ଏମ୍ କିଜାଏ।” ଏନାଲାଗିନ୍ ୟୀଶୁ ଆଜାଃ ଚେଲାକୋକେ ଆଡୋଃଗି କାଜିକେଦାଏ, “ଚିୟାଃଚି ଆପେ କାପେ ସାରିତାନା ଚି ଅଡ଼୍ଆଃ ରେନ୍ ଗୋମ୍‍କେ ଚିଉଲା ହିଜୁଗାଏ, ଆୟୁବ୍ ଇମ୍ତାଙ୍ଗ୍ ଚି ଥାଲା ନିଦା ରେ, ଚି ସିମ୍‍କୋ ରାଆ ସାମାୟ୍ ରେ ଚି ସେତାଃ ଇମ୍ତା ରେ। ଇନିଃ ଆଚ୍‍କାତେ ହିଜୁଗାଏ, ଏନାମେନ୍ତେ ଏୟୋନ୍ କାନ୍‍ପେ, ଚି ଇନିଃ ଆପେକେ ଦୁଣୁମ୍ ତାନ୍ କାଏ ନାମ୍ ପେୟାଏ। ହାର୍ ଅକନାଃ ଇଙ୍ଗ୍ ଆପେକେ କାଜିୟାପେ ତାନାଇଙ୍ଗ୍, ଏନାଗି ସବେନ୍ କୋକେ କାଜି ତାନିଙ୍ଗ୍: ଇଙ୍ଗ୍ଆଃ ହିଜୁଃ ଇମ୍ତା ରେ ଏୟୋନ୍‍କାନ୍ ତାଇନ୍‍ପେ।” ନାଆ ଦୋ ବାର୍‍ସିଙ୍ଗ୍ ତାୟୋମ୍ତେ ୟାହୁଦୀ କୋୱାଃ ଫାସାହ୍ ପାରାବ୍ ହାର୍ ଖାମୀର୍ କାମେଶାକାନ୍ ହୋଲୋଙ୍ଗ୍ ରାଃ ପାରାବ୍ ହୋବାଅଃ ରାଃ ତାଇକେନା। ଆଡୋଃ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ୟୀଶୁ କେ ଚିଲ୍‍କା ହିଡ଼୍ କେତେ ହାପା-ହାପା ସାବି ୟାକୋ ହାର୍ ଗୋଜିୟାକୋ ନେୟାମେନ୍ତେ ହୋରା ଦାଣାବାଡ଼ା ରେ ତାଇକେନାକୋ। ମେନ୍ଦୋ କାଜି ତାଇକେନାକୋ, “ପାରାବ୍ ରାଃ ହୁଲାଙ୍ଗ୍ ନେକା ରିକା ଠାଉକା କା ହୋବାୱା, କାରେ ଦୋ ହୋଡ଼ୋକୋ କିର୍ଲାଅବାଡ଼ା ୟାକୋ।” ଏନ୍ ସାମାୟ୍ ୟୀଶୁ ବେଥାନି ସାହାର୍ ରାଃ ଶିମୋନ୍ ଅଡ଼୍ଆଃ ରେ ଜୋମ୍ ଲାଗିନ୍ତେ ଦୁବ୍‍ଲେନ୍ ତାଇନାଏ, ଅକନିଃକେ ୟୀଶୁ କୋଢ଼୍ ବିମାର୍ ଏତେ ଚାଙ୍ଗାଇ ଲିଜାଏ। ଇମ୍ତାଙ୍ଗ୍ ମିୟାଃ କୁଡ଼ି ସାଙ୍ଗ୍‍ମାର୍ମାର୍ ଦିରି ରାଃ ଶିଶି ରେ ଜାଟାମାଂସି ରାଃ ଗୋନୋଙ୍ଗାନ୍ ସୋୱାନ୍ ସୁନୁମ୍ ଆଉକେତେ ହିଜୁଃ ଲେନାଏ; ହାର୍ ଶିଶି ରାଃ ବୋଅ କେ ଠୋଏଃ କେଦାଏ, ଏନ୍ତେ ୟୀଶୁ କେ ମାଇନ୍ ଲାଗିନ୍ ସୁନୁମ୍ ଇନିଜାଃ ବୋଅ ରେ ଦୁଲ୍ କେଦାଏ। ମେନ୍ଦୋ ଚିମିନାଙ୍ଗ୍ ହୋଡ଼ୋକୋ ଆକୋୱାଃ ମୋନ୍ ରେ ଖିସ୍ କେତେକୋ କାଜିକେଦା, “ଚିନାଃ ମେନ୍ତେ ଇନିଃ ଏନ୍ ଗୋନୋଙ୍ଗାନ୍ ସୁନୁମ୍ କେ ଦୁଲ୍ କେତେ ବେକାର୍ ତାଦାଏ? ଚିୟାଃଚି ଏନ୍ ସୁନୁମ୍ ମିଃ ଶିର୍ମା ରାଃ ନାଲା ଟାକା ଏତେ ଥିମ୍ବା ଗୋନୋଙ୍ଗ୍ ରେ ଆଖ୍ରିଙ୍ଗ୍ କେତେ ଗାରିବ୍ କୋକେ ହାଟିଙ୍ଗ୍ ଧାଡ଼ି ଜାନ୍ତେୟାଃ।” ହାର୍ ଇନ୍‍କୁ ଇନିଃକେ ବେଶେ ଏଗେର୍ କିଜାକୋ। ୟୀଶୁ କାଜିକେଦାଏ, “ଇନିଃକେ ଆଲୋପେ ଏଗେରେ; ଇନିଃକେ ଆଲୋପେ ଦୁକୁଇୟା? ଇନିଃ ଅକନାଃ ଇଙ୍ଗ୍ଆଃ ଲାଗିନ୍ ରିକା କେଦାଏ, ଏନା ବୁଗିନ୍ କାମି କେଦାଏ। ଗାରିବ୍ କୋ ଆପେୟାଃ ଲୋଃ ସବେନ୍ ଇମ୍ତା ତାଇନ୍ ତାନାକୋ ହାର୍ ଆପେ ଚିମ୍ତା ସାନାଙ୍ଗ୍ ୟାପେ ଇମ୍ତା ଇନ୍‍କୁ ଲୋଃ ବୁଗିନ୍ ରିକା ଧାଡ଼ିୟାପେ; ମେନ୍ଦୋ ଇଙ୍ଗ୍ ଆପେୟାଃ ଲୋଃ ସବେନ୍ ଇମ୍ତା କାଇଙ୍ଗ୍ ତାଇନା। ଏନ୍ କୁଡ଼ି ଅକନାଃ ରିକା ଧାଡ଼ିଜାନାଏ; ଏନା ଇନିଃ ବୁଗିନାଃ ରିକା କେଦାଏ; ଇନିଃ ଇଙ୍ଗ୍ଆଃ ଗୋଜୋଃ ସିଦା ତୋପା ସେକାଡ଼୍ ଲାଗିନ୍, ଇଙ୍ଗ୍ଆଃ ହୋଡ଼ମୋ ରେ ସୋୱାନ୍ ସୁନୁମ୍ ଗୋସୋଃ କେଦାଏ। ଇଙ୍ଗ୍ ଆପେକେ ସାର୍ତିଗୀ କାଜି ତାନିଙ୍ଗ୍, ସବେନ୍ ଦିଶୁମ୍ ରେ ଜାହାଁତାଃ ରେ ହଗି ସୁସାମାଚାର୍ ପାର୍ଚାର୍ ଅଗା, ଏନ୍ତାଃରେ ଇନିଜାଃ ନେ କାମି ରାଃ କାଜି ବିଷାୟ୍ ରେ କାଜିୟାକୋ, ହାର୍ ହୋଡ଼ୋକୋ ଇନିଃକେ ପାହୋମି ୟାକୋ” ଏନ୍ତେ ୟାହୁଦା ଇସ୍କାରିୟୋତୀ ଅକନିଃ ବାରାଝାନ୍ କୁଲାକାନ୍ ଚେଲାକୋ କୋଏତେ ମିହୋଡ଼୍ ତାଇକେନାଏ, ଇନିଃ ପ୍ରାଧାନ୍ ୟାଜାକ୍ କୋୱାଃ ନାଡ଼େଏ ସେନ୍ ଜାନାଏ, ହାର୍ ଇନ୍‍କୁକେ କାଜିକେଦାଏ ୟୀଶୁ କେ ସାବ୍ ଲାଗିନ୍ ଦେଙ୍ଗା ରିକାୟାଏ। ଇନ୍‍କୁ ନେୟା ଆୟୁମ୍‍କେତେ ରାଶିକା ଜାନାକୋ ହାର୍ ଇନିଃକେ ଥିମ୍ବାଗି ଟାକା ଏମେୟାଲେ ମେନ୍ତେ କାଜିକିଜାକୋ, ହାର୍ ଇନିଃ ୟାହୁଦୀ କୋୱାଃ ମୁଖିୟା କୋୱାଃ ତିଈ ରେ ୟୀଶୁ କେ ଧୋକା ତେ ସାବ୍ ଲାଗିନ୍ ଏନ୍ ସାମାୟ୍ କେ ଦାଣାବାଡ଼ା କେଦାଏ। ଖାମୀର୍ କାମେଶାକାନ୍ ହୋଲୋଙ୍ଗ୍ ପାରାବ୍ ରାଃ ସିଦା ହୁଲାଙ୍ଗ୍ ରେ, ଅକଣ୍ଡେ ଇନ୍‍କୁ ୟାହୁଦୀ କୋୱାଃ ଫାସାହ୍ ପାରାବ୍ ଜୋମ୍ ରେ ମିଣ୍ଡୀହୋନ୍ ଦାଣେ ରିକାତାଇନାକୋ, ଇନିଜାଃ ଚେଲାକୋ ଇନିଃକେ କୁଲିକିଜାକୋ, କୋତାଃ ଆମ୍ ସାନାଙ୍ଗ୍ ତାନାମ୍ ଚି, “ଆଲେ ସେନ୍ କେତେ ଆମାଃ ଲାଗିନ୍ ଫାସାହ୍ ପାରାବ୍ ରାଃ ଜୋମେୟାଃ ବାଇୟାଲେ?” ଇନିଃ ଆଜାଃ ଚେଲାକୋ ଏତେ ବାର୍ ହୋଡ଼ କିନ୍‍କେ ନେୟା କାଜିକେତେ କୁଲ୍ କେଦାଏ, “ୟୀରୁଶାଲେମ୍ ସାହାର୍ ତେ ସେନ୍ ବେନ୍, ହାର୍ ମିୟାଃ ହୋଡ଼ ଦାଆ ତେ ଫେରେଃ କାନ୍ ଚାଟୁ ଗୋଃ ସେନ୍ ଆବେନ୍ କେ ନାମୋଗାଏ, ଇନିଜାଃ ଦୋୟା ତେ ସେନ୍ ବେନ୍। ହାର୍ ଇନିଃ ଅକନ୍ ଅଡ଼୍ଆଃ ରେ ସେନାଏ ଏନ୍ ଅଡ଼୍ଆଃ ରେନ୍ ଗୋମ୍‍କେ କେ କାଜିବେନ୍, ‘ଗୁରୁ ନେୟା କାଜି ତାନାଏ, ଇଙ୍ଗ୍ ଇଙ୍ଗ୍ଆଃ ଚେଲାକୋ ଲୋଃ ଫାସାହ୍ ପାରାବ୍ ରାଃ ଜୋମେୟାଃ ଜୋମେୟାଇଙ୍ଗ୍ ଏନାତେ ମାନାତିଙ୍ଗ୍ ଲାଗିନ୍ ଧାରାମ୍ ସାଲା ଅଡ଼୍ଆଃ ଅକନାଃ ତାନାଃ?’ ଏନ୍ତେ ଅଡ଼୍ଆଃ ରେନ୍ ଗୋମ୍‍କେ ଆପେକେ ମିୟାଃ ଶାଜାଅ କାନ୍ ହାର୍ ସେକାଡ଼୍‍କାନ୍ ମାରାଙ୍ଗ୍ ଚେତାନ୍ କୋଠୋରୀ ଉଦୁବ୍ ପେୟାଏ। ଏନ୍ତାଃରେ ଆବୁୱାଃ ଲାଗିନ୍ ବାଇପେ।” ଏନ୍ତେ ବାରିୟା ଚେଲାକିନ୍ ଅଡୋଙ୍ଗ୍ କେତେ ସାହାର୍ ତେ ସେନ୍ ଲେନାକିନ୍, ହାର୍ ଚିଲ୍‍କା ୟୀଶୁ ଇନ୍‍କୁକେ କାଜି ଲେଃକୋୱାଏ, ଏନ୍‍ଲେକାଗି ନାମ୍ କେଦାକିନ୍ ଏନ୍ତେ ଫାସାହ୍ ପାରାବ୍ ରାଃ ଜୋମେୟାଃ ବାଇକେଦାକିନ୍। ଏନ୍ତେ ରୁଆଡ଼୍ ଜାନାକିନ୍। ଚିମ୍ତାଙ୍ଗ୍ ଶିଙ୍ଗି ଡୁବିଃ ଜାନା, ଦୋ ୟୀଶୁ ଆଜାଃ ବାରାଝାନ୍ କୁଲାକାନ୍ ଚେଲାକୋ ଲୋଃ ହିଜୁଃ ଲେନାଏ। ହାର୍ ଚିମ୍ତାଙ୍ଗ୍ ଆକୋ ଦୁବ୍ କେତେ ଜୋମ୍ ତାଇନାକୋ, ଦୋ ୟୀଶୁ କାଜିକେଦାଏ, “ଇଙ୍ଗ୍ ଆପେକେ ସାର୍ତିଗୀ କାଜିପେ ତାନିଙ୍ଗ୍, ଚି ଆପେ କୋଏତେ ମିହୋଡ଼୍, ଅକନିଃ ଇଙ୍ଗ୍ଆଃ ଲୋଃ ଜୋମ୍ ତାନାଏ, ଇଙ୍ଗ୍‍କେ ସାବିଙ୍ଗ୍ ୟାଏ।” ଚିମ୍ତା ଇନ୍‍କୁ ନେୟା ଆୟୁମ୍ କେଦାକୋ, ଇନ୍‍କୁ ଦୁକୁ ଜାନାକୋ ହାର୍ ଇନ୍‍କୁ ମିହୋଡ଼୍-ମିହୋଡ଼୍ କେତେ ଇନିଃକେ କାଜିକେଦାକୋ, “ଚିନାଃ ଇନିଃ ଇଙ୍ଗ୍ ଦୋ ନାହାଲାଇଙ୍ଗ୍?” ଇନିଃ ଇନ୍‍କୁକେ କାଜିକେଦାଏ, “ଇନିଃ ବାରାଝାନ୍ କୁଲାକାନ୍ ଚେଲାକୋ ଏତେ ମିହୋଡ଼୍ ତାନିଃ, ଅକନିଃ ଆଜାଃ ହୋଲୋଙ୍ଗ୍ ଇଙ୍ଗ୍ଆଃ ଲୋଃ ମିୟାଃ ଥାଡ଼ିୟା ରେ ଜୋମେୟାଏ। ଚିୟାଃଚି ଇଙ୍ଗ୍ ମାନ୍‍ୱା ରାଃ ହୋନ୍, ଇଙ୍ଗ୍ଆଃ ବିଷାୟ୍ ରେ ଜେଲେକା ଅଲାକାନା, ଏନ୍‍ଲେକା ଇଙ୍ଗ୍ ଗୋଜୋଗାଇଙ୍ଗ୍; ମେନ୍ଦୋ ଏନ୍ ହୋଡ଼ ଲାଗିନ୍ ହାୟ୍ ଅକନିଜାଃ ହୋରାତେ ମାନ୍‍ୱା ରାଃ ହୋନ୍ ସାବୋଃ ତାନାଏ! ଏନ୍ ହୋଡ଼ କାଏ ଜାନାମ୍ କାନ୍ ରେ ଇନିଜାଃ ଲାଗିନ୍ ବୁଗିନ୍ ତାଇକେନା।” ହାର୍ ଚିମ୍ତାଙ୍ଗ୍ ଇନ୍‍କୁ ଜୋମ୍ ତାଇନାକୋ ଦୋ ୟୀଶୁ ହୋଲୋଙ୍ଗ୍ ଇଦିକେଦାଏ, ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ ଏମ୍‍କେଦାଏ, ଏନ୍ତେ ଏନାକେ କେଚାଃ କେଦାଏ, ହାର୍ ଚେଲାକୋକେ ଏମାଃ କୋୱାଏ, ହାର୍ କାଜିୟାଃକୋୱାଏ, “ଇଦିପେ ହାର୍ ଜୋମେ ପେ, ନେୟା ଇଙ୍ଗ୍ଆଃ ହୋଡ଼ମୋ ତାନାଃ।” ଏନ୍ତେ ଇନିଃ ଗିଲାସ୍ କେ ଅକଣ୍ଡେ ଆଙ୍ଗୁର୍-ରାଶି ତାଇକେନା ଇଦିକେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ, ହାର୍ ଚେଲାକୋକେ ଏମାଃ କୋୱାଏ; ହାର୍ ସବେନ୍ କୋ ଏନାଏତେ ନୁ କେଦାକୋ। ହାର୍ ଇନିଃ ଇନ୍‍କୁକେ କାଜିକେଦାଏ, “ନେ ଆଙ୍ଗୁର୍-ରାଶି ଇଙ୍ଗ୍ଆଃ ମାୟୋମ୍ ତାନାଃ। ନେୟା ଥିମ୍ବାଗି ହୋଡ଼ୋକୋ ଲାଗିନ୍ ପାପ୍ ରାଃ ଦାଣେ ରାଃ ହୋରାତେ ଲିଙ୍ଗୀଅଃ ତାନା, ନେୟା ମାୟୋମ୍ ରାଃ ନାୱା ନିୟାମ୍‍ଥଲ୍ ପାର୍ମେଶ୍ଵାର୍ ଆଜାଃ ହୋଡ଼ୋକୋ ଲୋଃ ଥୋଲ୍ ତାନାଏ। ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍, ନେୟା ତାୟୋମ୍ତେ ଇଙ୍ଗ୍ ଆଙ୍ଗୁର୍-ରାଶି କେ ଏନ୍ ହୁଲାଙ୍ଗ୍ ସାନ୍ତେ କାଇଙ୍ଗ୍ ନୁୱେୟା, ଚିମ୍ତାଙ୍ଗ୍ ସାନ୍ତେ ପାର୍ମେଶ୍ଵାର୍ ରାଃ ରାଇଜ୍ ରେ ନାୱା ଆଙ୍ଗୁର୍-ରାଶି କାଇଙ୍ଗ୍ ନୁୱେୟା।” ଏନ୍ତେ ଇନ୍‍କୁ ଫାସାହ୍ ପାରାବ୍ ରାଃ ଦୁରାଙ୍ଗ୍-ଭାଜାନ୍ କେତେ ୟୀରୁଶାଲେମ୍ ସାହାର୍ ରାଃ ବାହାରି ଜାଏତୁନ୍ ଦାରୁ ରାଃ ବୁରୁ ତେ ସେନ୍ ଜାନାକୋ। ଚିମ୍ତାଙ୍ଗ୍ ବୁରୁ ହୋରାତେ ଆକୋ ସେନ୍ ତାଇକେନାକୋ, ୟୀଶୁ ଇନ୍‍କୁକେ କାଜିକେଦାଏ, “ଆପେ ସବେନ୍ କୋ ଇଙ୍ଗ୍‍କେ ବାଗିଙ୍ଗ୍ ୟାପେ। ଚିୟାଃଚି ପାର୍ମେଶ୍ଵାର୍ ରାଃ ପୁଥି ରେ ଅଲାକାନା, ‘ଇଙ୍ଗ୍ ଇଙ୍ଗ୍ଆଃ ହୋଡ଼ୋକୋକେ ମିଣ୍ଡୀକୋ ଲେକା ଗୁପିତାନ୍ ନିଈକେ ଗୋଜିୟାଇଙ୍ଗ୍ ହାର୍ ହୋଡ଼ୋକୋ ମିଣ୍ଡୀକୋ ଲେକା ଛିତି-ଛାନ୍ କେନୋଗାକୋ।’ ଏନା ତାୟୋମ୍ତେ ଇଙ୍ଗ୍ ଇଙ୍ଗ୍ଆଃ ଜୀବିରିଃ ରାଃ ତାୟୋମ୍ତେ ଆପେୟାଃ ଏତେ ସିଦାରେ ଗାଲିଲୀ ଜିଲ୍ଲା ତେ ସେନାଇଙ୍ଗ୍।” ପାତ୍ରାସ୍ ଇନିଃକେ କାଜିକେଦାଏ, “ସବେନ୍ କୋ ଆମ୍‍କେ ବାଗେମ୍ ରେଦୋ ବାଗେ ଚାକୋ, ମେନ୍ଦୋ ଇଙ୍ଗ୍ କାଇଙ୍ଗ୍ ବାଗିୟା।” ୟୀଶୁ ପାତ୍ରାସ୍ କେ କାଜିକେଦାଏ, “ଇଙ୍ଗ୍ ଆମ୍‍କେ ସାର୍ତିଗୀ କାଜିମେ ତାନିଙ୍ଗ୍, ଚି ଇସିଙ୍ଗ୍ ଗି ନେ ନିଦା ରେ ସିମ୍‍କୋ ବାର୍ସା ରାଆ ସିଦାରେ, ଆମ୍ ଆପିସା ଇଙ୍ଗ୍‍କେ କାଇଙ୍ଗ୍ ସାରିୟା ମେନ୍ତେ କାଜିୟାମ୍।” ମେନ୍ଦୋ ପାତ୍ରାସ୍ ଆଡୋଃଗି କେଟେଃ ତେ କାଜିକେଦାଏ, “ଇଙ୍ଗ୍‍କେ ଆମାଃ ଲୋଃ ଗୋଜେନ୍ ହୋବାଅଃ ରେ ହଗି, ଇଙ୍ଗ୍ ଆମ୍‍କେ କାଇଙ୍ଗ୍ ସାରିୟା ମେନ୍ତେ ଚିଉଲା ହ କାଇଙ୍ଗ୍ କାଜିୟା।” ନେଲେକାଗି ଆଡୋଃ ସବେନ୍ କୋ ହଗି କାଜିକେଦାକୋ। ଚିମ୍ତାଙ୍ଗ୍ ୟୀଶୁ ଆଡୋଃ ଚେଲାକୋ ଗେଥ୍‍ସେମାନୀ ନୁତୁମ୍ ମିୟାଃ ଜାଗା ରେ ହିଜୁଃ ଲେନାକୋ, ହାର୍ ଇନିଃ ଆଜାଃ ଚେଲାକୋକେ କାଜିକେଦାଏ, “ନେତାଃ ରେ ଦୁବ୍ କାନ୍‍ପେ, ଚିମ୍ତାଙ୍ଗ୍ ସାନ୍ତେ ଇଙ୍ଗ୍ ବିନ୍ତି ୟାଇଙ୍ଗ୍।” ହାର୍ ଇନିଃ ପାତ୍ରାସ୍ ହାର୍ ୟାକୁବ୍ ହାର୍ ଯୋହାନ୍ କେ ଆଜାଃ ଲୋଃ ହୁଡିଙ୍ଗ୍ ସାଙ୍ଗିନ୍ ଗେନା ପାଡ଼୍ ଇଦି କେଃକୋୱାଏ; ହାର୍ ବାହୁତ୍ ଗି ଉଦାସ୍ ହାର୍ ଆକ୍‍ବାକାଅ ଜାନାଏ। ହାର୍ ଇନ୍‍କୁକେ କାଜିକେଦାଏ, “ଇଙ୍ଗ୍ଆଃ ମୋନ୍ ଥିମ୍ବାଗି ଦୁକୁ ରେ ମେନାଃ, ଇଙ୍ଗ୍ଆଃ ଜୀଉ ଅଡୋଙ୍ଗୋଃ ଲେକା ଆଟ୍‍କାରିଙ୍ଗ୍ ତାନା। ଆପେ ନେତାଃ ରେ ତାଇନ୍‍ପେ ହାର୍ ଏୟୋନ୍ ତାଇନ୍‍ପେ।” ଏନ୍ତେ ୟୀଶୁ ହୁଡିଙ୍ଗ୍ ଆୟୁର୍ ସେନ୍ ଜାନାଏ, ହାର୍ ଅତେ ରେ ଇକ୍ଡ଼ୁମ୍ କେତେ ବିନ୍ତି ଏଟେଃ କେଦାଏ ଚି, ହୋବା ଧାଡ଼ିୟୋଃ ରେଦୋ ନେ ସାମାୟ୍ ଆଜାଃ ତାଃ ଏତେ ଗେନା କେନୋଃ କା, ହାର୍ କାଜିକେଦାଏ, “ହେ ଆବା, ଆପୁ, ଆମାଃ ତେ ସବେନାଃ ହୋବା ଧାଡ଼ିୟୋଗା; ନେ ଦୁକୁ କେ ଇଙ୍ଗ୍ଆଃ ନାଡ଼େଏ ଏତେ ଆତୋମ୍ ତାମେ: ଏଣ୍ଡେରେ ଅଗି ଚିଲ୍‍କା ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍ ଏନ୍‍ଲେକା କାହା ମେନ୍ଦୋ ଚିଲ୍‍କା ଆମ୍ ସାନାଙ୍ଗ୍ ତାନାମ୍ ଏନ୍‍ଲେକାଗି ହୋବାଅଃକା।” ଚିମ୍ତାଙ୍ଗ୍ ୟୀଶୁ ହିଜୁଃ ଲେନାଏ ଦୋ ଇନ୍‍କୁକେ ଦୁଣୁମ୍ ତାନ୍ ନାମ୍ କେତେ ପାତ୍ରାସ୍ କେ କାଜିକେଦାଏ, “ହେ ଶିମୋନ୍, ଆମ୍ ଦୁଣୁମ୍ ତାନାମ୍? ଚିନାଃ ମିୟାଃ ଘାଣ୍ଟା ଲାଗିନ୍ ହ ଏୟୋନ୍ କାମ୍ ଧାଡ଼ିଜାନା? ଏୟୋନ୍ କାନ୍‍ପେ ହାର୍ ବିନ୍ତି କାତେପେ ଚି ଆପେ ପାପ୍ ରିକା ଲାଗିନ୍ ହାୟା ରେ ଆଲୋପେ ଉୟୁଗୋୱା। ଆପେୟାଃ ମୋନ୍ ଦୋ ବୁଗିନାଃ ରିକା ଲାଗିନ୍ ସାନାଙ୍ଗ୍ ତାନାଏ, ମେନ୍ଦୋ ହୋଡ଼ମୋ ନାରାଦୁରା ଗିୟାଃ।” ୟୀଶୁ ଆଡୋଃଗି ଇନ୍‍କୁକେ ବାଗେ ତାଃକୋୱାଏ ହାର୍ ସେନ୍ ଜାନାଏ, ଏନ୍ତେ ଏନ୍ କାଜିକୋ ଗି କାଜିକେତେ ବିନ୍ତି କେଦାଏ। ଏନ୍ତେ ଆଡୋଃଗି ହିଜୁଃକେତେ ଇନ୍‍କୁକେ ଦୁଣୁମ୍ ତାନ୍ ନାମ୍ କେଃକୋୱାଏ, ଚିୟାଃଚି ଇନ୍‍କୁ ଦୁଣୁମ୍ ତେ ଫେରେଃ ଲେନ୍ ତାଇନାକୋ; ହାର୍ କାକୋ ସାରିତାନା ଚି ଇନିଃକେ ଚିନାଃ କାଜି ରୁଆଡ଼ିୟାଲେ। ଆଡୋଃଗି ଆପିସା ରୁଆଡ଼୍ ହିଜୁଃକେତେ ଇନ୍‍କୁକେ କାଜିକେଦାଏ, “ନାଆ ସାନ୍ତେ ଆପେ ଦୁଣୁମ୍ ତାନାପେ ହାର୍ ସାଥାୱନ୍ ତାନାପେ? ହୋବାଜାନା! ନେଲେପେ, ଏନ୍ ସାମାୟ୍ ହିଜୁଃଜାନା; ମାନ୍‍ୱା ରାଃ ହୋନ୍ ପାପୀକୋୱାଃ ତିଈ ରେ ସାବୋଃ ତାନାଏ। ବିରିଃପେ! ଦୋଲା! ନେଲିପେ, ଇଙ୍ଗ୍‍କେ ସାସାବ୍ ଲାଗିନ୍ ଦେଙ୍ଗା ଏମେ ନିଈ ନାଡ଼େଏ ହିଜୁଃ ସେଟେର୍ କାନାଏ।” ଚିମ୍ତାଙ୍ଗ୍ ୟୀଶୁ ନେୟା କାଜି ତାଇନାଏ, ଚି ୟାହୁଦା ଅକଏ ବାରାଝାନ୍ କୁଲାକାନ୍ ଚେଲାକୋ ଏତେ ମିହୋଡ଼୍ ତାଇକେନାଏ। ଇନିଜାଃ ଲୋଃ ମିଃଥିମ୍ବା ହୋଡ଼ୋକୋ ତାଲ୍‍ୱାର୍ ହାର୍ ଲାଠି ଆଉକେତେ ଇମ୍ତାଗି ହିଜୁଃ ସେଟେର୍ ଜାନାକୋ। ନିକୁ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ହାର୍ ମାରିହୋଡ଼ୋକୋ ପାଡ଼େତେ କୁଲ୍‍ଲେନ୍ ତାଇକେନାକୋ। ୟୀଶୁ କେ ସାସାବ୍ ଲାଗିନ୍ ଦେଙ୍ଗା ରିକା ନିଈ ୟାହୁଦା ଇନ୍‍କୁକେ ନେୟା ଉଦୁବ୍ ଲେଃକୋ ତାଇନାଏ, ଚି ଅକନିଃକେ ଇଙ୍ଗ୍ ଦୁଲାଡ଼୍ ତେ ଚୁମାୟାଇଙ୍ଗ୍ ଇନିଃଗି ତାନିଃ। ଇନିଃକେ ସାବ୍ କେତେ ହୋସିଆର୍ ତେ ଇଦିକିପେ। ୟାହୁଦା ହିଜୁଃ ଲେନାଏ, ହାର୍ ଇମ୍ତାଗି ୟୀଶୁ ନାଡ଼େଏ ହିଜୁଃକେତେ କାଜିକେଦାଏ, ହେ ଗୁରୁ ହାର୍ ଇନିଃକେ ବାହୁତ୍ ଗି ଚୁମା କିଜାଏ। ଏନ୍ତେ ଇନ୍‍କୁ ଇନିଃକେ ପେଡ଼େଏ ଲାଗାଅ କେତେ ସାବ୍ କିଜାକୋ ହାର୍ ବାନ୍ଦି ବାଇ କିଜାକୋ। ଇନ୍‍କୁ ଏତେ ଅକନ୍‍କୋ ନାଡ଼େଏ ତିଙ୍ଗୁ ଲେନ୍ ତାଇନାକୋ, ମିହୋଡ଼୍ ଚେଲା ତାଲ୍‍ୱାର୍ ଥାଇଃ କେତେ ମାରାଙ୍ଗ୍ ୟାଜାକ୍ ରାଃ ଦାସୀ ଚେତାନ୍ ରେ ଚାଲାଓ କେଦାଏ ହାର୍ ଇନିଜାଃ ଲୁତୁର୍ ଖାଣ୍ଡାଅ ଜାନା। ୟୀଶୁ ଇନ୍‍କୁକେ କାଜିକେଦାଏ, “ଚିନାଃ ଆପେ ଡାକୁ ଆଟ୍‍କାର୍ କେତେ ଇଙ୍ଗ୍‍କେ ସାସାବ୍ ଲାଗିନ୍ ତାଲ୍‍ୱାର୍ ହାର୍ ଲାଠି ଆଉକେତେ ଅଡୋଙ୍ଗ୍ କାନାପେ? ଇଙ୍ଗ୍ ଦୋ ସବେନ୍ ହୁଲାଙ୍ଗ୍ ମାନ୍ଦିର୍ ରାଃ ରାଚା ରେ ଆପେୟାଃ ଲୋଃ ତାଇନ୍ କେତେ ଶିଖାଅ ପେ ତାଇନାଇଙ୍ଗ୍, ହାର୍ ଇମ୍ତାଙ୍ଗ୍ ଆପେ ଇଙ୍ଗ୍‍କେ କାପେ ବାନ୍ଦି ବାଇ କେଦିଙ୍ଗା, ମେନ୍ଦୋ ନେୟା ନେୟାଲାଗିନ୍ ହୋବାଜାନା ଚି ପାବିତାର୍ ପୁଥି ରାଃ କାଜି ପୁରାଅଃ କା।” ଏନ୍ ସାମାୟ୍ ରେ ସବେନ୍ ଚେଲାକୋ ୟୀଶୁ କେ ବାଗେ କେତେ ନିର୍ ଜାନାକୋ। ମିୟାଃ ଜାୱାନ୍ ଆଜାଃ ଡେଣ୍ଡ୍ଲେ ହୋଡ଼ମୋ ରେ ଚାଦାର୍ ଉୟୁକାନ୍ ୟୀଶୁ କେ ଅତୋଙ୍ଗି ତାଇନାଏ, ହାର୍ ହୋଡ଼ୋକୋ ଇନିଃକେ ସାବ୍ କିଜାକୋ, ମେନ୍ଦୋ ଇନିଃ ଚାଦାର୍ ବାଗେ କେତେ ଡେଣ୍ଡ୍ଲେ ହୋଡ଼ମୋ ନିର୍ ଜାନାଏ। ଏନ୍ତେ ଇନ୍‍କୁ ୟୀଶୁ କେ ମାରାଙ୍ଗ୍ ୟାଜାକ୍ ରାଃ ଅଡ଼୍ଆଃ ତାଃ ଇଦିକିଜାକୋ, ହାର୍ ସବେନ୍ ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ହାର୍ ଆଇନ୍ ଗୁରୁକୋ ଇନିଜାଃ ଏନ୍ତାଃ ହୁଣ୍ଡି ଜାନାକୋ। ପାତ୍ରାସ୍ ସାଙ୍ଗିନ୍ ଏତେ ଇନିଜାଃ ଦୋୟା-ଦୋୟା ମାରାଙ୍ଗ୍ ୟାଜାକ୍ ରାଃ ରାଚା ସାନ୍ ଭିତାର୍ ସେନ୍ ଜାନାଏ, ହାର୍ ମାନ୍ଦିର୍ କେ ହୋରୋତାନ୍ କୋଲୋଃ ଦୁବ୍ କେତେ ସେଙ୍ଗେଲ୍ ଜୁରୁବ୍ ଏଟେଃ କେଦାଏ। ପ୍ରାଧାନ୍ ୟାଜାକ୍‍କୋ ହାର୍ ୟାହୁଦୀ ମାରାଙ୍ଗ୍‍ସାଭା ରେନ୍ ସବେନ୍ ସାଦାଶ୍ୟା କୋ ୟୀଶୁ କେ ଗୋଜି ଲାଗିନ୍ତେ ଇନିଜାଃ ବିରୋଧ୍ ରେ ବେଦା ଗୋୱା ଏମେ ଲାଗିନ୍ ହୋଡ଼ ନାମ୍ ବାଡ଼ା ତାଇକେନାକୋ, ମେନ୍ଦୋ କାକୋ ନାମ୍ କେଦା। ଚିୟାଃଚି ଥିମ୍ବା ହୋଡ଼ୋକୋ ଇନିଜାଃ ବିରୋଧ୍ ରେ ବେଦା ଗୋୱା ଏମ୍ ତାଇନାକୋ, ମେନ୍ଦୋ ଇନ୍‍କୁୱାଃ ଗୋୱା ମିୟାଃ ଲେକା କା ତାଇକେନା। ଆଖିର୍ ରେ, ଚିମିନାଙ୍ଗ୍ ହୋଡ଼ୋକୋ ବିରିଃ କେତେ ଇନିଜାଃ ବିରୁଦ୍ଧ୍ ରେ ନେୟା ବେଦା ଗୋୱା ଏମ୍‍କେଦାକୋ। “ଆଲେ ନିଈକେ ନେୟା କାଜିତାନ୍ ଆୟୁମ୍ କେଦାଲେ, ‘ଇଙ୍ଗ୍ ନେ ହୋଡ଼ୋକୋ ତେ ବାଇକାନ୍ ମାନ୍ଦିର୍ କେ ଧାଶୁଡ଼୍ ତାଃଇଙ୍ଗ୍, ହାର୍ ତିନ୍ ଦିନ୍ ରେ ଏଟାଃ ବାଇୟାଇଙ୍ଗ୍, ଅକନାଃ ହୋଡ଼ୋକୋ ଏତେ କା ବାଇକାନୋୱା।’ ” ନେୟା ରେ ହଗି ଇନ୍‍କୁୱାଃ ଗୋୱା ମିଃ ଲେକା କା ହୋବାଜାନା। ଏନ୍ତେ ମାରାଙ୍ଗ୍ ୟାଜାକ୍ ୟାହୁଦୀ ମାରାଙ୍ଗ୍‍ସାଭା ଆୟୁର୍ ରେ ତିଙ୍ଗୁ କେତେ ୟୀଶୁ କେ କୁଲିକିଜାଏ, “ଆମ୍ ଜେତ୍ନାଃ କାମ୍ କାଜିରୁଆଡ଼୍ ତାନାମ୍? ନେ ହୋଡ଼ୋକୋ ଆମାଃ ବିରୋଧ୍ ରେ ଚିକାନାଃ ଗୋୱା ଏମ୍ ତାନାକୋ?” ମେନ୍ଦୋ ଇନିଃ ହାପାଗି ତାଇନ୍ ଜାନାଏ, ହାର୍ ଜାହାନାଃ କାଏ କାଜିରୁଆଡ଼୍ କିଜାଏ। ମାରାଙ୍ଗ୍ ୟାଜାକ୍ ଇନିଃକେ ଆଡୋଃଗି କୁଲିକିଜାଏ, “ଚିନାଃ ଆମ୍ ଏନ୍ ପାର୍ମେଶ୍ଵାର୍ କେ ଆଲେ ସୁସାରି ନିଜାଃ ହୋନ୍ ମାସୀହ୍ ତାନ୍‍ମେ?” ୟୀଶୁ କାଜିକେଦାଏ, “ହାଁ, ଇଙ୍ଗ୍ ତାନିଙ୍ଗ୍। ହାର୍ ଆପେ ଇଙ୍ଗ୍‍କେ ମାନ୍‍ୱା ରାଃ ହୋନ୍ କେ ସବେନ୍ ଏତେ ପେଡ଼େଜାନ୍ ରାଃ ଜୋମ୍ ପାଡ଼୍ ରେ ଦୁବାକାନ୍, ହାର୍ ରିମିଲ୍‍ଦିଶୁମ୍ ରାଃ ରିମିଲ୍ ଲୋଃ ହିଜୁଃ ତାନ୍ ନେଲିଙ୍ଗ୍‍ୟାପେ।” ଏନ୍ତେ ମାରାଙ୍ଗ୍ ୟାଜାକ୍ ଆଜାଃ ଲିଜାଃ ଚାଗାଡ଼୍ କେତେ କାଜିକେଦାଏ, “ନାଆ ଆବୁକେ ଗୋୱା କୋରାଃ ଚିକାନ୍ ଦାର୍‍କାର୍? ଆପେ ନେୟା ପାର୍ମେଶ୍ଵାର୍ କେ ନିନ୍ଦାତାନ୍ ଆୟୁମ୍ କେଦାପେ। ଆପେୟାଃ ଚିନାଃ ବିଚାର୍ ତାନାଃ?” ସବେନ୍ ୟାହୁଦୀ ମାରାଙ୍ଗ୍‍ସାଭା ରେନ୍ ସାଦାଶ୍ୟା କୋ କାଜିକେଦାକୋ, ଇନିଃକେ ଦୋଷୀ ନାମ୍ କିଜାକୋ, ହାର୍ ଏନ୍ ଦୋଷ୍ ଲାଗିନ୍ ଗୋନୋଏଃ ନାମେ ଲେକାନିଃ ତାନିଃ କାଜିକିଜାକୋ। ଏନ୍ତେ ଅକଏ-ଅକଏ ଇନିଃକେ ବେଏଃ କିଜାକୋ, ହାର୍ ଅକଏ-ଅକଏ ଇନିଜାଃ ମେଏଃମୁହାଡ଼୍ କେ ଦାଲୋବ୍ କିଜାକୋ ହାର୍ ଇନିଃକେ ତିଈ ମୁଠାତେ ବିଡ଼ା କିଜାକୋ, ହାର୍ ଇନିଃକେ ଲାନ୍ଦାତାନ୍ ଲୋଃ କାଜିକିଜାକୋ, “ଆୟାର୍‍କାଜି କାଜିମ୍!” ଅକଏ ଆମ୍‍କେ ବିଡ଼ା କେଃମେୟାଏ କାଜିମ୍, ଏନ୍ତେ ମାନ୍ଦିର୍ କେ ହୋରୋତାନ୍ କୋ ଇନିଃକେ ଇନ୍‍କୁ ଏତେ ଇଦିକିଜାକୋ ଏନ୍ତେ ସାବ୍ କେତେ ଥାପ୍ଡ଼ାଅ କିଜାକୋ। ଚିମ୍ତାଙ୍ଗ୍ ପାତ୍ରାସ୍ ଲାଥାର୍ ରାଚା ରେ ତାଇନ୍ କେନାଏ, ଦୋ ମାରାଙ୍ଗ୍ ୟାଜାକ୍ କୋୱାଃ ଦାସୀ କୁଡ଼ି କୋଏତେ ମିହୋଡ଼୍ ଏନ୍ତାଃ ହିଜୁଃ ଲେନାଏ। ହାର୍ ପାତ୍ରାସ୍ କେ ସେଙ୍ଗେଲ୍ ଜୁରୁବ୍ ତାନ୍ ନେଲ୍‍କେତେ ଇନିଃକେ ଧ୍ୟାନ୍‍ତେ ନେଲ୍ କିଜାଏ ହାର୍ କାଜିକିଜାଏ, “ଆମ୍ ହଗି ଦୋ ଏନ୍ ନାଜ୍ରେଥିୟା ୟୀଶୁ ଲୋଃ ତାଇକେନାମ୍।” ଇନିଃ ମାନା କିଜାଏ, ହାର୍ କାଜିକେଦାଏ, “ଇଙ୍ଗ୍ ଦୋ କାଇଙ୍ଗ୍ ସାରିତାନା ହାର୍ କାଇଙ୍ଗ୍ ବୁଝାଅଃ ତାନା ଚି ଆମ୍ ଚିନାଃ କାଜିତାନାମ୍।” ଏନ୍ତେ ଇନିଃ ରାଚା ଦୁହାର୍ ପାଡ଼୍ ଅଡୋଙ୍ଗ୍ ଜାନାଏ, ହାର୍ ସିମ୍ ରାଆ କେଦାଏ। ଏନ୍ ଦାସୀ କୁଡ଼ି ଇନିଃକେ ନେଲ୍‍କେତେ ଇନିଜାଃ ନାଡ଼େଏ ରେ ତିଙ୍ଗୁ ଲେନ୍ ହୋଡ଼ୋକୋକେ ଆଡୋଃଗି କାଜିୟାଃକୋୱାଏ ଚି, “ନିଈ ଇନିଜାଃ ଚେଲାକୋ ଏତେ ମିହୋଡ଼୍ ତାନିଃ।” ମେନ୍ଦୋ ଇନିଃ ଆଡୋଃଗି ମାନା କିଜାଏ। ଏନ୍ତେ ହୁଡିଙ୍ଗ୍ ସାମାୟ୍ ତାୟୋମ୍ତେ ଇନ୍‍କୁ ଅକନ୍‍କୋ ନାଡ଼େଏ ରେ କୋ ତିଙ୍ଗୁ ଲେନ୍ ତାଇନା ପାତ୍ରାସ୍ କେ କାଜିକିଜାକୋ, “ସାର୍ତିଗୀ ଆମ୍ ଇନ୍‍କୁ ଏତେ ମିହୋଡ଼୍ ତାନ୍‍ମେ, ଚିୟାଃଚି ଆମ୍ ଗାଲିଲୀ ସାହାର୍ ରେନ୍ କୋ ଲେକା ବାକାଣ୍ ତାନାମ୍।” ଏନ୍ତେ ଇନିଃ ଆଏଃ ଆପାନ୍ କେଗି ସାର୍ପାଅ ତାନ୍ ହାର୍ କିରିୟା ଜୋମ୍‍ତାନ୍ କାଜି ଏଟେଃ କେଦାଏ, “ଇଙ୍ଗ୍ ଏନ୍ ହୋଡ଼ କେ, ଅକନିଜାଃ ବିଷାୟ୍ ରେ ଆପେ କାଜି ତାନାପେ କାଇଙ୍ଗ୍ ସାରିୟା।” ଏନ୍ତେ ଇମ୍ତାଗି ଆଡୋଃ-ମିଶା ସିମ୍ ରାଆ କେଦାଏ। ପାତ୍ରାସ୍ କେ ଏନ୍ କାଜି ଅକନାଃ ୟୀଶୁ ଇନିଃକେ କାଜି ଲିଜାଏ ପାହୋମ୍ ହିଜୁଃଲେନା, “ସିମ୍‍କୋ ବାର୍ସା ରାଆ ସିଦାରେ ଆମ୍ ଆପିସା ଇଙ୍ଗ୍‍କେ କାଇଙ୍ଗ୍ ସାରିୟା ମେନ୍ତେ କାଜିୟାମ୍।” ଏନ୍ତେ ପାତ୍ରାସ୍ ଦୁକୁ ଜାନାଏ ହାର୍ ରାଆ କେଦାଏ। ସେତାଃ ଇଦାନ୍ ହୋବାଅଃ ଲୋଃ ଗି ସେକାଡ଼୍ ଗି ପ୍ରାଧାନ୍ ୟାଜାକ୍‍କୋ, ମାରିହୋଡ଼ୋକୋ, ହାର୍ ଆଇନ୍ ଗୁରୁକୋ ମେନ୍ଦୋ ସବେନ୍ ୟାହୁଦୀ ମାରାଙ୍ଗ୍‍ସାଭା ରେନ୍ ସବେନ୍ ସାଦାଶ୍ୟା କୋ ୟୀଶୁ ରାଃ ବିଷାୟ୍ ରେ ବିଚାର୍ କେଦାକୋ। ଏନ୍ତେ ଇନିଃକେ ଥୋଲ୍ ରିକା କିଜାକୋ, ହାର୍ ଇନିଃକେ ଇଦିକେତେ ପିଲାତୁସ୍ ନୁତୁମ୍ ରୋମାନ୍ ରାଇଜ୍ କୋୱାଃ ହାକିମ୍ ରାଃ ଅଡ଼୍ଆଃ ତେ ଆଉକିଜାକୋ। ଏନ୍ତେ ପିଲାତୁସ୍ ଇନିଃକେ କୁଲିକିଜାଏ, “ଚିନାଃ ଆମ୍ ୟାହୁଦୀ କୋୱାଃ ରାଜା ତାନ୍‍ମେ?” ଇନିଃ ହିନିଃକେ କାଜିରୁଆଡ଼୍ କିଜାଏ, “ଆମ୍ ସାର୍ତି କାଜି ତାନାମ୍।” ହାର୍ ପ୍ରାଧାନ୍ ୟାଜାକ୍‍କୋ ୟୀଶୁ କେ ଥିମ୍ବାଗି କାଜି କୋରେ ଦୋଷ୍ ଲାଗାଅ ତାଇନାକୋ। ଏନ୍ତେ ପିଲାତୁସ୍ ଇନିଃକେ ଆଡୋଃଗି କୁଲିକିଜାଏ, “ଚିନାଃ ଲାଗିନ୍ ଆମ୍ ଜେତ୍ନାଃ କାମ୍ କାଜିରୁଆଡ଼୍ ତାନା? ନେଲେମ୍, ନିକୁ ଆମାଃ ରେ ଚିମିନାଙ୍ଗ୍ କାଜି କୋରେ ଦୋଷ୍ ଲାଗାଅ ତାନାକୋ।” ମେନ୍ଦୋ ୟୀଶୁ ଜେତ୍ନାଃ କାଏ କାଜିରୁଆଡ଼୍ କିଜାଏ, ନେତାଃ ସାନ୍ତେ ଚି ପିଲାତୁସ୍ ଆକ୍‍ଦାନ୍ଦା ଜାନାଏ। ସବେନ୍ ଶିର୍ମା ଫାସାହ୍ ପାରାବ୍ ରେ ପିଲାତୁସ୍ ସାଦାଏଗି ମିହୋଡ଼୍ ଜେଲ୍ଅଡ଼୍ଆଃ ରେ ବାନ୍ଦିକାନ୍ ନିଈକେ ଅକନିଃକେ ହୋଡ଼ୋକୋ ସାନାଙ୍ଗ୍ ତାଇନାକୋ, ଇନିଃକେ ଇନ୍‍କୁୱାଃ ଲାଗିନ୍ ବାଗେ ତାଇନାଏ। ଏନ୍ ସାମାୟ୍ ରେ ବାରାବ୍ବା ନୁତୁମ୍ ମିୟାଃ ହୋଡ଼ ଏନ୍ କ୍ରାନ୍ତୀକାରୀ ହୋଡ଼ୋକୋ ଲୋଃ ଜେଲ୍ଅଡ଼୍ଆଃ ରେ ତାଇକେନାଏ, ଅକନ୍‍କୋ ରୋମାନ୍ ରାଇଜ୍ ବିରୁଦ୍ଧ୍ ରେ ହାଲାଗୁଲାତାନ୍ ଲୋଃ ଚିମିନାଙ୍ଗ୍ ସିପାହୀ କୋକେ ଗୋଏଃ ଲେଃ କୋୱାକୋ। ଏନା ଲାଗିନ୍ ମିଃଥିମ୍ବା ହୋଡ଼ୋକୋ ପିଲାତୁସ୍ ତାଃ ହିଜୁଃକେତେ କାଜିକିଜାକୋ, “ଜେଲେକା ଆମ୍ ସବେନ୍ ଶିର୍ମା ଆଲେୟାଃ ଲାଗିନ୍ ସାଦାଏଗି ରିକା ଆଉ ତାନାମ୍ ଏନ୍‍ଲେକାଗି ରିକାଏମେ।” ପିଲାତୁସ୍ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଚିନାଃ ଆପେ ସାନାଙ୍ଗ୍ ତାନାପେ ଚି, ଇଙ୍ଗ୍ ଆପେୟାଃ ଲାଗିନ୍ତେ ୟାହୁଦୀ କୋୱାଃ ରାଜା କେ ବାଗେ ତାଃଇଙ୍ଗ୍?” ଚିୟାଃଚି ଇନିଃ ସାରି ତାଇନାଏ, ପ୍ରାଧାନ୍ ୟାଜାକ୍‍କୋ ୟୀଶୁ କେ ହିସିଙ୍ଗା ତେ ସାବ୍ ରିକା ଲିଜାକୋ। ମେନ୍ଦୋ ପ୍ରାଧାନ୍ ୟାଜାକ୍‍କୋ ହୋଡ଼ୋକୋକେ ଉସ୍କୁର୍ କେଦାକୋ, ଚି ଇନିଃ ବାରାବ୍ବା କେଗି ଇନ୍‍କୁୱାଃ ଲାଗିନ୍ ବାଗି ତାଇୟାଏ। ନେୟା ଆୟୁମ୍‍କେତେ ପିଲାତୁସ୍ ଇନ୍‍କୁକେ ଆଡୋଃଗି କୁଲିକେଃକୋୱାଏ, “ଏଣ୍ଡେ ଅକନିଃକେ ଆପେ ୟାହୁଦୀ କୋୱାଃ ରାଜା କାଜିତାନାପେ, ଇନିଃକେ ଇଙ୍ଗ୍ ଚିନାଃ ଚିକାଇୟାଇଙ୍ଗ୍?” ଏନ୍ତେ ହୋଡ଼ୋକୋ କାଉରି କେଦାକୋ, “ଇନିଃକେ କ୍ରୁଶ୍ ରେ ରାକାବ୍ ଗୋଜି ମେ!” ପିଲାତୁସ୍ ଇନ୍‍କୁକେ କାଜିକେଦାଏ, “ଚିନାଃ ଲାଗିନ୍, ନିଈ ଚିକାନାଃ ଦୋଷ୍ ରିକା କାଦାଏ?” ମେନ୍ଦୋ ହୋଡ଼ୋକୋ ଆଡୋଃଗି କାଉରି କେଦାକୋ, “ଇନିଃକେ କ୍ରୁଶ୍ ରେ ରାକାବ୍ ଗୋଜି ମେ!” ଏନ୍ତେ ପିଲାତୁସ୍ ହୋଡ଼ୋକୋକେ ଖୁସ୍ ରିକା ଲାଗିନ୍, ବାରାବ୍ବା କେ ଇନ୍‍କୁୱାଃ ଲାଗିନ୍ ବାଗି ତାଦାଏ। ଏନ୍ତେ ଇନିଃ ୟୀଶୁ କେ କୋଡ୍ରା ବିଡ଼ା ରିକା କେତେ ରୋମାନ୍ ସିପାହୀ କୋକେ ଜିମା ତାଃ କୋୱାଏ, ଚି କ୍ରୁଶ୍ ରେ ରାକାବୋଃ ଚାଏ। ସିପାହୀକୋ ଇନିଃକେ କାଚ୍‍ହାରି ଭିତାର୍ ରାଃ ରାଚା ତେ ଇଦିକିଜାକୋ ଅକନାଃ ପ୍ରେତୋରିୟୁମ୍ କାଜିୟୋଃ ୱା, ହାର୍ ସବେନ୍ ପାଲ୍‍ଟାନ୍ କୋକେ କେଡ଼ା ଆଉ ଲେଃ କୋୱାକୋ। ଏନ୍ତେ ଇନ୍‍କୁ ଇନିଃକେ ଟୋକୋ ରାଙ୍ଗ୍ ରାଃ ଲିଜାଃ ତୁସିଙ୍ଗ୍ କିଜାକୋ ହାର୍ ଜାନୁମ୍ ରାଃ ମୁକୁଟ୍ ଗାଲାଙ୍ଗ୍ କେତେ ଇନିଜାଃ ବୋଅ ରେ ତୁସିଙ୍ଗ୍ ତାଇଜାକୋ। ହାର୍ ନେୟା ଲାନ୍ଦାତାନ୍ ଲୋଃ ଇନିଃକେ ଜୋହାର୍ କିଜାକୋ “ହେ ୟାହୁଦୀ କୋୱାଃ ରାଜା ଜୋହାର୍!” ଇନ୍‍କୁ ଇନିଜାଃ ବୋଅ ରେ ମାଆସୋଟା ତେ ବିଡ଼ାଇ ତାଇନାକୋ ହାର୍ ଇନିଜାଃ ରେ ବେଜି ତାଇନାକୋ ହାର୍ ଇକ୍ଡ଼ୁମ୍ କେତେ ଇନିଃକେ ଲାନ୍ଦାତାନ୍ ଲୋଃ ଜୋହାର୍ ତାଇନାକୋ। ଚିମ୍ତାଙ୍ଗ୍ ଇନ୍‍କୁ ଇନିଃକେ ଲାନ୍ଦା ଛାବା କିଜାକୋ, ଦୋ ଇନିଜାଃ ଏତେ ଟୋକୋ ରାଙ୍ଗ୍ ରାଃ ଲିଜାଃ ଆଡ଼୍‍ଗୁ ରାଡ଼ାକେତେ ଇନିଜାଃ ଗି ଲିଜାଃ ତୁସିଙ୍ଗ୍ କିଜାକୋ; ଏନ୍ତେ ଇନିଃକେ କ୍ରୁଶ୍ ରେ ରାକାବ୍ ଲାଗିନ୍ ସାହାର୍ ବାହାରି ତେ ଇଦିକିଜାକୋ। ଚିମ୍ତା ଇନ୍‍କୁ ସାହାର୍ ଏତେ ବାହାରି ଅଡୋଙ୍ଗୋଃ ତାଇନାକୋ ଇମ୍ତା ଶିମୋନ୍ ନୁତୁମ୍ କୁରେନୀ ସାହାର୍ ରେନ୍ ମିୟାଃ ହୋଡ଼, ଜାପାଃ ହାତୁ ଏତେ ୟୀରୁଶାଲେମ୍ ସାହାର୍ ହିଜୁଃ ତାଇନାଏ। ଇନିଃ ସିକାନ୍ଦାର୍ ହାର୍ ରୁଫୁସ୍ ଗାଃ ଆପୁ ତାଇକେନାଏ। ସିପାହୀକୋ ଇନିଃକେ ଆନାଚୁ ଏମ୍ କିଜାକୋ, ଚି ୟୀଶୁ ରାଃ କ୍ରୁଶ୍ କେ ଏନ୍ ଜାଗା ସାନ୍ତେ ଉଠାଓ ଇଦିୟାଏ, ଅକତାଃ କ୍ରୁଶ୍ ରାକାବି ୟାକୋ। ହାର୍ ସିପାହୀକୋ ୟୀଶୁ କେ ଗୋଲ୍‍ଗୋଥା ନୁତୁମ୍ ଜାଗା ତେ ଆଉଲିଜାକୋ, ଏନାରାଃ ମାନେ ଖୋପ୍‍ଡ଼ି ରାଃ ଜାଗା ତାନାଃ। ଏନ୍ତାଃ ଇନିଃକେ ରାନୁ ମେଶାକାନ୍ ଆଙ୍ଗୁର୍ ରାଶି ଏମାଇଜାକୋ, ମେନ୍ଦୋ ଇନିଃ ନୁୱେ ଲାଗିନ୍ ମାନା କେଦାଏ। ଏନ୍ତେ ଇନ୍‍କୁ ଇନିଃକେ କ୍ରୁଶ୍ ରେ କିଲା କେତେ ରାକାବ୍ କିଜାକୋ, ହାର୍ ଇନିଜାଃ ଲିଜାଃ ଇଦି ଲାଗିନ୍ ଚିଠି ଉୟୁଃକେତେ ସାଲା କେଦାକୋ ଚି ଅକଏକେ ଚିନାଃ ନାମୋଗା, ହାର୍ ଏନାକେ ହାଟିଙ୍ଗ୍ ଜାନାକୋ। ଏନ୍ତେ ସେତାଃ ନାଓ ଷାଡି ଲେନା, ଚିମ୍ତା ଇନ୍‍କୁ ଇନିଃକେ କ୍ରୁଶ୍ ରେ କିଲା ରାକାବ୍ କିଜାକୋ। ହାର୍ ଇନିଜାଃ ଦୋଷ୍ ଚିଠି ଅଲ୍ କେତେ ଇନିଜାଃ ବୋଅ ଚେତାନ୍ କ୍ରୁଶ୍ ରେ ଲାଗାଅ କେଦାକୋ, “ୟାହୁଦୀ କୋୱାଃ ରାଜା।” ଇନ୍‍କୁ ୟୀଶୁ ଲୋଃ ବାରିୟା ଡାକୁକୋକେ, ମିୟାଃ ଇନିଜାଃ ଜୋମ୍ ପାଡ଼୍ ରେ ହାର୍ ମିୟାଃ ଇନିଜାଃ ଲେଙ୍ଗା ପାଡ଼୍ ରେ କ୍ରୁଶ୍ ରେ କିଲା ରାକାବ୍ କେଦାକୋ। ଏନ୍‍ଲେକାତେ ପାବିତାର୍ ପୁଥି ରାଃ ଏନ୍ ବାଚାନ୍ ପୁରା ଜାନା, “ଇନିଃ ପାପୀକୋ ଲୋଃ ଲେକା ଜାନାଏ।” ହାର୍ ହୋରା ରେ ସେନ୍‍ତାନ୍ କୋ ବୋଅ ହିଲାଅ-ହିଲାଅ କେତେ ହାର୍ ନେୟା କାଜିକେତେ ଇନିଜାଃ ନିନ୍ଦା ତାଇନାକୋ, “ବାଃ! ମାନ୍ଦିର୍ କେ ଧାଶୁଡ଼୍ ନିଈ, ହାର୍ ତିନ୍ ଦିନ୍ ରେ ବାଇନିଃ, କ୍ରୁଶ୍ ଏତେ ଆଡ଼୍‍ଗୁ କେତେ ଆମ୍ତେଗୀ ବାଞ୍ଚାଅଃ ମେ।” ନେଲେକାତେ ପ୍ରାଧାନ୍ ୟାଜାକ୍‍କୋ ହଗି, ଆଇନ୍ ଗୁରୁ କୋଲୋଃ ଆକୋ ରେ ଲାନ୍ଦା କେତେ କାଜି ତାଇନାକୋ, “ନିଈ ଦୋ ଏଟାଃ କୋକେ ବାଞ୍ଚାଅ କେଃକୋୱାଏ, ମେନ୍ଦୋ ଆଏଃ ଗି କାଏ ବାଞ୍ଚାଅ ଧାଡ଼ିତାନା! ଇସ୍ରାଏଲ୍ ଦିଶୁମ୍ ରାଃ ରାଜା, ମାସୀହ୍, ନାଆ କ୍ରୁଶ୍ ଏତେ ଆଡ଼୍‍ଗୁନ୍ କାଏ ଚି ଆଲେ ନେଲ୍‍କେତେ ବିଶ୍ଵାସ୍ ୟାଲେ।” ହାର୍ ଅକନ୍ କିନ୍ ଇନିଜାଃ ଲୋଃ କ୍ରୁଶ୍ ରେ କିନ୍ ରାକାବ୍ ଲେନ୍ ତାଇନା, ଇନ୍‍କିନ୍ ଅଗି ଇନିଜାଃ ନିନ୍ଦା ତାଇକେନାକିନ୍। ଆଡୋଃ ବାରା ବାଜେ ଶିଙ୍ଗି ସାମାୟ୍ ରେ ପୁରା ଦିଶୁମ୍ ରେ ନୁବାଃ ଜାନା, ହାର୍ ଶିଙ୍ଗି ତିନ୍ ବାଜେ ସାନ୍ତେ ତାଇଜାନା। ଶିଙ୍ଗି ତିନ୍ ବାଜେ ସାମାୟ୍ ରେ ୟୀଶୁ ମାରାଙ୍ଗ୍ ଆୱାଜ୍ ତେ କାଉରି କେତେ କାଜିକେଦାଏ, “ଇଲୋଇ, ଇଲୋଇ, ଲାମା ସାବାକ୍ତାନୀ?” ଏନାରାଃ ମାନେ ନେୟା ତାନାଃ, “ହେ ଇଙ୍ଗ୍ଆଃ ପାର୍ମେଶ୍ଵାର୍, ହେ ଇଙ୍ଗ୍ଆଃ ପାର୍ମେଶ୍ଵାର୍, ଆମ୍ ଇଙ୍ଗ୍‍କେ ଚିନାଃ ମେନ୍ତେ ବାଗି ତାଦିଙ୍ଗାମ୍?” ଅକନ୍‍କୋ ନାଡ଼େଏ ରେ ତିଙ୍ଗୁ ଲେନ୍ ତାଇନାକୋ, ଇନ୍‍କୁ ଏତେ ଚିମିନାଙ୍ଗ୍ କୋ ନେୟା ଆୟୁମ୍ କେଦାକୋ ହାର୍ କାକୋ ବୁଝାଅ କେତେ କାଜିକେଦାକୋ, “ନେଲିପେ, ନିଈ ଏଲିୟା ନାବୀ କେ ଦେଙ୍ଗା ଆସି ଲାଗିନ୍ ହାକାୱି ତାନାଏ।” ହାର୍ ମିହୋଡ଼୍ ନିର୍ କେତେ ସ୍ପଞ୍ଜ କେ ଜୋଜୋ ଆଙ୍ଗୁର୍ ରାଶି ରେ ତୁପୁ କେଦାଏ, ହାର୍ ମାଆସୋଟା ରାଃ ଆଗା ରେ ମାଣ୍ଡାଅ କେତେ ଇନିଃକେ ଚୋପୋଃ କିଜାଏ। ହାର୍ କାଜିକେଦାଏ, “ଆଉରି, ନେଲେୟାବୁ, ଏଲିୟା ନାବୀ ଇନିଃକେ ଆଡ଼୍‍ଗୁ ଲାଗିନ୍ ହିଜୁଃ ତାନାଏ ଚି କାହା।” ଏନ୍ତେ ୟୀଶୁ ଜୋର୍ତେ କାଉରି କେତେ ଗୋଏଃ ଜାନାଏ। ଏନ୍ତେ ୟାହୁଦୀ-ମାନ୍ଦିର୍ ରାଃ ମୋଟା ପାର୍ଦା ଅକନାଃ ସବେନ୍ କୋକେ ଭିତାର୍ ପାର୍ମେଶ୍ଵାର୍ ତାଇନ୍ ତାଃ ଛେକାଃ ତାଇନାଏ, ଚେତାନ୍ ଏତେ ଲାଥାର୍ ସାନ୍ତେ ଚାଗାଡ଼୍ କେତେ ବାର୍ ଖାଣ୍ଡା ହୋବାଜାନା। ସିପାହୀ କୋୱାଃ ଗୋମ୍‍କେ ଅକନିଃ ଇନିଜାଃ ନାଡ଼େଏ ରେ ତିଙ୍ଗୁ ଲେନ୍ ତାଇନାଏ, ଚିମ୍ତାଙ୍ଗ୍ ୟୀଶୁ କେ ନେଲେକା କାଉରିତାନ୍ ଲୋଃ ଜୀଉ ବାଗିତାନ୍ ନେଲ୍ କିଜାଏ, ଦୋ ଇନିଃ କାଜିକେଦାଏ, “ସାର୍ତିଗୀ ନେ ହୋଡ଼, ପାର୍ମେଶ୍ଵାର୍ ରାଃ ହୋନ୍ ତାଇକେନାଏ!” ଚିମିନାଙ୍ଗ୍ କୁଡ଼ିକୋ ହଗି ସାଙ୍ଗିନ୍ ଏତେ ନେଲ୍ ତାଇନାକୋ: ଇନ୍‍କୁ ଏତେ ମାରିୟାମ୍ ମାଗ୍‍ଦାଲା ସାହାର୍ ରେନ୍, ହାର୍ ହୁଡିଙ୍ଗ୍ ୟାକୁବ୍ ହାର୍ ଯୋଶେଷ୍ ରାଃ ଏଙ୍ଗା ମାରିୟାମ୍ ହାର୍ ସାଲୋମି ତାଇକେନାକୋ। ଚିମ୍ତାଙ୍ଗ୍ ଇନିଃ ଗାଲିଲୀ ଜିଲ୍ଲା ରେ ତାଇକେନାଏ ଦୋ ଇନ୍‍କୁ ଇନିଜାଃ ଚେଲା ବାଇକେତେ ଅତୋଙ୍ଗ୍ ଲିଜାକୋ ହାର୍ ଇନିଜାଃ ସେୱା-ସୁସାର୍ ତାଇନାକୋ ହାର୍ ଏନ୍‍ଲେକାଗି ଆଡୋଃଗି କୁଡ଼ିକୋ ତାଇକେନାକୋ, ଅକନ୍‍କୋ ଇନିଜାଃ ଲୋଃ ୟୀରୁଶାଲେମ୍ ସାହାର୍ ତେ ହିଜୁଃ ଲେନ୍ ତାଇନାକୋ। ଚିୟାଃଚି ସେକାଡ଼େନ୍ ରାଃ ହୁଲାଙ୍ଗ୍ ତାଇକେନା, ଅକନାଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରାଃ ମୁଶିଙ୍ଗ୍ ସିଦା ହୋବାଅଃ ତାଇନା, ଏନାମେନ୍ତେ ଚିଲ୍‍କା ଶିଙ୍ଗି ଡୁବିଃ ଜାନା, ଆରିମାତିୟା ରେନ୍ ତାଇନ୍ ତାନ୍ ଯୋଶେଫ୍ ହିଜୁଃ ଲେନାଏ। ଇନିଃ ୟାହୁଦୀ ମାରାଙ୍ଗ୍‍ସାଭା ରେନ୍ ମାଇନାନ୍ ସାଦାଶ୍ୟା ତାଇକେନାଏ, ଆଜୋଗି ପାର୍ମେଶ୍ଵାର୍ ରାଃ ରାଇଜ୍ ରାଃ ହୋରା ନେଲ୍ ତାଇନାଏ। ହିନିଃ ସାହାସ୍ କେତେ ପିଲାତୁସ୍ ରାଃ ନାଡ଼େଏ ସେନ୍ ଜାନାଏ, ହାର୍ ୟୀଶୁ ରାଃ ମାଣା କେ ଆସିକେଦାଏ। ପିଲାତୁସ୍ ଚିମ୍ତା ୟୀଶୁ ଗୋଏଃ ଜାନାଏ ମେନ୍ତେ ଆୟୁମ୍ କେଦାଏ ଦୋ ଆକ୍‍ଦାନ୍ଦା ଜାନାଏ ଚି, ଇନିଃ ଇମିନ୍ ସେକାଡ଼୍ ଗୋଏଃ ଜାନାଏ; ହାର୍ ଇନିଃ ସିପାହୀ କୋୱାଃ ଗୋମ୍‍କେ କେ କେଡ଼ାକେତେ କୁଲିକିଜାଏ “ଚିନାଃ ଇନିଃ ସାର୍ତିଗୀ ଗୋଏଃ ଜାନାଏ?” ଏନ୍ତେ ଚିମ୍ତାଙ୍ଗ୍ ସିପାହୀ କୋୱାଃ ଗୋମ୍‍କେ ପିଲାତୁସ୍ କେ ୟୀଶୁ ଗୋଏଃ ଜାନାଏ ମେନ୍ତେ କାଜିକିଜାଏ, ଦୋ ୟୀଶୁ ରାଃ ମାଣା କେ ଇଦି ଲାଗିନ୍ ଯୋଶେଫ୍ କେ ଏମ୍ କିଜାଏ। ଏନ୍ତେ ଇନିଃ ମିୟାଃ ପୁଣ୍ଡୀ ନିରାଲ୍ ଲିଜାଃ ରାଃ ଚାଦାର୍ କିରିଙ୍ଗ୍ କେଦାଏ, ହାର୍ ୟୀଶୁ ରାଃ ମାଣା କେ ଆଡ଼୍‍ଗୁ କେତେ ଏନ୍ ଚାଦାର୍ ରେ ଲାଟୁମ୍ କିଜାଏ, ହାର୍ ମିୟାଃ କାବାର୍ ରେ ଅକନାଃ ଦିରି ରେ ଉର୍ କେତେ ଗୁଫା ଲେକା କାବାର୍ ବାଇଲେନା ମାଣ୍ଡାଅ କିଜାଏ। ଏନ୍ତେ କାବାର୍ ରାଃ ଦୁହାର୍ ରେ ମିୟାଃ ମାରାଙ୍ଗ୍ ଗୋଲ୍ ଦିରି ହାରୁବ୍ ରିକା କେଦାଏ। ମାରିୟାମ୍ ମାଗ୍‍ଦାଲା ସାହାର୍ ରେନ୍ ହାର୍ ୟାକୁବ୍ ହାର୍ ଯୋଶେଷ୍ ରାଃ ଏଙ୍ଗା ମାରିୟାମ୍ ନେଲ୍ ତାଇକେନାକିନ୍ ଚି ଇନିଃ କତାଃରେ ମାଣ୍ଡାଅ କାନାଏ। ଚିମ୍ତାଙ୍ଗ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଫାରୋମ୍ ଜାନା, ଦୋ ମାରିୟାମ୍ ମାଗ୍‍ଦାଲା ସାହାର୍ ରେନ୍, ହାର୍ ୟାକୁବ୍ ହାର୍ ଯୋଶେଷ୍ ରାଃ ଏଙ୍ଗା ମାରିୟାମ୍, ହାର୍ ସାଲୋମି ସୋୱାନ୍ ସୁନୁମ୍ ଜିନିଷ୍‍କୋ କିରିଙ୍ଗ୍ ଆଉ ଲେଦାକୋ ଚି, ହିଜୁଃକେତେ ଇନିଜାଃ ରେ ସୁନୁମ୍ ଗୋସୋଃ ୟାକୋ। ଏତ୍ଵାର୍ ହୁଲାଙ୍ଗ୍ ସେତାଃ ପାଡ଼୍ ଚିମ୍ତାଙ୍ଗ୍ ଶିଙ୍ଗି ତୁରୋଃ ତାଇନା, ଇନ୍‍କୁ କାବାର୍ ତାଃ ସେନ୍ ଜାନାକୋ। ଏନ୍ତେ ଆକୋ-ଆକୋ ରେ ବାକାଣ୍ ତାଇକେନାକୋ, “ଆବୁୱାଃ ଲାଗିନ୍ କାବାର୍ ରାଃ ଦୁହାର୍ ଏତେ ମାରାଙ୍ଗ୍ ଦିରି କେ ଅକଏ ଉଦୁର୍ ୟାଏ?” ଚିମ୍ତାଙ୍ଗ୍ ଇନ୍‍କୁ ମେଏଃ ଆରିଃ କେତେ ନେଲ୍ କେଦାକୋ ଅକନାଃ ଥିମ୍ବାଗି ମାରାଙ୍ଗ୍ ଦିରି ତାଇକେନା, ଏନ୍ ଦିରି ଆତୋମ୍ କାନ୍ ତାଇକେନା। ଏନ୍ତେ କାବାର୍ ରାଃ ଭିତାର୍ ସେନ୍ କେତେ, ଇନ୍‍କୁ ମିୟାଃ ଜାୱାନ୍ କଡ଼ା କେ ପୁଣ୍ଡୀ ଲିଜାଃ ତୁସିଙ୍ଗ୍ କାନ୍ ଜୋମ୍ ପାଡ଼୍ ରେ ଦୁବାକାନ୍ ନେଲ୍ କିଜାକୋ, ହାର୍ ଥିମ୍ବାଗି ବୋରୋ ଜାନାକୋ। ଏନ୍ତେ ଏନ୍ ଜାୱାନ୍ କଡ଼ା ଇନ୍‍କୁକେ କାଜିକେଃକୋୱାଏ, “ଆଲୋପେ ବୋରୋୟା, ଆପେ ନାଜ୍ରେଥିୟା ୟୀଶୁ କେ, ଅକନିଃ କ୍ରୁଶ୍ ରେ ରାକାବ୍ ଲେନ୍ ତାଇନାଏ, ଦାଣାଇ ତାନାପେ। ଇନିଃ ଜୀବିରିଃ କାନାଏ, ନେତାଃ ରେ ବାଙ୍ଗୁଇଜା, ନେଲେପେ, ନେୟା ଏନ୍ ଜାଗା ଗି ତାନାଃ, ଅକତାଃରେ ଇନ୍‍କୁ ଇନିଃକେ ମାଣ୍ଡାଅ ଲିଜାକୋ। ମେନ୍ଦୋ ନାଆ ଆପେ ସେନୋଃ ପେ, ହାର୍ ପାତ୍ରାସ୍ କେ ହାର୍ ଇନିଜାଃ ଏଟାଃ ଚେଲାକୋକେ କାଜିକୋପେ ଚି, ‘ଇନିଃ ଆପେ ତେ ସିଦା ଗାଲିଲୀ ଜିଲ୍ଲା ତେ ସେନାଏ ଜେଲେକା ଇନିଃ ଆପେକେ ସିଦାରେ କାଜିଲେଦାଏ, ଆପେ ଏନ୍ତାଃରେ ଇନିଃକେ ନେଲିୟାପେ।’ ” ନେୟା ଆୟୁମ୍‍କେତେ ଇନ୍‍କୁ କାବାର୍ ଏତେ ଅଡୋଙ୍ଗ୍ କେତେ ନିର୍ କେଦାକୋ; ଚିୟାଃଚି ଇନ୍‍କୁ ବୋରୋତେ ଥାର୍ଥାରାଅ ହାର୍ ଆକ୍‍ଦାନ୍ଦା ଲେନାକୋ, ଏନ୍ତେ ହୋରା ରେ ଇନ୍‍କୁ ଅକଏ କେହ ଜାହାନାଃ କାକୋ କାଜିକେଦା, ଚିୟାଃଚି ଇନ୍‍କୁ ବୋରୋ ଲେନ୍ ତାଇକେନାକୋ। ଏତ୍ଵାର୍ ହୁଲାଙ୍ଗ୍ ସେତାଃ ପାଡ଼୍ ଚିମ୍ତାଙ୍ଗ୍ ୟୀଶୁ ଜୀବିରିଃ ଜାନାଏ, ଇନିଃ ସିଦାରେ ମାରିୟାମ୍ ମାଗ୍‍ଦାଲା ସାହାର୍ ରେନ୍ ନିଈ କେ, ଅକନିଃତେ ସାତ୍‍ଠୁ ବୋଙ୍ଗାଆତ୍ମା କୋକେ ଅଡୋଙ୍ଗ୍ ଲେଃକୋୱାଏ, ନେଲ୍ ଜାନାଏ। ଇନିଃ ସେନ୍ କେତେ ୟୀଶୁ ରାଃ ଚେଲାକୋକେ ଉଦୁବ୍ କେଃକୋୱାଏ। ଇନ୍‍କୁ ଇନିଜାଃ ଲାଗିନ୍ ଦୁକୁଅଃ ତାଇକେନାକୋ ହାର୍ ରାଆ ତାଇକେନାକୋ। ମେନ୍ଦୋ ଚିମ୍ତା ମାରିୟାମ୍ ଇନ୍‍କୁକେ ନେ କାଜି ଉଦୁବ୍ କେଃକୋୱାଏ ଚି, “ୟୀଶୁ ଜୀବିରିଃ କାନାଏ ହାର୍ ଇଙ୍ଗ୍ ଇନିଃକେ ନେଲ୍ କିଜାଇଙ୍ଗ୍!” ମେନ୍ଦୋ ଇନ୍‍କୁ ନେୟା ଆୟୁମ୍‍କେତେ କାକୋ ବିଶ୍ଵାସ୍ କେଦା। ନେୟା ତାୟୋମ୍ତେ ୟୀଶୁ ଏଟାଃ ରୂପ୍ ରେ ଇନ୍‍କୁ ଏତେ ବାର୍ହୋଡ଼୍ ଚେଲାକିନ୍ ତାଃ ରେ ଚିମ୍ତାଙ୍ଗ୍ ଆକିନ୍ ୟୀରୁଶାଲେମ୍ ସାହାର୍ ଏତେ ଆକୋୱାଃ ହାତୁ ପାଡ଼୍ କିନ୍ ସେନ୍ ତାଇନା, ନେଲ୍ ଜାନାଏ। ଚିମ୍ତାଙ୍ଗ୍ ଆକିନ୍ ୟୀଶୁ କେ ଉରୁମ୍ କିଜାକିନ୍, ଇନ୍‍କୁ ହଗି ରୁଆଡ଼୍ କେତେ ଏଟାଃ କୋକେ ଉଦୁବ୍ କେଦାକିନ୍, ମେନ୍ଦୋ ଜେତାଏ କାକୋ ବିଶ୍ଵାସ୍ କେଦା। ତାୟୋମ୍ତେ ୟୀଶୁ ଏନ୍ ଏଗାରା କୁଲାକାନ୍ ଚେଲାକୋକେ ହଗି, ଚିମ୍ତାଙ୍ଗ୍ ଇନ୍‍କୁ ଜୋମ୍ ଲାଗିନ୍ ଦୁବ୍‍ଲେନ୍ ତାଇନାକୋ ନେଲ୍ ଜାନାଏ, ହାର୍ ଇନ୍‍କୁୱାଃ କାବିଶ୍ଵାସ୍ ହାର୍ କେଟେଃ ମୋନ୍ ଲାଗିନ୍ତେ ଏଗେର୍ କେଃକୋୱାଏ, ଚିୟାଃଚି ଅକନ୍‍କୋ ଇନିଜାଃ ଜୀବିରିଃ ରାଃ ତାୟୋମ୍ତେ ଇନିଃକେ ନେଲ୍ ଲିଜାକୋ, ଇନ୍‍କୁୱାଃ କାଜିକେ ଇନ୍‍କୁ କାକୋ ବିଶ୍ଵାସ୍ ଲେଦା। ଏନ୍ତେ ୟୀଶୁ ଇନ୍‍କୁକେ କାଜିକେଦାଏ, “ଆପେ ସବେନ୍ ଅତେଦିଶୁମ୍ ରେ ସେନ୍ କେତେ ସବେନ୍ ହୋଡ଼ୋକୋକେ ସୁସାମାଚାର୍ ଉଦୁବ୍ କୋପେ। ଅକଏ ଇଙ୍ଗ୍‍କେ ବିଶ୍ଵାସ୍ ଏୟାଏ ହାର୍ ଚିହ୍ନା ଲାଗିନ୍ ବାପ୍ତିସ୍ମା ଇଦିୟାଏ, ଇନିଃ ପାର୍ମେଶ୍ଵାର୍ ରାଃ ଦାଣ୍ଡ୍ ଏତେ ବାଞ୍ଚାଅ ୱାଏ, ମେନ୍ଦୋ ଅକଏ କାଏ ବିଶ୍ଵାସ୍ ୟାଏ ଇନିଃ ପାପ୍ କୋରାଃ ଦାଣ୍ଡ୍ ନାମେୟାଏ। ବିଶ୍ଵାସ୍ ତାନ୍‍କୋ ରେ ନେ ଚିହ୍ନା ହୋବାୱାଃ ଚି ଇନ୍‍କୁ ଇଙ୍ଗ୍ଆଃ ନୁତୁମ୍ ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋୱାକୋ, ଇନ୍‍କୁ ନାୱା-ନାୱା ଭାଷା ରେ କାଜି କାଜିୟାକୋ। ବିଙ୍ଗ୍ କୋକେ ଉଠାଓ କୋୱାକୋ ହାର୍ ଜେତାନ୍ ଗୋଜୋଃ ତେୟାଃ ନୁୱେ ରେହ ଇନ୍‍କୁୱାଃ ଜେତ୍ନାଃ ହାନି କା ହୋବାୱା; ଇନ୍‍କୁ ବେମାରୀ କୋୱାଃ ରେ ତିଈ ମାଣ୍ଡାଅୟାକୋ, ହାର୍ ଇନ୍‍କୁ ବୁଗିନ୍ କେନୋଗାକୋ।” ଏନ୍ତେ ପ୍ରାଭୁ ୟୀଶୁ ଇନ୍‍କୁ ଲୋଃ ବାକାଣ୍ ତାୟୋମ୍ତେ ସିର୍ମାଦିଶୁମ୍ ତେ ଉଠାଓ ଇଦି ଜାନାଏ, ହାର୍ ପାର୍ମେଶ୍ଵାର୍ ରାଃ ଜୋମ୍ ପାଡ଼୍ ରେ ଦୁବ୍ ଜାନାଏ। ହାର୍ ଇନ୍‍କୁ ଅଡୋଙ୍ଗ୍ କେତେ ସବେନ୍ ପାଡ଼୍ ପାର୍ଚାର୍ କେଦାକୋ, ଏନ୍ତେ ପ୍ରାଭୁ ଇନ୍‍କୁ ଲୋଃ ଆକ୍‍ଦାନ୍ଦା କାମି ତାଇନାଏ ହାର୍ ଏନ୍ ଚିହ୍ନା କୋୱା ରାଃ ହୋରାତେ ଅକନାଃ ଇନ୍‍କୁ ଲୋଃ ହୋବାଅଃ ତାଇନା, ଆଜାଃ ବାଚାନ୍ କୋକେ ସାର୍ତି ମେନ୍ତେ ପ୍ରାମାଣ୍ ଇଦିକେଦାଏ। “ଆମୀନ୍ ।” ହେ ମାଇନାନ୍ ଥିଉଫିଲୁସ୍, ଥିମ୍ବାଗି ହୋଡ଼ୋକୋ ଏନ୍ କାଜିକୋକେ ଅକନାଃ ଆବୁ ଥାଲା ରେ ହୋବା ଛାବାକାନା, ଏନା ରାଃ ଇତିହାସ୍ ଅଲେଲାଗିନ୍ ସାନାଙ୍ଗ୍ କେନାକୋ। ଜେଲେକା ଚି ଇନ୍‍କୁ ଅକନ୍‍କୋ ସିଦା ତେଗି ନେ କାଜିକୋକେ ନେଲ୍ ଲେଦାକୋ ହାର୍ ତାୟୋମ୍ତେ ପାର୍ମେଶ୍ଵାର୍ ରାଃ ବାଚାନ୍ ରାଃ ଦାସୀ ବାଇଜାନାକୋ, ଆବୁ ତାଃ ସେଟେର୍ କେଦାକୋ। ଏନାମେନ୍ତେ, ହେ ଥିୟୁଫିଲୁସ୍, ଇଙ୍ଗ୍‍କେ ନେୟା ଠାଉକା ଆଟ୍‍କାର୍ କେଦିଙ୍ଗା ଚି ଆମ୍‍କେ ନେ ସବେନ୍ କାଜି କୋରାଃ ହୋବାକାନ୍ ଘାଟ୍ନା କୋକେ ଇଙ୍ଗ୍ ଜେଲେକା ସାରିକେଦାଇଙ୍ଗ୍ ସୁରୁ ଏତେ ଠିକ୍-ଠିକ୍ ଯାଞ୍ଚ୍ କେତେ, ଏନା କୋକେ ଆମାଃ ନାଙ୍ଗ୍ ମିୟାଃ-ମିୟାଃ କେତେ ଅଲେୟାଇଙ୍ଗ୍, ଏନାତେ ଆମ୍ ଏନ୍ ସାର୍ତି କାଜିକୋକେ ସାରିଧାଡ଼ିୟାମ୍ ଅକନାଃ ଆମ୍ ହୋଡ଼ୋକୋ ଏତେ ଆୟୁମ୍ ଲେଦାମ୍। ଚିମ୍ତାଙ୍ଗ୍ ହେରୋଦ୍ ୟାହୁଦୀୟା ଜିଲ୍ଲା ରାଃ ରାଜା ତାଇକେନାଏ। ଏନ୍ ସାମାୟ୍ ରେ ଆବିୟାହ୍ ୟାଜାକ୍ ଦାଲ୍ ଏତେ ଜାକାର୍ୟାହ୍ ନୁତୁମ୍ ମିୟାଃ ୟାଜାକ୍ ତାଇକେନାଏ, ହାର୍ ଇନିଜାଃ କୁଡ଼ି ରାଃ ନୁତୁମ୍ ଏଲିଶାବେଥ୍ ତାଇକେନା, ଇନିଜୋ ଗି ଇସ୍ରାଏଲ୍ କୋୱାଃ ପାହିଲା ୟାଜାକ୍ ହାରୁନ୍ ବାଂଶ୍ ରେନ୍ ତାଇକେନାଏ। ଇନ୍‍କିନ୍ ବାରାନ୍ କିନ୍ ପାର୍ମେଶ୍ଵାର୍ ରାଃ ନେନେଲ୍ ରେ ଧାର୍ମୀ ତାଇକେନାକିନ୍, ଆଡୋଃ ପ୍ରାଭୁ ରାଃ ସବେନ୍ ଆନାଚୁ କୋକେ ହାର୍ ନିୟାମ୍ କୋକେ ବେଗାର୍ ଗାଲ୍ତି କେତେ ମାନାତିଙ୍ଗ୍ ତାଇକେନାକିନ୍। ମେନ୍ଦୋ ଇନ୍‍କୁୱାଃ ହୋନ୍-ଗାଣା କାକୋ ତାଇକେନା, ଚିୟାଃଚି ଏଲିଶାବେଥ୍ ବାଞ୍ଜ୍ ତାଇକେନାଏ, ଏନ୍ତେ ଆକିନ୍ ବାରାନ୍‍କିନ୍ ହାଡ଼ାମ୍ ବୁଡୀ ଲେନାକିନ୍। ଚିମ୍ତାଙ୍ଗ୍ ଇନିଃ ଆଜାଃ ୟାଜାକ୍ ଦାଲ୍ ରାଃ ପାଡ଼ି ଲେକାତେ ପାର୍ମେଶ୍ଵାର୍ ରାଃ ନାଡ଼େଏ ରେ ୟାଜାକ୍ ରାଃ କାମି-କାମି ତାଇକେନାଏ। ଇମ୍ତା ଇନିଜାଃ ନୁତୁମ୍ ରେ ୟାଜାକ୍ କୋୱାଃ କାମି ସାଲା ରାଃ ରୀତି ଲେକାତେ ଖୁଡ଼୍‍ଖୁଡ଼ି କେତେ ମିୟାଃ ଚିଠି ଅଡୋଙ୍ଗ୍ ଜାନା ଚି ଇନିଃ ପ୍ରାଭୁ ରାଃ ମାନ୍ଦିର୍ ରେ ବୁଗିନ୍ ସୋୱାନ୍ ତେୟାଃ ଧୁୱାନ୍ ଜୁଲେୟାଏ। ଇନିଜାଃ ବୁଗିନ୍ ସୋୱାନ୍ ତେୟାଃ ଧୁୱାନ୍ ଜୁଲେ ସାମାୟ୍ ରେ ମିଃଥିମ୍ବା ହୋଡ଼ୋକୋ ମାନ୍ଦିର୍ ରାଃ ରାଚା ରେ ବିନ୍ତି ତାଇକେନାକୋ। ଏନ୍ ସାମାୟ୍ ରେ ପ୍ରାଭୁ ଆଃ ମିୟାଃ ସିର୍ମାଦାସୀ ବୁଗିନ୍ ସୋୱାନ୍ ତେୟାଃ ଧୁୱାନ୍ ଜୁଲ୍ ବେଦୀ ରାଃ ଯୋମ୍ପାଡ଼୍ ତିଙ୍ଗୁକାନ୍ ଇନିଃକେ ନେଲ୍ ଜାନାଏ। ଜାକାର୍ୟାହ୍ ନେଲ୍‍କେତେ ଆକ୍‍ବାକାଅ ଜାନାଏ ହାର୍ ଥିମ୍ବାଗି ବୋରୋଜାନାଏ। ମେନ୍ଦୋ ସିର୍ମାଦାସୀ ଇନିଃକେ କାଜିକେଦାଏ, “ହେ ଜାକାର୍ୟାହ୍ ଆଲୋମ୍ ବୋରୋୟା, ଚିୟାଃଚି ଆମାଃ ବିନ୍ତି ପାର୍ମେଶ୍ଵାର୍ ଆୟୁମ୍ କେଦାଏ, ହାର୍ ଆମାଃ କୁଡ଼ି ଏଲିଶାବେଥ୍ ଆମାଃ ଲାଗିନ୍ ମିୟାଃ କଡ଼ାହୋନ୍ ଜାନାମି ୟାଏ, ଆଡୋଃ ଆମ୍ ଇନିଜାଃ ନୁତୁମ୍ ଯୋହାନ୍ ମାଣ୍ଡାଅୟାମ୍। ଆମ୍ ରାଶିକା ହାର୍ ସୁକୁ ନାମେୟାମ୍ ଚିୟାଃଚି ଇନିଜାଃ ଜାନାମ୍ ରାଃ ଚାଲ୍ତେ ମିଃଥିମ୍ବା ହୋଡ଼ୋକୋ ରାଶିକା ଅଗାକୋ। ଚିୟାଃଚି ଇନିଃ ପ୍ରାଭୁ ରାଃ ନେପେଲ୍ ରେ ମାରାଙ୍ଗ୍ ଅଗାଏ ହାର୍ ଆଙ୍ଗୁର୍ ରାଶି ଆଡୋଃ ବୁଲୋଃ ତେୟାଃ ଚିଉଲା ହ କାଏ ନୁୱେୟାଏ, ହାର୍ ଏଙ୍ଗା ଲାହେଃ ତେଗି ପାବିତାର୍ ଆତ୍ମା ରେ ଫେରେଃ କେନୋଗାଏ। ଇନିଃ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଏତେ ମିଃଥିମ୍ବା କୋକେ ଆକୋୱାଃ ପ୍ରାଭୁ ପାର୍ମେଶ୍ଵାର୍ ପାଡ଼୍ ପାପ୍ କାମି ବାଗେ ରିକା କେତେ ରୁଆଡ଼୍ କୋୱାଏ। ଇନିଃ ଏଲିୟା ରାଃ ଆତ୍ମା ହାର୍ ପେଡ଼େଏ ନାମ୍ କେତେ ପ୍ରାଭୁ ରାଃ ଆୟୁର୍-ଆୟୁର୍ ସେସେନାଏ ଏନାତେ ଆପୁକୋକେ ହୋନ୍ କୋୱାଃ ପାଡ଼୍ ରୁଆଡ଼୍ କୋୱାଏ; ଆଡୋଃ ଆନାଚୁ କାକୋ ମାନାତିଙ୍ଗ୍ କୋକେ ଧାର୍ମୀ କୋୱାଃ ହୋରାତେ ଆଉକୋୱାଏ ଆଡୋଃ ପ୍ରାଭୁ ଲାଗିନ୍ ମିଃଥିମ୍ବା ହୋଡ଼ୋକୋକେ ସେକାଡ଼୍ କୋୱାଏ।” ଜାକାର୍ୟାହ୍ ସିର୍ମାଦାସୀ କେ କୁଲିକିଜାଏ, “ନେୟାକେ ଇଙ୍ଗ୍ ଚିଲ୍‍କା ସାରିୟାଇଙ୍ଗ୍? ଚିୟାଃଚି ଇଙ୍ଗ୍ ଦୋ ହାଡ଼ାମ୍ ତାନିଙ୍ଗ୍, ଆଡୋଃ ଇଙ୍ଗ୍ଆଃ କୁଡ଼ି ହଗି ବୁଡୀ ଜାନାଏ।” ସିର୍ମାଦାସୀ ଇନିଃକେ କାଜିରୁଆଡ଼୍ କିଜାଏ, “ଇଙ୍ଗ୍ ମୁଖିୟା ସିର୍ମାଦାସୀ ଗାବ୍ରିଏଲ୍ ତାନିଙ୍ଗ୍, ଅକଏ ପାର୍ମେଶ୍ଵାର୍ ରାଃ ସାମାନାଙ୍ଗ୍ ରେ ତିଙ୍ଗୁକାନ୍ ତାଇନୋଗାଇଙ୍ଗ୍। ହାର୍ ଇଙ୍ଗ୍ ଆମ୍ ଲୋଃ ବାକାଣ୍ ଲାଗିନ୍ତେ ଆଡୋଃ ଆମ୍‍କେ ନେ ସୁସାମାଚାର୍ ଉଦୁବ୍ ନାଙ୍ଗ୍ କୁଲା କାନାଇଙ୍ଗ୍। ନେଲେମ୍, ଅକନ୍ ହୁଲାଙ୍ଗ୍ ସାନ୍ତେ ନେ କାଜି କା ପୁରାଅଗା, ଏନ୍ ହୁଲାଙ୍ଗ୍ ସାନ୍ତେ ଆମ୍ ହାପା ତାଇନୋଗାମ୍ ହାର୍ କାମ୍ ବାକାଣ୍ ଧାଡ଼ିୟା, ନେୟା ଏନାମେନ୍ତେ ହୋବାୱା ଚିୟାଃଚି ଆମ୍ ଇଙ୍ଗ୍ଆଃ କାଜିକେ କାମ୍ ବିଶ୍ଵାସ୍ କେଦା ଅକନାଃ ସାମାଏତେ ପୁରାଅଗା।” ହୋଡ଼ୋକୋ ଜାକାର୍ୟାହ୍ କେ ନେଲ୍ ହୋରା ତାଇନାକୋ ହାର୍ ଆକ୍‍ଦାନ୍ଦା ହୋବାଜାନାକୋ, ଚି ଇନିଃକେ ମାନ୍ଦିର୍ ରେ ନିମିନ୍ ଦେରି ସାନ୍ତେ ଚିନାଃ ମେନ୍ତେ ହୋବାଅଃ ତାନା। ଚିମ୍ତାଙ୍ଗ୍ ଇନିଃ ବାହାରି ତେ ଅଡୋଙ୍ଗ୍ ଜାନାଏ, ଦୋ ଇନ୍‍କୁ ଲୋଃ ବାକାଣ୍ କାଏ ଧାଡ଼ିକେଦାଏ, ଏନାମେନ୍ତେ ଇନ୍‍କୁ ସାରିକେଦାକୋ ଚି ଇନିଃ ମାନ୍ଦିର୍ ରେ ଜାହାନ୍ ଦାର୍ଶାନ୍ ନାମ୍ କାଦାଏ ଏନ୍ତେ ଜାକାର୍ୟାହ୍ ଇନ୍‍କୁ ଲୋଃ ତିଈ ତେ ଚୁଣ୍ଡୁଲ୍ କେତେ ବାକାଣ୍ କେଃକୋୱାଏ ହାର୍ କୋନ୍ଦା ବାଇ ଜାନାଏ। ଚିମ୍ତାଙ୍ଗ୍ ଆଜାଃ ସେୱା କାମି ରାଃ ହାପ୍ତା ପୁରା ଜାନା, ଏଣ୍ଡେ ଇନିଃ ୟୀରୁଶାଲେମ୍ ସାହାର୍ କେ ବାଗେ କେତେ ଆଜାଃ ଅଡ଼୍ଆଃ ତେ ସେନୋଃ ଜାନାଏ। ଚିମିନ୍ ହୁଲାଙ୍ଗ୍ ରାଃ ତାୟୋମ୍ତେ ଜାକାର୍ୟାହ୍ ରାଃ କୁଡ଼ି ଏଲିଶାବେଥ୍ ହୋଡ଼ମୋ ରେ ତାଇଜାନାଏ, ହାର୍ ପାଞ୍ଚ୍ ମାହିନା ସାନ୍ ଆଏଃ ଆପାନ୍ କେ ନେୟା କାଜିକେତେ ଉକୁ ତାଇଜାନାଏ, “ହୋଡ଼ୋକୋୱାଃ ଥାଲା ରେ ଇଙ୍ଗ୍ଆଃ ଆପ୍‍ମାନ୍ ଆତୋମେ ଲାଗିନ୍ ପ୍ରାଭୁ ନେକାନ୍ ହୁଲାଙ୍ଗ୍ ରେ ଇଙ୍ଗ୍ଆଃ ଚେତାନ୍ ରେ ଦାୟା ରିକା କେଦିଙ୍ଗ୍ଆଏ।” ଏଲିଶାବେଥ୍ ହୋଡ଼ମୋ ରେ ତାଇଜାନ୍ ରାଃ ଛାଅ ମାହିନା ରେ ପାର୍ମେଶ୍ଵାର୍ ପାଡ଼େତେ ସିର୍ମାଦାସୀ ଗାବ୍ରିଏଲ୍ ଗାଲିଲୀ ଜିଲ୍ଲା ରାଃ ନାଜ୍ରେଥ୍ ସାହାର୍ ରେନ୍ ମିୟାଃ ଡିଣ୍ଡାକୁଡ଼ି ତାଃ କୁଲ୍‍ଜାନାଏ ଅକନିଜାଃ ଦାଉଦ୍ କିଲି ରେନ୍ ଯୋଶେଫ୍ ନୁତୁମ୍ ମିୟାଃ କଡ଼ା ଲୋଃ ଲୋଟା-ଦାଆ ହୋବାକାନ୍ ତାଇକେନାଏ। ଏନ୍ ଡିଣ୍ଡା କୁଡ଼ି ରାଃ ନୁତୁମ୍ ମାରିୟାମ୍ ତାଇକେନା। ସିର୍ମାଦାସୀ ଇନିଜାଃ ନାଡ଼େଏ ଭିତାର୍ ହିଜୁଃକେତେ କାଜିକେଦାଏ, “ଜୋହାର୍, ପାର୍ମେଶ୍ଵାର୍ ଆମ୍ କେ ଥିମ୍ବାଗି ଆଶିଷ୍ କେଃମେୟାଏ! ଆମ୍ ଲୋଃ ପ୍ରାଭୁ ମେନିଜା!” ମେନ୍ଦୋ ଇନିଃ ନେ କାଜି ଆୟୁମ୍‍କେତେ ଥିମ୍ବାଗି ବୋରୋ ଜାନାଏ, ଏନ୍ତେ ପାହୋମ୍ ଏଟେଃ କେଦାଏ ଚି ନେ ଜୋହାର୍ ରାଃ ଚିନାଃ ମାନେ ତାନାଃ। ସିର୍ମାଦାସୀ ଇନିଃକେ କାଜିକେଦାଏ, “ହେ ମାରିୟାମ୍, ଆଲୋମ୍ ବୋରୋୟା, ପାର୍ମେଶ୍ଵାର୍ ରାଃ ଆନୁଗ୍ରାହ୍ ଆମାଃ ଚେତାନ୍ ରେ ହୋବାକାନା। ନେଲେମ୍, ଆମ୍ ହୋଡ଼ମୋ ରେ ତାଇନାମ୍, ହାର୍ ଆମାଃ ମିୟାଃ କଡ଼ାହୋନ୍ ଜାନାମ୍ ଅଗାଏ, ଆମ୍ ଇନିଜାଃ ନୁତୁମ୍ ୟୀଶୁ ମାଣ୍ଡାଅୟାମ୍। ଇନିଃ ମାରାଙ୍ଗ୍ ବାଇୟୋଗାଏ ଆଡୋଃ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ହୋନ୍ କାଜିୟଗାଏ ଆଡୋଃ ପ୍ରାଭୁ ପାର୍ମେଶ୍ଵାର୍ ଇନିଃକେ ଦାଉଦ୍ ରାଜା ଲେକା ଇନିଃକେ ରାଜା ବାଇୟାଏ। ଇନିଃ ୟାକୁବ୍ ଘାରାନା ରେ ସବେନ୍ ହୁଲାଙ୍ଗ୍ ରାଇଜ୍ ରିକାୟାଏ, ଆଡୋଃ ଇନିଜାଃ ରାଇଜ୍ ଚିଉଲା ହ କା ଛାବାୱା।” ମାରିୟାମ୍ ସିର୍ମାଦାସୀ କେ କାଜିକେଦାଏ, “ନେୟା ଚିଲ୍‍କା ହୋବାଅଗା। ଇଙ୍ଗ୍ ଦୋ ଡିଣ୍ଡା ଗିୟାଇଙ୍ଗ୍।” ସିର୍ମାଦାସୀ ଇନିଃକେ କାଜିକେଦାଏ, “ପାବିତାର୍ ଆତ୍ମା ଆମାଃ ଚେତାନ୍ ରେ ଆଡ଼୍‍ଗୁଅଗାଏ ଆଡୋଃ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ପେଡ଼େଏ ଆମାଃ ରେ ଉମ୍ବୁଲ୍ ମେୟାଏ। ଏନାମେନ୍ତେ ଏନ୍ ହୋନ୍ ଅକଏ ଆମାଃ ରେ ଜାନାମ୍ ଅଗାଏ ଇନିଃ ପାବିତାର୍ ତାଇନାଏ ହାର୍ ପାର୍ମେଶ୍ଵାର୍ ରାଃ ହୋନ୍ କାଜିୟଗାଏ। ନେଲେମ୍, ଆପେୟାଃ ପେଡ଼ା ଠୋଗୋଗାଏ ଏଲିଶାବେଥ୍ ଆମାଃ ମିଶି ହଗି ବୁଡୀୟୋଃତାନ୍ ରେ ହୋଡ଼ମୋ ରେ ମେନିଜା ହାର୍ ଇନିଜାଃ ମିୟାଃ କୋଡ଼ାହୋନ୍ ହୋବାଅଃ ୱାଲା ମେନାଃ। ଇନିଃ ବାଞ୍ଜ୍ କାଜିୟୋଃ ତାଇନାଏ ଇନିଜାଃ ନେୟା ଛାଟ୍‍ୱା ମାହିନା ଚାଲାଅଃ ତାନା। ଚିୟାଃଚି ପାର୍ମେଶ୍ଵାର୍ ନାଙ୍ଗ୍ ଅକନାଃଅ କାହୋବାଅଃ ଲେକା ବାନୋଗା।” ମାରିୟାମ୍ କାଜିକେଦାଏ, “ନେଲେମ୍, ଇଙ୍ଗ୍ ପ୍ରାଭୁ ରାଃ ମିୟାଃ ଦାସୀ ତାନିଙ୍ଗ୍, ଆମାଃ କାଜି ଲେକାଗି ହୋବାଅଃକା।” ଏନ୍ତେ ସିର୍ମାଦାସୀ ଇନିଃତାଃ ଏତେ ସେନୋଃ ଜାନାଏ। ହୁଡିଙ୍ଗ୍ ଦିନ୍ ରାଃ ତାୟୋମ୍ତେ ମାରିୟାମ୍ ସେକାଡ଼୍ ଗି ବିରିଃ କେତେ ୟାହୁଦୀୟା ଜିଲ୍ଲା ରାଃ ମିୟାଃ ହାତୁ ଅକନାଃ ବୁରୁ ଚେତାନ୍ ରେ ତାଇଲେନା ହେନ୍ତାଃ ସେନ୍ ଜାନାଏ। ଆଡୋଃ ଜାକାର୍ୟାହ୍ ରାଃ ଅଡ଼୍ଆଃ ସେନ୍‍କେତେ ଏଲିଶାବେଥ୍ କେ ଜୋହାର୍ କିଜାଏ। ଚିମ୍ତାଙ୍ଗ୍ ଏଲିଶାବେଥ୍ ମାରିୟାମ୍ ରାଃ ଜୋହାର୍ ଆୟୁମ୍ କେଦାଏ, ଇମ୍ତାଙ୍ଗ୍ ଲାହେଃ ଭିତାର୍ ରେ ତାଇନ୍ ବାଲେଃ ହୋନ୍ ରାଶିକା ତେ ଇନୁଙ୍ଗ୍ ଜାନାଏ ଆଡୋଃ ଏଲିଶାବେଥ୍ ପାବିତାର୍ ଆତ୍ମା ରେ ଫେରେଃ ଜାନାଏ। ଆଡୋଃ ଇନିଃ ରାଶିକାନ୍ ଲୋଃ ଜୋର୍ତେ କାଜିକେଦାଏ, “ଆମ୍ କୁଡ଼ି କୋୱାଃ ରେ ଧାନ୍ୟା ତାନ୍‍ମେ, ହାର୍ ଆମ୍ ଜାନାମିୟାମ୍ ଏନ୍ ହୋନ୍ ଧାନ୍ୟା ତାନିଃ। ହାର୍ ଇଙ୍ଗ୍‍କେ ଥିମ୍ବାଗି ମାଇନାନ୍ ଲେକା ଆଟ୍‍କାରିଙ୍ଗ୍ ତାନା, ଇଙ୍ଗ୍ଆଃ ପ୍ରାଭୁ ଆଃ ଏଙ୍ଗା ଇଙ୍ଗ୍ ଲୋଃ ନାପାମ୍ ହିଜୁଃ ଜାନାଏ! ଚିୟାଃଚି ନେଲେମ୍, ଚିଲ୍‍କା ଆମାଃ ଜୋହାର୍ ଲୁତୁର୍ ରେ ଆୟୁମ୍ କେଦାଇଙ୍ଗ୍ ଏନ୍‍ଲେକାଗି ଇଙ୍ଗ୍ଆଃ ଲାହେଃ ଭିତାର୍ ରେ ହୋନ୍ ରାଶିକା ତେ ଇନୁଙ୍ଗ୍ ଜାନାଏ। ଆବେନ୍ ଧାନ୍ୟା ତାନ୍‍ବେନ୍, ଚିୟାଃଚି ଆବେନ୍ ବିଶ୍ଵାସ୍ ରିକା କେଦାବେନ୍ ଚି ଅକନ୍ କାଜି ପ୍ରାଭୁ କାଜିକେଦାଏ, ଏନାକେ ପୁରାୟାଏ!” ଏନ୍ତେ ମାରିୟାମ୍ କାଜିକେଦାଏ, “ଇଙ୍ଗ୍ଆଃ ଜୀଉ ପ୍ରାଭୁ ଆଃ ମାନାରାଙ୍ଗ୍ ରିକା ତାନାଏ, ଇଙ୍ଗ୍ଆଃ ଆତ୍ମା ଇଙ୍ଗ୍ଆଃ ବାଞ୍ଚାଅନିଃ ପାର୍ମେଶ୍ଵାର୍ ଏତେ ରାଶିକା ଜାନାଏ, ଚିୟାଃଚି ଇନିଃ ଇଙ୍ଗ୍ ଆଜାଃ ଦାସୀ ରାଃ ମୋନ୍ ରେ ହୁଡିଙ୍ଗେନ୍ କେ ନେଲ୍‍କେଦାଏ, ଏନାମେନ୍ତେ ନେଲେପେ, ନାଆ ଏତେ ସବେନ୍ ଯୁଗ୍-ଯୁଗ୍ ରେନ୍ ହୋଡ଼ୋକୋ ଇଙ୍ଗ୍‍କେ ଧାନ୍ୟା କାଜିୟାକୋ। ଚିୟାଃଚି ଏନ୍ ପେଡ଼େଜାନ୍ ନିଈ ଇଙ୍ଗ୍ଆଃ ଲାଗିନ୍ ମାରାଙ୍ଗ୍-ମାରାଙ୍ଗ୍ କାମି ରିକା କେଦାଏ। ଇନିଜାଃ ନୁତୁମ୍ ପାବିତାର୍ ତାନାଃ। ଇନିଜାଃ ଦାୟା ଇନ୍‍କୁ ଲାଗିନ୍ ପିଢ଼ୀ ତେ ପିଢ଼ୀ ତାଇନୋଗା ଅକଏ ଇନିଃକେ ବୋରୋୟାକୋ। ଇନିଃ ଆଜାଃ ସୁପୁ ତେ ମାରାଙ୍ଗ୍ ପେଡ଼େଏ ରାଃ କାମି ଦେଖାଅ କେଦାଏ, ଆଡୋଃ ଅକଏ ଆଏଃ ଆପାନ୍ କେ ମାରାଙ୍ଗ୍ ଆଟ୍‍କାରେନ୍ ତାଇନାଏ, ଇନ୍‍କୁକେ ଛିତିଛାନ୍ଦ୍ କେଃକୋୱାଏ। ଇନିଃ ପେଡ଼େଜାନ୍ କୋକେ ଇନ୍‍କୁୱାଃ ସିଂହାସାନ୍ ଏତେ ଉୟୁଃ କେଃକୋୱାଏ ଆଡୋଃ ମୋନ୍ ରେ ହୁପୁଡିଙ୍ଗ୍ କୋକେ ରାକାବ୍ କେଃକୋୱାଏ। ଇନିଃ ରେଙ୍ଗେଃତାନ୍ କୋକେ ବୁଗିନ୍ ଜିନିଷ୍‍କୋ ଏତେ ବିଇ କେଃକୋୱାଏ ଆଡୋଃ କିଶାଣ୍ କୋକେ ସାମା ତିଈ ରୁଆଡ଼୍ କେଃକୋୱାଏ। ଇନିଃ ଆୟାଃ ଦାୟା ମୋନେ କେତେ ଆଜାଃ ଦାସୀ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋକେ ଦେଙ୍ଗା ରିକା କେଦାଏ। ଅକନାଃ ଆବ୍ରାହାମ୍ ଆଡୋଃ ଇନିଜାଃ ହୋନ୍‍ଗାଣା କୋ ଚେତାନ୍ ରେ ଜାନାଓ ତାଇନୋଗା, ଜେଲେକା ଇନିଃ ଆବୁୱାଃ ଆପୁ-ତାତା କୋକେ କାଜିଲେଦାଏ।” ମାରିୟାମ୍ ଲାଗ୍‍ଭାଗ୍ ଆପି ମାହିନା ସାନ୍ ଏଲିଶାବେଥ୍ ତାଃ ତାଇକେତେ ଆଜାଃ ଅଡ଼୍ଆଃ ତେ ରୁଆଡ଼୍ ଜାନାଏ। ଏଲିଶାବେଥ୍ ଆଜାଃ ହୋନ୍ କେ ଜାନାମ୍ ଏହେମ୍ ରାଃ ସାମାୟ୍ ପୁରା ଜାନା, ଆଡୋଃ ଇନିଃ ମିୟାଃ କଡ଼ାହୋନ୍ ଜାନାମ୍ କିଜାଏ। ଇନିଜାଃ ନାଡ଼େଏ ଜାପାଃ ରେନ୍ କୋ ଆଡୋଃ ପେଡ଼ା ଠୋଗୋଃ କୋ ନେୟା ଆୟୁମ୍‍କେତେ ଚି ପ୍ରାଭୁ ଏଲିଶାବେଥ୍ ନାଙ୍ଗ୍ ମାରାଙ୍ଗ୍ ଦାୟା ରିକା କାଦାଏ, ଇନିଜାଃ ଲୋଃ ରାଶିକା ଜାନାକୋ। ନାଆ ନେଲେକା ହୋବାଜାନା ଆଠ୍ ଦିନ୍ ପୁରାଜାନ୍ ତାୟୋମ୍ତେ ନିୟାମ୍ ଲେକାତେ ବାଲେଃ ହୋନ୍ କେ ଖାତ୍ନା ରିକା ନାଙ୍ଗ୍ ହିଜୁଃ ଲେନାକୋ। ହାର୍ ଇନିଜାଃ ନୁତୁମ୍ ଆଜାଃ ଆପୁ ରାଃ ନୁତୁମ୍ ଲେକା ଜାକାର୍ୟାହ୍ ମାଣ୍ଡାଅ ସାନାଙ୍ଗ୍ କେଦାକୋ। ନେୟାରେ ଇନିଜାଃ ଏଙ୍ଗାକିନ୍ କାଜିରୁଆଡ଼୍ କେଦାକିନ୍, “କାହା, ଇନିଜାଃ ନୁତୁମ୍ ଯୋହାନ୍ ଦହଏପେ।” ଇନ୍‍କୁ ଆକିନ୍‍କେ କାଜିକେଦାକୋ, “ଆପେୟାଃ ପେଡ଼ାକୋ ରେଦୋ ଜେତାୟାଃ ନେକା ନୁତୁମ୍ ବାନୋଗା!” ଏନ୍ତେ ଇନ୍‍କୁ ଇନିଜାଃ ଆପୁ କେ ତିଈ ଚୁଣ୍ଡୁଲ୍ କେତେ କୁଲିକିଜାକୋ, ଇନିଜାଃ ଚିନାଃ ନୁତୁମ୍ ମାଣ୍ଡାଅ ସାନାଙ୍ଗ୍ ତାନାମ୍? ଇନିଃ ଅନୋଲ୍ ସାକାମ୍ ଆସିକେତେ ଅଲ୍ କେଦାଏ, “ନିଜାଃ ନୁତୁମ୍ ଯୋହାନ୍ ତାନାଃ,” ହାର୍ ସବେନ୍ କୋ ଆକ୍‍ଦାନ୍ଦା ଜାନାକୋ। ଇମ୍ତାଗି ଇନିଜାଃ ମୋଚା ଆଡୋଃ ଆଲାଙ୍ଗ୍ ଖଲାଅ ଜାନା ଆଡୋଃ ଇନିଃ ବାକାଣ୍ ଏଟେଃ କେଦାଏ ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ। ଇନିଜାଃ ନାଡ଼େଏଃ ଜାପାଃ ରେ ତାଇନ୍‍ତାନ୍ କୋୱାଃ ରେ ବୋରୋ ବୋଲୋଜାନା, ଏନ୍ତେ ୟାହୁଦୀୟା ଜିଲ୍ଲା ରାଃ ହାତୁ କୋରେ ଅକନାଃ ବୁରୁ ଚେତାନ୍ ରେ ତାଇଲେନା ଏନ୍ତାଃ ରେନ୍ ହୋଡ଼ୋକୋ ନେ ସବେନ୍ କାଜିକୋକେ ବାକାଣ୍ କେଦାକୋ। ଏନ୍ତେ ସବେନ୍ ଆୟୁମ୍‍କେନ୍ କୋ ଆକୋୱାଃ-ଆକୋୱାଃ ମୋନ୍ ରେ ପାହୋମ୍ ହାର୍ କାଜିକେଦାକୋ, “ନେ ହୋନ୍ ଚିଲ୍‍କାନ୍ ହୋନ୍ ହୋବାଅଗାଏ?” ଚିୟାଃଚି ପ୍ରାଭୁ ଆଃ ପେଡ଼େଏ ଇନିଜାଃ ଲୋଃ ତାଇକେନା। ଇନିଜାଃ ଆପୁ ଜାକାର୍ୟାହ୍ ପାବିତାର୍ ଆତ୍ମା ତେ ଫେରେଃ ଜାନାଏ ଆଡୋଃ ଆୟାର୍‍କାଜି କାଜିକେଦାଏ, “ଧାନ୍ୟା ତାନିଃ ପ୍ରାଭୁ, ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋୱାଃ ପାର୍ମେଶ୍ଵାର୍! ଚିୟାଃଚି ଇନିଃ ଆକୋ ହୋଡ଼ୋକୋକେ ନେଲ୍ କେଃକୋୱାଏ ହାର୍ ଇନ୍‍କୁକେ ଛୋଡ଼ାଓ କେଃକୋୱାଏ। ଇନିଃ ଆଜାଃ ଦାସୀ ଦାଉଦ୍ ରାଜା ରାଃ କିଲି ରେ ଆବୁଲାଗିନ୍ ମିୟାଃ ପେଡ଼େଜାନ୍ ବାଞ୍ଚାଅ ନିଈ କେ କୁଲ୍‍କିଜାଏ। ସିଦା ସାମାୟ୍ ଏତେ ପ୍ରାଭୁ ଆଜାଃ ପାବିତାର୍ ନାବୀ କୋଏତେ ଅକନାଃ କାଜିଲେଦାଏ, ଇନିଃ ଆବୁୱାଃ ବାଇରୀ କୋୱାଃ ତେ ଆଡୋଃ ଏନ୍ ସବେନ୍ ପେଡ଼େଏ ଏତେ ଆବୁକେ ବାଞ୍ଚାଅ ବୁୱାଏ ଅକନ୍‍କୋ ଆବୁକେ ହିଲାଙ୍ଗ୍ ୟାକୋ। ଇନିଃ ଆବୁୱାଃ ପୁର୍ଖା-ଆପୁ କୋକେ ଦାୟା ଏମ୍ ନାଙ୍ଗ୍ ହାର୍ ଆୟାଃ ପାବିତାର୍ ନିୟାମ୍‍ଥଲ୍ କେ ମୋନେ ନାଙ୍ଗ୍ ରିକାୟାଏ। ଏନ୍ କିରିୟା ଅକନାଃ ଇନିଃ ଆବୁୱାଃ ପୁର୍ଖା-ଆପୁ ଆବ୍ରାହାମ୍ ଲୋଃ ଜୋମ୍ ଲେଦାଏ। ଇନିଃ ଆବୁକେ ନେୟା ଏମାଃ ବୁୱାଏ ଏନାତେ ଆବୁକେ ଆବୁୱାଃ ବାଇରୀ କୋୱାଃ ତିଈ ତେ ବାଞ୍ଚାଅ କେତେ, ଇନିଜାଃ ନାଡ଼େଏଃ ପାବିତାର୍ ଗି ଆଡୋଃ ଧାର୍ମୀ ଗି ତାଇନ୍ କେତେ ଜୀଦାନ୍ ଭାଇର୍ କା ବୋରୋ କେତେ ଆଜାଃ ସେୱା ବୁ ରିକାୟା। ଏନ୍ତେ ଆମ୍ ହେ ହୋନ୍, ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ନାବୀ କାଜିୟଗାମ୍, ଚିୟାଃଚି ଆମ୍ ପ୍ରାଭୁ ଆଃ ଆୟୁର୍-ଆୟୁର୍ ସେନ୍ଆମ୍ ଚି, ହୋଡ଼ୋକୋକେ ପ୍ରାଭୁ ରାଃ ହିଜୁଃ ଲାଗିନ୍ ସେକାଡ଼୍ କୋୱାମ୍। ଚି ଇନିଜାଃ ହୋଡ଼ୋକୋକେ ବାଞ୍ଚାଅ ରାଃ ସେଣା ଏମେୟାମ୍, ଅକନାଃ ଇନ୍‍କୁକେ ପାପ୍ ଛାମା ଏତେ ନାମୋଗା। ନେୟା ଆବୁୱାଃ ପାର୍ମେଶ୍ଵାର୍ ରାଃ ଏନ୍ ମାରାଙ୍ଗ୍ ଦାୟା ଏତେ ହୋବାୱା, ଜେଲେକା ଚେତାନ୍ ଏତେ ଆବୁ ଲାଗିନ୍ ସେତାଃ ରାଃ ଶିଙ୍ଗି ତୁରୋଃୱା ଏନ୍‍‍ଲେକା ମାସୀହ୍ ହଗି ଆବୁ ତାଃ ସିର୍ମାଦିଶୁମ୍ ଏତେ ହିଜୁଗାଏ। ଏନାତେ ନୁବାଃ ଆଡୋଃ ଗୋନୋଏଃ ରାଃ ଉମ୍ବୁଲ୍ ରେ ଦୁବାକାନ୍ କୋ ମାସ୍କାଲ୍ ନାମେୟାକୋ ଆଡୋଃ ଏନ୍ ମାସ୍କାଲ୍ ଆବୁୱାଃ ସେସେନ୍ ହୋରା ରେ ପାର୍ମେଶ୍ଵାର୍ ଲୋଃ ସୁକୁ ଏମାବୁୱାଏ।” ଆଡୋଃ ଏନ୍ ହୋନ୍ ଯୋହାନ୍ ମାରାଙ୍ଗ୍ ଇଦି ଜାନାଏ, ହାର୍ ଆତ୍ମା ରେ ପେଡ଼େଏ ଇଦି ଜାନାଏ, ହାର୍ତେ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋକେ ଆଉରି ପାର୍ଚାର୍ ସାନ୍ ସୁନ୍‍ସାନ୍ ଜାଗା ରେ ତାଇଜାନାଏ। ଏନ୍ ହୁଲାଙ୍ଗ୍ କୋରେ ରୋମ୍‍ରେନ୍ ରାଜା ଆଗାସ୍ତୁସ୍ ପାଡ଼େତେ ଆନାଚୁ ଅଡୋଙ୍ଗ୍ ଜାନା ଚି ଗୋଟା ରୋମ୍ ଦିଶୁମ୍ ରାଃ ହୋଡ଼ୋକୋୱାଃ ନୁତୁମ୍ ଅଲୋଃ କା। ନେ ପାହିଲା ନୁତୁମ୍ ଅନୋଲ୍ ଏନ୍ ସାମାୟ୍ ରେ ହୋବାଜାନା, ଚିମ୍ତାଙ୍ଗ୍ କ୍ୱିରିନିଉସ୍ ସିରିୟା ଜିଲ୍ଲା ରେନ୍ ହାକିମ୍ ତାଇକେନାଏ। ଏନାମେନ୍ତେ ହୋଡ଼ୋକୋ ନୁତୁମ୍ ଅହଲ୍ ନାଙ୍ଗ୍ ଆକୋୱାଃ-ଆକୋୱାଃ ପୁର୍ଖା-ଆପୁ କୋୱାଃ ହାତୁ ତେକୋ ସେନ୍ ଜାନାକୋ। ଏନାତେ ଯୋଶେଫ୍ ହ ଗାଲିଲୀ ଜିଲ୍ଲା ରାଃ ନାଜ୍ରେଥ୍ ସାହାର୍ ଏତେ ୟାହୁଦୀୟା ଜିଲ୍ଲା ରାଃ ଦାଉଦ୍ ଆଃ ହାତୁ ବେଥ୍ଲେହେମ୍ ତେ ସେନ୍ ଜାନାଏ, ଚିୟାଃଚି ଇନିଃ ଦାଉଦ୍ ଅଡ଼୍ଆଃ ରେନିଃ ଆଡୋଃ ଆଜାଃ କିଲି ରେନ୍ ତାଇକେନାଏ। ଏନାମେନ୍ତେ ଇନିଃ ଆଜାଃ ଲୋଟାଦାଆଃ ହୋବାକାନ୍ କୁଡ଼ି ମାରିୟାମ୍ ଲୋଃ ଅକନିଃ ହୋଡ଼ମୋ ରେ ତାଇକେନାଏ ନୁତୁମ୍ ଅହଲ୍ ରିକା ନାଙ୍ଗ୍ ସେନ୍ ଜାନାଏ। ଏନ୍ ଜାଗା ରେ ତାଇତାନ୍ ଲୋଃ ବୁଗିୟୋଃ ସାମାୟ୍ ପୁରା ଜାନା। ଏନ୍ତେ ମାରିୟାମ୍ ଆଜାଃ ପାହିଲା ହୋନ୍‍କୋଡ଼ା ଜାନାମ୍ କିଜାଏ, ଇନିଃକେ ଲିଜାଃ ରେ ଲାଟୁମ୍ଉୟୁ କେତେ ଉରିଃ କୋୱାଃ ଡାଟ୍କା ରେ ଦୋହୋକିଜାଏ, ଚିୟାଃଚି ଇନ୍‍କୁ ଲାଗିନ୍ତେ ବେଥ୍ଲେହେମ୍ ହାତୁ ରେ ତାଇନ୍ ଲାଗିନ୍ ଡେରା-ଅଡ଼୍ଆଃ ରେ ଜାଗା କା ତାଇକେନା। ଆଡୋଃ ଏନ୍ ବେଥ୍ଲେହେମ୍ ହାତୁ ରାଃ ନାଡ଼େଏ ପିଡ଼ି ରେ ଚିମିନାଙ୍ଗ୍ ମିଣ୍ଡୀ ଗୁପିକୋ ମିଣ୍ଡୀ ଗୁପି ତାଇକେନାକୋ, ଇନ୍‍କୁ ନିଦା ଇମ୍ତା ପିଡ଼ି ରେ ଆକୋୱାଃ ମିଣ୍ଡୀ କୋକେ ହୋରୋ ତାଇକେନାକୋ। ପ୍ରାଭୁ ଆଃ ମିୟାଃ ସିର୍ମାଦାସୀ ଇନ୍‍କୁୱାଃ ସାମାନାଙ୍ଗ୍ ରେ ତିଙ୍ଗୁ ଜାନାଏ, ଆଡୋଃ ପ୍ରାଭୁ ଆଃ ମାସ୍କାଲ୍ ସବେନ୍ ପାଡ଼୍ ମାର୍ଶାଲ୍ ଜାନା, ଏନ୍ତେ ଇନ୍‍କୁ ଥିମ୍ବାଗି ବୋରୋ ଜାନାକୋ। ଏନ୍ତେ ସିର୍ମାଦାସୀ ଇନ୍‍କୁକେ କାଜିକେଦାଏ, “ଆଲୋପେ ବୋରୋୟା, ନେଲେପେ ଇଙ୍ଗ୍ ଆପେକେ ମାରାଙ୍ଗ୍ ରାଶିକା ରାଃ ସୁସାମାଚାର୍ ଉଦୁବ୍ ପେ ତାନିଙ୍ଗ୍ ଏନା ସବେନ୍ ହୋଡ଼ୋକୋ ଲାଗିନ୍ ହୋବାୱା। ଇସିଙ୍ଗ୍ ଦାଉଦ୍ ରାଜା ରାଃ ହାତୁ ବେଥ୍ଲେହେମ୍ ରେ ଆପେ ଲାଗିନ୍ ମିୟାଃ ବାଞ୍ଚାଅନିଃ ଜାନାମ୍ କାନାଏ, ଆଡୋଃ ନିଈ ଗି ମାସୀହ୍ ପ୍ରାଭୁ ତାନିଃ। ଆପେ ନେଲ୍ ଉରୁମ୍ ଧାଡ଼ିୟାପେ ମେନ୍ତେ ନେୟା ମିୟାଃ ଚିହ୍ନା ତାନାଃ ଚି ମିୟାଃ କୋଡ଼ାହୋନ୍ ଲିଜାଃ ରେ ଲାଟୁମ୍ ଉୟୁକାନ୍ ଆଡୋଃ ଉରିଃ କୋୱାଃ ଡାଟ୍କା ରେ ଗିତିଃକାନ୍ ନାମିୟାପେ।” ଏନ୍ତେ ଇମ୍ତାଗି ଏନ୍ ସିର୍ମାଦାସୀ ଲୋଃ ଆଡୋଃଗି ସିର୍ମାଦାସୀ କୋୱାଃ ଦାଲ୍ ନେଲ୍ ଜାନାକୋ ଏନ୍ତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ତାନ୍ ଲୋଃ ଦୁରାଙ୍ଗ୍ କେଦାକୋ। “ସିର୍ମାଦିଶୁମ୍ ରେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ହାର୍ ଅତେ ରେ ଏନ୍ ହୋଡ଼ୋକୋୱାଃ ରେ ଅକନ୍ କୋକେ ଇନିଃ ସୁକୁକୋ ତାନାଏ, ଶାନ୍ତି ହୋବାଅଃକା।” ଚିମ୍ତାଙ୍ଗ୍ ସିର୍ମାଦାସୀକୋ ଇନ୍‍କୁୱାଃ ନାଡ଼େଜେତେ ସିର୍ମାଦିଶୁମ୍ ତେ ରୁଆଡ଼୍ ଜାନାକୋ, ଏନ୍ତେ ମିଣ୍ଡୀ ଗୁପିକୋ ଆକୋ ରେ କାଜିଜାନାକୋ, “ଦୋଲାବୁ, ବେଥ୍ଲେହେମ୍ ହାତୁ ତେ ଅକତାଃ ନେୟାକୋ ହୋବାକାନା ଜେଲେକା ପ୍ରାଭୁ ଆବୁକେ ଉଦୁବାଃ କାବୁୱାଏ, ନେଲେୟାବୁ।” ଏନ୍ତେ ଇନ୍‍କୁ ସେକାଡ଼୍ ଗି ସେନ୍ କେତେ ମାରିୟାମ୍ ଆଡୋଃ ଯୋଶେଫ୍ କେ ହାର୍ ଉରିଃ କୋୱାଃ ଡାଟ୍କା ରେ ଏନ୍ ହୋନ୍ କେ ଗିତିଃକାନ୍ ନେଲ୍ କିଜାକୋ। ନେୟା ନେଲ୍‍କେତେ ଏନ୍ ହୋନ୍ ଅକନିଜାଃ ବିଷାୟ୍ ରେ ସିର୍ମାଦାସୀ ଇନ୍‍କୁକେ ଉଦୁବ୍ ଲେଦାଏ, ଏନାକେ ଉଦୁବ୍ କେଦାକୋ। ଏନ୍ତେ ସବେନ୍ ଆୟୁମ୍‍ତାନ୍ କୋ ଏନ୍ କାଜିକୋକେ ଅକନାଃ ମିଣ୍ଡୀ ଗୁପିକୋ ଇନ୍‍କୁକେ କାଜିକେଦାକୋ ଆକ୍‍ଦାନ୍ଦା ଜାନାକୋ। ମେନ୍ଦୋ ମାରିୟାମ୍ ନେ ସବେନ୍ କାଜିକୋକେ ଆୟୁମ୍‍କେତେ ମୋନ୍ ରେ ପାହୋମ୍ ତାଇକେନାଏ। ଏନ୍ତେ ମିଣ୍ଡୀ ଗୁପିକୋ ଜେଲେକା ସିର୍ମାଦାସୀ ଇନ୍‍କୁକେ କାଜିଲେଦାଏ ଏନ୍‍ଲେକାଗି ଆୟୁମ୍ ନେଲ୍‍କେତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଆଡୋଃ ଦୁରାଙ୍ଗ୍ ତାନ୍ ଲୋଃ ଆକୋୱାଃ ମିଣ୍ଡୀ କୋତାଃ ରୁଆଡ଼୍ ଜାନାକୋ। ଚିମ୍ତା ଆଠ୍ ଦିନ୍ ପୁରା ଜାନା ଏନ୍ତେ ଇନିଜାଃ ଖାତ୍ନା ରାଃ ଦିନ୍ ସେଟେର୍ ଜାନା, ଏଣ୍ଡେ ଇନିଜାଃ ନୁତୁମ୍ ୟୀଶୁ ମାଣ୍ଡାଅ କେଦାକୋ, ଜେଲେକା ସିର୍ମାଦାସୀ ଇନିଜାଃ ଲାହେଃ ରେ ହିଜୁଃ ସିଦା କାଜିଲେଦାଏ। ଚିମ୍ତାଙ୍ଗ୍ ମୁଶା ନାବୀ ରାଃ ଆଇନ୍ ଲେକା ମାରିୟାମ୍ ରାଃ ଫାର୍ଚିଏନ୍ ସାମାୟ୍ ପୁରା ଜାନା, ଏଣ୍ଡେ ଯୋଶେଫ୍ ଆଡୋଃ ମାରିୟାମ୍ ଆଏଃକେ ୟୀରୁଶାଲେମ୍ ମାନ୍ଦିର୍ ରେ ପ୍ରାଭୁ ଆଃ ସାମ୍‍ନାଙ୍ଗ୍ ରେ ଆଉକିଜାକୋ। ଜେଲେକା ମୁଶା ନାବୀ ରାଃ ଆଇନ୍ ରେ ଅଲାକାନା, “ସବେନ୍ ପାହିଲା ଜାନାମ୍ କୋଡ଼ାହୋନ୍ ପ୍ରାଭୁ ଲାଗିନ୍ ପାବିତାର୍ ହୋବାୱା।” ହାର୍ ମୁଶା ନାବୀ ରାଃ ଆଇନ୍ ଲେକାତେ “ମିଃଜୁଡ଼ି ଦୁଦ୍‍ମୁଲ୍ ୟାଦୋ ପୁତାମ୍ ଆଃ ବାରିୟା ହୋନ୍ କିନ୍ ଆଉକେତେ ଦାଣେ ରାକାବ୍ ୟାକୋ।” ଏନ୍ ସାମାୟ୍ ୟୀରୁଶାଲେମ୍ ରେ ସିମିୟୋନ୍ ନୁତୁମ୍ ମିୟାଃ ହୋଡ଼ ତାଇକେନାଏ, ହାର୍ ଏନ୍ ହୋଡ଼ ଧାର୍ମୀ ଆଡୋଃ ପାର୍ମେଶ୍ଵାର୍ କେ ମାନାତିଙ୍ଗ୍ ନିଈ ତାଇକେନାଏ, ଆଡୋଃ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଶାନ୍ତି ନାମେ ୟାକୋ ମେନ୍ତେ ମାସୀହ୍ କେ ହୋରୋ ତାଇନାଏ, ଆଡୋଃ ପାବିତାର୍ ଆତ୍ମା ଇନିଜାଃ ଲୋଃ ତାଇକେନାଏ। ଇନିଃକେ ପାବିତାର୍ ଆତ୍ମା ତେ ଉଦୁବାକାନ୍ ତାଇକେନା, ଚି ଜେ ହୁଲାଙ୍ଗ୍ ସାନ୍ ପ୍ରାଭୁ ଆଃ ମାସୀହ୍ କେ କାଏ ନେଲେୟାଏ ଏନ୍ ହୁଲାଙ୍ଗ୍ ସାନ୍ ଆଏ କାଏ ଗୋଜୋଗା। ଏନ୍ ହୁଲାଙ୍ଗ୍ ଇନିଃ ପାବିତାର୍ ଆତ୍ମା ରାଃ ଶିଖାଅ ଲେକାତେ ମାନ୍ଦିର୍ ରେ ହିଜୁଃ ଜାନାଏ, ଆଡୋଃ ଚିମ୍ତା ବାଲେଃ ୟୀଶୁ କେ ଆଜାଃ ଏଙ୍ଗା-ଆପୁକିନ୍ ମୁଶା ନାବୀ ରାଃ ଆଇନ୍ ଲେକା ରାଃ କାମି ରିକାଲାଗିନ୍ ଭିତାର୍ ଆଉକିଜାକୋ, ଇମ୍ତା ଇନିଃ ବାଲେଃ ୟୀଶୁ କେ ତିଈ ରେ ହାତାର୍ କେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କାଜିକେଦାଏ, “ହେ ଗୋମ୍‍କେ, ନାଆ ଆମ୍ ଆମାଃ ଦାସୀ ଇଙ୍ଗ୍‍କେ ଆମାଃ କିରିୟା ଲେକାତେ ଶାନ୍ତି ତେ ଗୋଏଃ ଲାଗିନ୍ ବିଦା ଏମାଇଙ୍ଗ୍ ମେ, ଚିୟାଃଚି ଇଙ୍ଗ୍ଆଃ ମେଏଃ ଆମାଃ ବାଞ୍ଚାଅ ରିକା ନିଈ କେ ନେଲ୍‍କିଜାଏ। ଅକଏକେ ସବେନ୍ ଦିଶୁମ୍ ରେନ୍ ହୋଡ଼ୋକୋ ଲାଗିନ୍ ବାଇ କାଇଜାମ୍। ଇନିଃ ଏଟାଃଜାତି ରେନ୍ କୋକେ ମାସ୍କାଲ୍ ଏମ୍ ଲାଗିନ୍ତେ ପାର୍ମେଶ୍ଵାର୍ ଦିମି ଆଡୋଃ ଆମାଃ ନିଜ୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଲାଗିନ୍ ମାଇନ୍ ରାଃ କାଜି ତାନାଃ।” ୟୀଶୁ ରାଃ ଏଙ୍ଗା-ଆପୁକିନ୍ ନେ ସବେନ୍ ବାକାଣ୍ କୋକେ ଅକନାଃ ସିମିୟୋନ୍ ଇନିଜାଃ ବିଷାୟ୍ ରେ କାଜିକେଦାଏ, ଆୟୁମ୍‍କେତେ ଆକ୍‍ଦାନ୍ଦାଅଃ ତାଇକେନାକିନ୍। ଏନ୍ତେ ସିମିୟୋନ୍ ଇନ୍‍କୁକେ ଆଶିଷ୍ ଏମ୍‍କେତେ ଇନିଜାଃ ଏଙ୍ଗା ମାରିୟାମ୍ କେ କାଜିକେଦାଏ, “ନେଲେମ୍, ନିଈ ଦୋ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ରେ ବାହୁତ୍ କୋ ଲାଗିନ୍ ନାଶ୍ ଆଡୋଃ ବାଞ୍ଚାଅ ଲାଗିନ୍, ଆଡୋଃ ମିୟାଃ ନେଲେକା ଚିହ୍ନା ହୋବାଅଃ ଲାଗିନ୍ ମାଣ୍ଡାଅ କାନାଏ, ଅକନିଜାଃ ବିରୋଧ୍ ରେ କାଜିକୋ କାଜିୟୋଗା, ନେତାଃ ସାନ୍ତେ ଚି ଆବେନାଃ ଜୀଉ ହ ତାଲ୍‍ୱାର୍ ଏତେ ଗୁତୁ ଫାରୋମ୍ ଲେକା ଦୁକୁ ନାମେୟାଏ, ନେୟାତେ ଥିମ୍ବାଗି ହୋଡ଼ୋକୋୱାଃ ମୋନ୍ ରାଃ ବିଚାର୍ ଉଦୁବୋଗା।” ଆଶେର୍ ରାଃ କିଲି ଏତେ ଆନ୍ନା ନୁତୁମ୍ ଫାନୁଏଲ୍ ଆଃ ହୋନ୍‍କୁଡ଼ି ମିହୋଡ଼୍ କୁଡ଼ି ନାବୀ ତାଇକେନାଏ। ଇନିଃ ଥିମ୍ବାଗି ବୁଡୀ ତାଇକେନାଏ, ହାର୍ ଆଣାଦୀ ହୋବାକେତେ ସାତ୍ ଶିର୍ମା ଭାଇର୍ ଆୟାଃ କଡ଼ା ଲୋଃ ତାଇନ୍ ଧାଡ଼ିକେନାଏ। ଇନିଃ ଚାଉରାସି ଶିର୍ମା ରେନ୍ ବିଧୋବା ତାଇଲେନାଏ, ହାର୍ ମାନ୍ଦିର୍ ନାଡ଼େଏ ଜାଗା କେ କାଏ ବାଗେ ତାଇକେନାଏ, ମେନ୍ଦୋ ଉପାସ୍ ହାର୍ ବିନ୍ତି ରିକା କେତେ ନିଦାଶିଙ୍ଗୀ ପାର୍ମେଶ୍ଵାର୍ କେ ସେୱା ତାଇକେନାଏ। ହାର୍ ଇନିଃ ନେଲେକାନ୍ ସାମାୟ୍ ରେ ହେନ୍ତାଃ ହିଜୁଃ ସେଟେର୍ ନାଏ ଚିମ୍ତା ସିମିୟୋନ୍ ମାରିୟାମ୍ ହାର୍ ଯୋଶେଫ୍ ଲୋଃ ବାକାଣ୍ ତାଇନାଏ ଏନ୍ତେ ଇନିଃ ପାର୍ମେଶ୍ଵାର୍ କେ ଧାନ୍ୟାବାଦ୍ ରିକା ଏଟେଃ କେଦାଏ, ହାର୍ ଏନ୍ ସବେନ୍ କୋକେ ଅକନ୍ କୋ ୟୀରୁଶାଲେମ୍ ରେନ୍ ହୋଡ଼ୋକୋୱାଃ ଛୋଡ଼ାଓ ଲାଗିନ୍ ପାର୍ମେଶ୍ଵାର୍ ମାସୀହ୍ କେ କୁଲିୟାଏ ମେନ୍ତେ ନେଲ୍ ହୋରୋ ତାଇକେନାକୋ, ଇନ୍‍କୁକେ ଏନ୍ ବାଲେଃ ୟୀଶୁ ରାଃ ବିଷାୟ୍ ରେ କାଜିକେଃକୋୱାଏ। ଚିମ୍ତାଙ୍ଗ୍ ଯୋଶେଫ୍ ଆଡୋଃ ମାରିୟାମ୍ ମୁଶା ନାବୀ ରାଃ ଆଇନ୍ ଲେକା ସବେନ୍ କାମି ପୁରା ଛାବା କେଦାକୋ, ଇନ୍‍କୁ ଗାଲିଲୀ ଜିଲ୍ଲା ରେ ଆକୋୱାଃ ହାତୁ ନାଜ୍ରେଥ୍ ସାହାର୍ ତେ ରୁଆଡ଼୍ ଜାନାକୋ। ହାର୍ ବାଲେଃ ହୋନ୍ ହାରା ଇଦିୟାନାଏ, ହାର୍ ପେଡ଼େଏ ଇଦିୟାନାଏ, ହାର୍ ସେଣା ତେ ଫେରେଃ ଇଦିୟାନାଏ, ହାର୍ ପାର୍ମେଶ୍ଵାର୍ ଇନିଃ କେ ଥିମ୍ବାଗି ସୁକୁଅଃ ତାଇକେନାଏ। ଇନିଜାଃ ଏଙ୍ଗା-ଆପୁକିନ୍ ସବେନ୍ ଶିର୍ମା ଫାସାହ୍ ପାରାବ୍ ରେ ୟୀରୁଶାଲେମ୍ ସେନ୍ ତାଇକେନାକିନ୍। ଚିମ୍ତାଙ୍ଗ୍ ୟୀଶୁ ବାରା ବାରାଶ୍ ରେନ୍ ହୋବାଜାନାଏ, ଇନ୍‍କୁ ପାରାବ୍ ରାଃ ନିୟାମ୍ ଲେକା ୟୀରୁଶାଲେମ୍ ତେ ସେନ୍ ଜାନାକୋ। ଚିମ୍ତାଙ୍ଗ୍ ଇନ୍‍କୁ ପାରାବେନ୍ ହୁଲାଙ୍ଗ୍ ପୁରା କେତେ ରୁଆଡ଼୍ ନାକୋ, ଇମ୍ତାଙ୍ଗ୍ ହୋନ୍ ୟୀଶୁ ୟୀରୁଶାଲେମ୍ ରେ ତାଇଜାନାଏ, ଆଡୋଃ ଆଜାଃ ଏଙ୍ଗା-ଆପୁକିନ୍ ନେୟା କାକିନ୍ ସାରି ତାଇକେନା। ଇନ୍‍କୁ ନେୟା ପାହୋମ୍ କେଦାକୋ, ଚି ଇନିଃ ଏଟାଃ ହୋରା ସେସେନ୍ କୋଲୋଃ ତାଇନୋଗାଏ, ଏନାମେନ୍ତେ ଇନ୍‍କୁ ମୁଶିଙ୍ଗ୍ ହୁଲାଙ୍ଗ୍ ରାଃ ହୋରା ସେନ୍-ସେନ୍ ଫାରୋମ୍ ଛାବା କେଦାକୋ, ଏନା ତାୟୋମ୍ତେ ଇନିଃକେ ଆକୋୱାଃ ଜାତିପେଡ଼ା ଆଡୋଃ ଚିହ୍ନାର୍-ଜାହ୍ନାର୍ କୋତାଃ ସାଙ୍ଗାର୍ ଏଟେଃ କିଜାକୋ। ମେନ୍ଦୋ ଚିମ୍ତାଙ୍ଗ୍ ଇନିଃକେ କାକୋ ନାମ୍ କିଜା ଏଣ୍ଡେ ସାଙ୍ଗାର୍-ସାଙ୍ଗାର୍ ୟୀରୁଶାଲେମ୍ ସାନ୍ ଆଡୋଃଗି ରୁଆଡ଼୍ ଜାନାକୋ। ଏନ୍ତେ ଆପି ହୁଲାଙ୍ଗ୍ ରାଃ ତାୟୋମ୍ତେ ଇନ୍‍କୁ ଇନିଃକେ ୟାହୁଦୀ-ମାନ୍ଦିର୍ ରାଃ ରାଚା ରେ ୟାହୁଦୀ ଧାରାମ୍ ଗୁରୁ କୋୱାଃ ଥାଲା ରେ ଦୁବ୍ କାନ୍, ଇନ୍‍କୁୱାଃ ବାକାଣ୍ ଆୟୁମ୍ ହାର୍ ଆକୋକେ କୁଲିତାନ୍ ଲୋଃ ନାମ୍ କିଜାକୋ। ଏନ୍ତାଃ ଚିମିନାଙ୍ଗ୍ ହୋଡ଼ୋକୋ ଇନିଜାଃ ବାକାଣ୍ ଆୟୁମ୍ ତାଇକେନାକୋ, ଇନ୍‍କୁ ସବେନ୍ ଇନିଜାଃ ସେଣା, ଆଡୋଃ ଇନିଜାଃ କାଜିରୁଆଡ଼୍ କେ ଆୟୁମ୍ କେତେ ଆକ୍‍ଦାନ୍ଦାଅଃ ତାଇକେନାକୋ। ଆଜାଃ ଏଙ୍ଗା-ଆପୁକିନ୍ ଆଏଃ କେ ନେଲ୍ କେତେ ଆକ୍‍ଦାନ୍ଦା ଜାନାକିନ୍ ଏନ୍ତେ ଆଜାଃ ଏଙ୍ଗାକିନ୍ ଆଏଃ କେ କାଜିକିଜାକିନ୍, “ହେ ବାବୁ, ଆମ୍ ଚିନାଃ ମେନ୍ତେ ଆଲେ ଲୋଃ ନେକା ରିକାକେଦାମ୍? ନେଲେମ୍, ଆମାଃ ଆବା ଆଡୋଃ ଇଙ୍ଗ୍ ଆମ୍‍କେ ଥିମ୍ବାଗି ଦୁକୁତାନ୍ ଲୋଃ ଦାଣା ବାଡ଼ାମେ ତାନାଲେ?” ଇନିଃ ଇନ୍‍କିନ୍ କେ କାଜିକେଃକିନାଏ, “ଆପେ ଚିନାଃ ମେନ୍ତେ ଇଙ୍ଗ୍‍କେ ଦାଣା ବାଡ଼ାଇଙ୍ଗ୍ ତାନାପେ? ଚିନାଃ କାପେ ସାରି ତାଇନା ଚି ଇଙ୍ଗ୍‍କେ ଇଙ୍ଗ୍ଆଃ ଆପୁ ଆଃ ଅଡ଼୍ଆଃ ରେ ତାଇନ୍ ମେନାଃ?” ମେନ୍ଦୋ ଅକନ୍ କାଜି ଇନିଃ ଇନ୍‍କିନ୍ କେ କାଜିକେଃକିନାଏ, ଏନା ରାଃ ମାନେ ଆକିନ୍ କାକିନ୍ ବୁଝାଅଜାନା। ଏନ୍ତେ ଇନିଃ ଇନ୍‍କୁ ଲୋଃ ନାଜ୍ରେଥ୍ ସାହାର୍ ରୁଆଡ଼୍ ଜାନାଏ, ହାର୍ ଆକିନାଃ କାଜି ଆୟୁମ୍ କେଦାଏ, ଆଡୋଃ ଆଜାଃ ଏଙ୍ଗାକିନ୍ ନେ ସବେନ୍ କାଜିକୋକେ ମୋନ୍ ରେ ଦହ କେଦାଏ। ଏନ୍ତେ ୟୀଶୁ ସେଣା ରେ ହାର୍ ହୋଡ଼ମୋ ରେ ହାରା ଇଦିୟାନାଏ ହାର୍ ପାର୍ମେଶ୍ଵାର୍ ରାଃ ଆଡୋଃ ହୋଡ଼ୋକୋୱାଃ ଆନୁଗ୍ରାହ୍ ରେ ମାରାଙ୍ଗ୍ ଇଦି ଜାନାଏ। ରୋମ୍‍ରେନ୍ ରାଜା ତିବିରିୟୁସ୍ ଆଜାଃ ରାଇଜ୍ ତାନ୍ ରାଃ ପାନ୍ଦ୍ରା ବାରାଶ୍ ରେ, ଚିମ୍ତା ପୁନ୍ତିୟୁସ୍ ପିଲାତୁସ୍ ୟାହୁଦୀୟା ଜିଲ୍ଲା ରେନ୍ ହାକିମ୍ ତାଇକେନାଏ, ହାର୍ ଗାଲିଲୀ ଜିଲ୍ଲା ରେ ରାଜା ହେରୋଦ୍ ରାଇଜ୍ ତାଇନାଏ, ଏନ୍ତେ ଇନିଜାଃ ହାଗା ଫିଲିପୁସ୍ ଇତୁରେୟା ହାର୍ ତ୍ରାଖୋନିତିସ୍ ଜିଲ୍ଲା ରେ ଆଡୋଃ ରାଜା ଲିସାନିଆସ୍ ଆବିଲେନେ ଜିଲ୍ଲା ରେନ୍ ତାଇକେନାଏ। ଏନ୍ତେ ଚିମ୍ତାଙ୍ଗ୍ ହାନ୍ନା ହାର୍ କୈଫା ମାରାଙ୍ଗ୍‍ୟାଜାକ୍ ତାଇକେନାକୋ, ଏନ୍ ସାମାୟ୍ ରେ ପାର୍ମେଶ୍ଵାର୍ ରାଃ ବାଚାନ୍ ସୁନ୍‍ସାନ୍ ଜାଗା ରେ ତାଇତାନ୍ ଜାକାର୍ୟାହ୍ ରାଃ ହୋନ୍‍କୋଡ଼ା ଯୋହାନ୍ ତାଃ ସେଟେର୍ ଜାନା। ଇନିଃ ଯାର୍ଦାନ୍ ନାଈ ଜାପାଃ ରେୟାଃ ସବେନ୍ ନାଡ଼େଏ ଜାଗାକୋ ରେ ସେନ୍ କେତେ, ପାପ୍ କୋରାଃ ଛାମା ଲାଗିନ୍ ପାପ୍ କାମି ବାଗେ ରାଃ ବାପ୍ତିସ୍ମା ରାଃ ପାର୍ଚାର୍ ବାଡ଼ା କେଦାଏ। ଜେଲେକା ୟାଶାୟାହ୍ ନାବୀ ରାଃ କାଜିକାନ୍ ତେୟାଃ ବାଚାନ୍ କୋରାଃ କିତାବ୍ ରେ ଅଲାକାନା, “ସୁନ୍‍ସାନ୍ ଜାଗା ରେ ମିହୋଡ଼୍ କାଉରିତାନ୍ ନିଜାଃ କେଡ଼ା ଆୟୁମୋଃ ତାନା ଚି, ପ୍ରାଭୁ ଗାଃ ହୋରା ବାଇପେ, ଇନିଜାଃ ସାଣ୍ଡାକ୍ ସିଧା ବାଇୟେପେ। ସବେନ୍ ଗାଡା ଅତେକୋ ଫେରେଦୋଗା, ଆଡୋଃ ସବେନ୍ ବୁରୁ ହାର୍ ମାରାଙ୍ଗ୍‍ବୁରୁ କୋ ସାମାନ୍ ବାଇୟୋଗା; ହାର୍ ଅକନାଃ ବେଙ୍କୋ କାନା ସିଧାଅଗା, ହାର୍ ଅକନାଃ ଉବାଡ଼୍ ଖାବାଡ଼୍ ମେନାଃ ଏନା ସାମ୍ ହୋରା ବାଇୟୋଗା। ହାର୍ ସବେନ୍ ମାନ୍‍ୱା ହୋଡ଼ୋକୋ ପାର୍ମେଶ୍ଵାର୍ ରାଃ କୁଲାକାନ୍ ନିଃକେ ଅକନିଃ ଇନ୍‍କୁକେ ବାଞ୍ଚାଅ କୋୱାଏ ନେଲିୟାକୋ।” ଏନ୍ତେ ଚିମ୍ତାଙ୍ଗ୍ ମିଃଥିମ୍ବା ହୋଡ଼ୋକୋ ବାପ୍ତିସ୍ମା ଇଦି ନାଙ୍ଗ୍ ଇନିଃତାଃ ହିଜୁଃ ତାଇକେନାକୋ, ଇନିଃ ଇନ୍‍କୁକେ କାଜିକୋ ତାଇକେନାଏ, “ହେ ଆପେ ବିଷ୍ ରାକାବ୍ ବିଙ୍ଗ୍ ରାଃ ହୋନ୍ ଲେକାନ୍‍କୋ, ଆପେ ବାପ୍ତିସ୍ମା ଇଦିକେତେ ପାର୍ମେଶ୍ଵାର୍ ଏତେ ପାପ୍ ରାଃ ଦାଣ୍ଡ୍ କାଲେ ନାମେୟା ମେନ୍ତେ ଆଲୋପେ ପାହୋମେ।” ଏନାମେନ୍ତେ ଦାଣ୍ଡ୍ ଏତେ ବାଞ୍ଚାଅଃ ନାଙ୍ଗ୍ ଏନ୍‍ଲେକା କାମି କାମିପେ ଏନାତେ ସାରିଅଗା ଚି ଆପେ ପାପ୍ କାମି ବାଗେ କେଦାପେ, ହାର୍ ଆପେ ଆପେୟାଃ ମୋନ୍ ରେ ନେୟା ଆଲୋପେ ପାହୋମେୟା ଚି, ଆଲେୟାଃ ଆପୁ ଆବ୍ରାହାମ୍ ତାନିଃ ହାର୍ ପାର୍ମେଶ୍ଵାର୍ ଆବୁକେ କାଏ ଦାଣ୍ଡ୍ ଏମାବୁୱାଏ। ଚିୟାଃଚି ଇଙ୍ଗ୍ ଆପେକେ କାଜିୟାପେ ତାନାଇଙ୍ଗ୍, ଚି ପାର୍ମେଶ୍ଵାର୍ ନେ ଦିରି କୋଏତେ ଆବ୍ରାହାମ୍ ଲାଗିନ୍ ହୋନ୍‍ଗାଣା ଜାନାମ୍ ଧାଡ଼ିୟାଏ। ପାର୍ମେଶ୍ଵାର୍ ଏନ୍ ହୋଡ଼ୋକୋକେ ଦାଣ୍ଡ୍ ଏମେ ନାଙ୍ଗ୍ ସେକାଡ଼୍ କାନାଏ ଜେଲେକା ମିୟାଃ ହୋଡ଼ ହାକେ କେ ଦାରୁ ରାଃ ରେହେଃ ତାଃ ଦୋହୋ କାଦାଏ, ଏନାମେନ୍ତେ ଅକନ୍ ହୋଡ଼ କୋ ଏନ୍ ଦାରୁ ଲେକା ବୁଗିନ୍ ଯଅ କାକୋ ଆଉୱେୟା, ଇନ୍‍କୁ କେ ପାର୍ମେଶ୍ଵାର୍ ବିଚାର୍ କୋୱାଏ ହାର୍ ସେଙ୍ଗେଲ୍ ରେ ଦୁଡ଼ିଙ୍ଗ୍ ରିକା କୋୱାଏ। ହୋଡ଼ୋକୋ ଇନିଃକେ କୁଲିକିଜାକୋ, ଏଣ୍ଡେ ଆଲେ ଚିନାଃ ରିକାୟାଲେ? ଇନିଃ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଅକେତାଃ ବାରିୟା ଝୁଲା ମେନାଃ? ଇନିଃ ଏନାକେ ଅକେତାଃ ବାନୋଃ ହାଟିଙ୍ଗ୍ ତାକାଏ ହାର୍ ଅକେତାଃ ଜୋମେୟାଃ ମେନାଃ, ଇନିଃ ହଗି ଏନ୍‍ଲେକାଗି ରିକା କାଏ।” ମାଲ୍ ହାରୋମ୍ କୋ ହ ବାପ୍ତିସ୍ମା ଇଦିନାଙ୍ଗ୍ ହିଜୁଃ ନାକୋ, ହାର୍ ଇନିଃକେ କୁଲିକିଜାକୋ, ଚି “ହେ ଗୁରୁ, ଆଲେ ଚିନାଃ ରିକାୟାଲେ?” ଇନିଃ ଇନ୍‍କୁକେ କାଜିକେଃକୋୱାଏ, “ଅକନାଃ ଆପେ ଇଦି ଲାଗିନ୍ ରୋମାନ୍ ସାର୍କାର୍ ଠାହ୍‍ରାଓ କାଦାଏ, ଏନାତେ ଥିମ୍ବା ମାଲ୍ ଟାକା ଆଲୋପେ ହାରୋମେୟା।” ସିପାହୀକୋ ହ ଇନିଃକେ ନେୟା କୁଲିକିଜାକୋ, ଏଣ୍ଡେ “ଆଲେ ଚିନାଃ ରିକାୟାଲେ?” ଇନିଃ ଇନ୍‍କୁକେ କାଜିକେଦାଏ, “ଜେତାଏ ତେ ଜାବାରାନ୍ ଟାକା ଆଲୋପେ ଇଦିୟା, ଆଡୋଃ ଝୁଠ୍ ଦୋଷ୍ ଜେତାଏ କେ ଆଲୋପେ ଲାଗାଅୟା, ଆପେୟାଃ ନାଲା ଟାକା ରେ ଗି ସୁକୁଅଃପେ।” ହୋଡ଼ୋକୋ ମାସୀହ୍ ରାଃ ହିଜୁଃ ରାଃ ଆଶ୍ରା ରେ ତାଇକେନାକୋ, ଏନାଲାଗିନ୍ ସବେନ୍ ଆକୋ-ଆକୋୱାଃ ମୋନ୍ ରେ ଯୋହାନ୍ ବିଷାୟ୍ ରେ କୁପୁଲିଅଃ ତାଇକେନାକୋ, ଚିନାଃ ନିଈ ଦୋ ମାସୀହ୍ ନାହାଲାଏ! ଏଣ୍ଡେ ଯୋହାନ୍ ଏନ୍ ସବେନ୍ କୋକେ କାଜିକେଃକୋୱାଏ, “ଇଙ୍ଗ୍ ଦୋ ଆପେକେ ଦାଆ ଏତେ ବାପ୍ତିସ୍ମା ଏମାପେ ତାନିଙ୍ଗ୍, ମେନ୍ଦୋ ଇନିଃ ହିଜୁଃୱାଲା ମେନାଇଜା, ଅକନିଃ ଇଙ୍ଗ୍ଆଃ ତେ ପେଡ଼େଜାନ୍ ତାନିଃ; ଇଙ୍ଗ୍ ଦୋ ନେଲେକା ନିଈ ହ ନାହାଲାଇଙ୍ଗ୍, ଚି ଇନିଜାଃ ଖାର୍ପା ରାଃ ଥୋନୋଲ୍ ଖୋଲାଅୟାଇଙ୍ଗ୍, ଇନିଃ ଆପେକେ ପାବିତାର୍ ଆତ୍ମା ଆଡୋଃ ସେଙ୍ଗେଲ୍ ତେ ବାପ୍ତିସ୍ମା ଏମାପେୟାଏ। ଇନିଜାଃ ହାଟାଃ, ଇନିଜାଃ ତିଈ ରେ ମେନାଃ; ହାର୍ ଇନିଃ ଆଜାଃ କୋଲୋମ୍ ବେଶ୍ ଲେକାତେ ସାଫାୟାଏ; ହାର୍ ଗହମ୍ କୋକେ ଆଜାଃ ମୋଣା ରେ ହୁଣ୍ଡିୟାଏ, ମେନ୍ଦୋ ହେଡ଼େକେ ଏନ୍ ସେଙ୍ଗେଲ୍ ରେ ଅକନାଃ କା ଇଣିଜୋଗା ଜୁଲେୟାଏ।” ଇନିଃ ନେଲେକା ଥିମ୍ବାଗି ବୁଗିନ୍ କାଜିକୋ ହାର୍ ଉପ୍‍ଦେଶ୍ ଏମ୍ କେତେ ହୋଡ଼ୋକୋକେ ସୁସାମାଚାର୍ ଉଦୁବ୍ କେଃକୋୱାଏ। ମେନ୍ଦୋ ଚିମ୍ତା ଚାଇର୍ ଜିଲ୍ଲା ହାନାଟିଙ୍ଗ୍ ତେ ମିୟାଃ ଜିଲ୍ଲା ରେନ୍ ରାଜା ହେରୋଦ୍ କେ ଇନିଜାଃ ହାଗା ଫିଲିପୁସ୍ ରାଃ କୁଡ଼ି ହେରୋଦିଆସ୍ ରାଃ ବିଷାୟ୍ ରେ, ହାର୍ ସବେନ୍ ଏତ୍କାନ୍ କାମି ବିଷାୟ୍ ରେ ଅକନାଃ ଇନିଃ ରିକା ଲେଦାଏ, ଯୋହାନ୍ ଏଗେର୍ କିଜାଏ। ଏନାମେନ୍ତେ ହେରୋଦ୍ ରାଜା, ଯୋହାନ୍ କେ ଜେଲ୍ଅଡ଼୍ଆଃ ରେ ଆଦେର୍ କେତେ ଏନା ତେହ ମାରାଙ୍ଗ୍ ଏତ୍କାନ୍ କାମି ରିକା କେଦାଏ। ଯୋହାନ୍ କେ ଜେଲ୍ଅଡ଼୍ଆଃ ରେ ଆଦେର୍ ସିଦା ଚିମ୍ତା ସବେନ୍ ହୋଡ଼ୋକୋ ବାପ୍ତିସ୍ମା ଇଦିକେଦାକୋ ଇମ୍ତା ୟୀଶୁ ହ ବାପ୍ତିସ୍ମା ଇଦିକେତେ ବିନ୍ତି ତାଇକେନାଏ, ଏଣ୍ଡେ ରିମିଲ୍‍ଦିଶୁମ୍ ଖଲାଅ ଜାନା, ଆଡୋଃ ପାବିତାର୍ ଆତ୍ମା ହୋଡ଼ମୋ ରୂପ୍ ରେ ଦୁଦ୍‍ମୁଲ୍ ଲେକା ଇନିଜାଃ ଚେତାନ୍ ରେ ଆଡ଼୍‍ଗୁଜାନାଏ, ହାର୍ ନେ କାଜି ରିମିଲ୍‍ଦିଶୁମ୍ ତେ ହିଜୁଃଲେନା: “ଆମ୍ ଇଙ୍ଗ୍ଆଃ ଦୁଲାଡ଼ାନ୍ ହୋନ୍ ତାନ୍‍ମେ, ଇଙ୍ଗ୍ ଆମ୍ତେ ସୁକୁ ମେନାଇଙ୍ଗ୍‍ୟା।” ଚିମ୍ତାଙ୍ଗ୍ ୟୀଶୁ ଆଜାଃ ସେୱା କାମି ଏଟେଃ କେଦାଏ, ଇମ୍ତାଙ୍ଗ୍ ଇନିଃ ଲାଗ୍‍ଭାଗ୍ ତିସ୍ ବାରାଶ୍ ରେନ୍ ତାଇକେନାଏ (ଜେଲେକା ଆନୁମାନୋଃ ତାଇକେନା) ଇନିଃ ଯୋଶେଫ୍ ରାଃ ହୋନ୍‍କୋଡ଼ା ତାଇକେନାଏ, ହାର୍ ଯୋଶେଫ୍ ଏଲି ରାଃ ହୋନ୍‍କୋଡ଼ା ତାଇକେନାଏ, ଆଡୋଃ ଏଲି ମାତ୍ତାତ୍ ରାଃ, ଆଡୋଃ ମାତ୍ତାତ୍ ଲେବୀ ରାଃ, ଆଡୋଃ ଲେବୀ ମଲ୍‍କି ରାଃ, ଆଡୋଃ ମଲ୍‍କି ୟାନ୍ନା ରାଃ, ଆଡୋଃ ୟାନ୍ନା ଯୋଶେଫ୍ ରାଃ। ଆଡୋଃ ଯୋଶେଫ୍ ମାତିୟାହ୍ ରାଃ, ଆଡୋଃ ମାତିୟାହ୍ ଆମୋସ୍ ରାଃ, ଆଡୋଃ ଆମୋସ୍ ନାହୁମ୍ ରାଃ, ଆଡୋଃ ନାହୁମ୍ ଅସଲ୍ୟାହ୍ ରାଃ, ଆଡୋଃ ଅସଲ୍ୟାହ୍ ନଗୋହ୍ ରାଃ। ଆଡୋଃ ନଗୋହ୍ ମାତ୍ ରାଃ, ଆଡୋଃ ମାତ୍ ମାତିୟାହ୍ ରାଃ ଆଡୋଃ ମାତିୟାହ୍ ଶିମି ରାଃ, ଆଡୋଃ ଶିମି ୟୋଖେସ୍ ରାଃ, ଆଡୋଃ ୟୋଖେସ୍ ୟୋଦାହ୍ ରାଃ, ଆଡୋଃ ୟୋଦାହ୍ ଯୋହାନ୍ ରାଃ, ଆଡୋଃ ଯୋହାନ୍ ରେସା ରାଃ, ଆଡୋଃ ରେସା ଜେରୁବାବିଲ୍ ରାଃ, ଆଡୋଃ ଜେରୁବାବିଲ୍ ଶାଲ୍‍ତିୟେଲ୍ ରାଃ, ଆଡୋଃ ଶାଲ୍‍ତିୟେଲ୍ ନେରି ରାଃ ଆଡୋଃ ନେରି ମଲ୍‍କି ରାଃ, ଆଡୋଃ ମଲ୍‍କି ଆଦ୍ଦି ରାଃ, ଆଡୋଃ ଆଦ୍ଦି କୋସାମ୍ ରାଃ, ଆଡୋଃ କୋସାମ୍ ଇଲ୍ମୋଦାମ୍ ରାଃ, ଆଡୋଃ ଇଲ୍ମୋଦାମ୍ ଏର୍ ରାଃ। ଆଡୋଃ ଏର୍ ଯୋଶୁଆ ରାଃ, ଆଡୋଃ ଯୋଶୁଆ ଏଲିୟାଜାର୍ ରାଃ, ଆଡୋଃ ଏଲିୟାଜାର୍ ୟୋରିମ୍ ରାଃ, ଆଡୋଃ ୟୋରିମ୍ ମାତ୍ତାତ୍ ରାଃ, ଆଡୋଃ ମାତ୍ତାତ୍ ଲେବୀ ରାଃ ଆଡୋଃ ଲେବୀ ସିମିୟୋନ୍ ରାଃ, ଆଡୋଃ ସିମିୟୋନ୍ ୟାହୁଦା ରାଃ, ଆଡୋଃ ୟାହୁଦା ଯୋଶେଫ୍ ରାଃ, ଆଡୋଃ ଯୋଶେଫ୍ ୟୋନାନ୍ ରାଃ, ଆଡୋଃ ୟୋନାନ୍ ଇଲିୟାକିମ୍ ରାଃ। ଆଡୋଃ ଇଲିୟାକିମ୍ ମାଲେଆହ୍ ରାଃ, ଆଡୋଃ ମାଲେଆହ୍ ମିନ୍ନାହ୍ ରାଃ, ଆଡୋଃ ମିନ୍ନାହ୍ ମାତ୍ତାତା ରାଃ, ଆଡୋଃ ମାତ୍ତାତା ନାଥାନ୍ ରାଃ, ଆଡୋଃ ନାଥାନ୍ ଦାଉଦ୍ ରାଃ। ଆଡୋଃ ଦାଉଦ୍ ଯେଶୀ ରାଃ, ଆଡୋଃ ଯେଶୀ ଓବେଦ୍ ରାଃ, ଆଡୋଃ ଓବେଦ୍ ବୋଆଜ୍ ରାଃ, ଆଡୋଃ ବୋଆଜ୍ ସାଲ୍‍ମୋନ୍ ରାଃ, ଆଡୋଃ ସାଲ୍‍ମୋନ୍ ନାହ୍‍ସୋନ୍ ରାଃ। ଆଡୋଃ ନାହ୍‍ସୋନ୍ ଅମ୍ମିନାଦାବ୍ ରାଃ, ଆଡୋଃ ଅମ୍ମିନାଦାବ୍ ଆର୍ନି ରାଃ, ଆଡୋଃ ଆର୍ନି ହିସ୍ରୋନ୍ ରାଃ, ଆଡୋଃ ହିସ୍ରୋନ୍ ଫିରିସ୍ ରାଃ, ଆଡୋଃ ଫିରିସ୍ ୟାହୁଦା ରାଃ। ଆଡୋଃ ୟାହୁଦା ୟାକୁବ୍ ରାଃ, ଆଡୋଃ ୟାକୁବ୍ ଇସାହାକ୍ ରାଃ, ଆଡୋଃ ଇସାହାକ୍ ଆବ୍ରାହାମ୍ ରାଃ, ଆଡୋଃ ଆବ୍ରାହାମ୍ ତିରାହ୍ ରାଃ, ଆଡୋଃ ତିରାହ୍ ନାହୋର୍ ରାଃ। ଆଡୋଃ ନାହୋର୍ ସାରୂଗ୍ ରାଃ, ଆଡୋଃ ସାରୂଗ୍ ରେଉ ରାଃ, ଆଡୋଃ ରେଉ ପେଲେଗ୍ ରାଃ, ଆଡୋଃ ପେଲେଗ୍ ଏବିର୍ ରାଃ, ଆଡୋଃ ଏବିର୍ ଶିଲୋହ୍ ରାଃ। ଆଡୋଃ ଶିଲୋହ୍ କେନାନ୍ ରାଃ, ଆଡୋଃ କେନାନ୍ ଆର୍ଫାକ୍ଷଦ୍ ରାଃ, ଆଡୋଃ ଆର୍ଫାକ୍ଷଦ୍ ଶେମ୍ ରାଃ, ଆଡୋଃ ଶେମ୍ ନୁହ୍ ରାଃ, ନୁହ୍ ଲିମିକ୍ ରାଃ। ଆଡୋଃ ଲିମିକ୍ ମାଥୁଶିଲାହ୍ ରାଃ, ଆଡୋଃ ମାଥୁଶିଲାହ୍ ହାନୋକ୍ ରାଃ, ଆଡୋଃ ହାନୋକ୍ ୟୀରିଦ୍ ରାଃ, ଆଡୋଃ ୟୀରିଦ୍ ମାହାଲ୍‍ଲେଲ୍ ରାଃ, ଆଡୋଃ ମାହାଲ୍‍ଲେଲ୍ କେନାନ୍ ରାଃ। ଆଡୋଃ କେନାନ୍ ଏନୋସ୍ ରାଃ, ଆଡୋଃ ଏନୋସ୍ ଶେତ୍ ରାଃ, ଆଡୋଃ ଶେତ୍ ଆଦାମ୍ ରାଃ, ଆଡୋଃ ଆଦାମ୍ ପାର୍ମେଶ୍ଵାର୍ ରାଃ ହୋନ୍ କଡ଼ା ତାଇକେନାଏ। ଏନାତାୟୋମ୍ତେ ୟୀଶୁ ପାବିତାର୍ ଆତ୍ମା ତେ ଫେରେଃ କେତେ ଯାର୍ଦାନ୍ ନାଈ ଗେନା ଏତେ ରୁଆଡ଼୍‍ନାଏ, ଆଡୋଃ ଚାଲିଶ୍ ଦିନ୍ ସାନ୍ ଆତ୍ମା ଶିଖାଅ ଲେକାତେ ସୁନ୍‍ସାନ୍ ଜାଗା ରେ ହୋନୋର୍ କେଦାଏ, ଆଡୋଃ ଶାଏତାନ୍ ଇନିଜାଃ ପାରୀକ୍ଷା ରିକା ତାଇକେନାଏ। ଏନ୍ ହୁଲାଙ୍ଗ୍ କୋରେ ୟୀଶୁ ଜାହାନାଃ କାଏ ଜୋମ୍‍କେଦାଏ, ଆଡୋଃ ଚିମ୍ତା ଏନ୍ ସବେନ୍ ହୁଲାଙ୍ଗ୍ କୋ ପୁରା ଜାନା, ଏଣ୍ଡେ ଇନିଃକେ ରେଙ୍ଗେଃ କିଜା। ଏନ୍ତେ ଶାଏତାନ୍ ୟୀଶୁ କେ କାଜିକେଦାଏ, “ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ, ଏଣ୍ଡେ ନେ ଦିରି କେ କାଜିମ୍ ଚି ହୋଲୋଙ୍ଗ୍ ବାଇକୋୱା।” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଅଲାକାନା, ‘ହୋଲୋଙ୍ଗ୍ ରେ ଭାଇର୍ ହୋଡ଼ୋ ଜୀହିଦ୍ କାଏ ତାହିନାଏ।’ ” ଏନ୍ତେ ଶାଏତାନ୍ ଇନିଃକେ ମିୟାଃ ଚେତାନ୍ ଜାଗା ଇଦିକିଜାଏ ଆଡୋଃ ଇନିଃକେ ଘାଡ଼ିକାଃ ରେ ଗୋଟା ଅତେଦିଶୁମ୍ ରାଃ ରାଇଜ୍ କେ ଦେଖାଅକିଜାଏ, ଆଡୋଃ ଇନିଃକେ କାଜିକେଦାଏ, “ଇଙ୍ଗ୍ ନେୟା ସବେନାଃ ରାଃ ଆଧିକାର୍ ଆଡୋଃ ଏନାରାଃ ଧାନ୍‍ସାମ୍ପାତି ଆମ୍‍କେ ଏମାମେୟାଇଙ୍ଗ୍, ଚିୟାଃଚି ନେୟା ଇଙ୍ଗ୍‍କେ ଜିମା କାନା: ଆଡୋଃ ଅକଏକେ ସାନାଙ୍ଗାଇଙ୍ଗ୍, ଇନିଃକେ ଏମେୟାଇଙ୍ଗ୍। ଏନାମେନ୍ତେ ଆଗାର୍ ଆମ୍ ଇଙ୍ଗ୍‍କେ ଜୋହାର୍ ୟାମ୍, ଏଣ୍ଡେ ନେୟା ସବେନାଃ ଆମାଃ ହୋବାକୋୱା।” ୟୀଶୁ ଇନିଃକେ କାଜିକେଦାଏ, “ଧାରାମ୍ ପୁଥି ରେ ଅଲାକାନା, ‘ଆମ୍ ଆମାଃ ପ୍ରାଭୁ ପାର୍ମେଶ୍ଵାର୍ କେ ଜୋହାର୍ ଏମ୍ ଆଡୋଃ ଇନିଃକେ ଭାଇର୍ ସୁସାର୍ ଏମ୍।’ ” ଏନ୍ତେ ଶାଏତାନ୍ ୟୀଶୁ କେ ୟୀରୁଶାଲେମ୍ ଇଦିକେତେ ମାନ୍ଦିର୍ ରାଃ ଚୁଟାରେ ତିଙ୍ଗୁ କିଜାଏ, ଆଡୋଃ ଇନିଃକେ କାଜିକେଦାଏ, “ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ, ଏଣ୍ଡେ ଆମ୍ ନେତାଃ ଏତେ ଲାଥାର୍ ଦୋନ୍‍ତାମ୍।” ଚିୟାଃଚି ଧାରାମ୍ ପୁଥି ରେ ଅଲାକାନା, “ଇନିଃ ଆମାଃ ବିଷାୟ୍ ରେ ଆଜାଃ ସିର୍ମାଦାସୀ କୋକେ ଆଚୁ କୋୱାଏ, ଚି ଇନ୍‍କୁ ଆମ୍‍କେ ବାଞ୍ଚାଅ ମେୟାକୋ।” ହାର୍ ଇନ୍‍କୁ ଆମ୍‍କେ ତିଈ ରେ ଲୋକା କେମେୟାକୋ, ନେକା ଆଲୋକା ହୋବାଅଃ କା ଚି ଆମାଃ କାଟା ରେ ଦିରିତେ ଠୋଗୋଗାମ୍। ୟୀଶୁ ଇନିଃକେ କାଜିରୁଆଡ଼୍ କିଜାଏ, ନେୟା ହ ଧାରାମ୍ ପୁଥି ରେ କାଜିୟାକାନା, “ଆମ୍ ଆମାଃ ପାର୍ମେଶ୍ଵାର୍ କେ ଆଲୋମ୍ ପାରୀକ୍ଷା ୟା। ଚିମ୍ତା ଶାଏତାନ୍ ସବେନ୍ ପାରୀକ୍ଷା ଛାବା କେଦାଏ, ଇମ୍ତା ଇନିଃକେ ଆଡୋଃଗି ପାରୀକ୍ଷା ଲାଗିନ୍ ତାକ୍ ଆଉରି ନାମେ ସାନ୍ତେ ବାଗେ ତାଜାଏ। ଆଡୋଃ ୟୀଶୁ ଆତ୍ମା ରାଃ ପେଡ଼େଏ ତେ ଫେରେଃ କେତେ ଗାଲିଲୀ ଜିଲ୍ଲା ତେ ରୁଆଡ଼୍ ଜାନାଏ, ହାର୍ ଆଜାଃ କାମି କୋକେ ନାଡ଼େଏ-ଜାପାଃ ରେନ୍ ସବେନ୍ ଜାଗା କୋରେ ହୋଡ଼ୋକୋ ଆୟୁମ୍ କେଦାକୋ। ଏନ୍ତେ ଇନିଃ ଏନ୍ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ଶିଖାଅ କୋତାଇକେନାଏ, ଆଡୋଃ ସବେନ୍ କୋ ଆଜାଃ ମାନାରାଙ୍ଗ୍ ତାଇକେନାକୋ। ୟୀଶୁ ନାଜ୍ରେଥ୍ ସାହାର୍ ତେ ହିଜୁଃ ରୁଆଡ଼୍ ନାଏ, ଅକତାଃ ରେ ଆସୁଲ୍ ହାରା ଲେନାଏ; ଆଡୋଃ ଆକୋୱାଃ ନିୟାମ୍ ଲେକାତେ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଇନିଃ ଆକୋୱାଃ ବିନ୍ତିଅଡ଼୍ଆଃ ରେ ସେନ୍ କେତେ ପାବିତାର୍ ପୁଥି ପାଢ଼ାଅ ଲାଗିନ୍ ତିଙ୍ଗୁ ଜାନାଏ। ୟାଶାୟାହ୍ ନାବୀ ରାଃ କିତାବ୍ ଇନିଃକେ ଏମ୍‍କିଜାକୋ, ହାର୍ ଇନିଃ କିତାବ୍ ଖଲାଅ କେତେ ଏନ୍ ଜାଗା ଅଟାଃ କେଦାଏ ଅକତାଃ ରେ ନେୟା ଅଲାକାନ୍ ତାଇକେନା: ପ୍ରାଭୁ ଆଃ ଆତ୍ମା ଇଙ୍ଗ୍ଆଃ ରେ ମେନାଃ, ଏନାଲାଗିନ୍ତେ ଇନିଃ ଗାରିବ୍ କୋକେ ସୁସାମାଚାର୍ ଉଦୁବ୍ ଲାଗିନ୍ତେ ଇଙ୍ଗ୍‍କେ ଆଭିଷେକ୍ କାଦିଙ୍ଗାଏ, ହାର୍ ଇଙ୍ଗ୍‍କେ ଏନାଲାଗିନ୍ତେ କୁଲା କାଦିଙ୍ଗାଏ, ଚି ଥୋଲାକାନ୍ କୋକେ ରାଡ଼ାନାମେ ରାଃ ହାର୍ ଆନ୍ଧା କୋକେ ନେନେଲ୍ ନାମ୍ ଧାଡ଼ି ରାଃ ସୁସାମାଚାର୍ ପାର୍ଚାର୍ କୋୱାଇଙ୍ଗ୍ ଆଡୋଃ ଦୁକୁ ରେ ଅତାକାନ୍ କୋକେ ଛୋଡ଼ାଓ କୋୱାଇଙ୍ଗ୍। ହାର୍ ପ୍ରାଭୁ ଏତେ ସୁକୁ ନାମେ ରାଃ ଶିର୍ମା କେ ଉଦୁବ୍ ୟାଇଙ୍ଗ୍।” ଏନ୍ତେ ଇନିଃ କିତାବ୍ ବାନ୍ଦ୍ କେତେ ଦେଙ୍ଗା ନିଜାଃ ତିଈ ରେ ସାବାଇଜାଏ ହାର୍ ଦୁବ୍ ଜାନାଏ; ଆଡୋଃ ବିନ୍ତିଅଡ଼୍ଆଃ ରେନ୍ ସବେନ୍ ହୋଡ଼ୋକୋ ୟୀଶୁ କେ ନେଲ୍ ତାଇକେନାକୋ। ଏନ୍ତେ ଇନିଃ ଇନ୍‍କୁକେ କାଜି ଏଟେଃ କେଦାଏ, “ଇସିଙ୍ଗ୍ ଗି ନେ ପାବିତାର୍ ପୁଥି ରାଃ ଅନୋଲ୍ ଆପେୟାଃ ନାଡ଼େଏ ରେ ପୁରା ଜାନା।” ସବେନ୍ କୋ ଇନିଃକେ ବୁଗିନ୍ କାଜି କାଜିକେଦାକୋ, ହାର୍ ଅକନ୍ ସୁକୁ କାଜି ଆଜାଃ ମୋଚା ତେ ଅଡୋଙ୍ଗ୍ ଲେନ୍ ତାଇନା, ଏନାତେ ଆକ୍‍ଦାନ୍ଦା ଜାନାକୋ ହାର୍ କାଜିକେଦାକୋ “ଚିନାଃ ନିଈ ଯୋଶେଫ୍ ରାଃ ହୋନ୍‍କଡ଼ା ନାହାଲାଏ?” ଇନିଃ ଇନ୍‍କୁକେ କାଜିକେଦାଏ, “ଆପେ ଇଙ୍ଗ୍‍କେ ନେ ଜୋନୋକା ଜାଲେକାତେ କାଜିୟାପେ ଚି, ‘ହେ ବାଈଦ୍, ଆମ୍ ଆମ୍ତେଗୀ ବେଶେନ୍ ମେ! ଅକନାଃ ଆଲେ ଆୟୁମ୍ କାଦାଲେ ଚି ଆମ୍ କାଫାର୍ନାହୁମ୍ ସାହାର୍ ରେ ରିକାକେଦାମ୍, ଏନା ନେତାଃ ଆମାଃ ହାତୁ ରେହ ରିକାଏମ୍।’ ” ୟୀଶୁ କାଜିକେଦାଏ, “ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଜାହାନ୍ ନାବୀ ଆଜାଃ ହାତୁ ରେ ମାଇନ୍-ଦୁଲାଡ଼୍ କାଏ ନାମେୟାଏ। ମେନ୍ଦୋ ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍, ଏଲିୟା ନାବୀ ସାମାୟ୍ ରେ ଚିମ୍ତା ଆପି ଶିର୍ମା ଛାଅ ମାହିନା ସାନ୍ ରିମିଲ୍‍ଦିଶୁମ୍ ତେ ଦାଆ କା ଗାମା ଲେନା, ନେତାଃ ସାନ୍ତେ ଚି ସବେନ୍ ଇସ୍ରାଏଲ୍ ଦିଶୁମ୍ ରେ ମାରାଙ୍ଗ୍ ଆକାଲ୍ ହୋବାଲେନା, ଏନ୍ତେ ଇସ୍ରାଏଲ୍ ଦିଶୁମ୍ ରେ ଥିମ୍ବାଗି ବିଧୋବାକୋ ତାଇକେନା। ମେନ୍ଦୋ ଏଲିୟା ନାବୀ ଇନ୍‍କୁ ଏତେ ଅକନ୍ ବିଧୋବା ତାଃ ହ କାଏ କୁଲ୍‍ଲେନ୍ ତାଇନାଏ, ମେନ୍ଦୋ ସାଇଦା ସାହାର୍ ରାଃ ସାର୍ଫାତ୍ ହାତୁ ରେନ୍ ମିୟାଃ ଏଟାଃଜାତି ବିଧୋବା ତାଃ ଭାଇର୍ କୁଲ୍‍ଜାନାଏ। ହାର୍ ଏଲୀସା ନାବୀ ରାଃ ସାମାୟ୍ ରେ ଇସ୍ରାଏଲ୍ ଦିଶୁମ୍ ରେ ଥିମ୍ବାଗି କୋଢ଼ି ରୋଗୀକୋ ତାଇକେନାକୋ, ମେନ୍ଦୋ ସିରିୟା ଦିଶୁମ୍ ରେନ୍ ମିୟାଃ ଏଟାଃଜାତି ହୋଡ଼ ନାମ୍ମାନ୍ କେ ବାଗିକେତେ ଇନ୍‍କୁ ଏତେ ଜେତାଏ କାଏ ବେଶ୍ ରିକାଜାନାଏ।” ନେ କାଜି ଆୟୁମ୍‍ତାନ୍ ଲୋଃ ଚିମିନାଙ୍ଗ୍ ବିନ୍ତିଅଡ଼୍ଆଃ ରେ ତାଇକେନାକୋ, ସବେନ୍ କୋ ଖିସ୍ ତେ ଫେରେଃ ଜାନାକୋ, ଏନ୍ତେ ଇନ୍‍କୁ ବିରିଃ କେତେ ଇନିଃକେ ହାତୁ ଏତେ ବାହାରି ଅଡୋଙ୍ଗ୍ କିଜାକୋ, ଆଡୋଃ ଅକନ୍ ବୁରୁ ଚେତାନ୍ ରେ ଇନ୍‍କୁୱାଃ ହାତୁ ତାଇଲେନା, ଏନାରାଃ ଚୋଟି ରେ ଇଦି କିଜାକୋ ଚି ଇନିଃକେ ଏନ୍ତାଃ ଏତେ ଲାଥାର୍ ଉୟୁଃ ଗୋଜିୟାକୋ। ମେନ୍ଦୋ ଇନିଃ ଇନ୍‍କୁୱାଃ ଥାଲା ଏତେ ଅଡୋଙ୍ଗ୍ କେତେ ସେନୋଃ ଜାନାଏ। ଏନ୍ତେ ଇନିଃ ଗାଲିଲୀ ଜିଲ୍ଲା ରାଃ କାଫାର୍ନାହୁମ୍ ସାହାର୍ ତେ ସେନ୍ ଜାନାଏ; ଆଡୋଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ହୋଡ଼ୋକୋକେ ଉପ୍‍ଦେଶ୍ ଏମ୍‍କୋ ତାଇକେନାଏ। ଇନ୍‍କୁ ଇନିଜାଃ ଉପ୍‍ଦେଶ୍ କାଜିତେ ଆକ୍‍ଦାନ୍ଦା ଜାନାକୋ ଚିୟାଃଚି ଇନିଜାଃ ଶିଖାଅ ଆଧିକାର୍ ଲୋଃ ତାଇକେନା। ବିନ୍ତିଅଡ଼୍ଆଃ ରେ ମିହୋଡ଼୍ ହୋଡ଼ ତାଇକେନାଏ, ଅକନିଃକେ ବୋଙ୍ଗାଆତ୍ମା ଏସେର୍ ଲିଜାଏ। ଇନିଃ ଜୋର୍ତେ କାଉରି କେଦାଏ, “ହେ ୟୀଶୁ ନାଜ୍ରେଥିୟା, ଆଲେୟାଃ ଲୋଃ ଆମ୍ ଚିନାଃ ସାନାଙ୍ଗ୍ ତାନାମ୍? ଚିନାଃ ଆଲେକେ ଆମ୍ ନାଷ୍ଟ୍ ଲାଗିନାମ୍ ହିଜୁଃ କାନା? ଇଙ୍ଗ୍ ଆମ୍‍କେ ସାରିୟାଇଙ୍ଗ୍, ଆମ୍ ଅକଏ ତାନ୍‍ମେ? ଆମ୍ ପାର୍ମେଶ୍ଵାର୍ ରାଃ ପାବିତାର୍ ହୋନ୍ ତାନ୍‍ମେ!” ୟୀଶୁ ଇନିଃକେ ଧାମ୍‍କାଅ କେତେ କାଜିକେଦାଏ, “ହାପା ତାଇନୋଃମେ; ଆଡୋଃ ଇନିଜାଃ ତେ ଅଡୋଙ୍ଗ୍ ମେ!” ଏନ୍ତେ ବୋଙ୍ଗାଆତ୍ମା ଇନିଃକେ ଥାଲା ରେ ଥାୱାଃ କେତେ ବେଗାର୍ ଚୋଟ୍ ଏମ୍ କେତେ ଇନିଜାଃ ତେ ଅଡୋଙ୍ଗ୍ ଜାନାଏ। ଏନାତେ ସବେନ୍ କୋ ଆକ୍‍ଦାନ୍ଦା ଜାନାକୋ, ହାର୍ ଆକୋ-ଆକୋ ରେ ବାକାଣ୍ ତାନ୍ ଲୋଃ କାଜିକେଦାକୋ, “ନେୟା ଚିଲ୍‍କାନ୍ କାଜି ତାନାଃ? ଚିୟାଃଚି ଇନିଃ ଆଧିକାର୍ ହାର୍ ପେଡ଼େଏ ଲୋଃ ବୋଙ୍ଗାଆତ୍ମା କୋକେ ଆଚୁ କୋୱାଏ, ହାର୍ ଇନ୍‍କୁ ଅଡୋଙ୍ଗ୍ କେନୋଃ ୱାକୋ।” ଏନ୍‍ଲେକାତେ ସବେନ୍ ପାଡ଼୍ ହାର୍ ସବେନ୍ ଜାଗାକୋ ରେ ୟୀଶୁ ଚିନାଃ ରିକା କେଦାଏ ଏନ୍ କାଜିକୋ ଆୟୁମ୍ ବାକାଣ୍ କେଦାକୋ। ଏନ୍ତେ ୟୀଶୁ ୟାହୁଦୀ କୋୱାଃ ବିନ୍ତିଅଡ଼୍ଆଃ ଏତେ ବିରିଃ କେତେ ଶିମୋନ୍ ରାଃ ଅଡ଼୍ଆଃ ସେନ୍ ଜାନାଏ। ହାର୍ ଶିମୋନ୍ ରାଃ ହାନାର୍ କିନ୍‍କେ ଉରୁୟୁ ସାବ୍ ଲେଃ କିନା, ଆଡୋଃ ଇନ୍‍କୁ ଆକିନ୍ କେ ବେଶ୍ ଲାଗିନ୍ ଇନିଃକେ ଆର୍ଜି କିଜାକୋ। ଇନିଃ ଆକିନାଃ ନାଡ଼େଏ ତିଙ୍ଗୁ କେତେ ଉରୁୟୁ କେ ଧାମ୍‍କାଅ କେଦାଏ ଆଡୋଃ ଉରୁୟୁ ଆଡ଼୍‍ଗୁ ଜାନା, ହାର୍ ଇମ୍ତାଗି ବେଶ୍ ଜାନାକିନ୍, ଆଡୋଃ ଇନ୍‍କିନ୍ ସେକାଡ଼୍ ବିରିଃ କେତେ ଇନ୍‍କୁୱାଃ ସେୱା-ସୁସାର୍ ରିକା କେଦାକିନ୍। ଶିଙ୍ଗି ଡୁବିଜୋଃ ସାମାୟ୍ ରେ, ୟାହୁଦୀ କୋୱାଃ ଆରାମେ ହୁଲାଙ୍ଗ୍, ଅକନ୍-ଅକନ୍ ହୋଡ଼ୋକୋତାଃ ସବେନ୍ ରାକାମ୍ ରାଃ ବେମାର୍ ରେ ତାଇକାନ୍ ହୋଡ଼ୋକୋ ତାଇକେନାକୋ, ଇନ୍‍କୁ ସବେନ୍ ବେମାରୀ କୋକେ ଇନିଜାଃ ନାଡ଼େଏ ଆଉକେଦାକୋ, ହାର୍ ଇନିଃ ମିହୋଡ଼୍-ମିହୋଡ଼୍ କୋୱା ଚେତାନ୍ ରେ ତିଈ ମାଣ୍ଡାଅ କେତେ ଇନ୍‍କୁକେ ଚାଙ୍ଗାଇ କେଃକୋୱାଏ। ଆଡୋଃ ବୋଙ୍ଗାଆତ୍ମାକୋ ହଗି କାଉରିତାନ୍ ହାର୍ ନେୟା କାଜିତାନ୍ ଲୋଃ ଚି, “ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ” ମିଃଥିମ୍ବା ହୋଡ଼ୋ କୋଏତେ ଅଡୋଙ୍ଗ୍ ଜାନାକୋ। ଆଡୋଃ ଇନିଃ ବୋଙ୍ଗାଆତ୍ମା କୋକେ ଧାମ୍‍କାଅ କୋ ତାଇନାଏ ହାର୍ କାଏ କାଜି ଏମ୍‍କୋ ତାଇନାଏ, ଚିୟାଃଚି ଇନ୍‍କୁ ସାରି ତାଇକେନାକୋ ଚି ଇନିଃ ମାସୀହ୍ ତାନିଃ। ଏଟାଃ ହୁଲାଙ୍ଗ୍ ସେତାଃ ପାଡ଼୍ ୟୀଶୁ ଅଡୋଙ୍ଗ୍ କେତେ ମିୟାଃ ସୁନ୍‍ସାନ୍ ଜାଗା ରେ ସେନ୍ ଜାନାଏ, ହାର୍ ମିଃଥିମ୍ବା ହୋଡ଼ୋକୋ ଇନିଃକେ ଦାଣାତାନ୍ ଲୋଃ ଇନିଜାଃ ନାଡ଼େଏ ହିଜୁଃଲେନାକୋ, ହାର୍ ଇନିଃକେ ଆର୍ଜି କେତେ ରୋକାଅ କିଜାକୋ ଚି ଇନିଃ ଇନ୍‍କୁୱାଃ ନାଡ଼େଜେତେ ଆଲୋକାଏ ସେନ୍ କା। ମେନ୍ଦୋ ଇନିଃ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍‍କେ ଏଟାଃ ହାତୁ କୋରେ ହଗି ପାର୍ମେଶ୍ଵାର୍ ରାଃ ରାଇଜ୍ ଗାଃ ସୁସାମାଚାର୍ ଉଦୁବ୍ ଜାରୁରୀ ମେନାଃ, ଚିୟାଃଚି ଇଙ୍ଗ୍ ନେୟା ଲାଗିନ୍ତେ ଗି କୁଲା କାନିଙ୍ଗ୍।” ଆଡୋଃ ଇନିଃ ୟାହୁଦୀୟା ଜିଲ୍ଲା ରେ ୟାହୁଦୀ କୋୱାଃ ବିନ୍ତିଅଡ଼୍ଆଃ କୋରେ ପାର୍ଚାର୍ ତାଇକେନାଏ। ମୁଶିଙ୍ଗ୍ ମିଃଥିମ୍ବା ହୋଡ଼ୋକୋ ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍ ନାଙ୍ଗ୍ ୟୀଶୁ ତାଃ ହୁଣ୍ଡିଅଃ ତାଇକେନାକୋ, ଇମ୍ତା ଇନିଃ ଗାନ୍ନେସାରାତ୍ ରାଃ ସାମୁଦାର୍ ଗେନା ରେ ତିଙ୍ଗୁ ଲେନ୍ ତାଇକେନାଏ, ଇନିଃ ସାମୁଦାର୍ ଗେନା ରେ ବାରିୟା ଡୋଙ୍ଗା ତିଙ୍ଗୁକାନ୍ ନେଲ୍‍କେଦାଏ, ଆଡୋଃ ଝୋରାକୋ ଏଣ୍ଡେ ଏତେ ଆଡ଼୍‍ଗୁ କେତେ ହାକୁ ସାବ୍ ଜାଲୋମ୍ କେ ଆବୁଙ୍ଗ୍ ତାଇକେନାକୋ। ଏନ୍ ଡୋଙ୍ଗାକୋ ଏତେ ମିୟାଃ ରେ ଅକନାଃ ଶିମୋନ୍ ରାଃ ତାଇକେନା, ରାକାବ୍ କେତେ, ଇନିଃ-ଇନିଃକେ ଆର୍ଜି କିଜାଏ, ଚି ନାଡ଼େଏ ତେ କାଟିଃ ଗେନା ଇଦିକେମେ, ଏନ୍ତେ ଇନିଃ ଦୁବ୍ କେତେ ଡୋଙ୍ଗା ଚେତାନ୍ ଏତେ ଉପ୍‍ଦେଶ୍ ଏଟେଃ କେଦାଏ। ଚିମ୍ତାଙ୍ଗ୍ ଇନିଃ ହୋଡ଼ୋକୋକେ କାଜି ଛାବା କେଃକୋୱାଏ, ଇନିଃ ଶିମୋନ୍ କେ କାଜିକେଦାଏ, “ଗାଡା ପାଡ଼୍ ଇଦିମେ, ଆଡୋଃ ହୁଡିଙ୍ଗ୍ ଲେକା ହାକୁ ସାବ୍ ନାଙ୍ଗ୍ ଆମାଃ ଜାଲୋମ୍ ଉୟୁଦେମେ।” ଶିମୋନ୍ ଇନିଃକେ କାଜିରୁଆଡ଼୍ କିଜାଏ, “ହେ ଗୋମ୍‍କେ, ଆଲେ ଗୋଟା ନୁବାଃ କାମି କେଦାଲେ ଆଡୋଃ ମିୟାଦୋ କାଲେ ସାବ୍ ଧାଡ଼ି ଜାନା; ଏଣ୍ଡେ ହ ଆମାଃ କାଜିତେ ଜାଲୋମ୍ ଉୟୁଃଦେୟାଇଙ୍ଗ୍।” ଚିମ୍ତାଙ୍ଗ୍ ପାତ୍ରାସ୍ ହାର୍ ଆଜାଃ ଗାତିକୋ ଜାଲୋମ୍ ଉୟୁଃ କେଦାକୋ, ଏଣ୍ଡେ ମିଃଥିମ୍ବା ହାକୁକୋ ପାଶେ ଆଉକେଦାକୋ, ଆଡୋଃ ଇନ୍‍କୁୱାଃ ଜାଲୋମ୍ ଚେଚାଗୋଃ ତାଇକେନା। ଏନାମେନ୍ତେ ଇନ୍‍କୁ ଆକୋୱାଃ ଗାତିକୋକେ ଅକନ୍‍କୋ ଏଟାଃ ଡୋଙ୍ଗା ରେ ତାଇକେନାକୋ, ତିଈ ହିଲାଅ କେତେ କେଡ଼ା କେଃକୋୱାକୋ, ଚି ହିଜୁଃକେତେ ଆଲେକେ ଦେଙ୍ଗା ରିକାଏପେ, ହାର୍ ଇନ୍‍କୁ ହିଜୁଃକେତେ, ବାରାନ୍ ଡୋଙ୍ଗା ରେ ନିମିନ୍ ହାକୁକୋ ଫେରେଃ ତାଦାକୋ ଚି ଇନ୍‍କୁ ଡୁବିଜୋଃ ତାଇକେନାକୋ। ନେୟା ନେଲ୍‍କେତେ ଶିମୋନ୍ ପାତ୍ରାସ୍ ୟୀଶୁ ଆଃ କାଟାସୁବା ରେ ଇକ୍ଡ଼ୁମ୍ କେଦାଏ, ଆଡୋଃ କାଜିକେଦାଏ; “ହେ ପ୍ରାଭୁ, ଇଙ୍ଗ୍ଆଃ ନାଡ଼େଜେତେ ସେନୋଃ କୋମେ, ଚିୟାଃଚି ଇଙ୍ଗ୍ ପାପୀ ହୋଡ଼ ତାନିଙ୍ଗ୍।” ଚିୟାଃଚି ନିମିନାଙ୍ଗ୍ ହାକୁକୋ ପାଶେ କେତେ ସାବ୍ କେଦାକୋ ଚି ପାତ୍ରାସ୍ ଆଡୋଃ ଆଜାଃ ଗାତିକୋ ଆକ୍‍ଦାନ୍ଦା ଜାନାକୋ। ଏନ୍‍ଲେକାଗି ଯାବ୍ଦୀ ରାଃ ହୋନ୍ ୟାକୁବ୍ ଆଡୋଃ ଯୋହାନ୍ ହ, ଆକ୍‍ଦାନ୍ଦା ଜାନାକିନ୍, ଅକନ୍‍କୋ ଶିମୋନ୍ ରାଃ ଗାତି ତାଇକେନାକିନ୍, ଏନ୍ତେ ୟୀଶୁ ଶିମୋନ୍ କେ କାଜିକେଦାଏ, “ଆଲୋମ୍ ବୋରୋଏ, ନାଆ ଏତେ ଆମ୍ ହୋଡ଼ୋକୋକେ ଇଙ୍ଗ୍ଆଃ ଚେଲା ବାଇ ଲାଗିନ୍ ହୁଣ୍ଡି କୋୱାମ୍।” ଏନ୍ତେ ଇନ୍‍କୁ ଡୋଙ୍ଗା କୋକେ ଗେନା ପାଡ଼୍ ଆଉକେଦାକୋ ହାର୍ ହାକୁ ସାବ୍ କାମି ବାଗେ କେତେ ଇନିଃକେ ଅତୋଙ୍ଗ୍ କିଜାକୋ। ଚିମ୍ତାଙ୍ଗ୍ ଇନିଃ ଗାଲିଲୀ ଜିଲ୍ଲା ରାଃ ମିୟାଃ ସାହାର୍ ରେ ତାଇକେନାଏ, ଏଣ୍ଡେ ନେଲେପେ, ହେନ୍ତାଃ ରେ କୋଢ଼୍ ବିମାର୍ ହୋବାକାନ୍ ମିୟାଃ ହୋଡ଼ ହିଜୁଃନାଏ, ଆଡୋଃ ଇନିଃ ୟୀଶୁ କେ ନେଲ୍‍କେତେ ଆଜାଃ କାଟାସୁବା ରେ ଇକ୍ଡ଼ୁମ୍ କେତେ ଗୁହାରି କିଜାଏ; ଚି “ଆମ୍ ସାନାଙ୍ଗ୍ତାନ୍ ରେଦୋମ୍, ଇଙ୍ଗ୍‍କେ ବେଶ୍ ଧାଡ଼ିୟାମ୍।” ଇନିଃ ତିଈ ଆୟୁର୍ କେତେ ଇନିଃକେ ଜୁଟିଃ କିଜାଏ, ହାର୍ କାଜିକେଦାଏ, “ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍, ଚି ଆମ୍ ବେଶ୍ କେନୋଃମେ।” ଇମ୍ତାଗି ଇନିଃ କୋଢ଼୍ ଏତେ ବେଶ୍ ଜାନାଏ। ଏନ୍ତେ ୟୀଶୁ ଇନିଃକେ ଆନାଚୁ ଏମ୍ କିଜାଏ, “ଜେତାଏ କେ ଆଲୋମ୍ କାଜିୟା, ମେନ୍ଦୋ ସେନ୍ କେତେ ଆପାନ୍ କେ ୟାଜାକ୍ କେ ଦେଖାୱିମେ, ଆଡୋଃ ଆପେୟାଃ ବେଶ୍ ହୋବାଅଃ ବିଷାୟ୍ ରେ ଅକନାଃ ମୁଶା ନାବୀ ଭେଁଟ୍ ରାକାବ୍ ଠାହ୍‍ରାଓ କାଦାଏ, ଏନାକେ ରାକାବେମେ; ଏନାତେ ସବେନ୍ କୋ ସାରିୟାକୋ ଚି ଆମ୍ ବେଶ୍ ଜାନାମ୍।” ମେନ୍ଦୋ ଇନିଜାଃ ବିଷାୟ୍ ରେ କାଜିକୋ ଆଡୋଃଗି ଥିମ୍ବା ହୋଡ଼ୋକୋ ରେ ଆୟୁମ୍ ଜାନା, ହାର୍ ମିଃଥିମ୍ବା ହୋଡ଼ୋକୋ ଇନିଜାଃ ସାନ୍ଦେଶ୍ ଆୟୁମ୍ ଲାଗିନ୍ତେ ଆଡୋଃ ଆକୋୱାଃ ବିମାରୀ କୋଏତେ ବେଶ୍ ହୋବାଅଃ ଲାଗିନ୍ତେ ହୁଣ୍ଡି ଜାନାକୋ। ମେନ୍ଦୋ ଇନିଃ ସୁନ୍‍ସାନ୍ ଜାଗା ରେ ଏସ୍କାର୍ ସେନ୍ କେତେ ବିନ୍ତି ରିକା ତାଇକେନାଏ। ମୁଶିଙ୍ଗ୍ ନେକା ହୋବାଜାନା ଚି ୟୀଶୁ ଉପ୍‍ଦେଶ୍ ଏମ୍ ତାଇକେନାଏ, ଆଡୋଃ ଫାରିସୀ ହୋଡ଼ୋକୋ ହାର୍ ଆଇନ୍ ଗୁରୁ କୋ ହେନ୍ତାଃ ରେ ଦୁବ୍ ଲେନ୍ ତାଇକେନାକୋ, ଇନ୍‍କୁ ଗାଲିଲୀ ଜିଲ୍ଲା ଆଡୋଃ ୟାହୁଦୀୟା ଜିଲ୍ଲା ରାଃ ସବେନ୍ ହାତୁ କୋଏତେ, ଆଡୋଃ ୟୀରୁଶାଲେମ୍ ସାହାର୍ ଏତେ ହିଜୁଃ ଲେନ୍ ତାଇକେନାକୋ; ଆଡୋଃ ଚାଙ୍ଗାଇ ରିକାଲାଗିନ୍ ପ୍ରାଭୁ ରାଃ ପେଡ଼େଏ ଇନିଜାଃ ଲୋଃ ତାଇକେନା। ଏନ୍ ସାମାୟ୍ ଚିମିନାଙ୍ଗ୍ ହୋଡ଼ୋକୋ ମିୟାଃ ହୋଡ଼ କେ ଅକନିଃ ଏକାଙ୍ଗୀ ରୋଗୀ ତାଇକେନାଏ, ଗିତିଃ-ଜାଟି ରେ ଆଉକିଜାକୋ, ଆଡୋଃ ଇନ୍‍କୁ ଇନିଃକେ ଭିତାର୍ ଇଦି ଲାଗିନ୍ତେ ହାର୍ ୟୀଶୁ ଆଃ ନାଡ଼େଏ ମାଣ୍ଡାୱି ଲାଗିନ୍ତେ ହୋରା ଦାଣା ତାଇକେନାକୋ। ମେନ୍ଦୋ ମିଃଥିମ୍ବା ହୋଡ଼ୋକୋୱାଃ ଚାଲ୍ତେ ଇନିଃକେ ଭିତାର୍ ଇଦି ଲାଗିନ୍ ହୋରା କାକୋ ନାମ୍ ଧାଡ଼ିକେଦା, ଏଣ୍ଡେ ହିନ୍‍କୁ ଅଡ଼୍ଆଃ ଚେତାନ୍ ରାକାବ୍ ଜାନାକୋ ହାର୍ ଖାପ୍ରା କୋକେ ଗେନାକେଦାକୋ, ଆଡୋଃ ଇନିଃକେ ବାୟ୍‍ହାର୍ ତେ ଗିତିଃ-ଜାଟି ଲୋଃ ଗି ଥାଲା ରେ ୟୀଶୁ ଆଃ ନାଡ଼େଏ ଆଡ଼୍‍ଗୁ କିଜାକୋ। ୟୀଶୁ ଇନ୍‍କୁୱାଃ ବିଶ୍ଵାସ୍ ନେଲ୍‍କେତେ ଇନିଃକେ କାଜିକେଦାଏ; “ହେ ହାଗା, ଆମାଃ ପାପ୍‍କୋ ଛାମା ଜାନା।” ଏନ୍ତେ ଆଇନ୍ ଗୁରୁ ହାର୍ ଫାରିସୀ ହୋଡ଼ୋକୋ କୁପୁଲି ଜାନାକୋ ଚି, “ନିଈ ଅକଏ ତାନିଃ, ଜେ ପାର୍ମେଶ୍ଵାର୍ ରାଃ ନିନ୍ଦା ତାନାଏ? ପାର୍ମେଶ୍ଵାର୍ କେ ବାଗିକେତେ ଅକଏ ପାପ୍ କୋରାଃ ଛାମା ରିକା ଧାଡ଼ିୟାଏ?” ମେନ୍ଦୋ ୟୀଶୁ ଇନ୍‍କୁୱାଃ ମୋନ୍ ରାଃ ବାକାଣ୍ କେ ସାରିକେତେ, ଇନ୍‍କୁକେ କାଜିୟାଃକୋୱାଏ, “ଆପେୟାଃ ମୋନ୍ ରେ ଚିନାଃ ଲାଗିନ୍ କୁପୁଲିଅଃ ତାନାପେ? ସାହାଜ୍ ଚିନାଃ ତାନାଃ? ଚିନାଃ ନେୟା କାଜି ଚି, ‘ଆମାଃ ପାପ୍ ଛାମା ଜାନା ଚି ନେୟା କାଜି ଚି ବିରିଃମେ ଆଡୋଃ ସେନେମେ?’ ମେନ୍ଦୋ ନେୟାଲାଗିନ୍ ଚି ଆପେ ସାରିପେ ଚି ମାନ୍‍ୱା ରାଃ ହୋନ୍ କେ ଅତେ ରେ ପାପ୍ ଛାମା ରିକା ରାଃ ହ ଆଧିକାର୍ ମେନାଃ।” ଇନିଃ ଏନ୍ ଏକାଙ୍ଗୀ ହୋଡ଼ କେ କାଜିକେଦାଏ, “ଇଙ୍ଗ୍ ଆମ୍‍କେ କାଜିମେ ତାନିଙ୍ଗ୍ ବିରିଃମେ ଆଡୋଃ ଆମାଃ ଗିତିଃ-ଜାଟି ଉଠାଓକେତେ ଆମାଃ ଅଡ଼୍ଆଃ ସେନୋଃ କୋମେ।” ଇମ୍ତାଗି ଇନ୍‍କୁୱାଃ ନାଡ଼େଏଃ ରେ ବିରିଃ ଜାନାଏ, ହାର୍ ଅକନାଃ ରେ ଇନିଃ ବାଟି ଲେନ୍ ତାଇକେନାଏ ଏନାକେ ଉଠାଓ କେତେ, ପାର୍ମେଶ୍ଵାର୍ ରାଃ ମାନାରାଙ୍ଗ୍ ତାନ୍ ଲୋଃ ଆଜାଃ ଅଡ଼୍ଆଃ ତେ ସେନ୍ ଜାନାଏ। ଏଣ୍ଡେ ସବେନ୍ କୋ ଆକ୍‍ଦାନ୍ଦା ଜାନାକୋ ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ କେଦାକୋ ହାର୍ ଥିମ୍ବାଗି ବୋରୋକେତେ କାଜିକେଦାକୋ ଚି, “ଇସିଙ୍ଗ୍ ଆଲେ ଚିଉଲା ହ କାନେଲାକାନ୍ କାଜି ନେଲ୍ କେଦାଲେ।” ଏନାରାଃ ତାୟୋମ୍ତେ ୟୀଶୁ ଏନ୍ ସାହାର୍ ଏତେ ବାହ୍‍ରେ ଅଡୋଙ୍ଗ୍ ଜାନାଏ, ହାର୍ ଲେବୀ ନୁତୁମ୍ ମିୟାଃ ରୋମାନ୍ ସାର୍‍କାର୍ ରାଃ ମାଲ୍‍ହାରୋମ୍ ଟାକା ଇଦି ନିଈ କେ ମାଲ୍‍ହାରୋମ୍ ଟାକା ଜାମା ତେୟାଃ ଅଡ଼୍ଆଃ ରେ ଦୁବାକାନ୍ ନେଲ୍‍କେଦାଏ, ହାର୍ ଇନିଃକେ କାଜିକେଦାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ!” ଇନିଃ ସବେନାଃ ବାଗେ କେତେ ବିରିଃ ଜାନାଏ, ହାର୍ ଇନିଃକେ ଅତୋଙ୍ଗ୍ କିଜାଏ। ଏନ୍ତେ ଲେବୀ ନୁତୁମ୍ ହୋଡ଼ ଆଜାଃ ଅଡ଼୍ଆଃ ରେ ଇନିଜାଃ ଲାଗିନ୍ ମାରାଙ୍ଗ୍ ଭୋଜ୍ ମାଣ୍ଡାଅ କେଦାଏ; ଏନ୍ତାଃରେ ମିଃଥିମ୍ବା ମାଲ୍‍ହାରୋମ୍‍କୋ ହାର୍ ଏଟାଃ ହୋଡ଼ୋକୋ ଇନିଜାଃ ଲୋଃ ଜୋମ୍ ଲାଗିନ୍ ଦୁବ୍ ଲେନାକୋ। ଏନ୍ତେ ଫାରିସୀ ହୋଡ଼ୋକୋ ହାର୍ ଇନ୍‍କୁୱାଃ ଆଇନ୍ ଗୁରୁକୋ ୟୀଶୁ ରାଃ ଚେଲାକୋକେ ନେୟା କାଜିକେତେ କୁର୍‍ବୁରାୱ ଜାନାକୋ ଚି, “ଆପେ ମାଲ୍‍ହାରୋମ୍‍କୋ ଆଡୋଃ ପାପୀକୋ ଲୋଃ ଚିନାଃ ମେନ୍ତେ ଜୋମ୍-ନୁୱେ ତାନାପେ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ବାଈଦ୍ ବୁଗିନ୍ ତାନ୍‍କୋ ଲାଗିନ୍ କାହା, ମେନ୍ଦୋ ବେମାରୀକୋ ଲାଗିନ୍ ଦାର୍‍କାର୍ ତାନାଃ। ଇଙ୍ଗ୍ ଧାର୍ମୀ କୋକେ କାହା, ମେନ୍ଦୋ ପାପୀକୋକେ କେଡ଼ା ଲାଗିନ୍ତେ ହିଜୁଃ କାନାଇଙ୍ଗ୍।” ଇନ୍‍କୁ ଇନିଃକେ କାଜିକିଜାକୋ, “ଯୋହାନ୍ ବାପ୍ତିସ୍ମା ଏହେମ୍ ନିଜାଃ ଚେଲାକୋ ଦୋ ସବେନ୍ ଇମ୍ତା ଉପାସ୍ ମାଣ୍ଡାଅୟାକୋ, ଆଡୋଃ ବିନ୍ତି ରିକା ୟାକୋ, ହାର୍ ଏନ୍‍ଲେକାଗି ଫାରିସୀ ହୋଡ଼ୋକୋ ହଗି, ମେନ୍ଦୋ ଆମାଃ ଚେଲାକୋ ଜୋମ୍ ନୁୱେ କାତେୟାକୋ!” ୟୀଶୁ ଇନ୍‍କୁକେ କାଜିକେଃକୋୱାଏ, “ଚିନାଃ ଆମ୍ ବାରାତିକୋକେ ଚିମିନ୍ ଜାକେଦ୍ ଦୁଲ୍‍ହା ଇନ୍‍କୁ ଲୋଃ ମେନାଇଜା ଉପାସ୍ ମାଣ୍ଡାଅ ରିକା ଧାଡ଼ିକୋୱାମ୍? ମେନ୍ଦୋ ଏନ୍‍କାନ୍ ସାମାୟ୍ ହିଜୁଗା, ଚିମ୍ତା ଦୁଲ୍‍ହା ଇନ୍‍କୁ ଲୋଃ ଗେନାଅଗାଏ; ଏଣ୍ଡେ ଇନ୍‍କୁ ଏନ୍ ହୁଲାଙ୍ଗ୍ କୋରେ ଉପାସ୍ ମାଣ୍ଡାଅୟାକୋ।” ଏନ୍ତେ ୟୀଶୁ ଇନ୍‍କୁକେ ଆଡୋଃ ବାରିୟା ଜୋନୋକା ଉଦୁବାଃ କୋୱାଏ, “ଜେତାଏ ନାୱା ଲିଜାଃ ଏତେ ଚାଗାଡ଼୍ କେତେ ମାରି ଲିଜାଃ ରେ କାଏ ସିଲାଇୟାଏ, ନେକା ରିକାଏ ରେ ନାୱା ଲିଜାଃ ଚାଗାଡ଼୍ ବାଗ୍‍ଡ଼ାଅ କେନୋଗା ହାର୍ ଏନା ମାରି ରେହ କା ଜୋକାଅଗା। ଜେତାଏ ନାୱା ଆଙ୍ଗୁର୍ ରାଶି କେ ମାରି ଉହୁର୍ ତୁମ୍ବା ରେ କାକୋ ଫେରେଜେୟା, ନେକା ରିକାଏ ରେ ନାୱା ଆଙ୍ଗୁର୍ ରାଶି ଉହୁର୍ ତୁମ୍ବା କେ ଚାଗାଡ଼୍ କେତେ ଲିଙ୍ଗୀ କେନୋଗା, ହାର୍ ଉହୁର୍ ତୁମ୍ବା ହ ନାଷ୍ଟ୍ କେନୋଗା। ମେନ୍ଦୋ ନାୱା ଆଙ୍ଗୁର୍ ରାଶି ନାୱା ଉହୁର୍ ତୁମ୍ବା ରେ ଫେରେଦେ ଚାହି। ଆଡୋଃ ଜେତାଏ ମାରି ଆଙ୍ଗୁର୍ ରାଶି ନୁକେତେ ନାୱା ଆଙ୍ଗୁର୍ ରାଶି କାଏ ସାନାଙ୍ଗା, ଚିୟାଃଚି ଇନିଃ କାଜିୟାଏ, ଚି ମାରି ତେୟାଃ ଗି ବୁଗିନ୍ ତାନାଃ।” ମୁଶିଙ୍ଗ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ୟୀଶୁ ଲୋୟୋଙ୍ଗ୍ ଆଡ଼ି ତେ ସେନୋଃ ତାଇକେନାଏ; ଆଡୋଃ ଇନିଜାଃ ଚେଲାକୋ ଯଅ ଗେଲେ କେ ପେଟେଃ-ପେଟେଃ କେତେ ହାର୍ ତିଈ ତେ ରାଗ୍ଡ଼ାଅ-ରାଗ୍ଡ଼ାଅ କେତେ ଜୋମ୍ ତୋରା ସେନୋଃ ତାଇକେନାକୋ। ଏନ୍ତେ ଫାରିସୀ ହୋଡ଼ୋକୋ ଏତେ ଚିମିନାଙ୍ଗ୍ କୋ କାଜିକେଦାକୋ, “ଆପେ ଏନ୍ କାମି ଚିନାଃ ଲାଗିନ୍ ରିକା ତାନାପେ ଅକନାଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ରିକା ନିୟାମ୍ ନାହାଲା?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଚିନାଃ ଆପେ କାପେ ପାଢ଼ାଅ କାନା ଚି, ଦାଉଦ୍ ରାଜା ଚିମ୍ତା ଇନିଃ ହାର୍ ଆଜାଃ ଗାତିକୋ ରେଙ୍ଗେଃ ତାଇକେନାକୋ, ଏଣ୍ଡେ ଚିନାଃ ରିକା କେଦାଏ? ଇନିଃ ଚିଲ୍‍କା ପାର୍ମେଶ୍ଵାର୍ ରାଃ ଅଡ଼୍ଆଃ ରେ ବୋଲୋ ଜାନାଏ, ଆଡୋଃ ଭେଁଟ୍ ରାଃ ହୋଲୋଙ୍ଗ୍‍କୋ ଆଉକେତେ ଜୋମ୍‍କେଦାଏ, ଅକନାଃକେ ଜୋଜୋମ୍ ୟାଜାକ୍ କୋକେ ବାଗେ କେତେ ଆଡୋଃ ଜେତାଏ କେ ନିୟାମ୍ କା ତାଇକେନା, ହାର୍ ଆଜାଃ ଗାତିକୋକେ ହ ଏମାଃ କୋୱାଏ?” ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ମାନ୍‍ୱା ରାଃ ହୋନ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରାଃ ହ ପ୍ରାଭୁ ତାନିଃ।” ଆଡୋଃ ନେକା ହୋବାଜାନା ଚି ଆଡୋଃ ଏଟାଃ ମୁଶିଙ୍ଗ୍ ୟୀଶୁ, ୟାହୁଦୀ କୋୱାଃ ଆରାମେ ହୁଲାଙ୍ଗ୍, ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ସେନ୍ କେତେ ଶିଖାଅ ଏଟେଃ କେଦାଏ; ଆଡୋଃ ହେନ୍ତାଃ ମିହୋଡ଼୍ ହୋଡ଼ ତାଇକେନାଏ ଇନିଜାଃ ଜୋମ୍ ତିଈ ରୋହଡ଼୍ ତାଇନ୍ ଲେନା। ଆଇନ୍ ଗୁରୁକୋ ଆଡୋଃ ଫାରିସୀ ହୋଡ଼ୋକୋ ଇନିଃକେ ଦୋଷ୍ ଲାଗାଅ ଲାଗିନ୍ ହୋରା ନାମ୍ ବାଡ଼ା ତାଇକେନାକୋ, ଚି ନେଲେୟାକୋ ଇନିଃ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଚାଙ୍ଗାଇ ରିକାୟାଏ ଚି କାହା। ମେନ୍ଦୋ ଇନିଃ ଇନ୍‍କୁୱାଃ ବିଚାର୍ ସାରି ତାଇକେନାଏ; ଏନାମେନ୍ତେ ଇନିଃ ରୋହଡ଼୍ କାନ୍ ତିଈ ହୋଡ଼ କେ କାଜିକେଦାଏ, “ବିରିଃମେ, ଥାଲା ରେ ତିଙ୍ଗୁନ୍ ମେ।” ଇନିଃ ବିରିଃ କେତେ ତିଙ୍ଗୁ ଜାନାଏ। ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଆପେକେ କୁଲିପେ ତାନିଙ୍ଗ୍ ଚି, ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଚିନାଃ ବୁଗିନ୍ ତାନାଃ, ବୁଗିନ୍ ରିକା ଚି ଏତ୍କାନ୍ ରିକା; ଜିୟୁ କେ ବାଞ୍ଚାଅ ଚି ନାଷ୍ଟ୍ ରିକା?” ଏନ୍ତେ ଇନିଃ ସବେନ୍ ପାଡ଼୍ ହାର୍ ଏନ୍ ସବେନ୍ କୋକେ ନେଲ୍‍କେତେ ଏନ୍ ହୋଡ଼ କେ କାଜିକେଦାଏ, “ଆମାଃ ତିଈ ଜିଲିଙ୍ଗ୍ଏମ୍।” ଇନିଃ ଜିଲିଙ୍ଗ୍ କେଦାଏ, ହାର୍ ଇନିଜାଃ ତିଈ ବେଶ୍ ଜାନା। ମେନ୍ଦୋ ଇନ୍‍କୁ ଖିସ୍ ତେ ଫେରେଃ କେତେ ଆକୋ-ଆକୋ ରେ କୁଲିଜାନାକୋ ଚି ୟୀଶୁ ଲୋଃ ଚିନାଃ ରିକାୟାବୁ? ଏନ୍ ହୁଲାଙ୍ଗ୍ କୋରେ ୟୀଶୁ ବୁରୁ ରେ ବିନ୍ତି ରିକା ସେନ୍ ଜାନାଏ, ଆଡୋଃ ପାର୍ମେଶ୍ଵାର୍ ଲୋଃ ବିନ୍ତି ରିକାରେ ପୁରା ନିଦା ବିତାଅ କେଦାଏ। ଚିମ୍ତା ଶିଙ୍ଗି ଜାନା ଏଣ୍ଡେ ଇନିଃ ଆଜାଃ ଚେଲାକୋକେ କେଡ଼ାକେତେ ଇନ୍‍କୁ ଏତେ ବାରାଝାନ୍ ସାଲା କେଃକୋୱାଏ, ଆଡୋଃ ଇନ୍‍କୁକେ କୁଲାକାନ୍ ଚେଲା ନୁତୁମ୍ ଏମାଃ କେଃକୋୱାଏ; ଆଡୋଃ ଇନ୍‍କୁ ନିକୁ ତାନ୍‍କୋ: ଶିମୋନ୍, ଅକେୟାଃ ନୁତୁମ୍ ଇନିଃ ପାତ୍ରାସ୍ ହ ମାଣ୍ଡାଅ କେଦାଏ, ଆଡୋଃ ଇନିଜାଃ ହାଗା ଆନ୍ଦ୍ରିୟାସ୍, ହାର୍ ୟାକୁବ୍, ହାର୍ ଯୋହାନ୍, ହାର୍ ଫିଲିପୁସ୍, ହାର୍ ବାର୍ତୁଲ୍‍ମୈ, ହାର୍ ମାତ୍ତି ଇନିଜାଃ ଏଟାଃ ନୁତୁମ୍ ଲେବୀ, ହାର୍ ଥୋମା, ହାର୍ ହାଲ୍‍ଫାଇ ଗାଃ ହୋନ୍ ୟାକୁବ୍, ହାର୍ ଶିମୋନ୍ ଅକନିଃ ଦିଶୁମ୍ କେ ଦୁଲାଡ଼୍ ନିଈ କାଜିୟୋଗାଏ, ଆଡୋଃ ୟାକୁବ୍ ରାଃ ହୋନ୍ ୟାହୁଦା, ହାର୍ ୟାହୁଦା ଇସ୍କାରିୟୋତୀ ଅକଏ ଇନିଜାଃ ସାବ୍ ରିକା ନିଈ ବାଇଜାନାଏ। ଏନ୍ତେ ୟୀଶୁ ଇନ୍‍କୁ ଲୋଃ ଆଡ଼୍‍ଗୁ କେତେ ସାମାନ୍ ପିଡ଼ି ଜାଗା ରେ ତିଙ୍ଗୁ ଜାନାଏ, ଆଡୋଃ ଇନିଜାଃ ମିଃଥିମ୍ବା ଚେଲାକୋ, ଆଡୋଃ ସବେନ୍ ୟାହୁଦୀୟା ଜିଲ୍ଲା ତେ, ୟୀରୁଶାଲେମ୍ ସାହାର୍ ଏତେ, ଆଡୋଃ ସୁର୍ ଆଡୋଃ ସିଦୋନ୍ ସାହାର୍ ରାଃ ସାମୁଦାର୍ ଗେନା ଜାଗା କୋଏତେ ମିଃଥିମ୍ବା ହୋଡ଼ୋକୋ, ଅକନ୍‍କୋ ଇନିଜାଃ ବାଚାନ୍ ଆୟୁମ୍ ଲାଗିନ୍ ଆଡୋଃ ଆକୋୱାଃ ବିମାରୀ କୋଏତେ ଚାଙ୍ଗାଇ ହୋବାଅଃ ଲାଗିନ୍ ଇନିଜାଃ ନାଡ଼େଏ ହିଜୁଃ ଲେନାକୋ। ଆଡୋଃ ବୋଙ୍ଗାଆତ୍ମା କୋଏତେ ଦୁକୁ ନାମ୍ ତାନ୍ ହୋଡ଼ୋକୋ ହଗି ବେଶ୍ ରିକାଅଃ ତାଇକେନାକୋ। ସବେନ୍ କୋ ଇନିଃକେ ଜୁଟିଃ ସାନାଙ୍ଗ୍ ତାଇକେନାକୋ, ଚିୟାଃଚି ଇନିଃତେ ପାର୍ମେଶ୍ଵାର୍ ରାଃ ପେଡ଼େଏ ଅଡୋଙ୍ଗ୍ କେତେ ସବେନ୍ କୋକେ ଚାଙ୍ଗାଇ ରିକା ତାଇକେନାଏ। ଏନ୍ତେ ଇନିଃ ଆଜାଃ ଚେଲାକୋ ପାଡ଼୍ ନେଲ୍‍କେତେ କାଜିକେଦାଏ, “ଧାନ୍ୟା ଆପେ ତାନ୍‍ପେ, ଅକଏ ଗାରିବ୍ ତାନ୍‍ପେ, ଚିୟାଃଚି ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ଗି ତାନାଃ। ଧାନ୍ୟା ଆପେ ତାନ୍‍ପେ, ଅକଏ ନାଆ ରେଙ୍ଗେଃ ମେନାପେୟା, ଚିୟାଃଚି ବିୟୋଃ ୱାପେ। ଧାନ୍ୟା ଆପେ ତାନ୍‍ପେ, ଅକଏ ନାଆ ରାଆ ତାନାପେ, ଚିୟାଃଚି ଲାନ୍ଦାୟାପେ। ଧାନ୍ୟା ଆପେ ତାନ୍‍ପେ, ଚିମ୍ତା ଇଙ୍ଗ୍ ମାନ୍‍ୱା ରାଃ ହୋନ୍ ଲାଗିନ୍ ହୋଡ଼ୋକୋ ଆପେକେ ଖିସ୍ ପେୟାକୋ, ଆଡୋଃ ଆପେକେ ଅଡୋଙ୍ଗ୍ ପେୟାକୋ, ଆଡୋଃ ଆପେକେ ନିନ୍ଦା ପେୟାକୋ, ହାର୍ ଆପେ ଏତ୍କାନ୍ ହୋଡ଼ ମେନ୍ତେ ଆପେୟାଃ ନୁତୁମ୍ କେ ହାଃ କେୟାକୋ। ଏନ୍ ହୁଲାଙ୍ଗ୍ ରାଶିକା କେତେ ସୁସୁଙ୍ଗ୍ ୟାପେ, ଚିୟାଃଚି ନେଲେପେ, ଆପେୟାଃ ଲାଗିନ୍ ସିର୍ମାଦିଶୁମ୍ ରେ ମାରାଙ୍ଗ୍ ଯଅ ମେନାଃ। ଇନ୍‍କୁୱାଃ ପୁର୍ଖା-ଆପୁ କୋ ନାବୀ କୋଲୋଃ ହ ଏନ୍‍ଲେକାଗି ରିକା ତାଇକେନାକୋ।” “ମେନ୍ଦୋ ହାୟ୍ ଆପେ ନାଙ୍ଗ୍ ବୋରୋୱାନ୍ ଦାଣ୍ଡ୍ ମେନାଃ ଅକଏ ଧାନୀକୋ ତାନ୍‍ପେ, ଚିୟାଃଚି ଆପେ ଆପେୟାଃ ସୁକୁ ନାମ୍ କେଦାପେ। ହାୟ୍ ଆପେ ନାଙ୍ଗ୍ ଅକଏ ନାଆ ବିଇ କାନାପେ, ଚିୟାଃଚି ରେଙ୍ଗେଜୋୱାପେ। ହାୟ୍ ଆପେ ନାଙ୍ଗ୍ ଅକଏ ନାଆ ଲାନ୍ଦା ତାନାପେ, ଚିୟାଃଚି ଦୁକୁ ୱାପେ ହାର୍ ରାଆ ୟାପେ। ହାୟ୍ ଆପେ ନାଙ୍ଗ୍ ଚିମ୍ତା ସବେନ୍ ହୋଡ଼ୋକୋ ଆପେକେ ବୁଗିନ୍ କାଜିୟାକୋ, ଚିୟାଃଚି ଇନ୍‍କୁୱାଃ ପୁର୍ଖା-ଆପୁ କୋ ହିହିଡ଼୍ ନାବୀକୋକେ ହ ନେକାଗି ବୁଗିନ୍ ତାନ୍‍କୋ ମେନ୍ତେ କାଜି ଲେଦାକୋ।” “ମେନ୍ଦୋ ଇଙ୍ଗ୍ ଆପେ ଆୟୁମ୍‍ତାନ୍ କୋକେ କାଜିତାନିଙ୍ଗ୍ ଚି ଆପେୟାଃ ବାଇରୀ କୋକେ ଦୁଲାଡ଼୍ କୋପେ; ଅକଏ ଆପେକେ ଖିସ୍ ପେୟାକୋ, ଇନ୍‍କୁୱାଃ ବୁଗିନ୍ ରିକାଏପେ। ଅକଏ ଆପେକେ ସାର୍ପାଅ ପେୟାକୋ, ଇନ୍‍କୁକେ ଆଶିଷ୍ ଏମାକୋପେ; ଅକଏ ଆପେକେ ଆପ୍‍ମାନ୍ ପେୟାକୋ, ଇନ୍‍କୁ ଲାଗିନ୍ ବିନ୍ତି ରିକାଏପେ। ଅକଏ ଆପେକେ ମିୟାଃ ଯୋୱା କେ ଥାପ୍ଡ଼ାଅ ପେ ରେ, ହୀନିଜାଃ ପାଡ଼୍ ଏଟାଃ ଯୋୱା କେହ ଦେଖାୱିପେ; ଆଡୋଃ ଜାହାଁଏ ଆପେୟାଃ ଚାଦାର୍ ରେଏଃ କେରେ, ଇନିଃକେ ଝୁଲା ଇଦି କେରେ ହ ଆଲୋପେ ରୋକାୱିୟା। ଜାହାଁଏ ଆପେକେ ଆସିରେ, ଇନିଃକେ ଏମାଇପେ; ଆଡୋଃ ଜାହାଁଏ ଆପେୟାଃ ଜିନିଷ୍ ରେଏଃ କେରେ, ଏନାକେ ଆଲୋପେ ଆସିୟା। ଆଡୋଃ ଜେଲେକା ଆପେ ସାନାଙ୍ଗ୍ ତାନାପେ, ଚି ହୋଡ଼ୋକୋ ଆପେୟାଃ ଲୋଃ ରିକା ୟାକୋ, ଆପେ ହ ଇନ୍‍କୁ ଲୋଃ ଏନ୍‍ଲେକାଗି ରିକାଏପେ। ଆଗାର୍ ଆପେ ଆପେୟାଃ ଦୁଲାଡ଼୍ ମାଣ୍ଡାଅ ତାନ୍ କୋଲୋଃ ଦୁଲାଡ଼୍ ମାଣ୍ଡାଅ ୟାପେ, ଏଣ୍ଡେ ଆପେ ଚିଲ୍‍କାନ୍ ସୁକୁ ନାମେୟାପେ? ଚିୟାଃଚି ପାପୀକୋ ହ ଆକୋୱାଃ ଦୁଲାଡ଼୍ ମାଣ୍ଡାଅ ତାନ୍ କୋଲୋଃ ଦୁଲାଡ଼୍ ମାଣ୍ଡାଅୟାକୋ। ଆଗାର୍ ଆପେ ଆପେୟାଃ ବୁଗିନ୍ ରିକା କୋଲୋଃ ଭାଇର୍ ବୁଗିନାଃ ରିକାୟାପେ, ଏଣ୍ଡେ ଆପେ ଚିଲ୍‍କାନ୍ ସୁକୁ ନାମେୟାପେ? ଚିୟାଃଚି ପାପୀକୋ ହ ନେକା ରିକା ୟାକୋ। ଆଗାର୍ ଆପେ ଇନ୍‍କୁକେ ଉଧାର୍ ଏମ୍ କୋୱାପେ ଅକେୟାଃ ତେ ରୁଆଡ଼୍ ନାମ୍ ରାଃ ଆଶ୍ରା ମାଣ୍ଡାଅ ୟାପେ, ଏଣ୍ଡେ ଆପେ ଚିଲ୍‍କାନ୍ ସୁକୁ ନାମେୟାପେ? ଚିୟାଃଚି ପାପୀକୋ ପାପୀକୋକେ ଉଧାର୍ ଏମେୟାକୋ ଚି ଇମିନାଙ୍ଗ୍ ଗି ରୁଆଡ଼୍ ନାମେ ୟାକୋ। ମେନ୍ଦୋ ଆପେ ଆପେୟାଃ ବାଇରୀ କୋଲୋଃ ଦୁଲାଡ଼୍ ମାଣ୍ଡାଅ ୱେପେ, ଆଡୋଃ ବୁଗିନାଃ ରିକାଏପେ, ଆଡୋଃ ରୁଆଡ଼୍ ନାମେ ରାଃ ଆଶ୍ରା କାମାଣ୍ଡାଅ କେତେ ଉଧାର୍ ଏମେପେ; ଆଡୋଃ ଆପେୟାଃ ଲାଗିନ୍ ମାରାଙ୍ଗ୍ ଯଅ ହୋବାୱା, ଆଡୋଃ ଆପେ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ସାନ୍ତାନ୍ ପେ ବାଇୟୋଗା, ଚିୟାଃଚି ହିନିଃ ଇନ୍‍କୁ ନାଙ୍ଗ୍ ଅକଏ ଧାନ୍ୟାବାଦ୍ କାକୋ ରିକାୟା ଆଡୋଃ ଖାରାପ୍ କୋ ନାଙ୍ଗ୍ ହ ଶୋଗାଅ ନିଈ ତାନିଃ। ଜେଲେକା ଆପେୟାଃ ଆପୁ ଦାୟା ନିଈ ତାନିଃ ଏନ୍‍ଲେକାଗି ଆପେ ହ ଦାୟାଲୁ ବାଇୟେନ୍ ପେ।” “ଆଲୋପେ ବିଚାର୍ ଏୟା, ଏଣ୍ଡେ ଆପେକେ ହ କାକୋ ବିଚାର୍ ପେୟା। ଦୋଷୀ ଆଲୋପେ ବାଇକୋୱା, ଏଣ୍ଡେ ଆପେ ହ ଦୋଷୀ କାପେ ବାଇୟୋଗା। ଛାମା ରିକାଏପେ, ଏଣ୍ଡେ ଆପେକେ ହ ଛାମା ନାମୋଗା। ଏମେପେ, ଏଣ୍ଡେ ଆପେକେ ହ ଏମୋଗା। ହୋଡ଼ୋକୋ ପୁରା ନାପି କେତେ ଅତା-ଅତା କେତେ ଆଡୋଃ ହିଲାଅ-ହିଲାଅ କେତେ ଆଡୋଃ ଫେରେଃ ଉୟୁଗୋଃ ସାନ୍ ଆପେୟାଃ କୋୟୋଙ୍ଗ୍ ରେ କୋ ସାଜୁୟା, ଚିୟାଃଚି ଅକନ୍ ନାପ୍ ତେ ଆପେ ସୋଙ୍ଗେୟା, ଏନ୍ ନାପ୍ ତେଗି ଆପେୟାଃ ଲାଗିନ୍ ସୋଙ୍ଗୋଗା।” ଆଡୋଃ ଇନିଃ ଇନ୍‍କୁକେ ମିୟାଃ ଜୋନୋକା କାଜିକେଦାଏ: “ଚିନାଃ ଆନ୍ଧା, ଆନ୍ଧା କେ ହୋରା ଉଦୁବ୍ ଧାଡ଼ିୟାଏ? ଚିନାଃ ବାରାନ୍‍କିନ୍ ଗାଡା ରେ କାକୋ ଉୟୁଗୋଃ ୱା? ଚେଲା ଆଜାଃ ଗୁରୁ ତେ ମାରାଙ୍ଗ୍ ନାହାଲାଏ, ମେନ୍ଦୋ ଅକଏ ପୁରା ଶିଖାଅ ଅଗାଏ, ଇନିଃ ଆଜାଃ ଗୁରୁ ଲେକା ବାଇୟୋଗାଏ। ଆମ୍ ଆମାଃ ହାଗାମାଃ ହୁଡିଙ୍ଗ୍ ଭୁଲ୍ କେ ଚିନାଃ ନେଲ୍ ତାନାମ୍ ଅକନାଃ ମେଏଃ ରେ ବୋଲୋକାନ୍ ସାହାନ୍ ଗୁଣ୍ଡା ଲେକା ତାନାଃ, ମେନ୍ଦୋ ଆମ୍ ଆମାଃ ଗି ମାରାଙ୍ଗ୍ ଭୁଲ୍ କେ ଆମ୍‍କେ କା ଲୁରୋଃ ତାନାଃ ଅକନାଃ ମେଏଃ ରେ ସାହାନ୍ ପାଟା ଲେକା ତାନାଃ? ଚିମ୍ତା ଆମ୍ ଆମାଃ ଗି ମେଏଃ ରେ ବୋଲୋକାନ୍ ସାହାନ୍ ପାଟା କାମ୍ ନେଲ୍ ଧାଡ଼ିତାନା, ଏଣ୍ଡେ ଆମାଃ ହାଗା କେ ଚିଲ୍‍କାମ୍ କାଜି ଧାଡ଼ିୟା, ହେ ହାଗା, ଆଉରି ଆମାଃ ମେଏଃ ରେ ବୋଲୋକାନ୍ ସାହାନ୍ ଗୁଣ୍ଡା କେ ଅଡୋଙ୍ଗ୍ ତାଃଇଙ୍ଗ୍? ହେ ବେଦାହୋଡ଼! ସିଦା ଆମ୍ ଆମାଃ ମାରାଙ୍ଗ୍ ଭୁଲ୍ କୋକେ ସୁଧ୍‍ରାଓ ଲେମ୍, ଏଣ୍ଡେ ଆମ୍ ଆମାଃ ହାଗାମାଃ ହୁଡିଙ୍ଗ୍ ଭୁଲ୍ କୋକେ ସୁଧ୍ରାଏମେ ମେନ୍ତେ କାଜି ଧାଡ଼ିୟାମ୍।” “ଜେତାନ୍ ବେଶ୍ ଦାରୁ ବାନୋଗା, ଅକନାଃ ଖାରାପ୍ ଯଅ ଆଉୱେୟାଏ, ହାର୍ ନା ଜେତାନ୍ ଖାରାପ୍ ଦାରୁ ମେନାଃ, ଅକନାଃ ବେଶ୍ ଯଅ ଆଉୱେୟାଏ। ସବେନ୍ ଦାରୁ ଆଜାଃ ଯଅ ଏତେ ନେଲ୍ଉରୁମୋଃୱା; ଚିୟାଃଚି ହୋଡ଼ୋକୋ ଜାନୁମ୍ ଦାରୁ ଏତେ ଲୋୱା କାକୋ ଗୋଦେୟା ହାର୍ ନା ଜାନୁମ୍ ଚୁପାଃ ଏତେ ଆଙ୍ଗୁର୍ ଗୋଦେୟାକୋ। ବେଶ୍ ହୋଡ଼ ଆଜାଃ ମୋନ୍ ରାଃ ବେଶ୍ ଭାଣ୍ଡାର୍ ଏତେ ବେଶ୍ କାଜି ଅଡୋଙ୍ଗ୍ ୟାଏ, ହାର୍ ଖାରାପ୍ ହୋଡ଼ ଆଜାଃ ମୋନ୍ ରାଃ ଖାରାପ୍ ଭାଣ୍ଡାର୍ ଏତେ ଖାରାପ୍ କାଜି ଅଡୋଙ୍ଗ୍ ୟାଏ। ଚିୟାଃଚି ଅକନାଃ ମୋନ୍ ରେ ଫେରେଜା କାନା ଏନାକୋ ଗି ଇନିଜାଃ ମୋନ୍ ଏତେ ଅଡୋଙ୍ଗୋଃ ୱା।” “ଚିମ୍ତା ଆପେ ଇଙ୍ଗ୍ଆଃ କାଜି କାପେ ମାନାତିଙ୍ଗ୍ ୟା, ଏଣ୍ଡେ ଚିନାଃ ଲାଇ ହେ ପ୍ରାଭୁ, ହେ ପ୍ରାଭୁ, କାଜିୟାପେ? ଅକଏ ଇଙ୍ଗ୍ଆଃ ତାଃ ହିଜୁଗାଏ, ଆଡୋଃ ଇଙ୍ଗ୍ଆଃ ବାକାଣ୍ ଆୟୁମ୍‍କେତେ ଏନାକେ ମାନାତିଙ୍ଗ୍ ତାନାଏ, ଇଙ୍ଗ୍ ଆପେକେ ଉଦୁବ୍ ପେ ତାନିଙ୍ଗ୍ ଚି ହିନିଃ ଅକେୟାଃ ଲେକା ତାନିଃ? ଇନିଃ ଏନ୍ ହୋଡ଼ ଲେକା ତାନିଃ, ଅକଏ ଅଡ଼୍ଆଃ ବାଇ ଇମ୍ତା ଅତେ କେ ଗାଡା ଉର୍ କେତେ ସେରେଙ୍ଗ୍ ରେ ନାହି ବାଇକେଦାଏ, ଆଡୋଃ ଚିମ୍ତା ବାଇଡ଼୍ ରାକାବ୍ ଲେନା ଏଣ୍ଡେ ଦାଆ-ଧାର୍ ଏନ୍ ଅଡ଼୍ଆଃ ରେ ଧାକା ଜାନା, ମେନ୍ଦୋ ଏନାକେ ହିଲାଅ କାଏ ଧାଡ଼ିକେଦାଏ; ଚିୟାଃଚି ଏନା କେଟେଃ ତେ ବାଇଲେନା। ମେନ୍ଦୋ ଅକଏ ଆୟୁମ୍‍କେତେ କାଏ ମାନାତିଙ୍ଗ୍ ୟାଏ ହିନିଃ ଏନ୍ ହୋଡ଼ ଲେକା ତାନିଃ, ଅକଏ ହାସା ଚେତାନ୍ ରେ ବେଗାର୍ ନାହି ରାଃ ଅଡ଼୍ଆଃ ବାଇକେଦାଏ, ଚିମ୍ତା ଏନାରେ ଦାଆ-ଧାର୍ ଧାକା ଜାନା ଏନା ଇମ୍ତାଗି ଉୟୁଃଜାନା ଆଡୋଃ ଉୟୁଃକେତେ ଏନା ଧାଶୁଡ଼୍ ଜାନା।” ଚିମ୍ତା ୟୀଶୁ ହୋଡ଼ୋକୋକେ ଆଜାଃ ସବେନ୍ କାଜିକୋ ଉଦୁବ୍ କେଃକୋୱାଏ, ଏନ୍ତେ କାଫାର୍ନାହୁମ୍ ସାହାର୍ ତେ ହିଜୁଃ ଜାନାଏ। ଏନ୍ତାଃ ମିୟାଃ ଶାଅସିପାହୀ କୋୱାଃ ଗୋମ୍‍କେ ରାଃ ମିୟାଃ ଦାସୀ ଅକନିଃ ଇନିଜାଃ ଦୁଲାଡ଼ାନ୍ ତାଇକେନାଏ, ଇନିଃ ବେମାର୍ ଏତେ ଗୋଜୋଃ ଲେକା ତାଇକେନାଏ। ଏନ୍ ଶାଅସିପାହୀ କୋୱାଃ ଗୋମ୍‍କେ ୟୀଶୁ ରାଃ ବିଷାୟ୍ ରେ ଆୟୁମ୍‍କେତେ ୟାହୁଦୀହୋଡ଼ୋକୋ ଏତେ ଚିମିନାଙ୍ଗ୍ ମାରିହୋଡ଼ୋକୋକେ ଇନିଃତାଃ ନେୟା ଆର୍ଜି ଲାଗିନ୍ କୁଲ୍ କେଃକୋୱାଏ ଚି, ହିଜୁଃକେତେ ଇଙ୍ଗ୍ଆଃ ଦାସୀ କେ ବେଶ୍ ତାଇମେ। ଇନ୍‍କୁ ୟୀଶୁ ରାଃ ନାଡ଼େଏଃ ହିଜୁଃକେତେ ଇନିଃକେ ଆର୍ଜି କେତେ କାଜିକିଜାକୋ, “ଇନିଃ ନେଲେକାନ୍ ଲାଏକ୍ ହୋଡ଼ ତାନିଃ ଚି ଆମ୍ ଇନିଜାଃ ଲାଗିନ୍ ନେୟା ରିକାଏମେ। ଚିୟାଃଚି ଇନିଃ ଆବୁୱାଃ ୟାହୁଦୀହୋଡ଼ୋ କୋକେ ଦୁଲାଡ଼୍ ମାଣ୍ଡାଅ ୟାଏ, ହାର୍ ଇନିଃଗି ଆବୁୱାଃ ବିନ୍ତିଅଡ଼୍ଆଃ କେ ବାଇକାଦାଏ।” ୟୀଶୁ ଇନ୍‍କୁ ଲୋଃ ସେନ୍ ଜାନାଏ, ମେନ୍ଦୋ ଚିମ୍ତା ଇନିଃ ଅଡ଼୍ଆଃ ଏତେ ସାଙ୍ଗିନ୍ କାଏ ତାଇକେନାଏ, ଏଣ୍ଡେ ଶାଅସିପାହୀ କୋୱାଃ ଗୋମ୍‍କେ ଆଜାଃ ଚିମିନାଙ୍ଗ୍ ଗାତିକୋକେ କାଜିକୁଲ୍ କେଃକୋୱାଏ, “ହେ ପ୍ରାଭୁ, ଆଲୋମ୍ ଦୁକୁ ଉଠାଓୟା, ଚିୟାଃଚି ଇଙ୍ଗ୍ ନେ ଲାଏକ୍ ନାହାଲାଇଙ୍ଗ୍ ଚି ଆମ୍ ଇଙ୍ଗ୍ଆଃ ଅଡ଼୍ଆଃ ଭିତାର୍ ହିଜୁଆମ୍। ଏନା ମେନ୍ତେ ଇଙ୍ଗ୍ ଆପାନ୍ କେ ନେ ଲାଏକ୍ ହ କାଇଙ୍ଗ୍ ବୁଝାଅଃ ତାନା ଚି, ଆମାଃ ତାଃ ହିଜୁଗାଇଙ୍ଗ୍, ମେନ୍ଦୋ ମୋଚାତେ ଗି କାଜିତାମ୍ ଏଣ୍ଡେ ଇଙ୍ଗ୍ଆଃ ଦାସୀ ବେଶ୍ କେନୋଗାଏ। ଇଙ୍ଗ୍ ହ ଏଟାଃ କୋୱାଃ ଆଧିନ୍ ରେ ତାଇନ୍ ହୋଡ଼ ତାନିଙ୍ଗ୍, ହାର୍ ସିପାହୀକୋ ଇଙ୍ଗ୍ଆଃ ଆଧିନ୍ ରେକୋୱା, ଆଡୋଃ ଚିମ୍ତାଙ୍ଗ୍ ମିହୋଡ଼୍ କେ କାଜିୟାଇଙ୍ଗ୍, ‘ଜୁ,’ ଏଣ୍ଡେ ଇନିଃ ସେନୋଗାଏ, ଆଡୋଃ ଏଟାଃ ନିଈ କେ କାଜିୟାଇଙ୍ଗ୍, ‘ହିଜୁଃମେ,’ ଏଣ୍ଡେ ଇନିଃ ହିଜୁଗାଏ, ଆଡୋଃ ଇଙ୍ଗ୍ଆଃ ଜାହାନ୍ ଦାସୀ କେ ଚି ‘ନେୟା ରିକାଏମେ,’ ଏଣ୍ଡେ ଇନିଃ ଏନା ରିକାୟାଏ।” ନେୟା ଆୟୁମ୍‍କେତେ ୟୀଶୁ ଆକ୍‍ଦାନ୍ଦା ଜାନାଏ, ହାର୍ ଇନିଃ ତାୟୋମ୍ ପାଡ଼୍ ମୁହ୍ଡ଼ାଅ କେତେ ଏନ୍ ମିଃଥିମ୍ବା ହୋଡ଼ୋକୋକେ ଅକନ୍‍କୋ ଇନିଜାଃ ଦୋୟା ହିଜୁଃ ତାଇକେନାକୋ କାଜିକେଦାଏ, ଇଙ୍ଗ୍ ଆପେକେ କାଜିପେ ତାନିଙ୍ଗ୍, “ଇଙ୍ଗ୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ରେହ ନେଲେକା ବିଶ୍ଵାସ୍ ରିକା ନିଈ କାଇଙ୍ଗ୍ ନାମାକାଦା।” ଏନ୍ତେ ଏନ୍ କୁଲାକାନ୍ ଗାତିକୋ ଅଡ଼୍ଆଃ ରୁଆଡ଼୍ କେତେ ଏନ୍ ଦାସୀ କେ ବେଶ୍ ଗି ନାମ୍ କିଜାକୋ। ହୁଡିଙ୍ଗ୍ ଦିନ୍ ରାଃ ତାୟୋମ୍ତେ ୟୀଶୁ ନାଇନ୍ ନୁତୁମ୍ ମିୟାଃ ସାହାର୍ ତେ ସେନ୍ ଜାନାଏ, ଆଡୋଃ ଆଜାଃ ଚେଲାକୋ ହ ହାର୍ ମିଃଥିମ୍ବା ହୋଡ଼ୋକୋ ଇନିଜାଃ ଲୋଃ ସେନ୍ ତାଇକେନାକୋ। ଚିମ୍ତା ଇନିଃ ସାହାର୍ ରାଃ ବୋଲୋ ଦୁହାର୍ ନାଡ଼େଏଃ ସେଟେର୍ ଜାନାଏ, ଏଣ୍ଡେ ନେଲେପେ, ହୋଡ଼ୋକୋ ମିୟାଃ ମୁର୍ଦା କେ ବାହ୍‍ରେ ଗୋଅ ଇଦି ତାଇକେନାକୋ; ଅକନିଃ ଆଜାଃ ଏଙ୍ଗା କିନାଃ ମିୟାଃ ଭାଇର୍ ହୋନ୍‍କଡ଼ା ତାଇକେନାଏ: ଆଡୋଃ ଏଙ୍ଗାକିନ୍ ବିଧୋବା ତାଇକେନାକିନ୍: ହାର୍ ସାହାର୍ ରେନ୍ ମିଃଥିମ୍ବା ହୋଡ଼ୋକୋ ଆକିନ୍ ଲୋଃ ତାଇକେନାକୋ। ଆକିନ୍ କେ ନେଲ୍‍କେତେ ପ୍ରାଭୁ ଦାୟା ତେ ଫେରେଃ ଜାନାଏ, ଆଡୋଃ ଆକିନ୍ କେ କାଜିକେଦାଏ; “ଆଲୋମ୍ ରାଆଏ।” ଏନ୍ତେ ଇନିଃ ନାଡ଼େଏଃ ହିଜୁଃକେତେ ମାଣା ପାର୍କୋମ୍ କେ ଜୁଟିଃ କେଦାଏ; ଆଡୋଃ ଗୋଅୱାଲାକୋ ତିଙ୍ଗୁ ଜାନାକୋ, ଏନ୍ତେ ଇନିଃ କାଜିକେଦାଏ; “ହେ ଧାଙ୍ଗ୍ଡ଼ା, ଇଙ୍ଗ୍ ଆମ୍‍କେ କାଜିମେ ତାନିଙ୍ଗ୍, ବିରିଃମେ।” ଏନ୍ ମୁର୍ଦା ବିରିଃ କେତେ ଦୁବ୍ ଜାନାଏ, ହାର୍ ବାକାଣ୍ ଏଟେଃ କେଦାଏ, ଆଡୋଃ ୟୀଶୁ ଇନିଃକେ ଇନିଜାଃ ଏଙ୍ଗାକିନ୍ କେ ଜିମା ତାଇଜାଏ। ନେୟାତେ ଏନ୍ତାଃ ସବେନ୍ କୋରେ ବୋରୋ ବୋଲୋଜାନା; ଆଡୋଃ ଇନ୍‍କୁ ପାର୍ମେଶ୍ଵାର୍ ରାଃ ମାନାରାଙ୍ଗ୍ ତାନ୍ ଲୋଃ କାଜି ଏଟେଃ କେଦାକୋ, ଆବୁୱାଃ ଥାଲା ରେ ମିୟାଃ ମାରାଙ୍ଗ୍ ନାବୀ ଅଡୋଙ୍ଗ୍ କାନାଏ, ହାର୍ ପାର୍ମେଶ୍ଵାର୍ ଆଜାଃ ହୋଡ଼ୋକୋକେ ଦେଙ୍ଗା ନାଙ୍ଗ୍ ହିଜୁଃ କାନାଏ। ଆଡୋଃ ଇନିଜାଃ ବିଷାୟ୍ ରେ ନେ କାଜିକୋ ସବେନ୍ ୟାହୁଦୀୟା ଜିଲ୍ଲା ରେନ୍ ହାର୍ ନାଡ଼େଏଃ ଜାପାଃ ରେନ୍ ସବେନ୍ ଜାଗା କୋ ରେନ୍ ହୋଡ଼ୋକୋ ଆୟୁମ୍ କେଦାକୋ। ଯୋହାନ୍ କେ ଆଜାଃ ଚେଲାକୋ ନେ ସବେନ୍ କାଜି କୋରାଃ ସାମାଚାର୍ ଏମ୍‍କେଦାକୋ। ଏନ୍ତେ ଯୋହାନ୍ ଆଜାଃ ଚେଲାକୋ ଏତେ ବାର୍ହୋଡ଼୍ କେ କେଡ଼ାକେତେ ପ୍ରାଭୁ ଆଃ ନାଡ଼େଏ ନେୟା କୁଲି ଲାଗିନ୍ତେ କୁଲ୍ କେଃକୋୱାଏ, “ଚିନାଃ ଆମ୍‍ଗି ହେନ୍ ହିଜୁଃନିଃ ତାନ୍‍ମେ, ଚି ଆଲେ ଜାହାନ୍ ଆଡୋଃ ଏଟାଃନିଃ କେ ନେଲ୍ ହୋରାଇୟାଲେ?” ଇନ୍‍କୁ ଇନିଜାଃ ନାଡ଼େଏ ହିଜୁଃକେତେ କାଜିକେଦାକୋ, “ଯୋହାନ୍ ବାପ୍ତିସ୍ମା ଏହେମ୍ ନିଈ ଆଲେକେ ଆମ୍ ତାଃ ନେୟା କୁଲି ଲାଗିନ୍ ତେ କୁଲ୍ କାଃଲେୟାଏ, ଚିନାଃ ଆମ୍ ଗି ହେନ୍ ହିଜୁଃନିଃ ତାନ୍‍ମେ, ଚି ଆଲେ ଏଟାଃନିଃ କେ ନେଲ୍ ହୋରାଇୟାଲେ?” ଏନ୍ ସାମାୟ୍ ରେ ଗି ୟୀଶୁ ମିଃଥିମ୍ବା ହୋଡ଼ୋକୋକେ ବିମାରୀ କୋତେ, ଆଡୋଃ ହାସୁ କୋତେ, ଆଡୋଃ ବୋଙ୍ଗାଆତ୍ମା କୋତେ ଛୋଡ଼ାଓ କେଃକୋୱାଏ, ହାର୍ ଥିମ୍ବାଗି ଆନ୍ଧା କୋ ନେଲ୍ ଧାଡ଼ି କେଦାକୋ। ଆଡୋଃ ଇନିଃ ଇନ୍‍କୁକେ କାଜିକେଃକୋୱାଏ; ଅକନାଃ କୋ ଆପେ ନେଲ୍ କେଦାପେ ହାର୍ ଆୟୁମ୍ କେଦାପେ, ସେନ୍ କେତେ ଯୋହାନ୍ କେ କାଜିୟାଇପେ; ଚି ଆନ୍ଧାକୋ ନେଲ୍‍ତାନାକୋ, ଲାଙ୍ଗ୍ଡ଼ାକୋ ସେସେନ୍ ତାନାକୋ, କୋଢ଼୍ ବେମାର୍ ରେନ୍ ହୋଡ଼ୋକୋ ବେଶ୍ ହୋବାଅଃ ତାନାକୋ, ବାହିରାକୋ ଆୟୁମ୍ ତାନାକୋ, ଗୋଜାକାନ୍ କୋ ଜୀବିରିଦୋଃ ତାନାକୋ; ଆଡୋଃ ରେଙ୍ଗେଃ ତାନ୍ କୋକେ ସୁସାମାଚାର୍ ଉଦୁବଃ ତାନା। ଧାନ୍ୟା ଇନିଃ ତାନିଃ, ଅକଏ ଇଙ୍ଗ୍ଆଃ ବିଷାୟ୍ ରେ ବିଶ୍ଵାସ୍ ରିକା କାଏ ବାଗେ ତାନାଏ। ଚିମ୍ତା ଯୋହାନ୍ ରାଃ ସାନ୍ଦେଶ୍ ଏହେମ୍ ହୋଡ଼ୋକୋ ସେନୋଃ ଜାନାକୋ, ଏଣ୍ଡେ ୟୀଶୁ ଯୋହାନ୍ ବିଷାୟ୍ ରେ ହୋଡ଼ୋକୋକେ କାଜି ଏଟେଃ କେଦାଏ, “ଆପେ ସୁନ୍‍ସାନ୍ ଜାଗା ରେ ଚିନାଃ ନେନେଲ୍ ସେନ୍ କେନାପେ? ଚିନାଃ ହୋୟୋ ତେ ହିଲାଅଃତାନ୍ ଜିପିଲିଙ୍ଗ୍ ତାସାଃ କୋକେ? ଏଣ୍ଡେ ଆପେ ଚିନାଃ ନେନେଲ୍ ସେନ୍ କାନ୍ ତାଇକେନାପେ? ଚିନାଃ ସୁନ୍ଦାର୍ ଲିଜାଃ ତୁସିଙ୍ଗାକାନ୍ ହୋଡ଼ କେ? ନେଲେପେ, ଗୋନୋଙ୍ଗାନ୍ ଲିଜାଃ ତୁସିଙ୍ଗ୍ ତାନ୍‍କୋ, ହାର୍ ସୁକୁ ରେ ତାଇତାନ୍ ତାନ୍‍କୋ ରାଜା ଅଡ଼୍ଆଃ ରେ ତାଇନାକୋ? ଏଣ୍ଡେ ଆପେ ଚିନାଃ ନେନେଲ୍ ସେନ୍ କାନ୍ ତାଇକେନାପେ? ଚିନାଃ ଜାହାନ୍ ନାବୀ କେ? ହାଁ, ଇଙ୍ଗ୍ ଆପେକେ କାଜିପେ ତାନିଙ୍ଗ୍, ନାବୀ ଏତେ ଅଗି ମାରାଙ୍ଗ୍ ନିଃକେ। ନିଈ ଇନିଃଗି ତାନିଃ, ଅକେୟାଃ ବିଷାୟ୍ ରେ ଅଲାକାନା, ଚି ନେଲେପେ, ‘ଇଙ୍ଗ୍ ଇଙ୍ଗ୍ଆଃ ସାନ୍ଦେଶ୍ ଏହେମ୍ ନିଈ କେ ଆମାଃ ଆୟୁର୍-ଆୟୁର୍ କୁଲ୍ ତାନିଙ୍ଗ୍, ଅକଏ ଆମାଃ ଆୟୁର୍ ହୋରାକେ ବାଇୟାଏ।’ ଇଙ୍ଗ୍ ଆପେକେ କାଜିପେ ତାନିଙ୍ଗ୍, ଚି କୁଡ଼ି କୋଏତେ ଅକନ୍ କୋ ଜାନାମାକାନାକୋ, ଇନ୍‍କୁ ଏତେ ଜେତାଏ ଯୋହାନ୍ ତେ ମାରାଙ୍ଗ୍ ନାହାଲାକୋ: ମେନ୍ଦୋ ଅକଏ ପାର୍ମେଶ୍ଵାର୍ ରାଃ ରାଇଜ୍ ରେ ହୁଡିଙ୍ଗ୍ ଏତେ ହୁଡିଙ୍ଗ୍ ତାନିଃ, ହିନିଃ ଇନିଜେତେ ହ ମାରାଙ୍ଗ୍ ତାନିଃ।” ଏନ୍ତେ ସବେନ୍ ସାଧାରାନ୍ ହୋଡ଼ୋକୋ ଅକନାଃ ୟୀଶୁ କାଜିକେଦାଏ ଆୟୁମ୍‍କେତେ ଆଡୋଃ ପିଟ୍-ଟାକା ହାରୋମ୍‍କୋ ହ ଯୋହାନ୍ ରାଃ ବାପ୍ତିସ୍ମା ଇଦିକେତେ ପାର୍ମେଶ୍ଵାର୍ ରାଃ ହୋରା ବୁଗିନ୍ ତାନାଃ ମେନ୍ତେ ମାନାତିଙ୍ଗ୍ ଜାନାକୋ। ମେନ୍ଦୋ ଫାରିସୀ ହୋଡ଼ୋକୋ ହାର୍ ଆଇନ୍ ଗୁରୁକୋ ଯୋହାନ୍ ରାଃ ବାପ୍ତିସ୍ମା କା ଇଦିକେତେ ପାର୍ମେଶ୍ଵାର୍ ରାଃ ସାନାଙ୍ଗ୍ କେ ଆତୋମ୍ କେଦାକୋ। “ଏନାତେ ଇଙ୍ଗ୍ ନେ ଯୁଗ୍ ରେନ୍ ହୋଡ଼ୋକୋକେ ଅକେୟାଃ ଲେକା ଜୋକା କୋୱାୟାଇଙ୍ଗ୍ ଚି ଇନ୍‍କୁ ଅକେୟାଃ ଲେକା ମେନାକୋୱା? ଇନ୍‍କୁ ଏନ୍ ହୋନ୍ କୋ ଲେକାକୋ ମେନାକୋୱା ଅକନ୍‍କୋ ପିଟ୍ ରେ ଦୁବ୍ କେତେ ମିହୋଡ଼୍ ଏଟାଃନିଃ କେ କେଡ଼ା କେତେ କାଜିୟାକୋ, ‘ଆଲେ ଆପେୟାଃ ଲାଗିନ୍ ରାଶିକା ଦୁରାଙ୍ଗ୍ ଷାଡି କେଦାଲେ ହାର୍ ଆପେ କାପେ ସୁସୁଙ୍ଗ୍ କେଦା, ଆଲେ ଦୁକୁ ଦୁରାଙ୍ଗ୍ ରେ ରାଆ କେଦାଲେ ହାର୍ ଆପେ କାପେ ରାଆ କେଦା।’ ଚିୟାଃଚି ଯୋହାନ୍ ବାପ୍ତିସ୍ମା ଏହେମ୍ ନିଈ ନାଦୋ ସାଧାରାନ୍ ଯୋଜୋମାଃ ଜୋମ୍ କେଦାଏ, ନାଦୋ ଆଙ୍ଗୁର୍ ରାଶି ନୁ କେଦାଏ, ହାର୍ ଆପେ କାଜିୟାପେ, ‘ଇନିଜାଃ ରେ ବୋଙ୍ଗାଆତ୍ମା ମେନାଇଜା।’ ଇଙ୍ଗ୍ ମାନ୍‍ୱା ରାଃ ହୋନ୍ ଜୋମ୍ ନୁ କେତେ ହିଜୁଃ ନାଇଙ୍ଗ୍ ହାର୍ ଆପେ କାଜିୟାପେ, ‘ନେଲେପେ, ପେଟୁ ହାର୍ ମାତ୍‍ୱାର୍ ହୋଡ଼, ମାଲ୍‍ଗୁଜାରୀ ହାରୋମ୍ କୋୱାଃ ହାର୍ ପାପୀକୋୱାଃ ଗାତି!’ ମେନ୍ଦୋ ପାର୍ମେଶ୍ଵାର୍ କେ ସାରିତାନ୍ ହୋନ୍ କୋ ସାରି ଧାଡ଼ିୟାକୋ ଯେ ଅକନାଃ ସେଣା ତାନାଃ।” ମୁଶିଙ୍ଗ୍ ଫାରିସୀ ହୋଡ଼ୋ କୋଏତେ ମିହୋଡ଼୍ ଇନିଃକେ ଆର୍ଜି କିଜାଏ, ଚି ଇଙ୍ଗ୍ଆଃ ଲୋଃ ଜୋମ୍ ନାଙ୍ଗ୍ ହିଜୁଃମେ; ଏନାତେ ଇନିଃ ଫାରିସୀ ହୋଡ଼ ରାଃ ଅଡ଼୍ଆଃ ସେନ୍ କେତେ ଜୋମ୍ ନାଙ୍ଗ୍ ଦୁବ୍ ଜାନାଏ। ଏନ୍ତେ ନେଲେପେ, ଏନ୍ ସାହାର୍ ରେନ୍ ମିୟାଃ ପାପୀ କୁଡ଼ି ନେୟା ସାରିକେତେ ଚି ଇନିଃ ଫାରିସୀ ହୋଡ଼ ରାଃ ଅଡ଼୍ଆଃ ରେ ଜୋମ୍ ଦୁବାକାନାଏ; ମିୟାଃ ସାଙ୍ଗ୍‍ମାର୍ମାର୍ ଦିରି ରାଃ ଶିଶି ରେ ଗୋନୋଙ୍ଗାନ୍ ସୋୱାନ୍ ସୁନୁମ୍ ଆଉକେଦାଏ। ହାର୍ ଇନିଜାଃ କାଟା ନାଡ଼େଏଃ ତାଃ, ଦୋୟା ପାଡ଼୍ ତିଙ୍ଗୁ କେତେ ରାଆ ତାନ୍ ଲୋଃ, ଇନିଜାଃ କାଟାକେ ମେଏଃ ଦାଆ ଲୋଃ ଲୁମ୍ କେଦାଏ ଆଡୋଃ ଆଜାଃ ବୋଅ ରାଃ ଉବ୍ ତେ ଜଅଃ ଏଟେଃ କେଦାଏ, ହାର୍ ଇନିଜାଃ କାଟାକେ ସବେନ୍ ଇମ୍ତା ଚୁମାକେତେ ଏନା ରେ ସୋୱାନ୍ ସୁନୁମ୍ ଗୋସୋଃ କେଦାଏ। ନେୟା ନେଲ୍‍କେତେ, ଏନ୍ ଫାରିସୀ ହୋଡ଼ ଅକନିଃ ୟୀଶୁ କେ କେଡ଼ା ଲିଜାଏ, ଆଜାଃ ମୋନ୍ ରେ ପାହୋମ୍ କେଦାଏ, ଆଗାର୍ ନିଈ ନାବୀ ତାଇନ୍ ତେ ଏଣ୍ଡେ ସାରିଜାନ୍ତେ, ଚି ନିଈ ଜେ ଇନିଃକେ ଜୁଟିଃ ତାନାଏ, ଇନିଃ ଅକଏ ହାର୍ ଚିଲ୍‍କାନ୍ କୁଡ଼ି ତାନିଃ? ଚିୟାଃଚି ଇନିଃ ଦୋ ପାପୀ କୁଡ଼ି ତାନିଃ। ୟୀଶୁ ଇନିଃକେ କାଜିରୁଆଡ଼୍ କିଜାଏ, “ହେ ଶିମୋନ୍, ଇଙ୍ଗ୍‍କେ ଆମ୍ ଲୋଃ କାଟିଃ ବାକାଣ୍ ମେନାଃ।” ଇନିଃ କାଜିକେଦାଏ, “ହେ ଗୁରୁ, କାଜିମେ।” ଏନ୍ତେ ୟୀଶୁ ନେ ଜୋନୋକା କାଜିକେଦାଏ, ମିୟାଃ ମାହାଜାନ୍ (ଟାକା ଉଧାର୍ ଏମ୍‍ନିଃ) ରାଃ ବାର୍ହୋଡ଼୍ ରିଣୀ-ରୁଆଡ଼୍ ହୋଡ଼ୋ ତାଇକେନାକିନ୍, ମିହୋଡ଼୍ ପାଞ୍ଚ୍ ଶୋ ରାଃ, ଆଡୋଃ ଏଟାଃ ନିଜାଃ ପାଚାଶ୍ ଦିନାର୍ ବାଇୟୋଃ ତାଇନା। ଚିମ୍ତା ଇନ୍‍କୁ ତାଃ ହାଲ୍-ରୁଆଡ଼୍ ଲାଗିନ୍ ଜାହାନାଃ କାତାଇନ୍ ଜାନା, ଏଣ୍ଡେ ଇନିଃ ବାରାନ୍‍କିନ୍ କେ ରିଣୀ ଛାମା ଏମାଃ କୋୱାଏ: ଏଣ୍ଡେ ଏନ୍ ବାରାନ୍‍କିନ୍ ଏତେ ଅକଏ ଇନିଃକେ ଥିମ୍ବା ଦୁଲାଡ଼୍ ମାଣ୍ଡାଅୟାଏ। ଶିମୋନ୍ କାଜିରୁଆଡ଼୍ କେଦାଏ, ଇଙ୍ଗ୍ଆଃ ବୁଝାଅ ଲେକା ରେ ହିନିଃ, ଅକେୟାଃ ଇନିଃ ଥିମ୍ବା ରିଣୀ ବାଗି ତାଦାଏ, ୟୀଶୁ ଇନିଃକେ କାଜିକେଦାଏ, ଆମ୍ ଠିକ୍ କାଜିକେଦାମ୍। ଏନ୍ତେ ଏନ୍ କୁଡ଼ି ପାଡ଼୍ ମୁହାଡ଼୍ କେତେ ଇନିଃ ଶିମୋନ୍ କେ କାଜିକେଦାଏ; ଚିନାଃ ଆମ୍ ନେ କୁଡ଼ି କେ ନେଲିତାନାମ୍? ଇଙ୍ଗ୍ ଆମାଃ ଅଡ଼୍ଆଃ ହିଜୁଃ ଜାନିଙ୍ଗ୍ ମେନ୍ଦୋ ଆମ୍ ଇଙ୍ଗ୍ଆଃ କାଟା ଆବୁଙ୍ଗ୍ ଲାଗିନ୍ତେ ଦାଆ କାମ୍ ଏମ୍ କେଦିଙ୍ଗା, ମେନ୍ଦୋ ନିଈ ଇଙ୍ଗ୍ଆଃ କାଟାକେ ମେଏଃ ଦାଆ ତେ ଲୁମ୍ କେଦାଏ, ହାର୍ ଆଜାଃ ଉବ୍ ତେ ଜଅଃ କେଦାଏ! ଆବୁ ଜେଲେକା ଆବୁୱାଃ ପେଡ଼ାକୋକେ ମାଇନ୍ କୋୱାବୁ ଏନ୍ ଲେକାତେ ଆମ୍ ଇଙ୍ଗ୍‍କେ କାମ୍ ଚୁମା କିଦିଙ୍ଗ୍ଆ, ମେନ୍ଦୋ ଚିମ୍ତା ଏତେ ଇଙ୍ଗ୍ ହିଜୁଃ କାନାଇଙ୍ଗ୍ ଇମ୍ତା ଏତେ ନିଈ ଇଙ୍ଗ୍ଆଃ କାଟାକେ ଚୁମା କାଏ ବାଗିକେଦାଏ। ଆମ୍ ଇଙ୍ଗ୍ଆଃ ବୋଅ ରେ ସୁନୁମ୍ କାମ୍ ଗୋସୋଃ କେଦା ମେନ୍ଦୋ ନିଈ ଇଙ୍ଗ୍ଆଃ କାଟା ରେ ସୋୱାନ୍ ସୁନୁମ୍ ଗୋସୋଃ କେଦାଏ। ଏନାମେନ୍ତେ ଇଙ୍ଗ୍ ଆମ୍‍କେ କାଜିତାନିଙ୍ଗ୍; ଚି ନିଜାଃ ଜେ ପାପ୍ ଥିମ୍ବା ତାଇକେନା, ଛାମା ଜାନା, ଚିୟାଃଚି ନିଈ ଥିମ୍ବା ଦୁଲାଡ଼୍ କେଦିଙ୍ଗାଏ; ମେନ୍ଦୋ ଅକେୟାଃ ହୁଡିଙ୍ଗ୍ ଛାମା କାନା, ଇନିଃ ହୁଡିଙ୍ଗ୍ ଦୁଲାଡ଼୍ ରିକାୟାଏ। ଏନ୍ତେ ଇନିଃ କୁଡ଼ି କେ କାଜିକେଦାଏ, ଆମାଃ ପାପ୍ ଛାମା ଜାନା। ଏନ୍ତେ ଅକନ୍ ହୋଡ଼ୋକୋ ଇନିଃ ଲୋଃ ଜୋମ୍ ଦୁବ୍ ଲେନାକୋ, ଇନ୍‍କୁ ଆକୋୱାଃ ମୋନ୍ ରେ ପାହୋମ୍ କେଦାକୋ, ନିଈ ଅକଏ ତାନିଃ ଜେ ପାପ୍ କୋକେ ହ ଛାମା ରିକାୟାଏ? ଅକନାଃ କେ ପାର୍ମେଶ୍ଵାର୍ ଭାଇର୍ ଛାମା ଧାଡ଼ିୟାଏ। ମେନ୍ଦୋ ୟୀଶୁ ଏନ୍ କୁଡ଼ି କେ କାଜିକେଦାଏ, ଆମ୍ ବାଞ୍ଚାଅ ଜାନାମ୍ ଚିୟାଃଚି ଆମ୍ ଇଙ୍ଗ୍‍କେ ବିଶ୍ଵାସ୍ କେଦିଙ୍ଗାମ୍, ମାଜା ତେ ସେନୋଃ ମେ। ନେୟା ତାୟୋମ୍ତେ ୟୀଶୁ ସାହାର୍-ସାହାର୍ ଆଡୋଃ ହାତୁ-ହାତୁ ପାର୍ଚାର୍ ରିକାତାନ୍ ଲୋଃ, ଆଡୋଃ ପାର୍ମେଶ୍ଵାର୍ ରାଃ ରାଇଜ୍ ରାଃ ସୁସାମାଚାର୍ ଉଦୁବ୍ ତାନ୍ ଲୋଃ, ହୋନୋର୍ କେଦାଏ। ଆଡୋଃ ଏନ୍ ବାରାଝାନ୍ ଚେଲାକୋ ଇନିଃ ଲୋଃ ତାଇକେନାକୋ। ଏନ୍ତେ ଚିମିନାଙ୍ଗ୍ କୁଡ଼ିକୋ ହ ଅକନ୍‍କୋ ବୋଙ୍ଗାଆତ୍ମା ତେ ହାର୍ ବିମାରୀକୋତେ ବେଶ୍ ଲେନାକୋ, ଇନ୍‍କୁ ନିକୁ ତାନ୍‍କୋ, ମାରିୟାମ୍ ଅକନିଃ ମାଗ୍‍ଦାଲା ସାହାର୍ ରେନ୍ କାଜିଅଃ ତାଇକେନାଏ, ଅକନିଃତେ ସାତ୍‍ଠୁ ବୋଙ୍ଗାଆତ୍ମା କୋ ଅଡୋଙ୍ଗ୍ ଲେନାକୋ, ଆଡୋଃ ରାଜା ହେରୋଦ୍ ରାଃ ମୁନ୍‍ସି ଖୁଜା ରାଃ କୁଡ଼ି ୟୋଆନ୍ନା, ସୁସାନ୍ନା, ହାର୍ ଆଡୋଃଗି ଚିମିନାଙ୍ଗ୍ କୁଡ଼ିକୋ। ନିକୁ ଆକୋ ଆକୋୱାଃ ସାମ୍ପାତିକୋ ଏତେ ୟୀଶୁ ହାର୍ ଆଜାଃ ଚେଲାକୋୱାଃ ସେୱା ତାଇନାକୋ। ଚିମ୍ତା ମିଃଥିମ୍ବା ହୋଡ଼ୋକୋ ହୁଣ୍ଡି ଜାନାକୋ, ହାର୍ ସାହାର୍-ସାହାର୍ ରେନ୍ ହୋଡ଼ୋକୋ ଇନିଜାଃ ନାଡ଼େଏଃ ହିଜୁଃ ତାଇକେନାକୋ, ଏନ୍ତେ ଇନିଃ ଇନ୍‍କୁକେ ଜୋନୋକା ତେ କାଜିକେଦାଏ, “ମିୟାଃ ହେର୍‍ନିଃ ହିତା ହେର୍ ଅଡୋଙ୍ଗ୍ ଜାନାଏ। ହେର୍ ତାନ୍ ଇମ୍ତା ଚିମିନାଙ୍ଗ୍ ହିତା ହୋରା ରାଃ ଗେନା ରେ ଉୟୁଃଜାନା, ହାର୍ ହୋଡ଼ୋକୋ ତେ ଏନା ତିକାଜାନା, ଆଡୋଃ ରିମିଲ୍‍ଦିଶୁମ୍ ରେନ୍ ଅଡ଼େକୋ ଏନାକେ ଜୋମ୍ କେଦାକୋ। ଚିମିନାଙ୍ଗ୍ ସେରେଙ୍ଗ୍ ଅତେ ରେ ଉୟୁଃଜାନା, ହାର୍ ଗାଜା ଅଡୋଙ୍ଗ୍ ଜାନା, ମେନ୍ଦୋ ଆଲି କାଏ ନାମ୍ କେଦା ଏନାତେ ରୋହଡ଼୍ ଜାନା। ଚିମିନାଙ୍ଗ୍ ହିତା ଜାନୁମ୍ ବୁଟା ଥାଲା ରେ ଉୟୁଃଜାନା, ହାର୍ ଜାନୁମ୍ ବୁଟା କୋଏତେ ଗାତି-ଗାତି ହାରା ତୋପାୟାନା। ଚିମିନାଙ୍ଗ୍ ହିତା ବେଶ୍ ଅତେ ରେ ଉୟୁଃଜାନା, ହାର୍ ଅମୋନ୍ କେତେ ଶାଅ ଗୁନା ଯଅ ଜାନା।” ନେୟା କାଜିକେତେ ଇନିଃ ଜୋର୍ତେ କାଜିକେଃକୋୱାଏ, “ଅକେୟାଃ ଆୟୁମ୍ ଲାଗିନ୍ ଲୁତୁର୍ ମେନାଃ ରେଦୋ ଇନିଃ ଆୟୁମେ କାଏ।” ଇନିଜାଃ ଚେଲାକୋ ଇନିଃକେ କୁଲିକିଜାକୋ, ଚି ନେ ଜୋନୋକା ରାଃ ମାନେ ଚିନାଃ ତାନାଃ? ଇନିଃ କାଜିକେଦାଏ, “ଆପେକେ ପାର୍ମେଶ୍ଵାର୍ ରାଃ ରାଇଜ୍ ରାଃ ଉକୁକାନ୍ କାଜି ରାଃ ସେଣା ଏମାକାନା। ମେନ୍ଦୋ, ଏଟାଃ କୋକେ ଜୋନୋକା ଲେକାତେ ଉଦୁବୋଃ ତାନା, ଏନାମେନ୍ତେ ଚି, ଇନ୍‍କୁ ନେଲ୍‍ତାନ୍ ରେ ହଗି କାକୋ ନେଲେୟା, ହାର୍ ଆୟୁମ୍‍ତାନ୍ ରେ ହଗି କାକୋ ବୁଝାଅଃ ୱା।” “ଜୋନୋକା ରାଃ ମାନେ ନେୟା ତାନାଃ, ହିତା ଦୋ ପାର୍ମେଶ୍ଵାର୍ ରାଃ ବାଚାନ୍ ତାନାଃ। ହୋରା ଗେନା ରେନ୍ କୋ ଇନ୍‍କୁ ତାନ୍‍କୋ, ଅକଏକୋ ଆୟୁମ୍ କେଦାକୋ; ଇମ୍ତା ଶାଏତାନ୍ ହିଜୁଃକେତେ ଇନ୍‍କୁୱାଃ ମୋନ୍ ଏତେ ବାଚାନ୍ ହାଲାଙ୍ଗ୍ ଇଦି କେୟାଏ, ଏନାତେ ନେକା କା ହୋବାଅଃ କା ଚି ଇନ୍‍କୁ ବିଶ୍ଵାସ୍ କେତେ ବାଞ୍ଚାଅଃ ୱାକୋ। ସେରେଙ୍ଗ୍ ଅତେ ରେନ୍ କୋ ଇନ୍‍କୁ ତାନ୍‍କୋ, ଚିମ୍ତା ଇନ୍‍କୁ ଆୟୁମ୍ ୟାକୋ, ଇମ୍ତା ରାଶିକା ଲୋଃ ବାଚାନ୍ କେ ଦୋ ମାନାତିଙ୍ଗ୍ ୟାକୋ, ମେନ୍ଦୋ ରେହେଃ କାଏ ସାବେ ରାଃ ହୋରାତେ ଇନ୍‍କୁ ହୁଡିଙ୍ଗ୍ ସାମାୟ୍ ସାନ୍ ବିଶ୍ଵାସ୍ ୟାକୋ ହାର୍ ପାରୀକ୍ଷା ରାଃ ସାମାୟ୍ ପାର୍ମେଶ୍ଵାର୍ କେ ବିଶ୍ଵାସ୍ ରିକା ବାଗେ ତାଃକୋ। ଅକନାଃ ଜାନୁମ୍ ବୁଟା ରେ ଉୟୁଃନା, ନେକୋ ଇନ୍‍କୁ ତାନ୍‍କୋ ଅକଏ ଆୟୁମ୍ ୟାକୋ, ମେନ୍ଦୋ ଆୟୁର୍ ତେ ଜୀହିଃ ରାଃ ଚିନ୍ତା, ହାର୍ କିଶାଣ୍ ବାଇୟେନ୍ ଆଡୋଃ ଜୀଦାନ୍ କେ ସୁକୁ ଏହେମ୍ ଜିନିଷ୍‍କୋ ରାଃ ସାନାଙ୍ଗ୍ ରେ ପାଶେ କୋଃୱାକୋ, ଆଡୋଃ ଇନ୍‍କୁୱାଃ ଯଅ କା ମାତାୱା। ମେନ୍ଦୋ ବେଶ୍ ଅତେ ରେନ୍ କୋ ଇନ୍‍କୁ ତାନ୍‍କୋ, ଅକନ୍‍କୋ ବାଚାନ୍ ଆୟୁମ୍‍କେତେ ଏନାକେ ବୁଗିନ୍ ଆଡୋଃ ବେଶ୍ ମୋନ୍ ରେ ମାଣ୍ଡାଅ କାଃକୋ, ହାର୍ ମାଡ଼ି ତେ ଯଅ ଆଉୱେୟାକୋ।” “ଜେତାଏ ବାତୀ ଜୁଲ୍ କେତେ ଚାଟୁ ତେ କାଏ ହାରୁବେୟାଏ, ନାଦୋ ପାର୍କୋମ୍ ଲାଥାର୍ ରେ ମାଣ୍ଡାଅ ୟାଏ, ମେନ୍ଦୋ ପାଖା ଚେତାନ୍ ରେ ମାଣ୍ଡାଅ ୟାଏ, ଏନାତେ ଭିତାର୍ ହିଜୁଃ ତାନ୍‍କୋ ମାସ୍କାଲ୍ କୋ ନାମେୟା। ଏନ୍‍କା ଜେତ୍ନାଃ ଉକୁକାନ୍ ବାନୋଗା ଅକନାଃ କାନେଲୋଗା, ଆଡୋଃ ନା ଜେତ୍ନାଃ ଉକୁକାନ୍ ମେନାଃ ଅକନାଃ କା ସାରିୟଗା ଆଡୋଃ କାଉଦୁବ୍ ଅଗା। ଏନାଲାଗିନ୍ତେ ଧ୍ୟାନ୍ ରେ ତାଇନ୍‍ପେ, ଚି ଚିଲ୍‍କା ଆପେ ଆୟୁମ୍ ତାନାପେ? ଚିୟାଃଚି ଅକଏ ତାଃ ରେ ମେନାଃ ଇନିଃକେ ଥିମ୍ବା ଏମୋଗା, ଆଡୋଃ ଅକଏ ତାଃ ରେ ବାନୋଗା, ଇନିଃତାଃ ଏତେ ଏନା ହଗି ଇଦିୟୋଗା, ଅକନାଃକେ ଆଏଃତାଃ ରେ ମେନାଃ ମେନ୍ତେ ବୁଝାଅଃ ତାନାଏ।” ମୁଶିଙ୍ଗ୍ ୟୀଶୁ ରାଃ ଏଙ୍ଗାକିନ୍ ହାର୍ ଇନିଜାଃ ହାଗାକୋ ଇନିଜାଃ ନାଡ଼େଏ ହିଜୁଃ ଲେନାକୋ, ମେନ୍ଦୋ ମିଃଥିମ୍ବା ହୋଡ଼ୋକୋ ଅଡ଼୍ଆଃ ଜାପାଃ ରେ ତାଇକେନାକୋ ଏନ୍ ଚାଲ୍ତେ ଇନିଃ ଲୋଃ କାକୋ ନାପାମ୍ ଧାଡ଼ିଜାନା। ଜେତାଏ ମିହୋଡ଼୍ ଇନିଃକେ କାଜିକେଦାଏ, “ଆମାଃ ଏଙ୍ଗାକିନ୍ ଆଡୋଃ ଆମାଃ ହାଗାକୋ ବାହାରି ରେ ତିଙ୍ଗୁ କାନାକୋ, ଆମାଃ ଲୋଃ ନାପାମ୍ ସାନାଙ୍ଗ୍ ତାନାକୋ।” ଇନିଃ ନେୟା କାଜିରୁଆଡ଼୍ କେଦାଏ, “ଇଙ୍ଗ୍ଆଃ ଏଙ୍ଗା ଆଡୋଃ ଇଙ୍ଗ୍ଆଃ ହାଗାକୋ ନିକୁଗି ତାନ୍‍କୋ ଅକନ୍‍କୋ ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍ ତାନାକୋ ହାର୍ ମାନାତିଙ୍ଗ୍ ତାନାକୋ।” ଆଡୋଃ ମୁଶିଙ୍ଗ୍ ଇନିଃ ହାର୍ ଆଜାଃ ଚେଲାକୋ ଡୋଙ୍ଗା ରେ ରାକାବ୍ ଜାନାକୋ, ଆଡୋଃ ଇନିଃ ଇନ୍‍କୁକେ କାଜିକେଦାଏ, “ଦେଲା ସାମୁଦାର୍ ହାନ୍ ଫାରୋମ୍ ବୁ ସେନା।” ଏନ୍ତେ ଇନ୍‍କୁ ଡୋଙ୍ଗା ରାଡ଼ା କେଦାକୋ। ମେନ୍ଦୋ ଚିମ୍ତା ଡୋଙ୍ଗା ଚାଲାଅଃ ତାଇକେନା, ଏଣ୍ଡେ ଇନିଃ ଦୁଣୁମ୍ ଜାନାଏ, ଇମ୍ତା ସାମୁଦାର୍ ରେ ମାରାଙ୍ଗ୍-ହୋୟୋ ହିଜୁଃଲେନା, ହାର୍ ଡୋଙ୍ଗା ଦାଆ ତେ ଫେରେଜୋଃ ତାଇକେନା, ଆଡୋଃ ଇନ୍‍କୁ ଡୁବିଜୋଃ ଲେକା ତାଇକେନାକୋ। ଏନ୍ତେ ଇନ୍‍କୁ ନାଡ଼େଏ ହିଜୁଃକେତେ ଇନିଃକେ ବିରିଃ କିଜାକୋ, ଆଡୋଃ କାଜିକେଦାକୋ, ହେ ଗୋମ୍‍କେ! ହେ ଗୋମ୍‍କେ! ଆବୁ ଡୁବିଃ ଗୋଜୋଃ ତାନାବୁ। ଏନ୍ତେ ଇନିଃ ବିରିଃ କେତେ ମାରାଙ୍ଗ୍-ହୋୟୋ କେ ଆଡୋଃ ଦାଆ ରାଃ ଲାହାଡ଼ି କେ ଏଗେର୍ କେଦାଏ ହାର୍ ଏନା ହକା ଜାନା ହାର୍ ସାନ୍ତ୍ ଜାନା। ଏନ୍ତେ ଇନିଃ ଇନ୍‍କୁକେ କାଜିକେଦାଏ, “ଆପେୟାଃ ବିଶ୍ଵାସ୍ କୋତାଃ ରେ ତାଇକେନା?” ମେନ୍ଦୋ ଇନ୍‍କୁ ବୋରୋ ଜାନାକୋ, ଆଡୋଃ ଆକ୍‍ଦାନ୍ଦା ହୋବାକେତେ ଆକୋ-ଆକୋ ରେ କାଜିଜାନାକୋ, “ନିଈ ଅକଏ ତାନିଃ, ମାରାଙ୍ଗ୍-ହୋୟୋ ହାର୍ ଦାଆ ହ ଇନିଜାଃ ହୁକୁମ୍ କେ ମାନାତିଙ୍ଗ୍ ତାନାକୋ?” ଆଡୋଃ ଇନ୍‍କୁ ଗିରାସେନିୟା ହୋଡ଼ୋକୋ ତାଇନ୍ ତାନ୍ ଜାଗା ରେ ସେଟେର୍ ଜାନାକୋ, ଅକନାଃ ଏନ୍ ଫାରୋମ୍ ଗାଲିଲୀ ଜିଲ୍ଲା ସାମୁଦାର୍ ରାଃ ନାଡ଼େଏ ରେ ମେନାଃ। ଚିମ୍ତା ୟୀଶୁ ଗେନା ରେ ଆଡ଼୍‍ଗୁଜାନାଏ, ଦୋ ଏନ୍ ସାହାର୍ ରେନ୍ ମିୟାଃ ହୋଡ଼ ଇନିଃକେ ନାପାମ୍ ନାଏ, ଅକନିଜାଃରେ ବୋଙ୍ଗାଆତ୍ମାକୋ ତାଇକେନାକୋ। ଇନିଃ ବାହୁତ୍ ଦିନ୍ ଏତେ ଲିଜାଃ କାଏ ତୁସିଙ୍ଗେନ୍ ତାଇନାଏ, ଆଡୋଃ ଅଡ଼୍ଆଃ ରେହ କାଏ ତାଇନ୍ ତାଇନାଏ, ମେନ୍ଦୋ କାବାର୍ କୋରେ ତାଇନ୍ ତାଇନାଏ। ଇନିଃ ୟୀଶୁ କେ ନେଲ୍‍କେତେ କାଉରି କେଦାଏ, ଆଡୋଃ ଇନିଜାଃ ନାଡ଼େଏ ରେ ଉୟୁଃକେତେ ଜୋର୍ତେ କାଜିକେଦାଏ, “ହେ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ହୋନ୍ ୟୀଶୁ, ଇଙ୍ଗ୍ ଲୋଃ ଆମାଃ ଚିକାନ୍ କାମି? ଇଙ୍ଗ୍ ଆମ୍‍କେ ବିନ୍ତି ତାନିଙ୍ଗ୍ ଇଙ୍ଗ୍‍କେ ଦୁକୁ ଆଲୋମ୍ ଏମାଇଙ୍ଗ୍‍ମେ।” ଚିୟାଃଚି ୟୀଶୁ ଏନ୍ ବୋଙ୍ଗାଆତ୍ମା କେ ଏନ୍ ହୋଡ଼ ଏତେ ଅଡୋଙ୍ଗ୍ ଲାଗିନ୍ ଆନାଚୁ ଏମ୍ ତାଇକେନାଏ, ଏନାଲାଗିନ୍ ଚି ଇନିଃ ଇନିଜାଃ ରେ ଘାରି-ଘାରି ପେଡ଼େଜୋଃ ତାଇନାଏ। ହୋଡ଼ୋକୋ ଇନିଃକେ ସିକ୍ରିକୋତେ ଆଡୋଃ ବେଡ଼ୀ କୋତେ ଥୋଲି ତାଇକେନାକୋ ଏଣ୍ଡେ ରେହ ଇନିଃ ଥୋଲ୍‍କାନ୍ କେ ଟୋଟାଃ କେ ତାଇକେନାଏ, ଆଡୋଃ ବୋଙ୍ଗାଆତ୍ମା ଇନିଃକେ ସୁନ୍‍ସାନ୍ ଜାଗା ରେ ଇଦି ବାଡ଼ା ତାଇନାଏ। ୟୀଶୁ ଇନିଃକେ କୁଲିକିଜାଏ, “ଆମାଃ ନୁତୁମ୍ ଚିନାଃ ତାନାଃ?” ଇନିଃ କାଜିକେଦାଏ, “ଗୋଦେଲ୍,” ଚିୟାଃଚି ଥିମ୍ବାଗି ବୋଙ୍ଗାଆତ୍ମାକୋ ଇନିଜାଃ ରେ ବୋଲୋଲେନ୍ ତାଇକେନାକୋ। ଇନ୍‍କୁ ଇନିଃକେ ଆର୍ଜି କିଜାକୋ, ଚି ଆଲେକେ କାସୋଙ୍ଗ୍ଅଃ ଡୋଡା ସେନ୍ ଲାଗିନ୍ ଆନାଚୁ ଆଲୋମ୍ ଏମାଲେ। ଏନ୍ତାଃ ରେ ବୁରୁ ଚେତାନ୍ ରେ ଶୂକ୍ରୀ କୋୱାଃ ମିୟାଃ ମାରାଙ୍ଗ୍ ଗୋଟ୍ ଆତିଙ୍ଗ୍ ତାଇନାକୋ, ଏନ୍ତେ ବୋଙ୍ଗାଆତ୍ମାକୋ ଇନିଃକେ ଆର୍ଜି କିଜାକୋ ଚି ଆଲେକେ ଇନ୍‍କୁୱାଃ ରେ ବୋଲୋ ଲାଗିନ୍ ଆନାଚୁ ଏମାଲେମ୍। ଇନିଃ ଇନ୍‍କୁକେ ଆନାଚୁ ଏମାଃ କୋୱାଏ। ଏଣ୍ଡେ ବୋଙ୍ଗାଆତ୍ମାକୋ ଏନ୍ ହୋଡ଼ ଏତେ ଅଡୋଙ୍ଗ୍ କେତେ ଶୂକ୍ରୀ କୋୱାଃ ରେ ବୋଲୋ ଜାନାକୋ। ଏନ୍ତେ ଏନ୍ ଗୋଟ୍ ଜୋର୍ତେ ନିର୍ କେତେ ଚାଟାନ୍ ଚେତାନ୍ ଏତେ ସାମୁଦାର୍ ରେ କୋ ଉୟୁଃଜାନା ହାର୍ ଡୁବିଃ ଗୋଏଃ ଜାନାକୋ। ଶୂକ୍ରୀ କୋକେ ଗୁପିତାନ୍ ହୋଡ଼ୋକୋ ନେୟା ଅକନାଃ ହୋବାଲେନ୍ ତାଇକେନା ନେଲ୍‍କେତେ ନିର୍ କେଦାକୋ, ଆଡୋଃ ହାତୁ ରେ ଆଡୋଃ ଟୋଲା କୋରେ ସେନ୍ କେତେ ଚିନାଃ ହୋବାନା ଏନା ବିଷାୟ୍ ଉଦୁବ୍ କେଦାକୋ। ହୋଡ଼ୋକୋ ନେୟା ଅକନାଃ ହୋବାଲେନ୍ ତାଇକେନା ଏନାକେ ନେଲ୍ ଲାଗିନ୍ କୋ ଅଡୋଙ୍ଗ୍ ଜାନା, ଆଡୋଃ ୟୀଶୁ ରାଃ ନାଡ଼େଏ ହିଜୁଃକେତେ ଅକନ୍ ହୋଡ଼ ଏତେ ବୋଙ୍ଗାଆତ୍ମାକୋ ଅଡୋଙ୍ଗ୍ ଲେନ୍ ତାଇକେନା, ଇନିଃକେ ୟୀଶୁ ରାଃ କାଟା-ସୁବା ନାଡ଼େଏ ଲିଜାଃ ତୁସିଙ୍ଗ୍ କାନ୍ ହାର୍ ହାପା-ହାପା ତେ ଦୁବାକାନ୍ କୋ ନାମ୍ କେତେ ବୋରୋ ଜାନାକୋ। ଏନ୍ତେ ନେନେଲ୍ କେନ୍‍କୋ ଇନ୍‍କୁକେ ଉଦୁବ୍ କେଦାକୋ, ଚି ଏନ୍ ବୋଙ୍ଗାଆତ୍ମାକୋ ତେ ଏସେର୍‍କାନ୍ ହୋଡ଼ ଚିଲ୍‍କା ତେ ବେଶ୍ ଜାନାଏ। ଏନ୍ତେ ଗିରାସେନିୟା ଜାଗା ରାଃ ନାଡ଼େଏ ଜାପାଃ କୋରେନ୍ ସବେନ୍ ହୋଡ଼ୋକୋ ୟୀଶୁ କେ ଆର୍ଜି କିଜାକୋ, ଚି ଆଲେୟାଃ ନେତାଃ ଏତେ ସେନୋଃ ମେ, ଚିୟାଃଚି ଇନ୍‍କୁ ଥିମ୍ବାଗି ବୋରୋ ଲେନାକୋ। ଏନ୍ତେ ୟୀଶୁ ଆଡୋଃ ଆଜାଃ ଚେଲାକୋ ଡୋଙ୍ଗା ରେ ରାକାବ୍ କେତେ ରୁଆଡ଼୍ ଜାନାକୋ। ଅକନ୍ ହୋଡ଼ ଏତେ ଏନ୍ ବୋଙ୍ଗାଆତ୍ମାକୋ ଅଡୋଙ୍ଗ୍ ଲେନ୍ ତାଇକେନାକୋ, ହିନିଃ ୟୀଶୁ କେ ଆର୍ଜି କିଜାଏ ଚି, “ଇଙ୍ଗ୍‍କେ ଆମାଃ ଲୋଃ ତାଇନ୍ ରିକାଇଙ୍ଗ୍ ମେ,” ମେନ୍ଦୋ ୟୀଶୁ ଇନିଃକେ ବିଦା କେତେ କାଜିକେଦାଏ, “ଆମାଃ ଅଡ଼୍ଆଃ ତେ ରୁଆଡ଼୍ ମେ, ଆଡୋଃ ହୋଡ଼ୋକୋକେ ଉଦୁବ୍ କୋମେ, ଚି ପାର୍ମେଶ୍ଵାର୍ ଆମାଃ ଲାଗିନ୍ ଚିମିନାଙ୍ଗ୍ ମାରାଙ୍ଗ୍ କାମି ରିକା କାଦାଏ।” ଇନିଃ ସେନ୍ କେତେ ହାତୁ ରେ ଉଦୁବ୍ ଏଟେଃ କେଦାଏ ଚି, ୟୀଶୁ ଇଙ୍ଗ୍ଆଃ ଲାଗିନ୍ ଚିମିନାଙ୍ଗ୍ ମାରାଙ୍ଗ୍ କାମି ରିକା କାଦାଏ। ଚିମ୍ତା ୟୀଶୁ ହାର୍ ଆଜାଃ ଚେଲାକୋ ରୁଆଡ଼୍ ଜାନାକୋ, ଦୋ ହୋଡ଼ୋକୋ ଇନିଃ ଲୋଃ ରାଶିକା ତେ ନାପାମ୍ ଜାନାକୋ, ଚିୟାଃଚି ଇନ୍‍କୁ ସବେନ୍ କୋ ଇନିଃକେ ନେଲ୍ ହୋରା ତାଇକେନାକୋ। ଇମ୍ତା ରେ ୟାଇର୍ ନୁତୁମ୍ ମିୟାଃ ହୋଡ଼ ଅକନିଃ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେନ୍ ମୁଖିୟା ତାଇନ୍ କେନାଏ, ଇନିଃ ହିଜୁଃ ଲେନାଏ ହାର୍ ୟୀଶୁ ରାଃ କାଟାସୁବା ରେ ଇକ୍ଡ଼ୁମ୍ କେତେ ଇନିଃକେ ଆର୍ଜି କିଜାଏ, ଇଙ୍ଗ୍ଆଃ ଅଡ଼୍ଆଃ ଦୋଲା। ଚିୟାଃଚି ଇନିଜାଃ ବାରା ବାରାଶ୍ ରେନ୍ ମିୟାଃ ଭାଇର୍ କୁଡ଼ିହୋନ୍ ତାଇକେନାଏ, ଇନିଃ ଗୋଜୋଃ ଲେକା ତାଇକେନାଏ। ଚିମ୍ତା ୟୀଶୁ ସେନ୍ ତାଇନାଏ ଇମ୍ତାଙ୍ଗ୍ ହୋଡ଼ୋକୋ ଇନିଜାଃ ରେ ଉୟୁଗୋଃ ତାଇକେନାକୋ। ମିୟାଃ କୁଡ଼ି ଅକନିଃକେ ବାରା ବାରାଶ୍ ଏତେ ମାୟୋମ୍ ଲିଙ୍ଗୀ ରାଃ ବେମାର୍ ତାଇକେନା ଆଡୋଃ ଅକନିଃ ଆଜାଃ ସବେନ୍ ଆସୁଲୋଃ ତେୟାଃ କୋ ବାଈଦ୍ କୋୱାଃ ଦୋୟା ରେ ଖାର୍ଚା ଛାବା ଲେଃ ତାଇକେନାଏ। ଏଣ୍ଡେ ହଗି ଅକେୟାଃ ତିଈ ତେହ ଚାଙ୍ଗାଇ କାଏ ନାମ୍ ଲେଦାଏ, ତାୟୋମ୍ ପାଡ଼େତେ ହିଜୁଃକେତେ, ଇନିଜାଃ ଲିଜାଃ ରାଃ ଆଚ୍ରା କେ ଜୁଟିଃ କେଦାଏ, ଆଡୋଃ ଇମ୍ତାଗି ଇନିଜାଃ ମାୟୋମ୍ ଲିଙ୍ଗୀ ବାନ୍ଦ୍ ଜାନା। ଏନାତେ ୟୀଶୁ କାଜିକେଦାଏ, “ଇଙ୍ଗ୍‍କେ ଅକଏ ଜୁଟିଃ କେଦିଙ୍ଗାଏ?” ଚିମ୍ତା ସବେନ୍ କୋ ମାନା କେଦାକୋ ଦୋ ପାତ୍ରାସ୍ ଆଡୋଃ ଆଜାଃ ଗାତିକୋ କାଜିକିଜାକୋ, “ହେ ଗୋମ୍‍କେ ଆମ୍‍କେ ଦୋ ମିଃଥିମ୍ବା ହୋଡ଼ୋକୋ ଘେରାୱ କାଃ ମେୟାକୋ, ଆଡୋଃ ଆମାଃ ରେ ଉୟୁଗୋଃ ତାନାକୋ।” ମେନ୍ଦୋ ୟୀଶୁ କାଜିକେଦାଏ, “ଜେତାଏ ମିହୋଡ଼୍ ଇଙ୍ଗ୍‍କେ ଜୁଟିଃ କେଦିଙ୍ଗାଏ, ଚିୟାଃଚି ଇଙ୍ଗ୍ ସାରି କେଦାଇଙ୍ଗ୍ ଚି ଇଙ୍ଗ୍ଏତେ ପେଡ଼େଏ ଅଡୋଙ୍ଗ୍ କାନା।” ଚିମ୍ତା କୁଡ଼ି ନେଲ୍‍କେଦାଏ ଚି, ଇଙ୍ଗ୍ କାଇଙ୍ଗ୍ ଉକୁ ଧାଡ଼ିତାନା, ଏଣ୍ଡେ ଥାର୍ଥାରାଅ ତାନ୍ ଲୋଃ ହିଜୁଃ ଲେନାଏ, ହାର୍ ଇନିଜାଃ କାଟାସୁବା ରେ ଇକ୍ଡ଼ୁମ୍ କେତେ ସବେନ୍ ହୋଡ଼ୋକୋୱାଃ ନାଡ଼େଏ ରେ ଉଦୁବ୍ କେଦାଏ ଚି, ଇନିଃ ଚିନାଃ ମେନ୍ତେ ଇନିଃକେ ଜୁଟିଃ କିଜାଏ, ହାର୍ ଚିଲ୍‍କା ଇମ୍ତାଗି ବେଶ୍ ଜାନାଏ। ୟୀଶୁ ଇନିଃକେ କାଜିକେଦାଏ, “ମାଈ, ଆମାଃ ବିଶ୍ଵାସ୍ ଆମ୍‍କେ ବେଶ୍ କେଃମେୟାଏ, ମାଜା ତେ ସେନୋଃ ମେ।” ଇନିଃ ନେୟା କାଜି ତାଇକେନାଏ ଇମ୍ତା ଜେତାଏ ମିହୋଡ଼୍ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ପାଡ଼େତେ ହିଜୁଃକେତେ କାଜିକେଦାଏ, “ଆମାଃ ହୋନ୍‍କୁଡ଼ି ଗୋଏଃ ଜାନାଏ। ଗୁରୁ କେ ଦୁକୁ ଆଲୋମ୍ ଏମାଇ ମେ।” ୟୀଶୁ ନେୟା ଆୟୁମ୍‍କେତେ ଇନିଃକେ କାଜିରୁଆଡ଼୍ କିଜାଏ, “ଆଲୋମ୍ ବୋରୋୟା, ବିଶ୍ଵାସ୍ ଭାଇର୍ ମାଣ୍ଡାଏମ୍, ଏଣ୍ଡେ ଇନିଃ ବେଶ୍ କେନୋଗାଏ।” ଚିମ୍ତା ଅଡ଼୍ଆଃ ତେ ହିଜୁଃ ଜାନାକୋ ଇନିଃ ପାତ୍ରାସ୍, ଯୋହାନ୍, ୟାକୁବ୍, ଆଡୋଃ ମାଈହୋନ୍ ରାଃ ଏଙ୍ଗା-ଆପୁ କେ ବାଗେ କେତେ ଜେତାଏ ଏଟାଃ କୋକେ ଆଜାଃ ଲୋଃ ଭିତାର୍ ହିଜୁଃ କାଏ ରିକା କେଃକୋୱାଏ। ସବେନ୍ ଇନିଃ ଲାଗିନ୍ ରାଆ ଗେରାଙ୍ଗ୍ ତାଇକେନାକୋ, ମେନ୍ଦୋ ଇନିଃ କାଜିକେଦାଏ, “ଆଲୋପେ ରାଆଏ; ଇନିଃ କାଏ ଗୋଜାକାନା, ମେନ୍ଦୋ ଦୁଣୁମ୍ ତାନାଏ।” ମେନ୍ଦୋ ଇନ୍‍କୁ ଆଏଃକେ ଲାନ୍ଦା କିଜାକୋ ଚିୟାଃଚି ଇନ୍‍କୁ ନେୟା ସାରିତାଇକେନାକୋ ଚି ଇନିଃ ଗୋଏଃ କାନାଏ। ମେନ୍ଦୋ ଇନିଃ ଇନିଜାଃ ତିଈ କେ ସାବ୍ କେଦାଏ, ହାର୍ କେଡ଼ାକେତେ କାଜିକେଦାଏ, “ହେ ମାଈହୋନ୍, ବିରିଃମେ!” ଏଣ୍ଡେ ଇନିଜାଃ ଜୀଉ ରୁଆଡ଼୍ ଜାନା ଆଡୋଃ ଇନିଃ ଇମ୍ତାଗି ବିରିଃ କେତେ ଦୁବ୍ ଜାନାଏ। ଆଡୋଃ ଇନିଃ ଆଚୁ କେଃକୋୱାଏ ଚି ଇନିଃକେ ଜାହାନାଃ ଜୋଜୋମାଃ ଏମୋଃ କା। ଇନିଜାଃ ଏଙ୍ଗା-ଆପୁ ଆକ୍‍ଦାନ୍ଦା ଜାନାକୋ, ମେନ୍ଦୋ ଇନିଃ ଇନ୍‍କୁକେ ଚେତାଓ କେଃକୋୱାଏ ଚି ନେତାଃ ରେ ଅକନାଃ ହୋବାକାନା ଅକଏ କେହ ଆଲୋପେ କାଜିକୋୱା। ମୁଶିଙ୍ଗ୍ ୟୀଶୁ ବାରାଝାନ୍ କୁଲାକାନ୍ ଚେଲାକୋକେ କେଡ଼ାକେତେ, ଇନ୍‍କୁକେ ସବେନ୍ ବୋଙ୍ଗାଆତ୍ମା କୋକେ ଅଡୋଙ୍ଗ୍ ହାର୍ ବେମାର୍ ତାନ୍ କୋକେ ବେଶ୍ ଲାଗିନ୍ ପେଡ଼େଏ ହାର୍ ଆଧିକାର୍ ଏମ୍‍କେଦାଏ, ହାର୍ ଇନ୍‍କୁକେ ପାର୍ମେଶ୍ଵାର୍ ରାଃ ରାଇଜ୍ ରାଃ ପାର୍ଚାର୍ ଲାଗିନ୍ ହାର୍ ବିମାର୍ ତାନ୍ କୋକେ ବେଶ୍ କୋ ଲାଗିନ୍ କୁଲ୍ କେଃକୋୱାଏ। ଇନିଃ ଇନ୍‍କୁକେ କାଜିକେଃକୋୱାଏ, “ହୋରା ଲାଗିନ୍ ଜେତ୍ନାଃ ହ ଆଲୋପେ ଇଦିୟା, ନାଦୋ ସୋଟା, ନାଦୋ ଥାଇଲା, ନାଦୋ ହୋଲୋଙ୍ଗ୍, ନାଦୋ ଟାକା ଆଡୋଃ ନାଦୋ ବାବାରିୟା ଝୁଲା। ଜେତାୟାଃ ଅଡ଼୍ଆଃ ରେହ ଆପେ ବୋଲୋୱାପେ, ଏନ୍ତାଃରେ ଗି ତାଇନ୍‍ପେ, ଆଡୋଃ ଏନ୍ତାଃ ତେଗି ବିଦା ଇଦିୟାପେ। ଅକଏ ଆପେକେ କାକୋ ଗ୍ରାହାନ୍ ପେୟା ଏନ୍ ହାତୁ ତେ ଅଡୋଙ୍ଗ୍‍ତାନ୍ ଲୋଃ ଆପେୟାଃ କାଟା ରାଃ ଧୂଡ଼ି କୋଟା କେପେ ଚି ଇନ୍‍କୁୱାଃ ରେ ଗୋୱା ହୋବାଃ ୱା।” ଏନ୍ତେ ଇନ୍‍କୁ ଅଡୋଙ୍ଗ୍ କେତେ ହାତୁ-ହାତୁ ସୁସାମାଚାର୍ ଉଦୁବ୍ ତାନ୍ ଲୋଃ ସବେନ୍ ତାଃ ରେ ହୋଡ଼ୋକୋକେ ବେଶ୍ ତାନ୍ ଲୋଃ ହୋନୋର୍ ତାଇକେନାକୋ। ଚାଇର୍ ଜିଲ୍ଲା ହାନାଟିଙ୍ଗ୍ ତେ ମିୟାଃ ଜିଲ୍ଲା ରେନ୍ ରାଜା ହେରୋଦ୍ ନେୟା ସବେନ୍ ଆୟୁମ୍‍କେତେ ବୋରୋ ଜାନାଏ, ଚିୟାଃଚି ଚିମିନାଙ୍ଗ୍ କୋ କାଜିକିଜାକୋ ଯୋହାନ୍ ଗୋଜାକାନ୍ କୋଏତେ ଜୀବିରିଃ କାନାଏ, ଆଡୋଃ ଚିମିନାଙ୍ଗ୍ କୋ ନେୟା କାଜିକେଦାକୋ ଚି ଏଲିୟା ନେଲ୍ ଜାନାଏ, ଆଡୋଃ କୋ ନେୟା ଚି ସିଦା ସାମାୟ୍ ରେନ୍ ନାବୀ କୋଏତେ ଜେତାଏ ଜୀବିରିଃ କାନାଏ। ମେନ୍ଦୋ ହେରୋଦ୍ କାଜିକେଦାଏ, “ଯୋହାନ୍ ରାଃ ବୋଅ ଦୋ ଇଙ୍ଗ୍ ଖାଣ୍ଡାଅ ରିକା କେଦାଇଙ୍ଗ୍, ନାଆ ନିଈ ଅକଏ ତାନିଃ? ଅକନିଜାଃ ବିଷାୟ୍ ରେ ନେକାନ୍ କାଜି ଆୟୁମ୍ ତାନିଙ୍ଗ୍?” ଆଡୋଃ ଇନିଃ ହିନିଃକେ ନେଲ୍ ଲାଗିନ୍ ସାନାଙ୍ଗ୍ କିଜାଏ। ଚିମ୍ତା କୁଲାକାନ୍ ଚେଲାକୋ ରୁଆଡ଼୍ କେତେ ଅକନାଃ କୋ ଇନ୍‍କୁ ରିକା ଲେଦାକୋ, ଏନାକୋ ୟୀଶୁ କେ ଉଦୁବ୍ କିଜାକୋ, ଆଡୋଃ ଇନିଃ ଇନ୍‍କୁକେ ଗେନା କେତେ ବେଥ୍‍ସୈଦା ନୁତୁମ୍ ମିୟାଃ ସାହାର୍ ତେ ଇଦି କେଃକୋୱାଏ। ନେୟା ସାରିକେତେ ଥିମ୍ବାଗି ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ ଆଡୋଃ ଇନିଃ ରାଶିକାତାନ୍ ଲୋଃ ଇନ୍‍କୁ ଲୋଃ ନାପାମ୍ ଜାନାଏ, ଆଡୋଃ ଇନ୍‍କୁକେ ପାର୍ମେଶ୍ଵାର୍ ରାଃ ରାଇଜ୍ ରାଃ ବିଷାୟ୍ ରେ ଉଦୁବ୍ କେଦାଏ, ଆଡୋଃ ଅକନ୍‍କୋ ବେଶ୍ ହୋବାଅଃ କୋ ସାନାଙ୍ଗ୍ ତାଇନାକୋ ଇନ୍‍କୁକେ ବେଶ୍ କେଃକୋୱାଏ। ଚିମ୍ତାଙ୍ଗ୍ ଶିଙ୍ଗି ଡୁବିଜୋଃ ତାଇନା ଇମ୍ତା ବାରାଝାନ୍ କୁଲାକାନ୍ ଚେଲାକୋ ହିଜୁଃକେତେ ଇନିଃକେ କାଜିକିଜାକୋ, “ହୋଡ଼ୋକୋକେ ବିଦା କୋମ୍, ଚି ସବେନ୍ ପାଡ଼୍ ରାଃ ହାତୁ ଆଡୋଃ ବାସ୍ତି କୋରେ ସେନ୍ କେତେ ତାଇନାକୋ ହାର୍ ଜୋମେୟାଃ ରାଃ ଉପାୟ୍ ୟାକୋ, ଚିୟାଃଚି ଆବୁ ନେତାଃ ସୁନ୍‍ସାନ୍ ଜାଗା ରେ ମେନାବୁୱା।” ଇନିଃ ଇନ୍‍କୁକେ କାଜିକେଦାଏ, ଆପେ ଗି ଇନ୍‍କୁକେ ଜୋମେ ଲାଗିନ୍ ଏମାକୋପେ। ଇନ୍‍କୁ କାଜିକେଦାକୋ, ଆଲେତାଃ ରେ ପାଞ୍ଚ୍ ଠୁ ହୋଲୋଙ୍ଗ୍ ଆଡୋଃ ବାରିୟା ହାକୁ କେ ବାଗେ କେତେ ଆଡୋଃ ଜେତ୍ନାଃ ହ ବାନୋଃ, ମେନ୍ଦୋ ହାଁ, ଆଗାର୍ ଆବୁ ସେନ୍ କେତେ ନେ ସବେନ୍ ହୋଡ଼ୋକୋ ଲାଗିନ୍ ଜୋମେୟାଃ କିରିଙ୍ଗ୍ ରେବୁ ଦୋ ହୋବାଅଃ ତେୟା। ଏନ୍ ହୋଡ଼ୋକୋ ଦୋ ପାଞ୍ଚ୍ ହାଜାର୍ ଲାଗ୍‍ଭାଗ୍ କୋଡ଼ାକୋ ତାଇକେନାକୋ। ଏନ୍ତେ ଇନିଃ ଆଜାଃ ଚେଲାକୋକେ କାଜିକେଦାଏ, “ଇନ୍‍କୁକେ ପାଚାଶ୍-ପାଚାଶ୍ କେତେ ପାନ୍ତି ରେ ଦୁବ୍ କୋପେ।” ଇନ୍‍କୁ ଏନ୍‍ଲେକାଗି ରିକା କେଦାକୋ ଆଡୋଃ ସବେନ୍ କୋକେ ଦୁବ୍ କେଃକୋୱାକୋ। ଏନ୍ତେ ଇନିଃ ଏନ୍ ପାଞ୍ଚ୍ ହୋଲୋଙ୍ଗ୍ କେ ହାର୍ ବାରିୟା ହାକୁ କେ ଇଦିକେଦାଏ, ଆଡୋଃ ରିମିଲ୍‍ଦିଶୁମ୍ ପାଡ଼୍ ଆରିଃ କେତେ ଧାନ୍ୟାବାଦ୍ କେଦାଏ, ହାର୍ କେଚାଃ-କେଚାଃ କେତେ ଚେଲାକୋକେ ଏମ୍ ଇଦିକେଦାଏ ଚି ହୋଡ଼ୋକୋକେ ହାଟିଙ୍ଗ୍ ୟାକୋ। ଏନ୍ତେ ସବେନ୍ କୋ ଜୋମ୍ କେତେ ବିଇ ଜାନାକୋ ଆଡୋଃ ଚେଲାକୋ ବାଚାଓ କାନ୍ ଖାଣ୍ଡା କୋଏତେ ବାରା ଡାଲି ଫେରେଃ କେତେ ଉଠାଓ କେଦାକୋ। ଚିମ୍ତାଙ୍ଗ୍ ଇନିଃ ଏସ୍କାର୍ ଗି ବିନ୍ତି ତାଇନାଏ, ଆଡୋଃ ଚେଲାକୋ ଆଜାଃ ଲୋଃ ତାଇକେନାକୋ, ଏନ୍ତେ ଇନିଃ ଇନ୍‍କୁକେ କୁଲିକେଃକୋୱାଏ, “ହୋଡ଼ୋକୋ ଇଙ୍ଗ୍‍କେ ଚିନାଃ ମେତାଇଙ୍ଗ୍ ତାନାକୋ?” ଇନ୍‍କୁ କାଜିରୁଆଡ଼୍ କେଦାକୋ, “ଯୋହାନ୍ ବାପ୍ତିସ୍ମା ଏହେମ୍ ନିଈ, ଆଡୋଃ ଅକଏ-ଅକଏ ଏଲିୟା, ଆଡୋଃ ଅକଏ-ଅକଏକୋ ସିଦା ସାମାୟ୍ ରେନ୍ ନାବୀ କୋଏତେ ଜେତାଏ ମିହୋଡ଼୍ ଜୀବିରିଃ କାନାଏ।” ଇନିଃ ଇନ୍‍କୁକେ କୁଲିକେଃକୋୱାଏ, “ମେନ୍ଦୋ ଆପେ ଇଙ୍ଗ୍‍କେ ଚିନାଃ ପେ କାଜିତାନା?” ପାତ୍ରାସ୍ କାଜିରୁଆଡ଼୍ କେଦାଏ, “ଆମ୍ ପାର୍ମେଶ୍ଵାର୍ ରାଃ ମାସୀହ୍ ତାନ୍‍ମେ।” ଏନ୍ତେ ଇନିଃ ଇନ୍‍କୁକେ କେଟେଃ ତେ ଆନାଚୁ ଏମ୍ କେତେ କାଜିକେଦାଏ, ଚି ନେୟା ଅକଏ କେହ ଆଲୋପେ କାଜିୟା। ଏନ୍ତେ ଇନିଃ କାଜିକେଦାଏ, “ଇଙ୍ଗ୍ ମାନ୍‍ୱା ରାଃ ହୋନ୍ କେ ଥିମ୍ବାଗି ଦୁକୁ ସାହାତିଙ୍ଗ୍ ଲାଗାତିଙ୍ଗ୍ଆ, ଆଡୋଃ ମାରିହୋଡ଼ୋକୋ, ଆଡୋଃ ପ୍ରାଧାନ୍ ୟାଜାକ୍‍କୋ, ଆଡୋଃ ଆଇନ୍ ଗୁରୁକୋ, ଇଙ୍ଗ୍‍କେ ହିଲାଙ୍ଗ୍ କେତେ ଗୋଜିଙ୍ଗ୍‍ୟାକୋ। ଆଡୋଃ ଇଙ୍ଗ୍ ଆପି ହୁଲାଙ୍ଗ୍ ରେ ଜୀହିଃ ବୀରିଦୋଗାଇଙ୍ଗ୍।” ଇନିଃ ସବେନ୍ କୋକେ କାଜିୟାଃକୋୱାଏ, “ଆଗାର୍ ଅକଏ ଇଙ୍ଗ୍‍କେ ଅତୋଙ୍ଗିଙ୍ଗ୍ ସାନାଙ୍ଗ୍ ରେଦୋ, ଇନିଃ ଆଜାଃ ସାନାଙ୍ଗ୍ କୋକେ ବାଗିକାଏ, ହାର୍ ସବେନ୍ ହୁଲାଙ୍ଗ୍ ଆଜାଃ କ୍ରୁଶ୍ ଉଠାଓ ତାନ୍ ଲୋଃ ଇଙ୍ଗ୍‍କେ ଅତୋଙ୍ଗିଙ୍ଗ୍ କାଏ। ଚିୟାଃଚି ଅକଏ ଆଜାଃ ଜୀଉ କେ ବାଞ୍ଚାଅ ଲାଗିନ୍ ସାନାଙ୍ଗାଏ ଇନିଃ ଏନାକେ ଆଦେୟାଏ, ମେନ୍ଦୋ ଅକଏ ଇଙ୍ଗ୍ଆଃ ଲାଗିନ୍ତେ ଆଜାଃ ଜୀଉ କେ ଆଦେୟାଏ ଇନିଃ ଏନାକେ ନାମେୟାଏ। ଆଗାର୍ ମିୟାଃ ହୋଡ଼ ସବେନ୍ ଅତେଦିଶୁମ୍ କେ ନାମ୍ କେୟାଏ ହାର୍ ଆଡୋଃ ଜୀଉ କେ ଆଦେୟାଏ ୟାଦୋ ପାର୍ମେଶ୍ଵାର୍ ଏତେ ଜୀଉ କାଏ ନାମେୟାଏ, ଦୋ ଇନିଃକେ ଚିକାନ୍ ଲାଭ୍ ହୋବାୱା? ଜେତାଏ ଇଙ୍ଗ୍‍କେ ଆଡୋଃ ଇଙ୍ଗ୍ଆଃ କାଜି କୋକେ ଗିୟୁଗୋୱାଏ, ଇଙ୍ଗ୍ ମାନ୍‍ୱା ରାଃ ହୋନ୍ ହଗି ଚିମ୍ତା ଇଙ୍ଗ୍ଆଃ ହାର୍ ଇଙ୍ଗ୍ଆଃ ଆପୁ ରାଃ ହାର୍ ପାବିତାର୍ ସିର୍ମାଦାସୀ କୋୱାଃ ମାନାରାଙ୍ଗ୍ ଲୋଃ ହିଜୁଗାଇଙ୍ଗ୍, ଏଣ୍ଡେ ଇନିଃକେ ଗିୟୁଗୋୱାଇଙ୍ଗ୍। ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍, ଚି ଅକଏକୋ ନେତାଃ ତିଙ୍ଗୁ କାନାକୋ, ଇନ୍‍କୁ ଏତେ ଚିମିନାଙ୍ଗ୍ କୋ ନେଲେକା ମେନାକୋୱା, ଚି ଚିମିନ୍ ସାନ୍ତେ ପାର୍ମେଶ୍ଵାର୍ ରାଃ ରାଇଜ୍ କାକୋ ନେଲେୟା ଏନ୍ ସାନ୍ତେ ଗୋନୋଏଃ ରାଃ ଶିବିଲ୍ କାକୋ ଚାଖାୟା।” ନେ କାଜିକୋକେ ୟୀଶୁ କାଜି ରାଃ ଆଠ୍ ଦିନ୍ ତାୟୋମ୍ତେ, ଇନିଃ ପାତ୍ରାସ୍, ଯୋହାନ୍ ଆଡୋଃ ୟାକୁବ୍ କେ ଆଜାଃ ଲୋଃ ଇଦିକେତେ ବିନ୍ତି ଲାଗିନ୍ତେ ବୁରୁ ଚେତାନ୍ ତେ ସେନ୍ ଜାନାଏ। ଚିମ୍ତା ଇନିଃ ବିନ୍ତି ତାଇକେନାଏ, ଇମ୍ତା ଇନିଜାଃ ମେଏଃମୁହାଡ଼୍ ରାଃ ରୂପ୍ ବାଦ୍‍ଲାଅ ଜାନା, ଆଡୋଃ ଇନିଜାଃ ଲିଜାଃ ପୁଣ୍ଡୀ ହୋବାକେତେ ଚାମ୍‍କାଓ ଜାନା। ଆଡୋଃ ନେଲେପେ ମୁଶା ନାବୀ ହାର୍ ଏଲିୟା ନାବୀ ନେ ବାର୍ହୋଡ଼୍ କିନ୍ ଇନିଃ ଲୋଃ ବାକାଣ୍ ତାଇନ୍ କେନାକିନ୍। ନିକିନ୍ ମାନାରାଙ୍ଗ୍ ଲୋଃ ନେଲ୍ ଜାନାକିନ୍, ଆଡୋଃ ଇନିଜାଃ ଗୋଜୋଃ ରାଃ ବିଷାୟ୍ ରେ ବାକାଣ୍ ତାଇକେନାକୋ, ଅକନାଃ ୟୀରୁଶାଲେମ୍ ସାହାର୍ ରେ ହୋବାଅଃ ରାଃ ତାଇକେନା। ପାତ୍ରାସ୍ ଆଡୋଃ ଇନିଜାଃ ଗାତିକୋ ଦୁଣୁମ୍ ତେ ଭାର୍ଖାରାଓ ଲେନ୍ ତାଇକେନାକୋ, ଆଡୋଃ ଚିମ୍ତା ବେଶ୍ ଲେକା ଏୟୋନ୍ ଜାନାକୋ, ଏଣ୍ଡେ ଇନିଜାଃ ମାନାରାଙ୍ଗ୍ ଆଡୋଃ ଏନ୍ ବାର୍ହୋଡ଼୍ କିନ୍‍କେ ଅକଏକୋ ଇନିଜାଃ ଲୋଃ ତିଙ୍ଗୁ ଲେନ୍ ତାଇକେନାକିନ୍ ନେଲ୍ କେଦାକୋ। ଚିମ୍ତା ଇନ୍‍କିନ୍ ଇନିଜାଃ ନାଡ଼େଏ ତେ ସେନୋଃ ତାଇକେନାକିନ୍, ଇମ୍ତା ପାତ୍ରାସ୍ ୟୀଶୁ କେ କାଜିକେଦାଏ, “ହେ ଗୋମ୍‍କେ, ଆଲେୟାଃ ନେତାଃ ତାଇନୋଃ ବୁଗିନ୍ ତାନାଃ, ଏନାଲାଗିନ୍ ଆଲେକେ ଆଚୁ ଲେମ୍ ଚି, ଆପିୟା ମାଣ୍ଡ୍‍ୱା ବାଇୟାଲେ, ମିୟାଃ ଆମାଃ ଲାଗିନ୍, ମିୟାଃ ମୁଶା ଲାଗିନ୍ ଆଡୋଃ ମିୟାଃ ଏଲିୟା ଲାଗିନ୍।” ଇନିଃ କାଏ ସାରି ତାଇନା ଚି ଚିନାଃ କାଜି ତାନାଏ। ଇନିଃ ନେୟା ଗି କାଜି ତାଇକେନାଏ ଚି ମିୟାଃ ରିମିଲ୍ ହିଜୁଃକେତେ ଇନ୍‍କୁକେ ଉମ୍ବୁଲ୍ କେଃକୋୱାଏ, ଆଡୋଃ ଚିମ୍ତା ଇନ୍‍କୁ ଏନ୍ ରିମିଲ୍ ଏତେ ହାରୁବ୍ ଜାନାକୋ ଏଣ୍ଡେ ବୋରୋ ଜାନାକୋ। ଏନ୍ତେ ଏନ୍ ରିମିଲ୍ ଏତେ ପାର୍ମେଶ୍ଵାର୍ କାଜିକେଦାଏ, “ନିଈ ଇଙ୍ଗ୍ଆଃ ହୋନ୍ ଆଡୋଃ ଇଙ୍ଗ୍ଆଃ ସାଲାକାନ୍ ନିଈ ତାନିଃ, ନିଜାଃ ଆୟୁମେପେ।” ନେ କାଜି ଆୟୁମୋଃ ଲୋଃଗି ୟୀଶୁ ଏସ୍କାର୍ ଗି ନାମ୍ ଜାନାଏ, ଆଡୋଃ ଇନ୍‍କୁ ହାପା ଜାନାକୋ। ଆଡୋଃ ଅକନାଃ ନେଲ୍ ଲେଦାକୋ, ଏନାରାଃ ଜେତାନ୍ କାଜିକୋ ଏନ୍ ସାମାୟ୍ ରେ ଅକଏ କେହ କାକୋ କାଜିକେଦା। ଏଟାଃ ହୁଲାଙ୍ଗ୍ ଚିମ୍ତା ଇନ୍‍କୁ ବୁରୁ ଚେତାନ୍ ଏତେ ଆଡ଼୍‍ଗୁ ଜାନାକୋ ଏଣ୍ଡେ ମିଃଥିମ୍ବା ହୋଡ଼ୋକୋ ୟୀଶୁ ଲୋଃ ନାପାମ୍ ଜାନାକୋ। ଏନ୍ତେ ନେଲେପେ, ମିଃଥିମ୍ବା ହୋଡ଼ୋକୋ ଏତେ ମିୟାଃ ହୋଡ଼ କାଉରି କେତେ କାଜିକେଦାଏ, “ହେ ଗୁରୁ, ଇଙ୍ଗ୍ ଆମ୍‍କେ ଆର୍ଜି ତାନିଙ୍ଗ୍ ଚି ଇଙ୍ଗ୍ଆଃ ହୋନ୍‍କଡ଼ା ଚେତାନ୍ ରେ ଦାୟା ତାଇମେ, ଚିୟାଃଚି ଇଙ୍ଗ୍ଆଃ ମିୟାଃ ଗି ହୋନ୍‍କଡ଼ା ମେନାଇଜା, ହାର୍ ନେଲେମ୍, ମିୟାଃ ବୋଙ୍ଗାଆତ୍ମା ଇନିଃକେ ଏସେରିୟାଏ, ଆଡୋଃ ଇନିଃ ମିଶା-ମିଶା କାଉରି ବିରିଃ କୋୱାଏ, ଆଡୋଃ ଏନ୍ ବୋଙ୍ଗାଆତ୍ମା ଇନିଃକେ ଏନ୍‍ଲେକା ଆଇଣ୍ଠାଅଇୟାଏ ଯେ ଇନିଜାଃ ମୋଚା ପାଡ଼େତେ ବୋଟୋ ଫେରେଃ କେନୋଃୱା, ଆଡୋଃ ଇନିଃକେ ଥାୱାଃ କେତେ ହାସୁ ଏମ୍ କେତେ ବାଗେ ୟାଏ। ଇଙ୍ଗ୍ ଆମାଃ ଚେଲାକୋକେ ଆର୍ଜି କେଦାଇଙ୍ଗ୍ ଚି ଇନିଃକେ ଅଡୋଙ୍ଗୀ କାକୋ ମେନ୍ଦୋ ଇନ୍‍କୁ କାକୋ ଅଡୋଙ୍ଗ୍ ଧାଡ଼ିଜାନା।” ୟୀଶୁ କାଜିରୁଆଡ଼୍ କେଃକୋୱାଏ, “ହେ ଆବିଶ୍ଵାସୀ ଆଡୋଃ ସେଠ୍ରା ହୋଡ଼ୋକୋ, ଇଙ୍ଗ୍ ଚିମିନ୍ ସାନ୍ତେ ଆପେୟାଃ ଲୋଃ ତାଇନାଇଙ୍ଗ୍? ଆଡୋଃ ଆପେୟାଃ ସାହାତିଙ୍ଗ୍ ୟାଇଙ୍ଗ୍? ଆମାଃ କଡ଼ାହୋନ୍ କେ ନେତାଃ ଆୱିମେ।” ଚିମ୍ତା ଏନ୍ ହୋନ୍ ହିଜୁଃ ତାଇନ୍ ରେ ଗି ବୋଙ୍ଗାଆତ୍ମା ଇନିଃକେ ଥାୱାଃ କେତେ ଆଇଣ୍ଠାଅ କିଜାଏ, ମେନ୍ଦୋ ୟୀଶୁ ବୋଙ୍ଗାଆତ୍ମା କେ ଧାମ୍‍କାଅ କିଜାଏ, ଆଡୋଃ କଡ଼ାହୋନ୍ କେ ବେଶ୍ କେତେ ଇନିଜାଃ ଆପୁ କେ ଜିମା ତାଜାଏ। ଏନ୍ତେ ସବେନ୍ ହୋଡ଼ୋକୋ ପାର୍ମେଶ୍ଵାର୍ ରାଃ ମାରାଙ୍ଗ୍ ପେଡ଼େଏ ତେ ଆକ୍‍ଦାନ୍ଦା ଜାନାକୋ। ମେନ୍ଦୋ ଚିମ୍ତା ସବେନ୍ ହୋଡ଼ୋକୋ ଏନ୍ ସବେନ୍ କାମି କୋଏତେ ଅକନାଃ ଇନିଃ ରିକାତାଇନାଏ ଆକ୍‍ଦାନ୍ଦାଅଃ ତାଇନ୍ କେନାକୋ। ଏନ୍ତେ ଇନିଃ ଆଜାଃ ଚେଲାକୋକେ କାଜିକେଦାଏ, “ଆପେ ନେ କାଜି କୋରେ ଲୁତୁରେପେ ଚିୟାଃଚି ଇଙ୍ଗ୍ ମାନ୍‍ୱା ରାଃ ହୋନ୍ ହୋଡ଼ୋକୋୱାଃ ତିଈ ରେ ସାବୋଃ ରାଃ ମେନାଇଙ୍ଗ୍‍ୟା।” ମେନ୍ଦୋ ଇନ୍‍କୁ ନେ କାଜିକେ କାକୋ ବୁଝାଅ ଲେନ୍ ତାଇନା, ହାର୍ ପାର୍ମେଶ୍ଵାର୍ ନେୟାକେ ଇନ୍‍କୁ ଏତେ ଉକୁକେଦାଏ ଏନାମେନ୍ତେ ଚି ଇନ୍‍କୁ ଏନା କାକୋ ସାରିକା, ଆଡୋଃ ଇନ୍‍କୁ ନେ କାଜି ରାଃ ବିଷାୟ୍ ରେ ଇନିଃକେ କୁଲି ଲାଗିନ୍ ବୋରୋ ତାଇକେନାକୋ। ଏନ୍ତେ ଇନ୍‍କୁୱାଃ ରେ ନେୟା କୁପୁଲି ହୋବାଜାନା, ଚି ଆବୁ କୋଏତେ ମାରାଙ୍ଗ୍ ଅକଏ ତାନିଃ। ମେନ୍ଦୋ ୟୀଶୁ ଇନ୍‍କୁୱାଃ ମୋନ୍ ରାଃ କାଜିକେ ସାରିକେଦାଏ, ଆଡୋଃ ମିୟାଃ ହୋନ୍ କେ ଇଦିକେତେ ଆଜାଃ ନାଡ଼େଏ ରେ ତିଙ୍ଗୁ କିଜାଏ, ହାର୍ ଇନ୍‍କୁକେ କାଜିକେଦାଏ, “ଅକଏ ହଗି ଇଙ୍ଗ୍ଆଃ ନୁତୁମ୍ ତେ ନେ ବାଲେଃ ହୋନ୍ କେ ସ୍ଵାଗାତ୍ ଇୟାଏ, ଇନିଃ ଇଙ୍ଗ୍‍କେ ସ୍ଵାଗାତ୍ ତାନାଏ, ଆଡୋଃ ଇଙ୍ଗ୍ଆଃ କୁକୁଲ୍ ନିଃକେ ସ୍ଵାଗାତ୍ ତାନାଏ। ଚିୟାଃଚି ଅକଏ ଆପେ କୋଏତେ ସବେନ୍ ଏତେ ହୁଡିଙ୍ଗ୍ ଏତେ ହୁଡିଙ୍ଗ୍ ତାନିଃ, ଇନିଃଗି ମାରାଙ୍ଗ୍ ତାନିଃ।” ଏନ୍ତେ ଯୋହାନ୍ କାଜିକେଦାଏ, “ହେ ଗୋମ୍‍କେ, ଆଲେ ମିୟାଃ ହୋଡ଼ କେ ଆମାଃ ନୁତୁମ୍ ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍‍ତାନ୍ ନେଲ୍ କିଜାଲେ, ଆଡୋଃ ଆଲେ ଇନିଃ କେ ମାନା କିଜାଲେ, ଚିୟାଃଚି ଇନିଃ ଆବୁ ଚେଲାକୋ ଏତେ ନାହାଲାଏ।” ୟୀଶୁ ଇନିଃକେ ହାର୍ ଏଟାଃ ଚେଲାକୋକେ କାଜିୟାଃକୋୱାଏ, “ଇନିଃକେ ଆଲୋପେ ମାନାଇୟା, ଚିୟାଃଚି ଅକଏ ଆପେୟାଃ ବିରୋଧ୍ ରେ ବାଙ୍ଗୁଇଜା, ଇନିଃ ଆପେୟାଃ ପାଡ଼୍ ମେନିଜା।” ଚିମ୍ତାଙ୍ଗ୍ ୟୀଶୁ କେ ଚେତାନ୍ ସିର୍ମାଦିଶୁମ୍ ଉଠାଓ ରାଃ ଦିନ୍ ପୁରା ହୋବାଅଃ ରାଃ ତାଇକେନା, ଦୋ ଇନିଃ ୟୀରୁଶାଲେମ୍ ସାହାର୍ ସେନ୍ ଲାଗିନ୍ ମୋନ୍ କେ ପୋକ୍ତା କେଦାଏ। ଇନିଃ ଆଜାଃ ଆୟୁର୍ ତେ ସାନ୍ଦେଶ୍ ଏହେମ୍ କୋକେ କୁଲ୍ କେଃକୋୱାଏ। ଇନ୍‍କୁ ସାମାରୀୟା କୋୱା ମିୟାଃ ହାତୁ ରେ ସେନ୍ ଜାନାକୋ ଚି ଇନିଜାଃ ଲାଗିନ୍ ଜାଗାକୋ ବାଇୟା। ମେନ୍ଦୋ ଏନ୍ ହୋଡ଼ୋକୋ ଇନିଃକେ କାକୋ ଆଡ଼୍‍ଗୁଇଚାକିଜା, ଚିୟାଃଚି ଇନିଃ ୟୀରୁଶାଲେମ୍ ସେନ୍ ତାଇନାଏ। ନେୟା ନେଲ୍‍କେତେ ଆୟାଃ ଚେଲା ୟାକୁବ୍ ହାର୍ ଯୋହାନ୍ କାଜିକେଦାକିନ୍, “ହେ ପ୍ରାଭୁ ଚିନାଃ ଆମ୍ ସାନାଙ୍ଗ୍ ତାନାମ୍ ଚି ଆଲେ ଆନାଚୁ ଏମେୟାଲେ, ଚି ରିମିଲ୍‍ଦିଶୁମ୍ ଏତେ ସେଙ୍ଗେଲ୍ ଉୟୁଃକେତେ ଇନ୍‍କୁକେ ରୋଙ୍ଗୋ ତାକୋୱାଲେ?” ମେନ୍ଦୋ ଇନିଃ ଇନ୍‍କୁକେ ଏଗେର୍ କେଃକୋୱାଏ (ଆଡୋଃ କାଜିକେଦାଏ, “ଆପେ କାପେ ସାରିତାନା ଚି ଆପେ ଚିଲ୍‍କାନ୍ ଆତ୍ମା ରେନ୍ କୋ ତାନ୍‍ପେ। ଚିୟାଃଚି ଇଙ୍ଗ୍ ମାନ୍‍ୱା ରାଃ ହୋନ୍ ହୋଡ଼ୋ କୋୱାଃ ଜୀଉ କେ ନାଶ୍ ଲାଗିନ୍ କାହା ମେନ୍ଦୋ ବାଚାଓ ଲାଗିନ୍ ହିଜୁଃ କାନାଇଙ୍ଗ୍।”) ଏନାମେନ୍ତେ ଇନ୍‍କୁ ମିୟାଃ ଏଟାଃ ହାତୁ ତେ ସେନୋଃ ଜାନାକୋ। ଚିମ୍ତା ଇନ୍‍କୁ ହୋରା ରେ ସେନ୍ ତାଇନାକୋ, ଏଣ୍ଡେ ଜେତାଏ ମିହୋଡ଼୍ ଇନିଃକେ କାଜିକେଦାଏ, “କୋତାଃ-କୋତାଃ ଆମ୍ ସେନାମ୍, ଇଙ୍ଗ୍ ଆମ୍‍କେ ଅତୋଙ୍ଗ୍ ମେୟାଇଙ୍ଗ୍।” ୟୀଶୁ ଇନିଃକେ କାଜିକେଦାଏ, “ତୁୟୁ କୋୱାଃ ଦୋ ଉଣ୍ଡୁଃ ତାଇନା ଆଡୋଃ ରିମିଲ୍‍ଦିଶୁମ୍ ରେନ୍ ଅଡ଼େ କୋୱାଃ ତୂକା ତାଇନା ମେନ୍ଦୋ ଇଙ୍ଗ୍ ମାନ୍‍ୱା ରାଃ ହୋନ୍ କେ ବୋଅ ମାଣ୍ଡାଅ ଲାଗିନ୍ ଅଗି ଜାଗା ବାନୋଗା।” ଇନିଃ ଏଟାଃ ନିଈ କେ କାଜିକେଦାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ।” ଇନିଃ କାଜିକେଦାଏ, “ହେ ପ୍ରାଭୁ ଇଙ୍ଗ୍‍କେ ସିଦା ସେନ୍ ରିକାଇଙ୍ଗ୍ ମେ ଚି ଇଙ୍ଗ୍ଆଃ ଆପୁ ଗୋଜୋଃ ତାୟୋମ୍ତେ ଇନିଃକେ ତୋପା ତାୟିଙ୍ଗ୍।” ୟୀଶୁ ଇନିଃକେ କାଜିକେଦାଏ, “ଗୋଜାକାନ୍ କୋ ଆକୋୱାଃ ଗୋଜାକାନ୍ କୋକେ ତୋପା କାକୋ, ମେନ୍ଦୋ ଆମ୍ ସେନ୍ କେତେ ପାର୍ମେଶ୍ଵାର୍ ରାଃ ରାଇଜ୍ ରାଃ କାଜି ଉଦୁବାଃ କୋମ୍।” ମିହୋଡ଼୍ ଏଟାଃ ନିଜୋ କାଜିକେଦାଏ, “ହେ ପ୍ରାଭୁ ଇଙ୍ଗ୍ ଆମ୍‍କେ ଅତୋଙ୍ଗ୍ ମେୟାଇଙ୍ଗ୍; ମେନ୍ଦୋ ସିଦା ଇଙ୍ଗ୍‍କେ ସେନ୍ ରିକାଇଙ୍ଗ୍ ମେ ଚି ଇଙ୍ଗ୍ଆଃ ଅଡ଼୍ଆଃ ରେନ୍ କୋଏତେ ବିଦା ଆଉଲେୟାଇଙ୍ଗ୍।” ୟୀଶୁ ଇନିଃକେ କାଜିକେଦାଏ, “ଜାହାଁଏ ହ ଆଜାଃ ତିଈ ନାଏହାଲ୍ ରେ ମାଣ୍ଡାଅ କେତେ ଦୋୟା ପାଡ଼୍ ନେଲେୟାଏ ଇନିଃ ପାର୍ମେଶ୍ଵାର୍ ରାଃ ରାଇଜ୍ ରାଃ ଲାଏକ୍ ନାହାଲାଏ।” ନେ କାଜି କୋରାଃ ତାୟୋମ୍ତେ, ପ୍ରାଭୁ ଆଡୋଃ ଏଟାଃ ସାତାର୍ ଝାନ୍ ଚେଲାକୋକେ ସାଲା କେଃକୋୱାଏ, ହାର୍ ଅକନ୍-ଅକନ୍ ସାହାର୍ ଆଡୋଃ ଜାଗା କୋ ଆଏଃକେ ସେନ୍ ରାଃ ତାଇକେନା, ହେନ୍ତାଃ ଇନ୍‍କୁକେ ବାର୍ହୋଡ଼୍-ବାର୍ହୋଡ଼୍ କେତେ ଆୟାଃ ଆୟୁର୍ ତେ କୁଲ୍ କେଃକୋୱାଏ। ଇନିଃ ଇନ୍‍କୁକେ କାଜିକେଦାଏ, “ଇରୋଃ ଲାଗିନ୍ ଦୋ ଥିମ୍ବା ଗିୟା, ମେନ୍ଦୋ କାମି ନାଲାକୋ ହୁଡିଙ୍ଗ୍ ଗିୟାକୋ; ଏନାଲାଗିନ୍ ଅତେ ରାଃ ଗୋମ୍‍କେ କେ ବିନ୍ତି ପେ ଚି ଇନିଃ ଆଜାଃ ଅତେ ଇହିର୍ ଲାଗିନ୍ କାମି ନାଲାକୋକେ କୁଲ୍ କୋୱାଏ। ଜୁ, ନେଲେପେ, ଇଙ୍ଗ୍ ଆପେକେ ମିଣ୍ଡୀହୋନ୍ କୋ ଲେକା ହୁଣ୍ଡାର୍ କୋୱା ଥାଲା ରେ କୁଲ୍ ପେ ତାନିଙ୍ଗ୍। ଏନାଲାଗିନ୍ ନାଦୋ ଟାକା ଥାଇଲା, ନାଦୋ ଥାଇଲା, ନାଦୋ ଖାର୍ପା ଇଦିପେ, ଆଡୋଃ ନାଦୋ ହୋରା ରେ ଜେତାଏ କେହ ଆଲୋପେ ଜୋହାର୍ କୋୱା। ଜେତାୟାଃ ଅଡ଼୍ଆଃ ରେହ ସେନ୍ ପେ, ସିଦା କାଜିପେ, ନେ ଅଡ଼୍ଆଃ ରେ ସୁକୁ ତାଇନୋଃକା। ଏନ୍ତାଃରେ ସୁକୁ ନାମେ ଲେକାନ୍ ହୋଡ଼ ତାଇନୋଃ ରେଦୋ ଆପେୟାଃ ସୁକୁ ଇନିଜାଃ ରେ ହୋବାୱା, କାରେ ଦୋ ଆପେୟାଃ ତାଃ ରୁଆଡ଼୍ କେନୋଗା। ଏନ୍ ଅଡ଼୍ଆଃ ରେଗି ତାଇନ୍‍ପେ, ଆଡୋଃ ଅକନାଃ ଇନ୍‍କୁ ଏତେ ନାମୋଗା, ଏନାଗି ଜୋମେପେ ହାର୍ ନୁୱେପେ, ଚିୟାଃଚି ନାଲାନିଃ କେ ଆଜାଃ ନାଲା ନାମୋଃ ଚାହି, ଅଡ଼୍ଆଃ-ଅଡ଼୍ଆଃ ଆଲୋପେ ହୋନୋର୍‍ୟା। ଜାହାନ୍ ସାହାର୍ ରେ ବୋଲୋୱାପେ, ଆଡୋଃ ହେନ୍ତାଃ ରେନ୍ ହୋଡ଼ୋକୋ ଆପେକେ ସୁକୁ ପେୟାକୋ, ଏଣ୍ଡେ ଆପେୟାଃ ନାଡ଼େଏ ରେ ଅକନାଃ ମାଣ୍ଡାଅଗା ଏନାଗି ଜୋମେପେ। ହେନ୍ତାଃ ରେନ୍ ବିମାରୀ କୋକେ ବେଶ୍ କୋପେ ଆଡୋଃ ଇନ୍‍କୁକେ କାଜିୟାକୋପେ, ‘ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ନାଡ଼େଏ ହିଜୁଃ ସେଟେର୍ କାନା।’ ମେନ୍ଦୋ ଜାହାନ୍ ସାହାର୍ ରେ ସେନାପେ ଆଡୋଃ ଏନ୍ତାଃ ରେନ୍ ହୋଡ଼ୋକୋ ଆପେକେ କାକୋ ଗ୍ରାହାନ୍ ପେୟା, ଏଣ୍ଡେ ଇନ୍‍କୁୱାଃ ପିଟ୍ କୋରେ ସେନ୍ କେତେ କାଜିପେ। ‘ଆପେୟାଃ ସାହାର୍ ରାଃ ଧୂଡ଼ି ଅଗି, ଅକନାଃ ଆଲେୟାଃ କାଟା ରେ ଲାଗାଅ କାନା, ଆଲେ ଆପେୟାଃ ନାଡ଼େଏ ରେ କୋଟା ତାନାଲେ, ଏଣ୍ଡେ ରେହ ନେୟା ସାରିକେପେ ଚି ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ନାଡ଼େଏ ହିଜୁଃ ସେଟେର୍ କାନା।’ ଇଙ୍ଗ୍ ଆପେକେ କାଜିତାନିଙ୍ଗ୍ ଚି ଏନ୍ ବିଚାର୍ ହୁଲାଙ୍ଗ୍ ଏନ୍ ସାହାର୍ ଅକନ୍ ଦାଣ୍ଡ୍ ନାମେୟାଏ ଏନାତେ ସାଦୋମ୍ ସାହାର୍ ରାଃ ଦାଣ୍ଡ୍ ହୁଡିଙ୍ଗ୍ ତାଇଲେନା।” “ହାୟ୍, ଖୁରାଜିନ୍ ସାହାର୍ ରେନ୍ ହୋଡ଼ୋକୋ! ହାୟ୍ ବେଥ୍‍ସୈଦା ସାହାର୍ ରେନ୍ ହୋଡ଼ୋକୋ! ଅକନ୍ ପେଡ଼େଏ ରାଃ କାମି ଆପେୟାଃ ରେ ରିକା ଲେନ୍ ତାଇନା, ଆଗାର୍ ଏନା ସୁର୍ ହାର୍ ସିଦୋନ୍ ସାହାର୍ କୋରେ ରିକା ଜାନ୍ତେ, ଏଣ୍ଡେ ଇନ୍‍କୁ ଦୁକୁଲିଜାଃ ତୁସିଙ୍ଗ୍ କେତେ ହାର୍ ତରେଃ ରେ ଦୁବ୍‍କେତେ ଚିଉଲାଏତେ ଗି ପାପ୍ କାମି ବାଗେ ତାତେକୋ। ମେନ୍ଦୋ ବିଚାର୍ ରାଃ ହୁଲାଙ୍ଗ୍ ରେ ଆପେ ଅକନ୍ ଦାଣ୍ଡ୍ ନାମେୟାପେ ଏନାତେ ସୁର୍ ହାର୍ ସିଦୋନ୍ ସାହାର୍ ରେନ୍ କୋ ନାମ୍ ଲେନ୍ ଦାଣ୍ଡ୍ ହୁଡିଙ୍ଗ୍ ହୋବାୱା। ଆଡୋଃ ହେ କାଫାର୍ନାହୁମ୍ ସାହାର୍ ରେନ୍ ହୋଡ଼ୋକୋ, ଚିନାଃ ଆପେ ସିର୍ମାଦିଶୁମ୍ ସାନ୍ତେ ଚେତାନ୍ ଅଗାପେ? ଏନ୍‍କା କା ହୋବାୱା ଆପେ ନାରାକ୍ ସାନ୍ତେ ଲାଥାର୍ ତେ ସେନାପେ।” “ଅକଏ ଆପେୟାଃ ଆୟୁମ୍ ତାନାଏ ଇନିଃ ଇଙ୍ଗ୍ଆଃ ହ ଆୟୁମ୍ ତାନାଏ, ହାର୍ ଅକଏ ଆପେକେ ହିଲାଙ୍ଗ୍ ତାନାଏ ଇନିଃ ଇଙ୍ଗ୍‍କେ ହିଲାଙ୍ଗ୍ ତାନାଏ, ଆଡୋଃ ଅକଏ ଇଙ୍ଗ୍‍କେ ହିଲାଙ୍ଗ୍ ତାନାଏ ଇନିଃ ଇଙ୍ଗ୍ଆଃ କୁକୁଲ୍ ନିଃକେ ହିଲାଙ୍ଗ୍ ତାନାଏ।” ଏନ୍ ସାତାର୍ ଝାନ୍ ଚେଲାକୋ ରାଶିକାତାନ୍ ଲୋଃ ରୁଆଡ଼୍ ଜାନାକୋ ଆଡୋଃ କାଜିକେଦାକୋ, “ହେ ପ୍ରାଭୁ, ଆମାଃ ନୁତୁମ୍ ତେ ବୋଙ୍ଗାଆତ୍ମା କୋଗି ଆଲେୟାଃ ଆଧିନ୍ ରେ ମେନାକୋୱା।” ଇନିଃ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଶାଏତାନ୍ କେ ବିଜ୍‍ଲୀ ଲେକା ରିମିଲ୍‍ଦିଶୁମ୍ ଏତେ ଉୟୁଃକାନ୍ ନେଲି ତାଇନାଇଙ୍ଗ୍। ନେଲେପେ, ଇଙ୍ଗ୍ ଆପେକେ ବିଙ୍ଗ୍ କୋକେ ଆଡୋଃ ମାର୍ମାର୍ କୋକେ ତିକା ସେରେଦ୍ ରାଃ ଆଡୋଃ ବାଇରୀ କୋୱାଃ ସବେନ୍ ପେଡ଼େଏ ଚେତାନ୍ ରେ ଆଧିକାର୍ ଏମାକାଦିଙ୍ଗ୍ ଆଡୋଃ ଜେତାନ୍ ଜିନିଷ୍ କୋଏତେ ଆପେକେ ଜାହାନ୍ ହାନି କା ହୋବାୱା। ଏଣ୍ଡେ ରେହ ନେୟା ରେ ଆଲୋପେ ରାଶିକା ଅଃୱା ଚି ବୋଙ୍ଗାଆତ୍ମା ଆପେୟାଃ ଆଧିନ୍ ରେ ମେନାଃ ମେନ୍ଦୋ ନେୟାତେ ରାଶିକାନ୍ ପେ ଚି ଆପେୟାଃ ନୁତୁମ୍ ସିର୍ମାଦିଶୁମ୍ ରେ ଅଲାକାନା।” ଏନ୍ ସାମାୟ୍ ରେଗି ୟୀଶୁ ପାବିତାର୍ ଆତ୍ମା ରେ ହୋବାକେତେ ରାଶିକା ତେ ଫେରେଃ ଜାନାଏ, ଆଡୋଃ କାଜିକେଦାଏ, “ହେ ଆବା, ସିର୍ମାଦିଶୁମ୍ ଆଡୋଃ ଅତେ ରେନ୍ ପ୍ରାଭୁ ଇଙ୍ଗ୍ ଆମାଃ ଧାନ୍ୟାବାଦ୍ ତାନିଙ୍ଗ୍ ଚି ଆମ୍ ନେ କାଜିକୋକେ ସେଣାନ୍‍କୋ ହାର୍ ବୁଝାଅଧାଡ଼ି ଲେକାନ୍‍କୋ ଏତେ ଉକୁକେତେ ମାଣ୍ଡାଅ କେଦାମ୍, ଆଡୋଃ ବାଲେଃ ହୋନ୍ କୋୱାଃ ରେ ଉଦୁବ୍ କେଦାମ୍। ହାଁ, ହେ ଆବା, ଚିୟାଃଚି ଆମ୍‍କେ ନେୟାଗି ସୁକୁ ଆଦା କେଃମେୟା। ଇଙ୍ଗ୍ଆଃ ଆପୁ ଇଙ୍ଗ୍‍କେ ସବେନାଃ ଜିମା କାଦିଙ୍ଗାଏ, ଆଡୋଃ ଆପୁ କେ ବାଗି କେତେ ଅକଏ ହ କାକୋ ସାରିତାନା ଚି ଇଙ୍ଗ୍ ଅକଏ ତାନିଙ୍ଗ୍, ଆଡୋଃ ଇଙ୍ଗ୍‍କେ ବାଗେ କେତେ ଅକଏ ହଗି କାକୋ ସାରିତାନା ଚି ଆପୁ ଅକଏ ତାନିଃ, ଏନ୍ତେ ଇନିଃ ସାରିୟାଏ ଅକନିଃକେ ଇଙ୍ଗ୍ ଆପୁ ପାର୍ମେଶ୍ଵାର୍ ଅକଏ ତାନିଃ ମେନ୍ତେ ଉଦୁବ୍ ସାନାଙ୍ଗାଇଙ୍ଗ୍।” ଏନ୍ତେ ଚେଲାକୋ ପାଡ଼୍ ବିୟୁର୍ କେତେ ଇନ୍‍କୁ କେ ଏସ୍କାର୍ କାଜିକେଦାଏ, “ଧାନ୍ୟା ଆପେ ତାନ୍‍ପେ, ଅକନ୍ କାଜିକୋ ଆପେ ନେଲ୍ ତାନାପେ। ଚିୟାଃଚି ଇଙ୍ଗ୍ ଆପେକେ କାଜିତାନିଙ୍ଗ୍ ଚି ଥିମ୍ବାଗି ନାବୀ କୋ ଆଡୋଃ ରାଜା କୋ ସାନାଙ୍ଗ୍ କେଦାକୋ ଚି ଅକନ୍ କାଜି ଆପେପେ ନେଲ୍‍ତାନା ନେଲେୟାକୋ, ମେନ୍ଦୋ କାକୋ ନେଲ୍‍କେଦା, ଆଡୋଃ ଅକନ୍ କାଜି ଆପେପେ ଆୟୁମ୍ ତାନା ଆୟୁମ୍ ସାନାଙ୍ଗ୍ କେନାକୋ, ମେନ୍ଦୋ କାକୋ ଆୟୁମ୍‍କେଦା।” ନେଲେପେ, ମୁଶିଙ୍ଗ୍ ୟୀଶୁ ହୋଡ଼ୋକୋକେ ଶିଖାଅ କୋ ତାଇନାଏ, ଇମ୍ତା ମିୟାଃ ମୁଶା ନାବୀ ରାଃ ନିୟାମ୍ କେ ବୁଗିନ୍ ତେ ସାରିକାନ୍ ଆଇନ୍ ଗୁରୁ ବିରିଃ ଜାନାଏ, ଆଡୋଃ ନେୟା କାଜିକେତେ ଇନିଃକେ ପାରୀକ୍ଷା କେଦାଏ, “ହେ ଗୁରୁ, ଜାନାଓ ଜୀଦାନ୍ ରାଃ ହାନାଟିଙ୍ଗ୍ ନାମ୍ ଲାଗିନ୍ ଇଙ୍ଗ୍ ଚିନାଃ ରିକାୟାଇଙ୍ଗ୍?” ୟୀଶୁ ହିନିଃକେ କାଜିକେଦାଏ, “ମୁଶା ନାବୀ ରାଃ ଆଇନ୍ ରେ ଚିନାଃ ଅଲାକାନା? ଆମ୍ ଚିଲ୍‍କା ପାଢ଼ାଅନ୍ ତାନାମ୍?” ହିନିଃ କାଜିରୁଆଡ଼୍ କେଦାଏ, ଆମ୍ ପ୍ରାଭୁ ଆମାଃ ପାର୍ମେଶ୍ଵାର୍ କେ ଆମାଃ ସବେନ୍ ମୋନ୍ ତେ ଆଡୋଃ ଆମାଃ ସବେନ୍ ଜୀଉ ତେ ଆଡୋଃ ଆମାଃ ସବେନ୍ ପେଡ଼େଏ ତେ ଆଡୋଃ ଆମାଃ ସବେନ୍ ସେଣା ତେ ଦୁଲାଡ଼ି ମେ। ଆଡୋଃ ଆମାଃ ନାଡ଼େଏଃ-ଜାପାଃ ରେନ୍ କୋକେ ଆପାନାଃ ଲେକା ଦୁଲାଡ଼୍ କୋମ୍। ୟୀଶୁ ହିନିଃକେ କାଜିକେଦାଏ, “ଆମ୍ ଠିକ୍ କାଜିରୁଆଡ଼୍ କେଦାମ୍। ନେକାଗି ରିକାଏମ୍ ଏଣ୍ଡେ ଆମ୍ ପାର୍ମେଶ୍ଵାର୍ ଲୋଃ ସବେନ୍ ହୁଲାଙ୍ଗ୍ ନାଙ୍ଗ୍ ଜୀନିଦ୍ ତାଇନୋଗାମ୍।” ମେନ୍ଦୋ ଇନିଃ ଆଏଃ ଆଏଃକେ ଧାର୍ମୀ ବାଇୟେନ୍ ସାନାଙ୍ଗ୍ ତେ ୟୀଶୁ କେ କୁଲିକିଜାଏ, “ଏଣ୍ଡେ ଇଙ୍ଗ୍ଆଃ ନାଡ଼େଏଃ-ଜାପାଃ ରେନ୍ ଅକଏ ତାନିଃ?” ୟୀଶୁ ମିୟାଃ ଜୋନୋକା କାଜିତେ କାଜିରୁଆଡ଼୍ କେଦାଏ, “ମିୟାଃ ହୋଡ଼ ୟୀରୁଶାଲେମ୍ ସାହାର୍ ଏତେ ୟାରିହୋ ସାହାର୍ ତେ ସେନ୍ ତାଇକେନାଏ, ଇମ୍ତା ଡାକୁକୋ ଇନିଃକେ କେସେଃ କିଜାକୋ ହାର୍ ଇନିଜାଃ ଲିଜାଃ କୋ ହାର୍ ଏଟାଃ ଜିନିଷ୍ କୋ ଚିନାଃ ଇନିଃ ତାଃ ରେ ତାଇକେନା ସବେନାଃ ରେଏଃ ଇଦିକେଦାକୋ ହାର୍ ବିଡ଼ାହୁମାଃ କେତେ ଇନିଃକେ ଗୋଜୋଃ ଲେକା ବାଗିକେତେ ସେନୋଃ ଜାନାକୋ। ଏନ୍ତେ ନେକା ହୋବାଜାନା ଚି ଏନ୍ ହୋରା ତେଗି ମିୟାଃ ୟାହୁଦୀ ୟାଜାକ୍ ସେନ୍ ତାଇନାଏ, ମେନ୍ଦୋ ଇନିଃକେ ନେଲ୍‍କେତେ କାଏ ଦେଙ୍ଗା କିଜାଏ ହାର୍ ବିୟୁର୍ କେତେ ସେନୋଃ ଜାନାଏ। ଏନ୍‍ଲେକାଗି ୟୀରୁଶାଲେମ୍ ମାନ୍ଦିର୍ ରେ କାମିତାନ୍ ମିୟାଃ ଲେବୀ କିଲି ରେନ୍ ହୋଡ଼ ଏନ୍ ଜାଗା ତେ ହିଜୁଃ ଲେନାଏ ଇନିଃ ହଗି ଇନିଃକେ ନେଲ୍‍କେତେ କାଏ ଦେଙ୍ଗା କିଜାଏ ହାର୍ ବିୟୁର୍ କେତେ ସେନୋଃ ଜାନାଏ। ମେନ୍ଦୋ ସାମାରୀୟା ଜାଗା ରେନ୍ ମିୟାଃ ହୋଡ଼ ଏନ୍ ହୋରା ରେ ଅକ୍ତାଃ ଏନ୍ ହୋଡ଼ ଗୋଜୋଃ ଲେକା ବାଗେ ଲେନାଏ ହିଜୁଃ ସେଟେର୍ ଜାନାଏ, ହାର୍ ଇନିଃକେ ନେଲ୍‍କେତେ ଦାୟା ତେ ଫେରେଃ ଜାନାଏ। ଇନିଃ ଇନିଜାଃ ନାଡ଼େଏ ହିଜୁଃକେତେ ଇନିଜାଃ ଘାଅ ରେ ଜାଇତୁନ୍ ସୁନୁମ୍ ଆଡୋଃ ଆଙ୍ଗୁର୍ ରାଶି ଦୁଲ୍ କେତେ ପାଟି ଥୋଲ୍ କିଜାଏ ହାର୍ ଆଜାଃ ଗାଧା ଚେତାନ୍ ରେ ଦୁବ୍ କିଜାଏ ଏନ୍ତେ ଡେରା ଅଡ଼୍ଆଃ ଇଦିକିଜାଏ ଆଡୋଃ ଇନିଜାଃ ସେୱା କିଜାଏ। ଏଟାଃ ହୁଲାଙ୍ଗ୍ ଇନିଃ ବାରିୟା ଦିନାର୍ ଅଡୋଙ୍ଗ୍ କେତେ ଡେରା ଅଡ଼୍ଆଃ ରେନ୍ ମାଲିକ୍ କେ ଏମ୍‍କିଜାଏ। ଆଡୋଃ କାଜିକେଦାଏ ନିଜାଃ ସେୱା ରିକାଏମ୍ ଆଡୋଃ ଅକନାଃ କୋ ଆମ୍‍କେ ଲାଗାଅଗା ଏନାକେ ଆମ୍‍କେ ରୁଆଡ଼୍ ଇମ୍ତା ଫେରେଃ ତାଃଇଙ୍ଗ୍। ନାଆ ଆମାଃ ବୁଝାଅନ୍ ଲେକାତେ ଅକନିଃ ଡାକୁ କୋଏତେ କେସେଃ ଲେନାଏ, ଇନିଜାଃ ଲାଗିନ୍ ନେ ଆପି ହୋଡ଼ କୋଏତେ ନାଡ଼େଏଃ-ଜାପାଃ ରେନ୍ ହୋଡ଼ ଲେକା ଦେଙ୍ଗା ଅକଏ ଏମ୍ କେଦାଏ?” ଇନିଃ କାଜିକେଦାଏ, “ହିନିଃ ଗି ଅକନିଃ ଇନିଃକେ ଦାୟା କିଜାଏ।” ୟୀଶୁ ଇନିଃକେ କାଜିକେଦାଏ, “ଜୁ, ଆମୋଗି ଏନ୍‍ଲେକା ରିକାଏମ୍।” ଚିମ୍ତା ୟୀଶୁ ହାର୍ ଆଜାଃ ଚେଲାକୋ ସେନ୍ ତାଇକେନାକୋ ଇମ୍ତା ଇନ୍‍କୁ ମିୟାଃ ହାତୁ ରେ ବୋଲୋଜାନାକୋ, ଆଡୋଃ ମାର୍ଥା ନୁତୁମ୍ ମିୟାଃ କୁଡ଼ି ଇନ୍‍କୁକେ ଆଜାଃ ଅଡ଼୍ଆଃ ତେ କେଡ଼ାକେଃକୋୱାଏ। ମାରିୟାମ୍ ନୁତୁମ୍ ଇନିଜାଃ ମିୟାଃ ମିଶି ତାଇକେନାଏ ଇନିଃ ପ୍ରାଭୁ ଆଃ କାଟା ତାଃ ରେ ଦୁବ୍ କେତେ ଇନିଜାଃ ବାଚାନ୍ ଆୟୁମ୍ ତାଇନାଏ। ମେନ୍ଦୋ ମାର୍ଥା ଯୋଜୋମାଃ ବାବାଇ ରେ ଆସ୍‍ଦି ଜାନାଏ ଏନ୍ତେ ୟୀଶୁ ନାଡ଼େଏ ହିଜୁଃକେତେ କାଜିକେଦାଏ, “ହେ ପ୍ରାଭୁ ଚିନାଃ ଆମ୍ ଜେତ୍ନାଃ ହ କାମ୍ ପାହୋମ୍ ତାନା ଚି ଇଙ୍ଗ୍ଆଃ ମିଶି ଇଙ୍ଗ୍‍କେ ସବେନ୍ କାମି ରିକା ଲାଗିନ୍ତେ ଏସ୍କାର୍ ଗି ବାଗେ କାଦିଙ୍ଗାଏ? ଏନାଲାଗିନ୍ ଇନିଃକେ କାଜିମ୍ ଚି ଇଙ୍ଗ୍‍କେ ଦେଙ୍ଗାଇଙ୍ଗ୍ ୟାଏ।” ପ୍ରାଭୁ ଇନିଃକେ କାଜିରୁଆଡ଼୍ କିଜାଏ, “ମାର୍ଥା, ହେ ମାର୍ଥା; ଆମ୍ ଥିମ୍ବାଗି କାଜିକୋ ଲାଗିନ୍ତେ ଚିନ୍ତା ତାନାମ୍ ହାର୍ ଆସ୍‍ଦିଅଃ ତାନାମ୍। ମେନ୍ଦୋ ମିୟାଃ କାଜି ଭାଇର୍ ଲାଗାତିଙ୍ଗ୍ ତାନାଃ, ଆଡୋଃ ଏନ୍ ବୁଗିନ୍ କାଜିକେ ମାରିୟାମ୍ ସାଲା କେଦାଏ, ଅକନାଃ ଇନିଜେତେ କା ରେଜୋଗା।” ମୁଶିଙ୍ଗ୍ ୟୀଶୁ ମିୟାଃ ଜାଗା ରେ ବିନ୍ତି ତାଇନାଏ। ଚିମ୍ତାଙ୍ଗ୍ ଇନିଃ ବିନ୍ତି ଛାବା କେଦାଏ, ଦୋ ଇନିଜାଃ ଚେଲାକୋ ଏତେ ମିହୋଡ଼୍ ଇନିଃକେ କାଜିକେଦାଏ, ହେ ପ୍ରାଭୁ, ଜେଲେକା ଯୋହାନ୍ ବାପ୍ତିସ୍ମା ଏହେମ୍ ନିଈ ଆଜାଃ ଚେଲାକୋକେ ବିନ୍ତି ଲାଗିନ୍ ଶିଖାଅ କାଃକୋୱାଏ ଏନ୍‍ଲେକାଗି ଆଲେକେ ୟଗି ଆମ୍ ଶିଖାଅ ତାଲେମ୍। ୟୀଶୁ ଇନ୍‍କୁକେ କାଜିକେଦାଏ, “ଚିମ୍ତା ଆପେ ବିନ୍ତି ରିକାୟାପେ ଦୋ କାଜିପେ, ‘ହେ ଆପୁ, ଆମାଃ ନୁତୁମ୍ ପାବିତାର୍ ମାନାତିଙ୍ଗ୍ ଅଃକା, ଆମାଃ ରାଇଜ୍ ହିଜୁଃ କା। ଆଲେୟାଃ ଦିନ୍ ଭାଇର୍ ରାଃ ହୋଲୋଙ୍ଗ୍ ସବେନ୍ ହୁଲାଙ୍ଗ୍ ଆଲେକେ ଏମାଲେମ୍; ଆଡୋଃ ଆଲେୟାଃ ପାପ୍ କୋକେ ଛାମା ତାମେ, ଚିୟାଃଚି ଆଲେ ୟଗି ଆଲେୟାଃ ସବେନ୍ ଆପ୍ରାଧି କୋକେ ଛାମା କୋ ତାନାଲେ। ହାର୍ ଆଲେକେ ପାରୀକ୍ଷା ରେ ଆଲୋମ୍ ଉୟୁଃ ଲେୟା।’” ଏନ୍ତେ ଇନିଃ ଇନ୍‍କୁକେ କାଜିୟାଃକୋୱାଏ, “ପାହୋମେପେ, ଆପେ କୋଏତେ ମିହୋଡ଼୍ ନିଜାଃ ମିୟାଃ ଗାତି ମେନାଇଜା, ହାର୍ ଇନିଃ ଆଧା ନିଦା ରେ ଇନିଜାଃ ତାଃ ସେନ୍ କେତେ ଇନିଃକେ କାଜିୟାଏ, ‘ହେ ଗାତି; ଇଙ୍ଗ୍‍କେ ଆପିୟା ହୋଲୋଙ୍ଗ୍ ଏମାଇଙ୍ଗ୍‍ମେ।’ ଚିୟାଃଚି ଇଙ୍ଗ୍ଆଃ ମିୟାଃ ଗାତି ଆଜାଃ ସେନ୍ ହୋରା ଏତେ ଇଙ୍ଗ୍‍ତାଃ ହିଜୁଃକାନାଏ, ହାର୍ ଇନିଜାଃ ଆୟୁର୍ ରେ ମାଣ୍ଡାଅ ଲାଗିନ୍ ଇଙ୍ଗ୍‍ତାଃ ରେ ଜେତ୍ନାଃ ଅଗି ବାନୋଗା। ହାର୍ ହୋବାଧାଡ଼ିଅଗା ଇନିଃ ଭିତାର୍ ଏତେ କାଜିରୁଆଡ଼୍ ୟାଏ, ‘ଇଙ୍ଗ୍‍କେ ଆଲୋମ୍ ହାୟ୍‍ରାନିଙ୍ଗ୍ ମେ, ନାଆ ଦୋ ଦୁହାର୍ ବାନ୍ଦ୍ ମେନାଃ, ହାର୍ ଇଙ୍ଗ୍ଆଃ ହୋନ୍‍କୋ ଇଙ୍ଗ୍ଆଃ ନାଡ଼େଏ ଡିସ୍ନା ରେ ମେନାକୋୱା, ଏନାଲାଗିନ୍ ଇଙ୍ଗ୍ ବିରିଃ କେତେ ଆମ୍‍କେ କାଇଙ୍ଗ୍ ଏମ୍ ଧାଡ଼ିୟା?’ ଇଙ୍ଗ୍ ଆପେକେ କାଜିପେ ତାନିଙ୍ଗ୍, ଆଗାର୍ ଇନିଜାଃ ଗାତି ହୋବାଅଃ ରେ ୟଗି ଇନିଃକେ ବିରିଃ କେତେ କାଏ ଏମାଇୟା, ଏଣ୍ଡେ ୟଗି ଆଜାଃ ଗିୟୁଃ ବାଗିକେତେ ଆସି ରାଃ ହୋରାତେ ଇନିଃକେ ଚିମିନ୍ ଦାର୍‍କାର୍ ମେନାଃ ଇମିନାଙ୍ଗ୍ ବିରିଃ କେତେ ଏମାଇୟାଏ।” ହାର୍ ଇଙ୍ଗ୍ ଆପେକେ କାଜିପେ ତାନିଙ୍ଗ୍, ଚି “ଆସିପେ, ଦୋ ଆପେକେ ଏମୋଗା; ଦାଣାୟାପେ, ଦୋ ଆପେ ନାମେୟା, ଟୋଃ-ଟୋଃ ୟାପେ, ଦୋ ଆପେୟାଃ ଲାଗିନ୍ ନିଜୋଗା। ଚିୟାଃଚି ଅକଏ ଆସିୟାଏ, ଇନିଃକେ ନାମୋୱା, ହାର୍ ଅକଏ ଦାଣାୟାଏ, ଇନିଃ ନାମେୟାଏ; ହାର୍ ଅକଏ ଟୋଃ-ଟୋଃ ୟାଏ ଇନିଜାଃ ଲାଗିନ୍ ନିଜୋଗା। ଆପେ କୋଏତେ ଅକନ୍ ଆପୁ ଏନ୍‍ଲେକା ତାନିଃ, ଚିମ୍ତା ଆଜାଃ ହୋନ୍‍କଡ଼ା ଜୋମ୍ ଲାଗିନ୍ ହୋଲୋଙ୍ଗ୍ ଆସିୟାଏ, ଦୋ ଇନିଃ ଆଏଃକେ ଦିରି ଏମାଇୟାଏ, ୟାଦୋ ଜୋମ୍ ଲାଗିନ୍ ହାକୁ ଆସିରେ ଦୋ ହାକୁ ରାଃ ବାଦ୍‍ଲା ରେ ଇନିଃକେ ବିଙ୍ଗ୍ ଏମାଇୟାଏ? ୟାଦୋ ଜୋମ୍ ଲାଗିନ୍ ଆଣ୍ଡା ଆସିରେ ଇନିଃକେ ମାର୍ମାର୍ ଏମାଇୟାଏ? ଏନାତେ ଚିମ୍ତାଙ୍ଗ୍ ଆପେ ଖାରାପ୍ ହୋବା କେତେ ଆପେୟାଃ ହୋନ୍‍କୋକେ ବେଶ୍ ଜିନିଷ୍‍କୋ ଏମୋଃ ପେ ସାରିୟା, ଦୋ ଆପେୟାଃ ସିର୍ମାଦିଶୁମ୍ ରେନ୍ ବୁଗିନ୍ ଆପୁ ଆଜାଃ ଆସିତାନ୍ କୋକେ ଏନାକୋ ଏତେ ହ ଥିମ୍ବା ପାବିତାର୍ ଆତ୍ମା ଚିନାଃ ମେନେଃ କାଏ ଏମାକୋୱା।” ମୁଶିଙ୍ଗ୍ ୟୀଶୁ ମିୟାଃ କୋନ୍ଦା ବୋଙ୍ଗାଆତ୍ମା କେ ଅଡୋଙ୍ଗ୍ କିଜାଏ; ଚିମ୍ତାଙ୍ଗ୍ ବୋଙ୍ଗାଆତ୍ମା ଅଡୋଙ୍ଗ୍ ଜାନାଏ ଦୋ କୋନ୍ଦା ବାକାଣ୍ ଏଟେଃ କେଦାଏ ଆଡୋଃ ହୋଡ଼ୋକୋ ଆକ୍‍ଦାନ୍ଦା ଜାନାକୋ। ମେନ୍ଦୋ ଇନ୍‍କୁ ଏତେ ଚିମିନାଙ୍ଗ୍ କୋ କାଜିକେଦାକୋ, “ନିଈ ବାଲ୍‍ଜିବୁଲ୍ ନୁତୁମ୍ ବୋଙ୍ଗାଆତ୍ମା କୋୱାଃ ମାରାଙ୍ଗ୍, ଇନିଜାଃ ଦେଙ୍ଗା ଏତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋୱାଏ।” ଏଟାଃକୋ ଇନିଃକେ ପାରୀକ୍ଷା ଲାଗିନ୍ତେ ଇନିଃକେ ରିମିଲ୍‍ଦିଶୁମ୍ ରାଃ ମିୟାଃ ଚିହ୍ନା ଆସିକିଜାକୋ। ମେନ୍ଦୋ ଇନିଃ ଇନ୍‍କୁୱାଃ ମୋନ୍ ରାଃ କାଜି ସାରିକେତେ ଇନ୍‍କୁକେ କାଜିକେଃକୋୱାଏ, ଅକନ୍-ଅକନ୍ ରାଇଜ୍ ରେ ହୋଡ଼ୋକୋ ଆକୋ ଆକୋରେଗି ବିପିଡ଼ା ହୋବା କୋରେ, ଏନ୍ ରାଇଜ୍ ଉଜ୍ଡ଼ାଅ କେନୋଃୱା, ହାର୍ ଅକନ୍ ଅଡ଼୍ଆଃ ରେନ୍ ହୋଡ଼ୋକୋ ଆକୋ ଆକୋରେଗି ବିପିଡ଼ାଅ ୱାକୋ, ଏନା ମିଃ ଅଡ଼୍ଆଃ କେତେ କା ତାଇନୋଗା। ଏନ୍‍ଲେକାଗି ଶାଏତାନ୍ ଆଜାଃ ଗି ବିରୋଧୀ ହୋବା କୋୱାଏ, ଦୋ ଇନିଜାଃ ରାଇଜ୍ ଚିଲ୍‍କା ବାଇକେତେ ତାଇନୋଗା? ଚିୟାଃଚି ଆପେ ଇଙ୍ଗ୍ଆଃ ବିଷାୟ୍ ରେ କାଜିୟାପେ, ଚି ନିଈ ବାଲ୍‍ଜିବୁଲ୍ ରାଃ ଦେଙ୍ଗା ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋୱାଏ। ମାର୍ କାଜିପେ, ଆଗାର୍ ଇଙ୍ଗ୍ ବାଲ୍‍ଜିବୁଲ୍ ରାଃ ଦେଙ୍ଗା ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋତାନାଇଙ୍ଗ୍, ଦୋ ଆପେୟାଃ ହୋନ୍‍କୋ ଅକେୟାଃ ଦେଙ୍ଗାତେ ଅଡୋଙ୍ଗ୍ କୋତାନାକୋ? ଏନାମେନ୍ତେ ଇନ୍‍କୁଗି ଆପେୟାଃ ବିଚାର୍ ରିକା ୟାକୋ। ମେନ୍ଦୋ ଆଗାର୍ ଇଙ୍ଗ୍ ପାର୍ମେଶ୍ଵାର୍ ରାଃ ପେଡ଼େଏ ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋତାନାଇଙ୍ଗ୍, ଦୋ ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ନାଡ଼େଏ ହିଜୁଃ ସେଟେର୍ କାନା। ଚିମ୍ତାଙ୍ଗ୍ ପେଡ଼େଜାନ୍ ହୋଡ଼ ହାତିୟାର୍ ଥୋଲ୍‍କାନ୍ ଲୋଃ ଆଜାଃ ଅଡ଼୍ଆଃ କେ ହୋରୋୟାଏ, ଦୋ ଇନିଜାଃ ସାମ୍ପାତି ବାଚାଓ କେତେ ତାଇନୋଃ ୱା। ମେନ୍ଦୋ ଚିମ୍ତାଙ୍ଗ୍ ଇନିଃତେ ବାଢ଼ାଅ କେତେ ଜେତାଏ ଆଡୋଃ ପେଡ଼େଜାନ୍ ରାକାବ୍ କେତେ ଇନିଃତେ ଜିତାଅ କେନୋଃ ୱାଏ, ଦୋ ଇନିଜାଃ ଏନ୍ ହାତିୟାର୍ ଅକନାଃ ରେ ଇନିଃକେ ଆଶ୍ରା ତାଇକେନା, ରେଏଃ କେୟାଏ ହାର୍ ଇନିଜାଃ ସାମ୍ପାତି ରେଏଃ କେତେ ହାଟିଙ୍ଗ୍ କେୟାଏ। ଅକଏ ଇଙ୍ଗ୍ଆଃ ଲୋଃ ବାଙ୍ଗୁଇଜା ଇନିଃ ଇଙ୍ଗ୍ଆଃ ବିରୋଧ୍ ରେ ମେନାଇଜା, ହାର୍ ଅକଏ ଇଙ୍ଗ୍ଆଃ ଲୋଃ କାଏ ହାଲାଙ୍ଗ୍ ହୁଣ୍ଡିୟାଏ ଇନିଃ ଛିତିଛାନେୟାଏ। “ଚିମ୍ତାଙ୍ଗ୍ ବୋଙ୍ଗାଆତ୍ମା ହୋଡ଼ ଏତେ ଅଡୋଙ୍ଗ୍ କେନୋଃ ୱାଏ, ଦୋ ସୁନ୍‍ସାନ୍ ଜାଗାକୋ ରେ ତାଇନ୍ ଲାଗିନ୍ ଜାଗା ଦାଣା ବାଡ଼ାୟାଏ, ହାର୍ କାଏ ନାମେୟାଏ ଦୋ ଆଏଃ ଆପାନ୍ କେଗି କାଜିୟାଏ, ‘ଇଙ୍ଗ୍ ଇଙ୍ଗ୍ଆଃ ଏନ୍ ହୋଡ଼ ତାଃ ଗି ଅକୋତାଃ ତେ ଇଙ୍ଗ୍ ଅଡୋଙ୍ଗ୍ ଲେନ୍ ତାଇନା ରୁଆଡ଼୍ କେନୋ ଗାଇଙ୍ଗ୍।’ ହାର୍ ରୁଆଡ଼୍ କେତେ ଏନ୍ ହୋଡ଼ ରାଃ ଜୀଦାନ୍ କେ ଅଡ଼୍ଆଃ ଲେକା ଅକନାଃ ସୁନ୍‍ସାନ୍, ଜଅଃ ସାଫାକାନ୍ ହାର୍ ବାଇସେକାଡ଼୍‍କାନ୍ ନାମିୟାଏ। ଏନ୍ତେ ବୋଙ୍ଗାଆତ୍ମା ସେନ୍‍କେତେ ଆଏଃ ତେ ଥିମ୍ବା ଖାରାପ୍ ଏଟାଃ ସାତ୍‍ଠୁ ବୋଙ୍ଗାଆତ୍ମା କୋକେ ଆଜାଃ ଲୋଃ ଆଉ କୋୱାଏ, ଆଡୋଃ ଇନ୍‍କୁ ଇନିଜାଃ ରେ ବୋଲୋ କେତେ ଏନ୍ତାଃରେ ଡେରା କେୟାକୋ, ଏନ୍ତେ ଏନ୍ ହୋଡ଼ ରାଃ ତାୟୋମ୍ ଦାଶା ପାହିଲା ଦାଶା ତେ ହଗି ଥିମ୍ବା ଖାରାପ୍ କେନୋଃ ୱା।” ଚିମ୍ତାଙ୍ଗ୍ ୟୀଶୁ ନେ କାଜିକୋ କାଜିତାଇନାଏ ଇମ୍ତା ମିଃଥିମ୍ବା ହୋଡ଼ୋ କୋଏତେ ମିୟାଃ କୁଡ଼ି ଜୋର୍ତେ କାଜିକେଦାଏ, “ଧାନ୍ୟା ଏନ୍ କୁଡ଼ି ଅକନିଜାଃ ତେ ଆମ୍ ଜାନାମ୍-ଜାନାମ୍ ହାର୍ ଇନିଜାଃ ତେ ଆସୁଲ୍ ଜାନାମ୍।” ଏନ୍ତେ ଇନିଃ କାଜିକେଦାଏ, “ହାଁ ମେନ୍ଦୋ ଧାନ୍ୟା ଇନ୍‍କୁ ତାନ୍‍କୋ, ଅକନ୍‍କୋ ଚି ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍‍ତାନ୍ ହାର୍ ମାନାତିଙ୍ଗ୍ ତାନାକୋ।” ଚିମ୍ତାଙ୍ଗ୍ ମିଃଥିମ୍ବା ହୋଡ଼ୋକୋ ହୁଣ୍ଡି ଇଦିଅଃ ତାଇନାକୋ, ଦୋ ୟୀଶୁ କାଜିକେଦାଏ, ନେ ଯୁଗ୍ ରେନ୍ ହୋଡ଼ୋକୋ ଖାରାପ୍ ମେନାକୋୱା, ଇନ୍‍କୁ ଚିହ୍ନାକୋ ନାମ୍ ତାନା ମେନ୍ଦୋ ଯୋନା ନାବୀ ରାଃ ଚିହ୍ନା କେ ବାଗେ କେତେ ଆଡୋଃ ଜେତାନ୍ ଚିହ୍ନା ଇନ୍‍କୁକେ କା ଏମୋଗା। ଚିଲ୍‍କା ଯୋନା ନାବୀ ନୀନ୍‍ୱେ ସାହାର୍ ରେନ୍ ହୋଡ଼ କୋ ଲାଗିନ୍ ଚିହ୍ନା ହୋବାଜାନାଏ ଏନ୍‍ଲେକାଗି ଇଙ୍ଗ୍ ମାନ୍‍ୱା ରାଃ ହୋନ୍ ଅଗି ନେନ୍ ଯୁଗ୍ ରେନ୍ ହୋଡ଼ୋକୋ ଲାଗିନ୍ ହୋବାୱାଇଙ୍ଗ୍। ଇସ୍ରାଏଲ୍ ଦିଶୁମ୍ ରାଃ ଦାକ୍ଷିଣ୍ ପାଡ଼୍ ଶୀବା ନୁତୁମ୍ ଜାଗା ରେନ୍ ରାନୀ ବିଚାର୍ ହୁଲାଙ୍ଗ୍ ନେ ଯୁଗ୍ ରେନ୍ ହୋଡ଼ୋକୋ ଲୋଃ ବିରିଃ କେତେ ଇନ୍‍କୁକେ ଦୋଷୀ ବାଇକୋୱାଏ, ଚିୟାଃଚି ଇନିଃ ସୁଲେମାନ୍ ରାଜା ରାଃ ସେଣାକାଜି ଆୟୁମ୍ ଲାଗିନ୍ତେ ଅତେ ରାଃ ଟୁଣ୍ଡୁ ଏତେ ହିଜୁଃନାଏ, ଆଡୋଃ ନେଲେପେ, ନେତାଃ ରେ ଇଙ୍ଗ୍ ମେନାଇଙ୍ଗ୍ ଅକନିଃ ସୁଲେମାନ୍ ରାଜା ଏତେ ହଗି ମାରାଙ୍ଗ୍ ତାନିଙ୍ଗ୍। ନୀନ୍‍ୱେ ସାହାର୍ ରେନ୍ ହୋଡ଼ୋକୋ ବିଚାର୍ ହୁଲାଙ୍ଗ୍ ରେ ନେ ଯୁଗ୍ ରେନ୍ ହୋଡ଼ୋକୋ ଲୋଃ ବିରିଃ କେତେ ଇନ୍‍କୁକେ ଦୋଷୀ ବାଇ କୋୱାକୋ, ଚିୟାଃଚି ଇନ୍‍କୁ ଯୋନା ନାବୀ ରାଃ ପାର୍ଚାର୍ ଆୟୁମ୍‍କେତେ ମୋନ୍ ରୁଆଡ଼୍ କେଦାକୋ, ହାର୍ ନେଲେପେ, ନେତାଃ ଇଙ୍ଗ୍ ମେନାଇଙ୍ଗ୍ ଅକନିଃ ଯୋନା ନାବୀ ତେୟଗି ମାରାଙ୍ଗ୍ ତାନିଙ୍ଗ୍। “ଜାହାନ୍ ହୋଡ଼ ବାତୀ ଜୁଲ୍ କେତେ ଦାନାଙ୍ଗ୍ ରେ ୟାଦୋ ପାଇଲା ଲାଥାର୍ ରେ କାଏ ମାଣ୍ଡାଅୟାଏ, ମେନ୍ଦୋ ପାଖା ଚେତାନ୍ ରେ ମାଣ୍ଡାଅୟାଏ ଚି, ଭିତାର୍ ହିଜୁଃ ତାନ୍‍କୋ ମାସ୍କାଲ୍ କୋ ନାମେୟା। ଆମାଃ ହୋଡ଼ମୋ ରାଃ ବାତୀ ଆମାଃ ମେଏଃ ତାନାଃ, ଏନାଲାଗିନ୍ ଚିମ୍ତାଙ୍ଗ୍ ଆମାଃ ମେଏଃ ସାଫା ମେନାଃ, ଦୋ ଆମାଃ ସବେନ୍ ହୋଡ଼ମୋ ହ ମାସ୍କାଲ୍ ମେନାଃ; ମେନ୍ଦୋ ଚିମ୍ତାଙ୍ଗ୍ ଏନା ଖାରାପ୍ ମେନାଃ, ଏଣ୍ଡେ ଆମାଃ ହୋଡ଼ମୋ ହ ପୁରା ନୁବାଃ ମେନାଃ। ଏନାଲାଗିନ୍ ହୋସିଆର୍ ତାଇନୋଃପେ ଚି ଅକନ୍ ମାସ୍କାଲ୍ ଆପେୟାଃ ରେ ମେନାଃ ଏନା ଆଲୋ ନୁବାଗୋଃକା। ଏନାଲାଗିନ୍ ଆଗାର୍ ଆମାଃ ସବେନ୍ ହୋଡ଼ମୋ ମାସ୍କାଲ୍ ତାଇନା ହାର୍ ଏନାରାଃ ଜାହାନ୍ ଭାଗ୍ ନୁବାଃ କାତାଇନା ଦୋ ଆମାଃ ସବେନ୍ ହୋଡ଼ମୋ ଏନ୍‍ଲେକା ମାସ୍କାଲ୍ ହୋବାୱା, ଜେଲେକା ବାତୀ ଆଜାଃ ଜୁଲୋଃତାନ୍ ଇମ୍ତା ଆମ୍‍କେ ମାସ୍କାଲ୍ ଏମାମେ ତାନାଏ।” ଚିମ୍ତାଙ୍ଗ୍ ୟୀଶୁ ବାକାଣ୍ ତାଇକେନାଏ, ଦୋ ମିହୋଡ଼୍ ଫାରିସୀ ହୋଡ଼ୋ କୋଏତେ ଇନିଃକେ ଆର୍ଜି କେଦାଏ ଚି ଇନିଜାଃ ଅଡ଼୍ଆଃ ଜୋମ୍ ଲାଗିନ୍ ସେନ୍ କାଏ। ଏନାତେ ଇନିଃ ଅଡ଼୍ଆଃ ଭିତାର୍ ସେନ୍‍କେତେ ଜୋମ୍ ଲାଗିନ୍ ଦୁବ୍ ଜାନାଏ। ଫାରିସୀ ହୋଡ଼ୋକୋ ନେୟା ନେଲ୍‍କେତେ ଆକ୍‍ଦାନ୍ଦା ଜାନାକୋ ଚି, ଇନିଃ ଜୋମ୍ ସିଦାରେ ତିଈ କାଏ ଆବୁଙ୍ଗ୍ ଜାନାଏ। ଏନ୍ତେ ପ୍ରାଭୁ ଇନିଃକେ କାଜିକେଦାଏ, “ହେ ଫାରିସୀ ହୋଡ଼ୋକୋ, ଆପେ ଡୁଭ୍‍ନୀ ହାର୍ ଥାଡ଼ିୟା ଲେକାନ୍ ହୋଡ଼ୋକୋ ତାନ୍‍ପେ ଅକନାଃ କେ ଚେତାନ୍-ଚେତାନ୍ ଦୋପେ ଗାସାର୍ ଏୟା, ଏନ୍ ଲେକାଗି ଆପେ ହୋଡ଼ୋକୋୱାଃ ନେପେଲ୍ ତେଦୋ ବୁଗିନ୍ ନେଲୋଃୱାପେ ମେନ୍ଦୋ ମୋନ୍ ତେ ଲୋଭୀ ହାର୍ ଦୁଷ୍ଟ କାମି ତେ ଫେରେଃ କାନାପେ। ହେ ଡୋଣ୍ଡୋ ହୋଡ଼ୋକୋ, ଅକନିଃ ବାହାରି ରାଃ ଭାଗ୍ କେ ବାଇକେଦାଏ, ଚିନାଃ ଇନିଃ ଭିତାର୍ ରାଃ ଭାଗ୍ କେ କାଏ ବାଇକାଦା? ମେନ୍ଦୋ ହାଁ, ଭିତାର୍ ରାଃ ଜିନିଷ୍ କୋଏତେ ଗାରିବ୍ କୋକେ ଦାନ୍ ଏମାକୋପେ, ଏଣ୍ଡେ ନେଲେପେ, ସବେନାଃ ଆପେ ଲାଗିନ୍ ଫାର୍ଚି ହୋବା କେନୋଗା।” “ମେନ୍ଦୋ ହେ ଫାରିସୀ ହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ପୁଦୀନା ହାର୍ ହେନ୍ଦେ ଜିରା ରାଃ, ହାର୍ ସବେନ୍ ରାକାମ୍ ରାଃ ଆଡ଼ାଆଃ-ସାକାମ୍ ରାଃ ଦାଶ୍ୱାଁ ଭାଗ୍ ଏମେୟାପେ, ମେନ୍ଦୋ ବିଚାର୍ କେ ହାର୍ ପାର୍ମେଶ୍ଵାର୍ ରାଃ ଦୁଲାଡ଼୍‍କେ ରିଡ଼ିଙ୍ଗ୍ ତାଃପେ; ହୋବା ତାଇକେନା ଚି ନେୟାକୋକେ ହଗି ରିକା କାତେୟାଃପେ ହାର୍ ଏନାକୋକେ ହଗି କାପେ ବାଗେ ତେୟାଃ। ହେ ଫାରିସୀ ହୋଡ଼ୋକୋ, ଆପେୟାଃ ଚେତାନ୍ ରେ ହାୟ୍! ଆପେ ବିନ୍ତିଅଡ଼୍ଆଃ କୋରେ ଆୟୁର୍-ଆୟୁର୍ ଜାଗା ଦୁଦୁବ୍ ହାର୍ ପିଟ୍ କୋରେ ହୋଡ଼ୋକୋୱାଃ ଜୋହାର୍ ସାନାଙ୍ଗ୍ ୟାପେ। ଆପେୟାଃ ଚେତାନ୍ ରେ ହାୟ୍! ଚିୟାଃଚି ଆପେ ଏନ୍ ଉକୁକାନ୍ କାବାର୍ ଲେକା ତାନ୍‍ପେ, ଅକନ୍ ଚେତାନ୍ ରେ ହୋଡ଼ୋକୋ ସେସେନ୍ ତାନାକୋ ମେନ୍ଦୋ କାକୋ ସାରିତାନା।” ଏନ୍ତେ ମିୟାଃ ଆଇନ୍ ଗୁରୁ ଇନିଃକେ କାଜିରୁଆଡ଼୍ କିଜାଏ, “ହେ ଗୁରୁ, ନେ କାଜିକୋ କାଜିକେତେ ଆମ୍ ଆଲେୟାଃ ନିନ୍ଦା ତାନାମ୍।” ୟୀଶୁ କାଜିକେଦାଏ, “ହେ ଆଇନ୍ ଗୁରୁକୋ, ଆପେୟାଃ ଚେତାନ୍ ରେ ହଗି ହାୟ୍! ଆପେ ଏନ୍‍ଲେକା ହାମ୍ବାଲ୍ ନିୟାମ୍ ଅକନାଃକେ ଉଠାଓ କାଠିନ୍ ତାନାଃ ହୋଡ଼ୋକୋୱାଃ ରେ ଲାଦି ତାନାପେ ମେନ୍ଦୋ ଆପେ-ଆପେ ଗି ଏନ୍ ହାମ୍ବାଲ୍ ନିୟାମ୍ କେ ଆପେୟାଃ ମିୟାଃ ସାର୍ସାର୍ ତେ ୟଗି କାପେ ଜୁଟିଦେୟା। ଆପେୟାଃ ଚେତାନ୍ ରେ ହାୟ୍! ଆପେ ଏନ୍ ନାବୀ କୋୱାଃ କାବାର୍ କୋକେ ବାଇୟାପେ, ଅକନ୍‍କୋକେ ଆପେୟାଃ ଗି ପୁର୍ଖା-ହୋଡ଼ୋକୋ ଗୋଏଃ ଲେଦାକୋ। ଏନାମେନ୍ତେ ଆପେ ଗୋୱା ତାନାପେ, ହାର୍ ଆପେୟାଃ ପୁର୍ଖା-ହୋଡ଼ୋକୋୱାଃ କାମିକୋ ରେ ମିଃମୋନ୍ ମେନାପେୟା; ଚିୟାଃଚି ଇନ୍‍କୁ ହିନ୍‍କୁକେ ଗୋଏଃ କେଃକୋୱାକୋ ହାର୍ ଆପେ ଇନ୍‍କୁୱାଃ କାବାର୍ କୋକେ ବାଇତାନାପେ। ଏନାଲାଗିନ୍ ପାର୍ମେଶ୍ଵାର୍ ରାଃ ସେଣା ହଗି କାଜିକାଦାଏ, ଚି ଇଙ୍ଗ୍ ଇନ୍‍କୁୱାଃ ନାଡ଼େଏ ନାବୀକୋକେ ହାର୍ କୁଲାକାନ୍ ଚେଲା କୋକେ କୁଲ୍ କୋୱାଇଙ୍ଗ୍, ହାର୍ ଇନ୍‍କୁ ହିନ୍‍କୁ ଏତେ ଚିମିନାଙ୍ଗ୍ କୋକେ ଗୋଏଃ କୋୱାକୋ, ହାର୍ ଚିମିନାଙ୍ଗ୍ କୋକେ ସାତାଅ କୋୱାକୋ। ଏନାମେନ୍ତେ ଚିମିନାଙ୍ଗ୍ ନାବୀ କୋୱା ମାୟୋମ୍ ଅତେଦିଶୁମ୍ ରାଃ ସୁରୁଏତେ ଲିଙ୍ଗିକାନା, ଏନ୍ ସବେନାଃ ରାଃ ହିସାବ୍ ନେ ସାମାୟ୍ ରେନ୍ ହୋଡ଼ୋକୋ ଏତେ ଇଦିୟୋଗା। ହାବିଲ୍ ରାଃ ଗୋଏଃ ତେ ଇଦିକେତେ ଜାକାର୍ୟାହ୍ କେ ଗୋଏଃ ସାନ୍ତେ, ଅକୋନ୍‍କୋକେ ବେଦୀ ହାର୍ ମାନ୍ଦିର୍ ରାଃ ଥାଲା ରେ ଗୋଏଃ ଲେଃକୋୱାକୋ: ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍; ନେ ସବେନାଃ ରାଃ ହିସାବ୍ ନେ ସାମାୟ୍ ରେନ୍ ହୋଡ଼ୋ କୋଏତେ ଇଦିୟୋଗା। ଆପେ ଆଇନ୍ ଗୁରୁକୋୱାଃ ଚେତାନ୍ ରେ ହାୟ୍! ଆପେ ସେଣା ରାଃ ଚାଭି ଦୋ ଇଦିକେଦାପେ, ମେନ୍ଦୋ ଆପେ-ଆପେ ଗି କାପେ ବୋଲୋଜାନା, ହାର୍ ବୋଲୋତାନ୍ କୋକେ ହଗି ରୋକାଅ ତାଃକୋୱାପେ।” ଚିମ୍ତାଙ୍ଗ୍ ଇନିଃ ଏନ୍ତାଃ ଏତେ ଅଡୋଙ୍ଗ୍ ଜାନାଏ, ଦୋ ଆଇନ୍ ଗୁରୁକୋ ହାର୍ ଫାରିସୀ ହୋଡ଼ୋକୋ କାଟିଜୋ କାକୋ ବାଗେ କିଜା ହାର୍ ବିର୍ଝାଅ କିଜାକୋ, ଚି ଇନିଃ ବେଶେ ଥିମ୍ବା କାଜି କୋରାଃ ବିଷାୟ୍ ରେ କାଜି-ବାକାଣ୍ ୟାଏ, ହାର୍ ଇନିଃକେ ଆଜାଃ ଗି କାଜି କୋରେ ପାଶେ ଲାଗିନ୍ ତାକ୍ ରେ ତାଇଜାନାକୋ। ଏନ୍ ଥାଲା ରେ, ଚିମ୍ତା ହାଜାର୍-ହାଜାର୍ ହୋଡ଼ୋକୋ ହୁଣ୍ଡି ଜାନାକୋ ନେତାଃ ସାନ୍ତେ ଚି ଇନ୍‍କୁ ମିହୋଡ଼୍ ଏଟାଃ ନିଜାଃ ରେ ଉୟୁଗୋଃ ତାଇନାକୋ, ଦୋ ୟୀଶୁ ସବେନାଃ ତେ ସିଦା ଆଜାଃ ଚେଲାକୋକେ କାଜିକେଦାଏ, “ଫାରିସୀ ହୋଡ଼ୋକୋୱାଃ ବେଦାମୋନ୍ ଲେକା ଖାମୀର୍ ତେ ହୁସିଆର୍ ତାଇନ୍‍ପେ। ଜେତ୍ନାଃ ହାରୁବ୍ ବାନୋଗା, ଯେ କା ଖଲାଅ ଅଗା, ହାର୍ ନା ଜେତ୍ନାଃ ଉକୁକାନ୍ ମେନାଃ, ଯେ କା ସାରିୟଗା। ଏନାଲାଗିନ୍ ଅକନାଃ ଆପେ ନୁବାଃ ରେ ପେ କାଜି କାଦା ଏନା ମାସ୍କାଲ୍ ରେ ଉଦୁବୋଗା, ହାର୍ ଅକନାଃ ଆପେ ଭିତାର୍ କୋଠୋରୀ ରେ ହାପା-ହାପା ରେ କାଜିକେଦାପେ, ଏନା ଅଡ଼୍ଆଃ ରାଃ ଛାତ୍ ଚେତାନ୍ ରେ ଉଦୁବୋଗା।” “ହେ ଇଙ୍ଗ୍ଆଃ ଗାତିକୋ, ଇଙ୍ଗ୍ ଆପେକେ କାଜିପେତାନିଙ୍ଗ୍, ଚି ଅକଏ ହୋଡ଼ମୋ କେ ଗୋଏଃ ୟାକୋ ମେନ୍ଦୋ ଏନାରାଃ ତାୟୋମ୍ତେ ଆଡୋଃ ଜେତ୍ନାଃ କାକୋ ରିକା ଧାଡ଼ିୟା, ଇନ୍‍କୁକେ ଆଲୋପେ ବୋରୋୟା। ଇଙ୍ଗ୍ ଆପେକେ ଚେତାଓ ପେ ତାନିଙ୍ଗ୍ ଚି ଆପେକେ ଅକଏ କେ ବୋରୋ ଚାହି, ଆପେକେ ଗୋଏଃ ରାଃ ତାୟୋମ୍ତେ ଅକନିଃକେ ନାରାକ୍ ରେ ଦୁଡ଼ିଙ୍ଗ୍ ରାଃ ଆଧିକାର୍ ମେନାଃ ଇନିଃକେ ବୋରୋୱାଇପେ, ହାଁ, ଇଙ୍ଗ୍ ଆପେକେ କାଜିତାନିଙ୍ଗ୍, ଇନିଃ କେଗି ବୋରୋୱାଇପେ। ଚିନାଃ ବାରିୟା ପାଇସା ରେ ପାଞ୍ଚ୍-ଠୁ ଗେର୍‍ୱାଁ ଅଡ଼େକୋ କାକୋ ଆଖ୍ରିଙ୍ଗ୍ଅୱା? ଏଣ୍ଡେ ରେ ହଗି ପାର୍ମେଶ୍ଵାର୍ ଇନ୍‍କୁ ଏତେ ମିହୋଡ଼୍ କେ ହଗି କାଏ ରିଡ଼ିଙ୍ଗ୍ କୋୱା। ଆପେୟାଃ ବୋଅ ରାଃ ସବେନ୍ ଉବ୍ ହଗି ଲେକା କାନା, ଏନାଲାଗିନ୍ ଆଲୋପେ ବୋରୋୟା ଆପେ ଥିମ୍ବା ଗେର୍‍ୱାଁ କୋଏତେ ହ ଗୋନୋଙ୍ଗାନ୍ ତାନ୍‍ପେ। ଇଙ୍ଗ୍ ଆପେକେ କାଜିପେ ତାନାଇଙ୍ଗ୍ ଜେତାଏ ହ ହୋଡ଼ୋକୋୱାଃ ନାଡ଼େଏ ରେ ଇଙ୍ଗ୍‍କେ ମାନାତିଙ୍ଗ୍ କେୟାକୋ ଚି ଇନ୍‍କୁ ଇଙ୍ଗ୍ଆଃ ଚେଲା ତାନ୍‍କୋ, ଇନ୍‍କୁକେ ଇଙ୍ଗ୍ ମାନ୍‍ୱା ରାଃ ହୋନ୍ ହଗି ପାର୍ମେଶ୍ଵାର୍ ରାଃ ସିର୍ମାଦାସୀ କୋୱାଃ ନାଡ଼େଏ ରେ ଇଙ୍ଗ୍ଆଃ ଚେଲା ତାନ୍‍କୋ ମେନ୍ତେ ମାନାତିଙ୍ଗ୍ କୋୱାଇଙ୍ଗ୍। ମେନ୍ଦୋ ଜେତାଏ ହ ହୋଡ଼ୋକୋୱାଃ ନାଡ଼େଏ ରେ ବୋରୋତେ ଇନିଜାଃ ଚେଲା ତାନିଙ୍ଗ୍ ମେନ୍ତେ ଇଙ୍ଗ୍‍କେ କାଏ ମାନାତିଙ୍ଗ୍‍ୟାଏ, ଇନିଃକେ ପାର୍ମେଶ୍ଵାର୍ ରାଃ ସିର୍ମାଦାସୀ କୋୱାଃ ନାଡ଼େଏ ରେ ଇଙ୍ଗ୍ଆଃ ଚେଲା ନାହାଲାଏ ମେନ୍ତେ କାଜିୟୋଗାଏ। ଜେତାଏ ଇଙ୍ଗ୍ ମାନ୍‍ୱା ରାଃ ହୋନ୍ ରାଃ ବିରୁଦ୍ଧ୍ ରେ ଜାହାନ୍ ବାକାଣ୍ କାଜିୟାଏ, ଇନିଜାଃ ଏନ୍ ପାପ୍ ଛାମା ଅଗା, ମେନ୍ଦୋ ଜେତାଏ ପାବିତାର୍ ଆତ୍ମା ରାଃ ବିରୁଦ୍ଧ୍ ରେ ନିନ୍ଦା ରିକାୟାଏ, ଇନିଜାଃ ପାପ୍ କା ଛାମା ଅଗା। ଚିମ୍ତାଙ୍ଗ୍ ହୋଡ଼ୋକୋ ଆପେକେ ବିନ୍ତିଅଡ଼୍ଆଃ ରେ ହାର୍ ହାକିମ୍ କୋୱାଃ ହାର୍ ଆଧିକାରୀ କୋୱା ନାଡ଼େଏ ରେ ଇଦିପେୟାକୋ, ଏଣ୍ଡେ ଆଲୋପେ ପାହୋମେୟା ଚି ଆଲେ ଅକୋ ଲେକାତେ ୟାଦୋ ଚିନାଃ କାଜିରୁଆଡ଼୍ ଏମେୟାଲେ, ୟାଦୋ ଚିନାଃ କାଜିୟାଲେ। ଚିୟାଃଚି ପାବିତାର୍ ଆତ୍ମା ଏନ୍ ସାମାୟ୍ ରେଗି ଆପେକେ ଶିଖାଅ ତାପେୟାଏ ଚି ଚିନାଃ କାଜିୟାପେ।” ଏନ୍ତେ ଥିମ୍ବାଗି ହୋଡ଼ୋକୋ ଏତେ ମିହୋଡ଼୍ ୟୀଶୁ କେ କାଜିକେଦାଏ, “ହେ ଗୁରୁ, ଇଙ୍ଗ୍ଆଃ ହାଗା କେ କାଜିମେ, ଚି ଆପୁ ଆଃ ସାମ୍ପାତି ଇଙ୍ଗ୍ଆଃ ଲୋଃ ହାଟିଙ୍ଗ୍ ଏକାଏ।” ୟୀଶୁ ଇନିଃକେ କାଜିକେଦାଏ, “ହେ ହାଗା, ଅକଏ ଇଙ୍ଗ୍‍କେ ଆପେୟାଃ ବିଚାର୍ ରିକାନିଃ ୟାଦୋ ହାଟିଙ୍ଗ୍ ରିକାନିଃ ବାଇ କାଦିଙ୍ଗାଏ?” ଏନ୍ତେ ଇନିଃ ହୋଡ଼ୋକୋକେ କାଜିକେଦାଏ, “ହୋସିଆର୍ ତାଇନ୍‍ପେ, ହାର୍ ସବେନ୍ ରାକାମ୍ ରାଃ ଲୋଭ୍ ଏତେ ଆପେ ଆପାନ୍ କେ ବାଚାଓ କେତେ ତାଇନ୍‍ପେ; ଚିୟାଃଚି ଜେତାୟାଃ ଜୀଦାନ୍ ଇନିଜାଃ ମିଃଥିମ୍ବା ସାମ୍ପାତି ରେ ବାଇକେତେ କା ତାଇନୋଃ ୱା।” ଇନିଃ ଇନ୍‍କୁକେ ମିୟାଃ ଜୋନୋକା କାଜିକେଦାଏ, “ମିୟାଃ କିଶାଣ୍ ହୋଡ଼ ରାଃ ଅତେ ରେ ଥିମ୍ବାଗି ଯଅ ହୋବାଜାନା। ଏନ୍ତେ ଇନିଃ ଆଜାଃ ମୋନ୍ ରେ ପାହୋମ୍ ଏଟେଃ କେଦାଏ, ‘ଇଙ୍ଗ୍ ଚିନାଃ ରିକାୟାଇଙ୍ଗ୍, ଚିୟାଃଚି ଇଙ୍ଗ୍ଆଃ ନେତାଃ ମାରାଙ୍ଗ୍ ଜାଗା ବାନୋଗା ଅକତାଃରେ ଇଙ୍ଗ୍ଆଃ ଯଅ କୋକେ ମାଣ୍ଡାଅ ୟାଇଙ୍ଗ୍?’ ହାର୍ ଇନିଃ କାଜିକେଦାଏ, ଇଙ୍ଗ୍ ନେୟା ରିକାୟାଇଙ୍ଗ୍ ଇଙ୍ଗ୍ ଇଙ୍ଗ୍ଆଃ ମୋଣାଅଡ଼୍ଆଃ କେ ଧାଶୁଡ଼୍ କେତେ ଏନାଏତେ ମାରାଙ୍ଗ୍ ବାଇୟାଇଙ୍ଗ୍ ହାର୍ ଏନ୍ତାଃରେ ଇଙ୍ଗ୍ଆଃ ସବେନ୍ ଯଅ କୋକେ ହାର୍ ସାମ୍ପାତି କୋକେ ମାଣ୍ଡାଅ ୟାଇଙ୍ଗ୍; ହାର୍ ଇଙ୍ଗ୍ଆଃ ଜୀଉ କେ କାଜିୟାଇଙ୍ଗ୍ ଚି ଜୀଉ, ଆମାଃ ତାଃରେ ଥିମ୍ବା ବାରାଶ୍ ଲାଗିନ୍ ଥିମ୍ବାଗି ସାମ୍ପାତିକୋ ମାଣ୍ଡାଅ କାନା; ସାଥାଅନ୍ ମେ, ଜୋମେ ମେ, ନୁୱେ ମେ, ସୁକୁ ରେ ତାଇନ୍ ମେ। ମେନ୍ଦୋ ପାର୍ମେଶ୍ଵାର୍ ଇନିଃକେ କାଜିୟାଜାଏ, ‘ହେ ଡୋଣ୍ଡୋ! ନେ ନିଦା ଗି ଆମାଃ ଜୀଉ ଆମ୍ ଏତେ ଇଦିୟୋଗା; ଏଣ୍ଡେ ଅକନାଃକୋ ଆମ୍ ହୁଣ୍ଡି କାଦାମେ ଏନା ଅକେୟାଃ ହୋବାଅଃୱା?’ ଏନ୍‍ଲେକାଗି ଏନ୍ ହୋଡ଼ ହଗି ତାନିଃ ଅକଏ ଆଜାଃ ଲାଗିନ୍ ଧାନ୍ ହୁଣ୍ଡିତାନାଏ, ମେନ୍ଦୋ ପାର୍ମେଶ୍ଵାର୍ ରାଃ ନେପେଲ୍ ରେ ଧାନୀ ନାହାଲାଏ।” ଏନ୍ତେ ୟୀଶୁ ଆଜାଃ ଚେଲାକୋକେ କାଜିକେଃକୋୱାଏ, ଏନାମେନ୍ତେ ଇଙ୍ଗ୍ ଆପେକେ କାଜିପେ ତାନାଇଙ୍ଗ୍, ଚି ଆପାନାଃ ଜୀଉ ଲାଗିନ୍ ନେୟା ଆଲୋପେ ଚିନ୍ତା ରିକାୟା ଚି ଆଲେ ଚିନାଃ ଜୋମେୟାଲେ, ହାର୍ ନା ଆପେୟାଃ ହୋଡ଼ମୋ ଲାଗିନ୍ ଚି ଚିନାଃ ତୁସିଙ୍ଗ୍ ଏନାଲେ। ଚିୟାଃଚି ଜୀଉ ଜୋମେୟାଃ ତେ, ହାର୍ ହୋଡ଼ମୋ ଲିଜାଃ ତେ ମାରାଙ୍ଗ୍ ତାନାଃ। କାଉୱା ଅଡ଼େ କୋକେ ଧ୍ୟାନ୍ କୋପେ; ଇନ୍‍କୁ ନାଦୋ କୋ ହେରେତାନା, ନାଦୋ କୋ ଇରେତାନା; ନାଦୋ ଇନ୍‍କୁୱାଃ ଭାଣ୍ଡାର୍ ଅଡ଼୍ଆଃ ଆଡୋଃ ନା କୋଲୋମ୍ ମେନାଃ, ଏଣ୍ଡେରେ ହ ପାର୍ମେଶ୍ଵାର୍ ଇନ୍‍କୁକେ ଆସୁଲ୍ ତାନାଏ। ଆପେୟାଃ ଗୋନୋଙ୍ଗ୍ ଅଡ଼େକୋ ଏତେ ହ ଥିମ୍ବା ମେନାଃ। ଆପେ କୋଏତେ ନେକା ଅକଏ ମେନିଜା, ଯେ ପାହୋମ୍ କେତେ ଆଜାଃ ବାରାଶ୍ କେ ମିଃ ଘାଡ଼ି ହ ବାଢ଼ାଅ ଧାଡ଼ିୟାଏ? ଏନାମେନ୍ତେ ଆଗାର୍ ଆପେ ସବେନ୍ ଏତେ ହୁଡିଙ୍ଗ୍ କାମି ୟଗି କାପେ ରିକା ଧାଡ଼ିୟା, ଏଣ୍ଡେ ଜୀଦାନ୍ ରାଃ ଏଟାଃ କାଜିକୋ ଲାଗିନ୍ତେ ଚିନାଃ ମେନ୍ତେ ପାହୋମ୍ ତାନାପେ? ବାହା କୋକେ ନେଲେପେ, ଚି ଏନାକୋ ଚିଲ୍‍କା ହାରାଅଃତାନା, ନାଦୋ ଇନ୍‍କୁ କାମିୟାକୋ, ନା ଲିଜାଃ ଗାଲାଙ୍ଗ୍ ୟାକୋ। ଏଣ୍ଡେ ହ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍, ଚି ରାଜା ସୁଲେମାନ୍ ହ, ଆଏଃ କିଶାଣ୍ ତାଇନ୍‍କାନ୍ ସାମାୟ୍ ରେ ଏନ୍ ବାହା କୋଏତେ ମିୟାଃ ବାହା ଲେକା ହ ଲିଜାଃ କାଏ ତୁସିଙ୍ଗ୍ ଲେନ୍ ତାଇନାଏ। ଏନାମେନ୍ତେ ଚିମ୍ତାଙ୍ଗ୍ ପାର୍ମେଶ୍ଵାର୍ ପିଡ଼ି ରାଃ ଏନ୍ ତାସାଃ କୋକେ ଅକନାଃ ଇସିଙ୍ଗ୍ ମେନାଃ ହାର୍ ଗାପା ଚୁଲ୍‍ହା ରେ ସାଜୁଅଗା, ଏନାକେ ଏନ୍‍ଲେକା ଶିଙ୍ଗ୍ରାଅ ତାନାଏ, ଦୋ ହେ ହୁଡିଙ୍ଗ୍ ବିଶ୍ଵାସ୍ ମାଣ୍ଡାଅତାନ୍‍କୋ, ଇନିଃ ଏନାକୋ ଏତେ ହ ଥିମ୍ବା ଚିନାଃ ମେନ୍ତେ ଆପେକେ କାଏ ତୁସିଙ୍ଗ୍ ପେୟାଏ! ହାର୍ ଆପେ ନେ କାଜି କୋରାଃ ଦାଣାରେ ଆଲୋପେ ତାଇନୋଗା, ଚି ଚିନାଃ ଜୋମେୟାଲେ ହାର୍ ଚିନାଃ ନୁୱେୟାଲେ, ଆଡୋଃ ନାଦୋ ନେ ବିଷାୟ୍ ରେ ପାହୋମ୍ ଏପେ। ଚିୟାଃଚି ଅତେଦିଶୁମ୍ ରେ ପାର୍ମେଶ୍ଵାର୍ କେ କାକୋ ସାରିକାନ୍ ହୋଡ଼ୋକୋ ନେ ଜିନିଷ୍‍କୋ ରାଃ ଦାଣା-ବାଡ଼ା ରେ ତାଇନାକୋ ମେନ୍ଦୋ ଆପେୟାଃ ଆପୁ ସାରିତାନାଏ ଚି ଆପେକେ ନେ ଜିନିଷ୍‍କୋ ରାଃ ଦାର୍‍କାର୍ ମେନାଃ। ମେନ୍ଦୋ ଇନିଜାଃ ରାଇଜ୍ କେ ଦାଣା ରେ ତାଇନ୍ ପେ, ଏଣ୍ଡେ ନେ ଜିନିଷ୍ କୋ ହଗି ଆପେକେ ନାମ୍ କେନୋଗା। “ଆପେ ମିଣ୍ଡୀକୋୱାଃ ହୁଡିଙ୍ଗ୍ ଗୋଟ୍ ଲେକା ତାନ୍‍ପେ, ଆଲୋପେ ବୋରୋୟା, ଚିୟାଃଚି ଆପେୟାଃ ସିର୍ମାଦିଶୁମ୍ ରେନ୍ ଆପୁ କେ ନେୟା ସୁକୁ କିଜା ଚି ଆପେକେ ରାଇଜ୍ ଏମାପେୟାଏ। ଆପେୟାଃ ସାମ୍ପାତି କୋକେ ଆଖ୍ରିଙ୍ଗ୍ କେତେ ଗାରିବ୍ କୋକେ ଦାନ୍ ତାପେ, ହାର୍ ଆପେୟାଃ ଲାଗିନ୍ ଏନ୍‍ଲେକା ଥାଇଲା ବାଇପେ ଅକନାଃ କା ମାରିୟଗା, ମାନେ ସିର୍ମାଦିଶୁମ୍ ରେ ଏନ୍‍ଲେକା ଧାନ୍ ହୁଣ୍ଡିପେ ଅକନାଃ କା ଘାଟାଅଃୱା ହାର୍ ଏଣ୍ଡେରାଃ ନାଡ଼େଏ ଜାହାନ୍ କୁମ୍ଡ଼ୁ କାଏ ସେନାଏ, ହାର୍ ଏନାକେ ଜାହାନ୍ ତିଜୁ କାଏ ଜୋମ୍ ଧାଡ଼ିୟାଏ। ଚିୟାଃଚି ଅକତାଃରେ ଆପେୟାଃ ଧାନ୍ ମେନାଃ ଏନ୍ତାଃରେ ଆପେୟାଃ ମୋନ୍ ଅଗି ଲାଗାଅ କାନ୍ ତାଇନୋଗା।” “ଆପେୟାଃ ମାୟାଙ୍ଗ୍ କେ କାମି ଲାଗିନ୍ ଥୋଲ୍ କେଟେଃ କେତେ ହାର୍ ଆପେୟାଃ ବାତୀ କେ ଗୋଟା ନିଦା ଜୁଲ୍ କେତେ ଇଙ୍ଗ୍ଆଃ ହିଜୁଃ ଲାଗିନ୍ ସେକାଡ଼୍ କାନ୍ ତାଇନୋଃପେ। ହାର୍ ଆପେ ଏନ୍ ହୋଡ଼ୋଲେକା ବାଇନ୍‍ପେ, ଅକନ୍ କୋ ଆକୋୱାଃ ଗୋମ୍‍କେ ରାଃ ହୋରା ନେଲ୍ କାତେୟାକୋ ଚି ଇନିଃ ଆଣାଦୀ ଭୋଜ୍ ତେ ଚିଉଲା ରୁଆଡ଼ାଏ, ଏନ୍ତେ ଚିମ୍ତାଙ୍ଗ୍ ଇନିଃ ହିଜୁଃକେତେ ଦୁହାର୍ ଟୋଃ-ଟୋଃ ୟାଏ ଦୋ ସେକାଡ଼୍ ଗି ଇନିଜାଃ ଲାଗିନ୍ ଦୁହାର୍ ଖଲାଅ ତାଃପେ।” ଧାନ୍ୟା ଏନ୍ ଦାସୀକୋ ତାନ୍‍କୋ ଅକନ୍ କୋକେ ଗୋମ୍‍କେ ଆଜାଃ ହିଜୁଃ ରାଃ ହୋରା କେ ନେଲ୍ ତାନାକୋ ମେନ୍ତେ ନେଲ୍ କୋୱାଏ; ଇଙ୍ଗ୍ ଆପେକେ ସାର୍ତି କାଜି ତାନାଇଙ୍ଗ୍ ଚି ଗୋମ୍‍କେ ଦାସୀ କୋ ଲେକା ମାୟାଙ୍ଗ୍ ରେ ଲିଜାଃ ଥୋଲ୍ କେତେ ଇନ୍‍କୁକେ ଜୋମେ ଲାଗିନ୍ ଦୁବ୍ କୋୱାଏ ହାର୍ ନାଡ଼େଏ ହିଜୁଃ କେତେ ଇନ୍‍କୁୱାଃ ସେୱା ରିକାୟାଏ। ଆଗାର୍ ଗୋମ୍‍କେ ଥାଲା ନିଦା ଚାହେ ସିମ୍‍କୋ ରାଆ ରେ ହିଜୁଃକେତେ ଇନ୍‍କୁକେ ଏୟୋନ୍‍କାନ୍ ନାମ୍ କୋୱାଏ, ଏଣ୍ଡେ ଏନ୍ ଦାସୀକୋ ଧାନ୍ୟା ତାନ୍‍କୋ। ମେନ୍ଦୋ ଆପେ ନେୟା ସାରିକେପେ ଚି ଆଗାର୍ ଅଡ଼୍ଆଃ ରେନ୍ ଗୋମ୍‍କେ ସାରିତେୟାଃଏ ଚି ଚୋର୍ହା ଅକନ୍ ସାମାୟ୍ ରେ ହିଜୁଗାଏ, ଏଣ୍ଡେ ଏୟୋନ୍‍କାନ୍ ତାଇନୋଃତେୟାଏ ହାର୍ ଆଜାଃ ଅଡ଼୍ଆଃ ରେ ଚୋର୍ହା ରିକା କାଏ ଏମ୍ ତେୟାଃଏ। ଆପେ ହଗି ଇଙ୍ଗ୍ଆଃ ହିଜୁଃ ଲାଗିନ୍ ସେକାଡ଼୍‍କାନ୍ ତାଇନୋଃପେ ଚିୟାଃଚି ଅକନ୍ ସାମାୟ୍ ଆପେ କାପେ ପାହୋମ୍ କାତେୟା ଏନ୍ ସାମାୟ୍ ରେ ଇଙ୍ଗ୍ ମାନ୍‍ୱା ରାଃ ହୋନ୍ ହିଜୁଃ କେନୋଗାଇଙ୍ଗ୍। ଏନ୍ତେ ପାତ୍ରାସ୍ କାଜିକେଦାଏ, “ହେ ପ୍ରାଭୁ, ଚିନାଃ ନେ ଜୋନୋକା ଆମ୍ ଆଲେକେ ଏସ୍କାର୍ ଚି ସବେନ୍ କୋକେ କାଜିତାନାମ୍?” ପ୍ରାଭୁ କାଜିକେଦାଏ, “ଏନ୍ ବିଶ୍ଵାସେଲେକାନିଃ ହାର୍ ସେଣାନ୍ ମୁନ୍‍ସି ଅକଏ ତାନିଃ, ଅକନିଜାଃ ଗୋମ୍‍କେ ଇନିଃକେ ଆଜାଃ ଏଟାଃ ଦାସୀକୋୱାଃ ଚେତାନ୍ ରେ ମୁଖିୟା ବାଇୟାଏ ଚି ଇନ୍‍କୁକେ ସାମାୟ୍ ରେ ଜୋମେୟାଃ ଜିନିଷ୍ କୋ ଏମାକୋୱାଏ? ଧାନ୍ୟା ଏନ୍ ଦାସୀ ତାନିଃ ଅକନିଃକେ ଇନିଜାଃ ଗୋମ୍‍କେ ହିଜୁଃକେତେ ଏନ୍‍ଲେକାଗି ରିକାତାନ୍ ନାମିୟାଏ। ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍, ଇନିଃ ଇନିଃକେ ଆଜାଃ ସବେନ୍ ସାମ୍ପାତି ରେ ଆଧିକାରୀ ବାଇୟାଏ। ମେନ୍ଦୋ ଆଗାର୍ ଏନ୍ ଦୁଷ୍ଟ ଦାସୀ ପାହୋମେ ୟାଏ ଚି ଇଙ୍ଗ୍ଆଃ ଗୋମ୍‍କେ ହିଜୁଃ ରେ ଦେରି ତାନାଏ, ହାର୍ କଡ଼ା ଦାସୀକୋକେ ହାର୍ କୁଡ଼ି ଦାସୀକୋକେ ବିଡ଼ା ଏଟେଃ କୋୱାଏ, ହାର୍ ଜୋମେ-ନୁୱେ ୟାଏ ହାର୍ ମାତ୍‍ୱାର୍ ହୋବାଅଃ ୱାଏ। ଏଣ୍ଡେ ଏନ୍ ଦାସୀ ରାଃ ଗୋମ୍‍କେ ଏନ୍ ଲେକା ହୁଲାଙ୍ଗ୍ ରେ, ଚିମ୍ତା ଇନିଃ ଇନିଜାଃ ହୋରା କାଏ ନେଲ୍ କାତେୟାଏ, ହାର୍ ଏନ୍ ଲେକାନ୍ ସାମାୟ୍ ଅକଣ୍ତେ ଇନିଃ କାଏ ସାରି କାତେୟାଏ, ହିଜୁଃ ରୁଆଡ଼ାଏ ହାର୍ ଇନିଃକେ କାଠୋର୍ ଦାଣ୍ଡ୍ ଏମ୍ କେତେ କାବିଶ୍ଵାସ୍ ଲେକାନ୍ କୋ ଲୋଃ ମାଣ୍ଡାୱିୟାଏ। ଏନ୍ ଦାସୀ ଅକନିଃ ଆଜାଃ ଗୋମ୍‍କେ ରାଃ ସାନାଙ୍ଗ୍ କେ ସାରିତାଇନାଏ, ହାର୍ ସେକାଡ଼୍ କେତେ କାଏ ତାଇଜାନାଏ ହାର୍ ନାଦୋ ଇନିଜାଃ ସାନାଙ୍ଗ୍ ଲେକା ସେସେନ୍ ଜାନାଏ, ଥିମ୍ବାଗି ମାଉର୍ ଜୋମେୟାଏ। ମେନ୍ଦୋ ଅକଏ କା ସାରିକେତେ ମାଉର୍ ଜୋମେ ଲେକା କାମିୟାଏ ଇନିଃ ହୁଡିଙ୍ଗ୍ ମାଉର୍ ଜୋମେୟାଏ। ଏନାଲାଗିନ୍ ଅକନିଃକେ ଥିମ୍ବା ଏମାକାନା, ଇନିଜେତେ ଥିମ୍ବା ଆସୀୟଗା; ହାର୍ ଅକନିଃକେ ଥିମ୍ବା ଜିମାକାନା, ଇନିଜେତେ ଥିମ୍ବା ଇଦିୟୋଗା।” “ଇଙ୍ଗ୍ ଅତେ ରେ ସେଙ୍ଗେଲ୍ ଜୁଲ୍ ଲାଗିନ୍ ହିଜୁଃ କାନାଇଙ୍ଗ୍; ହାର୍ ଚିନାଃ ସାନାଙ୍ଗ୍ ତାନିଙ୍ଗ୍, ଖାଲି ନେୟା ଚି ନାଆ ଜୁଲ୍ କେନୋଃ ତେୟାଃ। ଇଙ୍ଗ୍‍କେ ଦୋ ମିୟାଃ ବାପ୍ତିସ୍ମା ଇଦି ରାଃ ମେନାଃ, ହାର୍ ଚିମ୍ତାଙ୍ଗ୍ ସାନ୍ତେ ଏନା କା ହୋବାୱାଃ ଏନ୍ ସାନ୍ତେ ଇଙ୍ଗ୍ ଚିଲ୍‍କା ହାସୁ ରେ ତାଇନାଇଙ୍ଗ୍! ଚିନାଃ ଆପେ ପାହୋମ୍ ତାନାପେ ଚି ଇଙ୍ଗ୍ ଅତେ ରେ ବାପାଇତେ ତାଇନ୍‍ପେ ମେନ୍ତେ ହିଜୁଃ କାନାଇଙ୍ଗ୍? ଇଙ୍ଗ୍ ଆପେ କେ କାଜିପେ ତାନିଙ୍ଗ୍; କାହା, ମେନ୍ଦୋ ଆଲାଗ୍ ରିକା ନାଙ୍ଗ୍ ହିଜୁଃ କାନାଇଙ୍ଗ୍। ଚିୟାଃଚି ନାଆ ଏତେ ମିୟାଃ ଅଡ଼୍ଆଃ ରେ ପାଞ୍ଚ୍ ଝାନ୍ ଆକୋ ଥାଲା ରେ କାକୋ ବାପାଇୟୋଗା, ଆପି ହୋଡ଼ ଅକନ୍‍କୋ ଇଙ୍ଗ୍ଆଃ ରେ କାକୋ ବିଶ୍ଵାସ୍ ତାନାକୋ ଇନ୍‍କୁ ବାର୍ହୋଡ଼୍ ବିଶ୍ଵାସ୍ ତାନାକୋ ଇନ୍‍କୁ ଲୋଃ କାକୋ ବାପାଇୟୋଗା ହାର୍ ବାର୍ହୋଡ଼୍ କାକୋ ବିଶ୍ଵାସ୍ ତାନାକୋ ଇନ୍‍କୁ ଆପି ହୋଡ଼ ବିଶ୍ଵାସ୍ ତାନ୍‍କୋ ଇନ୍‍କୁ ଲୋଃ କାକୋ ବାପାଇୟୋଗା। ଆପୁ ହୋନ୍‍କଡ଼ା ଏତେ ହାର୍ ହୋନ୍‍କଡ଼ା ଆପୁ ଏତେ କାକିନ୍ ବାପାଇୟୋଗା; ଏଙ୍ଗା ହୋନ୍‍କୁଡ଼ି ଏତେ ହାର୍ ହୋନ୍‍କୁଡ଼ି ଏଙ୍ଗା ଏତେ, ହାର୍ ହାନାର୍ କିମିନ୍ ଏତେ ହାର୍ କିମିନ୍ ହାନାର୍ ଏତେ କାକୋ ବାପାଇୟୋଗା।” ଇନିଃ ମିଃଥିମ୍ବା ହୋଡ଼ୋକୋକେ ହଗି କାଜିକେଃକୋୱାଏ, “ଚିମ୍ତାଙ୍ଗ୍ ଆପେ ରିମିଲ୍ କେ ପାଶ୍ଚିମ୍ ଏତେ ରାକାବ୍ ତାନ୍ ନେଲେୟାପେ ଦୋ ଇମ୍ତାଗି କାଜିୟାପେ ଚି ଦାଆ ଗାମା ୟାଏ, ହାର୍ ଏନ୍‍ଲେକାଗି ହୋବାଅଃ ୱା; ହାର୍ ଚିମ୍ତାଙ୍ଗ୍ ଦାକ୍ଷିଣ୍ ହୋୟୋ ହୋୟୋୟାଏ ଏଣ୍ଡେ କାଜିୟାପେ ଚି ଶିତୁମ୍ ହୋୟୋ ହୋୟୋୟାଏ, ହାର୍ ଏନ୍‍ଲେକାଗି ହୋବାଅଃ ୱା; ହେ ବେଦାହୋଡ଼ୋକୋ, ଆପେ ଅତେ ହାର୍ ରିମିଲ୍‍ଦିଶୁମ୍ ରାଃ ଚିହ୍ନା କୋକେ ସାରି ଧାଡ଼ିୟାପେ, ମେନ୍ଦୋ ନେ ଯୁଗ୍ ରାଃ ବିଷାୟ୍ ରେ ଚିନାଃ ମେନ୍ତେ କାପେ ସାରିଧାଡ଼ି ତାନା ଚି ପାର୍ମେଶ୍ଵାର୍ ଚିନାଃ କାଜି ସାନାଙ୍ଗ୍ ତାନାଏ?” “ହାର୍ ଆପେ-ଆପେ ଗି ଚିନାଃ ଲାଗିନ୍ କାପେ ବିଚାର୍ ତାନା ଚି ଚିନାଃ ବୁଗିନ୍ ତାନାଃ? ଚିମ୍ତାଙ୍ଗ୍ ଆମ୍ ଆମାଃ ଦୋଷ୍ ଲାଗାଅନିଃ ଲୋଃ ହାକିମ୍ ରାଃ ନାଡ଼େଏ ସେନ୍ ତାନାମ୍ ଦୋ ହୋରା ରେଗି ଆଜାଃ ଲୋଃ ଝାଟ୍‍ପାଟ୍ ବାପାଇ କେନୋଃମେ, କାରେ ଦୋ ଦୋଷ୍ ଲାଗାଅନିଃ ଆମ୍‍କେ ବିଚାର୍‍ନିଃ ତାଃ ଅର୍ ଇଦିମେୟାଏ, ହାର୍ ବିଚାର୍‍ନିଃ ଆମ୍‍କେ ସିପାହୀ କେ ସାବାମେୟାଏ ହାର୍ ସିପାହୀ ଆମ୍‍କେ ଜେଲ୍ଅଡ଼୍ଆଃ ରେ ଆଦେର୍ ତାମାଏ। ଇଙ୍ଗ୍ ଆମ୍‍କେ କାଜିତାନିଙ୍ଗ୍ ଚି ଯେ ହୁଲାଙ୍ଗ୍ ସାନ୍ ଆମ୍ କାଟିଃ ତେ କାଟିଃ କେ କାମ୍ ଫେରେଃ ରୁଆଡ଼େୟା ଏନ୍ ହୁଲାଙ୍ଗ୍ ସାନ୍ ହେନ୍ତାଃ ଏତେ କାମ୍ ରାଡ଼ା ଧାଡ଼ିୟୋଗା।” ଏନ୍ ସାମାୟ୍ ଚିମିନାଙ୍ଗ୍ ହୋଡ଼ୋକୋ ହିଜୁଃ ସେଟେର୍ ଜାନାକୋ, ହାର୍ ୟୀଶୁ କେ ଏନ୍ ଗାଲିଲୀ ଜିଲ୍ଲା ରେନ୍ ହୋଡ଼ୋ କୋୱାଃ ବିଷାୟ୍ ରେ ଉଦୁବ୍ କିଜାକୋ, ଅକନ୍ କୋୱାଃ ମାୟୋମ୍ ପିଲାତୁସ୍ ଇନ୍‍କୁୱାଃ ଦାଣେ ଲୋଃ ମେଶା ଲେଦାଏ। ନେୟା ଆୟୁମ୍‍କେତେ ଇନିଃ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଆପେ ଚିନାଃ ପାହୋମ୍ ତାନାପେ, ଚିନାଃ ନେ ଗାଲିଲୀ ଜିଲ୍ଲା ରେନ୍ ହୋଡ଼ୋକୋ ଏଟାଃ ସବେନ୍ ଗାଲିଲୀ ଜିଲ୍ଲା ରେନ୍ ହୋଡ଼ୋକୋ ଏତେ ଥିମ୍ବା ପାପୀକୋ ତାଇକେନା ଏନାତେ ଇନ୍‍କୁକେ ନେକା ଦୁକୁ ସାହାତିଙ୍ଗ୍ ହୋବାନା? ଇଙ୍ଗ୍ ଆପେକେ କାଜିତାନିଙ୍ଗ୍ କାହା, ମେନ୍ଦୋ ଆଗାର୍ ଆପେ ପାପ୍ କାମି କାପେ ବାଗେୟାପେ ଏଣ୍ଡେ ଆପେ ସବେନ୍ କୋ ହଗି ନେଲେକାତେ ନାଷ୍ଟ୍ ଅଗାପେ। ଚି, ଆପେ ଚିନାଃ ପାହୋମ୍ ତାନାପେ ଚିନାଃ ନେ ଆଠାରା ହୋଡ଼ୋକୋ ଅକନ୍ କୋୱା ଚେତାନ୍ ରେ ଶିଲୋହ୍ ସାହାର୍ ରେ ଦିରି ତେ ବାଇୟାକାନ୍ ସାଲାଙ୍ଗୀ ଅଡ଼୍ଆଃ ଉୟୁଃଜାନା ଆଡୋଃ ଇନ୍‍କୁ ଅତାକେତେ ଗୋଏଃ ଜାନାକୋ, ଚିନାଃ ଇନ୍‍କୁ ୟୀରୁଶାଲେମ୍ ରେନ୍ ସବେନ୍ ତାଇନ୍ ତାନ୍ ହୋଡ଼ୋକୋ କୋଏତେ ଥିମ୍ବାଗି ପାପୀକୋ ତାଇକେନାକୋ? ଇଙ୍ଗ୍ ଆପେକେ କାଜିତାନିଙ୍ଗ୍ ଚି କାହା, ମେନ୍ଦୋ ଆଗାର୍ ଆପେ ପାପ୍ କାମି କାପେ ବାଗେୟା ଏଣ୍ଡେ ଆପେ ସବେନ୍ କୋ ହଗି ନେଲେକାଗି ନାଷ୍ଟ୍ ଅଗାପେ।” ଏନ୍ତେ ୟୀଶୁ ନେ ଜୋନୋକା କାଜିକେଦାଏ, “ମିୟାଃ ହୋଡ଼ ରାଃ ଆଙ୍ଗୁର୍ ବାଖ୍‍ଡ଼ି ରେ ମିୟାଃ ଲୋୱା ଦାରୁ ରୋଏକାନ୍ ତାଇକେନା। ସବେନ୍ ଶିର୍ମା ଇନିଃ ଏନାରେ ଯଅ ଦାଣା ଲାଗିନ୍ ହିଜୁଃ ଲେନାଏ, ମେନ୍ଦୋ କାଏ ନାମ୍ କେଦା। ଏନ୍ତେ ଇନିଃ ଏନ୍ ବାଖ୍‍ଡ଼ି କେ ହୋରୋତାନ୍ ମାଲି କେ କାଜିକେଦାଏ, ‘ନେଲେମ୍, ଆପି ଶିର୍ମା ଏତେ ଇଙ୍ଗ୍ ନେ ଲୋୱା ଦାରୁ ରେ ଯଅ ଦାଣା ହିଜୁଃ ତାନିଙ୍ଗ୍, ମେନ୍ଦୋ କାଇଙ୍ଗ୍ ନାମ୍ ତାନା। ନେୟା କେ ମାଆ ଖାଣ୍ଡାଅ ତାମେ, ନେୟା ବେଶ୍ ଅତେ କେ ଚିନାଃ ମେନ୍ତେ ଆବ୍ରାଅ କାଦାଏ?’ ଇନିଃ ଗୋମ୍‍କେ କେ କାଜିରୁଆଡ଼୍ କିଜାଏ, ‘ହେ ଗୋମ୍‍କେ, ନେୟାକେ ନେ ଶିର୍ମା ଆଡୋଃଗି ତାଇନୋଃକା, ଇଙ୍ଗ୍ ନେୟା ରାଃ ସବେନ୍ ପାଡ଼୍ ଉର୍ ବିୟୁର୍ କେତେ ମାଇଦ୍ ଏମେୟାଇଙ୍ଗ୍। ଆଗାର୍ ଆୟୁର୍ ତେ ଯଅଃ ୱା ଏଣ୍ଡେ ଦୋ ବେଶ୍ ତାନାଃ କାରେଦୋ ଏନାକେ ମାଆ ଖାଣ୍ଡାଅ ତାଃବୁ।’ ” ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ୟୀଶୁ ମିୟାଃ ବିନ୍ତିଅଡ଼୍ଆଃ ରେ ଉପ୍‍ଦେଶ୍ ଏମ୍ ତାଇନାଏ। ଏନ୍ତାଃ ମିୟାଃ କୁଡ଼ି ତାଇକେନାଏ, ଅକନିଃକେ ଆଠାରା ଶିର୍ମା ଏତେ ମିୟାଃ ନାରାଦୁରା ରିକା ବୋଙ୍ଗାଆତ୍ମା ଏସେର୍ ଲିଜାଏ, ହାର୍ ଇନିଃ କୁବ୍‍ଡ଼ି ବାଇଲେନ୍ ତାଇକେନାଏ ହାର୍ ଅକୋ ଲେକାତେ ହ ସୋଜ୍ ହୋବା କାଏ ଧାଡ଼ି ତାଇନାଏ। ୟୀଶୁ ଇନିଃକେ ନେଲ୍‍କେତେ କେଡ଼ା କିଜାଏ ହାର୍ କାଜିକେଦାଏ, “ହେ କୁଡ଼ି, ଆମ୍ ଆମାଃ ନାରାଦୁରା ତେ ବେଶ୍ ଜାନାମ୍।” ଏନ୍ତେ ଇନିଃ ଇନିଜାଃ ଚେତାନ୍ ରେ ତିଈ ମାଣ୍ଡାଅ କେଦାଏ, ଆଡୋଃ ଇନିଃ ଇମ୍ତାଗି ସୋଜ୍ ଜାନାଏ ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଏଟେଃ କେଦାଏ। ମେନ୍ଦୋ ୟୀଶୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଇନିଃକେ ବେଶ୍ ଲେଃ ତାଇକେନାଏ, ଏନାମେନ୍ତେ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ଖିସ୍ କେତେ ହୋଡ଼ୋକୋକେ କାଜିକେଦାଏ, ମିୟାଃ ହାପ୍ତା ରେ ଛାଅ ଦିନ୍ ମେନାଃ ଏଣ୍ଡେ ରେ କାମି ଚାହି, ଏନ୍ତେ ଏନ୍ ହୁଲାଙ୍ଗ୍ କୋରେ ଗି ହିଜୁଃକେତେ ବେଶ୍ ହୋବାଃଅନ୍ ପେ, ମେନ୍ଦୋ ଆବୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ କାହା। ଏନ୍ତେ ନେୟା ଆୟୁମ୍‍କେତେ ପ୍ରାଭୁ କାଜିରୁଆଡ଼୍ କେଦାଏ, “ହେ ବେଦାହୋଡ଼ୋକୋ, ଆବୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଆପେ କୋଏତେ ସବେନ୍ ଚିନାଃ ଆପେୟାଃ ଉରିଃ ୟାଦୋ ଗାଧା କେ ଗୋଣା ଏତେ ରାଡ଼ାକେତେ ଦାଆ ନୁୱେ ଲାଗିନ୍ କାପେ ଇଦିକୋୱା? ଏଣ୍ଡେ ଚିନାଃ ଠାଉକା କା ତାଇକେନା ଚି ନେ କୁଡ଼ି ଅକନିଃ ଆବ୍ରାହାମ୍ ବାଂଶ୍ ରାଃ ହୋନ୍‍କୁଡ଼ି ତାନିଃ ଅକନିଃକେ ଶାଏତାନ୍ ଆଠାରା ଶିର୍ମା ଏତେ ଥୋଲ୍ କେତେ ମାଣ୍ଡାଅ ଲିଃ ତାଇକେନାଏ, ଆରାମେ ହୁଲାଙ୍ଗ୍ ରେ ନେ ଥୋନୋଲ୍ ଏତେ ରାଡ଼ାଅଃ କା ତାଇକେନା?” ଚିମ୍ତାଙ୍ଗ୍ ଇନିଃ ନେ କାଜିକୋ କାଜିକେଦାଏ, ଦୋ ଇନିଜାଃ ସବେନ୍ ବିରୋଧୀ କୋ ଗିୟୁଃ ଜାନାକୋ, ହାର୍ ସବେନ୍ ହୋଡ଼ୋକୋ ଏନ୍ ମାନାରାଙ୍ଗ୍ ରାଃ କାମି କେ ଅକନାଃ ଇନିଃ କାମିକେଦାଏ, ରାଶିକା ଜାନାକୋ। ଏନ୍ତେ ୟୀଶୁ କାଜିକେଦାଏ, “ପାର୍ମେଶ୍ଵାର୍ ରାଃ ରାଇଜ୍ ଅକେୟାଃ ଲେକା ମେନାଃ? ହାର୍ ଇଙ୍ଗ୍ ଏନା କେ ଅକନାଃ ତେ ଜୋକା ୟାଇଙ୍ଗ୍? ଏନା ମାନି ରାଃ ମିୟାଃ ଯାଙ୍ଗ୍ ଲେକା ତାନାଃ, ଅକନାଃକେ ମିୟାଃ ହୋଡ଼ ଇଦିକେତେ ଆଜାଃ ବାଖ୍‍ଡ଼ି ରେ ହେର୍ କେଦାଏ, ଆଡୋଃ ଏନା ହାରା କେତେ ଦାରୁ ବାଇଜାନା ହାର୍ ରିମିଲ୍‍ଦିଶୁମ୍ ରେନ୍ ଅଡ଼େକୋ ଏଣ୍ଡେରାଃ କୋତୋକୋ ରେ ତୂକାକୋ ବାଇକେଦାକୋ।” ଇନିଃ ଆଡୋଃଗି କାଜିକେଦାଏ, “ଇଙ୍ଗ୍ ପାର୍ମେଶ୍ଵାର୍ ରାଃ ରାଇଜ୍ କେ ଅକନାଃ ତେ ଜୋକା ୟାଇଙ୍ଗ୍? ଏନା ଖାମୀର୍ ରାଃ ଲେକା ତାନାଃ, ଅକନାଃକେ ମିୟାଃ କୁଡ଼ି ଇଦିକେତେ ଆପି ନାପ୍ ଆଟା ରେ ମେଶା କେଦାଏ, ଆଡୋଃ ସିପୁଃ-ସିପୁଃ ଲୋଃ ସବେନ୍ ଆଟା ରେ ଖାମୀର୍ ମେଶା ଜାନା।” ଏନ୍ତେ ୟୀଶୁ ଆଜାଃ ଚେଲାକୋ ଲୋଃ ସାହାର୍-ସାହାର୍ ଆଡୋଃ ହାତୁ-ହାତୁ ସେନ୍ କେତେ ଉପ୍‍ଦେଶ୍ ତାନ୍ ଲୋଃ ୟୀରୁଶାଲେମ୍ ପାଡ଼୍ ସେନ୍ ତାଇକେନାଏ। ଇମ୍ତା ଜାହାଁଏ ମିହୋଡ଼୍ ଇନିଃକେ କୁଲିକିଜାଏ, “ହେ ପ୍ରାଭୁ, ଚିନାଃ ପାର୍ମେଶ୍ଵାର୍ ହୁଡିଙ୍ଗ୍ ଗି ହୋଡ଼ୋକୋକେ ଜାନାଓ ଦାଣ୍ଡ୍ ଏତେ ବାଞ୍ଚାଅ କୋୱାଏ?” ଇନିଃ ଇନ୍‍କୁକେ କାଜିକେଦାଏ, “ସାକୁର୍ ଦୁହାର୍ ରେ ବୋଲୋ ଲାଗିନ୍ ପେଡ଼େଏ ଲାଗାୱେପେ, ଚିୟାଃଚି ଇଙ୍ଗ୍ ଆପେକେ କାଜିତାନିଙ୍ଗ୍, ଚି ମିଃଥିମ୍ବା ହୋଡ଼ୋକୋ ବୋଲୋ କୋ ସାନାଙ୍ଗା, ହାର୍ କାକୋ ଧାଡ଼ିୟା। ଚିମ୍ତା ପାର୍ମେଶ୍ଵାର୍ ଅଡ଼୍ଆଃ ରେନ୍ ଗୋମ୍‍କେ, ବିରିଃ କେତେ ଦୁହାର୍ ହାଣ୍ଡେଃ ଛାବା କେଦାଏ, ଏନ୍ତେ ଆପେ ବାହାରି ତିଙ୍ଗୁ କେତେ ଦୁହାର୍ ଟୋଅ-ଟୋଅ ୟାପେ ହାର୍ ଆର୍ଜି କେତେ କାଜିୟାପେ, ‘ହେ ପ୍ରାଭୁ, ଆଲେୟାଃ ଲାଗିନ୍ ଖଲାଅ ତାମ୍,’ ହାର୍ ଇନିଃ କାଜିରୁଆଡ଼୍ ୟାଏ, ‘ଇଙ୍ଗ୍ ଆପେକେ କାଇଙ୍ଗ୍ ସାରିୟା, ଆପେ କୋତାଃ ରେନ୍ ତାନ୍‍ପେ?’ ଇମ୍ତା ଆପେ କାଜିୟାପେ, ‘ଆଲେ ଆମାଃ ନାଡ଼େଏ ରେ ଜୋମ୍ ନୁ କେଦାଲେ ଆଡୋଃ ଆମ୍ ଆଲେୟାଃ ପିଟ୍ କୋରେ ଉପ୍‍ଦେଶ୍ କେଦାମ୍।’ ମେନ୍ଦୋ ଇନିଃ କାଜିୟାଏ, ‘ଇଙ୍ଗ୍ ଆପେକେ କାଇଙ୍ଗ୍ ସାରିତାନା, ଆପେ କୋତାଃ ରେନ୍ ତାନ୍‍ପେ? ହେ ଶିତୃ-କାମି ରିକାତାନ୍‍କୋ, ଆପେ ସବେନ୍ କୋ ଇଙ୍ଗ୍ଆଃ ନାଡ଼େଏ ତେ ଆତୋମେନ୍ ପେ।’ ହେନ୍ତାଃରେ ରାଆ ହାର୍ ଡାଟା ରିଦ୍ ହୋବାଅଃୱା, ଚିମ୍ତାଙ୍ଗ୍ ଆପେ ଆବ୍ରାହାମ୍ ହାର୍ ଇସାହାକ୍, ହାର୍ ୟାକୁବ୍ ହାର୍ ସବେନ୍ ନାବୀ କୋକେ ପାର୍ମେଶ୍ଵାର୍ ରାଃ ରାଇଜ୍ ରେ ଦୁବାକାନ୍, ଆଡୋଃ ଆପେ ଆପାନ୍ କେଗି ବାହାରି ଅଡୋଙ୍ଗ୍ କାନ୍ ନେଲେୟାପେ। ଆଡୋଃ ପୁରାବ୍ ହାର୍ ପାଶ୍ଚିମ୍, ଉତ୍ତାର୍ ହାର୍ ଦାଖିନ୍ ସବେନ୍ ଅତେଦିଶୁମ୍ ଏତେ ହୋଡ଼ୋକୋ ହିଜୁଃକେତେ ପାର୍ମେଶ୍ଵାର୍ ରାଃ ରାଇଜ୍ ରାଃ ଭୋଜ୍ ରେ ଦୁବାକୋ। ଆଡୋଃ ନେଲେପେ ଚିମିନାଙ୍ଗ୍ ହୁଡିଙ୍ଗେନ୍ ହୋଡ଼ୋକୋ ସିଦାରେ ମାରାଙ୍ଗ୍ ଅଗାକୋ, ହାର୍ ଚିମିନାଙ୍ଗ୍ ମାରାଙ୍ଗେନ୍ ହୋଡ଼ୋକୋ ତାୟୋମ୍ତେ ହୁଡିଙ୍ଗ୍ ଅଗାକୋ।” ଏନ୍ ସାମାୟ୍ ରେଗି ଚିମିନାଙ୍ଗ୍ ଫାରିସୀ ହୋଡ଼ୋକୋ ହିଜୁଃକେତେ ୟୀଶୁ କେ କାଜିକିଜାକୋ, “ନେତାଃ ଏତେ ଅଡୋଙ୍ଗ୍ କେତେ ସେନୋଃ କୋମେ, ଚିୟାଃଚି ହେରୋଦ୍ ରାଜା ଆମ୍‍କେ ଗୋଏଃ ଲାଗିନ୍ ସାନାଙ୍ଗ୍ ତାନାଏ।” ଇନିଃ ଇନ୍‍କୁକେ କାଜିକେଦାଏ, “ସେନ୍ କେତେ ଏନ୍ ତୁୟୁ ଲେକା ଚାତୁର୍ ହୋଡ଼ କେ କାଜିୟାଇପେ ଚି, ନେଲେମ୍, ଇଙ୍ଗ୍ ଇସିଙ୍ଗ୍ ହାର୍ ଗାପା ବୋଙ୍ଗାଆତ୍ମା କୋକେ ଅଡୋଙ୍ଗ୍‍ କୋ ତାନିଙ୍ଗ୍ ଆଡୋଃ ବିମାରୀ କୋକେ ବେଶ୍ କୋ ତାନିଙ୍ଗ୍, ହାର୍ ଆପି ହୁଲାଙ୍ଗ୍ ରେ ଇଙ୍ଗ୍ଆଃ କାମି କେ ପୁରା କେୟାଇଙ୍ଗ୍। ଏଣ୍ଡେ ହ ଇଙ୍ଗ୍‍କେ ଇସିଙ୍ଗ୍ ହାର୍ ଗାପା ହାର୍ ମେୟାଙ୍ଗ୍ ସେନୋଃ ଲାଗାତିଙ୍ଗ୍ ମେନାଃ, ଚିୟାଃଚି ୟୀରୁଶାଲେମ୍ ସାହାର୍ ବାହାରି ରେ ଜେତାନ୍ ନାବୀ ଗୋଜୋଗାଏ ଏନ୍‍କା ହୋବା କା ଧାଡ଼ିୱା।” “ହେ ୟୀରୁଶାଲେମ୍ ସାହାର୍ ରେନ୍ ହୋଡ଼ୋକୋ! ହେ ୟୀରୁଶାଲେମ୍ ସାହାର୍ ରେନ୍ ହୋଡ଼ୋକୋ! ଆପେ ଜେ ନାବୀ କୋକେ ଗୋଏଃ କୋ ତାନାମେ, ଆଡୋଃ ଅକନ୍‍କୋ ଆପେତାଃ କୁଲ୍ ଲେନାକୋ ଇନ୍‍କୁୱାଃ ଚେତାନ୍ ରେ ଦିରି ଥେର୍ ୟାପେ। ଚିମିନ୍ ଥର୍ ଇଙ୍ଗ୍ ନେୟା ସାନାଙ୍ଗ୍ କେଦାଇଙ୍ଗ୍ ଚି ଚିଲ୍‍କା ସିମ୍ ଆଜାଃ ହୋନ୍ କୋକେ ଆଜାଃ ଆପ୍‍ରୋବ୍ ଲାଥାର୍ ରେ ହୁଣ୍ତି କୋୱାଏ, ଏନ୍‍ଲେକାଗି ଇଙ୍ଗ୍ ହଗି ଆପେ କେ ହୁଣ୍ତି କୋୱାଇଙ୍ଗ୍, ମେନ୍ଦୋ ଆପେ ନେୟା କାପେ ସାନାଙ୍ଗ୍ କେଦା। ନେଲେପେ, ଆପେୟାଃ ଅଡ଼୍ଆଃ ଆପେୟାଃ ଲାଗିନ୍ ଉଜ୍ଡ଼ାଅ ବାଗିୟଃ ତାନା, ଆଡୋଃ ଇଙ୍ଗ୍ ଆପେକେ କାଜିତାନିଙ୍ଗ୍, ଚିମ୍ତା ସାନ୍ତେ ଆପେ କାପେ କାଜିୟା, ‘ଧାନ୍ୟା ଇନିଃ ତାନିଃ, ଅକନିଃ ପ୍ରାଭୁ ଆଃ ନୁତୁମ୍ ତେ ହିଜୁଃ ତାନାଏ, ଇମିନ୍ ସାନ୍ତେ ଆପେ ଇଙ୍ଗ୍‍କେ ଆଡୋଃ ଚିଉଲା ହ କାପେ ନେଲିଙ୍ଗ୍‍ୟା।’ ” ମୁଶିଙ୍ଗ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ୟୀଶୁ ମିହୋଡ଼୍ ଫାରିସୀ ହୋଡ଼ୋ କୋୱାଃ ମୁଖିୟା ରାଃ ଅଡ଼୍ଆଃ ଜୋଜୋମାଃ ଜୋମ୍ ତେ ସେନୋଃ ଜାନାଏ, ଆଡୋଃ ଇନ୍‍କୁ ଇନିଜାଃ ଭୁଲ୍ ସାବ୍ ରାଃ ତାକ୍ ରେ କୋ ତାଇକେନା। ଏନ୍ତାଃ ମିୟାଃ ହୋଡ଼ ଇନିଜାଃ ନାଡ଼େଏ ରେ ତାଇକେନାଏ, ଅକନିଃକେ ତିଈ କାଟା ମୋ ରାଃ ବେମାର୍ ତାଇକେନା। ନେୟାତେ ୟୀଶୁ ଆଇନ୍ ଗୁରୁକୋକେ ହାର୍ ଫାରିସୀ ହୋଡ଼ୋ କୋକେ କୁଲି କେଃକୋୱାଏ, “ଚିନାଃ ଆରାମେ ହୁଲାଙ୍ଗ୍ ରେ ବେଶ୍ ରିକା ବୁଗିନ୍ ତାନାଃ ଚି ନାହାଲା?” ମେନ୍ଦୋ ଇନ୍‍କୁ ହାପାଗି ତାଇଜାନାକୋ। ଏନ୍ତେ ୟୀଶୁ ହିନିଃକେ ଜୁଟିଃ କେତେ ବେଶ୍ କିଜାଏ ହାର୍ ସେନୋଃ ରିକାକିଜାଏ। ଏନ୍ତେ ଇନ୍‍କୁକେ କାଜିକେଦାଏ, “ଆପେ କୋଏତେ ନେଲେକା ଅକଏ ମେନାଇଜା, ଅକନିଜାଃ ହୋନ୍ ୟାଦୋ ଉରିଃ କୁଆଁ ରେ ଉୟୁଗୋୱାଏ ଆଡୋଃ ଇନିଃ ଆରାମେ ହୁଲାଙ୍ଗ୍ ରେ ଇନିଃକେ ସେକାଡ଼୍ ତେ ବାହାରି କାଏ ଅଡୋଙ୍ଗିୟାଏ?” ଇନ୍‍କୁ ନେ କାଜି ରାଃ ଜେତାନ୍ କାଜିରୁଆଡ଼୍ କାକୋ ଏମ୍ କେଦା। ଚିମ୍ତାଙ୍ଗ୍ ୟୀଶୁ ନେଲ୍‍କେଦାଏ ଚି ନେୱତାକାନ୍ ହୋଡ଼ୋକୋ ଚିଲ୍‍କା ମାଇନ୍ ନାମ୍ ସାନାଙ୍ଗ୍ ଜାଗା ସାଲା କେତେ ଦୁବ୍ ତାନାକୋ ଦୋ ମିୟାଃ ଜୋନୋକା ଏମ୍ କେତେ ଇନ୍‍କୁକେ କାଜିକେଦାଏ, “ଚିମ୍ତା ଜେତାଏ ଆପେକେ ଆଣାଦୀ-ଭୋଜ୍ ରେ କେଡ଼ା ପେୟାକୋ ଏଣ୍ଡେ ମାଇନ୍ ନାମ୍ ଜାଗା ରେ ଆଲୋପେ ଦୁବା, ନେକା ଆଲୋକା ହୋବାଅଃ ଚି ଇନିଃ ଆପେ ତେୟ ଗି ଜାହାଁଏ ମାରାଙ୍ଗ୍ ହୋଡ଼ କେ ନେୱତାକାଇୟାଏ, ଆଡୋଃ ଅକନିଃ ହିନିଃକେ ହାର୍ ଆମ୍‍କେ ବାରାନ୍‍କିନ୍ କେ ନେୱତା ଏମ୍ କାଦାଏ, ହିଜୁଃକେତେ ଆମ୍‍କେ କାଜିୟାଏ, ‘ନିଈ କେ ଜାଗା ଏମାଇମେ,’ ଏନ୍ତେ ଇମ୍ତା ଆମ୍‍କେ ଗିୟୁଃ କେତେ ସବେନ୍ କୋଏତେ ଲାଥାର୍ ଜାଗା ରେ ଦୁବ୍ ହୋବାଃ ୱା। ମେନ୍ଦୋ ଚିମ୍ତା ଆମ୍ ନେୱତାୱାମ୍ ଦୋ ସବେନ୍ ଏତେ ଲାଥାର୍ ଜାଗା ରେ ଦୁବ୍ ମେ, ଏନାତେ ଚିମ୍ତା ଇନିଃ ଆମ୍‍କେ ନେୱତା ଏମାକାଃ ମେୟାଏ ହିଜୁଃ କେତେ ଆମ୍‍କେ କାଜିୟାଏ, ‘ହେ ଗାତି, ଆୟୁର୍ ତେ ସେନ୍ କେତେ ଦୁବ୍ ମେ,’ ଏନ୍ତେ ଆମାଃ ଲୋଃ ଦୁବାକାନ୍ କୋୱାଃ ନାଡ଼େଏ ରେ ଆମାଃ ମାଇନ୍ ହୋବାଃ ୱା। ଚିୟାଃଚି ଅକଏ ଆଏଃ ଆପାନ୍ କେ ମାରାଙ୍ଗ୍ ବାଇୟାଏ ଇନିଃ ହୁଡିଙ୍ଗ୍ ଅଗାଏ ଆଡୋଃ ଅକଏ ଆପାନ୍ କେ ହୁଡିଙ୍ଗ୍ ବାଇୟାଏ ଇନିଃ ମାରାଙ୍ଗ୍ ଅଗାଏ।” ଏନ୍ତେ ୟୀଶୁ ଏନ୍ ଫାରିସୀ ହୋଡ଼ କେ ଅକଏ ଆଏଃ କେ ନେୱତା ଲିଜାଏ କାଜିକେଦାଏ, “ଚିମ୍ତା ଆମ୍ ଶିଙ୍ଗି ୟାଦୋ ନିଦା ଭୋଜ୍ ଏମେୟାମ୍ ଏଣ୍ଡେ ଆମାଃ ଗାତିକୋକେ ୟାଦୋ ହାଗାକୋକେ ୟାଦୋ କୁଟୁମ୍ବ କୋକେ ୟାଦୋ ନାଡ଼େଏ-ଜାପାଃ ରେନ୍ କିଶାଣ୍ କୋକେ ଆଲୋମ୍ କେଡ଼ା କୋୱା, କାରେଦୋ ଇନ୍‍କୁ ହ ଆମ୍‍କେ ନେୱତା କେଡ଼ାମେୟାକୋ, ହାର୍ ଆମାଃ ବାଦ୍‍ଲା ହୋବା କେନୋଗା। ମେନ୍ଦୋ ଚିମ୍ତାଙ୍ଗ୍ ଆମ୍ ଭୋଜ୍ ମାଣ୍ଡାଅୟାମ୍ ଏଣ୍ଡେ ଗାରିବ୍ କୋକେ, ଠୁଠା କୋକେ, ଲାଙ୍ଗ୍ଡ଼ା କୋକେ, ଆଡୋଃ ଆନ୍ଧା କୋକେ କେଡ଼ା କୋମ୍। ଏଣ୍ଡେ ଆମ୍ ଆଶିଷ୍ ନାମେୟାମ୍, ଚିୟାଃଚି ଇନ୍‍କୁ ତାଃ ରେ ଆମ୍‍କେ ବାଦ୍‍ଲା ଏମେଲାଗିନ୍ ଜେତ୍ନାଃ ବାନୋଃ, ମେନ୍ଦୋ ଆମ୍‍କେ ଧାର୍ମୀ କୋୱାଃ ଜୀବିନିରିଦ୍ ରେ ନେୟା ରାଃ ଯଅ ନାମୋଗା।” ଇନ୍‍କୁ ଲୋଃ ଜୋମ୍ ଦୁବାକାନ୍ କୋଏତେ ମିହୋଡ଼୍ ନେ କାଜି ଆୟୁମ୍‍କେତେ ୟୀଶୁ କେ କାଜିକେଦାଏ, “ଧାନ୍ୟା ଇନିଃ ତାନିଃ ଅକନିଃ ପାର୍ମେଶ୍ଵାର୍ ରାଃ ରାଇଜ୍ ରେ ଭୋଜ୍ ଜୋମେୟାଏ।” ୟୀଶୁ ଇନିଃକେ କାଜିକେଦାଏ, “ମିହୋଡ଼୍ ହୋଡ଼ ଆୟୁବ୍ ଇମ୍ତା ମାରାଙ୍ଗ୍ ଭୋଜ୍ ମାଣ୍ଡାଅକେଦାଏ ହାର୍ ଥିମ୍ବାଗି ହୋଡ଼ୋକୋକେ ନେୱତା କେଃକୋୱାଏ। ଚିମ୍ତାଙ୍ଗ୍ ଜୋମେୟାଃ ବାଇଜାନା ଦୋ ଇନିଃ ଆଜାଃ ଦାସୀ କେ ନେୱତାକାନ୍ ହୋଡ଼ୋକୋ ତାଃ କାଜିକୁଲ୍ କେଦାଏ, ‘ଦେଲା, ନାଆ ଜୋମେୟାଃ ବାଇ ସେକାଡ଼୍‍ଜାନା।’ ମେନ୍ଦୋ ଏନ୍ ସବେନ୍ କୋଗି ଛାମା ଆସି କେଦାକୋ। ସିଦାରେ ନିଈ ଇନିଃକେ କାଜିକେଦାଏ, ‘ଇଙ୍ଗ୍ ଅତେ କିରିଙ୍ଗ୍ କାଦିଙ୍ଗ୍, ଆଡୋଃ ଲାଗାତିଙ୍ଗ୍ ମେନାଃ ଚି ଏନାକେ ନେଲେ ୟାଇଙ୍ଗ୍, ଇଙ୍ଗ୍ ଆମ୍‍କେ ଆର୍ଜି ମେତାନିଙ୍ଗ୍ ଇଙ୍ଗ୍‍କେ ଛାମା ତାଇଙ୍ଗ୍ ମେ।’ ଏଟାଃ ନିଈ କାଜିକେଦାଏ, ‘ଇଙ୍ଗ୍ ପାଞ୍ଚ୍ ଯୋଡ଼ା ଉରିଃ ଆରାଣା କିରିଙ୍ଗ୍ କାଦିଙ୍ଗ୍ ଆଡୋଃ ଇନ୍‍କୁକେ ଶିୟୁଃ ଯାଞ୍ଚ୍ ଲାଗିନ୍ ସେନ୍ ତାନିଙ୍ଗ୍। ଇଙ୍ଗ୍ ଆମ୍‍କେ ଆର୍ଜି ମେତାନିଙ୍ଗ୍ ଇଙ୍ଗ୍‍କେ ଛାମା ତାଇଙ୍ଗ୍ ମେ।’ ଏନ୍ତେ ଏଟାଃ ମିହୋଡ଼୍ ନିଈ କାଜିକେଦାଏ, ‘ଇଙ୍ଗ୍ ଆଣାଦୀ କାନାଇଙ୍ଗ୍ ଏନାଲାଗିନ୍ ଇଙ୍ଗ୍ କାଇଙ୍ଗ୍ ସେନ୍ ଧାଡ଼ିୟା।’ ଏନ୍ ଦାସୀ ହିଜୁଃକେତେ ଆଜାଃ ଗୋମ୍‍କେ କେ ନେ କାଜି ଉଦୁବାଇ ଜାଏ। ଏନ୍ତେ ଅଡ଼୍ଆଃ ରେନ୍ ଗୋମ୍‍କେ ଖିସ୍ ତେ ହିଜୁଃକେତେ ଆଜାଃ ଦାସୀ କେ କାଜିକେଦାଏ, ‘ବାସ୍ତି ରାଃ ପିଟ୍ ରେ ହାର୍ ହୋରା କୋରେ ସେକାଡ଼୍ ସେନ୍ କେତେ ଗାରିବ୍ କୋକେ, ଠୁଠା କୋକେ, ଲାଙ୍ଗ୍ଡ଼ା କୋକେ ଆଡୋଃ ଆନ୍ଧା କୋକେ ନେତାଃ ଆଉ କୋମ୍।’ ଦାସୀ ଆଡୋଃଗି କାଜିକେଦାଏ ହେ ଗୋମ୍‍କେ ଚିଲ୍‍କା ଆମ୍ କାଜିଲେଦାମ୍ ଏନ୍‍ଲେକାଗି ରିକା କାନା ଏଣ୍ଡେ ହଗି ଆଡୋଃ ଜାଗା ମେନାଃ। ଗୋମ୍‍କେ ଦାସୀ କେ କାଜିକେଦାଏ, ‘ସାଣ୍ଡାକ୍ ପାଡ଼୍ ହାର୍ ଟୋଲା ହୋରା ପାଡ଼୍ ସେନ୍ ମେ ଆଡୋଃ ହୋଡ଼ୋକୋକେ ଜାବ୍ରାଇ ଆର୍ଜି କେତେ ଆଉକୋମ୍। ଏନାତେ ଇଙ୍ଗ୍ଆଃ ଅଡ଼୍ଆଃ ଫେରେଃ କେନୋଗା। ଚିୟାଃଚି ଇଙ୍ଗ୍ ଆମ୍‍କେ କାଜିତାନିଙ୍ଗ୍ ଚି ଆୟୁର୍ ରେନ୍ ନେୱତାକାନ୍ ହୋଡ଼ୋକୋ ଏତେ ଜେତାଏ ଇଙ୍ଗ୍ଆଃ ଭୋଜ୍ କେ କାକୋ ଚାଖାୟା।’ ” ଚିମ୍ତାଙ୍ଗ୍ ମିଃଥିମ୍ବା ହୋଡ଼ୋକୋ ଇନିଜାଃ ଲୋଃ ସେନ୍ ତାଇକେନାକୋ, ଏଣ୍ଡେ ଇନିଃ ବିୟୁର୍ କେତେ ଇନ୍‍କୁକେ କାଜିକେଦାଏ, “ଆଗାର୍ ଜେତାଏ ଇଙ୍ଗ୍ଆଃ ନାଡ଼େଏ ହିଜୁଗାଏ ହାର୍ ଆଜାଃ ଆପୁ ହାର୍ ଏଙ୍ଗା ହାର୍ କୁଡ଼ି ହାର୍ ହୋନ୍‍କୋକେ ହାର୍ ହାଗା କୋକେ ହଗି ହାର୍ ମିଶି କୋକେ ହଗି ମେନ୍ଦୋ ଆଜାଃ ଜୀଉ କେ ହଗି ଇଙ୍ଗ୍ଆଃ ତେ ଥିମ୍ବା ଦୁଲାଡ଼୍ ୟାଏ ଏଣ୍ଡେ ଇନିଃ ଇଙ୍ଗ୍ଆଃ ଚେଲା କାଏ ବାଇ ଧାଡ଼ିୟୋଗାଏ; ହାର୍ ଜାହାଁଏ ହ ଆଜାଃ କ୍ରୁଶ୍ କାଏ ଉଠାଓୟାଏ ଆଡୋଃ ଇଙ୍ଗ୍‍କେ କାଏ ଅତୋଙ୍ଗିଙ୍ଗ୍ ୟାଏ, ଇନିଃ ହଗି ଇଙ୍ଗ୍ଆଃ ଚେଲା କାଏ ବାଇ ଧାଡ଼ିୟୋଗାଏ। ଆପେ କୋଏତେ ଅକଏ ମେନିଜା ଅକନିଃ ମାରାଙ୍ଗ୍ ଅଡ଼୍ଆଃ ବାବାଇ ସାନାଙ୍ଗ୍ ତାନାଏ, ଆଡୋଃ ସିଦାରେ ଦୁବ୍ କେତେ ପାଇସା ଚିମିନ୍ ଖାର୍ଚା ହୋବାୱା କାଏ ଯୋଡ଼ାଅ ୟାଏ ଚି ପୁରା ଲାଗିନ୍ତେ ପେଡ଼େଏ ଇଙ୍ଗ୍ଆଃ ତାଃ ରେ ମେନାଃ ଚି କାହା? ନେକା କା ରିକାଏ ରେ ଚିମ୍ତା ଇନିଃ ନେଓ ବାଇୟାଏ ମାଗାର୍ କାଏ ବାଇ ଧାଡ଼ିୟାଏ, ଦୋ ସବେନ୍ ନେଲ୍‍ତାନ୍ କୋ ନେୟା କାଜିକେତେ ଇନିଃକେ ଲାନ୍ଦାୟି ୟାକୋ। ‘ନେ ହୋଡ଼ ବାଇ ଦୋ ଏଟେଃ କେଦାଏ ମାଗାର୍ ପୁରା କାଏ ଧାଡ଼ିକେଦା?’ ୟାଦୋ ନେକା ଅକନ୍ ରାଜା ମେନାଇଜା ଅକନିଃ ଏଟାଃ ରାଜା ଲୋଃ ଲାଡ଼ାଇ ଲାଗିନ୍ ସେନ୍ ତାନାଏ, ଆଡୋଃ ସିଦା ଦୁବ୍ କେତେ କାଏ ବିଚାର୍ ୟାଏ, ଚି ଏନ୍ ବିଶ୍ ହାଜାର୍ ସିପାହୀ କୋକେ ଇଦିକେତେ ଅକନାଃ ଇଙ୍ଗ୍ଆଃ ଚେତାନ୍ ରେ ହିଜୁଃ ତାନାକୋ, ଚିନାଃ ଇଙ୍ଗ୍ ଦାଶ୍ ହାଜାର୍ ସିପାହୀ କୋକେ ଇଦିକେତେ ଇନ୍‍କୁୱାଃ ସାମ୍ନା ରିକା ଧାଡ଼ିୟାଇଙ୍ଗ୍ ଚି କାହା? ନେକା କା ରିକାଏ ରେଦୋ ଇନିଜାଃ ସାଙ୍ଗିନ୍ ରେ ତାଇତାନ୍ ରେଗି ଇନିଃ ସାନ୍ଦେଶ୍ ଏହେମ୍ କୋକେ କୁଲ୍ କେତେ ମେଶା ଲାଗିନ୍ ସାନାଙ୍ଗାଏ। ଏନ୍‍ଲେକାଗି ଆପେ କୋଏତେ ଜେତାଏ ଆଜାଃ ସବେନାଃ କାଏ ବାଗେ ୟା ଇନିଃ ଇଙ୍ଗ୍ଆଃ ଚେଲା କାଏ ହୋବା ଧାଡ଼ିୟୋଗାଏ।” “ବୁଲୁଙ୍ଗ୍ ଦୋ ବେଶ୍ ତାନାଃ, ମେନ୍ଦୋ ଆଗାର୍ ବୁଲୁଙ୍ଗ୍ ରାଃ ଶିବିଲ୍ ବାଗ୍‍ଡ଼ାଅ କେନୋଃ ରେଦୋ ଏନାତେ ଅକନ୍ ଜିନିଷ୍ କେ ବୁଲୁଙ୍ଗ୍ଅଗା? ଏନା ନାଦୋ ଅତେ ରାଃ ନାଦୋ ମାଇଦ୍ ଲାଗିନ୍ କାମି ରେ ହିଜୁଗା, ଏନାକେ ଦୋ ହୋଡ଼ୋକୋ ବାହ୍‍ରେ ଦୁଡ଼ିଙ୍ଗ୍ କେୟାକୋ। ଅକେୟାଃ ଆୟୁମ୍ ଲାଗିନ୍ ଲୁତୁର୍ ମେନାଃ ରେଦୋ ଇନିଃ ଆୟୁମେ କାଏ।” ୟୀଶୁ ତାଃ ମିଃ ଥିମ୍ବା ମାଲ୍‍ହାରୋମ୍‍କୋ ହାର୍ ପାପୀ କୋ ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍ ଲାଗିନ୍ ହିଜୁଃ ତାଇକେନାକୋ। ମେନ୍ଦୋ ଫାରିସୀ ହୋଡ଼ୋକୋ ହାର୍ ଆଇନ୍ ଗୁରୁକୋ କୁର୍ବୁରାୱ ଜାନାକୋ ହାର୍ କାଜିକେଦାକୋ, “ନିଈ ଦୋ ପାପୀକୋ ଲୋଃ ମେଶାନ୍ ତାନାଏ ହାର୍ ଆକୋ ଲୋଃ ଜୋମ୍ ତାନାଏ।” ଏନ୍ତେ ୟୀଶୁ ଇନ୍‍କୁ କେ ନେ ଜୋନୋକା କାଜିକେଦାଏ, “ଆପେ କୋଏତେ ଅକଏ ମେନିଜା ଅକେୟାଃ ଶାଅ ଠୁ ମିଣ୍ଡୀକୋ ମେନାକୋୱା, ହାର୍ ଇନ୍‍କୁ ଏତେ ମିୟାଃ ମିଣ୍ଡୀ ଆଃ କେନୋଃରେ, ଦୋ ନିନ୍ୟାନାବେ କୋକେ ସୁନ୍‍ସାନ୍ ଜାଗା ପିଡ଼ି ରେ ବାଗେକେତେ, ଏନ୍ ଆଦାକାନ୍ ନିଈ କେ ଚିମିନ୍ ଜାକେଦ୍ କାଏ ନାମୋଗାଏ ଦାଣା କାଏ କାତିୟାଏ? ଆଡୋଃ ଚିମ୍ତା ନାମ୍ କେନୋଗାଏ, ଇମ୍ତା ଇନିଃ ଥିମ୍ବାଗି ରାଶିକା ତେ ଇନିଃକେ ତାରାଣ୍ ରେ ଗୋଃ କେତେ ଆଉକିୟାଏ। ଏନ୍ତେ ଆଜାଃ ଅଡ଼୍ଆଃ ରେ ହିଜୁଃକେତେ ଗାତିକୋକେ ହାର୍ ନାଡ଼େଏ-ଜାପାଃ ରେନ୍ କୋକେ ହୁଣ୍ଡି କେତେ କାଜିୟାଏ, ‘ଇଙ୍ଗ୍ଆଃ ଲୋଃ ରାଶିକାଅଃ ପେ, ଚିୟାଃଚି ଇଙ୍ଗ୍ଆଃ ଆଦାକାନ୍ ମିଣ୍ଡୀ ନାମ୍‍ଜାନାଏ।’ ଇଙ୍ଗ୍ ଆପେକେ କାଜିପେ ତାନିଙ୍ଗ୍ ଚି ନେଲେକାଗି ମିୟାଃ ପାପୀ, ପାପ୍ କାମି ବାଗେ କେରେ ଇନିଜାଃ ଲାଗିନ୍ତେ ସିର୍ମାଦିଶୁମ୍ ରେ ଇମିନାଙ୍ଗ୍ ରାଶିକା ହୋବାୱାଃ, ଚିମିନାଙ୍ଗ୍ ଚି ନିନ୍ୟାନାବେ ଧାର୍ମୀକୋ ଲାଗିନ୍ କାହୋବାୱା, ଅକନ୍ କୋ ପାପ୍ କାମି ବାଗେ ଛାବା କାଦାକୋ।” “ୟାଦୋ ଏନ୍‍ଲେକା ଅକନ୍ କୁଡ଼ି ମେନିଜା ଅକନିଜାଃ ଆଗାର୍ ଦାଶ୍ ଠୁ ରୂପା ସିକ୍କା ତାଇଲେନା, ହାର୍ ଏନାତେ ମିୟାଃ ଆଃ କେନୋଃରେ; ଇନିଃ ବାତୀ ଜୁଲ୍ କେତେ ହାର୍ ଅଡ଼୍ଆଃ କେ ଜଅଃ କେତେ, ଆଉରି ନାମୋଃ ସାନ୍ତେ ମୋନ୍ ଲାଗାଅ କେତେ ଚିନାଃ କାଏ ଦାଣାୟାଏ? ଚିମ୍ତାଙ୍ଗ୍ ଇନିଃ ନାମ୍ କେଦାଏ, ଦୋ ଇନିଃ ଆଜାଃ ଗାତିକୋକେ ଆଡୋଃ ନାଡ଼େଏ-ଜାପାଃ ରେନ୍ କୋକେ ହୁଣ୍ଡି କେତେ କାଜିୟାକୋୱାଏ, ‘ଇଙ୍ଗ୍ଆଃ ଲୋଃ ରାଶିକାଅଃ ପେ, ଚିୟାଃଚି ଇଙ୍ଗ୍ଆଃ ଆଦାକାନ୍ ଶିକା ନାମ୍‍ଜାନା।’ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ଏନ୍‍ଲେକାଗି ମିୟାଃ ପାପୀ, ପାପ୍ କାମି ବାଗେ କେରେ, ଇନିଜାଃ ଲାଗିନ୍ତେ ପାର୍ମେଶ୍ଵାର୍ ରାଃ ସିର୍ମାଦାସୀ କୋୱାଃ ସାମ୍‍ନାଙ୍ଗ୍ ରେ ରାଶିକା ହୋବାୱା।” ଏନ୍ତେ ୟୀଶୁ ଆଡୋଃ ମିୟାଃ ଜୋନୋକା କାଜିକେଦାଏ, “ମିୟାଃ ହୋଡ଼ ରାଃ ବାରିୟା ହୋନ୍‍କଡ଼ା ତାଇକେନାକିନ୍। ଇନ୍‍କୁ ଏତେ ହୁଡିଙ୍ଗ୍ ହୋନ୍‍କଡ଼ା ଆପୁ ତେକେ କାଜିକିଜାଏ, ‘ହେ ଆବା, ସାମ୍ପାତି ତେ ଅକନାଃ ଇଙ୍ଗ୍ଆଃ ଭାଗ୍ ତାନାଃ ଏନା ଇଙ୍ଗ୍‍କେ ଏମ୍ ତାଇଙ୍ଗ୍‍ମେ।’ ଏନ୍ତେ ଆପୁ ତେ ଆକିନ୍ କେ ଆଜାଃ ସାମ୍ପାତି ହାଟିଙ୍ଗ୍ ତାଃକୁୱାଏ। ଥିମ୍ବା ହୁଲାଙ୍ଗ୍ ହ କାହୋବା ଲେନା ଚି ହୁଡିଙ୍ଗ୍ ହୋନ୍‍କଡ଼ା ଆଜାଃ ସାମ୍ପାତି ସବେନାଃ ହୁଣ୍ଡି କେତେ ସାଙ୍ଗିନ୍ ଦିଶୁମ୍ ତେ ସେନୋଃ ଜାନାଏ, ହାର୍ ଏନ୍ତାଃରେ ଏତ୍କାନ୍ କାମି ରେ ସବେନ୍ ସାମ୍ପାତି କେ ଖାର୍ଚା ଛାବା ତାଦାଏ। ଚିମ୍ତାଙ୍ଗ୍ ସବେନ୍ ସାମ୍ପାତି କେ ଖାର୍ଚା ଛାବା କେଦାଏ, ଇମ୍ତା ଏନ୍ ଦିଶୁମ୍ ରେ ମାରାଙ୍ଗ୍ ଆକାଲ୍ ହୋବାଜାନା ହାର୍ ଇନିଃ ଗାରିବ୍ ବାଇଜାନାଏ ହାର୍ ଇନିଃ ତାଃ ଜୋଜୋମାଃ କାତାଇକେନା। ଏନାମେନ୍ତେ ଇନିଃ ଏନ୍ ଦିଶୁମ୍ ରେନ୍ ମିୟାଃ ବାସିନ୍ଦା ହୋଡ଼ ତାଃ କାମି ଲାଗିନ୍ ସେନ୍ ଜାନାଏ। ଏନ୍ତେ ଏନ୍ ହୋଡ଼ ଆଏଃକେ ଆଜାଃ ଅତେ ରେ ଶୂକ୍ରୀ ଗୁପିକୋ ଲାଗିନ୍ କୁଲ‍୍‍କିଜାଏ। ଏଣ୍ତେ ଇନିଃ ସାନାଙ୍ଗ୍ ତାଇନାଏ, ଚି ଏନ୍ ମାଲ୍‍ହାନ୍ ଯାଙ୍ଗ୍ କୋଏତେ ଅକନାଃ ଶୂକ୍ରୀ କୋ ଜୋମ୍ ତାଇକେନାକୋ ଆଜୋଗି ଜୋମ୍ କେତେ ବିୟୋଗାଏ; ଚିୟାଃଚି ଇନିଃକେ ଜେତାଏ ଜାହାନାଃ କାକୋ ଏମାଇ ତାଇନା। ଚିମ୍ତାଙ୍ଗ୍ ଇନିଃକେ ସେଣା ବୋଲୋ ଜାନା ଇମ୍ତା ଆଏଃ ଆପାନ୍ କେ କାଜିକେଦାଏ, ‘ଇଙ୍ଗ୍ଆଃ ଆପୁ ରାଃ ଚିମିନାଙ୍ଗ୍ କାମି-ନାଲା ହୋଡ଼ୋକୋ ତାଃ ଜୋମେୟାଃ ତେ ଥିମ୍ବା ଜୋଜୋମାଃ ମେନାଃ, ହାର୍ ଇଙ୍ଗ୍ ନେତାଃ ରେ ରେଙ୍ଗେଃ ତେ ଗୋଜୋଃ ତାନାଇଙ୍ଗ୍। ନାଆ ଇଙ୍ଗ୍ ବିରିଃ କେତେ ଇଙ୍ଗ୍ଆଃ ଆପୁ ତାଃ ସେନୋଃ ୱାଇଙ୍ଗ୍ ହାର୍ ଇନିଃକେ କାଜିୟାଇଙ୍ଗ୍ ହେ ଆବା ଇଙ୍ଗ୍ ପାର୍ମେଶ୍ଵାର୍ ରାଃ ବିରୋଧ୍ ରେ ହାର୍ ଆମାଃ ନେନେଲ୍ ରେ ପାପ୍ କାଦାଇଙ୍ଗ୍। ନାଆ ନେ ଲାଏକ୍ ହ କାଇଙ୍ଗ୍ ତାଇନ୍ ଜାନା, ଚି ଆମାଃ ହୋନ୍‍କଡ଼ା କାଜିୟୋଗାଇଙ୍ଗ୍, ଇଙ୍ଗ୍‍କେ ଆମାଃ ଦାସୀ ଲେକା ମାଣ୍ଡାଅ କିଙ୍ଗ୍‍ମେ।’ ଏନ୍ତେ ଇନିଃ ବିରିଃ କେତେ, ଏନ୍ ଦିଶୁମ୍ କେ ବାଗେ କେଦାଏ ହାର୍ ଆଜାଃ ଆପୁ ତାଃ ରୁଆଡ଼୍ ଜାନାଏ। ହାର୍ ଇନିଃ ସାଙ୍ଗିନ୍ ରେଗି ତାଇକେନାଏ ଚି ଇନିଜାଃ ଆପୁ ତେ ଇନିଃକେ ନେଲ୍‍କେତେ ଦାୟା କିଜାଏ, ହାର୍ ନିର୍ କେତେ ହାମ୍‍ବୁଃ କିଜାଏ, ହାର୍ ଚୋଅ କିଜାଏ। ହୋନ୍ ତେ କଡ଼ା କାଜିକେଦାଏ, ‘ହେ ଆବା, ଇଙ୍ଗ୍ ପାର୍ମେଶ୍ଵାର୍ ରାଃ ବିରୋଧ୍ ରେ ହାର୍ ଆମାଃ ନେନେଲ୍ ରେ ପାପ୍ କାଦାଇଙ୍ଗ୍, ନାଆ ନେ ଲାଏକ୍ ହ କାଇଙ୍ଗ୍ ତାଇନ୍ ଜାନା ଚି ଆମାଃ ହୋନ୍‍କଡ଼ା କାଜିୟୋଗାଇଙ୍ଗ୍।’ ମେନ୍ଦୋ ଆପୁ ତେ ଆଜାଃ ଦାସୀକୋକେ କାଜିକେଦାଏ, ‘ସେକାଡ଼୍ ପେ ବୁଗିନ୍ ଏତେ ବୁଗିନ୍ ଲିଜାଃ ଅଡୋଙ୍ଗ୍ କେତେ ଇନିଃକେ ତୁସିଙ୍ଗିପେ, ଆଡୋଃ ଇନିଜାଃ ତିଈ ରେ ମୁଦାମ୍, ଆଡୋଃ କାଟା ରେ ଖାର୍ପା ତୁସିଙ୍ଗିପେ। ହାର୍ ଆସୁଲ୍‍କାନ୍ ପାଶୁ ଆଉକେତେ ଗୋଜିପେ ଏନାତେ ଆବୁ ଜୋମେୟାବୁ ହାର୍ ରାଶିକାନାବୁ। ଚିୟାଃଚି ଇଙ୍ଗ୍ଆଃ ହୋନ୍‍କଡ଼ା ଗୋଏଃ ଲେନ୍ ତାଇନାଏ ହାର୍ ଜୀହିଃ ରୁଆଡ଼୍ ଜାନାଏ, ଆଃ ଲେନ୍ ତାଇନାଏ, ନାଆ ନାମ୍ ରୁଆଡ଼୍ କାନାଏ।’ ହାର୍ ଇନ୍‍କୁ ରାଶିକା ଜାନାକୋ। ଇମ୍ତା ଆଜାଃ ମାରାଙ୍ଗ୍ ହୋନ୍‍କଡ଼ା ଲୋୟୋଙ୍ଗ୍ ପାଡ଼୍ ତାଇକେନାଏ। ଚିମ୍ତା ଇନିଃ ଅଡ଼୍ଆଃ ନାଡ଼େଏ ହିଜୁଃ ସେଟେର୍ ଜାନାଏ, ଦୋ ଇନିଃ ଦୁରାଙ୍ଗ୍-ଷାଡି ହାର୍ ସୁସୁଙ୍ଗ୍ ତାନ୍ ଆୱାଜ୍ ଆୟୁମ୍ କେଦାଏ। ଏନ୍ତେ ଇନିଃ ମିୟାଃ ଦାସୀକେ କେଡ଼ାକେତେ କୁଲିକିଜାଏ, ‘ନେୟା ଚିନାଃ ହୋବାଅଃ ତାନା?’ ଇନିଃ ହିନିଃକେ କାଜିକେଦାଏ, ‘ଆମାଃ ହୁଡିଙ୍ଗ୍ ହାଗା ଅଡ଼୍ଆଃ ହିଜୁଃ ରୁଆଡ଼୍ କାନାଏ, ହାର୍ ଆମାଃ ଆପୁ ଆସୁଲ୍‍କାନ୍ ପାଶୁ ଗେଃ ରିକା କାଦାଏ, ଚିୟାଃଚି ଇନିଃ ମାଜାତେ ଗି ହିଜୁଃ ଜାନାଏ।’ ନେୟା ଆୟୁମ୍‍କେତେ ଇନିଃ ଖିସ୍ ତେ ଫେରେଃ ଜାନାଏ ହାର୍ ଅଡ଼୍ଆଃ ଭିତାର୍ କାଏ ସେନ୍ ସାନାଙ୍ଗ୍ କେନାଏ, ମେନ୍ଦୋ ଇନିଜାଃ ଆପୁ ବାହାରି ହିଜୁଃକେତେ ଇନିଃକେ ବୁଝାଅ କିଜାଏ। ଇନିଃ ଆପୁ ତେକେ କାଜିକେଦାଏ, ‘ଇଙ୍ଗ୍ ଆମାଃ ଲୋଃ ଇମିନ୍ ବାରାଶ୍ ଏତେ ଦାସୀ ଲେକା ଖାଟାଅଃ ତାନିଙ୍ଗ୍ ଆଡୋଃ ଚିଉଲା ହ ଆମାଃ କାଜିକେ କାଇଙ୍ଗ୍ ମାନା କାଦା, ଏଣ୍ଡେ ହ ଆମ୍ ଇଙ୍ଗ୍‍କେ ମିୟାଃ କାଟିଃ ମାରାଙ୍ଗ୍ ପାଶୁ ହ କାମ୍ ଏମ୍‍କେଦିଙ୍ଗା ଚି ଇଙ୍ଗ୍ ଇଙ୍ଗ୍ଆଃ ଗାତିକୋ ଲୋଃ ରାଶିକାଅଃ ତେୟାଃଇଙ୍ଗ୍। ମେନ୍ଦୋ ଚିମ୍ତା ଆମାଃ ନେ ହୋନ୍‍କଡ଼ା, ଅକନିଃ ଆମାଃ ସାମ୍ପାତି କୋକେ ବେଶ୍ୟା କୋୱାଃ ରେ ଖାର୍ଚା ଛାବା ତାଦାଏ, ଇନିଃ ହିଜୁଃ ଜାନାଏ, ଦୋ ଇନିଜାଃ ଲାଗିନ୍ ଆମ୍ ଆସୁଲ୍‍କାନ୍ ପାଶୁ କେ ଗେଃ ରିକା କେଃକୋୱାମ୍।’ ଆପୁ ତେ ମାରାଙ୍ଗ୍ ହୋନ୍‍କଡ଼ା କେ କାଜିକେଦାଏ, ‘ବାବୁ, ଆମ୍ ଇଙ୍ଗ୍ଆଃ ଲୋଃ ସବେନ୍ ଇମ୍ତା ମେନାମେୟା, ହାର୍ ଅକନାଃ ଇଙ୍ଗ୍ଆଃ ତାନାଃ ଏନା ସବେନାଃ ଆମାଃ ଗି ତାନାଃ। ମେନ୍ଦୋ ନାଆ ପାରାବେନ୍ ହାର୍ ରାଶିକାନ୍ ଚାହି ତାଇକେନା, ଚିୟାଃଚି ଆମାଃ ହୁଡିଙ୍ଗ୍ ହାଗା ଗୋଏଃ ଲେନ୍ ତାଇନାଏ, ହାର୍ ଜୀହିଃ ରୁଆଡ଼୍ ଜାନାଏ, ଆଃ ଲେନ୍ ତାଇନାଏ, ନାଆ ନାମ୍ ରୁଆଡ଼୍ କାନାଏ।’ ” ୟୀଶୁ ଆଡୋଃଗି ଆଜାଃ ଚେଲାକୋକେ ଜୋନୋକା ତେ କାଜିୟାଃକୋୱାଏ, “ମିୟାଃ କିଶାଣ୍ ହୋଡ଼ ରାଃ ମିହୋଡ଼୍ ମୁନ୍‍ସି ତାଇକେନାଏ, ହାର୍ ହୋଡ଼ୋକୋ ମୁନ୍‍ସି କେ ଗୋମ୍‍କେ ରାଃ ନାଡ଼େଏ ରେ ଦୋଷ୍ ଲାଗାଅ କିଜାକୋ ଚି ଇନିଃ ଆମାଃ ସବେନ୍ ସାମ୍ପାତି କେ ସାମା ରେ ଖାର୍ଚା କେ ତାନାଏ। ଏନାମେନ୍ତେ କିଶାଣ୍ ହୋଡ଼ ଏନ୍ ମୁନ୍‍ସି କେ କେଡ଼ାକେତେ କାଜିକେଦାଏ, ‘ନେୟା ଚିନାଃ ତାନାଃ ଅକନାଃ ଇଙ୍ଗ୍ ଆମାଃ ବିଷାୟ୍ ରେ ଆୟୁମ୍ ତାନିଙ୍ଗ୍? ଆମ୍ ଇଙ୍ଗ୍ଆଃ ପାଇସା କେ କୋତାଃ-କୋତାଃ ଖାର୍ଚା କେଦାମ୍ ଏନାରାଃ ହିସାବ୍ ଏମାଇଙ୍ଗ୍ ମେ, ଚିୟାଃଚି ଆମ୍ ଆୟୁର୍ ତେ ଇଙ୍ଗ୍ଆଃ ମୁନ୍‍ସି କାମ୍ ତାହିନା।’ ଏନ୍ତେ ମୁନ୍‍ସି ପାହୋମ୍ କେଦାଏ, ‘ନାଆ ଇଙ୍ଗ୍ ଚିନାଃ ରିକାୟାଇଙ୍ଗ୍? ଚିୟାଃଚି ଇଙ୍ଗ୍ଆଃ ଗୋମ୍‍କେ ନାଆ ମୁନ୍‍ସି କାମି ତେ ଅଡୋଙ୍ଗିଙ୍ଗ୍ ତାନାଏ। ହାସା ଉର୍ ଦୋ ଇଙ୍ଗ୍ଆଃ ତେ କା ହୋବାୱା, ହାର୍ ଆସି ଜୋମ୍ ଦୋ ଗିୟୁଃ ଆଟ୍‍କାରିଙ୍ଗ୍ ୟା। ନାଆ ଇଙ୍ଗ୍ ସାରି କେଦାଇଙ୍ଗ୍ ଚି ଚିନାଃ ରିକାୟାଇଙ୍ଗ୍, ଏନାତେ ଚିମ୍ତାଙ୍ଗ୍ ଇଙ୍ଗ୍ ମୁନ୍‍ସି କାମି ତେ ଅଡୋଙ୍ଗୋଗାଇଙ୍ଗ୍ ଇମ୍ତାଙ୍ଗ୍ ହୋଡ଼ୋକୋ ଇଙ୍ଗ୍‍କେ ଆକୋୱାଃ ଅଡ଼୍ଆଃ ରେ ଦେଙ୍ଗା ଏମାଇଙ୍ଗ୍ ୟାକୋ।’ ଏନ୍ତେ ଇନିଃ ଆଜାଃ ଗୋମ୍‍କେ ତାଃ ଏତେ ରିଣୀ ଟାକା ଇଦିଲେଃ ହୋଡ଼ କୋକେ ମିହୋଡ଼୍-ମିହୋଡ଼୍ କେତେ କେଡ଼ାକେଃକୋୱାଏ ହାର୍ ସିଦା ରେନିଃ କେ କୁଲିକିଜାଏ, ‘ଆମାଃ ଚେତାନ୍ ରେ ଇଙ୍ଗ୍ଆଃ ଗୋମ୍‍କେ ରାଃ ଚିମିନାଙ୍ଗ୍ ରିଣୀ ମେନାଃ? ଇନିଃ କାଜିକେଦାଏ, ଶାଅ ମାନ୍ ଜାଇତୁନ୍ ସୁନୁମ୍,’ ଏନ୍ତେ ଇନିଃ ହିନିଃକେ କାଜିକିଜାଏ, ‘ଆମାଃ ରାସୀଦ୍ ଇଦିମ୍, ଜାଲ୍‍ଦି ଦୁବ୍ ମେ ହାର୍ ଆମାଃ ନାୱା ଖାତା ରେ ପାଚାଶ୍ ଅଲେମ୍।’ ହାର୍ତେ ଏଟାଃ ନିଈକେ କୁଲିକିଜାଏ, ‘ଆମାଃ ଚେତାନ୍ ରେ ଚିମିନାଙ୍ଗ୍ ରିଣୀ ମେନାଃ?’ ଇନିଃ କାଜିକେଦାଏ, ‘ଶାଅ ମାନ୍ ଗହମ୍,’ ଏନ୍ତେ ହିନିଃ ଇନିଃକେ କାଜିକେଦାଏ, ‘ଆମାଃ ରାସୀଦ୍ ଇଦିମ୍, ଜାଲ୍‍ଦି ଦୁବ୍ ମେ ହାର୍ ଆମାଃ ନାୱା ଖାତା ରେ ଆଶି ଅଲେମ୍।’ ଗୋମ୍‍କେ ଏନ୍ ଆଧାର୍ମୀ ମୁନ୍‍ସି କେ ଇନିଜାଃ ଚାଲାକି କାମି କେ ନେଲ୍ କେତେ ଇନିଃକେ ନୁତୁମ୍ କିଜାଏ। ଚିୟାଃଚି ନେ ଅତେଦିଶୁମ୍ ରେନ୍ ହୋଡ଼ୋକୋ ଆକୋୱାଃ ସାମାୟ୍ ରେନ୍ ହୋଡ଼ୋକୋ ଲୋଃ ସବେନ୍ ହୁଲାଙ୍ଗ୍ ରାଃ ବେଓହାର୍ ରେ ମାସ୍କାଲ୍ ରେନ୍ ହୋଡ଼ୋକୋ ଏତେ ଥିମ୍ବା ଚାଲାକ୍ ମେନାକୋୱା। ଇଙ୍ଗ୍ ଆପେକେ କାଜିପେ ତାନିଙ୍ଗ୍ ଅତେଦିଶୁମ୍ ରାଃ ଧାନ୍ ତେ ସେୱା କେତେ ଗାତି ବାଇ କପେ, ଏନାତେ ଚିମ୍ତା ଆପେୟାଃ ଗୋନୋଏଃ ତାୟୋମ୍ତେ ଏନା ଛାବା କୋୱା ଏନା ଆପେକେ ସିର୍ମାଦିଶୁମ୍ ତେ କାଟୁଣ୍ଡୁ ଅଡ଼୍ଆଃ ରେ ସେଟେର୍ ପେୟାଏ। ଅକଏ ହୁଡିଙ୍ଗ୍ ତେ ହୁଡିଙ୍ଗ୍ ରେ ବିଶ୍ଵାସ୍ ଲେକାନିଃ ମେନିଜା, ଇନିଃ ଥିମ୍ବା ରେହ ବିଶ୍ଵାସ୍ ଲେକାନିଃ ମେନିଜା, ହାର୍ ଅକଏ ହୁଡିଙ୍ଗ୍ ଏତେ ହୁଡିଙ୍ଗ୍ ରେ ବିଶ୍ଵାସ୍ ଲେକାନିଃ ବାଙ୍ଗୁଇଜା ଇନିଃ ଥିମ୍ବା ରେହ ବିଶ୍ଵାସ୍ ଲେକାନିଃ ବାଙ୍ଗୁଇଜା। ଏନାମେନ୍ତେ ଚିମ୍ତାଙ୍ଗ୍ ଆପେ ଅତେଦିଶୁମ୍ ରାଃ ଧାନ୍ ରେ ବିଶ୍ଵାସ୍ ଲେକାନିଃ କାପେ ବାଇଜାନା, ଏଣ୍ଡେ ସିର୍ମାଦିଶୁମ୍ ରାଃ ଧାନ୍ ଆପେକେ ଅକଏ ଏମାପେୟାଏ? ଆଗାର୍ ଆପେ ଏଟାଃ ନିଜାଃ ଧାନ୍ ରେ ବିଶ୍ଵାସ୍ ଲେକାନିଃ କାପେ ବାଇଜାନା, ଏଣ୍ଡେ ଅକନାଃ ଆପେୟାଃ ତାନାଃ ଏନାକେ ଅକଏ ଆପେକେ ଏମାପେୟାଏ।” “ଜାହାନ୍ ଦାସୀ ବାରିୟା ଗୋମ୍‍କେ କେ କାଏ ସେୱା ଧାଡ଼ିୟାଏ, ଚିୟାଃଚି ଇନିଃ ମିୟାଃ ଲୋଃ ଖିସ୍ ହାର୍ ଏଟାଃ ଲୋଃ ଦୁଲାଡ଼୍ ମାଣ୍ଡାଅ ୟାଏ, ୟାଦୋ ଇନିଃ ମିହୋଡ଼୍ ଲୋଃ ମେଶା କେତେ ତାଇନୋଗାଏ ହାର୍ ଏଟାଃ ନିଈ କେ ହିଲାଙ୍ଗିୟାଏ। ଆପେ ପାର୍ମେଶ୍ଵାର୍ ହାର୍ ଧାନ୍ ବାରାନାଃ କେ କାପେ ସେୱା ଧାଡ଼ିୟା।” ଫାରିସୀ ହୋଡ଼ୋକୋ ଅକନ୍‍କୋ ଟାକା ରାଃ ଲୋଭୀ ତାଇକେନାକୋ, ନେ କାଜି ଆୟୁମ୍‍କେତେ ଇନିଃକେ ଲାନ୍ଦା କିଜାକୋ। ୟୀଶୁ ଇନ୍‍କୁକେ କାଜିକେଦାଏ, “ଆପେ ଦୋ ହୋଡ଼ୋକୋୱାଃ ସାମ୍ନାଙ୍ଗ୍ ରେ ଆପେ ଆପାନ୍ କେ ଧାର୍ମୀ ବାଇ ତାନାପେ, ମେନ୍ଦୋ ପାର୍ମେଶ୍ଵାର୍ ଆପେୟାଃ ମୋନ୍ କେ ସାରିୟାଏ, ଚିୟାଃଚି ଅକନ୍ ଜିନିଷ୍‍କୋ ହୋଡ଼ୋ କୋୱାଃ ନେପେଲ୍ ରେ ମାଇନ୍ ନାମେ ଲେକା ତାନାଃ, ଏନା ପାର୍ମେଶ୍ଵାର୍ ରାଃ ନାଡ଼େଏଃ ରେ ହିଲାଙ୍ଗ୍ ତାନାଃ। ମୁଶା ନାବୀ ରାଃ ଆଇନ୍ ହାର୍ ନାବୀ କୋୱାଃ ସାନ୍ଦେଶ୍ ଯୋହାନ୍ ବାପ୍ତିସ୍ମା ଏହେମ୍ ନିଜାଃ ହିଜୁଃ ଜାକେଦ୍ ତାଇକେନା, ଏନ୍ ସାମାୟ୍ ଏତେ ପାର୍ମେଶ୍ଵାର୍ ରାଃ ରାଇଜ୍ ରାଃ ସୁସାମାଚାର୍ ଉଦୁବ୍ ଆଉଅଃତାନା, ଆଡୋଃ ସବେନ୍ କୋ ଏନା ରେ ପେଡ଼େଏ ତେ ବୋଲୋଃ ତାନାକୋ। ରିମିଲ୍‍ଦିଶୁମ୍ ହାର୍ ଅତେ ରାଃ ଛାବାଅଃ ତେୟାଃ ସାହାଜ୍ ତାନାଃ ମେନ୍ଦୋ ମୁଶା ନାବୀ ରାଃ ଆଇନ୍ ଏତେ ମିୟାଃ ବିନ୍ଦୁ ହ ଛାବା କେନୋଃ ତେୟାଃ ସାହାଜ୍ ନାହାଲା।” “ଜେଲେକା, ଜାହାଁଏ ଆଜାଃ କୁଡ଼ି କେ ବାଗେ କେତେ ଏଟାଃ ନିଈ ଲୋଃ ଆଣାଦୀ ତାନାଏ, ଇନିଃ ବ୍ୟାଭିଚାର୍ ତାନାଏ, ହାର୍ ଜାହାଁଏ ନେକାନ୍ ବାଗେକାନ୍ ଏରା କେ ଆଣାଦୀ ତାନାଏ ହିନିଃ ହଗି ବ୍ୟାଭିଚାର୍ ତାନାଏ।” “ମିୟାଃ କିଶାଣ୍ ହୋଡ଼ ତାଇକେନାଏ ଅକନିଃ ଥିମ୍ବା ଗୋନୋଙ୍ଗାନ୍ ଲିଜାଃ ତୁସିଙ୍ଗ୍ଏନ୍ ତାଇନାଏ ହାର୍ ସବେନ୍ ହୁଲାଙ୍ଗ୍ ସୁକୁ ରେ ତାଇନ୍ ତାଇନାଏ ହାର୍ ବୁଗିନ୍-ବୁଗିନ୍ ଜୋଜୋମାଃ ଜୋମ୍ ତାଇନାଏ। ଲାଜାର୍ ନୁତୁମ୍ ମିୟାଃ ଆସିଜୋମ୍ ନିଈ ପୁରା ହୋଡ଼ମୋ ରେ ଘାଅ ତେ ଫେରେଜାକାନ୍ ତାଇକେନାଏ, ଇନିଃ କିଶାଣ୍ ହୋଡ଼ ରାଃ ଦୁହାର୍ ନାଡ଼େଏ ଦୁବ୍ ବାଗେଅଃ ତାଇନାଏ, ହାର୍ ଇନିଃ ସାନାଙ୍ଗ୍ ତାଇକେନାଏ ଚି କିଶାଣ୍ ହୋଡ଼ ରାଃ ଟେବୁଲ୍ ଏତେ ଉୟୁଃକାନ୍ ସାକ୍‍ଡ଼ି କେ ଜୋମ୍ କେତେ ଆଜାଃ ଲାହେଃ ଫେରେଜେୟାଏ। ନେତାଃ ସାନ୍ତେ ଚି ସେତାକୋ ହ ହିଜୁଃ କେତେ ଇନିଜାଃ ଘାଅ କୋକେ ଜାଲି ତାଇକେନାକୋ। ହୁଡିଙ୍ଗ୍ ହୁଲାଙ୍ଗ୍ ତାୟୋମ୍ତେ ଏନ୍ ଆସିଜୋମ୍ ହୋଡ଼ ଗୋଏଃ ଜାନାଏ, ହାର୍ ସିର୍ମାଦାସୀ କୋ ଇନିଃକେ ଇଦିକେତେ ଆବୁୱାଃ ପୁର୍ଖା-ହୋଡ଼ ଆବ୍ରାହାମ୍ ଲୋଃ ତାଇନ୍ ଲାଗିନ୍ ସେଟେର୍ ତାଇଜାକୋ। ଏନ୍ କିଶାଣ୍ ହୋଡ଼ ହଗି ଗୋଏଃ ଜାନାଏ ହାର୍ତେ ତୋପା ଜାନାଏ, ହାର୍ ନାରାକ୍ ରେ ଇନିଃ ଦୁକୁ ରେ ଉୟୁଃକାନ୍ ଗି ଆଜାଃ ମେଏଃ ଆରିଃ କେଦାଏ, ହାର୍ ସାଙ୍ଗିନ୍ ଏତେ ଲାଜାର୍ କେ ଆବ୍ରାହାମ୍ ରାଃ ନାଡ଼େଏ ନେଲ୍ କିଜାଏ। ଏନ୍ତେ ଇନିଃ କାଉରି କେତେ କାଜିକେଦାଏ, ‘ହେ ଆବା ଆବ୍ରାହାମ୍, ଇଙ୍ଗ୍‍କେ ଦାୟା କେତେ ଲାଜାର୍ କେ କୁଲ୍ ତାଇମ୍, ଚି ଇନିଃ ଆଜାଃ ସାର୍ସାର୍ ଚୋଟି କେ ଦାଆ ରେ ଡୁବିଃ କେତେ ଇଙ୍ଗ୍ଆଃ ଆଲାଙ୍ଗ୍ କେ ଥାଣ୍ଡା ତାକାଏ, ଚିୟାଃଚି ଇଙ୍ଗ୍ ନେ ସେଙ୍ଗେଲ୍ ରେ କାଲ୍‍ପାଅଃ ତାନିଙ୍ଗ୍।’ ମେନ୍ଦୋ ଆବ୍ରାହାମ୍ କାଜିକେଦାଏ, ‘ହେ ବାବୁ, ପାହୋମେମ୍ ଚି ଆମ୍ ଆମାଃ ଜୀଦାନ୍ ରେ ବେଶ୍ ଜିନିଷ୍ କୋ ନାମ୍ ଛାବା କାଦାମ୍, ହାର୍ ଏନ୍‍ଲେକା ଗି ଲାଜାର୍ ଖାରାପ୍ ଜିନିଷ୍ କୋ, ମେନ୍ଦୋ ଇନିଃ ନେତାଃ ରେ ସୁକୁ ନାମ୍ ତାନାଏ ହାର୍ ଆମ୍ କାଲ୍‍ପାଅଃ ତାନାମ୍। ନେ କାଜିକୋ ବାଗିକେତେ, ଆଲେୟାଃ ହାର୍ ଆମାଃ ଥାଲା ରେ ମିୟାଃ ମାରାଙ୍ଗ୍ ଡୋଡା ମେନାଃ ଏନାତେ ଅକଏ ନେତାଃ ଏତେ ହାନ୍ ଫାରୋମ୍ ଆମାଃ ତାଃ ସେନ୍ ସାନାଙ୍ଗ୍ ୟାଏ, ଇନିଃ ସେନ୍ କାଏ ଧାଡ଼ିୟାଏ, ହାର୍ ନା ହାନ୍ ଫାରୋମ୍ ଏତେ ଜେତାଏ ନେ ଫାରୋମ୍ ଆଲେୟାଃ ତାଃ ହିଜୁଃ ଧାଡ଼ିୟାଏ।’ ଇନିଃ କାଜିକେଦାଏ, ‘ଏଣ୍ଡେ ହେ ଆବା, ଇଙ୍ଗ୍ ଆମ୍‍କେ ଆର୍ଜି ମେତାନିଙ୍ଗ୍ ଚି ଆମ୍ ଇନିଃକେ ଇଙ୍ଗ୍ଆଃ ଆପୁ ରାଃ ଅଡ଼୍ଆଃ କୁଲ୍ ତାଇମ୍, ଚିୟାଃଚି ଇଙ୍ଗ୍ଆଃ ପାଞ୍ଚ୍ ଝାନ୍ ହାଗାକୋ ମେନାକୋୱା, ଇନିଃ ଇନ୍‍କୁୱାଃ ନାଡ଼େଏ ନେ କାଜି କୋରାଃ ବିଷାୟ୍ ରେ ଚେତାଓ କୋୱାଏ, କାରେଦୋ ଇନ୍‍କୁ ହଗି ନେ ଦୁକୁ ରାଃ ଜାଗା ରେ ହିଜୁଃ କୋୱାକୋ।’ ଆବ୍ରାହାମ୍ ଇନିଃକେ କାଜିକେଦାଏ, ‘ଇନ୍‍କୁ ତାଃ ଦୋ ମୁଶା ନାବୀ ରାଃ ଆଇନ୍ ହାର୍ ନାବୀକୋୱାଃ ପୁଥିକୋ ମେନାଃ, ଇନ୍‍କୁ ଏନାକେ ଆୟୁମେକାକୋ।’ ଇନିଃ କାଜିକେଦାଏ, ‘କାହା, ହେ ଆବା, ଆବ୍ରାହାମ୍, ଆଗାର୍ ଜେତାଏ ଗୋଜାକାନ୍ କୋଏତେ ଆକୋ ତାଃ ସେନାଏ, ଦୋ ଇନ୍‍କୁ ପାପ୍ କାମି ବାଗେ ୟାକୋ।’ ଆବ୍ରାହାମ୍ ଇନିଃକେ କାଜିକେଦାଏ, ‘ଚିମ୍ତାଙ୍ଗ୍ ଇନ୍‍କୁ ମୁଶା ନାବୀ ରାଃ ଆଇନ୍ ହାର୍ ନାବୀକୋୱାଃ ପୁଥିକେ କାକୋ ମାନାତିଙ୍ଗ୍ ତାନା, ଏଣ୍ଡେ ଆଗାର୍ ଗୋଜାକାନ୍ କୋଏତେ ଜେତାଏ ହଗି ଜୀବିରିଦୋଗାଏ ଏଣ୍ଡେ ହଗି ଇନିଜାଃ କାକୋ ବିଶ୍ଵାସେୟା।’ ” ମୁଶିଙ୍ଗ୍ ୟୀଶୁ ଆଜାଃ ଚେଲାକୋକେ କାଜିକେଃକୋୱାଏ, “ହୋବା କା ଧାଡ଼ିୟୋଗା ଚି ବିଶ୍ଵାସ୍ ବାଗେ ଲାଗିନ୍ କାକୋ ଉସ୍କୁର୍ ରିକାୱା, ମେନ୍ଦୋ ହାୟ୍, ଏନ୍ ହୋଡ଼ ଚେତାନ୍ ରେ ଅକନିଜାଃ ଚାଲ୍ତେ ଏନାକୋ ହିଜୁଗା! ଅକଏ ନେ ହୁଡିଙ୍ଗ୍ କୋଏତେ ମିହୋଡ଼୍ କେ ବିଶ୍ଵାସ୍ ବାଗେ ଲାଗିନ୍ ଉସ୍କୁର୍ ରିକାୟାଏ, ଇନିଜାଃ ଲାଗିନ୍ ନେୟା ବେଶ୍ ହୋବାଅଃ ତେୟାଃ, ଚି ମିୟାଃ ମାରାଙ୍ଗ୍ ଜାଁତା ଦିରି ଇନିଜାଃ ହୋଟୋଃ ରେ ହାକା ଜାନ୍ତେ, ଆଡୋଃ ଇନିଃ ସାମୁଦାର୍ ରେ ଦୁଡ଼ିଙ୍ଗ୍ ଜାନ୍ତେ। ହୋସିଆର୍ ତାଇନୋଃ ପେ; ଆଗାର୍ ଆପେୟାଃ ହାଗା ପାପ୍ ରିକାଏ ରେ ଇନିଃକେ ବୁଝାୱିପେ, ଆଡୋଃ ଆଗାର୍ ପାପ୍ କାମି ବାଗେ ତାରେ ଇନିଃକେ ଛାମାଇପେ। ଆଗାର୍ ମୁଶିଙ୍ଗ୍ ସିଂଙ୍ଗ୍‍ସାଟୁବ୍ ରେ ଇନିଃ ସାତ୍ ଧୋର୍ ଆମାଃ ବିରୋଧ୍ ରେ ପାପ୍ ରିକାଏ ରେ ଆଡୋଃ ସାତ୍ ଧୋର୍ ଆମାଃ ନାଡ଼େଏ ହିଜୁଃକେତେ କାଜି ରେ, ‘ଇଙ୍ଗ୍ ପାସ୍ତାଅଃ ତାନିଙ୍ଗ୍,’ ଏଣ୍ଡେ ଇନିଃକେ ଛାମା ତାଇମେ।” ଏଣ୍ଡେ ପ୍ରାଭୁ ୟୀଶୁ ରାଃ କୁଲାକାନ୍ ଚେଲାକୋ ଆଏଃକେ କାଜିକିଜାକୋ, “ଆଲେୟାଃ ବିଶ୍ଵାସ୍ କେ ହାରା ତାମେ।” ପ୍ରାଭୁ କାଜିକେଦାଏ, “ଆଗାର୍ ଆପେ ତାଃ ମିୟାଃ ମାନି ରାଃ ଯାଙ୍ଗ୍ ଲେକା ହ ବିଶ୍ଵାସ୍ ତାଇନ୍‍ତେ, ଏଣ୍ଡେ ଆପେ ନେ ତୁତ୍ ଦାରୁ କେ କାଜିତେପେ ଚି ରେହେଃ ତେ ପାଟୁବ୍ କେତେ ସାମୁଦାର୍ ରେ ରୋଏ କେନୋଃମେ, ଏଣ୍ଡେ ଏନା ଆପେୟାଃ ମାନାତିଙ୍ଗ୍ ତେୟାଃଏ।” “ଆପେ କୋଏତେ ନେଲେକା ଅକଏ ମେନିଜା, ଅକେୟାଃ ଦାସୀ ଶିୟୁଃ କାତେୟାଏ, ୟାଦୋ ମିଣ୍ଡୀ ଗୁପି କାତେୟାଏ, ହାର୍ ଚିମ୍ତା ଇନିଃ ପିଡ଼ି ଏତେ ରୁଆଡ଼ାଏ, ଏଣ୍ଡେ ଚିନାଃ ଇନିଃକେ କାଜିୟାଏ, ‘ସେକାଡ଼୍ ହିଜୁଃକେତେ ଜୋମ୍ ଦୁବ୍ ମେ?’ ଚିନାଃ ନେୟା କାଏ କାଜିୟାଏ, ‘ଇଙ୍ଗ୍ଆଃ ଜୋଜୋମାଃ ବାଇୟେମେ, ହାର୍ ଇଙ୍ଗ୍ଆଃ ଜୋମେ ନୁୱେ ସାନ୍ ମାୟାଙ୍ଗ୍ ସାକ୍ତାଅ କେତେ ଇଙ୍ଗ୍ଆଃ ସେୱା ରିକାଏମେ; ଏନା ତାୟୋମ୍ତେ ଆମ୍ ହ ଜୋମେମ୍ ନୁୱେମ୍?’ ଚିନାଃ ଇନିଃ ଏନ୍ ଦାସୀ କେ ଧାନ୍ୟାବାଦ୍ ଏମାଇୟାଏ, ଚି ଇନିଃ ଏନ୍ କାମି କୋକେ ରିକା କେଦାଏ ଅକନାଃ ଆଚୁ ଲେନ୍ ତାଇନା? ନେଲେକାତେ ଆପେ ହଗି ଚିମ୍ତାଙ୍ଗ୍ ଏନ୍ ସବେନ୍ କାମିକୋ କାମି ଛାବା କେୟାପେ ଅକନାଃ ଆପେକେ ଆଚୁ ଏମାକାନ୍ ତାଇକେନା, ଏଣ୍ଡେ କାଜିପେ, ‘ଆଲେ କାମି ଲାଏକ୍ ଦାସୀକୋ ନାହାଲାଲେ, ଅକନାଃ ଆଲେକେ ରିକାତାଇକେନା ଆଲେ ଏନା ଭାଇର୍ ରିକାକେଦାଲେ।’ ” ନେଲେକା ହୋବାଜାନା ଚି ୟୀଶୁ ହାର୍ ଆଜାଃ ଚେଲାକୋ ୟୀରୁଶାଲେମ୍ ସାହାର୍ ସେନ୍ ଇମ୍ତା ସାମାରୀୟା ଜିଲ୍ଲା ଆଡୋଃ ଗାଲିଲୀ ଜିଲ୍ଲା ରାଃ ଥାଲା ହୋବାକେତେ ସେନୋଃ ତାଇକେନାକୋ। ମିୟାଃ ହାତୁ ବୋଲୋତାନ୍ ଇମ୍ତା ଇନ୍‍କୁକେ ଦାଶ୍ ଝାନ୍ କୋଢ଼୍ ବେମାର୍ ରେନ୍ ହୋଡ଼ୋକୋ ନାମ୍ ଜାନାକୋ। ଇନ୍‍କୁ ସାଙ୍ଗିନ୍ ରେ ତିଙ୍ଗୁ କେତେ, କାଉରି କେତେ କାଜିକେଦାକୋ, “ହେ ୟୀଶୁ, ହେ ଗୋମ୍‍କେ, ଆଲେ ଚେତାନ୍ ରେ ଦାୟାଏମେ!” ଇନିଃ ଇନ୍‍କୁକେ ନେଲ୍ କେତେ କାଜିକେଃକୋୱାଏ, “ଜୁ ୟୀରୁଶାଲେମ୍ ମାନ୍ଦିର୍ ସେନୋଃପେ ହାର୍ ଆପେ ଆପାନ୍ କେ ୟାଜାକ୍ କୋକେ ଦେଖାୱେପେ।” ହାର୍ ହୋରା ସେନ୍ ତାନ୍ ଲୋଃ ଇନ୍‍କୁ ବେଶ୍ ଜାନାକୋ। ଏନ୍ତେ ଇନ୍‍କୁ ଏତେ ମିହୋଡ଼୍ ନେୟା ନେଲ୍‍କେତେ ଚି ଇଙ୍ଗ୍ ବେଶ୍ ହୋବାଜାନିଙ୍ଗ୍, ଜୋର୍ ଜୋର୍ତେ ତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାତାନ୍ ଲୋଃ ୟୀଶୁ ନାଡ଼େଏ ରୁଆଡ଼୍ ନାଏ, ହାର୍ ୟୀଶୁ ରାଃ କାଟାସୁବା ରେ ଉୟୁଃକେତେ ଇନିଜାଃ ଧାନ୍ୟାବାଦ୍ ରିକା କେଦାଏ; ଆଡୋଃ ଇନିଃ ସାମାରୀୟା ଜାଗା ରେନ୍ ହୋଡ଼ ତାଇକେନାଏ। ଏନାତେ ୟୀଶୁ କାଜିକେଦାଏ, “ଚିନାଃ ଦାଶ୍ ଝାନ୍ ହୋଡ଼ୋକୋ କାକୋ ବେଶ୍ ଜାନା, ଏଣ୍ଡେ ଏନ୍ ଆଡୋଃ ନାଅ ଝାନ୍ କୋତାଃ ରେ ମେନାକୋୱା? ଚିନାଃ ନେ ଏଟାଃଜାତି ହୋଡ଼ କେ ବାଗେ କେତେ ଆଡୋଃ କାକୋ ଅଡୋଙ୍ଗ୍ ଜାନା ଜେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାତେୟାଃକୋ?” ଏନ୍ତେ ଇନିଃ ହିନିଃକେ କାଜିକେଦାଏ, “ବିରିଃ କେତେ ସେନୋଃ ମେ, ଆମ୍ ବିଶ୍ଵାସ୍ କେଦାମ୍ ଏନାମେନ୍ତେ ବେଶ୍ ଜାନାମ୍।” ମୁଶିଙ୍ଗ୍ ଫାରିସୀ ହୋଡ଼ୋକୋ ୟୀଶୁ କେ କୁଲିକିଜାକୋ, ଚି ପାର୍ମେଶ୍ଵାର୍ ରାଃ ରାଇଜ୍ ଚିଉଲା ହିଜୁଗା? ଏଣ୍ଡେ ଇନିଃ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ପାର୍ମେଶ୍ଵାର୍ ରାଃ ରାଇଜ୍ ମେଏଃ ତେ ନେଲୋଃ ଲେକା କାହିଜୁଗା, ଆଡୋଃ ହୋଡ଼ୋକୋ ନେୟା କାକୋ କାଜିୟା, ‘ନେଲେପେ, ନେତାଃ ମେନାଃ, ୟାଦୋ ହେନ୍ତାଃ ମେନାଃ।’ ଚିୟାଃଚି ନେଲେପେ, ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ଥାଲା ରେ ମେନାଃ।” ଏନ୍ତେ ଇନିଃ ଆଜାଃ ଚେଲାକୋକେ କାଜିକେଃକୋୱାଏ, “ଏନ୍‍କାନ୍ ହୁଲାଙ୍ଗ୍ କୋ ହିଜୁଗା, ଅକନାଃ ରେ ଆପେ ଇଙ୍ଗ୍ ମାନ୍‍ୱା ରାଃ ହୋନ୍ ରାଃ ହୁଲାଙ୍ଗ୍ କୋଏତେ ମିୟାଃ ହୁଲାଙ୍ଗ୍ କେ ନେଲ୍ ନାଙ୍ଗ୍ ସାନାଙ୍ଗ୍ ୟାପେ, ହାର୍ କାପେ ନେଲ୍ ଧାଡ଼ିୟା। ହୋଡ଼ୋକୋ ଆପେକେ କାଜିପେୟାକୋ, ‘ନେଲେପେ, ୟୀଶୁ ହେନ୍ତାଃ ରେ ମେନାଇଜା!’ ୟାଦୋ ‘ନେଲେପେ, ନେତାଃ ରେ ମେନାଇଜା!’ ମେନ୍ଦୋ ଆପେ ଆଲୋପେ ସେନୋଗା ହାର୍ ନା ଇନ୍‍କୁକେ ଅତୋଙ୍ଗ୍ କୋୱାଃପେ। ଚିୟାଃଚି ଜେଲେକା ବିଜ୍‍ଲୀ ରିମିଲ୍‍ଦିଶୁମ୍ ରାଃ ମିୟାଃ କୋନା ଏତେ ରିମିଲ୍‍ଦିଶୁମ୍ ରାଃ ଏଟାଃ କୋନା ପାଡ଼୍ ଚାମ୍‍କାଅଃୱା, ଏନ୍‍ଲେକାଗି ଇଙ୍ଗ୍ ମାନ୍‍ୱା ରାଃ ହୋନ୍ କେ ହଗି ଇଙ୍ଗ୍ଆଃ ହିଜୁଃ ହୁଲାଙ୍ଗ୍ ରେ ସବେନ୍ କୋ ନେଲିଙ୍ଗ୍‍ୟାକୋ। ମେନ୍ଦୋ ସିଦା ଜାରୁରୀ ମେନାଃ, ଚି ଇନିଃ ଥିମ୍ବାଗି ଦୁକୁ ସାହାତିଙ୍ଗ୍ ୟାଏ, ହାର୍ ନେ ଯୁଗ୍ ରେନ୍ ହୋଡ଼ୋକୋ ଇନିଃକେ ହିଲାଙ୍ଗିୟାକୋ। ଜେଲେକା ନୁହ୍ ଆବୁୱାଃ ପୁର୍ଖା ରାଃ ହୁଲାଙ୍ଗ୍ ରେ ହୋବା ଲେନ୍ ତାଇକେନା, ଏନ୍‍ଲେକାଗି ଇଙ୍ଗ୍ ମାନ୍‍ୱା ରାଃ ହୋନ୍ ରାଃ ହୁଲାଙ୍ଗ୍ କୋରେ ହଗି ହୋବାୱା। ଅକୋ ହୁଲାଙ୍ଗ୍ ସାନ୍ତେ ନୁହ୍ ଜାହାଜ୍ ରେ କାଏ ରାକାବ୍ ଜାନାଏ, ଏନ୍ ହୁଲାଙ୍ଗ୍ ସାନ୍ତେ ହୋଡ଼ୋକୋ ଜୋମ୍-ନୁ ତାଇକେନାକୋ, ଆଡୋଃ ଇନ୍‍କୁୱାଃ ରେ ଆଣାଦୀ ହାର୍ ଗୋଙ୍ଗ୍‍ ହୋବାଅଃ ତାଇକେନା; ଇମ୍ତା ଦାଆ-ବାଇଡ଼୍ ହିଜୁଃକେତେ ଏନ୍ ସବେନ୍ କୋକେ ନାଶ୍ କେଃକୋୱାଏ। ଏନ୍‍ଲେକାଗି ଲୁତ୍ ଆବୁୱାଃ ପୁର୍ଖା ରାଃ ହୁଲାଙ୍ଗ୍ କୋରେ ଅକନିଃ ସାଦୋମ୍ ସାହାର୍ ରେ ତାଇନ୍ ତାଇକେନାଏ ହାର୍ ଇନିଜାଃ ସାମାୟ୍ ରେ ହୋବା ଲେନ୍ ତାଇନା, ହୋଡ଼ୋକୋ ଜୋମ୍-ନୁୱେତାନ୍, କିରିଙ୍ଗ୍-ଆଖ୍ରିଙ୍ଗ୍ ତାନ୍, ଦାରୁ ରୋଏ ତାନ୍ ହାର୍ ଅଡ଼୍ଆଃ ବାଇତାଇକେନାକୋ, ମେନ୍ଦୋ ଅକୋ ହୁଲାଙ୍ଗ୍ ଲୁତ୍ ସାଦୋମ୍ ନାଗାର୍ ଏତେ ଅଡୋଙ୍ଗ୍ ଜାନାଏ, ଏନ୍ ହୁଲାଙ୍ଗ୍ ସେଙ୍ଗେଲ୍ ଆଡୋଃ ଗାନ୍ଧାକ୍ ରିମିଲ୍‍ଦିଶୁମ୍ ଏତେ ଗାମା ଜାନା ହାର୍ ସବେନ୍ କୋକେ ଅକନ୍‍କୋ ଏନ୍ ସାହାର୍ ରେ ତାଇନ୍ ତାଇନାକୋ ନାଶ୍ କେଃକୋୱାଏ। ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ଆଡୋଃ ମିଶା ରୁଆଡ଼୍ ହୁଲାଙ୍ଗ୍ ରେହ କାସାରି ଲେକା ନେଲେକାଗି ହୋବାୱା।” “ଏନ୍ ହୁଲାଙ୍ଗ୍ ଅକଏ ଅଡ଼୍ଆଃ ଛାତ୍ ଚେତାନ୍ ରେ ତାଇନାଏ ହାର୍ ଇନିଜାଃ ସାମାନ୍ ଅଡ଼୍ଆଃ ରେ ତାଇନ୍ ରେଦୋ, ଇନିଃ ଏନାକେ ଇଦି ନାଙ୍ଗ୍ ଆଲୋକାଏ ଆଡ଼୍‍ଗୁନ୍ କା, ହାର୍ ଏନ୍‍ଲେକାଗି ଅକଏ ପିଡ଼ି ରେ ତାହିନ୍ ରେ ଇନିଃ ଦୋୟା ପାଡ଼୍ ଆଲୋକାଏ ରୁଆଡ଼୍ କା। ଲୁତ୍ ରାଃ କୁଡ଼ି କେ ପାହୋମି ପେ। ଅକଏ ଆଜାଃ ଜୀଉ ବାଞ୍ଚାଅ ସାନାଙ୍ଗାଏ ଇନିଃ ଏନାକେ ଆଦେୟାଏ, ଆଡୋଃ ଅକଏ ଏନାକେ ଆଦେୟାଏ ଇନିଃ ଏନାକେ ଜୀହିଃ ମାଣ୍ଡାଅ ୟାଏ। ଇଙ୍ଗ୍ ଆପେକେ କାଜିପେ ତାନିଙ୍ଗ୍, ଏନ୍ ନିଦା ବାର୍ହୋଡ଼୍ ମିୟାଃ ପାର୍କୋମ୍ ରେ ତାଇନୋଗାକିନ୍, ମିହୋଡ଼୍ ଇଦିୟୋଗାଏ, ହାର୍ ଏଟାଃ ନିଈ ବାଗେ କେନୋଗାଏ। ବାର୍ହୋଡ଼୍ କୁଡ଼ିକିନ୍ ମିଃତେ ଚାକି ବିୟୁର୍ କାତେୟାକିନ୍, ମିହୋଡ଼୍ ଇଦିୟୋଗାଏ, ହାର୍ ଏଟାଃ ନିଈ ବାଗେ କେନୋଗାଏ। ବାର୍ହୋଡ଼୍ ପିଡ଼ି ରେ କିନ୍ ତାଇନୋଗା, ମିହୋଡ଼୍ ଇଦିୟୋଗାଏ ହାର୍ ଏଟାଃ ନିଈ ବାଗେ କେନୋଗାଏ।” ନେୟା ଆୟୁମ୍‍କେତେ ଚେଲାକୋ ଇନିଃକେ କୁଲିକିଜାକୋ, “ହେ ପ୍ରାଭୁ ନେୟା କୋତାଃ ରେ ହୋବାଅଗା?” ଇନିଃ ଇନ୍‍କୁକେ କାଜିୟାଃକୋୱାଏ, “ଅକ୍ତାଃରେ ପାଶୁ କୋୱାଃ ମାଣା ତାଇନା ଏନ୍ତାଃରେ ଗିଦି କୋ ହୁଣ୍ଡି ଅଗାକୋ।” ଏନ୍ତେ ୟୀଶୁ ଆଜାଃ ଚେଲାକୋକେ ନେ ବିଷାୟ୍ ରେ ଚି ସବେନ୍ ଇମ୍ତା ବିନ୍ତି ରିକା ଆଡୋଃ ସାହାସ୍ କା ବାଗେ ଚାହି ମେନ୍ତେ ମିୟାଃ ଜୋନୋକା କାଜିକେଦାଏ, “ମିୟାଃ ସାହାର୍ ରେ ମିହୋଡ଼୍ ବିଚାର୍ ରିକାନିଃ ତାଇକେନାଏ, ଇନିଃ ନା ପାର୍ମେଶ୍ଵାର୍ କେ ବୋରୋଇ ତାଇକେନାଏ ଆଡୋଃ ନା ଜେତାନ୍ ହୋଡ଼ ରାଃ ଖାତିର୍ ତାଇକେନାଏ। ଏନ୍ ସାହାର୍ ରେଗି ମିହୋଡ଼୍ ବିଧୋବା ହ ତାଇନ୍ ତାଇକେନାଏ, ଅକନିଃ ଇନିଜାଃ ନାଡ଼େଏ ହିଜୁଃ-ହିଜୁଃକେତେ କାଜି ତାଇକେନାଏ, ‘ଇଙ୍ଗ୍ଆଃ ବିଚାର୍ ରିକା କେତେ ଇଙ୍ଗ୍‍କେ ବାଇରୀ ତେ ବାଞ୍ଚାଅୱିଙ୍ଗ୍ ମେ।’ ଚିମିନ୍ ହୁଲାଙ୍ଗ୍ ସାନ୍ ଦୋ କାଏ ମାନାତିଙ୍ଗ୍ ଜାନାଏ ମେନ୍ଦୋ ଟୁଣ୍ଡୁ ରେ ମୋନ୍ ରେ ପାହୋମ୍ କେତେ କାଜିକେଦାଏ, ଇଙ୍ଗ୍ ନାଦୋ ପାର୍ମେଶ୍ଵାର୍ କେ ବୋରୋୟାଇଙ୍ଗ୍ ନାଦୋ ହୋଡ଼ୋକୋକେ ଖାତିର୍ କୋୱାୟାଇଙ୍ଗ୍। ଏଣ୍ଡେ ରେ ହଗି ନେ ବିଧୋବା ଇଙ୍ଗ୍‍କେ ବିତ୍‍ଲାୱିଙ୍ଗ୍ ତାନାଏ, ଏନାମେନ୍ତେ ଇଙ୍ଗ୍ ଇନିଜାଃ ବିଚାର୍ ରିକାୟାଇଙ୍ଗ୍, କାରେଦୋ ଇନିଃ ଘାଡ଼ି ଧାଓଁ ହିଜୁଃକେତେ ଟୁଣ୍ଡୁ ରେ ଇଙ୍ଗ୍‍କେ ହାଇରାନିଙ୍ଗ୍ ୟାଏ।” ପ୍ରାଭୁ ୟୀଶୁ କାଜିକେଦାଏ, “ଆୟୁମେପେ, ନେ ଆଧାର୍ମୀ ବିଚାର୍ ରିକାନିଃ ଚିନାଃ କାଜି ତାନାଏ? ଏନାମେନ୍ତେ ଚିନାଃ ପାର୍ମେଶ୍ଵାର୍ ଆଜାଃ ସାଲାକାନ୍ କୋୱାଃ ବିଚାର୍ କାଏ ରିକାୟାଏ, ଅକନ୍‍କୋ ନିଦା-ଶିଙ୍ଗି ଇନିଃକେ ବିନ୍ତି କାତେୟାକୋ? ଚିନାଃ ଇନିଃ ଇନ୍‍କୁୱାଃ ବିଷାୟ୍ ରେ ଦେରି ରିକାୟାଏ? ଇଙ୍ଗ୍ ଆପେକେ କାଜିପେ ତାନିଙ୍ଗ୍; ଇନିଃ ସେକାଡ଼୍‍ଗୀ ଇନ୍‍କୁୱାଃ ବିଚାର୍ ରିକାୟାଏ; ଏଣ୍ଡେ ହ ଇଙ୍ଗ୍ ମାନ୍‍ୱା ରାଃ ହୋନ୍ ଚିମ୍ତା ହିଜୁଗାଇଙ୍ଗ୍, ଇମ୍ତା ଚିନାଃ ଇଙ୍ଗ୍ ଅତେ ରେ ବିଶ୍ଵାସ୍‍ତାନ୍ ହୋଡ଼ୋକୋକେ ନାମ୍ କୋୱାଇଙ୍ଗ୍?” ୟୀଶୁ ଇନ୍‍କୁକେ ଅକନ୍‍କୋ ଆକୋ ଆପାନ୍ କେ ପାହୋମ୍ ତାଇକେନାକୋ, ଚି ଆଲେ ଧାର୍ମୀ ତାନ୍‍ଲେ, ଆଡୋଃ ଏଟାଃ କୋକେ ତୁଛ୍ ସାରିତାଇକେନାକୋ, ନେ ଜୋନୋକା କାଜିକେଃକୋୱାଏ। “ବାର୍ହୋଡ଼୍ ମାନ୍ଦିର୍ ରେ ବିନ୍ତି ରିକାନାଙ୍ଗ୍ ସେନ୍ ଜାନାକିନ୍; ମିହୋଡ଼୍ ଫାରିସୀ ହୋଡ଼ୋ କୋଏତେ ତାଇକେନାଏ ଆଡୋଃ ଏଟାଃ ନିଈ ମାଲ୍‍ହାରୋମ୍ ହୋଡ଼ ତାଇକେନାଏ। ଫାରିସୀ ହୋଡ଼ୋ ତିଙ୍ଗୁ କେତେ ଆଜାଃ ମୋନ୍ ରେ ନେଲେକା ବିନ୍ତି ରିକା ଏଟେଃ କେଦାଏ, ଚି ହେ ପାର୍ମେଶ୍ଵାର୍, ଇଙ୍ଗ୍ ଆମାଃ ଧାନ୍ୟାବାଦ୍ ତାନିଙ୍ଗ୍, ଚି ଇଙ୍ଗ୍ ଆଡୋଃ ହୋଡ଼ୋକୋ ଲେକା ରେଏଃ ଇଦି ନିଈ, ଏତ୍କାନ୍ କାମି ନିଈ ଆଡୋଃ ବ୍ୟାଭିଚାରୀ ନାହାଲାଇଙ୍ଗ୍, ଆଡୋଃ ନା ନେ ମାଲ୍‍ହାରୋମ୍ ଇଦି ନିଈ ଲେକା ତାନିଙ୍ଗ୍। ଇଙ୍ଗ୍ ହାପ୍ତା ରେ ବାର୍ସା ଉପାସ୍ ମାଣ୍ଡାଅୟାଇଙ୍ଗ୍, ଇଙ୍ଗ୍ ଇଙ୍ଗ୍ଆଃ ସବେନ୍ କାମି କୋରାଃ ଦାଶ୍ୱାଁ ହିସା ହ ଏମେୟାଇଙ୍ଗ୍।” “ମେନ୍ଦୋ ମାଲ୍‍ହାରୋମ୍ ଇଦି ନିଈ ସାଙ୍ଗିନ୍ ରେ ତିଙ୍ଗୁ କେତେ, ରିମିଲ୍‍ଦିଶୁମ୍ ପାଡ଼୍ ମେଏଃ ଆରିଦୋ କାଏ ସାନାଙ୍ଗ୍ କେନାଏ, ମେନ୍ଦୋ ଆଜାଃ କୁଡ଼ାମ୍ କେ ଦୁକୁ ତେ ବିଡ଼ା-ବିଡ଼ା କେତେ କାଜିକେଦାଏ, ‘ହେ ପାର୍ମେଶ୍ଵାର୍, ଇଙ୍ଗ୍ ପାପୀ କେ ଦାୟା ଇଙ୍ଗ୍‍ମେ!’ ଇଙ୍ଗ୍ ଆପେକେ କାଜିପେ ତାନିଙ୍ଗ୍ ଚି ହେନ୍ ଏଟାଃ ନିଈ କାହା, ମେନ୍ଦୋ ମାଲ୍‍ହାରୋମ୍ ଇଦି ନିଈ ଗି ଧାର୍ମୀ ବାଇକେତେ ଆଜାଃ ଅଡ଼୍ଆଃ ସେନୋଃ ଜାନାଏ; ଚିୟାଃଚି ଅକଏ ଆଏଃ ଆପାନ୍ କେ ମାରାଙ୍ଗ୍ ବାଇୟାଏ, ଇନିଃ ହୁଡିଙ୍ଗ୍ ହୋବାୱାଏ, ହାର୍ ଅକଏ ଆଏଃ ଆପାନ୍ କେ ହୁଡିଙ୍ଗ୍ ବାଇୟାଏ, ଇନିଃ ମାରାଙ୍ଗ୍ ବାଇୟୋଗାଏ।” ମୁଶିଙ୍ଗ୍ ହୁଲାଙ୍ଗ୍ ହୋଡ଼ୋକୋ ଆକୋୱାଃ ହୁଡିଙ୍ଗ୍ ହୋନ୍‍କୋକେ ହଗି ଇନିଜାଃ ନାଡ଼େଏ ଆଉକେଃ କୋୱାକୋ, ଚି ଇନିଃ ଇନ୍‍କୁୱାଃ ରେ ତିଈ ମାଣ୍ଡାଅୟାଏ; ମେନ୍ଦୋ ଚିମ୍ତା ଚେଲାକୋ ନେଲ୍ କେଦାକୋ ଇନ୍‍କୁକେ ଏଗେର୍ କେଃକୋୱାକୋ। ମେନ୍ଦୋ ୟୀଶୁ ହୁଡିଙ୍ଗ୍ ହୋନ୍‍କୋକେ ଆଜାଃ ନାଡ଼େଏ କେଡ଼ାକେତେ କାଜିକେଃକୋୱାଏ, “ହୁଡିଙ୍ଗ୍ ହୋନ୍‍କୋକେ ଇଙ୍ଗ୍ଆଃ ତାଃ ହିଜୁଃ ରିକାକୋପେ, ହାର୍ ଇନ୍‍କୁକେ ଆଲୋପେ ମାନା କୋୱା: ଚିୟାଃଚି ପାର୍ମେଶ୍ଵାର୍ ରାଃ ରାଇଜ୍ ନିକୁୱାଃ ଲେକାନ୍ କୋୱାଃ ତାନାଃ। ଇଙ୍ଗ୍ ଆପେକେ ସାର୍ତି କାଜିପେ ତାନିଙ୍ଗ୍, ଚି ଅକଏ ପାର୍ମେଶ୍ଵାର୍ ରାଃ ରାଇଜ୍ କେ ହୁଡିଙ୍ଗ୍ ହୋନ୍‍କୋ ଲେକା କାଏ ଗ୍ରାହାନ୍ ରିକାୟାଏ ଇନିଃ ଏଣ୍ଡେରେ ଚିଉଲା ହ କାଏ ବୋଲୋ ଧାଡ଼ିୟାଏ।” ମିୟାଃ ୟାହୁଦୀ କୋୱାଃ ଗୁରୁ ୟୀଶୁ କେ କୁଲିକିଜାଏ, “ହେ ବୁଗିନ୍ ଗୁରୁ, ଜାନାଓ ଜୀଦାନ୍ ଜୀଦୋଃ ନାମ୍ ଲାଗିନ୍ ଇଙ୍ଗ୍ ଚିନାଃ ରିକାୟାଇଙ୍ଗ୍?” ୟୀଶୁ ଇନିଃକେ କାଜିକେଦାଏ, “ଆମ୍ ଇଙ୍ଗ୍‍କେ ବୁଗିନ୍ ଚିନାଃ ଲାଗିନ୍ କାଜି ତାନାମ୍? ପାର୍ମେଶ୍ଵାର୍ କେ ବାଗେ କେତେ, ଜେତାଏ ବୁଗିନ୍ ନାହାଲାଏ। ଆମ୍ ପାର୍ମେଶ୍ଵାର୍ ରାଃ ଆନାଚୁ କୋକେ ଦୋ ସାରି ତାନାମ୍, ‘ବ୍ୟାଭିଚାର୍ ଆଲୋମ୍ ରିକାୟା, ହୋଡ଼ ଆଲୋମ୍ ଗୋଏଃୟା, ଆଡୋଃ ଆଲୋମ୍ କୁମ୍ଡ଼ୁୟା, ଲୋଗୋ ଗୋୱା ଆଲୋମ୍ ଏମେୟା, ଆମାଃ ଆପୁ ହାର୍ ଏଙ୍ଗା କିନ୍‍କେ ମାଇନ୍ କୋମ୍।’ ” ଇନିଃ କାଜିକେଦାଏ, “ଇଙ୍ଗ୍ ଦୋ ନେ ସବେନ୍ କୋକେ ହୁଡିଙ୍ଗେତେ ମାନାତିଙ୍ଗ୍ ହିଜୁଃ ତାନିଙ୍ଗ୍।” ନେୟା ଆୟୁମ୍‍କେତେ ୟୀଶୁ ଇନିଃକେ କାଜିକେଦାଏ, “ଆମ୍ତାଃ ରେ ନାଆ ହ ମିୟାଃ କାଜି ରାଃ ଘାଟି ମେନାଃ, ଆମାଃ ସବେନାଃ କେ ଆଖ୍ରିଙ୍ଗ୍ କେତେ ଗାରିବ୍ କୋକେ ହାଟିଙ୍ଗ୍ କୁମେ; ହାର୍ ଏନାରେ ଆମ୍ ସିର୍ମାଦିଶୁମ୍ ରେ କିଶାଣ୍ ବାଇୟୋଗାମ୍ ହାର୍ ହିଜୁଃକେତେ ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ।” ନେୟା ଆୟୁମ୍‍କେତେ ଇନିଃ ଥିମ୍ବାଗି ଦୁକୁ ଜାନାଏ, ଚିୟାଃଚି ଇନିଃ ବେଶେ କିଶାଣ୍ ତାଇକେନାଏ। ୟୀଶୁ ଇନିଃକେ ନେଲ୍‍କେତେ କାଜିକେଦାଏ, “କିଶାଣ୍ ହୋଡ଼ ରାଃ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋ ନାଙ୍ଗ୍ ଚିମିନାଙ୍ଗ୍ କାଠିନ୍ ମେନାଃ! ପାର୍ମେଶ୍ଵାର୍ ରାଃ ରାଇଜ୍ ରେ କିଶାଣ୍ ହୋଡ଼ ରାଃ ବୋଲୋ ଏତେ, ସୁଇ ରାଃ ଉଣ୍ଡୁଃ ରେ ଉଁଟ୍ ରାଃ ବୋଲୋ ଫାରୋମ୍ ତେୟାଃ ସାହାଜ୍ ତାନାଃ।” ନେୟାତେ ଆୟୁମ୍‍ତାନ୍ କୋ କାଜିକେଦାକୋ, “ଏଣ୍ଡେ ପାର୍ମେଶ୍ଵାର୍ ରାଃ ରାଇଜ୍ ରେ ଜାନାଓ ଜୀଦାନ୍ ନାମେ ଲାଗିନ୍ ଅକଏ ବାଞ୍ଚାଅଃ ୱାଏ?” ଇନିଃ କାଜିକେଦାଏ, “ଅକନାଃ ହୋଡ଼ୋକୋ ଏତେ କା ହୋବା ଧାଡ଼ିୟୋଗା, ଏନା ପାର୍ମେଶ୍ଵାର୍ ଏତେ ହୋବା ଧାଡ଼ିୟୋଗା।” ପାତ୍ରାସ୍ କାଜିକେଦାଏ, “ନେଲେମ୍, ଆଲେ ଦୋ ଅଡ଼୍ଆଃ-ଦୁହାର୍ ବାଗେ କେତେ ଆମ୍‍କେ ଅତୋଙ୍ଗ୍ କାଃ ମେୟାଲେ।” ଇନିଃ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଚି ନେଲେକା ଅକଏ ହ ବାଂକୁୱା ଅକଏ ପାର୍ମେଶ୍ଵାର୍ ରାଃ ରାଇଜ୍ ଲାଗିନ୍ ଅଡ଼୍ଆଃ, ୟାଦୋ କୁଡ଼ି, ୟାଦୋ ହାଗାକୋକେ, ୟାଦୋ ଏଙ୍ଗା-ଆପୁ ୟାଦୋ ହୋନ୍-ଗାଣାକୋକେ ବାଗେ କାଦାଏ; ହାର୍ ଚିନାଃ ଇନିଃ ନେ ଯୁଗ୍ ରେଗି ଥିମ୍ବା ଗୁନା କାଏ ନାମେୟାଏ ଆଡୋଃ ହିଜୁଃ ଯୁଗ୍ ରେ ଚିନାଃ ଜାନାଓ ଜୀଦାନ୍ କାଏ ନାମେୟାଏ।” ଏନା ତାୟୋମ୍ତେ ୟୀଶୁ ବାରାଝାନ୍ ଚେଲାକୋକେ ଆଜାଃ ଲୋଃ ଇଦିକେତେ ଇନ୍‍କୁକେ କାଜିକେଃକୋୱାଏ, “ନେଲେପେ, ଆବୁ ୟୀରୁଶାଲେମ୍ ତେ ସେନ୍ ତାନାବୁ, ହାର୍ ଚିମିନାଙ୍ଗ୍ କାଜିକୋ ଇଙ୍ଗ୍ ମାନ୍‍ୱା ରାଃ ହୋନ୍ ବିଷାୟ୍ ରେ ନାବୀ କୋଏତେ ଅଲାକାନା ଏନା ସବେନାଃ ପୁରାଅଗା। ଚିୟାଃଚି ଇଙ୍ଗ୍ ଏଟାଃଜାତି କୋୱାଃ ତିଈ ରେ ଜିମାଅଗାଇଙ୍ଗ୍, ହାର୍ ହିନ୍‍କୁ ଇଙ୍ଗ୍‍କେ ଲାନ୍ଦାୟିଙ୍ଗ୍ ୟାକୋ, ହାର୍ ଇଙ୍ଗ୍‍କେ ଆପ୍‍ମାନ୍ ରିକା ୟାକୋ, ହାର୍ ଇଙ୍ଗ୍ଆଃ ଚେତାନ୍ ରେ ବେଜେୟାକୋ, ହାର୍ ଇଙ୍ଗ୍‍କେ କୋଡ୍ରା ମାଉରିଙ୍ଗ୍ ୟାକୋ, ଆଡୋଃ ଗୋଜିଙ୍ଗ୍ ୟାକୋ, ମେନ୍ଦୋ ଇଙ୍ଗ୍ ଆପି ହୁଲାଙ୍ଗ୍ ରେ ଜୀବିରିଦୋଗାଇଙ୍ଗ୍।” ମେନ୍ଦୋ ଇନ୍‍କୁ ନେ କାଜିକୋ ଏତେ ଜାହାନ୍ କାଜିକେ କାକୋ ବୁଝାଅଜାନା, ହାର୍ ନେ କାଜିକୋ ଇନ୍‍କୁ ଲାଗିନ୍ ଉକୁଗି ତାଇଜାନା, ହାର୍ ଅକନାଃ କୋ କାଜିଲେନା ଏନାକୋ ଇନ୍‍କୁ କାକୋ ବୁଝାଅ ଧାଡ଼ିଜାନା। ଚିମ୍ତା ୟୀଶୁ ୟାରିହୋ ସାହାର୍ ନାଡ଼େଏ ସେଟେର୍ ଜାନାଏ, ଏଣ୍ଡେ ମିୟାଃ ଆନ୍ଧା ସାଣ୍ଡାକ୍ ଗେନା ରେ ଦୁବ୍ କେତେ ଭିକ୍ ଆସି ତାଇକେନାଏ। ଇନିଃ ମିଃଥିମ୍ବା ହୋଡ଼ୋ କୋୱାଃ ସେସେନ୍ ଆୱାଜ୍ କେ ଆୟୁମ୍‍କେତେ ହୋଡ଼ୋକୋକେ କୁଲିକେଃକୋୱାଏ, “ନେୟା ଚିନାଃ ହୋବାଅଃ ତାନା?” ଇନ୍‍କୁ ଇନିଃକେ ଉଦୁବ୍ କିଜାକୋ, “ନାଜ୍ରେଥିୟା ୟୀଶୁ ସେନ୍ ତାନାଏ।” ଏଣ୍ଡେ ଇନିଃ କାଉରି କେତେ କାଜିକେଦାଏ, “ହେ ୟୀଶୁ, ଦାଉଦ୍ ରାଜା ରାଃ ସାନ୍ତାନ୍, ଇଙ୍ଗ୍‍କେ ଦାୟାଇଙ୍ଗ୍ ମେ!” ଅକନ୍‍କୋ ଆୟୁର୍-ଆୟୁର୍ ସେସେନ୍ ତାଇକେନାକୋ, ଇନ୍‍କୁ ଇନିଃକେ ଏଗେର୍ କିଜାକୋ ଚି ହାପା ତାଇନୋଃ କାଏ; ମେନ୍ଦୋ ଇନିଃ ଆଡୋଃଗି କାଉରି ଏଟେଃ କେଦାଏ, “ହେ ଦାଉଦ୍ ରାଜା ରାଃ ସାନ୍ତାନ୍, ଇଙ୍ଗ୍‍କେ ଦାୟାଇଙ୍ଗ୍ ମେ!” ଏନ୍ତେ ୟୀଶୁ ତିଙ୍ଗୁ କେତେ ଆଚୁ କେଃକୋୱାଏ ଚି ଇନିଃକେ ଇଙ୍ଗ୍ଆଃ ତାଃ ଆୱିପେ, ହାର୍ ଚିମ୍ତା ଇନିଃ ନାଡ଼େଏ ସେଟେର୍ ଜାନାଏ ଏଣ୍ଡେ ୟୀଶୁ ଇନିଃକେ କୁଲିକେଦାଏ, “ଆମ୍ ଚିନାଃ ସାନାଙ୍ଗ୍ ତାନାମ୍ ଚି ଇଙ୍ଗ୍ ଆମାଃ ଲାଗିନ୍ ରିକାୟାଇଙ୍ଗ୍?” ଇନିଃ କାଜିକିଜାଏ, “ହେ ପ୍ରାଭୁ, ଇଙ୍ଗ୍ ନେନେଲ୍ ସାନାଙ୍ଗ୍ ତାନିଙ୍ଗ୍।” ୟୀଶୁ ଇନିଃକେ କାଜିକେଦାଏ, “ନେଲ୍ ଧାଡ଼ିମ୍, ଆମାଃ ବିଶ୍ଵାସ୍ ଆମ୍‍କେ ବେଶ୍ କେଃମେୟାଏ।” ଇନିଃ ଇମ୍ତାଗି ନେଲ୍ ଧାଡ଼ିକେଦାଏ, ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାତାନ୍ ଲୋଃ ଇନିଃକେ ଅତୋଙ୍ଗ୍ କିଜାଏ, ହାର୍ ସବେନ୍ ହୋଡ଼ୋକୋ ନେୟା ନେଲ୍‍କେତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକା କେଦାକୋ। ୟୀଶୁ ୟାରିହୋ ସାହାର୍ ରେ ବୋଲୋ କେତେ ସେନ୍ ତାଇନାଏ। ଏନ୍ତାଃରେ ଜାକ୍କାଇ ନୁତୁମ୍ ମିୟାଃ କିଶାଣ୍ ହୋଡ଼ ତାଇନ୍ କେନାଏ, ଇନିଃ ମାଲ୍‍ହାରୋମ୍ ଇଦି କୋୱାଃ ମୁଖିୟା ତାଇକେନାଏ। ଇନିଃ ୟୀଶୁ କେ ନେଲ୍ ନାଙ୍ଗ୍ ସାନାଙ୍ଗ୍ ତାଇକେନାଏ ଚି ଇନିଃ ଅକଏ ତାନିଃ। ମେନ୍ଦୋ ମିଃଥିମ୍ବା ହୋଡ଼ୋକୋୱାଃ ଚାଲ୍ତେ କାଏ ନେଲ୍ ଧାଡ଼ି ତାଇନା, ଚିୟାଃଚି ଇନିଃ ନାଟ୍ରା ତାଇକେନାଏ। ଏନ୍ତେ ଇନିଃକେ ନେଲ୍ ଲାଗିନ୍ ଆୟୁର୍ତେ ନିର୍ କେତେ ମିୟାଃ ଲୋୱା ଦାରୁ ରେ ରାକାବ୍ ଜାନାଏ, ଚିୟାଃଚି ୟୀଶୁ ଏନ୍ ହୋରା ଏତେଗି ସେନ୍ ରାଃ ତାଇକେନାଏ। ଚିମ୍ତାଙ୍ଗ୍ ୟୀଶୁ ଏନ୍ ଲୋୱା ଦାରୁ ତାଃ ସେଟେର୍ ଜାନାଏ, ଇମ୍ତା ଦାରୁ ଚେତାନ୍ ନେଲ୍ କେଦାଏ ହାର୍ ଇନିଃକେ କାଜିକିଜାଏ, “ହେ ଜାକ୍କାଇ, ସେକାଡ଼୍ ଆଡ଼୍‍ଗୁନ୍ ମେ, ଚିୟାଃଚି ଇସିଙ୍ଗ୍ ଇଙ୍ଗ୍‍କେ ଆମାଃ ଅଡ଼୍ଆଃ ରେ ତାଇନ୍ ଜାରୁରୀ ମେନାଃ।” ଇନିଃ ଇମ୍ତାଗି ଆଡ଼୍‍ଗୁ କେତେ ରାଶିକା ତେ ୟୀଶୁ କେ ଆଜାଃ ଅଡ଼୍ଆଃ ତେ ଇଦିକିଜାଏ। ନେୟା ନେଲ୍‍କେତେ ସବେନ୍ ହୋଡ଼ୋକୋ କୁର୍ବୁରାୱ କେତେ କାଜିକେଦାକୋ, “ଇନିଃ ଦୋ ମିୟାଃ ପାପୀ ହୋଡ଼ ରାଃ ଅଡ଼୍ଆଃ ତେ ସେନ୍ କାନାଏ।” ଜାକ୍କାଇ ତିଙ୍ଗୁ କେତେ ପ୍ରାଭୁ ୟୀଶୁ କେ କାଜିକେଦାଏ, “ହେ ପ୍ରାଭୁ, ନେଲେମ୍, ଇଙ୍ଗ୍ ଇଙ୍ଗ୍ଆଃ ଆଧା ସାମ୍ପାତି ଗାରିବ୍ କୋକେ ଏମାକୋ ତାନାଇଙ୍ଗ୍, ହାର୍ ଆଗାର୍ ଅକେୟାଃ ଜାହାନାଃ ଅଗି ଆନ୍ୟାୟ କେତେ ଇଦିକାଦିଙ୍ଗ୍ ରେଦୋ ଇନିଃକେ ଚାଇର୍ ଗୁନା ରୁଆଡ଼୍ ତାକୋୱାଇଙ୍ଗ୍।” ଏନ୍ତେ ୟୀଶୁ ଇନିଃକେ କାଜିକେଦାଏ, “ଇସିଙ୍ଗ୍ ନେ ଅଡ଼୍ଆଃ ରେନ୍ ହୋଡ଼ୋକୋୱାଃ ରେ ବାଞ୍ଚାଅ ହିଜୁଃ କାନା, ଏନାମେନ୍ତେ ଚି ନିଜୋଗି ଆବ୍ରାହାମ୍ ରାଃ ମିୟାଃ ସାନ୍ତାନ୍ ତାନିଃ। ଚିୟାଃଚି ଇଙ୍ଗ୍ ମାନ୍‍ୱା ରାଃ ହୋନ୍ ଆଦାକାନ୍ କୋକେ ଦାଣା ଲାଗିନ୍ ହାର୍ ଇନ୍‍କୁକେ ବାଞ୍ଚାଅ ଲାଗିନ୍ତେ ହିଜୁଃକାନାଇଙ୍ଗ୍।” ଚିମ୍ତାଙ୍ଗ୍ ଇନ୍‍କୁ ନେ କାଜିକୋ ଆୟୁମ୍ ତାଇକେନାକୋ, ଇମ୍ତା ୟୀଶୁ ଇନ୍‍କୁକେ ମିୟାଃ ଜୋନୋକା କାଜିକେଦାଏ, ଚିୟାଃଚି ଇନିଃ ୟୀରୁଶାଲେମ୍ ନାଡ଼େଏ ରେ ତାଇକେନାଏ, ହାର୍ ଇନ୍‍କୁ ବୁଝାଅଃ ତାଇନାକୋ ଚି ପାର୍ମେଶ୍ଵାର୍ ରାଃ ରାଇଜ୍ ସେକାଡ଼୍‍ଗୀ ହିଜୁଃ ରାଃ ମେନାଃ। ଏନାମେନ୍ତେ ଇନିଃ କାଜିକେଦାଏ, “ମିୟାଃ କିଶାଣ୍ ଅଡ଼୍ଆଃ ରେନ୍ ହୋଡ଼ ସାଙ୍ଗିନ୍ ଦିଶୁମ୍ ତେ ସେନୋଃ ନାଏ ଏନାତେ ଚି ହାକିମ୍ ତାଃ ଏତେ ରାଜ୍‍ଗାଦି ନାମ୍ କେତେ ରୁଆଡ଼ାଏ। ଇନିଃ ଆଜାଃ ଦାସୀ କୋଏତେ ଦାଶ୍ ଝାନ୍ କୋକେ କେଡ଼ାକେତେ ଇନ୍‍କୁକେ ମିପୀୟାଃ ଶିକା ଏମାଃ କୋୱାଏ ହାର୍ ଇନ୍‍କୁକେ କାଜିକେଦାଏ, ‘ଇଙ୍ଗ୍ଆଃ ହିଜୁଃ ସାନ୍ ନେ ଟାକାତେ ବେପାର୍ ରିକା ଏପେ।’ ମେନ୍ଦୋ ଏନ୍ ସାହାର୍ ରେନ୍ ହୋଡ଼ୋକୋ ଏନ୍ କିଶାଣ୍ ହୋଡ଼ କେ ଖିସ୍ ତାଇକେନାକୋ, ହାର୍ ଇନିଜାଃ ଦୋୟାତେ ସାନ୍ଦେଶ୍ ଏହେମ୍ କୋୱାଃ ହୋରାତେ ହାକିମ୍ ତାଃ କାଜିକୁଲ୍ କେଦାକୋ ଚି, ‘ଆଲେ କାଲେ ସାନାଙ୍ଗ୍ ତାନା ଚି ନିଈ ଆଲେୟାଃ ଚେତାନ୍ ରେ ରାଇଜ୍ କାଏ।’ ” “ଚିମ୍ତା ଇନିଃ ରାଜ୍‍ଗାଦି ନାମ୍ କେତେ ରୁଆଡ଼୍ ଜାନାଏ, ଏଣ୍ଡେ ଇନିଃ ଏନ୍ ଦାଶ୍ ଝାନ୍ ଦାସୀକୋକେ ଅକନ୍ କୋକେ ଇନିଃ ପାଇସା ଏମ୍ ଲେଃ କୋତାଇନାଏ କେଡ଼ାକେଃକୋୱାଏ, ଏନାତେ ଇନିଃ କୁଲି କେତେ ସାରି କୋୱାଏ ଚି ଇନ୍‍କୁ ବେପାର୍ କେତେ ଚିମିନ୍ କାମି କେଦାକୋ। ଏନ୍ତେ ସିଦା ନିଈ ହିଜୁଃକେତେ କାଜିକେଦାଏ, ‘ହେ ଗୋମ୍‍କେ, ଆମାଃ ଶିକା ଏତେ ଇଙ୍ଗ୍ ଆଡୋଃ ଦାଶ୍ ଶିକା କାମି କେଦାଇଙ୍ଗ୍।’ ଏନ୍ କିଶାଣ୍ ହୋଡ଼ ଇନିଃକେ କାଜିକେଦାଏ, ‘ଥିମ୍ବାଗି ବେଶ୍, ହେ ବୁଗିନ୍ ଦାସୀ! ଆମ୍ କାଟିଃକାନ୍ ଟାକା ରେ ବିଶ୍ଵାସ୍ ଲେକାନିଃ ବାଇଜାନାମ୍ ଆମ୍ ଦାଶ୍ ଠୁ ସାହାର୍ ଚେତାନ୍ ରେ ଆଧିକାର୍ ମାଣ୍ଡାଏମ୍।’ ଏଟାଃ ନିଈ ହିଜୁଃକେତେ କାଜିକେଦାଏ, ‘ହେ ଗୋମ୍‍କେ, ଆମାଃ ଶିକା ଏତେ ଆଡୋଃ ପାଞ୍ଚ୍ ଶିକା କାମି କେଦାଇଙ୍ଗ୍।’ ଏନ୍ କିଶାଣ୍ ହୋଡ଼ ଇନିଃକେ ହ କାଜିକେଦାଏ, ‘ଆମ୍ ହଗି ପାଞ୍ଚ୍ ଠୁ ସାହାର୍ ଚେତାନ୍ ରେ ଆଧିକାର୍ ହୋବାଅଃମେ।’ ତିସ୍ରା ନିଈ ହ ହିଜୁଃକେତେ କାଜିକେଦାଏ, ‘ହେ ଗୋମ୍‍କେ, ନେଲେମ୍, ଆମାଃ ଶିକା ନେୟା ତାନାଃ, ଅକନାଃ କେ ଇଙ୍ଗ୍ ପାଚି ରେ ଟନମ୍ କେତେ ମାଣ୍ଡାଅ ଲେଦାଇଙ୍ଗ୍। ଚିୟାଃଚି ଇଙ୍ଗ୍ ଆମ୍‍କେ ବୋରୋ ମେ ତାଇନାଇଙ୍ଗ୍, ଏନାଲାଗିନ୍ ଚି ଆମ୍ କାଠୋର୍ ମୋନ୍ ହୋଡ଼ ତାନ୍‍ମେ, ଅକନାଃ ଆମ୍ କାମ୍ ମାଣ୍ଡାଅ କାଦା ଏନାକେ ଇଦି କେୟାମ୍, ହାର୍ ଅକନାଃ କେ କାମ୍ ହେର୍, ଏନାକେ ଇରେ ୟାମ୍।’ ଏନ୍ କିଶାଣ୍ ହୋଡ଼ ଇନିଃକେ କାଜିକେଦାଏ, ‘ହେ ଦୁଷ୍ଟ ଦାସୀ, ଇଙ୍ଗ୍ ଆମାଃ ମୋଚା ରାଃ କାଜି ତେଗି ଆମ୍‍କେ ଦୋଷୀ ବାଇମେତାନିଙ୍ଗ୍। ଆମ୍ ଇଙ୍ଗ୍‍କେ ସାରି ତାଇନାମ୍ ଚି ଇଙ୍ଗ୍ କାଠୋର୍ ହୋଡ଼ ତାନିଙ୍ଗ୍, ଅକନାଃ ଇଙ୍ଗ୍ କାଇଙ୍ଗ୍ ମାଣ୍ଡାଅ କାଦା ଏନାକେ ଇଦି କେୟାଇଙ୍ଗ୍, ହାର୍ ଅକନାଃ ଇଙ୍ଗ୍ କାଇଙ୍ଗ୍ ହେର୍ କାଦା ଏନାକେ ଇରେ ୟାଇଙ୍ଗ୍, ଏଣ୍ଡେ ଆମ୍ ଇଙ୍ଗ୍ଆଃ ଶିକା କେ ବେଙ୍କ୍ ରେ ଚିନାଃ ମେନ୍ତେ କାମ୍ ମାଣ୍ଡାଅ କେଦା, ଏନାତେ ଇଙ୍ଗ୍ ହିଜୁଃକେତେ ସୁଧ୍ ସାହିତ୍ ଇଦି ତେୟାଃଇଙ୍ଗ୍?’ ଏନ୍ତେ ଅକନ୍ ହୋଡ଼ୋକୋ ଆଜାଃ ନାଡ଼େଏ ତିଙ୍ଗୁ ଲେନାକୋ, ଏନ୍ କିଶାଣ୍ ହୋଡ଼ ଇନ୍‍କୁକେ କାଜିକେଃକୋୱାଏ, ‘ଏନ୍ ଶିକା କେ ଇନିଃତାଃ ଏତେ ଇଦିକେପେ, ହାର୍ ଅକନିଃ ତାଃ ରେ ଦାଶ୍ ଶିକା ମେନାଃ ଇନିଃକେ ଏମାଇପେ।’ ଇନ୍‍କୁ ଏନ୍ କିଶାଣ୍ ହୋଡ଼ କେ କାଜିକିଜାକୋ, ‘ହେ ଗୋମ୍‍କେ, ଇନିଃତାଃ ରେଦୋ ଦାଶ୍ ଠୁ ଶିକା ମେନାଃ।’ ‘ଇଙ୍ଗ୍ ଆପେକେ କାଜିତାନିଙ୍ଗ୍ ଚି ଅକଏ ତାଃ ରେ ମେନାଃ, ଇନିଃକେ ଥିମ୍ବା ଏମୋଗା; ହାର୍ ଅକଏ ତାଃ ରେ ବାନୋଗା, ଇନିଃତାଃ ଏତେ ଏନା ହଗି ଅକନାଃ ମେନାଃ ଇଦିୟୋଗା। ମେନ୍ଦୋ ଇଙ୍ଗ୍ଆଃ ଏନ୍ ବାଇରୀକୋକେ ଅକନ୍‍କୋ କାକୋ ସାନାଙ୍ଗ୍ ତାଇନା ଚି ଇଙ୍ଗ୍ ଇନ୍‍କୁୱାଃ ଚେତାନ୍ ରେ ରାଜା ବାଇକେତେ ରାଇଜ୍ ୟାଇଙ୍ଗ୍, ଇନ୍‍କୁକେ ନେତାଃ ଆଉକେତେ ଗୋଏଃ କୋପେ।’ ” ନେ କାଜିକୋ କାଜିକେତେ ୟୀଶୁ ଆଜାଃ ଚେଲାକୋଲୋଃ ୟୀରୁଶାଲେମ୍ ସାହାର୍ ହୋବା କେତେ ଆୟୁର୍ ତେ ସେନୋଃ ଜାନାଏ। ଚିମ୍ତାଙ୍ଗ୍ ଇନିଃ ଜାଏତୁନ୍ ଦାରୁ ବୁରୁ ମେନ୍ତେ ନୁତୁମୋଃତାନ୍ ବୁରୁ ଚେତାନ୍ ରେ ବେଥ୍‍ଫାଗେ ହାର୍ ବେଥାନି ହାତୁ ରାଃ ନାଡ଼େଏ ସେଟେର୍ ଜାନାଏ, ଏଣ୍ଡେ ଇନିଃ ଆଜାଃ ଚେଲାକୋ ଏତେ ବାର୍ହୋଡ଼୍ କିନ୍‍କେ ନେୟା କାଜିକେତେ କୁଲ୍ କେଃକିନାଏ, “ଆବେନ୍ ନାଡ଼େଏ ରାଃ ହାତୁ ତେ ସେନୋଃ ବେନ୍, ହାର୍ ଏନ୍ତାଃ ସେଟେର୍ ଲୋଃ ଗି ମିୟାଃ ଗାଧିଆ ରାଃ ହୋନ୍ ଅକନିଜାଃ ରେ ଜେତାଏ କାକୋ ଦୁବ୍ ଲେନ୍ ତାଇନା, ଥୋଲାକାନ୍ ଆପେକେ ନାମୋଗାଏ, ଇନିଃକେ ରାଡ଼ାକେତେ ଇଙ୍ଗ୍ଆଃ ତାଃ ଆୱିବେନ୍। ଆଗାର୍ ଜେତାଏ ଆବେନ୍ କେ କୁଲିବେନ୍ ରେ, ଚି ଚିନାଃ ମେନେଃ ବେନ୍ ରାଡ଼ାଇତାନା, ଦୋ ନେୟା କାଜିତାଃ ପେ, ଚି ପ୍ରାଭୁ କେ ନିଜାଃ ଦାର୍‍କାର୍ ମେନାଃ।” ଅକନ୍ ଚେଲାକିନ୍ କୁଲ୍ ଲେନାକିନ୍, ଇନିଃ ଇନ୍‍କିନ୍‍କେ ଅକଲେକା କାଜିଲେଦାଏ ଏନ୍ ଲେକାଗି ନାମ୍ କିଜାକିନ୍। ଚିମ୍ତାଙ୍ଗ୍ ଇନ୍‍କିନ୍ ଗାଧିଆ ରାଃ ହୋନ୍ କେ ରାଡ଼ାଇ ତାଇକିନାକିନ୍, ଇମ୍ତାଙ୍ଗ୍ ଗାଧିଆ ରାଃ ଗୋମ୍‍କେ ଇନ୍‍କିନ୍ କେ କୁଲିକେଃକିନାଏ, “ନେ ଗାଧିଆ ରାଃ ହୋନ୍ କେ ଚିନାଃ ମେନେଃ ରାଡ଼ାଇ ତାନାବେନ୍।” ଇନ୍‍କିନ୍ କାଜିକେଦାକିନ୍, “ପ୍ରାଭୁ କେ ନିଜାଃ ଦାର୍‍କାର୍ ମେନାଃ।” ଏନ୍ତେ ଇନ୍‍କିନ୍ ଏନ୍ ଗାଧିଆ ରାଃ ହୋନ୍ କେ ୟୀଶୁ ତାଃ ଆଉ ଲିଜାକିନ୍, ହାର୍ ଆକିନାଃ ଲିଜାଃ ଏନ୍ ଗାଧିଆ ହୋନ୍ ରାଃ ଦୋୟା ରେ ଏମ୍ କେତେ ୟୀଶୁ କେ ଇନିଜାଃ ଚେତାନ୍ ରେ ଦୁବ୍ ତାଜାକିନ୍। ଚିମ୍ତାଙ୍ଗ୍ ଇନିଃ ସେନ୍ ତାଇକେନାଏ, ଇମ୍ତା ଇନ୍‍କୁ ଆକୋୱାଃ ଲିଜାଃ ହୋରା ରେ ବିଲ୍ ଇଦି ତାଇନାକୋ। ଚିମ୍ତାଙ୍ଗ୍ ୟୀଶୁ ଜାଏତୁନ୍ ଦାରୁ ବୁରୁ ରାଃ ଢାଲୁ ହୋରା ଜାଗା ନାଡ଼େଏ ସେଟେର୍ ଜାନାଏ, ଦୋ ମିଃଥିମ୍ବା ଚେଲାକୋୱାଃ ଗୋହ୍‍ଣା ଏନ୍ ସବେନ୍ ପେଡ଼େଏ ରାଃ କାମି ରାଃ ହୋରାତେ ଅକନାଃ ଇନ୍‍କୁ ନେଲ୍ ଲେଦାକୋ, ରାଶିକା ହୋବାକେତେ ଜୋର୍ ଜୋର୍ତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଏଟେଃ କେଦାକୋ। “ଧାନ୍ୟା ଏନ୍ ରାଜା ତାନିଃ, ଅକନିଃ ପ୍ରାଭୁ ଆଃ ନୁତୁମ୍ ତେ ହିଜୁଃ ତାନାଏ! ସିର୍ମାଦିଶୁମ୍ ରେ ଶାନ୍ତି ହାର୍ ରିମିଲ୍‍ଦିଶୁମ୍ ରେ ମାନାରାଙ୍ଗ୍ ହୋବାଅଃ କା!” ଏନ୍ତେ ମିଃଥିମ୍ବା ହୋଡ଼ୋକୋ ଏତେ ଚିମିନାଙ୍ଗ୍ ଫାରିସୀ ହୋଡ଼ୋକୋ ଇନିଃକେ କାଜିକେଦାକୋ, “ହେ ଗୁରୁ, ଆମାଃ ଚେଲାକୋକେ ଏଗେର୍ କୋମ୍।” ୟୀଶୁ କାଜିରୁଆଡ଼୍ କେଦାଏ, “ଇଙ୍ଗ୍ ଆପେକେ କାଜିପେତାନିଙ୍ଗ୍, ଆଗାର୍ ନିକୁ ହାପା ତାଇନୋଗାକୋ, ଏଣ୍ଡେ ଦିରିକୋ କାଉରି ବିରିଦାକୋ।” ଚିମ୍ତା ୟୀଶୁ ୟୀରୁଶାଲେମ୍ ସାହାର୍ ନାଡ଼େଏ ହିଜୁଃ ଜାନାଏ ଏଣ୍ଡେ ସାହାର୍ କେ ନେଲ୍‍କେତେ ରାଆ କେଦାଏ, ହାର୍ କାଜିକେଦାଏ, “ଚିମିନ୍ ବୁଗିନ୍ ହୋବାଅଃ ତେୟାଃ, ଆଗାର୍ ଆପେ, ହାଁ ଆପେ ଗି ନେ ହୁଲାଙ୍ଗ୍ ରେ ପାର୍ମେଶ୍ଵାର୍ ରାଃ ଶାନ୍ତି କାଜିକୋକେ ସାରିତେୟାଃପେ, ମେନ୍ଦୋ ନାଆ ଏନାକୋ ଆପେୟାଃ ତେ ଉକୁଜାନା। ଚିୟାଃଚି ଏନ୍ ହୁଲାଙ୍ଗ୍ କୋ ଆପେୟାଃ ରେ ହିଜୁଗା ଚିମ୍ତା ଆପେୟାଃ ବାଇରୀକୋ ଆପେୟାଃ ବିରୋଧ୍ ରେ ଦାଲ୍ ବାଇକେତେ ଆପେକେ କେସେଃ ପେୟାକୋ, ହାର୍ ସବେନ୍ ହୋରାତେ ଆପେକେ ଅତା ପେୟାକୋ। ହାର୍ ଆପେୟାଃ ସାହାର୍ ଆଡୋଃ ଆପେୟାଃ ହୋଡ଼ୋକୋକେ ଅକନ୍‍କୋ ସାହାର୍ ରେ ମେନାକୋୱା, ଇନ୍‍କୁକେ ହାସା ରେ ମେଶା ତାପେୟାକୋ, ହାର୍ ଆପେୟାଃ ରେ ଦିରି ଚେତାନ୍ ଦିରି ଦୁଡ଼ିଙ୍ଗେୟାକୋ, ଚିୟାଃଚି ଆପେ ଏନ୍ ବୁଗିନ୍ ସାମାୟ୍ କେ ଚିମ୍ତା ପାର୍ମେଶ୍ଵାର୍ ଆପେକେ ବାଞ୍ଚାଅ ହିଜୁଃ ଲେନାଏ ଏନାକେ କାପେ ନେଲ୍ ଉରୁମ୍ କେଦା।” ଏନ୍ତେ ୟୀଶୁ ମାନ୍ଦିର୍ ରାଚା ଏତେ ଆଖ୍ରିଙ୍ଗ୍ ତାନ୍ କୋକେ ବାହାରି ଅଡୋଙ୍ଗ୍ କେଃକୋୱାଏ, ହାର୍ ଇନିଃ ଇନ୍‍କୁକେ କାଜିକେଃକୋୱାଏ, “ଅଲାକାନା, ‘ଇଙ୍ଗ୍ଆଃ ଅଡ଼୍ଆଃ ବିନ୍ତି ରାଃ ଅଡ଼୍ଆଃ କାଜିୟୋଗା’ ମେନ୍ଦୋ ଆପେ ଏନାକେ ଡାକୁକୋୱାଃ ଅଡ଼୍ଆଃ ବାଇକାଦାପେ।” ୟୀଶୁ ସବେନ୍ ହୁଲାଙ୍ଗ୍ ମାନ୍ଦିର୍ ରାଃ ରାଚା ରେ ଉପ୍‍ଦେଶ୍ ତାଇନାଏ, ମେନ୍ଦୋ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ହାର୍ ହୋଡ଼ୋକୋୱାଃ ମୁଖିୟା କୋ ଇନିଃ କେ ଗୋଏଃ ଲାଗିନ୍ ତାକ୍ ଦାଣା ବାଡ଼ା ତାଇକେନାକୋ। ମେନ୍ଦୋ ଜେତାନ୍ ହୋରା କାକୋ ନାମ୍ ଧାଡ଼ିଜାନା ଚି ନେୟା ଚିଲ୍‍କା ରିକା ୟାକୋ, ଚିୟାଃଚି ସବେନ୍ ହୋଡ଼ୋକୋ ଥିମ୍ବାଗି ସୁକୁ ତେ ଇନିଜାଃ କାଜି ଆୟୁମ୍ ତାଇନାକୋ। ମୁଶିଙ୍ଗ୍ ହୁଲାଙ୍ଗ୍ ଏନ୍‍ଲେକା ହୋବାଜାନା ଚି ୟୀଶୁ ମାନ୍ଦିର୍ ଅଡ଼୍ଆଃ ରାଃ ରାଚା ରେ ହୋଡ଼ୋକୋକେ ଉପ୍‍ଦେଶ୍ ଏମ୍‍କୋତାଇନାଏ ହାର୍ ସୁସାମାଚାର୍ ଉଦୁବ୍ କୋ ତାଇନାଏ, ଦୋ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ, ମାରିହୋଡ଼ୋକୋ ଲୋଃ ନାଡ଼େଏ ହିଜୁଃକେତେ ତିଙ୍ଗୁଜାନାକୋ, ହାର୍ ଇନିଃକେ କାଜିକେଦାକୋ, “ଆଲେକେ ଉଦୁବାଲେମ୍, ଆମ୍ ନେ କାମି କୋକେ ଅକେୟାଃ ଆଧିକାର୍ ତେ କାମିତାନାମ୍, ହାର୍ ଇନିଃ ଅକଏ ତାନିଃ ଅକନିଃ ଆମ୍‍କେ ନେ ଆଧିକାର୍ ଏମାକାଃମେୟାଏ?” ଇନିଃ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ହଗି ଆପେକେ ମିୟାଃ କାଜି କୁଲିପେ ତାନିଙ୍ଗ୍, ଇଙ୍ଗ୍‍କେ ଉଦୁବାଇଙ୍ଗ୍ ପେ। ଯୋହାନ୍ ରାଃ ବାପ୍ତିସ୍ମା ସିର୍ମାଦିଶୁମ୍ ଏତେ ତାଇକେନା ଚି ହୋଡ଼ୋକୋୱାଃ ପାଡ଼େତେ ତାଇକେନା?” ଏଣ୍ଡେ ଇନ୍‍କୁ ଆକୋ-ଆକୋ ରେ ବାକାଣ୍ କେଦାକୋ, “ଆଗାର୍ ଆବୁ କାଜିୟାବୁ, ‘ସିର୍ମାଦିଶୁମ୍ ଏତେ,’ ରେଦୋ ଇନିଃ କାଜିୟାଏ, ‘ଏଣ୍ଡେ ଆପେ ଇନିଜାଃ ଚିନାଃ ମେନ୍ତେ କାପେ ବିଶ୍ଵାସ୍ କେଦା?’ ହାର୍ ଆଗାର୍ ଆବୁ କାଜିୟାବୁ, ‘ହୋଡ଼ୋକୋୱାଃ ପାଡ଼େତେ,’ ରେଦୋ ସବେନ୍ ହୋଡ଼ୋକୋ ଆବୁକେ ଥେର୍ ବୁୱାକୋ, ଚିୟାଃଚି ଇନ୍‍କୁ ସବେନ୍ କୋ ସାରି ତାଇକେନାକୋ ଚି ଯୋହାନ୍ ନାବୀ ତାଇକେନାଏ।” ଏନାମେନ୍ତେ ଇନ୍‍କୁ କାଜିରୁଆଡ଼୍ କେଦାକୋ, “ଆଲେ କାଲେ ସାରିୟା ଚି ଇନିଃ ଅକେୟାଃ ପାଡ଼େତେ ତାଇକେନାଏ।” ୟୀଶୁ ଇନ୍‍କୁକେ କାଜିରୁଆଡ଼୍ କେଦାଏ, “ଏଣ୍ଡେ ଇଙ୍ଗ୍ ହଗି ଆପେକେ କାଇଙ୍ଗ୍ ଉଦୁବ୍ ପେୟା ଚି ନେ କାମି ଅକେୟାଃ ଆଧିକାର୍ ତେ କାମି ତାନିଙ୍ଗ୍।” ଏନ୍ତେ ୟୀଶୁ ହୋଡ଼ୋକୋକେ ନେ ଜୋନୋକା କାଜି ଏଟେଃ କେଦାଏ, “ମିୟାଃ ହୋଡ଼ ଆଙ୍ଗୁର୍ ବାଖ୍‍ଡ଼ି ବାଇକେଦାଏ, ହାର୍ ଚାଷିକୋକେ ଏନାକେ ସାଝା-ଚାଷି କାମି ନାଙ୍ଗ୍ ଏମ୍ କେଦାଏ ହାର୍ ଏଟାଃ ଦିଶୁମ୍ ତେ ଥିମ୍ବାଗି ହୁଲାଙ୍ଗ୍ ଲାଗିନ୍ ସେନୋଃ ଜାନାଏ। ଚିମ୍ତାଙ୍ଗ୍ ସାମାୟ୍ ହିଜୁଃଲେନା ଦୋ ଗୋମ୍‍କେ ଚାଷି କୋତାଃ ମିୟାଃ ଦାସୀ କେ କୁଲ‍୍‍କିଜାଏ ଚି ଆଙ୍ଗୁର୍ ବାଖ୍‍ଡ଼ି ଏତେ ଆଙ୍ଗୁର୍ ଯଅ ରାଃ ହିସା ଆଏଃକେ ଏମିକାକୋ, ମେନ୍ଦୋ ଚାଷିକୋ ଏନ୍ ଦାସୀ କେ ବିଡ଼ାକେତେ ସାମା ତିଈ ରୁଆଡ଼୍ ତାଇଜାକୋ। ଏନ୍ତେ ଇନିଃ ଆଡୋଃ ମିୟାଃ ଦାସୀ କେ କୁଲ‍୍‍କିଜାଏ, ହାର୍ ଇନ୍‍କୁ ଇନିଃକେ ହଗି ବିଡ଼ାକେତେ ହାର୍ ଇନିଃକେ ଆପ୍‍ମାନ୍ କେତେ ସାମା ତିଈ ରୁଆଡ଼୍ ତାଇଜାକୋ। ଏନ୍ତେ ଇନିଃ ତିସ୍ରା ଦାସୀ କେ କୁଲ‍୍‍କିଜାଏ, ହାର୍ ଇନ୍‍କୁ ଇନିଃକେ ହ ବିଡ଼ାକେତେ କେତେ ଅଡୋଙ୍ଗ୍ ତାଜାକୋ। ଏନ୍ତେ ଆଙ୍ଗୁର୍ ବାଖ୍‍ଡ଼ି ରେନ୍ ଗୋମ୍‍କେ କାଜିକେଦାଏ, ‘ଇଙ୍ଗ୍ ଚିନାଃ ରିକାୟାଇଙ୍ଗ୍? ଇଙ୍ଗ୍ ଇଙ୍ଗ୍ଆଃ ଦୁଲାଡ଼୍ ହୋନ୍ କେ କୁଲେୟାଇଙ୍ଗ୍, ହୋବା ଧାଡ଼ିୟୋଃୱା ଇନ୍‍କୁ ଇନିଃକେ ମାଇନ୍ ୟାକୋ।’ ଚିମ୍ତା ଚାଷିକୋ ଇନିଃକେ ନେଲ୍ କିଜାକୋ ଦୋ ଆକୋ-ଆକୋ ରେ ବିଚାର୍ କେଦାକୋ, ‘ନିଈ ଦୋ ଉତ୍ତାର୍-ଆଧିକାରୀ ତାନିଃ, ଦେଲା, ଆବୁ ନିଈକେ ଗୋଜିୟାବୁ ଏଣ୍ଡେ ନେ ଆଧିକାର୍ ଆବୁୱାଃ ହୋବାକୋୱା।’ ଏନ୍ତେ ଇନ୍‍କୁ ଇନିଃକେ ଆଙ୍ଗୁର୍ ବାଖ୍‍ଡ଼ି ରାଃ ବାହାରି ଅଡୋଙ୍ଗ୍ କେତେ ଗୋଏଃ କିଜାକୋ। ଏନାଲାଗିନ୍ ଆଙ୍ଗୁର୍ ବାଖ୍‍ଡ଼ି ରାଃ ଗୋମ୍‍କେ ଇନ୍‍କୁ ଲୋଃ ଚିନାଃ ରିକାୟାଏ? ଇନିଃ ହିଜୁଃକେତେ ଏନ୍ ଚାଷି କୋକେ ଗୋଏଃ କୋୱାଏ, ହାର୍ ଆଙ୍ଗୁର୍ ବାଖ୍‍ଡ଼ି କେ ଏଟାଃ କୋକେ ଜିମାତାକୋୱାଏ।” ନେୟା ଆୟୁମ୍‍କେତେ ଇନ୍‍କୁ କାଜିକେଦାକୋ, “ପାର୍ମେଶ୍ଵାର୍ ରିକାଏକା ଚି ନେଲେକା ଆଲୋକା ହୋବାଅଃକା।” ୟୀଶୁ ଇନ୍‍କୁ ପାଡ଼୍ ନେଲ୍‍କେତେ କାଜିକେଦାଏ, “ଏଣ୍ଡେ ନେୟା ଚିନାଃ ଅଲାକାନା: ଅକନ୍ ଦିରି କେ ରାଜ୍‍ମିସ୍ତ୍ରୀକୋ ଏଣ୍ଡାଃ ଲେଦାକୋ, ଏନାଗି କୋଚା ରାଃ ମୁଖିୟା ଦିରି ହୋବାଜାନା। ଜେତାଏ ଏନ୍ ଦିରି ଚେତାନ୍ ରେ ଉୟୁଗୋୱାଏ ଇନିଃ ଖାଣ୍ଡ୍-ଖାଣ୍ଡ୍ କେନୋଗାଏ, ହାର୍ ଅକେୟାଃ ଚେତାନ୍ ରେ ଏନା ଉୟୁଗୋଗା, ଇନିଃକେ ଏନା ରିଦ୍ ତାଇୟାଏ।” ଏନ୍ ସାମାୟ୍ ରେଗି ଆଇନ୍ ଗୁରୁକୋ ହାର୍ ପ୍ରାଧାନ୍ ୟାଜାକ୍‍କୋ ୟୀଶୁ କେ ସାସାବ୍ ସାନାଙ୍ଗ୍ କେନାକୋ, ଚିୟାଃଚି ଇନ୍‍କୁ ସାରି ଜାନାକୋ ଚି ଇନିଃ ଆବୁକେ ଠୋଗୋଃ ଲେକା ନେ ଜୋନୋକା କାଜିକେଦାଏ, ମେନ୍ଦୋ ଇନ୍‍କୁ ହୋଡ଼ୋକୋକେ ବୋରୋ କେଦାକୋ। ଏନ୍ତେ ଇନ୍‍କୁ ଇନିଜାଃ ତାକ୍ ରେ ତାଇନ୍ ଜାନାକୋ ହାର୍ ଯାସୁଶ୍ କୋକେ କୁଲ୍ କେଦାକୋ ଚି ଧାରାମ୍ ରାଃ ଭେଷ୍ ସାବ୍ କେତେ ଇନିଜାଃ ମିୟାଃ ନା ମିୟାଃ କାଜି ରେ ଭୁଲ୍ ସାବେୟାକୋ, ଏନାତେ ଇନିଃକେ ହାକିମ୍ ରାଃ ତିଈ ହାର୍ ଆଧିକାର୍ ରେ ଜିମାଇୟାକୋ। ଇନ୍‍କୁ ଇନିଃକେ ନେୟା କୁଲିକିଜାକୋ, “ହେ ଗୁରୁ, ଆଲେ ସାରିୟାଲେ ଚି ଆମ୍ ଠିକ୍ ଗି କାଜିୟାମ୍ ହାର୍ ଶିଖାଅୟାମ୍, ହାର୍ ଜେତାୟାଃ ମେଏଃମୁହାଡ଼୍ ନେଲ୍ କେତେ କାମ୍ କାଜିୟାକୋୱା, ମେନ୍ଦୋ ପାର୍ମେଶ୍ଵାର୍ ରାଃ ହୋରା କେ ସାର୍ତି ତେ ଉଦୁବେୟାମ୍। ଚିନାଃ ଆଲେକେ ରୋମ୍‍ରେନ୍ ରାଜା କେ ମାଲ୍-ଗୁଜାରି ଏମ୍ ତେୟାଃ ଠିକ୍ ତାନାଃ ଚି ନାହାଲା?” ୟୀଶୁ ଇନ୍‍କୁୱାଃ ହୋସିୟାର୍ କେ ଆଟ୍‍କାର୍ କେତେ ଇନ୍‍କୁକେ କାଜିୟାଃକୋୱାଏ, ମିୟାଃ ଦିନାର୍ ଇଙ୍ଗ୍‍କେ ଦେଖାଇଙ୍ଗ୍ ପେ। ନେଣ୍ଡେ ରେ ଅକେୟାଃ ଛାପା ହାର୍ ଅକେୟାଃ ନୁତୁମ୍ ମେନାଃ? ଇନ୍‍କୁ କାଜିକେଦାକୋ “ରୋମ୍‍ରେନ୍ ରାଜା ରାଃ।” ଇନିଃ ଇନ୍‍କୁକେ କାଜିକେଃକୋୱାଏ, “ଏଣ୍ଡେ ଅକନାଃ ରୋମ୍‍ରେନ୍ ରାଜା ରାଃ ତାନାଃ, ଏନା ରୋମ୍‍ରେନ୍ ରାଜା କେ ଏମାଇପେ ହାର୍ ଅକନାଃ ପାର୍ମେଶ୍ଵାର୍ ରାଃ ତାନାଃ, ଏନା ପାର୍ମେଶ୍ଵାର୍ କେ ଏମାଇପେ।” ଇନ୍‍କୁ ହୋଡ଼ୋକୋୱାଃ ସାମ୍ନା ରେ ନେ କାଜି ରେ ଇନିଃକେ ଭୁଲ୍ କାକୋ ସାବ୍ ଧାଡ଼ିଜାନା, ମେନ୍ଦୋ ଇନିଜାଃ କାଜିରୁଆଡ଼୍ ଆୟୁମ୍‍କେତେ ଆକ୍‍ଦାନ୍ଦା ହୋବାକେତେ ହାପା ଜାନାକୋ। ଏନା ତାୟୋମ୍ତେ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ, ଇନ୍‍କୁ କାଜିୟାକୋ ଚି ଗୋଜାକାନ୍ କୋୱାଃ ଜୀବିନିରିଦ୍ ଗି ବାନୋଗା, ଇନ୍‍କୁ ଏତେ ଚିମିନାଙ୍ଗ୍ ୟୀଶୁ ତାଃ ହିଜୁଃକେତେ କୁଲିକିଜାକୋ, “ହେ ଗୁରୁ, ମୁଶା ନାବୀ ନେୟା ଅଲାକାଦାଏ, ‘ଆଗାର୍ ମିୟାଃ ହାଗା ଆଜାଃ କୁଡ଼ି କେ ଜୀହିଃ ତାଇନ୍ ରେଗି ବେଗାର୍ ହୋନ୍-ଗାଣା ହୋବା କେତେ ଗୋଏଃ କେନୋଗାଏ, ଦୋ ଇନିଜାଃ ହାଗା ଇନିଜାଃ କୁଡ଼ି କେ ଆଣାଦୀ କେକାଏ, ହାର୍ ଆଜାଃ ହାଗା ତେ ଲାଗିନ୍ ହୋନ୍-ଗାଣାକୋ ଜାନାମ୍ କୋକାଏ।’ ସାତ୍ ଝାନ୍ ହାଗାକୋ ତାଇନ୍ କେନାକୋ, ପାହିଲା ହାଗା ଆଣାଦୀ କେତେ ବେଗାର୍ ହୋନ୍-ଗାଣା ଗୋଏଃ ଜାନାଏ। ଆଡୋଃ ଏଟାଃନିଃ, ଏନ୍ତେ ତିସ୍ରା ନିଈ ହଗି ଏନ୍ କୁଡ଼ି କେ ଆଣାଦୀ କିଜାଏ। ଏନ୍ ଲେକାତେ ସାତ୍ ଝାନ୍ ବେଗାର୍ ହୋନ୍-ଗାଣା ଗୋଏଃ ଜାନାକୋ। ଟୁଣ୍ଡୁ ରେ ଏନ୍ କୁଡ଼ି ହଗି ଗୋଏଃ ଜାନାଏ। ଏନାମେନ୍ତେ ଜୀବିନିରିଦ୍ ରେ ଏନ୍ କୁଡ଼ି ଇନ୍‍କୁୱାଃ ତେ ଅକେୟାଃ କୁଡ଼ି ହୋବାୱାଏ, ଚିୟାଃଚି ଇନିଃ ସାତୋ ଝାନ୍ କୋୱାଃ କୁଡ଼ି ହୋବା ଲେନ୍ ତାଇନାଏ।” ୟୀଶୁ ଇନ୍‍କୁକେ କାଜିୟାଃକୋୱାଏ, “ନେ ଯୁଗ୍ ରେନ୍ ହୋଡ଼ୋକୋ ରେ ଆଣାଦୀ ହାର୍ ଗୋଙ୍ଗ୍‍ ହୋବାୱା, ମେନ୍ଦୋ ଅକନ୍ ହୋଡ଼ୋକୋ ନେ ଲାଏକ୍ ହୋବାଃୱାକୋ ଚି ଏନ୍ ଯୁଗ୍ କେ ହାର୍ ଗୋଜାକାନ୍ କୋଏତେ ଜୀବିନିରିଦ୍ କେ ନାମେୟାଏ, ଇନ୍‍କୁ ନାଦୋ ଆଣାଦିନାକୋ ନାଦୋ ଗୋଙ୍ଗ୍ଅଗାକୋ। ଏନ୍ତେ ଇନ୍‍କୁ ଆଡୋଃ କାକୋ ଗୋଜୋଗା, ଚିୟାଃଚି ଇନ୍‍କୁ ସିର୍ମାଦାସୀକୋ ଲେକା ହୋବାୱାକୋ, ହାର୍ ଜୀବିନିରିଦ୍ ରାଃ ହୋନ୍ ହୋବାଜାନ୍ତେ ପାର୍ମେଶ୍ଵାର୍ ରାଃ ହ ହୋନ୍ ହୋବାୱାକୋ। ମେନ୍ଦୋ ନେ କାଜିକେ ଚି ଗୋଜାକାନ୍ କୋ ଜୀହିଃ ବିରିଦାକୋ, ମେନ୍ତେ ମୁଶା ନାବୀ ଅଗି ଜାନୁମ୍ ଚୁପାଃ ରାଃ କାହାନୀ ରେ ଉଦୁବ୍ କାଦାଏ, ଇନିଃ ପ୍ରାଭୁ କେ ‘ଆବ୍ରାହାମ୍ ରାଃ ପାର୍ମେଶ୍ଵାର୍, ହାର୍ ଇସାହାକ୍ ରାଃ ପାର୍ମେଶ୍ଵାର୍ ହାର୍ ୟାକୁବ୍ ରାଃ ପାର୍ମେଶ୍ଵାର୍’ ମେନ୍ତେ କାଜି ତାନାଏ। ପାର୍ମେଶ୍ଵାର୍ ଦୋ ଗୋଜାକାନ୍ କୋୱାଃ କାହା ମେନ୍ଦୋ ଜୀହିଦ୍ ତାନ୍ କୋୱାଃ ପାର୍ମେଶ୍ଵାର୍ ତାନିଃ, ଚିୟାଃଚି ଇନିଜାଃ ନାଡ଼େଏ ରେ ସବେନ୍ କୋ ଜୀହିଃ ଗିୟାକୋ।” ଏନ୍ତେ ନେ କିଜାକୋ ଆୟୁମ୍‍କେତେ ଆଇନ୍ ଗୁରୁ କୋଏତେ ଚିମିନାଙ୍ଗ୍ କୋ ନେୟା କାଜିକେଦାକୋ, “ହେ ଗୁରୁ, ଆମ୍ ବେଶ୍ କାଜିକେଦାମ୍।” ଏନ୍ତେ ଇନ୍‍କୁ ଇନିଃକେ ଆଡୋଃ ଜେତ୍ନାଃ କୁଲି ଲାଗିନ୍ ସାହାସ୍ କା ହୋବାଜାନା। ଏନ୍ତେ ୟୀଶୁ ଇନ୍‍କୁକେ କୁଲିକେଦାଏ, “ମାସୀହ୍ କେ ଦାଉଦ୍ ରାଜା ରାଃ ସାନ୍ତାନ୍ ଚିନାଃ ଲାଗିନ୍ କାଜିୟାକୋ? ଦାଉଦ୍ ଆଏଃ ଗି ଦୁରାଙ୍ଗ୍ କିତାବ୍ ରେ କାଜିୟାଏ: ‘ପ୍ରାଭୁ ଦୋ ଇଙ୍ଗ୍ଆଃ ପ୍ରାଭୁ କେ କାଜିକେଦାଏ, ଇଙ୍ଗ୍ଆଃ ଜୋମ୍ ତିଈ ପାଡ଼୍ ରେ ଦୁବ୍‍ମେ, ଚିମିନ୍ ଜାକେଦ୍ ଚି ଇଙ୍ଗ୍ ଆମାଃ ବାଇରୀ କୋକେ ଆମାଃ କାଟା ଲାଥାର୍ କାଇଙ୍ଗ୍ ବାଇତାକୋୱା।’ ଦାଉଦ୍ ଦୋ ଇନିଃକେ ପ୍ରାଭୁ କାଜି ତାନାଏ, ଏଣ୍ଡେ ମାସୀହ୍ ଇନିଜାଃ ସାନ୍ତାନ୍ ଚିଲ୍‍କା ବାଇଜାନାଏ?” ଚିମ୍ତାଙ୍ଗ୍ ସବେନ୍ ହୋଡ଼ୋକୋ ଆୟୁମ୍ ତାଇନାକୋ, ଇମ୍ତା ୟୀଶୁ ଆଜାଃ ଚେଲାକୋକେ କାଜିକେଦାଏ, “ଆଇନ୍ ଗୁରୁ କୋଏତେ ହୁସିଆର୍ ତାଇନ୍ ପେ ଅକନ୍ କୋ ଜିଲିଙ୍ଗ୍-ଜିଲିଙ୍ଗ୍ ଲିଜାଃ ଦୁସିଙ୍ଗ୍ କେତେ ହୋନୋର୍ ବେଶ୍ ଆଦା କୋୱା, ହାର୍ ଇନ୍‍କୁକେ ପିଟ୍ ରେ ହୋଡ଼ୋକୋୱାଃ ଜୋହାର୍ ହାର୍ ବିନ୍ତିଅଡ଼୍ଆଃ ରେ ମାଇନ୍ ନାମେ ଜାଗା କୋରେ ଦୁବ୍ ହାର୍ ଭୋଜ୍ ଅଡ଼୍ଆଃ ରେ ମାଇନ୍ ନାମେ ଜାଗା କୋରେ ଦୁବ୍ ସୁକୁ ଆଦା କୋୱା। ଇନ୍‍କୁ ବିଧୋବା କୋୱାଃ ଅଡ଼୍ଆଃ ହାର୍ ସାମ୍ପାତି କୋକେ ରେଏଃ ଇଦିକେୟାକୋ, ହାର୍ ହୋଡ଼ୋକୋ ବେଶ୍ ପାତି ୟାକୋ ମେନ୍ତେ ଜିଲିଙ୍ଗ୍ ବିନ୍ତି ରିକା ୟାକୋ, ଇନ୍‍କୁ ଥିମ୍ବାଗି ଦାଣ୍ଡ୍ ନାମେୟାକୋ।” ୟୀଶୁ ଆଜାଃ ମେଏଃ ଆରିଃ କେତେ କିଶାଣ୍ ହୋଡ଼ୋକୋକେ ଆପାନାଃ-ଆପାନାଃ ଭେଁଟ୍ ଟାକା କୋକେ ବାକ୍ସା ରେ ସାଜୁତାନ୍ ନେଲ୍ କେଦାଏ। ଇନିଃ ମିୟାଃ ଗାରିବ୍ ବିଧୋବା କେ ହ ଏନାରେ ବାରିୟା ତାମ୍ବା ପାଏସା ଭେଁଟ୍ ସାଜୁତାନ୍ ନେଲ୍ କିଜାଏ। ଏନ୍ତେ ଇନିଃ କାଜିକେଦାଏ, “ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍ ଚି ନେ ଗାରିବ୍ ବିଧୋବା ସବେନ୍ କୋଏତେ ଥିମ୍ବା ସାଜୁ କେଦାଏ। ଚିୟାଃଚି ଏନ୍ ସବେନ୍ ହୋଡ଼ୋକୋ ଆପାନାଃ-ଆପାନାଃ ଥିମ୍ବା ଟାକା କୋଏତେ ବାକ୍ସା ରେ ହୁଡିଙ୍ଗ୍ ଟାକା ସାଜୁ କେଦାକୋ, ମେନ୍ଦୋ ନିଈ ଗାରିବ୍ ତାଇକେତେ ଅକନାଃ ଆଜାଃ ଜୀଦାନ୍ ଆସୁଲେନ୍ ତେୟାଃ ସବେନ୍ ପାଏସା ସାଜୁ ତାଦାଏ।” ଚିମ୍ତାଙ୍ଗ୍ ହୋଡ଼ୋକୋ ମାନ୍ଦିର୍ ରାଃ ବିଷାୟ୍ ରେ କାଜି ତାଇନାକୋ ଚି ଏନା ଚିଲ୍‍କା ସୁନ୍ଦାର୍ ଦିରିକୋତେ ହାର୍ ଭେଁଟ୍ ଏମାକାଃ ଜିନିଷ୍ କୋଏତେ ଶାଜାଅ କାନା, ଏଣ୍ଡେ ୟୀଶୁ କାଜିକେଦାଏ, “ଏନ୍ ହୁଲାଙ୍ଗ୍ ହିଜୁଗା, ଅକଣ୍ଡେରେ ନେ ସବେନାଃ ଅକନାଃ ଆପେ ନେଲ୍‍ତାନାପେ, ଏନାକୋଏତେ ନେତାଃ ରେ ଜାହାନ୍ ଦିରି ଚେତାନ୍ ଦିରି ହ ତିରିଙ୍ଗ୍‍କାନ୍ କା ତାଇନା ସବେନାଃ ଧାଶୁଡ଼୍ ଅଗା।” ଇନ୍‍କୁ ଇନିଃକେ କୁଲିକିଜାକୋ, “ହେ ଗୁରୁ, ନେୟା ସବେନାଃ ଚିଉଲା ହୋବାୱା? ହାର୍ ନେ କିଜାକୋ ଚିମ୍ତାଙ୍ଗ୍ ପୁରାଅଃ ରାଃ ତାଇନୋଃୱା, ଦୋ ଏନ୍ ସାମାୟ୍ ରାଃ ଚିହ୍ନା ଚିନାଃ ହୋବାୱା?” ଇନିଃ କାଜିୟାଃକୋୱାଏ, “ହୋସିଆର୍ ତାଇନ୍‍ପେ ଚି ଆଲୋପେ ହିଡ଼୍ଅଃୱା, ଚିୟାଃଚି ଥିମ୍ବାଗି ଇଙ୍ଗ୍ଆଃ ନୁତୁମ୍ ତେ ହିଜୁଃ କେତେ କାଜିୟାକୋ, ‘ଇଙ୍ଗ୍ ଇନିଃଗି ତାନିଙ୍ଗ୍,’ ହାର୍ ନେୟା ହ ଚି, ‘ସାମାୟ୍ ନାଡ଼େଏଃ ହିଜୁଃ ସେଟେର୍ କାନା।’ ଇନ୍‍କୁ କେ ଆଲୋପେ ଅତୋଙ୍ଗ୍ କୋୱା। ଚିମ୍ତାଙ୍ଗ୍ ଲାଡ଼ାଇ ହାର୍ ଦାଙ୍ଗା ରାଃ କାଜିକୋ ଆୟୁମ୍ ୟାପେ ଦୋ ଆଲୋପେ ବୋରୋୟା, ଚିୟାଃଚି ନେୟା କୋରାଃ ହୋବାଅଃ ସିଦା ଜାରୁରୀ ମେନାଃ, ମେନ୍ଦୋ ଏନ୍ ସାମାୟ୍ ସେକାଡ଼୍ ଗି ଟୁଣ୍ଡୁ କା ହୋବାୱା।” ଏନ୍ତେ ଇନିଃ ଇନ୍‍କୁକେ କାଜିୟାଃକୋୱାଏ, “ଜାତି ଚେତାନ୍ ଜାତି ହାର୍ ରାଇଜ୍ ଚେତାନ୍ ରାଇଜ୍ ଲାଡ଼ାଇ ହୋବାୱା। ହାର୍ ମାପ୍‍ରାଙ୍ଗ୍ ଅତେହିଲାଅ ହୋବାୱା, ହାର୍ ଜାଗା-ଜାଗା ରେ ଆକାଲ୍ ହୋବାୱା ହାର୍ ମାହାମାରୀ ହୋବାୱା, ହାର୍ ରିମିଲ୍‍ଦିଶୁମ୍ ରେ ବୋରୋୱାନ୍ କାଜିକୋ ହାର୍ ମାପ୍‍ରାଙ୍ଗ୍ ଚିହ୍ନା କୋ ନେଲୋଗା। ମେନ୍ଦୋ ନେ କାଜି କୋରାଃ ସିଦାରେ ଇନ୍‍କୁ ଆପେକେ ଇଙ୍ଗ୍ଆଃ ଚେଲା ତାନ୍‍ପେ ମେନ୍ତେ ସାବ୍ ପେୟାକୋ, ହାର୍ ସାତାଅ ପେୟାକୋ, ବିନ୍ତିଅଡ଼୍ଆଃ କୋରେ ବିଚାର୍ ଜିମା ପେୟାକୋ, ଏନ୍ତେ ଜେଲ୍ଅଡ଼୍ଆଃ କୋରେ ଆଦେର୍ ପେୟାକୋ, ରାଜା କୋୱାଃ ହାର୍ ହାକିମ୍ କୋୱାଃ ନାଡ଼େଏଃ ଇଦିପେୟାକୋ। ମେନ୍ଦୋ ନେୟା ଆପେ ଲାଗିନ୍ ଗୋୱା ଏମେ ରାଃ ସାମାୟ୍ ହୋବାୱା। ଏନାଲାଗିନ୍ତେ ଆପାନାଃ-ଆପାନାଃ ମୋନ୍ ରେ ସିଦାରେ ଚିନାଃ କାଜିରୁଆଡ଼୍ ହୋବାୱା ମେନ୍ତେ ଆଲୋପେ ସେକାଡ଼୍ କାନୋଃୱା। ଚିୟାଃଚି ଇଙ୍ଗ୍ ଆପେକେ ନେଲେକା କାଜି ହାର୍ ସେଣା ଏମାପେୟାଇଙ୍ଗ୍ ଚି ଆପେୟାଃ ସବେନ୍ ବିରୋଧୀକୋ ସାମ୍ନା ରିକା ହାର୍ କାଜି କାଟାଅ କାକୋ ଧାଡ଼ିପେୟା। ଆପେୟାଃ ଏଙ୍ଗା-ଆପୁ ହାର୍ ହାଗାକୋ ହାର୍ କୁଟୁମ୍ବ କୋ ହାର୍ ଗାତିକୋ ହଗି ଆପେକେ ସାବାପେୟାକୋ, ନେତାଃ ସାନ୍ତେ ଚି ଆପେ କୋଏତେ ଚିମିନାଙ୍ଗ୍ କୋକେ ଗୋଏଃ ରିକା ପେୟାକୋ। ଇଙ୍ଗ୍ଆଃ ନୁତୁମ୍ ରେ ବିଶ୍ଵାସ୍ ତାନାପେ ମେନ୍ତେ ସବେନ୍ ହୋଡ଼ୋକୋ ଆପେକେ ହିଲାଙ୍ଗ୍ ପେୟାକୋ। ମେନ୍ଦୋ ଆପେୟାଃ ବୋଅ ରାଃ ମିୟାଃ ଉବ୍ ହଗି କା କୋଟା ଅଗା। ଆପାନାଃ ସାହାତିଙ୍ଗ୍ ପେଡ଼େଏ ତେ ଆପାନାଃ ଜୀଉ କେ ବାଚାଓ ୟାପେ। ଚିମ୍ତାଙ୍ଗ୍ ଆପେ ୟୀରୁଶାଲେମ୍ ସାହାର୍ କେ ସିପାହୀ କୋଏତେ କେସେଃକାନ୍ ନେଲେୟାପେ, ଦୋ ସାରିକେୟାପେ ଚି ଏନା ଧାଶୁଡ଼୍‍ଅଃ ରାଃ ସାମାୟ୍ ନାଡ଼େଏ ମେନାଃ। ଇମ୍ତା ଅକଏ ୟାହୁଦୀୟା ଜିଲ୍ଲା ରେ ତାଇନାକୋ ଇନ୍‍କୁ ବୁରୁ ଚେତାନ୍ ତେ ନିର୍ କାକୋ, ହାର୍ ଅକଏ ୟୀରୁଶାଲେମ୍ ସାହାର୍ ଭିତାର୍ ରେ ତାଇନାକୋ ଇନ୍‍କୁ ବାହାରି ତେ ଅଡୋଙ୍ଗଅଃ କାକୋ, ହାର୍ ଅକଏ ହାତୁ କୋରେ ତାଇନାକୋ ଇନ୍‍କୁ ସାହାର୍ ଭିତାର୍ ତେ ଆଲୋ ସେନ୍ କାକୋ। ଚିୟାଃଚି ଏନା ବାଦ୍‍ଲା ଇଦି ରାଃ ଏନ୍ ହୁଲାଙ୍ଗ୍ କୋ ହୋବାୱା, ଅକନାଃ ଅଲାକାନା ଏନ୍ ସବେନ୍ କାଜିକୋ ପୁରାଅଗା। ଏନ୍ ହୁଲାଙ୍ଗ୍ କୋରେ ଅକଏ ହୋଡ଼ମୋ ରେ ତାଇନୋଗାଏ ହାର୍ ତୱା ଆନୁ କାତେୟାଏ, ଇନ୍‍କୁ ଲାଗିନ୍ ହାୟ୍, ହାୟ୍! ଚିୟାଃଚି ଦିଶୁମ୍ ରେ ମାରାଙ୍ଗ୍ ଦୁକୁ ହାର୍ ନେ ହୋଡ଼ୋକୋୱାଃ ଚେତାନ୍ ରେ ଖିସ୍ ହୋବାୱା। ହାର୍ ଇନ୍‍କୁ ତାଲ୍‍ୱାର୍ କୋଏତେ ମାଗୋଗାକୋ, ସବେନ୍ ଦିଶୁମ୍ ରେନ୍ ହୋଡ଼ୋ କୋତାଃ ଥୋଲ୍ ଇଦିକେତେ ସେଟେର୍ ଅଗାକୋ, ହାର୍ ଚିମ୍ତାଙ୍ଗ୍ ସାନ୍ ଏଟାଃଜାତି ରେନ୍ ହୋଡ଼ୋକୋୱାଃ ସାମାୟ୍ କା ପୁରାଅଗା, ଏନ୍ ସାନ୍ତେ ୟୀରୁଶାଲେମ୍ ଏଟାଃଜାତି କୋଏତେ ତିକାଅଗା। ଶିଙ୍ଗି ହାର୍ ଚାଣ୍ଡୁଃ, ହାର୍ ଇପିଲ୍ କୋରେ ଚିହ୍ନା କୋ ନେଲୋଗା, ହାର୍ ଅତେ ରେ ଦିଶୁମ୍-ଦିଶୁମ୍ ରେନ୍ ହୋଡ଼ୋକୋୱାଃ ରେ ମାରାଙ୍ଗ୍ ଦୁକୁ ହୋବାୱା, ଚିୟାଃଚି ଇନ୍‍କୁ ସାମୁଦାର୍ ରାଃ ହାର୍ ଏନାରାଃ ଲାହାଡ଼ି ରାଃ ଗାର୍ଜାଅ ତେ ବୋରୋ କେନୋଗାକୋ। ବୋରୋ ରାଃ ହୋରାତେ ଅତେ ରେ ହିଜୁତାନ୍ ଘାଟ୍ନା କୋରାଃ ହୋରା ନେଲ୍-ନେଲ୍‍କେତେ ହୋଡ଼ୋକୋୱାଃ ଜୀଉ ରେ ଜୀଉ କା ତାଇନା, ଚିୟାଃଚି ରିମିଲ୍‍ଦିଶୁମ୍ ରାଃ ପେଡ଼େଏ ହିଲାଅଗା। ଇମ୍ତା ଇଙ୍ଗ୍ ମାନ୍‍ୱା ରାଃ ହୋନ୍ କେ ପେଡ଼େଏ ହାର୍ ମାରାଙ୍ଗ୍ ଯୁନୁଲ୍‍ତାନ୍ ଲୋଃ ରିମିଲ୍ ରେ ହିଜୁଃତାନ୍ ନେଲିଙ୍ଗ୍‍ୟାକୋ। ଚିମ୍ତାଙ୍ଗ୍ ନେ କାଜିକୋ ହୋବା ଏଟେଃୱା, ଦୋ ସିଧା ତିଙ୍ଗୁ କେତେ ଆପାନାଃ ବୋଅ କେ ଚେତାନ୍ ପାଡ଼୍ ଉଠାଓଏପେ, ଚିୟାଃଚି ଆପେୟାଃ ଛୋଡ଼ାଓ ନାଡ଼େଏ ହୋବାୱା।” ୟୀଶୁ ଇନ୍‍କୁକେ ମିୟାଃ ଜୋନୋକା କାଜି ହଗି କାଜିକେଦାଏ, “ଲୋୱା ଦାରୁ କେ ହାର୍ ସବେନ୍ ଦାରୁ କୋକେ ନେଲେପେ। ଚିମ୍ତା ଏନା କୋରେ ବାଲେଃ ସାକାମ୍ ସାଗେନୋଃ ୱା, ଇମ୍ତାଙ୍ଗ୍ ଆପେ ଆପେତେଗୀ ସାରିକେୟାପେ ଚି ଶିତୁମ୍ ସାମାୟ୍ ନାଡ଼େଏ ଗିୟା। ନେଲେକାଗି ଚିମ୍ତା ଆପେ ନେ କାଜିକୋ ହୋବାଅଃତାନ୍‍ ନେଲେୟାପେ, ଦୋ ସାରିକେପେ ଚି ପାର୍ମେଶ୍ଵାର୍ ରାଃ ରାଇଜ୍ ନାଡ଼େଏ ମେନାଃ। ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଚି ଚିମିନ୍ ସାନ୍ତେ ନେ କାଜିକୋ କାପୁରାଅଃୱା, ଏନ୍ ସାନ୍ତେ ନେ ଜାତିରେନ୍ ପିଢ଼ୀ ରାଃ ଟୁଣ୍ଡୁ ଚିଉଲା ହ କା ହୋବାଅଃୱା। ରିମିଲ୍‍ଦିଶୁମ୍ ଆଡୋଃ ଅତେ ଛାବା କେନୋଗା ମେନ୍ଦୋ ଇଙ୍ଗ୍ଆଃ କାଜି ଚିଉଲା ହ କାଛାବାଅଃୱା। ଏନାଲାଗିନ୍ ହୋସିଆର୍ ତାଇନୋଃପେ, ଏନ୍ ଲେକା ଆଲୋକା ହୋବାଅଃକା ଚି ଆପେୟାଃ ମୋନ୍ ଏତ୍କାନ୍ ଆଭ୍ୟାସ୍ ରେ ହାର୍ ବୁବୁଲେନ୍ ରେ, ହାର୍ ନେ ଜୀଦାନ୍ ରାଃ ପାହୋମ୍ କୋରେ ଆଲୋକା ତାଇନୋଃକା, ହାର୍ ଏନ୍ ହୁଲାଙ୍ଗ୍ ଫାନ୍ଦା ଲେକା ଆପେ ରେ ଆଲୋକା ହିଜୁଃ କା। ଚିୟାଃଚି ଏନା ସବେନ୍ ଅତେଦିଶୁମ୍ ରେ ତାଇନ୍ ତାନ୍ ହୋଡ଼ୋକୋରେ ନେଲେକା ଗି ହିଜୁଃ ସେଟେରା। ଏନାମେନ୍ତେ ଏୟୋନାକାନ୍ ତାଇନ୍‍ପେ ହାର୍ ସବେନ୍ ସାମାୟ୍ ବିନ୍ତି କାତେପେ ଚି ଆପେ ନେ ସବେନ୍ ହିଜୁଃ ଘାଟ୍ନା କୋଏତେ ବାଞ୍ଚାଅ ୱାପେ ହାର୍ ଇଙ୍ଗ୍ ମାନ୍‍ୱା ରାଃ ହୋନ୍ ନାଡ଼େଏ ରେ ତିଙ୍ଗୁନ୍ ଲାଏକ୍ ବାଇୟୋଃପେ।” ଇନିଃ ସବେନ୍ ହୁଲାଙ୍ଗ୍ ମାନ୍ଦିର୍ ରାଃ ରାଚା ରେ ଉପ୍‍ଦେଶ୍ ତାଇନାଏ, ହାର୍ ନିଦା ଇମ୍ତା ବାହାରି ସେନ୍ କେତେ ଜାଏତୁନ୍ ଦାରୁ ନୁତୁମ୍ ବୁରୁ ରେ ତାଇନ୍ ତାଇନାଏ, ହାର୍ ଇଦାନ୍ ସେତାଃ ରେ ସବେନ୍ ହୋଡ଼ୋକୋ ଆଜାଃ ଉପ୍‍ଦେଶ୍ ଆୟୁମ୍ ଲାଗିନ୍ ମାନ୍ଦିର୍ ରାଃ ରାଚା ରେ ହିଜୁଃ ତାଇନାକୋ। ଖାମୀର୍ କାମେଶାକାନ୍ ହୋଲୋଙ୍ଗ୍ ରାଃ ପାରାବ୍ ଅକନାଃ ୟାହୁଦୀ କୋୱାଃ ଫାସାହ୍ ପାରାବ୍ କାଜିୟୋଃୱା, ନାଡ଼େଏ ଗି ତାଇକେନା, ହାର୍ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ନେ କାଜି କୋରାଃ ଦାଣା ରେ କୋ ତାଇକେନା ଚି ଇନିଃକେ ଚିଲ୍‍କା ତେ ଗୋଜିୟାକୋ, ମେନ୍ଦୋ ଇନ୍‍କୁ ହୋଡ଼ୋକୋକେ ବୋରୋ ତାଇନାକୋ। ଏନ୍ତେ ଶାଏତାନ୍ ୟାହୁଦା ରେ ବୋଲୋଜାନାଏ, ଅକନିଃ ଇସ୍କାରିୟୋତୀ କାଜିୟୋଃ ତାଇନାଏ ହାର୍ ବାରା ଚେଲାକୋ ଏତେ ମିହୋଡ଼୍ ତାଇକେନାଏ। ଇନିଃ ସେନ୍ କେତେ ପ୍ରାଧାନ୍ ୟାଜାକ୍ କୋଲୋଃ ହାର୍ ମାନ୍ଦିର୍ କେ ହୋରୋତାନ୍ କୋୱାଃ ଗୋମ୍‍କେ କୋଲୋଃ ବାକାଣ୍ କେଦାଏ ଚି ଇନିଃକେ ଚିଲ୍‍କା ଇନ୍‍କୁୱାଃ ତିଈ ରେ ସାବାଇ ୟାଏ। ଇନ୍‍କୁ ରାଶିକା ଜାନାକୋ, ହାର୍ ଇନିଃକେ ପାଇସା ଏମେୟାଲେ ମେନ୍ତେ କାଜିକିଜାକୋ। ଇନିଃ ମାନାତିଙ୍ଗ୍ ଜାନାଏ, ହାର୍ ତାକ୍ ଦାଣା-ବାଡ଼ା କେଦାଏ ଚି ଚିମ୍ତାଙ୍ଗ୍ ଥିମ୍ବା ହୋଡ଼ୋକୋ କାକୋ ତାଇନା ଇମ୍ତାଙ୍ଗ୍ ଇନିଃକେ ଇନ୍‍କୁୱାଃ ତିଈ ରେ ସାବାଇ ୟାଏ। ଏନ୍ତେ ଖାମୀର୍ କାମେଶାକାନ୍ ହୋଲୋଙ୍ଗ୍ ରାଃ ପାରାବ୍ ହୁଲାଙ୍ଗ୍ ହିଜୁଃଲେନା, ଅକଣ୍ଡେରେ ଫାସାହ୍ ରାଃ ମିଣ୍ଡୀ କେ ଦାଣେ ରାକାବ୍ ଜାରୁରୀ ତାଇନ୍ କେନା। ୟୀଶୁ ପାତ୍ରାସ୍ ହାର୍ ଯୋହାନ୍ କେ ନେୟା କାଜିକେତେ କୁଲ୍ କେଦାଏ, “ସେନ୍ କେତେ ଆବୁୱାଃ ଲାଗିନ୍ ଫାସାହ୍ ପାରାବ୍ ରାଃ ଜୋମେୟାଃ ବାଇବେନ୍।” ଇନ୍‍କୁ ଇନିଃକେ କୁଲିକିଜାକୋ, “ଆମ୍ କୋତାଃ ସାନାଙ୍ଗ୍ ତାନାମ୍ ଚି ଆଲେ ଏନା ବାଇୟାଲେ?” ଇନିଃ ଇନ୍‍କୁକେ କାଜିକେଦାଏ, “ନେଲେପେ, ସାହାର୍ ବୋଲୋତାନ୍ ଲୋଃଗି ମିୟାଃ ହୋଡ଼ ଦାଆ ଚାଟୁ ତାରାଣ୍ ରେ ଗୋଅକାନ୍ ଆପେକେ ନାମୋଗାଏ, ଅକନ୍ ଅଡ଼୍ଆଃ ରେ ଇନିଜାଃଏ ସେନା ଆପେ ଇନିଜାଃ ଦୋୟା ତେ ସେନ୍ ପେ, ଏନ୍ତେ ଏନ୍ ଅଡ଼୍ଆଃ ରେନ୍ ଗୋମ୍‍କେ କେ କାଜିୟାଇପେ, ‘ଗୁରୁ ଆମ୍‍କେ କୁଲିମେତାନାଏ ଚି ଧାରାମ୍‍ଶାଲା କୋତାଃ ରେୟା ଏନାରେ ଇଙ୍ଗ୍ ଇଙ୍ଗ୍ଆଃ ଚେଲାକୋ ଲୋଃ ଫାସାହ୍ ପାରାବ୍ ରାଃ ଜୋମେୟାଃ ଜୋମେୟାଇଙ୍ଗ୍?’ ଇନିଃ ଆପେକେ ମିୟାଃ ଶାଜାଅ କାନ୍ ହାର୍ ସେକାଡ଼୍‍କାନ୍ ମାରାଙ୍ଗ୍ କୋଠୋରୀ ଦେଖାଅ ପେୟାଏ, ଏନ୍ତାଃରେ ଗି ଯୋଜୋମାଃ ବାଇୟେପେ। ଇନ୍‍କୁ ସେନ୍ କେତେ, ଜେଲେକା ୟୀଶୁ କାଜିଲେଦାଏ, ଏନ୍‍ଲେକାଗି ନାମ୍ କେଦାକୋ ହାର୍ ଫାସାହ୍ ପାରାବ୍ ରାଃ ଜୋମେୟାଃ ବାଇକେଦାକୋ।” ଚିମ୍ତାଙ୍ଗ୍ ସାମାୟ୍ ହୋବାଜାନା, ଏଣ୍ଡେ ୟୀଶୁ ଆଜାଃ କୁଲାକାନ୍ ଚେଲାକୋ ଲୋଃ ଜୋମ୍ ଲାଗିନ୍ ଦୁବ୍ ଜାନାଏ। ଏନ୍ତେ ଇନିଃ ଇନ୍‍କୁକେ କାଜିୟାଃକୋୱାଏ, “ଇଙ୍ଗ୍ଆଃ ଥିମ୍ବାଗି ସାନାଙ୍ଗ୍ ତାଇକେନା ଚି ଦୁକୁ ଉଠାଓ ହାର୍ ଗୋଜୋଃ ସିଦାରେ ନେ ଫାସାହ୍ ପାରାବ୍ ରାଃ ଜୋମେୟାଃ ଆପେ ଲୋଃ ଜୋମେୟାଇଙ୍ଗ୍। ଚିୟାଃଚି ଇଙ୍ଗ୍ ଆପେକେ କାଜିପେ ତାନିଙ୍ଗ୍ ଚି ଚିମିନ୍ ସାନ୍ତେ ଏନା ପାର୍ମେଶ୍ଵାର୍ ରାଃ ରାଇଜ୍ ରେ କାପୁରାଅଃୱା ଏନ୍ ସାନ୍ତେ ଇଙ୍ଗ୍ ଏନା ଚିଉଲା ହ କାଇଙ୍ଗ୍ ଜୋମେୟା।” ଏନ୍ତେ ୟୀଶୁ ଗିଲାସ୍ ସାବ୍ କେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ ହାର୍ କାଜିକେଦାଏ, “ନେୟା ଇଦିପେ ହାର୍ ଆପେ ଥାଲା ରେ ହାଟିଙ୍ଗ୍ ଏପେ। ଚିୟାଃଚି ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ଚିମିନ୍ ସାନ୍ତେ ପାର୍ମେଶ୍ଵାର୍ ରାଃ ରାଇଜ୍ କାହିଜୁଗା ଏନ୍ ସାନ୍ତେ ଇଙ୍ଗ୍ ଆଙ୍ଗୁର୍ ରାଃ ରାଶି ନାଆ ଏତେ ଚିଉଲା ହ କାଇଙ୍ଗ୍ ନୁୱେୟା।” ଏନ୍ତେ ଇନିଃ ହୋଲୋଙ୍ଗ୍ ସାବ୍ କେଦାଏ ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କେଚାଃ କେଦାଏ, ହାର୍ ଇନ୍‍କୁକେ ନେୟା କାଜିତାନ୍ ଲୋଃ ଏମାଃ କୋୱାଏ, “ନେୟା ଇଙ୍ଗ୍ଆଃ ହୋଡ଼ମୋ ତାନାଃ ଅକନାଃ ଆପେୟାଃ ଲାଗିନ୍ତେ ଏମୋଃ ତାନାଃ, ଇଙ୍ଗ୍‍କେ ପାହୋମ୍ ଲାଗିନ୍ତେ ନେୟାଗି ରିକାଏପେ।” ନେ ଲେକାତେଗି ଇନିଃ ଜୋମେ ରାଃ ତାୟୋମ୍ତେ ଗିଲାସ୍ ହ ନେୟା କାଜିତାନ୍ ଲୋଃ ଏମ୍‍କେଦାଏ, “ନେ ଗିଲାସ୍ ଇଙ୍ଗ୍ଆଃ ଏନ୍ ମାୟୋମ୍ ରେ ଅକନାଃ ଆପେୟାଃ ଲାଗିନ୍ତେ ଲିଙ୍ଗୀଅଃ ତାନା ନାୱା ନିୟାମ୍‍ଥଲ୍ ତାନାଃ। ମେନ୍ଦୋ ନେଲେପେ, ଇଙ୍ଗ୍‍କେ ସାସାବ୍ ନିଈ ଇଙ୍ଗ୍ଆଃ ଲୋଃ ଟେବୁଲ୍ ରେ ମେନାଇଜା। ଚିୟାଃଚି ଇଙ୍ଗ୍ ମାନ୍‍ୱା ରାଃ ହୋନ୍ ଜେଲେକା ଇଙ୍ଗ୍ଆଃ ଲାଗିନ୍ ମାଣ୍ଡାଅ କାନା ଏନ୍‍ଲେକା ହୋବାୱା, ମେନ୍ଦୋ ହାୟ୍ ଏନ୍ ହୋଡ଼ ଲାଗିନ୍ ଅକନିଜାଃ ହୋରାତେ ଇଙ୍ଗ୍ ସାବୋଃ ତାନିଙ୍ଗ୍!” ଏନ୍ତେ ଇନ୍‍କୁ ଆକୋ-ଆକୋ ରେ କୁଲି-ଯାଞ୍ଚ୍ ଏଟେଃ କେଦାକୋ ଚି ଆବୁ ଥାଲା ଏତେ ଅକଏ ତାନିଃ, ଚି ଇନିଃ ନେ କାମି ରିକାୟାଏ? ଇନ୍‍କୁରେ ନେୟା କୁପୁଲି ହଗି ହୋବାଜାନା ଚି ଆକୋ ଥାଲା ରେ ଅକଏ ମାରାଙ୍ଗ୍ କାଜିୟୋଃ ତାନାଏ। ୟୀଶୁ ଇନ୍‍କୁକେ କାଜିକେଦାଏ, “ଏଟାଃଜାତି କୋୱାଃ ରାଜାକୋ ଆକୋରେ ରାଇଜ୍ ତାନାକୋ, ହାର୍ ଅକଏ ହିନ୍‍କୁୱାଃ ରେ ଆଧିକାର୍ ମାଣ୍ଡାଅ ତାନାକୋ, ଇନ୍‍କୁ ହୋଡ଼ ସେୱାନିଃ ନୁତୁମୋଃ ତାନାକୋ। ଆପେ ଏନ୍‍ଲେକା ଆଲୋପେ ହୋବାୱା! ମେନ୍ଦୋ ଅକଏ ଆପେ ରେ ମାରାଙ୍ଗ୍ ତାନିଃ, ଇନିଃ ହୁଡିଙ୍ଗ୍ ଲେକା ହାର୍ ଅକଏ ମୁଖିୟା ତାନିଃ, ଇନିଃ ଦାସୀ ଲେକା ହୁଡିଙ୍ଗ୍ଏନ୍ କାଏ। ଚିୟାଃଚି ମାରାଙ୍ଗ୍ ଅକଏ ତାନିଃ? ଇନିଃ ଅକନିଃ ଜୋମ୍ ଲାଗିନ୍ ଦୁବ୍ କାନାଏ, ଚି ଇନିଃ ଅକନିଃ ସେୱା ତାନାଏ? ଚିନାଃ ଇନିଃ ନାହାଲି ଅକନିଃ ଜୋମ୍ ଲାଗିନ୍ ଦୁବ୍ କାନାଏ? ମେନ୍ଦୋ ଇଙ୍ଗ୍ ଆପେ ଥାଲା ରେ ସେୱାକ୍ ଲେକା ମେନାଇଙ୍ଗ୍ ୟା।” ଆପେ ହିନ୍‍କୁ ତାନ୍‍ପେ, ଅକନ୍‍କୋ ଇଙ୍ଗ୍ଆଃ ପାରୀକ୍ଷା ରେ ସବେନ୍ ଇମ୍ତା ଇଙ୍ଗ୍ ଲୋଃ ତାଇକେନାପେ; ଜେଲେକା ଇଙ୍ଗ୍ଆଃ ଆପୁ ଇଙ୍ଗ୍ଆଃ ଲାଗିନ୍ ମିୟାଃ ରାଇଜ୍ ମାଣ୍ଡାଅ କାଦାଏ, ଏନ୍‍ଲେକାଗି ଇଙ୍ଗ୍ ହଗି ଆପେୟାଃ ଲାଗିନ୍ ମାଣ୍ଡାଅ ତାନିଙ୍ଗ୍, ଏନାତେ ଆପେ ଇଙ୍ଗ୍ଆଃ ରାଇଜ୍ ରେ ଇଙ୍ଗ୍ଆଃ ଟେବୁଲ୍ ରେ ଜୋମେୟାପେ-ନୁୱେୟାପେ, ଆଡୋଃ ସିଂହାସାନ୍ ଚେତାନ୍ ରେ ଦୁବ୍ କେତେ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋୱାଃ ବାରା କିଲି କୋକେ ବିଚାର୍ ୟାପେ। “ଶିମୋନ୍, ହେ ଶିମୋନ୍, ନେଲେମ୍, ଶାଏତାନ୍ ଆପେକେ ଆସିକାଃ ପେୟାଏ ଚି ଗହମ୍ ଲେକା ଆପେକେ ଗୁମ୍ ପେୟାଏ, ମେନ୍ଦୋ ଇଙ୍ଗ୍ ଆମାଃ ଲାଗିନ୍ ବିନ୍ତି କାଦାଇଙ୍ଗ୍ ଚି ଆମାଃ ବିଶ୍ଵାସ୍ ଆଲୋ ଘାଟାଅଃକା; ହାର୍ ଚିମ୍ତାଙ୍ଗ୍ ଆମ୍ ଇଙ୍ଗ୍ ଲୋଃ ବାଇରୁଆଡ଼୍ଅଗାମ୍, ଦୋ ଆମାଃ ହାଗାକୋକେ କେଟେଃ କୋମ୍।” ପାତ୍ରାସ୍ ଇନିଃକେ କାଜିକେଦାଏ, “ହେ ପ୍ରାଭୁ, ଇଙ୍ଗ୍ ଆମାଃ ଲୋଃ ଜେଲ୍ଅଡ଼୍ଆଃ ସେନ୍ ଲାଗିନ୍, ହାର୍ ଗୋଜେନ୍ ଲାଗିନ୍ ହ ସେକାଡ଼୍ ମେନାଇଙ୍ଗ୍ ୟା।” ୟୀଶୁ କାଜିକେଦାଏ, “ହେ ପାତ୍ରାସ୍, ଇଙ୍ଗ୍ ଆମ୍‍କେ କାଜିତାନିଙ୍ଗ୍ ଚି ଇସିଙ୍ଗ୍ ସିମ୍ କାଏ ରାଆୟାଏ ଚିମିନ୍ ସାନ୍ତେ ଆମ୍ ଆପିସା ଇଙ୍ଗ୍‍କେ କାମ୍ ମାନାୟା ଚି ଆମ୍ ଇଙ୍ଗ୍ କେ କାମ୍ ସାରିୟା।” ଏନ୍ତେ ୟୀଶୁ ଇନ୍‍କୁକେ କାଜିୟାଃକୋୱାଏ, “ଚିମ୍ତାଙ୍ଗ୍ ଇଙ୍ଗ୍ ଆପେକେ ପାଏସା, ଆଡୋଃ ଥାଇଲା, ହାର୍ ବେଗାର୍ ଖାର୍ପା କୁଲ୍ ଲେଃ ପେୟାଇଙ୍ଗ୍, ଏଣ୍ଡେ ଚିନାଃ ଆପେକେ ଜାହାନାଃ ଘାଟି ହୋବା ଲେନା?” ଇନ୍‍କୁ କାଜିକେଦାକୋ, “ଜେତ୍ନାଃ କାହା।” ଇନିଃ ଇନ୍‍କୁକେ କାଜିୟାଃକୋୱାଏ, “ମେନ୍ଦୋ ନାଆ ଏଟାଃ ସାମାୟ୍ ତାନାଃ ଅକେୟାଃ ତାଃ ରେ ପାଏସା ମେନାଃ ଇନିଃ ଏନାକେ ସାବେକାଏ ହାର୍ ଏନ୍ ଲେକାଗି ଥାଇଲା ହଗି, ହାର୍ ଅକେୟାଃ ତାଃ ରେ ତାଲ୍‍ୱାର୍ ବାନୋଃୱା ଇନିଃ ଆଜାଃ ବାହାରି ଲିଜାଃ ଆଖ୍ରିଙ୍ଗ୍ କେତେ ମିୟାଃ କିରିଙ୍ଗ୍ ଏକାଏ। ଚିୟାଃଚି ଇଙ୍ଗ୍ ଆପେକେ କାଜିୟାପେତାନିଙ୍ଗ୍, ନେୟା ଅକନାଃ ପାବିତାର୍ ପୁଥି ରେ ଅଲାକାନା, ‘ଇନିଃ ଆପ୍ରାଧି କୋଲୋଃ ଲେକା ଜାନାଏ,’ ଏନା ଇଙ୍ଗ୍ଆଃ ରେ ପୁରା ହୋବାଅଃ ଜାଲେକାତେ ମେନାଃ, ଚିୟାଃଚି ଇଙ୍ଗ୍ଆଃ ବିଷାୟ୍ ରେ ଅଲାକାନ୍ କାଜି ପୁରା ହୋବାଅଃ ରାଃ ମେନାଃ।” ଇନ୍‍କୁ କାଜିକେଦାକୋ, “ହେ ପ୍ରାଭୁ, ନେଲେମ୍, ନେତାଃ ରେ ବାରିୟା ତାଲ୍‍ୱାର୍ ମେନାଃ।” ଇନିଃ ଇନ୍‍କୁକେ କାଜିୟାଃକୋୱାଏ, “ନିମିନ୍ ହୋବାକୋୱା।” ଏନ୍ତେ ୟୀଶୁ ବାହାରି ତେ ଅଡୋଙ୍ଗ୍ କେତେ ଆଜାଃ ସବେନ୍ ହୁଲାଙ୍ଗ୍ ଲେକା ଜାଏତୁନ୍ ଦାରୁ ବୁରୁ ଚେତାନ୍ ତେ ସେନ୍ ଜାନାଏ, ହାର୍ ଚେଲାକୋ ଆଜାଃ ଦୋୟା-ଦୋୟା ତେ ଅତୋଙ୍ଗ୍ କିଜାକୋ। ଏନ୍ ଜାଗା ସେଟେର୍ କେତେ ଇନିଃ ଇନ୍‍କୁକେ କାଜିକେଃକୋୱାଏ, “ବିନ୍ତି ପେ ଚି ଆପେ ପାରୀକ୍ଷା ରେ କାପେ ଉୟୁଗୋଃୱା।” ଏନ୍ତେ ଇନିଃ ଇନ୍‍କୁଏତେ ଆଲାଗ୍ ମିୟାଃ ଢେଲା ଦୁଡ଼ିଙ୍ଗ୍ ଇମିନ୍ ସାଙ୍ଗିନ୍ ସେନ୍ ଜାନାଏ, ଆଡୋଃ ଇକ୍ଡ଼ୁମ୍ କେତେ ବିନ୍ତି ଏଟେଃ କେଦାଏ, “ହେ ଆବା, ଆଗାର୍ ଆମ୍ ସାନାଙ୍ଗ୍ ତାନାମ୍ ରେଦୋ ନେ ଦୁକୁକେ ଇଙ୍ଗ୍ଆଃ ତାଃତେ ଆତୋମ୍ ତାମ୍ ମେନ୍ଦୋ ଇଙ୍ଗ୍ଆଃ କାହା ଆମାଃ ସାନାଙ୍ଗ୍ ପୁରାଅଃକା।” ଏନ୍ତେ ସିର୍ମାଦିଶୁମ୍ ଏତେ ମିୟାଃ ସିର୍ମାଦାସୀ ଇନିଃକେ ନେଲ୍ ଜାନାଏ ଅକନିଃ ଚି ଇନିଃକେ ପେଡ଼େଏ ଏମ୍ ତାଇନାଏ। ଇନିଃ ଥିମ୍ବାଗି ଦୁକୁ ରେ ଆକ୍‍ବାକାଅ କେତେ ପୁରାଃ ମୋନ୍ ଏତେ ବିନ୍ତି ଏଟେଃ କେଦାଏ, ହାର୍ ଆଜାଃ ବାଲ୍-ବାଲ୍ ଦାଆ ମାୟୋମ୍ ରାଃ ମାରାଙ୍ଗ୍-ମାରାଙ୍ଗ୍ ଟିପାଃ ଲେକା ଅତେ ରେ ଉୟୁଗୋଃ ତାଇନା। ଏନ୍ତେ ଇନିଃ ବିନ୍ତି ଏତେ ବିରିଃ ଜାନାଏ ହାର୍ ଆଜାଃ ଚେଲା କୋତାଃ ହିଜୁଃକେତେ ଇନ୍‍କୁକେ ଦୁକୁ ରାଃ ହୋରାତେ ଦୁଣୁମ୍ ତାନ୍ ନାମ୍ କେଃକୋୱାଏ, ଏନ୍ତେ ଇନ୍‍କୁକେ କାଜିକେଃକୋୱାଏ, “ଚିନାଃ ନାଙ୍ଗ୍ ଦୁଣୁମ୍ ତାନାପେ? ବିରିଃପେ, ବିନ୍ତି ପେ ଚି ପାରୀକ୍ଷା ରେ କାପେ ଉୟୁଗୋଃୱା।” ଚିମ୍ତାଙ୍ଗ୍ ୟୀଶୁ କାଜିତାନ୍ ସାମାୟ୍ ରେ ଥିମ୍ବାଗି ହୋଡ଼ୋକୋ ହିଜୁଃ ଲେନାକୋ, ହାର୍ ଏନ୍ ବାରା ଚେଲାକୋ ଏତେ ମିହୋଡ଼୍ ଅକନିଜାଃ ନୁତୁମ୍ ୟାହୁଦା ତାଇକେନା ଇନ୍‍କୁୱାଃ ଆୟୁର୍-ଆୟୁର୍ ହିଜୁଃ ତାଇନାଏ। ଇନିଃ ୟୀଶୁ ତାଃ ହିଜୁଃ ଲେନାଏ ଚି ଇନିଃକେ ଚୁମାଇୟାଏ। ୟୀଶୁ ଇନିଃକେ କାଜିକେଦାଏ, “ହେ ୟାହୁଦା, ଚିନାଃ ଆମ୍ ଚୁମା କେତେ ଇଙ୍ଗ୍ ମାନ୍‍ୱା ରାଃ ହୋନ୍ କେ ସାବିତାନାମ୍?” ଇନିଜାଃ ଗାତିକୋ ଚିମ୍ତାଙ୍ଗ୍ ନେଲ୍ କେଦାକୋ ଚି ଚିନାଃ ହୋବାଅଃ ରାଃ ମେନାଃ, ଏଣ୍ଡେ କାଜିକେଦାକୋ, “ହେ ପ୍ରାଭୁ, ଚିନାଃ ଆଲେ ତାଲ୍‍ୱାର୍ ତେ ମାଆ କୋୱାଲେ?” ହାର୍ ଇନ୍‍କୁ ଏତେ ମିହୋଡ଼୍ ମାରାଙ୍ଗ୍ ୟାଜାକ୍ ରାଃ ଦାସୀ ଚେତାନ୍ ରେ ତାଲ୍‍ୱାର୍ ବିୟୁର୍ କେତେ ଇନିଜାଃ ଜୋମ୍ ପାଡ଼୍ ରାଃ ଲୁତୁର୍ କେ ଖାଣ୍ଡାଅ ତାଦାଏ। ନେୟାରେ ୟୀଶୁ କାଜିକେଦାଏ, “କାହା, ଇମିନାଙ୍ଗ୍ ଗି ଆଲୋପେ ରିକାଏ।” ହାର୍ ଇନିଜାଃ ଲୁତୁର୍ ଜୁଟିଃ କେତେ ଇନିଃକେ ବେଶ୍ ତାଦାଏ। ଏନ୍ତେ ୟୀଶୁ ପ୍ରାଧାନ୍ ୟାଜାକ୍‍କୋକେ ହାର୍ ମାନ୍ଦିର୍ କେ ହୋରୋତାନ୍ କୋୱାଃ ଗୋମ୍‍କେ କୋକେ ହାର୍ ମାରିହୋଡ଼ୋକୋକେ, ଅକନ୍ କୋ ଆଜାଃ ବିରୋଧ୍ ରେ ହିଜୁଃ ଲେନାକୋ, କାଜିକେଃକୋୱାଏ, “ଚିନାଃ ଆପେ ଇଙ୍ଗ୍‍କେ ଡାକୁ ଆଟ୍‍କାର୍ କେତେ ତାଲ୍‍ୱାର୍ ହାର୍ ଲାଠି ସାବ୍ କେତେ ହିଜୁଃ କାନାପେ? ଚିମ୍ତାଙ୍ଗ୍ ଇଙ୍ଗ୍ ମାନ୍ଦିର୍ ରେ ସବେନ୍ ହୁଲାଙ୍ଗ୍ ଆପେ ଲୋଃ ତାଇ ତାଇକେନାଇଙ୍ଗ୍, ଦୋ ଇମ୍ତା ଆପେ ଇଙ୍ଗ୍‍କେ କାପେ ସାବ୍ କିଦିଙ୍ଗ୍ଆ; ମେନ୍ଦୋ ନେୟା ଆପେୟାଃ ସାମାୟ୍ ତାନାଃ। ହାର୍ ନୁବାଃ ରାଃ ଆଧିକାର୍ ତାନାଃ।” ଏନ୍ତେ ଇନ୍‍କୁ ୟୀଶୁ କେ ସାବ୍ କେତେ ଇଦିକିଜାକୋ, ହାର୍ ମାରାଙ୍ଗ୍ ୟାଜାକ୍ ରାଃ ଅଡ଼୍ଆଃ ତେ ଆଉଲିଜାକୋ। ମେନ୍ଦୋ ପାତ୍ରାସ୍ ସାଙ୍ଗିନ୍-ସାଙ୍ଗିନ୍ ରେ ଇନିଜାଃ ତାୟୋମ୍-ତାୟୋମ୍ ସେନ୍ ତାଇନାଏ। ଚିମ୍ତାଙ୍ଗ୍ ଇନ୍‍କୁ ରାଚା ରେ ସେଙ୍ଗେଲ୍ ଜୁଲ୍ କେତେ ଜୁରୁବ୍ ନାଙ୍ଗ୍ ହୁଣ୍ଡି ଲେନ୍ ତାଇନାକୋ, ଇମ୍ତା ପାତ୍ରାସ୍ ହ ଆକୋୱାଃ ଥାଲା ରେ ଦୁବ୍ ଜାନାଏ। ଏନ୍ତେ ମିୟାଃ ଦାସୀ କୁଡ଼ି ଇନିଃକେ ସେଙ୍ଗେଲ୍ ରାଃ ମାସ୍କାଲ୍ ତେ ନେଲ୍ କେତେ ହାର୍ ଇନିଜାଃ ପାଡ଼୍ ନେଲ୍‍କେତେଗି କାଜିକେଦାଏ, “ନିଜୋଗି ଦୋ ଇନିଜାଃ ଲୋଃ ତାଇକେନାଏ।” ମେନ୍ଦୋ ପାତ୍ରାସ୍ ନେୟା କାଜିକେତେ ମାନା କିଜାଏ, “ହେ କୁଡ଼ି, ଇଙ୍ଗ୍ ଇନିଃକେ କାଇଙ୍ଗ୍ ସାରିୟା।” ହୁଡିଙ୍ଗ୍ ସାମାୟ୍ ରାଃ ତାୟୋମ୍ତେ ଆଡୋଃ ମିହୋଡ଼୍ ପାତ୍ରାସ୍ କେ ନେଲ୍‍କେତେ କାଜିକେଦାଏ, “ଆମ୍ ହଗି ଦୋ ଇନ୍‍କୁ ଏତେ ତାନ୍‍ମେ।” ପାତ୍ରାସ୍ କାଜିକେଦାଏ, “ହେ ହୋଡ଼, ଇଙ୍ଗ୍ ନାହାଲାଇଙ୍ଗ୍।” ମିୟାଃ ଘାଣ୍ଟା ତାୟୋମ୍ତେ ଆଡୋଃ ମିହୋଡ଼୍ କେଟେଃ ତେଗି ତେ କାଜିକେଦାଏ, ସାର୍ତିଗୀ ନିଜୋଗି ଇନିଜାଃ ଲୋଃ ତାଇକେନାଏ, ଚିୟାଃଚି ନିଈ ଗାଲିଲୀ ଜିଲ୍ଲା ରେନ୍ ତାନିଃ। ପାତ୍ରାସ୍ କାଜିକେଦାଏ, “ହେ ହୋଡ଼, ଇଙ୍ଗ୍ କାଇଙ୍ଗ୍ ସାରିତାନା ଚି ଆମ୍ ଚିନାଃ କାଜିତାନାମ୍!” ଇନିଃ କାଜି ତାଇନାଏ ଚି ଇମ୍ତାଗି ସିମ୍ ରାଆ କେଦାଏ। ଏନ୍ତେ ପ୍ରାଭୁ ତାୟୋମ୍ ପାଡ଼୍ ଆରିଃ କେତେ ପାତ୍ରାସ୍ କେ ନେଲ୍ କିଜାଏ, ଏନ୍ତେ ପାତ୍ରାସ୍ କେ ପ୍ରାଭୁ ରାଃ ଏନ୍ କାଜି ପାହୋମ୍ ହିଜୁଃ ଲେନା ଅକନାଃ ଇନିଃ କାଜିଲେଦାଏ, “ଇସିଙ୍ଗ୍ ସିମ୍ କୋ ରାଆ ସିଦାରେ, ଆମ୍ ଆପିସା ଇଙ୍ଗ୍‍କେ ମାନା ୟାମ୍।” ଏନ୍ତେ ଇନିଃ ବାହାରି ଅଡୋଙ୍ଗ୍ କେତେ ପାହୋମ୍-ପାହୋମ୍ ରାଆ କେଦାଏ। ଅକନ୍ ହୋଡ଼ୋକୋ ୟୀଶୁ କେ ସାବ୍ ଲିଜାକୋ, ଇନ୍‍କୁ ଲାନ୍ଦା କେତେ ବିଡ଼ା କିଜାକୋ, ହାର୍ ଇନିଜାଃ ମେଏଃ କେ ଲିଜାଃ ତେ ଥୋଲ୍ କେତେ ଇନିଃକେ କୁଲିକିଜାକୋ, “ଆୟାର୍‍କାଜି କାଜିକେତେ ଉଦୁବେମ୍ ଚି ଅକଏ ଆମ୍‍କେ ବିଡ଼ାକେଃ ମେୟାଏ!” ହାର୍ ଇନ୍‍କୁ ଥିମ୍ବାଗି ନିନ୍ଦା କିଜାକୋ ଇନିଜାଃ ବିରୁଦ୍ଧ୍ ରେ କାଜିକେଦାକୋ। ଚିମ୍ତାଙ୍ଗ୍ ସେତାଃ ହୋବାଜାନା ଦୋ ହୋଡ଼ୋକୋୱାଃ ମାରିହୋଡ଼ୋକୋ ହାର୍ ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ହୁଣ୍ଡି ଜାନାକୋ, ଆଡୋଃ ୟୀଶୁ କେ ଆକୋୱାଃ ମାରାଙ୍ଗ୍‍ସାଭା ରେ ଆଉକେତେ କୁଲିକିଜାକୋ, “ଆଗାର୍ ଆମ୍ ମାସୀହ୍ ତାନ୍‍ମେ ରେଦୋ, ଆଲେକେ କାଜିତାଲେମ୍!” ୟୀଶୁ ଇନ୍‍କୁକେ କାଜିୟାଃକୋୱାଏ, “ଆଗାର୍ ଇଙ୍ଗ୍ ଆପେକେ କାଜିପେୟାଇଙ୍ଗ୍, ଏଣ୍ଡେ କାପେ ବିଶ୍ଵାସ୍ ଏୟା; ହାର୍ ଆଗାର୍ ଆପେ କେ କୁଲି ପେୟାଇଙ୍ଗ୍, ଏଣ୍ଡେ କାପେ କାଜିରୁଆଡ଼୍ ୟା। ମେନ୍ଦୋ ନାଆ ତେ ଇଙ୍ଗ୍ ମାନ୍‍ୱା ରାଃ ହୋନ୍ ସବେନ୍ ଏତେ ପେଡ଼େଜାନ୍ ପାର୍ମେଶ୍ଵାର୍ ରାଃ ଜୋମ୍ ପାଡ଼୍ ରେ ଦୁବାକାନ୍ ତାଇନୋଗାଇଙ୍ଗ୍।” ନେୟାରେ ସବେନ୍ କୋ କାଜିକେଦାକୋ, “ଦୋ ଚିନାଃ ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ?” ଇନିଃ ଇନ୍‍କୁକେ କାଜିକେଦାଏ, “ହାଁ ଆପେ କାଜିତାନ୍ ଲେକାଗି, ଇଙ୍ଗ୍ ତାନିଙ୍ଗ୍।” ଏନ୍ତେ ଇନ୍‍କୁ କାଜିକେଦାକୋ, “ନାଆ ଆବୁକେ ଗୋୱା ରାଃ ଚିକାନ୍ ଦାର୍‍କାର୍ ମେନାଃ, ଚିୟାଃଚି ଆବୁ ଆବୁଗି ଇନିଜାଃ ମୋଚା ଏତେ ଆୟୁମ୍ କେଦାବୁ।” ଏନ୍ତେ ସାଭା ରେନ୍ ସବେନ୍ ବିରିଃ କେତେ ୟୀଶୁ କେ ପିଲାତୁସ୍ ରୋମାନ୍ ହାକିମ୍ ତାଃ ଇଦିକିଜାକୋ। ଇନ୍‍କୁ ନେୟା କାଜିକେତେ ଇନିଜାଃ ରେ ଦୋଷ୍ ଲାଗାଅ କେଦାକୋ, “ଆଲେ ନିଃକେ ହୋଡ଼ୋକୋକେ ଲୋଗୋ କେତେ ବାଗ୍ଡ଼ାଅତାନ୍, ହାର୍ ରୋମ୍‍ରେନ୍ ରାଜା କେ ମାଲ୍‍ହାରୋମ୍ ଟାକା ଏମ୍ ଲାଗିନ୍ ମାନାରିକାତାନ୍, ହାର୍ ଆଏଃ ଆପାନ୍ କେ ମାସୀହ୍, ରାଜା କାଜିତାନ୍ ଆୟୁମ୍ କିଜାଲେ।” ପିଲାତୁସ୍ ଇନିଃକେ କୁଲିକିଜାଏ, “ଚିନାଃ ଆମ୍ ୟାହୁଦୀ କୋୱାଃ ରାଜା ତାନ୍‍ମେ?” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଆମ୍ ଗିଦୋ କାଜି ତାନାମ୍।” ଏନ୍ତେ ପିଲାତୁସ୍ ପ୍ରାଧାନ୍ ୟାଜାକ୍‍କୋକେ ହାର୍ ହୋଡ଼ୋକୋକେ କାଜିୟାଃକୋୱାଏ, “ଇଙ୍ଗ୍ ନେ ହୋଡ଼ ରେ ଜେତାନ୍ ଦୋଷ୍ କାଇଙ୍ଗ୍ ନାମ୍‍ତାନା।” ମେନ୍ଦୋ ଇନ୍‍କୁ ଆଡୋଃଗି କେଟେଃତେ କାଜିକେଦାକୋ, “ନିଈ ଗାଲିଲୀ ଜିଲ୍ଲା ଏତେ ଇଦିକେତେ ନେତାଃ ସାନ୍ତେ, ସବେନ୍ ୟାହୁଦୀୟା ଜିଲ୍ଲା ରେ ଉପ୍‍ଦେଶ୍ ଏମ୍ ଏମ୍‍କେତେ ହୋଡ଼ୋକୋକେ ଭାଡ଼୍‍କାଅ କୋତାନାଏ।” ନେୟା ଆୟୁମ୍‍କେତେ ପିଲାତୁସ୍ କୁଲିକେଃକୋୱାଏ, “ଚିନାଃ ନେ ହୋଡ଼ ଗାଲିଲୀ ଜିଲ୍ଲା ରେନ୍ ତାନିଃ?” ହାର୍ ନେୟା ସାରିକେତେ ଚି ଇନିଃ ହେରୋଦ୍ ରାଜା ରାଇଜ୍ ତାନ୍ ଜାଗା ରେନ୍ ତାନିଃ, ଇନିଃକେ ହେରୋଦ୍ ରାଜା ତାଃ କୁଲ୍ ତାଜାଏ, ଚିୟାଃଚି ଏନ୍ ହୁଲାଙ୍ଗ୍ କୋରେ ଇନିଃ ହଗି ୟୀରୁଶାଲେମ୍ ସାହାର୍ ରେ ତାଇକେନାଏ। ହେରୋଦ୍ ରାଜା ୟୀଶୁ କେ ନେଲ୍‍କେତେ ଥିମ୍ବାଗି ରାଶିକା ଜାନାଏ, ଚିୟାଃଚି ଇନିଃ ଥିମ୍ବା ହୁଲାଙ୍ଗ୍ ଏତେ ଇନିଃକେ ନେଲ୍ ସାନାଙ୍ଗି ତାଇନାଏ, ଏନାମେନ୍ତେ ଚି ଇନିଜାଃ ବିଷାୟ୍ ରେ ଆୟୁମ୍ ଲେଦାଏ, ହାର୍ ଇନିଜାଃ ତେ ଜାହାନ୍ ଚିହ୍ନା ନେଲ୍ ରାଃ ଆଶ୍ରା ମାଣ୍ଡାଅ ତାଇନାଏ। ଇନିଃ ୟୀଶୁ କେ ଥିମ୍ବାଗି କାଜିକୋ କୁଲି ତାଇନାଏ, ମେନ୍ଦୋ ଇନିଃ କେ ଜେତ୍ନାଃ କାଏ କାଜିରୁଆଡ଼୍ କିଜାଏ। ପ୍ରାଧାନ୍ ୟାଜାକ୍‍କୋ ହାର୍ ଆଇନ୍ ଗୁରୁକୋ ତିଙ୍ଗୁ କେତେ ଖିସ୍ ତାନ୍ ଲୋଃ ଇନିଃ ରେ ଦୋଷ୍ ଲାଗାଅ ତାଇନାକୋ। ଏନ୍ତେ ହେରୋଦ୍ ରାଜା ଆଜାଃ ସିପାହୀ କୋଲୋଃ ୟୀଶୁ କେ ଆପ୍‍ମାନ୍ କେତେ ଲାନ୍ଦା କେତେ, ରାଜା ଲେକା ରାଙ୍ଗିନ୍ ଝିଲ୍-ମିଲ୍ ଲିଜାଃ ତୁସିଙ୍ଗ୍ କେତେ ଇନିଃକେ ପିଲାତୁସ୍ ତାଃ ରୁଆଡ଼୍ ତାଜାଏ। ଏନ୍ ହୁଲାଙ୍ଗ୍ ଗି ପିଲାତୁସ୍ ହାର୍ ହେରୋଦ୍ ରାଜା ଗାତି ବାଇଜାନାକିନ୍, ନେୟା ରାଃ ସିଦାରେ ଇନ୍‍କିନ୍ ମିହୋଡ଼୍ ଏଟାଃ ନିଜାଃ ବାଇରୀ ତାଇକେନାକିନ୍। ପିଲାତୁସ୍ ପ୍ରାଧାନ୍ ୟାଜାକ୍‍କୋକେ ହାର୍ ୟାହୁଦୀ ମୁଖିୟାକୋକେ ଆଡୋଃ ହୋଡ଼ୋକୋକେ କେଡ଼ାକେତେ ଇନ୍‍କୁକେ କାଜିକେଃକୋୱାଏ, “ଆପେ ନେ ହୋଡ଼ କେ ହୋଡ଼ୋକୋକେ ବାଗ୍ଡ଼ାଅତାନ୍ ନିଈ ଆଟ୍‍କାର୍ କେତେ ଇଙ୍ଗ୍ଆଃ ତାଃ ଆଉ କିଜାପେ, ହାର୍ ନେଲେପେ, ଇଙ୍ଗ୍ ଆପେୟାଃ ନାଡ଼େଏ ରେ ଇନିଜାଃ ଯାଞ୍ଚ୍ କେଦାଇଙ୍ଗ୍, ମେନ୍ଦୋ ଅକନ୍ କାଜିକୋ ଲାଗିନ୍ ଆପେ ଇନିଜାଃ ଚେତାନ୍ ରେ ଦୋଷ୍ ଲାଗାଅ ତାନାପେ ଏନ୍ କାଜି କୋରାଃ ବିଷାୟ୍ ରେ ଇଙ୍ଗ୍ ଇନିଜାଃ ରେ ଜାହାନ୍ ଦୋଷ୍ କାଇଙ୍ଗ୍ ନାମ୍ କେଦା; ନାଦୋ ହେରୋଦ୍ ରାଜା ନାମ୍ କେଦାଏ, ଚିୟାଃଚି ଇନିଃ ୟୀଶୁ କେ ଆବୁ ତାଃ ରୁଆଡ଼୍ ତାଜାଏ, ଆଡୋଃ ନେଲେପେ, ନେ ହୋଡ଼ ଜାହାନାଃ ଏନ୍ ଲେକା କାମି କାଏ ରିକା ଚି ଇନିଃ ଏନାତେ ଗୋନୋଏଃ ରାଃ ଶାଜାଇ ନାମେ ୟାଏ। ଏନାମେନ୍ତେ ଇଙ୍ଗ୍ ଇନିଃକେ କୋଡ୍ରା ରେ ବିଡ଼ା ରିକା କେତେ ବାଗେ ତାନିଙ୍ଗ୍।” ପିଲାତୁସ୍ କେ ପାରାବ୍ ରାଃ ସାମାୟ୍ ରେ ଇନ୍‍କୁୱାଃ ଲାଗିନ୍ ମିୟାଃ କୈଦୀ କେ ବାଗି ରାଃ ତାଇକେନା। ଏନ୍ତେ ସବେନ୍ କୋ ମେଶା କେତେ କାଉରି ବିରିଃ ଜାନାକୋ, “ନିଈ କେ ଗୋଏଃ ରିକା ତାଇମେ, ଆଡୋଃ ଆଲେୟାଃ ଲାଗିନ୍ତେ ବାରାବ୍ବା କେ ବାଗିତାଇମେ!” ଇନିଃ ସାହାର୍ ରାଃ ମିୟାଃ ଝାଗ୍ଡ଼ା-ଝାଟି ହାର୍ ହୋଡ଼ ଗୋଏଃ ରାଃ ହୋରାତେ ଜେଲ୍ଅଡ଼୍ଆଃ ରେ ଆଦେର୍ ଲେନ୍ ତାଇନାଏ। ମେନ୍ଦୋ ପିଲାତୁସ୍ ୟୀଶୁ କେ ବାଗେ ରାଃ ସାନାଙ୍ଗ୍ ତେ ହୋଡ଼ୋକୋକେ ଆଡୋଃ ମିଶା ବୁଝାଅ କେଃକୋୱାଏ, ମେନ୍ଦୋ ଇନ୍‍କୁ କାଉରିତାନ୍ ଲୋଃ କାଜିକେଦାକୋ, “ଇନିଃକେ କ୍ରୁଶ୍ ରେ ରାକାବିପେ, କ୍ରୁଶ୍ ରେ!” ଇନିଃ ଆପିସା ଇନ୍‍କୁକେ କାଜିକେଃକୋୱାଏ, “ଚିନାଃ ଲାଗିନ୍, ଇନିଃ ଚିକାନ୍ ଖାରାପ୍ କାମି ରିକା କାଦାଏ? ଇଙ୍ଗ୍ ଇନିଜାଃ ରେ ଗୋନୋଏଃ ରାଃ ଶାଜାଇ ନାମେ ଲାଏକ୍ ଜେତାନ୍ କାଜି କାଇଙ୍ଗ୍ ନାମ୍ କେଦା। ଏନାମେନ୍ତେ ଇଙ୍ଗ୍ ଇନିଃକେ ବିଡ଼ା ରିକା କେତେ ବାଗେ ତାଇୟାଇଙ୍ଗ୍।” ମେନ୍ଦୋ ଇନ୍‍କୁ କାଉରି-କାଉରି କେତେ ଆକୋୱାଃ କାଜି ରେଗି ତାଇଜାନାକୋ ଚି ଇନିଃ କ୍ରୁଶ୍ ରେ ରାକାବୋଃ କାଏ, ଆଡୋଃ ଇନ୍‍କୁୱାଃ କାଉରି ଆଡୋଃଗି ଥିମ୍ବା ଜାନା। ଏନାମେନ୍ତେ ପିଲାତୁସ୍ ନେ ଆନାଚୁ ଏମ୍‍କେଦାଏ ଚି ଇନ୍‍କୁୱାଃ ସାନାଙ୍ଗ୍ ଲେକା ହୋବାଅଃ କା। ଇନିଃ ଏନ୍ ହୋଡ଼ କେ ଅକନିଃ ଚି ଝାଗ୍ଡ଼ା-ଝାଟି ହାର୍ ହୋଡ଼ ଗୋଏଃ ରାଃ ହୋରାତେ ଜେଲ୍ଅଡ଼୍ଆଃ ରେ ଆଦେର୍ ଲେନ୍ତାଇ କେନାଏ, ହାର୍ ଅକଏକେ ଇନ୍‍କୁ ଆସି ତାଇକେନାକୋ, ଇନିଃକେ ବାଗେ ତାଦାଏ; ହାର୍ ୟୀଶୁ କେ ଇନ୍‍କୁୱାଃ ସାନାଙ୍ଗ୍ ଲେକାତେ ଜିମାତାଃକୋୱାଏ। ଚିମ୍ତାଙ୍ଗ୍ ଇନ୍‍କୁ ୟୀଶୁ କେ ଇଦି ତାଇନାକୋ, ଇମ୍ତା ଇନ୍‍କୁ ଶିମୋନ୍ ନୁତୁମ୍ କୁରେନୀ ସାହାର୍ ରେନ୍ ମିୟାଃ ହୋଡ଼ କେ ଅକନିଃ ହାତୁ ଏତେ ହିଜୁଃ ତାଇକେନାଏ, ସାବ୍ କେତେ ଇନିଜାଃ ରେ କ୍ରୁଶ୍ କେ ଲାଦିକେଦାକୋ ଚି ଇନିଃ ୟୀଶୁ ଆଃ ଦୋୟା-ଦୋୟାତେ ଇଦିକାଏ। ମିଃଥିମ୍ବା ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ ହାର୍ ଇନ୍‍କୁ ରେ ଥିମ୍ବାଗି କୁଡ଼ିକୋ ହ ତାଇକେନାକୋ, ଅକନ୍‍କୋ ଇନିଜାଃ ଲାଗିନ୍ ଦୁକୁ ତେ କୁଡ଼ାମ୍ ବିଡ଼ା ତାଇକେନାକୋ ହାର୍ ରାଆ ତାଇକେନାକୋ। ୟୀଶୁ ଇନ୍‍କୁ ପାଡ଼୍ ତାୟୋମ୍ ନେଲ୍ କେତେ କାଜିକେଦାଏ, “ହେ ୟୀରୁଶାଲେମ୍ ରେନ୍ ହୋନ୍‍କୁଡ଼ିକୋ, ଇଙ୍ଗ୍ଆଃ ଲାଗିନ୍ତେ ଆଲୋପେ ରାଆୟା, ମେନ୍ଦୋ ଆପେୟାଃ ଲାଗିନ୍ ହାର୍ ଆପାନାଃ ହୋନ୍‍କୋ ଲାଗିନ୍ ରାଆଏପେ। ଚିୟାଃଚି ନେଲେପେ, ଏନ୍‍କାନ୍ ଦୁକୁ ରାଃ ହୁଲାଙ୍ଗ୍ କୋ ହିଜୁଃ ତାନା, ଅକଣ୍ଡେ ରେ ହୋଡ଼ୋକୋ କାଜିୟାକୋ, ‘ଧାନ୍ୟା ଇନ୍‍କୁ ତାନ୍‍କୋ ଅକନ୍‍କୋ ବାଞ୍ଜ୍ ତାନ୍‍କୋ, ହାର୍ ଏନ୍ ଲାହେଃ ଅକନାଃ କାଏ ଜାନାମ୍ କେଦାଏ ଆଡୋଃ ଏନ୍ ତୋୱା ଅକନ୍‍କୋ କାକୋ ଆନୁକେଦା।’ ଏନ୍ ସାମାୟ୍ ‘ଇନ୍‍କୁ ବୁରୁ କୋକେ କାଜିୟାକୋ ଚି ଆଲେୟାଃ ଚେତାନ୍ ରେ ଉୟୁଗୋଃମେ, ଆଡୋଃ ମାରାଙ୍ଗ୍ ବୁରୁ କୋକେ ଚି ଆଲେକେ ହାରୁବ୍ ତାଲେମ୍।’ ଚିୟାଃଚି ଚିମ୍ତାଙ୍ଗ୍ ଇନ୍‍କୁ ହାରିଆର୍ ଦାରୁ ଲୋଃ ଏନ୍‍ଲେକା ରିକା ତାନାକୋ, ଏଣ୍ଡେ ରୋହଡ଼୍ ଦାରୁ ଲୋଃ ଚିନାଃ ଜେତ୍ନାଃ କା ରିକାଃୱା?” ସିପାହୀକୋ ଏଟାଃ ବାର୍ହୋଡ଼୍ କିନ୍‍କେ ହଗି ଅକନ୍ କିନ୍ ଏତ୍କାନ୍ କାମି କାମିଲେଦାକିନ୍ ୟୀଶୁ ଲୋଃ ଗୋଏଃ ଲାଗିନ୍ ଇଦି କେଦାକୋ। ଚିମ୍ତାଙ୍ଗ୍ ଇନ୍‍କୁ ଏନ୍ ଜାଗା ଅକନାଃ ଖୋପ୍‍ଡ଼ି କାଜିୟୋଃ ୱା ସେଟେର୍ ଜାନାକୋ, ଦୋ ଇନ୍‍କୁ ଏନ୍ତାଃରେ ଇନିଃକେ ହାର୍ ଏନ୍ ଏତ୍କାନ୍ କାମି ରିକାକିନ୍ କୋକେ ହଗି, ମିହୋଡ଼୍ କେ ଜୋମ୍ ପାଡ଼୍ ରେ ଆଡୋଃ ମିହୋଡ଼୍ କେ ଲେଙ୍ଗା ପାଡ଼୍ ରେ କ୍ରୁଶ୍ ରେ ରାକାବ୍ କେଦାକୋ। ଇମ୍ତାଙ୍ଗ୍ ୟୀଶୁ କାଜିକେଦାଏ, “ହେ ଆବା, ନିକୁକେ ଛାମାକୋମ୍, ଚିୟାଃଚି ନିକୁ କାକୋ ସାରିତାନା ଚି ଚିନାଃ ରିକା ତାନାକୋ।” ଏନ୍ତେ ଇନ୍‍କୁ ଖୁଡ଼୍‍ଖୁଡ଼ି ଉୟୁଃକେତେ ଇନିଜାଃ ଲିଜାଃ କେ ହାଟିଙ୍ଗ୍ ଇଦିକେଦାକୋ। ହୋଡ଼ୋକୋ ତିଙ୍ଗୁ-ତିଙ୍ଗୁ ନେଲ୍ ତାଇନାକୋ, ଆଡୋଃ ୟାହୁଦୀ ମୁଖିୟାକୋ ହଗି ଲାନ୍ଦାତାନ୍ ଲୋଃ କାଜି ତାଇକେନାକୋ, “ନିଈ ଏଟାଃ କୋକେ ବାଞ୍ଚାଅ କେଃକୋୱାଏ, ଆଗାର୍ ନିଈ ପାର୍ମେଶ୍ଵାର୍ ରାଃ ମାସୀହ୍ ତାନିଃ, ଆଡୋଃ ଇନିଜାଃ ସାଲାକାନ୍ ତାନିଃ, ରେଦୋ ଆଏଃ ଆପାନ୍ କେ ବାଞ୍ଚାଅ ଲେକାଏ।” ସିପାହୀକୋ ହଗି ଆଜାଃ ନାଡ଼େଏ ହିଜୁଃକେତେ ଆଡୋଃ ଜୋଜୋ ରାଶି ଏମ୍‍କେତେ ଇନିଃକେ ଲାନ୍ଦାତାନ୍ ଲୋଃ କାଜି ତାଇକେନାକୋ, “ଆଗାର୍ ଆମ୍ ୟାହୁଦୀ ହୋଡ଼ୋକୋୱାଃ ରାଜା ତାନ୍‍ମେ, ରେଦୋ ଆମ୍ ଆମ୍‍ଗି ବାଞ୍ଚାଅନ୍ ମେ!” ହାର୍ ଇନିଜାଃ ଚେତାନ୍ ରେ ମିୟାଃ ଦୋଷ୍ ଅନୋଲ୍ ଠୋକାଅକାନ୍ ତାଇକେନା; “ନିଈ ୟାହୁଦୀ କୋୱାଃ ରାଜା ତାନିଃ।” ଏନ୍ ଏତ୍କାନ୍ କାମିତାନ୍‍କିନ୍ ଏନ୍ତାଃରେ ଡୁଙ୍ଗାଲେନ୍ ତାଇକେନାକିନ୍, ଇନ୍‍କୁ ଏତେ ମିହୋଡ଼୍ ଇନିଃକେ ନିନ୍ଦା କେତେ କାଜିକେଦାଏ, “ଚିନାଃ ଆମ୍ ମାସୀହ୍ ନାହାଲାମ୍? ଏଣ୍ଡେ ଆମ୍ ଆପାନ୍ କେ ହାର୍ ଆଲିଙ୍ଗ୍ କେ ହ ବାଞ୍ଚାଅ ଲିଙ୍ଗ୍‍ମେ!” ନେୟାରେ ଏଟାଃନିଃ ଇନିଃକେ ଏଗେର୍ କିଜାଏ, “ଚିନାଃ ଆମ୍ ପାର୍ମେଶ୍ଵାର୍ କେ ହଗି କାମ୍ ବୋରୋୱାଇତାନା? ଆମ୍ ହଗି ଦୋ ଏନ୍ ଶାଜାଇ ନାମ୍ ତାନାମ୍। ହାର୍ ଆଲାଙ୍ଗ୍ ଦୋ ବିଚାର୍ ଲେକାତେ ଶାଜାଇ ନାମ୍ ତାନାଲାଙ୍ଗ୍, ଚିୟାଃଚି ଆଲାଙ୍ଗ୍ ଆଲାଙ୍ଗ୍ଆଃ କାମି ରାଃ ଠିକ୍ ଯଅ ନାମ୍ ତାନାଲାଙ୍ଗ୍, ମେନ୍ଦୋ ଇନିଃ ଜେତାନ୍ ଖାରାପ୍ କାମି କାଏ କାମି କାଦା।” ଏନ୍ତେ ଇନିଃ କାଜିକେଦାଏ, “ହେ ୟୀଶୁ, ଚିମ୍ତାଙ୍ଗ୍ ଆମ୍ ଆମାଃ ରାଇଜ୍ ରେ ରାଜା ଲେକା ହିଜୁଗାମ୍, ଏଣ୍ଡେ ଇଙ୍ଗ୍‍କେ ପାହୋମିଙ୍ଗ୍ ମେ।” ୟୀଶୁ ଇନିଃକେ କାଜିକେଦାଏ, “ଇଙ୍ଗ୍ ଆମ୍‍କେ ସାର୍ତି କାଜିୟାମେତାନିଙ୍ଗ୍ ଚି ଇସିଙ୍ଗ୍ ଗି ଆମ୍ ଇଙ୍ଗ୍ଆଃ ଲୋଃ ପାରାଦିଶ୍ ରେ ତାଇନୋଗାମ୍।” ଇମ୍ତା ଶିଙ୍ଗି ବାରା ବାଜେ ଏତେ ଶିଙ୍ଗି ତିନ୍ ବାଜେ ସାନ୍ତେ ସବେନ୍ ଦିଶୁମ୍ ରେ ନୁବାଃ ହୋବାଜାନା, ହାର୍ ଶିଙ୍ଗି କାଏ ମାସ୍କାଲ୍ କେଦାଏ ହାର୍ ୟାହୁଦୀ-ମାନ୍ଦିର୍ ରାଃ ପାର୍ଦା ଥାଲା ଏତେ ଚାଗାଡ଼୍ ଜାନା, ହାର୍ ୟୀଶୁ ପୁରାଃ ଗି କାଉରି କେତେ କାଜିକେଦାଏ, “ହେ ଆବା, ଇଙ୍ଗ୍ ଇଙ୍ଗ୍ଆଃ ଆତ୍ମା ଆମାଃ ତିଈ ରେ ଜିମାତାନିଙ୍ଗ୍।” ହାର୍ ନେୟା କାଜିକେତେ ଟୁଣ୍ଡୁ କେଦାଏ। ସିପାହୀ କୋୱାଃ ଗୋମ୍‍କେ, ଅକନାଃ ହୋବା ଲେନ୍ ତାଇନା ନେଲ୍‍କେତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ କେଦାଏ, ଆଡୋଃ କାଜିକେଦାଏ, “ସାର୍ତିଗୀ ନେ ହୋଡ଼ ଧାର୍ମୀ ତାଇକେନାଏ।” ଏନ୍ତେ ଚିମ୍ତାଙ୍ଗ୍ ଏନ୍ ମିଃଥିମ୍ବା ହୋଡ଼ୋକୋ ଅକନ୍‍କୋ ନେୟା ନେଲ୍ ଲାଗିନ୍ ହୁଣ୍ଡି ଲେନ୍ ତାଇନାକୋ, ନେ ହୋବାୟାନ୍ ତେୟାଃ ଘାଟ୍ନା କେ ନେଲ୍‍କେତେ ଦୁକୁ ତେ କୁଡ଼ାମ୍ କେ ବିଡ଼ାତାନ୍ ଲୋଃ ରୁଆଡ଼୍ ଜାନାକୋ। ମେନ୍ଦୋ ଇନିଃକେ ସାରିତାନ୍ ସବେନ୍ କୋ ହାର୍ ଏନ୍ କୁଡ଼ିକୋ ଅକନ୍ କୋ ଗାଲିଲୀ ଜିଲ୍ଲା ତେ ଇନିଜାଃ ଲୋଃ ହିଜୁଃ ଲେନ୍ ତାଇକେନାକୋ, ସାଙ୍ଗିନ୍ ଏତେ ତିଙ୍ଗୁ କେତେ ନେୟା ସବେନାଃ ନେଲ୍ ତାଇନାକୋ। ଏନ୍ତାଃରେ ଯୋଶେଫ୍ ନୁତୁମ୍ ମିହୋଡ଼୍ ୟାହୁଦୀ ମାରାଙ୍ଗ୍‍ସାଭା ରେନ୍ ସାଦାଶ୍ୟା ତାଇକେନାଏ, ହାର୍ ଇନିଃ ବୁଗିନ୍ ହାର୍ ଧାର୍ମୀ ହୋଡ଼ ତାଇକେନାଏ। ଅକନିଃ ଇନ୍‍କୁୱାଃ ବିଚାର୍ ହାର୍ ଇନ୍‍କୁୱାଃ ନେ କାମି ତେ ସୁକୁ କାଏ ତାଇକେନାଏ। ଇନିଃ ୟାହୁଦୀହୋଡ଼ୋ କୋୱାଃ ସାହାର୍ ଆରିମାତିୟା ରେନ୍ ତାଇକେନାଏ ହାର୍ ପାର୍ମେଶ୍ଵାର୍ ରାଃ ରାଇଜ୍ କେ ନେଲ୍ ହୋରା ତାଇନାଏ। ଇନିଃ ପିଲାତୁସ୍ ତାଃ ସେନ୍ କେତେ ୟୀଶୁ ରାଃ ମାଣା କେ ଆସି କିଜାଏ। ଏନ୍ତେ ଏନ୍ ମାଣା କେ ଆଡ଼୍‍ଗୁ କେତେ ପୁଣ୍ଡୀ ନିରାଲ୍ ଲିଜାଃ ରେ ଲାଟୁମ୍ କେଦାଏ, ହାର୍ ମିୟାଃ କାବାର୍ ରେ ମାଣ୍ଡାଅ କିଜାଏ, ଅକନାଃ ସେରେଙ୍ଗ୍ ରେ ଖଦା ଉର୍ ଲେନ୍ ତାଇନା; ହାର୍ ଏଣ୍ଡେରେ ଜେତାଏ କେହ ଚିଉଲାଅ କାକୋ ମାଣ୍ଡାଅ ଲେଦା। ଏନା ସେକାଡ଼େନ୍ ରାଃ ହୁଲାଙ୍ଗ୍ ତାଇକେନା ଆଡୋଃ ୟାହୁଦୀ କୋୱା ଆରାମେ ହୁଲାଙ୍ଗ୍ ଏଟେଜୋଃ ରାଃ ତାଇକେନା। ଏନ୍ କୁଡ଼ିକୋ ଅକନ୍‍କୋ ୟୀଶୁ ଲୋଃ ଗାଲିଲୀ ଜିଲ୍ଲା ଏତେ ହିଜୁଃଲେନ୍ ତାଇନାକୋ, ଦୋୟା-ଦୋୟା ସେନ୍ କେତେ ଏନ୍ କାବାର୍ କେ ନେଲ୍ କେଦାକୋ, ହାର୍ ନେୟା କେହ ଗି ଚି ଇନିଜାଃ ମାଣା ଚିଲ୍‍କା ମାଣ୍ଡାଅ କାନା। ଏନ୍ତେ ଇନ୍‍କୁ ଅଡ଼୍ଆଃ ରୁଆଡ଼୍ କେତେ ସୋୱାନ୍ ଜିନିଷ୍ କୋ ହାର୍ ସୋୱାନ୍ ସୁନୁମ୍ କୋ ୟୀଶୁ ରାଃ ମାଣା ରେ ଗୋସୋଃ ଲାଗିନ୍ ବାଇକେଦାକୋ, ଆଡୋଃ ଆରାମେ ହୁଲାଙ୍ଗ୍ ଇନ୍‍କୁ ଆନାଚୁ ଲେକାତେ ମାନାତିଙ୍ଗ୍ କେଦାକୋ। ହାପ୍ତା ରାଃ ପାହିଲା ହୁଲାଙ୍ଗ୍ ଇଦାନ୍ ସେତାଃ ରେ ଇନ୍‍କୁ ଏନ୍ ସୋୱାନ୍ ଜିନିଷ୍‍କୋକେ ଅକନାଃ ଇନ୍‍କୁ ବାଇଲେଦାକୋ, ଇଦିକେତେ କାବାର୍ ତାଃ ହିଜୁଃ ନାକୋ। ଇନ୍‍କୁ ଦିରି କେ କାବାର୍ ଏତେ ଗୁଡ୍ରାଓକାନ୍ ନେଲ୍ କେଦାକୋ, ମେନ୍ଦୋ ଭିତାର୍ ସେନ୍ କେତେ ୟୀଶୁ ରାଃ ମାଣା କେ କାକୋ ନାମ୍ କେଦା। ଚିମ୍ତା ଇନ୍‍କୁ ନେ କାଜିତେ ଆକ୍‍ଚାକାଅଃ ତାଇକେନାକୋ ଏଣ୍ଡେ ନେଲେପେ, ବାର୍ହୋଡ଼୍ ଚାମ୍‍କାଅଃତାନ୍ ଲିଜାଃ ତୁସିଙ୍ଗ୍‍କାନ୍ ଇନ୍‍କୁୱାଃ ନାଡ଼େଏ ତିଙ୍ଗୁ ଜାନାକୋ। ଚିମ୍ତା ଇନ୍‍କୁ ବୋରୋ ଜାନାକୋ, ହାର୍ ଅତେ ପାଡ଼୍ ବୋଅ ତିରୁବ୍ ଲେଦାକୋ; ଇମ୍ତା ଏନ୍ ବାର୍ହୋଡ଼୍‍କିନ୍ ଇନ୍‍କୁକେ କାଜିକେଦାକୋ; “ଆପେ ଜୀହିଦାକାନ୍ ନିଃକେ ଗୋଜାକାନ୍ କୋୱାଃ ରେ ଚିନାଃ ମେନ୍ତେ ଦାଣା ତାନାପେ? ଇନିଃ ନେତାଃ ରେ ବାଙ୍ଗୁଇଜା, ମେନ୍ଦୋ ଜୀବିରିଃ କାନାଏ। ପାହୋମେପେ ଚି ଇନିଃ ଗାଲିଲୀ ଜିଲ୍ଲା ରେ ତାଇତାନ୍ ଇମ୍ତା ଆପେକେ କାଜିଲେଦାଏ, ‘ନେୟା ଲାଗାତିଙ୍ଗ୍ ତାଇକେନା, ଚି ଇନିଃ ମାନ୍‍ୱା ରାଃ ହୋନ୍ ପାପୀକୋୱାଃ ତିଈ ରେ ସାବୋଗାଏ, ହାର୍ କ୍ରୁଶ୍ ରେ ରାକାବୋଗାଏ; ହାର୍ ଆପି ହୁଲାଙ୍ଗ୍ ରେ ଜୀହିଃ ବୀରିଦୋଗାଏ।’ ” ଏନ୍ତେ ଇନିଜାଃ କାଜିକୋ ଇନ୍‍କୁକେ ପାହୋମ୍ ହିଜୁଃ ଜାନା, ଏନାମେନ୍ତେ କାବାର୍ ପାଡ଼େତେ ଇନ୍‍କୁ ରୁଆଡ଼୍ କେତେ ଏନ୍ ଏଗାରା କୁଲାକାନ୍ ଚେଲାକୋକେ, ହାର୍ ଆଡୋଃ ଏଟାଃ ଚେଲା କୋକେ, ନେ କାଜିକୋ ଉଦୁବ୍ କେଦାକୋ। ଅକନ୍ କୋ ନେ କାଜି କୁଲାକାନ୍ ଚେଲାକୋକେ କାଜିକେଦାକୋ, ଇନ୍‍କୁ ମାରିୟାମ୍ ମାଗ୍‍ଦାଲା ସାହାର୍ ରେନ୍ ଆଡୋଃ ୟୋଆନ୍ନା ଆଡୋଃ ୟାକୁବ୍ ରାଃ ଏଙ୍ଗା ମାରିୟାମ୍ ଆଡୋଃ ଇନ୍‍କୁ ଲୋଃ ଆଡୋଃ କୁଡ଼ିକୋ ହ ତାଇକେନାକୋ। ମେନ୍ଦୋ ଇନ୍‍କୁୱାଃ କାଜି ହିନ୍‍କୁକେ କାହାନୀ କୋ ଲେକା ଆଦା କେଃକୋୱା, ଆଡୋଃ ହିନ୍‍କୁ ଇନ୍‍କୁକେ କାକୋ ବିଶ୍ଵାସ୍ କେଦା। ଏନ୍ତେ ପାତ୍ରାସ୍ ବିରିଃ କେତେ କାବାର୍ ପାଡ଼୍ ନିର୍ କେଦାଏ, ଆଡୋଃ ଉଙ୍ଗୁଃ କେତେ ମାଣା ଲିଜାଃ କେ ଭାଇର୍ ମାଣ୍ଡାଅକାନ୍ ନେଲ୍‍କେଦାଏ, ଆଡୋଃ ଅକନାଃ ହୋବାଲେନ୍ ତାଇନା ଏନାତେ ଆକ୍‍ଦାନ୍ଦା କେତେ, ଆଜାଃ ଅଡ଼୍ଆଃ ସେନୋଃ ଜାନାଏ। ନେଲେପେ, ଏନ୍ ହୁଲାଙ୍ଗ୍ ଗି ଇନିଜାଃ ଚେଲାକୋ ଏତେ ବାର୍ହୋଡ଼୍ ଇମ୍ମାଉସ୍ ନୁତୁମ୍ ମିୟାଃ ହାତୁ ସେନ୍ ତାଇକେନାକୋ, ଅକନାଃ ୟୀରୁଶାଲେମ୍ ହାତୁ ଏତେ ସାତ୍ ମିଲ୍ ସାଙ୍ଗିନ୍ ଲେକା ତାଇକେନା। ଇନ୍‍କିନ୍ ନେ ସବେନ୍ କାଜିକୋ ଅକନାଃ ହୋବାଲେନା, ଆକିନ୍ ବାରାନ୍‍କିନ୍ ରେ ବାକାଣ୍ ତାନ୍ ଲୋଃ ସେନ୍ ତାଇକେନାକିନ୍, ଚିମ୍ତା ଆକିନ୍ ବାରାନ୍‍କିନ୍ ରେ ବାକାଣ୍ ହାର୍ କୁପୁଲିଅଃ ତାଇକେନାକିନ୍, ଇମ୍ତା ୟୀଶୁ ଆଏଃ ନାଡ଼େଏ ହିଜୁଃକେତେ ଇନ୍‍କିନ୍ ଲୋଃ ଗାତି-ଗାତି ସେନ୍ ଜାନାଏ। ମେନ୍ଦୋ ଇନ୍‍କିନାଃ ମେଏଃ କେ ପାର୍ମେଶ୍ଵାର୍ ନେକା ବାନ୍ଦ୍ ରିକାଲେଦାଏ, ଚି ଇନିଃକେ କାକୋ ଉରୁମ୍ କିଜା। ୟୀଶୁ ଇନ୍‍କିନ୍ କେ କୁଲିକେଃକିନାଏ, “ନେୟା ଚିନାଃ ବାକାଣ୍ ତାନାଃ, ଅକନାଃ ଆପେ ବାରାନ୍‍କିନ୍ ସେନ୍-ସେନ୍ ଆବେନ୍ ରେ ବାକାଣ୍ ତାନାବେନ୍?” ଇନ୍‍କିନ୍ ତିଙ୍ଗୁ ଜାନାକିନ୍ ହାର୍ ମୋନ୍ ରେ ଥିମ୍ବାଗି ଦୁକୁତାନ୍ ନେଲୋଃ ତାଇକେନାକିନ୍। ନେୟା ଆୟୁମ୍‍କେତେ, ଇନ୍‍କିନାଃ ଥାଲା ଏତେ କ୍ଲିଉପାସ୍ ନୁତୁମ୍ ମିୟାଃ ହୋଡ଼ କାଜିକେଦାଏ, “ଚିନାଃ ଆମ୍ ୟୀରୁଶାଲେମ୍ ରେ ଏସ୍କାର୍ ପାର୍ଦେଶୀ ତାନ୍‍ମେ, ଜେ କାମ୍ ସାରିତାନା, ଚି ନେ ହୋଲା ହୋନ୍ଦେର୍ ରେ ହେନ୍ତାଃ ଚିନାଃ-ଚିନାଃ ହୋବାଲେନା?” ଇନିଃ ଇନ୍‍କିନ୍ କେ କୁଲିକେଃକିନାଏ, “ଅକନ୍ ବାକାଣ୍?” ଇନ୍‍କିନ୍ ହିନିଃକେ କାଜିକେଦାକିନ୍, “ୟୀଶୁ ନାଜ୍ରେଥିୟା ରାଃ ବିଷାୟ୍ ରେ ଅକନିଃ ପାର୍ମେଶ୍ଵାର୍ ଆଡୋଃ ସବେନ୍ ହୋଡ଼ୋକୋୱାଃ ନାଡ଼େଏ କାମି ଆଡୋଃ ବାଚାନ୍ ରେ ପେଡ଼େଜାନ୍ ନାବୀ ତାଇକେନାଏ। ମେନ୍ଦୋ ପ୍ରାଧାନ୍ ୟାଜାକ୍‍କୋ ହାର୍ ଆଲେୟାଃ ମୁଖିୟାକୋ ଇନିଃକେ ସାବ୍ ରିକା କିଜାକୋ ଚି ଇନିଜାଃ ଚେତାନ୍ ରେ ଗୋନୋଏଃ ରାଃ ଆନାଚୁ ଏମୋଃକା, ଆଡୋଃ ଇନିଃକେ କ୍ରୁଶ୍ ରେ ରାକାବ୍ କିଜାକୋ। ମେନ୍ଦୋ ଆଲେକେ ଆଶ୍ରା ତାଇକେନା, ଚି ନିଈଗି ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋକେ ରୋମାନ୍ ସାର୍କାର୍ ଏତେ ଛୋଡ଼ାଓ କୋୱାଏ, ଆଡୋଃ ନେ ସବେନ୍ କାଜିକୋକେ ବାଗେ କେତେ ନେ ଘାଟ୍ନା ହୋବାକେତେ ଆପି ହୁଲାଙ୍ଗ୍ ତାନାଃ। ଏନ୍ତେ ନାଆ ଆଲେୟାଃ ଝୁଣ୍ଡ୍ କୋଏତେ ଚିମିନାଙ୍ଗ୍ କୁଡ଼ିକୋ ହ ଆଲେକେ ଆକ୍‍ଦାନ୍ଦା ରେ ଉୟୁଃ କାଦାକୋ, ଅକନ୍ କୋ ଇସିଙ୍ଗ୍ ସେତାଃ ଇଦାନ୍ ଇମ୍ତା ରେ କାବାର୍ ପାଡ଼୍ ସେନ୍ ଲେନାକୋ, ଆଡୋଃ ଚିମ୍ତା ଇନିଜାଃ ମାଣା କାକୋ ନାମ୍ କେଦା ଏଣ୍ଡେ ନେୟା କାଜିତାନ୍ ଲୋଃ ରୁଆଡ଼୍ ଜାନାକୋ ଚି ଆଲେ ସିର୍ମାଦାସୀ କୋୱାଃ ଦାର୍ଶାନ୍ ନାମାକେଦାଲେ, ଅକନ୍ କୋ କାଜିକେଦାକୋ ଚି ୟୀଶୁ ଜୀହିଃ ମେନାଇଜା। ଏନ୍ତେ ଆଲେୟାଃ ଝୁଣ୍ଡ୍ କୋଏତେ ଚିମିନାଙ୍ଗ୍ କୋ କାବାର୍ ପାଡ଼୍ ସେନ୍ ଜାନାକୋ, ହାର୍ ଜେଲେକା କୁଡ଼ିକୋ କାଜି ଲେଦାକୋ ଏନ୍‍ଲେକାଗି ନାମ୍ କେଦାକୋ; ମେନ୍ଦୋ ଇନିଃକେ କାକୋ ନେଲ୍‍କିଜା।” ଏନ୍ତେ ୟୀଶୁ ବାରାନ୍‍କିନ୍ କେ କାଜିକେଃକିନାଏ, “ହେ ନିର୍ବୁଦ୍ଧିକିନ୍, ହାର୍ ନାବୀ କୋୱାଃ ସବେନ୍ କାଜି କୋରେ ବିଶ୍ଵାସ୍ ନାଙ୍ଗ୍ ମୋନ୍ ରେ ନାରାଦୁରାକିନ୍। ଚିନାଃ ଲାଗାତିଙ୍ଗ୍ କା ତାଇକେନା ଚି ମାସୀହ୍ ନେ ଦୁକୁ ଉଠାଓକେତେ ଆଜାଃ ମାନାରାଙ୍ଗ୍ ରେ ବୋଲୋୱାଏ?” ଏନ୍ତେ ଇନିଃ ମୁଶା ନାବୀ ଏତେ ଆଡୋଃ ସବେନ୍ ନାବୀ କୋଏତେ ଏଟେଃ କେତେ ସବେନ୍ ପାବିତାର୍ ପୁଥି କୋଏତେ, ଆଜାଃ ବିଷାୟ୍ ରେ ଅଲାକାନ୍ କାଜି କୋରାଃ ମାନେ, ଇନ୍‍କିନ୍ କେ ବୁଝାଅ ତାଃକିନାଏ। ନିମିନାଙ୍ଗ୍ ଲୋଃ ଇନ୍‍କିନ୍ ଏନ୍ ହାତୁ ତାଃ ସେଟେର୍ ଜାନାକିନ୍ ଅକତାଃ ଇନ୍‍କିନ୍ ସେନ୍ ତାଇକେନାକିନ୍, ଆଡୋଃ ଇନିଜାଃ କାଜି ଢାଙ୍ଗ୍ ଏତେ ନେକା ଆଟ୍‍କାରୋଃ ତାଇନା ଚି ଇନିଃ ଆୟୁର୍ ତେ ସେନୋଃ ସାନାଙ୍ଗ୍ ତାଇନାଏ। ମେନ୍ଦୋ ଇନ୍‍କିନ୍ ନେୟା କାଜିକେତେ ଇନିଃକେ ରୋକାଅ କିଜାକିନ୍, “ଆଲେ ଲୋଃ ତାଇନ୍ ମେ, ଚିୟାଃଚି ଆୟୁବଃ ତାନା ହାର୍ ଶିଙ୍ଗି ଡୁବିଜୋଃ ତାନା।” ଏନ୍ତେ ଇନିଃ ଇନ୍‍କୁ ଲୋଃ ତାଇନ୍ ଲାଗିନ୍ ଭିତାର୍ ପାଡ଼୍ ସେନୋଃ ଜାନାଏ। ଚିମ୍ତା ଇନିଃ ଇନ୍‍କିନ୍ ଲୋଃ ଜୋମ୍ ଲାଗିନ୍ ଦୁବ୍ ଜାନାଏ, ଇମ୍ତା ଇନିଃ ହୋଲୋଙ୍ଗ୍ ଇଦିକେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ, ହାର୍ ଏନାକେ ଖାଣ୍ଡା କେତେ ଇନ୍‍କିନ୍ କେ ଏମାଃ କିନାଏ। ଇମ୍ତା ଇନ୍‍କିନାଃ ମେଏଃ କେ ପାର୍ମେଶ୍ଵାର୍ ଅଟାଃ ତାଦାଏ, ହାର୍ ଇନ୍‍କିନ୍ ଇନିଃକେ ନେଲ୍ ଉରୁମ୍ କିଜାକିନ୍, ହାର୍ ଇନିଃ ଇନ୍‍କିନାଃ ମେଏଃ ତେ କାଏ ନେଲ୍ ଜାନାଏ। ବାରାନ୍‍କିନ୍ ଆକିନ୍ ରେ ବାକାଣ୍ କେଦାକିନ୍, “ଚିମ୍ତା ଇନିଃ ହୋରା ରେ ଆଲାଙ୍ଗ୍ ଲୋଃ ବାକାଣ୍ ତାଇକେନାଏ ଆଡୋଃ ପାବିତାର୍ ପୁଥି ରେ ଅଲାକାନ୍ କାଜି କୋକେ ଉଦୁବ୍ କେତେ ଆଲାଙ୍ଗ୍ କେ ବୁଝାଅ ତାଇକେନାଏ, ଇମ୍ତା ଚିନାଃ ଆବୁୱାଃ ମୋନ୍ ରାଶିକା ତେ କା ଥାଇଜୋଃ ତାଇକେନା?” ଇନ୍‍କିନ୍ ଇମ୍ତାଗି ବିରିଃ କେତେ ୟୀରୁଶାଲେମ୍ ସାହାର୍ ତେ ରୁଆଡ଼୍ ଜାନାକିନ୍, ହାର୍ ଏନ୍ ଏଗାରା ଝାନ୍ କୋକେ ଆଡୋଃ ଆକିନାଃ ଗାତିକୋକେ ମିଃ ତାଃ ହୁଣ୍ଡିକାନ୍ ନାମ୍ କେଃକୋୱାକିନ୍। ଇନ୍‍କୁ ବାରାନ୍ କିନ୍‍କେ କାଜିକେଦାକୋ, “ପ୍ରାଭୁ ସାର୍ତିଗୀ ଜୀହିଃ ବିରିଃ କାନାଏ, ହାର୍ ଶିମୋନ୍ ପାତ୍ରାସ୍ କେ ନେଲ୍ ଜାନାଏ।” ଇମ୍ତା ଇନ୍‍କିନ୍ ହୋରା ରାଃ ବାକାଣ୍ କୋକେ ଇନ୍‍କୁକେ ଉଦୁବ୍ କେଦାକିନ୍ ହାର୍ ନେୟା ହ ଚି ଇନ୍‍କିନ୍ ୟୀଶୁ କେ ହୋଲୋଙ୍ଗ୍ କେଚାଃ ସାମାୟ୍ ଚିଲ୍‍କା ନେଲ୍ ଉରୁମ୍ କିଜାକିନ୍। ଇନ୍‍କୁ ନେ କାଜିକୋ ବାକାଣ୍ ତାଇକେନାକୋ ଚି ୟୀଶୁ ଆଏଃ ଗି ଇନ୍‍କୁୱାଃ ଥାଲା ରେ ନେଲ୍ ଜାନାଏ, ହାର୍ ଇନ୍‍କୁକେ କାଜିକେଃକୋୱାଏ, “ଆପେକେ ଜୀଉସୁକୁ ନାମୋଃକା। ମେନ୍ଦୋ ଇନ୍‍କୁ ଆକ୍‍ଚାକାଅଃ ଜାନାକୋ ହାର୍ତେ ବୋରୋ ଜାନାକୋ, ଏନ୍ତେ ପାହୋମ୍ କେଦାକୋ ଚି ଆଲେ ଜାହାନ୍ ବୋଙ୍ଗା କେ ନେଲ୍ ତାନାଲେ। ଇନିଃ ଇନ୍‍କୁକେ କାଜିକେଃକୋୱାଏ, ଚିନାଃ ମେନେଃ ବୋରୋ ତାନାପେ? ହାର୍ ଆପେୟାଃ ମୋନ୍ ରେ ଚିନାଃ ମେନ୍ତେ ସାନ୍ଦେହ୍ ତାନାପେ? ଇଙ୍ଗ୍ଆଃ ତିଈ ହାର୍ତେ ଇଙ୍ଗ୍ଆଃ କାଟାକୋକେ ନେଲେପେ ଇଙ୍ଗ୍ ଇନିଃଗି ତାନିଙ୍ଗ୍। ଇଙ୍ଗ୍‍କେ ଜୁଟିଃ କେତେ ନେଲେପେ, ଚିୟାଃଚି ବୋଙ୍ଗା ରାଃ ଜାଙ୍ଗ୍ ମାସ୍ କା ତାଇନା ଜେଲେକା ଇଙ୍ଗ୍ଆଃ ରେ ନେଲ୍ ତାନାପେ।” ନେୟା କାଜିକେତେ ଇନିଃ ଇନ୍‍କୁକେ ଆଜାଃ ତିଈ କାଟା ଦେଖାଅ କେଃକୋୱାଏ। ଚିମ୍ତାଙ୍ଗ୍ ଇନ୍‍କୁ ରାଶିକା ତେ କାକୋ ବିଶ୍ଵାସ୍ ତାଇନା ଚି ୟୀଶୁ ଜୀହିଃ ଜାନାଏ, ହାର୍ ଆକ୍‍ଦାନ୍ଦାଅଃ ତାଇକେନାକୋ, ଇମ୍ତା ଇନିଃ ଇନ୍‍କୁକେ କୁଲିକେଃକୋୱାଏ, “ଚିନାଃ ନେତାଃ ଆପେତାଃ ହୁଡିଙ୍ଗ୍ ଜୋଜୋମାଃ ମେନାଃ?” ହିନ୍‍କୁ ଇନିଃକେ ରାପାଃ କାନ୍ ହାକୁ ଖାଣ୍ଡା ଏମ୍ କିଜାକୋ। ଇନିଃ ଇଦିକେତେ ଇନ୍‍କୁୱାଃ ନେପେଲ୍ ରେ ଜୋମ୍‍କେଦାଏ। ଏନ୍ତେ ଇନିଃ ଇନ୍‍କୁକେ କାଜିକେଃକୋୱାଏ, “ନେୟା ଇଙ୍ଗ୍ଆଃ ଏନ୍ କାଜିକୋ ତାନାଃ, ଅକନାଃ ଇଙ୍ଗ୍ ଆପେ ଲୋଃ ତାଇନ୍ ତାନ୍ ଇମ୍ତା ଆପେକେ କାଜିଲେଦାଇଙ୍ଗ୍ ଚି, ଲାଗାତିଙ୍ଗ୍ ମେନାଃ, ଚି ଚିମିନାଙ୍ଗ୍ କାଜିକୋ ମୁଶା ନାବୀ ରାଃ ଆଇନ୍ ଆଡୋଃ ନାବୀ କୋୱାଃ ଆଡୋଃ ଦୁରାଙ୍ଗ୍ କିତାବ୍ କୋରେ ଇଙ୍ଗ୍ଆଃ ବିଷାୟ୍ ରେ ଅଲାକାନା, ଏନା ସବେନାଃ ପୁରା ସାର୍ତି ହୋବାଅଃକା।” ଏନ୍ତେ ଇନିଃ ପାବିତାର୍ ପୁଥି ରେ ଅଲାକାନ୍ କାଜିକୋକେ ବୁଝାଅ ଲାଗିନ୍ ଇନ୍‍କୁୱାଃ ସେଣା ଖଲାଅ କେଦାଏ, ହାର୍ ଇନ୍‍କୁକେ କାଜିକେଃକୋୱାଏ, “ନେଲେକା ପାବିତାର୍ ପୁଥି ରେ ଅଲାକାନା, ଚି ମାସୀହ୍ ଦୁକୁ ଉଠାଓୟାଏ, ହାର୍ ଆପି ହୁଲାଙ୍ଗ୍ ରେ ଗୋଜାକାନ୍ କୋଏତେ ଜୀହିଃ ବୀରିଦୋଗାଏ, ହାର୍ ୟୀରୁଶାଲେମ୍ ସାହାର୍ ଏତେ ଏଟେଃ କେତେ ସବେନ୍ ଜାତି ହୋଡ଼ୋକୋୱାଃ ରେ ପାପ୍ କାମି ବାଗେ ରାଃ ଆଡୋଃ ପାପ୍ କୋରାଃ ଛାମା ରାଃ ପାର୍ଚାର୍, ଇନିଜାଃ ଗି ନୁତୁମ୍ ରେ ରିକାଅଗା। ଆପେ ନେ ସବେନ୍ କାଜି କୋରାଃ ଗୋୱା ତାନ୍‍ପେ। ନେଲେପେ, ଅକନାଃ ଇଙ୍ଗ୍ଆଃ ଆପୁ କାଜିଥୋଲ୍ କାଦାଏ, ଇଙ୍ଗ୍ ଏନ୍ ପାବିତାର୍ ଆତ୍ମା କେ ଆପେୟାଃ ରେ କୁଲେୟାଇଙ୍ଗ୍ ହାର୍ ଚିମିନ୍ ସାନ୍ତେ ସିର୍ମାଦିଶୁମ୍ ଏତେ ପେଡ଼େଏ କାପେ ନାମେୟା, ଇମିନ୍ ସାନ୍ତେ ସାହାର୍ ରେ ଗି ତାଇନୋଃ ପେ।” ଏନ୍ତେ ଇନିଃ ଇନ୍‍କୁକେ ବେଥାନି ହାତୁ ସାନ୍ ବାହାରି ଆଉ ଇଦି କେଃକୋୱାଏ, ହାର୍ ଆଜାଃ ତିଈ ଉଠାଓକେତେ ଇନ୍‍କୁକେ ଆଶିଷ୍ ଏମାଃ କୋୱାଏ, ହାର୍ ଇନ୍‍କୁକେ ଆଶିଷ୍ ଏମ୍ ତାନ୍ ଲୋଃ ଇନିଃ ଇନ୍‍କୁ ଏତେ ଗେନା ଜାନାଏ ହାର୍ ରିମିଲ୍‍ଦିଶୁମ୍ ଚେତାନ୍ ଉଠାଓ ଇଦି ଜାନାଏ। ଏନ୍ତେ ଇନ୍‍କୁ ଇନିଃକେ ଇକ୍ଡ଼ୁମ୍ ଜୋହାର୍ କେତେ ରାଶିକାତାନ୍ ଲୋଃ ୟୀରୁଶାଲେମ୍ ସାହାର୍ ତେ ରୁଆଡ଼୍ ଜାନାକୋ। ଏନ୍ତେ ଇନ୍‍କୁ ସବେନ୍ ହୁଲାଙ୍ଗ୍ ମାନ୍ଦିର୍ ରେ ତାଇତାନ୍ ଲୋଃ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକା ତାଇକେନାକୋ। ଏନେଟେଃ ରେ ବାଚାନ୍ ତାଇକେନା, ହାର୍ ବାଚାନ୍ ପାର୍ମେଶ୍ଵାର୍ ଲୋଃ ତାଇକେନା, ହାର୍ ଏନ୍ ବାଚାନ୍ ପାର୍ମେଶ୍ଵାର୍ ତାଇକେନାଏ। ଇନିଃ ଏନେଟେଃ ରେ ପାର୍ମେଶ୍ଵାର୍ ଲୋଃ ତାଇକେନାଏ। ସବେନାଃ ଆଜାଃ ତେଗି ବାଇୟାକାନା, ହାର୍ ଅକନାଃ ଅଗି ବାଇୟାକାନା ଏନା କୋଏତେ ଜାହାନ୍ ଜିନିଷ୍ ହ ଆଜାଃ ବେଗାର୍ କା ବାଇୟାକାନା। ଇନିଜାଃ ରେ ଜୀଦାନ୍ ତାଇକେନା ହାର୍ ଏନ୍ ଜୀଦାନ୍ ହୋଡ଼ୋକୋୱାଃ ମାସ୍କାଲ୍ ତାଇକେନା। ମାସ୍କାଲ୍ ନୁବାଃ ରେ ଚାମ୍‍କାଅଃୱା, ହାର୍ ନୁବାଃ ଏନାକେ ଇଣିଃ କାଏ ଧାଡ଼ିକେଦା। ମିହୋଡ଼୍ ହୋଡ଼ ପାର୍ମେଶ୍ଵାର୍ ପାଡ଼େତେ ହିଜୁଃ ଲେନାଏ ଇନିଜାଃ ନୁତୁମ୍ ଯୋହାନ୍ ତାଇକେନା। ଇନିଃ ମାସ୍କାଲ୍ ରାଃ ଗୋୱା ଏମ୍ ହିଜୁଃ ଲେନାଏ, ଏନାତେ ସବେନ୍ କୋ ଇନିଜାଃ ହୋରାତେ ବିଶ୍ଵାସ୍ ୟାକୋ। ଯୋହାନ୍ ଆଏଃ ଦୋ ମାସ୍କାଲ୍ କାଏ ତାଇକେନାଏ, ମେନ୍ଦୋ ଏନ୍ ମାସ୍କାଲ୍ ରାଃ ଗୋୱା ଏମ୍ ଲାଗିନ୍ତେ ହିଜୁଃ ଲେନାଏ। ଇନିଃ ସାର୍ତି ମାସ୍କାଲ୍ ତାନିଃ ଅକନିଃ ସବେନ୍ ହୋଡ଼ୋକୋକେ ମାସ୍କାଲ୍ କୋୱାୟାଏ, ଅତେଦିଶୁମ୍ ରେ ହିଜୁଃ ରାଃ ତାଇକେନାଏ। ଇନିଃ ଅତେଦିଶୁମ୍ ରେ ତାଇକେନାଏ, ହାର୍ ଅତେଦିଶୁମ୍ ଇନିଜାଃ ତେ ବାଇଲେନା, ଏଣ୍ଡେ ରେହଗି ଅତେଦିଶୁମ୍ ରେନ୍ ହୋଡ଼ୋକୋ ଇନିଃକେ କାକୋ ନେଲ୍ଉରୁମ୍ କିଜା। ଇନିଃ ଆଜାଃ ହୋଡ଼ୋକୋ ତାଃ ହିଜୁଃ ଲେନାଏ ହାର୍ ଇନିଜାଃ ହୋଡ଼ୋକୋ ଇନିଃକେ କାକୋ ଗ୍ରାହାନ୍ କିଜା। ମେନ୍ଦୋ ଚିମିନାଙ୍ଗ୍ ହୋଡ଼ୋକୋ ଇନିଃକେ ଗ୍ରାହାନ୍ କିଜାକୋ, ଇନିଃ ଇନ୍‍କୁକେ ପାର୍ମେଶ୍ଵାର୍ ରାଃ ସାନ୍ତାନ୍ ହୋବାଅଃ ଲାଗିନ୍ତେ ଆଧିକାର୍ ଏମାଃ କୋୱାଏ, ମାନେ ଇନ୍‍କୁକେ ଅକନ୍‍କୋ ଇନିଃକେ ବିଶ୍ଵାସ୍ ୟାକୋ। ଇନ୍‍କୁ ନାଦୋ ଏଙ୍ଗାଆପୁ କୋୱା ମାୟୋମ୍ ତେ, ନାଦୋ ହୋଡ଼ୋକୋୱାଃ ସାନାଙ୍ଗ୍ ତେ, ନାଦୋ ମିୟାଃ ହୋଡ଼ ହୋନ୍ ନାମେ ରାଃ ସାନାଙ୍ଗ୍ ତେ, ମେନ୍ଦୋ ପାର୍ମେଶ୍ଵାର୍ ଏତେ ଜାନାମ୍ ନାକୋ। ବାଚାନ୍ ହୋଡ଼ମୋ ବାଇଜାନାଏ, ହାର୍ ଆନୁଗ୍ରାହ୍ ହାର୍ ସାର୍ତି ତେ ଫେରେଃ କେତେ ଆବୁ ଥାଲା ରେ ତାଇଜାନାଏ, ହାର୍ ଆବୁ ଇନିଜାଃ ନେଲେକା ମାନାରାଙ୍ଗ୍ ନେଲ୍ କେଦାବୁ, ଜେଲେକା ଆପୁ ପାର୍ମେଶ୍ଵାର୍ ଏତେ ହିଜୁଃକାନ୍ ମିୟାଃ ଗି କଡ଼ାହୋନ୍ ରାଃ ମାନାରାଙ୍ଗ୍। ଯୋହାନ୍ ଇନିଜାଃ ବିଷାୟ୍ ରେ ଗୋୱା ଏମ୍ କେଦାଏ, ହାର୍ କାଉରିକେତେ କାଜିକେଦାଏ, “ନିଈ ଇନିଃଗି ତାନିଃ, ଅକନିଜାଃ ଇଙ୍ଗ୍ କାଜିଲେଦାଇଙ୍ଗ୍ ଚି ଅକନିଃ ଇଙ୍ଗ୍ଆଃ ତାୟୋମ୍ତେ ହିଜୁଃ ତାନାଏ, ଇନିଃ ଇଙ୍ଗ୍ ଏତେ ମାରାଙ୍ଗ୍ ତାନିଃ ଚିୟାଃଚି ଇନିଃ ଇଙ୍ଗ୍ ଏତେ ସିଦାରେ ତାଇକେନାଏ।” ଚିୟାଃଚି ଇନିଜାଃ ଫେରେଃକାନ୍ ଏତେ ଆବୁ ସବେନ୍ କୋ ଆନୁଗ୍ରାହ୍ ଚେତାନ୍ ଆନୁଗ୍ରାହ୍ ନାମ୍ କେଦାବୁ। ଏନାମେନ୍ତେ ଚି ଆଇନ୍ ମୁଶା ନାବୀ ପାଡ଼୍ ଏତେ ଏମ୍‍ଜାନା, ମେନ୍ଦୋ ଆନୁଗ୍ରାହ୍ ହାର୍ ସାର୍ତି ୟୀଶୁ ମାସୀହ୍ ହୋରାତେ ଥେବାଃ ଜାନା। ପାର୍ମେଶ୍ଵାର୍ କେ ଅକଏ ହ ଚିଉଲା କାକୋ ନେଲାକାଇଜା, ମିୟାଃଗି ହୋନ୍‍କଡ଼ା, ଅକନିଃ ସାର୍ତିଗୀ ପାର୍ମେଶ୍ଵାର୍ ତାନିଃ ହାର୍ ଆପୁ ରାଃ ସବେନ୍ ଏତେ ନାଡ଼େଏ ରେ ମେନିଜା, ଇନିଃଗି ଆବୁକେ ଉଦୁବ୍ କେଦାଏ ଚି ପାର୍ମେଶ୍ଵାର୍ ଚିଲ୍‍କା ତାନିଃ। ଯୋହାନ୍ ରାଃ ଗୋୱା ନେୟା ତାନାଃ, ଚିମ୍ତା ୟାହୁଦୀ ଗୁରୁକୋ ୟୀରୁଶାଲେମ୍ ଏତେ ୟାଜାକ୍ କୋକେ ଆଡୋଃ ଲେବୀ କିଲି ରେନ୍ ହୋଡ଼ୋ କୋକେ ଇନିଃ ତାଃ ନେୟା କୁଲି ଲାଗିନ୍ତେ କୁଲ୍‍କେଃକୋୱାକୋ, “ଆମ୍ ଅକଏ ତାନ୍‍ମେ?” ଏଣ୍ଡେ ଇନିଃ ଇନ୍‍କୁକେ ସାଫା-ସାଫା କାଜିକେଦାଏ, “ଇଙ୍ଗ୍ ମାସୀହ୍ ନାହାଲାଇଙ୍ଗ୍।” ଏନ୍ତେ ଇନ୍‍କୁ ଇନିଃକେ କୁଲିକିଜାକୋ, “ଏଣ୍ଡେ ଆମ୍ ଅକଏ ତାନ୍‍ମେ? ଚିନାଃ ଆମ୍ ଏଲିୟା ନାବୀ ତାନ୍‍ମେ?” ଇନିଃ କାଜିକେଦାଏ, “ଇଙ୍ଗ୍ ନାହାଲାଇଙ୍ଗ୍।” “ଏଣ୍ଡେ ଚିନାଃ ଆମ୍ ଏନ୍ ନାବୀ ତାନ୍‍ମେ?” ଇନିଃ କାଜିରୁଆଡ଼୍ କେଦାଏ, “କାହା।” ଏନ୍ତେ ଇନ୍‍କୁ ଇନିଃକେ କୁଲିକିଜାକୋ, “ଏଣ୍ଡେ ଆମ୍ ଅକଏ ତାନ୍‍ମେ? ଏନାତେ ଆଲେ ଆଲେୟାଃ କୁକୁଲ୍‍ନିଃ କୋକେ କାଜିରୁଆଡ଼୍ କୋୱାଲେ। ଆମ୍ ଆମାଃ ବିଷାୟ୍ ରେ ଚିନାଃ କାଜିତାନାମ୍?” ଯୋହାନ୍ କାଜିକେଦାଏ, ଜେଲେକା ୟାଶାୟାହ୍ ନାବୀ କାଜିକାଦାଏ, “ଇଙ୍ଗ୍ ସୁନ୍‍ସାନ୍ ଜାଗା ରେ ମିହୋଡ଼୍ କେଡ଼ାତାନ୍ ନିଜାଃ ଆୱାଜ୍ ତାନିଙ୍ଗ୍ ଚି ଆପେ ପ୍ରାଭୁ ଗାଃ ହୋରା ସିଧା ରିକାଏପେ।” ଇନ୍‍କୁ ଫାରିସୀ ହୋଡ଼ୋକୋ ପାଡ଼େତେ କାଜି କୁଲ୍‍ଲେନ୍ ତାଇକେନାକୋ। ଇନ୍‍କୁ ଇନିଃକେ କୁଲିକିଜାକୋ, “ଆମ୍ ଆଗାର୍ ମାସୀହ୍ ନାହାଲାମ୍, ହାର୍ ଏଲିୟା ନାହାଲାମ୍ ହାର୍ ନାବୀ ନାହାଲାମ୍ ଏଣ୍ଡେ ଆମ୍ ଚିନାଃଲାଇ ବାପ୍ତିସ୍ମା ଏମାକୋତାନାମ୍?” ଯୋହାନ୍ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଦୋ ଦାଆ ତେ ବାପ୍ତିସ୍ମା ଏମାପେତାନିଙ୍ଗ୍, ମେନ୍ଦୋ ଆପେ ଥାଲା ରେ ମିୟାଃ ହୋଡ଼ ତିଙ୍ଗୁ କାନାଏ ଅକନିଃକେ ଆପେ କାପେ ସାରିୟା। ଇନିଃ ଇଙ୍ଗ୍ଆଃ ତାୟୋମ୍ତେ ହିଜୁଃ ରାଃ ମେନିଜା, ଅକନିଜାଃ ଖାର୍ପା ରାଃ ଥୋନୋଲ୍ ଇଙ୍ଗ୍ ଖଲାଅ ଲେକାନିଃ ନାହାଲାଇଙ୍ଗ୍।” ନେ କାଜିକୋ ଯାର୍ଦାନ୍ ନାଈ ହାନ୍ ଫାରୋମ୍ ବେଥାନି ହାତୁ ରେ ହୋବାଜାନା, ଅକତାଃ ରେ ଯୋହାନ୍ ହୋଡ଼ୋକୋକେ ବାପ୍ତିସ୍ମା ଏମାକୋ ତାଇନାଏ। ଏଟାଃ ହୁଲାଙ୍ଗ୍ ଯୋହାନ୍ ୟୀଶୁ କେ ଆଜାଃ ପାଡ଼୍ ହିଜୁଃତାନ୍ ନେଲ୍‍କେତେ କାଜିକେଦାଏ, “ନେଲିପେ, ନିଈ ପାର୍ମେଶ୍ଵାର୍ ରାଃ ମିଣ୍ଡୀ ହୋନ୍ ତାନିଃ ଅକନିଃ ଅତେଦିଶୁମ୍ ରାଃ ପାପ୍ ଗୋଅ ଇଦି କେତାନାଏ। ନିଈ ଇନିଃଗି ତାନିଃ ଅକନିଜାଃ ବିଷାୟ୍ ରେ ଇଙ୍ଗ୍ କାଜିଲେଦାଇଙ୍ଗ୍, ‘ମିୟାଃ ହୋଡ଼ ଇଙ୍ଗ୍ଆଃ ତାୟୋମ୍ତେ ହିଜୁଃ ତାନାଏ ଅକନିଃ ଇଙ୍ଗ୍ଆଃ ଏତେ ମାରାଙ୍ଗ୍ ତାନିଃ, ଚିୟାଃଚି ଇନିଃ ଇଙ୍ଗ୍ ଏତେ ସିଦାରେ ତାଇକେନାଏ।’ ଇଙ୍ଗ୍ ଦୋ ଇନିଃକେ ମାସୀହ୍ ତାନିଃ ମେନ୍ତେ କାଇଙ୍ଗ୍ ନେଲ୍ଉରୁମ୍ ଲିଜା, ମେନ୍ଦୋ ଇଙ୍ଗ୍ ଏନାଲାଗିନ୍ତେ ଦାଆ ରେ ହୋଡ଼ୋକୋକେ ବାପ୍ତିସ୍ମା ଏମାକୋ ତାଇନାଇଙ୍ଗ୍ ଚି ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ରେ ଇନିଃ ଉଦୁବଃ ୱାଏ।” ଏନ୍ତେ ଯୋହାନ୍ ନେୟା ଗୋୱା ଏମ୍‍କେଦାଏ, “ଇଙ୍ଗ୍ ଆତ୍ମା କେ ଦୁଦ୍‍ମୁଲ୍ ଲେକା ରିମିଲ୍‍ଦିଶୁମ୍ ଏତେ ଆଡ଼୍‍ଗୁତାନ୍ ନେଲ୍ କେଦାଇଙ୍ଗ୍, ହାର୍ ଏନା ଇନିଜାଃ ଚେତାନ୍ ରେ ତାଇନ୍ ଜାନାଏ। ଇଙ୍ଗ୍ ଦୋ ଇନିଃକେ କାଇଙ୍ଗ୍ ନେଲ୍ଉରୁମ୍ ଲିଜା, ମେନ୍ଦୋ ଅକଏ ଇଙ୍ଗ୍‍କେ ଦାଆ ତେ ବାପ୍ତିସ୍ମା ଏମ୍ ଲାଗିନ୍ କୁଲ୍ କାଦିଙ୍ଗାଏ, ଇନିଃଗି ଇଙ୍ଗ୍‍କେ କାଜିକାଦାଏ, ‘ଅକେୟାଃ ଚେତାନ୍ ରେ ଆମ୍ ଆତ୍ମା କେ ଆଡ଼୍‍ଗୁନ୍ ତାନ୍ ହାର୍ ତାଇନୋଃ ତାନ୍ ନେଲେୟାମ୍, ଇନିଃଗି ପାବିତାର୍ ଆତ୍ମା ତେ ବାପ୍ତିସ୍ମା ଏହେମ୍ ନିଈ ତାନିଃ।’ ଆଡୋଃ ଇଙ୍ଗ୍ ଆଏଃକେ ନେଲ୍ କିଜାଇଙ୍ଗ୍ ହାର୍ ସାର୍ତି କାଜିତାନିଙ୍ଗ୍ ଚି ନିଈ ଗି ପାର୍ମେଶ୍ଵାର୍ ରାଃ ହୋନ୍ ତାନିଃ।” ଏଟାଃ ହୁଲାଙ୍ଗ୍ ଯୋହାନ୍ ଲୋଃ ଆୟାଃ ଚେଲା କୋଏତେ ବାର୍ହୋଡ଼୍ ତିଙ୍ଗୁ ଲେନାକିନ୍, ଏନ୍ତେ ଇନିଃ ୟୀଶୁ କେ ଅକନିଃ ଏନ୍ ହୋରା ରେ ସେନ୍ ତାଇନାଏ, ନେଲ୍‍କେତେ କାଜିକେଦାଏ, “ନେଲେପେ, ନିଈ ପାର୍ମେଶ୍ଵାର୍ ରାଃ ମିଣ୍ଡୀହୋନ୍ ତାନିଃ।” ଏନ୍ତେ ଏନ୍ ବାରାନ୍ ଚେଲାକିନ୍ ଇନିଜାଃ ବାକାଣ୍ ଆୟୁମ୍‍କେତେ ୟୀଶୁ କେ ଅତୋଙ୍ଗ୍ କିଜାକିନ୍। ୟୀଶୁ ତାୟୋମ୍ ପାଡ଼୍ ଇନ୍‍କିନ୍‍କେ ହିଜୁଃତାନ୍ ନେଲ୍ କେଃକିନାଏ ହାର୍ ଇନ୍‍କିନ୍‍କେ କାଜିକେଃକିନାଏ, “ଆବେନ୍ ଅକଏ କେ ସାଙ୍ଗାର୍ ତାନାବେନ୍?” ଇନ୍‍କିନ୍ ଇନିଃକେ କାଜିକେଦାକିନ୍, “ହେ ଗୁରୁ, ଆମ୍ ଅକତାଃ ରେ ତାଇନାମ୍?” ଇନିଃ ଇନ୍‍କିନ୍ କେ କାଜିକେଃକିନାଏ, “ଦୋଲା, ହାର୍ ନେଲ୍ କେପେ।” ଏନ୍ତେ ଇନ୍‍କିନ୍ ସେନ୍ କେତେ ଇନିଜାଃ ତାଇନ୍ ଜାଗା କେ ନେଲ୍ କେଦାକିନ୍, ହାର୍ ଏନ୍ ହୁଲାଙ୍ଗ୍ ଇନିଜାଃ ଲୋଃ ତାଇଜାନାକିନ୍। ଇମ୍ତାଙ୍ଗ୍ ଲାଗ୍-ଭାଗ୍ ଶିଙ୍ଗି ଡୁବିଃ ପାଡ଼୍ ଚାଇର୍ ଷାଡି ଲେନା। ଏନ୍ ବାରାନ୍‍କିନ୍ ଏତେ, ଅକନ୍‍କିନ୍ ଯୋହାନ୍ ଆଃ ବାକାଣ୍ ଆୟୁମ୍‍କେତେ ୟୀଶୁ କେ ଅତୋଙ୍ଗ୍ ଲିଜାକିନ୍, ମିହୋଡ଼୍ ଶିମୋନ୍ ପାତ୍ରାସ୍ ରାଃ ହାଗା ଆନ୍ଦ୍ରିୟାସ୍ ତାଇ କେନାଏ। ଆନ୍ଦ୍ରିୟାସ୍ ସିଦା ଆଜାଃ ନିଜ୍ ହାଗା ଶିମୋନ୍ ଲୋଃ ଭେଁଟ୍ କେତେ କାଜିକେଦାଏ, “ଆଲେକେ ଖ୍ରୀଷ୍ଟ୍, ମାନେ ମାସୀହ୍ ନାମ୍ ଜାନାଏ।” ଆନ୍ଦ୍ରିୟାସ୍ ଶିମୋନ୍ କେ ୟୀଶୁ ରାଃ ନାଡ଼େଏ ଆଉକିଜାଏ। ୟୀଶୁ ଇନିଃକେ ନେଲ୍‍କେତେ କାଜିକେଦାଏ, “ଆମ୍ ଯୋହାନ୍ ରାଃ ହୋନ୍‍କଡ଼ା ଶିମୋନ୍ ତାନ୍‍ମେ, ଆମ୍ କୈଫା ମାନେ ପାତ୍ରାସ୍ କାଜିଅଃଗାମ୍।” ୟୀଶୁ ଏଟାଃ ହୁଲାଙ୍ଗ୍ ଗାଲିଲୀ ଜିଲ୍ଲା ତେ ସେନ୍ ଲାଗିନ୍ ସାନାଙ୍ଗ୍ କେଦାଏ। ଇନିଃ ଫିଲିପୁସ୍ ଲୋଃ ନାପାମ୍ ଜାନାଏ ହାର୍ କାଜିକିଜାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ।” ଫିଲିପୁସ୍, ଆନ୍ଦ୍ରିୟାସ୍ ଆଡୋଃ ପାତ୍ରାସ୍ କିନାଃ ହାତୁ ବେଥ୍‍ସୈଦା ରେନ୍ ବାସିନ୍ଦା ତାଇକେନାଏ। ଫିଲିପୁସ୍ ନାଥ୍‍ନିଏଲ୍ ଲୋଃ ନାପାମ୍ ଜାନାଏ ହାର୍ ଇନିଃକେ କାଜିକିଜାଏ, “ଅକେୟାଃ ବିଷାୟ୍ ରେ ମୁଶା ନାବୀ ରାଃ ଆଇନ୍ ରେ ହାର୍ ନାବୀ କୋ ଅଲାକାଦାକୋ, ଇନିଃ ଆଲେକେ ନାମ୍‍ଜାନାଏ, ଇନିଃ ଯୋଶେଫ୍ ରାଃ ହୋନ୍, ୟୀଶୁ ନାଜ୍ରେଥ୍ ସାହାର୍ ରେନ୍ ତାନିଃ।” ନାଥ୍‍ନିଏଲ୍ ଇନିଃକେ କାଜିକିଜାଏ, “ଚିନାଃ ନାଜ୍ରେଥ୍ ସାହାର୍ ଏତେ ହଗି ଜାହାନ୍ ବୁଗିନ୍ ଜିନିଷ୍ ଅଡୋଙ୍ଗ୍ଅଃ ୱା?” ଫିଲିପୁସ୍ ଇନିଃକେ କାଜିକିଜାଏ, “ହୁଜୁଃମେ ହାର୍ ନେଲିମେ।” ୟୀଶୁ ନାଥ୍‍ନିଏଲ୍ କେ ଆୟାଃ ନାଡ଼େଏ ହିଜୁଃତାନ୍ ନେଲ୍‍କେତେ ଇନିଜାଃ ବିଷାୟ୍ ରେ କାଜିକେଦାଏ, “ନେଲିପେ, ନିଈ ସାର୍ତିଗୀ ଇସ୍ରାଏଲୀ ହୋଡ଼ ତାନିଃ, ନିଜାଃ ତାଃ ଲୋଗୋ ବାନୋଗା।” ନାଥ୍‍ନିଏଲ୍ ଇନିଃକେ କୁଲିକିଜାଏ, “ଆମ୍ ଇଙ୍ଗ୍‍କେ ଚିଲ୍‍କା ସାରିୟାମ୍?” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଆମ୍‍କେ ଫିଲିପୁସ୍ କେଡ଼ା ସିଦାରେ, ଆମ୍ ଚିମ୍ତାଙ୍ଗ୍ ଲୋୱା ଦାରୁ ଲାଥାର୍ ରେ ତାଇନ୍ କେନାମ୍, ଇମ୍ତାଙ୍ଗ୍ ଇଙ୍ଗ୍ ଆମ୍‍କେ ନେଲ୍ ଲେଃ ମିଙ୍ଗ୍।” ନାଥ୍‍ନିଏଲ୍ ଇନିଃକେ କାଜିରୁଆଡ଼୍ କିଜାଏ, “ହେ ଗୁରୁ, ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ, ଆମ୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋୱାଃ ରାଜା ତାନ୍‍ମେ।” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଇଙ୍ଗ୍ ଆମ୍‍କେ ଲୋୱା ଦାରୁ ଲାଥାର୍ ରେ ନେଲ୍ ଲେଦିଙ୍ଗ୍ ମେନ୍ତେ କାଜିକାଦିଙ୍ଗ୍, ଚିନାଃ ଏନାମେନ୍ତେ ଆମ୍ ଇଙ୍ଗ୍‍କେ ବିଶ୍ଵାସ୍ ରିକାତାନାମ୍? ଆମ୍ ନେୟା ଏତେ ହଗି ମାପ୍‍ରାଙ୍ଗ୍-ମାପ୍‍ରାଙ୍ଗ୍ କାମିକୋ ନେଲେୟାମ୍।” ଏନ୍ତେ ଇନିଃକେ କାଜିକିଜାଏ, “ଇଙ୍ଗ୍ ଆମ୍‍କେ ସାର୍ତି-ସାର୍ତି କାଜିତାନିଙ୍ଗ୍ ଚି ଆମ୍ ସିର୍ମାଦିଶୁମ୍ କେ ନିଜାକାନ୍, ହାର୍ ପାର୍ମେଶ୍ଵାର୍ ରାଃ ସିର୍ମାଦାସୀ କୋକେ, ଇଙ୍ଗ୍ ମାନ୍‍ୱା ରାଃ ହୋନ୍ ଚେତାନ୍ ରେ ଆଡ଼୍‍ଗୁତାନ୍ ହାର୍ ରାକାବ୍ ତାନ୍ ନେଲ୍ କୋୱାମ୍।” ନାଆ ଆପି ହୁଲାଙ୍ଗ୍ ରେ ଗାଲିଲୀ ଜିଲ୍ଲା ରାଃ କାନା ହାତୁ ରେ ମିୟାଃ ଆଣାଦୀ ତାଇକେନା, ହାର୍ ୟୀଶୁ ରାଃ ଏଙ୍ଗାକିନ୍ ଏନ୍ତାଃରେ ତାଇକେନାକିନ୍। ୟୀଶୁ ହାର୍ ଆୟାଃ ଚେଲାକୋ ହଗି ଏନ୍ ଆଣାଦୀ ରେ ନେୱୋତା ଲେନ୍ ତାଇକେନାକୋ। ଚିମ୍ତା ଆଙ୍ଗୁର୍ ରାଶି ଛାବାଜାନା, ଏଣ୍ଡେ ୟୀଶୁ ରାଃ ଏଙ୍ଗାକିନ୍ ଇନିଃକେ କାଜିକେଦାକିନ୍, “ଇନ୍‍କୁ ତାଃ ଆଙ୍ଗୁର୍ ରାଶି ଛାବାଜାନା।” ୟୀଶୁ ଆୟାଃ ଏଙ୍ଗାକିନ୍ କେ କାଜିକେଦାଏ, “ହେ ମା, ଇଙ୍ଗ୍‍କେ ଚିକାନ୍ ଲାଇ କାଜିତାନାମ୍? ଇଙ୍ଗ୍ଆଃ ସାମାୟ୍ ନାଆ ସାନ୍ତେ କା ହିଜୁଃ କାନା।” ମେନ୍ଦୋ ଇନିଜାଃ ଏଙ୍ଗାକିନ୍ ଦାସୀକୋକେ କାଜିକେଃକୋୱାଏ, “ଅକନାଃ କୋ ଇନିଃ ଆପେକେ କାଜିୟାଏ, ଏନା ରିକାୟାପେ।” ହେନ୍ତାଃ ରେ ୟାହୁଦୀ ଗୁରୁ କୋୱାଃ ଧାରାମ୍ ରୀତି ଲେକା ତେ ତିଈ ଆବୁଙ୍ଗେନ୍ ଲାଗିନ୍ ଦିରି ରାଃ ଛାଅ ଠୁ ମାରାଙ୍ଗ୍ ଚାଟୁ ମାଣ୍ଡାଅ ଲେନା, ଏନା କୋରେ ବା-ବାରିୟା, ଆପି-ଆପିୟା ମାନ୍ ଲେକା ଫେରେଦୋଃ ତାଇନା। ୟୀଶୁ ଇନ୍‍କୁକେ କାଜିକେଦାଏ, “ଚାଟୁ କୋରେ ଦାଆ ଫେରେଦେପେ,” ଏନାମେନ୍ତେ ଇନ୍‍କୁ ମୁଖା ସାନ୍ତେ ଫେରେଃ କେଦାକୋ। ଏନ୍ତେ ଇନିଃ ଦାସୀକୋକେ କାଜିକେଦାଏ, “ନାଆ କାଟିଃ ଅଡୋଙ୍ଗ୍ ଏପେ ଆଡୋଃ ଭୋଜ୍ ରେନ୍ ଖାନ୍ଦାସାର୍ ଗୋମ୍‍କେ ତାଃ ଇଦି କେପେ।” ହାର୍ ଇନ୍‍କୁ ଇଦିକେଦାକୋ। ଚିମ୍ତାଙ୍ଗ୍ ଭୋଜ୍ ରେନ୍ ଖାନ୍ଦାସାର୍ ଗୋମ୍‍କେ ଏନ୍ ଦାଆ କେ ଚାଖାକେଦାଏ, ଅକନାଃ ଆଙ୍ଗୁର୍ ରାଶି ବାଇଛାବା ଲେନା ହାର୍ କାଏ ସାରି ତାଇନାଏ ଚି ଏନା ଅକତାଃ ଏତେ ହିଜୁଃ ଲେନା (ମେନ୍ଦୋ ଅକନ୍ ଦାସୀକୋ ଦାଆ ଅଡୋଙ୍ଗ୍ ଲେଦାକୋ ଇନ୍‍କୁ ସାରି ତାଇନାକୋ), ଏନ୍ତେ ଭୋଜ୍ ରେନ୍ ଖାନ୍ଦାସାର୍ ଗୋମ୍‍କେ ଦୁଲ୍‍ହା କେ କେଡ଼ାକେତେ ଇନିଃକେ କାଜିକେଦାଏ, “ସବେନ୍ କୋ ସିଦା ତେ ବୁଗିନ୍ ଆଙ୍ଗୁର୍ ରାଶି କୋ ଏମେୟାକୋ, ହାର୍ ଚିମ୍ତା ହୋଡ଼ୋକୋ ଆସ୍‍ଦି କୋୱାଃକୋ, ଇମ୍ତା ସାବାଃ ତେୟାଃ ଏମେୟାକୋ, ମେନ୍ଦୋ ଆମ୍ ନାଆ ସାନ୍ ବେଶ୍ ଆଙ୍ଗୁର୍ ରାଶି ଦହ ମାଣ୍ଡାଅ କାଦାମ୍।” ୟୀଶୁ ଗାଲିଲୀ ଜିଲ୍ଲା ରାଃ କାନା ହାତୁ ରେ ଆୟାଃ ନେ ପାହିଲା ଆକ୍‍ଦାନ୍ଦା କାମି ଏଟେଃ କେତେ ଆୟାଃ ମାନାରାଙ୍ଗ୍ ଉଦୁବ୍ କେଦାଏ ହାର୍ ଇନିଜାଃ ଚେଲାକୋ ଇନିଃକେ ବିଶ୍ଵାସ୍ କେଦାକୋ। ଏନା ତାୟୋମ୍ତେ ୟୀଶୁ ଆଡୋଃ ଆଜାଃ ଏଙ୍ଗା ମାରିୟାମ୍ ଆଡୋଃ ଇନିଜାଃ ହାଗାକୋ ଆଡୋଃ ଇନିଜାଃ ଚେଲାକୋ କାଫାର୍ନାହୁମ୍ ସାହାର୍ ତେ ସେନ୍ ଜାନାକୋ ହାର୍ ହେନ୍ତାଃ ରେ ହୁଡିଙ୍ଗ୍ ଦିନ୍ ତାଇନ୍ ଜାନାକୋ। ଇମ୍ତାଙ୍ଗ୍ ୟାହୁଦୀ କୋୱାଃ ଫାସାହ୍ ପାରାବ୍ ନାଡ଼େଏ ହିଜୁଃ ତାଇନା, ଆଡୋଃ ୟୀଶୁ ୟୀରୁଶାଲେମ୍ ସେନ୍ ଜାନାଏ। ଇନିଃ ମାନ୍ଦିର୍ ରାଃ ରାଚା ରେ ଉରିଃ, ମିଣ୍ଡୀ ହାର୍ ଦୁଦ୍‍ମୁଲ୍ କୋକେ ଆଖ୍ରିଙ୍ଗ୍ ତାନ୍ ହୋଡ଼ୋକୋକେ, ହାର୍ ଟାକା ଭାଞ୍ଜାଅ କୋକେ ଦୁବ୍ କାନ୍ ନେଲ୍‍କେଃକୋୱାଏ। ଏନ୍ତେ ଇନିଃ ବାୟ୍‍ହାର୍ ରାଃ ମିୟାଃ କୋଡ୍ରା ବାଇକେତେ, ସବେନ୍ ମିଣ୍ଡୀକୋକେ ଆଡୋଃ ଉରିଃ କୋକେ ମାନ୍ଦିର୍ ଏତେ ଅଡୋଙ୍ଗ୍ କେଃକୋୱାଏ, ହାର୍ ଟାକା ଭାଞ୍ଜାଅ କୋୱାଃ ପାଇସା କୋକେ ଛିତିଛାନ୍ଦ୍ ତାଦାଏ, ଆଡୋଃ ଟେବୁଲ୍ କୋକେ ଉଲ୍‍ଟାଅ ତାଦାଏ; ହାର୍ ଦୁଦ୍‍ମୁଲ୍ ଆଖ୍ରିଙ୍ଗ୍ କୋକେ କାଜିକେଦାଏ, “ନିକୁକେ ନେତାଃ ତେ ଇଦିକୋପେ। ଇଙ୍ଗ୍ଆଃ ଆପୁ ରାଃ ଅଡ଼୍ଆଃ କେ କିରିଙ୍ଗ୍ ଆଖ୍ରିଙ୍ଗ୍ ରାଃ ଅଡ଼୍ଆଃ ଆଲୋପେ ବାଇୟା।” ଇମ୍ତାଙ୍ଗ୍ ଆୟାଃ ଚେଲାକୋକେ ପାହୋମ୍ ହିଜୁଃ ଜାନା ଚି ଅଲାକାନା, “ଇଙ୍ଗ୍ଆଃ ଦୁଲାଡ଼୍ ଆମାଃ ଅଡ଼୍ଆଃ ଲାଗିନ୍ ଇଙ୍ଗ୍‍କେ ସେଙ୍ଗେଲ୍ ଲେକା ଜୁଲିଙ୍ଗ୍ ତାନାଏ।” ଏନ୍ତେ ୟାହୁଦୀ ଗୁରୁକୋ ଇନିଃକେ କାଜିକିଜାକୋ, “ଆମ୍ ଯେ ନେୟା ରିକା ତାନାମ୍ ଦୋ ଆଲେ କେ ଚିନାଃ ଚିହ୍ନା ଦେଖାଅ ତାନାମ୍?” ୟୀଶୁ ଇନ୍‍କୁକେ କାଜିରୁଆଡ଼୍ କେଦାଏ, “ନେ ମାନ୍ଦିର୍ କେ ଆପେ ଧାଶୁଡ଼୍ ତାପେ, ଆଡୋଃ ଇଙ୍ଗ୍ ଆପି ହୁଲାଙ୍ଗ୍ ରେ ବାଇ ରୁଆଡ଼୍ ତାଃଇଙ୍ଗ୍।” ୟାହୁଦୀ ଗୁରୁକୋ କାଜିକିଜାକୋ, “ନେ ମାନ୍ଦିର୍ କେ ବାଇଲାଗିନ୍ ଛୟାଲିଶ୍ ବାରାଶ୍ ଲାଗାଅ କାନା, ହାର୍ତେ ଚିନାଃ ଆମ୍ ଏନାକେ ଆପି ହୁଲାଙ୍ଗ୍ ରେ ବାଇ ତାଃମ୍?” ମେନ୍ଦୋ ଇନିଃ ଆୟାଃ ହୋଡ଼ମୋ ରାଃ ମାନ୍ଦିର୍ ରାଃ ବିଷାୟ୍ ରେ କାଜିଲେଦାଏ। ତାୟୋମ୍ତେ ଚିମ୍ତା ଇନିଃ ଗୋଜାକାନ୍ କୋଏତେ ଜୀହିଃ ବିରିଃ ଜାନାଏ ଇମ୍ତା ଆୟାଃ ଚେଲାକୋକେ ମୋନେ ହିଜୁଃଜାନା ଚି ଇନିଃ ନେୟା କାଜିଲେଦାଏ, ଏନ୍ତେ ଇନ୍‍କୁ ପାବିତାର୍ ପୁଥି ଆଡୋଃ ୟୀଶୁ ରାଃ ବାଚାନ୍ ରେ ଅକନାଃ ଇନିଃ କାଜିଲେଦାଏ, ବିଶ୍ଵାସ୍ କେଦାକୋ। ଚିମ୍ତାଙ୍ଗ୍ ୟୀଶୁ ୟୀରୁଶାଲେମ୍ ରେ ଫାସାହ୍ ପାରାବ୍ ସାମାୟ୍ ରେ ପାରାବ୍ ରେ ତାଇଲେନାଏ, ଇମ୍ତା ଥିମ୍ବାଗି ହୋଡ଼ୋକୋ ଏନ୍ ଚିହ୍ନା କୋକେ ଅକନାଃ ଇନିଃ ରିକାତାଇନାଏ ନେଲ୍‍କେତେ ଇନିଃକେ ବିଶ୍ଵାସ୍ କେଦାକୋ। ମେନ୍ଦୋ ୟୀଶୁ ଆଏଃ ଆପାନ୍ କେ ଇନ୍‍କୁୱାଃ ଭାରୋସା ରେ କାଏ ବାଗେ କେଦାଏ, ଚିୟାଃଚି ଇନିଃ ହୋଡ଼ୋକୋୱାଃ ସବେନ୍ ସ୍ଵଭାବ୍ ସାରି ତାଇନାଏ। ଇନିଃକେ ନେୟା ଜାରୁରୀ କା ତାଇକେନା ଚି ଜାହାଁଏ ହୋଡ଼ୋ କୋୱାଃ ବିଷାୟ୍ ରେ ଇନିଃକେ ଉଦୁବେୟାଏ, ଚିୟାଃଚି ଇନିଃ ଆଏଃଗି ସାରିତାଇନାଏ ଚି ହୋଡ଼ ରାଃ ମୋନ୍ ରେ ଚିନାଃ ମେନାଃ? ଫାରିସୀ ହୋଡ଼ୋ କୋଏତେ ନିକୁଦିମୁସ୍ ନୁତୁମ୍ ମିୟାଃ ହୋଡ଼ ତାଇକେନାଏ, ଇନିଃ ୟାହୁଦୀ ଗୁରୁ କୋୱାଃ ମୁଖିୟା ତାଇକେନାଏ। ଇନିଃ ନିଦା ଇମ୍ତା ୟୀଶୁ ତାଃ ନାଡ଼େଏ ହିଜୁଃକେତେ କାଜିକେଦାଏ, “ହେ ଗୁରୁ, ଆଲେ ସାରିତାନାଲେ ଚି ଆମ୍ ପାର୍ମେଶ୍ଵାର୍ ପାଡ଼େତେ ଗୁରୁ ହୋବାକେତେ ହିଜୁଃ କାନାମ୍, ଚିୟାଃଚି ଜେତାଏ ନେ ଚିହ୍ନା କୋକେ ଅକନାଃ ଆମ୍ ଦେଖାଅ ତାନାମ୍, ଆଗାର୍ ପାର୍ମେଶ୍ଵାର୍ ଇନିଜାଃ ଲୋଃ କାଏ ତାଇନ୍ ରେଦୋ କାଏ ଦେଖାଅ ଧାଡ଼ିୟାଏ।” ୟୀଶୁ ଇନିଃକେ କାଜିରୁଆଡ଼୍ କେଦାଏ, “ଇଙ୍ଗ୍ ଆମ୍‍କେ ସାର୍ତି-ସାର୍ତି କାଜିତାନିଙ୍ଗ୍, ଆଗାର୍ ଜେତାଏ ଆଡୋଃ ମିଶା କାଏ ଜାନାମୋଃ ରେ, ପାର୍ମେଶ୍ଵାର୍ ରାଃ ରାଇଜ୍ କାଏ ନେଲ୍ ଧାଡ଼ିୟାଏ।” ନିକୁଦିମୁସ୍ ଇନିଃକେ କାଜିକିଜାଏ, “ହୋଡ଼ ଚିମ୍ତା ହାଡ଼ାମ୍ କେନୋଗାଏ, ଏଣ୍ଡେ ଚିଲ୍‍କା ଜାନାମୋ ଅଗାଏ? ଚିନାଃ ଇନିଃ ଆୟାଃ ଏଙ୍ଗା ଲାହେଃ ରେ ବାର୍ସା ବୋଲୋ କେତେ ଜାନାମୋଃ ଧାଡ଼ିୟାଏ?” ୟୀଶୁ କାଜିରୁଆଡ଼୍ କେଦାଏ, “ଇଙ୍ଗ୍ ଆମ୍‍କେ ସାର୍ତି-ସାର୍ତି କାଜିତାନିଙ୍ଗ୍, ଚିମିନ୍ ସାନ୍ତେ ଜାହାନ୍ ହୋଡ଼ ଦାଆ ଆଡୋଃ ଆତ୍ମା ଏତେ କାଏ ଜାନାମୋଗାଏ ଇମ୍ତା ସାନ୍ତେ ଇନିଃ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋ କାଏ ଧାଡ଼ିୟାଏ। ଚିୟାଃଚି ହୋଡ଼ ହୋଡ଼କେ ଭାଇର୍ ଜାନାମ୍ ଧାଡ଼ିୟାଏ, ମେନ୍ଦୋ ସିର୍ମାଦିଶୁମ୍ ଏତେ ପାବିତାର୍ ଆତ୍ମା ହୋଡ଼ କେ ନାୱା ଜାନାମ୍ ଏମେୟାଏ। ଆଲୋପେ ଆକ୍‍ଦାନ୍ଦାଅଃକା ଚି ଇଙ୍ଗ୍ ଆପେକେ କାଜିକେଦାଇଙ୍ଗ୍, ‘ଆପେକେ ନାୱା ଜାନାମ୍ ଇଦି ଜାଲେକାତେ ମେନାଃ।’ ହୋୟୋ ଅକ୍ତେ ସାନାଙ୍ଗ୍ ୟାଏ ଏନ୍ତେ ହୋୟୋୟାଏ, ହାର୍ ଆମ୍ ଏନାରାଃ ଷାଡି ଆୟୁମ୍ ୟାମ୍, ମେନ୍ଦୋ କାମ୍ ସାରିୟା ଚି ଏନା ଅକ୍ତାଃ ଏତେ ହିଜୁଃୱା ହାର୍ ଅକ୍ତାଃ ସେନୋଃୱା? ଅକଏ ପାବିତାର୍ ଆତ୍ମା ଏତେ ଜାନାମ୍ କାନାଏ ଏନ୍ ସବେନ୍ କୋ ଏନ୍‍ଲେକାଗି ତାନ୍‍କୋ।” ନିକୁଦିମୁସ୍ ଇନିଃକେ କାଜିରୁଆଡ଼୍ କିଜାଏ, “ନେୟା ଚିଲ୍‍କା ହୋବା ଧାଡ଼ିୟୋଃୱା?” ନେୟା ଆୟୁମ୍‍କେତେ ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଆମ୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋୱାଃ ମାରାଙ୍ଗ୍ ଗୁରୁ ହୋବାକେତେ ହଗି ଚିନାଃ ନେ କାଜିକୋକେ କାମ୍ ବୁଝାଅଃ ତାନାମ୍? ଇଙ୍ଗ୍ ଆମ୍‍କେ ସାର୍ତି-ସାର୍ତି କାଜିତାନିଙ୍ଗ୍ ଚି ଆଲେ ଅକନାଃ ସାରିୟାଲେ ଏନା କାଜିୟାଲେ, ହାର୍ ଅକନାଃ ଆଲେ ନେଲ୍ କାଦାଲେ ଏନା ରାଃ ବିଷାୟ୍ ରେ ଗୋୱା ଏମେୟାଲେ, ଏଣ୍ଡେ ରେହଗି ଆଲେ ଅକନାଃ କାଜି ତାନାଲେ ଏନାକେ ଆପେ କାପେ ବିଶ୍ଵାସ୍ ତାନା। ଚିମ୍ତାଙ୍ଗ୍ ଇଙ୍ଗ୍ ଆମ୍‍କେ ଅତେ ରେ ହୋବାଅଃ ବିଷାୟ୍ କେ କାଜିକେଦାଇଙ୍ଗ୍ ହାର୍ ଆପେ କାପେ ବିଶ୍ଵାସ୍ ତାନା, ଏଣ୍ଡେ ଆଗାର୍ ଇଙ୍ଗ୍ ଆମ୍‍କେ ସିର୍ମାଦିଶୁମ୍ ରେ ଚିନାଃ ହୋବାୱା ଏନା ବିଷାୟ୍ ରେ କାଜିୟାଇଙ୍ଗ୍ ଏଣ୍ଡେ ଆପେ ଚିଲ୍‍କା ବିଶ୍ଵାସ୍ ୟାପେ। ଜେତାଏ ସିର୍ମାଦିଶୁମ୍ ତେ କାକୋ ସେନ୍ କାନା, ଇନିଃ ଭାଇର୍ ଅକନିଃ ସିର୍ମାଦିଶୁମ୍ ଏତେ ଆଡ଼୍‍ଗୁ କାନାଏ, ମାନେ ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ଅଡ଼୍ଆଃ ସିର୍ମାଦିଶୁମ୍ ରେ ମେନାଃ। ଜେଲେକା ମୁଶା ନାବୀ ସୁନ୍‍ସାନ୍ ଜାଗା ରେ ପିତାଲ୍ ତେ ବାଇକାନ୍ ମିୟାଃ ବିଙ୍ଗ୍ କେ ଚେତାନ୍ ରାକାବ୍ ଲିଜାଏ, ହେନ୍ ଲେକାଗି ମାନ୍‍ୱା ରାଃ ହୋନ୍ ହ ଚେତାନ୍ ରେ ରାକାବ୍ ଅଗାଏ। ଏନାତେ ଜାହାଁଏ ହ ଇଙ୍ଗ୍‍କେ ବିଶ୍ଵାସ୍ ୟାଏ, ଇନିଃ ଜାନାଓ ଜୀଦାନ୍ ନାମେୟାଏ।” “ଚିୟାଃଚି ପାର୍ମେଶ୍ଵାର୍ ଅତେଦିଶୁମ୍ ରେନ୍ ହୋଡ଼ୋକୋକେ ନେଲେକା ଦୁଲାଡ଼୍ ମାଣ୍ଡାଅ କେଦାଏ ଚି ଇନିଃ ଆଜାଃ ମିୟାଃ ଗି ହୋନ୍‍କଡ଼ା କେ ଏମ୍ ତାଜାଏ, ଏନାତେ ଅକଏ ଇନିଜାଃ ରେ ବିଶ୍ଵାସ୍ ୟାଏ, ଇନିଃ କାଏ ନାଶ୍ ଅଗାଏ, ମେନ୍ଦୋ ଜାନାଓ ଜୀଦାନ୍ ନାମେ ୟାଏ। ଏନାମେନ୍ତେ ପାର୍ମେଶ୍ଵାର୍ ଆୟାଃ ମିୟାଃ ଗି ହୋନ୍‍କଡ଼ା କେ ଅତେଦିଶୁମ୍ ରେନ୍ ହୋଡ଼ୋକୋ ତାଃ ନେୟା ଲାଗିନ୍ତେ କାଏ କୁଲ୍‍କିଜା ଚି ଅତେଦିଶୁମ୍ ରେନ୍ କୋକେ ଶାଜାଇ ଲାଗିନ୍ତେ ଆନାଚୁ ଏମେୟାଏ, ମେନ୍ଦୋ ଏନା ଲାଗିନ୍ ଚି ଅତେଦିଶୁମ୍ ରେନ୍ ହୋଡ଼ୋକୋ ଆଜାଃ ହୋରାତେ ବାଞ୍ଚାଅ ନାମେୟାକୋ। ଅକଏ ପାର୍ମେଶ୍ଵାର୍ ରାଃ ହୋନ୍ ଚେତାନ୍ ରେ ବିଶ୍ଵାସ୍ ୟାଏ, ଇନିଜାଃ ରେ ଶାଜାଇ ରାଃ ଆନାଚୁ କା ହୋବାୱା, ମେନ୍ଦୋ ଅକଏ ଇନିଜାଃ ରେ କାଏ ବିଶ୍ଵାସ୍ ତାନା, ଇନିଃ ଦୋଷୀ ବାଇ ଜାନାଏ; ଏନାଲାଗିନ୍ତେ ଚି ଇନିଃ ପାର୍ମେଶ୍ଵାର୍ ରାଃ ମିୟାଃ ଗି ହୋନ୍‍କଡ଼ା ରାଃ ନୁତୁମ୍ ରେ କାଏ ବିଶ୍ଵାସ୍ କେଦା। ଶାଜାଇ ରାଃ ଆନାଚୁ ଏମେ ରାଃ ହୋରା ନେୟା ଲାଗିନ୍ତେ ବାଇୟୋଃ ତାନା ଚି ମାସ୍କାଲ୍ ଅତେଦିଶୁମ୍ ତେ ହିଜୁଃ ଲେନାଏ, ହାର୍ ହୋଡ଼ୋକୋ ନୁବାଃ କେ ମାସ୍କାଲ୍ ଏତେ ଥିମ୍ବା ଦୁଲାଡ଼୍ କେଦାକୋ ଚିୟାଃଚି ଇନ୍‍କୁୱାଃ କାମି ଶିତୃ ତାଇକେନା। ଚିୟାଃଚି ଅକଏ ଶିତୃ କାମିତାନାଏ, ଇନିଃ ମାସ୍କାଲ୍ କେ ହିଲାଙ୍ଗ୍ ୟାଏ ହାର୍ ମାସ୍କାଲ୍ ନାଡ଼େଏ ତେ କାଏ ହିଜୁଗା, କାରେ ଦୋ ଆଜାଃ କାମି ନେଲ୍ କୋଃୱା। ମେନ୍ଦୋ ଅକଏ ସାର୍ତି ହୋରା ରେ ସେସେନ୍ ତାନାଏ ଇନିଃ ମାସ୍କାଲ୍ ନାଡ଼େଏ ତାଃ ହିଜୁଃ ତାନାଏ, ଏନାତେ ଇନିଜାଃ କାମିକୋ ନେଲୋଗା ଚି ଏନା ପାର୍ମେଶ୍ଵାର୍ ପାଡ଼େତେ ରିକା କାନା।” ନେୟା ତାୟୋମ୍ତେ ୟୀଶୁ ହାର୍ ଆୟାଃ ଚେଲାକୋ ୟାହୁଦୀୟା ଜିଲ୍ଲା ତେ ସେନ୍ ଜାନାକୋ, ଆଡୋଃ ଇନିଃ ଏନ୍ତାଃ ରେ ଇନ୍‍କୁ ଲୋଃ ତାଇନ୍ କେତେ ବାପ୍ତିସ୍ମା ଏମ୍ କେଃକୋୱାଏ। ଯୋହାନ୍ ହ ସାମାରୀୟା ଜିଲ୍ଲା ରାଃ ଶାଲେମ୍ ସାହାର୍ ରାଃ ନାଡ଼େଏ ଏନୋନ୍ ହାତୁ ରେ ବାପ୍ତିସ୍ମା ଏମ୍ ତାଇନାଏ, ଚିୟାଃଚି ହେନ୍ତାଃ ରେ ଥିମ୍ବାଗି ଦାଆ ତାଇଲେନା, ହାର୍ ହୋଡ଼ୋକୋ ହିଜୁଃକେତେ ବାପ୍ତିସ୍ମା ଇଦି ତାଇନାକୋ। ଯୋହାନ୍ ଇମ୍ତାଙ୍ଗ୍ ସାନ୍ ଜେଲ୍ଅଡ଼୍ଆଃ ରେ କାଏ ଆଦେର୍ ଲେନାଏ। ଏନ୍ତାଃ ରେ ଯୋହାନ୍ ରାଃ ଚେଲାକୋ ଏତେ ମିୟାଃ ୟାହୁଦୀ ଗୁରୁ ଲୋଃ ଧାରାମ୍ ରୀତି ରାଃ ଲେକାତେ ଫାର୍ଚିନ୍ ବିଷାୟ୍ ରେ କୁପୁଲି ହୋବାଜାନା। ଏନ୍ତେ ଯୋହାନ୍ ରାଃ ଚେଲାକୋ ଆଜାଃ ତାଃ ହିଜୁଃକେତେ କାଜିକିଜାକୋ, “ହେ ଗୁରୁ, ଅକଏ ଆମ୍ ଲୋଃ ଯାର୍ଦାନ୍ ନାଈ ରାଃ ପୁରାବ୍ ପାଡ଼୍ ତାଇନ୍ କେନାଏ, ହାର୍ ଅକନିଜାଃ ଆମ୍ ଗୋୱା ଏମ୍ କେଦାମ୍, ନେଲେମ୍, ଇନିଃ ବାପ୍ତିସ୍ମା ଏମ୍ ତାନାଏ, ହାର୍ ସବେନ୍ କୋ ଇନିଜାଃ ତାଃ ସେନ୍ ତାନାକୋ।” ଯୋହାନ୍ କାଜିରୁଆଡ଼୍ କେଦାଏ, “ଚିମିନ୍ ସାନ୍ତେ ହୋଡ଼ କେ ସିର୍ମାଦିଶୁମ୍ ଏତେ କା ଏମୋଗା, ଏନ୍ ସାନ୍ତେ ଇନିଃ ଜେତ୍ନାଃ କାଏ ନାମ୍ ଧାଡ଼ିୟା। ଆପେ ଆପେଗୀ ପେ ଇଙ୍ଗ୍ଆଃ ତେ ଆୟୁମ୍ କାଦାପେ ଚି ଇଙ୍ଗ୍ କାଜିଲେଦାଇଙ୍ଗ୍, ‘ଇଙ୍ଗ୍ ମାସୀହ୍ ନାହାଲାଇଙ୍ଗ୍, ମେନ୍ଦୋ ଇନିଜାଃ ଆୟୁର୍ ରେ କୁଲା କାନିଙ୍ଗ୍।’ ଅକେୟାଃ ଦୁଲ୍‍ହୀନ୍ ତାନିଃ, ଇନିଃଗି ଦୁଲ୍‍ହା ତାନିଃ, ମେନ୍ଦୋ ଦୁଲ୍‍ହା ରାଃ ଗାତି ତିଙ୍ଗୁ କେତେ ଇନିଜାଃ ଆୟୁମ୍ ତାନାଏ, ହାର୍ ଦୁଲ୍‍ହା ରାଃ କାଜି ଆୟୁମ୍ କେତେ ପୁରାଃ ଗି ରାଶିକାଅଃ ତାନାଏ, ନାଆ ଇଙ୍ଗ୍ଆଃ ନେ ରାଶିକା ପୁରା ହୋବାଜାନା। ଲାଗାତିଙ୍ଗ୍ ମେନାଃ ଚି ଇନିଃ ମାରାଙ୍ଗ୍ ଇଦିଅଃ କାଏ, ହାର୍ ଇଙ୍ଗ୍ ହୁଡିଙ୍ଗ୍ ଇଦିଅଃ କାଇଙ୍ଗ୍।” “ଅକଏ ରିମିଲ୍‍ଦିଶୁମ୍ ଏତେ ହିଜୁଃୱାଏ ଇନିଃ ନେ ସବେନ୍ କୋଏତେ ମାରାଙ୍ଗ୍ ତାନିଃ, ହାର୍ ଅକଏ ଅତେ ଏତେ ହିଜୁଃୱାଏ ଇନିଃ ଅତେ ରେନ୍ ନିଈ ତାନିଃ, ହାର୍ ଅତେ ରେୟାଃ ବାକାଣ୍ କାଜିୟାଏ, ଅକଏ ସିର୍ମାଦିଶୁମ୍ ଏତେ ହିଜୁଃୱାଏ, ଇନିଃ ସବେନ୍ କୋଏତେ ମାରାଙ୍ଗ୍ ତାନିଃ। ଇନିଃ ଅକନାଃ ହଗି ନେଲ୍ କାଦାଏ ହାର୍ ଆୟୁମ୍ କାଦାଏ, ଏନା ରାଃ ବିଷାୟ୍ ରେ ଗି ସାନ୍ଦେଶ୍ ଏମେୟାଏ, ମେନ୍ଦୋ ଆୟାଃ ସାନ୍ଦେଶ୍ କେ କାଟିଃ ହୋଡ଼ୋକୋ ଗ୍ରାହାନ୍ ତାନାକୋ। ଅକଏ ଇନିଜାଃ ସାନ୍ଦେଶ୍ କେ ମାନାତିଙ୍ଗ୍ କେଦାଏ ଇନିଃ ପୋକ୍ତା ତାଦାଏ ଚି ପାର୍ମେଶ୍ଵାର୍ ସାର୍ତି ତାନିଃ। ଚିୟାଃଚି ଅକଏକେ ପାର୍ମେଶ୍ଵାର୍ କୁଲ‍୍‍ କିଜାଏ, ଇନିଃ ପାର୍ମେଶ୍ଵାର୍ ରାଃ ବାକାଣ୍ କାଜିୟାଏ, ଚିୟାଃଚି ପାର୍ମେଶ୍ଵାର୍ ପାବିତାର୍ ଆତ୍ମା ସୋଙ୍ଗ୍-ସୋଙ୍ଗ୍ କେତେ କାଏ ଏମେୟାଏ। ଆପୁ-ପାର୍ମେଶ୍ଵାର୍ ହୋନ୍‍କଡ଼ା ଲୋଃ ଦୁଲାଡ଼୍ ମାଣ୍ଡାଅ ତାନାଏ, ହାର୍ ଇନିଃ ସବେନ୍ ଜିନିଷ୍‍କୋକେ ଇନିଜାଃ ତିଈ ରେ ଏମ୍ କାଦାଏ। ଅକଏ ହୋନ୍‍କଡ଼ା ରେ ବିଶ୍ଵାସ୍ ତାନାଏ, ଜାନାଓ ଜୀଦାନ୍ ଇନିଜାଃ ତାନାଃ, ମେନ୍ଦୋ ଅକଏ ହୋନ୍‍କଡ଼ା କେ କାଏ ମାନାତିଙ୍ଗ୍ ୟାଏ, ଇନିଃ ଜାନାଓ ଜୀଦାନ୍ କାଏ ନେଲେୟାଏ, ମେନ୍ଦୋ ପାର୍ମେଶ୍ଵାର୍ ରାଃ ଖିସ୍ ହୀନିଜାଃ ରେ ତାଇନ୍ କେନୋଃୱା।” ନାଆ ଚିମ୍ତାଙ୍ଗ୍ ୟୀଶୁ ସାରିକେଦାଏ ଚି ଫାରିସୀ ହୋଡ଼ୋକୋ ଆୟୁମ୍ କେଦାକୋ ଚି ୟୀଶୁ ଯୋହାନ୍ ତାଃ ଏତେ ଥିମ୍ବା ଚେଲାକୋ ବାଇତାନାଏ, ହାର୍ ଇନ୍‍କୁକେ ବାପ୍ତିସ୍ମା ଏମାକୋ ତାନାଏ। ମେନ୍ଦୋ ୟୀଶୁ ଆଏଃ କାହା ଆଜାଃ ଚେଲାକୋ ବାପ୍ତିସ୍ମା ଏମ୍ ତାଇକେନାକୋ, ଇମ୍ତାଙ୍ଗ୍ ୟୀଶୁ ୟାହୁଦୀୟା ଜିଲ୍ଲା ବାଗେକେତେ ଆଡୋଃଗି ଗାଲିଲୀ ଜିଲ୍ଲା ତେ ଆଜାଃ ଚେଲାକୋ ଲୋଃ ରୁଆଡ଼୍ ଜାନାଏ। ହାର୍ ଇନିଃକେ ସାମାରୀୟା ଜିଲ୍ଲା ହୋବାକେତେ ସେସେନ୍ ଜାରୁରୀ ତାଇକେନା। ଏନାମେନ୍ତେ ଇନିଃ ସୁଖାର୍ ନୁତୁମ୍ ସାମାରୀୟା ଜିଲ୍ଲା ରାଃ ମିୟାଃ ହାତୁ ତାଃ ହିଜୁଃ ନାଏ, ଅକନାଃ ଏନ୍ ଅତେ ରାଃ ନାଡ଼େଏ ରେ ମେନାଃ ଅକନାଃ କେ ୟାକୁବ୍ ଆଜାଃ ହୋନ୍‍କଡ଼ା ଯୋଶେଫ୍ କେ ଏମ୍ ଲିଜାଏ, ହାର୍ ୟାକୁବ୍ ରାଃ କୁଆଁ ହ ଏନ୍ ସାମାୟ୍ ରେ ହେନ୍ତାଃ ରେ ତାଇଲେନା, ୟୀଶୁ ସେନ୍-ସେନ୍ ତେ ଲାଗା କେତେ ହେନ୍ କୁଆଁ ତାଃ ଦୁବ୍ ଜାନାଏ। ନେ କାଜି ତିକିନ୍ ଇମ୍ତା ହୋବାଲେନା। ଏନ୍ ସାମାୟ୍ ରେ ମିୟାଃ ସାମାରୀୟା ରେନ୍ କୁଡ଼ି ଦାଆ ଇଦି କୁଆଁ ତାଃ ହିଜୁଃ ଲେନାଏ। ୟୀଶୁ ଏନ୍ କୁଡ଼ି କେ କାଜିକେଦାଏ, “ଇଙ୍ଗ୍‍କେ କାଟିଃ ନୁ ଲାଗିନ୍ ଦାଆ ଏମାଇଙ୍ଗ୍ ମେ।” ଚିୟାଃଚି ଆଜାଃ ଚେଲାକୋ ଜୋଜୋମାଃ କିରିଙ୍ଗ୍ ଲାଗିନ୍ତେ ହାତୁ ତେ ସେନ୍ କେକାନାକୋ। ଏନ୍ ସାମାରୀୟା କୁଡ଼ି ଇନିଃକେ କାଜିକେଦାଏ, “ଆମ୍ ମିୟାଃ ୟାହୁଦୀ ହୋଡ଼ ହୋବା କେତେ ଇଙ୍ଗ୍ ସାମାରୀୟା କୁଡ଼ି ତେ ଦାଆ ଚିନାଃ ଲାଗିନ୍ ଆସିତାନାମ୍?” (ଚିୟାଃଚି ୟାହୁଦୀ ହୋଡ଼ୋକୋ ସାମାରୀୟା ରେନ୍ କୋଲୋଃ ଜାହାନ୍ ପ୍ରାକାର୍ ରାଃ ସାମ୍ବାଦ୍ଧ୍ କାକୋ ମାଣ୍ଡାଅ ତାଇକେନା।) ୟୀଶୁ କାଜିରୁଆଡ଼୍ କେଦାଏ, “ଆଗାର୍ ଆମ୍ ପାର୍ମେଶ୍ଵାର୍ ରାଃ ବାର୍ଦାନ୍ କେ ସାରିତେମ୍, ହାର୍ ନେୟା ହ ସାରିତେମ୍ ଚି ନିଈ ଅକଏ ତାନିଃ, ଅକନିଃ ଆମ୍‍କେ କାଜି ତାନାଏ, ‘ଇଙ୍ଗ୍‍କେ କାଟିଃ ନୁ ଲାଗିନ୍ ଦାଆ ଏମାଇଙ୍ଗ୍ ମେ,’ ଏଣ୍ଡେ ଦୋ ଆମ୍ ଇନିଃକେ ଆସିତେମ୍, ହାର୍ ଇନିଃ ଆମ୍‍କେ ଜୀଦାନ୍ ରାଃ ଦାଆ ଏମାମେତେ।” କୁଡ଼ି ଇନିଃକେ କାଜିକେଦାଏ, “ହେ ସାହେବ୍, ଆମ୍ ତାଃ ଦୋ ଦାଆ ବୁରାଃ ଲାଗିନ୍ ଜେତ୍ନାଃ ବାନୋଗା, ଆଡୋଃ କୁଆଁ ଥିମ୍ବାଗି ଈକିରା, ଏଣ୍ଡେ ଏନ୍ ଜୀଦାନ୍ ରାଃ ଦାଆ ଆମ୍ ତାଃ କୋତାଃ ଏତେ ହିଜୁଃ ଲେନା? ଚିନାଃ ଆମ୍ ଆଲେୟାଃ ପୁର୍ଖା-ଆପୁ ୟାକୁବ୍ ଏତେ ମାରାଙ୍ଗ୍ ତାନ୍‍ମେ, ଅକନିଃ ଆଲେକେ ନେ କୁଆଁ ଏମାକାଃ ଲେୟାଏ; ଆଡୋଃ ଆଜୋଗି ଆଜାଃ ହୋନ୍-ଗାଣାକୋ ହାର୍ ଆକୋୱାଃ ପାଶୁ କୋକେ ହ ନେ କୁଆଁ ଏତେ ଦାଆ ଆନୁ କେଃକୋୱାଏ?” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଅକଏ ହ ନେ ଦାଆ ନୁୟାଏ ଇନିଃ ଆଡୋଃଗି ତେତାଙ୍ଗ୍ ଅଗାଏ, ମେନ୍ଦୋ ଅକଏ ଏନ୍ ଦାଆ ଏତେ ନୁୟାଏ ଅକନାଃ ଇଙ୍ଗ୍ ଇନିଃକେ ଏମାୟିଙ୍ଗ୍, ଇନିଃ ଆଡୋଃ ଚିଉଲା ହ କାଏ ତେତାଙ୍ଗ୍ ଅଗା, ମେନ୍ଦୋ ଅକନ୍ ଦାଆ ଇଙ୍ଗ୍ ଇନିଃକେ ଏମାୟିଙ୍ଗ୍, ଏନା ଇନିଜାଃ ରେ ମିୟାଃ ପାଝ୍ରା ବାଇ କେନୋଗା ଅକନାଃ ଜାନାଓ ଜୀଦାନ୍ ଲାଗିନ୍ ଲିଙ୍ଗୀ କାତେଅଗା।” କୁଡ଼ି ଇନିଃକେ କାଜିକେଦାଏ, “ହେ ସାହେବ୍, ଏନ୍ ଦାଆ ଇଙ୍ଗ୍‍କେ ଏମାଇଙ୍ଗ୍‍ମେ ଏନାତେ ଇଙ୍ଗ୍ କାଇଙ୍ଗ୍ ତେତାଙ୍ଗ୍ ଅଗା ହାର୍ ଦାଆ ଆଉ ଲାଗିନ୍ ନିମିନ୍ ସାଙ୍ଗିନ୍ କାଇଙ୍ଗ୍ ହିଜୁଗା।” ୟୀଶୁ ଇନିଃକେ କାଜିକେଦାଏ, “ଜୁ ଆମାଃ କଡ଼ା କେ ନେତାଃ କେଡ଼ା ଆୱିମ୍।” କୁଡ଼ି କାଜିରୁଆଡ଼୍ କେଦାଏ, “ଇଙ୍ଗ୍ଆଃ କଡ଼ା ବାଙ୍ଗୁଇଜା।” ୟୀଶୁ ଇନିଃକେ କାଜିକେଦାଏ, “ଆମ୍ ଠିକ୍ କାଜିତାନାମ୍, ‘ଇଙ୍ଗ୍ଆଃ କଡ଼ା ବାଙ୍ଗୁଇଜା।’ ଚିୟାଃଚି ଆମ୍ ପାଞ୍ଚ୍ ଠୁ କଡ଼ା ଲେଃ କୋୱାମ୍, ଆଡୋଃ ଅକନିଃ ତାଃ ରେ ନାଆ ଆମ୍ ମେନାମେୟା ଇନିଜୋଗି ଆମାଃ କଡ଼ା ନାହାଲି। ନେୟା ଆମ୍ ସାର୍ତି ଗି କାଜିକେଦାମ୍।” କୁଡ଼ି ଇନିଃକେ କାଜିକେଦାଏ, “ହେ ସାହେବ୍, ଇଙ୍ଗ୍‍କେ ଆଦାଇଙ୍ଗ୍ ତାନା ଚି ଆମ୍ ନାବୀ ତାନ୍‍ମେ। ଆଲେୟାଃ ପୁର୍ଖା ହୋଡ଼ୋକୋ ନେ ବୁରୁ ରେ ଆରାଧାନା କେଦାକୋ, ହାର୍ ଆପେ ୟାହୁଦୀକୋ କାଜିତାନାପେ ଚି ଏନ୍ ଜାଗା ଅକ୍ତାଃ ରେ ଆରାଧାନା ରିକା ଚାହି ଏନା ୟୀରୁଶାଲେମ୍ ରେ ମେନାଃ।” ୟୀଶୁ ଇନିଃକେ କାଜିକେଦାଏ, “ହେ କୁଡ଼ି, ଇଙ୍ଗ୍ଆଃ କାଜି ରେ ବିଶ୍ଵାସ୍ ଏମ୍ ଚି ଏନ୍ ସାମାୟ୍ ହିଜୁଃ ତାନା ଚି ଆମ୍ ନାଦୋ ନେ ବୁରୁ ରେ ଆପୁ ଆଃ ଆରାଧାନା ରିକାୟାମ୍ ନାଦୋ ୟୀରୁଶାଲେମ୍ ରେ। ଆପେ ସାମାରୀୟା ହୋଡ଼ୋକୋ ଅକନିଃକେ କାପେ ସାରିତାନା, ଇନିଜାଃ ଆରାଧାନା ତାନାପେ; ହାର୍ ଆଲେ ୟାହୁଦୀ ହୋଡ଼ୋକୋ ଅକନିଃକେ ସାରିତାନାଲେ ଇନିଜାଃ ଆରାଧାନା ତାନାଲେ, ଚିୟାଃଚି ବାଞ୍ଚାଅ ୟାହୁଦୀ କୋଏତେ ମେନାଃ। ମେନ୍ଦୋ ଏନ୍ ସାମାୟ୍ ହିଜୁଃ ତାନାଃ, ମେନ୍ଦୋ ସାମାୟ୍ ନାଆ ତାନାଃ, ଅକନାଃ ରେ ସାର୍ତି ରେ ଆରାଧାନା ତାନ୍‍କୋ ଆତ୍ମା ହାର୍ ସାର୍ତି ତେ ଆରାଧାନା ୟାକୋ, ଚିୟାଃଚି ଆପୁ ଆଜାଃ ଲାଗିନ୍ତେ ନେଲେକାଗି ଆରାଧାନା ତାନ୍ କୋକେ ସାଙ୍ଗାର୍ କୋ ତାନାଏ। ପାର୍ମେଶ୍ଵାର୍ ଆତ୍ମା ତାନିଃ, ଏନାମେନ୍ତେ ଜାରୁରୀ ମେନାଃ ଚି ଇନିଜାଃ ଆରାଧାନା ରିକାତାନ୍ କୋ ଆତ୍ମା ହାର୍ ସାର୍ତିତେ ଆରାଧାନା ରିକାଏକାକୋ।” କୁଡ଼ି ଇନିଃକେ କାଜିକେଦାଏ, “ଇଙ୍ଗ୍ ସାରିୟାଇଙ୍ଗ୍ ଚି ମାସୀହ୍ ଅକନିଃ ଖ୍ରୀଷ୍ଟ୍ କାଜିୟୋଃୱାଏ, ହିଜୁଃ ରାଃ ମେନାଇଜା; ଚିମ୍ତା ଇନିଃ ହିଜୁଗାଏ, ଦୋ ଆଲେକେ ସବେନ୍ କାଜି ଉଦୁବେୟାଏ।” ୟୀଶୁ ଇନିଃକେ କାଜିକେଦାଏ, “ଇଙ୍ଗ୍ ଅକଏ ଆମାଃ ଲୋଃ ବାକାଣ୍ ତାନିଙ୍ଗ୍, ଇନିଃଗି ତାନିଙ୍ଗ୍।” ଇମିନାଙ୍ଗ୍ ରେ ଆୟାଃ ଚେଲାକୋ ହିଜୁଃ ଜାନାକୋ, ହାର୍ ଆକ୍‍ଚାକାଅଃ ଜାନାକୋ ଚି ଇନିଃ କୁଡ଼ି ଲୋଃ ବାକାଣ୍ ତାନାଏ, ଏଣ୍ଡେ ହ ଜେତାଏ କାକୋ କୁଲିକିଜା, “ଆମ୍ ଚିନାଃ ସାନାଙ୍ଗ୍ ତାନାମ୍?” ୟାଦୋ “ଚିନାଃ ଲାଇ ଇନିଃ ଲୋଃ ବାକାଣ୍ ତାନାମ୍?” ଏନ୍ତେ ଏନ୍ କୁଡ଼ି ଆୟାଃ ଦାଆ ଚାଟୁ ବାଗିକେତେ ହାତୁ ତେ ସେନ୍ ଜାନାଏ, ହାର୍ ହୋଡ଼ୋକୋକେ କାଜିକେଃକୋୱାଏ, “ଦେଲା, ମିୟାଃ ହୋଡ଼ କେ ନେଲିପେ, ଅକନିଃ ସବେନାଃ ଅକନାଃ ଇଙ୍ଗ୍ ରିକାକାଦିଙ୍ଗ୍ ଇଙ୍ଗ୍‍କେ ଉଦୁବ୍ କେଦିଙ୍ଗାଏ। ଇଦୁ ନିଈଗି ଦୋ ମାସୀହ୍ ନାହାଲାଏ?” ଏନାମେନ୍ତେ ହୋଡ଼ୋକୋ ହାତୁ ଏତେ ଅଡୋଙ୍ଗ୍ କେତେ ୟୀଶୁ କେ ନେନେଲ୍ ନାଙ୍ଗ୍ ସେନ୍ ଜାନାକୋ। ଏନ୍ ଥାଲା ରେ ଆୟାଃ ଚେଲାକୋ ୟୀଶୁ କେ ନେୟା ଆର୍ଜି କେଦାକୋ, “ହେ ଗୁରୁ, କାଟିଃ ଜୋମ୍ ଲେମ୍।” ମେନ୍ଦୋ ଇନିଃ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ତାଃ ରେ ଜୋମ୍ ଲାଗିନ୍ ନେକା ଜୋଜୋମାଃ ମେନାଃ ଅକନାଃ ଆପେ କାପେ ସାରିୟା।” ଏନ୍ତେ ଚେଲାକୋ ଆକୋ-ଆକୋ ବାକାଣ୍ କେଦାକୋ, “ଚିନାଃ ଜେତାଏ ଇନିଜାଃ ଲାଗିନ୍ ଜୋଜୋମାଃ ଆଉ କାଦାକୋ?” ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍ଆଃ ଜୋଜୋମାଃ ନେୟା ତାନାଃ ଚି ଇଙ୍ଗ୍ଆଃ କୁଲାକାନ୍ ରାଃ ସାନାଙ୍ଗ୍ ଲେକା ସେସେନାଇଙ୍ଗ୍ ହାର୍ ଆୟାଃ କାମି କେ ପୁରା ୟାଇଙ୍ଗ୍। ଚିନାଃ ଆପେ କାପେ କାଜିୟା, ‘ଇରଃ ଲାଗିନ୍ତେ ନାଆ ହଗି ଚାଇର୍ ମାହିନା ମେନାଃ?’ ନେଲେପେ ଇଙ୍ଗ୍ ଆପେକେ କାଜିତାନିଙ୍ଗ୍, ଆପେୟାଃ ମେଏଃ ଆରିଃ କେତେ ଲୋୟୋଙ୍ଗ୍ ପାଡ଼୍ ନେଲେପେ ଚି ଏନାକୋ ଇରଃ ଲାଗିନ୍ତେ ମାତା ଛାବା କାନାକୋ। ଇହିର୍ ନିଈ ନାଲା ନାମେୟାଏ ହାର୍ ଜାନାଓ ଜୀଦାନ୍ ଲାଗିନ୍ତେ ଯଅ ହାଲାଙ୍ଗ୍ ହୁଣ୍ଡି ୟାଏ, ଏନାତେ ହେହେର୍ ନିଈ ଆଡୋଃ ଇହିର୍ ନିଈ ବାରାନ୍‍କିନ୍ ମେଶା କେତେ ରାଶିକା ୱାକିନ୍। ଚିୟାଃଚି ନେତାଃ ନେ କାଜି ଠିକ୍ ଉଦୁବୋଗା, ‘ହେହେର୍ ନିଈ ଏଟାଃ ତାନିଃ, ହାର୍ ଇହିର୍ ନିଈ ଏଟାଃ ତାନିଃ।’ ଇଙ୍ଗ୍ ଆପେକେ ଏନ୍ ଲୋୟୋଙ୍ଗ୍ ରେ ଇହିର୍ ଲାଗିନ୍ତେ କୁଲ୍ କେଃପେୟାଇଙ୍ଗ୍ ଅକଣ୍ଡେ ଆପେ କାପେ କାମି କାଦା, ଏଟାଃ କୋ କାମି କାଦାକୋ ହାର୍ ଆପେ ଇନ୍‍କୁୱାଃ କାମି ରାଃ ଯଅ କେ ନାମ୍ ତାନାପେ।” ଏନ୍ ହାତୁ ରେନ୍ ମିଃଥିମ୍ବା କୋ ଅକନ୍ କୋ ସାମାରୀୟା ଜିଲ୍ଲା ରେ ତାଇନ୍ ତାଇନାକୋ ଏନ୍ କୁଡ଼ି ରାଃ କାଜିତେ ୟୀଶୁ ରେ ବିଶ୍ଵାସ୍ କେଦାକୋ, ଚିୟାଃଚି ଇନିଃ କାଜିଲେଦାଏ, “ଇନିଃ ସବେନାଃ ଅକନାଃ ଇଙ୍ଗ୍ ରିକାକାଦିଙ୍ଗ୍, ଇଙ୍ଗ୍‍କେ ଉଦୁବ୍ ତାଦାଏ।” ଏନାମେନ୍ତେ ଏନ୍ ସାମାରୀୟା ରେନ୍ ହୋଡ଼ୋକୋ ଇନିଃତାଃ ହିଜୁଃ ନାକୋ, ହାର୍ ଇନିଃକେ ଆର୍ଜି କେତେ କାଜିକିଜାକୋ ଚି ଆଲେୟାଃ ଲୋଃ ନେତାଃ ତାଇନ୍ ମେ। ଏନାତେ ଇନିଃ ଏନ୍ତାଃ ବାର୍ ଶିଙ୍ଗ୍ ସାନ୍ ତାଇନ୍ ଜାନାଏ। ୟୀଶୁ ରାଃ ବାଚାନ୍ ରାଃ ହୋରାତେ ଆଡୋଃଗି ଥିମ୍ବା ହୋଡ଼ୋକୋ ବିଶ୍ଵାସ୍ କେଦାକୋ, ହାର୍ ଏନ୍ କୁଡ଼ି କେ କାଜିକିଜାକୋ, “ନାଆ ଆଲେ ଆମାଃ ବାକାଣ୍ ରେ ଭାଇର୍ କାଲେ ବିଶ୍ଵାସ୍ ତାନା, ମେନ୍ଦୋ ଆଲେ ଆଲେଗି ଆୟୁମ୍ କେଦାଲେ, ହାର୍ ସାରିତାନାଲେ ଚି ନିଈଗି ସାର୍ତି ଅତେଦିଶୁମ୍ ରେନ୍ ବାଞ୍ଚାଅନିଃ ତାନିଃ।” ଏନ୍ ବାର୍ ଶିଙ୍ଗ୍ ତାୟୋମ୍ତେ ଇନିଃ ଏନ୍ତାଃ ଏତେ ଅଡୋଙ୍ଗ୍ କେତେ ଗାଲିଲୀ ଜିଲ୍ଲା ତେ ସେନୋଃ ଜାନାଏ, ଚିୟାଃଚି ୟୀଶୁ ଆଏଃଗି କାଜିଲେଦାଏ ଚି ନାବୀ ଆଜାଃ ହାତୁ ରେ ମାଇନ୍ କାଏ ନାମେୟାଏ। ଚିମ୍ତାଙ୍ଗ୍ ଇନିଃ ଗାଲିଲୀ ଜିଲ୍ଲା ତେ ହିଜୁଃ ଜାନାଏ, ଦୋ ଗାଲିଲୀ ଜିଲ୍ଲା ରେନ୍ ହୋଡ଼ୋକୋ ଆୟାଃ ଲୋଃ ରାଶିକା ତେ ନାପାମ୍ ଜାନାକୋ, ଚିୟାଃଚି ଚିମିନାଙ୍ଗ୍ କାମି ଇନିଃ ୟୀରୁଶାଲେମ୍ ରେ ପାରାବ୍ ରାଃ ସାମାୟ୍ ରେ ରିକା ଲେଦାଏ, ଇନ୍‍କୁ ଏନ୍ ସବେନ୍ କାମି କୋକେ ନେଲ୍ ଲେଦାକୋ, ଚିୟାଃଚି ଇନ୍‍କୁ ହ ପାରାବ୍ ରେ ସେନ୍‍ଲେନ୍ ତାଇକେନାକୋ। ଏନ୍ତେ ୟୀଶୁ ଆଡୋଃଗି ଗାଲିଲୀ ଜିଲ୍ଲା ରାଃ କାନା ହାତୁ ରେ ହିଜୁଃ ଲେନାଏ, ଅକତାଃ ଇନିଃ ଦାଆ କେ ଆଙ୍ଗୁର୍ ରାଶି ବାଇ ଲେଦାଏ। ହେନ୍ତାଃ ରେ ରାଜା ରାଃ କାମିତାନ୍ ନିଈ ମିୟାଃ ହୋଡ଼ ତାଇକେନାଏ ଅକନିଜାଃ ହୋନ୍‍କଡ଼ା କାଫାର୍ନାହୁମ୍ ସାହାର୍ ରେ ବେମାର୍ ରେ ତାଇଲେନାଏ। ଇନିଃ ନେୟା ଆୟୁମ୍ କେତେ ଚି ୟୀଶୁ ୟାହୁଦୀୟା ଜିଲ୍ଲା ଏତେ ଗାଲିଲୀ ଜିଲ୍ଲା ରେ ହିଜୁଃ କାନାଏ, ଇନିଜାଃ ନାଡ଼େଏ ସେନ୍ ଜାନାଏ ହାର୍ ଇନିଃକେ ଆର୍ଜି କେତେ କାଜିକେଦାଏ ଚି ଦୋଲା ସେନ୍ କେତେ ଇଙ୍ଗ୍ଆଃ ହୋନ୍ କେ ବେଶ୍ ତାଇମେ, ଚିୟାଃଚି ଇନିଃ ଗୋଜୋଃ ଲେକା ମେନାଇଜା। ୟୀଶୁ ଇନିଃକେ କାଜିକେଦାଏ, “ଚିମିନ୍ ସାନ୍ତେ ଆପେ ଚିହ୍ନା ହାର୍ ଆକ୍‍ଦାନ୍ଦା କାମି କାପେ ନେଲେୟା ଏନ୍ ସାନ୍ତେ ଆପେ ଚିଉଲାଅ କାପେ ବିଶ୍ଵାସ୍ ୟା।” ରାଜା ରାଃ କାମିତାନ୍ ନିଈ ଇନିଃକେ କାଜିକେଦାଏ, “ହେ ସାହେବ୍, ଇଙ୍ଗ୍ଆଃ ହୋନ୍‍କଡ଼ା ଗୋଜୋଃ ସିଦା ରେ ଦୋଲା।” ୟୀଶୁ ଇନିଃକେ କାଜିକେଦାଏ, “ଜୁ, ଆମାଃ ହୋନ୍‍କଡ଼ା ଜୀହିଃ ମେନାଇଜା।” ଏନ୍ ହୋଡ଼ ୟୀଶୁ ରାଃ କାଜିକାନ୍ ବାକାଣ୍ କେ ବିଶ୍ଵାସ୍ କେଦାଏ ହାର୍ ସେନ୍ ଜାନାଏ। ଇନିଃ ହୋରା ରେଗି ତାଇକେନାଏ ଚି ଆୟାଃ ଦାସୀକୋ ଆୟାଃ ଲୋଃ ନାପାମ୍ ଜାନାକୋ ହାର୍ କାଜିକିଜାକୋ, “ଆମାଃ ହୋନ୍‍କଡ଼ା ଜୀହିଃ ମେନାଇଜା।” ଇନିଃ ଇନ୍‍କୁକେ କୁଲିକେଃକୋୱାଏ, “ଅକନ୍ ଇମ୍ତା ବେଶ୍ ହୋବା ଏଟେଃ ନାଏ?” ଇନ୍‍କୁ ଇନିଃକେ କାଜିକେଦାକୋ, “ହୋଲା ତିକିନ୍ ଏକ୍ ବାଜେ ରେ ଇନିଜାଃ ଉରୁୟୁ ଆଡ଼୍‍ଗୁ ଜାନା।” ଇମ୍ତାଙ୍ଗ୍ ଆପୁ ତେ ସାରିଜାନାଏ ଚି ନେୟା ଏନ୍ ସାମାୟ୍ ରେଗି ହୋବାଜାନା ଅକନ୍ ସାମାୟ୍ ୟୀଶୁ ଇନିଃକେ କାଜିଲେଦାଏ, “ଆମାଃ ହୋନ୍‍କଡ଼ା ଜୀହିଃ ମେନାଇଜା,” ଏନାମେନ୍ତେ ଆଏଃ ହାର୍ ଆୟାଃ ସବେନ୍ ଅଡ଼୍ଆଃ ରେନ୍ କୋ ବିଶ୍ଵାସ୍ କେଦାକୋ। ନେୟା ଏଟାଃ ଆକ୍‍ଦାନ୍ଦା କାମି ତାଇକେନା ଅକନାଃ ୟୀଶୁ ୟାହୁଦୀୟା ଜିଲ୍ଲା ଏତେ ଗାଲିଲୀ ଜିଲ୍ଲା ରେ ହିଜୁଃକେତେ କାମି ରିକା ଲେଦାଏ। ନେ କାଜି କୋରାଃ ତାୟୋମ୍ତେ ୟାହୁଦୀ କୋୱାଃ ମିୟାଃ ପାରାବ୍ ହୋବା ଜାନା, ହାର୍ ୟୀଶୁ ୟୀରୁଶାଲେମ୍ ସେନ୍ ଜାନାଏ। ନାଆ ୟୀରୁଶାଲେମ୍ ରେ ମିଣ୍ଡୀ ଦୁହାର୍ ନାଡ଼େଏ ରେ ମିୟାଃ ବାନ୍ଦା ମେନାଃ ଅକନାଃ ଇବ୍ରାନୀ ବାକାଣ୍ ରେ ବେଥେସ୍‍ଦା କାଜିଅଃୱା, ଏନାରାଃ ପାଞ୍ଚ୍ ଠୁ ଘାଟ୍ ତାଇନ୍ ଲେନା। ଏଣ୍ଡେ କୋରେ ଥିମ୍ବାଗି ବେମାର୍ କୋ, ଆନ୍ଧା କୋ, ଲେଙ୍ଗ୍ଡ଼ାକାନ୍ କୋ ହାର୍ ଏକାଙ୍ଗୀକାନ୍ କୋ (ଦାଆ ହିଲାଅଃ ରାଃ ଆଶ୍ରା ରେ) ହୋରୋ କାଃ ତାଇକେନାକୋ। (ଚିୟାଃଚି ଠାହ୍‍ରାଓକାନ୍ ସାମାୟ୍ ରେ ପାର୍ମେଶ୍ଵାର୍ ରାଃ ମିୟାଃ ସିର୍ମାଦାସୀ ଏନ୍ ବାନ୍ଦା ରେ ଆଡ଼୍‍ଗୁ କେତେ ଦାଆ କେ ହିଲାଅ ତାଇନାଏ। ଦାଆ ହିଲାଅତାନ୍ ଲୋଃ ଗି ଅକଏ ସିଦାରେ ଆଡ଼୍‍ଗୁନାଏ ହିନିଃ ବେଶ୍ କୋଃ ତାଇନାଏ ଚାହେ ଇନିଜାଃ ଜାହାନ୍ ଗି ବିମାରୀ ତାଇନ୍ କା।) ହେନ୍ତାଃ ରେ ମିୟାଃ ହୋଡ଼ ତାଇକେନାଏ, ଅକନିଃ ଆଡ଼୍‍ତିଶ୍ ବାରାଶ୍ ତେ ବେମାର୍ ରେ ତାଇଲେନାଏ। ୟୀଶୁ ଇନିଃକେ ଗିତିଜାକାନ୍ ନେଲ୍‍କେତେ ହାର୍ ନେୟା ସାରିକେତେ ଚି ଇନିଃ ଥିମ୍ବା ହୁଲାଙ୍ଗ୍ ଏତେ ନେ ଦାଶା ରେ ଉୟୁଃ କାନାଏ, ଇନିଃକେ କୁଲିକିଜାଏ, “ଚିନାଃ ଆମ୍ ବେଶ୍ ହୋବାଅଃ ସାନାଙ୍ଗ୍ ତାନାମ୍?” ଏନ୍ ବେମାର୍ ହୋଡ଼ ଇନିଃକେ କାଜିରୁଆଡ଼୍ କେଦାଏ, “ହେ ଗୋମ୍‍କେ, ଇଙ୍ଗ୍‍କେ ବାନ୍ଦା ରେ ଆଡ଼୍‍ଗୁନ୍ ନାଙ୍ଗ୍ ଦେଙ୍ଗା ଏମ୍ ଲାଗିନ୍ ଜେତାଏ ହୋଡ଼ ବାଙ୍ଗ୍‍କୋୱା ଚି ଚିମ୍ତା ଦାଆ ହିଲାଅଗା, ଦୋ ଇଙ୍ଗ୍‍କେ ବାନ୍ଦା ରେ ଆଡ଼୍‍ଗୁଇଙ୍ଗ୍ ୟାଏ, ମେନ୍ଦୋ ଇଙ୍ଗ୍ଆଃ ଆଡ଼୍‍ଗୁନ୍ ସିଦାରେ ଏଟାଃ ମିହୋଡ଼୍ ସବେନ୍ ଇମ୍ତା ବୋଲୋ କୋୱାଏ।” ୟୀଶୁ ଇନିଃକେ କାଜିକେଦାଏ, “ବିରିଃମେ, ଆମାଃ ଗିତିଃ-ଜାଟି ଉଠାଓଏମ୍ ହାର୍ ସେନେମ୍।” ଇମ୍ତାଙ୍ଗ୍ ଗି ଏନ୍ ହୋଡ଼ ଠିକ୍ ଜାନାଏ, ହାର୍ ଆୟାଃ ଗିତିଃ-ଜାଟି ଉଠାଓ କେତେ ସେନ୍ କେଦାଏ। ଏନା ୟାହୁଦୀ କୋୱାଃ ଆରାମେ ହୁଲାଙ୍ଗ୍ ତାଇକେନା। ଏନାମେନ୍ତେ ୟାହୁଦୀ ଗୁରୁକୋ ଇନିଃକେ ଅକନିଃ ବେଶ୍ ହୋବା ଲେନାଏ, କାଜିକେଦାକୋ, “ଇସିଙ୍ଗ୍ ଦୋ ଆରାମେ ହୁଲାଙ୍ଗ୍ ତାନାଃ, ଆମ୍‍କେ ଗିତିଃ-ଜାଟି ଉଠାଓ ଠିକ୍ କା ତାଇକେନା।” ଇନିଃ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଅକଏ ଇଙ୍ଗ୍‍କେ ବେଶ୍ କେଦିଙ୍ଗାଏ, ହିନିଃଗି ଇଙ୍ଗ୍‍କେ କାଜିକେଦାଏ, ‘ଆମାଃ ଗିତିଃ-ଜାଟି ଉଠାଓଏମ୍ ହାର୍ ସେନେମ୍।’ ” ଇନ୍‍କୁ ଇନିଃକେ କୁଲିକିଜାକୋ, “ଇନିଃ ଅକନ୍ ହୋଡ଼ ତାନିଃ, ଅକଏ ଆମ୍‍କେ କାଜି କେଃମେୟାଏ, ‘ଗିତିଃ-ଜାଟି ଉଠାଓଏମ୍ ହାର୍ ସେନେମ୍?’ ” ମେନ୍ଦୋ ଅକଏ ବେଶ୍ ହୋବା ଲେନ୍ତାଇନାଏ ଇନିଃ କାଏ ସାରିତାଇନାଏ ଚି ହିନିଃ ଅକଏ ତାନିଃ, ଚିୟାଃଚି ହେନ୍ତାଃ ରେ ଥିମ୍ବାଗି ହୋଡ଼ୋକୋ ହୁଣ୍ଡି ଜାନ୍ତେ ୟୀଶୁ ଏନ୍ତାଃ ଏତେ ଗେନା ଲେନ୍ ତାଇନାଏ। ଏନା ତାୟୋମ୍ତେ ଇନିଃ ୟୀଶୁ କେ ମାନ୍ଦିର୍ ରାଚା ରେ ନାମ୍ କିଜାଏ। ୟୀଶୁ ଇନିଃକେ କାଜିକେଦାଏ, “ନେଲେମ୍, ଆମ୍ ବେଶ୍ ଜାନାମ୍, ଆୟୁର୍ତେ ଆଲୋମ୍ ପାପ୍ ୟା, କାରେଦୋ ଆମାଃ ରେ ନେୟାତେ ହଗି ମାରାଙ୍ଗ୍ ଦୁକୁ ହୋବାଅଃୱା।” ଏନ୍ ହୋଡ଼ ସେନ୍ କେତେ ୟାହୁଦୀ ଗୁରୁ କୋକେ ଉଦୁବ୍ କେଦାଏ ଚି ୟୀଶୁ ଇନିଃକେ ବେଶ୍ କିଜାଏ। ଏନାମେନ୍ତେ ୟାହୁଦୀ ଗୁରୁକୋ ୟୀଶୁ କେ ସାତାଅ ଏଟେଃ କିଜାକୋ, ଚିୟାଃଚି ଇନିଃ ଏନ୍ କାମି ଆରାମେ ହୁଲାଙ୍ଗ୍ ରେ ରିକା ତାଇନାଏ। ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ଆଃ ଆବା ନାଆ ସାନ୍ତେ କାମିତାନାଏ, ହାର୍ ଇଙ୍ଗ୍ ହ କାମିତାନିଙ୍ଗ୍।” ନେୟା ଲାଗିନ୍ତେ ୟାହୁଦୀ ଗୁରୁକୋ ଆଡୋଃଗି ଥିମ୍ବା ଇନିଃକେ ଗୋଏଃ ଲାଗିନ୍ ହୋରା ଦାଣା-ବାଡ଼ା କେଦାକୋ, ଚିୟାଃଚି ଇନିଃ ଆରାମେ ହୁଲାଙ୍ଗ୍ ରାଃ ନିୟାମ୍ କେ କାଏ ମାନାତିଙ୍ଗ୍ ତାଇନାଏ ଏନା ଭାଇର୍ କାହା, ମେନ୍ଦୋ ପାର୍ମେଶ୍ଵାର୍ କେ ଆଜାଃ ଆପୁ କାଜିକେତେ ଆଏଃ ଆପାନ୍ କେ ପାର୍ମେଶ୍ଵାର୍ ଲେକା ବାଇତାଇନାଏ। ଏନ୍ତେ ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଇଙ୍ଗ୍ ଇଙ୍ଗ୍‍ତେ ଜାହାନାଃ କାଇଙ୍ଗ୍ ରିକା ଧାଡ଼ିୟା, ଅକନାଃ ଆପୁ କେ କାମିତାନ୍ ନେଲିୟାଇଙ୍ଗ୍ ଏନାଗି ରିକାୟାଇଙ୍ଗ୍, ଚିୟାଃଚି ଅକନ୍-ଅକନ୍ କାମି ଇନିଃ ରିକାୟାଏ ଏନାକେ ଇଙ୍ଗ୍ ହଗି ଏନ୍ ଲେକାଗି ରିକାୟାଇଙ୍ଗ୍। ଚିୟାଃଚି ଆପୁ ହୋନ୍‍କଡ଼ା କେ ଦୁଲାଡ଼୍ ଇୟାଏ ହାର୍ ଅକନ୍-ଅକନ୍ କାମି ଇନିଃ ଆଏଃ ରିକାୟାଏ, ଇନିଃ ଏନା ସବେନାଃ ଦେଖାଅୟାଏ; ହାର୍ ଇନିଃ ନେୟାକୋତେ ହଗି ମାପ୍‍ରାଙ୍ଗ୍ କାମି ଇନିଃକେ ଦେଖାୱିୟାଏ, ଏନାତେ ଆପେ ଆକ୍‍ଦାନ୍ଦାଅଃ ୱାପେ। ଜେଲେକା ଆପୁ ଗୋଜାକାନ୍ ହୋଡ଼ କୋକେ ଜୀହିଃ କୋୱାଏ, ଏନ୍ ଲେକାଗି ଇଙ୍ଗ୍ ହଗି ଅକନିଃକେ ସାନାଙ୍ଗ୍ ୟାଇଙ୍ଗ୍ ହିନିଃକେ ଜାନାଓ ଜିହୀଦି ୟାଇଙ୍ଗ୍। ଆପୁ ଜାହେଁୟାଃ ହ କାଏ ବିଚାର୍ ରିକାଏ, ମେନ୍ଦୋ ବିଚାର୍ ରିକା ରାଃ କାମି ଇଙ୍ଗ୍‍କେ ଜିମା କାଦିଙ୍ଗାଏ। ଏନାମେନ୍ତେ ଚି ସବେନ୍ ହୋଡ଼ୋକୋ ଜେଲେକା ଆପୁ କେ ମାଇନ୍ ତାନାକୋ ଏନ୍‍ଲେକାଗି ଇଙ୍ଗ୍‍କେ ହଗି ମାଇନ୍ କାକୋ। ଅକଏ ଇଙ୍ଗ୍‍କେ କାଏ ମାଇନ୍ ତାନାଏ, ହିନିଃ ଆପୁ କେ ଅକନିଃ ଇଙ୍ଗ୍‍କେ କୁଲା କାଦିଙ୍ଗାଏ, କାଏ ମାଇନ୍ ତାନାଏ। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, ଅକଏ ଇଙ୍ଗ୍ଆଃ ବାଚାନ୍ ଆୟୁମ୍‍କେତେ ଇଙ୍ଗ୍ଆଃ କୁକୁଲ୍ ନିଈକେ ବିଶ୍ଵାସ୍ ମାଣ୍ଡାଅୟାଏ, ଜାନାଓ ଜୀଦାନ୍ ଇନିଜାଃ ତାନାଃ, ହାର୍ ଇନିଃକେ ଦାଣ୍ଡ୍ ରାଃ ଆନାଚୁ କାନାମୋଗା ମେନ୍ଦୋ ଇନିଃ ଜାନାଓ ଗୋନୋଏଃ ତେ ଫାରୋମ୍ କେତେ ନାୱା ଜୀଦାନ୍ ରେ ବୋଲୋ ଛାବା ଜାନାଏ। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଏନ୍ ସାମାୟ୍ ହିଜୁଃ ତାନାଃ, ହାର୍ ନାଆ ତାନାଃ, ଅକେଣ୍ଡେ ରେ ଗୋଜାକାନ୍ କୋ ଇଙ୍ଗ୍ ପାର୍ମେଶ୍ଵାର୍ ରାଃ ହୋନ୍ ଇଙ୍ଗ୍ଆଃ କେଡ଼ା ଆୱାଜ୍ ଆୟୁମ୍ ୟାକୋ, ହାର୍ ଅକନ୍ କୋ ଆୟୁମ୍ ୟାକୋ ଇନ୍‍କୁ ଜାନାଓ ଲାଗିନ୍ ଜୀହିଦାକୋ। ଚିୟାଃଚି ଜେଲେକା ତେ ଆପୁ ଆଏଃ ଆପାନାଃ ରେ ଜୀଦାନ୍ ମାଣ୍ଡାଅ ୟାଏ, ଏନ୍‍ଲେକା ଇନିଃ ଇଙ୍ଗ୍‍କେ ହଗି ନେ ଆଧିକାର୍ ଏମାକାଦିଙ୍ଗାଏ ଚି ଇଙ୍ଗ୍ ଇଙ୍ଗ୍ଆଃ ରେ ଜୀଦାନ୍ ମାଣ୍ଡାଅ ୟାଇଙ୍ଗ୍, ହାର୍ ଇଙ୍ଗ୍‍କେ ଆପୁ ପାର୍ମେଶ୍ଵାର୍ ବିଚାର୍ ରିକା ରାଃ ହ ଆଧିକାର୍ ଏମ୍ କାଦିଙ୍ଗାଏ, ଏନାମେନ୍ତେ ଚି ଇଙ୍ଗ୍ ମାନ୍‍ୱା ରାଃ ହୋନ୍ ତାନିଙ୍ଗ୍। ନେୟାତେ ଆଲୋପେ ଆକ୍‍ଚାକାଅଃ କା, ଚିୟାଃଚି ଏନ୍ ସାମାୟ୍ ହିଜୁଃ ତାନା ଚି ଚିମିନ୍ କୋ କାବାର୍ ରେ ମେନାକୋୱା ଇନ୍‍କୁ ଇଙ୍ଗ୍ଆଃ କେଡ଼ା ଆୱାଜ୍ ଆୟୁମ୍‍କେତେ ଜୀହିଃ ବିରିଃ କେନୋଗାକୋ। ଅକଏ ବୁଗିନ୍ କାମିକୋ କାମି କାଦାକୋ ଇନ୍‍କୁ ଜୀଦାନ୍ ରାଃ ଜୀବିନିରିଦ୍ ଲାଗିନ୍ତେ ବିରିଃ ୱାକୋ ହାର୍ ଅକଏ ଏତ୍କାନ୍ କାମିକୋ କାମି କାଦାକୋ ଇନ୍‍କୁ ଦାଣ୍ଡ୍ ନାମେ ରାଃ ଜୀବିନିରିଦ୍ ଲାଗିନ୍ତେ ବିରିଦୋଗାକୋ।” “ଇଙ୍ଗ୍ ଇଙ୍ଗ୍ଆଃ ତେ ଜେତ୍ନାଃ କାଇଙ୍ଗ୍ ରିକା ଧାଡ଼ିୟା, ଜେଲେକା ଆୟୁମେୟାଇଙ୍ଗ୍, ଏନ୍‍ଲେକା ବିଚାର୍ ୟାଇଙ୍ଗ୍, ହାର୍ ଇଙ୍ଗ୍ଆଃ ବିଚାର୍ ସାର୍ତି ତାନାଃ, ଚିୟାଃଚି ଇଙ୍ଗ୍ ଇଙ୍ଗ୍ଆଃ ସାନାଙ୍ଗ୍ କେ କାହା ମେନ୍ଦୋ ଇଙ୍ଗ୍ଆଃ କୁଲ୍ ନିଜାଃ ସାନାଙ୍ଗ୍ କେ ସାନାଙ୍ଗ୍ ତାନିଙ୍ଗ୍। ଆଗାର୍ ଇଙ୍ଗ୍ ଇଙ୍ଗ୍ଆଃ ବିଷାୟ୍ ରେ ଗୋୱା ଏମେରେ, ଦୋ ଇଙ୍ଗ୍ଆଃ ଗୋୱା ସାର୍ତି ନାହାଲା। ମିହୋଡ଼୍ ଏଟାଃ ନିଈ ମେନିଜା ଅକଏ ଇଙ୍ଗ୍ଆଃ ଗୋୱା ଏମେୟାଏ, ହାର୍ ଇଙ୍ଗ୍ ସାରିତାନିଙ୍ଗ୍ ଚି ଇଙ୍ଗ୍ଆଃ ଏନ୍ ଗୋୱା ଅକଏ ଏମ୍ ତାନାଏ ଏନା ସାର୍ତି ତାନାଃ। ଆପେ ଯୋହାନ୍ କେ କୁଲିରିକା ଲିଜାପେ ହାର୍ ଇନିଃ ସାର୍ତି ରାଃ ଗୋୱା ଏମ୍‍କେଦାଏ। ମେନ୍ଦୋ ଇଙ୍ଗ୍ ଇଙ୍ଗ୍ଆଃ ବିଷାୟ୍ ରେ ହୋଡ଼ୋ କୋୱାଃ ଗୋୱା କାଇଙ୍ଗ୍ ସାନାଙ୍ଗ୍ ତାନା, ଏଣ୍ଡେ ହ ଯୋହାନ୍ ରାଃ ଗୋୱା ଅକନାଃ ଇଙ୍ଗ୍ଆଃ ବିଷାୟ୍ ରେ କାଜିଲେଦାଏ, ଏନାମେନ୍ତେ ଇଙ୍ଗ୍ ନେ କାଜି ନେୟା ଲାଗିନ୍ କାଜିତାନିଙ୍ଗ୍ ଚି ଆପେକେ ବାଞ୍ଚାଅ ନାମୋଃ କା। ଯୋହାନ୍ ଦୋ ଜୁଲୋଃତାନ୍ ହାର୍ ମାର୍ଶାଲୋଃତାନ୍ ଲେକା ବାତୀ ତାଇକେନାଏ, ହାର୍ ଆପେକେ ହୁଡିଙ୍ଗ୍ ସାମାୟ୍ ସାନ୍ ଇନିଜାଃ ମାସ୍କାଲ୍ ରେ ରାଶିକାନ୍ ବେଶ୍ ସାନାଙ୍ଗ୍ କେନା। ମେନ୍ଦୋ ଇଙ୍ଗ୍ଆଃ ତାଃ ଅକନ୍ ଗୋୱା ମେନାଃ ଏନା ଯୋହାନ୍ ରାଃ ଗୋୱା ଏତେ ହ ମାରାଙ୍ଗ୍ ଗୋୱା ତାନାଃ, ଚିୟାଃଚି ଅକନ୍ କାମି ଆପୁ ଇଙ୍ଗ୍ କେ ପୁରାଲାଗିନ୍ତେ ଜିମା କାଦିଙ୍ଗାଏ ମାନେ ନେ କାମିଗି ଅକନାଃ ଇଙ୍ଗ୍ କାମିତାନିଙ୍ଗ୍, ଏନାକୋଗି ଇଙ୍ଗ୍ଆଃ ଗୋୱା ତାନାଃ ଚି ଆପୁ ଇଙ୍ଗ୍‍କେ କୁଲ୍ କାଦିଙ୍ଗାଏ। ହାର୍ ଆପୁ ଅକଏ ଇଙ୍ଗ୍‍କେ କୁଲ୍ କାଦିଙ୍ଗାଏ, ଇନିଃଗି ଇଙ୍ଗ୍ଆଃ ଗୋୱା ଏମ୍ କାଦାଏ। ଆପେ ନାଦୋ ଇନିଜାଃ ବାକାଣ୍ ଆୟୁମ୍ କାଦାପେ, ହାର୍ ନାଦୋ ଇନିଃକେ ନେଲ୍ କାଜାପେ। ହାର୍ ଇନିଜାଃ ବାଚାନ୍ କେ ମୋନ୍ ରେ କାପେ ଦହୟା, ଚିୟାଃଚି ଅକଏ ହିନିଃକେ କୁଲ‍୍‍କିଜାଏ ଆପେ ଇନିଜାଃ କାପେ ବିଶ୍ଵାସ୍ ତାନା। ଆପେ ପାବିତାର୍ ପୁଥି ରେ ଦାଣାୟାପେ, ଚିୟାଃଚି ଆପେ ବୁଝାଅଃୱାପେ ଚି ଏଣ୍ଡେରେ ଜାନାଓ ଜୀଦାନ୍ ଆପେକେ ନାମୋଃୱା। ହାର୍ ନେ ବାଚାନ୍ କୋଗି ଏନା ତାନାଃ ଅକନାଃ ଇଙ୍ଗ୍ଆଃ ଗୋୱା ଏମେୟାଏ। ଏଣ୍ଡେ ଅଗି ଆପେ ଜାନାଓ ଜୀଦାନ୍ ନାମ୍ ଲାଗିନ୍ ଇଙ୍ଗ୍ଆଃ ତାଃ କାପେ ହିଜୁଃ ସାନାଙ୍ଗ୍ଆ। ଇଙ୍ଗ୍ ହୋଡ଼ୋ କୋଏତେ ମାଇନୋଃ କାଇଙ୍ଗ୍ ସାନାଙ୍ଗ୍ଆ। ମେନ୍ଦୋ ଇଙ୍ଗ୍ ଆପେକେ ସାରିୟାଇଙ୍ଗ୍ ଚି ଆପେ ରେ ପାର୍ମେଶ୍ଵାର୍ ଲାଗିନ୍ ଦୁଲାଡ଼୍ ବାନୋଗା। ଇଙ୍ଗ୍ ଇଙ୍ଗ୍ଆଃ ଆପୁ ରାଃ ଆଧିକାର୍ ଏତେ ହିଜୁଃ କାନିଙ୍ଗ୍, ହାର୍ ଆପେ ଇଙ୍ଗ୍‍କେ କାପେ ଆୟୁମ୍ ତାନା, ଆଗାର୍ ଏଟାଃ ଜାହାଁଏ ଆଜାଃ ଆଧିକାର୍ ତେ ହିଜୁଃ ୱାଏ, ଏଣ୍ଡେ ଇନିଃକେ ଆୟୁମ୍ କିୟାପେ। ଆପେ ମିହୋଡ଼୍ ଏଟାଃ ନିଈ ତେ ମାଇନୋଃ ସାନାଙ୍ଗାପେ ହାର୍ ଏନ୍ ମାଇନ୍ କେ ଅକନାଃ ମିୟାଃଗି ପାର୍ମେଶ୍ଵାର୍ ପାଡ଼େତେ ତାନାଃ, କାପେ ସାନାଙ୍ଗା, ଏଣ୍ଡେ ଚିଲ୍‍କା ବିଶ୍ଵାସ୍ ରିକା ଧାଡ଼ିୟାପେ? ନେୟା ଆଲୋପେ ବୁଝାଅଃୱା ଚି ଇଙ୍ଗ୍ ଆପୁ ତାଃ ଆପେକେ ଦୋଷୀ ପେୟାଇଙ୍ଗ୍, ଆପେ କେ ଦୋଷ୍ ଲାଗାଅ ନିଈ ମୁଶା ନାବୀ ତାନିଃ, ଅକନିଜାଃ ରେ ଆପେ ଆଶ୍ରା ତାନାପେ। ଚିୟାଃଚି ଆଗାର୍ ଆପେ ମୁଶା ନାବୀ କେ ବିଶ୍ଵାସ୍ ତେପେ, ଏଣ୍ଡେ ଇଙ୍ଗ୍‍କେ ହ ବିଶ୍ଵାସ୍ ତେପେ, ଏନାମେନ୍ତେ ଚି ଇନିଃ ଇଙ୍ଗ୍ଆଃ ବିଷାୟ୍ ରେ ଅଲାକାଦାଏ। ମେନ୍ଦୋ ଆଗାର୍ ଆପେ ଇନିଜାଃ ଅନୋଲ୍ ବାଚାନ୍ କେ କାପେ ବିଶ୍ଵାସ୍ ରିକାୟା, ଏଣ୍ଡେ ଇଙ୍ଗ୍ଆଃ ବାଚାନ୍ କେ ଚିଲ୍‍କା ବିଶ୍ଵାସ୍ ରିକାୟାପେ?” ନେ କାଜି କୋରାଃ ତାୟୋମ୍ତେ ୟୀଶୁ ଗାଲିଲୀ ରାଃ ସାମୁଦାର୍ ମାନେ ଅକନାଃ ତିବିରିୟାସ୍ ରାଃ ସାମୁଦାର୍ ହଗି କାଜିଅଃତାଇନା ଏନ୍ ଫାରୋମ୍ ସେନ୍ ଜାନାଏ। ଏନ୍ତେ ମିଃଥିମ୍ବା ହୋଡ଼ୋକୋ ଇନିଃକେ ଅତୋଙ୍ଗ୍ କିଜାକୋ ଚିୟାଃଚି ଅକନ୍ ଆକ୍‍ଦାନ୍ଦା କାମି ଇନିଃ ବେମାର୍ ହୋଡ଼ୋକୋୱାଃ ଚେତାନ୍ ରେ ଦେଖାଅ ଲେଃ ତାଇକେନାଏ ଏନାକୋକେ ଇନ୍‍କୁ ନେଲ୍ ତାଇକେନାକୋ। ଏନ୍ତେ ୟୀଶୁ ବୁରୁ ଚେତାନ୍ ରାକାବ୍ କେତେ ଆଜାଃ ଚେଲାକୋ ଲୋଃ ଏନ୍ତାଃ ଦୁବ୍‍ଜାନାଏ। ୟାହୁଦୀ କୋୱାଃ ଫାସାହ୍ ପାରାବ୍ ନାଡ଼େଏ ତାଇକେନା। ଚିମ୍ତା ୟୀଶୁ ଆୟାଃ ମେଏଃ ଆରିଃକେତେ ମିଃଥିମ୍ବା ହୋଡ଼ୋକୋକେ ଆଜାଃ ତାଃ ହିଜୁଃତାନ୍ ନେଲ୍‍କେଃକୋୱାଏ, ଏଣ୍ଡେ ଫିଲିପୁସ୍ କେ କାଜିକେଦାଏ, “ଆବୁ ନିକୁୱାଃ ଜୋଜୋମାଃ ଲାଗିନ୍ତେ ହୋଲୋଙ୍ଗ୍ କୋତାଃ ଏତେ କିରିଙ୍ଗ୍ ଆଉୱେୟାବୁ?” ମେନ୍ଦୋ ଇନିଃ ନେ କାଜି ଇନିଃକେ ପାର୍ଖାଅ ଲାଗିନ୍ତେ କାଜିକେଦାଏ, ଚିୟାଃଚି ଇନିଃ ଆଏଃଗି ସାରି ତାଇକେନାଏ ଚି ଆଏଃ ଚିନାଃ ରିକାୟାଏ। ଫିଲିପୁସ୍ ଇନିଃକେ କାଜିରୁଆଡ଼୍ କିଜାଏ, “ଦୁଇ ଶାଅ ଦିନ୍ ରାଃ ନାଲା ଟାକା ଇମିନ୍ ଗୋନୋଙ୍ଗ୍ ରାଃ ହୋଲୋଙ୍ଗ୍ ତେହ ଇନ୍‍କୁୱାଃ ଲାଗିନ୍ତେ ସବେନ୍ କୋକେ ହୁଡିଙ୍ଗ୍-ହୁଡିଙ୍ଗ୍ ହ କା ହୋବାଅଃୱା।” ଇନିଜାଃ ଚେଲା କୋଏତେ ଶିମୋନ୍ ପାତ୍ରାସ୍ ରାଃ ହାଗା ଆନ୍ଦ୍ରିୟାସ୍ ଇନିଃକେ କାଜିକେଦାଏ, “ନେତାଃ ରେ ମିୟାଃ କଡ଼ାହୋନ୍ ମେନିଜା ଇନିଜାଃ ତାଃ ଜାଓ ରାଃ ପାଞ୍ଚ୍ ଠୁ ହୋଲୋଙ୍ଗ୍ ହାର୍ ବାରିୟା ହାକୁ ମେନାଃ, ମେନ୍ଦୋ ନିମିନ୍ ହୋଡ଼ୋକୋ ଲାଗିନ୍ ନେୟା ଚିନାଃ ହୋବାୱା?” ୟୀଶୁ କାଜିକେଦାଏ, “ହୋଡ଼ୋକୋକେ ଦୁବ୍ ଆଚୁକୋପେ।” ଏନ୍ ଜାଗା ରେ ଥିମ୍ବା ତାସାଃ ତାଇକେନା, ଏନ୍ତେ ଇନ୍‍କୁ ଦୁବ୍ ଜାନାକୋ, ଏନ୍ ହୋଡ଼ୋକୋୱାଃ ରେ କୋଡ଼ାକୋୱାଃ ଗିନ୍ତି ପାଞ୍ଚ୍ ହାଜାର୍ ଲାଗ୍‍ଭାଗ୍ ତାଇକେନା। ଏନ୍ତେ ୟୀଶୁ ହୋଲୋଙ୍ଗ୍ ଇଦିକେଦାଏ, ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ ଦୁବାକାନ୍ କୋକେ ହାଟିଙ୍ଗ୍ ନାଙ୍ଗ୍ ଚେଲା କୋକେ ଏମ୍ କେଃକୋୱାଏ, ଏନ୍‍ଲେକାଗି ହାକୁ କୋକେ ହଗି ଇନ୍‍କୁକେ ଚିମିନାଙ୍ଗ୍ ଇନ୍‍କୁ ସାନାଙ୍ଗ୍ କେଦାକୋ ହାଟିଙ୍ଗ୍ ନାଙ୍ଗ୍ ଚେଲା କୋକେ ଏମ୍ କେଃକୋୱାଏ। ଚିମ୍ତାଙ୍ଗ୍ ଇନ୍‍କୁ ଜୋମ୍ କେତେ ବିଇ ଜାନାକୋ ଏଣ୍ଡେ ଇନିଃ ଆଜାଃ ଚେଲାକୋକେ କାଜିକେଃକୋୱାଏ, “କେଚାଃକାନ୍ ତେୟାଃ ହୋଲୋଙ୍ଗ୍ କୋଏତେ ବାଚାଓ କାନ୍ ଖାଣ୍ଡା କୋକେ ହୁଣ୍ଡିପେ, ଚି ଏନା ଆଲୋକା ଦୁଡ଼ିଙ୍ଗ୍ଅଃକା।” ଏନ୍ତେ ଇନ୍‍କୁ ହୁଣ୍ଡି କେଦାକୋ, ହାର୍ ବାରା ଡାଲି ଫେରେଃ କେଦାକୋ ଅକନାଃ ଚି ଜାଓ ରାଃ ପାଞ୍ଚ୍ ଠୁ ହୋଲୋଙ୍ଗ୍ ଏତେ କେଚାଃକାନ୍ ତେୟାଃ ହୋଲୋଙ୍ଗ୍ ଖାଣ୍ଡକୋ ଏନା ହୋଡ଼ୋକୋ ଜୋମ୍ ତାୟୋମ୍ତେ ସାରେଃ ଲେନା। ଏନ୍ତେ ଅକନ୍ ଆକ୍‍ଦାନ୍ଦା କାମି ଇନିଃ ରିକା କେତେ ଦେଖାଅ କେଦାଏ ଏନାକେ ଇନ୍‍କୁ ନେଲ୍‍କେତେ କାଜିକେଦାକୋ, “ନେ ନାବୀ ଅକନିଃ ଅତେଦିଶୁମ୍ ରେ ହିଜୁଃ ରାଃ ତାଇକେନାଏ ସାର୍ତିଗୀ ନିଈ ତାନିଃ।” ୟୀଶୁ ନେୟା ସାରିକେତେ ଚି ଇନ୍‍କୁ ଇଙ୍ଗ୍‍କେ ରାଜା ବାବାଇ ଲାଗିନ୍ତେ ସାସାବ୍ ସାନାଙ୍ଗ୍ ତାନାକୋ, ଇନିଃ ଆଡୋଃଗି ବୁରୁ ତେ ଏସ୍କାର୍ ଗି ସେନୋଃ ଜାନାଏ। ଚିମ୍ତା ଶିଙ୍ଗି ଡୁବିଃ ଜାନା, ଦୋ ଆଜାଃ ଚେଲାକୋ ସାମୁଦାର୍ ଗେନା ସେନୋଃ ଜାନାକୋ, ହାର୍ ଡୋଙ୍ଗା ରେ ରାକାବ୍ କେତେ ସାମୁଦାର୍ ରାଃ ଏନ୍ ଫାରୋମ୍ କାଫାର୍ନାହୁମ୍ ସାହାର୍ ତେ ସେନ୍ ତାଇକେନାକୋ। ଏନ୍ ସାମାୟ୍ ନୁବାଃ ଲେନ୍ତାଇକେନା, ହାର୍ ଏନ୍ ସାନ୍ତେ ୟୀଶୁ ଆକୋତାଃ କାଏ ହିଜୁଃ ଲେନ୍ ତାଇନାଏ, ହାର୍ ଥିମ୍ବା ହୋୟୋ ହିଜୁଃ ରାଃ ଚାଲ୍ତେ ସାମୁଦାର୍ ରେ ଲାହାଡ଼ି ଉଠାଅଃ ତାଇନା। ଏନ୍ତେ ଚିମ୍ତାଙ୍ଗ୍ ଇନ୍‍କୁ ଡୋଙ୍ଗା ଚାଲାଓ-ଚାଲାଓ ତିନ୍ ଚାଇର୍ ମିଲ୍ ଲାଗ୍-ଭାଗ୍ ଅଡୋଙ୍ଗ୍ ଜାନାକୋ, ଏଣ୍ଡେ ଇନ୍‍କୁ ୟୀଶୁ କେ ସାମୁଦାର୍ ରେ ସେସେନ୍ ତାନ୍ ହାର୍ ଡୋଙ୍ଗା ନାଡ଼େଏ ତାଃ ହିଜୁଃ ତାନ୍ ନେଲ୍‍କିଜାକୋ, ହାର୍ ବୋରୋ ଜାନାକୋ। ମେନ୍ଦୋ ଇନିଃ ଇନ୍‍କୁକେ କାଜିକେଦାଏ, “ଇଙ୍ଗ୍ ତାନିଙ୍ଗ୍! ଆଲୋପେ ବୋରୋୟା।” ଏଣ୍ଡେ ଇନ୍‍କୁ ଇନିଃକେ ଡୋଙ୍ଗା ରେ ରାକାବ୍ ଲାଗିନ୍ତେ ମାନାତିଙ୍ଗ୍ ଜାନାକୋ ହାର୍ ସେକାଡ଼୍ ଗି ଏନ୍ ଡୋଙ୍ଗା ଏନ୍ ଜାଗା ତାଃ ସେଟେର୍ ଜାନା ଅକତାଃ ଇନ୍‍କୁ ସେନ୍ ତାଇକେନାକୋ। ଏଟାଃ ହୁଲାଙ୍ଗ୍ ଏନ୍ ମିଃଥିମ୍ବା ହୋଡ଼ୋକୋ, ଅକନ୍‍କୋ ସାମୁଦାର୍ ଏନ୍ ଫାରୋମ୍ ରେ ତିଙ୍ଗୁ ଲେନାକୋ, ନେୟା ନେଲ୍ କେଦାକୋ ଚି ନେତାଃ ରେ ମିୟାଃ ବାଗିକେତେ ଆଡୋଃ ଜାହାନ୍ ଏଟାଃ ଡୋଙ୍ଗା କା ତାଇକେନା, ହାର୍ ୟୀଶୁ ଆଜାଃ ଚେଲାକୋ ଲୋଃ କାଏ ରାକାବ୍ ଲେନ୍ତାଇକେନାଏ, ମେନ୍ଦୋ ଆଜାଃ ଚେଲାକୋ ଭାଇର୍ ସେନ୍ ଲେନାକୋ। ଏନ୍ତେ ଏଟାଃ ଡୋଙ୍ଗା କୋ ତିବିରିୟାସ୍ ଏତେ ଏନ୍ ଜାଗା ତାଃ ହିଜୁଃଜାନା, ଅକତାଃରେ ଇନ୍‍କୁ ପ୍ରାଭୁ ରାଃ ଧାନ୍ୟାବାଦ୍ ତାୟୋମ୍ତେ ହୋଲୋଙ୍ଗ୍ ଜୋମ୍ ଲେଦାକୋ। ଏନାମେନ୍ତେ ଚିମ୍ତା ମିଃଥିମ୍ବା ହୋଡ଼ୋକୋ ନେଲ୍ କେଦାକୋ ଚି ନେତାଃ ରେ ନାଦୋ ୟୀଶୁ ମେନିଜା, ନାଦୋ ଇନିଜାଃ ଚେଲାକୋ, ଏଣ୍ଡେ ଇନ୍‍କୁ ଡୋଙ୍ଗା କୋରେ ରାକାବ୍ କେତେ ୟୀଶୁ କେ ଦାଣାତାନ୍ ଲୋଃ କାଫାର୍ନାହୁମ୍ ସାହାର୍ ତେ ସେଟେର୍ ଜାନାକୋ। ଚିମ୍ତାଙ୍ଗ୍ ସାମୁଦାର୍ ରାଃ ହାନ୍ ଫାରୋମ୍ ଇନ୍‍କୁ ଇନିଃ ଲୋଃ ନାପାମ୍ ଜାନାକୋ ଏଣ୍ଡେ କାଜିକେଦାକୋ, “ହେ ଗୁରୁ, ଆମ୍ ନେତାଃ ଚିମ୍ତାମ୍ ହିଜୁଃଲେନାମ୍?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, ଆପେ ଇଙ୍ଗ୍‍କେ ନେୟା ଲାଗିନ୍ତେ କାପେ ଦାଣାଇଙ୍ଗ୍ ତାନା ଚି ଆପେ ଆକ୍‍ଦାନ୍ଦା କାମି ନେଲ୍‍କେଦାପେ, ମେନ୍ଦୋ ଏନାଲାଗିନ୍ତେ ଚି ଆପେ ହୋଲୋଙ୍ଗ୍ ଜୋମ୍ କେତେ ବିଇ ଜାନାପେ। ନାଶୋଃତେୟାଃ ଜୋଜୋମାଃ ଲାଗିନ୍ତେ ଆଲୋପେ କାମିୟା, ମେନ୍ଦୋ ଏନ୍ ଜୋଜୋମାଃ ଲାଗିନ୍ତେ କାମି ପେ ଅକନାଃ ଜାନାଓ ଜୀଦାନ୍ ସାନ୍ ତାଇନୋଃ ୱା, ଅକନାଃ କେ ଇଙ୍ଗ୍ ମାନ୍‍ୱା ରାଃ ହୋନ୍ ଆପେକେ ଏମାପେୟାଇଙ୍ଗ୍, ଚିୟାଃଚି ଆପୁ ମାନେ ପାର୍ମେଶ୍ଵାର୍ ଇଙ୍ଗ୍‍କେ ନେକା ଆଧିକାର୍ ଏମ୍ ନାଙ୍ଗ୍ ପୋକ୍ତା କାଦିଙ୍ଗ୍ଆଏ। ଇନ୍‍କୁ ଇନିଃକେ କୁଲିକେଦାକୋ, “ପାର୍ମେଶ୍ଵାର୍ ରାଃ କାମି ଲାଗିନ୍ତେ ଆଲେ ଚିନାଃ ରିକାୟାଲେ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ପାର୍ମେଶ୍ଵାର୍ ରାଃ କାମି ନେୟା ତାନାଃ ଚି ଆପେ ଇଙ୍ଗ୍‍କେ ବିଶ୍ଵାସ୍ ଏପେ, ଅକଏ ଆଏଃ କୁଲା କାଦିଙ୍ଗ୍ଆଏ।” ଏନ୍ତେ ଇନ୍‍କୁ ଇନିଃକେ କୁଲିକିଜାକୋ, “ଆମ୍ ଅକନ୍ ଚିହ୍ନା ଦେଖାଅ ତାନାମ୍ ଚି ଆଲେ ନେଲ୍‍କେତେ ଆମ୍‍କେ ବିଶ୍ଵାସ୍ ୟାଲେ? ଆମ୍ ଅକନ୍ କାମି ଦେଖାଅ ତାନାମ୍? ଆଲେୟାଃ ପୁର୍ଖା-ଆପୁ କୋ ସୁନ୍‍ସାନ୍ ଜାଗା ରେ ମାନ୍ନା ଜୋମ୍ କେଦାକୋ; ଜେଲେକା ଅଲାକାନା, ‘ଇନିଃ ଇନ୍‍କୁକେ ଜୋମ୍ ଲାଗିନ୍ତେ ସିର୍ମାଦିଶୁମ୍ ଏତେ ହୋଲୋଙ୍ଗ୍ ଏମାଃ କୋୱାଏ।’ ” ୟୀଶୁ ଇନ୍‍କୁକେ କାଜିୟାଃକୋୱାଏ, “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ମୁଶା ନାବୀ ଆପେ କେ ଏନ୍ ହୋଲୋଙ୍ଗ୍ ସିର୍ମାଦିଶୁମ୍ ଏତେ କାଏ ଏମାଃପେୟାଏ, ମେନ୍ଦୋ ଇଙ୍ଗ୍ଆଃ ଆପୁ ଆପେ କେ ସାର୍ତି ହୋଲୋଙ୍ଗ୍ ସିର୍ମାଦିଶୁମ୍ ଏତେ ଏମାପେତାନାଏ। ଚିୟାଃଚି ପାର୍ମେଶ୍ଵାର୍ ରାଃ ହୋଲୋଙ୍ଗ୍ ଇନିଃଗି ତାନିଃ, ଅକଏ ସିର୍ମାଦିଶୁମ୍ ଏତେ ଆଡ଼୍‍ଗୁକେତେ ଅତେଦିଶୁମ୍ କେ ଜୀଦାନ୍ ଏମ୍ ତାନାଏ।” ଏଣ୍ଡେ ଇନ୍‍କୁ ଇନିଃକେ କାଜିକେଦାକୋ, “ହେ ସାହେବ୍, ନେ ହୋଲୋଙ୍ଗ୍ ଆଲେକେ ଜାନାଓ ଏମାକାତେଲେମ୍।” ୟୀଶୁ ଇନ୍‍କୁକେ କାଜିକେଃକୋୱାଏ, “ଜୀଦାନ୍ ରାଃ ହୋଲୋଙ୍ଗ୍ ଇଙ୍ଗ୍ ତାନିଙ୍ଗ୍। ଅକଏ ଇଙ୍ଗ୍‍ତାଃ ହିଜୁଃୱାଏ ଇନିଃ ଚିଉଲାଅ କାଏ ରେଙ୍ଗେଜୋୱା, ହାର୍ ଅକଏ ଇଙ୍ଗ୍ଆଃ ରେ ବିଶ୍ଵାସ୍ ତାନାଏ ଇନିଃ ଚିଉଲାଅ କାଏ ତେତାଙ୍ଗ୍ଅଃୱା। ମେନ୍ଦୋ ଇଙ୍ଗ୍ ଆପେ କେ ସିଦାରେ କାଜିଲେଦାଇଙ୍ଗ୍ ହାର୍ ଆପେ ଇଙ୍ଗ୍‍କେ ନେଲ୍ ହ କାଦିଙ୍ଗାପେ, ଏଣ୍ଡେ ରେହ କାପେ ବିଶ୍ଵାସ୍ ତାନା। ଅକନ୍ କୋକେ ଆପୁ ଇଙ୍ଗ୍‍କେ ଏମାଇଙ୍ଗ୍ ତାନାଏ ଇନ୍‍କୁ ସବେନ୍ ଇଙ୍ଗ୍‍ତାଃ ହିଜୁଃୱାକୋ, ଅକଏ ଇଙ୍ଗ୍‍ତାଃ ହିଜୁଗାଏ ଇନିଃକେ ଇଙ୍ଗ୍ ଚିଉଲାଅ କାଇଙ୍ଗ୍ ଅଡୋଙ୍ଗିୟା। ଚିୟାଃଚି ଇଙ୍ଗ୍ ଇଙ୍ଗ୍ଆଃ ସାନାଙ୍ଗ୍ କାହା, ମେନ୍ଦୋ ଇଙ୍ଗ୍ଆଃ କୁକୁଲ୍ ନିଜାଃ ସାନାଙ୍ଗ୍ ପୁରା ଲାଗିନ୍ତେ ସିର୍ମାଦିଶୁମ୍ ଏତେ ଆଡ଼୍‍ଗୁକାନିଙ୍ଗ୍। ଇଙ୍ଗ୍ଆଃ କୁକୁଲ୍ ନିଜାଃ ସାନାଙ୍ଗ୍ ନେୟା ତାନାଃ ଚି ଅକନ୍ କୋକେ ଇଙ୍ଗ୍‍କେ ଏମାକାଦିଙ୍ଗାଏ, ଇନ୍‍କୁ ଏତେ ଜେତାଏ କେହ କାଇଙ୍ଗ୍ ଆଃକୋୱା, ମେନ୍ଦୋ ଇନିଃକେ ଟୁଣ୍ଡୁ ହୁଲାଙ୍ଗ୍ ରେ ଆଡୋଃଗି ଜୀହିଃ ବିରିଦିୟାଇଙ୍ଗ୍। ଚିୟାଃଚି ଇଙ୍ଗ୍ଆଃ ଆପୁ ଆଃ ସାନାଙ୍ଗ୍ ନେୟା ତାନାଃ ଚି ଜେତାଏ ହ ଇଙ୍ଗ୍‍କେ ନେଲିଙ୍ଗ୍ ୟାଏ, ହାର୍ ଇଙ୍ଗ୍ଆଃ ରେ ବିଶ୍ଵାସ୍ ୟାଏ, ଇନିଃ ଜାନାଓ ଜୀଦାନ୍ ନାମେୟାଏ, ହାର୍ ଇଙ୍ଗ୍ ଇନିଃକେ ବିଚାର୍ ହୁଲାଙ୍ଗ୍ ରେ ଆଡୋଃଗି ଜୀହିଃ ବିରିଦିୟାଇଙ୍ଗ୍।” ଏନ୍ତେ ୟାହୁଦୀ ଗୁରୁକୋ ଇନିଃକେ କୁର୍ବୁରାଅ ଜାନାକୋ, ଚିୟାଃଚି ଇନିଃ ଇନ୍‍କୁକେ କାଜିଲେଦାଏ, “ଅକନ୍ ହୋଲୋଙ୍ଗ୍ ସିର୍ମାଦିଶୁମ୍ ଏତେ ଆଡ଼୍‍ଗୁଜାନା, ଇନିଃ ଇଙ୍ଗ୍ ତାନିଙ୍ଗ୍।” ଇନ୍‍କୁ କାଜିକେଦାକୋ, “ଚିନାଃ ନିଈ ଯୋଶେଫ୍ ରାଃ ହୋନ୍‍କଡ଼ା ୟୀଶୁ ନାହାଲାଏ, ଅକନିଜାଃ ଏଙ୍ଗାଆପୁ କିନ୍‍କେ ଆଲେ ସାରିତାନାଲେ? ଏଣ୍ଡେ ନିଈ ଚିଲ୍‍କା କାଜି ତାନାଏ ଚି ଇଙ୍ଗ୍ ସିର୍ମାଦିଶୁମ୍ ଏତେ ଆଡ଼୍‍ଗୁ କାନିଙ୍ଗ୍?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଆପେ ଆପେଗୀ ଆଲୋ କୁର୍ବୁରାଅଃ ପେ। ଜେତାଏ ଇଙ୍ଗ୍ଆଃ ଜାପାଃ କାଏ ହିଜୁଃ ଧାଡ଼ିୟା ଚିମିନ୍ ସାନ୍ତେ ଆପୁ, ଅକନିଃ ଇଙ୍ଗ୍‍କେ କୁଲ୍ କାଦିଙ୍ଗାଏ, ଇନିଃକେ କାଏ ଥାଉଜିୟାଏ, ହାର୍ ଇଙ୍ଗ୍ ଇନିଃକେ ଟୁଣ୍ଡୁ ହୁଲାଙ୍ଗ୍ ରେ ଆଡୋଃଗି ଜୀହିଃ ବିରିଦିୟାଇଙ୍ଗ୍। ନାବୀ କୋୱା ଅନୋଲ୍ ରେ ନେୟା ଅଲାକାନା, ‘ଇନ୍‍କୁ ସବେନ୍ କୋ ପାର୍ମେଶ୍ଵାର୍ ପାଡ଼େତେ ଶିଖାଅକାନ୍ ତାଇନୋଗାକୋ।’ ଅକନ୍‍କୋ ଆପୁ ତେ ଆୟୁମ୍ କେଦାକୋ ହାର୍ ଶିଖାଅ ଜାନାକୋ, ଇନିଃ ଇଙ୍ଗ୍‍ତାଃ ହିଜୁଃତାନାଏ। ନେୟା କାହା ଚି ଜାହାଁଏ ଆପୁ କେ ନେଲ୍ କାଇଜାଏ, ମେନ୍ଦୋ ଅକଏ ପାର୍ମେଶ୍ଵାର୍ ପାଡ଼େତେ ତାନିଃ, ଇନିଃଗି ଆପୁ କେ ନେଲ୍ କାଇଜାଏ। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଅକଏ ବିଶ୍ଵାସ୍ ତାନାଏ, ଇନିଜାଃ ଗି ଜାନାଓ ଜୀଦାନ୍ ତାନାଃ। ଜୀଦାନ୍ ରାଃ ହୋଲୋଙ୍ଗ୍ ଇଙ୍ଗ୍ ତାନିଙ୍ଗ୍। ଆପେୟାଃ ପୁର୍ଖା-ଆପୁ କୋ ସୁନ୍‍ସାନ୍ ଜାଗା ରେ ମାନ୍ନା ଜୋମ୍ କେଦାକୋ ହାର୍ ଗୋଏଃ ଜାନାକୋ। ମେନ୍ଦୋ ନେୟା ଏନ୍ ହୋଲୋଙ୍ଗ୍ ତାନାଃ ଅକନାଃ ସିର୍ମାଦିଶୁମ୍ ଏତେ ଆଡ଼୍‍ଗୁଅଃତାନା, ଏନାତେ ହୋଡ଼ ଏନା ଏତେ ଜୋମେୟାଏ ହାର୍ କାଏ ଗୋଜୋଗା। ଜୀଦାନ୍ ରାଃ ହୋଲୋଙ୍ଗ୍ ଅକନାଃ ସିର୍ମାଦିଶୁମ୍ ଏତେ ଆଡ଼୍‍ଗୁଜାନା, ଏନା ଇଙ୍ଗ୍ ତାନିଙ୍ଗ୍। ଆଗାର୍ ଜେତାଏ ନେ ହୋଲୋଙ୍ଗ୍ ଏତେ ଜୋମେୟାଏ, ଏଣ୍ଡେ ଜାନାଓ ଜୀହିଃ ତାଇନୋଗାଏ, ହାର୍ ଅକନ୍ ହୋଲୋଙ୍ଗ୍ ଇଙ୍ଗ୍ ଅତେଦିଶୁମ୍ ରାଃ ଜୀଦାନ୍ ଲାଗିନ୍ତେ ଏମେୟାଇଙ୍ଗ୍, ଏନା ଇଙ୍ଗ୍ଆଃ ହୋଡ଼ମୋ ତାନାଃ।” ଏନ୍ତେ ୟାହୁଦୀ ଗୁରୁକୋ ନେୟା କାଜିକେତେ ଆକୋ ଥାଲା ରେ କୁଲିକାପାଜି ଜାନାକୋ, “ନେ ହୋଡ଼ ଚିଲ୍‍କା ଆବୁକେ ଆଜାଃ ମାସ୍ ଜୋମ୍ ଲାଗିନ୍ତେ ଏମ୍ ଧାଡ଼ିୟାଏ?” ୟୀଶୁ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଚିମିନ୍ ସାନ୍ତେ ଆପେ ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ମାସ୍ କାପେ ଜୋମେୟା ହାର୍ ଇଙ୍ଗ୍ଆଃ ମାୟୋମ୍ କାପେ ନୁୱେୟା, ଆପେୟାଃ ରେ ଜୀଦାନ୍ ବାନୋଗା। ଅକଏ ଇଙ୍ଗ୍ଆଃ ମାସ୍ ଜୋମେୟାଏ, ହାର୍ ଇଙ୍ଗ୍ଆଃ ମାୟୋମ୍ ନୁୱେୟାଏ, ଜାନାଓ ଜୀଦାନ୍ ଇନିଜାଃ ଗି ତାନାଃ, ହାର୍ ଇଙ୍ଗ୍ ଇନିଃକେ ଟୁଣ୍ଡୁ ହୁଲାଙ୍ଗ୍ ଆଡୋଃଗି ଜୀହିଃ ବିରିଦିୟାଇଙ୍ଗ୍। ଚିୟାଃଚି ଇଙ୍ଗ୍ଆଃ ହୋଡ଼ମୋ ସାର୍ତିଗୀ ଜୋଜୋମାଃ ତାନାଃ, ହାର୍ ଇଙ୍ଗ୍ଆଃ ମାୟୋମ୍ ସାର୍ତିଗୀ ନୁୱେତେୟାଃ ତାନାଃ। ଅକଏ ଇଙ୍ଗ୍ଆଃ ମାସ୍ ଜୋମେୟାଏ ହାର୍ ଇଙ୍ଗ୍ଆଃ ମାୟୋମ୍ ନୁୱେୟାଏ, ଇନିଃ ଇଙ୍ଗ୍ଆଃ ରେ ବାଇ ତାଇନୋଃୱାଏ, ହାର୍ ଇଙ୍ଗ୍ ଇନିଃ ରେ। ଜେଲେକା ଜୀହିଃତାନ୍ ଆପୁ ଇଙ୍ଗ୍‍କେ କୁଲ୍ କାଦିଙ୍ଗାଏ, ହାର୍ ଇଙ୍ଗ୍ ଆପୁ ରାଃ ଚାଲ୍ତେ ଜୀହିଃ ମେନାଇଙ୍ଗ୍ ୟା, ଏନ୍‍ଲେକାଗି ଇନିଃ ହ ଅକଏ ଇଙ୍ଗ୍‍କେ ଜୋମିଙ୍ଗ୍ ୟାଏ ଇଙ୍ଗ୍ଆଃ ଚାଲ୍ତେ ଜୀହିଃ ତାଇନୋଗାଏ। ଅକନ୍ ହୋଲୋଙ୍ଗ୍ ସିର୍ମାଦିଶୁମ୍ ଏତେ ଆଡ଼୍‍ଗୁ ଜାନା ଏନା ଇଙ୍ଗ୍ ତାନିଙ୍ଗ୍, ଏନା ଏନ୍ ହୋଲୋଙ୍ଗ୍ ଲେକା ନାହାଲା ଅକନାଃ ପୁର୍ଖା-ଆପୁ କୋ ଜୋମ୍ କେଦାକୋ ହାର୍ ଗୋଏଃ ଜାନାକୋ, ମେନ୍ଦୋ ଅକଏ ନେ ହୋଲୋଙ୍ଗ୍ ଜୋମେୟାଏ, ଇନିଃ ଜାନାଓ ଜୀହିଃ ତାଇନୋଗାଏ।” ନେ କାଜିକୋ ଇନିଃ କାଫାର୍ନାହୁମ୍ ସାହାର୍ ରାଃ ମିୟାଃ ବିନ୍ତିଅଡ଼୍ଆଃ ରେ ଉପ୍‍ଦେଶ୍ ଏମ୍ ତାନ୍ ସାମାୟ୍ ରେ କାଜିକେଦାଏ। ଏନ୍ତେ ଇନିଜାଃ ଚେଲାକୋ ଏତେ ଥିମ୍ବାକୋ ନେୟା ଆୟୁମ୍‍କେତେ କାଜିକେଦାକୋ, “ନେୟା ବାକାଣ୍ କାଠିନ୍ ତାନାଃ, ନେୟା ଅକଏ ଆୟୁମ୍ ଧାଡ଼ିୟାଏ?” ୟୀଶୁ ଆୟାଃ ମୋନ୍ ରେ ନେୟା ସାରିକେତେ ଚି ଇଙ୍ଗ୍ଆଃ ଚେଲାକୋ ଆକୋ-ଆକୋ ରେ ନେ କାଜି ରେ କୁର୍ବୁରାଅଃ ତାନାକୋ, ଇନ୍‍କୁକେ କୁଲିକେଃକୋୱାଏ, “ଚିନାଃ ନେ କାଜି ଆପେକେ ଇଙ୍ଗ୍ଆଃ ରେ ବିଶ୍ଵାସ୍ ମାଣ୍ଡାଅ ଲାଗିନ୍ ରୋକାଅ ପେତାନାଏ? ଆଗାର୍ ଆପେ ଇଙ୍ଗ୍ ମାନ୍‍ୱା ରାଃ ହୋନ୍ କେ ଅକ୍ତାଃ ଇଙ୍ଗ୍ ସିଦା ତାଇକେନାଇଙ୍ଗ୍, ହେନ୍ତାଃ ଚେତାନ୍ ସେନୋଃ ତାନ୍ ନେଲିଙ୍ଗ୍ ୟାପେ, ଏଣ୍ଡେ ଚିନାଃ ହୋବାଅଃୱା? ଆତ୍ମା ଦୋ ଜୀଦାନ୍ ଏହେମ୍ ନିଈ ତାନିଃ, ହୋଡ଼ମୋ ଏତେ ଜାହାନ୍ ଲାଭ ବାନୋଗା, ଅକନ୍ ବାକାଣ୍ ଇଙ୍ଗ୍ ଆପେକେ କାଜିକେଦାଇଙ୍ଗ୍ ଏନା ଆତ୍ମା ତାନାଃ, ହାର୍ ଜୀଦାନ୍ ହ ତାନାଃ। ମେନ୍ଦୋ ଆପେ କୋଏତେ ଚିମିନାଙ୍ଗ୍ ନେକା ମେନାକୋୱା ଅକନ୍ କୋ କାକୋ ବିଶ୍ଵାସ୍ ତାନା।” ଚିୟାଃଚି ୟୀଶୁ ସିଦାଏତେ ଗି ସାରି ତାଇକେନାଏ ଚି ଅକନ୍‍କୋ କାକୋ ବିଶ୍ଵାସ୍ ତାନା, ଇନ୍‍କୁ ଅକଏକୋ ତାନ୍‍କୋ ହାର୍ ଅକଏ ଇଙ୍ଗ୍‍କେ ସାବିଙ୍ଗ୍ ୟାଏ। ଏନ୍ତେ ଇନିଃ କାଜିକେଦାଏ, “ଏନାମେନ୍ତେ ଇଙ୍ଗ୍ ଆପେକେ କାଜିଲେଦାଇଙ୍ଗ୍ ଚି ଚିମିନ୍ ସାନ୍ତେ ଆପୁ ପାଡ଼େତେ ନେ ବାର୍ଦାନ୍ କା ଏମୋଗା ଏନ୍ ସାନ୍ତେ ଇନିଃ ଇଙ୍ଗ୍ଆଃ ତାଃ କାଏ ହିଜୁଃ ଧାଡ଼ିୟା।” ନେୟା ରାଃ ଚାଲ୍ତେ ଇନିଜାଃ ଚେଲାକୋ ଏତେ ଥିମ୍ବାଗି ହୋଡ଼ୋକୋ ତାୟୋମ୍ ରୁଆଡ଼୍ ଜାନାକୋ ହାର୍ ଏନା ତାୟୋମ୍ତେ ଇନିଃକେ କାକୋ ଅତୋଙ୍ଗ୍ କିଜା। ଏନ୍ତେ ୟୀଶୁ ଏନ୍ ବାରାଝାନ୍ କୁଲାକାନ୍ ଚେଲାକୋକେ କାଜିକେଃକୋୱାଏ, “ଚିନାଃ ଆପେ ହଗି ସେନୋଃ ସାନାଙ୍ଗ୍ ତାନାପେ?” ଶିମୋନ୍ ପାତ୍ରାସ୍ ଇନିଃକେ କାଜିରୁଆଡ଼୍ କିଜାଏ, “ହେ ପ୍ରାଭୁ, ଆଲେ ଅକଏ ତାଃ ସେନାଲେ? ଜାନାଓ ଜୀଦାନ୍ ରାଃ ବାକାଣ୍ ଦୋ ଆମ୍ ତାଃଗି ମେନାଃ, ହାର୍ ଆଲେ ବିଶ୍ଵାସ୍ କେଦାଲେ ହାର୍ ସାରିକେଦାଲେ ଚି ପାର୍ମେଶ୍ଵାର୍ ରାଃ ପାବିତାର୍ ହୋନ୍ ଆମ୍ ଗି ତାନ୍‍ମେ।” ୟୀଶୁ ଇନ୍‍କୁକେ କାଜିକେଃକୋୱାଏ, “ଚିନାଃ ଇଙ୍ଗ୍ ଆପେ ବାରାଝାନ୍ କୋକେ କାଇଙ୍ଗ୍ ସାଲା କାଃ ପେୟା? ଏଣ୍ଡେ ହ ଆପେ ଏତେ ମିହୋଡ଼୍ ଶାଏତାନ୍ ତାନିଃ।” ନେୟା ଇନିଃ ଶିମୋନ୍ ଇସ୍କାରିୟୋତୀ ରାଃ ହୋନ୍ ୟାହୁଦା ବିଷାୟ୍ ରେ କାଜିକେଦାଏ, ଚିୟାଃଚି ଇନିଃ ଏନ୍ ବାରାଝାନ୍ କୁଲାକାନ୍ ଚେଲାକୋ ଏତେ ମିହୋଡ଼୍ ତାଇନ୍ ରେହଗି ଇନିଃଗି ଇନିଃକେ ସାସାବ୍ ରିକାନିଃ ତାଇକେନାଏ। ନେ କାଜିକୋରାଃ ତାୟୋମ୍ତେ ୟୀଶୁ ଗାଲିଲୀ ଜିଲ୍ଲା ରାଃ ଜାଗା କୋରେ ହୋନୋର୍ ତାଇକେନାଏ। ଚିୟାଃଚି ୟାହୁଦୀ ଗୁରୁକୋ, ଇନିଃକେ ଗୋଏଃ ନାଙ୍ଗ୍ ନାମ୍ ବାଡ଼ା ତାଇକେନାକୋ, ଏନାମେନ୍ତେ ଇନିଃ ୟାହୁଦୀୟା ଜିଲ୍ଲା ରାଃ ଜାଗା କୋରେ କାଏ ହୋନୋର୍ କେଦାଏ। ୟାହୁଦୀ କୋୱାଃ ମାଣ୍ଡ୍‍ୱା ରାଃ ପାରାବ୍ ନାଡ଼େଏ ତାଇକେନା। ଏନାମେନ୍ତେ ଆୟାଃ ହୁଡିଙ୍ଗ୍ ହାଗାକୋ ଆଏଃକେ କାଜିକିଜାକୋ, “ନେତାଃ ଏତେ ୟାହୁଦୀୟା ଜିଲ୍ଲା ତେ ସେନ୍ ମେ, ଚି ଅକନ୍ କାମି ଆମ୍ ରିକା ତାନାମ୍ ଏନାକୋକେ ଆମାଃ ଚେଲାକୋ ହେନ୍ତାଃ ରେହ ନେଲେୟାକୋ। ଚିୟାଃଚି ଏନ୍ ଲେକା ଜାହାଁଏ ବାଙ୍ଗୁଇଜା ଅକନିଃ ଉକୁକେତେ କାମି ରିକାୟାଏ ଇନିଃ ନୁତୁମ୍ ଅଗାଏ। ଆଗାର୍ ଆମ୍ ନେ କାମି କାମିତାନାମ୍, ଏଣ୍ଡେ ଆମ୍ ଆପାନ୍ କେ ଅତେଦିଶୁମ୍ ରେ ଉଦୁବେମ୍।” ଚିୟାଃଚି ଆୟାଃ ହାଗାକୋ ହ ଆଏଃକେ କାକୋ ବିଶ୍ଵାସ୍ ତାଇନା। ଏନାମେନ୍ତେ ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍ଆଃ ସାମାୟ୍ ନାଆ କା ହୁଜୁଃକାନା, ମେନ୍ଦୋ ଆପେୟାଃ ଲାଗିନ୍ ସବେନ୍ ଇମ୍ତା ସାମାୟ୍ ମେନାଃ। ଅତେଦିଶୁମ୍ ରେନ୍ ହୋଡ଼ୋକୋ ଆପେକେ କାକୋ ହିଲାଙ୍ଗ୍ ପେୟା, ମେନ୍ଦୋ ଇନ୍‍କୁ ଇଙ୍ଗ୍‍କେ ହିଲାଙ୍ଗ୍ ତାନାକୋ ଚିୟାଃଚି ଇଙ୍ଗ୍ ଇନ୍‍କୁୱାଃ ବିରୋଧ୍ ରେ କାଜିକୋ ତାନିଙ୍ଗ୍ ଚି ଇନ୍‍କୁୱାଃ କାମି ଶିତୃ ମେନାଃ। ଆପେ ପାରାବ୍ ରେ ସେନ୍ ପେ, ନାଆ ଇଙ୍ଗ୍ ନେ ପାରାବ୍ ରେ କାଇଙ୍ଗ୍ ସେନା, ଚିୟାଃଚି ଇଙ୍ଗ୍ଆଃ ସାମାୟ୍ କା ପୁରା କାନା।” ଇନିଃ ଇନ୍‍କୁକେ ନେ କାଜିକୋ କାଜିକେତେ ଗାଲିଲୀ ଜିଲ୍ଲା ରେଗି ତାଇଜାନାଏ। ମେନ୍ଦୋ ଚିମ୍ତାଙ୍ଗ୍ ଆୟାଃ ହୁଡିଙ୍ଗ୍ ହାଗାକୋ ସେନୋଃ ଜାନାକୋ ଏଣ୍ଡେ ଆଏଃ ହ, ହୋଡ଼ୋକୋୱାଃ ନେପେଲ୍ ରେ କାହା ମେନ୍ଦୋ ଉକୁ କେତେ ସେନ୍ ଜାନାଏ। ନାଆ ୟାହୁଦୀ ଗୁରୁକୋ ପାରାବ୍ ରେ ଇନିଃକେ ନେୟା କାଜିକେତେ ଦାଣାଇ ତାନାକୋ, “ଇନିଃ କୋତାଃ ରିୟା?” ଏନ୍ତେ ହୋଡ଼ୋକୋୱାଃ ଥାଲା ରେ ହାପା-ହାପା ଇନିଜାଃ ବିଷାୟ୍ ରେ ଥିମ୍ବାଗି କାଜିକୋ ଆୟୁମ୍ ଜାନା, ଚିମିନାଙ୍ଗ୍ କୋ କାଜି ତାଇନାକୋ, “ଇନିଃ ବେଶ୍ ହୋଡ଼ ତାନିଃ।” ହାର୍ ଚିମିନାଙ୍ଗ୍ କୋ କାଜି ତାଇନାକୋ, “କାହା ଇନିଃ ହୋଡ଼ୋକୋକେ ଲୋଗୋ କୋୱାଏ।” ଏଣ୍ଡେ ହଗି ୟାହୁଦୀ ଗୁରୁ କୋୱାଃ ବୋରୋ ତେ ଜାହାଁଏ ହ ମୋଚା ଖଲାଅ କେତେ କାକୋ କାଜି ତାଇନାକୋ। ଚିମ୍ତା ପାରାବ୍ ହୁଲାଙ୍ଗ୍ ରାଃ ଆଧା ଶିଙ୍ଗି ଫାରୋମ୍ ଜାନା, ଦୋ ୟୀଶୁ ମାନ୍ଦିର୍ ରାଃ ରାଚା ରେ ଉପ୍‍ଦେଶ୍ ଏଟେଃ କେଦାଏ। ଏନ୍ତେ ୟାହୁଦୀ ଗୁରୁକୋ ଆକ୍‍ଚାକାଅଃ କେତେ କାଜିକେଦାକୋ, “ନିଈ ପାବିତାର୍ ପୁଥି ବେଗାର୍ ପାଢ଼ାଅ କେତେ ଚିଲ୍‍କା ନିମିନ୍ ସେଣାନ୍ ବାଇଜାନାଏ?” ୟୀଶୁ ଇନ୍‍କୁକେ କାଜିରୁଆଡ଼୍ କେଦାଏ, “ଇଙ୍ଗ୍ଆଃ ଶିଖାଅ ଇଙ୍ଗ୍ଆଃ ନାହାଲା, ମେନ୍ଦୋ ଇଙ୍ଗ୍‍କେ କୁକୁଲ୍ ନିଜାଃ ତାନାଃ। ଆଗାର୍ ଜେତାଏ ଇନିଜାଃ ସାନାଙ୍ଗ୍ ରେ ସେନେନ୍ ସାନାଙ୍ଗାଏ, ଦୋ ଇନିଃ ନେ ଶିଖାଅ ବିଷାୟ୍ କେ ସାରିକେୟାଏ ଚି ନେୟା ପାର୍ମେଶ୍ଵାର୍ ପାଡ଼େତେ ତାନାଃ ଚି ଇଙ୍ଗ୍ ଇଙ୍ଗ୍ଆଃ ପାଡ଼େତେ କାଜି ତାନିଙ୍ଗ୍। ଅକଏ ଆଜାଃ ପାଡ଼େତେ କାଜିୟାଏ, ଇନିଃ ଆୟାଃ ନୁତୁମ୍ ସାନାଙ୍ଗାଏ, ମେନ୍ଦୋ ଅକଏ ଆୟାଃ କୁକୁଲ୍ ନିଜାଃ ନୁତୁମ୍ ସାନାଙ୍ଗାଏ ହିନିଃଗି ସାର୍ତି ତାନିଃ, ହାର୍ ଇନିଜାଃ ରେ ଲୋଗୋ ବାନୋଗା। ଚିନାଃ ମୁଶା ନାବୀ ଆପେକେ ଆଇନ୍ କାଏ ଏମ୍ କାଦା? ଏଣ୍ଡେ ହ ଆପେ ଜେତାଏ ମୁଶା ନାବୀ ରାଃ ଆଇନ୍ କେ କାପେ ମାନାତିଙ୍ଗ୍ ତାନା। ଆପେ ଚିନାଃ ମେନ୍ତେ ଇଙ୍ଗ୍‍କେ ଗୋଏଃ ସାନାଙ୍ଗ୍ ତାନାପେ?” ହୋଡ଼ୋକୋ କାଜିରୁଆଡ଼୍ କେଦାକୋ, “ଆମାଃ ରେ ବୋଙ୍ଗାଆତ୍ମା ମେନିଜା! ଆମ୍‍କେ ଅକଏ ଗୋଏଃ ସାନାଙ୍ଗ୍ ତାନାଏ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ମିୟାଃ କାମି କାମିକେଦାଇଙ୍ଗ୍, ହାର୍ ଆପେ ସବେନ୍ ଆକ୍‍ଦାନ୍ଦା ହୋବାଅଃ ତାନାପେ। ଏନାମେନ୍ତେ ମୁଶା ନାବୀ ଆପେକେ ଖାତ୍ନା ରାଃ ଆନାଚୁ ଏମ୍ କାଦାଏ (ନେୟା ନାହାଲା ଚି ନେୟା ମୁଶା ନାବୀ ପାଡ଼େତେ ତାନାଃ ମେନ୍ଦୋ ପୁର୍ଖା-ଆପୁ କୋତେ ଚାଲ୍‍ଓକାନା), ହାର୍ ଆପେ ଆରାମେ ହୁଲାଙ୍ଗ୍ କଡ଼ାହୋନ୍ କୋରାଃ ଖାତ୍ନା ତାନାପେ। ଚିମ୍ତାଙ୍ଗ୍ ଆରାମେ ହୁଲାଙ୍ଗ୍ ରେ କଡ଼ାହୋନ୍ ରାଃ ଖାତ୍ନା ରିକାଅଃୱା ଏନାତେ ମୁଶା ନାବୀ ରାଃ ଆଇନ୍ ରାଃ ଆନାଚୁ କେ ମାନାତିଙ୍ଗ୍ଅଃ ତାନା, ଏଣ୍ଡେ ଆପେ ଇଙ୍ଗ୍ଆଃ ଚେତାନ୍ ରେ ଚିନାଃ ଲାଗିନ୍, ଖିସୋଃ ତାନାପେ ଚି ଇଙ୍ଗ୍ ମିୟାଃ ହୋଡ଼ କେ ଆରାମେ ହୁଲାଙ୍ଗ୍ ରେ ପୁରା-ପୁରୀ ବେଶ୍ କିଜାଇଙ୍ଗ୍। ମେଏଃମୁହାଡ଼୍ ନେଲ୍‍କେତେ ଆଲୋପେ ବିଚାର୍ ୟା ମେନ୍ଦୋ ଠିକ୍-ଠିକ୍ ବିଚାର୍ ପେ।” ଏନ୍ତେ ଚିମିନ୍ ୟୀରୁଶାଲେମ୍ ସାହାର୍ ରେ ତାଇତାନ୍ ହୋଡ଼ୋକୋ କାଜିକେଦାକୋ, “ଚିନାଃ ନିଈ ହିନିଃ ନାହାଲି ଅକନିଃକେ ୟାହୁଦୀ ଗୁରୁକୋ ଗୋଗୋଏଃ ନାମ୍ ତାନାକୋ? ମେନ୍ଦୋ ନେଲେପେ, ହିନିଃ ସବେନ୍ କୋୱାଃ ନେପେଲ୍ ରେ ବାକାଣ୍ ତାନାଏ ହାର୍ ଜାହାଁଏ ଇନିଃକେ ଜାହାନାଃ କାକୋ କାଜିତାନା। ଚିନାଃ ଆବୁୱାଃ ଗୁରୁକୋ ସାର୍ତି କାଜି ସାରିତାଦାକୋ ଚି ନିଈଗି ମାସୀହ୍ ତାନିଃ? ନିଈକେ ଦୋ ଆଲେ ସାରିଆଲେ ଚି ନିଈ କୋତାଃ ରେନ୍ ତାନିଃ, ମେନ୍ଦୋ ମାସୀହ୍ ଚିମ୍ତା ହିଜୁଗାଏ ଏଣ୍ଡେ ଜେତାଏ କାକୋ ସାରିୟା ଚି ଇନିଃ କୋତାଃ ରେନ୍ ତାନିଃ।” ଏନ୍ତେ ୟୀଶୁ ମାନ୍ଦିର୍ ରାଃ ରାଚା ଏତେ ଶିଖାଅ ତାନ୍ ଲୋଃ ଜୋର୍ତେ କାଜିକେଦାଏ, “ଆପେ ଇଙ୍ଗ୍‍କେ ସାରିୟାପେ, ହାର୍ ନେୟା ହ ସାରିୟାପେ ଚି ଇଙ୍ଗ୍ କୋତାଃ ରେନ୍ ତାନିଙ୍ଗ୍। ଇଙ୍ଗ୍ ଦୋ ଇଙ୍ଗ୍ଏତେ କାଇଙ୍ଗ୍ ହିଜୁଃ, ମେନ୍ଦୋ ଇଙ୍ଗ୍‍କେ କୁଲି ନିଈ ସାର୍ତି ତାନିଃ, ଇନିଃକେ ଆପେ କାପେ ସାରିୟା। ଇଙ୍ଗ୍ ଆଏଃକେ ସାରିୟାଇଙ୍ଗ୍ ଚିୟାଃଚି ଇଙ୍ଗ୍ ଆଜାଃ ପାଡ଼େତେ ତାନିଙ୍ଗ୍ ହାର୍ ଇନିଃଗି ଇଙ୍ଗ୍‍କେ କୁଲ୍ କାଦିଙ୍ଗାଏ।” ଏନ୍ତେ ଦୋ ଗୁରୁକୋ ଇନିଃକେ ସାବ୍ ନାଙ୍ଗ୍ ସାନାଙ୍ଗ୍ କେଦାକୋ, ଏଣ୍ଡେ ହ ଜାହାଁଏ କାକୋ ସାବ୍ କିଜା ଚିୟାଃଚି ଆୟାଃ ସାମାୟ୍ ନାଆ ସାନ୍ କା ପୁରା ଲେନା। ଏଣ୍ଡେ ହ ହୋଡ଼ୋକୋ ଏତେ ଥିମ୍ବାଗି ହୋଡ଼ୋକୋ ଇନିଃକେ ବିଶ୍ଵାସ୍ କିଜାକୋ, ହାର୍ କାଜିକେଦାକୋ, “ମାସୀହ୍ ଚିମ୍ତାଙ୍ଗ୍ ହିଜୁଗାଏ ଦୋ ଚିନାଃ ନେୟା ଏତେ ଥିମ୍ବା ଆକ୍‍ଦାନ୍ଦା କାମି ଦେଖାଅ ୟାଏ?” ଫାରିସୀ ହୋଡ଼ୋକୋ ହୋଡ଼ୋକୋକେ ଇନିଜାଃ ବିଷାୟ୍ ରେ ନେ କାଜିକୋକେ ହାପା-ହାପା କାଜିତାନ୍ ଆୟୁମ୍ କେଦାକୋ, ହାର୍ ପ୍ରାଧାନ୍ ୟାଜାକ୍‍କୋ ହାର୍ ଫାରିସୀ ହୋଡ଼ୋକୋ ଇନିଃକେ ସାବିନାଙ୍ଗ୍ ସିପାହୀକୋକେ କୁଲ୍ କେଦାକୋ। ଏନ୍ତେ ୟୀଶୁ କାଜିକେଦାଏ, “ଇଙ୍ଗ୍ ହୁଡ଼ିଙ୍ଗ୍ ସାମାୟ୍ ସାନ୍ ଆପେ ଲୋଃ ମେନାଇଙ୍ଗ୍ ୟା, ଏନ୍ତେ ଇଙ୍ଗ୍ ଇଙ୍ଗ୍ଆଃ କୁକୁଲ୍ ନିଃତାଃ ସେନୋଃ ରୁଆଡ଼୍ କୋୱାଇଙ୍ଗ୍। ଆପେ ଇଙ୍ଗ୍‍କେ ଦାଣାଇଙ୍ଗ୍ ୟାପେ, ମେନ୍ଦୋ କାପେ ନାମିଙ୍ଗ୍‍ୟା ହାର୍ ଇଙ୍ଗ୍ କୋତାଃ ସେନ୍‍ତାନାଇଙ୍ଗ୍, ହେନ୍ତାଃ ଆପେ କାପେ ହିଜୁଃ ଧାଡ଼ିୟା।” ଏନ୍ତେ ୟାହୁଦୀ ଗୁରୁକୋ ଆକୋ-ଆକୋରେ ବାକାଣ୍ ଜାନାକୋ, “ନିଈ କୋତାଃ ସେନୋଗାଏ ଚି ଆବୁ ନିଈକେ କାବୁ ନାମିୟା? ଚିନାଃ ନିଈ ଇନ୍‍କୁ ତାଃ ସେନୋଗାଏ ଅକନ୍ ୟାହୁଦୀ ହୋଡ଼ୋକୋ ୟୁନାନୀ ହୋଡ଼ୋକୋ ତାଃ ଛିତିଛାନ୍ଦ୍ କେତେ ତାଇନ୍ ତାନାକୋ, ହାର୍ ୟୁନାନୀ ହୋଡ଼ୋକୋକେ ହଗି ଶିଖାଅ କୋୱାଏ? ନେୟା ଚିକାନ୍ ବାକାଣ୍ ଇନିଃ କାଜିକେଦାଏ, ଚି ‘ଆପେ ଇଙ୍ଗ୍‍କେ ଦାଣାଇଙ୍ଗ୍ ୟାପେ, ମେନ୍ଦୋ କାପେ ନାମିଙ୍ଗ୍‍ୟା, ହାର୍ ଅକ୍ତାଃରେ ଇଙ୍ଗ୍ ସେନ୍‍ତାନାଇଙ୍ଗ୍, ହେନ୍ତାଃ ଆପେ କାପେ ହିଜୁଃ ଧାଡ଼ିୟା?’ ” ପାରାବ୍ ରାଃ ଆଖ୍ରି ହୁଲାଙ୍ଗ୍, ଅକନାଃ ମୁଖ୍ୟା ହୁଲାଙ୍ଗ୍ ତାନାଃ, ୟୀଶୁ ତିଙ୍ଗୁ ଜାନାଏ ହାର୍ ଜୋର୍ତେ କାଜିକେଦାଏ, “ଆଗାର୍ ଜାହାଁଏ ତେତାଙ୍ଗ୍ତାନ୍ ରେଦୋ ଇଙ୍ଗ୍ଆଃ ତାଃ ହିଜୁଃକାଏ ହାର୍ ନୁୱେକାଏ। ଅକଏ ଇଙ୍ଗ୍ଆଃ ରେ ବିଶ୍ଵାସ୍ ୟାଏ, ଜେଲେକା ପାବିତାର୍ ପୁଥି ରେ ମେନାଃ ‘ଇନ୍‍କୁୱାଃ ହିର୍‍ଦାୟ୍ ଏତେ ଜୀଦାନ୍-ଦାଆ ରାଃ ନାଈ ଅଡୋଙ୍ଗ୍ଅଗା।’” ଇନିଃ ନେ ବାଚାନ୍ ପାବିତାର୍ ଆତ୍ମା ରାଃ ବିଷାୟ୍ ରେ କାଜିକେଦାଏ, ଅକନିଃକେ ଇନିଜାଃ ଚେତାନ୍ ବିଶ୍ଵାସ୍ ତାନ୍ ହୋଡ଼ୋକୋ ନାମେ ଲାଗିନ୍ ତାଇକେନାକୋ, ଚିୟାଃଚି ଏନ୍ ସାନ୍ ଆତ୍ମା ସିର୍ମାଦିଶୁମ୍ ଏତେ କାଏ ଆଡ଼୍‍ଗୁ ଲେନା, ଚିୟାଃଚି ୟୀଶୁ ଏନ୍ ସାନ୍ ଆୟାଃ ମାନାରାଙ୍ଗ୍ ରେ କାଏ ସେଟେର୍ ଲେନାଏ। ଏଣ୍ଡେ ହୋଡ଼ୋକୋ ଥାଲା ଏତେ ଅକଏ-ଅକଏ ନେ କାଜି ଆୟୁମ୍ କେତେ କାଜିକେଦାକୋ, “ସାର୍ତିଗୀ ନିଈ ହେନ୍ ନାବୀ ତାନିଃ।” ଏଟାଃ କୋ କାଜିକେଦାକୋ, “ନିଈ ମାସୀହ୍ ତାନିଃ।” ମେନ୍ଦୋ ଚିମିନାଙ୍ଗ୍ କୋ କାଜିକେଦା, “ଚିଲ୍‍କା? ଚିନାଃ ମାସୀହ୍ ଗାଲିଲୀ ଜିଲ୍ଲା ଜାଗା ଏତେ ହିଜୁଗାଏ? ଚିନାଃ ପାବିତାର୍ ପୁଥି ନେୟା କାଏ କାଜିତାନାଏ ଚି ମାସୀହ୍ ଦାଉଦ୍ ରାଜା ରାଃ କିଲି ଏତେ ଆଡୋଃ ବେଥ୍ଲେହେମ୍ ହାତୁ ତେ ହିଜୁଗାଏ, ଅକ୍ତାଃ ଦାଉଦ୍ ରାଜା ତାଇନ୍ ତାଇନାଏ?” ଏନାମେନ୍ତେ ହୋଡ଼ୋକୋୱାଃ ଥାଲା ରେ ଆକୋୱାଃ କାଜି କାଜୋକା ଜାନା। ଇନ୍‍କୁ ଏତେ ଚିମିନାଙ୍ଗ୍ କୋ ଇନିଃକେ ସାବ୍‍ନାଙ୍ଗ୍ ସାନାଙ୍ଗ୍ ତାଇକେନାକୋ, ମେନ୍ଦୋ ଜାହାଁଏ କାକୋ ସାବ୍ କିଜା। ଏନ୍ତେ ସିପାହୀକୋ ପ୍ରାଧାନ୍ ୟାଜାକ୍ କୋତାଃ ହାର୍ ଫାରିସୀ ହୋଡ଼ୋ କୋତାଃ ରୁଆଡ଼୍ ଜାନାକୋ, ଇନ୍‍କୁ ହିନ୍‍କୁକେ କାଜିକେଦାକୋ, “ଚିନାଃ ମେନ୍ତେ ହିନିଃକେ କାପେ ସାବ୍ ଆଉକିଜା?” ସିପାହୀକୋ କାଜିକେଦାକୋ, “ଜାହାଁଏ ହ ଇନିଜାଃ ଲେକା ବାକାଣ୍ କାକୋ କାଜିକାଦା।” ଫାରିସୀ ହୋଡ଼ୋକୋ ଇନ୍‍କୁକେ କାଜିକେଦାକୋ, “ଚିନାଃ ଆପେ ହ ଲୋଗୋ ଜାନାପେ? ଚିନାଃ ଆଲେୟାଃ ଗୁରୁ କୋଏତେ ୟାଦୋ ଫାରିସୀ ହୋଡ଼ୋ କୋଏତେ ଜାହାଁଏ ହ ଇନିଃକେ ବିଶ୍ଵାସ୍ କିଜାକୋ? ମେନ୍ଦୋ ନେ ହୋଡ଼ୋକୋ ଅକନ୍‍କୋ ମୁଶା ନାବୀ ରାଃ ଆଇନ୍ କାକୋ ସାରିୟା, ପାର୍ମେଶ୍ଵାର୍ ଏତେ ସାର୍ପାଅ କାନାକୋ।” ନିକୁଦିମୁସ୍ ଅକନିଃ ୟୀଶୁ ତାଃ ସିଦା ନିଦା ରେ ହିଜୁଃ ଲେନ୍ ତାଇନାଏ ହାର୍ ଇନ୍‍କୁ ଏତେ ମିହୋଡ଼୍ ତାଇକେନାଏ, ଇନ୍‍କୁକେ କାଜିକେଦାଏ, “ଚିନାଃ ଆବୁୱାଃ ମୁଶା ନାବୀ ରାଃ ଆଇନ୍ ଜାହାନ୍ ହୋଡ଼ କେ, ଚିମିନ୍ ସାନ୍ତେ ସିଦା ଇନିଜାଃ ଆୟୁମ୍‍କେତେ କାଏ ସାରିଲେୟାଏ ଚି ଇନିଃ ଚିନାଃ ରିକା ତାନାଏ; ଦୋଷୀ କାଏ ବାଇୟେୟାଏ?” ଇନ୍‍କୁ ଇନିଃକେ କାଜିରୁଆଡ଼୍ କେଦାକୋ, “ଚିନାଃ ଆମ୍ ହ ଗାଲିଲୀ ଜିଲ୍ଲା ରେନ୍ ତାନ୍‍ମେ? ପାବିତାର୍ ପୁଥି ରେ ଦାଣା କେତେ ନେଲ୍ ଲେମ୍ ଗାଲିଲୀ ଜିଲ୍ଲା ଏତେ ଜାହାନ୍ ନାବୀ କାକୋ ଅଡୋଙ୍ଗ୍ଅଗା।” ଏନ୍ତେ ସବେନ୍ କୋ ଆକୋୱାଃ-ଆକୋୱାଃ ଅଡ଼୍ଆଃ ତେ ସେନୋଃ ଜାନାକୋ। ମେନ୍ଦୋ ୟୀଶୁ ଆୟାଃ ଚେଲାକୋ ଲୋଃ ଜାଏତୁନ୍ ଦାରୁ ବୁରୁ ତେ ସେନୋଃ ନାଏ। ଏଟାଃ ହୁଲାଙ୍ଗ୍ ସେତାଃ ପାଡ଼୍ ଇନିଃ ଆଡୋଃଗି ମାନ୍ଦିର୍ ରାଃ ରାଚା ରେ ହିଜୁଃନାଏ, ଆଡୋଃ ସବେନ୍ ହୋଡ଼ୋକୋ ଇନିଜାଃ ନାଡ଼େଏ ହିଜୁଃ ଜାନାକୋ ହାର୍ ଇନିଃ ଦୁବ୍ କେତେ ଇନ୍‍କୁକେ ଶିଖାଅ କେଃକୋୱାଏ। ଏନ୍ତେ ଆଇନ୍ ଗୁରୁକୋ ଆଡୋଃ ଫାରିସୀ ହୋଡ଼ୋକୋ ମିୟାଃ କୁଡ଼ି କେ ଆଉକିଜାକୋ, ଅକନିଃ ବ୍ୟାଭିଚାର୍ ରେ ସାବାକାନ୍ ତାଇକେନାଏ, ହାର୍ ଇନିଃକେ ଥାଲା ରେ ତିଙ୍ଗୁ କେତେ ୟୀଶୁ କେ କାଜିକିଜାକୋ, “ହେ ଗୁରୁ, ନେ କୁଡ଼ି ବ୍ୟାଭିଚାର୍ ତାନ୍ ଲୋଃ ସାବ୍ କାନାଏ। ମୁଶା ନାବୀ ରାଃ ଆଇନ୍ ରେ ଆଏଃ ଆଲେକେ ଆନାଚୁ ଏମ୍ କାଦାଏ ଚି ନେଲେକାନ୍ କୁଡ଼ିକୋକେ ଦିରି ଥେର୍ କୋ ଚାହି, ଏଣ୍ଡେ ଆମ୍ ନେ କୁଡ଼ି ଆଃ ବିଷାୟ୍ ରେ ଚିନାଃ କାଜିତାନାମ୍?” ଇନ୍‍କୁ ଇନିଃକେ ପାର୍ଖାଅ ଲାଗିନ୍ ନେ କାଜି କାଜିକେଦାକୋ ଏନାତେ ଇନିଃ ରେ ଦୋଷ୍ ଲାଗାଅ ଲାଗିନ୍ ଜାହାନ୍ କାଜିକୋ ନାମେୟା। ମେନ୍ଦୋ ୟୀଶୁ କବଃ କେତେ ସାର୍ସାର୍ ତେ ଅତେ ରେ ଅହଲ୍ ଲାଗାଅ ଜାନାଏ। ଚିମ୍ତା ଇନ୍‍କୁ ଇନିଃକେ କୁଲିକାତି ତାଇନାକୋ, ଏଣ୍ଡେ ଇନିଃ ସିଧା ଜାନାଏ ହାର୍ ଇନ୍‍କୁକେ କାଜିକେଦାଏ, “ଆପେ ଏତେ ଅକଏ ଚିଉଲା ହ କାଏ ପାପ୍ କାଦାଏ, ଇନିଃ ସିଦା ନିଈକେ ଦିରି ଥେର୍ କାଏ।” ହାର୍ ଆଡୋଃଗି କବଃ କେତେ ଅତେ ରେ ସାର୍ସାର୍ ତେ ଅହଲ୍ ଲାଗାଅଜାନାଏ। ମେନ୍ଦୋ ନେୟା ଆୟୁମ୍‍କେତେ ମାରାଙ୍ଗ୍ ଏତେ ହୁପୁଡିଙ୍ଗ୍ ସାନ୍, ମିହୋଡ଼୍-ମିହୋଡ଼୍ କେତେ ଆକୋ ପାପୀ ତାନ୍‍କୋ ଏନା ଆଟ୍‍କାର୍ କେତେ ଅଡୋଙ୍ଗ୍ ଜାନାକୋ, ହାର୍ ୟୀଶୁ ଏସ୍କାର୍ ଗି ତାଇଜାନାଏ, ହାର୍ କୁଡ଼ି ହେନ୍ତାଃ ଗି ଥାଲା ରେ ତିଙ୍ଗୁ ତାଇଜାନାଏ। ୟୀଶୁ ସିଧା ଜାନାଏ ହାର୍ ଇନିଃକେ କାଜିକେଦାଏ, “ହେ କୁଡ଼ି, ଇନ୍‍କୁ କୋତାଃ ସେନୋଃ ଜାନାକୋ? ଚିନାଃ ଜେତାଏ ଆମ୍‍କେ ଦାଣ୍ଡ୍ ରାଃ ଆନାଚୁ କାକୋ ଏମ୍ କେଦା?” ଇନିଃ କାଜିକେଦାଏ, “ହେ ସାହେବ୍, ଜେତାଏ ହ କାହା।” ୟୀଶୁ କାଜିକେଦାଏ, “ଇଙ୍ଗ୍ ହ ଆମ୍‍କେ ଦାଣ୍ଡ୍ ରାଃ ଆନାଚୁ କାଇଙ୍ଗ୍ ଏମାମେତାନା; ଜୁ ଅଡ଼୍ଆଃ, ହାର୍ ଆୟୁର୍ ତେ ଆଲୋମ୍ ପାପ୍ ୟା।” ଏନ୍ତେ ୟୀଶୁ ଆଡୋଃଗି ହୋଡ଼ୋକୋକେ କାଜିକେଦାଏ, “ଇଙ୍ଗ୍ ଅତେଦିଶୁମ୍ ରାଃ ମାସ୍କାଲ୍ ତାନିଙ୍ଗ୍; ଅକଏ ଇଙ୍ଗ୍‍କେ ଅତୋଙ୍ଗିଙ୍ଗ୍ ୟାଏ ଇନିଃ ନୁବାଃ ରେ କାଏ ସେନେୟାଏ, ମେନ୍ଦୋ ମାସ୍କାଲ୍ ନାମେୟାଏ ଏନା ଇନିଃକେ ଜାନାଓ ଜୀଦାନ୍ ଏମେୟାଏ।” ଫାରିସୀ ହୋଡ଼ୋକୋ ଇନିଃକେ କାଜିକିଜାକୋ, “ଆମ୍ ଆମାଃ ଗୋୱା ଆମ୍‍ଗି ଏମ୍ ତାନାମ୍, ଆମାଃ ଗୋୱା ସାର୍ତି ନାହାଲା।” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଆଗାର୍ ଇଙ୍ଗ୍ ଇଙ୍ଗ୍ଆଃ ଗୋୱା ଇଙ୍ଗ୍ ଏମ୍ ତାନିଙ୍ଗ୍, ଏଣ୍ଡେ ହ ଇଙ୍ଗ୍ଆଃ ଗୋୱା ସାର୍ତି ତାନାଃ, ଚିୟାଃଚି ଇଙ୍ଗ୍ ସାରିୟାଇଙ୍ଗ, ଚି ଇଙ୍ଗ୍ କୋତାଃ ଏତେ ହିଜୁଃ କାନିଙ୍ଗ୍ ହାର୍ କୋତାଃ ତେ ସେନୋଃ ତାନିଙ୍ଗ୍? ମେନ୍ଦୋ ଆପେ କାପେ ସାରିତାନା ଚି ଇଙ୍ଗ୍ କୋତାଃ ଏତେ ହିଜୁଃ ତାନିଙ୍ଗ୍ ୟାଦୋ କୋତାଃ ତେ ସେନୋଃ ତାନିଙ୍ଗ୍। ଆପେ ହୋଡ଼ କୋୱାଃ ପାହୋମ୍ ଲେକା ବିଚାର୍ ୟାପେ, ଇଙ୍ଗ୍ ଅକେୟାଃ ହ କାଇଙ୍ଗ୍ ବିଚାର୍ ୟା। ହାର୍ ଆଗାର୍ ଇଙ୍ଗ୍ ବିଚାର୍ ରିକାୟାଇଙ୍ଗ୍ ଏଣ୍ଡେ ହ ଇଙ୍ଗ୍ଆଃ ବିଚାର୍ ସାର୍ତି ତାନାଃ; ଚିୟାଃଚି ଇଙ୍ଗ୍ ଏସ୍କାର୍ ବାଙ୍ଗୁଇଙ୍ଗ୍‍ୟା, ମେନ୍ଦୋ ଇଙ୍ଗ୍ ମେନାଇଙ୍ଗ୍‍ୟା, ହାର୍ ଆପୁ ହ ମେନାଇଜା ଅକନିଃ ଇଙ୍ଗ୍‍କେ କୁଲ୍ କାଦିଙ୍ଗାଏ। ଆପେୟାଃ ମୁଶା ନାବୀ ରାଃ ଆଇନ୍ ରେହ ଅଲାକାନା ଚି ଦୁଇ ଝାନ୍ ରାଃ ଗୋୱା ମେଶା କେତେ ସାର୍ତି ହୋବାଅଃୱା। ପାହିଲା ଇଙ୍ଗ୍ ଇଙ୍ଗ୍ଆଃ ଗୋୱା ଏମ୍ ତାନିଙ୍ଗ୍, ହାର୍ ଏଟାଃ ଆପୁ ଇଙ୍ଗ୍ଆଃ ଗୋୱା ଏମ୍‍ତାନାଏ ଅକନିଃ ଇଙ୍ଗ୍‍କେ କୁଲ୍ କାଦିଙ୍ଗାଏ।” ଇନ୍‍କୁ ଇନିଃକେ କାଜିକେଦାକୋ, “ଆମାଃ ଆପୁ କୋତାଃ ରେ ମେନାଇଜା?” ୟୀଶୁ କାଜିରୁଆଡ଼୍ କେଃକୋୱାଏ, “ନାଦୋ ଆପେ ଇଙ୍ଗ୍‍କେ ସାରିୟାପେ, ନାଦୋ ଇଙ୍ଗ୍ଆଃ ଆପୁ କେ, ଆଗାର୍ ଇଙ୍ଗ୍‍କେ ସାରିତେପେ, ଏଣ୍ଡେ ଇଙ୍ଗ୍ଆଃ ଆପୁ କେ ହଗି ସାରିତେପେ।” ନେ କାଜି ଇନିଃ ମାନ୍ଦିର୍ ରାଃ ରାଚା ରେ ଶିଖାଅତାନ୍ ଇମ୍ତା ଭାଣ୍ଡାର୍ ଅଡ଼୍ଆଃ ରାଃ ନାଡ଼େଏ ରେ କାଜିକେଦାଏ, ହାର୍ ଜେତାଏ ହ ଇନିଃକେ କାକୋ ସାବ୍‍କିଜା, ଚିୟାଃଚି ଇନିଜାଃ ଦୁକୁ ସାହାତିଙ୍ଗ୍ ହାର୍ ଗୋଜୋଃ ରାଃ ସାମାୟ୍ ଏନ୍ ସାନ୍ କା ସେଟେର୍ ଲେନା। ୟୀଶୁ ଆଡୋଃଗି ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ସେନୋଃ ତାନିଙ୍ଗ୍ ହାର୍ ଆପେ ଇଙ୍ଗ୍‍କେ ଦାଣାଇଙ୍ଗ୍ ୟାପେ ହାର୍ ଆପେ ଆପେୟାଃ ବେଗାର୍ ପାପ୍ ଛାମା ରେଗି ଗୋଜୋଗାପେ, ଅକତାଃ ଇଙ୍ଗ୍ ସେନୋଃ ତାନିଙ୍ଗ୍, ହେନ୍ତାଃ ଆପେ କାପେ ହିଜୁଃ ଧାଡ଼ିୟା।” ଏନାତେ ୟାହୁଦୀ ଗୁରୁ କୋ କାଜିକେଦାକୋ, “ଚିନାଃ ଇନିଃ ଆଏଃଗି ଗୋଜେନାଏ, ଯେ କାଜିୟାଏ, ‘ଅକତାଃ ଇଙ୍ଗ୍ ସେନୋଃ ତାନିଙ୍ଗ୍ ହେନ୍ତାଃ ଆପେ କାପେ ହିଜୁଃ ଧାଡ଼ିୟା?’ ” ୟୀଶୁ ଇନ୍‍କୁକେ କାଜିକେଦାଏ, “ଆପେ ନେତାଃ ଅତେଦିଶୁମ୍ ରେ ଜାନାମ୍ କାନାପେ, ଇଙ୍ଗ୍ ସିର୍ମାଦିଶୁମ୍ ତେ ହିଜୁଃ କାନିଙ୍ଗ୍; ଆପେ ଅତେଦିଶୁମ୍ ରେନ୍ ତାନ୍‍ପେ, ଇଙ୍ଗ୍ ଅତେଦିଶୁମ୍ ରେନ୍ ନାହାଲାଇଙ୍ଗ୍। ଏନାମେନ୍ତେ ଇଙ୍ଗ୍ ଆପେକେ କାଜିକେଦାଇଙ୍ଗ୍ ଚି ଆପେ ଆପେୟାଃ ବେଗାର୍ ପାପ୍ ଛାମା ରେଗି ଗୋଜୋଗାପେ; ଚିୟାଃଚି ଆଗାର୍ ଆପେ କାପେ ବିଶ୍ଵାସେୟା ଚି ଇଙ୍ଗ୍ ଇନିଃଗି ତାନିଙ୍ଗ୍ ଏଣ୍ଡେ ଆପେ ଗୋଜୋଗାପେ ହାର୍ ଆପେୟାଃ ପାପ୍ କା ଛାମା ଅଗା।” ୟାହୁଦୀ ଗୁରୁ କୋ ଇନିଃକେ କାଜିକେଦାକୋ, “ଆମ୍ ଅକଏ ତାନ୍‍ମେ?” ୟୀଶୁ ଇନ୍‍କୁକେ କାଜିକେଃକୋୱାଏ, “ଇନିଃଗି ତାନିଙ୍ଗ୍ ଅକନିଃ ସୁରୁଏତେ ଆପେକେ କାଜିପେ ତାନିଙ୍ଗ୍। ଆପେୟାଃ ବିଷାୟ୍ ରେ ଇଙ୍ଗ୍‍କେ ଥିମ୍ବାଗି କାଜି ରାଃ ମେନାଃ ଆଡୋଃ ବିଚାର୍ ରିକା ରାଃ ମେନାଃ, ମେନ୍ଦୋ ଇଙ୍ଗ୍ଆଃ କୁଲ୍‍ନିଃ ସାର୍ତି ତାନିଃ, ହାର୍ ଅକନାଃ ଇଙ୍ଗ୍ ଇନିଃତେ ଆୟୁମା କାଦିଙ୍ଗ୍, ଏନାଗି ଅତେଦିଶୁମ୍ ରେନ୍ ହୋଡ଼ୋକୋକେ କାଜିତାନିଙ୍ଗ୍।” ଇନ୍‍କୁ କାକୋ ବୁଝାଅଜାନା ଚି ଇନିଃ ଆଲେ ତେ ଆପୁ ଆଃ ବିଷାୟ୍ ରେ କାଜି ତାନାଏ। ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, ଚିମ୍ତା ଆପେ ଇଙ୍ଗ୍ ମାନ୍‍ୱା ରାଃ ହୋନ୍ କେ ଚେତାନ୍ କ୍ରୁଶ୍ ରେ ରାକାବିୟାପେ, ଏଣ୍ଡେ ସାରିୟାପେ ଚି ଇଙ୍ଗ୍ ଇନିଃଗି ତାନିଙ୍ଗ୍, ଇଙ୍ଗ୍ ଇଙ୍ଗ୍ଆଃ ତେ ଜାହାନାଃ କାଇଙ୍ଗ୍ କାମିୟା, ମେନ୍ଦୋ ଜେଲେକା ଆପୁ ଇଙ୍ଗ୍‍କେ ଶିଖାଅ କାଦିଙ୍ଗାଏ ଏନ୍‍ଲେକାଗି ନେ କାଜିକୋ କାଜିୟାଇଙ୍ଗ୍। ଇଙ୍ଗ୍ଆଃ କୁଲ୍‍ନିଃ ଇଙ୍ଗ୍ ଲୋଃ ମେନିଜା, ଇନିଃ ଇଙ୍ଗ୍‍କେ ଏସ୍କାର୍ କାଏ ବାଗେ କାଦିଙ୍ଗାଏ, ଚିୟାଃଚି ଇଙ୍ଗ୍ ସବେନ୍ ଇମ୍ତା ଏନ୍ କାମି ଗି କାମିୟାଇଙ୍ଗ୍, ଅକନାଃ ତେ ଇନିଃ ସୁକୁୱାଏ। ୟୀଶୁ ନେ ବାକାଣ୍ କାଜିତାନ୍ ଇମ୍ତା ରେ, ଥିମ୍ବାଗି ହୋଡ଼ୋକୋ ଇନିଜାଃ ରେ ବିଶ୍ଵାସ୍ କିଜାକୋ। ଏନ୍ତେ ୟୀଶୁ ଏନ୍ ୟାହୁଦୀ ଗୁରୁ କୋକେ ଅକନ୍‍କୋ ଇନିଃକେ ବିଶ୍ଵାସ୍ ଲିଜାକୋ, କାଜିକେଃକୋୱାଏ, “ଆଗାର୍ ଆପେ ଇଙ୍ଗ୍ଆଃ ବାଚାନ୍ ରେ ତାଇନ୍ ରେଦୋ ପେ, ଏଣ୍ଡେ ସାର୍ତି ଗି ଇଙ୍ଗ୍ଆଃ ଚେଲା ହୋବାୱାପେ। ଆପେ ସାର୍ତି କେ ସାରିୟାପେ, ହାର୍ ସାର୍ତି ଆପେକେ ରାଡ଼ା ପେୟାଏ।” ଇନ୍‍କୁ ୟୀଶୁ କେ କାଜିରୁଆଡ଼୍ କିଜାକୋ, “ଆଲେ ଦୋ ଆବ୍ରାହାମ୍ ରାଃ କିଲି ଏତେ ତାନ୍‍ଲେ ହାର୍ ଚିଉଲା ହ ଜାହେଁୟାଃ ଦାସୀ କାଲେ ବାଇକାନା। ଏଣ୍ଡେ ଆମ୍ ଚିଲ୍‍କା କାଜିତାନାମ୍, ଚି ଆପେ ରାଡ଼ା କେନୋଗାପେ?” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଅକଏ ପାପ୍ ତାନାଏ, ଇନିଃ ପାପ୍ ରାଃ ଦାସୀ ତାନିଃ। ଦାସୀ ସବେନ୍ ହୁଲାଙ୍ଗ୍ ନାଙ୍ଗ୍ ଅଡ଼୍ଆଃ ରେ କାଏ ତାଇନାଏ, ହୋନ୍‍କଡ଼ା ସବେନ୍ ହୁଲାଙ୍ଗ୍ ନାଙ୍ଗ୍ ତାଇନୋଗାଏ। ଏନାମେନ୍ତେ ଆଗାର୍ ହୋନ୍‍କଡ଼ା ଆପେକେ ରାଡ଼ା ପେୟାଏ, ଏଣ୍ଡେ ସାର୍ତି ଗି ଆପେ ରାଡ଼ା କେନୋଗାପେ। ଇଙ୍ଗ୍ ସାରିୟାଇଙ୍ଗ୍ ଚି ଆପେ ଆବ୍ରାହାମ୍ ରାଃ କିଲି ରେନ୍ ତାନ୍‍ପେ, ଏଣ୍ଡେ ହ ଇଙ୍ଗ୍ଆଃ ବାଚାନ୍ ଆପେୟାଃ ହିର୍‍ଦାୟ୍ ରେ ଜାଗା କାଏ ନାମ୍ ତାନା, ଏନାଲାଗିନ୍ ଆପେ ଇଙ୍ଗ୍‍କେ ଗୋଗୋଏଃ ସାନାଙ୍ଗ୍ ତାନାପେ। ଇଙ୍ଗ୍ ଏନାଗି କାଜିୟାଇଙ୍ଗ୍, ଅକନାଃ ଇଙ୍ଗ୍ଆଃ ଆପୁ ତାଃ ନେଲ୍ କାଦିଙ୍ଗ୍, ହାର୍ ଆପେ ଏନାଗି ରିକାତାନାପେ ଅକନାଃ ଆପେ ଆପେୟାଃ ଆପୁ ତେ ଆୟୁମ୍ କାଦାପେ।” ଇନ୍‍କୁ ଇନିଃକେ କାଜିରୁଆଡ଼୍ କିଜାକୋ, “ଆଲେୟାଃ ପୁର୍ଖା ଆପୁ ଦୋ ଆବ୍ରାହାମ୍ ତାନିଃ।” ୟୀଶୁ ଇନ୍‍କୁକେ କାଜିକେଃକୋୱାଏ, “ଆଗାର୍ ଆପେ ଆବ୍ରାହାମ୍ ରାଃ ସାନ୍ତାନ୍ ତାଇନ୍ ତେପେ, ଏଣ୍ଡେ ଆବ୍ରାହାମ୍ ଲେକା କାମି କାମିତେପେ। ମେନ୍ଦୋ ନାଆ ଆପେ ଇଙ୍ଗ୍ ଲେକାନ୍ ହୋଡ଼ କେ ଗୋଗୋଏଃ ସାନାଙ୍ଗ୍ ତାନାପେ, ଅକନିଃ ଆପେକେ ଏନ୍ ସାର୍ତି ବାଚାନ୍ ଉଦୁବ୍ କେଃପେୟାଏ ଅକନାଃ ପାର୍ମେଶ୍ଵାର୍ ଏତେ ଆୟୁମ୍ କେଦାଏ, ନେକା ଦୋ ଆବ୍ରାହାମ୍ କାଏ ରିକା ଲେଦାଏ। ଆପେ ଆପେୟାଃ ଆପୁ ଲେକା କାମି ତାନାପେ।” ଇନ୍‍କୁ ଇନିଃକେ କାଜିକେଦାକୋ, “ଆଲେ ବ୍ୟାଭିଚାର୍ ଏତେ କାଲେ ଜାନାମ୍ କାନା, ଆଲେୟାଃ ମିୟାଃଗି ଆପୁ ମେନାଇଜା ମାନେ ପାର୍ମେଶ୍ଵାର୍।” ୟୀଶୁ ଇନ୍‍କୁକେ କାଜିକେଃକୋୱାଏ, “ଆଗାର୍ ପାର୍ମେଶ୍ଵାର୍ ଆପେୟାଃ ଆପୁ ତାଇନ୍‍ତେ, ଏଣ୍ଡେ ଆପେ ଇଙ୍ଗ୍‍କେ ଦୁଲାଡ଼ିଙ୍ଗ୍ ତେପେ; ଚିୟାଃଚି ଇଙ୍ଗ୍ ପାର୍ମେଶ୍ଵାର୍ ଏତେ ହିଜୁଃ କାନିଙ୍ଗ୍। ଇଙ୍ଗ୍ ଇଙ୍ଗ୍ଆଃ ତେ କାଇଙ୍ଗ୍ ହିଜୁଃ କାନା, ମେନ୍ଦୋ ଇନିଃଗି ଇଙ୍ଗ୍‍କେ କୁଲ୍ କାଦିଙ୍ଗାଏ। ଆପେ ଇଙ୍ଗ୍ଆଃ ବାକାଣ୍ ଚିନାଃ ଲାଗିନ୍ କାପେ ବୁଝାଅଃ ତାନା? ନେୟା ଏନାମେନ୍ତେ ଚି ଆପେ ଇଙ୍ଗ୍ଆଃ ବାଚାନ୍ କାପେ ଆୟୁମ୍ ସାନାଙ୍ଗ୍ ତାନା। ଆପେ ଆପେୟାଃ ଆପୁ ଶାଏତାନ୍ ପାଡ଼େତେ ତାନ୍‍ପେ, ହାର୍ ଆପେ ଆପେୟାଃ ଆପୁ ରାଃ ଶିତୃ ସାନାଙ୍ଗ୍ କୋକେ ପୁରା ନାଙ୍ଗ୍ ସାନାଙ୍ଗ୍ ତାନାପେ। ଇନିଃ ଦୋ ସୁରୁଏତେ ଗୋଗୋଏଃନିଃ ତାନିଃ, ହାର୍ ସାର୍ତି ରେ ବାଇକେତେ କାଏ ତାଇଜାନାଏ, ଚିୟାଃଚି ଇନିଜାଃ ରେ ସାର୍ତି ବାନୋଗା। ଚିମ୍ତା ଇନିଃ ହିଡ଼େୟାଏ, ଆଜାଃ ସ୍ଵଭାବ୍ ଏତେ ଗି କାଜିୟାଏ, ଚିୟାଃଚି ଇନିଃ ହିହିଡ଼୍‍ନିଃ ତାନିଃ ହାର୍ ହିଡ଼୍-କାଜି ରାଃ ଆପୁ ତାନିଃ। ମେନ୍ଦୋ ଇଙ୍ଗ୍ ସାର୍ତି କାଜିୟାଇଙ୍ଗ୍, ଏଣ୍ଡେହ ଆପେ ଇଙ୍ଗ୍ଆଃ କାପେ ବିଶ୍ଵାସ୍ ତାନା। ଆପେ ଏତେ ଅକଏ ଇଙ୍ଗ୍‍କେ ପାପୀ ମେନ୍ତେ ଦୋଷୀ ବାଇତାନାଏ? ଆଗାର୍ ଇଙ୍ଗ୍ ସାର୍ତି କାଜିତାନିଙ୍ଗ୍, ଏଣ୍ଡେ ଆପେ ଇଙ୍ଗ୍ଆଃ ଚିନାଃ ଲାଗିନ୍ କାପେ ବିଶ୍ଵାସ୍ ତାନା? ଅକଏ ପାର୍ମେଶ୍ଵାର୍ ରାଃ ତାନିଃ, ଇନିଃ ପାର୍ମେଶ୍ଵାର୍ ରାଃ ବାକାଣ୍ ଆୟୁମ୍‍ୟାଏ, ହାର୍ ଆପେ ନେୟା ଲାଗିନ୍ କାପେ ଆୟୁମ୍‍ୟା ଚିୟାଃଚି ଆପେ ପାର୍ମେଶ୍ଵାର୍ ପାଡ଼େତେ ନାହାଲାପେ।” ନେୟା ଆୟୁମ୍‍କେତେ ୟାହୁଦୀ ଗୁରୁ କୋ ଇନିଃକେ କାଜିକେଦାକୋ, “ଚିନାଃ ଆଲେ ଠିକ୍ କାଲେ କାଜିତାନା, ଚି ଆମ୍ ସାମାରୀୟା ତାନ୍‍ମେ, ହାର୍ ଆମାଃ ରେ ବୋଙ୍ଗାଆତ୍ମା ମେନିଜା?” ୟୀଶୁ କାଜିରୁଆଡ଼୍ କେଦାଏ, “ଇଙ୍ଗ୍ଆଃ ରେ ବୋଙ୍ଗାଆତ୍ମା ବାଙ୍ଗୁଇଜା, ମେନ୍ଦୋ ଇଙ୍ଗ୍ ଇଙ୍ଗ୍ଆଃ ଆପୁ ଗାଃ ମାଇନ୍ ତାନିଙ୍ଗ୍, ଆଡୋଃ ଆପେ ଇଙ୍ଗ୍ଆଃ କାପେ ମାଇନ୍ ତାନା। ମେନ୍ଦୋ ଇଙ୍ଗ୍ ଇଙ୍ଗ୍‍କେ ମାଇନ୍ ଏପେ ମେନ୍ତେ କାଇଙ୍ଗ୍ ସାନାଙ୍ଗ୍ ତାନା, ହାଁ, ମିହୋଡ଼୍ ମେନାଇଜା ଅକନିଃ ସାନାଙ୍ଗାଏ ଚି ଇଙ୍ଗ୍ଆଃ ମାଇନୋଃକା ଆଡୋଃ ଇଙ୍ଗ୍‍କେ କାକୋ ମାଇନ୍ କୋକେ ବିଚାର୍ କୋୱାୟାଏ। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, ଆଗାର୍ ଜେତାଏ ଇଙ୍ଗ୍ଆଃ ବାଚାନ୍ କେ ମାନାତିଙ୍ଗ୍ ୟାଏ, ଏଣ୍ଡେ ଇନିଃ ଚିଉଲା ହ କାଏ ଗୋଜୋଗା।” ୟାହୁଦୀ ଗୁରୁ କୋ ଇନିଃକେ କାଜିକିଜାକୋ, “ନାଆ ଆଲେ ସାରିତାଦାଲେ ଚି ଆମାଃ ରେ ବୋଙ୍ଗାଆତ୍ମା ମେନିଜା। ଆବ୍ରାହାମ୍ ଗୋଏଃ ଜାନାଏ, ହାର୍ ନାବୀ କୋ ହ ଗୋଏଃ ଜାନାକୋ, ହାର୍ ଆମ୍ କାଜିୟାମ୍, ‘ଆଗାର୍ ଜେତାଏ ଇଙ୍ଗ୍ଆଃ ବାଚାନ୍ କେ ମାନାତିଙ୍ଗ୍ ୟାଏ ଏଣ୍ଡେ ଇନିଃ ଚିଉଲା ହ କାଏ ଗୋଜୋଗାଏ।’ ଆଲେୟାଃ ପୁର୍ଖା ଆପୁ ଆବ୍ରାହାମ୍ ଦୋ ଗୋଏଃ ଜାନାଏ। ଚିନାଃ ଆମ୍ ଇନିଃତେ ମାରାଙ୍ଗ୍ ତାନ୍‍ମେ? ହାର୍ ନାବୀ କୋ ହ ଗୋଏଃ ଜାନାକୋ। ଆମ୍ ଆପାନ୍‍କେ ଚିନାଃ ପାହୋମ୍ ତାନାମ୍? ୟୀଶୁ କାଜିରୁଆଡ଼୍ କେଃକୋୱାଏ, ଆଗାର୍ ଇଙ୍ଗ୍ ଇଙ୍ଗ୍ଆଃ ମାନାରାଙ୍ଗ୍ ରିକାୟାଇଙ୍ଗ୍, ଏଣ୍ଡେ ଇଙ୍ଗ୍ଆଃ ମାନାରାଙ୍ଗ୍ ଜାହାନାଃ ନାହାଲା, ମେନ୍ଦୋ ଇଙ୍ଗ୍ଆଃ ମାନାରାଙ୍ଗ୍ ରିକାନିଃ ଇଙ୍ଗ୍ଆଃ ଆପୁ ତାନିଃ, ଅକନିଃକେ ଆପେ କାଜିୟାପେ, ଚି ଇନିଃ ଆବୁୱାଃ ପାର୍ମେଶ୍ଵାର୍ ତାନିଃ। ଆପେ ଦୋ ଇନିଃକେ କାପେ ସାରିୟା, ମେନ୍ଦୋ ଇଙ୍ଗ୍ ଇନିଃକେ ସାରିୟାଇଙ୍ଗ୍, ହାର୍ ଆଗାର୍ ଇଙ୍ଗ୍ କାଜିୟାଇଙ୍ଗ୍ ଚି ଇନିଃକେ କାଇଙ୍ଗ୍ ସାରିୟା, ଏଣ୍ଡେ ଇଙ୍ଗ୍ ଆପେ ଲେକା ଲୋଗୋ ହୋଡ଼ ବାଇୟୋଗାଇଙ୍ଗ୍; ମେନ୍ଦୋ ଇଙ୍ଗ୍ ଇନିଃକେ ସାରିୟାଇଙ୍ଗ୍ ହାର୍ ଇନିଜାଃ ବାଚାନ୍ କେ ମାନାତିଙ୍ଗ୍ ୟାଇଙ୍ଗ୍। ଆପେୟାଃ ପୁର୍ଖା ଆପୁ ଆବ୍ରାହାମ୍ ଇଙ୍ଗ୍ଆଃ ହିଜୁଃ ରାଃ ହୁଲାଙ୍ଗ୍ କେ ନେନେଲ୍ ଆଶ୍ରା ରେ ଥିମ୍ବାଗି ରାଶିକାଅଃ ତାଇକେନାଏ; ଆଡୋଃ ଇନିଃ ନେଲ୍‍କେଦାଏ, ହାର୍ ରାଶିକା ଜାନାଏ।” ଏନ୍ତେ ୟାହୁଦୀ ଗୁରୁ କୋ ଇନିଃକେ କାଜିକେଦାକୋ, “ନାଆ ସାନ୍ ଆମ୍ ପାଚାଶ୍ ବାରାଶ୍ ରେନ୍ ହ କାମ୍ ହୋବାକାନା, ଏଣ୍ଡେ ହ ଆମ୍ ଆବ୍ରାହାମ୍ କେ ନେଲ୍ ତାଇଜାମ୍?” ୟୀଶୁ ଇନ୍‍କୁକେ କାଜିକେଃକୋୱାଏ, ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, “ଆବ୍ରାହାମ୍ ଜାନାମୋଃ ସିଦାରେ ଇଙ୍ଗ୍ ମେନାଇଙ୍ଗ୍‍ୟା।” ଏଣ୍ଡେ ଇନ୍‍କୁ ୟୀଶୁ କେ ଥେର୍ ଗୋଏଃ ଲାଗିନ୍ ଦିରି ଉଠାଓ କେଦାକୋ, ମେନ୍ଦୋ ୟୀଶୁ ଉକୁକେତେ ମାନ୍ଦିର୍ ଏତେ ଅଡୋଙ୍ଗ୍ ଜାନାଏ। ଚିମ୍ତାଙ୍ଗ୍ ୟୀଶୁ ଆୟାଃ ଚେଲାକୋ ଲୋଃ ସେନ୍ ତାଇକେନାଏ ଇନିଃ ମିୟାଃ ହୋଡ଼ କେ ନେଲ୍ କିଜାଏ, ଅକନିଃ ଜାନାମ୍ ଏତେ ଆନ୍ଧା ତାଇକେନାଏ। ଆୟାଃ ଚେଲାକୋ ଇନିଃକେ କୁଲିକିଜାକୋ, “ହେ ଗୁରୁ, ଅକଏ ପାପ୍ ଲେଃ ତାଇନାଏ ଚି ନିଈ ଆନ୍ଧା ଜାନାମ୍ କାନାଏ, ନେ ହୋଡ଼ ଚି, ଆଜାଃ ଏଙ୍ଗାଆପୁ କିନ୍?” ୟୀଶୁ କାଜିରୁଆଡ଼୍ କେଃକୋୱାଏ, ନାଦୋ ନିଈ ପାପ୍ ଲେଃ ତାଇନାଏ, ନାଦୋ ଆଜାଃ ଏଙ୍ଗାଆପୁ କିନ୍, ମେନ୍ଦୋ ନିଈ ନେୟା ଏନାମେନ୍ତେ ଆନ୍ଧା ଜାନାମ୍ ଜାନାଏ ଚି ପାର୍ମେଶ୍ଵାର୍ ରାଃ ପେଡ଼େଏ ଇନିଜାଃ ରେ ଉଦୁବୋଃୱା। ଅକନିଃ ଇଙ୍ଗ୍‍କେ କୁଲ୍ କାଦିଙ୍ଗାଏ, ଆବୁ ଆଜାଃ କାମି କେ ଶିଙ୍ଗି-ଶିଙ୍ଗି ରେଗି ରିକା ଦାର୍‍କାର୍; ଏନ୍ ନିଦା ହିଜୁଃ ରାଃ ମେନାଃ ଅକଣ୍ଡେ ରେ ଜେତାଏ କାକୋ କାମି ଧାଡ଼ିୟା। ଚିମ୍ତାଙ୍ଗ୍ ସାନ୍ତେ ଇଙ୍ଗ୍ ଅତେଦିଶୁମ୍ ରେ ମେନାଇଙ୍ଗ୍‍ୟା, ଏନ୍ ସାନ୍ତେ ଇଙ୍ଗ୍ ଅତେଦିଶୁମ୍ ରେନ୍ ମାସ୍କାଲ୍ ତାନିଙ୍ଗ୍। ନେୟା କାଜିକେତେ ଇନିଃ ଅତେ ରେ ବେଏଃ କେଦାଏ, ହାର୍ ଏନ୍ ବେଏଃ ଦାଆ ତେ ହାସା କେ ସାନାଅ କେଦାଏ, ହାର୍ ଏନ୍ ହାସା କେ ଏନ୍ ଆନ୍ଧା ଗାଃ ମେଏଃ ରେ ଲାଗାଅ କେତେ, ଇନିଃକେ କାଜିକେଦାଏ, “ଜୁ ଶିଲୋହ୍ ରେଆ ପୋଖରା ରେ ଆବୁଙ୍ଗେନ୍‍ମେ, (ଶିଲୋହ୍ ରାଃ ମାନେ ‘କୁଲାକାନା’ ତାନାଃ)। ଇନିଃ ସେନ୍ କେତେ ଆବୁଙ୍ଗ୍ ଜାନାଏ, ହାର୍ ନେଲ୍ ତାନ୍ ଲୋଃ ରୁଆଡ଼୍ ଜାନାଏ। ଏନ୍ତେ ଆୟାଃ ନାଡ଼େଏ-ଜାପାଃ ରେନ୍ ହୋଡ଼ୋକୋ ହାର୍ ଏନ୍ ହୋଡ଼ୋକୋ ଅକନ୍‍କୋ ସିଦା ଇନିଃକେ ଆସିଜୋମ୍ ତାନ୍ କୋ ନେଲ୍ ଲିଃ ତାଇକେନାକୋ, ଆକୋ ଆକୋରେ କାଜିକେଦାକୋ, ଚିନାଃ ନିଈ ହିନିଃ ନାହାଲାଏ, ଅକନିଃ ଦୁବ୍ କେତେ ଆସିଜୋମ୍ ତାଇନାଏ?” ଚିମିନ୍ ହୋଡ଼ୋକୋ କାଜିକେଦାକୋ, “ନିଈ ଇନିଃଗି ତାନିଃ,” ଏଟାଃ କୋ କାଜିକେଦାକୋ, “କାହା, ମେନ୍ଦୋ ଇନିଃ ଲେକା ଗିୟାଏ।” ଇନିଃ କାଜିକେଦାଏ, “ଇଙ୍ଗ୍ ଇନିଃଗି ତାନିଙ୍ଗ୍।” ଏନ୍ତେ ଇନ୍‍କୁ ଇନିଃକେ କୁଲିକିଜାକୋ, ଆମ୍ ଚିଲ୍‍କା ତେ ନେଲ୍ ଧାଡ଼ିକେଦାମ୍? ଇନିଃ କାଜିରୁଆଡ଼୍ କେଦାଏ, “ୟୀଶୁ ନୁତୁମ୍ ମିୟାଃ ହୋଡ଼ ହାସା ସାନାଅ କେଦାଏ, ହାର୍ ଇଙ୍ଗ୍ଆଃ ମେଏଃ ରେ ଗୋସୋଃ କେଦାଏ, ଏନ୍ତେ ଇଙ୍ଗ୍‍କେ କାଜିକେଦିଙ୍ଗ୍ଆଏ, ‘ଶିଲୋହ୍ ରାଃ ପୋଖରା ରେ ଆବୁଙ୍ଗ୍ କେନୋଃମେ,’ ଏନ୍ତେ ଇଙ୍ଗ୍ ସେନ୍ ଜାନିଙ୍ଗ୍ ହାର୍ ଆବୁଙ୍ଗ୍ ଜାନିଙ୍ଗ୍, ଏନ୍ତେ ନେଲ୍ ଧାଡ଼ିଜାନିଙ୍ଗ୍।” ଇନ୍‍କୁ ଇନିଃକେ କୁଲିକିଜାକୋ, “ଇନିଃ କୋତାଃ ରିୟା?” ଇନିଃ କାଜିକେଦାଏ, “ଇଙ୍ଗ୍ କାଇଙ୍ଗ୍ ସାରିତାନା।” ହୋଡ଼ୋକୋ ଇନିଃକେ ଅକନିଃ ସିଦା ଆନ୍ଧା ତାଇକେନାଏ ଫାରିସୀ ହୋଡ଼ୋକୋ ତାଃ ଆଉକିଜାକୋ। ଅକନ୍ ହୁଲାଙ୍ଗ୍ ୟୀଶୁ ହାସା ସାନାଅ କେତେ ଇନିଜାଃ ମେଏଃ କେ ବେଶ୍ ଲେଃ ତାଇନାଏ, ଏନା ୟାହୁଦୀ କୋୱାଃ ଆରାମେ ହୁଲାଙ୍ଗ୍ ତାଇକେନା। ଏନ୍ତେ ଆଡୋଃଗି ଫାରିସୀ ହୋଡ଼ୋକୋ ଇନିଃକେ କୁଲିକିଜାକୋ, ଚି ଇନିଜାଃ ମେଏଃ ଚିଲ୍‍କା ତେ ବେଶ୍ ଜାନା। ଇନିଃ ଇନ୍‍କୁକେ କାଜିକେଃକୋୱାଏ, “ଇନିଃ ଇଙ୍ଗ୍ଆଃ ମେଏଃ ରେ ହାସା କେ ଗୋସୋଃ ତାଦାଏ ଆଡୋଃ ଇଙ୍ଗ୍ ଆବୁଙ୍ଗ୍ ଜାନିଙ୍ଗ୍ ହାର୍ ନାଆ ନେଲ୍ ତାନିଙ୍ଗ୍।” ନେୟା ରେ ଚିମିନାଙ୍ଗ୍ ଫାରିସୀ ହୋଡ଼ୋକୋ କାଜିକେଦାକୋ, “ନେ ହୋଡ଼ ପାର୍ମେଶ୍ଵାର୍ ପାଡ଼େତେ ନାହାଲାଏ, ଚିୟାଃଚି ଇନିଃ ଆରାମେ ହୁଲାଙ୍ଗ୍ କେ କାଏ ମାନାତିଙ୍ଗ୍ ତାନା।” ଏଟାଃ କୋ କାଜିକେଦା, “ପାପୀ ହୋଡ଼ ନେଲ୍‍କାନ୍ ଚିହ୍ନା କାମିକୋ ଚିଲ୍‍କା ଦେଖାଅ ଧାଡ଼ିୟାଏ?” ଏନ୍ତେ ଇନ୍‍କୁୱାଃ କାଜି କାଜୋକା ଜାନା। ଇନ୍‍କୁ ଏନ୍ ଆନ୍ଧା କେ ଆଡୋଃଗି କାଜିକିଜାକୋ, “ଇନିଃ ଆମାଃ ମେଏଃ ବେଶ୍ ତାଦାଏ, ଆମ୍ ଇନିଜାଃ ବିଷାୟ୍ ରେ ଚିନାଃ କାଜିତାନାମ୍?” ଇନିଃ କାଜିକେଦାଏ, “ଇନିଃ ନାବୀ ତାନିଃ।” ମେନ୍ଦୋ ୟାହୁଦୀ ଗୁରୁ କୋକେ ବିଶ୍ଵାସ୍ କାହବାଜାନା ଚି ଇନିଃ ଆନ୍ଧା ତାଇକେନାଏ ହାର୍ ନାଆ ନେଲ୍‍ତାନାଏ, ଚିମିନ୍ ସାନ୍ତେ ଚି ଇନ୍‍କୁ ଅକନିଜାଃ ମେଏଃ ବେଶ୍ ହୋବାଲେନ୍ ତାଇନା ଇନିଜାଃ ଏଙ୍ଗା-ଆପୁ କିନ‍୍‍କେ କେଡ଼ାକେତେ କାକୋ କୁଲିକେଃ କିନା, “ଚିନାଃ ନିଈ ଆବେନାଃ ହୋନ୍‍କଡ଼ା ତାନିଃ, ଅକନିଃ କେ ଆବେନ୍ କାଜିତାନାବେନ୍ ଚି ଆନ୍ଧା ଜାନାମ୍ ଲେନାଏ? ଏଣ୍ଡେ ନାଆ ଇନିଃ ଚିଲ୍‍କା ନେଲ୍‍ତାନାଏ?” ଇନିଜାଃ ଏଙ୍ଗା-ଆପୁ କାଜିରୁଆଡ଼୍ କେଦାକିନ୍, “ଆଲିଙ୍ଗ୍ ଦୋ ସାରିତାନାଲିଙ୍ଗ୍ ଚି ନିଈ ଆଲିଙ୍ଗ୍ଆଃ ହୋନ୍‍କଡ଼ା ତାନିଃ ହାର୍ ଆନ୍ଧା ଜାନାମ୍ ଲେନ୍ ତାଇନାଏ। ମେନ୍ଦୋ ଆଲିଙ୍ଗ୍ ନେୟା କାଲିଙ୍ଗ୍ ସାରିତାନା ଚି ନାଆ ଚିଲ୍‍କା ତେ ନେଲ୍‍ତାନାଏ, ହାର୍ ନା ନେୟା ଆଲିଙ୍ଗ୍ ସାରିତାନାଲିଙ୍ଗ୍ ଚି ଅକଏ ଇନିଜାଃ ମେଏଃ କେ ବେଶ୍ ତାଦାଏ। ଇନିଃ ସେଣାନ୍ ଗିୟାଏ, ଇନିଃ କେଗି କୁଲିପେ ଇନିଃ ଆଜାଃ ବିଷାୟ୍ ରେ ଆଏଃ ଗି କାଜିଧାଡ଼ିୟାଏ।” ନେ କାଜି ଇନିଜାଃ ଏଙ୍ଗା-ଆପୁକିନ୍ ନେୟାଲାଗିନ୍ କାଜିକେଦାକିନ୍ ଚିୟାଃଚି ଇନ୍‍କିନ୍ ୟାହୁଦୀ ଗୁରୁ କୋକେ ବୋରୋ ତାଇକେନାକିନ୍, ଚିୟାଃଚି ୟାହୁଦୀ ଗୁରୁ କୋ ରୋଜୋଟ୍ କାଃ ତାଇକେନାକୋ ଚି ଆଗାର୍ ଜେତାଏ କାଜିୟାଏ ଚି ଇନିଃ ମାସୀହ୍ ତାନିଃ, ଏଣ୍ଡେ ଇନିଃକେ ବିନ୍ତିଅଡ଼୍ଆଃ ତେ ଅଡୋଙ୍ଗ୍ ରିକାଅଗା। ନେୟାମେନ୍ତେ ଇନିଜାଃ ଏଙ୍ଗା-ଆପୁକିନ୍ କାଜିକେଦାକିନ୍, “ଇନିଃ ସେଣାନ୍ ଗିୟାଏ, ଇନିଃ କେଗି କୁଲିପେ।” ଏନ୍ତେ ଆଡୋଃ ମିଶା ୟାହୁଦୀ ଗୁରୁ କୋ ଏନ୍ ହୋଡ଼ କେ ଅକନିଃ ଚି ଆନ୍ଧା ତାଇକେନାଏ କେଡ଼ାକେତେ ଇନିଃକେ କାଜିକିଜାକୋ, ପାର୍ମେଶ୍ଵାର୍ ରାଃ ମାନାରାଙ୍ଗ୍ ଏମେ। ଆଲେ ଦୋ ସାରିତାନାଲେ ଚି ଏନ୍ ହୋଡ଼ ପାପୀ ତାନିଃ। ଇନିଃ କାଜିରୁଆଡ଼୍ କେଦାଏ, “ଇଙ୍ଗ୍ କାଇଙ୍ଗ୍ ସାରିତାନା ଚି ଇନିଃ ପାପୀ ତାନିଃ ଚି ନାହାଲାଏ, ଇଙ୍ଗ୍ ମିୟାଃ କାଜି ସାରିତାନାଇଙ୍ଗ୍ ଚି ଇଙ୍ଗ୍ ଆନ୍ଧା ତାଇକେନାଇଙ୍ଗ୍ ହାର୍ ନାଆ ନେଲ୍ ଧାଡ଼ି ତାନିଙ୍ଗ୍।” ଇନ୍‍କୁ ଇନିଃକେ ଆଡୋଃଗି କାଜିକିଜାକୋ, “ଇନିଃ ଆମାଃ ଲୋଃ ଚିନାଃ ରିକାକେଦା? ହାର୍ ଚିଲ୍‍କା ଆମାଃ ମେଏଃ ବେଶ୍ ତାଦାଏ?” ଇନିଃ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଦୋ ଆପେକେ କାଜି ଛାବା କାଃପେୟାଇଙ୍ଗ୍, ହାର୍ ଆପେ କାପେ ଆୟୁମ୍ କେଦା, ନାଆ ଆଡୋଃ ମିଶା ଚିନାଃ ମେନ୍ତେ ଆୟୁମ୍ ସାନାଙ୍ଗ୍ ତାନାପେ? ଚିନାଃ ଆପେ ହଗି ଆଜାଃ ଚେଲା ବାଇୟେନ୍ ସାନାଙ୍ଗ୍ ତାନାପେ?” ଏନ୍ତେ ଇନ୍‍କୁ ଇନିଃକେ ଏଗେର୍ କେତେ କାଜିକେଦାକୋ, “ଆମ୍ ଗି ଆଜାଃ ଚେଲା ତାନ୍‍ମେ, ଆଲେ ଦୋ ମୁଶା ନାବୀ ଗାଃ ଚେଲା ତାନ୍‍ଲେ। ଆଲେ ସାରିୟାଲେ ଚି ପାର୍ମେଶ୍ଵାର୍ ମୁଶା ନାବୀ ଲୋଃ ବାକାଣ୍ କେଦାଏ, ମେନ୍ଦୋ ନେ ହୋଡ଼ କେ କାଲେ ସାରିୟା ଚି କୋତାଃ ରେନ୍ ତାନିଃ।” ଇନିଃ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ନେୟା ଦୋ ଆକ୍‍ଚାକାଅଃ ରାଃ କାଜି ତାନାଃ ଚି ଆପେ କାପେ ସାରିତାନା ଚି ଇନିଃ କୋତାଃ ରେନ୍ ତାନିଃ, ଏନ୍ ରେହ ଇନିଃ ଇଙ୍ଗ୍ଆଃ ମେଏଃ ବେଶ୍ ତାଦାଏ। ଆଲେ ସାରିତାନାଲେ ଚି ପାର୍ମେଶ୍ଵାର୍ ପାପୀ କୋୱାଃ କାଏ ଆୟୁମ୍ ମେୟା, ମେନ୍ଦୋ ଆଗାର୍ ଅକଏ ପାର୍ମେଶ୍ଵାର୍ ରାଃ ସେୱାନିଃ ତାନିଃ, ହାର୍ ଆଜାଃ ସାନାଙ୍ଗ୍ ଲେକା ସେନେରେ, ଦୋ ଇନିଃ ଇନିଜାଃ ଆୟୁମେୟାଏ। ଅତେଦିଶୁମ୍ ରାଃ ଏନେଟେଃ ତେ ନେୟା ଚିଉଲା ହ କା ଆୟୁମ୍ କାନା ଚି, ଜେତାଏ ଜାନାମ୍ ଏତେ ଆନ୍ଧା ହୋଡ଼ ନିଜାଃ ମେଏଃ କେ ବେଶ୍ ତାଦାଏ। ଆଗାର୍ ନେ ହୋଡ଼ ପାର୍ମେଶ୍ଵାର୍ ପାଡ଼େତେ କାଏ ତାଇନ୍ ତେୟାଃଏ, ଏଣ୍ଡେ ଜେତ୍ନାଃ ରିକା କାଏ ଧାଡ଼ିତେୟାଃଏ।” ଇନ୍‍କୁ ଇନିଃକେ କାଜିରୁଆଡ଼୍ କିଜାକୋ, “ଆମ୍ ଦୋ ପୁରାଃଗି ପାପ୍ ରେ ଜାନାମ୍ କାନାମ୍, ଆମ୍ ଆଲେକେ ଚିନାଃ ଶିଖାଅ ଲେ ତାନାମ୍?” ଏନ୍ତେ ଇନ୍‍କୁ ଇନିଃକେ ବିନ୍ତିଅଡ଼୍ଆଃ ଏତେ ବାହାରି ଅଡୋଙ୍ଗ୍ ତାଇଜାକୋ। ୟୀଶୁ ଆୟୁମ୍ କେଦାଏ ଚି ଇନ୍‍କୁ ଇନିଃକେ ବିନ୍ତିଅଡ଼୍ଆଃ ଏତେ ବାହାରି ଅଡୋଙ୍ଗ୍ ତାଇଜାକୋ, ହାର୍ ଚିମ୍ତାଙ୍ଗ୍ ଇନିଃ ଲୋଃ ନାପାମ୍ ଜାନାଏ ଦୋ କାଜିକେଦାଏ, “ଚିନାଃ ଆମ୍ ମାନ୍‍ୱା ରାଃ ହୋନ୍ ରେ ବିଶ୍ଵାସ୍ ତାନାମ୍?” ଇନିଃ କାଜିରୁଆଡ଼୍ କିଜାଏ, “ହେ ସାହେବ୍, ହିନିଃ ଅକଏ ତାନିଃ, ଚି ଇଙ୍ଗ୍ ଇନିଜାଃ ଚେତାନ୍ ବିଶ୍ଵାସ୍ ୟାଇଙ୍ଗ୍?” ୟୀଶୁ ଇନିଃକେ କାଜିକେଦାଏ, “ଆମ୍ ଇନିଃକେ ନେଲ୍ ଛାବା କାଇଜାମ୍, ହାର୍ ଅକଏ ଆମାଃ ଲୋଃ ବାକାଣ୍ ତାନାଏ ଇନିଃଗି ତାନିଃ।” ଇନିଃ କାଜିକେଦାଏ, “ହେ ପ୍ରାଭୁ, ଇଙ୍ଗ୍ ବିଶ୍ଵାସ୍ ତାନିଙ୍ଗ୍।” ହାର୍ ଆଏଃକେ ଇକ୍ଡ଼ୁମ୍ କେତେ ଜୋହାର୍ କିଜାଏ। ଏନ୍ତେ ୟୀଶୁ କାଜିକିଜାଏ, “ଇଙ୍ଗ୍ ନେ ଅତେଦିଶୁମ୍ ରେ ବିଚାର୍ ଲାଗିନ୍ତେ ହିଜୁଃ କାନିଙ୍ଗ୍, ଏନାତେ ଅକଏ କାକୋ ନେଲ୍ ତାନା ଇନ୍‍କୁ ନେଲେ କାକୋ, ହାର୍ ଅକଏ ନେଲ୍ ତାନାକୋ ଇନ୍‍କୁ ଆନ୍ଧା ବାଇୟୋଃ କାକୋ।” ଅକନ୍ ଫାରିସୀ ହୋଡ଼ୋକୋ ଆଜାଃ ଲୋଃ ତାଇନ୍ କେନାକୋ, ଇନ୍‍କୁ ନେ କାଜି ଆୟୁମ୍‍କେତେ ଇନିଃକେ କାଜିକିଜାକୋ, “ଚିନାଃ ଆଲେ ହ ଆନ୍ଧା ତାନ୍‍ଲେ?” ୟୀଶୁ ଇନ୍‍କୁକେ କାଜିକେଃକୋୱାଏ, “ଆଗାର୍ ଆପେ ଆନ୍ଧା ତାଇନୋଃ ତେପେ ଏଣ୍ଡେ ପାପୀ କାପେ ହୋବାଅଃ ତେପେ, ମେନ୍ଦୋ ନାଆ କାଜି ତାନାପେ ଚି ଆଲେ ନେଲ୍ ତାନାଲେ, ଏନାମେନ୍ତେ ଆପେୟାଃ ପାପ୍ ବାଇ ତାଇନୋଃୱା ହାର୍ ଆପେକେ କା ଛାମାଅଗା।” “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଜାହାଁଏ ହ ଦୁହାର୍ ରାଃ ହୋରାତେ ମିଣ୍ଡୀ କୋୱାଃ ଗୋଣା ରେ କାଏ ବୋଲୋୱା, ଇନିଃ କୁମ୍ଡ଼ୁ ହାର୍ ଡାକୁ ତାନିଃ। ମେନ୍ଦୋ ମିଣ୍ଡୀ କୋୱାଃ ଗୁପୀନିଃ ଦୁହାର୍ ହୋରା ତେ ଭିତାର୍ ବୋଲୋୱାଏ। ଇନିଜାଃ ଲାଗିନ୍ତେ ଦୁହାର୍ ହୋରୋନିଃ ଦୁହାର୍ ନିଈ ତାଆଏ, ହାର୍ ମିଣ୍ଡୀକୋ ଇନିଜାଃ କେଡ଼ା କେ ଆୟୁମ୍ଉରୁମ୍ ୟାକୋ, ଆଡୋଃ ଇନିଃ ଆଜାଃ ମିଣ୍ଡୀ କୋକେ ନୁତୁମ୍ ସାବ୍ କେତେ କେଡ଼ା କୋୱାଏ ହାର୍ ବାହାରି ତେ ଇଦିକୋୱାଏ। ଚିମ୍ତା ଇନିଃ ଆଜାଃ ସବେନ୍ ମିଣ୍ଡୀ କୋକେ ବାହାରି ତେ ନିଈ କେକୋୱାଏ, ଦୋ ଇନ୍‍କୁୱାଃ ଆୟୁର୍-ଆୟୁର୍ ସେସେନାଏ, ହାର୍ ମିଣ୍ଡୀକୋ ଆଜାଃ ତାୟୋମ୍-ତାୟୋମ୍ ଅତୋଙ୍ଗିୟାକୋ, ଚିୟାଃଚି ଇନ୍‍କୁ ଇନିଜାଃ କେଡ଼ା କେ ଆୟୁମ୍ଉରୁମ୍ ୟାକୋ। ମେନ୍ଦୋ ଇନ୍‍କୁ ଏଟାଃନିଃ କେ କାକୋ ଅତୋଙ୍ଗିୟା, ମେନ୍ଦୋ ଇନିଃତାଃ ତେ ନିରାକୋ, ଚିୟାଃଚି ଇନ୍‍କୁ ଏଟାଃନିଃ ଜାଃ କେଡ଼ା କାକୋ ଆୟୁମ୍ଉରୁମ୍ଏୟା।” ୟୀଶୁ ଇନ୍‍କୁକେ ନେ ଜୋନୋକା କାଜିୟାଃକୋୱାଏ, ମେନ୍ଦୋ ଇନ୍‍କୁ କାକୋ ବୁଝାଅଜାନା ଚି ନେ ବାକାଣ୍ ରାଃ ଚିନାଃ ମାନେ ତାନାଃ ଅକନାଃ ଇନିଃ ଆବୁକେ କାଜିୟାବୁତାନାଏ। ଏନ୍ତେ ୟୀଶୁ ଇନ୍‍କୁକେ ଆଡୋଃଗି କାଜିୟାଃକୋୱାଏ, “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, ମିଣ୍ଡୀ କୋୱାଃ ଦୁହାର୍ ଇଙ୍ଗ୍ ତାନିଙ୍ଗ୍। ଚିମିନାଙ୍ଗ୍ ଇଙ୍ଗ୍ଆଃ ତେ ସିଦାରେ ହିଜୁଃଲେନାକୋ ଇନ୍‍କୁ ସବେନ୍ କୁମ୍ଡ଼ୁ ହାର୍ ଡାକୁ ତାନ୍‍କୋ, ମେନ୍ଦୋ ମିଣ୍ଡୀକୋ ଇନ୍‍କୁୱାଃ କାକୋ ଆୟୁମ୍ କେଦା। ଦୁହାର୍ ଇଙ୍ଗ୍ ତାନିଙ୍ଗ୍; ଆଗାର୍ ଜେତାଏ ଇଙ୍ଗ୍ଆଃ ହୋରାତେ ଦୁହାର୍ ଭିତାର୍ ବୋଲୋୱାଏ, ଏଣ୍ଡେ ଇନିଃକେ ପାର୍ମେଶ୍ଵାର୍ ବାଞ୍ଚାଅୱିୟାଏ ହାର୍ ଭିତାର୍ ବାହାରି ଅଡୋଙ୍ଗ୍ ବୋଲୋୱାଏ ହାର୍ ଜୋମେୟାଃ ନାମେୟାଏ। କୁମ୍ଡ଼ୁ ଦୋ ଆଡୋଃ ଜେତାନ୍ କାମି ଲାଗିନ୍ କାହା ମେନ୍ଦୋ ଖାଲି କୁମ୍ଡ଼ୁ ଲାଗିନ୍ ହାର୍ ଗୋଗୋଏଃ ଲାଗିନ୍ ହାର୍ ନାଷ୍ଟ୍ ଲାଗିନ୍ ହିଜୁଗାଏ; ଇଙ୍ଗ୍ ନେୟା ଲାଗିନ୍ ହିଜୁଃ କାନିଙ୍ଗ୍ ଚି ଇନ୍‍କୁ ଜୀଦାନ୍ ନାମେକାକୋ ଆଡୋଃ ପୁରାଃ ଗି ନାମେକାକୋ। ବୁଗିନ୍ ଗୁପୀନିଃ ଇଙ୍ଗ୍ ତାନିଙ୍ଗ୍। ବୁଗିନ୍ ଗୁପୀନିଃ ମିଣ୍ଡୀକୋ ଲାଗିନ୍ ଆଜାଃ ଜୀଉ ଏମେୟାଏ। ଦାସୀ ନାଦୋ ଗୁପୀନିଃ ତାନିଃ ନାଦୋ ମିଣ୍ଡୀ କୋୱାଃ ଗୋମ୍‍କେ ତାନିଃ, ହୁଣ୍ଡାର୍ କେ ହିଜୁଃ ତାନ୍ ନେଲ୍‍କେତେ, ମିଣ୍ଡୀ କୋକେ ବାଗେ କେତେ ନିର୍ କୋଃୱାଏ; ଏନ୍ତେ ହୁଣ୍ଡାର୍ ମିଣ୍ଡୀଗୋଟ୍ ରେ ବୋଲୋ କେତେ ଝାପ୍ଟାଅ କୋୱାଏ ହାର୍ ଛିତି-ଛାନ୍ କେକୋୱାଏ। ଇନିଃ ଏନା ଲାଗିନ୍ତେ ନିର୍ କୋୱାଏ ଚିୟାଃଚି ଇନିଃ ଦାସୀ ତାନିଃ, ହାର୍ ଇନିଃକେ ମିଣ୍ଡୀ କୋୱା ଚିନ୍ତା ବାନୋଗା। ବୁଗିନ୍ ଗୁପୀନିଃ ଇଙ୍ଗ୍ ତାନିଙ୍ଗ୍; ଇଙ୍ଗ୍ ଇଙ୍ଗ୍ଆଃ ମିଣ୍ଡୀ କୋକେ ସାରିକୋୱାଇଙ୍ଗ୍, ହାର୍ ଇଙ୍ଗ୍ଆଃ ମିଣ୍ଡୀକୋ ଇଙ୍ଗ୍‍କେ ସାରିୟାକୋ। ଜେଲେକା ଆପୁ ଇଙ୍ଗ୍‍କେ ସାରିୟାଏ ଆଡୋଃ ଇଙ୍ଗ୍ ଆପୁ କେ ସାରିୟାଇଙ୍ଗ୍ ହାର୍ ଇଙ୍ଗ୍ ମିଣ୍ଡୀକୋ ଲାଗିନ୍ ଗୋଜୋଃ ନାଙ୍ଗ୍ ସେକାଡ଼୍ କାନୋଃ ୱାଇଙ୍ଗ୍। ଇଙ୍ଗ୍ଆଃ ଆଡୋଃଗି ମିଣ୍ଡୀକୋ ମେନାକୋୱା, ଅକନ୍ କୋ ନେ ମିଣ୍ଡୀ ଗୋଣା ରେନ୍ ନାହାଲାକୋ। ଇଙ୍ଗ୍‍କେ ଇନ୍‍କୁ କେ ୟଗି ଆହାଉ ଜାରୁରୀ ମେନାଃ। ଇନ୍‍କୁ ଇଙ୍ଗ୍ଆଃ କେଡ଼ା ଆୟୁମ୍ ୟାକୋ, ଏନ୍ତେ ମିୟାଃ ଗି ଗୋଟ୍ ହାର୍ ମିହୋଡ଼୍ ଗି ଗୁପୀନିଃ ହୋବାୱାଏ। ଆପୁ ଏନାଲାଗିନ୍ତେ ଇଙ୍ଗ୍‍କେ ଦୁଲାଡ଼ିଙ୍ଗ୍ ୟାଏ ଚି ଇଙ୍ଗ୍ ଇଙ୍ଗ୍ଆଃ ସାନାଙ୍ଗ୍ ତେ ଜୀଉ ଏମେୟାଇଙ୍ଗ୍, ଏନ୍ତେ ଆଡୋଃଗି ଜୀଉ ନାମ୍ କେୟାଇଙ୍ଗ୍। ଜେତାଏ ହ ଇଙ୍ଗ୍ଆଃ ଜୀଉ କେ ରେଏଃ କାକୋ ଧାଡ଼ିୟା, ମେନ୍ଦୋ ଏନାକେ ଇଙ୍ଗ୍ ଗି ଏମେୟାଇଙ୍ଗ୍। ଇଙ୍ଗ୍‍କେ ଏନା ଏହେମ୍ ରାଃ ଆଧିକାର୍ ହ ମେନାଃ, ହାର୍ ଏନା ଏତେ ଇଦି ରାଃ ହ ଆଧିକାର୍ ମେନାଃ: ନେ ଆନାଚୁ ଇଙ୍ଗ୍‍କେ ଇଙ୍ଗ୍ଆଃ ଆପୁ ଏତେ ନାମାକାନା।” ନେ କାଜି କୋରାଃ ଚାଲ୍ତେ ୟାହୁଦୀ ଗୁରୁ କୋରେ ଆଡୋଃଗି କାଜି କାଜୋକା ଜାନା। ଇନ୍‍କୁ ଏତେ ଥିମ୍ବାଗି ହୋଡ଼ୋକୋ କାଜିକେଦାକୋ, “ଇନିଃକେ ବୋଙ୍ଗାଆତ୍ମା ଏସେର୍ କାଜାଏ, ହାର୍ ଇନିଃ ବାୟ୍‍ହା ତାନିଃ, ଇନିଜାଃ କାଜି ଚିନାଃ ନାଙ୍ଗ୍ ଆୟୁମ୍ ତାନାପେ?” ଏଟାଃ ହୋଡ଼ୋକୋ କାଜିକେଦାକୋ, “ନେ କାଜିକୋ ବୋଙ୍ଗାଆତ୍ମା ଏସେର୍ କାନ୍ ହୋଡ଼ ରାଃ ନାହାଲା। ଚିନାଃ ବୋଙ୍ଗାଆତ୍ମା ଆନ୍ଧା କୋୱାଃ ମେଏଃ ବେଶ୍ ଧାଡ଼ିୟାଏ?” ୟୀରୁଶାଲେମ୍ ରେ ମାନ୍ଦିର୍ ଫାର୍ଚି ରେୟା ପାରାବ୍ ମାନାତିଙ୍ଗ୍ଅଃ ତାଇକେନା, ଆଡୋଃ ରାବାଙ୍ଗ୍ ରାଃ ସାମାୟ୍ ତାଇକେନା। ୟୀଶୁ ମାନ୍ଦିର୍ ରେ ସୁଲେମାନ୍ ରାଃ ପିଣ୍ଡିଗି ରେ ହୋନୋର୍ ତାଇକେନାଏ। ଏନ୍ତେ ୟାହୁଦୀ ଗୁରୁକୋ ଇନିଃକେ ସବେନ୍ ପାଡ଼େତେ ହିଜୁଃ କେତେ କେସେଃ କିଜାକୋ ଆଡୋଃ କୁଲିକିଜାକୋ, “ଆମ୍ ଆଲେୟାଃ ମୋନ୍ କେ ଚିଉଲା ସାନ୍ତେ ସାନ୍ଦେହ୍ ରେ ମାଣ୍ଡାଅ ୟାମ୍? ଆଗାର୍ ଆମ୍ ମାସୀହ୍ ତାନ୍‍ମେ, ଏଣ୍ଡେ ଆଲେକେ ସାଫା-ସାଫା କାଜିତାଲେମ୍।” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଆପେକେ କାଜି ତାଦାଇଙ୍ଗ୍ ମେନ୍ଦୋ ଆପେ କାପେଗି ବିଶ୍ଵାସ୍ ତାନା। ଅକନ୍ କାମି ଇଙ୍ଗ୍ ଇଙ୍ଗ୍ଆଃ ଆପୁ ଆଃ ଆଧିକାର୍ ତେ ରିକାତାନିଙ୍ଗ୍ ଏନାଗି ଇଙ୍ଗ୍ଆଃ ଗୋୱା ତାନାଃ। ମେନ୍ଦୋ ଆପେ ନେୟା ଲାଗିନ୍ କାପେ ବିଶ୍ଵାସ୍ ତାନା, ଚିୟାଃଚି ଇଙ୍ଗ୍ଆଃ ମିଣ୍ଡୀ କୋଏତେ ନାହାଲାପେ। ଇଙ୍ଗ୍ଆଃ ମିଣ୍ଡୀକୋ ଇଙ୍ଗ୍ଆଃ କେଡ଼ା ଆୟୁମ୍ ୟାକୋ, ଇଙ୍ଗ୍ ଇନ୍‍କୁକେ ସାରିକୋୱାଇଙ୍ଗ୍, ହାର୍ ଇନ୍‍କୁ ଇଙ୍ଗ୍‍କେ ଅତୋଙ୍ଗିଙ୍ଗ୍ ୟାକୋ। ହାର୍ ଇଙ୍ଗ୍ ଇନ୍‍କୁକେ ଜାନାଓ ଜୀଦାନ୍ ଏମାକୋୱାଇଙ୍ଗ୍। ଇନ୍‍କୁ ଚିଉଲା ହ କାକୋ ଗୋଜୋଗା, ହାର୍ ଜେତାଏ ଇନ୍‍କୁକେ ଇଙ୍ଗ୍ଆଃ ତିଈ ତେ ରେଏଃ ଇଦି କାକୋ ଧାଡ଼ିୟା। ଇଙ୍ଗ୍ଆଃ ଆପୁ, ଅକଏ ଇନ୍‍କୁକେ ଇଙ୍ଗ୍‍କେ ଏମାକାଦିଙ୍ଗାଏ, ସବେନ୍ କୋଏତେ ମାରାଙ୍ଗ୍ ତାନିଃ ହାର୍ ଜେତାଏ ଇନ୍‍କୁକେ ଆପୁ ଆଃ ତିଈ ତେ ରେଏଃ କାକୋ ଧାଡ଼ିୟା। ଇଙ୍ଗ୍ ହାର୍ ଆପୁ ମିଃ ତାନ୍‍ଲେ।” ୟାହୁଦୀ ଗୁରୁକୋ ଇନିଃକେ ଥେରୀ ଲାଗିନ୍ ଆଡୋଃଗି ଦିରି ଉଠାଓ କେଦାକୋ। ଏନାତେ ୟୀଶୁ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଆପେକେ ଇଙ୍ଗ୍ଆଃ ଆପୁ ପାଡ଼େତେ ଥିମ୍ବାଗି ବୁଗିନ୍ କାମିକୋ ଦେଖାଅ କେଃପେୟାଇଙ୍ଗ୍, ଏନା କୋଏତେ ଅକନ୍ କାମି ଲାଗିନ୍ ଆପେ ଇଙ୍ଗ୍‍କେ ଥେରିଙ୍ଗ୍ ତାନାପେ?” ୟାହୁଦୀ ଗୁରୁକୋ ଇନିଃକେ କାଜିରୁଆଡ଼୍ କିଜାକୋ, “ବୁଗିନ୍ କାମି ଲାଗିନ୍ ଆଲେ ଆମାଃ ଚେତାନ୍ ରେ କାଲେ ଥେର୍ ମେତାନା, ମେନ୍ଦୋ ପାର୍ମେଶ୍ଵାର୍ ରାଃ ନିନ୍ଦା ଲାଗିନ୍ତେ, ହାର୍ ଏନାଲାଗିନ୍ ଚି ଆମ୍ ହୋଡ଼ ହୋବାକେତେ ଆମ୍ ଆପାନ୍ କେ ପାର୍ମେଶ୍ଵାର୍ ଦାବି ତାନାମ୍।” ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଚିନାଃ ଆପେୟାଃ ମୁଶା ନାବୀ ରାଃ ଆଇନ୍ ରେ କା ଅଲାକାନା, ‘ଇଙ୍ଗ୍ କାଜିକେଦାଇଙ୍ଗ୍, ଆପେ ଇଶ୍ୱାର୍ ତାନ୍‍ପେ?’ ଆଗାର୍ ଇନିଃ ଇନ୍‍କୁକେ ଇଶ୍ୱାର୍ କାଜିକେଦାଏ ଅକେତାଃ ପାର୍ମେଶ୍ଵାର୍ ରାଃ ବାଚାନ୍ ସେଟେର୍ ଜାନା (ଆଡୋଃ ପାବିତାର୍ ପୁଥି ରାଃ କାଜି କା ଆତୋମ୍ଅଗା), ଏଣ୍ଡେ ଇଙ୍ଗ୍‍କେ ଆପୁ ପାବିତାର୍ ବାଇକେତେ ଅତେଦିଶୁମ୍ ରେ କୁଲ୍ କେଦିଙ୍ଗାଏ, ଆପେ ଇଙ୍ଗ୍‍କେ କାଜିୟାପେ ‘ଆମ୍ ନିନ୍ଦା ତାନାମ୍,’ ଚିନାଃ ଏନାମେନ୍ତେ ଚି ଇଙ୍ଗ୍ କାଜିକେଦାଇଙ୍ଗ୍, ‘ଇଙ୍ଗ୍ ପାର୍ମେଶ୍ଵାର୍ ରାଃ ହୋନ୍ ତାନିଙ୍ଗ୍?’ ଆଗାର୍ ଇଙ୍ଗ୍ ଇଙ୍ଗ୍ଆଃ ଆପୁ ରାଃ କାମି କାଇଙ୍ଗ୍ କାମି ତାନା, ଏଣ୍ଡେ ଇଙ୍ଗ୍ଆଃ ଆଲୋପେ ବିଶ୍ଵାସେୟା। ମେନ୍ଦୋ ଆଗାର୍ ଇଙ୍ଗ୍ କାମିତାନିଙ୍ଗ୍ ରେଦୋ, ଆପେ ଇଙ୍ଗ୍‍କେ କାପେ ବିଶ୍ଵାସ୍ ରେହ, ଏନ୍ କାମି ଲାଗିନ୍ତେ ଦୋ ବିଶ୍ଵାସ୍ ଏପେ, ଏନାତେ ଆପେ ସାରି ୟାପେ, ହାର୍ ବୁଝାଅଃୱାପେ, ଚି ଆପୁ ଇଙ୍ଗ୍ଆଃ ରେ ମେନିଜା, ଆଡୋଃ ଇଙ୍ଗ୍ ଆପୁ ରେ ମେନାଇଙ୍ଗ୍ ୟା।” ଏନ୍ତେ ଇନ୍‍କୁ ଆଡୋଃଗି ଇନିଃକେ ସାସାବ୍ ନାଙ୍ଗ୍ ସାନାଙ୍ଗ୍ କେଦାକୋ ମେନ୍ଦୋ ଇନ୍‍କୁୱାଃ ତାଃ ଏତେ ଅଡୋଙ୍ଗ୍ ଜାନାଏ। ଏନ୍ତେ ଇନିଃ ଯାର୍ଦାନ୍ ନାଈ ରାଃ ଫାରୋମ୍ ଏନ୍ ଜାଗା ତାଃ ସେନୋଃ ଜାନାଏ, ଅକତାଃ ଯୋହାନ୍ ସିଦା ବାପ୍ତିସ୍ମା ଏମ୍ ତାଇକେନାଏ, ହାର୍ ହେନ୍ତାଃ ରେ ତାଇନ୍ ଜାନାଏ। ଥିମ୍ବାଗି ହୋଡ଼ୋକୋ ଇନିଜାଃ ତାଃ ହିଜୁଃକେତେ କାଜି ତାଇନାକୋ, “ଯୋହାନ୍ ଦୋ ଜାହାନ୍ ଆକ୍‍ଦାନ୍ଦା ଚିହ୍ନା କାଏ ଦେଖାଅକେଦାଏ, ମେନ୍ଦୋ ଅକନାଃ କୋ ଯୋହାନ୍ ନିଜାଃ ବିଷାୟ୍ ରେ କାଜିଲେଦାଏ, ଏନା ସବେନାଃ ସାର୍ତି ତାଇକେନା।” ହାର୍ ହେନ୍ତାଃ ଥିମ୍ବାଗି ହୋଡ଼ୋକୋ ଇନିଃକେ ବିଶ୍ଵାସ୍ କେଦାକୋ। ମାରିୟାମ୍ ଆଡୋଃ ଇନିଜାଃ ମିଶି ମାର୍ଥା କିନାଃ ହାତୁ ବେଥାନି ରେ ଲାଜାର୍ ନୁତୁମ୍ ମିୟାଃ ହୋଡ଼ ବେମାର୍ ତାଇକେନାଏ। ଇନିଃ ହେନ୍ ମାରିୟାମ୍ ଗି ତାଇକେନାଏ ଅକନିଃ ପ୍ରାଭୁ ୟୀଶୁ ରାଃ ଚେତାନ୍ ରେ ବୁଗିନ୍ ଗୋନୋଙ୍ଗାନ୍ ସୋୱାନ୍ ସୁନୁମ୍ ଦୁଲ୍ କେତେ ଇନିଜାଃ କାଟା କେ ଆପାନାଃ ଉବ୍ ତେ ଜଅଃ ଲିଜାଏ, ଇନ୍‍କିନାଃ ଗି ହାଗା ଲାଜାର୍ ବେମାର୍ ତାଇକେନାଏ। ଏନ୍ତେ ଇନିଜାଃ ମିଶିକିନ୍ ୟୀଶୁ ତାଃ କାଜିକୁଲ୍ କେଦାକିନ୍, “ହେ ପ୍ରାଭୁ, ନେଲେମ୍, ଆମାଃ ଦୁଲାଡ଼୍‍ତାନ୍ ଲାଜାର୍ ବେମାର୍ ଅଃ ତାନାଏ।” ୟୀଶୁ ନେୟା ଆୟୁମ୍‍କେତେ କାଜିକେଦାଏ, “ନେ ବିମାରୀ ଗୋନୋଏଃ ଲାଗିନ୍ କାହା, ମେନ୍ଦୋ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଲାଗିନ୍ ତାନାଃ, ଏନାରାଃ ହୋରାତେ ଇଙ୍ଗ୍ ପାର୍ମେଶ୍ଵାର୍ ରାଃ ହୋନ୍ ରାଃ ମାନାରାଙ୍ଗ୍ ହୋବାଅଃକା।” ୟୀଶୁ ମାର୍ଥା କେ ହାର୍ ଇନିଜାଃ ମିଶି କେ ହାର୍ ଲାଜାର୍ କେ ଦୁଲାଡ଼୍ କୋ ତାଇନାଏ। ଏଣ୍ଡେହ ଚିମ୍ତା ଇନିଃ ନେୟା ଆୟୁମ୍‍କେଦାଏ ଚି ଲାଜାର୍ ବେମାର୍ ରେ ମେନାଇଜା, ମାଗାର୍ ଏନ୍ ଜାଗା ରେ ଅକ୍ତାଃ ଇନିଃ ତାଇକେନାଏ, ଏନ୍ତାଃ ଆଡୋଃଗି ବାର୍‍ସିଙ୍ଗ୍ ତାଇଜାନାଏ। ବାର୍‍ସିଙ୍ଗ୍ ତାୟୋମ୍ତେ ଇନିଃ ଆଜାଃ ଚେଲାକୋକେ କାଜିକେଃକୋୱାଏ, “ଦୋଲାବୁ ଆଡୋଃଗି ୟାହୁଦୀୟା ଜିଲ୍ଲା ତେ ସେନାବୁ।” ଚେଲାକୋ ଇନିଃକେ କାଜିକେଦାକୋ, “ହେ ଗୁରୁ, କାଟିଃ ସିଦା ରେ ଆମ୍‍କେ ଦୋ ୟାହୁଦୀ ଗୁରୁକୋ ଦିରି ତେ ଥେର୍ ନାହାମ୍ ତାଇକେନାକୋ, ଚିନାଃ ଏଣ୍ଡେ ହଗି ଆଡୋଃ ମିଶା ହେନ୍ତାଃ ସେନ୍ ତାନାମ୍?” ୟୀଶୁ କାଜିରୁଆଡ଼୍ କେଃକୋୱାଏ, “ଚିନାଃ ମିଃ ଶିଙ୍ଗି ରେ ବାରା ଘାଣ୍ଟା କା ତାଇନା? ଆଗାର୍ ଜାହାଁଏ ଶିଙ୍ଗି ରେ ସେସେନାଏ ଦୋ କାଏ ଥୋଦୋଗାଏ, ଚିୟାଃଚି ନେ ଅତେଦିଶୁମ୍ ରେ ଶିଙ୍ଗି ରାଃ ମାସ୍କାଲ୍ ତେ ନେଲେୟାଏ। ମେନ୍ଦୋ ଆଗାର୍ ଜାହାଁଏ ନିଦା ରେ ସେସେନାଏ ଦୋ ଥୋଦୋଗାଏ, ଚିୟାଃଚି ଇନିଜାଃ ତାଃ ରେଦୋ ମାସ୍କାଲ୍ ବାନୋଗା।” ଇନିଃ ନେ କାଜି କାଜିକେଦାଏ, ହାର୍ ଏନା ତାୟୋମ୍ତେ ଇନ୍‍କୁକେ କାଜିୟାଃକୋୱାଏ, “ଆବୁୱାଃ ଗାତି ଲାଜାର୍ ଦୁଣୁମ୍ ଜାନାଏ, ମେନ୍ଦୋ ଇଙ୍ଗ୍ ଇନିଃକେ ବିରିଃ ସେନ୍ ତାନିଙ୍ଗ୍।” ଏନ୍ତେ ଚେଲାକୋ ଇନିଃକେ କାଜିକେଦାକୋ, “ହେ ପ୍ରାଭୁ, ଇନିଃ ଦୁଣୁମ୍ କାନାଏ ରେଦୋ, ଇନିଃ ବେଶ୍ କେନୋୱାଏ।” ୟୀଶୁ ଦୋ ଇନିଜାଃ ଗୋନୋଏଃ ବିଷାୟ୍ ରେ କାଜି କାଜିଲେଦାଏ, ମେନ୍ଦୋ ଇନ୍‍କୁ ଦୁଣୁମ୍ ରେୟାଃ ଗିତିଃ କାଜି କାଜିକେଦାଏ ମେନ୍ତେ ପାହୋମ୍ କେଦାକୋ। ଏଣ୍ଡେ ୟୀଶୁ ଇନ୍‍କୁକେ ସାଫା-ସାଫା କାଜିକେଃକୋୱାଏ, “ଲାଜାର୍ ଗୋଏଃ ଜାନାଏ; ହାର୍ ଇଙ୍ଗ୍ ଆପେ ଲାଗିନ୍ତେ ରାଶିକାଅଃ ତାନିଙ୍ଗ୍ ଚି ଇଙ୍ଗ୍ ଏନ୍ତାଃରେ କାଇଙ୍ଗ୍ ତାଇକେନା ଏନାତେ ଆପେ ବିଶ୍ଵାସ୍ ୟାପେ। ମେନ୍ଦୋ ନାଆ ଦୋଲା, ଇନିଃତାଃ ସେନାବୁ।” ଏନ୍ତେ ଥୋମା ଅକନିଃ ଦୀଦ୍‍ମୁସ୍ ନୁତୁମୋଃୱାଏ, ଆୟାଃ ଗାତି ଚେଲାକୋକେ କାଜିକେଃକୋୱାଏ, “ଦୋଲା ଆବୁ ହଗି ଆୟାଃ ଲୋଃ ଗୋଜୋଃ ତେ ସେନାବୁ।” ଏନ୍ତାଃ ସେଟେର୍ କେତେ ୟୀଶୁ ସାରିକେଦାଏ ଚି ଲାଜାର୍ କେ କାବାର୍ ରେ ଦୋହୋକାନ୍ ଚାଇର୍ ଦିନ୍ ହୋବାଜାନା। ବେଥାନି ହାତୁ ୟୀରୁଶାଲେମ୍ ସାହାର୍ ଏତେ ଦୁଇ ମିଲ୍ ସାଙ୍ଗିନ୍ ନାଡ଼େଏ ରେ ତାଇକେନା। ଥିମ୍ବାଗି ୟାହୁଦୀ ହୋଡ଼ୋକୋ ମାର୍ଥା ହାର୍ ମାରିୟାମ୍ କିନ୍ ତାଃ ଆକିନାଃ ହାଗା ଗୋଏଃ ଜାନ୍ତେ ଶାନ୍ତି ଏହେମ୍ ଲାଗିନ୍ ହିଜୁଃ ଲେନାକୋ। ଚିମ୍ତା ମାର୍ଥା ୟୀଶୁ ରାଃ ହିଜୁଃ ବିଷାୟ୍ ରେ ଆୟୁମ୍‍କେଦାଏ ଦୋ ଇନିଃ ଲୋଃ ନାପାମ୍ ଲାଗିନ୍ତେ ସେନ୍ ଜାନାଏ, ମେନ୍ଦୋ ମାରିୟାମ୍ ଅଡ଼୍ଆଃ ରେ ଦୁବାକାନ୍ ତାଇନ୍ ଜାନାଏ। ମାର୍ଥା ୟୀଶୁ କେ କାଜିକେଦାଏ, “ହେ ପ୍ରାଭୁ, ଆଗାର୍ ଆମ୍ ନେତାଃ ରେ ତାଇନ୍ ଲେନ୍ତେୟାମ୍, ହୋଲେ ଇଙ୍ଗ୍ଆଃ ହାଗା କାଏ ଗୋଏଃ ଜାନ୍ତେ। ଆଡୋଃ ନାଆ ହ ଇଙ୍ଗ୍ ସାରିୟାଇଙ୍ଗ୍ ଚି ଅକନାଃ ହଗି ଆମ୍ ପାର୍ମେଶ୍ଵାର୍ ଏତେ ଆସିୟାମ୍, ପାର୍ମେଶ୍ଵାର୍ ଆମ୍‍କେ ଏମାମେୟାଏ।” ୟୀଶୁ ଇନିଃକେ କାଜିକିଜାଏ, “ଆମାଃ ହାଗା ଆଡୋଃ ମିଶା ଜୀହିଃ ବୀରିଦୋଗାଏ।” ମାର୍ଥା ଇନିଃକେ କାଜିକେଦାଏ, “ଇଙ୍ଗ୍ ସାରିୟାଇଙ୍ଗ୍ ଚି ବିଚାର୍ ହୁଲାଙ୍ଗ୍ ଜୀବିନିରିଦ୍ ସାମାୟ୍ ରେ ଲାଜାର୍ ଜୀହିଃ ବୀରିଦୋଗାଏ।” ୟୀଶୁ ଇନିଃକେ କାଜିକେଦାଏ, “ଜୀବିନିରିଦ୍ ହାର୍ ଜୀଦାନ୍ ଇଙ୍ଗ୍ ତାନିଙ୍ଗ୍, ଅକଏ ଇଙ୍ଗ୍ଆଃ ରେ ବିଶ୍ଵାସ୍ ୟାଏ ଇନିଃ ଆଗାର୍ ଗୋଏଃ କେନୋଃ ରେ ହଗି ଜୀହିଦୋଗାଏ, ଆଡୋଃ ଅକଏ ଜୀହିଃ ମେନାଇଜା ହାର୍ତେ ଇଙ୍ଗ୍ଆଃ ରେ ବିଶ୍ଵାସ୍ ତାନାଏ, ହିନିଃ ଚିଉଲା ହ କାଏ ଗୋଜୋଗା। ଚିନାଃ ଆମ୍ ନେ କାଜି ରେ ବିଶ୍ଵାସ୍ ତାନାମ୍?” ଇନିଃ ହିନିଃକେ କାଜିକେଦାଏ, “ହାଁ ହେ ପ୍ରାଭୁ, ଇଙ୍ଗ୍ ବିଶ୍ଵାସ୍ ତାନିଙ୍ଗ୍ ଚି ଆମ୍ ପାର୍ମେଶ୍ଵାର୍ ରାଃ ହୋନ୍ ମାସୀହ୍ ଅକନିଃ ଅତେଦିଶୁମ୍ ରେ ହିଜୁଃ ଲାଗିନ୍ ତାଇକେନାଏ, ଇନିଃ ଆମ୍ ଗି ତାନ୍‍ମେ।” ମାର୍ଥା ନେୟା କାଜିକେତେ ସେନ୍ ଜାନାଏ, ଏନ୍ତେ ଆଜାଃ ମିଶି ମାରିୟାମ୍ କେ କେଡ଼ାକେତେ ହାପା-ହାପା କାଜିକିଜାଏ, “ଗୁରୁ ନେତାଃ ରେଗି ମେନିଜା ହାର୍ ଆମ୍‍କେ କେଡ଼ାମେ ତାନାଏ।” ନେୟା ଆୟୁମ୍‍କେତେ ମାରିୟାମ୍ ସେକାଡ଼୍ ତିଙ୍ଗୁ ଜାନାଏ ହାର୍ ଇନିଃ ତାଃ ସେନ୍ ଜାନାଏ। ୟୀଶୁ ନାଆ ସାନ୍ତେ ହାତୁ ରାଃ ବାହ୍‍ରେ ତାଇଲେନାଏ ମେନ୍ଦୋ ଏନ୍ ଜାଗା ରେଗି ତାଇକେନାଏ ଅକ୍ତାଃ ମାର୍ଥା ଇନିଃ ଲୋଃ ନାପାମ୍ ଲେନାଏ। ଏନ୍ତେ ହେନ୍ ୟାହୁଦୀ ହୋଡ଼ୋକୋ ଅକନ୍‍କୋ ଇନିଜାଃ ଲୋଃ ଅଡ଼୍ଆଃ ରେ ତାଇକେନାକୋ ହାର୍ ଇନିଃ କେ ଶାନ୍ତି ଏମ୍ ତାଇକେନାକୋ, ଇନ୍‍କୁ ନେୟା ନେଲ୍ କେତେ ଚି ମାରିୟାମ୍ ସେକାଡ଼୍ ବାହାରି ତେ ସେନ୍ ଜାନାଏ ଇନ୍‍କୁ ପାହୋମ୍ କେଦାକୋ ଚି ଇନିଃ କାବାର୍ ପାଡ଼୍ ରାଆ ନାଙ୍ଗ୍ ସେନ୍ ତାନାଏ, ଏନ୍ତେ ଇନ୍‍କୁ ଇନିଜାଃ ତାୟୋମ୍-ତାୟୋମ୍ ତେ ସେନ୍ ଜାନାକୋ। ଚିମ୍ତା ମାରିୟାମ୍ ଏନ୍ତାଃ ସେଟେର୍ ଜାନାଏ ଅକ୍ତାଃ ୟୀଶୁ ତାଇକେନାଏ, ଦୋ ଇନିଃକେ ନେଲ୍ ତୋର୍ଷା ଇନିଜାଃ କାଟାସୁବା ରେ ଉୟୁଃକେତେ କାଜିକେଦାଏ, “ହେ ପ୍ରାଭୁ, ଆଗାର୍ ଆମ୍ ନେତାଃ ତାଇନ୍ ଲେନ୍ତେୟାଃମ୍ ଏଣ୍ଡେ ଇଙ୍ଗ୍ଆଃ ହାଗା କାଏ ଗୋଏଃ ଜାନ୍ତେ।” ଚିମ୍ତାଙ୍ଗ୍ ୟୀଶୁ ଇନିଃକେ ଆଡୋଃ ହେନ୍ ୟାହୁଦୀ ହୋଡ଼ୋକୋକେ ଅକନ୍‍କୋ ଇନିଃ ଲୋଃ ହିଜୁଃ ଲେନାକୋ, ରାଆତାନ୍ ନେଲ୍‍କେଦାଏ, ଦୋ ଆତ୍ମା ରେ ଥିମ୍ବାଗି ଦୁକୁ ହାର୍ ଆକ୍‍ବାକାଅ ଜାନାଏ, ଏନ୍ତେ କାଜିକେଦାଏ, “ଆପେ ଇନିଃକେ କୋତାଃ ରେ କାବାର୍ ଏମ୍ କାଇଜାପେ?” ଇନ୍‍କୁ ଇନିଃକେ କାଜିକେଦାକୋ, “ହେ ପ୍ରାଭୁ, ଦୋଲା ସେନ୍ କେତେ ନେଲ୍ କିମେ।” ୟୀଶୁ ରାଆ କେଦାଏ। ଏନ୍ତେ ୟାହୁଦୀ ହୋଡ଼ୋକୋ କାଜିକେଦାକୋ, “ନେଲେପେ, ଇନିଃ ହିନିଃକେ ଚିମିନାଙ୍ଗ୍ ଦୁଲାଡ଼୍ ତାଇକେନାଏ।” ମେନ୍ଦୋ ଇନ୍‍କୁ ଏତେ ଚିମିନାଙ୍ଗ୍ କୋ କାଜିକେଦାକୋ, “ନିଈ ଆନ୍ଧା ହୋଡ଼ ରାଃ ମେଏଃ ବେଶ୍ କେଦାଏ, ଚିନାଃ ନେୟା ହଗି କାଏ ରିକା ଧାଡ଼ିଜାନାଏ ଚି ନେ ହୋଡ଼ କାଏ ଗୋଏଃ ଜାନ୍ତେ?” ୟୀଶୁ ମୋନ୍ ରେ ଆଡୋଃଗି ଥିମ୍ବା ଦୁକୁ କେତେ କାବାର୍ ତାଃ ହିଜୁଃ ଜାନାଏ। ଏନା ମିୟାଃ ଗୁଫା ତାଇକେନା ହାର୍ ଏନା ମାରାଙ୍ଗ୍ ଦିରି ତେ ହାରୁପ୍‍କାନ୍ ତାଇକେନା। ୟୀଶୁ କାଜିକେଦାଏ, “ଦିରି କେ ଆତୋମ୍ ଏପେ।” ଏନ୍ ଗୋଜାକାନ୍ ନିଜାଃ ମିଶି ମାର୍ଥା ଇନିଃକେ କାଜିକେଦାଏ, “ହେ ପ୍ରାଭୁ, ଏନାତେ ଦୋ ଶିତୃ ସୋୱାନ୍ ତାନା। ଚିୟାଃଚି ଇନିଃକେ ଗୋଜାକାନ୍ ଚାଇର୍ ଦିନ୍ ହୋବା ଛାବାକାନା।” ୟୀଶୁ ଇନିଃକେ କାଜିକେଦାଏ, “ଚିନାଃ ଇଙ୍ଗ୍ କାଇଙ୍ଗ୍ କାଜି ଲେଦା ଚି ଆଗାର୍ ଆମ୍ ଇଙ୍ଗ୍‍କେ ବିଶ୍ଵାସ୍ ୟାମ୍, ଦୋ ପାର୍ମେଶ୍ଵାର୍ ରାଃ ମାନାରାଙ୍ଗ୍ ନେଲେୟାମ୍।” ଏନା ତାୟୋମ୍ତେ ହୋଡ଼ୋକୋ ଦିରି କେ ଆତୋମ୍ କେଦାକୋ। ଏନ୍ତେ ୟୀଶୁ ସିର୍ମାଦିଶୁମ୍ ପାଡ଼୍ ନେଲ୍‍କେତେ କାଜିକେଦାଏ, “ହେ ଆବା, ଇଙ୍ଗ୍ ଆମାଃ ଧାନ୍ୟାବାଦ୍ ତାନିଙ୍ଗ୍ ଚି ଆମ୍ ଇଙ୍ଗ୍ଆଃ ଆୟୁମ୍ କେଦାମ୍। ଇଙ୍ଗ୍ ସାରି ତାଇକେନାଇଙ୍ଗ୍ ଚି ଆମ୍ ଜାନାଓ ଇଙ୍ଗ୍ଆଃ ଆୟୁମ୍ ୟାମ୍, ମେନ୍ଦୋ ଅକନ୍ ହୋଡ଼ୋକୋ ନାଡ଼େଏ କୋରେ ତିଙ୍ଗୁ କାନାକୋ, ଇନ୍‍କୁୱାଃ ଚାଲ୍ତେ ଇଙ୍ଗ୍ ନେୟା ଜୋର୍ତେ କାଜିକେଦାଇଙ୍ଗ୍, ଏନାତେ ଚି ଇନ୍‍କୁ ବିଶ୍ଵାସ୍ ୟାକୋ ଚି ଆମ୍ ଇଙ୍ଗ୍‍କେ କୁଲ୍ କାଦିଙ୍ଗାମ୍।” ନେୟା କାଜିକେତେ ଇନିଃ ଜୋର୍ତେ କାଉରି କେତେ କାଜିକେଦାଏ, “ହେ ଲାଜାର୍ ଅଡୋଙ୍ଗ୍ ମେ!” ଅକଏ ଗୋଜାକାନ୍ ତାଇକେନାଏ ଇନିଃ ମାଣା ଲିଜାଃ ତେ ତିଈ କାଟା ଥୋଲାକାନ୍ ଅଡୋଙ୍ଗ୍ ଜାନାଏ, ଆଡୋଃ ଇନିଜାଃ ମେଏଃମୁହାଡ଼୍ ମିୟାଃ ମାଣା ପାଚି ତେ ଥୋଲାକାନ୍ ତାଇକେନା। ୟୀଶୁ ଇନ୍‍କୁକେ କାଜିକେଃକୋୱାଏ, “ଇନିଃକେ ରାଡ଼ାଇ ପେ ଆଡୋଃ ସେନ୍ ରିକାୟିପେ।” ଏନ୍ତେ ଅକନ୍ ୟାହୁଦୀ ହୋଡ଼ୋକୋ ମାରିୟାମ୍ ତାଃ ହିଜୁଃକାନ୍ ତାଇକେନାକୋ ହାର୍ ଇନିଜାଃ ନେ କାମି ନେଲ୍ ଲେଦାକୋ, ଇନ୍‍କୁ ଏତେ ଥିମ୍ବାଗି ହୋଡ଼ୋକୋ ଇନିଜାଃ ରେ ବିଶ୍ଵାସ୍ କିଜାକୋ। ମେନ୍ଦୋ ଇନ୍‍କୁ ଏତେ ଚିମିନାଙ୍ଗ୍ କୋ ଫାରିସୀ ହୋଡ଼ୋକୋ ତାଃ ସେନ୍ କେତେ ୟୀଶୁ ରାଃ କାମି କୋକେ ଉଦୁବ୍ କେଦାକୋ। ଏନ୍ତେ ପ୍ରାଧାନ୍ ୟାଜାକ୍‍କୋ ହାର୍ ଫାରିସୀ ହୋଡ଼ୋକୋ ମାରାଙ୍ଗ୍‍ସାଭା କେଡ଼ା କେଦାକୋ, ଆଡୋଃ କାଜିକେଦାକୋ, “ଆବୁ ଚିନାଃ ବୁ ରିକାତାନା? ନେ ହୋଡ଼ ଦୋ ଥିମ୍ବାଗି ଆକ୍‍ଦାନ୍ଦା ଚିହ୍ନା କାମିକୋ ରିକା ତାନାଏ। ଆଗାର୍ ଆବୁ ଇନିଃକେ ନେକାଗି ବାଗେ ତାଇୟାବୁ, ଏଣ୍ଡେ ସବେନ୍ ହୋଡ଼ୋକୋ ଆଏଃକେ ବିଶ୍ଵାସ୍ ୟାକୋ ଚି ଇନିଃ ମାସୀହ୍ ତାନିଃ, ଏନ୍ତେ ରୋମୀ ହୋଡ଼ୋକୋ ଆବୁୱାଃ ପାବିତାର୍ ମାନ୍ଦିର୍ କୋକେ ଆଡୋଃ ଆବୁୱାଃ ହୋଡ଼ୋକୋକେ ଆଧିକାର୍ କେୟାକୋ।” ଏନ୍ତେ ଇନ୍‍କୁ ଏତେ କୈଫା ନୁତୁମ୍ ମିୟାଃ ହୋଡ଼ ଅକନିଃ ଏନ୍ ଶିର୍ମା ରେନ୍ ମାରାଙ୍ଗ୍ ୟାଜାକ୍ ତାଇକେନାଏ, ଇନ୍‍କୁକେ କାଜିକେଦାଏ, “ଆପେ ଜାହାନାଃ କାପେ ସାରିୟା; ଆଡୋଃ କାପେ ବୁଝାଅଃ ତାନା ଚି ଆପେୟାଃ ଲାଗିନ୍ ନେୟା ବୁଗିନ୍ ତାନାଃ ଚି ଆବୁ ହୋଡ଼ୋକୋୱାଃ ଲାଗିନ୍ତେ ମିୟାଃ ହୋଡ଼ ଗୋଜୋଃ କାଏ, ହାର୍ ସବେନ୍ ଜାତି ହୋଡ଼ୋକୋ କାକୋ ନାଷ୍ଟ୍‍ଅଃକା।” ନେ କାଜି ଇନିଃ ଆୟାଃ ପାଡ଼େତେ କାଏ କାଜିକେଦାଏ, ମେନ୍ଦୋ ଏନ୍ ଶିର୍ମା ରେନ୍ ମାରାଙ୍ଗ୍ ୟାଜାକ୍ ତାଇକେତେ ଆୟାର୍‍କାଜି କାଜିକେଦାଏ, ଚି ୟୀଶୁ ଇସ୍ରାଏଲ୍ ହୋଡ଼ୋକୋ ନାଙ୍ଗ୍ ଗୋଜୋଗାଏ, ମେନ୍ଦୋ ଇନ୍‍କୁ ନାଙ୍ଗ୍ ଭାଇର୍ କାହା, ମେନ୍ଦୋ ପାର୍ମେଶ୍ଵାର୍ ରାଃ ଏଟାଃ ଛିତିଛାନ୍ଦ୍ ହୋନ୍ କୋ ନାଙ୍ଗ୍ ହ ଏନାତେ ଇନିଃ ଇନ୍‍କୁକେ ମିଃ ତାକୋୱାଏ। ଏନାମେନ୍ତେ ଏନ୍ ହୁଲାଙ୍ଗ୍ ତେଗି ଇନ୍‍କୁ ଇନିଃକେ ଗୋଗୋଏଃ ଲାଗିନ୍ତେ ରୋଜୋଟ୍ ବାଇ ଏଟେଃ କେଦାକୋ। ଏନାମେନ୍ତେ ୟୀଶୁ ଆଡୋଃ ୟାହୁଦୀ ହୋଡ଼ୋକୋୱାଃ ନେପେଲ୍ ରେ କାଏ ହୋନୋର୍ କେଦାଏ, ମେନ୍ଦୋ ଏନ୍ତାଃ ଏତେ ସୁନ୍‍ସାନ୍ ଜାଗା ନାଡ଼େଏ ଜାଗା ଇଫ୍ରାଇମ୍ ନୁତୁମ୍ ମିୟାଃ ହାତୁ ରେ ଆୟାଃ ଚେଲାକୋ ଲୋଃ ଏନ୍ତାଃଗି ତାଇଜାନାଏ। ୟାହୁଦୀ କୋୱାଃ ଫାସାହ୍ ପାରାବ୍ ନାଡ଼େଏ ତାଇକେନା, ଏନ୍ତେ ଥିମ୍ବାଗି ହୋଡ଼ୋକୋ ଫାସାହ୍ ପାରାବ୍ ରାଃ ସିଦା ହାତୁଟୋଲା ଏତେ ୟୀରୁଶାଲେମ୍ ତେ ସେନ୍ ଜାନାକୋ ଚି ଆକୋ ଆପାନ୍ କେ ମାନ୍ଦିର୍ ରେ ଫାର୍ଚି ୟାକୋ। ଏନ୍ତେ ଇନ୍‍କୁ ୟୀଶୁ କେ ଦାଣା ଏଟେଃ କିଜାକୋ ହାର୍ ମାନ୍ଦିର୍ ରାଚା ରେ ତିଙ୍ଗୁ କେତେ ଆକୋ-ଆକୋରେ କାଜିଜାନାକୋ, “ଆମ୍ ଚିନାଃ ପାହୋମ୍ ତାନାମ୍? ଚିନାଃ ଇନିଃ ପାରାବ୍ ରେ କାଏ ହିଜୁଗାଏ?” ପ୍ରାଧାନ୍ ୟାଜାକ୍‍କୋ ଆଡୋଃ ଫାରିସୀ ହୋଡ଼ୋକୋ ନେ ଆନାଚୁ ଏମ୍ ଲେଦାକୋ ଚି ଆଗାର୍ ଜାହାଁଏ ହ ନେୟା ସାରିୟାଏ ଚି ୟୀଶୁ କୋତାଃ ରେ ମେନାଇଜା ଏଣ୍ଡେ ଉଦୁବେ କାକୋ, ଏନାତେ ଇନ୍‍କୁ ଇନିଃକେ ସାବ୍ ଧାଡ଼ିୟାକୋ। ୟୀଶୁ ଫାସାହ୍ ପାରାବ୍ ରାଃ ଛାଅ ଦିନ୍ ସିଦାରେ ବେଥାନି ହାତୁ ତେ ହିଜୁଃ ଜାନାଏ ଅକ୍ତାରେ ଲାଜାର୍ ତାଇକେନାଏ, ଅକଏକେ ୟୀଶୁ ଗୋଜାକାନ୍ କୋଏତେ ଜୀହିଃ ବିରିଃ ଲିଜାଏ। ହେନ୍ତାଃ ଇନ୍‍କୁ ୟୀଶୁ କେ ମାଇନ୍ ଲାଗିନ୍ ଭୋଜ୍ ବାଇକେଦାକୋ; ହାର୍ ମାର୍ଥା ସେୱା-ସୁସାର୍ ରିକାତାଇନାଏ, ଆଡୋଃ ଲାଜାର୍ ଇନ୍‍କୁ ଏତେ ମିହୋଡ଼୍ ତାଇକେନାଏ ଅକନିଃ ଇନ୍‍କୁ ଲୋଃ ଜୋମ୍ ଲାଗିନ୍ ଦୁବ୍ ଲେନ୍ ତାଇକେନାଏ। ଇମ୍ତା ମାରିୟାମ୍ ଆଧା ଲିଟାର୍ ଜାଟାମାଂସି ରାଃ ଗୋନୋଙ୍ଗାନ୍ ସୋୱାନ୍ ସୁନୁମ୍ ଆଉକେତେ ୟୀଶୁ ରାଃ କାଟା ରେ ଦୁଲ୍ କେଦାଏ, ହାର୍ ଆଜାଃ ଉବ୍ ତେ ଇନିଜାଃ କାଟା କେ ଜଅଃ କିଜାଏ; ହାର୍ ବେଶ୍ ସୋୱାନ୍ ସୁନୁମ୍ ତେ ଗୋଟା ଅଡ଼୍ଆଃ ସୋୱାନ୍ ଜାନା। ମେନ୍ଦୋ ଇନିଜାଃ ଚେଲାକୋ ଏତେ ୟାହୁଦା ଇସ୍କାରିୟୋତୀ ନୁତୁମ୍ ମିହୋଡ଼୍ ଚେଲା ଅକଏ ୟୀଶୁ କେ ସାସାବ୍ ରିକା ନିଈ ତାଇକେନାଏ, କାଜିକେଦାଏ, “ନେ ଗୋନୋଙ୍ଗାନ୍ ସୋୱାନ୍ ସୁନୁମ୍ ତିନ୍ ଶୋ ଦିନାର୍ ରେ ଆଖ୍ରିଙ୍ଗ୍ କେତେ ଗାରିବ୍ କୋକେ ଚିନାଃ ଲାଗିନ୍ କା ଏମ୍ ଜାନା?” ଇନିଃ ନେ କାଜି ନେୟାଲାଗିନ୍ କାଏ କାଜିକେଦାଏ ଚି ଇନିଃକେ ଗାରିବ୍ କୋୱା ଚିନ୍ତା ତାଇକେନା ମେନ୍ଦୋ ଇନିଃ ମିୟାଃ କୁମ୍ଡ଼ୁ ତାଇକେନାଏ, ହାର୍ ଇନିଜାଃ ତାଃ ଇନ୍‍କୁୱାଃ ପାଇସା ଥାଇଲା ତାଇନୋଃ ତାଇକେନା ହାର୍ ଏଣ୍ଡେରେ ଚିମିନାଙ୍ଗ୍ ଗି ସାଜୁଅଃ ତାଇକେନା, ଏନା ଇନିଃ ଅଡୋଙ୍ଗ୍ କେ ତାଇକେନାଏ। ୟୀଶୁ କାଜିକେଦାଏ, “ଇନିଃକେ ବାଗେ ତାଇପେ। ନିଈ ଇଙ୍ଗ୍ଆଃ ତୋପା ସେକାଡ଼୍ ସିଦା ରେ ନେୟା ରିକା କେଦାଏ। ଚିୟାଃଚି ଗାରିବ୍ କୋ ଦୋ ଆପେ ଲୋଃ ସବେନ୍ ହୁଲାଙ୍ଗ୍ ତାଇନ୍ ତାନାକୋ, ମେନ୍ଦୋ ଇଙ୍ଗ୍ ଆପେ ଲୋଃ ସବେନ୍ ହୁଲାଙ୍ଗ୍ କାଇଙ୍ଗ୍ ତାଇନା।” ଚିମ୍ତାଙ୍ଗ୍ ମିଃଥିମ୍ବା ୟାହୁଦୀ ହୋଡ଼ୋକୋ ସାରିକେଦାକୋ ଚି ୟୀଶୁ ବେଥାନି ହାତୁ ରେ ମେନିଜା, ଏଣ୍ଡେ ଇନ୍‍କୁ ୟୀଶୁ ଲାଗିନ୍ ଭାଇର୍ କାହା ମେନ୍ଦୋ ଲାଜାର୍ କେ ହ ନେଲ୍ ନାଙ୍ଗ୍ ହିଜୁଃନାକୋ ଅକନିଃକେ ଇନିଃ ଗୋଜାକାନ୍ ଏତେ ଜୀହିଃବିରିଃ ଲିଜାଏ। ଏନ୍ତେ ପ୍ରାଧାନ୍ ୟାଜାକ୍‍କୋ ଲାଜାର୍ କେ ହଗି ଗୋଏଃ ଲାଗିନ୍ତେ ରୋଜୋଟ୍ କେଦାକୋ। ଚିୟାଃଚି ଇନିଜାଃ ମେନ୍ତେ ଥିମ୍ବାଗି ୟାହୁଦୀ ହୋଡ଼ୋକୋ ୟାହୁଦୀ ଗୁରୁ କୋୱାଃ ଶିଖାଅ ହାର୍ ରୀତି ନିୟାମ୍ କେ ବାଗେ ତାଦାକୋ ହାର୍ ୟୀଶୁ କେ ବିଶ୍ଵାସ୍ କିଜାକୋ। ଏଟାଃ ହୁଲାଙ୍ଗ୍ ମିଃଥିମ୍ବା ହୋଡ଼ୋକୋ ପାରାବ୍ ରେ ହିଜୁଃ ଜାନାକୋ, ଚିମ୍ତାଙ୍ଗ୍ ଇନ୍‍କୁ ନେୟା ଆୟୁମ୍ କେଦାକୋ ଚି ୟୀଶୁ ୟୀରୁଶାଲେମ୍ ତେ ହିଜୁଃ ତାନାଏ, ଇନ୍‍କୁ କିତା କୋତୋକୋକେ ମାଆ ଆଉକେଦାକୋ ଆଡୋଃ ଇନିଃ ଲୋଃ ନାପାମ୍ ଲାଗିନ୍ ଅଡୋଙ୍ଗ୍ ନାକୋ, ହାର୍ କାଉରି ଏଟେଃ କେଦାକୋ, “ହୋଶାନ୍ନା! ଧାନ୍ୟା ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋୱାଃ ରାଜା, ଅକନିଃ ପ୍ରାଭୁ ଆଃ ନୁତୁମ୍ ତେ ହିଜୁଃ ତାନାଏ।” ଚିମ୍ତା ୟୀଶୁ ୟୀରୁଶାଲେମ୍ ସାହାର୍ ତେ ହିଜୁଃ ତାଇନାଏ ଇମ୍ତା ମିୟାଃ ଗାଧା ରାଃ ହୋନ୍ ନାମ୍ ଜାନାଏ; ଏଣ୍ଡେ ଇନିଃ ଇନିଜାଃ ଚେତାନ୍ ରେ ଦୁବ୍‍ଜାନାଏ, ଜେଲେକା ଅଲାକାନା, “ହେ ସିୟୋନ୍ ରାଃ କୁଡ଼ିହୋନ୍ (ୟୀରୁଶାଲେମ୍ ରେନ୍ ହୋଡ଼ୋକୋ), ଆଲୋମ୍ ବୋରୋୟା, ନେଲେମ୍, ଆମାଃ ରାଜା ଗାଧିଆ ରାଃ ହୋନ୍ ଚେତାନ୍ ରେ ଦୁବ୍ କେତେ ହିଜୁଃ ତାନାଏ।” ଇନିଜାଃ ଚେଲାକୋ ନେ କାଜିକୋକେ ସିଦା କାକୋ ବୁଝାଅ ଧାଡ଼ିଲେନା, ମେନ୍ଦୋ ଚିମ୍ତାଙ୍ଗ୍ ୟୀଶୁ ରାଃ ମାନାରାଙ୍ଗ୍ ହୋବାଜାନା ଇମ୍ତା ଇନ୍‍କୁ କେ ମୋନେ ହୋବାଜାନା ଚି, ନେ କାଜିକୋ ଇନିଜାଃ ବିଷାୟ୍ ରେ ପାବିତାର୍ ପୁଥି ରେ ଅଲାକାନ୍ ତାଇକେନା ଏନ୍ତେ ଇନ୍‍କୁ ଆଏଃକେ ଏନ୍‍ଲେକାଗି ବେଓହାର୍ ଲେଦାକୋ। ଏନ୍ତେ ଏନ୍ ହୋଡ଼ୋକୋ, ଅକନ୍‍କୋ ଏନ୍ ସାମାୟ୍ ୟୀଶୁ ଲୋଃ ତାଇକେନାକୋ ଚିମ୍ତା ଇନିଃ ଲାଜାର୍ କେ କାବାର୍ ଏତେ କେଡ଼ାକେତେ ଗୋଜାକାନ୍ କୋଏତେ ଜୀହିଃ ଲିଜାଏ, ଏନା ବିଷାୟ୍ ରେ ଏଟାଃକୋକେ କାଜି ଉଦୁବ୍ କେଦାକୋ। ଏନାମେନ୍ତେଗି ଥିମ୍ବାଗି ହୋଡ଼ୋକୋ ଆଏଃକେ ନାପାମ୍ ନାଙ୍ଗ୍ ହିଜୁଃ ଲେନାକୋ ଚିୟାଃଚି ଇନ୍‍କୁ ଆୟୁମ୍ ଲେଦାକୋ ଚି ଇନିଃ ନେ ଆକ୍‍ଦାନ୍ଦା କାମି କାମିକାଦାଏ। ଏନ୍ତେ ଫାରିସୀ ହୋଡ଼ୋକୋ ଆକୋ-ଆକୋ କାଜିଜାନାକୋ, “ନେଲେପେ, ଆପେ ସାମାଗୀ ପେ କୋଷିସ୍ ତାନା, ହାର୍ ପୁରା ଅତେଦିଶୁମ୍ ଆଏଃ କେ ଅତୋଙ୍ଗି ତାନାଏ।” ଅକନ୍ ହୋଡ଼ୋକୋ ଏନ୍ ପାରାବ୍ ରେ ଆରାଧାନା ଲାଗିନ୍ ହିଜୁଃ ଲେନାକୋ ଇନ୍‍କୁ ଏତେ ଚିମିନାଙ୍ଗ୍ କୋ ୟୁନାନୀ ହୋଡ଼ୋ ତାଇକେନାକୋ। ଇନ୍‍କୁ ଗାଲିଲୀ ଜିଲ୍ଲା ରାଃ ବେଥ୍‍ସୈଦା ହାତୁ ରେ ତାଇନ୍ ତାନ୍ ଫିଲିପୁସ୍ ତାଃ ହିଜୁଃକେତେ ଇନିଃକେ ଆର୍ଜି କିଜାକୋ ଚି, “ସାହେବ୍, ଆଲେ ୟୀଶୁ ଲୋଃ ନାପାମ୍ ସାନାଙ୍ଗ୍ ତାନାଲେ।” ଫିଲିପୁସ୍ ହିଜୁଃକେତେ ଆନ୍ଦ୍ରିୟାସ୍ କେ କାଜିକେଦାଏ, ଏନ୍ତେ ଆନ୍ଦ୍ରିୟାସ୍ ଆଡୋଃ ଫିଲିପୁସ୍ ବାରାନ୍‍କିନ୍ ସେନ୍ କେତେ ୟୀଶୁ କେ କାଜିକିଜାକିନ୍। ଏନ୍ତେ ୟୀଶୁ ଇନ୍‍କୁକେ କାଜିକେଦାଏ, “ଏନ୍ ସାମାୟ୍ ସେଟେର୍ ଜାନା ଚି ଇଙ୍ଗ୍ ମାନ୍‍ୱା ରାଃ ହୋନ୍ ରାଃ ମାନାରାଙ୍ଗ୍ ହୋବାଅଃକା। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଚିମିନ୍ ସାନ୍ତେ ଗହମ୍ ରାଃ ମିୟାଃ ହିତା-ଯାଙ୍ଗ୍ ଅତେ ରେ ଉୟୁଃ କେତେ କାଏ ଗୋଜୋଗା, ଏନା ଏସ୍କାର୍ ଗି ତାଇନା, ମେନ୍ଦୋ ଚିମ୍ତା ଗୋଏଃ କୋୱା, ଏଣ୍ଡେ ମିଃଥିମ୍ବା ଯଅ କୋୱା। ଅକଏ ଆୟାଃ ଜୀଦାନ୍ କେ ସୁକୁୱାଏ, ହିନିଃ ଏନାକେ ଆଃ କେୟାଏ, ଏନ୍ତେ ଅକଏ ନେ ଅତେଦିଶୁମ୍ ରେ ଆୟାଃ ଜୀଦାନ୍ କେ କାଏ ସୁକୁୱାଏ, ଇନିଃ ଆୟାଃ ଜୀଦାନ୍ କେ ଜାନାଓ ଜୀଦାନ୍ ଲାଗିନ୍ ବାଚାଓ କେୟାଏ। ଆଗାର୍ ଜାହାଁଏ ଇଙ୍ଗ୍ଆଃ ସେୱାୟାଏ, ଏଣ୍ଡେ ଇନିଃ ଇଙ୍ଗ୍ଆଃ ଚେଲା ବାଇୟୋଃ କାଏ; ଏନ୍ତେ ଅକତାଃ ଇଙ୍ଗ୍ ମେନାଇଙ୍ଗ୍‍ୟା, ହେନ୍ତାଃ ଇଙ୍ଗ୍ଆଃ ସେୱାନିଃ ହ ତାଇନୋଗାଏ। ଆଗାର୍ ଜାହାଁଏ ଇଙ୍ଗ୍ଆଃ ସେୱାୟାଏ, ଏଣ୍ଡେ ଆବା ଇନିଃକେ ମାଇନ୍ ୟାଏ।” “ନାଆ ଇଙ୍ଗ୍ଆଃ ଜୀଉ ରେ କାଇଙ୍ଗ୍ ସାହାଅ ତାନା। ଏନାମେନ୍ତେ ନାଆ ଇଙ୍ଗ୍ ଚିନାଃ କାଜିୟାଇଙ୍ଗ୍? ‘ହେ ଆବା, ଇଙ୍ଗ୍‍କେ ନେ ଦୁକୁ ରାଃ ସାମାୟ୍ ତେ ବାଞ୍ଚାଅୱିଙ୍ଗ୍ ମେ?’ କାହା, ଚିୟାଃଚି ଇଙ୍ଗ୍ ନେଲାଗିନ୍ ଗି ନେ ଅତେଦିଶୁମ୍ ରେ ସେଟେରା କାନିଙ୍ଗ୍। ହେ ଆବା, ଆମାଃ ନୁତୁମ୍ ରାଃ ମାନାରାଙ୍ଗ୍ ରିକାଏମେ।” ଏନ୍ତେ ପାର୍ମେଶ୍ଵାର୍ ରିମିଲ୍‍ଦିଶୁମ୍ ତେ ନେ କାଜି କାଜିକେଦାଏ, “ଇଙ୍ଗ୍ ଇନିଜାଃ ମାନାରାଙ୍ଗ୍ କାଦାଇଙ୍ଗ୍, ହାର୍ ଆଡୋଃଗି ରିକାୟାଇଙ୍ଗ୍।” ଏନ୍ତେ ଅକନ୍ ହୋଡ଼ୋକୋ ତିଙ୍ଗୁ କେତେ ଆୟୁମ୍ ତାଇକେନାକୋ ଇନ୍‍କୁ କାଜିକେଦାକୋ ଚି ରିମିଲ୍ ସାଡିଜାନା। ଏଟାଃକୋ କାଜିକେଦାକୋ, “ମିୟାଃ ସିର୍ମାଦାସୀ ଇନିଃ ଲୋଃ ବାକାଣ୍ କେଦାଏ।” ଏନ୍ତେ ୟୀଶୁ କାଜିକେଦାଏ, “ନେ ଆୱାଜ୍ ଇଙ୍ଗ୍ଆଃ ନାଙ୍ଗ୍ କାହା, ମେନ୍ଦୋ ଆପେ ନାଙ୍ଗ୍ ହିଜୁଃଜାନା। ନାଆ ନେ ଅତେଦିଶୁମ୍ ରାଃ ବିଚାର୍ ହୋବାଅଃତାନା, ନାଆ ନେ ଅତେଦିଶୁମ୍ ରେ ରାଇଜ୍ ତାନ୍ ଶାଏତାନ୍ ଅଡୋଙ୍ଗ୍ ରିକାଅଗାଏ; ହାର୍ ଚିମ୍ତାଙ୍ଗ୍ ଇଙ୍ଗ୍ ଅତେ ଏତେ ଚେତାନ୍ କ୍ରୁଶ୍ ରେ ରାକାବୋଗାଇଙ୍ଗ୍, ଏଣ୍ଡେ ସବେନ୍ କୋକେ ଇଙ୍ଗ୍ଆଃ ଜାପାଃ ଥାଇଃ କୋୱାଇଙ୍ଗ୍।” ନେଲେକା କାଜିକେତେ ଇନିଃ ନେୟା ଉଦୁବ୍ ତାଦାଏ ଚି ଇନିଃ ଚିଲ୍‍କା ଗୋନୋଏଃ ତେ ଗୋଜୋଗାଏ। ଏନାତେ ହୋଡ଼ୋକୋ ଇନିଃକେ କାଜିକେଦାକୋ, “ଆଲେ ମୁଶା ନାବୀ ରାଃ ଆଇନ୍ ରାଃ ନେ କାଜି ଆୟୁମ୍ କାଦାଲେ ଚି ମାସୀହ୍ ସବେନ୍ ହୁଲାଙ୍ଗ୍ ଜୀହିଃ ତାଇନୋଗାଏ, ହାର୍ ଆମ୍ ଚିନାଃ ମେନ୍ତେ କାଜିତାନାମ୍ ଚି ମାନ୍‍ୱା ରାଃ ହୋନ୍ କେ ଚେତାନ୍ ରାକାବ୍ ଜାରୁରୀ ମେନାଃ? ନେ ମାନ୍‍ୱା ରାଃ ହୋନ୍ ଅକଏ ତାନିଃ?” ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ମାସ୍କାଲ୍ ନାଆ ହୁଡିଙ୍ଗ୍ ସାମାୟ୍ ଲାଗିନ୍ ଆପେ ଥାଲା ରେ ମେନିଜା। ଚିମିନ୍ ସାନ୍ତେ ମାସ୍କାଲ୍ ଆପେ ଥାଲା ରେ ମେନିଜା ଏନ୍ ସାନ୍ତେ ସେନ୍ କାତେପେ, କାରେଦୋ ନୁବାଃ ଆପେକେ ଛେକାଃ ତାପେୟାଏ। ଅକଏ ନୁବାଃ ରେ ସେସେନାଏ ଇନିଃ କାଏ ସାରିୟାଏ ଚି କୋତେ ସେନ୍ ତାନାଏ। ଚିମିନ୍ ସାନ୍ତେ ମାସ୍କାଲ୍ ଆପେ ଲୋଃ ମେନାଇଜା, ମାସ୍କାଲ୍ ରେ ବିଶ୍ଵାସ୍ ଏପେ ଏନାତେ ଆପେ ମାସ୍କାଲ୍ ରାଃ ହୋନ୍‍ଗାଣା ପେ ବାଇୟୋଗା।” ନେ କାଜିକୋ କାଜିକେତେ ୟୀଶୁ ସେନୋଃ ଜାନାଏ ହାର୍ ଇନ୍‍କୁ ଏତେ ଉକୁ ଜାନାଏ। ଇନିଃ ଇନ୍‍କୁୱାଃ ସାମାନାଙ୍ଗ୍ ରେ ଇମିନାଙ୍ଗ୍ ଚିହ୍ନା ଦେଖାଅ କେଦାଏ ଏଣ୍ଡେ ହଗି, ଇନ୍‍କୁ ଇନିଜାଃ ଚେତାନ୍ ରେ କାକୋ ବିଶ୍ଵାସ୍ କେଦା; ଏନାତେ ୟାଶାୟାହ୍ ନାବୀ ରାଃ କାଜି ତେୟାଃ ପୁରା ହୋବାଅଃକା ଅକନାଃ ଇନିଃ କାଜିକେଦାଏ, “ହେ ପ୍ରାଭୁ, ଅକଏ ଆଲେୟାଃ ସାନ୍ଦେଶ୍ କେ ବିଶ୍ଵାସ୍ କେଦାଏ? ହାର୍ ପାର୍ମେଶ୍ଵାର୍ ଆଃ ପେଡ଼େଏ ଅକଏ ଲାଗିନ୍ତେ ନେଲ୍ ଜାନା?” ଏନାମେନ୍ତେ ଇନ୍‍କୁ କାକୋ ବିଶ୍ଵାସ୍ ଧାଡ଼ି କେଦା, ଚିୟାଃଚି ୟାଶାୟାହ୍ ନାବୀ ନେୟା ହ କାଜିକାଦାଏ, “ଇନିଃ ଇନ୍‍କୁୱାଃ ମେଏଃ କେ ଆନ୍ଧା ହାର୍ ଇନ୍‍କୁୱାଃ ମୋନ୍ କେ କେଟେଃ କେଦାଏ; କାରେଦୋ ଇନ୍‍କୁ ମେଏଃ ତେ ନେଲେ ତେୟାଃକୋ, ହାର୍ ମୋନ୍ ତେ ବୁଝାଅଃ ତେୟାଃକୋ, ହାର୍ ପାପ୍ କାମି ବାଗେ ତେୟାଃକୋ, ହାର୍ ଇଙ୍ଗ୍ ଇନ୍‍କୁକେ ବେଶ୍ ତାକୋ ତେୟାଃଇଙ୍ଗ୍।” ୟାଶାୟାହ୍ ନେ କାଜି ନେୟାମେନ୍ତେ କାଜିକେଦାଏ ଚି ଇନିଃ ୟୀଶୁ ରାଃ ଆୟୁର୍ତେ ହୋବାଅଃ ତେୟାଃ ମାନାରାଙ୍ଗ୍ ନେଲ୍ ଲେଦାଏ, ହାର୍ ଇନିଃ ଇନିଜାଃ ବିଷାୟ୍ ରେ କାଜିକେଦାଏ। ଏଣ୍ଡେ ହଗି ୟାହୁଦୀ ଗୁରୁ କୋତେ ଥିମ୍ବାଗି ହୋଡ଼ୋକୋ ଇନିଃକେ ବିଶ୍ଵାସ୍ କିଜାକୋ, ମେନ୍ଦୋ ଫାରିସୀ ହୋଡ଼ୋ କୋୱାଃ ଚାଲ୍ତେ ହୋଡ଼ୋକୋୱାଃ ନେପେଲ୍ ରେ କାକୋ ଗ୍ରାହାନ୍ ତାଇକେନା, କାରେଦୋ ଇନ୍‍କୁକେ ବିନ୍ତିଅଡ଼୍ଆଃ ଏତେ ଅଡୋଙ୍ଗ୍ ତାଃ କୋତେକୋ, ଚିୟାଃଚି ହୋଡ଼ୋ କୋଏତେ ମାଇନ୍ ନାନାମ୍ ଇନ୍‍କୁକେ ପାର୍ମେଶ୍ଵାର୍ ପାଡ଼େତେ ମାଇନ୍ ନାମୋଃ ଏନାତେ ଥିମ୍ବା ବେଶ୍ ଆଦା କୋ ତାଇନା। ୟୀଶୁ ହୋଡ଼ୋକୋକେ ଜୋର୍ତେ କାଜିକେଦାଏ, “ଅକଏ ଇଙ୍ଗ୍‍କେ ବିଶ୍ଵାସ୍ ତାନାଏ, ଇନିଃ ଇଙ୍ଗ୍‍କେ ଭାଇର୍ କାହା ମେନ୍ଦୋ ଇଙ୍ଗ୍ଆଃ କୁଲ୍‍ନିଃ କେ ବିଶ୍ଵାସ୍ ତାନାଏ। ହାର୍ ଅକଏ ଇଙ୍ଗ୍‍କେ ନେଲ୍ ତାନାଏ, ଇନିଃ ଇଙ୍ଗ୍ଆଃ କୁଲ୍‍ନିଃ କେ ନେଲ୍ ତାନାଏ। ଇଙ୍ଗ୍ ଅତେଦିଶୁମ୍ ରେ ମାସ୍କାଲ୍ ବାଇକେତେ ହିଜୁଃ କାନିଙ୍ଗ୍, ଏନାତେ ଅକଏ ଇଙ୍ଗ୍‍କେ ବିଶ୍ଵାସ୍ ୟାଏ ଇନିଃ ନୁବାଃ ରେ କାଏ ତାଇନୋଗାଏ। ଆଗାର୍ ଜାହାଁଏ ଇଙ୍ଗ୍ଆଃ ବାକାଣ୍ ଆୟୁମ୍‍କେତେ କାଏ ମାନାତିଙ୍ଗାଏ, ଏଣ୍ଡେ ଇଙ୍ଗ୍ ଇନିଃକେ କାଇଙ୍ଗ୍ ଦୋଷୀୟା; ଚିୟାଃଚି ଇଙ୍ଗ୍ ଅତେଦିଶୁମ୍ ରେନ୍ ହୋଡ଼ୋକୋକେ ଦୋଷୀ ବାଇଲାଗିନ୍ କାହା, ମେନ୍ଦୋ ଅତେଦିଶୁମ୍ ରେନ୍ ହୋଡ଼ୋକୋକେ ବାଞ୍ଚାଅ ଲାଗିନ୍ ହିଜୁଃ କାନିଙ୍ଗ୍। ଅକଏ ଇଙ୍ଗ୍‍କେ କାଏ ମାନାତିଙ୍ଗାଏ ଏନ୍ତେ ଇଙ୍ଗ୍ଆଃ ବାକାଣ୍ କାଏ ଗ୍ରାହାନ୍ ୟାଏ ଇନିଃକେ ଦୋଷୀ ଲାଗିନ୍ ମିହୋଡ଼୍ ମେନିଜା, ମାନେ ଅକନ୍ ବାଚାନ୍ ଇଙ୍ଗ୍ କାଜିକେଦାଇଙ୍ଗ୍, ଏନାଗି ଆଖ୍ରୀ ହୁଲାଙ୍ଗ୍ ହିନିଃକେ ଦୋଷୀ ବାଇୟାଏ। ଚିୟାଃଚି ଇଙ୍ଗ୍ ଇଙ୍ଗ୍ଆଃ ପାଡ଼େତେ ନେ କାଜି କାଇଙ୍ଗ୍ କାଜି; ମେନ୍ଦୋ ଆବା ଅକଏ ଇଙ୍ଗ୍‍କେ କୁଲ୍ କାଦିଙ୍ଗାଏ ଇନିଃଗି ଇଙ୍ଗ୍‍କେ ଆନାଚୁ ଏମ୍ କାଦିଙ୍ଗାଏ ଚି ଚିନାଃ-ଚିନାଃ କାଜିୟାଇଙ୍ଗ୍ ହାର୍ ଚିନାଃ-ଚିନାଃ ବାକାଣ୍ ୟାଇଙ୍ଗ୍। ହାର୍ ଇଙ୍ଗ୍ ସାରିୟାଇଙ୍ଗ୍ ଚି ଇନିଜାଃ ଆନାଚୁ ଜାନାଓ ଜୀଦାନ୍ ତାନାଃ। ଏନାମେନ୍ତେ ଇଙ୍ଗ୍ ଅକନାଃ କାଜିୟାଇଙ୍ଗ୍, ଏନା ଜେଲେକା ଆବା ଇଙ୍ଗ୍‍କେ କାଜିକାଦାଏ ଏନ୍‍ଲେକାଗି କାଜିୟାଇଙ୍ଗ୍।” ଫାସାହ୍ ପାରାବ୍ ସିଦାରେ, ଚିମ୍ତା ୟୀଶୁ ସାରିକେଦାଏ ଚି ଇଙ୍ଗ୍ଆଃ ଏନ୍ ସାମାୟ୍ ସେଟେର୍ ଜାନା ଚି ଅତେଦିଶୁମ୍ କେ ବାଗେ କେତେ ଆବା ତାଃ ସେନାଇଙ୍ଗ୍, ଏଣ୍ଡେ ଆଏଃକେ ଅତୋଙ୍ଗିତାନ୍ ହୋଡ଼ୋକୋକେ ଅକନ୍‍କୋ ଅତେଦିଶୁମ୍ ରେ ତାଇକେନାକୋ ଚିଲ୍‍କା ଦୁଲାଡ଼୍ ଇନିଃ ମାଣ୍ଡାଅ ତାଇନାଏ, ଟୁଣ୍ଡୁ ସାନ୍ ଏନ୍‍ଲେକାଗି ପୁରାଃଗି ଦୁଲାଡ଼୍ କେଃକୋୱାଏ। ଚିମ୍ତାଙ୍ଗ୍ ଶାଏତାନ୍ ଶିମୋନ୍ ରାଃ ହୋନ୍ ୟାହୁଦା ଇସ୍କାରିୟୋତୀ ରାଃ ମୋନ୍ ରେ ନେ କାଜି ସାଜୁ ଛାବା ଲେଦାଏ ଚି ଇନିଃକେ ସାବ୍ ରିକାୟିୟାଏ, ଦୋ ଆୟୁବ୍ ରାଃ ଜୋମ୍ ସାମାୟ୍ ରେ, ୟୀଶୁ ନେୟା ସାରିକେତେ ଚି ଆବା ଇଙ୍ଗ୍ଆଃ ତିଈ ରେ ସବେନାଃ ରାଃ ଜିମା କାଦିଙ୍ଗ୍ଆଏ ଏନ୍ତେ ଇଙ୍ଗ୍ ପାର୍ମେଶ୍ଵାର୍ ହେତେ ହିଜୁଃ କାନିଙ୍ଗ୍ ଆଡୋଃ ପାର୍ମେଶ୍ଵାର୍ ତାଃ ସେନ୍ ତାନିଙ୍ଗ୍, ଇନିଃ ଜୋମ୍ ତାଃ ଏତେ ବିରିଃ ଜାନାଏ ଆଜାଃ ଚେତାନ୍ ରାଃ ଲିଜାଃ ଖଲାଅ କେଦାଏ ଏନ୍ତେ ଗାମ୍‍ଛା ଇଦିକେତେ ମାୟାଙ୍ଗ୍ ରେ ଥୋଲ୍ ଜାନାଏ। ଏନ୍ତେ ଆବୁଙ୍ଗ୍ ତେୟାଃ ମାରାଙ୍ଗ୍ ଥାରିୟା ରେ ଦାଆ ଫେରେଃ କେତେ ଆୟାଃ ଚେଲାକୋୱାଃ କାଟା ଆବୁଙ୍ଗ୍ କେଦାଏ ଏନ୍ତେ ମାୟାଙ୍ଗ୍ ରେ ଥୋଲ୍ ଗାମ୍‍ଛା ଏତେ ଗି ଜଅଃ ଏଟେଃ କେଦାଏ। ଚିମ୍ତା ଶିମୋନ୍ ପାତ୍ରାସ୍ ରାଃ ନାଡ଼େଏ ସେଟେର୍ ଜାନାଏ, ଇମ୍ତା ପାତ୍ରାସ୍ ଇନିଃକେ କାଜିକିଜାଏ, “ହେ ପ୍ରାଭୁ, ଇଙ୍ଗ୍ଆଃ ହ କାଟା ଆବୁନ୍‍ୟାମ୍ ଚି?” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଅକନାଃ ଇଙ୍ଗ୍ ରିକାତାନିଙ୍ଗ୍, ନାଆ ଆମ୍ ଏନାକୋ କାମ୍ ସାରିୟା, ମେନ୍ଦୋ ନେୟା ତାୟୋମ୍ତେ ସାରିଧାଡ଼ିୟାମ୍।” ପାତ୍ରାସ୍ ଇନିଃକେ କାଜିକେଦାଏ, “ଆମ୍ ଇଙ୍ଗ୍ଆଃ କାଟା ଚିଉଲା ହ ଆଲୋ ଆବୁନେମ୍!” ନେୟା ଆୟୁମ୍ କେତେ ୟୀଶୁ ଇନିଃକେ କାଜିକେଦାଏ, ଆଗାର୍ ଇଙ୍ଗ୍ ଆମାଃ କାଟା କାଇଙ୍ଗ୍ ଆବୁନେୟା ଏଣ୍ଡେ ଆମ୍ ଇଙ୍ଗ୍ଆଃ ଚେଲା ନାହାଲାମ୍। ଶିମୋନ୍ ପାତ୍ରାସ୍ ଇନିଃକେ କାଜିକିଜାଏ, “ହେ ପ୍ରାଭୁ, ଏଣ୍ଡେ ଦୋ ଇଙ୍ଗ୍ଆଃ କାଟା ଭାଇର୍ କାହା, ମେନ୍ଦୋ ତିଈ ଆଡୋଃ ବୋଅ ହ ଆବୁଙ୍ଗ୍ ତାମ୍।” ୟୀଶୁ ଇନିଃକେ କାଜିକିଜାଏ, “ଅକଏ ଉମେନ୍ ଛାବା କାନାଏ ଇନିଃକେ କାଟା କେ ବାଗେ କେତେ ଆଡୋଃ ଜାହାନାଃ ଆବୁଙ୍ଗେନ୍ ଦାର୍‍କାର୍ ବାନୋଃ ଇନିଃ ପୁରା ସାଫା କାନାଏ, ଆମ୍ ସାଫା କାନାମ୍ ମେନ୍ଦୋ ସବେନ୍ କାହା।” ଇନିଃ ଦୋ ଆଏଃକେ ସାବ୍ ରିକାନିଃ କେ ସାରି ତାଇନାଏ ଏନାମେନ୍ତେ ଇନିଃ କାଜିକେଦାଏ, “ଆପେ ସବେନ୍ ସାଫା କାପେ ମେନାପେୟା।” ଚିମ୍ତା ୟୀଶୁ ଇନ୍‍କୁୱାଃ କାଟା ଆବୁଙ୍ଗ୍ ଛାବା କେଦାଏ, ଆୟାଃ ଚେତାନ୍ ରାଃ ଲିଜାଃ ଅକନାଃ ଖଲାଅ ଲେଦାଏ ଏନା ତୁସିଙ୍ଗ୍ କେତେ ଦୁବ୍ ଜାନାଏ, ଏନ୍ତେ କାଜିକେଦାଏ, “ଚିନାଃ ନାଆ ଆପେ ବୁଝାଅଜାନାପେ ଚି ଇଙ୍ଗ୍ ଆପେ ଲୋଃ ଚିନାଃ ରିକାକେଦାଇଙ୍ଗ୍? ଆପେ ଇଙ୍ଗ୍‍କେ ଗୁରୁ ହାର୍ ପ୍ରାଭୁ କାଜିୟାପେ, ଠିକ୍ ଗି କାଜିୟାପେ, ଚିୟାଃଚି ଇଙ୍ଗ୍ ଇନିଃଗି ତାନିଙ୍ଗ୍। ଆଗାର୍ ଇଙ୍ଗ୍ ପ୍ରାଭୁ ହାର୍ ଗୁରୁ ହୋବାକେତେ ଆପେୟାଃ କାଟାକୋ ଆବୁଙ୍ଗ୍ କେଦାଇଙ୍ଗ୍, ଏଣ୍ଡେ ଆପେ ହ ମିହୋଡ଼୍ ଏଟାଃ ନିଈ କେ କାଟା ଆବୁଙ୍ଗ୍ କେତେ ଇଙ୍ଗ୍ ଲେକା ବାଇଏନ୍ ଚାହି। ଚିୟାଃଚି ଇଙ୍ଗ୍ ଆପେକେ ନାମୁନା ଦେଖାଅ କେଃପେୟାଇଙ୍ଗ୍, ଚିଲ୍‍କା ଇଙ୍ଗ୍ ଆପେଲୋଃ ରିକାକେଦାଇଙ୍ଗ୍ ଆପେ ହ ଏନ୍‍ଲେକାଗି ରିକାଏପେ। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, ଦାସୀ ଆୟାଃ ଗୋମ୍‍କେ ଏତେ ମାରାଙ୍ଗ୍ ନାହାଲାଏ, ହାର୍ ନା କୁଲାକାନ୍ ନିଃ ଆୟାଃ କୁକୁଲ୍ ନିଃତେ। ଆପେ ନେ ବାକାଣ୍ ସାରିୟାପେ, ହାର୍ ଆଗାର୍ ନେଲେକା ଗି ରିକାୟାପେ ଆପେ ଆଶିଷ୍ ନାମେୟାପେ। ଇଙ୍ଗ୍ ଆପେ ସବେନ୍ କୋୱାଃ ବିଷାୟ୍ ରେ କାଇଙ୍ଗ୍ କାଜିତାନା, ଅକନ୍ କୋକେ ଇଙ୍ଗ୍ ସାଲା କାଃପେୟାଇଙ୍ଗ୍, ଇନ୍‍କୁକେ ଇଙ୍ଗ୍ ସାରିୟାଇଙ୍ଗ୍; ମେନ୍ଦୋ ନେୟା ନେୟାଲାଗିନ୍ ହୋବାଅଃ ତାନା ଚି ପାବିତାର୍ ପୁଥି ରାଃ ବାଚାନ୍ ପୁରା ହୋବାଅଃକା, ‘ଅକଏ ଇଙ୍ଗ୍ଆଃ ଲୋଃ ହୋଲୋଙ୍ଗ୍ ଜୋମ୍ କେଦାଏ, ଇନିଃଗି ଇଙ୍ଗ୍‍କେ ହିଡ଼୍ କେଦିଙ୍ଗାଏ।’ ନାଆ ଇଙ୍ଗ୍ ଏନା ହୋବାଅଃ ସିଦାରେ ଆପେକେ ଉଦୁବ୍ ପେ ତାନିଙ୍ଗ୍ ଚି ଚିମ୍ତା ନେୟା ହୋବାକୋୱା ଏଣ୍ଡେ ଆପେ ବିଶ୍ଵାସ୍ ୟାପେ ଚି ଇଙ୍ଗ୍ ଏନ୍ ମାସୀହ୍ ଗି ତାନିଙ୍ଗ୍। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଅକଏ ଇଙ୍ଗ୍ଆଃ କୁଲ୍ ନିଈ କେ ଗ୍ରାହାନ୍ ୟାଏ, ଇନିଃ ଇଙ୍ଗ୍‍କେ ଗ୍ରାହାନ୍ ୟାଏ, ହାର୍ତେ ଅକଏ ଇଙ୍ଗ୍‍କେ ଗ୍ରାହାନ୍ ୟାଏ, ଇନିଃ ଇଙ୍ଗ୍ଆଃ କୁଲ୍ ନିଃକେ ଗ୍ରାହାନ୍ ୟାଏ।” ନେ ବାକାଣ୍ କାଜିକେତେ ୟୀଶୁ ଆତ୍ମା ରେ କାଏ ସାହାଅ ଧାଡ଼ି କେଦା ଏନ୍ତେ ଆୟାଃ ଚେଲା କୋକେ କାଜିକେଦାଏ, “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଆପେ ହେତେ ମିହୋଡ଼୍ ଇଙ୍ଗ୍‍କେ ସାବ୍ ରିକାଇଙ୍ଗ୍ ୟାଏ।” ଚେଲାକୋ ସାନ୍ଦେହ୍ କେତେ, ଚି ଇନିଃ ଅକେୟାଃ ବିଷାୟ୍ ରେ କାଜି ତାନାଏ ମିହୋଡ଼୍ ଏଟାଃ ନିଈ କେ ନେଲ୍ କେଦାକୋ। ଇନିଜାଃ ଚେଲାକୋ ଏତେ ମିହୋଡ଼୍ ଅକଏକେ ୟୀଶୁ ଦୁଲାଡ଼୍ ତାଇକେନାଏ, ୟୀଶୁ ରାଃ କୁଡ଼ାମ୍ ସାମାନାଙ୍ଗ୍ ପାଡ଼୍ କବଃ କେତେ ଦୁବାକାନ୍ ତାଇକେନାଏ। ଶିମୋନ୍ ପାତ୍ରାସ୍ ଇନିଃକେ ତିଈ ତେ ଥୁକ୍ଡ଼ାଅ କେତେ କୁଲିକେଦାଏ, “ଉଦୁବେମ୍ ତୋ, ଅକେୟାଃ ବିଷାୟ୍ ରେ କାଜି ତାନାଏ?” ଏନ୍ତେ ଇନିଃ ଏନ୍‍ଲେକାଗି ୟୀଶୁ ରାଃ କୁଡ଼ାମ୍ ପାଡ଼୍ ଟେଣ୍ଡେର୍ କେତେ କୁଲିକିଜାଏ, “ହେ ପ୍ରାଭୁ, ଇନିଃ ଅକଏ ତାନିଃ?” ୟୀଶୁ କାଜିରୁଆଡ଼୍ କେଦାଏ, “ଅକନିଃକେ ଇଙ୍ଗ୍ ନେ ହୋଲୋଙ୍ଗ୍ ଖାଣ୍ଡା ଉତୁ ରେ ଡୁବିଃ କେତେ ଏମେୟାଇଙ୍ଗ୍ ହିନିଃଗି ତାନିଃ।” ଏନ୍ତେ ଖାଣ୍ଡା ହୋଲୋଙ୍ଗ୍ କେ ଉତୁ ରେ ଡୁବିଃ କେତେ ଶିମୋନ୍ ରାଃ ହୋନ୍ ୟାହୁଦା ଇସ୍କାରିୟୋତୀ କେ ଏମ୍ କିଜାଏ। ଖାଣ୍ଡା ହୋଲୋଙ୍ଗ୍ ଇଦି ତୋର୍ଷା ଗି ଶାଏତାନ୍ ଇନିଜାଃ ରେ ବୋଲୋ ଜାନାଏ। ଏନ୍ତେ ୟୀଶୁ ଇନିଃକେ କାଜିକେଦାଏ, “ଚିନାଃ ରିକା ସାନାଙ୍ଗ୍ ତାନାମ୍ ସେକାଡ଼୍ ଗି ରିକାଏମେ।” ମେନ୍ଦୋ ଦୁବାକାନ୍ କୋଏତେ ଜାହାଁଏ ହ କାକୋ ସାରିକେଦା ଚି ନେୟା ଚିନାଃ ଲାଗିନ୍ ଇନିଃକେ କାଜିକିଜାଏ। ୟାହୁଦା ତାଃ ଥାଇଲା ତାଇନ୍ ତାଇନା, ଏନାମେନ୍ତେ ଅକଏ-ଅକଏକୋ ବୁଝାଅ ଜାନାକୋ ଚି ୟୀଶୁ ଆଏଃ କାଜିତାନାଏ ଚି ଫାସାହ୍ ପାରାବ୍ ଲାଗିନ୍ ଚିନାଃ କୋ ଦାର୍‍କାର୍ ରେଦୋ କିରିଙ୍ଗ୍ ଚାଏ, ୟାଦୋ ଗାରିବ୍ କୋକେ ହୁଡିଙ୍ଗ୍ ଏମାକୋକାଏ। ୟାହୁଦା ଖାଣ୍ଡା ହୋଲୋଙ୍ଗ୍ ଜୋମ୍ ତାୟୋମ୍ତେ ସେକାଡ଼୍ ଗି ବାହାରି ଅଡୋଙ୍ଗ୍ ଜାନାଏ, ଇମ୍ତା ନୁବାଃ ସାମାୟ୍ ତାଇକେନା। ଚିମ୍ତା ୟାହୁଦା ବାହାରି ଅଡୋଙ୍ଗ୍ ଜାନାଏ ଦୋ ୟୀଶୁ କାଜିକେଦାଏ, “ନାଆ ଇଙ୍ଗ୍ ମାନ୍‍ୱା ରାଃ ହୋନ୍ ରାଃ ମାନାରାଙ୍ଗ୍ ହୋବାଜାନା, ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଇନିଜାଃ ରେ ହୋବାଜାନା। ଆଗାର୍ ଇନିଜାଃ ରେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ହୋବାଜାନାଏ ଏଣ୍ଡେ ପାର୍ମେଶ୍ଵାର୍ ହ ଆୟାଃ ରେ ଆୟାଃ ହୋନ୍ ରାଃ ମାନାରାଙ୍ଗ୍ ରିକାୟାଏ ଆଡୋଃ ସେକାଡ଼୍ ଗି ମାନାରାଙ୍ଗ୍ ରିକାୟାଏ। ହେ ଦୁଲାଡ଼୍ କୋ, ଇଙ୍ଗ୍ ଆଡୋଃ ହୁଡିଙ୍ଗ୍ ସାମାୟ୍ ଆପେ ଲୋଃ ମେନାଇଙ୍ଗ୍ ୟା, ଏନ୍ତେ ଇଙ୍ଗ୍‍କେ ଦାଣାୟାପେ, ହାର୍ତେ ଚିଲ୍‍କା ୟାହୁଦୀ ଗୁରୁ କୋକେ କାଜି କେଃକୋୱାଇଙ୍ଗ୍, ‘ଅକତାଃ ଇଙ୍ଗ୍ ସେନୋଃ ତାନିଙ୍ଗ୍ ହେନ୍ତାଃ ଆପେ କାପେ ହିଜୁଃ ଧାଡ଼ିୟା,’ ଏନ୍‍ଲେକା ଗି ଇଙ୍ଗ୍ ନାଆ ଆପେ କୋକେ ହ କାଜିତାନିଙ୍ଗ୍। ଇଙ୍ଗ୍ ଆପେକେ ମିୟାଃ ନାୱା ଆନାଚୁ ଏମ୍ ପେତାନିଙ୍ଗ୍ ଚି ମିହୋଡ଼୍ ଏଟାଃ ନିଈ ଲୋଃ ଦୁଲାଡ଼୍ ଏପେ, ଚିଲ୍‍କା ଇଙ୍ଗ୍ ଆପେ ଲୋଃ ଦୁଲାଡ଼୍ ମାଣ୍ଡାଅ କେଦାଇଙ୍ଗ୍, ଏନ୍‍ଲେକା ଗି ଆପେ ହ ମିହୋଡ଼୍ ଏଟାଃ ନିଈ ଲୋଃ ଦୁଲାଡ଼୍ ମାଣ୍ଡାଏପେ। ଆଗାର୍ ଆପେ ମିହୋଡ଼୍ ଏଟାଃ ନିଈ ଲୋଃ ଦୁଲାଡ଼୍ ମାଣ୍ଡାଅ ରେଦୋ, ସବେନ୍ କୋ ସାରିୟାକୋ ଚି ଆପେ ଇଙ୍ଗ୍ଆଃ ଚେଲା ତାନ୍‍ପେ।” ଶିମୋନ୍ ପାତ୍ରାସ୍ ୟୀଶୁ କେ କାଜିକେଦାଏ, “ହେ ପ୍ରାଭୁ, ଆମ୍ କୋତାଃ ସେନ୍ ତାନାମ୍?” ୟୀଶୁ କାଜିରୁଆଡ଼୍ କେଦାଏ, “ଅକତାଃ ଇଙ୍ଗ୍ ସେନ୍ ତାନିଙ୍ଗ୍ ଏନ୍ତାଃ ଆମ୍ ନାଆ କାମ୍ ହିଜୁଃ ଧାଡ଼ିୟା, ମେନ୍ଦୋ ନେୟା ତାୟୋମ୍ତେ ଇଙ୍ଗ୍ଆଃ ତାଃ ହିଜୁଃ ୱାମ୍।” ପାତ୍ରାସ୍ ଇନିଃକେ କାଜିକେଦାଏ, “ହେ ପ୍ରାଭୁ, ନାଆ ଇଙ୍ଗ୍ ଚିନାଃ ମେନ୍ତେ ଆମାଃ ଦୋୟା କାଇଙ୍ଗ୍ ହିଜୁଃ ଧାଡ଼ିୟା? ଇଙ୍ଗ୍ ଆମାଃ ଲାଗିନ୍ ଇଙ୍ଗ୍ଆଃ ଜୀଉ ହ ଏମ୍ ତାଃଇଙ୍ଗ୍।” ୟୀଶୁ କାଜିରୁଆଡ଼୍ କେଦାଏ, “ଚିନାଃ ଇଙ୍ଗ୍ଆଃ ଲାଗିନ୍ ଆମ୍ ଜୀଉ ଏମେୟାମ୍? ଇଙ୍ଗ୍ ଆମ୍‍କେ ସାର୍ତି-ସାର୍ତି କାଜିତାନିଙ୍ଗ୍ ଚି ସିମ୍ କାଏ ରାଆଏ ସାନ୍ ଆମ୍ ଆପିସା ଇଙ୍ଗ୍‍କେ କାଇଙ୍ଗ୍ ସାରିୟା କାଜିୟାମ୍।” “ଆପେୟାଃ ମୋନ୍ ଆଲୋକା ଆକ୍‍ବାକାଅଃ କା, ପାର୍ମେଶ୍ଵାର୍ ରେ ବିଶ୍ଵାସ୍ ଦହଏପେ ହାର୍ତେ ଇଙ୍ଗ୍ଆଃ ରେ ହ ବିଶ୍ଵାସ୍ ଦହଏପେ। ଇଙ୍ଗ୍ଆଃ ଆବା ରାଃ ଅଡ଼୍ଆଃ ରେ ମିଃଥିମ୍ବା ତାଇନ୍ ଲାଗିନ୍ ଜାଗା ମେନାଃ, ଆଗାର୍ କାତାଇନ୍ ତେ ହୋଲେ ଇଙ୍ଗ୍ ଆପେକେ କାଜି ତେତେୟାଃଇଙ୍ଗ୍, ଚିୟାଃଚି ଇଙ୍ଗ୍ ଆପେ ଲାଗିନ୍ ଜାଗା ବାବାଇ ସେନୋଃ ତାନିଙ୍ଗ୍। ହାର୍ ଆଗାର୍ ଇଙ୍ଗ୍ ସେନ୍ କେତେ ଆପେୟାଃ ଲାଗିନ୍ ଜାଗା ବାଇକେୟାଇଙ୍ଗ୍, ଏଣ୍ଡେ ଆଡୋଃଗି ହିଜୁଃକେତେ ଆପେ କୋକେ ଇଙ୍ଗ୍ଆଃ ହେନ୍ତାଃ ଇଦିପେୟାଇଙ୍ଗ୍ ଚି ଅକତାଃ ଇଙ୍ଗ୍ ତାହିନାଇଙ୍ଗ୍ ହେନ୍ତାଃ ଆପେ ହ ତାହିନାପେ। ଅକତାଃ ଇଙ୍ଗ୍ ସେନୋଃ ତାନିଙ୍ଗ୍ ଆପେ ହେନ୍ତାଃ ରାଃ ହୋରା ସାରିୟାପେ।” ଥୋମା ଇନିଃକେ କାଜିକେଦାଏ, “ହେ ପ୍ରାଭୁ, ଆଲେ କାଲେ ସାରିୟାଲେ ଚି ଆମ୍ କୋତାଃ ସେନ୍ ତାନାମ୍, ଏଣ୍ଡେ ହୋରା ଆଲେ ଚିଲ୍‍କା ସାରିୟାଲେ?” ୟୀଶୁ ଇନିଃକେ କାଜିକେଦାଏ, “ହୋରା ହାର୍ ସାର୍ତି ହାର୍ ଜୀଦାନ୍ ଇଙ୍ଗ୍ ଗି ତାନିଙ୍ଗ୍। ଇଙ୍ଗ୍ଆଃ ବେଗାର୍ ଜେତାଏ ହଗି ଆବା ତାଃ କାଏ ସେଟେର୍ ଧାଡ଼ିୟାଏ। ଆଗାର୍ ଆପେ ଇଙ୍ଗ୍‍କେ ସାରିଲେନ୍ତେୟାଃପେ, ଦୋ ଇଙ୍ଗ୍ଆଃ ଆବା କେ ହଗି ସାରିତେପେ, ହାର୍ ନାଆ ଏତେ ଇନିଃକେ ସାରି ତାନାପେ ଆଡୋଃ ଇନିଃକେ ନେଲ୍ ହ କାଇଜାପେ।” ଫିଲିପୁସ୍ ଇନିଃକେ କାଜିକେଦାଏ, “ହେ ପ୍ରାଭୁ, ଅକନିଃ ଆବା ତାନିଃ ଆଲେକେ ଦେଖାଅଲେମ୍, ଏନାଗି ଆଲେ ଲାଗିନ୍ତେ ଥିମ୍ବା ହୋବାୱା।” ୟୀଶୁ ଇନିଃକେ କାଜିକେଦାଏ, “ହେ ଫିଲିପୁସ୍, ଇଙ୍ଗ୍ ଇମିନ୍ ହୁଲାଙ୍ଗ୍ ଏତେ ଆପେ ଲୋଃ ମେନାଇଙ୍ଗ୍ ୟା, ହାର୍ ଚିନାଃ ଆମ୍ ଇଙ୍ଗ୍‍କେ କାମ୍ ସାରିୟା? ଅକଏ ଇଙ୍ଗ୍‍କେ ନେଲ୍ କାଦିଙ୍ଗାଏ ଇନିଃ ଆବା କେ ନେଲ୍ କାଦାଏ। ଆମ୍ ଚିନାଃ ମେନ୍ତେ କାଜିୟାମ୍ ଚି ଅକନିଃ ଆବା ତାନିଃ ଆଲେକେ ଦେଖାଅଲେମ୍? ଚିନାଃ ଆମ୍ କାମ୍ ବିଶ୍ଵାସ୍ ତାନା ଚି ଇଙ୍ଗ୍ ଆବା ରେ ମେନାଇଙ୍ଗ୍ ୟା ହାର୍ତେ ଆବା ଇଙ୍ଗ୍ଆଃ ରେ ମେନିଜା? ନେ ବାକାଣ୍ ଅକନାଃ ଇଙ୍ଗ୍ ଆମ୍ କେ କାଜିତାନିଙ୍ଗ୍, ଏନା ଇଙ୍ଗ୍ଆଃ ପାଡ଼୍ ଏତେ କାଇଙ୍ଗ୍ କାଜିତାନା, ମେନ୍ଦୋ ଆବା ଇଙ୍ଗ୍ଆଃ ରେ ତାଇନ୍ କେତେ ଆଜାଃ କାମି କାମିତାନାଏ। ଇଙ୍ଗ୍ଆଃ ବିଶ୍ଵାସ୍ ଏପେ ଚି ଇଙ୍ଗ୍ ଆବା ରେ ମେନାଇଙ୍ଗ୍ ୟା ହାର୍ତେ ଆବା ଇଙ୍ଗ୍ଆଃ ରେ ମେନିଜା, କାରେଦୋ ଆକ୍‍ଦାନ୍ଦା କାମି ନେଲ୍‍କେତେ ଗି ବିଶ୍ଵାସ୍ ଏପେ।” ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଅକଏ ଇଙ୍ଗ୍ଆଃ ରେ ବିଶ୍ଵାସ୍ ମାଣ୍ଡାଅୟାଏ, ଇନିଃ ନେ କାମି ଅକନାଃ ଇଙ୍ଗ୍ କାମିତାନିଙ୍ଗ୍ ଇନିଃ ହଗି କାମିୟାଏ, ମେନ୍ଦୋ ନେୟା ତେ ହଗି ମାପ୍‍ରାଙ୍ଗ୍ କାମି କାମିୟାଏ, ଚିୟାଃଚି ଇଙ୍ଗ୍ ଆବା ତାଃ ସେନ୍ ତାନିଙ୍ଗ୍। ଜାହାନାଃ ହ ଇଙ୍ଗ୍ଆଃ ନୁତୁମ୍ ରେ ଆସିୟାପେ, ଏନାଗି ଇଙ୍ଗ୍ ରିକାୟାଇଙ୍ଗ୍ ଏନାତେ ହୋନ୍‍କଡ଼ା ରାଃ ହୋରାତେ ଆବା ଗାଃ ମାନାରାଙ୍ଗ୍ ହୋବାଅଃକା। ଆଗାର୍ ଆପେ ଜାହାନାଃ ଇଙ୍ଗ୍ଆଃ ନୁତୁମ୍ ତେ ଆସିୟାପେ, ଏଣ୍ଡେ ଇଙ୍ଗ୍ ଏନାକେ ରିକାୟାଇଙ୍ଗ୍। “ଆଗାର୍ ଇଙ୍ଗ୍‍କେ ଆପେ ଦୁଲାଡ଼ିଙ୍ଗ୍ ରେଦୋ ଇଙ୍ଗ୍ଆଃ ଆନାଚୁ କୋକେ ମାନାତିଙ୍ଗ୍ ୟାପେ। ଇଙ୍ଗ୍ ଆବା କେ ଆସିୟାଇଙ୍ଗ୍, ହାର୍ତେ ଇନିଃ ଆପେକେ ଆଡୋଃ ମିୟାଃ ସାହାଏତା ନିଈ ଏମାପେୟାଏ ଚି ଇନିଃ ଜାନାଓ ଗି ଆପେ ଲୋଃ ତାହିନାଏ। ଇନିଃ ପାବିତାର୍ ଆତ୍ମା ତାନିଃ, ଅକନିଃ ପାର୍ମେଶ୍ଵାର୍ ବିଷାୟ୍ ରେ ସାର୍ତି କାଜିକେ ଉଦୁବ୍ ୟାଏ। ଅକନିଃକେ ଅତେଦିଶୁମ୍ କାଏ ଗ୍ରାହାନ୍ ଧାଡ଼ିୟାଏ, ଚିୟାଃଚି ଇନିଃକେ ଅତେଦିଶୁମ୍ କାଏ ନେଲେୟାଏ ହାର୍ ନା ସାରିୟାଏ, ମେନ୍ଦୋ ଆପେ ଇନିଃକେ ସାରିୟାପେ, ଚିୟାଃଚି ଇନିଃ ଆପେ ଲୋଃ ତାହିନ୍ ତାନାଏ, ହାର୍ ଇନିଃ ଆପେ ଲୋଃ ତାହିନାଏ। ଇଙ୍ଗ୍ ଆପେକେ ଟୁୱାର୍ ଲେକା କାଇଙ୍ଗ୍ ବାଗେପେୟା, ଇଙ୍ଗ୍ ଆପେତାଃ ହିଜୁଃ ତାନିଙ୍ଗ୍। ହୁଡିଙ୍ଗ୍ ସାମାୟ୍ ତାଇଜାନା ଚି ଅତେଦିଶୁମ୍ ଇଙ୍ଗ୍‍କେ କାଏ ନେଲିଙ୍ଗ୍‍ୟାଏ, ମେନ୍ଦୋ ଆପେ ଇଙ୍ଗ୍‍କେ ନେଲିଙ୍ଗ୍‍ୟାପେ, ଚିୟାଃଚି ଇଙ୍ଗ୍ ଜୀହିଃ ମେନାଇଙ୍ଗ୍‍ୟା, ଆପେ ହଗି ଜୀହିଃ ତାଇନାପେ। ଏନ୍ ହୁଲାଙ୍ଗ୍ ଆପେ ସାରିୟାପେ ଚି ଇଙ୍ଗ୍ ଇଙ୍ଗ୍ଆଃ ଆବା ରେ ମେନାଇଙ୍ଗ୍‍ୟା, ହାର୍ତେ ଆପେ ଇଙ୍ଗ୍ଆଃ ରେ ହାର୍ ଇଙ୍ଗ୍ ଆପେୟାଃ ରେ। ଅକଏ ତାଃ ଇଙ୍ଗ୍ଆଃ ଆନାଚୁ ମେନାଃ ହାର୍ ଇନିଃ ଏନାକେ ମାନାତିଙ୍ଗ୍‍ୟାଏ, ଇନିଃଗି ଇଙ୍ଗ୍‍କେ ଦୁଲାଡ଼ିଙ୍ଗ୍‍ୟାଏ, ହାର୍ ଅକଏ ଇଙ୍ଗ୍‍କେ ଦୁଲାଡ଼ିଙ୍ଗ୍‍ୟାଏ, ଇନିଃକେ ଇଙ୍ଗ୍ଆଃ ଆପୁ ଦୁଲାଡ଼ିୟାଏ, ହାର୍ ଇଙ୍ଗ୍ ଇନିଃକେ ଦୁଲାଡ଼ିୟାଇଙ୍ଗ୍ ହାର୍ ଇଙ୍ଗ୍ ଆପାନ୍ କେ ଇନିଜାଃ ରେ ଉଦୁବୋଗାଇଙ୍ଗ୍।” ଏନ୍ ୟାହୁଦା ଅକନିଃ ଇସ୍କାରିୟୋତୀ କାଏ ତାଇକେନାଏ, ଇନିଃ କାଜିକେଦାଏ, “ହେ ପ୍ରାଭୁ, ଚିନାଃ ହୋବାଜାନା ଚି ଆମ୍ ଆପାନ୍ କେ ଆଲେ ଚେତାନ୍ ରେ ଉଦୁବେନ୍ ସାନାଙ୍ଗ୍ ତାନାମ୍ ହାର୍ ଅତେଦିଶୁମ୍ ରେନ୍ ହୋଡ଼ୋକୋକେ କାହା?” ୟୀଶୁ ଇନିଃକେ କାଜିରୁଆଡ଼୍ କେଦାଏ, “ଆଗାର୍ ଜାହାଁଏ ଇଙ୍ଗ୍‍କେ ଦୁଲାଡ଼ିଙ୍ଗ୍‍ୟାଏ ଏଣ୍ଡେ ଇନିଃ ଇଙ୍ଗ୍ଆଃ ବାଚାନ୍ କେ ମାନାତିଙ୍ଗ୍‍ୟାଏ, ହାର୍ ଇଙ୍ଗ୍ଆଃ ଆବା ଇନିଃକେ ଦୁଲାଡ଼ିୟାଏ, ହାର୍ତେ ଆଲେ ଇନିଜାଃ ତାଃ ହିଜୁଗାଲେ ହାର୍ ଇନିଃ ରେ ତାଇନାଲେ। ଅକଏ ଇଙ୍ଗ୍‍କେ କାଏ ଦୁଲାଡ଼ିଙ୍ଗ୍‍ୟାଏ, ଇନିଃ ଇଙ୍ଗ୍ଆଃ ବାଚାନ୍ କେ କାଏ ମାନାତିଙ୍ଗ୍‍ୟାଏ, ହାର୍ ଅକନ୍ ବାଚାନ୍ ଆପେ ଆୟୁମ୍ ତାନାପେ ଏନା ଇଙ୍ଗ୍ଆଃ ନାହାଲା ମେନ୍ଦୋ ଆବା ରାଃ ତାନାଃ, ଅକଏ ଇଙ୍ଗ୍‍କେ କୁଲ୍ କାଦିଙ୍ଗାଏ। ନେ ବାକାଣ୍ ଇଙ୍ଗ୍ ଆପେ ଲୋଃ ତାଇନ୍ କେତେ ଆପେ କେ କାଜିକେଦାଇଙ୍ଗ୍। ମେନ୍ଦୋ ସାହାଏତା ନିଈ ମାନେ ପାବିତାର୍ ଆତ୍ମା ଅକନିଃକେ ଆବା ଇଙ୍ଗ୍ଆଃ ନୁତୁମ୍ ତେ କୁଲେୟାଏ, ଇନିଃ ଆପେକେ ସବେନ୍ ବାକାଣ୍ ଶିଖାଅୟାଏ, ଆଡୋଃ ଅକନାଃ ଇଙ୍ଗ୍ ଆପେକେ କାଜିକାଦିଙ୍ଗ୍, ଏନା ସବେନାଃ ଆପେକେ ମୋନେ ରିକା ପେୟାଏ। ଇଙ୍ଗ୍ ଆପେକେ ଜୀଉସୁକୁ ଏମ୍ ତୁକାପେ ତାନିଙ୍ଗ୍, ଇଙ୍ଗ୍ଆଃ ଜୀଉସୁକୁ ଆପେକେ ଏମାପେ ତାନିଙ୍ଗ୍। ଚିଲ୍‍କା ଅତେଦିଶୁମ୍ ଏମାପେୟାଏ ଇଙ୍ଗ୍ ଆପେକେ କାଇଙ୍ଗ୍ ଏମାପେ ତାନା। ଆପେୟାଃ ମୋନ୍ ଆଲୋ ଆକ୍‍ବାକାଅଃ କା ହାର୍ ଆଲୋପେ ବୋରୋଏ। ଆପେ ଆୟୁମ୍ କାଦାପେ ଚି ଇଙ୍ଗ୍ କାଜିକେଦାଇଙ୍ଗ୍, ‘ଇଙ୍ଗ୍ ସେନୋଃ ତାନିଙ୍ଗ୍, ହାର୍ ଆପେତାଃ ଆଡୋଃଗି ହିଜୁଗାଇଙ୍ଗ୍।’ ଆଗାର୍ ଇଙ୍ଗ୍‍କେ ଦୁଲାଡ଼୍ ତାନାପେ ରେଦୋ, ନେ ବାକାଣ୍ ତେ ରାଶିକାଅଃ ତେୟାଃପେ ଚି ଇଙ୍ଗ୍ ଆବା ତାଃ ସେନୋଃ ତାନିଙ୍ଗ୍, ଚିୟାଃଚି ଆବା ଇଙ୍ଗ୍ ଏତେ ମାରାଙ୍ଗ୍ ତାନିଃ। ଆଡୋଃ ଇଙ୍ଗ୍ ନାଆ ନେୟା ହୋବାଅଃ ସିଦାରେ ଆପେକେ ଉଦୁବ୍ କେଦାଇଙ୍ଗ୍, ଚି ଚିମ୍ତା ଏନା ହୋବାକୋୱା, ଦୋ ଆପେ ଇଙ୍ଗ୍‍କେ ବିଶ୍ଵାସ୍ ୟାପେ। ଇଙ୍ଗ୍ ନାଆ ଆପେ ଲୋଃ ଆଡୋଃ ଥିମ୍ବା କାଇଙ୍ଗ୍ ବାକାଣେୟା, ଚିୟାଃଚି ନେ ଅତେଦିଶୁମ୍ ରେ ରାଇଜ୍ ତାନ୍ ଶାଏତାନ୍ ହିଜୁଃ ତାନାଏ। ଇଙ୍ଗ୍ଆଃ ଚେତାନ୍ ରେ ଇନିଜାଃ ଜାହାନ୍ ଆଧିକାର୍ ବାନୋଗା, ମେନ୍ଦୋ ନେୟା ଏନାମେନ୍ତେ ହୋବାଅଃ ତାନା ଚି ଅତେଦିଶୁମ୍ ସାରିକାଏ ଚି ଇଙ୍ଗ୍ ଆବା କେ ଦୁଲାଡ଼୍ ତାନିଙ୍ଗ୍, ଆଡୋଃ ଚିଲ୍‍କା ଆବା ଇଙ୍ଗ୍‍କେ ଆନାଚୁ ଏମ୍ କାଦିଙ୍ଗାଏ ଏନ୍‍ଲେକାଗି ରିକାତାନିଙ୍ଗ୍। ବିରିଃପେ, ନେତାଃ ତେ ସେନାବୁ।” ଇଙ୍ଗ୍ ସାର୍ତି ଆଙ୍ଗୁର୍ ନାଡ଼ି ତାନିଙ୍ଗ୍, ହାର୍ ଇଙ୍ଗ୍ଆଃ ଆବା ଚାଷି ତାନିଃ। ଅକନ୍ କୋତୋ ଇଙ୍ଗ୍ଆଃ ରେ ମେନାଃ ହାର୍ କାଏ ଯଅଃ ତାନା, ଏନାକେ ଇନିଃ ମାଆ କେୟାଏ, ହାର୍ ଅକନ୍ କୋତୋ ଯଅଃ ତାନା ଏନାକେ ହିନିଃ ଛାଁଟାଅ ସାଫାୟାଏ। ଏନାମେନ୍ତେ ଚି ଆଡୋଃଗି ଯଅଃକା। ଆପେ ଦୋ ଏନ୍ ସାନ୍ଦେଶ୍ ରାଃ ହୋରାତେ ଅକନାଃ ଇଙ୍ଗ୍ ଆପେ କୋକେ କାଜିକେଦାଇଙ୍ଗ୍, ସାଫା କାନାପେ। ଆପେ ଇଙ୍ଗ୍ଆଃ ରେ ବାଇକେତେ ତାଇନୋଃପେ, ହାର୍ ଇଙ୍ଗ୍ ଆପେୟାଃ ରେ। ଜେଲେକା କୋତୋ ଆଗାର୍ ଆଙ୍ଗୁର୍ ନାଡ଼ି ରେ ବାଇକେତେ କାଏ ତାଇନୋଃୱାଏ ଦୋ ଆଏଃ ଆପାନ୍ ତେ କାଏ ଯଅ ଧାଡ଼ିୟୋଃୱା, ଏନ୍ ଲେକାଗି ଆପେ କୋ ହ ଆଗାର୍ ଇଙ୍ଗ୍ଆଃ ରେ ବାଇକେତେ କାପେ ତାଇନୋଃୱା ଦୋ କାପେ ଯଅ ଧାଡ଼ିୟୋଃୱା। ଇଙ୍ଗ୍ ଆଙ୍ଗୁର୍ ନାଡ଼ି ତାନିଙ୍ଗ୍, ଆପେ କୋତୋକୋ ତାନ୍‍ପେ। ଅକଏ ଇଙ୍ଗ୍ଆଃ ରେ ବାଇ ତାଇନୋଃୱାଏ ହାର୍ ଇଙ୍ଗ୍ ଇନିଜାଃ ରେ, ହିନିଃ ଥିମ୍ବା ଯଅ ଯୋଃୱାଏ, ଚିୟାଃଚି ଇଙ୍ଗ୍ ଏତେ ଆଲାଗ୍ ହୋବା କେତେ ଆପେ ଜାହାନାଃ ହ କାପେ ରିକା ଧାଡ଼ିୟା। ଆଗାର୍ ଜେତାଏ ଇଙ୍ଗ୍ଆଃ ରେ ବାଇକେତେ କାଏ ତାଇନୋଃୱାଏ, ଏଣ୍ଡେ ଇନିଃ କୋତୋ ଲେକା ମାଆ ଦୁଡ଼ିଙ୍ଗ୍ଅଃୱାଏ, ହାର୍ ରୋହଡ଼୍ କେନୋଃ ୱାଏ, ହାର୍ ହୋଡ଼ୋକୋ ଏନାକେ ହାଲାଙ୍ଗ୍ କେତେ ସେଙ୍ଗେଲ୍ ରେ ଦୁଡ଼ିଙ୍ଗ୍ ଜୁଲ୍ ତାଃକୋ ହାର୍ ଏନାକୋ ଜୁଲ୍ କୋଃୱା। ଆଗାର୍ ଆପେ ଇଙ୍ଗ୍ଆଃ ରେ ବାଇକେତେ ତାଇନୋଃୱାପେ ହାର୍ ଇଙ୍ଗ୍ଆଃ ଶିଖାଅ ଆପେ ରେ ବାଇକେତେ ତାଇନୋଃ ରେ, ଦୋ ଜାହାନାଃଗି ସାନାଙ୍ଗ୍ ୟାପେ ଆସିପେ ହାର୍ ହେନା ଆପେ ଲାଗିନ୍ ହୋବାକୋୱା। ଇଙ୍ଗ୍ଆଃ ଆବା ରାଃ ମାନାରାଙ୍ଗ୍ ନେୟା ତେଗି ହୋବାଅଃୱା ଚି ଆପେ ଥିମ୍ବାଗି ଯଅ ଯୋୟୋପେ, ହୋଲେ ଦୋ ଇଙ୍ଗ୍ଆଃ ଚେଲା ବାଇୟୋଃୱାପେ। ଜେଲେକା ଆବା ଇଙ୍ଗ୍‍କେ ଦୁଲାଡ଼୍ କେଦିଙ୍ଗାଏ, ଏନ୍ ଲେକାଗି ଇଙ୍ଗ୍ ଆପେ କେ ଦୁଲାଡ଼୍ କେଦାଇଙ୍ଗ୍, ଇଙ୍ଗ୍ଆଃ ଦୁଲାଡ଼୍ ରେ ବାଇକେତେ ତାଇନୋଃପେ। ଆଗାର୍ ଆପେ ଇଙ୍ଗ୍ଆଃ ଆନାଚୁ କୋକେ ମାନାତିଙ୍ଗ୍ ୟାପେ, ଏଣ୍ଡେ ଇଙ୍ଗ୍ଆଃ ଦୁଲାଡ଼୍ ରେ ବାଇକେତେ ତାଇନୋଃୱାପେ, ଜେଲେକା ଇଙ୍ଗ୍ ଆବା ରାଃ ଆନାଚୁ କୋକେ ମାନାତିଙ୍ଗ୍ କାଦାଇଙ୍ଗ୍, ହାର୍ ଆୟାଃ ଦୁଲାଡ଼୍ ରେ ବାଇକେତେ ତାଇନୋଃୱାଇଙ୍ଗ୍। ଇଙ୍ଗ୍ ନେ କାଜିକୋ ଆପେ କେ ଏନାମେନ୍ତେ କାଜିକେଦାଇଙ୍ଗ୍, ଚି ଇଙ୍ଗ୍ଆଃ ରାଶିକା ଆପେ ରେ ବାଇତାଇନୋଃକା, ହାର୍ ଆପେୟାଃ ରାଶିକା ପୁରା ହୋବାଅଃକା। “ଇଙ୍ଗ୍ଆଃ ଆନାଚୁ ନେୟା ତାନାଃ, ଚି ଜେଲେକା ଇଙ୍ଗ୍ ଆପେ କେ ଦୁଲାଡ଼୍ କେଦାଇଙ୍ଗ୍, ଏନ୍‍ଲେକାଗି ଆପେ ହଗି ମିହୋଡ଼୍ ଏଟାଃ ନିଈ କେ ଦୁଲାଡ଼୍ ରିକାଏପେ। ନେୟାତେ ମାରାଙ୍ଗ୍ ଦୁଲାଡ଼୍ ଜାହେଁୟାଃ ହ ବାନୋଃ ଚି ଜାହାଁଏ ଆଜାଃ ଗାତିକୋ ଲାଗିନ୍ ଜୀଉ ଏମେୟାଏ। ଅକନ୍ ଆନାଚୁ ଇଙ୍ଗ୍ ଆପେକେ ଏମ୍ ତାନିଙ୍ଗ୍, ଆଗାର୍ ଏନାକେ ମାନାତିଙ୍ଗ୍ ୟାପେ ଏଣ୍ଡେ ଆପେ ଇଙ୍ଗ୍ଆଃ ଗାତି ତାନ୍‍ପେ। ନାଆ ଏତେ ଇଙ୍ଗ୍ ଆପେକେ ଦାସୀ କାଇଙ୍ଗ୍ କାଜିୟା, ଚିୟାଃଚି ଦାସୀ କାଏ ସାରିୟାଏ ଚି ଇନିଜାଃ ଗୋମ୍‍କେ ଚିନାଃ ରିକାୟାଏ, ମେନ୍ଦୋ ଇଙ୍ଗ୍ ଆପେକେ ଗାତି କାଜିକେଦାଇଙ୍ଗ୍, ଚିୟାଃଚି ଇଙ୍ଗ୍ ଅକନ୍ କାଜିକୋ ଇଙ୍ଗ୍ଆଃ ଆବା ତାଃ ତେ ଆୟୁମ୍ କେଦାଇଙ୍ଗ୍, ଏନା ସବେନାଃ ଆପେକେ ଉଦୁବ୍ ତାନିଙ୍ଗ୍। ଆପେ ଇଙ୍ଗ୍‍କେ କାପେ ସାଲା କାଦିଙ୍ଗା ମେନ୍ଦୋ ଇଙ୍ଗ୍ ଆପେକେ ସାଲା କାଦିଙ୍ଗ୍ ଆଡୋଃ ଆପେକେ କାମି ଲାଗିନ୍ ଦୋହୋ କାପେୟାଇଙ୍ଗ୍ ଏନାତେ ଆପେ ସେନ୍‍କେତେ ଯଅ ଆଉୱେପେ, ହାର୍ ଆପେୟାଃ ଯଅ ବାଇ ତାଇନୋଃକା, ଚିୟାଃଚି ଆପେ ଇଙ୍ଗ୍ଆଃ ଚେଲା ତାନ୍‍ପେ ଆପେ ଇଙ୍ଗ୍ଆଃ ନୁତୁମ୍ ରେ ଜାହାନାଃ ହ ଆବା କେ ଆସିୟାପେ, ଇନିଃ ଏନା ଆପେକେ ଏମାପେୟାଏ। ନେ କାଜି କୋରାଃ ଆନାଚୁ ଇଙ୍ଗ୍ ଆପେକେ ଏନାମେନ୍ତେ ଏମ୍ ତାନିଙ୍ଗ୍ ଚି ଆପେ ମିହୋଡ଼୍ ଏଟାଃ ନିଈ ଲୋଃ ଦୁଲାଡ଼୍ ମାଣ୍ଡାଏପେ।” “ଆଗାର୍ ଅତେଦିଶୁମ୍ ରେନ୍ ହୋଡ଼ୋକୋ ଆପେକେ ଖିସ୍ ମାଣ୍ଡାଅ ୟାକୋ, ଦୋ ଆପେ ସାରିୟାପେ ଚି ଇନ୍‍କୁ ଆପେ ତେ ସିଦା ଇଙ୍ଗ୍‍କେ ଖିସ୍ ମାଣ୍ଡାଅ କେଦାକୋ। ଆଗାର୍ ଆପେ ଅତେଦିଶୁମ୍ ରେନ୍ ହୋଡ଼ୋ ତାଇନ୍ ତେପେ, ଏଣ୍ଡେ ନେ ଅତେଦିଶୁମ୍ ରେନ୍ ହୋଡ଼ୋକୋ ଆପେକେ ଆକୋୱାଃ ହୋଡ଼ୋ ମେନ୍ତେ ଦୁଲାଡ଼୍ ତେୟାଃକୋ, ମେନ୍ଦୋ ଆପେ ନେ ଅତେଦିଶୁମ୍ ରେନ୍ ନାହାଲାପେ, ମେନ୍ଦୋ ଇଙ୍ଗ୍ ଆପେକେ ଅତେଦିଶୁମ୍ ଏତେ ସାଲା କାଃପେୟାଇଙ୍ଗ୍, ଏନାମେନ୍ତେ ଅତେଦିଶୁମ୍ ରେନ୍ ହୋଡ଼ୋକୋ ଆପେକେ ଖିସ୍ ମାଣ୍ଡାଅ ପେୟାକୋ। ଅକନ୍ କାଜି ଇଙ୍ଗ୍ ଆପେକେ କାଜି ଲେଦାଇଙ୍ଗ୍, ‘ଦାସୀ ଆୟାଃ ଗୋମ୍‍କେ ତାଃ ଏତେ ମାରାଙ୍ଗ୍ ନାହାଲାଏ,’ ଏନାକେ ମୋନେ ମାଣ୍ଡାଏପେ। ଆଗାର୍ ଇନ୍‍କୁ ଇଙ୍ଗ୍‍କେ ସାସାତି କେଦାକୋ, ଏଣ୍ଡେ ଆପେକେ ହ ସାସାତି ପେୟାକୋ, ଆଗାର୍ ଇନ୍‍କୁ ଇଙ୍ଗ୍ଆଃ ଶିଖାଅ କେ ମାନାତିଙ୍ଗ୍ କାଦାକୋ, ଏଣ୍ଡେ ଆପେୟାଃ ହ ମାନାତିଙ୍ଗ୍ ୟାକୋ। ମେନ୍ଦୋ ନେୟା ସବେନାଃ ଇନ୍‍କୁ ଆପେ ଇଙ୍ଗ୍ଆଃ ଚେଲା ତାନ୍‍ପେ ମେନ୍ତେ ଆପେ ଲୋଃ ରିକା ୟାକୋ, ଚିୟାଃଚି ଇନ୍‍କୁ ଇଙ୍ଗ୍‍କେ କୁକୁଲ୍ ନିଈ ପାର୍ମେଶ୍ଵାର୍ କେ କାକୋ ସାରିୟା। ଆଗାର୍ ଇଙ୍ଗ୍ କାଇଙ୍ଗ୍ ହିଜୁଃ ଲେନ୍ତେ ହାର୍ ଇନ୍‍କୁ ଲୋଃ କାଇଙ୍ଗ୍ ବାକାଣ୍ କେତେ, ଏଣ୍ଡେ ଇନ୍‍କୁ ପାପୀ କାକୋ ବାଇୟୋଃତେ, ମେନ୍ଦୋ ନାଆ ଇନ୍‍କୁକେ ଇନ୍‍କୁୱାଃ ପାପ୍ ଲାଗିନ୍ତେ ଜାହାନାଃ ବାହାନା ବାନୋଗା। ଅକଏ ଇଙ୍ଗ୍‍କେ ଖିସ୍ ୟାଏ, ଇନିଃ ଇଙ୍ଗ୍ଆଃ ଆବା କେ ହ ଖିସ୍ ୟାଏ। ଆଗାର୍ ଇଙ୍ଗ୍ ଇନ୍‍କୁ ଥାଲା ରେ ନେ ଆକ୍‍ଦାନ୍ଦା କାମି କାଇଙ୍ଗ୍ ରିକାକାନ୍ତେୟାଃ ଅକନାଃ ଜାହାଁଏ ହ କାକୋ ରିକା, ଏଣ୍ଡେ ଇନ୍‍କୁ ପାପୀ କାକୋ ବାଇୟୋଃତେ, ମେନ୍ଦୋ ନାଆ ଇନ୍‍କୁ ଇଙ୍ଗ୍ଆଃ ଆକ୍‍ଦାନ୍ଦା କାମିକେ ନେଲ୍ କେଦାକୋ ଏଣ୍ଡେ ହ ଆଲେ ବାରାନ୍ କିନ୍‍କେ ଇଙ୍ଗ୍ ହାର୍ ଆବା କେ ଖିସ୍ କେଦାକୋ। ନେୟା ଏନାମେନ୍ତେ ହୋବାଜାନା ଚି ଏନ୍ ବାଚାନ୍ ପୁରାଅଃ କା, ଅକନାଃ ଇନ୍‍କୁୱାଃ ମୁଶା ନାବୀ ରାଃ ଆଇନ୍ ରେ ଅଲାକାନା, ‘ଇନ୍‍କୁ ଇଙ୍ଗ୍ ଲୋଃ ଆହାମ୍ବାଗି ଖିସ୍ ଦହ କେଦାକୋ।’ ମେନ୍ଦୋ ଚିମ୍ତା ଏନ୍ ସାହାଏତା ନିଈ ହିଜୁଗାଏ, ଅକନିଃକେ ଇଙ୍ଗ୍ ଆପେ ତାଃ ଆବା ପାଡ଼େତେ କୁଲିୟାଇଙ୍ଗ୍, ଇନିଃ ପାବିତାର୍ ଆତ୍ମା ତାନିଃ, ଅକନିଃ ପାର୍ମେଶ୍ଵାର୍ ବିଷାୟ୍ ରେ ସାର୍ତି କାଜିକେ ଉଦୁବ୍ ୟାଏ, ଅକନିଃ ଆବା ପାଡ଼େତେ ଅଡୋଙ୍ଗ୍ ଅଗାଏ, ଇନିଃ ଇଙ୍ଗ୍ଆଃ ବିଷାୟ୍ ରେ ଗୋୱା ଏମେୟାଏ। ଆଡୋଃ ଆପେ ହ ଇଙ୍ଗ୍ଆଃ ଗୋୱା ତାନ୍‍ପେ ଚିୟାଃଚି ଆପେ ମୁନୁଏତେ ଇଙ୍ଗ୍ ଲୋଃ ମେନାପେୟା।” “ନେ ବାକାଣ୍ କୋ ଇଙ୍ଗ୍ ଆପେକେ ନେ ଲାଗିନ୍ କାଜିକେଦାଇଙ୍ଗ୍ ଏନାତେ ଆପେ ଇଙ୍ଗ୍ଆଃ ରେ ବିଶ୍ଵାସ୍ କାପେ ବାଗେୟା। ଇନ୍‍କୁ ଆପେକେ ବିନ୍ତିଅଡ଼୍ଆଃ ଏତେ ଅଡୋଙ୍ଗ୍ ପେୟାକୋ, ମେନ୍ଦୋ ଏନ୍‍କା ସାମାୟ୍ ହିଜୁଃ ତାନା, ଚି ଚିମ୍ତା ଜାହାଁଏ ହ ଆପେକେ ଗୋଏଃ ପେୟାଏ ଇନିଃ ବୁଝାଅଃୱାଏ ଚି ଇଙ୍ଗ୍ ପାର୍ମେଶ୍ଵାର୍ ରାଃ ସେୱା ତାନିଙ୍ଗ୍। ନେଲେକା ଇନ୍‍କୁ ନେୟା ନେଲାଗିନ୍ ରିକା ୟାକୋ ଚିୟାଃଚି ଇନ୍‍କୁ ନା ଆବା କେ ସାରିୟାକୋ ନା ଇଙ୍ଗ୍‍କେ ସାରିୟାକୋ। ମେନ୍ଦୋ ଇଙ୍ଗ୍ ନେ ବାକାଣ୍ କୋ ଆପେକେ ନେୟାଲାଗିନ୍ କାଜିକେଦାଇଙ୍ଗ୍, ଏନାତେ ଚିମ୍ତା ନେ ସାମାୟ୍ ହିଜୁଃ ରେ ଆପେକେ ମୋନେ ହୋବାକୋୱା ଚି ଇଙ୍ଗ୍ ସିଦାରେଗି ଆପେକେ ନେୟା କାଜି ଲେଦାଇଙ୍ଗ୍। ଚିମ୍ତାଙ୍ଗ୍ ଆପେ ସୁରୁ ରେ ଇଙ୍ଗ୍ଆଃ ଚେଲା ବାଇଜାନାପେ ଇଙ୍ଗ୍ ଆପେକେ ନେ କାଜିକୋ ନେୟାଲାଗିନ୍ କାଇଙ୍ଗ୍ କାଜି ଲେଦା ଚିୟାଃଚି ଇଙ୍ଗ୍ ଆପେଲୋଃ ତାଇକେନାଇଙ୍ଗ୍।” “ମେନ୍ଦୋ ନାଆ ଇଙ୍ଗ୍ ଇଙ୍ଗ୍ଆଃ କୁକୁଲ୍‍ନିଃ ତାଃ ସେନୋଃ ତାନିଙ୍ଗ୍, ଏଣ୍ଡେ ହ ନାଆ ଆପେ କୋଏତେ ଜାହାଁଏ ହ କାପେ କୁଲି ତାନା, ‘ଇଙ୍ଗ୍ କୋତାଃ ସେନୋଃ ତାନିଙ୍ଗ୍?’ ମେନ୍ଦୋ ଇଙ୍ଗ୍ ନେ ବାକାଣ୍ କୋ କାଜିକାଦାଇଙ୍ଗ୍, ଏନାମେନ୍ତେ ଆପେ ଦୁକୁ ରେ ମେନାପେୟା। ଏଣ୍ଡେ ହ ଇଙ୍ଗ୍ ଆପେକେ ସାର୍ତି କାଜିତାନିଙ୍ଗ୍ ଚି ଇଙ୍ଗ୍ଆଃ ସେନୋଃ ଆପେଲାଗିନ୍ତେ ବୁଗିନାଃ ତାନାଃ, ଚିୟାଃଚି ଇଙ୍ଗ୍ କାଇଙ୍ଗ୍ ସେନ୍ ରେ ହେନ୍ ସାହାଏତା ନିଈ ଆପେତାଃ କାଏ ହିଜୁଗା, ମେନ୍ଦୋ ଆଗାର୍ ଇଙ୍ଗ୍ ସେନାଇଙ୍ଗ୍, ଏଣ୍ଡେ ଆଏଃକେ ଆପେ ତାଃ କୁଲ୍ ତାଃଇଙ୍ଗ୍। ହିନିଃ ହିଜୁଃକେତେ ଅତେଦିଶୁମ୍ ରେନ୍ ହୋଡ଼ୋକୋକେ ପାପ୍ ଆଡୋଃ ଧାରାମ୍ ଆଡୋଃ ବିଚାର୍ ରାଃ ବିଷାୟ୍ ରେ କାଜିହାପାକୋୱାଏ। ପାପ୍ ବିଷାୟ୍ ରେ ନେୟାଲାଗିନ୍ ଚି ଇନ୍‍କୁ ଇଙ୍ଗ୍ଆଃ ରେ କାକୋ ବିଶ୍ଵାସ୍ ୟା, ଆଡୋଃ ଧାରାମ୍ ବିଷାୟ୍ ରେ ନେୟାଲାଗିନ୍ ଚି ଇଙ୍ଗ୍ ଆବା ତାଃ ସେନ୍ ତାନିଙ୍ଗ୍, ହାର୍ତେ ଆପେ ଇଙ୍ଗ୍‍କେ ଆଡୋଃ କାପେ ନେଲ୍ ଧାଡ଼ିୟା। ବିଚାର୍ ବିଷାୟ୍ ରେ ନେୟାଲାଗିନ୍ ଚି ଅତେଦିଶୁମ୍ ରେ ରାଇଜ୍ ତାନ୍ ଶାଏତାନ୍ ଦୋଷୀ ବାଇକାନାଏ। ଇଙ୍ଗ୍‍କେ ଆପେ ଲୋଃ ଆଡୋଃଗି ଥିମ୍ବା ବାକାଣ୍ କାଜି ମେନାଃ, ମେନ୍ଦୋ ନାଆ ଆପେ ଏନାକୋକେ କାପେ ସାହାତିଙ୍ଗ୍ ଧାଡ଼ିୟା। ମେନ୍ଦୋ ଚିମ୍ତା ପାବିତାର୍ ଆତ୍ମା, ଅକନିଃ ପାର୍ମେଶ୍ଵାର୍ ବିଷାୟ୍ ରେ ସାର୍ତି କାଜିକେ ଉଦୁବ୍ ୟାଏ, ଇନିଃ ହିଜୁଗାଏ, ଏଣ୍ଡେ ଆପେକେ ସବେନ୍ ସାର୍ତି ରାଃ ହୋରା ଉଦୁବେୟାଏ, ଚିୟାଃଚି ଇନିଃ ଆୟାଃ ଆଧିକାର୍ ତେ କାଏ କାଜିୟାଏ ମେନ୍ଦୋ ଅକନାଃ ପାର୍ମେଶ୍ଵାର୍ ଏତେ ଆୟୁମ୍ ୟାଏ ଏନା କାଜିୟାଏ, ହାର୍ ହିଜୁଃ ତାନ୍ ବାକାଣ୍ କୋ ଉଦୁବେୟାଏ। ଇନିଃ ଇଙ୍ଗ୍ଆଃ ମାନାରାଙ୍ଗ୍ ରିକାୟାଏ, ଚିୟାଃଚି ଇନିଃକେ ଅକନାଃ ଇଙ୍ଗ୍ଆଃ ପାଡ଼େତେ ନାମାକାନା, ଏନାକେଗି ଆପେକେ ଇନିଃ ଉଦୁବେୟାଏ। ଅକନାଃ ଆବା ରାଃ ତାନାଃ, ଏନା ସବେନାଃ ଇଙ୍ଗ୍ଆଃ ତାନାଃ, ଏନାମେନ୍ତେ ଇଙ୍ଗ୍ କାଜିକେଦାଇଙ୍ଗ୍ ଚି ପାବିତାର୍ ଆତ୍ମା କେ ଅକନାଃ ଇଙ୍ଗ୍ଆଃ ପାଡ଼େତେ ନାମାକାନା, ଏନାକେଗି ଆପେକେ ଇନିଃ ଉଦୁବେୟାଏ।” “ହୁଡିଙ୍ଗ୍ ସାମାୟ୍ ତାୟୋମ୍ତେ ଆପେ ଇଙ୍ଗ୍‍କେ କାପେ ନେଲ୍ ଧାଡ଼ିୟା, ଏନ୍ତେ ଆଡୋଃଗି ହୁଡିଙ୍ଗ୍ ସାମାୟ୍ ତାୟୋମ୍ତେ ନେଲ୍ ଧାଡ଼ିୟାପେ।” ଏନ୍ତେ ଆୟାଃ ଚିମିନାଙ୍ଗ୍ ଚେଲାକୋ ଆକୋ-ଆକୋରେ କାଜିଜାନାକୋ, “ନେୟା ଚିନାଃ ତାନାଃ ଅକନାଃ ଇନିଃ ଆବୁକେ କାଜିତାନାଏ, ‘ହୁଡିଙ୍ଗ୍ ସାମାୟ୍ ତାୟୋମ୍ତେ ଆପେ ଇଙ୍ଗ୍‍କେ କାପେ ନେଲ୍ ଧାଡ଼ିୟା, ହାର୍ ଆଡୋଃଗି ହୁଡିଙ୍ଗ୍ ସାମାୟ୍ ତାୟୋମ୍ତେ ଇଙ୍ଗ୍‍କେ ନେଲ୍ ଧାଡ଼ିୟାପେ?’ ହାର୍ତେ ନେୟା ‘ଏନାମେନ୍ତେ ଚି ଇଙ୍ଗ୍ ଆବା ତାଃ ସେନ୍ ତାନିଙ୍ଗ୍?’ ” ଏନ୍ତେ ଇନ୍‍କୁ କାଜିକେଦାକୋ, “ନେ ‘ହୁଡିଙ୍ଗ୍ ସାମାୟ୍’ ଅକନାଃ ଇନିଃ କାଜିତାନାଏ, ଏନା ଚିକାନ୍ ବାକାଣ୍ ତାନାଃ? ଆଲେ କାଲେ ବୁଝାଅଃ ଧାଡ଼ିତାନା।” ୟୀଶୁ ନେୟା ସାରିକେତେ ଚି ଇନ୍‍କୁ ଇଙ୍ଗ୍‍କେ ଏନା ରାଃ ମାନେ କୁଲିନାଙ୍ଗ୍ ସାନାଙ୍ଗ୍ ତାନାକୋ, ଇନ୍‍କୁକେ କାଜିକେଃକୋୱାଏ, “ଚିନାଃ ଆପେ-ଆପେ ଗି ଇଙ୍ଗ୍ଆଃ ନେ ବିଷାୟ୍ ରେ କୁପୁଲିଅଃ ତାନାପେ, ‘ହୁଡିଙ୍ଗ୍ ସାମାୟ୍ ତାୟୋମ୍ତେ ଆପେ ଇଙ୍ଗ୍‍କେ ନେଲ୍ କାପେ ଧାଡ଼ିୟା, ହାର୍ ଆଡୋଃଗି ହୁଡିଙ୍ଗ୍ ସାମାୟ୍ ତାୟୋମ୍ତେ ଇଙ୍ଗ୍‍କେ ନେଲ୍ ଧାଡ଼ିୟାପେ?’ ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଇଙ୍ଗ୍ଆଃ ଗୋଜୋଃ ତାୟୋମ୍ତେ ଆପେ ରାଆ ୟାପେ ହାର୍ତେ ଦୁକୁ ୱାପେ, ମେନ୍ଦୋ ଅତେଦିଶୁମ୍ ରେନ୍ ହୋଡ଼ୋକୋ ରାଶିକାଅଗାକୋ, ଆପେକେ ଦୁକୁ ନାମୋଗା, ମେନ୍ଦୋ ଆପେୟାଃ ଦୁକୁ ରାଶିକା ରେ ବାଦ୍‍ଲାଅଗା ଚିମ୍ତା ଆପେ ଇଙ୍ଗ୍‍କେ ଆଡୋଃ ମିଶା ନେଲିଙ୍ଗ୍ ୟାପେ। ଚିମ୍ତା ମିୟାଃ କୁଡ଼ି ରାଃ ହୋନ୍ ଜାନ୍ମାଅ ସାମାୟ୍ ହିଜୁଃୱା, ଇନିଃ କାଏ ବୁଗିୟୋଃ ସାନ୍ତେ ହାସୁ କେ ସାହାତିଙ୍ଗ୍ ୟାଏ, ଚିୟାଃଚି ଇନିଜାଃ ସାମାୟ୍ ସେଟେର୍ କାନା, ମେନ୍ଦୋ ଚିମ୍ତା ଇନିଃ ହୋନ୍ ଜାନ୍ମାଅ କେୟାଏ, ଏନ୍ ରାଶିକା ତେ ଚି ଅତେଦିଶୁମ୍ ରେ ମିୟାଃ ହୋଡ଼ ହୋନ୍ ଜାନାମ୍ କାନାଏ, ଇନିଃ ଆୟାଃ ଦୁକୁ କେ ଆଡୋଃ କାଏ ପାହୋମେୟାଏ। ଏନ୍ ଲେକାଗି ଆପେକେ ହଗି ନାଆ ଦୁକୁ ମେନାଃ, ମେନ୍ଦୋ ଇଙ୍ଗ୍ ଆପେ ଲୋଃ ଆଡୋଃଗି ନାପାମାଇଙ୍ଗ୍ ହାର୍ତେ ଆପେ ରାଶିକାଃ ୱାପେ, ହାର୍ ଆପେୟାଃ ରାଶିକା କେ ଜାହାଁଏ ହ କାଏ ରେଏଃ ଧାଡ଼ିୟାଏ। ଏନ୍ ହୁଲାଙ୍ଗ୍ ଚିଉଲା ଆପେ ଇଙ୍ଗ୍ ଲୋଃ ନାପାମାପେ ଇଙ୍ଗ୍‍କେ ଜାହାନାଃ କାପେ କୁଲିୟା। ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, ଆଗାର୍ ଆବା କେ ଜାହାନାଃ ହ ଆସିୟାପେ, ଦୋ ହିନିଃ ଇଙ୍ଗ୍ଆଃ ନୁତୁମ୍ ତେ ଆପେକେ ଏମାପେୟାଏ। ନାଆ ସାନ୍ ଆପେ ଇଙ୍ଗ୍ଆଃ ନୁତୁମ୍ ତେ ଆବା କେ ଜାହାନାଃ ହ କାପେ ଆସିକାଦା, ଆସିପେ, ଦୋ ନାମେୟାପେ ଏନାତେ ଆପେୟାଃ ରାଶିକା ପୁରା ହୋବାଅଃୱା।” “ଇଙ୍ଗ୍ ଆପେକେ ନେ ବାକାଣ୍ ଜୋନୋକା ଲେକାତେ କାଜିକେଦାଇଙ୍ଗ୍, ମେନ୍ଦୋ ଏନ୍ ସାମାୟ୍ ହିଜୁଃ ତାନା ଚି ଇଙ୍ଗ୍ ଆପେ ଲୋଃ ଆଡୋଃ ଜୋନୋକା ଲେକାତେ ଇଙ୍ଗ୍ କାଇଙ୍ଗ୍ କାଜିୟା, ମେନ୍ଦୋ ଖଲାଅ କେତେ ଆପେକେ ଆବା ରାଃ ବିଷାୟ୍ ରେ ଉଦୁବେୟାଇଙ୍ଗ୍। ଏନ୍ ହୁଲାଙ୍ଗ୍ ଆପେ ଇଙ୍ଗ୍ଆଃ ନୁତୁମ୍ ତେ ଆସିୟାପେ, ହାର୍ ଇଙ୍ଗ୍ ଆପେକେ ନେୟା କାଇଙ୍ଗ୍ କାଜିତାନା ଚି ଇଙ୍ଗ୍ ଆପେ ଲାଗିନ୍ ଆବା କେ ଆସି ୟାଇଙ୍ଗ୍, ଚିୟାଃଚି ଇଙ୍ଗ୍ଆଃ ଆବା ଦୋ ଆଏଃଗି ଆପେ କେ ଦୁଲାଡ଼୍ ପେୟାଏ, ଏନାମେନ୍ତେ ଚି ଆପେ ଇଙ୍ଗ୍‍କେ ଦୁଲାଡ଼୍ କେଦାପେ ହାର୍ତେ ନେୟା ହ ବିଶ୍ଵାସ୍ କେଦାପେ ଚି ଇଙ୍ଗ୍ ଆବା ପାଡ଼େତେ ହିଜୁଃ କାନିଙ୍ଗ୍। ଇଙ୍ଗ୍ ଆବା ପାଡ଼େତେ ଅତେଦିଶୁମ୍ ରେ ହିଜୁଃ କାନିଙ୍ଗ୍, ଇଙ୍ଗ୍ ଆଡୋଃଗି ଅତେଦିଶୁମ୍ କେ ବାଗେକେତେ ଆବା ତାଃ ସେନୋଃ ତାନିଙ୍ଗ୍।” ଇନିଜାଃ ଚେଲାକୋ କାଜିକେଦାକୋ, “ନେଲେମ୍, ନାଆ ଦୋ ଆମ୍ ସାଫା-ସାଫା କାଜିତାନାମ୍, ହାର୍ ଜାହାନ୍ ଜୋନୋକା କାମ୍ କାଜିତାନା। ନାଆ ଆଲେ ସାରିକେଦାଲେ ଚି ଆମ୍ ସବେନାଃ ସାରିୟାମ୍, ହାର୍ ନେୟା ରାଃ ଦାର୍‍କାର୍ ବାନୋଗା ଚି ଆମ୍‍କେ ଜେତାଏ ଜାହାନାଃ କୁଲିୟାଏ, ନେୟାତେ ଆଲେ ବିଶ୍ଵାସ୍ ତାନାଲେ ଚି ଆମ୍ ପାର୍ମେଶ୍ଵାର୍ ପାଡ଼େତେ ହିଜୁଃ କାନାମ୍।” ନେୟା ଆୟୁମ୍‍କେତେ ୟୀଶୁ ଇନ୍‍କୁ କେ କାଜିକେଦାଏ, “ଚିନାଃ ଆପେ ନାଆ ବିଶ୍ଵାସ୍ ତାନାପେ? ନେଲେପେ, ଏନ୍ ସାମାୟ୍ ହିଜୁଃ ତାନା ମେନ୍ଦୋ ହିଜୁଃ ସେଟେର୍ କାନା ଚି ଆପେ ସବେନ୍ କୋ ନେତେ-ହେନ୍ତେ ହୋବା କେତେ ଆପେ ଆପାନାଃ-ଆପାନାଃ ଅଡ଼୍ଆଃ ସେନୋଃ କୋୱାପେ, ହାର୍ ଇଙ୍ଗ୍‍କେ ଏସ୍କାର୍ ଗି ବାଗେ ତାଇଙ୍ଗ୍ ୟାପେ, ଏଣ୍ଡେ ହ ଇଙ୍ଗ୍ ଏସ୍କାର୍ ବାଙ୍ଗୁଇଙ୍ଗ୍‍ୟା ଚିୟାଃଚି ଆବା ଇଙ୍ଗ୍ ଲୋଃ ମେନାଇଜା। ଇଙ୍ଗ୍ ନେ ବାକାଣ୍ ଆପେକେ ନେୟାମେନ୍ତେ କାଜିକେଦାଇଙ୍ଗ୍ ଚି ଆପେକେ ଇଙ୍ଗ୍ଆଃ ଚେଲା ମେନ୍ତେ ଜୀଉସୁକୁ ନାମୋଃକା। ଅତେଦିଶୁମ୍ ରେ ଆପେକେ ସାସାତି ନାମୋଃ ତାନା, ମେନ୍ଦୋ ସାହାସ୍ ମାଣ୍ଡାଏପେ, ଇଙ୍ଗ୍ ଅତେଦିଶୁମ୍ କେ ଜିତାଅ କାନିଙ୍ଗ୍।” ୟୀଶୁ ନେ ବାକାଣ୍ କୋ କାଜି ଛାବାକେଦାଏ ଏନ୍ତେ ଆୟାଃ ମେଏଃ ରିମିଲ୍‍ଦିଶୁମ୍ ପାଡ଼୍ ଆରିଃ କେତେ କାଜିକେଦାଏ, “ହେ ଆବା ଏନ୍ ସାମାୟ୍ ସେଟେର୍ ଜାନା, ଇଙ୍ଗ୍ ଆମାଃ ହୋନ୍‍କଡ଼ା ରାଃ ମାନାରାଙ୍ଗ୍ ରିକାଏମେ ଏନାତେ ଇଙ୍ଗ୍ ଆମାଃ ହୋନ୍‍କଡ଼ା ହଗି ଆମାଃ ମାନାରାଙ୍ଗ୍ ରିକାୟାଇଙ୍ଗ୍। ଚିୟାଃଚି ଆମ୍ ଇଙ୍ଗ୍‍କେ ସବେନ୍ ହୋଡ଼ୋକୋୱାଃ ଚେତାନ୍ ରେ ଆଧିକାର୍ ଏମ୍ କାଦାମ୍, ଚି ଅକନ୍ କୋକେ ଆମ୍ ଇଙ୍ଗ୍‍କେ ଏମାକାଃକୋୱାମ୍ ଏନ୍ ସବେନ୍ କୋକେ ଇଙ୍ଗ୍ ଜାନାଓ ଜୀଦାନ୍ ଏମାକୋୱାଇଙ୍ଗ୍। ହାର୍ ଜାନାଓ ଜୀଦାନ୍ ନେୟା ତାନାଃ ଚି ଇନ୍‍କୁ ଆମ୍‍କେ ମିୟାଃ ଭାଇର୍ ସାର୍ତି ପାର୍ମେଶ୍ଵାର୍ ମେନ୍ତେ ହାର୍ ଇଙ୍ଗ୍ ୟୀଶୁ ମାସୀହ୍ କେ ଅକନିଃକେ ଆମ୍ ଅତେ ରେ କୁଲ୍ କାଦିଙ୍ଗାମ୍, ସାରିକାକୋ। ଇଙ୍ଗ୍ ଅତେ ରେ ଆମାଃ ମାନାରାଙ୍ଗ୍ କେଦାଇଙ୍ଗ୍। ଇଙ୍ଗ୍ ଏନ୍ କାମି କୋକେ ଅକନାଃ ଆମ୍ ଇଙ୍ଗ୍‍କେ କାମିନାଙ୍ଗ୍ ଏମ୍ ଲେଦାମ୍, ଏନାକୋକେ ପୁରା ରିକା କେଦାଇଙ୍ଗ୍। ନାଆ ହେ ଆବା, ଇଙ୍ଗ୍ଆଃ ମାନାରାଙ୍ଗ୍ ଆମାଃ ସାମାନାଙ୍ଗ୍ ରେ ରିକାଏମେ ଅକନ୍ ମାନାରାଙ୍ଗ୍ ଅତେଦିଶୁମ୍ ରାଃ ବାବାଇ ସିଦାରେ, ଇଙ୍ଗ୍ଆଃ ଆମାଃ ଲୋଃ ତାଇକେନା।” “ଇଙ୍ଗ୍ ଆମ୍‍କେ ଆମ୍ ଚିଲ୍‍କାନିଃ ତାନ୍‍ମେ ଏନା ଏନ୍ ହୋଡ଼ୋକୋୱାଃ ଥାଲା ରେ ଉଦୁବ୍ କେଦାଇଙ୍ଗ୍ ଅକନ୍ କୋକେ ଆମ୍ ଇଙ୍ଗ୍‍କେ ଅତେଦିଶୁମ୍ ଏତେ ଏମ୍ କାଦିଙ୍ଗାମ୍। ଇନ୍‍କୁ ଆମାଃ ତାଇକେନାକୋ ହାର୍ ଆମ୍ ଇନ୍‍କୁକେ ଇଙ୍ଗ୍‍କେ ଏମ୍ କାଦିଙ୍ଗାମ୍, ହାର୍ତେ ଇନ୍‍କୁ ଆମାଃ ସାନ୍ଦେଶ୍ କେ ମାନାତିଙ୍ଗ୍ କେଦାକୋ। ନାଆ ଇନ୍‍କୁ ସାରିକେଦାକୋ ଚି ଅକନ୍ ସାନ୍ଦେଶ୍ ଆମ୍ ଇଙ୍ଗ୍‍କେ ଏମ୍ କାଦିଙ୍ଗାମ୍ ଏନା ସବେନାଃ ଆମାଃ ପାଡ଼େତେ ତାନାଃ। ଚିୟାଃଚି ଅକନ୍ ସାନ୍ଦେଶ୍ ଆମ୍ ଇଙ୍ଗ୍‍କେ ଏମ୍ କାଦିଙ୍ଗାମ୍, ଇଙ୍ଗ୍ ଏନାକୋକେ ଇନ୍‍କୁ ତାଃ ସେଟେର୍ ତାଦିଙ୍ଗ୍, ହାର୍ ଇନ୍‍କୁ ଏନା କୋକେ ବିଶ୍ଵାସ୍ କେଦାକୋ, ହାର୍ତେ ସାର୍ତି-ସାର୍ତି ସାରିକେଦାକୋ ଚି ଇଙ୍ଗ୍ ଆମାଃ ପାଡ଼େତେ ହିଜୁଃ କାନିଙ୍ଗ୍, ହାର୍ ବିଶ୍ଵାସ୍ କେଦାକୋ ଚି ଆମ୍ ଗି ଇଙ୍ଗ୍‍କେ କୁଲ୍ କାଦିଙ୍ଗାମ୍। ଇଙ୍ଗ୍ ଇନ୍‍କୁ ଲାଗିନ୍ ବିନ୍ତି ତାନିଙ୍ଗ୍, ଅତେଦିଶୁମ୍ ରେନ୍ କୋ ଲାଗିନ୍ କାଇଙ୍ଗ୍ ବିନ୍ତି ତାନା ମେନ୍ଦୋ ଇନ୍‍କୁ ଲାଗିନ୍ ଅକନ୍ କୋକେ ଆମ୍ ଇଙ୍ଗ୍‍କେ ଏମ୍ କାଦିଙ୍ଗାମ୍, ଚିୟାଃଚି ଇନ୍‍କୁ ଆମାଃ ତାନ୍‍କୋ। ହାର୍ ଅକନ୍ ଚେଲାକୋ ଇଙ୍ଗ୍ଆଃ ତାନ୍‍କୋ ଇନ୍‍କୁ ସବେନ୍ ଆମାଃ ତାନ୍‍କୋ, ହାର୍ତେ ଅକନ୍ କୋ ଆମାଃ ତାନ୍‍କୋ ଇନ୍‍କୁ ଇଙ୍ଗ୍ଆଃ ତାନ୍‍କୋ, ହାର୍ ଏନାତେ ଇଙ୍ଗ୍ଆଃ ମାନାରାଙ୍ଗ୍ ହୋବାକାନା। ଇଙ୍ଗ୍ ନାଆ ଅତେଦିଶୁମ୍ ରେ କାଇଙ୍ଗ୍ ତାହିନା, ମେନ୍ଦୋ ନିକୁ ଅତେଦିଶୁମ୍ ରେ ତାଇନାକୋ, ହାର୍ ଇଙ୍ଗ୍ ଆମାଃ ତାଃ ହିଜୁଃ ତାନିଙ୍ଗ୍। ହେ ପାବିତାର୍ ଆବା, ଆମ୍ ଏନ୍ ନୁତୁମ୍ ରାଃ ପେଡ଼େଏ ରେ ଅକନାଃ ଆମ୍ ଇଙ୍ଗ୍‍କେ ଏମ୍ କାଦିଙ୍ଗାମ୍, ଇନ୍‍କୁକେ ହୋରୋ କୋମେ ଏନାତେ ଇନ୍‍କୁ ଆବୁ ଲେକା ମିଃ ହୋବାଅଃକାକୋ। ଚିମ୍ତାଙ୍ଗ୍ ଇଙ୍ଗ୍ ଇନ୍‍କୁ ଲୋଃ ତାଇକେନାଇଙ୍ଗ୍, ଦୋ ଇଙ୍ଗ୍ ଆମାଃ ଏନ୍ ନୁତୁମ୍ ରାଃ ପେଡ଼େଏ ରେ, ଅକନାଃ ଆମ୍ ଇଙ୍ଗ୍‍କେ ଏମ୍ କାଦିଙ୍ଗାମ୍ ଇନ୍‍କୁ କେ ହୋରୋ କେଃକୋୱାଇଙ୍ଗ୍। ଇଙ୍ଗ୍ ଇନ୍‍କୁ କେ ହୋସିୟାର୍ ତେ ବାଞ୍ଚାଅ କେଃକୋୱାଇଙ୍ଗ୍, ହାର୍ ବିନାଶ୍ ରାଃ ହୋନ୍‍କଡ଼ା କେ ବାଗେକେତେ ଇନ୍‍କୁ ଏତେ ଜେତାଏ ହ କାକୋ ନାଷ୍ଟ୍ ଜାନା, ଏନାମେନ୍ତେ ଚି ପାବିତାର୍ ପୁଥି ରେ ଅକନାଃ ଅଲାକାନ୍ ତେୟାଃ ଏନା ପୁରା ହୋବାଅଃକା। ନାଆ ଇଙ୍ଗ୍ ଆମାଃ ତାଃ ହିଜୁଃ ତାନିଙ୍ଗ୍, ଆଡୋଃ ନେ ବାକାଣ୍ ଅତେଦିଶୁମ୍ ରେ କାଜିତାନିଙ୍ଗ୍, ଚି ଇନ୍‍କୁ ଇଙ୍ଗ୍ଆଃ ରାଶିକା ଆକୋ ଆପାନାଃ ରେ ଫେରେଃଗି ନାମେକାକୋ। ଇଙ୍ଗ୍ ଆମାଃ ସାନ୍ଦେଶ୍ କେ ଇନ୍‍କୁ ତାଃ ସେଟେର୍ ତାଦିଙ୍ଗ୍, ହାର୍ ଅତେଦିଶୁମ୍ ରେନ୍ ହୋଡ଼ୋକୋ ଇନ୍‍କୁକେ ଖିସ୍ କେଃକୋୱାକୋ, ଚିୟାଃଚି ଜେଲେକା ଇଙ୍ଗ୍ ଅତେଦିଶୁମ୍ ରେନ୍ ନାହାଲାଇଙ୍ଗ୍, ଏନ୍‍ଲେକାଗି ଇନ୍‍କୁ ହ ଅତେଦିଶୁମ୍ ରେନ୍ ନାହାଲାକୋ। ଇଙ୍ଗ୍ ନେୟା କାଇଙ୍ଗ୍ ବିନ୍ତି ତାନା ଚି ଆମ୍ ଇନ୍‍କୁକେ ଅତେଦିଶୁମ୍ ଏତେ ଇଦିକୋମ୍, ମେନ୍ଦୋ ନେୟା ଚି ଆମ୍ ଇନ୍‍କୁକେ ହେନ୍ ଦୁଷ୍ଟ ଶାଏତାନ୍ ଏତେ ବାଞ୍ଚାଅ କୋମ୍। ଜେଲେକା ଇଙ୍ଗ୍ ଅତେଦିଶୁମ୍ ରେନ୍ ନାହାଲାଇଙ୍ଗ୍, ଏନ୍‍ଲେକାଗି ଇନ୍‍କୁ ହ ଅତେଦିଶୁମ୍ ରେନ୍ ନାହାଲାକୋ। ସାର୍ତି ରାଃ ହୋରାତେ ଆମ୍ ଇନ୍‍କୁକେ ପାବିତାର୍ କୋମ୍, ଆମାଃ ବାଚାନ୍ ସାର୍ତି ତାନାଃ। ଜେଲେକା ଆମ୍ ଇଙ୍ଗ୍‍କେ ଅତେଦିଶୁମ୍ ରେ କୁଲ୍ କାଦିଙ୍ଗାମ୍, ଏନ୍‍ଲେକାଗି ଇଙ୍ଗ୍ ହଗି ଇନ୍‍କୁକେ ଅତେଦିଶୁମ୍ ରେ କୁଲ୍ କେଃକୋୱାଇଙ୍ଗ୍। ହାର୍ତେ ଇନ୍‍କୁ ଲାଗିନ୍ତେ ଇଙ୍ଗ୍ ଆପାନ୍ କେ ପାବିତାର୍ ରିକାଅଃତାନିଙ୍ଗ୍, ଏନାତେ ଇନ୍‍କୁ ହଗି ସାର୍ତି ରାଃ ହୋରାତେ ପାବିତାର୍ ହୋବାଅଃକାକୋ।” “ଇଙ୍ଗ୍ ନେ ଚେଲାକୋ ଲାଗିନ୍ ଭାଇର୍ କାଇଙ୍ଗ୍ ବିନ୍ତି ତାନା ମେନ୍ଦୋ ଇନ୍‍କୁ ଲାଗିନ୍ ହ ବିନ୍ତି ତାନିଙ୍ଗ୍ ଅକନ୍ କୋ ନିକୁୱାଃ ସାନ୍ଦେଶ୍ ଆୟୁମ୍‍କେତେ ଇଙ୍ଗ୍ଆଃ ରେ ବିଶ୍ଵାସ୍ ୟାକୋ। ଏନାତେ ଇନ୍‍କୁ ସବେନ୍ ମିଃ ହୋବାଅଃକାକୋ, ଜେଲେକା ଆମ୍ ହେ ଆବା ଇଙ୍ଗ୍ଆଃ ରେ ମେନାମା, ହାର୍ ଇଙ୍ଗ୍ ଆମାଃ ରେ ମେନାଇଙ୍ଗ୍‍ୟା, ଏନ୍‍ଲେକାଗି ଇନ୍‍କୁ ହ ଆବୁ ରେ ତାଇନୋଃକାକୋ, ଏନାତେ ଅତେଦିଶୁମ୍ ରେନ୍ ହୋଡ଼ୋକୋ ବିଶ୍ଵାସ୍ ୟାକୋ ଚି ଆମ୍ ଗି ଇଙ୍ଗ୍‍କେ କୁଲ୍ କାଦିଙ୍ଗାମ୍। ଏନ୍ ମାନାରାଙ୍ଗ୍ ଅକନାଃ ଆମ୍ ଇଙ୍ଗ୍‍କେ ଏମ୍ କାଦାମ୍ ଇଙ୍ଗ୍ ଇନ୍‍କୁକେ ଏମ୍ କେଦାଇଙ୍ଗ୍, ଏନାତେ ଇନ୍‍କୁ ଏନ୍‍ଲେକାଗି ମିଃ ହୋବାଅଃକାକୋ ଜେଲେକା ଆବୁ ମିଃ ମେନାବୁୱା। ଇଙ୍ଗ୍ ଇନ୍‍କୁୱାଃ ରେ ହାର୍ ଆମ୍ ଇଙ୍ଗ୍ଆଃ ରେ ଏନାତେ ଇନ୍‍କୁ ପୁରା ମିଃଉତ୍ତାର୍ ହୋବାଅଃକାକୋ, ଏନାତେ ଅତେଦିଶୁମ୍ ସାରିୟାଏ ଚି ଆମ୍ ଗି ଇଙ୍ଗ୍‍କେ କୁଲ୍ କାଦିଙ୍ଗାମ୍, ହାର୍ ଜେଲେକା ଆମ୍ ଇଙ୍ଗ୍ ଲୋଃ ଦୁଲାଡ଼୍ କେଦାମ୍ ଏନ୍‍ଲେକାଗି ଇନ୍‍କୁ ଲୋଃ ଦୁଲାଡ଼୍ କେଦାମ୍। ହେ ଆବା, ଇଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି ଅକନ୍ କୋକେ ଆମ୍ ଇଙ୍ଗ୍‍କେ ଏମ୍ କାଦିଙ୍ଗାମ୍, ଅକତାଃ ଇଙ୍ଗ୍ ମେନାଇଙ୍ଗ୍‍ୟା ଏନ୍ତାଃ ଇନ୍‍କୁ ହଗି ଇଙ୍ଗ୍ଆଃ ଲୋଃ ତାଇନ୍ କାକୋ, ଏନାତେ ଇନ୍‍କୁ ଇଙ୍ଗ୍ଆଃ ଏନ୍ ମାନାରାଙ୍ଗ୍ ନେଲେକାକୋ ଅକନାଃ ଆମ୍ ଇଙ୍ଗ୍‍କେ ଏମ୍ କାଦାମ୍, ଚିୟାଃଚି ଆମ୍ ଅତେଦିଶୁମ୍ ରାଃ ବାଇୟେନ୍ ସିଦାତେ ଇଙ୍ଗ୍ଆଃ ଲୋଃ ଦୁଲାଡ଼୍ କେଦାମ୍। ହେ ଧାର୍ମୀ ଆବା, ଅତେଦିଶୁମ୍ ରେନ୍ ହୋଡ଼ୋକୋ ଆମ୍‍କେ କାକୋ ସାରିକେଦା, ମେନ୍ଦୋ ଇଙ୍ଗ୍ ଆମ୍‍କେ ସାରିକେଦାଇଙ୍ଗ୍, ହାର୍ ଇନ୍‍କୁ ହ ସାରିକେଦାକୋ ଚି ଆମ୍ ଗି ଇଙ୍ଗ୍‍କେ କୁଲ୍ କାଦିଙ୍ଗାମ୍। ଇଙ୍ଗ୍ ଆମ୍‍କେ ଆମ୍ ଚିଲ୍‍କାନିଃ ତାନ୍‍ମେ ଏନାକେ ଇନ୍‍କୁ କେ ଉଦୁବ୍ କାଦାଇଙ୍ଗ୍ ହାର୍ ଉଦୁବ୍ କାତେୟାଇଙ୍ଗ୍ ଏନାତେ ଅକନ୍ ଦୁଲାଡ଼୍ ଆମ୍‍କେ ଇଙ୍ଗ୍ ଲୋଃ ତାଇକେନା ଏନା ଇନ୍‍କୁ ଲୋଃ ତାଇନୋଃକା, ହାର୍ ଇଙ୍ଗ୍ ହଗି ଇନ୍‍କୁୱାଃ ରେ ତାଇନୋଃ କାଇଙ୍ଗ୍।” ଚିମ୍ତାଙ୍ଗ୍ ୟୀଶୁ ନେ ବିନ୍ତି ଛାବା କେଦାଏ ଆୟାଃ ଚେଲାକୋ ଲୋଃ କିନ୍ଦ୍ରୋନ୍ ଗାଡା ଫାରୋମ୍ ସେନ୍ ଜାନାଏ। ଏନ୍ତାଃ ମିୟାଃ ବାଗିଚା ତାଇକେନା, ଅକ୍ତାଃ ଆଏଃ ହାର୍ ଆୟାଃ ଚେଲାକୋ ସେନ୍ ଜାନାକୋ। ଇନିଃକେ ସାବ୍ ରିକାନିଃ ୟାହୁଦା ହ ଏନ୍ ଜାଗା କେ ସାରି ତାଇନାଏ, ଚିୟାଃଚି ୟୀଶୁ ଆୟାଃ ଚେଲାକୋ ଲୋଃ ମିଶା-ମିଶା ହେନ୍ତାଃ ସେନ୍ ତାଇକେନାଏ। ଏନ୍ତେ ୟାହୁଦା ମିୟାଃ ଦାଲ୍ ପାଲ୍‍ଟାନ୍ କୋକେ ହାର୍ ପ୍ରାଧାନ୍ ୟାଜାକ୍‍କୋ ହାର୍ ଫାରିସୀ ହୋଡ଼ୋକୋ ପାଡ଼େତେ ମାନ୍ଦିର୍ କେ ହୋରୋତାନ୍ ସିପାହୀ କୋକେ ଇଦିକେତେ, ଦିମି କୋ ହାର୍ ହୁଲ୍ଲା କୋ ହାର୍ ହାତିୟାର୍ କୋ ଆଉକେତେ ହେନ୍ତାଃ ସେଟେର୍ ଜାନାଏ। ଏନ୍ତେ ୟୀଶୁ, ଏନ୍ ସବେନ୍ କାଜି ଅକନାଃ ଆୟାଃ ଚେତାନ୍ ରେ ହୋବାଅଃ ରାଃ ତାଇକେନା ସାରିକେତେ, ଇନ୍‍କୁ ତାଃ ସେନ୍ ଜାନାଏ ହାର୍ ଇନ୍‍କୁକେ କୁଲିକେଃକୋୱାଏ, “ଅକଏ କେ ଦାଣା ତାନାପେ?” ଇନ୍‍କୁ ଇନିଃକେ କାଜିରୁଆଡ଼୍ କେଦାକୋ, “ନାଜ୍ରେଥ୍ ସାହାର୍ ରେନ୍ ୟୀଶୁ କେ।” ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍ ତାନିଙ୍ଗ୍।” ଇନିଃକେ ସାବ୍ ରିକାନିଃ ୟାହୁଦା ହ ଇନ୍‍କୁ ଲୋଃ ତିଙ୍ଗୁ ଲେନାଏ। ଇନିଜାଃ ନେୟା କାଜିତୋର୍ଷା ଚି, “ଇଙ୍ଗ୍ ତାନିଙ୍ଗ୍” ଇନ୍‍କୁ ତାୟୋମ୍ ଗେନା କେତେ ଅତେ ରେ ଉୟୁଃ ଜାନାକୋ। ଏନ୍ତେ ଇନିଃ ଇନ୍‍କୁକେ ଆଡୋଃଗି କୁଲିକେଃକୋୱାଏ, “ଆପେ ଅକଏ କେ ଦାଣା ତାନାପେ?” ଇନ୍‍କୁ ଆଡୋଃଗି କାଜିକେଦାକୋ, “ନାଜ୍ରେଥ୍ ସାହାର୍ ରେନ୍ ୟୀଶୁ କେ।” ୟୀଶୁ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଦୋ ଆପେକେ କାଜି ଛାବା କେଦାଇଙ୍ଗ୍, ଆଗାର୍ ଇଙ୍ଗ୍‍କେ ଦାଣା ତାନାପେ ଏଣ୍ଡେ ଇଙ୍ଗ୍ଆଃ ଚେଲାକୋକେ ବାଗେତାକୋପେ।” ନେୟା ଏନାମେନ୍ତେ ହୋବାଜାନା ଚି ଏନ୍ ବାଚାନ୍ ପୁରାଅଃକା ଅକନାଃ ଇନିଃ କାଜିଲେଦାଏ, “ଅକନ୍ କୋକେ ଆମ୍ ଇଙ୍ଗ୍‍‍କେ ଏମ୍ କାଦିଙ୍ଗାମ୍ ଇନ୍‍କୁ ହେତେ ମିହୋଡ଼୍ କେହ କାଇଙ୍ଗ୍ ଆଃ କେଦା।” ଏନ୍ତେ ଶିମୋନ୍ ପାତ୍ରାସ୍ ଆଜାଃ ତାଃ ତାଇକେନ୍ ତାଲ୍‍ୱାର୍ କେ ଥାଇଃ ଅଡୋଙ୍ଗ୍ କେଦାଏ ହାର୍ତେ ମାରାଙ୍ଗ୍ ୟାଜାକ୍ ରାଃ ଦାସୀ ଗାଃ ଜୋମ୍ ପାଡ଼୍ ରାଃ ଲୁତୁର୍ କେ ମାଆ ଖାଣ୍ଡାଅ କେଦାଏ। ଏନ୍ ଦାସୀ ରାଃ ନୁତୁମ୍ ମାଲ୍‍ଖୁସ୍ ତାଇକେନା। ଏନ୍ତେ ୟୀଶୁ ପାତ୍ରାସ୍ କେ କାଜିକିଜାଏ, “ଆମାଃ ତାଲ୍‍ୱାର୍ ଖାପ୍ ରେ ଦୋହୋଏମେ। ଅକନ୍ ଦୁକୁ ଆବା ଇଙ୍ଗ୍‍କେ ଏମ୍ କାଦିଙ୍ଗାଏ, ଚିନାଃ ଏନାକେ କାଇଙ୍ଗ୍ ସାହାତିଙ୍ଗ୍ ୟା?” ଏନ୍ତେ ପାଲ୍‍ଟାନ୍ କୋ ହାର୍ ଇନ୍‍କୁୱାଃ ଗୋମ୍‍କେକୋ ଆଡୋଃ ୟାହୁଦୀ କୋୱାଃ ମାନ୍ଦିର୍ କେ ହୋରୋତାନ୍ ସିପାହୀକୋ ୟୀଶୁ କେ ସାବ୍ କେତେ ଥୋଲ୍ କିଜାକୋ, ହାର୍ତେ ଇନିଃକେ ସିଦା ହାନ୍ନା ତାଃ ଇଦିକିଜାକୋ, ଚିୟାଃଚି ଇନିଃ ଏନ୍ ଶିର୍ମା ରାଃ ମାରାଙ୍ଗ୍ ୟାଜାକ୍ କୈଫା ରାଃ ହଁୟାର୍ ତାଇକେନାଏ। ନିଈ ଏନ୍ କୈଫା ଗି ତାଇକେନାଏ, ଅକନିଃ ୟାହୁଦୀ ଗୁରୁ କୋକେ ସାଲ୍‍ହା ଏମ୍ ଲେଦାଏ ଚି ଆବୁ ହୋଡ଼ୋକୋ ଲାଗିନ୍ତେ ମିୟାଃ ହୋଡ଼ ଗୋଜୋଃ ବୁଗିନ୍ ତାନାଃ। ଶିମୋନ୍ ପାତ୍ରାସ୍ ହାର୍ ମିହୋଡ଼୍ ଏଟାଃ ଚେଲା ହ ୟୀଶୁ ରାଃ ତାୟୋମ୍-ତାୟୋମ୍ ସେନ୍ ତାଇନାକୋ। ନେ ଚେଲା ମାରାଙ୍ଗ୍ ୟାଜାକ୍ ରାଃ ନେଲ୍ ଉପୁରୁମ୍ ହୋଡ଼ ତାଇକେନାଏ, ଏନାମେନ୍ତେ ଇନିଃ ୟୀଶୁ ଲୋଃ ମାରାଙ୍ଗ୍ ୟାଜାକ୍ ରାଃ ରାଚା ରେ ବୋଲୋ ଜାନାଏ। ମେନ୍ଦୋ ପାତ୍ରାସ୍ ବାହାରି ଦୁହାର୍ ରେ ତିଙ୍ଗୁ ଜାନାଏ। ଏନ୍ତେ ଏନ୍ ଏଟାଃ ଚେଲା ଅକନିଃ ମାରାଙ୍ଗ୍ ୟାଜାକ୍ ରାଃ ଉପୁରୁମ୍ ହୋଡ଼ ତାଇକେନାଏ, ବାହାରି ଅଡୋଙ୍ଗ୍ ଜାନାଏ ଆଡୋଃ ଦୁହାର୍-ହୋରୋ ଦାସୀ କୁଡ଼ି କେ କାଜିକେତେ ପାତ୍ରାସ୍ କେ ଭିତାର୍ ଆଉକିଜାଏ। ଏନ୍ ଦାସୀ କୁଡ଼ି ଅକନିଃ ଦୁହାର୍-ହୋରୋ ନିଈ ତାଇକେନାଏ, ପାତ୍ରାସ୍ କେ କାଜିକେଦାଏ, “ଚିନାଃ ଆମ୍ ହ ଦୋ ଏନ୍ ହୋଡ଼ ରାଃ ଚେଲାକୋ ଏତେ ନାହାଲାମ୍?” ଇନିଃ କାଜିକେଦାଏ, “ଇଙ୍ଗ୍ ନାହାଲାଇଙ୍ଗ୍।” ଦାସୀକୋ ଆଡୋଃ ମାନ୍ଦିର୍ କେ ହୋରୋତାନ୍ ସିପାହୀକୋ ରାବାଙ୍ଗ୍ ରାଃ ଚାଲ୍ତେ କୁଇଲା ଜୁଲ୍ କେତେ ସେଙ୍ଗେଲ୍ ଜୁରୁବେନ୍ ତାଇକେନାକୋ, ଆଡୋଃ ପାତ୍ରାସ୍ ହ ଇନ୍‍କୁ ଲୋଃ ତିଙ୍ଗୁ କେତେ ସେଙ୍ଗେଲ୍ ଜୁରୁବେନ୍ ତାଇକେନାଏ। ଏନ୍ତେ ମାରାଙ୍ଗ୍ ୟାଜାକ୍ ୟୀଶୁ କେ ଆୟାଃ ଚେଲା କୋୱାଃ ବିଷାୟ୍ ରେ ହାର୍ ଆୟାଃ ଉପ୍‍ଦେଶ୍ ବିଷାୟ୍ ରେ କୁଲିକିଜାଏ। ୟୀଶୁ ଇନିଃକେ କାଜିରୁଆଡ଼୍ କେଦାଏ, “ଇଙ୍ଗ୍ ସବେନ୍ କୋକେ ଥିମ୍ବାଗି ହୋଡ଼ୋକୋ ଥାଲାରେ କାଜିକେଦାଇଙ୍ଗ୍, ଇଙ୍ଗ୍ ବିନ୍ତିଅଡ଼୍ଆଃ ରେ ହାର୍ ମାନ୍ଦିର୍ ରାଃ ରାଚା ରେ, ଅକତାଃ ସବେନ୍ ୟାହୁଦୀ ଗୁରୁକୋ ହୁଣ୍ଡିଅଃ ତାଇକେନାକୋ, ଏନ୍ତାଃ ସାଦାଏଗି ଉପ୍‍ଦେଶ୍ ଏମ୍‍କେଦାଇଙ୍ଗ୍ ହାର୍ ଉକୁ କେତେ ଜାହାନାଃ ହ କାଇଙ୍ଗ୍ କାଜିକାଦା। ଆମ୍ ଇଙ୍ଗ୍‍କେ ଚିନାଃ ମେନ୍ତେ କୁଲିତାନାମ୍? ଆୟୁମ୍‍‍ଲାଃକୋ ଏନ୍ ହୋଡ଼ୋକୋକେ କୁଲିକୋମେ ଚି ଇଙ୍ଗ୍ ଇନ୍‍କୁକେ ଚିନାଃ କାଜିକେଦାଇଙ୍ଗ୍। ନେଲେମ୍, ଇନ୍‍କୁ ସାରିୟାକୋ ଚି ଇଙ୍ଗ୍ ଚିନାଃ-ଚିନାଃ କାଜିକେଦାଇଙ୍ଗ୍।” ଚିମ୍ତା ଇନିଃ ନେୟା କାଜିକେଦାଏ, ଏଣ୍ଡେ ମାନ୍ଦିର୍ କେ ହୋରୋତାନ୍ ସିପାହୀ ହେତେ ମିହୋଡ଼୍ ଅକନିଃ ନାଡ଼େଏ ରେ ତିଙ୍ଗୁ ଲେନ୍ ତାଇକେନାଏ, ୟୀଶୁ କେ ଚାଟ୍‍କାନ୍ କେତେ କାଜିକିଜାଏ, “ଚିନାଃ ଆମ୍ ମାରାଙ୍ଗ୍ ୟାଜାକ୍ କେ ନେଲେକା କାଜିରୁଆଡ଼ିୟାମ୍?” ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଆଗାର୍ ଇଙ୍ଗ୍ ଗାଲ୍ତି କାଜି କାଜିକେଦାଇଙ୍ଗ୍, ଏଣ୍ଡେ ଏନା ଚିକାନ୍ ଗାଲ୍ତି ତାନାଃ କାଜିମ୍, ମେନ୍ଦୋ ଆଗାର୍ ବୁଗିନ୍ କାଜି କାଜିକେଦାଇଙ୍ଗ୍, ଏଣ୍ଡେ ଆମ୍ ଇଙ୍ଗ୍‍କେ ଚିନାଃ ଲାଗିନ୍ ହୁମାଃଇଙ୍ଗ୍ ତାନାମ୍?” ଏନ୍ତେ ହାନ୍ନା ଇନିଃକେ ଥୋଲାକାନ୍ ଗି କୈଫା ମାରାଙ୍ଗ୍ ୟାଜାକ୍ ନାଡ଼େଏ ତାଃ କୁଲ‍୍‍ତାଇଜାଏ। ଶିମୋନ୍ ପାତ୍ରାସ୍ ତିଙ୍ଗୁ କେତେ ସେଙ୍ଗେଲ୍ ଜୁରୁବେନ୍ ତାଇକେନାଏ। ଇମ୍ତା ଇନ୍‍କୁ ଇନିଃକେ କାଜିକିଜାକୋ, “ଚିନାଃ ଆମ୍ ହ ଦୋ ଇନିଜାଃ ଚେଲାକୋ ହେତେ ନାହାଲାମ୍?” ଇନିଃ ମାନା କେତେ କାଜିକେଦାଏ, “ଇଙ୍ଗ୍ ନାହାଲାଇଙ୍ଗ୍।” ମାରାଙ୍ଗ୍ ୟାଜାକ୍ ରାଃ ଦାସୀ କୋଏତେ ମିୟାଃ ହୋଡ଼, ଅକଏ ଇନିଜାଃ ପେଡ଼ା କୋଏତେ ତାଇକେନାଏ ଅକନିଜାଃ ଲୁତୁର୍ କେ ପାତ୍ରାସ୍ ମାଆ ଲେଦାଏ, ଇନିଃ କାଜିକେଦାଏ, “ଚିନାଃ ଇଙ୍ଗ୍ ଆମ୍‍କେ ଇନିଜାଃ ଲୋଃ ବାଖ୍‍ଡ଼ି ରେ କାଇଙ୍ଗ୍ ନେଲ୍ ଲେଃମେୟା?” ପାତ୍ରାସ୍ ଆଡୋଃଗି ମାନା କେଦାଏ, ହାର୍ତେ ଇମ୍ତାଗି ମିୟାଃ ସିମ୍ ରାଆ କେଦାଏ। ଏନ୍ତେ ଇନ୍‍କୁ ୟୀଶୁ କେ କୈଫା ତାଃ ଏତେ ହାକିମ୍ ରାଃ ବିଚାର୍ ଅଡ଼୍ଆଃ ତେକୋ ଇଦିକିଜାକୋ, ହାର୍ ସେତାଃ ରାଃ ସାମାୟ୍ ତାଇକେନା, ମେନ୍ଦୋ ଇନ୍‍କୁ ଆକୋ ହାକିମ୍ ରାଃ ବିଚାର୍ ଅଡ଼୍ଆଃ ଭିତାର୍ ରେ କାକୋ ବୋଲୋଜାନା, ଏନାମେନ୍ତେ ଚି ଆଶୁଦ୍ଧ୍ କାକୋ ହୋବାଅଃୱା ମେନ୍ଦୋ ଫାସାହ୍ ପାରାବ୍ ରାଃ ଜୋମେୟାଃ ଜୋମ୍ ଧାଡ଼ିୟାକୋ। ଏନ୍ତେ ପିଲାତୁସ୍ ଇନ୍‍କୁ ତାଃ ବାହାରି ଅଡୋଙ୍ଗ୍ କେତେ କାଜିକେଦାଏ, “ଆପେ ନେ ହୋଡ଼ ଚେତାନ୍ ରେ ଚିନାଃ ଦୋଷ୍ ଲାଗାୱି ତାନାପେ?” ଇନ୍‍କୁ ଇନିଃକେ କାଜିରୁଆଡ଼୍ କେଦାକୋ, “ଆଗାର୍ ଇନିଃ ଏତ୍କାନ୍ କାମିନିଃ କାଏ ତାଇନ୍ ତେୟାଃଏ ଏଣ୍ଡେ ଆଲେ ଇନିଃକେ ଆମାଃ ନାଡ଼େଏ କାଲେ ଆୱିତେୟାଃ।” ପିଲାତୁସ୍ ଇନ୍‍କୁକେ କାଜିକେଃକୋୱାଏ, “ଆପେଗୀ ନିଈକେ ଇଦିକେତେ ଆପେୟାଃ ମୁଶା ନାବୀ ରାଃ ଆଇନ୍ ଲେକାତେ ଗି ନିଜାଃ ବିଚାର୍ ରିକାଏପେ।” ୟାହୁଦୀ ଗୁରୁକୋ ଇନିଃକେ କାଜିକେଦାକୋ, “ଆଲେକେ ଆଧିକାର୍ ବାନୋଗା ଚି ଜାହାଁଏ କେ ଗୋଜିୟାଲେ।” ନେୟା ଏନାମେନ୍ତେ ହୋବାଜାନା ଚି ୟୀଶୁ ରାଃ ଏନ୍ କାଜି ପୁରାଅଃକା ଅକନାଃ ଇନିଃ ନେୟା ଉଦୁବ୍ ସିଦା ଲେଦାଏ ଚି ଇନିଃ ଚିଲ୍‍କାନ୍ ଗୋନୋଏଃ ଗୋଜୋଗାଏ। ଏନ୍ତେ ପିଲାତୁସ୍ ଆଡୋଃଗି ହାକିମ୍ ରାଃ ବିଚାର୍ ଅଡ଼୍ଆଃ ଭିତାର୍ ସେନ୍ ଜାନାଏ, ଆଡୋଃ ୟୀଶୁ କେ ଅଡ଼୍ଆଃ ଭିତାର୍ କେଡ଼ାକେତେ କୁଲିକିଜାଏ, “ଚିନାଃ ଆମ୍ ୟାହୁଦୀ କୋୱା ରାଜା ତାନ୍‍ମେ?” ୟୀଶୁ କାଜିରୁଆଡ଼୍ କେଦାଏ, “ଚିନାଃ ନେ କାଜି ଆମାଃ ପାଡ଼େତେ କାଜିତାନାମ୍ ଚି ଏଟାଃ କୋ ଇଙ୍ଗ୍ଆଃ ବିଷାୟ୍ ରେ ଆମ୍‍କେ ନେୟା କାଜିକାଦାକୋ?” ପିଲାତୁସ୍ କାଜିରୁଆଡ଼୍ କେଦାଏ, “ଆମ୍ ସାରିୟାମ୍ ଚି ଇଙ୍ଗ୍ ୟାହୁଦୀ ନାହାଲିଙ୍ଗ୍? ଆମାଃଗି ଜାତି ହୋଡ଼ୋକୋ ଆଡୋଃ ପ୍ରାଧାନ୍ ୟାଜାକ୍‍କୋ ଆମ୍‍କେ ଇଙ୍ଗ୍ଆଃ ତିଈ ରେ ଜିମାକାଦିଙ୍ଗାକୋ। ଆମ୍ ଚିନାଃ ଚିକାକାଦାମ୍?” ୟୀଶୁ କାଜିରୁଆଡ଼୍ କେଦାଏ, “ଇଙ୍ଗ୍ଆଃ ରାଇଜ୍ ନେ ଅତେଦିଶୁମ୍ ରାଃ ନାହାଲା, ଆଗାର୍ ଇଙ୍ଗ୍ଆଃ ରାଇଜ୍ ନେ ଅତେଦିଶୁମ୍ ରାଃ ତାଇନ୍ ତେୟାଃ, ଏଣ୍ଡେ ଇଙ୍ଗ୍ଆଃ ଦାସୀ କୋ ଲାଡ଼ାଇ ରିକା ତେୟାଃକୋ ଏନ୍ତେ ଇଙ୍ଗ୍ ୟାହୁଦୀ ଗୁରୁ କୋୱା ତିଈ ରେ କାଇଙ୍ଗ୍ ସାବ୍ ରିକାଅଃ ତେୟାଃ। ମେନ୍ଦୋ ଇଙ୍ଗ୍ଆଃ ରାଇଜ୍ ନେତାଃ ରାଃ ନାହାଲା।” ପିଲାତୁସ୍ ଇନିଃକେ କାଜିକିଜାଏ, “ଏଣ୍ଡେ ଚିନାଃ ଆମ୍ ରାଜା ତାନ୍‍ମେ?” ୟୀଶୁ କାଜିରୁଆଡ଼୍ କେଦାଏ, “ଆମ୍ କାଜିତାନାମ୍ ଚି ଇଙ୍ଗ୍ ରାଜା ତାନିଙ୍ଗ୍। ଇଙ୍ଗ୍ ନେୟାମେନ୍ତେ ଜାନାମ୍ ଇଦିକାଦିଙ୍ଗ୍ ହାର୍ ନେୟାମେନ୍ତେ ଅତେଦିଶୁମ୍ ରେ ହିଜୁଃ କାନିଙ୍ଗ୍ ଚି ସାର୍ତି ରାଃ ଗୋୱା ଏମେୟାଇଙ୍ଗ୍। ଅକଏ ସାର୍ତି ରାଃ ତାନିଃ, ଇନିଃ ଇଙ୍ଗ୍ଆଃ କେଡ଼ା ଆୟୁମ୍ ୟାଏ।” ପିଲାତୁସ୍ ଇନିଃକେ କାଜିକିଜାଏ, “ସାର୍ତି ଚିନାଃ ତାନାଃ?” ନେୟା କାଜିକେତେ ଇନିଃ ଆଡୋଃ ୟାହୁଦୀ ଗୁରୁ କୋତାଃ ଅଡୋଙ୍ଗ୍ ଜାନାଏ ହାର୍ ଇନ୍‍କୁକେ କାଜିକେଦାଏ, “ଇଙ୍ଗ୍ ଦୋ ଇନିଜାଃ ରେ ଜାହାନ୍ ଦୋଷ୍ କାଇଙ୍ଗ୍ ନାମ୍ ତାନା। ମେନ୍ଦୋ ଆପେୟାଃ ନେୟା ନିୟାମ୍ ତାନାଃ ଚି ଇଙ୍ଗ୍ ଫାସାହ୍ ପାରାବ୍ ରେ ଆପେ ଲାଗିନ୍ ମିୟାଃ ହୋଡ଼ କେ ବାଗେ ତାୟିଙ୍ଗ୍। ଏନାତେ ଆପେ ଚିନାଃ ସାନାଙ୍ଗ୍ ତାନାପେ ଚି ଆପେୟାଃ ଲାଗିନ୍ ୟାହୁଦୀ କୋୱାଃ ରାଜା କେ ବାଗେ ତାୟିଙ୍ଗ୍?” ଏନ୍ତେ ଇନ୍‍କୁ ଆଡୋଃଗି କାଉରି କେତେ କାଜିକେଦାକୋ, “ନିଈ କେ କାହା, ମେନ୍ଦୋ ଆଲେୟାଃ ଲାଗିନ୍ତେ ବାରାବ୍ବା କେ ବାଗେତାମେ।” ହାର୍ ବାରାବ୍ବା ଝାଗ୍ଡ଼ା-ଝାଟି ହାର୍ ହୋଡ଼ ଗୋଗୋଏଃ ଡାକୁ ତାଇକେନାଏ। ଏନ୍ତେ ପିଲାତୁସ୍ ଆନାଚୁ ଏମ୍ କେଦାଏ ଚି ୟୀଶୁ କେ ଇଦି କେତେ କୋଡ୍ରା ମାଉରି କାକୋ। ପାଲ୍‍ଟାନ୍ କୋ ଜାନୁମ୍ ରାଃ ମୁକୁଟ୍ ଗାଲାଙ୍ଗ୍ କେତେ ଇନିଜାଃ ବୋଅ ରେ ମାଣ୍ଡାଅ କେଦାକୋ, ହାର୍ ଇନିଃକେ ଟୋକୋ ରାଙ୍ଗ୍ ରାଃ ଲିଜାଃ ତୁସିଙ୍ଗ୍ କିଜାକୋ। ହାର୍ ଇନିଜାଃ ନାଡ଼େଏ ହିଜୁଃ-ହିଜୁଃକେତେ କାଜିକେଦାକୋ, “ହେ ୟାହୁଦୀ କୋୱାଃ ରାଜା, ଜୋହାର୍!” ହାର୍ ଇନିଃକେ ଚାଟ୍‍କାନ୍ କିଜାକୋ। ଏନ୍ତେ ପିଲାତୁସ୍ ଆଡୋଃଗି ବାହାରି ଅଡୋଙ୍ଗ୍ କେତେ ହୋଡ଼ୋକୋକେ କାଜିକେଃକୋୱାଏ, “ନେଲେପେ, ଇଙ୍ଗ୍ ଇନିଃକେ ଆପେୟାଃ ନାଡ଼େଏ ରେ ବାହାରି ଆୱିତାନିଙ୍ଗ୍, ଏନାତେ ଆପେ ସାରିପେ ଚି ଇଙ୍ଗ୍ ଇନିଜାଃ ଜେତ୍ନାଃ ଦୋଷ୍ କାଇଙ୍ଗ୍ ନାମ୍ ତାନା।” ଚିମ୍ତାଙ୍ଗ୍ ୟୀଶୁ ଜାନୁମ୍ ରାଃ ମୁକୁଟ୍ ହାର୍ ଟୋକୋ ରାଙ୍ଗ୍ ରାଃ ଲିଜାଃ ତୁସିଙ୍ଗ୍‍କାନ୍ ବାହାରି ଅଡୋଙ୍ଗ୍‍ନାଏ, ପିଲାତୁସ୍ ଇନ୍‍କୁକେ କାଜିକେଦାଏ, “ନେଲିପେ, ନେ ହୋଡ଼କେ!” ଚିମ୍ତାଙ୍ଗ୍ ପ୍ରାଧାନ୍ ୟାଜାକ୍‍କୋ ହାର୍ ମାନ୍ଦିର୍ ହୋରୋତାନ୍ ସିପାହୀକୋ ଇନିଃକେ ନେଲ୍ କିଜାକୋ, ଦୋ କାଉରିକେତେ କାଜିକେଦାକୋ, “ଇନିଃକେ କ୍ରୁଶ୍ ରେ ରାକାବିପେ, କ୍ରୁଶ୍ ରେ!” ପିଲାତୁସ୍ ଇନ୍‍କୁକେ କାଜିକେଃକୋୱାଏ, “ଆପେଗୀ ଇନିଃକେ ଇଦିକେତେ କ୍ରୁଶ୍ ରେ ରାକାବିପେ, ଚିୟାଃଚି ଇଙ୍ଗ୍ ଇନିଜାଃ ରେ ଜେତାନ୍ ଦୋଷ୍ କାଇଙ୍ଗ୍ ନାମ୍ ତାନା।” ୟାହୁଦୀ ଗୁରୁକୋ ଇନିଃକେ କାଜିରୁଆଡ଼୍ କିଜାକୋ, “ଆଲେୟାଃ ପୁର୍ଖା ମୁଶା ନାବୀ ରାଃ ଆଇନ୍ ହ ମେନାଃ ହାର୍ ଏନ୍ ଆଇନ୍ ଲେକାତେ ଇନିଃ ଗୋଜୋଃ ଦାଣ୍ଡ୍ ନାମେ ଲେକାନିଃ ତାନିଃ, ଚିୟାଃଚି ଇନିଃ ଆପାନ୍ କେ ପାର୍ମେଶ୍ଵାର୍ ରାଃ ହୋନ୍ ବାଇକେଦାଏ।” ଚିମ୍ତାଙ୍ଗ୍ ପିଲାତୁସ୍ ନେ କାଜି ଆୟୁମ୍‍କେଦାଏ ଦୋ ଆଡୋଃଗି ବୋରୋ ଜାନାଏ, ହାର୍ ଇନିଃ ଆଡୋଃଗି ହାକିମ୍ ରାଃ ବିଚାର୍ ଅଡ଼୍ଆଃ ତେ ବୋଲୋ ଜାନାଏ ହାର୍ ୟୀଶୁ କେ କାଜିକିଜାଏ, “ଆମ୍ କୋତାଃ ରେନ୍ ତାନ୍‍ମେ?” ମେନ୍ଦୋ ୟୀଶୁ ଇନିଃକେ ଚିନାଃ ହ କାଏ କାଜିରୁଆଡ଼୍ କିଜାଏ। ଏନ୍ତେ ପିଲାତୁସ୍ ଇନିଃକେ କାଜିକିଜାଏ, “ଇଙ୍ଗ୍‍କେ ଚିନାଃ ଲାଗିନ୍ କାମ୍ କାଜିତାନା? ଚିନାଃ ଆମ୍ କାମ୍ ସାରିୟା ଚି ଆମ୍‍କେ ବାଗେ ରାଃ ଆଧିକାର୍ ଇଙ୍ଗ୍ଆଃ ତାଃ ମେନାଃ ହାର୍ କ୍ରୁଶ୍ ରେ ରାକାବ୍ ରାଃ ହ ଆଧିକାର୍ ଇଙ୍ଗ୍ଆଃ ତାଃ ମେନାଃ?” ୟୀଶୁ କାଜିରୁଆଡ଼୍ କିଜାଏ, “ଆଗାର୍ ଆମ୍‍କେ ପାର୍ମେଶ୍ଵାର୍ ଏତେ କା ଏମୋଃ ତେୟାଃ, ଦୋ ଆମାଃ ଇଙ୍ଗ୍ଆଃ ଚେତାନ୍ ରେ ଜେତାନ୍ ଆଧିକାର୍ କା ହୋବାଅଃ ତେୟାଃ, ଏନାମେନ୍ତେ ଅକଏ ଇଙ୍ଗ୍‍କେ ଆମାଃ ତିଈ ରେ ସାବାଦିଙ୍ଗାଏ ଇନିଜାଃ ପାପ୍ ଥିମ୍ବା ମେନାଃ।” ଏନାମେନ୍ତେ ପିଲାତୁସ୍ ଇନିଃକେ ବାଗେ ଲାଗିନ୍ ସାନାଙ୍ଗ୍ କିଜାଏ, ମେନ୍ଦୋ ୟାହୁଦୀ ହୋଡ଼ୋକୋ କାଉରି-କାଉରି କେତେ କାଜିକେଦାକୋ, “ଆଗାର୍ ଆମ୍ ଇନିଃକେ ବାଗେତାୟାମ୍, ଏଣ୍ଡେ ଆମ୍ ରୋମ୍‍ରେନ୍ ରାଜା ରାଃ ଗାତି ନାହାଲାମ୍, ଜେତାଏ ଆଏଃ ଆପାନ୍ କେ ରାଜା ବାଇତାନାଏ ଇନିଃ କୈସାର୍ ରାଃ ବିରୋଧ୍ ତାନାଏ।” “ନେ ବାକାଣ୍ ଆୟୁମ୍‍କେତେ ପିଲାତୁସ୍ ୟୀଶୁ କେ ବାହାରି ଆଉକିଜାଏ ହାର୍ ଏନ୍ ଜାଗା ରେ ମିୟାଃ ଦିରି ରାଃ ପିଣ୍ଡା ତାଇକେନା ଏନା ଇବ୍ରାନୀ ବାକାଣ୍ ରେ ‘ଗାବ୍ବାଥା’ କାଜିୟଗା, ହାର୍ ଏନ୍ତାଃ ବିଚାର୍ କୁର୍ସି ରେ ଦୁବ୍ ଜାନାଏ। ନେୟା ଫାସାହ୍ ପାରାବ୍ ହାପ୍ତା ରାଃ ସେକାଡ଼େନ୍ ହୁଲାଙ୍ଗ୍ ତାଇକେନା, ହାର୍ ତିକିନ୍ ସାମାୟ୍ ତାଇକେନା।” ଇମ୍ତା ଇନିଃ ୟାହୁଦୀ ହୋଡ଼ୋକୋକେ କାଜିକେଃକୋୱାଏ, “ନେଲିପେ ଆପେୟାଃ ରାଜା!” ମେନ୍ଦୋ ଇନ୍‍କୁ କାଉରି କେଦାକୋ, “ଗୋଜିମ୍! ଗୋଜିମ୍! ଇନିଃକେ କ୍ରୁଶ୍ ରେ ରାକାବିମ୍!” ପିଲାତୁସ୍ ଇନ୍‍କୁକେ କାଜିକେଃକୋୱାଏ, “ଚିନାଃ ଇଙ୍ଗ୍ ଆପେୟାଃ ରାଜା କେ କ୍ରୁଶ୍ ରେ ରାକାବିୟାଇଙ୍ଗ୍?” ପ୍ରାଧାନ୍ ୟାଜାକ୍‍କୋ କାଜିରୁଆଡ଼୍ କେଦାକୋ, “ରୋମ୍‍ରେନ୍ ରାଜା କେ ବାଗେ କେତେ ଜେତାଏ ଆଲେୟାଃ ରାଜା ନାହାଲାଏ।” ଏନ୍ତେ ପିଲାତୁସ୍ ଇନିଃକେ ଇନ୍‍କୁୱାଃ ତିଈ ରେ ଜିମା ତାଃ କୋୱାଏ ଏନାତେ ଇନିଃ କ୍ରୁଶ୍ ରେ ରାକାବୋଃ କାଏ। “ଏନ୍ତେ ପାଲ୍‍ଟାନ୍ କୋ ୟୀଶୁ କେ ଇଦିକିଜାକୋ, ହାର୍ ଇନିଃ ଆୟାଃ କ୍ରୁଶ୍ ଉଠାଓ କେତେ ଏନ୍ ଜାଗା ସାନ୍ ବାହାରି ତେ ସେନ୍ ଜାନାଏ, ଅକନାଃ ‘ଖୋପ୍‍ଡ଼ି ରାଃ ଜାଗା’ କାଜିଅଃୱା ହାର୍ ଇବ୍ରାନୀ ବାକାଣ୍ ରେ ‘ଗୋଲ୍‍ଗୋଥା’। ହେନ୍ତାଃ ରେ ଇନ୍‍କୁ ଇନିଃକେ ହାର୍ ଇନିଃ ଲୋଃ ଆଡୋଃ ବାରିୟା ହୋଡ଼ୋ କିନ୍‍କେ ଏଟାଃ କ୍ରୁଶ୍ ରେ ରାକାବ୍ କେଃକୋୱାକୋ ମିହୋଡ଼୍ କେ ନେତେରେ ହାର୍ ଏଟାଃ ମିହୋଡ଼୍ କେ ହାନ୍ତେରେ, ହାର୍ ଥାଲା ରେ ୟୀଶୁ କେ।” ପିଲାତୁସ୍ ମିୟାଃ ଦୋଷ୍ ଅନୋଲ୍ ଅଲ୍‍କେତେ କ୍ରୁଶ୍ ଚେତାନ୍ ରେ ଲାଗାଅ ତାଦାଏ, ହାର୍ ଏନାରେ ନେୟା ଅଲ୍‍ଲେନା, “ୟୀଶୁ ନାଜ୍ରେଥ୍ ସାହାର୍ ରେନ୍ ୟାହୁଦୀ କୋୱାଃ ରାଜା।” ନେ ଦୋଷ୍ ଚିଠି କେ ଥିମ୍ବାଗି ୟାହୁଦୀକୋ ପାଢ଼ାଅ କେଦାକୋ, ଚିୟାଃଚି ଏନ୍ ଜାଗା ଅକତାଃ ୟୀଶୁ କେ କ୍ରୁଶ୍ ରେ ରାକାବ୍ ଲିଜାକୋ ୟୀରୁଶାଲେମ୍ ସାହାର୍ ରାଃ ନାଡ଼େଏ ରେ ତାଇକେନା, ହାର୍ ଚିଠି ଇବ୍ରାନୀ ବାକାଣ୍ ହାର୍ ଲାଟିନ୍ ବାକାଣ୍ ହାର୍ ୟୁନାନୀ ବାକାଣ୍ ରେ ଅଲାକାନ୍ ତାଇକେନା। ଏନ୍ତେ ୟାହୁଦୀ ହୋଡ଼ୋ କୋୱା ପ୍ରାଧାନ୍ ୟାଜାକ୍‍କୋ ପିଲାତୁସ୍ କେ କାଜିକେଦାକୋ, “ ‘ୟାହୁଦୀ କୋୱା ରାଜା’ ଆଲୋମ୍ ଅଲେ ମେନ୍ଦୋ ନେୟା ଅଲେମ୍ ଚି ‘ଇନିଃ କାଜିକେଦାଏ, ଇଙ୍ଗ୍ ୟାହୁଦୀ କୋୱା ରାଜା ତାନିଙ୍ଗ୍।’ ” ପିଲାତୁସ୍ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଅକନାଃ ଅଲ୍ ତାଦାଇଙ୍ଗ୍ ଏନା ଅଲ୍ ତାଦାଇଙ୍ଗ୍।” ଚିମ୍ତା ପାଲ୍‍ଟାନ୍ କୋ ୟୀଶୁ କେ କ୍ରୁଶ୍ ରେ ରାକାବ୍ ତାଇଜାକୋ, ଏନ୍ତେ ଇନିଜାଃ ଲିଜାଃ କେ ଇଦିକେତେ ଚାଇର୍ ଭାଗ୍ କେଦାକୋ, ଚାଇର୍ ପାଲ୍‍ଟାନ୍ କୋ ନାଙ୍ଗ୍ ମିପୀୟାଃ ଭାଗ୍, ହାର୍ ଝୁଲା କେ ହ ଇଦିକେଦାକୋ, ମେନ୍ଦୋ ଝୁଲା ସିଲାଇକାନ୍ ତେୟାଃ କା ତାଇକେନା ଚେତାନ୍ ହେତେ ଲାଥାର୍ ଗାଲାଙ୍ଗ୍ କାନ୍ ତେୟାଃ ତାଇକେନା। ଏନାଲାଗିନ୍ ଇନ୍‍କୁ ଆକୋ-ଆକୋ ରେ କାଜିଜାନାକୋ, “ଆବୁ ନେୟାକେ କାବୁ ଚାଗାଡ଼େୟା, ମେନ୍ଦୋ ନେୟା ରେ ଖୁଡ଼୍‍ଖୁଡ଼ି ୟାବୁ ଚି ନେୟା ଅକେୟାଃ ହୋବାୱା।” ନେୟା ଏନାଲାଗିନ୍ ହୋବାଜାନା, ଚି ପାବିତାର୍ ପୁଥି ରେ ଅକନାଃ କାଜିଲେନ୍ ତାଇନା ଏନା ପୁରାଅଃକା, “ଇନ୍‍କୁ ଇଙ୍ଗ୍ଆଃ ଲିଜାଃ ଆକୋ କେରେ ହାପାଟିଙ୍ଗ୍ ଜାନାକୋ ହାର୍ ଇଙ୍ଗ୍ଆଃ ଝୁଲା ରେ ଖୁଡ଼୍‍ଖୁଡ଼ି ଉୟୁଃ କେଦାକୋ।” ଏନାମେନ୍ତେ ପାଲ୍‍ଟାନ୍ କୋ ନେକାଗି ରିକା କେଦାକୋ। ୟୀଶୁ ରାଃ କ୍ରୁଶ୍ ନାଡ଼େଏ ରେ ଇନିଜାଃ ଏଙ୍ଗାକିନ୍ ହାର୍ ଏଙ୍ଗାକିନା ମିଶି, କ୍ଲୋପାସ୍ ଗାଃ କୁଡ଼ି ମାରିୟାମ୍, ହାର୍ ମାରିୟାମ୍ ମାଗ୍‍ଦାଲା ସାହାର୍ ରେନ୍ ତିଙ୍ଗୁକାନ୍ ତାଇକେନାକୋ। ଚିମ୍ତାଙ୍ଗ୍ ୟୀଶୁ ଆୟାଃ ଏଙ୍ଗାକିନ୍ କେ ହାର୍ ଏନ୍ ଚେଲା କେ ଅକନିଃକେ ଇନିଃ ଦୁଲାଡ଼୍ ତାଇକେନାଏ ନାଡ଼େଏ ଦିଙ୍ଗୁଆକାନ୍ ନେଲ୍‍କେଦାଏ, ଦୋ ଆୟାଃ ଏଙ୍ଗାକିନ୍ କେ କାଜିକେଦାଏ, “ହେ ମା, ନେଲେମ୍, ନିଈ ଆମାଃ ହୋନ୍ ତାନିଃ।” ଏନ୍ତେ ଇନିଃ ଏନ୍ ଚେଲା କେ କାଜିକିଜାଏ, “ନିଈ ଆମାଃ ଏଙ୍ଗାକିନ୍ ତାନ୍‍କିନ୍।” ହାର୍ ଇମ୍ତା ଏତେଗି ଏନ୍ ଚେଲା, ଆକିନ୍ କେ ଆୟାଃ ଅଡ଼୍ଆଃ ଇଦିକିଜାଏ। ନେୟା ରାଃ ତାୟୋମ୍ତେ ୟୀଶୁ ନେୟା ସାରିକେତେ ଚି ନାଆ ସବେନାଃ ପୁରା ହୋବାଜାନା, ଏନାମେନ୍ତେ ଚି ପାବିତାର୍ ପୁଥି ରେ ଅକନାଃ କାଜି ଜାନା ଏନା ପୁରାଅଃକା, କାଜିକେଦାଏ, “ଇଙ୍ଗ୍ ତେତାଙ୍ଗ୍ ମେନାଇଙ୍ଗ୍‍ୟା।” ଏନ୍ତାଃ ଜୋଜୋ ଆଙ୍ଗୁର୍ ରାଶି ତେ ଫେରେଃକାନ୍ ମିୟାଃ ଚାଟୁ ତାଇକେନା, ଏନ୍ତେ ଇନ୍‍କୁ ଜୋଜୋ ଆଙ୍ଗୁର୍ ରାଶି ରେ ତୁପୁକାନ୍ ସ୍ପଞ୍ଜ କେ ହିସୋପ୍ ସୋଟା ରାଃ ଆଗା ରେ ମାଣ୍ଡାଅ କେତେ ମୋଚା ତାଃ ଏମ୍ କିଜାକୋ। ଚିମ୍ତା ୟୀଶୁ ଏନ୍ ଜୋଜୋ ଆଙ୍ଗୁର୍ ରାଶି ଚାଖାକେଦାଏ, ଦୋ କାଜିକେଦାଏ, “ପୁରା ହୋବାଜାନା” ହାର୍ ବୋଅ ତିରୁବ୍ କେତେ ଗୋଏଃ ଜାନାଏ। ନାଆ ଦୋ ଏନା ସେକାଡ଼େନ୍ ହୁଲାଙ୍ଗ୍ ତାଇକେନା, ହାର୍ ଏଟାଃ ହୁଲାଙ୍ଗ୍ ଆରାମେ ହୁଲାଙ୍ଗ୍ ହାର୍ ଫାସାହ୍ ପାରାବ୍ ବାରାନାଃ ତାଇକେନା, ଏନାମେନ୍ତେ ୟାହୁଦୀ ଗୁରୁ କୋ ପିଲାତୁସ୍ କେ ଆର୍ଜି କିଜାକୋ ଚି ଇନ୍‍କୁୱାଃ କାଟା କୋକେ ଠୋଏଃ ରିକାଅଃକା ଏନାତେ ଇନ୍‍କୁ ଜାଲ୍‍ଦି ଗୋଜୋଃ କାକୋ ହାର୍ ଇନ୍‍କୁକେ ଆଡ଼୍‍ଗୁ ରିକାଅଃକାକୋ, ହାର୍ ଆରାମେ ହୁଲାଙ୍ଗ୍ ରେ କ୍ରୁଶ୍ ରେ ଇନ୍‍କୁୱାଃ ଗୋଏଃ ହୋଡ଼ମୋକୋ କାତାଇନ୍‍କା, ଚିୟାଃଚି ଏନ୍ ଆରାମେ ହୁଲାଙ୍ଗ୍ ଖାସ୍ ମାରାଙ୍ଗ୍ ହୁଲାଙ୍ଗ୍ ତାଇକେନା। ଏନ୍ତେ ପାଲ୍‍ଟାନ୍ କୋ ହିଜୁଃକେତେ ସିଦା ନିଜାଃ କାଟା ଠୋଏଃ କେଦାକୋ ଏନ୍ତେ ଏଟାଃ ନିଜାଃ ହ, ଅକନ୍‍କୋ ଇନିଜାଃ ଲୋଃ କ୍ରୁଶ୍ ରେ ରାକାବ୍ ଲେନାକୋ। ମେନ୍ଦୋ ଚିମ୍ତା ୟୀଶୁ ରାଃ ନାଡ଼େଏ ହିଜୁଃକେତେ ନେଲ୍ କିଜାକୋ ଚି ଇନିଃ ଗୋଏଃ ଛାବା କାନାଏ, ଏଣ୍ଡେ ଇନିଜାଃ କାଟା କାକୋ ଠୋଏଃ କେଦା। ମେନ୍ଦୋ ପାଲ୍‍ଟାନ୍ କୋଏତେ ମିହୋଡ଼୍ ବାର୍ଛା ତେ ଇନିଜାଃ ପାଞ୍ଜ୍ରା କେ ହୋଟୋର୍ କିଜାଏ, ହାର୍ ଏନା ଏତେ ଇମ୍ତାଗି ମାୟୋମ୍ ଆଡୋଃ ଦାଆ ଅଡୋଙ୍ଗ୍ ଜାନା। ଅକଏ ନେୟା ନେଲ୍‍କେଦାଏ, ଇନିଃଗି ଗୋୱା ଏମ୍‍କେଦାଏ, ହାର୍ ଇନିଜାଃ ଗୋୱା ସାର୍ତି ତାନାଃ, ହାର୍ ଇନିଃ ସାରିୟାଏ ଚି ଇନିଃ ସାର୍ତି କାଜି ତାନାଏ ଏନାତେ ଆପେ ହ ୟୀଶୁ ରେ ବିଶ୍ଵାସ୍ ୟାପେ। ନେ କାଜିକୋ ନେୟାମେନ୍ତେ ହୋବାଜାନା ଚି ପାବିତାର୍ ପୁଥି ରେ ଅକନାଃ ଅଲାକାନ୍ ତାଇକେନା ଏନା ପୁରାଅଃକା, “ଇନିଜାଃ ଜାହାନ୍ ଜାଙ୍ଗ୍ କା ଠୋଏଜୋଗା।” ଆଡୋଃଗି ପାବିତାର୍ ପୁଥି ରାଃ ଏଟାଃ ଜାଗା ରେ ନେକା ଅଲାକାନା, “ଅକଏକେ ହିନ୍‍କୁ ହୋଟୋର୍ ଲିଜାକୋ, ଇନିଃକେ ହିନ୍‍କୁ ନେଲିୟାକୋ।” ନେ ବାକାଣ୍ କୋରାଃ ତାୟୋମ୍ତେ ଆରିମାତିୟା ହାତୁ ରେନ୍ ଯୋଶେଫ୍ ଅକନିଃ ୟୀଶୁ ରାଃ ଚେଲା ତାଇକେନାଏ, ମେନ୍ଦୋ ୟାହୁଦୀ ଗୁରୁ କୋୱା ବୋରୋ ତେ ନେ କାଜିକୋକେ ଉକୁ ମାଣ୍ଡାଅ ତାଇକେନାଏ, ପିଲାତୁସ୍ କେ ଆର୍ଜି କିଜାଏ ଚି, ଚିନାଃ ଇନିଃ ୟୀଶୁ ରାଃ ମାଣା କେ ଇଦି ଧାଡ଼ିୟାଏ। ପିଲାତୁସ୍ ଇନିଜାଃ ଆର୍ଜି କେ ଆୟୁମ୍ କେଦାଏ, ହାର୍ ଇନିଃ ହିଜୁଃକେତେ ଇନିଜାଃ ମାଣା କେ ଇଦିକେଦାଏ। ନିକୁଦିମୁସ୍ ହଗି, ଅକଏ ସିଦା ୟୀଶୁ ତାଃ ନିଦା ରେ ସେନ୍ ଲେନାଏ, ପାଚାଶ୍ ସେର୍ ଲାଗ୍‍ଭାଗ୍ ମେଶାକାନ୍ ଗାନ୍ଧରାସ୍ ହାର୍ ଏଲାବା ଆଉକେଦାଏ। ଏନ୍ତେ ଇନ୍‍କୁ ୟୀଶୁ ରାଃ ମାଣା କେ ଇଦିକେଦାକୋ, ହାର୍ ୟାହୁଦୀ କୋୱାଃ କାବାର୍ ଏମ୍ ନିୟାମ୍ ଲେକାତେ ଇନିଃକେ ସୋୱାନ୍ ଜିନିଷ୍ କୋତେ ମାଣା ଲିଜାଃ ରେ ପୋଟୋମ୍ କିଜାକୋ। ଅକ୍ତାଃ ୟୀଶୁ କେ କ୍ରୁଶ୍ ରେ ରାକାବ୍ ରିକାଲେନା ଏନ୍ ଜାଗା ରେ ମିୟାଃ ବାଖ୍‍ଡ଼ି ତାଇକେନା, ହାର୍ ଏନ୍ ବାଖ୍‍ଡ଼ି ରେ ମିୟାଃ ନାୱା କାବାର୍ ତାଇକେନା ଅକଣ୍ଡେ ଚିଉଲା ହ ଜେତାଏ କେ କାମାଣ୍ଡାଅ ଲେନା। ଏନାମେନ୍ତେ ୟାହୁଦୀ କୋୱା ସେକାଡ଼େନ୍ ହୁଲାଙ୍ଗ୍ ରାଃ ଚାଲ୍ତେ ଇନ୍‍କୁ ୟୀଶୁ କେ ଏଣ୍ଡେ ରେଗି ଦହ କିଜାକୋ, ଚିୟାଃଚି ଏନ୍ କାବାର୍ ନାଡ଼େଏ ରେ ତାଇକେନା। ଏତ୍ଵାର୍ ହୁଲାଙ୍ଗ୍ ଇଦାନ୍ ସେତାଃ ରେ ନୁବାଃ ତାଇକେନ୍ ଇମ୍ତା ରେ ମାରିୟାମ୍ ମାଗ୍‍ଦାଲା ସାହାର୍ ରେନ୍ ହାର୍ ଏଟାଃ କୁଡ଼ି କୋହ କାବାର୍ ତାଃ ହିଜୁଃନାକୋ, ହାର୍ କାବାର୍ ରାଃ ଦିରି କେ ଗେନାକାନ୍ ନେଲ୍‍କେଦାକୋ। ଏନ୍ତେ ଇନିଃ ନିର୍ କେଦାଏ ହାର୍ ଶିମୋନ୍ ପାତ୍ରାସ୍ ଆଡୋଃ ଏନ୍ ଏଟାଃ ଚେଲା ରାଃ ନାଡ଼େଏ ଅକନିଃକେ ୟୀଶୁ ଦୁଲାଡ଼୍ ତାଇକେନାଏ, ହିଜୁଃକେତେ କାଜିକେଦାଏ, “ଇନ୍‍କୁ ପ୍ରାଭୁ ରାଃ ମାଣା କେ କାବାର୍ ଏତେ ଅଡୋଙ୍ଗ୍ ଇଦିକେଦାକୋ, ହାର୍ ଆଲେ କାଲେ ସାରିତାନା ଚି, ଇନିଃକେ କୋତାଃ ରେ ମାଣ୍ଡାଅ କିଜାକୋ।” ଏନ୍ତେ ପାତ୍ରାସ୍ ଆଡୋଃ ଏଟାଃ ଚେଲା ଅଡୋଙ୍ଗ୍ କେତେ କାବାର୍ ପାଡ଼୍ ସେନ୍ ଜାନାକିନ୍। ଏନ୍ ବାରାନ୍ କିନ୍ ମିଶାତେ ନିର୍ ତାଇକେନାକିନ୍, ମେନ୍ଦୋ ଏଟାଃ ଚେଲା ପାତ୍ରାସ୍ ଏତେ ଆୟୁର୍ ନିର୍ କେତେ ସିଦାରେ କାବାର୍ ତାଃ ଥେବାଃ ଜାନାଏ, ହାର୍ ଉଙ୍ଗୁଃ କେତେ ମାଣା ଲିଜାଃ ଉୟୁଃକାନ୍ ନେଲ୍‍କେଦାଏ, ଏଣ୍ଡେ ରେହ ଇନିଃ ଭିତାର୍ କାଏ ବୋଲୋ ଜାନାଏ। ଏନ୍ତେ ଶିମୋନ୍ ପାତ୍ରାସ୍ ଇନିଜାଃ ଦୋୟା-ଦୋୟା ଥେବାଃ ଜାନାଏ, ହାର୍ କାବାର୍ ରାଃ ଭିତାର୍ ରେ ବୋଲୋ ଜାନାଏ ଆଡୋଃ ମାଣା ଲିଜାଃ ଉୟୁଃକାନ୍ ନେଲ୍‍କେଦାଏ; ହାର୍ ଏନ୍ ମିୟାଃ ମାଣା ପାଚି ଅକନାଃ ଇନିଜାଃ ବୋଅ ରେ ଥୋଲାକାନ୍ ତାଇକେନା, ଏନ୍ ଲିଜାଃ କୋଲୋଃ ମିଶାତେ ଉୟୁଃକାନ୍ କାହା, ମେନ୍ଦୋ ଏଟାଃ ମିୟାଃ ଜାଗା ରେ ଲାଟୁମାକାନ୍ ନେଲ୍‍କେଦାଏ। ଏନ୍ତେ ଏଟାଃ ଚେଲା ହଗି ଅକନିଃ କାବାର୍ ତାଃ ସିଦା ଥେବାଃ ଲେନାଏ, ଭିତାର୍ ତେ ବୋଲୋ ଜାନାଏ ଆଡୋଃ ନେଲ୍‍କେତେ ବିଶ୍ଵାସ୍ କେଦାଏ। ଇନ୍‍କୁ ଦୋ ନାଆ ସାନ୍ତେ ପାବିତାର୍ ପୁଥି ରାଃ ଏନ୍ କାଜିକେ କାକୋ ବୁଝାଅଲେନା ଚି ଇନିଃକେ ଗୋଜାକାନ୍ କୋଏତେ ଜୀହିଃ ହୋବାଅଃୱା। ଏନ୍ତେ ନେ ଚେଲାକିନ୍ ଆକିନାଃ ଅଡ଼୍ଆଃ ତେ ରୁଆଡ଼୍ ଜାନାକିନ୍। ମେନ୍ଦୋ ମାରିୟାମ୍ ରାଆ ତାନ୍ କାବାର୍ ରାଃ ନାଡ଼େଏ ରେଗି ତିଙ୍ଗୁକାନ୍ ତାଇଜାନାଏ, ହାର୍ ରାଆ-ରାଆ କାବାର୍ ପାଡ଼୍ ଉଙ୍ଗୁଃକେତେ, ବାରିୟା ସିର୍ମାଦାସୀ କେ ମାସ୍କାଲ୍ ଲିଜାଃ ତୁସିଙ୍ଗ୍‍କାନ୍ ମିହୋଡ଼୍ କେ ବୋଅ ପାଡ଼୍ ରେ ହାର୍ ଏଟାଃ ନିଈ କେ କାଟା ପାଡ଼୍ ରେ ଦୁବାକାନ୍ ନେଲ୍ କେଃକିନାଏ, ଅକ୍ତାଃରେ ୟୀଶୁ ରାଃ ମାଣା ଦୋହୋକାନ୍ ତାଇକେନା। ଇନ୍‍କୁ ଇନିଃକେ କାଜିକେଦାକୋ, “ହେ ମାଈ, ଆମ୍ ଚିନାଃ ମେନ୍ତେ ରାଆ ତାନାମ୍?” ଇନିଃ ଇନ୍‍କୁକେ କାଜିୟାଃକୋୱାଏ, “ଇନ୍‍କୁ ଇଙ୍ଗ୍ଆଃ ପ୍ରାଭୁ କେ ଉଠାଓ ଇଦିକେଦାକୋ ହାର୍ ଇଙ୍ଗ୍ କାଇଙ୍ଗ୍ ସାରିତାନା ଚି ଇନିଃକେ କୋତାଃ ରେ କୋ ମାଣ୍ଡାଅ କିଜାକୋ।” ନେୟା କାଜିକେତେ ଇନିଃ ଦୋୟା ବିୟୁର୍ ଜାନାଏ ହାର୍ ୟୀଶୁ କେ ତିଙ୍ଗୁକାନ୍ ନେଲ୍‍କିଜାଏ, ମେନ୍ଦୋ କାଏ ନେଲ୍ ଉରୁମ୍ କିଜାଏ ଚି ଇନିଃ ୟୀଶୁ ତାନିଃ। ୟୀଶୁ ଇନିଃକେ କାଜିକେଦାଏ, “ହେ ମାଈ, ଆମ୍ ଚିନାଃ ମେନ୍ତେ ରାଆ ତାନାମ୍? ଅକଏ କେ ସାଙ୍ଗାରି ତାନାମ୍?” ଇନିଃ ମାଲି ମେନ୍ତେ ପାହୋମ୍ କେତେ ଇନିଃକେ କାଜିକେଦାଏ, “ହେ ସାହେବ୍, ଆଗାର୍ ଆମ୍ ଇନିଃକେ ଇଦି କାଇଜାମ୍ ରେଦୋ ଇଙ୍ଗ୍‍କେ ଉଦୁବାଇଙ୍ଗ୍ ମେ ଚି କୋତାଃ ରେ ମାଣ୍ଡାଅ କିଜାମ୍ ଆଡୋଃ ଇଙ୍ଗ୍ ଇନିଃକେ ଇଦିୟାଇଙ୍ଗ୍।” ୟୀଶୁ ଇନିଃକେ କାଜିକିଜାଏ, “ମାରିୟାମ୍! ଇନିଃ ତାୟୋମ୍ ବିୟୁର୍ କେତେ ଇନିଃକେ ଇବ୍ରାନୀ ବାକାଣ୍ ରେ କାଜିକେଦାଏ, ‘ରବ୍ବୁନୀ!’ ମାନେ ‘ହେ ଗୁରୁ।’ ” ୟୀଶୁ ଇନିଃକେ କାଜିକିଜାଏ, “ଇଙ୍ଗ୍ଆଃ କାଟା ସାବ୍ କେତେ ଆଲୋମ୍ ରୋକାୱିଙ୍ଗ୍‍ୟା, ଚିୟାଃଚି ଇଙ୍ଗ୍ ନାଆ ସାନ୍ ଆବା ତାଃ ଚେତାନ୍ କାଇଙ୍ଗ୍ ସେନ୍ କାନା, ମେନ୍ଦୋ ଇଙ୍ଗ୍ଆଃ ହାଗା କୋତାଃ ସେନ୍ କେତେ କାଜିୟାକୋମେ, ଚି ଇଙ୍ଗ୍ ଇଙ୍ଗ୍ଆଃ ଆବା ହାର୍ ଆପେୟାଃ ଆବା ହାର୍ ଇଙ୍ଗ୍ଆଃ ପାର୍ମେଶ୍ଵାର୍ ହାର୍ ଆପେୟାଃ ପାର୍ମେଶ୍ଵାର୍ ତାଃ ଚେତାନ୍ ସେନ୍ ତାନିଙ୍ଗ୍।” ମାରିୟାମ୍ ମାଗ୍‍ଦାଲା ସାହାର୍ ରେନ୍, ଇନିଃ ସେନ୍‍କେତେ ଚେଲାକୋକେ ଉଦୁବ୍ କେଃକୋୱାଏ, “ଇଙ୍ଗ୍ ପ୍ରାଭୁ କେ ନେଲ୍ କିଜାଇଙ୍ଗ୍ ହାର୍ ଇନିଃ ଇଙ୍ଗ୍‍କେ ନେ କାଜି କାଜିକେଦାଏ।” ଏନ୍ ଏତ୍ଵାର୍ ହୁଲାଙ୍ଗ୍ ଗି ଶିଙ୍ଗି ଡୁବିଃ ସାମାୟ୍ ରେ ଚିମ୍ତା ଏନ୍ ଅଡ଼୍ଆଃ ରାଃ ଦୁହାର୍ ଅକଣ୍ଡେ ଚେଲାକୋ ତାଇକେନାକୋ, ୟାହୁଦୀ ଗୁରୁ କୋୱା ବୋରୋତେ ହାଣ୍ଡେଃ ତାଇକେନା, ଇମ୍ତାଙ୍ଗ୍ ୟୀଶୁ ହିଜୁଃ ଜାନାଏ ହାର୍ ଇନ୍‍କୁୱାଃ ଥାଲା ରେ ତିଙ୍ଗୁ କେତେ ଇନ୍‍କୁକେ କାଜିକେଦାଏ, “ଆପେକେ ଜୀଉସୁକୁ ନାମୋଃକା।” ହାର୍ ନେୟା କାଜିକେତେ ଇନିଃ ଆୟାଃ ଘାଅ ତିଈ ରାଃ ଆଡୋଃ ଆୟାଃ ପାଞ୍ଜ୍ରା ରାଃ ଇନ୍‍କୁକେ ଦେଖାଅ କେଃକୋୱାଏ। ଏନ୍ତେ ଚେଲାକୋ ପ୍ରାଭୁ କେ ନେଲ୍‍କେତେ ରାଶିକାଜାନାକୋ। ୟୀଶୁ ଆଡୋଃଗି ଇନ୍‍କୁକେ କାଜିକେଃକୋୱାଏ, “ଆପେକେ ଜୀଉସୁକୁ ନାମୋଃକା; ଚିଲ୍‍କା ଆପୁ ଇଙ୍ଗ୍‍କେ କୁଲ୍ କାଦିଙ୍ଗାଏ, ଏନ୍‍ଲେକାଗି ଇଙ୍ଗ୍ ହ ଆପେକେ କୁଲ୍ ପେ ତାନିଙ୍ଗ୍।” ନେୟା କାଜିକେତେ ଇନିଃ ଇନ୍‍କୁୱାଃ ଚେତାନ୍ ରେ ଅଙ୍ଗ୍ କେଦାଏ ଆଡୋଃ ଇନ୍‍କୁକେ କାଜିକେଦାଏ, “ପାବିତାର୍ ଆତ୍ମା ଇଦିପେ। ଅକନ୍ କୋୱାଃ ପାପ୍ ଆପେ ଛାମା ୟାପେ, ଏନାକୋ ଇନ୍‍କୁ ଲାଗିନ୍ ଛାମା ରିକାକାନା, ହାର୍ ଅକନ୍ କୋୱାଃ ପାପ୍ ଆପେ କାପେ ଛାମା ତାନା, ଏନା କା ଛାମା ଅଗା।” ମେନ୍ଦୋ ବାରାଝାନ୍ ଚେଲା କୋଏତେ ମିହୋଡ଼୍ ମାନେ ଥୋମା ଅକନିଃ ଦୀଦ୍‍ମୁସ୍ ନୁତୁମୋଃୱାଏ, ଚିମ୍ତା ୟୀଶୁ ହିଜୁଃ ଲେନାଏ ଇମ୍ତାଙ୍ଗ୍ ଇନ୍‍କୁ ଲୋଃ କାଏ ତାଇକେନାଏ। ଚିମ୍ତା ଏଟାଃ ଚେଲାକୋ ଇନିଃକେ କାଜିକିଜାକୋ, “ଆଲେ ପ୍ରାଭୁ କେ ନେଲ୍ କିଜାଲେ,” ଇମ୍ତା ଇନିଃ ଇନ୍‍କୁକେ କାଜିକେଦାଏ, “ଇଙ୍ଗ୍ ଇନିଜାଃ ତିଈ ରେ କାଣ୍ଟି ବିଡ଼ାକାନ୍ ରାଃ ଚିହ୍ନା କାଇଙ୍ଗ୍ ନେଲ୍ ରେଦୋ ହାର୍ କାଣ୍ଟି ବିଡ଼ାକାନ୍ ରାଃ ଚିହ୍ନା ରେ ଇଙ୍ଗ୍ଆଃ ସାର୍ସାର୍ ତେ କାଇଙ୍ଗ୍ ଜୁଟିଃ ଲେରେ ହାର୍ ଇନିଜାଃ ପାଞ୍ଜ୍ରା ରେ ଇଙ୍ଗ୍ଆଃ ତିଈ ତେ କାଇଙ୍ଗ୍ ଜୁଟିଃ ଲେରେ ଦୋ ଇମ୍ତାଙ୍ଗ୍ ଜାକେଦ୍ କାଇଙ୍ଗ୍ ବିଶ୍ଵାସେୟା।” ଆଠ୍ ଦିନ୍ ତାୟୋମ୍ତେ ଇନିଜାଃ ଚେଲାକୋ ଆଡୋଃଗି ଅଡ଼୍ଆଃ ଭିତାର୍ ରେ ତାଇକେନାକୋ, ହାର୍ ଥୋମା ଇନ୍‍କୁଲୋଃ ତାଇକେନାଏ, ହାର୍ ଦୁହାର୍ ହାଣ୍ଡେଃ ତାଇକେନା, ଇମ୍ତା ୟୀଶୁ ହିଜୁଃ ଜାନାଏ ହାର୍ ଇନ୍‍କୁୱାଃ ଥାଲା ରେ ତିଙ୍ଗୁ କେତେ କାଜିକେଦାଏ, “ଆପେକେ ଜୀଉସୁକୁ ନାମୋଃକା।” ଇମ୍ତାଙ୍ଗ୍ ଇନିଃ ଥୋମା କେ କାଜିକିଜାଏ, “ଆମାଃ ସାର୍ସାର୍ ଆୟୁର୍ କେତେ ଇଙ୍ଗ୍ଆଃ ତିଈ କେ ଜୁଟିଃ କେତେ ନେଲେମ୍ ହାର୍ ଆମାଃ ତିଈ ଆୟୁର୍ କେତେ ଇଙ୍ଗ୍ଆଃ ପାଞ୍ଜ୍ରା ରେ ଜୁଟୀଦେମ୍ ହାର୍ ଆବିଶ୍ଵାସୀ କାହା ମେନ୍ଦୋ ବିଶ୍ଵାସୀ ବାଇୟେନ୍ ମେ।” ନେୟା ଆୟୁମ୍‍କେତେ ଥୋମା କାଜିରୁଆଡ଼୍ କିଜାଏ, “ହେ ଇଙ୍ଗ୍ଆଃ ପ୍ରାଭୁ, ହେ ଇଙ୍ଗ୍ଆଃ ପାର୍ମେଶ୍ଵାର୍!” ୟୀଶୁ ଇନିଃକେ କାଜିକିଜାଏ, “ଆମ୍ ଇଙ୍ଗ୍‍କେ ନେଲ୍‍କେଦାମ୍, ଚିନାଃ ଏନାଲାଗିନ୍ ବିଶ୍ଵାସ୍ କେଦାମ୍? ଧାନ୍ୟା ଇନ୍‍କୁ ତାନ୍‍କୋ ଅକନ୍ କୋ କାକୋ ନେଲ୍‍କେତେ ବିଶ୍ଵାସ୍ କେଦାକୋ।” ୟୀଶୁ ଆଡୋଃଗି ମିଃଥିମ୍ବା ଚିହ୍ନା ଚେଲାକୋୱାଃ ନାଡ଼େଏ ରେ ଦେଖାଅ କେଦାଏ, ଅକନାଃ ନେ କିତାବ୍ ରେ କା ଅଲାକାନା। ମେନ୍ଦୋ ନେୟା ନେମେନ୍ତେ ଅଲାକାନା ଚି, ଆପେ ବିଶ୍ଵାସ୍ ଏପେ ଚି ୟୀଶୁ ଗି ପାର୍ମେଶ୍ଵାର୍ ରାଃ ହୋନ୍ ମାସୀହ୍ ତାନିଃ, ହାର୍ ଇନିଃକେ ବିଶ୍ଵାସ୍ କେତେ ଇନିଜାଃ ନୁତୁମ୍ ତେ ଜାନାଓ ଜୀଦାନ୍ ନାମେପେ। ନେ କାଜି କୋରାଃ ତାୟୋମ୍ତେ ୟୀଶୁ ଆଏଃ ଆପାନ୍ କେ ତିବିରିୟାସ୍ ରାଃ ସାମୁଦାର୍ ଗେନା ରେ ଚେଲାକୋକେ ଦେଖାଅ ଜାନାଏ ଅକନାଃ ଗାଲିଲୀ ସାମୁଦାର୍ ରାଃ ଏଟାଃ ନୁତୁମ୍ ତାନାଃ। ହାର୍ ନେଲେକାତେ ହୋବାଲେନା, ଶିମୋନ୍ ପାତ୍ରାସ୍ ହାର୍ ଥୋମା ଅକନିଃ ଦୀଦ୍‍ମୁସ୍ ନୁତୁମୋଃୱାଏ, ହାର୍ ଗାଲିଲୀ ଜିଲ୍ଲା ରାଃ କାନା ହାତୁ ରେନ୍ ନାଥ୍‍ନିଏଲ୍ ହାର୍ ଯାବ୍ଦୀ ରାଃ ହୋନ୍‍କଡ଼ା, ହାର୍ ଆୟାଃ ଚେଲାକୋ ଏତେ ଆଡୋଃ ବାର୍ହୋଡ଼୍ କିନ୍ ହୁଣ୍ଡି ଲେନାକୋ। ଶିମୋନ୍ ପାତ୍ରାସ୍ ଇନ୍‍କୁକେ କାଜିକେଦାଏ, “ଇଙ୍ଗ୍ ହାକୁ ସାସାବ୍ ସେନ୍ ତାନିଙ୍ଗ୍।” ଇନ୍‍କୁ ଇନିଃକେ କାଜିକେଦାକୋ, “ଆଲେ ହ ଆମାଃ ଲୋଃ ସେନାଲେ।” ଏନ୍ତେ ଇନ୍‍କୁ ଅଡୋଙ୍ଗ୍ କେତେ ଡୋଙ୍ଗା ରେ ରାକାବ୍ ଜାନାକୋ, ମେନ୍ଦୋ ଏନ୍ ନୁବାଃ ଚିନାଃ ହ କାକୋ ସାବ୍ କେଦା। ଏଟାଃ ହୁଲାଙ୍ଗ୍ ସେତାଃ ହୋବାଅଃ ଲୋଃ ୟୀଶୁ ଗେନା ରେ ତିଙ୍ଗୁ ଜାନାଏ, ଏଣ୍ଡେ ହଗି ଚେଲାକୋ କାକୋ ଉରୁମ୍ କିଜା ଚି ନିଈ ୟୀଶୁ ତାନିଃ। ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ହେ ଦୁଲାଡ଼୍ କୋ, ଚିନାଃ ଆପେତାଃ କାଟୀଜୋଃ ହାକୁ ମେନାକୋୱା?” ଇନ୍‍କୁ କାଜିରୁଆଡ଼୍ କେଦାକୋ “କାହା।” ଇନିଃ ଇନ୍‍କୁକେ କାଜିକେଦାଏ, “ଡୋଙ୍ଗା ରାଃ ଯୋମ୍ପାଡ଼୍ ଜାଲୋମ୍ ଉୟୁଗେପେ ଏଣ୍ଡେ ନାମେୟାପେ,” ଏନ୍ତେ ଇନ୍‍କୁ ଜାଲୋମ୍ ଉୟୁଃକେଦାକୋ, ହାର୍ ନାଆ ମିଃଥିମ୍ବା ହାକୁକୋୱା ଚାଲ୍ତେ ଏନା ଥାଇଃ କାକୋ ଧାଡ଼ିଜାନା। ଏନାମେନ୍ତେ ଏନ୍ ଚେଲା ଅକଏକେ ୟୀଶୁ ଦୁଲାଡ଼୍ ତାଇକେନାଏ, ପାତ୍ରାସ୍ କେ କାଜିକେଦାଏ, “ନିଈ ଦୋ ପ୍ରାଭୁ ତାନିଃ!” ଶିମୋନ୍ ପାତ୍ରାସ୍ ନେୟା ଆୟୁମ୍ କେତେ ଚି ଇନିଃ ପ୍ରାଭୁ ତାନିଃ, ଚେତାନ୍ ରାଃ ଲିଜାଃ ତୁସିଙ୍ଗ୍ ଜାନାଏ, ଚିୟାଃଚି ଇନିଃ ଲିଜାଃ ଖୋଲାଅ ଲେଦାଏ, ହାର୍ ସାମୁଦାର୍ ରାଃ ଗେନା ସେନ୍ ନାଙ୍ଗ୍ ଦୋନ୍ କେଦାଏ। ମେନ୍ଦୋ ଏଟାଃ ଚେଲାକୋ ହୁଡିଙ୍ଗ୍ ଡୋଙ୍ଗା ତେ ହାକୁକୋ ଫେରେଃକାନ୍ ଜାଲୋମ୍ ଥାଇଃତାନ୍ ଲୋଃ ହିଜୁଃ ନାକୋ, ଚିୟାଃଚି ଇନ୍‍କୁ ସାମୁଦାର୍ ଗେନା ଏତେ ଥିମ୍ବା ସାଙ୍ଗିନ୍ ରେ କାକୋ ତାଇକେନା, ମେନ୍ଦୋ ଦୁଇ ଶୋ ତିଈ ସାଙ୍ଗିନ୍ ଲେକା ରେ ତାଇକେନାକୋ। ଚିମ୍ତା ଇନ୍‍କୁ ସାମୁଦାର୍ ଗେନା ତେ ଥେବାଃ ଜାନାକୋ, ଏଣ୍ଡେ ଇନ୍‍କୁ କୋଇଲା ରାଃ ସେଙ୍ଗେଲ୍, ହାର୍ ଏନ୍ ଚେତାନ୍ ରେ ହାକୁ ଦୋହୋକାନ୍, ହାର୍ ହୋଲୋଙ୍ଗ୍ ନେଲ୍ କେଦାକୋ। ୟୀଶୁ ଇନ୍‍କୁକେ କାଜିକେଃକୋୱାଏ, “ଅକନ୍ ହାକୁକୋକେ ଆପେ ନାଆ ସାବ୍ କେଃକୋୱାପେ, ଏନାତେ ହୁଡିଙ୍ଗ୍ ଆଉକୋପେ।” ଶିମୋନ୍ ପାତ୍ରାସ୍ ଡୋଙ୍ଗା ରେ ରାକାବ୍ କେତେ ଏକ୍ ଶୋ ତିର୍ପାନ୍ ମାପ୍‍ରାଙ୍ଗ୍ ହାକୁକୋ ଫେରେଃ କାନ୍ ଜାଲୋମ୍ କେ ଗେନା ଅତେ ପାଡ଼୍ ଥାଇଃ କେଦାଏ, ହାର୍ ନିମିନାଙ୍ଗ୍ ହାକୁ ତାଇନ୍ ରେହ ଜାଲୋମ୍ କା ଚେଚାଃଜାନା। ୟୀଶୁ ଇନ୍‍କୁକେ କାଜିକେଦାଏ, “ଦେଲା, ଜୋମେପେ।” ଚେଲାକୋଏତେ ଜେତାଏ କେହ ସାହାସ୍ କା ହୋବାଜାନା, ଚି ଇନିଃକେ କୁଲିୟାକୋ, “ଆମ୍ ଅକଏ ତାନ୍‍ମେ?” ଚିୟାଃଚି ଇନ୍‍କୁ ସାରିତାଇନାକୋ ଚି ନିଈ ପ୍ରାଭୁ ଗି ତାନିଃ। ୟୀଶୁ ହିଜୁଃ ଜାନାଏ ହାର୍ ହୋଲୋଙ୍ଗ୍ ଇଦିକେତେ ଇନ୍‍କୁକେ ଏମାଃ କୋୱାଏ, ହାର୍ ଏନ୍‍ଲେକାଗି ହାକୁ କୋକେ ହ। ନେୟା ଆପିସା ହୋବାଜାନା, ଚି ୟୀଶୁ ଗୋଜାକାନ୍ କୋଏତେ ଜୀହିଃ ବିରିଃ ତାୟୋମ୍ତେ ଚେଲାକୋକେ ଦେଖାଅ ଜାନାଏ। ସେତାଃ ଜୋମ୍ ତାୟୋମ୍ତେ ୟୀଶୁ ଶିମୋନ୍ ପାତ୍ରାସ୍ କେ କାଜିକିଜାଏ, “ହେ ଶିମୋନ୍ ଯୋହାନ୍ ରାଃ ହୋନ୍‍କଡ଼ା, ଚିନାଃ ଆମ୍ ଇଙ୍ଗ୍‍କେ ନେ ଏଟାଃ ଚେଲାକୋଏତେ ଥିମ୍ବା ଦୁଲାଡ଼ିଙ୍ଗ୍ ୟାମ୍?” ପାତ୍ରାସ୍ ଇନିଃକେ କାଜିକିଜାଏ, “ହାଁ ପ୍ରାଭୁ ଆମ୍ ଦୋ ସାରିତାନାମ୍ ଚି ଇଙ୍ଗ୍ ଆମ୍‍କେ ଦୁଲାଡ଼୍ ୟାଇଙ୍ଗ୍।” ୟୀଶୁ ଇନିଃକେ କାଜିକେଦାଏ, “ଇଙ୍ଗ୍ଆଃ ମିଣ୍ଡୀହୋନ୍ କୋକେ ଗୁପିକୋମେ।” ଇନିଃ ଆଡୋଃ ମିଶା ପାତ୍ରାସ୍ କେ କାଜିକିଜାଏ, “ହେ ଶିମୋନ୍ ଯୋହାନ୍ ରାଃ ହୋନ୍‍କଡ଼ା, ଚିନାଃ ଆମ୍ ଇଙ୍ଗ୍‍କେ ଦୁଲାଡ଼ିଙ୍ଗ୍ ୟାମ୍?” ପାତ୍ରାସ୍ ଇନିଃକେ କାଜିକିଜାଏ, “ହାଁ ପ୍ରାଭୁ, ଆମ୍ ସାରିତାନାମ୍ ଚି ଇଙ୍ଗ୍ ଆମ୍‍କେ ଦୁଲାଡ଼୍ ୟାଇଙ୍ଗ୍।” ୟୀଶୁ ଇନିଃକେ କାଜିକିଜାଏ, “ଇଙ୍ଗ୍ଆଃ ମିଣ୍ଡୀ କୋକେ ହୋରୋ କୋମ୍।” ଇନିଃ ଆପିସା ପାତ୍ରାସ୍ କେ କାଜିକିଜାଏ, “ହେ ଶିମୋନ୍ ଯୋହାନ୍ ରାଃ ହୋନ୍‍କଡ଼ା, ଚିନାଃ ଆମ୍ ଇଙ୍ଗ୍‍କେ ଦୁଲାଡ଼ିଙ୍ଗ୍ ୟାମ୍?” ପାତ୍ରାସ୍ ଉଦାସ୍ ଜାନାଏ ଚି ୟୀଶୁ ଇନିଃକେ ଆପିସା ନେକା କାଜିକେଦାଏ, “ଚିନାଃ ଆମ୍ ଇଙ୍ଗ୍‍କେ ଦୁଲାଡ଼ିଙ୍ଗ୍ ୟାମ୍?” ହାର୍ ଇନିଃକେ କାଜିକିଜାଏ, “ହେ ପ୍ରାଭୁ, ଆମ୍ ଦୋ ସବେନାଃ ସାରିତାନାମ୍, ଆମ୍ ନେୟା ସାରିୟାମ୍ ଚି ଇଙ୍ଗ୍ ଆମ୍‍କେ ଦୁଲାଡ଼୍ ୟାଇଙ୍ଗ୍।” ୟୀଶୁ ଇନିଃକେ କାଜିକିଜାଏ, “ଇଙ୍ଗ୍ଆଃ ମିଣ୍ଡୀ କୋକେ ଗୁପିକୋମେ।” ଇଙ୍ଗ୍ ଆମ୍‍କେ ସାର୍ତି-ସାର୍ତି କାଜିତାନିଙ୍ଗ୍, ଚିମ୍ତାଙ୍ଗ୍ ଆମ୍ ଜାୱାନ୍ ତାଇକେନାମ୍ ଏଣ୍ଡେ ଆମ୍ ଆମାଃ ମାୟାଙ୍ଗ୍ ସାକ୍ତାଅ କେତେ କୋତାଃ ସାନାଙ୍ଗ୍ ତାଇକେନାମ୍ ହେନ୍ତାଃ ହୋନୋର୍ ତାଇକେନାମ୍; ମେନ୍ଦୋ ଚିମ୍ତା ଆମ୍ ହାଡ଼ାମୋଗାମ୍ ଏଣ୍ଡେ ଆମାଃ ତିଈ ଜିଲିଙ୍ଗ୍ ୟାମ୍, ହାର୍ ଏଟାଃ ନିଈ ଆମାଃ ମାୟାଙ୍ଗ୍ ସାକ୍ତାଅ ମେୟାଏ ହାର୍ ଅକତାଃ କାମ୍ ସାନାଙ୍ଗ୍ଆ ହେନ୍ତାଃ ଇଦିମେୟାଏ। ୟୀଶୁ ନେ ବାକାଣ୍ କାଜିକେତେ ପାତ୍ରାସ୍ ରାଃ ବିଷାୟ୍ ରେ କାଜିକେଦାଏ ଚି ଇନିଃ ଚିଲ୍‍କାନ୍ ଗୋନୋଏଃ ତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାୟାଏ। ଏନ୍ତେ ନେୟା କାଜି ତାୟୋମ୍ତେ ଇନିଃ ପାତ୍ରାସ୍ କେ କାଜିକିଜାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ।” ପାତ୍ରାସ୍ ବିୟୁର୍ କେତେ ଏନ୍ ଚେଲା କେ ହିଜୁଃ ତାନ୍ ନେଲ୍ କିଜାଏ, ଅକନିଃକେ ୟୀଶୁ ଦୁଲାଡ଼୍ ତାଇକେନାଏ, ହାର୍ ଅକନିଃ ଜୋମେ ସାମାୟ୍ ଇମ୍ତାଙ୍ଗ୍ ଇନିଜାଃ କୁଡ଼ାମ୍ ପାଡ଼୍ ଟେଣ୍ଡେର୍ କେତେ କୁଲିଲେଦାଏ, “ହେ ପ୍ରାଭୁ, ଆମ୍‍କେ ସାବ୍ ରିକାନିଃ ଅକଏ ତାନିଃ?” ଇନିଃକେ ନେଲ୍‍କେତେ ପାତ୍ରାସ୍ ୟୀଶୁ କେ କାଜିକେଦାଏ, “ହେ ପ୍ରାଭୁ, ନିଜାଃ ଚିକାନାଃ ହୋବାୱା?” ୟୀଶୁ ଇନିଃକେ କାଜିକିଜାଏ, “ଆଗାର୍ ଇଙ୍ଗ୍ ସାନାଙ୍ଗାଇଙ୍ଗ୍ ଚି ଇନିଃ ଇଙ୍ଗ୍ଆଃ ହିଜୁଃ ସାନ୍ ତାଇନୋଃକାଏ, ଏଣ୍ଡେ ଆମ୍‍କେ ନେୟାତେ ଚିନାଃ? ଆମ୍ ଇଙ୍ଗ୍‍କେ ଅତୋଙ୍ଗିଙ୍ଗ୍ ମେ।” ଏନାମେନ୍ତେ ହାଗା କୋରେ ନେ ବାକାଣ୍ ଫାଏଲାଓ ଜାନା ଚି ହେନ୍ ଚେଲା କାଏ ଗୋଜୋଗାଏ; ଏଣ୍ଡେ ହ ୟୀଶୁ ଇନିଃକେ ନେୟା କାଏ କାଜି ଚି ଇନିଃ କାଏ ଗୋଜୋଗା, ମେନ୍ଦୋ ନେୟା ଚି “ଆଗାର୍ ଇଙ୍ଗ୍ ସାନାଙ୍ଗାଇଙ୍ଗ୍ ଚି ଇନିଃ ଇଙ୍ଗ୍ଆଃ ହିଜୁଃ ସାନ୍ ତାଇନୋଃକାଏ, ଏଣ୍ଡେ ଆମ୍‍କେ ନେୟାତେ ଚିନାଃ?” ନିଈ ହେନ୍ ଚେଲା ଗି ତାନିଃ ଅକନିଃ ନେ କାଜି କୋରାଃ ଗୋୱା ଏମ୍ ତାନାଏ ହାର୍ ଅକଏ ନେ କାଜି କୋକେ ଅଲ୍ କାଦାଏ, ହାର୍ ଆଲେ ସାରିୟାଲେ, ଇନିଜାଃ ଗୋୱା ସାର୍ତି ତାନାଃ ଏନାତେ ଆପେ ହ ୟୀଶୁ ରେ ବିଶ୍ଵାସ୍ ୟାପେ। ଆଡୋଃଗି ଥିମ୍ବା କାମିକୋ ମେନାଃ, ଅକନାଃ ୟୀଶୁ ରିକା କେଦାଏ; ଆଗାର୍ ଏନାକୋ ମିୟାଃ-ମିୟାଃ ଅଲୋଃତେ, ଏଣ୍ଡେ ଇଙ୍ଗ୍ ବୁଝାଅଃ ତାନିଙ୍ଗ୍ ଚି କିତାବ୍ କୋ ଅକନାଃ ଅଲୋଃତେ ଏନା ଅତେଦିଶୁମ୍ ରେହ କା ସୋହୋବ୍ ଜାନ୍ତେ। ହେ ଥିୟୁଫିଲୁସ୍, ଇଙ୍ଗ୍ ପାହିଲା କିତାବ୍ ରେ ହେନ୍ ସବେନ୍ କାଜି କୋରାଃ ବିଷାୟ୍ ରେ ଅଲ୍ କେଦାଇଙ୍ଗ୍ ଅକନାଃ ୟୀଶୁ ସୁରୁ ଏତେ କାମି ଲେଦାଏ ଆଡୋଃ ଶିଖାଅ ତାଇନାଏ, ଇନିଃ ଏନ୍ ହୁଲାଙ୍ଗ୍ ସାନ୍ତେ ଚିମିନ୍ ସାନ୍ ଚେତାନ୍ କାଏ ରାକାବ୍ ଜାନାଏ, ପାବିତାର୍ ଆତ୍ମା ରାଃ ହୋରାତେ ଏନ୍ କୁଲାକାନ୍ ଚେଲା କୋକେ ଅକନ୍ କୋକେ ଆଏଃ ସାଲା ଲେଃକୋୱାଏ ଆନାଚୁ ଏମ୍ କେଦାଏ। ଏନ୍ତେ ଇନିଃ ଦୁକୁ ସାହାଅ କେତେ ଗୋଜୋଃ ତାୟୋମ୍ତେ ଥିମ୍ବାଗି ପୋକ୍ତା କାଜି କୋଲୋଃ ଆଏଃ ଆପାନ୍ କେ ଇନ୍‍କୁକେ ଜୀହିଃ ଦେଖାଅ କେଃକୋୱାଏ, ହାର୍ ଚାଲିଶ୍ ଦିନ୍ ସାନ୍ତେ ଇନିଃ ଇନ୍‍କୁକେ ନେଲ୍ ଜାନାଏ, ହାର୍ ପାର୍ମେଶ୍ଵାର୍ ରାଃ ରାଇଜ୍ ରାଃ ବାକାଣ୍ ଉଦୁବ୍ କୋତାଇନାଏ। ଆଡୋଃ ଇନ୍‍କୁ ଲୋଃ ମିଶା ଜୋମ୍ ଇମ୍ତା ନାପାମ୍ କେତେ ଇନ୍‍କୁକେ ନେ ଆନାଚୁ ଏମାଃକୋୱାଏ, “ୟୀରୁଶାଲେମ୍ ସାହାର୍ କେ ଆଲୋପେ ବାଗେୟା, ମେନ୍ଦୋ ଆବା ଗାଃ ଏନ୍ କାଜି କେ ପୁରା ହୋବାଅଃ ତେୟାଃକେ ନେଲ୍ ହୋରା କାତେପେ, ଅକନାଃ ବିଷାୟ୍ ରେ ଇଙ୍ଗ୍ଆଃ ତେ ଆପେ ଆୟୁମ୍ ଛାବା କାଦାପେ। ଚିୟାଃଚି ଯୋହାନ୍ ଦୋ ଦାଆ ରେ ବାପ୍ତିସ୍ମା ଏମ୍‍କେଦାଏ ମେନ୍ଦୋ ହୁଡିଙ୍ଗ୍ ଦିନ୍ ରାଃ ତାୟୋମ୍ତେ ଆପେ ପାବିତାର୍ ଆତ୍ମା ତେ ବାପ୍ତିସ୍ମା ନାମେୟାପେ।” ଏନାଲାଗିନ୍ ଇନ୍‍କୁ ହୁଣ୍ଡି କେତେ ୟୀଶୁ କେ କୁଲିକିଜାକୋ, “ହେ ପ୍ରାଭୁ, ଚିନାଃ ଆମ୍ ନେ ସାମାୟ୍ ରେଗି ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋକେ ରାଇଜ୍ ଏମ୍ ରୁଆଡ଼୍ କୋୱାମ୍?” ଇନିଃ ଇନ୍‍କୁକେ କାଜିକେଃକୋୱାଏ, “ଏନ୍ ସାମାୟ୍ କେ ୟାଦୋ ଏନ୍ ହୁଲାଙ୍ଗ୍ କେ ସାରିନ୍ ଅକନାଃକେ ଆବା ଆଜାଃ ଗି ଆଧିକାର୍ ରେ ମାଣ୍ଡାଅ କାଦାଏ, ଆପେୟାଃ କାମି ନାହାଲା। ମେନ୍ଦୋ ଚିମ୍ତା ପାବିତାର୍ ଆତ୍ମା ଆପେୟାଃ ଚେତାନ୍ ରେ ହିଜୁଗା ଇମ୍ତା ଆପେ ପେଡ଼େଏ ନାମେୟାପେ; ଆଡୋଃ ୟୀରୁଶାଲେମ୍ ସାହାର୍ ହାର୍ ସବେନ୍ ୟାହୁଦୀୟା ଜିଲ୍ଲା ହାର୍ ସାମାରୀୟା ଜିଲ୍ଲା ରେ, ହାର୍ ଅତେ ରାଃ ଗେନା ସାନ୍ ଇଙ୍ଗ୍ଆଃ ବିଷାୟ୍ ରେ ହୋଡ଼ୋକୋକେ ଉଦୁବ୍ କୋୱାପେ।” ନେୟା କାଜି ତାୟୋମ୍ତେ ୟୀଶୁ ଇନ୍‍କୁୱାଃ ନେଲ୍-ନେଲ୍ ଲୋଃଗି ଚେତାନ୍ ଇଦି ଜାନାଏ, ହାର୍ ମିୟାଃ ରିମିଲ୍ ଇନିଃକେ ଇନ୍‍କୁୱାଃ ମେଏଃ ତେ ଉକୁ ତାଜାଏ। ଇନିଜାଃ ସେନୋଃ ସାମାୟ୍ ରେ ଚିମ୍ତା ଇନ୍‍କୁ ରିମିଲ୍‍ଦିଶୁମ୍ ପାଡ଼୍ ନେଲ୍ ତାଇନାକୋ, ଏଣ୍ଡେ ନେଲେପେ, ବାରିୟା ହୋଡ଼ ପୁଣ୍ଡୀ ଲିଜାଃ ତୁସିଙ୍ଗ୍‍କାନ୍ ଇନ୍‍କୁୱାଃ ନାଡ଼େଏ ରେ ହିଜୁଃ ତିଙ୍ଗୁ ଜାନାକୋ। ଆଡୋଃ ଇନ୍‍କୁକେ କାଜିକେଦାକୋ, “ହେ ଗାଲିଲୀ ଜିଲ୍ଲା ରେନ୍ ହୋଡ଼ୋକୋ, ଆପେ ଚିନାଃ ମେନ୍ତେ ତିଙ୍ଗୁ କେତେ ରିମିଲ୍‍ଦିଶୁମ୍ ପାଡ଼୍ ନେଲ୍ ତାନାପେ? ନେ ୟୀଶୁ ଗି ଅକନିଃ ଆପେ ନାଡ଼େଏ ତେ ସିର୍ମାଦିଶୁମ୍ ରେ ଇଦି ଜାନାଏ, ଜେଲେକା ତେ ଆପେ ଇନିଃକେ ସିର୍ମାଦିଶୁମ୍ ସେନ୍‍ତାନ୍ ନେଲ୍ କିଜାପେ ଏନ୍‍ଲେକାଗି ଇନିଃ ଆଡୋଃଗି ହିଜୁଗାଏ।” ଏନା ତାୟୋମ୍ତେ କୁଲାକାନ୍ ଚେଲାକୋ ଜୈତୁନ୍ ନୁତୁମ୍ ବୁରୁ ଏତେ ଅକନାଃ ୟୀରୁଶାଲେମ୍ ନାଡ଼େଏ ମିୟାଃ ଆରାମେ ହୁଲାଙ୍ଗ୍ ରାଃ ସାଙ୍ଗିନ୍ ରେ ମେନାଃ, ଏନ୍ ସାହାର୍ ତେ ରୁଆଡ଼୍ ଜାନାକୋ। ଚିମ୍ତା ଇନ୍‍କୁ ହେନ୍ତାଃ ସେଟେର୍ ଜାନାକୋ ଏଣ୍ଡେ ହେନ୍ ଚେତାନ୍ କୋଠୋରୀ ରେ ସେନ୍ ଜାନାକୋ, ଅକତାଃ ପାତ୍ରାସ୍ ଆଡୋଃ ଯୋହାନ୍ ଆଡୋଃ ୟାକୁବ୍ ଆଡୋଃ ଆନ୍ଦ୍ରିୟାସ୍ ଆଡୋଃ ଫିଲିପୁସ୍ ଆଡୋଃ ଥୋମା ଆଡୋଃ ବାର୍ତୁଲ୍‍ମୈ ଆଡୋଃ ମାତ୍ତି ଆଡୋଃ ହାଲ୍‍ଫାଇ ରାଃ ହୋନ୍ ୟାକୁବ୍ ଆଡୋଃ ଶିମୋନ୍ ଯେଲୋତେସ୍ ଆଡୋଃ ୟାକୁବ୍ ରାଃ ହୋନ୍‍କଡ଼ା ୟାହୁଦା ତାଇନ୍ ତାଇନାକୋ। ନିକୁ ସବେନ୍ କୋ ଚିମିନାଙ୍ଗ୍ କୁଡ଼ିକୋ ଲୋଃ ଆଡୋଃ ୟୀଶୁ ରାଃ ଏଙ୍ଗା ମାରିୟାମ୍ ଆଡୋଃ ଇନିଜାଃ ହାଗାକୋ ଲୋଃ ମିୟାଃ ମୋନ୍ ହୋବାକେତେ ବିନ୍ତି ରେ ତାଇ ଜାନାକୋ। ଏନ୍ ହୁଲାଙ୍ଗ୍ କୋରେ ପାତ୍ରାସ୍ ହାଗା କୋୱାଃ ଥାଲା ରେ ଅକନ୍‍କୋ ଏକ୍ ଶାଅ ବିଶ୍ ହୋଡ଼ୋ ଲାଗ୍‍ଭାଗ୍ ତାଇକେନାକୋ, ଏନ୍ତାଃ ତିଙ୍ଗୁ କେତେ କାଜିକେଦାଏ, “ହେ ହାଗାକୋ, ଲାଗାତିଙ୍ଗ୍ ତାଇକେନା ଚି ପାବିତାର୍ ପୁଥି ରାଃ ଏନ୍ ଅଲାକାନ୍ କାଜି ପୁରାଅଃକା ଅକନାଃ ପାବିତାର୍ ଆତ୍ମା ଦାଉଦ୍ ରାଃ ମୋଚା ତେ ୟାହୁଦା ରାଃ ବିଷାୟ୍ ରେ, ଅକନିଃ ୟୀଶୁ କେ ସାସାବ୍ କୋୱାଃ ଆଗୁଆ ତାଇକେନାଏ, ସିଦା ଏତେ କାଜିଲେଦାଏ। ଚିୟାଃଚି ଇନିଃ ଦୋ ଆବୁ ଲୋଃ ଗିନ୍ତି ଜାନାଏ, ଆଡୋଃ ନେ ସେୱା କାମି ରେ ହାନାଟିଙ୍ଗ୍ ନାମ୍ କେଦାଏ। (ଇନିଃ ଆଧାର୍ମ୍ ରାଃ କାମି ତେ ମିୟାଃ ଅତେ କିରିଙ୍ଗ୍ କେଦାଏ, ଆଡୋଃ ବୋଅ ତିରୁବ୍ ଉୟୁଃଜାନାଏ ଆଡୋଃ ଇନିଜାଃ ଲାହେଃ ଫାଡ଼ାଆ ଜାନା ଆଡୋଃ ଇନିଜାଃ ସବେନ୍ ପଟାକୋ ଅଡୋଙ୍ଗ୍ ଜାନା। ନେ କାଜି କେ ୟୀରୁଶାଲେମ୍ ସାହାର୍ ରେନ୍ ସବେନ୍ ତାଇତାନ୍ ହୋଡ଼ୋକୋ ସାରିକେଦାକୋ, ନେତାଃ ସାନ୍ ଚି ଏନ୍ ଅତେ ରାଃ ନୁତୁମ୍ ଇନ୍‍କୁୱାଃ ଭାଷା ରେ ‘ହାକାଲ୍‍ଦମା’ ମାନେ ‘ମାୟୋମ୍ ରାଃ ଅତେ’ କାଜି ଜାନା)। ଦାଉଦ୍ ରାଃ ଦୁରାଙ୍ଗ୍ ପୁଥି ରେ ଅଲାକାନା, ‘ଇନିଜାଃ ଅଡ଼୍ଆଃ ଉଜ୍ଡ଼ାଅ କୋଃଚା, ହାର୍ ଏଣ୍ଡେରେ ଜେତାଏ କାକୋ ତାଇନୋଃଚା,’ ହାର୍ ‘ଇନିଜାଃ ପାଦ୍ ଜାହାଁଏ ଏଟାଃନିଃ ଇଦିକେ ଚାଏ।’ ଏନାମେନ୍ତେ ଚିମିନ୍ ହୁଲାଙ୍ଗ୍ ସାନ୍ତେ ପ୍ରାଭୁ ୟୀଶୁ ଆବୁ ଲୋଃ ହିଜୁଃ ସେନୋଃ ତାଇକେନାଏ, ମାନେ ଯୋହାନ୍ ରାଃ ବାପ୍ତିସ୍ମା ତାଃଏତେ ଇନିଜାଃ ଆବୁୱାଃ ନାଡ଼େଜେତେ ଚେତାନ୍ ଇଦି ଜାକେଦ୍, ଅକନ୍‍କୋ ସବେନ୍ ସାମାୟ୍ ଆବୁ ଲୋଃ ତାଇନ୍ ତାଇକେନାକୋ, ବୁଗିନ୍ ହୋବାଅଃ ତେୟାଃ ଚି ଇନ୍‍କୁ ଏତେ ମିୟାଃ ହୋଡ଼ ଆବୁ ଲୋଃ ଇନିଜାଃ ଜୀବିନିରିଦ୍ ରାଃ ଗୋୱା ହୋବା କେନୋଃ କାଏ।” ଏନ୍ତେ ଇନ୍‍କୁ ବାରିୟା ହୋଡ଼ କିନ୍‍କେ ତିଙ୍ଗୁ କେଦାକୋ, ମିହୋଡ଼୍ ଯୋସେଫ୍ କେ ଅକନିଃ ବାର୍-ସାବା କାଜିଅଃୱାଏ, ଅକନିଜାଃ କିଲି ୟୁସ୍ତୁସ୍ ତାନାଃ, ଏଟାଃ ହୋଡ଼ ମାତିୟାସ୍ କେ, ହାର୍ ନେୟା ବିନ୍ତି କେଦାକୋ, “ହେ ପ୍ରାଭୁ, ଆମ୍ ଦୋ ସବେନ୍ କୋୱାଃ ମୋନ୍ କେ ସାରିୟାମ୍, ଏନାତେ ନେୟା ଉଦୁବ୍ ତାମ୍ ଚି ନେ ବାରାନ୍‍କିନ୍ ଏତେ ଆମ୍ ଅକଏ କେ ସାଲା କେଦାମ୍, ଏନାତେ ଇନିଃ ନେ ସେୱା କାମି ହାର୍ କୁଲାକାନ୍ ଚେଲା ପାଦ୍ ରାଃ କାମି ଇଦିକାଏ, ଅକନାଃ କେ ୟାହୁଦା ବାଗେକେତେ ଆଜାଃ ଜାଗା ତେ ସେନୋଃ ଜାନାଏ।” ଏନ୍ତେ ଇନ୍‍କୁ ଇନ୍‍କିନାଃ ଲାଗିନ୍ ଖୁଡ଼୍‍ଖୁଡ଼ି ଉୟୁଃ କେଦାକୋ, ହାର୍ ଖୁଡ଼୍‍ଖୁଡ଼ି ମାତିୟାସ୍ ଗାଃ ନୁତୁମ୍ ରେ ଅଡୋଙ୍ଗ୍ ଜାନା। ଏନାତେ ଇନିଃ ଏନ୍ ଏଗାରା କୁଲାକାନ୍ ଚେଲା କୋଲୋଃ ଲେକା ଜାନାଏ। ଚିମ୍ତାଙ୍ଗ୍ ୟାହୁଦୀ କୋୱାଃ ପେନ୍ତିକୋଷ୍ତ ପାରାବ୍ ରାଃ ହୁଲାଙ୍ଗ୍ ହିଜୁଃଲେନା, ଏଣ୍ଡେ ସବେନ୍ କୋ ମିୟାଃ ଜାଗା ରେ ହୁଣ୍ଡିଲେନ୍ ତାଇକେନାକୋ। ହାର୍ ଆଚ୍‍କାତେ ରିମିଲ୍‍ଦିଶୁମ୍ ଏତେ ମାରାଙ୍ଗ୍ ହୋୟୋ ହୋୟୋତାନ୍ ଲେକା ଷାଡି ଜାନା, ହାର୍ ଏନାତେ ପୁରା ଅଡ଼୍ଆଃ ଅକ୍ତାଃ ରେ ହିନ୍‍କୁ ଦୁବ୍ ଲେନାକୋ, ଫେରେଃ ଜାନା। ଆଡୋଃ ସେଙ୍ଗେଲ୍ ଲେକା ଆଲାଙ୍ଗ୍ କୋ ହାଟିଙ୍ଗ୍ଅଃତାନ୍ ନେଲ୍ ଜାନା ହାର୍ ଏନ୍ ସବେନ୍ ହୋଡ଼ୋକୋୱାଃ ଚେତାନ୍ ରେ ଆଡ଼୍‍ଗୁ ଜାନା। ଆଡୋଃ ଇନ୍‍କୁ ସବେନ୍ କୋ ପାବିତାର୍ ଆତ୍ମା ରେ ଫେରେଃ ଜାନାକୋ, ହାର୍ ଜେଲେକା ଆତ୍ମା ହିନ୍‍କୁକେ ବାକାଣ୍ ଲାଗିନ୍ ପେଡ଼େଏ ଏମ୍‍କେଦାଏ, ଏନ୍ ଲେକା ହିନ୍‍କୁ ଏଟାଃ-ଏଟାଃ ଭାଷା ରେ ବାକାଣ୍ ଏଟେଃ କେଦାକୋ। ଆଡୋଃ ରିମିଲ୍‍ଦିଶୁମ୍ ରାଃ ଲାଥାର୍ ରେନ୍ ସବେନ୍ ଦିଶୁମ୍ କୋଏତେ ପାର୍ମେଶ୍ଵାର୍ କେ ମାନାତିଙ୍ଗ୍ ୟାହୁଦୀକୋ ପେନ୍ତିକୋଷ୍ତ ପାରାବ୍ ମାନାତିଙ୍ଗ୍ ନାଙ୍ଗ୍ ୟୀରୁଶାଲେମ୍ ସାହାର୍ ରେ ତାଇନ୍ ତାଇକେନାକୋ। ଆଡୋଃ ଚିମ୍ତାଙ୍ଗ୍ ନେ ଆୱାଜ୍ ହୋବାଜାନା ଦୋ ଥିମ୍ବାଗି ହୋଡ଼ୋକୋ ମିଃତାଃ ହୁଣ୍ଡିଜାନାକୋ ହାର୍ ହୋଡ଼ୋକୋ ଆକ୍‍ଚାକାଅଃ ଜାନାକୋ, ଚିୟାଃଚି ସବେନ୍ କୋକେ ନେୟାଗି ଆୟୁମୋଃ ତାଇନା ଚି ଇନ୍‍କୁ ଇଙ୍ଗ୍ଆଃ ଗି ଭାଷା ରେ ବାକାଣ୍ ତାନାକୋ। ଆଡୋଃ ଇନ୍‍କୁ ସବେନ୍ କୋ ଆକ୍‍ଚାକାଅଃ ହାର୍ ଆକ୍‍ଦାନ୍ଦା ହୋବା କେତେ କାଜି ଏଟେଃ କେଦାକୋ, “ନେଲ୍‍କୋପେ, ଚିନାଃ ନେ ସବେନ୍ କୋ ଅକନ୍‍କୋ ବାକାଣ୍ ତାନାକୋ ଗାଲିଲୀ ଜିଲ୍ଲା ରେନ୍ ନାହାଲାକୋ? ଏଣ୍ଡେ ଆବୁକେ ଚିଲ୍‍କା ଆବୁୱାଃ-ଆବୁୱାଃ ଜାନାମ୍ ଅତେ ରାଃ ଭାଷା ଆୟୁମୋଃ ତାନା! ଆବୁ ଦୋ ଆଲାଗ୍-ଆଲାଗ୍ ଜାଗା ରେନ୍ ତାନ୍‍ବୁ ଜେଲେକା ପାରଥୀ ଆଡୋଃ ମେଦୀ ଆଡୋଃ ଏଲାମୀ ଆଡୋଃ ମେସୋପୋଟାମିୟା ଆଡୋଃ ୟାହୁଦୀୟା ହାର୍ କାପ୍ପଦୁକିୟା ଆଡୋଃ ପୁନ୍ତୁସ୍ ଆଡୋଃ ଆସିୟା। ଆଡୋଃ ଫୃଗିୟା ଆଡୋଃ ପାମ୍ଫୁଲିୟା ଆଡୋଃ ମିଶାର୍ ଦିଶୁମ୍ ରେନ୍ ଆଡୋଃ ଲିବିୟା ଜାଗା ରେନ୍ ଅକନାଃ କୁରେନୀ ସାହାର୍ ନାଡ଼େଏ ରେ ମେନାଃ, ନେ ସବେନ୍ ଦିଶୁମ୍ ରେନ୍ ହାର୍ ଜାଗା ରେନ୍ ତାଇନ୍ ତାନ୍‍କୋ ହାର୍ ରୋମ୍ ଦିଶୁମ୍ ଏତେ ହୋନୋର୍ ଲାଗିନ୍ ୟୀରୁଶାଲେମ୍ ସାହାର୍ ହିଜୁଃ କାନ୍ ହୋଡ଼ୋକୋ, ମାନେ ୟାହୁଦୀ ହୋଡ଼ୋକୋ, ହାର୍ ୟାହୁଦୀ ଧାରାମ୍ କେ ଗ୍ରାହାନ୍ କାନ୍ ହୋଡ଼ୋକୋ, କ୍ରେତି ଆଡୋଃ ଆରବୀ କୋ ହ ମେନାବୁୱା, ମେନ୍ଦୋ ଆବୁୱାଃ-ଆବୁୱାଃ ଭାଷା ରେ ନିକୁଏତେ ପାର୍ମେଶ୍ଵାର୍ ରାଃ ମାରାଙ୍ଗ୍-ମାରାଙ୍ଗ୍ କାମି କୋରାଃ କାଜିକୋ ଆୟୁମ୍ ତାନାବୁ।” ଆଡୋଃ ଇନ୍‍କୁ ସବେନ୍ ଆକ୍‍ଦାନ୍ଦା ହାର୍ ଆକ୍‍ଚାକାଅଃ କେତେ ମିହୋଡ଼୍ ଏଟାଃ ନିଈ କେ କାଜି ଏଟେଃ କେଦାକୋ, “ନେୟା ଚିନାଃ ହୋବାଅଃ ତାନା?” ମେନ୍ଦୋ ଏଟାଃକୋ ଲାନ୍ଦା କେତେ କାଜିକେଦାକୋ, “ଇନ୍‍କୁ ଦୋ ନାୱା ଆଙ୍ଗୁର୍ ରାଶି ନୁ କେତେ ବୁଲ୍ ପୁଟି କାନାକୋ।” ଏନ୍ତେ ପାତ୍ରାସ୍ ଏନ୍ ଏଗାରା କୁଲାକାନ୍ ଚେଲାକୋ ଲୋଃ ତିଙ୍ଗୁ ଜାନାଏ ହାର୍ କାଉରି କେତେ କାଜିକେଃକୋୱାଏ, “ହେ ୟାହୁଦୀୟା ଜିଲ୍ଲା ରେନ୍ ହୋଡ଼ୋକୋ ଆଡୋଃ ୟୀରୁଶାଲେମ୍ ସାହାର୍ ରେ ସବେନ୍ ତାଇନ୍ ତାନ୍‍କୋ, ନେୟା ସାରିକେପେ ହାର୍ ଇଙ୍ଗ୍ଆଃ ବାକାଣ୍ ବୁଝାଅଃପେ। ଜେଲେକା ଆପେ ପାହୋମ୍ ତାନାପେ, ନିକୁ କାକୋ ବୁଲା କାନା, ଚିୟାଃଚି ନାଆ ଦୋ ସେତାଃ ରାଃ ନାଅ ଭାଇର୍ ସାଡିକାନା। ମେନ୍ଦୋ ନେୟା ଏନ୍ କାଜି ତାନାଃ, ଅକନାଃ ୟୋଏଲ୍ ନାବୀ ରାଃ ହୋରାତେ କାଜିକାନ୍ ତାଇକେନା: ‘ପାର୍ମେଶ୍ଵାର୍ କାଜିତାନାଏ, ଟୁଣ୍ଡୁ ହୁଲାଙ୍ଗ୍ କୋରେ ନେଲେକା ହୋବାୱା ଚି ଇଙ୍ଗ୍ ଇଙ୍ଗ୍ଆଃ ଆତ୍ମା ସବେନ୍ ହୋଡ଼ୋକୋୱାଃ ଚେତାନ୍ ରେ ଦୁଲେୟାଇଙ୍ଗ୍, ଏନ୍ତେ ଆପେୟାଃ ହୋନ୍‍କଡ଼ାକୋ ଆଡୋଃ ହୋନ୍‍କୁଡ଼ିକୋ ଆୟାର୍‍କାଜି କାଜିୟାକୋ, ଆଡୋଃ ଆପେୟାଃ ଧାଙ୍ଗ୍ଡ଼ାକୋ ଦାର୍ଶାନ୍ ନେଲେୟାକୋ, ହାର୍ ଆପେୟାଃ ହାଡ଼ାମ୍-ହୋଡ଼ୋକୋ କୁମୁ ନେଲେୟାକୋ। ନେତାଃ ସାନ୍ ଚି ଏନ୍ ହୁଲାଙ୍ଗ୍ କୋରେ ଇଙ୍ଗ୍ ଇଙ୍ଗ୍ଆଃ କଡ଼ା ଦାସୀ ହାର୍ କୁଡ଼ି ଦାସୀ କୋୱାଃ ଚେତାନ୍ ରେ ହଗି ଇଙ୍ଗ୍ଆଃ ଆତ୍ମା ଏତେ ଦୁଲେୟାଇଙ୍ଗ୍, ଆଡୋଃ ଇନ୍‍କୁ ଆୟାର୍‍କାଜି କାଜି ୟାକୋ। ହାର୍ ଇଙ୍ଗ୍ ଚେତାନ୍ ରିମିଲ୍‍ଦିଶୁମ୍ ରେ ଆକ୍‍ଦାନ୍ଦା କାମିକୋ ଆଡୋଃ ଲାଥାର୍ ଅତେ ରେ ଚିହ୍ନା କୋ, ମାନେ ମାୟୋମ୍ ହାର୍ ସେଙ୍ଗେଲ୍ ହାର୍ ସୁକୁଲ୍ ରାଃ ରିମିଲ୍ ଦେଖାଅ ପେୟାଇଙ୍ଗ୍। ପ୍ରାଭୁ ଆଃ ମାରାଙ୍ଗ୍ ଆଡୋଃ ମାନାରାଙ୍ଗ୍ ହୁଲାଙ୍ଗ୍ ରାଃ ହିଜୁଃ ସିଦାରେ ଶିଙ୍ଗି ନୁବାଃ ଆଡୋଃ ଚାଣ୍ଡୁଃ ମାୟୋମ୍ କେନୋଗା। ଆଡୋଃ ଏନ୍ ସାମାୟ୍ ରାଃ ସିଦାରେ ଜାହାଁଏ ହ ପ୍ରାଭୁ ରାଃ ନୁତୁମ୍ କେଡ଼ାୟାଏ, ଇନିଃ ବାଞ୍ଚାଅ ନାମେୟାଏ।’ ” “ହେ, ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ, ନେ କାଜିକୋ ଆୟୁମେପେ: ୟୀଶୁ ନାଜ୍ରେଥିୟା ମିୟାଃ ହୋଡ଼ ତାଇକେନାଏ ଅକନିଜାଃ ପାର୍ମେଶ୍ଵାର୍ ପାଡ଼େତେ ହୋବାକାନ୍ ରାଃ ପୋକ୍ତା କାଜି ଏନ୍ ପେଡ଼େଏ ରାଃ କାମିକୋ ହାର୍ ଆକ୍‍ଦାନ୍ଦା କୋରାଃ କାମି ଆଡୋଃ ଚିହ୍ନାକୋ ଏତେ ଉଦୁବାକାନା, ଅକନାଃ ପାର୍ମେଶ୍ଵାର୍ ଆପେୟାଃ ଥାଲା ରେ ଇନିଜାଃ ହୋରାତେ ରିକା କେଦାଏ ଅକନିଃକେ ଆପେ ଖୁଦ୍ ସାରି ୟାପେ। ଏନ୍ ୟୀଶୁ କେଗି, ଅକଏ ପାର୍ମେଶ୍ଵାର୍ ରାଃ ଠାହ୍‍ରାଓ କାନ୍ ସାନାଙ୍ଗ୍ ଲେକାତେ ହାର୍ ଆୟୁର୍ ତେଗି ସାରିକାନ୍ ସେଣା ଲେକାତେ ସାବ୍ ରିକା ଜାନାଏ, ଏଣ୍ଡେ ଆପେ ଆଧାର୍ମୀ ହୋଡ଼ୋକୋୱାଃ ତିଈ ତେ ଇନିଃକେ କ୍ରୁଶ୍ ରେ ରାକାବ୍ କେତେ ଗୋଏଃ କିଜାପେ। ମେନ୍ଦୋ ଇନିଃକେ ଗି ପାର୍ମେଶ୍ଵାର୍ ଗୋନୋଏଃ ରାଃ ଥୋନୋଲ୍ ଏତେ ରାଡ଼ାକେତେ ଜୀହିଃ କିଜାଏ; ଚିୟାଃଚି ନେୟା ହୋବାଗି କା ଧାଡ଼ିୟୋଃ ତେୟାଃ ଯେ ଇନିଃ ଗୋନୋଏଃ ରାଃ ପେଡ଼େଏ ରେ ତାଇନ୍ ତେୟାଃଏ। ଚିୟାଃଚି ଦାଉଦ୍ ରାଜା ଇନିଜାଃ ବିଷାୟ୍ ରେ କାଜିୟାଏ, ‘ଇଙ୍ଗ୍ ପ୍ରାଭୁ କେ ସବେନ୍ ସାମାୟ୍ ଇଙ୍ଗ୍ଆଃ ନାଡ଼େଏ ରେ ନେଲ୍ କାତେ ତାଇନାଇଙ୍ଗ୍, ଚିୟାଃଚି ହିନିଃ ଇଙ୍ଗ୍ଆଃ ଜୋମ୍ ପାଡ଼୍ ରେ ମେନିଜା, ଏନାତେ ଇଙ୍ଗ୍ କେ ଜେତାଏ କାକୋ ବୋରୋ ଧାଡ଼ିୟା। ନେୟା ମେନ୍ତେ ଇଙ୍ଗ୍ଆଃ ମୋନ୍ ରାଶିକା ଜାନା, ହାର୍ ଇଙ୍ଗ୍ଆଃ ଆଲାଙ୍ଗ୍ ଥିମ୍ବାଗି ମାନାରାଙ୍ଗ୍ କେଦାଏ, ଏନାଏତେ ଅଗି ଆଡୋଃ ଇଙ୍ଗ୍ଆଃ ହୋଡ଼ମୋ ହ ଆଶ୍ରା ରେ ବାଇତାଇନୋଗା। ଚିୟାଃଚି ଆମ୍ ଇଙ୍ଗ୍ଆଃ ଜୀଉ କେ ପାତାଲ୍ ରେ କାମ୍ ବାଗିୟା; ହାର୍ ନା ଆମାଃ ପାବିତାର୍ ହୋଡ଼ କେ ସୋୟା ନାଙ୍ଗ୍ ବାଗିୟାମ୍। ଆମ୍ ଇଙ୍ଗ୍‍କେ ଜୀଦାନ୍ ରାଃ ହୋରା ଉଦୁବ୍ କାଦିଙ୍ଗାମ୍; ଆମ୍ ଇଙ୍ଗ୍‍କେ ଆମାଃ ନାଡ଼େଏ ରେ ରାଶିକା ତେ ଫେରେଃ କେୟାମ୍।’ ” “ହେ ହାଗାକୋ, ଇଙ୍ଗ୍ ଖାନ୍ଦାନୀ-ହାଡ଼ାମ୍ ଦାଉଦ୍ ରାଃ ବିଷାୟ୍ ରେ ଆପେ କେ ସାହାସ୍ ଏତେ କାଜି ଧାଡ଼ିୟାଇଙ୍ଗ୍ ଚି ଇନିଃ ଦୋ ଗୋଏଃ ଜାନାଏ ହାର୍ ତୋପା ହ ଜାନାଏ ହାର୍ ଇନିଜାଃ କାବାର୍ ଇସିଙ୍ଗ୍ ସାନ୍ ଆବୁ ତାଃ ମେନାଃ। ଇନିଃ ନାବୀ ତାଇକେନାଏ, ଇନିଃ ସାରି ତାଇକେନାଏ ଚି ପାର୍ମେଶ୍ଵାର୍ ଇଙ୍ଗ୍ଆଃ ଲୋଃ କିରିୟା ଜୋମ୍‍କାଦାଏ ଚି ଇଙ୍ଗ୍ ଆମାଃ ବାଂଶ୍ ଏତେ ମିୟାଃ ହୋଡ଼କେ ଆମାଃ ସିଂହାସାନ୍ ରେ ଦୁବିୟାଇଙ୍ଗ୍। ଇନିଃ ହୋବାଅଃ ତେୟାକେ ସୀଦାଏତେ ନେଲ୍‍କେତେ ମାସୀହ୍ ରାଃ ଜୀବିନିରିଦ୍ ବିଷାୟ୍ ରେ ଆୟାର୍‍କାଜି କାଜି କେଦାଏ ଚି, ନାଦୋ ଇନିଜାଃ ଜୀଉ ପାତାଲ୍ ରେ ବାଗିଜାନା ହାର୍ ନା ଇନିଜାଃ ହୋଡ଼ମୋ ସୋୟାଜାନା। ନେ ୟୀଶୁ କେଗି ପାର୍ମେଶ୍ଵାର୍ ଜୀହିଃ କିଜାଏ, ଅକେୟାଃ ଆଲେ ସବେନ୍ କୋ ଗୋୱା ତାନ୍‍ଲେ। ନେଲେକାତେ ପାର୍ମେଶ୍ଵାର୍ ରାଃ ଜୋମ୍ ତିଈ ତେ ମାରାଙ୍ଗ୍ ପାଦ୍ ନାମ୍ କେତେ, ହାର୍ ଆବା ଏତେ ଇନିଃ ପାବିତାର୍ ଆତ୍ମା ନାମ୍ କେତେ ଅକନାଃ କାଜିକାନ୍ ତାଇକେନା, ଇନିଃ ନେୟା ଦୁଲ୍ କାଦାଏ, ଅକନାଃ ଆପେ ନେଲ୍ ତାନାପେ ହାର୍ ଆୟୁମ୍ ତାନାପେ। ଚିୟାଃଚି ଦାଉଦ୍ ରାଜା ଦୋ ସିର୍ମାଦିଶୁମ୍ ରେ କାଏ ରାକାବ୍ କାନା, ମେନ୍ଦୋ ଆଏଃ ଖୁଦ୍ କାଜିୟାଏ, ପ୍ରାଭୁ ଇଙ୍ଗ୍ଆଃ ପ୍ରାଭୁ କେ କାଜିକେଦାଏ, ଇଙ୍ଗ୍ଆଃ ଜୋମ୍ ପାଡ଼୍ ଦୁବ୍ ମେ। ଚିମିନ୍ ସାନ୍ତେ ଚି ଇଙ୍ଗ୍ ଆମାଃ ବାଇରୀକୋକେ ଆମାଃ କାଟା ଲାଥାର୍ ରାଃ ପିଣ୍ଡିଗି କାଇଙ୍ଗ୍ ବାଇକୋୱା। ଏନାମେନ୍ତେ ନାଆ ଇସ୍ରାଏଲ୍ ଦିଶୁମ୍ ରାଃ ସବେନ୍ ଘାରାନା ପୁରା ସାରିକେକାକୋ ଚି ପାର୍ମେଶ୍ଵାର୍ ଗି ଏନ୍ ୟୀଶୁ କେଗି ଅକନିଃକେ ଆପେ କ୍ରୁଶ୍ ରେ ରାକାବ୍ କିଜାପେ, ପ୍ରାଭୁ ହ ଠାହ୍‍ରାଓ କିଜାଏ ହାର୍ ମାସୀହ୍ ହ।” ଏନ୍ତେ ସବେନ୍ ଆୟୁମ୍‍ତାନ୍ ହୋଡ଼ୋକୋ ମୋନ୍ ରେ ଦୁକୁ କେତେ ପାସ୍ତାଅ କେଦାକୋ, ହାର୍ ଇନ୍‍କୁ ପାତ୍ରାସ୍ ହାର୍, ଏଟାଃ କୁଲାକାନ୍ ଚେଲା କୋକେ କୁଲି ଏଟେଃ କେଦାକୋ, “ହେ ହାଗାକୋ, ଆଲେ ଚିନାଃ ରିକାୟାଲେ?” ପାତ୍ରାସ୍ ହିନ୍‍କୁ କେ କାଜିକେଦାଏ, “ପାପ୍ କାମି ବାଗେ ତାପେ, ହାର୍ ଆପେ ସବେନ୍ କୋ ଆପେୟାଃ-ଆପେୟାଃ ପାପ୍ କୋରାଃ ଛାମା ଲାଗିନ୍ ୟୀଶୁ ମାସୀହ୍ ରାଃ ନୁତୁମ୍ ରେ ବାପ୍ତିସ୍ମା ଇଦିପେ, ଏଣ୍ଡେ ଆପେ ପାବିତାର୍ ଆତ୍ମା ରାଃ ଦାନ୍ ନାମେୟାପେ। ଚିୟାଃଚି ନେ କାଜିଏମ୍ ଆପେ ନାଙ୍ଗ୍, ହାର୍ ଆପେୟାଃ ହୋନ୍‍ଗାଣା ନାଙ୍ଗ୍, ହାର୍ ଏନ୍ ସବେନ୍ ସାଙ୍ଗିନ୍-ସାଙ୍ଗିନ୍ ରେନ୍ ହୋଡ଼ୋକୋ ଲାଗିନ୍ ହଗି ତାନାଃ ଅକନ୍ କୋକେ ପ୍ରାଭୁ ଆବୁୱାଃ ପାର୍ମେଶ୍ଵାର୍ ଆଜାଃ ନାଡ଼େଏ କେଡ଼ାକୋୱାଏ।” ଇନିଃ ଆଡୋଃଗି ଥିମ୍ବା ବାକାଣ୍ କୋତେ ହ ଗୋୱା ଏମ୍-ଏମ୍ କେତେ ବୁଝାଅ କେଃକୋୱାଏ ଚି ଆପେ ଆପାନ୍ କେ ନେ ଟେଢ଼ା ପିଢ଼ୀ ଏତେ ବାଞ୍ଚାଅ ୱେପେ। ଏନାମେନ୍ତେ ଅକନ୍ କୋ ଇନିଜାଃ ବାଚାନ୍ ଗ୍ରାହାନ୍ କେଦାକୋ ଇନ୍‍କୁ ବାପ୍ତିସ୍ମା ଇଦିକେଦାକୋ; ହାର୍ ଏନ୍ ହୁଲାଙ୍ଗ୍ ଗି ତିନ୍ ହାଜାର୍ ହୋଡ଼ୋକୋ ଲାଗ୍-ଭାଗ୍ ଇନ୍‍କୁ ଲୋଃ ମେଶା ଜାନାକୋ। ଆଡୋଃ ଇନ୍‍କୁ କୁଲାକାନ୍ ଚେଲା କୋୱାଃ ତେ ଶିଖାଅ ନାନାମ୍, ହାର୍ ମିଃତାଃ ନାପାମ୍ ନାଙ୍ଗ୍ ହାର୍ ହୋଲୋଙ୍ଗ୍ କେଚାଃ ରେ ହାର୍ ବିନ୍ତି କାତେ ରେ ତାଇନ୍ ଜାନାକୋ। ହାର୍ ସବେନ୍ ହୋଡ଼ୋ କୋୱାଃ ଚେତାନ୍ ରେ ପାର୍ମେଶ୍ଵାର୍ ନାଙ୍ଗ୍ ବୋରୋ ହାର୍ ମାଇନ୍ ଭିନାଅ ଜାନା, ହାର୍ ଥିମ୍ବାଗି ଆକ୍‍ଦାନ୍ଦା କାମି ହାର୍ ଚିହ୍ନାକୋ କୁଲାକାନ୍ ଚେଲା କୋୱାଃ ତେ ହୋବାଅଃ ତାଇକେନା। ହାର୍ ସବେନ୍ ବିଶ୍ଵାସ୍ ତାନ୍ ହୋଡ଼ୋକୋ ମିଃତାଃ ହୁଣ୍ଡିନ୍ ତାଇକେନାକୋ, ହାର୍ ଇନ୍‍କୁୱାଃ ସବେନ୍ ଜିନିଷ୍‍କୋ ମିଃ ରେ ସବେନ୍ କୋ ଲାଗିନ୍ ତାଇକେନା। ହାର୍ ଇନ୍‍କୁ ଆକୋୱାଃ-ଆକୋୱାଃ ସାମ୍ପାତି ଆଡୋଃ ସାମାନ୍ କୋକେ ଆଖ୍ରିଙ୍ଗ୍-ଆଖ୍ରିଙ୍ଗ୍ କେତେ ଜେଲେକା ଅକେୟାଃ ଦାର୍‍କାର୍ ଏନ୍‍ଲେକା ହାଟିଙ୍ଗ୍ କେ ତାଇକେନାକୋ। ହାର୍ ଇନ୍‍କୁ ସବେନ୍ ହୁଲାଙ୍ଗ୍ ମିୟାଃ ମୋନ୍ ହୋବାକେତେ ମାନ୍ଦିର୍ ନାଡ଼େଏ ଜାଗା ରେ ହୁଣ୍ଡିନ୍ ତାଇକେନାକୋ, ହାର୍ ଅଡ଼୍ଆଃ-ଅଡ଼୍ଆଃ ରେ ହୋଲୋଙ୍ଗ୍ କେଚାଃ ତାଇନାକୋ, ଏନ୍ତେ ରାଶିକା ହାର୍ ମୋନ୍ ରାଃ ଫାର୍ଚିତେ ଜୋଜୋମାଃ ଜୋମ୍ ତାଇକେନାକୋ। ହାର୍ ପାର୍ମେଶ୍ଵାର୍ ରାଃ ସ୍ତୁତି ରିକା ତାଇକେନାକୋ, ହାର୍ ସବେନ୍ କୋ ଇନ୍‍କୁତେ ସୁକୁଅଃ ତାଇକେନାକୋ; ହାର୍ ଅକନ୍ କୋ ବାଞ୍ଚାଅ ନାମ୍ ତାଇକେନାକୋ, ଇନ୍‍କୁକେ ପ୍ରାଭୁ ସବେନ୍ ହୁଲାଙ୍ଗ୍ ଇନ୍‍କୁୱାଃ ଲୋଃ ମେଶା କୋ ତାଇକେନାଏ। “ମୁଶିଙ୍ଗ୍ ପାତ୍ରାସ୍ ହାର୍ ଯୋହାନ୍ ଉଲ୍‍ଟି ବେଲା ତିନ୍ ବାଜେ ବିନ୍ତି ସାମାୟ୍ ମାନ୍ଦିର୍ ତେ ସେନ୍ ତାଇନ୍ କେନାକିନ୍। ହାର୍ ହୋଡ଼ୋକୋ ମିହୋଡ଼୍ ଜାନାମ୍ ରେନ୍ ଲେଙ୍ଗ୍ଡ଼ା କେ ଆୱି ତାଇକେନାକୋ, ଅକନିଃକେ ଇନ୍‍କୁ ସବେନ୍ ହୁଲାଙ୍ଗ୍ ମାନ୍ଦିର୍ ଜାଗା ରେ ବୋଲୋ ତେୟାଃ ଦୁହାର୍ ଅକନାଃକେଚି ‘ସୁଗାଡ଼୍’ ମେନ୍ତେ କାଜି ତାଇକେନାକୋ, ଏନ୍ତାଃରେ ଦୁବ୍ କି ତାଇକେନାକୋ ଏନାତେ ଇନିଃ ମାନ୍ଦିର୍ ରାଚା ରେ ବୋଲୋ ଅଡୋଙ୍ଗ୍ ତାନ୍‍କୋ ତାଃତେ ଆସିଜୋମ୍ ତାଇନାଏ। ଚିମ୍ତା ଇନିଃ ପାତ୍ରାସ୍ ହାର୍ ଯୋହାନ୍ କିନ୍‍କେ ମାନ୍ଦିର୍ ରାଚା ରେ ବୋଲୋତାନ୍ ନେଲ୍ କେଃ କିନାଏ, ଏଣ୍ଡେ ଇନ୍‍କିନ୍ କେ ଆସି କେଃକିନାଏ। ପାତ୍ରାସ୍ ଯୋହାନ୍ ଲୋଃ ଇନିଃ ପାଡ଼୍ ଧ୍ୟାନ୍‍ତେ ନେଲ୍‍କେତେ କାଜିକେଦାଏ, ‘ଆଲିଙ୍ଗ୍ ପାଡ଼୍ ନେଲେମ୍!’ ଏନ୍ତେ ଇନିଃ ଇନ୍‍କିନ୍ ତାଃ ତେ ଜାହାନାଃ ନାମେ ରାଃ ଆଶ୍ରା ମାଣ୍ଡାଅ କେତେ ଇନ୍‍କିନ୍ ପାଡ଼୍ ସାଙ୍ଗିଲ୍ କେଦାଏ। ଏନ୍ତେ ପାତ୍ରାସ୍ କାଜିକେଦାଏ, ‘ରୂପା ହାର୍ ସୋନା ଦୋ ଇଙ୍ଗ୍ଆଃ ତାଃ ରେ ବାନୋଃ, ମେନ୍ଦୋ ଅକନାଃ ଇଙ୍ଗ୍ଆଃ ତାଃ ରେ ମେନାଃ ଏନା ଆମ୍‍କେ ଏମାମେ ତାନିଙ୍ଗ୍; ୟୀଶୁ ମାସୀହ୍ ନାଜ୍ରେଥିୟା ରାଃ ନୁତୁମ୍ ତେ ତିଙ୍ଗୁନ୍‍ମେ ହାର୍ ସେନ୍‍ମେ।’ ଏନ୍ତେ ଇନିଃ ଇନିଜାଃ ଜୋମ୍ ତିଈ କେ ସାବ୍ କେତେ ଇନିଃକେ ବିରିଃ କିଜାଏ; ଇମ୍ତାଗି ଇନିଜାଃ କାଟା ହାର୍ କାଟା ଜାଙ୍ଗ୍ ରେ ପେଡ଼େଏ ହିଜୁଃ ଜାନା। ଇନିଃ ନିର୍ ବିରିଃ କେତେ ତିଙ୍ଗୁ ଜାନାଏ, ହାର୍ ସେନ୍ ଏଟେଃ କେଦାଏ; ହାର୍ ସେସେନ୍ ହାର୍ ନିର୍ କେଦାଏ, ହାର୍ ପାର୍ମେଶ୍ଵାର୍ ରାଃ ସ୍ତୁତି ରିକାତାନ୍ ଲୋଃ ଇନ୍‍କିନ୍ ଲୋଃ ମାନ୍ଦିର୍ ରାଚା ରେ ବୋଲୋ ଜାନାଏ। ସବେନ୍ ହୋଡ଼ୋକୋ ଇନିଃକେ ସେସେନ୍ ତାନ୍ ହାର୍ ପାର୍ମେଶ୍ଵାର୍ ରାଃ ସ୍ତୁତି ରିକାତାନ୍ ନେଲ୍ କେତେ, ଇନିଃକେ ନେଲ୍ଉରୁମ୍ କିଜାକୋ ଚି ହିନିଃ ଇନିଃଗି ତାନିଃ, ଅକନିଃ ମାନ୍ଦିର୍ ତେ ବୋଲୋ ତେୟାଃ ‘ସୁଗାଡ଼୍’ ନୁତୁମ୍ ଦୁହାର୍ ତାଃରେ ଦୁବ୍ କେତେ ଭିକ୍ ଆସି ତାଇନ୍ ତାଇକେନାଏ; ହାର୍ ଏନ୍ ଘାଟ୍ନା ତେ ଅକନାଃ ଇନିଃ ଲୋଃ ହୋବାଲେନ୍ ତାଇକେନା ଇନ୍‍କୁ ଆକ୍‍ଦାନ୍ଦା ହାର୍ ଆକ୍‍ଚାକାଅଃ ଜାନାକୋ।” ଚିମ୍ତାଙ୍ଗ୍ ଏନ୍ ଭିକାରି ପାତ୍ରାସ୍ ହାର୍ ଯୋହାନ୍ କିନ୍‍କେ ସାବ୍ ଲେଃ ତାଇକେନାଏ, ଇମ୍ତା ସବେନ୍ ହୋଡ଼ୋକୋ ଥିମ୍ବାଗି ଆକ୍‍ଦାନ୍ଦା ହୋବାକେତେ ଇନ୍‍କୁତାଃ ନିର୍ ସେନ୍ ଜାନାକୋ ଅକନାଃ ସୁଲେମାନ୍ ରାଃ ପିଣ୍ଡିଗି କାଜିୟଗା। ନେୟା ନେଲ୍‍କେତେ ପାତ୍ରାସ୍ ହୋଡ଼ୋକୋକେ କାଜି କେଃକୋୱାଏ, “ହେ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ, ଆପେ ନେ ହୋଡ଼ ବିଷାୟ୍ ରେ ଚିନାଃ ମେନ୍ତେ ଆକ୍‍ଦାନ୍ଦାଅଃ ତାନାପେ, ହାର୍ ଆଲିଙ୍ଗ୍ ପାଡ଼୍ ଚିନାଃ ମେନ୍ତେ ନେଲେକା ନେଲ୍ ତାନାପେ, ଜେଲେକା ଆଲିଙ୍ଗ୍ ଗି ନିଈ କେ ଆଲେୟାଃ ପେଡ଼େଏ ହାର୍ ଧାରାମ୍ କାମି ତେ ନିଈ କେ ସେସେନ୍ ନାଙ୍ଗ୍ ବାଇତାଜାଲୀଙ୍ଗ୍। ଆବ୍ରାହାମ୍, ଇସାହାକ୍ ହାର୍ ୟାକୁବ୍ ଗାଃ ପାର୍ମେଶ୍ଵାର୍ ଆବୁୱାଃ ଆପୁତାତା କୋୱାଃ ପାର୍ମେଶ୍ଵାର୍ ଗି ଆଜାଃ ସେୱାକ୍ ୟୀଶୁ ଗାଃ ମାନାରାଙ୍ଗ୍ କେଦାଏ, ଅକନିଃକେ ଆପେ ଗୋଜୋଃ କାଏ ମେନ୍ତେ ସାବ୍ ରିକା ତାଇଜାପେ, ହାର୍ ଚିମ୍ତାଙ୍ଗ୍ ପିଲାତୁସ୍ ଇନିଃକେ ବାଗେ ଲାଗିନ୍ ବିଚାର୍ କେଦାଏ, ଇମ୍ତା ଆପେ ଇନିଃତାଃ ରେ ଇନିଃକେ ରାଜା ଲେକା କାପେ ମାନାତିଙ୍ଗ୍ କିଜା। ଆପେ ଏନ୍ ପାବିତାର୍ ହାର୍ ଧାର୍ମୀ ହୋଡ଼ କେ କାପେ ଗ୍ରାହାନ୍ କିଜା, ହାର୍ ଆର୍ଜି କେଦାପେ ଚି ମିହୋଡ଼୍ ହୋଡ଼ ଗୋଗୋଏଃ ନିଃକେ ଆପେ ଲାଗିନ୍ ବାଗେଅଃ କାଏ; ହାର୍ ଆପେ ଜୀଦାନ୍ ରାଃ ଏଟେଃନିଃ କେ ଗୋଏଃ କିଜାପେ, ଅକନିଃକେ ପାର୍ମେଶ୍ଵାର୍ ଗୋଜାକାନ୍ କୋଏତେ ଜୀହିଃ କିଜାଏ, ହାର୍ ନେ କାଜି ରାଃ ଗୋୱା ତାନ୍‍ଲେ। ହାର୍ ଏନ୍ ୟୀଶୁ ନୁତୁମ୍ ଗି, ଏନ୍ ବିଶ୍ଵାସ୍ ରାଃ ହୋରାତେ ଅକନାଃ ଇନିଜାଃ ନୁତୁମ୍ ରେ ମେନାଃ, ନେ ହୋଡ଼ କେ ଅକନିଃକେ ଆପେ ନେଲି ତାନାପେ ଆଡୋଃ ସାରିୟାପେ ହ ପେଡ଼େଏ ଏମା କାଇଜାଏ। ଏନ୍ ବିଶ୍ଵାସ୍ ଗି ଅକନାଃ ଇନିଜାଃ ହୋରାତେ ମେନାଃ, ନିଃକେ ଆପେ ସବେନ୍ କୋୱାଃ ନାଡ଼େଏ ରେ ପୁରା ବେଶ୍ ରିକା କିଜାଏ।” “ନାଆ ହେ ହାଗାକୋ, ଇଙ୍ଗ୍ ସାରିୟାଇଙ୍ଗ୍ ଚି ନେ କାମି ଆପେ କାସାରି ତେ ରିକାକେଦାପେ, ହାର୍ ଏନ୍‍ଲେକାଗି ଆପେୟାଃ ମୁଖିୟାକୋ ରିକା କେଦାକୋ। ମେନ୍ଦୋ ଅକନ୍ ବାକାଣ୍ କୋକେ ପାର୍ମେଶ୍ଵାର୍ ସବେନ୍ ନାବୀ କୋୱାଃ ମୋଚା ତେ ସିଦାରେ ଗି ଉଦୁବ୍ ଲେଃକୋୱାଏ, ଚି ଇନିଜାଃ ମାସୀହ୍ ଦୁକୁ ସାହାତିଙ୍ଗ୍ ୟାଏ; ଏନାକୋ ଇନିଃ ନେଲେକାତେ ପୁରା କେଦାଏ। ଏନାମେନ୍ତେ, ପାପ୍ କାମି ବାଗେ ତାପେ ହାର୍ ରୁଆଡ଼୍ ହିଜୁଃପେ ଏନାତେ ଆପେୟାଃ ପାପ୍‍କୋ ମେଟାଅଃୱା, ଏନାତେ ପ୍ରାଭୁ ଗାଃ ନାଡ଼େଏ ତେ ଆରାମ୍ ନାମେ ରାଃ ଦିନ୍ ହିଜୁଃୱା, ହାର୍ ଇନିଃ ୟୀଶୁ କେ କୁଲିୟାଏ ଅକନିଃ ଆପେ ଲାଗିନ୍ ସିଦା ଏତେଗି ମାସୀହ୍ ଠାହ୍‍ରାଓ କାନାଏ। ଜାରୁରୀ ମେନାଃ ଚି ଇନିଃ ସିର୍ମାଦିଶୁମ୍ ରେ ଏନ୍ ସାମାୟ୍ ସାନ୍ ତାଇନୋଃ ୱାଏ ଚିମିନ୍ ସାନ୍ତେ ଚି ଇନିଃ ସବେନ୍ ବାକାଣ୍ କୋକେ କାଏ ସୁଧାର୍ ଲେୟାଏ ଅକନ୍ କାଜି ରାଃ ବିଷାୟ୍ ସିଦା ସାମାୟ୍ ଏତେ ପାର୍ମେଶ୍ଵାର୍ ଆଜାଃ ପାବିତାର୍ ନାବୀ କୋୱାଃ ମୋଚା ଏତେ କାଜିକାଦାଏ। ଜେଲେକା ଚି ମୁଶା ନାବୀ କାଜିକେଦାଏ, ‘ପ୍ରାଭୁ ପାର୍ମେଶ୍ଵାର୍ ଆପେୟାଃ ହାଗା କୋଏତେ ଆପେୟାଃ ଲାଗିନ୍ ଇଙ୍ଗ୍ଆଃ ଲେକା ମିହୋଡ଼୍ ନାବୀ ଅଡୋଙ୍ଗିୟାଏ, ଜାହାନାଃ ଗି ଆପେକେ ଇନିଃ କାଜିପେୟାଏ, ଏନାକୋକେ ଆୟୁମ୍ ଏପେ। ମେନ୍ଦୋ ସବେନ୍ ହୋଡ଼ୋକୋ ଅକଏ ଏନ୍ ନାବୀ କେ କାଏ ଆୟୁମ୍ ୟାଏ ଇନିଃ ପାର୍ମେଶ୍ଵାର୍ ରାଃ ହୋଡ଼ କାଏ ହୋବାଅଃ ୱାଏ, ହାର୍ ପାର୍ମେଶ୍ଵାର୍ ଇନିଃକେ ନାଶ୍ ତାଇୟାଏ।’ ହାର୍ ଶାମୁଏଲ୍ ଏତେ ଇଦି କେତେ ଇନିଜାଃ ତାୟୋମ୍ତେ ହିଜୁଃ ଲେନ୍ କୋ ସାନ୍ତେ ଚିମିନ୍ ନାବୀ କୋ କାଜିକେଦାକୋ ଏନ୍ ସବେନ୍ କୋ ନେ ହୁଲାଙ୍ଗ୍ କୋରାଃ ବିଷାୟ୍ କେ ଉଦୁବ୍ କେଦାକୋ। ଆପେ ନାବୀ କୋୱା ସାନ୍ତାନ୍ ହାର୍ ଏନ୍ ନିୟାମ୍‍ଥଲ୍ ରାଃ ଉତ୍ତାର୍-ଆଧିକାରୀ ତାନ୍‍ପେ, ଅକନାଃ ପାର୍ମେଶ୍ଵାର୍ ଆପେୟାଃ ଆପୁ ତାତା କୋଲୋଃ ଥୋଲ୍ କେଦାଏ, ଚିମ୍ତାଙ୍ଗ୍ ଇନିଃ ଆବ୍ରାହାମ୍ କେ କାଜିକେଦାଏ, ‘ଆମାଃ ବାଂଶ୍ ରାଃ ହୋରାତେ ଅତେ ରେନ୍ ସବେନ୍ ଘାରାନାକୋ ଆଶିଷ୍ ନାମେୟାକୋ।’ ପାର୍ମେଶ୍ଵାର୍ ଆଜାଃ ସେୱାକ୍ ୟୀଶୁ କେ ବିରିଃ କେତେ ସିଦା ଆପେୟାଃ ନାଡ଼େଏ କୁଲ‍୍‍କିଜାଏ, ଏନାତେ ଆପେ ସବେନ୍ କୋକେ ଆପେୟାଃ ଏତ୍କାନ୍ କାମି କୋଏତେ ରୁଆଡ଼୍ କେତେ ଆଶିଷ୍ ଏମେୟାଏ।” ଚିମ୍ତାଙ୍ଗ୍ ପାତ୍ରାସ୍ ହାର୍ ଯୋହାନ୍ ହୋଡ଼ୋକୋକେ ନେୟା କାଜି ତାଇନାକୋ, ଇମ୍ତା ୟାଜାକ୍ କୋ ହାର୍ ମାନ୍ଦିର୍ କେ ହୋରୋତାନ୍ ସିପାହୀ କୋୱାଃ ଗୋମ୍‍କେ ହାର୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ ଇନ୍‍କୁ ଇନ୍‍କିନାଃ ନାଡ଼େଏ ହିଜୁଃ ସେଟେର୍ ନାକୋ। ଚିୟାଃଚି ଇନ୍‍କୁ ବେଶେ କୋ ଖିସ୍ ଜାନା ଏନାମେନ୍ତେ ଚି ଇନ୍‍କୁ ହୋଡ଼ୋକୋକେ ଶିଖାଅ କୋ ତାଇନାକୋ ହାର୍ ୟୀଶୁ ଆଃ ଯୋନୋକା ଏମ୍ ଏମ୍‍କେତେ ଗୋଜାକାନ୍ କୋୱାଃ ଜୀବିନିରିଦ୍ ରାଃ ପାର୍ଚାର୍ ତାଇକେନାକୋ। ଇନ୍‍କୁ ଇନ୍‍କିନ୍ କେ ସାବ୍ କେତେ ଏଟାଃ ହୁଲାଙ୍ଗ୍ ସାନ୍ତେ ବାନ୍ଦିଅଡ଼୍ଆଃ ରେ ମାଣ୍ଡାଅ କେଃକିନାକୋ ଚିୟାଃଚି ଆୟୁବ୍ ହୋବା ଲେନ୍ ତାଇକେନା। ମେନ୍ଦୋ ସାନ୍ଦେଶ୍ କେ ଆୟୁମ୍ ହୋଡ଼ୋକୋ ଏତେ ଥିମ୍ବାଗି ହୋଡ଼ୋକୋ ବିଶ୍ଵାସ୍ କେଦାକୋ, ହାର୍ ଇନ୍‍କୁୱାଃ ହିସାବ୍ ପାଞ୍ଚ୍ ହାଜାର୍ କୋଡ଼ାକୋ ଲାଗ୍-ଭାଗ୍ ହୋବାଜାନା। ଏଟାଃ ହୁଲାଙ୍ଗ୍ ନେକା ହୋବାଜାନା ଚି ଇନ୍‍କୁୱାଃ ମୁଖିୟା କୋ ହାର୍ ମାରିହୋଡ଼ୋକୋ ହାର୍ ଆଇନ୍ ଗୁରୁ କୋ। ହାର୍ ମାରାଙ୍ଗ୍ ୟାଜାକ୍ ହାନ୍ନା ହାର୍ କୈଫା ହାର୍ ଯୋହାନ୍ ହାର୍ ଆଲେକ୍‍ଜାଣ୍ଡାର୍ ହାର୍ ଚିମିନ୍ ମାରାଙ୍ଗ୍ ୟାଜାକ୍ ରାଃ ଘାରାନା ରେନ୍ ତାଇକେନାକୋ, ସବେନ୍ କୋ ୟୀରୁଶାଲେମ୍ ରେ ହୁଣ୍ଡି ଜାନାକୋ। ଇନ୍‍କୁ ଇନ୍‍କିନ୍ କେ ଥାଲା ରେ ତିଙ୍ଗୁ କେତେ କୁଲିକେଃ କିନାକୋ ଚି ଆପେ ନେ କାମି ଅକେୟାଃ ପେଡ଼େଏ ତେ ହାର୍ ଅକେୟାଃ ନୁତୁମ୍ ତେ ରିକା କେଦାପେ? ଏନ୍ତେ ପାତ୍ରାସ୍ ପାବିତାର୍ ଆତ୍ମା ରେ ଫେରେଃ କେତେ ଇନ୍‍କୁକେ କାଜିକେଦାଏ, “ହେ ହୋଡ଼ୋ କୋୱାଃ ଗୋମ୍‍କେକୋ ହାର୍ ମାରିହୋଡ଼ୋକୋ, ନେ ନାରାଦୁରା ହୋଡ଼ ଲୋଃ ଅକନାଃ ବୁଗିନାଃ ରିକାକାନା, ଆଗାର୍ ଇସିଙ୍ଗ୍ ଆଲେକେ ଇନିଜାଃ ବିଷାୟ୍ ରେ କୁଲିବାଡ଼ାଅଃ ତାନା, ଚି ଇନିଃ ଚିଲ୍‍କା ଠିକ୍ ଜାନାଏ। ଏଣ୍ଡେ ଆପେ ସବେନ୍ କୋ ହାର୍ ପୁରା ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ସାରିକେପେ ଚି ୟୀଶୁ ମାସୀହ୍ ନାଜ୍ରେଥିୟା ନୁତୁମ୍ ରେଗି ଅକନିଃକେ ଆପେ କ୍ରୁଶ୍ ରେ ରାକାବ୍ କିଜାପେ, ହାର୍ ପାର୍ମେଶ୍ଵାର୍ ଗୋଜାକାନ୍ କୋଏତେ ଜୀହିଃ କିଜାଏ, ଇନିଜାଃ ଚାଲ୍ତେ ଗି ନେ ହୋଡ଼ ଆପେୟାଃ ନାଡ଼େଏ ରେ ବେଶ୍ ହୋବାକେତେ ତିଙ୍ଗୁକାନାଏ। ନେୟା ଏନ୍ ଦିରି ଗି ତାନାଃ ଅକନାଃକେ ଆପେ ରାଜ୍‍ମିସ୍ତ୍ରୀକୋ ଏଣ୍ଡାଃ ଲେଦାପେ ହାର୍ ଏନା କୋନା ରାଃ ଖାସ୍ ଦିରି ହୋବାଜାନା। ଜେତାଏ ଏଟାଃ ନିଈ ତେ ବାଞ୍ଚାଅ ବାନୋଗା ୟୀଶୁ କେ ବାଗି କେତେ; ଚିୟାଃଚି ରିମିଲ୍‍ଦିଶୁମ୍ ରାଃ ଲାଥାର୍ ହୋଡ଼ୋକୋୱାଃ ରେ ଆଡୋଃ ଜେତାନ୍ ଏଟାଃ ନୁତୁମ୍ କା ଏମାକାନା, ଅକନାଃ ଲୋଃ ଆବୁ ବାଞ୍ଚାଅ ନାମ୍ ଧାଡ଼ିୟାବୁ।” ଚିମ୍ତାଙ୍ଗ୍ ଇନ୍‍କୁ ପାତ୍ରାସ୍ ହାର୍ ଯୋହାନ୍ ଗାଃ ସାହାସ୍ ନେଲ୍ କେଦାକୋ, ହାର୍ ନେୟା ସାରି କେଦାକୋ ଚି ନିକୁ କାକୋ ପାଢ଼ାଅ ଶିଖାଅ କାନା ହାର୍ ସାଧାରାନ୍ ହୋଡ଼ୋ ତାନ୍‍କୋ, ଇମ୍ତା ଆକ୍‍ଦାନ୍ଦା ଜାନାକୋ; ହାର୍ ଇନ୍‍କୁକେ ନେଲ୍ ଉରୁମ୍ କେଃକୋୱାକୋ, ଚି ନିକୁ ୟୀଶୁ ଲୋଃ ତାଇନ୍ କାନାକୋ। ଏନ୍ତେ ଏନ୍ ହୋଡ଼ କେ ଅକନିଃ ବେଶ୍ ଲେନ୍ ତାଇନାଏ, ପାତ୍ରାସ୍ ହାର୍ ଯୋହାନ୍ ଲୋଃ ତିଙ୍ଗୁକାନ୍ ନେଲ୍‍କେତେ, ଇନ୍‍କୁ ବିରୋଧ୍ ରେ ଜାହାନାଃ କାକୋ କାଜି ଧାଡ଼ିଜାନା। ମେନ୍ଦୋ ଇନ୍‍କୁକେ ସାଭା ତେ ବାହାରି ତେ ସେନୋଃ ରାଃ ହୁକୁମ୍ ଏମ୍ କେତେ, ଇନ୍‍କୁ ଆକୋ-ଆକୋ ରେ ବିଚାର୍ କେଦାକୋ, “ଆବୁ ନେ ହୋଡ଼ କିନ୍ ଲୋଃ ଚିନାଃ ବୁ ରିକାକିନା? ଚିୟାଃଚି ୟୀରୁଶାଲେମ୍ ରେନ୍ ସବେନ୍ ତାଇନ୍ ତାନ୍ କୋ ତାଃ ଉଦୁବ୍ କାନା, ଚି ନିକିନ୍ ଏତେ ମିୟାଃ ଆସାଧାରାନ୍ ଚିହ୍ନା ଉଦୁବାକାନା; ହାର୍ ଆବୁ ନେୟା କେ ମାନା କାବୁ ଧାଡ଼ିୟା। ମେନ୍ଦୋ ଏନାମେନ୍ତେ ଚି ନେ କାଜି ହୋଡ଼ୋକୋ ରେ ଆଡୋଃ ଥିମ୍ବା ଆଲୋକା ପାସ୍ରାଅଃକା, ଆବୁ ଇନ୍‍କିନ୍ କେ ବୋତୋଙ୍ଗ୍ କିନାବୁ, ଏନାତେ ଇନ୍‍କିନ୍ ନେ ନୁତୁମ୍ ତେ ଆଡୋଃ ଜେତାଏ ହୋଡ଼ ତେ କାକୋ ଜାଗାର୍ ଧାଡ଼ିୟା।” ଏନ୍ତେ ଇନ୍‍କିନ୍ କେ କେଡ଼ାକେଦାକୋ ହାର୍ ଚେତାୱନୀ ଏମ୍‍କେତେ ନେୟା କାଜି କେଃକିନାକୋ, “ୟୀଶୁ ରାଃ ନୁତୁମ୍ ତେ ଜାହାନାଃ ହ ଆଲୋପେ କାଜିୟା ଆଡୋଃ ଶିଖାଅୟା।” ମେନ୍ଦୋ ପାତ୍ରାସ୍ ହାର୍ ଯୋହାନ୍ ଇନ୍‍କୁକେ କାଜିରୁଆଡ଼୍ କେଦାକିନ୍, “ଆପେ ଗି ବିଚାର୍ ଏପେ; ଚିନାଃ ନେୟା ପାର୍ମେଶ୍ଵାର୍ ରାଃ ନାଡ଼େଏ ରେ ବୁଗିନାଃ ତାନାଃ ଚି ଆଲିଙ୍ଗ୍ ପାର୍ମେଶ୍ଵାର୍ ରାଃ ବାକାଣ୍ କେ ମାନାତିଙ୍ଗ୍ ବାଗି କେତେ ଆପେୟାଃ ବାକାଣ୍ ଆୟୁମ୍ ୟାଲେ। ଚିୟାଃଚି ନେୟା ଦୋ ଆଲେ ତେ କା ହୋବାୱା ଚି ଅକନାଃ ଆଲେ ଲେ ନେଲ୍ କାଦା ହାର୍ ଆୟୁମ୍ କାଦା, ଏନା କାଲେ କାଜିୟା।” ଏଣ୍ଡେ ଇନ୍‍କୁ ପାତ୍ରାସ୍ ହାର୍ ଯୋହାନ୍ କିନ୍‍କେ ଆଡୋଃଗି ବୋତୋଙ୍ଗ୍ କେତେ ବାଗେ କେଦାକୋ, ଚିୟାଃଚି ହୋଡ଼ୋକୋୱାଃ ଚାଲ୍ତେ ଇନ୍‍କୁକେ ଶାଜାଇ ଏମ୍ ଲାଗିନ୍ ଜାହାନ୍ ଉପାୟ୍ କାକୋ ନାମ୍ କେଦା, ଏନାମେନ୍ତେ ଚି ଅକନ୍ ଘାଟ୍ନା ହୋବା ଲେନ୍ ତାଇକେନା ଏନାରାଃ ଚାଲ୍ତେ ସବେନ୍ ହୋଡ଼ୋକୋ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାତାଇକେନାକୋ। ଚିୟାଃଚି ଏନ୍ ହୋଡ଼, ଅକନିଃ ରେ ନେ ଚାଙ୍ଗାଇ ରାଃ ଚିହ୍ନା ହୋବା ଲେନ୍ ତାଇକେନା, ଇନିଃ ଚାଲିଶ୍ ଶିର୍ମା ହେତେ ଥିମ୍ବା ରେନିଃ ତାଇକେନାଏ। ଚିମ୍ତାଙ୍ଗ୍ ଇନ୍‍କିନ୍ ବାଗିଜାନାକିନ୍ ଆକିନାଃ ଗାତି କୋତାଃ ହିଜୁଃ ନାକିନ୍, ହାର୍ ଅକନାଃ କୋ ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ଇନ୍‍କିନ୍ କେ କାଜି ଲେଃକିନାକୋ, ଏନାକୋ ବାକାଣ୍ ଉଦୁବ୍ କେଦାକିନ୍। ନେୟା ଆୟୁମ୍‍କେତେ ଇନ୍‍କୁ ସବେନ୍ ମିୟାଃ ମୋନ୍ ହୋବା କେତେ ଜୋର୍ତେ ପାର୍ମେଶ୍ଵାର୍ କେ ବିନ୍ତି କେତେ କାଜିକେଦାକୋ, “ହେ ପ୍ରାଭୁ, ଆମ୍ ଇନିଃଗି ତାନ୍‍ମେ ଅକଏ ସିର୍ମାଦିଶୁମ୍ ଆଡୋଃ ଅତେ ଆଡୋଃ ସାମୁଦାର୍ ଆଡୋଃ ଏନାରେ ଅକନାଃ କୋ ମେନାଃ ବାଇୟାକାଦାମ୍। ଆମ୍ ପାବିତାର୍ ଆତ୍ମା ରାଃ ହୋରାତେ ଆମାଃ ଦାସୀ ଆଲେୟାଃ ଆପୁ ଦାଉଦ୍ ରାଜା ଗାଃ ମୋଚା ତେ କାଜିକେଦାମ୍, ‘ଏଟାଃଜାତି କୋ ଚିନାଃ ମେନ୍ତେ ରାଡ଼ାମ୍-କାଚାମ୍ ରିକା କେଦାକୋ? ହାର୍ ଦିଶୁମ୍-ଦିଶୁମ୍ ରେନ୍ ହୋଡ଼ୋକୋ ଚିନାଃ ମେନ୍ତେ ସାମା କାଜି କୋକେ ପାହୋମ୍ କେଦାକୋ? ପ୍ରାଭୁ ହାର୍ ଆୟାଃ ମାସୀହ୍ ରାଃ ବିରୋଧ୍ ରେ ଅତେ ରେନ୍ ରାଜାକୋ ତିଙ୍ଗୁଜାନାକୋ, ହାର୍ ହାକିମ୍ କୋ ମିଃତେ ହୁଣ୍ଡି ଜାନାକୋ।’ ଚିୟାଃଚି ସାର୍ତିଗୀ ଆମାଃ ପାବିତାର୍ ଦାସୀ ୟୀଶୁ ରାଃ ବିରୋଧ୍ ରେ, ଅକନିଃ କେ ଆମ୍ ଆଭିଷେକ୍ କିଜାମ୍, ହେରୋଦ୍ ରାଜା ହାର୍ ପୁନ୍ତିୟୁସ୍ ପିଲାତୁସ୍ ହ ଏଟାଃଜାତି ହାର୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଲୋଃ ନେ ହାତୁ ରେ ହୁଣ୍ଡି ଜାନାକୋ, ଏନାତେ ଅକନାଃ ସିଦା ଏତେ ଆମାଃ ପେଡ଼େଏ ହାର୍ ସାନାଙ୍ଗ୍ ତେ ମାଣ୍ଡାୱାକାନ୍ ତାଇକେନା ଏନାଗି ରିକା ୟାକୋ। ନାଆ ହେ ପ୍ରାଭୁ, ଇନ୍‍କୁୱାଃ ବୋତୋଙ୍ଗ୍ କେ ନେଲେମ୍; ହାର୍ ଆମାଃ ଦାସୀକୋକେ ନେ ବାର୍ଦାନ୍ ଏମେମ୍, ଏନାତେ ଆମାଃ ବାଚାନ୍ ମାରାଙ୍ଗ୍ ସାହାସ୍ ଏତେ କାଜି ଧାଡ଼ିୟାକୋ। ବେଶ୍ ରିକା ଲାଗିନ୍ ଆମ୍ ଆମାଃ ତିଈ ଆୟୁର୍ ଏମ୍ ଏନାତେ ଚିହ୍ନା ହାର୍ ଆକ୍‍ଦାନ୍ଦା କାମି ଆମାଃ ପାବିତାର୍ ଦାସୀ ୟୀଶୁ ରାଃ ନୁତୁମ୍ ରେ ହୋବା ଧାଡ଼ିୟୋଃୱା।” ଚିମ୍ତା ଇନ୍‍କୁ ବିନ୍ତି ଛାବା କେଦାକୋ, ଏଣ୍ଡେ ଏନ୍ ଜାଗା ଅକ୍ତାଃ ଇନ୍‍କୁ ହୁଣ୍ଡିଲେନ୍ ତାଇକେନାକୋ ହିଲାଅ ଜାନା, ହାର୍ ଇନ୍‍କୁ ସବେନ୍ ପାବିତାର୍ ଆତ୍ମା ତେ ଫେରେଃ ଜାନାକୋ, ହାର୍ ପାର୍ମେଶ୍ଵାର୍ ରାଃ ବାଚାନ୍ ସାହାସ୍ଏତେ କାଜି ଏଟେଃ କେଦାକୋ। ସବେନ୍ ବିଶ୍ଵାସ୍ ତାନ୍ କୋୱାଃ ମିଃଗି ମୋନ୍ ହାର୍ ମିଃଗି ପାହୋମ୍ ତାଇକେନା, ନିମିନ୍ ସାନ୍ତେ ଚି ଜେତାଏ ଆଜାଃ ସାମ୍ପାତି କେ ଆଜାଃ ତାନାଃ ମେନ୍ତେ କାଏ କାଜି ତାଇନା, ମେନ୍ଦୋ ସବେନ୍ ଜିନିଷ୍‍କୋ ସାମାନ୍ ହାର୍ ସବେନ୍ କୋ ନାଙ୍ଗ୍ ତାଇକେନା। କୁଲାକାନ୍ ଚେଲା କୋ ବେଶେ ପେଡ଼େଏ ତେ ପ୍ରାଭୁ ୟୀଶୁ ଆଃ ଜୀବିନିରିଦ୍ ରାଃ ଗୋୱା ଏମ୍ ତାଇକେନାକୋ ହାର୍ ଏନ୍ ସବେନ୍ କୋୱାଃ ରେ ଥିମ୍ବାଗି ଆନୁଗ୍ରାହ୍ ତାଇକେନା। ଇନ୍‍କୁ ଏତେ ଜେତାଏ ହଗି ଗାରିବ୍ କାଏ ତାଇକେନାଏ; ଚିୟାଃଚି ଅକେୟାଃ ତାଃ ଅତେ ୟାଦୋ ଅଡ଼୍ଆଃ ତାଇକେନା, ଇନ୍‍କୁ ଏନାକୋକେ ଆଖ୍ରିଙ୍ଗ୍ କେତେ, ଏନ୍ ଜିନିଷ୍‍କୋ ରାଃ ଗୋନୋଙ୍ଗ୍ କେ ଆଉ ତାଇକେନାକୋ ହାର୍ ଏନାକେ କୁଲାକାନ୍ ଚେଲା କୋୱାଃ କାଟା ତାଃରେ ମାଣ୍ଡାଅ ତାଇକେନାକୋ; ହାର୍ ଜେଲେକା ଅକେୟାଃ ଦାର୍‍କାର୍ ହୋବାଅଃ ତାଇନା, ଏନ୍‍ଲେକା ସବେନ୍ କୋ ହାଟିଙ୍ଗ୍ଅଃ ତାଇକେନାକୋ। ଯୋଶେଫ୍ ନୁତୁମ୍ ସାଇପ୍ରାସ୍ ଟାପୁ ରେନ୍ ମିୟାଃ ଲେବୀ କିଲି ରେନ୍ ହୋଡ଼ ତାଇକେନାଏ, ଅକନିଜାଃ ନୁତୁମ୍ ବାର୍ନାବାସ୍ (ମାନେ ଶାନ୍ତି ରାଃ ହୋନ୍) କୁଲାକାନ୍ ଚେଲା କୋ ମାଣ୍ଡାଅ ଲେଦାକୋ। ଇନିଜାଃ ମିୟାଃ ଅତେ ତାଇକେନା, ଅକନାଃକେ ଇନିଃ ଆଖ୍ରିଙ୍ଗ୍ କେଦାଏ, ହାର୍ ଗୋନୋଙ୍ଗ୍ ଟାକା କେ ଆଉକେତେ କୁଲାକାନ୍ ଚେଲା କୋୱାଃ କାଟା ତାଃରେ ମାଣ୍ଡାଅ କେଦାଏ। ହାନାନ୍ୟାହ୍ ନୁତୁମ୍ ମିୟାଃ ହୋଡ଼, ହାର୍ ଇନିଜାଃ କୁଡ଼ି ସାଫିରା ଆକୋୱାଃ ଅତେ କୋଏତେ ହୁଡିଙ୍ଗ୍ ଆଖ୍ରିଙ୍ଗ୍ କେଦାକିନ୍। ହାର୍ ଏନାରାଃ ଗୋନୋଙ୍ଗ୍ ଏତେ ଇନିଃ ଆୟାଃ ନାଙ୍ଗ୍ ହୁଡିଙ୍ଗ୍ ମାଣ୍ଡାଅ କେଦାଏ, ହାର୍ ନେ ବାକାଣ୍ ଇନିଜାଃ କୁଡ଼ିକିନ୍ ହ ସାରି ତାଇକେନାକିନ୍, ହାର୍ ଏନାରାଃ ଏଟାଃ ଭାଗ୍ ଆଉକେତେ କୁଲାକାନ୍ ଚେଲା କୋୱାଃ କାଟା ଆୟୁର୍ ମାଣ୍ଡାଅ କେଦାଏ। ଏନ୍ତେ ପାତ୍ରାସ୍ କାଜିକେଦାଏ, “ହେ ହାନାନ୍ୟାହ୍! ଶାଏତାନ୍ ଆମାଃ ମୋନ୍ ରେ ନେ ବାକାଣ୍ ଚିନାଃ ମେନ୍ତେ ଫେରେଃ କେଦାଏ ଚି ଆମ୍ ପାବିତାର୍ ଆତ୍ମା କେ ଲୋଗୋୟାମ୍, ହାର୍ ଅତେ ରାଃ ଗୋନୋଙ୍ଗ୍ ଏତେ ହୁଡିଙ୍ଗ୍ ମାଣ୍ଡାଅ କେୟାମ୍? ଚିମିନ୍ ଜାକେଦ୍ ଏନା ଆମାଃ ତାଃ ତାଇକେନା, ଚିନାଃ ଆମାଃ କା ତାଇକେନା? ହାର୍ ଚିମ୍ତା ଆଖ୍ରିଙ୍ଗ୍ ଜାନା ଚିନାଃ ଆମାଃ ଆଧିକାର୍ ରେ କା ତାଇକେନା? ଆମ୍ ନେ ବାକାଣ୍ ଆମାଃ ମୋନ୍ ରେ ଚିନାଃ ମେନ୍ତେ ପାହୋମ୍ କେଦାମ୍? ଆମ୍ ହୋଡ଼ୋକୋକେ କାହା, ମେନ୍ଦୋ ପାର୍ମେଶ୍ଵାର୍ କେ ଲୋଗୋ କିଜାମ୍।” ନେ ବାକାଣ୍ ଆୟୁମ୍ ତୋର୍ଷା ଗି ହାନାନ୍ୟାହ୍ ଅତେ ରେ ଉୟୁଃଜାନାଏ ହାର୍ ଗୋଏଃ ଜାନାଏ, ଏନ୍ତେ ସବେନ୍ ଆୟୁମ୍‍ତାନ୍ କୋରେ ବେଶେ ବୋରୋ ବୋଲୋଜାନା। ଏନ୍ତେ ଜାୱାନ୍ କୋଡ଼ାକୋ ବିରିଃ କେତେ ମାଣା କେ ପୁଣ୍ଡୀ ଲିଜାଃ ତେ ପିଟୁଲି କେଦାକୋ ହାର୍ ବାହାରି ଇଦିକେତେ ତୋପା କିଜାକୋ। ଲାଗ୍-ଭାଗ୍ ତିନ୍ ଘାଣ୍ଟା ରାଃ ତାୟୋମ୍ତେ ଇନିଜାଃ କୁଡ଼ି, ଅକନାଃକୋ ହୋବାଲେନା କାସାରିକେତେ, ଭିତାର୍ ବୋଲୋ ଜାନାଏ। ଏନ୍ତେ ପାତ୍ରାସ୍ ଆଏଃକେ କୁଲିକିଜାଏ, “ଇଙ୍ଗ୍‍କେ ଉଦୁବିଙ୍ଗ୍ ମେ ଚିନାଃ ଆପେ ଏନ୍ ଅତେ କେ ନିମିନାଙ୍ଗ୍ ରେଗି ଆଖ୍ରିଙ୍ଗ୍ ଲେଦାପେ?” ଇନିଃ କାଜି କେଦାଏ, “ହାଁ, ନିମିନାଙ୍ଗ୍ ରେଗି।” ପାତ୍ରାସ୍ ଇନିଃକେ କାଜିକେଦାଏ, “ନେୟା ଚିକାନ୍ କାଜି, ଆବେନ୍ ବାରାନ୍ କିନ୍ ପ୍ରାଭୁ ଆଃ ଆତ୍ମା କେ ପାରୀକ୍ଷା ଲାଗିନ୍ ମିଃ ରେ ରାଜି ଜାନାପେ? ନେଲେମ୍, ଆମାଃ କଡ଼ା କେ ତୋପାକେନ୍ କୋ ଦୁହାର୍ ରେଗି ତିଙ୍ଗୁ କାନାକୋ, ହାର୍ ଆମ୍‍କେ ହଗି ବାହାରି ଇଦି କେମେୟାକୋ।” ହାର୍ ଇନିଃ ଇମ୍ତାଗି ଇନିଜାଃ କାଟା ତାଃ ଅତେ ରେ ଉୟୁଃଜାନାଏ, ହାର୍ ଗୋଏଃ ଜାନାଏ; ଏନ୍ତେ ଜାୱାନ୍ କୋଡ଼ାକୋ ଭିତାର୍ ହିଜୁଃକେତେ ଇନିଃକେ ଗୋଜାକାନ୍ ନାମ୍ କିଜାକୋ, ହାର୍ ବାହାରି ଇଦିକେତେ ଆଜାଃ କଡ଼ା ଗାଃ ନାଡ଼େଏ ରେ ତୋପା କିଜାକୋ। ୟୀରୁଶାଲେମ୍ ରେନ୍ ସବେନ୍ କାଲିସିୟା କୋରେ ହାର୍ ନେ ବାକାଣ୍ ଆୟୁମ୍‍କେନ୍ ସବେନ୍ କୋୱାଃ ରେ ମାରାଙ୍ଗ୍ ବୋରୋ ଭିନାଅ ଜାନା। କୁଲାକାନ୍ ଚେଲା କୋୱାଃ ତିଈ ତେ ଥିମ୍ବାଗି ଚିହ୍ନା ଆଡୋଃ ଆକ୍‍ଦାନ୍ଦା କାମି ହୋଡ଼ୋକୋୱାଃ ଥାଲା ରେ ହୋବାଅଃ ତାଇକେନା, ହାର୍ ସବେନ୍ ବିଶ୍ଵାସୀକୋ ମିଃ ମୋନ୍ ହୋବା କେତେ ସୁଲେମାନ୍ ରାଃ ପିଣ୍ଡିଗି ରେ ହୁଣ୍ଡିଅଃ ତାଇକେନାକୋ। ମେନ୍ଦୋ ଏଟାଃ କୋଏତେ ଅକଏ କେହ ନେ ସାହାସ୍ କା ହୋବାଅଃ ତାଇକେନା ଚି ଇନ୍‍କୁ ଲୋଃ ମେଶା ୱାକୋ; ଏଣ୍ଡେ ରେ ହଗି ହୋଡ଼ୋକୋ ଇନ୍‍କୁକେ ଥିମ୍ବାଗି ମାଇନ୍ ତାଇକେନାକୋ। ବିଶ୍ଵାସ୍ ତାନ୍ ଥିମ୍ବାଗି କଡ଼ାକୋ ହାର୍ କୁଡ଼ିକୋ ପ୍ରାଭୁ ଆଃ କାଲିସିୟା ରେ ଥିମ୍ବା ସାଂଖ୍ୟା ରେ ମେଶା ଇଦିଅଃ ତାଇକେନାକୋ। ନେତାଃ ସାନ୍ ଚି ହୋଡ଼ୋକୋ ବିମାରୀ କୋକେ ସାଣ୍ଡାକ୍ ରେ ଆଉ-ଆଉକେତେ, ପାର୍କୋମ୍ କୋରେ ହାର୍ ଜାଟି କୋରେ ଗିତିଃ କୋ ତାଇକେନାକୋ ଏନାତେ ଚିମ୍ତା ପାତ୍ରାସ୍ ହିଜୁଃ ୱାଏ, ଏଣ୍ଡେ ଇନିଜାଃ ଉମ୍ବୁଲ୍ ଗି ଇନ୍‍କୁ ଏତେ ଜାହେଁୟାଃ ରେ ଉମ୍ବୁଲ୍ କୋଃକା। ୟୀରୁଶାଲେମ୍ ସାହାର୍ ରାଃ ନାଡ଼େଏ ଜାପାଃ ହାତୁ କୋତେ ହ ଥିମ୍ବାଗି ହୋଡ଼ୋକୋ ବିମାରୀକୋକେ ହାର୍ ବୋଙ୍ଗାଆତ୍ମା ତେ ଏସେର୍ କାନ୍ କୋକେ ଆଉ-ଆଉକେତେ, ହୁଣ୍ଡିଅଃ ତାଇକେନାକୋ, ହାର୍ ସବେନ୍ କୋ ବେଶୋଃ ତାଇକେନାକୋ। ଏନ୍ତେ ମାରାଙ୍ଗ୍ ୟାଜାକ୍ ହାର୍ ସବେନ୍ ୟାହୁଦୀ ଗୁରୁକୋ ଅକନ୍‍କୋ ସାଦୁକୀ କାଜିୟୋଃ ତାଇକେନାକୋ, ଖିସ୍ ତେ ଫେରେଃ ଜାନାକୋ। ହାର୍ କୁଲାକାନ୍ ଚେଲା କୋକେ ସାବ୍‍କେତେ ବାନ୍ଦିଅଡ଼୍ଆଃ ରେ ଆଦେର୍ ତାଃ କୋୱାକୋ। ମେନ୍ଦୋ ନିଦା ଇମ୍ତା ପ୍ରାଭୁ ଆଃ ମିୟାଃ ସିର୍ମାଦାସୀ ବାନ୍ଦିଅଡ଼୍ଆଃ କେ ଖଲାଅ କେତେ ଇନ୍‍କୁକେ ବାହାରି ତେ ଅଡୋଙ୍ଗ୍ କେତେ କାଜିକେଦାଏ, “ସେନୋଃପେ, ମାନ୍ଦିର୍ ରାଃ ରାଚା ରେ ତିଙ୍ଗୁ କେତେ, ହୋଡ଼ୋକୋକେ ନେ ନାୱା କାଟୁଣ୍ଡୁ ଜୀଦାନ୍ ରାଃ ବାଚାନ୍ କୋକେ ଉଦୁବ୍ କୋପେ।” ଇନ୍‍କୁ ନେୟା ଆୟୁମ୍‍କେତେ ସେତାଃ ଇଦାନ୍ ଲୋଃଗି ମାନ୍ଦିର୍ ରାଃ ରାଚା ରେ ସେନ୍‍କେତେ ଉପ୍‍ଦେଶ୍ ଏମ୍ ଏଟେଃ କେଦାକୋ। ଇମ୍ତା ମାରାଙ୍ଗ୍ ୟାଜାକ୍ ହାର୍ ଇନିଜାଃ ଲୋଃ ତାଇକେନ୍ ହୋଡ଼ୋକୋ ହିଜୁଃକେତେ ମାରାଙ୍ଗ୍‍ସାଭା କେ ହାର୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋୱାଃ ସବେନ୍ ମାରିହୋଡ଼ୋକୋକେ ହୁଣ୍ଡି କେଃକୋୱାକୋ, ହାର୍ ବାନ୍ଦିଅଡ଼୍ଆଃ ରେ କାଜିକୁଲ୍ କେଦାକୋ ଚି ଇନ୍‍କୁକେ ଆଉୱେକାକୋ। ମେନ୍ଦୋ ସିପାହୀ କୋ ହେନ୍ତାଃ ସେଟେର୍ କେତେ ଇନ୍‍କୁକେ ବାନ୍ଦିଅଡ଼୍ଆଃ ରେ କାକୋ ନାମ୍ କେଦା, ହାର୍ ରୁଆଡ଼୍ କେତେ କାଜିକେଦାକୋ, “ଆଲେ ବାନ୍ଦିଅଡ଼୍ଆଃ କେ ପୁରାଃଗି ପୋକ୍ତା ତେ ବାନ୍ଦ୍ କାନ୍, ହାର୍ ହୋରୋତାନ୍ କୋକେ ବାହାରି ଦୁହାର୍ ତାଃ ତିଙ୍ଗୁୱାକାନ୍ ନାମ୍ କେଃକୋୱାଲେ; ମେନ୍ଦୋ ଚିମ୍ତା ଖଲାଅ କେଦାଲେ, ଏଣ୍ଡେ ଭିତାର୍ ରେ ଜେତାଏ କେ କାଲେ ନାମ୍ କେଦାଲେ।” ଚିମ୍ତା ମାନ୍ଦିର୍ କେ ହୋରୋତାନ୍ ସିପାହୀ କୋୱାଃ ଗୋମ୍‍କେ ହାର୍ ପ୍ରାଧାନ୍ ୟାଜାକ୍‍କୋ ନେ ବାକାଣ୍ ଆୟୁମ୍ କେଦାକୋ, ଏଣ୍ଡେ ଇନ୍‍କୁୱାଃ ବିଷାୟ୍ ରେ ଥିମ୍ବାଗି ଆକ୍‍ବାକାଅ ଜାନାକୋ ଚି ନେୟା ତେ ଆୟୁର୍ ଆଡୋଃ ଚିନାଃ ହୋବାଅଃୱା! ଇମ୍ତାଙ୍ଗ୍ ମିହୋଡ଼୍ ହିଜୁଃକେତେ ଇନ୍‍କୁକେ ଉଦୁବ୍ କେଃକୋୱାଏ, “ନେଲେପେ, ଅକନ୍ କୋକେ ଆପେ ବାନ୍ଦିଅଡ଼୍ଆଃ ରେ ବାନ୍ଦ୍ ଲେଃ କୋୱାପେ, ଏନ୍ ହୋଡ଼ୋକୋ ମାନ୍ଦିର୍ ରାଃ ରାଚା ରେ ତିଙ୍ଗୁ କେତେ ଉପ୍‍ଦେଶ୍ ଏମ୍ ତାନାକୋ।” ଏଣ୍ଡେ ସିପାହୀ କୋୱାଃ ଗୋମ୍‍କେ, ସିପାହୀ କୋଲୋଃ ମିଃତେ ସେନ୍‍କେତେ, ଇନ୍‍କୁକେ ଆଉକେଦାକୋ, ମେନ୍ଦୋ ଜାବାରାନ୍ କାହା, ଚିୟାଃଚି ଇନ୍‍କୁ ହୋଡ଼ୋକୋକେ ବୋରୋ ତାଇକେନାକୋ ଚି ଆଲେକେ ଦିରି ତେ ଦୋ କାକୋ ଥେରେୟା। ହିନ୍‍‍କୁ ଇନ୍‍କୁକେ ଆଉକେତେ ମାରାଙ୍ଗ୍‍ସାଭା ନାଡ଼େଏ ରେ ତିଙ୍ଗୁ କେଃକୋୱାକୋ; ଏନ୍ତେ ମାରାଙ୍ଗ୍ ୟାଜାକ୍ ଇନ୍‍କୁକେ କୁଲିକେଃକୋୱାଏ, “ଚିନାଃ ଆଲେ ଆପେକେ ଚେତାୱନୀ କାଲେ ଏମ୍ ଲେଦା ଚି, ଆପେ ନେ ନୁତୁମ୍ ତେ ଉପ୍‍ଦେଶ୍ ଆଲୋପେ ଏମେୟା? ଏଣ୍ଡେ ହ ନେଲେପେ, ଆପେ ପୁରା ୟୀରୁଶାଲେମ୍ ରେ ତାଇନ୍ ତାନ୍ କୋକେ ଆପେୟାଃ ଉପ୍‍ଦେଶ୍ ତେ ଫେରେଃ କେଃକୋୱାପେ ହାର୍ ଏନ୍ ହୋଡ଼ ଆଃ ମାୟୋମ୍ ଆଲେୟାଃ ରେ ଠୋଅ ରିକା ସାନାଙ୍ଗ୍ ତାନାପେ।” ଇମ୍ତା ପାତ୍ରାସ୍ ହାର୍ ଏଟାଃ କୁଲାକାନ୍ ଚେଲା କୋ କାଜିରୁଆଡ଼୍ କେଦାକୋ, “ହୋଡ଼ୋ କୋୱାଃ ଆନାଚୁ ଏତେ ମାରାଙ୍ଗ୍ ପାର୍ମେଶ୍ଵାର୍ ରାଃ ଆନାଚୁ ମାନାତିଙ୍ଗ୍ ଗି ଆଲେୟାଃ କାମି ତାନାଃ। ଆଲେୟାଃ ଆପୁ-ତାତା କୋୱାଃ ପାର୍ମେଶ୍ଵାର୍ ଗି ୟୀଶୁ କେ ଜୀହିଃ ବିରିଃ କିଜାଏ, ଅକନିଃକେ ଆପେ କ୍ରୁଶ୍ ରେ ଡୁଙ୍ଗା କେତେ ଗୋଏଃ ଲିଜାପେ। ଇନିଃକେଗି ପାର୍ମେଶ୍ଵାର୍ ପ୍ରାଭୁ ହାର୍ ବାଞ୍ଚାଅନିଃ ବାଇକେତେ, ଆଜାଃ ଜୋମ୍ ତିଈ ତେ ଉଠାଓକିଜାଏ, ଏନାତେ ଇନିଃ ଇସ୍ରାଏଲୀ ହୋଡ଼ୋକୋକେ ପାପ୍ କାମି ବାଗେ ରାଃ ପେଡ଼େଏ ହାର୍ ପାପ୍ କୋରାଃ ଛାମା ଏମେୟାଏ। ଆଲେ ନେ କାଜି କୋରାଃ ଗୋୱା ତାନ୍‍ଲେ, ହାର୍ ଏନ୍ ଲେକାଗି ପାବିତାର୍ ଆତ୍ମା ହଗି, ଅକନିଃକେ ପାର୍ମେଶ୍ଵାର୍ ଇନ୍‍କୁକେ ଏମାଃ କୋୱାଏ ଅକଏ ଇନିଜାଃ ଆନାଚୁ ମାନାତିଙ୍ଗ୍ ୟାକୋ।” ନେୟା ଆୟୁମ୍‍କେତେ ଇନ୍‍କୁ ବେଶେ ଖିସ୍ ଜାନାକୋ, ହାର୍ ଇନ୍‍କୁକେ ଗୋଏଃ ଲାଗିନ୍ ସାନାଙ୍ଗ୍ କେନାକୋ। ମେନ୍ଦୋ ଗାମାଲିଏଲ୍ ନୁତୁମ୍ ମିହୋଡ଼୍ ଫାରିସୀ ହୋଡ଼ ଅକନିଃ ଆଇନ୍ ଗୁରୁ ହାର୍ ସବେନ୍ ହୋଡ଼ୋକୋ ରେ ମାଇନାନ୍ ତାଇକେନାଏ, ବିଚାର୍ ସାଭା ରେ ତିଙ୍ଗୁ କେତେ କୁଲାକାନ୍ ଚେଲା କୋକେ ହୁଡିଙ୍ଗ୍ ସାମାୟ୍ ଲାଗିନ୍ ବାହାରି ତେ ଅଡୋଙ୍ଗ୍ ଲାଗିନ୍ ଆନାଚୁ ଏମ୍‍କେଦାଏ। ଏନ୍ତେ ଇନିଃ କାଜିକେଦାଏ, “ହେ ଇସ୍ରାଏଲୀ ହୋଡ଼ୋକୋ, ଆପେ ଅକନାଃ କୋ ନେ ହୋଡ଼ୋକୋ ଲୋଃ ରିକା ନାଙ୍ଗ୍ ସାନାଙ୍ଗ୍ ତାନାପେ, ସୋଚାଅ ବୁଝାଅ କେତେ ରିକାୟାପେ। ଚିୟାଃଚି ନେ ସିଦା ହୁଲାଙ୍ଗ୍ କୋରେ ଥିୟୁଦାସ୍ ନେୟା କାଜିତାନ୍ ଲୋଃ ଅଡୋଙ୍ଗ୍ ଲେନାଏ, ଚି ଇଙ୍ଗ୍ ହ ଜାହାନାଃ ତାନିଙ୍ଗ୍: ହାର୍ ଚାଇର୍ ଶାଅ ଲେକା ହୋଡ଼ୋକୋ ଇନିଜାଃ ଲୋଃ ହୋବାଲେନାକୋ, ମେନ୍ଦୋ ଇନିଃ ବିଡ଼ାଗୋଏଃ ଜାନାଏ ହାର୍ ଚିମିନାଙ୍ଗ୍ କୋ ଇନିଃକେ ମାନାତିଙ୍ଗ୍ ତାଇକେନାକୋ, ସବେନ୍ ଛିତି-ଛାନ୍ ହୋବାଜାନାକୋ ହାର୍ ଆଃ ଜାନାକୋ। ଏନାରାଃ ତାୟୋମ୍ତେ ନୁତୁମ୍ ଅନୋଲ୍ ହୁଲାଙ୍ଗ୍ କୋରେ ଗାଲିଲୀ ଜିଲ୍ଲା ରେନ୍ ୟାହୁଦା ଅଡୋଙ୍ଗ୍ ଜାନାଏ, ଏନ୍ତେ ହୁଡିଙ୍ଗ୍ ହୋଡ଼ୋକୋ କେ ଆଜାଃ ପାଡ଼୍ ବାଇକେଃ କୋୱାଏ; ଇନିଜୋଗି ଛାବା ଜାନାଏ, ହାର୍ ଚିମିନାଙ୍ଗ୍ କୋ ଇନିଃକେ ମାନାତିଙ୍ଗ୍ ତାଇକେନାକୋ, ସବେନ୍ ଛିତି ଛାନ୍ ହୋବାଜାନାକୋ। ଏନାମେନ୍ତେ ଇଙ୍ଗ୍ ଆପେକେ କାଜିତାନିଙ୍ଗ୍, ନେ ହୋଡ଼ୋକୋ ଏତେ ସାଙ୍ଗିନ୍ ରେଗି ତାଇନ୍ ପେ ହାର୍ ଇନ୍‍କୁ ଲୋଃ ଜାହାନ୍ କାମି ଆଲୋପେ ମାଣ୍ଡାଅୟା; ଚିୟାଃଚି ଆଗାର୍ ନେ ଧାରାମ୍ ୟାଦୋ କାମି ହୋଡ଼ୋକୋ ପାଡ଼େତେ ତାନାଃ ରେଦୋ ମେଟାଅଃୱା; ମେନ୍ଦୋ ଆଗାର୍ ପାର୍ମେଶ୍ଵାର୍ ପାଡ଼େତେ ତାନାଃ; ଏଣ୍ଡେ ଆପେ ଇନ୍‍କୁକେ ଚିଉଲା ହ କାପେ ମେଟାଅ ଧାଡ଼ିୟା। ନେକା ଆଲୋକା ହୋବାଅଃକା ଚି ଆପେ ପାର୍ମେଶ୍ଵାର୍ ଲୋଃ ହ ଲାପ୍ଡ଼ାଇ ନିଈ ବାଇୟୋଃ ୱାପେ।” ଏନ୍ତେ ଇନ୍‍କୁ ଇନିଜାଃ କାଜି ମାନାତିଙ୍ଗ୍ ଜାନାକୋ; ଏନ୍ତେ କୁଲାକାନ୍ ଚେଲା କୋକେ କେଡ଼ାକେତେ ହୁମାଃ କେଃକୋୱାକୋ; ହାର୍ ନେ ଆନାଚୁ ଏମ୍ କେତେ ବାଗେ ତାଃ କୋୱାକୋ ଚି ୟୀଶୁ ରାଃ ନୁତୁମ୍ ରେ ଆଡୋଃ ଜାହାନ୍ କାଜି ଆଲୋପେ କାଜିୟା। କୁଲାକାନ୍ ଚେଲା ନେ କାଜିକୋ ଏତେ ରାଶିକା ହୋବା କେତେ ମାରାଙ୍ଗ୍‍ସାଭା ନାଡ଼େଏ ଏତେ ସେନୋଃ ଜାନାକୋ, ଚି ଆଲେ ଇନିଜାଃ ନୁତୁମ୍ ରେ ଆପ୍‍ମାନ୍ ନାମେ ଲେକାନ୍ ହୋଡ଼ ଦୋ ବାଇଜାନାଲେ। ଇନ୍‍କୁ ସବେନ୍ ହୁଲାଙ୍ଗ୍ ମାନ୍ଦିର୍ ରାଃ ରାଚା ରେ ହାର୍ ଅଡ଼୍ଆଃ-ଅଡ଼୍ଆଃ କୋରେ ଉପ୍‍ଦେଶ୍ ରିକା ରେ, ହାର୍ ନେ କାଜି ରାଃ ସୁସାମାଚାର୍ ଉଦୁବ୍ ରେ ଚି ୟୀଶୁ ଗି ମାସୀହ୍ ତାନିଃ କାକୋ ହୋକା ଜାନା। ଏନ୍ ହୁଲାଙ୍ଗ୍ କୋରେ ଚିମ୍ତାଙ୍ଗ୍ ଚେଲାକୋୱାଃ ସାଂଖ୍ୟା ଥିମ୍ବାଗି ବାଢ଼ାଅ ଇଦି ଜାନା, ଇମ୍ତାଙ୍ଗ୍ ୟୁନାନୀ ଭାଷା ବାକାଣ୍ ତାନ୍ ୟାହୁଦୀ ବିଶ୍ଵାସୀକୋ ଇବ୍ରାନୀ ଭାଷା ବାକାଣ୍ ତାନ୍ ୟାହୁଦୀ ବିଶ୍ଵାସୀକୋୱାଃ ରେ କୁର୍ବୁରାୱ ଜାନାକୋ, ଚି ସବେନ୍ ହୁଲାଙ୍ଗ୍ ରାଃ ସେୱା କାମି ରେ ଆଲେୟାଃ ବିଧୋବା କୋୱା ଯାତାନ୍ କା ଇଦିଅଃତାନା। ଏଣ୍ଡେ ଏନ୍ ବାରା ଝାନ୍ କୁଲାକାନ୍ ଚେଲାକୋ ୟୀରୁଶାଲେମ୍ ରେନ୍ ଏଟାଃ ବିଶ୍ଵାସୀ କୋୱାଃ ଝୁଣ୍ଡ୍ କେ ଆକୋୱାଃ ନାଡ଼େଏ କେଡ଼ାକେତେ କାଜିକେଦାକୋ, “ନେୟା ଠିକ୍ ନାହାଲା ଚି ଆବୁ ପାର୍ମେଶ୍ଵାର୍ ରାଃ ବାଚାନ୍ କେ ବାଗି କେତେ ଜୋମେୟାଃ ନୁୱେୟାଃ ସେୱା ରେବୁ ତାଇନା। ଏନାମେନ୍ତେ, ହେ ହାଗାକୋ, ଆପେୟାଃ ଏତେ ସାତ୍ ଝାନ୍ ବୁଗିନ୍ ହୋଡ଼ୋକୋକେ ଅକନ୍ କୋ ପାବିତାର୍ ଆତ୍ମା ହାର୍ ସେଣା ତେ ଫେରେଜାକାନ୍ ତାଇନାକୋ, ଇନ୍‍କୁ କେ ସାଲା କୋପେ, ଏନାତେ ଆଲେ ଇନ୍‍କୁକେ ନେ କାମି କେ ଜିମା ଏମାକୋୱାଲେ। ମେନ୍ଦୋ ଆଲେ ବିନ୍ତି ରେ ହାର୍ ବାଚାନ୍ ରାଃ ପାର୍ଚାର୍ ଏନ୍ତେ ଶିଖାଅ କାମି ରେ ଲାଗାଅ କାନୋଃୱାଲେ।” ନେ କାଜି ସବେନ୍ ବିଶ୍ଵାସୀ କୋକେ ବେଶ୍ ଆଦା କେଃକୋୱା, ହାର୍ ଇନ୍‍କୁ ସ୍ଥିଫାନୁସ୍ ନୁତୁମ୍ ମିୟାଃ କଡ଼ା କେ ଅକନିଃ ବିଶ୍ଵାସ୍ ହାର୍ ପାବିତାର୍ ଆତ୍ମା ତେ ଫେରେଜାକାନ୍ ତାଇକେନାଏ, ହାର୍ ଫିଲିପୁସ୍ ହାର୍ ପ୍ରୁଖୁରୁସ୍ ହାର୍ ନୀକାନୋର୍ ହାର୍ ତୀମୋନ୍ ହାର୍ ପାର୍ମିନାସ୍ ହାର୍ ଆନ୍ତାକିୟା ସାହାର୍ ରେନ୍ ନୀକୁଲାଉସ୍ କେ ଅକନିଃ ୟାହୁଦୀ ଧାରାମ୍ କେ ଗ୍ରାହାନ୍ ଲେଃ ତାଇକେନାଏ, ନିକୁକେ ସାଲା କେଃକୋୱାକୋ। ନିକୁକେ କୁଲାକାନ୍ ଚେଲା କୋୱାଃ ନାଡ଼େଏ ରେ ତିଙ୍ଗୁ କେଃକୋୱାକୋ ହାର୍ ଇନ୍‍କୁ ବିନ୍ତି କେତେ ଇନ୍‍କୁୱାଃ ଚେତାନ୍ ରେ ତିଈ ମାଣ୍ତାଅ କେଦାକୋ। ପାର୍ମେଶ୍ଵାର୍ ରାଃ ବାଚାନ୍ ପାସ୍ରାଅ ଇଦିଜାନା, ହାର୍ ୟୀରୁଶାଲେମ୍ ରେ ଚେଲା କୋୱାଃ ସାଂଖ୍ୟା ଥିମ୍ବାଗି ବାଢ଼ାଅ ଜାନା; ହାର୍ ଥିମ୍ବାଗି ୟାହୁଦୀ ୟାଜାକ୍ କୋ ନେ ବିଶ୍ଵାସ୍ କେ ୟୀଶୁ ମାସୀହ୍ ରେ ମାନାତିଙ୍ଗ୍ କେଦାକୋ। ସ୍ଥିଫାନୁସ୍ ଆନୁଗ୍ରାହ୍ ହାର୍ ପେଡ଼େଏ ତେ ଫେରେଃ କେତେ ହୋଡ଼ୋକୋ ରେ ମାପ୍‍ରାଙ୍ଗ୍-ମାପ୍‍ରାଙ୍ଗ୍ ଆକ୍‍ଦାନ୍ଦା କାମି ହାର୍ ଚିହ୍ନା କୋ ଦେଖାଅ ତାଇନାଏ। ଏନ୍ତେ ଏନ୍ ବିନ୍ତିଅଡ଼୍ଆଃ ଏତେ ଅକନାଃ ଲିବିରିନୀ କୋୱାଃ କାଜିୟୋଃ ତାଇନା, ଅକନ୍ କୋ କୁରେନୀ ସାହାର୍ ରେନ୍ ହାର୍ ଆଲେକ୍‍ଜାଣ୍ଡାରିୟା ସାହାର୍ ହାର୍ କିଲିକିୟା ହାର୍ ଆସିୟା ରାଇଜ୍ ରେନ୍ ହୋଡ଼ୋ କୋଏତେ ଚିମିନାଙ୍ଗ୍ ହିଜୁଃ କେତେ ସ୍ଥିଫାନୁସ୍ କେ କୁଲିକାପାଜି କିଜାକୋ। ମେନ୍ଦୋ ଏନ୍ ସେଣା ହାର୍ ଏନ୍ ଆତ୍ମା ରାଃ ଅକନାଃଏତେ ଇନିଃ ବାକାଣ୍ ତାଇନାଏ, ଇନ୍‍କୁ କାଜି ରେ ହାରାଅ କାକୋ ଧାଡ଼ିଜାନା। ନେୟା ରେ ଇନ୍‍କୁ ଚିମିନାଙ୍ଗ୍ ହୋଡ଼ୋକୋକେ ଉସ୍କୁର୍ କେଃକୋୱାକୋ ଅକନ୍ କୋ କାଜି ଏଟେଃ କେଦାକୋ, “ଆଲେ ନିଃକେ ମୁଶା ରାଃ ହାର୍ ପାର୍ମେଶ୍ଵାର୍ ରାଃ ବିରୋଧ୍ ରେ ନିନ୍ଦାତାନ୍ ଆୟୁମ୍ କେଦାଲେ।” ଏନ୍ତେ ହୋଡ଼ୋକୋକେ ହାର୍ ମାରିହୋଡ଼ୋକୋକେ ହାର୍ ଆଇନ୍ ଗୁରୁ କୋକେ ଉସ୍କୁର୍ କେତେ ହିଜୁଃ ଜାନାକୋ ହାର୍ ଇନିଃକେ ସାବ୍ କେତେ ମାରାଙ୍ଗ୍‍ସାଭା ରେ ଆଉକିଜାକୋ। ହାର୍ ଝୁଠା ଗୋୱା ତିଙ୍ଗୁ କେଦାକୋ, ଅକନ୍ କୋ କାଜିକେଦାକୋ, “ନେ ହୋଡ଼ ନେ ପାବିତାର୍ ଜାଗା ହାର୍ ମୁଶା ନାବୀ ରାଃ ଆଇନ୍ ରାଃ ବିରୋଧ୍ ରେ କାଜି କାଏ ବାଗିତାନାଏ। ଚିୟାଃଚି ନିଈକେ ଆଲେ ନେୟା କାଜିତାନ୍ ଆୟୁମ୍ କେଦାଲେ ଚି ନେ ୟୀଶୁ ନାଜ୍ରେଥିୟା ଗି ନେ ଜାଗା କେ ଧାଶାଅ ତାଆଏ, ହାର୍ ଏନ୍ ନିୟାମ୍ କୋକେ ବାଦ୍‍ଲାଅ ତାଆଏ ଅକନାଃ ମୁଶା ନାବୀ ଆଲେକେ ଜିମାକାଃ ଲେୟାଏ।” ଏନ୍ତେ ସବେନ୍ ହୋଡ଼ୋକୋ ଅକନ୍‍କୋ ମାରାଙ୍ଗ୍‍ସାଭା ରେ ଦୁବ୍‍ଲେନ୍ ତାଇକେନାକୋ, ଇନିଃକେ ନେଲ୍ କିଜାକୋ ଇମ୍ତା ଇନିଜାଃ ମେଏଃମୁହାଡ଼୍ ସିର୍ମାଦାସୀ ଲେକା ନେଲ୍ ଜାନା। ଏନ୍ତେ ମାରାଙ୍ଗ୍ ୟାଜାକ୍ ସ୍ଥିଫାନୁସ୍ କେ କୁଲିକିଜାଏ, “ଚିନାଃ ନେ ଦୋଷ୍ କାଜିକୋ ସାର୍ତେଗୀ ତାନାଃ?” ଏନ୍ତେ ଇନିଃ କାଜିକେଦାଏ, “ହେ ହାଗାକୋ, ହାର୍ ଆପୁକୋ ଆୟୁମ୍ ଏପେ। ଆବୁୱାଃ ଆପୁ ଆବ୍ରାହାମ୍ ହାରାନ୍ ହାତୁ ରେ ତାଇନୋଃ ସିଦାରେ ଚିମ୍ତାଙ୍ଗ୍ ମେସୋପୋଟାମିୟା ଜାଗା ରେ ତାଇନ୍ ତାଇନାଏ, ଏନ୍ତାଃ ଯୁନୁଲାନ୍ ପାର୍ମେଶ୍ଵାର୍ ଇନିଃକେ ନେଲ୍ ଜାନାଏ, ହାର୍ ଇନିଃକେ କାଜିକିଜାଏ, ‘ଆମ୍ ଆମାଃ ଦିଶୁମ୍ ହାର୍ ଆମାଃ କୁଟୁମ୍ବ ଏତେ ଅଡୋଙ୍ଗ୍ କେତେ ଏନ୍ ଦିଶୁମ୍ ତେ ସେନୋଃମେ, ଅକନାଃ ଇଙ୍ଗ୍ ଆମ୍‍କେ ଦେଖାଅ ମେଇଙ୍ଗ୍।’ ଏନ୍ତେ ଇନିଃ କାସଦିକୋୱାଃ ଜାଗା ଏତେ ଅଡୋଙ୍ଗ୍ କେତେ ହାରାନ୍ ହାତୁ ରେ ଡେରା କେଦାଏ। ହାର୍ ଇନିଜାଃ ଆପୁ ଆଃ ଗୋନୋଏଃ ତାୟୋମ୍ତେ ପାର୍ମେଶ୍ଵାର୍ ଇନିଃକେ ଏନ୍ତାଃ ଏତେ ନେ ଜାଗା ରେ ଆଉକେତେ ତାଇ ରିକାକିଜାଏ ଅକଣ୍ଡେରେ ନାଆ ଆପେ ତାଇନ୍ ତାନାପେ। ଏନ୍ ସାମାୟ୍ ଇନିଃକେ ଖାଣ୍ଡା ଅତେ ମିଃ ଚାଣ୍ଡାଙ୍ଗ୍ କାଟା ମାଣ୍ଡାଅ ଇମିନ୍ ହଗି ଏଣ୍ଡେରେ ଜାଗା କାଏ ଏମାଇଜା। ଏନ୍ ସାମାୟ୍ ରେ ଇନିଜାଃ ଜେତାଏ ହୋନ୍ ହଗି କାକୋ ତାଇନ୍ କେନା ଏନ୍ ରେ ହଗି, ଇନିଃ କିରିୟା ଏମାଇଯାଏ ଚି ଇଙ୍ଗ୍ ନେ ଦିଶୁମ୍ ଆମାଃ ହାର୍ ଆମାଃ ତାୟୋମ୍ ଆମାଃ ବାଂଶ୍ କୋୱାଃ ତିଈ ରେ ଜିମା ତାଃଇଙ୍ଗ୍। ହାର୍ ପାର୍ମେଶ୍ଵାର୍ ନେକା କାଜିକିଜାଏ, ‘ଆମାଃ ସାନ୍ତାନ୍ ରେନ୍ ହୋଡ଼ୋକୋ ଏଟାଃ ଦିଶୁମ୍ ରେ ପାର୍ଦେଶୀ ତାଇନାକୋ, ହାର୍ ହିନ୍‍କୁ ଇନ୍‍କୁକେ ଦାସୀ ବାଇକୋୱାକୋ ହାର୍ ଚାଇର୍ ଶାଅ ବାରାଶ୍ ସାନ୍ ଦୁକୁ ଏମାକୋୱାକୋ।’ ଏନ୍ତେ ପାର୍ମେଶ୍ଵାର୍ କାଜିକେଦାଏ, ‘ଅକନ୍ ଜାତି ରେନ୍ ହୋଡ଼ୋକୋୱାଃ ଇନ୍‍କୁ ଦାସୀ ହୋବାୱାକୋ, ଇନ୍‍କୁକେ ଇଙ୍ଗ୍ ଶାଜାଇ ଏମାକୋୱାଇଙ୍ଗ୍, ହାର୍ ଏନା ରାଃ ତାୟୋମ୍ତେ ଇନ୍‍କୁ ଏନ୍ ଦିଶୁମ୍ ଏତେ ଅଡୋଙ୍ଗ୍ କେତେ ନେ ଦିଶୁମ୍ ରେଗି ଇଙ୍ଗ୍ଆଃ ସେୱା ରିକା ୟାକୋ।’ ହାର୍ ପାର୍ମେଶ୍ଵାର୍ ଆବ୍ରାହାମ୍ ଲୋଃ ଖାତ୍ନା ରାଃ ନିୟାମ୍‍ଥଲ୍ କେଦାଏ; ହାର୍ ଏନ୍ ନିୟାମ୍ ଲେକାତେ ଗି ଇସାହାକ୍ ଇନିଜେତେ ଜାନାମ୍ ଜାନାଏ ହାର୍ ଆଠ୍ ଦିନ୍ ରେ ଇନିଜାଃ ଖାତ୍ନା ରିକାଜାନା; ହାର୍ ଇସାହାକ୍ ଏତେ ୟାକୁବ୍ ହାର୍ ୟାକୁବ୍ ଏତେ ବାରା ପୁର୍ଖା ହାଡ଼ାମ୍ କୋ ଜାନାମ୍ ଜାନାକୋ।” “ପୁର୍ଖା ହାଡ଼ାମ୍ କୋ ଆକୋୱାଃ ହାଗା ଯୋଶେଫ୍ କେ ହିସିଙ୍ଗା କେତେ ଇନିଃକେ ମିଶାର୍ ଦିଶୁମ୍ ସେନ୍ ତାନ୍ କୋତାଃ ଆଖ୍ରିଙ୍ଗ୍ ତାଜାକୋ। ମେନ୍ଦୋ ପାର୍ମେଶ୍ଵାର୍ ଇନିଜାଃ ଲୋଃ ତାଇକେନାଏ। ହାର୍ ଇନିଃକେ ଇନିଜାଃ ସବେନ୍ ଦୁକୁକୋଏତେ ବାଞ୍ଚାଅ କେତେ ମିଶାର୍ ଦିଶୁମ୍ ରେନ୍ ରାଜା ଫିରୋନ୍ ରାଃ ନେପେଲ୍ ରେ ଆନୁଗ୍ରାହ୍ ହାର୍ ବୁଦ୍ଧି ଏମାଇଜାଏ, ହାର୍ ଇନିଃ-ଇନିଃକେ ମିଶାର୍ ଦିଶୁମ୍ ରେ ହାର୍ ଆଜାଃ ସବେନ୍ ଅଡ଼୍ଆଃ ଚେତାନ୍ ରେ ହାକିମ୍ ସାଲା କିଜାଏ। ଇମ୍ତା ମିଶାର୍ ଦିଶୁମ୍ ହାର୍ କାନାନ୍ ରାଃ ସବେନ୍ ଦିଶୁମ୍ ରେ ଆକାଲ୍ ହୋବାଜାନା, ଏନାତେ ଥିମ୍ବାଗି ଦୁକୁ ହୋବାଜାନା, ହାର୍ ଆବୁୱାଃ ଆପୁ ହାଡ଼ାମ୍ କୋକେ ଜୋମେୟାଃ କାନାମୋଃ ତାଇନା। ମେନ୍ଦୋ ୟାକୁବ୍ ନେୟା ଆୟୁମ୍ କେଦାଏ ଚି ମିଶାର୍ ଦିଶୁମ୍ ରେ ଜୋମେୟାଃ ମେନାଃ, ଆବୁୱାଃ ଆପୁ ହାଡ଼ାମ୍ କୋକେ ପାହିଲା ବେର୍ କୁଲ୍ କେଃକୋୱାଏ। ହାର୍ ଏଟାଃ ମିଶା ରେ ଯୋଶେଫ୍ ଆଏଃ ଆପାନ୍ କେ ଆଜାଃ ହାଗାକୋୱାଃ ଥାଲା ରେ ଉଦୁବ୍ ଜାନାଏ ହାର୍ ଯୋଶେଫ୍ ରାଃ ଅଡ଼୍ଆଃ ରେନ୍ କୋକେ ଫିରୋନ୍ ସାରି କେଦାଏ। ଏନ୍ତେ ଯୋଶେଫ୍ ଆଜାଃ ଆପୁ ୟାକୁବ୍ ହାର୍ ଆଜାଃ ସବେନ୍ ଅଡ଼୍ଆଃ ରେନ୍ କୋକେ, ଅକନ୍‍କୋ ଆପି ହିଶି ପାନ୍ଦ୍ରା ହୋଡ଼ୋକୋ ତାଇନ୍ କେନାକୋ, କେଡ଼ା କେଃକୋୱାଏ। ଏନ୍ତେ ୟାକୁବ୍ ମିଶାର୍ ଦିଶୁମ୍ ତେ ସେନୋଃ ଜାନାଏ; ହାର୍ ଏନ୍ତାଃରେ ଇନିଃ ହାର୍ ଆବୁୱାଃ ଆପୁ ହାଡ଼ାମ୍ କୋ ଗୋଏଃ ଜାନାକୋ। ଇନ୍‍କୁୱାଃ ମାଣା କେ ଶେକେମ୍ ସାହାର୍ ଇଦିଜାନା ହାର୍ ଏନ୍ କାବାର୍ ରେ ମାଣ୍ଡାଅନା, ଅକନାଃ କେ ଆବ୍ରାହାମ୍ ଚିମିନ୍ ଟାକା ଏମ୍ କେତେ ଶେକେମ୍ ସାହାର୍ ରେ ହାମାର୍ ରାଃ ହୋନ୍ କୋଏତେ କିରିଙ୍ଗ୍ ଲେଦାଏ।” “ମେନ୍ଦୋ ଚିମ୍ତାଙ୍ଗ୍ ଏନ୍ କିରିୟା ପୁରାଅଃ ରାଃ ସାମାୟ୍ ନାଡ଼େଏ ହିଜୁଃ ଲେନା ଅକନାଃ ପାର୍ମେଶ୍ଵାର୍ ଆବ୍ରାହାମ୍ ଲୋଃ ରିକା ଲେଦାଏ, ଇମ୍ତା ମିଶାର୍ ଦିଶୁମ୍ ରେ ଆବୁୱାଃ ହୋଡ଼ୋକୋ ହାରା ଇଦି ଜାନାକୋ, ହାର୍ ଥିମ୍ବାଗି ହୋବାଜାନାକୋ। ଇମ୍ତାଙ୍ଗ୍ ମିଶାର୍ ଦିଶୁମ୍ ରେ ଏଟାଃ ରାଜା ହୋବାଜାନାଏ ଅକନିଃ ଯୋଶେଫ୍ କେ କାଏ ସାରି ତାଇନାଏ। ଇନିଃ ଆବୁୱାଃ ହୋଡ଼ୋକୋ ଏତେ ହୁସିଆର୍ କାମି କେତେ ଆବୁୱାଃ ଆପୁ ହୋଡ଼ୋକୋ ଲୋଃ ନେତାଃ ସାନ୍ତେ ଖାରାପ୍ ବେଓହାର୍ କେଦାଏ, ଚି ଇନ୍‍କୁକେ ଆକୋୱାଃ ବାଲେଃ ହୋନ୍‍କଡ଼ା କୋକେ ଦୁଡ଼ିଙ୍ଗ୍ ପାଡ଼ାଅଜାନା ଚି ଏନାତେ ଇନ୍‍କୁ ଗୋଜୋଃ କାକୋ। ଏନ୍ ସାମାୟ୍ ରେ ମୁଶା ନାବୀ ଜାନାମ୍ ନାଏ। ଇନିଃ ପାର୍ମେଶ୍ଵାର୍ ରାଃ ନେପେଲ୍ ରେ ଥିମ୍ବାଗି ସୁଗାଡ଼୍ ତାଇକେନାଏ। ଇନିଃ ଆପୁ ଆଃ ଅଡ଼୍ଆଃ ରେ ଆପି ମାହିନା ସାନ୍ତେ ଆସୁଲ୍ ହାରା ଜାନାଏ। ମେନ୍ଦୋ ଚିମ୍ତାଙ୍ଗ୍ ଇନିଃକେ ଆଡୋଃ କାକୋ ଉକୁ ଧାଡ଼ିଜାନା ଇମ୍ତା ଅଡ଼୍ଆଃ ରାଃ ବାହାରି ରେ ମାଣ୍ଡାଅ ତାଇଜାକୋ ଦୋ ଫିରୋନ୍ ରାଃ ହୋନ୍ତେକୁଡ଼ି ଇନିଃକେ ବାଲ୍‍ପୋଷ୍ ହୋନ୍ ବାଇକିଜାଏ, ହାର୍ ଇନିଃକେ ଆଜାଃ ହୋନ୍‍କଡ଼ା ଲେକା ଆସୁଲ୍ ହାରା କିଜାଏ। ମୁଶା କେ ମିଶାର୍ ରେନ୍ ହୋଡ଼ୋ କୋୱାଃ ସବେନ୍ ସେଣା ପାଢ଼ାଅ ଶିଖାଅ କିଜାକୋ, ହାର୍ ଇନିଃ ବାକାଣ୍ ହାର୍ କାମି ବାରାନାଃ ରେ ପେଡ଼େଜାନ୍ ତାଇକେନାଏ।” “ଚିମ୍ତାଙ୍ଗ୍ ଇନିଃ ଚାଲିଶ୍ ବାରାଶ୍ ରେନ୍ ହୋବାଜାନାଏ, ଦୋ ଇନିଃକେ ଆଜାଃ ମୋନ୍ ରେ ସାନାଙ୍ଗ୍ ହିଜୁଃ ଲେନା ଚି ଆଜାଃ ଇସ୍ରାଏଲୀ ହାଗା କୋଲୋଃ ନାପାମ୍ ସେନାଏ। ଇନିଃ ମିୟାଃ ହୋଡ଼ ରାଃ ଚେତାନ୍ ରେ ଆନ୍ୟାୟ ହୋବାଅଃତାନ୍ ନେଲ୍‍କେତେ ଇନିଃକେ ଦେଙ୍ଗା କିଜାଏ, ହାର୍ ମିଶାର୍ ରେନ୍ ହୋଡ଼କେ ଗୋଏଃ କେତେ ଦୁକୁକାନ୍ ହୋଡ଼ ନିଜାଃ ବାଦ୍‍ଲା ଇଦିକେଦାଏ। ଇନିଃ ପାହୋମ୍ କେଦାଏ ଚି ଇନିଜାଃ ହାଗାକୋ ବୁଝାଅଃୱାକୋ ଚି ପାର୍ମେଶ୍ଵାର୍ ଇନିଜାଃ ତିଈ ତେ ଇନ୍‍କୁକେ ବାଞ୍ଚାଅ କୋୱାଏ, ମେନ୍ଦୋ ଇନ୍‍କୁ କାକୋ ବୁଝାଅଜାନା। ଏଟାଃ ହୁଲାଙ୍ଗ୍ ଚିମ୍ତାଙ୍ଗ୍ ବାରିୟା ଇସ୍ରାଏଲୀ ହୋଡ଼ୋ କିନ୍ ଆକିନ୍ ରେ ଲାପାଡ଼ାଇନ୍ ତାଇ କେନାକିନ୍, ଦୋ ଏନ୍ତାଃ ମୁଶା ସେଟେର୍ ଜାନାଏ, ହାର୍ ନେୟା କାଜିକେତେ ଇନ୍‍କୁକେ ମେଶା ଲାଗିନ୍ ବୁଝାଅ କେଃକୋୱାଏ, ‘ହେ ହୋଡ଼ୋକିନ୍, ଆବେନ୍ ଦୋ ହାଗେୟା ତାନ୍‍ବେନ୍, ମିହୋଡ଼୍ ଏଟାଃନିଃ କେ ଚିନାଃ ମେନ୍ତେ ଦୁକୁ ଏମ୍ ତାନାବେନ୍?’ ମେନ୍ଦୋ ଅକନିଃ ଆଜାଃ ଜାପାଃ ରେନିଃକେ ଦୁକୁ ଏମ୍ ତାଇନାଏ, ହିନିଃ ମୁଶା କେ ନେୟା କାଜିକେତେ ଆତୋମ୍ କିଜାଏ, ‘ଅକଏ ଆମ୍‍କେ ଆଲେୟାଃ ଚେତାନ୍ ରେ ହାକିମ୍ ହାର୍ ବିଚାର୍ ନିଈ ବାଇ କେଃମେୟାଏ? ଚିନାଃ ଆମ୍ ଜେଲେକା ହୋଲା ମିଶାର୍ ରେନ୍ ହୋଡ଼କେ ଗୋଏଃ କିଜାମ୍ ଇଙ୍ଗ୍‍କେ ହଗି ଗୋଏଃ ସାନାଙ୍ଗ୍ ତାନାମ୍?’ ନେ କାଜି ଆୟୁମ୍‍କେତେ ମୁଶା ନିର୍ ଜାନାଏ ହାର୍ ମିଦ୍ୟାନ୍ ଦିଶୁମ୍ ରେ ପାର୍ଦେଶୀ ହୋବାକେତେ ତାଇନ୍ ଏଟେଃ କେଦାଏ, ହାର୍ ହେନ୍ତାଃରେ ଆଜାଃ ବାରିୟା ହୋନ୍‍କଡ଼ା କିନ୍ ଜାନାମ୍ ନାକିନ୍।” “ଚିମ୍ତାଙ୍ଗ୍ ପୁରା ଚାଲିଶ୍ ବାରାଶ୍ ଫାରୋମ୍ ଜାନା, ଇମ୍ତା ମିୟାଃ ସିର୍ମାଦାସୀ ଇନିଃକେ ସିନାଇ ବୁରୁ ରାଃ ସୁନ୍‍ସାନ୍ ଜାଗା ରେ ଜୁଲୋଃତାନ୍ ଚୁପାଃ ରେ ନେଲ୍ ଜାନାଏ। ମୁଶା ନେୟା ନେଲ୍‍କେତେ ଆକ୍‍ଚାକାଅଃ ଜାନାଏ, ହାର୍ ଚିମ୍ତାଙ୍ଗ୍ ନେଲ୍ ଲାଗିନ୍ତେ ନାଡ଼େଏ ସେନ୍ ଜାନାଏ, ଇମ୍ତା ପ୍ରାଭୁ ଆଃ ନେ ଆୱାଜ୍ ଆୟୁମ୍ କେଦାଏ, ‘ଇଙ୍ଗ୍ ଆମାଃ ଆପୁ-ତାତା, ଆବ୍ରାହାମ୍, ଇସାହାକ୍ ହାର୍ ୟାକୁବ୍ ଆଃ ପାର୍ମେଶ୍ଵାର୍ ତାନିଙ୍ଗ୍,’ ଏଣ୍ଡେ ମୁଶା ବୋରୋତେ ଥାର୍ଥାରାଅ ଜାନାଏ, ନେତାଃ ସାନ୍ତେ ଚି ଏନାକେ ନେଲ୍ ଲାଗିନ୍ତେ କାଏ ସାହାସ୍ କେଦା। ଇମ୍ତା ପ୍ରାଭୁ ଇନିଃକେ କାଜିକିଜାଏ, ‘ଆମାଃ କାଟା ଏତେ ଖାର୍ପା ଖଲାଅ ଲେମ୍, ଚିୟାଃଚି ଅକନ୍ ଜାଗା ରେ ଆମ୍ ତିଙ୍ଗୁକାନାମ୍, ଏନା ପାବିତାର୍ ଅତେ ତାନାଃ। ଇଙ୍ଗ୍ ସାର୍ତିଗୀ ଇଙ୍ଗ୍ଆଃ ହୋଡ଼ୋକୋୱାଃ ସାସାତି କେ ଅକନ୍‍କୋ ମିଶାର୍ ଦିଶୁମ୍ ରେ ମେନାକୋୱା ନେଲ୍ କେଦାଇଙ୍ଗ୍, ହାର୍ ଇନ୍‍କୁୱାଃ ଗେରାଙ୍ଗ୍ ଆୟୁମ୍ କେଦାଇଙ୍ଗ୍, ଏନାମେନ୍ତେ ଇନ୍‍କୁକେ ବାଞ୍ଚାଅ ଲାଗିନ୍ତେ ଆଡ଼୍‍ଗୁ କାନିଙ୍ଗ୍। ନାଆ ହିଜୁଃମେ, ଇଙ୍ଗ୍ ଆମ୍‍କେ ମିଶାର୍ ଦିଶୁମ୍ ତେ କୁଲ୍ ମେୟାଇଙ୍ଗ୍।’ ” “ଅକନ୍ ମୁଶା କେ ଇନ୍‍କୁ ନେୟା କାଜିକେତେ କାକୋ ଗ୍ରାହାନ୍ ତାଇନାକୋ, ‘ଆମ୍‍କେ ଅକଏ ଆଲେୟାଃ ଚେତାନ୍ ରେ ହାକିମ୍ ହାର୍ ବିଚାର୍ ନିଈ ବାଇ କେଃମେୟାଏ?’ ଇନିଃକେ ଗି ପାର୍ମେଶ୍ଵାର୍ ହାକିମ୍ ହାର୍ ଛୋଡ଼ାଓନିଃ ବାଇକେତେ, ଏନ୍ ସିର୍ମାଦାସୀ ଆଃ ହୋରାତେ ଅକନିଃ ଇନିଃକେ ଚୁପାଃ ରେ ଦାର୍ଶାନ୍ ଏମ୍ ଲିଜାଏ, କୁଲ‍୍‍କିଜାଏ। ନେ ହୋଡ଼ ଗି ମିଶାର୍ ଦିଶୁମ୍ ହାର୍ ଆରାଃ ସାମୁଦାର୍ ହାର୍ ସୁନ୍‍ସାନ୍ ଜାଗା ରେ ଚାଲିଶ୍ ବାରାଶ୍ ସାନ୍ତେ ଆକ୍‍ଦାନ୍ଦା କାମି ହାର୍ ଚିହ୍ନା ଦେଖାଅ-ଦେଖାଅ କେତେ ଇନ୍‍କୁକେ ଅଡୋଙ୍ଗ୍ ଆଉ କେଃକୋୱାଏ। ନିଈ ଏନ୍ ମୁଶା ଗି ତାନିଃ, ଅକନିଃ ଇସ୍ରାଏଲୀ ହୋଡ଼ୋକୋକେ କାଜିକେଃକୋୱାଏ, ‘ପାର୍ମେଶ୍ଵାର୍ ଆପେୟାଃ ହାଗା କୋଏତେ ଆପେୟାଃ ଲାଗିନ୍ ଇଙ୍ଗ୍ଆଃ ଲେକା ମିହୋଡ଼୍ ନାବୀ ଅଡୋଙ୍ଗିୟାଏ।’ ନିଈ ଇନିଃଗି ତାନିଃ, ଅକନିଃ ସୁନ୍‍ସାନ୍ ଜାଗା ରେ ଇସ୍ରାଏଲ୍ ହୋଡ଼ୋକୋୱାଃ ସାଭା ଥାଲା ରେ ଏନ୍ ସିର୍ମାଦାସୀ ଲୋଃ ସିନାଇ ବୁରୁ ଚେତାନ୍ ରେ ଇନିଃ ଲୋଃ ବାକାଣ୍ କେଦାଏ ହାର୍ ଆବୁୱାଃ ଆପୁ-ତାତା କୋଲୋଃ ତାଇକେନାଏ, ଇନିଃକେ ଗି ଜୀହିଃ ବାଚାନ୍ ନାମ୍ ଜାନା ଏନାତେ ଆବୁତାଃ ସେଟେର୍ ୟାଏ। ମେନ୍ଦୋ ଆବୁୱାଃ ଆପୁ-ତାତା କୋ ଇନିଃକେ କାକୋ ମାନାତିଙ୍ଗ୍ କେଦା, ମେନ୍ଦୋ ଇନିଃକେ ଆତୋମ୍ କେତେ ଆକୋୱାଃ ମୋନ୍ ରେ ମିଶାର୍ ଦିଶୁମ୍ ପାଡ଼୍ ରୁଆଡ଼୍ ନାଙ୍ଗ୍ ସାନାଙ୍ଗ୍ କେଦାକୋ, ହାର୍ ମୁଶା ରାଃ ମାରାଙ୍ଗ୍ ହାଗା ହାରୁନ୍ କେ କାଜିକେଦାକୋ, ‘ଆଲେୟାଃ ଲାଗିନ୍ ଏନ୍‍ଲେକା ମୂର୍ତି ବାଇଏମ୍ ଅକନିଃ ଆଲେୟାଃ ଦେଓତା ହୋବାୱାଏ ହାର୍ ଆଲେୟାଃ ଆୟୁର୍-ଆୟୁର୍ ମିଶାର୍ ଦିଶୁମ୍ ତେ ଇଦିଲେୟାଏ, ଚିୟାଃଚି ନେ ମୁଶା ଅକନିଃ ଆଲେକେ ମିଶାର୍ ଦିଶୁମ୍ ଏତେ ଅଡୋଙ୍ଗ୍ ଆଉ ଲେଃଲେୟାଏ, ଆଲେ କାଲେ ସାରିତାନା ଇନିଃକେ ଚିନାଃ ହୋବାଜାନା?’ ଏନ୍ ହୁଲାଙ୍ଗ୍ କୋରେ ଇନ୍‍କୁ ମିୟାଃ ବାଛ୍‍ରୁ ରାଃ ମୂର୍ତି ବାଇକେତେ, ଏନାରାଃ ଆୟୁର୍ ରେ ପାଶୁ ଦାଣେ କେଦାକୋ, ହାର୍ ଆକୋୱାଃ ତିଈ ରାଃ କାମି ରେ ରାଶିକା ଜାନାକୋ। ଏନାମେନ୍ତେ ପାର୍ମେଶ୍ଵାର୍ ଦୋୟାକୁଣ୍ଡାମ୍ କେତେ ଇନ୍‍କୁକେ ବାଗି ତାଃକୋୱାଏ, ଚି ଶିଙ୍ଗି, ଚାଣ୍ଡୁଃ, ଇପିଲ୍ କୋକେ ସେୱା କାକୋ, ଜେଲେକା ନାବୀକୋୱାଃ କିତାବ୍ ରେ ଅଲାକାନା, ‘ହେ ଇସ୍ରାଏଲ୍ ଦିଶୁମ୍ ରେନ୍ ଘାରାନାକୋ, ଚିନାଃ ଆପେ ସୁନ୍‍ସାନ୍ ଜାଗା ରେ ଚାଲିଶ୍ ବାରାଶ୍ ସାନ୍ତେ ପାଶୁ ଦାଣେ ହାର୍ ଜୋମେୟାଃ ଦାଣେ ଇଙ୍ଗ୍‍କେ ଗି ରାକାବ୍ ତାଇନାପେ? ଆପେ ମୋଲେକ୍ ଦେଓତା ରାଃ ତାମ୍‍ବୁ ହାର୍ ରିଫାନ୍ ଦେଓତା ରାଃ ଇପିଲ୍ କେ ଇଦିବାଡ଼ା ତାଇନାପେ, ମାନେ ଏନ୍ ମୂର୍ତି କୋକେ ଅକନ୍ କୋକେ ଆପେ ଜୋହାର୍ ଲାଗିନ୍ତେ ବାଇଲେଃକୋ ତାଇନାପେ: ଏନାମେନ୍ତେ ଇଙ୍ଗ୍ ଆପେକେ ବେବିଲୋନ୍ ଦିଶୁମ୍ ରାଃ ହାନ୍ ଫାରୋମ୍ ଇଦିକେତେ ଡେରା ପେୟାଇଙ୍ଗ୍।’ ” “ଗୋୱା ରାଃ ତାମ୍‍ବୁ ସୁନ୍‍ସାନ୍ ଜାଗା ରେ ଆବୁୱାଃ ଆପୁତାତା କୋୱାଃ ଥାଲା ରେ ତାଇକେନା, ଜେଲେକା ପାର୍ମେଶ୍ଵାର୍ ମୁଶା ନାବୀ କେ ଉଦୁବ୍ କେତେ କାଜିଲିଜାଏ, ‘ଅକନାଃ ହିଜୁଃକେତେ ଆମ୍ ନେଲ୍ କେଦାମ୍, ଏନ୍‍ଲେକା ଗି ନେୟାକେ ବାଇୟେମ୍।’ ଏନ୍ ତାମ୍‍ବୁ କେଗି ଆବୁୱାଃ ଆପୁତାତା କୋ ସିଦା ସାମାୟ୍ ଏତେ ନାମ୍ କେତେ ୟାହୁଶୁ ଲୋଃ ନେତାଃ ଆଉ ଲେଃ କେଦାକୋ; ଚିମ୍ତାଙ୍ଗ୍ ଇନ୍‍କୁ ଏନ୍ ଏଟାଃଜାତିକୋୱା ଚେତାନ୍ ରେ ଆଧିକାର୍ ନାମ୍ କେଦାକୋ, ଅକନ୍ କୋକେ ପାର୍ମେଶ୍ଵାର୍ ଆବୁୱାଃ ଆପୁତାତା କୋୱାଃ ନାଡ଼େଏ ତେ ଅଡୋଙ୍ଗ୍ ତାଃକୋୱାଏ, ହାର୍ ଏନ୍ ତାମ୍‍ବୁ ଦାଉଦ୍ ରାଜା ରାଃ ସାମାୟ୍ ସାନ୍ ତାଇଜାନା। ଦାଉଦ୍ ରାଜା କେ ପାର୍ମେଶ୍ଵାର୍ ଆନୁଗ୍ରାହ୍ କିଜାଏ, ଏନାତେ ଇନିଃ ଆର୍ଜି କେଦାଏ ଚି ଇନିଃ ୟାକୁବ୍ ରାଃ ପାର୍ମେଶ୍ଵାର୍ ଲାଗିନ୍ ତାଇନ୍ ଅଡ଼୍ଆଃ ବାଇୟାଏ। ମେନ୍ଦୋ ଆଜାଃ ହୋନ୍‍କଡ଼ା ସୁଲେମାନ୍ ଇନିଜାଃ ଲାଗିନ୍ ଅଡ଼୍ଆଃ ବାଇକେଦାଏ। ମେନ୍ଦୋ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ତିଈ ତେ ବାଇକାନ୍ ଅଡ଼୍ଆଃ ରେ କାଏ ତାଇନାଏ, ଜେଲେକା ଚି ୟାଶାୟାହ୍ ନାବୀ କାଜିକେଦାଏ, ‘ପ୍ରାଭୁ କାଜି ତାନାଏ, ସିର୍ମାଦିଶୁମ୍ ଇଙ୍ଗ୍ଆଃ ସିଂହାସାନ୍ ତାନାଃ ହାର୍ ଅତେ ଇଙ୍ଗ୍ଆଃ କାଟା ଲାଥାର୍ ରାଃ ଗାଣ୍ଡୁ ତାନାଃ, ଇଙ୍ଗ୍ଆଃ ଲାଗିନ୍ତେ ଆମ୍ ଚିଲ୍‍କାନ୍ ଅଡ଼୍ଆଃ ବାଇୟାମ୍? ହାର୍ ଇଙ୍ଗ୍ଆଃ ସାଥାୱନ୍ ଲାଗିନ୍ ଅକନ୍ ଜାଗା ହୋବାଅଃୱା? ଚିନାଃ ନେ ସବେନ୍ ଜିନିଷ୍ କୋ ଇଙ୍ଗ୍ଆଃ ତିଈ ତେ ଚି କାଇଙ୍ଗ୍ ବାଇକାଦା?’ ହେ ନିଠୁର୍, ହାର୍ ମୋନ୍ ହାର୍ ଲୁତୁର୍ ରେ କାଖାତ୍ନା ହୋଡ଼ୋକୋ, ଆପେ ସାଦାଏ ପାବିତାର୍ ଆତ୍ମା ରାଃ ବିରୋଧ୍ ରିକାୟାପେ। ଜେଲେକା ଆପେୟାଃ ଆପୁତାତା କୋ ରିକାତାଇନାକୋ, ଏନ୍‍ଲେକାଗି ଆପେୟଗି ରିକାତାନାପେ। ନାବୀ କୋଏତେ ଅକଏକେ ଆପେୟାଃ ଆପୁତାତାକୋ କାକୋ ସାତାଅ କାଦା? ଇନ୍‍କୁ ଏନ୍ ଧାର୍ମୀ ମାସୀହ୍ ରାଃ ହିଜୁଃ ସିଦା ରେ ସାନ୍ଦେଶ୍ ଏମ୍ କୋକେ ଗୋଏଃ କେଦାକୋ; ହାର୍ ନାଆ ଆପେୟଗି ମାସୀହ୍ କେ ସାବ୍ ରିକାନିଃ ହାର୍ ଗୋଏଃ ରିକାନିଃ ବାଇଜାନାପେ। ଆପେ ସିର୍ମାଦାସୀ କୋୱାଃ ହୋରାତେ ବାଇୟାକାନ୍ ଆଇନ୍ ଦୋପେ ନାମ୍ କେଦା, ମେନ୍ଦୋ ଏନାକୋକେ କାପେ ମାନାତିଙ୍ଗ୍ କେଦା।” ନେ କାଜିକୋ ଆୟୁମ୍‍କେତେ ୟାହୁଦୀ ମାରାଙ୍ଗ୍‍ସାଭା ରେନ୍ ହୋଡ଼ୋକୋ ଥିମ୍ବାଗି ଖିସ୍ ଜାନାକୋ ହାର୍ ସ୍ଥିଫାନୁସ୍ କେ ଖିସ୍ କେତେ ଆକୋ ରିମ୍-ରିମ୍ ଜାନାକୋ। ମେନ୍ଦୋ ସ୍ଥିଫାନୁସ୍ ପାବିତାର୍ ଆତ୍ମା ତେ ଫେରେଃ କେତେ ସିର୍ମାଦିଶୁମ୍ ପାଡ଼୍ ନେଲ୍‍କେଦାଏ ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ କେ ହାର୍ ୟୀଶୁ କେ ପାର୍ମେଶ୍ଵାର୍ ରାଃ ଜୋମ୍ ତିଈ ପାଡ଼୍ ତିଙ୍ଗୁକାନ୍ ନେଲ୍‍କେତେ, କାଜିକେଦାଏ, “ନେଲେପେ, ଇଙ୍ଗ୍ ସିର୍ମାଦିଶୁମ୍ କେ ଖଲାଅକାନ୍, ହାର୍ ମାନ୍‍ୱା ରାଃ ହୋନ୍ କେ ପାର୍ମେଶ୍ଵାର୍ ରାଃ ଜୋମ୍ ତିଈ ପାଡ଼୍ ତିଙ୍ଗୁକାନ୍ ନେଲିତାନିଙ୍ଗ୍।” ଏନ୍ତେ ଇନ୍‍କୁ ଜୋର୍ତେ କାଉରି କେତେ ଲୁତୁର୍ କେ ବାନ୍ଦ୍ ତାଦାକୋ, ହାର୍ ମିଶାତୋରା ଇନିଃକେ ଅତା କିଜାକୋ, ହାର୍ ଇନିଃକେ ହାତୁ ରାଃ ବାହାରି ଅଡୋଙ୍ଗ୍ କେତେ ଇନିଃକେ ଦିରିଥେର୍ କିଜାକୋ। ସ୍ଥିଫାନୁସ୍ କେ ଦୋଷ୍ ଏମ୍ ତାନ୍‍କୋ ଆକୋୱାଃ ହୋଡ଼ମୋ ରାଃ ବାହାରି ଲିଜାଃ କୋକେ ଶାଉଲ୍ ନୁତୁମ୍ ଜାୱାନ୍ ହୋଡ଼ ରାଃ କାଟା ନାଡ଼େଏ ତାଃ ରାଡ଼ା କେତେ ମାଣ୍ଡାଅ କେଦାକୋ। ଏନ୍ତେ ଇନ୍‍କୁ ସ୍ଥିଫାନୁସ୍ କେ ଦିରି ଥେର୍ କାତେକିଜାକୋ, ହାର୍ ଇନିଃ ନେୟା କାଜି-କାଜିକେତେ ବିନ୍ତି କାତେ ତାଇନାଏ, “ହେ, ପ୍ରାଭୁ ୟୀଶୁ, ଇଙ୍ଗ୍ଆଃ ଆତ୍ମା କେ ଗ୍ରାହାନ୍ କେମେ।” ଏନ୍ତେ ଇକ୍ଡ଼ୁମ୍ କେତେ ଜୋର୍ତେ କାଉରି କେତେ କେଡ଼ା କେଦାଏ, “ହେ ପ୍ରାଭୁ, ନିକୁକେ ନେ ପାପ୍ ରାଃ ଦୋଷ୍ ଆଲୋମ୍ ଏମାକୋ।” ହାର୍ ନେୟା କାଜିକେତେ ଇନିଃ ଗୋଏଃ ଜାନାଏ। ଶାଉଲ୍ ସ୍ଥିଫାନୁସ୍ କେ ଗୋଗୋଏଃ ରେ ରାଜି ତାଇକେନାଏ। ଏନ୍ ହୁଲାଙ୍ଗ୍ ୟୀରୁଶାଲେମ୍ ସାହାର୍ ରାଃ କାଲିସିୟା କୋରେ ଥିମ୍ବାଗି ସାସାତି ଏଟେଃ ଜାନା ହାର୍ କୁଲାକାନ୍ ଚେଲା କୋକେ ବାଗି କେତେ ସବେନ୍ କୋ ୟାହୁଦୀୟା ଜିଲ୍ଲା ହାର୍ ସାମାରୀୟା ଜିଲ୍ଲା କୋରେ ଛିତି ଛାନ୍ ଜାନାକୋ। ଏନ୍ତେ ପାର୍ମେଶ୍ଵାର୍ କେ ମାନାତିଙ୍ଗ୍ ତାନ୍ ଚିମିନ୍ ହୋଡ଼ୋକୋ ସ୍ଥିଫାନୁସ୍ କେ କାବାର୍ ରେ ମାଣ୍ଡାଅ କିଜାକୋ ହାର୍ ଇନିଜାଃ ଲାଗିନ୍ ଥିମ୍ବାଗି ଦୁକୁ କେଦାକୋ। ଶାଉଲ୍ କାଲିସିୟା କୋକେ ସାତାଅ କୋତାଇକେନାଏ, ହାର୍ ଅଡ଼୍ଆଃ-ଅଡ଼୍ଆଃ ବୋଲୋ କେତେ କଡ଼ାକୋକେ ଆଡୋଃ କୁଡ଼ିକୋକେ ଅର୍-ଅର୍ କେତେ ବାନ୍ଦିଅଡ଼୍ଆଃ ରେ ଆଦେର୍ କୋତାଇନାଏ। ଅକନ୍ ବିଶ୍ଵାସୀକୋ ଛିତି ଛାନ୍ ହୋବାଲେନାକୋ, ଇନ୍‍କୁ ଅକ୍ତେ-ଅକ୍ତେ ହୋନୋର୍ କେଦାକୋ ଏନ୍ତେ ସୁସାମାଚାର୍ ଉଦୁବ୍ କେଦାକୋ। ଏନ୍ତେ ଫିଲିପୁସ୍ ସାମାରୀୟା ଜିଲ୍ଲା ରାଃ ମିୟାଃ ସାହାର୍ ରେ ସେନ୍ କେତେ ହୋଡ଼ୋକୋତାଃ ରେ ମାସୀହ୍ ରାଃ ପାର୍ଚାର୍ କେଦାଏ। ଅକନ୍ ବାକାଣ୍ ଫିଲିପୁସ୍ କାଜିକେଦାଏ ଏନାକେ ହୋଡ଼ୋକୋ ଆୟୁମ୍‍କେତେ ହାର୍ ଅକନ୍ ଚିହ୍ନାକୋ ଦେଖାଅ ତାଇନାଏ ଏନାକୋକେ ନେଲ୍-ନେଲ୍‍କେତେ, ଇନ୍‍କୁ ମିଃ ମୋନ୍ ହୋବାକେତେ ଧ୍ୟାନ୍ କେଦାକୋ। ଚିୟାଃଚି ଥିମ୍ବାଗି ହୋଡ଼ୋକୋ ଏତେ ବୋଙ୍ଗାଆତ୍ମା କୋ ଜୋର୍ତେ କାଉରିତାନ୍ ଲୋଃ ଅଡୋଙ୍ଗ୍ ଜାନାକୋ, ହାର୍ ଥିମ୍ବାଗି ଏକାଙ୍ଗୀ ରୋଗୀ କୋ ଆଡୋଃ ଲେଙ୍ଗ୍ଡ଼ା କୋ ହ ବେଶ୍ ଜାନାକୋ। ଏନାମେନ୍ତେ ଏନ୍ ସାହାର୍ ରେନ୍ ହୋଡ଼ୋକୋ ଥିମ୍ବାଗି ରାଶିକା ଜାନାକୋ। ନେୟାକୋରାଃ ସିଦାରେ ଏନ୍ ସାହାର୍ ରେ ଶିମୋନ୍ ନୁତୁମ୍ ମିୟାଃ ହୋଡ଼ ତାଇକେନାଏ, ଅକନିଃ ଦେଓଁଣା କାମି ରିକା କେତେ ସାମାରୀୟା ଜିଲ୍ଲା ରେନ୍ ହୋଡ଼ୋକୋକେ ଆକ୍‍ଚାକାଅଃ କୋତାଇନାଏ ହାର୍ ଆଏଃ ଆପାନ୍ କେ ମିୟାଃ ମାରାଙ୍ଗ୍ ହୋଡ଼ ବାଇୟେନ୍ ତାଇକେନାଏ। ହୁଡିଙ୍ଗ୍ ଏତେ ମାରାଙ୍ଗ୍ ସାନ୍ତେ ସବେନ୍ କୋ ଆଏଃକେ ମାଇନ୍ ତାଇକେନାକୋ ହାର୍ କାଜି ତାଇକେନାକୋ, “ନେ ହୋଡ଼ ଇଶ୍ୱାର୍ ରାଃ ଏନ୍ ମାରାଙ୍ଗ୍ ନୁତୁମୋଃ ତାନ୍ ପେଡ଼େଏ ତାନିଃ।” ଇନିଃ ଥିମ୍ବାଗି ହୁଲାଙ୍ଗ୍ ଏତେ ଇନ୍‍କୁକେ ଆଜାଃ ଦେଓଁଣା କାମି ତେ ଆକ୍‍ଚାକାଅଃ କୋ ତାଇନାଏ, ଏନାମେନ୍ତେ ଇନ୍‍କୁ ଇନିଃକେ ମାଇନ୍ ତାଇକେନାକୋ। ମେନ୍ଦୋ ଚିମ୍ତାଙ୍ଗ୍ ଇନ୍‍କୁ ଫିଲିପୁସ୍ ଗାଃ ବିଶ୍ଵାସ୍ କେଦାକୋ ଅକନିଃ ପାର୍ମେଶ୍ଵାର୍ ରାଃ ରାଇଜ୍ ହାର୍ ୟୀଶୁ ମାସୀହ୍ ଗାଃ ନୁତୁମ୍ ରାଃ ସୁସାମାଚାର୍ ଉଦୁବ୍ ତାଇନାଏ, ଏଣ୍ଡେ ଚିନାଃ କଡ଼ାକୋ, ଚିନାଃ କୁଡ଼ିକୋ, ବାପ୍ତିସ୍ମା ଇଦିକେଦାକୋ। ଇମ୍ତା ଶିମୋନ୍ ଆଏଃ ହ ବିଶ୍ଵାସ୍ କେଦାଏ ହାର୍ ବାପ୍ତିସ୍ମା ଇଦିକେତେ ଫିଲିପୁସ୍ ଲୋଃ ତାଇନ୍ ଜାନାଏ। ଇନିଃ ଚିହ୍ନା ହାର୍ ମାପ୍‍ରାଙ୍ଗ୍ ପେଡ଼େଏ ରାଃ କାମି ହୋବାଅଃ ତାନ୍ ନେଲ୍‍କେତେ ଆକ୍‍ଦାନ୍ଦାଅଃ ତାଇ କେନାଏ। ଇମ୍ତାଙ୍ଗ୍ କୁଲାକାନ୍ ଚେଲା କୋ ଅକନ୍‍କୋ ୟୀରୁଶାଲେମ୍ ସାହାର୍ ରେ ତାଇନ୍ କେନାକୋ, ଆୟୁମ୍ କେଦାକୋ ଚି ସାମାରୀୟା ଜିଲ୍ଲା ରେନ୍ ହୋଡ଼ୋକୋ ପାର୍ମେଶ୍ଵାର୍ ରାଃ ବାଚାନ୍ ମାନାତିଙ୍ଗ୍ କେଦାକୋ ଦୋ ପାତ୍ରାସ୍ ହାର୍ ଯୋହାନ୍ କେ ଆକୋତାଃ କୁଲ୍‍କେଃ କୋୱାକୋ। ଇନ୍‍କୁ ସେନ୍ କେତେ ଇନ୍‍କୁ ଲାଗିନ୍ ବିନ୍ତି କେଦାକୋ ଚି ପାବିତାର୍ ଆତ୍ମା ନାମେକାକୋ। ଚିୟାଃଚି ପାବିତାର୍ ଆତ୍ମା ନାଆ ସାନ୍ତେ ଇନ୍‍କୁୱାଃ ରେ ଅକଏ ତାଃ ହ କା ଆଡ଼୍‍ଗୁଲେନାଏ; ଇନ୍‍କୁ ଦୋ ପ୍ରାଭୁ ୟୀଶୁ ଗାଃ ନୁତୁମ୍ ରେ ବାପ୍ତିସ୍ମା ଭାଇର୍ ଇଦିଲେଦାକୋ। ଏନ୍ତେ ଇନ୍‍କୁ ଇନ୍‍କୁୱାଃ ଚେତାନ୍ ରେ ତିଈ ମାଣ୍ଡାଅ କେଦାକୋ ହାର୍ ଇନ୍‍କୁ ପାବିତାର୍ ଆତ୍ମା ନାମ୍ କେଦାକୋ। ଚିମ୍ତାଙ୍ଗ୍ ଶିମୋନ୍ ନେଲ୍‍କେଦାଏ ଚି କୁଲାକାନ୍ ଚେଲା କୋୱାଃ ତିଈ ମାଣ୍ଡାଅ ରେ ପାବିତାର୍ ଆତ୍ମା ଏମୋଃ ତାନା, ଏଣ୍ଡେ ଇନ୍‍କୁତାଃ ପାଇସା ଆଉକେତେ କାଜିକେଦାଏ, “ନେ ପେଡ଼େଏ ଇଙ୍ଗ୍‍କେ ହ ଏମାଇଙ୍ଗ୍‍ପେ, ଏନାତେ ଅକନିଃ ରେ ତିଈ ମାଣ୍ଡାଅ ୟାଇଙ୍ଗ୍ ଇନିଃ ପାବିତାର୍ ଆତ୍ମା ନାମ୍ କେୟାଏ।” ପାତ୍ରାସ୍ ଇନିଃକେ କାଜିକିଜାଏ, “ଆମାଃ ପାଇସା ଆମାଃ ଲୋଃ ନାଷ୍ଟ୍‍ଅଃକା, ଚିୟାଃଚି ଆମ୍ ପାର୍ମେଶ୍ଵାର୍ ରାଃ ଦାନ୍ କେ ପାଇସା ତେ କିରିଙ୍ଗ୍ ଲାଗିନ୍ ବିଚାର୍ କେଦାମ୍। ନେ ସେୱା ରେ ନା ଆମାଃ ହିସା ମେନାଃ, ନା ଆମାଃ ହାନାଟିଙ୍ଗ୍, ଚିୟାଃଚି ଆମାଃ ମୋନ୍ ପାର୍ମେଶ୍ଵାର୍ ନାଡ଼େଏ ରେ ସାଫା ବାନୋଃ। ଏନାମେନ୍ତେ ଆମାଃ ନେ ଏତ୍କାନ୍ ପାହୋମ୍ ମୋନ୍ ତେ ବାଗି କେତେ ପ୍ରାଭୁ ତାଃ ବିନ୍ତି ମେ, ହୋବା ଧାଡ଼ିୟୋଗା ଆମାଃ ମୋନ୍ ରାଃ ଏତ୍କାନ୍ ପାହୋମ୍ ଛାମା ଅଗା। ଚିୟାଃଚି ଇଙ୍ଗ୍ ନେଲେୟାଇଙ୍ଗ୍ ଚି ଆମ୍ ପିତ୍ ଲେକା ଥିମ୍ବାଗି ହିସିଙ୍ଗା ହାର୍ ଆଧାର୍ମ୍ ରାଃ ଥୋନୋଲ୍ ରେ ପାଶେ କାନାମ୍।” ଶିମୋନ୍ କାଜିରୁଆଡ଼୍ କେଦାଏ, “ଆମ୍ ଇଙ୍ଗ୍ଆଃ ଲାଗିନ୍ ପ୍ରାଭୁ ତେ ବିନ୍ତି ମେ ଚି ଅକନ୍ ବାକାଣ୍ ଆମ୍ କାଜିକେଦାମ୍, ଏନା କୋଏତେ ଅକନାଃ ହ ଇଙ୍ଗ୍ଆଃ ରେ ଆଲୋକା ହିଜୁଃକା।” ଏନ୍ତେ ପାତ୍ରାସ୍ ହାର୍ ଯୋହାନ୍ ଗୋୱା ଏମ୍ କେତେ ହାର୍ ପ୍ରାଭୁ ୟୀଶୁ ଗାଃ ବାଚାନ୍ ଉଦୁବ୍ କେତେ ୟୀରୁଶାଲେମ୍ ସାହାର୍ ତେ ରୁଆଡ଼୍ ଇମ୍ତା ସାମାରୀୟା ଜିଲ୍ଲା ରାଃ ଥିମ୍ବାଗି ହାତୁ କୋରେ ସୁସାମାଚାର୍ ଉଦୁବ୍ କେଦାକୋ। ମୁଶିଙ୍ଗ୍ ମିୟାଃ ପ୍ରାଭୁ ରାଃ ସିର୍ମାଦାସୀ ଫିଲିପୁସ୍ କେ କାଜିକେଦାଏ, “ବିରିଃମେ ହାର୍ ଦାଖିନ୍ ଦିଶା ରାଃ ଏନ୍ ହୋରା ପାଡ଼୍ ତେ ଜୁ, ଅକନାଃ ୟୀରୁଶାଲେମ୍ ତେ ଗାଜା ସାହାର୍ ପାଡ଼୍ ତେ ସେନୋଗା।” ଏନା ସୁନ୍‍ସାନ୍ ଜାଗା ହୋରା ତାନାଃ। ଇନିଃ ବିରିଃ କେତେ ସେନୋଃ ଜାନାଏ, ହାର୍ ନେଲେପେ, କୁଶ୍ ଦିଶୁମ୍ ରେନ୍ ମିହୋଡ଼୍ ହୋଡ଼ ହିଜୁଃ ତାଇକେନାଏ ଅକନିଃ ଚାକୁରା ହାର୍ କୁଶ୍ ରେନ୍ ରାନୀ କାନ୍ଦୋକେ ରାଃ ମାନ୍ତ୍ରୀ ହାର୍ ଖାଯାଞ୍ଚି ତାଇକେନାଏ। ଇନିଃ ଆରାଧାନା ଲାଗିନ୍ ୟୀରୁଶାଲେମ୍ ତେ ହିଜୁଃ ଲେନାଏ। ଇନିଃ ଆଜାଃ ରାଥ୍ ରେ ଦୁବ୍ ଲେନାଏ, ଏନ୍ତେ ୟାଶାୟାହ୍ ନାବୀ ରାଃ କିତାବ୍ ପାଢ଼ାଅଃତାନ୍ ଲୋଃ ରୁଆଡ଼୍ ତାଇକେନାଏ। ଇମ୍ତା ପାବିତାର୍ ଆତ୍ମା ଫିଲିପୁସ୍ କେ କାଜିକିଜାଏ, “ନାଡ଼େଏ ସେନ୍ କେତେ ନେ ରାଥ୍ ଗାଡି ଲୋଃ ମିଶା-ମିଶା ତେ ସେନେମ୍।” ଫିଲିପୁସ୍ ଇନିଜାଃ ପାଡ଼୍ ନିର୍ କେଦାଏ ହାର୍ ଇନିଃକେ ୟାଶାୟାହ୍ ନାବୀ ରାଃ କିତାବ୍ ପାଢ଼ାଅଃତାନ୍ ଆୟୁମ୍ କିଜାଏ, ହାର୍ କୁଲି କିଜାଏ, “ଆମ୍ ଜେ ପାଢ଼ାଅଃତାନ୍ ଚିନାଃ ଏନାକେ ବୁଝାଅଃ ତାନାମ୍?” ଇନିଃ କାଜିକେଦାଏ, “ଚିମିନ୍ ସାନ୍ତେ ଜେତାଏ ଇଙ୍ଗ୍‍କେ କାଏ ବୁଝାଅୟାଏ ଏଣ୍ଡେ ଇଙ୍ଗ୍ ଚିଲ୍‍କା ବୁଝାଅଃୱାଇଙ୍ଗ୍?” ଏନ୍ତେ ଇନିଃ ଫିଲିପୁସ୍ କେ ଆର୍ଜି କିଜାଏ, “ରାଥ୍ ଗାଡି ରେ ରାକାବ୍ କେତେ ଇଙ୍ଗ୍ଆଃ ନାଡ଼େଏ ରେ ଦୁବ୍ ମେ।” ପାବିତାର୍ ପୁଥି ରାଃ ଅକନ୍ ଆଧ୍ୟାୟ୍ ଇନିଃ ପାଢ଼ାଅଃ ତାଇକେନାଏ, ଏନା ନେୟା ତାଇକେନା; “ଇନିଃ ମିଣ୍ଡୀ ଲେକା ଦାଣେଅଃ ଲାଗିନ୍ ସେଟେର୍ ରିକାନାଏ, ଆଡୋଃ ଜେଲେକା ମିଣ୍ଡୀହୋନ୍ ଉବ୍ ଖୁରାଅ ନିଜାଃ ନାଡ଼େଏ ହାପା-ହାପା ତାଇନୋଗାଏ, ଏନ୍‍ଲେକାଗି ଇନିଃ ହଗି ଆଜାଃ ମୋଚା କାଏ ଖଲାଅ କେଦାଏ। ଇନିଃ ଆପ୍‍ମାନ୍ ଜାନାଏ ହାର୍ ବିଚାର୍ କାଏ ନାମ୍ ଧାଡ଼ିକେଦାଏ, ହାର୍ ଇନିଜାଃ ବାଂଶ୍ ରେନ୍ ହୋଡ଼ୋକୋୱାଃ ବିଷାୟ୍ ଅକଏ କାଜିୟାଏ? ଚିୟାଃଚି ଅତେଦିଶୁମ୍ ଏତେ ଇନିଜାଃ ଜୀଉ ଇଦିଜାନା।” ଏନ୍ତେ ଚାକୁରା ଫିଲିପୁସ୍ କେ କୁଲିକିଜାଏ, “ଇଙ୍ଗ୍ ଆମ୍‍କେ ଆର୍ଜି ମେତାନିଙ୍ଗ୍, ନେୟା ଉଦୁବାଇଙ୍ଗ୍ ମେତୋ ନାବୀ ନେୟା ଅକେୟାଃ ବିଷାୟ୍ ରେ କାଜିତାନାଏ, ଆଜାଃ ଚି ଏଟାଃ କୋୱା ବିଷାୟ୍ ରେ?” ଏନ୍ତେ ଫିଲିପୁସ୍ କାଜି ଏଟେଃ କେଦାଏ, ହାର୍ ଏନ୍ ପାବିତାର୍ ପୁଥି ଏତେ ଗି ଏଟେଃ କେତେ ଇନିଃକେ ୟୀଶୁ ଆଃ ସୁସାମାଚାର୍ ଉଦୁବ୍ କିଜାଏ। ହୋରା ରେ ସେନ୍-ସେନ୍ ତାନ୍ ଲୋଃ ମିୟାଃ ଦାଆ ଜାଗା ତାଃ ସେଟେର୍ ଜାନାକୋ। ଇମ୍ତା ଖାଯାଞ୍ଚି କାଜିକେଦାଏ, “ନେଲେମ୍ ନେତାଃ ରେ ଦାଆ ମେନାଃ, ନାଆ ଇଙ୍ଗ୍‍କେ ବାପ୍ତିସ୍ମା ଇଦି ରେ ଚିନାଃ ରୋକ୍ ମେନାଃ।” ଫିଲିପୁସ୍ କାଜିକେଦାଏ, “ଆଗାର୍ ଆମ୍ ପୁରା ମୋନ୍ ଏତେ ବିଶ୍ଵାସ୍ ତାନାମ୍ ଏଣ୍ଡେ ଇଦି ଧାଡ଼ିୟାମ୍।” ଇନିଃ କାଜିରୁଆଡ଼୍ କିଜାଏ, “ଇଙ୍ଗ୍ ବିଶ୍ଵାସ୍ ତାନିଙ୍ଗ୍ ଚି ୟୀଶୁ ମାସୀହ୍ ପାର୍ମେଶ୍ଵାର୍ ରାଃ ହୋନ୍ ତାନିଃ।” ଏନ୍ତେ ଇନିଃ ରାଥ୍ ଗାଡି ତିଙ୍ଗୁ ଲାଗିନ୍ ଆଚୁ କେଦାଏ, ଏନ୍ତେ ଫିଲିପୁସ୍ ହାର୍ ଖାଯାଞ୍ଚି ବାରାନ୍ କିନ୍ ଦାଆ ରେ ବୋଲୋ ଜାନାକିନ୍, ଏନ୍ତେ ଇନିଃ ଖାଯାଞ୍ଚି କେ ବାପ୍ତିସ୍ମା ଏମ୍ କିଜାଏ। ଚିମ୍ତା ଇନ୍‍କିନ୍ ଦାଆ ଏତେ ଅଡୋଙ୍ଗ୍ କେତେ ଚେତାନ୍ ହିଜୁଃ ଜାନାକିନ୍, ଇମ୍ତାଗି ପ୍ରାଭୁ ରାଃ ଆତ୍ମା ଫିଲିପୁସ୍ କେ ଉଠାଓ ଇଦିକିଜାଏ, ଏନ୍ତେ ଖାଯାଞ୍ଚି ଇନିଃକେ ଆଡୋଃ କାଏ ନେଲ୍ କିଜାଏ, ଏନ୍ତେ ଇନିଃ ରାଶିକାତାନ୍ ଲୋଃ ଆଜାଃ ହୋରା ତେ ସେନୋଃ ଜାନାଏ। ମେନ୍ଦୋ ଫିଲିପୁସ୍ ଆଶାଦୋଦ୍ ସାହାର୍ ରେ ନେଲ୍ ଜାନାଏ, ହାର୍ ଚିମିନ୍ ସାନ୍ କୈସାରିୟା ସାହାର୍ କାଏ ସେଟେର୍ ଜାନାଏ, ଇମିନ୍ ସାନ୍ ହାତୁ-ହାତୁ ସୁସାମାଚାର୍ ଉଦୁବ୍ ତୋରା ସେନୋଃ ଜାନାଏ। ଏନ୍ ସାମାୟ୍ ରେ ଶାଉଲ୍ ପ୍ରାଭୁ ଆଃ ଚେଲାକୋକେ ଧାମ୍‍କାଅ ଆଡୋଃ ଗୋଗୋଏଃ ରାଃ ସାନାଙ୍ଗ୍ ରେଗି ତାଇକେନାଏ, ଇନିଃ ମାରାଙ୍ଗ୍ ୟାଜାକ୍ ନାଡ଼େଏ ତାଃ ସେନ୍ ଜାନାଏ। ହାର୍ ଇନିଃକେ ଦାମେଶ୍କସ୍ ସାହାର୍ ରାଃ ବିନ୍ତିଅଡ଼୍ଆଃ କୋରାଃ ନୁତୁମ୍ ରେ ନେ ସାନାଙ୍ଗ୍ ତେ ଆଦେଶ୍ ଚିଠିକୋ ଆସିକେଦାଏ, ଚି ଚିନାଃ କଡ଼ାକୋକେ, ଚିନାଃ କୁଡ଼ିକୋକେ, ଅକନ୍ କୋକେ ଇନିଃ ୟୀଶୁ ରାଃ ହୋରା ରେ ଅତୋଙ୍ଗ୍ ତାନ୍ କୋକେ ନାମ୍ କୋୱାଏ ଇନ୍‍କୁକେ ଥୋଲ୍ କେତେ ୟୀରୁଶାଲେମ୍ ସାହାର୍ ତେ ଆଉ କୋୱାଏ। ମେନ୍ଦୋ ସେନ୍ ତାନ୍ ଇମ୍ତା ଚିମ୍ତା ଶାଉଲ୍ ହାର୍ ଆଜାଃ ହୋଡ଼ୋକୋ ଦାମେଶ୍କସ୍ ସାହାର୍ ରାଃ ନାଡ଼େଏ ତେ ଥେବାଃ ଜାନାକୋ, ଇମ୍ତା ମିଶାତୋରା ସିର୍ମାଦିଶୁମ୍ ଏତେ ଇନିଜାଃ ସବେନ୍ ପାଡ଼୍ ମାର୍ଶାଲ୍ ମାସ୍କାଲ୍ ଜାନା। ଏନ୍ତେ ଇନିଃ ଅତେ ରେ ଉୟୁଃଜାନାଏ ହାର୍ ପ୍ରାଭୁ ଆଃ ନେ କାଜି ଆୟୁମ୍ କେଦାଏ, “ହେ ଶାଉଲ୍, ହେ ଶାଉଲ୍, ଆମ୍ ଇଙ୍ଗ୍‍କେ ଚିନାଃ ନାଙ୍ଗ୍ ସାତାଅ ତାନାମ୍?” ଇନିଃ କୁଲିକିଜାଏ, “ହେ ପ୍ରାଭୁ, ଆମ୍ ଅକଏ ତାନ୍‍ମେ?” ଇନିଃ କାଜିକେଦାଏ, “ଇଙ୍ଗ୍ ୟୀଶୁ ତାନିଙ୍ଗ୍, ଅକନିଃ କେ ଚି ଆମ୍ ସାତାଅ ତାନାମ୍। ମେନ୍ଦୋ ନାଆ ବିରିଃ କେତେ ସାହାର୍ ତେ ସେନୋଃମେ, ହାର୍ ଅକନାଃକୋ ଆମ୍‍କେ ରିକା ମେନାଃ ଏନା ଆମ୍‍କେ କାଜିୟୋଗା।” ଅକନ୍ ହୋଡ଼ୋକୋ ଆଜାଃ ଲୋଃ ତାଇନ୍ କେନାକୋ, ଇନ୍‍କୁ ହାପା ତାଇ ଜାନାକୋ; ଚିୟାଃଚି ମିହୋଡ଼୍ ରାଃ କାଜି ଦୋ ଆୟୁମ୍ କେଦାକୋ ମେନ୍ଦୋ ଜେତାଏ କେ ହଗି କାକୋ ନେଲ୍ କେଦା। ଇମ୍ତାଙ୍ଗ୍ ଶାଉଲ୍ ଅତେ ଏତେ ବିରିଃ ଜାନାଏ, ମେନ୍ଦୋ ଚିମ୍ତାଙ୍ଗ୍ ମେଏଃ ଆରିଃ କେଦାଏ ଏଣ୍ଡେ ଇନିଃକେ ଜାହାନାଃ କା ନେଲ୍‍ଜାନା, ହାର୍ ଇନ୍‍କୁ ଇନିଜାଃ ତିଈ ସାବ୍ କେତେ ଦାମେଶ୍କସ୍ ସାହାର୍ ତେ ଇଦି କିଜାକୋ। ଇନିଃ ଆପି ହୁଲାଙ୍ଗ୍ ସାନ୍ କାଏ ନେଲ୍ ଧାଡ଼ିଜାନା, ହାର୍ କାଏ ଜୋମ୍ କେଦାଏ ହାର୍ କାଏ ନୁ କେଦାଏ। ଦାମେଶ୍କସ୍ ସାହାର୍ ରେ ହାନାନ୍ୟାହ୍ ନୁତୁମ୍ ମିହୋଡ଼୍ ପ୍ରାଭୁ ରାଃ ଚେଲା ତାଇକେନାଏ, ଇନିଃକେ ପ୍ରାଭୁ ଦାର୍ଶାନ୍ ରେ ମେତାଇଜାଏ, “ହେ ହାନାନ୍ୟାହ୍!” ଇନିଃ କାଜିକେଦାଏ, “ହାଁ, ପ୍ରାଭୁ।” ଇମ୍ତାଙ୍ଗ୍ ପ୍ରାଭୁ ଇନିଃକେ କାଜିକେଦାଏ, “ବିରିଃ କେତେ ଏନ୍ ହୋରା ରେ ସେନ୍ ମେ ଅକନାଃ ‘ସିଧା’ କାଜିଅଃୱା, ହାର୍ ୟାହୁଦା ରାଃ ଅଡ଼୍ଆଃ ରେ ଶାଉଲ୍ ନୁତୁମ୍ ମିହୋଡ଼୍ ତାର୍ସୁସ୍ ସାହାର୍ ରେନିଃ କେ କୁଲିମେ; ଚିୟାଃଚି ନେଲେମ୍, ଇନିଃ ବିନ୍ତି ତାନାଏ, ହାର୍ ଇନିଃ ହାନାନ୍ୟାହ୍ ନୁତୁମ୍ ମିହୋଡ଼୍ କଡ଼ା କେ ଭିତାର୍ ହିଜୁଃତାନ୍, ହାର୍ ଆଜାଃ ଚେତାନ୍ ରେ ତିଈ ମାଣ୍ଡାଅତାନ୍ ଦାର୍ଶାନ୍ ରେ ନେଲ୍ କିଜାଏ; ଏନାତେ ଇନିଃ ହାଡୋଃଗି ନେନେଲ୍ ଧାଡ଼ିକାଏ।” ହାନାନ୍ୟାହ୍ କାଜିରୁଆଡ଼୍ କେଦାଏ, “ହେ ପ୍ରାଭୁ, ଇଙ୍ଗ୍ ନେ ହୋଡ଼ ଆଃ ବିଷାୟ୍ ରେ ଥିମ୍ବାଗି ହୋଡ଼ୋକୋ ଏତେ ଆୟୁମ୍ କାଦାଇଙ୍ଗ୍ ଚି ନିଈ ୟୀରୁଶାଲେମ୍ ରେ ଆମାଃ ପାବିତାର୍ ହୋଡ଼ୋକୋକେ ମାପ୍‍ରାଙ୍ଗ୍ ଦୁକୁ-ସାସାତି ଏମାକାଃ କୋୱାଏ; ହାର୍ ନେତାଃ ରେହ ନିଈ କେ ପ୍ରାଧାନ୍ ୟାଜାକ୍‍କୋ ପାଡ଼େତେ ଆଧିକାର୍ ନାମ୍ କାନା ଚି ଅକନ୍ ହୋଡ଼ୋକୋ ଆମାଃ ନୁତୁମ୍ ଇଦିତାନାକୋ, ଏନ୍ ସବେନ୍ କୋକେ ଥୋଲ୍ ଇଦିକୋୱାଏ।” ମେନ୍ଦୋ ପ୍ରାଭୁ ଇନିଃକେ କାଜିକିଜାଏ, “ଆମ୍ ସେନ୍‍ମେ, ଚିୟାଃଚି ଇନିଃ ଦୋ ଏଟାଃଜାତି କୋକେ ହାର୍ ରାଜା କୋକେ ହାର୍ ଇସ୍ରାଏଲୀ କୋୱାଃ ନାଡ଼େଏ ରେ ଇଙ୍ଗ୍ଆଃ ନୁତୁମ୍ ପାର୍ଚାର୍ ଲାଗିନ୍ ଇଙ୍ଗ୍‍କେ ସେୱାକାଏ ମେନ୍ତେ ସାଲାକାଜାଇଙ୍ଗ୍। ହାର୍ ଇଙ୍ଗ୍ ଇନିଃକେ ଉଦୁବାଇୟାଇଙ୍ଗ୍ ଚି ଇଙ୍ଗ୍ଆଃ ନୁତୁମ୍ ଲାଗିନ୍ ଇନିଃକେ ଚିଲ୍‍କାନ୍ ଦୁକୁ ସାହାତିଙ୍ଗ୍ ହୋବାୱା।” ଏନ୍ତେ ହାନାନ୍ୟାହ୍ ବିରିଃ କେତେ ଏନ୍ ଅଡ଼୍ଆଃ ତେ ସେନ୍ ଜାନାଏ, ହାର୍ ଇନିଜାଃ ଚେତାନ୍ ରେ ଆୟାଃ ତିଈ ମାଣ୍ଡାଅ କେତେ କାଜିକେଦାଏ, “ହେ ହାଗା ଶାଉଲ୍, ପ୍ରାଭୁ, ମାନେ ୟୀଶୁ, ଅକଏ ଏନ୍ ହୋରା ରେ, ଅକୋଣ୍ଡେ ଆମ୍ ହିଜୁଃ ଲେନାମ୍ ଆମ୍‍କେ ନେଲାଃ ମେୟାଏ, ଇନିଃଗି ଇଙ୍ଗ୍‍କେ କୁଲା କାଦିଙ୍ଗାଏ ଚି ଆମ୍ ସୀଦାଲେକା ଗି ନେନେଲ୍ ଧାଡ଼ିମ୍ ହାର୍ ପାବିତାର୍ ଆତ୍ମା ତେ ଫେରେଃ କେନୋଃମ୍।” ଇମ୍ତାଗି ଆଜାଃ ମେଏଃ ତେ ଚୋୟାଁ ଲେକା ଉୟୁଃଜାନା ହାର୍ ଇନିଃ ନେଲ୍ ଧାଡ଼ିଜାନାଏ, ହାର୍ ବିରିଃ କେତେ ବାପ୍ତିସ୍ମା ଇଦିକେଦାଏ; ଏନ୍ତେ ଇନିଃ ଜୋମ୍ କେତେ ପେଡ଼େଏ ନାମ୍ କେଦାଏ। ଶାଉଲ୍ ଚିମିନ୍ ଦିନ୍ ଲେକା ଏନ୍ ଚେଲାକୋ ଲୋଃ ତାଇନ୍ ଜାନାଏ ଅକନ୍ କୋ ଦାମେଶ୍କସ୍ ସାହାର୍ ରେ ତାଇନ୍ ତାଇକେନାକୋ। ଆଡୋଃ ଇନିଃ ସେକାଡ଼୍ ଗି ବିନ୍ତିଅଡ଼୍ଆଃ ରେ ୟୀଶୁ ଆଃ ପାର୍ଚାର୍ ଏଟେଃ କେଦାଏ ଚି ଇନିଃ ପାର୍ମେଶ୍ଵାର୍ ରାଃ ହୋନ୍ ତାନିଃ। ସବେନ୍ ଆୟୁମ୍ କେନ୍ ହୋଡ଼ୋକୋ ଆକ୍‍ଦାନ୍ଦା ହୋବା କେତେ କାଜି ଏଟେଃ କେଦାକୋ, “ଚିନାଃ ନିଈ ଏନ୍ ହୋଡ଼ ଗି ନାହାଲାଏ ଅକନିଃ ୟୀରୁଶାଲେମ୍ ରେ ଇନ୍‍କୁକେ ଅକନ୍ କୋ ୟୀଶୁ ମାସୀହ୍ ନୁତୁମ୍ ରେ ବିଶ୍ଵାସ୍ ତାଇକେନାକୋ, ଗୋଏଃ କୋ ତାଇନାଏ; ହାର୍ ନେତାଃ ରେ ହଗି ନେୟା ଲାଗିନ୍ ଗି ହିଜୁଃ ଲେନାଏ ଚି ଇନ୍‍କୁକେ ଥୋଲ୍ କେତେ ପ୍ରାଧାନ୍ ୟାଜାକ୍ କୋୱାଃ ନାଡ଼େଏ ଇଦି କୋୱାଏ?” ମେନ୍ଦୋ ଶାଉଲ୍ ହାଡୋଃଗି ପେଡ଼େଏ ଇଦି ଜାନାଏ, ହାର୍ ନେ କାଜି ରାଃ ପ୍ରାମାଣ୍ ଏମ୍-ଏମ୍ କେତେ ଚି ମାସୀହ୍ ନିଈଗି ତାନିଃ, ଦାମେଶ୍କସ୍ ସାହାର୍ ରେନ୍ ତାଇନ୍ ତାନ୍ ୟାହୁଦୀ ହୋଡ଼ୋୱାଃ ମୋଚା ହାପାକୋ ତାଇକେନାଏ। ଚିମ୍ତାଙ୍ଗ୍ ଥିମ୍ବା ହୁଲାଙ୍ଗ୍ ହୋବା ଜାନା, ଏଣ୍ଡେ ୟାହୁଦୀକୋ ମେଶା କେତେ ଇନିଃକେ ଗୋଜି ରାଃ ବିଚାର୍ କେଦାକୋ। ମେନ୍ଦୋ ଇନ୍‍କୁୱାଃ ବିଚାର୍ କେ ଶାଉଲ୍ ସାରିକେଦାଏ। ଇନ୍‍କୁ ଦୋ ଇନିଃକେ ବିଡ଼ା ଗୋଏଃ ଲାଗିନ୍ତେ ନିଦା ଶିଙ୍ଗି ସାହାର୍ ବୋଲୋ ହୋରା କୋରେ ତାକ୍ ନେଲ୍ ବାଡ଼ା ତାଇକେନାକୋ। ମେନ୍ଦୋ ନିଦା ଇମ୍ତାଙ୍ଗ୍ ଚେଲାକୋ ଇନିଃକେ ଗେଣ୍ଡୁୱା ରେ ଦୁବ୍ କିଜାକୋ, ଆଡୋଃ ଘେରା ଚେତାନ୍ ଏତେ ଲାଟ୍‍କାଅଡୁଙ୍ଗା କେତେ ଆଡ଼୍‍ଗୁ କିଜାକୋ। ୟୀରୁଶାଲେମ୍ ରେ ଥେବାଃ କେତେ ଇନିଃ ଚେଲାକୋ ଲୋଃ ମେଶାନ୍ ଲାଗିନ୍ ସାନାଙ୍ଗ୍ କେଦାଏ; ମେନ୍ଦୋ ସବେନ୍ କୋ ଇନିଃକେ ବୋରୋୱାଇ ତାଇକେନାକୋ, ଚିୟାଃଚି ଇନ୍‍କୁକେ ବିଶ୍ଵାସ୍ କା ହୋବାଅଃ ତାଇକେନା, ଚି ଇନିଃ ହଗି ଚେଲା ତାନିଃ। ମେନ୍ଦୋ ବାର୍ନାବାସ୍ ଶାଉଲ୍ କେ କୁଲାକାନ୍ ଚେଲା କୋତାଃ ଇଦିକେତେ ଇନ୍‍କୁକେ ଉଦୁବାଃ କୋୱାଏ ଚି ଇନିଃ ଚିଲ୍‍କାତେ ଦାମେଶ୍କସ୍ ସାହାର୍ ହୋରା ରେ ପ୍ରାଭୁ ୟୀଶୁ କେ ନେଲ୍ କିଜାଏ, ହାର୍ ପ୍ରାଭୁ ଇନିଃ ଲୋଃ ବାକାଣ୍ କେଦାଏ; ହାର୍ ଦାମେଶ୍କସ୍ ସାହାର୍ ରେ ଇନିଃ ଚିଲ୍‍କା ସାହାସ୍ ଲୋଃ ୟୀଶୁ ରାଃ ନୁତୁମ୍ ତେ ପାର୍ଚାର୍ କେଦାଏ। ଏନ୍ତେ ବାର୍ନାବାସ୍ କେ କୁଲାକାନ୍ ଚେଲାକୋ ବିଶ୍ଵାସ୍ କିଜାକୋ ହାର୍ ଶାଉଲ୍ ଇନ୍‍କୁ ଲୋଃ ତାଇଜାନାଏ ହାର୍ ୟୀରୁଶାଲେମ୍ ରେ ହିଜୁଃ-ସେନୋଃ ତାଇକେନାଏ ହାର୍ ସାହାସ୍ ଲୋଃ ପ୍ରାଭୁ ରାଃ ନୁତୁମ୍ ତେ ପାର୍ଚାର୍ ତାଇକେନାଏ। ହାର୍ ୟୁନାନୀ ଭାଷା ବାକାଣ୍ ତାନ୍ ୟାହୁଦୀକୋ ଲୋଃ କାଜି-ବାକାଣ୍ ହାର୍ କୁଲି-କାପାଜି ତାଇକେନାଏ; ମେନ୍ଦୋ ଇନ୍‍କୁ ଇନିଃକେ ବିଡ଼ା ଗୋଏଃ ରାଃ ବିଚାର୍ ଏଟେଃ କେଦାକୋ। ନେୟା ସାରିକେତେ ହାଗାକୋ ଇନିଃକେ କୈସାରିୟା ସାହାର୍ ଆଉ କିଜାକୋ ହାର୍ ତାର୍ସୁସ୍ ସାହାର୍ ତେ କୁଲ୍ ତାଇଜାକୋ। ନେଲେକାତେ ସବେନ୍ ୟାହୁଦୀୟା ଜିଲ୍ଲା ହାର୍ ଗାଲିଲୀ ଜିଲ୍ଲା ହାର୍ ସାମାରୀୟା ଜିଲ୍ଲା ରେ କାଲିସିୟା ରେନ୍ କୋକେ ଶାନ୍ତି ନାମ୍‍ଜାନା, ହାର୍ ଇନ୍‍କୁ ଆୟୁର୍ତେ ହାରା ଇଦିୟାନାକୋ ହାର୍ ଇନ୍‍କୁ ପ୍ରାଭୁ ଆଃ ବୋରୋ ହାର୍ ପାବିତାର୍ ଆତ୍ମା ରାଃ ଶାନ୍ତି ରେ ସେସେନ୍ ହାର୍ ଆୟୁର୍ତେ ଆଡୋଃଗି ହୋଡ଼ୋକୋ ପ୍ରାଭୁ ୟୀଶୁ ଚେତାନ୍ ରେ ବିଶ୍ଵାସ୍ କେଦାକୋ। ନାଆ ନେକୋ ହୋବାଜାନା ଚି ପାତ୍ରାସ୍ ସବେନ୍ ଜାଗା ହୋନୋର୍ ତାନ୍ ଲୋଃ, ଏନ୍ ପାବିତାର୍ ହୋଡ଼ୋ କୋତାଃ ହଗି ଥେବାଃ ଜାନାଏ ଅକନ୍ କୋ ଚି ଲୁଦ୍ଦା ହାତୁ ରେ ତାଇନ୍ ତାଇକେନାକୋ। ଏନ୍ତାଃରେ ଇନିଃକେ ଏନିୟାସ୍ ନୁତୁମ୍ ଏକାଙ୍ଗୀ ବେମାର୍ ତାନ୍ ମିହୋଡ଼୍ ହୋଡ଼ ନାମ୍ ଜାନାଏ, ଅକନିଃ ଆଠ୍ ସାଲ୍ ଏତେ ପାର୍କୋମ୍ ରେ ଗିତିଜାକାନ୍ ତାଇକେନାଏ। ପାତ୍ରାସ୍ ଇନିଃକେ କାଜିକେଦାଏ, “ହେ ଏନିୟାସ୍! ୟୀଶୁ ମାସୀହ୍ ଆମ୍‍କେ ବେଶ୍ ମେତାନାଏ। ବିରିଃମେ, ଆମାଃ ଡିସ୍ନା ଲାଟୁମେମ୍।” ଏନ୍ତେ ଇନିଃ ସେକାଡ଼୍ ଗି ବିରିଃ କେତେ ତିଙ୍ଗୁ ଜାନାଏ। ଏନ୍ତେ ଲୁଦ୍ଦା ହାର୍ ଶାରୋନ୍ ହାତୁ ରେନ୍ ସବେନ୍ ହୋଡ଼ୋକୋ ଇନିଃକେ ନେଲ୍‍କେତେ ପ୍ରାଭୁ କେ ବିଶ୍ଵାସ୍ କେଦାକୋ। ୟାଫା ହାତୁ ରେ ତାବିତା ମାନେ ଦାର୍କାସ୍ ଗ୍ରୀକ୍ ଭାଷା ରେ ହାରିନ୍ ନୁତୁମ୍ ମିହୋଡ଼୍ ବିଶ୍ଵାସୀ କୁଡ଼ି ତାଇନ୍ କେନାଏ। ଇନିଃ ଥିମ୍ବାଗି ବୁଗିନ୍-ବୁଗିନ୍ କାମି ହାର୍ ଗାରିବ୍ କୋକେ ଦାନ୍ ଏମ୍‍କୋ ତାଇକେନାଏ। ପାତ୍ରାସ୍ ଲୁଦ୍ଦା ହାତୁ ରେ ତାଇନ୍ ହୁଲାଙ୍ଗ୍ କୋରେଗି ଏନ୍ କୁଡ଼ି ବେମାର୍ ହୋବା କେତେ ଗୋଏଃ ଜାନାଏ; ହାର୍ ଇନ୍‍କୁ ଇନିଃକେ ଉମେନ୍ କେତେ ଚେତାନ୍ କୋଠୋରୀ ରେ ମାଣ୍ଡାଅ ତାଇଜାକୋ। ଲୁଦ୍ଦା ହାତୁ ୟାଫା ହାତୁ ରାଃ ନାଡ଼େଏ ରେ ତାଇକେନା, ଏନାମେନ୍ତେ ଚେଲାକୋ ଚିମ୍ତାଙ୍ଗ୍ ନେୟା ଆୟୁମ୍‍କେତେ ଚି ପାତ୍ରାସ୍ ଏନ୍ତାଃ ରେ ମେନାଇଜା, ବାରିୟା ହୋଡ଼ କୁଲ୍ କେତେ ଇନିଃକେ ଆର୍ଜି କିଜାକୋ ଚି, “ଆଲେ ତାଃ ହିଜୁଃ ଲାଗିନ୍ତେ ଆଲୋମ୍ ଦେରୀୟା।” ଏନ୍ତେ ପାତ୍ରାସ୍ ବିରିଃ କେତେ ଇନ୍‍କୁ ଲୋଃ ଗାତି ଜାନାଏ, ହାର୍ ଚିମ୍ତାଙ୍ଗ୍ ଇନିଃ ଥେବାଃ ଜାନାଏ ଦୋ ଇନ୍‍କୁ ଇନିଃକେ ଏନ୍ ଚେତାନ୍ କୋଠୋରୀ ରେ ଇଦିକିଜାକୋ। ସବେନ୍ ବିଧୋବାକୋ ରାଆତାନ୍ ଇନିଃ ତାଃ ହିଜୁଃ ତିଙ୍ଗୁ ଜାନାକୋ, ହାର୍ ଅକନ୍ ଝୁଲାକୋ ଆଡୋଃ ଲିଜାଃକୋ ଅକନାଃ ଚି ଦାର୍କାସ୍ ଇନ୍‍କୁ ଲୋଃ ତାଇନ୍ ଇମ୍ତା ବାଇ ଲେଦାଏ ଦେଖାଅ କିଜାକୋ। ଏନ୍ତେ ପାତ୍ରାସ୍ ସବେନ୍ କୋକେ ବାହାରି ତେ କୁଲ୍ ତାଃ କୋୱାଏ, ଆଡୋଃ ଇକ୍ଡ଼ୁମ୍ କେତେ ବିନ୍ତି କେଦାଏ ହାର୍ ମାଣା ପାଡ଼୍ ନେଲ୍‍କେତେ କାଜିକେଦାଏ, “ହେ ତାବିତା, ବିରିଃମେ।” ଏନ୍ତେ ଇନିଃ ଆୟାଃ ମେଏଃ ଆରିଃ କେଦାଏ; ହାର୍ ପାତ୍ରାସ୍ କେ ନେଲ୍‍କେତେ ବିରିଃ ଦୁବ୍ ଜାନାଏ। ଇନିଃ ତିଈ ସାବ୍ କେତେ ଇନିଃକେ ବିରିଃ କିଜାଏ, ହାର୍ ପାବିତାର୍ ହୋଡ଼ୋକୋକେ ଆଡୋଃ ବିଧୋବାକୋକେ କେଡ଼ାକେତେ ଇନିଃକେ ଜୀହିଃ ଦେଖାଅ କେଃକୋୱାଏ। ନେ କାଜି ସବେନ୍ ୟାଫା ହାତୁ ରେନ୍ କୋ ସାରିଜାନାକୋ; ହାର୍ ଥିମ୍ବାଗି ହୋଡ଼ୋକୋ ପ୍ରାଭୁ ୟୀଶୁ ଚେତାନ୍ ରେ ବିଶ୍ଵାସ୍ କେଦାକୋ। ଏନ୍ତେ ପାତ୍ରାସ୍ ୟାଫା ହାତୁ ରେ ଶିମୋନ୍ ନୁତୁମ୍ ମିହୋଡ଼୍ ଉହୁର୍ ରାଃ କାମିତାନ୍ ନିଃ ତାଃ ଥିମ୍ବାଗି ହୁଲାଙ୍ଗ୍ ସାନ୍ ତାଇନ୍ ଜାନାଏ। କୈସାରିୟା ହାତୁ ରେ କୁର୍ନେଲିୟୁସ୍ ନୁତୁମ୍ ମିୟାଃ ହୋଡ଼ ତାଇକେନାଏ, ଅକନିଃ ଇଟାଲିୟାନ୍ ନୁତୁମ୍ ରୋମାନ୍ ଶାଅସିପାହୀ କୋୱାଃ ଗୋମ୍‍କେ ତାଇକେନାଏ। ଇନିଃ ପାର୍ମେଶ୍ଵାର୍ କେ ସେୱା ନିଈ ତାଇକେନାଏ, ହାର୍ ଆଜାଃ ପୁରା ଅଡ଼୍ଆଃ ରେନ୍ କୋଲୋଃ ପାର୍ମେଶ୍ଵାର୍ କେ ବୋରୋ ତାଇକେନାଏ, ହାର୍ ୟାହୁଦୀ ଗାରିବ୍ ହୋଡ଼ୋକୋକେ ଥିମ୍ବାଗି ଦାନ୍ ଏମାକୋ ତାଇକେନାଏ, ହାର୍ ସବେନ୍ ଇମ୍ତା ପାର୍ମେଶ୍ଵାର୍ କେ ବିନ୍ତି ତାଇକେନାଏ। ଇନିଃ ଉଲ୍‍ଟି ବେଲା ତିନ୍ ବାଜେ ନାଡ଼େଏ ରେ ଦାର୍ଶାନ୍ ରେ ସାଫା-ସାଫା ନେଲ୍‍କେଦାଏ ଚି ପାର୍ମେଶ୍ଵାର୍ ରାଃ ମିୟାଃ ସିର୍ମାଦାସୀ ଇନିଜାଃ ନାଡ଼େଏ ଭିତାର୍ ହିଜୁଃକେତେ କାଜି ତାନାଏ, “ହେ କୁର୍ନେଲିୟୁସ୍!” ଇନିଃ ଇନିଃକେ ଧ୍ୟାନ୍‍ତେ ନେଲ୍ କିଜାଏ ହାର୍ ବୋରୋ କେତେ କାଜିକେଦାଏ, “ହେ ପ୍ରାଭୁ, ଚିନାଃ ହୋବାନା?” ଇନିଃ ଇନିଃକେ କାଜିକେଦାଏ, “ଆମାଃ ବିନ୍ତି ହାର୍ ଦାନ୍ ମୋନେ ଲାଗିନ୍ ପାର୍ମେଶ୍ଵାର୍ ରାଃ ସାମାନାଙ୍ଗ୍ ରେ ସେଟେର୍ କାନା। ନାଆ ୟାଫା ହାତୁ ତେ ହୋଡ଼ୋ କୁଲ୍ କେତେ ଶିମୋନ୍ କେ, ଅକନିଃ ପାତ୍ରାସ୍ କାଜିୟୋଗାଏ, କେଡ଼ା ଆଉକିମେ। ଇନିଃ ଶିମୋନ୍ ଉହୁର୍ ବେପାରୀ ତାଃ ପେଡ଼ା ହିଜୁଃ କାନାଏ, ଅକନିଜାଃ ଅଡ଼୍ଆଃ ସାମୁଦାର୍ ଗେନା ରେ ମେନାଃ।” ଚିମ୍ତାଙ୍ଗ୍ ହେନ୍ ସିର୍ମାଦାସୀ ଅକଏ ଇନିଃ ଲୋଃ ବାକାଣ୍ ଲେଦାଏ ସେନୋଃ ଜାନାଏ, ଏଣ୍ଡେ ଇନିଃ ବାରିୟା ସେୱାକ୍ କୋକେ, ହାର୍ ଅକନ୍ କୋ ଇନିଜାଃ ନାଡ଼େଏ ରେ ତାଇନ୍ ତାଇକେନାକୋ ଇନ୍‍କୁ ଏତେ ମିହୋଡ଼୍ ପାର୍ମେଶ୍ଵାର୍ କେ ସେୱାତାନ୍ ସିପାହୀ କେ କେଡ଼ା କିଜାଏ, ହାର୍ ଇନ୍‍କୁକେ ସବେନ୍ ବାକାଣ୍ ଉଦୁବ୍ କେତେ ୟାଫା ହାତୁ ତେ କୁଲ୍ କେଃକୋୱାଏ। ଏଟାଃ ହୁଲାଙ୍ଗ୍ ଚିମ୍ତାଙ୍ଗ୍ ଇନ୍‍କୁ ସେନ୍-ସେନ୍ ହାତୁ ନାଡ଼େଏ ସେଟେର୍ ଜାନାକୋ, ଏଣ୍ଡେ ଏନ୍ ସାମାୟ୍ ତିକିନ୍ ଇମ୍ତା ପାତ୍ରାସ୍ ଛାତ୍ ଚେତାନ୍ ରେ ବିନ୍ତି ଲାଗିନ୍ ରାକାବ୍ ଜାନାଏ। ଇନିଃକେ ରେଙ୍ଗେଃ କିଜା ହାର୍ ଜାହାନାଃ ଜୋମ୍ ସାନାଙ୍ଗ୍ ତାଇକେନାଏ, ମେନ୍ଦୋ ଚିମ୍ତାଙ୍ଗ୍ ଇନ୍‍କୁ ଯୋଜୋମାଃ ବାଇତାଇକେନାକୋ ଇମ୍ତା ଇନିଃ ଆଧା-ଦୁଣୁମ୍ ଲେକା ହୋବା ଜାନାଏ; ହାର୍ ଇନିଃ ନେଲ୍‍କେଦାଏ, ଚି ରିମିଲ୍‍ଦିଶୁମ୍ ଖଲାଅ ଜାନା; ହାର୍ ମିୟାଃ ଜିନିଷ୍ ମାରାଙ୍ଗ୍ ଚାଦାର୍ ଲେକା ଚାଇର୍ କୋନା ରେ ଡୁଙ୍ଗାକେତେ ଅତେ ପାଡ଼୍ ଆଡ଼୍‍ଗୁ ତାନା। ଅକନାଃ ରେ ଅତେ ରାଃ ସବେନ୍ ଲେକାନ୍ ଚାଇର୍ କାଟାକାନ୍ ପାଶୁକୋ ହାର୍ ରେଙ୍ଗାଅ ତେ ସେସେନ୍ ଜାନ୍ତୁକୋ ହାର୍ ରିମିଲ୍‍ଦିଶୁମ୍ ରାଃ ଅଡ଼େ କୋ ତାଇକେନାକୋ। ଇନିଃକେ ମିୟାଃ ନେକା ଆୱାଜ୍ ଆୟୁମ୍‍ଜାନା, “ହେ ପାତ୍ରାସ୍ ବିରିଃମେ, ଗୋଏଃକୋମେ ହାର୍ ଜୋମ୍ କୋମେ।” ମେନ୍ଦୋ ପାତ୍ରାସ୍ କାଜିକେଦାଏ, “କାହା ପ୍ରାଭୁ, କାହୋବାୱା; ଚିୟାଃଚି ଇଙ୍ଗ୍ ଚିଉଲା ହ ଜାହାନ୍ ଆପାବିତାର୍ ୟାଦୋ ଆଶୁଦ୍ଧ୍ ଜିନିଷ୍ କେ କାଇଙ୍ଗ୍ ଜୋମ୍ କାଦା।” ଏନ୍ତେ ଆଡୋଃ ମିଶା ଇନିଃକେ ଆୱାଜ୍ ଆୟୁମ୍ ଜାନା, “ଅକନାଃକୋକେ ପାର୍ମେଶ୍ଵାର୍ ଶୁଦ୍ଧ୍ ଠାହ୍‍ରାଓ କାଦାଏ ଏନାକେ ଆମ୍ ଆଶୁଦ୍ଧ୍ ଆଲୋମ୍ କାଜିୟା।” ଆପିସା ଏନ୍‍ଲେକାଗି ହୋବାଜାନା; ଏନ୍ତେ ଇମ୍ତାଗି ହେନ୍ ଜିନିଷ୍ ରିମିଲ୍‍ଦିଶୁମ୍ ପାଡ଼୍ ଉଠାଓ ଇଦିଜାନା। ଚିମ୍ତାଙ୍ଗ୍ ପାତ୍ରାସ୍ ଆଜାଃ ମୋନ୍ ରେ ବାରିୟା ଚିନ୍ତା ରେ ତାଇକେନାଏ, ଚି ନେ ଦାର୍ଶାନ୍ ଅକନାଃ ଇଙ୍ଗ୍ ନେଲ୍ କେଦାଇଙ୍ଗ୍ ଏନା ଚିନାଃ ହୋବାଧାଡ଼ିୟୋଃୱା, ଏଣ୍ଡେ ନେଲେପେ, ହେନ୍ ହୋଡ଼ୋକୋ ଅକନ୍ କୋକେ କୁର୍ନେଲିୟୁସ୍ କୁଲ୍ ଲେଃ କୋୱାଏ, ଶିମୋନ୍ ରାଃ ଅଡ଼୍ଆଃ କୁଲି-କୁଲି କେତେ ଦୁହାର୍ ତାଃ ହିଜୁଃ ତିଙ୍ଗୁଜାନାକୋ। ହାର୍ କେଡ଼ା କେତେ କୁଲି କେଦାକୋ, “ଚିନାଃ ଶିମୋନ୍ ଅକନିଃ ପାତ୍ରାସ୍ କାଜିୟୋଗାଏ, ନେତାଃ ରେ ପେଡ଼ା ହିଜୁଃ କାନାଏ?” ପାତ୍ରାସ୍ ଦୋ ଏନ୍ ଦାର୍ଶାନ୍ ବିଷାୟ୍ ରେ ପାହୋମ୍ ରେ ତାଇକେନାଏ, ଚି ପାବିତାର୍ ଆତ୍ମା ଇନିଃକେ କାଜିକେଦାଏ, “ନେଲେମ୍, ଆପିୟା ହୋଡ଼ୋକିନ୍ ଆମ୍‍କେ ଦାଣାମେ ତାନାକୋ। ଏନାତେ ବିରିଃ କେତେ ଲାଥାର୍ ସେନ୍‍ମେ, ହାର୍ ବେଗାର୍ ପାହୋମ୍ ଇନ୍‍କୁ ଲୋଃ ସେନ୍‍ମେ; ଚିୟାଃଚି ଇଙ୍ଗ୍ ଗି ଇନ୍‍କୁକେ କୁଲା କାଃକୋୱାଇଙ୍ଗ୍।” ଏନ୍ତେ ପାତ୍ରାସ୍ ଆଡ଼୍‍ଗୁକେତେ ଏନ୍ ହୋଡ଼ୋକୋକେ କାଜିକେଦାଏ, “ନେଲେପେ, ଅକନିଃକେ ଆପେ ଦାଣାଇ ତାନାପେ, ଇନିଃ ଇଙ୍ଗ୍ ଗି ତାନିଙ୍ଗ୍। ଆପେ ଚିନାଃ ମେନେଃ ହିଜୁଃ କାନାପେ?” ଇନ୍‍କୁ କାଜିକେଦାକୋ, “କୁର୍ନେଲିୟୁସ୍ ଶାଅସିପାହୀ କୋୱା ଗୋମ୍‍କେ ଅକନିଃ ଧାର୍ମୀ ହାର୍ ପାର୍ମେଶ୍ଵାର୍ କେ ବୋରୋତାନ୍ ନିଈ ହାର୍ ସବେନ୍ ୟାହୁଦୀ ଜାତି କୋରେ ନୁତୁମାନ୍ ହୋଡ଼ ତାନିଃ, ଇନିଃ ମିୟାଃ ପାବିତାର୍ ସିର୍ମାଦାସୀ ତେ ନେ ଆନାଚୁ ନାମାକାଦାଏ ଚି ଆମ୍‍କେ ଆଜାଃ ଅଡ଼୍ଆଃ କେଡ଼ାକେତେ ଆମାଃ ତେ ବାଚାନ୍ ଆୟୁମେ ୟାଏ।” ଏନ୍ତେ ଇନିଃ ଇନ୍‍କୁକେ ଭିତାର୍ କେଡ଼ାକେତେ ସୁସାର୍ କେଃକୋୱାଏ। ଏଟାଃ ହୁଲାଙ୍ଗ୍ ଇନିଃ ଇନ୍‍କୁ ଲୋଃ ସେନ୍ ଜାନାଏ, ହାର୍ ୟାଫା ହାତୁ ତେ ହାଗାକୋଏତେ ଚିମିନ୍ କୋ ଇନିଃ ଲୋଃ ଗାତିଜାନାକୋ। ଏଟାଃ ହୁଲାଙ୍ଗ୍ ଇନ୍‍କୁ କୈସାରିୟା ହାତୁ ସେଟେର୍ ଜାନାକୋ, ହାର୍ କୁର୍ନେଲିୟୁସ୍ ଆୟାଃ କୁଟୁମ୍ବ କୋଲୋଃ ଆଡୋଃ ଦୁଲାଡ଼୍ ଗାତିକୋକେ ହୁଣ୍ଡି କେତେ ଇନ୍‍କୁୱାଃ ନେଲ୍ ହୋରା ତାଇକେନାଏ। ଚିମ୍ତାଙ୍ଗ୍ ପାତ୍ରାସ୍ ଭିତାର୍ ହିଜୁଃ ତାଇକେନାଏ, ଏଣ୍ଡେ କୁର୍ନେଲିୟୁସ୍ ଇନିଃକେ ଦାରୋମ୍ କିଜାଏ, ଆଡୋଃ ଇନିଜାଃ କାଟାସୁବା ରେ ଉୟୁଃକେତେ ଜୋହାର୍ କିଜାଏ; ମେନ୍ଦୋ ପାତ୍ରାସ୍ ଇନିଃକେ ବିରିଃ କେତେ କାଜିକେଦାଏ, “ତିଙ୍ଗୁନ୍ ମେ, ଇଙ୍ଗ୍ ହ ଦୋ ହୋଡ଼ ତାନିଙ୍ଗ୍।” ଏନ୍ତେ ଇନିଃ ଲୋଃ ବାକାଣ୍ ତାନ୍‍ଲୋଃ ଭିତାର୍ ସେନ୍‍ନାଏ, ହାର୍ ମିଃଥିମ୍ବା ହୋଡ଼ୋକୋକେ ହୁଣ୍ଡିକାନ୍ ନେଲ୍‍କେତେ ଇନ୍‍କୁ କେ କାଜିକେଦାଏ, “ଆପେ ସାରିୟାପେ ଚି ଏଟାଃଜାତି କୋଲୋଃ ଗାତିନ୍ ୟାଦୋ ଇନ୍‍କୁତାଃ ସେନ୍ ଆଲେ ୟାହୁଦୀ କୋ ଲାଗିନ୍ ଆଧାର୍ମ୍ ତାନାଃ, ମେନ୍ଦୋ ପାର୍ମେଶ୍ଵାର୍ ଇଙ୍ଗ୍‍କେ ଉଦୁବ୍ କେଦିଙ୍ଗାଏ ଚି ଜେତାନ୍ ହୋଡ଼ କେ ଆପାବିତାର୍ ୟାଦୋ ଆଶୁଦ୍ଧ୍ କାଇଙ୍ଗ୍ କାଜିୟା। ଏନାମେନ୍ତେ ଚିମ୍ତା ଇଙ୍ଗ୍ କେଡ଼ା ଜାନିଙ୍ଗ୍ ଏଣ୍ଡେ ବେଗାର୍ ଜାହାନାଃ କାଜି ହିଜୁଃ ଜାନାଇଙ୍ଗ୍। ନାଆ ଇଙ୍ଗ୍ କୁଲିତାନିଙ୍ଗ୍ ଚି ଇଙ୍ଗ୍‍କେ ଚିକାନ୍ କାମି ଲାଗିନ୍ କେଡ଼ା କାନା?” କୁର୍ନେଲିୟୁସ୍ କାଜିକେଦାଏ, “ନେ ସାମାୟ୍ ଗି, ପୁରା ଚାଇର୍ ଦିନ୍ ହୋବାଜାନା, ଇଙ୍ଗ୍ ଇଙ୍ଗ୍ଆଃ ଅଡ଼୍ଆଃ ରେ ଶିଙ୍ଗି ତିନ୍ ବାଜେ ବିନ୍ତି ତାଇକେନାଇଙ୍ଗ୍; ଏଣ୍ଡେ ନେଲେପେ, ମିୟାଃ ହୋଡ଼ୋ ଚାକ୍-ଚାକ୍ ଲିଜାଃ ତୁସିଙ୍ଗ୍ କାନ୍, ଇଙ୍ଗ୍ଆଃ ନାଡ଼େଏ ତିଙ୍ଗୁ ଜାନାଏ। ହାର୍ତେ କାଜିକେଦାଏ, ‘ହେ, କୁର୍ନେଲିୟୁସ୍, ଆମାଃ ବିନ୍ତି ଆୟୁମ୍ ଜାନା ହାର୍ ଆମାଃ ଦାନ୍ ପାର୍ମେଶ୍ଵାର୍ ରାଃ ନାଡ଼େଏ ରେ ପାହୋମ୍ କାନା। ଏନାମେନ୍ତେ ଜାହାଁଏ କେ ୟାଫା ହାତୁ କୁଲ୍ କେତେ ଶିମୋନ୍ କେ ଅକନିଃ ପାତ୍ରାସ୍ କାଜିୟୋଗାଏ, କେଡ଼ାଇମେ। ଇନିଃ ସାମୁଦାର୍ ଗେନା ରେ ଶିମୋନ୍ ଉହୁର୍ ବେପାରୀ ନିଜାଃ ଅଡ଼୍ଆଃ ରେ ପେଡ଼ା ମେନିଜା।’ ଏନ୍ତେ ଇଙ୍ଗ୍ ଇମ୍ତାଗି ଆମାଃ ନାଡ଼େଏ ହୋଡ଼ୋକୋକେ କୁଲ୍‍କେଦାଇଙ୍ଗ୍, ହାର୍ ଆମ୍ ବେଶ୍ କେଦାମ୍ ଜେ ହିଜୁଃ ଜାନାମ୍। ନାଆ ଆବୁ ସବେନ୍ ନେତାଃ ରେ ପାର୍ମେଶ୍ଵାର୍ ରାଃ ସାମାନାଙ୍ଗ୍ ରେ ମେନାବୁୱା, ଏନାତେ ଅକନାଃକୋ ପ୍ରାଭୁ ଆମ୍‍କେ କାଜିକାଦାଏ ଏନାକେ ଆୟୁମ୍‍ୟାଲେ।” ଏନ୍ତେ ପାତ୍ରାସ୍ କାଜିକେଦାଏ, “ନାଆ ଇଙ୍ଗ୍ ସାରି ଉରୁମ୍ କେଦାଇଙ୍ଗ୍ ଚି ପାର୍ମେଶ୍ଵାର୍ ଜେତାୟାଃ ମେଏଃମୁହାଡ଼୍ ନେଲ୍ କେତେ କାଏ ବିଚାର୍ ୟାଏ, ମେନ୍ଦୋ ସବେନ୍ ଜାତି ରେ ଅକଏ ଇନିଃକେ ବୋରୋୟାଏ ହାର୍ ଧାରାମ୍ ରାଃ କାମି ରିକାୟାଏ, ହିନିଃ ଇନିଃକେ ବେଶ୍ ପାତିୟାଏ। ଅକନ୍ ବାଚାନ୍ ଇନିଃ ଇସ୍ରାଏଲୀ କୋୱାଃ ନାଡ଼େଏ କୁଲ୍ କେଦାଏ, ଚିମ୍ତା ଇନିଃ ୟୀଶୁ ମାସୀହ୍ ହୋରାତେ (ଅକଏ ସବେନ୍ କୋୱାଃ ପ୍ରାଭୁ ତାନିଃ) ଶାନ୍ତି ରାଃ ସୁସାମାଚାର୍ ଉଦୁବ୍ କେଃକୋୱାଏ, ଆପେ ନେ ସବେନ୍ କାଜିକୋ ସାରିୟାପେ, ଅକନାଃ ଯୋହାନ୍ ରାଃ ବାପ୍ତିସ୍ମା ରାଃ ପାର୍ଚାର୍ ତାୟୋମ୍ତେ ଗାଲିଲୀ ଜିଲ୍ଲା ଏତେ ସୁରୁ କେତେ ପୁରା ୟାହୁଦୀୟା ଜିଲ୍ଲା ରେ ଫୈଲାଅ ଜାନା: ପାର୍ମେଶ୍ଵାର୍ ଚିଲ୍‍କା ତେ ୟୀଶୁ ନାଜ୍ରେଥିୟା କେ ପାବିତାର୍ ଆତ୍ମା ଆଡୋଃ ପେଡ଼େଏ ତେ ଆଭିଷେକ୍ କିଜାଏ; ଇନିଃ ବୁଗିନାଃ ରିକାତାନ୍ ଲୋଃ ହାର୍ ସବେନ୍ କୋକେ ଅକନ୍ କୋ ଶାଏତାନ୍ ତେ ସାସାତି ଲେନାକୋ, ବେଶ୍ ରିକାତାନ୍ ଲୋଃ ହୋନୋର୍ କେଦାଏ, ଚିୟାଃଚି ପାର୍ମେଶ୍ଵାର୍ ଇନିଃ ଲୋଃ ତାଇକେନାଏ। ଆଲେ ଏନ୍ ସବେନ୍ କାମି କୋରାଃ ଗୋୱା ତାନ୍‍ଲେ; ଅକନାଃ ଇନିଃ ୟାହୁଦୀ ହୋଡ଼ୋକୋୱାଃ ଜାଗା କୋରେ ହାର୍ ୟୀରୁଶାଲେମ୍ ରେହ ରିକା କେଦାଏ, ହାର୍ ୟାହୁଦୀ ଗୁରୁ କୋ ଇନିଃକେ ସାହାନ୍ କ୍ରୁଶ୍ ରେ ଲାଟ୍‍କାଅ କେତେ ଗୋଏଃ କିଜାକୋ। ଇନିଃକେ ପାର୍ମେଶ୍ଵାର୍ ଆପି ହୁଲାଙ୍ଗ୍ ରେ ଜୀହିଃ ବିରିଃ କିଜାଏ, ହାର୍ ଦେଖାଅ ତାଦାଏ; ସବେନ୍ ହୋଡ଼ୋକୋ ରେ କାହା ମାଗାର୍ ଏନ୍ ଗୋୱାକୋ ରେ ଅକନ୍ କୋକେ ପାର୍ମେଶ୍ଵାର୍ ସିଦାଏତେ ସାଲାଲେଃ କୋୱାଏ, ମାନେ ଆଲେକେ ଅକନ୍ କୋ ଇନିଜାଃ ଗୋଜାକାନ୍ କୋଏତେ ଜୀହିଃ ବିରିଦେନ୍ ତାୟୋମ୍ତେ ଇନିଃ ଲୋଃ ଜୋମ୍-ନୁ କେଦାଲେ; ହାର୍ ଇନିଃ ଆଲେକେ ଆନାଚୁ ଏମ୍‍କେଦାଏ ଚି ହୋଡ଼ୋକୋ ରେ ପାର୍ଚାର୍ ଏପେ ହାର୍ ଗୋୱା ଏମେପେ, ଚି ନିଈ ହିନିଃଗି ତାନିଃ ଅକନିଃକେ ପାର୍ମେଶ୍ଵାର୍ ଜୀହିଦାକାନ୍ ହାର୍ ଗୋଜାକାନ୍ କୋୱାଃ ବିଚାର୍‍ନିଃ ବାଇ କିଜାଏ। ସବେନ୍ ନାବୀ କୋ ଇନିଜାଃ ଗୋୱା ଏମେୟାକୋ ଚି ଜେତାଏ ଇନିଜାଃ ଚେତାନ୍ ରେ ବିଶ୍ଵାସ୍ ୟାଏ, ଇନିଃକେ ଇନିଜାଃ ନୁତୁମ୍ ରେ ପାପ୍ କୋରାଃ ଛାମା ନାମୋଗା।” ପାତ୍ରାସ୍ ନେ ବାକାଣ୍ କାଜି ତାଇନ୍ ରେଗି ପାବିତାର୍ ଆତ୍ମା ବାଚାନ୍ କେ ଆୟୁମ୍‍ତାନ୍ ସବେନ୍ କୋ ଚେତାନ୍ ରେ ଆଡ଼୍‍ଗୁଜାନା। ହାର୍ ଚିମିନାଙ୍ଗ୍ ଖାତ୍ନା ହୋବାକାନ୍ ବିଶ୍ଵାସୀକୋ ପାତ୍ରାସ୍ ଲୋଃ ହିଜୁଃ ଲେନାକୋ, ଇନ୍‍କୁ ସବେନ୍ ଆକ୍‍ଦାନ୍ଦା ଜାନାକୋ ଚି ଏଟାଃଜାତି କୋୱାଃ ରେ ହଗି ପାବିତାର୍ ଆତ୍ମା ରାଃ ଦାନ୍ ଦୁଲ୍ ଜାନା। ଚିୟାଃଚି ହିନ୍‍କୁ ଇନ୍‍କୁକେ ଏଟାଃ-ଏଟାଃ ରାଃ ଭାଷା ବାକାଣ୍ ତାନ୍ ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାତାନ୍ ଆୟୁମ୍ କେଦାକୋ। ଏନାତେ ପାତ୍ରାସ୍ କାଜିକେଦାଏ, “ଚିନାଃ ଜାହାଁଏ ଦାଆ କେ ହୋକା ଧାଡ଼ିୟାଏ ଚି ନିକୁ ବାପ୍ତିସ୍ମା ଆଲୋକା ନାମେଚା, ଅକନ୍ କୋ ଆବୁ ଲେକା ପାବିତାର୍ ଆତ୍ମା ନାମା କେଦାକୋ?” ଏନ୍ତେ ପାତ୍ରାସ୍ ଆନାଚୁ ଏମ୍‍କେଦାଏ ଚି ହିନ୍‍କୁକେ ୟୀଶୁ ମାସୀହ୍ ରାଃ ନୁତୁମ୍ ରେ ବାପ୍ତିସ୍ମା ଏମୋଃକା। ଏନ୍ତେ ହିନ୍‍କୁ ଇନିଃକେ ଆର୍ଜି କିଜାକୋ ଚି ହିନିଃ ଆଡୋଃ ହୁଡିଙ୍ଗ୍ ଦିନ୍ ଇନ୍‍କୁ ଲୋଃ ତାଇନ୍ କାଏ। କୁଲାକାନ୍ ଚେଲାକୋ ହାର୍ ଏଟାଃ ବିଶ୍ଵାସୀ ହାଗାକୋ ଅକନ୍ କୋ ୟାହୁଦୀୟା ଜିଲ୍ଲା ରେ ତାଇନ୍ ତାଇକେନାକୋ ଆୟୁମ୍ କେଦାକୋ ଚି ଏଟାଃଜାତି କୋ ହ ପାର୍ମେଶ୍ଵାର୍ ରାଃ ବାଚାନ୍ କେ ମାନାତିଙ୍ଗ୍ କେଦାକୋ। ଏନାମେନ୍ତେ ଚିମ୍ତାଙ୍ଗ୍ ପାତ୍ରାସ୍ ୟୀରୁଶାଲେମ୍ ସାହାର୍ ରେ ହିଜୁଃଲେନାଏ, ଇମ୍ତାଙ୍ଗ୍ ଖାତ୍ନାକାନ୍ ବିଶ୍ଵାସୀ ହୋଡ଼ୋକୋ ଇନିଃ ଲୋଃ କୁଲି-କାପାଜି ଜାନାକୋ, “ଆମ୍ କାଖାତ୍ନାକାନ୍ ହୋଡ଼ୋକୋ ତାଃ ସେନ୍ କେତେ ଇନ୍‍କୁ ଲୋଃ ଜୋମ୍ କେଦାମ୍।” ଇମ୍ତାଙ୍ଗ୍ ପାତ୍ରାସ୍ ଇନ୍‍କୁକେ ସୁରୁଏତେ ମିୟାଃ-ମିୟାଃ ବାକାଣ୍ କାଜିକେଦାଏ, “ଇଙ୍ଗ୍ ୟାଫା ହାତୁ ରେ ବିନ୍ତି ତାଇକେନାଇଙ୍ଗ୍, ହାର୍ ଆଧା-ଦୁଣୁମ୍ ଲେକା ହୋଇ କେତେ ମିୟାଃ ଦାର୍ଶାନ୍ ନେଲ୍ କେଦାଇଙ୍ଗ୍ ଚି ମିୟାଃ ଜିନିଷ୍ ମାରାଙ୍ଗ୍ ଚାଦାର୍ ଲେକା ଚାଇରୋ କୋନା ତେ ଲାଟ୍‍କାଅ କାନ୍, ରିମିଲ୍‍ଦିଶୁମ୍ ତେ ଆଡ଼୍‍ଗୁ କେତେ ଇଙ୍ଗ୍ଆଃ ତାଃ ହିଜୁଃଲେନା। ଚିମ୍ତାଙ୍ଗ୍ ଇଙ୍ଗ୍ ଏନାକେ ନେଲ୍ କେଦାଇଙ୍ଗ୍, ଦୋ ଏଣ୍ଡେରେ ଅତେ ରାଃ ଚାଇର୍ କାଟାକାନ୍ ପାଶୁକୋ ହାର୍ ଟୋନାଙ୍ଗ୍ ଜାନ୍ତୁକୋ ହାର୍ ରେଙ୍ଗାଅତାନ୍ ଜାନ୍ତୁକୋ ହାର୍ ରିମିଲ୍‍ଦିଶୁମ୍ ରାଃ ଅଡ଼େ କୋକେ ନେଲ୍ କେଦାଇଙ୍ଗ୍। ହାର୍ ନେ କାଜି ହ ଆୟୁମ୍ କେଦାଇଙ୍ଗ୍, ‘ହେ ପାତ୍ରାସ୍ ବିରିଃମେ, ଗୋଏଃକୋମେ ହାର୍ ଜୋମ୍ କୋମେ।’ ଇଙ୍ଗ୍ କାଜିକେଦାଇଙ୍ଗ୍, ‘କାହା ପ୍ରାଭୁ, କାହୋବାୱା, ଚିୟାଃଚି ଜାହାନ୍ ଆପାବିତାର୍ ୟାଦୋ ଆଶୁଦ୍ଧ୍ ଜିନିଷ୍ ଇଙ୍ଗ୍ଆଃ ମୋଚା ରେ ଚିଉଲା ହ କାବୋଲୋ କାନା।’ ନେୟାରାଃ କାଜିରୁଆଡ଼୍ ରେ ରିମିଲ୍‍ଦିଶୁମ୍ ତେ ଆଡୋଃ ମିଶା କାଜି ଆୟୁମ୍ ଜାନା, ‘ଅକନାଃକୋକେ ପାର୍ମେଶ୍ଵାର୍ ଶୁଦ୍ଧ୍ ଠାହ୍‍ରାଓ କାଦାଏ ଏନାକେ ଆଶୁଦ୍ଧ୍ ଆଲୋମ୍ କାଜିୟା।’ ଆପିସା ଏନ୍‍ଲେକାଗି ହୋବାଜାନା; ଏନ୍ତେ ସବେନାଃ ଆଡୋଃ ରିମିଲ୍‍ଦିଶୁମ୍ ପାଡ଼୍ ଚେତାନ୍ ଥାଇଃ ଇଦିଜାନା। ହାର୍ ନେଲେପେ, ସେକାଡ଼୍ ଗି ଆପି ହୋଡ଼ୋକୋ ଅକନ୍ କୋ କୈସାରିୟା ହାତୁ ତେ ଇଙ୍ଗ୍ଆଃ ତାଃ କୁଲ୍ ଲେନାକୋ, ଏନ୍ ଅଡ଼୍ଆଃ ରେ ଅକତାଃ ଆଲେ ତାଇ କେନାଲେ, ହିଜୁଃ ତିଙ୍ଗୁଜାନାକୋ। ଏନ୍ତେ ପାବିତାର୍ ଆତ୍ମା ଇଙ୍ଗ୍‍କେ ଇନ୍‍କୁ ଲୋଃ ବେଗାର୍ ପାହୋମ୍ ସେନ୍ ମେ କାଜିକେଦିଙ୍ଗ୍ଆଏ ଆଡୋଃ ନେ ଛାଅ ଝାନ୍ ହାଗାକୋ ହଗି ଇଙ୍ଗ୍ଆଃ ଲୋଃ ହୋବାଜାନାକୋ ଆଡୋଃ ଆଲେ ଏନ୍ ହୋଡ଼ ରାଃ ଅଡ଼୍ଆଃ ରେ ସେନ୍ ଜାନାଲେ। ଆଡୋଃ ଇନିଃ ଆଲେକେ ଉଦୁବ୍ କେଦାଏ ଚି, ଇନିଃ ମିୟାଃ ସିର୍ମାଦାସୀ କେ ଆଜାଃ ଅଡ଼୍ଆଃ ରେ ତିଙ୍ଗୁ ନେଲ୍ କିଜାଏ, ଅକନିଃ ଇନିଃକେ କାଜିକେଦାଏ, ‘ୟାଫା ହାତୁ ରେ ହୋଡ଼ କୁଲ୍ କେତେ ଶିମୋନ୍ କେ ଅକନିଃ ପାତ୍ରାସ୍ କାଜିୟଗାଏ, କେଡ଼ା କିମେ। ଇନିଃ ଆମ୍‍କେ ନେକା ବାକାଣ୍ କାଜିମେୟାଏ, ଅକନାଃତେ ଆମ୍ ହାର୍ ଆମାଃ ଅଡ଼୍ଆଃ ରେନ୍ ସବେନ୍ କୋ ବାଞ୍ଚାଅ ନାମେୟାକୋ।’ ଚିମ୍ତାଙ୍ଗ୍ ଇଙ୍ଗ୍ ବାକାଣ୍ ଏଟେଃ କେଦାଇଙ୍ଗ୍, ଦୋ ପାବିତାର୍ ଆତ୍ମା ଇମ୍ତାଗି ଇନ୍‍କୁୱାଃ ରେ ଏନ୍ ଲେକାଗି ଆଡ଼୍‍ଗୁଜାନାଏ ଜେଲେକା ସୁରୁ ଇମ୍ତା ଆବୁ ଚେତାନ୍ ରେ ଆଡ଼୍‍ଗୁ ଲେନା। ଏନ୍ତେ ଇଙ୍ଗ୍‍କେ ପ୍ରାଭୁ ଆଃ ଏନ୍ ବାଚାନ୍ ମୋନେ ହିଜୁଃଲେନା, ଅକନାଃ ଇନିଃ କାଜିଲେଦାଏ, ‘ଯୋହାନ୍ ଦୋ ଦାଆ ତେ ବାପ୍ତିସ୍ମା ଏମ୍‍କେଦାଏ, ମେନ୍ଦୋ ଆପେ ପାବିତାର୍ ଆତ୍ମା ତେ ବାପ୍ତିସ୍ମା ନାମେୟାପେ।’ ଏନାମେନ୍ତେ ପାର୍ମେଶ୍ଵାର୍ ଇନ୍‍କୁକେ ହଗି ଏନ୍ ଦାନ୍ ଏମ୍ କେଃକୋୱାଏ, ଅକନାଃ ଆଲେକେ ପ୍ରାଭୁ ୟୀଶୁ ମାସୀହ୍ ରେ ବିଶ୍ଵାସ୍ ରିକାରେ ନାମ୍ ଲେନା; ଏଣ୍ଡେ ଇଙ୍ଗ୍ ଅକଏ ତାଇକେନାଇଙ୍ଗ୍ ଜେ ପାର୍ମେଶ୍ଵାର୍ କେ ଆଟ୍‍କାଅ ଧାଡ଼ିୟାଇଙ୍ଗ୍?” ନେୟା ଆୟୁମ୍‍କେତେ ଇନ୍‍କୁ ହାପା ତାଇଜାନାକୋ, ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ତାନ୍ ଲୋଃ କାଜିକେଦାକୋ, “ଏଣ୍ଡେ ଦୋ ପାର୍ମେଶ୍ଵାର୍ ଏଟାଃଜାତି କୋକେ ହଗି ଜାନାଓ ଜୀଦାନ୍ ନାମେ ଲାଗିନ୍ତେ ପାପ୍ କାମି ବାଗେ ରାଃ ଦାନ୍ ଏମ୍‍କେଦାଏ।” ଅକନ୍ ହୋଡ଼ୋକୋ ଏନ୍ ଦୁକୁ ରାଃ ହୋରାତେ ଅକନାଃ ସ୍ଥିଫାନୁସ୍ କେ ଗୋଜି ରାଃ ଚାଲ୍ତେ ହିଜୁଃ ଲେନ୍ ତାଇନା, ଛିତି-ଛାନ୍ ହୋବା ଲେନାକୋ, ଇନ୍‍କୁ ହୋନୋର୍-ହୋନୋର୍ ଫିନିକେ ରାଇଜ୍ ହାର୍ ସାଇପ୍ରାସ୍ ଟାପୁ ହାର୍ ସିରିୟା ଜିଲ୍ଲା ରାଃ ଆନ୍ତାକିୟା ସାହାର୍ ରେ ସେଟେର୍ ଜାନାକୋ; ମେନ୍ଦୋ ୟାହୁଦୀ ହୋଡ଼ୋକୋକେ ଭାଇର୍ ବାଚାନ୍ ଉଦୁବ୍ ତାଇକେନାକୋ। ମେନ୍ଦୋ ଇନ୍‍କୁ ଏତେ ଚିମିନ୍ ବିଶ୍ଵାସୀକୋ ସାଇପ୍ରାସ୍ ଟାପୁ ରେନ୍ ହାର୍ କୁରେନୀ ସାହାର୍ ରେନ୍ ତାଇନ୍ ତାନ୍‍କୋ, ଅକନ୍‍କୋ ଆନ୍ତାକିୟା ସାହାର୍ ରେ ହିଜୁଃକେତେ ୟୁନାନୀ ହୋଡ଼ୋକୋକେ ହଗି ପ୍ରାଭୁ ୟୀଶୁ ରାଃ ସୁସାମାଚାର୍ କାଜି ଉଦୁବ୍ ଏଟେଃ କେଦାକୋ। ପ୍ରାଭୁ ଆଃ ପେଡ଼େଏ ଇନ୍‍କୁୱାଃ ଚେତାନ୍ ରେ ତାଇକେନା, ହାର୍ ଥିମ୍ବାଗି ଏଟାଃଜାତି ହୋଡ଼ୋକୋ ଇନ୍‍କୁୱାଃ ସାନ୍ଦେଶ୍ ଆୟୁମ୍ କେତେ ପ୍ରାଭୁ ୟୀଶୁ ରେ ବିଶ୍ଵାସ୍ କେଦାକୋ। ଚିମ୍ତାଙ୍ଗ୍ ଇନ୍‍କୁୱାଃ କାଜି ୟୀରୁଶାଲେମ୍ କାଲିସିୟା ରେନ୍ ବିଶ୍ଵାସୀକୋ ଆୟୁମ୍ କେଦାକୋ, ଏଣ୍ଡେ ଇନ୍‍କୁ ବାର୍ନାବାସ୍ କେ ଆନ୍ତାକିୟା ସାହାର୍ କୁଲ୍ କିଜାକୋ। ଇନିଃ ଏନ୍ତାଃରେ ସେଟେର୍ କେତେ ହାର୍ ପାର୍ମେଶ୍ଵାର୍ ରାଃ ଆନୁଗ୍ରାହ୍ ନେଲ୍‍କେତେ ରାଶିକା ଜାନାଏ, ହାର୍ ସବେନ୍ କୋକେ ଉପ୍‍ଦେଶ୍ ଏମ୍‍କେଦାଏ ଚି ମୋନ୍ ଧ୍ୟାନ୍ କେତେ ପ୍ରାଭୁ ରେ ବାଇ କେତେ ତାଇନୋଃପେ। ଇନିଃ ମିହୋଡ଼୍ ବେଶ୍ ହୋଡ଼ ତାଇକେନାଏ, ହାର୍ ପାବିତାର୍ ଆତ୍ମା ହାର୍ ବିଶ୍ଵାସ୍ ରେ ଫେରେଃ କାନ୍ ତାଇକେନାଏ; ହାର୍ ଏନ୍ତାଃ ରେ ଥିମ୍ବାଗି ହୋଡ଼ୋକୋ ପ୍ରାଭୁ ରେ ମେଶା ଜାନାକୋ। ଏନ୍ତେ ବାର୍ନାବାସ୍ ଶାଉଲ୍ କେ ଦାଣା ଲାଗିନ୍ ତାର୍ସୁସ୍ ସାହାର୍ ତେ ସେନୋଃ ଜାନାଏ। ହାର୍ ଚିମ୍ତାଙ୍ଗ୍ ଇନିଃ-ଇନିଃ ଲୋଃ ନାପାମ୍ ଜାନାଏ ଏଣ୍ଡେ ଇନିଃକେ ଆନ୍ତାକିୟା ସାହାର୍ ତେ ଆଉକିଜାଏ; ହାର୍ ନେଲେକା ହୋବାନା ଚି ଇନ୍‍କୁ ମିୟାଃ ଶିର୍ମା ସାନ୍ତେ କାଲିସିୟା ଲୋଃ ନାପାମ୍ ହାର୍ ଥିମ୍ବାଗି ହୋଡ଼ୋକୋକେ ଉପ୍‍ଦେଶ୍ ଏମ୍ ତାଇକେନାକୋ; ହାର୍ ଚେଲାକୋ ସବେନ୍ ଏତେ ପାହିଲା ଆନ୍ତାକିୟା ସାହାର୍ ରେ ଖ୍ରୀଷ୍ଟିୟାନ୍ ମେନ୍ତେ ନୁତୁମ୍ ଜାନାକୋ। ଏନ୍ ହୁଲାଙ୍ଗ୍ କୋରେ ଚିମିନ୍ ବିଶ୍ଵାସୀକୋ ଅକନ୍ କୋ ନାବୀ ତାଇକେନାକୋ ୟୀରୁଶାଲେମ୍ ସାହାର୍ ଏତେ ଆନ୍ତାକିୟା ସାହାର୍ ହିଜୁଃନାକୋ। ଇନ୍‍କୁ ଏତେ ଆଗାବୁସ୍ ନୁତୁମ୍ ମିହୋଡ଼୍ ତିଙ୍ଗୁ କେତେ ଆତ୍ମା ରାଃ ଚାଲାଓ ତେ ନେୟା ଉଦୁବ୍ କେଦାଏ ଚି ସବେନ୍ ଦିଶୁମ୍ ରେ ମାରାଙ୍ଗ୍ ଆକାଲ୍ ହୋବାୱା। ଏନ୍ ଆକାଲ୍ କ୍ଲୌଦିୟୁସ୍ ରୋମ୍‍ରେନ୍ ରାଜା ସାମାୟ୍ ରେ ହୋବାନା। ଏନ୍ତେ ଚେଲାକୋ ରୋଜୋଟ୍ କେଦାକୋ ଚି ସବେନ୍ କୋ ଆପାନାଃ-ଆପାନାଃ ପେଡ଼େଏ ଲେକା ଟାକା ୟାହୁଦୀୟା ଜିଲ୍ଲା ରେ ତାଇନ୍ ତାନ୍ ହାଗା କୋୱାଃ ଦେଙ୍ଗା ନାଙ୍ଗ୍ କୁଲ୍ କାକୋ। ହାର୍ ଇନ୍‍କୁ ଏନ୍ ଲେକାଗି ରିକା କେଦାକୋ; ହାର୍ ବାର୍ନାବାସ୍ ହାର୍ ଶାଉଲ୍ ଆଃ ତିଈ ତେ ୟୀରୁଶାଲେମ୍ ସାହାର୍ ରାଃ କାଲିସିୟା ରେନ୍ ମାରିହୋଡ଼ୋକୋ ତାଃ କୁଲ୍ କେଦାକୋ। ଏନ୍ ସାମାୟ୍ ହେରୋଦ୍ ରାଜା କାଲିସିୟା ରେନ୍ ଚିମିନାଙ୍ଗ୍ କୋକେ ସାତାଅ ଲାଗିନ୍ତେ ଇନ୍‍କୁୱାଃ ଚେତାନ୍ ରେ ତିଈ ଜିଲିଙ୍ଗ୍ କେଦାଏ। ଇନିଃ ଯୋହାନ୍ ଆଃ ହାଗା ୟାକୁବ୍ କେ ତାଲ୍‍ୱାର୍ ତେ ମାଆ ଗୋଏଃ ରିକା କିଜାଏ। ଇମ୍ତାଙ୍ଗ୍ ଇନିଃ ନେଲ୍‍କେଦାଏ ଚି ୟାହୁଦୀ ହୋଡ଼ୋକୋ ନେୟାତେ ରାଶିକାଅଃ ତାନାକୋ, ଏଣ୍ଡେ ଇନିଃ ପାତ୍ରାସ୍ କେହ ସାବ୍ କିଜାଏ। ଏନା ଖାମୀର୍ କାମେଶାକାନ୍ ହୋଲୋଙ୍ଗ୍ ରାଃ ପାରାବ୍ ରେ ହୋବାଲେନା। ହେରୋଦ୍ ରାଜା ପାତ୍ରାସ୍ କେ ସାବ୍ କେତେ ବାନ୍ଦିଅଡ଼୍ଆଃ ରେ ଆଦେର୍ କିଜାଏ, ହାର୍ ଚାଇର୍-ଚାଇର୍ ସିପାହୀକୋକେ ଚାଇର୍ ପାଡ଼ି ରେ ମାଣ୍ଡାଅ କେଃକୋୱାଏ; ନେୟା ପାହୋମ୍ କେତେ ଚି ଫାସାହ୍ ପାରାବ୍ ରାଃ ଦୋୟାତେ ଇନିଃକେ ହୋଡ଼ୋକୋୱାଃ ଆୟୁର୍ ବିଚାର୍ ନାଙ୍ଗ୍ ଆୱିୟାଏ। ବାନ୍ଦିଅଡ଼୍ଆଃ ରେ ପାତ୍ରାସ୍ ବାନ୍ଦ୍ ତାଇଲେନାଏ; ମେନ୍ଦୋ କାଲିସିୟା ରେନ୍ କୋ ଆଜାଃ ଲାଗିନ୍ତେ ସବେନ୍ ଇମ୍ତା ପାର୍ମେଶ୍ଵାର୍ କେ ବିନ୍ତି ତାଇକେନାକୋ। ଚିମ୍ତାଙ୍ଗ୍ ହେରୋଦ୍ ରାଜା ଇନିଃକେ ହୋଡ଼ୋକୋୱାଃ ନାଡ଼େଏ ରେ ଆୱି ରାଃ ତାଇକେନା, ଏନ୍ ନିଦା ଗି ପାତ୍ରାସ୍ ବାରିୟା ସିକିଡ଼ି ତେ ଥୋଲାକାନ୍ ବାରିୟା ସିପାହୀକୋୱାଃ ଥାଲା ରେ ଦୁଣୁମ୍ ତାଇକେନାଏ; ହାର୍ ଏଟାଃ ବାରିୟା ସିପାହୀକିନ୍ ଦୁହାର୍ ରେ ବାନ୍ଦିଅଡ଼୍ଆଃ କେ ହୋରୋ ତାଇକେନାକିନ୍। ଇମ୍ତାଗି ପ୍ରାଭୁ ଆଃ ମିୟାଃ ସିର୍ମାଦାସୀ ପାତ୍ରାସ୍ ନାଡ଼େଏ ହିଜୁଃ ତିଙ୍ଗୁ ଜାନାଏ ହାର୍ ଏନ୍ କୋଠୋରୀ ମାସ୍କାଲ୍ ଜାନା, ହାର୍ ଇନିଃ ପାତ୍ରାସ୍ ଆଃ ପାଞ୍ଜ୍ରା କେ ଥାପ୍‍ଥାପାଅ କେତେ ଇନିଃକେ ବିରିଃ କିଜାଏ ହାର୍ କାଜିକିଜାଏ, “ବିରିଃମେ, ଜାଲ୍‍ଦିମେ।” ହାର୍ ଇନିଜାଃ ତିଈ ତେ ସିକିଡ଼ି ଖଲାଅ କେତେ ଉୟୁଃଜାନା। ଇମ୍ତାଙ୍ଗ୍ ସିର୍ମାଦାସୀ ଇନିଃକେ କାଜିକିଜାଏ, “ମାୟାଙ୍ଗ୍ ଥୋଲେନ୍ ମେ, ଆଡୋଃ ଆମାଃ ଖାର୍ପା ତୁସିଙ୍ଗ୍ଏନ୍ ମେ।” ଇନିଃ ଏନ୍‍କାଗି ରିକା କେଦାଏ। ଆଡୋଃ ସିର୍ମାଦାସୀ ଇନିଃକେ କାଜିକେଦାଏ, “ଆମାଃ ଲିଜାଃ ତୁସିଙ୍ଗ୍ କେତେ ଇଙ୍ଗ୍ଆଃ ତାୟୋମ୍ ହିଜୁଃମେ।” ଇନିଃ ଅଡୋଙ୍ଗ୍ କେତେ ଆଜାଃ ତାୟୋମ୍-ତାୟୋମ୍ ସେନ୍ ଜାନାଏ; ମେନ୍ଦୋ ନେୟା କାଏ ସାରିତାଇନାଏ ଚି ଅକନାଃକୋ ସିର୍ମାଦାସୀ ରିକା ତାନାଏ ଏନା ସାର୍ତିଗୀ ତାନାଃ, ମେନ୍ଦୋ ନେୟା ବୁଝାଅଃ ତାଇନାଏ ଚି ଇଙ୍ଗ୍ ଦାର୍ଶାନ୍ ନେଲ୍ ତାନାଇଙ୍ଗ୍। ଇମ୍ତାଙ୍ଗ୍ ଇନିଃ ସିଦା ହାର୍ ଏଟାଃ ହୋରୋତାନ୍ କୋଏତେ ଅଡୋଙ୍ଗ୍ କେତେ ଏନ୍ ମେଣେଏଃ ରାଃ ଦୁହାର୍ ତାଃ ସେଟେର୍ ଜାନାକିନ୍, ଅକନାଃ ହାତୁ ପାଡ଼୍ ସେନ୍ ହୋରା ତାଇକେନା। ଏନା ଆକୋନାଙ୍ଗ୍ ଆଏଃ ସୁକୁଗି ଖଲାଅ ଜାନା, ହାର୍ ଇନ୍‍କୁ ଅଡୋଙ୍ଗ୍ କେତେ ମିୟାଃଗି ହୋରା ରେ ସେନ୍ ଜାନାକିନ୍, ହାର୍ ଇମ୍ତାଗି ସିର୍ମାଦାସୀ ଇନିଃକେ ବାଗିତାଜାଏ। ଏନ୍ତେ ପାତ୍ରାସ୍ କେ ହୋସ୍ ହିଜୁଃ ଲେନା ହାର୍ କାଜିକେଦାଏ, “ନାଆ ଇଙ୍ଗ୍ ସାର୍ତି କେ ସାରି ତାଦାଇଙ୍ଗ୍ ଚି ପ୍ରାଭୁ ଆଜାଃ ସିର୍ମାଦାସୀ କୁଲ୍ କେତେ ଇଙ୍ଗ୍‍କେ ହେରୋଦ୍ ରାଜା ରାଃ ଆଧିକାର୍ ତେ ବାଞ୍ଚାଅ କେଦିଙ୍ଗାଏ, ହାର୍ ୟାହୁଦୀ ଗୁରୁ କୋୱାଃ ସବେନ୍ ଆଶ୍ରା କେ ଟୋଟାଃ ତାଦାଏ।” ଚିମ୍ତାଙ୍ଗ୍ ପାର୍ମେଶ୍ଵାର୍ ଇନିଃକେ ଛୋଡ଼ାଓ କିଜାଏ ମେନ୍ତେ ସାରିକେଦାଏ ପାତ୍ରାସ୍ ଏନ୍ ଯୋହାନ୍ ଗାଃ ଏଙ୍ଗା ମାରିୟାମ୍ ଆଃ ଅଡ଼୍ଆଃ ସେନ୍‍ନାଏ, ଅକନିଃ ମାର୍କୁସ୍ କାଜିଅଃୱାଏ। ଏନ୍ତାଃ ଥିମ୍ବାଗି ହୋଡ଼ୋକୋ ହୁଣ୍ଡି କେତେ ବିନ୍ତି ତାଇକେନାକୋ। ଇମ୍ତାଙ୍ଗ୍ ଇନିଃ ଦୁହାର୍ କେ ଠକ୍-ଠକାଅକେଦାଏ, ଦୋ ରୁଦେ ନୁତୁମ୍ ମିୟାଃ କୁଡ଼ି ଦାସୀ ନେନେଲ୍ ଲାଗିନ୍ ହିଜୁଃନାଏ। ପାତ୍ରାସ୍ ଆଃ କେଡ଼ା ଆୟୁମ୍ ଉରୁମ୍ କେତେ ରାଶିକା ତେ ଦୁହାର୍ କାଏ ଖଲାଅ କେଦା, ମେନ୍ଦୋ ନିର୍ କେତେ ଭିତାର୍ ସେନ୍ ଜାନାଏ ହାର୍ କାଜିକେଦାଏ ଚି ପାତ୍ରାସ୍ ଦୁହାର୍ ରେ ତିଙ୍ଗୁ କାନାଏ। ଇନ୍‍କୁ ଇନିଃକେ କାଜିକିଜାକୋ, “ଆମ୍ ବାଉଡ଼ିଅଃ ତାନାମ୍।” ମେନ୍ଦୋ ଇନିଃ ନେୟା ସାର୍ତି କାଜି ତାନାଃ ମେନ୍ତେ କାଜିକେଦାଏ। ଏନ୍ତେ ଇନ୍‍କୁ କାଜିକେଦାକୋ, “ଇନିଜାଃ ସିର୍ମାଦାସୀ ତାଇନୋଗାଏ।” ମେନ୍ଦୋ ପାତ୍ରାସ୍ ଠକ୍-ଠକାଅକାତେ କେଦାଏ, ଏନ୍ତେ ଇନ୍‍କୁ ଦୁହାର୍ ଖଲାଅ କେଦାକୋ, ହାର୍ ଇନିଃକେ ନେଲ୍‍କେତେ ଆକ୍‍ଦାନ୍ଦା ଜାନାକୋ। ଏନ୍ତେ ଇନିଃ ତିଈ ଇସାରା କେତେ କାଜିକେଦାଏ ଚି ହାପା ତାଇୟୋଃପେ; ହାର୍ ଇନ୍‍କୁକେ ଉଦୁବାଃ କୋୱାଏ ଚି ପ୍ରାଭୁ ଚିଲ୍‍କାତେ ଇନିଃକେ ବାନ୍ଦିଅଡ଼୍ଆଃ ଏତେ ଅଡୋଙ୍ଗ୍ ଆଉ କିଜାଏ। ହାଡୋଃ କାଜିକେଦାଏ, “ୟାକୁବ୍ ହାର୍ ହାଗାକୋକେ ନେ ବାକାଣ୍ ଉଦୁବ୍ ତାକୋପେ।” ଏନ୍ତେ ଅଡୋଙ୍ଗ୍ କେତେ ଏଟାଃ ଜାଗା ସେନୋଃ ଜାନାଏ। ସେତାଃ ଇଦାନ୍ ରେ ବାନ୍ଦିଅଡ଼୍ଆଃ ରେନ୍ ସିପାହୀକୋ ଆକୋ ଥାଲା ରେ ଆକ୍‍ବାକାଅ ଜାନାକୋ ଚି ପାତ୍ରାସ୍ ଚିନାଃ ହୋବାଜାନାଏ। ଚିମ୍ତା ହେରୋଦ୍ ରାଜା ଇନିଃକେ ଦାଣା କିଜାଏ ଆଡୋଃ କାଏ ନାମ୍ କିଜାଏ, ଏଣ୍ଡେ ହୋରୋତାନ୍ କୋକେ କୁଲିକେଃକୋୱାଏ ମେନ୍ଦୋ ଜାହାନାଃ କାକୋ କାଜି ଧାଡ଼ିଜାନ୍ ରେ ଇନ୍‍କୁକେ ଗୋଏଃକୋ ଲାଗିନ୍ ଆନାଚୁ ଏମ୍‍କେଦାଏ; ହାର୍ ଇନିଃ ୟାହୁଦୀୟା ଜିଲ୍ଲା କେ ବାଗେ କେତେ କୈସାରିୟା ସାହାର୍ ରେ ସେନ୍ କେତେ ତାଇନ୍ ଜାନାଏ। ହେରୋଦ୍ ରାଜା ସୁର୍ ହାର୍ ସିଦୋନ୍ ସାହାର୍ ରେନ୍ ହୋଡ଼ୋକୋକେ ଥିମ୍ବାଗି କାଏସୁକୁକୋ ତାଇନାଏ। ଏନାମେନ୍ତେ ଇନ୍‍କୁ ମିୟାଃ ମୋନ୍ ହୋବାକେତେ ଇନିଜାଃ ନାଡ଼େଏଃ ତେକୋ ହିଜୁଃଜାନା, ହାର୍ ବାଲାସ୍ତୁସ୍ କେ ଅକନିଃ ରାଜା ରାଃ ମିହୋଡ଼୍ କାମିହୋଡ଼ ନିଈ ତାଇକେନାଏ, ଇନିଃକେ ବୁଝାଅ କେତେ ମେଶା ସାନାଙ୍ଗ୍ କେନାକୋ, ଚିୟାଃଚି ରାଜା ରାଃ ରାଇଜ୍ ଏତେ ଇନ୍‍କୁୱାଃ ସାହାର୍ ରେନ୍ କୋ ଆସୁଲ୍-ହାରାଅଃ ତାଇକେନାକୋ। ମୁଶିଙ୍ଗ୍ ଠାହ୍‍ରାଓକାନ୍ ହୁଲାଙ୍ଗ୍ ରେ ହେରୋଦ୍ ରାଜା ରାଜାଲିଜାଃ ତୁସିଙ୍ଗ୍ କେତେ ସିଂହାସାନ୍ ରେ ଦୁବ୍ ଜାନାଏ, ହାର୍ ଇନ୍‍କୁକେ ଭାଷାନ୍ ଏମ୍ କେଦାଏ। ଇମ୍ତା ହୋଡ଼ୋକୋ କାଉରି ଏଟେଃ କେଦାକୋ, “ନେୟା ଦୋ ହୋଡ଼ ରାଃ ନାହାଲା ଇଶ୍ୱାର୍ ରାଃ କାଜି ତାନାଃ।” ଏନ୍ ସାମାୟ୍ ରେଗି ପ୍ରାଭୁ ଆଃ ମିୟାଃ ସିର୍ମାଦାସୀ ଇମ୍ତାଗି ଇନିଃକେ ବିଡ଼ା କିଜାଏ ଚିୟାଃଚି ଇନିଃ ପାର୍ମେଶ୍ଵାର୍ କେ କାଏ ମାନାରାଙ୍ଗ୍ କିଜାଏ; ହାର୍ ଇନିଃକେ ତିଜୁ କିଜାକୋ ହାର୍ ଗୋଏଃ ଜାନାଏ। ମେନ୍ଦୋ ପାର୍ମେଶ୍ଵାର୍ ରାଃ ବାଚାନ୍ ହାରା ଇଦିୟାନା ଆଡୋଃ ପାସ୍ରାଅ ଇଦିୟାନା ହାର୍ ଥିମ୍ବାଗି ବିଶ୍ଵାସୀକୋ ହୋବାଜାନାକୋ। ଚିମ୍ତାଙ୍ଗ୍ ବାର୍ନାବାସ୍ ଆଡୋଃ ଶାଉଲ୍ ଆକିନାଃ ସେୱା କାମି ପୁରା କେଦାକୋ ଦୋ ଯୋହାନ୍ କେ ଅକନିଃ ମାର୍କୁସ୍ କାଜିୟୋଃୱାଏ, ମିଶାତେ ଇଦିକେତେ ୟୀରୁଶାଲେମ୍ ସାହାର୍ ଏତେ ରୁଆଡ଼୍ ଜାନାକୋ। ଆନ୍ତାକିୟା ସାହାର୍ ରାଃ କାଲିସିୟା ରେ ଚିମିନାଙ୍ଗ୍ ନାବୀ କୋ ହାର୍ ଶିଖାଅନିଃକୋ ତାଇକେନାକୋ, ଜେଲେକା: ବାର୍ନାବାସ୍ ହାର୍ ଶିମୋନ୍ ଅକନିଃ ନିଗର୍ କାଜିଅଃୱାଏ, ହାର୍ ଲୁକିୟୁସ୍ କୁରେନୀ ସାହାର୍ ରେନ୍, ହାର୍ ଚାଇର୍ ଜିଲ୍ଲା ହାନାଟିଙ୍ଗ୍ ତେ ମିୟାଃ ଜିଲ୍ଲା ରେନ୍ ରାଜା ହେରୋଦ୍ ରାଃ ହାଗା ମାନାହେମ୍ ହାର୍ ଶାଉଲ୍। ଚିମ୍ତାଙ୍ଗ୍ ଇନ୍‍କୁ ଉପାସ୍ ତାନ୍ ଲୋଃ ପ୍ରାଭୁ କେ ଆରାଧାନା ତାଇକେନାକୋ, ଏଣ୍ଡେ ପାବିତାର୍ ଆତ୍ମା କାଜିକେଦାଏ, “ଇଙ୍ଗ୍ଆଃ ଲାଗିନ୍ ବାର୍ନାବାସ୍ ହାର୍ ଶାଉଲ୍ କେ ଏନ୍ କାମି ଲାଗିନ୍ତେ ଗେନାକିନ୍ ପେ ଅକନାଃ ନାଙ୍ଗ୍ ଇଙ୍ଗ୍ ଇନ୍‍କୁକେ ସାଲାକାଃ କୋୱାଇଙ୍ଗ୍।” ଏନ୍ତେ ଇନ୍‍କୁ ଉପାସ୍ ହାର୍ ବିନ୍ତି କେତେ ହାର୍ ଇନ୍‍କିନାଃ ଚେତାନ୍ ରେ ତିଈ ମାଣ୍ଡାଅ କେତେ ଇନ୍‍କିନ୍ କେ କୁଲ୍ କେଃକୋୱାକୋ। ଏନାମେନ୍ତେ ପାଉଲୁସ୍ ହାର୍ ବାର୍ନାବାସ୍ କିନ୍ ପାବିତାର୍ ଆତ୍ମା ତେ କୁଲାକାନ୍ ସିଲୁକିୟା ହାତୁ ଜାହାଜ୍ ତିଙ୍ଗୁନ୍ ଜାଗା ତେ ସେନ୍ ଜାନାକିନ୍; ହାର୍ ଏନ୍ତାଃ ଏତେ ଜାହାଜ୍ ରେ ରାକାବ୍ କେତେ ସାଇପ୍ରାସ୍ ଟାପୁ ସେନ୍ ଜାନାକିନ୍। ହାର୍ ସାଲାମିସ୍ ହାତୁ ଜାହାଜ୍ ତିଙ୍ଗୁନ୍ ଜାଗା ରେ ଆଡ଼୍‍ଗୁଜାନାକିନ୍ ହାର୍ ପାର୍ମେଶ୍ଵାର୍ ରାଃ ବାଚାନ୍ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ଉଦୁବ୍ କେଦାକିନ୍। ହାର୍ ଯୋହାନ୍ ମାର୍କୁସ୍ ଆକିନ୍ ଲୋଃ ତାଇନ୍ କେତେ ଦେଙ୍ଗାକିନ୍ ତାଇକେନାଏ। ଇନ୍‍କୁ ଏନ୍ ସବେନ୍ ଟାପୁ ହୋରାତେ ପାଫୁସ୍ ସାହାର୍ ସାନ୍ତେ ଥେବାଃ ଜାନାକୋ। ଏନ୍ତାଃରେ ବାର୍-ୟୀଶୁ ନୁତୁମ୍ ମିହୋଡ଼୍ ୟାହୁଦୀ ଦେଓଁଣା ସେୱାନିଃ ହାର୍ ଲୋଗୋ ନାବୀ ନାମ୍ ଜାନାଏ। ଇନିଃ ହାକିମ୍ ଶିର୍ଗିୟୁସ୍ ପାଉଲୁସ୍ ଲୋଃ ତାଇନ୍ କେନାଏ, ଅକନିଃ ସେଣାନ୍ ହୋଡ଼ ତାଇନ୍ କେନାଏ। ହାକିମ୍ ବାର୍ନାବାସ୍ ହାର୍ ଶାଉଲ୍ କେ ଆଜାଃ ନାଡ଼େଏ କେଡ଼ାକେତେ ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍ ସାନାଙ୍ଗ୍ କେଦାଏ। ମେନ୍ଦୋ ଏଲିମାସ୍ ଦେଓଁଣା ସେୱାନିଃ, ଚିୟାଃଚି ନେୟାଗି ଇନିଜାଃ ନୁତୁମ୍ ରାଃ ମାନେ ତାନାଃ, ଇନ୍‍କୁୱାଃ ବିରୋଧ୍ କେତେ ହାକିମ୍ କେ ବିଶ୍ଵାସ୍ ଏତେ ରୁଆଡ଼ି ନାଙ୍ଗ୍ ସାନାଙ୍ଗ୍ କିଜାଏ। ଇମ୍ତା ଶାଉଲ୍ ଅକନିଜାଃ ନୁତୁମ୍ ପାଉଲୁସ୍ ହଗି ତାନାଃ, ପାବିତାର୍ ଆତ୍ମା ତେ ଫେରେଃ କେତେ ଇନିଜାଃ ପାଡ଼୍ ନେଲ୍ ବାଇକେତେ କାଜିକେଦାଏ, “ହେ ଶାଏତାନ୍ ରାଃ ହୋନ୍, ସବେନ୍ ବେଦା ଆଡୋଃ ସବେନ୍ ରାକାମ୍ ରାଃ ହିଡିଡ଼୍ ତେ ଫେରେଃକାନ୍, ସବେନ୍ ଧାରାମ୍ କାମି ରାଃ ବାଇରୀ, ଚିନାଃ ଆମ୍ ପ୍ରାଭୁ ଆଃ ଠାଉକା ହୋରା କେ ବାଗ୍‍ଡ଼ାଅ କାମ୍ ବାଗିୟା? ନାଆ ନେଲେମ୍, ପ୍ରାଭୁ ଆଃ ତିଈ ଆମାଃ ଚେତାନ୍ ରେ ଜିଲିଙ୍ଗାକାନା, ହାର୍ ଆମ୍ ହୁଡିଙ୍ଗ୍ ସାମାୟ୍ ସାନ୍ ଆନ୍ଧାଅଃୱା ଆଡୋଃ ଶିଙ୍ଗି କାମ୍ ନେଲ୍ ଜୋମା।” ଏନ୍ତେ ଇମ୍ତାଗି ଧୁନ୍ଦଲା ହାର୍ ନୁବାଃ ଇନିଃକେ ଦାଲୋବ୍ କିଜାଏ, ହାର୍ ଇନିଃ ନେତେ ହେନ୍ତେ ଦାଣାବାଡ଼ା କେତେ ଚାପୁ ଏଟେଃ କେଦାଏ ଜେଚି ଜେତାଏ ଇନିଜାଃ ତିଈ କେ ସାବ୍ କେତେ ଇଦିୟାକୋ। ଇମ୍ତା ହାକିମ୍ ଅକନାଃ ହୋବାଲେନା ଏନାକେ ନେଲ୍ କେତେ ହାର୍ ପ୍ରାଭୁ ଆଃ ଉପ୍‍ଦେଶ୍ ତେ ଆକ୍‍ଦାନ୍ଦା ହୋବାକେତେ ପ୍ରାଭୁ ୟୀଶୁ କେ ବିଶ୍ଵାସ୍ କେଦାଏ। ପାଉଲୁସ୍ ଆଡୋଃ ଇନିଜାଃ ଗାତି ପାଫୁସ୍ ହାତୁ ଜାହାଜ୍ ତିଙ୍ଗୁନ୍ ଜାଗା ଏତେ ଜାହାଜ୍ ରେ ପାମ୍ଫୁଲିୟା ଜିଲ୍ଲା ରାଃ ଜାହାଜ୍ ତିଙ୍ଗୁନ୍ ଜାଗା ପିର୍ଗା ହାତୁ ରେ ହିଜୁଃ ନାକିନ୍; ହାର୍ ଯୋହାନ୍ ମାର୍କୁସ୍ ଇନ୍‍କୁକେ ବାଗେ କେତେ ୟୀରୁଶାଲେମ୍ ସାହାର୍ ତେ ରୁଆଡ଼୍ ଜାନାଏ। ପିର୍ଗା ହାତୁ ଏତେ ଆୟୁର୍ ସେନ୍ କେତେ ଇନ୍‍କୁ ପିସିଦିୟା ଜିଲ୍ଲା ରାଃ ଆନ୍ତାକିୟା ସାହାର୍ ରେ ସେଟେର୍ ଜାନାକିନ୍; ହାର୍ ଆରାମେ ହୁଲାଙ୍ଗ୍ ବିନ୍ତିଅଡ଼୍ଆଃ ରେ ଦୁବ୍ ଜାନାକିନ୍। ମୁଶା ନାବୀ ରାଃ ଆଇନ୍ ଆଡୋଃ ନାବୀ କୋୱାଃ କିତାବ୍ ଏତେ ପାଢ଼ାଅ ତାୟୋମ୍ତେ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ହୋଡ଼ୋକୋ ଇନ୍‍କୁୱାଃ ନାଡ଼େଏ କାଜିକୁଲ୍ କେଦାକୋ, “ହେ ହାଗାକୋ, ହୋଡ଼ୋକୋୱାଃ ଉପ୍‍ଦେଶ୍ ଲାଗିନ୍ ଆପେୟାଃ ମୋନ୍ ରେ ଜାହାନ୍ ବାକାଣ୍ ମେନାଃ ରେଦୋ କାଜିପେ।” ଏଣ୍ଡେ ପାଉଲୁସ୍ ତିଙ୍ଗୁ କେତେ ହାର୍ ତିଈ ତେ ଚୁଣ୍ଡୁଲ୍ କେତେ କାଜିକେଦାଏ, “ହେ ଇସ୍ରାଏଲୀ ହୋଡ଼ୋକୋ, ହାର୍ ପାର୍ମେଶ୍ଵାର୍ କେ ବୋରୋତାନ୍ ଏଟାଃଜାତି ହୋଡ଼ୋକୋ, ଆୟୁମେପେ: ନେ ଇସ୍ରାଏଲୀ ହୋଡ଼ୋକୋୱାଃ ପାର୍ମେଶ୍ଵାର୍ ଆବୁୱାଃ ଆପୁ-ତାତା କୋକେ ସାଲା କେଃକୋୱାଏ, ହାର୍ ଚିମ୍ତାଙ୍ଗ୍ ନେ ହୋଡ଼ୋକୋ ମିଶାର୍ ଦିଶୁମ୍ ରେ ପାର୍ଦେଶୀ ହୋଇ କେତେ ତାଇନ୍ ତାଇକେନାକୋ, ଦୋ ଇନ୍‍କୁକେ ହାରା କେଃକୋୱାଏ ଆଡୋଃ ମାରାଙ୍ଗ୍ ପେଡ଼େଏ ତେ ଅଡୋଙ୍ଗ୍ ଆଉକେଃକୋୱାଏ। ଇନିଃ ଚାଲିଶ୍ ଶିର୍ମା ସାନ୍ତେ ସୁନ୍‍ସାନ୍ ଜାଗା ରେ ଇନ୍‍କୁକେ ସାହାତିଙ୍ଗ୍ କେଃକୋୱାଏ। ଆଡୋଃ କାନାନ୍ ଦିଶୁମ୍ ରେନ୍ ସାତ୍ ଜାତି କୋକେ ନାଷ୍ଟ୍ କେତେ ଇନ୍‍କୁୱାଃ ଦିଶୁମ୍ କେ ସାଡ଼େ ଚାଇର୍ ଶାଅ ଶିର୍ମା ରେ ଆବୁୱାଃ ଆପୁ-ତାତା କୋକେ ଆଧିକାର୍ ରେ ଏମାଃକୋୱାଏ। ନେୟା ରାଃ ତାୟୋମ୍ତେ ଇନିଃ ଶାମୁଏଲ୍ ନାବୀ ରାଃ ସାମାୟ୍ ସାନ୍ତେ ଇନ୍‍କୁକେ ବିଚାର୍ ରିକାନିଃ ଏମାଃ କୋୱାଏ। ନେୟା ରାଃ ତାୟୋମ୍ତେ ଇନ୍‍କୁ ମିହୋଡ଼୍ ରାଜା ଆସିକେଦାକୋ, ଏଣ୍ଡେ ପାର୍ମେଶ୍ଵାର୍ ବେନ୍ୟାମିନ୍ ରାଃ କିଲି ଏତେ ମିହୋଡ଼୍ ହୋଡ଼; ମାନେ କିଶ୍ ରାଃ ହୋନ୍‍କଡ଼ା ଶାଉଲ୍ କେ ଇନ୍‍କୁୱାଃ ରେ ଚାଲିଶ୍ ଶିର୍ମା ଲାଗିନ୍ ରାଜା ବାଇକେଦାଏ। ଏନ୍ତେ ଇନିଃକେ ଇନିଜାଃ ପାଦ୍ ଏତେ ଗେନା କେତେ ଦାଉଦ୍ କେ ଇନ୍‍କୁୱାଃ ରାଜା ବାଇକେଦାଏ; ଅକନିଜାଃ ବିଷାୟ୍ ରେ ଆଏଃ ଗୋୱା ଏମ୍ କେଦାଏ, ‘ଇଙ୍ଗ୍‍କେ ମିୟାଃ ହୋଡ଼, ଯେଶୀ ରାଃ ହୋନ୍ତେକଡ଼ା ଦାଉଦ୍, ଇଙ୍ଗ୍ଆଃ ମୋନ୍ ଲେକାତେ ନାମ୍ କାନାଏ, ଇନିଃଗି ଇଙ୍ଗ୍ଆଃ ସବେନ୍ ସାନାଙ୍ଗ୍ କେ ପୁରାୟାଏ।’ ଇନିଜାଃଗି କିଲି ଏତେ ପାର୍ମେଶ୍ଵାର୍ ଆଜାଃ କିରିୟା ରାଃ ଲେକାତେ ଇସ୍ରାଏଲୀ ହୋଡ଼ୋକୋ ନାଡ଼େଏ ମିହୋଡ଼୍ ବାଞ୍ଚାଅନିଃ, ମାନେ ୟୀଶୁ କେ କୁଲ‍୍‍କିଜାଏ। ଅକନିଜାଃ ହିଜୁଃ ସିଦାରେ ଯୋହାନ୍ ବାପ୍ତିସ୍ମା ଏହେମ୍‍ନିଃ ସବେନ୍ ଇସ୍ରାଏଲୀ ହୋଡ଼ୋକୋକେ ପାପ୍ କାମି ବାଗେ ରାଃ ବାପ୍ତିସ୍ମା ରାଃ ପାର୍ଚାର୍ କେଦାଏ। ଚିମ୍ତାଙ୍ଗ୍ ଯୋହାନ୍ ବାପ୍ତିସ୍ମା ଏହେମ୍‍ନିଃ ଆଜାଃ ସେୱା କାମି ପୁରାଛାବା ତାଇନାଏ, ଦୋ ଇନିଃ କାଜିକେଦାଏ, ‘ଆପେ ଇଙ୍ଗ୍‍କେ ଅକଏ ତାନିଃ ମେନ୍ତେ ପାହୋମ୍ ତାନାପେ? ଇଙ୍ଗ୍ ଇନିଃ ନାହାଲାଇଙ୍ଗ୍! ମେନ୍ଦୋ ନେଲେପେ, ଇଙ୍ଗ୍ଆଃ ତାୟୋମ୍ତେ ମିହୋଡ଼୍ ହିଜୁଃ ରାଃ ମେନିଜା, ଇନିଜାଃ କାଟା ରାଃ ଖାର୍ପା କେହ ଖଲାଅ ଲେକାନିଃ ଇଙ୍ଗ୍ ନାହାଲାଇଙ୍ଗ୍।’ ” “ହେ ହାଗାକୋ, ଆପେ ଜେ ଆବ୍ରାହାମ୍ ଗାଃ ସାନ୍ତାନ୍ କୋ ତାନ୍‍ପେ; ଆଡୋଃ ଆପେ ଜେ ପାର୍ମେଶ୍ଵାର୍ କେ ବୋରୋତାନ୍ ଏଟାଃଜାତି ହୋଡ଼ୋକୋ ତାନ୍‍ପେ, ଆପେ ତାଃ ନେ ବାଞ୍ଚାଅ ରାଃ ବାଚାନ୍ କୁଲାକାନା। ଚିୟାଃଚି ୟୀରୁଶାଲେମ୍ ସାହାର୍ ରେ ତାଇନ୍ ତାନ୍‍କୋ ହାର୍ ଇନ୍‍କୁୱାଃ ହାକିମ୍ କୋ, ନା ଇନିଃକେ ନେଲ୍ ଉରୁମ୍ କିଜାକୋ ହାର୍ ନା ନାବୀ କୋୱାଃ ବାକାଣ୍ ବୁଝାଅଜାନାକୋ, ଅକନାଃ ସବେନ୍ ଆରାମେ ହୁଲାଙ୍ଗ୍ ପାଢ଼ାଅଃ ତାନା, ଏନାମେନ୍ତେ ଇନିଃକେ ଦୋଷୀ ବାଇକେତେ ଏନ୍ କାଜିକୋକେ ପୁରା କେଦାକୋ। ଇନ୍‍କୁ ଇନିଃକେ ଗୋନୋଏଃ ନାମେ ରାଃ ଦାଣ୍ଡ୍ ନାମେ ଲେକାନିଃ ଜାହାନ୍ ଦୋଷ୍ ଇନିଜାଃ ରେ କାକୋ ନାମ୍ କେଦା, ଏଣ୍ଡେ ହଗି ପିଲାତୁସ୍ କେ ଆର୍ଜି କିଜାକୋ ଚି ଇନିଃ ଗୋନୋଏଃ ଦାଣ୍ଡ୍ ନାମେ କାଏ। ଚିମ୍ତାଙ୍ଗ୍ ଇନ୍‍କୁ ଇନିଜାଃ ବିଷାୟ୍ ରେ ଅଲାକାନ୍ ସବେନ୍ କାଜିକୋକେ ପୁରା କେଦାକୋ, ଏଣ୍ଡେ ଇନିଃକେ କ୍ରୁଶ୍ ଏତେ ଆଡ଼୍‍ଗୁ କେତେ କାବାର୍ ରେ ମାଣ୍ଡାଅ କିଜାକୋ। ମେନ୍ଦୋ ପାର୍ମେଶ୍ଵାର୍ ଇନିଃକେ ଗୋଜାକାନ୍ କୋଏତେ ଜୀହିଃ କିଜାଏ, ହାର୍ ଇନିଃ ଇନ୍‍କୁକେ ଅକନ୍ କୋ ଇନିଃ ଲୋଃ ଗାଲିଲୀ ଜିଲ୍ଲା ଏତେ ୟୀରୁଶାଲେମ୍ ସାହାର୍ ହିଜୁଃ ଲେନାକୋ, ଇନ୍‍କୁକେ ଥିମ୍ବାଗି ହୁଲାଙ୍ଗ୍ ସାନ୍ତେ ନେଲ୍ ଜାନାଏ; ହୋଡ଼ୋକୋୱାଃ ନାଡ଼େଏ ରେ ନାଆ ଇନ୍‍କୁଗି ଇନିଜାଃ ଗୋୱା ତାନ୍‍କୋ। ଆଲେ ଆପେକେ ଏନ୍ କିରିୟା ରାଃ ବିଷାୟ୍ ରେ ଅକନାଃ ଆପୁତାତା କୋ ଲୋଃ ଥୋଲାକାନ୍ ତାଇକେନା, ନେ ସୁସାମାଚାର୍ ଉଦୁବାପେ ତାନାଲେ ଚି, ପାର୍ମେଶ୍ଵାର୍ ୟୀଶୁ କେ ଜୀହିଃ କେତେ, ଏନ୍ କିରିୟା କେ ଆବୁୱାଃ ହୋନ୍‍ଗାଣା କୋ ନାଙ୍ଗ୍ ପୁରା କେଦାଏ; ଜେଲେକା ଏଟାଃ ଦୁରାଙ୍ଗ୍ କିତାବ୍ ରେ ହ ଅଲାକାନା, ଆମ୍ ଇଙ୍ଗ୍ଆଃ ହୋନ୍‍କଡ଼ା ତାନ୍‍ମେ; ଇସିଙ୍ଗ୍ ଇଙ୍ଗ୍ ଗି ଆମ୍‍କେ ଜାନାମାଃ କାଃ ମେୟାଇଙ୍ଗ୍। ହାର୍ ଇନିଜାଃ ନେଲେକାତେ ଗୋଜାକାନ୍ କୋଏତେ ଜୀହିଃ ରାଃ ବିଷାୟ୍ ରେ ହ ଚି ଇନିଃ ଚିଉଲା ହ କାଏ ସୋୟାୱାଏ, ଇନିଃ ନେଲେକା କାଜିକେଦାଏ, ଇଙ୍ଗ୍ ଦାଉଦ୍ ରାଜା ଚେତାନ୍ ରେୟାଃ ପାବିତାର୍ ହାର୍ କାଗେନାଅଃ ଆଶିଷ୍ ଆପେୟାଃ ଚେତାନ୍ ରେ ଏମାପେୟାଇଙ୍ଗ୍। ଏନାମେନ୍ତେ ଇନିଃ ଆଡୋଃ ମିୟାଃ ଦୁରାଙ୍ଗ୍ କିତାବ୍ ରେ ହ କାଜିକେଦାଏ, ‘ଆମ୍ ଆମାଃ ପାବିତାର୍ ହୋଡ଼ କେ ସୋୟା ନାଙ୍ଗ୍ କାମ୍ ଏମେୟା।’ ଚିୟାଃଚି ଦାଉଦ୍ ରାଜା ଦୋ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ଆଜାଃ ସାମାୟ୍ ରେ ସେୱା କେତେ ଗୋଏଃ ଜାନାଏ, ହାର୍ ଆଜାଃ ଆପୁ-ତାତା କୋରେ ମେଶା ଜାନାଏ, ହାର୍ ସୋୟା ହ ଜାନାଏ। ମେନ୍ଦୋ ଅକନିଃକେ ପାର୍ମେଶ୍ଵାର୍ ଜୀହିଃ କିଜାଏ ଇନିଃ କାଏ ସୋୟା ଜାନାଏ। ଏନାମେନ୍ତେ, ହେ ହାଗାକୋ, ଆପେ ସାରିକେପେ ଚି ୟୀଶୁ ରାଃ ହୋରାତେ ଗି ପାପ୍ କୋରାଃ ଛାମା ରେୟାଃ ସାମାଚାର୍ ଆପେକେ ଏମୋଃ ତାନା। ହାର୍ ଅକନ୍ ବାକାଣ୍ ରେ ଆପେ ମୁଶା ନାବୀ ରାଃ ଆଇନ୍ ହୋରାତେ ନିର୍ଦୋଷ୍ କାପେ ବାଇୟୋଃୱା, ଏନ୍ ସବେନାଃ କୋରେ ଜାହାଁଏ ଗି ବିଶ୍ଵାସ୍‍ତାନ୍ ନିଈ ଇନିଜାଃ ହୋରାତେ ନିର୍ଦୋଷ୍ ହୋବାଅଃୱାଏ। ଏନାମେନ୍ତେ ହୋସିୟାର୍ କାନ୍ ତାଇନ୍‍ପେ, ନେଲେକା ଆଲୋକା ହୋବାଅଃକା ଚି ଅକନାଃ ନାବୀ କୋୱାଃ କିତାବ୍ ରେ ଅଲାକାନା, ଏନା ଆପେ ରେ ହ ଆଲୋ ହିଜୁଃ କା: ‘ହେ ନିନ୍ଦା ରିକାତାନ୍ କୋ, ନେଲେପେ, ହାର୍ ଆକ୍‍ଦାନ୍ଦାନ୍ ପେ, ହାର୍ ନାଷ୍ଟ୍‍ଅଃପେ; ଚିୟାଃଚି ଇଙ୍ଗ୍ ଆପେୟାଃ ଜୀହିଃତାନ୍ ହୁଲାଙ୍ଗ୍ କୋରେ ମିୟାଃ କାମି ରିକାତାନିଙ୍ଗ୍, ନେଲେକାନ୍ କାମି ଚି, ଆଗାର୍ ଜେତାଏ ଆପେ କେ ଇନିଜାଃ ବିଷାୟ୍ ରେ ଉଦୁବାପେୟାଏ ରେଦୋ, ଆପେ ଚିଉଲା ହ କାପେ ବିଶ୍ଵାସେୟା।’ ” ପାଉଲୁସ୍ ହାର୍ ବାର୍ନାବାସ୍ ବିନ୍ତିଅଡ଼୍ଆଃ ଏତେ ବାହାରି ତେ ଅଡୋଙ୍ଗ୍ ସାମାୟ୍ ରେ ହୋଡ଼ୋକୋ ଇନ୍‍କିନ୍ କେ ଆର୍ଜି କେଦାକୋ ଚି ହିଜୁଃ ଆରାମେ ହୁଲାଙ୍ଗ୍ ରେ ଆଲେକେ ନେ କାଜି କେ ଆଡୋଃଗି ଉଦୁବେବେନ୍। ଚିମ୍ତାଙ୍ଗ୍ ଦୁନୁବ୍-ସାଭା ଛାବା ଜାନା ଦୋ ୟାହୁଦୀକୋ ହାର୍ ୟାହୁଦୀ କୋୱାଃ ବିଶ୍ଵାସ୍ କେ ମାନାତିଙ୍ଗ୍ ତାନ୍ ହୋଡ଼ୋକୋ ଏତେ ଚିମିନାଙ୍ଗ୍ କୋ ପାଉଲୁସ୍ ହାର୍ ବାର୍ନାବାସ୍ କିନାଃ ସାନ୍ଦେଶ୍ କେ ବିଶ୍ଵାସ୍ କେଦାକୋ, ହାର୍ ଇନ୍‍କିନ୍ ଇନ୍‍କୁକେ ବାକାଣ୍ କେତେ ବୁଝାଅ କେଦାକୋ ଚି ପାର୍ମେଶ୍ଵାର୍ ରାଃ ଆନୁଗ୍ରାହ୍ ରେ ବାଇକେତେ ତାଇନ୍‍ପେ। ଏନ୍ ସେଟେର୍ ଆରାମେ ହୁଲାଙ୍ଗ୍ ରେ ସାହାର୍ ରେନ୍ ଥିମ୍ବାଗି ହୋଡ଼ୋକୋ ପାର୍ମେଶ୍ଵାର୍ ରାଃ ବାଚାନ୍ ଆୟୁମ୍ ନାଙ୍ଗ୍ ହୁଣ୍ଡି ଜାନାକୋ। ମେନ୍ଦୋ ୟାହୁଦୀ ଗୁରୁ କୋ ମିଃଥିମ୍ବା ହୋଡ଼ୋକୋକେ ନେଲ୍ କେତେ ଖିସ୍ ତେ ଫେରେଃ ଜାନାକୋ, ହାର୍ ନିନ୍ଦାତାନ୍ ଲୋଃ ପାଉଲୁସ୍ ଆଃ ବାକାଣ୍ ରାଃ ବିରୋଧ୍ ରେ କାଜି ଏଟେଃ କେଦାକୋ। ଏନ୍ତେ ପାଉଲୁସ୍ ହାର୍ ବାର୍ନାବାସ୍ ବେଗାର୍ ବୋରୋ ତେ କାଜିକେଦାକିନ୍, “ଲାଗାତିଙ୍ଗ୍ ତାଇକେନା ଚି ପାର୍ମେଶ୍ଵାର୍ ରାଃ ବାଚାନ୍ ସିଦାରେ ଆପେକେ ଉଦୁବଃ ତେୟାଃ; ମେନ୍ଦୋ ଚିମ୍ତାଙ୍ଗ୍ ଆପେ ଏନାକେ ଗେନାକେ ତାନାପେ, ହାର୍ ଆପାନ୍ କେ ଜାନାଓ ଜୀଦାନ୍ ନାମେ ଲେକାନିଃ କାପେ ବାଇତାନା, ଏଣ୍ଡେ ନାଆ, ଆଲିଙ୍ଗ୍ ଏଟାଃଜାତି କୋ ପାଡ଼୍ ସେନାଲିଙ୍ଗ୍। ଚିୟାଃଚି ପ୍ରାଭୁ ଆଲିଙ୍ଗ୍‍କେ ନେ ଆନାଚୁ ଏମାକାଃ ଲିଙ୍ଗ୍ଆଏ, ‘ଇଙ୍ଗ୍ ଆପେକେ ଏଟାଃଜାତି ହୋଡ଼ୋକୋ ନାଙ୍ଗ୍ ମାସ୍କାଲ୍ ବାଇୟାକାଃ ପେୟାଇଙ୍ଗ୍, ଆପେ ଅତେ ରାଃ ଟୁଣ୍ଡୁ ସାନ୍ ବାଞ୍ଚାଅ ରାଃ ହୋରା ବାୟୋଗାପେ।’ ” ନେୟା ଆୟୁମ୍ କେତେ ଏଟାଃଜାତି ହୋଡ଼ୋକୋ ରାଶିକା ଜାନାକୋ, ହାର୍ ପାର୍ମେଶ୍ଵାର୍ ରାଃ ବାଚାନ୍ ରାଃ ମାନାରାଙ୍ଗ୍ କେଦାକୋ; ଆଡୋଃ ଚିମିନାଙ୍ଗ୍ ହୋଡ଼ୋକୋ ଜାନାଓ ଜୀଦାନ୍ ନାଙ୍ଗ୍ ବାଇଲେନ୍ ତାଇକେନାକୋ, ଇନ୍‍କୁ ପ୍ରାଭୁ କେ ବିଶ୍ଵାସ୍ କେଦାକୋ। ଏନ୍ତେ ପ୍ରାଭୁ ଆଃ ବାଚାନ୍ ଏନ୍ ସବେନ୍ ଜାଗା କୋରେ ପାସ୍ରାଅ ଜାନା। ମେନ୍ଦୋ ୟାହୁଦୀ ଗୁରୁ କୋ ପାର୍ମେଶ୍ଵାର୍ କେ ବୋରୋତାନ୍ ମାଇନାନ୍ କୋଡ଼ାକୋକେ ହାର୍ ମାଇନାନ୍ କୁଡ଼ିକୋକେ ହାର୍ ସାହାର୍ ରେନ୍ ମୁଖିୟା କୋକେ ଉସ୍କୁର୍ କେଃ କୋୱାକୋ, ଆଡୋଃ ପାଉଲୁସ୍ ହାର୍ ବାର୍ନାବାସ୍ କିନାଃ ବିରୁଦ୍ଧ୍ ରେ ସାସାତି ରିକା କେତେ ଇନ୍‍କିନ୍ କେ ଆକୋୱାଃ ସୀମା ଏତେ ଅଡୋଙ୍ଗ୍ କେଃକିନାକୋ। ଇମ୍ତାଙ୍ଗ୍ ଇନ୍‍କିନ୍ ଇନ୍‍କୁୱାଃ ଆୟୁର୍ ରେ ଆକିନାଃ କାଟା ରାଃ ଧୂଡ଼ି କେ କଟା କେତେ ଇକୁନିୟୁମ୍ ସାହାର୍ ତେ ସେନୋଃ ଜାନାକିନ୍। ଆଡୋଃ ଚେଲାକୋ ରାଶିକା ତେ ହାର୍ ପାବିତାର୍ ଆତ୍ମା ତେ ଫେରେଃ ଇଦିୟାନାକୋ। ଇକୁନିୟୁମ୍ ସାହାର୍ ରେ ନେଲେକା ହୋବାଜାନା ଚି ପାଉଲୁସ୍ ହାର୍ ବାର୍ନାବାସ୍ ୟାହୁଦୀ କୋୱାଃ ବିନ୍ତିଅଡ଼୍ଆଃ ରେ ମିଶାତେ ସେନ୍ ଜାନାକିନ୍, ହାର୍ ନେଲେକା ବାକାଣ୍ କେଦାକିନ୍ ଚି ୟାହୁଦୀ ହୋଡ଼ୋକୋ ହାର୍ ଏଟାଃଜାତି ୟୁନାନୀ ହୋଡ଼ୋକୋ ଏତେ ଥିମ୍ବାଗି ହୋଡ଼ୋକୋ ବିଶ୍ଵାସ୍ କେଦାକୋ। ମେନ୍ଦୋ କାକୋ ବିଶ୍ଵାସ୍ କେଃ ୟାହୁଦୀ ହୋଡ଼ୋକୋ ଏଟାଃଜାତି ହୋଡ଼ୋକୋୱାଃ ମୋନ୍ କେ ବିଶ୍ଵାସୀ ହାଗାକୋୱାଃ ବିରୋଧ୍ ରେ ଉସ୍କୁର୍ କେଦାକୋ ହାର୍ ଖିସ୍ ରିକାକେଃ କୋୱାକୋ। ପାଉଲୁସ୍ ହାର୍ ବାର୍ନାବାସ୍ ଥିମ୍ବାଗି ହୁଲାଙ୍ଗ୍ ସାନ୍ତେ ଏନ୍ତାଃ ରେ ତାଇନ୍ ଜାନାକିନ୍, ହାର୍ ପ୍ରାଭୁ ଆଃ ଚେତାନ୍ ରେ ଆଶ୍ରା ମାଣ୍ଡାଅ କେତେ ସାହାସ୍ ଲୋଃ ବାକାଣ୍ ତାଇକେନାକିନ୍; ଆଡୋଃ ୟୀଶୁ ଇନ୍‍କିନାଃ ତିଈ ତେ ଚିହ୍ନା ହାର୍ ଆକ୍‍ଦାନ୍ଦା କାମି ରିକା କେତେ ଆୟାଃ ଆନୁଗ୍ରାହ୍ ରାଃ ବାଚାନ୍ ରେ ଗୋୱା ଏମ୍ ତାଇକେନାଏ। ମେନ୍ଦୋ ସାହାର୍ ରେନ୍ ହୋଡ଼ୋ କୋୱାଃ ରେ କାଜି କାଜୋକାଜାନା, ଏନାତେ ଚିମିନାଙ୍ଗ୍ କୋ ୟାହୁଦୀ ଗୁରୁକୋ ପାଡ଼୍ ଆଡୋଃ ଚିମିନାଙ୍ଗ୍ କୋ କୁଲାକାନ୍ ଚେଲା କୋୱାଃ ପାଡ଼୍ ହୋବା ଜାନାକୋ। ମେନ୍ଦୋ ଏଟାଃଜାତି ହୋଡ଼ୋକୋ ହାର୍ ୟାହୁଦୀ ହୋଡ଼ୋକୋ ଆକୋୱାଃ ଗୁରୁ କୋଲୋଃ ମେଶା କେତେ ଇନ୍‍କୁକେ ଖାରାପ୍ ବେଓହାର୍ ହାର୍ ଦିରି ଥେର୍ ଲାଗିନ୍ ଅଡୋଙ୍ଗ୍ ଜାନାକୋ। ଇମ୍ତା ଇନ୍‍କୁ ନେ କାଜିକେ ସାରିକେଦାକୋ, ହାର୍ ଲୁକାଉନିୟା ଜିଲ୍ଲା ରାଃ ଲୁସ୍ତ୍ରା ହାତୁ ହାର୍ ଦିର୍ବେ ହାତୁ କୋରେ, ଆଡୋଃ ନାଡ଼େଏ ଜାପାଃ ରେୟାଃ ଜାଗା କୋରେ ନିର୍ ଜାନାକୋ। ହାର୍ ଇନ୍‍କୁ ଏନ୍ତାଃରେ ସୁସାମାଚାର୍ ପାର୍ଚାର୍ କେଦାକୋ। ଲୁସ୍ତ୍ରା ହାତୁ ରେ ମିହୋଡ଼୍ ହୋଡ଼ ଦୁବାକାନ୍ ତାଇକେନାଏ, ଅକନିଃ କାଟା ତେ ନାରାଦୁରା ତାଇକେନାଏ। ଇନିଃ ଏଙ୍ଗା ଲାହେଃ ତେଗି ଲାଙ୍ଗ୍ଡ଼ା ତାଇକେନାଏ ଆଡୋଃ ଚିଉଲାଅ ହ କାଏ ସେନ୍ ଲେଦା। ଇନିଃ ପାଉଲୁସ୍ କେ ବାକାଣ୍ ତାନ୍ ଆୟୁମି ତାଇନାଏ। ପାଉଲୁସ୍ ଇନିଜାଃ ପାଡ଼୍ ନେଲ୍ ବାଇକେତେ ନେଲ୍ କିଜାଏ ଚି ଇନିଃକେ ବେଶ୍ ହୋବାଅଃ ରାଃ ବିଶ୍ଵାସ୍ ମେନାଃ, ହାର୍ ଜୋର୍ତେ କାଜିକିଜାଏ, “ଆମାଃ କାଟା ରାଃ ପେଡ଼େଏ ତେ ସୋଜ୍ ତିଙ୍ଗୁନ୍ ମେ।” ଇମ୍ତା ଇନିଃ ଡେଗାୱ ବିରିଃ କେତେ ସେସେନ୍ ଏଟେଃ କେଦାଏ। ହୋଡ଼ୋକୋ ପାଉଲୁସ୍ ଆଃ ନେ କାମି ନେଲ୍‍କେତେ ଲୁକାଉନିୟା ଭାଷା ରେ ଜୋର୍ତେ କାଉରି କେତେ କାଜିକେଦାକୋ, “ଦେଓତାକୋ ହୋଡ଼ୋକୋ ଲେକା ବାଇକେତେ ଆବୁୱାଃ ଥାଲା ରେ ଆଡ଼୍‍ଗୁ କାନାକୋ।” ଇନ୍‍କୁ ବାର୍ନାବାସ୍ କେ ଜିଉସ୍ ହାର୍ ପାଉଲୁସ୍ କେ ହିର୍ମେସ୍ କାଜିକେଦାକୋ ଚିୟାଃଚି ଇନିଃ କାଜି ରେ ମାରାଙ୍ଗ୍ ତାଇକେନାଏ। ଜିଉସ୍ ମାନ୍ଦିର୍ ରେନ୍ ପୁଝାରି ଅକନିଃ ହାତୁ ରାଃ ନାଡ଼େଏ ରେ ତାଇକେନାଏ, ଇନିଃ ଉରିଃ ହାର୍ ବାହା-ମାଲା କୋ ହାତୁ ରାଃ ସୀମାନ୍ ଦୁହାର୍ ତାଃରେ ଆଉକେଦାଏ, ଇନିଃ ହାର୍ ହୋଡ଼ୋକୋ ଏନାକେ ଇନ୍‍କିନାଃ ଲାଗିନ୍ ଦାଣେ ଏମ୍ ନାଙ୍ଗ୍ ସାନାଙ୍ଗ୍ ତାଇକେନାକୋ। ମେନ୍ଦୋ ବାର୍ନାବାସ୍ ହାର୍ ପାଉଲୁସ୍ କୁଲାକାନ୍ ଚେଲାକିନ୍ ଚିମ୍ତାଙ୍ଗ୍ ନେୟା ଆୟୁମ୍ କେଦାକିନ୍, ଦୋ ଆକିନାଃ ଲିଜାଃ କେ ଚାଗାଡ଼୍ କେଦାକିନ୍ ହାର୍ ହୋଡ଼ୋକୋୱାଃ ନାଡ଼େଏ ନିର୍ ସେନ୍ ଜାନାକିନ୍ ହାର୍ କାଉରି କେତେ କାଜି ଏଟେଃ କେଦାକିନ୍, “ହେ ହୋଡ଼ୋକୋ, ଆପେ ଚିନାଃ ରିକାତାନାପେ? ଆଲିଙ୍ଗ୍ ହଦୋ ଆପେ ଲେକା ଦୁକୁ-ସୁକୁ ସାହାତିଙ୍ଗ୍ ସାଧାରାନ୍ ହୋଡ଼ୋକୋ ତାନ୍‍ଲିଙ୍ଗ୍, ଆଡୋଃ ଆପେକେ ସୁସାମାଚାର୍ ଉଦୁବାପେ ତାନାଲେ ଚି, ଆପେ ନେ ସାମା ଜିନିଷ୍ କୋଏତେ ଗେନା କେତେ ଜୀନିଦ୍ ପାର୍ମେଶ୍ଵାର୍ ପାଡ଼୍ ରୁଆଡ଼୍ ଏନ୍‍ପେ, ଅକନିଃ ସିର୍ମାଦିଶୁମ୍ ଆଡୋଃ ଅତେ ଆଡୋଃ ସାମୁଦାର୍ ଆଡୋଃ ଏନାରେ ଅକନାଃ କୋ ମେନାଃ ବାଇକାଦାଏ। ଇନିଃ ସିଦା ସାମାୟ୍ ରେ ସବେନ୍ ଜାତିରେନ୍ ହୋଡ଼ୋକୋକେ ଆକୋ-ଆକୋୱାଃ ସାନାଙ୍ଗ୍ ହୋରା ଲେକା ସେସେନ୍ ଏମାଃ କୋୱାଏ। ଏଣ୍ଡେ ହ ଇନିଃ ଆଏଃ ଆପାନ୍ କେ ବେଗାର୍ ଗୋୱା ଲେକା କାଏ ମାଣ୍ଡାଅ କେଦା, ମେନ୍ଦୋ ଇନିଃ ବୁଗିନାଃ ରିକାତାନ୍, ହାର୍ ରିମିଲ୍‍ଦିଶୁମ୍ ଏତେ ଗାମା ଦାଆତାନ୍ ଲୋଃ ଆଡୋଃ ଯଅ-ସାକାମ୍ କୋ ଠିକ୍ ସାମାୟ୍ ରେ ଏମ୍‍କେତେ ଆପେୟାଃ ମୋନ୍ କେ ଯୋଜୋମାଃ ହାର୍ ରାଶିକା ତେ ଫେରେଃ କେଦାଏ।” ନେୟା କାଜିକେତେ ହଗି ଇନ୍‍କିନ୍ ହୋଡ଼ୋକୋକେ ପୁରାଃ କାଠିନ୍ ତେ ରୋକାଅ କେଃକୋୱାକୋ ଚି ଇନ୍‍କିନାଃ ଲାଗିନ୍ ଦାଣେ ଆଲୋ ରାକାବ୍ କାକୋ। ମେନ୍ଦୋ ଚିମିନାଙ୍ଗ୍ ୟାହୁଦୀ ଗୁରୁକୋ ଆନ୍ତାକିୟା ସାହାର୍ ହାର୍ ଇକୁନିୟୁମ୍ ସାହାର୍ ଏତେ ହିଜୁଃକେତେ ହୋଡ଼ୋକୋକେ ଆକୋୱାଃ ପାଡ଼୍ ବାଇ କେଃକୋୱାକୋ, ହାର୍ ପାଉଲୁସ୍ କେ ଦିରି ତେ ଥେର୍ କେଦାକୋ, ହାର୍ ଗୋଏଃ ଜାନାଏ ମେନ୍ତେ ଇନିଃକେ ହାତୁ ରାଃ ବାହାରି ତେକୋ ଘେସ୍ରାୱ ଅଡୋଙ୍ଗ୍ କିଜା। ମେନ୍ଦୋ ଚିମ୍ତାଙ୍ଗ୍ ଚେଲାକୋ ଇନିଜାଃ ସବେନ୍ ପାଡ଼୍ ଘେରାୱ ତିଙ୍ଗୁ ଜାନାକୋ, ଦୋ ଇନିଃ ବିରିଃ କେତେ ସାହାର୍ ରେ ବୋଲୋ ଜାନାଏ ଆଡୋଃ ଏଟାଃ ହୁଲାଙ୍ଗ୍ ଇନିଃ ବାର୍ନାବାସ୍ ଲୋଃ ଦିର୍ବେ ହାତୁ ତେ ସେନୋଃ ଜାନାଏ। ହାର୍ ଇନ୍‍କିନ୍ ଏନ୍ ହାତୁ ରେନ୍ ହୋଡ଼ୋକୋକେ ସୁସାମାଚାର୍ ଉଦୁବ୍ କେତେ, ଆଡୋଃ ଥିମ୍ବାଗି ଚେଲା ବାଇକେତେ, ଲୁସ୍ତ୍ରା ହାର୍ ଏନ୍ତାଃତେ ଇକୁନିୟୁମ୍ ଆଡୋଃ ଏନ୍ତାଃତେ ଆନ୍ତାକିୟା ସାହାର୍ ତେ ରୁଆଡ଼୍ ଜାନାକିନ୍। ଆଡୋଃ ଏନ୍ତାଃକୋରେ ଚେଲା କୋୱାଃ ବିଶ୍ଵାସ୍ କେ କେଟେଃ କେଦାକିନ୍ ହାର୍ ନେୟା ଉପ୍‍ଦେଶ୍ ଏମ୍ ତାଇକେନାକିନ୍ ଚି ବିଶ୍ଵାସ୍ ରେ ବାଇକାନ୍ ତାଇନୋଃପେ; ହାର୍ ନେୟା କାଜି ତାଇକେନାକିନ୍, “ଆବୁକେ ଥିମ୍ବାଗି ଦୁକୁ କୋ ସାହାତିଙ୍ଗ୍ କେତେ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋ ହୋବାଅଃୱା।” ଆଡୋଃ ଇନ୍‍କିନ୍ ସବେନ୍ ମିପୀୟାଃ କାଲିସିୟା ରେ ଇନ୍‍କୁ ନାଙ୍ଗ୍ ମାରିହୋଡ଼ ଦହ କେଦାକିନ୍, ହାର୍ ଉପାସ୍ ରିକାତାନ୍ ଲୋଃ ବିନ୍ତି କେତେ ଇନ୍‍କୁକେ ପ୍ରାଭୁ ଆଃ ତିଈ ରେ ଜିମାକେଦାକିନ୍ ଅକନିଜାଃ ରେ ଇନ୍‍କୁ ବିଶ୍ଵାସ୍ ଲେଦାକୋ। ଏନା ତାୟୋମ୍ତେ ପାଉଲୁସ୍ ହାର୍ ବାର୍ନାବାସ୍ ପିସିଦିୟା ଜିଲ୍ଲା ହୋବା କେତେ ପାମ୍ଫୁଲିୟା ଜିଲ୍ଲା ରେ ହିଜୁଃ ଜାନାକିନ୍। ଆଡୋଃ ଏନ୍ତାଃ ପିର୍ଗା ହାତୁ ରେ ବାଚାନ୍ ଉଦୁବ୍ କେତେ ଆତ୍ତାଲିୟା ହାତୁ ତେ ସେନ୍ ଜାନାକିନ୍। ଆଡୋଃ ଏନ୍ତାଃ ଏତେ ଇନ୍‍କିନ୍ ଜାହାଜ୍ ରେ ଆନ୍ତାକିୟା ସାହାର୍ ରୁଆଡ଼୍ ଜାନାକିନ୍, ଅକ୍ତାଃରେ ଇନ୍‍କିନ୍ ପାର୍ମେଶ୍ଵାର୍ ରାଃ ଆନୁଗ୍ରାହ୍ ରେ ଜିମା ଲେନ୍ ତାଇକେନାକିନ୍ ଏନ୍ କାମିକୋକେ ନାଆ ଇନ୍‍କିନ୍ ପୁରା ଛାବା କେଦାକିନ୍। ଏନ୍ତାଃ ସେଟେର୍ କେତେ, ଇନ୍‍କିନ୍ କାଲିସିୟା ରେନ୍ ହୋଡ଼ୋକୋକେ ହୁଣ୍ଡି କେଃକୋୱାକିନ୍ ହାର୍ ଉଦୁବ୍ କେଦାକିନ୍ ଚି ପାର୍ମେଶ୍ଵାର୍ ଇନ୍‍କିନ୍ ଲୋଃ ହୋବାକେତେ ଚିଲ୍‍କା ମାରାଙ୍ଗ୍-ମାରାଙ୍ଗ୍ କାମି କେଦାଏ, ହାର୍ ଏଟାଃଜାତି ହୋଡ଼ୋକୋ ଲାଗିନ୍ ବିଶ୍ଵାସ୍ ରାଃ ଦୁହାର୍ ନିଃ ତାଦାଏ। ହାର୍ ଇନ୍‍କିନ୍ ଏନ୍ତାଃ ଚେଲାକୋ ଲୋଃ ଥିମ୍ବାଗି ହୁଲାଙ୍ଗ୍ ସାନ୍ତେ ତାଇନ୍ ଜାନାକିନ୍। ଏନ୍ତେ ଚିମିନାଙ୍ଗ୍ ୟାହୁଦୀ ବିଶ୍ଵାସୀ ହୋଡ଼ୋକୋ ୟାହୁଦୀୟା ଜିଲ୍ଲା ଏତେ ହିଜୁଃକେତେ ଆନ୍ତାକିୟା ସାହାର୍ ରେନ୍ ବିଶ୍ଵାସୀ ହାଗାକୋକେ ଶିଖାଅ କେଃକୋୱାକୋ; “ଆଗାର୍ ମୁଶା ନାବୀ ରାଃ ନିୟାମ୍ ଲେକାତେ ଆପେୟାଃ ଖାତ୍ନା କାହବାଅଃ ରେଦୋ ଆପେ ବାଞ୍ଚାଅ କାପେ ନାମେୟା।” ଚିମ୍ତାଙ୍ଗ୍ ପାଉଲୁସ୍ ହାର୍ ବାର୍ନାବାସ୍ କିନାଃ ଇନ୍‍କୁ ଲୋଃ ବେଶେ ଗି ଏପେଗେର୍ ଆଡୋଃ କୁଲିକାପାଜି ହୋବାଜାନା ଦୋ ନେୟା କାଜି ବିଚାର୍ ଜାନା, ଚି ପାଉଲୁସ୍ ହାର୍ ବାର୍ନାବାସ୍, ଆଡୋଃ ଇନ୍‍କୁ ଏତେ ଚିମିନାଙ୍ଗ୍ ହୋଡ଼ୋକୋ ନେ କାଜି ରାଃ ବିଷାୟ୍ ରେ କୁଲାକାନ୍ ଚେଲା କୋତାଃ ହାର୍ ମାରିହୋଡ଼ୋ କୋତାଃ ୟୀରୁଶାଲେମ୍ ତେକୋ ସେନା। ଏନ୍ତେ କାଲିସିୟା ରେନ୍ କୋ ଇନ୍‍କୁକେ ସେନ୍ ହୋରା ନାଙ୍ଗ୍ ଜିନିଷ୍‍କୋ ହାର୍ ଖାର୍ଚା ଏମ୍ କେଦାକୋ; ଆଡୋଃ ଇନ୍‍କୁ ଫିନିକେ ରାଇଜ୍ ଆଡୋଃ ସାମାରୀୟା ଜିଲ୍ଲା ହୋବା କେତେ ସେନ୍ ଇମ୍ତା ଏନ୍ତାଃ ଉଦୁବ୍ କେଦାକୋ ଚି ଚିଲ୍‍କା ଏଟାଃଜାତିକୋ ସୁସାମାଚାର୍ ଆୟୁମ୍ କେତେ ବିଶ୍ଵାସୀ ବାଇଜାନାକୋ, ନେୟା ଆୟୁମ୍ କେତେ ଏନ୍ତାଃ ରେନ୍ ସବେନ୍ ବିଶ୍ଵାସୀ ହାଗାକୋ ବେଶେ କୋ ରାଶିକା ଜାନା। ଚିମ୍ତାଙ୍ଗ୍ ଇନ୍‍କୁ ୟୀରୁଶାଲେମ୍ ସାହାର୍ ଥେବାଃଜାନାକୋ, ଦୋ କାଲିସିୟା ରେନ୍ କୋ ହାର୍ କୁଲାକାନ୍ ଚେଲା କୋ ହାର୍ ମାରିହୋଡ଼ୋକୋ ଇନ୍‍କୁ ଲୋଃ ରାଶିକା ତେକୋ ନାପାମ୍ ଜାନା, ଆଡୋଃ ପାଉଲୁସ୍ ହାର୍ ବାର୍ନାବାସ୍ ଉଦୁବ୍ କେଦାକିନ୍ ଚି ପାର୍ମେଶ୍ଵାର୍ ଇନ୍‍କୁ ଲୋଃ ହୋବା କେତେ ଚିଲ୍‍କାନ୍-ଚିଲ୍‍କାନ୍ କାମି ରିକାଲେଦାଏ। ମେନ୍ଦୋ ଫାରିସୀ ହୋଡ଼ୋକୋୱାଃ ଦାଲ୍ ରେନ୍ ଏନ୍ ବିଶ୍ଵାସୀକୋ ଅକନ୍‍କୋ ଚି ୟୀଶୁ କେ ମାସୀହ୍ ବିଶ୍ଵାସ୍ ଲେଦାକୋ, ଇନ୍‍କୁ ଏତେ ଚିମିନାଙ୍ଗ୍ ତିଙ୍ଗୁ କେତେ କାଜିକେଦାକୋ, “ଇନ୍‍କୁକେ ଖାତ୍ନା ରିକା ଆଡୋଃ ମୁଶା ନାବୀ ରାଃ ଆଇନ୍ କେ ମାନାତିଙ୍ଗ୍ ରାଃ ଆନାଚୁ ଏମ୍ ଲାଗାତିଙ୍ଗ୍ ତାନାଃ।” ଏନ୍ତେ କୁଲାକାନ୍ ଚେଲା କୋ ଆଡୋଃ ମାରିହୋଡ଼ୋକୋ ନେ କାଜି ରାଃ ବିଷାୟ୍ ରେ ବିଚାର୍ ଲାଗିନ୍ତେ କୋ ହୁଣ୍ତି ଜାନା। ଏନ୍ତେ ପାତ୍ରାସ୍ ଥିମ୍ବାଗି କୁଲିକାପାଜି ରାଃ ତାୟୋମ୍ତେ ତିଙ୍ଗୁ କେତେ ଇନ୍‍କୁକେ କାଜିୟାଃକୋୱାଏ, “ହେ ହାଗାକୋ, ଆପେ ପେ ସାରିତାନା ଚି ଥିମ୍ବାଗି ହୁଲାଙ୍ଗ୍ ହୋବାଜାନା ପାର୍ମେଶ୍ଵାର୍ ଆପେ କୋଏତେ ଇଙ୍ଗ୍‍କେ ସାଲା କେଦିଙ୍ଗ୍ଆଏ ଚି ଇଙ୍ଗ୍ଆଃ ହୋରାତେ ଏଟାଃଜାତି ରେନ୍ ହୋଡ଼ୋକୋ ସୁସାମାଚାର୍ ରାଃ ବାଚାନ୍ ଆୟୁମ୍ କେତେ ବିଶ୍ୱାସ୍ ୟାକୋ। ମୋନ୍ କେ ସାରିଉରୁମ୍ ତାନ୍ ପାର୍ମେଶ୍ଵାର୍ ଇନ୍‍କୁକେ ହଗି ଆବୁୱାଃ ଲେକାଗି ପାବିତାର୍ ଆତ୍ମା ଏମ୍ କେତେ ଆୟାଃ ହୋଡ଼ୋକୋ ମେନ୍ତେ ଗ୍ରାହାନ୍ କେଃକୋୱାଏ। ଆଡୋଃ ବିଶ୍ଵାସ୍ ରାଃ ହୋରାତେ ଇନ୍‍କୁୱାଃ ମୋନ୍ କେ ଫାର୍ଚି କେତେ ଆବୁ ରେ ଆଡୋଃ ଇନ୍‍କୁ ରେ ଜାହାନ୍ ଆନ୍ତାର୍ କାଏ ମାଣ୍ତାଅ କେଦାଏ। ଏଣ୍ଡେ ନାଆ ଚେଲା କୋୱାଃ ତାରାଣ୍ ଚେତାନ୍ ରେ ଥିମ୍ବାଗି ହାମ୍ବାଲ୍ ଏମ୍ କେତେ, ଆପେ ଚିନାଃ ମେନ୍ତେ ପାର୍ମେଶ୍ଵାର୍ କେ ପାରୀକ୍ଷା ତାନାପେ, ଅକନାଃ କେ ନା ଆବୁୱାଃ ପୁର୍ଖାହୋଡ଼ୋକୋ ଗୋଅ ଧାଡ଼ି ଲେଦାକୋ ଆଡୋଃ ନା ଆବୁ ଗୋଅ ଧାଡ଼ିୟାବୁ? ହାଁ, ଆଲେକେ ନେ କାଜି ରେ ବିଶ୍ଵାସ୍ ମେନାଃ ଚି ଜେଲେକା ଇନ୍‍କୁ ପ୍ରାଭୁ ୟୀଶୁ ଆଃ ଆନୁଗ୍ରାହ୍ ତେ ବାଞ୍ଚାଅ ନାମେୟାକୋ; ଏନ୍ ଲେକାଗି ଆଲେ ହଗି ନାମେୟାଲେ।” ଏନ୍ତେ ସବେନ୍ ସାଭା ରେନ୍ ହୋଡ଼ୋକୋ ହାପା ଜାନାକୋ ହାର୍ ବାର୍ନାବାସ୍ ଆଡୋଃ ପାଉଲୁସ୍ ରାଃ କାଜିକୋ ଆୟୁମ୍ କେଦା ଚି, ପାର୍ମେଶ୍ଵାର୍ ଇନ୍‍କୁୱାଃ ହୋରାତେ ଏଟାଃଜାତି ହୋଡ଼ୋକୋ ରେ ଚିଲ୍‍କା ମାପ୍‍ରାଙ୍ଗ୍-ମାପ୍‍ରାଙ୍ଗ୍ ଚିହ୍ନା ଆଡୋଃ ଆକ୍‍ଦାନ୍ଦା କାମିକୋ ଦେଖାଅ କେଦାଏ। ଚିମ୍ତାଙ୍ଗ୍ ଇନ୍‍କୁ ହାପାଜାନାକୋ ଦୋ ୟାକୁବ୍ କାଜି ଏଟେଃ କେଦାଏ, “ହେ ହାଗାକୋ, ଇଙ୍ଗ୍ଆଃ କାଜି ଆୟୁମେପେ। ଶିମୋନ୍ ପାତ୍ରାସ୍ ଉଦୁବ୍ କେଦାଏ ଚି, ପାର୍ମେଶ୍ଵାର୍ ଚିଲ୍‍କା ସିଦା ରେ ଏଟାଃଜାତି କୋକେ ଦାୟାନେଲ୍ କେଃକୋୱାଏ ଏନାତେ ଇନ୍‍କୁ ଏତେ ଆଜାଃ ନୁତୁମ୍ ଲାଗିନ୍ତେ ମିୟାଃ ଆୟାଃ ଜାତି ବାଇକୋୱାଏ। ନେୟାତେ ନାବୀ କୋୱାଃ କାଜି ହଗି ଜୋକାଅଃ ତାନା, ଜେଲେକା ଅଲାକାନା, ‘ନେୟା ରାଃ ତାୟୋମ୍ତେ ଇଙ୍ଗ୍ ଆଡୋଃଗି ହିଜୁଃକେତେ ଦାଉଦ୍ ରାଜା ରାଃ ଉୟୁଃକାନ୍ ଡେରା କେ ତିଙ୍ଗୁୟାଇଙ୍ଗ୍, ହାର୍ ଆୟାଃ ଧାଶୁଡ଼ାକାନ୍ କୋକେ ୟଗି ଆଡୋଃ ମିଶା ବାଇ ରୁଆଡ଼େୟାଇଙ୍ଗ୍, ହାର୍ ଏନାକେ ବାଇ ତିଙ୍ଗୁୟାଇଙ୍ଗ୍। ଏନାମେନ୍ତେ ଚି ସାରେଃକାନ୍ ହୋଡ଼ୋକୋ, ମାନେ ସବେନ୍ ଏଟାଃଜାତିକୋ ଅକନ୍‍କୋ ଇଙ୍ଗ୍ଆଃ ହୋଡ଼ୋକୋ ମେନ୍ତେ ନୁତୁମୋଃ ତାନାକୋ, ପ୍ରାଭୁ କେ ସାଙ୍ଗାରି ୟାକୋ, ନେୟା ଏନ୍ ପ୍ରାଭୁ ଗି କାଜି ତାନାଏ ଅକନିଃ ଅତେ ରାଃ ଏନେଟେଃ ଏତେ ନେ କାଜି କୋରାଃ ସାମାଚାର୍ ଏମ୍ ଆଉ ତାଇନାଏ।’ ଏନାମେନ୍ତେ ଇଙ୍ଗ୍ଆଃ ବିଚାର୍ ନେୟା ତାନାଃ, ଚି ଏଟାଃଜାତି କୋଏତେ ଅକନ୍ ହୋଡ଼ୋକୋ ପାର୍ମେଶ୍ଵାର୍ ତାଃକୋ ରୁଆଡ଼୍ ହିଜୁଃ ତାନା, ଆବୁ ଇନ୍‍କୁକେ ଦୁକୁ କାବୁ ଏମାକୋୱାଃ। ମେନ୍ଦୋ ଇନ୍‍କୁକେ ଅଲ୍ କୁଲ୍ କୋୱାବୁ ଚି, ଇନ୍‍କୁ ମୂର୍ତି କୋକେ ରାକାବାକାନ୍ ଜିନିଷ୍ କୋଏତେ ଆଡୋଃ ବ୍ୟାଭିଚାର୍ କାମି ଆଡୋଃ ହୋଟୋଃ ଲିମ୍ବୁଦାକାନ୍ ମାସ୍ ତେ ଆଡୋଃ ମାୟୋମ୍ ତେ ସାଙ୍ଗିନ୍ ତାଇନ୍ କାକୋ। ଚିୟାଃଚି ସିଦା ସାମାୟ୍ ଏତେ ସାହାର୍-ସାହାର୍ ମୁଶା ନାବୀ ରାଃ ଆଇନ୍ ରାଃ ପାର୍ଚାର୍ ଆଉ ଇଦି ତାନାକୋ ହାର୍ ଏନା ସବେନ୍ ଆରାମେ ହୁଲାଙ୍ଗ୍ ବିନ୍ତିଅଡ଼୍ଆଃ ରେ ପାଢ଼ାଅଃ ତାଇକେନା।” ଏନ୍ତେ ସବେନ୍ କାଲିସିୟା କୋଲୋଃ କୁଲାକାନ୍ ଚେଲା କୋକେ ଆଡୋଃ ମାରିହୋଡ଼ୋକୋକେ ବେଶ୍ ସାନାଙ୍ଗ୍ କେଃକୋୱା ଚି ଆକୋ ଏତେ ଚିମିନ୍ ହୋଡ଼ୋକୋକେ ସାଲାୟାକୋ, ମାନେ ୟାହୁଦା ଅକଏଚି ବାର୍ସାବ୍ବା କାଜିଅଃ ତାଇନାଏ ହାର୍ ଶିଲାସ୍ କେ, ନିକିନ୍ ହାଗାକୋରେ ଆଗୁୱା ତାଇନ୍ କେନାକିନ୍, ହାର୍ ନିକିନ୍‍କେ ପାଉଲୁସ୍ ହାର୍ ବାର୍ନାବାସ୍ ଲୋଃ ଆନ୍ତାକିୟା ସାହାର୍ ରାଃ କାଲିସିୟା ତେକୋ କୁଲ୍ କିନା। ଏନ୍ତେ ଇନ୍‍କୁ ଇନ୍‍କିନାଃ ତିଈ ରେ ନେୟା ଅଲ୍ କୁଲ୍ କେଦାକୋ; “ଆନ୍ତାକିୟା ଆଡୋଃ ସିରିୟା ଆଡୋଃ କିଲିକିୟା ସାହାର୍ ରେ ତାଇନ୍ ତାନ୍ ବିଶ୍ଵାସୀ ହାଗାକୋକେ ଅକନ୍ କୋଚି ଏଟାଃଜାତି କୋଏତେ ତାନ୍‍କୋ, କୁଲାକାନ୍ ଚେଲା ହାର୍ ମାରିହୋଡ଼ୋ ହାଗାକୋ ପାଡ଼େତେ ଜୋହାର୍। ଆଲେ ଆୟୁମ୍ କାଦାଲେ ଚି, ଆଲେ ହେତେ ଚିମିନାଙ୍ଗ୍ କୋ ହେନ୍ତାଃ ସେନ୍‍କେତେ, ଆପେକେ ଆକୋୱାଃ ବାକାଣ୍ କୋ ରେ ବୋରୋ ତାଃପେୟାକୋ, ହାର୍ ଆପେୟାଃ ମୋନ୍ କେ ବାଦ୍‍ଲାଅ ତାଦାକୋ, ମେନ୍ଦୋ ଆଲେ ଇନ୍‍କୁକେ ହୁକୁମ୍ କାଲେ ଏମ୍ ଲେଦାଲେ। ଏନାମେନ୍ତେ ଆଲେ ମିୟାଃ ମୋନ୍ ହୋବାକେତେ ଠିକ୍ ଆଟ୍‍କାର୍ କେଦାଲେ, ଚି ସାଲାକାନ୍ ବାର୍ହୋଡ଼୍ କିନ୍‍କେ ଆଲେୟାଃ ଦୁଲାଡ଼୍ ବାର୍ନାବାସ୍ ହାର୍ ପାଉଲୁସ୍ କିନ୍ ଲୋଃ ଆପେୟାଃ ନାଡ଼େଏ କୁଲ୍ କୋୱାଲେ। ନିକିନ୍ ନେକାନ୍ ହୋଡ଼ୋ ତାନ୍‍କିନ୍ ଅକନ୍‍କିନ୍ ୟୀଶୁ ମାସୀହ୍ ରାଃ ନୁତୁମ୍ ଲାଗିନ୍ ଆକିନାଃ ଜୀଉ ରେ ଦୁକୁ ସାହାତିଙ୍ଗ୍ କାଦାକିନ୍। ଏନାମେନ୍ତେ ଆଲେ ୟାହୁଦା ଆଡୋଃ ଶିଲାସ୍ କିନ୍‍କେ କୁଲ୍ କେଃକିନାଲେ, ଅକନ୍ କିନ୍ ଆକିନାଃ ମୋଚା ତେ ହଗି ନେ କାଜିକେ କାଜିୟାକିନ୍। ପାବିତାର୍ ଆତ୍ମା କେ ହାର୍ ଆଲେକେ ବେଶ୍ ଆଟ୍‍କାର୍ କେନା ଚି ନେ ଲାଗାତିଙ୍ଗ୍ କାଜି କୋକେ ବାଗି କେତେ ଆଡୋଃ ଜେତାନ୍ ହାମ୍ବାଲ୍ କାଜି ଆପେରେ କାଲେ ଲାଦିୟା; ଚି ଆପେ ମୂର୍ତି କୋକେ ରାକାବାକାନ୍ ଜିନିଷ୍ କୋଏତେ ଆଡୋଃ ମାୟୋମ୍ ତେ, ଆଡୋଃ ହୋଟୋଃ ଲିମ୍ବୁଦାକାନ୍ ମାସ୍ ତେ, ଆଡୋଃ ବ୍ୟାଭିଚାର୍ କାମି ତେ ସାଙ୍ଗିନ୍ ତାଇନ୍‍ପେ। ନେୟାତେ ସାଙ୍ଗିନ୍ ତାଇନୋଃ ରେପେ ଆପେୟାଃ ଠାଉକା ହୋବାୱା। ଆୟୁର୍ତେ ବୁଗିନ୍ ହୋବାଅଃକା।” ଏନ୍ତେ ଇନ୍‍କୁ ବିଦା ଜାନ୍ତେ ଆନ୍ତାକିୟା ସାହାର୍ ତେକୋ ଥେବାଃଜାନା, ଆଡୋଃ କାଲିସିୟା ସାଭାକେ ହୁଣ୍ତିକେତେ ଏନ୍ ଅନୋଲ୍-ସାକାମ୍ କେ ଇନ୍‍କୁକେ ଜିମା ଏମାଃକୋୱାକୋ। ଇନ୍‍କୁ ଅନୋଲ୍-ସାକାମ୍ କେ ପାଢ଼ାଅ କେତେ ଏନ୍ ଉପ୍‍ଦେଶ୍ ରାଃ କାଜିତେ ଥିମ୍ବାଗି ରାଶିକା ଜାନାକୋ। ୟାହୁଦା ଆଡୋଃ ଶିଲାସ୍ ଅକନ୍‍କିନ୍ ଚି ଆକିନ୍ ହଗି ନାବୀ କିନ୍ ତାଇକେନା, ଥିମ୍ବାଗି କାଜିକୋ ଏତେ ହାଗା କୋକେ ଉପ୍‍ଦେଶ୍ ଏମ୍ କେତେ କେଟେଃ କେଃକୋୱାକୋ। ଇନ୍‍କିନ୍ ହୁଡିଙ୍ଗ୍ ହୁଲାଙ୍ଗ୍ ତାଇନ୍ କେତେ, ହାଗା କୋଏତେ ମାଜା ଲୋକାତେ ବିଦା ଜାନାକିନ୍ ଚି ଆକିନାଃ କୁକୁଲ୍ କୋତାଃ ସେନ୍ ରୁଆଡ଼ାକିନ୍। (ମେନ୍ଦୋ ଶିଲାସ୍ କେ ଏନ୍ତାଃରେ ତାଇନୋଃ ବେଶ୍ ଆଦା କିଜା। ଏନାମେନ୍ତେ ୟାହୁଦା ଏସ୍କାର୍ ଗି ୟୀରୁଶାଲେମ୍ ସାହାର୍ ରୁଆଡ଼୍ ଜାନାଏ।) ହାର୍ତେ ପାଉଲୁସ୍ ଆଡୋଃ ବାର୍ନାବାସ୍ ଆନ୍ତାକିୟା ସାହାର୍ ରେ କିନ୍ ତାଇଜାନା: ହାର୍ ଆଡୋଃ ଥିମ୍ବାଗି ହୋଡ଼ୋକୋ ଲୋଃ ପ୍ରାଭୁ ଆଃ ବାଚାନ୍ ରାଃ ଉପ୍‍ଦେଶ୍ ତାଇ କେନାକିନ୍ ହାର୍ ସୁସାମାଚାର୍ ଉଦୁବ୍ ତାଇ କେନାକିନ୍। ହୁଡିଙ୍ଗ୍ ହୁଲାଙ୍ଗ୍ ରାଃ ତାୟୋମ୍ତେ ପାଉଲୁସ୍ ବାର୍ନାବାସ୍ କେ କାଜିକିଜାଏ, “ଅକନ୍-ଅକନ୍ ସାହାର୍ କୋରେ ଆବୁ ପ୍ରାଭୁ ଆଃ ବାଚାନ୍ ଉଦୁବ୍ ଲେଦାବୁ, ଦୋଲା ହାଡୋଃଗି ଏନ୍ତାଃ ସେନ୍‍କେତେ ଆବୁୱାଃ ହାଗାକୋକେ ବୁ ନେଲ୍ଆଉ ଲେକୋୱା ଚି ଇନ୍‍କୁ ଚିଲ୍‍କା ମେନାକୋୱା।” ଏନ୍ତେ ବାର୍ନାବାସ୍ ଯୋହାନ୍ କେ ଅକନିଃ ଚି ମାର୍କୁସ୍ କାଜିୟୋଗାଏ, ଇନିଃକେ ମିଶାତେ ଇଦି ନାଙ୍ଗ୍ ସାନାଙ୍ଗ୍ କେଦାଏ। ମେନ୍ଦୋ ପାଉଲୁସ୍ ଇନିଃକେ ମିଶାତେ ଇଦି ବେଶ୍ କାଏ ଆଦାକେଦା। ଚିୟାଃଚି ଇନିଃ ପାମ୍ଫୁଲିୟା ଜାଗା ରେ ଇନ୍‍କୁ ଏତେ ଆଲାଗ୍ ଲେନ୍ ତାଇକେନାଏ, ଆଡୋଃ କାମି ରେ ଇନ୍‍କୁ ଲୋଃ କାଏ ସେନ୍ ଜାନା। ଏନାମେନ୍ତେ ନେକା କାପାଜି ହୋବାଜାନା ଚି ପାଉଲୁସ୍ ହାର୍ ବାର୍ନାବାସ୍ ବାରାନ୍‍କିନ୍ ଆଲାଗ୍ ଜାନାକିନ୍: ହାର୍ ବାର୍ନାବାସ୍ ମାର୍କୁସ୍ କେ ଇଦିକେତେ ଜାହାଜ୍ ରେ ସାଇପ୍ରାସ୍ ଟାପୁ ତେ ସେନୋଃ ଜାନାଏ। ମେନ୍ଦୋ ପାଉଲୁସ୍ ଶିଲାସ୍ କେ ସାଲା କିଜାଏ, ହାର୍ ହାଗାକୋ ଏତେ ପାର୍ମେଶ୍ଵାର୍ ରାଃ ଆନୁଗ୍ରାହ୍ ରେ ଜିମାଜାନାକିନ୍ ଏନ୍ତେ ଏନ୍ତାଃ ଏତେ ସେନୋଃ ଜାନାକିନ୍। ଆଡୋଃ ଇନିଃ ଶିଲାସ୍ ଲୋଃ କାଲିସିୟା ରେନ୍ କୋକେ କେଟେଃ ତାନ୍ ଲୋଃ ସିରିୟା ହାର୍ କିଲିକିୟା ଜିଲ୍ଲା ତେ ହୋବାକେତେ ସେନ୍ ଜାନାଏ। ନାଆ ପାଉଲୁସ୍ ଶିଲାସ୍ ଲୋଃ ଦିର୍ବେ ହାତୁ ଆଡୋଃ ଲୁସ୍ତ୍ରା ସାହାର୍ ରେ ହଗି ସେନ୍ ଜାନାଏ। ଏନ୍ତାଃ ତିମୁଥିୟୁସ୍ ନୁତୁମ୍ ମିହୋଡ଼୍ ଚେଲା ତାଇକେନାଏ। ଇନିଜାଃ ଏଙ୍ଗାକିନ୍ ମିୟାଃ ୟାହୁଦୀ ବିଶ୍ଵାସୀ ତାଇକେନାକିନ୍, ମେନ୍ଦୋ ଆଜାଃ ଆପୁ ୟୁନାନୀ ହୋଡ଼ ତାଇକେନାଏ। ଇନିଃ ଲୁସ୍ତ୍ରା ଆଡୋଃ ଇକୁନିୟୁମ୍ ସାହାର୍ ରେନ୍ ହାଗା କୋରେ ନୁତୁମାନ୍ ହୋଡ଼ ତାଇକେନାଏ। ପାଉଲୁସ୍ ରାଃ ସାନାଙ୍ଗ୍ ତାଇକେନା ଚି ଇନିଃ ଆଜାଃ ଲୋଃ ସେନ୍‍ଚାଏ, ଆଡୋଃ ଅକନ୍ ୟାହୁଦୀ ହୋଡ଼ୋକୋ ଏନ୍ ଜାଗା ରେ ତାଇକେନାକୋ ଇନ୍‍କୁୱାଃ ଚାଲ୍ତେ ଇନିଃ ଆଏଃକେ ଖାତ୍ନା କେଦାଏ, ଚିୟାଃଚି ଇନ୍‍କୁ ସବେନ୍ ସାରି ତାଇକେନାକୋ ଚି ଇନିଜାଃ ଆପୁ ୟୁନାନୀ ହୋଡ଼ ତାଇକେନାଏ। ଆଡୋଃ ସାହାର୍-ସାହାର୍ ସେନ୍ କେତେ ପାଉଲୁସ୍ ହାର୍ ଶିଲାସ୍ ହାର୍ ତିମୁଥିୟୁସ୍ ଏନ୍ ବିଧି କୋକେ ଅକନାଃ ୟୀରୁଶାଲେମ୍ ରେନ୍ କୁଲାକାନ୍ ଚେଲାକୋ ଆଡୋଃ ମାରିହୋଡ଼ୋକୋ ବାଇ ଲେଦାକୋ, ଏନାକେ ମାନାତିଙ୍ଗ୍ ଲାଗିନ୍ ଇନ୍‍କୁକେ ସେଟେର୍ ଇଦି ତାଇନାକୋ। ନେଲେକାତେ କାଲିସିୟା ରେନ୍‍କୋ ବିଶ୍ଵାସ୍ ରେ କେଟେଃ ଇଦି ଜାନାକୋ ଆଡୋଃ ସାଂଖ୍ୟାରେ ସବେନ୍ ହୁଲାଙ୍ଗ୍ ବାଢ଼ାଅ ଇଦି ଜାନାକୋ। ପାଉଲୁସ୍ ହାର୍ ଆୟାଃ ଗାତିକିନ୍ ଫୃଗିୟା ଆଡୋଃ ଗାଲାତିୟା ଜିଲ୍ଲା ହୋବାକେତେ ସେନ୍ କେନାକୋ, ଚିୟାଃଚି ପାବିତାର୍ ଆତ୍ମା ଇନ୍‍କୁକେ ଆସିୟା ରାଇଜ୍ ଜାଗା କୋରେ ବାଚାନ୍ ଉଦୁବ୍ ଲାଗିନ୍ତେ ମାନା କେଃକୋୱାଏ। ଇନ୍‍କୁ ମୁସିୟା ରାଇଜ୍ ରାଃ ନାଡ଼େଏ ସେଟେର୍ କେତେ, ବିତୁନିୟା ଜାଗା ତେ ସେନ୍ ଲାଗିନ୍ ସାନାଙ୍ଗ୍ କେଦାକୋ, ମେନ୍ଦୋ ୟୀଶୁ ରାଃ ଆତ୍ମା ଇନ୍‍କୁକେ ସେନ୍ କାଏ ରିକାକେଃକୋୱାଏ। ଏନାମେନ୍ତେ ଇନ୍‍କୁ ମୁସିୟା ରାଇଜ୍ ହୋବା କେତେ ତ୍ରୋଆସ୍ ଦାଆ ଜାହାଜ୍ ତିଙ୍ଗୁ ଜାଗା ରେ ହିଜୁଃ ଜାନାକୋ। ଏନ୍ତାଃ ପାଉଲୁସ୍ ନିଦା ଇମ୍ତାଙ୍ଗ୍ ମିୟାଃ ଦାର୍ଶାନ୍ ନେଲ୍ କେଦାଏ ଚି ମିୟାଃ ମାକିଦୁନିୟା ଜାଗା ରେନ୍ ହୋଡ଼ ତିଙ୍ଗୁ କେତେ ଇନିଃକେ ଆର୍ଜି କେତେ କାଜି ତାଇନାଏ, “ଆୟୁର୍ ଫାରୋମ୍ ଆଡ଼୍‍ଗୁ କେତେ ମାକିଦୁନିୟା ଜାଗା ରେ ହିଜୁଃମେ ଆଡୋଃ ଆଲେକେ ଦେଙ୍ଗାଏମ୍।” ଇନିଜାଃ ନେ ଦାର୍ଶାନ୍ ନେଲ୍ ଲୋଃଗି ସେକାଡ଼୍ ଗି ଆଲେ ମାକିଦୁନିୟା ଜାଗା ସେନ୍ ସାନାଙ୍ଗ୍ କେଦାଲେ, ନେୟା ବୁଝାଅ କେତେ ଚି ପାର୍ମେଶ୍ଵାର୍ ଆଲେକେ ଇନ୍‍କୁକେ ସୁସାମାଚାର୍ ଉଦୁବ୍ ଲାଗିନ୍ତେ କେଡ଼ା କେଃଲେୟାଏ। ନେୟାଲାଗିନ୍ ତ୍ରୋଆସ୍ ଦାଆ ଜାହାଜ୍ ତିଙ୍ଗୁନ୍ ଘାଟ୍ ଏତେ ଜାହାଜ୍ ଖଲାଅ କେତେ ଆଲେ ସିଧା ସୁମାତ୍ରାକେ ଟାପୁ ଆଡୋଃ ଏଟାଃ ହୁଲାଙ୍ଗ୍ ନିୟାପୁଲିସ୍ ଜାହାଜ୍ ତିଙ୍ଗୁନ୍ ଜାଗା ରେ ହିଜୁଃ ଲେନାଲେ। ଏନ୍ତାଃଏତେ ଆଲେ ଫିଲିପ୍ପି ସାହାର୍ ସେଟେର୍ ଜାନାଲେ, ଅକନାଃ ମାକିଦୁନିୟା ଜିଲ୍ଲା ରାଃ ମିୟାଃ ମାରାଙ୍ଗ୍ ସାହାର୍ ରେ ରୋମ୍ ରେନ୍ ହୋଡ଼ୋକୋୱାଃ ବାସ୍ତି ତାଇକେନା; ଆଡୋଃ ଆଲେ ଏନ୍ ସାହାର୍ ରେ ହୁଡିଙ୍ଗ୍ ଦିନ୍ ସାନ୍ ତାଇ ଜାନାଲେ। ଆରାମେ ହୁଲାଙ୍ଗ୍ ରେ ଆଲେ ସାହାର୍ ରାଃ ସୀମାନ୍ ଦୁହାର୍ ରାଃ ବାହ୍‍ରେ ନାଈ ଗେନା ରେ ନେୟା ଆଟ୍‍କାର୍ କେତେ ସେନ୍ ଜାନାଲେ ଚି ଏନ୍ତାଃ ବିନ୍ତି ଲାଗିନ୍ ଜାଗା ତାଇନା, ଆଡୋଃ ଦୁବ୍ କେତେ ଏନ୍ କୁଡ଼ି କୋଲୋଃ ଅକନ୍‍କୋ ହୁଣ୍ଡି କାନ୍ ତାଇନାକୋ ବାକାଣ୍ ଏଟେଃ କେଦାଲେ। ଲୁଦିୟା ନୁତୁମ୍ ଥୁୱାଥିରା ସାହାର୍ ରେନ୍ ଟୋକୋରାଙ୍ଗ୍ ରାଃ ଲିଜାଃ ଆଖ୍ରିଙ୍ଗ୍ ତାନ୍ ମିହୋଡ଼୍ ପାର୍ମେଶ୍ଵାର୍ କେ ବୋରୋତାନ୍ କୁଡ଼ି ଆୟୁମ୍ ତାଇକେନାଏ। ପ୍ରାଭୁ ଇନିଜାଃ ମୋନ୍ କେ ଖଲାଅ କେଦାଏ ଚି ଇନିଃ ପାଉଲୁସ୍ ରାଃ ବାକାଣ୍ ରେ ମୋନ୍ ଲାଗାଅ କାଏ। ଚିମ୍ତାଙ୍ଗ୍ ଇନିଃ ଆଜାଃ ଅଡ଼୍ଆଃ ରେନ୍ କୋ ଲୋଃ ବାପ୍ତିସ୍ମା ଇଦିକେଦାଏ, ଦୋ ଇନିଃ ଆଲେକେ ଆର୍ଜି କେଦାଏ ଚି, “ଆଗାର୍ ଆପେ ଇଙ୍ଗ୍‍କେ ପ୍ରାଭୁ ଆଃ ବିଶ୍ଵାସୀନି ମେନ୍ତେ ଆଟ୍‍କାରିଙ୍ଗ୍ ତାନାପେ, ଏଣ୍ଡେ ଦୋଲା ଆଲେୟାଃ ଅଡ଼୍ଆଃ ରେ ତାଇନ୍‍ପେ,” ହାର୍ ଇନିଃ ଆଲେକେ ଜାବ୍ରାଇ ଇଦି କେଃଲେୟାଏ। ଚିମ୍ତାଙ୍ଗ୍ ଆଲେ ବିନ୍ତି ଜାଗା ତାଃ ସେନ୍ ତାଇ କେନାଲେ, ଦୋ ଆଲେକେ ମିୟାଃ କୁଡ଼ି ଦାସୀ ନାମ୍ ଜାନାଏ ଅକନିଜାଃ ରେ ଆୟାର୍‍କାଜି କେ କାଜି ତେୟାଃ ବୋଙ୍ଗାଆତ୍ମା ତାଇକେନାଏ; ହାର୍ ଆୟାର୍‍କାଜିକୋ କାଜିକେତେ ଆଜାଃ ଗୋମ୍‍କେ କୋ ଲାଗିନ୍ତେ ଥିମ୍ବାଗି ଟାକା କାମି ଆଉତାଇକେନାଏ। ଇନିଃ ପାଉଲୁସ୍ ରାଃ ହାର୍ ଆଲେୟାଃ ଦୋୟା ହିଜୁଃ କେତେ କାଉରି ଏଟେଃ କେଦାଏ, “ନେ ହୋଡ଼ୋକୋ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ଦାସୀକୋ ତାନ୍‍କୋ, ଅକନ୍‍କୋ ଆଲେକେ ବାଞ୍ଚାଅ ରାଃ ହୋରା ରାଃ ବାକାଣ୍ ଉଦୁବ୍ ତାନାକୋ।” ଇନିଃ ଥିମ୍ବାଗି ହୁଲାଙ୍ଗ୍ ସାନ୍ତେ ନେକା ଗି ରିକାତାଇକେନାଏ; ମେନ୍ଦୋ ପାଉଲୁସ୍ ଦୁକୁ ଜାନାଏ, ଆଡୋଃ ଦୋୟାପାଡ଼୍ ବିୟୁର୍ କେତେ ଏନ୍ ବୋଙ୍ଗାଆତ୍ମା କେ କାଜିକେଦାଏ, “ଇଙ୍ଗ୍ ଆମ୍‍କେ ୟୀଶୁ ମାସୀହ୍ ରାଃ ନୁତୁମ୍ ରେ ଆନାଚୁ ଏମାମେତାନିଙ୍ଗ୍ ଚି ଇନିଜାଃ ଏତେ ଅଡୋଙ୍ଗ୍ କୋଃମ୍।” ଆଡୋଃ ଇନିଃ ଇମ୍ତାଗି ଅଡୋଙ୍ଗ୍ ଜାନାଏ। ଚିମ୍ତାଙ୍ଗ୍ ଇନିଜାଃ ଗୋମ୍‍କେ କୋ ନେଲ୍ କେଦାକୋ ଚି ଆଲେୟାଃ ଟାକା କାମି ରାଃ ଆଶ୍ରା ଟୋଟାଗୋଃ ତାନା, ଦୋ ପାଉଲୁସ୍ ଆଡୋଃ ଶିଲାସ୍ କେ ସାବ୍ କେତେ ବିଚାର୍ ଜାଗା ରେ ମାରାଙ୍ଗ୍ ଆଧିକାରୀ କୋତାଃ ଥାଇଃ ଇଦି କେଃକୋୱାକୋ; ହାର୍ ଇନ୍‍କିନ୍ କେ ମାରାଙ୍ଗ୍ ହାକିମ୍ ତାଃ ଇଦି କେଃକୋୱାକୋ ହାର୍ କାଜିକେଦାକୋ, “ନେ ହୋଡ଼ୋକୋ ଅକନ୍‍କୋ ୟାହୁଦୀ ତାନ୍‍କୋ, ଆଲେୟାଃ ସାହାର୍ ରେ ମାରାଙ୍ଗ୍ ଗାଡ଼୍‍ବାଡ଼ି ରିକା ତାନାକୋ। ହାର୍ ନେଲେକା ନିୟାମ୍ କାଜିତାନାକୋ, ଅକନାଃକେ ଗ୍ରାହାନ୍ ହାର୍ ମାନାତିଙ୍ଗ୍ ଲାଗିନ୍ ଆବୁ ରୋମ୍ ରେନ୍‍କୋ ଲାଗିନ୍ ଠିକ୍ ନାହାଲା।” ଇମ୍ତାଙ୍ଗ୍ ହୋଡ଼ୋକୋ ପାଉଲୁସ୍ ହାର୍ ଶିଲାସ୍ କିନାଃ ବିରୋଧ୍ ରେ ହୁଣ୍ଡି କେତେ ବିରିଃ ଜାନାକୋ ଆଡୋଃ ରୋମ୍ ରେନ୍ ହାକିମ୍ କୋ ଇନ୍‍କୁୱାଃ ଲିଜାଃ ଚେଚାଃ ଆଡ଼୍‍ଗୁ କେତେ ଇନ୍‍କିନ୍ କେ ସୋଟା ତେ ବିଡ଼ା ରିକା ରାଃ ଆନାଚୁ ସିପାହୀ କୋକେ ଏମ୍ କେଦାକୋ। ଏନାମେନ୍ତେ ଇନ୍‍କୁ ବେଶେ ସୋଟା ତେ ବିଡ଼ା କେତେ ଇନ୍‍କିନ୍ କେ ବାନ୍ଦିଅଡ଼୍ଆଃ ରେ ଆଦେର୍ ତାଦାକୋ ଆଡୋଃ ବାନ୍ଦିଅଡ଼୍ଆଃ ରାଃ ହୋରୋନିଃ ଆନାଚୁ ନାମ୍ କେଦାଏ ଚି ଇନ୍‍କୁକେ ହୋରୋ କାଏ। ଇନିଃ ନେକା କେଟେଃ ଆନାଚୁ ନାମ୍ କେତେ ଇନ୍‍କୁକେ ଭିତାର୍ କୋଠୋରୀ ରେ ମାଣ୍ଡାଅ କେଃକୋୱାଏ ଆଡୋଃ ଇନ୍‍କୁୱାଃ କାଟା କେ ସାହାନ୍ ରେ ଠୋକାଅ ତାଦାଏ। ଥାଲା ନିଦା ଲାଗ୍‍ଭାଗ୍ ପାଉଲୁସ୍ ହାର୍ ଶିଲାସ୍ ବିନ୍ତି ହାର୍ ପାର୍ମେଶ୍ଵାର୍ ନାଙ୍ଗ୍ ଦୁରାଙ୍ଗ୍ ତାଇକେନାକିନ୍, ଆଡୋଃ କୈଦୀକୋ ଇନ୍‍କୁକେ ଆୟୁମ୍ ତାଇକେନାକୋ। ଇମ୍ତାଙ୍ଗ୍ ଇମ୍ତାଗି ମିୟାଃ ମାରାଙ୍ଗ୍ ଅତେହିଲାଅ ହୋବାଜାନା, ନେତାଃ ସାନ୍ ଚି ବାନ୍ଦିଅଡ଼୍ଆଃ ରାଃ ନେଓ ହିଲାଅ ଜାନା, ହାର୍ ଇମ୍ତାଗି ସବେନ୍ ଦୁହାର୍ ନିଃ ଜାନା; ଆଡୋଃ ସବେନ୍ କୋୱାଃ ବେଡ଼ୀ ରାଡ଼ା ଜାନା। ବାନ୍ଦିଅଡ଼୍ଆଃ ହୋରୋନିଃ ବିରିଃ ଜାନାଏ, ଆଡୋଃ ବାନ୍ଦିଅଡ଼୍ଆଃ ରାଃ ଦୁହାର୍ କୋ ନିଜାକାନ୍ ନେଲ୍‍କେତେ ପାହୋମ୍ କେଦାଏ ଚି କୈଦୀକୋ ନିର୍ ଜାନାକୋ, ଏନ୍ତେ ଇନିଃ ଆଜାଃ ତାଲ୍‍ୱାର୍ ଥାଇଃ କେତେ ଆଏଃ ଆପାନ୍ କେଗି ମାଆଗୋଏଃ ସାନାଙ୍ଗ୍ କେଦାଏ। ମେନ୍ଦୋ ପାଉଲୁସ୍ ଜୋର୍ତେ କାଉରି କେତେ କାଜିକେଦାଏ, “ଆମ୍ ଆପାନ୍ କେ ଆଲୋମ୍ ମାଆ ଏନା, ଚିୟାଃଚି ଆଲେ ସବେନ୍ ନେତାଃ ରେଗି ମେନାଲେୟା।” ଏନ୍ତେ ବାନ୍ଦିଅଡ଼୍ଆଃ କେ ହୋରୋନିଃ ବାତୀ ଆସି କେତେ ଭିତାର୍ ନିର୍ କେଦାଏ ଆଡୋଃ ଥାର୍ଥାରାଅ ତାନ୍ ଲୋଃ ପାଉଲୁସ୍ ହାର୍ ଶିଲାସ୍ କିନାଃ ଆୟୁର୍ ରେ ଉୟୁଃଜାନାଏ। ଏନ୍ତେ ଇନିଃ ଇନ୍‍କିନ୍ କେ ବାହ୍‍ରେ ଅଡୋଙ୍ଗ୍ କେତେ କାଜିକେଃକୋୱାଏ, “ହେ ଗୋମ୍‍କେ କିନ୍, ବାଞ୍ଚାଅ ନାମେ ଲାଗିନ୍ ଇଙ୍ଗ୍ ଚିନାଃ ରିକାୟାଇଙ୍ଗ୍?” ଇନ୍‍କିନ୍ କାଜିକେଦାକିନ୍, “ପ୍ରାଭୁ ୟୀଶୁ ମାସୀହ୍ ରେ ବିଶ୍ଵାସ୍ ଏପେ, ଏଣ୍ଡେ ଆମ୍ ହାର୍ ଆମାଃ ଅଡ଼୍ଆଃ ରେନ୍ କୋ ବାଞ୍ଚାଅ ନାମେୟାକୋ।” ଏନ୍ତେ ଇନ୍‍କିନ୍ ଇନିଃକେ ହାର୍ ଇନିଜାଃ ସବେନ୍ ଅଡ଼୍ଆଃ ରେନ୍ ହୋଡ଼ୋକୋକେ ପ୍ରାଭୁ ଆଃ ବାଚାନ୍ ଉଦୁବ୍ କେଦାକିନ୍। ନିଦା ଇମ୍ତା ଏନ୍ ସାମାୟ୍ ରେଗି ବାନ୍ଦିଅଡ଼୍ଆଃ କେ ହୋରୋନିଃ ଇନ୍‍କିନ୍ କେ ଇଦିକେତେ ଇନ୍‍କୁୱାଃ ଘାଅ ଆବୁଙ୍ଗ୍ କେଦାଏ, ଆଡୋଃ ଇନିଃ ଆଜାଃ ସବେନ୍ ହୋଡ଼ୋକୋ ଲୋଃ ଇମ୍ତାଗି ବାପ୍ତିସ୍ମା ଇଦିକେଦାଏ। ଏନ୍ତେ ଇନିଃ ଇନ୍‍କିନ୍ କେ ଆଜାଃ ଅଡ଼୍ଆଃ ଇଦିକେତେ ଜୋମେୟାଃ ଏମ୍ କେଦାଏ, ହାର୍ ସବେନ୍ ଅଡ଼୍ଆଃ ରେନ୍ କୋଲୋଃ ପାର୍ମେଶ୍ଵାର୍ ତାଃ ବିଶ୍ଵାସ୍ କେତେ ରାଶିକା ଜାନାଏ। ଏଟାଃ ହୁଲାଙ୍ଗ୍ ସେତାଃ ଚିମ୍ତାଙ୍ଗ୍ ରୋମ୍ ରେନ୍ ହାକିମ୍ କୋ ସିପାହୀ କୋୱାଃ ତିଈ ରେ ବାନ୍ଦିଅଡ଼୍ଆଃ ହୋରୋନିଃ ତାଃ କାଜିକୁଲ୍ କେଦାକୋ ଚି ଏନ୍ ହୋଡ଼ୋକିନ୍ କେ ବାଗେ ତାକୋମ୍। ବାନ୍ଦିଅଡ଼୍ଆଃ କେ ହୋରୋନିଃ ପାଉଲୁସ୍ କେ ନେ ବାକାଣ୍ କାଜିକେଦାଏ, “ରୋମ୍ ରେନ୍ ହାକିମ୍ କୋ ଆବେନ୍ କେ ବାଗେ ରାଃ ଆନାଚୁ କୁଲ୍ କେଦାକୋ। ଏନା ନାଙ୍ଗ୍ ଆବେନ୍ ଅଡୋଙ୍ଗ୍ କେତେ ମାଜା ତେ ସେନୋଃପେ।” ମେନ୍ଦୋ ପାଉଲୁସ୍ ଇନିଃକେ କାଜିକେଦାଏ, “ଇନ୍‍କୁ ଆଲେକେ ଯେ ରୋମ୍ ରେନ୍ ତାନ୍‍ଲେ, ବେଗାର୍ ବିଚାର୍ କେତେ ହୋଡ଼ୋ କୋୱାଃ ନାଡ଼େଏ ରେ ବିଡ଼ା କେଦାକୋ ହାର୍ ବାନ୍ଦିଅଡ଼୍ଆଃ ରେ ଆଦେର୍ ତାଦାକୋ। ନାଆ ଚିକାନ୍ ଲାଗିନ୍ ହାପା-ହାପା ଅଡୋଙ୍ଗ୍ ଲେ ତାନାକୋ? ନେକା କାହୋବାୱା, ମେନ୍ଦୋ ଆକୋଗି ହିଜୁଃ କେତେ ଆଲେକେ ଅଡୋଙ୍ଗ୍ ଲେଚାକୋ।” ସିପାହୀକୋ ନେ ବାକାଣ୍ ରୋମ୍ ରେନ୍ ହାକିମ୍ କୋକେ କାଜିକେଦାକୋ, ଆଡୋଃ ନେୟା ଆୟୁମ୍‍କେତେ ଚି ଇନ୍‍କୁ ରୋମ୍ ରେନ୍ ତାନ୍‍କୋ, ବୋରୋ ଜାନାକୋ। ଆଡୋଃ ହିଜୁଃକେତେ ଇନ୍‍କୁ ଏତେ ଛାମା ଆସି କେଦାକୋ, ହାର୍ ବାହ୍‍ରେ ଇଦିକେତେ ଆର୍ଜି କେଦାକୋ ଚି, ସାହାର୍ ଏତେ ସେନୋଃ କାକୋ। ଇନ୍‍କିନ୍ ବାନ୍ଦିଅଡ଼୍ଆଃ ଏତେ ଅଡୋଙ୍ଗ୍ କେତେ ଲୁଦିୟା ରାଃ ଅଡ଼୍ଆଃ ସେନ୍ ଜାନାକିନ୍, ହାର୍ ହାଗା କୋଲୋଃ ନାପାମ୍ କେତେ ଇନ୍‍କୁକେ ଇତୁ କେଟେଃ କେଃକୋୱାକୋ ଆଡୋଃ ସେନୋଃ ଜାନାକିନ୍। ନାଆ ପାଉଲୁସ୍ ହାର୍ ଶିଲାସ୍ ଆମ୍ଫିପୁଲିସ୍ ହାର୍ ଆପୁଲୋନିୟା ହାତୁ ହୋରା ତେ ସେନ୍‍କେତେ ଥିସ୍ସଲୁନିକେ ସାହାର୍ ହିଜୁଃ ଜାନାକିନ୍, ହେନ୍ତାଃ ରେ ୟାହୁଦୀ କୋୱାଃ ମିୟାଃ ବିନ୍ତିଅଡ଼୍ଆଃ ତାଇନ୍ ଲେନା। ପାଉଲୁସ୍ ଆୟାଃ ନିୟାମ୍ ଲେକାତେ ଇନ୍‍କୁତାଃ ସେନ୍ ଜାନାଏ, ହାର୍ ଆପିୟା ଆରାମେ ହୁଲାଙ୍ଗ୍ ପାବିତାର୍ ପୁଥି ରାଃ ବାଚାନ୍ ତେ ଇନ୍‍କୁ ଲୋଃ କାଜି-କୁପୁଲି ଜାନାଏ। ହାର୍ ଏନାକୋରାଃ ମାନେ ସାଫା-ସାଫା ବୁଝାଅକୋ ତାଇକେନାଏ ଚି ମାସୀହ୍ କେ ଦୁକୁ ସାହାତିଙ୍ଗ୍ ହାର୍ ଗୋଜାକାନ୍ କୋଏତେ ଜୀବିରିଃ ଲାଗାତିଙ୍ଗ୍ ତାଇକେନା, ହାର୍ “ନେ ୟୀଶୁ ଗି ଅକନିଜାଃ କାଜି ଆପେକେ ଉଦୁବାପେ ତାନିଙ୍ଗ୍, ଇନିଃ ମାସୀହ୍ ତାନିଃ।” ଇନ୍‍କୁ ଏତେ ଚିମିନାଙ୍ଗ୍ ୟାହୁଦୀକୋ, ହାର୍ ପାର୍ମେଶ୍ଵାର୍ କେ ବୋରୋତାନ୍ ୟୁନାନୀ ହୋଡ଼ୋକୋ ଏତେ ଚିମିନାଙ୍ଗ୍ କୋ ହାର୍ ଥିମ୍ବାଗି ନୁତୁମାନ୍ କୁଡ଼ିକୋ ବିଶ୍ଵାସ୍ କେଦାକୋ, ହାର୍ ପାଉଲୁସ୍ ହାର୍ ଶିଲାସ୍ ଲୋଃ ମେଶା ଜାନାକୋ। ମେନ୍ଦୋ ୟାହୁଦୀ ଗୁରୁକୋ ହିସିଙ୍ଗା ରେ ଫେରେଃ କେତେ ପିଟ୍ ପିଡ଼ି ଏତେ ଖାରାପ୍ ହୋଡ଼ୋକୋକେ ଆକୋ ଲୋଃ ଇଦିକେଦାକୋ, ହାର୍ ଥିମ୍ବାଗି ହୋଡ଼ୋକୋକେ ହୁଣ୍ଡି କେତେ ସାହାର୍ ରେ ହାଲାଗୁଲା ଏଟେଃ କେଦାକୋ, ହାର୍ ୟାସୋନ୍ ରାଃ ଅଡ଼୍ଆଃ ରେ ଧାମ୍‍କାଚାମ୍‍କା କେତେ ପାଉଲୁସ୍ ହାର୍ ଶିଲାସ୍ କିନ୍‍କେ ହୋଡ଼ୋକୋୱାଃ ଥାଲା ରେ ଆଉ ସାନାଙ୍ଗ୍ କେନାକୋ। ମେନ୍ଦୋ ଚିମ୍ତାଙ୍ଗ୍ ଇନ୍‍କୁକେ କାକୋ ନାମ୍ କେଦା ଇନ୍‍କୁ ୟାସୋନ୍ ହାର୍ ଚିମିନ୍ ବିଶ୍ଵାସୀ ହାଗାକୋକେ ସାହାର୍ ରେନ୍ ହାକିମ୍ କୋତାଃ ଥାଇଃ ଆଉକେଦାକୋ ହାର୍ ନେୟା କାଉରିତାନ୍ ଲୋଃ କାଜିକେଦାକୋ, “ନେ ହୋଡ଼ୋକୋ ଅକନ୍‍କୋ ଅତେଦିଶୁମ୍ କେ ଉଲ୍‍ଟା ପୁଲ୍‍ଟା ରିକା କେଦାକୋ, ନେତାଃ ରେହ ହିଜୁଃ କାନାକୋ। ହାର୍ ୟାସୋନ୍ ଇନ୍‍କୁକେ ଆଜାଃ ଅଡ଼୍ଆଃ ରେ ପେଡ଼ାକାଃ କୋୱାଏ। ନିକୁ ସବେନ୍ ରୋମ୍‍ରେନ୍ ରାଜା ରାଃ ଆନାଚୁ କେ ବିରୋଧ୍ ତାନାକୋ ହାର୍ କାଜିୟାକୋ, ଆଡୋଃ ମିହୋଡ଼୍ ରାଜା ମେନିଜା ଇନିଜାଃ ନୁତୁମ୍ ୟୀଶୁ ତାନାଃ।” ଚିମ୍ତାଙ୍ଗ୍ ହୋଡ଼ୋକୋକେ ହାର୍ ସାହାର୍ ରେନ୍ ହାକିମ୍ କୋ ନେ ବାକାଣ୍ ଆୟୁମ୍ କେଦାକୋ ଦୋ, ଇନ୍‍କୁ ଆକ୍‍ବାକାଅ ଜାନାକୋ। ଏନ୍ତେ ଇନ୍‍କୁ ୟାସୋନ୍ ହାର୍ ଏଟାଃ ହୋଡ଼ୋକୋ ତାଃଏତେ ଜାମିନ୍ ଇଦି କେତେ ଇନ୍‍କୁକେ ବାଗେ କେଃକୋୱାକୋ। ବିଶ୍ଵାସୀ ହାଗାକୋ ଇମ୍ତାଗି ପାଉଲୁସ୍ ହାର୍ ଶିଲାସ୍ କିନ୍‍କେ ବିରିୟା ହାତୁ କୁଲ୍ କେଃକୋୱାକୋ ହାର୍ ଇନ୍‍କିନ୍ ଏନ୍ତାଃରେ ସେଟେର୍ କେତେ ୟାହୁଦୀ କୋୱାଃ ବିନ୍ତିଅଡ଼୍ଆଃ ତେ ସେନ୍ ଜାନାକିନ୍। ନେ ହୋଡ଼ୋକୋ ଦୋ ଥିସ୍ସଲୁନିକେ ସାହାର୍ ରେନ୍ ୟାହୁଦୀ ହୋଡ଼ୋକୋୱାଃ ତେ ବୁଗିନ୍ ତାଇକେନାକୋ, ହାର୍ ଇନ୍‍କୁ ପୁରା ସାନାଙ୍ଗ୍ ତେ ବାଚାନ୍ ଆୟୁମ୍ କେଦାକୋ, ହାର୍ ସବେନ୍ ହୁଲାଙ୍ଗ୍ ପାବିତାର୍ ପୁଥି ରେ ଦାଣା ତାଇନାକୋ ଚି ନେ କାଜିକୋ ନେକାଗି ମେନାଃ ଚି କାହା। ଏନାମେନ୍ତେ ଇନ୍‍କୁ ଥାଲା ଏତେ ଥିମ୍ବାଗି ହୋଡ଼ୋକୋ, ହାର୍ ୟୁନାନୀ ହୋଡ଼ୋକୋୱାଃ ନୁତୁମାନ୍ କୁଡ଼ିକୋ ଥାଲା କୋଏତେ ହାର୍ କୋଡ଼ାକୋ ଥାଲା ଏତେ ହଗି ଥିମ୍ବାଗିକୋ ବିଶ୍ଵାସ୍ କେଦା। ମେନ୍ଦୋ ଚିମ୍ତାଙ୍ଗ୍ ଥିସ୍ସଲୁନିକେ ସାହାର୍ ରେନ୍ ୟାହୁଦୀ ହୋଡ଼ୋକୋ ସାରି ତାଦାକୋ ଚି ପାଉଲୁସ୍ ବିରିୟା ହାତୁ ରେ ହଗି ପାର୍ମେଶ୍ଵାର୍ ରାଃ ବାଚାନ୍ ଉଦୁବ୍ ତାନାଏ, ଏଣ୍ଡେ ହେନ୍ତାଃ ଏତେ ହିଜୁଃକେତେ ହୋଡ଼ୋକୋକେ ଉସ୍କୁର୍ ହାର୍ ଗୋଣ୍ଡୋଗୋଲ୍ ରିକା କେଦାକୋ। ଏନ୍ତେ ବିଶ୍ଵାସୀ ହାଗାକୋ ସେକାଡ଼୍ ଗି ପାଉଲୁସ୍ କେ କୁଲ୍ ତାଇଜାକୋ ଚି ସାମୁଦାର୍ ଗେନା ପାଡ଼୍ ସେନ୍ କାଏ; ମେନ୍ଦୋ ଶିଲାସ୍ ହାର୍ ତିମୁଥିୟୁସ୍ ହେନ୍ତାଃ ରେଗି ତାଇନ୍ ଜାନାକିନ୍। ପାଉଲୁସ୍ କେ ଥେବାଃ ତୁକାକୋ ଇନିଃକେ ଏଥେନ୍ସ୍ ସାହାର୍ ସାନ୍ତେ ଇଦିକିଜାକୋ, ହାର୍ ଶିଲାସ୍ ହାର୍ ତିମୁଥିୟୁସ୍ ଲାଗିନ୍ ନେୟା ଆନାଚୁ ଇଦିକେତେ ବିଦାଜାନାକୋ ଚି ଇନ୍‍କିନ୍ ଇନିଜାଃ ନାଡ଼େଏ ସେକାଡ଼୍ ଗି ହିଜୁଃ କାକିନ୍। ଚିମ୍ତାଙ୍ଗ୍ ପାଉଲୁସ୍ ଏଥେନ୍ସ୍ ସାହାର୍ ରେ ଇନ୍‍କିନ୍ କେ ତାଙ୍ଗିତାନ୍ ଇମ୍ତା ହେନ୍ ସାହାର୍ କେ ମୂର୍ତି ତେ ଫେରେଃ ନେଲ୍‍କେତେ ଆୟାଃ ଆତ୍ମା ରେ ଥିମ୍ବାଗି ଦୁକୁ ଜାନାଏ। ଏନାମେନ୍ତେ ଇନିଃ ବିନ୍ତିଅଡ଼୍ଆଃ ରେ ୟାହୁଦୀ କୋଲୋଃ ହାର୍ ପାର୍ମେଶ୍ଵାର୍ କେ ବୋରୋତାନ୍ ଏଟାଃଜାତି କୋଲୋଃ ହାର୍ ପିଟ୍ ଛକୋ ରେ ସବେନ୍ ହୁଲାଙ୍ଗ୍ ଅକନ୍ କୋ ଇନିଃ ଲୋଃ ନାପାମୋଃ ତାଇକେନାକୋ ଇନ୍‍କୁ ଲୋଃ କୁଲିକାପାଜି ରିକା ତାଇକେନାଏ। ଇମ୍ତା ଇପିକୁରି ହାର୍ ସ୍ତୋୟିକ୍ ସେଣାନ୍ କୋଏତେ ହ ଚିମିନାଙ୍ଗ୍ କୋ ଆୟାଃ ଲୋଃ ଏପେଗେର୍ ଜାନାକୋ ହାର୍ ଅକଏ-ଅକଏ କାଜିକେଦାକୋ, “ନିଈ ଥେଥାଡ଼୍ ହୋଡ଼ ଚିନାଃ କାଜି ସାନାଙ୍ଗ୍ ତାନାଏ?” ମେନ୍ଦୋ ଏଟାଃକୋ କାଜିକେଦାକୋ, ଇନିଃ ଏଟାଃ ଦେଓତା କୋୱାଃ ପାର୍ଚାରାକ୍ ଲେକା ଆଟ୍‍କାରୋଃ ତାନାଏ। ଚିୟାଃଚି ଇନିଃ ୟୀଶୁ ରାଃ ହାର୍ ଜୀବିନିରିଦ୍ ରାଃ ସୁସାମାଚାର୍ ଉଦୁବ୍ ତାଇକେନାଏ। ଏନ୍ତେ ଇନ୍‍କୁ ଇନିଃକେ ଆକୋଲୋଃ ଆରିୟୁପଗୁସ୍ ନୁତୁମ୍ ଦୁନୁବ୍-ସାଭା ତେ ଇଦିକିଜାକୋ ହାର୍ କୁଲିକିଜାକୋ, “ଚିନାଃ ଆଲେ ସାରିଧାଡ଼ିୟାଲେ ଚି ନେ ଯେ ନାୱା କାଜି ଆମ୍ ଶିଖାଅ ତାନାମ୍, ହେନା ଚିନାଃ ତାନାଃ? ଚିୟାଃଚି ଆମ୍ କାଆୟୁମ୍‍କାନ୍ କାଜିକୋ ଆଲେକେ ଉଦୁବାଲେତାନାମ୍, ଏନାମେନ୍ତେ ଆଲେ ସାରି ସାନାଙ୍ଗ୍ ତାନାଲେ ଚି ନେ କାଜି କୋରାଃ ମାନେ ଚିନାଃ ତାନାଃ।” (ଏନାମେନ୍ତେ ଚି ସବେନ୍ ଏଥେନ୍ସ୍ ସାହାର୍ ରେନ୍ ହୋଡ଼ୋକୋ ହାର୍ ହେନ୍ତାଃ ରେ ତାଇନ୍ ତାନ୍ ପାର୍ଦେଶୀକୋ, ନାୱା-ନାୱା ବାକାଣ୍ କାଜି ହାର୍ ଆୟୁମ୍ ବାଗିକେତେ ଆଡୋଃ ଜେତ୍ନାଃ କାମି ରେ ସାମାୟ୍ କାକୋ ବିତାଅ ତାଇନା।) ଏନ୍ତେ ପାଉଲୁସ୍ ଆରିୟୁପଗୁସ୍ ନୁତୁମ୍ ଦୁନୁବ୍-ସାଭା ଥାଲା ରେ ତିଙ୍ଗୁ କେତେ କାଜିକେଦାଏ, “ହେ ଏଥେନ୍ସ୍ ସାହାର୍ ରେନ୍ ହୋଡ଼ୋକୋ, ଇଙ୍ଗ୍ ନେଲ୍ ପେତାନିଙ୍ଗ୍ ଚି ଆପେ ସବେନ୍ କାଜି ରେ ଧାର୍ମୀକ୍ ହାର୍ ଦେଓତା କୋକେ ମାନାତିଙ୍ଗ୍ ତାନ୍‍କୋ ତାନ୍‍ପେ। ଚିୟାଃଚି ଇଙ୍ଗ୍ ହୋନୋର୍ ତାନ୍ ସାମାୟ୍ ରେ ଚିମ୍ତା ଆପେୟାଃ ପୂଜାଏ ତେୟାଃ ଜିନିଷ୍‍କୋକେ ନେଲ୍ କେଦାଇଙ୍ଗ୍, ଦୋ ମିୟାଃ ନେଲ୍‍କା ବେଦୀ ହ ନାମ୍ କେଦାଇଙ୍ଗ୍, ଅକନାଃ ରେ ଅଲାକାନ୍ ତାଇକେନା, ‘କାସାରି ଇଶ୍ୱାର୍ ଲାଗିନ୍ତେ।’ ଏନାମେନ୍ତେ ଅକନିଃକେ ଆପେ କାପେ ସାରିକେତେ ଆରାଧାନା ତାନାପେ, ଇଙ୍ଗ୍ ଆପେକେ ଇନିଜାଃ ସାମାଚାର୍ ଉଦୁବ୍ ତାନିଙ୍ଗ୍। ଅକନ୍ ପାର୍ମେଶ୍ଵାର୍ ଅତେଦିଶୁମ୍ ହାର୍ ଏନାରାଃ ସବେନ୍ ଜିନିଷ୍ କୋକେ ବାଇକାଦାଏ, ହିନିଃ ସିର୍ମାଦିଶୁମ୍ ହାର୍ ଅତେ ରେନ୍ ପ୍ରାଭୁ ହୋବାକେତେ, ତିଈ ତେ ବାଇୟାକାନ୍ ମାନ୍ଦିର୍ ରେ କାଏ ତାଇନାଏ। ନା ଜାହାନ୍ ଜିନିଷ୍ ରାଃ ଦାର୍‍କାର୍ ନାଙ୍ଗ୍ ହୋଡ଼ୋକୋୱାଃ ତିଈ ତେ ଆସୁଲୋଃ ତାନାଏ, ଚିୟାଃଚି ଇନିଃ ଆଏଃଗି ସବେନ୍ କୋକେ ଜୀଦାନ୍ ହାର୍ ସାହେଃ, ହାର୍ ସବେନାଃ ଏମ୍ ତାନାଏ। ଇନିଃ ମିୟାଃଗି ମାୟୋମ୍ ଏତେ ହୋଡ଼ୋକୋୱାଃ ସବେନ୍ ଜାତିକୋ ପୁରା ଅତେ ରେ ତାଇନ୍ ନାଙ୍ଗ୍ ବାଇକେଃକୋୱାଏ, ହାର୍ ଇନ୍‍କୁୱାଃ ଠାହ୍‍ରାଓ କାନ୍ ସାମାୟ୍ ହାର୍ ତାଇନ୍ ରାଃ ସୀମାନ୍ କୋକେ ନେୟାମେନ୍ତେ ଦୋହୋ କାଦାଏ, ଚି ଇନ୍‍କୁ ପାର୍ମେଶ୍ଵାର୍ କେ ଦାଣାୟାକୋ, ହୋଇ ଧାଡ଼ିୟୋଃୱା ଇନିଃକେ ଦାଣାବାଡ଼ା କେତେ ନାମ୍ ଧାଡ଼ିୟାକୋ, ଏଣ୍ଡେ ହ ହିନିଃ ଆବୁ କୋଏତେ ସାଙ୍ଗିନ୍ ରେ ବାଙ୍ଗୁଇଜା। ଚିୟାଃଚି ଆବୁ ଦୋ ଇନିଃ ରେଗି ଜୀହିଦୋଃ ତାନାବୁ ହାର୍ ହୋନୋର୍-ବାଡ଼ା ତାନାବୁ ହାର୍ ତାଇନ୍ ତାନାବୁ; ଜେଲେକା ଆପେୟାଃ ଚିମିନାଙ୍ଗ୍ ଦୁରାଙ୍ଗ୍ ଅହୋଲ୍‍କୋ ହଗି କାଜିକାଦାକୋ, ‘ଆବୁ ଦୋ ଇନିଜାଃ କିଲିରେନ୍ କୋଗି ତାନ୍‍ବୁ।’ ଏନାତେ ପାର୍ମେଶ୍ଵାର୍ ରାଃ କିଲିରେନ୍ ହୋବାକେତେ ଆବୁକେ ନେୟା ବୁଝାଅଃ ଠାଉକା ନାହାଲା ଚି ପାର୍ମେଶ୍ଵାର୍ ସୋନା ଚାହେ ରୂପା ଚାହେ ଦିରି ଲେକା ତାନିଃ, ଅକନାଃ ହୋଡ଼ ରାଃ ଖୋଦାକାନ୍ କାମି ହାର୍ ପାହୋମ୍ ତେ ବାଇକାନୋଗା। ଏନାମେନ୍ତେ ପାର୍ମେଶ୍ଵାର୍ ଏନ୍ କାସେଣାନ୍ ସାମାୟ୍ ଇମ୍ତା ଧ୍ୟାନ୍ କାଏ ଏମ୍‍କେଦାଏ, ମେନ୍ଦୋ ନାଆ ସବେନ୍ ଜାଗା ରେ ସବେନ୍ ହୋଡ଼ୋକୋକେ ପାପ୍ କାମି ବାଗେ ଲାଗିନ୍ତେ ଆନାଚୁ ଏମ୍‍ତାନାଏ। ଚିୟାଃଚି ଇନିଃ ମୁଶିଙ୍ଗ୍ ହୁଲାଙ୍ଗ୍ ମାଣ୍ଡାଅ କାଦାଏ, ଅକନାଃ ରେ ଇନିଃ ଏନ୍ ହୋଡ଼ ରାଃ ହୋରାତେ ଧାରାମ୍ ଲୋଃ ଅତେଦିଶୁମ୍ ରାଃ ବିଚାର୍ ୟାଏ, ଅକନିଃକେ ଇନିଃ ମାଣ୍ଡାଅ କାଇଜାଏ, ହାର୍ ଇନିଃକେ ଗୋଜାକାନ୍ କୋଏତେ ଜୀହିଃ ବିରିଃ କେତେ ନେ କାଜି ସବେନ୍ କୋୱାଃ ରେ ଉଦୁବ୍ ଛାବା କାଦାଏ।” ଗୋଏଃକାନ୍ ହୋଡ଼ୋ କୋୱାଃ ଜୀବିନିରିଦ୍ ରାଃ କାଜି ଆୟୁମ୍‍କେତେ ଚିମିନାଙ୍ଗ୍ କୋ ଲାନ୍ଦା ଏଟେଃ କେଦାକୋ, ଆଡୋଃ ଚିମିନାଙ୍ଗ୍ କୋ କାଜିକେଦାକୋ, “ନେ କାଜି କେ ଆଲେ ଆଡୋଃ ଜାହୁଲାଙ୍ଗ୍ ଆମ୍ ଏତେ ଆୟୁମ୍‍ୟାଲେ।” ନେୟା ଇନ୍‍କୁ କାଜିକେଦାକୋ ଏନ୍ତେ ପାଉଲୁସ୍ ଇନ୍‍କୁୱାଃ ଥାଲା ଏତେ ଅଡୋଙ୍ଗ୍ ଜାନାଏ। ମେନ୍ଦୋ ଚିମିନ୍ ହୋଡ଼ୋକୋ ଆଜାଃ ଲୋଃ ମେଶା ଜାନାକୋ, ହାର୍ ପ୍ରାଭୁ କେ ବିଶ୍ଵାସ୍ କେଦାକୋ, ହିନ୍‍‍କୁୱାଃ ଥାଲାଏତେ ଦିୟୁନୁସିୟୁଷ୍ ଅକନିଃ ଆରିୟୁପଗୁସ୍ ଦୁନୁବ୍-ସାଭା ରେନ୍ ହୋଡ଼ ତାଇନ୍ କେନାଏ, ଆଡୋଃ ଦାମାରୀସ୍ ନୁତୁମ୍ ମିହୋଡ଼୍ କୁଡ଼ି, ହାର୍ ହିନ୍‍‍କୁ ଲୋଃ ଆଡୋଃଗି ଚିମିନ୍ ହୋଡ଼ୋକୋ ତାଇନ୍ କେନାକୋ। ଏନାରାଃ ତାୟୋମ୍ତେ ପାଉଲୁସ୍ ଏଥେନ୍ସ୍ ସାହାର୍ କେ ବାଗେ କେତେ କୁରିନ୍ଥିଉସ୍ ସାହାର୍ ରେ ହିଜୁଃଲେନାଏ। ଏନ୍ତାଃରେ ଇନିଃକେ ଆକ୍ୱିଲା ନୁତୁମ୍ ମିହୋଡ଼୍ ୟାହୁଦୀ ହୋଡ଼ ନାମ୍‍ଜାନାଏ, ଇନିଜାଃ ଜାନାମ୍ ପୁନ୍ତୁସ୍ ରାଇଜ୍ ରେ ହୋବାଲେନା। ଇନିଃ ଆଜାଃ କୁଡ଼ି ପ୍ରିସ୍କିଲ୍ଲା ଲୋଃ ଇଟାଲୀ ଦିଶୁମ୍ ଏତେ ହୁଡିଙ୍ଗ୍ ସାମାୟ୍ ଗି ହୋବାଲେନା ହିଜୁଃ ଲେନ୍ ତାଇକେନାଏ, ଚିୟାଃଚି କ୍ଲୌଦିୟୁସ୍ ରୋମ୍‍ରେନ୍ ରାଜା ସବେନ୍ ୟାହୁଦୀକୋକେ ରୋମ୍ ଏତେ ଅଡୋଙ୍ଗ୍ ପେ ମେନ୍ତେ ଆନାଚୁ ଏମ୍ ଲେଦାଏ। ପାଉଲୁସ୍ ଇନ୍‍କିନ୍ କେ ନେନେଲ୍ ସେନ୍ ଜାନାଏ। ପାଉଲୁସ୍ ହାର୍ ଆକ୍ୱିଲା ରାଃ ମିଃ ଲେକା ବେପାର୍ ତାଇକେନା, ଏନାମେନ୍ତେ ଇନିଃ ଇନ୍‍କିନ୍ ତାଃ ତାଇଜାନାଏ ଆଡୋଃ ଇନ୍‍କୁ ମିଃତେ କାମି କେଦାକୋ, ଚିୟାଃଚି ଇନ୍‍କୁୱାଃ କାମି ତାମ୍‍ବୁ ବାବାଇ କାମି ତାଇକେନା। ପାଉଲୁସ୍ ସବେନ୍ ଆରାମେ ହୁଲାଙ୍ଗ୍ ବିନ୍ତିଅଡ଼୍ଆଃ ରେ ୟାହୁଦୀ କୋକେ ଆଡୋଃ ୟୁନାନୀ ହୋଡ଼ୋକୋକେ ବୁଝାଅ କୋତାଇନାଏ। ଚିମ୍ତାଙ୍ଗ୍ ଶିଲାସ୍ ଆଡୋଃ ତିମୁଥିୟୁସ୍ ମାକିଦୁନିୟା ରାଇଜ୍ ଏତେ ହିଜୁଃ ଲେନାକିନ୍, ଦୋ ପାଉଲୁସ୍ ବାଚାନ୍ ଉଦୁବ୍ ରାଃ ମୋନ୍ ରେ ତାଇକେତେ ୟାହୁଦୀ କୋକେ ଗୋୱା ଏମ୍ ଏଟେଃ କେଦାଏ ଚି ୟୀଶୁ ଗି ମାସୀହ୍ ତାନିଃ। ମେନ୍ଦୋ ଚିମ୍ତାଙ୍ଗ୍ ଇନ୍‍କୁ ବିରୋଧ୍ ଆଡୋଃ ନିନ୍ଦା କେଦାକୋ, ଏଣ୍ଡେ ଇନିଃ ଆଜାଃ ଲିଜାଃ କଟା କେତେ ଇନ୍‍କୁକେ କାଜିକେଦାଏ, “ଆପେୟାଃ ମାୟୋମ୍ ରାଃ ଦୋଷ୍ ଆପେୟାଃ ବୋଅ ରେ ଗି ଠୋଗୋଃକା! ଇଙ୍ଗ୍ଆଃ ଦୋଷ୍ ବାନୋଃୱା। ନାଆ ତାଃଏତେ ଇଙ୍ଗ୍ ଏଟାଃଜାତି କୋୱାଃ ନାଡ଼େଏ ସେନୋଃୱାଇଙ୍ଗ୍।” ଏନ୍ତାଃଏତେ ଅଡୋଙ୍ଗ୍ କେତେ ଇନିଃ ତିତୁସ୍ ୟୁସ୍ତୁସ୍ ନୁତୁମ୍ ପାର୍ମେଶ୍ଵାର୍ କେ ବୋରୋତାନ୍ ହୋଡ଼ ନିଜାଃ ଅଡ଼୍ଆଃ ରେ ହିଜୁଃଲେନାଏ, ଅକନିଜାଃ ଅଡ଼୍ଆଃ ବିନ୍ତିଅଡ଼୍ଆଃ ତେ ସାଟାଅ କେତେ ତାଇକେନା। ଇମ୍ତାଙ୍ଗ୍ ବିନ୍ତିଅଡ଼୍ଆଃ ରେନ୍ ମୁଖିୟା କ୍ରିସ୍‍ପୁସ୍ ଆଜାଃ ସବେନ୍ ଅଡ଼୍ଆଃ ରେନ୍ କୋଲୋଃ ପ୍ରାଭୁ ଚେତାନ୍ ରେ ବିଶ୍ୱାସ୍ କେଦାଏ; ହାର୍ ଥିମ୍ବାଗି କୁରିନ୍ଥିୟୋରେନ୍ ତାଇନ୍ ତାନ୍‍କୋ ହଗି ପାଉଲୁସ୍ କେ ଆୟୁମ୍‍କେତେ ବିଶ୍ଵାସ୍ କେଦାକୋ ଆଡୋଃ ବାପ୍ତିସ୍ମା ଇଦିକେଦାକୋ। ପ୍ରାଭୁ ମୁଶିଙ୍ଗ୍ ନିଦା କୁମୁ ରେ ପାଉଲୁସ୍ କେ କାଜିକିଜାଏ, “ଆଲୋମ୍ ବୋରୋଏ, କାଜି ଇଦିମ୍ ଆଡୋଃ ଆଲୋମ୍ ହାପାନା। ଚିୟାଃଚି ଇଙ୍ଗ୍ ଆମାଃ ଲୋଃ ମେନାଇଙ୍ଗ୍‍ୟା, ଆଡୋଃ ଜେତାଏ ଆମ୍‍କେ ବିଡ଼ା ନାଙ୍ଗ୍ କାକୋ ଜୁଟିଃ ଧାଡ଼ିୟା; ଚିୟାଃଚି ନେ ସାହାର୍ ରେ ଇଙ୍ଗ୍ଆଃ ମିଃଥିମ୍ବା ହୋଡ଼ୋକୋ ମେନାକୋୱା।” ଏନାମେନ୍ତେ ପାଉଲୁସ୍ ଇନ୍‍କୁତାଃ ମିଃ ଶିର୍ମା ଆଧା ପାର୍ମେଶ୍ଵାର୍ ରାଃ ବାଚାନ୍ ଶିଖାଅତାନ୍ ଲୋଃ ତାଇଜାନାଏ। ଚିମ୍ତାଙ୍ଗ୍ ଗାଲ୍ଲିୟୋ ଆଖାୟା ରାଇଜ୍ ରେନ୍ ହାକିମ୍ ତାଇକେନାଏ, ଇମ୍ତାଙ୍ଗ୍ ୟାହୁଦୀ ଗୁରୁ କୋ ମିଃ ମୋନ୍ ହୋବାକେତେ ପାଉଲୁସ୍ କେ ବିଚାର୍ ଜାଗା ତାଃ ଆଉକେତେ କାଜି ଏଟେଃ କେଦାକୋ, “ନିଈ ହୋଡ଼ୋକୋକେ ନେଲେକା ଭୁରିୟାଅ କୋତାନାଏ ଚି ପାର୍ମେଶ୍ଵାର୍ ରାଃ ଆରାଧାନା ନେଲେକା ରିକାଏପେ; ଅକନାଃ ମୁଶା ନାବୀ ରାଃ ଆଇନ୍ ରାଃ ଉଲ୍‍ଟା ତାନାଃ।” ଚିମ୍ତାଙ୍ଗ୍ ପାଉଲୁସ୍ କାଜି ଚେତାନ୍ ରେ ତାଇକେନାଏ, ଇମ୍ତା ଗାଲ୍ଲିୟୋ ୟାହୁଦୀ ଗୁରୁକୋକେ କାଜିକେଃକୋୱାଏ, “ହେ ୟାହୁଦୀ କୋ, ଆଗାର୍ ନେୟା ଜାହାନ୍ ଆନ୍ୟାୟ ଚାହେ ଏତ୍କାନ୍ କାମି ରାଃ କାଜି ତାଇନ୍‍ତେ, ଏଣ୍ଡେ ଠାଉକା ତାଇକେନା ଚି ଇଙ୍ଗ୍ ଆପେକେ ଆୟୁମ୍‍ପେ ତେୟାଇଙ୍ଗ୍। ମେନ୍ଦୋ ଆଗାର୍ ନେ କୁଲି-କାପାଜି କାଜିକୋରାଃ, ହାର୍ ନୁତୁମ୍ କୋରାଃ, ହାର୍ ଆପେୟାଃ ନେତାଃ ମୁଶା ନାବୀ ରାଃ ଆଇନ୍ ରାଃ ବିଷାୟ୍ ରେ ତାନାଃ, ଏଣ୍ଡେ ଏନା ଆପେ ଗି ସାରିପେ; ଚିୟାଃଚି ଇଙ୍ଗ୍ ନେ କାଜି କୋରାଃ ବିଚାର୍‍ନିଃ କାଇଙ୍ଗ୍ ବୋଇୟୋଃ ସାନାଙ୍ଗ୍ ତାନା।” ଆଡୋଃ ଗାଲ୍ଲିୟୋ ଇନ୍‍କୁକେ ବିଚାର୍ ଜାଗା ନାଡ଼େଏ ତେ ଅଡୋଙ୍ଗ୍ ତାଃକୋୱାଏ। ଇମ୍ତାଙ୍ଗ୍ ସବେନ୍ ହୋଡ଼ୋକୋ ବିନ୍ତିଅଡ଼୍ଆଃ ରେନ୍ ମୁଖିୟା ସୋସ୍ଥିନେସ୍ କେ ସାବ୍ କେତେ ବିଚାର୍ ଜାଗା ରେ ବିଡ଼ା କିଜାକୋ। ମେନ୍ଦୋ ଗାଲ୍ଲିୟୋ ନେ ବାକାଣ୍ କୋକେ କାଟିଜୋ କାଏ ଧ୍ୟାନ୍ କେଦାଏ। ପାଉଲୁସ୍ ଥିମ୍ବାଗି ହୁଲାଙ୍ଗ୍ ସାନ୍ତେ ହେନ୍ତାଃ ତାଇକେନାଏ, ଏନ୍ତେ ହାଗାକୋ ଏତେ ବିଦା ଇଦିକେତେ କିନ୍‍ଖ୍ରୀୟା ଡୋଙ୍ଗା ତିଙ୍ଗୁନ୍ ସାହାର୍ ରେ ବୋଅ ରାଃ ଉବ୍ ହୋୟୋ କେଦାଏ, ଚିୟାଃଚି ଇନିଃ ମାନ୍ନାତ୍ ମାଣ୍ଡାଅ ଲେଦାଏ; ଏନ୍ତେ ଜାହାଜ୍ ରେ ସିରିୟା ରାଇଜ୍ ତେ ସେନୋଃ ଜାନାଏ ହାର୍ ଇନିଃ ଲୋଃ ପ୍ରିସ୍କିଲ୍ଲା ହାର୍ ଆକ୍ୱିଲା ତାଇକେନାକିନ୍। ଇନ୍‍କୁ ଇଫିସୁସ୍ ସାହାର୍ ସେଟେର୍ ଜାନାକୋ, ଏନ୍ତାଃ ପାଉଲୁସ୍ ଇନ୍‍କିନ୍ କେ ବାଗେ ତାଃକିନାଏ, ହାର୍ ଆଏଃ ଏସ୍କାର୍ ବିନ୍ତିଅଡ଼୍ଆଃ ରେ ସେନ୍‍କେତେ ୟାହୁଦୀ ଗୁରୁକୋ ଲୋଃ କୁଲି-କାପାଜି କେଦାଏ। ଚିମ୍ତାଙ୍ଗ୍ ଇନ୍‍କୁ ଇନିଃକେ ଆର୍ଜି କିଜାକୋ, “ଆଲେ ଲୋଃ ଆଡୋଃ ହୁଡିଙ୍ଗ୍ ହୁଲାଙ୍ଗ୍ ତାଇନ୍‍ମେ।” ଏଣ୍ଡେ ଇନିଃ କାଏ ମାନାତିଙ୍ଗ୍ ଜାନାଏ। ମେନ୍ଦୋ ନେୟା କାଜିକେତେ ଇନ୍‍କୁଏତେ ବିଦା ଜାନାଏ, “ଆଗାର୍ ପାର୍ମେଶ୍ଵାର୍ ସାନାଙ୍ଗ୍ ରେଦୋ ଇଙ୍ଗ୍ ଆପେୟାଃ ନାଡ଼େଏ ଆଡୋଃ ମିଶା ହିଜୁଃୱାଇଙ୍ଗ୍।” ଏନ୍ତେ ଇନିଃ ଇଫିସୁସ୍ ସାହାର୍ ଏତେ ଜାହାଜ୍ ରେ ରାକାବ୍ କେତେ ସେନୋଃ ଜାନାଏ। ହାର୍ କୈସାରିୟା ଡୋଙ୍ଗା ତିଙ୍ଗୁନ୍ ସାହାର୍ ରେ ଆଡ଼୍‍ଗୁ କେତେ ୟୀରୁଶାଲେମ୍ ସେନ୍ ଜାନାଏ ହାର୍ କାଲିସିୟା ରେନ୍ ବିଶ୍ଵାସୀ କୋଲୋଃ ନାପାମ୍ ଜାନାଏ। ଏନ୍ତେ ଏନ୍ତାଃ ଏତେ ଆନ୍ତାକିୟା ସାହାର୍ ତେ ରୁଆଡ଼୍ ଜାନାଏ। ଏନ୍ତେ ହୁଡିଙ୍ଗ୍ ହୁଲାଙ୍ଗ୍ ତାଇନ୍ କେତେ ଇନିଃ ଏନ୍ତାଃ ଏତେ ଅଡୋଙ୍ଗ୍ ଜାନାଏ, ହାର୍ ତାରା ଗେନା ଏତେ ଗାଲାତିୟା ରାଇଜ୍ ହାର୍ ଫୃଗିୟା ରାଇଜ୍ ରେ ସବେନ୍ ଚେଲାକୋକେ କେଟେଃ ତାନ୍ ଲୋଃ ହୋନୋର୍ ବାଡ଼ାକେଦାଏ। ଆପୁଲୋସ୍ ନୁତୁମ୍ ମିହୋଡ଼୍ ୟାହୁଦୀ, ଅକନିଜାଃ ଜାନାମ୍ ଆଲେକ୍‍ଜାଣ୍ଡାରିୟା ସାହାର୍ ରେ ହୋବାଲେନା, ଅକନିଃ ସେଣାନ୍ ହୋଡ଼ ତାଇକେନାଏ ହାର୍ ପାବିତାର୍ ପୁଥି କେ ବେଶ୍ ଲେକାତେ ସାରିତାଇକେନାଏ, ଇନିଃ ଇଫିସୁସ୍ ସାହାର୍ ରେ ହିଜୁଃନାଏ। ଇନିଃ ପ୍ରାଭୁ ଆଃ ହୋରା ରାଃ ସେଣା ନାମ୍ ଲେଦାଏ, ହାର୍ ଆଜାଃ ଥିମ୍ବାଗି ସାନାଙ୍ଗ୍ ତେ ୟୀଶୁ ଆଃ ବିଷାୟ୍ ରେ ଠିକ୍-ଠିକ୍ ଉଦୁବ୍ ତାଇକେନାଏ ହାର୍ ଶିଖାଅ ତାଇକେନାଏ। ମେନ୍ଦୋ ଇନିଃ ଯୋହାନ୍ ରାଃ ବାପ୍ତିସ୍ମା ବିଷାୟ୍ ରେ ଭାଇର୍ ସାରିତାଇନାଏ। ଇନିଃ ବିନ୍ତିଅଡ଼୍ଆଃ ରେ ସାହାସ୍ ଲୋଃ କାଜି ଏଟେଃ କେଦାଏ, ମେନ୍ଦୋ ପ୍ରିସ୍କିଲ୍ଲା ହାର୍ ଆକ୍ୱିଲା ଇନିଜାଃ କାଜି ଆୟୁମ୍‍କେତେ ଇନିଃକେ ଆକିନାଃ ଅଡ଼୍ଆଃ ତେ ଆଉ କିଜାକିନ୍ ହାର୍ ପାର୍ମେଶ୍ଵାର୍ ରାଃ ହୋରା ଅକନାଃ କାଟୁଣ୍ଡୁ ଜୀଦାନ୍ ତାନାଃ ଇନିଃକେ ଆଡୋଃଗି ବୁଗିନ୍ ଲେକାତେ ଉଦୁବ୍ କିଜାକିନ୍। ଇମ୍ତାଙ୍ଗ୍ ଆପୁଲୋସ୍ ଆଖାୟା ରାଇଜ୍ ତେ ସେନ୍ ଲାଗିନ୍ ସାନାଙ୍ଗ୍ କେଦାଏ ଦୋ ବିଶ୍ଵାସୀ ହାଗାକୋ ଇନିଃକେ ସାହାସ୍ ଏମ୍ କିଜାକୋ ହାର୍ ଚେଲାକୋକେ ଚିଠି ଅଲ୍ କେଦାକୋ ଚି ଇନ୍‍କୁ ଇନିଃକେ ବେଶ୍ ଲେକା ସ୍ଵାଗାତି କାକୋ। ଏନ୍ତାଃ ସେଟେର୍ ତାୟୋମ୍ତେ ଇନିଃ ଏନ୍ ହୋଡ଼ୋକୋକେ ଥିମ୍ବାଗି ଦେଙ୍ଗା କେଃକୋୱାଏ ଅକନ୍ କୋ ଆନୁଗ୍ରାହ୍ ରାଃ ଚାଲ୍ତେ ୟୀଶୁ କେ ବିଶ୍ଵାସ୍ ଲେଦାକୋ। ଚିୟାଃଚି ଇନିଃ ପାବିତାର୍ ପୁଥି ତେ ୟୀଶୁ ଗି ମାସୀହ୍ ତାନିଃ ମେନ୍ତେ ଉଦୁବ୍ ପୋକ୍ତା କେତେ, ଆଜାଃ ପେଡ଼େଏ ହାର୍ ସେଣା ତେ ୟାହୁଦୀ ଗୁରୁକୋକେ ସବେନ୍ କୋୱାଃ ନାଡ଼େଏ କାଜିହାପା କେଃକୋୱାଏ। ଚିମ୍ତାଙ୍ଗ୍ ଆପୁଲୋସ୍ କୁରିନ୍ଥିଉସ୍ ସାହାର୍ ରେ ତାଇକେନାଏ, ଇମ୍ତା ପାଉଲୁସ୍ ଚେତାନ୍ ରେୟା ସବେନ୍ ରାଇଜ୍ ହୋବାକେତେ ଇଫିସୁସ୍ ସାହାର୍ ହିଜୁଃ ଜାନାଏ। ଏନ୍ତାଃ ଚିମିନ୍ ଚେଲାକୋକେ ନେଲ୍ କେତେ ଇନ୍‍କୁକେ କାଜିକେଦାଏ, “ଚିନାଃ ଆପେ ବିଶ୍ୱାସ୍ ତାନ୍ ଇମ୍ତା ପାବିତାର୍ ଆତ୍ମା କେ ନାମ୍ ଲିଜାପେ?” ଇନ୍‍କୁ ଇନିଃକେ କାଜିକେଦାକୋ, “ଆଲେ ଦୋ ପାବିତାର୍ ଆତ୍ମା ଏମାକାନା ମେନ୍ତେ ଆୟୁମୋ କାଲେ ଆୟୁମ୍ କାଦା।” ପାଉଲୁସ୍ ଇନ୍‍କୁକେ କାଜିକେଃକୋୱାଏ, “ଏଣ୍ଡେ ଆପେ ଅକେୟାଃ ବାପ୍ତିସ୍ମା ଇଦିଲାଃପେ?” ଇନ୍‍କୁ କାଜିକେଦାକୋ, “ଯୋହାନ୍ ରାଃ ବାପ୍ତିସ୍ମା।” ପାଉଲୁସ୍ କାଜିକେଦାଏ, “ଯୋହାନ୍ ଦୋ ନେୟା କାଜିକେତେ ପାପ୍ ବାଗେ ରାଃ ବାପ୍ତିସ୍ମା ଏମ୍‍କେଦାଏ ଚି ଅକଏ ଇଙ୍ଗ୍ଆଃ ତାୟୋମ୍ତେ ହିଜୁଃ ରାଃ ମେନାଇଜା, ଇନିଜାଃ ରେ ମାନେ ୟୀଶୁ ଚେତାନ୍ ରେ ବିଶ୍ୱାସ୍ ଏପେ।” ନେୟା ଆୟୁମ୍ କେତେ ଇନ୍‍କୁ ପ୍ରାଭୁ ୟୀଶୁ ନୁତୁମ୍ ତେ ବାପ୍ତିସ୍ମା ଇଦିକେଦାକୋ। ଚିମ୍ତାଙ୍ଗ୍ ପାଉଲୁସ୍ ଇନ୍‍କୁୱାଃ ଚେତାନ୍ ରେ ତିଈ ମାଣ୍ତାଅ କେଦାଏ, ପାବିତାର୍ ଆତ୍ମା ଇନ୍‍କୁୱାଃ ଚେତାନ୍ ରେ ଆଡ଼୍‍ଗୁଜାନାଏ, ହାର୍ ଇନ୍‍କୁ ଏଟାଃ-ଏଟାଃ ଭାଷା କାଜିକେଦାକୋ ଆଡୋଃ ଆୟାର୍କାଜି କାଜି ଏଟେଃ କେଦାକୋ। ନିକୁ ସବେନ୍ ବାରାଝାନ୍ ଲେକା କୋଡ଼ାକୋ ତାଇନ୍ କେନାକୋ। ଏନ୍ତେ ପାଉଲୁସ୍ ବିନ୍ତିଅଡ଼୍ଆଃ ରେ ସେନ୍‍କେତେ ବେଗାର୍ ବୋରୋତେ ତିନ୍ ମାହିନା ସାନ୍ତେ କାଜି କେଦାଏ ହାର୍ ପାର୍ମେଶ୍ଵାର୍ ରାଃ ବିଷାୟ୍ ରେ କୁଲି-କାପାଜି କେଦାଏ ହାର୍ ବୁଝାଅ କେଃକୋୱାଏ। ମେନ୍ଦୋ ଚିମ୍ତାଙ୍ଗ୍ ଚିମିନ୍ ହୋଡ଼ୋକୋ କେଟେଃ ହୋବାକେତେ କାକୋ ମାନାତିଙ୍ଗ୍ ଜାନା ମେନ୍ଦୋ ହୋଡ଼ୋକୋୱାଃ ନାଡ଼େଏ ରେ ନେ ପ୍ରାଭୁ ରାଃ ହୋରା କେ ନିନ୍ଦା କେଦାକୋ, ଏଣ୍ଡେ ଇନିଃ ଇନ୍‍କୁକେ ବାଗେ ତାଃକୋୱାଏ ହାର୍ ଚେଲାକୋକେ ଗେନା କେଃକୋୱାଏ, ହାର୍ ସବେନ୍ ହୁଲାଙ୍ଗ୍ ତୁର୍ନୁସ୍ ରାଃ ସ୍କୁଲ୍ ଅଡ଼୍ଆଃ ରେ କୁଲି-କାପାଜି ତାଇ କେନାଏ। ବାର୍ ଶିର୍ମା ସାନ୍ତେ ନେୟାଗି ହୋବାଅଃ ତାଇକେନା, ନେତାଃ ସାନ୍ତେ ଚି ଆସିୟା ରାଇଜ୍ ରେ ତାଇନ୍ ତାନ୍‍କୋ ଚିକାନ୍ ୟାହୁଦୀ ଚିକାନ୍ ୟୁନାନୀ ହୋଡ଼ୋ ସବେନ୍ କୋ ପ୍ରାଭୁ ଆଃ ବାଚାନ୍ ଆୟୁମ୍ କେଦାକୋ। ପାର୍ମେଶ୍ଵାର୍ ପାଉଲୁସ୍ ରାଃ ତିଈ ତେ ପେଡ଼େଏ ରାଃ ଆକ୍‍ଦାନ୍ଦା କାମି ରିକା ତାଇନାଏ। ନେତାଃ ସାନ୍ତେ ଚି ରୁମାଲ୍ ହାର୍ ଗାମ୍‍ଛା ଇନିଜାଃ ହୋଡ଼ମୋ ତେ ଜୁଟିଃ କେତେ ବିମାରୀକୋୱାଃ ଚେତାନ୍ ମାଣ୍ଡାଅ ତାଇକେନାକୋ, ଆଡୋଃ ଇନ୍‍କୁୱାଃ ବେମାର୍ ଛୁଟାଅ କୋଃତାଇନା, ହାର୍ ବୋଙ୍ଗାଆତ୍ମା କୋ ଇନ୍‍କୁ ତାଃଏତେ ଅଡୋଙ୍ଗ୍ କୋଃତାଇକେନାକୋ। ମେନ୍ଦୋ ଚିମିନ୍ ୟାହୁଦୀକୋ ଅକନ୍‍କୋ ଝାଡ଼୍ ଫୁକ୍ ରିକାତାନ୍ ଲୋଃ ହୋନୋର୍ ବାଡ଼ା ତାଇକେନାକୋ, ଇନ୍‍କୁ ହଗି ମିଶା ନେୟା ରିକା ସାନାଙ୍ଗ୍ କେଦାକୋ ଚି ଅକନ୍ କୋୱାଃ ରେ ବୋଙ୍ଗାଆତ୍ମା ତାଇନୋଃ ତାଇନାକୋ ଇନ୍‍କୁୱାଃ ଚେତାନ୍ ରେ ପ୍ରାଭୁ ୟୀଶୁ ରାଃ ନୁତୁମ୍ ସାବ୍ କେତେ କାଜିକେଦାକୋ, “ଅକନ୍ ୟୀଶୁ ରାଃ ପାର୍ଚାର୍ ପାଉଲୁସ୍ ରିକା ତାନାଏ, ଇଙ୍ଗ୍ ଆମ୍‍କେ ଇନିଜାଃ ଗି କିରିୟା ଏମାମେ ତାନିଙ୍ଗ୍ ଅଡୋଙ୍ଗ୍ ମେ।” ସ୍କେବା ନୁତୁମ୍ ମିହୋଡ଼୍ ୟାହୁଦୀ ପ୍ରାଧାନ୍ ୟାଜାକ୍ ରାଃ ସାତ୍-ଝାନ୍ ହୋନ୍‍କୋଡ଼ା ତାଇକେନାକୋ, ଅକନ୍‍କୋ ନେକାଗି ରିକାତାଇକେନାକୋ। ମେନ୍ଦୋ ବୋଙ୍ଗାଆତ୍ମା ଇନ୍‍କୁକେ କାଜିରୁଆଡ଼୍ କେଦାଏ, “ୟୀଶୁ କେ ଇଙ୍ଗ୍ ସାରିୟାଇଙ୍ଗ୍, ଆଡୋଃ ପାଉଲୁସ୍ କେହ ସାରିୟାଇଙ୍ଗ୍, ମେନ୍ଦୋ ଆପେ ଅକଏ ତାନ୍‍ପେ?” ଆଡୋଃ ଏନ୍ ହୋଡ଼ ଅକନିଜାଃ ରେ ବୋଙ୍ଗାଆତ୍ମା ତାଇନ୍ କେନାଏ ଇନ୍‍କୁୱାଃ ଚେତାନ୍ ରେ ଦୋନ୍ କେଦାଏ ହାର୍ ଇନ୍‍କୁକେ ହାରୁୱାଅ କେତେ, ଇନ୍‍କୁକେ ନେକୋ ବିଡ଼ାକେଦାଏ ଚି ଇନ୍‍କୁ ସାମା ହୋଡ଼ମୋ ହାର୍ ଘାଅ ହୋବାକେତେ ଏନ୍ ଅଡ଼୍ଆଃ ଏତେ ନିର୍ ଜାନାକୋ। ନେ କାଜିକେ ଇଫିସୁସ୍ ସାହାର୍ ରେ ତାଇନ୍ ତାନ୍ ସବେନ୍ ୟାହୁଦୀକୋ ହାର୍ ୟୁନାନୀ ହୋଡ଼ୋକୋ ହ ସାରି ଜାନାକୋ, ହାର୍ ଏନ୍ ସବେନ୍ କୋ ବୋରୋ ଜାନାକୋ; ଆଡୋଃ ପ୍ରାଭୁ ୟୀଶୁ ରାଃ ନୁତୁମ୍ ଗି ମାନାରାଙ୍ଗ୍ ଜାନା। ଅକନ୍ କୋ ବିଶ୍ଵାସ୍ ଲେଦାକୋ, ଇନ୍‍କୁ ଏତେ ଥିମ୍ବାଗି ହୋଡ଼ୋକୋ ହିଜୁଃକେତେ ଆପାନାଃ-ଆପାନାଃ ଏତ୍କାନ୍ କାମି କୋକେ ମାନାତିଙ୍ଗ୍ କେଦାକୋ ଆଡୋଃ ଉଦୁବ୍ କେଦାକୋ। ଦେଓଁଣା କାମି ରିକାତାନ୍ କୋଏତେ ଥିମ୍ବାଗି ହୋଡ଼ୋକୋ ଆପାନାଃ-ଆପାନାଃ ପୁଥି କୋକେ ହୁଣ୍ଡି କେତେ ସବେନ୍ କୋୱାଃ ନାଡ଼େଏ ରେ ଜୁଲ୍ ତାଦାକୋ, ଆଡୋଃ ଚିମ୍ତାଙ୍ଗ୍ ଏନାକୋରାଃ ଗୋନୋଙ୍ଗ୍ ଲେକା ଜାନା, ଏଣ୍ଡେ ଏନା ପାଚାଶ୍ ହାଜାର୍ ରୂପା ରାଃ ଶିକା ଇମିନ୍ ହୋବାନା। ନେଲେକାତେ ପ୍ରାଭୁ ଆଃ ବାଚାନ୍ ପେଡ଼େଏ ତେ ପାସ୍ରାଅ ଇଦିଜାନା ହାର୍ କେଟେଃ ଇଦିଜାନା। ଚିମ୍ତାଙ୍ଗ୍ ନେ କାଜିକୋ ହୋବାଜାନା ଇମ୍ତା ପାଉଲୁସ୍ ମାକିଦୁନିୟା ହାର୍ ଆଖାୟା ରାଇଜ୍ ହୋବାକେତେ ୟୀରୁଶାଲେମ୍ ତେ ସେନାଇଙ୍ଗ୍ ମେନ୍ତେ ମୋନ୍ ରେ ପାହୋମ୍ କେଦାଏ ହାର୍ କାଜିକେଦାଏ, “ଏନ୍ତାଃ ସେନ୍ ତାୟୋମ୍ତେ ଇଙ୍ଗ୍‍କେ ରୋମ୍ ସାହାର୍ ହଗି ସେନ୍ ଲାଗାତିଙ୍ଗ୍ ମେନାଃ।” ଏନାମେନ୍ତେ ଆୟାଃ ସେୱା ରେ ଦେଙ୍ଗା ରିକାଏତାନ୍ କୋଏତେ ତିମୁଥିୟୁସ୍ ହାର୍ ଇରାସ୍ତୁସ୍ କେ ମାକିଦୁନିୟା କୁଲ୍‍କେତେ ଆଏଃ ହୁଡିଙ୍ଗ୍ ଦିନ୍ ଆସିୟା ରାଇଜ୍ ରେ ତାଇନ୍ ଜାନାଏ। ଏନ୍ ସାମାୟ୍ ପ୍ରାଭୁ ରାଃ ହୋରା ବିଷାୟ୍ ରେ ମାରାଙ୍ଗ୍ ହାଲାଗୁଲା ହୋବାଜାନା। ଚିୟାଃଚି ଦେମେତ୍ରିୟୁସ୍ ନୁତୁମ୍ ମିହୋଡ଼୍ ସୋନାର୍, ଆର୍ତିମିସ୍ ୟୁନାନୀ ଦେବୀ ରାଃ ରୂପା ତେ ବାଇୟାକାନ୍ ହୁପୁଡିଙ୍ଗ୍ ମାନ୍ଦିର୍ ବାଇ ଲାଗିନ୍ କାରୀଗାର୍ କୋକେ ଥିମ୍ବାଗି କାମି ଏମାକୋ ତାଇନାଏ। ଦେମେତ୍ରିୟୁସ୍ ଆଜାଃ କାରୀଗାର୍ କୋକେ ଆଡୋଃ ନେକାନ୍ ଜିନିଷ୍ କୋରାଃ ଏଟାଃ କାରୀଗାର୍ କୋକେ କେଡ଼ାହୁଣ୍ତି କେଃକୋୱାଏ ହାର୍ କାଜିକେଦାଏ, “ହେ ହାଗାକୋ, ଆପେ ସାରିତାନାପେ ଚି ନେ କାମି ତେ ଆବୁକେ ଚିମିନ୍ ଟାକା ନାମୋଃତାନା। ଆପେ ନେଲ୍ ତାନାପେ ହାର୍ ଆୟୁମ୍ ତାନାପେ ଚି ଇଫିସୁସ୍ ସାହାର୍ ରେ ଭାଇର୍ କାହା, ମେନ୍ଦୋ ପ୍ରାୟ୍ ପୁରା ଆସିୟା ରାଇଜ୍ ରେ ନେୟା କାଜି-କାଜିକେତେ ନେ ପାଉଲୁସ୍ ଥିମ୍ବାଗି ହୋଡ଼ୋକୋକେ ବୁଝାଅ କାଃକୋୱାଏ ହାର୍ ଉସ୍କୁର୍ ହ କାଦାଏ, ଚି ଅକନାଃ ତିଈ ତେ ବାଇୟାକାନ୍ ଦେଓତା କୋ ଇଶ୍ୱାର୍ ନାହାଲାକୋ। ଏନାତେ ନାଆ ନେ ବାକାଣ୍ ରାଃ ଭାଇର୍ ବୋରୋ ବାନୋଗା ଚି ଆବୁୱାଃ ନେ କାମିକୋ ଡୁବିଜୋଗା; ମେନ୍ଦୋ ନେୟା ହଗି ଚି ମାରାଙ୍ଗ୍ ଦେବୀ ଆର୍ତିମିସ୍ ରାଃ ମାନ୍ଦିର୍ କାମାଇନ୍ ଅଗା, ଅକନିଃକେ ଗୋଟା ଆସିୟା ହାର୍ ପୁରା ଅତେଦିଶୁମ୍ ପୂଜା ତାନାଏ ଏନାରାଃ ମାନାରାଙ୍ଗ୍ ଅଗି ସେନୋଃ ଇଦିୟୋଗା।” ଇନ୍‍କୁ ନେୟା ଆୟୁମ୍ କେତେ ଖିସ୍ ତେ ଫେରେଃ ଜାନାକୋ ହାର୍ କାଉରି-କାଉରି କାଜିକେଦାକୋ, “ଇଫିସିୟା କୋୱାଃ ଆର୍ତିମିସ୍ ମାରାଙ୍ଗ୍ ତାନିଃ!” ହାର୍ ପୁରା ସାହାର୍ ରେ ମାରାଙ୍ଗ୍ ଗୋଣ୍ଡୋଗୋଲ୍ ହୋବାଜାନା, ହାର୍ ହୋଡ଼ୋକୋ ମାକିଦୁନିୟା ରାଇଜ୍ ରେନ୍ ଗାୟୁସ୍ ହାର୍ ଆରିସ୍ଥାର୍ଖୁସ୍ କିନ୍‍କେ ଅକନ୍‍କିନ୍ ପାଉଲୁସ୍ ରାଃ ସେସେନ୍ ହୋରା ରେ ଗାତି ତାଇନ୍ କେନାକିନ୍ ସାବ୍ କେଃକିନାକୋ, ହାର୍ ମିଶାତେ ହୋବାକେତେ ଆଖ୍ଡ଼ା ରେ ନିର୍ କେଦାକୋ। ଚିମ୍ତାଙ୍ଗ୍ ପାଉଲୁସ୍ ହୋଡ଼ୋକୋୱାଃ ନାଡ଼େଏ ଭିତାର୍ ବୋଲୋ ସାନାଙ୍ଗ୍ କେଦାଏ ଏଣ୍ଡେ ଚେଲାକୋ ଆଏଃକେ କାକୋ ସେନ୍ ଇଚାକିଜା। ଆସିୟା ରେନ୍ ହାକିମ୍ କୋଏତେ ହଗି ଅକନ୍‍କୋ ଇନିଜାଃ ଗାତି ତାଇକେନାକୋ ଇନିଃ ତାଃ କାଜିକୁଲ୍ କେଦାକୋ ହାର୍ ଆର୍ଜି କେଦାକୋ ଚି ଆଖ୍ଡ଼ା ରେ ନିର୍ବୁଦ୍ଧି କାମି ଲେକା ଆଲୋମ୍ ବୋଲୋୱା। ଏନ୍ତାଃରେ ଅକଏ ଚିନାଃ ଗୁଲ୍ ତାନାଏ ଆଡୋଃ ଅକଏ ଚିନାଃ, ଚିୟାଃଚି ହୁଣ୍ଡିକାନ୍ ହୋଡ଼ୋକୋୱାଃ ଥାଲା ରେ ମାରାଙ୍ଗ୍ ହାଲାଗୁଲା ହୋବାଅଃ ତାଇକେନା, ଆଡୋଃ ଥିମ୍ବାଗି ହୋଡ଼ୋକୋ ଦୋ ନେୟା ହ କାକୋ ସାରିତାଇକେନା ଚି ଇନ୍‍କୁ ଚିନାଃ ମେନେଃ ହୁଣ୍ତି କାନାକୋ। ଇମ୍ତା ଇନ୍‍କୁ ସିକାନ୍ଦାର୍ ନୁତୁମ୍ ହୋଡ଼ କେ, ଅକନିଃକେ ୟାହୁଦୀ କୋ ସାଲା ଲିଜାକୋ, ହୋଡ଼ୋକୋୱାଃ ଆୟୁର୍ତେ କୁଲ୍ କିଜାକୋ। ସିକାନ୍ଦାର୍ ତିଈ ଉଠାଓ କେତେ ହୋଡ଼ୋକୋୱାଃ ସାମାନାଙ୍ଗ୍ ରେ କାଜି ସାନାଙ୍ଗ୍ ତାଇକେନାଏ। ମେନ୍ଦୋ ଚିମ୍ତାଙ୍ଗ୍ ଇନ୍‍କୁ ସାରିତାଦାକୋ ଚି ଇନିଃ ୟାହୁଦୀ ତାନିଃ, ଏଣ୍ଡେ ସବେନ୍ ମିଶାତେ ମିୟାଃ କାଜିକେଗି ଦୁଇ ଘାଣ୍ଟା ସାନ୍ତେ ଗୁଲ୍ କେଦାକୋ, “ଇଫିସିୟା କୋୱାଃ ଆର୍ତିମିସ୍ ମାରାଙ୍ଗ୍ ତାନିଃ!” ଇମ୍ତା ସାହାର୍ ରେନ୍ ମୁନ୍‍ସି ହୋଡ଼ୋକୋକେ ହାପା ରିକା କେତେ କାଜି କେଃକୋୱାଏ, “ହେ ଇଫିସୁସ୍ ରେନ୍ ହୋଡ଼ୋକୋ, ଅକଏ କାଏ ସାରିତାନାଏ ଚି ଇଫିସିୟା କୋୱାଃ ସାହାର୍ ମାରାଙ୍ଗ୍ ଦେବୀ ଆର୍ତିମିସ୍ ରାଃ ମାନ୍ଦିର୍ ହାର୍ ରିମିଲ୍‍ଦିଶୁମ୍ ଏତେ ଉୟୁଃକାନ୍ ମୂର୍ତି ରାଃ ହୋରୋନିଃ ତାନିଃ। ଏନାତେ ନେ କାଜିକେ କାହାଦ୍ ଧାଡ଼ିୟୋଃୱା, ଏନାମେନ୍ତେ ନେୟା ଠାଉକା ହୋବାୱା ଚି ଆପେ ହାପା ତାଇନୋଃପେ ହାର୍ ବେଗାର୍ ପାହୋମ୍-ବିଚାର୍ କେତେ ଜାହାନାଃ ଆଲୋପେ ରିକାୟା। ଆପେ ନେ ହୋଡ଼ୋକୋକେ ଆଉ କାଃକୋୱାପେ ଅକନ୍‍କୋ ନା ମାନ୍ଦିର୍ କେ ରେଏଃନିକୋ ତାନ୍‍କୋ ଆଡୋଃ ନା ଆବୁୱାଃ ଦେବୀ କୋକେ ନିନ୍ଦା ରିକାୱାଲା ତାନ୍‍କୋ। ଏନାମେନ୍ତେ ଆଗାର୍ ଦେମେତ୍ରିୟୁସ୍ ହାର୍ ଇନିଜାଃ ଗାତି କାରୀଗାର୍ କୋକେ ଜାହାଁଏ ଲୋଃ ଜାହାନ୍ କାଜି ମେନାଃ ରେଦୋ ବିଚାର୍-ଅଡ଼୍ଆଃ ଖଲାଅ କାନା, ହାର୍ ହାକିମ୍ କୋହ ମେନାକୋୱା; ଏନ୍ତାଃ ଇନ୍‍କୁ ମିହୋଡ଼୍ ଏଟାଃନିଃକେ ଦୋଷ୍ ଏମେକାକୋ। ମେନ୍ଦୋ ଆଗାର୍ ଆପେ ଜେତାନ୍ ଆଡୋଃ କାଜି ରାଃ ବିଷାୟ୍ ରେ ଜେତ୍ନାଃ କୁଲି ସାନାଙ୍ଗ୍ ତାନାପେ ରେଦୋ ଟୋଲା-ପାଞ୍ଚ୍ ଦୁନୁବ୍ ରେ ବିଚାର୍ ରିକାଅଗା। ଚିୟାଃଚି ଇସିଙ୍ଗ୍ ରାଃ ହାଲାଗୁଲା ଲାଗିନ୍ତେ ଆବୁ ଚେତାନ୍ ରେ ଦୋଷ୍ ଠୋଗୋଃ ରାଃ ବୋରୋ ମେନାଃ, ଏନାମେନ୍ତେ ଚି ନେୟା ରାଃ ଜାହାନ୍ କାରାନ୍ ବାନୋଃ, ହାର୍ ଆବୁ ନେ ମିଃଥିମ୍ବା ହୋଡ଼ୋକୋୱାଃ ହୁଣ୍ଡିନ୍ ରାଃ ଜାହାନ୍ କାଜିରୁଆଡ଼୍ କାବୁ ଏମ୍ ଧାଡ଼ିୟା।” ନେୟା କାଜିକେତେ ଦୁନୁବ୍ କେ ଛାବା କେତେ ବିଦାକେଃକୋୱାଏ। ଚିମ୍ତାଙ୍ଗ୍ ରାଡ଼ାମ୍-କାଚାମ୍ ହୋକା ଜାନା ଇମ୍ତାଙ୍ଗ୍ ପାଉଲୁସ୍ ଚେଲାକୋକେ କେଡ଼ାକେତେ ବୁଝାଅ କେଃକୋୱାଏ, ଆଡୋଃ ଇନ୍‍କୁ ତାଃତେ ବିଦା ଇଦିକେତେ ମାକିଦୁନିୟା ରାଇଜ୍ ତେ ସେନୋଃ ଜାନାଏ। ଏନ୍ତାଃ ସବେନ୍ ଜାଗା କୋରେ ହୋନୋର୍ ବାଡ଼ା କେତେ ଆଡୋଃ ଚେଲାକୋକେ ବେଶେ ଯୋଶ୍ ରିକାତାନ୍ ଲୋଃ ଇନିଃ ୟୁନାନୀ ରାଇଜ୍ ତେ ସେଟେର୍ ଜାନାଏ। ଏନ୍ତାଃ ଇନିଃ ଆପି ମାହିନା ତାଇନ୍ ଜାନାଏ। ଚିମ୍ତାଙ୍ଗ୍ ଇନିଃ ଏନ୍ତାଃ ଏତେ ଜାହାଜ୍ ରେ ସିରିୟା ରାଇଜ୍ ପାଡ଼୍ ସେନ୍ ରାଃ ତାଇକେନାଏ, ଏଣ୍ଡେ ୟାହୁଦୀ ଗୁରୁକୋ ଇନିଃକେ ଗୋଏଃ ଲାଗିନ୍ ଲୋଡୋବାଡ଼ା କିଜାକୋ, ଏନାମେନ୍ତେ ଇନିଃ ନେୟା ପାହୋମ୍ କେଦାଏ ଚି ମାକିଦୁନିୟା ରାଇଜ୍ ହୋରାତେ ରୁଆଡ଼୍ କେନୋଗାଏ। ବିରିୟା ହାତୁ ରେନ୍ ପିର୍ହୁସ୍ ନୁତୁମ୍ ମିୟାଃ ହୋଡ଼ ରାଃ ହୋନ୍‍କଡ଼ା ସୋପୋତ୍ରୁସ୍ ଆଡୋଃ ଥିସ୍ସଲୁନିକେ ସାହାର୍ ରେନ୍ ଆରିସ୍ଥାର୍ଖୁସ୍ ଆଡୋଃ ସିକୁନ୍ଦୁସ୍ ଆଡୋଃ ଦିର୍ବେ ହାତୁ ରେନ୍ ଗାୟୁସ୍, ହାର୍ ତିମୁଥିୟୁସ୍ ଆଡୋଃ ଆସିୟା ରାଇଜ୍ ରେନ୍ ତୁଖିକୁସ୍ ଆଡୋଃ ତ୍ରୁଫିମୁସ୍ ନିକୁ ଇନିଜାଃ ଲୋଃ ସେନ୍ ରାଃ ତାଇକେନାକୋ। ନିକୁ ସିଦା ରେ ସେନ୍ କେତେ ତ୍ରୋଆସ୍ ସାହାର୍ ରେ ଆଲେୟାଃ ନେଲ୍ ହୋରା ତାଇନ୍ କେନାକୋ। ହାର୍ ଆଲେ ଖାମୀର୍ କାମେଶାକାନ୍ ହୋଲୋଙ୍ଗ୍ ରାଃ ପାରାବ୍ ହୁଲାଙ୍ଗ୍ କୋରାଃ ତାୟୋମ୍ତେ ଫିଲିପ୍ପି ସାହାର୍ ତେ ଜାହାଜ୍ ରେ ରାକାବ୍ କେତେ ପାଞ୍ଚ୍ ଦିନ୍ ରେ ତ୍ରୋଆସ୍ ସାହାର୍ ରେ ଇନ୍‍କୁତାଃ ଥେବାଃ ଜାନାଲେ, ହାର୍ ସାତ୍ ଦିନ୍ ସାନ୍ ଏନ୍ତାଃରେଗି ତାଇଜାନାଲେ। ହାପ୍ତା ରାଃ ସୁରୁ ହୁଲାଙ୍ଗ୍ ଚିମ୍ତାଙ୍ଗ୍ ଆଲେ ପ୍ରାଭୁଭୋଜ୍ ଲାଗିନ୍ତେ ହୁଣ୍ତି ଲେନାଲେ, ଦୋ ପାଉଲୁସ୍ ଏଟାଃ ହୁଲାଙ୍ଗ୍ ସେନୋଃ ରାଃ ତାଇନ୍ କେନାଏ, ଇନ୍‍କୁ ଲୋଃ ବାକାଣ୍ କେଦାଏ ଆଡୋଃ ଥାଲା ନିଦା ଜାକେଦ୍ ଉପ୍‍ଦେଶ୍ ଏମାଃ କୋୱାଏ। ଅକନ୍ ଚେତାନ୍ କୋଠୋରୀ ରେ ଆଲେ ହୁଣ୍ତି ଲେନ୍ ତାଇଲେନାଲେ, ଏନ୍ତାଃ ରେ ଥିମ୍ବାଗି ବାତୀ କୋ ଜୁଲୋଃ ତାଇନ୍ କେନା। ଆଡୋଃ ୟୁତୁଖୁସ୍ ନୁତୁମ୍ ମିହୋଡ଼୍ ଧାଙ୍ଗ୍ଡ଼ା ଖିଡ଼୍‍କୀ ରେ ଦୁବାକାନ୍ ପୁରା ଦୁଣୁମ୍ ରେ ଝୁପାଅଃ ତାଇକେନାଏ। ଚିମ୍ତାଙ୍ଗ୍ ପାଉଲୁସ୍ ଦେରି ସାନ୍ତେ ଉପ୍‍ଦେଶ୍ କେଦାଏ ଦୋ ଇନିଃ ଦୁଣୁମ୍ ରାଃ ଚାଲ୍ତେ ତିସ୍ରା ଚେତାନ୍ କୋଠୋରୀ ଏତେ ଉୟୁଃଜାନାଏ, ହାର୍ ଇନିଃ ଗୋଜାକାନ୍ ଉଠାଓ ଜାନାଏ। ମେନ୍ଦୋ ପାଉଲୁସ୍ ଆଡ଼୍‍ଗୁ କେତେ ଇନିଃ ଲୋଃ ଲିପ୍ଟାଅ ଜାନାଏ ଆଡୋଃ ହାମ୍‍ବୁଃ କେତେ କାଜିକେଦାଏ, “ଆଲୋପେ ଆକ୍‍ବାକାଅଃ ଚିୟାଃଚି ଇନିଜାଃ ଜୀଉ ଇନିଃ ରେଗି ମେନାଃ।” ହାର୍ ଆଡୋଃଗି ଚେତାନ୍ ସେନ୍ କେତେ ହୋଲୋଙ୍ଗ୍ କେଚାଃ କେଦାଏ ହାର୍ ଜୋମ୍ କେତେ ଇମିନ୍ ଦେରି ସାନ୍ତେ ଇନ୍‍କୁଲୋଃ ବାକାଣ୍ କେଦାଏ ଚି ସେତାଃ ଜାନା। ଏନ୍ତେ ଇନିଃ ସେନୋଃ ଜାନାଏ। ଆଡୋଃ ଇନ୍‍କୁ ଏନ୍ ଧାଙ୍ଗ୍ଡ଼ା କେ ଜୀହିଃଗି ଆଉ ଲିଜାକୋ ଆଡୋଃ ବେଶେ ଶାନ୍ତି କୋ ନାମ୍ କେଦା। ଆଲେ ସିଦା ରେଗି ଜାହାଜ୍ ରେ ରାକାବ୍ କେତେ ଆସ୍ସୁସ୍ ହାତୁ ତେ ନେୟା ପାହୋମ୍ କେତେ ଆୟୁର୍ ସେନ୍ ଜାନାଲେ, ଚି ଏନ୍ତାଃ ଏତେ ଆଲେ ପାଉଲୁସ୍ କେ ରାକାବ୍ କିୟାଲେ, ଚିୟାଃଚି ଇନିଃ ନେୟା ଲାଗିନ୍ତେ ଠାହ୍‍ରାଓ ଲେଦାଏ, ଚି ଆଏଃଗି ପାଏଦାଲ୍ ସେସେନ୍ ସାନାଙ୍ଗ୍ ତାଇକେନାଏ। ଚିମ୍ତାଙ୍ଗ୍ ଇନିଃ ଆସ୍ସୁସ୍ ହାତୁ ରେ ଆଲେକେ ନାମ୍ ଜାନାଏ ଦୋ ଆଲେ ଇନିଃକେ ରାକାବ୍ କେତେ ମିତୁଲେନେ ସାହାର୍ ରେ ହିଜୁଃ ଜାନାଲେ। ଏନ୍ତାଃ ଏତେ ଜାହାଜ୍ ଖଲାଅ କେତେ ଆଲେ ଏଟାଃ ହୁଲାଙ୍ଗ୍ ଖିୟୁସ୍ ଟାପୁ ରାଃ ସାମ୍ନାଙ୍ଗ୍ ରେ ଥେବା ଜାନାଲେ, ଏନ୍ତେ ଏଟାଃ ହୁଲାଙ୍ଗ୍ ମିଲେତୁସ୍ ସାହାର୍ ରେ ହିଜୁଃଜାନାଲେ। ଚିୟାଃଚି ପାଉଲୁସ୍ ଇଫିସୁସ୍ ସାହାର୍ ରାଃ ନାଡ଼େଏ ହୋବା କେତେ ସେନ୍ ଲାଗିନ୍ ମୋନ୍ ରେ ପାହୋମ୍ ଲେଦାଏ କାରେ ନେକା ଆଲୋକା ହୋବାଅଃକା ଚି ଇନିଃକେ ଆସିୟା ରାଇଜ୍ ରେ ଦେରିୟୋଃୱା, ଚିୟାଃଚି ଇନିଃ ଜାଲ୍‍ଦି ରେ ତାଇକେନାଏ ଚି ଆଗାର୍ ହୋବାଧାଡ଼ିଅଃ ରେଦୋ ଇନିଃ ପେନ୍ତିକୋଷ୍ତ ପାରାବ୍ ରାଃ ହୁଲାଙ୍ଗ୍ ୟୀରୁଶାଲେମ୍ ରେ ତାଇନୋଗାଏ। ପାଉଲୁସ୍ ମିଲେତୁସ୍ ସାହାର୍ ଏତେ ଇଫିସୁସ୍ ସାହାର୍ ତାଃ କାଜିକୁଲ୍ କେଦାଏ, ଆଡୋଃ କାଲିସିୟା ରେନ୍ ମାରିହୋଡ଼ୋକୋକେ କେଡ଼ା କେଃକୋୱାଏ। ଚିମ୍ତାଙ୍ଗ୍ ଇନ୍‍କୁ ଇନିଃତାଃ ହିଜୁଃଲେନାକୋ, ଏଣ୍ଡେ ଇନିଃ କାଜିକେଦାଏ, ଆପେ ସାରିୟାପେ ଚି ସୁରୁ ହୁଲାଙ୍ଗ୍ ତେଗି ଚିମ୍ତାଙ୍ଗ୍ ଇଙ୍ଗ୍ ଆସିୟା ରାଇଜ୍ ରେ ହିଜୁଃଲେନାଇଙ୍ଗ୍, ଇଙ୍ଗ୍ ସବେନ୍ ସାମାୟ୍ ଆପେୟାଃ ଲୋଃ ଚିଲ୍‍କା ତାଇନ୍ କେନାଇଙ୍ଗ୍। ମାନେ ପୁରା ଲେବେଃ ମୋନ୍ ତେ ହାର୍ ମେଏଃ ଦାଆ ଜୋରୋ-ଜୋରୋ କେତେ, ଆଡୋଃ ଏନ୍ ପାରୀକ୍ଷା କୋରେ ଅକନାଃ ୟାହୁଦୀ ଗୁରୁକୋୱାଃ ଗୋଗୋଏଃ ରାଃ ବିଚାର୍ ରାଃ ଚାଲ୍ତେ ଅକନାଃ ଇଙ୍ଗ୍ଆଃ ରେ ହିଜୁଃଲେନା, ଏଣ୍ଡେ ହଗି ଇଙ୍ଗ୍ ପ୍ରାଭୁ ଗାଃ ସେୱା ରିକାତାନ୍ ଗି ତାଇଜାନାଇଙ୍ଗ୍। ହାର୍ ଅକନ୍-ଅକନ୍ କାଜି ଆପେୟାଃ ବୁଗିନ୍ ଲାଗିନ୍ ତାଇକେନା, ଏନାକୋକେ ଉଦୁବ୍ ଆଡୋଃ ହୋଡ଼ୋକୋୱାଃ ସାମାନାଙ୍ଗ୍ ରେ ଆଡୋଃ ଅଡ଼୍ଆଃ-ଅଡ଼୍ଆଃ ଶିଖାଅ ଲାଗିନ୍ ଚିଉଲା ହ କାଇଙ୍ଗ୍ ଧୁକର୍‍ପୁଚୁର୍ ଜାନା। ମେନ୍ଦୋ ୟାହୁଦୀ କୋୱାଃ ଆଡୋଃ ଏଟାଃଜାତି ୟୁନାନୀ ହୋଡ଼ୋକୋୱାଃ ନାଡ଼େଏ ରେ ଗୋୱା ଏମ୍ ଇଦିକେଦାଇଙ୍ଗ୍ ଚି ପାର୍ମେଶ୍ଵାର୍ ନାଡ଼େଏ ହିଜୁଃ ନାଙ୍ଗ୍ ପାପ୍ କାମି ବାଗେ ହାର୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରେ ବିଶ୍ୱାସ୍ ଚାହି। ନାଆ ନେଲେପେ, ଇଙ୍ଗ୍ ପାବିତାର୍ ଆତ୍ମା ରେ ଥୋଲାକାନ୍ ତେ ୟୀରୁଶାଲେମ୍ ତେ ସେନ୍ ତାନିଙ୍ଗ୍, ହାର୍ କାଇଙ୍ଗ୍ ସାରିତାନା ଚି ଏନ୍ତାଃରେ ଇଙ୍ଗ୍ଆଃ ଚେତାନ୍ ରେ ଚିନାଃ-ଚିନାଃ ହୋବାଃୱା। ମେନ୍ଦୋ ପାବିତାର୍ ଆତ୍ମା ଭାଇର୍ ସବେନ୍ ସାହାର୍ ରେ ଇଙ୍ଗ୍ଆଃ ଲୋଃ ବାକାଣ୍ ତାଇକେନାଏ ଚି ଥୋନୋଲ୍ ହାର୍ ଦୁକୁ ଆମ୍ ଲାଗିନ୍ ବାଇ ସେକାଡ଼୍ କାନା। ମେନ୍ଦୋ ଇଙ୍ଗ୍ ଇଙ୍ଗ୍ଆଃ ଜୀଉ ନାଙ୍ଗ୍ ଚିନାଃ ଅଗି କାଇଙ୍ଗ୍ ପାହୋମ୍ ତାନା ଚି ଏନାକେ ଦୁଲାଡ଼୍ ୟାଇଙ୍ଗ୍, ମେନ୍ଦୋ ନେୟା ଚି ଇଙ୍ଗ୍ ଚିଲ୍‍କା ତେ ଇଙ୍ଗ୍ଆଃ ନୀନିର୍ କେ ହାର୍ ଏନ୍ ସେୱା କେ ପୁରାୟାଇଙ୍ଗ୍ ଅକନାଃ ଚି ଇଙ୍ଗ୍ ଇଙ୍ଗ୍ଆଃ ପାର୍ମେଶ୍ଵାର୍ ରାଃ ଆନୁଗ୍ରାହ୍ ରାଃ ସୁସାମାଚାର୍ ରେ ଗୋୱା ଏମ୍ ଲାଗିନ୍ ପ୍ରାଭୁ ୟୀଶୁ ତେ ନାମ୍ କାଦାଇଙ୍ଗ୍। ନାଆ ନେଲେପେ, ଇଙ୍ଗ୍ ସାରି ତାନାଇଙ୍ଗ୍ ଚି ଆପେ ସବେନ୍ କୋ ଅକନ୍ କୋୱାଃ ରେ ଇଙ୍ଗ୍ ପାର୍ମେଶ୍ଵାର୍ ରାଃ ରାଇଜ୍ ରାଃ ପାର୍ଚାର୍ ତାନ୍ ଲୋଃ ହୋନୋର୍ କେଦାଇଙ୍ଗ୍, ଆପେ ଇଙ୍ଗ୍ଆଃ ମେଏଃମୁହାଡ଼୍ ଆଡୋଃ କାପେ ନେଲେୟା। ଏନାମେନ୍ତେ ଇଙ୍ଗ୍ ଇସିଙ୍ଗ୍ ରାଃ ହୁଲାଙ୍ଗ୍ ଆପେକେ ଗୋୱା ଏମ୍ କେତେ କାଜିତାନିଙ୍ଗ୍, ଚି ଇଙ୍ଗ୍ ସବେନ୍ କୋୱା ମାୟୋମ୍ ଏତେ କାଇଙ୍ଗ୍ ଦୋଷୀ ହୋବାଅଃୱା। ଚିୟାଃଚି ଇଙ୍ଗ୍ ପାର୍ମେଶ୍ଵାର୍ ରାଃ ମୋନ୍ ରେୟାଃ ସବେନ୍ କାଜି କେ ଆପେକେ ସବେନ୍ ଲେକାତେ ଉଦୁବ୍ ଲାଗିନ୍ତେ କାଇଙ୍ଗ୍ ଧୁକର୍‍ପୁଚୁର୍ କାନା। ଏନାମେନ୍ତେ ଆପେୟାଃ ହାର୍ ଗୋଟା ଝୁଣ୍ଡ୍ କେ ଗୁପି କୋପେ ଅକନାଃ ରେ ପାବିତାର୍ ଆତ୍ମା ଆପେକେ ବିଶାପ୍ ବାଇକାଃ ପେୟାଏ। ଏନାତେ ଆପେ ପାର୍ମେଶ୍ଵାର୍ ରାଃ କାଲିସିୟା କେ ହୋରୋଏପେ, ଅକନାଃକେ ଇନିଃ ଆଜାଃ ମାୟୋମ୍ ଏତେ କିରିଙ୍ଗ୍ କାଦାଏ। ଇଙ୍ଗ୍ ସାରିତାନାଇଙ୍ଗ୍ ଚି ଇଙ୍ଗ୍ଆଃ ସେନୋଃ ରାଃ ତାୟୋମ୍ତେ ଚାଗାଡ଼୍ ନାଙ୍ଗ୍ ହୁଣ୍ଡାର୍ କୋ ଆପେ ତାଃ ହିଜୁଗାକୋ ଅକନ୍ କୋ ଝୁଣ୍ଡ୍ କେ କାକୋ ବାଗେୟା। ଆପେୟାଃ ଥାଲା ଏତେ ୟଗି ନେକା-ନେକା ହୋଡ଼ୋକୋ ଆଡୋଙ୍ଗ୍ଅଗାକୋ, ଅକନ୍‍କୋ ଚେଲାକୋକେ ଆକୋୱାଃ ଦୋୟା ତେ ଥାଇଃ ଇଦି ଲାଗିନ୍ ଟେଢ଼ା-ମେଢ଼ା କାଜିକୋ କାଜିୟାକୋ। ଏନାମେନ୍ତେ ଏୟୋନ୍ କାନ୍‍ପେ, ହାର୍ ପାହୋମେପେ ଚି ଇଙ୍ଗ୍ ଆପି ଶିର୍ମା ସାନ୍ତେ ନିଦା ଶିଙ୍ଗି ରାଆ ତାନ୍‍ଲୋଃ ଚେତାଓ ଏହେମ୍ କାଇଙ୍ଗ୍ ବାଗିକେଦା। ଆଡୋଃ ନାଆ ଇଙ୍ଗ୍ ଆପେକେ ପାର୍ମେଶ୍ଵାର୍ ରାଃ ତିଈ ରେ, ହାର୍ ଇନିଜାଃ ଆନୁଗ୍ରାହ୍ ରାଃ ବାଚାନ୍ ରେ ଜିମାପେ ତାନିଙ୍ଗ୍; ଅକନାଃ ଆପେକେ ଆୟୁର୍ ହାରାଇଦିପେୟାଏ ହାର୍ ସବେନ୍ ପାବିତାର୍ ହୋବାକାନ୍ ହୋଡ଼ୋକୋ ଲୋଃ ମେଶା କେତେ ହାନାଟିଙ୍ଗ୍ ଏମାପେୟାଏ। ଇଙ୍ଗ୍ ଅକେୟାଃ ହ ରୂପା, ସୋନା ୟାଦୋ ଲିଜାଃ ରାଃ କାଇଙ୍ଗ୍ ହାୟା ଜାନା। ଆପେ ଆପେଗୀପେ ସାରିତାନା ଚି ନେ ତିଈ କୋଗି ଇଙ୍ଗ୍ଆଃ ଆଡୋଃ ଇଙ୍ଗ୍ଆଃ ଗାତି କୋୱାଃ ଦାର୍‍କାର୍ କୋକେ ପୁରା କେଦାଏ। ଇଙ୍ଗ୍ ଆପେକେ ସବେନାଃ ରିକା କେତେ ଦେଖାଅ କେଃପେୟାଇଙ୍ଗ୍, ଚି ନେଲେକାଗି କାମି-କାମିକେତେ ନାରାଦୁରା କୋକେ ଦେଙ୍ଗା କୋପେ, ହାର୍ ପ୍ରାଭୁ ୟୀଶୁ ରାଃ ବାଚାନ୍ କେ ପାହୋମେ ଲାଗାତିଙ୍ଗ୍ ମେନାଃ, ଅକନାଃ ଇନିଃ ଆଏଃଗି କାଜିକାଦାଏ, “ଇଦି ଏତେ ଏମେ ତେୟାଃ ବୁଗିନ୍ ତାନାଃ।” ନେୟା କାଜିକେତେ ଇନିଃ ଇକ୍ଡ଼ୁମ୍ କେଦାଏ ହାର୍ ଇନ୍‍କୁ ଲୋଃ ବିନ୍ତି କେଦାଏ। ଇମ୍ତା ଇନ୍‍କୁ ସବେନ୍ ଥିମ୍ବାଗି ରାଆ କେଦାକୋ ହାର୍ ପାଉଲୁସ୍ କେ ହାମ୍‍ବୁଃ କେତେ ଇନିଃକେ ଚୁମା କିଜାକୋ। ଇନ୍‍କୁ ଏନ୍ କାଜି ଏତେ ଥିମ୍ବାଗି ଦୁକୁ ଲେନାକୋ, ଅକନାଃ ଇନିଃ କାଜିଲେଦାଏ, ଚି ଆପେ ଆଡୋଃ ଇଙ୍ଗ୍ଆଃ ମେଏଃମୁହାଡ଼୍ କେ କାପେ ନେଲେୟା। ଏନ୍ତେ ଇନ୍‍କୁ ଇନିଃକେ ଜାହାଜ୍ ତାଃ ଥେବାଃ ତାଇଜାକୋ। ଚିମ୍ତାଙ୍ଗ୍ ଆଲେ ଇନ୍‍କୁ ଏତେ ବିଦା ଇଦିକେତେ ଜାହାଜ୍ ରେ ରାକାବ୍ କେତେ, ସୋଜ୍ ହୋରା ହୋବାକେତେ କୋସ୍ ଟାପୁ ତେ ହିଜୁଃ ଲେନାଲେ, ହାର୍ ଏଟାଃ ହୁଲାଙ୍ଗ୍ ରୁଦୁସ୍ ଟାପୁ ହାର୍ ଏନ୍ତାଃ ଏତେ ପାତାରା ଟାପୁ ରେ ସେଟେର୍ ଜାନାଲେ। ଏନ୍ତାଃ ମିୟାଃ ଜାହାଜ୍ ଫିନିକେ ରାଇଜ୍ ପାଡ଼୍ ସେନୋଃତାନ୍ ନାମ୍‍ଜାନା, ଆଡୋଃ ଆଲେ ଏନାରେ ରାକାବ୍ ଜାନାଲେ ହାର୍ ଜାହାଜ୍ ବାଗେ କେଦାଏ। ଚିମ୍ତାଙ୍ଗ୍ ସାଇପ୍ରାସ୍ ଟାପୁ ନେଲ୍ ଜାନା, ଦୋ ଆଲେ ଏନାକେ ଲେଙ୍ଗା ତିଈ ପାଡ଼୍ ବାଗିକେଦାଲେ, ହାର୍ ସିରିୟା ଜିଲ୍ଲା ତେ ସେନ୍ କେତେ ସୁର୍ ସାହାର୍ ରେ ଆଡ଼୍‍ଗୁ ଜାନାଲେ, ଚିୟାଃଚି ଏନ୍ତାଃରେ ଜାହାଜ୍ ରାଃ ସାମାନ୍ କୋ ଆଡ଼୍‍ଗୁ ଲାଗିନ୍ ତାଇନ୍‍କେନା। ଚେଲାକୋକେ ନାମ୍ କେତେ ଆଲେ ଏନ୍ତାଃରେ ସାତ୍ ଦିନ୍ ସାନ୍ତେ ତାଇଜାନାଲେ। ଇନ୍‍କୁ ପାବିତାର୍ ଆତ୍ମା ପାଡ଼େତେ ଶିଖାଅ ଜାନ୍ତେ ପାଉଲୁସ୍ କେ କାଜିୟାଜାକୋ ଚି ୟୀରୁଶାଲେମ୍ ଆଲୋମ୍ ସେନା। ଚିମ୍ତାଙ୍ଗ୍ ସାତ୍ ଦିନ୍ ପୁରା ଜାନା, ଦୋ ଆଲେ ସବେନ୍ କୋ ଏନ୍ତାଃ ଏତେ ଅଡୋଙ୍ଗ୍ ଜାନାଲେ ଇମ୍ତା ଇନ୍‍କୁୱାଃ ସବେନ୍ କୁଡ଼ିକୋ ହାର୍ ହୋନ୍‍କୋ ଆଲେକେ ସାହାର୍ ରାଃ ବାହାରି ସାନ୍ତେ ସେଟେର୍ ତାଦାକୋ, ହାର୍ ଆଲେ ସାମୁଦାର୍ ଗେନା ରେ ଇକ୍ଡ଼ୁମ୍ କେତେ ବିନ୍ତି କେଦାଲେ। ଏନ୍ତେ ମିହୋଡ଼୍ ଏଟାଃ ନିଃଲୋଃ ବିଦା ଇଦି ତାୟୋମ୍ତେ ଆଲେ ଜାହାଜ୍ ରେ ରାକାବ୍ ଜାନାଲେ ହାର୍ ଇନ୍‍କୁ ଆପାନାଃ-ଆପାନାଃ ଅଡ଼୍ଆଃ ତେ ରୁଆଡ଼୍ ଜାନାକୋ। ଏନ୍ତେ ଆଲେ ସୁର୍ ସାହାର୍ ଏତେ ଦାଆ ହୋରା ସେସେନ୍ ପୁରାକେତେ ପୁତୁଲିମାଇସ୍ ସାହାର୍ ତେ ସେଟେର୍ ଜାନାଲେ, ହାର୍ ବିଶ୍ଵାସୀ ହାଗାକୋକେ ଜୋହାର୍ କେତେ ଇନ୍‍କୁଲୋଃ ମୁଶିଙ୍ଗ୍ ତାଇଜାନାଲେ। ଏଟାଃ ହୁଲାଙ୍ଗ୍ ଆଲେ ଏନ୍ତାଃ ଏତେ ଅଡୋଙ୍ଗ୍ କେତେ କୈସାରିୟା ସାହାର୍ ତେ ହିଜୁଃ ଲେନାଲେ, ଆଡୋଃ ଫିଲିପୁସ୍ ସୁସାମାଚାର୍ ପାର୍ଚାରାକ୍ ରାଃ ଅଡ଼୍ଆଃ ରେ ଅକନିଃ ସାତ୍ ଝାନ୍ କୋଏତେ ମିହୋଡ଼୍ ତାଇକେନାଏ, ସେନ୍‍କେତେ ଇନିଃତାଃ ତାଇନ୍ ଜାନାଲେ। ଇନିଜାଃ ଚାଇର୍ ଝାନ୍ ଡିଣ୍ଡା ହୋନ୍‍କୁଡ଼ି ତାଇକେନାକୋ, ଅକନ୍‍କୋ ଆୟାର୍‍କାଜି କାଜି ତାଇକେନାକୋ। ଚିମ୍ତାଙ୍ଗ୍ ଆଲେ ଏନ୍ତାଃରେ ଥିମ୍ବାଗି ହୁଲାଙ୍ଗ୍ ତାଇଜାନାଲେ, ଇମ୍ତା ଆଗାବୁସ୍ ନୁତୁମ୍ ମିୟାଃ ନାବୀ ୟାହୁଦୀୟା ଜିଲ୍ଲା ଏତେ ହିଜୁଃନାଏ। ଇନିଃ ଆଲେ ତାଃ ହିଜୁଃକେତେ ପାଉଲୁସ୍ ରାଃ କାଶ୍‍ନା କେ ଇଦିକେଦାଏ ହାର୍ ଆଏଃ ଆଜାଃଗି ତିଈ କାଟା କେ ଥୋଲ୍ ଜାନାଏ ହାର୍ କାଜିକେଦାଏ, “ପାବିତାର୍ ଆତ୍ମା ନେୟା କାଜିତାନାଏ ଚି ଅକନ୍ ହୋଡ଼ ରାଃ ନେୟା କାଶ୍‍ନା ତାନାଃ, ଇନିଃକେ ୟୀରୁଶାଲେମ୍ ରେ ୟାହୁଦୀ ଗୁରୁକୋ ନେଲେକାଗି ଥୋଲିୟାକୋ, ହାର୍ ଏଟାଃଜାତି କୋୱାଃ ତିଈ ରେ ଜିମାଇୟାକୋ।” ଚିମ୍ତାଙ୍ଗ୍ ଆଲେ ନେ କାଜିକେ ଆୟୁମ୍ କେଦାଲେ, ଦୋ ଆଲେ ହାର୍ ଏନ୍ତାଃ ରେନ୍ ହୋଡ଼ୋକୋ ପାଉଲୁସ୍ କେ ଆର୍ଜି କିଜାଲେ ଚି ୟୀରୁଶାଲେମ୍ ତେ ଆଲୋ ସେନ୍‍କାଏ। ମେନ୍ଦୋ ପାଉଲୁସ୍ କାଜିରୁଆଡ଼୍ କେଦାଏ, “ଆପେ ଚିନାଃ ଲାଗିନ୍ ରାଆ-ବାଡ଼ା ତାନାପେ ହାର୍ ଇଙ୍ଗ୍ଆଃ ମୋନ୍ କେ ହୁଡିଙ୍ଗ୍ ତାନାପେ? ଇଙ୍ଗ୍ ଦୋ ପ୍ରାଭୁ ୟୀଶୁ ରାଃ ନୁତୁମ୍ ଲାଗିନ୍ତେ ୟୀରୁଶାଲେମ୍ ରେ ଥୋନୋଲ୍ ଲାଗିନ୍ ଖାଲି କାହା ମେନ୍ଦୋ ଗୋଜେନ୍ ଲାଗିନ୍ତେ ହ ସେକାଡ଼୍ ମେନାଇଙ୍ଗ୍‍ୟା।” ଚିମ୍ତାଙ୍ଗ୍ ଇନିଃ କାଏ ମାନାତିଙ୍ଗ୍ ଜାନା ଦୋ ଆଲେ ନେୟା କାଜିକେତେ ହାପାଜାନାଲେ, “ପ୍ରାଭୁ ରାଃ ସାନାଙ୍ଗ୍ ପୁରାଅଃକା।” ହୁଡିଙ୍ଗ୍ ହୁଲାଙ୍ଗ୍ ରାଃ ତାୟୋମ୍ତେ ଆଲେ ସାପ୍ଡ଼ାଅ ଜାନାଲେ ହାର୍ ୟୀରୁଶାଲେମ୍ ତେ ସେନ୍ ଜାନାଲେ। କୈସାରିୟା ସାହାର୍ ତେ ହଗି ଚିମିନାଙ୍ଗ୍ ଚେଲାକୋ ଆଲେ ଲୋଃ ଗାତି ଜାନାକୋ, ହାର୍ ଆଲେକେ ମାନାସୋନ୍ ନୁତୁମ୍ ସାଇପ୍ରାସ୍ ଟାପୁ ରେନ୍ ମିହୋଡ଼୍ ମାରି ଚେଲା ତାଃ ଇଦିକେଦାକୋ, ଚି ଏନ୍ତାଃ ରେ ଆଲେ ତାଇନାଲେ। ଚିମ୍ତାଙ୍ଗ୍ ଆଲେ ୟୀରୁଶାଲେମ୍ ରେ ସେଟେର୍ ଜାନାଲେ, ଦୋ ବିଶ୍ଵାସୀ ହାଗାକୋ ଥିମ୍ବାଗି ରାଶିକା ତେ ଆଲେକେ ଦାରୋମ୍ କେଃଲେୟାକୋ। ଏଟାଃ ହୁଲାଙ୍ଗ୍ ପାଉଲୁସ୍ ଆଲେକେ ଇଦିକେତେ ୟାକୁବ୍ ତାଃ ସେନ୍ ଜାନାଏ, ଅକ୍ତାଃ ରେ ସବେନ୍ ମାରିହୋଡ଼ୋକୋ ହୁଣ୍ଡିଲେନ୍ ତାଇକେନାକୋ। ଏନ୍ତେ ଇନିଃ ଇନ୍‍କୁକେ ଜୋହାର୍ କେତେ ଅକନ୍-ଅକନ୍ କାମି ପାର୍ମେଶ୍ଵାର୍ ଇନିଜାଃ ସେୱା କାମି ହୋରାତେ ଏଟାଃଜାତି ହୋଡ଼ୋକୋ ରେ ରିକାଲେଦାଏ, ଏନାକୋକେ ତାରା ଗେନାତେ ସବେନାଃ ଉଦୁବ୍ କେଦାଏ। ଇନ୍‍କୁ ନେୟା ଆୟୁମ୍ କେତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ କେଦାକୋ। ଏନ୍ତେ ଇନ୍‍କୁ ପାଉଲୁସ୍ କେ କାଜିକିଜାକୋ, “ହେ ହାଗା, ଆମ୍ ନେଲ୍ ତାନାମ୍ ଚି ୟାହୁଦୀକୋ ଏତେ ଚିମିନ୍ ହାଜାର୍ ହୋଡ଼ୋକୋ ବିଶ୍ଵାସ୍ କେଦାକୋ, ହାର୍ ସବେନ୍ କୋ ମୁଶା ନାବୀ ରାଃ ଆଇନ୍ ରେ ମୋନ୍ ଲାଗାଅ କାଦାକୋ। ଇନ୍‍କୁକେ ଆମାଃ ବିଷାୟ୍ ରେ ଉଦୁବ୍ କାନା ଚି ଆମ୍ ଏଟାଃଜାତି କୋରେ ତାଇନ୍ ତାନ୍ ୟାହୁଦୀକୋକେ ମୁଶା ନାବୀ ରାଃ ଆଇନ୍ କେ ବାଗି ତାପେ ମେନ୍ତେ ଶିଖାଅକୋ ତାନାମ୍, ଆଡୋଃ କାଜିୟାମ୍, ଚି ନାଦୋ ଆପାନାଃ ହୋନ୍‍କଡ଼ା କୋକେ ଖାତ୍ନା କୋପେ ହାର୍ ନାଦୋ ଏନ୍ ନିୟାମ୍ ରେ ସେନେପେ। ମାର୍ କାଜିମେ ନାଆ ଆଲେ ଚିନାଃ ରିକାୟାଲେ? ହୋଡ଼ୋକୋ ଜାଲେକାତେଗି ଆୟୁମ୍ କେୟାକୋ ଚି ଆମ୍ ହିଜୁଃ କାନାମ୍। ଏନାମେନ୍ତେ ଅକନାଃ ଆଲେ ଆମ୍‍କେ କାଜିମେ ତାନାଲେ, ଏନା ରିକାଏମେ। ଆଲେୟାଃ ନେତାଃ ରେ ଚାଇର୍ ଝାନ୍ ହୋଡ଼ୋକୋ ମେନାକୋୱା ଅକନ୍‍କୋ ମାନ୍ନାତ୍ ମାଣ୍ଡାଅ କାଦାକୋ। ଇନ୍‍କୁକେ ଇଦିକେତେ ଇନ୍‍କୁୱାଃ ଲୋଃ ଆମ୍ ଆପାନ୍ କେ ଫାର୍ଚି ଏନ୍‍ମେ; ହାର୍ ଇନ୍‍କୁ ଆକୋୱାଃ ବୋଅ ହୋୟୋ ୟାକୋ ଏନା ରାଃ ଖାର୍ଚା ଇନ୍‍କୁକେ ଏମେମ୍। ଏଣ୍ଡେ ସବେନ୍ କୋ ସାରିକେୟାକୋ ଚି ଅକନ୍ କାଜି ଇନ୍‍କୁକେ ଆମାଃ ବିଷାୟ୍ ରେ ଉଦୁବ୍ ଲେନା, ଏନ୍ କାଜି ରେ ଜେତ୍ନାଃ ସାର୍ତି ବାନୋଗା ମେନ୍ଦୋ ଆଜୋଗି ମୁଶା ନାବୀ ରାଃ ଆଇନ୍ କେ ମାନାତିଙ୍ଗ୍ ତାନାଏ ହାର୍ ସେସେନ୍ ତାନାଏ। ମେନ୍ଦୋ ଏନ୍ ଏଟାଃଜାତି ହୋଡ଼ୋକୋୱାଃ ବିଷାୟ୍ ରେ ଅକନ୍‍କୋ ବିଶ୍ୱାସ୍ କାଦାକୋ, ଆଲେ ନେୟା ବିଚାର୍ ବାଇକେତେ ଅଲ୍ କୁଲା କାଦାଲେ ଚି ଇନ୍‍କୁ ମୁର୍ତ୍ତି କୋୱାଃ ନାଡ଼େଏ ରେ ଦାଣେକାନ୍ ମାସ୍ ତେ, ହାର୍ ମାୟୋମ୍ ତେ, ହାର୍ ହୋଟୋଃ ଲିମ୍ବୁଦାକାନ୍ ମାସ୍ ତେ, ଆଡୋଃ ବ୍ୟାଭିଚାର୍ ତେ ସାଙ୍ଗିନ୍ ତାଇନ୍ କାକୋ।” ଏନ୍ତେ ପାଉଲୁସ୍ ଏନ୍ ହୋଡ଼ୋକୋକେ ଇଦିକେଦାଏ ହାର୍ ଏଟାଃ ହୁଲାଙ୍ଗ୍ ଇନ୍‍କୁଲୋଃ ଫାର୍ଚି ହୋବା କେତେ ମାନ୍ଦିର୍ ରାଚା ତେ ସେନ୍ ଜାନାଏ, ହାର୍ ଏନ୍ତାଃରେ ସାରିକେତେ ଉଦୁବ୍ କେଦାଏ ଚି ଫାର୍ଚି ହୋବାଅଃ ରାଃ ଦିନ୍, ମାନେ ଇନ୍‍କୁ ଏତେ ସବେନ୍ କୋ ନାଙ୍ଗ୍ ଦାଣେ ରାକାବ୍ ରାଃ ହୁଲାଙ୍ଗ୍ କୋ ଚିଉଲା ଛାବାଅଗା। ଚିମ୍ତାଙ୍ଗ୍ ସାତ୍ ଦିନ୍ ପୁରା ହୋବାଅଃ ରାଃ ତାଇକେନା, ଏଣ୍ଡେ ଆସିୟା ରାଇଜ୍ ରେନ୍ ୟାହୁଦୀକୋ ପାଉଲୁସ୍ କେ ମାନ୍ଦିର୍ ରାଃ ରାଚା ରେ ନେଲ୍‍କେତେ ସବେନ୍ ହୋଡ଼ୋକୋକେ ଉସ୍କୁର୍ କେଃକୋୱାକୋ ହାର୍ ନେଲେକା କାଉରିତାନ୍ ଲୋଃ ଇନିଃକେ ସାବ୍ କିଜାକୋ, “ହେ ଇସ୍ରାଏଲୀ ହୋଡ଼ୋକୋ, ଦେଙ୍ଗାଏପେ; ନିଈ ଏନ୍ ହୋଡ଼ ଗି ତାନିଃ, ଅକନିଃ ହୋଡ଼ୋକୋୱାଃ, ହାର୍ ମୁଶା ନାବୀ ରାଃ ଆଇନ୍ ରାଃ, ହାର୍ ନେ ଜାଗା ରାଃ ବିରୋଧ୍ ରେ ସବେନ୍ ପାଡ଼୍ ହୋଡ଼ୋକୋକେ ଶିଖାଅକୋ ତାନାଏ, ନେତାଃ ସାନ୍ତେ ଚି ଏଟାଃଜାତି ୟୁନାନୀ ହୋଡ଼ୋକୋକେ ହଗି ମାନ୍ଦିର୍ ନାଡ଼େଏ ଜାଗା କୋରେ ଆଉକେତେ ଇନିଃ ନେ ପାବିତାର୍ ଜାଗା କେ ଆପାବିତାର୍ କେଦାଏ।” ଇନ୍‍କୁ ନେୟା ଏନାମେନ୍ତେ କାଜିକେଦାକୋ ଚିୟାଃଚି ନେୟା ରାଃ ସିଦାରେ ଇଫିସୁସ୍ ସାହାର୍ ରେନ୍ ତ୍ରୁଫିମୁସ୍ କେ ଇନିଃ ଲୋଃ ସାହାର୍ ରେ ନେଲ୍ ଲିଜାକୋ, ହାର୍ ପାହୋମ୍ ଲେଦାକୋ ଚି ପାଉଲୁସ୍ ଇନିଃକେ ମାନ୍ଦିର୍ ରାଚା ରେ ଆଉ କାଇଜାଏ। ଇମ୍ତା ସବେନ୍ ସାହାର୍ ରେ ହାଲାଗୁଲା ହୋବାଜାନା ହାର୍ ହୋଡ଼ୋକୋ ନିର୍ ହିଜୁଃ କେତେ ହୁଣ୍ଡି ଜାନାକୋ ହାର୍ ପାଉଲୁସ୍ କେ ସାବ୍ କେତେ ମାନ୍ଦିର୍ ରାଚା ରାଃ ବାହାରି ଅର୍ ଆଉ ଲିଜାକୋ, ହାର୍ ଇମ୍ତାଗି ମାନ୍ଦିର୍ ରାଚା ରାଃ ଦୁହାର୍ ବାନ୍ଦ୍ ରିକା ଜାନା। ଚିମ୍ତାଙ୍ଗ୍ ଇନ୍‍କୁ ଇନିଃକେ ଗୋଏଃ ନାଙ୍ଗ୍ ସାନାଙ୍ଗ୍ କିଜାକୋ, ଇମ୍ତା ହାଜାର୍ ସିପାହୀ କୋୱାଃ ଗୋମ୍‍କେ କେ ଖାବାର୍ ସେଟେର୍ ଜାନା ଚି ପୁରା ୟୀରୁଶାଲେମ୍ ରେ ହାଲାଗୁଲା ହୋବାଅଃ ତାନା। ଇମ୍ତା ଇନିଃ ସେକାଡ଼୍ ଗି ସିପାହୀକୋକେ ହାର୍ ଶାଅସିପାହୀ କୋୱାଃ ଗୋମ୍‍କେ କୋକେ ଇଦିକେତେ ଇନ୍‍କୁତାଃ ଲାଥାର୍ ନିର୍ ଆଡ଼୍‍ଗୁ ଜାନାଏ; ଏନ୍ତେ ଇନ୍‍କୁ ହାଜାର୍ ସିପାହୀ କୋୱାଃ ଗୋମ୍‍କେ କେ ହାର୍ ଶାଅସିପାହୀ କୋୱାଃ ଗୋମ୍‍କେ କୋକେ ହାର୍ ସିପାହୀକୋକେ ନେଲ୍‍କେତେ ପାଉଲୁସ୍ କେ ବିଡ଼ା ବାଗି ତାଜାକୋ। ଏନ୍ତେ ହାଜାର୍ ସିପାହୀ କୋୱାଃ ଗୋମ୍‍କେ ପାଉଲୁସ୍ ନାଡ଼େଏ ହିଜୁଃ କେତେ ଇନିଃକେ ସାବ୍ କିଜାଏ, ହାର୍ ବାରିୟା ସିକ୍ରି ତେ ଥୋଲ୍ ରାଃ ଆନାଚୁ ଏମ୍ କେତେ ହୋଡ଼ୋକୋକେ କୁଲିକେଃକୋୱାଏ, “ନିଈ ଅକଏ ତାନିଃ, ହାର୍ ଚିନାଃ ରିକା କାଦାଏ?” ମେନ୍ଦୋ ହୋଡ଼ୋକୋ କୋଏତେ ଅକଏ ଚିନାଃ ହାର୍ ଅକଏ ଚିନାଃ କାଉରି କେଦାକୋ। ଚିମ୍ତା ଇନିଃ ହାଲାଗୁଲା ରାଃ ହୋରାତେ ବେଶ୍ ତେ ସାର୍ତି କାଜି କେ କାଏ ସାରିଧାଡ଼ି ଜାନାଏ, ଏଣ୍ଡେ ଇନିଃକେ ଗାଢ଼ ତେ ଇଦି ରାଃ ଆନାଚୁ ଏମ୍ କେଦାଏ। ଚିମ୍ତାଙ୍ଗ୍ ଇନିଃ ସିଢ଼ି ତାଃ ସେଟେର୍ ଜାନାଏ, ଏଣ୍ଡେ ଏନ୍‍ଲେକା ହୋବାଜାନା ଚି ମିଃଥିମ୍ବା ହୋଡ଼ୋକୋୱାଃ ଚାଲ୍ତେ ସିପାହୀ କୋକେ ଇନିଃକେ ଗୋଅ ଇଦି ପାଡ଼ାଅନା। ଚିୟାଃଚି ମିଃଥିମ୍ବା ହୋଡ଼ୋକୋ ନେୟା କାଉରିତାନ୍ ଲୋଃ ଇନିଜାଃ ଦୋୟା ହିଜୁଃ ତାଇକେନାକୋ, “ଇନିଃକେ ଗୋଜିପେ! ଇନିଃକେ ଗୋଜିପେ!” ଚିମ୍ତାଙ୍ଗ୍ ଇନ୍‍କୁ ପାଉଲୁସ୍ କେ ଗାଢ଼ ତେ ଇଦିରାଃ ତାଇକେନାକୋ, ଇମ୍ତା ଇନିଃ ହାଜାର୍ ସିପାହୀ କୋୱାଃ ଗୋମ୍‍କେ କେ କାଜିକିଜାଏ, “ଚିନାଃ ଇଙ୍ଗ୍‍କେ ଆଧିକାର୍ ମେନାଃ ଚି ଇଙ୍ଗ୍ ଆମ୍‍କେ ଜାହାନାଃ କାଜି ଧାଡ଼ିୟାଇଙ୍ଗ୍?” ଇନିଃ କାଜିକେଦାଏ, “ଚିନାଃ ଆମ୍ ୟୁନାନୀ ବାକାଣ୍ ସାରିୟାମ୍? ଚିନାଃ ଆମ୍ ଏନ୍ ମିଶାର୍ ରେନ୍ ହୋଡ଼ ନାହାଲାମ୍, ଅକନିଃ ନେ ହୁଲାଙ୍ଗ୍ କୋରାଃ ସିଦା ରେ ସାର୍କାର୍ ରାଃ ବାଇରୀ ବାଇ କେତେ ଚାଇର୍ ହାଜାର୍ ଡାକୁ କୋକେ ସୁନ୍‍ସାନ୍ ଜାଗା ତେ ଇଦିଲେଃକୋୱାଏ?” ପାଉଲୁସ୍ କାଜିକେଦାଏ, “ଇଙ୍ଗ୍ ଦୋ ତାର୍ସୁସ୍ ସାହାର୍ ରେନ୍ ୟାହୁଦୀ ହୋଡ଼ ତାନିଙ୍ଗ୍! କିଲିକିୟା ରାଇଜ୍ ରାଃ ନୁତୁମାନ୍ ସାହାର୍ ରେନ୍ ଭୁଇଁୟାର୍ ତାନିଙ୍ଗ୍। ଇଙ୍ଗ୍ ଆମ୍ କେ ଆର୍ଜି ମେତାନିଙ୍ଗ୍ ଚି ଇଙ୍ଗ୍‍କେ ହୋଡ଼ୋକୋ ଲୋଃ ବାକାଣ୍ ଏମାଇଙ୍ଗ୍ ମେ।” ଚିମ୍ତାଙ୍ଗ୍ ଇନିଃ କାଜି ନାଙ୍ଗ୍ ଆନାଚୁ ଏମାଇଜାଏ, ଏଣ୍ଡେ ପାଉଲୁସ୍ ସିଢ଼ି ରେ ତିଙ୍ଗୁ କେତେ ହୋଡ଼ୋକୋକେ ତିଈ ତେ ଇସାରା କେଦାଏ। ଚିମ୍ତାଙ୍ଗ୍ ହୋଡ଼ୋକୋ ହାପା ଜାନାକୋ ଇମ୍ତା ଇନିଃ ଇବ୍ରାନୀ ବାକାଣ୍ ରେ କାଜି ଏଟେଃ କେଦାଏ। “ହେ ହାଗାକୋ ଆଡୋଃ ଆପୁକୋ, ଇଙ୍ଗ୍ଆଃ ପାଡ଼୍ ରାଃ କାଜିରୁଆଡ଼୍ କେ ଆୟୁମ୍ଏପେ, ଅକନାଃ ଇଙ୍ଗ୍ ଆପେୟାଃ ନାଡ଼େଏ ରେ ଉଦୁବ୍ ତାନାଇଙ୍ଗ୍।” ଇନ୍‍କୁ ନେୟା ଆୟୁମ୍ କେତେ ଚି ଇନିଃ ଆବୁଲୋଃ ଇବ୍ରାନୀ ବାକାଣ୍ ରେ କାଜି ତାନାଏ, ପୁରାଃଗି ହାପା ଜାନାକୋ। ଇମ୍ତା ଇନିଃ କାଜିକେଦାଏ, ଇଙ୍ଗ୍ ଦୋ ୟାହୁଦୀ ହୋଡ଼ ତାନିଙ୍ଗ୍, କିଲିକିୟା ରାଇଜ୍ ରାଃ ତାର୍ସୁସ୍ ସାହାର୍ ରେ ଇଙ୍ଗ୍ଆଃ ଜାନାମ୍ ହୋବାକାନା, ମେନ୍ଦୋ ନେ ସାହାର୍ ରେ ଗାମାଲିଏଲ୍ ଗୁରୁ ରାଃ କାଟାସୁବା ରେ ଦୁବ୍ କେତେ ଶିଖାଅ କାନିଙ୍ଗ୍ ଆଡୋଃ ଆପୁତାତା କୋୱାଃ ମୁଶା ନାବୀ ରାଃ ଆଇନ୍ କେ ବେଶ୍ ଲେକା ତେ ଶିଖାଅ ନାମ୍ କେଦିଙ୍ଗ୍; ହାର୍ ପାର୍ମେଶ୍ଵାର୍ ଲାଗିନ୍ ନେଲେକା ମୋନ୍ ଲାଗାଅ ଲେଦାଇଙ୍ଗ୍, ଜେଲେକା ଆପେ ସବେନ୍ ଇସିଙ୍ଗ୍ ଲାଗାଅ କାଦାପେ। ଇଙ୍ଗ୍ କଡ଼ାକୋ ହାର୍ କୁଡ଼ିକୋ ଥାଲା ଏତେ ଥୋଲ୍ ଆଉକୋ ତାଇନାଇଙ୍ଗ୍ ଆଡୋଃ ଇନ୍‍କୁକେ ବାନ୍ଦିଅଡ଼୍ଆଃ ରେ ଆଦେର୍ କୋତାଇନିଙ୍ଗ୍, ନେ ହୋରା ରେ ସେସେନ୍ ତାନ୍ କୋକେ ନେତାଃ ସାନ୍ତେ ସାତାଅ କେଃକୋୱାଇଙ୍ଗ୍ ଚି ଇନ୍‍କୁକେ ଗୋଏଃ ରିକା କେଃକୋୱାଇଙ୍ଗ୍। ନେ କାଜି ରାଃ ବିଷାୟ୍ ରେ ମାରାଙ୍ଗ୍ ୟାଜାକ୍ ହାର୍ ସବେନ୍ ମାରାଙ୍ଗ୍‍ସାଭା ରେନ୍ ମାରିହୋଡ଼ୋକୋ ଗୋୱା ତାନ୍‍କୋ। ଇନ୍‍କୁ ତାଃତେ ଇଙ୍ଗ୍ ୟାହୁଦୀ ହାଗାକୋୱାଃ ନୁତୁମ୍ ରେ ଚିଠି ଇଦିକେତେ ଦାମେଶ୍କସ୍ ସାହାର୍ ତେ ସେନ୍ ତାଇକେନାଇଙ୍ଗ୍ ଚି ଅକନ୍‍କୋ ହେନ୍ତାଃ ରେ ତାଇନାକୋ ଇନ୍‍କୁକେ ହ ଦାଣ୍ଡ୍ ଏମାକୋଲାଗିନ୍ ତେ ଥୋଲ୍ କେତେ ୟୀରୁଶାଲେମ୍ ଆଉ କୋୱାଇଙ୍ଗ୍। “ଚିମ୍ତାଙ୍ଗ୍ ଇଙ୍ଗ୍ ସେସେନ୍ ହୋରା ତେ ଦାମେଶ୍କସ୍ ସାହାର୍ ନାଡ଼େଏ ସେଟେର୍ ନାଇଙ୍ଗ୍, ଏଣ୍ଡେ ନେଲେକା ହୋବାଜାନା ଚି ତିକିନ୍ ଇମ୍ତା ରେ ଆଚ୍‍କାଏତେ ମିୟାଃ ମାରାଙ୍ଗ୍ ମାର୍ଶାଲ୍ ରିମିଲ୍‍ଦିଶୁମ୍ ଏତେ ଇଙ୍ଗ୍ଆଃ ସବେନ୍ ପାଡ଼୍ ବିୟୁର୍ ଜାନା। ହାର୍ ଇଙ୍ଗ୍ ଅତେ ରେ ଉୟୁଃ ଜାନାଇଙ୍ଗ୍ ହାର୍ ନେ କାଜି ଆୟୁମ୍ କେଦାଇଙ୍ଗ୍, ‘ହେ ଶାଉଲ୍, ହେ ଶାଉଲ୍, ଆମ୍ ଇଙ୍ଗ୍‍କେ ଚିନାଃ ନାଙ୍ଗ୍ ସାତାଅ ତାନାମ୍?’ ଇଙ୍ଗ୍ କାଜିରୁଆଡ଼୍ କେଦାଇଙ୍ଗ୍, ‘ହେ ପ୍ରାଭୁ, ଆମ୍ ଅକଏ ତାନ୍‍ମେ?’ ଇନିଃ ଇଙ୍ଗ୍‍କେ କାଜିକେଦିଙ୍ଗ୍ଆଏ, ‘ଇଙ୍ଗ୍ ୟୀଶୁ ନାଜ୍ରେଥିୟା ତାନିଙ୍ଗ୍, ଅକନିଃକେ ଆମ୍ ସାତାଅ ତାନାମ୍।’ ଇଙ୍ଗ୍ଆଃ ଗାତିକୋ ମାର୍ଶାଲ୍ ଦୋ ନେଲ୍ କେଦାକୋ ମେନ୍ଦୋ ଅକଏ ଇଙ୍ଗ୍‍କେ କାଜି ତାଇକେନାଏ ଇନିଜାଃ କାଜି କେ କାକୋ ବୁଝାଅ ଜାନା। ଇମ୍ତା ଇଙ୍ଗ୍ କାଜିକେଦାଇଙ୍ଗ୍, ‘ହେ ପ୍ରାଭୁ, ଇଙ୍ଗ୍ ଚିକାୟାଇଙ୍ଗ୍?’ ପ୍ରାଭୁ ଇଙ୍ଗ୍ କେ କାଜିକେଦିଙ୍ଗ୍ଆଏ, ‘ବିରିଃ କେତେ ଦାମେଶ୍କସ୍ ସାହାର୍ ତେ ସେନ୍ ମେ ଆଡୋଃ ଚିକ୍‍ନାଃ କୋ ଆମାଃ ରିକା ଲାଗିନ୍ ଠାହ୍‍ରାଓ କାନା ଏନ୍ତାଃ ଆମ୍ କେ ସବେନାଃ ଉଦୁବୋଗା।’ ଚିମ୍ତା ଏନ୍ ମାର୍ଶାଲ୍ ରାଃ ଯୁନୁଲ୍ ରାଃ ଚାଲ୍ତେ ଇଙ୍ଗ୍‍କେ ଜାହାନାଃ କା ନେଲ୍‍ଜାନା, ଦୋ ଇଙ୍ଗ୍ ଇଙ୍ଗ୍ଆଃ ଗାତି କୋୱାଃ ତିଈ ସାବ୍ କେତେ ଦାମେଶ୍କସ୍ ସାହାର୍ ତେ ହିଜୁଃ ଜାନାଇଙ୍ଗ୍।” “ଏନ୍ତେ ହାନାନ୍ୟାହ୍ ନୁତୁମ୍ ହୋଡ଼ ମୁଶା ନାବୀ ରାଃ ଆଇନ୍ ରାଃ ଲେକାତେ ପାର୍ମେଶ୍ଵାର୍ କେ ବୋରୋତାନ୍ ନିଈ ତାଇକେନାଏ, ଅକନିଃ ଏନ୍ତାଃରେ ତାଇନ୍ ତାନ୍ ସବେନ୍ ୟାହୁଦୀ ହୋଡ଼ୋକୋ ରେ ନୁତୁମାନ୍ ତାଇନ୍ କେନାଏ, ଇନିଃ ଇଙ୍ଗ୍ଆଃ ତାଃ ହିଜୁଃ ନାଏ, ହାର୍ ତିଙ୍ଗୁକେତେ ଇଙ୍ଗ୍‍କେ କାଜିକେଦାଏ, ‘ହେ ହାଗା ଶାଉଲ୍, ଆଡୋଃ ମିଶା ନେଲ୍ ଧାଡ଼ିମ୍।’ ଇମ୍ତାଗି ଇଙ୍ଗ୍ଆଃ ମେଏଃ ଖଲାଅ ଜାନା ଆଡୋଃ ଇଙ୍ଗ୍ ଇନିଃକେ ନେଲ୍ କେଦିଙ୍ଗ୍। ଇମ୍ତା ଇନିଃ କାଜିକେଦାଏ, ‘ଆବୁୱାଃ ଆପୁତାତା କୋୱାଃ ପାର୍ମେଶ୍ଵାର୍ ଆମ୍‍କେ ନେୟାମେନ୍ତେ ଠାହ୍‍ରାଓ କାଃମେୟାଏ ଚି ଆମ୍ ଇନିଜାଃ ସାନାଙ୍ଗ୍ କେ ସାରିମ୍, ହାର୍ ଏନ୍ ଧାର୍ମୀ ହୋଡ଼ କେ ନେଲିମ୍ ହାର୍ ଇନିଜାଃ ମୋଚା ଏତେ ବାକାଣ୍ ଆୟୁମେମ୍। ଚିୟାଃଚି ଆମ୍ ଇନିଜାଃ ପାଡ଼େତେ ସବେନ୍ ହୋଡ଼ୋକୋୱାଃ ନାଡ଼େଏ ରେ ଏନ୍ କାଜିକୋରାଃ ଗୋୱା ବାଇୟୋଗାମ୍ ଅକନାଃ ଆୟୁମ୍ କେଦାମ୍ ହାର୍ ନେଲ୍ କେଦାମ୍। ନାଆ ଚିନାଃ ମେନେଃ ଦେରି ତାନାମ୍? ବିରିଃମେ, ବାପ୍ତିସ୍ମା ଇଦିମେ, ଆଡୋଃ ଇନିଜାଃ ନୁତୁମ୍ ଇଦିକେତେ ଆମାଃ ପାପ୍ କୋକେ ଚାପିତାମେ।’” “ଚିମ୍ତାଙ୍ଗ୍ ଇଙ୍ଗ୍ ୟୀରୁଶାଲେମ୍ ରେ ହିଜୁଃକେତେ ମାନ୍ଦିର୍ ରାଃ ରାଚା ରେ ବିନ୍ତି ତାଇନ୍ କେନାଇଙ୍ଗ୍, ଇମ୍ତା ଆଧା-ଦୁଣୁମ୍ ଲେକା ହୋଇ ଜାନିଙ୍ଗ୍ ହାର୍ ଦାର୍ଶାନ୍ ନେଲ୍ କେଦାଇଙ୍ଗ୍, ହାର୍ ପ୍ରାଭୁ କେ ନେୟା କାଜିତାନ୍ ନେଲ୍ କିଜାଇଙ୍ଗ୍, ‘ଜାଲ୍‍ଦିମେ, ସେକାଡ଼୍ ଗି ୟୀରୁଶାଲେମ୍ ଏତେ ଅଡୋଙ୍ଗ୍ ଥାବୋଃମେ; ଚିୟାଃଚି ଇନ୍‍କୁ ଇଙ୍ଗ୍ଆଃ ବିଷାୟ୍ ରେ ଆମାଃ ଗୋୱା କେ କାକୋ ମାନାତିଙ୍ଗ୍‍ୟା।’ ଇଙ୍ଗ୍ କାଜିକେଦାଇଙ୍ଗ୍, ‘ହେ ପ୍ରାଭୁ, ଇନ୍‍କୁ ଦୋ ଆକୋଗି ସାରିତାନାକୋ ଚି ଇଙ୍ଗ୍ ଆମାଃ ଚେତାନ୍ ରେ ବିଶ୍ଵାସ୍ ତାନ୍ କୋକେ ଜେଲ୍ ଅଡ଼୍ଆଃ ରେ ଆଦେର୍ କୋତାଇନିଙ୍ଗ୍ ହାର୍ ମିୟାଃ ବିନ୍ତିଅଡ଼୍ଆଃ ଏତେ ଏଟାଃ ବିନ୍ତିଅଡ଼୍ଆଃ ରେ ବିଡ଼ା ରିକା କୋତାଇନିଙ୍ଗ୍। ଚିମ୍ତାଙ୍ଗ୍ ଆମାଃ ଗୋୱା ସ୍ଥିଫାନୁସ୍ ରାଃ ମାୟୋମ୍ ଲିଙ୍ଗୀଅଃ ତାଇନା ଇମ୍ତା ଇଙ୍ଗ୍ ହଗି ଏନ୍ତାଃ ରେ ତିଙ୍ଗୁ ଲେନ୍ ତାଇକେନାଇଙ୍ଗ୍ ହାର୍ ଇନିଃକେ ଗୋଗୋଏଃ କେନ୍ କୋୱାଃ ଲିଜାଃ କୋକେ ହୋରୋ ତାଇନ୍ କେନାଇଙ୍ଗ୍।’ ଏନ୍ତେ ପ୍ରାଭୁ ଇଙ୍ଗ୍‍କେ କାଜିକେଦାଏ, ‘ସେନୋଃମେ, ଚିୟାଃଚି ଇଙ୍ଗ୍ ଆମ୍‍କେ ଏଟାଃଜାତି କୋତାଃ ରେ ସାଙ୍ଗିନ୍-ସାଙ୍ଗିନ୍ କୁଲ୍ ମେୟାଇଙ୍ଗ୍।’ ” ହୋଡ଼ୋକୋ ନେ ବାକାଣ୍ ସାନ୍ତେ ଇନିଜାଃ ଆୟୁମ୍ କେଦାକୋ, ଏନ୍ତେ ଜୋର୍ତେ କାଉରି କେତେ କାଜିକେଦାକୋ, “ନେକାନ୍ ହୋଡ଼ କେ ଗୋଜିପେ, ନିଜାଃ ଜୀହିଦୋଃ ଠାଉକା ନାହାଲା!” ଚିମ୍ତାଙ୍ଗ୍ ଇନ୍‍କୁ ଗୁଲ୍ ତାଇନାକୋ ହାର୍ ଆକୋୱାଃ ବାହାରି ଲିଜାଃ କୋ ହୁଦ୍‍ମା ତାଇନାକୋ ହାର୍ ରିମିଲ୍‍ଦିଶୁମ୍ ପାଡ଼୍ ଖିସ୍ ତେ ଧୂଡ଼ି ଆରେଃ ଦୁଡ଼ିଙ୍ଗ୍ ତାଇନାକୋ; ଇମ୍ତା ହାଜାର୍ ସିପାହୀ କୋୱାଃ ଗୋମ୍‍କେ କାଜିକେଦାଏ, “ନିଈ କେ ଗାଢ଼ ତେ ଇଦି କେପେ, ଆଡୋଃ କୋଡ୍ରା ମାଉର୍ କେତେ ଯାଞ୍ଚିପେ, ଏନାତେ ଇଙ୍ଗ୍ ସାରିୟାଇଙ୍ଗ୍ ଚି ହୋଡ଼ୋକୋ ଚିନାଃ ମେନ୍ତେ ଇନିଜାଃ ବିରୋଧ୍ ରେ ନେଲେକା ଗୁଲ୍ ତାନାକୋ।” ଚିମ୍ତାଙ୍ଗ୍ ଇନ୍‍କୁ ଇନିଃକେ ଚାମ୍ଡ଼ାଫିତା ତେ ଥୋଲ୍ କିଜାକୋ ଇମ୍ତା ପାଉଲୁସ୍ ଏନ୍ ଶାଅସିପାହୀ କୋୱାଃ ଗୋମ୍‍କେ କେ ଅକନିଃ ଇନିଜାଃ ନାଡ଼େଏ ରେ ତିଙ୍ଗୁଲେନାଏ, କାଜିକେଦାଏ, “ଚିନାଃ ନେୟା ଠାଉକା ତାନାଃ, ଚି ଆମ୍ ମିହୋଡ଼୍ ରୋମ୍ ରେନ୍ ହୋଡ଼ କେ, ହାର୍ ଏନା ହ ବେଗାର୍ ଦୋଷୀ ଠାହ୍‍ରାଓ କେତେ, କୋଡ୍ରା ମାଉର୍ ରିକାଇୟାମ୍?” ଶାଅସିପାହୀ କୋୱାଃ ଗୋମ୍‍କେ ନେୟା ଆୟୁମ୍ କେତେ ହାଜାର୍ ସିପାହୀ କୋୱାଃ ଗୋମ୍‍କେ ତାଃ ସେନ୍ କେତେ କାଜିକେଦାଏ, “ଆମ୍ ନେୟା ଚିନାଃ ରିକା ତାନାମ୍? ନିଈ ଦୋ ରୋମ୍ ରେନ୍ ହୋଡ଼ ତାନିଃ।” ଏଣ୍ଡେ ହାଜାର୍ ସିପାହୀ କୋୱାଃ ଗୋମ୍‍କେ ପାଉଲୁସ୍ ତାଃ ସେନ୍ କେତେ କାଜିକେଦାଏ, “ଇଙ୍ଗ୍‍କେ ଉଦୁବେମ୍, ଚିନାଃ ଆମ୍ ରୋମ୍ ରେନ୍ ହୋଡ଼ ତାନ୍‍ମେ?” ଇନିଃ କାଜିକେଦାଏ, “ହାଁ।” ନେୟା ଆୟୁମ୍‍କେତେ ହାଜାର୍ ସିପାହୀ କୋୱାଃ ଗୋମ୍‍କେ କାଜିକେଦାଏ, “ଇଙ୍ଗ୍ ରୋମ୍ ରେନ୍ ହୋଡ଼ ହୋବାଅଃ ଲାଗିନ୍ତେ ଥିମ୍ବାଗି ଟାକା ଏମ୍ କେତେ ଏନା ନାମ୍ କାଦାଇଙ୍ଗ୍।” ପାଉଲୁସ୍ କାଜିକେଦାଏ, “ଇଙ୍ଗ୍ ଦୋ ଜାନାମ୍ ଏତେ ରୋମ୍ ରେନ୍ ହୋଡ଼ ତାନିଙ୍ଗ୍।” ଇମ୍ତାଙ୍ଗ୍ ଅକନ୍ କୋ ଇନିଃକେ ସାରି ସାନାଙ୍ଗ୍ ତାଇକେନାକୋ, ଇନ୍‍କୁ ଇମ୍ତାଗି ଇନିଃ ତାଃତେ ଗେନା ଜାନାକୋ, ହାର୍ ହାଜାର୍ ସିପାହୀ କୋୱାଃ ଗୋମ୍‍କେ ହଗି ନେୟା ସାରିକେତେ ଚି ଇନିଃ ରୋମ୍ ରେନ୍ ହୋଡ଼ ତାନିଃ ହାର୍ ଇଙ୍ଗ୍ ଇନିଃକେ ଥୋଲା କାଜାଇଙ୍ଗ୍ ବୋରୋ ଜାନାଏ। ଏଟାଃ ହୁଲାଙ୍ଗ୍ ଠିକ୍-ଠିକ୍ ସାରି ଲାଗିନ୍ ସାନାଙ୍ଗ୍ ତେ ଚି ୟାହୁଦୀ ଗୁରୁକୋ ଇନିଜାଃ ରେ ଚିନାଃ ମେନେଃ ଦୋଷ୍ ଲାଗାଅ ତାନାକୋ, ଇନିଜାଃ ଥୋନୋଲ୍ କେ ଖଲାଅ ତାଦାଏ; ହାର୍ ପ୍ରାଧାନ୍ ୟାଜାକ୍ କୋକେ ଆଡୋଃ ସବେନ୍ ମାରାଙ୍ଗ୍‍ସାଭା କେ ହୁଣ୍ଡିନ୍ ଲାଗିନ୍ ଆନାଚୁ ଏମ୍‍କେଦାଏ, ଆଡୋଃ ପାଉଲୁସ୍ କେ ଲାଥାର୍ ଇଦି କେତେ ଇନ୍‍କୁୱାଃ ନାଡ଼େଏ ରେ ତିଙ୍ଗୁ କିଜାଏ। ପାଉଲୁସ୍ ମାରାଙ୍ଗ୍‍ସାଭା ପାଡ଼୍ ନେଲ୍ ବାଇକେଦାଏ ହାର୍ କାଜିକେଦାଏ, “ହେ ହାଗାକୋ, ଇଙ୍ଗ୍ ଇସିଙ୍ଗ୍ ସାନ୍ତେ ପାର୍ମେଶ୍ଵାର୍ ନାଙ୍ଗ୍ ପୁରା ସାର୍ତି ମୋନ୍ ତେ ଜୀଦାନ୍ ଜୀକାନାଇଙ୍ଗ୍।” ନେୟା ରେ ହାନାନ୍ୟାହ୍ ମାରାଙ୍ଗ୍ ୟାଜାକ୍ ଇନ୍‍କୁକେ ଅକନ୍‍କୋ ଇନିଜାଃ ନାଡ଼େଏ ରେ ତିଙ୍ଗୁ ଲେନାକୋ, ଇନିଜାଃ ମୋଚା ରେ ଥାପ୍ଡ଼ାଅ ଲାଗିନ୍ ଆଚୁ କେଃକୋୱାଏ। ଇମ୍ତାଙ୍ଗ୍ ପାଉଲୁସ୍ ହାନାନ୍ୟାହ୍ କେ କାଜିକେଦାଏ, “ହେ ଚୁନା ପୋତାଅକାନ୍ ଭିତ୍, ପାର୍ମେଶ୍ଵାର୍ ଆମ୍‍କେ ବିଡ଼ା ମେୟାଏ। ଆମ୍ ମୁଶା ନାବୀ ରାଃ ଆଇନ୍ ଲେକାତେ ଇଙ୍ଗ୍ଆଃ ବିଚାର୍ ଲାଗିନ୍ ଦୁବ୍ କାନାମ୍; ଏନ୍ତେ ଚିଲ୍‍କା ଆଇନ୍ ରାଃ ବିରୁଦ୍ଧ୍ ଇଙ୍ଗ୍‍କେ ବିଡ଼ା ଲାଗିନ୍ ଆଚୁ କୋତାନାମ୍?” ଅକନ୍‍କୋ ନାଡ଼େଏ ରେ ତିଙ୍ଗୁ ଲେନାକୋ ଇନ୍‍କୁ କାଜିକେଦାକୋ, “ଚିନାଃ ଆମ୍ ପାର୍ମେଶ୍ଵାର୍ ରାଃ ମାରାଙ୍ଗ୍ ୟାଜାକ୍ କେ ଆପ୍‍ମାନ୍ ତାନାମ୍?” ପାଉଲୁସ୍ କାଜିକେଦାଏ, “ହେ ହାଗାକୋ, ଇଙ୍ଗ୍ କାଇଙ୍ଗ୍ ସାରିତାଇନା ଚି ନିଈ ମାରାଙ୍ଗ୍ ୟାଜାକ୍ ତାନିଃ; ଚିୟାଃଚି ପାବିତାର୍ ପୁଥି ରେ ଅଲାକାନା, ‘ଆପେୟାଃ ହୋଡ଼ୋକୋ ଚେତାନ୍ ରେ ରାଇଜ୍ ତାନ୍ ମୁଖିୟା ନିଜାଃ ଖାରାପ୍ ବାକାଣ୍ ଆଲୋପେ କାଜିୟା।’ ” ଇମ୍ତାଙ୍ଗ୍ ପାଉଲୁସ୍ ନେୟା ସାରିକେତେ ଚି ତାରା ସାଦୁକୀକୋ ଆଡୋଃ ତାରା ଫାରିସୀ ହୋଡ଼ୋକୋ ତାନ୍‍କୋ, ମାରାଙ୍ଗ୍‍ସାଭା ରେ ଜୋର୍ତେ କାଜିକେଦାଏ, “ହେ ହାଗାକୋ, ଇଙ୍ଗ୍ ଫାରିସୀ ହାର୍ ଫାରିସୀ ରାଃ ହୋନ୍ ତାନିଙ୍ଗ୍, ଗୋଜାକାନ୍ କୋୱାଃ ଆଶ୍ରା ଆଡୋଃ ଜୀବିନିରିଦ୍ ରାଃ ବିଷାୟ୍ ରେ ଇଙ୍ଗ୍‍କେ ବିଚାର୍‍ଅଃ ତାନା। ଇମ୍ତାଙ୍ଗ୍ ଇନିଃ ନେ ବାକାଣ୍ କାଜିକେଦାଏ ଇମ୍ତା ଫାରିସୀ ହୋଡ଼ୋକୋୱାଃ ହାର୍ ସାଦୁକୀ କୋୱାଃ ଥାଲା ରେ ଏପେଗେର୍ ହୋବାଜାନା, ହାର୍ ଦୁନୁବ୍ ରେ ବାର୍ ହାପାଟିଙ୍ଗ୍ ହୋବାଜାନାକୋ। ଚିୟାଃଚି ସାଦୁକୀକୋ ଦୋ ନେୟା କାଜିୟାକୋ, ଚି ନା ଜୀବିନିରିଦ୍ ମେନାଃ, ନା ସିର୍ମାଦାସୀ ହାର୍ ନା ଆତ୍ମା ମେନାଃ; ମେନ୍ଦୋ ଫାରିସୀ ହୋଡ଼ୋକୋ ନେ ସବେନାଃ କେ ମାନାତିଙ୍ଗ୍ ୟାକୋ। ଇମ୍ତାଙ୍ଗ୍ ଜୋର୍-ଜୋର୍ତେ ଗୁଲ୍ ଏଟେଃ କେଦାକୋ ଆଡୋଃ ଚିମିନ୍ ଆଇନ୍ ଗୁରୁକୋ ଅକନ୍‍କୋ ଫାରିସୀ ହୋଡ଼ୋକୋୱାଃ ଦାଲ୍ ରେନ୍ ତାଇକେନାକୋ, ଇନ୍‍କୁ ତିଙ୍ଗୁ ଜାନାକୋ, ଏନ୍ତେ ନେୟା କାଜି-କାଜିକେତେ ଏପେଗେର୍ ଏଟେଃ ୟାନାକୋ, ଆଲେ ନେ ହୋଡ଼ ରେ ଜାହାନ୍ ଗାଲ୍ତି କାଲେ ନାମ୍ ତାନା, ଆଡୋଃ ଆଗାର୍ ଜେତାନ୍ ଆତ୍ମା ୟାଦୋ ସିର୍ମାଦାସୀ ଇନିଃକେ କାଜିକିଜାଏ ଏଣ୍ଡେ ଚିନାଃ ହୋବାନା?” ଚିମ୍ତାଙ୍ଗ୍ ଥିମ୍ବାଗି ଏପେଗେର୍ ହୋବାଜାନା, ଇମ୍ତା ହାଜାର୍ ସିପାହୀ କୋୱାଃ ଗୋମ୍‍କେ ନେ ବୋରୋ କେତେ ଚି ପାଉଲୁସ୍ କେ ଖାଣ୍ଡା-ଖାଣ୍ଡା ତାଇୟାକୋ, ଇନିଃ ପାଲ୍‍ଟାନ୍ କୋକେ ଆନାଚୁ ଏମ୍ କେଦାଏ ଚି ଆଡ଼୍‍ଗୁ କେତେ ପାଉଲୁସ୍ କେ ଇନ୍‍କୁୱାଃ ଥାଲା ଏତେ ଜାବ୍ରାଇ ଅଡୋଙ୍ଗିକାକୋ, ହାର୍ ଗାଢ଼ ତେ ଇଦିକେଚାକୋ। ଏନ୍ ନୁବାଃ ଗି ପ୍ରାଭୁ ୟୀଶୁ ଇନିଃତାଃ ତିଙ୍ଗୁ କେତେ କାଜିକିଜାଏ, “ହେ ପାଉଲୁସ୍, ସାହାସ୍ ଏମେ, ଚିୟାଃଚି ଜେଲେକା ଆମ୍ ୟୀରୁଶାଲେମ୍ ରେ ଇଙ୍ଗ୍ଆଃ ଗୋୱା ଏମ୍ କେଦାମ୍, ଏନ୍‍ଲେକା ଗି ଆମ୍‍କେ ରୋମ୍ ସାହାର୍ ରେହ ଗୋୱା ଏହେମ୍ ହୋବାୱା।” ଚିମ୍ତାଙ୍ଗ୍ ସେତାଃ ହୋବାଜାନା ଦୋ ୟାହୁଦୀ ଗୁରୁକୋ ମିଃ ହୋବାକେତେ ରୋଜୋଟ୍ କେଦାକୋ ହାର୍ କିରିୟା ଜୋମ୍ କେଦାକୋ ଚି ଚିମିନ୍ ଜାକେଦ୍ ଆବୁ ପାଉଲୁସ୍ କେ କାବୁ ଗୋଜିୟା, ଏନ୍ ସାନ୍ତେ ଆବୁ ନାଦୋ ଜୋମେୟାବୁ ନାଦୋ ନୁୱେୟାବୁ। ଅକନ୍‍କୋ ଆକୋ ଥାଲା ରେ ଏନ୍ କିରିୟା ଜୋମ୍ ଲେଦାକୋ ଇନ୍‍କୁ ଚାଲିଶ୍ ଝାନ୍ ତେ ଥିମ୍ବା ତାଇକେନାକୋ। ଇନ୍‍କୁ ପ୍ରାଧାନ୍ ୟାଜାକ୍‍କୋ ତାଃ ହାର୍ ମାରିହୋଡ଼ୋକୋ ତାଃ ସେନ୍ କେତେ କାଜିକେଦାକୋ, “ଆଲେ ନେୟା କିରିୟା ଜୋମ୍ କାଦାଲେ ଚିମିନ୍ ଜାକେଦ୍ ଆଲେ ପାଉଲୁସ୍ କେ କାଲେ ଗୋଜିୟା, ଇମିନ୍ ଜାକେଦ୍ କାଲେ ଜୋମେୟା। ଏନାମେନ୍ତେ ନାଆ ମାରାଙ୍ଗ୍‍ସାଭା କୋଲୋଃ ମେଶା କେତେ ହାଜାର୍ ସିପାହୀ କୋୱାଃ ଗୋମ୍‍କେ କେ ବୁଝାଇପେ, ଚି ନେ ପାଉଲୁସ୍ କେ ଆପେୟାଃ ନାଡ଼େଏ ବାହାନା କେତେ ଆୱିୟାଏ, ଯେ ଚି ଆପେ ଇନିଜାଃ ବିଷାୟ୍ ରେ ଆଡୋଃଗି ବେଶ୍ ଲେକାତେ ଯାଞ୍ଚ୍ ରିକା ସାନାଙ୍ଗ୍ ତାନାପେ, ହାର୍ ଆଲେ ଇନିଜାଃ ସେଟେର୍ ସିଦାରେ ଗି ଇନିଃକେ ଗୋଏଃ ଲାଗିନ୍ ସେକାଡ଼୍ ତାଇନାଲେ।” ମେନ୍ଦୋ ପାଉଲୁସ୍ ଆଃ ଗେଡ଼େ ତେ ଆୟୁମ୍ କେଦାଏ ଚି ୟାହୁଦୀକୋ ଇନିଃକେ ଗୋଏଃ ଲାଗିନ୍ ପାହୋମ୍ ତାନାକୋ, ଏଣ୍ଡେ ଗାଢ଼ ରେ ସେନ୍‍କେତେ ପାଉଲୁସ୍ କେ ଉଦୁବ୍ କିଜାଏ। ପାଉଲୁସ୍ ଶାଅସିପାହୀ କୋୱାଃ ଗୋମ୍‍କେ କୋଏତେ ମିହୋଡ଼୍ କେ ଆୟାଃ ତାଃ କେଡ଼ାକେତେ କାଜିକିଜାଏ, “ନେ ଧାଙ୍ଗ୍ଡ଼ା କଡ଼ାକେ ହାଜାର୍ ସିପାହୀ କୋୱାଃ ଗୋମ୍‍କେ ତାଃ ଇଦିକିମେ, ନିଈ ଇନିଃକେ ମିୟାଃ ବାକାଣ୍ ଉଦୁବ୍ ସାନାଙ୍ଗ୍ ତାନାଏ।” ଏନାଲାଗିନ୍ ଇନିଃ-ହିନିଃକେ ହାଜାର୍ ସିପାହୀ କୋୱାଃ ଗୋମ୍‍କେ ତାଃ ଇଦିକେତେ କାଜିକେଦାଏ, “ବାନ୍ଦିକାନ୍ ପାଉଲୁସ୍ ଇଙ୍ଗ୍‍କେ କେଡ଼ା ଆର୍ଜି କେଦାଏ ଚି ନେ ଧାଙ୍ଗ୍ଡ଼ା କଡ଼ା ହାଜାର୍ ସିପାହୀ କୋୱାଃ ଗୋମ୍‍କେ କେ ମିୟାଃ ବାକାଣ୍ କାଜି ସାନାଙ୍ଗ୍ ତାନାଏ, ନିଈ କେ ଇନିଜାଃ ନାଡ଼େଏ ଇଦିକେମ୍।” ହାଜାର୍ ସିପାହୀ କୋୱାଃ ଗୋମ୍‍କେ ଇନିଜାଃ ତିଈ ସାବ୍ କେତେ ଆଡୋଃ ଇନିଃକେ ଏସ୍କାର୍ ଇଦିକେତେ କୁଲିକିଜାଏ, “ଆମ୍ ଇଙ୍ଗ୍‍କେ ଚିନାଃ ଉଦୁବ୍ ସାନାଙ୍ଗ୍ ତାନାମ୍?” ଇନିଃ କାଜିକେଦାଏ, ୟାହୁଦୀ ଗୁରୁକୋ ମିଃ ହୋବାକେତେ ରୋଜୋଟ୍ କାଦାକୋ ଚି ଆମ୍‍କେ ଆର୍ଜି ମେୟାକୋ ଚି ଗାପା ପାଉଲୁସ୍ କେ ମାରାଙ୍ଗ୍‍ସାଭା ରେ ବାହାନା କେତେ ଆୱିୟାମ୍, ଯେ ଚି ଇନ୍‍କୁ ଆଡୋଃଗି ବେଶ୍ ଲେକାତେ ଇନିଜାଃ ଯାଞ୍ଚ୍ ରିକା ସାନାଙ୍ଗ୍ ତାନାକୋ। ମେନ୍ଦୋ ଇନ୍‍କୁୱାଃ ଆର୍ଜି କେ ଆଲୋମ୍ ମାନାତିଙ୍ଗ୍‍ୟା, ଚିୟାଃଚି ଇନ୍‍କୁ ଏତେ ଚାଲିଶ୍ ଝାନ୍ ତେହ ଥିମ୍ବା ହୋଡ଼ୋକୋ ପାଉଲୁସ୍ କେ ଗୋଏଃ ଲାଗିନ୍ ପାହୋମ୍ ତାନାକୋ, ଅକନ୍‍କୋ ନେୟା କିରିୟା ଜୋମ୍ କାଦାକୋ ଚି, ଚିମିନ୍ ଜାକେଦ୍ ଇନ୍‍କୁ ପାଉଲୁସ୍ କେ କାକୋ ଗୋଜିୟା, ଏନ୍ ଜାକେଦ୍ ନାଦୋ ଜୋମେୟାକୋ ନାଦୋ ନୁୱେୟାକୋ। ଆଡୋଃ ନାଆ ଇନ୍‍କୁ ସେକାଡ଼୍ ମେନାକୋୱା ହାର୍ ଆମାଃ କାଜି ଏମ୍ କେ ନେଲ୍ ହୋରା ତାନାକୋ। ଇମ୍ତାଙ୍ଗ୍ ହାଜାର୍ ସିପାହୀ କୋୱାଃ ଗୋମ୍‍କେ ଏନ୍ ଧାଙ୍ଗ୍ଡ଼ା କଡ଼ା କେ ନେ ଆନାଚୁ ଏମ୍ କେତେ ବିଦା କିଜାଏ, “ଜେତାଏ କେ ଆଲୋମ୍ କାଜିୟା ଚି ଆମ୍ ଇଙ୍ଗ୍‍କେ ନେ କାଜିକୋ ଉଦୁବ୍ କାଦିଙ୍ଗାମ୍।” ଇମ୍ତାଙ୍ଗ୍ ଇନିଃ ବାର୍ ହୋଡ଼ ଶାଅସିପାହୀ କୋୱାଃ ଗୋମ୍‍କେ କିନ୍‍କେ କେଡ଼ାକେତେ କାଜିକେଦାଏ, “ଦୁଇ ଶାଅ ସିପାହୀ, ସାତାର୍ ଶାଦୋମ୍ ଦୁବାକାନ୍ କୋ, ଦୁଇ ଶାଅ ବାର୍ଛା ସାସାବ୍ କୋକେ ନିଦା ନାଅ ବାଜେ ରେ କୈସାରିୟା ସାହାର୍ ସେନ୍ ଲାଗିନ୍ ସେକାଡ଼୍ ମାଣ୍ଡାଅ କୋପେ। ଆଡୋଃ ପାଉଲୁସ୍ ଆଃ ସେନ୍ ଲାଗିନ୍ତେ ଶାଦୋମ୍ କେ ସେକାଡ଼୍ କାଇପେ, ଏନାତେ ଇନିଃକେ ଫେଲିକ୍ସ ହାକିମ୍ ରାଃ ନାଡ଼େଏ ବେଶ୍ ତେ ସେଟେର୍ ତାଇୟାପେ।” ଇନିଃ ନେଲେକାନାଃ ଚିଠି ହ ଅଲ୍ କେଦାଏ: “ପୁରାଃ ମାଇନାନ୍ ଫେଲିକ୍ସ ହାକିମ୍ କେ କ୍ଲୌଦିୟୁସ୍ ଲୁସିୟାସ୍ ରାଃ ଜୋହାର୍। ନେ ହୋଡ଼ କେ ୟାହୁଦୀ ଗୁରୁକୋ ସାବ୍ କେତେ ଗୋଏଃ ଲାଗିନ୍ ସାନାଙ୍ଗ୍ କେଦାକୋ, ମେନ୍ଦୋ ଚିମ୍ତା ଇଙ୍ଗ୍ ସାରିକେଦାଇଙ୍ଗ୍ ଚି ଇନିଃ ରୋମ୍ ରେନ୍ ହୋଡ଼ ତାନିଃ, ଇମ୍ତା ପାଲ୍‍ଟାନ୍ କୋକେ ଇଦିକେତେ ଛୋଡ଼ାଓ ଆଉ କିଜାଇଙ୍ଗ୍। ଇଙ୍ଗ୍ ସାରି ସାନାଙ୍ଗ୍ ତାଇକେନାଇଙ୍ଗ୍ ଚି, ଇନିଜାଃ ରେ ଚିନାଃ ମେନ୍ତେ ଦୋଷ୍ ଲାଗାୱି ତାନାକୋ, ଏନାମେନ୍ତେ ଇନିଃକେ ଇନ୍‍କୁୱାଃ ମାରାଙ୍ଗ୍‍ସାଭା ରେ ଇଦିକିଜାଇଙ୍ଗ୍। ଇମ୍ତା ଇଙ୍ଗ୍ ସାରିକେଦାଇଙ୍ଗ୍, ଚି ଇନ୍‍କୁ ଆକୋୱାଃ ୟାହୁଦୀ ଆଇନ୍ ରାଃ କୁଲିକାପାଜି ବିଷାୟ୍ ରେ ଇନିଃକେ ଦୋଷ୍ ଲାଗାଅ ତାନାକୋ, ମେନ୍ଦୋ ଗୋନୋଏଃ ଦାଣ୍ଡ୍ ନାମେ ଲେକା ୟାଦୋ ବାନ୍ଦିଅଡ଼୍ଆଃ ରେ ଆଦେରି ଲେକା ଇନିଃରେ ଜେତାନ୍ ଦୋଷ୍ ବାନୋଃ। ଇମ୍ତାଗି ଇଙ୍ଗ୍‍କେ ଉଦୁବ୍ କେଦାକୋ ଚି ଇନ୍‍କୁ ନେ ହୋଡ଼ କେ ଗୋଏଃ ଲାଗିନ୍ ସାନାଙ୍ଗ୍ ତାନାକୋ ଦୋ ଇଙ୍ଗ୍ ସେକାଡ଼୍ ଗି ଇନିଃକେ ଆମାଃ ତାଃ କୁଲ୍ ତାଇଜାଇଙ୍ଗ୍: ଆଡୋଃ ଦୋଷ୍ ଲାଗାଅତାନ୍ କୋକେ ହଗି ଆନାଚୁ ଏମାଃ କୋୱାଇଙ୍ଗ୍ ଚି ଆମାଃ ନାଡ଼େଏ ରେ ଇନିଃକେ ଦୋଷ୍ ଏମ୍ କାକୋ।” ଏନାମେନ୍ତେ ଜେଲେକା ସିପାହୀ କୋକେ ଆନାଚୁ ଏମ୍ ଲେନା, ଏନ୍‍ଲେକାଗି ଇନ୍‍କୁ ପାଉଲୁସ୍ କେ ଇଦିକେତେ ନିଦା-ନିଦାଗି ଆନ୍ତିପାତ୍ରିସ୍ ସାହାର୍ ରେ ହିଜୁଃ ଲେନାକୋ। ଏଟାଃ ହୁଲାଙ୍ଗ୍ ଏନ୍ ଶାଦୋମ୍ ଦୁବାକାନ୍ କୋକେ ଇନିଃ ଲୋଃ ଗାତି ରେ ସେନ୍ ଲାଗିନ୍ ବାଗେ କେତେ ସିପାହୀକୋ ଗାଢ଼ ତେ ରୁଆଡ଼୍ ଜାନାକୋ। ଇନ୍‍କୁ କୈସାରିୟା ସାହାର୍ ରେ ସେଟେର୍ କେତେ ହାକିମ୍ କେ ଚିଠି ଏମ୍ କିଜାକୋ, ଆଡୋଃ ପାଉଲୁସ୍ କେହ ଇନିଜାଃ ନାଡ଼େଏ ରେ ତିଙ୍ଗୁ କିଜାକୋ। ହାକିମ୍ ଚିଠି ପାଢ଼ାଅ କେତେ କୁଲିକେଦାଏ, “ନିଈ ଅକନ୍ ରାଇଜ୍ ରେନ୍ ତାନିଃ?” ଆଡୋଃ ଇମ୍ତାଙ୍ଗ୍ ସାରିକେଦାଏ ଚି କିଲିକିୟା ରାଇଜ୍ ରେନ୍ ତାନିଃ, ଇମ୍ତା ଇନିଃକେ କାଜିକେଦାଏ, “ଚିମ୍ତା ଆମାଃ ଦୋଷ୍ ଲାଗାଅକୋ ହିଜୁଗାକୋ, ଇମ୍ତା ଇଙ୍ଗ୍ ଆମାଃ ବିଚାର୍ ୟାଇଙ୍ଗ୍।” ଆଡୋଃ ଇନିଃ ପାଉଲୁସ୍ କେ ହେରୋଦ୍ ରାଃ ବିଚାର୍ ଅଡ଼୍ଆଃ ରେ ପାହ୍‍ରା ରେ ମାଣ୍ଡାଅ ରାଃ ଆନାଚୁ ଏମ୍‍କେଦାଏ। ପାଞ୍ଚ୍ ଦିନ୍ ରାଃ ତାୟୋମ୍ତେ ହାନାନ୍ୟାହ୍ ମାରାଙ୍ଗ୍ ୟାଜାକ୍ ଚିମିନାଙ୍ଗ୍ ମାରିହୋଡ଼ୋକୋକେ ଆଡୋଃ ତିର୍ତୁଲୁସ୍ ନୁତୁମ୍ ମିହୋଡ଼୍ ଓକିଲ୍ କେଃ ମିଶାତେ ଆଉ କେଃକୋୱାଏ। ଇନ୍‍କୁ ହାକିମ୍ ରାଃ ନାଡ଼େଏ ରେ ପାଉଲୁସ୍ ବିରୋଧ୍ ରେ କାଜିକେଦାକୋ। ଚିମ୍ତାଙ୍ଗ୍ ପାଉଲୁସ୍ କେଡ଼ା ଜାନାଏ ଏନ୍ତେ ତିର୍ତୁଲୁସ୍ ଇନିଜାଃ ଚେତାନ୍ ରେ ଦୋଷ୍ ଲାଗାଅ କେତେ କାଜି ଏଟେଃ କେଦାଏ: “ହେ ପୁରାଃ ମାଇନାନ୍ ଫେଲିକ୍ସ, ଆମାଃ ଚାଲ୍ତେ ଆଲେକେ ମୁରୁକ୍ ସୁକୁ ହୋବାଅଃ ତାନା, ଆଡୋଃ ଆମାଃ ଯୋଗାଡ଼୍ ଏତେ ନେ ଜାତି ଲାଗିନ୍ତେ ଚିମିନାଙ୍ଗ୍ ଗି ଏତ୍କାନ୍ କାଜିକୋ ସୁଧ୍‍ରାଓ ଇଦିଅଃ ତାନା। ନେୟାକେ ଆଲେ ସବେନ୍ ଜାଗା ଆଡୋଃ ସବେନ୍ ଲେକାତେ ଧାନ୍ୟାବାଦ୍ ଲୋଃ ମାନାତିଙ୍ଗ୍ ତାନାଲେ। ମେନ୍ଦୋ ଏନାମେନ୍ତେ ଚି ଆମ୍‍କେ ଆଡୋଃ ଦୁକୁ ଏହେମ୍ କାଲେ ସାନାଙ୍ଗ୍ ତାନା, ଇଙ୍ଗ୍ ଆମ୍‍କେ ଆର୍ଜି ମେ ତାନାଇଙ୍ଗ୍ ଚି ଦାୟା କେତେ ଆଲେୟାଃ ମିୟାଃ ବାରିୟା କାଜିକୋ ଆୟୁମ୍ ଲେମ୍। ଚିୟାଃଚି ଆଲେ ନେ ହୋଡ଼ କେ ଗୋଣ୍ଡୋଗୋଲ୍ ରିକାନିଃ ଆଡୋଃ ଦିଶୁମ୍ ରେନ୍ ସବେନ୍ ୟାହୁଦୀ କୋରେ ଦାଙ୍ଗା ରିକାନିଃ ଆଡୋଃ ନାଜ୍ରେଥିୟା କୋୱାଃ ଏତ୍କାନ୍ ହୋରା ରେନ୍ ଆୟାର୍ ଇଦିନିଃ ବାଇ କାନାଏ। ଇନିଃ ମାନ୍ଦିର୍ କେ ଆଶୁଦ୍ଧ୍ ରିକା ସାନାଙ୍ଗ୍ କେଦାଏ, ମେନ୍ଦୋ ଆଲେ ଇନିଃକେ ସାବ୍ ତାଇଜାଲେ। (ଆଲେ ଇନିଃକେ ଆଲେୟାଃ ଆଇନ୍ ରାଃ ଲେକାତେ ଦାଣ୍ଡ୍ ଏମ୍ ଲେନ୍ତେୟାଃଲେ; ମେନ୍ଦୋ ହାଜାର୍ ସିପାହୀ କୋୱାଃ ଗୋମ୍‍କେ ଲୁସିୟାସ୍ ଇନିଃକେ ଜାବ୍ରାଇ ଆଲେୟାଃ ତିଈ ତେ ରେଏଃ ଇଦିକିଜାଏ, ଆଡୋଃ ନିଈକେ ଦୋଷ୍ ଲାଗଅତାନ୍ କୋକେ ଆମାଃ ନାଡ଼େଏଃ ହିଜୁଃ ରାଃ ହୁକୁମ୍ ଏମାଃକୋୱାଏ।) ନେ ସବେନ୍ କାଜିକୋକେ ଅକନାଃ ବିଷାୟ୍ ରେ ଆଲେ ଇନିଃକେ ଦୋଷ୍ ଲାଗାୱି ତାନାଲେ, ଆମ୍ ଆମ୍ତେଗୀ ଇନିଃକେ ଯାଞ୍ଚ୍ କେତେ ସାରି କିୟାମ୍।” ୟାହୁଦୀ ଗୁରୁକୋ ହଗି ଇନିଃ ଲୋଃ ମେଶା କେତେ କାଜିକେଦାକୋ, ନେ କାଜି ନେଲେକା ଗିୟା। ଚିମ୍ତାଙ୍ଗ୍ ହାକିମ୍ ପାଉଲୁସ୍ କେ କାଜି ଲାଗିନ୍ତେ ଇସାରା ଏମାଇଜାଏ, ଏଣ୍ଡେ ଇନିଃ କାଜିରୁଆଡ଼୍ କେଦାଏ: “ଇଙ୍ଗ୍ ନେୟା ସାରିକେତେ ଚି ଆମ୍ ଥିମ୍ବାଗି ଶିର୍ମା ଏତେ ନେ ଦିଶୁମ୍ ରେନ୍ ହୋଡ଼ୋକୋୱାଃ ବିଚାର୍ ରିକାତାନାମ୍, ଏନାମେନ୍ତେ ରାଶିକା ତେ ଇଙ୍ଗ୍ ଇଙ୍ଗ୍ଆଃ ନାଙ୍ଗ୍ କାଜିରୁଆଡ଼୍ ତାନିଙ୍ଗ୍। ଆମ୍-ଆମ୍‍ଗି ସାରି ଧାଡ଼ିୟାମ୍ ଚି ଇଙ୍ଗ୍‍କେ ବାରା ଦିନ୍ ଏତେ ଥିମ୍ବା କାହୋବାଅଃ ତାନା ଇଙ୍ଗ୍ ୟୀରୁଶାଲେମ୍ ସାହାର୍ ରେ ଆରାଧାନା ଲାଗିନ୍ତେ ସେନ୍ ଲେନାଇଙ୍ଗ୍। ଇନ୍‍କୁ ଇଙ୍ଗ୍‍କେ ନା ମାନ୍ଦିର୍ ରେ ନା ବିନ୍ତିଅଡ଼୍ଆଃ ରେ, ନା ସାହାର୍ ରେ ଜେତାଏ ଲୋଃ କୁଲିକାପାଜିତାନ୍ ୟାଦୋ ହୋଡ଼ୋକୋକେ ହୁଣ୍ତିତାନ୍ ନାମ୍ କେଦାକୋ; ଆଡୋଃ ଇନ୍‍କୁ ଏନ୍ କାଜିକୋକେ, ଅକନ୍ କୋରାଃ ଇନ୍‍କୁ ନାଆ ଇଙ୍ଗ୍ଆଃ ଚେତାନ୍ ରେ ଦୋଷ୍ ଲାଗାଅ ତାନାକୋ ଆମାଃ ନାଡ଼େଏ ରେ ସାର୍ତି ତାନାଃ ମେନ୍ତେ କାକୋ ଉଦୁବ୍ ଧାଡ଼ିୟାକୋ। ମେନ୍ଦୋ ଇଙ୍ଗ୍ ଆମାଃ ନାଡ଼େଏ ରେ ନେୟା ମାନାତିଙ୍ଗ୍ କେ ତାନିଙ୍ଗ୍ ଚି ଅକନ୍ ହୋରା କେ ଇନ୍‍କୁ ଏତ୍କାନ୍ ହୋରା ମେନ୍ତାନା, ଏନ୍ ହୋରା ରାଃ ନିୟାମ୍ ତେଗି ଇଙ୍ଗ୍ ଇଙ୍ଗ୍ଆଃ ଆପୁତାତା କୋୱାଃ ପାର୍ମେଶ୍ଵାର୍ ରାଃ ସେୱା ତାନିଙ୍ଗ୍, ହାର୍ ଅକନ୍ କାଜି କୋକେ ମୁଶା ନାବୀ ରାଃ ଆଇନ୍ ଆଡୋଃ ନାବୀକୋୱାଃ କିତାବ୍ କୋରେ ଅଲାକାନା, ଏନ୍ ସବେନାଃ ରେ ଇଙ୍ଗ୍ ବିଶ୍ଵାସ୍ ତାନିଙ୍ଗ୍। ଆଡୋଃ ପାର୍ମେଶ୍ଵାର୍ ରେ ଆଶ୍ରା ମାଣ୍ଡାଅୟାଇଙ୍ଗ୍ ଜେଲେକା ଆକୋ ହଗି ମାଣ୍ଡାଅୟାକୋ, ଚି ଧାର୍ମୀ ହାର୍ ଆଧାର୍ମୀ ବାରାନ୍ କୋୱାଃ ଜୀବିନିରିଦ୍ ହୋବାୱା। ନେୟାତେ ଇଙ୍ଗ୍ ଆପାନ୍ ଗି କୋଷିସ୍ କାତେୟାଇଙ୍ଗ୍ ଚି ପାର୍ମେଶ୍ଵାର୍ ରାଃ ହାର୍ ହୋଡ଼ୋକୋୱାଃ ନାଡ଼େଏ ରେ ଇଙ୍ଗ୍ଆଃ ମୋନ୍ ସବେନ୍ ହୁଲାଙ୍ଗ୍ ନିର୍ଦୋଷ୍ ଗି ତାଇନୋଃକା। ଥିମ୍ବାଗି ଶିର୍ମା ରାଃ ତାୟୋମ୍ତେ ଇଙ୍ଗ୍ ଇଙ୍ଗ୍ଆଃ ଗାରିବ୍ ହୋଡ଼ୋକୋକେ ଦାନ୍ ଏମାକୋ ନାଙ୍ଗ୍ ଆଡୋଃ ପାର୍ମେଶ୍ଵାର୍ କେ ଭେଁଟ୍ ରାକାବ୍ ଲାଗିନ୍ତେ ୟୀରୁଶାଲେମ୍ ସାହାର୍ ହିଜୁଃଲେନାଇଙ୍ଗ୍। ଇନ୍‍କୁ ଇଙ୍ଗ୍‍କେ ମାନ୍ଦିର୍ ରେ ଫାର୍ଚିକାନ୍ ରେ, ଥିମ୍ବା ହୋଡ଼ୋ କୋଲୋଃ କାହା ଆଡୋଃ ବେଗାର୍ ଜାହାନ୍ ହାଲାଗୁଲା ତାନ୍ ଲୋଃ ଭେଁଟ୍ ରାକାବ୍ ତାନ୍ ନାମ୍ କେଦିଙ୍ଗାକୋ। ମେନ୍ଦୋ ହେନ୍ତାଃ ରେ ଆସିୟା ରେନ୍ ଚିମିନ୍ ୟାହୁଦୀକୋ ତାଇକେନା ହାର୍ ଇନ୍‍କୁକେ ଠାଉକା ତାଇକେନା। ଚି ଆଗାର୍ ଇଙ୍ଗ୍ଆଃ ବିରୋଧ୍ ରେ ଇନ୍‍କୁତାଃ ଜାହାନ୍ କାଜି ମେନାଃ ରେଦୋ ନେତାଃ ଆମାଃ ନାଡ଼େଏ ରେ ହିଜୁଃକେତେ ଇଙ୍ଗ୍‍କେ ଦୋଷ୍ ଲାଗାଅ ତେୟାଃକୋ। ୟାଦୋ ନେୟା ଆପେ ଗି ଉଦୁବେପେ ଚି ଚିମ୍ତାଙ୍ଗ୍ ଇଙ୍ଗ୍ ମାରାଙ୍ଗ୍‍ସାଭା ରାଃ ସାମାନାଙ୍ଗ୍ ରେ ତିଙ୍ଗୁ ଲେନିଙ୍ଗ୍, ଦୋ ଇନ୍‍କୁ ଇଙ୍ଗ୍ଆଃ ରେ ଅକନ୍ ଗାଲ୍ତି ନାମ୍ କେଦାକୋ? ନେ ମିୟାଃ କାଜି କେ ବାଗେ କେତେ ଅକନାଃ ଚି ଇଙ୍ଗ୍ ଇନ୍‍କୁୱାଃ ଥାଲା ରେ ତିଙ୍ଗୁ କେତେ କାଉରିକେତେ କାଜିଲେଦାଇଙ୍ଗ୍: ଗୋଜାକାନ୍ କୋୱାଃ ଜୀବିନିରିଦ୍ ରାଃ ବିଷାୟ୍ ରେ ଇସିଙ୍ଗ୍ ଇଙ୍ଗ୍ଆଃ ଆପେୟାଃ ସାମାନାଙ୍ଗ୍ ରେ ବିଚାର୍ ହୋବାଅଃ ତାନା।” ଫେଲିକ୍ସ, ଅକନିଃ ନେ ହୋରା ରାଃ କାଜିକୋକେ ଠିକ୍-ଠିକ୍ ସାରି ତାଇକେନାଏ, ଇନ୍‍କୁକେ ନେୟା କାଜିକେତେ କାଜିକାଟାଅ ତାଦାଏ, “ଚିମ୍ତା ହାଜାର୍ ସିପାହୀ କୋୱାଃ ଗୋମ୍‍କେ ଲୁସିୟାସ୍ ହିଜୁଗାଏ, ଏଣ୍ଡେ ଆପେୟାଃ କାଜି ରାଃ ବିଚାର୍ ୟାଇଙ୍ଗ୍।” ହାର୍ ଶାଅସିପାହୀ କୋୱାଃ ଗୋମ୍‍କେ କେ ଆନାଚୁ ଏମ୍ କେଦାଏ ଚି ପାଉଲୁସ୍ କେ କାଟିଃ ସୁକୁ ରେ ମାଣ୍ତାଅ କେତେ ହୋରୋଇପେ, ଆଡୋଃ ଇନିଜାଃ ଗାତି କୋଏତେ ଜାହାଁଏ କେ ହ ଇନିଜାଃ ସେୱା ଲାଗିନ୍ତେ ଆଲୋପେ ମାନାକୋୱା। ହୁଡିଙ୍ଗ୍ ହୁଲାଙ୍ଗ୍ ରାଃ ତାୟୋମ୍ତେ ଫେଲିକ୍ସ ହାକିମ୍ ଆୟାଃ କୁଡ଼ି ଦ୍ରୂସିଲ୍ଲା କେ, ଅକନିଃ ୟାହୁଦୀନୀ ତାଇକେନାଏ, ଆଜାଃ ଲୋଃ ଆଉକିଜାଏ ହାର୍ ପାଉଲୁସ୍ କେ କେଡ଼ାକେତେ ଏନ୍ ବିଶ୍ୱାସ୍ ରାଃ ବିଷାୟ୍ ରେ ଅକନାଃ ମାସୀହ୍ ୟୀଶୁ ରେ ମେନାଃ, ଇନିଃତେ ଆୟୁମ୍ କେଦାଏ। ଚିମ୍ତାଙ୍ଗ୍ ଇନିଃ ଧାରାମ୍ ହାର୍ ସାନାଙ୍ଗ୍ କେ କାବୁ ନାଙ୍ଗ୍, ହାର୍ ହିଜୁଃତାନ୍ ବିଚାର୍ ରାଃ ବିଷାୟ୍ କାଜି ତାଇକେନାଏ, ଇମ୍ତା ଫେଲିକ୍ସ ହାକିମ୍ ବୋରୋ ତେ କାଜିରୁଆଡ଼୍ କେଦାଏ, “ନାଆ ଦୋ ସେନୋଃମେ; ସାମାୟ୍ ନାମେ ରେଦୋ ଇଙ୍ଗ୍ ଆମ୍‍କେ ଆଡୋଃଗି କେଡ଼ା ମେୟାଇଙ୍ଗ୍।” ଇନିଃକେ ପାଉଲୁସ୍ ଏତେ ହୁଡିଙ୍ଗ୍ ଲେକା ଘୁସ୍ ପାଇସା ନାମେ ରାଃ ହଗି ଆଶ୍ରା ତାଇକେନାଏ; ଏନାମେନ୍ତେ ଆଡୋଃଗି କେଡ଼ା-କେଡ଼ାକେତେ ଇନିଃ ଲୋଃ ବାକାଣ୍ ତାଇନ୍ କେନାଏ। ମେନ୍ଦୋ ଚିମ୍ତାଙ୍ଗ୍ ଦୁଇ ଶିର୍ମା ଫାରୋମ୍ ଜାନା, ପୁରକିୟୁସ୍ ଫେସ୍ତୁସ୍, ଫେଲିକ୍ସ ହାକିମ୍ ରାଃ ଜାଗା ରେ ହାକିମ୍ ବାଇଜାନାଏ, ଆଡୋଃ ଫେଲିକ୍ସ ୟାହୁଦୀକୋକେ ଖୁସ୍ ରିକା ରାଃ ସାନାଙ୍ଗ୍ ରେ ପାଉଲୁସ୍ କେ ବାନ୍ଦିକାନ୍ ଗି ବାଗେ ତାଜାଏ। ଫେସ୍ତୁସ୍ ହାକିମ୍ ଏନ୍ ଜାଗା ରେ ସେଟେର୍ କେତେ ଆପି ହୁଲାଙ୍ଗ୍ ତାୟୋମ୍ତେ କୈସାରିୟା ସାହାର୍ ଏତେ ୟୀରୁଶାଲେମ୍ ସାହାର୍ ତେ ସେନୋଃ ଜାନାଏ। ଇମ୍ତାଙ୍ଗ୍ ପ୍ରାଧାନ୍ ୟାଜାକ୍‍କୋ ହାର୍ ୟାହୁଦୀ କୋୱାଃ ମାପ୍‍ରାଙ୍ଗ୍ ହୋଡ଼ୋକୋ ଇନିଜାଃ ନାଡ଼େଏ ପାଉଲୁସ୍ କେ ଦୋଷ୍ ଲାଗାଅ କିଜାକୋ। ହାର୍ ଇନିଃକେ ଆର୍ଜି କେତେ ଇନିଜାଃ ବିଷାୟ୍ ରେ କାଜିକେଦାକୋ ଚି, ଆଲେୟାଃ ମିୟାଃ କାମି କାମିତାମ୍ ପାଉଲୁସ୍ କେ ୟୀରୁଶାଲେମ୍ କେଡ଼ା ଆଉଲିମ୍, ଚିୟାଃଚି ଇନ୍‍କୁ ଇନିଃକେ ହୋରା ରେଗି ଗୋଏଃ ଲାଗିନ୍ତେ ଉକୁ ଦୁବ୍ ଲେନାକୋ। ଫେସ୍ତୁସ୍ କାଜିରୁଆଡ଼୍ କେଦାଏ, “ପାଉଲୁସ୍ କୈସାରିୟା ରେ ବାନ୍ଦିକାନ୍ ମେନାଇଜା, ହାର୍ ଇଙ୍ଗ୍ ସେକାଡ଼୍ ଗି ଏନ୍ତାଃରେ ସେନାଇଙ୍ଗ୍।” ଏନ୍ତେ କାଜିକେଦାଏ, “ଆପେ ରେ ଅକନ୍ କୋ ଆଧିକାରୀ ଲେକା ମେନାପେୟା ଇନ୍‍କୁ ଇଙ୍ଗ୍ଆଃ ଲୋଃ ଦୋଲା, ଆଗାର୍ ନେ ହୋଡ଼ ଜାହାନାଃ ଭୁଲ୍ କାମି-କାମି କାଦାଏ ଏଣ୍ଡେ ଇନିଃ ରେ ଦୋଷ୍ ଲାଗାଅ କାଏ।” ଆଡୋଃ ଇନିଃ ଇନ୍‍କୁୱାଃ ତାଃ ଆଠ୍ ଦାଶ୍ ଦିନ୍ ତାଇନ୍ କେତେ କୈସାରିୟା ତେ ସେନ୍ ଜାନାଏ, ଆଡୋଃ ଏଟାଃ ହୁଲାଙ୍ଗ୍ ବିଚାର୍ ଜାଗା ରେ ଦୁବ୍ କେତେ ପାଉଲୁସ୍ କେ ଆଉ ଲାଗିନ୍ତେ ଆନାଚୁ ଏମ୍‍କେଦାଏ। ଚିମ୍ତା ଇନିଃ ହିଜୁଃ ଜାନାଏ, ଦୋ ଅକନ୍ ୟାହୁଦୀ ଗୁରୁକୋ ୟୀରୁଶାଲେମ୍ ସାହାର୍ ଏତେ ହିଜୁଃକାନ୍ ତାଇକେନାକୋ, ଇନ୍‍କୁ ନାଡ଼େଏ-ନାଡ଼େଏ ତିଙ୍ଗୁ କେତେ ଆୟାଃ ଚେତାନ୍ ରେ ଥିମ୍ବା ମାପ୍‍ରାଙ୍ଗ୍ ଦୋଷ୍ କୋ ଲାଗାଅ କେଦାକୋ, ଅକନାଃ ରାଃ ପ୍ରାମାଣ୍ ଇନ୍‍କୁ କାକୋ ଏମ୍ ଧାଡ଼ି ତାଇନା। ମେନ୍ଦୋ ପାଉଲୁସ୍ କାଜିରୁଆଡ଼୍ କେଦାଏ, “ଇଙ୍ଗ୍ ନା ୟାହୁଦୀ କୋୱାଃ ଆଇନ୍ ରାଃ, ଆଡୋଃ ନା ମାନ୍ଦିର୍ ରାଃ ଆଡୋଃ ନା ରୋମ୍‍ରେନ୍ ରାଜା ରାଃ ବିରୁଦ୍ଧ୍ ରେ ଜେତ୍ନାଃ ଭୁଲ୍ କାମି କାଇଙ୍ଗ୍ ରିକା କାଦିଙ୍ଗ୍।” ଏନ୍ତେ ଫେସ୍ତୁସ୍ ୟାହୁଦୀ ଗୁରୁକୋକେ ରାଶିକା ଏମ୍ ସାନାଙ୍ଗ୍ ତେ ପାଉଲୁସ୍ କେ କାଜିକେଦାଏ, “ଚିନାଃ ଆମ୍ ୟୀରୁଶାଲେମ୍ ସାହାର୍ ସେନ୍ ସାନାଙ୍ଗ୍ ତାନାମ୍; ହାର୍ ଏନ୍ତାଃ ରେ ଇଙ୍ଗ୍ଆଃ ନାଡ଼େଏ ରେ ଆମାଃ ନେ କାଜି କୋରାଃ ବିଚାର୍ ରିକାଅଗା?” ପାଉଲୁସ୍ କାଜିକେଦାଏ, “ଇଙ୍ଗ୍ ରୋମ୍‍ରେନ୍ ରାଜା ରାଃ ବିଚାର୍ ଜାଗା ରେ ତିଙ୍ଗୁ କାନିଙ୍ଗ୍, ଇଙ୍ଗ୍ଆଃ କାଜି କୋରାଃ ବିଚାର୍ ନେତାଃ ରେଗି ହୋବାଅଃ ଚାହି। ଜେଲେକା ଆମ୍ ବୁଗିନ୍ ତେ ସାରିୟାମ୍, ଇଙ୍ଗ୍ ୟାହୁଦୀ କୋୱାଃ ଜେତ୍ନାଃ କାଇଙ୍ଗ୍ ଗାଲ୍ତି କାଦା। ଆଗାର୍ ଇଙ୍ଗ୍ ଦୋଷୀ ତାନିଙ୍ଗ୍ ହାର୍ ଗୋନୋଏଃ ନାମେ ଲେକା ଜାହାନ୍ କାମି ରିକା କାଦିଙ୍ଗ୍, ଦୋ ଗୋଜୋଃ ଲାଗିନ୍ କାଇଙ୍ଗ୍ ଗେନାଅଃ ତାନା; ମେନ୍ଦୋ ଅକନ୍ କାଜିକୋ ଲାଗିନ୍ ନିକୁ ଇଙ୍ଗ୍‍କେ ଦୋଷ୍ ଲାଗାଅ ତାନାକୋ, ଆଗାର୍ ଏନା କୋଏତେ ଜେତାନ୍ କାଜି ରେ ଶାଚାଇ ବାନୋଗା ଏଣ୍ଡେ ଜେତାୟାଃ ଆଧିକାର୍ ବାନୋଗା ଚି ଇଙ୍ଗ୍‍କେ ଇନ୍‍କୁୱାଃ ତିଈ ରେ ଜିମା ଧାଡ଼ିୟାଏ। ଇଙ୍ଗ୍ ରୋମ୍‍ରେନ୍ ରାଜା କେ ବିଚାର୍ ଲାଗିନ୍ତେ ଆର୍ଜି ତାନିଙ୍ଗ୍।” ଏନ୍ତେ ଫେସ୍ତୁସ୍ ପାଞ୍ଚ୍‍ସାଭା ରାଃ ମୁଖିୟା କୋଲୋଃ ବାକାଣ୍ କେତେ କାଜିରୁଆଡ଼୍ କେଦାଏ, “ଆମ୍ ରୋମ୍‍ରେନ୍ ରାଜା କେ ଆର୍ଜି କାଇଜାମ୍, ଆମ୍ ରୋମ୍‍ରେନ୍ ରାଜା ତାଃଗି ସେନାମ୍।” ହୁଡିଙ୍ଗ୍ ହୁଲାଙ୍ଗ୍ ଫାରୋମ୍ ରାଃ ତାୟୋମ୍ତେ ରାଜା ଆଗ୍ରିପ୍ପା ହାର୍ ବିର୍ନିକେ ଆଜାଃ ମିଶି କୈସାରିୟା ସାହାର୍ ତେ ହିଜୁଃ କେତେ ଫେସ୍ତୁସ୍ ଲୋଃ ନାପାମ୍ ଜାନାକିନ୍। ଇନ୍‍କିନାଃ ଏନ୍ତାଃ ରେ ଥିମ୍ବାଗି ହୁଲାଙ୍ଗ୍ ତାଇନ୍ ତାୟୋମ୍ତେ ଫେସ୍ତୁସ୍ ପାଉଲୁସ୍ ରାଃ ବିଷାୟ୍ ରେ ରାଜା କେ ଉଦୁବ୍ କିଜାଏ, “ମିହୋଡ଼୍ ହୋଡ଼ ମେନାଇଜା, ଅକନିଃକେ ଫେଲିକ୍ସ ବାନ୍ଦି କେତେ ବାଗି କାଇଜାଏ। ଚିମ୍ତା ଇଙ୍ଗ୍ ୟୀରୁଶାଲେମ୍ ରେ ତାଇନ୍ କେନାଇଙ୍ଗ୍, ଦୋ ପ୍ରାଧାନ୍ ୟାଜାକ୍‍କୋ ହାର୍ ୟାହୁଦୀ କୋୱାଃ ମାରିହୋଡ଼ୋକୋ ଇନିଜାଃ ବିରୋଧ୍ ରେ ଦୋଷ୍ ଏମ୍ କେଦାକୋ ଆଡୋଃ ସାନାଙ୍ଗ୍ କେଦାକୋ, ଚି ଇନିଜାଃ ରେ ଦାଣ୍ଡ୍ ରାଃ ଆନାଚୁ ଏମୋଃକା। ଇଙ୍ଗ୍ ଇନ୍‍କୁକେ କାଜିରୁଆଡ଼୍ କେଃକୋୱାଇଙ୍ଗ୍ ଚି ରୋମ୍ ରେନ୍ ହୋଡ଼ୋକୋୱାଃ ନେ ନିୟାମ୍ ବାନୋଗା ଚି, ଚିମିନ୍ ସାନ୍ତେ ଦୋଷୀବାଇୟାକାନ୍ ହୋଡ଼ ଆଏଃ କେ ଦୋଷ୍ ଏମ୍ ତାନ୍ କୋତାଃ ନାଡ଼େଏ ରେ ତିଙ୍ଗୁ କେତେ ଦୋଷ୍ କୋରାଃ କାଜିରୁଆଡ଼୍ ନାଙ୍ଗ୍ ସାମାୟ୍ କାଏ ନାମେୟାଏ ଏନ୍ ହୋଡ଼କେ ଦାଣ୍ଡ୍ ଏମ୍ ଲାଗିନ୍ ଜିମା କାଏମୋଗା। ଏନାମେନ୍ତେ ଚିମ୍ତାଙ୍ଗ୍ ଇନ୍‍କୁ ନେତାଃ ରେ ମିଶାତେ ତାଇକେନାକୋ, ଦୋ ଇଙ୍ଗ୍ କାଇଙ୍ଗ୍ ଦେରି କେଦା, ମେନ୍ଦୋ ଏଟାଃ ହୁଲାଙ୍ଗ୍ ଗି ବିଚାର୍ ଜାଗା ରେ ଦୁବ୍ କେତେ ଏନ୍ ହୋଡ଼ୋକୋକେ ଆଉୱେ ଲାଗିନ୍ତେ ଆନାଚୁ ଏମ୍ କେଦିଙ୍ଗ୍। ଚିମ୍ତାଙ୍ଗ୍ ଇନିଃକେ ଦୋଷ୍ ଲାଗାଅତାନ୍ କୋ ତିଙ୍ଗୁ ଜାନାକୋ, ଦୋ ଇନ୍‍କୁ ଏନ୍ ଲେକାନ୍ ଏତ୍କାନ୍ କାଜି କୋରାଃ ଦୋଷ୍ କାକୋ ଏମ୍ କେଦା, ଜେଲେକା ଇଙ୍ଗ୍ ବୁଝାଅଃ ତାଇକେନାଇଙ୍ଗ୍। ମେନ୍ଦୋ ଇନ୍‍କୁ ଆକୋୱାଃ ବିଶ୍ଵାସ୍ ରାଃ ହୋରା ହାର୍ ୟୀଶୁ ନୁତୁମ୍ ମିହୋଡ଼୍ ହୋଡ଼ ରାଃ ବିଷାୟ୍ ରେ, ଅକନିଃ ଗୋଏଃ ଲେନ୍ତାଇକେନାଏ, ଆଡୋଃ ପାଉଲୁସ୍ ଇନିଃକେ ଜୀହିଃ ଉଦୁବ୍ ତାଇକେନାଏ, କୁଲିକାପାଜିଅଃ ତାଇକେନାକୋ। ଇଙ୍ଗ୍ କାଇଙ୍ଗ୍ ସାରିଲେଦାଇଙ୍ଗ୍ ଚି ନେ କାଜି କୋରାଃ ବିଷାୟ୍ ରେ ଚିଲ୍‍କା ସାରିୟାଇଙ୍ଗ୍? ଏନାମେନ୍ତେ ଇଙ୍ଗ୍ ଇନ୍‍କୁକେ କୁଲିକେଃ କୋୱାଇଙ୍ଗ୍, ‘ଚିନାଃ ଆମ୍ ୟୀରୁଶାଲେମ୍ ସାହାର୍ ସେନାମ୍ ଚି ଏନ୍ତାଃ ରେ ନେ କାଜି କୋରାଃ ବିଷାୟ୍ ରେ ବିଚାର୍ ରିକାଅଗା?’ ମେନ୍ଦୋ ଚିମ୍ତା ପାଉଲୁସ୍ ଆର୍ଜି କେଦାଏ ଚି, ଇନିଜାଃ କାଜିକୋରାଃ ବିଷାୟ୍ ରେ ବିଚାର୍ ରାଜା ତାଃ ହୋବାଅଃକା, ଦୋ ଇଙ୍ଗ୍ ଆନାଚୁ ଏମ୍ କେଦାଇଙ୍ଗ୍, ଚି ଚିମିନ୍ ଜାକେଦ୍ ଇନିଃକେ ରୋମ୍‍ରେନ୍ ରାଜା ନାଡ଼େଏ ତେ କାଇଙ୍ଗ୍ କୁଲିୟା, ଇନିଃକେ ବାନ୍ଦି କେତେ ହୋରୋଃ କାଏ।” ଏନ୍ତେ ଆଗ୍ରିପ୍ପା ଫେସ୍ତୁସ୍ କେ କାଜିକେଦାଏ, “ଇଙ୍ଗ୍ ହ ଏନ୍ ହୋଡ଼ କେ ଆୟୁମ୍ ଲାଗିନ୍ ସାନାଙ୍ଗ୍ ତାନିଙ୍ଗ୍।” ଇନିଃ କାଜିକେଦାଏ, “ଗାପା ଆମ୍ ଆୟୁମ୍ କିୟାମ୍।” ଏଟାଃ ହୁଲାଙ୍ଗ୍ ଚିମ୍ତାଙ୍ଗ୍ ଆଗ୍ରିପ୍ପା ହାର୍ ବିର୍ନିକେ ମାରାଙ୍ଗ୍ ଧୂମ୍-ଧାମ୍ ତେ ହିଜୁଃ ଜାନାକିନ୍ ହାର୍ ହାଜାର୍ ସିପାହୀ କୋୱାଃ ଗୋମ୍‍କେ କୋକେ ହାର୍ ହାତୁ ରେନ୍ ମୁଖିୟା ହୋଡ଼ୋକୋ ଲୋଃ ବିଚାର୍ ଜାଗା ରେ ସେଟେର୍ ଜାନାକୋ। ଇମ୍ତା ଫେସ୍ତୁସ୍ ଆନାଚୁ ଏମ୍ କେଦାଏ ଚି ପାଉଲୁସ୍ କେ ଆୱିପେ। ଫେସ୍ତୁସ୍ କାଜିକେଦାଏ, “ହେ ରାଜା ଆଗ୍ରିପ୍ପା, ହାର୍ ହେ ସବେନ୍ ମାଇନାନ୍ ହୋଡ଼ୋକୋ ଅକନ୍‍କୋ ଆବୁ ନେତାଃ ରେ ମେନାବୁୱା, ଆପେ ନେ ହୋଡ଼କେ ନେଲିତାନାପେ, ନିଜାଃ ବିରୋଧ୍ ରେ ସବେନ୍ ୟାହୁଦୀ ହୋଡ଼ୋକୋ ୟୀରୁଶାଲେମ୍ ରେ ହାର୍ ନେତାଃ ରେ ହ କାଉରି-କାଉରି କେତେ ଇଙ୍ଗ୍‍କେ ଆର୍ଜି କେଦାକୋ ଚି ନିଜାଃ ଜୀନିଃ ତାଇନୋଃ ବୁଗିନ୍ ନାହାଲା। ମେନ୍ଦୋ ଇଙ୍ଗ୍ ସାରିକେଦାଇଙ୍ଗ୍ ଚି ଇନିଃ ଏନ୍‍ଲେକା ଜାହାନ୍ କାମି କାଏ ରିକା କାଦାଏ ଚି ଗୋନୋଏଃ ରାଃ ଦାଣ୍ଡ୍ ନାମେୟାଏ, ହାର୍ ଜାବ୍ ଚି ଆଏଃଗି ରାଜା କେ ଆର୍ଜି କିଜାଏ, ଇମ୍ତା ଇଙ୍ଗ୍ ଇନିଃକେ ରୋମ୍ ସାହାର୍ କୁଲ୍ ଲାଗିନ୍ ବିଚାର୍ କେଦାଇଙ୍ଗ୍। ମେନ୍ଦୋ ଇଙ୍ଗ୍ ଇନିଜାଃ ବିଷାୟ୍ ରେ ଜାହାନ୍ ଦୋଷ୍ କାଜି କାଇଙ୍ଗ୍ ନାମ୍ କେଦା ଚି ଇଙ୍ଗ୍ଆଃ ଗୋମ୍‍କେ ତାଃ ଅଲେୟାଇଙ୍ଗ୍। ଏନାମେନ୍ତେ ଇଙ୍ଗ୍ ଇନିଃକେ ଆପେ ସବେନ୍ କୋୱାଃ ନାଡ଼େଏଃ ରେ ଖାସ୍ କେତେ ହେ ରାଜା ଆଗ୍ରିପ୍ପା, ଆମାଃ ନାଡ଼େଏଃ ରେ ଆଉ କିଜାଇଙ୍ଗ୍, ଚି ଯାଞ୍ଚ୍ ରିକା ତାୟୋମ୍ ତେ ଇଙ୍ଗ୍‍କେ ଜାହାନାଃ ଅଲେ ଲାଗିନ୍ ନାମୋଗା। ଚିୟାଃଚି ବାନ୍ଦିକାନ୍ ନିଜାଃ ଚେତାନ୍ ରେ ଅକନ୍ ଦୋଷ୍ କୋ ଏମାକାନା, ଏନାକୋକେ କାଉଦୁବ୍ ରେ, ଇନିଃକେ ରୋମ୍ ସାହାର୍ କୁଲ୍ ଇଙ୍ଗ୍‍କେ ସାମାଗୀ ଆଟ୍‍କାରିଙ୍ଗ୍ ତାନା।” ଆଗ୍ରିପ୍ପା ପାଉଲୁସ୍ କେ କାଜିକିଜାଏ, “ଆମ୍‍କେ ଆପାନାଃ ବିଷାୟ୍ ରେ କାଜି ଲାଗିନ୍ ଆନାଚୁ ଏମୋଃ ତାନା।” ଇମ୍ତାଙ୍ଗ୍ ପାଉଲୁସ୍ ତିଈ ଉଠାଓ କେତେ କାଜିକେଦାଏ। “ହେ ରାଜା ଆଗ୍ରିପ୍ପା, ଚିମିନ୍ ଗି କାଜି କୋରାଃ ୟାହୁଦୀ ଗୁରୁକୋ ଇଙ୍ଗ୍‍କେ ଦୋଷ୍ କୋ ଏମାଇଙ୍ଗ୍ ତାନା, ଇସିଙ୍ଗ୍ ଆମାଃ ନାଡ଼େଏ ରେ ଏନ୍ କାଜି କୋରାଃ କାଜିରୁଆଡ଼୍ ଲାଗିନ୍ ଇଙ୍ଗ୍ ଆପାନ୍ କେ ସୁକୁ ଆଟ୍‍କାର୍ ତାନିଙ୍ଗ୍। ଖାସ୍ କେତେ ନେୟାମେନ୍ତେ ଚି ଆମ୍ ୟାହୁଦୀ କୋୱାଃ ସବେନ୍ ରୀତି ଆଡୋଃ କୁଲିକାପାଜି କୋକେ ସାରିୟାମ୍। ଏନାତେ ଇଙ୍ଗ୍ ଆର୍ଜି ତାନିଙ୍ଗ୍ ଚି ଜାଲେକା ତେହ ଇଙ୍ଗ୍ଆଃ କାଜି କେ ଆୟୁମେମ୍।” “ଇଙ୍ଗ୍ଆଃ ସେସେନ୍ କେ ମିଃ ସିଟିୟା ଏତେ ଇଙ୍ଗ୍ଆଃ ହୋଡ଼ୋକୋ ଥାଲା ରେ ହାର୍ ୟୀରୁଶାଲେମ୍ ସାହାର୍ ରେ ଜେଲେକା ତାଇନ୍ କେନାଇଙ୍ଗ୍, ଏନା ସବେନାଃ ୟାହୁଦୀକୋ ସାରିୟାକୋ। ଆଗାର୍ ଇନ୍‍କୁ ଗୋୱା ଏମ୍ ସାନାଙ୍ଗ୍ତାନ୍ ରେଦୋ, ମିଃ ସିଟିୟା ତେ ଇଙ୍ଗ୍‍କେ ଉରୁମିଙ୍ଗ୍ ୟାକୋ ଚି ଇଙ୍ଗ୍ ଫାରିସୀ ହୋଡ଼ ତାଇକେତେ ଆଲେୟାଃ ଧାରାମ୍ ରାଃ ସବେନ୍ ଏତେ କେଟେଃ ହୋରା ଲେକାତେ ସେସେନ୍ କେନାଇଙ୍ଗ୍। ଆଡୋଃ ନାଆ ଏନ୍ କାଜିଥୋଲ୍ ରାଃ ଆଶ୍ରା ରାଃ ଚାଲ୍ତେ ଅକନାଃ ପାର୍ମେଶ୍ଵାର୍ ଆବୁୱାଃ ଆପୁତାତା କୋଲୋଃ ରିକା ଲେଦାଏ, ଇଙ୍ଗ୍ଆଃ ଚେତାନ୍ ରେ ବିଚାର୍ ରିକାଅଃ ତାନା। ଏନ୍ କାଜିଥୋଲ୍ ରାଃଗି ପୁରାଅଃ ଲାଗିନ୍ତେ ଆଶ୍ରା ମାଣ୍ଡାଅତାନ୍ ଲୋଃ, ଆଲେୟାଃ ବାରା କିଲି ଆକୋୱାଃ ପୁରା ମୋନ୍ ତେ ନିଦା-ଶିଙ୍ଗି ପାର୍ମେଶ୍ଵାର୍ ରାଃ ସେୱା ରିକାତାନ୍ ହିଜୁଃ ନାକୋ। ହେ ରାଜା, ନେ ଆଶ୍ରା ବିଷାୟ୍ ରେଗି ୟାହୁଦୀ ଗୁରୁକୋ ଇଙ୍ଗ୍ଆଃ ଚେତାନ୍ ରେ ଦୋଷ୍ ଏମ୍ ତାନାକୋ। ଜାବ୍ ଚି ପାର୍ମେଶ୍ଵାର୍ ଗୋଜାକାନ୍ କୋକେ ଜୀଉ ବିରିଃ କୋୱାଏ, ଏଣ୍ଡେ ଆପେୟାଃ ନେତାଃ ରେ ନେ ବାକାଣ୍ ଚିନାଃ ବିଶ୍ଵାସ୍ ଲେକା କାପାତିଅଃ ୱା?” “ଇଙ୍ଗ୍ ହଗି ପାହୋମ୍ ତାଇନାଇଙ୍ଗ୍ ଚି ୟୀଶୁ ନାଜ୍ରେଥିୟା ରାଃ ନୁତୁମ୍ ରେ ବିରୋଧ୍ କେତେ ଇଙ୍ଗ୍‍କେ ଥିମ୍ବାଗି ଜାହାନାଃ ରିକା ଚାହି। ଆଡୋଃ ଇଙ୍ଗ୍ ୟୀରୁଶାଲେମ୍ ରେ ନେକାଗି ରିକା କେଦାଇଙ୍ଗ୍, ହାର୍ ପ୍ରାଧାନ୍ ୟାଜାକ୍ କୋଏତେ ଆଧିକାର୍ ନାମ୍ କେତେ ଥିମ୍ବାଗି ପାବିତାର୍ ହୋଡ଼ୋକୋକେ ବାନ୍ଦିଅଡ଼୍ଆଃ ରେ ଆଦେର୍ କେଃ କୋୱାଇଙ୍ଗ୍, ଚିମ୍ତାଙ୍ଗ୍ ଇନ୍‍କୁ ବିଡ଼ା ଗୋଜୋଃ ତାଇନ୍ କେନାକୋ, ଦୋ ଇଙ୍ଗ୍ ହଗି ଇନ୍‍କୁୱାଃ ବିରୋଧ୍ ରେ ନେ କାଜିରେ ସୁକୁଅଃ ତାଇକେନାଇଙ୍ଗ୍। ସବେନ୍ ବିନ୍ତିଅଡ଼୍ଆଃ କୋରେ ଇଙ୍ଗ୍ ଇନ୍‍କୁକେ ସାତାଅ କେତେ ୟୀଶୁ ରାଃ ନିନ୍ଦା ରିକା କୋତାଇକେନାଇଙ୍ଗ୍, ନେତାଃ ସାନ୍ତେ ଚି ଖିସ୍ ତେ ନେକା ଫେରେଃ ଜାନାଇଙ୍ଗ୍ ଚି ଏଟାଃ ସାହାର୍ କୋରେ ହଗି ସେନ୍ କେତେ ଇନ୍‍କୁକେ ସାତାଅ କୋତାଇକେନାଇଙ୍ଗ୍।” “ନେ ଜୋଶ୍ ରେଗି ଚିମ୍ତାଙ୍ଗ୍ ଇଙ୍ଗ୍ ପ୍ରାଧାନ୍ ୟାଜାକ୍ କୋଏତେ ଆଧିକାର୍ ହାର୍ ଆନାଚୁ-ଚିଠି ଇଦି କେତେ ଦାମେଶ୍କସ୍ ସାହାର୍ ତେ ସେନ୍ ତାଇନ୍ କେନାଇଙ୍ଗ୍। ଇମ୍ତା ହେ ରାଜା, ହୋରା ରେ ଉଲ୍‍ଟା ବେଲା ରାଃ ସାମାୟ୍ ରେ ଇଙ୍ଗ୍ ରିମିଲ୍‍ଦିଶୁମ୍ ଏତେ ଶିଙ୍ଗି ତେୟ ଥିମ୍ବା ମିୟାଃ ମାର୍ଶାଲ୍, ଇଙ୍ଗ୍ଆଃ ଆଡୋଃ ଇଙ୍ଗ୍ଆଃ ଲୋଃ ସେନ୍‍ତାନ୍ କୋୱାଃ ସବେନ୍ ପାଡ଼୍ ମାର୍ଶାଲ୍ ବିୟୁର୍ ଅଃତାନ୍ ନେଲ୍ କେଦାଇଙ୍ଗ୍। ଚିମ୍ତାଙ୍ଗ୍ ଆଲେ ସବେନ୍ ଅତେ ରେ ଉୟୁଃ ଜାନାଲେ, ଇମ୍ତା ଇଙ୍ଗ୍ ଇବ୍ରାନୀ ବାକାଣ୍ ରେ, ଇଙ୍ଗ୍ କେ ନେ କାଜିତାନ୍ ମିୟାଃ କାଜି ଆୟୁମ୍ କେଦାଇଙ୍ଗ୍, ‘ହେ ଶାଉଲ୍, ହେ ଶାଉଲ୍, ଆମ୍ ଇଙ୍ଗ୍‍କେ ଚିନାଃ ମେନେଃ ସାତାଅ ତାନାମ୍? ଚୋଖ୍ ସୋଟା ରେ ଫାଦା ଆମ୍ ଲାଗିନ୍ କାଠିନ୍ ମେନାଃ।’ ଇଙ୍ଗ୍ କାଜିକେଦାଇଙ୍ଗ୍, ‘ହେ ପ୍ରାଭୁ, ଆମ୍ ଅକଏ ତାନ୍‍ମେ?’ ପ୍ରାଭୁ କାଜିକେଦାଏ, ‘ଇଙ୍ଗ୍ ୟୀଶୁ ତାନିଙ୍ଗ୍, ଅକନିଃକେ ଆମ୍ ସାତାଅ ତାନାମ୍। ମେନ୍ଦୋ ବିରିଃମେ, ଆମାଃ କାଟା ରେ ତିଙ୍ଗୁନ୍ ମେ, ଚିୟାଃଚି ଇଙ୍ଗ୍ ଆମ୍‍କେ ନେୟାଲାଗିନ୍ ଦାର୍ଶାନ୍ ଏମାଃ ମେୟାଇଙ୍ଗ୍ ଚି ଆମ୍‍କେ ଏନ୍ ବାକାଣ୍ କୋରାଃ ହ ସେୱାନିଃ ଆଡୋଃ ଗୋୱା ବାଇମେୟାଇଙ୍ଗ୍, ଅକନାଃ ଆମ୍ ନେଲ୍ କେଦାମ୍, ଆଡୋଃ ଏନା କୋରାଃ ହଗି ଅକନାଃ ଲାଗିନ୍ ଇଙ୍ଗ୍ ଆମ୍ କେ ଦାର୍ଶାନ୍ ଏମାମେୟାଇଙ୍ଗ୍। ଆଡୋଃ ଇଙ୍ଗ୍ ଆମ୍‍କେ ଆମାଃ ହୋଡ଼ୋକୋ ତେ ହାର୍ ଏଟାଃଜାତି କୋୱାଃ ଏତେ ବାଞ୍ଚାଅ କାତେମେୟାଇଙ୍ଗ୍, ଅକେୟାଃ ନାଡ଼େଏ ରେ ନାଆ ଆମ୍‍କେ ନେୟାମେନ୍ତେ କୁଲ୍ ମେତାନିଙ୍ଗ୍ ଚି ଆମ୍ ଇନ୍‍କୁୱାଃ ମେଏଃ କେ ଖୋଲାଏମ୍, ଚି ଇନ୍‍କୁ ନୁବାଃ ଏତେ ମାସ୍କାଲ୍ ପାଡ଼୍, ହାର୍ ଶାଏତାନ୍ ରାଃ ଆଧିକାର୍ ଏତେ ପାର୍ମେଶ୍ଵାର୍ ପାଡ଼୍ ରୁଆଡ଼୍ ଚାକୋ; ଏନାତେ ପାପ୍ କୋରାଃ ଛାମା, ଆଡୋଃ ଏନ୍ ହୋଡ଼ୋକୋୱାଃ ଲୋଃ ଅକନ୍ କୋ ଇଙ୍ଗ୍ଆଃ ଚେତାନ୍ ରେ ବିଶ୍ଵାସ୍ କେତେ ପାବିତାର୍ ରିକାକାନାକୋ, ଉତ୍ତାରାଧିକାର୍ ନାମେ ଚାକୋ।’” “ଏନାତେ ହେ ରାଜା ଆଗ୍ରିପ୍ପା, ଇଙ୍ଗ୍ ଏନ୍ ସିର୍ମାଦିଶୁମ୍ ରାଃ ଦାର୍ଶାନ୍ ରାଃ କାଜି କେ କାଇଙ୍ଗ୍ ଗେନା କେଦା। ମେନ୍ଦୋ ସିଦା ତେ ଦାମେଶ୍କସ୍ ସାହାର୍ ରେନ୍ କୋକେ, ଏନ୍ତେ ୟୀରୁଶାଲେମ୍ ସାହାର୍ ରେନ୍ କୋକେ ଏନା ତାୟୋମ୍ତେ ୟାହୁଦୀୟା ଜିଲ୍ଲା ରେନ୍ ସବେନ୍ ଜାଗା କୋରେ ତାଇନ୍ ତାନ୍ କୋକେ ଆଡୋଃ ଏଟାଃଜାତି କୋକେ ବୁଝାଅ କୋ ତାଇନାଇଙ୍ଗ୍, ଚି ପାପ୍ କାମି ବାଗେ ତାପେ ହାର୍ ପାର୍ମେଶ୍ଵାର୍ ପାଡ଼୍ ମୋନ୍ ରୁଆଡ଼୍ କେତେ ପାପ୍ କାମି ବାଗେ ତାଦାପେ ଲେକା କାମିପେ। ନେ ବାକାଣ୍ କୋରାଃ ଚାଲ୍ତେ ୟାହୁଦୀକୋ ଇଙ୍ଗ୍‍କେ ମାନ୍ଦିର୍ ରେ ସାବ୍ କେତେ ବିଡ଼ା ଗୋଏଃ ଲାଗିନ୍ ଦାଣା ତାଇନାକୋ। ମେନ୍ଦୋ ପାର୍ମେଶ୍ଵାର୍ ରାଃ ଦେଙ୍ଗା ତେ ଇଙ୍ଗ୍ ଇସିଙ୍ଗ୍ ସାନ୍ତେ ବାଇକାନାଇଙ୍ଗ୍ ଆଡୋଃ ହୁଡିଙ୍ଗ୍ ମାରାଙ୍ଗ୍ ସବେନ୍ କୋୱାଃ ଥାଲା ରେ ଗୋୱା ଏମ୍ କୋୱାଇଙ୍ଗ୍, ହାର୍ ଏନ୍ କାଜିକୋକେ ବାଗି କେତେ ଚିନାଃ ହଗି କାଇଙ୍ଗ୍ କାଜିୟା ଅକନାଃ ନାବୀ କୋ ଆଡୋଃ ମୁଶା ନାବୀ ହଗି କାଜିକାଦାଏ ଚି ହୋବାଅଃ ରାଃ ମେନାଃ। ଚି ମାସୀହ୍ କେ ଦୁକୁ ସାହାତିଙ୍ଗ୍ ହୋବାଅଃୱା, ଇନିଃଗି ସବେନ୍ କୋଏତେ ସିଦାରେ ଗୋଜାକାନ୍ କୋଏତେ ଜୀବିରିଃ କେତେ, ଆବୁୱାଃ ହୋଡ଼ୋକୋୱାଃ ରେ ହାର୍ ଏଟାଃଜାତି କୋୱାଃ ରେ ମାସ୍କାଲ୍ ରାଃ ପାର୍ଚାର୍ ରିକାୟାଏ।” ଚିମ୍ତାଙ୍ଗ୍ ପାଉଲୁସ୍ ନେଲେକାତେ କାଜି ତାଇକେନାଏ, ଇମ୍ତା ଫେସ୍ତୁସ୍ ଜୋର୍ତେ କାଜିକେଦାଏ, “ହେ ପାଉଲୁସ୍, ଆମ୍ ପାଗ୍‍ଲା ତାନ୍‍ମେ। ଥିମ୍ବାଗି ସେଣା ଆମ୍‍କେ ପାଗ୍‍ଲା କେଃମେୟାଏ।” ମେନ୍ଦୋ ପାଉଲୁସ୍ କାଜିକେଦାଏ, “ହେ ପୁରାଃ ମାଇନାନ୍ ଫେସ୍ତୁସ୍, ଇଙ୍ଗ୍ ପାଗ୍‍ଲା ନାହାଲାଇଙ୍ଗ୍, ମେନ୍ଦୋ ସାର୍ତି ହାର୍ ସେଣା ରାଃ କାଜି କୋକେ କାଜିୟାଇଙ୍ଗ୍। ରାଜା ହଗି ଅକନିଜାଃ ନାଡ଼େଏ ରେ ବେଗାର୍ ବୋରୋ କେତେ କାଜି ତାନିଙ୍ଗ୍, ନେ କାଜିକୋ ସାରିୟାଏ, ହାର୍ ଇଙ୍ଗ୍ କେ ବିଶ୍ଵାସ୍ ମେନାଃ ଚି ନେ କାଜିକୋଏତେ ଜାହାନାଃ ଇନିଜେତେ କା ଉକୁ କାନା, ଚିୟାଃଚି ନେ ଘାଟ୍ନା ଜାହାନ୍ କୋଚା ରେ କାହୋବାକାନା। ହେ ରାଜା ଆଗ୍ରିପ୍ପା, ଚିନାଃ ଆମ୍ ନାବୀ କୋୱାଃ କାଜିକେ ବିଶ୍ଵାସ୍ ୟାମ୍? ହାଁ, ଇଙ୍ଗ୍ ସାରିୟାଇଙ୍ଗ୍ ଚି ଆମ୍ ବିଶ୍ୱାସ୍ ୟାମ୍।” ଏନ୍ତେ ଆଗ୍ରିପ୍ପା ପାଉଲୁସ୍ କେ କାଜିକିଜାଏ, “ଆମ୍ ହୁଡିଙ୍ଗ୍ ଗି କାଜି ବୁଝାଅ କେତେ ଇଙ୍ଗ୍‍କେ ଖ୍ରୀଷ୍ଟିୟାନ୍ ବାଇ ସାନାଙ୍ଗ୍ ତାନାମ୍?” ପାଉଲୁସ୍ କାଜିକେଦାଏ, “ପାର୍ମେଶ୍ଵାର୍ ତେ ଇଙ୍ଗ୍ଆଃ ବିନ୍ତି ମେନାଃ ଚି ଚିନାଃ ହୁଡିଙ୍ଗ୍ ଗି କାଜି ଚାହେ ଥିମ୍ବାଗି, ଆମ୍ ଭାଇର୍ କାହା ମେନ୍ଦୋ ଚିମିନ୍ ହୋଡ଼ୋକୋ ଇସିଙ୍ଗ୍ ଇଙ୍ଗ୍ କେ ଆୟୁମ୍ ତାନାକୋ, ନେ ଥୋନୋଲ୍ କୋକେ ବାଗେ କେତେ ଇଙ୍ଗ୍ଆଃ ଲେକା ବାଇୟୋଃ କାକୋ।” ଇମ୍ତା ରାଜା ଆଡୋଃ ହାକିମ୍ ଆଡୋଃ ବିର୍ନିକେ ଆଡୋଃ ଇନ୍‍କୁୱାଃ ଲୋଃ ଦୁବ୍ କାନ୍ କୋ ତିଙ୍ଗୁ ଜାନାକୋ। ଆଡୋଃ ଗେନା ପାଡ଼୍ ତେ ସେନ୍ କେତେ ଆକୋ-ଆକୋ ରେ କାଜିଜାନାକୋ, “ନେ ହୋଡ଼ ନେକା ଦୋ ଚିନାଃ ହ କାଏ ରିକାତାନା, ଜେ ଗୋଜୋଃ ନାମେ ରାଃ ଦାଣ୍ଡ୍ ୟାଦୋ ବାନ୍ଦିଅଡ଼୍ଆଃ ରେ ଆଦେରେନ୍ ଲେକା ମେନାଇଜା।” ଆଗ୍ରିପ୍ପା ଫେସ୍ତୁସ୍ କେ କାଜିକିଜାଏ, “ଆଗାର୍ ନେ ହୋଡ଼ ରୋମ୍‍ରେନ୍ ରାଜା ତାଃ କାଏ ଆର୍ଜି କାନ୍ତେୟାଃ ଏଣ୍ଡେ ବାଗି ଜାନ୍ତେୟାଃଏ।” “ଚିମ୍ତାଙ୍ଗ୍ ନେ କାଜି ଠାହ୍‍ରାଓ ଜାନା ଚି ଆଲେ ଜାହାଜ୍ ରେ ଇଟାଲୀ ରାଇଜ୍ ସେନାଲେ, ଏଣ୍ଡେ ଇନ୍‍କୁ ପାଉଲୁସ୍ ଆଡୋଃ ଚିମିନ୍ ଏଟାଃ ବାନ୍ଦି କୋକେ ହଗି ଯୁଲିୟୁସ୍ ନୁତୁମ୍ ଆଗାସ୍ତୁସ୍ ରାଜା ରାଃ ଶାଅସିପାହୀ କୋୱାଃ ଗୋମ୍‍କେ କୋୱାଃ ଗୋମ୍‍କେ ରାଃ ତିଈ ରେ ଜିମାତାଃ ଲେୟାକୋ। ଆଦ୍ରମୁତିୟୁସ୍ ସାହାର୍ ରାଃ ମିୟାଃ ଜାହାଜ୍ ରେ ଅକନାଃଚି ଆସିୟା ରାଇଜ୍ ରାଃ ଗେନା ରେୟାଃ ଜାଗା କୋରେ ସେନ୍ ରାଃ ତାଇକେନା, ରାକାବ୍ କେତେ ଆଲେ ଏନାରେ ସେନ୍ ଏଟେଃ କେଦାଲେ ଆଡୋଃ ଆରିସ୍ଥାର୍ଖୁସ୍ ନୁତୁମ୍ ଥିସ୍ସଲୁନିକେ ସାହାର୍ ରେନ୍ ମାକିଦୁନିୟା ଆଲେ ଲୋଃ ମିଶାତେ ତାଇକେନାଏ। ଏଟାଃ ହୁଲାଙ୍ଗ୍ ଆଲେ ସିଦୋନ୍ ସାହାର୍ ସେଟେର୍ କେତେ ତିଙ୍ଗୁ ଜାନାଲେ, ହାର୍ ଯୁଲିୟୁସ୍ ପାଉଲୁସ୍ ଚେତାନ୍ ରେ ଦାୟା କେତେ ଆଏଃକେ ଆଜାଃ ଗାତି କୋତାଃ ସେନ୍ ଲାଗିନ୍ ଏମାଇଜାଏ ଚି ଇନିଜାଃ ଦାର୍‍କାର୍ ଜିନିଷ୍ କୋ ଆଉୱେୟାଏ। ଏନ୍ତାଃ ଏତେ ଜାହାଜ୍ ତେ ଆୟୁର୍ ପାଡ଼୍ ଏତେ ହୋୟୋ ହୋୟୋତାନ୍ ଚାଲ୍ତେ ଆଲେ ସାଇପ୍ରାସ୍ ଟାପୁ ଗେନା ହୋରା ତେ ସେନ୍ ଜାନାଲେ, ଆଡୋଃ କିଲିକିୟା ଆଡୋଃ ପାମ୍ଫୁଲିୟା ରାଇଜ୍ ରାଃ ନାଡ଼େଏ ସାମୁଦାର୍ ହୋବା କେତେ ଲୁସିୟା ରାଇଜ୍ ରାଃ ମୁରା ସାହାର୍ ରେ ଆଡ଼୍‍ଗୁ ଜାନାଲେ। ଏନ୍ତାଃରେ ଶାଅସିପାହୀ କୋୱାଃ ଗୋମ୍‍କେ କେ ଆଲେକ୍‍ଜାଣ୍ଡାରିୟା ସାହାର୍ ରାଃ ମିୟାଃ ଜାହାଜ୍ ଇଟାଲୀ ସେନ୍‍ତାନ୍ ନାମ୍ କେଦାଏ, ଆଡୋଃ ଇନିଃ ଆଲେକେ ଏଣ୍ଡେ ରେ ରାକାବ୍ କେଦାଏ। ଚିମ୍ତାଙ୍ଗ୍ ଆଲେ ଥିମ୍ବା ହୁଲାଙ୍ଗ୍ ସାନ୍ତେ ମାଡ଼ି-ମାଡ଼ି ସେନ୍‍କେତେ ମାସ୍କିଲ୍ ତେ କାନିଦୁସ୍ ହାତୁ ରାଃ ନାଡ଼େଏ ସେଟେର୍ ଜାନାଲେ, ଏନ୍ତେ ଏନାଲାଗିନ୍ ଚି ହୋୟୋ ଆଲେୟାଃ ଆୟୁର୍ ପାଡ଼େତେ ହିଜୁଃ ତାଇନା ଆଲେକେ ବାଢ଼ାଅ କାଏ ଏମ୍ ତାଇନା, ଆଲେ ସାଲ୍‍ମୋନି ଟାପୁ ରାଃ ନାଡ଼େଏ ହୋବା କେତେ କ୍ରେତେ ଟାପୁ ରାଃ ଗେନା କେତେ ସେନ୍ ତାଇନାଲେ; ଆଡୋଃ ଏନାରାଃ ଗେନା-ଗେନା କେତେ ସେନ୍ କେତେ ମାସ୍କିଲ୍ ତେ ‘ବୁଗିନ୍ ଘାଟ୍’ ନୁତୁମ୍ ମିୟାଃ ଜାଗା ରେ ସେଟେର୍ ଜାନାଲେ, ଏନ୍ ଜାଗା ତାଃଏତେ ଲାସୟା ହାତୁ ନାଡ଼େଏ ରେ ତାଇକେନା।” ଚିମ୍ତାଙ୍ଗ୍ ଥିମ୍ବାଗି ହୁଲାଙ୍ଗ୍ ଫାରୋମ୍ ଜାନା ହାର୍ ଦାଆ ସେସେନ୍ ହୋରା ରେ ନେୟାଲାଗିନ୍ତେ ବୋରୋୱାନ୍ ଆଦା ତାଇନା ଚି ଉପାସ୍ ରାଃ ହୁଲାଙ୍ଗ୍ ନାଆ ଛାବା କାନ୍ ତାଇକେନା। ଏନାମେନ୍ତେ ପାଉଲୁସ୍ ଇନ୍‍କୁକେ ନେୟା କାଜିକେତେ ବୁଝାଅ କେଦାଏ, “ହେ ସାହେବ୍ କୋ, ଇଙ୍ଗ୍‍କେ ନେକା ଆଦାଅଃ ତାନା ଚି ନେ ସେସେନ୍ ତାନ୍ ହୋରା ରେ ବିପାତୀ ହାର୍ ଥିମ୍ବା ହାନି, ମାଲ୍ ରାଃ ହାର୍ ଜାହାଜ୍ ରାଃ ଭାଇର୍ କାହା ମେନ୍ଦୋ ଆବୁୱାଃ ଜୀଉ କୋରାଃ ହ ହୋବାୱା।” ମେନ୍ଦୋ ଶାଅସିପାହୀ କୋୱାଃ ଗୋମ୍‍କେ ପାଉଲୁସ୍ ରାଃ କାଜି କୋଏତେ ଜାହାଜ୍ କେ ଚାଲାଓନିଜାଃ ହାର୍ ଜାହାଜ୍ ରାଃ ଗୋମ୍‍କେ ରାଃ ବାକାଣ୍ କେ ଥିମ୍ବାଗି ମାନାତିଙ୍ଗ୍ କେଦାଏ ଏନ୍ ଜାହାଜ୍ ଘାଟ୍ ରାବାଙ୍ଗ୍ କାଟାବ୍ ଲାଗିନ୍ତେ ବେଶ୍ କାତାଇନ୍ କେନା; ଏନାମେନ୍ତେ ଥିମ୍ବା କୋୱାଃ ବିଚାର୍ ହୋବାଜାନା ଚି ଏନ୍ତାଃ ଏତେ ଜାହାଜ୍ ରାଡ଼ା କେତେ ଆଗାର୍ ଜାଲେକାତେ ହଗି ହୋବା ଧାଡ଼ିୟୋଃ ରେଦୋ ଫିନିକ୍ସ୍ ଜାହାଜ୍ ଘାଟ୍ ସେଟେର୍ କେତେ ରାବାଙ୍ଗ୍ କାଟାବେୟାକୋ। ନେୟା ଦୋ କ୍ରେତେ ଟାପୁ ରାଃ ଗେନା ରେ ମିୟାଃ ଜାହାଜ୍ ଘାଟ୍ ତାନାଃ ଅକନାଃ ଦାଖିନ୍-ପାଶ୍ଚିମ୍ ହାର୍ ଉତ୍ତାର୍-ପାଶ୍ଚିମ୍ ପାଡ଼୍ ଖଲାଅଃ ତାନା। “ଚିମ୍ତାଙ୍ଗ୍ କାଟିଃ-କାଟିଃ ଦାକ୍ଷିଣ୍ ହୋୟୋ ହିଜୁଃ ତାଇନା, ଇମ୍ତା ଇନ୍‍କୁ ନେୟା ବୁଝାଅ ଜାନାକୋ ଚି ଆବୁୱାଃ ସାନାଙ୍ଗ୍ ପୁରା ଜାନା, ଜାହାଜ୍ ତିଙ୍ଗୁନ୍ ମେଣେଏଃ ଆଂଶି କେ ଉଠାଓକେତେ ଆଡୋଃ ଗେନା କେତେ କ୍ରେତେ ଟାପୁ ପାଡ଼୍ ସେନ୍ ଏଟେଃ କେଦାକୋ। ମେନ୍ଦୋ କାଟିଃ ସାମାୟ୍ ରାଃ ତାୟୋମ୍ତେ ଅତେ ପାଡ଼୍ ଏତେ ମିୟାଃ ମାରାଙ୍ଗ୍ ହୋୟୋ ବିରିଃ ଜାନା, ଏନା ‘ୟୁରକୁଲିନ୍’ କାଜିୟୋଃୱା। ଚିମ୍ତାଙ୍ଗ୍ ମାରାଙ୍ଗ୍ ହୋୟୋ ଜାହାଜ୍ ରେ ଠଅ ଜାନା ଦୋ ଜାହାଜ୍ ଏନ୍ ହୋୟୋ କେ ସାମାନାଙ୍ଗ୍ କାଏ ଧାଡ଼ିକେଦାଏ, ଏନାତେ ଆଲେ ଏନାକେ ଆତୁରିକା କେଦାଲେ ଆଡୋଃ ଏନ୍ ଲେକାତେ ଆତୁ ତାନ୍ ଲୋଃ ଆଲେ ସେନୋଃ ଜାନାଲେ। ଇମ୍ତାଙ୍ଗ୍ କୌଦା ନୁତୁମ୍ ମିୟାଃ ହୁଡିଙ୍ଗ୍ ଟାପୁ ରାଃ ଗେନା ରେ ଆତୁ-ଆତୁ କେତେ ଆଲେ ମାସ୍କିଲ୍ ତେ ହୁଡିଙ୍ଗ୍-ଡୋଙ୍ଗା କୋକେ ଆଲେ ସାବ୍ ଧାଡ଼ି କେଦାଲେ। ଏନ୍ତେ ଜାହାଜ୍ ରେ କାମିତାନ୍ କୋ ଏନ୍ ହୁଡିଙ୍ଗ୍-ଡୋଙ୍ଗା କୋକେ ଉଠାଓ କେତେ ଥିମ୍ବାଗି ଉପାୟ୍ ତେ ହୁଡିଙ୍ଗ୍-ଡୋଙ୍ଗା କୋକେ ଜାହାଜ୍ ରାଃ ଚେତାନ୍ ରେ ଥୋଲ୍ ସାକ୍ତାଅ କେଦାକୋ, ଆଡୋଃ ସୁରତିସ୍ ମାରାଙ୍ଗ୍ ସାଙ୍ଗିନ୍ ଗିତିଲ୍ ଜାଗା ରେ ହାଟ୍‍କାଅ ଜାନ୍ ରାଃ ବୋରୋତେ ପାଲ୍ ଲିଜାଃ କେ ଲାଥାର୍ ଆଡ଼୍‍ଗୁ କେଦାକୋ ହାର୍ ଆତୁ ତାନ୍ ଲୋଃ ସେନୋଃ ଜାନାଲେ। ଚିମ୍ତାଙ୍ଗ୍ ଆଲେ ଆନ୍ଧି ତେ ଥିମ୍ବା ହିଲୋଡୋଲୋ ହାର୍ ଧାକା ଜୋମ୍ କେଦାଲେ, ଦୋ ଏଟାଃ ହୁଲାଙ୍ଗ୍ ଇନ୍‍କୁ ଜାହାଜ୍ ରାଃ ମାଲ୍ କୋକେ ଦୁଡ଼ିଙ୍ଗ୍ ଏଟେଃ କେଦାକୋ; ଆଡୋଃ ଆପି ହୁଲାଙ୍ଗ୍ ରେ ଇନ୍‍କୁ ଆକୋୱାଃ ତିଈ ରେ ଜାହାଜ୍ ରାଃ ଶାଜାଅ ସାମାନ୍ କୋକେ ହଗି ଦୁଡ଼ିଙ୍ଗ୍ ତାଦାକୋ। ଚିମ୍ତାଙ୍ଗ୍ ଥିମ୍ବା ଦିନ୍ ସାନ୍ତେ ନା ଶିଙ୍ଗି, ନା ଇପିଲ୍ କାକୋ ନେଲ୍ ଜାନା ଆଡୋଃ ମାରାଙ୍ଗ୍ ହୋୟୋ ହୋୟୋତାଇକେନା, ଏଣ୍ଡେ ଆଖ୍ରୀ ରେ ଆଲେୟାଃ ବାଞ୍ଚାଅ ରାଃ ସବେନ୍ ଆଶ୍ରା ଟୋଟାଗୋଃ ତାଇକେନା।” ଚିମ୍ତାଙ୍ଗ୍ ଇନ୍‍କୁ ଥିମ୍ବାଗି ହୁଲାଙ୍ଗ୍ ସାନ୍ତେ ରେଙ୍ଗେଃ ରେ ତାଇକେନାକୋ, ଦୋ ପାଉଲୁସ୍ ଆକୋୱାଃ ଥାଲା ରେ ତିଙ୍ଗୁ କେତେ କାଜିକେଦାଏ, “ହେ ହୋଡ଼ୋକୋ ଠାଉକା ତାଇକେନା ଚି ଆପେ ଇଙ୍ଗ୍ଆଃ ବାକାଣ୍ ଆୟୁମ୍‍କେତେ କ୍ରେତେ ଟାପୁ ଏତେ ନା ଜାହାଜ୍ ରାଡ଼ାତେପେ ଆଡୋଃ ନା ନେ ବିପାତୀ ହିଜୁଃତେ ଆଡୋଃ ନା ନେ ହାନି ଉଠାଓତେ। ମେନ୍ଦୋ ନାଆ ଇଙ୍ଗ୍ ଆପେକେ ବୁଝାଅ ପେ ତାନିଙ୍ଗ୍ ଚି ଧିରାଜ୍ ଦହଏପେ, ଚିୟାଃଚି ଆପେ କୋଏତେ ଅକେୟାଃ ହ ଜୀଉ କା ସେନା, ମେନ୍ଦୋ ଖାଲି ଜାହାଜ୍ ଠୋଏଜୋଗା। ଚିୟାଃଚି ପାର୍ମେଶ୍ଵାର୍ ଅକନିଜାଃ ଇଙ୍ଗ୍ ତାନିଙ୍ଗ୍ ଆଡୋଃ ଅକନିଜାଃ ଇଙ୍ଗ୍ ସେୱା ତାନିଙ୍ଗ୍, ଇନିଜାଃ ସିର୍ମାଦାସୀ ଇସିଙ୍ଗ୍ ନିଦା ଇଙ୍ଗ୍ ତାଃ ହିଜୁଃକେତେ କାଜିକେଦାଏ, ‘ହେ ପାଉଲୁସ୍, ଆଲୋମ୍ ବୋରୋୟା! ଆମ୍‍କେ ରୋମ୍‍ରେନ୍ ରାଜା ରାଃ ନାଡ଼େଏ ତିଙ୍ଗୁ ହୋବା ଜାରୁରୀ ମେନାଃ। ହାର୍ ପାର୍ମେଶ୍ଵାର୍ ସବେନ୍ କୋକେ ଅକନ୍‍କୋ ଆମାଃ ଲୋଃ ସେସେନ୍ ହୋରା ରେ ମେନାକୋୱା, ଆମ୍‍କେ ଏମ୍ କାଦାଏ।’ ଏନାମେନ୍ତେ ହେ ବୁଗିନ୍ ହୋଡ଼ୋକୋ, ଧିରାଜ୍ ଦହଏପେ; ଚିୟାଃଚି ଇଙ୍ଗ୍ ପାର୍ମେଶ୍ଵାର୍ ତାଃ ବିଶ୍ଵାସ୍ ୟାଇଙ୍ଗ୍, ଚି ଇଙ୍ଗ୍‍କେ ଚିଲ୍‍କା କାଜିକାନା ଏନ୍‍ଲେକାଗି ହୁୟୋଗା। ମେନ୍ଦୋ ଆବୁକେ ଜାହାନ୍ ଟାପୁ ରେ ସେନ୍ କେତେ ତାଇନ୍ ପାଡ଼ାଅଗା।” ଚିମ୍ତା ଚାଉଦା ନିଦା ହୋବାଜାନା, ଆଡୋଃ ଆଲେ ଆଦ୍ରିୟା ସାମୁଦାର୍ ରେ ଆଦ୍ ତର୍ସା ସେନ୍ ତାଇନାଲେ, ଦୋ ଆଧା ନିଦା ରାଃ ସାମାୟ୍ ରେ ଜାହାଜ୍ ରେ କାମିତାନ୍ କୋ ଆନୁମାନ୍ କେତେ ସାରି କେଦାକୋ ଚି ଆଲେ ଜାହାନ୍ ଦିଶୁମ୍ ରାଃ ନାଡ଼େଏ ରେ ସେଟେର୍ ତାନାଲେ। ଗାଡା ସୋଙ୍ଗ୍ ଇମ୍ତା ଇନ୍‍କୁ ବିଶ୍ ପୁର୍ସା ଗାଡା କୋ ନାମ୍ କେଦା, ଆଡୋଃ-ଆଡୋଃଗି ଆୟୁର୍ ସେନ୍ କେତେ ସୋଙ୍ଗ୍ କେଦାକୋ ଏନ୍ତାଃ ପାନ୍ଦ୍ରା ପୁର୍ସା କୋ ନାମ୍ କେଦା। ଇମ୍ତାଙ୍ଗ୍ ଦିରି ଜାଗା ରେ ଠଅ ରାଃ ବୋରୋତେ ଇନ୍‍କୁ ଜାହାଜ୍ ରାଃ ତାୟୋମ୍ ପାଡ଼୍ ରେ ଚାଇର୍ ଆଂଶି ଜାହାଜ୍ ତିଙ୍ଗୁନ୍ ତେୟାଃ ମେଣେଏଃ ଉୟୁଃ କେଦାକୋ, ଆଡୋଃ ସେତାଃଅଚା ମେନ୍ତେ ହୋରୋ କେଦାକୋ। ମେନ୍ଦୋ ଚିମ୍ତାଙ୍ଗ୍ ଜାହାଜ୍ ରେ କାମିତାନ୍ କୋ ଜାହାଜ୍ ଏତେ ନିର୍ ସାନାଙ୍ଗ୍ ତାଇକେନାକୋ, ଆଡୋଃ ଆୟୁର୍ ପାଡ଼୍ ଏତେ ଜାହାଜ୍ ତିଙ୍ଗୁନ୍ ମେଣେଏଃ ରାଃ ଆଂଶି କେ ଉୟୁଃ ରାଃ ବାହାନା ରେ ହୁଡିଙ୍ଗ୍-ଡୋଙ୍ଗା କେ ସାମୁଦାର୍ ରେ ଆଡ଼୍‍ଗୁ ତାଦାକୋ। ଇମ୍ତା ପାଉଲୁସ୍ ଶାଅସିପାହୀ କୋୱାଃ ଗୋମ୍‍କେ ଆଡୋଃ ସିପାହୀ କୋକେ କାଜିକେଦାଏ, “ଆଗାର୍ ନିକୁ ଜାହାଜ୍ ରେ କାକୋ ତାଇନା ଏଣ୍ଡେ ଆପେ ହଗି କାପେ ବାଞ୍ଚାଅଗା।” ଇମ୍ତାଙ୍ଗ୍ ସିପାହୀକୋ ବାୟ୍‍ହାର୍ କେ ହାଃ କେତେ ହୁଡିଙ୍ଗ୍ ଡୋଙ୍ଗା କୋକେ ଉୟୁଃ ତାଦାକୋ। ଇମ୍ତାଙ୍ଗ୍ ସେତାଃ ହୋବାଅଃ ରାଃ ତାଇକେନା ଇମ୍ତାଙ୍ଗ୍ ପାଉଲୁସ୍ ନେୟା କାଜିକେତେ, ସବେନ୍ କୋକେ ଜୋମ୍ ଲାଗିନ୍ତେ ବୁଝାଅ କେଃକୋୱାଏ, “ଇସିଙ୍ଗ୍ ଚାଉଦା ଦିନ୍ ତାନାଃ ଆପେ ନେଲ୍-ନେଲ୍‍କେତେ ରେଙ୍ଗେଃଗି ତାଇନ୍ କାନାପେ, ଆଡୋଃ କାପେ ଜୋମ୍ କାଦା। ଏନାଲାଗିନ୍ ଆପେକେ ବୁଝାଅପେ ତାନିଙ୍ଗ୍ ଚି ଜାହାନାଃ ଜୋମ୍ କେପେ, ଏନାତେ ଆପେୟାଃ ବାଞ୍ଚାଅ ହୋବାଅଃକା; ଚିୟାଃଚି ଆପେ କୋତେ ଜେତାୟାଃ ବୋଅ ରାଃ ମିୟାଃ ଉବ୍ ହଗି କା ଉୟୁଗୋଗା।” ହାର୍ ନେୟା କାଜିକେତେ ହୋଲୋଙ୍ଗ୍ ଇଦିକେତେ ସବେନ୍ କୋୱାଃ ନାଡ଼େଏ ରେ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ ଆଡୋଃ କେଚାଃ କେତେ ଜୋମ୍ ଏଟେଃ କେଦାଏ। ଇମ୍ତାଙ୍ଗ୍ ଇନ୍‍କୁ ୟଗି ସାହାସ୍ ନାମ୍ କେଦାକୋ ଏନ୍ତେ ଜୋମ୍ କେଦାକୋ। ଆଲେ ସବେନ୍ ମେଶା କେତେ ଜାହାଜ୍ ରେ ଦୁଇ ଶାଅ ଛୟଶ୍ତୋର୍ ଝାନ୍ ହୋଡ଼ୋ ତାଇ କେନାଲେ। ଚିମ୍ତାଙ୍ଗ୍ ଜୋମ୍ କେତେ ବି ଜାନାକୋ ଦୋ ଗହମ୍ କୋକେ ସାମୁଦାର୍ ରେ ଦୁଡ଼ିଙ୍ଗ୍ କେତେ ଜାହାଜ୍ କେ ହାଲ୍‍କା ତାଇକେନାକୋ। ଚିମ୍ତାଙ୍ଗ୍ ଶିଙ୍ଗି ଅଡୋଙ୍ଗ୍ ଜାନା ଇମ୍ତାଙ୍ଗ୍ ଇନ୍‍କୁ ଏନ୍ ଦିଶୁମ୍ କେ କାକୋ ନେଲ୍ ଉରୁମ୍ କେଦା, ମେନ୍ଦୋ ମିୟାଃ ଥିମ୍ବାଗି ଗିତିଲ୍ ଜାଗା ନେଲ୍ କେଦାକୋ ଏନା ରାଃ ଗେନା ଚାକାର୍ ତାଇକେନା, ଆଡୋଃ ବିଚାର୍ କେଦାକୋ ଚି ଆଗାର୍ ହୋବା ଧାଡ଼ି ରେଦୋ ନେଣ୍ଡେରେ ଜାହାଜ୍ କେ ତିଙ୍ଗୁ ୟାଲେ। ଇମ୍ତାଙ୍ଗ୍ ଇନ୍‍କୁ ଜାହାଜ୍ ତିଙ୍ଗୁନ୍ ମେଣେଏଃ ରାଃ ଆଂଶି କୋକେ ରାଡ଼ା କେତେ ସାମୁଦାର୍ ରେ ବାଗେ ତାଦାକୋ ଆଡୋଃ ଏନ୍ ସାମାୟ୍ ରେଗି ପାଲ୍ ଲିଜାଃ ରାଃ ବାୟ୍‍ହାର୍ କେ ରାଡ଼ା ତାଦାକୋ, ଆଡୋଃ ହୋୟୋ ରାଃ ସାମାନାଙ୍ଗ୍ ପାଡ଼୍ ଆୟୁର୍ ପାଲ୍-ଲିଜାଃ କେ ରାକାବ୍ କେତେ ସାମୁଦାର୍ ଗେନା ପାଡ଼୍ ସେନ୍ ଜାନାକୋ। ମେନ୍ଦୋ ବାରିୟା ସାମୁଦାର୍ ମେଶାକାନ୍ ଜାଗା ଥାଲା ରେ ଜାହାଜ୍ କେ ତିଙ୍ଗୁ କେଦାକୋ, ଆଡୋଃ ସାମାନାଙ୍ଗ୍ ଭାଗ୍ ଠୋକାର୍ ଜୋମ୍ କେତେ ଡୁବିଃ ଜାନା ହାର୍ କା ହିଲାଅନା; ମେନ୍ଦୋ ଦୋୟା ପାଡ଼୍ ରାଃ ହିସା ଲାହାର୍ ରାଃ ପେଡ଼େଏ ତେ ଠଏଃ ଏଟେଃ ଜାନା। ଇମ୍ତାଙ୍ଗ୍ ସିପାହୀକୋ ନେୟା ବିଚାର୍ କେଦାକୋ ଚି ବାନ୍ଦିକାନ୍ କୋକେ ଗୋଏଃ ତାକୋଆବୁ, ନେକା ଆଲୋକା ହୋବାଅଃକା ଚି ଜେତାଏ ପାହୁଁରାୱ ଅଡୋଙ୍ଗ୍ କେତେ ନିରାଏ। ମେନ୍ଦୋ ଶାଅସିପାହୀ କୋୱାଃ ଗୋମ୍‍କେ ପାଉଲୁସ୍ କେ ବାଞ୍ଚାଅ ରାଃ ସାନାଙ୍ଗ୍ ତେ ଇନ୍‍କୁକେ ନେ ବିଚାର୍ ଏତେ ରକାଅ କେଦାଏ, ଆଡୋଃ ନେୟା କାଜିକେଦାଏ, ଚି ଅକଏକୋ ପାହୁଁରାୱ ଧାଡ଼ିୟାକୋ, ସିଦା ଦୋନ୍ କେତେ ଗେନା ଫାରାମ୍ ଅଡୋଙ୍ଗ୍ କାକୋ। ଆଡୋଃ ବାକିକୋ ତାକ୍ତା କୋତେ ଆଡୋଃ ଏଟାଃକୋ ଜାହାଜ୍ ରାଃ ଏଟାଃ-ଏଟାଃ ଜିନିଷ୍ କୋୱାଃ ସାହାରା ତେ ଅଡୋଙ୍ଗଅଃ କାକୋ। ହାର୍ ନେଲେକାତେ ସବେନ୍ କୋ ବାଞ୍ଚାଅ ଅଡୋଙ୍ଗ୍ ଜାନାକୋ। ଚିମ୍ତାଙ୍ଗ୍ ଆଲେ ବାଞ୍ଚାଅ କେତେ ସାମୁଦାର୍ ଗେନା ଅଡୋଙ୍ଗ୍ ଜାନାଲେ, ଇମ୍ତା ସାରି କେଦାଲେ ଚି ନେୟା ମାଲ୍‍ଟା ଟାପୁ କାଜିୟୋଗା। ହାର୍ ଏନ୍ତାଃରେନ୍ ତାଇନ୍ ତାନ୍ ହୋଡ଼ୋକୋ ଆଲେୟାଃ ଚେତାନ୍ ରେ କାନେଲାକାନ୍ ପୁରାଃଗି ଦାୟା କେଦାକୋ, ଚିୟାଃଚି ଦାଆ ଗାମା ତାଇନାଏ ହାର୍ ରାବାଙ୍ଗ୍ ତାଇନା, ଏନାତେ ଇନ୍‍କୁ ସେଙ୍ଗେଲ୍ ତିଙ୍ଗ୍ କେତେ ଆଲେ ସବେନ୍ କୋକେ ନାଡ଼େଏ କେଡ଼ା ଲେଃକେୟାକୋ। ଚିମ୍ତାଙ୍ଗ୍ ପାଉଲୁସ୍ ସାହାନ୍ ହୁଣ୍ତି କେତେ ସେଙ୍ଗେଲ୍ ରେ ମାଣ୍ଡାଅ କେଦାଏ, ଇମ୍ତା ମିୟାଃ ବିଷ୍ ରାକାବ୍ ବିଙ୍ଗ୍ ସେଙ୍ଗେଲ୍ ରାଃ ଏଲାଙ୍ଗ୍ ନାମ୍ କେତେ ଅଡୋଙ୍ଗ୍ ଜାନାଏ ହାର୍ ଇନିଜାଃ ତିଈ ରେ ବିୟୁର୍ ଜାନାଏ। ଚିମ୍ତାଙ୍ଗ୍ ଏନ୍ତାଃରେ ତାଇନ୍ ତାନ୍ କୋ ବିଙ୍ଗ୍ କେ ଇନିଜାଃ ତିଈ ରେ ବିୟୁରାକାନ୍ ନେଲ୍ କିଜାକୋ, ଦୋ ଆକୋ-ଆକୋରେ କାଜି ଜାନାକୋ, “ସାର୍ତିଗୀ ନେ ହୋଡ଼-ହୋଡ଼ ଗୋଗୋଏଃ ନିଈ ତାନିଃ, ସାମୁଦାର୍ ଏତେ ବାଞ୍ଚାଅ ଜାନ୍ ରେହଗି ବିଚାର୍ ଦେବୀ ଜୀହିଃ କାଏ ଏମାଇଜାଏ।” ଏନ୍ତେ ଇନିଃ ବିଙ୍ଗ୍ କେ ସେଙ୍ଗେଲ୍ ରେ ତିଈ ହିଲାଅ କେତେ ଦୁଡ଼ିଙ୍ଗ୍ କିଜାଏ, ହାର୍ ଇନିଃକେ ଜେତାନ୍ ହାନି କା ହୋବାଜାନା। ମେନ୍ଦୋ ଇନ୍‍କୁ ନେଲ୍ ହୋରା ତାଇନାକୋ ଚି ଇନିଃ ମୋ କେନୋଗାଏ, କାରେ ମିଶାତୋରା ଉୟୁଃକେତେ ଗୋଏଃ କେନୋଃ ଗାଏ, ମେନ୍ଦୋ ଚିମ୍ତାଙ୍ଗ୍ ଇନ୍‍କୁ ଥିମ୍ବା ସାମାୟ୍ ସାନ୍ ନେଲ୍‍କିଜାକୋ ହାର୍ ନେଲ୍ କେଦାକୋ ଚି ଇନିଜାଃ ଜେତ୍ନାଃ ହାନି କାହୋବାଜାନା ଦୋ ଆକୋ ଥାଲା ରେୟାଃ କାଜିକେ ବାଦ୍‍ଲି କେତେ କାଜିକେଦାକୋ, ନିଈ ଦୋ ଜାହାନ୍ ଦେଓତା ତାନିଃ। ଏନ୍ ଜାଗା ରାଃ ନାଡ଼େଏ-ଜାପାଃ କୋରେ ପୁବୁଲିଉସ୍ ନୁତୁମ୍ ମିୟାଃ ଟାପୁ ରାଃ ମୁଖିୟା ରାଃ ଅତେ ତାଇକେନା। ଇନିଃ ଆଜାଃ ଅଡ଼୍ଆଃ ଇଦିକେତେ ତିନ୍ ଦିନ୍ ସାନ୍ ଗାତିଦୁଲାଡ଼୍ ଲେକା ସେୱା କେଃଲେୟାଏ। ପୁବୁଲିଉସ୍ ଆଃ ଆପୁ କେ ଉରୁୟୁ ହାର୍ ଝାଡ଼ା-ଉଷାଡ଼୍ ସାବ୍ ଲିଜାଏ। ଏନ୍ତେ ପାଉଲୁସ୍ ଇନିଜାଃ ଅଡ଼୍ଆଃ ସେନ୍ କେତେ ବିନ୍ତି କେଦାଏ ହାର୍ ଇନିଜାଃ ରେ ତିଈ ମାଣ୍ତାଅ କେତେ ଇନିଃକେ ଚାଙ୍ଗାଇ କିଜାଏ। ଚିମ୍ତାଙ୍ଗ୍ ନେଲେକା ହୋବାଜାନା ଦୋ ଏନ୍ ଟାପୁ ରେନ୍ ବାଚାୱାକାନ୍ ବେମାରୀକୋ ହିଜୁଃ ଲେନାକୋ ହାର୍ ଚାଙ୍ଗାଇ ଜାନାକୋ ଇନ୍‍କୁ ଆଲେକେ ଥିମ୍ବାଗିକୋ ମାଇନ୍ କେଦା, ହାର୍ ଚିମ୍ତାଙ୍ଗ୍ ଆଲେ ସେନ୍ ଏଟେଃ ଜାନାଲେ ଇମ୍ତା ଅକନାଃ ଆଲେୟାଃ ଲାଗିନ୍ତେ ଦାର୍‍କାର୍ ତାଇକେନା, ଜାହାଜ୍ ରେ ମାଣ୍ତାଅ ତାଦାକୋ। ତିନ୍ ମାହିନା ତାୟୋମ୍ତେ ଆଲେ ଆଲେକ୍‍ଜାଣ୍ଡାରିୟା ସାହାର୍ ରାଃ ମିୟାଃ ଜାହାଜ୍ ରେ ସେନ୍ ଜାନାଲେ, ଅକନାଃ ଏନ୍ ଟାପୁ ରେ ରାବାଙ୍ଗ୍ କାଟାବ୍ ଇମ୍ତା ତାଇକେନା, ହାର୍ ଏନା ଜାହାଜ୍ ରାଃ ଆୟୁର୍ ରେ ଜାଁୱା ଦେଓତା ରାଃ ଚିହ୍ନା ତାଇକେନା। ସୁର୍କୁସା ସାହାର୍ ରେ ସେଟେର୍ କେତେ ଆଲେ ତିନ୍ ଦିନ୍ ସାନ୍ତେ ତାଇଜାନାଲେ। ଏନ୍ତାଃ ତେ ଆଲେ ବିୟୁର୍ କେତେ ରେଗିୟୁସ୍ ସାହାର୍ ତେ ହିଜୁଃଲେନାଲେ ହାର୍ ଏଟାଃ ହୁଲାଙ୍ଗ୍ ତାୟୋମ୍ତେ ଦାଖିନ୍ ପାଡ଼େତେ ହୋୟୋ କେଦାଏ, ଏନ୍ତେ ଆଲେ ଏଟାଃ ହୁଲାଙ୍ଗ୍ ପୁତିୟୁଲି ସାହାର୍ ତେ ହିଜୁଃଲେନାଲେ। ଏନ୍ତାଃ ରେ ଆଲେକେ ଚିମିନ୍ ବିଶ୍ଵାସୀ ହାଗାକୋ ନାମ୍‍ଜାନାକୋ, ହାର୍ ଇନ୍‍କୁ ୱାଃ କାଜି ରେ ଆଲେ ଇନ୍‍କୁତାଃ ସାତ୍ ଦିନ୍ ସାନ୍ତେ ତାଇଜାନାଲେ, ହାର୍ ନେଲେକାତେ ଆଲେ ରୋମ୍ ସାହାର୍ ତେ ସେନୋଃ ଜାନାଲେ। ଏନ୍ତାଃ ଏତେ ବିଶ୍ଵାସୀ ହାଗାକୋ ଆଲେୟାଃ ସାମାଚାର୍ ଆୟୁମ୍‍କେତେ ଆପ୍ରିୟୁସ୍ ରାଃ ଛକୋ ହାର୍ ଆପି ଡେରା ସାନ୍ତେ ଆଲେ ଲୋଃ ନାପାମ୍ ହିଜୁଃ ନାକୋ। ଇନ୍‍କୁ କେ ନେଲ୍‍କେତେ ପାଉଲୁସ୍ ପାର୍ମେଶ୍ଵାର୍ ରାଃ ଧାନ୍ୟାବାଦ୍ କେଦାଏ ହାର୍ ସାହାସ୍ ନାମ୍ କେଦାଏ। ଚିମ୍ତାଙ୍ଗ୍ ଆଲେ ରୋମ୍ ସାହାର୍ ତେ ସେଟେର୍ ଜାନାଲେ, ଦୋ ପାଉଲୁସ୍ କେ ମିହୋଡ଼୍ ସିପାହୀ ଲୋଃ ଅକନିଃ ଇନିଃକେ ବାଚାୱି ତାଇନାଏ, ଏସ୍କାର୍ ତାଇନ୍ ଲାଗିନ୍ ଆନାଚୁ ନାମ୍‍ନା। ଆପି ହୁଲାଙ୍ଗ୍ ରାଃ ତାୟୋମ୍ତେ ଇନିଃ ୟାହୁଦୀ କୋୱାଃ ମୁଖିୟା ହୋଡ଼ୋକୋକେ କେଡ଼ା କେଃକୋୱାଏ, ହାର୍ ଚିମ୍ତାଙ୍ଗ୍ ଇନ୍‍କୁ ହୁଣ୍ତି ଜାନାକୋ ଦୋ ଇନିଃ କାଜିକେଦାଏ, “ହେ ହାଗାକୋ ଇଙ୍ଗ୍ ଆବୁୱାଃ ହୋଡ଼ୋକୋୱାଃ ୟାଦୋ ଆପୁତାତା କୋୱାଃ ନିୟାମ୍ ରାଃ ବିରୋଧ୍ ରେ ଜେତ୍ନାଃ କାଇଙ୍ଗ୍ ରିକା କେଦା, ଏନାରେ ହଗି ବାନ୍ଦି ବାଇକେତେ ୟୀରୁଶାଲେମ୍ ସାହାର୍ ଏତେ ରୋମ୍ ଆଧିକାରୀ ହୋଡ଼ୋ କୋୱାଃ ତିଈ ରେ ଜିମାଜାନାଇଙ୍ଗ୍। ରୋମାନ୍ ହୋଡ଼ୋକୋ ଇଙ୍ଗ୍‍କେ ଯାଞ୍ଚ୍ କେତେ ବାଗେ ସାନାଙ୍ଗ୍ କେଦାକୋ, ଚିୟାଃଚି ଇଙ୍ଗ୍ଆଃ ରେ ଗୋନୋଏଃ ଦାଣ୍ଡ୍ ନାମେ ଲେକାନ୍ ଜେତାନ୍ ଦୋଷ୍ କାତାଇନ୍ କେନା। ମେନ୍ଦୋ ଚିମ୍ତାଙ୍ଗ୍ ୟାହୁଦୀ ଗୁରୁକୋ ନେୟା ରାଃ ବିରୋଧ୍ ରେ କାଜି ଏଟେଃ କେଦାକୋ, ଦୋ ଇଙ୍ଗ୍‍କେ ରୋମ୍‍ରେନ୍ ରାଜା ରାଃ ନାଡ଼େଏ ରେ ଆର୍ଜି ପାଡ଼ାଅ ଜାନା; ନେୟା କାହା ଚି ଇଙ୍ଗ୍‍କେ ଇଙ୍ଗ୍ଆଃ ହୋଡ଼ୋକୋୱାଃ ଚେତାନ୍ ରେ ଜେତାନ୍ ଦୋଷ୍ ଏମ୍ ରାଃ ତାଇକେନା। ଏନାଲାଗିନ୍ତେ ଇଙ୍ଗ୍ ଆପେକେ କେଡ଼ା କାଃପେୟାଇଙ୍ଗ୍, ଚି ଆପେ ଲୋଃ ନାପାମାଇଙ୍ଗ୍ ହାର୍ତେ ବାକାଣ୍ କୁଦୁମେୟାଇଙ୍ଗ୍, ଚିୟାଃଚି ଇସ୍ରାଏଲ୍ ଦିଶୁମ୍ ରେନ୍ କୋୱାଃ ଆଶ୍ରା ମାସୀହ୍ ଲାଗିନ୍ତେ ଇଙ୍ଗ୍ ନେ ସିକ୍ରି ତେ ଥୋଲା କାନାଇଙ୍ଗ୍।” ହିନ୍‍କୁ ଇନିଃକେ କାଜିକେଦାକୋ, “ନାଦୋ ଆଲେ ଆମାଃ ବିଷାୟ୍ ରେ ୟାହୁଦୀୟା ଜିଲ୍ଲା ରେନ୍ କୋଏତେ ଚିଠିକୋ ନାମ୍ କେଦାଲେ, ନାଦୋ ହାଗାକୋ ଏତେ ଜେତାଏ ହଗି ଆମାଃ ବିଷାୟ୍ ରେ ଜାହାନାଃ ଉଦୁବ୍ କେଦାକୋ, ଆଡୋଃ ନାଦୋ ଖାରାପ୍ ବିଷାୟ୍ କାଜିକେଦାକୋ। ମେନ୍ଦୋ ଆମାଃ ବିଚାର୍ ଚିନାଃ ତାନାଃ? ଏନାଗି ଆଲେ ଆମ୍ ତାଃଏତେ ଆୟୁମ୍ ସାନାଙ୍ଗ୍ ତାନାଲେ, ଚିୟାଃଚି ଆଲେ ସାରିତାନାଲେ ଚି ସବେନ୍ ଜାଗା ନେ କାଜି କୋରାଃ ବିରୋଧ୍ ହୋଡ଼ୋକୋ ବାକାଣ୍ ତାନାକୋ।” ଏନ୍ତେ ଇନ୍‍କୁ ଇନିଜାଃ ଲାଗିନ୍ତେ ମୁଶିଙ୍ଗ୍ ହୁଲାଙ୍ଗ୍ ଠାହ୍‍ରାଓ କେଦାକୋ, ଆଡୋଃ ଥିମ୍ବାଗି ହୋଡ଼ୋକୋ ଇନିଃ ତାଃରେ ହୁଣ୍ତି ଜାନାକୋ, ହାର୍ ଇନିଃ ପାର୍ମେଶ୍ଵାର୍ ରାଃ ରାଇଜ୍ ରାଃ ଗୋୱା ଏମ୍‍ତାନ୍ ଲୋଃ, ହାର୍ ମୁଶା ନାବୀ ରାଃ ଆଇନ୍ ହାର୍ ନାବୀ କୋୱାଃ କିତାବ୍ କୋଏତେ ୟୀଶୁ ରାଃ ବିଷାୟ୍ ରେ ବୁଝାଅ-ବୁଝାଅ କେତେ ସେତାଃ ଏତେ ଆୟୁବ୍ ସାନ୍ତେ କାଜିକେଦାଏ। ଏନ୍ତେ ଚିମିନାଙ୍ଗ୍ କୋ ଏନ୍ କାଜିକୋକେ ମାନାତିଙ୍ଗ୍ ଜାନାକୋ ହାର୍ ଚିମିନାଙ୍ଗ୍ କୋ କାକୋ ବିଶ୍ୱାସ୍ କେଦା। ଚିମ୍ତାଙ୍ଗ୍ ଇନ୍‍କୁ ଆକୋ ଥାଲା ରେ ମିଃ ମୋନ୍ କାକୋ ହୋବାଜାନା, ଏଣ୍ଡେ ପାଉଲୁସ୍ ରାଃ ନେ କାଜି ରେ ଇନ୍‍କୁ ସେନୋଃ ଜାନାକୋ। “ପାବିତାର୍ ଆତ୍ମା ୟାଶାୟାହ୍ ନାବୀ ରାଃ ହୋରାତେ ଆପେୟାଃ ଆପୁତାତା କୋଲୋଃ ଠିକ୍ ଗି କାଜିକାଦାଏ, ‘ସେନ୍ କେତେ ନେ ହୋଡ଼ୋକୋକେ କାଜିୟାକୋମ ଚି, ଆୟୁମ୍ ଦୋକୋ ଆୟୁମେୟା ମେନ୍ଦୋ କାକୋ ବୁଝାଅଃୱା। ଚିୟାଃଚି ନେ ହୋଡ଼ୋ କୋୱାଃ ମୋନ୍ ମୋଟା ହାର୍ ଇନ୍‍କୁୱାଃ ଲୁତୁର୍ ରେ ଜୋର୍ତେ କାଜି ରେ ଆୟୁମ୍ ତାନାକୋ, ହାର୍ ଇନ୍‍କୁ ଆକୋୱାଃ ମେଏଃ କୋ ବାନ୍ଦ୍ କାଦାକୋ, ଏନ୍‍ଲେକା ଆଲୋକା ହୋବାଅଃ ଚି ଇନ୍‍କୁ ଚିଉଲାଅ ମେଏଃ ତେକୋ ନେଲେୟା ହାର୍ ଲୁତୁର୍ ତେକୋ ଆୟୁମେୟା, ହାର୍ ମୋନ୍ ରେ କୋ ବୁଝାଅଃୱା ହାର୍ ରୁଆଡ଼୍ ଅଃୱାକୋ, ହାର୍ ଇଙ୍ଗ୍ ଇନ୍‍କୁକେ ଚାଙ୍ଗାଇ କୋୱାଇଙ୍ଗ୍।’ ଏନାତେ ଆପେ ସାରିକେପେ ଚି ପାର୍ମେଶ୍ଵାର୍ ରାଃ ନେ ବାଞ୍ଚାଅ ରାଃ କାଜି ଏଟାଃଜାତି କୋତାଃ କୁଲ୍‍ଜାନା, ହାର୍ ଇନ୍‍କୁ ଆୟୁମେୟାକୋ।” ଚିମ୍ତାଙ୍ଗ୍ ଇନିଃ ନେୟା କାଜିକେଦାଏ ଦୋ ୟାହୁଦୀକୋ ଆକୋ ଥାଲା ରେ ଥିମ୍ବାଗି କୁଲିକାପାଜି ଏଟେଃ କେଦାକୋ ହାର୍ ଏନ୍ତାଃ ଏତେ ସେନୋଃ ଜାନାକୋ। ଇନିଃ ପୁରା ଦୁଇ ଶିର୍ମା ଆଜାଃ ଡେରା ଅଡ଼୍ଆଃ ରେ ତାଇଜାନାଏ। ହାର୍ ଅକନ୍ କୋ ଇନିଃତାଃ ହିଜୁଃ ତାଇନାକୋ ଏନ୍ ସବେନ୍ କୋଲୋଃ ନାପାମ୍ ତାଇନାଏ ହାର୍ ଜେତାଏ ଇନିଃକେ କାକୋ କାଜି କାଟାଅ ତାଇନା ହାର୍ ବେଗାର୍ ବୋରୋ ତାନ୍ ଲୋଃ ପାର୍ମେଶ୍ଵାର୍ ରାଃ ରାଇଜ୍ ରାଃ ପାର୍ଚାର୍ ତାନ୍ ହାର୍ ପ୍ରାଭୁ ୟୀଶୁ ମାସୀହ୍ ରାଃ କାଜିକୋ ଶିଖାଅ ତାଇନାଏ। ପାଉଲୁସ୍ ଆଃ ହୋରାତେ ଅକନିଃ ୟୀଶୁ ମାସୀହ୍ ରାଃ ଦାସୀ ତାନିଃ, ହାର୍ କୁଲାକାନ୍ ଚେଲା ହୋବାଅଃ ଲାଗିନ୍ତେ କେଡ଼ାକାନାଏ, ହାର୍ ପାର୍ମେଶ୍ଵାର୍ ରାଃ ଏନ୍ ସୁସାମାଚାର୍ ଲାଗିନ୍ତେ ସାଲା କାନାଏ। ଅକନାଃ ଲାଗିନ୍ ପାର୍ମେଶ୍ଵାର୍ ସିଦା ଏତେଗି ଆଜାଃ ନାବୀ କୋୱାଃ ହୋରାତେ ପାବିତାର୍ ପୁଥି ରେ, ଆଜାଃ ହୋନ୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ବିଷାୟ୍ ରେ କାଜିଏମ୍ ଲେଦାଏ, ଇନିଃ ହୋଡ଼ମୋ ରାଃ ଲେକାତେ ଦୋ ଦାଉଦ୍ ଆଃ କିଲି ରେ ଜାନାମ୍ ଜାନାଏ। ହାର୍ ପାବିତାର୍ ଆତ୍ମା ରାଃ ହୋରାତେ ଗୋଜାକାନ୍ କୋଏତେ ଜୀବିନିରିଦ୍ ଜାନ୍ତେ ପେଡ଼େଏ ଲୋଃ ପାର୍ମେଶ୍ଵାର୍ ରାଃ ହୋନ୍ ବାଇଜାନାଏ। ଇନିଃ ୟୀଶୁ ମାସୀହ୍ ଆବୁୱାଃ ପ୍ରାଭୁ ତାନିଃ। ଇନିଜାଃ ହୋରାତେ ଆବୁକେ ଆନୁଗ୍ରାହ୍ ଆଡୋଃ କୁଲାକାନ୍ ଚେଲା ପାଦ୍ ନାମ୍ କାନା ଚି ଇନିଜାଃ ନୁତୁମ୍ ରାଃ ହୋରାତେ ସବେନ୍ ଜାତିରେନ୍ ହୋଡ଼ୋକୋ ବିଶ୍ଵାସ୍ କେତେ ଇନିଃକେ ମାନାତିଙ୍ଗ୍ ୟାକୋ, ଆପେ ରୋମ୍ ରେନ୍ କୋ ହଗି ୟୀଶୁ ମାସୀହ୍ ରାଃ ହୋବାଅଃ ଲାଗିନ୍ତେ କେଡ଼ା କାନାପେ। ଏନ୍ ସବେନ୍ କୋୱାଃ ନୁତୁମ୍ ରେ ଅକନ୍ କୋ ରୋମ୍ ସାହାର୍ ରେ ପାର୍ମେଶ୍ଵାର୍ ରାଃ ଦୁଲାଡ଼୍ କୋ ତାନ୍ କୋ ହାର୍ ପାବିତାର୍ ହୋବାଅଃ ଲାଗିନ୍ତେ କେଡ଼ା କାନାକୋ: ଆବୁୱାଃ ଆପୁ ପାର୍ମେଶ୍ଵାର୍ ହାର୍ ପ୍ରାଭୁ ୟୀଶୁ ମାସୀହ୍ ରାଃ ହୋରାତେ ଆପେକେ ଆନୁଗ୍ରାହ୍ ଆଡୋଃ ଜୀଉସୁକୁ ନାମୋଃକା। ସିଦାତେ ଇଙ୍ଗ୍ ସବେନ୍ କୋ ଲାଗିନ୍ତେ ୟୀଶୁ ମାସୀହ୍ ରାଃ ହୋରାତେ ଇଙ୍ଗ୍ଆଃ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ତାନିଙ୍ଗ୍, ଚିୟାଃଚି ଆପେୟାଃ ବିଶ୍ଵାସ୍ ରାଃ କାଜି ଗୋଟା ଦିଶୁମ୍ କୋରେ ଆୟୁମୋଃ ତାନା। ପାର୍ମେଶ୍ଵାର୍ ଅକନିଜାଃ ସେୱା ରେ ଇଙ୍ଗ୍-ଇଙ୍ଗ୍ଆଃ ମୋନ୍ ତେ ଇନିଜାଃ ହୋନ୍ ରାଃ ସୁସାମାଚାର୍ ପାର୍ଚାର୍ ତାନିଙ୍ଗ୍, ଇନିଃଗି ଇଙ୍ଗ୍ଆଃ ଗୋୱା ତାନିଃ ଚି ଇଙ୍ଗ୍ ଚିଲ୍‍କା ଆପେକେ ସବେନ୍ ଇମ୍ତା ବିନ୍ତି ରେ ପାହୋମ୍ କାନ୍ତେ ୟାଇଙ୍ଗ୍, ଆଡୋଃ ସାଦାଏଗି ଇଙ୍ଗ୍ଆଃ ବିନ୍ତି କୋରେ ଆର୍ଜି କାତେୟାଇଙ୍ଗ୍ ଚି ଜାହାନ୍ ଲେକାତେ ନାଆ ଆପେୟାଃ ନାଡ଼େଏ ହିଜୁଃ ନାଙ୍ଗ୍ ଇଙ୍ଗ୍ଆଃ ସେସେନ୍ ପାର୍ମେଶ୍ଵାର୍ ରାଃ ସାନାଙ୍ଗ୍ ତେଗି ପୁରାଅଃକା। ଚିୟାଃଚି ଇଙ୍ଗ୍ ଆପେ ଲୋଃ ନାପାମ୍ ନାଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି ଇଙ୍ଗ୍ ଆପେକେ ଜାହାନ୍ ଆତ୍ମିକ୍ ବାର୍ଦାନ୍ ଏମାପେଇଙ୍ଗ୍ ଅକନାଃ ତେ ଆପେ କେଟେଃ ତାଇନୋଗାପେ; ମାନେ ନେୟା ଚି ଚିମ୍ତାଙ୍ଗ୍ ଇଙ୍ଗ୍ ଆପେୟାଃ ଥାଲା ରେ ହିଜୁଗାଇଙ୍ଗ୍, ଇମ୍ତା ମିହୋଡ଼୍ ଏଟାଃ ନିଜାଃ ବିଶ୍ଵାସ୍ କେ ଆୟୁମ୍ କେତେ ଆବୁ ଏନ୍ ବିଶ୍ଵାସ୍ ରାଃ ହୋରାତେ ଅକନାଃ ଇଙ୍ଗ୍ଆଃ ରେ ହାର୍ ଆପେୟାଃ ରେ ମେନାଃ କେଟେଜୋଗାବୁ। ହେ ହାଗାକୋ ହାର୍ ମିଶିକୋ, ଇଙ୍ଗ୍ ଆପେତାଃ ଘାରି-ଘାରି ହିଜୁଃ ସାନାଙ୍ଗ୍ ତାଇକେନାଇଙ୍ଗ୍ ଏନାକେ ଆପେ ଆଲୋପେ ସାରି ମେନ୍ତେ ଇଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା, ଚି ଚିଲ୍‍କା ଇଙ୍ଗ୍‍କେ ଏଟାଃଜାତି କୋରେ ଯଅ ନାମ୍ ଜାନା, ଏନ୍‍ଲେକାଗି ଆପେ ରେହଗି ନାମୋଃଚା, ମେନ୍ଦୋ ନାଆ ସାନ୍ ହିଜୁଃ ନାଙ୍ଗ୍ ରୋକାଅ ଜାନିଙ୍ଗ୍। ଇଙ୍ଗ୍ ୟୁନାନୀ ହୋଡ଼ୋ କୋୱାଃ ଆଡୋଃ ଏଟାଃ ଭାଷା ବାକାଣ୍ ତାନ୍ କୋୱାଃ, ଆଡୋଃ ସେଣାନ୍ କୋୱାଃ ହାର୍ ଡୋଣ୍ଡୋ କୋୱାଃ ରିଣୀ ତାନିଙ୍ଗ୍। ଏନାମେନ୍ତେ ଇଙ୍ଗ୍ ଆପେକେ ହଗି ଅକନ୍ କୋ ରୋମ୍ ସାହାର୍ ରେ ତାଇନ୍ ତାନାପେ, ସୁସାମାଚାର୍ ପାର୍ଚାର୍ ଲାଗିନ୍ତେ ସାନାଙ୍ଗ୍ ତାନିଙ୍ଗ୍ ହାର୍ ସେକାଡ଼୍ ଗିୟାଇଙ୍ଗ୍। ଇଙ୍ଗ୍ ସୁସାମାଚାର୍ ତେ କାଇଙ୍ଗ୍ ଗିୟୁଗୋଃୱା, ଚିୟାଃଚି ଏନା ସବେନ୍ ମିପୀୟାଃ ବିଶ୍ଵାସ୍ ତାନ୍‍କୋ ଲାଗିନ୍, ସିଦାତେଦୋ ୟାହୁଦୀ ହୋଡ଼ୋକୋ ନାଙ୍ଗ୍ ଏନ୍ତେ ୟୁନାନୀ ହୋଡ଼ୋକୋ ନାଙ୍ଗ୍, ବାଞ୍ଚାଅ ନାମେ ଲାଗିନ୍ତେ ପାର୍ମେଶ୍ଵାର୍ ରାଃ ପେଡ଼େଏ ତାନାଃ। ଚିୟାଃଚି ସୁସାମାଚାର୍ ରେ ପାର୍ମେଶ୍ଵାର୍ ରାଃ ଧାରାମ୍ କାଜି ବିଶ୍ଵାସ୍ ରେ ଆଡୋଃ ବିଶ୍ଵାସ୍ ତାଇନୋଃ ସାନ୍ତେ ନେଲୋଗା, ଜେଲେକା ପାବିତାର୍ ପୁଥି ରେ ଅଲାକାନା, “ବିଶ୍ଵାସ୍ ରେ ଧାର୍ମୀ ହୋଡ଼ ଜୀହିଃ ତାଇନୋଗାଏ।” ପାର୍ମେଶ୍ଵାର୍ ରାଃ ଖିସ୍ ଦୋ ଏନ୍ ହୋଡ଼ୋକୋୱାଃ ସବେନ୍ ଏତ୍କାନ୍ ହାର୍ ଆଧାର୍ମ୍ କାମି ରାଃ ଚାଲ୍ତେ ସିର୍ମାଦିଶୁମ୍ ତେ ଉଦୁବୋଃ ତାନା, ଅକନ୍‍କୋ ସାର୍ତି କେ ଆଧାର୍ମ୍ କାମି ତେ ରୋକାଅ ତାନାକୋ। ଏନାମେନ୍ତେ ଚି ପାର୍ମେଶ୍ଵାର୍ ରାଃ ବିଷାୟ୍ ରେ ସେଣା ଇନ୍‍କୁୱାଃ ମୋନ୍ ରେ ଉଦୁବ୍ କାନା, ଚିୟାଃଚି ପାର୍ମେଶ୍ଵାର୍ ଇନ୍‍କୁକେ ଉଦୁବ୍ କାଃକୋୱାଏ। ଚିୟାଃଚି ଇନିଜାଃ କାନେଲାକାନ୍ ଗୁନ୍, ମାନେ ଇନିଜାଃ ଜାନାଓ-ଜାନାଓ ରେୟାଃ ପେଡ଼େଏ ଆଡୋଃ ପାର୍ମେଶ୍ଵାର୍ ମାନାରାଙ୍ଗ୍ ତେ ଫେରେଃକାନ୍ କେ, ଅତେଦିଶୁମ୍ ରାଃ ସିର୍ଜାଅ ସାମାୟ୍ ଏତେ ଇନିଜାଃ କାମି କୋରାଃ ହୋରାତେ ନେଲୋଃ ତାନାଃ, ନେତାଃ ସାନ୍ତେ ଚି ଇନ୍‍କୁତାଃ ଜେତାନ୍ ବାହାନା ବାନୋଗା। ଚିୟାଃଚି ପାର୍ମେଶ୍ଵାର୍ କେ ଇନ୍‍କୁ ସାରିତାନ୍ ରେହଗି ପାର୍ମେଶ୍ଵାର୍ ତାନିଃ ଲେକା ମାନାରାଙ୍ଗ୍ ହାର୍ ଧାନ୍ୟାବାଦ୍ କାକୋ ଏମ୍ କିଜା, ମେନ୍ଦୋ ସାମା କାଜିକୋରେ ପାହୋମ୍ ବାଡ଼ା କେଦାକୋ, ନେତାଃ ସାନ୍ତେ ଚି ଇନ୍‍କୁୱାଃ ଡୋଣ୍ଡୋ ମୋନ୍ ନୁବାଃ ଜାନା। ଇନ୍‍କୁ ଆକୋ-ଆକୋତେଗି ସେଣାନ୍ ବାଇ କେତେ ଡୋଣ୍ଡୋ ବାଇଜାନାକୋ, ଆଡୋଃ କାଏଗୋଜୋଃ ପାର୍ମେଶ୍ଵାର୍ ରାଃ ମାନାରାଙ୍ଗ୍ କେ ଗୋଜୋଃ ହୋଡ଼, ଅଡ଼େକୋ, ଚାଇର୍କାଟା ପାଶୁ, ରେଙ୍ଗାଅତାନ୍ ଜାନ୍ତୁ କୋୱାଃ ମୂର୍ତି ଲେକା ବାଇତାଦାକୋ। ନେୟାରାଃ ଚାଲ୍ତେ ପାର୍ମେଶ୍ଵାର୍ ଇନ୍‍କୁକେ ଇନ୍‍କୁୱାଃ ମୋନ୍ ରାଃ ଏତ୍କାନ୍ ସାନାଙ୍ଗ୍ ଲେକାତେ ବାଗିତାଃ କୋୱାଏ ଏନାତେ ଇନ୍‍କୁ ଆକୋ-ଆକୋୱାଃ ହୋଡ଼ମୋ କୋକେ ଆଲୋ ମାଇନ୍ କାକୋ। ଚିୟାଃଚି ଇନ୍‍କୁ ପାର୍ମେଶ୍ଵାର୍ ରାଃ ସାର୍ତି କେ ବାଦ୍‍ଲାଅ କେତେ ଲୋଗୋ ରେ ବାଇତାଦାକୋ, ହାର୍ ସିର୍ଜାଅକାନ୍ ତେୟାଃ କେ ସୁସାର୍ ଆଡୋଃ ସେୱା କେଦାକୋ, ହାର୍ ଶିର୍ଜାଅନିଃ କେ ବାଗିତାଜାକୋ ଅକନିଃ ସବେନ୍ ହୁଲାଙ୍ଗ୍ ଲାଗିନ୍ତେ ଧାନ୍ୟା ତାନିଃ। ଆମୀନ୍। ଏନାମେନ୍ତେ ପାର୍ମେଶ୍ଵାର୍ ଇନ୍‍କୁକେ ଶିତୃ ଏତ୍କାନ୍ ସାନାଙ୍ଗ୍ କୋରେ ବାଗେ ତାଃକୋୱାଏ; ନେତାଃ ସାନ୍ତେ ଚି ଇନ୍‍କୁୱାଃ କୁଡ଼ିକୋ ହଗି ହୋଡ଼ମୋ ଲେକାନ୍ କାମି କେ ହୋଡ଼ମୋ ରାଃ ବିରୁଦ୍ଧ୍ ଲେକାନ୍ କାମି କୋରେ ବାଦ୍‍ଲି ତାଦାକୋ। ଏନ୍‍ଲେକାଗି କଡ଼ାକୋ ହଗି କୁଡ଼ିକୋ ଲୋଃ ହୋଡ଼ମୋ ଲେକାନ୍ ସାନାଙ୍ଗ୍ କେ ବାଗିକେତେ ଆକୋ-ଆକୋ ରେ ହୋଡ଼ମୋ ରାଃ ଶିତୃ ସାନାଙ୍ଗ୍ ରେ ଜୁଲ୍ ଏଟେଃ ନାକୋ, ହାର୍ କଡ଼ାକୋ-କଡ଼ା କୋଲୋଃ ଗିୟୁଃ କାମି ରିକା କେତେ ଆକୋୱାଃ ପାପ୍ ରାଃ ଠିକ୍ ଯଅ ନାମ୍ କେଦାକୋ। ହାର୍ ଚିମ୍ତାଙ୍ଗ୍ ଇନ୍‍କୁ ପାର୍ମେଶ୍ଵାର୍ ସାର୍ତି ସେଣା କେ ବୁଗିନ୍ ମେନ୍ତେ କାକୋ ଆଟ୍‍କାର୍ ଉରୁମ୍ ସାନାଙ୍ଗ୍ କେଦା, ଏଣ୍ଡେ ପାର୍ମେଶ୍ଵାର୍ ହଗି ଇନ୍‍କୁକେ ଇନ୍‍କୁୱାଃ ଏତ୍କାନ୍ ମୋନ୍ ସାନାଙ୍ଗ୍ ଲେକା ବାଗି ତାଦାଏ ଚି ଇନ୍‍କୁ କାଠାଉକା କାମି ରିକାଚାକୋ। ଏନାମେନ୍ତେ ଇନ୍‍କୁ ସବେନ୍ ଲେକାନ୍ ଆଧାର୍ମ୍, ହାର୍ ଖାରାପ୍ କାମି, ଆଡୋଃ ହାୟା, ଆଡୋଃ ଖିସ୍ ତେ ଫେରେଃ ଜାନାକୋ, ହାର୍ ହିସିଙ୍ଗା, ଆଡୋଃ ହୋଡ଼ ଗୋଗୋଏଃ, ଆଡୋଃ ଝାଗ୍ଡ଼ା, ଆଡୋଃ ଲୋଗୋ, ହାର୍ ହିସିଙ୍ଗା ତେ ଫେରେଃ ଜାନାକୋ, ଆଡୋଃ ଚୁଗ୍‍ଲି, ବାଦ୍‍ନାମ୍ ରିକା ହୋଡ଼ୋ, ପାର୍ମେଶ୍ଵାର୍ କେ ହିଲାଙ୍ଗ୍ ହୋଡ଼ୋ, ଏଟାଃ କୋକେ କାମାଇନ୍‍କୋ, ଘାମାଣ୍ଡି, ମାରାଙ୍ଗେନ୍ ଆଟ୍‍କାରେନ୍‍, ଶିତୃ କାଜି ବାବାଇତାନ୍‍କୋ, ଏଙ୍ଗାଆପୁ କୋକେ କାମାନାତିଙ୍ଗ୍ ତାନ୍‍କୋ, ଡୋଣ୍ଡୋ, ବିଶ୍ଵାସ୍‍ଘାତି, ଦୁଲାଡ଼୍ ବାନୋଃ ତାନ୍‍କୋ, ଲିନିବୁଇ ବାନୋଃ ତାନ୍‍କୋ ବାଇଜାନା। ଇନ୍‍କୁ ଦୋ ପାର୍ମେଶ୍ଵାର୍ ରାଃ ନେ ନିୟାମ୍ ସାରିୟାକୋ ଚି ନେଲେକାନ୍-ନେଲେକାନ୍ କାମି ତାନ୍‍କୋ ଗୋନୋଏଃ ରାଃ ଶାଜାଇ ନାମେ ଲେକାନ୍ କୋ ତାନ୍‍କୋ, ଏଣ୍ଡେରେ ହଗି ଆକୋ ଭାଇର୍ ନେକା କାମି ରିକା ୟାକୋ ମେନ୍ତେ କାହା ମେନ୍ଦୋ ଏନ୍‍ଲେକାନ୍ କାମିତାନ୍ କୋଲୋଃ ହଗି ସୁକୁୱାକୋ। ଏନାମେନ୍ତେ ହେ ଦୋଷ୍ ଏହେମ୍‍ନିଃ, ଆମ୍ ଜାହାଁଏଗି ତାନ୍‍ମେ, ଆମାଃ ତାଃ ଜାହାନ୍ ବାହାନା ବାନୋଗା; ଚିୟାଃଚି ଆମ୍ ଅକନ୍ କାଜି କୋରେ ଏଟାଃନିଃ କେ ଦୋଷ୍ ତାନାମ୍, ଏନ୍ କାଜି ରେଗି ଆମ୍ ଆପାନ୍ କେ ଦୋଷୀ ବାଇତାନାମ୍, ଚିୟାଃଚି ଆମ୍ ଅକନ୍ ଦୋଷ୍ ଏମ୍ ତାନାମ୍, ଆମ୍ ଗି ଏନ୍ କାମିକେ ରିକାତାନାମ୍। ହାର୍ ଆଲେ ସାରିୟାଲେ ଚି ନେଲେକାନ୍-ନେଲେକାନ୍ କାମିତାନ୍ କୋୱାଃ ଚେତାନ୍ ରେ ପାର୍ମେଶ୍ଵାର୍ ପାଡ଼େତେ ଠିକ୍ ଦାଣ୍ଡ୍ ରାଃ ଆନାଚୁ ଏମୋଗା। ଆଡୋଃ ଆମ୍ ହେ ହୋଡ଼, ଅକନ୍‍କୋ ନେକାନ୍ କାମିତାନାକୋ ଇନ୍‍କୁୱାଃ ରେ ଦୋଷ୍ ଏମ୍ ତାନାମ୍ ହାର୍ ଆମ୍ ଗି ଏନ୍‍ଲେକା କାମିକୋ କାମିତାନାମ୍; ଆମ୍ ଚିନାଃ ପାହୋମ୍ ତାନାମ୍, ଚିନାଃ ପାର୍ମେଶ୍ଵାର୍ ରାଃ ଦାଣ୍ଡ୍ ଆନାଚୁ ଏତେ ବାଗି କେନୋଗାମ୍? ଚିନାଃ ଆମ୍ ପାର୍ମେଶ୍ଵାର୍ ରାଃ ଦାୟା, ହାର୍ ସାହାତିଙ୍ଗ୍, ହାର୍ ସାହାଅ ପେଡ଼େଏ ଲେକା ଗୋନୋଙ୍ଗାନ୍ କାଜି କୋକେ ହିଲାଙ୍ଗ୍ ତାନାମ୍? ହାର୍ ଚିନାଃ ନେୟା କାମ୍ ଆଟ୍‍କାର୍ ତାନା ଚି ପାର୍ମେଶ୍ଵାର୍ ରାଃ ଦାୟା ଆମ୍‍କେ ପାପ୍ କାମି ବାଗେ ଲାଗିନ୍ ଶିଖାଅ ତାନାଏ? ମେନ୍ଦୋ ଆମ୍ ଆମାଃ କେଟେଃ ହାର୍ ସେଠ୍ରା ମୋନ୍ ରାଃ ଲେକାତେ ଇନିଜାଃ ଖିସ୍ ରେୟାଃ ହୁଲାଙ୍ଗ୍ ଲାଗିନ୍ତେ, ଆମ୍ ଆମାଃ ଲାଗିନ୍ ଖିସ୍ କେ କାମି ହୁଣ୍ଡି ତାନାମ୍, ଅକନ୍ ହୁଲାଙ୍ଗ୍ ପାର୍ମେଶ୍ଵାର୍ ରାଃ ସାର୍ତି ବିଚାର୍ ଉଦୁବୋଗା। ଇନିଃ ସବେନ୍ ହୋଡ଼ୋକୋକେ ଆକୋୱାଃ କାମି ଲେକାତେ ଯଅ ଏମା କୋୱାଏ। ଅକନ୍‍କୋ ବୁଗିନ୍ କାମି ରେ ବାଇକେତେ ମାନାରାଙ୍ଗ୍, ଆଡୋଃ ମାଇନ୍, ହାର୍ ଚିଉଲାଅ କାକୋ ଗୋଜୋଗା ଏନାରାଃ ଦାଣା ରେ ମେନାକୋୱା, ଇନ୍‍କୁକେ ଇନିଃ ଜାନାଓ ଜୀଦାନ୍ ଏମାକୋୱାଏ; ମେନ୍ଦୋ ଅକନ୍‍କୋ ଆପାନାଃ ସାନାଙ୍ଗ୍ କେ ଭାଇର୍ ପୁରାନିଃ ତାନ୍‍କୋ ହାର୍ ସାର୍ତି କେ କାକୋ ମାନାତିଙ୍ଗ୍ ତାନା, ମେନ୍ଦୋ ଏତ୍କାନ୍ କେ ମାନାତିଙ୍ଗ୍ ତାନାକୋ, ଇନ୍‍କୁୱାଃ ରେ ଖିସ୍ ହାର୍ କାଉରି ଉୟୁଗୋଗା। ଆଡୋଃ ଦୁକୁ ହାର୍ ସାସାତି ସବେନ୍ ଏତ୍କାନ୍ କାମିତାନ୍ ହୋଡ଼ୋକୋୱାଃ ଜୀଉ ଚେତାନ୍ ରେ ହିଜୁଗା, ସିଦା ତେଦୋ ୟାହୁଦୀ ହୋଡ଼ୋକୋ ରେ ଏନ୍ତେ ଏଟାଃଜାତି ହୋଡ଼ୋକୋ ଚେତାନ୍ ରେ, ମେନ୍ଦୋ ମାନାରାଙ୍ଗ୍ ଆଡୋଃ ମାଇନ୍ ଆଡୋଃ ସୁକୁ ସବେନ୍ କୋକେ ନାମୋଗା, ଅକଏ ବୁଗିନାଃ କାମିତାନାଏ, ସିଦା ତେଦୋ ୟାହୁଦୀ ହୋଡ଼ୋକୋକେ ଏନ୍ତେ ଏଟାଃଜାତି ହୋଡ଼ୋକୋକେ। ଚିୟାଃଚି ପାର୍ମେଶ୍ଵାର୍ ଜେତାୟାଃ ମେଏଃମୁହାଡ଼୍ କାଏ ନେନେଲା। ଏନାମେନ୍ତେ ଅକନ୍‍କୋ ବେଗାର୍ ମୁଶା ନାବୀ ରାଃ ଆଇନ୍ ନାମ୍ କେତେ ପାପ୍ କାମି କେଦାକୋ, ଇନ୍‍କୁ ବେଗାର୍ ମୁଶା ନାବୀ ରାଃ ଆଇନ୍ ଏତେ ନାଶୋଃ ୱାକୋ, ହାର୍ ଅକନ୍‍କୋ ମୁଶା ନାବୀ ରାଃ ଆଇନ୍ ନାମ୍ କେତେ ପାପ୍ କାଦାକୋ, ଇନ୍‍କୁୱାଃ ବିଚାର୍ ମୁଶା ନାବୀ ରାଃ ଆଇନ୍ ଲେକାତେ ହୋବାୱା। ଚିୟାଃଚି ମୁଶା ନାବୀ ରାଃ ଆଇନ୍ କେ ଆୟୁମ୍ ତାନ୍‍କୋ ପାର୍ମେଶ୍ଵାର୍ ରାଃ ନାଡ଼େଏ ରେ ଧାର୍ମୀ ନାହାଲାକୋ ମେନ୍ଦୋ ମୁଶା ନାବୀ ରାଃ ଆଇନ୍ ରେ ସେସେନ୍ ତାନ୍‍କୋ ଧାର୍ମୀ ହୋବାଅଃ ୱାକୋ। ହାର୍ ଚିମ୍ତାଙ୍ଗ୍ ଏଟାଃଜାତି ହୋଡ଼ୋକୋ, ଅକନ୍ କୋତାଃ ମୁଶା ନାବୀ ରାଃ ଆଇନ୍ ବାନୋଃ, ଆକୋ-ଆକୋୱାଃ ମୋନ୍ ରେ ଅଲାକାନ୍ ନିୟାମ୍ ଲେକାତେଗି ସେସେନ୍ ତାନାକୋ ଅକନାଃ ମୁଶା ନାବୀ ରାଃ ଆଇନ୍ ରେହ ଅଲାକାନା, ଏନାତେ ମୁଶା ନାବୀ ରାଃ ଆଇନ୍ ଇନ୍‍କୁତାଃ କାତାଇନ୍ ରେହଗି ଇନ୍‍କୁ ଆକୋତାଃ ନିୟାମ୍ ମେନାଃ ମେନ୍ତେ ଉଦୁବ୍ ତାନାକୋ। ଇନ୍‍କୁ ମୁଶା ନାବୀ ରାଃ ଆଇନ୍ କାଜିକୋକେ ଆପାନାଃ-ଆପାନାଃ ମୋନ୍ ରେ ଅଲାକାନା ଲେକା ଦେଖାଅୟାକୋ ହାର୍ ଇନ୍‍କୁୱାଃ ଆଟ୍‍କାର୍ ଉରୁମ୍ ପେଡ଼େଏ ହଗି ଗୋୱା ଏମେୟାଏ, ଆଡୋଃ ଇନ୍‍କୁୱାଃ ବିଚାର୍ ଆକୋକେ ଦୋଷୀ ବାଇକୋୱାଏ, ୟାଦୋ ନିର୍ଦୋଷ୍ ବାଇକୋୱାଏ। ଅକନ୍ ହୁଲାଙ୍ଗ୍ ପାର୍ମେଶ୍ଵାର୍ ଇଙ୍ଗ୍ଆଃ ସୁସାମାଚାର୍ ପାର୍ଚାର୍ ଲେକାତେ ୟୀଶୁ ମାସୀହ୍ ହୋରାତେ ହୋଡ଼ୋକୋୱାଃ ଉକୁକାଜିକୋକେ ବିଚାର୍ ରିକାୟାଏ। ଆଗାର୍ ଆମ୍ ୟାହୁଦୀ କାଜିୟୋଃ ତାନାମ୍, ହାର୍ ମୁଶା ନାବୀ ରାଃ ଆଇନ୍ ଚେତାନ୍ ରେ ଭାରୋସା ମାଣ୍ଡାଅ ତାନାମ୍, ହାର୍ ପାର୍ମେଶ୍ଵାର୍ ରାଃ ବିଷାୟ୍ ରେ ଘାମାଣ୍ଡ୍ ତାନାମ୍, ଆଡୋଃ ଇନିଜାଃ ସାନାଙ୍ଗ୍ କେ ସାରିତାନାମ୍ ହାର୍ ମୁଶା ନାବୀ ରାଃ ଆଇନ୍ ରାଃ ଶିକ୍ଷା ନାମ୍ କେତେ ବୁଗିନ୍-ବୁଗିନ୍ କାଜିକୋକେ ବେଶ୍ ପାତି ତାନାମ୍; ଆଡୋଃ ଆମ୍ ଆପାନ୍ ରେ ଭାରୋସା ମାଣ୍ଡାଅ ତାନାମ୍ ଚି ଇଙ୍ଗ୍ ଆନ୍ଧା କୋୱାଃ ଆୟାର୍ ନିଈ, ହାର୍ ନୁବାଃ ରେ ତାଇନ୍ ତାନ୍‍କୋ ନାଙ୍ଗ୍ ମାସ୍କାଲ୍, ହାର୍ ଡୋଣ୍ଡୋ କୋକେ ଶିଖାଅ ନିଈ, ହାର୍ ହୋନ୍ କୋୱାଃ ଶିଖାଅ ନିଈ ତାନିଙ୍ଗ୍, ହାର୍ ସେଣା, ହାର୍ ସାର୍ତି ରାଃ ନାମୁନା, ଅକନାଃ ମୁଶା ନାବୀ ରାଃ ଆଇନ୍ ରେ ମେନାଃ, ଏନା ଇଙ୍ଗ୍‍କେ ନାମ୍ କାନା। ଏନାମେନ୍ତେ ଚିମ୍ତାଙ୍ଗ୍ ଆମ୍ ଏଟାଃକୋକେ ଶିଖାଅ କୋତାନାମ୍, ଚିନାଃ ଆମ୍ ଆପାନ୍ କେ କାମ୍ ଶିଖାଅ ତାନା? ଆମ୍ ଆଲୋପେ କୁମ୍ଡ଼ୁୟା ମେନ୍ତେ ଶିଖାଅ ତାନାମ୍, ହାର୍ ଚିନାଃ ଆମ୍‍ଗି କୁମ୍ଡ଼ୁ ତାନାମ୍? ଆମ୍ କାଜିକୋତାନାମ୍, “ଆଲୋପେ ବ୍ୟାଭିଚାର୍ ୟା” ଚିନାଃ ଆମ୍ ଗି ବ୍ୟାଭିଚାର୍ ତାନାମ୍? ଆମ୍ ଯେ ମୂର୍ତି କୋକେ ହିଲାଙ୍ଗ୍ ତାନାମ୍, ଚିନାଃ ଆମ୍ ଗି ମାନ୍ଦିର୍ କୋରାଃ ଗୋନୋଙ୍ଗ୍ ଜିନିଷ୍ କୋକେ ଚୋର୍ହା ତାନାମ୍? ଆମ୍ ଜେ ମୁଶା ନାବୀ ରାଃ ଆଇନ୍ ରାଃ ବିଷାୟ୍ ରେ ଘାମାଣ୍ଡ୍ ରିକାତାନାମ୍, ଚିନାଃ ଏନ୍ ଆଇନ୍ କୋକେ କାମାନାତିଙ୍ଗ୍ କେତେ ପାର୍ମେଶ୍ଵାର୍ କେ ଆପ୍‍ମାନ୍ ତାନାମ୍? “ଚିୟାଃଚି ଆମାଃ ଚାଲ୍ତେ ଏଟାଃଜାତି କୋରେ ପାର୍ମେଶ୍ଵାର୍ ରାଃ ନୁତୁମ୍ କେ ନିନ୍ଦା ରିକାଅଃ ତାନା,” ଏନାମେନ୍ତେଗି ପାବିତାର୍ ପୁଥି ରେ ଅଲାକାନା। ଆଗାର୍ ଆମ୍ ମୁଶା ନାବୀ ରାଃ ଆଇନ୍ ଲେକାତେ ସେସେନାମ୍, ଏଣ୍ଡେ ଖାତ୍ନା ତେ ଦୋ ଲାଭ୍ ମେନାଃ, ମେନ୍ଦୋ ଆଗାର୍ ଆମ୍ ମୁଶା ନାବୀ ରାଃ ଆଇନ୍ କେ କାମ୍ ମାନାତିଙ୍ଗ୍ ତାନା, ଏଣ୍ଡେ ଆମାଃ ଖାତ୍ନା କାଖାତ୍ନାକାନ୍ ଲେକା ହୋବାଜାନା। ଏନାମେନ୍ତେ ଆଗାର୍ କାଖାତ୍ନାକାନ୍ ହୋଡ଼ ମୁଶା ନାବୀ ରାଃ ଆଇନ୍ ରାଃ ବିଧିକୋକେ ମାନାତିଙ୍ଗ୍ ତାନାଏ, ଏଣ୍ଡେ ଚିନାଃ ଇନିଜାଃ କାଖାତ୍ନାକାନ୍ ଲେକା ତାଇନ୍ ଖାତ୍ନା ଲେକା ମିଃଗି କାଲେକାଅଗା? ହାର୍ ଅକନ୍ ହୋଡ଼ ହୋଡ଼ମୋ ଲେକାତେ କାଖାତ୍ନାକାନ୍ ମେନାଇଜା, ଆଗାର୍ ଇନିଃ ମୁଶା ନାବୀ ରାଃ ଆଇନ୍ କେ ମାନାତିଙ୍ଗ୍ ତାନାଏ, ଏଣ୍ଡେ ଚିନାଃ ଆମ୍‍କେ ମୁଶା ନାବୀ ରାଃ ଆଇନ୍ ନାମ୍ କେତେ ହାର୍ ଖାତ୍ନା ହୋବାକେତେ ହ ଆଇନ୍ କୋକେ କାମ୍ ମାନାତିଙ୍ଗ୍ ତାନା, ଦୋଷୀ କାଏ ବାଇମେ ତାନାଏ? ଚିୟାଃଚି ହିନିଃ ୟାହୁଦୀ ନାହାଲାଏ ଅକଏ ନେପେଲ୍ ରେ ୟାହୁଦୀ ତାନିଃ; ହାର୍ ନା ଏନା ଖାତ୍ନା ତାନାଃ ଅକନାଃ ନେପେଲ୍ ମେନାଃ ହାର୍ ହୋଡ଼ମୋ ରେ ମେନାଃ। ମେନ୍ଦୋ ୟାହୁଦୀ ଇନିଃଗି ତାନିଃ ଅକଏ ମୋନ୍ ତେ ତାନିଃ। ହାର୍ ଖାତ୍ନା ଏନାଗି ତାନାଃ ଅକନାଃ ମୋନ୍ ରାଃ ଖାତ୍ନା ତାନାଃ, ଅକନାଃ ଆତ୍ମା ରାଃ କାମି ତେ ହୋବାକାନା, ଏନା ଅଲାକାନ୍ ଲେକାତେ ନାହାଲା: ନେକାନ୍ କୋୱାଃ ସାହାରାଅ ହୋଡ଼ୋକୋ ପାଡ଼େତେ କାହା, ମେନ୍ଦୋ ପାର୍ମେଶ୍ଵାର୍ ପାଡ଼େତେ ହୋବାଅଃୱାଃ। ଏଣ୍ଡେ ୟାହୁଦୀ ହୋଡ଼ ହୋବାକେତେ ୟାଦୋ ଖାତ୍ନା ହୋବାକେତେ ଚିକାନ୍ ଫାଏଦା? ସବେନ୍ ଲେକାତେ ଥିମ୍ବାଗି କାଜିକୋ। ସିଦା ତେଦୋ ନେୟା ଚି ପାର୍ମେଶ୍ଵାର୍ ରାଃ ବାଚାନ୍ ଇନ୍‍କୁକେ ଜିମା ଜାନା। ଆଗାର୍ ୟାହୁଦୀ କୋଏତେ ଚିମିନାଙ୍ଗ୍ କୋ ବିଶ୍ଵାସ୍ ଘାତି ଅଡୋଙ୍ଗ୍ ଜାନାକୋ ଏଣ୍ଡେ ଚିନାଃ ହୋବାଜାନା? ଚିନାଃ ଇନ୍‍କୁୱାଃ ବିଶ୍ଵାସ୍ ଘାତି ହୋବାଜାନ୍ତେ ପାର୍ମେଶ୍ଵାର୍ ରାଃ ସାର୍ତି ସାମା ହୋବାକୋୱା? ଚିଉଲା ହ କାହା! ମେନ୍ଦୋ ପାର୍ମେଶ୍ଵାର୍ ସାର୍ତି ତାନିଃ ହାର୍ ସବେନ୍ ମିପୀୟାଃ ହୋଡ଼ ହିହିଡ଼୍ ନିଃ ହୋବାଅଃକାକୋ, ଜେଲେକା ପାବିତାର୍ ପୁଥି ରେ ଅଲାକାନା, “ଏନାତେ ଆମ୍ ଆମାଃ କାଜି କୋରେ ଧାର୍ମୀ ବାଇୟୋଃୱାମ୍ ହାର୍ ବିଚାର୍ ରିକା ସାମାୟ୍ ରେ ଜିତାଅଃୱାମ୍।” ଏନାମେନ୍ତେ ଆଗାର୍ ଆବୁୱାଃ ଆଧାର୍ମ୍ ପାର୍ମେଶ୍ଵାର୍ ରାଃ ଧାରାମ୍ କାମି ହୋବାଅଃ ତାନା, ଏଣ୍ଡେ ଆବୁ ଚିନାଃ କାଜିୟାବୁ? ଚିନାଃ ନେୟା ଚି ପାର୍ମେଶ୍ଵାର୍ ଅକଏ ଖିସୋଃୱାଏ ଆନ୍ୟାୟୀ ତାନିଃ? (ନେୟା ଦୋ ଇଙ୍ଗ୍ ହୋଡ଼ କୋୱାଃ କାଜି ଲେକାତେ କାଜିତାନିଙ୍ଗ୍)। ଚିଉଲା ହ କାହା! କାରେଦୋ ପାର୍ମେଶ୍ଵାର୍ ଚିଲ୍‍କା ଅତେଦିଶୁମ୍ ରାଃ ବିଚାର୍ ୟାଏ? ଆଗାର୍ ଇଙ୍ଗ୍ଆଃ ହିହିଡ଼୍ ରାଃ ଚାଲ୍ତେ ପାର୍ମେଶ୍ଵାର୍ ରାଃ ସାର୍ତି ଇନିଜାଃ ମାନାରାଙ୍ଗ୍ ଲାଗିନ୍ତେ, ଥିମ୍ବାଗି ହୋବାଜାନା ଏଣ୍ଡେ ଦୋ ଚିନାଃ ମେନ୍ତେ ଇଙ୍ଗ୍ ପାପୀ କୋୱାଃ ଲେକା ଦାଣ୍ଡ୍ ନାମେନିଃ ହୋବାଅଃ ତାନିଙ୍ଗ୍? “ଆବୁ ଚିନାଃ ମେନ୍ତେ ଖାରାପ୍ କାମି କାବୁ ରିକାୟା ଚି ଏନାତେ ବୁଗିନାଃ ଅଡୋଙ୍ଗ୍ଅଃୱା?” ଜେଲେକା ଚି ଆବୁୱାଃ ରେ ନେ ଦୋଷ୍ କୋ ଲାଗାଅଃ ତାନ୍ ଗିୟା, ହାର୍ ଚିମିନାଙ୍ଗ୍ କୋ କାଜିୟାକୋ ଚି ନିକୁୱାଃ ନେୟାଗି କାଜି ତାନାଃ। ମେନ୍ଦୋ ନେକାନ୍ କୋୱାଃ ଦୋଷୀ ବାଇଏନ୍ ଠାଉକା ତାନାଃ। ଏଣ୍ଡେ ଚିନାଃ ହୋବାନା? ଚିନାଃ ଆବୁ ଇନ୍‍କୁୱାଃ ତେ ଥିମ୍ବା ବେଶ୍ ତାନ୍‍ବୁ? ଚିଉଲା ହ କାହା; ଚିୟାଃଚି ଆବୁ ୟାହୁଦୀ ହୋଡ଼ୋକୋକେ ଆଡୋଃ ଏଟାଃଜାତି ହୋଡ଼ୋକୋକେ ବାରାନ୍ କୋରେ ନେ ଦୋଷ୍ ଲାଗାଅ ଛାବା କାଦାବୁ ଚି ସବେନ୍ କୋ ପାପ୍ ରାଃ ଆଧିନ୍ ରେ ମେନାକୋୱା। ଚିଲ୍‍କା ପାବିତାର୍ ପୁଥି ରେ ଅଲାକାନା: “ଜେତାଏ ଧାର୍ମୀ ବାଙ୍ଗ୍‍କୋୱା, ମିହୋଡ଼୍ ହ ବାଙ୍ଗ୍‍କୋୱା। ଜେତାଏ ସେଣାନ୍ ହୋଡ଼ ବାଙ୍ଗ୍‍କୋୱା; ଜେତାଏ ପାର୍ମେଶ୍ଵାର୍ କେ ଦାଣାବାଡ଼ାନିଃ ବାଙ୍ଗ୍‍କୋୱା। ସବେନ୍ କୋ ଆଦାଛାବା କାନାକୋ, ସବେନ୍ କୋ ବେକାମି ରେନ୍ ହୋଡ଼ ବାଇଜାନାକୋ; ଜେତାଏ ବୁଗିନ୍ କାମିନିଃ ବାଙ୍ଗ୍‍କୋୱା, ମିହୋଡ଼୍ ହ ବାଙ୍ଗ୍‍କୋୱା। ଇନ୍‍କୁୱାଃ ହୋଟୋଃ ଅଟାଃକାନ୍ କାବାର୍ ତାନାଃ, ଇନ୍‍କୁ ଆକୋୱାଃ ଆଲାଙ୍ଗ୍ ତେ ହିଡ଼୍ କାଦାକୋ, ଇନ୍‍କୁୱାଃ ମୋଚା ରେ ବିଙ୍ଗ୍ କୋୱାଃ ବିଷ୍ ମେନାଃ। ଇନ୍‍କୁୱାଃ ମୋଚା ସାର୍ପାଅ ତେ ଆଡୋଃ ହାଡ଼୍ଆଃ ତେ ଫେରେଃକାନା। ଇନ୍‍କୁୱାଃ କାଟା ମାୟୋମ୍ ଲିଙ୍ଗୀ ଲାଗିନ୍ତେ ସେକାଡ଼୍ ଗିୟାଃ, ଇନ୍‍କୁୱାଃ ହୋରା ରେ ନାଶ୍ ହାର୍ ଦୁକୁ ମେନାଃ, ଇନ୍‍କୁ ସୁକୁ ରାଃ ହୋରା କେ କାକୋ ସାରିକାଦା। ଇନ୍‍କୁୱାଃ ମେଏଃ ରାଃ ନାଡ଼େଏ ରେ ପାର୍ମେଶ୍ଵାର୍ ରାଃ ବୋରୋ ବାନୋଗା।” ଆବୁ ସାରିତାନାବୁ ଚି ମୁଶା ନାବୀ ରାଃ ଆଇନ୍ ଅକନାଃ କୋ କାଜିତାନାଏ, ଇନ୍‍କୁକେଗି କାଜିୟାକୋ ତାନାଏ, ଅକନ୍ କୋ ମୁଶା ନାବୀ ରାଃ ଆଇନ୍ ଆଧିନ୍ ରେ ମେନାକୋୱା, ଏନାମେନ୍ତେ ଚି ସବେନ୍ କୋୱାଃ ମୋଚା ହାପା ରିକାଅଗା ହାର୍ ଗୋଟା ଅତେଦିଶୁମ୍ ପାର୍ମେଶ୍ଵାର୍ ରାଃ ଦାଣ୍ଡ୍ ନାମେ ନାଙ୍ଗ୍ ବାଇୟୋଃୱା; ଚିୟାଃଚି ମୁଶା ନାବୀ ରାଃ ଆଇନ୍ ରାଃ କାମିକୋଏତେ ଜେତାନ୍ ହୋଡ଼ ଇନିଜାଃ ନାଡ଼େଏ ରେ ଧାର୍ମୀ କାଏ ବାଇୟୋଗାଏ, ଚିୟାଃଚି ମୁଶା ନାବୀ ରାଃ ଆଇନ୍ ତେଦୋ ପାପ୍ ନେଲ୍ ଉରୁମ୍ ହୋବାଅଃୱା। ମେନ୍ଦୋ ନାଆ ମୁଶା ନାବୀ ରାଃ ଆଇନ୍ ବେଗାର୍ ପାର୍ମେଶ୍ଵାର୍ ରାଃ ଧାରାମ୍ ହୋରା ଉଦୁବ୍ କାନା, ଅକନାଃ ରାଃ ଗୋୱା ମୁଶା ନାବୀ ରାଃ ଆଇନ୍ ହାର୍ ନାବୀ କୋୱାଃ କିତାବ୍ ଏମ୍ ତାନାଏ, ମାନେ ପାର୍ମେଶ୍ଵାର୍ ରାଃ ଏନ୍ ଧାରାମ୍ ହୋରା ଅକନାଃ ୟୀଶୁ ମାସୀହ୍ ରେ ବିଶ୍ୱାସ୍ ରେ ସବେନ୍ ବିଶ୍ଵାସ୍ ତାନ୍‍କୋ ଲାଗିନ୍ ତାନାଃ। ଚିୟାଃଚି ଜାହାନ୍ ଫାରାକ୍ ବାନୋଗା; ଏନାମେନ୍ତେ ଚି ସବେନ୍ କୋ ପାପ୍ କାଦାକୋ ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଏତେ ଗେନା କାନାକୋ, ମେନ୍ଦୋ ଇନିଜାଃ ଆନୁଗ୍ରାହ୍ ତେ ଏନ୍ ଛୋଡ଼ାଓ ରାଃ ହୋରାତେ ଅକନାଃ ମାସୀହ୍ ୟୀଶୁ ରେ ମେନାଃ, ବେଗାର୍ ଗୋନୋଙ୍ଗ୍ ରେ ଧାର୍ମୀ ବାଇୟୋଃ ତାନାକୋ। ଇନିଃକେ ପାର୍ମେଶ୍ଵାର୍ ଇନିଜାଃ ମାୟୋମ୍ ରାଃ ଚାଲ୍ତେ ମିୟାଃ ନେକା ପାପ୍ କୋରାଃ ହାଲ୍ ଫେରେଃ ନିଃ ବାଇକିଜାଏ। ଅକନାଃକେ ବିଶ୍ଵାସ୍ ଲେରେ କାମି ବାଇୟୋଗା, ଅକନ୍ ପାପ୍ ସିଦା ରେ ରିକା ଲେନା ହାର୍ ଅକନ୍ କୋୱାଃ ରେ ପାର୍ମେଶ୍ଵାର୍ ଆଜାଃ ସାହାତିଙ୍ଗ୍ ରାଃ ହୋରାତେ ଧ୍ୟାନ୍ କାଏ ମାଣ୍ଡାଅ। ଇନ୍‍କୁୱାଃ ବିଷାୟ୍ ରେ ଇନିଃ ଆଏଃ ଧାର୍ମୀ ମେନ୍ତେ ଉଦୁବ୍ ଜାନାଏ। ମେନ୍ଦୋ ନାଆଗି ଆଜାଃ ଧାରାମ୍ କାମି ଉଦୁବୋଃକା ଚି ଏନାତେ ଇନିଃ ଆଏଃଗି ଧାର୍ମୀ ହୋବାଅଃୱାଏ, ହାର୍ ଅକଏ ୟୀଶୁ ରେ ବିଶ୍ଵାସ୍ ୟାଏ ଇନିଃକେ ହଗି ଧାର୍ମୀ ବାଇନିଃ ହୋବାଅଃୱାଏ। ଏଣ୍ଡେ ଘାମାଣ୍ଡ୍ ରିକା କୋତାଃ ତାଇନ୍ ଜାନା? ଏନାରାଃ ଦୋ ଜାଗା ଗି ବାନୋଗା। ଅକନ୍ ନିୟାମ୍ ରାଃ ହୋରାତେ? ଚିନାଃ ମୁଶା ନାବୀ ରାଃ ଆଇନ୍ କେ ମାନାତିଙ୍ଗ୍ ରାଃ ହୋରାତେ? କାହା, ମେନ୍ଦୋ ବିଶ୍ଵାସ୍ ରାଃ ନିୟାମ୍ ଲେକାତେ। ଏନାମେନ୍ତେ ଆବୁ ନେ କାଜି ରେ ସେଟେରୋଃ ତାନାବୁ ଚି ହୋଡ଼ ମୁଶା ନାବୀ ରାଃ ଆଇନ୍ ବେଗାର୍, ବିଶ୍ଵାସ୍ ରାଃ ହୋରାତେ ଧାର୍ମୀ ବାଇୟୋଃ ତାନାଏ। ଚିନାଃ ପାର୍ମେଶ୍ଵାର୍ ୟାହୁଦୀକୋ ନାଙ୍ଗ୍ ଭାଇର୍ ତାନିଃ? ଚିନାଃ ଏଟାଃଜାତିକୋ ନାଙ୍ଗ୍ ନାହାଲାଏ? ହାଁ, ଏଟାଃଜାତିକୋ ନାଙ୍ଗ୍ ହଗି ତାନିଃ। ଚିୟାଃଚି ମିୟାଃଗି ପାର୍ମେଶ୍ଵାର୍ ମେନିଜା, ଅକନିଃ ଖାତ୍ନାକାନ୍ କୋକେ ବିଶ୍ୱାସ୍ ତେ ହାର୍ କାଖାତ୍ନାକାନ୍ କୋକେ ହଗି ବିଶ୍ଵାସ୍ ରାଃ ହୋରାତେ ଧାର୍ମୀ ବାଇକୋୱାଏ। ଏଣ୍ଡେ ଚିନାଃ ଆବୁ ମୁଶା ନାବୀ ରାଃ ଆଇନ୍ କେ ବିଶ୍ଵାସ୍ ରାଃ ହୋରାତେ ସାମା ବୁ ଆଟ୍‍କାର୍ ତାନା? ଚିଉଲାଅ କାହା! ମେନ୍ଦୋ ମୁଶା ନାବୀ ରାଃ ଆଇନ୍ କେ ପୁରା ତାନାବୁ। ଏଣ୍ଡେ ଆବୁ ଚିନାଃ କାଜିୟାବୁ, ଆବୁୱାଃ ପୁର୍ଖାଆବା ଆବ୍ରାହାମ୍ କେ ଚିନାଃ ନାମ୍‍ଜାନା? ଚିୟାଃଚି ଆଗାର୍ ଆବ୍ରାହାମ୍ ବୁଗିନ୍ କାମି ତେ ଧାର୍ମୀ ହୋବାଜାନ୍ତେ, ଏଣ୍ଡେ ଇନିଜାଃ ଘାମାଣ୍ଡ୍ ହୋବାଅଃ ତେୟା, ମେନ୍ଦୋ ପାର୍ମେଶ୍ଵାର୍ ନାଡ଼େଏ ରେ କାହା। ପାବିତାର୍ ପୁଥି ଚିନାଃ କାଜିତାନାଏ? ନେୟା ଚି “ଆବ୍ରାହାମ୍ ପାର୍ମେଶ୍ଵାର୍ ତାଃ ରେ ବିଶ୍ଵାସ୍ କେଦାଏ, ହାର୍ ନେୟା ଇନିଜାଃ ଲାଗିନ୍ତେ ଧାରାମ୍ ଲେକା ଜାନା।” କାମିତାନ୍ କୋକେ ନାଲା ଏମ୍ ତେୟାଃ ଦାନ୍ ନାହାଲା, ମେନ୍ଦୋ ହାକ୍ କାଜିଅଃତାନା। ମେନ୍ଦୋ ଅକଏ କାଏ କାମି ତାନାଏ ମେନ୍ଦୋ ଏତ୍କାନ୍ କାମିତାନ୍ ନିଃକେ ଧାର୍ମୀ ବାବାଇ ନିଜାଃରେ ବିଶ୍ଵାସ୍ ମାଣ୍ଡାଅ ତାନାଏ, ଇନିଜାଃ ବିଶ୍ଵାସ୍ ଇନିଃ ଲାଗିନ୍ତେ ଧାରାମ୍ ଲେକାଅଃତାନା। ଅକନିଃକେ ପାର୍ମେଶ୍ଵାର୍ ବେଗାର୍ କାମି ତେ ଧାର୍ମୀ ବାଇତାନାଏ, ଇନିଃକେ ଦାଉଦ୍ ହଗି ଧାନ୍ୟା କାଜି ତାନାଏ: “ଧାନ୍ୟା ଇନ୍‍କୁ ତାନ୍‍କୋ, ଅକନ୍ କୋୱାଃ ଆଧାର୍ମ୍ ଛାମା ରିକାନା, ହାର୍ ଅକନ୍ କୋୱାଃ ପାପ୍ ମେଟାଅ ଜାନା। ଧାନ୍ୟା ଏନ୍ ହୋଡ଼ ତାନିଃ ଅକନିଃକେ ପାର୍ମେଶ୍ଵାର୍ ପାପୀ କାଏ ଲେକାଇୟାଏ।” ଦୋ ନେ ଧାନ୍ୟା ବାଚାନ୍, ଚିନାଃ ଖାତ୍ନାକାନ୍ କୋ ଲାଗିନ୍ତେ ଭାଇର୍ ତାନାଃ ଚି କାଖାତ୍ନାକାନ୍ କୋ ଲାଗିନ୍ତେ ହଗି ତାନାଃ? ଆବୁ ନେୟା କାଜିତାନାବୁ, “ଆବ୍ରାହାମ୍ ଲାଗିନ୍ତେ ଇନିଜାଃ ବିଶ୍ଵାସ୍ ଧାରାମ୍ ଲେକା ଜାନା।” ଏଣ୍ଡେ ଏନା ଚିଲ୍‍କା ଲେକା ଜାନା? ଖାତ୍ନାକାନ୍ ହୋବା ଲେକାତେ ଚି କାଖାତ୍ନାକାନ୍ ରାଃ ସାମାୟ୍ ରେ? ଖାତ୍ନା ହୋବା ତାୟୋମ୍ତେ କାହା ମେନ୍ଦୋ ଖାତ୍ନା ହୋବାରାଃ ସିଦାରେ। ଇନିଃ ଖାତ୍ନା ରାଃ ଚିହ୍ନା ନାମ୍‍କେଦାଏ, ଏନା ମିୟାଃ ଛାପ୍ ଲେକା ବିଶ୍ଵାସ୍ ରାଃ ଧାରାମ୍ ହୋରା ରେ ହୋବାଅଃକା, ଅକନାଃ ଇନିଃ କାଖାତ୍ନାକାନ୍ ଇମ୍ତା ରେ ନାମ୍ ଲେଦାଏ, ଏନାତେ ଇନିଃ ଏନ୍ ସବେନ୍ କୋୱାଃ ଆପୁ ହୋବାଅଃୱାଏ, ଅକନ୍‍କୋ କାଖାତ୍ନାକାନ୍ ରାଃ ଲେକାତେ ବିଶ୍ଵାସ୍ ୟାକୋ ଏନାତେ ଇନ୍‍କୁ ହଗି ଧାର୍ମୀ ଲେକାଅଃୱାକୋ; ହାର୍ ଏନ୍ ଖାତ୍ନାକାନ୍ କୋୱାଃ ଆପୁ ହୋବାଅଃୱାଏ, ଅକନ୍‍କୋ ଖାତ୍ନାକାନାକୋ ମେନ୍ତେ ଭାଇର୍ କାହା, ମେନ୍ଦୋ ଆବୁୱାଃ ଆପୁ ଆବ୍ରାହାମ୍ ରାଃ ଏନ୍ ବିଶ୍ଵାସ୍ ରାଃ ନିୟାମ୍ ଲେକାତେ ହଗି ସେସେନ୍ ତାନାକୋ ଅକନାଃ ଇନିଃ କାଖାତ୍ନାକାନ୍ ଇମ୍ତା ରେ ରିକାଲେଦାଏ। ଚିୟାଃଚି ନେ କିରିୟା-କାଜି ଅକନାଃଚି ଇନିଃ ଅତେଦିଶୁମ୍ ରାଃ ଆଧିକାରୀ ହୋବାଅଃ ୱାଏ, ନାଦୋ ଆବ୍ରାହାମ୍ କେ ନାଦୋ ଆଜାଃ ହୋନ୍‍ଗାଣା କୋକେ ମୁଶା ନାବୀ ରାଃ ଆଇନ୍ ଲେକାତେ ଏମ୍ ଲେନ୍ ତାଇକେନା, ମେନ୍ଦୋ ବିଶ୍ଵାସ୍ ରାଃ ଧାରାମ୍ ହୋରାତେ ନାମ୍‍ନା। ଚିୟାଃଚି ଆଗାର୍ ମୁଶା ନାବୀ ରାଃ ଆଇନ୍ ନାମାକାନ୍ କୋ ଆଧିକାରୀ ତାନ୍‍କୋ, ଏଣ୍ଡେ ବିଶ୍ଵାସ୍ ସାମାଗୀୟା ହାର୍ କିରିୟା-କାଜି ସାମାଜାନା। ମୁଶା ନାବୀ ରାଃ ଆଇନ୍ ଦୋ ଖିସ୍ ରିକା ତାନାଏ, ହାର୍ ଅକତାଃରେ ମୁଶା ନାବୀ ରାଃ ଆଇନ୍ ବାନୋଗା, ଏନ୍ତାଃରେ ଆଇନ୍ ଟୋଟାଃ ହ ବାନୋଃ। ଏନାଲାଗିନ୍ତେ କିରିୟା-କାଜି ବିଶ୍ଵାସ୍ ଚେତାନ୍ ମେନାଃ, ଏନାତେ ଆନୁଗ୍ରାହ୍ ରାଃ ନିୟାମ୍ ରେ ହୋବାଅଃକା, ଚି ଏନା ଇନିଜାଃ ସବେନ୍ ହୋନ୍‍ଗାଣା କୋ ଲାଗିନ୍ ପୋକ୍ତାଅଃକା, ଏନା ଏନ୍ ମୁଶା ନାବୀ ରାଃ ଆଇନ୍ ନାମାକାନ୍ ଲାଗିନ୍ କୋ ଭାଇର୍ କାହା ମେନ୍ଦୋ ଇନ୍‍କୁ ଲାଗିନ୍ ହଗି ତାନାଃ ଅକନ୍ କୋ ଆବ୍ରାହାମ୍ ଲେକା ବିଶ୍ଵାସ୍ ତାନ୍‍କୋ-ତାନ୍‍କୋ; ଇନିଃଗି ଦାଙ୍ଗ୍ ଆବୁ ସବେନ୍ କୋୱାଃ ଆପୁ ତାନିଃ, ଜେଲେକା ପାବିତାର୍ ପୁଥି ରେ ଅଲାକାନା, “ଇଙ୍ଗ୍ ଆମ୍‍କେ ଥିମ୍ବାଗି ଜାତିକୋୱାଃ ଆପୁ ବାଇକାଃମେୟାଇଙ୍ଗ୍” ଏନ୍ ପାର୍ମେଶ୍ଵାର୍ ରାଃ ନାଡ଼େଏ ରେ ଅକନିଜାଃ ଚେତାନ୍ ରେ ଇନିଃ ବିଶ୍ଵାସ୍ କେଦାଏ, ହାର୍ ଅକନିଃ ଗୋଜାକାନ୍ କୋକେ ଜୀହିଃ କେୱାଏ, ହାର୍ ଅକନାଃ ବାନୋଃ ଏନାକେ ମେନାଃ ଲେକା ନୁତୁମେୟାଏ। ଇନିଃ ଆଶ୍ରା ବାନୋଃ ହେନ୍ତାଃ ରେହଗି ଆଶ୍ରା ମାଣ୍ଡାଅ କେତେ ବିଶ୍ଵାସ୍ କେଦାଏ, ଏନାମେନ୍ତେ ଚି ଏନ୍ ବାଚାନ୍ ରାଃ ହୋରାତେ ଚି “ଆମାଃ ହୋନ୍‍ଗାଣା କୋ ନେଲେକା ହୋବାୱାକୋ,” ଇନିଃ ଥିମ୍ବାଗି ଜାତିକୋୱାଃ ଆପୁ ହୋବାଅଃୱାଏ। ଇନିଃ ଏକ୍ ଶାଅ ବାରାଶ୍ ରେନ୍ ତାଇକେନ୍ ରେ, ଆଜାଃ ଗୋଜୋଃ ଲେକାନ୍ ହୋଡ଼ମୋ ହାର୍ ସାରା ରାଃ ଗାର୍ଭ କେ ଗୋଜାକାନ୍ ମେନ୍ତେ ସାରିକେତେ ହଗି ବିଶ୍ଵାସ୍ ରେ କାଏ ନାରାଦୁରା ଜାନା। ହାର୍ ପାର୍ମେଶ୍ଵାର୍ ରାଃ କିରିୟା-କାଜି କେ କାଏ ସାନ୍ଦେହ୍ କେଦାଏ, ମେନ୍ଦୋ ବିଶ୍ଵାସ୍ ରେ ପୋକ୍ତା କେତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ କେଦାଏ। ହାର୍ ସାର୍ତିଗୀ ସାରିକେଦାଏ ଚି ଅକନ୍ କାଜି ରାଃ ପାର୍ମେଶ୍ଵାର୍ କିରିୟା ଜୋମ୍ କାଦାଏ, ଏନାକେ ଇନିଃ ପୁରା ରିକାରେ ହଗି ପେଡ଼େଜାନ୍ ତାନିଃ। ଏନାମେନ୍ତେ, ନେୟା ଇନିଜାଃ ଲାଗିନ୍ତେ ଧାରାମ୍ ଲେକା ଜାନା। ହାର୍ ନେ ବାଚାନ୍ ଚି, “ବିଶ୍ଵାସ୍ ଆଜାଃ ଲାଗିନ୍ ଧାରାମ୍ ଲେକା ଜାନା,” ଏନା ଖାଲି ଆଜାଃ ଲାଗିନ୍ତେ ଅଲାକାନା ମେନ୍ତେ କାହା, ମେନ୍ଦୋ ଆବୁୱାଃ ଲାଗିନ୍ତେ ହଗି ଅକନ୍ କୋୱାଃ ବିଶ୍ଵାସ୍ ଧାରାମ୍ ଲେକାଅଗା, ମାନେ ଆବୁୱାଃ ଲାଗିନ୍ ଅକନ୍ କୋ ପାର୍ମେଶ୍ଵାର୍ ଚେତାନ୍ ରେ ବିଶ୍ଵାସ୍ ତାନାବୁ, ଅକନିଃ ଆବୁୱାଃ ପ୍ରାଭୁ ୟୀଶୁ କେ ଗୋଜାକାନ୍ କୋଏତେ ଜୀବିରିଃ କିଜାଏ। ଇନିଃ ଆବୁୱାଃ ପାପ୍ କୋ ଲାଗିନ୍ତେ ସାବ୍ ଜାନାଏ, ହାର୍ ଆବୁକେ ଧାର୍ମୀ ଲେକାଲାଗିନ୍ତେ ଜୀବିରିଃ ଜାନାଏ। ଏନାମେନ୍ତେ ଚିମ୍ତାଙ୍ଗ୍ ଆବୁ ବିଶ୍ଵାସ୍ ରେ ଧାର୍ମୀ ବାଇଜାନାବୁ, ଦୋ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହୋରାତେ ପାର୍ମେଶ୍ଵାର୍ ଲୋଃ ମେଶାକାନ୍ ତାଇନ୍ କାବୁ, ଅକନିଜାଃ ହୋରାତେ ବିଶ୍ଵାସ୍ ରାଃ ଚାଲ୍ତେ ଏନ୍ ଆନୁଗ୍ରାହ୍ ସାନ୍ତେ ଅକନାଃ ରେ ଆବୁ ବାଇକାନାବୁ, ଆବୁ ସେଟେର୍ କାନାବୁ, ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରାଃ ଆଶ୍ରା ରେ ରାଶିକାନ୍ କାବୁ। ଖାଲି ନେୟା କାହା, ମେନ୍ଦୋ ଦୁକୁ ଇମ୍ତା ରେହ ଆବୁ ରାଶିକାନ୍ କାବୁ, ନେୟା ସାରିକେତେ ଚି ଦୁକୁ ତେ ସାହାତିଙ୍ଗ୍, ହାର୍ ସାହାତିଙ୍ଗ୍ ତେ ପୋକ୍ତା ବାଇଏନ୍ ଆଡୋଃ ପୋକ୍ତା ବାଇଏନ୍ ତେ ଆଶ୍ରା ଅମୋନୋଃୱା; ହାର୍ ଆଶ୍ରା ତେ ଗିୟୁଃ କାହୋବାୱା, ଚିୟାଃଚି ପାବିତାର୍ ଆତ୍ମା ଅକନାଃ ଆବୁକେ ଏମାକାନା ଇନିଜାଃ ହୋରାତେ ପାର୍ମେଶ୍ଵାର୍ ରାଃ ଦୁଲାଡ଼୍ ଆବୁୱାଃ ମୋନ୍ ରେ ସାଜୁକାନା। ଚିୟାଃଚି ଚିମ୍ତାଙ୍ଗ୍ ଆବୁ ନାରାଦୁରାଗି ତାଇନ୍ କେନାବୁ, ଦୋ ମାସୀହ୍ ଠିକ୍ ସାମାୟ୍ ରେ ପାପୀକୋ ଲାଗିନ୍ ଗୋଏଃନାଏ। ଜାହାନ୍ ଧାର୍ମୀ ହୋଡ଼ ଲାଗିନ୍ ଜାହାଁଏ ଗୋଜୋଃ ୱାଏ ଇଦୁ ନେୟା ଦୋ ମୁସ୍କିଲ୍ କାଜି ତାନାଃ; ମେନ୍ଦୋ ଇଦୁ ଜାହାନ୍ ବେଶ୍ ହୋଡ଼ ଲାଗିନ୍ ଜେତାଏ ଗୋଜୋଃ ଲାଗିନ୍ ସାନାଙ୍ଗ୍ଆଏ। ମେନ୍ଦୋ ପାର୍ମେଶ୍ଵାର୍ ଆବୁୱାଃ ରେ ଆଜାଃ ଦୁଲାଡ଼୍ କେ ନେଲେକାତେ ଉଦୁବ୍ ତାନାଏ, ଚି ଚିମ୍ତାଙ୍ଗ୍ ଆବୁ ପାପୀ ଗି ତାଇକେନାବୁ ଇମ୍ତାଗି ମାସୀହ୍ ଆବୁୱାଃ ଲାଗିନ୍ତେ ଗୋଏଃ ଜାନାଏ। ଏନାମେନ୍ତେ ଯାବ୍ ଚି ଆବୁ ନାଆ, ଇନିଜାଃ ମାୟୋମ୍ ରାଃ ହୋରାତେ ଧାର୍ମୀ ବାଇଜାନାବୁ, ଦୋ ଇନିଜାଃ ହୋରାତେ ପାର୍ମେଶ୍ଵାର୍ ରାଃ ଖିସ୍ ଏତେ ଚିନାଃଲାଇ କାବୁ ବାଞ୍ଚାଅଃୱା? ଚିୟାଃଚି ଆବୁ ବାଇରୀ ତାଇକେନ୍ ଇମ୍ତାରେ ଇନିଜାଃ ହୋନ୍‍କଡ଼ା ରାଃ ଗୋନୋଏଃ ହୋରାତେ ଆବୁୱାଃ ମେନେଶା ପାର୍ମେଶ୍ଵାର୍ ଲୋଃ ହୋବାଜାନା, ଏଣ୍ଡେ ଦୋ ମେନେଶା ହୋବାଜାନ୍ତେ ଆବୁ ଇନିଜାଃ ଜୀଦାନ୍ ରାଃ ହୋରାତେ ବାଞ୍ଚାଅ ଚିନାଃ ଲାଇ କାବୁ ନାମେୟା? ନେୟା ଖାଲି କାହା, ମେନ୍ଦୋ ଆବୁ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହୋରାତେ, ଅକନିଜାଃ ହୋରାତେ ଆବୁୱାଃ ମେନେଶା ହୋବାକାନା, ପାର୍ମେଶ୍ଵାର୍ ରେ ରାଶିକାଅଃ ତାନାବୁ। ଏନାମେନ୍ତେ ଜେଲେକା ମିୟାଃ ହୋଡ଼ ରାଃ ହୋରାତେ ଅତେଦିଶୁମ୍ ରେ ପାପ୍ ହିଜୁଃଲେନା, ହାର୍ ପାପ୍ ରାଃ ହୋରାତେ ଗୋନୋଏଃ ହିଜୁଃଲେନା, ହାର୍ ନେ ଲେକାତେ ଗୋନୋଏଃ ସବେନ୍ ହୋଡ଼ୋକୋରେ ବୋଲୋଜାନା, ଚିୟାଃଚି ସବେନ୍‍କୋ ପାପ୍ କେଦାକୋ। ମୁଶା ନାବୀ ରାଃ ଆଇନ୍ ଏମ୍ ସିଦା ରେ ପାପ୍ ନେ ଅତେଦିଶୁମ୍ ରେଦୋ ତାଇକେନା, ମେନ୍ଦୋ ମୁଶା ନାବୀ ରାଃ ଆଇନ୍ କାତାଇନ୍ ରାଃ ଚାଲ୍ତେ ପାପ୍ କୋ କାଲେକା ଲେନା। ଏଣ୍ଡେହଗି ଆଦାମ୍ ଏତେ ମୁଶା ନାବୀ ସାନ୍ତେ ଗୋନୋଏଃ ଏନ୍ ହୋଡ଼ୋକୋୱାଃ ରେହ ରାଇଜ୍ କେଦାଏ, ଅକନ୍‍କୋ ଏନ୍ ଆଦାମ୍ ଲେକା ଆନାଚୁ କାମାନାତିଙ୍ଗ୍ କେତେ ପାପ୍ କାକୋ ରିକାଲେଦା, ଅକନିଃ ହିଜୁଃତାନ୍ ନିଜାଃ ଲେକା ରାଃ ମିୟାଃ ଚିହ୍ନା ତାନିଃ। ମେନ୍ଦୋ ଜେଲେକା ଆଦାମ୍ ରାଃ ପାପ୍ ତାଇକେନା, ଏନ୍‍ଲେକା ଆନୁଗ୍ରାହ୍ ରାଃ ବାର୍ଦାନ୍ ନାହାଲା, ଚିୟାଃଚି ଚିମ୍ତା ମିୟାଃ ହୋଡ଼ ରାଃ ପାପ୍ ରିକାତେ ଥିମ୍ବାଗି ହୋଡ଼ୋକୋ ଗୋଏଃ ଜାନାକୋ, ଏଣ୍ଡେ ପାର୍ମେଶ୍ଵାର୍ ରାଃ ଆନୁଗ୍ରାହ୍ ଆଡୋଃ ଇନିଜାଃ ଏନ୍ ଦାନ୍ ମିୟାଃ ହୋଡ଼ ତେ, ମାନେ ୟୀଶୁ ମାସୀହ୍ ରାଃ ଆନୁଗ୍ରାହ୍ ତେ ଥିମ୍ବାଗି ହୋଡ଼ୋକୋୱାଃ ଚେତାନ୍ ରେ ଥିମ୍ବାତେ ହୋବାଜାନା। ଜେଲେକା ମିୟାଃ ହୋଡ଼ ରାଃ ପାପ୍ ରିକାରାଃ ଯଅ ହୋବାଜାନା, ଏନ୍‍ଲେକାଗି ଦାନ୍ ରାଃ ଦୋ ନାହାଲା, ଚିୟାଃଚି ମିହୋଡ଼୍ ରାଃ ଲାଗିନ୍ତେ ଦାଣ୍ଡ୍ ରାଃ ଆନାଚୁ ରାଃ ଫାଏସାଲା ହୋବାନା, ମେନ୍ଦୋ ଥିମ୍ବାଗି ପାପ୍ କୋରାଃ ଲାଗିନ୍ତେ ନେକା ବାର୍ଦାନ୍ ହୋବାଜାନା ଚି ହୋଡ଼ୋକୋ ଧାର୍ମୀ ବାଇୟୋଃୱାକୋ। ଚିୟାଃଚି ଚିମ୍ତାଙ୍ଗ୍ ମିୟାଃ ହୋଡ଼ ରାଃ ପାପ୍ ହୋରାତେ ଗୋନୋଏଃ ଏନ୍ ମିହୋଡ଼୍ ରାଃ ହୋରାତେଗି ରାଇଜ୍ କେଦାଏ, ଏଣ୍ଡେ ଅକନ୍ ହୋଡ଼ୋକୋ ଆନୁଗ୍ରାହ୍ ହାର୍ ଧାର୍ମୀ ଲେକା ବାର୍ଦାନ୍ ଥିମ୍ବାଗି ନାମ୍ ତାନାକୋ ଇନ୍‍କୁ ମିୟାଃ ହୋଡ଼ ତେ, ମାନେ ୟୀଶୁ ମାସୀହ୍ ରାଃ ହୋରାତେ ସାର୍ତିଗୀ ଜାନାଓ ଜୀଦାନ୍ ରେ ରାଇଜ୍ ୟାକୋ। ଏନାମେନ୍ତେ ଜେଲେକା ମିହୋଡ଼୍ ରାଃ ପାପ୍ ସବେନ୍ ହୋଡ଼ୋକୋ ଲାଗିନ୍ ଦାଣ୍ଡ୍ ରାଃ ଆନାଚୁ ହୋବାଜାନା, ଏନ୍‍ଲେକାଗି ମିହୋଡ଼୍ ରାଃ ଧାରାମ୍ ରାଃ କାମି ହ ସବେନ୍ ହୋଡ଼ୋକୋ ନାଙ୍ଗ୍ ଜୀହିଦୋଃ ଲାଗିନ୍ତେ ଧାର୍ମୀ ହୋବାଅଃ ଲାଗିନ୍ତେ ହୋବାଜାନା। ଚିୟାଃଚି ଜେଲେକା ମିୟାଃ ହୋଡ଼ ରାଃ ଆନାଚୁ କାମାନାତିଙ୍ଗ୍ ହୋରାତେ ଥିମ୍ବାଗି ହୋଡ଼ୋକୋ ପାପୀ ହୋବାଜାନାକୋ, ଏନ୍‍ଲେକାଗି ମିୟାଃ ହୋଡ଼ ରାଃ ଆନାଚୁ ମାନାତିଙ୍ଗ୍ ହୋରାତେ ଥିମ୍ବାଗି ହୋଡ଼ୋକୋ ଧାର୍ମୀ ହୋବାଅଃୱାକୋ। ମୁଶା ନାବୀ ରାଃ ଆଇନ୍ ଥାଲା ରେ ହିଜୁଃଜାନା ଚି ପାପ୍ ଥିମ୍ବାଗି ହୋବାୱା, ମେନ୍ଦୋ ଅକତାଃ ରେ ପାପ୍ ଥିମ୍ବା ହୋବାନା ହେନ୍ତାଃ ଆନୁଗ୍ରାହ୍ ଏନା ତେହଗି ଥିମ୍ବା ହୋବାନା, ଚି ଜେଲେକା ପାପ୍ ଗୋନୋଏଃ ରେ ରାଇଜ୍ କେଦାଏ, ଏନ୍ ଲେକାଗି ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହୋରାତେ ଆନୁଗ୍ରାହ୍ ହଗି ଜାନାଓ ଜୀଦାନ୍ ଲାଗିନ୍ ଧାର୍ମୀ ବାଇତାନ୍ ଲୋଃ ରାଇଜ୍ ୟାଏ। ଏଣ୍ଡେ ଆବୁ ଚିନାଃ କାଜିୟାବୁ? ଚିନାଃ ଆବୁ ପାପ୍ କେତେୟାବୁ ଚି ଆନୁଗ୍ରାହ୍ ଥିମ୍ବାଗି ହୋବାକାତୋଃୱା? ଚିଉଲାଅ ହ କାହା! ଚିମ୍ତାଙ୍ଗ୍ ଆବୁ ପାପ୍ ଲାଗିନ୍ ଗୋଏଃ ଜାନାବୁ ଦୋ ଆଡୋଃ ଆୟୁର୍ତେ ଏନାରେ ଚିଲ୍‍କା ଜୀଦାନ୍ ଜୀହୀଦୋୱାବୁ? ଆପେ ସାରିତାନାପେ ଚି ଆବୁ ସବେନ୍ ଅକନ୍‍କୋ ମାସୀହ୍ ୟୀଶୁ ରାଃ ବାପ୍ତିସ୍ମା ଇଦିକେଦାବୁ, ଏନା ଇନିଜାଃ ଗୋନୋଏଃ ରାଃ ବାପ୍ତିସ୍ମା ଇଦିକେଦାବୁ। ଏନାତେ ଏନ୍ ଗୋନୋଏଃ ରାଃ ବାପ୍ତିସ୍ମା ନାମ୍ ଜାନ୍ତେ ଆବୁ ଇନିଜାଃ ଲୋଃ ତୋପାଜାନାବୁ, ଏନାତେ ଜେଲେକା ମାସୀହ୍ ଆପୁ ରାଃ ମାନାରାଙ୍ଗ୍ ହୋରାତେ ଗୋଜାକାନ୍ କୋଏତେ ଜୀହିଃ ଜାନାଏ, ଏନ୍‍ଲେକାଗି ଆବୁ ହ ନାୱା ଜୀଦାନ୍ ନାମ୍ ଜାନ୍ ଲେକା ସେନ୍ କାବୁ। ଚିୟାଃଚି ଆଗାର୍ ଆବୁ ଇନିଜାଃ ଗୋନୋଏଃ ଲେକା ଇନିଜାଃ ଲୋଃ ମେଶା କାନାବୁ, ଏଣ୍ଡେ ସାର୍ତିଗୀ ଇନିଜାଃ ଜୀବିନିରିଦ୍ ଲେକା ହଗି ମେଶା କେନୋଗାବୁ। ଆବୁ ସାରିତାନାବୁ ଚି ଆବୁୱାଃ ପାପ୍ ରାଃ ହୋଡ଼ମୋ ଇନିଜାଃ ଲୋଃ କ୍ରୁଶ୍ ରେ ରାକାବ୍ ଜାନା, ଏନାତେ ପାପ୍ ରାଃ ହୋଡ଼ମୋ ନାଷ୍ଟ୍ କେନୋଃକା, ହାର୍ ଆବୁ ଆୟୁର୍ତେ ପାପ୍ ରାଃ ଦାସୀ କାବୁ ତାଇନା। ଚିୟାଃଚି ଅକଏ ଗୋଏଃଜାନାଏ, ଇନିଃ ପାପ୍ ଏତେ ରାଡ଼ାଜାନ୍ତେ ଧାର୍ମୀ ବାଇଜାନାଏ। ଏନାମେନ୍ତେ ଆଗାର୍ ଆବୁ ମାସୀହ୍ ଲୋଃ ଗୋଏଃ ଜାନାବୁ, ଏଣ୍ଡେ ଆବୁୱାଃ ବିଶ୍ଵାସ୍ ନେୟା ତାନାଃ ଚି ଇନିଜାଃ ଲୋଃଗି ଜୀହିଦୋଗାବୁ। ଚିୟାଃଚି ଆବୁ ନେୟା ସାରିତାନାବୁ ଚି ମାସୀହ୍ ଗୋଜାକାନ୍ କୋଏତେ ଜୀବିରିଃ କେତେ ଆଡୋଃ କାଏ ଗୋଜୋଗା; ଗୋନୋଏଃ ଇନିଜାଃ ରେ ଆଡୋଃ କାଏ ରାଇଜ୍ ଧାଡ଼ିୟା। ଚିୟାଃଚି ମାସୀହ୍ ଗୋଏଃ ଲେନାଏ ଦୋ ପାପ୍ ଲାଗିନ୍ ମିଶାଗି ଗୋଏଃ ଜାନାଏ: ମେନ୍ଦୋ ଇନିଃ ଜୀହିଦୋଃ ତାନାଏ ଦୋ ପାର୍ମେଶ୍ଵାର୍ ଲାଗିନ୍ ଜୀହିଦୋଃ ତାନାଏ। ନେକାଗି ଆପେ ଆପାନ୍ କେ ପାପ୍ ଲାଗିନ୍ ଗୋଜାକାନ୍, ମେନ୍ଦୋ ପାର୍ମେଶ୍ଵାର୍ ଲାଗିନ୍ ମାସୀହ୍ ୟୀଶୁ ରେ ଜୀହିଃ ବୁଝାଅନ୍‍ପେ। ଏନାମେନ୍ତେ ପାପ୍ ଆପେୟାଃ ଗୋଜୋଃ ତେୟାଃ ହୋଡ଼ମୋ ରେ ଆଲୋକା ରାଇଜ୍ ଏଚାଏ, ଚି ଆପେ ଏନାରାଃ ସାନାଙ୍ଗ୍ କୋରାଃ ଆଧିନ୍ ରେ ତାଇନାପେ। ହାର୍ ଆପାନାଃ ହୋଡ଼ମୋ ରାଃ ହାନାଟିଙ୍ଗ୍ କୋକେ ଏତ୍କାନ୍ କାମି ରେ ଆଉୱେ ଲାଗିନ୍ତେ ପାପ୍ ରାଃ ତିଈ ରେ ଆଲୋପେ ଜିମାନା, ମେନ୍ଦୋ ଆପେ ଆପାନ୍ କେ ଗୋଜାକାନ୍ କୋଏତେ ଜୀବିରିଃକାନ୍ ସାରିକେତେ ପାର୍ମେଶ୍ଵାର୍ ରାଃ ତିଈ ରେ ଜିମାନ୍‍ପେ, ହାର୍ ଆପାନାଃ ହୋଡ଼ମୋ ରାଃ ହାନାଟିଙ୍ଗ୍ କୋକେ ଧାରାମ୍ ରାଃ କାମି ଲାଗିନ୍ତେ ପାର୍ମେଶ୍ଵାର୍ କେ ଜିମାନ୍‍ପେ। ଏଣ୍ଡେ ଆପେୟାଃ ରେ ଚେତାନ୍ ପାପ୍ ରାଃ ରାଇଜ୍ କାହୋବାଅଃୱା, ଚିୟାଃଚି ଆପେ ମୁଶା ନାବୀ ରାଃ ଆଇନ୍ ରାଃ ଆଧିନ୍ ବାଙ୍ଗ୍‍ପେୟା ମେନ୍ଦୋ ଆନୁଗ୍ରାହ୍ ରାଃ ଆଧିନ୍ ରେ ମେନାପେୟା। ଏଣ୍ଡେ ଚିନାଃ ହୋବାଜାନା? ଚିନାଃ ଆବୁ ନେୟାଲାଗିନ୍ତେ ପାପ୍ ୟାବୁ ଚି ଆବୁ ମୁଶା ନାବୀ ରାଃ ଆଇନ୍ ରାଃ ଆଧିନ୍ ବାଙ୍ଗ୍‍ବୁୱା ମେନ୍ଦୋ ଆନୁଗ୍ରାହ୍ ରାଃ ଆଧିନ୍ ରେ ମେନାବୁୱା? ଚିଉଲାଅ କାହା! ଚିନାଃ ଆପେ କାପେ ସାରିତାନା ଚି ଅକେୟାଃ ଆନାଚୁ ମାନାତିଙ୍ଗ୍ ଲାଗିନ୍ ଆପେ ଆପାନ୍ କେ ଦାସୀ କୋୱାଃ ଲେକା ଜିମାତାଃପେ ଇନିଜାଃ ଆପେ ଦାସୀ ତାନ୍‍ପେ: ଚାହେ ପାପ୍ ରାଃ, ଅକନାଃ ତେ ଗୋନୋଏଃପେ ନାମେୟା, ଚାହେ ଆନାଚୁ ମାନାତିଙ୍ଗ୍ ରାଃ, ଅକନାଃତେ ଧାର୍ମୀ ବାଇୟୋଃୱାପେ। ମେନ୍ଦୋ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ହୋବାଅଃକା ଚି, ଆପେ ଜେ ପାପ୍ ରାଃ ଦାସୀ ତାଇନ୍ କେନାପେ, ନାଆ ମୋନ୍ ତେ ପାର୍ମେଶ୍ଵାର୍ ରାଃ ଏନ୍ ଶିଖାଅକାନ୍ କାଜି ରାଃ ମାନାତିଙ୍ଗ୍ ତାନ୍‍କୋ ହୋବାଜାନାପେ, ଅକନାଃଏତେ ଶିଖାଅ ପୋକ୍ତା ଲେନ୍ତାଇ କେନାପେ, ହାର୍ ପାପ୍ ଏତେ ରାଡ଼ା ଜାନ୍ତେ ଧାରାମ୍ କାମି ରାଃ ଦାସୀ ବାଇଜାନାପେ। ଇଙ୍ଗ୍ ଆପେୟାଃ ହୋଡ଼ମୋ ରାଃ ନାରାଦୁରା ଲାଗିନ୍ତେ ହୋଡ଼ ଲେକା କାଜିତାନିଙ୍ଗ୍। ଜେଲେକା ଆପେ ଆପାନାଃ ହୋଡ଼ମୋ ରାଃ ହାନାଟିଙ୍ଗ୍ କୋକେ ପାପ୍ କାମି ଲାଗିନ୍ତେ କାଫାର୍ଚି ହାର୍ ପାପ୍ ରାଃ ଦାସୀ ହୋବାକେତେ ଜିମା ଲେଦାପେ, ଏନ୍‍ଲେକାଗି ନାଆ ଆପେୟାଃ ହୋଡ଼ମୋ ରାଃ ହାନାଟିଙ୍ଗ୍ କୋକେ ପାବିତାର୍‍ଅଃ ଲାଗିନ୍ତେ ଧାରାମ୍ ରାଃ ଦାସୀ ବାଇକେତେ ଜିମାଏପେ। ଚିମ୍ତାଙ୍ଗ୍ ଆପେ ପାପ୍ ରାଃ ଦାସୀ ତାଇନ୍ କେନାପେ, ଇମ୍ତା ଧାରାମ୍ ରେ କାପେ ଥୋଲାକାନ୍ ତାଇକେନା। ଏନାମେନ୍ତେ ଅକନ୍ କାଜିକୋଏତେ ନାଆ ଆପେ ଗିୟୁଗୋଃ ତାନାପେ, ଇମ୍ତା ଆପେ ଏନା କୋଏତେ ଚିକାନ୍ ଯଅ ନାମ୍ ତାଇକେନାପେ? ଚିୟାଃଚି ଏନାକୋରାଃ ଟୁଣ୍ଡୁ ଦୋ ଗୋନୋଏଃ ତାନାଃ। ମେନ୍ଦୋ ନାଆ ପାପ୍ ଏତେ ରାଡ଼ାଜାନ୍ତେ ହାର୍ ପାର୍ମେଶ୍ଵାର୍ ରାଃ ଦାସୀ ହୋବାକେତେ ପାବିତାର୍‍ଅଃ ତାନାପେ, ଏନାଗି ଆପେୟାଃ ଯଅ ତାନାଃ, ହାର୍ ଏନାରାଃ ଟୁଣ୍ଡୁ ଜାନାଓ ଜୀଦାନ୍ ତାନାଃ। ଚିୟାଃଚି ପାପ୍ ରାଃ ନାଲା ଦୋ ଗୋନୋଏଃ ତାନାଃ, ମେନ୍ଦୋ ପାର୍ମେଶ୍ଵାର୍ ରାଃ ବାର୍ଦାନ୍ ଆବୁୱାଃ ପ୍ରାଭୁ ୟୀଶୁ ରେ ଜାନାଓ ଜୀଦାନ୍ ତାନାଃ। ହେ ହାଗାକୋ ହାର୍ ମିଶିକୋ, ଚିନାଃ ଆପେ କାପେ ସାରିତାନା-ଇଙ୍ଗ୍ ମୁଶା ନାବୀ ରାଃ ଆଇନ୍ କେ ସାରିତାନ୍ କୋକେ କାଜି ତାନିଙ୍ଗ୍-ଚି ଚିମିନ୍ ସାନ୍ତେ ହୋଡ଼ ଜୀହିଃ ତାଇନୋଗାଏ, ଇମିନ୍ ସାନ୍ତେ ଇନିଜାଃ ରେ ମୁଶା ନାବୀ ରାଃ ଆଇନ୍ ରାଇଜ୍ ଏୟାଏ? ଚିୟାଃଚି ଆଣାଦୀକାନ୍ କୁଡ଼ି ମୁଶା ନାବୀ ରାଃ ଆଇନ୍ ରାଃ ଲେକାତେ ଆପାନାଃ କଡ଼ା ରାଃ ଜୀନିଦ୍ ରେ ଇନିଃ ଲୋଃ ଥୋଲାକାନାଏ, ମେନ୍ଦୋ ଆଗାର୍ କଡ଼ା ଗୋଏଃ କେନୋଃ ରେଦୋ, ଇନିଃ କଡ଼ା ରାଃ ଆଣାଦୀ ନିୟାମ୍ ତେ ରାଡ଼ା ଜାନାଏ। ଏନାମେନ୍ତେ ଆଗାର୍ କଡ଼ା ରାଃ ଜୀନିଦ୍ ରେଗି ଇନିଃ ଜାହାନ୍ ଏଟାଃ କଡ଼ା ରାଃ ହୋବାଅଃ ତାନାଏ, ଏଣ୍ଡେ ଦୋ ବ୍ୟାଭିଚାରୀ କାଜିୟୋଗାଏ, ମେନ୍ଦୋ ଆଗାର୍ କଡ଼ା ତେ ଗୋଏଃ କେନୋଗାଏ, ଏଣ୍ଡେ ଇନିଃ ଏନ୍ ଆଣାଦୀ ନିୟାମ୍ ତେ ରାଡ଼ା ଜାନାଏ, ନେତାଃ ସାନ୍ ଚି ଆଗାର୍ ଜାହାନ୍ ଏଟାଃ କଡ଼ା ଲୋଃ ଆଣାଦୀଏନ୍ ତାନାଏ ଏଣ୍ଡେ ହ ବ୍ୟାଭିଚାରୀ କାଏ ଲେକାଅଗାଏ। ଏନ୍ ଲେକାଗି ହେ ଇଙ୍ଗ୍ଆଃ ହାଗାକୋ ହାର୍ ମିଶିକୋ, ଆପେ ହଗି ମାସୀହ୍ ରାଃ ହୋଡ଼ମୋ ହୋରାତେ ମୁଶା ନାବୀ ରାଃ ଆଇନ୍ ଲାଗିନ୍ ଗୋଏଃକାନ୍ ଲେକା ବାଇଜାନାପେ, ଚି ଏନ୍ ଏଟାଃନିଜାଃ ହୋବାକେନୋଃପେ, ଅକଏ ଗୋଜାକାନ୍ କୋଏତେ ଜୀହିଃ ବିରିଃ ଜାନାଏ: ଏନାତେ ଆବୁ ପାର୍ମେଶ୍ଵାର୍ ଲାଗିନ୍ ଯଅ ଆଉୱେୟାବୁ। ଚିୟାଃଚି ଚିମ୍ତାଙ୍ଗ୍ ଆବୁ ହୋଡ଼ମୋ ଲେକା ପାପ୍ ରେ ତାଇନ୍ କେନାବୁ, ଦୋ ପାପ୍ କୋରାଃ ସାନାଙ୍ଗ୍ କୋ ଅକନାଃ ମୁଶା ନାବୀ ରାଃ ଆଇନ୍ ହୋରାତେ ତାଇକେନା, ଗୋନୋଏଃ ରାଃ ଯଅ ଆଉୱେ ଲାଗିନ୍ ଆବୁୱାଃ ହୋଡ଼ମୋ ରାଃ ହାନାଟିଙ୍ଗ୍ କୋରେ କାମି ତାଇକେନାଏ। ମେନ୍ଦୋ ଅକନ୍ ଥୋନୋଲ୍ ରେ ଆବୁ ତାଇକେନାବୁ ଏନା ଲାଗିନ୍ ଗୋଏଃ କେତେ, ନାଆ ମୁଶା ନାବୀ ରାଃ ଆଇନ୍ ତେ ନେକା ରାଡ଼ାଜାନାବୁ, ଚି ଅଲାକାନ୍ ମାରି ନିୟାମ୍ ଲେକା କାହା, ମେନ୍ଦୋ ଆତ୍ମା ରାଃ ନାୱା ନିୟାମ୍ ଲେକା ସେୱା ତାନାବୁ। ଏଣ୍ଡେ ଆବୁ ଚିନାଃ କାଜିୟାବୁ? ଚିନାଃ ମୁଶା ନାବୀ ରାଃ ଆଇନ୍ ପାପ୍ ତାନାଃ? ଚିଉଲାଅ କାହା! ମେନ୍ଦୋ ବେଗାର୍ ଆଇନ୍ ରେ ଇଙ୍ଗ୍ ପାପ୍ କେ କାଇଙ୍ଗ୍ ଉରୁମେୟା: ମୁଶା ନାବୀ ରାଃ ଆଇନ୍ ଆଗାର୍ କାଏ କାଜିତେୟାଃଏ, ଚି ଆଲୋପେ ହାୟାଅଃୱା ଦୋ ହାୟା ଚିନାଃ ତାନାଃ ଇଙ୍ଗ୍ କାଇଙ୍ଗ୍ ସାରିତେୟାଃ। ମେନ୍ଦୋ ପାପ୍ ହୋରା ନାମ୍ କେତେ ଆନାଚୁ ରାଃ ହୋରାତେ ଇଙ୍ଗ୍ଆଃ ରେ ସବେନ୍ ଲେକାନାଃ ହାୟା ଅମୋନ୍ କେଦାଏ, ଚିୟାଃଚି ମୁଶା ନାବୀ ରାଃ ଆଇନ୍ ବେଗାର୍ ପାପ୍ ଗୋଏଃ କାନାଏ। ଇଙ୍ଗ୍ ଦୋ ସିଦା ବେଗାର୍ ମୁଶା ନାବୀ ରାଃ ଆଇନ୍ ତେ ଜୀହିଃ ତାଇକେନାଇଙ୍ଗ୍, ମେନ୍ଦୋ ଚିମ୍ତାଙ୍ଗ୍ ଆନାଚୁ ହିଜୁଃଜାନା, ଦୋ ପାପ୍ ଜୀହିଃ ଜାନାଏ, ହାର୍ ଇଙ୍ଗ୍ ଗୋଏଃ ଜାନାଇଙ୍ଗ୍। ହାର୍ ଏନ୍ ଆନାଚୁ ଗି ଅକନାଃ ଜୀଦାନ୍ ଲାଗିନ୍ ତାଇକେନା, ଇଙ୍ଗ୍ଆଃ ଲାଗିନ୍ ଗୋନୋଏଃ ଆଉକେଦାଏ। ଚିୟାଃଚି ପାପ୍ ହୋରା ନାମ୍ କେତେ ଆନାଚୁ ରାଃ ହୋରାତେ ଇଙ୍ଗ୍‍କେ ବେଦା କେଦିଙ୍ଗାଏ, ହାର୍ ଏନାରାଃ ହୋରାତେ ଇଙ୍ଗ୍‍କେ ହ ଗୋଏଃ ତାଦିଙ୍ଗାଏ। ଏନାମେନ୍ତେ ମୁଶା ନାବୀ ରାଃ ଆଇନ୍ ପାବିତାର୍ ତାନାଃ, ହାର୍ ଆନାଚୁ ହଗି ଠାଉକା ଆଡୋଃ ବୁଗିନ୍ ତାନାଃ। ଏଣ୍ଡେ ଚିନାଃ ଆଇନ୍ ଅକନାଃ ବୁଗିନ୍ ତାଇଲେନା, ଇଙ୍ଗ୍ଆଃ ଲାଗିନ୍ ଗୋନୋଏଃ ବାଇଜାନା? ଏନ୍‍କା ଦୋ କାହା! ମେନ୍ଦୋ ପାପ୍-ପାପ୍ ମେନ୍ତେ ଉଦୁବୋଃକା, ଏନା ବୁଗିନ୍ ଜିନିଷ୍ ରାଃ ହୋରାତେ ଇଙ୍ଗ୍ଆଃ ଲାଗିନ୍ ଗୋନୋଏଃ କେ ସିର୍ଜାଅ କେଦାଏ, ହାର୍ ଆନାଚୁ ରାଃ ହୋରାତେ ପାପ୍ ପୁରାଃଗି ପାପ୍ ହୁୟୋଃକା। ଆବୁ ସାରିତାନାବୁ ଚି ମୁଶା ନାବୀ ରାଃ ଆଇନ୍ ଦୋ ଆତ୍ମାନ୍ ତାନାଃ, ମେନ୍ଦୋ ଇଙ୍ଗ୍ ହୋଡ଼ମୋ ଲେକା କାଆତ୍ମାନ୍ ତାନିଙ୍ଗ୍ ହାର୍ ପାପ୍ ରାଃ ତିଈ ରେ ଦାସୀ ଲେକା ଆଖ୍ରିଙ୍ଗ୍ କାନାଇଙ୍ଗ୍। ଅକନାଃ ଇଙ୍ଗ୍ ରିକାତାନିଙ୍ଗ୍ ଏନାକେ କାଇଙ୍ଗ୍ ସାରିତାନା; ଚିୟାଃଚି ଅକନାଃ ଇଙ୍ଗ୍ ସାନାଙ୍ଗ୍ ତାନିଙ୍ଗ୍ ଏନା କାଇଙ୍ଗ୍ ରିକାତାନା, ମେନ୍ଦୋ ଅକନାଃକେ ଇଙ୍ଗ୍ ହିଲାଙ୍ଗ୍ ତାନିଙ୍ଗ୍ ଏନା କେଗି ରିକାତାନାଇଙ୍ଗ୍। ଆଗାର୍ ଅକନାଃ ଇଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା ଏନାକେଗି ରିକାତାନିଙ୍ଗ୍, ଦୋ ଇଙ୍ଗ୍ ମାନାତିଙ୍ଗ୍ କେତାନିଙ୍ଗ୍ ଚି ମୁଶା ନାବୀ ରାଃ ଆଇନ୍ ବୁଗିନ୍ ତାନାଃ। ଏଣ୍ଡେ ନେକାରେ ଏନାକେ ରିକାତାନ୍‍ନିଃ ଇଙ୍ଗ୍ ନାହାଲାଇଙ୍ଗ୍, ମେନ୍ଦୋ ପାପ୍ ତାନାଃ ଅକନାଃ ଇଙ୍ଗ୍ଆଃ ରେ ଡେରା କାଦାଏ। ଚିୟାଃଚି ଇଙ୍ଗ୍ ସାରିତାନିଙ୍ଗ୍ ଚି ଇଙ୍ଗ୍ଆଃ ରେ ମାନେ ଇଙ୍ଗ୍ଆଃ ପାପୀ ହୋଡ଼ମୋ ରେ ଜାହାନ୍ ବୁଗିନ୍ କାଜି କାତାଇନ୍ ତାନା। ସାନାଙ୍ଗ୍ ଦୋ ଇଙ୍ଗ୍ ରେ ମେନାଃ, ମେନ୍ଦୋ ବୁଗିନ୍ କାମି ଇଙ୍ଗ୍ଆଃ ତେ କାହୋବାଅଃ ତାନା। ଚିୟାଃଚି ଅକନ୍ ବୁଗିନ୍ କାମି ରାଃ ଇଙ୍ଗ୍ ସାନାଙ୍ଗ୍ ତାନିଙ୍ଗ୍, ଏନା ଦୋ କାଇଙ୍ଗ୍ ରିକାତାନା, ମେନ୍ଦୋ ଅକନ୍ ଏତ୍କାନାଃ କେ କାଇଙ୍ଗ୍ ସାନାଙ୍ଗ୍ ତାନା, ଏନାକେଗି ରିକାତାନିଙ୍ଗ୍। ଏନାତେ ଆଗାର୍ ଇଙ୍ଗ୍ ଏନାଗି ରିକାତାନିଙ୍ଗ୍ ଅକନାଃ କେ କାଇଙ୍ଗ୍ ସାନାଙ୍ଗ୍ ତାନା, ଦୋ ଏନାକେ ରିକାନିଃ ଇଙ୍ଗ୍ ନାହାଲାଇଙ୍ଗ୍, ମେନ୍ଦୋ ଇଙ୍ଗ୍ ରେ ତାଇନ୍‍ତାନ୍ ପାପ୍ ଏନ୍‍କା ତାନାଏ। ନେଲେକାତେ ଇଙ୍ଗ୍ ନେ ନିୟାମ୍ ନାମ୍ ତାନିଙ୍ଗ୍ ଚି ଅକୋଇମ୍ତାଙ୍ଗ୍ ବୁଗିନାଃ ରିକା ସାନାଙ୍ଗ୍ ତାନିଙ୍ଗ୍, ଦୋ ଏତ୍କାନାଃ ଇଙ୍ଗ୍ଆଃ ରେଗି ମେନାଃ ଏନା ନାମ୍ ତାନିଙ୍ଗ୍। ଚିୟାଃଚି ଇଙ୍ଗ୍ ଭିତାର୍‍ରେନ୍ ହୋଡ଼ମୋ ତେଦୋ ପାର୍ମେଶ୍ଵାର୍ ରାଃ ଆଇନ୍ ତେ ଥିମ୍ବାଗି ସୁକୁଅଃ ତାନାଇଙ୍ଗ୍। ମେନ୍ଦୋ ଇଙ୍ଗ୍‍କେ ଆପାନାଃ ହୋଡ଼ମୋ ରେୟାଃ ହାନାଟିଙ୍ଗ୍ କୋରେ ଏଟାଃ ଲେକାନାଃ ଆଇନ୍ ନେଲୋଃତାନା, ଅକନାଃ ଇଙ୍ଗ୍ଆଃ ମୋନ୍ ରେୟାଃ ଆଇନ୍ ତେ ଲାଡ଼ାଇୟୋଃ ତାନାଏ ହାର୍ ଇଙ୍ଗ୍‍କେ ପାପ୍ ରାଃ ଆଇନ୍ ରେ ଥୋଲିଙ୍ଗ୍ ତାନାଏ ଅକନାଃ ଇଙ୍ଗ୍ଆଃ ହୋଡ଼ମୋ ରାଃ ହାନାଟିଙ୍ଗ୍ କୋରେ ମେନାଃ। ହାୟ୍, ଇଙ୍ଗ୍ ଚିଲ୍‍କା ବେଚାରା ଦୁକୁନାମ୍ ତାନ୍ ହୋଡ଼ ତାନିଙ୍ଗ୍! ଇଙ୍ଗ୍‍କେ ନେ ଗୋନୋଏଃ ରାଃ ହୋଡ଼ମୋ ତେ ଅକଏ ରାଡ଼ାଇଙ୍ଗ୍ ୟାଏ? ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହୋରାତେ ଛୋଡ଼ାଓ ଜାନିଙ୍ଗ୍ ଏନା ଲାଗିନ୍ତେ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ତାନିଙ୍ଗ୍। ଏନାମେନ୍ତେ ଇଙ୍ଗ୍ ମୋନ୍ ତେଦୋ ପାର୍ମେଶ୍ଵାର୍ ରାଃ ଆଇନ୍ ରାଃ, ମେନ୍ଦୋ ହୋଡ଼ମୋ ତେ ପାପ୍ ରାଃ ଆଇନ୍ ରାଃ ଦାସୀ କାନିଙ୍ଗ୍। ଏନାମେନ୍ତେ ନାଆ ଅକଏ ମାସୀହ୍ ୟୀଶୁ ରେ ମେନାଇୟା, ଇନ୍‍କୁରେ ଶାଜାଇ ରାଃ ଆନାଚୁ ବାନୋଃୱା। (ଚିୟାଃଚି ଇନ୍‍କୁ ପାପୀ ହୋଡ଼ମୋ ସାନାଙ୍ଗ୍ ଲେକାତେ ଦୋ କାହା ମେନ୍ଦୋ ଆତ୍ମା ଲେକାତେ ସେସେନ୍ ତାନାକୋ।) ଚିୟାଃଚି ଜୀଦାନ୍ ରାଃ ଆତ୍ମା ରାଃ ଆଇନ୍ ଇଙ୍ଗ୍‍କେ ମାସୀହ୍ ୟୀଶୁ ରେ ପାପ୍ ରାଃ, ହାର୍ ଗୋନୋଏଃ ରାଃ ଆଇନ୍ ଏତେ ରାଡ଼ା କିଦିଙ୍ଗାଏ। ଚିୟାଃଚି ଅକନ୍ କାମି ମୁଶା ନାବୀ ରାଃ ଆଇନ୍ ପାପୀ ହୋଡ଼ମୋ ରାଃ ଲେକାତେ କାଏ ଧାଡ଼ି କେଦାଏ, ଏନାକେ ପାର୍ମେଶ୍ଵାର୍ ରିକା କେଦାଏ, ମାନେ ଆଜାଃଗି ହୋନ୍‍କଡ଼ା କେ ପାପୀ ହୋଡ଼ ଲେକା ହାର୍ ଆବୁୱାଃ ପାପ୍ ରାଃ ଦାଣେ ବାଇଏନ୍ ଲାଗିନ୍ତେ କୁଲ୍ କେତେ, ହୋଡ଼ମୋ ରେ ପାପ୍ କେ ଶାଜାଇ ରାଃ ଆନାଚୁ ଏମ୍ କେଦାଏ। ଏନାମେନ୍ତେ ଚି ମୁଶା ନାବୀ ରାଃ ଆଇନ୍ ରାଃ ଧାରାମ୍-ନିୟାମ୍ ଆବୁ ରେ ଅକନ୍‍କୋ ହୋଡ଼ମୋ ରାଃ ଲେକାତେ କାହା ମେନ୍ଦୋ ଆତ୍ମା ରାଃ ଲେକାତେ ସେସେନ୍ ତାନାବୁ, ପୁରା ହୋବାଅଃଚା। ଚିୟାଃଚି ହୋଡ଼ମୋ-ଲେକାତାଇନ୍ ହୋଡ଼ ହୋଡ଼ମୋ ରାଃ କାଜି କୋରେ ମୋନ୍ ଲାଗାଅୟାଏ; ମେନ୍ଦୋ ଆତ୍ମାନ୍ ହୋଡ଼ ଆତ୍ମା ରାଃ କାଜିକୋରେ ମୋନ୍ ଲାଗାଅୟାଏ। ପାପୀ ହୋଡ଼ମୋ ରେ ମୋନ୍ ଲାଗାଅ ତେୟାଃ ଦୋ ଗୋନୋଏଃ ତାନାଃ, ମେନ୍ଦୋ ଆତ୍ମା ରେ ମୋନ୍ ଲାଗାଅ ଜୀଦାନ୍ ଆଡୋଃ ଶାନ୍ତି ତାନାଃ। ଚିୟାଃଚି ପାପୀ ହୋଡ଼ମୋ ରେ ମୋନ୍ ଲାଗାଅ ଦୋ ପାର୍ମେଶ୍ଵାର୍ ରାଃ ବାଇରୀ ବାଇୟେନ୍ ତାନାଃ, ଚିୟାଃଚି ଏନାଦୋ ପାର୍ମେଶ୍ଵାର୍ ରାଃ ଆଇନ୍ ରାଃ ଆଧିନ୍ ବାନୋଃୱା ହାର୍ କା ହୋବାଅଃୱା। ହାର୍ ଅକନ୍‍କୋ ହୋଡ଼ମୋ-ଲେକାତାଇନ୍ ରେ ମେନାକୋୱା, ଇନ୍‍କୁ ପାର୍ମେଶ୍ଵାର୍ କେ ସୁକୁ କାକୋ ଧାଡ଼ିୟା। ମେନ୍ଦୋ ଆପେ ରେ ପାର୍ମେଶ୍ଵାର୍ ରାଃ ଆତ୍ମା ତାଇନ୍ ତାନ୍ ରେଦୋ, ଆପେ ପାପୀ ହୋଡ଼ମୋ ରାଃ ସାନାଙ୍ଗ୍ ଲେକାତେ ନାହାଲାପେ ମେନ୍ଦୋ ଆତ୍ମାନ୍ ଲେକା ରେ ମେନାପେୟା। ଆଗାର୍ ଜେତାଏ ମାସୀହ୍ ରାଃ ଆତ୍ମା କାଏ ନାମ୍ କାରେଦୋ ଇନିଃ ଆଜାଃ ହୋଡ଼ ନାହାଲାଏ। ଆଗାର୍ ମାସୀହ୍ ଆପେ ରେ ମେନିଜାଏ ରେଦୋ, ହୋଡ଼ମୋ ପାପ୍ ଲାଗିନ୍ତେ ଗୋଜାକାନାଏ; ମେନ୍ଦୋ ଆତ୍ମା ଧାରାମ୍ ଲାଗିନ୍ତେ ଜୀହିଦ୍ ତାନ୍ ମେନାଇଜା। ଆଗାର୍ ଇନିଜାଃ ଆତ୍ମା ଅକଏ ୟୀଶୁ କେ ଗୋଜାକାନ୍ କୋଏତେ ଜୀହିଃ କିଜାଏ, ଆପେ ରେ ମେନାଇଃ ରେଦୋ; ଅକଏ ମାସୀହ୍ କେ ଗୋଜାକାନ୍ କୋଏତେ ଜୀହିଃ କିଜାଏ, ଇନିଃ ଆପେୟାଃ ଗୋଜୋଃ ହୋଡ଼ମୋ କେ ହଗି ଆଜାଃ ଆତ୍ମା ରାଃ ହୋରାତେ ଅକନିଃ ଆପେ ରେ ମେନାଇଜା, ଜୀହିଃପେୟାଏ। ଏନାମେନ୍ତେ ହେ ହାଗାକୋ ହାର୍ ମିଶିକୋ, ଆବୁ ହୋଡ଼ମୋ ଲାଗିନ୍ ରିଣୀ ହାଲ୍‍ତାନ୍ କୋ ନାହାଲାବୁ ଚି ପାପୀ ହୋଡ଼ମୋ ରାଃ ଲେକାତେ ଜୀହିଦୋଃୱାବୁ। ଚିୟାଃଚି ଆଗାର୍ ଆପେ ପାପୀ ହୋଡ଼ମୋ ରାଃ ଲେକାତେ ଜୀହିଦୋଃୱାପେ ଏଣ୍ଡେଦୋ ଗୋଜୋଃୱାପେ, ଆଗାର୍ ପାବିତାର୍ ଆତ୍ମା ରାଃ ପେଡ଼େଏ ତେ ହୋଡ଼ମୋ ରାଃ କାମିକୋକେ ଗୋଜେୟାପେ ଏଣ୍ଡେ ଜୀହିଃ ଦୋଗାପେ। ଏନାମେନ୍ତେ ଚି ଚିମିନ୍ ହୋଡ଼ୋକୋ ପାର୍ମେଶ୍ଵାର୍ ରାଃ ଆତ୍ମା ତେ ସେସେନ୍ ନାକୋ ଇନ୍‍କୁ ଗି ପାର୍ମେଶ୍ଵାର୍ ରାଃ ହୋନ୍ କୋ ତାନ୍‍କୋ। ଚିୟାଃଚି ଆପେକେ ଦାସୀଏନ୍ ରାଃ ଆତ୍ମା କାନାମ୍ କାନା ଚି ଆଡୋଃଗି ବୋରୋୟାପେ ମେନ୍ଦୋ ଆସୁଲ୍‍ହୋନ୍ ବାଇଏନ୍ ରାଃ ଆତ୍ମା ନାମ୍ କାଦାପେ, ଅକନାଃତେ ଆବୁ ହେ ଆବା, ହେ ଆପୁ କାଜିକେତେ କେଡ଼ାୟାବୁ। ପାବିତାର୍ ଆତ୍ମା ଆଏଃଗି ଆବୁୱାଃ ଆତ୍ମା ଲୋଃ ଗୋୱା ଏମ୍ ତାନାଏ, ଚି ଆବୁ ପାର୍ମେଶ୍ଵାର୍ ରାଃ ହୋନ୍ ଗାଣାକୋ ତାନ୍‍ବୁ। ହାର୍ ଆଗାର୍ ହୋନ୍ ଗାଣାକୋ ତାନ୍‍ବୁ ରେଦୋ ଆଧିକାରୀ ନାମେକୋ ତାନ୍‍ବୁ, ପାର୍ମେଶ୍ଵାର୍ ରାଃ ଆଧିକାରୀ ନାମେକୋ ତାନ୍‍ବୁ ହାର୍ ମାସୀହ୍ ଲୋଃ ମିଃତେ ଆଧିକାରୀ ନାମେକୋ ତାନ୍‍ବୁ, ଚିମ୍ତାଙ୍ଗ୍ ଆବୁ ଇନିଜାଃ ଲୋଃ ଦୁକୁ ସାହାତିଙ୍ଗ୍ ତାନାବୁ ଦୋ ଇନିଜାଃ ଲୋଃ ମାନାରାଙ୍ଗ୍ ହ ନାମେୟାବୁ। ଚିୟାଃଚି ଇଙ୍ଗ୍ ସାର୍ତିଗୀ ଆଟ୍‍କାର୍ ତାନିଙ୍ଗ୍ ଚି ନେ ସାମାୟ୍ ରାଃ ଦୁକୁ ଆଡୋଃ ସାସାତି ଏନ୍ ମାନାରାଙ୍ଗ୍ ରାଃ ନାଡ଼େଏ ରେ ଏନା ଜାହାନାଃ ହ ନାହାଲା, ଅକନାଃ ଆବୁ କେ ନେଲୋଗା। ଚିୟାଃଚି ସିର୍ଜାଅ ପୁରାଃ ଆଶ୍ରାଏତେ ପାର୍ମେଶ୍ଵାର୍ ରାଃ ହୋନ୍‍କଡ଼ାକୋୱାଃ ନେଲୋଃ ରାଃ ନେଲ୍ ହୋରା ତାନାଏ। ଚିୟାଃଚି ପାର୍ମେଶ୍ଵାର୍ ଅକନାଃକୋ ସିର୍ଜାଅ ଲେଦାଏ, ଏନାକୋ ସାମାଜାନା। ଏନାମେନ୍ତେ କାହା ଚି ଆକୋୱାଃ ମୋନ୍ ତାଇକେନା, ମେନ୍ଦୋ ଏନାମେନ୍ତେ ଚି ପାର୍ମେଶ୍ଵାର୍ ଏନାକେ ଏନ୍‍କା କେଦାଏ। ମେନ୍ଦୋ ଆଶ୍ରା ମେନାଃ। ସିର୍ଜାଅ ଏନ୍ ହୁଲାଙ୍ଗ୍ କେ ନେଲ୍ ହୋରା ତାନାଏ ଅକହୁଲାଙ୍ଗ୍ ଏନା ନାଷ୍ଟ୍ ରାଃ ଦାସୀକାନେତେ ରାଡ଼ା ନାମ୍ କେତେ ପାର୍ମେଶ୍ଵାର୍ ରାଃ ହୋନ୍ କୋୱାଃ ମାନାରାଙ୍ଗ୍ ରାଃ ରାଡ଼ା ନାମେ ରେ ମେଶାଅଗାଏ। ଚିୟାଃଚି ଆବୁ ସାରିତାନାବୁ ଚି ସବେନ୍ ସିର୍ଜାଅ ନାଆ ସାନ୍ ମିଃତେ ଗେରାଙ୍ଗ୍ ତାନାଏ ଜେଲେକା କୁଡ଼ି ହୋନ୍ ଜାନାମେ ଇମ୍ତା ଦୁକୁ ସାହାତିଙ୍ଗ୍ ୟାଏ; ହାର୍ ଏନା ଏସ୍କାର୍ ଦୋ କାହା ମେନ୍ଦୋ ଆବୁ ହଗି ଅକନ୍ କୋତାଃ ରେ ଆତ୍ମା ରାଃ ସିଦା ଯଅ ମେନାଃ, ଆବୁ ଆପାନ୍ ରେଗି ଗେରାଙ୍ଗ୍ ତାନାବୁ; ହାର୍ ଆସୁଲ୍ ନାମେ ହୋନ୍ ଲେକା ରାଃ ମାନେ ଆପାନାଃ ହୋଡ଼ମୋ ରାଃ ଛୋଡ଼ାଓ କେ ନେଲ୍ ହୋରା ତାନାବୁ। ନେ ଆଶ୍ରା ରାଃ ହୋରାତେ ଆବୁ ବାଞ୍ଚାଅ ନାମାକାଦାବୁ; ମେନ୍ଦୋ ଅକନ୍ ଜିନିଷ୍ ରାଃ ଆଶ୍ରା ମାଣ୍ଡାଅଃୱା, ଆଗାର୍ ଏନା ନେଲୋଃ ତାନ୍ ରେଦୋ ଏନା ଚିନାଃ ମେନେଃ ଆଶ୍ରା ଅଃୱା? ଚିୟାଃଚି ଅକନ୍ ଜିନିଷ୍ କେ ଜେତାଏ ନେଲ୍ ତାନ୍ ରେଦୋ ଏନାକେ ଚିନାଃ ମେନେଃ ଆଶ୍ରା ୟାଏ? ମେନ୍ଦୋ ଅକନ୍ ଜିନିଷ୍ କେ ଆବୁ କାବୁ ନେଲ୍ ତାନା, ଆଗାର୍ ଏନାକେ ଆଶ୍ରା ମାଣ୍ଡାଅ ତାନାବୁ ରେଦୋ, ମାଣିତେ ଏନାକେ ହୋରୋକାବୁ। ନେଲେକାତେଗି ଆତ୍ମା ଅଗି ଆବୁୱାଃ ନାରାଦୁରା ଇମ୍ତାରେ ଦେଙ୍ଗାବୁ ତାନାଏ: ଚିୟାଃଚି ଆବୁ କାବୁ ସାରିୟା ଚି ବିନ୍ତି ଚିଲ୍‍କା ରିକା ଚାହି, ମେନ୍ଦୋ ଆତ୍ମା ଆଏଃଗି ନେକା ଗେରାଙ୍ଗ୍ କେତେ ଅକନାଃ କାଜିତେ କାଉଦୁବ୍ ଧାଡ଼ିୟୋଗା, ଆବୁ ଲାଗିନ୍ତେ ଆର୍ଜି ରିକା ତାନାଏ; ହାର୍ ମୋନ୍ କେ ସାରିଉରୁମ୍ ନିଃ ସାରିତାନାଏ ଚି ଆତ୍ମା ରାଃ ସାନାଙ୍ଗ୍ ଚିନାଃ ତାନାଃ, ଚିୟାଃଚି ଇନିଃ ପାବିତାର୍ ହୋଡ଼ୋକୋ ଲାଗିନ୍ତେ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ବିନ୍ତିୟାଏ। ଆବୁ ସାରିତାନାବୁ ଚି, ଅକନ୍ ହୋଡ଼ୋକୋ ପାର୍ମେଶ୍ଵାର୍ ଲୋଃ ଦୁଲାଡ଼୍ ମାଣ୍ଡାଅତାନାକୋ, ଇନ୍‍କୁ ଲାଗିନ୍ ସବେନ୍ କାଜିକୋ ବୁଗିନାଃଗି ହୋବାୱା; ଇନ୍‍କୁ ଲାଗିନ୍ତେଗି ଅକନ୍‍କୋ ଇନିଜାଃ ସାନାଙ୍ଗ୍ ଲେକାତେ କେଡ଼ା କାନାକୋ। ଚିୟାଃଚି ଅକନ୍ କୋକେ ଇନିଃ ସୀଦାଏତେ ସାରିକାଦାଏ ଇନ୍‍କୁକେ ସୀଦାଏତେଗି ଦୋହୋକାଃକୋୱାଏ ଚି ଇନିଜାଃ ହୋନ୍ ଲେକା ହୋବାଅଃକାକୋ, ଏନାତେ ଇନିଃ ଥିମ୍ବାଗି ହାଗାକୋ ଥାଲାରେ ସିଦାଜାନାମ୍ ହୋନ୍ ହୋବାଅଃୱାଏ। ହାର୍ ଅକନ୍ କୋକେ ଇନିଃ ସୀଦାଏତେ ମାଣ୍ଡାଅ କାଃକୋୱାଏ, ଇନ୍‍କୁକେ ହ କେଡ଼ାକେଃକୋୱାଏ, ହାର୍ ଅକନ୍ କୋକେ କେଡ଼ାକାଃକୋୱାଏ, ଇନ୍‍କୁକେ ଧାର୍ମୀ ହଗି ବାଇକେଃକୋୱାଏ, ହାର୍ ଅକନ୍ କୋକେ ଧାର୍ମୀ ବାଇକାଦାଏ, ଇନ୍‍କୁକେ ହଗି ମାନାରାଙ୍ଗ୍ କେଃକୋୱାଏ। ଏନାମେନ୍ତେ ଆବୁ ନେ କାଜି କୋରାଃ ବିଷାୟ୍ ରେ ଚିନାଃ କାଜିୟାବୁ? ଆଗାର୍ ପାର୍ମେଶ୍ଵାର୍ ଆବୁୱାଃ ପାଡ଼୍ ମେନାଇଜା, ଏଣ୍ଡେ ଆବୁୱାଃ ବିରୋଧୀ ଅକଏ ହୋବାଅଃୟାଏ? ଅକନିଃ ଆୟାଃ ଆପାନ୍ ହୋନ୍‍କଡ଼ା କେ ହଗି କାଏ ବାଗିକିଜାଏ, ମେନ୍ଦୋ ଇନିଃକେ ଆବୁ ସବେନ୍ କୋ ଲାଗିନ୍ତେ ଏମ୍ କିଜାଏ, ଇନିଃ ଇନିଜାଃଲୋଃ ଆବୁକେ ହାଡୋଃ ସବେନାଃ ଚିନାଃ ଲାଗିନ୍ କାଏ ଏମାବୁୱାଏ? ପାର୍ମେଶ୍ଵାର୍ ରାଃ ସାଲାକାନ୍ କୋୱାଃ ଚେତାନ୍ ରେ ଅକଏ ଦୋଷ୍ ଲାଗାଅୟାଏ? ପାର୍ମେଶ୍ଵାର୍ ଗି ତାନିଃ ଅକନିଃ ଇନ୍‍କୁକେ ଧାର୍ମୀ ବାବାଇନିଃ ତାନିଃ। ଏଣ୍ଡେ ଆଡୋଃ ଅକଏ ତାନିଃ ଜେ ଦାଣ୍ଡ୍ ରାଃ ଆନାଚୁ ଏମେୟାଏ? ୟୀଶୁ ମାସୀହ୍ ଗି ତାନିଃ ଅକଏ ଗୋଏଃଲେନାଏ ମେନ୍ଦୋ ଗୋଜାକାନ୍ କୋଏତେ ଜୀବିରିଃ ଜାନାଏ, ହାର୍ ପାର୍ମେଶ୍ଵାର୍ ରାଃ ଜୋମ୍ ପାଡ଼୍ ରେ ମେନିଜା, ହାର୍ ଆବୁୱାଃ ଲାଗିନ୍ ହଗି ଆର୍ଜି ତାନାଏ। ଅକଏ ଆବୁ କେ ମାସୀହ୍ ରାଃ ଦୁଲାଡ଼୍ ତେ ଗେନାବୁଆଏ? ଚିନାଃ ଦୁକୁ, ଚି ସାଙ୍କାଟ୍, ଚି ସାସାତି, ଚି ଆକାଲ୍, ଚି ଲିଜାଃବାନୋଃ, ଚି ବୋରୋୱାନ୍ ତେୟାଃ, ଚି ତାଲ୍‍ୱାର୍? ଜେଲେକା ଅଲାକାନା, “ଆମାଃ ଲାଗିନ୍ ଆଲେ ଗୋଟା ଶିଙ୍ଗି ଗୋଜୋଃ ତାନାଲେ; ଆଲେ ଗୋଜୋଃ ନାଙ୍ଗ୍ ସେକାଡ଼ାକାନ୍ ମିଣ୍ଡୀ କୋୱାଃ ଲେକା ଗିନ୍ତି ଜାନାଲେ।” ମେନ୍ଦୋ ନେ ସବେନ୍ କାଜି କୋରେ ଆବୁ ଇନିଜାଃ ହୋରାତେ ଅକନିଃ ଆବୁ କେ ଦୁଲାଡ଼୍ କାଃବୁୱାଏ, ଜିତାଅକାନ୍ ଏତେ ହଗି ମାରାଙ୍ଗ୍ ତାନ୍‍ବୁ। ଚିୟାଃଚି ଇଙ୍ଗ୍ ସାର୍ତିଗୀ ସାରିତାନିଙ୍ଗ୍ ଚି ଗୋନୋଏଃ କାହା, ଜୀଦାନ୍ କାହା, ସିର୍ମାଦାସୀକୋ କାହା, ରାଜାକୋ କାହା, ନେସାମାଏ କାହା, ଆୟୁର୍ତେ କାହା, ପେଡ଼େଏ କୋ କାହା, ସାଲାଙ୍ଗୀ କାହା, ଈକିର୍ କାହା, ହାର୍ ଏଟାଃ ଜେତାନ୍ ସିର୍ଜାଅ ଆବୁକେ ପାର୍ମେଶ୍ଵାର୍ ରାଃ ଦୁଲାଡ଼୍ ତେ ଅକନାଃ ଆବୁୱାଃ ପ୍ରାଭୁ ମାସୀହ୍ ୟୀଶୁ ରେ ମେନାଃ କାଏ ଗେନା ଧାଡ଼ିୟାଏ। ଇଙ୍ଗ୍ ୟୀଶୁ ମାସୀହ୍ ରେ ସାର୍ତି କାଜିତାନିଙ୍ଗ୍, ଇଙ୍ଗ୍ କାଇଙ୍ଗ୍ ବେଦାକାନା ହାର୍ ଇଙ୍ଗ୍ଆଃ ମୋନ୍ ହଗି ପାବିତାର୍ ଆତ୍ମା ରେ ଗୋୱା ଏମ୍ ତାନାଏ। ଚି ଇଙ୍ଗ୍‍କେ ମାରାଙ୍ଗ୍ ଦୁକୁ ମେନାଃ, ହାର୍ ଇଙ୍ଗ୍ଆଃ ମୋନ୍ ସବେନ୍ ଇମ୍ତାଙ୍ଗ୍ ଦୁକୁ ତାଇନ୍ ତାନା, ଚିୟାଃଚି ଆଗାର୍ ହୋବା ଧାଡ଼ିୟୋଃ ରେଦୋ ଇଙ୍ଗ୍ ନେୟା ସାନାଙ୍ଗ୍ ତାଇନାଇଙ୍ଗ୍, ଚି ଇଙ୍ଗ୍ଆଃ ହାଗାକୋ ଲାଗିନ୍ ଇଙ୍ଗ୍ ଆପାନ୍ କେଗି ମାସୀହ୍ ତେ ସାର୍ପାଅ କୋଃତେଇଙ୍ଗ୍, ଅକନ୍‍କୋ ହୋଡ଼ମୋ ରାଃ ଲେକାତେଦୋ ଇଙ୍ଗ୍ଆଃ ଜାତି-କୁଟୁମ୍ବ ରେନ୍ ତାନ୍‍କୋ। ଇନ୍‍କୁ ଇସ୍ରାଏଲୀ ତାନ୍‍କୋ; ହାର୍ ଆସୁଲ୍‍ନାମ୍ ହୋନ୍ ରାଃ ହାକ୍ ହାର୍ ମାନାରାଙ୍ଗ୍ ହାର୍ ନିୟାମ୍‍ଥଲ୍‍କାନ୍ ହାର୍ ଆଇନ୍ ହାର୍ ଆରାଧାନା ହାର୍ କିରିୟା କାଜିକୋ ଇନ୍‍କୁୱାଃଗି ତାନାଃ। ପୁର୍ଖାହୋଡ଼ୋକୋ ହଗି ଆକୋୱାଃଗି ତାନ୍‍କୋ, ହାର୍ ମାସୀହ୍ ହ ହୋଡ଼ମୋ ଲେକାତେଦୋ ଇନ୍‍କୁ ଏତେ ହୋବାଜାନାଏ, ଅକନିଃ ସବେନ୍ କୋୱାଃ ଚେତାନ୍ ମାରାଙ୍ଗ୍-ଉତ୍ତାର୍ ପାର୍ମେଶ୍ଵାର୍ ତାନିଃ, ଯୁଗ୍-ଯୁଗ୍ ସାନ୍ତେ ଧାନ୍ୟା ହୋବାଅଃକା। ଆମୀନ୍। ମେନ୍ଦୋ ପାର୍ମେଶ୍ଵାର୍ ରାଃ ବାଚାନ୍ କାପୁରାଜାନା ମେନ୍ତେ କାଇଙ୍ଗ୍ କାଜିତାନା, ଏନାମେନ୍ତେ ଚି ସବେନ୍ ଇସ୍ରାଏଲ୍ ରେନ୍ ହୋନ୍‍କୋ ସାର୍ତି ଇସ୍ରାଏଲୀ ନାହାଲାକୋ। ହାର୍ ଆବ୍ରାହାମ୍ ରାଃ କିଲି ରେନ୍ ସବେନ୍ କୋ ଇନିଜାଃ ହୋନ୍ କୋ ନାହାଲାକୋ, ମେନ୍ଦୋ ଅଲାକାନା, ଇସାହାକ୍ ରାଃ କିଲି ତେଗି ଆମାଃ ହୋନ୍ କୋ କାଜିଅଃୱାକୋ। ମାନେ ହୋଡ଼ମୋ ଲେକାତେ ହୋନ୍ କୋ ଦୋ ପାର୍ମେଶ୍ଵାର୍ ରାଃ ହୋନ୍ ନାହାଲାକୋ, ମେନ୍ଦୋ କିରିୟା-କାଜି ରାଃ ସାନ୍ତାନ୍‍କୋ ଆବ୍ରାହାମ୍ ରାଃ ହୋନ୍‍କୋ ଲେକାଅଗାକୋ। ଚିୟାଃଚି କିରିୟା ରାଃ କାଜି ନେୟା ତାନାଃ, “ଇଙ୍ଗ୍ ନେ ସାମାୟ୍ ଗି ହିଜୁଃ ଶିର୍ମା ହିଜୁଗାଇଙ୍ଗ୍, ହାର୍ ସାରା ରାଃ ହୋନ୍‍କଡ଼ା ହୋବାଅଃୱାଏ।” ହାର୍ ଏନା ଏସ୍କାର୍ କାହା, ମେନ୍ଦୋ ଚିମ୍ତାଙ୍ଗ୍ ରୀବିକା ହଗି ମିହୋଡ଼୍ ଏତେ ମାନେ ଆବୁୱାଃ ଆପୁ ଇସାହାକ୍ ଏତେ ହୋଡ଼ମୋ ରେ ତାଇନ୍ ଲେନାଏ। ହାର୍ ନାଆ ସାନ୍ତେ ନାଦୋ ଜାଁୱା ହୋନ୍ ଜାନାମ୍ ଲେନାକିନ୍, ହାର୍ ନାଦୋ ଇନ୍‍କିନ୍ ଜାହାନାଃ ବୁଗିନାଃ ୟାଦୋ ଏତ୍କାନାଃ ରିକାଲେଦାକିନ୍, ଏନାମେନ୍ତେ ଚି ପାର୍ମେଶ୍ଵାର୍ ରାଃ ସାନାଙ୍ଗ୍ ଅକନାଃ ଇନିଜାଃ ସାଲାକାନ୍ ରାଃ ଲେକାତେ ତାନାଃ, କାମିକାନ୍ ଲେକାତେ କାହା, ମେନ୍ଦୋ କେଡ଼ାନିଜାଃ ଲେକାତେ ବାଇ ତାଇନୋଗା, ଇନିଃ କାଜିକେଦାଏ, “ମାରାଙ୍ଗ୍ ନିଈ ହୁଡିଙ୍ଗ୍ ନିଜାଃ ଦାସୀ ବାଇୟୋଃୱାଏ।” ଜେଲେକା ଅଲାକାନା, “ଇଙ୍ଗ୍ ୟାକୁବ୍ କେ ଦୁଲାଡ଼୍ କେଦାଇଙ୍ଗ୍, ମେନ୍ଦୋ ଏସାଓ କେ କାଇଙ୍ଗ୍ ସୁକୁ କିଜା।” ଏନାମେନ୍ତେ ଆବୁ ଚିନାଃ କାଜିୟାବୁ? ଚିନାଃ ପାର୍ମେଶ୍ଵାର୍ ତାଃରେ ଆନ୍ୟାୟ ମେନାଃ? ଚିଉଲାଅ କାହା। ଚିୟାଃଚି ଇନିଃ ମୁଶା ନାବୀ କେ କାଜିୟାଏ, “ଇଙ୍ଗ୍ ଅକେୟାଃ ଚେତାନ୍ ରେ ଦାୟା ନାଙ୍ଗ୍ ସାନାଙ୍ଗାଇଙ୍ଗ୍ ଇନିଜାଃ ଚେତାନ୍ ରେ ଦାୟା ୟାଇଙ୍ଗ୍, ହାର୍ ଅକେୟାଃ ଚେତାନ୍ ରେ ଲିବୁଇ ନାଙ୍ଗ୍ ସାନାଙ୍ଗାଇଙ୍ଗ୍ ଇନିଜାଃ ଚେତାନ୍ ରେ ଲିବୁଇ ୟାଇଙ୍ଗ୍।” ଏନାତେ ନେୟା ସାନାଙ୍ଗ୍ ମାଣ୍ଡାଅ ନିଜାଃ କାହା, କୋଷିସ୍ ରିକାନିଜାଃ କାହା ମେନ୍ଦୋ ଦାୟା ତାନ୍ ପାର୍ମେଶ୍ଵାର୍ ରାଃ କାଜି ତାନାଃ। ଚିୟାଃଚି ପାବିତାର୍ ପୁଥି ରେ ଫିରୋନ୍ ରାଜା କେ କାଜିଜାନା, “ଇଙ୍ଗ୍ ଆମ୍‍କେ ନେୟାମେନ୍ତେଗି ତିଙ୍ଗୁ କାଃମେୟାଇଙ୍ଗ୍, ଚି ଆମାଃ ଚେତାନ୍ ରେ ଇଙ୍ଗ୍ଆଃ ପେଡ଼େଏ ଦେଖାଅୟାଇଙ୍ଗ୍, ହାର୍ ଇଙ୍ଗ୍ଆଃ ନୁତୁମ୍ ରାଃ ପାର୍ଚାର୍ ସବେନ୍ ଅତେ ରେନ୍ ହୋଡ଼ୋକୋ ରେ ହୋବାଅଃକା।” ଏନାମେନ୍ତେ ଇନିଃ ଅକେୟାଃ ଚେତାନ୍ ରେ ଦାୟା ନାଙ୍ଗ୍ ସାନାଙ୍ଗ୍ଆଏ ଇନିଜାଃ ଚେତାନ୍ ରେ ଦାୟା ୟାଏ; ହାର୍ ଅକଏକେ ସାନାଙ୍ଗ୍ଆଏ ଇନିଃକେ କେଟେଃ ବାଇତାଇୟାଏ। ଏନାତେ ଆପେ ଇଙ୍ଗ୍‍କେ କାଜିୟାପେ, “ଏଣ୍ଡେ ଇନିଃ ଚିନାଃ ଲାଗିନ୍ ଦୋଷ୍ ଲାଗାଅୟାଏ? ଅକଏ ଇନିଜାଃ ସାନାଙ୍ଗ୍ ରାଃ ନାଡ଼େଏ ରେ ତିଙ୍ଗୁନାଏ?” ହେ ହୋଡ଼, ଆମ୍ ଅକଏ ତାନ୍‍ମେ ଜେ ପାର୍ମେଶ୍ଵାର୍ କେ କାଜିରୁଆଡ଼ିୟାମ୍? ଚିନାଃ ବାଇୟାକାନ୍ ଜିନିଷ୍ ବାଇକାଦାଏ ଇନିଃକେ କାଜି ଧାଡ଼ିୟାଏ, “ଆମ୍ ଇଙ୍ଗ୍‍କେ ଚିନାଃ ଲାଗିନ୍ ନେକା ବାଇକେଦିଙ୍ଗ୍ଆମ୍?” ଚିନାଃ କୁମ୍ଭାର୍ କେ ହାସା ରେ ଆଧିକାର୍ ବାନୋଗା ଚି ମିୟାଃଗି ଲୁନ୍ଦି ଏତେ ମିୟାଃ ମାଇନ୍ ବାସାନ୍ ନାମେ ଲାଗିନ୍ ହାର୍ ଏଟାଃ କାମାଇନ୍ ଲାଗିନ୍ ବାଇୟାଏ? ଏଣ୍ଡେ ନେୟାରେ ଆକ୍‍ଦାନ୍ଦାଅଃ ରାଃ ଚିକାନ୍ କାଜି, ପାର୍ମେଶ୍ଵାର୍ ଆଜାଃ ଖିସ୍ ଦେଖାଅ ହାର୍ ଆଜାଃ ପେଡ଼େଏ ଉଦୁବ୍ ସାନାଙ୍ଗ୍ ଲାଗିନ୍ତେ ଖିସ୍ ରାଃ ବାସାନ୍ କୋ, ଅକନାଃ ରାପୁଃ ଲାଗିନ୍ତେ ବାଇଲେନା, ମାଡ଼ିତେ ସାହାତିଙ୍ଗ୍ କେଦାଏ; ହାର୍ ଦାୟା ରାଃ ବାସାନ୍ କୋକେ, ଅକନାଃକେ ଇନିଃ ମାନାରାଙ୍ଗ୍ ଲାଗିନ୍ତେ ସିଦା ଏତେଗି ବାଇସେକାଡ଼୍ କେଦାଏ, ଆଜାଃ ମାନାରାଙ୍ଗ୍ ରାଃ ଧାନ୍ କେ ଉଦୁବ୍ ଲାଗିନ୍ ସାନାଙ୍ଗ୍ କେଦାଏ? ମାନେ ଆବୁୱାଃ ରେ ଅକନ୍ କୋକେ ଇନିଃ ୟାହୁଦୀ କୋଏତେ ଭାଇର୍ କାହା ମେନ୍ଦୋ ଏଟାଃଜାତି କୋତେ ହଗି କେଡ଼ାକେଃବୁୱାଏ। ଜେଲେକା ଇନିଃ ହୋଶେ ରାଃ କିତାବ୍ ରେହ କାଜିତାନାଏ, “ଅକନ୍‍କୋ ଇଙ୍ଗ୍ଆଃ ହୋଡ଼ୋ କାକୋ ତାଇକେନା, ଇନ୍‍କୁକେ ଇଙ୍ଗ୍ଆଃ ହୋଡ଼ୋକୋ ମେନ୍ତେ କାଜିକୋୱାଇଙ୍ଗ୍। ଆଡୋଃ ଅକନ୍‍କୋ ଦୁଲାଡ଼ାନ୍ କାକୋ ତାଇକେନା, ଇନ୍‍କୁକେ ଦୁଲାଡ଼ାନ୍ ମେନ୍ତେ କାଜିକୋୱାଇଙ୍ଗ୍। ହାର୍ ନେକା ହୋବାୱା ଚି ଅକନ୍ ଜାଗା ରେ ଇନ୍‍କୁକେ ନେୟା କାଜିଲେନା, ଚି ଆପେ ଇଙ୍ଗ୍ଆଃ ହୋଡ଼ୋକୋ ନାହାଲାପେ, ଏନ୍ ଜାଗା ରେଗି ଇନ୍‍କୁ ଜୀହିଃ ପାର୍ମେଶ୍ଵାର୍ ରାଃ ହୋନ୍ କୋ କାଜିୱାକୋ।” ହାର୍ ୟାଶାୟାହ୍ ନାବୀ ଇସ୍ରାଏଲ୍ ହୋଡ଼ୋକୋୱାଃ ବିଷାୟ୍ ରେ କାଉରିକେତେ କାଜିତାନାଏ, “ଇସ୍ରାଏଲ୍ କୋୱାଃ ହୋନ୍‍ଗୋଣା କୋୱାଃ ଗିନ୍ତି ସାମୁଦାର୍ ରାଃ ଗିତିଲ୍ ବାରାବାରି ହୋବାଅଃ ରେହ, ଇନ୍‍କୁଏତେ ହୁଡିଙ୍ଗ୍ ଗି ହୋଡ଼ୋକୋ ବାଞ୍ଚାଅ ୱାକୋ। ଚିୟାଃଚି ପ୍ରାଭୁ ଆପାନାଃ ବିଚାର୍ ଅତେ ରେ କାମିଆଉ ନାଙ୍ଗ୍ ସେକାଡ଼୍ ଗି ଏନାକେ ପୁରାୟାଏ।” ଚିଲ୍‍କା ୟାଶାୟାହ୍ ନାବୀ ହ ସିଦା ରେ କାଜିଲେଦାଏ, “ଆଗାର୍ ପେଡ଼େଜାନ୍ ପ୍ରାଭୁ ଆବୁ ବାଂଶ୍ କୋକେ କାଏ ବାଗିବୁତେୟାଃଏ, ଏଣ୍ଡେ ଦୋ ଆବୁ ସାଦୋମ୍ ସାହାର୍ ରେନ୍ ହୋଡ଼ୋକୋ ଲେକା ହୋବା କୋତେୟାଃବୁ, ଆଡୋଃ ଆମୋରା ସାହାର୍ ରେନ୍ ହୋଡ଼ୋକୋ ଲେକା ହୋବାଅଃ ତେୟାଃବୁ।” ଏନାତେ ଆବୁ ଚିନାଃ କାଜିୟାବୁ? ନେୟା ଚି ଏଟାଃଜାତିକୋ ଅକନ୍ କୋ ଧାରାମ୍ ହୋରା କେ କାକୋ ଦାଣା ତାଇନା, ଧାରାମ୍ ହୋରା କେ ନାମ୍ କେଦାକୋ ମାନେ ଏନ୍ ଧାରାମ୍ ହୋରା କେ ଅକନାଃ ବିଶ୍ଵାସ୍ ରେ ମେନାଃ। ମେନ୍ଦୋ ଇସ୍ରାଏଲୀ ହୋଡ଼ୋକୋ, ଅକନ୍ ଧାରାମ୍ ହୋରା କେ ଆଇନ୍ ଲେକାତେ ଦାଣା ତାଇନାକୋ ଏନ୍ ଆଇନ୍ ସାନ୍ତେ କାକୋ ସେଟେର୍ ଜାନା। ଚିନାଃ ମେନ୍ତେ? ଏନାମେନ୍ତେ ଚି ଇନ୍‍କୁ ବିଶ୍ଵାସ୍ ତେ କାହା, ମେନ୍ଦୋ ନେଲେକା ଚି କାମି କୋଏତେ ଏନାରାଃ ଦାଣା ତାଇନାକୋ। ଇନ୍‍କୁକେ ଏନ୍ ଠୋକାର୍ ରାଃ ଦିରି ତେ ଠୋକାର୍ ଜୋମ୍ କେଦାକୋ। ଜେଲେକା ଅଲାକାନା, “ନେଲେପେ, ଇଙ୍ଗ୍ ସିୟୋନ୍ ସାହାର୍ ରେ ମିୟାଃ ଥୋଦୋଃ ରାଃ ଦିରି, ହାର୍ ଉୟୁଗେନ୍ ରାଃ ସେରେଙ୍ଗ୍-ଦିରି ମାଣ୍ଡାଅ ତାନିଙ୍ଗ୍, ହାର୍ ଅକଏ ଇନିଃତାଃ ରେ ବିଶ୍ଵାସ୍ ୟାଏ, ଇନିଃ କାଏ ଗିୟୁଗୋଃୱାଏ।” ହେ ଇଙ୍ଗ୍ଆଃ ହାଗାକୋ ହାର୍ ମିଶିକୋ, ଇଙ୍ଗ୍ଆଃ ମୋନ୍ ରାଃ ସାନାଙ୍ଗ୍ ହାର୍ ଇନ୍‍କୁୱାଃ ଲାଗିନ୍ତେ ପାର୍ମେଶ୍ଵାର୍ ଏତେ ଇଙ୍ଗ୍ଆଃ ବିନ୍ତି ନେୟା ତାନାଃ ଚି ଇନ୍‍କୁ ବାଞ୍ଚାଅ ନାମେକାକୋ। ଚିୟାଃଚି ଇଙ୍ଗ୍ ଇନ୍‍କୁୱାଃ ଗୋୱା ଏମ୍ ତାନିଙ୍ଗ୍ ଚି ଇନ୍‍କୁ ତାଃ ପାର୍ମେଶ୍ଵାର୍ ଲାଗିନ୍ ମିୟାଃ ଜୋଶ୍ ମେନାଃ, ମେନ୍ଦୋ ସେଣା ଲେକାତେଦୋ କାହା। ଚିୟାଃଚି ଇନ୍‍କୁ ପାର୍ମେଶ୍ଵାର୍ ରାଃ ଧାରାମ୍ ହୋରା କେ କାସାରି କେତେ, ଆକୋୱାଃ ଧାରାମ୍ ରାଃ ହୋରା କେ ବାବାଇଲାଗିନ୍ତେ କୋଷିସ୍ କେତେ, ପାର୍ମେଶ୍ଵାର୍ ରାଃ ଧାରାମ୍ ହୋରା ରାଃ ଆଧିନ୍ କାକୋ ତାଇଜାନା। ଚିୟାଃଚି ସବେନ୍ ବିଶ୍ଵାସ୍ ତାନ୍‍କୋ ଲାଗିନ୍ ଧାରାମ୍ ହୋରା ଲାଗିନ୍ତେ ମାସୀହ୍ ମୁଶା ନାବୀ ରାଃ ଆଇନ୍ ରାଃ ଟୁଣ୍ଡୁ ତାନିଃ। ଚିୟାଃଚି ମୁଶା ନାବୀ ଦୋ ନେୟା ଅଲ୍ କାଦାଏ ଚି ଅକନ୍ ହୋଡ଼ ଏନ୍ ଧାରାମ୍ ହୋରା ରେ ଅକନାଃ ମୁଶା ନାବୀ ରାଃ ଆଇନ୍ ଲେକାତେ ମେନାଃ, ସେସେନ୍ ତାନାଏ, ଇନିଃ ଏନାତେଗୀ ଜୀହିଃ ତାଇନାଏ। ମେନ୍ଦୋ ଅକନ୍ ଧାରାମ୍ ହୋରା ବିଶ୍ଵାସ୍ ତେ ମେନାଃ, ଏନା ନେକା କାଜିତାନାଏ, “ଆମ୍ ଆମାଃ ମୋନ୍ ରେ ନେୟା ଆଲୋମ୍ କାଜିୟା ଚି ସିର୍ମାଦିଶୁମ୍ ରେ ଅକଏ ରାକାବାଏ?” (ମାନେ ମାସୀହ୍ କେ ଆଡ଼୍‍ଗୁଇ ଲାଗିନ୍ତେ!) ୟାଦୋ “ପାତାଲ୍ ରେ ଅକଏ ଆଡ଼୍‍ଗୁନାଏ?” (ମାନେ ମାସୀହ୍ କେ ଗୋଜାକାନ୍ କୋଏତେ ଜୀହିଃ କେତେ ଚେତାନ୍ ଆୱି ଲାଗିନ୍ତେ!) ମେନ୍ଦୋ ଏନା ଚିନାଃ କାଜିତାନାଏ? ନେୟା ଚି “ବାଚାନ୍ ଆମାଃ ନାଡ଼େଏ ରେ ମେନାଃ, ଆମାଃ ମୋଚା ରେ ହାର୍ ଆମାଃ ମୋନ୍ ରେୟା,” ନେୟା ଏନ୍ ବିଶ୍ଵାସ୍ ରାଃ ବାଚାନ୍ ତାନାଃ, ଅକନାଃ ଆବୁ ପାର୍ଚାର୍ ତାନାବୁ, ଚି ଆଗାର୍ ଆମ୍ ଆମାଃ ମୋଚା ତେ ୟୀଶୁ କେ ପ୍ରାଭୁ ସାରିକେତେ ମାନାତିଙ୍ଗ୍ ୟାମ୍, ହାର୍ ଆମାଃ ମୋନ୍ ତେମ୍ ବିଶ୍ଵାସ୍ ୟା ଚି ପାର୍ମେଶ୍ଵାର୍ ଇନିଃକେ ଗୋଜାକାନ୍ କୋଏତେ ଜୀହିଃ କିଜାଏ ଦୋ ଆମ୍ ବାଞ୍ଚାଅଃୱାମ୍। ଚିୟାଃଚି ଧାରାମ୍ ହୋରା ରେ ସେସେନ୍ ଲାଗିନ୍ତେ ମୋନ୍ ତେ ବିଶ୍ଵାସ୍ ଲାଗାତିଙ୍ଗ୍ଆ, ହାର୍ ବାଞ୍ଚାଅଃ ଲାଗିନ୍ତେ ମୋଚା ତେ ସ୍ଵୀକାର୍ ଲାଗାତିଙ୍ଗ୍ଆ। ଚିୟାଃଚି ୟାଶାୟାହ୍ ନାବୀ ପାବିତାର୍ ପୁଥି ରେ ନେୟା କାଜିତାନାଏ, “ଅକଏ ଇନିଜାଃ ରେ ବିଶ୍ଵାସ୍ ୟାଏ ଇନିଃ କାଏ ଗିୟୁଗୋଃୱା।” ୟାହୁଦୀ ହୋଡ଼ୋକୋ ହାର୍ ଏଟାଃଜାତି ହୋଡ଼ୋକୋ ରେ ଜାହାନ୍ ଆନ୍ତାର୍ ବାନୋଗା, ଏନାମେନ୍ତେ ଚି ଇନିଃ ସବେନ୍ କୋୱାଃ ପ୍ରାଭୁ ତାନିଃ ହାର୍ ଆଏଃକେ କେଡ଼ାତାନ୍ ସବେନ୍ କୋକେ ଆଶିଷ୍ ଏମେ ନାଙ୍ଗ୍ ଥିମ୍ବାଗି କିଶାଣ୍‍କାନ୍ ତାନିଃ। ଚିୟାଃଚି “ଅକଏ ପ୍ରାଭୁ ଆଃ ନୁତୁମ୍ ତେ ବିନ୍ତିୟାଏ ଇନିଃ ବାଞ୍ଚାଅ ନାମେୟାଏ।” ମେନ୍ଦୋ ଅକନିଜାଃ ରେ ଇନ୍‍କୁ କାକୋ ବିଶ୍ଵାସ୍ କାଦା, ଇନିଜାଃ ନୁତୁମ୍ ତେ ଚିଲ୍‍କା ବିନ୍ତିୟାକୋ? ହାର୍ ଅକନିଜାଃ ବିଷାୟ୍ ରେ କାକୋ ଆୟୁମ୍ କାଦା ଇନିଜାଃ ଚେତାନ୍ ରେ ଚିଲ୍‍କା ବିଶ୍ଵାସ୍ ୟାକୋ? ହାର୍ ଜେତାଏ କାଏ ପାର୍ଚାର୍ ଲେରେ ଚିଲ୍‍କା ଆୟୁମେ ୟାକୋ? ହାର୍ ଆଗାର୍ କାକୋ କୁଲୋଃ ରେଦୋ, ଚିଲ୍‍କା ପାର୍ଚାର୍ ୟାକୋ? ଜେଲେକା ପାବିତାର୍ ପୁଥି ରେ ଅଲାକାନା, “ଇନ୍‍କୁୱାଃ କାଟା ଚିମିନାଙ୍ଗ୍ ସୁଗାଡ଼ା, ଅକନ୍‍କୋ ବୁଗିନ୍ କାଜି କୋରାଃ ସୁସାମାଚାର୍ ଉଦୁବ୍ ତାନାକୋ।” ମେନ୍ଦୋ ସବେନ୍ କୋ ଏନ୍ ସୁସାମାଚାର୍ ଚେତାନ୍ ରେ ମୋନ୍ କାକୋ ଏମ୍ କେଦା: ୟାଶାୟାହ୍ ନାବୀ କାଜିୟାଏ, “ହେ ପ୍ରାଭୁ ଅକଏ ଆଲେୟାଃ ସାନ୍ଦେଶ୍ ରେ ବିଶ୍ଵାସ୍ କେଦାଏ?” ଏନାତେ ବିଶ୍ଵାସ୍ ସାନ୍ଦେଶ୍ ଆୟୁମ୍ ଲେରେ ହାର୍ ସାନ୍ଦେଶ୍ ଆୟୁମ୍ ମାସୀହ୍ ରାଃ ବାଚାନ୍ ଏତେ ହୋବାଅଃୱା। ମେନ୍ଦୋ ଇଙ୍ଗ୍ କାଜିତାନିଙ୍ଗ୍, ଚିନାଃ ଇନ୍‍କୁ କାକୋ ଆୟୁମ୍ କେଦା? ଆୟୁମ୍ ଦୋ ଲେଦାକୋ; ଚିୟାଃଚି ଅଲାକାନା, “ଇନ୍‍କୁୱାଃ ସାନ୍ଦେଶ୍ ସବେନ୍ ଅତେ ରେ, ହାର୍ ଇନ୍‍କୁୱାଃ ବାଚାନ୍ ଅତେଦିଶୁମ୍ ରାଃ ଟୁଣ୍ଡୁ ସାନ୍ ସେଟେର୍ ଜାନା।” ଇଙ୍ଗ୍ ଆଡୋଃଗି କାଜିତାନିଙ୍ଗ୍, ଚିନାଃ ଇସ୍ରାଏଲୀ କୋ କାକୋ ସାରିତାଇନା? ସିଦା ତେଦୋ ପ୍ରାଭୁ ମୁଶା ନାବୀ ହୋରାତେ କାଜିକେଦାଏ, ଅକନ୍‍କୋ ଇଙ୍ଗ୍ଆଃ ଜାତି ରେନ୍ ନାହାଲାକୋ, ଇନ୍‍କୁୱାଃ ହୋରାତେ ଆପେୟାଃ ମୋନ୍ ରେ ହିସିଙ୍ଗା ରିକାପେୟାଇଙ୍ଗ୍; ଇଙ୍ଗ୍ ମିୟାଃ ଡୋଣ୍ଡୋ ଜାତି କୋୱାଃ ହୋରାତେ ଖିସ୍ ରିକାପେୟାଇଙ୍ଗ୍। ଆଡୋଃ ୟାଶାୟାହ୍ ନାବୀ ମାରାଙ୍ଗ୍ ସାହାସ୍ ଏତେ କାଜିତାନାଏ, “ଅକନ୍‍କୋ ଇଙ୍ଗ୍‍କେ କାକୋ ଦାଣା ତାଇନା, ଇନ୍‍କୁ ଇଙ୍ଗ୍‍କେ ନାମ୍ କେଦିଙ୍ଗାକୋ; ହାର୍ ଅକନ୍‍କୋ ଇଙ୍ଗ୍‍କେ କାକୋ କୁଲିଙ୍ଗ୍ ତାଇନା, ଇନ୍‍କୁତାଃ ରେ ଇଙ୍ଗ୍ ଉଦୁବ୍ ଜାନାଇଙ୍ଗ୍।” ମେନ୍ଦୋ ଇସ୍ରାଏଲୀ ହୋଡ଼ୋକୋୱାଃ ବିଷାୟ୍ ରେ ପାର୍ମେଶ୍ଵାର୍ ନେୟା କାଜିତାନାଏ, “ଇଙ୍ଗ୍ ପୁରା ସିଂଙ୍ଗ୍‍ସାଟୁବ୍ ଇଙ୍ଗ୍ଆଃ ତିଈ କେ କାମାନାତିଙ୍ଗ୍ ତାନ୍‍କୋ ପାଡ଼୍ ହାର୍ ଜୀଦ୍ଧି ହୋଡ଼ୋକୋ ପାଡ଼୍ ପାସ୍ରାଅ ଲେଦାଇଙ୍ଗ୍।” ଏନାମେନ୍ତେ ଇଙ୍ଗ୍ କାଜିତାନିଙ୍ଗ୍, ଚିନାଃ ପାର୍ମେଶ୍ଵାର୍ ଆଜାଃ ହୋଡ଼ୋକୋକେ ବାଗେ ତାଃକୋୱାଏ? ଚିଉଲା ହ କାହା! ଇଙ୍ଗ୍ ହ ଦୋ ଇସ୍ରାଏଲୀ ହୋଡ଼ ତାନିଙ୍ଗ୍: ଆବ୍ରାହାମ୍ ରାଃ ବାଂଶ୍ ହାର୍ ବେନ୍ୟାମିନ୍ ରାଃ କିଲି ଏତେ ତାନିଙ୍ଗ୍। ପାର୍ମେଶ୍ଵାର୍ ଆଜାଃ ହୋଡ଼ୋକୋକେ ଅକନ୍‍କୋକେ ଇନିଃ ସିଦା ଏତେ ସାରିକାଃକୋୱାଏ ଇନ୍‍କୁକେ କାଏ ବାଗି କାଃକୋୱାଏ। ଚିନାଃ ଆପେ କାପେ ସାରିୟା ଚି ପାବିତାର୍ ପୁଥି ଏଲିୟା ରାଃ ବିଷାୟ୍ ରେ ଚିନାଃ କାଜିତାନାଏ, ଚି ଇନିଃ ଚିଲ୍‍କା ଇସ୍ରାଏଲୀ ହୋଡ଼ୋକୋୱାଃ ବିରୋଧ୍ ରେ ପାର୍ମେଶ୍ଵାର୍ ତାଃ ବିନ୍ତି ତାନାଏ? “ହେ ପ୍ରାଭୁ, ହିନ୍‍କୁ ଆମାଃ ନାବୀ କୋକେ ଗୋଏଃ କେଃକୋୱାକୋ, ଆଡୋଃ ଆମାଃ ବେଦୀକୋକେ ଧାଶୁଡ଼୍ କେଦାକୋ, ହାର୍ ଇଙ୍ଗ୍ ଏସ୍କାର୍ ଗି ବାଚାଓ କାନିଙ୍ଗ୍, ହାର୍ ଇନ୍‍କୁ ଇଙ୍ଗ୍ଆଃ ଜୀଉ ଇଦି ନାଙ୍ଗ୍ ସାନାଙ୍ଗ୍ ତାନାକୋ।” ମେନ୍ଦୋ ପାର୍ମେଶ୍ଵାର୍ ଏତେ ଆଏଃକେ ଚିନାଃ କାଜିରୁଆଡ଼୍ ନାମ୍‍ଜାନା? “ଇଙ୍ଗ୍ ଇଙ୍ଗ୍ଆଃ ଲାଗିନ୍ ସାତ୍ ହାଜାର୍ କୋଡ଼ାକୋକେ ମାଣ୍ଡାଅ କାଃକୋୱାଇଙ୍ଗ୍, ଅକନ୍‍କୋ ବାଲ୍ ମୂର୍ତି ରାଃ ଆୟୁର୍ ରେ କାକୋ ଇକ୍ଡ଼ୁମ୍ କେଦା।” ଏନ୍‍ଲେକାଗି ନାଆ ହଗି, ଆନୁଗ୍ରାହ୍ ତେ ସାଲାକାନ୍ ଚିମିନ୍ ହୋଡ଼ୋକୋ ମେନାକୋୱା। ଆଗାର୍ ନେୟା ଆନୁଗ୍ରାହ୍ ଏତେ ହୋବାକାନା, ଏଣ୍ଡେ କାମି ତେଦୋ କାହୋବାକାନା; କାରେଦୋ ଆନୁଗ୍ରାହ୍ ଆଡୋଃ ଆନୁଗ୍ରାହ୍ କାତାଇନା। ଏଣ୍ଡେ ଚିନାଃ ହୋବାନା? ଇସ୍ରାଏଲୀ ହୋଡ଼ୋକୋ ଚିନାଃ ଦାଣା ତାଇନାକୋ, ଏନା ଇନ୍‍କୁକେ କାନାମ୍‍ଜାନା; ମେନ୍ଦୋ ସାଲାକାନ୍ କୋକେ ନାମ୍ ଜାନା, ହାର୍ ସାରେଜାକାନ୍ ହୋଡ଼ୋକୋୱାଃ ମୋନ୍ କେଟେଃ ବାଇଜାନା। ଜେଲେକା ପାବିତାର୍ ପୁଥି ରେ ଅଲାକାନା, “ପାର୍ମେଶ୍ଵାର୍ ଇନ୍‍କୁକେ ଇସିଙ୍ଗ୍ ସାନ୍ତେ ଦୁଣୁମ୍ ରାଃ ଆତ୍ମା ଏମାକାଃକୋୱାଏ, ହାର୍ ନେକାନ୍ ମେଏଃ ଏମାକାଃକୋୱାଏ ଅକନାଃତେ ନେଲ୍ କାକୋ ଧାଡ଼ିୟା ହାର୍ ନେକା ଲୁତୁର୍ ଏମାକାଃକୋୱାଏ ଅକନାଃତେ କାକୋ ଆୟୁମ୍ ଧାଡ଼ିୟା।” ହାର୍ ଦାଉଦ୍ ରାଜା କାଜିତାନାଏ, “ଇନ୍‍କୁୱାଃ ଯୋଜୋମାଃ ଇନ୍‍କୁ ଲାଗିନ୍ତେ ଜାଲୋମ୍ ହାର୍ ଫାଶ୍ରୀ ହାର୍ ଥୋଦୋଃ ହାର୍ ଦାଣ୍ଡ୍ ନାମେ ରାଃ କାଜି ବାଇୟୋଃକା। ଇନ୍‍କୁୱାଃ ମେଏଃ ନୁବାଃ କେନୋଃଚା ଏନାତେ କାକୋ ନେଲ୍ ଧାଡ଼ିକା, ହାର୍ ସାଦାଏ ଆମ୍ ଇନ୍‍କୁୱାଃ ଦୋୟା ତାକୋୱାଃ କେ କୁବୁଃ ମାଣ୍ଡାଅକାମ୍।” ଏନାତେ ଇଙ୍ଗ୍ କାଜିତାନିଙ୍ଗ୍ ଚିନାଃ ଇନ୍‍କୁ ଉୟୁଃଗିତାଇନାକୋ ମେନ୍ତେ ଥୋଦ୍ ଜୋମ୍ କେଦାକୋ? ଚିଉଲା ହ କାହା! ମେନ୍ଦୋ ଇନ୍‍କୁୱାଃ ଉୟୁଗୋଃ ରାଃ ଚାଲ୍ତେ ଏଟାଃଜାତି କୋକେ ବାଞ୍ଚାଅ ନାମ୍‍ଜାନା, ଏନାତେ ଇନ୍‍କୁକେ ହିସିଙ୍ଗା ହୋବାଅଃକା। ଏନାମେନ୍ତେ ଆଗାର୍ ଇନ୍‍କୁୱାଃ ଉୟୁଗେନ୍ ଅତେଦିଶୁମ୍ ଲାଗିନ୍ ଥିମ୍ବା ଆଶିଷ୍ ତାନାଃ ହାର୍ ଇନ୍‍କୁୱାଃ ଘାଟି ଏଟାଃଜାତି କୋ ଲାଗିନ୍ ଥିମ୍ବା ଆଶିଷ୍ ତାନାଃ, ଏଣ୍ଡେ ଇନ୍‍କୁୱାଃ ଫେରେଜାନ୍ ତେ ଆଡୋଃ ଚିମିନାଙ୍ଗ୍ କାହୋବାୱା। ଇଙ୍ଗ୍ ଆପେ ଏଟାଃଜାତି କୋକେ ନେୟା କାଜିତାନିଙ୍ଗ୍। ଯାବ୍ ଚି ଇଙ୍ଗ୍ ଏଟାଃଜାତିକୋ ଲାଗିନ୍ କୁଲାକାନ୍ ଚେଲା ତାନିଙ୍ଗ୍, ଏଣ୍ଡେ ଇଙ୍ଗ୍ ଇଙ୍ଗ୍ଆଃ ସେୱା ରାଃ ପାଦ୍ କେ ସାହାରାଅ ତାନିଙ୍ଗ୍, ଏନାତେ ଜାହାନ୍ ଲେକାତେ ଇଙ୍ଗ୍ ଇଙ୍ଗ୍ଆଃ କୁଟୁମ୍ବ କୋୱାଃ ରେ ମିୟାଃ ହିସିଙ୍ଗା ରିକାକୋୱାଇଙ୍ଗ୍ ଏନାଏତେ ଚିମିନାଙ୍ଗ୍ କୋକେ ବାଞ୍ଚାଅ ଧାଡ଼ିକୋୱାଇଙ୍ଗ୍। ଚିୟାଃଚି ଚିମ୍ତାଙ୍ଗ୍ ଇସ୍ରାଏଲୀ ହୋଡ଼ୋକୋୱାଃ ବାଗେ ଜାନ୍ତେ ଅତେଦିଶୁମ୍ ରେନ୍ କୋୱାଃ ମେନେଶା ରାଃ କାଜି ହୋବାଜାନା, ଦୋ ଚିନାଃ ଇନ୍‍କୁୱାଃ ଗ୍ରାହାନ୍ଅଃ ତେୟାଃ ଗୋଜାକାନ୍ କୋଏତେ ଜୀଉ ବିରିଃ ରାଃ ବାରାବାରି କାହୋବାଅଃୱା? ଚିମ୍ତାଙ୍ଗ୍ ସିଦା ଲାଦେ ତେୟାଃ ପାବିତାର୍ ହୋବାଜାନା, ଏଣ୍ଡେ ସବେନ୍ ସିପୁଃକାନ୍ ଆଟା ହ ପାବିତାର୍ ତାନାଃ: ହାର୍ ଚିମ୍ତାଙ୍ଗ୍ ରେହେଃ ପାବିତାର୍ ହୋବାକାନା, ଏଣ୍ଡେ କୋତୋକୋ ହ ଏନ୍ ଲେକାଗି ତାନାଃ। ମେନ୍ଦୋ ଆଗାର୍ ତାରାମାରା କୋତୋକୋ ପେଟେଃ-ଠୋଏଃ ଜାନା, ହାର୍ ଆମ୍ ଟୋନାଙ୍ଗ୍ ରେନ୍ ଜାଏତୁନ୍ ଦାରୁ କୋତୋ ହୋବାକେତେ ଏଣ୍ଡେରେ ଜାଲାଃ ଜାନାମ୍, ହାର୍ ବୁଗିନ୍ ଜାଏତୁନ୍ ଦାରୁ ରାଃ ରେହେଃ ହାର୍ ରାଶି ରେ ମେଶା ଜାନାମ୍, ଏଣ୍ଡେ କୋତୋକୋ ରେ ଆଲୋମ୍ ଘାମାଣ୍ଡ୍ ଏନା, ଆଗାର୍ ଆମ୍ ଘାମାଣ୍ଡ୍ ୟାମ୍ ଏଣ୍ଡେ ସାରିଲେମ୍ ଚି ଆମ୍ ରେହେଃ କେ କାହା, ମେନ୍ଦୋ ରେହେଃ ଆମ୍‍କେ ସାମ୍ଭଲାଅ କାଃମେୟାଏ। ଆଡୋଃ ଆମ୍ କାଜିୟାମ୍, “କୋତୋକୋ ନେୟାମେନ୍ତେ ପେଟେଃ-ଠୋଏଃ ଜାନା ଚି ଇଙ୍ଗ୍ ଜାଲାଦୋଗାଇଙ୍ଗ୍।” ଠିକ୍ ଗିୟା, ଇନ୍‍କୁ ଦୋ ଆବିଶ୍ଵାସ୍ ରାଃ ହୋରାତେ ପେଟେଃ-ଠୋଏଃ ଜାନାକୋ, ମେନ୍ଦୋ ଆମ୍ ବିଶ୍ଵାସ୍ ରେ ତିଙ୍ଗୁ କାନାମ୍, ଏନାମେନ୍ତେ ଆଲୋମ୍ ମାରାଙ୍ଗ୍ଏନ୍ ମେ, ମେନ୍ଦୋ ବୋରୋ ମାଣ୍ଡାଅଏମ୍, ଚିୟାଃଚି ଚିମ୍ତାଙ୍ଗ୍ ପାର୍ମେଶ୍ଵାର୍ ଦାରୁ ରେ ଆଏଃତେ ହାରାକାନ୍ କୋତୋକୋ କେହଗି କାଏ ବାଗିକେଦାଏ, ଦୋ ଆମ୍‍କେ ହ କାଏ ବାଗିମେୟାଏ। ଏନାମେନ୍ତେ ପାର୍ମେଶ୍ଵାର୍ ରାଃ ଦାୟା କେ ହାର୍ କେନେଟେଃ କେ ନେଲେମ୍! ଅକନ୍‍କୋ ଉୟୁଃଜାନାକୋ, ଇନ୍‍କୁୱାଃ ଲାଗିନ୍ କେନେଟେଃ, ମେନ୍ଦୋ ଆମାଃ ଚେତାନ୍ ରେ ଦାୟା ଆଗାର୍ ଆମ୍ ଏଣ୍ଡେରେ ବାଇକେଃ ତାଇନୋଃରେମ୍, କାରେ ଦୋ ଆମ୍ ହଗି ଛପା କେନୋଃୱାମ୍। ଆଡୋଃ ଇନ୍‍କୁ ହଗି ଆଗାର୍ ଆବିଶ୍ଵାସ୍ କାକୋ ତାଇନୋଃୱା, ଏଣ୍ଡେଦୋ ଜାଲାଦୋଗାକୋ; ଚିୟାଃଚି ପାର୍ମେଶ୍ଵାର୍ ଇନ୍‍କୁକେ ଆଡୋଃଗି କାଲ୍‍ମି ଧାଡ଼ିୟାଏ। ଚିୟାଃଚି ଆଗାର୍ ଆମ୍ ଏନ୍ ଜାଏତୁନ୍ ଦାରୁ ଏତେ, ଅକନାଃ ଦାରୁ କେ ନେଲେ ରେଦୋ ଟୋନାଙ୍ଗ୍ ରେନ୍ ତାନ୍‍ମେ, ହାର୍ ମାଆ ଜାନାମ୍ ହାର୍ ଟୋନାଙ୍ଗ୍ ଦାରୁ ବାଗିକେତେ ବୁଗିନ୍ ଜାଏତୁନ୍ ଦାରୁ ରେ ଯୋଡ଼ାନ୍ ଜାନାମ୍, ଏଣ୍ଡେ ନେୟା ଅକନାଃ ଆଏଃତେ ହୋବାକାନ୍ କୋତୋକୋ ତାନାଃ, ଆପାନାଃଗି ବୁଗିନ୍ ଜାଏତୁନ୍ ଦାରୁ ରେ ଚିନାଃ ଲାଗିନ୍ କାକୋ ଯୋଡ଼ାନ୍ ଅଗା। ହେ ହାଗାକୋ, ନେକା ଆଲୋକା ହୋବାଅଃକା, ଚି ଆପେ ଆପାନ୍ କେ ସେଣାନ୍ ଆଟ୍‍କାରେପେ; ଏନାମେନ୍ତେ ଇଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା ଚି ଆପେ ନେ ଉକୁକାନ୍ କାଜିତେ କାସାରିକାନ୍ ଲେକା ତାଇନ୍ ପେ ଚି ଏଟାଃଜାତିକୋ ପୁରାପୁରି ଆଉରି ବୋଲୋ ସାନ୍ତେ ଇସ୍ରାଏଲୀ ହୋଡ଼ୋକୋୱାଃ ତାରାମାରା ଭାଗ୍ ନେକାଗି କେଟେଃ ତାଇନାକୋ। ହାର୍ ନେଲେକାତେ ସବେନ୍ ଇସ୍ରାଏଲୀ ହୋଡ଼ୋକୋ ବାଞ୍ଚାଅ ନାମେୟାକୋ। ଜେଲେକା ପାବିତାର୍ ପୁଥି ତେ ଅଲାକାନା, “ଛୋଡ଼ାଓନିଃ ସିୟୋନ୍ ସାହାର୍ ଏତେ ହିଜୁଗାଏ, ହାର୍ ଏତ୍କାନ୍ କାଜି କୋକେ ୟାକୁବ୍ ରାଃ ହୋନ୍ କୋଏତେ ଆତୋମ୍ ୟାଏ। ହାର୍ ଚିମ୍ତାଙ୍ଗ୍ ଇଙ୍ଗ୍ ଇନ୍‍କୁୱାଃ ପାପ୍ କୋକେ ଆତୋମ୍ ୟାଇଙ୍ଗ୍ ଇମ୍ତା ଇନ୍‍କୁଲୋଃ ଇଙ୍ଗ୍ଆଃ ନେ ନିୟାମ୍‍ଥଲ୍ ହୋବାଅଃୱା।” ଇନ୍‍କୁ ସୁସାମାଚାର୍ ରାଃ ଲେକାତେଦୋ ଆପେୟାଃ ଲାଗିନ୍ତେ ଇନ୍‍କୁ ପାର୍ମେଶ୍ଵାର୍ ରାଃ ବାଇରୀ ତାନ୍‍କୋ, ମେନ୍ଦୋ ସାଲାକାନ୍ ଲେକାତେଦୋ ଇନ୍‍କୁ ପୁର୍ଖାହାଡ଼ାମ୍ କୋୱାଃ ଦୁଲାଡ଼୍ ତାନ୍‍କୋ। ଚିୟାଃଚି ପାର୍ମେଶ୍ଵାର୍ ରାଃ ବାର୍ଦାନ୍ ହାର୍ତେ କେନେଡ଼ା ଚିଉଲା ହ କାବେକାରୋଗା। ଚିୟାଃଚି ଜେଲେକା ସିଦା ଆପେ ପାର୍ମେଶ୍ଵାର୍ ରାଃ ଆନାଚୁ କାପେମାନାତିଙ୍ଗ୍ ତାଇନା, ମେନ୍ଦୋ ନାଆ ଆଜାଃ ଆନାଚୁ ମାନାତିଙ୍ଗ୍ ରାଃ ହୋରାତେ ଆପେ ଚେତାନ୍ ରେ ଦାୟା ହୋବାଜାନା; ଏନ୍ ଲେକାଗି ଇନ୍‍କୁ ହ ନାଆ ଆନାଚୁ କାକୋ ମାନାତିଙ୍ଗ୍ ତାନା, ଏନାତେ ଆପେୟାଃ ଚେତାନ୍ ରେ ଅକନ୍ ଦାୟା ହୋବାଅଃ ତାନା ଏନା ଇନ୍‍କୁୱାଃ ରେହ ଦାୟା ହୋବାଅଃକା। ଚିୟାଃଚି ପାର୍ମେଶ୍ଵାର୍ ସବେନ୍ କୋକେ ଆନାଚୁ କାମାନାତିଙ୍ଗ୍ ରାଃ ହୋରାତେ ଥୋଲ୍ ମାଣ୍ଡାଅ କେଃକୋୱାଏ, ଏନାତେ ଇନିଃ ସବେନ୍ କୋୱାଃ ଚେତାନ୍ ଦାୟା ରିକାୟାଏ। ଆହା! ପାର୍ମେଶ୍ଵାର୍ ରାଃ ଧାନ୍ ହାର୍ ବୁଦ୍ଧି ହାର୍ ସେଣା ଚିମିନ୍ ଈକିର୍ ମେନାଃ! ଇନିଜାଃ ବିଚାର୍ କାଥେବାଗୋଃୱା, ହାର୍ ଇନିଜାଃ ହୋରା କାସାରିଲେକା ମେନାଃ! “ପ୍ରାଭୁ ଆଃ ମୋନ୍ କେ ଅକଏ ସାରିକାଦାଏ? ୟାଦୋ ଅକଏ ଇନିଃକେ ରୋଜୋଟିୟାଏ? ୟାଦୋ ଅକଏ ଇନିଃକେ ସିଦାତେ ଜାହାନାଃ ଏମ୍ କାଇଜାଏ, ଏନାରାଃ ବାଦ୍‍ଲା ରେ ଇନିଃକେ ଏମ୍ ରୁଆଡ଼ୋଗା?” ଚିୟାଃଚି ସବେନାଃ ଇନିଜାଃ ଏତେ, ହାର୍ ଇନିଜାଃ ହୋରାତେ, ହାର୍ ଇନିଜାଃ ଲାଗିନ୍ତେ ତାନାଃ। ଇନିଜାଃ ମାନାରାଙ୍ଗ୍ ଜାନାଓ-ଜାନାଓ ହୋବାଅଃ କାତୋଃକା: ଆମୀନ୍। ଏନାମେନ୍ତେ ହେ ହାଗାକୋ ହାର୍ ମିଶିକୋ, ଇଙ୍ଗ୍ ଆପେକେ ପାର୍ମେଶ୍ଵାର୍ ରାଃ ଦାୟା ମୋନେ ରିକା କେତେ ଆର୍ଜି ପେତାନିଙ୍ଗ୍, ଚି ଆପେୟାଃ ହୋଡ଼ମୋ କେ ଜୀହିଦାକାନ୍ ହାର୍ ପାବିତାର୍ ହାର୍ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକା ଦାଣେ ରାକାବେପେ। ନେୟାଗି ଆପେୟାଃ ଆତ୍ମାନ୍ ସେୱା ତାନାଃ। ନେ ଅତେଦିଶୁମ୍ ରେନ୍‍କୋ ଲେକା ଆଲୋପେ ବାଇୟୋଃୱା; ମେନ୍ଦୋ ଆପେୟାଃ ମୋନ୍ ନାୱା ହୋବାଜାନ୍ତେ ଆପେୟାଃ ସେସେନ୍ ହ ବାଦ୍‍ଲାଅ ଇଦିଅଃକା, ଏନାତେ ଆପେ ପାର୍ମେଶ୍ଵାର୍ ରାଃ ବୁଗିନ୍, ହାର୍ ସୁକୁଲେକା ହାର୍ ଠାଉକା ସାନାଙ୍ଗ୍ କେ ଆଟ୍‍କାର୍ କେତେ ସାରିକାତେପେ। ଚିୟାଃଚି ଇଙ୍ଗ୍ ଏନ୍ ଆନୁଗ୍ରାହ୍ ରାଃ ହୋରାତେ ଅକନାଃ ଇଙ୍ଗ୍‍କେ ନାମ୍ କାନା, ଆପେ ସବେନ୍ କୋକେ କାଜିପେ ତାନିଙ୍ଗ୍ ଚି ଜେଲେକା ଆଟ୍‍କାରେ ଚାହି, ଏନାଏତେ ଜେତାଏ ଆପାନ୍ କେ ମାରାଙ୍ଗ୍ କା-ଆଟ୍‍କାରେ ଚାହି; ମେନ୍ଦୋ ଜେଲେକା ପାର୍ମେଶ୍ଵାର୍ ମିପୀୟାଃ ହୋଡ଼ କେ ବିଶ୍ଵାସ୍ ସୋଙ୍ଗ୍ କେତେ ହାଟିଙ୍ଗ୍ କାଦାଏ, ଏନ୍ ଲେକାଗି ବୁଗିନ୍ ମୋନ୍ ଲେକାତେ ଆପେ ଆପାନ୍ କେ ଆଟ୍‍କାରେପେ। ଚିୟାଃଚି ଚିଲ୍‍କା ଆବୁୱାଃ ମିୟାଃ ହୋଡ଼ମୋ ରେ ଥିମ୍ବାଗି ହାନାଟିଙ୍ଗ୍ କୋ ମେନାଃ, ହାର୍ ସବେନ୍ ହାନାଟିଙ୍ଗ୍ କୋରାଃ ମିଃଲେକା କାମି ବାନୋଗା; ଏନ୍‍ଲେକାଗି ଆବୁ ଯେ ଥିମ୍ବାଗି ମେନାବୁୱା, ମାସୀହ୍ ରେ ମିୟାଃଗି ହୋଡ଼ମୋ ହୋବାକେତେ ଆବୁ-ଆପାନ୍ ରେ ମିହୋଡ଼୍ ଏଟାଃ ମିହୋଡ଼୍ ରାଃ ହାନାଟିଙ୍ଗ୍ ତାନିଃ। ଆଡୋଃ ଚିମ୍ତାଙ୍ଗ୍ ଏନ୍ ଆନୁଗ୍ରାହ୍ ରାଃ ଲେକାତେ ଅକନାଃ ଆବୁକେ ଏମାକାନା, ଆବୁକେ ଆଲାଗ୍-ଆଲାଗ୍ ବାର୍ଦାନ୍ ନାମା କାନା, ଦୋ ଅକଏକେ ଆୟାର୍‍କାଜି ରାଃ ଦାନ୍ ନାମ୍ କାନା, ଇନିଃକେ ବିଶ୍ଵାସ୍ ଚିମିନ୍ ଏମ୍ କାନା ଇମିନ୍ ଗି ଆୟାର୍‍କାଜି କାଜିକାଏ। ଆଗାର୍ ସେୱା ରିକା ରାଃ ଦାନ୍ ନାମାକାନା, ଦୋ ସେୱା ରେ ଲାଗାଅ କାନୋଃ କାଏ, ଆଗାର୍ ଅକଏ ଶିଖାଅନିଃ ତାନିଃ, ଦୋ ଶିଖାଅ ରେ ଲାଗାଅ କାନୋଃ କାଏ; ଅକଏ ଉତ୍ସାହ୍ ଏମେନିଃ ତାନିଃ, ଇନିଃ ଉତ୍ସାହ୍ ଏମ୍ କାତେ ଚାଏ; ଦାନ୍ ଏମେନିଃ ଆୟାଃ ବୁଗିନ୍ ମୋନ୍ ତେ ଏମେଚାଏ, ଅକଏ ଆୟାର୍ ଇଦିୟାଏ ଇନିଃ ଜାତାନ୍ କେତେ ଇଦିକାଏ, ଅକଏ ଦାୟା ତାନାଏ, ଇନିଃ ରାଶିକା ତେ ରିକା ଚାଏ। ଦୁଲାଡ଼୍ ଦୋ ବେଗାର୍ ବେଦା ତାଇନ୍‍କା; ଏତ୍କାନାଃ ତେ ହିଲାଙ୍ଗ୍ ଏପେ, ବୁଗିନାଃ ରେ ତାଇକାନ୍‍ପେ। ହାଗାଦୁଲାଡ଼୍ ତେ ମିହୋଡ଼୍ ଏଟାଃ ମିହୋଡ଼୍ ତେ ଦୁଲାଡ଼୍ ଏପେ; ଆପେ-ଆପାନ୍ ଏତେ ଥିମ୍ବା ଏଟାଃନିଃକେ ମାଇନ୍ ଏପେ। କାମି ଇମ୍ତା ରେ ଆଲୋପେ କୋଢ଼ିୟାନା, ଆତ୍ମାନ୍ ଯୋଶ୍ ରେ ଫେରେଃକାନ୍ ତାଇନ୍‍ପେ, ପ୍ରାଭୁ ଆଃ ସେୱା କାତେପେ। ଆଶ୍ରା ରେ ରାଶିକାନ୍ ପେ; ଦୁକୁଅଃତାନ୍ ଇମ୍ତାରେ ସାହାତିଙ୍ଗ୍ଏପେ; ବିନ୍ତି ରେ ଲାଗାୱକାନ୍‍ପେ। ପାବିତାର୍ ହୋଡ଼ କୋକେ ଚିନାଃକୋ ଦାର୍‍କାର୍ ରେଦୋ, ଇନ୍‍କୁକେ ଦେଙ୍ଗାକୋପେ; ପେଡ଼ାକୋୱାଃ ସେୱାରେ ଲାଗାଅ କାନୋଃପେ। ଆପେକେ ସାତାଅ ହୋଡ଼ କୋକେ ଆଶିଷ୍ ଏମାକୋପେ; ଆଶିଷ୍ ଏମାକୋପେ ଆଲୋପେ ସାର୍ପାଅକୋୱା। ରାଶିକାନ୍ କୋଲୋଃ ରାଶିକାନ୍ ପେ, ହାର୍ ରାଆତାନ୍ କୋଲୋଃ ରାଆ ଏପେ। ଆପାନ୍ ରେ ମିୟାଃଗି ମୋନ୍ ମାଣ୍ଡାଏପେ; ଆଲୋପେ ଘାମାଣ୍ଡେୟା, ମେନ୍ଦୋ ସାଧାରାନ୍ ହୁପୁଡିଙ୍ଗ୍ କୋଲୋଃ ଗାତିୟୋଃପେ; ଆପେ ଆପାନ୍ କେ ସେଣାନ୍ ଆଲୋପେ ଆଟ୍‍କାରେୟା। ଏତ୍କାନ୍ ରାଃ ବାଦ୍‍ଲା ରେ ଜେତାଏ କେ ଆଲୋପେ ଏତ୍କାନ୍ ୟା; ଅକନ୍ କାଜିକୋ ସବେନ୍ ହୋଡ଼ୋକୋୱାଃ ନାଡ଼େଏ ରେ ବୁଗିନ୍ ତାନାଃ, ଏନାକେଗି ପାହୋମେପେ। ହୋବାଧାଡ଼ିଅଃ ରେଦୋ, ଆପେୟାଃ ପେଡ଼େଏ ଲେକା ସବେନ୍ ହୋଡ଼ୋ କୋଲୋଃ ମେଶା କେତେ ତାଇନ୍‍ପେ। ହେ ଦୁଲାଡ଼୍ କୋ, ଆଲୋପେ ବାଦ୍‍ଲା ଇଦିୟା, ମେନ୍ଦୋ ପାର୍ମେଶ୍ଵାର୍ କେ ଖିସ୍ ହାନ୍ତାଡ଼ାଇପେ, ଚିୟାଃଚି ପାବିତାର୍ ପୁଥି ରେ ଅଲାକାନା, “ବାଦ୍‍ଲା ଇଦି ଇଙ୍ଗ୍ଆଃ କାମି ତାନାଃ, ପ୍ରାଭୁ କାଜିୟାଏ ଇଙ୍ଗ୍ ଗି ବାଦ୍‍ଲା ଇଦିୟାଇଙ୍ଗ୍।” ମେନ୍ଦୋ “ଆଗାର୍ ଆମାଃ ବାଇରୀ ରେଙ୍ଗେଃତାନ୍ ରେଦୋ ଇନିଃକେ ଯୋଜୋମାଃ ଏମାଇମେ, ଆଗାର୍ ତେତାଙ୍ଗ୍ ତାନ୍ ରେଦୋ ଇନିଃକେ ଦାଆ ଆନୁଇମେ; ଚିୟାଃଚି ନେକା ରିକାଏରେ ଆମ୍ ଇନିଜାଃ ବୋଅ ରେ ସେଙ୍ଗେଲ୍ ରାଃ ଆଙ୍ଗ୍ରା କେ କୁଧାୟାମ୍।” ଏତ୍କାନାଃ ଏତେ ଆଲୋ ହାରାଅନ୍‍ପେ, ମେନ୍ଦୋ ବୁଗିନାଃ ତେ ଏତ୍କାନାଃ କେ ଜିତାଅନ୍‍ପେ। ସବେନ୍ ହୋଡ଼ୋକୋ ରାଇଜ୍ ରେ ରାଇଜ୍‍ତାନ୍ କୋୱାଃ ଆଧିନ୍ ରେ ତାଇନ୍ କାକୋ, ଚିୟାଃଚି ପାର୍ମେଶ୍ଵାର୍ ପାଡ଼େତେ କାକୁଲାକାନା ମେନ୍ତେ ନେକା ଜେତାନ୍ ଆଧିକାର୍ ବାନୋଃ, ହାର୍ ଅକନ୍ କୋକେ ଆଧିକାର୍ ଏମାକାନା, ଇନ୍‍କୁକେ ପାର୍ମେଶ୍ଵାର୍ ପାଡ଼େତେ ଦୋହୋକାନା। ଏନାମେନ୍ତେ ଅକଏ ଆଧିକାର୍ ରାଃ ବିରୋଧ୍ ତାନାଏ ଇନିଃ ପାର୍ମେଶ୍ଵାର୍ ରାଃ ନିୟାମ୍ ବିରୋଧ୍ ରେ ତିଙ୍ଗୁନ୍ ତାନାଏ ହାର୍ ନିୟାମ୍ ବିରୋଧ୍ ରେ ତିଙ୍ଗୁନ୍ ହୋଡ଼ୋକୋ ଦାଣ୍ଡ୍ ନାମେୟାକୋ। ଚିୟାଃଚି ହାକିମ୍ କୋ ବୁଗିନ୍ କାମିତାନ୍‍କୋ ଲାଗିନ୍ କାହା, ମେନ୍ଦୋ ଖାରାପ୍ କାମିତାନ୍‍କୋ ଲାଗିନ୍ ବୋରୋୱାନ୍ ତାନ୍‍କୋ, ଏନାମେନ୍ତେ ଆଗାର୍ ଆମ୍ ହାକିମ୍ କେ କାମ୍ ବୋରୋଇ ସାନାଙ୍ଗ୍ ତାନ୍ ରେଦୋ, ବୁଗିନ୍ କାମି ରିକାଏମ୍, ହାର୍ ଇନିଃ ଆମ୍ କେ ସାହାରାଅ ମେୟାଏ। ଚିୟାଃଚି ଇନିଃ ଆମାଃ ବୁଗିନାଃ ଲାଗିନ୍ତେ ପାର୍ମେଶ୍ଵାର୍ ଆଃ ଦାସୀ ତାନିଃ। ମେନ୍ଦୋ ଆଗାର୍ ଆମ୍ ଏତ୍କାନାଃ ରିକାତାନ୍ ରେଦୋମ୍, ବୋରୋଇମେ; ଚିୟାଃଚି ଇନିଃ ତାଲ୍‍ୱାର୍ ସାମାଗୀ କାଏ ଇଦିକାଦାଏ; ଆଡୋଃ ଇନିଃ ପାର୍ମେଶ୍ଵାର୍ ରାଃ ଦାସୀ ହାର୍ ଏତ୍କାନାଃ ରିକାତାନ୍ କୋକେ ଖିସ୍ ତେ ଦାଣ୍ଡ୍ ଏମେନିଃ ତାନିଃ। ଏନାମେନ୍ତେ ଆପେକେ ଆଧିନ୍ ରେ ତାଇନୋଃ ଏନ୍ ଖିସ୍ ରାଃ ଚାଲ୍ତେ ଲାଗାତିଙ୍ଗ୍ ମେନାଃ ମେନ୍ତେ ଭାଇର୍ କାହା, ମେନ୍ଦୋ ଆପେୟାଃ ମୋନ୍ ହଗି ଆଟ୍‍କାର୍ ଉରୁମ୍ ତାନାଏ। ଏନାମେନ୍ତେ ମାଲ୍‍ଗୁଜାରୀ ଏମେପେ ଚିୟାଃଚି ରାଇଜ୍‍ତାନ୍ କୋ ପାର୍ମେଶ୍ଵାର୍ ଆଃ ଦାସୀ ତାନ୍‍କୋ ଆଡୋଃ ସବେନ୍ ଇମ୍ତା ନେ କାମି ରେଗି ତାଇନ୍ ତାନାକୋ। ଏନାମେନ୍ତେ ସବେନ୍ କୋକେ ଅକନାଃ ଦାର୍‍କାର୍ ଏନା ଏମ୍ କୋପେ; ଅକଏ କେ ମାଲ୍-ଟାକା ଦାର୍‍କାର୍, ଇନିଃକେ ମାଲ୍-ଟାକା ଏମେପେ; ଅକଏ କେ ମାଲ୍‍ଗୁଜାରୀ ଦାର୍‍କାର୍ ଇନିଃକେ ମାଲ୍‍ଗୁଜାରୀ ଏମେପେ; ଅକଏ କେ ବୋରୋ ଦାର୍‍କାର୍, ଇନିଃକେ ବୋରୋଇପେ, ଅକଏ କେ ମାଇନ୍ ଦାର୍‍କାର୍, ଇନିଃକେ ମାଇନ୍ ଏମାଇପେ। ଆପେ-ଆପେ ରେ ଦୁଲାଡ଼୍ ରାଃ ରିଣୀ ବାଗେ କେତେ ଆଡୋଃ ଜେତାନ୍ ରିଣୀ ଜେତାୟାଃ ଆଲୋପେ ମାଣ୍ଡାଅୟା; ଚିୟାଃଚି ଅକଏ ଏଟାଃ ନିଈ ଲୋଃ ଦୁଲାଡ଼୍ ମାଣ୍ଡାଅୟାଏ, ଇନିଃଗି ମୁଶା ନାବୀ ରାଃ ଆଇନ୍ କେ ପୁରା କାଦାଏ। ଚିୟାଃଚି ଆନାଚୁ କୋଏତେ ଜେଲେକା, “ଆଲୋମ୍ ବ୍ୟାଭିଚାର୍ ୟା, ହୋଡ଼ ଆଲୋମ୍ ଗୋଗୋଏଃୟା, ଆଲୋମ୍ କୁମ୍ଡ଼ୁୟା, ଆଲୋମ୍ ହାୟାଅଃୱା,” ହାର୍ ନେୟାକେ ବାଗି କେତେ ଆଡୋଃ ଜାହାନ୍ ଗି ଆନାଚୁ ମେନାଃ ରେଦୋ ସବେନାଃ ନେ ବାକାଣ୍ ରେଗି ପୁରାଅଃ ତାନା ଚି, “ଆପେୟାଃ ନାଡ଼େଏ-ଜାପାଃ ରେନ୍ କୋକେ ଆପାନାଃ ଲେକା ଦୁଲାଡ଼୍ କୋପେ।” ଦୁଲାଡ଼୍ ନାଡ଼େଏ-ଜାପାଃ ରେନ୍ କୋକେ କାଏ ଦୁକୁ କୋୱାଏ, ଏନାମେନ୍ତେ ଦୁଲାଡ଼୍ ଦୋହୋ ମୁଶା ନାବୀ ରାଃ ଆଇନ୍ କେ ପୁରା ରିକାତାନାଃ। ସାମାୟ୍ କେ ନେଲ୍ ଉରୁମ୍ କେତେ ନେକାଗି ରିକାଏପେ, ଏନାମେନ୍ତେ ଚି ନାଆ ଆପେୟାଃ ଲାଗିନ୍ତେ ଦୁଣୁମ୍ ଏତେ ଏୟୋନ୍ ରାଃ ସାମାୟ୍ ହିଜୁଃ ସେଟେର୍ କାନା; ଚିୟାଃଚି ଅକନ୍ ସାମାୟ୍ ଆବୁ ବିଶ୍ଵାସ୍ ଲେଦାବୁ ଇମ୍ତାତେଦୋ ପାହୋମ୍ ଲେରେ ଆବୁୱାଃ ବାଞ୍ଚାଅ ନାଡ଼େଏ ଗିୟା। ନିଦା ଛାବା ଇଦିଅଃ ତାନା, ହାର୍ ଶିଙ୍ଗି ତୁରୋଃ ରାଃ ମେନାଃ; ଏନାମେନ୍ତେ ଆବୁ ନିଦା ରାଃ କାମିକୋକେ ବାଗିକେତେ ମାସ୍କାଲ୍ ରାଃ ହାଥ୍‍ୟାର୍ ଥୋଲେନ୍‍କାବୁ। ଜେଲେକା ଶିଙ୍ଗି ଇମ୍ତା ଲାଗାତିଙ୍ଗ୍ ତାନାଃ, ଏନ୍ ଲେକାଗି ସୋଜ୍ ମୋନ୍ ତେ ସେସେନ୍ କାବୁ, ରିଜ୍-ରାଙ୍ଗ୍ ରେ କାହା, ବୁଲୋଃ ରେ କାହା, ବ୍ୟାଭିଚାର୍ ରେ କାହା, ଶିତୃ ସାନାଙ୍ଗ୍ କାହା, ଲାପ୍ଡ଼ାଇ କାହା ହାର୍ ହିସିଙ୍ଗା କାହା। ମେନ୍ଦୋ ପ୍ରାଭୁ ୟୀଶୁ ମାସୀହ୍ କେ ତୁସିଙ୍ଗ୍ କୋଃପେ ହାର୍ ପାପୀ ହୋଡ଼ମୋ ରାଃ ସାନାଙ୍ଗ୍ କେ ପୁରାନାଙ୍ଗ୍ ଆଲୋପେ ଦାଣାବାଡ଼ାୟା। ଅକଏ ବିଶ୍ଵାସ୍ ରେ ନାରାଦୁରା ମେନାଇଜା, ଇନିଃକେ ଆପେ ଲୋଃ ଗାତି କିପେ, ମେନ୍ଦୋ ଇନିଜାଃ ରାକାମ୍ ରାଃ ବିଚାର୍ କୋକେ କାପାଜି ଲାଗିନ୍ତେ କାହା। ମିହୋଡ଼୍ କେ ବିଶ୍ଵାସ୍ ମେନାଃ ଚି ସବେନାଃ ଜୋଜୋମ୍ ଠାଉକା ତାନାଃ, ମେନ୍ଦୋ ଅକଏ ବିଶ୍ଵାସ୍ ରେ ନାରାଦୁରା ମେନାଇଜା ଇନିଃ ଆଡ଼ାଆଃ ସାକାମ୍ ଗି ଜୋମେୟାଏ। ଜୋଜୋମ୍ ନିଃ କାଜୋଜୋମ୍ ନିଃକେ ଆଲୋ ହିଲାଙ୍ଗେକାଏ, ହାର୍ କାଜୋଜୋମ୍ ନିଃ ଜୋଜୋମ୍ ନିଃକେ ଆଲୋ ଦୋଷ୍ ଏମିକାଏ, ଚିୟାଃଚି ପାର୍ମେଶ୍ଵାର୍ ଇନିଃକେ ଗ୍ରାହାନ୍ କାଇଜାଏ। ଆମ୍ ଅକଏ ତାନ୍‍ମେ ଏଟାଃ ନିଜାଃ ଦାସୀ ଚେତାନ୍ ରେ ଦୋଷ୍ ଏମ୍ ତାନାମ୍? ଇନିଃ ଆଜାଃ ଗୋମ୍‍କେ ନାଡ଼େଏ ରେ ତିଙ୍ଗୁନ୍ ତାନାଏ ଚାହେ ଉୟୁଗେନ୍ ତାନାଏ, ମେନ୍ଦୋ ଇନିଃ ତିଙ୍ଗୁ ଅଗାଏ, ଚିୟାଃଚି ପ୍ରାଭୁ ଇନିଃକେ ତିଙ୍ଗୁ ଧାଡ଼ିୟାଏ। ମିହୋଡ଼୍ ମୁଶିଙ୍ଗ୍ ହୁଲାଙ୍ଗ୍ କେ ଏଟାଃ ହୁଲାଙ୍ଗ୍ ଏତେ ମାରାଙ୍ଗ୍ ଆଟ୍‍କାର୍ ତାନାଏ, ହାର୍ ଏଟାଃ ମିହୋଡ଼୍ ସବେନ୍ ହୁଲାଙ୍ଗ୍ କେ ମିଃଗି ଆଟ୍‍କାର୍ ତାନାଏ। ସବେନ୍ ମିପୀହୋଡ଼୍ ଆପାନାଃ-ଆପାନାଃ ମୋନ୍ ରେ ପାହୋମ୍ ଲେକାଏ। ଅକଏ ଜାହାନ୍ ହୁଲାଙ୍ଗ୍ କେ ମାନାତିଙ୍ଗ୍ ତାନାଏ, ଇନିଃ ପ୍ରାଭୁ ଲାଗିନ୍ତେ ମାନାତିଙ୍ଗ୍ ତାନାଏ। ଅକଏ ଜୋମ୍ ତାନାଏ, ଇନିଃ ପ୍ରାଭୁ ଲାଗିନ୍ତେ ଜୋମ୍ ତାନାଏ, ଚିୟାଃଚି ଇନିଃ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ରିକା ତାନାଏ, ହାର୍ ଅକଏ କାଏ ଜୋମ୍ ତାନାଏ, ଇନିଃ ପ୍ରାଭୁ ଲାଗିନ୍ତେ କାଏ ଜୋମ୍ ତାନାଏ ହାର୍ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ରିକା ତାନାଏ। ଚିୟାଃଚି ଆବୁ କୋଏତେ ଜେତାଏ ଆପାନାଃ ଲାଗିନ୍ତେ କାଏ ଜୀହିଦୋଃ ତାନାଏ ହାର୍ ନା ଜେତାଏ ଆପାନାଃ ଲାଗିନ୍ତେ ଗୋଜୋଃ ତାନାଏ। ଆଗାର୍ ଆବୁ ଜୀହିଃ ମେନାବୁୱା, ଦୋ ପ୍ରାଭୁ ଲାଗିନ୍ତେ ଜୀହିଃ ମେନାବୁୱା, ହାର୍ ଆଗାର୍ ଆବୁ ଗୋଜୋଃ ତାନାବୁ ଦୋ ପ୍ରାଭୁ ଲାଗିନ୍ତେ ଗୋଜୋଃ ତାନାବୁ; ଏନାମେନ୍ତେ ଆବୁ ଜୀହିଦ୍‍ତାନ୍ ଚାହେ ଗୋଜୋଃତାନ୍, ଆବୁ ପ୍ରାଭୁ ଆଃ ଗି ତାନ୍‍ବୁ। ଚିୟାଃଚି ମାସୀହ୍ ଏନାମେନ୍ତେ ଗୋଏଃଜାନାଏ ହାର୍ ଜୀହିଃ ରୁଆଡ଼୍ ଜାନାଏ ଚି ଇନିଃ ଗୋଜାକାନ୍ ହାର୍ ଜୀହିଦ୍‍ତାନ୍ ବାରାନ୍ କୋୱାଃ ପ୍ରାଭୁ ହୋବାଅଃୱାଏ। ମେନ୍ଦୋ ଆମ୍ ଆମାଃ ହାଗା ରାଃ ଚେତାନ୍ ଚିନାଃ ମେନ୍ତେ ଦୋଷ୍ ଏମ୍ ତାନାମ୍? ଆଡୋଃ ଆମ୍ ଆଡୋଃଗି ଚିନାଃ ମେନ୍ତେ ଆମାଃ ହାଗା କେମ୍ ହିଲାଙ୍ଗିତାନା? ଆବୁ ସବେନ୍ କୋଦୋ ପାର୍ମେଶ୍ଵାର୍ ରାଃ ବିଚାର୍ ସିଂହାସାନ୍ ରାଃ ସାମାନାଙ୍ଗ୍ ରେ ତିଙ୍ଗୁନାବୁ। ଚିୟାଃଚି ପାବିତାର୍ ପୁଥି ରେ ଅଲାକାନା, “ପ୍ରାଭୁ କାଜିତାନାଏ, ଚିୟାଃଚି ଇଙ୍ଗ୍ ଜୀହିଃ ମେନାଇଙ୍ଗ୍‍ୟା ସବେନ୍ ମୁକ୍‍ଡ଼ିକୋ ଇଙ୍ଗ୍ଆଃ ନାଡ଼େଏ ରେ ଇକ୍‍ଡ଼ୁମେୟାକୋ, ହାର୍ ସବେନ୍ ଆଲାଙ୍ଗ୍ କୋ ପାର୍ମେଶ୍ଵାର୍ କେ ମାନାତିଙ୍ଗ୍ ୟାକୋ।” ଏନାମେନ୍ତେ ଆବୁ ଏତେ ସବେନ୍ ମିପୀହୋଡ଼୍ ପାର୍ମେଶ୍ଵାର୍ କେ ଆପାନାଃ-ଆପାନାଃ ହିସାବ୍ ଏମ୍ ହୋବାୱା। ଏନାମେନ୍ତେ ଆୟୁର୍ତେ ଆବୁ ମିହୋଡ଼୍ ଏଟାଃ ନିଃକେ ଦୋଷ୍ ଆଲୋକାବୁ ଏମେକା, ମେନ୍ଦୋ ଆପେ ନେୟା ବିଚାର୍ କେପେ ଚି ଜେତାଏ ଆପାନାଃ ହାଗା ରାଃ ନାଡ଼େଏ ରେ ଥୋଦୋଃ ୟାଦୋ ଉୟୁଗେନ୍ ରାଃ ବିଷାୟ୍ ଆଲୋପେ ମାଣ୍ଡାଅୟା। ଇଙ୍ଗ୍ ସାରିତାନିଙ୍ଗ୍ ହାର୍ ପ୍ରାଭୁ ୟୀଶୁ ରେ ସାର୍ତିଗୀ ଆଟ୍‍କାର୍ ତାନିଙ୍ଗ୍ ଚି ଜାହାନ୍ ଜିନିଷ୍ ଆଏଃ-ଆଏଃତେ ଆଶୁଦ୍ଧ୍ ବାନୋଃୱା, ମେନ୍ଦୋ ଅକଏ ଏନାକେ ଆଶୁଦ୍ଧ୍ ଆଟ୍‍କାର୍ ତାନାଏ ଇନିଜାଃ ଲାଗିନ୍ ଆଶୁଦ୍ଧ୍ ତାନାଃ। ଆଗାର୍ ଆମାଃ ହାଗା ଆମାଃ ଜୋଜୋମାଃ ହୋରାତେ ଦୁକୁଅଃ ତାନାଏ, ଏଣ୍ଡେ ଆମ୍ ଦୁଲାଡ଼୍ ରାଃ ହୋରା କାମ୍ ସେସେନ୍ ତାନା, ଅକେୟାଃ ଲାଗିନ୍ ମାସୀହ୍ ଗୋଏଃ ଜାନାଏ, ଇନିଃକେ ଆମ୍ ଆମାଃ ଜୋଜୋମାଃ ହୋରାତେ ଆଲୋମ୍ ବାଗ୍ଡ଼ାୱିୟା। ଏନାମେନ୍ତେ ଆପେୟାଃ ଲାଗିନ୍ତେ ଅକନାଃ ବୁଗିନ୍ ତାନାଃ ଏନା ଆଲୋ ହିଲାଙ୍ଗ୍ ଅଃକା। ଚିୟାଃଚି ପାର୍ମେଶ୍ଵାର୍ ରାଃ ରାଇଜ୍ ଜୋମ୍ ନୁ ଦୋ କାହା, ମେନ୍ଦୋ ଧାରାମ୍ ହାର୍ ମେଶା ହାର୍ ପାବିତାର୍ ଆତ୍ମା ତେ ରାଶିକା ତାନାଃ। ଅକଏ ନେଲେକାତେ ମାସୀହ୍ ରାଃ ସେୱା ରିକା ତାନାଏ, ଇନିଃ ପାର୍ମେଶ୍ଵାର୍ କେ ସୁକୁୱାଇ ତାନାଏ ହାର୍ ହୋଡ଼ୋକୋ ଇନିଃକେ ବୁଗିନ୍ ମେତାଇ ତାନାକୋ। ଏନାମେନ୍ତେ ଆବୁ ଏନ୍ ବାକାଣ୍ କୋରେ ତାଇନ୍ କାବୁ ଅକନାଃ ତେ ମେଶା ହାର୍ ମିହୋଡ଼୍ ଏଟାଃ ନିଜାଃ ସୁଧ୍‍ରାଓ ହୋବାଅଃୱା। ଜୋଜୋମାଃ ଲାଗିନ୍ତେ ପାର୍ମେଶ୍ଵାର୍ ରାଃ କାମି ଆଲୋମ୍ ବାଗ୍ଡ଼ାଅୟା। ସବେନାଃ ଫାର୍ଚି ଦୋ ମେନାଃ, ମେନ୍ଦୋ ଏନ୍ ହୋଡ଼ ଲାଗିନ୍ ଶିତୃ ତାନାଃ ଅକନିଃକେ ଇନିଜାଃ ଜୋଜୋମାଃତେ ଥୋଦୋଃ ତାନାଏ। ବୁଗିନ୍ ଦୋ ନେୟା ତାନାଃ ଚି ଆମ୍ ମାସ୍ ଆଲୋମ୍ ଜୋମେ ହାର୍ ଆଙ୍ଗୁର୍ ରାଶି ଆଲୋମ୍ ନୁୱେ, ହାର୍ ଏନ୍‍କା ଜାହାନ୍ କାମି ଆଲୋମ୍ ରିକାୟା ଅକନାଃ ତେ ଆମାଃ ହାଗା ଥୋଦୋଃୱାଏ। ଆମାଃ ଅକନ୍ ବିଶ୍ଵାସ୍ ମେନାଃ, ଏନାକେ ପାର୍ମେଶ୍ଵାର୍ ରାଃ ନାଡ଼େଏ ରେ ଆମାଃ ମୋନ୍ ରେଗି ମାଣ୍ଡାଏମ୍। ଧାନ୍ୟା ଏନ୍ ହୋଡ଼ ତାନିଃ ଅକନ୍ କାଜି କେ ଇନିଃ ଠିକ୍ ଆଟ୍‍କାର୍ ତାନାଏ; ଏନାରେ ଆପାନ୍ କେ ଦୋଷୀ କାଏ ବାଇତାନାଏ। ମେନ୍ଦୋ ଅକଏ ସାନ୍ଦେହ୍ କେତେ ଜୋମେୟାଏ ଇନିଃ ଦାଣ୍ଡ୍ ନାମେୟାଏ, ଚିୟାଃଚି ଇନିଃ ବିଶ୍ଵାସ୍ କେତେ କାଏ ଜୋମ୍ ତାନାଏ, ହାର୍ ଅକନାଃ ବିଶ୍ଵାସ୍ ତେ ନାହାଲା, ଏନା ପାପ୍ ତାନାଃ। ଏନାମେନ୍ତେ ଆବୁ ପେଡ଼େଜାନ୍‍କୋ କାପେଡ଼େଜାନ୍ କୋୱାଃ ନାରାଦୁରାକେ ସାହାତିଙ୍ଗ୍ ଲାଗାତିଙ୍ଗ୍ଆ, ଆପାନାଃ ସୁକୁ କେ ଭାଇର୍ କାନେଲେ ଚାହି। ଆବୁଏତେ ମିପୀୟାଃ ହୋଡ଼ କୋକେ ଆପାନାଃ ନାଡ଼େଏ ଜାପାଃ ରେନ୍ କୋୱାଃ ବୁଗିନାଃ ଲାଗିନ୍ତେ ସୁକୁ ରିକାକୋ ଚାହି ଏନାତେ ଇନ୍‍କୁ ବିଶ୍ଵାସ୍ ରେ ବାଇ ଇଦିୟୋଃକାକୋ। ଚିୟାଃଚି ମାସୀହ୍ ଆଏଃ ଆପାନ୍ କେ କାଏ ସୁକୁ କେଦା, ମେନ୍ଦୋ ଜେଲେକା ପାବିତାର୍ ପୁଥି ରେ ଅଲାକାନା: “ଆମ୍‍କେ ନିନ୍ଦାତାନ୍ କୋୱା ନିନ୍ଦା ଇଙ୍ଗ୍ଆଃ ଚେତାନ୍ ରେ ଠୋଅ ଜାନା।” ଚିମିନାଙ୍ଗ୍ କାଜିକୋ ସିଦା ରେ ଅଲ୍ ଲେନା, ଏନାକୋ ଆବୁୱାଃ ସେଣା ନାମେ ଲାଗିନ୍ ଗି ଅଲାକାନା ଏନାତେ ଆବୁ ସାହାତିଙ୍ଗ୍ ହାର୍ ପାବିତାର୍ ପୁଥି ରାଃ ସାହାସ୍ଏମ୍ କାଜି ରାଃ ହୋରାତେ ଆଶ୍ରା ମାଣ୍ଡାଅକାବୁ। ସାହାତିଙ୍ଗ୍ ହାର୍ ସାହାସ୍ଏମ୍ ନିଃ ପାର୍ମେଶ୍ଵାର୍ ଆପେକେ ନେୟା ବାର୍ଦାନ୍ ଏମାପେକାଏ ଏନାତେ ଆପେ ମାସୀହ୍ ୟୀଶୁ ଲେକା ଆପେ ଥାଲା ରେ ମିୟାଃ ମୋନ୍ ତାଇନ୍‍ପେ। ଏନାତେ ଆପେ ମିୟାଃ ମୋନ୍ ହାର୍ ମିୟାଃ ମୋଚା ତେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆପୁ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାଏପେ। ଏନାମେନ୍ତେ, ଜେଲେକା ମାସୀହ୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଲାଗିନ୍ତେ ଆପେକେ ଗ୍ରାହାନ୍ କାଃପେୟାଏ, ଏନ୍‍ଲେକାଗି ଆପେ ହଗି ମିହୋଡ଼୍ ଏଟାଃନିଃକେ ଗ୍ରାହାନ୍ ଏପେ। ଏନାମେନ୍ତେ ଇଙ୍ଗ୍ କାଜିତାନିଙ୍ଗ୍ ଚି ଅକନ୍ କିରିୟା ପୁର୍ଖାଆପୁ କୋକେ ଏମ୍ ଲେନ୍ ତାଇନା ଏନାକେ ପୋକ୍ତା ଲାଗିନ୍ତେ ମାସୀହ୍, ପାର୍ମେଶ୍ଵାର୍ ରାଃ ସାର୍ତି କେ ଉଦୁବ୍ ଲାଗିନ୍, ଖାତ୍ନାକାନ୍ ହୋଡ଼ୋକୋୱାଃ ଦାସୀ ବାଇଜାନାଏ; ହାର୍ ଏଟାଃଜାତିକୋ ହଗି ଦାୟା ରାଃ ହୋରାତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ୟାକୋ, ଜେଲେକା ଅଲାକାନା, “ଏନାମେନ୍ତେ ଇଙ୍ଗ୍ ଜାତି-ଜାତିକୋ ରେ ଆମାଃ ଧାନ୍ୟାବାଦ୍ ରିକାୟାଇଙ୍ଗ୍, ହାର୍ ଆମାଃ ନୁତୁମ୍ ରାଃ ଦୁରାଙ୍ଗ୍ କେ ଦୁରାଙ୍ଗ୍ ୟାଇଙ୍ଗ୍।” ଆଡୋଃଗି କାଜିକାଦାଏ, “ହେ ଜାତି-ଜାତି ରେନ୍ ସବେନ୍ ହୋଡ଼ୋକୋ, ଇନିଜାଃ ହୋଡ଼ୋକୋ ଲୋଃ ରାଶିକାଅଃ ପେ।” ହାର୍ ଆଡୋଃଗି, “ହେ ଜାତି-ଜାତି ରେନ୍ ସବେନ୍ ହୋଡ଼ୋକୋ, ପ୍ରାଭୁ ଆଃ ସ୍ତୁତି ଏପେ; ହାର୍ ହେ ରାଇଜ୍-ରାଇଜ୍ ରେନ୍ ସବେନ୍ ହୋଡ଼ୋକୋ, ଇନିଃକେ ସାହାରାୱଇପେ।” ହାର୍ ଆଡୋଃଗି ୟାଶାୟାହ୍ ନାବୀ କାଜିତାନାଏ, “ଯେଶୀ ରାଃ ମିୟାଃ ରେହେଃ ନେଲୋଗାଏ, ହାର୍ ଏଟାଃଜାତି କୋୱାଃ ହାକିମ୍ ହୋବାଅଃ ଲାଗିନ୍ତେ ମିହୋଡ଼୍ ବୀରିଦାଏ, ଇନିଜାଃ ରେ ଏଟାଃଜାତି କୋ ଆଶ୍ରା ମାଣ୍ଡାଅୟାକୋ।” ପାର୍ମେଶ୍ଵାର୍ ଅକନିଃ ଆଶ୍ରା ଏହେମ୍ ନିଃ ତାନିଃ ଆପେକେ ବିଶ୍ଵାସ୍ ଲାଗିନ୍ତେ ସବେନ୍ ରାକାମ୍ ରାଃ ରାଶିକା ହାର୍ ଶାନ୍ତି ତେ ଫେରେଃ ପେକାଏ, ଏନାତେ ପାବିତାର୍ ଆତ୍ମା ରାଃ ପେଡ଼େଏ ତେ ଆପେୟାଃ ଆଶ୍ରା ହାରା ଇଦିୟୋଃକା। ହେ ଇଙ୍ଗ୍ଆଃ ହାଗାକୋ ହାର୍ ମିଶିକୋ, ଇଙ୍ଗ୍ ଆପେୟାଃ ବିଷାୟ୍ ରେ ବେଶ୍ ଲେକାତେ ସାରିତାନିଙ୍ଗ୍ ଚି ଆପେ ହଗି ବୁଗିନାଃ ତେ ଫେରେଃ କାନାପେ ହାର୍ ବୁଗିନ୍ ସେଣା ତେପେ ଫେରେଃ କାନା, ହାର୍ ମିହୋଡ଼୍ ଏଟାଃନିଃ କେ ଚେତାଓ ଧାଡ଼ିୟାପେ। ଏଣ୍ଡେ ହଗି ଇଙ୍ଗ୍ ମିଃତାଃ-ମିଃତାଃ ରେ ଆପେ ପାହୋମେୟାପେ ମେନ୍ତେ ଆପେକେ ଥିମ୍ବାଗି ସାହାସ୍ କେତେ ଅଲ୍ କେଦାଇଙ୍ଗ୍। ନେୟା ଏନ୍ ଆନୁଗ୍ରାହ୍ ରାଃ ହୋରାତେ ହୋବାଜାନା ଅକନାଃ ପାର୍ମେଶ୍ଵାର୍ ଇଙ୍ଗ୍‍କେ ଏମା କାଦିଙ୍ଗାଏ, ଚି ଇଙ୍ଗ୍ ଏଟାଃଜାତି କୋ ଲାଗିନ୍ତେ ମାସୀହ୍ ୟୀଶୁ ରାଃ ଦାସୀ ହୋବାକେତେ ପାର୍ମେଶ୍ଵାର୍ ରାଃ ସୁସାମାଚାର୍ ରାଃ ସେୱା ୟାଜାକ୍ ଲେକା ରିକାୟାଇଙ୍ଗ୍; ଏନାତେ ଏଟାଃଜାତିକୋ ପାବିତାର୍ ଆତ୍ମା ତେ ପାବିତାର୍ ହୋବାକେତେ ସୁକୁୱାନ୍ ଦାଣେ ଲେକାକୋ ଗ୍ରାହାନ୍ ଅଃକା। ଏନାମେନ୍ତେ ଏନ୍ କାଜିକୋରାଃ ବିଷାୟ୍ ରେ ଅକନାଃ ପାର୍ମେଶ୍ଵାର୍ ରେ ମେନାଃ, ଇଙ୍ଗ୍ ମାସୀହ୍ ୟୀଶୁ ରେ ମାରାଙ୍ଗେନ୍ ଆଟ୍‍କାର୍ ଧାଡ଼ିୟାଙ୍ଗ୍। ଚିୟାଃଚି ଏନ୍ କାଜିକୋକେ ବାଗିକେତେ ଇଙ୍ଗ୍‍କେ ଆଡୋଃ ଜେତାନ୍ କାଜି କୋରାଃ ବିଷାୟ୍ ରେ କାଜି ଲାଗିନ୍ତେ ସାହାସ୍ ବାନୋଗା, ଅକନାଃ ମାସୀହ୍ ଏଟାଃଜାତି କୋ ମାନାତିଙ୍ଗେ ଲାଗିନ୍ ବାଚାନ୍, ହାର୍ କାମି, ହାର୍ ଚିହ୍ନା ହାର୍ ଆକ୍‍ଦାନ୍ଦା କାମି ହାର୍ ପାବିତାର୍ ଆତ୍ମା ରାଃ ପେଡ଼େଏ ତେ ଇଙ୍ଗ୍ଆଃ ହୋରାତେ ରିକା କେଦାଏ; ନେୟା ସାନ୍ତେ ଚି ଇଙ୍ଗ୍ ୟୀରୁଶାଲେମ୍ ଏତେ ଇଦିକେତେ ସବେନ୍ ପାଡ଼୍ ଇଲୁରିକୁମ୍ ରାଇଜ୍ ସାନ୍ତେ ମାସୀହ୍ ରାଃ ସୁସାମାଚାର୍ କେ ପୁରା-ପୁରା ଉଦୁବ୍ କେଦାଇଙ୍ଗ୍। ମେନ୍ଦୋ ଇଙ୍ଗ୍ଆଃ ମୋନ୍ ରେୟାଃ ସାନାଙ୍ଗ୍ ନେୟା ତାନାଃ ଚି ଅକୋତାଃ-ଅକୋତାଃ ରେ ମାସୀହ୍ ରାଃ ନୁତୁମ୍ କା ଇଦିକାନା, ଏନ୍ତାଃ ସୁସାମାଚାର୍ ଉଦୁବେୟାଇଙ୍ଗ୍ ନେକା ଆଲୋକା ହୋବାଅଃ ଚି ଏଟାଃ କୋୱାଃ ନାହି ଗାଡା ରେ ଅଡ଼୍ଆଃ ବାଇୟାଇଙ୍ଗ୍। ମେନ୍ଦୋ ଜେଲେକା ଅଲାକାନା ଏନ୍‍ଲେକାଗି ହୋବାଅଃକା, “ଅକନ୍ କୋକେ ଇନିଜାଃ ବିଷାୟ୍ କାଉଦୁବା କାନା, ଇନ୍‍କୁ ଗି ନେଲେୟାକୋ ହାର୍ ଅକନ୍ କୋ କାକୋ ଆୟୁମ୍ କାଦା ଇନ୍‍କୁ ଗି ବୁଝାଅଃୱାକୋ।” ଏନାଲାଗିନ୍ତେ ଇଙ୍ଗ୍ ଆପେ ତାଃ ହିଜୁଃ ଲାଗିନ୍ତେ ଘାରି-ଘାରି କେସେଃ ଜାନିଙ୍ଗ୍। ମେନ୍ଦୋ ନାଆ ନେ ରାଇଜ୍ କୋରେ ଇଙ୍ଗ୍ଆଃ କାମି ଲାଗିନ୍ତେ ଆଡୋଃ ଜାଗା ବାନୋଗା, ହାର୍ ଥିମ୍ବାଗି ଶିର୍ମା ଏତେ ଇଙ୍ଗ୍‍କେ ଆପେ ତାଃ ହିଜୁଃ ରାଃ ସାନାଙ୍ଗ୍ ମେନାଃ। ଏନାମେନ୍ତେ ଚିମ୍ତାଙ୍ଗ୍ ଇଙ୍ଗ୍ ସ୍ପେନ୍ ଦିଶୁମ୍ ତେଇଙ୍ଗ୍ ସେନା ଦୋ ଆପେୟାଃ ତାଃ ବୋଲୋ ତୋରା ସେନାଇଙ୍ଗ୍, ଚିୟାଃଚି ଇଙ୍ଗ୍‍କେ ଆଶ୍ରା ମେନାଃ ଚି ଏନ୍ ସେସେନ୍ ହୋରା ରେ ଆପେ ଲୋଃ ନାପାମ୍ ହୋବାୱା, ହାର୍ ଚିମ୍ତାଙ୍ଗ୍ ଆପେୟାଃ ଲୋଃ ହୁଡିଙ୍ଗ୍ ଲେକା ସୁକୁ ନାମ୍ କେୟାଇଙ୍ଗ୍ ଦୋ ଆପେ ଇଙ୍ଗ୍‍କେ ହୁଡିଙ୍ଗ୍ ସାଙ୍ଗିନ୍ ଆୟୁର୍ତେ ଇଦି ସେଟେର୍ ତାଇଙ୍ଗ୍ ପେ। ମେନ୍ଦୋ ନାଆ ଦୋ ଇଙ୍ଗ୍ ପାବିତାର୍ ହୋଡ଼ୋକୋୱାଃ ସେୱା ଲାଗିନ୍ତେ ୟୀରୁଶାଲେମ୍ ତେ ସେନ୍ ତାନିଙ୍ଗ୍। ଚିୟାଃଚି ମାକିଦୁନିୟା ହାର୍ ଆଖାୟା ରାଇଜ୍ ରେନ୍ ହୋଡ଼ୋକୋକେ ନେୟା ବେଶ୍ ଆଟ୍‍କାର୍ କେଃକୋୱା, ଚି ୟୀରୁଶାଲେମ୍ ରେନ୍ ପାବିତାର୍ ହୋଡ଼ୋକୋ ଏତେ ଗାରିବ୍ କୋ ଲାଗିନ୍ ହୁଡିଙ୍ଗ୍ ଚାନ୍ଦା ୟାକୋ। ଇନ୍‍କୁ ରାଶିକା ତେ ନେୟା ରିକା କେଦାକୋ, ୟାହୁଦୀକୋ ଏଟାଃଜାତି କୋୱାଃ ରିଣୀ ହ ତାନ୍‍କୋ, ଚିୟାଃଚି ଆଗାର୍ ଏଟାଃଜାତି କୋ ୟାହୁଦୀକୋୱାଃ ଆତ୍ମାନ୍ କାଜି କୋରେ ହାନାଟିଙ୍ଗ୍ ନାମ୍ କେଦାକୋ, ଦୋ ଏଟାଃଜାତି କୋକେ ହଗି ନେୟା ଠାଉକା ତାନାଃ, ଚି ଟାକା-ପାଇସା କାଜି କୋରେ ହ ୟାହୁଦୀକୋକେ ଦେଙ୍ଗା ରିକାଚାକୋ। ଏନାମେନ୍ତେ ଇଙ୍ଗ୍ ନେ କାମି ପୁରା କେତେ ହାର୍ ଇନ୍‍କୁକେ ନେ ଚାନ୍ଦା ଜିମା କେତେ ଆପେୟାଃ ତାଃ ବୋଲୋ ତୋରା ସ୍ପେନ୍ ଦିଶୁମ୍ ତେଇଙ୍ଗ୍ ସେନା। ଆଡୋଃ ଇଙ୍ଗ୍ ସାରିତାନିଙ୍ଗ୍ ଚି ଚିମ୍ତାଙ୍ଗ୍ ଇଙ୍ଗ୍ ଆପେ ତାଃ ହିଜୁଗାଇଙ୍ଗ୍, ଦୋ ମାସୀହ୍ ରାଃ ପୁରା ଆଶିଷ୍ ଲୋଃ ଇଙ୍ଗ୍ ହିଜୁଗା। ହେ ହାଗାକୋ, ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହାର୍ ପାବିତାର୍ ଆତ୍ମା ରାଃ ଦୁଲାଡ଼୍ କେ ପାହୋମ୍ ରିକା କେତେ ଇଙ୍ଗ୍ ଆପେକେ ଆର୍ଜି ପେ ତାନାଇଙ୍ଗ୍ ଚି, ଇଙ୍ଗ୍ଆଃ ଲାଗିନ୍ ପାର୍ମେଶ୍ଵାର୍ ତାଃ ବିନ୍ତି ଲାଗିନ୍ତେ ଇଙ୍ଗ୍ଆଃ ଲୋଃ ମେଶା କେତେ ତାଇୟୋଃପେ। ଏନାତେ ଇଙ୍ଗ୍ ୟାହୁଦୀୟା ଜିଲ୍ଲା ରେନ୍ ଆବିଶ୍ଵାସୀ କୋଏତେ ବାଚାଓ କାନୋଃ ଚାଇଙ୍ଗ୍, ହାର୍ ଇଙ୍ଗ୍ଆଃ ଏନ୍ ସେୱା ଅକନାଃ ୟୀରୁଶାଲେମ୍ ଲାଗିନ୍ ମେନାଃ, ପାବିତାର୍ ହୋଡ଼ୋକୋକେ ସୁକୁ କୋଚା; ହାର୍ ଇଙ୍ଗ୍ ପାର୍ମେଶ୍ଵାର୍ ସାନାଙ୍ଗ୍ ତେ ଆପେତାଃ ରାଶିକା ଲୋଃ ହିଜୁଃକେତେ ଆପେଲୋଃ ଆରାମ୍ ନାମେୟାଇଙ୍ଗ୍। ଶାନ୍ତି ରାଃ ପାର୍ମେଶ୍ଵାର୍ ଆପେ ସବେନ୍ କୋଲୋଃ ତାଇନ୍ ଚାଏ। ଆମୀନ୍। ଇଙ୍ଗ୍ ଆପେକେ ଫିବେ ଲାଗିନ୍, ଅକନିଃ ଆବୁୱାଃ ମିଶି ଆଡୋଃ କିନ୍‍ଖ୍ରୀୟା ସାହାର୍ ରେନ୍ କାଲିସିୟା ରାଃ ଦାସୀ ତାନିଃ, ଆର୍ଜି ପେତାନିଙ୍ଗ୍ ଚି ଆପେ, ଜେଲେକା ପାବିତାର୍ ହୋଡ଼ୋକୋ ଲାଗାତିଙ୍ଗ୍ ମେନାଃ, ଇନିଃ କେ ପ୍ରାଭୁ ରେ ଗ୍ରାହାନିପେ; ହାଡୋଃ ଜେତାନ୍ କାଜିକୋରେ ଇନିଃକେ ଆପେୟାଃ ଦାର୍‍କାର୍ ମେନାଃ ରେଦୋ ଇନିଃକେ ଦେଙ୍ଗାଇପେ, ଚିୟାଃଚି ଇନିଃ ଥିମ୍ବାଗି ହୋଡ଼ୋକୋକେ ହାର୍ ଇଙ୍ଗ୍ କେ ହଗି ଦେଙ୍ଗା କାଦିଙ୍ଗ୍ଆଏ। ପ୍ରିସ୍କା ହାର୍ ଆକ୍ୱିଲା କିନ୍‍କେ ଜୋହାର୍, ଅକନ୍‍କିନ୍ ମାସୀହ୍ ୟୀଶୁ ରେ ଇଙ୍ଗ୍ଆଃ ଗାତିକାମି ତାନ୍‍କିନ୍। ଇନ୍‍କିନ୍ ଇଙ୍ଗ୍ଆଃ ଜୀଉ ଲାଗିନ୍ ଆପାନାଃ ଜୀଦାନ୍ କେ ପାଶେ ଲେଦାକିନ୍ ହାର୍ ଖାଲି ଇଙ୍ଗ୍ ଭାଇର୍ କାହା, ମେନ୍ଦୋ ଏଟାଃଜାତି କୋୱା ସବେନ୍ କାଲିସିୟା ରେନ୍ କୋ ହଗି ଇନ୍‍କିନ୍ କେ ଧାନ୍ୟାବାଦ୍ ତାନାକୋ। ଏନ୍ କାଲିସିୟା କେହ ଜୋହାର୍ ଅକନ୍ କୋ ଇନ୍‍କୁୱାଃ ଅଡ଼୍ଆଃ ରେ ହୁଣ୍ଡିନ୍ ତାନାକୋ। ଇଙ୍ଗ୍ଆଃ ଦୁଲାଡ଼୍ ଗାତି ଇପେନିତୁସ୍ କେ ଜୋହାର୍, ଅକଏ ମାସୀହ୍ ଲାଗିନ୍ ଆସିୟା ରାଇଜ୍ ରେନ୍ ସିଦା ଯଅ ତାନିଃ। ମାରିୟାମ୍ କେ ଜୋହାର୍, ଅକଏ ଆପେୟାଃ ଲାଗିନ୍ ଥିମ୍ବାଗି କାମି କାଦାଏ। ଆନ୍ଦ୍ରୋନିକୁସ୍ ହାର୍ ୟୁନିୟାସ୍ କିନ୍‍କେ ଜୋହାର୍ ଅକନ୍‍କିନ୍ ଇଙ୍ଗ୍ଆଃ କୁଟୁମ୍ବ ତାନ୍‍କିନ୍ ହାର୍ କୁଲାକାନ୍ ଚେଲା କୋୱା ରେ ନୁତୁମାନ୍ ତାନ୍‍କିନ୍, ହାର୍ ଇଙ୍ଗ୍ଆଃ ତେ ସିଦା ରେ ଆକିନ୍ ମାସୀହ୍ ବାଇଲେନାକିନ୍। ଆମ୍ପାଲିୟାତୁସ୍ କେ ଜୋହାର୍, ଅକଏ ପ୍ରାଭୁ ରେ ଇଙ୍ଗ୍ଆଃ ଦୁଲାଡ଼୍ ଗାତି ତାନିଃ। ଉର୍ବାନୁସ୍ କେ ଜୋହାର୍, ଅକନିଃ ମାସୀହ୍ ରେ ଆବୁୱାଃ ଗାତିକାମି ତାନିଃ, ହାର୍ ଇଙ୍ଗ୍ଆଃ ଦୁଲାଡ଼୍ ଗାତି ଇସ୍ତଖୁସ୍ କେ ଜୋହାର୍। ଆପିଲ୍ଲେସ୍ କେ ଜୋହାର୍, ଅକନିଃ ମାସୀହ୍ ରେ ପୋକ୍ତା ଅଡୋଙ୍ଗ୍ ନାଏ। ହାର୍ ଆରିସ୍ତୁବୁଲୁସ୍ ରେନ୍ ଅଡ଼୍ଆଃ ରେନ୍ କୋକେ ଜୋହାର୍। ଇଙ୍ଗ୍ଆଃ କୁଟୁମ୍ବ ରେନ୍ ହେରୋଦିୟୋନ୍ କେ ଜୋହାର୍। ନାର୍କିସ୍ସୁସ୍ ରାଃ ଅଡ଼୍ଆଃ ରେନ୍ କୋକେ ଅକନ୍ କୋ ପ୍ରାଭୁ ରେ ମେନାକୋୱା ଇନ୍‍କୁକେ ଜୋହାର୍। ତ୍ରୁଫେନା ହାର୍ ତ୍ରୁଫସା ମିଶି କିନ୍‍କେ ଅକନ୍ କିନ୍ ପ୍ରାଭୁ ରେ ଥିମ୍ବାଗି କାମି ୟାକିନ୍, ଇନ୍‍କିନ୍ କେ ଜୋହାର୍। ଦୁଲାଡ଼୍ ମିଶି ପାର୍ସୀସ୍ କେ ଜୋହାର୍, ଅକନିଃ ପ୍ରାଭୁ ରେ ଥିମ୍ବାଗି କାମି କାଦାଏ। ରୁଫୁସ୍ କେ ଅକନିଃ ପ୍ରାଭୁ ରେ ସାଲାକାନ୍ ହୋଡ଼ ତାନିଃ ହାର୍ ଇନିଜାଃ ଏଙ୍ଗା କିନ୍‍କେ, ଅକନିଃ ଇଙ୍ଗ୍ଆଃ ଏଙ୍ଗାକିନ୍ ଲେକା ତାନ୍‍କିନ୍, ବାରାନ୍‍କିନ୍ କେ ଜୋହାର୍। ଆଁଶୁକ୍ରିତୁସ୍ ହାର୍ ଫିଲଗନ୍ ହାର୍ ହିର୍ମେସ୍ ହାର୍ ପାତ୍ରୁବାସ୍ ହାର୍ ହିର୍ମାସ୍ ଆଡୋଃ ଇନ୍‍କୁ ଲୋଃ ତାଇନ୍‍ତାନ୍ ହାଗାକୋକେ ଜୋହାର୍। ଫିଲୁଲୁଗୁସ୍ ହାର୍ ଯୁଲିୟା ହାର୍ ନେର୍ୟୁସ୍ ହାର୍ ଇନିଜାଃ ମିଶି, ହାର୍ ଉଲୁମ୍ପାସ୍ ହାର୍ ଇନ୍‍କୁ ଲୋଃ ତାଇନ୍ ତାନ୍ ସବେନ୍ ପାବିତାର୍ ହୋଡ଼ୋକୋକେ ଜୋହାର୍। ଆପେ-ଆପେ ରେ ପାବିତାର୍ ଚୁମା ତେ ଜୋହାର୍ ରେନ୍ ପେ। ଆପେକେ ମାସୀହ୍ ରାଃ ସବେନ୍ କାଲିସିୟା ପାଡ଼େତେ ଜୋହାର୍। ନାଆ ହେ ହାଗାକୋ ହାର୍ ମିଶିକୋ, ଇଙ୍ଗ୍ ଆପେ ତେ ଆର୍ଜିପେତାନିଙ୍ଗ୍ ଚି, ଅକନ୍ ହୋଡ଼ୋକୋ ଏନ୍ ସାର୍ତି ଶିଖାଅକାନ୍ କେ ବାଗିକେତେ ଏନାରାଃ ଉଲ୍‍ଟା ଅକନାଃ ଆପେପେ ନାମ୍ କାଦା, ବାଗ୍‍ଡ଼ାଅ ହାର୍ ଥୋଦୋଃ ରାଃ ହୋଡ଼ ବାଇଏନ୍ ତାନାକୋ, ଇନ୍‍କୁ ତେ ସାଙ୍ଗିନ୍ ରେ ତାଇନ୍‍ପେ। ଚିୟାଃଚି ନେକାନ୍ ହୋଡ଼ୋକୋ ଆବୁୱାଃ ପ୍ରାଭୁ ମାସୀହ୍ କେ କାକୋ ସେୱା ତାନାକୋ, ମେନ୍ଦୋ ଆପାନାଃ ଲାହେଃ ରାଃ ଦାସୀ ତାନ୍ କୋ; ହାର୍ ବୁଗିନ୍-ବୁଗିନ୍ ବାକାଣ୍ କେତେ ସାଧା-ସିଧା ହୋଡ଼ୋ କୋୱାଃ ମୋନ୍ କେ ବେଦାତାଃକୋ। ଆପେୟାଃ ଆନାଚୁ ମାନାତିଙ୍ଗ୍ କାଜିକୋ ସବେନ୍ ହୋଡ଼ୋକୋତାଃ ସେଟେର୍ କାନା, ଏନାମେନ୍ତେ ଇଙ୍ଗ୍ ଆପେୟାଃ ଲାଗିନ୍ତେ ରାଶିକାଅଃ ତାନିଙ୍ଗ୍, ମେନ୍ଦୋ ଇଙ୍ଗ୍ ନେୟା ସାନାଙ୍ଗ୍ ତାନିଙ୍ଗ୍ ଚି ବୁଗିନାଃ ଲାଗିନ୍ ସେଣାନ୍ ମେନ୍ଦୋ ଏତ୍କାନାଃ ଲାଗିନ୍ କାଦୋଷ୍ କାନ୍ ବାଇୟେନ୍ ପେ। ଜୀଉସୁକୁ ଏମେନିଃ ପାର୍ମେଶ୍ଵାର୍ ଆପେୟାଃ କାଟା କୋତେ ଶାଏତାନ୍ କେ ସେକାଡ଼୍ ଗି ତିକା ସେରେଃୟାଏ। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ଆପେ ଲୋଃ ହୋବାକାତୋଃକା। ଇଙ୍ଗ୍ ଲୋଃ କାମିତାନ୍ ତିମୁଥିୟୁସ୍ ପାଡ଼େତେ ହାର୍ ଇଙ୍ଗ୍ଆଃ ପେଡ଼ା ଠୋଅ ହୋଡ଼ୋକୋ ଲୁକିୟୁସ୍ ଆଡୋଃ ୟୋସାନ୍ ହାର୍ ସୋସିପତ୍ରୁସ୍ ପାଡ଼େତେ ଆପେକେ ଜୋହାର୍। ଇଙ୍ଗ୍ ପାଉଲୁସ୍ ନାଙ୍ଗ୍ ଚିଠି କେ ଅଲେନିଃ ତିର୍ତିୟୁସ୍, ଇଙ୍ଗ୍ଆଃ ପାଡ଼େତେ ପ୍ରାଭୁ ରେ ଆପେକେ ଜୋହାର୍। ହାଗା ଗାୟୁସ୍ ଅକନିଃ ଇଙ୍ଗ୍ଆଃ ଆଡୋଃ କାଲିସିୟା ରେନ୍ କୋକେ ସେୱାନିଃ ତାନିଃ ଇନିଜାଃ ଆପେକେ ଜୋହାର୍। ଇରାସ୍ତୁସ୍ ଅକନିଃ ନେ ନାଗାର୍ ରେନ୍ ଖାଯାଞ୍ଚି ତାନିଃ, ଆଡୋଃ ହାଗା କ୍ଵାର୍ତୁସ୍ ରାଃ ଆପେକେ ଜୋହାର୍। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ଆପେ ରେ ହୋବାକାତୋଃଚା। ନାଆ ଅକନାଃ ଆପେକେ ଇଙ୍ଗ୍ଆଃ ସୁସାମାଚାର୍ ମାନେ ୟୀଶୁ ମାସୀହ୍ ରାଃ ବିଷାୟ୍ ରାଃ ପାର୍ଚାର୍ ରାଃ ଲେକାତେ ପୋକ୍ତାପେ ତାନାଏ, ଏନ୍ ମୁଣ୍ଡି କାଜି ରାଃ ଉଦୁବାକାନ୍ ହୋରାତେ ଅକନାଃ ଯୁଗ୍-ଯୁଗ୍ ଏତେ ଉକୁକାନ୍ ତାଇଲେନା, ମେନ୍ଦୋ ନାଆ ଉଦୁବାକାନ୍ ହାର୍ ଜାନାଓ-ଜାନାଓ ରେୟାଃ ପାର୍ମେଶ୍ଵାର୍ ରାଃ ଆନାଚୁ ତେ ନାବୀକୋୱାଃ କିତାବ୍ ହୋରାତେ ସବେନ୍ ଜାତିକୋକେ ଉଦୁବ୍ ଜାନା, ଚି ଇନ୍‍କୁ ବିଶ୍ଵାସ୍ ରାଃ ହୋରାତେ ଆନାଚୁ ମାନାତିଙ୍ଗ୍ ତାନ୍‍କୋ ହୋବା କେନୋଃଚାକୋ, ଏନ୍ ମିହୋଡ଼୍ ଗି ସେଣାନ୍ ପାର୍ମେଶ୍ଵାର୍ ରାଃ ୟୀଶୁ ମାସୀହ୍ ରାଃ ହୋରାତେ ଯୁଗ୍-ଯୁଗ୍ ମାନାରାଙ୍ଗ୍ ହୋବାକାତୋଃଚା। ଆମୀନ୍। ପାଉଲୁସ୍ ପାଡ଼େତେ ଅକନିଃ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ୟୀଶୁ ମାସୀହ୍ ରାଃ କୁଲାକାନ୍ ଚେଲା ହୋବାଅଃ ଲାଗିନ୍ତେ କେଡ଼ା ଜାନାଏ, ଆଡୋଃ ବିଶ୍ଵାସୀ ହାଗା ସୋସ୍ଥିନେସ୍ ପାଡ଼େତେ, ପାର୍ମେଶ୍ଵାର୍ ରାଃ ଏନ୍ କାଲିସିୟା ରାଃ ନୁତୁମ୍ ଅକନାଃ କୁରିନ୍ଥିଉସ୍ ସାହାର୍ ରେ ମେନାଃ, ମାନେ ଇନ୍‍କୁୱାଃ ନୁତୁମ୍ ରେ ଅକନ୍ କୋ ମାସୀହ୍ ୟୀଶୁ ରେ ପାବିତାର୍ କାନାକୋ, ହାର୍ ପାବିତାର୍ ହୋବାଅଃ ଲାଗିନ୍ତେ କେଡ଼ା କାନାକୋ, ହାର୍ ଏନ୍ ସବେନ୍ କୋୱାଃ ନୁତୁମ୍ ରେହଗି ଅକନ୍ କୋ ସବେନ୍ ଜାଗା ଆବୁୱାଃ ହାର୍ ଆକୋୱାଃ ପ୍ରାଭୁ ୟୀଶୁ ମାସୀହ୍ ରାଃ ନୁତୁମ୍ ତେ ବିନ୍ତି ତାନାକୋ। ଆବୁୱାଃ ଆପୁ ପାର୍ମେଶ୍ଵାର୍ ଆଡୋଃ ପ୍ରାଭୁ ୟୀଶୁ ମାସୀହ୍ ପାଡ଼େତେ ଆପେକେ ଆନୁଗ୍ରାହ୍ ହାର୍ ଜୀଉସୁକୁ ନାମ୍ କାତୋଃକା। ଇଙ୍ଗ୍ ଆପେୟାଃ ବିଷାୟ୍‍ରେ ଇଙ୍ଗ୍ଆଃ ପାର୍ମେଶ୍ଵାର୍ ରାଃ ସବେନ୍ ଇମ୍ତା ଧାନ୍ୟାବାଦ୍ ତାନିଙ୍ଗ୍, ଏନାମେନ୍ତେ ଚି ପାର୍ମେଶ୍ଵାର୍ ରାଃ ନେ ଆନୁଗ୍ରାହ୍ ଆପେ ରେ ମାସୀହ୍ ୟୀଶୁ ରେ ହୋବାକାନା। ଚିୟାଃଚି ଇନିଜାଃ ରେ ତାଇନ୍ କେତେ ଆପେ ସବେନ୍ କାଜି କୋରେ, ମାନେ ସବେନ୍ ବାଚାନ୍ ଆଡୋଃ ସବେନ୍ ସେଣା ରେ କିଶାଣ୍ କାନାପେ। ଏନାତେ ମାସୀହ୍ ରାଃ ଗୋୱା ଆପେ ରେ ପୋକ୍ତା ଅଡୋଙ୍ଗ୍ କାନା। ନେତାଃ ସାନ୍ ଚି ଜେତାନ୍ ବାର୍ଦାନ୍ ଆପେ ରେ ଘାଟି ବାନୋଃ, ହାର୍ ଆପେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହିଜୁଃ ରୁଆଡ଼୍ କେ ନେଲ୍ ହୋରା କାତେତାନାପେ। ପାର୍ମେଶ୍ଵାର୍ ଆପେକେ ଟୁଣ୍ଡୁ ସାନ୍ତେ ହ କେଟେଃ ରିକାୟାଏ ଏନାତେ ଆପେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହିଜୁଃ ହୁଲାଙ୍ଗ୍ ସାନ୍ତେ ନିର୍ଦୋଷ୍ ତାଇନୋଃୱାପେ। ପାର୍ମେଶ୍ଵାର୍ ବିଶ୍ଵାସେ ଲେକାନିଃ ତାନିଃ, ଅକନିଃ ଆପେକେ ଆଜାଃ ହୋନ୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ଲୋଃ ମିଃତେ ତାଇନୋଃ ଲାଗିନ୍ତେ କେଡ଼ାକାଃ ପେୟାଏ। ହେ ହାଗାକୋ, ଇଙ୍ଗ୍ ଆପେକେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ନୁତୁମ୍ ତେ ଆର୍ଜି ପେତାନିଙ୍ଗ୍ ଚି ଆପେ ସବେନ୍ କୋ ମିୟାଃଗି କାଜି କାଜିପେ, ଆଡୋଃ ଆପେ ଆଲୋ ହାଟିଙ୍ଗ୍ଅଃପେ, ମେନ୍ଦୋ ମିୟାଃଗି ମୋନ୍ ହାର୍ ମିୟାଃଗି ପାହୋମ୍ ହୋବାକେତେ ମେଶାକାନ୍ ତାଇନୋଃପେ। ଚିୟାଃଚି ହେ ଇଙ୍ଗ୍ଆଃ ହାଗାକୋ, ଖାଲୋଏ ରାଃ ଅଡ଼୍ଆଃ ରେନ୍ ହୋଡ଼ୋକୋ ଇଙ୍ଗ୍‍କେ ଆପେୟାଃ ବିଷାୟ୍ ରେ ଉଦୁବ୍ କେଦାକୋ ଚି ଆପେୟାଃ ରେ ଝାଗ୍ଡ଼ା ହୋବାଅଃ ତାନା। ଇଙ୍ଗ୍ଆଃ କାଜି ରାଃ ମାନେ ନେୟା ତାନାଃ ଚି ଆପେ କୋଏତେ ଅକଏ ଦୋ ଆପାନ୍ କେ “ପାଉଲୁସ୍ ରାଃ ଚେଲା,” ଅକଏ ଦୋ “ଆପୁଲୋସ୍ ରାଃ ଚେଲା,” ଅକଏ ଦୋ “କୈଫା ରାଃ ଚେଲା,” ଏନ୍ତେ ଅକଏ “ମାସୀହ୍ ରାଃ ଚେଲା” ମେନ୍ତେ କାଜିଅଃ ତାନାଏ। ଚିନାଃ ମାସୀହ୍ ହାଟିଙ୍ଗ୍ ଜାନାଏ? ଚିନାଃ ପାଉଲୁସ୍ ଆପେୟାଃ ଲାଗିନ୍ କ୍ରୁଶ୍ ରେ ରାକାବ୍ ଲେନାଏ? ଚି ଚିନାଃ ଆପେକେ ପାଉଲୁସ୍ ରାଃ ନୁତୁମ୍ ରେ ବାପ୍ତିସ୍ମା ନାମାକାନା? ଇଙ୍ଗ୍ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ତାନିଙ୍ଗ୍ ଚି କ୍ରିସ୍‍ପୁସ୍ ଆଡୋଃ ଗାୟୁସ୍ କେ ବାଗିକେତେ ଇଙ୍ଗ୍ ଆପେ ଜେତାଏ କେହ ବାପ୍ତିସ୍ମା କାଇଙ୍ଗ୍ ଏମ୍। ଏନାମେନ୍ତେ ନେକା ଜେତାଏ କାପେ କାଜି ଧାଡ଼ିୟା ଚି ଆପେକେ ଇଙ୍ଗ୍ଆଃ ନୁତୁମ୍ ରେ ବାପ୍ତିସ୍ମା ନାମାକାନା। ଆଡୋଃ ହାଁ, ଇଙ୍ଗ୍ ସ୍ଥିଫାନାଶ୍ ରାଃ ଅଡ଼୍ଆଃ ରେନ୍ କୋକେ ହଗି ବାପ୍ତିସ୍ମା ଏମାକାଃ କୋୱାଇଙ୍ଗ୍; ନିକୁକେ ବାଗେ କେତେ ଇଙ୍ଗ୍ କାଇଙ୍ଗ୍ ସାରିତାନା ଚି ଇଙ୍ଗ୍ ଆଡୋଃ ଅକଏ କୋକେ ବାପ୍ତିସ୍ମା ଏମାକାଦିଙ୍ଗ୍। ଚିୟାଃଚି ମାସୀହ୍ ଇଙ୍ଗ୍‍କେ ବାପ୍ତିସ୍ମା ଏମେଲାଗିନ୍ କାହା, ମେନ୍ଦୋ ସୁସାମାଚାର୍ ଉଦୁବ୍ ଲାଗିନ୍ କୁଲ୍ କାଦିଙ୍ଗାଏ, ହାର୍ ଏନା ହଗି ହୋଡ଼ ରାଃ କାଜି ସେଣା ଲେକାତେ ଦୋ କାହା, ନେକା ଆଲୋକା ହୋବାଅଃକା ଚି ମାସୀହ୍ ରାଃ କ୍ରୁଶ୍ ସାମାଗୀ ମାନାତିଙ୍ଗ୍ଅଃୱା। ଚିୟାଃଚି କ୍ରୁଶ୍ ରାଃ ବାକାଣ୍ ନାଷ୍ଟ୍‍ଅଃ ତାନ୍‍କୋ ଲାଗିନ୍ ଡୋଣ୍ଡୋ ତାନାଃ, ମେନ୍ଦୋ ଆବୁ ବାଞ୍ଚାଅ ନାମେ କୋ ଲାଗିନ୍ ପାର୍ମେଶ୍ଵାର୍ ରାଃ ପେଡ଼େଏ ତାନାଃ। ଚିୟାଃଚି ପାବିରାର୍ ପୁଥି ରେ ଅଲାକାନା, “ଇଙ୍ଗ୍ ସେଣାନ୍ କୋୱା ସେଣା କେ ନାଷ୍ଟ୍ ୟାଇଙ୍ଗ୍, ଆଡୋଃ ଚାତୁର୍ କୋୱାଃ ବୁଦ୍ଧି କେ ହିଲାଙ୍ଗ୍ ୟାଇଙ୍ଗ୍।” ସେଣାନ୍ ନିଃ କୋତାଃ ରିୟା? ଆଇନ୍ ଗୁରୁ କୋତାଃ ରିୟା? ନେପାରିୟା ରେନ୍ କାପାଜିନିଃ କୋତାଃ ରିୟା? ଚିନାଃ ପାର୍ମେଶ୍ଵାର୍ ନେ ଅତେଦିଶୁମ୍ ରାଃ ସେଣା କେ ଡୋଣ୍ଡୋ କାଏ ବାଇକାଦାଏ? ଚିୟାଃଚି ଚିମ୍ତା ପାର୍ମେଶ୍ଵାର୍ ରାଃ ସେଣା ଲେକାତେ ଅତେଦିଶୁମ୍ ରେନ୍‍କୋ ଆକୋୱାଃ ସେଣା ତେ ପାର୍ମେଶ୍ଵାର୍ କେ କାକୋ ସାରିକିଜା, ଏଣ୍ଡେ ପାର୍ମେଶ୍ଵାର୍ କେ ନେୟା ବେଶ୍ ଆଦା କିଜା ଚି ନେ ପାର୍ଚାର୍ ରାଃ ଡୋଣ୍ଡୋ ହୋରାତେ ବିଶ୍ଵାସ୍‍ତାନ୍ କୋକେ ବାଞ୍ଚାଅ କୋୱାଏ। ୟାହୁଦୀକୋ ଦୋ ଚିହ୍ନା ସାନାଙ୍ଗ୍ ତାନାକୋ, ହାର୍ ୟୁନାନୀ ହୋଡ଼ୋକୋ ସେଣା ରାଃ ଦାଣା ରେ ମେନାକୋୱା, ମେନ୍ଦୋ ଆଲେ ଦୋ ଏନ୍ କ୍ରୁଶ୍ ରେ ରାକାବ୍ କାନ୍ ମାସୀହ୍ ରାଃ ପାର୍ଚାର୍ ତାନାଲେ, ଅକନିଃ ୟାହୁଦୀକୋ ଲାଗିନ୍ ଥୋଦୋଃ ରାଃ କାରାନ୍ ଆଡୋଃ ଏଟାଃଜାତିକୋ ଲାଗିନ୍ ଡୋଣ୍ଡୋ ତାନାଃ। ମେନ୍ଦୋ ଅକନ୍‍କୋ କେଡ଼ା କାନାକୋ, ଚିକାନ୍ ୟାହୁଦୀ ହୋଡ଼ୋକୋ, ଚିକାନ୍ ୟୁନାନୀ ହୋଡ଼ୋକୋ, ଇନ୍‍କୁ ନାଡ଼େଏ ରେ ମାସୀହ୍ ପାର୍ମେଶ୍ଵାର୍ ରାଃ ପେଡ଼େଏ ଆଡୋଃ ପାର୍ମେଶ୍ଵାର୍ ରାଃ ସେଣା ତାନିଃ। ଚିୟାଃଚି ପାର୍ମେଶ୍ଵାର୍ ରାଃ ଡୋଣ୍ଡୋ, ହୋଡ଼ୋକୋୱାଃ ସେଣା ଏତେ ଥିମ୍ବା ସେଣା ତାନାଃ, ଆଡୋଃ ପାର୍ମେଶ୍ଵାର୍ ରାଃ ନାରାଦୁରା, ହୋଡ଼ୋକୋୱାଃ ପେଡ଼େଏ ଏତେ ଥିମ୍ବା ପେଡ଼େଜାନ୍ ତାନାଃ। ହେ ହାଗାକୋ, ଆପେୟାଃ କେଡ଼ାକାନ୍ କେ ଦୋ ପାହୋମେପେ, ଆପେ ହୋଡ଼ମୋ ଲେକାତେ ପୁରାଃ ସେଣାନ୍ କାପେ ତାଇନା, ହାର୍ ପୁରାଃ ପେଡ଼େଜାନ୍ କାପେ ତାଇକେନା, ହାର୍ ମାରାଙ୍ଗ୍ ନୁତୁମାନ୍ କାପେ ତାଇକେନା। ମେନ୍ଦୋ ପାର୍ମେଶ୍ଵାର୍ ଅତେଦିଶୁମ୍ ରେନ୍ ଡୋଣ୍ଡୋ କୋକେ ସାଲାକେଃକୋୱାଏ, ଏନାତେ ସେଣାନ୍ କୋକେ ଗିୟୁଃ କୋୱାଏ, ଆଡୋଃ ପାର୍ମେଶ୍ଵାର୍ ଅତେଦିଶୁମ୍ ରେନ୍ ନାରାଦୁରା କୋକେ ସାଲାକେଃକୋୱାଏ ଏନାତେ ପେଡ଼େଜାନ୍ କୋକେ ଗିୟୁଃ କୋୱାଏ। ହାର୍ ପାର୍ମେଶ୍ଵାର୍ ନେ ଅତେଦିଶୁମ୍ ରେନ୍ ହୁପୁଡିଙ୍ଗ୍ କୋକେ ହାର୍ ବାଗେ କାନ୍ କୋକେ, ମେନ୍ଦୋ ଅକନ୍ କୋ ଜାହାନାଃ ହ ନାହାଲାକୋ ଇନ୍‍କୁ କେହ ସାଲା କେଃକୋୱାଏ ଚି ଇନ୍‍କୁକେ ଅକନ୍ କୋ ଜାହାନାଃ ତାନ୍‍କୋ, ଇନ୍‍କୁକେ ସାମା ତାକୋୱାଏ। ଏନାତେ ଜେତାନ୍ ମାନ୍‍ୱା ପାର୍ମେଶ୍ଵାର୍ ରାଃ ନାଡ଼େଏ ରେ କାଏ ଘାମାଣ୍ଡ୍ ଧାଡ଼ିୟାଏ। ମେନ୍ଦୋ ଇନିଜାଃ ପାଡ଼େତେଗି ଆପେ ମାସୀହ୍ ୟୀଶୁ ରେ ମେନାପେୟା, ଅକନିଃ ପାର୍ମେଶ୍ଵାର୍ ପାଡ଼େତେ ଆବୁୱାଃ ଲାଗିନ୍ ସେଣା ହୋବାଜାନାଏ, ମାନେ ଧାରାମ୍, ହାର୍ ପାବିତାର୍, ଆଡୋଃ ଛୋଡ଼ାଓ; ଏନାତେ ଜେଲେକା ପାବିତାର୍ ପୁଥି ରେ ଅଲାକାନା, ଏନ୍‍ଲେକାଗି ହୋବାଅଃକା, “ଜେତାଏ ଘାମାଣ୍ଡ୍ ୟାଏ ରେଦୋ ଇନିଃ ପ୍ରାଭୁ ଆଜାଃ ନାଙ୍ଗ୍ କାମି କାଦାଏ ମେନ୍ତେ ଘାମାଣ୍ଡେକାଏ।” ହେ ହାଗାକୋ, ଚିମ୍ତାଙ୍ଗ୍ ଇଙ୍ଗ୍ ପାର୍ମେଶ୍ଵାର୍ ରାଃ ଉକୁକାନ୍ କାଜିକେ ଉଦୁବ୍ ତାନ୍ ଲୋଃ ଆପେୟାଃ ନାଡ଼େଏ ହିଜୁଃ ନାଇଙ୍ଗ୍, ଇମ୍ତା କାଜି ସାରିଧାଡ଼ି ଚାହେ ସେଣା ରାଃ ବୁଗିନାଃ ଲେକାତେ କାଇଙ୍ଗ୍ ହିଜୁଃ। ଚିୟାଃଚି ଇଙ୍ଗ୍ ନେୟା ପାହୋମ୍ ଛାବା ଲେଦାଇଙ୍ଗ୍ ଚି ଆପେୟାଃ ଥାଲାରେ ୟୀଶୁ ମାସୀହ୍, ମାନେ କ୍ରୁଶ୍ ରେ ଗୋଜାକାନ୍ ୟୀଶୁ ମାସୀହ୍ କେ ବାଗିକେତେ ଆଡୋଃ ଜେତାନ୍ ବିଷାୟ୍ କେ କାଇଙ୍ଗ୍ କାଜିୟା। ଇଙ୍ଗ୍ ନାରାଦୁରା ହାର୍ ବୋରୋତାନ୍ ଲୋଃ, ହାର୍ ଥିମ୍ବାଗି ଥାର୍ଥାରାଅଃ ତାନ୍ ଲୋଃ ଆପେୟାଃ ଥାଲା ରେ ତାଇନ୍ ଜାନିଙ୍ଗ୍। ଇଙ୍ଗ୍ଆଃ ଶିଖାଅ, ହାର୍ ଇଙ୍ଗ୍ଆଃ ପାର୍ଚାର୍ ରେ ହୋଡ଼ୋକୋୱାଃ ସେଣା ତେ ମାନାତିଙ୍ଗ୍ ଲେକାନ୍ କାଜି କାତାଇନ୍, ମେନ୍ଦୋ ଆତ୍ମା ହାର୍ ପେଡ଼େଏ ରାଃ କାଜି ଉଦୁବ୍ ୟାନା। ଏନାମେନ୍ତେ ଚି ଆପେୟାଃ ବିଶ୍ଵାସ୍ ହୋଡ଼ୋକୋୱାଃ ସେଣା ରେ କାହା, ମେନ୍ଦୋ ପାର୍ମେଶ୍ଵାର୍ ରାଃ ପେଡ଼େଏ ରେ ଆଶ୍ରା ତାଇନ୍‍କା। ଏଣ୍ଡେହ ପୋକ୍ତାକାନ୍ ହୋଡ଼ୋକୋକେ ଆଲେ ସେଣା ଉଦୁବ୍ କୋତାନାଲେ, ମେନ୍ଦୋ ନେ ଅତେଦିଶୁମ୍ ରେନ୍ ହୋଡ଼ୋକୋୱାଃ ସେଣା ହାର୍ ନେ ଅତେଦିଶୁମ୍ ରେନ୍ ନାଶ୍ ହୋବାଅଃ ତେୟାଃ ହାକିମ୍ କୋୱାଃ ସେଣା କାହା; ମେନ୍ଦୋ ଆଲେ ପାର୍ମେଶ୍ଵାର୍ ରାଃ ଏନ୍ ଉକୁକାନ୍ ସେଣା, ମୁଣ୍ଡି ରାଃ ଲେକାତେ ଉଦୁବ୍ ତାନାଲେ, ଅକନାଃକେ ପାର୍ମେଶ୍ଵାର୍ ମୁନୁଏତେ ଆବୁୱାଃ ମାନାରାଙ୍ଗ୍ ଲାଗିନ୍ତେ ବାଇକାଦାଏ। ଅକନାଃକେ ନେ ଅତେଦିଶୁମ୍ ରେନ୍ ହାକିମ୍ କୋଏତେ ଜେତାଏ ହ କାକୋ ସାରିକେଦା, ଚିୟାଃଚି ଆଗାର୍ ଇନ୍‍କୁ ଏନା ସାରିତେୟାଃକୋ ଏଣ୍ଡେ ଯୁନୁଲାନ୍ ପ୍ରାଭୁ କେ କ୍ରୁଶ୍ ରେ କାକୋ ରାକାବିତେ। ମେନ୍ଦୋ ଜେଲେକା ପାବିତାର୍ ପୁଥି ରେ ଅଲାକାନା, “ଅକନ୍ କାଜିକୋ ମେଏଃ କାଏ ନେଲା କାଦା, ହାର୍ ଲୁତୁର୍ କାଏ ଆୟୁମ୍ କାଦା, ଆଡୋଃ ଅକନ୍ କାଜିକୋ ହୋଡ଼ ରାଃ ମୋନ୍ ରେ କାବୋଲୋ କାନା, ଏନାକୋଗି ତାନାଃ ଅକନାଃ ପାର୍ମେଶ୍ଵାର୍ ଆଏଃ ଲୋଃ ଦୁଲାଡ଼୍ ମାଣ୍ଡାଅତାନ୍ ହୋଡ଼ୋକୋ ନାଙ୍ଗ୍ ବାଇ କାଦାଏ।” ମେନ୍ଦୋ ପାର୍ମେଶ୍ଵାର୍ ଏନାକୋକେ ଆଜାଃ ଆତ୍ମା ରାଃ ହୋରାତେ ଆବୁକେ ଉଦୁବ୍ କାଦାଏ, ଚିୟାଃଚି ଆତ୍ମା ସବେନ୍ କାଜିକୋକେ, ନେତାଃସାନ୍ ଚି ପାର୍ମେଶ୍ଵାର୍ ରାଃ ଈକିର୍ କାଜିକୋକେ ହ ଦାଣାବାଡ଼ା ୟାଏ। ହୋଡ଼ୋକୋ ଏତେ ଜାହାନ୍ ହୋଡ଼ ଚିନାଃ ପାହୋମ୍ ତାନାଏ ଏନା ରାଃ ବିଷାୟ୍ ରେ ଅକଏ ସାରିଧାଡ଼ିୟାଏ, ଏସ୍କାର୍ ଆଜାଃ ଭିତାର୍ ରେନ୍ ଆତ୍ମା ଗିଦାଙ୍ଗ୍ ଅକନିଃ ଆଜାଃ ରେ ମେନିଜା? ଏନ୍ ଲେକାଗି ପାର୍ମେଶ୍ଵାର୍ ଚିନାଃ ପାହୋମ୍ ତାନାଏ ଏନା ରାଃ ବିଷାୟ୍ ଜେତାଏ କାଏ ସାରିଧାଡ଼ିୟାଏ, ପାର୍ମେଶ୍ଵାର୍ ରାଃ ଆତ୍ମା କେ ବାଗିକେତେ। ଆବୁ ନେ ଅତେଦିଶୁମ୍ ରାଃ ଆତ୍ମା କେ କାହା, ମେନ୍ଦୋ ଏନ୍ ଆତ୍ମା କେ ନାମ୍ କାଇଜାବୁ ଅକନିଃ ପାର୍ମେଶ୍ଵାର୍ ପାଡ଼େତେ ତାନିଃ ଏନାତେ ଆବୁ ଏନ୍ କାଜିକୋକେ ସାରିଧାଡ଼ିୟାବୁ ଅକନାଃ ପାର୍ମେଶ୍ଵାର୍ ଆବୁକେ ସାମାତେ ଏମ୍ କାଦାଏ। ଏନାମେନ୍ତେ ଆଲେ ହୋଡ଼ୋକୋୱାଃ ସେଣା ତେ ଶିଖାଅକାନ୍ କାଜିକୋ ଲେକାତେ କାହା, ମେନ୍ଦୋ ପାବିତାର୍ ଆତ୍ମା ତେ ଶିଖାଅକାନ୍ କାଜିକୋ ଲେକାତେ, ଆତ୍ମାନ୍ ସାର୍ତି କାଜିକୋ ଆତ୍ମାନ୍ କାଜି କୋଲୋଃ କାଜିୟାଲେ। ମେନ୍ଦୋ ହୋଡ଼ମୋ ଲେକାନ୍ ତାଇନ୍ ହୋଡ଼ ପାର୍ମେଶ୍ଵାର୍ ଆଃ ଆତ୍ମା ରାଃ କାଜିକୋକେ କାଏ ଗ୍ରାହାନ୍ ୟାଏ, ଚିୟାଃଚି ଏନାକୋ ଆଜାଃ ନେନେଲ୍ ରେ ଡୋଣ୍ଡୋ କାଜିକୋ ତାନାଃ, ହାର୍ ନାଦୋ ଇନିଃ ଏନାକୋକେ ସାରିଧାଡ଼ିୟାଏ ଚିୟାଃଚି ଏନାକୋ ଆତ୍ମାନ୍ ଲେକା ରେଗି ଆଟ୍‍କାର୍ ଉରୁମ୍ ଧାଡ଼ିୟୋଃୱା। ଆତ୍ମାନ୍ ହୋଡ଼ ସବେନାଃ ଆଟ୍‍କାର୍ ଉରୁମ୍ ୟାଏ, ମେନ୍ଦୋ ଇନିଃ ଏଟାଃ ଜେତାଏ ତେ କାଏ ଆଟ୍‍କାର୍ ଉରୁମ୍ ଧାଡ଼ିୟୋଃୱାଏ। “ଚିୟାଃଚି ପ୍ରାଭୁ ଆଃ ମୋନ୍ କେ ଅକଏ ସାରିକାଇଜାଏ, ଏନାତେ ଇନିଃକେ ଶିଖାଅଇୟାଏ?” ମେନ୍ଦୋ ଆଲେ ସାରିତାନାଲେ ଚି ଆବୁ ରେ ମାସୀହ୍ ରାଃ ମୋନ୍ ମେନାଃ। ହେ ହାଗାକୋ, ଇଙ୍ଗ୍ ଆପେ ଲୋଃ ଆତ୍ମାନ୍ ହୋଡ଼ୋକୋ ଲେକା କାଇଙ୍ଗ୍ ବାକାଣ୍ ଧାଡ଼ି କେଦା, ମେନ୍ଦୋ ହୋଡ଼ମୋ ସାନାଙ୍ଗ୍ ଲେକା ତାଇନ୍ ତାନ୍ ହୋଡ଼ୋକୋକେ କାଜିତାନ୍ ଲେକା, ହାର୍ ମାସୀହ୍ ରେ ବାଲେଃ ହୋନ୍ କୋକେ କାଜିତାନ୍ ଲେକା। ଇଙ୍ଗ୍ ଆପେକେ ତୱା ଆନୁକେଃ ପେୟାଇଙ୍ଗ୍, ଜୋଜୋମାଃ କାଇଙ୍ଗ୍ ଖିୟାଅ କେଦା; ଚିୟାଃଚି ଆପେ ଏନାକେ ଜୋମ୍ କାପେ ଧାଡ଼ି ତେୟାଃ; ମେନ୍ଦୋ ନାଆ ହଗି ଜୋମ୍ କାପେ ଧାଡ଼ିୟା, ଚିୟାଃଚି ନାଆ ସାନ୍ ହୋଡ଼ମୋ ସାନାଙ୍ଗ୍ ଲେକା ତାଇନ୍ ତାନାପେ। ଏନାମେନ୍ତେ ଚିମ୍ତାଙ୍ଗ୍ ଆପେୟାଃ ରେ ହିସିଙ୍ଗା ହାର୍ ଏପେଗେର୍ ମେନାଃ, ଦୋ ଚିନାଃ ଆପେ ହୋଡ଼ମୋ ସାନାଙ୍ଗ୍ ଲେକା ତାଇନ୍ ହୋଡ଼ ନାହାଲାପେ? ହାର୍ ଚିନାଃ ସାଧାରାନ୍ ହୋଡ଼ୋକୋ ଲେକା କାପେ ଜୀହିଦୋଃ ତାନା? ଚିୟାଃଚି ଚିମ୍ତାଙ୍ଗ୍ ମିହୋଡ଼୍ କାଜିତାନାଏ, “ଇଙ୍ଗ୍ ପାଉଲୁସ୍ ରାଃ ଚେଲା ତାନିଙ୍ଗ୍,” ଆଡୋଃ ଏଟାଃ ନିଈ, “ଇଙ୍ଗ୍ ଆପୁଲୋସ୍ ରାଃ ଚେଲା ତାନିଙ୍ଗ୍,” ଏଣ୍ଡେ ଚିନାଃ ଆପେ ସାଧାରାନ୍ ହୋଡ଼ ନାହାଲାପେ? ଆପୁଲୋସ୍ ଚିନିଃ ତାନିଃ? ହାର୍ ପାଉଲୁସ୍ ଚିନିଃ ତାନିଃ? ଆଲିଙ୍ଗ୍ ଦାସୀକିନ୍ ଭାଇର୍, ଅକନ୍ କିନାଃ ହୋରାତେ ଆପେ ବିଶ୍ଵାସ୍ କେଦାପେ, ଜେଲେକା ମିପୀହୋଡ଼୍ କେ ପ୍ରାଭୁ କାମି ଏମ୍‍କେଦାଏ। ଇଙ୍ଗ୍ ରୋଏ କେଦାଇଙ୍ଗ୍, ଆପୁଲୋସ୍ ଦାଆ ପାଟାଅକେଦାଏ, ମେନ୍ଦୋ ପାର୍ମେଶ୍ଵାର୍ ହାରା କେଦାଏ। ଏନାମେନ୍ତେ ନାଦୋ ରୋଏନିଃ ଜାହାନାଃ ତାନିଃ ଆଡୋଃ ନାଦୋ ପାଟାଅନିଃ, ମେନ୍ଦୋ ପାର୍ମେଶ୍ଵାର୍ ଗି ସବେନାଃ ତାନିଃ ଅକନିଃ ହାରା ନିଈ ତାନିଃ। ରୋଏନିଃ ହାର୍ ପାଟାଅନିଃ ବାରାନ୍ କିନ୍ ମିଃଲେକାଗି ତାନ୍‍କିନ୍; ମେନ୍ଦୋ ସବେନ୍ ମିପୀହୋଡ଼୍ ଆୟାଃ କାମି ଲେକାତେଗି ଆପାନାଃଗି ନାଲା ନାମେୟାଏ। ଚିୟାଃଚି ଆବୁ ପାର୍ମେଶ୍ଵାର୍ ରାଃ ଗାତିକାମିନିଃ କୋତାନ୍‍ବୁ; ଆପେ ପାର୍ମେଶ୍ଵାର୍ ରାଃ ଚାଷ୍ ଅତେ ଆଡୋଃ ପାର୍ମେଶ୍ଵାର୍ ରାଃ ବାଇୟାକାନ୍ ଅଡ଼୍ଆଃ ତାନ୍‍ପେ। ପାର୍ମେଶ୍ଵାର୍ ରାଃ ଏନ୍ ଆନୁଗ୍ରାହ୍ ଲେକାତେ ଅକନାଃ ଇଙ୍ଗ୍‍କେ ଏମାକାନା, ଇଙ୍ଗ୍ ସେଣାନ୍ ରାଜ୍‍ମିସ୍ତ୍ରି ଲେକା ନାହୀଗାଡା ମାଣ୍ଡାଅ କେଦାଇଙ୍ଗ୍, ହାର୍ ଏଟାଃନିଃ ଏନାରେ ଥାକି ମାଣ୍ଡାଅତାନାଏ। ମେନ୍ଦୋ ସବେନ୍ ମିପୀହୋଡ଼୍ ହୋସିଆର୍ ତାଇନ୍ କାଏ ଚି ଇନିଃ ଏଣ୍ଡେରେ ଚିଲ୍‍କା ଥାକି ମାଣ୍ଡାଅତାନାଏ। ଚିୟାଃଚି ଏନ୍ ସୀଦାଏତେ ମାଣ୍ଡାଅ କାନ୍ ନାହି କେ ବାଗିକେତେ ଜେତାଏ ଆଡୋଃଏଟାଃ ନାହି ମାଣ୍ଡାଅ କାଏ ଧାଡ଼ିୟାଏ, ଅକନାଃ ଚି ୟୀଶୁ ମାସୀହ୍ ତାନିଃ। ଆଗାର୍ ଜେତାଏ ନେ ନାହି ରେ ସୋନା ୟାଦୋ ରୂପା ୟାଦୋ ଗୋନୋଙ୍ଗାନ୍ ଦିରି ୟାଦୋ ସାହାନ୍ ୟାଦୋ ତାସାଃ ୟାଦୋ ବୁଶୁଃ ରାଃ ଥାକି ମାଣ୍ଡାଅ ୟାଏ, ଏଣ୍ଡେ ସବେନ୍ ମିପୀହୋଡ଼୍ କୋୱାଃ କାମି ନେଲ୍ କେନୋଗା; ଚିୟାଃଚି ଏନ୍ ହୁଲାଙ୍ଗ୍ ଆଏଃକେ ଉଦୁବିୟାଏ, ଏନାମେନ୍ତେ ଚି ସେଙ୍ଗେଲ୍ ଲୋଃ ନେଲୋଗା ଆଡୋଃ ଏନ୍ ସେଙ୍ଗେଲ୍ ସବେନ୍ ମିପୀହୋଡ଼୍ ରାଃ କାମି କେ ନେଲ୍ ପାର୍ଖାଅୟାଏ ଚି ଚିଲ୍‍କା ମେନାଃ। ଅକେୟାଃ କାମି ଏନାରେ ବାଇକାନ୍ ତାଇନା, ଇନିଃ ନାଲା ନାମେୟାଏ। ଆଗାର୍ ଜେତାୟାଃ କାମି ଜୁଲ୍ କେନୋଗା, ଏଣ୍ଡେ ଇନିଃ ହାନି ସାହାତିଙ୍ଗ୍ ୟାଏ; ଇନିଃ ଆଏଃ ବାଞ୍ଚାଅ କେନୋଗାଏ, ମେନ୍ଦୋ ମିହୋଡ଼୍ ସେଙ୍ଗେଲ୍ ତେ ବାଚାଅଜାନାଏ ଲେକା ବାଞ୍ଚାଅଃୱାଏ। ଚିନାଃ ଆପେ କାପେ ସାରିତାନା ଚି ଆପେ ପାର୍ମେଶ୍ଵାର୍ ରାଃ ମାନ୍ଦିର୍ ତାନ୍‍ପେ, ହାର୍ ପାର୍ମେଶ୍ଵାର୍ ରାଃ ଆତ୍ମା ଆପେ ରେ ତାଇନୋଃ ତାନାଏ? ଆଗାର୍ ଜେତାଏ ପାର୍ମେଶ୍ଵାର୍ ରାଃ ମାନ୍ଦିର୍ କେ ନାଷ୍ଟ୍‍ୟାଏ ଏଣ୍ଡେ ପାର୍ମେଶ୍ଵାର୍ ଇନିଃକେ ନାଷ୍ଟିୟାଏ; ଚିୟାଃଚି ପାର୍ମେଶ୍ଵାର୍ ରାଃ ମାନ୍ଦିର୍ ପାବିତାର୍ ତାନାଃ, ଆଡୋଃ ଆପେ ଏନ୍ ମାନ୍ଦିର୍ ତାନ୍‍ପେ। ଜେତାଏ ଆଏଃ ଆପାନ୍ କେ ଆଲୋ ଲୋଗୋକାଏ। ଆଗାର୍ ଆପେ କୋଏତେ ଜେତାଏ ନେ ଅତେଦିଶୁମ୍ ରେ ଆଏଃ ଆପାନ୍ କେ ସେଣାନ୍ ଆଟ୍‍କାର୍ ତାନାଏ, ଏଣ୍ଡେ ଡୋଣ୍ଡୋ ବାଇୟୋଃକାଏ ଏନାତେ ସେଣାନ୍ ବାଇକେନୋଗାଏ। ଚିୟାଃଚି ନେ ଅତେଦିଶୁମ୍ ରାଃ ସେଣା ପାର୍ମେଶ୍ଵାର୍ ରାଃ ନାଡ଼େଏ ଡୋଣ୍ଡୋ ତାନାଃ, ଜେଲେକା ପାବିତାର୍ ପୁଥି ରେ ଅଲାକାନା, “ଇନିଃ ସେଣାନ୍ କୋକେ ଆକୋୱାଃଗି ଚାଲାକି ରେ ପାଶେ କୋୱାଏ,” ଏନ୍ତେ ଆଡୋଃଗି, “ପ୍ରାଭୁ ସେଣାନ୍ କୋୱାଃ ପାହୋମ୍ କୋକେ ସାରିୟାଏ ଚି ଏନାକୋ ସାମାଗୀ ତାନାଃ।” ଏନାମେନ୍ତେ ହୋଡ଼ୋକୋ ଲାଗିନ୍ତେ ଜେତାଏ ଆଲୋ ଘାମାଣ୍ଡ୍ କାଏ, ଚିୟାଃଚି ସବେନାଃ ଆପେୟାଃ ଗି ତାନାଃ: ଚାହେ ପାଉଲୁସ୍, ଚାହେ ଆପୁଲୋସ୍, ଚାହେ କୈଫା, ଚାହେ ଅତେଦିଶୁମ୍, ଚାହେ ଜୀଦାନ୍, ଚାହେ ଗୋନୋଏଃ, ଚାହେ ନାଆ, ଚାହେ ହିଜୁଃତେୟାଃ, ସବେନାଃ ଆପେୟାଃ ତାନାଃ, ହାର୍ ଆପେ ମାସୀହ୍ ରାଃ ତାନ୍‍ପେ, ଆଡୋଃ ମାସୀହ୍ ପାର୍ମେଶ୍ଵାର୍ ରାଃ ତାନିଃ। ହୋଡ଼ୋକୋ ଆବୁକେ ମାସୀହ୍ ନାଙ୍ଗ୍ ଦାସୀ ହାର୍ ପାର୍ମେଶ୍ଵାର୍ ରାଃ ଉକୁକାନ୍ କାଜିକୋରାଃ ଭାଣ୍ଡାରୀ ମେନ୍ତେ ଆଟ୍‍କାରେ କାକୋ। ଏନ୍ତେ ନେତାଃ, ମିହୋଡ଼୍ ଭାଣ୍ଡାରୀ ରେ ନେ ବାକାଣ୍ ନେଲେୟାକୋ ଚି ଇନିଃ ବିଶ୍ଵାସେ ଲେକାନିଃ ତାଇନ୍ ଚାହି। ମେନ୍ଦୋ ଇଙ୍ଗ୍ଆଃ ନେନେଲ୍ ରେ ନେୟା ଥିମ୍ବାଗି ହୁଡିଙ୍ଗ୍ ବାକାଣ୍ ତାନାଃ ଚି ଆପେ ଚାହେ ହୋଡ଼ୋକୋୱାଃ ଜେତାଏ ବିଚାର୍ନିଃ ଇଙ୍ଗ୍‍କେ ପାର୍ଖାଅ ୟାଏ, ମେନ୍ଦୋ ଇଙ୍ଗ୍-ଇଙ୍ଗ୍‍କେ ଆପାନ୍ କେଗି କାଇଙ୍ଗ୍ ପାର୍ଖାଅୟା। ଚିୟାଃଚି ଇଙ୍ଗ୍ଆଃ ମୋନ୍ ଇଙ୍ଗ୍‍କେ ଜେତାନ୍ ବାକାଣ୍ ରେ ଦୋଷୀ କାଏ ରିକା ତାନାଏ, ମେନ୍ଦୋ ନେୟାତେ ଇଙ୍ଗ୍ ନିର୍ଦୋଷ୍ କାଇଙ୍ଗ୍ ବାଇୟୋଃ ତାନା, ଚିୟାଃଚି ଇଙ୍ଗ୍ଆଃ ବିଚାର୍ନିଃ ପ୍ରାଭୁ ତାନିଃ। ଏନାମେନ୍ତେ ଚିମିନ୍ ସାନ୍ତେ ପ୍ରାଭୁ କାଏ ହିଜୁଃୱା, ସାମାୟ୍ ତେ ସିଦାରେ ଜେତାନ୍ ବାକାଣ୍ ରାଃ ବିଚାର୍ ଆଲୋପେ ରିକାୟା; ଇନିଃଗି ନୁବାଃ ରାଃ ଉକୁକାନ୍ ବାକାଣ୍ କୋକେ ମାସ୍କାଲ୍ ରେ ଦେଖାଅୟାଏ, ହାର୍ ମୋନ୍ ରେୟାଃ ସାନାଙ୍ଗ୍ କୋକେ ଉଦୁବ୍ ତାଆଏ, ଇମ୍ତା ପାର୍ମେଶ୍ଵାର୍ ପାଡ଼େତେ ସବେନ୍ ମିପୀହୋଡ଼୍ କୋୱାଃ ସାହାରାଅ ହୋବାଅଃୱା। ହେ ହାଗାକୋ, ଇଙ୍ଗ୍ ଦୋ ନେନ୍ ବାକାଣ୍ କୋରେ ଇଙ୍ଗ୍ ଆପେ ଲାଗିନ୍ ଇଙ୍ଗ୍ଆଃ ହାର୍ ଆପୁଲୋସ୍ ଆଃ ବିଷାୟ୍ ଜୋନୋକା ଲେକା କାଜିକେଦାଇଙ୍ଗ୍, ଏନାମେନ୍ତେ ଚି ଆପେ ଆଲେୟାଃ ହୋରାତେ ନେୟା ଶିଖାଅନ୍ ପେ ଚି ପାବିତାର୍ ପୁଥି ରେ ଅଲାକାନ୍ତେ ଆୟୁର୍ ଆଲୋପେ ସେନା, ହାର୍ ମିହୋଡ଼୍ ପାଡ଼୍ ହୋବାକେତେ ଏଟାଃନିଜାଃ ବିରୋଧ୍ ରେ ଘାମାଣ୍ଡ୍ ଆଲୋପେ ରିକାୟା। ଚିୟାଃଚି ଆପେକେ ଏଟାଃକୋଏତେ ଆଲାଗ୍ ଅକଏ ବାଇପେତାନାଏ? ହାର୍ ଆପେୟାଃ ତାଃ ଚିନାଃ ମେନାଃ ଜେ (ଏଟାଃ କୋଏତେ) କାପେ ନାମ୍ କେଦା? ଆଡୋଃ ଯାବ୍ ଚି ଆପେ (ଏଟାଃ କୋଏତେ) ନାମ୍ କାଦାପେ, ଏଣ୍ଡେ ନେକା ଘାମାଣ୍ଡ୍ ଚିନାଃ ମେନ୍ତେ ରିକାତାନାପେ, ଜେଲେକାଚି ଆପେ କାପେ ନାମାକାଦା? ଆପେ ଦୋ ବିଇ ଜାନାପେ, ଆପେ ଦୋ କିଶାଣ୍ ଜାନାପେ, ଆପେ ଆଲେକେ ବାଗିକେତେ ରାଜା ଲେକା ରାଇଜ୍ କେଦାପେ; ମେନ୍ଦୋ ବୁଗିନ୍ ହୋବାଜାନ୍ତେ ଚି ଆପେ ରାଜା ଲେକା ରାଇଜ୍ କାତେପେ ଏନାତେ ଆଲେହଗି ଆପେଲୋଃ ରାଜା ଲେକା ରାଇଜ୍ ତେୟାଃଲେ। ଇଙ୍ଗ୍ଆଃ ବୁଝାଅ ରେ ପାର୍ମେଶ୍ଵାର୍ ଆଲେ କୁଲାକାନ୍ ଚେଲା କୋକେ ସବେନ୍ କୋୱାଃ ତାୟୋମ୍ତେ ଏନ୍ ହୋଡ଼ୋକୋ ଲେକା ବାଇକାଃଲେୟାଏ, ଅକନ୍ କୋୱାଃ ଗୋନୋଏଃ ରାଃ ଆନାଚୁ ଏମ୍ ଛାବା କାନା; ଚିୟାଃଚି ଆଲେ ଅତେଦିଶୁମ୍ ରେ ସିର୍ମାଦାସୀ କୋନାଙ୍ଗ୍ ଆଡୋଃ ହୋଡ଼ୋକୋ ନାଙ୍ଗ୍ ହଗି ମିୟାଃ ଆଖାଡ଼ା ରେ ତିଙ୍ଗୁକାନ୍ ମାଜାକ୍ ଲେକା ବାଇକାନାଲେ। ଆଲେ ମାସୀହ୍ ଲାଗିନ୍ ଡୋଣ୍ଡୋ ତାନ୍‍ଲେ, ମେନ୍ଦୋ ଆପେ ମାସୀହ୍ ରେ ଥିମ୍ବାଗି ସେଣାନ୍ ତାନ୍‍ପେ; ଆଲେ ନାରାଦୁରା ଗିୟାଃଲେ; ମେନ୍ଦୋ ଆପେ ପେଡ଼େଜାନ୍ ତାନ୍‍ପେ। ଆପେ ମାଇନ୍ ନାମ୍ ତାନାପେ, ମେନ୍ଦୋ ଆଲେ ମାଇନ୍ କାଲେ ନାମ୍ ତାନାଲେ। ଆଲେ ନାଆ ସାନ୍ତେ ରେଙ୍ଗେଃ ଆଡୋଃ ମାରି ଚେଚାଃ ଲିଜାଃ ତୁସିଙ୍ଗ୍ ତାନାଲେ, ଆଡୋଃ ମାଉର୍ ଜୋମ୍ ତାନାଲେ ହାର୍ ଅଡ଼୍ଆଃ ବାନୋଃ ଲେକା ହୋନୋର୍ ବାଡ଼ା ତାନାଲେ; ହାର୍ ଆପାନାଃ ତିଈ ତେ କେଟେଃ ତେ କାମି କେତେ ଜୀହିଦୋଃ ତାନାଲେ। ହୋଡ଼ୋକୋ ଆଲେକେ ସାର୍ପାଅ ତାନାକୋ, ଆଲେ ଆଶିଷ୍ ଏମ୍ ତାନାଲେ; ଇନ୍‍କୁ ସାତାଅ ତାନାକୋ, ଆଲେ ସାହାତିଙ୍ଗ୍ ତାନାଲେ। ଇନ୍‍କୁ ବାଦ୍‍ନାମ୍ ତାନାକୋ, ଆଲେ ନାରାମ୍ ତେ କାଜି ତାନାଲେ। ଆଲେ ଇସିଙ୍ଗ୍ ସାନ୍ତେ ଅତେଦିଶୁମ୍ ରେନ୍ ମାଇଲା ହାର୍ ସବେନ୍ ଜିନିଷ୍‍କୋ ରାଃ କାଚ୍ଡ଼ା ଲେକା ବାଇଜାନାଲେ। ଇଙ୍ଗ୍ ଆପେକେ ଗିୟୁଗୋଃପେ ମେନ୍ତେ ନେ ବାକାଣ୍ କାଇଙ୍ଗ୍ ଅଲ୍ ତାନା, ମେନ୍ଦୋ ଆପାନାଃ ଦୁଲାଡ଼୍ ହୋନ୍ କୋ ଲେକା ଆଟ୍‍କାର୍ କେତେ ଆପେକେ ଚେତାଓ ପେତାନିଙ୍ଗ୍। ଚିୟାଃଚି ଆଗାର୍ ମାସୀହ୍ ରେ ଆପେୟାଃ ଶିଖାଅକୋ ଦାଶ୍ ହାଜାର୍ ତାଇନ୍ ତେକୋ, ଏଣ୍ଡେ ହଗି ଆପେୟାଃ ଆପୁ ଥିମ୍ବା କାକୋ ତାଇନା; ଚିୟାଃଚି ମାସୀହ୍ ୟୀଶୁ ରେ ସୁସାମାଚାର୍ ରାଃ ହୋରାତେ ଇଙ୍ଗ୍ ଆପେୟାଃ ଆପୁ ହୋବାନାଇଙ୍ଗ୍। ଏନାମେନ୍ତେ ଇଙ୍ଗ୍ ଆପେକେ ଆର୍ଜି ପେତାନିଙ୍ଗ୍ ଚି ଇଙ୍ଗ୍ଆଃ ଲେକା ସେସେନ୍ ପେ। ଏନାମେନ୍ତେ ଇଙ୍ଗ୍ ତିମୁଥିୟୁସ୍ କେ ଅକନିଃ ପ୍ରାଭୁ ରେ ଇଙ୍ଗ୍ଆଃ ଦୁଲାଡ଼୍ ହାର୍ ବିଶ୍ଵାସେଲେକାନିଃ ହୋନ୍ ତାନିଃ, ଆପେତାଃ କୁଲ୍ କାଇଜାଇଙ୍ଗ୍। ଇନିଃ ଆପେକେ ମାସୀହ୍ ୟୀଶୁ ରେ ଇଙ୍ଗ୍ ଚିଲ୍‍କା ସେସେନ୍ ତାନିଙ୍ଗ୍ ମୋନେ ରିକା ପେୟାଏ, ଜେଲେକା ଚି ଇଙ୍ଗ୍ ସବେନ୍ ଜାଗା କୋରେ ସବେନ୍ କାଲିସିୟା ରେ ଉପ୍‍ଦେଶ୍ ଏମ୍ ତାନିଙ୍ଗ୍। ଚିମିନାଙ୍ଗ୍ କୋ ଦୋ ନେକା ଘାମାଣ୍ଡି ଜାନାକୋ, ନେଲେକା ଚି ଇଙ୍ଗ୍ ଆପେତାଃ କାଇଙ୍ଗ୍ ଗି ହିଜୁଗା। ମେନ୍ଦୋ ପ୍ରାଭୁ ସାନାଙ୍ଗ୍ ରେଦୋ ଇଙ୍ଗ୍ ଆପେୟାଃ ନାଡ଼େଏ ସେକାଡ଼୍ ହିଜୁଃ ଗାଇଙ୍ଗ୍, ହାର୍ ଏନ୍ ଘାମାଣ୍ଡିକାନ୍ କୋୱାଃ ବାକାଣ୍ କୋକେ କାହା, ମେନ୍ଦୋ ଇନ୍‍କୁୱାଃ ପେଡ଼େଏ କେ ହଗି ସାରି କେୟାଇଙ୍ଗ୍। ଚିୟାଃଚି ପାର୍ମେଶ୍ଵାର୍ ରାଃ ରାଇଜ୍ କାଜି ରେ କାହା ମେନ୍ଦୋ ପେଡ଼େଏ ରେ ମେନାଃ। ଆପେ ଚିନାଃ ସାନାଙ୍ଗ୍ ତାନାପେ? ଚିନାଃ ଇଙ୍ଗ୍ ସଟା ଇଦିକେତେ ଆପେତାଃ ହିଜୁଃ ଗାଇଙ୍ଗ୍, ଚି ଦୁଲାଡ଼୍ ହାର୍ ଲେବେଃ ରାଃ ଆତ୍ମା ଲୋଃତେ ହିଜୁଃ ଗାଇଙ୍ଗ୍? ଇଙ୍ଗ୍ ହୋଡ଼ୋକୋୱାଃ କାଜିତେ ଆୟୁମ୍ ନାମ୍ କେଦାଇଙ୍ଗ୍ ଚି ଆପେ ରେ ଆପ୍‍ଙ୍ଗିର୍ ହୋବାଅଃତାନା, ନେତାଃ ସାନ୍ ଚି ନେକା ଆପ୍‍ଙ୍ଗିର୍ ଅକନାଃଚି ଏଟାଃଜାତି କୋରେ ହ କା ହୋବାଅଃତାନା ଚି, ମିହୋଡ଼୍ ଆଜାଃ ଆପୁ ଆଃ ଛଟ୍‍କି କୁଡ଼ି କେ ମାଣ୍ତାଅ କିଜାଏ। ହାର୍ ଆପେ ଦୋ ହୋନାଙ୍ଗ୍ ଦୁକୁ ଆଟ୍‍କାରେ ତେପେ, ଏନାତେ ନେକାନ୍ କାମିନିଃ ଆପେୟାଃ ଥାଲାଏତେ ଅଡୋଙ୍ଗ୍ ରିକାତେୟାଃଏ, ମେନ୍ଦୋ ଆପେ ଘାମାଣ୍ଡ୍ ତାନାପେ। ଇଙ୍ଗ୍ ହୋଡ଼ମୋ ତେଦୋ ସାଙ୍ଗିନ୍ ରେ ତାଇକେନାଇଙ୍ଗ୍, ମେନ୍ଦୋ ଆତ୍ମା ତେ ଆପେୟାଃ ଲୋଃ ତାଇକେତେ ନେକାନ୍ ହୋଡ଼ ରାଃ ବିଷାୟ୍ ରେ ହେନ୍ତାଃ ମେନାଇଙ୍ଗ୍ ଲେକା ନେ ଆନାଚୁ ଏମ୍ ଛାବା ତାଦିଙ୍ଗ୍। ଚିମ୍ତାଙ୍ଗ୍ ଆପେ ହାର୍ ଇଙ୍ଗ୍ଆଃ ଆତ୍ମା, ଆବୁୱାଃ ପ୍ରାଭୁ ୟୀଶୁ ରାଃ ପେଡ଼େଏ ଲୋଃ ହୁଣ୍ଡିନ୍ ତାନାବୁ, ଏଣ୍ଡେ ନେକାନ୍ ହୋଡ଼ କେ ଆବୁୱାଃ ପ୍ରାଭୁ ୟୀଶୁ ରାଃ ନୁତୁମ୍ ରେ ପାପ୍ ରିକା ସାନାଙ୍ଗ୍ ହୋଡ଼ମୋ ରାଃ ବିନାଶ୍ ଲାଗିନ୍ତେ ଶାଏତାନ୍ ରାଃ ତିଈ ରେ ଜିମାଅଃକାଏ, ଏନାତେ ଇନିଜାଃ ଆତ୍ମା ପ୍ରାଭୁ ୟୀଶୁ ରାଃ ହିନିଜୁଃ ହୁଲାଙ୍ଗ୍ ରେ ବାଞ୍ଚାଅ ନାମେୟାଏ। ଆପେୟାଃ ଘାମାଣ୍ଡ୍ ରିକା ବେଶ୍ ନାହାଲା; ଚିନାଃ ଆପେ କାପେ ସାରିୟା ଚି ହୁଡିଙ୍ଗ୍ ଗି ଖାମୀର୍ ଆଟା ରେ ମେଶା କେତେ ସିପୁଃ ଲେରେ ପୁରା ସିପୁଃକାନ୍ ଆଟା ଖାମୀର୍ କୋଃତାନା? ମାରି ଖାମୀର୍ ଅଡୋଙ୍ଗ୍ କେତେ ଆପେ ଆପାନ୍ କେ ଫାର୍ଚିଏନ୍ ପେ ଏନାତେ ନାୱା ସିପୁଃକାନ୍ ଆଟା ଲେକା ବାଇୟୋଃୱାପେ; ଏନାତେ ଆପେ ଖାମୀର୍ କାମେଶାକାନ୍ ଲେକା ତାଇନାପେ। ଚିୟାଃଚି ଆବୁୱାଃ ହ ଫାସାହ୍ ପାରାବ୍ ରାଃ ମିଣ୍ଡୀ, ଅକନିଃ ଚି ମାସୀହ୍ ତାନିଃ, ଦାଣେ ହୋବାକାନାଏ। ଏନାମେନ୍ତେ ଏଲା, ଆବୁ ପାରାବ୍ କେ ରାଶିକା ତେ ମାନାତିଙ୍ଗ୍ ୟାବୁ, ଏନା ମାରି ଖାମୀର୍ ତେ କାହା ହାର୍ ଖିସ୍ ଆଡୋଃ ଏତ୍କାନାଃ ରାଃ ଖାମୀର୍ ତେ କାହା, ମେନ୍ଦୋ ସୋଜ୍ ମୋନ୍ ତେ ହାର୍ ସାର୍ତି ରାଃ କାମେଶାକାନ୍ ଖାମୀର୍ ହୋଲୋଙ୍ଗ୍ ଲୋଃତେ। ଇଙ୍ଗ୍ ଇଙ୍ଗ୍ଆଃ ସିଦା ଚିଠି ରେ ଆପେକେ ଅଲାକାଃ ପେୟାଇଙ୍ଗ୍ ଚି ଆପ୍‍ଙ୍ଗିର୍ ତାନ୍ କୋଲୋଃ ଆଲୋପେ ଗାତିନା। ନେୟା ରାଃ ମାନେ ନେୟା କାହା ଚି ଆପେ ପୁରା ନେ ଅତେଦିଶୁମ୍ ରେନ୍ ଆପ୍‍ଙ୍ଗିର୍ ତାନ୍ କୋଲୋଃ, ଚାହେ ହାୟାତାନ୍ କୋଲୋଃ, ଏଟାଃକୋକେ ଲୋଗୋତାନ୍ କୋଲୋଃ, ଚାହେ ମୂର୍ତି ପୂଜାତାନ୍ କୋଲୋଃ ଆଲୋପେ ଗାତିନା; ଚିୟାଃଚି ନେକା ଲେରେ ଦୋ ଆପେକେ ନେ ଅତେଦିଶୁମ୍ ଏତେଗି ଅଡୋଙ୍ଗ୍ ପାଡ଼ାଅଃୱା। ମେନ୍ଦୋ ଇଙ୍ଗ୍ଆଃ କାଜି ନେୟା ତାନାଃ ଚି ଆଗାର୍ ଜେତାଏ ହାଗା ମେନ୍ତେ କାଜିଅଃ ତାନାଏ, ହାର୍ ଆପ୍‍ଙ୍ଗିର୍ କାମିନିଃ, ଚାହେ ହାୟାନିଃ, ଚାହେ ମୂର୍ତି ପୂଜାତାନ୍ ନିଃ, ଚାହେ ଏପେଗେର୍ ରିକାନିଃ, ଚାହେ ବୁଲୋଃନିଃ, ଚାହେ ଏଟାଃକୋକେ ଲୋଗୋତାନ୍ ନିଃ ତାନିଃ ରେଦୋ, ଇନିଜାଃ ଲୋଃ ଆଲୋପେ ଗାତିନା; ଇମିନ୍ ଭାଇର୍ କାହା ଏନ୍‍କାନ୍ ହୋଡ଼ ଲୋଃ ଜୋଜୋମ୍ ହଗି ଆଲୋପେ ଦୁବେନା। ଚିୟାଃଚି ଇଙ୍ଗ୍‍କେ ବାହାରି ରେନ୍ ହୋଡ଼ୋକୋକେ ବିଚାର୍ ରିକା ଚିକାନ୍ କାମି? ଚିନାଃ ଆପେ ବିଶ୍ଵାସୀ ଭିତାର୍ ରେନ୍ କୋୱାଃ ବିଚାର୍ କାପେ ରିକା ତାନା? ମେନ୍ଦୋ ବାହ୍‍ରେ ରେନ୍ ହୋଡ଼ୋକୋୱାଃ ବିଚାର୍ ପାର୍ମେଶ୍ଵାର୍ ରିକା ତାନାଏ। ଏନାମେନ୍ତେ ଏନ୍ ଏତ୍କାନ୍ କାମିନିଃ କେ ଆପେୟାଃ ଥାଲା ଏତେ ବାହାରି ଅଡୋଙ୍ଗ୍ ତାଇପେ। ଚିନାଃ ଆପେ କୋଏତେ ଜେତାଏ କେ ନେକା ସାହାସ୍ ହୋବାଃୱା ଚିମ୍ତାଙ୍ଗ୍ ଏଟାଃନିଃ ଲୋଃ ଝାଗ୍ଡ଼ା ହୋବାଅଃୱା, ଇମ୍ତା ବିଚାର୍ ଲାଗିନ୍ତେ ପାବିତାର୍ ହୋଡ଼ୋ କୋତାଃ ସେନ୍ ବାଗିକେତେ ଆଧାର୍ମୀ କୋତାଃ ସେନାଏ? ଚିନାଃ ଆପେ କାପେ ସାରିୟା ଚି ପାବିତାର୍ ହୋଡ଼ୋକୋ ଅତେଦିଶୁମ୍ ରେନ୍ ହୋଡ଼ୋକୋୱାଃ ବିଚାର୍ ୟାକୋ? ଏନାମେନ୍ତେ ଚିମ୍ତାଙ୍ଗ୍ ଆପେକେ ଅତେଦିଶୁମ୍ ରେନ୍ ହୋଡ଼ୋକୋୱାଃ ବିଚାର୍ ରିକା ମେନାଃ, ଏଣ୍ଡେ ଚିନାଃ ଆପେ ହୁଡିଙ୍ଗ୍ ତେ ହୁଡିଙ୍ଗ୍ ଝାଗ୍ଡ଼ା ରାଃ ହ ଫାଏସାଲା ଧାଡ଼ିନିଃ ନାହାଲାପେ? ଚିନାଃ ଆପେ କାପେ ସାରିୟା ଚି ଆବୁ ସିର୍ମାଦାସୀ କୋୱାଃ ବିଚାର୍ ୟାବୁ? ଏଣ୍ଡେ ଚିନାଃ ନେ ଜୀଦାନ୍ ରେୟାଃ କାଜି କୋରାଃ ଫାଏସାଲା କାବୁ ଧାଡ଼ିୟା? ଆଗାର୍ ଆପେକେ ନେ ଜୀଦାନ୍ ରେୟାଃ କାଜି କୋରାଃ ଫାଏସାଲା ରିକା ମେନାଃ, ଏଣ୍ଡେ ଚିନାଃ ଇନ୍‍କୁକେଗି ବିଚାର୍ ଲାଗିନ୍ତେ ଦୁବ୍ କୋୱାପେ ଅକନ୍‍କୋ କାଲିସିୟା ରେନ୍ ଜେତ୍ନାଃ ହ ନାହାଲାକୋ? ଇଙ୍ଗ୍ ଆପେକେ ଗିୟୁଃ ଲାଗିନ୍ତେ ନେୟା କାଜିପେ ତାନିଙ୍ଗ୍। ଚିନାଃ ସାର୍ତିଗୀ ଆପେ ଥାଲାରେ ମିହୋଡ଼୍ ହ ସେଣାନ୍ ବାଙ୍ଗ୍ କୋୱା, ଅକନିଃ ଆପାନାଃ ମାସୀହ୍ ହାଗା କୋୱାଃ ବିଚାର୍ ରିକା ଧାଡ଼ିୟାଏ? ଆପେ ଥାଲାରେ ହାଗା-ହାଗା ରେଗି କାଛେରୀ କାଜିକୋ ହୋବାଅଃତାନା, ହାର୍ ଏନା ହ ଆବିଶ୍ଵାସୀ ବିଚାର୍ ହୋଡ଼ୋକୋ ନାଡ଼େଏ ରେ। ମେନ୍ଦୋ ସାର୍ତିଗୀ ଆପେ ଥାଲାରେ ମାରାଙ୍ଗ୍ ଦୋଷ୍ ଦୋ ନେୟା ତାନାଃ ଚି ଆପେ-ଆପେ ରେ କାଛେରୀ କାଜିକୋ ହୋବାଅଃ ତାନାପେ। ଆନ୍ୟାୟ ଚିନାଃ ମେନ୍ତେ କାପେ ସାହାତିଙ୍ଗ୍ ତାନା? ଆପାନାଃ ହାନି ଚିନାଃ ମେନ୍ତେ କାପେ ସାହାତିଙ୍ଗ୍ ତାନା? ମେନ୍ଦୋ ଆପେ ଗି ଦୋ ଆନ୍ୟାୟ ତାନାପେ ହାର୍ ହାନି ତାନାପେ, ହାର୍ ଏନା ହ ମାସୀହ୍ ହାଗାକୋକେ। ଚିନାଃ ଆପେ କାପେ ସାରିୟା ଚି ଆଧାର୍ମୀ ହୋଡ଼ୋକୋ ପାର୍ମେଶ୍ଵାର୍ ରାଃ ରାଇଜ୍ ରାଃ ଆଧିକାରୀ କାକୋ ହୋବାଅଃୱା? ଆଲୋପେ ହିହିଡ଼ୋଗା। ଆପ୍‍ଙ୍ଗିର୍ ତାନ୍‍କୋ, ମୂର୍ତିପୂଜାତାନ୍ କୋ, ଏଟାଃ କୋୱାଃ କୁଡ଼ି କୋଲୋଃ ଆପ୍‍ଙ୍ଗିର୍ ତାନ୍‍କୋ, ହୋଡ଼ମୋ ରାଃ ଶିତୃ ସାନାଙ୍ଗ୍ କେ ପୁରାତାନ୍ କୋ, କଡ଼ାକୋ କଡ଼ା କୋଲୋଃ ଏତ୍କାନ୍ କାମି ରିକାତାନ୍‍କୋ, କୁମ୍ଡ଼ୁ କୋ, ହାୟାତାନ୍ କୋ, ବୁଲୋଃ ହୋଡ଼ୋକୋ, ଏପ୍‍ଗେର୍ ହୋଡ଼ୋକୋ, ଏଟାଃକୋକେ ହିହିଡ଼୍ ତାନ୍‍କୋ ପାର୍ମେଶ୍ଵାର୍ ରାଃ ରାଇଜ୍ ରାଃ ଆଧିକାରୀ କାକୋ ହୋବାଅଃୱା। ହାର୍ ଆପେ ଏତେ ଚିମିନାଙ୍ଗ୍ କୋ ଏନ୍‍ଲେକା ତାଇକେନାପେ, ମେନ୍ଦୋ ଆପେ ପ୍ରାଭୁ ୟୀଶୁ ମାସୀହ୍ ଆଃ ନୁତୁମ୍ ରେ ଆଡୋଃ ଆବୁୱାଃ ପାର୍ମେଶ୍ଵାର୍ ରାଃ ଆତ୍ମା ତେ ଚାପିଜାନାପେ ହାର୍ ପାବିତାର୍ ବାଇଜାନାପେ ଆଡୋଃ ଧାର୍ମୀ ହୋବାଜାନାପେ। ସବେନାଃ ଇଙ୍ଗ୍ ରିକା ଧାଡ଼ିୟା, ମେନ୍ଦୋ ସବେନ୍ ଜିନିଷ୍ ଇଙ୍ଗ୍ଆଃ ଲାଭ ନାଙ୍ଗ୍ ନାହାଲା; ସବେନାଃ ଇଙ୍ଗ୍ ରିକା ଧାଡ଼ିୟା, ମେନ୍ଦୋ ଇଙ୍ଗ୍ ଜାହାନାଃ ରାଃ ଦାସୀ କାଇଙ୍ଗ୍ ହୋବାଃୱା। ଯୋଜୋମାଃ ଲାହେଃ ଲାଗିନ୍, ହାର୍ ଲାହେଃ ଯୋଜୋମାଃ ଲାଗିନ୍ ତାନାଃ, ମେନ୍ଦୋ ପାର୍ମେଶ୍ଵାର୍ ନେୟାକେ ହାର୍ ଏନାକେ, ବାରାନାଃକେ ନାଷ୍ଟ୍ ୟାଏ। ମେନ୍ଦୋ ହୋଡ଼ମୋ ଆପ୍‍ଙ୍ଗିର୍ ଲାଗିନ୍ତେ ନାହାଲା, ପ୍ରାଭୁ ଲାଗିନ୍ତେ ତାନାଃ, ଆଡୋଃ ପ୍ରାଭୁ ହୋଡ଼ମୋ ଲାଗିନ୍ତେ ତାନିଃ। ପାର୍ମେଶ୍ଵାର୍ ଆଜାଃ ପେଡ଼େଏ ତେ ପ୍ରାଭୁ କେ ଜୀବିରିଃ କିଜାଏ, ହାର୍ ଆବୁକେ ହଗି ଜୀବିରିଃ ବୁୱାଏ। ଚିନାଃ ଆପେ କାପେ ସାରିୟା ଚି ଆପେୟାଃ ହୋଡ଼ମୋ ମାସୀହ୍ ରାଃ ହାନାଟିଙ୍ଗ୍ ତାନାଃ? ଏଣ୍ଡେ ଚିନାଃ ଇଙ୍ଗ୍ ମାସୀହ୍ ରାଃ ହୋଡ଼ମୋ ଇଦିକେତେ ଏନାକେ ବେଶ୍ୟା ଲୋଃ ମେଶା ୱାଇଙ୍ଗ୍? ଚିଉଲା ହ କାହା। ଚିନାଃ ଆପେ କାପେ ସାରିୟା, ଚି ଅକଏ ବେଶ୍ୟା ଲୋଃ ମେଶାଅଃ ତାନାଏ, ଇନିଃ ଇନିଜାଃ ଲୋଃ ମିୟାଃ ହୋଡ଼ମୋ ହୋବାକୋଃ ତାନାଏ? ଚିୟାଃଚି ପାବିତାର୍ ପୁଥି ରେ ଅଲାକାନା: “ଇନ୍‍କୁ ବାରାନ୍ କିନ୍ ମିୟାଃ ହୋଡ଼ମୋ ହୋବାଅଃୱାକିନ୍।” ହାର୍ ଅକଏ ପ୍ରାଭୁ ଲୋଃ ମେଶା କେତେ ତାଇନ୍ ତାନାଏ, ଇନିଃ-ଇନିଜାଃ ଲୋଃ ମିୟାଃ ଆତ୍ମା ହୋବାକେନୋଗାଏ। ବ୍ୟାଭିଚାର୍ କାମି ତେ ନିରେପେ। ଚିମିନ୍ ଗି ଏଟାଃ ପାପ୍ ହୋଡ଼ ରିକା ତାନାଏ ଏନା ହୋଡ଼ମୋ ରାଃ ବାହ୍‍ରେ ମେନାଃ, ମେନ୍ଦୋ ବ୍ୟାଭିଚାର୍ ରିକାନିଃ ଆଜାଃଗି ହୋଡ଼ମୋ ରାଃ ବିରୁଦ୍ଧ୍ ପାପ୍ ତାନାଏ। ଚିନାଃ ଆପେ କାପେ ସାରିୟା ଚି ଆପେୟାଃ ହୋଡ଼ମୋ ପାବିତାର୍ ଆତ୍ମା ରାଃ ମାନ୍ଦିର୍ ତାନାଃ, ଅକନିଃ ଆପେୟାଃ ରେ ତାଇନ୍ ତାନାଏ ହାର୍ ଆପେକେ ପାର୍ମେଶ୍ଵାର୍ ପାଡ଼େତେ ନାମ୍ କାନାଏ; ଆଡୋଃ ଆପେ ଆପେୟାଃ ନାହାଲାପେ? ଚିୟାଃଚି ଗୋନୋଙ୍ଗ୍ ଏମ୍ କେତେ କିରିଙ୍ଗା କାନାପେ, ଏନାମେନ୍ତେ ଆପାନାଃ ହୋଡ଼ମୋ ରାଃ ହୋରାତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାଏପେ। ନାଆ ଦୋ, ଏନ୍ କାଜି କୋରାଃ ବିଷାୟ୍ ରେ ଅକନାଃ ଆପେ ଇଙ୍ଗ୍‍କେ ଅଲ୍ କାଦାପେ: ନେୟା ବୁଗିନାଃ ତାନାଃ ଚି କଡ଼ା କୁଡ଼ି କେ ଆଲୋ ଆଣାଦୀ କାଏ। ମେନ୍ଦୋ ଆପ୍‍ଙ୍ଗିର୍ ରାଃ ବୋରୋତେ ସବେନ୍ କଡ଼ା ରାଃ ଆଣାଦୀକାନ୍ କୁଡ଼ି, ଆଡୋଃ ସବେନ୍ କୁଡ଼ି ରାଃ ଆଣାଦୀକାନ୍ କଡ଼ା ତାଇନ୍ କାଏ। କଡ଼ା ଆଜାଃ ଆଣାଦୀକାନ୍ କୁଡ଼ି ରାଃ ହାକ୍ ପୁରାକାଏ; ହାର୍ ଏନ୍‍ଲେକାଗି କୁଡ଼ି ହଗି ଆଜାଃ ଆଣାଦୀକାନ୍ କଡ଼ା ଗାଃ। କୁଡ଼ି କେ ଆଜାଃ ହୋଡ଼ମୋ ଚେତାନ୍ ରେ ଆଧିକାର୍ ବାନୋଃ ମେନ୍ଦୋ ଇନିଜାଃ ଆଣାଦୀକାନ୍ କଡ଼ା ରାଃ ଆଧିକାର୍ ମେନାଃ; ଏନ୍‍ଲେକାଗି କଡ଼ା କେ ହଗି ଆଜାଃ ହୋଡ଼ମୋ ଚେତାନ୍ ରେ ଆଧିକାର୍ ବାନୋଃ, ମେନ୍ଦୋ ଆଣାଦୀକାନ୍ କୁଡ଼ି ଗାଃ ମେନାଃ। ଆପେ ମିହୋଡ଼୍ ଏଟାଃନିଃ ତେ ଆଲାଗ୍ ଆଲୋବେନ୍ ତାଇନା; ମେନ୍ଦୋ ଖାଲି କାଟିଃ ସାମାୟ୍ ଜାକେଦ୍ ଭାଇର୍ ଆବେନାଃ ମୋନେ ଲେକାତେ ଏନାତେ ବିନ୍ତି ଲାଗିନ୍ତେ ସାମାୟ୍ ନାମୋଃୱା, ହାର୍ ହାଡୋଃ ମିଃତେ ତାଇନ୍ ବେନ୍; ନେକା ଆଲୋ ହୋବାଅଃକା ଚି ଆପେ-ଆପେୟାଃ ମୋନ୍ କେ କାବୁଝାଅ ଧାଡ଼ିତାନ୍ ରାଃ ହୋରାତେ ଶାଏତାନ୍ ଆପେକେ ପାର୍ଖାଅ ପେୟାଏ। ମେନ୍ଦୋ ଅକନାଃ ଇଙ୍ଗ୍ ନେୟା କାଜିତାନିଙ୍ଗ୍ ଏନା ଆଚୁ ତାନାଃ ଆନାଚୁ ନାହାଲା। ଇଙ୍ଗ୍ ନେୟା ସାନାଙ୍ଗ୍ ତାନିଙ୍ଗ୍ ଚି ଚିଲ୍‍କା ଇଙ୍ଗ୍ ଡିଣ୍ଡା ମେନାଇଙ୍ଗ୍‍ୟା ଏନ୍ ଲେକାଗି ସବେନ୍ ହୋଡ଼ୋକୋ ତାଇନ୍ କାକୋ; ମେନ୍ଦୋ ସବେନ୍ ମିପୀହୋଡ଼୍ କୋକେ ପାର୍ମେଶ୍ଵାର୍ ପାଡ଼େତେ ଆଲାଗ୍-ଆଲାଗ୍ ବାର୍ଦାନ୍ ନାମାକାନା; ଅକଏକେ ନେଲେକା ଆଡୋଃ ଅକଏକେ ଏନ୍ ଲେକା। ମେନ୍ଦୋ ଇଙ୍ଗ୍ କାଆଣାଦୀକାନ୍ କୋ ନାଙ୍ଗ୍ ହାର୍ ବିଧୋବା କୋୱାଃ ବିଷାୟ୍ ରେ କାଜିତାନିଙ୍ଗ୍ ଚି ଇନ୍‍କୁ ଲାଗିନ୍ତେ ନେକାଗି ତାଇନ୍ ବେଶ୍ ତାନାଃ, ଚିଲ୍‍କା ଇଙ୍ଗ୍ ଡିଣ୍ଡା ମେନାଇଙ୍ଗ୍। ମେନ୍ଦୋ ଆଗାର୍ ଇନ୍‍କୁ ଆକୋ-ଆକୋୱାଃ ମୋନ୍ କେ ବୁଝାଅ କାକୋ ଧାଡ଼ିତାନ୍ ରେଦୋ, ଇନ୍‍କୁ ଆଣାଦୀୟୋଃ କାକୋ; ଚିୟାଃଚି ଆଣାଦୀଏନ୍ ତେୟାଃ ହୋଡ଼ମୋ ରାଃ ସାନାଙ୍ଗ୍ ରେ ଜୁଲୋଃ ତେୟାଃତେ ବୁଗିନ୍ ତାନାଃ। ଅକେୟାଃ ଆଣାଦୀ ହୋବାଜାନା, ଇନ୍‍କୁକେ ଇଙ୍ଗ୍ କାହା, ମେନ୍ଦୋ ପ୍ରାଭୁ ଆନାଚୁ ଏମ୍ କୋତାନାଏ ଚି ଆଣାଦୀକାନ୍ କୁଡ଼ି ଆଜାଃ କଡ଼ା ଏତେ ଜୁଦା ଆଲୋ ତାଇନ୍ କାଏ। ମେନ୍ଦୋ ଆଗାର୍ ଜୁଦା କେନୋଃ ତାନାଏ, ଏଣ୍ଡେ ବେଗାର୍ ଏଟାଃ ଆଣାଦୀ କେତେ ତାଇନ୍ କାଏ; ୟାଦୋ ଆଜାଃ କଡ଼ା ଲୋଃ ଆଡୋଃଗି ମେଶା କେନୋଃଚାଏ, ହାର୍ କଡ଼ା ଆଜାଃ ଆଣାଦୀକାନ୍ କୁଡ଼ି କେ ଆଲୋ ବାଗିକାଏ। ନାଆ ଏଟାଃ ସବେନ୍ କୋକେ ପ୍ରାଭୁ କାହା ମେନ୍ଦୋ ଇଙ୍ଗ୍ ଗି କାଜି ତାନାଇଙ୍ଗ୍, ଆଗାର୍ ଜାହାନ୍ ମାସୀହ୍ ହାଗା ରାଃ ଆଣାଦୀକାନ୍ କୁଡ଼ି ବିଶ୍ୱାସୀ ନାହାଲି ହାର୍ ଇନିଜାଃ ଲୋଃ ତାଇନ୍ ଲାଗିନ୍ ସୁକୁଅଃତାନ୍ ରେଦୋ, ହିନିଃ ଇନିଃକେ ଆଲୋ ବାଗିକାଏ। ହାର୍ ଆଗାର୍ ଅକନ୍ କୁଡ଼ି ଗାଃ ଆଣାଦୀକାନ୍ କଡ଼ା ବିଶ୍ୱାସୀ ନାହାଲାଏ, ହାର୍ ଇନିଜାଃ ଲୋଃ ତାଇନ୍ ଲାଗିନ୍ ସୁକୁଅଃ ତାନାଏ ରେଦୋ, ଇନିଃ ଆଣାଦୀକାନ୍ କଡ଼ା କେ ଆଲୋ ବାଗିକାଏ। ଚିୟାଃଚି ନେଲେକାନ୍ କଡ଼ା ଅକନିଃ ବିଶ୍ଵାସ୍ କାଏ ମାଣ୍ତାଅତାନାଏ, ଇନିଃ ଆଣାଦୀକାନ୍ କୁଡ଼ି ରାଃ ଚାଲ୍ତେ ପାବିତାର୍ ହୋବାଅଃ ତାନାଏ, ହାର୍ ନେକାନ୍ କୁଡ଼ି ଅକନିଃ ବିଶ୍ଵାସ୍ କାଏ ମାଣ୍ତାଅତାନାଏ, ଆଣାଦୀକାନ୍ କଡ଼ା ରାଃ ଚାଲ୍ତେ ପାବିତାର୍ ହୋବାଅଃ ତାନାଏ; କାରେ ଦୋ ଆପେୟାଃ ହୋନ୍ ଗାଣାକୋ ଆଶୁଦ୍ଧ୍ ହୋବାଅଃ ତେୟାକୋ, ମେନ୍ଦୋ ନାଆ ଇନ୍‍କୁ ପାବିତାର୍ ତାନ୍‍କୋ। ମେନ୍ଦୋ ଅକନ୍ କଡ଼ା ବିଶ୍ଵାସ୍ କାଏ ମାଣ୍ତାଅତାନାଏ, ଏନ୍ତେ ଆଗାର୍ ଇନିଃ ଜୁଦାଅଃ ସାନାଙ୍ଗ୍ ତାନ୍ ରେଦୋ ଜୁଦାଅଃ କାଏ, ନେକାନ୍ ଦାଶା ରେ ଜାହାନ୍ ହାଗା ୟାଦୋ ମିଶି ଥୋନୋଲ୍ ରେ ବାଙ୍ଗୁଇଃ। ପାର୍ମେଶ୍ଵାର୍ ଆବୁକେ ସୁକୁତେ ତାଇନ୍ ଲାଗିନ୍ କେଡ଼ା କାଃବୁୱାଏ। ଚିୟାଃଚି ହେ କୁଡ଼ି, ଆମ୍ ଚିନାଃ ସାରିୟାମ୍ ଚି ଆମ୍ ଆମାଃ ଆଣାଦୀକାନ୍ କଡ଼ା କେ ବାଞ୍ଚାଅ ଧାଡ଼ିୟାମ୍? ହାର୍ ହେ କଡ଼ା, ଆମ୍ ଚିନାଃ ସାରିୟାମ୍ ଚି ଆମ୍ ଆମାଃ ଆଣାଦୀକାନ୍ କୁଡ଼ି କେ ବାଞ୍ଚାଅ ଧାଡ଼ିୟାମ୍? ଜେଲେକା ପ୍ରାଭୁ ସବେନ୍ ମିପୀହୋଡ଼୍ କେ ହାଟିଙ୍ଗ୍ କାଦାଏ ହାର୍ ଜେଲେକା ପାର୍ମେଶ୍ଵାର୍ ସବେନ୍ ମିପୀହୋଡ଼୍ କେ କେଡ଼ାକାଃ କୋୱାଃଏ, ଏନ୍ ଲେକାଗି ଇନିଃ ସେସେନ୍ କାଏ। ଇଙ୍ଗ୍ ସବେନ୍ କାଲିସିୟା କୋରେ ନେକାଗି ନିୟାମ୍ ଠାହ୍‍ରାଓ ତାନିଙ୍ଗ୍। ଜେତାଏ ଖାତ୍ନା ହୋବାକେତେ କେଡ଼ା କାନାଏ, ଇନିଃ କାଖାତ୍ନାକାନ୍ ଲେକା ଆଲୋ ବାଇଏନ୍ କାଏ। ଜେତାଏ କାଖାତ୍ନାକାନ୍ ଲେକାତେ କେଡ଼ାକାନାଏ, ଇନିଃ ଆଲୋ ଖାତ୍ନାଅଃକାଏ। ଖାତ୍ନା ହୋବାଅଃ ତେୟାଃ ଜାହାନାଃ ନାହାଲା ହାର୍ କାଖାତ୍ନା କେତେ ତାଇନ୍ ଜାହାନାଃ ନାହାଲା, ମେନ୍ଦୋ ପାର୍ମେଶ୍ଵାର୍ ରାଃ ଆନାଚୁ କୋକେ ମାନାତିଙ୍ଗ୍ ତେୟାଃ ମାରାଙ୍ଗ୍ ତାନାଃ। ସବେନ୍ ମିପୀହୋଡ଼୍ ଅକନ୍ ଲେକାତେ କେଡ଼ା କାନାଏ, ଏନ୍ ଲେକାଗି ତାଇନ୍ କାଏ। ଆଗାର୍ ଆମ୍ ଦାସୀକାନ୍ ଲେକାତେ କେଡ଼ାକାନାମ୍ ଏଣ୍ଡେ ଆଲୋମ୍ ପାହୋମେୟା; ମେନ୍ଦୋ ଆଗାର୍ ଆମ୍ ଦାସୀକାନ୍ ଏତେ ରାଡ଼ାଅଃ ଧାଡ଼ିତାନ୍ ରେଦୋମ୍, ଏନ୍‍ଲେକାଗି କାମିମେ। ଚିୟାଃଚି ଜେତାଏ ଦାସୀକାନ୍ ଲେକାତେ ପ୍ରାଭୁ ରେ କେଡ଼ାକାନାଏ, ଇନିଃ ପ୍ରାଭୁ ଏତେ ରାଡ଼ା ନାମାକାନ୍ ନିଃ ତାନିଃ। ଏନ୍‍ଲେକାଗି ଜେତାଏ କାଦାସୀକାନ୍ ଲେକାତେ କେଡ଼ାକାନାଏ, ଇନିଃ ମାସୀହ୍ ରାଃ ଦାସୀ ତାନିଃ। ଆପେ ଗୋନୋଙ୍ଗ୍ ଏମ୍ କେତେ କିରିଙ୍ଗା କାନାପେ, ହୋଡ଼ୋକୋୱାଃ ଦାସୀ ଆଲୋପେ ବାଇନା। ହେ ହାଗାକୋ, ଜେତାଏ ଜାଲେକାତେଗି କେଡ଼ା କାନାଏ, ଇନିଃ ଏନ୍‍ଲେକାଗି ପାର୍ମେଶ୍ଵାର୍ ଲୋଃ ତାଇନ୍ କାଏ। ଡିଣ୍ଡାକୁଡ଼ି କୋୱାଃ ବିଷାୟ୍ ରେ ପ୍ରାଭୁ ଆଃ ଜାହାନ୍ ଆନାଚୁ ଇଙ୍ଗ୍‍କେ କାନାମାକାନା, ମେନ୍ଦୋ ବିଶ୍ଵାସେ ଲେକାନିଃ ହୋବାଅଃ ଲାଗିନ୍ତେ ଜେଲେକା ଦାୟା ପ୍ରାଭୁ ଇଙ୍ଗ୍ଆଃ ରେ ରିକା କାଦାଏ, ଏନାରାଃ ଲେକାତେଗି ଇଙ୍ଗ୍ କାଜି ଏମାପେତାନିଙ୍ଗ୍। ଇଙ୍ଗ୍ଆଃ ପାହୋମ୍ ଲେକାତେଦୋ ନେୟା ବୁଗିନ୍ ତାନାଃ ଚି ନିମିର୍-ଗାପା ରାଃ ଦୁକୁ ରାଃ ହୋରାତେ, ହୋଡ଼ ଚିଲ୍‍କା ମେନାଇଜା ଏନ୍‍ଲେକାଗି ତାଇନ୍ କାଏ। ଆଗାର୍ ଆମ୍ ଆଣାଦୀକାନ୍ ରେଦୋମ୍, ଇନିଃତେ ଜୁଦାଅଃ ଲାଗିନ୍ତେ ଆଲୋମ୍ ସାନାଙ୍ଗେ; ହାର୍ ଆଗାର୍ କାମ୍ ଆଣାଦୀକାନ୍ ରେଦୋମ୍, କୁଡ଼ି ଆଲୋମ୍ ସାଙ୍ଗାରେ। ମେନ୍ଦୋ ଆଗାର୍ ଆମ୍ ଆଣାଦୀଏନ୍ ତାନ୍ ରେଦୋ, ଏନା ପାପ୍ ନାହାଲା; ହାର୍ ଆଗାର୍ ଡିଣ୍ତା କୁଡ଼ି ଆଣାଦୀଏନ୍ ତାନାଏ ରେଦୋ ଇନିଃ କାଏ ପାପ୍ ତାନାଏ। ମେନ୍ଦୋ ନେକାନ୍ କୋକେ ହୋଡ଼ମୋ ରେ ଦୁକୁକୋ ନାମେୟା, ହାର୍ ଇଙ୍ଗ୍ ବାଞ୍ଚାଅ ସାନାଙ୍ଗ୍ ତାନିଙ୍ଗ୍। ହେ ହାଗାକୋ, ଇଙ୍ଗ୍ ନେୟା କାଜିତାନିଙ୍ଗ୍ ଚି ସାମାୟ୍ ହୁଡିଙ୍ଗ୍ କାନା, ଏନାମେନ୍ତେ ଅକେୟାଃ କୁଡ଼ି ମେନାଇଜା, ଇନିଃ ଇନିଜାଃ କୁଡ଼ି ବାଙ୍ଗୁଇଃ ଲେକା ତାଇନ୍ କାଏ। ହାର୍ ରାଆତାନ୍ କୋ, କାକୋ ରାଆତାନା ଲେକା; ହାର୍ ରାଶିକାତାନ୍ କୋ, କାକୋ ରାଶିକାତାନା ଲେକା, ହାର୍ କିରିଙ୍ଗ୍ ତାନ୍ କୋ, ଇନ୍‍କୁ ତାଃ ଜେତ୍ନାଃ ବାନୋଃ ଲେକା। ହାର୍ ନେ ଅତେଦିଶୁମ୍ ରେୟାଃ ଜିନିଷ୍ କୋ ନାମେ ତାନ୍ କୋ, ପୁରାଃତେ କାକୋ ନାମେତାନା ଲେକା ତାଇନ୍ କାକୋ; ଚିୟାଃଚି ନେ ନେଲୋଃତାନ୍ ନାଆ ରାଃ ଅତେଦିଶୁମ୍ ସେନୋଃତାନା। ଏନାତେ ଇଙ୍ଗ୍ ନେୟା ସାନାଙ୍ଗ୍ ତାନିଙ୍ଗ୍ ଚି ଆପେକେ ଚିନ୍ତା ଆଲୋ ହୋବାଅଃକା। କାଆଣାଦୀକାନ୍ ହୋଡ଼ ପ୍ରାଭୁ ଆଃ କାଜି କୋରାଃ ଚିନ୍ତା ରେ ତାଇନାଏ ଚି ପ୍ରାଭୁ କେ ଚିଲ୍‍କାତେ ସୁକୁୟାଇୟାଏ। ମେନ୍ଦୋ ଆଣାଦୀକାନ୍ ହୋଡ଼ ଅତେଦିଶୁମ୍ ରେୟାଃ କାଜି କୋରାଃ ଚିନ୍ତା ରେ ତାଇନାଏ ଚି ଆଜାଃ ଆଣାଦୀକାନ୍ କୁଡ଼ି କେ ଚିଲ୍‍କାତେ ସୁକୁୟାଇୟାଏ। ହାର୍ ଇନିଜାଃ ମୋନ୍ ହାଟିଙ୍ଗ୍ଅଃତାନା। ଆଣାଦୀକାନ୍ କୁଡ଼ି ହାର୍ ଡିଣ୍ଡାକୁଡ଼ି କିନାଃ ମୋନ୍ ରେହଗି ଆନ୍ତାର୍ ମେନାଃ: ଡିଣ୍ଡାକୁଡ଼ି ପ୍ରାଭୁ ଆଃ ଚିନ୍ତା ରେ ତାଇନାଏ ଚି ଇନିଃ ହୋଡ଼ମୋ ଆଡୋଃ ଆତ୍ମା ବାରାନାଃ ରେ ପାବିତାର୍ ତାଇନାଏ, ମେନ୍ଦୋ ଆଣାଦୀକାନ୍ କୁଡ଼ି ଅତେଦିଶୁମ୍ ରେୟାଃ ଚିନ୍ତା ରେ ତାଇନାଏ ଚି ଆଜାଃ ଆଣାଦୀକାନ୍ କଡ଼ା କେ ଚିଲ୍‍କାତେ ସୁକୁୟାଇୟାଏ। ଇଙ୍ଗ୍ ନେ କାଜି ଆପେୟାଃଗି ବୁଗିନାଃ ଲାଗିନ୍ତେ କାଜିତାନିଙ୍ଗ୍, ଆପେକେ ପାଶେ ମାଣ୍ଡାଅ ଲାଗିନ୍ତେ କାହା, ମେନ୍ଦୋ ନେୟାଲାଗିନ୍ତେ ଚି ଜେଲେକା ଠାଉକା ତାନାଃ ଏନ୍ ଲେକାଗି ତାଇନ୍ ପେ ଏନାତେ ଆପେ ମିୟାଃ ମୋନ୍ ହୋବାକେତେ ପ୍ରାଭୁ ଆଃ ସେୱା ରେ ତାଇନୋଃପେ। ଆଗାର୍ ଜେତାଏ ନେୟା ବୁଝାଅଃତାନାଏ ଚି ଇଙ୍ଗ୍ ଏନ୍ ଡିଣ୍ତା କୁଡ଼ି ଗାଃ ଆଧିକାର୍ କେ ଇଦିତାନିଙ୍ଗ୍, ଅକନିଜାଃ ଡିଣ୍ତା ସାମାୟ୍ ସେନୋଃ ତାନା, ହାର୍ ଦାର୍‍କାର୍ ଗି ମେନାଃ, ଏଣ୍ଡେ ଚିଲ୍‍କା ସାନାଙ୍ଗ୍ ତାନାଏ ଏନ୍‍ଲେକାଗି ରିକାଏକାଏ, ନେୟା ରେ ପାପ୍ ବାନୋଗା, ଇନିଃ ଗୋଙ୍ଗୋଃ କାଏ। ମେନ୍ଦୋ ଅକଏ ମୋନ୍ ରେ କେଟେଃତେ ତାଇନ୍ ଧାଡ଼ିତାନାଏ, ହାର୍ ଇନିଃକେ ଦାର୍‍କାର୍ ବାନୋଃ, ହାର୍ ଆଜାଃ ମୋନ୍ ରେ ପାହୋମ୍ ଛାବାକାଦାଏ ଚି ଇନିଃ ଆଜାଃ ଡିଣ୍ଡାକୁଡ଼ି କେ କାଏ ଗୋଙ୍ଗିୟାଏ, ଇନିଜୋଗି ବୁଗିନାଃ ରିକା ତାନାଏ। ଏନାମେନ୍ତେ ଅକଏ ଆଜାଃ ଡିଣ୍ତା କୁଡ଼ି କେ ଗୋଙ୍ଗିତାନାଏ, ଇନିଃ ବୁଗିନାଃ ରିକା ତାନାଏ, ହାର୍ ଅକଏ କାଏ ଗୋଙ୍ଗିତାନାଏ, ଇନିଃ ଆଡୋଃଗି ବୁଗିନ୍ ରିକା ତାନାଏ। ଚିମିନ୍ ସାନ୍ତେ ମିୟାଃ କୁଡ଼ି ରାଃ ଆଣାଦୀକାନ୍ କଡ଼ା ଜୀହିଃ ତାଇନାଏ, ଏନ୍ ସାନ୍ତେ ଇନିଃ ଇନିଜାଃ ଲୋଃ ଥୋଲାକାନାଏ; ମେନ୍ଦୋ ଆଗାର୍ ଇନିଜାଃ ଆଣାଦୀକାନ୍ କଡ଼ା ଗୋଏଃ କେନୋଃ ରେଦୋ ଅକଏକେ ସାନାଙ୍ଗ୍ ଇନିଃକେ ଆଣାଦୀ ଧାଡ଼ିୟାଏ, ମେନ୍ଦୋ ଖାଲି ପ୍ରାଭୁ ରେ ତାଇନ୍ କଡ଼ା କେ। ମେନ୍ଦୋ ଚିଲ୍‍କା ଇନିଃ ମେନାଇଜା ଆଗାର୍ ଏନ୍‍ଲେକାଗି ତାଇନ୍ ରେଦୋ, ଇଙ୍ଗ୍ଆଃ ବିଚାର୍ ରେ ଆଡୋଃଗି ଖୁସ୍ ରେ ତାଇନାଏ, ହାର୍ ଇଙ୍ଗ୍ ପାହୋମ୍ ତାନିଙ୍ଗ୍ ଚି ପାର୍ମେଶ୍ଵାର୍ ରାଃ ଆତ୍ମା ଇଙ୍ଗ୍ଆଃ ରେ ହଗି ମେନାଃ। ନାଆ ମୂର୍ତିକୋୱାଃ ନାଡ଼େଏ ରେ ଦାଣେ ଏମାକାନ୍ ଜିନିଷ୍ କୋରାଃ ବିଷାୟ୍ ରେ ଆବୁ ସାରିତାନାବୁ ଚି, ଆବୁ ସବେନ୍ କୋକେ ସେଣା ମେନାଃ; ସେଣା ଘାମାଣ୍ଡ୍ କେ ଶିର୍ଜାଅୟାଏ, ମେନ୍ଦୋ ଦୁଲାଡ଼୍ ତେ ଏଟାଃକୋକେ ବାଇଧାଡ଼ିଅଃ ତାନା। ଆଗାର୍ ଜେତାଏ ପାହୋମ୍ ତାନାଏ ଚି ଆଏଃ ଜାହାନାଃ ସାରିତାନାଏ, ଏଣ୍ଡେ ଜେଲେକା ସାରି ଚାହି ଏନ୍ ଲେକା ନାଆ ସାନ୍ତେ କାଏ ସାରିତାନାଏ। ମେନ୍ଦୋ ଜେତାଏ ପାର୍ମେଶ୍ଵାର୍ ଲୋଃ ଦୁଲାଡ଼୍ ମାଣ୍ତାଅତାନାଏ, ଏଣ୍ଡେ ପାର୍ମେଶ୍ଵାର୍ ଇନିଃକେ ସାରିୟାଏ। ମୂର୍ତିକୋୱାଃ ନାଡ଼େଏ ରେ ଦାଣେ ଏମ୍ କାନ୍ ଜିନିଷ୍ କୋରାଃ ଜୋଜୋମ୍ ବିଷାୟ୍ ରେ ଆବୁ ସାରିୟାବୁ ଚି ମୂର୍ତି ଅତେଦିଶୁମ୍ ରେ ଜାହାନିଃ ନାହାଲି, ହାର୍ ମିହୋଡ଼୍ କେ ବାଗିକେତେ ଆଡୋଃ ଜେତାଏ ହ ପାର୍ମେଶ୍ଵାର୍ ନାହାଲି। ସିର୍ମାଦିଶୁମ୍ ରେ ହାର୍ ଅତେ ରେ ଥିମ୍ବାଗି ଇଶ୍ୱାର୍ ହାର୍ ଥିମ୍ବାଗି ପ୍ରାଭୁ ମେନ୍ତେ କାଜିୟୋଃ ତାନାକୋ, ଜେଲେକା ଚି ଥିମ୍ବାଗି ଇଶ୍ୱାର୍ ହାର୍ ଥିମ୍ବାଗି ପ୍ରାଭୁ ମେନାକୋୱା। ଏଣ୍ଡେ ହ ଆବୁୱାଃ ଲାଗିନ୍ ଦୋ ମିହୋଡ଼୍ ଗି ପାର୍ମେଶ୍ଵାର୍ ମେନିଜା: ମାନେ ଆବା ଅକନିଜାଃ ହୋରାତେ ସବେନ୍ ଜିନିଷ୍ ମେନାଃ, ହାର୍ ଆବୁ ଇନିଜାଃ ଲାଗିନ୍ତେଗି ତାନ୍‍ବୁ। ହାର୍ ମିୟାଃଗି ପ୍ରାଭୁ ମେନାଇଜା, ମାନେ ୟୀଶୁ ମାସୀହ୍ ଅକନିଜାଃ ହୋରାତେ ସବେନ୍ ଜିନିଷ୍ କୋ ବାଇକାନା, ହାର୍ ଆବୁ ହ ଇନିଜାଃ ହୋରାତେ ତାନ୍‍ବୁ। ମେନ୍ଦୋ ସବେନ୍ କୋ ନେୟା କାକୋ ସାରିୟା, ମେନ୍ଦୋ ଚିମିନାଙ୍ଗ୍ କୋଦୋ ନାଆ ସାନ୍ ମୂର୍ତିପୂଜା ରେ ଗିନି କାନାକୋ ଏନାରାଃ ଚାଲ୍ତେ ମୂର୍ତିକୋୱାଃ ନାଡ଼େଏ ଦାଣେକାନ୍ ଜିନିଷ୍‍କୋକେ ଗିନିକାନ୍ ଲେକାତେ ପାହୋମ୍ କେତେ ଜୋମ୍ ତାନାକୋ, ହାର୍ ଇନ୍‍କୁୱାଃ ଆଟ୍‍କାର୍ ଉରୁମ୍ ପେଡ଼େଏ ନାରାଦୁରା ହୋରାତେ ଦୋଷିଅଃ ତାନା। ଜୋମେୟାଃ ଆବୁକେ ପାର୍ମେଶ୍ଵାର୍ ରାଃ ନାଡ଼େଏ କାଏ ସେଟେର୍ ବୁତାନାଏ। ଆଗାର୍ ଆବୁ କାବୁ ଜୋମେୟା ଏଣ୍ଡେ ଆବୁୱାଃ ଜେତ୍ନାଃ ହାନି କାହୋବାଅଃୱା, ହାର୍ ଆଗାର୍ ଜୋମେୟାବୁ ଏଣ୍ଡେ ଜେତ୍ନାଃ ଲାଭ୍ ବାନୋଗା। ମେନ୍ଦୋ ହୋସିୟାର୍ ତାଇନ୍‍ପେ! ନେଲେକା ଆଲୋକା ହୋବାଅଃକା, ଚି ଆପେୟାଃ ନେ ରାଡ଼ାକାନ୍ ତେୟାଃ ନାରାଦୁରା ନିଜାଃ ଲାଗିନ୍ତେ ବିଶ୍ଵାସ୍ ବାଗେ ରାଃ କାରାନ୍ ଆଲୋ ବାଇୟୋଃକା। ଚିୟାଃଚି ଆଗାର୍ ଜେତାଏ ଆପେ ସାରିକାନ୍ କୋକେ ମୂର୍ତି ରାଃ ମାନ୍ଦିର୍ ରେ ଜୋମ୍‍ତାନ୍ ନେଲ୍ ରେଦୋ ହାର୍ ଇନିଃ ମୋନ୍ ତେ ନାରାଦୁରା ମେନାଇଜା, ଏଣ୍ଡେ ଚିନାଃ ଇନିଜାଃ ଆଟ୍‍କାର୍ ଉରୁମ୍ ପେଡ଼େଏ ରେ ମୂର୍ତି ରାଃ ନାଡ଼େଏ ଦାଣେକାନ୍ ଜିନିଷ୍ କେ ଜୋମ୍ ଲାଗିନ୍ ସାହାସ୍ କାହୋବାଅଃୱା? ଏନ୍‍ଲେକାତେ ଆପେ ନେୟା ସାରିତାନାପେ ଏନାରାଃ ହୋରାତେ ଏନ୍ ମୋନ୍ ନାରାଦୁରା ହାଗା ଅକନିଜାଃ ଲାଗିନ୍ତେ ମାସୀହ୍ ଗୋଏଃ ଜାନାଏ ଆତ୍ମାନ୍ ପେଡ଼େଏ ତେ ନାଷ୍ଟ୍ କେନୋଗାଏ। ନେଲେକାତେ ହାଗା କୋୱାଃ ବିରୁଦ୍ଧ୍ ରେ ପାପ୍ କେତେ ହାର୍ ଇନ୍‍କୁୱାଃ ନାରାଦୁରା ଆଟ୍‍କାର୍ ପେଡ଼େଏ କେ ଦୁକୁ ଏମ୍ କେତେ ଆପେ ମାସୀହ୍ ରାଃ ବିରୁଦ୍ଧ୍ ରେ ପାପ୍ କାମିତାନାପେ। ଏନାମେନ୍ତେ ଆଗାର୍ ଜୋଜୋମାଃ ଇଙ୍ଗ୍ଆଃ ମାସୀହ୍ ହାଗା କେ ବିଶ୍ଵାସ୍ ବାଗେ ରାଃ କାରାନ୍ ହୋବାଅଃତାନ୍ ରେଦୋ, ଇଙ୍ଗ୍ ଚିଉଲା ହଗି ଜାଲେକାତେ ହ ମାସ୍ କାଇଙ୍ଗ୍ ଜୋମେୟା, ଏନ୍‍କା ଆଲୋକା ହୋବାଅଃକା ଚି ଇଙ୍ଗ୍ ଇଙ୍ଗ୍ଆଃ ହାଗା ରାଃ ବିଶ୍ଵାସ୍ ବାଗେ ରାଃ କାରାନ୍ ବାଇୟୋଗାଇଙ୍ଗ୍। ଇଙ୍ଗ୍ ଚିନାଃ ଥୋଲାକାନିଙ୍ଗ୍? ଇଙ୍ଗ୍ ଚିନାଃ କୁଲାକାନ୍ ଚେଲା ନାହାଲାଇଙ୍ଗ୍? ଇଙ୍ଗ୍ ଚିନାଃ ୟୀଶୁ କେ ଅକନିଃ ଆବୁୱାଃ ପ୍ରାଭୁ ତାନିଃ, କାଇଙ୍ଗ୍ ନେଲାକାଇଜା? ଚିନାଃ ଆପେ ପ୍ରାଭୁ ରେ ଇଙ୍ଗ୍ଆଃ କାମି ରାଃ ଯଅ ନାହାଲାପେ? ଆଗାର୍ ଇଙ୍ଗ୍ ଏଟାଃକୋ ଲାଗିନ୍ କୁଲାକାନ୍ ଚେଲା ନାହାଲିଙ୍ଗ୍, ଏଣ୍ଡେ ହ ଆପେୟାଃ ଲାଗିନ୍ତେ ଦୋ ତାନିଙ୍ଗ୍; ଚିୟାଃଚି ଆପେ ପ୍ରାଭୁ ରେ ଇଙ୍ଗ୍ଆଃ କୁଲାକାନ୍ ଚେଲା କାମି ରାଃ ଛାପ୍ ତାନ୍‍ପେ। ଅକଏ ଇଙ୍ଗ୍‍କେ ସାରିଉରୁମ୍ ସାନାଙ୍ଗ୍ ତାନାକୋ, ଇନ୍‍କୁ ଲାଗିନ୍ତେ ଇଙ୍ଗ୍ଆଃ ନେୟାଗି କାଜିରୁଆଡ଼୍ ତାନାଃ। ଚିନାଃ ବାର୍ନାବାସ୍ ହାର୍ ଇଙ୍ଗ୍‍କେ ଜୋମ୍-ନୁ ରାଃ ଆଧିକାର୍ ବାନୋଃୱା? ଚିନାଃ ଆଲିଙ୍ଗ୍‍କେ ନେୟା ଆଧିକାର୍ ବାନୋଃୱା ଚି, ଜାହାନ୍ ମାସୀହ୍ ମିଶି କେ ଆଣାଦୀ କେତେ ହୋନୋର୍ ବାଡ଼ାୟାଲେ, ଜେଲେକା ଏଟାଃ କୁଲାକାନ୍ ଚେଲାକୋ ହାର୍ ପ୍ରାଭୁ ଆଃ ହାଗାକିନ୍ ହାର୍ କୈଫା ରିକା ତାନାକୋ? ଚି ଇଙ୍ଗ୍‍କେ ହାର୍ ବାର୍ନାବାସ୍ ଆଲିଙ୍ଗ୍ ବାରାନ୍ କିନ୍‍କେ ଭାଇର୍ ଆଧିକାର୍ ବାନୋଃ ଚି ଜୀହିଦୋଃ ନାଙ୍ଗ୍ କାମି କେ କାଲିଙ୍ଗ୍ ବାଗିୟା? ଅକଏ ଚିଉଲା ଆପାନାଃ ଖାର୍ଚା ତେ ସିପାହୀ କାମି-କାମି ତାନାଏ? ଅକଏ ଆଙ୍ଗୁର୍ ବାଖ୍‍ଡ଼ି ରେ କାମି କେତେ ହେଣ୍ତେ ରାଃ ଯଅ କୋକେ କାଏ ଜୋମ୍ ତାନାଏ? ଅକଏ ମିଣ୍ଡୀ କୋକେ ଆସୁଲ୍ କେତେ ଇନ୍‍କୁୱାଃ ତୋୱା କାଏ ନୁୱେୟାଏ? ଚିନାଃ ଇଙ୍ଗ୍ ନେ କାଜିକୋକେ ହୋଡ଼ୋକୋୱାଃ ନିୟାମ୍ ଲେକାତେ ଭାଇର୍ କାଜିତାନିଙ୍ଗ୍? ଚିନାଃ ଆଇନ୍ ହ ନେକା କାଏ କାଜିୟାଏ? ଚିୟାଃଚି ମୁଶା ନାବୀ ରାଃ ଆଇନ୍ ରେ ଅଲାକାନା, “ଦାଉଁରି-ହାର୍ ଇମ୍ତା ଉରିଃ ରାଃ ମୋଚାକେ ଆଲୋପେ ଥୋଲେୟା।” ଚିନାଃ ପାର୍ମେଶ୍ଵାର୍ ଉରିଃ କୋୱାଃ ଭାଇର୍ ଚିନ୍ତା ତାନାଏ? ଚି ବିଶେଷ୍ କେତେ ଆବୁ ଲାଗିନ୍ ଗି କାଜି ତାନାଏ। ହାଁ, ଆବୁୱାଃ ଲାଗିନ୍ତେ ଗି ଅଲାକାନା, ଚିୟାଃଚି ନେୟା ଠାଉକା ତାନାଃ ଚି ଶିୟୁଃ ନିଃ ଆଶ୍ରା ତେ ଶିୟୁଃ ଚାଏ, ହାର୍ ଦାଉଁରି ନିଃ ହାନାଟିଙ୍ଗ୍ ନାମ୍ ଆଶ୍ରା ତେ ଦାଉଁରି କାଏ। ଏନାଲାଗିନ୍ତେ ଚିମ୍ତାଙ୍ଗ୍ ଆଲେ ଆପେୟାଃ ଲାଗିନ୍ତେ ଆତ୍ମାନ୍ ଜିନିଷ୍‍କୋ ହେର୍ କେଦାଲେ, ଦୋ ଚିନାଃ ନେୟା ଜାହାନ୍ ମାରାଙ୍ଗ୍ କାଜି ତାନାଃ ଆଗାର୍ ଆପେୟାଃ ନେ ଅତେଦିଶୁମ୍ ରେୟାଃ ଜିନିଷ୍ କୋକେ ଇରେୟାଲେ? ଚିମ୍ତାଙ୍ଗ୍ ଏଟାଃକୋୱାଃ ଆପେ ଚେତାନ୍ ରେ ଆଧିକାର୍ ମେନାଃ, ଏଣ୍ଡେ ଚିନାଃ ଆଲେୟାଃ ନେୟାତେ ଥିମ୍ବା କାହୋବାଅଃୱା? ମେନ୍ଦୋ ଆଲେ ନେ ଆଧିକାର୍ କାମି ରେ କାଲେ ଆଉକେଦା; ମେନ୍ଦୋ ସବେନାଃ ସାହାତିଙ୍ଗ୍ ତାନାଲେ ଏନାତେ ଆଲେୟାଃ ହୋରାତେ ମାସୀହ୍ ରାଃ ସୁସାମାଚାର୍ ରେ ଜେତାନ୍ ରୋକ୍ ଆଲୋ ହୋବାଅଃକା। ଚିନାଃ ଆପେ କାପେ ସାରିୟା ଚି ଅକନ୍‍କୋ ମାନ୍ଦିର୍ ରେ ସେୱାୟାକୋ ଇନ୍‍କୁ ମାନ୍ଦିର୍ ରେ ରାକାବାକାନ୍ ତେୟାଃତେ ଜୋମେୟାକୋ; ହାର୍ ଅକନ୍ କୋ ବେଦୀ ରାଃ ସେୱା ରେ ଲାଗାଅ କାନୋଗାକୋ, ଇନ୍‍କୁ ବେଦୀ ରେ ରାକାବାକାନ୍ ତେୟାଃତେ ହାନାଟିଙ୍ଗ୍ କୋ ନାମେୟାକୋ? ଏନ୍ ଲେକାଗି ପ୍ରାଭୁ ହ ଆଚୁ କାଦାଏଚି ଅକନ୍ କୋ ସୁସାମାଚାର୍ ପାର୍ଚାର୍ ୟାକୋ, ଇନ୍‍କୁ ସୁସାମାଚାର୍ ତେଗି ଜୀହିଃ ଆସୁଲୋଗାକୋ। ମେନ୍ଦୋ ଇଙ୍ଗ୍ ନେଣ୍ତେ ଏତେ ଜେତ୍ନାଃ କେ କାମି ରେ କାଇଙ୍ଗ୍ ଆଉକେଦା, ହାର୍ ଇଙ୍ଗ୍ ନେ କାଜିକୋ ନେୟାଲାଗିନ୍ତେ କାଇଙ୍ଗ୍ ଅଲ୍ କେଦା ଚି ଇଙ୍ଗ୍ଆଃ ଲାଗିନ୍ତେ ନେକା ରିକାଅଃକା, ଚିୟାଃଚି ଜାହାଁଏ ଇଙ୍ଗ୍ଆଃ ଘାମାଣ୍ଡ୍ କେ ସାମା ବାଇତାଃଏ ଏନାତେଦୋ ଇଙ୍ଗ୍ଆଃ ଗୋଜୋଃ ବୁଗିନାଃ ତାନାଃ। ଆଗାର୍ ଇଙ୍ଗ୍ ସୁସାମାଚାର୍ ପାର୍ଚାର୍ ୟାଇଙ୍ଗ୍, ଏନାରେ ଇଙ୍ଗ୍ଆଃ ଘାମାଣ୍ଡ୍ ରାଃ କାଜି ଜେତ୍ନାଃ ବାନୋଗା, ଚିୟାଃଚି ନେୟାଦୋ ଇଙ୍ଗ୍ଆଃ ନାଙ୍ଗ୍ ଲାଗାତିଙ୍ଗ୍ ତାନାଃ। ଆଗାର୍ ଇଙ୍ଗ୍ ସୁସାମାଚାର୍ ପାର୍ଚାର୍ କାଇଙ୍ଗ୍ ରିକାୟା, ଏଣ୍ଡେ ଦୋ ଇଙ୍ଗ୍ଆଃ ନାଙ୍ଗ୍ ହାୟ୍! ଚିୟାଃଚି ଆଗାର୍ ଇଙ୍ଗ୍ ଇଙ୍ଗ୍ଆଃ ସାନାଙ୍ଗେତେ ନେୟା ରିକାତାନିଙ୍ଗ୍ ଏଣ୍ଡେ ନାଲା ଦୋ ନାମୋଃ ତାନା, ହାର୍ ଆଗାର୍ ଇଙ୍ଗ୍ଆଃ ସାନାଙ୍ଗ୍ ତେ କାଇଙ୍ଗ୍ ରିକାତାନା ଏଣ୍ଡେରେହ ସେୱାକାମି ପାର୍ମେଶ୍ଵାର୍ ପାଡ଼େତେ ଇଙ୍ଗ୍‍କେ ଏମାକାନା। ଏଣ୍ଡେ ଇଙ୍ଗ୍‍କେ ଚିକାନ୍ ନାଲା ନାମୋଃ ତାନା? ନେୟାଗି ଚି ସୁସାମାଚାର୍ ପାର୍ଚାର୍ ରେ ଇଙ୍ଗ୍ ମାସୀହ୍ ରାଃ ସୁସାମାଚାର୍ କେ ସାମାତେଗି ଉଦୁବାକୋୱାଇଙ୍ଗ୍, ଇମିନ୍ ହ କାହା ସୁସାମାଚାର୍ ରେ ଅକନାଃ ଇଙ୍ଗ୍ଆଃ ଆଧିକାର୍ ମେନାଃ ଏନାକେ ହଗି ଇଙ୍ଗ୍ ପୁରାଃତେ କାମି ରେ କାଇଙ୍ଗ୍ ଆଉୱେୟା। ଚିୟାଃଚି ସବେନ୍ କୋଏତେ ରାଡ଼ାକାନ୍ ନିଃ ହୋଡ଼ ତାଇନ୍ ରେହ ଇଙ୍ଗ୍ ଆପାନ୍ କେ ସବେନ୍ କୋୱାଃ ଦାସୀ ବାଇ କାଦିଙ୍ଗ୍, ଏନାତେ ଥିମ୍ବାଗି ହୋଡ଼ୋକୋକେ ଥାଇଃ ଆଉ କୋୱାଇଙ୍ଗ୍। ଇଙ୍ଗ୍ ୟାହୁଦୀକୋ ନାଙ୍ଗ୍ ୟାହୁଦୀ ବାଇଜାନାଇଙ୍ଗ୍ ଏନାତେ ୟାହୁଦୀ ହୋଡ଼ୋକୋକେ ଥାଇଃ ଆଉ କୋୱାଇଙ୍ଗ୍। ଅକନ୍ ହୋଡ଼ୋକୋ ମୁଶା ନାବୀ ରାଃ ଆଇନ୍ ରାଃ ଆଧିନ୍ ରେ ମେନାକୋୱା ଇନ୍‍କୁୱାଃ ଲାଗିନ୍ ଇଙ୍ଗ୍ ମୁଶା ନାବୀ ରାଃ ଆଇନ୍ ରାଃ ଆଧିନ୍ ରେ କାତାଇନ୍ କେତେ ହ ମୁଶା ନାବୀ ରାଃ ଆଇନ୍ ରାଃ ଆଧିନ୍ ହୋବାଜାନାଇଙ୍ଗ୍, ଏନାତେ ଇନ୍‍କୁକେ ଅକନ୍‍କୋ ମୁଶା ନାବୀ ରାଃ ଆଇନ୍ ରାଃ ଆଧିନ୍ ରେ ମେନାକୋୱା, ଥାଇଃ କୋୱାଇଙ୍ଗ୍। ବେଗାର୍ ମୁଶା ନାବୀ ରାଃ ଆଇନ୍ କୋ ନାଙ୍ଗ୍ ଇଙ୍ଗ୍ ପାର୍ମେଶ୍ଵାର୍ ରାଃ ଆଇନ୍ ତେ ଗେନା ବାଙ୍ଗୁଇଙ୍ଗ୍, ମେନ୍ଦୋ ମାସୀହ୍ ରାଃ ଆଇନ୍ ରାଃ ଆଧିନ୍ ରେ ମେନାଇଙ୍ଗ୍, ଇନ୍‍କୁ ନାଙ୍ଗ୍ ବେଗାର୍ ମୁଶା ନାବୀ ରାଃ ଆଇନ୍ ଲେକା ବାଇଜାନାଇଙ୍ଗ୍, ଏନାତେ ବେଗାର୍ ମୁଶା ନାବୀ ରାଃ ଆଇନ୍ ରେ ତାଇନ୍ କୋକେ ଥାଇଃ ଆଉ କୋୱାଇଙ୍ଗ୍। ଇଙ୍ଗ୍ ନାରାଦୁରା କୋନାଙ୍ଗ୍ ନାରାଦୁରା କୋ ଲେକା ବାଇଜାନିଙ୍ଗ୍ ଏନାତେ ନାରାଦୁରା କୋକେ ଥାଇଃ ଆଉକୋୱାଇଙ୍ଗ୍। ଇଙ୍ଗ୍ ସବେନ୍ ହୋଡ଼ୋକୋ ନାଙ୍ଗ୍ ସବେନ୍ ଲେକା ବାଇଜାନିଙ୍ଗ୍ ଏନାତେ ଜାଲେକାତେ ରେହ ଚିମିନ୍ ଧାଡ଼ି ଇମିନ୍ କୋକେ ବାଞ୍ଚାଅ ଧାଡ଼ିକୋୱାଇଙ୍ଗ୍। ଇଙ୍ଗ୍ ନେ ସବେନାଃ ସୁସାମାଚାର୍ ଲାଗିନ୍ତେ ରିକା ତାନିଙ୍ଗ୍ ଏନାତେ ଏଟାଃ କୋଲୋଃ ଏନାରାଃ ଆଶିଷ୍ ହାନାଟିଙ୍ଗ୍ ନାମେୟାଇଙ୍ଗ୍। ଚିନାଃ ଆପେ କାପେ ସାରିୟା ଚି ନୀନିର୍ ପିଡ଼ି ରେଦୋ ସବେନ୍ ଗିକୋ ନିରେୟା, ମେନ୍ଦୋ ଜିତାଅ ରାଃ ଯଅ ମିହୋଡ଼୍ ଗି ନାମେୟାଏ? ଆପେ ଏନ୍ ଲେକାଗି ନିରେପେ ଚି ଜିତାଅଃପେ। ଜାହାନ୍ ଗି ପାହାଲ୍‍ୱାନ୍ ସବେନ୍ ଲେକାତେ ଧାଡ଼ିୟାଏ ମେନ୍ତେ ବ୍ୟାୟାମ୍ ଶିଖାଅଃୱାଏ; ଇନ୍‍କୁ ଦୋ ମିୟାଃ ଗୋସୋ ହୋବାଅଃ ତେୟାଃ ମୁକୁଟ୍ ନାନାମ୍ ଲାଗିନ୍ତେ ନେୟା ସବେନାଃ ରିକା ୟାକୋ, ମେନ୍ଦୋ ଆବୁ ଏନ୍ ମୁକୁଟ୍ ନାମେ ଲାଗିନ୍ତେ ରିକାତାନାବୁ, ଅକନାଃ କାଗୋସୋୱା। ଏନାମେନ୍ତେ ଇଙ୍ଗ୍ ଆହାମ୍ବାଗି ନିର୍ ଲେକା କାଇଙ୍ଗ୍ ନିରେତାନା, ଇଙ୍ଗ୍ ହୋୟୋ କେ ବିଡ଼ା ଲେକା କାଇଙ୍ଗ୍ ବିପିଡ଼ାତାନା। ମେନ୍ଦୋ ଇଙ୍ଗ୍ ଇଙ୍ଗ୍ଆଃ ହୋଡ଼ମୋ କେ ବିଡ଼ାୟାଇଙ୍ଗ୍ ହାର୍ ଦାସୀ ଲେକା ଆଧିନ୍ ରେ ଆଉୟାଇଙ୍ଗ୍, ନେଲେକା ଆଲୋକା ହୋବାୱକା ଚି ଏଟାଃ କୋକେ ପାର୍ଚାର୍ କେତେ, ଇଙ୍ଗ୍ ଇଙ୍ଗ୍ଆଃ ନାଙ୍ଗ୍ ଗି ବେକାମି ବାଇୟୋଗାଇଙ୍ଗ୍। ହେ ହାଗାକୋ, ଇଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା ଚି ଆପେ ନେ କାଜି ରେ କାସାରିକାନ୍ ଲେକା ତାଇନ୍ ପେ ଚି ଆବୁୱାଃ ସବେନ୍ ଆପୁ ହାଡ଼ାମ୍ କୋ ରିମିଲ୍ ରାଃ ଲାଥାର୍ ରେ ତାଇନ୍ କେନାକୋ, ହାର୍ ସବେନ୍ ଜାମାକୋ ସାମୁଦାର୍ ରାଃ ଥାଲା ରେ ଫାରୋମ୍ ଜାନାକୋ। ହାର୍ ସବେନ୍ କୋ ରିମିଲ୍ ଲାଥାର୍ ରେ, ହାର୍ ସାମୁଦାର୍ ରେ, ମୁଶା ରାଃ ବାପ୍ତିସ୍ମା ଇଦିକେଦାକୋ। ହାର୍ ସବେନ୍ କୋ ମିୟାଃଗି ଆତ୍ମାନ୍ ଯୋଜୋମାଃ ଜୋମ୍ କେଦାକୋ। ଆଡୋଃ ସବେନ୍ କୋ ମିୟାଃ ଗି ଆତ୍ମାନ୍ ଦାଆ ନୁ କେଦାକୋ, ଚିୟାଃଚି ଇନ୍‍କୁ ଏନ୍ ଆତ୍ମାନ୍ ସେରେଙ୍ଗ୍ ଏତେ ନୁ ତାଇକେନାକୋ ଅକନିଃ ଇନ୍‍କୁ ଲୋଃ ଗାତି-ଗାତି ସେନ୍ ତାଇନାଏ, ହାର୍ ଏନ୍ ସେରେଙ୍ଗ୍ ମାସୀହ୍ ତାଇକେନାଏ। ମେନ୍ଦୋ ପାର୍ମେଶ୍ଵାର୍ ଇନ୍‍କୁଏତେ ଚିମିନାଙ୍ଗ୍ କୋକେ କାଏ ସୁକୁ ୟାନା, ଏନାମେନ୍ତେ ପାର୍ମେଶ୍ଵାର୍ ଇନ୍‍କୁକେ ସୁନ୍‍ସାନ୍ ଜାଗା ରେ ନାଶ୍ କେଃକୋୱାଏ। ନେ କାଜିକୋ ଆବୁୱାଃ ଲାଗିନ୍ତେ ଜୋନୋକା ତାନାଃ, ଏନାତେ ଚିଲ୍‍କା ଇନ୍‍କୁ ହାୟା ଜାନାକୋ, ଏନ୍‍ଲେକା ଆବୁ ଖାରାପ୍ ଜିନିଷ୍ କୋରାଃ ଆଲୋକାବୁ ହାୟାଅଃକା। ହାର୍ ଆପେ ମୂର୍ତିପୂଜାନିଃ ଆଲୋପେ ବାଇୟୋଃକା; ଜେଲେକା ଚି ଇନ୍‍କୁ ଏତେ ଚିମିନାଙ୍ଗ୍ କୋ ବାଇଲେନାକୋ, ଜେଲେକା ଅଲାକାନା, “ହୋଡ଼ୋକୋ ଜୋମ୍ ନୁ ରେ କୋ ଦୁବ୍ ଜାନା, ଆଡୋଃ ଇନୁଙ୍ଗ୍-ମାଜା ଲାଗିନ୍ତେ ବିରିଃ ଜାନାକୋ।” ଆଡୋଃ ଇନ୍‍କୁ ଲେକା ବ୍ୟାଭିଚାର୍ ଆଲୋକାବୁ ରିକାଏକା; ଜେଲେକା ଇନ୍‍କୁ ଏତେ ଚିମିନାଙ୍ଗ୍ କୋ ରିକା କେଦାକୋ; ହାର୍ ମୁଶିଙ୍ଗ୍ ରେଗି ତେଇଶ୍ ହାଜାର୍ ଗୋଏଃ ଜାନାକୋ। ଆଡୋଃ ଇନ୍‍କୁ ଲେକା ପ୍ରାଭୁ କେ ଆଲୋକାବୁ ପାର୍ଖାୱିୟା, ଜେଲେକା ଇନ୍‍କୁ ଏତେ ଚିମିନାଙ୍ଗ୍ କୋ ରିକାକିଜା, ହାର୍ ବିଙ୍ଗ୍ କୋ ହାବ୍ କେଦାକୋ ଏନାତେ ଗୋଏଃ ଜାନାକୋ। ହାର୍ ଆପେ ଆଲୋପେ କୁର୍ବୁରାଅଃୱା, ଜେଲେକା ଇନ୍‍କୁ ଏତେ ଚିମିନାଙ୍ଗ୍ କୋ କୁର୍ବୁରାଅଃ ଜାନାକୋ ହାର୍ ଗୋଏଃ ନାଙ୍ଗ୍ କୁଲାକାନ୍ ସିର୍ମାଦାସୀ ହୋରାତେ ଗୋଏଃ ରିକା ଜାନାକୋ। ମେନ୍ଦୋ ନେ ସବେନ୍ କାଜିକୋ, ଅକନାଃ ଇନ୍‍କୁୱାଃ ରେ ହୋବାଜାନା, ଜୋନୋକା ଲେକା ତାଇକେନା; ହାର୍ ଏନା ଆବୁକେ ଚେତାୱନୀ ଏମ୍ ଲାଗିନ୍ତେ ଅଲାକାନା ଅକନ୍‍କୋ ଅତେଦିଶୁମ୍ ରାଃ ଆଖ୍ରୀ ସାମାୟ୍ ରେ ତାଇନ୍ ତାନାବୁ। ଏନାଲାଗିନ୍ତେ ଅକଏ ବୁଝାଅନ୍ ତାନାଏ ଚି, “ଇଙ୍ଗ୍ କେଟେଃ ତେ ତିଙ୍ଗୁ କାନିଙ୍ଗ୍,” ଇନିଃ ହୋସିୟାର୍ ତେ ତାଇନ୍ କାଏ କାରେଦୋ ଉୟୁଗୋଃୱାଏ। ଆପେ ଜାହାନ୍ ଏନ୍ ଲେକାନ୍ ପାରୀକ୍ଷା ରେ କାପେ ଉୟୁକାନା, ଅକନାଃ ହୋଡ଼ ରାଃ ସାହାତିଙ୍ଗ୍ ତେ ବାହ୍‍ରେ ତାନାଃ। ପାର୍ମେଶ୍ଵାର୍ ବିଶ୍ଵାସେ ଲେକାନିଃ ତାନିଃ ଆଡୋଃ ଇନିଃ ଆପେକେ ପେଡ଼େଏ ତେ ବାହାରି ପାରୀକ୍ଷା ରେ କାଏ ଉୟୁଃ ଇଚାପେୟାଏ, ମେନ୍ଦୋ ପାରୀକ୍ଷା ଏତେ ଅଡୋଙ୍ଗ୍ ପେୟାଏ ଚି ଆପେ ସାହାତିଙ୍ଗ୍ ଧାଡ଼ିୟାପେ। ଏନାଲାଗିନ୍ତେ, ହେ ଇଙ୍ଗ୍ଆଃ ଦୁଲାଡ଼୍ କୋ, ମୂର୍ତିପୂଜା ତେ ବାଚାଓ କାନ୍ ତାଇନ୍‍ପେ। ଇଙ୍ଗ୍ ଆପେକେ ସେଣାନ୍ ସାରିକେତେ କାଜିପେତାନିଙ୍ଗ୍, ଅକନାଃ ଇଙ୍ଗ୍ କାଜିତାନିଙ୍ଗ୍ ଏନାକେ ପାର୍ଖାଏପେ। ଏନ୍ ଧାନ୍ୟାବାଦ୍ ରାଃ ଗିଲାସ୍, ଅକନାଃ ରେ ଆବୁ ଧାନ୍ୟାବାଦ୍ ତାନାବୁ, ଚିନାଃ ଏନାରେ ମାସୀହ୍ ରାଃ ମାୟୋମ୍ କେ କାବୁ ହାଟିଙ୍ଗ୍ଅଃ ତାନା? ଏନ୍ ହୋଲୋଙ୍ଗ୍ ଅକନାଃ ଆବୁ କେଚାଃ ତାନାବୁ, ଚିନାଃ ଏନା ମାସୀହ୍ ରାଃ ହୋଡ଼ମୋ କେ କାବୁ ହାଟିଙ୍ଗ୍ଅଃ ତାନା? ଚିୟାଃଚି ମିୟାଃ ଗି ହୋଲୋଙ୍ଗ୍ ମେନାଃ ଏନ୍ତେ ଆବୁ ଅକନ୍ କୋ ଥିମ୍ବାଗି ମେନାବୁୱା, ମିୟାଃ ଗି ହୋଡ଼ମୋ ତାନ୍‍ବୁ, ଚିୟାଃଚି ଆବୁ ସବେନ୍ କୋ ଏନ୍ ମିୟାଃଗି ହୋଲୋଙ୍ଗ୍ କେ ହାଟିଙ୍ଗ୍ଅଃ ତାନାବୁ। ଅକନ୍ କୋ ଇସ୍ରାଏଲୀ ହୋଡ଼ୋକୋ ତାନ୍‍କୋ, ଇନ୍‍କୁକେ ନେଲ୍ କୋପେ: ଚିନାଃ ବେଦୀ ରେ ଦାଣେକାନ୍ ତେୟାଃକେ ଜୋମେତାନ୍ କୋ କାକୋ ହାଟିଙ୍ଗ୍ଅଃ ତାନାଃ। ଦୋ ଇଙ୍ଗ୍ ଚିନାଃ କାଜିତାନିଙ୍ଗ୍? ଚିନାଃ ମୂର୍ତିକୋ ଲାଗିନ୍ ରାକାବାକାନ୍ ଦାଣେକାନ୍ ଜେତ୍ନାଃ ତାନାଃ? ଚି ମୂର୍ତି ଜେତ୍ନାଃ ତାନିଃ? କାହା, ମେନ୍ଦୋ ନେୟା ଚି ଏଟାଃଜାତିକୋ ଅକନ୍ କୋ ଦାଣେ ରାକାବ୍ ତାନାକୋ; ଏନା ପାର୍ମେଶ୍ଵାର୍ ନାଙ୍ଗ୍ କାହା ମେନ୍ଦୋ ବୋଙ୍ଗାଆତ୍ମା କୋ ନାଙ୍ଗ୍ ଦାଣେତାନାକୋ ହାର୍ ଇଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା ଚି ଆପେ ବୋଙ୍ଗାଆତ୍ମା କୋଲୋଃ ମେଶାନ୍ ପେ। ଆପେ ପ୍ରାଭୁ ଆଃ ଗିଲାସ୍ ହାର୍ ବୋଙ୍ଗାଆତ୍ମା କୋୱାଃ ଗିଲାସ୍ ବାରାନାଃ ଏତେ କାପେ ନୁଧାଡ଼ିୟା। ଆପେ ପ୍ରାଭୁ ଆଃ ଟେବୁଲ୍ ହାର୍ ବୋଙ୍ଗାଆତ୍ମା କୋୱାଃ ଟେବୁଲ୍ ବାରାନାଃ ରେ କାପେ ଜୋମ୍ ଧାଡ଼ିୟା। ଚିନାଃ ଆବୁ ପ୍ରାଭୁ କେ ଖିସ୍ ଇଚାଇ ତାନାବୁ? ଚିନାଃ ଆବୁ ଆଏଜେତେ ପେଡ଼େଜାନ୍ ତାନ୍‍ବୁ? ସବେନ୍ ଜିନିଷ୍ କୋ ଇଙ୍ଗ୍ଆଃ ନାଙ୍ଗ୍ ଦୋ ଠିକ୍ ତାନାଃ, ମେନ୍ଦୋ ସବେନାଃ ତେ ଲାଭ୍ ବାନୋଗା: ସବେନ୍ ଜିନିଷ୍ କୋ ଇଙ୍ଗ୍ଆଃ ନାଙ୍ଗ୍ ଦୋ ଠିକ୍ ତାନାଃ, ମେନ୍ଦୋ ସବେନ୍ ଜିନିଷ୍ କୋଏତେ ଇଙ୍ଗ୍ କାଇଙ୍ଗ୍ ବାଇଧାଡ଼ିଅଃୱା। ଜେତାଏ ଆପାନାଃଗି ବୁଗିନାଃ କେ ଭାଇର୍ କାହା ମେନ୍ଦୋ ଏଟାଃ କୋୱା ବୁଗିନାଃ କେ ନେଲେକାଏ। ଅକନାଃକୋ ମାସ୍ ଗେଃ ହୋଡ଼ୋକୋତାଃ ଆଖ୍ରିଙ୍ଗ୍ଅଃ ତାନା, ଏନା ଜୋମେପେ ହାର୍ ଆପେୟାଃ ଆଟ୍‍କାର୍-ଉରୁମ୍ ଧାଡ଼ି ସେଣା ଲେକାତେ ଜେତ୍ନାଃ ଆଲୋପେ କୁଲିୟା? “ଚିୟାଃଚି ଅତେ ହାର୍ ଏଣ୍ଡେ ରାଃ ଫେରେଜାକାନ୍ ତେୟାଃ ସବେନାଃ ପ୍ରାଭୁ ଆଃ ତାନାଃ।” ଆଗାର୍ କାବିଶ୍ଵାସ୍ ତାନ୍‍କୋ ଏତେ ଜେତାଏ ଆପେକେ ନେୱତା ପେରେ, ହାର୍ ଆପେ ପେ ସେନ୍ ସାନାଙ୍ଗ୍ ତାନ୍ ରେଦୋ, ଅକନାଃକୋ ଆପେୟାଃ ଆୟୁର୍ ରେ କୋ ମାଣ୍ଡାଅୟା ଏନାଗି ଜୋମେପେ; ହାର୍ ଆଟ୍‍କାର୍-ଉରୁମ୍ ଧାଡ଼ି ସେଣା ଲେକାତେ ଜାହାନାଃ ଆଲୋପେ କୁଲିୟା। ମେନ୍ଦୋ ଆଗାର୍ ଆପେ କୋଏତେ ଜେତାଏ କାଜିପେରେ, “ନେୟା ଦୋ ମୁର୍ତ୍ତି କେ ଦାଣେକାନ୍ ଜୋମେୟାଃ ତାନାଃ,” ଦୋ ଇନିଜାଃ ଏନ୍ ଉଦୁବ୍ ରାଃ ହୋରାତେ ହାର୍ ଆଟ୍‍କାର୍-ଉରୁମ୍ ଧାଡ଼ି ସେଣା ରାଃ ହୋରାତେ ଆଲୋପେ ଜୋମେୟା। ଇଙ୍ଗ୍ଆଃ କାଜି ରାଃ ମାନେ ଆପେୟାଃ ଆଟ୍‍କାର୍-ଉରୁମ୍ ଧାଡ଼ି ସେଣା ନାଙ୍ଗ୍ କାହା, ମେନ୍ଦୋ ଏନ୍ ଏଟାଃ ନିଜାଃ ନାଙ୍ଗ୍। ଚିୟାଃଚି ଇଙ୍ଗ୍ କାଇଙ୍ଗ୍ ଥୋଲାକାନା ଏନାକେ ଏଟାଃ କୋୱା ଆଟ୍‍କାର୍-ଉରୁମ୍ ଧାଡ଼ି ସେଣା ତେ ଚିନାଃ ମେନ୍ତେ ବିଚାର୍ ଅଗାଇଙ୍ଗ୍? ଆଗାର୍ ଇଙ୍ଗ୍ ଧାନ୍ୟାବାଦ୍ କେତେ ଏନ୍ ଯୋଜୋମାଃ କେ ଜୋମ୍ ତାନିଙ୍ଗ୍, ଏଣ୍ଡେ ଅକନାଃକେ ଇଙ୍ଗ୍ ଧାନ୍ୟାବାଦ୍ ତାନିଙ୍ଗ୍ ଏନା ଲାଗିନ୍ତେ ଇଙ୍ଗ୍ଆଃ ବାଦ୍‍ନାମ୍ ଚିନାଃ ମେନେଃ ହୋବାଅଃୱା? ଏନାମେନ୍ତେ ଆପେ ଜୋମେପେ ଚାହେ ନୁୱେପେ, ଚାହେ ଜାହାନାଃଗି ରିକାଏପେ, ସବେନାଃ ପାର୍ମେଶ୍ଵାର୍ ରାଃ ମାନାରାଙ୍ଗ୍ ନାଙ୍ଗ୍ ରିକାୟାପେ। ଆପେ ଜେତାୟାଃ ବିଶ୍ଵାସ୍ ବାଗେ ରାଃ କାରାନ୍ ଆଲୋପେ ବାଇୟୋଃୱା ୟାହୁଦୀକୋ ନାଙ୍ଗ୍ କାହା, ୟୁନାନୀ ହୋଡ଼ୋକୋ ନାଙ୍ଗ୍ କାହା ହାର୍ ପାର୍ମେଶ୍ଵାର୍ ରାଃ କାଲିସିୟା ନାଙ୍ଗ୍ ହ କାହା। ଜେଲେକା ଇଙ୍ଗ୍ ହଗି ସବେନ୍ କାଜିକୋରେ ସବେନ୍ କୋକେ ସୁକୁ ମାଣ୍ଡାଅ କୋୱାଇଙ୍ଗ୍, ହାର୍ ଇଙ୍ଗ୍ଆଃ କାହା ମେନ୍ଦୋ ଥିମ୍ବାଗି ହୋଡ଼ୋକୋୱାଃ ଲାଭ୍ ଦାଣା ତାନିଙ୍ଗ୍ ଏନାତେ ଇନ୍‍କୁ ବାଞ୍ଚାଅ ନାମେକାକୋ। ଆପେ ଇଙ୍ଗ୍ଆଃ ଲେକା ସେସେନ୍ ଏପେ ଜେଲେକା ଇଙ୍ଗ୍ ମାସୀହ୍ କେ ଅତୋଙ୍ଗି ତାନିଙ୍ଗ୍। ହେ ହାଗାକୋ, ଇଙ୍ଗ୍ ଆପେକେ ସାହାରାଅ ପେତାନିଙ୍ଗ୍ ଏନାମେନ୍ତେ ଚି ଆପେ ସବେନ୍ କାଜିକୋରେ ଇଙ୍ଗ୍‍କେ ପାହୋମିଙ୍ଗ୍ ତାନାପେ; ହାର୍ ଅକନ୍ କାଜିକୋ ଇଙ୍ଗ୍ ଆପେ କେ ଜିମାକାଃ ପେୟାଇଙ୍ଗ୍, ଏନାକୋକେ ମାନାତିଙ୍ଗ୍ ତାନାପେ। ମେନ୍ଦୋ ଇଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି ଆପେ ନେୟା ସାରିକେପେ, ଚି ସବେନ୍ କଡ଼ା ରାଃ ବୋଅ ମାସୀହ୍ ତାନିଃ, ହାର୍ କୁଡ଼ି ରାଃ ବୋଅ ଆଜାଃ ଆଣାଦୀକାନ୍ କଡ଼ା ତାନିଃ, ଆଡୋଃ ମାସୀହ୍ ରାଃ ବୋଅ ପାର୍ମେଶ୍ଵାର୍ ତାନିଃ। ଅକନ୍ କଡ଼ା ବୋଅ ହାରୁବ୍ କେତେ ବିନ୍ତି ୟାଏ ଚାହେ ଆୟାର୍‍କାଜି କାଜିୟାଏ, ଇନିଃ ଆଜାଃ ବୋଅ ରାଃ ଆପ୍‍ମାନ୍ ତାନାଏ। ମେନ୍ଦୋ ଅକନ୍ କୁଡ଼ି ଆଜାଃ ବୋଅ କେ ବେଗାର୍ ଗୁଗୁଲୁ କେତେ ବିନ୍ତି ୟାଏ ଚାହେ ଆୟାର୍‍କାଜି କାଜିୟାଏ, ଇନିଃ ଆଜାଃ ବୋଅ ରାଃ ଆପ୍‍ମାନ୍ ତାନାଏ, ଚିୟାଃଚି ଇନିଃ ମୁଣ୍ତ୍ରି କାନ୍ ଲେକା ବାରାବାରି ତାନିଃ। ଆଗାର୍ କୁଡ଼ି ଆଜାଃ ବୋଅ କେ କାଏ ଗୁଗୁଲୁନ୍ ତାନାଏ ରେଦୋ ଉବ୍ କେ ହଗି ହାଦେନ୍ କାଏ; ଆଗାର କୁଡ଼ି ନାଙ୍ଗ୍ ଉବ୍ ହାଦେନ୍ ଚାହେ ମୁଣ୍ତ୍ରି ହୋବାଅଃ ଗିୟୁଃ ରାଃ କାଜି ତାନାଃ, ଏଣ୍ଡେ ଗୁଗୁଲୁନ୍ କାଏ। ହାଁ, କଡ଼ାକୋକେ ଆପାନାଃ ବୋଅ ଗୁଗୁଲୁନ୍ ଠାଉକା ନାହାଲା, ଚିୟାଃଚି ଇନିଃ ପାର୍ମେଶ୍ଵାର୍ ରାଃ ଲେକା ହାର୍ ମାନାରାଙ୍ଗ୍ ତାନିଃ, ମେନ୍ଦୋ କୁଡ଼ି କଡ଼ା ରାଃ ମାନାରାଙ୍ଗ୍ ତାନିଃ। ଚିୟାଃଚି କଡ଼ା କୁଡ଼ି ଏତେ କାଏ ହୋବାକାନାଏ, ମେନ୍ଦୋ କୁଡ଼ି କଡ଼ା ଏତେ ହୋବାକାନାଏ। ଆଡୋଃ କଡ଼ା କୁଡ଼ି ଲାଗିନ୍ କାଏ ବାଇକାନାଏ, ମେନ୍ଦୋ କୁଡ଼ି କଡ଼ା ଲାଗିନ୍ତେ ବାଇକାନାଏ। ଏନାମେନ୍ତେ ସିର୍ମାଦାସୀ କୋୱାଃ ଲାଗିନ୍ତେ କୁଡ଼ି କେ ଠାଉକା ତାନାଃ ଚି ଆଧିକାର୍ ରାଃ ଚିହ୍ନା ଆପାନାଃ ବୋଅ ରେ ମାଣ୍ଡାଅକାକୋ। ଏଣ୍ଡେରେ ହଗି ପ୍ରାଭୁ ରେ ନାଦୋ କୁଡ଼ି ବେଗାର୍ କଡ଼ା ହାର୍ ନାଦୋ କଡ଼ା ବେଗାର୍ କୁଡ଼ି ରେ ମେନାଇଜା। ଚିୟାଃଚି ଜେଲେକା କୁଡ଼ି କଡ଼ା ଏତେ ବାଇକାନାଏ, ଏନ୍‍ଲେକାଗି କଡ଼ା କୁଡ଼ି ଏତେ ଜାନାମ୍ କାନାଏ; ମେନ୍ଦୋ ସବେନ୍ ଜିନିଷ୍‍କୋ ପାର୍ମେଶ୍ଵାର୍ ଏତେ ବାଇକାନା। ଆପେ-ଆପେ ଗି ବିଚାର୍ ରିକାଏପେ, ଚିନାଃ କୁଡ଼ି କେ ବେଗାର୍ ବୋଅ ହାରୁବ୍ କେତେ ପାର୍ମେଶ୍ଵାର୍ କେ ବିନ୍ତି ଲାଗିନ୍ ଶୋଭା ନେଲୋଗା? ଚିନାଃ ଜାତି ଲେକାତେଗି ଆପେ କାପେ ସାରିତାନା ଚି ଆଗାର୍ କଡ଼ା ଜିଲିଙ୍ଗ୍ ଉବ୍ ମାଣ୍ତାଅତାନ୍ ରେଦୋ, ଇନିଜାଃ ଲାଗିନ୍ତେ ଗିୟୁଃ ରାଃ କାଜି ତାନାଃ। ମେନ୍ଦୋ ଆଗାର୍ କୁଡ଼ି ଜିଲିଙ୍ଗ୍ ଉବ୍ ମାଣ୍ତାଅତାନାଏ ଏଣ୍ଡେଦୋ ଇନିଜାଃ ଲାଗିନ୍ତେ ସୋଭା ତାନାଃ, ଚିୟାଃଚି ଉବ୍ ଇନିଃକେ ଦାଲୋବେନ୍ ଲାଗିନ୍ତେ ଏମାକାନା। ମେନ୍ଦୋ ଆଗାର୍ ଜେତାଏ ନେ କାଜି ରେ କାଏ ରାଜିୟୋଃ ସାନାଙ୍ଗ୍ ତାନ୍ ରେଦୋ, ନେୟା ସାରିଲେକାଏ ଚି ଆବୁୱାଃ ହାର୍ ନା ପାର୍ମେଶ୍ଵାର୍ ରାଃ କାଲିସିୟା କୋରାଃ ନେକା ନିୟାମ୍ ମେନାଃ। ମେନ୍ଦୋ ନେଲେକା ଆନାଚୁ ଏମ୍ ତାନ୍ ଲୋଃ ଇଙ୍ଗ୍ ଆପେକେ କାଇଙ୍ଗ୍ ସାହାରାଅ ପେତାନା, ଏନାଲାଗିନ୍ତେ ଚି ଆପେୟାଃ ହୁଣ୍ଡିଏନ୍ ତେ ବୁଗିନାଃ କାହା, ମେନ୍ଦୋ କାଠାଉକାଅଃ ତାନା। ଚିୟାଃଚି ସିଦା ତେଦୋ ଇଙ୍ଗ୍ ନେୟାଇଙ୍ଗ୍ ଆୟୁମ୍ ତାନା ଚି, ଚିମ୍ତାଙ୍ଗ୍ ଆପେ କାଲିସିୟା ରେ ହୁଣ୍ଡିନ୍ ତାନାପେ ଦୋ ଆପେ ଥାଲାରେ ହାଟିଙ୍ଗ୍ଅଃ ତାନାପେ, ହାର୍ ଇଙ୍ଗ୍ ନେୟା ରେ ଚିମିନ୍ ସାନ୍ ଦୋ ବିଶ୍ଵାସ୍ ତାନାଇଙ୍ଗ୍। ଚିୟାଃଚି ଆପେ ଥାଲା ରେ ହାଟିଙ୍ଗ୍ଅଃ ଦୋ ଜାଲେକାତେ ମେନାଃ, ଚିୟାଃଚି ଏନାତେ ଅକନ୍ ହୋଡ଼ୋକୋ ଆପେ ଥାଲା ରେ ପୋକ୍ତାକାନାକୋ ଇନ୍‍କୁ ନେଲ୍ ଉରୁମୋଃୱାକୋ। ଏନାତେ ଚିମ୍ତାଙ୍ଗ୍ ଆପେ ମିଃତାଃ ହୁଣ୍ଡିଅଃ ତାନାପେ ଦୋ ଏନା ପ୍ରାଭୁଭୋଜ୍ ଜୋମେ ଲାଗିନ୍ତେ କାହା। ଚିୟାଃଚି ଜୋମ୍ ଇମ୍ତା ମିହୋଡ଼୍ ଏଟାଃ ନିଈ ତେ ସିଦା ରେ ଆପାନାଃ ଯୋଜୋମାଃ ଜୋମ୍ କେୟାଏ, ନେଲେକାତେ ଦୋ ଅକଏ ରେଙ୍ଗେଃ ତାଇନ୍ କୋଃତାନାଏ ହାର୍ ଅକଏ ବୁଲ୍ କେନୋଃ ତାନାଏ। ଚିନାଃ ଜୋମ୍ ନୁ ଲାଗିନ୍ ଆପେୟାଃ ଅଡ଼୍ଆଃ ବାନୋଗା? ଚି ଆପେ ପାର୍ମେଶ୍ଵାର୍ ରାଃ କାଲିସିୟା କେ ହିଲାଙ୍ଗ୍ ତାନାପେ, ଆଡୋଃ ଅକଏ ତାଃ ରେ ବାନୋଗା ଇନିଃକେ ଗିୟୁଃ ରିକାୟି ତାନାପେ? ଇଙ୍ଗ୍ ଆପେକେ ଚିନାଃ କାଜିପେୟାଇଙ୍ଗ୍? ଚିନାଃ ନେ କାଜି ରେ ଆପେକେ ସାହାରାଅ ପେୟାଇଙ୍ଗ୍? କାହା କାଇଙ୍ଗ୍ ସାହାରାଅ ପେୟା। ଚିୟାଃଚି ନେ କାଜି ଇଙ୍ଗ୍ ପ୍ରାଭୁ ପାଡ଼େତେ ନାମ୍ କାଦିଙ୍ଗ୍, ହାର୍ ଇଙ୍ଗ୍ ଆପେ କେହ ଏମାପେତାନିଙ୍ଗ୍ ଚି ପ୍ରାଭୁ ୟୀଶୁ ଅକନ୍ ନିଦା ଇନିଃ ସାବ୍ ଜାନାଏ, ହୋଲୋଙ୍ଗ୍ ସାବ୍ କେଦାଏ, ହାର୍ ଧାନ୍ୟାବାଦ୍ କେତେ ଏନାକେ କେଚାଃ କେଦାଏ ହାର୍ କାଜିକେଦାଏ, “ନେୟା ଇଙ୍ଗ୍ଆଃ ହୋଡ଼ମୋ ତାନାଃ, ଅକନାଃ ଆପେୟାଃ ଲାଗିନ୍ ତାନାଃ, ଇଙ୍ଗ୍‍କେ ପାହୋମ୍ ଲାଗିନ୍ତେ ନେୟାଗି ରିକାଏପେ।” ଏନ୍‍ଲେକାଗି ଇନିଃ ଜୋମେୟାଃ ତାୟୋମ୍ତେ ଗିଲାସ୍ ହଗି ସାବ୍ କେଦାଏ ହାର୍ କାଜିକେଦାଏ, “ନେ ଗିଲାସ୍ ଇଙ୍ଗ୍ଆଃ ମାୟୋମ୍ ରେ ନାୱା ନିୟାମ୍‍ଥଲ୍ ତାନାଃ; ଜାହୁଲାଙ୍ଗ୍ ହ ଆପେ ନୁୱେୟାପେ, ଦୋ ଇଙ୍ଗ୍‍କେ ପାହୋମ୍ ଲାଗିନ୍ତେ ନେୟାଗି ରିକାଏପେ।” ଚିୟାଃଚି ଜାହୁଲାଙ୍ଗ୍ ଗି ଆପେ ନେ ହୋଲୋଙ୍ଗ୍ ଜୋମ୍ ତାନାପେ ଆଡୋଃ ନେ ଗିଲାସ୍ ଏତେ ନୁୱେ ତାନାପେ, ଦୋ ପ୍ରାଭୁ ଆଃ ଗୋନୋଏଃ କେ ଅକନ୍ ସାନ୍ତେ ଇନିଃ କାଏ ହିଜୁଃତାନାଏ, ପାର୍ଚାର୍ ତାନାପେ। ଏନାଲାଗିନ୍ତେ ଅକଏ ବେଗାର୍-ଠାଉକା ଲେକାତେ ପ୍ରାଭୁ ଆଃ ହୋଲୋଙ୍ଗ୍ ଜୋମେୟା, ୟାଦୋ ଇନିଜାଃ ଗିଲାସ୍ ଏତେ ନୁୱେୟା, ଇନିଃ ପ୍ରାଭୁ ଆଃ ହୋଡ଼ମୋ ରାଃ ହାର୍ ମାୟୋମ୍ ରାଃ ଦୋଷୀ ବାଇୟୋଃୱାଏ। ଏନାମେନ୍ତେ ହୋଡ଼ ଆଏଃ ଆପାନ୍ କେ ଜାଞ୍ଚ୍ ଏକାଏ ହାର୍ ଏନ୍ ଲେକାତେ ନେ ହୋଲୋଙ୍ଗ୍ ଏତେ ଜୋମେକାଏ, ଆଡୋଃ ନେ ଗିଲାସ୍ ଏତେ ନୁୱେକାଏ। ଚିୟାଃଚି ଅକଏ ଜୋମେ ନୁୱେ ଇମ୍ତା ପ୍ରାଭୁ ଆଃ ହୋଡ଼ମୋ କେ କାଏ ନେଲ୍ ଉରୁମେୟାଏ, ଇନିଃ ନେ ଜୋମ୍ ଆଡୋଃ ନୁୱେ ତେ ଆପାନାଃ ଚେତାନ୍ ରେ ଦାଣ୍ଡ୍ ଆଉତାନାଏ। ଏନାମେନ୍ତେ ଗି ଆପେ ଥାଲା ରେ ଚିମିନାଙ୍ଗ୍ କୋ ନାରାଦୁରା ହାର୍ ବେମାର୍ ମେନାକୋୱା, ଆଡୋଃ ଚିମିନାଙ୍ଗ୍ କୋ ଦୋ ଗୋଏଃ ଜାନାକୋ। ଆଗାର୍ ଆବୁ ଆପାନ୍ କେ ଜାଞ୍ଚ୍ ତେବୁ ଏଣ୍ଡେ ଦାଣ୍ଡ୍ କାବୁ ନାମେତେ। ମେନ୍ଦୋ ପ୍ରାଭୁ ଆବୁକେ ଦାଣ୍ଡ୍ ଏମ୍ କେତେ ସୁଧ୍‍ରାଓବୁ ତାନାଏ, ଏନାମେନ୍ତେ ଚି ଆବୁ ଅତେଦିଶୁମ୍ ଲୋଃ ଦୋଷୀ କାବୁ ହୋବାଅଃୱା। ଏନାଲାଗିନ୍ତେ, ହେ ଇଙ୍ଗ୍ଆଃ ହାଗାକୋ, ଚିମ୍ତାଙ୍ଗ୍ ଆପେ ଜୋମେ ଲାଗିନ୍ତେ ହୁଣ୍ଡିଏନ୍ ତାନାପେ ଦୋ ମିହୋଡ଼୍ ଏଟାଃନିଜାଃ ନାଙ୍ଗ୍ ହୋରୋ ଏପେ ଏନାତେ ମିଃତେ ଜୋମ୍ ଧାଡ଼ିୟାପେ। ଆଗାର୍ ଜେତାଏ ରେଙ୍ଗେଃ ମେନାଇଃ ରେଦୋ ଆଜାଃ ଅଡ଼୍ଆଃ ରେ ଜୋମେକାଏ, ଏନାତେ ଆପେୟାଃ ହୁଣ୍ତିଏନ୍ ତେୟାଃ ଦାଣ୍ଡ୍ ରାଃ କାରାନ୍ ଆଲୋକା ହୋବାଅଃକା। ଆଡୋଃ ସାରେଜାକାନ୍ କାଜିକୋକେ ଇଙ୍ଗ୍ ହିଜୁଃକେତେ ଆଚୁ ପେୟାଇଙ୍ଗ୍। ହେ ହାଗାକୋ, ଇଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା ଚି ଆପେ ଆତ୍ମାନ୍ ବାର୍ଦାନ୍ କୋରାଃ ବିଷାୟ୍ ରେ କାସାରିକାନ୍ ତାଇନୋଃପେ। ଆପେ ସାରିୟାପେ ଚି ଚିମ୍ତାଙ୍ଗ୍ ଆପେ ଏଟାଃଜାତି ତାଇକେନାପେ, ଇମ୍ତା କୋକା ମୂର୍ତିକୋୱାଃ ଦୋୟା ରେ ଜେଲେକା ସେସେନ୍ କାଜି ତାଇକେନାକୋ ଏନ୍‍ଲେକାଗି ସେସେନ୍ ତାଇକେନାପେ। ଏନାମେନ୍ତେ ଇଙ୍ଗ୍ ଆପେକେ ଚେତାୱନୀ ଏମାପେତାନିଙ୍ଗ୍ ଚି ଜେତାଏ ପାର୍ମେଶ୍ଵାର୍ ରାଃ ଆତ୍ମା ରାଃ ଆୟାର୍ ତେ କାଜିୟାଏ, ଇନିଃ କାଏ କାଜିଧାଡ଼ିୟା ଚି ୟୀଶୁ ସାର୍ପାଅଃ କାଏ, ଆଡୋଃ ଜେତାଏ ପାବିତାର୍ ଆତ୍ମା ରାଃ ବେଗାର୍ କାଜି ହଗି କାଏ ଧାଡ଼ିୟାଏ ଚି ୟୀଶୁ ପ୍ରାଭୁ ତାନିଃ। ବାର୍ଦାନ୍ ଦୋ ରାକାମ୍ ରାଃ ମେନାଃ, ମେନ୍ଦୋ ଆତ୍ମା ମିହୋଡ଼୍ ଗି ତାନିଃ; ହାର୍ ସେୱା-କାମି ହଗି ରାକାମ୍ ମେନାଃ ମେନ୍ଦୋ ପ୍ରାଭୁ ମିହୋଡ଼୍ ଗି ତାନିଃ; ହାର୍ ପେଡ଼େଏ ରାଃ କାମି ରାକାମ୍ ରାଃ ମେନାଃ, ମେନ୍ଦୋ ପାର୍ମେଶ୍ଵାର୍ ମିହୋଡ଼୍ ଗି ତାନିଃ, ଅକନିଃ ସବେନାଃ ରେ ସବେନ୍ ରାକାମ୍ ରାଃ କାମି ନାଙ୍ଗ୍ ପେଡ଼େଏ ଏମ୍ ତାନାଏ। ମେନ୍ଦୋ ସବେନ୍ କୋୱାଃ ବୁଗିନାଃ ଲାଗିନ୍ତେ ସବେନ୍ ମିପୀହୋଡ଼୍ କେ ଆତ୍ମା ରାଃ ହୋରାତେ ଉଦୁବୋଃ ତାନା। ଚିୟାଃଚି ମିହୋଡ଼୍ କେ ଆତ୍ମା ରାଃ ହୋରାତେ ସେଣା ରାଃ କାଜିକୋ ଏମୋଃତାନା, ହାର୍ ଏଟାଃନିଃକେ ଏନ୍ ଆତ୍ମା ରାଃ ହୋରାତେଗି ଆଟ୍‍କାର୍-ଉରୁମ୍ କାଜିକୋ ଏମୋଃତାନା। ଏଟାଃନିଃକେ ଏନ୍ ଆତ୍ମା ରାଃ ହୋରାତେଗି ବିଶ୍ଵାସ୍ ରାଃ, ଆଡୋଃ ଏଟାଃନିଃକେ ଏନ୍ ମିହୋଡ଼୍ ଗି ଆତ୍ମା ରାଃ ହୋରାତେ ବେଶ୍ ରିକା ରାଃ ବାର୍ଦାନ୍ ଏମୋଃତାନା। ଆଡୋଃ ଏଟାଃନିଃକେ ଆକ୍‍ଦାନ୍ଦା କାମି ନାଙ୍ଗ୍ ପେଡ଼େଏ, ଆଡୋଃ ଏଟାଃନିଃକେ ଆୟାର୍‍କାଜି କେ ଉଦୁବ୍ ରାଃ, ଆଡୋଃ ଏଟାଃନିଃକେ ଆତ୍ମା କୋକେ ସାରିଉରୁମ୍ ରାଃ, ଆଡୋଃ ଏଟାଃନିଃକେ ରାକାମ୍ ରାଃ ଭାଷା କାଜି ରାଃ, ଆଡୋଃ ଏଟାଃନିଃକେ ଭାଷା କୋରାଃ ମାନେ କେ ଉଦୁବ୍ ଧାଡ଼ି ରାଃ ପେଡ଼େଏ। ମେନ୍ଦୋ ନେ ସବେନ୍ ପେଡ଼େଏ ରାଃ କାମିକୋ ଏନ୍ ମିହୋଡ଼୍ ଗି ଆତ୍ମା ରାଃ ହୋରାତେ ହୋବାଅଃ ତାନା, ହାର୍ ମିପୀହୋଡ଼୍ କେ ଆଜାଏ ସାନାଙ୍ଗ୍ ଲେକା ହାଟିଙ୍ଗ୍ ତାକୋୱାଏ। ଚିୟାଃଚି ଜେଲେକା ହୋଡ଼ମୋ ଦୋ ମିୟାଃ ମେନାଃ ହାର୍ ଏନାରାଃ ହାନାଟିଙ୍ଗ୍ କୋ ଏଟାଃ-ଏଟାଃ ମେନାଃ, ହାର୍ ଏନ୍ ମିୟାଃ ହୋଡ଼ମୋ ରାଃ ହାନାଟିଙ୍ଗ୍ କୋ ଏଟାଃ-ଏଟାଃ ତାଇନ୍ ରେହଗି ସବେନାଃ ମେଶାକେତେ ମିୟାଃଗି ହୋଡ଼ମୋ ତାନାଃ, ଏନ୍‍ଲେକା ଗି ମାସୀହ୍ ହଗି ତାନିଃ। ଚିୟାଃଚି ଆବୁ ସବେନ୍ କୋ ଚାହେ ୟାହୁଦୀକୋ, ଚାହେ ୟୁନାନୀ ହୋଡ଼ୋକୋ, ଚାହେ ଦାସୀକାନାବୁ, ଚାହେ କାବୁଦାସିକାନା, ମିୟାଃଗି ଆତ୍ମା ରାଃ ହୋରାତେ ମିୟାଃଗି ହୋଡ଼ମୋ ହୋବାଲାଗିନ୍ତେ ବାପ୍ତିସ୍ମା ଇଦିକେଦାବୁ, ହାର୍ ଆବୁ ସବେନ୍ କୋକେ ମିୟାଃଗି ଆତ୍ମା ନାମ୍ ଜାନା। ଏନାମେନ୍ତେ ଚି ହୋଡ଼ମୋ ରେ ମିୟାଃଗି ହାନାଟିଙ୍ଗ୍ ବାନୋଃ ମେନ୍ଦୋ ଥିମ୍ବାଗି ମେନାଃ। ଆଗାର୍ କାଟା କାଜିୟାଏ, “ଇଙ୍ଗ୍ ତିଈ ନାହାଲାଇଙ୍ଗ୍, ଏନାମେନ୍ତେ ହୋଡ଼ମୋ ରାଃ ହାନାଟିଙ୍ଗ୍ ନାହାଲାଇଙ୍ଗ୍,” ଏଣ୍ଡେ ଚିନାଃ ଏନା ଏନାମେନ୍ତେ ହୋଡ଼ମୋ ରାଃ ହାନାଟିଙ୍ଗ୍ ନାହାଲା? ଆଗାର୍ ଲୁତୁର୍ କାଜିୟାଏ, “ଇଙ୍ଗ୍ ମେଏଃ ନାହାଲାଇଙ୍ଗ୍, ଏନାମେନ୍ତେ ହୋଡ଼ମୋ ରାଃ ନାହାଲାଇଙ୍ଗ୍,” ଏଣ୍ଡେ ଚିନାଃ ଏନା ଏନାମେନ୍ତେ ହୋଡ଼ମୋ ରାଃ ନାହାଲା? ଆଗାର୍ ପୁରା ହୋଡ଼ମୋ ମେଏଃ ତାଇନ୍ ତେୟାଃ ଏଣ୍ଡେ ଅକନାଃ ତେ ଆୟୁମ୍ ଧାଡ଼ିୟୋଃତେୟା? ମେନ୍ଦୋ ସାର୍ତିଗୀ ପାର୍ମେଶ୍ଵାର୍ ହାନାଟିଙ୍ଗ୍ କୋକେ ଆଜାଃ ସାନାଙ୍ଗ୍ ଲେକାତେ ମିୟାଃ-ମିୟାଃ କେତେ ହୋଡ଼ମୋ ରେ ମାଣ୍ତାଅ କେଦାଏ। ଆଗାର୍ ଏନାକୋ ସବେନାଃ ମିୟାଃଗି ହାନାଟିଙ୍ଗ୍ ତାଇନ୍ ତେୟାଃ, ଏଣ୍ଡେ ହୋଡ଼ମୋ କୋତାଃରେ ତାଇନ୍‍ତେ? ମେନ୍ଦୋ ନାଆ ହାନାଟିଙ୍ଗ୍ କୋ ଦୋ ଥିମ୍ବା ଗିୟାଃ, ମେନ୍ଦୋ ହୋଡ଼ମୋ ମିୟାଃଗି ତାନାଃ। ମେଏଃ ତିଈ ତେ କାଏ କାଜିଧାଡ଼ିୟାଏ, “ଇଙ୍ଗ୍‍କେ ଆମାଃ ଦାର୍‍କାର୍ ବାନୋଃ,” ହାର୍ ବୋଅ ହଗି କାଟା କେ କାଏ କାଜିଧାଡ଼ିୟାଏ, “ଇଙ୍ଗ୍‍କେ ଆମାଃ ଦାର୍‍କାର୍ ବାନୋଗା।” ମେନ୍ଦୋ ହୋଡ଼ମୋ ରାଃ ଏନ୍ ହାନାଟିଙ୍ଗ୍ ଅକନାଃ ଏଟାଃ ହାନାଟିଙ୍ଗ୍ କୋଏତେ ନାରାଦୁରା ଆଟ୍‍କାରୋଃୱା, ଏନାକୋ ପୁରାଃଗି ଦାର୍‍କାର୍ ମେନାଃ; ହାର୍ ହୋଡ଼ମୋ ରାଃ ଅକନ୍ ହାନାଟିଙ୍ଗ୍ କୋକେ ଆବୁ କାମାଇନ୍ ନାମେ ଲେକାନାଃ ମେନ୍ତେ ଆଟ୍‍କାର୍ ତାନାବୁ ଏନାକୋକେଗି ଆବୁ ପୁରାଃଗି ମାଇନ୍ ଏମ୍ ତାନାବୁ; ହାର୍ତେ ଆବୁୱାଃ ବେଶ୍ ଆଟ୍‍କାରୋଃ ତେୟାଃ ହୋଡ଼ମୋ ରାଃ ହାନାଟିଙ୍ଗ୍ କୋ ଆଡୋଃଗି ପୁରାଃ ବେଶ୍ ଆଟ୍‍କାରୋଃୱା, ଏଣ୍ଡେ ହଗି ଆବୁୱାଃ ବେଶ୍ ଆଟ୍‍କାରୋଃ ତେୟାଃ ହୋଡ଼ମୋ ରାଃ ହାନାଟିଙ୍ଗ୍ କୋକେ ନେୟାରାଃ ଦାର୍‍କାର୍ ବାନୋଃୱା। ମେନ୍ଦୋ ପାର୍ମେଶ୍ଵାର୍ ହୋଡ଼ମୋ କେ ନେକା ବାଇକେଦାଏ ଚି ହୋଡ଼ମୋ ରାଃ ଅକନ୍ ହାନାଟିଙ୍ଗ୍ କେ ମାଇନ୍ କାନାମୋଃ ତାଇକେନା ଏନାକେ ଆଡୋଃଗି ପୁରାଃ ମାଇନ୍ ନାମୋଃକା। ଏନାତେ ହୋଡ଼ମୋ ଆଲାଗ୍-ଆଲାଗ୍ ଆଲୋ ହୋବାଅଃକା, ମେନ୍ଦୋ ହୋଡ଼ମୋ ରାଃ ସବେନ୍ ଏଟାଃ-ଏଟାଃ ହାନାଟିଙ୍ଗ୍ କୋ ମିହୋଡ଼୍ ଏଟାଃନିଃ ଲାଗିନ୍ତେ ପାହୋମେ କାକୋ। ଏନାମେନ୍ତେ ଆଗାର୍ ମିୟାଃ ହାନାଟିଙ୍ଗ୍ ଦୁକୁ ନାମ୍ ତାନାଏ, ଏଣ୍ଡେ ସବେନ୍ ହାନାଟିଙ୍ଗ୍ ଏନାଲୋଃ ଦୁକୁ ନାମେୟାକୋ, ହାର୍ ଆଗାର୍ ମିୟାଃ ହାନାଟିଙ୍ଗ୍ ରାଃ ମାଇନ୍ ନାମ୍ ତାନାଏ, ଏଣ୍ଡେ ଏନାଲୋଃ ହୋଡ଼ମୋ ରାଃ ସବେନ୍ ହାନାଟିଙ୍ଗ୍ କୋ ରାଶିକାଅଃ ତାନାକୋ। ଏନ୍‍ଲେକାଗି ଆପେ ସବେନ୍ ମେଶାକେତେ ମାସୀହ୍ ରାଃ ହୋଡ଼ମୋ ତାନ୍‍ପେ, ଆଡୋଃ ଏଟାଃ-ଏଟାଃ ଇନିଜାଃ ହାନାଟିଙ୍ଗ୍ କୋ ତାନ୍‍ପେ। ହାର୍ ପାର୍ମେଶ୍ଵାର୍ କାଲିସିୟା ରେ ଏଟାଃ-ଏଟାଃ ଚିମିନାଙ୍ଗ୍ ହୋଡ଼ ଦୋହୋକାଃ କୋୱାଏ: ସୀଦାନିଃ କୁଲାକାନ୍ ଚେଲା, ଏଟାଃନିଃ ଆୟାର୍କାଜିନିଃ, ଆଡୋଃ ଏଟାଃନିଃ ଶିଖାଅନିଃ, ଏନ୍ତେ ପେଡ଼େଏ ରାଃ କାମି ରିକାନିଃ, ଏନ୍ତେ ବେଶ୍ ରିକାନିଃ, ହାର୍ ଏଟାଃକୋୱାଃ ବୁଗିନାଃ ରିକାନିଃ, ହାର୍ ଚାଲାଓ ଧାଡ଼ିନିଃ, ହାର୍ ରାକାମ୍ ରାଃ ଭାଷା କାଜିନିଃ। ଚିନାଃ ସବେନକୋ କୁଲାକାନ୍ ଚେଲା ତାନ୍‍କୋ? ଚିନାଃ ସବେନ୍ କୋ ଆୟାର୍କାଜିନିଃ ତାନ୍‍କୋ? ଚିନାଃ ସବେନ୍ କୋ ଶିଖାଅନିଃ ତାନ୍‍କୋ? ଚିନାଃ ସବେନ୍ ପେଡ଼େଏ ରାଃ କାମି ରିକାତାନ୍‍କୋ-ତାନ୍‍କୋ? ଚିନାଃ ସବେନ୍ କୋକେ ବେଶ୍ ରିକାରାଃ ବାର୍ଦାନ୍ ନାମାକାନା? ଚିନାଃ ସବେନ୍ କୋ ରାକାମ୍ ରାଃ ଭାଷା କାଜିୟାକୋ? ଚିନାଃ ସବେନ୍ କୋ ଭାଷା ମାନେ କେ ଉଦୁବ୍ ଧାଡ଼ିୟାକୋ? ଆମ୍ ମାରାଙ୍ଗ୍ ତେ ମାରାଙ୍ଗ୍ ବାର୍ଦାନ୍ କୋରାଃ ନାମେ ରାଃ ସାନାଙ୍ଗ୍ ରେ ତାଇନୋଃପେ। ମେନ୍ଦୋ ଇଙ୍ଗ୍ ଆପେକେ ଆଡୋଃଗି ସବେନ୍ ଏତେ ବୁଗିନ୍ ହୋରା ଉଦୁବ୍ ପେତାନିଙ୍ଗ୍। ଆଗାର୍ ଇଙ୍ଗ୍ ହୋଡ଼ୋୱାଃ ଆଡୋଃ ସିର୍ମାଦାସୀ କୋୱାଃ ଭାଷା ବାକାଣ୍‍ୟାଇଙ୍ଗ୍ ହାର୍ ଦୁଲାଡ଼୍ କାଇଙ୍ଗ୍ ମାଣ୍ତାଅତାନା, ଦୋ ଇଙ୍ଗ୍ ଠିନ୍-ଠିନ୍ ଷାଡି ତେୟାଃ ପିତାଲ୍, ଆଡୋଃ ଝାଙ୍ଗ୍-ଝାଙ୍ଗ୍ ଷାଡି ତେୟାଃ କାର୍ତାଲ୍ ଲେକା ତାନିଙ୍ଗ୍। ହାର୍ ଆଗାର୍ ଇଙ୍ଗ୍ ଆୟାର୍‍କାଜି କାଜି ଧାଡ଼ି ତାନିଙ୍ଗ୍, ହାର୍ ସବେନ୍ ଉକୁକାନ୍ କାଜି କୋକେ ହାର୍ ସବେନ୍ ଲେକାନାଃ ସେଣା କେ ବୁଝାଅଃ ତାନିଙ୍ଗ୍, ହାର୍ତେ ଇଙ୍ଗ୍‍କେ ନେତାଃ ସାନ୍ତେ ପୁରା ବିଶ୍ଵାସ୍ ମେନାଃ ଚି ଇଙ୍ଗ୍ ବୁରୁ କୋକେ ଗେନାତାଃଇଙ୍ଗ୍, ମେନ୍ଦୋ ଦୁଲାଡ଼୍ କାଇଙ୍ଗ୍ ମାଣ୍ତାଅ ତାନିଙ୍ଗ୍, ଦୋ ଇଙ୍ଗ୍ ଜାହାନାଃ ହ ନାହାଲିଙ୍ଗ୍। ଆଗାର୍ ଇଙ୍ଗ୍ ଇଙ୍ଗ୍ଆଃ ସବେନ୍ ସାମ୍ପାତି କେ କାଙ୍ଗାଲ୍ କୋକେ ଆଜୋମ୍ ତାକୋୱାଇଙ୍ଗ୍, ଚାହେ ଇଙ୍ଗ୍ଆଃ ହୋଡ଼ମୋ କେ ଜୁଲେ ଲାଗିନ୍ ଏମ୍ ତାଃଇଙ୍ଗ୍, ହାର୍ ଦୁଲାଡ଼୍ କାଇଙ୍ଗ୍ ମାଣ୍ତାଅୟା ରେଦୋ ଇଙ୍ଗ୍‍କେ ଜାହାନାଃ ଲାଭ୍ ବାନୋଗା। ଦୁଲାଡ଼୍ ଝେଲାଅଃ ୱାଏ, ହାର୍ ଲିବୁଇ ନିଃ ତାନିଃ; ଦୁଲାଡ଼୍ କାଏ ହିସିଙ୍ଗା ୟାଏ, ଦୁଲାଡ଼୍ ଆପାନାଃ କାଏ ମାରାଙ୍ଗ୍ଏନା ଆଡୋଃ କାଏ ଘାମାଣ୍ଡେ ୟାଏ, ଏନା କାଠାଉକା ଲେକାତେ କାଏ ସେସେନା, ଏନା ଆୟାଃଗି ବୁଗିନାଃ କାଏ ସାନାଙ୍ଗା, କାଏ ଖିସୋଃ ୱାଏ, ଗାଲ୍ତି କୋକେ କାଏ ସାବେୟାଏ। ଏତ୍କାନ୍ କାମି ତେ କାଏ ରାଶିକାଃୱା, ମେନ୍ଦୋ ସାର୍ତି ତେ ରାଶିକାଃ ୱାଏ। ଇନିଃ ସବେନ୍ ବାକାଣ୍ କୋକେ ସାହାତିଙ୍ଗ୍ କେୟାଏ, ସବେନ୍ ବାକାଣ୍ କୋକେ ପାତି କେୟାଏ, ସବେନ୍ ବାକାଣ୍ କୋରାଃ ଆଶ୍ରା ମାଣ୍ଡାଅୟାଏ, ସବେନ୍ ବାକାଣ୍ କୋରେ ସାହାତିଙ୍ଗ୍ ମାଣ୍ଡାଅୟାଏ। ଦୁଲାଡ଼୍ ଚିଉଲା ହ କାଛାବାଅଃୱା, ଆୟାର୍‍କାଜି କାଜିକାନ୍ ରେଦୋ, ଏନା ଛାବା କେନୋଗା, ଭାଷାକୋ ତାଇନ୍ ରେଦୋ, ଟୁଣ୍ଡୁଃୱା, ସେଣା ତାଇନୋଃ ରେଦୋ ରିଡ଼ିଙ୍ଗ୍ଅଃୱା। ଚିୟାଃଚି ଆବୁୱାଃ ସେଣା ତାରା ଗିୟାଃ; ହାର୍ ଆବୁୱାଃ ଆୟାର୍‍କାଜି କୋ ତାରା ଗିୟାଃ; ମେନ୍ଦୋ ଚିମ୍ତାଙ୍ଗ୍ ସବେନାଃ ପୁରା ରିକାନିଃ ହିଜୁଗାଏ, ଇମ୍ତା ସାରେଃତେୟାଃ ମେଟାଅ କେନୋଗା। ଚିମ୍ତାଙ୍ଗ୍ ଇଙ୍ଗ୍ ହୋନ୍ ଗି ତାଇନ୍ କେନାଇଙ୍ଗ୍, ଇମ୍ତା ହୋନ୍ କୋ ଲେକା କାଜି ତାଇନ୍ କେନାଇଙ୍ଗ୍, ହୋନ୍ କୋ ଲେକା ପାହୋମ୍ ତାଇନ୍ କେନାଇଙ୍ଗ୍, ହୋନ୍ କୋ ଲେକା ବୁଝାଅଃ ତାଇନ୍ କେନାଇଙ୍ଗ୍; ମେନ୍ଦୋ ଚିମ୍ତାଙ୍ଗ୍ ହାରା ଜାନିଙ୍ଗ୍ ଇମ୍ତାଙ୍ଗ୍ ହୋନ୍ କୋୱାଃ ଲେକାନ୍ କାଜିକୋକେ ବାଗେକେଦାଇଙ୍ଗ୍। ନାଆ ଆବୁକେ ଆଏନା ରେ ଧୁନ୍ଦଲା ଗି ନେଲୋଃ ତାନା, ମେନ୍ଦୋ ଏନ୍ ସାମାୟ୍ ଆମ୍‍ନାଙ୍ଗ୍-ସାମ୍‍ନାଙ୍ଗ୍ ନେଲେୟାବୁ, ନାଆ ଦୋ ଇଙ୍ଗ୍ଆଃ ସେଣା ତାରା ଗିୟାଃ, ମେନ୍ଦୋ ଏନ୍ ସାମାୟ୍ ପୁରାପୁରି କେ ସାରିଉରୁମେ ୟାଇଙ୍ଗ୍, ଜେଲେକା ପାର୍ମେଶ୍ଵାର୍ ଇଙ୍ଗ୍‍କେ ସାରିକାଦିଙ୍ଗ୍ଆଏ। ଏନାତେ ନାଆ ବିଶ୍ଵାସ୍, ଆଶ୍ରା, ଦୁଲାଡ଼୍ ନେ ଆପିୟା ବାଇକାନ୍ ତାଇନା, ମେନ୍ଦୋ ନିକୁୱାଃ ଏତେ ସବେନ୍ ଏତେ ମାରାଙ୍ଗ୍ ଦୁଲାଡ଼୍ ତାନାଃ। ଦୁଲାଡ଼୍ କେ ଅତୋଙ୍ଗେପେ, ହାର୍ ଆତ୍ମାନ୍ ବାର୍ଦାନ୍ କୋରାଃ ସାନାଙ୍ଗ୍ ରେହ ତାଇନୋଃପେ, ବିଶେଷ୍ କେତେ ନେୟାଚି ଆୟାର୍‍କାଜି କାଜିଏପେ। ଚିୟାଃଚି ଅକଏ ଏଟାଃ ଭାଷା ରେ ବାକାଣେୟାଏ ଇନିଃ ହୋଡ଼ୋକୋଲୋଃ କାହା ମେନ୍ଦୋ ପାର୍ମେଶ୍ଵାର୍ ଲୋଃ ବାକାଣ୍ ୟାଏ; ଏନାମେନ୍ତେ ଚି ଇନିଜାଃ ବାକାଣ୍ କେ ଜେତାଏ କାକୋ ବୁଝାଅଃୱା, ଚିୟାଃଚି ଇନିଃ ଉକୁକାନ୍ କାଜିକୋକେ ପାବିତାର୍ ଆତ୍ମା ରାଃ ପେଡ଼େଏ ତେ କାଜିୟାଏ। ମେନ୍ଦୋ ଅକଏ ଆୟାର୍‍କାଜି କାଜିୟାଏ, ଇନିଃ ହୋଡ଼ୋକୋକେ ଇନ୍‍କୁୱାଃ ହାରାଇଦିଅଃ ନାଙ୍ଗ୍ ହାର୍ ଉପ୍‍ଦେଶ୍ ହାର୍ ଶାନ୍ତି ନାମେ ନାଙ୍ଗ୍ କାଜିକୋୱାଏ। ଅକଏ ଏଟାଃ-ଏଟାଃ ଭାଷା ରେ ବାକାଣେୟାଏ, ଇନିଃ ଆଏଃଗି ହାରାଇଦିଅଃ ୱାଏ; ମେନ୍ଦୋ ଅକଏ ଆୟାର୍‍କାଜି କାଜିୟାଏ, ଇନିଃ କାଲିସିୟା କେ ହାରାଇଦି ୟାଏ। ଇଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି ଆପେ ସବେନ୍ ଏଟାଃ-ଏଟାଃ ଭାଷା ରେ ବାକାଣେପେ ମେନ୍ଦୋ ନେୟାତେ ଥିମ୍ବା ନେୟା ସାନାଙ୍ଗାଇଙ୍ଗ୍ ଚି ଆୟାର୍‍କାଜି କାଜିପେ: ଚିୟାଃଚି ଆଗାର୍ ଏଟାଃ-ଏଟାଃ ଭାଷା କୋ କାଜିନିଃ କାଲିସିୟା ରାଃ ହାରାଇଦିଅଃ ନାଙ୍ଗ୍ ବାକାଣ୍ ରାଃ ମାନେ କେ କାଏ ବୁଝାଅ ରେଦୋ ଆୟାର୍‍କାଜି କାଜିନିଃ ଇନିଃତେ ମାରାଙ୍ଗ୍ ତାନିଃ। ଏନାମେନ୍ତେ ହେ ହାଗାକୋ, ଆଗାର୍ ଇଙ୍ଗ୍ ଆପେୟାଃ ନାଡ଼େଏ ହିଜୁଃ କେତେ ଏଟାଃ-ଏଟାଃ ଭାଷା ରେ ବାକାଣେୟାଇଙ୍ଗ୍, ଆଡୋଃ ଉଦୁବ୍ କାଜି କୋ ଚାହେ ସେଣା ଚାହେ ଆୟାର୍‍କାଜି ଚାହେ ଶିଖାଅ କାଜିକୋ ଆପେକେ କାଇଙ୍ଗ୍ କାଜିପେରେ, ଦୋ ଇଙ୍ଗ୍ ତେ ଆପେକେ ଚିନାଃ ବୁଗିନାଃ ନାମୋଃୱା। ଏନ୍ ଲେକାଗି ଆଗାର୍ ଜୀଉ ବାନୋଃ ତେୟାଃ ଜିନିଷ୍ କୋ ହଗି ଅକନାଃ ଏତେ ଷାଡି ଅଡୋଙ୍ଗ୍ଅଃ ତାନା, ଜେଲେକା ମୂର୍ଲି ଚାହେ ବୀଣା, ଆଗାର୍ ଏନାରାଃ ରାଗ୍ ଆଲାଗ୍ କା ତାଇନୋଃ ରେଦୋ ଅକନାଃ ଅଙ୍ଗ୍ଅଃ ତାନା ଚାହେ ସାଡିଅଃ ତାନା, ଏନା ଚିଲ୍‍କା ତେ ଉରୁମୋଗା? ହାର୍ତେ ଆଗାର୍ ତୁର୍ହୀ ବାଜା ରାଃ ଷାଡି ସାଫା ତେ କାଆୟୁମୋଃ ରେଦୋ, ଅକଏ ଲାଡ଼ାଇ ଲାଗିନ୍ତେ ସେକାଡ଼େନାଏ? ଏନ୍ ଲେକାଗି ଆପେ ହଗି ଆଗାର୍ ଆଲାଙ୍ଗ୍ ତେ ସାଫା-ସାଫା କାପେ ବାକାଣେୟା ଏଣ୍ଡେ ଅକନାଃ କୋ କାଜିଅଃ ତାନା ଏନା ଚିଲ୍‍କା ବୁଝାଅଃୱା? ଆପେ ଦୋ ହୋୟୋ ରେ ବାକାଣ୍ ନିଃ ଲେକା ହୋବାଅଃୱାପେ। ଅତେଦିଶୁମ୍ ରେ ଚିମିନ୍ ଗି ରାକାମ୍ ରାଃ ଭାଷା କୋ ମେନାଃ ଏଣ୍ଡେ ରେହ, ଏନା କୋଏତେ କାବୁଝାଅଃ ଲେକା ମିୟାଦୋ ବାନୋଃ। ଏନାମେନ୍ତେ ଆଗାର୍ ଇଙ୍ଗ୍ ଜାହାନ୍ ଭାଷା ରାଃ ମାନେ କେ କାଇଙ୍ଗ୍ ବୁଝାଅଃ ତାନା, ଏଣ୍ଡେ କାଜିନିଜାଃ ନେପେଲ୍ ରେ ଏଟାଃ ଦିଶୁମ୍ ରେନ୍ ଲେକା ହୋବାଅଃ ୱାଇଙ୍ଗ୍ ଆଡୋଃ କାଜିନିଃ ଇଙ୍ଗ୍ଆଃ ନେପେଲ୍ ରେ ଏଟାଃ ଦିଶୁମ୍ ରେନିଃ ଲେକା ହୋବାଅଃୱାଏ। ଏନାମେନ୍ତେ ଆପେ ହଗି ଚିମ୍ତାଙ୍ଗ୍ ଆତ୍ମାନ୍ ବାର୍ଦାନ୍ କୋରାଃ ସାନାଙ୍ଗ୍ ରେ ପେ ତାଇନୋଃୱା, ଏଣ୍ଡେ ନେଲେକା କୋଷିସ୍ ଏପେ ଚି ଆପେୟାଃ ବାର୍ଦାନ୍ କୋରାଃ ହାରାଇଦିଅଃ ହୋରାତେ କାଲିସିୟା ହାରାଇଦିଅଃ କା। ଏନାଲାଗିନ୍ତେ ଅକଏ ଏଟାଃ-ଏଟାଃ ଭାଷା କାଜିୟାଏ, ଇନିଃ ବିନ୍ତି କାଏ ଚି ଏନା ରାଃ ମାନେ କେହ ଉଦୁବ୍ ଧାଡ଼ିୟାଏ। ଏନାମେନ୍ତେ ଆଗାର୍ ଇଙ୍ଗ୍ ଏଟାଃ-ଏଟାଃ ଭାଷା ରେ ବିନ୍ତି ତାନିଙ୍ଗ୍, ଏଣ୍ଡେ ଇଙ୍ଗ୍ଆଃ ଆତ୍ମା ବିନ୍ତି ତାନାଏ ମେନ୍ଦୋ ଇଙ୍ଗ୍ଆଃ ମୋନ୍ କାଏ କାମିତାନାଏ। ଏନାତେ ଚିନାଃ ରିକା ଚାହି? ଇଙ୍ଗ୍ ଆତ୍ମା ତେହଗି ବିନ୍ତି ୟାଇଙ୍ଗ୍, ଆଡୋଃ ମୋନ୍ ତେହଗି ବିନ୍ତି ୟାଇଙ୍ଗ୍; ଇଙ୍ଗ୍ ଆତ୍ମା ତେ ଦୁରାଙ୍ଗ୍ଏୟାଇଙ୍ଗ୍, ଆଡୋଃ ମୋନ୍ ତେହଗି ଦୁରାଙ୍ଗ୍ଏୟାଇଙ୍ଗ୍। କାରେଦୋ ଆଗାର୍ ଆମ୍ ଆତ୍ମା ଭାଇର୍ ତେଗି ଧାନ୍ୟାବାଦ୍ ୟାମ୍, ଏଣ୍ଡେ ଦୋ କାଏ ସାରିଧାଡ଼ିତାନ୍ ନିଃ ଆମାମ୍ ଧାନ୍ୟାବାଦ୍ ଏମ୍ ତାନ୍ ରେ ଆମୀନ୍ ଚିଲ୍‍କା କାଜିୟାଏ? ଚିୟାଃଚି ଇନିଃ ଦୋ କାଏସାରିଧାଡ଼ିୟାଏ ଚି ଆମ୍ ଚିନାଃ କାଜିତାନାମ୍? ଆମ୍ ଦୋ ମାଜା ତେମ୍ ଧାନ୍ୟାବାଦେ ତାନା, ମେନ୍ଦୋ ଏଟାଃନିଃ କାଏ ହାରାଇଦିଅଃ ତାନାଏ। ଇଙ୍ଗ୍ ଇଙ୍ଗ୍ଆଃ ପାର୍ମେଶ୍ଵାର୍ ଆଃ ଧାନ୍ୟାବାଦ୍ ତାନିଙ୍ଗ୍ ଚି, ଇଙ୍ଗ୍ ଆପେ ସବେନ୍ କୋଏତେ ଥିମ୍ବା ଏଟାଃ-ଏଟାଃ ଭାଷା ରେ କାଜିତାନିଙ୍ଗ୍। ମେନ୍ଦୋ କାଲିସିୟା ରେ ଏଟାଃ ଭାଷା ରେ ଦାଶ୍ ହାଜାର୍ ବାକାଣ୍ କାଜିତେ ନେୟା ଇଙ୍ଗ୍‍କେ ଆଡୋଃଗି ବୁଗିନ୍ ଆଟ୍‍କାର୍ ତାନା, ଚି ଏଟାଃ କୋକେ ଶିଖାଅକୋ ଲାଗିନ୍ ସେଣା ତେ ପାଞ୍ଚ୍ ଗି ବାକାଣ୍ କାଜିୟାଇଙ୍ଗ୍। ହେ ହାଗାକୋ, ଆପେ ଆଟ୍‍କାର୍ ଉରୁମ୍ ରେ ହୋନ୍ କୋ ଲେକା ଆଲୋପେ ବାଇୟୋଃୱା: ଏତ୍କାନାଃ ରେଦୋ ହୋନ୍ କୋ ବାଇୟୋଃପେ, ମେନ୍ଦୋ ଆଟ୍‍କାର୍ ଉରୁମ୍ ରେ ସେଣାକାନ୍ ଲେକା ବାଇୟୋଃପେ। ପାବିତାର୍ ପୁଥି ରେୟାଃ ମୁଶା ନାବୀ ରାଃ ଆଇନ୍ ରେ ଅଲାକାନା ଚି ପ୍ରାଭୁ କାଜିତାନାଏ, “ଇଙ୍ଗ୍ ଏଟାଃ ଭାଷା ବାକାଣ୍ ତାନ୍ କୋୱାଃ ହୋରାତେ ହାର୍ ଏଟାଃ କୋୱାଃ ମୋଚା ହୋରାତେ ନେ ହୋଡ଼ୋକୋ ଲୋଃ ବାକାଣ୍ ୟାଇଙ୍ଗ୍ ଏଣ୍ତେ ହଗି ଇନ୍‍କୁ ଇଙ୍ଗ୍ଆଃ କାକୋ ଆୟୁମେୟା।” ଏନାମେନ୍ତେ ଏଟାଃ-ଏଟାଃ ଭାଷା ବିଶ୍ଵାସୀ କୋୱାଃ ଲାଗିନ୍ କାହା ମେନ୍ଦୋ ଆବିଶ୍ଵାସୀ ଲାଗିନ୍ ଚିହ୍ନା ତାନାଃ; ଆଡୋଃ ଆୟାର୍‍କାଜି ଆବିଶ୍ଵାସୀ କୋ ଲାଗିନ୍ କାହା, ମେନ୍ଦୋ ବିଶ୍ୱାସୀ କୋ ଲାଗିନ୍ ଚିହ୍ନା ତାନାଃ। ଏନାମେନ୍ତେ ଆଗାର୍ କାଲିସିୟା ମିଃତାଃ ହୁଣ୍ଡିଅଃତାନ୍ ଇମ୍ତା, ହାର୍ ସବେନ୍ କୋ ଏଟାଃ-ଏଟାଃ ଭାଷା ତେ ବାକାଣ୍‍ତାନ୍ ରେ, ହାର୍ ବାହାରି ରେନ୍ କୋ ଚାହେ ଆବିଶ୍ଵାସୀ ହୋଡ଼ୋକୋ ଭିତାର୍ ହିଜୁଃ କୋଃରେ ଚିନାଃ ଇନ୍‍କୁ ଆପେକେ ପାଗ୍‍ଲାଅଃ ତାନାକୋ ମେନ୍ତେ କାକୋ କାଜିପେୟା? ମେନ୍ଦୋ ଆଗାର୍ ସବେନ୍ କୋ ଆୟାର୍‍କାଜି କାଜିୟାକୋ, ହାର୍ ଜାହାନ୍ ଆବିଶ୍ଵାସୀ ୟାଦୋ ବାହାରି ରେନ୍ ହୋଡ଼ ଭିତାର୍ ହିଜୁଃକେନୋଃ ରେ, ଏଣ୍ଡେ ସବେନ୍ ଇନିଃକେ ଦୋଷୀ ବାଇତାଇୟାକୋ ଆଡୋଃ ସାରି ଉରୁମ୍ କିୟାକୋ, ହାର୍ ଇନିଜାଃ ମୋନ୍ ରାଃ ଉକୁକାନ୍ କାଜି ଉଦୁବ୍ କୋଃୱା, ଆଡୋଃ ଇମ୍ତା ଇନିଃ ସାରିକେୟାଏ ଚି ପାର୍ମେଶ୍ଵାର୍ ଏତ୍କାନାଃ କୋକେ ସାରିତାଃଏ ହାର୍ ଇକ୍ଡ଼ୁମ୍ କେତେ ପାର୍ମେଶ୍ଵାର୍ କେ ଜୋହାର୍ ୟାଏ ଆଡୋଃ ମାନାତିଙ୍ଗ୍ କେୟାଏ ଚି ସାର୍ତିଗୀ ପାର୍ମେଶ୍ଵାର୍ ଆପେୟାଃ ଥାଲା ରେ ମେନିଜା। ଏନାମେନ୍ତେ ହେ ହାଗାକୋ, ଚିନାଃ ରିକା ଚାହି? ଚିମ୍ତାଙ୍ଗ୍ ଆପେ ହୁଣ୍ଡିନ୍ ତାନାପେ ଦୋ ସବେନ୍ ମିପୀୟାଃ କୋୱାଃ ମୋନ୍ ରେ ଦୁରାଙ୍ଗ୍ ଚାହେ ଉପ୍‍ଦେଶ୍ ଚାହେ ଏଟାଃ ଭାଷା ଚାହେ ଉଦୁବ୍ କାଜି ଚାହେ ଏଟାଃ ଭାଷା ରାଃ ମାନେ କେ ଉଦୁବ୍ କାଜିକୋ ହୋବାଅଃତାନା। ସବେନାଃ ଆତ୍ମାନ୍ ହାରାଇଦିଅଃ ଲାଗିନ୍ତେ ହୋବାଅଃକା। ଆଗାର୍ ଏଟାଃ ଭାଷା ରେ ବାକାଣ୍ ରାଃ ମେନାଃ ରେଦୋ ବାର୍ ହୋଡ଼ ଚାହେ ଥିମ୍ବା ହୋଡ଼ ତାଇନୋଃ ରେ ଆପି ହୋଡ଼ ମିହୋଡ଼୍-ମିହୋଡ଼୍ କେତେ କାଜିକାକୋ, ହାର୍ ମିହୋଡ଼୍ ଏନାରାଃ ମାନେ ଉଦୁବେକାଏ। ମେନ୍ଦୋ ଆଗାର୍ ଏନାରାଃ ମାନେ କେ ଉଦୁବ୍ ନିଃ ବାଙ୍ଗୁଇଃ ରେଦୋ, ଏଟାଃ ଭାଷା କାଜିନିଃ କାଲିସିୟା ରେ ହାପା ତାଇନୋଃକାଏ, ହାର୍ ଆପାନାଃ ମୋନ୍ ଲୋଃ ଆଡୋଃ ପାର୍ମେଶ୍ଵାର୍ ଲୋଃ ବାକାଣେକାଏ। ଆୟାର୍‍କାଜି କାଜି ହୋଡ଼ୋକୋ ଏତେ ବାର୍ ହୋଡ଼ ଚାହେ ଆପି ହୋଡ଼ କାଜି କାକୋ, ଏନ୍ତେ ସାରେଃ ହୋଡ଼ୋକୋ ଇନ୍‍କୁୱାଃ କାଜିକୋକେ ପାର୍ଖାଅକାକୋ। ମେନ୍ଦୋ ଆଗାର୍ ଏଟାଃନିଜାଃ ରେ ଅକନିଃ ଦୁବାକାନାଏ, ଜାହାନ୍ କାଜି ପାର୍ମେଶ୍ଵାର୍ ପାଡ଼େତେ ଉଦୁବୋଃତାନ୍ ରେଦୋ ସିଦା କାଜିତାନ୍ ନିଃ ହାପା କେନୋଃକାଏ। ଚିୟାଃଚି ଆପେ ସବେନ୍ ମିହୋଡ଼୍-ମିହୋଡ଼୍ କେତେ ଆୟାର୍‍କାଜି କାଜି ଧାଡ଼ିୟାପେ, ଏନାତେ ସବେନ୍ କୋ ଶିଖାଅନ୍ କାକୋ ଆଡୋଃ ସବେନ୍ କୋ ହାରାଇଦିଅଃ କାକୋ। ଆୟାର୍‍କାଜି କାଜି କୋୱାଃ ଆତ୍ମା ଆୟାର୍‍କାଜି କାଜି କୋୱାଃ ଆଧିକାର୍ ରେ ମେନାଃ। ଚିୟାଃଚି ପାର୍ମେଶ୍ଵାର୍ ଗାଡ଼୍‍ବାଡ଼ାଅ ନିଃ ନାହାଲାଏ, ମେନ୍ଦୋ ଶାନ୍ତି ରାଃ ପାର୍ମେଶ୍ଵାର୍ ତାନିଃ। ଜେଲେକା ପାବିତାର୍ ହୋଡ଼ୋକୋୱାଃ ସବେନ୍ କାଲିସିୟା ରେ ମେନାଃ। କୁଡ଼ିକୋ କାଲିସିୟା ରାଃ ସାଭା ରେ ହାପା ତାଇନ୍ ଚାକୋ, ଚିୟାଃଚି ଇନ୍‍କୁକେ ବାକାଣ୍ ଲାଗିନ୍ ଆନାଚୁ ବାନୋଃ, ମେନ୍ଦୋ ଆଧିନ୍ ତାଇନୋଃ ରାଃ ଆନାଚୁ ମେନାଃ: ଜେଲେକା ମୁଶା ନାବୀ ରାଃ ଆଇନ୍ ରେହ ଅଲାକାନା। ଆଗାର୍ ଇନ୍‍କୁ ଜାହାନାଃ ଶିଖାଅନ୍ ସାନାଙ୍ଗ୍ ରେଦୋ, ଅଡ଼୍ଆଃ ରେ ଆପାନାଃ-ଆପାନାଃ କଡ଼ା କେ କୁଲିଚାକୋ, ଚିୟାଃଚି କୁଡ଼ି ଗାଃ କାଲିସିୟା ରେ ବାକାଣ୍ ଗିୟୁଃ ରାଃ ବାକାଣ୍ ତାନାଃ। ଚିନାଃ ପାର୍ମେଶ୍ଵାର୍ ରାଃ ବାଚାନ୍ ଆପେ ଏତେ ଅଡୋଙ୍ଗ୍ କାନା? ଚିନାଃ ଆପେ ତାଃ ଭାଇର୍ ଏନା ଥେବାଃ କାନା? ଆଗାର୍ ଜାହାନ୍ ହୋଡ଼ ଆଏଃ ଆପାନ୍ କେ ଆୟାର୍କାଜିନିଃ ୟାଦୋ ଆତ୍ମାନ୍ ବାର୍ଦାନ୍ ନାମାକାନ୍ ହୋଡ଼ ମେନ୍ତେ ବୁଝାଅଃ ତାନାଏ, ଏଣ୍ଡେ ନେୟା ସାରିଲେକାଏ ଚି ଅକନ୍ ବାକାଣ୍ ଇଙ୍ଗ୍ ଆପେକେ ଅଲ୍ ପେତାନିଙ୍ଗ୍, ଏନା ପ୍ରାଭୁ ଆଃ ଆନାଚୁକୋ ତାନାଃ। ମେନ୍ଦୋ ଆଗାର୍ ଜେତାଏ ନେୟାକେ କାଏ ମାନାତିଙ୍ଗ୍ ତାନ୍ ରେଦୋ, ଇନିଃ କେହ ଆଲୋପେ ମାନାତିଙ୍ଗ୍ ୟା। ଏନାତେ ହେ ହାଗାକୋ, ଆୟାର୍‍କାଜି କାଜି ରାଃ ସାନାଙ୍ଗ୍ ରେ ତାଇନୋଃପେ ଆଡୋଃ ଏଟାଃ ଭାଷା କାଜିତାନ୍ କୋକେ ଆଲୋପେ ମାନାକୋୱା; ମେନ୍ଦୋ ସବେନ୍ ବାକାଣ୍ ବେଶ୍ ତେ ଆଡୋଃ ଠାଉକା ଲେକାତେ ରିକାଅଃକା। ହେ ହାଗାକୋ, ନାଆ ଇଙ୍ଗ୍ ଆପେକେ ଏନ୍ ସୁସାମାଚାର୍ ଗି ଉଦୁବ୍ ପେ ତାନାଇଙ୍ଗ୍ ଅକନାଃ ସିଦା ଏତେଗି ଉଦୁବ୍ ଛାବାକାଦିଙ୍ଗ୍, ଅକନାଃକେ ଆପେ ମାନାତିଙ୍ଗ୍ ହ ଲେଦାପେ ଆଡୋଃ ଅକନାଃ ରେ ଆପେ ବାଇକେତେ ହଗି ମେନାପେୟା। ଏନାରାଃ ହୋରାତେ ଗି ଆପେୟାଃ ବାଞ୍ଚାଅ ହୋବାଅଃତାନା, ଆଗାର୍ ଏନ୍ ସୁସାମାଚାର୍ କେ ଅକନାଃ ଇଙ୍ଗ୍ ଆପେକେ ଉଦୁବ୍ ଲେଦିଙ୍ଗ୍ ଏନାକେ ମୋନେ ରେ ମାଣ୍ଡାଅ ତାନାପେ, କାରେଦୋ ଆପେୟାଃ ବିଶ୍ଵାସ୍ ରିକା ସାମାଗୀ ତାନାଃ। ଏନାରାଃ ଚାଲ୍ତେଗି ଇଙ୍ଗ୍ ସବେନ୍ ଏତେ ସିଦା ଆପେକେ ଏନ୍ କାଜିଗି ଥେବାଗାଃ ପେୟାଇଙ୍ଗ୍, ଅକନାଃ ଇଙ୍ଗ୍ ତାଃ ଥେବାଃ ଲେନା ଚି ପାବିତାର୍ ପୁଥି ରାଃ ବାଚାନ୍ ରାଃ ଲେକାତେ ୟୀଶୁ ମାସୀହ୍ ଆବୁୱାଃ ପାପ୍‍କୋ ଲାଗିନ୍ତେ ଗୋଏଃ ଜାନାଏ, ହାର୍ ତୋପା ଜାନାଏ, ଆଡୋଃ ପାବିତାର୍ ପୁଥି ଲେକାତେ ଆପି ହୁଲାଙ୍ଗ୍ ରେ ଜୀବିରିଃ ଜାନାଏ। ହାର୍ କୈଫା କେ ଏନ୍ତେ ବାରା-ଝାନ୍ କୋକେ ନେଲ୍ ଇକାଜାନାଏ। ଏନା ତାୟୋମ୍ତେ ଇନିଃ ପାଞ୍ଚ୍ ଶାଅ ଏତେ ହ ଥିମ୍ବା ହାଗାକୋକେ ମିଶାତେ ନେଲ୍ ଇକାଜାନାଏ, ଇନ୍‍କୁ ଏତେ ଚିମିନାଙ୍ଗ୍ କୋ ନାଆ ସାନ୍ ଜୀହିଃ ଗିୟାଃକୋ ମେନ୍ଦୋ ଚିମିନାଙ୍ଗ୍ କୋ ଟୁଣ୍ଡୁ କେଦାକୋ। ଏନ୍ତେ ଇନିଃ ୟାକୁବ୍ କେ ନେଲ୍ ଇକାଜାନାଏ ଏନ୍ତେ ସବେନ୍ କୁଲାକାନ୍ ଚେଲା କୋକେ ନେଲ୍ ଇକାଜାନାଏ। ସବେନ୍ କୋୱାଃ ତାୟୋମ୍ତେ ଇଙ୍ଗ୍ କେ ହଗି ନେଲ୍ ଇକାଜାନାଏ, ଅକନିଃ କାପୁରାକାନ୍ ସାମାୟ୍ ରାଃ ହୋନ୍ ଲେକା ଜାନାମ୍ କାନିଙ୍ଗ୍। ଚିୟାଃଚି ଇଙ୍ଗ୍ କୁଲାକାନ୍ ଚେଲା କୋଏତେ ସବେନ୍ ଏତେ ହୁଡିଙ୍ଗ୍ ତାନିଙ୍ଗ୍, ମେନ୍ଦୋ କୁଲାକାନ୍ ଚେଲା କାଜିୟୋଃ ଲେକାନିଃ ହ ନାହାଲାଇଙ୍ଗ୍, ଚିୟାଃଚି ଇଙ୍ଗ୍ ପାର୍ମେଶ୍ଵାର୍ ରାଃ କାଲିସିୟା କେ ସାତାଅ ଲେଦାଇଙ୍ଗ୍। ମେନ୍ଦୋ ଇଙ୍ଗ୍ ଜାହାନାଃଗି ତାନିଙ୍ଗ୍, ପାର୍ମେଶ୍ଵାର୍ ରାଃ ଆନୁଗ୍ରାହ୍ ତେ ତାନିଙ୍ଗ୍। ଇନିଜାଃ ଆନୁଗ୍ରାହ୍ ଅକନାଃଚି ଇଙ୍ଗ୍ ଚେତାନ୍ ରେ ହୋବାଜାନା, ଏନା ସାମାଗୀ କାହୋବାଜାନା, ମେନ୍ଦୋ ଇଙ୍ଗ୍ ଏନ୍ ସବେନ୍ କୋଏତେ ଥିମ୍ବା ଖାଟାଅ ଜାନିଙ୍ଗ୍, ଏଣ୍ତେ ରେହଗି ନେୟା ଇଙ୍ଗ୍ଆଃ ଏତେ କାହୋବାକାନା ମେନ୍ଦୋ ପାର୍ମେଶ୍ଵାର୍ ରାଃ ଆନୁଗ୍ରାହ୍ ଏତେ ହୋବାନା ଅକନାଃ ଇଙ୍ଗ୍ଆଃ ଚେତାନ୍ ରେ ତାଇନ୍ କେନା। ଏନାମେନ୍ତେ ଚାହେ ଇଙ୍ଗ୍ ତାନିଙ୍ଗ୍, ଚାହେ ଇନ୍‍କୁ, ନେୟାଗି ପାର୍ଚାର୍ ତାନାଲେ, ହାର୍ ନେୟାରେଗି ଆପେ ହ ବିଶ୍ଵାସ୍ କେଦାପେ। ଏନାମେନ୍ତେ ଚିମ୍ତାଙ୍ଗ୍ ମାସୀହ୍ ରାଃ ନେ ପାର୍ଚାର୍ ହୋବାଅଃତାନା ଚି ଇନିଃ ଗୋଜାକାନ୍ କୋଏତେ ଜୀବିରିଃ ଜାନାଏ, ଦୋ ଆପେ କୋଏତେ ଚିମିନ୍ କୋ ଚିଲ୍‍କା କାଜିତାନାକୋ ଚି ଗୋଜାକାନ୍ କୋୱାଃ ଜୀବିନିରିଦ୍ ଗି ବାନୋଗା? ଆଗାର୍ ଗୋଜାକାନ୍ କୋୱାଃ ଜୀବିନିରିଦ୍ ଗି ବାନୋଃୱା, ଏଣ୍ଡେଦୋ ମାସୀହ୍ ହଗି କାଏ ଜୀବିରିଃ କାନାଏ; ହାର୍ ଆଗାର୍ ମାସୀହ୍ କାଏ ଜୀବିରିଃ କାନାଏ, ରେଦୋ ଆବୁୱାଃ ପାର୍ଚାର୍ ରିକା ହଗି ସାମାଗୀ ତାନାଃ, ହାର୍ ଆପେୟାଃ ବିଶ୍ୱାସ୍ ହଗି ସାମାଗୀ ତାନାଃ। ମେନ୍ଦୋ ଆବୁ ପାର୍ମେଶ୍ଵାର୍ ରାଃ ହିହିଡ଼୍ ଗୋୱା ବୁ ଠାହ୍‍ରାଅଃୱା; ଚିୟାଃଚି ଆବୁ ପାର୍ମେଶ୍ଵାର୍ ରାଃ ବିଷାୟ୍ ରେ ନେୟା ଗୋୱାବୁ ଏମ୍ କେଦା ଚି ଇନିଃ ମାସୀହ୍ କେ ଜୀହିଃ କିଜାଏ, ମେନ୍ଦୋ ଆଗାର୍ କାଏ ଜୀହିଃ କାଇଜାଏ ରେଦୋ ଗୋଜାକାନ୍ କୋ କାକୋ ଜୀବିରିଦୋଃ ତେ। ଏନ୍ତେ ଆଗାର୍ ଗୋଜାକାନ୍ କୋ କାକୋ ଜୀବିରିଦୋଃତେ, ଏଣ୍ଡେ ଦୋ ମାସୀହ୍ ହଗି କାଏ ଜୀବିରିଃ କାନାଏ; ହାର୍ ଆଗାର୍ ମାସୀହ୍ କାଏ ଜୀବିରିଃ କାନାଏ, ଏଣ୍ଡେଦୋ ଆପେୟାଃ ବିଶ୍ଵାସ୍ ସାମାଗୀ ତାନାଃ, ଆଡୋଃ ଆପେ ନାଆ ସାନ୍ତେ ଆପେୟାଃ ପାପ୍ କୋରେ ଗି ପାଶେ କାନାପେ। ମେନ୍ଦୋ ଅକନ୍ କୋ ମାସୀହ୍ ରେ ବିଶ୍ଵାସ୍ କେତେ ଗୋଜାକାନାକୋ ଇନ୍‍କୁ ହଗି ନାଶ୍ ଜାନାକୋ। ଆଗାର୍ ଆବୁ ନେ ଜୀଦାନ୍ ରେ ଭାଇର୍ ମାସୀହ୍ ତେ ଆଶ୍ରା ମାଣ୍ତାଅ ତାନାବୁ ରେଦୋ ଆବୁ ସବେନ୍ ହୋଡ଼ କୋଏତେ ଥିମ୍ବାଗି ଦୁକୁୱାକାନ୍ ତାନ୍‍ବୁ। ମେନ୍ଦୋ ସାର୍ତିଗୀ ମାସୀହ୍ ଗୋଜାକାନ୍ କୋଏତେ ଜୀବିରିଃ କାନାଏ, ହାର୍ ଅକନ୍‍କୋ ଗୋଜାକାନାକୋ ଇନ୍‍କୁ ରେ ଇନିଃ ସିଦା ଯଅ ହୋବାଜାନାଏ। ଚିୟାଃଚି ଚିମ୍ତାଙ୍ଗ୍ ମିୟାଃ ହୋଡ଼ ରାଃ ହୋରାତେ ଗୋନୋଏଃ ହିଜୁଃଜାନା, ଏଣ୍ଡେ ହୋଡ଼ ରାଃ ହୋରାତେଗି ଜୀବିନିରିଦ୍ ହଗି ହିଜୁଃଲେନା। ହାର୍ ଚିଲ୍‍କା ଆଦାମ୍ ରେ ହୋଡ଼ମୋ ଲେକାତେ ସବେନ୍ କୋ ଗୋଜୋଃତାନାକୋ, ଏନ୍‍ଲେକାଗି ମାସୀହ୍ ରେ ଆତ୍ମାନ୍ ଲେକାତେ ସବେନ୍ କୋ ଜିହୀଦୋଗାକୋ। ମେନ୍ଦୋ ସବେନ୍ କୋ ଆକୋୱାଃ-ଆକୋୱାଃ ପାଡ଼ିରେ: ପାହିଲା ଯଅ ମାସୀହ୍, ଏନ୍ତେ ମାସୀହ୍ ରାଃ ହିଜୁଃ ତାୟୋମ୍ତେ ଇନିଜାଃ ହୋଡ଼ୋକୋ। ଏନା ତାୟୋମ୍ତେ ଟୁଣ୍ଡୁ ହୋବାଅଗା। ଏନ୍ ସାମାୟ୍ ଇନିଃ ସବେନ୍ ରାଇଜ୍ ତାନ୍ କୋକେ ହାର୍ ସବେନ୍ ଆଧିକାର୍ ମାଣ୍ଡାଅତାନ୍ କୋକେ ହାର୍ ପେଡ଼େଏ କେ ବାନ୍ଦ୍ କେତେ ରାଇଜ୍ କେ ପାର୍ମେଶ୍ଵାର୍ ଆପୁ ଆଃ ତିଈ ରେ ଜିମାତାଆଏ। ଚିୟାଃଚି ଚିମ୍ତାଙ୍ଗ୍ ସାନ୍ତେ ଇନିଃ ଆଜାଃ ବାଇରୀ କୋକେ ଆଜାଃ କାଟା ମାଣ୍ତା ଲାଥାର୍ ରେ କାଏ ଆଉକୋୱାଏ, ଏନ୍ ସାନ୍ତେ ଇନିଜାଃ ରାଇଜ୍ ରିକା ଜାରୁରୀ ମେନାଃ। ସବେନ୍ ଏତେ ଆଖ୍ରୀ ବାଇରୀ ଅକନିଃ ଚି ନାଶୋଗାଏ, ଇନିଃ ଗୋନୋଏଃ ତାନିଃ। ଚିୟାଃଚି “ପାର୍ମେଶ୍ଵାର୍ ସବେନାଃ କେ ଆୟାଃ କାଟା ଲାଥାର୍ ରେ ମାଣ୍ତାଅ କାଦାଏ,” ମେନ୍ଦୋ ଚିମ୍ତାଙ୍ଗ୍ ଇନିଃ କାଜିୟାଏ ଚି ସବେନାଃ ଇନିଜାଃ ଆଧିନ୍ ରେ ମାଣ୍ତାଅ ଜାନା ଦୋ ନେୟା ସାଫା ମେନାଃ ଚି ଅକନିଃ ସବେନାଃ ଇନିଜାଃ ଆଧିନ୍ ରେ ମାଣ୍ତାଅ ତାଦାଏ, ଇନିଃ ଆଏଃ ଆଲାଗ୍ ତାଇନ୍ ଜାନାଏ। ଆଡୋଃ ଚିମ୍ତାଙ୍ଗ୍ ସବେନାଃ ଇନିଜାଃ ଆଧିନ୍ ହୋବାକେନୋଗା, ଏଣ୍ଡେ ହୋନ୍ କଡ଼ା ହଗି ଇନିଜାଃ ଆଧିନ୍ ହୋବା କେନୋଗାଏ, ଅକନିଃ ସବେନାଃ ଇନିଜାଃ ଆଧିନ୍ ରେ ମାଣ୍ତାଅ ତାଦାଏ; ଏନାତେ ସବେନାଃ ରେ ପାର୍ମେଶ୍ଵାର୍ ଗି ସବେନାଃ ହୋବାଅଃଚାଏ। ଅକନ୍ ହୋଡ଼ୋକୋ ଗୋଜାକାନ୍ କୋ ଲାଗିନ୍ ବାପ୍ତିସ୍ମା ଇଦିୟାକୋ ଇନ୍‍କୁ ଚିନାଃ ଚିକାୟାକୋ? ଆଗାର୍ ଗୋଜାକାନ୍ କୋ କାକୋ ଜୀବିରିଦୋଃ ତେ ରେଦୋ ଚିନାଃ ଲାଗିନ୍ତେ ଇନ୍‍କୁୱାଃ ଲାଗିନ୍ତେ ବାପ୍ତିସ୍ମା ଇଦିତାନାକୋ? ହାର୍ ଆବୁଅଗି ଚିନାଃ ଲାଇନ୍ ସବେନ୍ ସାମାୟ୍ ବୋରୋୱାନ୍ କାଜି କୋରେ ତାଇନୋଃ ତାନାବୁ? ହେ ହାଗାକୋ, ଇଙ୍ଗ୍‍କେ ଏନ୍ ଘାମାଣ୍ଡ୍ ରାଃ କିରିୟା ଜୋମ୍ କେତେ କାଜି ତାନିଙ୍ଗ୍, ଅକନାଃ ଚି ଆବୁୱାଃ ମାସୀହ୍ ୟୀଶୁ ରେ ଇଙ୍ଗ୍ ଆପେୟାଃ ବିଷାୟ୍ ରେ ରିକାତାନିଙ୍ଗ୍ ଚି ଇଙ୍ଗ୍ ସବେନ୍ ହୁଲାଙ୍ଗ୍ ଗୋଜୋଃ ତାନିଙ୍ଗ୍। ଆଗାର୍ ଇଙ୍ଗ୍ ହୋଡ଼ୋକୋୱାଃ ପାହୋମ୍ ଲେକାତେ ଇଫିସୁସ୍ ସାହାର୍ ରେ ବୁରୁ ଜାନ୍ତୁ ଲେକାନ୍ ହୋଡ଼ୋକୋଲୋଃ ଥାପାଃ ଜାନିଙ୍ଗ୍ ଏଣ୍ଡେ ଇଙ୍ଗ୍‍କେ ଚିକାନ୍ ଲାଭ୍ ହୋବାଜାନା? ଆଗାର୍ ଗୋଜାକାନ୍ ହୋଡ଼ୋକୋ କାକୋ ଜୀହିଦୋଃୱା, “ଏଣ୍ଡେ ଦୋ ହିଜୁଃପେ, ଜୋମ୍ ନୁୱେ ୟାବୁ, ଚିୟାଃଚି ଗାପା ଦୋ ଗୋଜୋଃ ଗିୟାବୁ।” ଆଲୋପେ ହିହିଡ଼ୋଗା, “ଏତ୍କାନ୍ ଗାତିଏନ୍ ବୁଗିନ୍ ସେସେନ୍ ହୋଡ଼ କେ ବାଗ୍‍ଡ଼ାଅ ତାଆଏ।” ଧାରାମ୍ ଲାଗିନ୍ତେ ଏୟୋନେନ୍ ପେ ଆଡୋଃ ଆଲୋପେ ପାପେୟା; ଚିୟାଃଚି ଚିମିନାଙ୍ଗ୍ କୋ ନେକା ମେନାକୋୱା ଅକନ୍‍କୋ ପାର୍ମେଶ୍ଵାର୍ କେ କାକୋ ସାରିୟା, ଇଙ୍ଗ୍ ଆପେକେ ଗିୟୁଃ ରିକା ଲାଗିନ୍ତେ ନେକା କାଜି ତାନିଙ୍ଗ୍। ନାଆ ଜେତାଏ ନେୟା କାଜିୟାଏ, “ଗୋଜାକାନ୍ କୋ ଅକନ୍ ଲେକାତେ ଜୀବିରିଦୋଃୱାକୋ, ଆଡୋଃ ଚିଲ୍‍କାନ୍ ହୋଡ଼ମୋ ତେ ହିଜୁଃୱାକୋ?” ହେ ଡୋଣ୍ଡୋ! ଅକନାଃ ଆମ୍ ହେର୍ ତାନାମ୍, ଚିମ୍ତାଙ୍ଗ୍ ସାନ୍ତେ ଏନା କାଗୋଜୋଃ ତାନା ଏନା କାଅମୋନୋଃ ତାନା। ହାର୍ ଅକନାଃ ଆମ୍ ହେର୍ ତାନାମ୍, ଏନା ନେ ହୋଡ଼ମୋ ନାହାଲା ଅକନାଃ ଅମୋନୋଃ ରାଃ ମେନାଃ, ମେନ୍ଦୋ ଯାଙ୍ଗ୍ ଭାଇର୍ ତାନାଃ ଚାହେ ଗହମ୍ ରାଃ ଚାହେ ଆଡୋଃ ଏଟାଃ ହିତା ରାଃ। ମେନ୍ଦୋ ପାର୍ମେଶ୍ଵାର୍ ଆଜାଃ ସାନାଙ୍ଗ୍ ରାଃ ଲେକାତେ ଏନାକେ ହୋଡ଼ମୋ ଏମେୟାଏ, ହାର୍ ସବେନ୍ ମିପୀୟାଃ ଜାଙ୍ଗ୍ କେ ଆଜାଃଗି ହୋଡ଼ମୋ ଏମେୟାଏ। ସବେନ୍ ହୋଡ଼ମୋ ମିଃଲେକା ବାନୋଃ: ହୋଡ଼ କୋୱାଃ ହୋଡ଼ମୋ ଏଟାଃଗିୟା ପାଶୁ କୋୱାଃ ହୋଡ଼ମୋ ଏଟାଃଗିୟା; ଅଡ଼େ-ଚେଣେଃ କୋୱାଃ ହୋଡ଼ମୋ ଏଟାଃଗିୟା; ହାକୁ କୋୱା ହୋଡ଼ମୋ ଏଟାଃଗିୟା। ରିମିଲ୍‍ଦିଶୁମ୍ ରେ ତାଇନୋଃ ତେୟାଃ ଶିଙ୍ଗି, ଚାଣ୍ଡୁଃ, ଇପିଲ୍ କୋ ଇନ୍‍କୁ ଏଟାଃଗି ନେଲୋଗାକୋ ହାର୍ ଅତେ ରେ ତାଇନୋଃ ତେୟାଃ ହୋଡ଼ୋକୋ, ପାଶୁକୋ ହାର୍ ଦାରୁକୋ ଇନ୍‍କୁ ଏଟାଃଗି ନେଲୋଗାକୋ। ମେନ୍ଦୋ ରିମିଲ୍‍ଦିଶୁମ୍ ରେ ତାଇନୋଃ ତେୟାଃ ଜିନିଷ୍ କୋୱାଃ ଯୁନୁଲ୍ ଏଟାଃ ମେନାଃ, ହାର୍ ଅତେ ରେ ତାଇନୋଃ ତେୟାଃ କୋୱାଃ ସୁଗାଡ଼୍ ଏଟାଃଗିୟା। ଶିଙ୍ଗି ରାଃ ଯୁନୁଲ୍ ଏଟାଃଗିୟା, ଚାଣ୍ଡୁଃ ରାଃ ଯୁନୁଲ୍ ଏଟାଃଗିୟା, ଆଡୋଃ ଇପିଲ୍ କୋୱାଃ ଯୁନୁଲ୍ ଏଟାଃଗିୟା, ଚିୟାଃଚି ମିୟାଃ ଇପିଲ୍ ତେ ଏଟାଃ ଇପିଲ୍ ରାଃ ଯୁନୁଲ୍ ରେ ଆନ୍ତାର୍ ମେନାଃ। ଗୋଜାକାନ୍ କୋୱାଃ ଜୀବିନିରିଦ୍ ହଗି ଏନ୍‍ଲେକା ଗିୟା, ହୋଡ଼ମୋ ଗୋଜୋଃ ଦାଶା ରେ ହେରୋଃ ତାନା ହାର୍ କାଗୋଜୋଃ ଲେକା ଜୀବିରିଦୋଃୱା। ଏନା ବେଗାର୍ ମାଇନ୍ ଲୋଃ ହେରୋଃ ତାନା ହାର୍ ମାନାରାଙ୍ଗ୍ ଲୋଃ ଜୀବିରିଦୋଃ ତାନା, ନାରାଦୁରା ତେ ହେରୋଃ ତାନା ହାର୍ ପେଡ଼େଏ ତେ ଜୀବିରିଦୋଃ ତାନା। ଜୀଉତାଇନ୍ ହୋଡ଼ମୋ ହେରୋଃ ତାନା ଆଡୋଃ ଆତ୍ମାନ୍ ହୋଡ଼ମୋ ଜୀବିରିଦୋଃ ତାନା, ଆଗାର୍ ଜୀଉତାଇନ୍ ହୋଡ଼ମୋ ମେନାଃ, ଦୋ ଆତ୍ମାନ୍ ହୋଡ଼ମୋ ହଗି ମେନାଃ। ଏନ୍ ଲେକାଗି ପାବିତାର୍ ପୁଥି ରେ ଅଲାକାନା ଚି, “ସିଦା ହୋଡ଼, ମାନେ ଆଦାମ୍ ଜୀହିଦ୍‍ତାନ୍ ଜୀଉ ବାଇଜାନାଏ” ଆଡୋଃ ଟୁଣ୍ଡୁ ଆଦାମ୍, ଜୀଦାନ୍ ଏମ୍‍ତାନ୍ ଆତ୍ମା ବାଇଜାନାଏ। ମେନ୍ଦୋ ସିଦା ଜୀଉତାଇନ୍ ହୋଡ଼ମୋ ହିଜୁଃନା ଏନାରାଃ ତାୟୋମ୍ତେ ଆତ୍ମାନ୍ ହୋଡ଼ମୋ ହିଜୁଃନା। ସିଦା ହୋଡ଼ ଅତେ ରେନିଃ ମାନେ ହାସା ରେନ୍ ତାଇକେନାଏ; ଏଟାଃ ହୋଡ଼ ସିର୍ମାଦିଶୁମ୍ ରେନ୍ ତାନିଃ। ଜେଲେକା ଇନିଃ ହାସା ରେନିଃ ତାଇକେନାଏ, ଏନ୍ ଲେକାଗି ଇନ୍‍କୁ ହଗି ତାନ୍‍କୋ ଅକନ୍‍କୋ ହାସା ରେନ୍ ତାନ୍‍କୋ; ହାର୍ ଜେଲେକା ଇନିଃ ସିର୍ମାଦିଶୁମ୍ ରେନ୍ ତାନିଃ, ଏନ୍ ଲେକାଗି ଇନ୍‍କୁହଗି ତାନ୍‍କୋ ଅକନ୍‍କୋ ସିର୍ମାଦିଶୁମ୍ ରେନ୍ ତାନ୍‍କୋ। ହାର୍ ଆବୁ ଜେଲେକା ସିଦା ହୋଡ଼ ରାଃ ହୋଡ଼ମୋ ଲେକା ହୋବାକାନାବୁ ଅକନିଃଚି ହାସା ରାଃ ହୋଡ଼ମୋ ତାଇକେନାଏ, ଏନ୍‍ଲେକାଗି ଏନ୍ ସିର୍ମାଦିଶୁମ୍ ରେନ୍ ହୋଡ଼ ମାସୀହ୍ ଲେକା ହଗି ବାଇୟୋଃୱାବୁ। ହେ ହାଗାକୋ, ଇଙ୍ଗ୍ ନେୟା କାଜି ତାନାଇଙ୍ଗ୍ ଚି ମାସ୍ ଆଡୋଃ ମାୟୋମ୍ ପାର୍ମେଶ୍ଵାର୍ ରାଃ ରାଇଜ୍ ରାଃ ଆଧିକାରୀ କାହୋବା ଧାଡ଼ିୟୋଃୱା, ହାର୍ ଗୋଏଃ-ସୋୟାଅଃ ତେୟାଃ କାଗୋଏଃ-ସୋୟାଅଃ ତେୟାଃ ରାଃ ଆଧିକାରୀ କାହୋବା ଧାଡ଼ିୟୋଃୱା। ନେଲେପେ, ଇଙ୍ଗ୍ ଆପେକେ ମୁଣ୍ଡି ରାଃ କାଜି କାଜିପେତାନିଙ୍ଗ୍ ଚି, ଆବୁ ସବେନ୍ କାବୁ ଗୋଜୋଗା, ମେନ୍ଦୋ ସବେନ୍ କୋ ବାଦ୍‍ଲି କେନୋଗାବୁ। ନେୟା ଘାଡ଼ିକାଃ ଲୋଃ ଗି, ମେଏଃ ଜାପିଦ୍ଦୋଗି ଆଖ୍ରୀ ତୁର୍ହୀ ଅଙ୍ଗ୍ ତୋରାଗି ହୋବାୱାଃ। ଚିୟାଃଚି ତୁର୍ହୀ ଅଙ୍ଗ୍ଅଃୱା ହାର୍ ଗୋଜାକାନ୍ କୋ କାକୋଗୋଜୋଃ ଲାଗିନ୍ତେ ବିରିଃ ୱାକୋ, ଆଡୋଃ ଆବୁ ବାଦ୍‍ଲି କେନୋଗାବୁ। ଚିୟାଃଚି ଜାରୁରୀ ତାନାଃ ଚି ନେ ଗୋଏଃ-ସୋୟାଅଃ ତେୟାଃ ହୋଡ଼ମୋ କୋଗୋଏଃ-ସୋୟାଅଃ ତେୟାଃ କେ ତୁସିଙ୍ଗେକାଏ ହାର୍ ନେ ଗୋଜୋଃତେୟାଃ ହୋଡ଼ମୋ କାଗୋଜୋଃତେୟାଃ କେ ତୁସିଙ୍ଗେକାଏ। ଚିମ୍ତାଙ୍ଗ୍ ନେ ଗୋଏଃ-ସୋୟାଅଃ ତେୟାଃ କାଗୋଏଃ-ସୋୟାଅଃ ତେୟାଃ କେ ତୁସିଙ୍ଗ୍ କେୟାଏ, ହାର୍ ନେ ଗୋଜୋଃତେୟାଃ କାଗୋଜୋଃତେୟାଃ କେ ତୁସିଙ୍ଗ୍ କେୟାଏ, ଇମ୍ତା ଏନ୍ ବାଚାନ୍ ଅକନାଃ ପାବିତାର୍ ପୁଥି ରେ ଅଲାକାନା ପୁରା କେନୋଗା: “ଜିନିତାଅ ଗୋନୋଏଃ କେ ଉଃ ତାଦାଏ। ହେ ଗୋନୋଏଃ ଆମାଃ ଜିତାଅ କୋତାଃ ରେୟା? ଗୋନୋଏଃ ଆମାଃ ତୁତୁଡ଼୍ ତେୟାଃ କୋତାଃ ରେୟା?” ଗୋନୋଏଃ ରାଃ ତୁଡ଼୍ ପାପ୍ ତାନ୍ ଆଡୋଃ ପାପ୍ ରାଃ ପେଡ଼େଏ ମୁଶା ନାବୀ ରାଃ ଆଇନ୍ ତାନାଃ। ମେନ୍ଦୋ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ହୋବାଅଃକା, ଅକନିଃ ଚି ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହୋରାତେ ଆବୁକେ ଜିନିତାଅ ବୁତାନାଏ। ଏନାମେନ୍ତେ ହେ ଇଙ୍ଗ୍ଆଃ ଦୁଲାଡ଼୍ ହାଗାକୋ ହାର୍ ମିଶିକୋ, କେଟେଃ ହାର୍ ପୋକ୍ତା ହୋବାଅଃପେ, ଏନ୍ତେ ପ୍ରାଭୁ ଆଃ କାମି ରେ ସବେନ୍ ଇମ୍ତାଙ୍ଗ୍ ହାରା ଇଦିଅଃପେ, ଚିୟାଃଚି ନେୟା ସାରିତାନାପେ ଚି ଆପେୟାଃ କାମି ଅକନାଃ ପ୍ରାଭୁ ରେ କାମି କାଦାପେ ଏନା ସାମା କାହୋବାଅଃୱା। ନାଆ ଏନ୍ ହାରୋମ୍ ଟାକା ରାଃ ବିଷାୟ୍ ରେ ଅକନାଃ ପାବିତାର୍ ହୋଡ଼ୋକୋ ନାଙ୍ଗ୍ ହୋବାକାନା, ଜେଲେକା ଇଙ୍ଗ୍ ଗାଲାତିୟା କାଲିସିୟା ରେନ୍ କୋକେ କାଜି କାଃକୋୱାଇଙ୍ଗ୍, ଏନ୍‍ଲେକାଗି ଆପେ ହଗି ରିକାଏପେ। ହାପ୍ତା ରାଃ ସୁରୁ ହୁଲାଙ୍ଗ୍ ଆପେ ଏତେ ସବେନ୍ ମିପୀହୋଡ଼୍ କୋ ଆପେୟାଃ କାମି ଟାକା ଏତେ ହୁଡିଙ୍ଗ୍ ଲେକା ଟାକା ଗେନା ମାଣ୍ଡାଅ କାଏ ଏନାତେ ଚିମ୍ତାଙ୍ଗ୍ ଇଙ୍ଗ୍ ହିଜୁଗାଇଙ୍ଗ୍ ଦୋ ଆପେକେ ଆଡୋଃ ଏଟାଃଗି ଲେକାତେ ଟାକା ହାରୋମ୍ କାପାଡ଼ାଅଃୱା। ଆଡୋଃ ଚିମ୍ତାଙ୍ଗ୍ ଇଙ୍ଗ୍ ହିଜୁଗାଇଙ୍ଗ୍, ଦୋ ଅକଏକେ ଆପେ ସାନାଙ୍ଗାପେ ଇନ୍‍କୁକେ ଇଙ୍ଗ୍ ଚିଠି ଏମ୍ କେତେ କୁଲ୍ ତାକୋୱାଇଙ୍ଗ୍, ଚି ଆପେୟାଃ ଏନ୍ ଦାନ୍ ଟାକା କେ ୟୀରୁଶାଲେମ୍ ସାହାର୍ ସେଟେର୍ ତାଃକୋ। ଆଗାର୍ ଇଙ୍ଗ୍ଆଃ ସେନ୍ ତେୟା ଠାଉକା ହୋବାଅଃୱା ରେଦୋ, ଇନ୍‍କୁ ଇଙ୍ଗ୍ଆଃ ଲୋଃ ସେନାକୋ। ଇଙ୍ଗ୍ ମାକିଦୁନିୟା ରାଇଜ୍ ହୋଇ କେତେ ଆପେତାଃ ହିଜୁଗାଇଙ୍ଗ୍, ଚିୟାଃଚି ଇଙ୍ଗ୍‍କେ ମାକିଦୁନିୟା ରାଇଜ୍ ହୋଇ କେତେ ଗି ସେନ୍ ମେନାଃ। ମେନ୍ଦୋ ହୋବା ଧାଡ଼ିୟୋଃୱା ଚି ଆପେୟାଃ ତାଃଗି ତାଇନ୍ କେନୋଗାଇଙ୍ଗ୍ ହାର୍ ରାବାଙ୍ଗ୍ ସାମାୟ୍ ରେ ଆପେତାଃ ବିତାଅୟାଇଙ୍ଗ୍, ଏନାତେ ଅକତାଃ ଇଙ୍ଗ୍ ସେନ୍ ସାନାଙ୍ଗାଇଙ୍ଗ୍ ଏନ୍ତାଃ ଆପେ ଇଙ୍ଗ୍‍କେ ସେଟେର୍ ନାଙ୍ଗ୍ ଦେଙ୍ଗାଇଙ୍ଗ୍ ୟାପେ। ଚିୟାଃଚି ଇଙ୍ଗ୍ ନାଆ ହୋରା ରେ ଆପେ ଲୋଃ ନାପାମ୍ ନାଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା; ମେନ୍ଦୋ ଇଙ୍ଗ୍‍କେ ଆଶ୍ରା ମେନାଃ ଚି ଆଗାର୍ ପ୍ରାଭୁ ସାନାଙ୍ଗ୍ ରେଦୋ ହୁଡିଙ୍ଗ୍ ସାମାୟ୍ ସାନ୍ତେ ଆପେୟାଃଲୋଃ ତାଇନୋଗାଇଙ୍ଗ୍। ମେନ୍ଦୋ ଇଙ୍ଗ୍ ପେନ୍ତିକୋଷ୍ତ ପାରାବ୍ ସାନ୍ତେ ଇଫିସୁସ୍ ସାହାର୍ ରେ ତାଇନାଇଙ୍ଗ୍। ଚିୟାଃଚି ଇଙ୍ଗ୍ଆଃ ନାଙ୍ଗ୍ ଏନ୍ତାଃରେ ମିୟାଃ ବୁଗିନ୍ କାମି ନାଙ୍ଗ୍ ମାରାଙ୍ଗ୍ ହୋରା ଅଟାଃକାନା, ଆଡୋଃ ଏନ୍ତାଃ ରେ ବିରୋଧୀ ହୋଡ଼ୋକୋ ଥିମ୍ବା ଗିୟାକୋ। ଆଗାର୍ ତିମୁଥିୟୁସ୍ କୁରିନ୍ଥିୟୋ ସାହାର୍ ରେ ହିଜୁଃ କେନୋଃ ୱାଏ, ଏଣ୍ଡେ ଇନିଃକେ ବୁଗିନ୍ ଲେକାତେ ମାଇନିୟାପେ ଚି ବେଗାର୍ ବୋରୋତେ ତାଇନାଏ, ଚିୟାଃଚି ଇନିଃ ଇଙ୍ଗ୍ଆଃ ଲେକା ପ୍ରାଭୁ ରାଃ କାମି ତାନାଏ। ଏନାମେନ୍ତେ ଜେତାଏ ଇନିଃକେ କାମାଇନ୍ ନାମେ ଲେକାନିଃ ଆଲୋପେ ବାଇୟା, ମେନ୍ଦୋ ଇନିଃକେ ମାଜା ତେ ନେତେ ସେଟେର୍ ତାଇପେ, ଏନାତେ ଇଙ୍ଗ୍ଆଃ ତାଃ ହିଜୁଃୱାଏ; ଚିୟାଃଚି ଇଙ୍ଗ୍ ଇନିଃକେ ନେଲ୍ ହୋରା ତାନାଇଙ୍ଗ୍, ଚି ଇନିଃ ବିଶ୍ଵାସୀ ହାଗା କୋଲୋଃ ହିଜୁଃଚାଏ। ଆଡୋଃ ବିଶ୍ଵାସୀ ହାଗା ଆପୁଲୋସ୍ କେ ଇଙ୍ଗ୍ ଥିମ୍ବାଗି ଆର୍ଜି କିଜାଇଙ୍ଗ୍ ଚି ଆପେୟାଃ ନାଡ଼େଏ ରେ ଏଟାଃ ବିଶ୍ଵାସୀ ହାଗା କୋୱାଃ ଲୋଃ ସେନ୍ କାଏ; ମେନ୍ଦୋ ଇନିଃ ନାଆ ସେନ୍ ଲାଗିନ୍ କାଏ ସାନାଙ୍ଗ୍ କେଦା, ମେନ୍ଦୋ ଚିମ୍ତାଙ୍ଗ୍ ସାମାୟ୍ ନାମେୟାଏ, ଇମ୍ତାଙ୍ଗ୍ ସେନାଏ। ଏୟୋନ୍ କାନ୍ ତାଇନ୍‍ପେ, ବିଶ୍ୱାସ୍ ରେ କେଟେଃ ତାଇନ୍‍ପେ, ଜାୱାନ୍ ହୋଡ଼ୋକୋ ଲେକା ସାହାସ୍ ଏପେ, ପେଡ଼େଜାନ୍ ବାଇୟୋଃପେ। ଜାହାନାଃଗି ରିକା ତାନାପେ ଏନା ଦୁଲାଡ଼୍ ତେ ରିକାଏପେ। ହେ ହାଗାକୋ ହାର୍ ମିଶିକୋ, ଆପେ ସ୍ଥିଫାନାଶ୍ ରାଃ ଅଡ଼୍ଆଃ ରେନ୍ କୋକେ ସାରିକୋତାନାପେ ଚି ଇନ୍‍କୁ ଆଖାୟା ରାଇଜ୍ ରେନ୍ ସିଦା ଯଅ ତାନ୍‍କୋ, ହାର୍ ପାବିତାର୍ ହୋଡ଼ୋକୋୱାଃ ସେୱା ଲାଗିନ୍ତେ ସେକାଡ଼୍ ତାଇନୋଃ ୱାକୋ। ଏନାମେନ୍ତେ ଇଙ୍ଗ୍ ଆପେ କେ ଆର୍ଜିପେ ତାନିଙ୍ଗ୍ ଚି ନେକାନ୍ କୋୱାଃ ଆଧିନ୍ ରେ ତାଇନୋଃପେ, ହାର୍ ଇନ୍‍କୁୱାଃ ହଗି ଅକନ୍ କୋ ନେ କାମି କେ କାମିତାନାକୋ ହାର୍ ଦେଙ୍ଗା ତାନାକୋ। ଇଙ୍ଗ୍ ସ୍ଥିଫାନାଶ୍ ଆଡୋଃ ଫୁର୍ତୁନାତୁସ୍ ଆଡୋଃ ଆଖାଇକୁସ୍ ରାଃ ହିଜୁଃ ତେ ଖୁସ୍ ଗିୟାଇଙ୍ଗ୍, ଚିୟାଃଚି ଇନ୍‍କୁ ଇଙ୍ଗ୍‍କେ ଦେଙ୍ଗା କେଦିଙ୍ଗ୍ଆକୋ ଅକନାଃଚି ଆପେ କାପେ ଧାଡ଼ିତେୟାଃ। ଇନ୍‍କୁ ଇଙ୍ଗ୍ଆଃ ଆଡୋଃ ଆପେୟାଃ ଆତ୍ମା କେ ସୁକୁ ଏମ୍‍କେଦାକୋ, ଏନାମେନ୍ତେ ନେକାନ୍ କୋକେ ମାନାତିଙ୍ଗ୍ କୋପେ। ଆସିୟା ରାଇଜ୍ ରେନ୍ କାଲିସିୟା କୋୱାଃ ପାଡ଼େତେ ଆପେକେ ଜୋହାର୍; ଆକ୍ୱିଲା ହାର୍ ପ୍ରିସ୍କା ରାଃ ଆଡୋଃ ଆକିନାଃ ଅଡ଼୍ଆଃ ରାଃ କାଲିସିୟା ରେନ୍ ହୋଡ଼ୋକୋୱାଃ ହଗି ଆପେକେ ପ୍ରାଭୁ ରେ ଥିମ୍ବା-ଥିମ୍ବା ଜୋହାର୍। ନେତାଃ ରେନ୍ ହାଗାକୋ ଆପେକେ ଜୋହାର୍ ପେ ତାନାକୋ। ପାବିତାର୍ ଚୁମା ତେ ଜୋହାରେନ୍ ପେ। ଇଙ୍ଗ୍ ପାଉଲୁସ୍ ଇଙ୍ଗ୍ଆଃ ତିଈ ତେ ଅଲାକାନ୍ ଆପେକେ ଜୋହାର୍ କାଜିପେ ତାନିଙ୍ଗ୍। ଆଗାର୍ ଜେତାଏ ପ୍ରାଭୁ ଲୋଃ କାଏ ଦୁଲାଡ଼୍ ମାଣ୍ତାଅ ତାନାଏ ରେଦୋ ଇନିଃ ସାର୍ପାଅଃ କାଏ। ହେ ଆଲେୟାଃ ପ୍ରାଭୁ, ହିଜୁଃ ମେ! ପ୍ରାଭୁ ୟୀଶୁ ଆଃ ଆନୁଗ୍ରାହ୍ ଆପେୟାଃ ରେ ହୋବାକାତୋଃକା। ଇଙ୍ଗ୍ଆଃ ଦୁଲାଡ଼୍ ମାସୀହ୍ ୟୀଶୁ ରେ ଆପେ ସବେନ୍ କୋଲୋଃ ତାଇନୋଃକା। ଆମୀନ୍। ପାଉଲୁସ୍ ଆଃ ପାଡ଼େତେ ଅକନିଃ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ମାସୀହ୍ ୟୀଶୁ ରାଃ କୁଲାକାନ୍ ଚେଲା ତାନିଃ, ହାର୍ ମାସୀହ୍ ରେ ହାଗା ତିମୁଥିୟୁସ୍ ପାଡ଼େତେ ପାର୍ମେଶ୍ଵାର୍ ରାଃ ଏନ୍ କାଲିସିୟା ରାଃ ନୁତୁମ୍ ରେ, ଅକନାଃ କୁରିନ୍ଥିଉସ୍ ସାହାର୍ ରେ ମେନାଃ, ଆଡୋଃ ସବେନ୍ ଆଖାୟା ରାଇଜ୍ ରେନ୍ ସବେନ୍ ପାବିତାର୍ ହୋଡ଼ୋକୋୱାଃ ନୁତୁମ୍ ରେ ନେ ଚିଠି ତାନାଃ: ଆବୁୱାଃ ଆବା ପାର୍ମେଶ୍ଵାର୍ ହାର୍ ପ୍ରାଭୁ ୟୀଶୁ ମାସୀହ୍ ଆଃ ପାଡ଼େତେ ଆପେକେ ଆନୁଗ୍ରାହ୍ ଆଡୋଃ ଜୀଉସୁକୁ ନାମ୍ କାତେୟୋଃକା। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହାର୍ ପାର୍ମେଶ୍ଵାର୍ ଆଃ ଧାନ୍ୟାବାଦ୍ ହୁୟୋଃକା, ଅକନିଃ ଦାୟା ତେ ଫେରେଃକାନ୍ ଆପୁ ଆଡୋଃ ସବେନ୍ ଲେକାନାଃ ଶାନ୍ତି ରାଃ ପାର୍ମେଶ୍ଵାର୍ ତାନିଃ। ଇନିଃ ଆବୁୱାଃ ସବେନ୍ ଦୁକୁ କୋରେ ଶାନ୍ତି ଏମ୍ ତାନାଏ; ଏନାତେ ଆବୁ ଏନ୍ ଶାନ୍ତି ରାଃ ହୋରାତେ ଅକନାଃ ପାର୍ମେଶ୍ଵାର୍ ତେ ନାମ୍ ତାନାବୁ, ଇନ୍‍କୁକେ ହଗି ଶାନ୍ତି ଏମ୍ ଧାଡ଼ିକୋୱାବୁ ଅକନ୍‍କୋ ଜାହାନ୍ ଲେକାନାଃ ଦୁକୁ ରେ ମେନାକୋୱା। ଚିୟାଃଚି ଜେଲେକା ଆବୁ ମାସୀହ୍ ରାଃ ଦୁକୁ କୋରେ ଥିମ୍ବା ମେଶାନ୍ ତାନାବୁ, ଏନ୍‍ଲେକାଗି ଆବୁ ଶାନ୍ତି ରେହଗି ମାସୀହ୍ ରାଃ ହୋରାତେ ଥିମ୍ବା ମେଶାନ୍ ତାନାବୁ। ଆଗାର୍ ଆଲେ ଦୁକୁ ନାମ୍ ତାନାଲେ, ଏଣ୍ଡେ ନେୟା ଆପେୟାଃ ଶାନ୍ତି ହାର୍ ବାଞ୍ଚାଅ ଲାଗିନ୍ତେ ତାନାଃ; ହାର୍ ଆଗାର୍ ଶାନ୍ତି ନାମ୍ ତାନାଲେ, ଏଣ୍ଡେ ନେୟା ଆପେୟାଃ ଶାନ୍ତି ନାମେ ଲାଗିନ୍ତେ ତାନାଃ; ଏନାରାଃ ଚାଲ୍ତେ ଆପେ ସାହାତିଙ୍ଗ୍ ତାନ୍ ଲୋଃ ଏନ୍ ଦୁକୁ କୋକେ ସାହାଅ ଧାଡ଼ିତାନାପେ, ଅକନାଃ କେ ଆଲେ ହଗି ସାହାଅ ତାନାଲେ। ଆଲେୟାଃ ଆଶ୍ରା ଆପେୟାଃ ବିଷାୟ୍ ରେହଗି କେଟେଃ ଗିୟାଃ; ଚିୟାଃଚି ଆଲେ ସାରି ତାନାଲେ ଚି ଆପେ ଜେଲେକା ଆଲେୟାଃ ଦୁକୁ କୋରେ, ଏନ୍‍ଲେକାଗି ଶାନ୍ତି ରେହଗି ମେଶା କାନାପେ। ହେ ହାଗାକୋ, ଆଲେ କାଲେ ସାନାଙ୍ଗ୍ ତାନା ଚି ଆପେ ଏନ୍ ଦୁକୁ କୋତେ କାସାରିଲେକା ତାଇନ୍‍ପେ, ଅକନାଃ ଆସିୟା ରାଇଜ୍ ରେ ଆଲେୟାଃ ରେ ଉୟୁଃଲେନା, ଆଲେ ନେକାନ୍ ମାରାଙ୍ଗ୍ ହାମ୍ବାଲ୍ ତେ ତେନାକାନ୍ ତାଇକେନାଲେ, ଅକନାଃ ଆଲେୟାଃ ସାହାତିଙ୍ଗ୍ ପେଡ଼େଏ ତେ ବାହାରି ତାଇକେନା, ନେତାଃ ସାନ୍ତେ ଚି ଆଲେ ଜୀଉ ନାମେ ରାଃ ଆଶ୍ରା ହ କାତାଇକେନା। ମେନ୍ଦୋ ଆଲେ ମୋନ୍ ରେ ପାହୋମ୍ ଲେଦାଲେ ଚି ଆଲେୟାଃ ରେ ଗୋନୋଏଃ ରାଃ ଆନାଚୁ ହୋବା ଛାବାକାନା, ଏନାତେ ଆଲେ ଆପାନାଃ ଚେତାନ୍ ରେ ଭାରୋସା କାମାଣ୍ଡାଅ ଚାହି ମେନ୍ଦୋ ପାର୍ମେଶ୍ଵାର୍ ଚେତାନ୍ ରେ ମାଣ୍ଡାଅ ଚାହି ଅକନିଃ ଗୋଜାକାନ୍ କୋକେ ଜୀହିଃ କୋୱାଏ। ଇନିଃଗି ଆଲେକେ ଗୋନୋଏଃ ରାଃ ନେକାନ୍ ମାରାଙ୍ଗ୍ ସାଙ୍କାଟ୍ ଏତେ ବାଚାଓ କେଃଲେୟାଏ; ହାର୍ ଇନିଜାଃ ଚେତାନ୍ ରେ ଆଲେୟାଃ ଆଶ୍ରା ମେନାଃ ଚି ଇନିଃ ଆୟୁର୍ ତେହଗି ବାଚାଓ କାତେୟାଏ। ଆପେହଗି ମିଃତେ ବିନ୍ତି ରାଃ ହୋରାତେ ଆଲେୟାଃ ଦେଙ୍ଗା ରିକାୟାପେ, ଏନାତେ ଅକନ୍ ଆନୁଗ୍ରାହ୍ ରାଃ ବାର୍ଦାନ୍ ଥିମ୍ବାଗି ହୋଡ଼ୋକୋୱାଃ ଚାଲ୍ତେ ଆଲେକେ ନାମ୍‍ଜାନା, ଏନା ଲାଗିନ୍ତେ ଥିମ୍ବାଗି ହୋଡ଼ୋକୋ ଆଲେୟାଃ ପାଡ଼େତେ ଧାନ୍ୟାବାଦ୍ ରିକାଚାକୋ। ଚିୟାଃଚି ଆଲେ ଆଲେୟାଃ ଆଟ୍‍କାର୍ ଧାଡ଼ି ସେଣା ତେ ନେ ଗୋୱା ଚେତାନ୍ ରେ ଘାମାଣ୍ଡ୍ ତାନାଲେ, ଚି ନେ ଅତେଦିଶୁମ୍ ରେ ହାର୍ ଖାସ୍ କେତେ ଆପେୟାଃ ଥାଲା ରେ ଆଲେୟାଃ ଚାଲ୍-ଚାଲାନ୍ ପାର୍ମେଶ୍ଵାର୍ ସାନାଙ୍ଗ୍ ଲେକା ନେକା ପାବିତାର୍ ହାର୍ ସାର୍ତି ଲୋଃ ତାଇକେନା। ଅକନାଃ ନେ ଅତେଦିଶୁମ୍ ରେନ୍ ହୋଡ଼ୋକୋୱାଃ ସେଣା ତେ କାହା ମେନ୍ଦୋ ପାର୍ମେଶ୍ଵାର୍ ରାଃ ଆନୁଗ୍ରାହ୍ ଲୋଃ ତାଇକେନା। ଆଲେ ଆପେକେ ଆଡୋଃ ଜାହାନାଃ କାଲେ ଅଲ୍ ତାନା, ଏନା ଭାଇର୍ ଅକନାଃ ଆପେ ପାଢ଼ାଅଃ ତାନାପେ ୟାଦୋ ମାନାତିଙ୍ଗ୍ ହ ତାନାପେ, ଆଡୋଃ ଇଙ୍ଗ୍‍କେ ଆଶ୍ରା ମେନାଃ ଚି ଏନାକେ ଆଖ୍ରୀ ସାନ୍ତେ ହଗି ମାନାତିଙ୍ଗ୍ କାତେୟାପେ। ଜେଲେକା ଆପେୟାଃ ଏତେ ଚିମିନାଙ୍ଗ୍ କୋ ମାନାତିଙ୍ଗ୍ ଜାନାକୋ ଚି ଆଲେ ଆପେୟାଃ ଘାମାଣ୍ଡ୍ ରାଃ କାରାନ୍ ତାନ୍‍ଲେ, ଏନ୍ ଲେକାଗି ଆପେ ହଗି ପ୍ରାଭୁ ୟୀଶୁ ରାଃ ହୁଲାଙ୍ଗ୍ ଆଲେୟାଃ ନାଙ୍ଗ୍ ଘାମାଣ୍ଡ୍ ରାଃ କାଜି ହୋବାଅଃୱାପେ। ଏନ୍ ଭାରୋସା ଏତେଗି ଇଙ୍ଗ୍ ସାନାଙ୍ଗ୍ ତାଇକେନାଇଙ୍ଗ୍ ଚି ସିଦା ଆପେୟାଃ ତାଃ ସେନାଇଙ୍ଗ୍ ଏନାତେ ଆପେ ବାର୍ସା ଆଶିଷ୍ ନାମେ ୟାପେ; ଇଙ୍ଗ୍ ପାହୋମ୍ ତାଇକେନାଇଙ୍ଗ୍ ଚି ଆପେୟାଃ ତାଃଏତେ ମାକିଦୁନିୟା ରାଇଜ୍ ତେ ସେନିଙ୍ଗ୍, ଏନ୍ତେ ଆଡୋଃଗି ମାକିଦୁନିୟା ରାଇଜ୍ ତାଃଏତେ ଆପେୟାଃ ତାଃ ହିଜୁଗାଇଙ୍ଗ୍; ହାର୍ ଏନ୍ତେ ଆପେ ଇଙ୍ଗ୍‍କେ ୟାହୁଦୀୟା ଜିଲ୍ଲା ପାଡ଼୍ ହୁଡିଙ୍ଗ୍ ସାଙ୍ଗିନ୍ ସାନ୍ ସେଟେର୍ ତାଇଙ୍ଗ୍ ପେ। ଏନାମେନ୍ତେ ଇଙ୍ଗ୍ ଅକନାଃ ସାନାଙ୍ଗ୍ ଲେଦାଇଙ୍ଗ୍ ଦୋ ଚିନାଃ ସାମାଗିଙ୍ଗ୍ ରିକାକେଦା? ଚି ଅକନାଃ ରିକାନାଙ୍ଗ୍ ସାନାଙ୍ଗ୍ ତାନିଙ୍ଗ୍ ଚିନାଃ ଅତେଦିଶୁମ୍ ରେନ୍ ହୋଡ଼ୋକୋ ଲେକା ରିକାନାଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି ଇଙ୍ଗ୍ ବାକାଣ୍ ରେ ହାଁ, ହାଁ ହ କାଜିୟାଇଙ୍ଗ୍ ଆଡୋଃ କାହା, କାହା ହ କାଜିୟାଇଙ୍ଗ୍? ପାର୍ମେଶ୍ଵାର୍ ବିଶ୍ଵାସେ ଲେକାନିଃ ତାନିଃ ଆଲେୟାଃ ଏନ୍ ସାନ୍ଦେଶ୍ କୋରେ ଅକନାଃ ଆପେକେ କାଜିକେଦାଲେ “ହାଁ” ଆଡୋଃ “କାହା” ବାରାନାଃ ବାନୋଃ। ଚିୟାଃଚି ପାର୍ମେଶ୍ଵାର୍ ରାଃ ହୋନ୍ ୟୀଶୁ ମାସୀହ୍ ଅକନିଜାଃ ଆଲେୟାଃ ହୋରାତେ ମାନେ ଇଙ୍ଗ୍ଆଃ ହାର୍ ସିଲ୍‍ବାନୁସ୍ ଆଡୋଃ ତିମୁଥିୟୁସ୍ ରାଃ ହୋରାତେ ଆପେୟାଃ ଥାଲା ରେ ପାର୍ଚାର୍ ହୋବାଜାନା, ଏନାରେ “ହାଁ” ଆଡୋଃ “କାହା” ବାରାନାଃ କାତାଇକେନା, ମେନ୍ଦୋ ୟୀଶୁ ମାସୀହ୍ ରେ “ହାଁ” ରାଃ “ହାଁ” ଗି ହୋବାନା। ଚିୟାଃଚି ପାର୍ମେଶ୍ଵାର୍ ରାଃ ଚିମିନାଙ୍ଗ୍ ଗି କିରିୟାକୋ ମେନାଃ, ଏନା ସବେନାଃ ଇନିଜାଃ ରେଗି “ହାଁ” ଗି ମେନାଃ। ଏନାଲାଗିନ୍ତେ ଇନିଜାଃ ହୋରାତେ “ଆମୀନ୍” ହଗି ହୋବାଜାନା ଚି ଆବୁୱାଃ ହୋରାତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ହୁୟୋଃକା। ଆଡୋଃ ଅକଏ ଆଲେକେ ଆପେୟାଃ ଲୋଃ ମାସୀହ୍ ରେ କେଟେଃ ରିକାୟାଏ, ଆଡୋଃ ଅକନିଃ ଆବୁକେ ଆଭିଷେକ୍ କେଦାଏ ଇନିଃଗି ପାର୍ମେଶ୍ଵାର୍ ତାନିଃ, ଅକନିଃ ଆବୁୱାଃ ରେ ଛାପା ହଗି ରିକା କେଦାଏ ଆଡୋଃ ବାୟାନା ରେ ଆତ୍ମା କେ ଆବୁୱାଃ ମୋନ୍ ରେ ଏମ୍‍କେଦାଏ। ଇଙ୍ଗ୍ ପାର୍ମେଶ୍ଵାର୍ କେ ଗୋୱା କେତେ କାଜି ତାନାଇଙ୍ଗ୍ ଚି ଇଙ୍ଗ୍ ନାଆ ସାନ୍ କୁରିନ୍ଥିଉସ୍ ରେ ନେୟାଲାଗିନ୍ତେ କାଇଙ୍ଗ୍ ହିଜୁଃଜାନା, ଚି ଇଙ୍ଗ୍‍କେ ଆପେ ଲାଗିନ୍ ଦାୟା ହିଜୁଃ ତାଇନା। ନେୟା କାହା ଚି ଆଲେ ବିଶ୍ଵାସ୍ ରାଃ ବିଷାୟ୍ ରେ ଆପେୟାଃ ଚେତାନ୍ ରେ ଗୋମ୍‍କେ ବାଇଏନ୍ ସାନାଙ୍ଗ୍ ତାନାଲେ; ମେନ୍ଦୋ ଆପେୟାଃ ରାଶିକା ରେ ଦେଙ୍ଗାନିଃ ତାନ୍‍ଲେ ଚିୟାଃଚି ଆପେ ବିଶ୍ଵାସ୍ ତେଗି କେଟେଃ ତାଇନୋଃ ତାନାପେ। ଇଙ୍ଗ୍ ଇଙ୍ଗ୍ଆଃ ମୋନ୍ ରେ ପାହୋମ୍ ଛାବା ଲେଦାଇଙ୍ଗ୍ ଚି ଆଡୋଃ ଆପେୟାଃ ନାଡ଼େଏ ଦୁକୁ ଏମ୍ ନାଙ୍ଗ୍ କାଇଙ୍ଗ୍ ସେନା। ଚିୟାଃଚି ଆଗାର୍ ଇଙ୍ଗ୍ ଆପେକେ ମୋନ୍ ରେ ଦୁକୁ ପେୟାଇଙ୍ଗ୍, ଏଣ୍ଡେ ଇଙ୍ଗ୍‍କେ ଅକଏ ସୁକୁ ଏମାଇଙ୍ଗ୍‍ୟାଏ, ଇନିଃ ଗିଦାଙ୍ଗ୍ ଅକଏକେ ଇଙ୍ଗ୍ ମୋନ୍ ରେ ଦୁକୁ ଏମାଇଜାଇଙ୍ଗ୍? ହାର୍ ଇଙ୍ଗ୍ ନେ କାଜିକେଗି ଆପେକେ ନେମେନ୍ତେ ଅଲ୍ କେଦାଇଙ୍ଗ୍ ଚି, ନେକା ଆଲୋକା ହୋବାଅଃକା ଚି, ଇଙ୍ଗ୍ ହିଜୁଃ ରେ, ଅକଏତେ ଇଙ୍ଗ୍‍କେ ସୁକୁ ନାମୋଃ ଚାହି ଇନିଃତେ ମୋନ୍ ରେ ଦୁକୁ ନାମେୟାଇଙ୍ଗ୍; ଚିୟାଃଚି ଇଙ୍ଗ୍‍କେ ଆପେ ସବେନ୍ କୋରେ ନେ କାଜି ରାଃ ଭାରୋସା ମେନାଃ, ଚି ଅକନାଃ ଇଙ୍ଗ୍ଆଃ ରାଶିକା ତାନାଃ, ଏନାଗି ଆପେୟାଃ ହଗି ତାନାଃ। ମାରାଙ୍ଗ୍ ଦୁକୁ ହାର୍ ମୋନ୍ ରାଃ ହାସୁ ତେ ଇଙ୍ଗ୍ ଥିମ୍ବାଗି ମେଏଃ ଦାଆ ଜୋରୋ-ଜୋରୋ କେତେ ଆପେକେ ଅଲ୍ ଲେଦାଇଙ୍ଗ୍, ନେୟା ଏନାମେନ୍ତେ କାହା ଚି ଆପେ ଦୁକୁଅଃପେ, ମେନ୍ଦୋ ଏନାମେନ୍ତେ ଚି ଆପେ ଏନ୍ ମାରାଙ୍ଗ୍ ଦୁଲାଡ଼୍ କେ ସାରିକେପେ, ଅକନାଃ ଇଙ୍ଗ୍‍କେ ଆପେ ଲୋଃ ମେନାଃ। ଆଗାର୍ ଜେତାଏ ଦୁକୁ ଏମାକାଃ ରେଦୋ, ଇଙ୍ଗ୍‍କେ ଭାଇର୍ କାହା ମେନ୍ଦୋ (ଇଙ୍ଗ୍ ଇନିଃ ନାଙ୍ଗ୍ ଥିମ୍ବାଗି କେଟେଃ ହୋବାଅଃ କାଇଙ୍ଗ୍ ସାନାଙ୍ଗ୍ ତାନା) ହୁଡିଙ୍ଗ୍-ହୁଡିଙ୍ଗ୍ ଦୋ ଆପେ ସବେନ୍ କେ ହଗି ଦୁକୁକାଃ ପେୟାଏ। ଏନ୍ ଲେକାନ୍ ହୋଡ଼ ନାଙ୍ଗ୍ ଏନ୍ ଶାଜା ଅକନାଃ ଥିମ୍ବାଗି ହାଗାକୋ ଏମ୍ କିଜାକୋ, ଇମିନାଙ୍ଗ୍ ଗି ଥିମ୍ବା ତାନାଃ। ଏନାମେନ୍ତେ ନେୟାତେ ବୁଗିନାଃ ନେୟା ତାନାଃ ଚି ଇନିଜାଃ ଦୋଷ୍ କେ ଛାମା ଇପେ ହାର୍ ଶାନ୍ତି ଏମାଇପେ, ନେକା ଆଲୋକା ହୋବାଅଃକା ଚି ନେକାନ୍ ହୋଡ଼ ଥିମ୍ବାଗି ଦୁକୁ ରେ ଡୁବିଜୋଗାଏ। ଏନା ଲାଗିନ୍ତେ ଇଙ୍ଗ୍ ଆପେକେ ଆର୍ଜି ପେତାନିଙ୍ଗ୍ ଚି ଇନିଃକେ ଆପେ ଦୁଲାଡ଼ି ତାନାପେ ମେନ୍ତେ ଦେଖାୱିପେ। ଚିୟାଃଚି ଇଙ୍ଗ୍ ଏନାମେନ୍ତେ ଗି ଅଲ୍ ଲେଦାଇଙ୍ଗ୍ ଚି ଆପେକେ ସାରିଉରୁମ୍ ପେୟାଇଙ୍ଗ୍ ଚି ଆପେ ଇଙ୍ଗ୍ଆଃ ସବେନ୍ କାଜିକୋକେ ମାନାତିଙ୍ଗ୍ ନାଙ୍ଗ୍ ସେକାଡ଼୍ ମେନାପେୟା ଚି କାହା। ଅକେୟାଃ ଆପେ ଛାମା ତାନାପେ ଇନିଃକେ ଇଙ୍ଗ୍ ହଗି ଛାମା ଇତାନିଙ୍ଗ୍, ଚିୟାଃଚି ଇଙ୍ଗ୍ ହଗି ଅକନାଃ ଛାମା କାଦାଇଙ୍ଗ୍, ଆଗାର୍ ଛାମା କାଃରେଦୋ, ଆପେୟାଃ ଲାଗିନ୍ତେ ମାସୀହ୍ ରାଃ ଜାଗା ରେ ତାଇକେତେ ଛାମା କାଦିଙ୍ଗ୍। ଏନାତେ ଶାଏତାନ୍ ରାଃ ଆବୁୱାଃ ରେ ଚାଲାକି ଆଲୋକା ହୋବାଅଃକା, ଚିୟାଃଚି ଆବୁ ଇନିଜାଃ ଚାଲ୍ କେ କାବୁ ସାରିକାଦା ଲେକା ବାଙ୍ଗ୍‍ବୁୱା। ଚିମ୍ତା ଇଙ୍ଗ୍ ମାସୀହ୍ ରାଃ ସୁସାମାଚାର୍ ଉଦୁବ୍ ଲାଗିନ୍ ତ୍ରୋଆସ୍ ସାହାର୍ ହିଜୁଃ ଜାନାଇଙ୍ଗ୍, ଏନ୍ତେ ପ୍ରାଭୁ ଇଙ୍ଗ୍ଆଃ ଲାଗିନ୍ ମିୟାଃ ହୋରା ଖଲାଅ କେଦାଏ, ଏଣ୍ଡେ ହ ଇଙ୍ଗ୍ଆଃ ମୋନ୍ ରେ କାଇଙ୍ଗ୍ ସାହାତିଙ୍ଗ୍ ଧାଡ଼ିକେଦା; ଏନାମେନ୍ତେ ଚି ମାସୀହ୍ ରେ ଇଙ୍ଗ୍ଆଃ ହାଗା ତିତୁସ୍ କେ କାଇଙ୍ଗ୍ ନାମ୍ କିଜା, ଏନାମେନ୍ତେ ଇନ୍‍କୁଏତେ ବିଦା ଇଦିକେତେ ଇଙ୍ଗ୍ ମାକିଦୁନିୟା ରାଇଜ୍ ପାଡ଼୍ ସେନ୍ ଜାନାଇଙ୍ଗ୍। ମେନ୍ଦୋ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ହୋବାଅଃକା ଅକନିଃ ମାସୀହ୍ ରେ ସବେନ୍ ଇମ୍ତା ଆଲେକେ ଜିତାଅ ରାଃ ପାରାବ୍ ରେ ଇଦି ହୋନୋର୍ ୟାଏ, ହାର୍ ଆଜାଃ ସେଣା ରାଃ ବୁଗିନ୍ ସୋୱାନ୍ ତେ ଆଲେୟାଃ ହୋରାତେ ସବେନ୍ ଜାଗା ତାଃ ପାସ୍ରାଅ ୟାଏ। ଚିୟାଃଚି ଆଲେ ପାର୍ମେଶ୍ଵାର୍ ରାଃ ନାଡ଼େଏ ବାଞ୍ଚାଅ ନାନାମ୍ କୋ ଲାଗିନ୍ ହାର୍ ନାଷ୍ଟ୍ ହୋବାଅଃ ବାରାନ୍ କୋ ଲାଗିନ୍ ମାସୀହ୍ ରାଃ ବୁଗିନ୍ ସୋୱାନ୍ ତାନ୍‍ଲେ। ଚିମିନାଙ୍ଗ୍ କୋ ନାଙ୍ଗ୍ ଦୋ ଗୋଜୋଃ ଲାଗିନ୍ ଗୋନୋଏଃ ରାଃ ସୋୟାଅଃତାନ୍ ସୋୱାନ୍, ହାର୍ ଚିମିନାଙ୍ଗ୍ କୋ ନାଙ୍ଗ୍ ଦୋ ଜୀହିଦୋଃ ନାଙ୍ଗ୍ ଜୀଦାନ୍ ରାଃ ବୁଗିନ୍ ସୋୱାନ୍। ଅକଏ ନେ କାମିକେ କାମି ଧାଡ଼ି ଲେକାନିଃ ତାନିଃ? ଚିୟାଃଚି ଆଲେ ଇନ୍‍କୁୱାଃ ଲେକା ନାହାଲାଲେ, ଅକନ୍‍କୋ ପାର୍ମେଶ୍ଵାର୍ ରାଃ ବାଚାନ୍ କେ ମେଶା ସାନାଅ ୟାକୋ; ମେନ୍ଦୋ ସୋଜ୍ ମୋନ୍ ତେ, ହାର୍ ପାର୍ମେଶ୍ଵାର୍ ପାଡ଼େତେ ପାର୍ମେଶ୍ଵାର୍ ଆବୁକେ ନେଲ୍ ତାନାଏ ମେନ୍ତେ ମାସୀହ୍ ରେ କାଜିୟାଲେ। ଚିନାଃ ଆବୁ ଆଡୋଃଗି ଆପାନ୍ କେ ସାହାରାଅ ଏଟେଃ ତାନାବୁ? ଚି ଆଲେକେ ଏଟାଃ ହୋଡ଼ୋକୋ ଲେକା ସିଫାରିଶ୍ ରାଃ ଚିଠିକୋ ଆପେୟାଃ ନାଡ଼େଏ ରେ ଆଉ ମେନାଃ ଚାହେ ଆପେ ତାଃତେ ଇଦି ମେନାଃ? ଆଲେୟାଃ ଚିଠି ଆପେ ଗି ତାନ୍‍ପେ, ଅକନାଃ ଆବୁୱାଃ ମୋନ୍ ରେ ଅଲାକାନା ଆଡୋଃ ଏନାକେ ସବେନ୍ ହୋଡ଼ୋକୋ ନେଲ୍ଉରୁମ୍ ତାନାକୋ ହାର୍ ପାଢ଼ାଅଃ ତାନାକୋ। ନେୟା ଉଦୁବୋଃ ତାନା ଚି ଆପେ ମାସୀହ୍ ରାଃ ଚିଠି ତାନ୍‍ପେ, ଅକନାଃ ଆଲେୟାଃ ସେୱାକାମି ରାଃ ଯଅ ତାନାଃ, ଅକନାଃ ସ୍ୟାହୀ ତେ କାହା, ମେନ୍ଦୋ ଜୀନିଦ୍ ପାର୍ମେଶ୍ଵାର୍ ରାଃ ଆତ୍ମା ତେ, ଦିରି ରାଃ ପାଟା କୋରେ କାହା, ମେନ୍ଦୋ ହୋଡ଼ ହିର୍‍ଦାୟ୍ ରାଃ ମାସ୍ ପାଟା କୋରେ ଅଲାକାନା। ଆଲେ ମାସୀହ୍ ରାଃ ହୋରାତେ ପାର୍ମେଶ୍ଵାର୍ ଚେତାନ୍ ରେ ନେଲେକାଗି ଭାରୋସା ମାଣ୍ଡାଅ ତାନାଲେ। ନେୟା କାହା ଚି ଆଲେ ଆପାନ୍ ତେଗି ଏନ୍ ଲେକାନିଃ ତାନ୍‍ଲେ ଚି ଆଲେ ତେଗି ଜାହାନ୍ କାଜି ରାଃ ବିଚାର୍ ରିକା ଧାଡ଼ିୟାଲେ, ମେନ୍ଦୋ ଆଲେକେ ଏନ୍ ଲେକା କାମି ଧାଡ଼ିତେୟାଃ ପାର୍ମେଶ୍ଵାର୍ ତେ ନାମାକାନା, ଅକନିଃ ଆଲେକେ ନାୱା ନିୟାମ୍‍ଥଲ୍ ରାଃ ଦାସୀ ହୋବା ଲାଗିନ୍ତେ ଏନ୍ ଲେକା ବାଇକେଦାଏ, ମୁଶା ନାବୀ ରାଃ ଅଲାକାନ୍ ନିୟାମ୍ ରାଃ ଦାସୀ କାହା ମେନ୍ଦୋ ପାବିତାର୍ ଆତ୍ମା ରାଃ; ଚିୟାଃଚି ମୁଶା ନାବୀ ରାଃ ଅଲାକାନ୍ ନିୟାମ୍ କାମାନାତିଙ୍ଗ୍ ଲେରେ ଗୋନୋଏଃ ଦାଣ୍ଡ୍ ମେନାଃ, ମେନ୍ଦୋ ପାବିତାର୍ ଆତ୍ମା ତେ ଜୀଦାନ୍ ମେନାଃ। ଆଗାର୍ ଏନ୍ ମୁଶା ନାବୀ ରାଃ ଆଇନ୍ ଗୋନୋଏଃ ଆଉତାନାଏ ଅକଣ୍ଡେ ରାଃ ଆକ୍ଷାର୍ ଦିରି ରେ ଖୋଦାକାନ୍ ତାଇକେନା, ଏନା ଏନ୍ ଲେକା ଯୁନୁଲାନ୍ ହୋବାଜାନା ଚି ମୁଶା ନାବୀ ରାଃ ମେଏଃମୁହାଡ଼୍ ରେୟାଃ ଯୁନୁଲ୍ ଚାଲ୍ତେ ଅକନାଃ ହୁଡିଙ୍ଗ୍ ଇଦିୟୋଃ ତାଇକେନା, ଇସ୍ରାଏଲୀ ହୋଡ଼ୋକୋ ଇନିଜାଃ ମେଏଃମୁହାଡ଼୍ କେ ନେଲ୍ କାକୋ ଧାଡ଼ି ତାଇନା, ଏଣ୍ଡେ ଆତ୍ମା ରାଃ ନିୟାମ୍ ଆଡୋଃଗି ଯୁନୁଲାନ୍ ଚିନାଃ ନାଙ୍ଗ୍ କାହୋବାଅଃୱା? ଚିୟାଃଚି ଚିମ୍ତାଙ୍ଗ୍ ଦୋଷୀ ବାଇତାନ୍ ନିୟାମ୍ ଯୁନୁଲାନ୍ ତାଇକେନା, ଏଣ୍ଡେ ଧାର୍ମୀ ବାଇତାନ୍ ନିୟାମ୍ ଆଡୋଃଗି ଯୁନୁଲାନ୍ ଚିନାଃ ନାଙ୍ଗ୍ କାହୋବାଅଃୱା? ହାର୍ ଅକନାଃ ଯୁନୁଲାନ୍ ତାଇକେନା, ଏନା ହଗି ଏନ୍ ଯୁନୁଲ୍ ରାଃ ଚାଲ୍ତେ ଅକନାଃ ଏନାତେ ହ ବାଢ଼ାଅ କେତେ ଯୁନୁଲାନ୍ ତାଇକେନା, ଜାହାନ୍ ଯୁନୁଲାନ୍ କାହୋବାଜାନା। ଚିୟାଃଚି ଚିମ୍ତା ଏନା ଅକନାଃ ଛାବା ଇଦିଅଃ ତାଇନା ଯୁନୁଲାନ୍ ତାଇକେନା, ଏଣ୍ଡେ ଏନା ଅକନାଃ ବାଇକେତେ ତାଇନୋଗା, ଆଡୋଃଗି ଯୁନୁଲାନ୍ ଚିନାଃ ନାଙ୍ଗ୍ କାହୋବାଅଃୱା? ଏନାମେନ୍ତେ ଏନ୍‍ଲେକା ଆଶ୍ରା ମାଣ୍ଡାଅ କେତେ ଆଲେ ପୁରାଃ ସାହାସ୍ ତେ କାଜିୟାଲେ, ଆଡୋଃ ମୁଶା ନାବୀ ଲେକା କାହା, ଅକନିଃ ଆଜାଃ ମେଏଃମୁହାଡ଼୍ କେ ଦାନାଙ୍ଗ୍ ଲିଜାଃ ତେ ହାରୁବ୍ ଲେଦାଏ ଏନାତେ ଇସ୍ରାଏଲୀ ହୋଡ଼ୋକୋ ଏନ୍ ଛାବାଇଦିଅଃ ଯୁନୁଲ୍ ରାଃ ଟୁଣ୍ଡୁ କେ କାକୋ ନେଲ୍ ଧାଡ଼ିୟା। ମେନ୍ଦୋ ଇନ୍‍କୁ ମୋନ୍ ତାକୋୱାଃ ରେ ଆନ୍ଧା ଜାନାକୋ, ଚିୟାଃଚି ଇସିଙ୍ଗ୍ ସାନ୍ତେ ମାରି ନିୟାମ୍ ପାଢ଼ାଅ ଇମ୍ତା ଇନ୍‍କୁୱାଃ ହିର୍‍ଦାୟ୍ ରେ ଏନ୍ ଦାନାଙ୍ଗ୍ ଲିଜାଃ ତାଇନୋଃ ତାନା, ମେନ୍ଦୋ ଏନା ମାସୀହ୍ ରେ ବିଶ୍ଵାସ୍ ରେ ଅଟାଗୋଃ ତାନା। ଇସିଙ୍ଗ୍ ସାନ୍ତେ ଚିମ୍ତା ମୁଶା ନାବୀ ରାଃ ପୁଥି ପାଢ଼ାଅଃତାନା, ଦୋ ଇନ୍‍କୁୱାଃ ହିର୍‍ଦାୟ୍ କେ ଦାନାଙ୍ଗ୍ ଲିଜାଃ ହାରୁବ୍ କେତାନାଏ। ମେନ୍ଦୋ ଜାହୁଲାଙ୍ଗ୍ ଅଗି ଇନ୍‍କୁୱାଃ ମୋନ୍ ପ୍ରାଭୁ ପାଡ଼୍ ରୁଆଡ଼ୋଗା, ଇମ୍ତା ଏନ୍ ଦାନାଙ୍ଗ୍ ଲିଜାଃ ଅଟାଗୋଗା। ପ୍ରାଭୁ ଦୋ ଆତ୍ମା ତାନିଃ। ହାର୍ ଅକ୍ତାଃରେ ପ୍ରାଭୁ ଆଃ ଆତ୍ମା ମେନାଇଜା ହେନ୍ତାଃ ରେ ଥୋଲାକାନ୍ ଏତେ ରାଡ଼ା ନାମୋଃତାନା। ମେନ୍ଦୋ ଚିମ୍ତା ଆବୁ ସବେନ୍ କୋୱାଃ ଅଟାଃକାନ୍ ମେଏଃମୁହାଡ଼୍ ତେ ପ୍ରାଭୁ ଆଃ ମାନାରାଙ୍ଗ୍ ନେଲେକା ନେଲୋଃ ତାନା, ଜେଲେକା ଆଏନା ରେ, ଏଣ୍ଡେ ପ୍ରାଭୁ ରାଃ ହୋରାତେ ଅକନିଃ ଆତ୍ମା ତାନିଃ, ଆବୁ ଇନିଜାଃ ଯୁନୁଲାନ୍ ଲେକାଗି କାଟିଃ-କାଟିଃ କେତେ ବାଦ୍‍ଲୀ ଇଦିଅଃ ତାନାବୁ। ଏନାମେନ୍ତେ ଚିମ୍ତାଙ୍ଗ୍ ଆବୁୱାଃ ରେ ନେଲେକା ଦାୟା ହୋବାଜାନା ଚି ଆଲେକେ ନେ ସେୱା ନାମ୍‍ଜାନା, ଦୋ ଆଲେ ସାହାସ୍ କାଲେ ବାଗିତାନା। ମେନ୍ଦୋ ଆଲେ ଗିୟୁଃ ରାଃ ଉକୁକାମି କୋକେ ବାଗିକେଦାଲେ, ହାର୍ ନା ବେଦାହୋଡ଼ୋକୋ ଲେକା ସେସେନାଲେ, ହାର୍ ନା ପାର୍ମେଶ୍ଵାର୍ ରାଃ ବାଚାନ୍ ରେ ମେଶାୟାଲେ, ମେନ୍ଦୋ ସାର୍ତି କେ ଉଦୁବ୍ କେତେ, ପାର୍ମେଶ୍ଵାର୍ ରାଃ ନାଡ଼େଏ ସବେନ୍ ହୋଡ଼ କୋୱାଃ ଆଟ୍‍କାର୍ ସେଣା ରେ ଆଲେୟାଃ ବୁଗିନାଃ କେ ଉଦୁବେୟାଲେ। ମେନ୍ଦୋ ଆଗାର୍ ଆବୁୱାଃ ସୁସାମାଚାର୍ ରେ ପାର୍ଦା ହୋବାକାନା ଏଣ୍ଡେ ଏନା ନାଷ୍ଟ୍ ହୋବାଅଃକୋ ଲାଗିନ୍ ହୋବାକାନା। ହାର୍ ଏନ୍ ଆବିଶ୍ଵାସୀ କୋ ଲାଗିନ୍, ଅକନ୍ କୋୱାଃ ସେଣା କେ ନେ ଅତେଦିଶୁମ୍ ରେନ୍ ଇଶ୍ୱାର୍ ଆନ୍ଧା କାଦାଏ, ଏନାତେ ମାସୀହ୍ ଅକନିଃ ପାର୍ମେଶ୍ଵାର୍ ରାଃ ଛାପା ତାନିଃ, ଇନିଜାଃ ଯୁନୁଲାନ୍ ସୁସାମାଚାର୍ ରାଃ ମାସ୍କାଲ୍ ଇନ୍‍କୁୱାଃ ରେ ଆଲୋ ନେଲୋଃକା। ଚିୟାଃଚି ଆଲେ ଆପାନାଃ କାହା ମେନ୍ଦୋ ମାସୀହ୍ ୟୀଶୁ କେ ପାର୍ଚାର୍ ୟାଲେ ଚି ଇନିଃ ପ୍ରାଭୁ ତାନିଃ; ହାର୍ ଆଲେୟାଃ ବିଷାୟ୍ ରେ ନେୟା କାଜିୟାଲେ ଚି ଆଲେ ୟୀଶୁ ଲାଗିନ୍ତେ ଆପେୟାଃ ଦାସୀ ତାନ୍‍ଲେ। ଏନାମେନ୍ତେ ଚି ପାର୍ମେଶ୍ଵାର୍ ଗି ତାନିଃ, ଅକନିଃ କାଜିକେଦାଏ, “ନୁବାଃ ଏତେ ମାସ୍କାଲ୍ ଜୁଲୋଃକା,” ହାର୍ ଇନିଃଗି ଆବୁୱାଃ ହିର୍‍ଦାୟ୍ ରେ ଜୁଲ୍ ଜାନାଏ, ଏନାତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରାଃ ଉରୁମ୍ ରାଃ ମାସ୍କାଲ୍ ୟୀଶୁ ମାସୀହ୍ ରାଃ ମେଏଃମୁହାଡ଼୍ ତେ ମାସ୍କାଲ୍ ଅଃକା। ମେନ୍ଦୋ ଆଲେୟାଃ ନାଡ଼େଏ ଏନ୍ ସାମ୍ପାତି ହାସା ରାଃ ଚାଟୁ ରେ ମାଣ୍ତାଅ କାନା ଚି ନେ ମାରାଙ୍ଗ୍ ପେଡ଼େଏ ଆଲେୟାଃ ପାଡ଼େତେ ନାହାଲା, ମେନ୍ଦୋ ପାର୍ମେଶ୍ଵାର୍ ପାଡ଼େତେଗି ହୋବାଅଃକା। ଆଲେ ସବେନ୍ ପାଡ଼େତେ ଦୁକୁ ଦୋ ନାମ୍ ତାନାଲେ, ମେନ୍ଦୋ ସାଙ୍କାଟ୍ ରେ କାଲେ ଉୟୁଗୋଃ ତାନା; ଉପାୟ୍ କାନାମୋଃତାନ୍ ଲେକା ଦୋଲେ ମେନାଲେୟା, ମେନ୍ଦୋ କାଲେ ନିରାଶୋଃ ତାନା; ସାତାଅ ଦୋ ନାମ୍ ତାନାଲେ, ମେନ୍ଦୋ ବାଗେକାନ୍ ଲେକା ବାଙ୍ଗ୍‍ଲେୟା; ବିଡ଼ା ଉୟୁଃ ତାନାକୋ ମେନ୍ଦୋ କାଲେ ନାଷ୍ଟ୍‍ଅଃ ତାନା। ଆଲେ ୟୀଶୁ ରାଃ ଗୋନୋଏଃ କେ ଆପାନାଃ ହୋଡ଼ମୋ ରେ ସବେନ୍ ଇମ୍ତା ଇଦି ହୋନୋର୍ ୟାଲେ ଚି ୟୀଶୁ ରାଃ ଜୀଦାନ୍ ହଗି ଆଲେୟାଃ ହୋଡ଼ମୋ ରେ ଉଦୁବୋଃକା। ଚିୟାଃଚି ଆଲେ ଜୀନିଦ୍ ରେଗି ସବେନ୍ ଇମ୍ତା ୟୀଶୁ ଲାଗିନ୍ତେ ଗୋନୋଏଃ ରାଃ ତିଈ ରେ ସୋମ୍ପାଅଃ ତାନାଲେ, ଏନାତେ ୟୀଶୁ ରାଃ ଜୀଦାନ୍ ହଗି ଆଲେୟାଃ ଗୋଜୋଃତେୟାଃ ହୋଡ଼ମୋ ରେ ଉଦୁବୋଃକା। ନେ ଲେକାତେ ଗୋନୋଏଃ ଦୋ ଆଲେୟାଃ ରେ ହାର୍ ଜୀଦାନ୍ ଆପେୟାଃ ରେ କାମି ତାନାଏ। ଏନାମେନ୍ତେ ଚି ଆଲେୟାଃ ରେ ଏନ୍ ବିଶ୍ଵାସ୍ ରାଃ ଆତ୍ମା ମେନାଃ, ଜେଲେକା ପାବିତାର୍ ପୁଥି ରେ ଅଲାକାନା, “ଇଙ୍ଗ୍ ବିଶ୍ଵାସ୍ କେଦାଇଙ୍ଗ୍, ଏନାମେନ୍ତେ ଇଙ୍ଗ୍ କାଜିକେଦାଇଙ୍ଗ୍।” ଏନାମେନ୍ତେ ଆଲେ ହଗି ବିଶ୍ଵାସ୍ ତାନାଲେ, ଏନାମେନ୍ତେ କାଜି ତାନାଲେ। ଚିୟାଃଚି ଆଲେ ସାରିତାନାଲେ ଚି ଅକଏ ପ୍ରାଭୁ ୟୀଶୁ କେ ଜୀହିଃ କିଜାଏ, ଇନିଃ ଆଲେ କେହଗି ୟୀଶୁ ଲୋଃ ଜୀହିଃୟାଏ, ହାର୍ ଆପେୟାଃ ଲୋଃ ଆଜାଃ ନାଡ଼େଏ ତିଙ୍ଗୁବୁୱାଏ। ଚିୟାଃଚି ସବେନାଃ ଆପେୟାଃ ବୁଗିନାଃ ନାଙ୍ଗ୍ ତାନାଃ, ଏନାତେ ଆନୁଗ୍ରାହ୍ ଥିମ୍ବା ତେ ଥିମ୍ବା ହୋଡ଼ୋକୋତାଃ ସେଟେରୋଃକା ହାର୍ତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଲାଗିନ୍ତେ ଧାନ୍ୟାବାଦ୍ ହାରା ଇଦିୟୋଃକା। ଏନାମେନ୍ତେ ଆଲେ ସାହାସ୍ କାଲେ ବାଗେୟା; ଆଲେୟାଃ ନେଲୋଃତାନ୍ ହୋଡ଼ମୋ ନାଷ୍ଟ୍ ଇଦିୟୋଃତାନା, ଏଣ୍ଡେ ରେହ ଆଲେୟାଃ କାନେଲୋଃ ହୋଡ଼ମୋ ସବେନ୍ ହୁଲାଙ୍ଗ୍ ନାୱା ଇଦିୟୋଃତାନା। ଚିୟାଃଚି ଆଲେୟାଃ ନେ ଘାଡ଼ିକାଃ ରାଃ ହୁଡିଙ୍ଗ୍ କାଲାଙ୍ଗ୍ ଦୁକୁ ଆଲେୟାଃ ଲାଗିନ୍ତେ ଥିମ୍ବାଗି ଖାସ୍ ଆଡୋଃ କାଟୁଣ୍ଡୁ ମାନାରାଙ୍ଗ୍ ବାଇ ଇଦିତାନାଏ; ହାର୍ ଆଲେ ଦୋ ନେଲାକାନ୍ ଜିନିଷ୍‍କୋକେ କାହା ମେନ୍ଦୋ କାନେଲାକାନ୍ ଜିନିଷ୍‍କୋକେ ନେଲ୍ କାତେୟାଲେ, ଚିୟାଃଚି ନେଲାକାନ୍ ଜିନିଷ୍ ହୁଡିଙ୍ଗ୍ ହୁଲାଙ୍ଗ୍ ନାଙ୍ଗ୍ ତାନାଃ, ମେନ୍ଦୋ କାନେଲାକାନ୍ ଜିନିଷ୍ ସବେନ୍ ହୁଲାଙ୍ଗ୍ ନାଙ୍ଗ୍ ବାଇକାନ୍ ତାଇନୋଗା। ଚିୟାଃଚି ଆବୁ ସାରିତାନାବୁ ଚି ଚିମ୍ତାଙ୍ଗ୍ ଆବୁୱାଃ ହୋଡ଼ମୋ ଅତେ ରେ ଡେରାକାନ୍ ଅଡ଼୍ଆଃ ଲେକା ମେନାଃ ଧାଶୁଡ଼୍‍ଅଗା, ଏଣ୍ଡେ ଆବୁକେ ପାର୍ମେଶ୍ଵାର୍ ପାଡ଼େତେ ସିର୍ମାଦିଶୁମ୍ ରେ ମିୟାଃ ନେକାନ୍ ଅଡ଼୍ଆଃ ନାମୋଗା ଅକନାଃ ତିଈ ତେ ବାଇକାନ୍ କାହା, ମେନ୍ଦୋ ସବେନ୍ ହୁଲାଙ୍ଗ୍ ନାଙ୍ଗ୍ ତାଇନୋଃ ରାଃ ଅଡ଼୍ଆଃ ତାନାଃ। ନେଣ୍ତେ ଦୋ ଆବୁ ଗେରାଙ୍ଗ୍ ତାନାବୁ ଆଡୋଃ ଥିମ୍ବାଗି ସାନାଙ୍ଗ୍ ମାଣ୍ଡାଅ ତାନାବୁ ଚି ଆବୁୱାଃ ସିର୍ମାଦିଶୁମ୍ ରାଃ ଅଡ଼୍ଆଃ କେବୁ ତୁସିଙ୍ଗ୍ କୋଃୱା। ଏନାତେ ନେୟାକେ ତୁସିଙ୍ଗ୍ କୋଃତେ ଆବୁ ଲିଜାଃ କାତୁସିଙ୍ଗ୍ କାନ୍ ଲେକା କାବୁ ତାଇନା। ଆଡୋଃ ଆବୁ ନେ ଡେରା ରେ ତାଇନ୍ ତାନ୍ ଲୋଃ ହାମ୍ବାଲ୍ ତେ ତେନାକାନ୍ ଗେରାଙ୍ଗ୍ କାତେତାନାବୁ, ଚିୟାଃଚି ଆବୁ ଖଲାଅ ନାଙ୍ଗ୍ କାହା, ମେନ୍ଦୋ ତୁସିଙ୍ଗ୍ ନାଙ୍ଗ୍ ସାନାଙ୍ଗ୍ ତାନାବୁ, ଏନାତେ ଅକନାଃ ଗୋଜୋଃ ତେୟାଃ ତାନାଃ ଏନା ଜୀଦାନ୍ ରେ ତାଇନୋଃକା। ଅକନିଃ ଆବୁକେ ନେ ବାକାଣ୍ ଲାଗିନ୍ ଗି ବାଇକେଦାଏ ଇନିଃ ପାର୍ମେଶ୍ଵାର୍ ତାନିଃ, ଅକନିଃ ଆବୁକେ ବାୟାନା ରେ ଆତ୍ମା ହଗି ଏମ୍‍ତାଦାଏ। ଏନାମେନ୍ତେ ଆଲେ ସବେନ୍ ଇମ୍ତା ଆପାନ୍ ରେ ବିଶ୍ଵାସ୍ ମାଣ୍ଡାଅ କାଃଲେ ହାର୍ ନେୟା ସାରିୟାଲେ ଚି ଚିମ୍ତାଙ୍ଗ୍ ସାନ୍ ଆଲେ ହୋଡ଼ମୋ ରେ ତାଇନୋଃ ତାନାଲେ, ଇମ୍ତା ସାନ୍ ପ୍ରାଭୁ ଏତେ ଆଲାଗ୍ ତାଇନୋଃ ତାନାଲେ। ଚିୟାଃଚି ଆଲେ ନେଲୋଃତାନା ଏନାକେ ନେଲ୍‍କେତେ କାହା, ମେନ୍ଦୋ ବିଶ୍ଵାସ୍ ତେ ସେସେନ୍ ତାନାଲେ। ଏନାମେନ୍ତେ ଆଲେ ଆପାନ୍ ରେ ବିଶ୍ଵାସ୍ ମାଣ୍ଡାଅ କାଃଲେ, ହାର୍ ହୋଡ଼ମୋ ତେ ଆଲାଗ୍ ହୋବାକେତେ ପ୍ରାଭୁ ଲୋଃ ତାଇନୋଃ ଆଡୋଃଗି ବୁଗିନ୍ ଆଟ୍‍କାର୍ ଆଦାତାନାଲେ। ଏନା ଲାଗିନ୍ତେ ଆଲେୟାଃ ମୋନ୍ ରେୟାଃ ସାନାଙ୍ଗ୍ ନେୟା ତାନାଃ ଚି ଚାହେ ମିଃତେ ତାଇନୋଃୱାଲେ ଚାହେ ଆଲାଗ୍ ତାଇନୋଃୱାଲେ, ଆଲେ ଇନିଃକେ ସୁକୁ ରିକା କାତେୟାଲେ। ଚିୟାଃଚି ଲାଗାତିଙ୍ଗ୍ ଗିୟାଃ ଚି ଆବୁ ସବେନ୍ କୋୱାଃ କାମି ମାସୀହ୍ ରାଃ ବିଚାର୍ କୁର୍ସି ରାଃ ସାମାନାଙ୍ଗ୍ ଖଲାଅଃୱା, ଏନାତେ ସବେନ୍ ହୋଡ଼ ଆପାନାଃ-ଆପାନାଃ ବୁଗିନାଃ ହାର୍ ଏତ୍କାନ୍ କାମି କୋରାଃ ବାଦ୍‍ଲା ଅକନାଃ ଇନିଜାଏ ହୋଡ଼ମୋ ରାଃ ହୋରାତେ ରିକା କାଦାଏ, ଏନା ନାମେ କାଏ। ଏନାମେନ୍ତେ ପ୍ରାଭୁ ଆଃ ବୋରୋ ମାଣ୍ଡାଅ କେତେ ଆଲେ ହୋଡ଼ୋକୋକେ ବୁଝାଅ କୋତାନାଲେ; ମେନ୍ଦୋ ପାର୍ମେଶ୍ଵାର୍ ତାଃ ଆଲେୟାଃ ସବେନ୍ ବିଷାୟ୍ ଅଟାଃଗିୟାଃ, ହାର୍ ଇଙ୍ଗ୍ଆଃ ଆଶ୍ରା ନେୟା ତାନାଃ ଚି ଆପେୟାଃ ଆଟ୍‍କାର୍ ସେଣା ତେହଗି ଆପେ ସାରିକାତେୟାପେ। ଏଣ୍ଡେହଗି ଆଲେ ଆପେୟାଃ ନାଡ଼େଏ ରେ ମାରାଙ୍ଗେନ୍ ନାମେ ନାଙ୍ଗ୍ କାଲେ ସାନାଙ୍ଗ୍ ତାନା, ମେନ୍ଦୋ ଆଲେ ଆଲେୟାଃ ବିଷାୟ୍ ରେ ଆପେକେ ଘାମାଣ୍ଡ୍ ରିକା ରାଃ ମାଉକା ଏମାପେତାନାଲେ, ଏନାତେ ଆପେ ଇନ୍‍କୁକେ କାଜିରୁଆଡ଼୍ ଧାଡ଼ିକୋୱାପେ, ଅକନ୍ କୋ ମୋନ୍ ରେ କାହା ମେନ୍ଦୋ ଦେଖାଅ ସାନାଙ୍ଗ୍ ତାନ୍ କାଜି କୋରେ ଘାମାଣ୍ଡେୟାକୋ। ଆଗାର୍ ଆଲେ ସେଣା ଆଦୋଃ ତାନାଲେ ଦୋ ପାର୍ମେଶ୍ଵାର୍ ଲାଗିନ୍, ହାର୍ ଆଗାର୍ ଆଲେ ଠିକ୍ ସେଣା ରେ ମେନାଲେୟା ଏଣ୍ଡେ ଆପେୟାଃ ଲାଗିନ୍ ତାନ୍‍ଲେ। ଚିୟାଃଚି ମାସୀହ୍ ରାଃ ଦୁଲାଡ଼୍ ଆବୁକେ ଥୋଲ୍ ବୁତାନାଏ, ଏନାମେନ୍ତେ ଚି ଆବୁ ନେୟା ବୁଝାଅଃ ତାନାବୁ, ଚି ଚିମ୍ତାଙ୍ଗ୍ ମିହୋଡ଼୍ ସବେନ୍ କୋ ଲାଗିନ୍ ଗୋଏଃ ଜାନାଏ ଦୋ ସବେନ୍ କୋ ଗୋଏଃ ଜାନାକୋ। ଆଡୋଃ ଇନିଃ ନେ ମେନ୍ତେ ସବେନ୍ କୋଲାଗିନ୍ ଗୋଏଃ ଜାନାଏ ଚି ଅକନ୍ କୋ ଜୀହିଃ ମେନାକୋୱା, ଇନ୍‍କୁ ଆୟୁର୍ତେ ଆକୋ ଲାଗିନ୍ତେ ଆଲୋ ଜୀହିଦୋଃକାକୋ ମେନ୍ଦୋ ଇନିଜାଃ ଲାଗିନ୍ତେ ଅକନିଃ ଇନ୍‍କୁ ଲାଗିନ୍ତେ ଗୋଏଃ ଜାନାଏ ହାର୍ତେ ଜୀହିଃ ବିରିଃ ଜାନାଏ। ଏନାମେନ୍ତେ ନାଆ ଏତେ ଆବୁ ଜେତାଏକେ ଅତେଦିଶୁମ୍ ରେନ୍ ହୋଡ଼ୋକୋ ପାହୋମ୍ ତାନ୍ ଲେକା କାବୁ ବିଚାର୍ କୋୱା। ଆବୁ ମାସୀହ୍ କେ ହଗି ଅତେଦିଶୁମ୍ ରେନ୍ ହୋଡ଼ୋକୋ ପାହୋମ୍ ତାନ୍ ଲେକା ସାରିଲିଜାବୁ, ଏଣ୍ଡେ ରେହ ନାଆ ତାଃଏତେ ଇନିଃକେ ନେକା କାବୁ ସାରିୟା। ଏନାମେନ୍ତେ ଆଗାର୍ ଜାହାଁଏ ମାସୀହ୍ ରେ ମେନିଜା ଦୋ ଇନିଃ ନାୱା ସିର୍ଜାଅ କାନାଏ; ମାରି ବାକାଣ୍ କୋ ଛାବାଜାନା, ନେଲେପେ, ସବେନ୍ ବାକାଣ୍ ନାୱା ହୋବାଜାନା। ନେ ସବେନ୍ ବାକାଣ୍ କୋ ପାର୍ମେଶ୍ଵାର୍ ଆଃ ପାଡ଼େତେ ତାନାଃ, ଅକନିଃ ମାସୀହ୍ ରାଃ ହୋରାତେ ଆୟାଃ ଲୋଃ ଆବୁୱାଃ ମେନେଶା ରିକା କେଦାଏ, ହାର୍ ମେନେଶା ରିକା ରାଃ ସେୱା ଆଲେକେ ଜିମା କାଃଲେୟାଏ। ମାନେ ପାର୍ମେଶ୍ଵାର୍ ମାସୀହ୍ ରେ ହୋବାକେତେ ଆୟାଃ ଲୋଃ ନେ ଅତେଦିଶୁମ୍ କେ ମେନେଶା କେଦାଏ, ଆଡୋଃ ଇନ୍‍କୁୱାଃ ପାପ୍ କୋୱାଃ ଦୋଷ୍ ଇନ୍‍କୁ ଚେତାନ୍ ରେ କାଏ ଏମ୍ କେଦାଏ ହାର୍ ଇନିଃ ମେନେଶା ରାଃ ବାଚାନ୍ ଆଲେକେ ଏମାକାଃବୁୱାଏ। ଏନାମେନ୍ତେ, ଆଲେ ମାସୀହ୍ ଆଃ ପାଡ଼େତେ କାଜିକୁଲାକାନ୍ କୋ ତାନ୍‍ଲେ; ଜେଲେକା ଚି ପାର୍ମେଶ୍ଵାର୍ ଆଲେୟାଃ ହୋରାତେ ଆର୍ଜି ତାନାଏ। ଆଲେ ମାସୀହ୍ ରାଃ ପାଡ଼େତେ ଆର୍ଜି ପେତାନାଲେ ଚି ପାର୍ମେଶ୍ଵାର୍ ଲୋଃ ମେନେଶା କୋଃପେ। ଅକନିଃ ପାପ୍ କେ କାଏ ସାରି ତାଇନାଏ, ଇନିଃକେଗି ପାର୍ମେଶ୍ଵାର୍ ଆବୁୱାଃ ଲାଗିନ୍ ପାପ୍ ବାଇକେଦାଏ ଏନାତେ ଆବୁ ଇନିଃରେ ହୋବାକେତେ ପାର୍ମେଶ୍ଵାର୍ ରାଃ ଧାରାମ୍ ହୋଡ଼ ବାଇୟୋଃୱାବୁ। ଆଲେ ପାର୍ମେଶ୍ଵାର୍ ରାଃ ଗାତିକାମିତାନ୍ କୋ ତାନ୍‍ଲେ ଏନାତେ ଆପେକେ ଆର୍ଜି ପେତାନାଲେ ଚି ଇନିଜାଃ ଆନୁଗ୍ରାହ୍ ଅକନାଃ ଆପେୟାଃ ରେ ହୋବାକାନା, ଏନାକେ ସାମା ତେ ଆଲୋ ସେନୋଃ ରିକାଏପେ। ଚିୟାଃଚି ପାର୍ମେଶ୍ଵାର୍ କାଜି ତାନାଏ, “ଇଙ୍ଗ୍ଆଃ ଦାୟା ଏମ୍ ରାଃ ସାମାୟ୍ ଇମ୍ତା ଇଙ୍ଗ୍ ଆମାଃ ଆୟୁମ୍ କେଦାଇଙ୍ଗ୍, ଆଡୋଃ ବାଞ୍ଚାଅ ନାମେ ହୁଲାଙ୍ଗ୍ ରେ ଇଙ୍ଗ୍ ଆମ୍ କେ ଦେଙ୍ଗା କେଃମେୟାଇଙ୍ଗ୍।” ନେଲେମ୍, ନାଆ ଦାୟା ରାଃ ସାମାୟ୍ ତାନାଃ; ନେଲେମ୍ ନାଆ ଏନ୍ ବାଞ୍ଚାଅ ରାଃ ହୁଲାଙ୍ଗ୍ ତାନାଃ। ଆଲେ ଜାହାନ୍ କାଜି ରେ ଜେତାଏ କେ ବିଶ୍ଵାସ୍ ବାଗି ରାଃ ଜେତାନ୍ ମାଉକା କାଲେ ଏମେୟା, ଏନାତେ ଆଲେୟାଃ ସେୱା ରେ ଜେତାନ୍ ଦୋଷ୍ ଆଲୋ ହିଜୁଃକା। ମେନ୍ଦୋ ସବେନ୍ ବାକାଣ୍ ରେ ପାର୍ମେଶ୍ଵାର୍ ରାଃ ଦାସୀକୋ ଲେକା ଆପାନାଃ ବୁଗିନ୍ ଗୁନ୍ କୋକେ ଉଦୁବେୟାଲେ, ଥିମ୍ବାଗି ସାହାତିଙ୍ଗ୍ ତାନ୍ ଲୋଃ, ଦୁକୁତାନ୍ ଇମ୍ତାରେ, କାନାମୋଃତାନ୍ ଇମ୍ତାରେ, ସାଙ୍କାଟ୍ ଇମ୍ତାରେ, ମାଉର୍ ଜୋମ୍ ଇମ୍ତାରେ, ବାନ୍ଦିଅଡ଼ାଆ ରେ ତାଇନ୍ କାନ୍ ଇମ୍ତାରେ, ଗୋଣ୍ଡୋଗୋଲ୍ ଇମ୍ତାରେ, ପାରିଶ୍ରାମ୍ ଇମ୍ତାରେ, ନିଦା କାଦୁଣୁମ୍ ତାନ୍ ଇମ୍ତାରେ, ଜୋଜୋମାଃ କାତାଇକାନ୍ ଇମ୍ତାରେ, ପାବିତାର୍ ହୋବାକେତେ, ସେଣା ତେ, ସାହାତିଙ୍ଗ୍ କେତେ, ଦାୟା ଦେଖାଅ କେତେ, ପାବିତାର୍ ଆତ୍ମା ତେ, ସାର୍ତି ଦୁଲାଡ଼୍ ତେ, ସାର୍ତି ରାଃ ବାଚାନ୍ ତେ, ପାର୍ମେଶ୍ଵାର୍ ରାଃ ପେଡ଼େଏ ତେ, ଧାରାମ୍ ରାଃ ହାତିୟାର୍ କୋତେ ଅକନାଃ ଜୋମ୍ ତିଈ-ଲେଙ୍ଗା ତିଈ ରେ ମେନାଃ, ମାଇନ୍ ନାନାମ୍ ଇମ୍ତାରେ ହାର୍ ମାଇନ୍ କାନାମୋଃ ଇମ୍ତାରେ, ବାଦ୍‍ନାମ୍ ହାର୍ ନୁତୁମୋଃ ତାନ୍ ଇମ୍ତାରେ। ଲୋଗୋତାନ୍ ହୋଡ଼ୋକୋ ଲେକା ଆଟ୍କାରୋଃ ୱାଲେ ଏଣ୍ଡେହ ବିଶ୍ଵାସେ ଲେକାନ୍ କୋ ହୋଡ଼ୋକୋ ତାନ୍‍ଲେ; କାଉପ୍ରୁମ୍ କାନ୍ ହୋଡ଼ୋକୋ ଲେକା ତାନ୍‍ଲେ, ଏଣ୍ଡେହ ଥିମ୍ବାଗି ହୋଡ଼ୋକୋ ଆଲେକେ ସାରିୟାକୋ; ଗୋଜାକାନ୍ କୋ ଲେକା ମେନାଲେୟା ଏଣ୍ଡେହ ନେଲେପେ ଜୀହିଃ ଗିୟାଃଲେ; ମାଉର୍ ଜୋମ୍ କାଃଲେକା ମେନାଲେୟା ମେନ୍ଦୋ କାଲେ ଗୋଏଃଜାନା; ଥିମ୍ବାଗି ଦୁକୁ ନାମ୍ କେଦାଲେ, ମେନ୍ଦୋ ସବେନ୍ ଇମ୍ତା ରାଶିକାଅଃ ତାନାଲେ; କାଙ୍ଗାଲ୍ ଲେକା ମେନାଲେୟା, ମେନ୍ଦୋ ଥିମ୍ବାଗି ହୋଡ଼ୋକୋକେ କିଶାଣ୍ ବାଇକୋୱାଲେ; ନେଲେକା ମେନାଲେୟା ଜେଲେକା ଆଲେୟାଃ ତାଃ ଜାହାନାଃ ବାନୋଃ ଏଣ୍ଡେହ ସବେନାଃ ମାଣ୍ଡାଅୟାଲେ। ହେ କୁରିନ୍ଥିୟୋରେନ୍ କୋ, ଆଲେ ସାଫା-ସାଫା ଆପେ ଲୋଃ ବାକାଣ୍ କେଦାଲେ, ଆଲେ ଆପେୟାଃ ଲୋଃ ଥିମ୍ବାଗି ଦୁଲାଡ଼୍ ମାଣ୍ଡାଅୟାଲେ। ଆଲେ ଆପେକେ କାଲେ ଦୁଲାଡ଼୍ ତାନା ଲେକା ଜେତ୍ନାଃ ହ କାଲେ ରିକା ତାନାଃ, ମେନ୍ଦୋ ଆପେ ଆଲେକେ କାପେ ଦୁଲାଡ଼୍ ତାନା ଲେକା ଆଲେକେ ରିକା ତାନାପେ। ମେନ୍ଦୋ ଇଙ୍ଗ୍ଆଃ ହୋନ୍‍କୋ ତାନ୍‍ପେ ଲେକା ସାରିକେତେ ଆପେକେ କାଜିପେ ତାନିଙ୍ଗ୍ ଚି ଆପେ ହଗି ଏନାରାଃ ବାଦ୍‍ଲା ରେ ଆପେୟାଃ ମୋନ୍ ଅଟାଗେପେ। ଆବିଶ୍ଵାସୀ କୋଲୋଃ ଆସାମାନ୍ ଆରାଣା ରେ ଆଲୋପେ ମେଶାନା, ଚିୟାଃଚି ଧାରାମ୍ ହାର୍ ଆଧାର୍ମ୍ ଥାଲା ରେ ଚିକାନ୍ ଯୋକା-ଯୋଡ଼ି? ୟାଦୋ ମାସ୍କାଲ୍ ହାର୍ ନୁବାଃ ଚିଲ୍‍କା ତେ ମିଃତେ ତାଇନାକିନ୍? ହାର୍ ମାସୀହ୍ ଆଡୋଃ ବାଲିୟାଲ୍ ଚିଲ୍‍କା ତେ ମିଦେନାକିନ୍, ହାର୍ ବିଶ୍ୱାସ୍‍ତାନ୍ ନିଃଲୋଃ କାବିଶ୍ୱାସ୍‍ତାନ୍ ନିଜାଃ ଚିକାନ୍ ହାନାଟିଙ୍ଗ୍ ମେନାଃ? ମୂର୍ତି କୋଲୋଃ ପାର୍ମେଶ୍ଵାର୍ ରାଃ ମାନ୍ଦିର୍ ଚିଲ୍‍କା ତେ ମେଶାୱା? ଚିୟାଃଚି ଆବୁ ଦୋ ଜୀହିଦ୍ ତାନ୍ ପାର୍ମେଶ୍ଵାର୍ ରାଃ ମାନ୍ଦିର୍ ତାନ୍‍ବୁ; ଜେଲେକା ପାର୍ମେଶ୍ଵାର୍ କାଜିକାଦାଏ, “ଇଙ୍ଗ୍ ଇନ୍‍କୁୱାଃରେ ତାଇନୋଗାଇଙ୍ଗ୍ ହାର୍ ଇନ୍‍କୁୱାଃରେ ହୋନୋର୍ ବାଡ଼ା ୟାଇଙ୍ଗ୍; ହାର୍ ଇଙ୍ଗ୍ ଇନ୍‍କୁୱାଃ ପାର୍ମେଶ୍ଵାର୍ ହୋବାୱାଇଙ୍ଗ୍, ହାର୍ ଇନ୍‍କୁ ଇଙ୍ଗ୍ଆଃ ହୋଡ଼ୋକୋ ହୋବାୱାକୋ।” ଏନାମେନ୍ତେ ପ୍ରାଭୁ କାଜିୟାଏ, “ଇନ୍‍କୁୱାଃ ଥାଲାଏତେ ଅଡୋଙ୍ଗ୍ଅଃପେ ହାର୍ ଆଲାଗ୍ ତାଇନୋଃପେ; ହାର୍ ଆଶୁଦ୍ଧ୍ ଜିନିଷ୍ ଆଲୋପେ ଜୁଟିଃୟା, ଏଣ୍ଡେ ଇଙ୍ଗ୍ ଆପେକେ ଗ୍ରାହାନ୍ ପେୟାଇଙ୍ଗ୍; ହାର୍ ଇଙ୍ଗ୍ ଆପେୟାଃ ଆପୁ ହୋବାୱାଇଙ୍ଗ୍, ହାର୍ ଆପେ ଇଙ୍ଗ୍ଆଃ ହୋନ୍‍କଡ଼ାକୋ ହାର୍ ହୋନ୍‍କୁଡ଼ିକୋ ବାୟୋଗାପେ। ନେୟା ସବେନ୍ ଏତେ ପେଡ଼େଜାନ୍ ପ୍ରାଭୁ ପାର୍ମେଶ୍ଵାର୍ ରାଃ କାଜି ତାନାଃ।” ଏନାମେନ୍ତେ ହେ ଦୁଲାଡ଼୍‍କୋ, ଯାବ୍ ଚି ନେ କିରିୟା ଆବୁକେ ନାମାକାନା, ଦୋ ଦେଲା, ଆବୁ ଆପାନ୍ କେ ହୋଡ଼ମୋ ଆଡୋଃ ଆତ୍ମା ରାଃ ସବେନ୍ ମାଇଲା ଏତେ ଫାର୍ଚିଏନ୍ କାବୁ, ହାର୍ ପାର୍ମେଶ୍ଵାର୍ ରାଃ ବୋରୋ ମାଣ୍ତାଅତାନ୍ ଲୋଃ ପାବିତାର୍ ଜୀଦାନ୍ ଜୀହିଦୋଃ କାବୁ। ଆଲେକେ ଆପେୟାଃ ମୋନ୍ ରେ ଜାଗା ଏମେପେ। ଆଲେ ଜେତାଏ ଲୋଃ ଆନ୍ୟାୟ କାଲେ ରିକାକାଦା, ନା ଜେତାଏକେ କାଲେ ବାଗ୍‍ଡ଼ାଅ କାଦା, ହାର୍ ନା ଜେତାଏକେ ହିଡ଼୍ କାଦାଲେ। ଇଙ୍ଗ୍ ଆପେକେ ଦୋଷ୍ ଲାଗାଅ ଲାଗିନ୍ତେ କାଇଙ୍ଗ୍ କାଜିପେତାନା। ଚିୟାଃଚି ଇଙ୍ଗ୍ ସିଦାରେଗି କାଜି ଛାବା କାଦାଇଙ୍ଗ୍ ଚି ଆପେ ଆଲେୟାଃ ମୋନ୍ ରେ ଜାଗା ନାମ୍ ଛାବା କାଦାପେ ଏନାତେ ଆଲେ ଆପେୟାଃ ଲୋଃ ଗୋଜେନ୍ ଜୀଦେନ୍ ଲାଗିନ୍ ସେକାଡ଼୍ କାନାଲେ। ଇଙ୍ଗ୍ ଆପେକେ ଥିମ୍ବାଗି ସାହାସ୍ଏତେ କାଜିପେ ତାନିଙ୍ଗ୍, ଇଙ୍ଗ୍ ଆପେ ନାଙ୍ଗ୍ ମାରାଙ୍ଗ୍ ଘାମାଣ୍ଡ୍ ଆଟ୍‍କାର୍ ତାନିଙ୍ଗ୍; ଇଙ୍ଗ୍ ଶାନ୍ତି ତେ ଫେରେଃ କାନାଇଙ୍ଗ୍। ଇଙ୍ଗ୍ ଦୁକୁ ନାମ୍ ତାନ୍ ରେହ ଇଙ୍ଗ୍ ସବେନାଃ ରେ ରାଶିକା ତେ ଫେରେଜାକାନ୍ ତାଇନୋଃ ତାନିଙ୍ଗ୍। ଚିୟାଃଚି ଚିମ୍ତାଙ୍ଗ୍ ଆଲେ ମାକିଦୁନିୟା ରାଇଜ୍ ରେ ହିଜୁଃ ଜାନାଲେ ଏଣ୍ତେ ରେହ ଆଲେୟାଃ ହୋଡ଼ମୋ କେ ଆରାମ୍ କାନାମ୍‍ଜାନା, ମେନ୍ଦୋ ଆଲେ ସବେନ୍ ପାଡ଼େତେ ଦୁକୁ ନାମ୍ ତାଇକେନାଲେ; ବାହାରି ପାଡ଼୍ ରେ ଲାଡ଼ାଇ ହୋବାଅଃ ତାଇକେନା, ଏନ୍ତେ ମୋନ୍ ଭିତାର୍ ରେ ବୋରୋ ତାଇକେନା। ଏଣ୍ଡେହ ନିରାଶ୍ କାନ୍ କୋକେ ଶାନ୍ତି ଏମେନିଃ ପାର୍ମେଶ୍ଵାର୍ ତିତୁସ୍ କେ ଆଲେତାଃ କୁଲ୍ ରାଃ ହୋରାତେ ଆଲେକେ ଶାନ୍ତି ଏମ୍ କେଃଲେୟାଏ; ହାର୍ ଇନିଜାଃ ହିଜୁଃତେ ଭାଇର୍ କାହା ମେନ୍ଦୋ ଇନିଜାଃ ଏନ୍ ଯୋଶ୍ ତେହଗି, ଅକନାଃ ତିତୁସ୍ କେ ଆପେୟାଃ ପାଡ଼େତେ ନାମ୍ ଲେନା। ଇନିଃ ଆପେୟାଃ ଇଙ୍ଗ୍ ଲୋଃ ନେଲ୍ ସାନାଙ୍ଗ୍ କେ, ଆଡୋଃ ଆପେୟାଃ ଦୁକୁକାନ୍ କେ ଆଡୋଃ ଆପେ ଇଙ୍ଗ୍‍କେ ନାମ୍ ସାନାଙ୍ଗ୍ ରାଃ ଚିମ୍ତାଙ୍ଗ୍ ଉଦୁବ୍ କେଦିଙ୍ଗ୍ଆଏ, ଇଙ୍ଗ୍ ଥିମ୍ବାଗି ରାଶିକା ଜାନିଙ୍ଗ୍। ଚିୟାଃଚି ଇଙ୍ଗ୍ ଇଙ୍ଗ୍ଆଃ ଚିଠି ତେ ଆପେକେ ଦୁକୁ କେଃପେୟାଇଙ୍ଗ୍ ଏଣ୍ଡେ ରେହ, ଏନାତେ କାଇଙ୍ଗ୍ ଆପ୍‍ଶୋଷ୍ ତାନା ଜେଲେକା ସିଦା ଆପ୍‍ଶୋଷ୍ ଲେନାଇଙ୍ଗ୍, ଚିୟାଃଚି ଇଙ୍ଗ୍ ନେଲ୍ ତାନାଇଙ୍ଗ୍ ଚି ଏନ୍ ଚିଠି ତେ ଆପେକେ ଦୁକୁ ଦୋ ହୋବାଜାନା ମେନ୍ଦୋ ଏନା ହୁଡିଙ୍ଗ୍ ସାମାୟ୍ ଲାଗିନ୍ ତାଇନ୍ କେନା। ନାଆ ଇଙ୍ଗ୍ ରାଶିକା ଗିୟାଇଙ୍ଗ୍ ମେନ୍ଦୋ ଏନାମେନ୍ତେ କାହା ଚି ଆପେ ଦୁକୁ ଜାନାପେ, ମେନ୍ଦୋ ନେୟାମେନ୍ତେ ଚି ଆପେ ଏନ୍ ଦୁକୁ ରାଃ ହୋରାତେ ପାପ୍ କାମି କେ ବାଗେ କେଦାପେ, ଚିୟାଃଚି ଆପେୟାଃ ଦୁକୁ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ତାଇକେନା ଚି ଆଲେ ପାଡ଼େତେ ଆପେକେ ଜାହାନ୍ କାଜି ରେହ ହାନି ଆଲୋ ହୋବାଅଃକା। ଚିୟାଃଚି ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ନାମାକାନ୍ ଦୁକୁ ନେକା ଆପ୍‍ଶୋଷ୍ କେ ଅଡୋଙ୍ଗ୍ ୟାଏ ଅକନାଃ ତେ ବାଞ୍ଚାଅ ନାମୋଃ ତାନାଃ ଆଡୋଃ ଏନାତେ ପାସ୍ତାଅ କାପାଡ଼ାଅଃୱା। ମେନ୍ଦୋ ଅତେଦିଶୁମ୍ ରେୟାଃ ଦୁକୁ ଗୋନୋଏଃ କେ ଆୱେୟାଏ। ଏନାତେ ନେଲେପେ, ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ନାମାକାନ୍ ଦୁକୁ ବାକାଣ୍ ତେ ଆପେକେ ଚିମିନ୍ ଯୋଶ୍ ହାର୍ କାଜି ରୁଆଡ଼୍‍ଧାଡ଼ି ରାଃ ପେଡ଼େଏ, ଖିସ୍, ହାର୍ ବୋରୋ, ଧାରାମ୍ ସାନାଙ୍ଗ୍ ହାର୍ ବୁଗିନାଃ ରିକା ନାଙ୍ଗ୍ ନାନାମ୍ ହାର୍ ଦାଣ୍ଡ୍ ଏମେ ରାଃ ବିଚାର୍ ଆପେରେ ହୋବାଜାନା? ଆପେ ସବେନ୍ ଲେକାତେ ପୁରା କେତେ ଦେଖାଅ କେଦାପେ ଚି ଆପେ ନେ ବାକାଣ୍ କୋରେ ନିର୍ଦୋଷ୍ ମେନାପେୟା। ହାର୍ତେ ଇଙ୍ଗ୍ ଅକନାଃ ଆପେୟାଃ ନାଡ଼େଏ ଅଲ୍ ଲେଦାଇଙ୍ଗ୍, ଏନା ଇନିଜାଃ ଚାଲ୍ତେ କାଇଙ୍ଗ୍ ଅଲ୍ କେଦା ଅକଏ ଆନ୍ୟାଏ ରିକା କେଦାଏ ଆଡୋଃ ନା ଇନିଜାଃ ଚାଲ୍ତେ ଅକେୟାଃ ଚେତାନ୍ ରେ ଆନ୍ୟାୟ ରିକାଜାନା, ମେନ୍ଦୋ ନେୟାଲାଗିନ୍ତେ ଚି ଆପେୟାଃ ଯୋଶ୍ ଅକନାଃ ଆଲେୟାଃ ଲାଗିନ୍ତେ ମେନାଃ, ଏନା ପାର୍ମେଶ୍ଵାର୍ ରାଃ ନାଡ଼େଏ ରେ ଆପେତାଃ ରେ ନେଲୋଃକା। ଏନାମେନ୍ତେ ଆଲେକେ ଯୋଶ୍ ନାମ୍‍ଜାନା। ଆଲେୟାଃ ନେ ଯୋଶ୍ ଲୋଃ ତିତୁସ୍ ରାଃ ହିଜୁଃ ରାଃ ରାଶିକା ଚାଲ୍ତେ ଆଡୋଃଗି ରାଶିକା ନାମ୍ ଜାନା ଚିୟାଃଚି ଇନିଜାଃ ଜୀଉ ଆପେ ସବେନ୍ କୋୱାଃ ଚାଲ୍ତେ ସୁକୁ-ରାଶିକା ହୋବାକାନା। ଚିୟାଃଚି ଆଗାର୍ ଇଙ୍ଗ୍ ଇନିଜାଃ ନାଡ଼େଏ ରେ ଆପେୟାଃ ବିଷାୟ୍ ରେ ହୁଡିଙ୍ଗ୍ ଘାମାଣ୍ଡ୍ କେଦାଇଙ୍ଗ୍, ଏଣ୍ଡେ କାଇଙ୍ଗ୍ ଗିୟୁଃଜାନା। ମେନ୍ଦୋ ଚିଲ୍‍କା ଇଙ୍ଗ୍ ଆପେକେ ସବେନ୍ ବାକାଣ୍ ସାର୍ତି-ସାର୍ତି କାଜି ଛାବା ଲେଦାଇଙ୍ଗ୍, ଏନ୍ ଲେକାଗି ଆବୁୱାଃ ଘାମାଣ୍ଡ୍ ଦେଖାଅ ତିତୁସ୍ ରାଃ ନାଡ଼େଏ ରେ ସାର୍ତି ମେନ୍ତେ ଉଦୁବ୍ ଜାନା। ଚିମ୍ତାଙ୍ଗ୍ ଇନିଃକେ ଆପେ ସବେନ୍ କୋୱାଃ ଆନାଚୁ ମାନାତିଙ୍ଗ୍ କାଜି ମୋନେ ହିଜୁଃତାନା ଚି ଚିଲ୍‍କା ଆପେ ବୋରୋତାନ୍ ଲୋଃ ଆଡୋଃ ଥାର୍ଥାରାଅ ତାନ୍ ଲୋଃ ଇନିଃକେ ନାପାମ୍ ଜାନାପେ, ଦୋ ଇନିଜାଃ ଦୁଲାଡ଼୍ ଆପେ ନାଙ୍ଗ୍ ଆଡୋଃଗି ବାଢ଼ାଅଃ ଇଦିଅଃତାନା। ଇଙ୍ଗ୍ ରାଶିକା ମେନାଇଙ୍ଗ୍ ଚିୟାଃଚି ଇଙ୍ଗ୍‍କେ ସବେନ୍ କାଜି ରେ ଆପେୟାଃ ଚେତାନ୍ ରେ ଭାରୋସା ମେନାଃ। ନାଆ ହେ ହାଗାକୋ, ଆଲେ ଆପେକେ ପାର୍ମେଶ୍ଵାର୍ ରାଃ ଏନ୍ ଆନୁଗ୍ରାହ୍ ରାଃ ସାମାଚାର୍ ଏମାପେ ତାନାଲେ ଅକନାଃ ମାକିଦୁନିୟା ରାଇଜ୍ ରେନ୍ କାଲିସିୟା କୋୱାଃ ରେ ହୋବାକାନା। ଚିମ୍ତାଙ୍ଗ୍ ଦୁକୁ ରାଃ ମାରାଙ୍ଗ୍ ପାରୀକ୍ଷା ସାମାୟ୍ ରେ ଇନ୍‍କୁୱାଃ ମାରାଙ୍ଗ୍ ରାଶିକା ଆଡୋଃ ଥିମ୍ବାଗି ଗାରିବ୍ ହୋବାକାନ୍ ରେ ଇନ୍‍କୁ ସୁକୁ ମୋନ୍ ତେ ଦାନ୍ ଏମ୍ କେଦାକୋ। ଇନ୍‍କୁୱାଃ ବିଷାୟ୍ ରେ ଇଙ୍ଗ୍ଆଃ ନେ ଗୋୱା ତାନାଃ ଚି ଇନ୍‍କୁ ଆକୋୱାଃ ପେଡ଼େଏ ତେ ମେନ୍ଦୋ ପେଡ଼େଏ ତେ ହଗି ଥିମ୍ବା ସୁକୁ ମୋନ୍ ତେ ଏମ୍‍କେଦାକୋ। ଆଡୋଃ ନେ ଦାନ୍ ଏହେମ୍ ରେ ହାର୍ ପାବିତାର୍ ହୋଡ଼ୋକୋୱାଃ ସେୱା ରେ ହାନାଟିଙ୍ଗ୍ ନାମେ ରାଃ ମାଇନ୍ ସୁକୁ ବିଷାୟ୍ ରେ, ଆଲେକେ ଘାରି-ଘାରି ଥିମ୍ବାଗି ଆର୍ଜି କେଦାକୋ, ହାର୍ ଚିଲ୍‍କା ଆଲେ ଆଶ୍ରା ଲେଃ ତାଇନାଲେ, ଏନ୍‍କା କାହା ମେନ୍ଦୋ ଇନ୍‍କୁ ଆପାନ୍ କେ ପ୍ରାଭୁ ତିଈ ରେ ଏନ୍ତେ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ଆଲେୟାଃ ତିଈ ରେ ଜିମାଜାନାକୋ। ଏନାମେନ୍ତେ ଆଲେ ତିତୁସ୍ କେ ବୁଝାଅ କିଜାଲେ ଚି ଜେଲେକା ଇନିଃ ସିଦା ଏଟେଃ ଲେଦାଏ, ଏନ୍‍ଲେକାଗି ଆପେୟାଃ ଥାଲା ରେ ନେ ଦାନ୍ ରାଃ କାମି କେ ହଗି ପୁରାକାଏ। ଏନାମେନ୍ତେ ଜେଲେକା ଆପେ ସବେନ୍ କାଜି କୋରେ ମାନେ ବିଶ୍ଵାସ୍ ରିକାରେ, ବାଚାନ୍ ରେ, ସେଣା ହାର୍ ସବେନ୍ ଲେକାତେ କୋଷିସ୍ ରିକାରେ, ଆଡୋଃ ଏନ୍ ଦୁଲାଡ଼୍ ତେ ଅକନାଃ ଆଲେ ଲୋଃ ରିକାତାନାପେ, ହାରାଇଦିଅଃ ତାନାପେ, ଏନ୍‍ଲେକାଗି (ଗାରିବ୍ ବିଶ୍ଵାସୀ କୋକେ) ନେ ଦାନ୍ ଏହେମ୍ ରାଃ କାମି ରେହ ହାରା ଇଦିଅଃପେ। ଇଙ୍ଗ୍ ଆପେକେ ଆନାଚୁ ଏମାପେତାନ୍ ଲେକାତେ ଦୋ କାହା, ମେନ୍ଦୋ ଏଟାଃକୋକେ ଯୋଶ୍ ଏମେ ଲାଗିନ୍ତେ ଆପେୟାଃ ଦୁଲାଡ଼୍ ସାର୍ତି ଚି କାହା ଏନାକେ ସାରିଲାଗିନ୍ତେ କାଜିପେ ତାନିଙ୍ଗ୍। ଆପେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ କେ ସାରିୟାପେ ଚି, ଇନିଃ କିଶାଣ୍ ତାଇନ୍ କେତେ ହଗି ଆପେୟାଃ ଲାଗିନ୍ ଗାରିବ୍ ବାଇଜାନାଏ, ଏନାତେ ଇନିଜାଃ କାଙ୍ଗାଲ୍ ହୋବାଜାନ୍ତେ ଆପେ କିଶାଣ୍ ବାଇ କେନୋଃପେ। ନେ ବାକାଣ୍ ରେ ଇଙ୍ଗ୍ଆଃ ସାଲାହ୍ କାଜି ଦୋ ନେୟା ତାନାଃ: ନେୟା ଆପେୟାଃ ଲାଗିନ୍ତେ ବୁଗିନ୍ ତାନାଃ, ଆପେ ଜେ ମିୟାଃ ଶିର୍ମା ତେ ନେ ଦାନ୍-ଟାକା ଏହେମ୍ କାମି କେ ରିକାରେ ଭାଇର୍ କାହା, ମେନ୍ଦୋ ନେ କାମି ରିକା ରାଃ ସାନାଙ୍ଗ୍ ରେହଗି ଆପେ ଗି ସିଦା ରେ ତାଇକେନାପେ। ଏନାମେନ୍ତେ ନାଆ ନେ କାମି କେ ପୁରା ତାପେ ଚି ଜେଲେକା ଆପେ ନେ କାମି ରିକା ନାଙ୍ଗ୍ ସାପ୍ଡ଼ାଅ ଲେନ୍ ତାଇକେନାପେ, ଏନ୍ ଲେକାଗି ଆପେ ଆପାନାଃ-ଆପାନାଃ ପେଡ଼େଏ ଲେକାତେ ପୁରା ରିକା ତାପେ। ଚିୟାଃଚି ଆଗାର୍ ମୋନ୍ ସାପ୍ଡ଼ାଅ କାନାଏ ରେଦୋ ଦାନ୍ ଏନ୍‍ଲେକାଗି ଗ୍ରାହାନ୍ ହୋବାୱାଃ ଚିମିନାଙ୍ଗ୍ ଇନିଜାଃ ତାଃରେ ମେନାଃ, ଆଜାଃ ତାଃରେ ଚିମିନାଙ୍ଗ୍ ବାନୋଃ ଏନ୍ ଲେକାତେ କାହା। ନେୟା କାହା ଚି ଏଟାଃ କୋକେ ସୁକୁ ନାମୋଃୱା ହାର୍ତେ ଆପେ ଦୁକୁ କାତୋଃୱାପେ, ମେନ୍ଦୋ ସବେନ୍ ପାଡ଼୍ ବାରାବାର୍ ହୋବାଅଃ ଚାହି। ମେନ୍ଦୋ ସବେନ୍ ପାଡ଼୍ ନେଲ୍ ପାହୋମ୍ ଚାହି ନାଆ ଆପେତାଃ ଥିମ୍ବା ମେନାଃ ଏନା ଇନ୍‍କୁୱାଃ ଘାଟି ରେ କାମି ହିଜୁଃକା, ଏନ୍ତେ ଚିମ୍ତାଙ୍ଗ୍ ଇନ୍‍କୁ ତାଃରେ ଥିମ୍ବା ତାଇନୋଃ ରେ ଆପେୟାଃ ଘାଟି ଇମ୍ତା ଏନା କାମି ରେ ହିଜୁଃକା ହାର୍ ସବେନ୍ ପାଡ଼୍ ବାରାବାର୍ ହୋବାଅଃକା। ଜେଲେକା ପାବିତାର୍ ପୁଥି ରେ ଅଲାକାନା, “ଅକଏ ଥିମ୍ବା ହୁଣ୍ଡି କେଦାଏ ଇନିଜାଃ ତାଃ ମିଃଥିମ୍ବା କାଅଡୋଙ୍ଗ୍ ଜାନା, ଆଡୋଃ ଅକଏ ହୁଡିଙ୍ଗ୍ ହୁଣ୍ଡି କେଦାଏ ଇନିଜାଃ ତାଃ ଘାଟି କାହୋବାଜାନା।” ପାର୍ମେଶ୍ଵାର୍ ରାଃ ଧାନ୍ୟାବାଦ୍ ହୋବାଅଃକା, ଅକନିଃ ଆପେୟାଃ ଲାଗିନ୍ତେ ଏନ୍ ଯୋଶ୍ ଗି ତିତୁସ୍ ରାଃ ମୋନ୍ ରେ ଏମ୍ କାଦାଏ। ଇନିଃ ଆଲେୟାଃ ବୁଝାଅ ତେୟାଃକେ ମାନାତିଙ୍ଗ୍ ଜାନାଏ ଇମିନ୍ ଭାଇର୍ କାହା ମେନ୍ଦୋ ଥିମ୍ବାଗି ଯୋଶ୍ ନାମ୍ କେତେ ଇନିଃ ଆଜାଃ ସାନାଙ୍ଗ୍ ଲେକାତେ ଆପେୟାଃ ନାଡ଼େଏ ସେନ୍ କାନାଏ। ଆଲେ ଇନିଃ ଲୋଃ ଏଟାଃ ବିଶ୍ଵାସୀ ହାଗା କେହ କୁଲ୍ କାଇଜାଲେ ଅକନିଜାଃ ନୁତୁମ୍ ସୁସାମାଚାର୍ ପାର୍ଚାର୍ ରିକାରେ ସବେନ୍ ବିଶ୍ଵାସୀ କୋତାଃ କାଲିସିୟା ରେ ନୁତୁମୋଃ ତାନା; ଆଡୋଃ ଇମିନ୍ ଭାଇର୍ କାହା, ମେନ୍ଦୋ ଇନିଃ କାଲିସିୟା ପାଡ଼େତେ ହଗି ଦୋହୋକାନାଏ ଚି ନେ ଦାନ୍ ଟାକା କେ ଆୱେ ନାଙ୍ଗ୍ ଆଲେୟାଃ ଲୋଃ ସେନ୍ ଚାଏ। ଆଲେ ନେ ସେୱା ନେମେନ୍ତେ ରିକାତାନାଲେ, ଚି ପ୍ରାଭୁ ଆଃ ମାନାରାଙ୍ଗ୍ ଆଡୋଃ ଆଲେୟାଃ ମୋନ୍ ରାଃ ସାପ୍ଡ଼ାଅକାନ୍ ଉଦୁବୋଃକା। ଆଲେ ନେ ବାକାଣ୍ ରେ ହୋସିୟାର୍ କେତେ ତାଇନ୍ ତାନାଲେ ଚି ନେ ସୁକୁ ମୋନ୍ ତେ ଦାନ୍ ଏମାକାନ୍ ବିଷାୟ୍ ରେ ମିୟାଃ ବିଶ୍ଵାସୀ ହାଗା କେ ତିତୁସ୍ ଲୋଃ କୁଲ୍ ରାଃ ହୋରାତେ, ଜେତାଏ ଆଲେୟାଃ ସେୱା କାମି ଚେତାନ୍ ରେ ଦୋଷ୍ ଲାଗାଅ ଆଲୋ ଧାଡ଼ିକାଏ। ଚିୟାଃଚି ନେ ବାକାଣ୍ ଖାଲି ପ୍ରାଭୁ ଆଃ ନେପେଲ୍ ରେ କାହା, ମେନ୍ଦୋ ହୋଡ଼ୋକୋୱାଃ ନେପେଲ୍ ରେହ ମାଇନାନ୍ ମେନ୍ତେ ହୋବାଅଃକା ମେନ୍ତେଲେ ପାହୋମ୍ ତାନା। ଆଲେ ଇନ୍‍କିନ୍ ଲୋଃ ଆଡୋଃ ମିହୋଡ଼୍ ବିଶ୍ଵାସୀ ହାଗା କେ କୁଲ୍ କାଇଜାଲେ, ଅକନିଃକେ ଆଲେ ଘାରି-ଘାରି ସାରିଉରୁମ୍ କେତେ ଥିମ୍ବାଗି କାଜି କୋରେ ପ୍ରାଭୁ ନାଙ୍ଗ୍ ଜୋଶିଲା ତାନିଃ ମେନ୍ତେ ନାମ୍ କାଇଜାଲେ, ମେନ୍ଦୋ ଆପେୟାଃ ରେ ଇନିଜାଃ ଥିମ୍ବାଗି ଭାରୋସା ମେନାଃ, ଏନାମେନ୍ତେ ଇନିଃ ନାଆ ଆଡୋଃଗି ଥିମ୍ବା ଜୋଶିଲା ମେନିଜାଏ। ଆଗାର୍ ଜେତାଏ ତିତୁସ୍ ରାଃ ବିଷାୟ୍ ରେ କୁଲିୟାଏ, ଏଣ୍ଡେ ଇନିଃ ଇଙ୍ଗ୍ଆଃ ଲାଗିନ୍ ଗାତି ଆଡୋଃ ଆପେୟାଃ ଲାଗିନ୍ ଇଙ୍ଗ୍ଆଃ ଦେଙ୍ଗାକାମିନିଃ ତାନିଃ, ହାର୍ତେ ଆଗାର୍ ଆଲେୟାଃ ବିଶ୍ଵାସୀ ହାଗା କିନାଃ ବିଷାୟ୍ ରେ କୁଲିୟାଏ, ଏଣ୍ଡେ ଇନ୍‍କିନ୍ କାଲିସିୟା ପାଡ଼େତେ କୁଲାକାନ୍ କିନ୍ ଆଡୋଃ ମାସୀହ୍ ରାଃ ମାନାରାଙ୍ଗ୍ କିନ୍ ତାନ୍‍କିନ୍। ଏନାମେନ୍ତେ ଆପେୟାଃ ଦୁଲାଡ଼୍ ଆଡୋଃ ଆଲେୟାଃ ଏନ୍ ଘାମାଣ୍ଡ୍ ଅକନାଃ ଆପେୟାଃ ବିଷାୟ୍ ରେ ମେନାଃ କାଲିସିୟା କୋୱାଃ ନାଡ଼େଏ ରେ ଏନାକେ ପୁରାକେତେ ଦେଖାଅତାପେ। ନାଆ ଏନ୍ ସେୱା ରାଃ ବିଷାୟ୍ ରେ ଅକନାଃ ପାବିତାର୍ ହୋଡ଼ୋକୋ ଲାଗିନ୍ତେ ରିକାଅଃ ତାନା, ଇଙ୍ଗ୍‍କେ ଆପେକେ ଅଲେ ଲାଗିନ୍ତେ ଲାଗାତିଙ୍ଗ୍ ବାନୋଃ। ଚିୟାଃଚି ଇଙ୍ଗ୍ ଆପେୟାଃ ମୋନ୍ ରେ ସାପ୍ଡ଼ାଅକାନ୍ କେ ସାରିତାନିଙ୍ଗ୍, ଏନାରାଃ ଚାଲ୍ତେ ଇଙ୍ଗ୍ ଆପେୟାଃ ବିଷାୟ୍ ରେ ମାକିଦୁନିୟା ରାଇଜ୍ ରେନ୍ ହୋଡ଼ୋ କୋତାଃ ରେ ଘାମାଣ୍ଡ୍ ରିକାତାନିଙ୍ଗ୍ ଚି ଆପେ ଆଖାୟା ରାଇଜ୍ ରେନ୍ ହୋଡ଼ୋକୋ ମିଃ ଶିର୍ମା ଏତେ ସାପ୍ଡ଼ାଅକାନ୍ ମେନାପେୟା, ହାର୍ ଆପେୟାଃ ଦେଙ୍ଗା ଏହେମ୍ ରାଃ ସାନାଙ୍ଗ୍ ଆଡୋଃ ଏଟାଃକୋକେ ହଗି ଯୋଶ୍ ଏମାକାଃକୋୱାଏ। ମେନ୍ଦୋ ଇଙ୍ଗ୍ ହାଗାକୋକେ ନେୟାମେନ୍ତେ କୁଲ୍‍କେଃ କୋୱାଇଙ୍ଗ୍ ଚି ଆଲେ ଅକନ୍ ଘାମାଣ୍ଡ୍ ଆପେୟାଃ ବିଷାୟ୍ ରେ ରିକାକେଦାଲେ, ଏନା ନେ କାଜି ରେ ଆଲୋ ସାମାଅଃକା, ମେନ୍ଦୋ ଜେଲେକା ଇଙ୍ଗ୍ କାଜିକାଦାଇଙ୍ଗ୍, ଏନ୍‍ଲେକାଗି ଆପେ ସାପ୍ଡ଼ାଅକାନ୍ ତାଇନ୍‍ପେ। ନେଲେକା ଆଲୋକା ହୋବାଅଃକା ଚି, ଆଗାର୍ ମାକିଦୁନିୟା ରାଇଜ୍ ରେନ୍ ଜାହାନ୍ ବିଶ୍ଵାସୀ ଇଙ୍ଗ୍ ଲୋଃ ହିଜୁଃ ୱାଏ ହାର୍ ଆପେକେ ସାପ୍ଡ଼ାଅକାନ୍ କାଏ ନାମେୟାଏ, ଏଣ୍ଡେ ହୋବା ଧାଡ଼ିୟୋଃୱା ନେ ଭାରୋସା ରାଃ ଚାଲ୍ତେ ଆଲେ (ନେୟା କାଲେ କାଜିତାନା ଚି ଆପେ) ଗିୟୁଗୋଃୱାଲେ। ଏନାମେନ୍ତେ ଇଙ୍ଗ୍ ବିଶ୍ଵାସୀ ହାଗାକୋକେ ନେୟା ଆର୍ଜି ରିକା ଜାରୁରୀ ସାନାଙ୍ଗ୍ କେଦାଇଙ୍ଗ୍ ଚି ଇନ୍‍କୁ ସିଦା ତେ ଆପେ ନାଡ଼େଏ ସେନ୍ ଚାକୋ, ହାର୍ ଆପେୟାଃ ସୁକୁ ମୋନ୍ ତେ ଏମାକାନ୍ ଯଅ ଅକନାଃ ବିଷାୟ୍ ରେ ସିଦାତେଗି କାଜି ଏମ୍ ଲେନା, ସେକାଡ଼୍ କେତେ ମାଣ୍ଡାଅ କାକୋ ଏନାତେ ଏନା ଜାବ୍ରାଇ କେତେ କାହା ମେନ୍ଦୋ ସୁକୁ ମୋନ୍ ତେ ଏମାକାନ୍ ଯଅ ଲେକା ହୋବାଅଃକା। ମେନ୍ଦୋ କାଜି ନେୟା ତାନାଃ ଚି: ଅକଏ ହୁଡିଙ୍ଗ୍ ହେର୍ ତାନାଏ, ଇନିଃ ହୁଡିଙ୍ଗ୍ ଗି ଇରେୟାଏ; ହାର୍ ଅକଏ ଥିମ୍ବା ହେର୍ ତାନାଏ, ଇନିଃ ଥିମ୍ବା ଇରେୟାଏ। ହାର୍ ସବେନ୍ ମିପୀହୋଡ଼୍ ଜେଲେକା ମୋନ୍ ରେ ସାନାଙ୍ଗ୍ ଏନ୍‍ଲେକାଗି ଦାନ୍ ଏମେକାଏ; କୁଡ଼-କୁଡ଼ାୱ କେତେ କାହା, ହାର୍ ଜାବ୍ରାଇ ତେ କାହା, ଚିୟାଃଚି ପାର୍ମେଶ୍ଵାର୍ ସୁକୁ ମୋନ୍ ତେ ଏମେତାନ୍ କୋଲୋଃ ଦୁଲାଡ଼୍ ମାଣ୍ଡାଅୟାଏ। ପାର୍ମେଶ୍ଵାର୍ ସବେନ୍ ଲେକାନାଃ ଆନୁଗ୍ରାହ୍ ଆପେକେ ଦାର୍‍କାର୍ ଏତେହ ଥିମ୍ବା ଏମ୍ ଧାଡ଼ିୟାଏ। ଅକନିଃ ସବେନ୍ କାଜିକୋରେ ହାର୍ ସବେନ୍ ଇମ୍ତା, ସବେନାଃଗି, ଅକନାଃ ଆପେକେ ଦାର୍‍କାର୍ ମେନାଃ, ଆପେତାଃ ରେ ତାଇନ୍ ଚାହି; ହାର୍ ସବେନ୍ ଲେକାନାଃ ବୁଗିନ୍ କାମି ନାଙ୍ଗ୍ ଆପେତାଃ ଥିମ୍ବାଗି ତାଇନ୍ କା। ଜେଲେକା ପାବିତାର୍ ପୁଥି ରେ ଅଲାକାନା, “ଇନିଃ ସୁକୁ ମୋନ୍ ତେ ହାଟିଙ୍ଗ୍ କେଃକୋୱାଏ, ଇନିଃ ରେଙ୍ଗେଃତାନ୍ କୋକେ ଦାନ୍ ଏମାଃକୋୱାଏ, ଇନିଜାଃ ଧାରାମ୍ ଜାନାଓ-ଜାନାଓ ବାଇକାନ୍ ତାଇନୋଃୱା।” ଏନାତେ ଅକନିଃ ହେର୍‍ତାନ୍ କୋକେ ହିତା ହାର୍ ଜୋମେ ଲାଗିନ୍ ଯୋଜୋମାଃ ଏମେୟାଏ, ଇନିଃ ଆପେକେ ହିତା ଏମାପେୟାଏ, ହାର୍ ଏନାକେ ଯଅତେ ଫେରେଃୟାଏ; ହାର୍ ଆପେୟାଃ ଧାରାମ୍ ରାଃ ଯଅ କେ ହାରାୟାଏ। ଆପେ ସବେନ୍ ଲେକାନାଃ ସାମାୟ୍ ରେ ସୁକୁ ତେ ଦାନ୍ ଏମ୍ ତାନାପେ ହାର୍ ଏନାରାଃ ଚାଲ୍ତେ ଆଲେ ପାର୍ମେଶ୍ଵାର୍ କେ ଧାନ୍ୟାବାଦୀ ତାନାଲେ, ଆପେ ସବେନ୍ କାଜି କୋରେ କିଶାଣ୍ ହୋଡ଼ ବାଇୟୋଃପେ। ଚିୟାଃଚି ନେ ଦାନ୍ ସେୱା କାମି କେ ପୁରା ତାନ୍ତେ ପାବିତାର୍ ହୋଡ଼ୋକୋୱାଃ ଦାର୍‍କାର୍ ପୁରାଅଃ ତାନା ମେନ୍ତେ ଭାଇର୍ କାହା, ମେନ୍ଦୋ ହୋଡ଼ୋକୋ ପାଡ଼େତେ ପାର୍ମେଶ୍ଵାର୍ ଆଃ ହଗି ଥିମ୍ବାଗି ଧାନ୍ୟାବାଦ୍ ହୋବାଅଃତାନା। ଚିୟାଃଚି ନେ ଟାକା ଦେଙ୍ଗା ଏମେ ରାଃ ହୋରାତେ ଆପେ ଆପାନ୍ କେ ଉଦୁବ୍ ଦେଖାଅ ତାନାପେ ଏନାତେ ଥିମ୍ବାଗି ହୋଡ଼ୋକୋ ପାର୍ମେଶ୍ଵାର୍ ରାଃ ମାନାରାଙ୍ଗ୍ ତାନାକୋ ଚି ଆପେ ମାସୀହ୍ ରାଃ ସୁସାମାଚାର୍ କେ ମାନାତିଙ୍ଗ୍ କେତେ ଏନାରାଃ ଆଧିନ୍ ରେ ତାଇନୋଃ ତାନାପେ, ହାର୍ ଇନ୍‍କୁୱାଃ ଆଡୋଃ ସବେନ୍ କୋୱାଃ ଦେଙ୍ଗା ରିକା ଲାଗିନ୍ତେ ସୁକୁ ମୋନ୍ ତେ ଦାନ୍ ଏମ୍ କାତେତାନାପେ। ଆଡୋଃ ଇନ୍‍କୁ ଆପେ ଲାଗିନ୍ତେ ବିନ୍ତି ତାନାକୋ; ହାର୍ ନେୟାମେନ୍ତେ ଚି ଆପେୟାଃ ରେ ପାର୍ମେଶ୍ଵାର୍ ରାଃ ଥିମ୍ବାଗି ଆନୁଗ୍ରାହ୍ ମେନାଃ, ଆପେକେ ନେଲ୍ ହୋରା କାତେତାନାକୋ। ପାର୍ମେଶ୍ଵାର୍ ରାଃ ଏନ୍ ଦାନ୍ ଲାଗିନ୍ତେ ମାନେ ମିୟାଃଗି ହୋନ୍‍କଡ଼ା ୟୀଶୁ ମାସୀହ୍ ଲାଗିନ୍ତେ ଅକନାଃ କାଜି ଲେରେ କାଛାବାଅଃୱା, ଧାନ୍ୟାବାଦ୍ ହୋବାଅଃକା। ଇଙ୍ଗ୍ ଏନ୍ ପାଉଲୁସ୍ ଗି ଅକନିଃ ଆପେୟାଃ ନାଡ଼େଏ କାଇଙ୍ଗ୍ ସାହାସ୍ ତାନିଙ୍ଗ୍, ମେନ୍ଦୋ ଆପେୟାଃତେ ସାଙ୍ଗିନ୍ ପାଡ଼୍ ତାଇକେତେ ସାହାସ୍ ତାନିଙ୍ଗ୍; ଆପେକେ ମାସୀହ୍ ରାଃ ସୋଜ୍ ହାର୍ ନାରାମ୍ ହୋରାତେ ବୁଝାଅପେ ତାନିଙ୍ଗ୍। ଇଙ୍ଗ୍ ନେୟା ଆର୍ଜି ପେତାନିଙ୍ଗ୍ ଚି ଆପେୟାଃ ନାଡ଼େଏ ଇଙ୍ଗ୍‍କେ ବେଗାର୍ ବୋରୋତେ ସାହାସ୍ ଦେଖାଅ ଆଲୋ ପାଡ଼ାଅଃକା, ଜେଲେକା ଇଙ୍ଗ୍ ଚିମିନ୍ ହୋଡ଼ୋକୋ ନାଙ୍ଗ୍ ଅକନ୍ କୋ ଇଙ୍ଗ୍‍କେ ନେ ଅତେଦିଶୁମ୍ ରେନ୍ ହୋଡ଼ୋକୋ ଲେକା ପାହୋମ୍ ତାନାକୋ, ଇନ୍‍କୁକେ ସାହାସ୍ ତେ କାଜିୟାଇଙ୍ଗ୍ ମେନ୍ତେ ପାହୋମ୍ କାଦିଙ୍ଗ୍। ଚିୟାଃଚି ଆଲେ ହୋଡ଼ମୋ ଲେକାତେ ନେ ଅତେଦିଶୁମ୍ ରେ ଜୀହିଦୋଃ ତାନାଲେ, ଏଣ୍ଡେ ହ ହୋଡ଼ମୋ ରାଃ ଲେକାତେ କାଲେ ଲାଡ଼ାଇୟୋଃ ତାନା। ଚିୟାଃଚି ଆଲେୟାଃ ଲାଡ଼ାଇ ରାଃ ହାତିୟାର୍ ହୋଡ଼ୋକୋୱାଃ ହାତିୟାର୍ ଲେକା ବାନୋଃ, ମେନ୍ଦୋ ଏଣ୍ଡେ ହ ଗାଢ଼ କୋକେ ଧାଶୁଡ଼୍ ଲାଗିନ୍ତେ ପାର୍ମେଶ୍ଵାର୍ ରାଃ ପେଡ଼େଏ ମେନାଃ। ଏନାମେନ୍ତେ ଆଲେ କାଧାଡ଼ି ଲେକା କୁଲିକାପାଜି କୋକେ, ଆଡୋଃ ସବେନ୍ ମାପ୍‍ରାଙ୍ଗ୍ କାଜି କୋକେ, ଅକନାଃ ପାର୍ମେଶ୍ଵାର୍ ରାଃ ସେଣା ରାଃ ବିରୋଧ୍ ରେ ବିରିଃ ତାନା, କାଜି ହାଃ ତାନାଲେ, ହାର୍ ସବେନ୍ ଲେକାନ୍ ବିଚାର୍ କୋକେ ଥୋଲ୍ କେତେ ମାସୀହ୍ ରାଃ ଆନାଚୁ ମାନାତିଙ୍ଗ୍ ବାଇ କୋତାନାଲେ। ହାର୍ ସେକାଡ଼୍ ତାଇନୋଃ ତାନାଲେ ଚି ଅକନ୍ ଇମ୍ତାଙ୍ଗ୍ ଆପେ ଆନାଚୁ ମାନାତିଙ୍ଗ୍ କେତାନାପେ, ଇମ୍ତା ସବେନ୍ ଲେକାନାଃ ଆନାଚୁ କାମାନାତିଙ୍ଗ୍ ତାନ୍ କୋକେ ଦାଣ୍ଡ୍ ଏମାକୋୱାଇଙ୍ଗ୍। ଆପେ ଏନ୍ କାଜି କୋକେ ନେଲେପେ, ଅକନାଃ ମେଏଃ ନାଡ଼େଏ ରେ ମେନାଃ। ଆଗାର୍ ଜେତାଏକେ ଆପାନାଃ ଚେତାନ୍ ରେ ଭାରୋସା ମେନାଃ ଚି ଇଙ୍ଗ୍ ମାସୀହ୍ ରାଃ ତାନିଙ୍ଗ୍, ଦୋ ଇନିଃ ନେୟା ହଗି ସାରିଲେକାଏ ଚି ଜେଲେକା ଇନିଃ ମାସୀହ୍ ରାଃ ତାନିଃ ଏନ୍ ଲେକାଗି ଆଲେ ହଗି ତାନ୍‍ଲେ। ଚିୟାଃଚି ଆଗାର୍ ଇଙ୍ଗ୍ ଏନ୍ ଆଧିକାର୍ ରାଃ ବିଷାୟ୍ ରେ ଆଡୋଃଗି ଘାମାଣ୍ଡ୍ ଦେଖାଅ ୟାଇଙ୍ଗ୍, ଅକନାଃ ପ୍ରାଭୁ ଆପେ କେ ବାଗ୍‍ଡ଼ାଅ ଲାଗିନ୍ କାହା ମେନ୍ଦୋ ବାଇ ଲାଗିନ୍ ଆଲେକେ ଏମାକାଃ ଲେୟାଏ, ଏଣ୍ଡେ କାଇଙ୍ଗ୍ ଗିୟୁଗୋଃୱା। ନେୟା ଇଙ୍ଗ୍ ନେୟାଲାଗିନ୍ତେ କାଜିତାନିଙ୍ଗ୍ ଚି ଚିଠି କୋରାଃ ହୋରାତେ ଆପେକେ ବୋତୋଙ୍ଗ୍ ନିଃ ଆଲୋ ବାଇୟୋଃକାଇଙ୍ଗ୍। ଚିୟାଃଚି ଚିମିନାଙ୍ଗ୍ କୋ କାଜିତାନାକୋ, “ଇନିଜାଃ ଚିଠିକୋ ଦୋ ହାମ୍ବାଲ୍ ହାର୍ କେଟେଃ ଗିୟାଃ; ମେନ୍ଦୋ ଅକୋ ଇମ୍ତାଙ୍ଗ୍ ଇନିଃ ନାଡ଼େଏ ରେ ତାଇନାଏ, ଦୋ ଇନିଃ ହୋଡ଼ମୋ ତେ କାପେଡ଼େଜାନ୍ ହାର୍ ଇନିଜାଃ କାଜି ରେ ହାମ୍ବାଲ୍ ବାନୋଃୱା।” ଅକଏ ନେକା କାଜିୟାଏ, ଇନିଃ ନେୟା ଆଟ୍‍କାର୍ ମାଣ୍ଡାଅକାଏ ଚି ଜେଲେକା ସାଙ୍ଗିନ୍ ରେ ତାଇକେତେ ଚିଠି କୋରେ ଆଲେୟାଃ କାଜି ଅଲାକାନ୍ ମେନାଃ, ଏନ୍ ଲେକାଗି ଆପେୟାଃ ନାଡ଼େଏ ରେ ଆଲେୟାଃ କାମି ହଗି ହୋବାୱା। ଚିୟାଃଚି ଆଲେକେ ନେ ସାହାସ୍ ବାନୋଃୱା ଚି ଆଲେ ଆପାନ୍ କେ ଇନ୍‍କୁ ଏତେ ଚିମିନାଙ୍ଗ୍ କୋ ଲେକା ଲେକାଅଃୱାଲେ ଚାହେ ଇନ୍‍କୁ ଲୋଃ ଆପାନ୍ ଜୋକା ନାଲେ। ଅକନ୍‍କୋ ଆକୋ ଆକୋଗି ନୁତୁମେନାକୋ, ହାର୍ ଆକୋ ଆପାନ୍ କେଗି ଆକୋ-ଆକୋ ରେଗି ଜୋକାଅଗାକୋ ହାର୍ ଡୋଣ୍ଡୋ ବାଇକେନୋଗାକୋ। ଆଲେ ଦୋ ସୀମାନ୍ ଏତେ ବାହାରି ଘାମାଣ୍ଡ୍ ଚିଉଲା ହ କାଲେ ରିକାୟା, ମେନ୍ଦୋ ଏନ୍ ସୀମାନ୍ ସାନ୍ତେଗି ଅକନାଃ ପାର୍ମେଶ୍ଵାର୍ ଆବୁଲାଗିନ୍ ମାଣ୍ତାଅ କାଦାଏ, ହାର୍ ଏନାରାଃ ଲେକାଗି ଆଲେ ଘାମାଣ୍ଡ୍ ହଗି ରିକାୟାଲେ। ଚିୟାଃଚି ଆଲେ ଆଲେୟାଃ ସୀମାନ୍ ତେ ବାହାରି ଆପାନ୍ କେ ଆୟୁର୍ରେ ନାଙ୍ଗ୍ କାଲେ ସାନାଙ୍ଗ୍ ତାନା, ଜେଲେକା ଚି ଆପେତାଃ କାଲେ ଥେବାଃ ଜାନ୍ତେ ଏଣ୍ଡେ ହୋବାଅଃ ତେୟା, ମେନ୍ଦୋ ମାସୀହ୍ ରାଃ ସୁସାମାଚାର୍ ଉଦୁବ୍ ତାନ୍ ଲୋଃ ଆପେତାଃ ଥେବାଃ ସେଟେର୍ କାନାଲେ। ଆଲେ ସୀମାନ୍ ତେ ବାହାରି ଏଟାଃକୋୱାଃ କାମି ଚେତାନ୍ ରେ ଘାମାଣ୍ଡ୍ କାଲେ ରିକାୟା; ମେନ୍ଦୋ ଆଲେକେ ଆଶ୍ରା ମେନାଃ ଚି ଜେଲେକା ଆପେୟାଃ ବିଶ୍ଵାସ୍ ହାରା ଇଦିୟୋଗା ଏନ୍‍ଲେକାଗି ଆଲେୟାଃ ସୀମାନ୍ ଲେକାତେ ଆପେୟାଃ ଚାଲ୍ତେ ଆଡୋଃଗି କାମି ଜାଗା ହାରା ଇଦିୟୋଗା। ଏନାତେ ଆଲେ ଆପେୟାଃ ସୀମାନ୍ ଏତେ ଆୟୁର୍ ସେନ୍ କେତେ ସୁସାମାଚାର୍ ଉଦୁବ୍ ଧାଡ଼ିୟାଲେ, ହାର୍ ନେୟା କାହା ଚି ଆଲେ ଏଟାଃକୋୱାଃ ସୀମାନ୍ ଭିତାର୍ ବାଇୟାକାନ୍ କାମି ଚେତାନ୍ ରେ ଘାମାଣ୍ଡ୍ ୟାଲେ। ମେନ୍ଦୋ ଜେଲେକା ପାବିତାର୍ ପୁଥି କାଜିୟାଏ, “ଜେତାଏ ଘାମାଣ୍ଡ୍ ୟାଏ ରେଦୋ ପ୍ରାଭୁ ରେ ଘାମାଣ୍ଡେକାଏ।” ଚିୟାଃଚି ଜେତାଏ ଆପାନାଃ ନୁତୁମ୍ ଆଏଃଗି ରିକାୟାଏ, ଇନିଃ କାହା, ମେନ୍ଦୋ ଅକନିଜାଃ ନୁତୁମ୍ ପ୍ରାଭୁ ରିକାୟାଏ, ଇନିଃଗି ଗ୍ରାହାନ୍ ଅଗାଏ। ଆଗାର୍ ଆପେ ଇଙ୍ଗ୍ଆଃ ହୁଡିଙ୍ଗ୍ ଲେକା ଡୋଣ୍ଡୋ କାନାଃ କେ ସାହାତିଙ୍ଗ୍ ତେପେ ଏଣ୍ଡେ ଚିମିନ୍ ବୁଗିନାଃ ହୋବାଅଃ ତେୟାଃ; ହାଁ ଆପେ ଇଙ୍ଗ୍ଆଃ ସାହାତିଙ୍ଗ୍ ତାନାପେ। ଚିୟାଃଚି ଇଙ୍ଗ୍ ଆପେୟାଃ ବିଷାୟ୍ ରେ ପାର୍ମେଶ୍ଵାର୍ ରାଃ ଯୋଶ୍ ରେ ତାଇନ୍ ତାନିଙ୍ଗ୍, ଏନାମେନ୍ତେ ଚି ଇଙ୍ଗ୍ ମିୟାଃଗି କଡ଼ା ଲୋଃ ଆପେୟାଃ କାଜି ବାଇକାଦାଇଙ୍ଗ୍ ଚି ଆପେକେ ପାବିତାର୍ ଡିଣ୍ଡାକୁଡ଼ି ଲେକା ମାସୀହ୍ କେ ଜିମା ତାଃଇଙ୍ଗ୍। ମେନ୍ଦୋ ଇଙ୍ଗ୍ ବୋରୋ ତାନାଇଙ୍ଗ୍ ଚି ଚିଲ୍‍କା ବିଙ୍ଗ୍ ଆଜାଃ ହୁସିଆର୍ ତେ ହାବ୍ବା କେ ହିଡ଼୍ କିଜାଏ ଏନ୍‍ଲେକାଗି ଆପେୟାଃ ମୋନ୍ କେ ଏନ୍ ସୋଜ୍ ହାର୍ ପାବିତାର୍ ତେ ଅକନାଃ ମାସୀହ୍ ଲୋଃ ହୋବାଅଃ ଚାହି, ଏନାକେ ଆଲୋଜାଃ ବାଗ୍ଡ଼ାଅକାଏ। ଆଗାର୍ ଜେତାଏ ଆପେ ତାଃ ହିଜୁଃ କେତେ ଜାହାନ୍ ଏଟାଃ ୟୀଶୁ ରାଃ ପାର୍ଚାର୍ ପେତାନାଏ, ଅକନିଜାଃ ଆଲେ କାଲେ ପାର୍ଚାର୍ କାଦା; ଚାହେ ଜାହାନ୍ ଏଟାଃ ଆତ୍ମା ନାମିତାନାପେ, ଅକନିଃକେ ସିଦା କାପେ ନାମ୍ ଲିଜାପେ; ଚାହେ ଆଡୋଃ ଏଟାଃ ସୁସାମାଚାର୍ କେ ଉଦୁବେତାନାଏ ଅକନାଃକେ ଆପେ ସିଦା କାପେ ମାନାତିଙ୍ଗ୍ ଲେଦା, ଦୋ ଆପେ ଏନାକେ ସାହାତିଙ୍ଗ୍ କେତାନାପେ। ଇଙ୍ଗ୍ ଦୋ ବୁଝାଅଃ ତାନିଙ୍ଗ୍ ଚି ଇଙ୍ଗ୍ ଅକନ୍ କାଜି ରେହ ମାରାଙ୍ଗ୍ ଏତେ ମାରାଙ୍ଗ୍ କୁଲାକାନ୍ ଚେଲା କୋଏତେ ହୁଡିଙ୍ଗ୍ ନାହାଲାଇଙ୍ଗ୍। ଆଗାର୍ ଇଙ୍ଗ୍ ବାକାଣ୍ ରେ ଆନାଡ଼ି ତାନାଇଙ୍ଗ୍, ଏଣ୍ଡେହ ସେଣା ରେ ଦୋ କାହା। ଆଲେ ନେୟାକେ ସବେନ୍ କାଜି ରେ ସବେନ୍ ଲେକାତେ ଆପେୟାଃ ଲାଗିନ୍ ଉଦୁବ୍ ଛାବାକାଦାଲେ। ଚିନାଃ ନେଣ୍ତେ ରେ ଇଙ୍ଗ୍ ଜାହାନାଃ ପାପ୍ କେଦାଇଙ୍ଗ୍ ଚି ଇଙ୍ଗ୍ ଆପେକେ ପାର୍ମେଶ୍ଵାର୍ ରାଃ ସୁସାମାଚାର୍ କେ ସାମାତେଗି ଉଦୁବାଃ ପେୟାଇଙ୍ଗ୍; ହାର୍ ଇଙ୍ଗ୍ ଆପାନ୍ କେ ହୁଡିଙ୍ଗ୍ ବାଇକେଦାଇଙ୍ଗ୍ ଏନାତେ ଆପେ ମାରାଙ୍ଗେନ୍ ଅଃପେ? ଇଙ୍ଗ୍ ଏଟାଃ କାଲିସିୟା କୋକେ ରେଏଃ କେଃକୋୱାଇଙ୍ଗ୍, ମାନେ ଇଙ୍ଗ୍ ଇନ୍‍କୁ ତାଃଏତେ ନାଲା ଇଦିକେଦାଇଙ୍ଗ୍ ଏନାତେ ଆପେୟାଃ ସେୱାୟାଇଙ୍ଗ୍। ଆଡୋଃ ଚିମ୍ତାଙ୍ଗ୍ ଇଙ୍ଗ୍ ଆପେୟାଃ ଲୋଃ ତାଇନ୍ କେନାଇଙ୍ଗ୍ ହାର୍ ଇଙ୍ଗ୍ଆଃ ତାଃ ଟାକା କାତାଇକେନା, ଇମ୍ତା ଇଙ୍ଗ୍ ଜେତାୟାଃ ଚେତାନ୍ ରେ ହାମ୍ବାଲ୍ କାଇଙ୍ଗ୍ ଏମ୍ କେଦା, ଚିୟାଃଚି ମାକିଦୁନିୟା ରାଇଜ୍ ଏତେ ହାଗାକୋ ହିଜୁଃକେତେ ଇଙ୍ଗ୍ଆଃ ଦାର୍‍କାର୍ କୋକେ ପୁରା କେଦାକୋ; ଆଡୋଃ ଇଙ୍ଗ୍ ସବେନ୍ କାଜି ରେ ଆପାନ୍ କେ ଆପେୟାଃ ଚେତାନ୍ ରେ ହାମ୍ବାଲ୍ କାଇଙ୍ଗ୍ ବାଇକେଦା, ହାର୍ କାଇଙ୍ଗ୍ ବାଇୟୋଃୱା। ଆଗାର୍ ମାସୀହ୍ ରାଃ ସାର୍ତି ଇଙ୍ଗ୍ଆଃ ରେ ମେନାଃ ଏଣ୍ଡେ ଆଖାୟା ରାଇଜ୍ ରେନ୍ ଜେତାଏ ଇଙ୍ଗ୍‍କେ ନେ ଘାମାଣ୍ଡ୍ ରିକାରେ କାଏ କାଜିଧାଡ଼ିୟା। ଚିନାଃ ମେନ୍ତେ? ଚିନାଃ ଏନାମେନ୍ତେ ଚି ଇଙ୍ଗ୍ ଆପେକେ କାଇଙ୍ଗ୍ ଦୁଲାଡ଼୍ ପେତାନା? ପାର୍ମେଶ୍ଵାର୍ ନେୟା ସାରିତାନାଏ ଚି ଇଙ୍ଗ୍ ଦୁଲାଡ଼୍‍ପେ ତାନିଙ୍ଗ୍। ମେନ୍ଦୋ ଅକନାଃ ଇଙ୍ଗ୍ ରିକାତାନିଙ୍ଗ୍, ଏନାଗି ରିକାକାତେୟାଇଙ୍ଗ୍ ଏନାତେ ଅକନ୍ ହୋଡ଼ୋକୋ ତାକ୍ ଦାଣା-ବାଡ଼ା ତାନାକୋ ଇନ୍‍କୁକେ ତାକ୍ କାଇଙ୍ଗ୍ ଏମାକୋୱା, ଏନାତେ ଅକନ୍ କାଜି ରେ ଇନ୍‍କୁ ଘାମାଣ୍ଡ୍ ତାନାକୋ, ଏନାରେ ଇନ୍‍କୁ ଆଲେୟାଃ ଲେକାଗି ହୋବାଅଃ କାକୋ। ଚିୟାଃଚି ନେକାନ୍ ହୋଡ଼ୋକୋ ହିହିଡ଼୍ କୁଲାକାନ୍ ଚେଲା ହାର୍ ଲୋଗୋ କେତେ କାମିତାନ୍ କୋ ହାର୍ ମାସୀହ୍ ରାଃ କୁଲାକାନ୍ ଚେଲାକୋ ଲେକା ନେଲୋଃ ଲାଗିନ୍ ବାଇୟେନାକୋ। ନେୟା ଆକ୍‍ଦାନ୍ଦାଅଃ ରାଃ କାଜି ନାହାଲା ଚିୟାଃଚି ଶାଏତାନ୍ ଆଏଃ ହଗି ମାର୍ଶାଲେନ୍ ସିର୍ମାଦାସୀ ଲେକା ନେଲୋଃ ଲାଗିନ୍ ବାଇକେତେ ଲୋଗୋୟାଏ। ଏନାମେନ୍ତେ ଆଗାର୍ ଇନିଜାଃ ଦାସୀକୋ ହଗି ଧାରାମ୍ ରାଃ ଦାସୀକୋ ଲେକା ବାଇୟେନ୍ ତାନାକୋ, ଏଣ୍ଡେ ଏନା ଜାହାନ୍ ମାରାଙ୍ଗ୍ କାଜି ନାହାଲା, ମେନ୍ଦୋ ଇନ୍‍କୁୱାଃ ଟୁଣ୍ଡୁ ଇନ୍‍କୁୱାଃ କାମିକୋ ଲେକା ହୋବାଅଃୱା। ଇଙ୍ଗ୍ ଆଡୋଃ ମିଶା କାଜିତାନିଙ୍ଗ୍, ଜେତାଏ ଇଙ୍ଗ୍‍କେ ଭାକୁୱା ଆଲୋ ପାହୋମେ କାଏ; ମେନ୍ଦୋ ଆଗାର୍ ଇଙ୍ଗ୍‍କେ ଏନ୍‍କା ପାହୋମ୍ ତାନାଏ ଏଣ୍ଡେ ଏନ୍‍କା ଗି ମାନାତିଙ୍ଗ୍ କାଏ, ଏନାତେ ଇଙ୍ଗ୍ ହଗି କାଟିଃ ଲେକା ଘାମାଣ୍ଡ୍ ଧାଡ଼ିୟାଇଙ୍ଗ୍। ଇଙ୍ଗ୍ ଜାହାନାଃଗି କାଜିତାନିଙ୍ଗ୍, ଏନା ପ୍ରାଭୁ ଆଃ ଆନାଚୁ ଲେକାତେ କାହା ମେନ୍ଦୋ ଭାକୁୱା ଲେକାତେ ଆପାନ୍ ରେଗି ଭାରୋସା ମାଣ୍ଡାଅ କେତେ ଘାମାଣ୍ଡ୍ ତେ କାଜିତାନିଙ୍ଗ୍। ଯାବ୍ ଚି ଥିମ୍ବାଗି ହୋଡ଼ୋକୋ ଅତେଦିଶୁମ୍ ରେନ୍ ହୋଡ଼ୋକୋ ଲେକା ଘାମାଣ୍ଡ୍ ୟାକୋ, ଏଣ୍ଡେ ଇଙ୍ଗ୍ ହଗି ଘାମାଣ୍ଡ୍ ୟାଇଙ୍ଗ୍। ଆପେ ଦୋ ସେଣାନ୍ ହୋବାକେତେ ରାଶିକା ତେ ଡୋଣ୍ଡୋ କୋକେ ସାହାତିଙ୍ଗ୍ କୋତାନାପେ। ଚିୟାଃଚି ଚିମ୍ତାଙ୍ଗ୍ ଆପେକେ ଜେତାଏ ଦାସୀ ବାଇପେତାନାଏ, ୟାଦୋ ଆପେୟାଃ ସବେନାଃ କେ ଜୋମ୍ କେ ତାନାଏ, ୟାଦୋ ଆପେକେ ପାଶେ ପେ ତାନାଏ, ୟାଦୋ ଆଏଃ ଆପାନ୍ କେ ମାରାଙ୍ଗ୍ଏନ୍ ବାଇଏନ୍ ତାନାଏ, ୟାଦୋ ଆପେୟାଃ ଜୋୱା ରେ ଥାପ୍‍ଡ଼ାଅ ପେତାନାଏ, ଦୋ ଆପେ ସାହାତିଙ୍ଗ୍ କେତାନାପେ। ଇଙ୍ଗ୍ଆଃ କାଜି କାମାଇନ୍ ନାମେ ଲେକାତେ ମେନାଃ, ଜେଲେକା ଆଲେ ନେୟା ଲାଗିନ୍ତେ ନାରାଦୁରା ଗି ତାଇଲେନାଲେ। ମେନ୍ଦୋ ଜାହାନ୍ କାଜି କୋରେ ଜେତାଏ ଘାମାଣ୍ଡ୍ ତାନାଏ-ଇଙ୍ଗ୍ ଭାକୁୱା ଲେକାତେ କାଜିତାନିଙ୍ଗ୍-ଏଣ୍ଡେ ଇଙ୍ଗ୍ ହଗି ଘାମାଣ୍ଡ୍ ତାନିଙ୍ଗ୍। ଚିନାଃ ଇନ୍‍କୁ ଭାଇର୍ ଇବ୍ରାନୀ ତାନ୍‍କୋ? ଇଙ୍ଗ୍ ହ ଦୋ ତାନିଙ୍ଗ୍। ଚିନାଃ ଇନ୍‍କୁ ଭାଇର୍ ଇସ୍ରାଏଲୀ ତାନ୍‍କୋ। ଇଙ୍ଗ୍ ହ ଦୋ ତାନିଙ୍ଗ୍। ଚିନାଃ ଇନ୍‍କୁ ଭାଇର୍ ଆବ୍ରାହାମ୍ ରାଃ ବାଂଶ୍ ରେନ୍ କୋତାନ୍‍କୋ। ଇଙ୍ଗ୍ ହ ଦୋ ତାନିଙ୍ଗ୍। ଚିନାଃ ଇନ୍‍କୁ ଭାଇର୍ ମାସୀହ୍ ରାଃ ଦାସୀ ତାନ୍‍କୋ? ଇଙ୍ଗ୍ ବାୟ୍‍ହା କୋଲେକା କାଜି ତାନିଙ୍ଗ୍। ଇଙ୍ଗ୍ ଇନ୍‍କୁ ଏତେ ଥିମ୍ବା ତାନିଙ୍ଗ୍! ଥିମ୍ବାଗି କାମି ରିକାରେ; ଘାରି-ଘାରି ଜେଲ୍ ଅଡ଼୍ଆଃ ରେ ବାନ୍ଦିଅଃତାନ୍ ରେ, କୋଡ୍ରା ମାଉର୍ ଜୋମ୍ ରେ, ଘାରି-ଘାରି ଗୋନୋଏଃ ରାଃ ବୋରୋ ରେ। ପାଞ୍ଚ୍ ଧୋର୍ ଇଙ୍ଗ୍ ୟାହୁଦୀ କୋୱାଃ ତିଈ ତେ ଉନ୍ତାଲିସ୍ କୋଡ୍ରା ମାଉର୍ ଜୋମ୍ କେଦିଙ୍ଗ୍। ଆପିସା ଇଙ୍ଗ୍ ସଟା ରେ ମାଉର୍ ଜୋମ୍ କେଦିଙ୍ଗ୍, ମିଶା ଇଙ୍ଗ୍‍କେ ଦିରିତେ ଥେର୍ କେଦିଙ୍ଗ୍ଆକୋ, ଆପିସା ଜାହାଜ୍ ରାପୁଃ ଜାନା ଅକଣ୍ତେରେ ଇଙ୍ଗ୍ ରାକାବ୍ ଲେନ୍ ତାଇନାଇଙ୍ଗ୍, ମିୟାଃ ନିଦା-ଶିଙ୍ଗି ଇଙ୍ଗ୍ ସାମୁଦାର୍ ରେ ଆତୁ ଜାନିଙ୍ଗ୍। ଇଙ୍ଗ୍ ଘାରି-ଘାରି ସେସେନ୍ ହୋରା ରେ, ନାଈ ଗାଡା ରାଃ ବୋରୋୱାନ୍ ଜାଗା ରେ, ଡାକୁ କୋୱାଃ ବୋରୋୱାନ୍ ରେ, ଇଙ୍ଗ୍ଆଃ ଦିଶୁମ୍ ଜାତି କୋୱାଃ ବୋରୋୱାନ୍ ରେ, ଏଟାଃଜାତି କୋଏତେ ବୋରୋୱାନ୍ ରେ, ସାହାର୍ ରାଃ ବୋରୋୱାନ୍ ରେ, ଟୋନାଙ୍ଗ୍ ରାଃ ବୋରୋୱାନ୍ ରେ, ସାମୁଦାର୍ ରାଃ ବୋରୋୱାନ୍ ରେ, ଲୋଗୋତାନ୍ ହାଗା କୋୱାଃ ଥାଲାରେ ବୋରୋୱାନ୍ ରେ ତାଇନ୍ ଲେନିଙ୍ଗ୍; ଥିମ୍ବାଗି କାମି ହାର୍ ଦୁକୁ ରେ; ଘାରି-ଘାରି ଏୟୋନ୍ ତାନ୍ ରେ, ରେଙ୍ଗେଃ-ତେତାଙ୍ଗ୍ ରେ, ଘାରି-ଘାରି ଯୋଜୋମାଃ କାତାଇକେନ୍ ରେ, ରାବାଙ୍ଗ୍ ତାନ୍ ରେ, ସାମା ହୋଡ଼ମୋ ରେ; ନେୟା ଲୋଃ ଆଡୋଃଗି ଏଟାଃ କାଜିକୋକେ ବାଗିକେତେ ସବେନ୍ ହୁଲାଙ୍ଗ୍ କାଲିସିୟା କୋରାଃ ପାହୋମ୍ ଇଙ୍ଗ୍‍କେ ତେନ୍ ତାଇକେନାଏ। ଅକଏ ନାରାଦୁରାଅଃ ତାନାଏ ହାର୍ ଇଙ୍ଗ୍ କାଇଙ୍ଗ୍ ନାରାଦୁରାଅଃ ତାନା? ଅକଏ ପାପ୍ ପାଡ଼୍ ଇଦିୟୋଃ ତାନାଏ ହାର୍ ଇଙ୍ଗ୍ ଭିତାର୍ ତେ କାଇଙ୍ଗ୍ ଖିସୋଃ ତାନା? ଆଗାର ଘାମାଣ୍ଡ୍ ରିକା ଲାଗାତିଙ୍ଗ୍ ତାନାଃ, ଦୋ ଇଙ୍ଗ୍ ଆପାନାଃ ନାରାଦୁରା କାଜି କୋରେ ଘାମାଣ୍ଡ୍ ୟାଇଙ୍ଗ୍। ପ୍ରାଭୁ ୟୀଶୁ ରାଃ ପାର୍ମେଶ୍ଵାର୍ ହାର୍ ଆପୁ ଅକନିଃ ଜାନାଓ ଧାନ୍ୟା ତାନିଃ, ସାରିୟାଏ ଚି ଇଙ୍ଗ୍ କାଇଙ୍ଗ୍ ହିଡ଼୍ ତାନା। ଦାମେଶ୍କସ୍ ସାହାର୍ ରେ ଇଙ୍ଗ୍ ଆରିତାସ୍ ରାଜା ରାଃ ପାଡ଼େତେ ଅକନିଃ ଚି ହାକିମ୍ ତାଇକେନାଏ, ଇନିଃ ଇଙ୍ଗ୍‍କେ ସାସାବ୍ ଲାଗିନ୍ତେ ଦାମେଶ୍କସ୍ ସାହାର୍ ରେ ହୋଡ଼ୋକୋକେ ଦୁବ୍ ଲେଃକୋତାଇନାଏ। ହାର୍ ଇଙ୍ଗ୍ ଗେଣ୍ଡୁୱା ରେ ଖିଡ଼୍‍କୀ ହୋରାତେ ଭିତ୍ ଏତେ ଆଡ଼୍‍ଗୁ ଜାନିଙ୍ଗ୍, ଆଡୋଃ ଇନିଜାଃ ତିଈ ଏତେ ବାଚାଓ ଜାନିଙ୍ଗ୍। ଇଙ୍ଗ୍‍କେ ଘାମାଣ୍ଡ୍ ରିକା ଠିକ୍ ନାହାଲା ଏଣ୍ଡେ ହ ଘାମାଣ୍ଡ୍ ପାଡ଼ାଅଃ ତାନା; ଏନାମେନ୍ତେ ଇଙ୍ଗ୍ ପ୍ରାଭୁ ଆଃ ଏମାକାନ୍ ଦାର୍ଶାନ୍ ହାର୍ ଉଦୁବ୍‍କାନ୍ କାଜି କୋକେ ବାକାଣ୍ ୟାଇଙ୍ଗ୍। ଇଙ୍ଗ୍ ମାସୀହ୍ ରେ ମିହୋଡ଼୍ ହୋଡ଼ କେ ସାରିୟାଇଙ୍ଗ୍; ଚାଉଦା ବାରାଶ୍ ହୋବାନା ଇଦୁ ହୋଡ଼ମୋ ଲୋଃଗି, ଚି ଇଦୁ ହୋଡ଼ମୋ ବାଗିକେତେ, ଏନା ପାର୍ମେଶ୍ଵାର୍ ସାରିୟାଏ; ନେକାନ୍ ହୋଡ଼ ତିସ୍ରା ସିର୍ମାଦିଶୁମ୍ ସାନ୍ତେ ଉଠାଓ ଇଦି ଜାନାଏ। ଇଙ୍ଗ୍ ନେକାନ୍ ହୋଡ଼ କେ ସାରିୟାଇଙ୍ଗ୍ ଇଦୁ ହୋଡ଼ମୋ ଲୋଃଗି, ଚି ଇଦୁ ହୋଡ଼ମୋ ବାଗିକେତେ ଏନା ପାର୍ମେଶ୍ଵାର୍ ଗି ସାରିୟାଏ ଚି ପାରାଦିଶ୍ ତେ ଉଠାଓ ଇଦି ଜାନାଏ, ହାର୍ ନେକାନ୍ ବାକାଣ୍ ଆୟୁମ୍ କେଦାଏ ଅକନାଃକେ ମୋଚା ରେ କାଜି ନାଙ୍ଗ୍ ହୋଡ଼ କେ ଆନାଚୁ ବାନୋଃ। ନେକାନ୍ ହୋଡ଼ ଚେତାନ୍ ରେ ଦୋ ଇଙ୍ଗ୍ ଘାମାଣ୍ଡ୍ ୟାଇଙ୍ଗ୍, ମେନ୍ଦୋ ଇଙ୍ଗ୍ ଇଙ୍ଗ୍ଆଃ ନାରାଦୁରା କେ ବାଗିକେତେ, ଇଙ୍ଗ୍ ଇଙ୍ଗ୍ଆଃ ବିଷାୟ୍ ରେ କାଇଙ୍ଗ୍ ଘାମାଣ୍ଡେୟା। ଚିୟାଃଚି ଆଗାର୍ ଇଙ୍ଗ୍ ଘାମାଣ୍ଡ୍ ନାଙ୍ଗ୍ ସାନାଙ୍ଗ୍ ୟାଇଙ୍ଗ୍ ଏଣ୍ଡେ ହଗି ଭାକୁୱା କାଇଙ୍ଗ୍ ବାଇୟୋଗା, ଚିୟାଃଚି ଇଙ୍ଗ୍ ସାର୍ତି କେ କାଜିୟାଇଙ୍ଗ୍, ଏଣ୍ଡେ ହ ହୋକା କେନୋଃ ତାନିଙ୍ଗ୍, ନେକା ଆଲୋକା ହୋବାଅଃକା ଚି ଇଙ୍ଗ୍‍କେ ଜାହାଁଏ ଜେଲେକା ନେଲିଙ୍ଗ୍ ତାନାଏ ଚାହେ ଇଙ୍ଗ୍ଆଃ ତେ ଆୟୁମ୍ ତାନାଏ, ଏନାତେ ଇଙ୍ଗ୍‍କେ ଥିମ୍ବା ଆଲୋ ପାହୋମେକାଏ। ଇଙ୍ଗ୍‍କେ ଥିମ୍ବାଗି କାଜିକୋ ଉଦୁବ୍ କାନା ମେନ୍ତେ ଇଙ୍ଗ୍ ଆଲୋକାଇଙ୍ଗ୍ ମାରାଙ୍ଗ୍ ଆଟ୍‍କାରେକା ଏନାମେନ୍ତେ, ଇଙ୍ଗ୍ଆଃ ହୋଡ଼ମୋ ରେ ମିୟାଃ ଜାନୁମ୍ ହୋଟୋର୍ କାନା, ମାନେ ଶାଏତାନ୍ ରାଃ ମିୟାଃ ଦାସୀ ଦୋହୋ ନାଏ ଚି, ଇଙ୍ଗ୍‍କେ ଦୁକୁ ଏମାଇଙ୍ଗ୍ ୟାଏ ଏନାତେ ଇଙ୍ଗ୍ ମାରାଙ୍ଗେନ୍ ଲେକା କାଇଙ୍ଗ୍ ଆଟ୍‍କାରେୟା। ନେୟାରାଃ ବିଷାୟ୍ ରେ ଇଙ୍ଗ୍ ଆପିସା ପ୍ରାଭୁ କେ ଆର୍ଜି କିଜାଇଙ୍ଗ୍ ଚି ନେୟା ଆତୋମ୍ କୋଃକା। ମେନ୍ଦୋ ଇନିଃ ଇଙ୍ଗ୍‍କେ କାଜିକେଦାଏ, “ଇଙ୍ଗ୍ଆଃ ଆନୁଗ୍ରାହ୍ ଆମାଃ ଲାଗିନ୍ତେ ଥିମ୍ବାଗିୟାଃ, ଚିୟାଃଚି ଇଙ୍ଗ୍ଆଃ ପେଡ଼େଏ ନାରାଦୁରା ଇମ୍ତା ପୁରାପେୟାଏ।” ଏନାମେନ୍ତେ ଇଙ୍ଗ୍ ପୁରା ରାଶିକା ତେ ଆପାନାଃ ନାରାଦୁରା ଇମ୍ତା ଘାମାଣ୍ଡ୍ ରିକାୟାଇଙ୍ଗ୍, ଚି ମାସୀହ୍ ରାଃ ପେଡ଼େଏ ଇଙ୍ଗ୍ଆଃ ରେ ଉମ୍ବୁଲ୍ କାତେୟାଏ। ଏନାମେନ୍ତେଗି ଇଙ୍ଗ୍ ମାସୀହ୍ ଲାଗିନ୍ତେ ନାରାଦୁରା ଇମ୍ତା ରେ, ଆପ୍‍ମାନୋଃତାନ୍ ଇମ୍ତା ରେ, ରେଙ୍ଗେଜୋଃତାନ୍ ଇମ୍ତା ରେ, ସାତାଅଃତାନ୍ ଇମ୍ତା ରେ, ସାଙ୍କାଟ୍ ଇମ୍ତା ରେ ସୁକୁ ଗିୟାଇଙ୍ଗ୍। ଚିୟାଃଚି ଚିମ୍ତାଙ୍ଗ୍ ଇଙ୍ଗ୍ ନାରାଦୁରାଅଃ ତାନିଙ୍ଗ୍, ଇମ୍ତାଙ୍ଗ୍ ଇଙ୍ଗ୍ ପେଡ଼େଜୋଃ ତାନିଙ୍ଗ୍। ଇଙ୍ଗ୍ ଡୋଣ୍ଡୋ ଦୋ ବାଇଜାନାଇଙ୍ଗ୍, ମେନ୍ଦୋ ଆପେ ଗି ନେୟା ରିକା ଲାଗିନ୍ ଜାବ୍ରାଇ କେଦାପେ। ଆପେକେ ଦୋ ଇଙ୍ଗ୍ଆଃ ସାହାରାଅ ରିକା ଚାହି ତାଇକେନା, ଚିୟାଃଚି ଇଙ୍ଗ୍ ଜେତ୍ନାଃ ନାହାଲାଇଙ୍ଗ୍ ଏଣ୍ଡେ ରେହ ଏନ୍ ମାରାଙ୍ଗ୍ ଏତେ ମାରାଙ୍ଗ୍ କୁଲାକାନ୍ ଚେଲାକୋଏତେ ହଗି ହୁଡିଙ୍ଗ୍ ନାହାଲାଇଙ୍ଗ୍। କୁଲାକାନ୍ ଚେଲା ରାଃ ନେୟା ଚିହ୍ନା କୋ ମେନ୍ତେ ଆପେୟାଃ ଥାଲାରେ ସବେନ୍ ଲେକାତେ ସାହାତିଙ୍ଗ୍ ତାନ୍ ଲୋଃ ଚିହ୍ନାକୋ ହାର୍ ଆକ୍‍ଦାନ୍ଦା କାମିକୋ ହାର୍ ପେଡ଼େଏ ରାଃ କାମିକୋ ଉଦୁବ୍ ଜାନା। ଆପେ ଅକନ୍ କାଜି ରେ ଏଟାଃ କାଲିସିୟା ରେନ୍ କୋଏତେ ହୁଡିଙ୍ଗ୍ ତାଇକେନାପେ, ଖାଲି ନେୟା ଭାଇର୍ ଚି ଇଙ୍ଗ୍ ଆପେୟାଃ ଚେତାନ୍ ରେ ଇଙ୍ଗ୍ଆଃ ହାମ୍ବାଲ୍ କେ କାଇଙ୍ଗ୍ ଲାଦି କେଦା। ଇଙ୍ଗ୍ଆଃ ନେ ଦୋଷ୍ କେ ଛାମା ଇଙ୍ଗ୍‍ପେ। ନେଲେପେ ଇଙ୍ଗ୍ ଆପେୟାଃ ତାଃ ନେୟା ଆପିସା ହୋବାୱା ସେନ୍ ନାଙ୍ଗ୍ ସାପ୍ଡ଼ାଅ କାନିଙ୍ଗ୍, ହାର୍ ଇଙ୍ଗ୍ ଆପେୟାଃ ଚେତାନ୍ ରେ ଜାହାନ୍ ହାମ୍ବାଲ୍ କାଇଙ୍ଗ୍ ଲାଦିପେୟା, ଚିୟାଃଚି ଇଙ୍ଗ୍ ଆପେୟାଃ ସାମ୍ପାତି କାହା ମେନ୍ଦୋ ଆପେକେ ସାନାଙ୍ଗ୍ ତାନାଇଙ୍ଗ୍। ଚିୟାଃଚି ହୋନ୍‍ଗାଣା କୋକେ ଏଙ୍ଗା-ଆପୁ କୋ ନାଙ୍ଗ୍ ଟାକା-ପାଇସା କା ହୁଣ୍ଡି ଚାହି, ମେନ୍ଦୋ ଏଙ୍ଗା-ଆପୁ କୋକେ ହୋନ୍‍ଗାଣା କୋ ନାଙ୍ଗ୍ ହୁଣ୍ଡି ଚାହି। ଇଙ୍ଗ୍ ଆପେୟାଃ ଆତ୍ମା କୋ ଲାଗିନ୍ତେ ଥିମ୍ବାଗି ରାଶିକା ତେ ଇଙ୍ଗ୍ଆଃ ସବେନାଃ ଏମାପେୟାଇଙ୍ଗ୍, ମେନ୍ଦୋ ଇଙ୍ଗ୍ ଆପାନ୍ କେ ହଗି ଆପେ ନାଙ୍ଗ୍ ଏମାପେୟାଇଙ୍ଗ୍। ଚିନାଃ ଚିମିନ୍ ଥିମ୍ବା ଇଙ୍ଗ୍ ଆପେ କେ ଦୁଲାଡ଼୍ ପେତାନିଙ୍ଗ୍, ଇମିନ୍ ଗି ହୁଡିଙ୍ଗ୍ ଆପେ ଇଙ୍ଗ୍‍କେ ଦୁଲାଡ଼୍ ୟାପେ? ଏନ୍ ଲେକା ହୋବା ଧାଡ଼ିୟୋଃୱା ଚି ଇଙ୍ଗ୍ ଆପେୟାଃ ଚେତାନ୍ ରେ ହାମ୍ବାଲ୍ କାଇଙ୍ଗ୍ ଏମ୍ କେଦା, ମେନ୍ଦୋ ଚାଲାକି କେତେ ଆପେକେ ହିଡ଼୍ କେତେ ପାଶେ କେଃପେ ୟାଇଙ୍ଗ୍! ମାର୍, ଅକଏକେ ଇଙ୍ଗ୍ ଆପେୟାଃ ନାଡ଼େଏ କୁଲ୍ କେଦାଇଙ୍ଗ୍, ଚିନାଃ ଇନ୍‍କୁତାଃ ଏତେ ଜେତାୟାଃ ହୋରାତେ ଇଙ୍ଗ୍ ଲୋଗୋ କେତେ ଆପେ ତେ ଜାହାନାଃ ଇଦି କାଦିଙ୍ଗ୍? ଇଙ୍ଗ୍ ତିତୁସ୍ କେ ବୁଝାଅ କେତେ ଆୟାଃ ଲୋଃ ଏନ୍ ହାଗା କେ କୁଲ୍ କିଜିଙ୍ଗ୍, ଦୋ ଚିନାଃ ତିତୁସ୍ ଲୋଗୋ କେତେ ଜାହାନାଃ ଆପେ ତେ ଇଦିକେଦାଏ? ଚିନାଃ ଆଲେ ମିୟାଃଗି ଆତ୍ମା ରାଃ ସେସେନ୍ ରେ କାଲେ ସେନ୍ କେନା? ଚିନାଃ ମିୟାଃଗି ନିୟାମ୍ ରେ କାଲେ ସେନ୍ ଲେନା? ଆପେ ନାଆ ସାନ୍ତେ ପାହୋମ୍ କାତେୟାପେ ଚି ଆଲେ ଆପେୟାଃ ନାଡ଼େଏ ରେ ଦୋଷ୍ ତେ ବାଚାଅଃ ଲାଗିନ୍ କାଜି ତାନିଙ୍ଗ୍। ଆଲେ ଦୋ ପାର୍ମେଶ୍ଵାର୍ ରାଃ ନାଡ଼େଏ ରେ ମାସୀହ୍ ରେ କାଜିପେ ତାନାଲେ, ହାର୍ ହେ ଦୁଲାଡ଼୍ କୋ, ସବେନ୍ ବିଷାୟ୍ ଆପେୟାଃ ହାରାଇଦିୟୋଃ ନାଙ୍ଗ୍ କାଜିପେ ତାନାଲେ। ଚିୟାଃଚି ଇଙ୍ଗ୍ ବୋରୋ ତାନିଙ୍ଗ୍, ନେଲେକା ଆଲୋ ହୋବାଅଃକା ଚି ଇଙ୍ଗ୍ ହିଜୁଃକେତେ ଆପେକେ ଜେଲେକା ନେଲ୍ ସାନାଙ୍ଗ୍ ତାନିଙ୍ଗ୍, ଏନ୍‍ଲେକା ଆପେକେ କାଇଙ୍ଗ୍ ନେଲ୍ ପେୟା; ହାର୍ ଇଙ୍ଗ୍‍କେ ହ ଆପେ ଜେଲେକା କାପେ ସାନାଙ୍ଗ୍ ତାନା ଏନ୍ ଲେକା ଇଙ୍ଗ୍‍କେ ନାମିଙ୍ଗ୍‍ୟାପେ; ହାର୍ ଆପେ ରେ ଝାଗ୍ଡ଼ା, ହିସିଙ୍ଗା, ଖିସ୍, ଆପାନାଃ ସାନାଙ୍ଗ୍ କେଗି ପୁରାରିକା, ବାଦ୍‍ନାମ୍, ଏଟାଃକୋୱାଃ ବିରୋଧ୍ ରେ କାଜି, ମାରାଙ୍ଗେନ୍ ବାଇୟେନ୍ ହାର୍ ଗୋଣ୍ଡୋଗୋଲ୍ ହୋବାକେନୋଃୱା; ହାର୍ ନେଲେକା ଆଲୋକା ହୋବାଅଃକା ଚି ଇଙ୍ଗ୍ଆଃ ପାର୍ମେଶ୍ଵାର୍ ଇଙ୍ଗ୍ଆଃ ଆଡୋଃ ମିଶା ଆପେତାଃ ହିଜୁଃ ରେ ଇଙ୍ଗ୍‍କେ ହୁଡିଙ୍ଗିଙ୍ଗ୍ ୟାଏ ହାର୍ ଇଙ୍ଗ୍ ଥିମ୍ବାଗି ହୋଡ଼ୋକୋ ଲାଗିନ୍ ଦୁକୁଅଃ ୱାଇଙ୍ଗ୍, ଅକନ୍ କୋଚି ସିଦା ପାପ୍ ଲେଦାକୋ ହାର୍ ଶିତୃ କାମି ହାର୍ ବ୍ୟାଭିଚାର୍ ହାର୍ ଏତ୍କାନ୍ ହାୟା ତେ, ଅକନାଃ ଇନ୍‍କୁ ରିକାଲେଦାକୋ, ଏନ୍ ପାପ୍ ରିକା କାକୋ ବାଗେ କେଦା। ନେୟା ଆପିସା ହୋବାୱା ଇଙ୍ଗ୍ ଆପେତାଃ ହିଜୁଃ ତାନିଙ୍ଗ୍: ବାର୍ହୋଡ଼୍ ଚାହେ ଆପି ହୋଡ଼ ଗୋୱା କୋୱାଃ ନାଡ଼େଏ ସବେନ୍ କାଜିକୋ ଠାହ୍‍ରାଅଃୱା। ଜେଲେକା ଇଙ୍ଗ୍ ବାର୍ସା ହୋବାଅଃ ତାଇକେନା ଆପେ ତାଃ ତାଇଲେନାଇଙ୍ଗ୍, ଏନ୍ ଲେକାଗି ନାଆ ସାଙ୍ଗିନ୍ ତାଇନ୍ ରେହଗି ଏନ୍ ହୋଡ଼ୋକୋ ଏତେ ଅକନ୍ କୋଚି ସୁରୁ ପାପ୍ କେଦାକୋ, ହାର୍ ଏଟାଃ ସବେନ୍ ହୋଡ଼ୋ କୋକେ ସୀଦାଏତେ କାଜିକୋତାନିଙ୍ଗ୍ ଚି ଆଗାର୍ ଇଙ୍ଗ୍ ଆଡୋଃ ମିଶା ହିଜୁଗାଇଙ୍ଗ୍ ଦୋ କାଇଙ୍ଗ୍ ବାଗେପେୟା। ଚିୟାଃଚି ଆପେ ଦୋ ନେୟା ରାଃ ପ୍ରାମାଣ୍ କେ ନାମ୍ ସାନାଙ୍ଗ୍ ତାନାପେ ଚି ମାସୀହ୍ ଇଙ୍ଗ୍ ରେ କାଜି ତାନାଏ, ଅକନିଃ ଆପେ ଲାଗିନ୍ ନାରାଦୁରା ନାହାଲାଏ ମେନ୍ଦୋ ଆପେ ରେ ପେଡ଼େଜାନ୍ ତାନିଃ। ଇନିଃ ନାରାଦୁରା ରାଃ ହୋରାତେ କ୍ରୁଶ୍ ରେ ରାକାବ୍ ରିକା ଦୋ ଜାନାଏ, ଏଣ୍ତେ ରେହ ପାର୍ମେଶ୍ଵାର୍ ରାଃ ପେଡ଼େଏ ତେ ଜୀନିଦ୍ ମେନାଇଜା। ଆଲେ ହଗି ଇନିଃରେ ନାରାଦୁରା ତାନ୍‍ଲେ, ମେନ୍ଦୋ ପାର୍ମେଶ୍ଵାର୍ ରାଃ ପେଡ଼େଏ ତେ ଅକନାଃ ଆପେ ଲାଗିନ୍ ତାନାଃ, ଇନିଜାଃ ଲୋଃ ଜୀହିଦୋଃ ୱାଲେ। ଆପେ ଆପାନ୍ କେ ପାର୍ଖାଏପେ ଚି ବିଶ୍ୱାସ୍ ରେ ମେନାପେୟା ଚି କାହା। ଆପେ ଆପାନ୍ କେ ଆଟ୍‍କାର୍ ଉରୁମ୍ ଏପେ, ଚିନାଃ ଆପେ ଆପେୟାଃ ବିଷାୟ୍ ରେ ନେୟା କାପେ ସାରିୟା ଚି ୟୀଶୁ ମାସୀହ୍ ଆପେ ରେ ତାଇନ୍ ତାନାଏ? କାରେଦୋ ଆପେ ଆଟ୍‍କାର୍ ଉରୁମ୍ ରେ ଠାଉକା କାପେ ଅଡୋଙ୍ଗ୍ କାନାପେ। ମେନ୍ଦୋ ଇଙ୍ଗ୍ଆଃ ଆଶ୍ରା ତାନାଃ ଚି ଆପେ ସାରିକେୟାପେ ଚି ଆଲେ କାଠାଉକା କାଲେ ଅଡୋଙ୍ଗ୍ କାନା। ଆଲେ ଆବୁୱାଃ ପାର୍ମେଶ୍ଵାର୍ ତେ ନେୟା ବିନ୍ତି ତାନାଲେ ଚି ଆପେ ଜାହାନ୍ ଏତ୍କାନ୍ କାମି ଆଲୋପେ ରିକାଏ, ଏନାମେନ୍ତେ କାହା ଚି ଆଲେ ଆଟ୍‍କାର୍ ଉରୁମ୍ ତେ ପୋକ୍ତା ନେଲୋଃୱାଲେ, ମେନ୍ଦୋ ଏନାମେନ୍ତେ ଚି ଆପେ ବୁଗିନାଃ ରିକାଏପେ, ଚାହେ ଆଲେ କାଠାଉକା ଲେକା ଆଟ୍‍କାରୋଃ ତାନାଲେ। ଚିୟାଃଚି ଆଲେ ସାର୍ତି ରାଃ ବିରୋଧ୍ ରେ ଚିକ୍‍ନାଃ ହ ରିକା କାଲେ ଧାଡ଼ିୟା, ମେନ୍ଦୋ ସାର୍ତି ଲାଗିନ୍ତେ ଗି ରିକା ଧାଡ଼ିୟାଲେ। ଚିମ୍ତାଙ୍ଗ୍ ଆଲେ ନାରାଦୁରା ମେନାଲେୟା, ଆଡୋଃ ଆପେ ପେଡ଼େଜାନ୍ ମେନାପେୟା, ଦୋ ଆଲେ ରାଶିକାଅଃ ତାନାଲେ, ହାର୍ ନେୟା ହଗି ବିନ୍ତି ତାନାଲେ, ଚି ଆପେ ପୋକ୍ତା ହୋବା କେନୋଃପେ। ନେୟାମେନ୍ତେ ଇଙ୍ଗ୍ ଆପେୟାଃ ଦୋୟା କୁଣ୍ଡାମ୍ କାନ୍ ଲେକା ନେ କାଜିକୋ ଅଲ୍ ତାନିଙ୍ଗ୍, ଚି ସାମାନାଙ୍ଗ୍ ରେ ତାଇକେତେ ଇଙ୍ଗ୍‍କେ ଏନ୍ ଆଧିକାର୍ ରାଃ ଲେକାତେ ଅକନାଃ କେ ପ୍ରାଭୁ ବାଗ୍‍ଡ଼ାଅ ଲାଗିନ୍ତେ କାହା ମେନ୍ଦୋ ବାବାଇ ଲାଗିନ୍ତେ ଇଙ୍ଗ୍‍କେ ଏମ୍ କାଦିଙ୍ଗାଏ, ଏନାକେ କେଟେଃ ତେ ଜାହାନାଃ ରିକା କାପାଡ଼ାଅଃକା। ଏନାତେ ହେ ହାଗାକୋ, ରାଶିକା ତେ ତାଇନ୍‍ପେ; ପୋକ୍ତା ବାଇ-ଇଦିନ୍ ପେ, ସାହାସ୍ ସାବେପେ; ମିୟାଃ ଗି ମୋନ୍ ମାଣ୍ତାଏପେ; ମେଶାତେ ତାଇନ୍‍ପେ। ହାର୍ ଦୁଲାଡ଼୍ ଆଡୋଃ ଶାନ୍ତି ଏହେମ୍ ନିଃ ପାର୍ମେଶ୍ଵାର୍ ଆପେ ଲୋଃ ତାଇନୋଗାଏ। ମିହୋଡ଼୍ ଏଟାଃ ନିଃକେ ପାବିତାର୍ ଚୁମା ତେ ଜୋହାରିପେ। ସବେନ୍ ପାବିତାର୍ ହୋଡ଼ୋକୋ ଆପେକେ ଜୋହାର୍ ପେତାନାକୋ। ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ହାର୍ ପାର୍ମେଶ୍ଵାର୍ ରାଃ ଦୁଲାଡ଼୍ ହାର୍ ପାବିତାର୍ ଆତ୍ମା ରାଃ ମିଃତେ ତାଇନ୍ ଆପେ ସବେନ୍ କୋଲୋଃ ହୋବା ଇଦିୟୋଃକା। ପାଉଲୁସ୍ ମିୟାଃ କୁଲାକାନ୍ ଚେଲା ତାନିଃ, ଅକଏ ନା ହୋଡ଼ୋକୋ ପାଡ଼େତେ, ଆଡୋଃ ନା ଜେତାଏ ହୋଡ଼ କୋଏତେ, ମାଗାର୍ ୟୀଶୁ ମାସୀହ୍ ଆଡୋଃ ପାର୍ମେଶ୍ଵାର୍ ଆପୁ ପାଡ଼େତେ, ଅକନିଃ ଇନିଃକେ ଗୋଜାକାନ୍ କୋଏତେ ବିରିଃ କିଜାଏ ଆଡୋଃ ସବେନ୍ ହାଗାକୋ ପାଡ଼େତେ, ଜେକୋ ଇଙ୍ଗ୍ ଲୋଃ ମେନାକୋୱା, ଗାଲାତିୟା ରେନ୍ କାଲିସିୟା କୋୱାଃ ନୁତୁମ୍ ରେ ନେ ଚିଠି ତାନାଃ। ପାର୍ମେଶ୍ଵାର୍ ଆପୁ, ଆଡୋଃ ଆବୁୱାଃ ପ୍ରାଭୁ ୟୀଶୁ ମାସୀହ୍ ପାଡ଼େତେ ଆପେକେ ଆନୁଗ୍ରାହ୍ ଆଡୋଃ ଜୀଉସୁକୁ ନାମ୍ କାତୋଃଚା। ଇନିଃଗି ଆଏଃ ଆପାନ୍ କେ ଆବୁୱାଃ ପାପ୍‍କୋ ଲାଗିନ୍ ଏମ୍‍କେଦାଏ, ଏନାତେ ଆବୁୱାଃ ପାର୍ମେଶ୍ଵାର୍ ଆପୁ ରାଃ ସାନାଙ୍ଗ୍ ଲେକାତେ ଆବୁକେ ନେ ନାଆ ରାଃ ଖାରାପ୍ ଅତେଦିଶୁମ୍ ଏତେ ବାଞ୍ଚାଅ ବୁୱାଏ। ଇନିଜାଃ ଗି ସ୍ତୁତି ଆଡୋଃ ମାନାରାଙ୍ଗ୍ ଜାନାଓ-ଜାନାଓ ହୋବାକାତୋଃକା। ଆମୀନ୍। ଇଙ୍ଗ୍ ଆକ୍‍ଦାନ୍ଦାଅଃ ତାନିଙ୍ଗ୍ ଚି ଅକନିଃ ଆପେକେ ମାସୀହ୍ ରାଃ ଆନୁଗ୍ରାହ୍ ରେ କେଡ଼ାକେଃ ପେୟାଏ ଇନିଃତେ ଆପେ ନିମିନ୍ ସେକାଡ଼୍ ରୁଆଡ଼୍ କେତେ ଆଡୋଃ ଏଟାଃ ଲେକାନାଃ ସୁସାମାଚାର୍ ପାଡ଼୍ ସେନୋଃ ତାନାପେ। ମେନ୍ଦୋ ଏନା ଏଟାଃ ସୁସାମାଚାର୍ ଗି ନାହାଲା: ମାଗାର୍ କାଜି ନେୟା ତାନାଃ, ଚି ଚିମିନାଙ୍ଗ୍ କୋ ନେକା ମେନାକୋୱା, ଅକନ୍‍କୋ ଆପେକେ ବେଦା କେତେ ଆଃଦ୍ ପେତାନାକୋ, ଆଡୋଃ ମାସୀହ୍ ରାଃ ସୁସାମାଚାର୍ କେ ବାଗ୍‍ଡ଼ାଅ ସାନାଙ୍ଗ୍ ତାନାକୋ। ମେନ୍ଦୋ ଆଗାର୍ ଆଲେ, ଚାହେ ସିର୍ମାଦିଶୁମ୍ ଏତେ ଜାହାନ୍ ସିର୍ମାଦାସୀ ହ ଏନ୍ ସୁସାମାଚାର୍ କେ ବାଗିକେତେ ଅକନାଃ ଆପେକେ ଉଦୁବ୍ କେଃପେୟାଲେ, ଜାହାନ୍ ଏଟାଃଗି ସୁସାମାଚାର୍ ଆପେକେ ଉଦୁବ୍ ପେ ତାନ୍ ରେଦୋ, ଇନିଃ ଯୁଗ୍-ଯୁଗ୍ ନାଙ୍ଗ୍ ସାର୍ପାଅଃ କାଏ। ଜେଲେକା ଆଲେ ସିଦା ରେ ଆପେକେ କାଜି ଛାବା କାଦାଲେ, ଏନ୍‍ଲେକାଗି ଇଙ୍ଗ୍ ନାଆ ଆଡୋଃଗି କାଜିତାନିଙ୍ଗ୍ ଚି, ଏନ୍ ସୁସାମାଚାର୍ କେ ବାଗି କେତେ ଅକନାଃ କେ ଆପେ ଗ୍ରାହାନ୍ କାଦାପେ, ଆଗାର୍ ଜେତାଏ ଏଟାଃଗି ସୁସାମାଚାର୍ ଆପେକେ ଉଦୁବ୍ ପେତାନାଏ, ଏଣ୍ଡେ ଇନିଃ ଯୁଗ୍-ଯୁଗ୍ ନାଙ୍ଗ୍ ସାର୍ପାଅଃକାଏ। ନାଆ ଇଙ୍ଗ୍ ଚିନାଃ ହୋଡ଼ୋକୋକେ ମାନାତିଙ୍ଗ୍ ତାନିଙ୍ଗ୍ ଚି ପାର୍ମେଶ୍ଵାର୍ କେ? ଚିନାଃ ଇଙ୍ଗ୍ ହୋଡ଼ୋକୋକେ ସୁକୁ ରିକା ସାନାଙ୍ଗ୍ କୋ ତାନିଙ୍ଗ୍? ଆଗାର୍ ଇଙ୍ଗ୍ ନାଆ ସାନ୍ ହୋଡ଼ୋକୋକେ ଗି ସୁକୁ ରିକାକୋତେୟାଃଇଙ୍ଗ୍, ଏଣ୍ଡେ ମାସୀହ୍ ରାଃ ଦାସୀ କାଇଙ୍ଗ୍ ହୋବାଅଃତେ। ହେ ହାଗାକୋ ହାର୍ ମିଶିକୋ, ଇଙ୍ଗ୍ ଆପେକେ ଉଦୁବ୍ ପେତାନିଙ୍ଗ୍ ଚି ଅକନ୍ ସୁସାମାଚାର୍ ଇଙ୍ଗ୍ ପାର୍ଚାର୍ କାଦିଙ୍ଗ୍, ଏନା ହୋଡ଼ ତେ ବାଇୟାକାନ୍ ନାହାଲା। ଚିୟାଃଚି ଏନା ଇଙ୍ଗ୍‍କେ ହୋଡ଼ୋକୋ ପାଡ଼େତେ କାସେଟେରା କାନା, ଆଡୋଃ ନା ଇଙ୍ଗ୍‍କେ ଶିଖାଅ କାନା, ମେନ୍ଦୋ ୟୀଶୁ ମାସୀହ୍ ରାଃ ଉନୁଦୁବ୍ ତେ ନାମାକାନା। ୟାହୁଦୀ ଧାରାମ୍ ରାଃ ନିୟାମ୍ ରେ ଜେଲେକା ଇଙ୍ଗ୍ ସିଦା ସେସେନ୍ ତାଇକେନାଇଙ୍ଗ୍, ଏନାରାଃ ବିଷାୟ୍ ରେ ଆପେ ଆୟୁମ୍ ଛାବା କାଦାପେ, ଚି ଇଙ୍ଗ୍ ପାର୍ମେଶ୍ଵାର୍ ରାଃ କାଲିସିୟା ରେନ୍ କୋକେ ଥିମ୍ବାଗି ସାସାତି ତାଇକେନାଇଙ୍ଗ୍ ଆଡୋଃ ନାଷ୍ଟ୍ କୋତାଇକେନାଇଙ୍ଗ୍। ଇଙ୍ଗ୍ଆଃ ଥିମ୍ବାଗି ଜାତି ପେଡ଼ାକୋଲୋ ଅକନ୍ କୋ ଇଙ୍ଗ୍ଆଃ ଇପ୍ରାଙ୍ଗ୍ ସାଲ୍ ରେନ୍ କୋ ତାଇକେନାକୋ, ଇନ୍‍କୁଏତେ ୟାହୁଦୀ ଧାରାମ୍ ରାଃ ନିୟାମ୍ ଲେକାତେ ଥିମ୍ବାଗି ହାରା ଇଦିଅଃ ତାଇକେନାଇଙ୍ଗ୍ ହାର୍ ଇଙ୍ଗ୍ଆଃ ଆପୁ-ତାତା କୋୱାଃ ରୀତି-ନିୟାମ୍ କେ ମାନାତିଙ୍ଗ୍ ଲାଗିନ୍ ଥିମ୍ବାଗି ଜୋଶିଲା ତାଇକେନାଇଙ୍ଗ୍। ମେନ୍ଦୋ ପାର୍ମେଶ୍ଵାର୍ ପାଡ଼େତେ, ଅକଏ ଇଙ୍ଗ୍‍କେ ଏଙ୍ଗା ଗାଃ ଲାହେଃ ଏତେ ସାଲାକାଦିଙ୍ଗାଏ ଆଡୋଃ ଆଜାଃ ଆନୁଗ୍ରାହ୍ ଏତେ କେଡ଼ା କେଦିଙ୍ଗାଏ, ଚିମ୍ତା ସାନାଙ୍ଗ୍ ହୋବାଜାନା ଚି ଇଙ୍ଗ୍ଆଃ ରେ ଆଜାଃ ହୋନ୍‍କଡ଼ା କେ ଉଦୁବିଙ୍ଗାଏ ଚି ଇଙ୍ଗ୍ ଏଟାଃଜାତି କୋରେ ଇନିଜାଃ ସୁସାମାଚାର୍ ଉଦୁବେୟାଇଙ୍ଗ୍; ଇମ୍ତା ଇଙ୍ଗ୍ ଜେତାନ୍ ହୋଡ଼ ଲୋଃ ସାଲାହ୍ କାଇଙ୍ଗ୍ ଇଦିକେଦା। ଆଡୋଃ ନାଦୋ ୟୀରୁଶାଲେମ୍ ତେ ଇନ୍‍କୁୱାଃ ତାଃ ସେନ୍ ଜାନାଇଙ୍ଗ୍ ଅକନ୍ କୋ ଇଙ୍ଗ୍ ତେ ସିଦା କୁଲାକାନ୍ ଚେଲା ହୋବାଲେନାକୋ, ମେନ୍ଦୋ ସେକାଡ଼୍ ଗି ଆରାବ୍ ଦିଶୁମ୍ ତେ ସେନୋଃ ଜାନିଙ୍ଗ୍ ହାର୍ ଆଡୋଃଗି ହେନ୍ତାଃ ଏତେ ଦାମେଶ୍କସ୍ ସାହାର୍ ତେ ରୁଆଡ଼୍ ଜାନିଙ୍ଗ୍। ଏନ୍ତେ ଆପି ଶିର୍ମା ରାଃ ତାୟୋମ୍ତେ ଇଙ୍ଗ୍ କୈଫା ଲୋଃ ଭେଁଟ୍ ଲାଗିନ୍ତେ ୟୀରୁଶାଲେମ୍ ତେ ସେନ୍ ଜାନିଙ୍ଗ୍ ହାର୍ ଇନିଜାଃ ତାଃ ପାନ୍ଦ୍ରା ଦିନ୍ ସାନ୍ ତାଇଜାନାଇଙ୍ଗ୍। ମେନ୍ଦୋ ପ୍ରାଭୁ ଆଃ ହାଗା ୟାକୁବ୍ କେ ବାଗିକେତେ ଏଟାଃ କୁଲାକାନ୍ ଚେଲା କୋଏତେ ଜେତାଏ ଲୋଃ କାଇଙ୍ଗ୍ ନାପାମ୍ ଜାନା। ଅକନ୍ କାଜି ଇଙ୍ଗ୍ ଆପେକେ ଅଲ୍ ତାନିଙ୍ଗ୍, ନେଲେପେ, ଏନା ପାର୍ମେଶ୍ଵାର୍ କେ ସାମାନାଙ୍ଗ୍ ସାରିକେତେ କାଜିତାନିଙ୍ଗ୍, ଇଙ୍ଗ୍ କାଇଙ୍ଗ୍ ଲୋଗୋପେ ତାନା। ନେୟା ରାଃ ତାୟୋମ୍ତେ ଇଙ୍ଗ୍ ସିରିୟା ଆଡୋଃ କିଲିକିୟା ରାଃ ଦିଶୁମ୍ ରେ ହିଜୁଃ ନାଇଙ୍ଗ୍। ମେନ୍ଦୋ ୟାହୁଦୀୟା ଜିଲ୍ଲା ରାଃ କାଲିସିୟାକୋ ଅକନାଃ କୋ ମାସୀହ୍ ରେ ତାଇକେନା, ମେଏଃମୁହାଡ଼୍ ଦୋ ଚିଉଲାଅ କାକୋ ନେଲ୍ ଲେଦା। ମେନ୍ଦୋ ନେୟା ଗି ଆୟୁମ୍ ତାଇକେନାକୋ ଚି, “ଅକଏ ଆବୁକେ ସିଦା ସାତାଅ ବୁ ତାଇକେନାଏ, ଇନିଃ ନାଆ ଏନ୍ ବିଶ୍ଵାସ୍ ରାଃ ସୁସାମାଚାର୍ ଉଦୁବ୍ ତାନାଏ, ଅକନାଃକେ ସିଦା ନାଷ୍ଟ୍ ତାଇକେନାଏ।” ଆଡୋଃ ଇନ୍‍କୁ ଇଙ୍ଗ୍ଆଃ ବିଷାୟ୍ ରେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକାତାଇକେନାକୋ। ଚାଉଦା ସାଲ୍ ରାଃ ତାୟୋମ୍ତେ ଇଙ୍ଗ୍ ବାର୍ନାବାସ୍ ଲୋଃ ଆଡୋଃଗି ମିଶା ୟୀରୁଶାଲେମ୍ ସାହାର୍ ତେ ସେନ୍ କେନାଇଙ୍ଗ୍, ହାର୍ ତିତୁସ୍ କେ ହଗି ଗାତି ଇଦି କିଜାଇଙ୍ଗ୍। ଇଙ୍ଗ୍ଆଃ ସେସେନ୍ ପାର୍ମେଶ୍ଵାର୍ ରାଃ ଉଦୁବ୍ ଲେକାତେ ହୋବାଜାନା: ଆଡୋଃ ଅକନ୍ ସୁସାମାଚାର୍ ଇଙ୍ଗ୍ ଏଟାଃଜାତି କୋତାଃ ପାର୍ଚାର୍ ତାନିଙ୍ଗ୍, ଏନାକୋକେ ଇଙ୍ଗ୍ ଇନ୍‍କୁକେ ଉଦୁବ୍ କେଃକୋୱାଇଙ୍ଗ୍, ମେନ୍ଦୋ ଏସ୍କାର୍ ତାଇନ୍ ଲେନ୍ ଇମ୍ତାରେ ଇଙ୍ଗ୍ ଇନ୍‍କୁକେ ଅକନ୍‍କୋ ମାପ୍‍ରାଙ୍ଗ୍ କୋ କାଜିୟୋଃ ତାଇକେନାକୋ, ଏନାତେ ନେକା ଆଲୋକା ହୋବାଅଃକା ଚି ଇଙ୍ଗ୍ଆଃ ନେ ସାମାୟ୍ ରାଃ ୟାଦୋ ସିଦା ସାମାୟ୍ ରାଃ ସେୱା କାମି ସାମା ହୋବାକୋୱା। ମେନ୍ଦୋ ତିତୁସ୍ କେହଗି ଅକନିଃ ଇଙ୍ଗ୍ଆଃ ଲୋଃ ତାଇକେନାଏ ହାର୍ ଇନିଃ ୟୁନାନୀ ହୋଡ଼ ତାନିଃ, ଇନିଃକେ ଖାତ୍ନାଅଃ ଲାଗିନ୍ ଜାବ୍ରାଇ କାରିକାକାନା। ନେୟା ଏନ୍ ହିହିଡ଼୍ ହାଗାକୋ ଲାଗିନ୍ତେ ହୋବାଜାନା, ଅକନ୍‍କୋ ଲୁକୁ ତେ ହିଜୁଃ ବୋଲୋ ଲେନାକୋ, ଚି ଏନ୍ ରାଡ଼ାକାନ୍ କେ ଅକନାଃ ମାସୀହ୍ ୟୀଶୁ ରେ ଆବୁକେ ନାମ୍‍କାନା, ଦାଣା ବାଇକେତେ, ଆବୁକେ ଦାସୀ ବାଇବୁୱାକୋ। ଇନ୍‍କୁୱାଃ ଆଧିନ୍ ରେ ହୋବାଅଃ ଲାଗିନ୍ତେ ଆଲେ ଘାଡ଼ିକାଃ ହ କାଲେ ମାନାତିଙ୍ଗ୍ ଜାନା, ଏନାମେନ୍ତେ ଚି ସୁସାମାଚାର୍ ରାଃ ସାର୍ତି ଆପେ ରେ ବାଇତାଇନୋଃକା। ଆଡୋଃ ଅକନ୍ ହୋଡ଼ୋକୋ ମାପ୍‍ରାଙ୍ଗ୍ ହୋଡ଼ ଲେକା ଆଟ୍‍କାର୍‍ଅଃ ତାଇକେନାକୋ ଇନ୍‍କୁ ଚାହେ ଜେତାଏଗି ତାଇନ୍ କେନାକୋ, ଇଙ୍ଗ୍‍କେ ଜାହାନାଃ ଫାରାକ୍ ବାନୋଗା; ପାର୍ମେଶ୍ଵାର୍ ଜେତାୟାଃ ମେଏଃମୁହାଡ଼୍ କାଏ ନେଲେୟାଏ, ଅକନ୍‍କୋ ମାପ୍‍ରାଙ୍ଗ୍ ହୋଡ଼ ଲେକା ଆଟ୍‍କାର୍‍ଅଃ ତାଇକେନାକୋ, ଇନ୍‍କୁଏତେ ଇଙ୍ଗ୍‍କେ ଜେତ୍ନାଃ ହଗି କାନାମ୍‍ଜାନା। ମେନ୍ଦୋ ନେୟା ରାଃ ଉଲ୍‍ଟା ଚିମ୍ତାଙ୍ଗ୍ ଇନ୍‍କୁ ନେଲ୍ କେଦାକୋ, ଚି ଜେଲେକା ଖାତ୍ନାକାନ୍ ହୋଡ଼ୋକୋ ଲାଗିନ୍ ସୁସାମାଚାର୍ ରାଃ କାମି ପାତ୍ରାସ୍ କେ ଜିମାକାନା, ଏନ୍‍ଲେକାଗି କାଖାତ୍ନାକାନ୍ କୋଲାଗିନ୍ ଇଙ୍ଗ୍‍କେ ସୁସାମାଚାର୍ ପାର୍ଚାର୍ ନାଙ୍ଗ୍ ଜିମାକାନା। ଚିୟାଃଚି ଅକନିଃ ପାତ୍ରାସ୍ ତେ ଖାତ୍ନା ରିକାକାନ୍ କୋରେ କୁଲାକାନ୍ ଚେଲା ରାଃ କାମି କେ ମାରାଙ୍ଗ୍ ପେଡ଼େଏ ତେ ରିକା ନାଙ୍ଗ୍ ଦେଙ୍ଗା କେଦାଏ, ଇନିଃଗି ଇଙ୍ଗ୍‍କେ ହଗି ଏଟାଃଜାତି କୋରେ ପେଡ଼େଏ ତେ ଫେରେଃକାନ୍ କାମି କାମିନାଙ୍ଗ୍ ଦେଙ୍ଗା କେଦିଙ୍ଗାଏ। ଆଡୋଃ ଚିମ୍ତାଙ୍ଗ୍ ଇନ୍‍କୁ ଏନ୍ ଆନୁଗ୍ରାହ୍ କେ ଅକନାଃ ଇଙ୍ଗ୍‍କେ ନାମ୍ ଲେନା ସାରିକେଦାକୋ, ଦୋ ୟାକୁବ୍, ଆଡୋଃ କୈଫା ଆଡୋଃ ଯୋହାନ୍ ଅକନ୍‍କୋ କାଲିସିୟା ରେନ୍ ଖୁଣ୍ଟୁ ଲେକା ସାରିୟୋଃ ତାଇକେନାକୋ, ଇଙ୍ଗ୍‍କେ ହାର୍ ବାର୍ନାବାସ୍ କେ ତିଈ ଭେଁଟ୍ କେତେ ରାଜି ଜାନାକୋ ଚି, ଆଲେ ଏଟାଃଜାତି କୋତାଃ ସେନାଲେ ହାର୍ ଇନ୍‍କୁ ଖାତ୍ନାକାନ୍ କୋତାଃ ସେନାକୋ; ଖାଲି ନିମିନ୍ କାଜିକେଦାକୋ ଚି ଆବୁ ଗାରିବ୍ ହୋଡ଼ୋକୋକେ ଦେଙ୍ଗା ନାଙ୍ଗ୍ କାବୁ ରିଡ଼ିଙ୍ଗ୍ଏକା, ହାର୍ ନେ କାମିକେଗି କାମି ଲାଗିନ୍ତେ ଇଙ୍ଗ୍ ହଗି ସାନାଙ୍ଗ୍ ତାଇକେନାଇଙ୍ଗ୍। ମେନ୍ଦୋ ଚିମ୍ତା କୈଫା ପାତ୍ରାସ୍ ଆନ୍ତାକିୟା ସାହାର୍ ତେ ହିଜୁଃଲେନାଏ, ଇମ୍ତାଙ୍ଗ୍ ଇଙ୍ଗ୍ ଇନିଜାଃ ମୋଚା ରେଗି କାଜିକିଜାଇଙ୍ଗ୍, ଚିୟାଃଚି ଇନିଃ ଦୋଷୀ ବାଇ ଲେନାଏ। ଚିୟାଃଚି ୟାକୁବ୍ ପାଡ଼େତେ ଚିମିନାଙ୍ଗ୍ ଖାତ୍ନା କେ ମାନାତିଙ୍ଗ୍ ତାନ୍ ୟାହୁଦୀ ବିଶ୍ଵାସୀ ହୋଡ଼ୋକୋ ହିଜୁଃ ରାଃ ଆୟୁର୍ ସିଦା ରେ ଇନିଃ ଏଟାଃଜାତି ବିଶ୍ଵାସୀ କୋଲୋଃ ଜୋମ୍ ନୁ ତାଇନାଏ, ମେନ୍ଦୋ ଚିମ୍ତା ଇନ୍‍କୁ ହିଜୁଃ ଜାନାକୋ, ଇମ୍ତା ଇନ୍‍କୁୱାଃ ବୋରୋ ତେ ଇନିଃ ଏଟାଃଜାତି ବିଶ୍ଵାସୀ କୋତେ ଗେନା ଜାନାଏ ଆଡୋଃ ଏସ୍କାର୍ ତାଇନ୍ ଜାନାଏ। ଏନ୍ତେ ଇନ୍‍କୁ ଲୋଃ ଏଟାଃ ୟାହୁଦୀ ବିଶ୍ଵାସୀ କୋ ହଗି ଅକନ୍‍କୋ ଆନ୍ତାକିୟା ସାହାର୍ ରେ ତାଇନ୍ ତାଇକେନାକୋ ଇନ୍‍କୁ ହଗି ଏଟାଃଜାତି ବିଶ୍ଵାସୀ କୋଲୋଃ ଗେନା ଜାନାକୋ। ନେତାଃ ସାନ୍ ଚି ବାର୍ନାବାସ୍ ହଗି ଏନ୍ ବେଦା ହୋଡ଼ୋକୋ ଲେକା ବାଇଜାନାଏ। ମେନ୍ଦୋ ଚିମ୍ତାଙ୍ଗ୍ ଇଙ୍ଗ୍ ନେଲ୍ କେଦାଇଙ୍ଗ୍ ଚି ଇନ୍‍କୁ ସୁସାମାଚାର୍ ରାଃ ସାର୍ତି ଶିଖାଅ କାଜି ଲେକାତେ କାକୋ ସେସେନ୍ ତାନା, ଦୋ ଇଙ୍ଗ୍ ସବେନ୍ କୋୱାଃ ସାମାନାଙ୍ଗ୍ ରେ କୈଫା ପାତ୍ରାସ୍ କେ କାଜିକିଜାଇଙ୍ଗ୍, “ଜାବ୍ ଚି ଆମ୍ ୟାହୁଦୀ ହୋବାକେତେ ଏଟାଃଜାତି କୋ ଲେକା ସେସେନ୍ ତାନାମ୍, ହାର୍ ୟାହୁଦୀ କୋ ଲେକା କାମ୍ ସେସେନ୍ ତାନା ଏଣ୍ଡେ ଆମ୍ ଏଟାଃଜାତି କୋକେ ୟାହୁଦୀ କୋ ଲେକା ସେସେନ୍ ଚିନାଃ ମେନ୍ତେ କାଜିୟାକୋ ତାନାମ୍?” ଆବୁ ଦୋ ଜାନାମ୍ ତେ ୟାହୁଦୀ ତାନ୍‍ବୁ, ହାର୍ ପାପୀ କାଜିୟୋଃତାନ୍ ଏଟାଃଜାତି କୋଏତେ ନାହାଲାବୁ। ଏଣ୍ଡେୟଗି ନେୟା ସାରିକେତେ ଚି ହୋଡ଼ ମୁଶା ନାବୀ ରାଃ ଆଇନ୍ ରାଃ କାମି କୋଏତେ କାହା, ମେନ୍ଦୋ ଏସ୍କାର୍ ୟୀଶୁ ମାସୀହ୍ ତାଃ ରେ ବିଶ୍ଵାସ୍ କେତେ ଧାର୍ମୀ ବାଇଏନ୍ ତାନାଏ। ଆବୁ ହଦୋ ମାସୀହ୍ ୟୀଶୁ ତାଃ ରେ ବିଶ୍ଵାସ୍ କେଦାବୁ, ଚି ଆବୁ ମୁଶା ନାବୀ ରାଃ ଆଇନ୍ ରାଃ କାମି କୋଏତେ କାହା, ମେନ୍ଦୋ ମାସୀହ୍ ତାଃ ବିଶ୍ଵାସ୍ ରିକାତେ ଧାର୍ମୀ ବାଇୟୋଃୱାବୁ, ଏନାମେନ୍ତେ ଚି ମୁଶା ନାବୀ ରାଃ ଆଇନ୍ ରାଃ କାମି କୋଏତେ ଜେତାଏ ଧାର୍ମୀ କାଏ ବାଇୟୋଃୱା। ଆବୁ ଅକନ୍‍କୋ ମାସୀହ୍ ରେ ଧାର୍ମୀ ବାଇୟେନ୍ ସାନାଙ୍ଗ୍ ତାନାବୁ, ଆଗାର୍ ଆବୁଗି ପାପୀ ଅଡୋଙ୍ଗାବୁ ଏଣ୍ଡେ ଚିନାଃ ମାସୀହ୍ ପାପ୍ ରିକାଏପେ ମେନ୍ତେ କାଜିତାନାଏ? ଚିଉଲା ହ କାହା! ଚିୟାଃଚି ଇଙ୍ଗ୍ ଅକନାଃ କୋ ବାଗି ଛାବା କାଦିଙ୍ଗ୍ ଏନାକୋକେ ଆଡୋଃମିଶା କାମି ତାନିଙ୍ଗ୍ ଏଣ୍ଡେ ଇଙ୍ଗ୍ ଆଇନ୍ କେ କାଇଙ୍ଗ୍ ମାନାତିଙ୍ଗ୍ କେତେ ନିୟାମ୍ ଠୋଏଃ ହୋଡ଼ ବାଇୟୋଃ ତାନିଙ୍ଗ୍। ଇଙ୍ଗ୍ ଦୋ ମୁଶା ନାବୀ ରାଃ ଆଇନ୍ ରାଃ ହୋରାତେ ମୁଶା ନାବୀ ରାଃ ଆଇନ୍ ଲାଗିନ୍ତେ ଗୋଏଃ ଜାନିଙ୍ଗ୍, ଏନାତେ ପାର୍ମେଶ୍ଵାର୍ ଲାଗିନ୍ତେ ଜୀହିଦୋଗାଇଙ୍ଗ୍। ଇଙ୍ଗ୍ ମାସୀହ୍ ଲୋଃ କ୍ରୁଶ୍ ରେ ରାକାବାକାନିଙ୍ଗ୍, ନାଆ ଇଙ୍ଗ୍ ଜୀହିଃ ବାଙ୍ଗୁଇଙ୍ଗ୍‍ୟା, ମେନ୍ଦୋ ମାସୀହ୍ ଇଙ୍ଗ୍ଆଃ ରେ ଜୀହିଃ ମେନାଇଜା; ହାର୍ ନାଆ ଇଙ୍ଗ୍ ହୋଡ଼ମୋ ରେ ଯେ ଜୀହିଦୋଃ ତାନିଙ୍ଗ୍ ଏନା ଏନ୍ ବିଶ୍ଵାସ୍ ତେ ଭାଇର୍ ଜୀହିଦୋଃ ତାନିଙ୍ଗ୍ ଅକନାଃ ପାର୍ମେଶ୍ଵାର୍ ରାଃ ହୋନ୍ ଚେତାନ୍ ରେ ମେନାଃ, ଅକନିଃ ଇଙ୍ଗ୍‍କେ ଦୁଲାଡ଼୍ କେଦିଙ୍ଗ୍ଆଏ ହାର୍ ଇଙ୍ଗ୍ଆଃ ଲାଗିନ୍ତେ ଆଏଃ ଆପାନ୍ କେ ଏମ୍ ତାଦାଏ। ଇଙ୍ଗ୍ ପାର୍ମେଶ୍ଵାର୍ ରାଃ ଆନୁଗ୍ରାହ୍ କେ ସାମାଗୀ ମେନ୍ତେ କାଇଙ୍ଗ୍ କାଜିତାନା, ଚିୟାଃଚି ଆଗାର୍ ମୁଶା ନାବୀ ରାଃ ଆଇନ୍ କେ ମାନାତିଙ୍ଗ୍ ଲେରେ ଧାରାମ୍ ନାମୋଃ ତେୟାଃ, ଏଣ୍ଡେ ଦୋ ମାସୀହ୍ ରାଃ ଗୋଏଃ ସାମାଗୀ ହୋବାଅଃତେୟାଃ। ହେ ନିର୍ବୁଦ୍ଧି ଗାଲାତିୟାରେନ୍ କୋ, ଅକଏ ଆପେକେ ମାନ୍ତାର୍ କାଃପେୟାଏ? ଆପେୟାଃ ନାଙ୍ଗ୍ ଦୋ ମେଏଃ ନାଡ଼େଏ ରେ ୟୀଶୁ ମାସୀହ୍ କ୍ରୁଶ୍ ରେ ରାକାବ୍ ଲେନାଏ ଲେକା ହୋବାକାନା। ଇଙ୍ଗ୍ ଆପେ ତେ ନିମିନାଙ୍ଗ୍ ଭାଇର୍ ସାରିନାଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି, ଆପେ ପାବିତାର୍ ଆତ୍ମା କେ ଚିନାଃ ମୁଶା ନାବୀ ରାଃ ଆଇନ୍ ରାଃ କାମିକୋ ଲେକାତେ ଚି, ବିଶ୍ଵାସ୍ ତେ ଅକନାଃ ଆପେପେ ଆୟୁମ୍ ରାଃ ହୋରାତେ ନାମ୍ କେଦାପେ? ଚିନାଃ ଆପେ ନେକାନ୍ ନିର୍ବୁଦ୍ଧିକୋ ତାନ୍‍ପେ, ଚିନାଃ ପାବିତାର୍ ଆତ୍ମା ଲୋଃ ନାୱା ଜୀଦାନ୍ କେ ଏଟେଃ କେତେ ନାଆ ଆପେୟାଃ ହୋଡ଼ମୋ ରାଃ ସାନାଙ୍ଗ୍ ଲେକାତେ ଟୁଣ୍ଡୁ ୟାପେ? ଚିନାଃ ଆପେ ନିମିନାଙ୍ଗ୍ ଦୁକୁ କେ ସାମାଗୀ ସାହାତିଙ୍ଗ୍ କେଦାପେ? ମେନ୍ଦୋ ସାର୍ତି ଗି ଏନା ସାମାଗୀ କାତାଇକେନା। ଅକଏ ଆପେକେ ପାବିତାର୍ ଆତ୍ମା ଦାନ୍ ଏମ୍ ପେତାନାଏ ହାର୍ ଆପେରେ ପେଡ଼େଏ ରାଃ କାମି ରିକା ତାନାଏ, ଏନା ଚିନାଃ ମୁଶା ନାବୀ ରାଃ ଆଇନ୍ କାମି ତେ ଚି ସୁସାମାଚାର୍ ଚେତାନ୍ ରେ ବିଶ୍ଵାସ୍ ତେ ନେକା ରିକା ତାନାଏ? “ଆବ୍ରାହାମ୍ ଦୋ ପାର୍ମେଶ୍ଵାର୍ ଚେତାନ୍ ରେ ବିଶ୍ଵାସ୍ କେଦାଏ ହାର୍ ନେୟା ଇନିଃ ଲାଗିନ୍ ଧାରାମ୍ ଲେକା ଜାନା।” ଏନାତେ ନେୟା ସାରିକେପେ ଚି ଜେତାଏ ବିଶ୍ଵାସ୍ ତାନ୍ ନିଃ ତାନିଃ ଇନିଃଗି ଆବ୍ରାହାମ୍ ରାଃ ସାନ୍ତାନ୍ ତାନିଃ। ହାର୍ ପାର୍ମେଶ୍ଵାର୍ ପାବିତାର୍ ପୁଥି ରେ ଦୋ ସିଦା ଏତେଗି ନେୟା ସାରିକେତେ କାଜିକେଦାଏ ଚି, ପାର୍ମେଶ୍ଵାର୍ ଏଟାଃଜାତି କୋକେ ବିଶ୍ଵାସ୍ ତେ ଧାର୍ମୀ ଠାହ୍‍ରାଓ କୋୱାଏ, ନେୟା ସିଦା ଏତେଗି ଆବ୍ରାହାମ୍ କେ ନେ ସୁସାମାଚାର୍ ଉଦୁବ୍ କିଜାଏ ଚି, “ଆମାଃ ରେ ସବେନ୍ ଜାତି ରେନ୍ କୋ ଆଶିଷ୍ ନାମେୟାକୋ।” ଏନାମେନ୍ତେ ଅକନ୍ କୋ ବିଶ୍ଵାସ୍ ତାନ୍‍କୋ-ତାନ୍‍କୋ, ଏନ୍ ବିଶ୍ଵାସୀକୋ ଆବ୍ରାହାମ୍ ଲୋଃ ଆଶିଷ୍ ନାମ୍ ତାନାକୋ। ଏନାମେନ୍ତେ ଅକନ୍ ହୋଡ଼ୋକୋ ମୁଶା ନାବୀ ରାଃ ଆଇନ୍ ରାଃ କାମିକୋ ଚେତାନ୍ ରେ ଭାରୋସା ମାଣ୍ଡାଅ ତାନାକୋ, ଇନ୍‍କୁ ସବେନ୍ ସାର୍ରପାଅ ରାଃ ଲାଥାର୍ ରେ ମେନାକୋୱା, ଚିୟାଃଚି ପାବିତାର୍ ପୁଥି ରେ ଅଲାକାନା, “ଜେତାଏ ଗି ମୁଶା ନାବୀ ରାଃ ଆଇନ୍ ରାଃ ପୁଥି ରେ ଅଲାକାନା ସବେନ୍ ମାନାତିଙ୍ଗ୍ କାଜି କୋକେ କାଏ ରିକା ତାନାଏ, ଇନିଃ ସାର୍ପଅଃୱାଏ।” ମେନ୍ଦୋ ନେ କାଜି ନେଲୋଃ ତାନା ଚି ମୁଶା ନାବୀ ରାଃ ଆଇନ୍ ରାଃ ହୋରାତେ ପାର୍ମେଶ୍ଵାର୍ ନାଡ଼େଏ ରେ ଜେତାଏ ହ ଧାର୍ମୀ କାକୋ ବାଇୟୋଃତାନା, ଚିୟାଃଚି “ଧାର୍ମୀ ହୋଡ଼ ବିଶ୍ଵାସ୍ ତେ ଜୀହିଃ ତାଇନୋଗାଏ।” ମେନ୍ଦୋ ମୁଶା ନାବୀ ରାଃ ଆଇନ୍ ବିଶ୍ଵାସ୍ ଲେକାତେ ଦୋ ବାନୋଃ, ଚିୟାଃଚି “ଅକଏ ଏନାକୋକେ ମାନାତିଙ୍ଗ୍ ୟାଏ, ଇନିଃ ଏନାକୋରାଃ ଚାଲ୍ତେ ଜୀହିଃ ତାଇନାଏ।” ମାସୀହ୍ ଅକନିଃ ଆବୁ ଲାଗିନ୍ତେ ସାର୍ପାଅ ଜାନାଏ, ଇନିଃ ଆବୁକେ କିରିଙ୍ଗ୍ କେତେ ମୁଶା ନାବୀ ରାଃ ଆଇନ୍ ରାଃ ସାର୍ପାଅ ତେ ଛୋଡ଼ାଓ କେଃବୁୱାଏ, ଚିୟାଃଚି ଅଲାକାନା, “ଅକଏ ସାହାନ୍ କ୍ରୁଶ୍ ରେ ଲାଟ୍‍କାଅଃୱାଏ ଇନିଃ ସାର୍ପାଅକାନାଏ।” ନେୟା ନେୟାମେନ୍ତେ ହୋବାଜାନା ଚି ଆବ୍ରାହାମ୍ ଆଃ ଆଶିଷ୍ ମାସୀହ୍ ୟୀଶୁ ରେ ଏଟାଃଜାତି କୋତାଃ ଥେବାଗୋଃଚା, ହାର୍ ଆବୁ ବିଶ୍ଵାସ୍ ରାଃ ହୋରାତେ ଏନ୍ ପାବିତାର୍ ଆତ୍ମା କେ ନାମେୟାବୁ ଅକନାଃ କିରିୟା କାନା। ହେ ହାଗାକୋ, ଇଙ୍ଗ୍ ହୋଡ଼ୋକୋୱାଃ ନିୟାମ୍ ଲେକାତେ କାଜିତାନିଙ୍ଗ୍; ହୋଡ଼ୋକୋୱାଃ ନିୟାମ୍‍ଥଲ୍ ହଗି ଅକନାଃ ପୋକ୍ତା କେନୋଗା, ଦୋ ଏନାକେ ଜେତାଏ କାଏ ଗେନାୟାଏ ହାର୍ ଏନାରେ ଜେତ୍ନାଃ କାଏ ମେଶା ଧାଡ଼ିୟାଏ। ଏନାତେ କିରିୟା ଆବ୍ରାହାମ୍ କେ ଆଡୋଃ ଇନିଜାଃ ବାଂଶ୍ କେ ଏମ୍ ଜାନା। ଏନା ନେୟା କାଏ କାଜିତାନା, “ବାଂଶ୍ କୋକେ” ଜେଲେକା ଥିମ୍ବାଗି ବାଂଶ୍ କୋୱାଃ ବିଷାୟ୍ ରେ କାଜିୟୋଃୱା; ମେନ୍ଦୋ ଜେଲେକା ମିହୋଡ଼୍ ଆଃ ବିଷାୟ୍ ରେ ଚି “ଆମାଃ ବାଂଶ୍ କେ” ହାର୍ ଇନିଃ ମାସୀହ୍ ତାନିଃ। ମେନ୍ଦୋ ଇଙ୍ଗ୍ ନେୟା କାଜିୟାଇଙ୍ଗ, ଅକନ୍ ନିୟାମ୍‍ଥଲ୍ ପାର୍ମେଶ୍ଵାର୍ ସିଦାଏ ତେଗି ପୋକ୍ତା ଲେଦାଏ, ଏନାକେ ଆଇନ୍ ଚାଇର୍ ଶାଅ ତିସ୍ ସାଲ୍ ରାଃ ତାୟୋମ୍ତେ ହିଜୁଃ କେତେ କାଏ ଗେନା ଧାଡ଼ିୟାଏ ଏନାତେ କିରିୟା ସାମାଅଃୱା। ଚିୟାଃଚି ଆଗାର ହାନାଟିଙ୍ଗ୍ ମୁଶା ନାବୀ ରାଃ ଆଇନ୍ ଏତେ ନାମାକାନା ଏଣ୍ଡେ ଦୋ କିରିୟା ଏତେ କାହା, ମେନ୍ଦୋ ପାର୍ମେଶ୍ଵାର୍ ଦୋ ଆବ୍ରାହାମ୍ କେ ଆନୁଗ୍ରାହ୍ ରାଃ ଲେକାତେ କିରିୟା ଏମ୍ କାଜାଏ। ଏଣ୍ଡେ ମୁଶା ନାବୀ ରାଃ ଆଇନ୍ ଚିନାଃ ମେନ୍ତେ ଏମ୍ ଜାନା? ଏନା ଦୋ ଆନାଚୁ କାମାନାତିଙ୍ଗ କୋୱାଃ ଚାଲ୍ତେ ତାୟୋମ୍ତେ ଏମ୍ ଜାନା ଚି ଆବ୍ରାହାମ୍ ରାଃ ବାଂଶ୍ ମାସୀହ୍ ରାଃ ହିଜୁଃ ସାନ୍ତେ ତାଇନା ଅକନାଃ ରାଃ କିରିୟା ଏମ୍ ଲେନା; ଆଡୋଃ ଏନା ସିର୍ମାଦାସୀ ରାଃ ହୋରାତେ ମିୟାଃ ଥାଲାରେନିଃ ଜାଃ ତିଈ ତେ ହୋବାଜାନା। ଥାଲାରେନିଃ ଦୋ ମିହୋଡ଼୍ ନାଙ୍ଗ୍ କାଏ ତାହିନାଏ, ମେନ୍ଦୋ ପାର୍ମେଶ୍ଵାର୍ ମିହୋଡ଼୍ ଗି ତାନିଃ। ଏଣ୍ଡେ ଚିନାଃ ମୁଶା ନାବୀ ରାଃ ଆଇନ୍ ପାର୍ମେଶ୍ଵାର୍ ଆଃ କିରିୟା ରାଃ ବିରୋଧ୍ ରେ ମେନାଃ? ଚିଉଲା ହ କାହା! ଚିୟାଃଚି ଆଗାର୍ ନେଲେକା ତେ ମୁଶା ନାବୀ ରାଃ ଆଇନ୍ ଏମୋଃ ତେୟାଃ ଅକନାଃ ଜୀଦାନ୍ ଏମ୍ ଧାଡ଼ିତେୟାଃଏ, ଏଣ୍ଡେ ଧାରାମ୍ ହୋରା ସାର୍ତିଗୀ ମୁଶା ନାବୀ ରାଃ ଆଇନ୍ ହୋରାତେ ହୋବାଜାନ୍ତେ। ମେନ୍ଦୋ ପାବିତାର୍ ପୁଥି ସବେନ୍ କୋକେ ପାପ୍ ରାଃ ଆଧିନ୍ ତାଃକୋୱାଏ, ଏନାତେ ଏନ୍ କିରିୟା ଅକନାଃ ୟୀଶୁ ମାସୀହ୍ ରେ ବିଶ୍ଵାସ୍ ରିକା ରେ ମେନାଃ, ବିଶ୍ଵାସ୍ ରିକାତାନ୍ କୋ ନାଙ୍ଗ୍ ପୁରା ହୋବା କେନୋଃକା। ମେନ୍ଦୋ ବିଶ୍ଵାସ୍ ରାଃ ହିଜୁଃ ସିଦାରେ ମୁଶା ନାବୀ ରାଃ ଆଇନ୍ ରାଃ ଆଧିନ୍ ରେ ଆବୁ ବାନ୍ଦିକାନ୍ ଲେକା ତାଇକେନାବୁ, ଆଡୋଃ ଏନ୍ ବିଶ୍ଵାସ୍ ରାଃ ହିଜୁଃ ସାନ୍ତେ ଅକନାଃ ନେଲୋଃ ନାଙ୍ଗ୍ ତାଇନ୍ କେନା, ଆବୁ ଏନାରାଃ ଥୋଲାକାନ୍ ରେ ତାଇକେନାବୁ। ଏନାମେନ୍ତେ ମୁଶା ନାବୀ ରାଃ ଆଇନ୍ ମାସୀହ୍ ସାନ୍ତେ ସେଟେର୍ ଲାଗିନ୍ତେ ଆବୁୱାଃ ଶିଖାଅନିଃ ହୋବାଜାନାଏ ଏନାତେ ଆବୁ ବିଶ୍ଵାସ୍ ତେ ଧାର୍ମୀ ବାଇୟୋଃୱାବୁ। ମେନ୍ଦୋ ଚିମ୍ତାଙ୍ଗ୍ ବିଶ୍ଵାସ୍ ହିଜୁଃ ସେଟେର୍ ଜାନା, ଦୋ ଆବୁ ନାଆ ଶିଖାଅନିଜାଃ ମାନେ ମୁଶା ନାବୀ ରାଃ ଆଇନ୍ ରାଃ ଆଧିନ୍ ରେ କାବୁ ତାଇନ୍ ଜାନା। ଚିୟାଃଚି ଆପେ ସବେନ୍ ଏନ୍ ବିଶ୍ଵାସ୍ ରାଃ ଲେକାତେ ଅକନାଃ ମାସୀହ୍ ୟୀଶୁ ଚେତାନ୍ ରେ ମେନାଃ, ପାର୍ମେଶ୍ଵାର୍ ରାଃ ହୋନ୍‍କୋ ତାନ୍‍ପେ। ହାର୍ ଆପେ କୋଏତେ ଅକନ୍ କୋ ମାସୀହ୍ ରେ ବାପ୍ତିସ୍ମା ଇଦିକାଦାପେ ଇନ୍‍କୁ ମାସୀହ୍ କେ ତୁସିଙ୍ଗ୍ କାନାପେ। ନାଆ ଦୋ ଜେତାଏ ୟାହୁଦୀ କାଏ ତାଇନ୍ ଜାନାଏ ହାର୍ ୟୁନାନୀ ହୋଡ଼ କାଏ ତାଇନ୍ ଜାନାଏ, ଜେତାଏ ଦାସୀକାନ୍ କାଏ ତାଇନ୍ ଜାନାଏ ଜେତାଏ ରାଡ଼ାକାନ୍ କାଏ ତାଇନ୍ ଜାନାଏ, ଜେତାଏ କଡ଼ା ଚି କୁଡ଼ି କାଏ ତାଇନ୍ ଜାନାଏ, ଚିୟାଃଚି ଆପେ ସବେନ୍ କୋ ମାସୀହ୍ ୟୀଶୁ ରେ ମିଃ ହୋବାଜାନାପେ। ହାର୍ ଆଗାର୍ ଆପେ ମାସୀହ୍ ରାଃ ତାନ୍‍ପେ ରେଦୋ ଆବ୍ରାହାମ୍ ଆଃ ବାଂଶ୍ ରେନ୍ କୋ ହାର୍ କିରିୟା ରାଃ ହୋରାତେ ଆଧିକାରୀ ହ ତାନ୍‍ପେ। ଇଙ୍ଗ୍ ନେୟା କାଜି ତାନିଙ୍ଗ୍ ଚି ହାକ୍‍ଦାର୍ ନାମେନିଃ ଚିମିନ୍ ସାନ୍ ହୁଡିଙ୍ଗ୍ ହୋନ୍ ତାଇନାଏ, ଇନିଃ ସବେନ୍ ଜିନିଷ୍‍କୋ ରାଃ ଗୋମ୍‍କେ ତାନିଃ ଏଣ୍ଡେ ରେହଗି ଇନିଃ ରେ ଆଡୋଃ ଦାସୀ ରେ ଜାହାନ୍ ଆନ୍ତାର୍ ବାନୋଗା। ମେନ୍ଦୋ ଆପୁ ରାଃ ଠାହ୍‍ରାଓକାନ୍ ସାମାୟ୍ ସାନ୍ ହୋରୋଇତାନ୍ କୋୱାଃ ହାର୍ ଭାଣ୍ଡାରୀ କୋୱାଃ ଆଧିନ୍ ରେ ତାଇନାଏ। ଏନ୍ ଲେକାଗି ଆବୁ ହଗି, ଚିମ୍ତାଙ୍ଗ୍ ହୁଡିଙ୍ଗ୍ ହୋନ୍ ତାଇନ୍ କେନାବୁ, ଦୋ ଅତେଦିଶୁମ୍ ରାଃ ମାରି ଶିଖାଅ କୋରାଃ ଆଧିନ୍ ରେ ହୋବାକେତେ ଦାସୀ ବାଇଲେନାବୁ। ମେନ୍ଦୋ ଚିମ୍ତାଙ୍ଗ୍ ସାମାୟ୍ ପୁରା ଜାନା ଦୋ ପାର୍ମେଶ୍ଵାର୍ ଆଜାଃ ହୋନ୍‍କଡ଼ା କେ କୁଲ‍୍‍କିଜାଏ ଅକନିଃ କୁଡ଼ି ତେ ଜାନାମ୍ ଜାନାଏ, ହାର୍ ମୁଶା ନାବୀ ରାଃ ଆଇନ୍ ରାଃ ଆଧିନ୍ ରେ ଜାନାମ୍ ନାଏ। ଏନାତେ ମୁଶା ନାବୀ ରାଃ ଆଇନ୍ ରାଃ ଆଧିନ୍ ତାଇନ୍ ତାନ୍ କୋକେ କିରିଙ୍ଗ୍ କେତେ ଛୋଡ଼ାଓ କୋୱାଏ, ହାର୍ ଆବୁକେ ଆସୁଲ୍ ନାମାନ୍ ହୋନ୍ ରାଃ ହାକ୍ ନାମୋଃକା। ଆଡୋଃ ଆପେ ଅକନ୍ କୋଚି ହୋନ୍ କୋ ତାନ୍‍ମେ, ଏନାମେନ୍ତେ ପାର୍ମେଶ୍ଵାର୍ ଆଜାଃ ହୋନ୍‍କଡ଼ା ରାଃ ଆତ୍ମା କେ, ଅକନିଃ “ହେ ଆବା, ହେ ଆପୁ” କାଜିକେତେ କେଡ଼ାୟାଏ, ଆବୁୱାଃ ମୋନ୍ ରେ କୁଲ୍ କିଜାଏ। ଏନାମେନ୍ତେ ଆପେ ନାଆ ଦାସୀ ନାହାଲାପେ, ମେନ୍ଦୋ ହୋନ୍ ତାନ୍‍ପେ; ଆଡୋଃ ଚିମ୍ତାଙ୍ଗ୍ ହୋନ୍ ହୋବାଜାନାପେ, ଦୋ ପାର୍ମେଶ୍ଵାର୍ ରାଃ ହୋରାତେ ହାକ୍‍ଦାର୍ ନାମେନିଃ ହଗି ହୋବାନାପେ। ସିଦା ଦୋ, ଆପେ ପାର୍ମେଶ୍ଵାର୍ କେ କାପେସାରିକେତେ ଇନ୍‍କୁୱାଃ ଦାସୀ ତାଇକେନାପେ ଅକନ୍‍କୋ ଚି ଜାତିତେଗି ଇଶ୍ୱାର୍ ନାହାଲାକୋ, ମେନ୍ଦୋ ନାଆ ଦୋ ଆପେ ପାର୍ମେଶ୍ଵାର୍ କେ ସାରିକିଜାପେ ଇମିନ୍ ହ କାହା ମେନ୍ଦୋ ପାର୍ମେଶ୍ଵାର୍ ଆପେକେ ସାରିଉରୁମ୍ କେଃପେୟାଏ, ଏଣ୍ଡେ ଏନ୍ ନାରାଦୁରା ଆଡୋଃ ସାମା ମାରି ଶିଖାଅ କୋରାଃ କାଜିକୋ ପାଡ଼୍ ଆଡୋଃଗି ଚିନାଃ ମେନ୍ତେ ରୁଆଡ଼୍ଅଃ ତାନାପେ, ଅକନ୍ କୋରାଃ ଆପେ ଆଡୋଃମିଶା ଦାସୀ ବାଇଏନ୍ ସାନାଙ୍ଗ୍ ତାନାପେ? ଆପେ ହୁଲାଙ୍ଗ୍ କୋକେ ଆଡୋଃ ମାହିନା କୋକେ ଆଡୋଃ ଠାହ୍‍ରାଓକାନ୍ ସାମାୟ୍ କୋକେ ଆଡୋଃ ବାରାଶ୍ କୋକେ ମାନାତିଙ୍ଗ୍ ୟାପେ। ଇଙ୍ଗ୍ ଆପେୟାଃ ବିଷାୟ୍ ରେ ବୋରୋ ୟାଇଙ୍ଗ୍, ଚି ନେଲେକା ଆଲୋ ହୋବାଅଃକା ଚି ଅକନ୍ କାମି ଇଙ୍ଗ୍ ଆପେ ଲାଗିନ୍ ରିକା କାଦିଙ୍ଗ୍ ଏନା ସାମାଗୀ ଆଲୋଜାଃ ହୋବାଅଃକା। ହେ ହାଗାକୋ, ଇଙ୍ଗ୍ ଆପେକେ ଆର୍ଜି ପେତାନିଙ୍ଗ୍, ଆପେ ଇଙ୍ଗ୍ଆଃ ଲେକା ହୋବା କେନୋଃପେ, ଚିୟାଃଚି ଇଙ୍ଗ୍ ହଗି ଆପେୟାଃ ଲେକା ହୋବା କାନିଙ୍ଗ୍; ଆପେ ଇଙ୍ଗ୍ଆଃ ଚିନାଃ ହଗି କାପେ ବାଗ୍‍ଡ଼ାଅ କାଦା। ମେନ୍ଦୋ ଆପେ ସାରିୟାପେ, ଚି ସିଦା-ସିଦାରେ ଇଙ୍ଗ୍ ହୋଡ଼ମୋ ରାଃ ନାରାଦୁରା ରାଃ ହୋରାତେ ଆପେକେ ସୁସାମାଚାର୍ ଉଦୁବାଃ ପେୟାଇଙ୍ଗ୍। ଆଡୋଃ ଆପେ ଇଙ୍ଗ୍‍କେ ହୋଡ଼ମୋ ରେ ବେମାର୍ ଲେନ୍ ଇମ୍ତାରେ ଅକନାଃ ଆପେୟାଃ ପାରୀକ୍ଷା ଲେକା ତାଇକେନା, ଇଙ୍ଗ୍‍କେ କାପେ ହିଲାଙ୍ଗ୍ କେଦା; ନାଦୋ ଇଙ୍ଗ୍‍କେ ବାଗି କେଦିଙ୍ଗ୍ଆପେ; ମେନ୍ଦୋ ଆପେ ଇଙ୍ଗ୍‍କେ ପାର୍ମେଶ୍ଵାର୍ ରାଃ ସିର୍ମାଦାସୀ ଲେକା, ଇମିନାଙ୍ଗ୍ ଗି ମେନ୍ଦୋ ଇଙ୍ଗ୍‍କେ ମାସୀହ୍ ୟୀଶୁ ଲେକା ଗ୍ରାହାନ୍ କେଦିଙ୍ଗ୍ଆପେ। ଦୋ ଏନ୍ ଆପେୟାଃ ରାଶିକା ମାନାତିଙ୍ଗ୍ କୋତାଃ ସେନୋଃ ଜାନା? ଇଙ୍ଗ୍ ଆପେୟାଃ ଗୋୱା ତାନିଙ୍ଗ୍, ଚି ଆଗାର ହୋବା ଧାଡ଼ିୟୋଃ ତେୟାଃ, ଦୋ ଆପେ ଆପେୟାଃ ମେଏଃ କେ ହଗି ଅଡୋଙ୍ଗ୍ କେତେ ଇଙ୍ଗ୍‍କେ ଏମ୍ ତେତେୟାଃପେ। ଦୋ ଚିନାଃ ଆପେକେ ସାର୍ତି କାଜି ରାଃ ଚାଲ୍ତେ ଇଙ୍ଗ୍ ଆପେୟାଃ ବାଇରୀ ବାଇ ଜାନାଇଙ୍ଗ୍? ଇନ୍‍କୁ ଆପେକେ ଗାତି ବାବାଇ ଦୋକୋ ସାନାଙ୍ଗ୍ ତାନା, ମେନ୍ଦୋ ବୁଗିନ୍ ସାନାଙ୍ଗ୍ ତେ କାହା; ମେନ୍ଦୋ ଆପେକେ ଇଙ୍ଗ୍ଆଃ ତେ ଜୁଦା ରିକା ସାନାଙ୍ଗ୍ ତାନାକୋ, ଏନାତେ ଆପେ ଇନ୍‍କୁକେଗି ଗାତି ବାଇକୋପେ। ମେନ୍ଦୋ ନେୟା ହଗି ବେଶ୍ ତାନାଃ ଚି ବୁଗିନ୍ କାଜି କୋରେ ସବେନ୍ ସାମାୟ୍ ଗାତି ବାବାଇ ରାଃ କୋଷିସ୍ ଚାହି, ଇମ୍ତାଙ୍ଗ୍ ଭାଇର୍ କାହା ଚିମ୍ତାଙ୍ଗ୍ ଇଙ୍ଗ୍ ଆପେୟାଃ ଲୋଃ ତାଇନାଇଙ୍ଗ୍। ହେ ଇଙ୍ଗ୍ଆଃ ହୋନ୍‍କୋ, ଚିମ୍ତାଙ୍ଗ୍ ସାନ୍ତେ ଆପେ ଭିତାର୍ ଏତେ ମାସୀହ୍ ଲେକା କାପେ ବାଇ ଇଦିୟୋଃ ତାନା, ଏନ୍ ସାନ୍ତେ ଇଙ୍ଗ୍ ଆପେ ଲାଗିନ୍ତେ ଆଡୋଃଗି ବୁଗିୟୋଃ ରାଃ ଦୁକୁ ଲେକା ସାହାତିଙ୍ଗ୍ ତାନିଙ୍ଗ୍। ସାନାଙ୍ଗ୍ ଦୋ ନେୟା ହୋବାଅଃ ତାନା ଚି ନାଆ ଆପେୟାଃ ନାଡ଼େଏ ରେ ହିଜୁଃକେତେ ଆଡୋଃ ଏଟାଃ ଲେକାତେ ଗି କାଜିୟାଇଙ୍ଗ୍, ଚିୟାଃଚି ଆପେୟାଃ ବିଷାୟ୍ ରେ ଇଙ୍ଗ୍ ପାଶେକାନ୍ ଲେକା ଆଟ୍‍କାର୍ ତାନିଙ୍ଗ୍। ଆପେ ଜେ ଅକନ୍ କୋ ମୁଶା ନାବୀ ରାଃ ଆଇନ୍ ରାଃ ଲାଥାର୍ ରେ ହୋବାଅଃ ସାନାଙ୍ଗ୍ ତାନାପେ, ଇଙ୍ଗ୍‍କେ ଉଦୁବାଇଙ୍ଗ୍ ପେ, ଚିନାଃ ଆପେ ମୁଶା ନାବୀ ରାଃ ଆଇନ୍ କେ କାପେ ଆୟୁମ୍ ତାନା? ନେୟା ପାବିତାର୍ ପୁଥି ରେ ଅଲାକାନା ଚି ଆବ୍ରାହାମ୍ ରାଃ ବାରିୟା ହୋନ୍ ହୋବାନାକିନ୍; ମିହୋଡ଼୍ ଦାସୀ କୁଡ଼ି ଏତେ ଆଡୋଃ ଏଟାଃମିହୋଡ଼୍ କାଦାସୀକାନ୍ ଆଣାଦୀକାନ୍ କୁଡ଼ି ସାରା ଏତେ। ମେନ୍ଦୋ ଅକନିଃ ଦାସୀ କୁଡ଼ି ଏତେ ହୋବାନାଏ, ଇନିଃ ହୋଡ଼ମୋ ରାଃ ଲେକାତେ ସାଧାରାନ୍ ଜାନାମ୍ ଜାନାଏ, ହାର୍ ଅକନିଃ କାଦାସୀକାନ୍ ଆଣାଦୀକାନ୍ କୁଡ଼ି ସାରା ଏତେ ହୋବାନାଏ, ଇନିଃ କିରିୟା ପୁରାଅଃକା ଏନାରାଃ ଲେକାତେ ଜାନାମ୍ ନାଏ। ନେ କାଜି କୋରେ ଜୋନୋକା ମେନାଃ, ନେ କୁଡ଼ିକିନ୍ ପାହୋମ୍ କେପେ ବାରିୟା ନିୟାମ୍‍ଥଲ୍ ତାନ୍‍କିନ୍, ମିହୋଡ଼୍ ଦୋ ସିନାଇ ବୁରୁ ରେନ୍ ଅକନାଃ ଏତେ ଦାସୀ ଗି ଜାନାମୋଃୱାକୋ; ହାର୍ ଇନିଃ ହାଜୀରା ତାନିଃ। ହାର୍ ହାଜୀରା କେ ପାହୋମ୍ କେପେ ଇନିଃ ଆରାବ୍ ଦିଶୁମ୍ ରାଃ ସିନାଇ ବୁରୁ ତାନିଃ ଆଡୋଃ ନାଆ ରାଃ ୟୀରୁଶାଲେମ୍ ସାହାର୍ ଇନିଜାଃ ଲେକା ତାନିଃ, ଚିୟାଃଚି ଇନିଃ ଆଜାଃ ହୋନ୍‍କୋ ଲୋଃ ଦାସୀକାନ୍ ରେ ମେନାଇଜା। ମେନ୍ଦୋ ଚେତାନ୍ ରାଃ ୟୀରୁଶାଲେମ୍ ରାଡ଼ାକାନ୍ ମେନାଇଜା, ଆଡୋଃ ଇନିଃ ଆବୁୱାଃ ଏଙ୍ଗା ତାନିଃ। ଚିୟାଃଚି ଅଲାକାନା, “ହେ ବାଞ୍ଜ୍ ଆମ୍ କାମ୍ ଜାନାମ୍ କୋୱା ରାଶିକାଅଃମେ ଆମ୍ ଅକନିଃ ବୁଗିୟୋଃ ଦୁକୁ କେ କାମ୍ ସାହାତିଙ୍ଗ୍ କାଦା, ମୋଚା ଖଲାଅ କେତେ ଜାଏ ଜାଏକାରେମ୍; ଚିୟାଃଚି ବାଗିକାନ୍ କୁଡ଼ି ନିଜାଃ ହୋନ୍ କୋ କଡ଼ା ଲୋଃ ତାଇନ୍ ତାନ୍ କୁଡ଼ି ରାଃ ହୋନ୍ କୋଏତେ ହଗି ଥିମ୍ବା ମେନାକୋୱା।” ହେ ହାଗାକୋ, ଆବୁ ଇସାହାକ୍ ଲେକା କିରିୟା ରାଃ ହୋନ୍ କୋ ତାନ୍‍ବୁ। ଆଡୋଃ ଜେଲେକା ଏନ୍ ସାମାୟ୍ ରେ ହୋଡ଼ମୋ ରାଃ ଲେକାତେ ଜାନାମ୍ କାନ୍ ଆତ୍ମା ରାଃ ଲେକାତେ ଜାନାମ୍ କାନ୍‍କେ ସାତାଅ ତାଇନାଏ, ଏନ୍‍ଲେକାଗି ନାଆ ହଗି ହୋବାଅଃ ତାନା। ମେନ୍ଦୋ ପାବିତାର୍ ପୁଥି ଚିନାଃ କାଜିୟାଏ? “ଦାସୀ ଆଡୋଃ ଇନିଜାଃ ହୋନ୍ କେ ଅଡୋଙ୍ଗ୍ ତାଇମେ ଚିୟାଃଚି ଦାସୀ ରାଃ ହୋନ୍ କାଦାସୀକାନ୍ ଆଣାଦୀକାନ୍ କୁଡ଼ି ରାଃ ହୋନ୍ ଲୋଃ ଉତ୍ତାର୍ ଆଧିକାରୀ କାଏ ହୋବାଃୱାଏ।” ଏନାମେନ୍ତେ ହେ ହାଗାକୋ, ଆବୁ ଦାସୀ ରାଃ କାହା ମେନ୍ଦୋ କାଦାସୀକାନ୍ ଆଣାଦୀକାନ୍ କୁଡ଼ି ରାଃ ହୋନ୍‍କୋ ତାନ୍‍ବୁ। ମାସୀହ୍ ଆବୁକେ ଆଲୋକାବୁ ଦାସୀ ନା ମେନ୍ତେ ରାଡ଼ା କାଃବୁୱାଏ; ଏନାମେନ୍ତେ ନେୟା ରେ ଗି କେଟେଜେନ୍ ପେ, ଆଡୋଃ ଦାସୀକାନ୍ ତେୟାଃ ଆରାଣା ରେ ଆଲୋପେ ରୁଆଡ଼ା। ନେଲେପେ, ଇଙ୍ଗ୍ ପାଉଲୁସ୍ ଆପେ ତେ କାଜିପେ ତାନିଙ୍ଗ୍ ଚି ଆଗାର୍ ଆପେ ଖାତ୍ନା ରିକାଅଃୱାପେ, ଏଣ୍ଡେ ମାସୀହ୍ ଏତେ ଆପେକେ ଜେତ୍ନାଃ ହ ଲାଭ କାହୋବାଅଃୱା। ଏଣ୍ଡେହଗି ଇଙ୍ଗ୍ ସବେନ୍ ମିପୀହୋଡ଼୍ ଖାତ୍ନାଅଃ ତାନ୍ କୋକେ କାଜିଉଦୁବ୍ ପେତାନିଙ୍ଗ୍ ଚି ଇନିଃକେ ସବେନ୍ ଆଇନ୍ ମାନାତିଙ୍ଗ୍ ପାଡ଼ାଅଃୱା। ଆପେ ଜେ ମୁଶା ନାବୀ ରାଃ ଆଇନ୍ ରାଃ ହୋରାତେ ଧାର୍ମୀ ବାଇଏନ୍ ସାନାଙ୍ଗ୍ ତାନାପେ, ମାସୀହ୍ ତେ ଗେନାକାନାପେ ଆଡୋଃ ଆନୁଗ୍ରାହ୍ ଏତେ ସାଙ୍ଗିନ୍ କାନାପେ। ଚିୟାଃଚି ପାବିତାର୍ ଆତ୍ମା ରାଃ ହୋରାତେ ଆଲେ ବିଶ୍ଵାସ୍ ତେ, ଆଶ୍ରା କାନ୍ ତେୟାଃ ଧାରାମ୍ ରାଃ ହୋରା କେ ନେଲ୍ ହୋରା ତାନାଲେ। ମାସୀହ୍ ୟୀଶୁ ରେ ଖାତ୍ନା ହାର୍ କାଖାତ୍ନାକାନ୍ ଜେତ୍ନାଃ କାମି ରାଃ ନାହାଲା, ମେନ୍ଦୋ ଖାଲି ବିଶ୍ଵାସ୍ ଗି ତାନାଃ, ଅକନାଃ ଦୁଲାଡ଼୍ ତେ କାମିୟାଏ। ଆପେ ଦୋ ବୁଗିନ୍ ଗି ନିର୍ ତାଇକେନାପେ। ନାଆ ଅକଏ ଆପେକେ ରୋକାଅ କେଃପେୟାଏ ଚି ସାର୍ତି କେ ଆଲୋପେ ମାନାତିଙ୍ଗ୍ ୟା। ନେକାନ୍ ଶିଖାଅ ଆପେୟାଃ କେଡ଼ାକାନ୍ ପାଡ଼େତେ ନାହାଲା। କାଟିଃ କାନ୍ ଖାମୀର୍ ସବେନ୍ ସିପୁଃକାନ୍ ଆଟା କେ ଖାମୀର୍ ତାଆଏ। ଇଙ୍ଗ୍ ପ୍ରାଭୁ ତାଃ ଆପେୟାଃ ବିଷାୟ୍ ରେ ଭାରୋସା ଦୋହୋ ତାନିଙ୍ଗ୍ ଚି ଆପେୟାଃ ଆଡୋଃ ଏଟାଃ ବିଚାର୍ କାହୁୟୋଃୱା; ମେନ୍ଦୋ ଅକଏ ଆପେକେ ମୋନ୍ ରେ ଆକ୍‍ବାକାଅ ତାନାଏ, ଇନିଃ ଜାହାଁଏ ଗି ତାଇନୋଃ କାଏ ଦାଣ୍ଡ୍ ନାମେୟାଏ। ମେନ୍ଦୋ ହେ ହାଗାକୋ, ଆଗାର ଇଙ୍ଗ୍ ନାଆ ସାନ୍ତେ ଖାତ୍ନା ରାଃ ପାର୍ଚାର୍ ତାନିଙ୍ଗ୍, ଏଣ୍ଡେ ଚିନାଃ ମେନ୍ତେ ନାଆ ସାନ୍ତେ ସାତାଅଃ ତାନିଙ୍ଗ୍? ନେକାରେଦୋ କ୍ରୁଶ୍ ତେ ଆଡୋଃ ଠୋକାର୍ କାକୋ ନାମେୟା। ବେଶ୍ ହୁୟୋଃତେୟାଃ ଚି ଅକଏ ଆପେକେ ଗାଡ଼୍‍ବାଡ଼ାଅ ପେତାନାଏ, ଇନ୍‍କୁ ଆକୋ ଆପାନ୍ କେଗି ହାଃ କେତେ ଚାକୁରା ବାଇତାତେକୋ। ହେ ହାଗାକୋ, ଆପେ ରାଡ଼ାକାନ୍ ଲାଗିନ୍ତେ କେଡ଼ା କାନାପେ; ମେନ୍ଦୋ ନେକା ଆଲୋକା ହୋବାଅଃକା ଚି ନେ ରାଡ଼ାକାନ୍ ତେୟାଃ ହୋଡ଼ମୋ ରେୟାଃ ପାପ୍ କାମି ଲାଗିନ୍ତେ ଜାଗା ନାମେୟାଏ, ମେନ୍ଦୋ ଦୁଲାଡ଼୍ ତେ ମିହୋଡ଼୍ ଏଟାଃ ନିଜାଃ ଦାସୀ ବାଇଏନ୍ ପେ। ଚିୟାଃଚି ପୁରା ମୁଶା ନାବୀ ରାଃ ଆଇନ୍ ନେ ମିୟାଃଗି ବାକାଣ୍ ରେ ପୁରାକୋଃ ତାନା, “ଆମ୍ ଆମାଃ ନାଡ଼େଏ-ଜାପାଃ ରେନିଃ କେ ଆମାଃ ସାମାନ୍ ଦୁଲାଡ଼ିମେ।” ମେନ୍ଦୋ ଆଗାର୍ ଆପେ-ଆପେ ଥାଲା ରେଗି ହାବୋଃ ତାନାପେ ହାର୍ ଚାଗାଡ଼୍ ଜୋମୋଃ ତାନାପେ, ଏଣ୍ଡେ ହୋସିୟାର୍ ତାଇନୋଃପେ ଚି ମିହୋଡ଼୍ ଏଟାଃନିଃ କେ ଆଲୋଜାଃ ନାଶ୍ ତାଃପେ। ମେନ୍ଦୋ ଇଙ୍ଗ୍ କାଜି ତାନାଇଙ୍ଗ୍, ପାବିତାର୍ ଆତ୍ମା ରାଃ ଲେକାତେ ସେନେପେ ଏଣ୍ଡେ ଆପେ ହୋଡ଼ମୋ ରାଃ ପାପ୍ ସାନାଙ୍ଗ୍ କେ ଜାଲେକାତେ କାପେ ପୁରାୟା। ଚିୟାଃଚି ପାପ୍ ରିକା ସାନାଙ୍ଗ୍ ହୋଡ଼ମୋ ପାବିତାର୍ ଆତ୍ମା ରାଃ ବିରୋଧ୍ ରେ ହାର୍ ପାବିତାର୍ ଆତ୍ମା ପାପ୍ ରିକା ସାନାଙ୍ଗ୍ ହୋଡ଼ମୋ ରାଃ ବିରୋଧ୍ ରେ ରିକା ନାଙ୍ଗ୍ ସାନାଙ୍ଗ୍ଆଏ, ହାର୍ ନିକିନ୍ ମିହୋଡ଼୍ ଏଟାଃ ନିଜାଃ ବିରୋଧୀ ତାନ୍‍କିନ୍, ଏନାମେନ୍ତେ ଚି ଅକନାଃ ଆପେ ରିକା ନାଙ୍ଗ୍ ସାନାଙ୍ଗ୍ ତାନାପେ ଏନା କାପେ ରିକା ଧାଡ଼ିୟା। ଆଡୋଃ ଆଗାର୍ ଆପେ ପାବିତାର୍ ଆତ୍ମା ରାଃ ସାନାଙ୍ଗ୍ ଲେକାତେ ସେସେନ୍ ତାନାପେ ଏଣ୍ଡେଦୋ ଆପେ ମୁଶା ନାବୀ ରାଃ ଆଇନ୍ ରାଃ ଲାଥାର୍ ରେ ବାଙ୍ଗ୍ ପେୟା। ପାପୀ ହୋଡ଼ମୋ ରାଃ କାମି ଦୋ ନେଲୋଃ ତାନା, ମାନେ ବ୍ୟାଭିଚାର୍, ଶିତୃ କାମି, ଏତ୍କାନ୍ ସାନାଙ୍ଗ୍, ମୂର୍ତିପୂଜା, ଟୋହ୍ନା, ବାଇରୀଏନ୍, ଲାପ୍ଡ଼ାଇ, ହିସିଙ୍ଗା, ଖିସ୍, ବିରୋଧ୍, ଆପାନାଃ ସାନାଙ୍ଗ୍ କେଗି ପୁରା ରିକା, କାଜି କାଜୋକାଅଃ, କାବାପାଇଏନ୍, ହିସିଙ୍ଗା, ନୁବୁଲେନ୍, ଏତ୍କାନ୍ କାମି ରେ ରାଶିକାଏନ୍ ଆଡୋଃ ନେୟା ଲେକା ଆଡୋଃ-ଆଡୋଃ କାମିକୋ ମେନାଗା, ନେୟା କୋରାଃ ବିଷାୟ୍ ରେ ଇଙ୍ଗ୍ ଆପେକେ ସିଦା ଏତେ କାଜିପେ ତାନିଙ୍ଗ୍, ଚି ନେକା-ନେକା କାମି ତାନ୍‍କୋ ପାର୍ମେଶ୍ଵାର୍ ରାଃ ରାଇଜ୍ ରେ ହାନାଟିଙ୍ଗ୍ କାକୋ ନାମେୟା। ମେନ୍ଦୋ ଆତ୍ମା ରାଃ ଯଅ ଦୁଲାଡ଼୍, ରାଶିକା, ମେଶା, ସାହାତିଙ୍ଗ୍, ଆଡୋଃ ଦାୟା, ବୁଗିନାଃ, ବିଶ୍ଵାସ୍, ଲେବେଃ ଆଡୋଃ ମୋନ୍ କେ ବୁଝାଅ ଧାଡ଼ି ତାନାଃ; ନେକାନ୍-ନେକାନ୍ କାମି କୋରାଃ ବିରୋଧ୍ ରେ ଜେତାନ୍ ନିୟାମ୍ ବାନୋଗା। ଆଡୋଃ ଅକନ୍ କୋ ମାସୀହ୍ ୟୀଶୁ ରାଃ ତାନ୍ କୋ, ଇନ୍‍କୁ ହୋଡ଼ମୋ କେ ଏନା ରାଃ ଏତ୍କାନ୍ ସାନାଙ୍ଗ୍ କୋକେ ଆଡୋଃ ହାୟା କୋକେ କ୍ରୁଶ୍ ରେ ରାକାବ୍ ତାଦାକୋ। ଆଗାର୍ ଆବୁ ପାବିତାର୍ ଆତ୍ମା ରାଃ ହୋରାତେ ଜୀହିଦ୍ ମେନାବୁୱା, ଏଣ୍ଡେ ପାବିତାର୍ ଆତ୍ମା ରାଃ ଲେକାତେଗି ସେସେନ୍ କାବୁ। ଆବୁ ଘାମାଣ୍ଡ୍ କେତେ ମିହୋଡ଼୍ ଏଟାଃ ନିଈକେ ଆଲୋ ଆପ୍‍ମାନି କାବୁ ଆଡୋଃ ମିହୋଡ଼୍ ଏଟାଃ ନିଃକେ ଆଲୋ ଖିସ୍ କାବୁ। ହେ ହାଗାକୋ, ଆଗାର୍ ଜେତାନ୍ ହୋଡ଼ ଜାହାନ୍ ପାପ୍ ରେ ସାବୋଃ ତାନାଏ ଏଣ୍ଡେ ଆପେ ଆତ୍ମାନ୍ ହୋଡ଼ୋକୋ ତାନ୍‍ପେ, ଲେବେଃତେ ନେକାନ୍ କୋକେ ବାଇସୁଧ୍ରାଅ କୋପେ, ହାର୍ ଆପେ ଆପାନ୍ କେହଗି ଏୟୋନ୍ କାନ୍ ମାଣ୍ଡାଏପେ ଏନାତେ ଆପେ ପାରୀକ୍ଷା ରେ କାପେ ଉୟୁଗୋଗା। ଆପେ ମିହୋଡ଼୍ ଏଟାଃ ନିଜାଃ ବାହାରୋମ୍ ଗୋଅଏପେ, ହାର୍ ନେଲେକାତେ ମାସୀହ୍ ରାଃ ନିୟାମ୍ କେ ପୁରାଏପେ। ଚିୟାଃଚି ଆଗାର ଜେତାଏ ଆପାନ୍ କେ ଜେତ୍ନାଃ ହ ନାହାଲାଏ ଏଣ୍ଡେ ରେହ ଆଏଃ ଆପାନ୍ କେ ଜାହାନାଃ ତାନିଃ ମେନ୍ତେ ଆଟ୍‍କାର୍ ତାନାଏ, ଦୋ ଆଏଃ ଆପାନ୍ କେଗି ଲୋଗୋ ତାନାଏ। ମେନ୍ଦୋ ସବେନ୍ ମିପୀହୋଡ଼୍ ଆପାନାଃ ଗି କାମି କେ ଯାଞ୍ଚ୍ କାଏ, ଏଣ୍ଡେ ଇନିଃକେ ଏଟାଃ କୋୱାଃ ବିଷାୟ୍ ରେ କାହା ମେନ୍ଦୋ ଆପାନାଃଗି ବିଷାୟ୍ ରେ ଆଏଃକେ ଘାମାଣ୍ଡ୍ ରିକା ଧାଡ଼ିୟାଏ। ଚିୟାଃଚି ସବେନ୍ ମିପୀହୋଡ଼୍ ଆଜାଃଗି ହାମ୍ବାଲ୍ ଗୋଅୟାଏ। ଅକଏ ପାର୍ମେଶ୍ଵାର୍ ରାଃ ବାଚାନ୍ ରାଃ ଶିଖାଅ ନାମ୍ ତାନାଏ, ଇନିଃ ଶିଖାଅନିଃକେ ସବେନ୍ ବେଶ୍ ଜିନିଷ୍ କୋରେ ହାନାଟିଙ୍ଗ୍ ଏମିକାଏ। ଆଲୋପେ ବେଦାଅଃୱା; ପାର୍ମେଶ୍ଵାର୍ କାଏ ଲାନ୍ଦାଅଃ ୱାଏ, ଚିୟାଃଚି ହୋଡ଼ ଅକନାଃଗି ହେରେୟାଏ ଏନାଗି ଇରେୟାଏ। ଚିୟାଃଚି ଅକଏ ଆପାନାଃ ପାପୀ ହୋଡ଼ମୋ ଲାଗିନ୍ ହେରେୟାଏ, ଇନିଃ ହୋଡ଼ମୋ ରାଃ ହୋରାତେ ଗୋନୋଏଃ କେ ଇରେୟାଏ: ହାର୍ ଅକଏ ପାର୍ମେଶ୍ଵାର୍ ରାଃ ଆତ୍ମା ଲେକାତେ ହେରେୟାଏ, ଇନିଃ ପାର୍ମେଶ୍ଵାର୍ ରାଃ ଆତ୍ମା ରାଃ ହୋରାତେ ଜାନାଓ ଜୀଦାନ୍ କେ ଇରେୟାଏ। ଆବୁ ବେଶ୍ କାମି ରିକା ନାଙ୍ଗ୍ ଆଲୋ ଲାଗାଅଃକାବୁ, ଚିୟାଃଚି ଆଗାର୍ ଆବୁ କାବୁ ଲାଗାଅଃୱା ଏଣ୍ଡେ ଠିକ୍ ସାମାୟ୍ ରେ ଇରେୟାବୁ। ଏନାମେନ୍ତେ ଚିମ୍ତାଙ୍ଗ୍ ଆବୁକେ ସାମାୟ୍ ନାମୋଃ ତାନା ସବେନ୍ କୋଲୋଃ ବୁଗିନାଃ ରିକାଏକାବୁ; ବିଶେଷ୍ କେତେ ବିଶ୍ଵାସୀ ହାଗାକୋ ଲୋଃ। ନେଲେପେ, ଇଙ୍ଗ୍ ଚିଲ୍‍କା ମାପ୍‍ରାଙ୍ଗ୍-ମାପ୍‍ରାଙ୍ଗ୍ ଆକ୍ଷାର୍ ରେ ଆପେକେ ଇଙ୍ଗ୍ଆଃ ତିଈ ତେ ଅଲ୍ କାଦିଙ୍ଗ୍। ଅକନ୍ ହୋଡ଼ୋକୋ ୟାହୁଦୀ ହୋଡ଼ୋକୋକେ ଖୁସ୍ ରିକା ନାଙ୍ଗ୍ ଦେଖାଅ ସାନାଙ୍ଗ୍ ତାନାକୋ, ଇନ୍‍କୁ ଗି ଆପେୟାଃ ଖାତ୍ନା ରିକା ଲାଗିନ୍ତେ ଜାବ୍ରାଇ ତାନାକୋ, ଏନା ଏନାମେନ୍ତେ ଚି ଇନ୍‍କୁ ମାସୀହ୍ ରାଃ କ୍ରୁଶ୍ ରାଃ ଚାଲ୍ତେ ଆଲୋକାକୋ ସାତାଅଃକା। ଚିୟାଃଚି ଖାତ୍ନା ରିକାତାନ୍ କୋ ଆକୋ ଗି ମୁଶା ନାବୀ ରାଃ ଆଇନ୍ ରେ କାକୋ ସେନ୍ ତାନା, ମେନ୍ଦୋ ଆପେୟାଃ ଖାତ୍ନା ନେୟାମେନ୍ତେ ରିକା ନାଙ୍ଗ୍ ସାନାଙ୍ଗ୍ ତାନାକୋ ଚି ଆପେୟାଃ ହୋଡ଼ମୋ ବିଷାୟ୍ ରେ ଘାମାଣ୍ଡ୍ ଧାଡ଼ିୟାକୋ। ମେନ୍ଦୋ ନେଲେକା ଆଲୋକା ହୋବାଅଃକା ଚି ଇଙ୍ଗ୍ ଜାହାନ୍ ଏଟାଃ କାଜି ରେ ଘାମାଣ୍ଡ୍ ୟାଇଙ୍ଗ୍, ମେନ୍ଦୋ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ କ୍ରୁଶ୍ ରେ ଭାଇର୍, ଅକନିଜାଃ ହୋରାତେ ଅତେଦିଶୁମ୍ ଇଙ୍ଗ୍ଆଃ ନେପେଲ୍ ତେ ହାର୍ ଇଙ୍ଗ୍ ଅତେଦିଶୁମ୍ ରାଃ ନେପେଲ୍ ତେ କ୍ରୁଶ୍ ରେ ରାକାବ୍ କାନିଙ୍ଗ୍। ଚିୟାଃଚି ଖାତ୍ନା, ହାର୍ କାଖାତ୍ନାକାନ୍ ଜାହାନାଃ ନାହାଲା, ମେନ୍ଦୋ ନାୱା ସିର୍ଜାଅ ଖାସ୍ ତାନାଃ। ଚିମିନାଙ୍ଗ୍ କୋ ନେ ନିୟାମ୍ ରେ ସେସେନାକୋ ଇନ୍‍କୁ ଚେତାନ୍ ରେ, ହାର୍ ପାର୍ମେଶ୍ଵାର୍ ରାଃ ଇସ୍ରାଏଲୀ ଚେତାନ୍ ରେ ଜୀଉସୁକୁ ହାର୍ ଦାୟା ହୋବାଅଃ କାତୋଃକା। ଆୟୁର୍ ତେ ଜେତାଏ ଇଙ୍ଗ୍‍କେ ଦୁକୁ ଆଲୋ ଏମାଇଙ୍ଗ୍ କାଏ, ଚିୟାଃଚି ଇଙ୍ଗ୍ ୟୀଶୁ ଆଃ ଚିହ୍ନା କୋ ଇଙ୍ଗ୍ଆଃ ହୋଡ଼ମୋ ରେ ଇଦିବାଡ଼ା ତାନିଙ୍ଗ୍। ହେ ହାଗାକୋ, ପ୍ରାଭୁ ୟୀଶୁ ମାସୀହ୍ ଆଃ ଆନୁଗ୍ରାହ୍ ଆପେୟାଃ ଆତ୍ମା ଲୋଃ ତାଇନୋଃକା। ଆମୀନ୍। ପାଉଲୁସ୍ ଆଃ ପାଡ଼େତେ ଅକନିଃ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ୟୀଶୁ ମାସୀହ୍ ରାଃ କୁଲାକାନ୍ ଚେଲା ତାନିଃ, ଏନ୍ ପାବିତାର୍ ଆଡୋଃ ମାସୀହ୍ ୟୀଶୁ ରେ ବିଶ୍ୱାସ୍ ତାନ୍ ହୋଡ଼ୋକୋୱାଃ ନୁତୁମ୍ ରେ ଅକନ୍ କୋ ଇଫିସୁସ୍ ସାହାର୍ ରେ ମେନାକୋୱାଃ। ଆବୁୱାଃ ଆପୁ ପାର୍ମେଶ୍ଵାର୍ ଆଡୋଃ ପ୍ରାଭୁ ୟୀଶୁ ମାସୀହ୍ ପାଡ଼େତେ ଆପେକେ ଆନୁଗ୍ରାହ୍ ହାର୍ ଜୀଉସୁକୁ ନାମୋଃକା। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ପାର୍ମେଶ୍ଵାର୍ ହାର୍ ଆପୁ ରାଃ ଧାନ୍ୟାବାଦ୍ ହୋବାଅଃକା ଚି ଇନିଃ ଆବୁକେ ମାସୀହ୍ ରେ ସିର୍ମାଦିଶୁମ୍ ଜାଗା ରେ ସବେନ୍ ରାକାମ୍ ରାଃ ଆତ୍ମାନ୍ ଆଶିଷ୍ ଏମ୍ କାଦାଏ। ଜେଲେକା ଇନିଃ ଆବୁକେ ଅତେଦିଶୁମ୍ ରାଃ ସିର୍ଜାଅ ସିଦା ରେ ମାସୀହ୍ ରେ ସାଲାକାଃବୁୱାଏ ଚି ଆବୁ ଇନିଜାଃ ନାଡ଼େଏ ରେ ଦୁଲାଡ଼୍ ରେ ପାବିତାର୍ ଆଡୋଃ ନିର୍ଦୋଷ୍ ହୋବାଅଃୱାବୁ। ହାର୍ ଆୟାଃ ମୋନେ ଲେକା ସୁକୁ ସାନାଙ୍ଗ୍ ତେ ଆବୁକେ ଆପାନାଃ ଲାଗିନ୍ତେ ସିଦା ଏତେଗି ଦୋହୋକାଦାଏ ଚି ୟୀଶୁ ମାସୀହ୍ ରାଃ ହୋରାତେ ଆବୁ ଇନିଜାଃ ଆସୁଲ୍ ନାମାନ୍ ହୋନ୍ ହୋବାଅଃୱାବୁ, ଏନାତେ ଇନିଜାଃ ଏନ୍ ଆନୁଗ୍ରାହ୍ ରାଃ ମାନାରାଙ୍ଗ୍ ରାଃ ସାହାରାଅ ହୋବାଅଃକା, ଅକନାଃକେ ଇନିଃ ଆବୁକେ ଏନ୍ ଦୁଲାଡ଼ାନ୍ ନିଃରେ ସାମାତେ ଏମ୍ କାଦାଏ। ଆବୁ କେ ଇନିଃରେ ଇନିଜାଃ ମାୟୋମ୍ ହୋରାତେ ଛୋଡ଼ାଓ, ମାନେ ପାପ୍ କୋରାଃ ଛାମା, ଇନିଜାଃ ଏନ୍ ଆନୁଗ୍ରାହ୍ ରାଃ ଧାନ୍ ରାଃ ଲେକାତେ ନାମ୍ କାନା, ଅକନାଃକେ ଇନିଃ ସବେନ୍ ସେଣା ହାର୍ ବୁଝାଅ ଲୋଃ ଆବୁ କେ ପୁରାଃଗି ଏମ୍ କେଦାଏ। ଚିୟାଃଚି ଇନିଃ ଆଜାଃ ସୁକୁ ମୋନେ ତେ ସାନାଙ୍ଗ୍ ତାନ୍ ରେୟାଃ ମୁଣ୍ଡି କେ ଆବୁକେ ଉଦୁବ୍ କେଃବୁୱାଏ, ଅକନାଃକେ ଇନିଃ ମାସୀହ୍ ରେ ରିକାନାଙ୍ଗ୍ ମୋନେ ଛାବା ଲେଦାଏ ଚି ସାମାୟ୍ କୋରାଃ ପୁରା ହୋବାଅଃ ଇମ୍ତା ରେ ଅକନାଃକୋ ସିର୍ମାଦିଶୁମ୍ ରେ ମେନାଃ ହାର୍ ଅକନାଃକୋ ଅତେ ରେ ମେନାଃ, ସବେନାଃ କେ ମାସୀହ୍ ରାଃ ଆଧିକାର୍ ରେ ମିଃତାଃ ହୁଣ୍ତିୟାଏ। ଇନିଃରେଗି ଅକନିଜାଃରେ ଆବୁ ହଗି ଆୟାଃ ସାନାଙ୍ଗ୍ ରେୟାଃ ବିଚାର୍ ଲେକାତେ ସବେନାଃ ରିକାୟାଏ, ସିଦା ଏତେ ଦୋହୋ କେତେ ହାନାଟିଙ୍ଗ୍ ବାଇୟୋଃୱାବୁ ଏନାତେ ଆବୁ ଅକନ୍ କୋ ସିଦା ତେଗି ମାସୀହ୍ ରେ ଆଶ୍ରା ମାଣ୍ତାଅ ଲେଦାବୁ, ଇନିଜାଃ ମାନାରାଙ୍ଗ୍ ରାଃ ସାହାରାଅ ୟାବୁ ମେନ୍ତେ ହୋବାଅଃକାବୁ। ହାର୍ ଇନିଃରେଗି ଆପେୟାଃ ଚେତାନ୍ ରେହଗି, ଚିମ୍ତାଙ୍ଗ୍ ଆପେ ସାର୍ତି ରାଃ ବାଚାନ୍ ଆୟୁମ୍ କେଦାପେ ଅକନାଃ ଆପେୟାଃ ବାଞ୍ଚାଅ ରାଃ ସୁସାମାଚାର୍ ତାନାଃ ଆଡୋଃ ଅକନାଃ ରେ ଆପେ ବିଶ୍ଵାସ୍ କେଦାପେ, କିରିୟା ଜୋମ୍ କାନ୍ତେୟାଃ ପାବିତାର୍ ଆତ୍ମା ତେ ଛାପ୍ ୟାନାପେ। ପାବିତାର୍ ଆତ୍ମା ଆୟାଃ କିରିଙ୍ଗାକାନ୍ କୋୱାଃ ଛୋଡ଼ାଓ ଲାଗିନ୍ତେ ଆବୁୱାଃ ହାନାଟିଙ୍ଗ୍ ରାଃ ବାୟାନା ତାନିଃ, ଏନାତେ ଇନିଜାଃ ମାନାରାଙ୍ଗ୍ ରାଃ ସାହାରାଅ ହୋବାଅଃକା। ନେୟା ରାଃ ଚାଲ୍ତେ, ଇଙ୍ଗ୍ ହଗି ଏନ୍ ବିଶ୍ୱାସ୍ ରାଃ ସାମାଚାର୍ ଆୟୁମ୍‍କେତେ ଅକନାଃ ଆପେ ହୋଡ଼ୋକୋୱାଃ ପ୍ରାଭୁ ୟୀଶୁ ରେ ମେନାଃ ହାର୍ ସବେନ୍ ପାବିତାର୍ ହୋଡ଼ୋକୋ ନାଙ୍ଗ୍ ଆପେୟାଃ ଦୁଲାଡ଼୍ ମେନାଃ, ଆପେ ଲାଗିନ୍ତେ ଧାନ୍ୟାବାଦ୍ ରିକା କାଇଙ୍ଗ୍ ବାଗିକାଦା, ଆଡୋଃ ଇଙ୍ଗ୍ଆଃ ବିନ୍ତି କୋରେ ଆପେକେ ମୋନେ ପେତାନିଙ୍ଗ୍। ଏନାତେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ପାର୍ମେଶ୍ଵାର୍ ଅକନିଃ ମାନାରାଙ୍ଗ୍ ରାଃ ଆପୁ ତାନିଃ, ଆପେ ଆଏଃ କେ ବୁଗିନ୍ତେ ସାରିଉରୁମିପେ ମେନ୍ତେ ସେଣା ହାର୍ ଉନୁଦୁବ୍ କାଜି ରାଃ ଆତ୍ମା ଏମାପେକାଏ। ହାର୍ ଆପେୟାଃ ମୋନ୍ ରାଃ ମେଏଃ ମାସ୍କାଲ୍ ତେ ଫେରେଜୋଃକା ଏନାତେ ଆପେ ସାରିଲେପେ ଚି ଇନିଜାଃ କେନେଡ଼ା ରାଃ ଆଶ୍ରା ଚିନାଃ ତାନାଃ, ହାର୍ ପାବିତାର୍ ହୋଡ଼ୋକୋ ରେ ଇନିଜାଃ ହାନାଟିଙ୍ଗ୍ ରାଃ ମାନାରାଙ୍ଗ୍ ରାଃ ଧାନ୍ ଚିଲ୍‍କା ମେନାଃ। ଆଡୋଃ ଇନିଜାଃ ପେଡ଼େଏ ଆବୁୱାଃ ରେ ଅକନ୍ କୋ ବିଶ୍ଵାସ୍ ତାନାବୁ, ଚିମିନ୍ ମାରାଙ୍ଗ୍ ମେନାଃ, ଇନିଜାଃ ଥିମ୍ବାଗି ପେଡ଼େଏ ଏନ୍ କାମି ରାଃ ଲେକାତେ, ଅକନାଃ ଇନିଃ ମାସୀହ୍ ରେ ରିକା କେଦାଏ ଚି ଇନିଃକେ ଗୋଜାକାନ୍ କୋଏତେ ଜୀହିଃ କେତେ ସିର୍ମାଦିଶୁମ୍ ରାଃ ଜାଗା ରେ ଆଜାଃ ଜୋମ୍ ପାଡ଼୍ ରେ, ସବେନ୍ ରାକାମ୍ ରାଃ ରାଇଜ୍ ତାନ୍ ହାର୍ ଆଧିକାର୍ ହାର୍ ପେଡ଼େଏ ହାର୍ ଗୋମ୍‍କେ କୋଏତେ ହାର୍ ସବେନ୍ ନୁତୁମାନ୍ ନୁତୁମ୍ କୋଏତେ ମାରାଙ୍ଗ୍, ଅକନାଃ ନେ ଯୁଗ୍ ରେ ଭାଇର୍ କାହା ମେନ୍ଦୋ ହିଜୁଃ ଯୁଗ୍ ରେହ ଇଦିୟୋଗା, ଦୁବ୍ କିଜାଏ; ହାର୍ ସବେନାଃ କେ ଇନିଜାଃ କାଟା ଲାଥାର୍ ରେ ମାଣ୍ତାଅ ତାଦାଏ; ହାର୍ ଇନିଃକେ ସବେନ୍ ଜିନିଷ୍ କୋରାଃ ବୋଅ ବାଇକେତେ କାଲିସିୟା କେ ଏମ୍‍ତାଦାଏ, ନେୟା ଇନିଜାଃ ହୋଡ଼ମୋ ତାନାଃ, ହାର୍ ଇନିଜାଃ ଗି ଫେନେରେଃ ତାନାଃ ଅକନିଃ ସବେନାଃ ରେ ସବେନାଃ ଫେରେଃ ୟାଏ। ହାର୍ ଇନିଃ ଆପେ କେ ହଗି ଜୀହିଃ କେଃପେୟାଏ, ଅକନ୍‍କୋ ସିଦା ଆପେୟାଃ ଆପ୍ରାଧ୍ ଆଡୋଃ ପାପ୍ ରାଃ ହୋରାତେ ଗୋଜାକାନ୍ ତାଇକେନାପେ। ଅକନାଃ ରେ ଆପେ ସିଦା ନେ ଅତେଦିଶୁମ୍ ରାଃ ନିୟାମ୍ ଲେକାତେ, ହାର୍ ରିମିଲ୍‍ଦିଶୁମ୍ ରେ ରାଇଜ୍ ତାନ୍ ହାକିମ୍ ମାନେ ଏନ୍ ଆତ୍ମା ରାଃ ଲେକାତେ ସେନ୍ ତାଇକେନାପେ, ଅକନିଃ ନାଆ ହଗି କାମାନାତିଙ୍ଗ୍ କୋରେ କାମିତାନାଏ। ନେୟା ରେ ଆବୁ ସବେନ୍ କୋ ହଗି ସିଦା ଆପାନାଃ ପାପୀ ହୋଡ଼ମୋ ରାଃ ସାନାଙ୍ଗ୍ ଲେକାତେ ସେସେନ୍ ତାଇକେନାବୁ, ହାର୍ ହୋଡ଼ମୋ ରେୟାଃ ମୋନ୍ ହାର୍ ବିଚାର୍ ଲେକା ରିକାତାଇକେନାବୁ, ହାର୍ ଏଟାଃ ହୋଡ଼ୋକୋ ଲେକା ଜାତିତେଗି ପାର୍ମେଶ୍ଵାର୍ ରାଃ ଖିସ୍ ରାଃ ଲାଥାର୍ ରେ ତାଇନ୍ କେନାବୁ। ମେନ୍ଦୋ ପାର୍ମେଶ୍ଵାର୍ ଅକନିଃ ଦାୟା ରେ କିଶାଣ୍ ତାନିଃ ଇନିଜାଃ ଏନ୍ ମାରାଙ୍ଗ୍ ଦୁଲାଡ଼୍ ରାଃ ଲାଗିନ୍ତେ ଅକନାଃ ଇନିଃ ଆବୁ ଲୋଃ ଦୁଲାଡ଼୍ କେଦାଏ, ଚିମ୍ତାଙ୍ଗ୍ ଆବୁ ପାପ୍ ରାଃ ହୋରାତେ ଗୋଜାକାନ୍ ତାଇଲେନାବୁ, ଇମ୍ତା ଆବୁକେ ମାସୀହ୍ ଲୋଃ ଜୀହିଃ କେଃବୁୱାଏ (ଆନୁଗ୍ରାହ୍ ଏତେଗି ଆପେ ବାଞ୍ଚାଅ ନାମାକାଦାପେ), ହାର୍ ମାସୀହ୍ ୟୀଶୁ ରେ ଇନିଃ ଲୋଃ ଜୀହିଃରୁଆଡ଼୍ କେଃବୁୱାଏ, ହାର୍ ସିର୍ମାଦିଶୁମ୍ ଜାଗା ରେ ଇନିଃ ଲୋଃ ଦୁବ୍ କେଃ ବୁୱାଏ। ଏନାତେ ଇନିଃ ଆଜାଃ ଏନ୍ ଦାୟାତେ ଅକନାଃ ମାସୀହ୍ ୟୀଶୁ ରେ ଆବୁ ଲୋଃ ମେନାଃ, ହିଜୁଃତାନ୍ ଯୁଗ୍ ରେ ଆଜାଃ ଆନୁଗ୍ରାହ୍ ରାଃ କାସୋଙ୍ଗ୍ ଧାଡ଼ିୟୋଃ ଧାନ୍ ଦେଖାଅ ବୁୱାଏ। ଚିୟାଃଚି ବିଶ୍ଵାସ୍ ରାଃ ହୋରାତେ ଆନୁଗ୍ରାହ୍ ଏତେଗି ଆପେପେ ବାଞ୍ଚାଅ ନାମ୍ କାଦା, ହାର୍ ନେୟା ଆପେୟାଃ ପାଡ଼େତେ ନାହାଲା, ମେନ୍ଦୋ ପାର୍ମେଶ୍ଵାର୍ ରାଃ ଦାନ୍ ତାନାଃ; ହାର୍ କାମି ରାଃ ଲେକାତେ ନାହାଲା, କାରେଦୋ ଜେତାଏଗି ଘାମାଣ୍ଡ୍ ରିକାତେୟାଃଏ। ଚିୟାଃଚି ଆବୁ ଇନିଜାଃ ବାଇୟାକାନ୍ କୋ ତାନ୍‍ବୁ, ଆଡୋଃ ମାସୀହ୍ ୟୀଶୁ ରେ ଏନ୍ ବୁଗିନ୍ କାମି-କାମି ଲାଗିନ୍ତେ ଶିର୍ଜାଅକାନାବୁ ଅକନ୍ କୋକେ ପାର୍ମେଶ୍ଵାର୍ ସିଦା ଏତେ ଆବୁୱାଃ ରିକାଲାଗିନ୍ ସେକାଡ଼୍ କାଦାଏ। ନେୟା ଲାଗିନ୍ତେ ପାହୋମେ ପେ, ଚି ଆପେ ଦୋ ହୋଡ଼ମୋଲେକାତେ ଏଟାଃଜାତି ତାନ୍‍ପେ, (ହାର୍ ଅକନ୍ ହୋଡ଼ୋକୋ ହୋଡ଼ମୋ ରାଃ ତିଈ ତେ ବାଇୟାକାନ୍ ଖାତ୍ନା ତେ ଖାତ୍ନାକାନ୍‍କୋ କାଜିଅଃୱାକୋ, ଇନ୍‍କୁ ଆପେକେ କାଖାତ୍ନାକାନ୍ କାଜିୟାକୋ), ଇମ୍ତା ଆପେ ମାସୀହ୍ ତେ ଆଲାଗ୍, ଆଡୋଃ ସାଲାକାନ୍ ଇସ୍ରାଏଲୀ ହୋଡ଼ୋକୋ ଏତେ ଗେନାକାନ୍ ତାଇକେନାପେ, ହାର୍ କିରିୟା କାଜି ରେ ନିୟାମ୍‍ଥଲ୍‍କାନ୍ ରେ ମେଶା କାପେ ତାଇକେନା, ହାର୍ ଆଶ୍ରା ବାନୋଃ ଲେକା ଆଡୋଃ ଅତେଦିଶୁମ୍ ରେ ଇଶ୍ୱାର୍ ଚେତାନ୍ ରେ ବିଶ୍ଵାସ୍ ବାନୋଃ ଲେକା ତାଇନ୍ କେନାପେ। ମେନ୍ଦୋ ନାଆ ମାସୀହ୍ ୟୀଶୁ ରେ ଆପେ ଅକନ୍ କୋ ସିଦା ରେ ସାଙ୍ଗିନ୍ ତାଇନ୍ କେନାପେ, ମାସୀହ୍ ରାଃ ମାୟୋମ୍ ହୋରାତେ ନାଡ଼େଏଃ ହିଜୁଃ କାନାପେ। ଚିୟାଃଚି ମାସୀହ୍ ଆବୁକେ ଶାନ୍ତି ଏମେନିଃ ହାର୍ ମେଶା ନିଈ ତାନିଃ, ଅକନିଃ ଆବୁ ବାରାନ୍ ଜାତିକେ ମିଃ ବାଇକେଦାଏ ହାର୍ ଆଲାଗ୍ ରିକା ତେୟାଃ ଭିତ୍ କେ ଅକନାଃ ଥାଲା ରେ ତାଇନ୍ କେନା ଉୟୁଃ ତାଦାଏ। ହାର୍ ଆପାନାଃ ହୋଡ଼ମୋ ରେ ଖିସ୍ ମାନେ ଏନ୍ ଆଇନ୍ ଅକନାଃ ରାଃ ଆନାଚୁକୋ ନିୟାମ୍ ଲେକାତେ ତାଇନ୍ କେନା, ଏନାକେ ମେଟାଅ ତାଦାଏ ଏନାତେ ବାରିୟା ଜାତିକିନ୍ କେ ଆପାନାଃ ରେ ମିୟାଃ ନାୱା ହୋଡ଼ ସିର୍ଜାଅକେତେ ମେଶା କେୟାଏ। ଆଡୋଃ କ୍ରୁଶ୍ ଚେତାନ୍ ରେ ଖିସ୍ କେ ନାଶ୍ କେତେ ଏନା ରାଃ ହୋରାତେ ବାରାନ୍ ଜାତି କିନ୍‍କେ ମିୟାଃ ହୋଡ଼ମୋ ବାଇକେତେ ପାର୍ମେଶ୍ଵାର୍ ଲୋଃ ମେନେଶା ତାଆଏ। ଇନିଃ ହିଜୁଃ କେତେ ଆପେ କେ ଅକନ୍‍କୋ ପାର୍ମେଶ୍ଵାର୍ ତେ ସାଙ୍ଗିନ୍ ତାଇକେନାପେ ଆଡୋଃ ଇନ୍‍କୁକେ ଅକନ୍‍କୋ ନାଡ଼େଏ ରେ ତାଇନ୍ କେନାକୋ, ବାରାନ୍ କୋକେ ମେନେଶା ରାଃ ସୁସାମାଚାର୍ ଉଦୁବ୍ କେଦାଏ। ଚିୟାଃଚି ଇନିଜାଃ ହୋରାତେଗି ଆବୁ ବାରାନ୍ କୋୱାଃ ମିୟାଃ ଆତ୍ମା ରେ ଆପୁ ପାର୍ମେଶ୍ଵାର୍ ତାଃ ଥେବାଃ ହୋବାଅଃତାନା। ଏନାମେନ୍ତେ ନାଆ ଆପେ ଏଟାଃଦିଶୁମ୍ ରେନ୍ ଆଡୋଃ ଏଟାଃଅଡ଼୍ଆଃ ରେନ୍ ନାହାଲାପେ, ମେନ୍ଦୋ ପାବିତାର୍ ହୋଡ଼ୋକୋ ଲୋଃ ମିୟାଃ ହାତୁ ରେନ୍ କୋ ହାର୍ ପାର୍ମେଶ୍ଵାର୍ ରାଃ ଅଡ଼୍ଆଃ ରେନ୍ କୋ ହୋବାଜାନାପେ। ହାର୍ କୁଲାକାନ୍ ଚେଲା କୋୱାଃ ହାର୍ ନାବୀକୋୱାଃ ନେଓ ରେ ମାଣ୍ଡାଅକାନାପେ, ଏନାରାଃ କୋଚା ଦିରି ମାସୀହ୍ ୟୀଶୁ ଆଏଃଗି ତାନିଃ। ଅକନିଜାଃ ରେ ସବେନାଃ ବାଇକାନ୍ ମିଃ ତେ ମେଶା କେତେ ପ୍ରାଭୁ ରେ ମିୟାଃ ପାବିତାର୍ ମାନ୍ଦିର୍ ବାଇ ଇଦିଅଃତାନା। ଅକନିଜାଃ ରେ ଆପେ ହଗି ପାବିତାର୍ ଆତ୍ମା ରାଃ ହୋରାତେ ପାର୍ମେଶ୍ଵାର୍ ତାଇନ୍ ଜାଗା ହୋବାଅଃ ଲାଗିନ୍ତେ ମିଃତେ ବାଇୟୋଃ ତାନାପେ। ଏନାମେନ୍ତେ ଇଙ୍ଗ୍ ପାଉଲୁସ୍ ଆପେ ଏଟାଃଜାତି କୋ ଲାଗିନ୍ ମାସୀହ୍ ୟୀଶୁ ରାଃ ଥୋଲାକାନ୍ ହୋଡ଼ ତାନିଙ୍ଗ୍ ଆଗାର୍ ଆପେ ପାର୍ମେଶ୍ଵାର୍ ରାଃ ଏନ୍ ଆନୁଗ୍ରାହ୍ ରାଃ ସାଲାକାନ୍ ସାମାଚାର୍ କେ ଆୟୁମ୍ କାଦାପେ ଅକନାଃ ଆପେୟାଃ ଲାଗିନ୍ ଇଙ୍ଗ୍‍କେ ଏମାକାନା। ମାନେ ନେୟା ଚି ଏନ୍ କାଜି ରାଃ ମୁଣ୍ଡି ଇଙ୍ଗ୍ଆଃ ରେ ଉଦୁବ୍ ଜାନା, ଜେଲେକା ଇଙ୍ଗ୍ ସିଦା ତେଗି ହୁଡିଙ୍ଗ୍ ଲେକା ଉଦୁବ୍ ଛାବା କାଦାଇଙ୍ଗ୍, ଏନାକେ ଆପେ ପାଢ଼ାଅ କେତେ ଆପେ ସାରି ଧାଡ଼ିୟାପେ ଚି ଇଙ୍ଗ୍ ମାସୀହ୍ ରାଃ ଏନ୍ ମୁଣ୍ଡି କେ କୋତାଃ ସାନ୍ତେ ବୁଝାଅଃତାନିଙ୍ଗ୍। ଅକନାଃକେ ଆଡୋଃ-ଏଟାଃ ସାମାୟ୍ ରେ ହୋଡ଼ୋ-ହୋନ୍ କୋକେ ନେକା କାଉଦୁବ୍ ଲେନ୍ ତାଇନା, ଜେଲେକା ଚି ପାବିତାର୍ ଆତ୍ମା ରାଃ ହୋରାତେ ନାଆ ଆଜାଃ ପାବିତାର୍ କୁଲାକାନ୍ ଚେଲାକୋ ତାଃ ହାର୍ ନାବୀ କୋତାଃ ଉଦୁବ୍ କାନା। ମାନେ ନେୟା ଚି ମାସୀହ୍ ୟୀଶୁ ରେ ସୁସାମାଚାର୍ ରାଃ ହୋରାତେ ଏଟାଃଜାତି ହୋଡ଼ୋକୋ ଇସ୍ରାଏଲ୍ ହୋଡ଼ୋକୋ ଲୋଃ ହାନାଟିଙ୍ଗ୍ ରେ ମେଶା ଧାଡ଼ିୟୋଃୱାକୋ, ହାର୍ ମିୟାଃଗି ହୋଡ଼ମୋ ରାଃ ହାର୍ କିରିୟା ରାଃ ହାନାଟିଙ୍ଗ୍ ନାମେ କୋ ତାନ୍‍କୋ। ହାର୍ ଇଙ୍ଗ୍ ପାର୍ମେଶ୍ଵାର୍ ରାଃ ଆନୁଗ୍ରାହ୍ ରାଃ ଏନ୍ ଦାନ୍ ଲେକାତେ, ଅକନାଃ ଇନିଜାଃ ପେଡ଼େଏ ରାଃ କାମି ରାଃ ଲେକାତେ ଇଙ୍ଗ୍‍କେ ଏମାକାନା, ଏନ୍ ସୁସାମାଚାର୍ ରାଃ ଦାସୀ ବାଇଜାନିଙ୍ଗ୍। ଇଙ୍ଗ୍ଆଃ ଚେତାନ୍ ରେ ଅକନିଃଚି ସବେନ୍ ପାବିତାର୍ ହୋଡ଼ୋ କୋଏତେ ହୁଡିଙ୍ଗ୍ ଏତେହୁଡିଙ୍ଗ୍ ତାନିଙ୍ଗ୍, ନେୟା ଆନୁଗ୍ରାହ୍ ହୋବାଜାନା ଚି ଇଙ୍ଗ୍ ଏଟାଃଜାତି କୋକେ ମାସୀହ୍ ରାଃ କାଆଟ୍‍କାର୍ ଉରୁମ୍ ଧାଡ଼ିୟୋଃ ଧାନ୍ ରାଃ ସୁସାମାଚାର୍ ଉଦୁବାକୋୱାଇଙ୍ଗ୍। ହାର୍ ସବେନ୍ କୋୱାଃ ରେ ନେ କାଜିକେ ଉଦୁବ୍ ୟାଇଙ୍ଗ୍ ଚି ଏନ୍ ମୁଣ୍ଡି ରାଃ କାଜିକାମିକୋ ଚିନାଃ ତାନାଃ, ଅକନାଃ ସବେନ୍ କୋୱାଃ ସିର୍ଜାଅ ନିଈ ପାର୍ମେଶ୍ଵାର୍ ରେ ଯୁଗ୍-ଯୁଗ୍ ଏତେ ଉକୁଲେନ୍ ତାଇକେନା। ଏନାତେ ନାଆ କାଲିସିୟା ରାଃ ହୋରାତେ, ପାର୍ମେଶ୍ଵାର୍ ରାଃ ରାକାମ୍-ରାକାମ୍ ରାଃ ସେଣା ଏନ୍ ରାଇଜ୍ ତାନ୍ କୋୱାଃ ହାର୍ ଆଧିକାରୀ କୋୱାଃ ଚେତାନ୍ ରେ ଅକନ୍ କୋ ସିର୍ମାଦିଶୁମ୍ ରାଃ ଜାଗା ରେ ମେନାକୋୱା, ଉଦୁବ୍ କୋୱାଏ। ଏନ୍ ଯୁଗ୍-ଯୁଗ୍ ରାଃ ସାନାଙ୍ଗ୍ ଲେକାତେ, ଅକନାଃ ଇନିଃ ଆବୁୱାଃ ପ୍ରାଭୁ ୟୀଶୁ ମାସୀହ୍ ରେ ରିକା ଲେଦାଏ। ଇନିଃରେ ଆବୁକେ ଇନିଜାଃ ଚେତାନ୍ ରେ ବିଶ୍ଵାସ୍ ମାଣ୍ଡାଅ ରାଃ ହୋରାତେ ସାହାସ୍ ହାର୍ ଭାରୋସା ଲୋଃ ପାର୍ମେଶ୍ଵାର୍ ନାଡ଼େଏ ହିଜୁଃ ରାଃ ଆଧିକାର୍ ନାମ୍ ନା। ଏନାଲାଗିନ୍ତେ ଇଙ୍ଗ୍ ଆର୍ଜି ତାନିଙ୍ଗ୍ ଚି ଅକନ୍ ଦୁକୁ ଆପେୟାଃ ଲାଗିନ୍ତେ ଇଙ୍ଗ୍‍କେ ହୋବାଅଃ ତାନା, ଏନା ରାଃ ଚାଲ୍ତେ ସାହାସ୍ ଆଲୋପେ ବାଗିୟା, ଚିୟାଃଚି ଏନାରେ ଆପେୟାଃ ମାନାରାଙ୍ଗ୍ ମେନାଃ। ଇଙ୍ଗ୍ ନେୟା ମେନ୍ତେ ଏନ୍ ଆପୁ ପାର୍ମେଶ୍ଵାର୍ ତାଃ ଇକ୍ଡ଼ୁମ୍ ତାନିଙ୍ଗ୍, ଅକନିଜାଃ ତେ ସିର୍ମାଦିଶୁମ୍ ହାର୍ ଅତେ ରେ, ସବେନ୍ କିଲି ରେନ୍ ହୋଡ଼ୋକୋୱାଃ ନୁତୁମ୍ ମାଣ୍ଡାଅଃ ତାନା। ଇଙ୍ଗ୍ ବିନ୍ତି ତାନିଙ୍ଗ୍ ଚି ଇନିଃ ଆଜାଃ ମାନାରାଙ୍ଗ୍ ରାଃ ଧାନ୍ ରାଃ ଲେକାତେ ଆପେକେ ନେୟା ଦାନ୍ ଏମେକାଏ, ଏନାତେ ଆପେ ଇନିଜାଃ ଆତ୍ମା ତେ ଆପେୟାଃ ଭିତାର୍ ହୋଡ଼ ରେ ପେଡ଼େଏ ନାମ୍ ଇଦିପେ; ହାର୍ ବିଶ୍ଵାସ୍ ରାଃ ହୋରାତେ ମାସୀହ୍ ଆପେୟାଃ ମୋନ୍ ରେ ତାଇନ୍ କାଏ ଏନାତେ ଆପେ ଦୁଲାଡ଼୍ ରେ ରେହେଃ ସାବ୍ କେତେ ହାର୍ ନେଓ ମାଣ୍ଡାଅ କେତେ, ସବେନ୍ ପାବିତାର୍ ହୋଡ଼ୋ କୋଲୋଃ ବୁଗିନ୍ ଲେକାତେ ବୁଝାଅଃ ଲାଗିନ୍ତେ ପେଡ଼େଏ ନାମେପେ, ଏନାତେ ଇନିଜାଃ ଚାକାର୍, ହାର୍ ଜିଲିଙ୍ଗ୍ ହାର୍ ସାଲାଙ୍ଗୀ, ହାର୍ ଈକିର୍ ଚିମିନ୍ ମେନାଃ, ହାର୍ ମାସୀହ୍ ରାଃ ଏନ୍ ଦୁଲାଡ଼୍ କେ ସାରିଧାଡ଼ିପେ ଅକନାଃ ସେଣା ତେହ ମାରାଙ୍ଗ୍ ତାନାଃ ଏନାତେ ଆପେ ପାର୍ମେଶ୍ଵାର୍ ରାଃ ସବେନ୍ ଫେରେଃକାନ୍ ତେପେ ଫେରେଃ ଇଦିଅଃକା। ନାଆ ଅକନିଃ ନେକା ପେଡ଼େଜାନ୍ ମେନିଜା ଚି ଆବୁୱାଃ ଆସି ଧାଡ଼ି ହାର୍ ପାହୋମ୍ ଧାଡ଼ି ତେହ ଥିମ୍ବା କାମି ରିକାଧାଡ଼ିୟାଏ, ଏନ୍ ପେଡ଼େଏ ରାଃ ଲେକାତେ ଅକନାଃ ଆବୁ ରେ କାମିତାନାଏ, କାଲିସିୟା ରେ ହାର୍ ମାସୀହ୍ ୟୀଶୁ ରେ ଇନିଜାଃ ମାନାରାଙ୍ଗ୍ ପିଢ଼ୀ-ପିଢ଼ୀ ସାନ୍ତେ ଜାନାଓ-ଜାନାଓ ହୋବା ଇଦିଅଃକା। ଆମୀନ୍। ଏନାମେନ୍ତେ ଇଙ୍ଗ୍ ଯେ ପ୍ରାଭୁ ଲାଗିନ୍ତେ ଥୋଲାକାନାଇଙ୍ଗ୍, ଆପେ କେ ଆର୍ଜିପେ ତାନାଇଙ୍ଗ୍ ଚି ଅକନ୍ କେନେଡ଼ା ଏତେ ଆପେ କେଡ଼ାକାନ୍ ତାଇକେନାପେ, ଏନ୍ ଠାଉକା ଲେକା ସେନେପେ। ମାନେ ପୁରା ମୋନ୍ ରେ ହୁଡିଙ୍ଗ୍ଏନ୍ ତେ ହାର୍ ଲେବେଃ ମୋନ୍ ତେ, ହାର୍ ସାହାତିଙ୍ଗ୍ କେତେ ଦୁଲାଡ଼୍ ତେ ମିହୋଡ଼୍ ଏଟାଃନିଜାଃ କେ ସାହାଏପେ; ହାର୍ ମେନେଶା ରାଃ ଥୋନୋଲ୍ ରେ ଆତ୍ମା ରେ ମିଃଗି ତାଇନାବୁ ମେନ୍ତେ କୋଷିସ୍ ଏପେ। ହୋଡ଼ମୋ ମିୟାଃ ଗିୟାଃ, ହାର୍ ଆତ୍ମା ମିୟାଃ ଗିୟାଃ; ଏନ୍ ଲେକାଗି ଆପେ ହଗି ମିୟାଃ କାଜି ରେ ଆଶ୍ରା ଏପେ ମେନ୍ତେ କେଡ଼ା ଲେନ୍ ତାଇକେନାପେ। ମିୟାଃ ଗି ପ୍ରାଭୁ, ମିୟାଃ ଗି ବିଶ୍ଵାସ୍, ମିୟାଃ ଗି ବାପ୍ତିସ୍ମା, ହାର୍ ସବେନ୍ କୋୱାଃ ମିୟାଃ ଗି ପାର୍ମେଶ୍ଵାର୍ ଆଡୋଃ ଆପୁ ମେନାଇଜା, ଅକନିଃ ସବେନ୍ କୋୱାଃ ଚେତାନ୍ ରେ ହାର୍ ସବେନ୍ କୋୱାଃ ଥାଲା ରେ ହାର୍ ସବେନ୍ କୋରେ ମେନାଇଜା। ମେନ୍ଦୋ ଆବୁ କୋଏତେ ସବେନ୍ ମିପୀହୋଡ଼୍ କେ ମାସୀହ୍ ରାଃ ଦାନ୍ ରାଃ ସୋଙ୍ଗ୍‍କାନ୍ ଲେକାତେ ଆନୁଗ୍ରାହ୍ ନାମା କାନା। ଏନାମେନ୍ତେ ପାବିତାର୍ ପୁଥି କାଜିୟାଏ, “ଇନିଃ ସିର୍ମାଦିଶୁମ୍ ରେ ରାକାବ୍ ଜାନାଏ, ହାର୍ ଥୋଲାକାନ୍ କୋକେ ଥୋଲ୍ ଇଦିକେଃକୋୱାଏ, ଆଡୋଃ ହୋଡ଼ୋକୋକେ ଦାନ୍ କୋ ଏମାଃକୋୱାଏ।” (ଇନିଜାଃ ରାକାବ୍ ଜାନ୍ତେ ଆଡୋଃ ଚିନାଃ ନାମୋଃ ତାନା ଏସ୍କାର୍ ନେୟା ଚି ଇନିଃ ଅତେ ରାଃ ଲାଥାର୍ ଜାଗା ରେ ଆଡ଼୍‍ଗୁ ହ ଲେନାଏ। ହାର୍ ଅକଏ ଆଡ଼୍‍ଗୁ ଜାନାଏ ଇନିଃ ନିଈଗି ତାନିଃ ଅକନିଃ ରିମିଲ୍‍ଦିଶୁମ୍ ଏତେ ଚେତାନ୍ ହ ରାକାବ୍ ଲେନାଏ ଏନାତେ ସବେନ୍ ଜାଗା କେ ଫେରେଃୟାଏ।) ଇନିଃ ଚିମିନ୍ କୋକେ କୁଲାକାନ୍ ଚେଲା ଦୋହୋ କେତେ, ଆଡୋଃ ଚିମିନ୍ କୋକେ ଆୟାର୍କାଜିକୋ ଦୋହୋ କେତେ, ହାର୍ ଚିମିନ୍ କୋକେ ସୁସାମାଚାର୍ ଉଦୁବ୍ କୋ ଦୋହୋ କେତେ, ହାର୍ ଚିମିନ୍ କୋକେ ଗୁପିକୋ ଦୋହୋ କେତେ ହାର୍ ଶିଖାଅକୋ ଦୋହୋ କେତେ ତିଙ୍ଗୁ କେଃକୋୱାଏ, ଏନାତେ ପାବିତାର୍ ହୋଡ଼ୋକୋ ସେକାଡ଼େନ୍ କାକୋ ହାର୍ ସେୱା ରାଃ କାମି ରିକାଅଃକା ହାର୍ ମାସୀହ୍ ରାଃ ହୋଡ଼ମୋ ବାଇ ଇଦିୟୋଃକା। ଚିମିନ୍ ସାନ୍ତେ ଆବୁ ସବେନ୍ କୋ ବିଶ୍ଵାସ୍ ହାର୍ ପାର୍ମେଶ୍ଵାର୍ ରାଃ ହୋନ୍ ରାଃ ନେଲ୍ ଉରୁମ୍ ରେ ମିଃ କାବୁ ବାଇୟେନ୍ ତାନା, ହାର୍ ମିୟାଃ ପୁରାଃ ପୋକ୍ତା ହୋଡ଼ କାବୁ ବାଇୟେନ୍ ତାନା ହାର୍ ମାସୀହ୍ ରାଃ ସବେନ୍ ଫେରେଃକାନ୍ ତେ କାବୁ ଫେରେଃ ଇଦିଅଃତାନା। ଏନାମେନ୍ତେ ଆବୁ ଆୟୁର୍ତେ ସିଟିୟା-ହୋନ୍ କାବୁ ତାଇନା, ଯେ ହୋଡ଼ୋକୋୱାଃ ଲୋଗୋ ଶିଖାଅ ହାର୍ ଚାତୁର୍ ତେ, ଇନ୍‍କୁୱାଃ ଆଦ୍ ରିକା ରାଃ ସାନାଙ୍ଗ୍ ଏତେ ହାର୍ ଉପ୍‍ଦେଶ୍ ରାଃ ସବେନ୍ ହୋୟୋ ଅଟାଙ୍ଗ୍ ଏତେ ହାର୍ ନେତେ-ହାନ୍ତେ ବିୟୁର୍ ୱାବୁ। ମେନ୍ଦୋ ଦୁଲାଡ଼୍ ତେ ସାର୍ତି ରେ ସେସେନ୍ ତାନ୍ ଲୋଃ, ସବେନ୍ କାଜି କୋରେ ଅକନିଃ ବୋଅ ତାନିଃ ମାନେ ମାସୀହ୍ ରେ ହାରା ଇଦିଅଃପେ। ଅକନିଜାଃ ରେ ଗୋଟା ହୋଡ଼ମୋ, ମିଃ ତେ ଯୋଡ଼ାନ୍ ରାଃ ଦେଙ୍ଗା ତେ ମେଶା କେତେ ହାର୍ ମିଃ ତେ ବାଇଜାନ୍ତେ, ଏନାତେ ମିପୀୟାଃ ହାନାଟିଙ୍ଗ୍ ଆୟାଃ ପେଡ଼େଏ ଲେକାତେ କାମିତାନାଏ, ହାର୍ ଆଏଃ ଆପାନ୍ କେ ହାରା ଇଦିତାନ୍ ଲୋଃ ଇନିଃ ଦୁଲାଡ଼୍ ରେ ବାଇ ଇଦିୟୋଃ ତାନାଏ। ଏନାମେନ୍ତେ ଇଙ୍ଗ୍ ନେୟା କାଜିତାନିଙ୍ଗ୍ ହାର୍ ପ୍ରାଭୁ ଆଃ ନୁତୁମ୍ ତେ କାଜିପେ ତାନିଙ୍ଗ୍ ଚି ଜେଲେକା ଏଟାଃଜାତି ହୋଡ଼ୋକୋ ଆକୋୱାଃ ମୋନେ ଲେକା ସେସେନ୍ ତାନାକୋ, ଆପେ ନାଆ ଏତେ ଆୟୁର୍ତେ ନେକା ଆଲୋପେ ସେସେନା। ଚିୟାଃଚି ଇନ୍‍କୁୱାଃ ସେଣା ନୁବାଃ ଛାବାକାନା, ହାର୍ ଏନ୍ କାସାରିନ୍ ରାଃ ହୋରାତେ ଅକନାଃ ଇନ୍‍କୁୱାଃ ରେ ମେନାଃ ଆଡୋଃ ଇନ୍‍କୁୱାଃ ମୋନ୍ ରାଃ ଢିଟ୍ ଚାଲ୍ତେ ଇନ୍‍କୁ ପାର୍ମେଶ୍ଵାର୍ ରାଃ ଜୀଦାନ୍ ଏତେ ଆଲାଗ୍ କାନାକୋ; ହାର୍ ଇନ୍‍କୁ ଗିୟୁଃ ବାଗି କେତେ ସବେନ୍ ଲେକାନାଃ ଏତ୍କାନ୍ କାମି ରେ ଜିମାଜାନାକୋ ଏନାତେ ସବେନ୍ ଲେକାନାଃ ଶିତୃ କାମି ହାୟା ତେ ରିକା ୟାକୋ। ମେନ୍ଦୋ ଆପେ ମାସୀହ୍ ରାଃ ନେଲେକାନ୍ ଶିଖାଅ କାପେ ନାମ୍ କାଦା। ମେନ୍ଦୋ ଆପେ ସାର୍ତିଗୀ ମାସୀହ୍ ରାଃ କାଜି କେ ଆୟୁମ୍ କେଦାପେ, ହାର୍ ଜେଲେକା ୟୀଶୁ ରେ ସାର୍ତି ତାନାଃ, ଏନାରେଗି ଶିଖାଅ ଜାନାପେ। ଏନାତେ ଆପେ ସିଦା ସେସେନ୍ ରେୟାଃ ମାରି ହୋଡ଼ କେ ରାଡ଼ା-ଆଡ଼୍‍ଗୁଏପେ, ଅକନାଃ ବେଦା ହାୟାକୋ ଲେକା ବାଗ୍‍ଡ଼ାଅ ତାଇନାଏ। ହାର୍ ଆପେୟାଃ ମୋନ୍ ରାଃ ଆତ୍ମା ରେ ନାୱାରୁଆଡ଼େନ୍ ପେ। ହାର୍ ନାୱା ହୋଡ଼ କେ ତୁସିଙ୍ଗେନ୍ ପେ, ଅକନିଃ ପାର୍ମେଶ୍ଵାର୍ ରାଃ ଲେକା ସାର୍ତି ରାଃ ଧାରାମ୍ ହୋରା ରେ ହାର୍ ପାବିତାର୍ ରେ ସିର୍ଜାଅ କାନାଏ। ଏନାମେନ୍ତେ ହିହିଡ଼୍ ବାଗି କେତେ ସବେନ୍ ମିପୀହୋଡ଼୍ କୋ ଆପାନ୍ ନାଡ଼େଏ-ଜାପାଃ ରେନ୍ କୋକେ ସାର୍ତି ବାକାଣ୍ ଚାଏ, ଚିୟାଃଚି ଆବୁ ଦୋ ଆବୁ ରେ ମିୟାଃ ହୋଡ଼ମୋ ରାଃ ହାନାଟିଙ୍ଗ୍ କୋ ତାନ୍‍ବୁ। ଖିସ୍ ଦୋ ଖିସୋଃପେ, ମେନ୍ଦୋ ଆଲୋପେ ପାପେୟା; ଶିଙ୍ଗି ଡୁବିଜୋଃ ସାନ୍ତେ ଆପେୟାଃ ଖିସ୍ ଆଲୋ ତାଇନ୍ ଚା, ହାର୍ ଶାଏତାନ୍ କେ କାଟା ମାଣ୍ଡାଅ ଆଲୋପେ ଏମାଇୟା। କୁମ୍ଡ଼ୁକେନ୍ ନିଃ ଆଡୋଃ ଆଲୋ କୁମ୍ଡ଼ୁକାଏ, ମେନ୍ଦୋ ଆଜାଃ ତିଈ ତେ ବୁଗିନ୍ କାମିକୋ-କାମି କାମିକାଏ, ଏନାତେ ଜେତାଏ କେ ଜାହାନାଃ ଦାର୍‍କାର୍ ଇମ୍ତା ଇନିଃକେ ଏମ୍ ଧାଡ଼ିୟାଏ। ଜେତାନ୍ ଶିତୃ କାଜି ଆପେୟାଃ ମୋଚା ଏତେ ଆଲୋ ଅଡୋଙ୍ଗ୍ ଚା, ମେନ୍ଦୋ ଲାଗାତିଙ୍ଗ୍ ଇମ୍ତା ଆୟୁମ୍ ତାନ୍ ନିଜାଃ ରେ ଆନୁଗ୍ରାହ୍ ହୋବାଅଃକା ଏନାତେ ଇନିଃ ସୁଧ୍ରାଅଃକାଏ ମେନ୍ତେ ବୁଗିନ୍ କାଜିକୋ କାଜିଅଃକା। ପାର୍ମେଶ୍ଵାର୍ ରାଃ ପାବିତାର୍ ଆତ୍ମା କେ ଆଲୋପେ ଦୁକୁଇୟା, ଅକନିଃ ତେ ଆପେ ଛୋଡ଼ାଓ ରାଃ ହୁଲାଙ୍ଗ୍ ଲାଗିନ୍ତେ ଛାପ୍ କାନାପେ। ସବେନ୍ ଲେକାନ୍ ରାଃ ହାଡ଼୍ଆଃ ବାକାଣ୍, ହାର୍ ଖିସ୍ ତେ କାଉରି ହାର୍ ଖିସ୍ ହାର୍ ଝାଗ୍ଡ଼ା ହାର୍ ନିନ୍ଦା, ସବେନ୍ ହିସିଙ୍ଗା-ପାଟାଙ୍ଗା ଆପେ ତେ ସାଙ୍ଗିନ୍ ଅଃକା। ମିହୋଡ଼୍ ଏଟାଃନିଃ ରେ ଦାୟା ହାର୍ ଲିନିବୁଇ ହୋବାଅଃପେ ହାର୍ ଜେଲେକା ପାର୍ମେଶ୍ଵାର୍ ମାସୀହ୍ ରେ ଆପେୟାଃ ପାପ୍ କେ ଛାମା କେଦାଏ, ଏନ୍‍ଲେକାଗି ଆପେ ହଗି ମିହୋଡ଼୍ ଏଟାଃ ନିଃକେ ଛାମା ଏପେ। ଏନାମେନ୍ତେ ଦୁଲାଡ଼୍ ହୋନ୍‍କୋ ଲେକା ପାର୍ମେଶ୍ଵାର୍ କେ ଅତୋଙ୍ଗିପେ, ହାର୍ ଦୁଲାଡ଼୍ ରେ ସେନେପେ ଜେଲେକା ମାସୀହ୍ ହଗି ଆପେ କେ ଦୁଲାଡ଼୍ କେଦାଏ, ହାର୍ ଆବୁୱାଃ ଲାଗିନ୍ ଆଏଃ ଆପାନ୍ କେ ବୁଗିନ୍ ସୋୱାନ୍ ନାଙ୍ଗ୍ ପାର୍ମେଶ୍ଵାର୍ ରାଃ ଆୟୁର୍ ଦାଣେ ରାକାବ୍ ୟାନାଏ। ଜେଲେକା ପାବିତାର୍ ହୋଡ଼ୋ କୋକେ ଲାଗାତିଙ୍ଗ୍ ତାନାଃ, ଏନ୍‍ଲେକା ଆପେ ରେ ବ୍ୟାଭିଚାର୍, ହାର୍ ଜାଲେକାନ୍ କାଫାର୍ଚି କାମି, ୟାଦୋ ହାୟା ରାଃ କାଜିକୋ କାଆୟୁମୋଃକା। ହାର୍ ଗିୟୁଃ କାଜିକୋ, କାସେଣାନ୍ ରାଃ ବାକାଣ୍ କୋ, ଫାସିୟାର୍ କାଜିକୋ କାତାଇନ୍‍କା, ଚିୟାଃଚି ନେ ବାକାଣ୍ କୋ ଆପେକେ ଠାଉକା ନାହାଲା, ମେନ୍ଦୋ ଧାନ୍ୟାବାଦ୍ ଗି ଆୟୁମୋଃକା। ଚିୟାଃଚି ଆପେ ନେୟା ସାରିତାନାପେ ଚି ଜେତାନ୍ ବ୍ୟାଭିଚାରୀ ହୋଡ଼, କାଫାର୍ଚି ହୋଡ଼, ୟାଦୋ ହାୟାନିଃ, ଇନିଃ ଦୋ ମୁର୍ତ୍ତିପୂଜା ଲେକାନିଃ ତାନିଃ, ଇନିଃ ମାସୀହ୍ ହାର୍ ପାର୍ମେଶ୍ଵାର୍ ରାଃ ରାଇଜ୍ ରେ ଜେତାନ୍ ହାନାଟିଙ୍ଗ୍ କାଏ ନାମେୟା। ଜେତାଏ ଆପେକେ ସାମାଗୀ ବାକାଣ୍ କୋରେ ଆଲୋ ବେଦାପେକାଏ; ଚିୟାଃଚି ନେକାନ୍ କୋୱାଃ କାମି କୋରାଃ ଚାଲ୍ତେ ପାର୍ମେଶ୍ଵାର୍ ରାଃ ଖିସ୍ ଆନାଚୁ କାମାନାତିଙ୍ଗ୍ କୋୱାଃ ଚେତାନ୍ ରେ ଉୟୁଗୋଃୱା। ଏନାମେନ୍ତେ ଇନ୍‍କୁ ଲୋଃ ଆଲୋପେ ଗାତିନା। ଚିୟାଃଚି ଆପେ ଦୋ ସିଦା ନୁବାଃ ରେନ୍ ତାଇକେନାପେ ମେନ୍ଦୋ ନିମ୍ତା ପ୍ରାଭୁ ରେ ମାସ୍କାଲ୍ ରେନ୍ କୋ ତାନ୍‍ପେ, ଏନାମେନ୍ତେ ମାସ୍କାଲ୍ ରେନ୍ ହୋନ୍‍କୋ ଲେକା ସେନେପେ। (ଚିୟାଃଚି ମାସ୍କାଲ୍ ରାଃ ଯଅ ସବେନ୍ ଲେକାନାଃ ବୁଗିନାଃ, ହାର୍ ଧାରାମ୍ ହୋରା ହାର୍ ସାର୍ତି ତାନାଃ), ହାର୍ ନେୟା ଆଟ୍କାର୍ ଉରୁମେପେ ଚି ପ୍ରାଭୁ ଚିନାଃ ରେ ସୁକୁଅଃ ତାନାଏ। ନୁବାଃ ରେୟାଃ ବେକାର୍ କାମି କୋରେ ଆଲୋପେ ମେଶାନା, ମେନ୍ଦୋ ଏନାକୋ ଭୁଲ୍ ମେନ୍ତେ ଉଦୁବ୍ ଏପେ। ଚିୟାଃଚି ଇନ୍‍କୁୱାଃ ଉକୁଦାନାଙ୍ଗ୍ କାମି କୋରାଃ ବିଷାୟ୍ ହଗି ଗିୟୁଃ ରାଃ ବାକାଣ୍ ତାନାଃ। ମେନ୍ଦୋ ଚିମିନାଙ୍ଗ୍ କାମିକୋ ଭୁଲ୍ ମେନ୍ତେ ଉଦୁବ୍ ଅଃତାନା ଏନା ସବେନାଃ ମାସ୍କାଲ୍ ରେ ନେଲୋଃ ତାନା, ଚିୟାଃଚି ଅକଏ ସବେନାଃ କେ ଦେଖାଅ ତାନାଏ ଇନିଃ ମାସ୍କାଲ୍ ତାନିଃ। ଏନାମେନ୍ତେ ଇନିଃ କାଜି ତାନାଏ, “ହେ ଦୁଣୁମ୍ କାନ୍ ନିଃ ଏୟୋନ୍ ମେ ଆଡୋଃ ଗୋଜାକାନ୍ କୋଏତେ ବିରିଃମେ; ଏଣ୍ଡେ ମାସୀହ୍ ଆମ୍ କେ ମାର୍ଶାଲ୍ ମେୟାଏ।” ଏନାମେନ୍ତେ ଧ୍ୟାନ୍‍ତେ ନେଲେପେ, ଚି ଚିଲ୍‍କା ସେସେନ୍ ସେନ୍ ତାନାପେ; ଡୋଣ୍ଡୋ କୋ ଲେକା କାହା ମେନ୍ଦୋ ସେଣାନ୍ କୋ ଲେକା ସେନେପେ। ସାମାୟ୍ କେ ବୁଗିନ୍ ଲେକାତେ କାମି ରେ ଆଉୱେପେ, ଚିୟାଃଚି ନେ ହୁଲାଙ୍ଗ୍ କୋଦୋ ବେଶ୍ ନାହାଲା। ଏନାମେନ୍ତେ ଆଲୋପେ ଡୋଣ୍ଡୋଏନା, ମେନ୍ଦୋ ଧ୍ୟାନ୍‍ତେ ଆଟ୍କାର୍ ଉରୁମେପେ ଚି ପ୍ରାଭୁ ରାଃ ସାନାଙ୍ଗ୍ ଚିନାଃ ତାନାଃ। ବୁଲୋଃତେୟାଃ ନୁକେତେ ଆଲୋପେ ବୁଲୋଃୱା, ଚିୟାଃଚି ଏନାତେ ଏତ୍କାନ୍ ସେସେନ୍ ହୋବାଅଃୱା, ମେନ୍ଦୋ ପାବିତାର୍ ଆତ୍ମା ତେ ଫେରେଃ ଇଦିଅଃପେ, ହାର୍ ଆପେ-ଆପେରେ ଭାଜାନ୍ ହାର୍ ଦୁରାଙ୍ଗ୍ ହାର୍ ଆତ୍ମାନ୍ ଦୁରାଙ୍ଗ୍-ଦୁରାଙ୍ଗ୍ଏପେ, ହାର୍ ଆପାନାଃ-ଆପାନାଃ ମୋନ୍ ରେ ପ୍ରାଭୁ ଆଃ ନାଡ଼େଏ ରେ ଦୁରାଙ୍ଗ୍ ହାର୍ ଷାଡି-ସାଡିପେ। ଆଡୋଃ ସବେନ୍ ଇମ୍ତାଙ୍ଗ୍ ସବେନ୍ ବାକାଣ୍ ଲାଗିନ୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ନୁତୁମ୍ ତେ ପାର୍ମେଶ୍ଵାର୍ ଆପୁ କେ ଧାନ୍ୟାବାଦ୍ ରିକାକାତେପେ। ମାସୀହ୍ କେ ମାଇନ୍ ତାନାବୁ ଏନା ମେନ୍ତେ ମିହୋଡ଼୍ ଏଟାଃନିଜାଃ ଆଧିନ୍ ରେ ତାଇନ୍‍ପେ। ହେ ଆଣାଦୀକାନ୍ କୁଡ଼ିକୋ, ଆପାନାଃ-ଆପାନାଃ ଆଣାଦୀକାନ୍ କଡ଼ା ରାଃ ଆଧିନ୍ ରେ ନେଲେକା ତାଇନ୍‍ପେ ଜେଲେକା ପ୍ରାଭୁ ରାଃ। ଚିୟାଃଚି ଆଣାଦୀକାନ୍ କଡ଼ା ଆଣାଦୀକାନ୍ କୁଡ଼ି ରାଃ ବୋଅ ତାନିଃ ଜେଲେକା ମାସୀହ୍ କାଲିସିୟା ରାଃ ବୋଅ ତାନିଃ; ଆଡୋଃ ଆଏଃଗି କାଲିସିୟା ରାଃ ବାଞ୍ଚାଅନିଃ ତାନିଃ, ଅକନାଃ ଚି ଆଜାଃ ହୋଡ଼ମୋ ତାନାଃ। ଜେଲେକା କାଲିସିୟା ମାସୀହ୍ ରାଃ ଆଧିନ୍ ରେ ମେନାଇଜା, ଏନ୍‍ଲେକାଗି ଆଣାଦୀକାନ୍ କୁଡ଼ିକୋ ହ ସବେନ୍ ବାକାଣ୍ ରେ ଆପାନାଃ-ଆପାନାଃ ଆଣାଦୀକାନ୍ କଡ଼ାକୋୱାଃ ଆଧିନ୍ ରେ ତାଇନ୍ ଚାକୋ। ହେ ଆଣାଦୀକାନ୍ କଡ଼ାକୋ, ଆପାନାଃ-ଆପାନାଃ ଆଣାଦୀକାନ୍ କୁଡ଼ି କେ ଦୁଲାଡ଼୍ ଏପେ, ଜେଲେକା ମାସୀହ୍ ହଗି କାଲିସିୟା କେ ଦୁଲାଡ଼୍ କେତେ ଆଏଃ ଆପାନାଃ ଜୀଦାନ୍ କେ କାଲିସିୟା ଲାଗିନ୍ ଏମ୍‍ତାଦାଏ। ଏନାତେ ଏନାକେ ବାଚାନ୍ ରାଃ ହୋରାତେ ଦାଆ ରେ ଚାପି ସାଫା କେତେ ପାବିତାର୍ ବାଇୟାଏ, ହାର୍ ଏନାକେ ମିୟାଃ ଏନ୍‍ଲେକା ମାସ୍କାଲାନ୍ କାଲିସିୟା ବାଇକେତେ ଆୟାଃ ସାମାନାଙ୍ଗ୍ ରେ ତିଙ୍ଗୁୟାଏ, ଏଣ୍ତେରେ ଜେତାନ୍ ଦାଗ୍ କାହା, ଜେତାନ୍ ସୁର୍କୁଇଙ୍ଗ୍ କାହା, ଜାହାନ୍ ଏଟାଃ ଦୋଷ୍-କାଜି କାହା, ମେନ୍ଦୋ ପାବିତାର୍ ଆଡୋଃ ନିର୍ଦୋଷ୍ ତାହିନା। ନେଲେକାତେଗି ଠାଉକା ମେନାଃ, ଚି ଆଣାଦୀକାନ୍ କଡ଼ା ଆପାନାଃ-ଆପାନାଃ ଆଣାଦୀକାନ୍ କୁଡ଼ି କେ ଆପାନାଃ ହୋଡ଼ମୋ ଲେକା ଦୁଲାଡ଼୍ ମାଣ୍ତାଅ ଚାଏ। ଅକଏ ଆପାନାଃ ଆଣାଦୀକାନ୍ କୁଡ଼ି କେ ଦୁଲାଡ଼୍ ମାଣ୍ତାଅ ତାନାଏ, ଇନିଃ ଆଏଃ ଆପାନ୍ କେ ଦୁଲାଡ଼୍ ମାଣ୍ତାଅ ତାନାଏ। ଚିୟାଃଚି ଜେତାଏ ଚିଉଲା ହ ଆଜାଃ ହୋଡ଼ମୋ କେ କାଏ ହିଲାଙ୍ଗ୍ କାଦା ମେନ୍ଦୋ ଏନାକେ ଆସୁଲ୍ ହାରାୟାଏ, ଜେଲେକା ମାସୀହ୍ ହଗି କାଲିସିୟା ଲୋଃ ରିକାୟାଏ। ଏନାମେନ୍ତେ ଚି ଆବୁ ଦୋ ଇନିଜାଃ ହୋଡ଼ମୋ ରାଃ ହାନାଟିଙ୍ଗ୍ ତାନ୍‍ବୁ। “ଏନାମେନ୍ତେ ହୋଡ଼ ଆଜାଃ ଏଙ୍ଗାଆପୁ କେ ବାଗେ କେତେ ଆଜାଃ କୁଡ଼ି ଲୋଃ ମେଶା କେତେ ତାଇନୋଗାଏ, ଆଡୋଃ ଆକିନ୍ ବାରାନ୍‍କିନ୍ ମିୟାଃ ହୋଡ଼ମୋ ହୋବାଅଃୱାକିନ୍।” ନେୟା ଦୋ ମାରାଙ୍ଗ୍ ମୁଣ୍ଡି କାଜି ତାନାଃ, ମେନ୍ଦୋ ଇଙ୍ଗ୍ ନେତାଃ ରେ ମାସୀହ୍ ହାର୍ କାଲିସିୟା ରାଃ ବିଷାୟ୍ ରେ କାଜିତାନିଙ୍ଗ୍। ମେନ୍ଦୋ ଆପେ କୋଏତେ ସବେନ୍ ମିପୀୟାଃ କୋ ଆପାନାଃ ଆଣାଦୀକାନ୍ କୁଡ଼ି ତେ ଆପାନ୍ ଲେକା ଦୁଲାଡ଼୍ ମାଣ୍ତାଅ ଚାଏ, ଆଡୋଃ ଆଣାଦୀକାନ୍ କୁଡ଼ି ହଗି ଆଜାଃ କଡ଼ା କେ ମାଇନ୍ କାଏ। ହେ ହୋନ୍‍କୋ, ପ୍ରାଭୁ ରେ ଆପାନ୍ ଏଙ୍ଗାଆପୁ କିନାଃ ଆନାଚୁ ମାନାତିଙ୍ଗ୍ ଏପେ, ଚିୟାଃଚି ନେୟା ବୁଗିନ୍ ତାନାଃ। “ଆପାନାଃ ଏଙ୍ଗା ହାର୍ ଆପୁ କେ ମାଇନ୍ କିନ୍‍ମେ (ନେୟା ସିଦା ଆନାଚୁ ତାନାଃ ହାର୍ ନେୟାରେ କିରିୟା କାଜି ହ ଥୋଲ୍ କାନା) ଏନାତେ ଆମାଃ ବୁଗିନାଃ ହୋବାଅଃୱା ଆଡୋଃ ଆମ୍ ଅତେ ରେ ଥିମ୍ବାଗି ହୁଲାଙ୍ଗ୍ ସାନ୍ ଜୀହିଃ ତାଇନୋଃୱାମ୍।” ହେ ଏଙ୍ଗାଆପୁ କିନ୍, ଆପାନାଃ ହୋନ୍ କୋକେ ଆଲୋପେ ଖିସ୍ ରିକାକୋୱା, ମେନ୍ଦୋ ପ୍ରାଭୁ ଆଃ ସେଣା ଆଡୋଃ ଚେତାୱନୀ ଏମ୍ ତାନ୍ ଲୋଃ ଇନ୍‍କୁକେ ଆସୁଲ୍ ହାରା କୋପେ। ହେ ଦାସୀକୋ, ଅକନ୍‍କୋ ନେ ଅତେଦିଶୁମ୍ ରେ ଆପେୟାଃ ଗୋମ୍‍କେକୋ ତାନ୍‍କୋ, ଆପାନ୍ ସୋଜ୍ ମୋନ୍ ରାଃ ଲେକାତେ ହାର୍ ବୋରୋତାନ୍ ଲୋଃ ଆଡୋଃ ଥାର୍ଥାରାଅଃ ତାନ୍‍ଲୋଃ ଇନ୍‍କୁୱାଃ ଆନାଚୁ କୋକେ ମାନାତିଙ୍ଗ୍ଏପେ, ଜେଲେକା ମାସୀହ୍ ରାଃ ମାନାତିଙ୍ଗ୍ ତାନାପେ। ହୋଡ଼ୋକୋକେ ସୁକୁକୋ ନାଙ୍ଗ୍ ଦେଖାଅ ଲାଗିନ୍ ସେୱା ଆଲୋପେ ରିକାୟା, ମେନ୍ଦୋ ମାସୀହ୍ ରାଃ ଦାସୀକୋ ଲେକା ମୋନ୍ ଏତେ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ସେନେପେ, ହାର୍ ଏନ୍ ସେୱା କେ ହୋଡ଼ୋ କୋୱାଃ କାହା ମେନ୍ଦୋ ପ୍ରାଭୁ ଆଃ ସାରିକେତେ ସାର୍ତି ମୋନ୍ ତେ ରିକାଏପେ। ଚିୟାଃଚି ଆପେ ସାରିୟାପେ ଚି ଜାହାଁଏଗି ଚିଲ୍‍କା ବୁଗିନ୍ କାମିୟାଏ, ପ୍ରାଭୁ ଏତେ ଏନ୍‍ଲେକାଗି ନାମେୟାଏ, ଚାହେ ଇନିଃ ଦାସୀ କାନାଏ ଚାହେ କାଏ ଦାସୀ କାନାଏ। ହେ ଗୋମ୍‍କେକୋ, ଆପେ ହଗି ଏଗେର୍ ଏମ୍ ବାଗି କେତେ ଇନ୍‍କୁଲୋଃ ଏନ୍‍ଲେକାଗି ବେଓହାର୍ ମାଣ୍ଡାଏପେ; ଚିୟାଃଚି ଆପେ ସାରିୟାପେ ଚି ଇନ୍‍କୁୱାଃ ଆଡୋଃ ଆପେୟାଃ ବାରାନ୍ କିନାଃ ଗୋମ୍‍କେ ସିର୍ମାଦିଶୁମ୍ ରେ ମେନିଜା, ହାର୍ ଇନିଃ ଜେତାୟାଃ ମେଏଃମୁହାଡ଼୍ କାଏ ନେଲେୟାଏ। ଇଙ୍ଗ୍ଆଃ ଟୁଣ୍ଡୁ କାଜି ନେୟା ତାନାଃ ଚି ପ୍ରାଭୁ ରେ ଆଡୋଃ ଇନିଜାଃ ପେଡ଼େଏ ରେ ପେଡ଼େଜାନ୍ ବାଇୟେନ୍‍ପେ। ପାର୍ମେଶ୍ଵାର୍ ରାଃ ସବେନ୍ ହାତିୟାର୍ କେ ଥୋଲେନ୍ ପେ ଏନାତେ ଶାଏତାନ୍ ରାଃ ଚାଲ୍ ନାଡ଼େଏ ରେ ତିଙ୍ଗୁ ଧାଡ଼ିୟାପେ। ଚିୟାଃଚି ଆବୁୱାଃ ନେ ଲାପ୍ଡ଼ାଇ ମାୟୋମ୍ ଆଡୋଃ ମାସ୍ ତେଦୋ କାହା ମେନ୍ଦୋ ରାଇଜ୍ ତାନ୍ କୋଲୋଃ ହାର୍ ଆଧିକାରୀ କୋଲୋଃ ହାର୍ ନେ ଅତେଦିଶୁମ୍ ରେନ୍ ନୁବାଃ ରାଃ ପେଡ଼େଏ କୋଲୋଃ ହାର୍ ଏନ୍ ଏତ୍କାନ୍ କାମି କୋରାଃ ବୋଙ୍ଗାଆତ୍ମା କୋଲୋଃ ମେନାଃ ଅକନ୍ କୋ ରିମିଲ୍‍ଦିଶୁମ୍ ରେ ମେନାକୋୱା। ପାର୍ମେଶ୍ଵାର୍ ରାଃ ସବେନ୍ ହାତିୟାର୍ ଥୋଲ୍ କେପେ ଏନାତେ ଆପେ ଖାରାପ୍ ହୁଲାଙ୍ଗ୍ ରେ ତିଙ୍ଗୁ ଧାଡ଼ିୟାପେ, ଆଡୋଃ ସବେନାଃ ପୁରା କେତେ କେଟେଃ ତେ ତାଇନ୍ ଧାଡ଼ିୟାପେ। ଏନାମେନ୍ତେ ସାର୍ତି ତେ ଆପାନାଃ ମାୟାଙ୍ଗ୍ କେଟେଃ କେତେ ଆଡୋଃ ଧାରାମ୍ ରାଃ ମେଣେଏଃ ଝୁଲା ତୁସିଙ୍ଗ୍ କେତେ; ହାର୍ କାଟା ରେ ଶାନ୍ତି ରାଃ ସୁସାମାଚାର୍ ରାଃ ସେକାଡ଼େକାନ୍ ଜୁତା ତୁସିଙ୍ଗ୍ କେତେ; ହାର୍ ଏନ୍ ସବେନାଃ ଲୋଃ ବିଶ୍ଵାସ୍ ରାଃ ଢାଲ୍ ଇଦିକେତେ ସାପାଡ଼ାଅକାନ୍ ତାଇନୋଃ ପେ ଏଣ୍ତେ ରେ ଆପେ ଏନ୍ ଦୁଷ୍ଟ ଶାଏତାନ୍ ରାଃ ସବେନ୍ ଜୁଲୋଃତାନ୍ ତୀର୍ କୋକେ ଇଣିଃ ଧାଡ଼ିୟାପେ। ହାର୍ ବାଞ୍ଚାଅ ରାଃ ଟୋପି ଆଡୋଃ ଆତ୍ମା ରାଃ ତାଲ୍‍ୱାର୍ ଅକନାଃ ପାର୍ମେଶ୍ଵାର୍ ରାଃ ବାଚାନ୍ ତାନାଃ, ଏନାକେ ଇଦିକେପେ। ସବେନ୍ ଇମ୍ତା ରେ ଆଡୋଃ ସବେନ୍ ଲେକାତେ ଆତ୍ମା ରେ ବିନ୍ତି ଆଡୋଃ ଆର୍ଜି କାତେପେ, ହାର୍ ନେୟାମେନ୍ତେ ଚେତାଓ କାନ୍ ତାଇନ୍‍ପେ ଚି ସବେନ୍ ପାବିତାର୍ ହୋଡ଼ୋକୋ ନାଙ୍ଗ୍ ସାଦାଏ ବିନ୍ତି କାତେପେ, ଇଙ୍ଗ୍ଆଃ ଲାଗିନ୍ ହଗି ଚି ଇଙ୍ଗ୍‍କେ କାଜି ଇମ୍ତା ଏନ୍‍ଲେକା ପେଡ଼େଜାନ୍ ବାଚାନ୍ କୋ ଏମୋଃକା ଏନାତେ ଇଙ୍ଗ୍ ସାହାସ୍ ଲୋଃ ସୁସାମାଚାର୍ ରାଃ ମୁଣ୍ଡି କେ ଉଦୁବ୍ ଧାଡ଼ିୟାଇଙ୍ଗ୍, ଅକନାଃ ଲାଗିନ୍ତେ ଇଙ୍ଗ୍ ସିକିଡ଼ି ରେ ଥୋଲାକାନ୍ ରାଜ୍‍ଦୁତ୍ ତାନିଙ୍ଗ୍; ହାର୍ ନେୟା ୟଗି ଚି ଇଙ୍ଗ୍ ଇନିଜାଃ ବିଷାୟ୍ ରେ ଚିଲ୍‍କା ଇଙ୍ଗ୍ କେ ଲାଗାତିଙ୍ଗ୍ ତାନାଃ ଏନ୍ ଲେକାଗି ସାହାସ୍ ତେ କାଜିୟାଇଙ୍ଗ୍। ତୁଖିକୁସ୍, ଅକଏ ଦୁଲାଡ଼ାନ୍ ହାଗା ହାର୍ ବିଶ୍ଵାସେ ଲେକାନିଃ ଦାସୀ ତାନିଃ, ଆପେକେ ସବେନ୍ ବାକାଣ୍ ଉଦୁବ୍ ପେୟାଏ ଏନାତେ ଆପେ ହ ସାରିଧାଡ଼ିୟାପେ ଚି ଇଙ୍ଗ୍ ଚିଲ୍‍କା ତାଇନ୍ ତାନିଙ୍ଗ୍ ହାର୍ ଚିନାଃ ରିକାତାନିଙ୍ଗ୍। ଇନିଃକେ ଇଙ୍ଗ୍ ଆପେୟାଃ ନାଡ଼େଏ ନେୟାମେନ୍ତେ କୁଲ୍ କାଦିଙ୍ଗ୍, ଚି ଆପେ ଆଲେ ଚିଲ୍‍କା ମେନାଲେୟା ଏନାକେ ସାରିପେ, ଆଡୋଃ ଇନିଃ ଆପେୟାଃ ମୋନ୍ ରେ ସାହାସ୍ ଏମେୟାଏ। ପାର୍ମେଶ୍ଵାର୍ ଆପୁ ହାର୍ ପ୍ରାଭୁ ୟୀଶୁ ମାସୀହ୍ ରାଃ ହୋରାତେ ହାଗାକୋକେ ହାର୍ ମିଶିକୋକେ ଜୀଉସୁକୁ ହାର୍ ବିଶ୍ଵାସ୍ ଲୋଃ ଦୁଲାଡ଼୍ ନାମୋଃଚା। ଅକନ୍ କୋ ଆବୁୱାଃ ପ୍ରାଭୁ ୟୀଶୁ ମାସୀହ୍ କେ ସାର୍ତି ତେ ଦୁଲାଡ଼୍ ମାଣ୍ତାଅ ତାନାକୋ, ଏନ୍ ସବେନ୍ କୋୱାଃ ରେ ଆନୁଗ୍ରାହ୍ ହୋବାଇଦିଅଃକା। ମାସୀହ୍ ୟୀଶୁ ରାଃ ଦାସୀ ପାଉଲୁସ୍ ହାର୍ ତିମୁଥିୟୁସ୍ ଆଃ ପାଡ଼େତେ ସବେନ୍ ପାବିତାର୍ ହୋଡ଼ୋକୋୱାଃ ନୁତୁମ୍ ରେ ଅକନ୍‍କୋ ମାସୀହ୍ ୟୀଶୁ ରେ ହୋବାକେତେ ଫିଲିପ୍ପି ସାହାର୍ ରେ ତାଇନ୍ ତାନାକୋ, ହାର୍ ବିଶାପ୍ କୋକେହ ଆଡୋଃ ସବେନ୍ ଦାସୀ କୋକେହ, ଆବୁୱାଃ ଆପୁ ପାର୍ମେଶ୍ଵାର୍ ଆଡୋଃ ପ୍ରାଭୁ ୟୀଶୁ ମାସୀହ୍ ପାଡ଼େତେ ଆପେକେ ଆନୁଗ୍ରାହ୍ ଆଡୋଃ ଜୀଉସୁକୁ ନାମୋଃଚା। ଇଙ୍ଗ୍ ଚିମ୍ତାଙ୍ଗ୍-ଚିମ୍ତାଙ୍ଗ୍ ଆପେକେ ପାହୋମ୍ ୟାଇଙ୍ଗ୍, ଇମ୍ତାଙ୍ଗ୍-ଇମ୍ତାଙ୍ଗ୍ ଇଙ୍ଗ୍ଆଃ ପାର୍ମେଶ୍ଵାର୍ କେ ଧାନ୍ୟାବାଦ୍ ୟାଇଙ୍ଗ୍, ଆଡୋଃ ରାଶିକା ଲୋଃ ଇଙ୍ଗ୍ଆଃ ସବେନ୍ ବିନ୍ତି କୋରେ ଆପେ ସବେନ୍ କୋ ଲାଗିନ୍ ସାଦାଏଗି ପାର୍ମେଶ୍ଵାର୍ ଦେଙ୍ଗା କାଏ ମେନ୍ତେ ଆର୍ଜି ତାନିଙ୍ଗ୍। ଏନାମେନ୍ତେ ଚି ଆପେ ସିଦା ହୁଲାଙ୍ଗ୍ ଏତେ ଇଦିକେତେ ଇସିଙ୍ଗ୍ ସାନ୍ ୟୀଶୁ ମାସୀହ୍ ରାଃ ସୁସାମାଚାର୍ କେ ପାସ୍ରାଅ ରେ ଇଙ୍ଗ୍ଆଃ ଲୋଃ ମିଃତେ ତାଇକେନାପେ। ଇଙ୍ଗ୍‍କେ ନେ କାଜି ରାଃ ଭାରୋସା ମେନାଃ ଚି ପାର୍ମେଶ୍ଵାର୍ ଅକନିଃ ଆପେ ରେ ବୁଗିନ୍ କାମି ଏଟେଃ କେଦାଏ, ଇନିଃଗି ଏନାକେ ୟୀଶୁ ମାସୀହ୍ ରାଃ ହୁଲାଙ୍ଗ୍ ସାନ୍ତେ ପୁରାୟାଏ। ଠାଉକା ତାନାଃ ଚି ଇଙ୍ଗ୍ ଆପେ ସବେନ୍ କୋ ଲାଗିନ୍ ନେଲେକାଗି ପାହୋମେ ୟାଇଙ୍ଗ୍, ଚିୟାଃଚି ଆପେକେ ଇଙ୍ଗ୍ଆଃ ମୋନ୍ ରେ ଦୋହୋ କାଃପେୟାଇଙ୍ଗ୍, ଆଡୋଃ ଇଙ୍ଗ୍ଆଃ ଥୋନୋଲ୍ ତାଇନ୍ ଇମ୍ତା ହାର୍ ସୁସାମାଚାର୍ ରାଃ ବାଞ୍ଚାଅ ଆଡୋଃ ପ୍ରାମାଣ୍ ଏମେ ରେ ଆପେ ସବେନ୍ କୋ ଇଙ୍ଗ୍ଆଃ ଲୋଃ ଆନୁଗ୍ରାହ୍ ରେ ମିଃତେ ମେନାପେୟା। ନେୟା ରେ ପାର୍ମେଶ୍ଵାର୍ ଇଙ୍ଗ୍ଆଃ ଗୋୱା ତାନିଃ ଚି ଇଙ୍ଗ୍ ମାସୀହ୍ ୟୀଶୁ ଲେକା ଦୁଲାଡ଼୍ ମାଣ୍ଡାଅ କେତେ ଆପେ ସବେନ୍ କୋଲୋଃ ନାପାମ୍ ସାନାଙ୍ଗ୍ ତାନିଙ୍ଗ୍। ଇଙ୍ଗ୍ ନେୟା ବିନ୍ତି ତାନିଙ୍ଗ୍ ଚି ଆପେୟାଃ ଦୁଲାଡ଼୍, ସେଣା ହାର୍ ସବେନ୍ ରାକାମ୍ ରାଃ ଆଟ୍‍କାର୍ ଉରୁମ୍ ଲୋଃ ଥିମ୍ବାଗି ହାରା ଇଦିୟୋଃକା, ନେତାଃ ସାନ୍ତେ ଚି ଆପେ ବେଶ୍ ତେ ବେଶ୍ କାଜିକୋକେ ସୁକୁଅଃପେ, ହାର୍ ମାସୀହ୍ ରାଃ ହୁଲାଙ୍ଗ୍ ସାନ୍ତେ ଫାର୍ଚିକାନ୍ ବାଇତାଇନ୍ ପେ, ଆଡୋଃ ଆଲୋପେ ଦୋଷୀୟୋଃୱା। ଆଡୋଃ ଏନ୍ ଧାରାମ୍ ହୋରା ରାଃ ଯଅ ଏତେ ଅକନାଃ ୟୀଶୁ ମାସୀହ୍ ରାଃ ହୋରାତେ ହୋବାଅଃୱା, ଫେରେଃ ଇଦିଅଃପେ ଏନାତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଆଡୋଃ ସ୍ତୁତି ହୋବା କାତୋଃକା। ହେ ହାଗାକୋ, ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍ ଚି ଆପେ ନେୟା ସାରିକେପେ ଚି ଇଙ୍ଗ୍ଆଃ ରେ ଅକନାଃ ବିତାଅ କାନା, ଏନାତେ ସୁସାମାଚାର୍ ଗି ହାରା ଇଦିଜାନା। ନେତାଃ ସାନ୍ତେ ଚି ରୋମ୍ ରେନ୍ ରାଜା ରାଃ ମାହାଲ୍ ଅଡ଼୍ଆଃ ରାଃ ସବେନ୍ ପାଲ୍‍ଟାନ୍ ହାର୍ ସାରେଜାକାନ୍ ସବେନ୍ ହୋଡ଼ୋକୋ ରେ ନେୟା ଉଦୁବ୍ ଛାବାଜାନା ଚି ଇଙ୍ଗ୍ ମାସୀହ୍ ଲାଗିନ୍ ଥୋଲା କାନାଇଙ୍ଗ୍। ଆଡୋଃ ପ୍ରାଭୁ ରେ ଅକନ୍‍କୋ ହାଗା ତାନ୍‍କୋ, ଇନ୍‍କୁ ଏତେ ଥିମ୍ବାକୋ ଇଙ୍ଗ୍ଆଃ ଥୋଲେନ୍ ରାଃ ହୋରାତେ, ସାହାସ୍ ମାଣ୍ଡାଅକେତେ ପାର୍ମେଶ୍ଵାର୍ ରାଃ ବାଚାନ୍ କେ ବେଗାର୍ ବୋରୋତାନ୍ ଲୋଃ ଉଦୁବ୍ ଲାଗିନ୍ ଆଡୋଃଗି ସାହାସ୍ ତାନାକୋ। ଚିମିନାଙ୍ଗ୍ କୋଦୋ ହିସିଙ୍ଗା ଆଡୋଃ ଝାଗ୍ଡ଼ା ରାଃ ହୋରାତେ ମାସୀହ୍ ରାଃ ପାର୍ଚାର୍ ତାନାକୋ ଆଡୋଃ ଚିମିନ୍ କୋ ବୁଗିନ୍ ସାନାଙ୍ଗ୍ ତେ। ଚିମିନାଙ୍ଗ୍ କୋ ନେୟା ସାରିକେତେ ଚି ଇଙ୍ଗ୍ ସୁସାମାଚାର୍ ରାଃ ବାଞ୍ଚାଅ ଲାଗିନ୍ତେ ବାଇକାନାଇଙ୍ଗ୍, ଇନ୍‍କୁ ଦୁଲାଡ଼୍ ତେ ପାର୍ଚାର୍ ତାନାକୋ। ଆଡୋଃ ଚିମିନାଙ୍ଗ୍ କୋଦୋ ମାସୀହ୍ ରାଃ କାଜି କେ ଆପାନାଃ ସାନାଙ୍ଗ୍ ଲାଗିନ୍ତେ ଉଦୁବ୍ ତାନାକୋ, ସାର୍ତି ମୋନ୍ ତେଦୋ କାହା, ମେନ୍ଦୋ ନେୟା ପାହୋମ୍ କେତେ ଚି ଇଙ୍ଗ୍ଆଃ ଥୋନୋଲ୍ ରେ ଇଙ୍ଗ୍ଆଃ ଲାଗିନ୍ ସାସ୍ତି ବାଇଧାଡ଼ିୟାକୋ। ଦୋ ଚିନାଃ ହୋବାଜାନା? ଖାଲି ନେୟା ଚି ସବେନ୍ ଲେକାତେ, ହୋବା ଧାଡ଼ିୟୋଃୱା ବାହାନା ଲେକାତେ, ୟାଦୋ ହୋବା ଧାଡ଼ିୟୋଃୱା ସାର୍ତି ଲେକାତେ, ମାସୀହ୍ ରାଃ କାଜି ଉଦୁବଃ ତାନା। ଆଡୋଃ ଇଙ୍ଗ୍ ନେୟାତେ ରାଶିକା ମେନାଇଙ୍ଗ୍‍ୟା ଆଡୋଃ ରାଶିକା ତାଇନୋଃୱାଇଙ୍ଗ୍। ଚିୟାଃଚି ଇଙ୍ଗ୍ ସାରି ତାନାଇଙ୍ଗ୍ ଚି ଆପେୟାଃ ବିନ୍ତି ରାଃ ହୋରାତେ, ଆଡୋଃ ୟୀଶୁ ମାସୀହ୍ ରାଃ ଆତ୍ମା ରାଃ ଦେଙ୍ଗା ନାମ୍ ହୋରାତେ, ଇଙ୍ଗ୍ଆଃ ବାଞ୍ଚାଅ ହୋବାଅଃୱା। ଇଙ୍ଗ୍ ଦୋ ନେୟାଗି ପୁରାଃ ନେଲ୍ ହୋରା ତାନାଇଙ୍ଗ୍ ହାର୍ ଆଶ୍ରା ମାଣ୍ଡାଅ ତାନାଇଙ୍ଗ୍ ଚି ଇଙ୍ଗ୍ ଜାହାନ୍ କାଜି ରେ କାଇଙ୍ଗ୍ ଗିୟୁଗୋଃଚା। ମେନ୍ଦୋ ଜେଲେକା ଇଙ୍ଗ୍ଆଃ ମାରାଙ୍ଗ୍ ସାହାସ୍ ଲେକାତେ ମାସୀହ୍ ରାଃ ମାନାରାଙ୍ଗ୍ ଇଙ୍ଗ୍ଆଃ ହୋଡ଼ମୋ ରାଃ ହୋରାତେ ଜାନାଓ ହୋବାଅଃ ତାନା, ଏନ୍‍ଲେକା ଗି ନାଆ ହଗି ହୋବାଅଃକା, ଚାହେ ଇଙ୍ଗ୍ ଜୀହିଦ୍ ତାଇନାଇଙ୍ଗ୍ ୟାଦୋ ଗୋଏଃ କେନୋଗାଇଙ୍ଗ୍। ଚିୟାଃଚି ଇଙ୍ଗ୍ଆଃ ଲାଗିନ୍ ଜୀହିଦ୍ ତାଇନ୍ ମାସୀହ୍ ତାନାଃ ହାର୍ ଗୋଏଃ କେନୋଃ ତେୟାଃ ଆଡୋଃଗି ଲାଭ୍ ତାନାଃ। ମେନ୍ଦୋ ଆଗାର୍ ହୋଡ଼ମୋ ରେ ଜୀହିଦ୍ ତାଇନୋଃଗି ଇଙ୍ଗ୍ଆଃ କାମି ଲାଗିନ୍ ଲାଭ୍ ତାନାଃ ରେଦୋ ଇଙ୍ଗ୍ କାଇଙ୍ଗ୍ ସାରିତାନା ଚି ଅକନାଃକେ ସାଲାୟାଇଙ୍ଗ୍। ମେନ୍ଦୋ ଇଙ୍ଗ୍ ବାରାନ୍ କାଜି ରାଃ ଥାଲା ରେ ପାଶେ କାନାଇଙ୍ଗ୍, ଜୀଉ ଦୋ ସାନାଙ୍ଗ୍ ତାନାଏ ଚି ବାଗି କେତେ ମାସୀହ୍ ରାଃ ଜାପାଃ ତେ ସେନ୍ କେତେ ତାଇନୋଃୱାଇଙ୍ଗ୍, ଚିୟାଃଚି ନେୟା ଥିମ୍ବାଗି ବୁଗିନ୍ ତାନାଃ। ମେନ୍ଦୋ ହୋଡ଼ମୋ ରେ ତାଇନୋଃ ଆପେୟାଃ ଲାଗିନ୍ତେ ଆଡୋଃଗି ଲାଗାତିଙ୍ଗ୍ ତାନାଃ। ଇଙ୍ଗ୍ କେ ନେୟା ରେ ଜାହାନ୍ ସାନ୍ଦେହ୍ ବାନୋଗା, ଏନାମେନ୍ତେ ଚି ଇଙ୍ଗ୍ ଜୀହିଦ୍ ତାଇନୋଗାଇଙ୍ଗ୍ ଏନା ସାରିତାନାଇଙ୍ଗ୍, ହାର୍ ଆପେ ସବେନ୍ କୋଲୋଃ ତାଇନୋଃୱାଇଙ୍ଗ୍ ଏନାତେ ଆପେ ବିଶ୍ୱାସ୍ ରେ କେଟେଃ ଇଦିୟୋଃପେ ହାର୍ ଏନାରେ ଆପେ ରାଶିକାନ୍ ତେ ତାଇନ୍‍ପେ। ଆଡୋଃ ଅକନ୍ ଘାମାଣ୍ଡ୍ ଆପେ ଇଙ୍ଗ୍ଆଃ ବିଷାୟ୍ ରେ ରିକାତାନାପେ, ଇଙ୍ଗ୍ଆଃ ଆଡୋଃଗି ଆପେୟାଃ ନାଡ଼େଏ ହିଜୁଃ ଚାଲ୍ତେ ଏନା ମାସୀହ୍ ୟୀଶୁ ରେ ଥିମ୍ବାଗି ବାଢ଼ାଅ କେନୋଃଚା। ଖାଲି ନିମିନାଙ୍ଗ୍ ରିକାଏପେ ଚି ଆପେୟାଃ ସେସେନ୍ ମାସୀହ୍ ରାଃ ସୁସାମାଚାର୍ ଲେକା ହୋବାଅଃକା ଏନାତେ ହୋବା ଧାଡ଼ିୟୋଗା ଇଙ୍ଗ୍ ହିଜୁଃକେତେ ଆପେକେ ନେଲ୍ ପେୟାଇଙ୍ଗ୍, ଚାହେ ଆପେ ତାଃ କାଇଙ୍ଗ୍ ସେଟେରୋଗା; ଏଣ୍ଡେ ହ ଆପେୟାଃ ବିଷାୟ୍ ରେ ନେୟା ଆୟୁମେୟାଇଙ୍ଗ୍ ଚି ଆପେ ମିୟାଃ ଗି ଆତ୍ମା ରେ ବାଇକେତେ ତାଇନୋଃ ତାନାପେ। ଆଡୋଃ ମିୟାଃ ମୋନ୍ ହୋବା କେତେ ସୁସାମାଚାର୍ ରାଃ ବିଶ୍ଵାସ୍ ଲାଗିନ୍ତେ କାମି ତାନାପେ। ଆଡୋଃ ଜାହାନ୍ କାଜି ରେ ବିରୋଧୀ ହୋଡ଼ୋକୋ ଏତେ କାପେ ବୋରୋତାନା। ନେୟା ଇନ୍‍କୁ ଲାଗିନ୍ ବିନାଶ୍ ରାଃ ଚିହ୍ନା ତାନାଃ, ମେନ୍ଦୋ ଆପେୟାଃ ଲାଗିନ୍ତେ ବାଞ୍ଚାଅ ନାଙ୍ଗ୍ ହାର୍ ନେୟା ପାର୍ମେଶ୍ଵାର୍ ପାଡ଼େତେ ତାନାଃ। ଚିୟାଃଚି ମାସୀହ୍ ରାଃ ହୋରାତେ ଆପେୟାଃ ରେ ନେୟା ଆନୁଗ୍ରାହ୍ ହୋବାକାନା ଚି ଏନାରେ ବିଶ୍ଵାସ୍ ଏପେ ଏନା ଭାଇର୍ କାହା ମେନ୍ଦୋ ଇନିଜାଃ ଲାଗିନ୍ତେ ଦୁକୁ ଅଗି ସାହାତିଙ୍ଗ୍ଏପେ। ଆଡୋଃ ଆପେକେ ଏନ୍‍ଲେକାଗି ପାରିଶ୍ରାମ୍ ରିକା ମେନାଃ, ଜେଲେକା ଆପେ ଇଙ୍ଗ୍‍କେ ଫିଲିପ୍ପି ସାହାର୍ ରେ ରିକାତାନ୍ ନେଲ୍ ଲେଦିଙ୍ଗ୍ଆପେ, ଆଡୋଃ ନାଆ ହଗି ଆୟୁମ୍ ତାନାପେ ଚି ଇଙ୍ଗ୍ ଥୋଲାକାନ୍ ରେ ଏନ୍‍ଲେକାଗି ରିକା ତାନିଙ୍ଗ୍। ଏନାମେନ୍ତେ ଆଗାର୍ ମାସୀହ୍ ରେ ଜାହାନ୍ ଜୀଉସୁକୁ, ହାର୍ ଦୁଲାଡ଼୍ ଏତେ ସାହାସ୍ ହାର୍ ପାବିତାର୍ ଆତ୍ମା ଲୋଃ ମିଃତେ ତାଇନ୍ ହାର୍ ଜାହାନ୍ ନାରାମ୍ ହାର୍ ଦାୟା ମେନାଃ ରେଦୋ, ଇଙ୍ଗ୍ଆଃ ନେ ରାଶିକା କେ ପୁରା ତାପେ ହାର୍ ମିଃଗି ମୋନ୍ ଲେକା ବାଇୟୋଃପେ, ହାର୍ ମିଃଗି ଦୁଲାଡ଼୍, ମିଃଗି ଜୀଉ ହାର୍ ମିଃଗି ସାନାଙ୍ଗ୍ ମାଣ୍ତାଏପେ। ଆପାନାଃ ସାନାଙ୍ଗ୍ ପୁରା ନାଙ୍ଗ୍ ୟାଦୋ ମାରାଙ୍ଗ୍ଏନ୍ ହୋବାଅଃ ନାଙ୍ଗ୍ ଜାହାନାଃ ଆଲୋପେ ରିକାୟା, ମେନ୍ଦୋ ହୁଡିଙ୍ଗ୍ଏନ୍ ବାଇୟେନ୍ତେ ମିହୋଡ଼୍ ଏଟାଃନିଃକେ ଆପାନାଃ ଏତେ ବେଶ୍ ଆଟ୍‍କାରିପେ। ଆପେ ମିପୀୟାଃକୋ ଆପେୟାଃ ଏସ୍କାର୍ ନାଙ୍ଗ୍ ଭାଇର୍ କାହା, ମେନ୍ଦୋ ଏଟାଃକୋୱାଃ ସୁକୁ ନାଙ୍ଗ୍ ହଗି ପାହୋମେପେ। ଜେଲେକା ମାସୀହ୍ ୟୀଶୁ ରାଃ ମୋନ୍ ତାଇକେନା ଏନ୍ ଲେକାଗି ଆପେୟାଃ ମୋନ୍ ହଗି ହୋବାଅଃକା; ଅକନିଃ ପାର୍ମେଶ୍ଵାର୍ ଲେକା ହୋବାକେତେ ହଗି ପାର୍ମେଶ୍ଵାର୍ ରାଃ ବାରାବାରି ଲେକା ତାଇନୋଃ କାଜିକେ ଆଏଃ ରେଏଃ-ମାଣ୍ଡାଅ ୟାଇଙ୍ଗ୍ ମେନ୍ତେ କାଏ ଆଟ୍‍କାର୍ କେଦା। ମେନ୍ଦୋ ଆଏଃ ଆପାନ୍ କେ ଏନ୍ ଲେକା ସାମା ବାଇତାଦାଏ, ହାର୍ ଦାସୀ ଲେକା ହୋବାୟାନାଏ, ହାର୍ ହୋଡ଼ ଲେକା ବାଇୟାନାଏ। ହାର୍ ହୋଡ଼ ଲେକା ନେପେଲ୍ ରେ ହୋବାୟାନ୍ତେ ଆଏଃ ଆପାନ୍ କେ ମୋନ୍ ରେ ହୁଡିଙ୍ଗ୍ଏନ୍ ନିଃ ବାଇକେଦାଏ। ହାର୍ ନେତାଃ ସାନ୍ତେ ଆନାଚୁ ମାନାତିଙ୍ଗ୍ ନିଃ ହୋବାୟାନାଏ ଚି ଗୋନୋଏଃ, ହାଁ, କ୍ରୁଶ୍ ରାଃ ଗୋନୋଏଃ ହଗି ସାହାତିଙ୍ଗ୍ କେଦାଏ। ଏନାମେନ୍ତେ ପାର୍ମେଶ୍ଵାର୍ ଇନିଃକେ ଥିମ୍ବାଗି ମାରାଙ୍ଗ୍ କିଜାଏ, ହାର୍ ଇନିଃକେ ଏନ୍ ନୁତୁମ୍ ଏମ୍ କିଜାଏ ଅକନାଃ ସବେନ୍ ନୁତୁମ୍ କୋଏତେ ମାରାଙ୍ଗ୍ ତାନାଃ, ଏନାତେ ଅକନ୍‍କୋ ସିର୍ମାଦିଶୁମ୍ ରେ ହାର୍ ଅତେ ରେ ହାର୍ ଅତେ ରାଃ ଲାଥାର୍ ରେ ମେନାକୋୱା, ଇନ୍‍କୁ ସବେନ୍ କୋ ୟୀଶୁ ରାଃ ନୁତୁମ୍ ରେ ଇକ୍‍ଡ଼ୁମେନ୍ କାକୋ; ହାର୍ ପାର୍ମେଶ୍ଵାର୍ ଆପୁ ରାଃ ମାନାରାଙ୍ଗ୍ ଲାଗିନ୍ତେ ସବେନ୍ ଆଲାଙ୍ଗ୍ କୋ ମାନାତିଙ୍ଗ୍ କାକୋ ଚି ୟୀଶୁ ମାସୀହ୍ ଗି ପ୍ରାଭୁ ତାନିଃ। ଏନାମେନ୍ତେ ହେ ଦୁଲାଡ଼୍‍କୋ, ଜେଲେକାତେ ଆପେ ସାଦାଏଗି କାଜି ମାନାତିଙ୍ଗ୍ ତାନାପେ, ଏନ୍ ଲେକାଗି ନାଆ ହଗି ଇଙ୍ଗ୍ଆଃ ଆପେ ଲୋଃ ତାଇନ୍ ଇମ୍ତା ଭାଇର୍ କାହା ମେନ୍ଦୋ ବିଶେଷ୍ କେତେ ନାଆ ଇଙ୍ଗ୍ ଆପେ ତାଃଏତେ ସାଙ୍ଗିନ୍ ରେ ତାଇନ୍ ରେ ହଗି ବୋରୋତାନ୍ ହାର୍ ଥାର୍ତାରାୱତାନ୍ ଲୋଃ ଆପାନାଃ-ଆପାନାଃ ବାଞ୍ଚାଅ ରାଃ କାମି କେ ପୁରା ଇଦିପେ। ଚିୟାଃଚି ପାର୍ମେଶ୍ଵାର୍ ଗି ତାନିଃ ଅକନିଃ ଆୟାଃ ବୁଗିନ୍ ସାନାଙ୍ଗ୍ ରାଃ ଚାଲ୍ତେ ଆପେୟାଃ ମୋନ୍ ରେ ସାନାଙ୍ଗ୍ ଆଡୋଃ କାମି, ବାରାନ୍ କାଜି ରେ କାମି ତାନାଏ। ସବେନ୍ କାମି ବେଗାର୍ କୁର୍ବୁରାୱ କେତେ ଆଡୋଃ ବେଗାର୍ କୁଲିକାପାଜି କେତେ କାମିଏପେ, ଏନାତେ ଆପେ ନିର୍ଦୋଷ୍ ହାର୍ ସୋଜ୍ ହୋଡ଼ ହୋବାକେତେ ଟେଢ଼ା ଆଡୋଃ ଖାରାପ୍ ହୋଡ଼ୋକୋୱାଃ ଥାଲା ରେ ପାର୍ମେଶ୍ଵାର୍ ରାଃ ବୁଗିନ୍ ହୋନ୍ ବାଇଏନ୍ ପେ, ଅକନ୍ କୋୱାଃ ଥାଲା ରେ ଆପେ ଜୀଦାନ୍ ରାଃ ବାଚାନ୍ ଇଦିତାନ୍ ଲୋଃ ଅତେଦିଶୁମ୍ ରେ ଜୁଲୋଃତାନ୍ ମାସ୍କାଲ୍ କୋଲେକା ମାସ୍କାଲୋଃ ତାନାପେ। ଏନାତେ ମାସୀହ୍ ରାଃ ହୁଲାଙ୍ଗ୍ ଇଙ୍ଗ୍ ମାରାଙ୍ଗ୍ ଜାନିଙ୍ଗ୍ ଲେକା ପାହୋମେ ୟାଇଙ୍ଗ୍ ଚି ଇଙ୍ଗ୍ଆଃ ନୀନିର୍ ହାର୍ ନା ଇଙ୍ଗ୍ଆଃ କାମି ସାମାଗୀ କା ହୋବାନା। ଆଗାର୍ ଇଙ୍ଗ୍‍କେ ଆପେୟାଃ ବିଶ୍ଵାସ୍ ରାଃ ଦାଣେ ଆଡୋଃ ସେୱା ରେ ଇଙ୍ଗ୍ଆଃ ମାୟୋମ୍ ଲିଙ୍ଗୀ ହୋବାଅଃ ରେ ହଗି, ଇଙ୍ଗ୍ ରାଶିକା ମେନାଇଙ୍ଗ୍‍ୟା ଆଡୋଃ ଆପେ ସବେନ୍ କୋଲୋଃ ରାଶିକାଅଃ ତାନିଙ୍ଗ୍। ଏନ୍‍ଲେକାଗି ଆପେ ହଗି ରାଶିକା ମେନାପେୟା ଆଡୋଃ ଇଙ୍ଗ୍ ଲୋଃ ରାଶିକାନ୍ ପେ। ଇଙ୍ଗ୍ ପ୍ରାଭୁ ୟୀଶୁ ରେ ଆଶ୍ରା ତାନିଙ୍ଗ୍ ଚି ତିମୁଥିୟୁସ୍ କେ ଆପେତାଃ ସେକାଡ଼୍‍ଗୀ କୁଲେୟାଇଙ୍ଗ୍, ଏନାତେ ଆପେୟାଃ ହାଲ୍ ଆୟୁମ୍ କେତେ ଇଙ୍ଗ୍ଆଃ ଜୀଉ କେ ସୁକୁ ନାମୋଗା। ଚିୟାଃଚି ଇଙ୍ଗ୍ ତାଃରେ ନେଲେକାନ୍ ହୋଡ଼ ଜେତାଏ ବାଙ୍ଗ୍ କୋୱା ଅକନିଃ ସାଫା ମୋନ୍ ତେ ଆପେୟାଃ ନାଙ୍ଗ୍ ପାହୋମ୍ ପେୟାଏ। ଚିୟାଃଚି ସବେନ୍ ଆପାନାଃ ଗି ସାନାଙ୍ଗ୍ ରାଃ ଦାଣା ରେ ତାଇନୋଃ ତାନାକୋ, ମେନ୍ଦୋ ୟୀଶୁ ମାସୀହ୍ ରାଃ କାହା। ତିମୁଥିୟୁସ୍ କେ ଆପେ ଦୋପେ ସାରିତାନା ହାର୍ ସାରିକାଇଜାପେ ଚି ଜେଲେକା ହୋନ୍ ଆପୁ ଲୋଃ ରିକାୟାଏ, ଏନ୍‍ଲେକାଗି ଇନିଃ ସୁସାମାଚାର୍ କେ ଫାଏଲାଓ କାମି ରେ ଇଙ୍ଗ୍ଆଃ ଲୋଃ କାମି କାଦାଏ। ଏନାମେନ୍ତେ ଇଙ୍ଗ୍‍କେ ଆଶ୍ରା ମେନାଃ ଚି ଚିଲ୍‍କା ଇଙ୍ଗ୍ ସାରି କେୟାଇଙ୍ଗ୍ ଚି ଇଙ୍ଗ୍ଆଃ ଚିନାଃ ହୋବାଅଃୱା, ଏନ୍‍ଲେକାଗି ଇଙ୍ଗ୍ ଇନିଃକେ ସେକାଡ଼୍‍ଗୀ କୁଲ୍ ତାୟିଙ୍ଗ୍। ହାର୍ ଇଙ୍ଗ୍‍କେ ପ୍ରାଭୁ ରେ ଭାରୋସା ମେନାଃ ଚି ଇଙ୍ଗ୍ ହଗି ସେକାଡ଼୍‍ଗୀ ହିଜୁଗାଇଙ୍ଗ୍। ମେନ୍ଦୋ ଇଙ୍ଗ୍ ଇପଫୃଦିତୁସ୍ କେ ଅକନିଃ ଇଙ୍ଗ୍ଆଃ ହାଗା ଆଡୋଃ ମିଃତେ କାମିନିଃ ଆଡୋଃ ଇଙ୍ଗ୍ଆଃ ଲୋଃ ସୁସାମାଚାର୍ କେ ବାଞ୍ଚାଅ ସିପାହୀ ତାନିଃ ଆଡୋଃ ଆପେୟାଃ କୁଲାକାନ୍ ନିଃ, ଆଡୋଃ ଦାର୍‍କାର୍ ଇମ୍ତା ଇଙ୍ଗ୍ କେ ଦେଙ୍ଗା ଏମେନିଃ ତାନିଃ, ଇନିଃକେ ଆପେତାଃ କୁଲ୍ ଲାଗିନ୍ ଲାଗାତିଙ୍ଗ୍ ଆଟ୍‍କାର୍ କେଦାଇଙ୍ଗ୍। ଚିୟାଃଚି ଇନିଃ ଆପେ ସବେନ୍ କୋକେ ନେନେଲ୍ ସାନାଙ୍ଗ୍ ପେ ତାଇନାଏ, ଏନାମେନ୍ତେ ଇନିଃ ଆକ୍‍ବାକାଅଃ ତାଇନାଏ ଚିୟାଃଚି ଆପେ ଇନିଃକେ ବେମାର୍ ରେ ମେନିଜାଏ ମେନ୍ତେ ଆୟୁମ୍ ଲେଦାପେ। ସାର୍ତି ଗି ଇନିଃ ଦୋ ବେମାର୍ ହୋବା ଲେନାଏ ନେତାଃ ସାନ୍ତେ ଚି ଗୋଜୋଃ ଲେକା ତାଇନ୍ କେନାଏ, ମେନ୍ଦୋ ପାର୍ମେଶ୍ଵାର୍ ଇନିଜାଃ ରେ ଦାୟା କେଦାଏ, ଆଡୋଃ ଇନିଃ ରେ ଭାଇର୍ କାହା, ମେନ୍ଦୋ ଇଙ୍ଗ୍ଆଃ ରେ ହଗି ଚି ଇଙ୍ଗ୍‍କେ ଦୁକୁ ଚେତାନ୍ ଦୁକୁ ଆଲୋକା ହୋବାଅଃଚା। ଏନାମେନ୍ତେ ଇଙ୍ଗ୍ ଇନିଃକେ କୁଲ୍ ଲାଗିନ୍ ଥିମ୍ବାଗି ସାନାଙ୍ଗ୍ କେଦାଇଙ୍ଗ୍ ଚି ଚିମ୍ତା ଆପେ ଇନିଃକେ ଆଡୋଃମିଶା ନେଲିୟାପେ ଦୋ ରାଶିକାୱାପେ ହାର୍ ଇଙ୍ଗ୍ଆଃ ହ ଚିନ୍ତା କାମ୍ତି କେନୋଗା। ଏନାମେନ୍ତେ ଆପେ ପ୍ରାଭୁ ରେ ଇନିଃକେ ଥିମ୍ବାଗି ରାଶିକା ତେ ସ୍ଵାଗାତି ପେ, ହାର୍ ନେଲେକାନ୍ କୋକେ ମାଇନ୍ କୋପେ। ଚିୟାଃଚି ଇନିଃ ମାସୀହ୍ ରାଃ କାମି ଲାଗିନ୍ ଆଜାଃ ଜୀଉ କେ ଜାହାନାଃ ଲେକା କାଏ ଆଟ୍‍କାର୍ କେତେ ଦୁକୁ ସାହାତିଙ୍ଗ୍ କେଦାଏ, ହାର୍ ଅକନାଃ ଆପେ କାପେ ଦେଙ୍ଗା ଧାଡ଼ିତେପେ ଏନା ଇଙ୍ଗ୍‍କେ ଦେଙ୍ଗା ପୁରାକେଦାଏ ହାର୍ ଗୋଜୋଃ ଚେତାନ୍ ରେ ତାଇକେନାଏ। ଏନାମେନ୍ତେ ହେ ଇଙ୍ଗ୍ଆଃ ବିଶ୍ଵାସୀ ହାଗାକୋ, ପ୍ରାଭୁ ରେ ରାଶିକାଅଃ ପେ। ଏନ୍ କାଜି କୋକେଗି ଆପେକେ ଘାରି-ଘାରି ଅଲେ ରେ ଇଙ୍ଗ୍ କେ ଦୋ ଜାହାନ୍ ଦୁକୁ ବାନୋଗା, ହାର୍ ନେୟାରେ ଆପେୟାଃ ସୁକୁ ମେନାଃ, ସେତା କୋଏତେ ବାଚାଓ କେତେ ତାଇନୋଃପେ, ଏନ୍ ଖାରାପ୍ କାମିତାନ୍ ହୋଡ଼ୋକୋ ଏତେ ବାଚାଓ କେତେ ତାଇନୋଃପେ, ଏନ୍ ଗେଃ ହାଃତାନ୍ କୋଏତେ ବାଚାଓ କେତେ ତାଇନୋଃପେ। ଚିୟାଃଚି ଖାତ୍ନା ରିକାତାନ୍ କୋ ଦୋ ଆବୁଗି ତାନ୍‍ବୁ ଅକନ୍ କୋ ପାର୍ମେଶ୍ଵାର୍ ରାଃ ଆତ୍ମା ରାଃ ଆୟାର୍ ତେ ଆରାଧାନା ତାନାବୁ, ଆଡୋଃ ମାସୀହ୍ ୟୀଶୁ ରେ ମାରାଙ୍ଗ୍ଏନ୍ ଲେକା ଆଟ୍‍କାର୍ ତାନାବୁ, ହାର୍ତେ ହୋଡ଼ମୋ ରେ ଭାରୋସା କାବୁ ମାଣ୍ତାଅ ତାନା। ମେନ୍ଦୋ ଇଙ୍ଗ୍ ଦୋ ହୋଡ଼ମୋ ରେହଗି ଭାରୋସା ମାଣ୍ତାଅ ଧାଡ଼ିୟାଇଙ୍ଗ୍। ଆଗାର୍ ଜେତାଏ ଏଟାଃକେ ହୋଡ଼ମୋ ରେ ଭାରୋସା ମାଣ୍ତାଅ ରାଃ ବିଚାର୍ ମେନାଃ ରେଦୋ, ଇଙ୍ଗ୍ ଏନାତେ ହଗି ଥିମ୍ବା ମାଣ୍ତାଅ ଧାଡ଼ିୟାଇଙ୍ଗ୍। ଆଠ୍ ଦିନ୍ ରାଃ ତାଇକେନ୍ ରେ ଇଙ୍ଗ୍ଆଃ ଖାତ୍ନା ହୋବାଜାନା, ଇସ୍ରାଏଲ୍ ରାଃ ବାଂଶ୍ ଆଡୋଃ ବେନ୍ୟାମିନ୍ ରାଃ କିଲି ରେନ୍ ତାନିଙ୍ଗ୍, ଇବ୍ରାନୀ କୋୱାଃ ଇବ୍ରାନୀ ତାନିଙ୍ଗ୍; ମୁଶା ନାବୀ ରାଃ ଆଇନ୍ ବିଷାୟ୍ ରେ କାଜି ରେଦୋ ଫାରିସୀ ହୋଡ଼ ତାନିଙ୍ଗ୍। ଉତ୍ସାହ୍ ରାଃ ବିଷାୟ୍ ରେ କାଜି ରେଦୋ କାଲିସିୟା କେ ସାତାଅନିଃ; ଆଡୋଃ ମୁଶା ନାବୀ ରାଃ ଆଇନ୍ ରାଃ ଧାରାମ୍ ହୋରା ବିଷାୟ୍ ରେ କାଜି ରେଦୋ ବେଗାର୍ ଦୋଷ୍ କାନ୍ ତାଇକେନାଇଙ୍ଗ୍। ମେନ୍ଦୋ ଅକନ୍-ଅକନ୍ କାଜି ଇଙ୍ଗ୍ଆଃ ଲାଭ ଲାଗିନ୍ ତାଇକେନା, ଏନାକୋକେ ଗି ଇଙ୍ଗ୍ ମାସୀହ୍ ରାଃ ଲାଗିନ୍ ହାନି ବୁଝାଅ ଜାନାଇଙ୍ଗ୍। ମେନ୍ଦୋ ଇଙ୍ଗ୍ ଇଙ୍ଗ୍ଆଃ ପ୍ରାଭୁ ମାସୀହ୍ ୟୀଶୁ ରାଃ ଉରୁମ୍ ରାଃ ବୁଗିନାଃ ଚାଲ୍ତେ ସବେନ୍ କାଜି କୋକେ ହାନି ବୁଝାଅଃ ତାନିଙ୍ଗ୍। ଅକନାଃ ଚାଲ୍ତେ ଇଙ୍ଗ୍ ସବେନ୍ ଜିନିଷ୍‍କୋ ରାଃ ହାନି ଉଠାଓକେଦାଇଙ୍ଗ୍, ଆଡୋଃ ଏନାକୋକେ କାତ୍ୱାର୍ ବୁଝାଅଃ ତାନିଙ୍ଗ୍, ଏନାତେଚି ଇଙ୍ଗ୍ ମାସୀହ୍ କେ ନାମିୟାଇଙ୍ଗ୍। ହାର୍ ଏନାରେ ନାମୋଃଚାଇଙ୍ଗ୍; ଏନା ଏନ୍ ଧାରାମ୍ ହୋରା ତେ କାହା ଅକନାଃ ଇଙ୍ଗ୍ ମୁଶା ନାବୀ ରାଃ ଆଇନ୍ କେ ମାନାତିଙ୍ଗ୍ ତେ ମେନାଃ, ମେନ୍ଦୋ ଏନ୍ ଧାରାମ୍ ହୋରା ଲୋଃତେ ଅକନାଃ ମାସୀହ୍ ରେ ବିଶ୍ୱାସେ ରାଃ ଚାଲ୍ତେ ମେନାଃ ହାର୍ ପାର୍ମେଶ୍ଵାର୍ ପାଡ଼େତେ ବିଶ୍ଵାସ୍ ରେ ନାମୋଃୱା; ଏନାତେ ଇଙ୍ଗ୍ ମାସୀହ୍ କେ ଆଡୋଃ ଇନିଜାଃ ଜୀବିନିରିଦ୍ ରାଃ ପେଡ଼େଏ କେ, ଆଡୋଃ ଇନିଃ ଲୋଃ ଦୁକୁ କୋରେ ମେଶାନ୍ ରାଃ ମାନେ କେ ସାରିୟାଇଙ୍ଗ୍, ଆଡୋଃ ଇନିଜାଃ ଗୋନୋଏଃ ରେ ଆଜାଃ ଲେକା ହୋବାୱାଇଙ୍ଗ୍। ଏନାତେ ଇଙ୍ଗ୍ ଜାଲେକାତେ ହଗି ଗୋଜାକାନ୍ କୋଏତେ ଜୀବିନିରିଦ୍ ତାଃ ଥେବାଗାଇଙ୍ଗ୍। ନେୟା ରାଃ ମାନେ କାହା ଚି ଇଙ୍ଗ୍ ନାମ୍ ଛାବା କେଦାଇଙ୍ଗ୍ ୟାଦୋ ପୁରା ଜାନାଇଙ୍ଗ୍; ମେନ୍ଦୋ ଏନ୍ ଜିନିଷ୍ କେ ସାସାବ୍ ଲାଗିନ୍ତେ ନିର୍ ସେନୋଃ ତାନିଙ୍ଗ୍, ଅକନାଃ ଲାଗିନ୍ ମାସୀହ୍ ୟୀଶୁ ଇଙ୍ଗ୍‍କେ ସାବ୍ ଲିଦିଙ୍ଗ୍‍ୟାଏ। ହେ ହାଗାକୋ, ଇଙ୍ଗ୍ଆଃ ବିଚାର୍ ନେୟା ନାହାଲା ଚି ଇଙ୍ଗ୍ ସାବ୍ ଛାବା ତାଦିଙ୍ଗ୍, ମେନ୍ଦୋ ଏସ୍କାର୍ ନେୟା ମିୟାଃ କାମି ତାନିଙ୍ଗ୍ ଚି ଅକନ୍ କାଜି କୋ ତାୟୋମ୍ ଜାନା ଏନାକୋକେ ରିଡ଼ିଙ୍ଗ୍ କେତେ, ଆୟୁର୍ ପାଡ଼୍ ସେନୋଃ ତାନ୍ ଲୋଃ, ମେଏଃ ତେ ଲାଖାଅ ବାଇକାନ୍ ପାଡ଼୍ ନିର୍ ତାନିଙ୍ଗ୍, ଏନାତେ ଏନ୍ ଇନାମ୍ ନାମେୟାଇଙ୍ଗ୍ ଅକନାଃ ଲାଗିନ୍ ପାର୍ମେଶ୍ଵାର୍ ଇଙ୍ଗ୍‍କେ ମାସୀହ୍ ୟୀଶୁ ରେ ଚେତାନ୍ କେଡ଼ା କାଦିଙ୍ଗାଏ। ଆବୁ କୋଏତେ ଚିମିନ୍ କୋ ବିଶ୍ଵାସ୍ ରେ ପେଡ଼େଜାନ୍ ମେନାବୁୱା, ନେୟା ଗି ବିଚାର୍ ମାଣ୍ତାଅ ଚାହି, ଆଡୋଃ ଆଗାର୍ ଜାହାନ୍ କାଜି ରେ ଆପେୟାଃ ଏଟାଃଗି ବିଚାର୍ ମେନାଃ ରେଦୋ ପାର୍ମେଶ୍ଵାର୍ ଏନାକେ ହଗି ଆପେୟାଃ ରେ ଉଦୁବା ପେୟାଏ। ଏନାମେନ୍ତେ ଚିମିନ୍ ସାନ୍ତେ ଧାଡ଼ି ତାନାବୁ, ପାର୍ମେଶ୍ଵାର୍ ଆବୁକେ ଉଦୁବାଃ କାବୁୱାଏ ଏନ୍ ଲେକାଗି ସେନେକାବୁ। ହେ ହାଗାକୋ, ଆପେ ସବେନ୍ ମେଶା କେତେ ଇଙ୍ଗ୍ଆଃ ଲେକା ସେସେନ୍‍ପେ, ଆଡୋଃ ଇନ୍‍କୁକେ ଉରୁମ୍ ମାଣ୍ଡାଅକୋପେ ଅକନ୍‍କୋ ନେଲେକା କୋ ସେସେନ୍ ତାନା ଅକନାଃ ରାଃ ଜୋନୋକା ଆପେ ଆଲେ ରେ ନାମ୍ ତାନାପେ। ଚିୟାଃଚି ଥିମ୍ବାଗି ହୋଡ଼ୋକୋ ନେଲେକା ସେସେନ୍ ତାନାକୋ, ଅକେୟାଃ ବିଷାୟ୍ ରେ ଇଙ୍ଗ୍ ଆପେକେ ଘାରି-ଘାରି ଉଦୁବ୍ କାଦିଙ୍ଗ୍, ଆଡୋଃ ନାଆ ହଗି ରାଆ-ରାଆ କେତେ କାଜିତାନିଙ୍ଗ୍ ଚି ଇନ୍‍କୁ ଆକୋୱାଃ ଚାଲ୍-ଚାଲାନ୍ ଏତେ ମାସୀହ୍ ରାଃ କ୍ରୁଶ୍ ରାଃ ବାଇରୀ ତାନ୍‍କୋ। ଇନ୍‍କୁୱାଃ ଟୁଣ୍ଡୁ କାଜି ବିନାଶ୍ ତାନାଃ, ଇନ୍‍କୁୱାଃ ଇଶ୍ୱାର୍ ଲାହେଃ ତାନାଃ, ଇନ୍‍କୁ ଆକୋୱାଃ ଗିୟୁଃ ରାଃ କାଜି କୋରେ ମାରାଙ୍ଗ୍ଏନ୍ ଆଟ୍‍କାର୍ ୟାକୋ ଆଡୋଃ ଅତେ ରାଃ ଜିନିଷ୍ କୋରେ ମୋନ୍ ଏମେୟାକୋ। ମେନ୍ଦୋ ଆବୁୱାଃ ଦିଶୁମ୍ ଦୋ ସିର୍ମାଦିଶୁମ୍ ରେୟା; ଆଡୋଃ ଆବୁ ମିୟାଃ ବାଞ୍ଚାଅନିଃ ପ୍ରାଭୁ ୟୀଶୁ ମାସୀହ୍ କେ ଏନ୍ତାଃ ଏତେ ହିଜୁଃ ରାଃ ହୋରା କେବୁ ନେଲ୍ ତାନା। ଇନିଃ ଆୟାଃ ପେଡ଼େଏ ରାଃ ଏନ୍ କାମି ଲେକାତେ ଅକନାଃ ରାଃ ଚାଲ୍ତେ ଇନିଃ ସବେନ୍ ଜିନିଷ୍‍କୋକେ ଆୟାଃ ତାଃ ରେ ମାଣ୍ତାଅ ଧାଡ଼ିୟାଏ, ଆବୁୱାଃ ନାରାଦୁରା ହାସା ହୋଡ଼ମୋ କେ ବାଦ୍‍ଲାଅ କେତେ, ଆଜାଃ ମାନାରାଙ୍ଗ୍ ରାଃ ହୋଡ଼ମୋ ଲେକା ବାଇ ତାଆଏ। ଏନାମେନ୍ତେ ହେ ଇଙ୍ଗ୍ଆଃ ଦୁଲାଡ଼ାନ୍ ହାଗାକୋ, ଆପେ ଲୋଃ ନାପାମ୍ ନାଙ୍ଗ୍ ଇଙ୍ଗ୍ଆଃ ଥିମ୍ବାଗି ସାନାଙ୍ଗ୍ ମେନାଃ, ଆପେ ଇଙ୍ଗ୍ଆଃ ରାଶିକା ଆଡୋଃ ମୁକୁଟ୍ ତାନ୍‍ପେ, ହେ ଦୁଲାଡ଼ାନ୍ ହାଗାକୋ, ପ୍ରାଭୁ ରେ ନେଲେକାଗି ବାଇକେତେ ତାହିନୋଃପେ। ଇଙ୍ଗ୍ ୟୁଅଦିୟା ହାର୍ ସୋନ୍ତୁଖେ ବାରାନ୍ ମିଶିୟାକିନ୍‍କେ ବୁଝାଅକିନ୍ ତାନିଙ୍ଗ୍, ଚି ଇନ୍‍କିନ୍ ପ୍ରାଭୁ ରେ ମିଃ ମୋନ୍ ତାଇନ୍ କାକିନ୍। ହେ ସାର୍ତି ଗାତିକାମିନିଃ, ଇଙ୍ଗ୍ ଆମ୍‍କେ ହଗି ଆର୍ଜି ମେତାନିଙ୍ଗ୍ ଚି ଆମ୍ ଏନ୍ କୁଡ଼ିକୋୱାଃ ଦେଙ୍ଗା ଏମେ, ଚିୟାଃଚି ଇନ୍‍କୁ ଇଙ୍ଗ୍ଆଃ ଲୋଃ ସୁସାମାଚାର୍ ଉଦୁବ୍ କାମି ରେ, କ୍ଲେମେନ୍ସ୍ ଆଡୋଃ ଇଙ୍ଗ୍ଆଃ ଏଟାଃ ଗାତିକାମିକୋ ଲୋଃ କାମି କାଦାକୋ, ଅକନ୍ କୋୱାଃ ନୁତୁମ୍ ଜୀଦାନ୍ ରେୟାଃ କିତାବ୍ ରେ ଅଲାକାନା। ପ୍ରାଭୁ ରେ ସବେନ୍ ଇମ୍ତା ରାଶିକା ତାଇନୋଃପେ; ଇଙ୍ଗ୍ ଆଡୋଃଗି କାଜିତାନିଙ୍ଗ୍, ରାଶିକା ତାଇନୋଃପେ। ଆପେୟାଃ ଲେବେଃ ମୋନ୍ ସବେନ୍ ହୋଡ଼ୋକୋୱାଃ ରେ ନେଲୋଃକା। ପ୍ରାଭୁ ନାଡ଼େଏ ରିୟା। ଜେତାନ୍ କାଜି କୋରାଃ ଆଲୋପେ ଚିନ୍ତାୟା; ମେନ୍ଦୋ ସବେନ୍ କାଜି କୋରେ ଆପେୟାଃ ନିବେଦାନ୍, ବିନ୍ତି ଆଡୋଃ ଆର୍ଜି କେତେ ଧାନ୍ୟାବାଦ୍ ତାନ୍ ଲୋଃ ପାର୍ମେଶ୍ଵାର୍ ରାଃ ସାମାନାଙ୍ଗ୍ ରେ ମାଣ୍ଡାଅଃକା। ଏଣ୍ଡେ ପାର୍ମେଶ୍ଵାର୍ ରାଃ ଜୀଉସୁକୁ, ଅକନାଃ ସବେନ୍ ସେଣାଏତେ ମାରାଙ୍ଗ୍ ତାନାଃ, ଆପେୟାଃ ମୋନ୍ ହାର୍ ଆପେୟାଃ ପାହୋମ୍ କୋକେ ମାସୀହ୍ ୟୀଶୁ ରେ ବାଞ୍ଚାଅ ମାଣ୍ଡାଅୟାଏ। ଏନାତେ ହେ ହାଗାକୋ, ଅକନ୍-ଅକନ୍ କାଜିକୋ ସାର୍ତି ତାନାଃ, ଆଡୋଃ ଅକନ୍-ଅକନ୍ କାଜିକୋ ମାଇନାନ୍ ତାନାଃ, ଆଡୋଃ ଅକନ୍-ଅକନ୍ କାଜିକୋ ଠାଉକା ତାନାଃ, ଆଡୋଃ ଅକନ୍-ଅକନ୍ କାଜିକୋ ପାବିତାର୍ ତାନାଃ, ଆଡୋଃ ଅକନ୍-ଅକନ୍ କାଜିକୋ ଦୁଲାଡ଼େଲେକାନ୍ ତାନାଃ, ଆଡୋଃ ଅକନ୍-ଅକନ୍ କାଜି ବୁଗିନାଃ ତାନାଃ, ମାନେ ଅକନାଃ କୋ ଆୟୁମ୍ ଲେକାନାଃ ଆଡୋଃ ସାହାରାଅ ଲେକାନାଃ କାଜିକୋ ତାନାଃ ଏନାରେ ଧ୍ୟାନ୍ ଲାଗାୱେପେ। ଅକନ୍ କାଜିକୋ ଇଙ୍ଗ୍ଆଃ ତେ ସିଖାଅକାନାପେ, ହାର୍ ଗ୍ରାହାନ୍ କାଦାପେ, ହାର୍ ଆୟୁମ୍ କାଦାପେ, ହାର୍ ଇଙ୍ଗ୍ଆଃ ରେ ନେଲ୍ କାଦାପେ, ଏନାକୋକେଗି ମାନାତିଙ୍ଗ୍ କାତେପେ, ଏଣ୍ଡେ ପାର୍ମେଶ୍ଵାର୍ ଅକନିଃ ଜୀଉସୁକୁ ଏହେମ୍ ନିଈ ତାନିଃ ଆପେୟାଃ ଲୋଃ ତାଇନୋଗାଏ। ଇଙ୍ଗ୍ ପ୍ରାଭୁ ରେ ଥିମ୍ବାଗି ରାଶିକା ମେନାଇଙ୍ଗ୍‍ୟା ଚି ନାଆ ନିମିନ୍ ଦିନ୍ ରାଃ ତାୟୋମ୍ତେ ଆପେ ଇଙ୍ଗ୍ଆଃ ଲାଗିନ୍ତେ ଆଡୋଃଗି ପାହୋମ୍ ଏଟେଃ କେଦାପେ; ସାର୍ତିଗୀ ଆପେ କୋକେ ସୁରୁ ଏତେ ନେୟା ରାଃ ବିଚାର୍ ତାଇକେନା, ମେନ୍ଦୋ ଆପେ ମୌକା କାପେ ନାମ୍ ଲେଦା। ନେୟା କାହା ଚି ଇଙ୍ଗ୍ ଇଙ୍ଗ୍ଆଃ ଘାଟି ମେନ୍ତେ ନେୟା କାଜିତାନିଙ୍ଗ୍: ଚିୟାଃଚି ଇଙ୍ଗ୍ ନେୟା ଶିଖାଅକାନିଙ୍ଗ୍ ଚି ଇଙ୍ଗ୍ ଜାଲେକାଗି ମେନାଇଙ୍ଗ୍‍ୟା, ଏନା ରେଗି ଖୁସ୍ ମେନାଇଙ୍ଗ୍‍ୟା। ଇଙ୍ଗ୍ ହୁଡିଙ୍ଗେନ୍ ହଗି ସାରିୟାଇଙ୍ଗ୍ ଆଡୋଃ ମାରାଙ୍ଗେନ୍ ହଗି ସାରିୟାଇଙ୍ଗ୍; ସବେନ୍ କାଜି ରେ ହାର୍ ସବେନ୍ ଲେକାନାଃ ରେ ବିୟୋଃ ତାଇନ୍, ରେଙ୍ଗେଃ ତାଇନ୍, ଆଡୋଃ ମାରାଙ୍ଗ୍ଏନ୍-ହୁଡିଙ୍ଗେନ୍ ଶିଖାଅ କାନିଙ୍ଗ୍। ଅକଏ ଇଙ୍ଗ୍‍କେ ପେଡ଼େଏ ଏମ୍ ତାନାଏ ଇନିଃରେ ଇଙ୍ଗ୍ ସବେନାଃ ରିକା ଧାଡ଼ିୟାଇଙ୍ଗ୍। ଏଣ୍ଡେ ହ ଆପେ ବୁଗିନାଃ ରିକାକେଦାପେ ଚି ଇଙ୍ଗ୍ଆଃ ଦୁକୁ ରେ ପାଇସା ଦେଙ୍ଗା କେତେ ଇଙ୍ଗ୍ଆଃ ଲୋଃ ମିଃଜାନାପେ। ହେ ଫିଲିପ୍ପି ରେନ୍ କୋ, ଆପେ-ଆପେଗୀପେ ସାରିତାନା ଚି ସୁସାମାଚାର୍ ପାର୍ଚାର୍ ରାଃ ଏନେଟେଃ ରେ, ଚିମ୍ତା ଇଙ୍ଗ୍ ମାକିଦୁନିୟା ରାଇଜ୍ ଏତେ ବିଦା ହୋବାନାଇଙ୍ଗ୍, ଇମ୍ତା ଆପେକେ ବାଗିକେତେ ଆଡୋଃ ଜେତାନ୍ କାଲିସିୟା ରେନ୍ କୋ ଏହେମ୍ ହାର୍ ଇଦି ବିଷାୟ୍ ରେ ଇଙ୍ଗ୍ଆଃ ଦେଙ୍ଗା କାକୋ ରିକାକାଦା। ନେଲେକାଗି ଚିମ୍ତା ଇଙ୍ଗ୍ ଥିସ୍ସଲୁନିକେ ସାହାର୍ ରେ ତାଇକେନାଇଙ୍ଗ୍, ଇମ୍ତା ହ ଆପେ ଇଙ୍ଗ୍ଆଃ ଘାଟି ପୁରା ରିକା ନାଙ୍ଗ୍ ମିଶା କାହା ମେନ୍ଦୋ ବାର୍ସା ପାଇସା ଦେଙ୍ଗା କୁଲ୍ କେଦାପେ। ନେୟା ଇଙ୍ଗ୍ କାଇଙ୍ଗ୍ କାଜିତାନା ଚି ଆପେ ଇଙ୍ଗ୍‍କେ ପାଇସା ଦେଙ୍ଗା ଏମାଇଙ୍ଗ୍ ପେ ମେନ୍ଦୋ ଇଙ୍ଗ୍ ନେଲେକାନ୍ ଯଅ ସାନାଙ୍ଗ୍ ତାନିଙ୍ଗ୍ ଅକନାଃ ଆପେୟାଃ ଲାଭ୍ ଲାଗିନ୍ ହାରା ଇଦିଅଃକା। ଇଙ୍ଗ୍ଆଃ ତାଃ ସବେନାଃ ମେନାଃ। ମେନ୍ଦୋ ଥିମ୍ବା ହେତେ ହଗି ଥିମ୍ବା ମେନାଃ; ଅକନ୍ ଜିନିଷ୍‍କୋ ଆପେ ଇପଫୃଦିତୁସ୍ ରାଃ ତିଈ ରେ କୁଲ୍ କେଦାପେ ଏନାକୋ ନାମ୍ କେତେ ଇଙ୍ଗ୍ ମୋନ୍ ତେ ଫେରେଃ ଜାନିଙ୍ଗ୍, ହେନା ଦୋ ଦୁଲାଡ଼୍ ନାମେଲେକାନାଃ ବୁଗିନ୍ ସୋୱାନ୍, ଗ୍ରାହାନ୍ ଲେକାନାଃ ଦାଣେ ତାନାଃ, ଅକନାଃ ପାର୍ମେଶ୍ଵାର୍ କେ ବେଶ୍ ସାନାଙ୍ଗ୍ଆ। ଇଙ୍ଗ୍ଆଃ ପାର୍ମେଶ୍ଵାର୍ ହଗି ମାସୀହ୍ ୟୀଶୁ ରାଃ ହୋରାତେ ମାନାରାଙ୍ଗ୍ ରେ ଆୟାଃ ଏନ୍ କିଶାଣେନ୍ ଲେକାତେ, ଆପେୟାଃ ସବେନ୍ ଲେକାନ୍ ଦାର୍‍କାର୍ କୋକେ ଫେରେଃପେୟାଏ। ଆବୁୱାଃ ପାର୍ମେଶ୍ଵାର୍ ହାର୍ ଆପୁ ରାଃ ମାନାରାଙ୍ଗ୍ ଜାନାଓ-ଜାନାଓ ହୋବାକାତୋଃକା। ଆମୀନ୍। ସବେନ୍ ପାବିତାର୍ ହୋଡ଼ୋକୋକେ, ଅକନ୍ କୋ ୟୀଶୁ ମାସୀହ୍ ରେ ମେନାକୋୱା ଜୋହାର୍ କାଜିତାକୋପେ। ଅକନ୍ ହାଗାକୋ ଇଙ୍ଗ୍ଆଃ ଲୋଃ ମେନାକୋୱା, ଆପେକେ ଜୋହାର୍ କାଜିପେତାନାକୋ। ସବେନ୍ ପାବିତାର୍ ହୋଡ଼ୋକୋ, ବିଶେଷ୍ କେତେ ବିଶ୍ଵାସୀକୋ ଅକନ୍ କୋ ରୋମ୍‍ରେନ୍ ରାଜା ରାଃ ଅଡ଼୍ଆଃ ରେନ୍ କୋ ତାନ୍‍କୋ, ଆପେକେ ଜୋହାର୍ କାଜିପେତାନାକୋ। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ଆପେୟାଃ ଆତ୍ମା ଲୋଃ ତାଇନ୍‍ଚା। ପାଉଲୁସ୍ ପାଡ଼େତେ, ଅକନିଃ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ୟୀଶୁ ମାସୀହ୍ ରାଃ କୁଲାକାନ୍ ଚେଲା ତାନିଃ, ହାର୍ ହାଗା ତିମୁଥିୟୁସ୍ ପାଡ଼େତେ, ମାସୀହ୍ ରେ ଏନ୍ ପାବିତାର୍ ଆଡୋଃ ବିଶ୍ୱାସୀ ହାଗା କୋୱାଃ ନୁତୁମ୍ ରେ ଅକନ୍‍କୋ କୁଲୁସ୍ସେ ସାହାର୍ ରେ ତାଇନ୍ ତାନାକୋ। ଆବୁୱାଃ ଆପୁ ପାର୍ମେଶ୍ଵାର୍ ରାଃ ପାଡ଼େତେ ଆପେକେ ଆନୁଗ୍ରାହ୍ ଆଡୋଃ ଜୀଉସୁକୁ ନାମ୍ କୋତାଃଚା। ଚିମ୍ତା ଆଲେ ଆପେ ଲାଗିନ୍ତେ ବିନ୍ତି ୟାଲେ, ଆଲେ ସାଦାଏ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆପୁ ମାନେ ପାର୍ମେଶ୍ଵାର୍ କେ ଧାନ୍ୟାବାଦ୍ ଏମିୟାଲେ। ଚିୟାଃଚି ଆଲେ ଆୟୁମ୍ କାଦାଲେ ଚି ମାସୀହ୍ ୟୀଶୁ ରେ ଆପେୟାଃ ବିଶ୍ଵାସ୍ ମେନାଃ, ହାର୍ ସବେନ୍ ପାବିତାର୍ ହୋଡ଼ୋକୋକେ ଆପେ ଦୁଲାଡ଼୍ ଦୋହୋୟାପେ; ଏନ୍ ଆଶ୍ରାକାନ୍ ତେୟାଃ ଜିନିଷ୍ ଲାଗିନ୍ ଅକନାଃ ଆପେ ଲାଗିନ୍ତେ ସିର୍ମାଦିଶୁମ୍ ରେ ଦୋହୋକାନା, ଅକନ୍ ବିଷାୟ୍ ରେ ଆପେ ହେନ୍ ସୁସାମାଚାର୍ ରାଃ ସାର୍ତି ବାଚାନ୍ ରେ ଆୟୁମ୍ ଛାବା କାଦାପେ, ଅକନାଃ ଆପେୟାଃ ତାଃ ସେଟେର୍ କାନା, ଆଡୋଃ ଜେଲେକା ଅତେଦିଶୁମ୍ ରେହ ସୁସାମାଚାର୍ ଯଅ ଯୋଃତାନା ହାର୍ ହାରାଇଦିଅଃ ତାନା, ଏନ୍‍ଲେକାଗି ଅକନ୍ ହୁଲାଙ୍ଗ୍ ଏତେ ଆପେ ଏନାକେ ଆୟୁମ୍ କାଦାପେ ହାର୍ ସାର୍ତି ଲେକାତେ ପାର୍ମେଶ୍ଵାର୍ ରାଃ ଆନୁଗ୍ରାହ୍ ବିଷାୟ୍ ରେ ସାରିଉରୁମ୍ କେଦାପେ, ଆପେ ରେ ହଗି ଏନ୍‍ଲେକାଗି ହୋବାଅଃତାନା। ଏନାରାଃ ଗି ସେଣା ଆପେ ଆଲେୟାଃ ଦୁଲାଡ଼ାନ୍ ଗାତିକାମି ଇପଫ୍ରାସ୍ ଏତେ ନାମ୍ କେଦାପେ, ଅକଏ ଆଲେ ଲାଗିନ୍ ମାସୀହ୍ ନାଙ୍ଗ୍ ବିଶ୍ଵାସ୍ ଲେକାନିଃ ଦାସୀ ତାନିଃ। ଇନିଃଗି ଆପେ କୋୱାଃ ଦୁଲାଡ଼୍ କେ ଅକନାଃ ପାବିତାର୍ ଆତ୍ମା ରେ ମେନାଃ ଆଲେ ତାଃ ଉଦୁବ୍ କେଦାଏ। ଏନାମେନ୍ତେ ଅକୋ ହୁଲାଙ୍ଗ୍ ତେ ନେୟା ଆୟୁମ୍ କାଦାଲେ, ଆଲେ ହ ଆପେ ଲାଗିନ୍ତେ ବିନ୍ତି ଆଡୋଃ ଆର୍ଜି ରିକା କାଲେ ବାଗିୟା ଏନାତେ ଆପେ ସବେନ୍ ଆତ୍ମାନ୍ ସେଣା ହାର୍ ଆଟ୍‍କାର୍ ଉରୁମ୍ ତେ ପାର୍ମେଶ୍ଵାର୍ ରାଃ ସାନାଙ୍ଗ୍ ରାଃ ଉରୁମ୍ ରେ ଫେରେଃ ଇଦିଅଃପେ, ଏନାତେ ଆପେୟାଃ ସେସେନ୍ ସବେନ୍ କାଜିକୋରେ ପ୍ରାଭୁ କେ ସୁକୁଇ ଲେକା ଠାଉକା ହୋବାଅଃକା, ହାର୍ ଆପେ ରେ ସବେନ୍ ଲେକାନାଃ ବୁଗିନ୍ କାମି କୋରାଃ ଯଅ ଯୋଃଚା, ହାର୍ ଆପେ ପାର୍ମେଶ୍ଵାର୍ ରାଃ ଉରୁମ୍ ରେ ହାରା ଇଦିଅଃପେ, ଇନିଜାଃ ମାନାରାଙ୍ଗ୍ ରାଃ ପେଡ଼େଏ ଲେକାତେ ସବେନ୍ ଲେକାନାଃ ପେଡ଼େଏ ତେ ପେଡ଼େଜାନ୍ ଇଦିଅଃପେ, ନେତାଃ ସାନ୍ ଚି ରାଶିକା ଲୋଃ ସବେନ୍ ଲେକାନାଃ ସାହାତିଙ୍ଗ୍ ଆଡୋଃ ସାହାଅ ପେଡ଼େଏ ଦେଖାଅ ଧାଡ଼ିୟାପେ। ଆଡୋଃ ପାର୍ମେଶ୍ଵାର୍ ଆପୁ କେ ଧାନ୍ୟାବାଦ୍ କାତେପେ, ଅକଏ ଆବୁକେ ନେଲେକା ବାଇକେଃବୁୱାଏ ଚି ମାସ୍କାଲ୍ ରେ ପାବିତାର୍ ହୋଡ଼ୋକୋ ଲୋଃ ହାନାଟିଙ୍ଗ୍ ନାମେୟାବୁ। ଇନିଃଗି ଆବୁକେ ନୁବାଃ ରାଃ ପେଡ଼େଏ ତେ ବାଞ୍ଚାଅ କେତେ ଆଜାଃ ଦୁଲାଡ଼୍ ହୋନ୍ ରାଃ ରାଇଜ୍ ରେ ବୋଲୋ କେଃବୁଆଏ, ଇନିଃରେ ଆବୁକେ ଛୋଡ଼ାଓ ମାନେ ପାପ୍ କୋରାଃ ଛାମା ନାମୋଃତାନା। ଇନିଃ ଦୋ କାନେଲୋଃ ପାର୍ମେଶ୍ଵାର୍ ଲେକା ନେଲୋଗାଏ ଆଡୋଃ ସବେନ୍ ସିର୍ଜାଅକାନ୍ ତେୟାଃ ରେ ପାହିଲା ଜାନାମ୍ ତାନିଃ। ଚିୟାଃଚି ଇନିଜାଃ ଏତେଗି ସବେନ୍ ଜିନିଷ୍ କୋ ସିର୍ଜାଅକାନା, ସିର୍ମାଦିଶୁମ୍ ରାଃ ଚାହେ ଅତେ ରାଃ, ନେଲାକାନ୍ ୟାଦୋ କାନେଲାକାନ୍, ଚିନାଃ ସିଂହାସାନ୍, ଚିନାଃ ପେଡ଼େଏ କୋ, ଚିନାଃ ରାଇଜ୍ ତାନ୍‍କୋ, ଚିନାଃ ଆଧିକାର୍, ସବେନ୍ ଜିନିଷ୍‍କୋ ଇନିଜାଃ ଏତେଗି ଆଡୋଃ ଇନିଃକେ ସେୱା ଲାଗିନ୍ ଗି ସିର୍ଜାଅକାନା। ଇନିଃଗି ସବେନ୍ ଜିନିଷ୍ କୋଏତେ ସିଦା ରେ ମେନାଇୟା, ଆଡୋଃ ସବେନ୍ ଜିନିଷ୍‍କୋ ଇନିଜାଃ ରେଗି କାମିତାନାଏ। ଇନିଃଗି ହୋଡ଼ମୋ, ମାନେ କାଲିସିୟା ରାଃ ବୋଅ ତାନିଃ; ଇନିଃଗି ମୁନୁ ତାନିଃ, ଆଡୋଃ ଗୋଜାକାନ୍ କୋଏତେ ଜୀଉ ବିରିଦାକାନ୍ କୋରେ ପାହିଲା ଜାନାମ୍ ଏନାତେ ସବେନ୍ କାଜି କୋରେ ଇନିଃଗି ମାରାଙ୍ଗ୍ ବାଇୟୋଃୱାଏ। ଚିୟାଃଚି ଆପୁ ପାର୍ମେଶ୍ଵାର୍ ନେୟା ତେଗି ସୁକୁଅଃ ତାନାଏ ଚି ଇନିଜାଃ ରେ ସବେନାଃ ଫେରେଦାକାନ୍ ତାଇନୋଃକା, ହାର୍ ଇନିଜାଃ କ୍ରୁଶ୍ ରେ ଲିଙ୍ଗିକାନ୍ ମାୟୋମ୍ ରାଃ ହୋରାତେ ମିଃରେ-ମେନେଶା କେତେ, ସବେନ୍ ଜିନିଷ୍ କୋକେ ଇନିଜାଃ ହୋରାତେ ଆଜାଃ ଲୋଃ ମେନେଶା କେୟାଏ, ଏନାକୋ ଚାହେ ଅତେ ରେ ମେନାଃ ତେୟାଃ ଚାହେ ସିର୍ମାଦିଶୁମ୍ ରେ ମେନାଃ ତେୟାଃ। ଆପେ ଦୋ ସିଦା ପାର୍ମେଶ୍ଵାର୍ ତାଃଏତେ ଗେନାକାନ୍ ତାଇକେନାପେ ଆଡୋଃ ଏତ୍କାନ୍ କାମି କୋରାଃ ଚାଲ୍ତେ ମୋନ୍ ତେ ବାଇରୀ ତାଇକେନାପେ; ଇନିଃ ଆୟାଃ ହୋଡ଼ମୋ ରେ ଗୋଏଃ ହୋରାତେ ନାଆ ଆପେକେ ହଗି ମେନେଶା କେଦାଏ ଏନାତେ ଆପେକେ ଆଜାଃ ସାମାନାଙ୍ଗ୍ ରେ ପାବିତାର୍ ଆଡୋଃ ବେଗାର୍ ନିନ୍ଦା, ଆଡୋଃ ନିର୍ଦୋଷ୍ ବାଇକେତେ ମାଣ୍ଡାଅ ପେୟାଏ। ଆଗାର୍ ଆପେ ବିଶ୍ଵାସ୍ ରାଃ ନେଓ ରେ ବାଇକାନୋଃ ୱାପେ ହାର୍ ଏନ୍ ସୁସାମାଚାର୍ ରାଃ ଆଶ୍ରା କେ ଅକନାଃକେ ଆପେ ଆୟୁମ୍ କାଦାପେ କାପେ ବାଗିରେ, ଅକନାଃ ରିମିଲ୍‍ଦିଶୁମ୍ ରାଃ ଲାଥାର୍ ଗୋଟା ସିରିଜାଅକାନ୍ ହୋଡ଼ୋକୋ ରେ ଉଦୁବ୍ କାନା, ହାର୍ ଏନାରାଃ ଇଙ୍ଗ୍, ପାଉଲୁସ୍, ସୁସାମାଚାର୍ ପାର୍ଚାର୍ ରାଃ ଦାସୀ ବାଇଜାନିଙ୍ଗ୍। ନାଆ ଇଙ୍ଗ୍ ଏନ୍ ଦୁକୁ କୋରାଃ ନାଙ୍ଗ୍ ରାଶିକାଅଃ ତାନିଙ୍ଗ୍, ଅକନାଃ ଆପେ ଲାଗିନ୍ ସାହାଅ ତାନିଙ୍ଗ୍ ହାର୍ ମାସୀହ୍ ରାଃ ସାରେଜାକାନ୍ ଦୁକୁ କୋ ନାଙ୍ଗ୍ ଇନିଜାଃ ହୋଡ଼ମୋ ଲାଗିନ୍, ମାନେ କାଲିସିୟା ଲାଗିନ୍, ଇଙ୍ଗ୍ଆଃ ହୋଡ଼ମୋ ରେ ପୁରା ତାନିଙ୍ଗ୍; ନେ କାଲିସିୟା ଲାଗିନ୍ ଇଙ୍ଗ୍ ପାର୍ମେଶ୍ଵାର୍ ରାଃ ଏନ୍ ଭାଣ୍ଡାରୀ କାମି ଲେକାତେ ସୁସାର୍ ନିଃ ବାଇନାଇଙ୍ଗ୍ ଅକନାଃ ଆପେ ଲାଗିନ୍ ଇଙ୍ଗ୍‍କେ ଜିମାକାନା, ଏନାତେ ଇଙ୍ଗ୍ ପାର୍ମେଶ୍ଵାର୍ ରାଃ ବାଚାନ୍ କେ ପୁରା-ପୁରା ପାର୍ଚାର୍ ରିକାୟାଇଙ୍ଗ୍। ମାନେ ଏନ୍ ମୁଣ୍ଡି କେ ଅକନାଃ ଯୁଗ୍-ଯୁଗ୍ ହାର୍ ପିଢ଼ୀ କୋଏତେ ଉକୁ ତାଇକେନା, ମେନ୍ଦୋ ନାଆ ଇନିଜାଃ ଏନ୍ ପାବିତାର୍ ହୋଡ଼ୋକୋ ରେ ଉଦୁବାକାନା। ଅକନ୍ କୋୱାଃ ରେ ପାର୍ମେଶ୍ଵାର୍ ଉଦୁବ୍ ସାନାଙ୍ଗ୍ କେଦାଏ ଚି ହିନ୍‍କୁ ସାରିକେକାକୋ ଚି ଏଟାଃଜାତି କୋରେ ଏନ୍ ମୁଣ୍ଡି ରାଃ ମାନାରାଙ୍ଗ୍ ଚିକ୍‍ନାଃ ତାନାଃ, ହାର୍ ଏନା ନେୟା ତାନାଃ ଚି, ମାସୀହ୍ ଅକନିଃ ମାନାରାଙ୍ଗ୍ ରାଃ ଆଶ୍ରା ତାନିଃ ଆପେ ରେ ତାହିନୋଃ ତାନାଏ। ଅକନିଜାଃ ପାର୍ଚାର୍ ରିକା କେତେ ଆଲେ ସବେନ୍ ହୋଡ଼ୋକୋକେ ଚେତାୱନୀ ଏମ୍ କୋୱାଲେ ଆଡୋଃ ପୁରା ସେଣା ତେ ସବେନ୍ ହୋଡ଼ୋକୋକେ ଶିଖାଅ କୋୱାଲେ, ଏନାତେ ଆଲେ ସବେନ୍ ମିପୀୟାଃ ହୋଡ଼ କେ ମାସୀହ୍ ରେ ବାଇସେକାଡ଼୍ କେତେ ତିଙ୍ଗୁଧାଡ଼ି କୋୱାଲେ। ହାର୍ ନେୟାଲାଗିନ୍ ଗି ଇଙ୍ଗ୍ ଇନିଜାଃ ଏନ୍ ପେଡ଼େଏ ରାଃ ଲେକାତେ ଅକନାଃ ଇଙ୍ଗ୍ଆଃ ରେ ପେଡ଼େଏ ଲୋଃ ଏସେର୍ୟାଏ, ପୁରାମୋନ୍ ଲାଗାଅ କେତେ ଖାଟାଅଃ ତାନିଙ୍ଗ୍। ଇଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି ଆପେ ସାରିକେପେ ଚି ଇଙ୍ଗ୍ ଆପେୟାଃ ଲାଗିନ୍ ଚିମିନ୍ କେଟେଃ କାମି-କାମି ତାନିଙ୍ଗ୍, ଆଡୋଃ ଏନ୍ ବିଶ୍ଵାସୀକୋ ଲାଗିନ୍ ଅକନ୍‍କୋ ଲୌଦିକିୟା ସାହାର୍ ରେ ମେନାକୋୱା, ଆଡୋଃ ଏନ୍ ସବେନ୍‍କୋ ଲାଗିନ୍ ଅକନ୍‍କୋ ଇଙ୍ଗ୍ଆଃ ଲୋଃ କାକୋ ନାପାମ୍ କାନା, ଏନାତେ ଇନ୍‍କୁୱାଃ ମୋନ୍ ରେ ସାହାସ୍ ନାମୋଃକା ଆଡୋଃ ଇନ୍‍କୁ ଦୁଲାଡ଼୍ ତେ ଆକୋରେ ଥୋଲାକାନ୍ ତାଇନୋଃ କାକୋ, ଆଡୋଃ ଇନ୍‍କୁ ପୁରା ସେଣା ତେ କିଶାଣ୍‍ଅଃ କାକୋ, ଆଡୋଃ ପାର୍ମେଶ୍ଵାର୍ ଆପୁ ରାଃ ମୁଣ୍ଡି କେ ମାନେ ମାସୀହ୍ କେ ନେଲ୍ଉରୁମି କାକୋ। ଅକନିଜାଃ ରେ ଆଟ୍‍କାର୍ ଉରୁମ୍ ଆଡୋଃ ସେଣା ରାଃ ସବେନ୍ ଭାଣ୍ଡାର୍ ଉକୁକାନା। ନେୟା ଇଙ୍ଗ୍ ନେୟାଲାଗିନ୍ତେ କାଜିତାନିଙ୍ଗ୍ ଚି ଜେତାନ୍ ହୋଡ଼ ଆପେକେ ବୁଗିନ୍ କୁଲିକାପାଜି କାଜିକୋଏତେ ଆଲୋ ଲୋଗୋପେ କାକୋ। ହୋଡ଼ମୋ ଲେକାତେ ଆପେ ତେ ସାଙ୍ଗିନ୍ ରେ ମେନାଇଙ୍ଗ୍ ରେହଗି, ଆତ୍ମା ଲେକାତେ ଆପେୟାଃ ନାଡ଼େଏ ରେଗିୟାଇଙ୍ଗ୍, ଆଡୋଃ ଆପେୟାଃ ନିୟାମ୍ ମାନାତିଙ୍ଗ୍ କେ ଆଡୋଃ ଆପେୟାଃ ବିଶ୍ଵାସ୍ କେ ଅକନାଃ ମାସୀହ୍ ରେ କେଟେଃ ମେନାଃ ନେଲ୍‍କେତେ ସୁକୁୟୋଃ ତାନିଙ୍ଗ୍। ଏନାତେ ଜେଲେକା ଆପେ ମାସୀହ୍ ୟୀଶୁ କେ ପ୍ରାଭୁ ସାରିକେତେ ଗ୍ରାହାନ୍ କେଦାପେ, ଏନ୍‍ଲେକାଗି ଏଣ୍ତେ ରେଗି ସେନ୍ କାତେପେ, ଆଡୋଃ ଏଣ୍ତେ ରେଗି ରେହେଃ ସାବ୍ କେତେ ଆଡୋଃ ହାରା ଇଦିଅଃପେ, ଆଡୋଃ ଜେଲେକା ଆପେ ଶିଖାଅ କାନାପେ ଏନ୍‍ଲେକାଗି ବିଶ୍ଵାସ୍ ରେ କେଟେଃ ଇଦିଅଃପେ; ଆଡୋଃ ଥିମ୍ବା-ଥିମ୍ବାଗି ଧାନ୍ୟାବାଦ୍ କାତେପେ। ହୋସିୟାର୍ ତାଇନ୍‍ପେ ଚି ଜେତାଏ ଆପେକେ ଏନ୍ ସାମା ହାର୍ ଲୋଗୋ କାଜିତେ ଆଲୋ କାକୋ ରେଏଃ ଇଦିକା, ଅକନାଃ ହୋଡ଼ୋକୋୱାଃ ରୀତିନିୟାମ୍ ଆଡୋଃ ଅତେଦିଶୁମ୍ ରେନ୍ ହୋଡ଼ୋକୋୱାଃ ମୁନୁ ଶିଖାଅ ଲେକାତେ ଦୋ ତାନାଃ, ମେନ୍ଦୋ ମାସୀହ୍ ରାଃ ଲେକାତେ ନାହାଲା। ଚିୟାଃଚି ମାସୀହ୍ ରାଃ ହୋଡ଼ମୋ ରେ ପାର୍ମେଶ୍ଵାର୍ ରାଃ ସବେନ୍ ଫେନେରେଃ ମେନାଃ, ହାର୍ ଆପେ ମାସୀହ୍ ରେ ଫେରେଃ କାନାପେ, ଅକନିଃ ସବେନ୍ ରାଇଜ୍ ତାନ୍ କୋରେ ଆଡୋଃ ଆଧିକାର୍ ଚେତାନ୍ ରେ ବୋଅ ତାନିଃ। ଇନିଜାଃ ରେଗି ଆପେୟାଃ ନେକା ଖାତ୍ନା ହୋବାକାନା ଅକନାଃ ହୋଡ଼ୋକୋୱାଃ ତିଈ ତେଦୋ କାରିକାଅଃୱା, ମାନେ ମାସୀହ୍ ରାଃ ଖାତ୍ନା, ଅକଣ୍ଡେ ପାପ୍ ରିକା ସାନାଙ୍ଗ୍ ହୋଡ଼ମୋ କେ ଆଡ଼୍‍ଗୁଅଃୱା। ଆଡୋଃ ଇନିଜାଃ ଲୋଃଗି ବାପ୍ତିସ୍ମା ରେ ତୋପା ଜାନାପେ ହାର୍ ଇନିଜାଃ ରେଗି ପାର୍ମେଶ୍ଵାର୍ ରାଃ ପେଡ଼େଏ ରେ ବିଶ୍ଵାସ୍ କେତେ, ଅକନିଃ ଇନିଃକେ ଗୋଜାକାନ୍ କୋଏତେ ଜୀହିଃ କିଜାଏ, ଇନିଜାଃ ଲୋଃଗି ଜୀହିଃ ବିରିଃ ଜାନାପେ। ପାର୍ମେଶ୍ଵାର୍ ଆପେ କେ ହଗି, ଅକନ୍ କୋ ଆପେୟାଃ ପାପ୍ କୋରେ ହାର୍ ହୋଡ଼ମୋ ତାପେୟାଃ କାଖାତ୍ନାକାନ୍ ରେ ଗୋଏଃକାନ୍ ତାଇକେନାପେ, ମାସୀହ୍ ଲୋଃ ଜୀହିଃ କେଃପେୟାଏ, ହାର୍ ଆବୁୱାଃ ସବେନ୍ ପାପ୍ କୋକେ ଛାମା କେଦାଏ। ଆଡୋଃ ବିଧିନିୟାମ୍ ରାଃ ଏନ୍ ଆନାଚୁ ଅନୋଲ୍ କୋକେ ଅକନାଃ ଆବୁୱାଃ ନୁତୁମ୍ ରେ ଆଡୋଃ ଆବୁୱାଃ କାମାନାତିଙ୍ଗ୍ ହୋରାତେ ପାପ୍ ହୋବା ଲେନା ଏନାକୋକେ ମେଟାଅ ତାଦାଏ, ଆଡୋଃ କ୍ରୁଶ୍ ଚେତାନ୍ ରେ କିଲା ଜାନ୍ତେ ଏନାକେ ଆବୁୱାଃ ନାଡ଼େଏ ତେ ଗେନା ତାଦାଏ। ଆଡୋଃ ଇନିଃ ସବେନ୍ ରାଇଜ୍ ତାନ୍ କୋକେ ଆଡୋଃ ପେଡ଼େଏ କୋକେ ହାରୁୱାଅଉତ୍ତାର୍ କେତେ ସବେନ୍ କୋୱାଃ ଥାଲାରେ କ୍ରୁଶ୍ ରାଃ ହୋରାତେ ଇନ୍‍କୁୱାଃ ଚେତାନ୍ ରେ ଜାଏ-ଜାଏ କେତେ ଜିତାଅ ଜାନାଏ। ଏନାମେନ୍ତେ ଜୋମେ-ନୁୱେ ରାଃ ୟାଦୋ ପାରାବ୍ ରାଃ ୟାଦୋ ନାୱା ଚାଣ୍ଡୁଃ ରାଃ, ୟାଦୋ ଆରାମେ ହୁଲାଙ୍ଗ୍ ରାଃ ବିଷାୟ୍ ରେ ଜେତାଏ ଆଲୋକା ଫାଏସାଲାଏଚା। ଚିୟାଃଚି ନେୟା ସବେନାଃକୋ ହିଜୁଃତାନ୍ କାଜି କୋରାଃ ଉମ୍ବୁଲ୍ ତାନାଃ, ମେନ୍ଦୋ ହୋଡ଼ମୋ ଦୋ ମାସୀହ୍ ତାନିଃ। ଜାହାନ୍ ହୋଡ଼ ଆଜାଃ ମୋନ୍ ରେ ହୁଡିଙ୍ଗ୍ ଜାନିଙ୍ଗ୍ ମେନ୍ତେ ହିଡ଼୍ କେତେ ହାର୍ ସିର୍ମାଦାସୀ ରାଃ ସେୱା ରିକା କେତେ ଆପେକେ ନୀନିର୍ ରେୟାଃ ଜିତାଅ ଯଅ କେ ଆଲୋକାଏ ରେଜେକା। ନେକାନ୍ ହୋଡ଼ ନେଲାକାନ୍ କାଜି କୋରେ ଲାଗାଅକାନ୍ ତାଇନୋଗାଏ ହାର୍ ଆୟାଃ ହୋଡ଼ମୋ ରାଃ ସେଣା ରେ ସାମାଗୀ ଘାମାଣ୍ଡ୍ ବାଡ଼ାୱାଏ। ଆଡୋଃ ଏନ୍ ବୋଅ କେ କାଏ ସାବ୍ ମାଣ୍ଡାଅୟାଏ ଅକନାଃ ରେ ସବେନ୍ ହୋଡ଼ମୋ ରାଃ ଯଡ଼ାନ୍ ଆଡୋଃ ଶିର୍ କୋରାଃ ହୋରାତେ ଆସୁଲ୍-ହାରା ନାମ୍ କେତେ ଆଡୋଃ ମିଶାତେ ବାଇକେତେ, ପାର୍ମେଶ୍ଵାର୍ ପାଡ଼େତେ ହାରା ଇଦିଅଃୱା। ଚିମ୍ତାଙ୍ଗ୍ ଆପେ ମାସୀହ୍ ଲୋଃ ଅତେଦିଶୁମ୍ ରାଃ ମୁନୁ ଶିଖାଅ ଲେକାତେ ଦୋ ଗୋଏଃ ଜାନାପେ, ଏଣ୍ଡେ ଆଡୋଃଗି ଚିନାଃ ଲାଗିନ୍ ଏନ୍ ଅତେଦିଶୁମ୍ ରେନ୍ ହୋଡ଼ୋକୋ ଲେକା ଜୀଦାନ୍ ଜୀହିଦୋଃ ତାନାପେ? ଆପେ ଏନ୍ ଲେକାନ୍ ନିୟାମ୍ ଆଡ଼ି ରେ ଚିନାଃ ମେନ୍ତେ ଥୋଲାକାନାପେ? ଚି “ନେୟା ଆଲୋପେ ସାବେ! ଏନାକେ ଆଲୋପେ ଚାଖାୟା! ଆଡୋଃ ଏନାକେ ଆଲୋପେ ଜୁଟିଦେୟା!”? (ନେ ସବେନ୍ ନିୟାମ୍ କୋ କାମି ରେ ଆଉ-ଆଉତେ ନାଷ୍ଟ୍ କେନୋଗା) ଚିୟାଃଚି ନେୟା ହୋଡ଼ୋକୋୱାଃ ଆନାଚୁ ହାର୍ ଶିଖାଅ ଲେକାତେ ମେନାଃ। ନେ ନିୟାମ୍ କୋରେ ଆକୋୱାଃ ସାନାଙ୍ଗ୍ ଲେକା ବାଇକାନ୍ ମାନାତିଙ୍ଗ୍ ନିୟାମ୍, ହାର୍ ମୋନ୍ ରେ ହୁଡିଙ୍ଗ୍ ଜାନିଙ୍ଗ୍ ମେନ୍ତେ ହିଡ଼୍ କେତେ, ହାର୍ ହୋଡ଼ମୋ ରାଃ କେଟେଃ ବ୍ୟାୟାମ୍ ଲେକାତେ ନୁତୁମ୍ ଦୋ ମେନାଃ, ମେନ୍ଦୋ ହୋଡ଼ମୋ ରାଃ ଏତ୍କାନ୍ ସାନାଙ୍ଗ୍ କୋକେ ରୋକାଅ ଲାଗିନ୍ ନେୟା କୋଏତେ ଜାହାନାଃ ହଗି ଲାଭ କାହୋବାୱା। ଏନାମେନ୍ତେ, ଚିମ୍ତାଙ୍ଗ୍ ମାସୀହ୍ ଲୋଃ ଜୀହିଃ ବିରିଃ ଜାନାପେ, ଏଣ୍ଡେ ସିର୍ମାଦିଶୁମ୍ ରାଃ ଜିନିଷ୍ କୋୱାଃ ନାମ୍ ବାଡ଼ା ରେ ତାଇନ୍‍ପେ, ଅକତାଃରେ ମାସୀହ୍ ମେନାଇଜା ହାର୍ ପାର୍ମେଶ୍ଵାର୍ ରାଃ ଜୋମ୍ ପାଡ଼୍ ରେ ଦୁବ୍ କାନାଏ। ଅତେ ରେୟାଃ କାହା ମେନ୍ଦୋ ସିର୍ମାଦିଶୁମ୍ ରାଃ ଜିନିଷ୍ କୋୱାଃ ନାମ୍ ବାଡ଼ା ରେ ତାଇନ୍‍ପେ। ଚିୟାଃଚି ଆପେ ଦୋ ଗୋଏଃ ଜାନାପେ ହାର୍ ଆପେୟାଃ ଜୀଦାନ୍ ମାସୀହ୍ ଲୋଃ ପାର୍ମେଶ୍ଵାର୍ ରେ ଉକୁକାନ୍ ମେନାଃ। ଇମ୍ତାଙ୍ଗ୍ ମାସୀହ୍ ଅକନିଃ ଆପେୟାଃ ଜୀଦାନ୍ ତାନିଃ, ଉଦୁବଃଗାଏ, ଇମ୍ତାଙ୍ଗ୍ ଆପେ ହଗି ଇନିଃ ଲୋଃ ମାନାରାଙ୍ଗ୍ ରେ ଉଦୁବଃଗାପେ। ଏନାମେନ୍ତେ ଆପେୟାଃ ଏନ୍ ଏତ୍କାନ୍ ସାନାଙ୍ଗ୍ କୋକେ ଗୋଏଃ ତାପେ ଅକନାଃ ଅତେ ରାଃ ହୋଡ଼ମୋ ରେ କାମିତାନାଏ, ମାନେ ବ୍ୟାଭିଚାର୍, ସିତ୍ରୁ, ଏତ୍କାନ୍ ସାନାଙ୍ଗ୍, ଏତ୍କାନ୍ ହାୟା ହାର୍ ସବେନ୍ ଲେକାନାଃ ହାୟା ଅକନାଃ ମୁର୍ତ୍ତି ପୂଜା ଲେକା ତାନାଃ। ନେକାନ୍ ହୋଡ଼ୋକୋୱାଃ ଚାଲ୍ତେ ପାର୍ମେଶ୍ଵାର୍ ରାଃ ଖିସ୍ ଆନାଚୁ କାମାନାତିଙ୍ଗ୍ କୋ ଚେତାନ୍ ରେ ଉୟୁଗୋଃୱା। ହାର୍ ଆପେ ହଗି, ଚିମ୍ତାଙ୍ଗ୍ ନେ ଖାରାପ୍ କାଜିକୋରେ ଜୀଦାନ୍ ଜୀହିଦୋଃ ତାଇକେନାପେ ଇମ୍ତା ଇନ୍‍କୁୱାଃ ଲେକାଗି ସେସେନ୍ ତାଇକେନାପେ। ମେନ୍ଦୋ ନାଆ ଆପେ ହଗି ନେ ସବେନାଃ କୋକେ, ମାନେ ଖିସ୍, ଖାଦ୍ରାଅ, ହିସିଙ୍ଗା, ନିନ୍ଦା, ଆଡୋଃ ମୋଚା ତେ ଏଗେର୍ ନେ ସବେନ୍ କାଜିକୋକେ ବାଗେ ତାପେ। ମିହୋଡ଼୍ ଏଟାଃନିଃ କେ ଆଲୋ ହିଡ଼୍ଏପେ, ଚିୟାଃଚି ଆପେ ମାରି ହୋଡ଼ ଲେକା ଜୀହିଃତାନ୍ ତେୟାଃକେ ହାର୍ ଏନ୍ ଏତ୍କାନ୍ କାମିକୋକେ ବାଗେ ଉତ୍ତାର୍ ତାଦାପେ। ହାର୍ ନାଆ ନାୱା ହୋଡ଼ ଲେକା ଜୀହିଃ ତାନାପେ, ଅକନାଃ ସିର୍ଜାଅକାନ୍ ନିଜାଃ ଲେକା ହୋବା ନାଙ୍ଗ୍ ସେଣା ନାମ୍ ଲାଗିନ୍ତେ ନାୱା ବାଇ ଇଦିପେତାନାଏ। ଇନିଃ ରେ ନାଦୋ ଜେତାଏ ୟୁନାନୀ ହୋଡ଼ ହୋବାଜାନାଏ ନା ୟାହୁଦୀ, ନା ଖାତ୍ନା ନା କାଖାତ୍ନାକାନ୍, ନା ଜାଙ୍ଗ୍‍ଲି, ନା ସ୍କୁତି, ନା ଦାସୀକାନ୍ ହାର୍ ନା କାଦାସୀକାନ୍: ମେନ୍ଦୋ ମାସୀହ୍ ଗି ଖାସ୍ ତାନିଃ ହାର୍ ଆଜାଃ ସବେନ୍ ହୋଡ଼ୋକୋୱାଃ ରେ ମେନିଜା। ଏନାମେନ୍ତେ ପାର୍ମେଶ୍ଵାର୍ ରାଃ ସାଲାକାନ୍ ହୋଡ଼ୋକୋୱାଃ ଲେକା ଅକନ୍‍କୋ ପାବିତାର୍ ହାର୍ ଦୁଲାଡ଼ାନ୍ ମେନାକୋୱା, ମାରାଙ୍ଗ୍ ଲିବୁଇ, ହାର୍ ବୁଗିନାଃ ହାର୍ ମୋନ୍ ରେ ହୁଡିଙ୍ଗ୍ଏନ୍, ହାର୍ ନାରାମ୍ ହାର୍ ସାହାତିଙ୍ଗ୍ ପେଡ଼େଏ କେ ତୁସିଙ୍ଗ୍ଏନ୍‍ପେ। ହାର୍ ଆଗାର୍ ଜେତାଏକେ ଜାହେଁୟାଃ ରେ ଦୋଷ୍ ଏମେ ରାଃ ଜାହାନ୍ କାରାନ୍ ମେନାଃ ରେଦୋ, ମିହୋଡ଼୍ ଏଟାଃ ନିଜାଃ ଦୋଷ୍ କେ ସାହାତିଙ୍ଗ୍ କେପେ ହାର୍ ମିହୋଡ଼୍ ଏଟାଃ ନିଜାଃ ଦୋଷ୍ କେ ଛାମା ତାପେ, ଜେଲେକା ପ୍ରାଭୁ ଆପେୟାଃ ଦୋଷ୍ ଛାମା କେଦାଏ, ଏନ୍‍ଲେକାଗି ଆପେ ହଗି ରିକାଏପେ। ନେ ସବେନାଃ ରାଃ ଚେତାନ୍ ରେ ଦୁଲାଡ଼୍ କେ ଅକନାଃ ଠାଉକା କାଜି ରାଃ ଥୋନୋଲ୍ ତାନାଃ ତୁସିଙ୍ଗ୍ଏନ୍ ପେ। ମାସୀହ୍ ରାଃ ଜୀଉସୁକୁ, ଅକନାଃ ଲାଗିନ୍ ଆପେ ମିୟାଃ ହୋଡ଼ମୋ ହୋଇ କେତେ କେଡ଼ା କାନାପେ, ଆପେୟାଃ ମୋନ୍ ରେ ରାଇଜ୍ କାଏ, ହାର୍ ଆପେ ଧାନ୍ୟାବାଦ୍ ଏମ୍ କାତେପେ। ମାସୀହ୍ ରାଃ ବାଚାନ୍ କେ ଆପାନାଃ ମୋନ୍ ରେ ଥିମ୍ବାଗି ମାଣ୍ଡାଏପେ, ହାର୍ ବୁଗିନ୍ ସେଣାନ୍ ଲୋଃ ମିହୋଡ଼୍ ଏଟାଃନିଃ କେ ସିଖାଏପେ ହାର୍ ଚେତାଅକୋପେ, ହାର୍ ଆପାନାଃ-ଆପାନାଃ ମୋନ୍ ରେ ଆନୁଗ୍ରାହ୍ ଲୋଃ ପାର୍ମେଶ୍ଵାର୍ ନାଙ୍ଗ୍ ଭାଜାନ୍ ହାର୍ ଦୁରାଙ୍ଗ୍ ହାର୍ ଆତ୍ମାନ୍ ଦୁରାଙ୍ଗ୍-ଦୁରାଙ୍ଗ୍ଏପେ। ବାଚାନ୍ ତେ ୟାଦୋ କାମି ରେ ଜାହାନାଃ ଗି ରିକାଏପେ ସବେନାଃ ପ୍ରାଭୁ ୟୀଶୁ ରାଃ ନୁତୁମ୍ ରେ ରିକାଏପେ, ହାର୍ ଇନିଜାଃ ହୋରାତେ ପାର୍ମେଶ୍ଵାର୍ ଆପୁ କେ ଧାନ୍ୟାବାଦ୍ ରିକାକାତେପେ। ହେ ଆଣାଦୀକାନ୍ କୁଡ଼ିକୋ, ଜେଲେକା ପ୍ରାଭୁ ରେ ଠାଉକା ମେନାଃ ଏନ୍‍ଲେକାଗି ଆପାନାଃ-ଆପାନାଃ ଆଣାଦୀକାନ୍ କଡ଼ା ରାଃ ଆଧିନ୍ ରେ ତାଇନ୍‍ପେ। ହେ ଆଣାଦୀକାନ୍ କଡ଼ାକୋ, ଆପାନାଃ-ଆପାନାଃ ଆଣାଦୀକାନ୍ କୁଡ଼ି କେ ଦୁଲାଡ଼୍ ଏପେ, ହାର୍ ଇନ୍‍କୁକେ କେଟେଃଗି ଆଲୋପେ ବେଓହାର୍ କୋୱା। ହେ ହୋନ୍‍କୋ, ସବେନ୍ କାଜି ରେ ଆପାନାଃ-ଆପାନାଃ ଏଙ୍ଗାଆପୁ କିନାଃ ଆନାଚୁ କେ ମାନାତିଙ୍ଗ୍ଏପେ, ଚିୟାଃଚି ପ୍ରାଭୁ ନେୟାତେ ସୁକୁ ଅଗାଏ। ହେ ଏଙ୍ଗାଆପୁ କୋ ଆପାନାଃ ହୋନ୍ କୋକେ ଆଲୋପେ ଖିଜ୍ରାଅ କୋୱା, କାରେ ଇନ୍‍କୁୱାଃ ସାହାସ୍ ଟଟାଃ କେନୋଗା। ହେ ଦାସୀକୋ, ଅକନ୍ କୋ ହୋଡ଼ମୋ ରାଃ ହୋରାତେ ଆପେୟାଃ ଗୋମ୍‍କେ ତାନ୍‍କୋ, ସବେନ୍ କାଜି ରେ ଇନ୍‍କୁୱାଃ ଆନାଚୁ ମାନାତିଙ୍ଗ୍ଏପେ, ହୋଡ଼ୋକୋକେ ସୁକୁକୋୱା ଲେକା ଦେଖାଅ ଲାଗିନ୍ କାହା, ମେନ୍ଦୋ ସୋଜ୍ ମୋନ୍ ଏତେ ହାର୍ ପାର୍ମେଶ୍ଵାର୍ କେ ବୋରୋ ତାନ୍ ଲୋଃ ରିକାଏପେ। ଜାହାନାଃ ଗି ରିକାତାନାପେ, ମୋନ୍ ଲାଗାଅ କେତେ ରିକାଏପେ, ନେୟା ପାହୋମ୍ କେତେ ଚି ହୋଡ଼ୋକୋୱାଃ ଲାଗିନ୍ ଭାଇର୍ କାହା ମେନ୍ଦୋ ପ୍ରାଭୁ ଲାଗିନ୍ ରିକାତାନାପେ। ଚିୟାଃଚି ଆପେ ସାରିୟାପେ ଚି ଆପେ‍କେ ନେୟା ରାଃ ବାଦ୍‍ଲା ରେ ପ୍ରାଭୁ ଏତେ ଯଅ ନାମୋଗା; ଆପେ ପ୍ରାଭୁ ମାସୀହ୍ ରାଃ ସେୱା କାତେପେ। ଚିୟାଃଚି ଅକଏ ଖାରାପ୍ କାମିତାନାଏ ଇନିଃ ଆପାନାଃ ଖାରାପ୍ କାମି ରାଃ ଯଅ ନାମେୟାଏ, ଏନ୍ତାଃ ରେ ଜାହେଁୟାଃ ମେଏଃ ମୁହାଡ଼୍ ନେଲ୍ କେତେ କାରିକାଅଗା। ହେ ଗୋମ୍‍କେ କୋ, ଆପେ ଆପେୟାଃ ଦାସୀ କୋଲୋଃ ନ୍ୟାୟ ତେ ଆଡୋଃ ଠିକ୍-ଠିକ୍ ବେଓହାର୍ ଏପେ, ନେୟା ସାରିକେତେ ଚି ସିର୍ମାଦିଶୁମ୍ ରେ ଆପେୟାଃ ହଗି ମିୟାଃ ଗୋମ୍‍କେ ମେନାଇଜା। ବିନ୍ତି ରେ ତାଇନ୍ କାନୋଃପେ ଆଡୋଃ ଧାନ୍ୟାବାଦ୍ ତାନ୍ ଲୋଃ ଏନାରେ ଏୟୋନ୍ କାନ୍ ତାଇନ୍‍ପେ; ଆଡୋଃ ଏନାଲୋଃ ଆଲେୟାଃ ଲାଗିନ୍ ହଗି ବିନ୍ତି କାତେପେ ଚି ପାର୍ମେଶ୍ଵାର୍ ଆଲେ ଲାଗିନ୍ ବାଚାନ୍ ଉଦୁବ୍ ନାଙ୍ଗ୍ ନେକା ଦୁହାର୍ ଖଲାଅ ତାଆଏ, ଚି ଆଲେ ମାସୀହ୍ ରାଃ ଏନ୍ ଉକୁକାନ୍ କାଜି ରାଃ ବିଷାୟ୍ ରେ କାଜି ଧାଡ଼ିୟାଲେ ଅକନାଃ ନାଙ୍ଗ୍ ଇଙ୍ଗ୍ ଥୋଲାକାନ୍ ମେନାଇଙ୍ଗ୍‍ୟା। ହାର୍ ଏନାକେ ନେକା ଉଦୁବେୟାଇଙ୍ଗ୍, ଜେଲେକା ଇଙ୍ଗ୍‍କେ ରିକା ଠାଉକା ମେନାଃ। ସାମାୟ୍ କେ ବୁଗିନ୍ ଲେକାତେ କାମି ରେ ଆଉୱେପେ ଆବିଶ୍ଵାସୀ କୋୱାଃ ସାମାନାଙ୍ଗ୍ ରେ ସେଣା ତେ ସେନେପେ। ଆପେୟାଃ ବାକାଣ୍ ସବେନ୍ ହୁଲାଙ୍ଗ୍ ଆନୁଗ୍ରାହ୍ ଲୋଃ ହାର୍ ଆୟୁମ୍ ଲାଗିନ୍ ଶିବିଲ୍ ହୋବାଅଃକା ଏନାତେ ଆପେକେ ସବେନ୍ ହୋଡ଼ୋକୋକେ ଠାଉକା ଲେକାତେ କାଜିରୁଆଡ଼୍ ଏମ୍ ସାରିୟାପେ। ଦୁଲାଡ଼ାନ୍ ହାଗା ହାର୍ ବିଶ୍ଵାସେ ଲେକାନିଃ ଦାସୀ, ତୁଖିକୁସ୍, ଅକନିଃ ପ୍ରାଭୁ ରେ ଇଙ୍ଗ୍ଆଃ ଲୋଃ ଗାତି କାମିନିଃ ତାନିଃ, ଇଙ୍ଗ୍ଆଃ ସବେନ୍ କାଜିକୋ ଆପେକେ ଉଦୁବ୍ ତାପେୟାଏ। ଇନିଃକେ ଇଙ୍ଗ୍ ନେୟାମେନ୍ତେ ଆପେତାଃ କୁଲ୍ କାଦିଙ୍ଗ୍ ଚି ଆପେ ଆଲେୟାଃ ଦାଶା କେ ସାରିକେପେ ହାର୍ ଇନିଃ ଆପେୟାଃ ମୋନ୍ ରେ ବିଶ୍ଵାସ୍ କେ କେଟେଃ ପେୟାଏ। ଇନିଃ ଲୋଃ ଇଙ୍ଗ୍ ଉନେସିମୁସ୍ କେହ କୁଲ୍ କାଇଜାଇଙ୍ଗ୍ ଅକନିଃ ବିଶ୍ଵାସ୍ ଲେକାନିଃ ଆଡୋଃ ଦୁଲାଡ଼ାନ୍ ହାଗା ହାର୍ ଆପେୟାଃ ହାତୁ ଏତେ ଗି ତାନିଃ; ନିକିନ୍ ଆପେକେ ନେତାଃ ରାଃ ସବେନ୍ କାଜିକୋ ଉଦୁବ୍ ତାପେୟାକୋ। ଆରିସ୍ଥାର୍ଖୁସ୍, ଅକନିଃ ଇଙ୍ଗ୍ଆଃ ଲୋଃ ବାନ୍ଦିଅଡ଼୍ଆଃ ରେ ଥୋଲାକାନ୍ ମେନାଇଜା, ହାର୍ ମାର୍କୁସ୍ ଅକନିଃ ବାର୍ନାବାସ୍ ରାଃ ହାଗା ଠୋଗୋଗାଏ (ଅକନିଜାଃ ବିଷାୟ୍ ରେ ଆପେ ଆନାଚୁ ନାମ୍ ଲେଦାପେ ଚି ଆଗାର୍ ଇନିଃ ଆପେୟାଃ ନାଡ଼େଏ ହିଜୁଃ ରେଦୋ ଇନିଃକେ ବୁଗିନ୍ ଲେକାତେ ସ୍ଵାଗାତିପେ), ହାର୍ ୟୀଶୁ ଅକନିଃ ୟୁସ୍ତୁସ୍ କାଜିୟୋଗାଏ, ଆପେକେ ଜୋହାର୍ ପେତାନାଏ। ୟାହୁଦୀ ଖାତ୍ନାକାନ୍ ହୋଡ଼ କୋଏତେ ଏସ୍କାର୍ ନିଈ ଗି ପାର୍ମେଶ୍ଵାର୍ ରାଃ ରାଇଜ୍ ଲାଗିନ୍ ଇଙ୍ଗ୍ଆଃ ଗାତି କାମିନିଃ ହାର୍ ଇଙ୍ଗ୍ଆଃ ଜୀଉସୁକୁ ରାଃ କାରାନ୍ ତାନିଃ। ଇପଫ୍ରାସ୍ ଅକନିଃ ଆପେୟାଃ ହାତୁ ଏତେ ଗି ତାନିଃ ହାର୍ ମାସୀହ୍ ୟୀଶୁ ରାଃ ଦାସୀ ତାନିଃ, ଆପେକେ ଜୋହାର୍ ପେତାନାଏ ହାର୍ ସାଦାଏ ଆପେ ଲାଗିନ୍ ରାଶିକା ତେ ବିନ୍ତି କାତେୟାଏ, ଏନାତେ ଆପେ କେଟେଃ ହୋବା କେତେ ପୁରାଃ ବିଶ୍ୱାସ୍ ଲୋଃ ପାର୍ମେଶ୍ଵାର୍ ରାଃ ସାନାଙ୍ଗ୍ ରେ ବାଇତାଇନୋଃପେ। ଇଙ୍ଗ୍ ଇନିଜାଃ ଗୋୱା ତାନିଙ୍ଗ୍ ଚି ଇନିଃ ଆପେୟାଃ ଲାଗିନ୍ ହାର୍ ଲୌଦିକିୟା ସାହାର୍ ହାର୍ ହିୟରାପୁଲିସ୍ ସାହାର୍ ରେନ୍ କୋ ଲାଗିନ୍ ଥିମ୍ବାଗି ରାଶିକା ତେ ବିନ୍ତି କାତେୟାଏ। ଦୁଲାଡ଼ାନ୍ ବାଈଦ୍ ଲୁକା ହାର୍ ଦେମାସ୍ ଆପେକେ ଜୋହାର୍ ମେତାନାକିନ୍। ଲୌଦିକିୟା ସାହାର୍ ରେନ୍ ବିଶ୍ଵାସୀ ହାଗାକୋକେ, ହାର୍ ନୁମ୍ଫାସ୍ ହାର୍ ଆକିନାଃ ଅଡ଼୍ଆଃ ରେନ୍ କାଲିସିୟା କୋକେ ଜୋହାର୍ ମେତାକୋମ୍। ଆଡୋଃ ଚିମ୍ତାଙ୍ଗ୍ ନେ ଚିଠି ଆପେୟାଃ ତାଃ ପାଢ଼ାଅ କେନୋୱା ଦୋ ନେଲେକା ରିକାଏପେ ଚି ଲୌଦିକିୟା ସାହାର୍ ରେନ୍ କାଲିସିୟା ରେ ହଗି ପାଢ଼ାଅଃଚା, ଆଡୋଃ ଏନ୍ ଚିଠି ଅକନାଃଚି ଲୌଦିକିୟା ସାହାର୍ ଏତେ ହିଜୁଗା ଏନାକେ ଆପେ ହଗି ପାଢ଼ାଅଃପେ। ଆଡୋଃ ଆର୍ଖିପ୍ପୁସ୍ କେ କାଜିୟାଇପେ ଚି “ଅକନ୍ ସେୱା ପ୍ରାଭୁ ରେ ଆମ୍‍କେ ଜିମାକାନା ଏନାକେ ହୋସିଆର୍ ତେ ପୁରାଏମେ।” ଇଙ୍ଗ୍ ପାଉଲୁସ୍ ଆଃ ଇଙ୍ଗ୍ଆଃ ତିଈ ତେ ଅଲାକାନ୍ ଜୋହାର୍। ଇଙ୍ଗ୍ଆଃ ଥୋଲାକାନ୍ କେ ମୋନେ ମାଣ୍ଡାଏପେ। ଆପେ ଚେତାନ୍ ଆନୁଗ୍ରାହ୍ ହୋବା ଇଦିଅଃକା। ଆମୀନ୍। ପାଉଲୁସ୍ ଆଡୋଃ ସିଲ୍‍ବାନୁସ୍ ହାର୍ ତିମୁଥିୟୁସ୍ ପାଡ଼େତେ ଥିସ୍ସଲୁନିକେ ସାହାର୍ ରେନ୍ କାଲିସିୟା ରାଃ ନୁତୁମ୍ ରେ ଅକନ୍‍କୋ ପାର୍ମେଶ୍ଵାର୍ ଆପୁ ଆଡୋଃ ପ୍ରାଭୁ ୟୀଶୁ ମାସୀହ୍ ରେ ମେନାକୋୱାଃ। ଆନୁଗ୍ରାହ୍ ଆଡୋଃ ଜୀଉସୁକୁ ଆପେକେ ନାମ୍ କୋତାଃଚା। ଆଲେ ଆଲେୟାଃ ବିନ୍ତି ରେ ଆପେକେ ମୋନେପେୟାଲେ ଆଡୋଃ ସବେନ୍ ହୁଲାଙ୍ଗ୍ ଆପେ ସବେନ୍ କୋୱାଃ ବିଷାୟ୍ ରେ ପାର୍ମେଶ୍ଵାର୍ କେ ଧାନ୍ୟାବାଦ୍ ରିକାୟାଲେ, ଆଡୋଃ ଆବୁୱାଃ ପାର୍ମେଶ୍ଵାର୍ ହାର୍ ଆପୁ ଆଃ ନାଡ଼େଏ ରେ ଆପେୟାଃ ବିଶ୍ଵାସ୍ କୋରାଃ କାମିକୋ, ହାର୍ ଦୁଲାଡ଼୍ ରାଃ କାମିକୋ, ହାର୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରେ ଆଶ୍ରା ତେ ନେଲ୍‍ହୋରା ତାନ୍ କେ ସବେନ୍ ହୁଲାଙ୍ଗ୍ ପାହୋମେ ତାନାଲେ। ହେ ହାଗାକୋ, ପାର୍ମେଶ୍ଵାର୍ ରାଃ ଦୁଲାଡ଼୍ ହୋଡ଼ୋକୋ, ଆଲେ ସାରିୟାଲେ ଚି ଆପେ ସାଲାକାନ୍ ତାନ୍‍ପେ। ଚିୟାଃଚି ଆଲେୟାଃ ସୁସାମାଚାର୍ ଆପେୟାଃ ନାଡ଼େଏ ରେ ବାଚାନ୍ ଭାଇର୍ ରେ କାହା ମେନ୍ଦୋ ପେଡ଼େଏ ହାର୍ ପାବିତାର୍ ଆତ୍ମା ରେ, ଆଡୋଃ ପୁରା ସାର୍ତି ଲୋଃ ସେଟେର୍ କାନା, ଜେଲେକା ଆପେ ସାରିୟାପେ ଚି ଆଲେ ଆପେଲାଗିନ୍ ଆପେ ଥାଲା ରେ ଚିଲ୍‍କା ବାଇଲେନ୍ ତାଇକେନାଲେ। ଆପେ ମାପ୍‍ରାଙ୍ଗ୍ ଦୁକୁ ରେ ପାବିତାର୍ ଆତ୍ମା ରାଃ ରାଶିକା ଲୋଃ, ବାଚାନ୍ କେ ମାନାତିଙ୍ଗ୍ କେତେ ଆଲେୟାଃ ହାର୍ ପ୍ରାଭୁ ଲେକା ସେସେନ୍ ସେନ୍ କେଦାପେ। ନେତାଃ ସାନ୍ତେ ଚି ମାକିଦୁନିୟା ଆଡୋଃ ଆଖାୟା ରାଇଜ୍ ରେନ୍ ସବେନ୍ ବିଶ୍ଵାସୀକୋ ଲାଗିନ୍ ଆପେ ନାମୁନା ବାଇଜାନାପେ। ଚିୟାଃଚି ପ୍ରାଭୁ ଆଃ ବାଚାନ୍ ଆପେୟାଃ ହୋରାତେ ମାକିଦୁନିୟା ଆଡୋଃ ଆଖାୟା ରାଇଜ୍ ରେ ଭାଇର୍ ଉଦୁବ୍ ଜାନା ଏନା କାହା, ମେନ୍ଦୋ ଆପେୟାଃ ବିଶ୍ଵାସ୍ ଅକନାଃ ପାର୍ମେଶ୍ଵାର୍ ରେ ମେନାଃ, ଏନା ସବେନ୍ ଜାଗା କୋରେ ନେଲେକା କାଜି ପାସ୍ରାଅ ଜାନା, ଚି ଆଲେକେ ଏନା ବିଷାୟ୍ ରେ କାଜି ରାଃ ଦାର୍‍କାର୍ ହ ବାନୋଗା। ଚିୟାଃଚି ଇନ୍‍କୁ ଆକୋଗି ଆଲେୟାଃ ବିଷାୟ୍ ରେ ଉଦୁବ୍ ୟାକୋ ଚି ଆପେୟାଃ ନାଡ଼େଏ ଆଲେୟାଃ ହିଜୁଃ ଚିଲ୍‍କା ତେ ହୋବାଜାନା, ହାର୍ ଆପେ ଚିଲ୍‍କା ମୂର୍ତି କୋକେ ବାଗିକେତେ ପାର୍ମେଶ୍ଵାର୍ ପାଡ଼୍ ରୁଆଡ଼୍ ଜାନାପେ ଏନାତେ ଜୀହିଃ ଆଡୋଃ ସାର୍ତି ପାର୍ମେଶ୍ଵାର୍ କେ ସେୱା ୟାପେ। ହାର୍ତେ ଇନ୍‍କୁ କାଜିୟାକୋ ଇନିଜାଃ ହୋନ୍‍କଡ଼ା କେ ସିର୍ମାଦିଶୁମ୍ ଏତେ ହିଜୁଃ ରାଃ ହୋରା ନେଲ୍ କାତେତାନାପେ ଅକନିଃକେ ଇନିଃ ଗୋଜାକାନ୍ କୋଏତେ ଜୀହିଃ ବିରିଃ କିଜାଏ, ମାନେ ୟୀଶୁ କେ, ଅକଏ ଚି ଆବୁ କେ ହିଜୁଃତେୟାଃ ଖିସ୍ ତେ ବାଞ୍ଚାଅ ୟାଏ। ହେ ହାଗାକୋ, ଆପେ-ଆପେ ଗି ଦୋ ସାରିୟାପେ ଚି ଆଲେୟାଃ ଆପେତାଃ ହିଜୁଃ ସାମାଗୀ କାହୋବାକାନା। ମେନ୍ଦୋ ଆପେ-ଆପେ ଗି ସାରିୟାପେ ଚି ସିଦା ଫିଲିପ୍ପି ସାହାର୍ ରେ ଦୁକୁ ସାହାତିଙ୍ଗ୍ ହାର୍ ଆପ୍‍ମାନ୍ ସାହାତିଙ୍ଗ୍ କୋରେ ହ ଆବୁୱାଃ ପାର୍ମେଶ୍ଵାର୍ ଆବୁକେ ନେଲେକା ସାହାସ୍ ଏମ୍‍କେଃବୁୱାଏ, ଚି ଆବୁ ପାର୍ମେଶ୍ଵାର୍ ରାଃ ସୁସାମାଚାର୍ ବେଶେ ବିରୋଧ୍ ହୋବା ରେହ ଆପେକେ ଉଦୁବ୍ ୟାଲେ। ଚିୟାଃଚି ଆଲେୟାଃ ଉପ୍‍ଦେଶ୍ ହିହିଡ଼୍ ଲାଗିନ୍ କାତାଇକେନା ହାର୍ ଏତ୍କାନ୍ ସାନାଙ୍ଗ୍ ତେଦୋ କାହା, ହାର୍ ଲୋଗୋ ଲାଗିନ୍ କାତାଇକେନା। ମେନ୍ଦୋ ଜେଲେକା ପାର୍ମେଶ୍ଵାର୍ ଆଲେକେ ସାଲାବାଇକେତେ ସୁସାମାଚାର୍ ଏମାକାଃଲେୟାଏ, ଆଲେ ଏନ୍‍ଲେକାଗି କାଜି ଉଦୁବ୍‍ୟାଲେ, ହାର୍ ନେଣ୍ଡେ ରେ ହୋଡ଼ୋକୋକେ କାହା, ମେନ୍ଦୋ ପାର୍ମେଶ୍ଵାର୍ କେ, ଅକନିଃ ଆବୁୱାଃ ମୋନ୍ କୋକେ ସାରିଉରୁମ୍ ୟାଏ, ସୁକୁଇ ତାନାଲେ। ଚିୟାଃଚି ଆପେ ସାରିୟାପେ ଚି ଆଲେ ଚିଉଲାଅ ଚାପ୍‍ଲୁଶି ରାଃ ବାକାଣ୍ କାଲେ ବାକାଣ୍ ତାଇକେନା, ହାର୍ ହାୟା ଲାଗିନ୍ କାଲେ ବାହାନା ବାଡ଼ା ତାଇକେନା, ଏନାରେ ପାର୍ମେଶ୍ଵାର୍ ଗୋୱା ତାନିଃ। ଆଡୋଃ ଆଲେ ମାସୀହ୍ ରାଃ କୁଲାକାନ୍ ଚେଲା ହୋବା ରାଃ ଚାଲ୍ତେ ଆପେୟାଃ ଚେତାନ୍ ରେ ହାମ୍ବାଲ୍ ଏମ୍ ଧାଡ଼ି ଲେନ୍ତେୟାଃଲେ, ଏଣ୍ଡେ ହଗି ଆଲେ ହୋଡ଼ୋକୋ ଏତେ ମାଇନ୍ କାଲେ ସାନାଙ୍ଗ୍ ତାଇନ୍ କେନା, ହାର୍ ଆପେତେ ହ କାହା, ହାର୍ ଜେତାଏ ତେହ କାହା। ମେନ୍ଦୋ ଚିଲ୍‍କା ଏଙ୍ଗା ଆଜାଃ ହୋନ୍ କେ ଆସୁଲ୍ ହାରାୟାଏ, ଏନ୍‍ଲେକାଗି ଆଲେ ହ ଆପେୟାଃ ଥାଲା ରେ ତାଇନ୍ କେତେ ଲେବେଃ କେଃପେୟାଲେ। ଆଡୋଃ ଏନ୍‍ଲେକାଗି ଆଲେ ଆପେକେ ଦୁଲାଡ଼୍‍ପେ ତାଇକେନାଲେ, ପାର୍ମେଶ୍ଵାର୍ ରାଃ ସୁସାମାଚାର୍ ଭାଇର୍ କାହା, ମେନ୍ଦୋ ଆଲେ ଆଲେୟାଃ ଜୀଉ ହ ଏମ୍ ଲାଗିନ୍ତେ ସେକାଡ଼୍ କାନ୍ ତାଇନ୍ କେନାଲେ, ଚିୟାଃଚି ଆପେ ଆଲେଲାଗିନ୍ ଦୁଲାଡ଼ାନ୍ ବାଇଲେନ୍ ତାଇକେନାପେ। ହେ ହାଗାକୋ, ଆପେ ଆଲେୟାଃ ହାମ୍ବାଲ୍ କାମି ଆଡୋଃ ଦୁକୁ କେ ମୋନେ ମାଣ୍ଡାଅୟାପେ, ଆଲେ ନେୟାମେନ୍ତେ ନିଦା ଶିଙ୍ଗି କାମି ନାଲା କେତେ ଆପେୟାଃ ରେ ପାର୍ମେଶ୍ଵାର୍ ରାଃ ସୁସାମାଚାର୍ ପାର୍ଚାର୍ କେଦାଲେ, ଏନାତେ ଆପେ କୋଏତେ ଜେତାଏ ରେହ କାଲେ ହାମ୍ବାଲ୍ ହୋବାଅଃୱା। ଗୋୱା ଆପେ ଗି ତାନ୍‍ପେ, ହାର୍ ପାର୍ମେଶ୍ଵାର୍ ହ ଗୋୱା ତାନିଃ ଚି ଆପେ ସବେନ୍ ବିଶ୍ଵାସ୍ କୋୱାଃ ଥାଲା ରେ ଆଲେୟାଃ ଚାଲ୍-ଚାଲାନ୍ ଚିଲ୍‍କା ପାବିତାର୍ ହାର୍ ଧାର୍ମୀ ଆଡୋଃ ନିର୍ଦୋଷ୍ ତାଇନ୍ କେନା। ଆପେ ସାରିତାନାପେ ଚି ଜେଲେକା ଆପୁ ଆଜାଃ ହୋନ୍ କୋକେ ଶିଖାଅ କୋୱାଏ, ଏନ୍‍ଲେକାଗି ଆଲେ ଆପେ ସବେନ୍ କୋକେ ଉପ୍‍ଦେଶ୍ ଏମ୍ ତାଇନାଲେ ହାର୍ ଜୀଉସୁକୁ ଏମ୍ ତାଇନାଲେ ହାର୍ ବୁଝାଅ ପେତାଇକେନାଲେ। ଏନାତେ ଆପେୟାଃ ଚାଲ୍-ଚାଲାନ୍ ପାର୍ମେଶ୍ଵାର୍ କେ ସୁକୁଇ ଲେକା ହୋବାଅଃକା, ଅକନିଃ ଆପେକେ ଆଜାଃ ରାଇଜ୍ ଆଡୋଃ ମାନାରାଙ୍ଗ୍ ରେ କେଡ଼ାପେ ତାନାଏ। ଏନାମେନ୍ତେ ଆଲେ ହଗି ପାର୍ମେଶ୍ଵାର୍ କେ ସବେନ୍ ଇମ୍ତା ଧାନ୍ୟାବାଦ୍ ଏମ୍ ତାନାଲେ, ଚି ଅକୋଇମ୍ତାଙ୍ଗ୍ ଆଲେୟାଃ ହୋରାତେ ପାର୍ମେଶ୍ଵାର୍ ରାଃ ସୁସାମାଚାର୍ ରାଃ ବାଚାନ୍ ଆପେୟାଃ ନାଡ଼େଏ ଥେବାଃଜାନା, ଇମ୍ତା ଆପେ ଏନାକେ ହୋଡ଼ୋକୋୱାଃ କାହା ମେନ୍ଦୋ ପାର୍ମେଶ୍ଵାର୍ ରାଃ ବାଚାନ୍ ଆଟ୍‍କାର୍ କେତେ (ହାର୍ ସାର୍ତିଗୀ ନେୟା ନେକାଗି ତାନାଃ) ଗ୍ରାହାନ୍ କେଦାପେ, ହାର୍ ପାର୍ମେଶ୍ଵାର୍ ରାଃ ବାଚାନ୍ ଆପେ ବିଶ୍ଵାସ୍ ତାନ୍ କୋରେ, କାମି ତାନାଏ। ଏନାମେନ୍ତେ ଆପେ, ହେ ହାଗାକୋ, ପାର୍ମେଶ୍ଵାର୍ ରାଃ ଏନ୍ କାଲିସିୟା କୋୱାଃ ଲେକା ସେନ୍ ସେସେନ୍ କେଦାପେ, ଅକନ୍‍କୋ ୟାହୁଦୀୟା ଜିଲ୍ଲା ରେ ମାସୀହ୍ ୟୀଶୁ ରେ ମେନାକୋୱା, ଚିୟାଃଚି ଆପେ ହଗି ଆପେୟାଃ ହୋଡ଼ୋକୋ ଏତେ ଏନ୍‍ଲେକାଗି ଦୁକୁ ନାମ୍ କେଦାପେ, ଜେଲେକା ଇନ୍‍କୁ ୟାହୁଦୀ ହୋଡ଼ୋ କୋୱାଃ ତେ ନାମ୍ ଲେଦାକୋ। ଅକନ୍‍କୋ ପ୍ରାଭୁ ୟୀଶୁ କେ ଆଡୋଃ ନାବୀ କୋକେ ହ ଗୋଏଃ କେଦାକୋ ଆଡୋଃ ଆଲେକେ ସାସାତି କେଦାକୋ, ଆଡୋଃ ପାର୍ମେଶ୍ଵାର୍ ଇନ୍‍କୁତେ ସୁକୁ ବାଙ୍ଗୁଇଜା ଆଡୋଃ ଇନ୍‍କୁ ସବେନ୍ ହୋଡ଼ୋକୋକେ ବିରୋଧ୍‍ୟାକୋ। ଆଡୋଃ ଇନ୍‍କୁ ଏଟାଃଜାତି କୋଏତେ ଇନ୍‍କୁୱାଃ ବାଞ୍ଚାଅ ଲାଗିନ୍ ବାକାଣ୍ ରିକା ଆଲେକେ ମାନାୟାକୋ, ଏନାତେ ସବେନ୍ ଇମ୍ତା ଆକୋ ପାପ୍ ଚେତାନ୍ ପାପ୍ କାତେୟାକୋ, ମେନ୍ଦୋ ଇନ୍‍କୁୱାଃ ଚେତାନ୍ ରେ ପାର୍ମେଶ୍ଵାର୍ ରାଃ ବୋରୋୱାନ୍ ଖିସ୍ ହିଜୁଃ ଥେବାଃ କାନା। ହେ ହାଗାକୋ, ଅକୋଇମ୍ତାଙ୍ଗ୍ ଆଲେ ହୁଡିଙ୍ଗ୍ ସାମାୟ୍ ଲାଗିନ୍ ମୋନ୍ ରେ କାହା ମେନ୍ଦୋ ନେନେଲ୍ ରେ, ଆପେ ଲୋଃ ଗେନା ଲେନାଲେ, ଇମ୍ତା ଆଲେ ଥିମ୍ବାଗି ସାନାଙ୍ଗ୍ ତେ ଆପେୟାଃ ମେଏଃମୁହାଡ଼୍ ନେଲେ ଲାଗିନ୍ ଆଡୋଃଗି ଥିମ୍ବା କୋଷିସ୍ କେଦାଲେ। ଏନାମେନ୍ତେ ଆଲେ (ମାନେ ଇଙ୍ଗ୍ ପାଉଲୁସ୍) ମିଶା କାହା ମେନ୍ଦୋ ବାର୍ସା ଆପେୟାଃ ନାଡ଼େଏ ହିଜୁଃ ସାନାଙ୍ଗ୍ କେନାଇଙ୍ଗ୍, ମେନ୍ଦୋ ଶାଏତାନ୍ ଆଲେକେ କେସେଃ କେଃଲେୟାଏ। ଚିୟାଃଚି ଆଲେୟାଃ ଆଶ୍ରା ୟାଦୋ ରାଶିକା ୟାଦୋ ମାନାରାଙ୍ଗ୍ ରାଃ ମୁକୁଟ୍ ଚିନାଃ ତାନାଃ? ଚିନାଃ ଆବୁୱାଃ ୟୀଶୁ ମାସୀହ୍ ରାଃ ନାଡ଼େଏ ଆଜାଃ ହିଜୁଃ ସାମାୟ୍ ରେ ଆପେ ଗି ନାହାଲାପେ? ଆଲେୟାଃ ମାନାରାଙ୍ଗ୍ ଆଡୋଃ ରାଶିକା ଆପେ ଗି ତାନ୍‍ପେ। ଏନାମେନ୍ତେ ଚିମ୍ତା ଆଲେତେ ଆଡୋଃ କାତାଇନ୍ ଜାନା, ଏଣ୍ଡେ ଆଲେ ନେୟା ପାହୋମ୍ କେଦାଲେ ଚି ଏଥେନ୍ସ୍ ସାହାର୍ ରେ ଆଲିଙ୍ଗ୍ ଏସ୍କାର୍ ଗି ତାଇନ୍ କୋୱାଃଲିଙ୍ଗ୍; ହାର୍ ଆଲିଙ୍ଗ୍ ତିମୁଥିୟୁସ୍ କେ ଅକନିଃ ମାସୀହ୍ ରାଃ ସୁସାମାଚାର୍ ରେ ଆବୁୱାଃ ହାଗା ହାର୍ ପାର୍ମେଶ୍ଵାର୍ ରାଃ ଦାସୀ ତାନିଃ, ଏନାଲାଗିନ୍ତେ କୁଲ୍ କିଜାଲେ, ଚି ଇନିଃ ଆପେକେ ପୋକ୍ତା ପେୟାଏ ହାର୍ ଆପେୟାଃ ବିଶ୍ୱାସ୍ ରାଃ ବିଷାୟ୍ ରେ ଆପେକେ ବୁଝାଅ ପେୟାଏ। ଏନାତେ ଜେତାଏ ନେ ସାତାୱାଟ୍ ରାଃ ଚାଲ୍ତେ ମାସୀହ୍ କେ ଆଲୋକାକୋ ବାଗିକା; ଚିୟାଃଚି ଆପେ-ଆପେ ଗି ସାରିତାନାପେ ଚି ଆବୁ ନେୟାଲାଗିନ୍ତେ ଗି ବାଇକାନାବୁ। ଚିୟାଃଚି ସିଦା ହ, ଚିମ୍ତାଙ୍ଗ୍ ଆଲେ ଆପେୟାଃ ତାଃ ରେ ତାଇନ୍ କେନାଲେ ଇମ୍ତା ଆପେକେ କାଜିୟାପେ ତାଇକେନାଲେ ଚି ଆବୁକେ ଦୁକୁ ସାହାତିଙ୍ଗ୍ ଲାଗାତିଙ୍ଗ୍ ମେନାଃ ହାର୍ ନେକାଗି ହୋବାଜାନା, ଜେଲେକା ଚି ଆପେ ହ ସାରିତାନାପେ। ଏନାମେନ୍ତେ ଚିମ୍ତାଙ୍ଗ୍ ଇଙ୍ଗ୍ ଆଡୋଃ କାଇଙ୍ଗ୍ ତାଇନ୍ ଧାଡ଼ିଜାନା, ଏଣ୍ଡେ ଆପେୟାଃ ବିଶ୍ଵାସ୍ ବିଷାୟ୍ ରେ ସାରି ଲାଗିନ୍ତେ ତିମୁଥିୟୁସ୍ କେ କୁଲ୍ କିଜାଇଙ୍ଗ୍, ଏନାତେ ନେଲେକା ଆଲୋକା ହୋବାଅଃକା ଚି ପାରୀକ୍ଷା ରିକାନିଃ ଶାଏତାନ୍ ଆପେୟାଃ ପାରୀକ୍ଷା ରିକା କେଦାଏ, ହାର୍ ଆଲେୟାଃ କାମି କୋଦୋ ସାମାଜାନା? ମେନ୍ଦୋ ନାଆ ତିମୁଥିୟୁସ୍ ଯେ ଆପେ ତାଃଏତେ ଆଲେୟାଃ ନାଡ଼େଏ ହିଜୁଃ ଜାନାଏ, ଆପେୟାଃ ବିଶ୍ଵାସ୍ ହାର୍ ଦୁଲାଡ଼୍ ରାଃ ସୁସାମାଚାର୍ ଉଦୁବ୍ କେଦାଏ ହାର୍ ନେ କାଜିକୋକେ ହଗି ଉଦୁବ୍ କେଦାଏ ଚି ଆପେ ସାଦାଏଗି ଦୁଲାଡ଼୍ ଲୋଃ ଆଲେକେ ପାହୋମ୍ ଲେ ତାନାପେ, ହାର୍ ଆଲେକେ ନେନେଲ୍ ନାଙ୍ଗ୍ ସାନାଙ୍ଗ୍ ତାନାପେ, ଜେଲେକା ଆଲେ ହଗି ଆପେକେ ନେନେଲ୍ ସାନାଙ୍ଗ୍ ତାନାଲେ। ଏନାମେନ୍ତେ ହେ ହାଗାକୋ ଆଡୋଃ ମିଶିକୋ, ଆଲେ ଆଲେୟାଃ ସବେନ୍ ଦୁକୁ ହାର୍ ସାସ୍ତି ରେ ଆପେୟାଃ ବିଶ୍ଵାସ୍ ତେ ଆପେୟାଃ ବିଷାୟ୍ ରେ ଜୀଉସୁକୁ ନାମ୍ କେଦାଲେ। ଚିୟାଃଚି ନାଆ ଆଗାର୍ ଆପେ ପ୍ରାଭୁ ରେ ବାଇକେତେ ମେନାପେୟା ରେଦୋ ଏଣ୍ଡେ ଆଲେ ଜୀହିଃ ମେନାଲେୟା। ଆଡୋଃ ଜେଲେକା ରାଶିକା ଆଲେକେ ଆପେୟାଃ ହୋରାତେ ଆବୁୱାଃ ପାର୍ମେଶ୍ଵାର୍ ରାଃ ନାଡ଼େଏ ରେ ମେନାଃ, ଏନାରାଃ ବାଦ୍‍ଲାରେ ଆପେୟାଃ ବିଷାୟ୍ ରେ ଆଲେ ଚିଲ୍‍କା ପାର୍ମେଶ୍ଵାର୍ ରାଃ ଧାନ୍ୟାବାଦ୍ ରିକାୟାଲେ? ଆଲେ ନିଦା ଶିଙ୍ଗି ଥିମ୍ବାଗି ବିନ୍ତି ତାନାଲେ ଚି ଆପେୟାଃ ଲୋଃ ଆଡୋଃଗି ନାପାମାଲେ ହାର୍ ଆପେୟାଃ ବିଶ୍ଵାସ୍ ରାଃ ଘାଟି କେ ପୁରା ଲାଗିନ୍ତେ ଦେଙ୍ଗାପେୟାଲେ। ନାଆ ଆବୁୱାଃ ପାର୍ମେଶ୍ଵାର୍ ଆଡୋଃ ଆପୁ ଆଏଃଗି ହାର୍ ଆବୁୱାଃ ପ୍ରାଭୁ ୟୀଶୁ, ଆପେ ତାଃ ହିଜୁଃ ରେ ଆଲେକେ ଆୟୁର୍ ଇଦିକାଏ; ହାର୍ ପ୍ରାଭୁ ଏନ୍‍ଲେକା ରିକାଏ ଚାଏ ଚି ଚିଲ୍‍କା ଆଲେ ଆପେ ଲୋଃ ଦୁଲାଡ଼୍ ମାଣ୍ଡାଅ ତାନାଲେ, ଏନ୍‍ଲେକାଗି ଆପେୟାଃ ଦୁଲାଡ଼୍ ହଗି ଆପେ କୋରେ ହାର୍ ସବେନ୍ ହୋଡ଼ୋକୋ ଲୋଃ ହାରାଅଃକା, ହାର୍ ପାର୍ମେଶ୍ଵାର୍ ଆପେୟାଃ ଦୁଲାଡ଼୍ କେ ଥିମ୍ବାତାକାଏ। ଏନାତେ ପ୍ରାଭୁ ୟୀଶୁ ଆପେୟାଃ ମୋନ୍ କୋକେ ନେକା ପେଡ଼େଏ ଏମେକାଏ ଚି ଚିମ୍ତାଙ୍ଗ୍ ଆବୁୱାଃ ପ୍ରାଭୁ ୟୀଶୁ ଆଜାଃ ସବେନ୍ ପାବିତାର୍ ହୋଡ଼ୋ କୋଲୋଃ ହିଜୁଗାଏ, ଇମ୍ତା ଆପେ ଆବୁୱାଃ ପାର୍ମେଶ୍ଵାର୍ ଆଡୋଃ ଆପୁ ରାଃ ସାମ୍‍ନାଙ୍ଗ୍ ରେ ପାବିତାର୍ ରେ ନିର୍ଦୋଷ୍ ହୋବାଅଃୱାପେ। ଚିୟାଃଚି ହେ ହାଗାକୋ, ଆଲେ ଆପେକେ ଆର୍ଜି ପେତାନାଲେ ଆଡୋଃ ଆପେକେ ପ୍ରାଭୁ ୟୀଶୁ ରେ ବୁଝାଅପେ ତାନାଲେ ଚି, ଜେଲେକା ଆପେ ଆଲେ ତେ ବୁଗିନ୍ ସେସେନ୍ ହାର୍ ପାର୍ମେଶ୍ଵାର୍ କେ ଖୁସ୍ ରିକା ଶିଖାଅ ଜାନାପେ, ହାର୍ ଜେଲେକା ଆପେ ସେସେନ୍ ତାନାପେ ହ, ଏନ୍‍ଲେକାଗି ଆଡୋଃଗି ହାରା ଇଦିଅଃପେ। ଚିୟାଃଚି ଆପେ ସାରିତାନାପେ ଚି ଆଲେ ପ୍ରାଭୁ ୟୀଶୁ ପାଡ଼େତେ ଆପେକେ ଅକନ୍-ଅକନ୍ ଆନାଚୁ ସେଟେର୍ କାଦାଲେ। ଚିୟାଃଚି ପାର୍ମେଶ୍ଵାର୍ ଗାଃ ନେୟା ସାନାଙ୍ଗ୍ ତାନାଃ ଚି, ଆପେ ପାବିତାର୍ ବାଇୟୋଃପେ, ମାନେ ବ୍ୟାଭିଚାର୍ ତେ ବାଚାଓ କେତେ ତାଇନ୍‍ପେ, ହାର୍ ଆପେକୋତେ ସବେନ୍ ମିପୀହୋଡ଼୍ ପାବିତାର୍ ହାର୍ ମାଇନ୍ ଲୋଃ ଆପାନ୍ ଆଣାଦୀକାନ୍ କୁଡ଼ି କେ ନାମ୍ ସାରିପେ, ହାର୍ ନେ କାମି ହାୟା ତେ କାହା, ହାର୍ ନା ହେନ୍ ଏଟାଃଜାତିକୋ ଲେକା, ଅକନ୍‍କୋ ପାର୍ମେଶ୍ଵାର୍ କେ କାକୋ ସାରିୟା। ଏନାତେ ଚି ନେ କାଜି ରେ ଜେତାଏ ଆଜାଃ ହାଗା କେ ଆଲୋ ବେଦାଚାଏ, ଆଡୋଃ ନା ଇନିଜାଃ ଫାଏଦା ଇଦିଚାଏ, ଚିୟାଃଚି ପ୍ରାଭୁ ନେ ସବେନ୍ କାଜି କୋରାଃ ପାଲ୍‍ଟା ଇଦି ନିଈ ତାନିଃ, ଜେଲେକା ଚି ଆଲେ ସିଦା ତେୟଗି କାଜିକାଦାଲେ ହାର୍ ଚେତାୱନୀ ହଗି ଏମ୍ ଲେଦାଲେ। ଚିୟାଃଚି ପାର୍ମେଶ୍ଵାର୍ ଆବୁକେ କାଫାର୍ଚି ଲାଗିନ୍ତେ କାହା, ମେନ୍ଦୋ ପାବିତାର୍ ବାଇୟୋଃ ଲାଗିନ୍ତେ କେଡ଼ା କାଃବୁୱାଏ। ଏନାମେନ୍ତେ ଅକଏ ନେ ନିୟାମ୍ କେ ହିଲାଙ୍ଗ୍ ୟାଏ, ଇନିଃ ହୋଡ଼ୋକୋକେ କାହା ମେନ୍ଦୋ ପାର୍ମେଶ୍ଵାର୍ ରାଃ ନିୟାମ୍ କେ ହିଲାଙ୍ଗ୍ ୟାଏ, ଅକନିଃ ଆଜାଃ ପାବିତାର୍ ଆତ୍ମା ଆପେକେ ଏମାପେତାନାଏ। ମେନ୍ଦୋ ହାଗା ଦୁଲାଡ଼୍ ବିଷାୟ୍ ରେ ନେୟା ଦାର୍‍କାର୍ ବାନୋଗା ଚି ଇଙ୍ଗ୍ ଆପେତାଃ ଜାହାନାଃ ଅଲେୟାଇଙ୍ଗ୍, ଚିୟାଃଚି ଆପେ ଆପେରେ ଦୁଲାଡ଼୍ ରିକା ଲାଗିନ୍ତେ ଆପେ ଗି ପାର୍ମେଶ୍ଵାର୍ ତେ ଶିଖାଅ କାନାପେ। ହାର୍ ସବେନ୍ ମାକିଦୁନିୟା ରାଇଜ୍ ରେନ୍ ସବେନ୍ ହାଗା କୋଲୋଃ ନେକାଗି ରିକାତାନାପେ। ମେନ୍ଦୋ ହେ ହାଗାକୋ ଆଲେ ଆପେକେ ବୁଝାଅପେ ତାନାଲେ ଚି ଆଡୋଃଗି ହାରା ଇଦିଅଃପେ। ହାର୍ ଜେଲେକା ଆଲେ ଆପେକେ ଆନାଚୁ ଏମ୍ କାଦାଲେ ଏନ୍‍ଲେକାଗି ହାପା-ହାପା ତାହିନ୍, ହାର୍ ଆପାନାଃ-ଆପାନାଃ କାମି ରିକା ହାର୍ ଆପାନାଃ-ଆପାନାଃ ତିଈ ତେ କାମି ଲାଗିନ୍ କୋଷିସ୍ ଏପେ। ଏନାତେ ବାହାରି ରେନ୍ ହୋଡ଼ୋକୋ ଏତେ ମାଇନ୍ ନାମ୍ ଧାଡ଼ିୟାପେ, ହାର୍ ଆପେକେ ଜେତାନ୍ ଜିନିଷ୍ ରାଃ ଘାଟି କାହୋବାଅଃଚା। ହେ ହାଗାକୋ, ଅକନ୍‍କୋ ଗୋଜାକାନାକୋ ଆପେ ଇନ୍‍କୁୱାଃ ବିଷାୟ୍ ରେ କାସାରିୟାକାନ୍ ଲେକା ତାହିନୋଃପେ, ଏନା ଆଲେ କାଲେ ସାନାଙ୍ଗ୍ ତାନା, ନେକା ଆଲୋକା ହୋବାଅଃକା ଚି ଆପେ ଏଟାଃକୋ ଲେକା ଦୁକୁଅଃପେ ଅକନ୍‍କୋକେ ଆଶ୍ରା ବାନୋଗା। ଚିୟାଃଚି ଆଗାର୍ ଆବୁ ବିଶ୍ଵାସ୍ ତାନାବୁ ଚି ୟୀଶୁ ଗୋଏଃ ଜାନାଏ ହାର୍ ଜୀଉ ବିରିଃ ଜାନାଏ, ଏଣ୍ଡେ ଏନ୍‍ଲେକାଗି ପାର୍ମେଶ୍ଵାର୍ ହ ଇନ୍‍କୁ କେହଗି ଅକନ୍‍କୋ ୟୀଶୁ ରେ ଗୋଜାକାନାକୋ, ପାର୍ମେଶ୍ଵାର୍ ଇନ୍‍କୁକେ ୟୀଶୁ ଲୋଃ ଇଦିରୁଆଡ଼୍ କୋୱାଏ। ଚିୟାଃଚି ଆଲେ ପ୍ରାଭୁ ଆଃ ବାଚାନ୍ ଲେକାତେ ଆପେକେ ନେୟା କାଜି ତାନାଲେ ଚି ଆବୁ ଯେ ଜୀହିଃ ମେନାବୁୱା ହାର୍ ପ୍ରାଭୁ ଆଃ ହିଜୁଃ ରୁଆଡ଼୍ ସାନ୍ତେ ତାଇନୋଃୱାବୁ, ଗୋଜାକାନ୍ କୋଏତେ ଚିଉଲା ହ ସିଦା ପ୍ରାଭୁ ଲୋଃ କାବୁ ନାପାମାବୁ। ଚିୟାଃଚି ପ୍ରାଭୁ ଆଏଃଗି ସିର୍ମାଦିଶୁମ୍ ତେ ଜୋର୍ତେ ଆଚୁତାନ୍ ଲୋଃ ଆଡ଼୍‍ଗୁନାଏ, ହାର୍ ମାରାଙ୍ଗ୍ ସିର୍ମାଦାସୀ ଆଃ ଷାଡି ଆୟୁମୋଗା, ହାର୍ ପାର୍ମେଶ୍ଵାର୍ ରାଃ ତୁର୍ହୀ ଅଙ୍ଗ୍ଅଗା, ହାର୍ ଅକନ୍‍କୋ ମାସୀହ୍ ରେ ଗୋଜାକାନାକୋ, ହିନ୍‍କୁ ସିଦା ଜୀଉ ବିରିଦାକୋ। ଇମ୍ତା ଆବୁ ଅକନ୍‍କୋ ଜୀହିଃ ହାର୍ ସାରେଜାକାନ୍ ତାଇନାବୁ, ଇନିଜାଃ ଲୋଃ ରିମିଲ୍‍ଦିଶୁମ୍ ରେ ଉଠାଓ କେନୋଃୱାବୁ ହାର୍ ହୋୟୋ ରେ ପ୍ରାଭୁ ଲୋଃ ନାପାମାବୁ; ହାର୍ ନେଲେକାତେ ଆବୁ ସବେନ୍ ହୁଲାଙ୍ଗ୍ ପ୍ରାଭୁ ଲୋଃ ତାଇନାବୁ। ନେଲେକାତେ ନେ ବାକାଣ୍‍କୋତେ ମିହୋଡ଼୍ ଏଟାଃନିଃ କେ ଜୀଉ ରେ ପେଡ଼େଏ ଏମ୍ କାତେପେ। ନାଆ ହେ ହାଗାକୋ, ନେୟା ରାଃ ଦାର୍‍କାର୍ ବାନୋଗା ଚି ସାମାୟ୍ ହାର୍ ତାରିଖ୍ କୋରାଃ ବିଷାୟ୍ ରେ ଆପେକେ ଜାହାନାଃ ଅଲୋଗା। ଚିୟାଃଚି ଆପେ ଗି ବେଶ୍ ତେ ସାରିୟାପେ ଚି ଜେଲେକା ନୁବାଃ ଇମ୍ତା କୁମ୍ଡ଼ୁ ହିଜୁଗାଏ, ଏନ୍‍ଲେକାଗି ପ୍ରାଭୁ ଆଃ ହୁଲାଙ୍ଗ୍ ହିଜୁଃ ରାଃ ମେନାଃ। ଚିମ୍ତାଙ୍ଗ୍ ହୋଡ଼ୋକୋ କାଜି କାତେୟାକୋ, ଜୀଉସୁକୁ ମେନାଃ, ହାର୍ ଜେତ୍ନାଃ ବୋରୋ ବାନୋଗା, ଇମ୍ତା ଇନ୍‍କୁୱାଃ ଚେତାନ୍ ରେ ଇମ୍ତାଗି ବିନାଶ୍ ହିଜୁଃ କୋୱା, ଜେଲେକା ହୋଡ଼ମୋ ରେ ତାଇନ୍ କାନ୍ କୁଡ଼ି ଚେତାନ୍ ରେ ବୁଗିୟୋଃ ରାଃ ଦୁକୁ ଆଚ୍‍କାତେ ବୀରିଦା; ଆଡୋଃ ଇନ୍‍କୁ ଅକଲେକା ହ କାକୋ ବାଞ୍ଚାଅୱା। ମେନ୍ଦୋ ହେ ହାଗାକୋ, ଆପେ ଦୋ ନୁବାଃ ରେ ବାଙ୍ଗ୍ ପେୟା, ଚି ଏନ୍ ହୁଲାଙ୍ଗ୍ ଆପେ ରେ କୁମ୍ଡ଼ୁ ଲେକା ହିଜୁଃ କେନୋଗା। ଚିୟାଃଚି ଆପେ ସବେନ୍ ମାସ୍କାଲ୍ ରେନ୍ ହୋନ୍‍କୋ ହାର୍ ଶିଙ୍ଗି ରେନ୍ ହୋନ୍‍କୋ ତାନ୍‍ପେ; ଆବୁ ନାଦୋ ନୁବାଃ ରେନ୍ ତାନ୍‍ବୁ, ନାଦୋ ଆୟୁବ୍ ରେନ୍ ତାନ୍‍ବୁ। ଏନାମେନ୍ତେ ଆବୁ ଏଟାଃକୋ ଲେକା ଆଲୋ ଦୁଣୁମୋଃ କାବୁ, ମେନ୍ଦୋ ଏୟୋନ୍‍କାନ୍ ହାର୍ ହୋସିୟାର୍ ତାଇନ୍ କାବୁ। ଚିୟାଃଚି ଅକନ୍‍କୋ ଦୁଣୁମାକୋ ଇନ୍‍କୁ ନିଦା ଇମ୍ତାଗି ଦୁଣୁମାକୋ, ହାର୍ ଅକନ୍‍କୋ ବୁଲୋଗାକୋ ଇନ୍‍କୁ ନିଦା ଇମ୍ତାଗି ବୁଲୋଗାକୋ। ମେନ୍ଦୋ ଆବୁ ଅକନ୍‍କୋ ଶିଙ୍ଗି ରେନ୍ ତାନ୍‍ବୁ, ବିଶ୍ଵାସ୍ ହାର୍ ଦୁଲାଡ଼୍ ରାଃ ଝୀଲାମ୍ ତୁସିଙ୍ଗ୍ କେତେ ହାର୍ ବାଞ୍ଚାଅ ରାଃ ଆଶ୍ରା ରାଃ ଟୋପି ତୁସିଙ୍ଗ୍ କେତେ ସାବ୍‍ଧାନ୍ ତାଇନ୍ କାବୁ। ଚିୟାଃଚି ପାର୍ମେଶ୍ଵାର୍ ଆବୁକେ ଖିସ୍ ନାଗିନ୍ କାହା, ମେନ୍ଦୋ ନେୟାଲାଗିନ୍ ଠାହ୍‍ରାଓ କାଦାଏ ଚି ଆବୁ ଆବୁୱାଃ ପ୍ରାଭୁ ୟୀଶୁ ମାସୀହ୍ ହୋରାତେ ବାଞ୍ଚାଅ ବୁ ନାମେୟା। ଇନିଃ ଆବୁ ଲାଗିନ୍ ନେୟାମେନ୍ତେ ଗୋଏଃ ଜାନାଏ ଚି ଆବୁ ଚାହେ ଏୟୋନ୍ କେତେ ମେନାବୁୱା ଚାହେ ଦୁଣୁମ୍ କେତେ ମେନାବୁୱା, ସବେନ୍ କୋ ମେଶା କେତେ ଇନିଃ ଲୋଃ ଜୀହିଃ ତାଇନାବୁ। ଏନାମେନ୍ତେ ମିହୋଡ଼୍ ଏଟାଃ ନିଈ କେ ଜୀଉ ରେ ପେଡ଼େଏ ଏମେପେ, ହାର୍ ମିହୋଡ଼୍ ଏଟାଃ ନିଈକେ ପାର୍ମେଶ୍ଵାର୍ ଚେତାନ୍ ରେ ବିଶ୍ଵାସ୍ ଲାଗିନ୍ତେ ଦେଙ୍ଗା କୋପେ, ଜେଲେକା ଚି ଆପେ ରିକାଭି ତାନାପେ। ହେ ହାଗାକୋ, ଆଲେ ଆପେକେ କେ ଆର୍ଜିପେ ତାନାଲେ ଚି ଅକନ୍‍କୋ ଆପେ ରେ ଥିମ୍ବାଗି କାମିତାନାକୋ, ହାର୍ ପ୍ରାଭୁ ରେ ଆପେୟାଃ ଆଗୁୱା ତାନ୍‍କୋ, ହାର୍ ଆପେକେ ଶିଖାଅପେ ତାନାକୋ, ଇନ୍‍କୁକେ ମାଇନ୍ କୋପେ। ହାର୍ ଇନ୍‍କୁୱାଃ କାମି ରାଃ ଲାଗିନ୍ତେ ଦୁଲାଡ଼୍ ଲୋଃ ଇନ୍‍କୁକେ ଥିମ୍ବାଗି ମାଇନ୍ ନାମେ ଲେକାନ୍ କୋ ମେନ୍ତେ ଆଟ୍‍କାର୍ କୋପେ। ଆପେ-ଆପେ ରେ ସୁକୁତେ ମେନେଶା ରେ ତାଇନୋଃପେ। ହେ ହାଗାକୋ, ଆଲେ ଆପେକେ ବୁଝାଅପେ ତାନାଲେ ଚି ଅକନ୍‍କୋ କୋଢ଼ିୟା ଲେକା ଜୀହିଦୋଃ ତାନାକୋ ଇନ୍‍କୁକେ ବୁଝାଅ କୋପେ, ବୋରୋତାନ୍ କୋକେ ସାହାସ୍ ଏମାକୋପେ, ନାରାଦୁରା କୋକେ ସାମ୍ଭ୍ଡ଼ାଅ କୋପେ, ସବେନ୍ କୋକେ ସାହାତିଙ୍ଗ୍ କୋପେ। ହୋସିୟାର୍! ଜେତାଏ ଜାହାଁଏକେ ଏତ୍କାନ୍ ରାଃ ବାଦ୍‍ଲା ରେ ଏତ୍କାନ୍ ଆଲୋପେ ରିକାୟା, ମେନ୍ଦୋ ସାଦାଏ ବୁଗିନାଃ ରିକାନାଙ୍ଗ୍ ସେକାଡ଼୍ ରେ ତାଇନ୍‍ପେ, ଆପେ-ଆପେକୋରେ ହାର୍ ସବେନ୍ କୋ ନାଙ୍ଗ୍ ବୁଗିନାଃଗି ରିକାନାଙ୍ଗ୍ କୋଷିସ୍ ଏପେ। ସାଦାଏ ରାଶିକା ତାଇନ୍‍ପେ। ସବେନ୍ ଇମ୍ତା ବିନ୍ତି ରେ ଲାଗାଅ କାନ୍‍ପେ। ସବେନ୍ କାଜିକୋରେ ଧାନ୍ୟାବାଦ୍ ରିକାଏପେ, ଚିୟାଃଚି ଆପେ ଲାଗିନ୍ ମାସୀହ୍ ୟୀଶୁ ରେ ପାର୍ମେଶ୍ଵାର୍ ରାଃ ନେୟାଗି ସାନାଙ୍ଗ୍ ତାନା। ପାବିତାର୍ ଆତ୍ମା କେ ଆଲୋପେ ଇଣିଜେୟା। ଆୟାର୍କାଜିକୋକେ ଆଲୋପେ ହିଲାଙ୍ଗ୍‍ୟା। ସବେନ୍ କାଜିକୋକେ ଆଟ୍‍କାର୍ ଉରୁମ୍ଏପେ; ଅକନାଃ ବୁଗିନାଃ ତାନାଃ ଏନାକେ ସାବେପେ ହାର୍ ମାନାତିଙ୍ଗ୍ଏପେ। ସବେନ୍ ଲେକାନାଃ ଏତ୍କାନାଃ ତେ ସାଙ୍ଗିନ୍ ରେ ତାଇନୋଃପେ। ଶାନ୍ତି ରାଃ ପାର୍ମେଶ୍ଵାର୍ ଆଏଃଗି ଆପେକୋକେ ପୁରାଃ ଲେକାତେ ପାବିତାର୍ କାଏ; ହାର୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହିଜୁଃ ସାନ୍ତେ ଆପେୟାଃ ପୁରା ଆତ୍ମା ହାର୍ ଜୀଉ ହାର୍ ହୋଡ଼ମୋ ନିର୍ଦୋଷ୍ ଗି ବାଞ୍ଚାଅ ତାଇନୋଃକା। ଆପେୟାଃ କେଡ଼ା ନିଈ ସାର୍ତି ତାନିଃ, ହାର୍ ଇନିଃ ଏନ୍ ଲେକାଗି ରିକାୟାଏ। ହେ ହାଗାକୋ ହାର୍ ମିଶିକୋ, ଆଲେୟାଃ ଲାଗିନ୍ ବିନ୍ତି ରିକାଏପେ। ସବେନ୍ ବିଶ୍ଵାସୀ ହାଗାକୋକେ ପାବିତାର୍ ମୋନ୍ ତେ ଜୋହାର୍ କୋପେ। ଇଙ୍ଗ୍ ଆପେକେ ପ୍ରାଭୁ ରାଃ କିରିୟା ଏମାପେ ତାନିଙ୍ଗ୍ ଚି ନେ ଚିଠି ସାକାମ୍ କେ ସବେନ୍ ବିଶ୍ଵାସୀ ହାଗାକୋକେ ପାଢ଼ାଅ ଆୟୁମାକୋପେ। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ଆପେ ଚେତାନ୍ ରେ ହୋବାକାତୋଃକା। ପାଉଲୁସ୍ ଆଡୋଃ ସିଲ୍‍ବାନୁସ୍ ହାର୍ ତିମୁଥିୟୁସ୍ ପାଡ଼େତେ ଥିସ୍ସଲୁନିକେ ସାହାର୍ ରେନ୍ କାଲିସିୟା ରାଃ ନୁତୁମ୍, ଅକନ୍‍କୋ ଆବୁୱାଃ ଆପୁ ପାର୍ମେଶ୍ଵାର୍ ହାର୍ ପ୍ରାଭୁ ୟୀଶୁ ମାସୀହ୍ ରେ ମେନାକୋୱା। ଆବୁୱାଃ ଆପୁ ପାର୍ମେଶ୍ଵାର୍ ଆଡୋଃ ପ୍ରାଭୁ ୟୀଶୁ ମାସୀହ୍ ପାଡ଼େତେ ଆପେକେ ଆନୁଗ୍ରାହ୍ ହାର୍ ଜୀଉସୁକୁ ନାମ୍ ଇଦିୟୋଃକା। ହେ ହାଗାକୋ, ଆପେୟାଃ ବିଷାୟ୍ ରେ ଆଲେକେ ସବେନ୍ ସାମାୟ୍ ପାର୍ମେଶ୍ଵାର୍ କେ ଧାନ୍ୟାବାଦ୍ ରିକା ଚାହି, ହାର୍ ନେୟା ବୁଗିନାଃ ହ ତାନାଃ, ଏନାଲାଗିନ୍ତେ ଚି ଆପେୟାଃ ବିଶ୍ଵାସ୍ ଥିମ୍ବାଗି ହାରା ଇଦିୟୋଃ ତାନାଃ ହାର୍ତେ ଆପେ ସବେନ୍ କୋୱାଃ ଦୁଲାଡ଼୍ ଆପେ ଥାଲା ରେ ଥିମ୍ବାଗି ହାରା ଇଦିୟୋଃ ତାନା। ଏନାମେନ୍ତେ, ଆଲେ-ଆଲେଗି ପାର୍ମେଶ୍ଵାର୍ ରାଃ କାଲିସିୟା ରେ ଆପେୟାଃ ବିଷାୟ୍ ରେ ମାରାଙ୍ଗ୍ଏନ୍ ଆଟ୍‍କାର୍ ତାନାଲେ ଚି ଚିମିନାଙ୍ଗ୍ ସାସାତି ଆଡୋଃ ଦୁକୁ ଆପେପେ ସାହାତିଙ୍ଗ୍ ତାନା, ଏନ୍ ସବେନାଃ ରେ ଆପେୟାଃ ସାହାତିଙ୍ଗ୍ ଆଡୋଃ ବିଶ୍ଵାସ୍ ନେଲୋଃ ତାନା। ନେୟା ପାର୍ମେଶ୍ଵାର୍ ରାଃ ସାର୍ତି ବିଚାର୍ ମେନ୍ତେ ଉଦୁବୋଃ ତାନା ଚି ଆପେ ପାର୍ମେଶ୍ଵାର୍ ରାଃ ରାଇଜ୍ ନାମେ ଲେକାନ୍ ହୋବାୱାପେ, ଅକନାଃ ଲାଗିନ୍ତେ ଆପେ ଦୁକୁ ହଗି ସାହାତିଙ୍ଗ୍ ତାନାପେ। ଚିୟାଃଚି ପାର୍ମେଶ୍ଵାର୍ ରାଃ ନାଡ଼େଏ ନେୟା ବିଚାର୍ ଲେକା ତାନାଃ ଏନାତେ ଅକନ୍‍କୋ ଆପେକେ ସାତାଅ ପେତାନାକୋ, ଇନ୍‍କୁକେ ଏନାରାଃ ବାଦ୍‍ଲା ରେ ସାତାଅ କୋୱାଏ ଆଡୋଃ ଆପେକେ, ଅକନ୍‍କୋ ସାସାତି ନାମ୍ ତାନାପେ, ଆଲେୟାଃ ଲୋଃ ଜୀଉସୁକୁ ଏମାପେୟାଏ, ଏନ୍ ସାମାୟ୍ ଚିମ୍ତାଙ୍ଗ୍ ପ୍ରାଭୁ ୟୀଶୁ ଆଜାଃ ପେଡ଼େଜାନ୍ ସିର୍ମାଦାସୀ କୋଲୋଃ, ଜୁଲୋଃତାନ୍ ସେଙ୍ଗେଲ୍ ରେ ସିର୍ମାଦିଶୁମ୍ ଏତେ ନେଲୋଗାଏ, ହାର୍ ଅକନ୍‍କୋ ପାର୍ମେଶ୍ଵାର୍ କେ କାକୋ ନେଲ୍ ଉରୁମିତାନା ଆଡୋଃ ଆବୁୱାଃ ପ୍ରାଭୁ ୟୀଶୁ ଆଃ ସୁସାମାଚାର୍ କେ କାକୋ ମାନାତିଙ୍ଗ୍ ତାନା ଇନ୍‍କୁକେ ଦାଣ୍ଡ୍ ଏମାକୋୱାଏ। ଇନ୍‍କୁ ପ୍ରାଭୁ ଆଃ ନାଡ଼େଏ ତେ, ଆଡୋଃ ଇନିଜାଃ ପେଡ଼େଏ ରାଃ ଯୁନୁଲ୍‍ତାନ୍ ତେ ସାଙ୍ଗିନ୍ ହୋବାକେତେ ଜାନାଓ ରାଃ ବିନାଶ୍ ରାଃ ଶାଜାଇ ନାମେୟାକୋ। ନେୟା ଏନ୍ ହୁଲାଙ୍ଗ୍ ହୋବାୱା, ଚିଉଲା ଇନିଃ ଆଜାଃ ପାବିତାର୍ ହୋଡ଼ୋକୋ ଲୋଃ ମାନାରାଙ୍ଗ୍ ନାମେନାଙ୍ଗ୍ ହାର୍ ସବେନ୍ ବିଶ୍ଵାସ୍ ତାନ୍ କୋରେ ଆକ୍‍ଦାନ୍ଦାଅଃ ରାଃ କାଜି ହୋବା ଲାଗିନ୍ତେ ହିଜୁଗାଏ, ଚିୟାଃଚି ଆପେ ହଗି ଏନାରେ ତାଇନାପେ ଅକନ୍‍କୋ ଆଲେୟାଃ ଗୋୱା ରେ ବିଶ୍ଵାସ୍ କାଦାପେ। ଏନାଲାଗିନ୍ତେ ଆଲେ ଜାନାଓ ଆପେୟାଃ ଲାଗିନ୍ତେ ବିନ୍ତି ତାନାଲେ, ଚି ଆବୁୱାଃ ପାର୍ମେଶ୍ଵାର୍ ଆପେକେ ନେ କେଡ଼ାକାନ୍ କୋ ମେନ୍ତେ ଆଟ୍‍କାରେକାଏ, ହାର୍ ସବେନ୍ ବୁଗିନାଃ ସାନାଙ୍ଗ୍ ହାର୍ ବିଶ୍ଵାସ୍ ରାଃ ସବେନ୍ କାମିକୋକେ ପେଡ଼େଏ ତେ ପୁରାକାଏ, ଏନାତେ ଆବୁୱାଃ ପାର୍ମେଶ୍ଵାର୍ ଆଡୋଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ଲେକାତେ ଆବୁୱାଃ ପ୍ରାଭୁ ୟୀଶୁ ଆଃ ନୁତୁମ୍ ଆପେ ରେ ମାନାରାଙ୍ଗ୍ଅଃକା, ହାର୍ ଆପେ ଇନିଜାଃ ରେ। ହେ ହାଗାକୋ, ନାଆ ଆବୁ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହିଜୁଃ, ଆଡୋଃ ଇନିଜାଃ ନାଡ଼େଏ ରେ ଆବୁୱାଃ ହୁଣ୍ଡିନ୍ ରାଃ ବିଷାୟ୍ ରେ ଆପେକେ ଆର୍ଜି ତାନାଲେ, ଚି ଜାହାନ୍ ଆତ୍ମା, ୟାଦୋ ବାଚାନ୍, ୟାଦୋ ଚିଠି ସାକାମ୍ ରାଃ ହୋରାତେ, ଅକନାଃ ଚି ଆଲେ ପାଡ଼େତେ ତାନାଃ ମେନ୍ତେ, ଆଟ୍‍କାର୍ କେତେ ଚି ପ୍ରାଭୁ ଆଃ ହୁଲାଙ୍ଗ୍ ହିଜୁଃ ଥେବାଃ କାନା, ଆପେୟାଃ ମୋନ୍ ଇମ୍ତାଗି ଆଲୋକା ଆସ୍ଥିରକା ହାର୍ ଆଲୋପେ ବୋରୋୟା। ଜାହାନ୍ ଲେକାତେ ଜେତାୟାଃ ହିହିଡ଼୍ ରେ ଆଲୋପେ ହିଜୁଗା, ଚିୟାଃଚି ଏନ୍ ହୁଲାଙ୍ଗ୍ କାହିଜୁଗା ଚିମ୍ତାଙ୍ଗ୍ ସାନ୍ ଧାରାମ୍ ରାଃ କାମି କାବାଗେଅଗା, ହାର୍ ଏନ୍ ପାପ୍ ରାଃ ହୋଡ଼ ମାନେ ବିନାଶ୍ ରାଃ ହୋନ୍ କାଏ ଉଦୁବ୍ ଅଗାଏ। ଅକନିଃ ବିରୋଧ୍ ରିକାୟାଏ, ହାର୍ ସବେନ୍ କୋକେ ଅକଏ ଇଶ୍ୱାର୍ ୟାଦୋ ସେୱା ନାମେନିଃ କାଜିୟୋଃତାନାଏ, ଇନ୍‍କୁଏତେ ଆଏଃ ଆପାନ୍ କେ ମାରାଙ୍ଗ୍ ଉଦୁବେନୋଗାଏ, ନେତାଃ ସାନ୍ ଚି ଇନିଃ ପାର୍ମେଶ୍ଵାର୍ ରାଃ ମାନ୍ଦିର୍ ରେ ଦୁବ୍ କେତେ ଆଏଃ ଆପାନ୍ କେ ପାର୍ମେଶ୍ଵାର୍ ଉଦୁବେନୋଗାଏ। ଚିନାଃ ଆପେ କାପେ ପାହୋମ୍ ତାନା ଚି ଚିମ୍ତାଙ୍ଗ୍ ଇଙ୍ଗ୍ ଆପେତାଃ ରେ ତାଇକେନାଇଙ୍ଗ୍, ଇମ୍ତା ଆପେକେ ନେ କାଜିକୋ କାଜି ତାଇକେନାଇଙ୍ଗ୍? ଆପେ ଏନ୍ ଜିନିଷ୍ କେ ସାରିୟାପେ, ଅକନାଃ ଇନିଃକେ ନାଆ ରୋକାୱି ତାନାଏ ଚି ଇନିଃ ଆଜାଃଗି ସାମାୟ୍ ରେ ଉଦୁବେନ୍ କାଏ। ଚିୟାଃଚି ଆଧାର୍ମ୍ ରାଃ ଉକୁକାନ୍ କାଜି ନାଆ ହଗି କାମି ଇଦିତାନାଏ, ମାଗାର୍ ନାଆ ମିୟାଃ ରୋକାଅନିଃ ମେନାଇଜା, ଆଡୋଃ ଚିମ୍ତାଙ୍ଗ୍ ସାନ୍ ଇନିଃ କାଏ ସାଙ୍ଗିନୋଗାଏ ଇନିଃ ରୋକାଅ କାଇୟାଏ। ଏନ୍ତେ ଏନ୍ ଆଧାର୍ମୀ ଉଦୁବ୍ ଅଗାଏ, ଅକନିଃକେ ପ୍ରାଭୁ ୟୀଶୁ ଆଜାଃ ମୋଚା ରାଃ ଅଙ୍ଗ୍ ତେ ଗୋଜିୟାଏ, ହାର୍ ଆଜାଃ ହିଜୁଃ ରାଃ ଯୁନୁଲ୍ ତେ ରୋଙ୍ଗୋ ତାଇୟାଏ। ଏନ୍ ଆଧାର୍ମୀ ରାଃ ହିଜୁଃ ଶାଏତାନ୍ ରାଃ କାମି ଲେକାତେ ସବେନ୍ ଲେକାନାଃ ହିହିଡ଼୍ ପେଡ଼େଏ, ଆଡୋଃ ଚିହ୍ନା, ଆଡୋଃ ଆକ୍‍ଦାନ୍ଦା କାମି କୋଲୋଃ, ହାର୍ ନାଶ୍ ହୋବାଅଃକୋ ଲାଗିନ୍ ଆଧାର୍ମ୍ ରାଃ ସବେନ୍ ଲେକାନାଃ ହିହିଡ଼୍ ଲୋଃ ହୋବାୱା, ଚିୟାଃଚି ଇନ୍‍କୁ ସାର୍ତି କେ କାକୋ ଦୁଲାଡ଼୍ କେଦା ଅକନାଃତେ ଇନ୍‍କୁୱାଃ ବାଞ୍ଚାଅ ହୋବାଅଃତେ। ଏନାମେନ୍ତେ ପାର୍ମେଶ୍ଵାର୍ ଇନ୍‍କୁରେ ମିୟାଃ ହୋରା ଆଦେ ରାଃ ପେଡ଼େଏ କେ କୁଲେୟାଏ ଏନାତେ ଇନ୍‍କୁ ଲୋଗୋ କେ ପାତି ୟାକୋ, ଏନାରାଃ ଚାଲ୍ତେ ଚିମିନ୍ ହୋଡ଼ୋକୋ ସାର୍ତି କେ କାକୋ ପାତିତାନା, ମେନ୍ଦୋ ଆଧାର୍ମ୍ କେ ସୁକୁଅଃ ତାନାକୋ, ଇନ୍‍କୁ ସବେନ୍ ସାଜାକୋ ନାମେୟା। ହେ ହାଗାକୋ, ଆଡୋଃ ପ୍ରାଭୁ ଆଃ ଦୁଲାଡ଼ାନ୍ ହୋଡ଼ୋକୋ, ଆଲେ ଆପେୟାଃ ବିଷାୟ୍ ରେ ସବେନ୍ ଇମ୍ତାଙ୍ଗ୍ ପାର୍ମେଶ୍ଵାର୍ ରାଃ ଧାନ୍ୟାବାଦ୍ ରିକା କାତେୟାଲେ ଏନା ଲାଗାତିଙ୍ଗ୍ ମେନାଃ, ଚିୟାଃଚି ପାର୍ମେଶ୍ଵାର୍ ଆପେକେ ମୁନୁ ଏତେ ସାଲାକାଃ ପେୟାଏ ଚି ଆତ୍ମା ରାଃ ହୋରାତେ ପାବିତାର୍ ବାଇକେତେ, ସାର୍ତି କେ ପାତି କେତେ ବାଞ୍ଚାଅ ନାମେପେ, ଅକନାଃ ଲାଗିନ୍ ଇନିଃ ଆପେକେ ଆଲେୟାଃ ସୁସାମାଚାର୍ ରାଃ ହୋରାତେ କେଡ଼ା କେଃପେୟାଏ, ଏନାତେ ଆପେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ମାନାରାଙ୍ଗ୍ କେ ନାମେ ୟାପେ। ଏନାମେନ୍ତେ ହେ ହାଗାକୋ, ତିଙ୍ଗୁ କେଟେଃ କାନ୍‍ପେ ତାଇନୋଃପେ, ହାର୍ ଅକନ୍-ଅକନ୍ କାଜିକୋକେ ଆପେ ବାଚାନ୍ ୟାଦୋ ଚିଠି ସାକାମ୍ ରାଃ ହୋରାତେ ଆଲେ ତେ ଶିଖାଅ କାନାପେ, ଏନାକୋକେ ସାବା କାପେ। ଆବୁୱାଃ ପ୍ରାଭୁ ୟୀଶୁ ମାସୀହ୍ ଆଏଃଗି, ଆଡୋଃ ଆବୁୱାଃ ଆପୁ ପାର୍ମେଶ୍ଵାର୍, ଅକନିଃ ଆବୁ ଲୋଃ ଦୁଲାଡ଼୍ ମାଣ୍ଡାଅ କେଦାଏ, ହାର୍ ଆନୁଗ୍ରାହ୍ ଏତେ ଜାନାଓ ରାଃ ଜୀଉସୁକୁ ଆଡୋଃ ବୁଗିନ୍ ଆଶ୍ରା ଏମ୍ କାଦାଏ, ଆପେୟାଃ ମୋନ୍ କୋରେ ଜୀଉସୁକୁ ଏମେକାଏ ହାର୍ ଆପେକେ ସବେନ୍ ଲେକାନାଃ ବୁଗିନ୍ କାମି ହାର୍ ବାଚାନ୍ ରେ କେଟେଃପେ କାଏ। ଟୁଣ୍ଡୁ ରାଃ କାଜି ଦୋ ନେୟା ତାନାଃ ଚି, ହେ ହାଗାକୋ, ଆଲେ ଲାଗିନ୍ ବିନ୍ତି କାତେପେ ଚି ପ୍ରାଭୁ ରାଃ ବାଚାନ୍ ନେକା ସେକାଡ଼୍ ପାସ୍ରାଅଃକା ଆଡୋଃ ମାନାରାଙ୍ଗ୍ ନାମୋଃକା, ଜେଲେକା ଆପେ ରେ ହୋବାଜାନା, ହାର୍ ଆବୁ ଟେଢ଼ା ଆଡୋଃ ଦୁଷ୍ଟ ହୋଡ଼ୋକୋ ଏତେ ବାଞ୍ଚାଅ କେତେ ତାଇନାବୁ ଚିୟାଃଚି ସବେନ୍ କୋୱାଃ ରେ ବିଶ୍ଵାସ୍ ବାନୋଃ। ମେନ୍ଦୋ ପ୍ରାଭୁ ସାର୍ତି ତାନିଃ, ଇନିଃ ଆପେକେ କେଟେଃ ତେ ତିଙ୍ଗୁ ପେୟାଏ ଆଡୋଃ ଏନ୍ ଦୁଷ୍ଟ ଶାଏତାନ୍ ଏତେ ବାଞ୍ଚାଅ ପେୟାଏ। ଆଲେକେ ପ୍ରାଭୁ ରେ ଆପେୟାଃ ଚେତାନ୍ ଭାରୋସା ମେନାଃ ଚି ଅକନ୍-ଅକନ୍ ଆନାଚୁ ଆପେକେ ଏମାପେ ତାନାଲେ, ଏନାକୋକେ ଆପେ ମାନାତିଙ୍ଗ୍ ତାନାପେ, ହାର୍ ମାନାତିଙ୍ଗ୍ କାତେୟାପେ। ପାର୍ମେଶ୍ଵାର୍ ରାଃ ଦୁଲାଡ଼୍ ଆଡୋଃ ମାସୀହ୍ ରାଃ କେଟେଃ ହାର୍ ସାହାତିଙ୍ଗ୍ ହୋରା ପାଡ଼୍ ପ୍ରାଭୁ ଆପେୟାଃ ମୋନ୍ କୋକେ ଆୟୁର୍ ଇଦିପେକାଏ। ହେ ହାଗାକୋ, ଆଲେ ଆପେକେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ନୁତୁମ୍ ତେ ଆନାଚୁ ଏମାପେ ତାନାଲେ ଚି ଆପେ ସବେନ୍ ନେକାନ୍ ହାଗା କୋଏତେ ଗେନା କେତେ ତାଇନୋଃପେ, ଅକଏ ଏତ୍କାନ୍ ସେସେନ୍ ସେନ୍ ତାନାଏ ହାର୍ ଅକନ୍ ଶିଖାଅ ଇନିଃ ଆଲେତେ ନାମ୍ କାଦାଏ ଏନ୍ ଲେକାତେ କାଏ ମାନାତିଙ୍ଗ୍ ତାନାଏ। ଚିୟାଃଚି ଆପେ-ଆପେ ଗି ସାରିୟାପେ ଚି ଚିଲ୍‍କା ସେସେନ୍ ରେ ଆପେ ଆଲେୟାଃ ଲେକା ସେସେନାପେ, ଚିୟାଃଚି ଆଲେ ଆପେୟାଃ ଥାଲା ରେ କୋଢ଼ିୟାକୋ ଲେକା କାଲେ ତାଇନ୍ କେନା, ହାର୍ ଜେତାୟାଃ ହୋଲୋଙ୍ଗ୍ ସାମା ତେ ଦୋ କାଲେ ଜୋମ୍ ମେନ୍ଦୋ କାମି କେଦାଲେ ହାର୍ ଦୁକୁ ସାହାତିଙ୍ଗ୍ କେତେ ନିଦା ଶିଙ୍ଗି କାମି-ଉଦାମ୍ ରିକା ତାଇନାଲେ ଏନାତେ ଆପେ କୋଏତେ ଅକେୟାଃ ରେହ ହାମ୍ବାଲ୍ କାଲେ ହୋବାୱା। ନେୟା କାହା ଚି ଆଲେକେ ଆଧିକାର୍ ବାନୋଃ, ମେନ୍ଦୋ ନେୟାମେନ୍ତେ ଚି ଆଲେ ଆପାନ୍ କେ ଆପେୟାଃ ଲାଗିନ୍ ନାମୁନା ବାଇୟୋଃୱାଲେ ଏନାତେ ଆପେ ଆଲେକେ ଅତୋଙ୍ଗ୍ ୟାପେ। ଚିୟାଃଚି ଅକୋଇମ୍ତାଙ୍ଗ୍ ଆଲେ ଆପେତାଃ ରେ ତାଇକେନାଲେ, ଇମ୍ତା ରେହ ନେ ଆନାଚୁ ଆପେକେ ଏମ୍ ତାଇକେନାଲେ ଚି ଆଗାର୍ ଜେତାଏ କାମି-କାମି ନାଙ୍ଗ୍ କାଏ ସାନାଙ୍ଗ୍ଆଏ ଏଣ୍ଡେ ଜୋମ୍ ହ ଆଲୋ ଜୋମେକାଏ। ଆଲେ ଆୟୁମ୍ ତାନାଲେ ଚି ଚିମିନାଙ୍ଗ୍ ହୋଡ଼ୋକୋ ଆପେୟାଃ ଥାଲା ରେ ଆଲ୍‍ସୀ ଲେକା ଜୀହିଦୋଃ ତାନାକୋ; ଆଡୋଃ ଜାହାନ୍ କାମି କାକୋ ରିକାତାନା ମେନ୍ଦୋ ଏଟାଃ କୋୱାଃ କାମି ରେ ତିଈ ସାଜୁ ବାଡ଼ାୟାକୋ। ନେଲେକାନ୍ କୋକେ ଆଲେ ପ୍ରାଭୁ ୟୀଶୁ ମାସୀହ୍ ରାଃ ନୁତୁମ୍ ତେ ଆନାଚୁ ଏମ୍ କୋତାନାଲେ ହାର୍ ବୁଝାଅ କୋତାନାଲେ ଚି ହାପା-ହାପା କାମି କେତେ ଆପାନାଃ ଗି ହୋଲୋଙ୍ଗ୍ ଜୋମେ କାକୋ। ହାର୍ ହେ ହାଗାକୋ, ବୁଗିନାଃ ରିକା ଲାଗିନ୍ ଆଲୋପେ ଲାଗାଅଃ। ଆଗାର୍ ଜେତାଏ ଆଲେୟାଃ ନେ ଚିଠି ସାକାମ୍ ରାଃ କାଜି କୋକେ କାଏ ମାନାତିଙ୍ଗ୍ ରେଦୋ ଇନିଃକେ ନେଲ୍ଉରୁମ୍ କାଇପେ, ହାର୍ ଇନିଜାଃ ଲୋଃ ଆଲୋପେ ଗାତିନା, ଏନାତେ ଇନିଃ ଗିୟୁଗୋୱାଏ। ଏଣ୍ଡେ ହ ଇନିଃକେ ବାଇରୀ ମେନ୍ତେ ଆଲୋପେ ବୁଝାୱାଃ, ମେନ୍ଦୋ ବିଶ୍ଵାସୀ ହାଗା ସାରିକେତେ ସୁଧ୍‍ରାଇପେ। ନାଆ ପ୍ରାଭୁ ଅକନିଃ ଜୀଉସୁକୁ ଏମେନିଃ ତାନିଃ ଆଏଃଗି ଆପେକେ ସାଦାଏ ଆଡୋଃ ସବେନ୍ ଲେକାତେ ଶାନ୍ତି ଏମେକାଏ। ପ୍ରାଭୁ ଆପେ ସବେନ୍ କୋଲୋଃ ତାଇନ୍ କାଏ। ଇଙ୍ଗ୍, ପାଉଲୁସ୍, ଇଙ୍ଗ୍ଆଃ ତିଈ ତେ ଜୋହାର୍ ଅଲ୍ ତାନାଇଙ୍ଗ୍। ସବେନ୍ ଚିଠି ସାକାମ୍ ରେ ଇଙ୍ଗ୍ଆଃ ନେୟାଗି ଚିହ୍ନା ତାନାଃ; ଇଙ୍ଗ୍ ନେଲେକାତେ ଗି ଅଲେୟାଇଙ୍ଗ୍। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ଆପେ ସବେନ୍ ରେ ହୋବାକାନ୍ତେଅଃକା। ପାଉଲୁସ୍ ପାଡ଼େତେ ଅକନିଃ ମାସୀହ୍ ୟୀଶୁ ରାଃ କୁଲାକାନ୍ ଚେଲା ତାନିଃ, ଆବୁୱାଃ ବାଞ୍ଚାଅନିଃ ପାର୍ମେଶ୍ଵାର୍ ହାର୍ ଆବୁୱାଃ ଆଶ୍ରା ମାସୀହ୍ ୟୀଶୁ ରାଃ ଆନାଚୁ ତେ, ତିମୁଥିୟୁସ୍ ରାଃ ନୁତୁମ୍ ଅକନିଃ ବିଶ୍ଵାସ୍ ରେ ଇଙ୍ଗ୍ଆଃ ସାର୍ତି ହୋନ୍‍କଡ଼ା ତାନିଃ ହାର୍ ଆପୁ ପାର୍ମେଶ୍ଵାର୍, ହାର୍ ଆବୁୱାଃ ପ୍ରାଭୁ ମାସୀହ୍ ୟୀଶୁ ପାଡ଼େତେ ଆମ୍‍କେ ଆନୁଗ୍ରାହ୍, ହାର୍ ଦାୟା ହାର୍ ଜୀଉସୁକୁ ନାମ୍ କାତୋଃକା। ଜେଲେକା ଇଙ୍ଗ୍ ମାକିଦୁନିୟା ରାଇଜ୍ ପାଡ଼୍ ସେସେନ୍ ସାମାୟ୍ ରେ ଆମ୍‍କେ ବୁଝାଅ ଲେଃମିଙ୍ଗ୍, ଚି ଇଫିସୁସ୍ ସାହାର୍ ରେ ତାଇନ୍ କେତେ ହିହିଡ଼୍ ଶିଖାଅ ହୋଡ଼ୋକୋକେ ଆନାଚୁ ଏମାକୋମ୍ ଚି ହିହିଡ଼୍ ଶିଖାଅ ଆଲୋ ଏମେକାକୋ, ହାର୍ ଏନ୍ ବାଇକାନ୍ କାଥ୍‍ନୀ କୋ ହାର୍ କାଟୁଣ୍ଡୁ କିଲିକୋରାଃ କାଜି କୋରେ ମୋନ୍ ଆଲୋ ଲାଗାୱେକାକୋ, ଅକନାଃ ରେ କୁଲିକାପାଜି ଅମୋନୋଃୱା; ହାର୍ ପାର୍ମେଶ୍ଵାର୍ ରାଃ ରାଇଜ୍ ବିଶ୍ଵାସ୍ ରେ କାହାରା ଇଦିଅଃୱା। ଏନ୍‍ଲେକାଗି ଆଡୋଃଗି କାଜିତାନିଙ୍ଗ୍। ଆନାଚୁ ରାଃ କାଜିଦୋ ନେୟା ତାନାଃ, ଚି ଫାର୍ଚି ମୋନ୍ ହାର୍ ବୁଗିନ୍ ଆଟ୍‍କାର୍, ହାର୍ କାବେଦା ବିଶ୍ଵାସ୍ ତେ ଦୁଲାଡ଼୍ ଅମୋନୋଃକା। ନେୟାକୋକେ ବାଗିକେତେ ଚିମିନ୍ ହୋଡ଼ୋକୋ ସାମାକାଜି ପାଡ଼୍ ଆଃ ଜାନାକୋ, ହାର୍ ମୁଶା ନାବୀ ରାଃ ଆଇନ୍ ଗୁରୁ ଦୋ ହୋବା ସାନାଙ୍ଗାକୋ, ମେନ୍ଦୋ ଅକନ୍ ବାକାଣ୍ କାଜିୟାକୋ ହାର୍ ଅକନାଃକେ କେଟେଃ ତେ କାଜିୟାକୋ, ଏନାକୋକେ ଆକୋଗି କାକୋ ବୁଝାଅଃ ତାନା। ମେନ୍ଦୋ ଆଲେ ସାରିତାନାଲେ ଚି ଆଗାର୍ ଜେତାଏ ଆଇନ୍ କେ ଠାଉକା ଲେକାତେ କାମି ରେ ଆୱେକାଏ ଏଣ୍ଡେ ଏନା ବେଶ୍ ତାନାଃ। ନେୟା ସାରିକେତେ ଚି ମୁଶା ନାବୀ ରାଃ ଆଇନ୍ ଧାର୍ମୀ ହୋଡ଼ୋକୋ ନାଙ୍ଗ୍ କାହା ମେନ୍ଦୋ ଆଧାର୍ମୀ ହୋଡ଼ୋକୋ ନାଙ୍ଗ୍, କାମାନାତିଙ୍ଗ୍ କୋ ନାଙ୍ଗ୍, ପାର୍ମେଶ୍ଵାର୍ କେ କାବୋରୋତାନ୍ କୋ ନାଙ୍ଗ୍, ପାପୀକୋ ନାଙ୍ଗ୍, ଆପାବିତାର୍ କୋ ନାଙ୍ଗ୍ ହାର୍ କାଫାର୍ଚି ହୋଡ଼ୋକୋ ନାଙ୍ଗ୍, ଏଙ୍ଗା-ଆପୁ କୋକେ ଗୋଗୋଏଃକୋ ନାଙ୍ଗ୍, ହୋଡ଼ ଗୋଗୋଏଃକୋ ନାଙ୍ଗ୍, ବ୍ୟାଭିଚାରୀ କୋ ନାଙ୍ଗ୍, କଡ଼ା-କଡ଼ା କୋଲୋଃ ଏତ୍କାନ୍ କାମିକୋ ନାଙ୍ଗ୍, ହୋଡ଼ କୋକେ ଆଖ୍ରିଙ୍ଗ୍ ତାନ୍ କୋ ନାଙ୍ଗ୍, ହିହିଡ଼୍ କୋ ନାଙ୍ଗ୍ ହାର୍ ଲୋଗୋ କିରିୟା ଜୋମ୍ ତାନ୍‍କୋ ନାଙ୍ଗ୍, ହାର୍ ନେୟାକେ ବାଗିକେତେ ବୁଗିନ୍ ଉପ୍‍ଦେଶ୍ କୋରାଃ ସବେନ୍ ବିରୋଧୀ କୋ ନାଙ୍ଗ୍ ବାଇକାନା। ନେ ଶିଖାଅଗି ପୁରାଃ ସୁକୁୱାକାନ୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରାଃ ଏନ୍ ସୁସାମାଚାର୍ ରାଃ ଲେକାତେ ତାନାଃ, ଅକନାଃ ଚି ଇଙ୍ଗ୍‍କେ ଜିମାକାନା। ଇଙ୍ଗ୍ ଆବୁୱାଃ ପ୍ରାଭୁ ମାସୀହ୍ ୟୀଶୁ ରାଃ ଅକନିଃ ଇଙ୍ଗ୍‍କେ ପେଡ଼େଏ ଏମ୍ କାଦାଏ, ଧାନ୍ୟାବାଦ୍ ତାନିଙ୍ଗ୍ ଚି ଇନିଃ ଇଙ୍ଗ୍‍କେ ବିଶ୍ଵାସ୍ ଲେକାନିଃ ଆଟ୍‍କାର୍ କେତେ ଆଜାଃ ସେୱା ଲାଗିନ୍ ସାଲା କାଦିଙ୍ଗାଏ। ଇଙ୍ଗ୍ ଦୋ ସିଦା ନିନ୍ଦା ରିକାନିଃ, ହାର୍ ବିଶ୍ଵାସୀକୋକେ ସାତାଅକୋ ତାଇନାଇଙ୍ଗ୍, ହାର୍ ଦୁକୁ ଏମ୍‍କୋ ତାଇନାଇଙ୍ଗ୍; ଏଣ୍ଡେ ହ ଇଙ୍ଗ୍ଆଃ ଚେତାନ୍ ରେ ଦାୟା ହୋବାନା, ଚିୟାଃଚି ଇଙ୍ଗ୍ କାବିଶ୍ଵାସ୍ ରାଃ ହୋରାତେ କାବୁଝାଅ-ସୁଝାଅ ନେ କାମି ରିକାଲେଦାଇଙ୍ଗ୍। ହାର୍ ଆବୁୱାଃ ପ୍ରାଭୁ ରାଃ ଆନୁଗ୍ରାହ୍ ଏନ୍ ବିଶ୍ଵାସ୍ ହାର୍ ଦୁଲାଡ଼୍ ଲୋଃ ଥିମ୍ବାଗି ହୋବାଜାନା, ଅକନାଃ ମାସୀହ୍ ୟୀଶୁ ରେ ମେନାଃ। ନେ ବାକାଣ୍ ସାର୍ତି ହାର୍ ସବେନ୍ ଲେକାତେ ମାନାତିଙ୍ଗ୍ କାଜି ତାନାଃ ମାସୀହ୍ ୟୀଶୁ ଆବୁ ପାପୀ କୋକେ ବାଞ୍ଚାଅ ଲାଗିନ୍ତେ ଅତେଦିଶୁମ୍ ରେ ହିଜୁଃ ଲେନାଏ, ଇନ୍‍କୁଏତେ ଇଙ୍ଗ୍ ମାରାଙ୍ଗ୍ ପାପୀ ତାନିଙ୍ଗ୍। ମେନ୍ଦୋ ଇଙ୍ଗ୍ଆଃ ଚେତାନ୍ ରେ ନେୟାଲାଗିନ୍ତେ ଦାୟା ହୋବାଜାନା ଚି ଇଙ୍ଗ୍ ସବେନ୍ଏତେ ମାରାଙ୍ଗ୍ ପାପୀ ହୋଡ଼ ରେ ୟୀଶୁ ମାସୀହ୍ ଆଜାଃ ପୁରାଃ ସାହାତିଙ୍ଗ୍ କେ ଦେଖାଅୟାଏ, ଚି ଅକନ୍ ହୋଡ଼ୋକୋ ଇନିଜାଃ ରେ ଜାନାଓ ଜୀଦାନ୍ ନାମେ ଲାଗିନ୍ ବିଶ୍ଵାସ୍ ୟାକୋ ଇନ୍‍କୁୱାଃ ଲାଗିନ୍ତେ ଇଙ୍ଗ୍ ମିୟାଃ ନାମୁନା ବାଇୟୋଗାଇଙ୍ଗ୍। ନାଆ ଜାନାଓ ରେନ୍ ରାଜା କାଏଗୋଜୋଃ ନିଃ, କାଏନେଲୋଃ ନିଃ, ମିୟାଃଗି ପାର୍ମେଶ୍ଵାର୍ ରାଃ ମାଇନ୍ ହାର୍ ମାନାରାଙ୍ଗ୍ ଜାନାଓ-ଜାନାଓ ହୋବା କାତୋଃକା। ଆମୀନ୍। ହେ ହୋନ୍‍କଡ଼ା ତିମୁଥିୟୁସ୍, ଏନ୍ ଆୟାର୍‍କାଜି କୋରାଃ ଲେକାତେ ଅକନାଃ ସିଦା ଆମାଃ ବିଷାୟ୍ ରେ ହୋବାଲେନା, ଇଙ୍ଗ୍ ନେୟା ଆନାଚୁ ଏମାମେ ତାନିଙ୍ଗ୍ ଚି ଆମ୍ ଏନ୍ କାଜିକୋରାଃ ଲେକାତେଗି ବୁଗିନ୍ ଲାଡ଼ାଇ-ଲାଡ଼ାଇ କାତୋଃମେ, ହାର୍ ବିଶ୍ଵାସ୍ ଆଡୋଃ ଏନ୍ ବୁଗିନ୍ ଆଟ୍‍କାର୍ ଉରୁମ୍ କେ ମାଣ୍ଡାଅକାମେ, ଅକନାଃକେ ବାଗି ରାଃ ଚାଲ୍ତେ ଚିମିନାଙ୍ଗ୍ ହୋଡ଼ୋକୋୱାଃ ବିଶ୍ଵାସ୍ ଲେକାନ୍ ଜାହାଜ୍ ରାପୁଃ ଜାନା। ଏନ୍ ହୋଡ଼ୋକୋ ଏତେଗି ହୁମିନାୟୁସ୍ ହାର୍ ଆଲେକ୍‍ଜାଣ୍ଡାର୍ ତାନ୍‍କିନ୍, ଇନ୍‍କିନ୍ କେ ଇଙ୍ଗ୍ ଶାଏତାନ୍ କେ ଜିମାତାଃ କିନିଙ୍ଗ୍ ଏନାତେ ଇନ୍‍କିନ୍ ପାର୍ମେଶ୍ଵାର୍ ରାଃ ନିନ୍ଦା ରିକା ଆଲୋକାକିନ୍ ଶିଖାଅଃକା। ନାଆ ଇଙ୍ଗ୍ ସବେନାଃ ତେ ସିଦାରେ ନେୟା ସାନାଙ୍ଗ୍ ତାନିଙ୍ଗ୍ ଚି ଆର୍ଜି, ବିନ୍ତି, ଏଟାଃକୋୱାଃ ନାଙ୍ଗ୍ ବିନ୍ତି ହାର୍ ଧାନ୍ୟାବାଦ୍ ସବେନ୍ ହୋଡ଼ୋକୋ ଲାଗିନ୍ ରିକାଅଃକା, ରାଜାକୋ ଲାଗିନ୍ ଆଡୋଃ ସବେନ୍ ମାପ୍‍ରାଙ୍ଗ୍ ପାଦ୍ ରେ ତାଇନ୍ ତାନ୍‍କୋ ଲାଗିନ୍, ନେୟାମେନ୍ତେ ଚି ଆବୁ ଆରାମ୍ ରେ ଆଡୋଃ ଜୀଉସୁକୁ ଲୋଃ ପୁରା ପାର୍ମେଶ୍ଵାର୍ କେ ବୋରୋ ତାନ୍‍ଲୋଃ ହାର୍ ମାଇନ୍ ନାମେ ତାନ୍‍ଲୋଃ ଜୀଦାନ୍ ଜୀହିଦାବୁ। ନେୟା ଆବୁୱାଃ ବାଞ୍ଚାଅନିଃ ପାର୍ମେଶ୍ଵାର୍ କେ ବେଶ୍ ଆଦାଇୟା ଆଡୋଃ ସୁକୁୱାଇୟା, ଅକନିଃ ନେୟା ସାନାଙ୍ଗ୍ଆଏ ଚି ସବେନ୍ ହୋଡ଼ୋକୋୱାଃ ବାଞ୍ଚାଅ ହୋବାଅଃକା, ହାର୍ ଇନ୍‍କୁ ସାର୍ତିକେ ବେଶ୍ ଲେକାକୋ ନେଲ୍ ଉରୁମେକାକୋ। ଚିୟାଃଚି ପାର୍ମେଶ୍ଵାର୍ ମିୟାଃ ଗିୟାଏ, ଆଡୋଃ ପାର୍ମେଶ୍ଵାର୍ ହାର୍ ହୋଡ଼ୋକୋୱାଃ ଥାଲା ରେ ମିୟାଃଗି ଥାଲାରେନିଃ ମେନାଇଜା, ମାନେ ମାସୀହ୍ ୟୀଶୁ ଅକଏ ଚି ହୋଡ଼ ତାନିଃ। ଅକଏ ଆଏଃ ଆପାନ୍ କେ ସବେନ୍ କୋୱାଃ ଛୋଡ଼ାଓ ରାଃ ଗୋନୋଙ୍ଗ୍ ଲେକାତେ ଏମ୍‍ତାଦାଏ, ଆଡୋଃ ଇନିଜାଃ ଗୋୱା ଠିକ୍ ସାମାୟ୍ ରେ ଏମ୍ ଜାନା। ଇଙ୍ଗ୍ ସାର୍ତି କାଜିତାନିଙ୍ଗ୍, କାଇଙ୍ଗ୍ ହିଡ଼୍‍ତାନା, ଚି ଇଙ୍ଗ୍ ଏନ୍ କାଜି ଲେକାତେଗି ପାର୍ଚାର୍ ହାର୍ କୁଲାକାନ୍ ଚେଲା ହୋବାନାଇଙ୍ଗ୍ ଆଡୋଃ ଏଟାଃଜାତିକୋ ଲାଗିନ୍ ବିଶ୍ଵାସ୍ ହାର୍ ସାର୍ତି ରାଃ ଉପ୍‍ଦେଶ୍ ଏହେମ୍ ନିଈ ବାଇଜାନାଇଙ୍ଗ୍। ଏନାମେନ୍ତେ ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍ ଚି ସବେନ୍ ଜାଗା ରେ କଡ଼ାକୋ, ବେଗାର୍ ଖିସ୍ ହାର୍ ଏପେଗେର୍ ତେ ପାବିତାର୍ ଜୀହିଦୋଃ ତାନ୍‍କୋ ତିଈ କୋକେ ଉଠାଓକେତେ ବିନ୍ତି କାକୋ। ଏନ୍‍ଲେକାଗି କୁଡ଼ିକୋ ହଗି ଗିୟୁଃ ଆଡୋଃ ମୋନ୍ କେ ବୁଝାଅ କେତେ ଠାଉକା ଲେକାନ୍ ସାଧାରାନ୍ ଲିଜାଃତେ ଆପାନ୍ କେ ସିଙ୍ଗାରେନ୍ କାକୋ; ଉବ୍ ଗାଲାଙ୍ଗ୍ଏନ୍ତେ ଆଡୋଃ ସୋନା ତେ, ଆଡୋଃ ମୋତି କୋଏତେ ଆଡୋଃ ଗୋନୋଙ୍ଗାନ୍ ଲିଜାଃ କୋଏତେ ଦୋ କାହା, ମେନ୍ଦୋ ବୁଗିନ୍ କାମି କୋଏତେ, ଚିୟାଃଚି ପାର୍ମେଶ୍ଵାର୍ କେ ମାନାତିଙ୍ଗ୍ ତାନ୍ କୁଡ଼ି କୋକେ ନେୟାଗି ଠାଉକା ତାନାଃ। କାଲିସିୟା ସାଭା ଇମ୍ତା ରେ କୁଡ଼ି କେ ହାପା-ହାପା ପୁରା ସବେନ୍ କାଜିକୋରେ ହୁଡିଙ୍ଗ୍ଏନ୍ ତାନ୍‍ଲୋଃ ଶିଖାଅନ୍ ଚାହି। ଇଙ୍ଗ୍ କୁଡ଼ି କେ ଶିଖାଅ ଏମ୍ ନାଙ୍ଗ୍ ହାର୍ କଡ଼ା ଚେତାନ୍ ରେ ଆଧିକାର୍ ମାଣ୍ଡାଅନାଙ୍ଗ୍ କାଇଙ୍ଗ୍ ଆଚୁଇତାନା, ମେନ୍ଦୋ ହାପାକାନ୍ ତାଇନ୍ କାଏ। ଚିୟାଃଚି ସିଦାରେ ଆଦାମ୍ ବାଇନାଏ, ଏନାରାଃ ତାୟୋମ୍ତେ ହାବ୍ବା। ହାର୍ ଆଦାମ୍ କାଏ ହିଡ଼୍ ଜାନାଏ, ମେନ୍ଦୋ କୁଡ଼ି ହିହିଡ଼୍ ଜାନ୍ତେ ପାପ୍ ରେ ଉୟୁଃ ଜାନାଏ। ଏଣ୍ଡେ ରେହ କୁଡ଼ି କେ ପାର୍ମେଶ୍ଵାର୍ ହୋନ୍‍ଗାଣା ଜାନାମେ ଇମ୍ତା ବାଞ୍ଚାଅ ୱିୟାଏ, ଆଗାର୍ ଇନିଃ ଆୟାଃ ମୋନ୍ କେ ବୁଝାଅ ତାନ୍‍ଲୋଃ ବିଶ୍ଵାସ୍, ଦୁଲାଡ଼୍ ଆଡୋଃ ପାବିତାର୍ ରେ ବାଇତାଇନୋଗାଏ। ନେ କାଜି ସାର୍ତି ତାନାଃ ଚି ଜେତାଏ କାଲିସିୟା ରେନ୍ ଆଗୁୱା ହୋବାଅଃ ସାନାଙ୍ଗ୍ ତାନାଏ, ଇନିଃ ବୁଗିନ୍ କାମି କୋରାଃ ସାନାଙ୍ଗ୍ ମାଣ୍ଡାଅୟାଏ। ନେୟା ଲାଗାତିଙ୍ଗ୍ ମେନାଃ ଚି ଆଗୁୱା ନିର୍ଦୋଷ୍ ଆଡୋଃ ମିୟାଃଗି କୁଡ଼ି ରାଃ କଡ଼ା, ଆଜାଃ ମୋନ୍ କେ ବୁଝାଅ କେତେ ମାଣ୍ଡାଅନିଃ, ସେଣାନ୍ ହୋଡ଼, ମାଇନାନ୍ ହୋଡ଼, ପେଡ଼ୋକୋକେ ବେଶ୍ ତେ ନେନେଲ୍ ନିଃ, ହାର୍ ବେଶ୍ ଶିଖାଅନିଃ ତାଇନୋଃ ଚାହି। ବୁଲୋଃନିଃ ହାର୍ ବିପିଡ଼ାନିଃ କାତାଇନ୍ ଚାହି, ମେନ୍ଦୋ ଲେବେଃ, ହାର୍ କାଏପେଗେର୍ ନିଃ, ଆଡୋଃ ଟାକା ପାଇସା ରାଃ ହାୟା କାତାଇନ୍ ଚାହି। ଆଜାଃ ଅଡ଼୍ଆଃ ରେନ୍ କୋକେ ବୁଗିନ୍ ତେ ଚାଲାଓନିଃ, ଆଡୋଃ ଆପାନାଃ ହୋନ୍ ଗାଣା କୋକେ ମାଇନ୍ ତେ ହାର୍ ବୁଗିନ୍ ତେ ଆଧିକାର୍ ଲୋଃ ମାଣ୍ଡାଅନିଃ ତାଇନ୍‍କାଏ। ଚିମ୍ତାଙ୍ଗ୍ ଜେତାଏ ଆଜାଃ ଅଡ଼୍ଆଃ ରେନ୍ କୋକେଗି ବୁଗିନ୍ ତେ ଚାଲାଓ କାଏ ସାରିୟାଏ, ଏଣ୍ଡେ ପାର୍ମେଶ୍ଵାର୍ ରାଃ କାଲିସିୟା କେ ଚିଲ୍‍କା ଚାଲାଓୟାଏ? ଇନିଃ ନାୱା ବିଶ୍ଵାସୀ କାତାଇନ୍ ଚାହି, କାରେଦୋ ଇନିଃ ମାରାଙ୍ଗେନ୍ ଲେକା ପାହୋମେୟାଏ ହାର୍ ଶାଏତାନ୍ ଲେକା ଶାଜାଇ ନାମେୟାଏ। ହାର୍ ବାହାରି ହୋଡ଼ୋକୋରେ ହଗି ଇନିଜାଃ ବୁଗିନ୍ ନୁତୁମ୍ ତାଇନ୍ ଚାହି, କାରେଦୋ ଗିୟୁଗୋଗାଏ ହାର୍ ଶାଏତାନ୍ ଆଃ ଫାନ୍ଦା ରେ ପାଶେ କେନୋଗାଏ। ଏନ୍‍ଲେକାଗି କାଲିସିୟା ରେନ୍ ଦାସୀକୋ ହଗି ମାଇନାନ୍ ନାମେ ଲେକାନ୍ କୋ ହୋବାଅଃ ଚାହି, ବାରିୟା ମୋଚା, ବୁଲୋଃନିଃ ହାର୍ ଏତ୍କାନ୍ କାମି ତେ ଟାକା ପାଇସା ରାଃ ହାୟାନିଃ କାତାଇନ୍ ଚାହି, ମେନ୍ଦୋ ବିଶ୍ଵାସ୍ ରାଃ ଈକିର୍ ସାର୍ତି କେ ବୁଗିନ୍ତେ ଆଟ୍‍କାର୍ ମାଣ୍ଡାଅକାଏ। ହାର୍ ଆକୋଗି ସିଦାତେ ଜାଞ୍ଚୋଃ କାକୋ, ଏନ୍ତେ ଆଗାର୍ ନିର୍ଦୋଷ୍ ଅଡୋଙ୍ଗାକୋ ଏଣ୍ଡେ କାଲିସିୟା ରାଃ ଦାସୀ କାମି-କାମି କାକୋ। ଏନ୍‍ଲେକାଗି କୁଡ଼ି କୋକେ ହଗି ମାଇନାନ୍ ନାମେ ଲେକାନ୍ ହୋବାଅଃ ଚାହି, ଦୋଷ୍ ଲାଗାଅନିଃ ଦୋ କାହା, ମେନ୍ଦୋ ହୋସିୟାର୍ ହାର୍ ସବେନ୍ କାଜି କୋରେ ବିଶ୍ଵାସ୍ ନାମେ ଲେକାନିଃ ବାଇଏନ୍ କାକୋ। କାଲିସିୟା ରେନ୍ ଦାସୀ କେ ମିୟାଃଗି କୁଡ଼ି ରାଃ କଡ଼ା ତାଇନୋଃ ଚାହି ହାର୍ ହୋନ୍ ଗାଣା କୋକେ ଆଡୋଃ ଆଜାଃ ଅଡ଼୍ଆଃ ରେନ୍ କୋକେ ବୁଗିନ୍ ତେ ଚାଲାଓ ସାରି ଚାହି। ଚିୟାଃଚି ଅକନ୍ କୋ କାଲିସିୟା ରେନ୍ ଦାସୀ କାମି ବେଶ୍ ଲେକାତେ କାମି ତାନାକୋ, ଇନ୍‍କୁ ଆକୋ ଲାଗିନ୍ ବୁଗିନ୍ ପାଦ୍ ଆଡୋଃ ଏନ୍ ବିଶ୍ଵାସ୍ ରେ ଅକନାଃ ମାସୀହ୍ ୟୀଶୁ ରେ ମେନାଃ, ମାରାଙ୍ଗ୍ ସାହାସ୍ ନାମେୟାକୋ। ଇଙ୍ଗ୍ ଆମାଃ ତାଃ ସେକାଡ଼୍ ହିଜୁଃ ରାଃ ଆଶ୍ରା ତାନ୍ ରେହଗି ନେ କାଜିକୋ ଆମ୍‍କେ ଏନାଲାଗିନ୍ ଅଲ୍ ତାନିଙ୍ଗ୍, ଚି ଆଗାର୍ ଇଙ୍ଗ୍ଆଃ ହିଜୁଃ ରେ ଦେରିୟୋଃୱା, ଏଣ୍ଡେ ଆମ୍ ସାରିମେଚି ପାର୍ମେଶ୍ଵାର୍ ରାଃ ଘାରାନା ରେ ଅକନାଃ ଜୀହିଃ ପାର୍ମେଶ୍ଵାର୍ ରାଃ କାଲିସିୟା ତାନାଃ ହାର୍ ଅକନାଃ ସାର୍ତି ରାଃ ଖୁଣ୍ଟୁ ହାର୍ ନାହି ତାନାଃ, ଚିଲ୍‍କା ଚାଲାଅନ୍ ଚାହି। ନେୟାରେ ସାନ୍ଦେହ୍ ବାନୋଃ ଚି ପାର୍ମେଶ୍ଵାର୍ କେ ବୋରୋଇ ତାନ୍ କାଜି ରାଃ ଉକୁକାନ୍ କାଜି ଈକିର୍ ଗିୟା, ମାନେ, ଇନିଃ ଅକନିଃ ମାନ୍‍ୱା ହୋଡ଼ମୋ ରେ ନେଲ୍ ଲେନାଏ, ଆତ୍ମା ରେ ଧାର୍ମୀ ବାଇଜାନାଏ, ସିର୍ମାଦାସୀ କୋକେ ନେଲ୍ ଜାନାଏ, ଏଟାଃଜାତି କୋରେ ଇନିଜାଃ ପାର୍ଚାର୍ ହୋବାଜାନା, ଅତେଦିଶୁମ୍ ରେନ୍ ହୋଡ଼ୋକୋ ଇନିଜାଃ ରେ ବିଶ୍ଵାସ୍ କେଦାକୋ, ହାର୍ ମାନାରାଙ୍ଗ୍ ରେ ଚେତାନ୍ ରାକାବ୍ ଜାନାଏ। ପାବିତାର୍ ଆତ୍ମା ସାଫା-ସାଫା କାଜି ତାନାଏ ଚି ହିଜୁଃ ହୁଲାଙ୍ଗ୍ କୋରେ ଚିମିନ୍ ହୋଡ଼ୋକୋ ବେଦାଆତ୍ମା ହାର୍ ବୋଙ୍ଗାଆତ୍ମା କୋୱାଃ ଶିଖାଅକୋକେ ମାନାତିଙ୍ଗ୍ କେତେ ବିଶ୍ଵାସ୍ କେ ବାଗିୟାକୋ। ନେୟା ଏନ୍ ବେଦା ହୋଡ଼ୋ କୋୱାଃ ହିହିଡ଼୍ ରାଃ ଚାଲ୍ତେ ହୋବାୱା, ଅକନ୍ କୋୱା ଆଟ୍‍କାର୍ଉରୁମ୍ କେ ଲୋଲୋ ମେଣେଏଃ ତେ ଅଣ୍ଡୋର୍ କାନା, ଇନ୍‍କୁ ଆଣାଦୀୟୋଃ ଲାଗିନ୍ତେ ମାନାୟାକୋ, ହାର୍ ଜୋଜୋମାଃ ଜିନିଷ୍ କୋଏତେ ଚିମିନାଙ୍ଗ୍ କେ ଆଲୋପେ ଜୋମେ ମେନ୍ତେ ଆଚୁ ୟାକୋ, ଅକନାଃକେ ପାର୍ମେଶ୍ଵାର୍ ନେୟାଲାଗିନ୍ ବାଇକାଦାଏ ଚି ବିଶ୍ଵାସ୍ ହାର୍ ସାର୍ତି କେ ନେଲ୍ଉରୁମ୍ ତାନ୍‍କୋ ଏନାକୋକେ ଧାନ୍ୟାବାଦ୍ ତାନ୍‍ଲୋଃ ଜୋମେକାକୋ। ଚିୟାଃଚି ପାର୍ମେଶ୍ଵାର୍ ରାଃ ସିର୍ଜାଅକାନ୍ ସବେନ୍ ଜିନିଷ୍‍କୋ ବେଶ୍ ଗିୟାଃ, ହାର୍ ଜେତାନ୍ ଜିନିଷ୍‍କୋ ହ କାଗ୍ରାହାନ୍ ଲେକା ବାନୋଗା, ମେନ୍ଦୋ ନେୟା ଚି ଧାନ୍ୟାବାଦ୍ ତାନ୍‍ଲୋଃ ଜୋମୋଃକା, ଚିୟାଃଚି ପାର୍ମେଶ୍ଵାର୍ ରାଃ ବାଚାନ୍ ଆଡୋଃ ବିନ୍ତି ରାଃ ହୋରାତେ ଶୁଦ୍ଧ୍ କେନୋଃୱା। ଆଗାର୍ ଆମ୍ ହାଗାକୋକେ ନେ କାଜିକୋକେ କାଜିକାତେ କୋୱାମ୍, ଏଣ୍ଡେ ୟୀଶୁ ମାସୀହ୍ ରାଃ ବୁଗିନ୍ ଦାସୀ ବାଇୟୋଗାମ୍; ହାର୍ ବିଶ୍ଵାସ୍ ଆଡୋଃ ଏନ୍ ବୁଗିନ୍ ଉପ୍‍ଦେଶ୍ କାଜିକୋଏତେ, ଅକନାଃ କୋକେ ଆମ୍ ମାନାତିଙ୍ଗ୍ ହିଜୁଃକାନାମ୍, ଆମାଃ ଆସୁଲ୍-ହାରା ହୋବାକାତୋଗା। ମେନ୍ଦୋ ସାମା ରାଃ ହାର୍ ବୁଡୀକୋୱାଃ ବାଇକାନ୍ କାଥ୍‍ନୀ କୋଏତେ ଗେନା ତାଇନ୍ ମେ; ହାର୍ ପାର୍ମେଶ୍ଵାର୍ କେ ସୁକୁଇତାନ୍ ଜୀଦାନ୍ ଜିହୀଦୋଃମେ। ଚିୟାଃଚି ହୋଡ଼ମୋ ରାଃ ବ୍ୟାୟାମ୍ ତେ ହୁଡିଙ୍ଗ୍ ଲାଭ୍ ହୋବାଃୱା, ମେନ୍ଦୋ ପାର୍ମେଶ୍ଵାର୍ କେ ସୁକୁଇତାନ୍ ଜୀଦାନ୍ ସବେନ୍ କାଜି କୋରେ ବୁଗିନ୍ ତାନାଃ, ଚିୟାଃଚି ନେ ସାମାୟ୍ ରାଃ ହାର୍ ହିଜୁଃ ତାନ୍ ଜୀଦାନ୍ ରାଃ ହ କିରିୟା ନେୟାଲାଗିନ୍ ଗି ତାନାଃ। ହାର୍ ନେ ବାକାଣ୍ ସାର୍ତି ହାର୍ ସବେନ୍ ଲେକାତେ ମାନାତିଙ୍ଗ୍ ଲେକାନାଃ କାଜି ତାନାଃ। ଚିୟାଃଚି ଆବୁ କାମି ହାର୍ କୋଷିସ୍ ନେୟାଲାଗିନ୍ତେଗି ରିକାତାନାବୁ ଚି ଆବୁୱାଃ ଆଶ୍ରା ଏନ୍ ଜୀହିଃ ପାର୍ମେଶ୍ଵାର୍ ଚେତାନ୍ ରେ ମେନାଃ, ଅକନିଃ ସବେନ୍ ହୋଡ଼ କୋୱାଃ ହାର୍ ବିଶେଷ୍ କେତେ ବିଶ୍ଵାସୀ ହୋଡ଼ୋକୋୱାଃ ବାଞ୍ଚାଅନିଃ ତାନିଃ। ନେ କାଜିକୋ ବିଶ୍ଵାସୀକୋକେ ଆଚୁକୋମ୍ ହାର୍ ଶିଖାଅ କାତେକୋମ୍। ଆମ୍ ଜାୱାନ୍ ତାନ୍‍ମେ ମେନ୍ତେ ଜେତାଏ ଆଲୋକାକୋ ହିଲାଙ୍ଗ୍ଏକା, ମେନ୍ଦୋ କାଜି ରେ, ହାର୍ ସେସେନ୍ ରେ, ହାର୍ ଦୁଲାଡ଼୍ ରେ ହାର୍ ବିଶ୍ଵାସ୍ ରେ ହାର୍ ପାବିତାର୍ ଜୀହିଦୋଃ ରେ ବିଶ୍ଵାସୀକୋ ଲାଗିନ୍ତେ ନାମୁନା ବାଇଏନ୍‍ମେ। ଚିମିନ୍ ସାନ୍ତେ ଇଙ୍ଗ୍ କାଇଙ୍ଗ୍ ହିଜୁଃ ତାନା, ଏନ୍ ସାନ୍ତେ ବିଶ୍ଵାସୀକୋକେ ପାବିତାର୍ ପୁଥି ପାଢ଼ାଅ କୋମେ ହାର୍ ପୋକ୍ତାକୋମେ ହାର୍ ଶିଖାଅ କାତେକୋମେ। ଏନ୍ ବାର୍ଦାନ୍ କେ ଅକନାଃ ଆମାଃ ରେ ମେନାଃ, ହାର୍ ଆୟାର୍‍କାଜି ରାଃ ହୋରାତେ ମାରିହୋଡ଼ୋକୋୱାଃ ତିଈ ମାଣ୍ଡାଅ ଇମ୍ତା ଆମ୍‍କେ ନାମ୍ ଲେନା, ଏନାକେ କାମି ରେ ଆଉୱେ ଲାଗିନ୍ତେ ଆଲୋମ୍ ରିଡ଼ିଙ୍ଗ୍ଏମେ। ଏନ୍ ବାକାଣ୍ କୋକେ ପାହୋମ୍ କାତେମେ ହାର୍ ନେୟା କୋରେଗି ମୋନ୍ ଲାଗାଅକାମେ, ଏନାତେ ଆମ୍ ହାରାଇଦିୟୋଃ ତାନାମ୍ ମେନ୍ତେ ସବେନ୍ କୋ ନେଲେକାକୋ। ଆମ୍ ଆମାଃ ସେସେନ୍ ହାର୍ ଆମାଃ ଶିଖାଅ କେ ଧ୍ୟାନ୍ ମାଣ୍ଡାଅକାମେ। ଏନ୍ ବାକାଣ୍ କୋରେ ବାଇତାଇନୋଃମେ, ଚିୟାଃଚି ଆଗାର୍ ନେକା ରିକାକାତେୟାମ୍ ଏଣ୍ଡେ ଆମ୍ ଆମାଃ ହାର୍ ଆମାଃ ଆୟୁମ୍ ହୋଡ଼ୋକୋୱାଃ ଲାଗିନ୍ ହଗି ବାଞ୍ଚାଅ ରାଃ କାରାନ୍ ବାଇୟୋଗାମ୍। ଜେତାନ୍ ହାଡ଼ାମ୍ କେ ଆଲୋମ୍ ଏଗେରିୟା, ମେନ୍ଦୋ ଇନିଃକେ ଆପୁ ଲେକା ବୁଝାଇମେ, ହାର୍ ଧାଙ୍ଗ୍ଡ଼ା କୋକେ ହାଗା ଲେକା ବୁଝାଅକୋମେ; ବୁଡୀ କୁଡ଼ି କୋକେ ଏଙ୍ଗା ଲେକା; ହାର୍ ଧାଙ୍ଗ୍‍ଡ଼ି କୁଡ଼ି କୋକେ ମିଶି ଲେକା ସବେନ୍ ପାବିତାର୍ ତେ ବୁଝାଅକୋମେ। ଏନ୍ ବିଧୋବା କୋକେ, ଅକନ୍‍କୋ ସାର୍ତି ବିଧୋବା ତାନ୍‍କୋ, ମାଇନ୍ କୋପେ। ଆଗାର୍ ଜେତାନ୍ ବିଧୋବା ରାଃ ହୋନ୍-ଗାଣା ୟାଦୋ ଜାଇ ହୋନ୍‍କୋ ମେନାକୋ ରେଦୋ, ଇନ୍‍କୁ ସିଦା ଆକୋୱାଃ ଅଡ଼୍ଆଃ ରେନ୍ କୋଗି ନେଲି କାକୋ, ହାର୍ତେ ଆକୋୱାଃ ଏଙ୍ଗା-ଆପୁ କିନ୍‍କେ ଆକିନାଃ ହାକ୍ ଏହେମ୍ ଶିଖାଅ କୋମେ, ଚିୟାଃଚି ନେୟା ପାର୍ମେଶ୍ଵାର୍ କେ ସୁକୁୱା। ଅକଏ ସାର୍ତି ଗି ବିଧୋବା ତାନିଃ, ହାର୍ ଇନିଜାଃ ଜେତାଏ ବାଙ୍ଗ୍ କୋୱା, ଇନିଃ ପାର୍ମେଶ୍ଵାର୍ ରେଗି ଆଶ୍ରା ମାଣ୍ଡାଅ ୟାଏ, ହାର୍ ନିନ୍ଦା ଶିଙ୍ଗି ପାର୍ମେଶ୍ଵାର୍ କେ ଦେଙ୍ଗା ଆସିୟାଏ ଆଡୋଃ ବିନ୍ତି ରେଗି ତାଇନାଏ; ମେନ୍ଦୋ ଅକଏ ଏତ୍କାନ୍ ସୁକୁ ରାଶିକା ରେ ତାଇନ୍ ତାନ୍‍ନିଃ ଆଜାଃ ଜୀନିଃ ରେଗି ଆତ୍ମାନ୍ ଲେକାତେ ଗୋଏଃ ଜାନାଏ। ନେ କାଜିକୋକେ ହଗି ଆନାଚୁ ଏମାକୋମ୍ ଏନାତେ ଇନ୍‍କୁ ନିର୍ଦୋଷ୍ ତାଇନ୍ କାକୋ। ମେନ୍ଦୋ ଆଗାର୍ ଜେତାଏ ଆପାନାଃ ପେଡ଼ାକୋୱାଃ ହାର୍ ଖାସ୍ କେତେ ଆପାନାଃ ଅଡ଼୍ଆଃ ରେନ୍ କୋ ନାଙ୍ଗ୍ କାଏ ପାହୋମେ ରେଦୋ, ଇନିଃ ବିଶ୍ଵାସ୍ କେ ବାଗି ତାଦାଏ ହାର୍ ଆବିଶ୍ଵାସୀ ଏତେ ହଗି ଖାରାପ୍ ବାଇଜାନାଏ। ଏନ୍ ବିଧୋବା ରାଃ ନୁତୁମ୍ ଅଲୋଃକା ଅକନିଃ ସାଠ୍ ଶିର୍ମା ଏତେ ହୁଡିଙ୍ଗ୍ କାଏ ତାଇନାଏ, ହାର୍ ମିୟାଃଗି କଡ଼ା ରାଃ କୁଡ଼ି ତାଇନ୍ ଲେନାଏ, ହାର୍ ବୁଗିନ୍ କାମିକୋ ରେ ନୁତୁମାନ୍ ତାଇନ୍ ଲେନାଏ, ଅକଏ ହୋନ୍-ଗାଣା କୋକେ ଆସୁଲ୍ ହାରା କାଃକୋୱାଏ; ପେଡ଼ାକୋକେ ମାଇନ୍ କାଃଆଏ, ପାବିତାର୍ ହୋଡ଼ୋକୋୱାଃ କାଟା ଆବୁଙ୍ଗ୍ କାଃଆଏ, ଦୁକୁତାନ୍ କୋକେ ଦେଙ୍ଗା କାଃଆଏ, ହାର୍ ସବେନ୍ ବୁଗିନ୍ କାମିକୋ ରେ ମୋନ୍ ଲାଗାଅ ଲେଦାଏ। ମେନ୍ଦୋ ଧାଙ୍ଗ୍‍ଡ଼ି ବିଧୋବା କୋୱା ନୁତୁମ୍ ଆଲୋମ୍ ଅଲେୟା, ଚିୟାଃଚି ଅକୋଇମ୍ତାଙ୍ଗ୍ ଇନ୍‍କୁ ବିଧୋବା ହୋବା କେତେ ମାସୀହ୍ ରାଃ ସେୱା କାକୋ ଧାଡ଼ିୟା ହାର୍ତେ ହୋଡ଼ମୋ ରାଃ ସାନାଙ୍ଗ୍ ରେ ଉୟୁଃ କେନୋଃ ୱାକୋ, ଏଣ୍ଡେ ଆଣାଦୀ ସାନାଙ୍ଗ୍ ୟାକୋ। ହାର୍ ଆଡୋଃ ମିଶା ଆଣାଦୀୟୋଃ ଚାଲ୍ତେ ଦୋଷୀ ବାଇୟୋଃୱାକୋ, ଚିୟାଃଚି ଇନ୍‍କୁ ଆପାନାଃ ସିଦା କିରିୟା କେ ବାଗେ କେଦାକୋ। ଆଡୋଃଗି ନେୟା ଲୋଃ ଇନ୍‍କୁ ଅଡ଼୍ଆଃ-ଅଡ଼୍ଆଃ ହୋନୋର୍ କେତେ ଆଲ୍‍ସୀ ବାଇୟେନ୍ ଶିଖାଅଃ ୱାକୋ, ହାର୍ ଖାଲି ଆଲ୍‍ସୀ କାହା ମେନ୍ଦୋ ସାମା ରେ ଭେଚେର୍-ଭେଚେର୍ କାତେୟାକୋ ହାର୍ ଏଟାଃକୋୱା କାମି ରେ ମେଶାନାକୋ ଆଡୋଃ କାଠାଉକା କାଜିକୋ କାଜିୟାକୋ। ଏନାମେନ୍ତେ ଇଙ୍ଗ୍ ନେୟା ସାନାଙ୍ଗ୍ ତାନିଙ୍ଗ୍ ଚି ଧାଙ୍ଗ୍‍ଡ଼ି ବିଧୋବା କୋ ଆଣାଦୀଏନ୍ କାକୋ, ହାର୍ ହୋନ୍-ଗାଣା ଜାନାମେ କାକୋ ହାର୍ ଅଡ଼୍ଆଃ ଦୁହାର୍ ସାମ୍ଭଲାଅ କାକୋ, ହାର୍ ଜେତାନ୍ ବିରୋଧୀ କେ ବାଦ୍‍ନାମ୍ ରିକା ରାଃ ମାଉକା ଆଲୋ ଏମେକାକୋ। ଚିୟାଃଚି ଚିମିନାଙ୍ଗ୍ ଧାଙ୍ଗ୍‍ଡ଼ି ବିଧୋବା କୋଦୋ ରୁଆଡ଼୍ କେତେ ଶାଏତାନ୍ କେ ଅତୋଙ୍ଗ୍ କିଜାକୋ। ଆଗାର୍ ଜାହାନ୍ ବିଶ୍ଵାସୀ କୁଡ଼ି ଅଡ଼୍ଆଃ ରେ ବିଧୋବା କୋ ମେନାକୋୱା, ଏଣ୍ଡେ ଇନିଃଗି ଇନ୍‍କୁକେ ଦେଙ୍ଗା କୋକାଏ ଚି କାଲିସିୟା ରେ ହାମ୍ବାଲ୍ ଆଲୋ ହୋବାଅଃକା, ଏନାତେ କାଲିସିୟା ଇନ୍‍କୁକେ ଦେଙ୍ଗା ଧାଡ଼ିୟାଏ ଅକନ୍ କୋ ସାର୍ତି ବିଧୋବାକୋ ତାନ୍‍କୋ। ଅକନ୍ ମାରିହୋଡ଼ୋକୋ ଆକୋୱାଃ କାମିକୋକେ ବୁଗିଲେକାତେ ଚାଲାଓ ତାନାକୋ, ବିଶେଷ୍ କେତେ ଇନ୍‍କୁ ଅକନ୍‍କୋ ବାଚାନ୍ ଉଦୁବ୍ ହାର୍ ଶିଖାଅ ରେ କାମି ତାନାକୋ, ବାର୍ ଗୁନା ମାଇନ୍ ନାମେ ଲେକାନ୍ କୋ ତାନ୍‍କୋ। ଚିୟାଃଚି ପାବିତାର୍ ପୁଥି କାଜିୟାଏ, “ଦାଉଁରିତାନ୍ ଉରିଃ ରାଃ ମୋଚାକେ ଆଲୋପେ ଥୋଲେୟା,” ଚିୟାଃଚି “କାମିତାନ୍ ନିଃ ଆଜାଃ ନାଲା ନାମେ ଲେକାଏ ତାନିଃ।” ଜାହାନ୍ ଦୋଷ୍ ଜେତାନ୍ ମାରିହୋଡ଼ୋ ଚେତାନ୍ ରେ ଏମେୟାକୋ ଏଣ୍ଡେ ବେଗାର୍ ବାର୍ହୋଡ଼୍ ଚାହେ ଆପି ହୋଡ଼ ଗୋୱା କାକୋ ଏମେରେ ଏନାକେ ଆଲୋମ୍ ଆୟୁମେୟା। ପାପ୍ ତାନ୍ କୋକେ ସବେନ୍ ବିଶ୍ଵାସୀ କୋୱା ନାଡ଼େଏ ରେ ବୋତୋଙ୍ଗ୍ କୋମେ, ଏନାତେ ଏଟାଃ ହୋଡ଼ୋକୋ ବୋରୋୟାକୋ। ପାର୍ମେଶ୍ଵାର୍ ଆଡୋଃ ମାସୀହ୍ ୟୀଶୁ ହାର୍ ସାଲାକାନ୍ ସିର୍ମାଦାସୀ କୋୱାଃ ଆୟାର୍ ରେ ଇଙ୍ଗ୍ ଆପେକେ ଚେତାଓ ପେତାନାଇଙ୍ଗ୍ ଚି ଆପେ ମୋନ୍ ଖଲାଅକେତେ ନେ ବାକାଣ୍ କୋକେ ମାନାତିଙ୍ଗ୍ ଏପେ, ହାର୍ ଜେତାନ୍ କାମି ମେଏଃମୁହାଡ଼୍ ନେଲ୍ କେତେ ଆଲୋମ୍ ରିକାଏ। ଜେତାଏ କେ ମାରିହୋଡ଼ ବାଇନାଙ୍ଗ୍ ଇନିଜାଃ ଚେତାନ୍ ରେ ସେକାଡ଼୍ ଗି ତିଈ ଆଲୋମ୍ ମାଣ୍ଡାଅୟା, ହାର୍ ଏଟାଃ କୋୱା ପାପ୍ ରେ ଆଲୋମ୍ ମେଶାନା, ଆମ୍ ଆପାନ୍ କେ ପାବିତାର୍ ମାଣ୍ଡାଅ କାନ୍‍ମେ। ନାଆ ଏତେ ଦାଆ କେଗି ଭାଇର୍ ଆଲୋମ୍ ନୁୱେ, ମେନ୍ଦୋ ଆପାନାଃ ଲାହେଃ ରାଃ ହାର୍ ସବେନ୍ ଇମ୍ତା ବେମାର୍ ହୋବାଅଃ ତାନାମ୍ ଏନାରାଃ ଲାଗିନ୍ କାଟିଃ-କାଟିଃ ଆଙ୍ଗୁର୍ ରାଶି ନୁୱେମ୍। ଚିମିନାଙ୍ଗ୍ ହୋଡ଼ୋକୋୱାଃ ପାପ୍ ନେଲ୍ କେନୋଃତାନା ହାର୍ ବିଚାର୍ ଲାଗିନ୍ତେ ଇନ୍‍କୁୱାଃ ସିଦାତେ ସେଟେରୋଃ ତାନା, ମେନ୍ଦୋ ଚିମ୍ତାଙ୍ଗ୍ କୋୱାଃ ତାୟୋମ୍ତେ ହିଜୁଃ ତାନା। ଏନ୍‍ଲେକାଗି ଚିମିନାଙ୍ଗ୍ ବୁଗିନ୍ କାମିକୋ ହଗି ନେଲୋଃ ତାନା, ହାର୍ ଅକନାଃକୋ କାନେଲୋଗା, ଏନାକୋ ହଗି କାଉକୁ ଧାଡ଼ିୟୋଃୱା। ସବେନ୍ ଆଁରାଣାକାନ୍ ଦାସୀ କୋ ଆକୋ ଆକୋୱାଃ ଗୋମ୍‍କେ କୋକେ ମାଇନ୍ ନାମେ ଲେକାନ୍‍କୋ ମେନ୍ତେ ଆଟ୍‍କାରେ କାକୋ, ଏନାତେ ପାର୍ମେଶ୍ଵାର୍ ରାଃ ନୁତୁମ୍ ହାର୍ ଉପ୍‍ଦେଶ୍ ରାଃ ନିନ୍ଦା ଆଲୋକା ହୋବାଅଃକା। ଅକନ୍‍କୋୱାଃ ଗୋମ୍‍କେକୋ ବିଶ୍ଵାସୀ ତାନ୍‍କୋ, ବିଶ୍ଵାସ୍ ତାନ୍‍କୋ ଆକୋୱାଃ ଗୋମ୍‍କେ କୋକେ ମାସୀହ୍ ହାଗାକୋ ତାନ୍‍ବୁ ମେନ୍ତେ ମାଇନ୍ ହୁଡିଙ୍ଗ୍ କାହୋବାଅଃ ଚାହି, ମେନ୍ଦୋ ଇନ୍‍କୁୱାଃ ଆଡୋଃଗି ପୁରାଃ କାମିକୋ କାମି ଚାହି, ଚିୟାଃଚି ଇନ୍‍କୁ ଏତେ ବୁଗିନାଃ ନାମେକୋ ଦୋ ବିଶ୍ଵାସୀକୋ ହାର୍ ଦୁଲାଡ଼ାନ୍‍କୋ ତାନ୍‍କୋ। ନେ ବାକାଣ୍ କୋରାଃ ଉପ୍‍ଦେଶ୍ ଏମାକୋମ୍ ହାର୍ ବୁଝାଅ କାତେକୋମ୍। ଆଗାର୍ ଜେତାଏ ଏଟାଃ ଲେକାନ୍ ଶିଖାଅ-ଶିଖାଅ ପେତାନାଏ ହାର୍ ବୁଗିନ୍ କାଜିକୋକେ, ମାନେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ବାକାଣ୍ କୋକେ ହାର୍ ଏନ୍ ଶିଖାଅ କୋକେ କାଏ ମାନାତିଙ୍ଗ୍ ତାନାଏ, ଅକନାଃ ପାର୍ମେଶ୍ଵାର୍ କେ ସୁକୁୱାଇ ଲେକାତେ ତାନାଃ, ଏଣ୍ଡେ ଇନିଃ ଘାମାଣ୍ଡେନ୍ ତାନାଏ, ହାର୍ ଜେତ୍ନାଃ କାଏ ସାରିୟାଏ, ମେନ୍ଦୋ ଇନିଃକେ ଏପେଗେର୍ ଲେକାନ୍ ହାର୍ ବାଚାନ୍ ରେ କୁଲିକାପାଜି ରାଃ କାଜିକୋକେ ବେମାର୍ ଲେକା ସାବାକାଦାଏ, ଏନାତେ ହିସିଙ୍ଗା, ହାର୍ ଏପେଗେର୍, ହାର୍ ନିନ୍ଦା ରାଃ ବାକାଣ୍ କୋ ହାର୍ ଖାରାପ୍-ଖାରାପ୍ ସାନ୍ଦେହ୍, ହାର୍ ଏନ୍ ହୋଡ଼ୋ କୋରେ ସାମା ରେ କାପାଜିକୋ ହୋବାଅଃୱା ଅକନ୍‍କୋୱାଃ ମୋନ୍ ବାଗ୍‍ଡ଼ାଅ ଛାବାକାନା, ହାର୍ ଇନ୍‍କୁ ସାର୍ତି କେ କାକୋ ଆଟ୍‍କାର୍ ଉରୁମେୟା, ଇନ୍‍କୁ ବୁଝାଅଃ ତାନାକୋ ଚି ପାର୍ମେଶ୍ଵାର୍ ରାଃ ସେୱା ରିକା ଟାକା କାମି ରାଃ ହୋରା ତାନାଃ। ମେନ୍ଦୋ ପାର୍ମେଶ୍ଵାର୍ କେ ସୁକୁତାନ୍ ଜୀହିଦୋଃ ଗି ମାରାଙ୍ଗ୍ ଯଅ ତାନାଃ ହାର୍ ଚିନାଃ ଆବୁକେ ଏମ୍ ତାନାଏ ଏନାରେଗି ସୁକୁଅଃ ଚାହି। ଚିୟାଃଚି ଆବୁ ଅତେଦିଶୁମ୍ ରେ ଜେତ୍ନାଃ କାବୁ ଆଉକାଦା ହାର୍ ଜେତ୍ନାଃ ଇଦି କାବୁ ଧାଡ଼ିୟା। ଆଗାର୍ ଆବୁ ତାଃରେ ଜୋଜୋମାଃ ହାର୍ ଲିଜାଃ ତୁସିଙ୍ଗ୍ ନାଙ୍ଗ୍ ମେନାଃ ରେଦୋ, ଏନାରେଗି ସୁକୁଅଃ ଚାହି। ମେନ୍ଦୋ ଅକଏ କିଶାଣେନ୍ ହୋବାଅଃ ସାନାଙ୍ଗ୍ ତାନାଏ, ଇନ୍‍କୁ ନେକାନ୍ ପାରୀକ୍ଷା ହାର୍ ଫାନ୍ଦା ହାର୍ ଥିମ୍ବାଗି ଡୋଣ୍ଡୋ ହାର୍ ଦୁକୁନାମେ ତେୟାଃ ହାୟା ରେ ପାଶେଅଃ ୱାକୋ, ଅକନାଃ ହୋଡ଼ୋକୋକେ ବାଗ୍‍ଡ଼ାଅ ତାଆଏ, ହାର୍ ବିନାଶ୍ ରାଃ ସାମୁଦାର୍ ରେ ଡୁବିଃ ତାଆଏ। ଚିୟାଃଚି ଟାକା-ପାଇସା ରାଃ ହାୟା ସବେନ୍ ଲେକାନାଃ ଏତ୍କାନାଃ ରାଃ ରେହେଃ ତାନାଃ। ଅକନାଃକେ ନାମେ ରାଃ ଆଶ୍ରା ରେ ଥିମ୍ବାଗି ହୋଡ଼ୋକୋ ବିଶ୍ଵାସ୍ ରାଃ ହୋରାଏତେ ଆଃ କେତେ ଆକୋ-ଆକୋକେଗି ସବେନ୍ ରାକାମ୍ ରାଃ ଦୁକୁ ରେ ମୋନ୍ କେ ସୋବୋଃ କେଦାକୋ। ମେନ୍ଦୋ ହେ ପାର୍ମେଶ୍ଵାର୍ ରାଃ ହୋଡ଼, ଆମ୍ ନେ କାଜି କୋଏତେ ନିର୍‍ମେ; ହାର୍ ଧାରାମ୍, ପାର୍ମେଶ୍ଵାର୍ କେ ସୁକୁୱାଇ ଲେକା ସେସେନ୍, ବିଶ୍ଵାସ୍, ଦୁଲାଡ଼୍, ସାହାତିଙ୍ଗ୍, ହାର୍ ଲେବେଃ ମୋନ୍ କେ ଅତୋଙ୍ଗ୍ଏମ୍। ବିଶ୍ଵାସ୍ ରାଃ ବୁଗିନ୍ ଲାଡ଼ାଇ-ଲାଡ଼ାଇମେ; ହାର୍ ଏନ୍ ଜାନାଓ ଜୀଦାନ୍ କେ ସାବ୍ କେମେ, ଅକନାଃ ଲାଗିନ୍ ଆମ୍ କେଡ଼ାକାନାମ୍, ହାର୍ ଥିମ୍ବାଗି ଗୋୱା କୋୱାଃ ନାଡ଼େଏ ରେ ବୁଗିନ୍ ମାନାତିଙ୍ଗ୍ କେ ମାନାତିଙ୍ଗ୍ ଲେଦାମ୍। ଇଙ୍ଗ୍ ପାର୍ମେଶ୍ଵାର୍ କେ, ଅକଏ ସବେନ୍ କୋକେ ଜୀହିଃ ମାଣ୍ଡାଅକୋୱାଏ, ହାର୍ ମାସୀହ୍ ୟୀଶୁ କେ ଗୋୱା ବାଇକେତେ ଅକନିଃ ପୁନ୍ତିୟୁସ୍ ପିଲାତୁସ୍ ରାଃ ନାଡ଼େଏ ରେ ବୁଗିନ୍ ମାନାତିଙ୍ଗ୍ କେ ମାନାତିଙ୍ଗ୍ ଲେଦାଏ, ଆମ୍‍କେ ନେୟା ଆନାଚୁ ଏମାମେ ତାନିଙ୍ଗ୍, ଚି ଆମ୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ରୁଆଡ଼୍‍ହିଜୁଃ ସାନ୍ତେ, ନେ ଆନାଚୁ କେ ବେଦାଗ୍ ହାର୍ ନିର୍ଦୋଷ୍ ମାଣ୍ଡାଅକାମେ। ଅକନିଃକେ ପାର୍ମେଶ୍ଵାର୍ ଆଜାଃ ଠିକ୍ ସାମାୟ୍ ରେ ଦେଖାଅୱାଏ, ଅକନିଃ ସବେନ୍ ଏତେ ସୁକୁୱାନ୍ ହାର୍ ମିୟାଃଗି ରାଇଜ୍‍ନିଃ, ରାଜାକୋୱାଃ ରାଜା ଆଡୋଃ ପ୍ରାଭୁକୋୱାଃ ପ୍ରାଭୁ ତାନିଃ, ଇନିଃ ଏସ୍କାର୍ ଗି କାଏ ଗୋଜୋଃ ଲେକାନିଃ, ହାର୍ ଇନିଃ କାଥେବାଃ ଧାଡ଼ିୟୋଃ ଲେକା ମାସ୍କାଲ୍ ରେ ତାଇନ୍ ତାନ୍ ନିଃ, ହାର୍ ଇନିଃକେ ଜେତାନ୍ ହୋଡ଼ କାଏ ନେଲ୍ କାଇଜା, ହାର୍ ଚିଉଲା ହ କାକୋ ନେଲ୍ ଧାଡ଼ିୟା। ଇନିଜାଃ ମାନାରାଙ୍ଗ୍ ହାର୍ ପେଡ଼େଏ ଜାନାଓ-ଜାନାଓ ତାଇନୋଃୱା। ଆମୀନ୍। ନେ ଅତେଦିଶୁମ୍ ରେନ୍ କିଶାଣ୍ କୋକେ ଆଚୁକୋମ୍ ଚି ଇନ୍‍କୁ ଘାମାଣ୍ଡ୍ ଆଲୋ ହୋବାଅଃ କାକୋ ହାର୍ ଇମ୍ତାଗି କାନେଲୋଃ ଧାନ୍ ଚେତାନ୍ ରେ ଆଶ୍ରା ଆଲୋ ମାଣ୍ଡାଅକାକୋ, ମେନ୍ଦୋ ପାର୍ମେଶ୍ଵାର୍ ଚେତାନ୍ ରେ ଆଶ୍ରା କାକୋ ଅକନିଃ ଆବୁୱାଃ ସୁକୁଲାଗିନ୍ ସବେନାଃ ଥିମ୍ବାଏତେ ଥିମ୍ବା ଏମ୍ ବୁତାନାଏ। ଇନ୍‍କୁ ବୁଗିନାଃ ରିକାକାକୋ ମେନ୍ତେ ଆଚୁକୋମ୍, ହାର୍ ବୁଗିନ୍ କାମିକୋ ରେ କିଶାଣେନ୍ କାକୋ, ହାର୍ ଆକୋୱାଃ ସୁକୁ ଲେକାତେ ଏମେକାକୋ ହାର୍ ହାଟିଙ୍ଗ୍ ଏକାକୋ, ହାର୍ ଆୟୁର୍ତେ ଲାଗିନ୍ ମିୟାଃ ବୁଗିନ୍ ନାହି ଲେକା ସାର୍ତି ଜୀଦାନ୍ କେ ନାମେ ଲାଗିନ୍ତେ ଧାନ୍ ହୁଣ୍ଡିକାକୋ। ହେ ତିମୁଥିୟୁସ୍, ପାର୍ମେଶ୍ଵାର୍ ଆମ୍‍କେ ଜିମା କାଃ ମେୟାଏ ଏନାକେ ହୋରୋ କାତେମେ; ହାର୍ ପାର୍ମେଶ୍ଵାର୍ କେ କାସୁକୁଇତାନ୍ ସାମା କୁଲିକାପାଜି କୋଏତେ ହାର୍ ପାର୍ମେଶ୍ଵାର୍ ରାଃ ସାର୍ତି କାଜିକେ ବିରୋଧ୍ ତାନ୍ କାଜିକୋଏତେ, ଅକନାଃ କେ ଇନ୍‍କୁ ଭୁଲ୍ ତେ ସେଣା ମେନ୍ତେ କାଜିତାନାକୋ ଏନାକୋଏତେ ଫାର୍କାନ୍ ମେ। ଚିମିନାଙ୍ଗ୍ ହୋଡ଼ୋକୋ ନେ ସେଣା କେ ମାନାତିଙ୍ଗ୍ କେତେ ମାସୀହ୍ ବିଶ୍ଵାସ୍ ରାଃ ହୋରା କେ ବାଗି ତାଦାକୋ। ଆନୁଗ୍ରାହ୍ ଆପେ ଲୋଃ ହୋବା କାତେଅଃକା। ପାଉଲୁସ୍ ପାଡ଼େତେ ଅକନିଃ, ଏନ୍ ଜୀଦାନ୍ ଏମେ ରାଃ କିରିୟା ଲେକାତେ ଅକନାଃ ମାସୀହ୍ ୟୀଶୁ ରେ ମେନାଃ, ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ମାସୀହ୍ ୟୀଶୁ ରାଃ କୁଲାକାନ୍ ଚେଲା ତାନିଃ, ଇଙ୍ଗ୍ଆଃ ଦୁଲାଡ଼ାନ୍ ହୋନ୍‍କଡ଼ା ଲେକା, ହେ ତିମୁଥିୟୁସ୍: ପାର୍ମେଶ୍ଵାର୍ ଆପୁ ଆଡୋଃ ଆବୁୱାଃ ପ୍ରାଭୁ ୟୀଶୁ ମାସୀହ୍ ପାଡ଼େତେ ଆମ୍‍କେ ଆନୁଗ୍ରାହ୍ ଆଡୋଃ ଦାୟା ଆଡୋଃ ଜୀଉସୁକୁ ନାମ୍ କାତୋଃକା। ଅକନ୍ ପାର୍ମେଶ୍ଵାର୍ ରାଃ ସେୱା ଇଙ୍ଗ୍ ଇଙ୍ଗ୍ଆଃ ଆପୁତାତା କୋୱାଃ ନିୟାମ୍ ଲେକାତେ ଫାର୍ଚି ମୋନ୍ ଏତେ ରିକାତାନିଙ୍ଗ୍, ଇନିଜାଃ ଧାନ୍ୟାବାଦ୍ ହୋବାଅଃକା ଚି ଇଙ୍ଗ୍ ଇଙ୍ଗ୍ଆଃ ବିନ୍ତି କୋରେ ଆମ୍‍କେ ସାଦାଏ ପାହୋମେ ତାନିଙ୍ଗ୍, ହାର୍ ଆମାଃ ରାଆ କୋକେ ମୋନେ କେତେ ନିଦା ଶିଙ୍ଗି ଆମାଃ ଲୋଃ ନାପାମ୍ ଲାଗିନ୍ତେ ସାନାଙ୍ଗ୍ ତାନିଙ୍ଗ୍ ଚି ରାଶିକା ତେ ଫେରେଃ କୋୱାଇଙ୍ଗ୍। ଇଙ୍ଗ୍‍କେ ଆମାଃ ଏନ୍ ସାର୍ତି ବିଶ୍ଵାସ୍ କେ ମୋନେ ହିଜୁଃ ତାନା, ଅକନାଃ ସିଦା ଆମାଃ ବୁଡୀମା ଲୋଇସ୍ ହାର୍ ଆମାଃ ଏଙ୍ଗା ୟୁନିକେ ରେ ତାଇନ୍ କେନା, ହାର୍ ଇଙ୍ଗ୍‍କେ ଭାରୋସା ମେନାଃ ଚି ଆମ୍ ରେ ହଗି ମେନାଃ। ନେୟା ରାଃ ଚାଲ୍ତେଗି ଇଙ୍ଗ୍ ଆମ୍‍କେ ମୋନେ ମେତାନିଙ୍ଗ୍ ଚି ପାର୍ମେଶ୍ଵାର୍ ରାଃ ଏନ୍ ବାର୍ଦାନ୍ କେ ଅକନାଃ ଇଙ୍ଗ୍ଆଃ ତିଈ ଦୋହୋ ଇମ୍ତା ଆମ୍‍କେ ନାମ୍ କାନା ଜୁନୁଲେମେ। ଚିୟାଃଚି ପାର୍ମେଶ୍ଵାର୍ ଆବୁକେ ବୋରୋ ରାଃ କାହା ମେନ୍ଦୋ ପେଡ଼େଏ ହାର୍ ଦୁଲାଡ଼୍ ହାର୍ ଆପାନାଃ ମୋନ୍ କେ ବୁଝାଅ ଧାଡ଼ି ରାଃ ଆତ୍ମା ଏମ୍ କାଦାଏ। ନେୟାଲାଗିନ୍ତେ ଆବୁୱାଃ ପ୍ରାଭୁ ବିଷାୟ୍ ରେ ଗୋୱା ଏମେଲାଗିନ୍ତେ, ହାର୍ ଇଙ୍ଗ୍ ଇନିଜାଃ ଚାଲ୍ତେ ବାନ୍ଦିଅଡ଼୍ଆଃ ଥୋଲାକାନିଙ୍ଗ୍ ମେନ୍ତେ ଆଲୋମ୍ ଗିୟୁଗୋଃୱା, ମେନ୍ଦୋ ଏନ୍ ପାର୍ମେଶ୍ଵାର୍ ରାଃ ପେଡ଼େଏ ଲେକାତେ ସୁସାମାଚାର୍ ଲାଗିନ୍ ଇଙ୍ଗ୍ଆଃ ଲୋଃ ଦୁକୁ ସାହାତିଙ୍ଗ୍ଏମେ। ଅକନିଃ ଆବୁକେ ବାଞ୍ଚାଅ କେଃବୁଆଏ ହାର୍ ପାବିତାର୍ ଜୀଦାନ୍ ଜୀହିଦୋଃ ନାଙ୍ଗ୍ କେଡ଼ାକେଦାଏ, ହାର୍ ନେୟା ଆବୁୱାଃ ବୁଗିନ୍ କାମିକୋ ଲେକାତେ କାହା, ମେନ୍ଦୋ ଇନିଜାଃ ମୋନ୍ ରାଃ ସାନାଙ୍ଗ୍ ଲେକାତେ ହାର୍ ଏନ୍ ଆନୁଗ୍ରାହ୍ ଲେକାତେ ତାନାଃ ଅକନାଃ ମାସୀହ୍ ୟୀଶୁ ରେ ମୁନୁ ଏତେଗି ଆବୁୱାଃ ଚେତାନ୍ ରେ ହୋବାଜାନା, ମେନ୍ଦୋ ନାଆ ନେ ଆନୁଗ୍ରାହ୍ ଆବୁୱାଃ ବାଞ୍ଚାଅନିଃ ମାସୀହ୍ ୟୀଶୁ ରାଃ ହିଜୁଃ ରାଃ ହୋରାତେ ଉଦୁବ୍‍ଜାନା, ଅକନିଃ ଗୋନୋଏଃ କେ ନାଶ୍ କେଦାଏ ହାର୍ ଜୀଦାନ୍ ଆଡୋଃ କାଗୋନୋଏଃ କେ ଏନ୍ ସୁସାମାଚାର୍ ଲୋଃ ଉଦୁବ୍ ଦେଖାଅ କେଦାଏ। ଅକେୟାଃ ଲାଗିନ୍ତେ ଇଙ୍ଗ୍ ପାର୍ଚାରାକ୍ ହାର୍, କୁଲାକାନ୍ ଚେଲା, ଆଡୋଃ ଶିଖାଅନିଃ ହ ବାଇଜାନିଙ୍ଗ୍। ନେୟା ରାଃ ଚାଲ୍ତେ ଇଙ୍ଗ୍ ନେ ଦୁକୁ କୋକେ ହ ବାନ୍ଦିଅଡ଼୍ଆଃ ରେ ସାହାତିଙ୍ଗ୍ ତାନିଙ୍ଗ୍, ମେନ୍ଦୋ କାଇଙ୍ଗ୍ ଗିୟୁଗୋଃ ତାନା, ଚିୟାଃଚି ଇଙ୍ଗ୍ ମାସୀହ୍ କେ ଅକେୟାଃ ଚେତାନ୍ ରେ ବିଶ୍ଵାସ୍ କାଦାଇଙ୍ଗ୍ ସାରିୟାଇଙ୍ଗ୍; ହାର୍ ଇଙ୍ଗ୍ ସାର୍ତିଗୀ ଭାରୋସା ତାନିଙ୍ଗ୍ ଚି ଅକନ୍ ବୁଗିନ୍ ସାନ୍ଦେଶ୍ ଇଙ୍ଗ୍‍କେ ଜିମାକାନ୍ ତେୟାଃକେ ଇନିଃ ଆଜାଃ ଏନ୍ ହିଜୁଃ ହୁଲାଙ୍ଗ୍ ସାନ୍ ହୋରୋ ମାଣ୍ଡାଅ ଧାଡ଼ିୟାଏ। ଅକନ୍ ସାର୍ତି ବାକାଣ୍ କୋ ଅକନାଃ ଆମ୍ ଇଙ୍ଗ୍ଆଃ ତେ ଆୟୁମ୍ କାଦାମ୍ ଏନାକୋକେ ଏନ୍ ବିଶ୍ଵାସ୍ ହାର୍ ଦୁଲାଡ଼୍ ଲୋଃ, ଅକନାଃ ମାସୀହ୍ ୟୀଶୁ ରେ ମେନାଃ, ଆମାଃ ଲାଗିନ୍ ଜୋନୋକା ବାଇକେତେ ମାଣ୍ଡାଅ କାମ୍। ହାର୍ ପାବିତାର୍ ଆତ୍ମା ରାଃ ଦେଙ୍ଗା ତେ ଅକଏ ଆବୁ ରେ ମେନିଜା, ଏନ୍ ବୁଗିନ୍ ଜିମାକାନ୍ ତେୟାଃ କେ ହୋରୋ ମାଣ୍ଡାଏମେ। ଆମ୍ ସାରିତାନାମ୍ ଚି ଆସିୟା ରାଇଜ୍ ରେନ୍ ସବେନ୍ ବିଶ୍ଵାସୀକୋ ଇଙ୍ଗ୍‍କେ ବାଗି କେଦିଙ୍ଗ୍ଆକୋ, ଇନ୍‍କୁ ରେ ଫୁଗିଲୁସ୍ ହାର୍ ହିର୍ମୁଗିନେସ୍ ମେନାକିନା। ଉନେସୀଫୁରୁଷ୍ ରାଃ ଅଡ଼୍ଆଃ ରେନ୍ କୋୱାଃ ରେ ପ୍ରାଭୁ ଦାୟା ରିକାକାଏ, ଚିୟାଃଚି ଇନିଃ ଚିମିନ୍ ଧୋର୍ ଇଙ୍ଗ୍ଆଃ ମୋନ୍ କେ ସୁକୁ କେଦିଙ୍ଗ୍ଆଏ ହାର୍ ଇଙ୍ଗ୍ ବାନ୍ଦିଅଡ଼୍ଆଃ ରେ ଥୋଲାକାନାଇଙ୍ଗ୍ ମେନ୍ତେ କାଏ ଗିୟୁଃନାଏ। ମେନ୍ଦୋ ଚିମ୍ତାଙ୍ଗ୍ ଇନିଃ ରୋମ୍ ସାହାର୍ ରେ ହିଜୁଃନାଏ, ଏଣ୍ଡେ ଥିମ୍ବାଗି ନାପାମ୍ ନାଙ୍ଗ୍ ସାନାଙ୍ଗ୍ ତେ ଦାଣା କେଦିଙ୍ଗ୍ଆଏ। ପ୍ରାଭୁ ରିକାକାଏ ଚି ଏନ୍ ହୁଲାଙ୍ଗ୍ ଇନିଃ ରେ ପ୍ରାଭୁ ରାଃ ଦାୟା ହୋବାଅଃକା। ହାର୍ ଅକନ୍-ଅକନ୍ ସେୱା ଇନିଃ ଇଫିସୁସ୍ ସାହାର୍ ରେ ରିକା କାଦାଏ ଏନାକୋକେ ହ ଆମ୍ ବୁଗିନ୍ ଲେକାତେ ସାରିତାନାମ୍। ଏନାଲାଗିନ୍ତେ ହେ ଇଙ୍ଗ୍ଆଃ ହୋନ୍ ତିମୁଥିୟୁସ୍, ଆମ୍ ଏନ୍ ଆନୁଗ୍ରାହ୍ ତେ ଅକନାଃ ମାସୀହ୍ ୟୀଶୁ ରେ ମେନାଃ, ପେଡ଼େଏ ନାମେମେ। ହାର୍ ଅକନ୍ କାଜିକୋ ଆମ୍ ଥିମ୍ବାଗି ଗୋୱା କୋୱାଃ ନାଡ଼େଏ ରେ ଇଙ୍ଗ୍ଆଃ ତେ ଆୟୁମ୍ କେଦାମ୍, ଏନାକୋକେ ବିଶ୍ଵାସୀ ହୋଡ଼ୋକୋକେ ଜିମାତାକୋମ୍; ଅକନ୍‍କୋ ଏଟାଃ କୋକେ ହଗି ଶିଖାଅ ଧାଡ଼ିୟାକୋ। ୟୀଶୁ ମାସୀହ୍ ରାଃ ବୁଗିନ୍ ଲାଡ଼ାଇନିଃ ଲେକା ଇଙ୍ଗ୍ଆଃ ଲୋଃ ଦୁକୁ ସାହାତିଙ୍ଗ୍ଏମ୍। ଚିମ୍ତାଙ୍ଗ୍ ଜେତାନ୍ ସିପାହୀ ଲାଡ଼ାଇ ରେ ସେନାଏ, ଦୋ ଆୟାଃ ବାହ୍‍ଲି ଏମାକାନ୍ ନିଃ କେ ଖୁସ୍ ରିକାଲାଗିନ୍ତେ, ଆଏଃ ଆପାନ୍ କେ ଅତେଦିଶୁମ୍ ରାଃ କାମି ରେ କାଏ ମେଶାନା। ହାର୍ତେ ଆଖାଡ଼ା ରେ ଲାଡ଼ାଇନିଃ ଆଗାର୍ ନିୟାମ୍ ଲେକାତେ କାଏ ଲାଡ଼ାଇ ରେଦୋ ମୁକୁଟ୍ କାଏ ନାମେୟାଏ। ଚାଷିକାମିତାନ୍ କାମି ହୋଡ଼ କେ ଯଅ ରାଃ ପାହିଲା ହାନାଟିଙ୍ଗ୍ ନାମୋଃ ଚାହି। ଅକନାଃ ଇଙ୍ଗ୍ କାଜି ତାନାଇଙ୍ଗ୍ ଏନାରେ ଧ୍ୟାନେମ୍, ହାର୍ ପ୍ରାଭୁ ଆମ୍‍କେ ସବେନ୍ ବାକାଣ୍ କୋରେ ସେଣା ଏମାମେୟାଏ। ୟୀଶୁ ମାସୀହ୍ କେ ପାହୋମିମେ, ଅକନିଃ ରାଜା ଦାଉଦ୍ ରାଃ କିଲିତେ ହିଜୁଃ ଲେନାଏ ହାର୍ ଗୋଜାକାନ୍ କୋଏତେ ଜୀହିଃ ବିରିଃ ଜାନାଏ, ହାର୍ ନେୟାଗି ଇଙ୍ଗ୍ଆଃ ସୁସାମାଚାର୍ ତାନାଃ। ଅକନିଜାଃ ଲାଗିନ୍ତେ ଇଙ୍ଗ୍ ଆପ୍ରାଧି ହୋଡ଼ ଲେକା ଦୁକୁ ସାହାତିଙ୍ଗ୍ ତାନିଙ୍ଗ୍, ନେତାଃ ସାନ୍ତେ ଚି ବାନ୍ଦିଅଡ଼୍ଆଃ ରେ ଥୋଲ୍ ହ ଜାନିଙ୍ଗ୍; ମେନ୍ଦୋ ପାର୍ମେଶ୍ଵାର୍ ରାଃ ବାଚାନ୍ ଥୋଲାକାନ୍ ବାନୋଗା। ଏନାଲାଗିନ୍ତେ ଇଙ୍ଗ୍ ସାଲାକାନ୍ ହୋଡ଼ୋକୋ ନାଙ୍ଗ୍ ସବେନାଃ ସାହାତିଙ୍ଗ୍ ୟାଇଙ୍ଗ୍, ଚି ଇନ୍‍କୁ ହଗି ଏନ୍ ବାଞ୍ଚାଅ କେ ଅକନାଃ ମାସୀହ୍ ୟୀଶୁ ରେ ମେନାଃ ଜାନାଓ ମାନାରାଙ୍ଗ୍ ଲୋଃ ନାମେକାକୋ। ନେ କାଜି ସାର୍ତିଗୀ ତାନାଃ, ଚି ଆଗାର୍ ଆବୁ ଆଜାଃ ଲୋଃ ଗୋଏଃ ଜାନାବୁ, ଏଣ୍ଡେ ଇନିଜାଃ ଲୋଃ ଜୀହିଦୋଗାବୁ ହ। ଆଗାର୍ ଆବୁ ଦୁକୁ ସାହାତିଙ୍ଗ୍ କାତେୟାବୁ, ଏଣ୍ଡେ ଆୟାଃ ଲୋଃ ରାଇଜ୍ ହ ରିକାୟାବୁ, ଆଗାର୍ ଆବୁ ଇନିଃକେ ମାନାୟାବୁ, ଏଣ୍ଡେ ଇନିଃ ହଗି ଆବୁକେ ମାନାବୁୱାଏ। ଆଗାର୍ ଆବୁ ବିଶ୍ଵାସ୍ ଲେକାନ୍ ହୋଡ଼ୋ କାବୁ ତାଇନା ଏଣ୍ଡେ ହଗି ଇନିଃ ବିଶ୍ଵାସ୍ ଲେକାନିଃ ବାଇକେତେ ତାଇନୋଗାଏ, ଚିୟାଃଚି ଇନିଃ ଆଏଃ ଆପାନ୍ କେ କାଏ ମାନା ଧାଡ଼ିୟାଏ। ନେ ବାକାଣ୍ କୋକେ ଇନ୍‍କୁକେ ପାହୋମ୍ ରିକାକୋମ୍ ହାର୍ ପ୍ରାଭୁ ରାଃ ନାଡ଼େଏ ରେ ଚେତାଓ କୋମ୍ ଚି ସାମା କାଜିକୋରେ ଆଲୋ ଏପ୍ରାଙ୍ଗେକାକୋ, ଅକନାଃତେ ଜାହାନାଃ ଲାଭ୍ କାହୋବାଅଃୱା, ମେନ୍ଦୋ ଆୟୁମେତାନ୍ ହୋଡ଼ୋକୋ ବାଗ୍‍ଡ଼ାଅ କେନୋଗାକୋ। ଆମ୍ ଆପାନ୍ କେ କେଟେଃ ପାରିଶ୍ରାମ୍ କାମିନିଃ ବାଇକେତେ ପାର୍ମେଶ୍ଵାର୍ ରାଃ ସାମାନାଙ୍ଗ୍ ରେ ଠାଉକା ହୋଡ଼ ହାର୍ କାଗିୟୁଗୋଃ ଲେକା କାମିନିଃ ବାଇଏନ୍ ମେ, ଅକନିଃ ସାର୍ତି ରାଃ ବାଚାନ୍ କେ ବୁଗିନ୍ ଲେକାତେ କାମି ରେ ଆଉୱେୟାଏ। ମେନ୍ଦୋ ପାର୍ମେଶ୍ଵାର୍ କେ କାସୁକୁଇତାନ୍ ସାମା କୁଲିକାପାଜି କୋଏତେ ଫାର୍କାକାନ୍ ତାଇନ୍ ମେ, ଚିୟାଃଚି ନେକାନ୍ ହୋଡ଼ୋକୋ ପାର୍ମେଶ୍ଵାର୍ କେ କାସୁକୁଇତାନ୍ କାଜିକୋରେ ଆଡୋଃଗି ହାରା ଇଦିୟୋଃୱାକୋ। ହାର୍ ଇନ୍‍କୁୱାଃ ଶିଖାଅକାଜି ସୋୟା ଘାଅ ଲେକା ପାସ୍ରାଅ ଇଦିଅଃୱା। ହୁମିନାୟୁସ୍ ଆଡୋଃ ଫିଲେତୁସ୍ ଏନ୍ ଲେକାନ୍ ହୋଡ଼ୋକିନ୍ ଗି ତାନ୍‍କିନ୍, ଅକନ୍‍କିନ୍ ନେୟା କାଜିୟାକିନ୍ ଚି ଜୀବିନିରିଦ୍ ହୋବା ଛାବାକାନା ସାର୍ତି ହୋରା କେ ବାଗିତାଦାକିନ୍, ହାର୍ ଚିମିନାଙ୍ଗ୍ ହୋଡ଼ୋକୋୱାଃ ବିଶ୍ଵାସ୍ କେ ବାଗ୍‍ଡ଼ାଅ ତାଦାକିନ୍। ଏଣ୍ଡେ ରେହ ପାର୍ମେଶ୍ଵାର୍ ରାଃ ନାହି କେଟେଃଗି ବାଇ ତାଇନୋଃୱା, ହାର୍ ଏନାରେ ନେୟା ଛାପ୍ ଲାଗାଅ କାନା: “ପ୍ରାଭୁ ଆପାନାଃ ହୋଡ଼ୋକୋକେ ନେଲ୍ଉରୁମ୍ କୋୱାଏ,” ଆଡୋଃ “ଜାହାଁଏ ହ ପ୍ରାଭୁ ଆଃ ନୁତୁମ୍ ଇଦିତାନାଏ, ଇନିଃ ଆଧାର୍ମ୍ ତେ ସାଙ୍ଗିନ୍ ତାଇନୋଃକାଏ।” ମାରାଙ୍ଗ୍ ଅଡ଼୍ଆଃ ରେ ସୋନା-ରୂପା ରାଃ ଭାଇର୍ କାହା, ମେନ୍ଦୋ ସାହାନ୍ ହାର୍ ହାସା ରାଃ ଥାଡ଼ି-ଡୁଭ୍‍ନୀ ହଗି ତାଇନା; ଅକନାଃ-ଅକନାଃ ମାଇନାନ୍ କାମି ଲାଗିନ୍, ହାର୍ ଅକନାଃ-ଅକନାଃ କାମାଇନାନ୍ କାମି ଲାଗିନ୍। ଆଗାର୍ ଜେତାନ୍ ହୋଡ଼ ଆଏଃ ଆପାନ୍ କେ ନେୟାକୋଏତେ ଫାର୍ଚି ନାଏ, ଏଣ୍ଡେ ଇନିଃ ମାଇନାନ୍ କାମି ରେୟାଃ ବାସାନ୍ ହାର୍ ପାବିତାର୍ ବାଇୟୋଗାଏ; ହାର୍ ଗୋମ୍‍କେ ରାଃ କାମି ରେ ହିଜୁଗାଏ, ହାର୍ ସବେନ୍ ବୁଗିନ୍ କାମି ଲାଗିନ୍ତେ ସେକାଡ଼୍ କାନାଏ। ଜାୱାନ୍ ସାମାୟ୍ ରାଃ ଏତ୍କାନ୍ ହାୟା କୋକେ ନିର୍ ବାଗିମେ, ହାର୍ ଅକନ୍‍କୋ ଫାର୍ଚି ମୋନ୍ ତେ ପ୍ରାଭୁ ଆଃ ନୁତୁମ୍ ଇଦିୟାକୋ ଇନ୍‍କୁ ଲୋଃ ଧାରାମ୍, ହାର୍ ବିଶ୍ଵାସ୍, ହାର୍ ଦୁଲାଡ଼୍, ହାର୍ ମେନେଶା କେ ନାମ୍ ବାଡ଼ାଏମେ। ମେନ୍ଦୋ ଡୋଣ୍ଡୋ ହାର୍ ବେଗାର୍ ସାରିକାନ୍ କୁଲିକାପାଜି କୋଏତେ ସାଙ୍ଗିନ୍ ତାଇନ୍ ମେ, ଚିୟାଃଚି ଆମ୍ ସାରିୟାମ୍ ଚି ନେକାନ୍ କୋଲୋଃ ଝାଗ୍ଡ଼ା ହୁୟୋଃୱା। ପ୍ରାଭୁ ଆଃ ଦାସୀ କେ ଝାଗ୍ଡ଼ାଲୁ କା ହୋବାଅଃ ଚାହି, ମେନ୍ଦୋ ଇନିଃ ସବେନ୍ କୋଲୋଃ ଲେବେଃ ଆଡୋଃ ଶିଖାଅ ରେ ସେଣାନ୍ ଆଡୋଃ ସାହାତିଙ୍ଗ୍ ନିଃ ତାଇନ୍ କାଏ। ଇନିଃ ବିରୋଧ୍ ତାନ୍ କୋକେ ଲେବେଃ ମୋନ୍ ତେ ବୁଝାଅକୋକାଏ, ଅକଏ ସାରିକାଦାଏ ପାର୍ମେଶ୍ଵାର୍ ଇନ୍‍କୁକେ ପାପ୍ କାମିବାଗେ ରାଃ ମୋନ୍ ଏମାକୋୱାଏ ଚି ଇନ୍‍କୁ ହଗି ସାର୍ତି କେ ସାରିଧାଡ଼ିୟାକୋ। ହାର୍ ଏନାତେ ଇନ୍‍କୁ ହୋସ୍ ରେ ହିଜୁଗାକୋ ଆଡୋଃ ଶାଏତାନ୍ ରାଃ ସାନାଙ୍ଗ୍ କେ ପୁରା ଲାଗିନ୍ତେ ବାଗିକେତେ ଇନିଜାଃ ଫାନ୍ଦା ଏତେ ଆଡ଼ାଆଃ କେନୋଗାକୋ। ନେୟା ମୋନେ କାମ୍ ଚି ଟୁଣ୍ଡୁ ହୁଲାଙ୍ଗ୍ କୋରେ ବୋରୋୱାନ୍ ସାମାୟ୍ ହିଜୁଗା। ଚିୟାଃଚି ହୋଡ଼ୋକୋ ଆକୋଗିକୋ ଦୁଲାଡ଼େନା, ଟାକା-ପାଇସା କେ ଦୁଲାଡ଼େୟାକୋ, ମାରାଙ୍ଗ୍ଏନ୍, ଘାମାଣ୍ଡି, ନିନ୍ଦାତାନ୍, ଏଙ୍ଗା-ଆପୁ କେ କା-ମାନାତିଙ୍ଗ୍‍ତାନ୍, କା-ଧାନ୍ୟାବାଦ୍‍ତାନ୍, ଆ-ପାବିତାର୍, କା-ଦୁଲାଡ଼େତାନ୍, କା-ଛାମାତାନ୍, ଦୋଷ୍ ଲାଗାଅତାନ୍, ମୋନ୍ କେ କାବୁଝାଅ ଧାଡ଼ିତାନ୍, ବୋରୋୱାନ୍, ବୁଗିନାଃ କେ କାସୁକୁତାନ୍, ବାଏମାନ୍, ଢିଟ୍, ଆପାନ୍‍କେ ମାରାଙ୍ଗ୍ଏନ୍ ବାଇଏନ୍, ହାର୍ ପାର୍ମେଶ୍ଵାର୍ କେ କାହା ମେନ୍ଦୋ ସୁକୁ ରାଶିକା କେ ଦୁଲାଡ଼େନ୍ ତାନ୍‍କୋ ହୋବାଅଃୱା। ଇନ୍‍କୁ ପାର୍ମେଶ୍ଵାର୍ କେ ସୁକୁଇତାନ୍ ଲେକାନ୍‍କୋ ନେଲୋଗାକୋ, ମେନ୍ଦୋ ଇନିଜାଃ ପେଡ଼େଏ କେ କାକୋ ମାନାତିଙ୍ଗ୍ଏୟା; ନେଲେକାନ୍ ହୋଡ଼ୋକୋ ଏତେ ଗେନା ରେ ତାଇନ୍‍ମେ। ହିନ୍‍କୁଗି ଏନ୍ ଲେକାନ୍ ହୋଡ଼ୋକୋ ତାନ୍‍କୋ, ଅକନ୍‍କୋ ଅଡ଼୍ଆଃ କୋରେ ଉକୁ-ଉକୁତେ ବୋଲୋଃୱାକୋ ହାର୍ ଏନ୍ ଡୋଣ୍ଡୋ କୁଡ଼ି କୋକେ ଆଧିନ୍ କେକୋୱାକୋ, ଅକନ୍‍କୋ ପାପ୍ କୋରେ ତେନାକାନ୍ ଆଡୋଃ ସବେନ୍ ରାକାମ୍ ରାଃ ଶିତୃ ସାନାଙ୍ଗ୍ ରାଃ ଆଧିନ୍ ରେ ମେନାକୋୱା। ହାର୍ ସବେନ୍ ଇମ୍ତାଙ୍ଗ୍ ଶିଖାଅ ଦୋ କାତୋଃୱାକୋ ମେନ୍ଦୋ ସାର୍ତି ରାଃ ସେଣା କେ ଚିଉଲା ହ କାକୋ ନେଲ୍ଉରୁମ୍ ଧାଡ଼ିୟା। ଜେଲେକା ୟାନ୍ନେଷ୍ ହାର୍ ୟାମ୍ବ୍ରେସ୍ ମୁଶା ନାବୀ କେ ବିରୋଧ୍ ଲେଦାକିନ୍, ଏନ୍ ଲେକାଗି ନିକୁ ହଗି ସାର୍ତି କେ ବିରୋଧ୍ ୟାକୋ; ନିକୁ ଏନ୍‍ଲେକା ହୋଡ଼ୋକୋ ତାନ୍‍କୋ, ଇନ୍‍କୁୱାଃ ମୋନ୍ ବାଗ୍‍ଡ଼ାଅ ଛାବାକାନା ହାର୍ ଇନ୍‍କୁ ବିଶ୍ଵାସ୍ ରାଃ ବିଷାୟ୍ ରେ ଠାଉକା ହୋଡ଼ୋ ନାହାଲାକୋ। ମେନ୍ଦୋ ଇନ୍‍କୁ ନେୟାତେ ଆୟୁର୍ କାକୋ ବାଢ଼ାଅ ଧାଡ଼ିୟା, ଚିୟାଃଚି ଜେଲେକା ଇନ୍‍କୁୱାଃ ଡୋଣ୍ଡୋକାନ୍ ସବେନ୍ ହୋଡ଼ୋକୋ ରେ ଉଦୁବ୍‍ଲେନ୍ ତାଇକେନା, ଏନ୍‍ଲେକାଗି ନିକୁୱାଃ ହଗି ହୋବାକେନୋଗା। ମେନ୍ଦୋ ଆମ୍ ଇଙ୍ଗ୍ଆଃ ଶିଖାଅ, ଇଙ୍ଗ୍ଆଃ ଜୀଦାନ୍ ଜୀହିଦୋଃ, ଇଙ୍ଗ୍ଆଃ ସାନାଙ୍ଗ୍, ବିଶ୍ଵାସ୍, ସାହାତିଙ୍ଗ୍, ଦୁଲାଡ଼୍, କେଟେଃ ତାଇନୋଃ, ହାର୍ ସାତାଅ ନାମେ କେ, ହାର୍ ଦୁକୁ ସାହାତିଙ୍ଗ୍ କେ ଆମ୍ ସାରିୟାମ୍। ହାର୍ ଏନ୍ ଚିମିନ୍ ଦୁକୁ କୋକେ ହଗି ଅକନାଃ ଆନ୍ତାକିୟା ସାହାର୍ ହାର୍ ଇକୁନିୟୁମ୍ ସାହାର୍ ହାର୍ ଲୁସ୍ତ୍ରା ସାହାର୍ ରେ ଚିଲ୍‍କା ଇଙ୍ଗ୍ଆଃ ଚେତାନ୍ ରେ ହିଜୁଃ ଲେନା ସାହାତିଙ୍ଗ୍ କେଦାଇଙ୍ଗ୍, ମେନ୍ଦୋ ପ୍ରାଭୁ ଇଙ୍ଗ୍‍କେ ଏନ୍ ସବେନାଃ ତେ ଛୋଡ଼ାଓ କେଦିଙ୍ଗ୍ଆଏ। ମେନ୍ଦୋ ଅକନ୍‍କୋ ମାସୀହ୍ ୟୀଶୁ ରେ ପାର୍ମେଶ୍ଵାର୍ କେ ସୁକୁଇତାନ୍ ଜୀଦାନ୍ ସେସେନ୍ ସାନାଙ୍ଗ୍‍ତାନାକୋ, ଇନ୍‍କୁ ସବେନ୍ ସାତାଅୱାକୋ। ମେନ୍ଦୋ ଦୁଷ୍ଟ ହାର୍ ହିଡିଡ଼୍ ହୋଡ଼ୋକୋ ଏଟାଃ ହୋଡ଼ୋକୋକେ ଲୋଗୋ କୋୱାକୋ ହାର୍ ଆକୋ ହଗି ଏଟାଃ ହୋଡ଼ୋକୋ ଏତେ ଲୋଗୋ ୱାକୋ, ଏନାତେ ଆଡୋଃଗି ହୋଡ଼ୋକୋ ବାଗ୍‍ଡ଼ାଅ ଇଦିଅଃୱାକୋ। ମେନ୍ଦୋ ଆମ୍ ଏନ୍ କାଜି କୋରେ ଅକନାଃ ଆମାମ୍ ଶିଖାଅକାନା ହାର୍ ବିଶ୍ଵାସ୍ କାଦାମ୍, ନେୟା ସାରିକେତେ କେଟେଃ ବାଇ ତାଇନୋଃମେ ଚି ଆମ୍ ଏନାକୋକେ ଅକନ୍ ହୋଡ଼ୋକୋ ଏତେ ଶିଖାଅ କାନାମ୍, ହାର୍ ହୁପୁଡିଙ୍ଗ୍ ଏତେ ପାବିତାର୍ ପୁଥି ଆମାଃ ସାରିକାନ୍ ତେୟାଃ ତାନାଃ, ଅକନାଃ ଆମ୍‍କେ ମାସୀହ୍ ୟୀଶୁ ରେ ବିଶ୍ଵାସ୍ ହୋରାତେ ବାଞ୍ଚାଅ ନାମ୍ ଲାଗିନ୍ତେ ସେଣାନ୍ ହୋଡ଼ ବାଇ ଧାଡ଼ିମେୟାଏ। ସବେନ୍ ପାବିତାର୍ ପୁଥି ପାର୍ମେଶ୍ଵାର୍ ରାଃ ଉଦୁବାକାନ୍ ତେ ଅଲାକାନା, ହାର୍ ଉପ୍‍ଦେଶ୍ ହାର୍ ବୁଝାଅ ଲାଗିନ୍ ହାର୍ ସୁଧ୍‍ରାଓ ଲାଗିନ୍ ହାର୍ ଧାରାମ୍ ରାଃ ସେଣା ଏମେଲାଗିନ୍ ବୁଗିନ୍ ତାନାଃ। ଏନାତେ ପାର୍ମେଶ୍ଵାର୍ ରାଃ ହୋଡ଼ ସେକାଡ଼ୋଃ ୱାଏ, ହାର୍ ସବେନ୍ ବୁଗିନ୍ କାମିକୋକେ କାମି ଧାଡ଼ିୟାଏ। ପାର୍ମେଶ୍ଵାର୍ ହାର୍ ମାସୀହ୍ ୟୀଶୁ ରାଃ ସାମାନାଙ୍ଗ୍ ରେ, ଅକନିଃ ଜୀହିଦାକାନ୍ ହାର୍ ଗୋଜାକାନ୍ କୋୱାଃ ବିଚାର୍ ୟାଏ, ହାର୍ ଇନିଜାଃ ହିଜୁଃରୁଆଡ଼୍ ଆଡୋଃ ରାଇଜ୍ ରାଃ କାଜି ଏମ୍ କେତେ ଇଙ୍ଗ୍ ଆମ୍‍କେ ଆଚୁମେ ତାନିଙ୍ଗ୍। ଚି ଆମ୍ ପାର୍ମେଶ୍ଵାର୍ ରାଃ ବାଚାନ୍ ପାର୍ଚାର୍ ଏମେ, ସାମାୟ୍ ତାଇୟୋଃ ଚାହେ କାତାଇୟୋଃ ସେକାଡ଼୍‍କାନ୍ ତାଇନ୍‍ମେ, ସବେନ୍ ଲେକାନାଃ ସାହାତିଙ୍ଗ୍ ରେ ଆଡୋଃ ଶିଖାଅ ତାନ୍‍ଲୋଃ ଇନ୍‍କୁୱାଃ ଗାଲ୍ତି ଉଦୁବାକୋମେ ହାର୍ ଏଗେର୍‍କୋମ୍ ହାର୍ ବୁଝାଅକୋମ୍। ଚିୟାଃଚି ନେଲେକାନ୍ ସାମାୟ୍ ହିଜୁଗା ଚିମ୍ତାଙ୍ଗ୍ ହୋଡ଼ୋକୋ ସାର୍ତି ଶିଖାଅ କେ କାକୋ ଆୟୁମ୍ ସାନାଙ୍ଗ୍ଆ, ମେନ୍ଦୋ ଲୁତୁର୍ ବାପ୍ତା ରାଃ ଚାଲ୍ତେ ଆକୋୱାଃ ସାନାଙ୍ଗ୍ ଲେକା ଆକୋ ନାଙ୍ଗ୍ ଥିମ୍ବାଗି ଶିଖାଅହୋଡ଼୍ ହୁଣ୍ଡି କୋୱାକୋ। ହାର୍ ସାର୍ତି କେ ଆୟୁମ୍ ବାଗିକେତେ ହୋଡ଼ ତେ ବାଇକାନ୍ କାଥ୍‍ନୀ କୋକେ ଆୟୁମ୍ ୟାକୋ। ମେନ୍ଦୋ ଆମ୍ ସବେନ୍ କାଜି କୋରେ ହୋସିୟାର୍ ତାଇନ୍‍ମେ, ଦୁକୁ ସାହାତିଙ୍ଗ୍ଏମେ, ସୁସାମାଚାର୍ ପାର୍ଚାର୍ ରାଃ କାମି କାମିମେ, ହାର୍ ଆମାଃ ସେୱା ରାଃ କାମିକେ ପୁରାଏମେ। ଚିୟାଃଚି ନାଆ ଇଙ୍ଗ୍ ଦାଣେ ଲେକା ଦୁଲୋଃ ଲାଗିନ୍ ସେକାଡ଼୍ କାନିଙ୍ଗ୍, ହାର୍ ଇଙ୍ଗ୍ଆଃ ସେନୋଃ ସାମାୟ୍ ହିଜୁଃ ସେଟେର୍ କାନା। ଇଙ୍ଗ୍ ବୁଗିନ୍ ଲାଡ଼ାଇ-ଲାଡ଼ାଇ କାନାଇଙ୍ଗ୍, ଇଙ୍ଗ୍ ଇଙ୍ଗ୍ଆଃ ନୀନିର୍ ପୁରା କେଦାଇଙ୍ଗ୍, ଇଙ୍ଗ୍ ବିଶ୍ଵାସ୍ କେ ସାବ୍ କାଦାଇଙ୍ଗ୍। ହିଜୁଃତାନ୍ ସାମାୟ୍ ରେ ଇଙ୍ଗ୍ଆଃ ଲାଗିନ୍ ଧାରାମ୍ ରାଃ ଏନ୍ ମୁକୁଟ୍ ମାଣ୍ଡାଅ କାନା, ଅକନାଃ କେ ପ୍ରାଭୁ, ଅକନିଃ ଧାର୍ମୀ ଆଡୋଃ ବିଚାର୍‍ନିଃ ତାନିଃ, ଇଙ୍ଗ୍‍କେ ଏନ୍ ହୁଲାଙ୍ଗ୍ ଏମେୟାଏ ହାର୍ ଇଙ୍ଗ୍‍କେ ଭାଇର୍ କାହା ମେନ୍ଦୋ ଏନ୍ ସବେନ୍ କୋକେ ହଗି ଅକନ୍‍କୋ ଇନିଜାଃ ହିଜୁଃରୁଆଡ଼୍ କେ ଦୁଲାଡ଼୍ ତେ ନେଲ୍ ହୋରା ତାନାକୋ ଇଙ୍ଗ୍ଆଃ ତାଃ ସେକାଡ଼୍ ହିଜୁଃ ରାଃ କୋଷିସ୍ ଏମ୍। ଚିୟାଃଚି ଦେମାସ୍ ନେ ଅତେଦିଶୁମ୍ କେ ଦୁଲାଡ଼୍ କେତେ ଇଙ୍ଗ୍‍କେ ବାଗେ ତାଦିଙ୍ଗାଏ ହାର୍ ଥିସ୍ସଲୁନିକେ ସାହାର୍ ତେ ସେନୋଃ ଜାନାଏ, ହାର୍ କ୍ରେସ୍‍‍କେନ୍ସ ହାଗା ଗାଲାତିୟା ରାଇଜ୍ ତେ ହାର୍ ତିତୁସ୍ ଦାଲ୍‍ମାତୀୟା ରାଇଜ୍ ତେ ସେନୋଃ ଜାନାଏ। ଲୁକା ଭାଇର୍ ଇଙ୍ଗ୍ଆଃ ଲୋଃ ମେନାଇଜା। ମାର୍କୁସ୍ କେ ଆଉକେତେ ହିଜୁଃମେ; ଚିୟାଃଚି ସେୱା ଲାଗିନ୍ତେ ଇନିଃ ଇଙ୍ଗ୍ଆଃ ଥିମ୍ବାଗି କାମି ରାଃ ହୋଡ଼ ତାନିଃ। ତୁଖିକୁସ୍ କେ ଇଙ୍ଗ୍ ଇଫିସୁସ୍ ସାହାର୍ କୁଲ୍ କାଦାଇଙ୍ଗ୍। ଅକନ୍ ଜିଲିଙ୍ଗ୍-ଲିଜାଃ ଇଙ୍ଗ୍ ତ୍ରୋଆସ୍ ସାହାର୍ ରେନ୍ କାର୍ପୁସ୍ ତାଃ ବାଗି କେତେ ହିଜୁଃ କାନାଇଙ୍ଗ୍, ଚିମ୍ତାଙ୍ଗ୍ ଆମ୍ ହିଜୁଃୱାମ୍, ଦୋ ଏନାକେ ଆଡୋଃ କିତାବ୍ କୋକେ, ବିଶେଷ୍ କେତେ ଚାମ୍ଡ଼ା-ଚିଠି କୋକେ ଆଉ ତୋରାଏମେ। ଆଲେକ୍‍ଜାଣ୍ଡାର୍ କାନ୍‍ସା ତେ ଜିନିଷ୍ ବାବାଇନିଃ ଇଙ୍ଗ୍‍କେ ବେଶେ ଦୁକୁ ଏମ୍ କିଦିଙ୍ଗାଏ; ପ୍ରାଭୁ ଇନିଃକେ ଇନିଜାଃ କାମି ଲୋକାତେ ବାଦ୍‍ଲା ଏମେୟାଏ। ଆମ୍ ହଗି ଇନିଜେତେ ହୁସିଆର୍ ତାଇନ୍ ମେ ଚିୟାଃଚି ଇନିଃ ଆବୁୱାଃ କାଜି କୋରାଃ ଥିମ୍ବାଗି ବିରୋଧ୍ କାଦାଏ। ଇଙ୍ଗ୍ଆଃ ସିଦା ବିଚାର୍ ଜାଗା ରେ ତିଙ୍ଗୁ ଲେନ୍ ଇମ୍ତାଙ୍ଗ୍ ଅକଏ ହଗି ଇଙ୍ଗ୍‍କେ କାକୋ ଦେଙ୍ଗା କେଦା, ମେନ୍ଦୋ ସବେନ୍ କୋ ଇଙ୍ଗ୍‍କେ ବାଗେ ଲିଦିଙ୍ଗାକୋ। ବୁଗିନ୍ ହୋବାଃୱା ଆଗାର୍ ନେୟାରାଃ ଲେକା ଇନ୍‍କୁକେ କା ଏମ୍ ପାଡ଼ାଅଃୱା। ମେନ୍ଦୋ ପ୍ରାଭୁ ଇଙ୍ଗ୍ଆଃ ଦେଙ୍ଗାନିଃ ହୋବାଜାନାଏ ହାର୍ ଇଙ୍ଗ୍‍କେ ପେଡ଼େଏ ଏମ୍ କେଦିଙ୍ଗାଏ; ଏନାତେ ଇଙ୍ଗ୍ଆଃ ହୋରାତେ ପୁରା ପାର୍ଚାର୍ ହୋବାଅଃକା ହାର୍ ସବେନ୍ ଏଟାଃଜାତି କୋ ଆୟୁମେକାକୋ; ଇଙ୍ଗ୍ କୁଲ୍ଲା ରାଃ ମୋଚା ରେ ପାଶେକାନ୍ ଲେକା ଏତେ ବାଞ୍ଚାଅ ଜାନାଇଙ୍ଗ୍। ହାର୍ ପ୍ରାଭୁ ଇଙ୍ଗ୍‍କେ ସବେନ୍ ଏତ୍କାନ୍ କାମି କୋଏତେ ଛୋଡ଼ାୱିଙ୍ଗ୍‍ୟାଏ, ହାର୍ ଆଜାଃ ସିର୍ମାଦିଶୁମ୍ ରାଇଜ୍ ରେ ବାଞ୍ଚାଅ କେତେ ଥେବାଗିଙ୍ଗାଏ। ଇନିଜାଃ ଗି ମାନାରାଙ୍ଗ୍ ଜାନାଓ-ଜାନାଓ ହୋବାକାତୋଃକା। ଆମୀନ୍। ପ୍ରିସ୍କା ହାର୍ ଆଜାଃ କଡ଼ା ଆକ୍ୱିଲା କେ ଆଡୋଃ ଉନେସୀଫୁରୁଷ୍ ରାଃ ଅଡ଼୍ଆଃ ରେନ୍ କୋକେ ଜୋହାର୍। ଇରାସ୍ତୁସ୍ କୁରିନ୍ଥିଉସ୍ ସାହାର୍ ରେ ତାଇନ୍ ଜାନାଏ, ହାର୍ ତ୍ରୁଫିମୁସ୍ କେ ଇଙ୍ଗ୍ ମିଲେତୁସ୍ ସାହାର୍ ରେ ବିମାର୍ ତାନ୍ ଗି ବାଗି କାଜାଇଙ୍ଗ୍। ରାବାଙ୍ଗ୍ ରାଃ ସିଦା ରେ ହିଜୁଃ ଲାଗିନ୍ କୋଷିସ୍ ଏମ୍। ୟୁବୁଲୁସ୍, ହାର୍ ପୁନ୍ଦେଶ୍, ହାର୍ ଲିନୁସ୍ ହାର୍ କ୍ଲୋଦିୟା, ହାର୍ ସବେନ୍ ହାଗା ମିଶି କୋ ପାଡ଼େତେ ଆମ୍‍କେ ଜୋହାର୍। ପ୍ରାଭୁ ଆମାଃ ଆତ୍ମା ଲୋଃ ତାଇନ୍ କାଏ। ଆମାଃ ଚେତାନ୍ ରେ ଆନୁଗ୍ରାହ୍ ହୋବାଅଃକାତୋକା। ପାଉଲୁସ୍ ପାଡ଼େତେ ଅକନିଃ ପାର୍ମେଶ୍ଵାର୍ ରାଃ ଦାସୀ ହାର୍ ୟୀଶୁ ମାସୀହ୍ ରାଃ କୁଲାକାନ୍ ଚେଲା ତାନିଃ, ପାର୍ମେଶ୍ଵାର୍ ରାଃ ସାଲାକାନ୍ ହୋଡ଼ୋକୋୱାଃ ବିଶ୍ଵାସ୍ କେ କେଟେଃ ନାଙ୍ଗ୍ ହାର୍ ଏନ୍ ସାର୍ତି କେ ସାରିଉରୁମେ କାକୋ ଅକନାଃ ପାର୍ମେଶ୍ଵାର୍ କେ ସୁକୁଇତାନ୍ ଜୀଦାନ୍ ଲେକାତେ ଇଦିକୋୱାଏ, ଏନ୍ ଜାନାଓ ଜୀଦାନ୍ ରାଃ ଆଶ୍ରା ଅକନାଃ ପାର୍ମେଶ୍ଵାର୍ ମୁନୁଏତେ କିରିୟା ଜୋମ୍ କାଦାଏ, ଅକଏ ହିଡ଼୍ ଗି କାଏ ଧାଡ଼ିୟାଏ। ହାର୍ ଠିକ୍ ସାମାୟ୍ ରେ ଆଜାଃ ବାଚାନ୍ କେ ଏନ୍ ପାର୍ଚାର୍ ରାଃ ହୋରାତେ ଉଦୁବ୍ କେଦାଏ, ଅକନାଃ ଆବୁୱାଃ ବାଞ୍ଚାଅନିଃ ପାର୍ମେଶ୍ଵାର୍ ରାଃ ଆନାଚୁ ହୋରାତେ ଇଙ୍ଗ୍‍କେ ଜିମା ଜାନା। ତିତୁସ୍ ରାଃ ନୁତୁମ୍ ରେ, ଅକନିଃ ମିଃଗି ବିଶ୍ଵାସ୍ ରାଃ ହୋରାତେ ଇଙ୍ଗ୍ଆଃ ସାର୍ତି ହୋନ୍ ଲେକା ତାନିଃ: ପାର୍ମେଶ୍ଵାର୍ ଆପୁ ଆଡୋଃ ଆବୁୱାଃ ବାଞ୍ଚାଅନିଃ ମାସୀହ୍ ୟୀଶୁ ରାଃ ହୋରାତେ ଆମ୍‍କେ ଆନୁଗ୍ରାହ୍ ହାର୍ ଜୀଉସୁକୁ ନାମ୍ କାତୋଃକା। ଇଙ୍ଗ୍ ନେୟାମେନ୍ତେ ଆମ୍‍କେ କ୍ରେତେ ଟାପୁ ରେ ବାଗେ କେତେ ହିଜୁଃ ଲେନାଇଙ୍ଗ୍ ଚି ଆମ୍ ସାରେଜାକାନ୍ କାଜିକୋକେ ସୁଧ୍ରାଏମେ, ହାର୍ ଇଙ୍ଗ୍ଆଃ ଆନାଚୁ ଲେକାତେ ହାତୁ-ହାତୁ ମାରିହୋଡ଼ୋକୋକେ ମାଣ୍ଡାଅ କୋମେ। ମାରିହୋଡ଼ ନିର୍ଦୋଷ୍ ହାର୍ ମିୟାଃଗି କୁଡ଼ି ରାଃ କଡ଼ା ତାଇନ୍ ଚାହି, ଇନିଜାଃ ହୋନ୍ କୋ ବିଶ୍ଵାସୀ ତାଇନ୍ ଚାହି, ହାର୍ ଇନ୍‍କୁ ରେ ସିଣିଇକାମି କାତାଇନ୍ ଚାହି ହାର୍ ଇନ୍‍କୁ କାମାନାତିଙ୍ଗ୍‍ତାନ୍ ଲେକା କାକୋ ତାଇନ୍ ଚାହି। ଚିୟାଃଚି ବିଶାପ୍ କେ ପାର୍ମେଶ୍ଵାର୍ ରାଃ କାମି ଜିମାକାନା ଏନାମେନ୍ତେ ଇନିଃକେ ନିର୍ଦୋଷ୍ ହୋବାଅଃ ଚାହି; ଜୀଦ୍ଧି ହୋଡ଼ କାହା, ଖିସୋଃନିଃ କାହା, ବୁଲୋଃନିଃ କାହା, ଲାପ୍ଡ଼ାଇନିଃ କାହା, ଆଡୋଃ ଟାକା-ପାଇସା ହାୟାନିଃ କାହା, ମେନ୍ଦୋ ପେଡ଼ାକୋକେ ସୁସାର୍ ରିକାଏନିଃ, ବୁଗିନାଃ କେ ସାନାଙ୍ଗ୍ ନିଃ, ଆଜାଃ ମୋନ୍ କେ ବୁଝାଅ ମାଣ୍ଡାଅନିଃ, ଧାରାମାନ୍ ନିଃ, ପାବିତାର୍ ତାଇନ୍ ନିଃ ହାର୍ ବୁଗିନ୍ ମୋନ୍ ରେ ସେସେନ୍ ନିଃ। ହାର୍ ଇନିଃ ବିଶ୍ଵାସେଲେକାନାଃ ବାଚାନ୍ କେ ଅକନାଃ ଧାରାମ୍ ଶିଖାଅ ଲେକାତେ ମେନାଃ, ଏନାରେ ବାଇକେତେ ତାଇନ୍ କାଏ, ଏନାତେ ବୁଗିନ୍ ଶିଖାଅ ଏମ୍ ଧାଡ଼ିୟାଏ ହାର୍ ବିରୋଧୀ କୋୱାଃ ମୋଚା କେହ ବାନ୍ଦ୍ ଧାଡ଼ିୟାଏ। ଚିୟାଃଚି ପୁରାଃଗି କାଜିକେ କାମାନାତିଙ୍ଗ୍ ତାନ୍ ହୋଡ଼ୋକୋ, ସାମାକାଜି କାଜିତାନ୍ କୋ ହାର୍ ଲୋଗୋତାନ୍ ହୋଡ଼ୋକୋ ମେନାକୋୱା; ବିଶେଷ୍ କେତେ ଖାତ୍ନାକାନ୍ ବିଶ୍ଵାସୀ ହୋଡ଼ୋକୋ ରେ। ଇନ୍‍କୁୱାଃ ମୋଚା ବାନ୍ଦ୍ ରିକା ଚାହି। ନେ ହୋଡ଼ୋକୋ ଟାକା-ପାଇସା ରାଃ ହାୟା ଲାଗିନ୍ତେ କା-ଠାଉକା କାଜିକୋ ଶିଖାଅକେତେ ଅଡ଼୍ଆଃ-ଅଡ଼୍ଆଃ କେକୋ ବାଗ୍‍ଡ଼ାଅ ତାଃକୋ। କ୍ରେତେ ଟାପୁ ରେନ୍ ମିହୋଡ଼୍, ଅକନିଃ ଇନ୍‍କୁୱାଃଗି ନାବୀ ତାନିଃ, କାଜିକାଦାଏ, “କ୍ରେତେ ଟାପୁ ରେନ୍ ହୋଡ଼ୋକୋ ସାଦାଏ ଲୋଗୋୟାକୋ, ଦୁଷ୍ଟ ପାଶୁ ଲେକା ବାଇୟୋଗାକୋ ଆଡୋଃ ଆଲ୍‍ସୀ ପେଟୁ ତାନ୍‍କୋ।” ନେ କାଜି ସାର୍ତିଗୀ ତାନାଃ, ଏନାମେନ୍ତେ ଇନ୍‍କୁକେ କେଟେଃ ତେ ଚେତାୱନୀ ଏମାକୋମ୍, ଏନାତେ ଇନ୍‍କୁ ବିଶ୍ଵାସ୍ ରେ ପୋକ୍ତା ହୋବାୱାକୋ। ହାର୍ ଇନ୍‍କୁ ୟାହୁଦୀ କୋୱାଃ ହୋଡ଼ୋତେ ବାଇୟାକାନ୍ କାଥ୍‍ନୀ କୋରେ ଆଡୋଃ ଏନ୍ ହୋଡ଼ୋକୋୱାଃ ଆନାଚୁକୋ ରେ ମୋନ୍ ଆଲୋ ଏମେ କାକୋ, ଅକନ୍‍କୋ ସାର୍ତି କେ ବାଗି ତାଃକୋ। ଫାର୍ଚି ହୋଡ଼ୋକୋ ଲାଗିନ୍ତେ ସବେନ୍ ଜିନିଷ୍‍କୋ ଫାର୍ଚି ତାନାଃ, ମେନ୍ଦୋ କାଫାର୍ଚି ଆଡୋଃ ୟୀଶୁ ରେ କାବିଶ୍ଵାସ୍ ତାନ୍‍କୋ ଲାଗିନ୍ତେ ଜେତ୍ନାଃ ହ ଫାର୍ଚି ନାହାଲା: ମେନ୍ଦୋ ଇନ୍‍କୁୱାଃ ମୋନ୍ ଆଡୋଃ ଆଟ୍‍କାର୍ଉରୁମ୍ ବାରାନାଃ ଫାର୍ଚି ବାନୋଗା। ଇନ୍‍କୁ କାଜିୟାକୋ ଚି ଆଲେ ପାର୍ମେଶ୍ଵାର୍ କେ ସାରିୟାଲେ, ମେନ୍ଦୋ ଆକୋୱାଃ କାମିକୋଏତେ ଇନିଃକେ ମାନା ୟାକୋ, ଚିୟାଃଚି ଇନ୍‍କୁ ଶିତୃ ଆଡୋଃ ଆନାଚୁ କାମାନାତିଙ୍ଗ୍ ହୋଡ଼ୋକୋ ତାନ୍‍କୋ, ହାର୍ ଜେତାନ୍ ବୁଗିନ୍ କାମି ଲାଗିନ୍ତେ ଠାଉକା ନାହାଲାକୋ। ମେନ୍ଦୋ ଆମ୍ ନେକାନ୍ କାଜିକୋ କାଜିକୋମେ ଅକନାଃ ବୁଗିନ୍ ଶିଖାଅ କାଜିକୋ ଲେକା ତାନାଃ। ମାନେ ହାଡ଼ାମ୍ କୋକେ ହୋସିୟାର୍ ହାର୍ ମାଇନ୍ ନାମେ ଲେକାନ୍, ଆଜାଃ ମୋନ୍ କେ ବୁଝାଅ ମାଣ୍ଡାଅନିଃ, ହାର୍ ଇନ୍‍କୁୱାଃ ବିଶ୍ଵାସ୍ ହାର୍ ଦୁଲାଡ଼୍ ହାର୍ ସାହାତିଙ୍ଗ୍ ପେଡ଼େଏ ପୋକ୍ତା ତାଇନୋଃ ଚାହି। ଏନ୍ ଲେକାଗି ବୁଡୀ କୋ ପାବିତାର୍ ହୋଡ଼ୋକୋ ଲେକା ତାଇନୋଃକାକୋ; ଇନ୍‍କୁ ଦୋଷ୍ ଲାଗାଅନିଃ ହାର୍ ବୁଲୋଃ ଲେକାନିଃ କାହା, ମେନ୍ଦୋ ବୁଗିନ୍ କାଜିକୋକେ ଶିଖାଅନିଃ ହୋବାଅଃକାକୋ। ଏନାତେ ଇନ୍‍କୁ ଜାୱାନ୍ କୁଡ଼ିକୋକେ ଚେତାୱନୀ ଏମା କାନ୍ତେ କାକୋ ଚି ଆପାନାଃ କଡ଼ାକୋଲୋଃ ହାର୍ ହୋନ୍‍ଗାଣା କୋଲୋଃ ଦୁଲାଡ଼୍ ମାଣ୍ଡାୱେ କାକୋ; ହାର୍ ଆଜାଃ ମୋନ୍ କେ ବୁଝାଅ ମାଣ୍ଡାଅନିଃ, ପାବିତାର୍, ଅଡ଼୍ଆଃ ରେ ବୁଗି ଲେକା କାମିନିଃ, ବୁଗିନ୍, ହାର୍ ଆପାନ୍-ଆପାନ୍ କଡ଼ାକୋୱାଃ ଆଧିନ୍ ରେ ତାଇନ୍ ନିଃ ହୋବାଅଃକାକୋ, ଏନାତେ ପାର୍ମେଶ୍ଵାର୍ ରାଃ ବାଚାନ୍ ରାଃ ନିନ୍ଦା ଆଲୋକା ହୋବାଅଃକା। ନେଲେକାଗି ଜାୱାନ୍ କଡ଼ାକୋକେ ହଗି ବୁଝାଅକୋମ୍ ଚି ଇନ୍‍କୁ ଆକୋୱାଃ ମୋନ୍ କୋକେ ବୁଝାଅ ମାଣ୍ଡାଅନିଃ ବାଇୟୋଃକାକୋ। ସବେନ୍ କାଜି କୋରେ ଆମ୍ ଆପାନ୍ କେ ବୁଗିନ୍ କାମି ରାଃ ନାମୁନା ବାଇୟେନ୍ ମେ। ଆମାଃ ଶିଖାଅ କାଜିକୋରେ ଫାର୍ଚି ମୋନ୍, ମାଇନୋଃ ଲେକାନ୍ ସେସେନ୍, ହାର୍ ନେକା ସାର୍ତି କାଜିକୋ ଉଦୁବେମେ ଏନାତେ ଜେତାଏ ଏନାକେ ଖାରାପ୍ କାଏ କାଜି ଧାଡ଼ିୟାଏ, ଏନାତେ ବିରୋଧୀ ଆବୁୱାଃ ଜେତାନ୍ ରେ ଦୋଷ୍ ଲାଗାଅ ନାଙ୍ଗ୍ ତାକ୍ କାଏ ନାମ୍ କେତେ ଗିୟୁଗୋଃୱାଏ। ଦାସୀ କୋକେ ବୁଝାଅ କୋମେ ଚି ଆକୋ ଆକୋୱାଃ ଗୋମ୍‍କେ କୋୱାଃ ଆଧିନ୍ ରେ ତାଇନ୍ କାକୋ, ହାର୍ ସବେନ୍ କାଜି କୋରେ ଇନ୍‍କୁକେ ସୁକୁରିକା କାକୋ, ହାର୍ ଆଲୋ କାଜିରୁଆଡ଼େ କାକୋ; ଚୋର୍ହା କାମିକୋ ଆଲୋ ରିକାକାକୋ, ମେନ୍ଦୋ ସବେନ୍ ଲେକାତେ ପୁରା ବିଶ୍ଵାସେ ଲେକାନ୍ ହୋଡ଼ ବାଇୟୋଃକାକୋ ଏନାତେ ଇନ୍‍କୁ ସବେନ୍ କାଜି କୋରେ ଆବୁୱାଃ ବାଞ୍ଚାଅନିଃ ପାର୍ମେଶ୍ଵାର୍ ରାଃ ଶିଖାଅ କେ ସିଙ୍ଗାରେ କାକୋ। ଚିୟାଃଚି ପାର୍ମେଶ୍ଵାର୍ ରାଃ ଏନ୍ ଆନୁଗ୍ରାହ୍ ଉଦୁବାକାନା, ଅକନାଃ ସବେନ୍ ହୋଡ଼ୋକୋ ନାଙ୍ଗ୍ ବାଞ୍ଚାଅ ରାଃ ହୋରା ତାନାଃ, ହାର୍ ଆବୁକେ ଚେତାୱନୀ ଏମ୍ ତାନାଏ ଚି ଆବୁ ଏତ୍କାନ୍ କାମି କୋଏତେ ହାର୍ ଅତେଦିଶୁମ୍ ରାଃ ଏତ୍କାନ୍ ସାନାଙ୍ଗ୍ ବାଗି କେତେ ନେ ଅତେ ରେ ମୋନ୍ କେ ବୁଝାଅ କେତେ ହାର୍ ଧାରାମ୍ ହାର୍ ପାର୍ମେଶ୍ଵାର୍ କେ ସୁକୁଇତାନ୍ ଜୀଦାନ୍ ଜିଦୋଃ କାବୁ; ହାର୍ ଏନ୍ ସୁକୁୱାନ୍ ଆଶ୍ରା ରାଃ ମାନେ ଆବୁୱାଃ ମାରାଙ୍ଗ୍ ପାର୍ମେଶ୍ଵାର୍ ହାର୍ ବାଞ୍ଚାଅନିଃ ୟୀଶୁ ମାସୀହ୍ ରାଃ ମାନାରାଙ୍ଗ୍ କେ ନେନେଲ୍ ଲାଗିନ୍ ନେଲ୍ ହୋରୋଏ କାବୁ। ଅକଏ ଆଏଃ ଆପାନ୍ କେ ଆବୁ ଲାଗିନ୍ ଏମ୍‍ତାଦାଏ ଏନାତେ ଆବୁକେ ସବେନ୍ ରାକାମ୍ ରାଃ ଆଧାର୍ମ୍ ଏତେ ଛୋଡ଼ାଓ ବୁୱାଏ, ହାର୍ ଫାର୍ଚି କେତେ ଆୟାଃ ଲାଗିନ୍ ମିୟାଃ ନେକାନ୍ ଜାତି ବାଇବୁୱାଏ ଅକନ୍‍କୋ ବୁଗିନ୍-ବୁଗିନ୍ କାମି ନାଙ୍ଗ୍ ସେକାଡ଼୍ କାନୋଗାକୋ। ପୁରା ଆଧିକାର୍ ଲୋଃ ନେ କାଜିକୋକେ କାଜିୟାକୋମ୍, ହାର୍ ବୁଝାଅକୋମ୍ ହାର୍ ଭୁଲ୍ ଉଦୁବ୍ କେତେ ସୁଧ୍‍ରାଓ କାନ୍ତେ କୋମ୍। ଜେତାଏ ଆମ୍‍କେ ଆଲୋ ହିଲାଙ୍ଗ୍ ମେକାକୋ। ହୋଡ଼ୋକୋକେ ମୋନେରିକା କୋମ୍ ଚି ହାକିମ୍ କୋୱାଃ ହାର୍ ଆଧିକାରୀ କୋୱାଃ ଆଧିନ୍ ରେ ତାଇନ୍ କାକୋ, ହାର୍ ଇନ୍‍କୁୱାଃ ଆନାଚୁ ମାନାତିଙ୍ଗ୍ କାକୋ, ହାର୍ ସବେନ୍ ବୁଗିନ୍ କାମିକୋ ଲାଗିନ୍ତେ ସେକାଡ଼୍ ତାଇନ୍ କାକୋ। ଜେତାଏ କେ ଆଲୋପେ ବାଦ୍‍ନାମେ, ହୋଡ଼ୋକୋ ଲୋଃ ଆଲୋପେ ଏପେଗେରା; ମେନ୍ଦୋ ବୁଝାଅନ୍ ହୋଡ଼ ଲେକା ତାଇନ୍‍ପେ, ହାର୍ ସବେନ୍ ହୋଡ଼ୋକୋ ଲୋଃ ଲେବେଃ ମୋନ୍ ତେ ତାଇନ୍‍ପେ। ଚିୟାଃଚି ଆବୁ ହ ସିଦା, କାସେଣାନ୍, ହାର୍ ଆନାଚୁ କାମାନାତିଙ୍ଗ୍ ତାନ୍, ହାର୍ ଭୁଲ୍ ରେ ଉୟୁଃକାନ୍, ହାର୍ ରାକାମ୍-ରାକାମ୍ ରାଃ ସାନାଙ୍ଗ୍ କୋରେ ହାର୍ ସୁକୁ ରାଶିକା ରାଃ ଦାସୀକାନ୍ ତାଇନ୍ କେନାବୁ, ହାର୍ ହିସିଙ୍ଗା ପାଟ୍କା, ହାର୍ ଲାପ୍ଡ଼ାଇ ରିକା ରେ ଜୀଦାନ୍ ଜିଦୋଃ ତାଇକେନାବୁ, ହାର୍ ହିଲାଙ୍ଗାନ୍ ତାଇନ୍ କେନାବୁ, ହାର୍ ମିହୋଡ଼୍ ଏଟାଃନିଃ ଲୋଃ ହିସିଙ୍ଗା ମାଣ୍ଡାଅ ତାଇନ୍ କେନାବୁ। ମେନ୍ଦୋ ଚିମ୍ତାଙ୍ଗ୍ ଆବୁୱାଃ ବାଞ୍ଚାଅନିଃ ପାର୍ମେଶ୍ଵାର୍ ରାଃ ଦାୟା ହାର୍ ହୋଡ଼ୋକୋୱାଃ ରେ ଇନିଜାଃ ଦୁଲାଡ଼୍ ନେଲ୍ ଜାନା, ଇମ୍ତାଙ୍ଗ୍ ଇନିଃ ଆବୁକେ ବାଞ୍ଚାଅ କେଃବୁୱାଏ; ହାର୍ ନେୟା ଧାରାମ୍ ରାଃ କାମିକୋ ଲେକାତେ କାହା, ଅକନାଃ ଆବୁ କାମି କେଦାବୁ, ମେନ୍ଦୋ ଆଜାଃ ଦାୟା ରାଃ ଲେକାତେ ନାୱା ଜାନାମ୍ ରାଃ ଗାଦିଙ୍ଗ୍ଏନ୍ ହାର୍ ପାବିତାର୍ ଆତ୍ମା ଆବୁକେ ନାୱା ବାଇ ରାଃ ହୋରାତେ ହୋବାଜାନା। ଅକନିଃକେ ଇନିଃ ଆବୁୱାଃ ବାଞ୍ଚାଅନିଃ ୟୀଶୁ ମାସୀହ୍ ରାଃ ହୋରାତେ ଥିମ୍ବାଗି ଆବୁ ଚେତାନ୍ ରେ ଦୁଲାକାଦାଏ। ଏନାତେ ଆବୁ ଇନିଜାଃ ଆନୁଗ୍ରାହ୍ ତେ ଧାର୍ମୀ ବାଇକେତେ, ଜାନାଓ ଜୀଦାନ୍ ରାଃ ଆଶ୍ରା ଲେକାତେ ଆଧିକାରୀ ବାଇୟୋଃୱାବୁ। ନେ କାଜି ସାର୍ତି ତାନାଃ, ହାର୍ ଇଙ୍ଗ୍ ସାନାଙ୍ଗ୍ ତାନିଙ୍ଗ୍ ଚି ଆମ୍ ନେ କାଜି କୋରାଃ ବିଷାୟ୍ ରେ କେଟେଃ ତେ କାଜିକୋମେ ନେୟାଲାଗିନ୍ ଚି ଅକନ୍‍କୋ ପାର୍ମେଶ୍ଵାର୍ କେ ବିଶ୍ଵାସ୍ କିଜାକୋ, ଇନ୍‍କୁ ବୁଗିନ୍-ବୁଗିନ୍ କାମି ରେ ବାଇକେତେ ତାଇନୋଃ ଲାଗିନ୍ ଧ୍ୟାନ୍ ମାଣ୍ଡାଅ କାକୋ। ନେ କାଜିକୋ ବୁଗିନ୍ ହାର୍ ହୋଡ଼ୋକୋ ନାଙ୍ଗ୍ ଲାଭ୍ କାଜି ତାନାଃ। ମେନ୍ଦୋ ଡୋଣ୍ଡୋ କୁଲିକାପାଜି, ହାର୍ ଖାନ୍ଦାନୀ ବିଷାୟ୍, ହାର୍ ବିରୋଧ୍ ହାର୍ ଏନ୍ ଝାଗ୍ଡ଼ା କୋଏତେ ଅକନାଃ ନିୟାମ୍ ରାଃ ବିଷାୟ୍ ରେ ମେନାଃ, ବାଚାଓ କେତେ ତାଇନୋଃମେ, ଚିୟାଃଚି ଏନାକୋ କାଯୋଅଃ ତେୟାଃ ହାର୍ ସାମା କାଜି ତାନାଃ। ଜାହାନ୍ ଏତ୍କାନାଃ ଶିଖାଅ କେତେ ଆଲାଗ୍ ରିକାହୋଡ଼୍ କେ ମିଶା ବାର୍ସା ଚେତାୱନୀ ଏମ୍ କେତେ ଇନିଜେତେ ଆଲାଗ୍ ତାଇନୋଃମେ, ନେକାନ୍ ହୋଡ଼ କେ ସାରିମେ ଚି ଇନିଃ ଆଦାକାନାଏ, ହାର୍ ଆଏଃ ଆପାନ୍ କେ ଦୋଷୀ ବାଇକେତେ ପାପ୍ କାମି ରିକା କାତେୟାଏ। ଚିମ୍ତାଙ୍ଗ୍ ଇଙ୍ଗ୍ ଆମାଃ ନାଡ଼େଏ ଆର୍ତେମାସ୍ ୟାଦୋ ତୁଖିକୁସ୍ କେ କୁଲେୟାଇଙ୍ଗ୍, ଇମ୍ତା ଇଙ୍ଗ୍ଆଃ ନାଡ଼େଏ ନିକୁପୁଲିସ୍ ସାହାର୍ ହିଜୁଃ ଲାଗିନ୍ କୋଷିସ୍ ୟାମ୍, ଚିୟାଃଚି ଇଙ୍ଗ୍ ହେନ୍ତାଃ ଗି ରାବାଙ୍ଗ୍ ସାମାୟ୍ କାଟାବ୍ ଲାଗିନ୍ତେ ମୋନେ କାଦିଙ୍ଗ୍। ଯେନାସ୍ ଆଇନ୍ ଗୁରୁ ହାର୍ ଆପୁଲୋସ୍ କିନ୍‍କେ ବୁଗି ଲେକା ସିଦା ରେ ସେଟେର୍ ତାକିନ୍ ମେ, ହାର୍ ନେଲେମ୍ ଚି ଇନ୍‍କିନ୍ କେ ଜେତ୍ନାଃ ଜିନିଷ୍ ରାଃ ଘାଟି ଆଲୋକା ହୋବାଅଃକା। ଆବୁୱାଃ ହୋଡ଼ୋକୋ ହଗି ଦାର୍‍କାର୍ ଜିନିଷ୍‍କୋକେ ପୁରା ଲାଗିନ୍ତେ ବୁଗିନ୍ କାମି ରେ ତାଇନୋଃ ଶିଖାଅନ୍ କାକୋ ଏନାତେ କାଯୋକାନ୍ ଲେକା କାକୋ ହୋବାଅଃୱା। ଇଙ୍ଗ୍ଆଃ ଲୋଃ ତାଇନ୍ ତାନ୍ ସବେନ୍ ଗାତିକୋ ଆମ୍‍କେ ଜୋହାର୍ ମେତାନାକୋ। ଅକନ୍‍କୋ ବିଶ୍ଵାସ୍ ରାଃ ହୋରାତେ ଆବୁ ଲୋଃ ଦୁଲାଡ଼୍ ମାଣ୍ଡାଅୟାକୋ, ଇନ୍‍କୁକେ ଜୋହାର୍। ଆପେ ସବେନ୍ କୋୱାଃ ଚେତାନ୍ ରେ ଆନୁଗ୍ରାହ୍ ହୋବା ଇଦିଅଃକା। ଇଙ୍ଗ୍ ପାଉଲୁସ୍ ଆଃ ପାଡ଼େତେ ଅକନିଃ ୟୀଶୁ ମାସୀହ୍ ନାଙ୍ଗ୍ ବାନ୍ଦିଅଡ଼୍ଆଃ ରେ ଥୋଲାକାନିଙ୍ଗ୍, ହାର୍ ହାଗା ତିମୁଥିୟୁସ୍ ପାଡ଼େତେ ଆଲିଙ୍ଗ୍ଆଃ ଦୁଲାଡ଼ାନ୍ ଗାତି କାମିତାନ୍ ଫିଲେମୋନ୍ କେ, ହାର୍ ମିଶି ଆଫଫିୟା କେ, ହାର୍ ଆଲେୟାଃ ଗାତି ଲାଡ଼ାଇନିଃ ଆର୍ଖିପ୍ପୁସ୍ କେ ହାର୍ ଫିଲେମୋନ୍ ଆଃ ଅଡ଼୍ଆଃ ରାଃ କାଲିସିୟା ରେନ୍ କୋକେ ଜୋହାର୍: ଆବୁୱାଃ ଆପୁ ପାର୍ମେଶ୍ଵାର୍ ହାର୍ ପ୍ରାଭୁ ୟୀଶୁ ମାସୀହ୍ ପାଡ଼େତେ ଆନୁଗ୍ରାହ୍ ହାର୍ ଜୀଉସୁକୁ ଆପେକେ ନାମୋଃ କାତୋଃଚା। ଇଙ୍ଗ୍ ସବେନ୍ ଇମ୍ତା ପାର୍ମେଶ୍ଵାର୍ ରାଃ ଧାନ୍ୟାବାଦ୍ ରିକାତାନିଙ୍ଗ୍, ହାର୍ ଇଙ୍ଗ୍ଆଃ ବିନ୍ତି କୋରେ ହ ଆମ୍‍କେ ପାହୋମେୟାଇଙ୍ଗ୍, ଚିୟାଃଚି ଇଙ୍ଗ୍ ଆମାଃ ଏନ୍ ଦୁଲାଡ଼୍ ହାର୍ ବିଶ୍ଵାସ୍ ରାଃ ବିଷାୟ୍ ରେ ଆୟୁମ୍ ତାନିଙ୍ଗ୍, ଅକନାଃ ସବେନ୍ ପାବିତାର୍ ହୋଡ଼ୋକୋ ଲୋଃ ହାର୍ ପ୍ରାଭୁ ୟୀଶୁ ଚେତାନ୍ ରେ ମେନାଃ। ଇଙ୍ଗ୍ ବିନ୍ତି ତାନିଙ୍ଗ୍ ଚି ବିଶ୍ଵାସୀ କୋଲୋଃ ବିଶ୍ଵାସ୍ ରେ ଆମାଃ ମିଃତେ ତାଇନ୍, ଆମାଃ ସବେନ୍ ବୁଗିନାଃ ରାଃ ଉରୁମ୍ ରେ, ମାସୀହ୍ ଲାଗିନ୍ ପୋକ୍ତା ଇଦିଅଃମେ। ଚିୟାଃଚି ହେ ହାଗା, ଇଙ୍ଗ୍‍କେ ଆମାଃ ଦୁଲାଡ଼୍ ତେ ଥିମ୍ବା ରାଶିକା ଆଡୋଃ ଜୀଉସୁକୁ ନାମାକାନା, ଏନାମେନ୍ତେ ଚି ଆମାଃ ହୋରାତେ ପାବିତାର୍ ହୋଡ଼ୋକୋୱାଃ ମୋନ୍ ସାହାସ୍ ତେ ଫେରେଃ କାନା। ଏନାମେନ୍ତେ ଇଙ୍ଗ୍‍କେ ମାସୀହ୍ ରେ ମାରାଙ୍ଗ୍ ସାହାସ୍ ତାଇନ୍ ରେ ହଗି, ଅକନ୍ କାଜି ବୁଗିନ୍ ତାନାଃ, ଏନାରାଃ ଆନାଚୁ ଆମ୍‍କେ ଏମେୟାଇଙ୍ଗ୍। ଏଣ୍ଡେ ହ ଇଙ୍ଗ୍ ହାଡ଼ାମ୍ ପାଉଲୁସ୍ କେ ଅକଏ ନାଆ ମାସୀହ୍ ୟୀଶୁ ଲାଗିନ୍ ଥୋଲାକାନ୍ ନିଃ ତାନିଙ୍ଗ୍, ନେୟା ଆଡୋଃଗି ବୁଗିନ୍ ସାରିଜାନା ଚି ଦୁଲାଡ଼୍ ତେ ବିନ୍ତି ୟାଇଙ୍ଗ୍। ଇଙ୍ଗ୍ ଇଙ୍ଗ୍ଆଃ ଆତ୍ମିକ୍ ହୋନ୍ ଉନେସିମୁସ୍ ଲାଗିନ୍, ଅକଏ ଇଙ୍ଗ୍ଆଃ ବାନ୍ଦିଅଡ଼୍ଆଃ ରେ ଥୋଲାକାନ୍ ସାମାୟ୍ ରେ ଜାନାମ୍ କାନାଏ, ଆମ୍‍କେ ଆର୍ଜି ମେତାନିଙ୍ଗ୍। ଇନିଃ ଦୋ ସିଦା ଆମାଃ ଜାହାନ୍ କାମି ରାଃ କାଏ ତାଇକେନାଏ, ମେନ୍ଦୋ ନାଆ ଆମାଃ ଆଡୋଃ ଇଙ୍ଗ୍ଆଃ ବାରାନ୍ କିନାଃ ଲାଗିନ୍ ମାରାଙ୍ଗ୍ କାମି ରାଃ ତାନିଃ। ଇନିଃ କେଗି ମାନେ ଅକନିଃ ଇଙ୍ଗ୍ଆଃ ଥିମ୍ବାଗି ଦୁଲାଡ଼ାନ୍ ତାନିଃ; ଇଙ୍ଗ୍ ଇନିଃକେ ଆମାଃ ତାଃ ରୁଆଡ଼୍ କାଇଜାଇଙ୍ଗ୍। ଇନିଃକେ ଇଙ୍ଗ୍ ଇଙ୍ଗ୍ଆଃ ନାଡ଼େଏ ରେ ଦୋହୋନାଙ୍ଗ୍ ସାନାଙ୍ଗ୍ ତାଇକେନାଇଙ୍ଗ୍ ଚି ଇନିଃ ଆମାଃ ପାଡ଼େତେ ନେ ଥୋଲାକାନ୍ ରେ ଅକନାଃ ସୁସାମାଚାର୍ ଲାଗିନ୍ତେ ହୋବାକାନା, ଇଙ୍ଗ୍ଆଃ ଦେଙ୍ଗା କାଏ। ମେନ୍ଦୋ ଇଙ୍ଗ୍ ଆମାଃ ବେଗାର୍ ସାନାଙ୍ଗ୍ ତେ ଜାହାନାଃ ହ ରିକା କାଇଙ୍ଗ୍ ସାନାଙ୍ଗ୍ କେନା, ଚି ଆମାଃ ନେ ବୁଗିନ୍ କାମି ଦାବାବ୍ ତେ କାହା ମେନ୍ଦୋ ରାଶିକା ତେ ହୋବାଅଃକା। ଚିୟାଃଚି ଇଦୁ ଇନିଃ ଆମାଃ ଲୋଃ ହୁଡିଙ୍ଗ୍ ଦିନ୍ ଲାଗିନ୍ତେ ନେୟା ମେନେଃ ଗେନା କାନାଏ ଚି ସବେନ୍ ହୁଲାଙ୍ଗ୍ ଲାଗିନ୍ ଆମାଃ ନାଡ଼େଏ ରେ ତାହିନାଏ। ମେନ୍ଦୋ ନାଆ ଏତେ ଦାସୀ ଲେକା କାହା ମାଗାର୍ ଦାସୀ ତେ ହଗି ବେଶ୍ ମାନେ ହାଗା ଲେକା ତାହିନ୍ ଚାଏ, ଅକନିଃ ଇଙ୍ଗ୍ଆଃ ଦୋ ଖାସ୍ ଦୁଲାଡ଼ାନ୍ ତାନିଃ ଗି, ମେନ୍ଦୋ ନାଆ ହୋଡ଼ମୋ ରେ ହଗି ଆଡୋଃ ପ୍ରାଭୁ ରେ ହଗି, ଆମାଃ ହଗି ଖାସ୍ ଦୁଲାଡ଼ାନ୍ ବାଇୟୋଃ କାଏ। ଏନାତେ ଆଗାର୍ ଆମ୍ ଇଙ୍ଗ୍‍କେ ଆମାଃ ଲୋଃ ମେଶାକାନିଙ୍ଗ୍ ମେନ୍ତେ ବୁଝାଅଃ ତାନ୍ ରେଦୋ, ଇନିଃକେ ନେଲେକା ଗ୍ରାହାନ୍ ଇମେ ଜେଲେକା ଇଙ୍ଗ୍‍କେ। ଆଗାର୍ ଇନିଃ ଆମାଃ ଜାହାନାଃ ହାନି ରିକା କାଦାଏ ରେଦୋ, ଚାହେ ଇନିଃ ଆମାଃ ତେ ଜାହାନାଃ ରିଣୀ ଇଦିକାଃ ରେଦୋ, ଏଣ୍ଡେ ଇଙ୍ଗ୍ଆଃ ନୁତୁମ୍ ରେ ଅଲ୍ କେମେ। ଇଙ୍ଗ୍ ପାଉଲୁସ୍ ଇଙ୍ଗ୍ଆଃ ତିଈ ତେ ଅଲ୍ ତାନିଙ୍ଗ୍ ଚି ଇଙ୍ଗ୍ ଫେରେଃ ହାଲେୟାଇଙ୍ଗ୍; ଆଡୋଃ ନେୟାତେ ଜାହାନାଃ ହ କାଜି ରାଃ ଦାର୍‍କାର୍ ବାନୋଗା, ଚି ଇଙ୍ଗ୍ଆଃ ରିଣୀ ଅକନାଃ ଆମାଃ ତାଃ ରେ ମେନାଃ ଏନାଦୋ ଆମ୍ ଗି ତାନ୍‍ମେ। ହେ ଦୁଲାଡ଼୍ ହାଗା, ନେ ରାଶିକା ଇଙ୍ଗ୍‍କେ ପ୍ରାଭୁ ରେ ଆମ୍ ପାଡ଼େତେ ନାମୋଃଚା। ମାସୀହ୍ ରେ ଇଙ୍ଗ୍ଆଃ ଜୀଉ କେ ସାହାସ୍ ତେ ଫେରେଃ ତାମେ। ଇଙ୍ଗ୍ ଆମାଃ ଆନାଚୁ ମାନାତିଙ୍ଗ୍ କେ ନେଲ୍ କେତେ ଭାରୋସା ତାନ୍ ଲୋଃ ଆମ୍‍କେ ଅଲ୍ ମେତାନିଙ୍ଗ୍, ହାର୍ ନେୟା ସାରିତାନିଙ୍ଗ୍ ଚି ଅକନାଃ ଇଙ୍ଗ୍ କାଜି ତାନିଙ୍ଗ୍, ଆମ୍ ଏନାତେୟଗି ବାଢ଼ାଅ କେତେ ରିକାୟାମ୍। ଆଡୋଃ ନେୟା ହ ଚି ଇଙ୍ଗ୍ଆଃ ଲାଗିନ୍ ତାହିନୋଃ ଲାଗିନ୍ ଜାଗା ବାଇ ଦହକାମେ। ଇଙ୍ଗ୍‍କେ ଆଶ୍ରା ମେନାଃ ଚି ଆପେୟାଃ ବିନ୍ତି ରାଃ ହୋରାତେ ଇଙ୍ଗ୍ ଆପେକେ ଏମ୍ କେନୋଗାଇଙ୍ଗ୍। ଇପଫ୍ରାସ୍, ଅକନିଃ ମାସୀହ୍ ୟୀଶୁ ରେ ଇଙ୍ଗ୍ଆଃ ଲୋଃ ଥୋଲାକାନ୍ ମେନିଜା, ହାର୍ ମାର୍କୁସ୍ ହାର୍ ଆରିସ୍ଥାର୍ଖୁସ୍ ହାର୍ ଦେମାସ୍ ହାର୍ ଲୁକା ଅକଏ ଇଙ୍ଗ୍ଆଃ ଗାତିକାମିନିଃ ତାନିଃ, ନିକୁୱାଃ ଆମ୍‍କେ ଜୋହାର୍। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଆନୁଗ୍ରାହ୍ ଆପେୟାଃ ଆତ୍ମା ଲୋଃ ହୋବାକାତୋଃଚା। ଆମୀନ୍। ସିଦା ସାମାୟ୍ ରେ ପାର୍ମେଶ୍ଵାର୍ ଆପୁ-ତାତା କୋକେ କାଟିଃ-କାଟିଃ କେତେ ହାର୍ ରାକାମ୍ ଲେକାତେ ନାବୀ କୋୱାଃ ହୋରାତେ ବାକାଣ୍ କେଦାଏ। ମେନ୍ଦୋ ନାଆ ନେ ଟୁଣ୍ଡୁ ହୁଲାଙ୍ଗ୍ କୋରେ ଆବୁ ଲୋଃ ଆଜାଃ ହୋନ୍‍କଡ଼ା ରାଃ ହୋରାତେ ବାକାଣ୍ କେଦାଏ, ଅକନିଃକେ ଇନିଃ ସବେନ୍ ଜିନିଷ୍ କୋରାଃ ଆଧିକାରୀ ବାଇକିଜାଏ ହାର୍ ଇନିଜାଃ ହୋରାତେଗି ଆଏଃ ସବେନ୍ ଅତେଦିଶୁମ୍ କେ ବାଇକାଦାଏ। ହୋନ୍‍କଡ଼ା ଗି ଇନିଜାଃ ମାନାରାଙ୍ଗ୍ ରାଃ ଯୁନୁଲ୍ ହାର୍ ସବେନ୍ ଲେକାତେ ପାର୍ମେଶ୍ଵାର୍ ଲେକାଗିୟାଃଏ, ହାର୍ ସବେନ୍ ଜିନିଷ୍‍କୋକେ ଆପାନାଃ ପେଡ଼େଏ ରେୟାଃ ବାଚାନ୍ ତେ ସାମ୍ଭ୍ଡ଼ାଅ ତାନାଏ। ଇନିଃ ପାପ୍ କୋକେ ଚାପିକେତେ ଚେତାନ୍ ଜାଗା ରେ ସବେନ୍ଏତେ ପେଡ଼େଜାନ୍ ଗାଃ ଜୋମ୍ ପାଡ଼୍ ରେ ଦୁବ୍ ଜାନାଏ। ଆଡୋଃ ସିର୍ମାଦାସୀ କୋଏତେ ଥିମ୍ବାଗି ବୁଗିନ୍ ହୋବାଜାନାଏ, ଚିମିନ୍ ଚି ଇନିଃ ସିର୍ମାଦାସୀ କୋଏତେ ମାରାଙ୍ଗ୍ ପାଦ୍ ରାଃ ଆଧିକାରୀ ହୋବାକେତେ ବୁଗିନ୍ ନୁତୁମ୍ ନାମ୍ କେଦାଏ। ଚିୟାଃଚି ସିର୍ମାଦାସୀ କୋଏତେ ପାର୍ମେଶ୍ଵାର୍ ଚିଉଲା ଅକଏକେ କାଜିକେଦାଏ, “ଆମ୍ ଇଙ୍ଗ୍ଆଃ ହୋନ୍‍କଡ଼ା ତାନ୍‍ମେ, ଇସିଙ୍ଗ୍ ଆମ୍ ଇଙ୍ଗ୍ ତେ ସିର୍ଜାଅ ଜାନାମ୍?” ଆଡୋଃଗି ଇନିଃ ନେୟା ଜେତାନ୍ ସିର୍ମାଦାସୀ କେ ଚିଉଲାଅ କାଏ କାଜି, “ଇଙ୍ଗ୍ ଇନିଜାଃ ଆପୁ ହୋବାଅଃୱାଇଙ୍ଗ୍, ହାର୍ ଇନିଃ ଇଙ୍ଗ୍ଆଃ ହୋନ୍‍କଡ଼ା ହୋବାଅଃୱାଏ?” ଆଡୋଃ ଅକୋଇମ୍ତାଙ୍ଗ୍ ପାହିଲା ହୋନ୍ କେ ଅତେଦିଶୁମ୍ ରେ ଆଡୋଃଗି ଆଉୱେୟାଏ, ଦୋ କାଜିୟାଏ, “ପାର୍ମେଶ୍ଵାର୍ ରାଃ ସବେନ୍ ସିର୍ମାଦାସୀକୋ ଇନିଃକେ ଜୋହାର୍ କାକୋ।” ଆଡୋଃ ସିର୍ମାଦାସୀ କୋୱାଃ ବିଷାୟ୍ ରେ ନେୟା କାଜିୟାଏ, “ଇନିଃ ଆଜାଃ ସିର୍ମାଦାସୀ କୋକେ ହୋୟୋ, ଆଡୋଃ ଆଜାଃ ଦାସୀକୋକେ ଜୁଲୋଃତାନ୍ ସେଙ୍ଗେଲ୍ ବାଇକୋୱାଏ।” ମେନ୍ଦୋ ହୋନ୍‍କଡ଼ା ବିଷାୟ୍ ରେ କାଜିୟାଏ, “ହେ ପାର୍ମେଶ୍ଵାର୍, ଆମାଃ ସିଂହାସାନ୍ ଜାନାଓ-ଜାନାଓ ତାଇନା: ଆମାଃ ରାଇଜ୍ ରାଃ ରାଜ୍ ଦାଣ୍ଡ୍ ନ୍ୟାୟ ରାଃ ରାଜ୍ ଦାଣ୍ଡ୍ ତାନାଃ। ଆମ୍ ଧାରାମ୍ ଲୋଃ ଦୁଲାଡ଼୍ ଆଡୋଃ ଆଧାର୍ମ୍ ଲୋଃ ଖିସ୍ ମାଣ୍ଡାଅ କେଦାମ୍, ନେୟାମେନ୍ତେ ପାର୍ମେଶ୍ଵାର୍, ଆମାଃ ପାର୍ମେଶ୍ଵାର୍, ଆମାଃ ଗାତି କୋଏତେ ଥିମ୍ବା ରାଶିକାନ୍ ରାଃ ସୁନୁମ୍ ତେ ଆମ୍ କେ ଆଭିଷେକ୍ କେଦାଏ।” ହାର୍ ନେୟା ଚି, “ହେ ପ୍ରାଭୁ, ମୁନୁ ରେ ଆମ୍ ଅତେଦିଶୁମ୍ ରାଃ ନାହି ମାଣ୍ଡାଅ କେଦାମ୍, ଆଡୋଃ ସିର୍ମାଦିଶୁମ୍ ଆମାଃ ତିଈ ରେୟାଃ ବାଇୟାକାନ୍ ତାନାଃ। ଏନାକୋ ଦୋ ନାଷ୍ଟ୍ କେନୋଗାକୋ, ମେନ୍ଦୋ ଆମ୍ ବାଇ ତାଇନୋଗାମ୍; ଆଡୋଃ ନେୟାକୋ ଲିଜାଃ ଲେକା ମାରି କେନୋଗା। ଆଡୋଃ ଆମ୍ ଏନାକୋକେ ଚାଦାର୍ ଲେକା ଲାଟୁମେୟାମ୍, ଆଡୋଃ ଏନାକୋ ଲିଜାଃ ଲେକା ବାଦ୍‍ଲାଅଃୱା: ମେନ୍ଦୋ ଆମ୍ ଇନିଃଗି ତାଇନାମ୍ ଆଡୋଃ ଆମାଃ ଶିର୍ମା କୋରାଃ ଟୁଣ୍ଡୁ କାହୋବାଅଃୱା।” ଆଡୋଃ ସିର୍ମାଦାସୀ କୋଏତେ ଇନିଃ ଅକଏକେ ଚିମ୍ତାଙ୍ଗ୍ କାଜିକେଦାଏ, “ଆମ୍ ଇଙ୍ଗ୍ଆଃ ଜୋମ୍ ପାଡ଼୍ ରେ ଦୁବ୍ ମେ, ଚିମିନ୍ ସାନ୍ତେ ଚି ଇଙ୍ଗ୍ ଆମାଃ ବାଇରୀ କୋକେ ଆମାଃ କାଟା ଲାଥାର୍ ରାଃ ଗାଣ୍ଡୁ କାଇଙ୍ଗ୍ ବାଇକୋୱା?” ଚିନାଃ ଇନ୍‍କୁ ସବେନ୍ ପାର୍ମେଶ୍ଵାର୍ ରାଃ ସେୱା-ସୁସାର୍ ରିକାତାନ୍ ଆତ୍ମାକୋ ନାହାଲାକୋ, ଅକନ୍‍କୋ ବାଞ୍ଚାଅ ନାମେ ତାନ୍‍କୋ ନାଙ୍ଗ୍ ସେୱା ରିକାଏ ଲାଗିନ୍ତେ କୁଲୋଃ ୱାକୋ? ଏନାମେନ୍ତେ ହୋବାଅଃ ଚାହି ଚି ଆବୁ ଏନ୍ କାଜି କୋରାଃ ଅକନାଃ ଆବୁ ଆୟୁମ୍ କାଦାବୁ, ଆଡୋଃଗି ମୋନ୍ ଲାଗାଅୟାବୁ, ନେଲେକା ଆଲୋ ହୋବାଅଃକା ଚି ଗେନା କେତେ ଏନାତେ ସାଙ୍ଗିନ୍ ସେନୋଃ କୋୱାବୁ। ଚିୟାଃଚି ପାର୍ମେଶ୍ଵାର୍ ରାଃ ବାଚାନ୍ ଅକନାଃ ସିର୍ମାଦାସୀ କୋଏତେ କାଜିଲେନ୍ ତାଇକେନା ଚିମ୍ତାଙ୍ଗ୍ ଏନା ବାଇକେତେ ତାଇଜାନା ଆଡୋଃ ସବେନ୍ ଆପ୍ରାଧ୍ ଆଡୋଃ ଆନାଚୁ କାମାନାତିଙ୍ଗ୍ କୋକେ ଠିକ୍-ଠିକ୍ ପାର୍ମେଶ୍ଵାର୍ ଦାଣ୍ଡ୍ ଏମାଃକୋୱାଏ। ଏଣ୍ଡେ ଆବୁ ନେଲେକାନ୍ ମାରାଙ୍ଗ୍ ବାଞ୍ଚାଅ ନାମେ ତେୟାଃ ଏତେ ବେଫିକିର୍ ତାଇଲେରେ ଚିଲ୍‍କା ବାଚାଅଃୱାବୁ? ଅକନାଃ ବିଷାୟ୍ ରେ ସିଦା-ସିଦା ପ୍ରାଭୁ ଏତେ କାଜିଜାନା, ଆଡୋଃ ଆୟୁମ୍ କେଃ ହୋଡ଼ୋକୋୱାଃ ହୋରାତେ ଆବୁକେ ଏନା ସାର୍ତି ମେନ୍ତେ ଉଦୁବ୍ ଜାନା। ଆଡୋଃ ଏନାଲୋଃ ପାର୍ମେଶ୍ଵାର୍ ହ ଆଜାଃ ସାନାଙ୍ଗ୍ ଲେକାତେ ଚିହ୍ନାକୋ, ଆଡୋଃ ଆକ୍‍ଦାନ୍ଦା କାମିକୋ, ଆଡୋଃ ସବେନ୍ ଲେକାନାଃ ପେଡ଼େଏ ରାଃ କାମିକୋ, ଆଡୋଃ ପାବିତାର୍ ଆତ୍ମା ରାଃ ବାର୍ଦାନ୍ କୋକେ ହାଟିଙ୍ଗ୍ ରାଃ ହୋରାତେ ଏନାରାଃ ଗୋୱା ଏମ୍ ତାନ୍ ଗିୟାଏ। ପାର୍ମେଶ୍ଵାର୍ ଏନ୍ ହିଜୁଃତାନ୍ ଅତେଦିଶୁମ୍ କେ ଅକନାଃ ବିଷାୟ୍ ରେ ଆବୁ ବାକାଣ୍ ତାନାବୁ, ସିର୍ମାଦାସୀ କୋୱାଃ ଆଧିନ୍ ରେ କାଏ ମାଣ୍ଡାଅ କେଦାଏ। ମେନ୍ଦୋ ଜାହାଁଏ ଜାହାଁତାଃ ନେୟା ଗୋୱା ଏମ୍ କାଦାଏ, “ହୋଡ଼ ଚିନାଃ ତାନିଃ ଚି ଆମ୍ ଇନିଜାଃ ମୋନେ ରିକାୟାମ୍? ୟାଦୋ ହୋଡ଼ ରାଃ ହୋନ୍ ଚିନିଃ ତାନିଃ ଚି ଆମ୍ ଇନିଜାଃ ଚିନ୍ତା ରିକାୟାମ୍? ଆମ୍ ଇନିଃକେ ସିର୍ମାଦାସୀ ଏତେ କାଟିଃ ହୁଡିଙ୍ଗ୍ ବାଇକାଇଜାମ୍; ଆମ୍ ଇନିଃ ରେ ମାନାରାଙ୍ଗ୍ ହାର୍ ମାଇନ୍ ରାଃ ମୁକୁଟ୍ ଦୋହୋକେଦାମ୍, ହାର୍ ଇନିଃକେ ଆମାଃ ତିଈ ରାଃ କାମି ଚେତାନ୍ ରେ ଆଧିକାର୍ ଏମ୍ କିଜାମ୍। ଆମ୍ ସବେନାଃ ଇନିଜାଃ କାଟା ଲାଥାର୍ କେଦାମ୍।” ଏନାମେନ୍ତେ ଚିମ୍ତାଙ୍ଗ୍ ପାର୍ମେଶ୍ଵାର୍ ସବେନାଃ ହୋଡ଼ ରାଃ ଆଧିନ୍ ରେ ରିକାତାଦାଏ, ଏଣ୍ଡେ ପାର୍ମେଶ୍ଵାର୍ ଇନିଜାଃ ଆଧିନ୍ ରେ ଅକନାଃକୋ କାତାଇନା ମେନ୍ତେ ଜେତ୍ନାଃ କାଏ ବାଗି। ମେନ୍ଦୋ ଆବୁ ନାଆ ସାନ୍ ସବେନାଃ ଇନିଜାଃ ଆଧିନ୍ ରେ କାବୁ ନେଲ୍ ତାନା। ମେନ୍ଦୋ ଆବୁ ୟୀଶୁ କେ ଅକଏ ସିର୍ମାଦାସୀ ଏତେ କାଟିଃଗି ହୁଡିଙ୍ଗ୍ ବାଇଲେନାଏ, ଗୋନୋଏଃ ରାଃ ଦୁକୁ ସାହାଅ କେଦାଏ ମେନ୍ତେ ମାନାରାଙ୍ଗ୍ ହାର୍ ମାଇନ୍ ରାଃ ମୁକୁଟ୍ ତୁସିଙ୍ଗ୍ କାନ୍ ନେଲିତାନାବୁ, ଏନାତେ ପାର୍ମେଶ୍ଵାର୍ ରାଃ ଆନୁଗ୍ରାହ୍ ହୋରାତେ ଇନିଃ ସବେନ୍ ହୋଡ଼ୋକୋ ଲାଗିନ୍ତେ ଗୋନୋଏଃ ରାଃ ଶିବିଲ୍ ଚାଖାୟାଏ। ଚିୟାଃଚି ଅକେୟାଃ ଲାଗିନ୍ ସବେନାଃ ତାନାଃ, ଆଡୋଃ ଅକେୟାଃ ହୋରାତେ ସବେନାଃ ତାନାଃ, ଏନ୍ ପାର୍ମେଶ୍ଵାର୍ କେ ନେୟା ବେଶ୍ ଆଦା କିଜା ଚି ଇନିଃ ଆଜାଃ ଥିମ୍ବାଗି ହୋନ୍ କୋକେ ମାନାରାଙ୍ଗ୍ ରେ ସେଟେର୍ କୋୱାଏ, ଏଣ୍ଡେ ଇନ୍‍କୁୱାଃ ବାଞ୍ଚାଅ ଏମେନିଃ କେ ଦୁକୁ ସାହାଅ ରାଃ ହୋରାତେ ପୋକ୍ତା ରିକାୟାଏ। ଚିୟାଃଚି ପାବିତାର୍ ରିକାନିଃ ଆଡୋଃ ପାବିତାର୍ ହୋବାଅଃତାନ୍ କୋ, ସବେନ୍ ମିୟାଃଗି ଆପୁ ଏତେ ତାନ୍‍କୋ, ଏନାମେନ୍ତେ ୟୀଶୁ ଇନ୍‍କୁକେ ହାଗା କାଜି ନାଙ୍ଗ୍ କାଏ ଗିୟୁଗୋଃୱାଏ। ମାସୀହ୍ କାଜିୟାଏ, “ଇଙ୍ଗ୍ ଆମାଃ ନୁତୁମ୍ ଇଙ୍ଗ୍ଆଃ ହାଗାକୋକେ ଉଦୁବାକୋୱାଇଙ୍ଗ୍; ଦୁନୁବ୍ ରାଃ ଥାଲା ରେ ଇଙ୍ଗ୍ ଆମାଃ ମାନାରାଙ୍ଗ୍ ଦୁରାଙ୍ଗ୍ ୟାଇଙ୍ଗ୍।” ଆଡୋଃଗି ନେୟା କାଜିୟାଏ, “ଇଙ୍ଗ୍ ଇନିଜାଃ ରେ ଭାରୋସା ଦୋହୋୟାଇଙ୍ଗ୍।” ଆଡୋଃଗି ନେୟା, “ନେଲେମେ, ଇଙ୍ଗ୍ ଏନ୍ ହୋନ୍ କୋଲୋଃ ଅକନ୍ କୋକେ ପାର୍ମେଶ୍ଵାର୍ ଇଙ୍ଗ୍‍କେ ଏମାକାଃକୋୱାଏ।” ଏନାମେନ୍ତେ ଚିମ୍ତାଙ୍ଗ୍ ପାର୍ମେଶ୍ଵାର୍ ରାଃ ହୋନ୍ କୋ ମାସ୍ ହାର୍ ମାୟୋମ୍ ରାଃ ହୋଡ଼ମୋ ହୋବାକାନାକୋ, ଦୋ ଇନିଜୋଗି ଇନ୍‍କୁୱାଃ ଲେକା ହୋଡ଼ ହୋବାଜାନାଏ, ଏନାତେ ଗୋନୋଏଃ ରାଃ ହୋରାତେ ଇନିଃକେ ଅକନିଃକେ ଗୋନୋଏଃ ରେ ପେଡ଼େଏ ନାମ୍ ଲେନା, ମାନେ ଶାଏତାନ୍ କେ ନାଶ୍ ରିକାୟିୟାଏ, ହାର୍ ଚିମିନାଙ୍ଗ୍ କୋ ଗୋନୋଏଃ ରାଃ ବୋରୋ ରେ ଜୀନିଃ ଭାଇର୍ ଦାସୀକାନ୍ ରେ ଫାନ୍ଦେ ଲେନାକୋ, ଇନ୍‍କୁକେ ଛୋଡ଼ାଓ କୋୱାଏ। ଚିୟାଃଚି ପ୍ରାଭୁ ୟୀଶୁ ଦୋ ସିର୍ମାଦାସୀ କୋକେ କାହା ମେନ୍ଦୋ ଆବ୍ରାହାମ୍ ରାଃ ବାଂଶ୍ କୋକେ ଦେଙ୍ଗା କୋତାନାଏ। ଏନାମେନ୍ତେ ଇନିଃକେ ହୋବାତାଇକେନା, ଚି ସବେନ୍ କାଜି କୋରେ ଆୟାଃ ହାଗାକୋ ଲେକା ବାଇୟୋଗାଏ; ଏନାତେ ଇନିଃ ଏନ୍ କାଜି କୋରେ ଅକନାଃ ପାର୍ମେଶ୍ଵାର୍ ଲୋଃ ସାମ୍ବାଦ୍ଧ୍ ମାଣ୍ଡାଅୟାଏ, ମିୟାଃ ଦାୟାଲୁ ହାର୍ ବିଶ୍ୱାସେ ଲେକାନିଃ ମାରାଙ୍ଗ୍ ୟାଜାକ୍ ବାଇୟୋଃୱାଏ ଏନାତେ ହୋଡ଼ୋକୋୱାଃ ପାପ୍‍କୋ ଲାଗିନ୍ ପାପ୍ କୋରାଃ ହାଲ୍ ଫେରେଃ ନିଃ ହୋବାଅଃୱାଏ। ଚିୟାଃଚି ଚିମ୍ତାଙ୍ଗ୍ ୟୀଶୁ ପାରୀକ୍ଷା ଇମ୍ତା ଦୁକୁ ସାହାଅ କେଦାଏ, ଦୋ ଇନିଃ ଇନ୍‍କୁୱାଃ ହ ଦେଙ୍ଗା ରିକା ଧାଡ଼ିୟାଏ ଅକେୟାଃ ପାରୀକ୍ଷା ହୋବାଅଃତାନା। ଏନାମେନ୍ତେ ହେ ପାବିତାର୍ ହାଗାକୋ, ଆପେ ଅକନ୍‍କୋ ସିର୍ମାଦିଶୁମ୍ କେଡ଼ା ତେୟାଃ ରେ ମେଶା କାନାପେ, ଆପେ ଏନ୍ କୁଲାକାନ୍ ନିଃ ଆଡୋଃ ମାରାଙ୍ଗ୍ ୟାଜାକ୍ ୟୀଶୁ ରେ ଅକନିଃକେ ଆବୁ ଗ୍ରାହାନ୍ ତାନାବୁ ଧେୟାନିପେ। ୟୀଶୁ ପାର୍ମେଶ୍ଵାର୍ ରାଃ ନେପେଲ୍ ରେ ବିଶ୍ଵାସେ ଲେକାନିଃ ବାଇଜାନାଏ ଅକନିଃ ଆଏଃକେ କାମି ଏମ୍ ଲିଜାଏ, ଜେଲେକା ମୁଶା ନାବୀ ହଗି ପାର୍ମେଶ୍ଵାର୍ ରାଃ ହୋଡ଼ୋକୋୱାଃ ସବେନ୍ ଅଡ଼୍ଆଃ ରେ ବିଶ୍ଵାସେ ଲେକାନିଃ ତାଇକେନାଏ। ଚିୟାଃଚି ୟୀଶୁ ମୁଶା ନାବୀ ଏତେ ଇମିନ୍ ଗି ଥିମ୍ବା ମାନାରାଙ୍ଗ୍ ନାମ୍ କେଦାଏ, ଚିମିନ୍ ଚି ମିହୋଡ଼୍ ଅଡ଼୍ଆଃ ବାବାଇନିଃ ଅଡ଼୍ଆଃ ତେହଗି ଥିମ୍ବା ମାଇନ୍ ନାମେୟାଏ। ଚିୟାଃଚି ସବେନ୍ ଅଡ଼୍ଆଃ ରାଃ ବାବାଇନିଃ ଜାହାଁଏ ମିହୋଡ଼୍ ତାଇନାଏ, ମେନ୍ଦୋ ଅକଏ ସବେନାଃ କେ ବାଇକାଦାଏ ଇନିଃ ପାର୍ମେଶ୍ଵାର୍ ତାନିଃ। ମୁଶା ନାବୀ ଦୋ ପାର୍ମେଶ୍ଵାର୍ ରାଃ ହୋଡ଼ୋକୋୱାଃ ସବେନ୍ ଅଡ଼୍ଆଃ ରେ ଦାସୀ ଲେକା ବିଶ୍ଵାସେ ଲେକାନିଃ ତାଇଲେନାଏ ଏନାତେ ଅକନ୍ କାଜିକୋ ଆୟୁର୍ତେ କାଜିୟୋଃ ରାଃ ତାଇକେନା ଏନାରାଃ ଗୋୱା ଏମେକାଏ। ମେନ୍ଦୋ ମାସୀହ୍ ହୋନ୍‍କଡ଼ା ଲେକା ବିଶ୍ଵାସେ ଲେକାନିଃ ପାର୍ମେଶ୍ଵାର୍ ରାଃ ଅଡ଼୍ଆଃ ରେୟାଃ ଆଧିକାରୀ ତାନିଃ; ଆଡୋଃ ଆଜାଃ ଅଡ଼୍ଆଃ ରେନ୍ କୋ ଆବୁ ତାନ୍‍ବୁ, ଆଗାର୍ ଆବୁ ସାହାସ୍ ରିକାଏରେ ହାର୍ ଆବୁୱାଃ ଆଶ୍ରା ରାଃ ଘାମାଣ୍ଡ୍ ରେ ଟୁଣ୍ଡୁ ସାନ୍ତେ କେଟେଃ ତେ ବାଇକାନ୍ ତାଇନ୍ ତାନାବୁ। ଏନାତେ ଚିଲ୍‍କା ପାବିତାର୍ ଆତ୍ମା କାଜିୟାଏ, “ଆଗାର୍ ଇସିଙ୍ଗ୍ ଆପେ ଇନିଜାଃ କେଡ଼ା ଆୟୁମ୍ ତାନାପେ ରେଦୋ, ଆପାନାଃ ମୋନ୍ କେ ଆଲୋ କେଟେଜେପେ, ଜେଲେକା ଖିସ୍ ଏମ୍ ତାନ୍ ଇମ୍ତା ହାର୍ ପାରୀକ୍ଷା ରାଃ ହୁଲାଙ୍ଗ୍ କୋରେ ସୁନ୍‍ସାନ୍ ଜାଗା ରେ ରିକା ଲେଦାପେ। ଅକତାଃରେ ଆପେୟାଃ ଆପୁ-ତାତାକୋ ଇଙ୍ଗ୍‍କେ ଆଟ୍‍କାର୍ ଉରୁମ୍ କେତେ ସାରିକେଦିଙ୍ଗ୍ଆକୋ ହାର୍ ବାର୍ ହିଶି ଶିର୍ମା ସାନ୍ତେ ଇଙ୍ଗ୍ଆଃ କାମି ନେଲ୍ କେଦାକୋ। ଏନାଲାଗିନ୍ ଇଙ୍ଗ୍ ଏନ୍ ସାମାୟ୍ ରେନ୍ ହୋଡ଼ୋକୋଲୋଃ ଖିସ୍ ତାଇନ୍ କେନିଙ୍ଗ୍, ଆଡୋଃ କାଜିକେଦିଙ୍ଗ୍, ‘ନିକୁୱାଃ ମୋନ୍ ସବେନ୍ ଇମ୍ତାଙ୍ଗ୍ ଆଦୋଃୱା, ହାର୍ ନିକୁ ଇଙ୍ଗ୍ଆଃ ହୋରା କୋକେ କାକୋ ନେଲ୍ଉରୁମ୍ କେଦା।’ ଏନ୍ତେ ଇଙ୍ଗ୍ ଇମ୍ତାଙ୍ଗ୍ ଖିସ୍ କେତେ କିରିୟା ଜୋମ୍ କେଦିଙ୍ଗ୍, ‘ଇନ୍‍କୁ ଇଙ୍ଗ୍ଆଃ ସାଥାୱନ୍ ଜାଗା ରେ କାକୋ ବୋଲୋ ଧାଡ଼ିୟା।’ ” ହେ ହାଗାକୋ, ହୁସିଆର୍ ତାଇନ୍‍ପେ ଚି ଆପେ ରେ ନେକାନ୍ ଖାରାପ୍ ହାର୍ ଆବିଶ୍ଵାସୀ ମୋନ୍ ଆଲୋ ହୋବାଅଃକା, ଅକନାଃ ଆପେକେ ଜୀହିଃ ପାର୍ମେଶ୍ଵାର୍ ଏତେ ସାଙ୍ଗିନ୍ କେପେୟାଏ। ମେନ୍ଦୋ ଅକହୁଲାଙ୍ଗ୍ ସାନ୍ତେ ଇସିଙ୍ଗ୍ ରାଃ ହୁଲାଙ୍ଗ୍ ମେନ୍ତେ କାଜିୟୋଃତାନା, ସବେନ୍ ହୁଲାଙ୍ଗ୍ ମିହୋଡ଼୍ ଏଟାଃ ନିଃକେ ବୁଝାଅ କାତେପେ, ନେକା ଆଲୋକା ହୋବାଅଃକା ଚି ଆପେ କୋଏତେ ଜାହାନ୍ ହୋଡ଼ ପାପ୍ ରାଃ ହିହିଡ଼୍ ରେ ହୋବାକେତେ କାଠୋର୍ ହୋବା କେନୋଗାଏ। ଚିୟାଃଚି ଆବୁ ମାସୀହ୍ ରାଃ ହାନାଟିଙ୍ଗ୍ ହୋବାକାନାବୁ, ଆଗାର୍ ଆବୁ ଆବୁୱାଃ ସିଦା ରାଃ ଭାରୋସା ରେ ଟୁଣ୍ଡୁ ସାନ୍ତେ କେଟେଃ ତେ ବାଇକେତେ ତାଇନୋଃତାନାବୁ। ଜେଲେକା ପାବିତାର୍ ପୁଥି ରେ କାଜିୟୋଃତାନା, “ଆଗାର୍ ଇସିଙ୍ଗ୍ ଆପେ ଇନିଜାଃ କେଡ଼ା ଆୟୁମ୍ ୟାପେ, ଦୋ ଆପାନାଃ ମୋନ୍ କେ ଆଲୋପେ କେଟେଜେୟା, ଜେଲେକା ଚି ଖିସ୍ ରିକା ଇମ୍ତାଙ୍ଗ୍ ରିକାଲେଦାପେ।” ମାର୍ ନେଲେପେତୋ ଅକନ୍ ହୋଡ଼ୋକୋ ପାର୍ମେଶ୍ଵାର୍ ରାଃ କେଡ଼ା ଆୟୁମ୍‍କେତେ ହଗି ଖିସ୍ ରିକା କେଦାକୋ? ଚିନାଃ ଏନ୍ ସବେନ୍ କୋ କାହା ଅକନ୍‍କୋ ମୁଶା ନାବୀ ଲୋଃ ମିଶାର୍ ଦିଶୁମ୍ ଏତେ ଅଡୋଙ୍ଗ୍ ଲେନାକୋ? ଆଡୋଃ ପାର୍ମେଶ୍ଵାର୍ ଚାଲିଶ୍ ବାରାଶ୍ ସାନ୍ ଅକନ୍ ହୋଡ଼ୋ କୋଏତେ ଖିସ୍ ତାଇନ୍ କେନାଏ? ଚିନାଃ ଇନ୍‍କୁ ଏତେ କାହା ଅକନ୍‍କୋ ଚି ପାପ୍ କେଦାକୋ, ହାର୍ ଇନ୍‍କୁୱାଃ ମାଣାକୋ ସୁନ୍‍ସାନ୍ ଜାଗା ରେ ଉୟୁଗାକାନ୍ ତାଇଲେନା? ଆଡୋଃ ପାର୍ମେଶ୍ଵାର୍ ଅକନ୍ ହୋଡ଼ୋକୋ ନାଙ୍ଗ୍ କିରିୟା ଜୋମ୍ କେଦାଏ ଚି ଆପେ ଇଙ୍ଗ୍ଆଃ ସାଥାୱନ୍ ଜାଗା ରେ ବୋଲୋ କାପେ ଧାଡ଼ିୟା? ଚିନାଃ ଏସ୍କାର୍ ଇନ୍‍କୁ ଲାଗିନ୍ତେ କାହା ଅକନ୍ କୋଚି ଆନାଚୁ କାକୋ ମାନାତିଙ୍ଗ୍ କେଦା? ଆବୁ ନେଲେକାତେ ସାରିତାନାବୁ ଚି ଇନ୍‍କୁ କାକୋ ବିଶ୍ଵାସ୍ ରାଃ ହୋରାତେ ବୋଲୋ କାକୋ ଧାଡ଼ିଜାନା। ଏନାମେନ୍ତେ ଚିମ୍ତାଙ୍ଗ୍ ଚି ପାର୍ମେଶ୍ଵାର୍ ରାଃ ସାଥାୱନ୍ ଜାଗା ରେ ବୋଲୋ ରେୟାଃ କିରିୟା ନାଆ ସାନ୍ତେ ମେନାଃ, ଦୋ ଆବୁକେ ବୋରୋ ଚାହି; ନେକା ଆଲୋ ହୋବାଅଃକା ଚି ଆପେ କୋଏତେ ଜେତାଏ ଏନାତେ ବାଗି କେନୋଗାଏ। ଚିୟାଃଚି ଆବୁକେ ଇନ୍‍କୁୱାଃ ଲେକାଗି ସୁସାମାଚାର୍ ଉଦୁବାକାନା, ମେନ୍ଦୋ ଆୟୁମ୍ କାନ୍ ବାଚାନ୍ ତେ ଇନ୍‍କୁକେ ଜେତ୍ନାଃ ହ ଲାଭ କାହୋବାଜାନା, ଚିୟାଃଚି ଆୟୁମ୍ ତାନ୍ କୋୱାଃ ମୋନ୍ ରେ ବିଶ୍ଵାସ୍ ଲୋଃ କାଦୁବ୍ ଜାନା। ମେନ୍ଦୋ ଆବୁ ଅକନ୍ କୋ ବିଶ୍ଵାସ୍ କେଦାବୁ; ଏନ୍ ସାଥାୱନ୍ ଜାଗା ରେ ବୋଲୋଃତାନାବୁ, ଜେଲେକା ପାର୍ମେଶ୍ଵାର୍ କାଜିକେଦାଏ, “ଇଙ୍ଗ୍ ଆପାନାଃ ଖିସ୍ କାନ୍ ଇମ୍ତା ରେ କିରିୟା ଜୋମାକାଦିଙ୍ଗ୍ ଚି ଇନ୍‍କୁ ଇଙ୍ଗ୍ଆଃ ସାଥାୱନ୍ ଜାଗା ରେ ବୋଲୋ କାକୋ ଧାଡ଼ିୟା।” ଯାବ୍ ଚି ଅତେଦିଶୁମ୍ ରାଃ ସିର୍ଜାଅ ସାମାୟ୍ ତେ ଇନିଜାଃ କାମି ପୁରା ହୋବାଲେନ୍ତାଇନା ଏଣ୍ଡେ ରେହଗି। ଚିୟାଃଚି ସାତ୍ ୱା ହୁଲାଙ୍ଗ୍ ରାଃ ବିଷାୟ୍ ରେ ଜାହାଁତାଃ ଇନିଃ ପାବିତାର୍ ପୁଥି ରେ ନେକା କାଜିକେଦାଏ, “ପାର୍ମେଶ୍ଵାର୍ ସାତ୍ ୱା ହୁଲାଙ୍ଗ୍ ଆଜାଃ ସବେନ୍ କାମି କୋକେ ପୁରା କେତେ ଆରାମ୍ କେଦାଏ।” ଆଡୋଃଗି ଏଟାଃ ଜାଗା ରେ ନେକା କାଜିୟାଏ, “ଇନ୍‍କୁ ଇଙ୍ଗ୍ଆଃ ସାଥାୱନ୍ ଜାଗା ରେ ବୋଲୋ କାକୋ ଧାଡ଼ିୟା।” ଦୋ ନେ କାଜି ହୋବା ରାଃ ବାକି ମେନାଃ ଚି ଆଡୋଃଗି ଚିମିନ୍ ହୋଡ଼ୋକୋ ମେନାକୋୱା ଅକନ୍ କୋ ଏନ୍ ସାଥାୱନ୍ ଜାଗା ରେ ବୋଲୋୱାକୋ, ଆଡୋଃ ଅକନ୍ କୋକେ ଇନିଜାଃ ସୁସାମାଚାର୍ ସିଦା ରେ ଉଦୁବ୍ ଜାନା ଇନ୍‍କୁ ଆନାଚୁ କାମାନାତିଙ୍ଗ୍ ହୋରାତେ ଏନାରେ ବୋଲୋ କାକୋ ଧାଡ଼ିଜାନା। ଏନାମେନ୍ତେ ଇନିଃ ଜାହାନ୍ ବିଶେଷ୍ ହୁଲାଙ୍ଗ୍ କେ ମାଣ୍ଡାଅ କେତେ ନିମିନ୍ ଦିନ୍ ରେ ତାୟୋମ୍ତେ ଦାଉଦ୍ ରାଜା ରାଃ ପୁଥି ରେ ଏନାକେ “ଇସିଙ୍ଗ୍ ରାଃ ହୁଲାଙ୍ଗ୍” କାଜିତାନାଏ। ଜେଲେକା ସିଦା କାଜିକାନା, “ଆଗାର୍ ଇସିଙ୍ଗ୍ ଆପେ ଇନିଜାଃ ବାକାଣ୍ ଆୟୁମେୟାପେ, ଦୋ ଆପେୟାଃ ମୋନ୍ କେ କେଟେଃ ଆଲୋପେ ରିକାୟା।” ଚିୟାଃଚି ଆଗାର୍ ୟାହୁଶୁ ଇନ୍‍କୁକେ ସାଥାୱନ୍ ଜାଗା ରେ ବୋଲୋ ରିକା ଧାଡ଼ି ଲେନ୍ତେୟାଃଏ, ଏଣ୍ଡେ ପାର୍ମେଶ୍ଵାର୍ ଏନାରାଃ ତାୟୋମ୍ତେ ଏଟାଃ ହୁଲାଙ୍ଗ୍ ରାଃ ବିଷାୟ୍ ରେ କାଏ କାଜିତେୟାଃଏ। ଏନାମେନ୍ତେ ସାରିଲେପେ ଚି ପାର୍ମେଶ୍ଵାର୍ ରାଃ ହୋଡ଼ୋକୋ ଲାଗିନ୍ତେ ଆରାମେ ହୁଲାଙ୍ଗ୍ ରାଃ ସାଥାୱନ୍ ବାକି ମେନାଃ। ଚିୟାଃଚି ଜେତାଏଗି ଇନିଜାଃ ସାଥାୱନ୍ ଜାଗା ରେ ବୋଲୋ ଜାନାଏ, ଇନିଜୋଗି ପାର୍ମେଶ୍ଵାର୍ ଲେକା ଆପାନାଃ କାମି କୋକେ ପୁରା କେତେ ସାଥାଅ ନାମ୍ କେଦାଏ। ଏନାମେନ୍ତେ ଆବୁ ଏନ୍ ସାଥାୱନ୍ ଜାଗା ରେ ବୋଲୋ ଲାଗିନ୍ତେ କୋଷିସ୍ ୟାବୁ, ନେକା ଆଲୋହୋବାଅଃକା ଚି ଜେତାଏ ଇନ୍‍କୁୱାଃ ଲେକା ଆନାଚୁ କାମାନାତିଙ୍ଗ୍ କେତେ ଉୟୁଃ କେନୋଗାଏ। ଚିୟାଃଚି ପାର୍ମେଶ୍ଵାର୍ ରାଃ ବାଚାନ୍ ଜୀହିଃ, ଆଡୋଃ ପେଡ଼େଜାନ୍ ହାର୍ ବାରାନ୍ ପାଡ଼୍ ଧାର୍ କାନ୍ ତାଲ୍‍ୱାର୍ ତେହଗି ଥିମ୍ବା ଲେସେରା; ହାର୍ ଜୀଉ ଆଡୋଃ ଆତ୍ମା କେ ଆଡୋଃ ଯୋଡ଼ାନ୍-ଯୋଡ଼ାନ୍ କେ ହାର୍ ଜାଙ୍ଗ୍ ରାଶା କେ ଗେନା-ଗେନା କେତେ ଗୁତୁ ଫାରୋମେୟାଏ ଆଡୋଃ ମୋନ୍ ରେୟାଃ ପାହୋମ୍ ଆଡୋଃ ସାନାଙ୍ଗ୍ କୋକେ ବିଚାର୍ ଏୟାଏ। ସିର୍ଜାଅକାନ୍ ଜାହାନ୍ ଜିନିଷ୍ ଆଏଜେତେ ଉକୁକାନ୍ ବାନୋଃୱା ମେନ୍ଦୋ ଇନିଃକେ ଆବୁ ସବେନ୍ କାମି କୋରାଃ ହିସାବ୍ ଏହେମ୍ ହୋବାଅଃୱା, ଇନିଜାଃ ମେଏଃ ନାଡ଼େଏ ରେ ସବେନ୍ ଜିନିଷ୍ ଖଲାଅକାନ୍ ଆଡୋଃ ଉଦୁବାକାନ୍ ମେନାଃ। ଏନାମେନ୍ତେ ଚିମ୍ତାଙ୍ଗ୍ ଆବୁୱାଃ ନେଲେକା ସବେନ୍ ଏତେ ମାରାଙ୍ଗ୍ ୟାଜାକ୍ ମେନାଇଜା, ଅକନିଃ ସିର୍ମାଦିଶୁମ୍ ହୋରାତେ ସେନ୍ ଜାନାଏ, ମାନେ ପାର୍ମେଶ୍ଵାର୍ ରାଃ ହୋନ୍ ୟୀଶୁ, ଦୋ ହିଜୁଃପେ, ଆବୁ ଆପାନାଃ ମାନାତିଙ୍ଗ୍ ରେୟାଃ ବିଶ୍ଵାସ୍ କେ କେଟେଃ ତେ ସାବ୍ କାଃବୁ। ଚିୟାଃଚି ଆବୁୱାଃ ନେଲେକା ମାରାଙ୍ଗ୍ ୟାଜାକ୍ ନାହାଲାଏ ଅକନିଃ ଆବୁୱାଃ ନାରାଦୁରା ଇମ୍ତାରେ ଆବୁ ଲୋଃ କାଏ ଦୁକୁଅଃୱାଏ; ମେନ୍ଦୋ ଇନିଃ ସବେନ୍ ବାକାଣ୍ କୋରେ ଆବୁୱାଃ ଲେକା ପାର୍ଖାଅ ଜାନାଏ, ଏଣ୍ଡେହ ଇନିଃ ଜାହାନ୍ ପାପ୍ କାଏ ରିକା କେଦା। ଏନାମେନ୍ତେ ହିଜୁଃପେ, ଆବୁ ଆନୁଗ୍ରାହ୍ ରାଃ ସିଂହାସାନ୍ ରାଃ ନାଡ଼େଏ ରେ ସାହାସ୍ ସାବ୍ କେତେ ସେନାବୁ ଏନାତେ ଆବୁ ରେ ଦାୟା ହୋବାଅଃୱା, ହାର୍ ଏନ୍ ଆନୁଗ୍ରାହ୍ ନାମେକାବୁ ଅକନାଃ ଦାର୍‍କାର୍ ଇମ୍ତା ରେ ଆବୁକେ ଦେଙ୍ଗା ଏମାବୁୱାଏ। ଚିୟାଃଚି ସବେନ୍ ମାରାଙ୍ଗ୍ ୟାଜାକ୍ ହୋଡ଼ୋକୋ ଏତେ ହାର୍ ହୋଡ଼ୋକୋ ଲାଗିନ୍ତେଗି ପାର୍ମେଶ୍ଵାର୍ ସାଲା କୋୱାଏ, ଚି ଏନ୍ ସବେନ୍ କାଜି କୋ ନାଙ୍ଗ୍ ଅକନାଃ ପାର୍ମେଶ୍ଵାର୍ ଲାଗିନ୍ତେ ଠାହ୍‍ରାଅଃତାନା ଏନା ଭେଁଟ୍ ହାର୍ ପାପ୍ ରାଃ ଦାଣେ ରାକାବେ ୟାଏ। ଇନିଃ କାସେଣାନ୍ ଆଡୋଃ ଆଦାକାନ୍ କୋଲୋଃ ନାରାମ୍ ଏତେ ବେଓହାର୍ ୟାଏ, ଚିୟାଃଚି ଆଏଜୋଗି ନାରାଦୁରା ରାଃ ଆଧିନ୍ ତାନିଃ। ଏନାମେନ୍ତେ ଆଏଃକେ ଲାଗାତିଙ୍ଗ୍ ତାନାଃ ଚି ଜେଲେକା ହୋଡ଼ୋକୋ ଲାଗିନ୍ତେ ଏନ୍ ଲେକାଗି ଆଜାଃ ଲାଗିନ୍ତେ ହଗି ପାପ୍ ଦାଣେ ରାକାବେୟାଏ। ନେ ମାଇନ୍ ନାମେ ତେୟାଃ ଜେତାଏ ଆପାନ୍ ସାନାଙ୍ଗ୍ ତେ କାଏ ନାମେୟାଏ, ଚିମିନ୍ ସାନ୍ତେ ଚି ହାରୁନ୍ ଲେକା ପାର୍ମେଶ୍ଵାର୍ ପାଡ଼େତେ କାଏ ସାଲାଅଃୱାଏ। ଏନ୍‍ଲେକାଗି ମାସୀହ୍ ହଗି ମାରାଙ୍ଗ୍ ୟାଜାକ୍ ବାଇଏନ୍ ଲାଗିନ୍ତେ ମାଇନ୍ ଆଏଃ ଆପାନ୍ ତେ କାଏ ଇଦିକେଦାଏ, ମେନ୍ଦୋ ପାର୍ମେଶ୍ଵାର୍ ଇନିଃକେ ମାଇନ୍ ଏମ୍ କିଜାଏ, ଅକଏ ଇନିଃକେ କାଜିକିଜାଏ, “ଆମ୍ ଇଙ୍ଗ୍ଆଃ ହୋନ୍‍କଡ଼ା ତାନ୍‍ମେ, ଇସିଙ୍ଗ୍ ଆଇଙ୍ଗ୍ ଗି ଆମ୍‍କେ ସିର୍ଜାଅ କେଃ ମେୟାଇଙ୍ଗ୍।” ନେଲେକାଗି ଇନିଃ ଏଟାଃ ଜାଗା ରେହ କାଜିୟାଏ, “ଆମ୍ ମେଲିକିସୀଦାକ୍ ରାଃ ନିୟାମ୍ ଲେକାତେ ସବେନ୍ ହୁଲାଙ୍ଗ୍ ଲାଗିନ୍ ୟାଜାକ୍ ତାନ୍‍ମେ।” ୟୀଶୁ ଆଜାଃ ହୋଡ଼ମୋ ରେ ତାଇନ୍ ସାମାୟ୍ ରେ ଜୋର୍-ଜୋର୍ତେ କାଉରି-କାଉରି କେତେ ହାର୍ ମେଏଃ ଦାଆ ଜୋରୋ-ଜୋରୋକେତେ ପାର୍ମେଶ୍ଵାର୍ କେ ଅକନିଃ ଆଏଃକେ ଗୋନୋଏଃ ତେ ବାଞ୍ଚାଅ ଧାଡ଼ିତେୟାଃଏ, ବିନ୍ତି ହାର୍ ଆର୍ଜି କେଦାଏ, ହାର୍ ଏନା ଆନାଚୁ ମାନାତିଙ୍ଗ୍ ରାଃ ସାନାଙ୍ଗ୍ ଲେକାତେ ଆଜାଃ ଆୟୁମ୍ ଜାନା। ହୋନ୍‍କଡ଼ା ହୋବା କେତେ ହ ଇନିଃ ଦୁକୁ ସାହାତିଙ୍ଗ୍–ସାହାତିଙ୍ଗ୍ କେତେ ଆନାଚୁ ମାନାତିଙ୍ଗ୍ ଶିଖାଅ ଜାନାଏ। ହାର୍ ପୋକ୍ତା ବାଇକେତେ, ଆଜାଃ ଆନାଚୁ ମାନାତିଙ୍ଗ୍ ତାନ୍ ସବେନ୍ କୋ ଲାଗିନ୍ତେ ଜାନାଓ-ଜାନାଓ ରାଃ ବାଞ୍ଚାଅ ରାଃ କାରାନ୍ ବାଇଜାନାଏ। ହାର୍ ଇନିଃକେ ପାର୍ମେଶ୍ଵାର୍ ପାଡ଼େତେ ମେଲିକିସୀଦାକ୍ ରାଃ ନିୟାମ୍ ଲେକାତେ ମାରାଙ୍ଗ୍ ୟାଜାକ୍ ରାଃ ପାଦ୍ ନାମ୍‍ଜାନା। ନେୟାରାଃ ବିଷାୟ୍ ରେ ଆଲେକେ ଥିମ୍ବାଗି କାଜିକୋ କାଜି ରାଃ ମେନାଃ, ଅକନାଃ କେ ବୁଝାଅ ଲାଗିନ୍ତେ ହ କାଠିନ୍ ତାନାଃ; ଚିୟାଃଚି ଆପେ ଜାଲ୍‍ଦି କାପେ ଶିଖାଅଃ ତାନା। ସାମାୟ୍ କେ ବିଚାର୍ ଲେରେ ଦୋ ଆପେକେ ଗୁରୁ ହୋବା କେନୋଃ ଚାହି ତାଇକେନା, ଏଣ୍ଡେ ରେହ ଆପେକେ ନେୟା ଲାଗାତିଙ୍ଗ୍ଅଃ ତାନା ଚି ଜେତାଏ ମିହୋଡ଼୍ ଆପେକେ ପାର୍ମେଶ୍ଵାର୍ ରାଃ ବାଚାନ୍ କୋରାଃ ଶିକ୍ଷା ଆଡୋଃ-ମିଶା ଶିଖାଅ ପେୟାଏ। ଆପେ ଦୋ ନେକା ହୋବାଜାନାପେ ଚି ଆପେକେ ମାଣ୍ଡି ବାଦ୍‍ଲା ରେ ନାଆ ସାନ୍ତେ ତୋୱା ଗି ଚାହି। ଚିୟାଃଚି ତୋୱା ନୁତାନ୍ ହୋନ୍ କେ ଧାରାମ୍ ହୋରା ରାଃ ବାଚାନ୍ କେ ନେଲ୍ ଉରୁମ୍ କାଏ ଧାଡ଼ିୟା, ଚିୟାଃଚି ଇନିଃ ହୋନ୍ ଗିୟାଏ। ମେନ୍ଦୋ ମାଣ୍ଡି ମାପ୍‍ରାଙ୍ଗ୍ କୋ ଲାଗିନ୍ ତାନାଃ, ଅକନ୍ କୋୱାଃ ଆଟ୍‍କାର୍ଉରୁମ୍ ପେଡ଼େଏ ଆଭ୍ୟାସ୍ ରିକା-ରିକା କେତେ, ବୁଗିନାଃ ହାର୍ ଏତ୍କାନାଃ କେ ଆଟ୍‍କାର୍ଉରୁମ୍ ଶିଖାଅ ଛାବା କାନାକୋ। ଏନାମେନ୍ତେ ହିଜୁଃପେ ମାସୀହ୍ କେ ସାରିନ୍ ତେୟାଃ ସିଦା କାଜି କୋକେ ବାଗିକେତେ ଆବୁ ପୋକ୍ତା କେଟେଃ ବାଇଏନ୍ ତେୟାଃ ଆୟୁର୍ କାଜି ପାଡ଼୍ ହାରା ଇଦିୟୋଃ କାବୁ, ଆଡୋଃ ଗୋନୋଏଃ ପାଡ଼୍ ଇଦି ତେୟାଃ ପାପ୍ କାମି କେ ବାଗେ ଲାଗିନ୍, ଆଡୋଃ ପାର୍ମେଶ୍ଵାର୍ ଚେତାନ୍ ରେ ବିଶ୍ଵାସ୍ ଲାଗିନ୍, ଆଡୋଃ ବାପ୍ତିସ୍ମା ଆଡୋଃ ତିଈ ଦହ, ଆଡୋଃ ଗୋଜାକାନ୍ କୋୱା ଜୀବିନିରିଦ୍ ଆଡୋଃ ଟୁଣ୍ଡୁ ବିଚାର୍ ରାଃ ଶିକ୍ଷା ଲେକାନାଃ ନାହି ଡୋଡା ଆଡୋଃମିଶା ଆଲୋପେ ମାଣ୍ଡାଅୟା। ଆଗାର୍ ପାର୍ମେଶ୍ଵାର୍ ସାନାଙ୍ଗ୍ ୟାଏ ଏଣ୍ଡେ ଆଲେ ନେୟାଗି ରିକାୟାଲେ। ଚିୟାଃଚି ଅକନ୍‍କୋ ମିଶା ମାସ୍କାଲ୍ ନାମ୍ କେଦାକୋ, ହାର୍ ଅକନ୍‍କୋ ସିର୍ମାଦିଶୁମ୍ ରାଃ ବାର୍ଦାନ୍ ରାଃ ଶିବିଲ୍ କେ ଚାଖା କେଦାକୋ ଆଡୋଃ ପାବିତାର୍ ଆତ୍ମା ହ ହାନାଟିଙ୍ଗ୍ ନାମ୍ କେଦାକୋ, ଆଡୋଃ ପାର୍ମେଶ୍ଵାର୍ ରାଃ ବାଚାନ୍ ରାଃ ଆଡୋଃ ହିଜୁଃ ତେୟାଃ ଯୁଗ୍ ରେୟାଃ ପେଡ଼େଏ ରାଃ ଶିବିଲ୍ କେ ଚାଖା ଛାବା କାଦାକୋ, ଏନ୍ତେ ଆଗାର୍ ଇନ୍‍କୁ ଆଦୋଃ ତାନାକୋ ଏଣ୍ଡେ ଇନ୍‍କୁକେ ଆଡୋଃଗି ପାପ୍ କାମି ବାଗେ ପେ ମେନ୍ତେ ନାୱା ଲେକାତେ ଏନ୍ କାଜି କାହୋବା ଧାଡ଼ିୟୋଃୱା; ଚିୟାଃଚି ଇନ୍‍କୁ ପାର୍ମେଶ୍ଵାର୍ ରାଃ ହୋନ୍ କେ ଆକୋୱାଃ ଲାଗିନ୍ତେ ଆଡୋଃଗି କ୍ରୁଶ୍ ରେ ରାକାବିତାନାକୋ ହାର୍ ସବେନ୍ କୋୱାଃ ନେପେଲ୍ ରେ ଇନିଃକେ ଆପ୍‍ମାନି ତାନାକୋ। ଚିୟାଃଚି ଅକନ୍ ଅତେ ଗାମା ଦାଆ କେ, ଅକନାଃ ଏନାରେ ସବେନ୍ ଇମ୍ତାଙ୍ଗ୍ ଉୟୁଗୋଃୱା, ନୁ ନୁକେତେ ଅକନ୍ ହୋଡ଼ୋକୋୱାଃ ଲାଗିନ୍ ଏନା ଶିୟୁଃ-ହେରୋଃ ତାନା, ଇନ୍‍କୁୱାଃ ନାଙ୍ଗ୍ ଆଡ଼ାଆଃ-ସାକାମ୍ ଅମୋନେୟାଏ, ଏନ୍ ଅତେ ପାର୍ମେଶ୍ଵାର୍ ତାଃଏତେ ଆଶିଷ୍ ଅଃତାନା। ମେନ୍ଦୋ ଆଗାର୍ ଏନାରେ ଜାନୁମ୍ ଆଡୋଃ ତାସାଃ ଅମୋନୋଃ ତାନା, ଏଣ୍ଡେ ଏନା ବାଗ୍‍ଡ଼ାଅ ଜାନା ହାର୍ ସାର୍ପାଅଃ ଲେକା ମେନାଃ, ହାର୍ ଏନା ଟୁଣ୍ଡୁ ରେ ଜୁଲୋଃ ନାଗିନ୍ ମେନାଃ। ହେ ଦୁଲାଡ଼୍ କୋ, ଆଲେ ନେ ବାକାଣ୍ କାଜି ତାନାଲେ ଏଣ୍ଡେ ରେହଗି ଆପେୟାଃ ବିଷାୟ୍ ରେ ନେୟା ଏତେ ବୁଗିନ୍ ଆଡୋଃ ବାଞ୍ଚାଅ ନାମେ ତେୟାଃ ବାକାଣ୍ ରେ ଭାରୋସା ତାନାଲେ। ଚିୟାଃଚି ପାର୍ମେଶ୍ଵାର୍ ଆନ୍ୟାୟ ରିକାନିଃ ନାହାଲି ଚି ଆପେୟାଃ କାମି, ହାର୍ ଏନ୍ ଦୁଲାଡ଼୍ କେ ରିଡ଼ିଙ୍ଗ୍ ତାଆଏ, ଅକନାଃ ଆପେ ଇନିଜାଃ ନୁତୁମ୍ ଲାଗିନ୍ ନେଲେକାତେ ଦେଖାଅ କେଦାପେ, ଯେଚି ପାବିତାର୍ ହୋଡ଼ୋକୋୱାଃ ସେୱା କେଦାପେ ଆଡୋଃ ରିକା ତାନାପେ ହଗି। ଆଲେ ଥିମ୍ବାତେଗି ସାନାଙ୍ଗ୍ ତାନାଲେ ଚି ଆପେ ଏତେ ସବେନ୍ ମିପୀହୋଡ଼୍ ଟୁଣ୍ଡୁ ସାନ୍ତେ ପୁରା ଆଶ୍ରା ଲାଗିନ୍ତେ ନେକାଗି ରିକା-କାତେକାଏ। ଏନାତେ ଆପେ ଆଲ୍‍ସୀ ଆଲୋପେ ହୋଇଅଃୱାଃ; ମେନ୍ଦୋ ଇନ୍‍କୁକେ ଅତୋଙ୍ଗ୍ କୋପେ ଅକନ୍ କୋ ବିଶ୍ଵାସ୍ ଆଡୋଃ ସାହାତିଙ୍ଗ୍ ରାଃ ହୋରାତେ କିରିୟା ରାଃ ଆଧିକାରୀ ହୁୟୋଃତାନାକୋ। ପାର୍ମେଶ୍ଵାର୍ ଆବ୍ରାହାମ୍ କେ କିରିୟା କାଜି ଏମ୍ ସାମାୟ୍ ଇମ୍ତା ଚିମ୍ତାଙ୍ଗ୍ ଆପାନାଃ ରେ କାଷାମ୍ ଜୋମ୍ ଲାଗିନ୍ତେ ଜେତାଏ କେ ଆଏଃତେ ମାରାଙ୍ଗ୍ କାଏ ନାମ୍ କେଦାଏ, ଦୋ ଆଏଃଗି ଆପାନାଃ ରେ କାଷାମ୍ ଜୋମ୍ କେତେ କାଜିକେଦାଏ, “ଇଙ୍ଗ୍ ସାର୍ତିଗୀ ଆମ୍‍କେ ଥିମ୍ବାଗି ଆଶିଷ୍ ଏମାମେୟାଇଙ୍ଗ୍, ହାର୍ ଆମାଃ ହୋନ୍-ଗାଣା କୋକେ ହାରା ଇଦି କୋୱାଇଙ୍ଗ୍।” ଆଡୋଃ ନେଲେକାତେ ଆବ୍ରାହାମ୍ ସାହାତିଙ୍ଗ୍ ତାନ୍ ଲୋଃ ହୋରୋ କେତେ କିରିୟା ଏମାକାନ୍ କାଜି ନାମ୍ କେଦାଏ। ହୋଡ଼ୋକୋ ଦୋ ଆକୋୱାଃ ତେ ମାରାଙ୍ଗ୍ କୋୱାଃ କାଷାମ୍ ଜୋମେୟାକୋ ଆଡୋଃ ଇନ୍‍କୁ ସବେନ୍ କାଜି ରାଃ ଫାଏସାଲା କାଷାମ୍ ତେ ପୋକ୍ତା ହୋବାଃୱା। ଚିମ୍ତାଙ୍ଗ୍ ପାର୍ମେଶ୍ଵାର୍ କିରିୟା ରାଃ ଆଧିକାରୀ କୋ ଲାଗିନ୍ତେ ଆଡୋଃଗି ସାଫାଗି ଉଦୁବ୍ ନାଙ୍ଗ୍ ସାନାଙ୍ଗ୍ କେଦାଏ ଚି ଇନିଜାଃ ସାନାଙ୍ଗ୍ କାବାଦ୍‍ଲାଅଃୱା, ଏନାମେନ୍ତେ କାଷାମ୍ ଜୋମ୍ ତେୟାଃକେ ଥାଲା ରେ ଆଉକେଦାଏ। ଏନାତେ ବାରିୟା କାବାଦ୍‍ଲାଅଃ କାଜି ରାଃ ହୋରାତେ, ଏନାରେ ପାର୍ମେଶ୍ଵାର୍ ଲୋଗୋ କାଏ ଧାଡ଼ିୟାଏ, ଆବୁୱାଃ ମୋନ୍ ପୋକ୍ତା ତେ ସାହାସ୍ ସାବେକାଏ, ଆବୁଦୋ ନାଡ଼େଏ ରେ ତେୟାର୍ କାନ୍ ଆଶ୍ରା କେବୁ ସାବ୍‍ଜୋମା ମେନ୍ତେ ନିର୍ କାଦାବୁ। ଏନ୍ ଆଶ୍ରା ଆବୁୱାଃ ଜୀଉ ଲାଗିନ୍ତେ ଜାହାଜ୍ ତିଙ୍ଗୁନ୍ ମେଣେଏଃ ଆଂଶି ଲେକା ତାନାଃ ଅକନାଃ କା-ଟାସ୍କାଅଃୱା ହାର୍ କେଟେଃ ଗିୟା, ଆଡୋଃ ଏନା ପାର୍ଦା ରାଃ ଭିତାର୍ ସାନ୍ତେ ସେଟେରୋଃ ତାନା, ଅକ୍ତାଃରେ ୟୀଶୁ ମେଲିକିସୀଦାକ୍ ରାଃ ନିୟାମ୍ ଲେକାତେ ଜାନାଓ-ଜାନାଓ ଲାଗିନ୍ ମାରାଙ୍ଗ୍ ୟାଜାକ୍ ହୋବାକେତେ, ଆବୁୱାଃ ଲାଗିନ୍ତେ ଆୟୁର୍ ସେନ୍ ନିଃ ଲେକା ବୋଲୋ ଜାନାଏ। “ନେ ମେଲିକିସୀଦାକ୍ ଶାଲେମ୍ ସାହାର୍ ରେନ୍ ରାଜା ଆଡୋଃ ସବେନ୍ ଏତେ ମାରାଙ୍ଗ୍ଉତ୍ତାର୍ ପାର୍ମେଶ୍ଵାର୍ ରାଃ ୟାଜାକ୍ ତାଇଲେନାଏ। ଚିମ୍ତାଙ୍ଗ୍ ଆବ୍ରାହାମ୍ ରାଜା କୋକେ ଗୋଏଃ କେତେ ରୁଆଡ଼୍ ତାଇକେନାଏ, ଦୋ ନିଈଗି ଆବ୍ରାହାମ୍ କେ ନାପାମ୍ ଜାନାଏ ହାର୍ ଆଶିଷ୍ ଏମ୍ କିଜାଏ। ଆବ୍ରାହାମ୍ ନିଈକେଗି ସବେନ୍ ଜିନିଷ୍ କୋରାଃ ଦାଶ୍ୱାଁ ଭାଗ୍ ଏମ୍ କିଜାଏ। ଇନିଃ ଆଜାଃ ସୁରୁ ନୁତୁମ୍ ରାଃ ମାନେ ଲେକା, ‘ଧାରାମ୍ ରାଃ ରାଜା’ ହାର୍ ଆଡୋଃ ‘ଶାଲେମ୍ ରାଃ ରାଜା’ ମାନେ ‘ଶାନ୍ତି ରାଃ ରାଜା’ ତାନିଃ। ଅକନିଜାଃ ନାଦୋ ଆପୁ, ନାଦୋ ଏଙ୍ଗା, ନାଦୋ ଖାନ୍ଦାନ୍ ମେନାଃ, ଇନିଜାଃ ନାଦୋ ହୁଲାଙ୍ଗ୍ କୋରାଃ ଏନେଟେଃ ମେନାଃ ନାଦୋ ଇନିଜାଃ ଜୀଦାନ୍ ରାଃ ଟୁଣ୍ଡୁ ମେନାଃ; ମେନ୍ଦୋ ପାର୍ମେଶ୍ଵାର୍ ରାଃ ହୋନ୍ ଲେକା ହୋବାକେତେ ଇନିଃ ସବେନ୍ ହୁଲାଙ୍ଗ୍ ଲାଗିନ୍ ୟାଜାକ୍ ବାଇ ତାଇନାଏ।” ନାଆ ଇନିଃକେ ପାହୋମିପେ ଚି ଇନିଃ ଚିଲ୍‍କାନ୍ ମାରାଙ୍ଗ୍ ତାଇକେନାଏ, ଅକନିଃକେ ପୁର୍ଖା-ଆପୁ କୋୱାଃ ଆପୁ ଆବ୍ରାହାମ୍ ବାଇରୀ କୋଏତେ ରେଜାକାନ୍ ରାଃ ବେଶ୍ ଏତେ ବେଶ୍ ଜିନିଷ୍ ରାଃ ଦାଶ୍ୱାଁ ଭାଗ୍ ଏମ୍ କିଜାଏ। ଲେବୀ ରାଃ ହୋନ୍-ଗାଣା କୋଏତେ ଅକନିଃ ୟାଜାକ୍ ରାଃ ପାଦ୍ ନାମେତାନାଏ, ଇନିଃକେ ଆନାଚୁ ନାମ୍ କାନା ଚି ହୋଡ଼ୋକୋ ଏତେ ମାନେ ଆଜାଃ ହାଗା କୋଏତେ, ଚାହେ ଆବ୍ରାହାମ୍ ଆଃ ହୋଡ଼ମୋ ଏତେ ଜାନାମାକାନ୍ କୋଏତେ, ମୁଶା ନାବୀ ରାଃ ଆଇନ୍ ଲେକାତେ ଦାଶ୍ୱାଁ ଭାଗ୍ ଇଦିୟାଏ। ମେନ୍ଦୋ ମେଲିକିସୀଦାକ୍, ଅକନିଃ ଇନ୍‍କୁୱାଃ ଖାନ୍ଦାନ୍ ରେନ୍ ହଗି କାଏ ତାଇନ୍ କେନାଏ, ଆବ୍ରାହାମ୍ ଏତେ ଦାଶ୍ୱାଁ ଭାଗ୍ ଇଦିକେଦାଏ, ଆଡୋଃ ଅକଏକେ କିରିୟା ନାମ୍ ଲେନା ଇନିଃକେ ଆଶିଷ୍ ଏମ୍ କିଜାଏ। ନେୟାତେ ଜାହାନ୍ ସାନ୍ଦେହ୍ ବାନୋଗା ଚି ହୁଡିଙ୍ଗ୍ ମାରାଙ୍ଗ୍ ଏତେ ଆଶିଷ୍ ନାମେୟାଏ। ହାର୍ ନେତାଃ ରେଦୋ ମୁଶିଙ୍ଗ୍ ଗୋଜୋଗାକୋ ଏନ୍ ହୋଡ଼ କୋ ଦାଶ୍ୱାଁ ଭାଗ୍ ଇଦିତାନାକୋ, ମେନ୍ଦୋ ଏନ୍ତାଃରେ ଇନିଜାଏ ଇଦିତାନା ଅକନିଜାଃ ଗୋୱା ଏମୋଃତାନା ଚି ଇନିଃ ଜୀନିଦ୍ ମେନାଇଜା। ଏଣ୍ଡେ ଆବୁ ନେୟା ହଗି କାଜି ଧାଡ଼ିୟାବୁ ଚି ଲେବୀ ହଗି, ଅକନିଃ ଦାଶ୍ୱାଁ ଭାଗ୍ ଇଦିୟାଏ, ଆବ୍ରାହାମ୍ ରାଃ ହୋରାତେ ଦାଶ୍ୱାଁ ଭାଗ୍ ଏମ୍‍କେଦାଏ। ଚିୟାଃଚି ଅକନ୍ ସାମାୟ୍ ରେ ମେଲିକିସୀଦାକ୍ ଇନିଜାଃ ଆପୁ ଲୋଃ ନାପାମ୍ ଜାନାଏ, ଏନ୍ ସାମାୟ୍ ଇନିଃ ଆବ୍ରାହାମ୍ ବାଂଶ୍ ରେୟାଃ ଆପୁ ହୋଡ଼ମୋ ରେ ତାଇକେନାଏ। ଆଗାର୍ ଲେବୀ କିଲି ରେନ୍ ୟାଜାକ୍ ପାଦ୍ ରାଃ ହୋରାତେ ପୁରା ରିକା ଧାଡ଼ିୟୋଃ ତାନା (ଅକନିଜାଃ ଆଧିନ୍ ରେ ହୋଡ଼ୋକୋକେ ମୁଶା ନାବୀ ରାଃ ଆଇନ୍ ନାମ୍ ଲେନା) ଏଣ୍ଡେ ଆଡୋଃ ଚିକାନ୍ ଦାର୍‍କାର୍ ତାଇକେନା ଜେ ଏଟାଃ ୟାଜାକ୍ ମେଲିକିସୀଦାକ୍ ରାଃ ନିୟାମ୍ ଲେକାତେ ତିଙ୍ଗୁୱାଏ, ଆଡୋଃ ହାରୁନ୍ ୟାଜାକ୍ ରାଃ ଅଡ଼୍ଆଃ ଏତେ କାଏ କାଜିଅଃୱାଏ? ଚିୟାଃଚି ଚିମ୍ତାଙ୍ଗ୍ ୟାଜାକ୍ ରାଃ ପାଦ୍ ବାଦ୍‍ଲାଅଃ ତାନା, ଏଣ୍ଡେ ଆଇନ୍ ହଗି ବାଦ୍‍ଲାଅଃ ଲାଗାତିଙ୍ଗ୍ ତାନାଃ। ଚିୟାଃଚି ମାସୀହ୍ ଅକନିଜାଃ ବିଷାୟ୍ ରେ ନେ ବାକାଣ୍ କାଜିୟୋଃତାନା ଚି ଇନିଃ ଏଟାଃ କିଲି ରେନ୍ ତାନିଃ, ଇନ୍‍କୁୱାଃ କିଲି ଏତେ ଜେତାଏ ବେଦୀ ରାଃ ସେୱା କାମି ଚିଉଲା ହ କାକୋ ରିକା କାଦା, ନେୟା ଦୋ ସାରିଅଃତାନା ଚି ଆବୁୱାଃ ପ୍ରାଭୁ ୟାହୁଦା କୋୱାଃ କିଲି ଏତେ ହିଜୁଃ ନାଏ, ଆଡୋଃ ନେ କିଲି ରେନ୍ କୋୱାଃ ୟାଜାକ୍ କାମି ବିଷାୟ୍ ରେ ମୁଶା ନାବୀ ଜେତ୍ନାଃ ହ କାଏ କାଜି। ଆଲେୟାଃ କାଜି ଆଡୋଃଗି ପୋକ୍ତାଅଃ ତାନା, ଚିମ୍ତାଙ୍ଗ୍ ମେଲିକିସୀଦାକ୍ ଲେକା ମିହୋଡ଼୍ ଏଟାଃ ୟାଜାକ୍ ତିଙ୍ଗୁଅଃତାନାଏ, ଅକନିଃ ହୋଡ଼ମୋ ଆନାଚୁ ରାଃ ଆଇନ୍ ଲେକାତେ ଲେବୀ ୟାଜାକ୍ କିଲି ତେଦୋ କାହା, ମେନ୍ଦୋ କାଗୋଜୋଃତେୟାଃ ଜୀଦାନ୍ ରାଃ ପେଡ଼େଏ ଲେକାତେ ୟାଜାକ୍ ବାଇୟାକାନାଏ। ଚିୟାଃଚି ଇନିଜାଃ ବିଷାୟ୍ ରେ ନେ ଗୋୱା ଏମାକାନା, “ଆମ୍ ମେଲିକିସୀଦାକ୍ ରାଃ ନିୟାମ୍ ଲେକାତେ ଜାନାଓ-ଜାନାଓ ଲାଗିନ୍ ୟାଜାକ୍ ତାନ୍‍ମେ।” ନେ ଲେକାତେ, ସିଦା ଆନାଚୁ ନାରାଦୁରା ହାର୍ ଜେତାନ୍ କାମି କାତାଇନ୍ ଲୋଃ ବାଗିଅଃ ତାନା (ନେୟାମେନ୍ତେ ଚି ମୁଶା ନାବୀ ରାଃ ଆଇନ୍ ଜାହାନାଃ କାଏ ବାଇ ଛାବା କେଦାଏ), ହାର୍ ଏନ୍ ଜାଗା ରେ ମିୟାଃ ଏନ୍ ଲେକାନ୍ ବୁଗିନ୍ ଆଶ୍ରା ମାଣ୍ଡାଅ ଜାନା ଅକନାଃ ହୋରାତେ ଆବୁ ପାର୍ମେଶ୍ଵାର୍ ରାଃ ନାଡ଼େଏ ସେନ୍ ଧାଡ଼ିତାନାବୁ। ଆଡୋଃ ମାସୀହ୍ ବେଗାର୍ କାଷାମ୍ ଜୋମ୍ ହୋରାତେ ୟାଜାକ୍ କାଏ ହୋବାଜାନା। ଚିୟାଃଚି ଇନ୍‍କୁ ଦୋ ବେଗାର୍ କାଷାମ୍ ଜୋମ୍ ତେ ୟାଜାକ୍ ବାଇ ଲେନାକୋ ମେନ୍ଦୋ କାଷାମ୍ ଜୋମ୍ ଲୋଃ ପାର୍ମେଶ୍ଵାର୍ ପାଡ଼େତେ ସାଲା ଲେନ୍ ତାଇନାଏ, ଅକନିଃ ଇନିଜାଃ ବିଷାୟ୍ ରେ କାଜିକେଦାଏ, “ପ୍ରାଭୁ କାଷାମ୍ ଜୋମ୍‍କେଦାଏ, ହାର୍ ଇନିଃ ଏନାତେ ଆଡୋଃ କାଏ ପାସ୍ତାଅଗାଏ, ଚି ଆମ୍ ଜାନାଓ-ଜାନାଓ ରେୟାଃ ୟାଜାକ୍ ତାନ୍‍ମେ।” ନେଲେକା ୟୀଶୁ ମିୟାଃ ବୁଗିନ୍ ନିୟାମ୍‍ଥଲ୍ ରାଃ ଜିମାଇଦିନିଃ ବାଇଜାନାଏ। ଇନ୍‍କୁ ଦୋ ଥିମ୍ବାଗି ୟାଜାକ୍ ବାଇଇଦି ୟାନାକୋ, ଚିୟାଃଚି ମିହୋଡ଼୍ ୟାଜାକ୍ ଗୋଜୋଃ ତାୟୋମ୍ତେ ଏନ୍ ଜାଗା ରେ ଏଟାଃନିଃ ବାଇଜାନାଏ; ମେନ୍ଦୋ ୟୀଶୁ ଜାନାଓ-ଜାନାଓ ତାଇନାଏ, ଏନାମେନ୍ତେ ଇନିଜାଃ ୟାଜାକ୍ ପାଦ୍ କେ ଏଟାଃନିଃ କାଏ ଇଦି ଧାଡ଼ିୟାଏ। ଏନାମେନ୍ତେ ଅକନ୍‍କୋ ଇନିଜାଃ ହୋରାତେ ପାର୍ମେଶ୍ଵାର୍ ଆଃ ନାଡ଼େଏ ହିଜୁଃ ୱାକୋ, ଇନିଃ ଇନ୍‍କୁକେ ପୁରା-ପୁରାଗି ବାଞ୍ଚାଅ ଧାଡ଼ିୟାଏ, ଚିୟାଃଚି ଇନିଃ ଇନ୍‍କୁୱାଃ ଲାଗିନ୍ ଆର୍ଜି ଲାଗିନ୍ତେ ସାଦାଏ ଜୀହିଃ ମେନାଇଜା। ଏନାମେନ୍ତେ ନେଲେକାନ୍ ମାରାଙ୍ଗ୍ ୟାଜାକ୍ ଗି ଆବୁୱାଃ ଲାଗାତିଙ୍ଗ୍ କୋକେ ପୁରା ଧାଡ଼ିୟାଏ, ଇନିଃ ପାବିତାର୍ ଆଡୋଃ ନିର୍ଦୋଷ୍ ହାର୍ ଫାର୍ଚି, ଆଡୋଃ ପାପୀକୋୱାଃ ଏତେ ଏଟାଃ ଆଡୋଃ ସିର୍ମାଦିଶୁମ୍ ଏତେ ହଗି ସାଲାଙ୍ଗୀ କାନ୍ ତାନିଃ। ଏନ୍ ଏଟାଃ ମାରାଙ୍ଗ୍ ୟାଜାକ୍ କୋୱାଃ ଲେକା ଇନିଃକେ ଲାଗାତିଙ୍ଗ୍ ବାନୋଗା ଚି ସବେନ୍ ହୁଲାଙ୍ଗ୍ ସିଦା ଆପାନ୍ ପାପ୍ ଲାଗିନ୍ତେ, ଏନ୍ତେ ହୋଡ଼ୋକୋୱାଃ ପାପ୍ ଲାଗିନ୍ତେ ଦାଣେ ରାକାବେୟାଏ; ଚିୟାଃଚି ଇନିଃ ଆଏଃ ଆପାନ୍ କେଗି ଦାଣେ ରାକାବ୍ କେତେ ମିଶାତେଗି ସବେନ୍ କୋ ନାଙ୍ଗ୍ ପୁରା ତାଦାଏ। ଚିୟାଃଚି ମୁଶା ନାବୀ ରାଃ ଆଇନ୍ ଦୋ ନାରାଦୁରା ହୋଡ଼ୋକୋକେ ମାରାଙ୍ଗ୍ ୟାଜାକ୍ ବାଇକୋୱାଏ, ମେନ୍ଦୋ ଏନ୍ କାଷାମ୍ ରାଃ ବାଚାନ୍ ଅକନାଃ ମୁଶା ନାବୀ ରାଃ ଆଇନ୍ ରାଃ ତାୟୋମ୍ତେ ଜୋମ୍ ଜାନା, ଏନା ଏନ୍ ହୋନ୍‍କଡ଼ା କେ ବାଇତାନାଏ ଅକନିଃ ଜାନାଓ-ଜାନାଓ ଲାଗିନ୍ ପୋକ୍ତା ଛାବା କାନାଏ। ନାଆ ଅକନ୍ କାଜି ଆଲେ କାଜି ତାନାଲେ ଏନାକୋଏତେ ସବେନ୍ ତେ ମାରାଙ୍ଗ୍ କାଜି ନେୟା ତାନାଃ ଚି ଆବୁୱାଃ ନେକାନ୍ ମାରାଙ୍ଗ୍ ୟାଜାକ୍ ମେନାଇଜା, ଅକନିଃ ସିର୍ମାଦିଶୁମ୍ ରେ ସବେନ୍ ଏତେ ପେଡ଼େଜାନ୍ ନିଜାଃ ସିଂହାସାନ୍ ରାଃ ଜୋମ୍ ପାଡ଼୍ ରେ ଦୁବ୍ କାନାଏ। ଆଡୋଃ ମାରାଙ୍ଗ୍ ପାବିତାର୍ ଜାଗା ରେ ହାର୍ ଏନ୍ ସାର୍ତି ତାମ୍‍ବୁ ରାଃ ସେୱାନିଃ ହୋବାଜାନାଏ ଅକନିଃକେ ଜେତାନ୍ ହୋଡ଼ କାହା, ମେନ୍ଦୋ ପ୍ରାଭୁ ତିଙ୍ଗୁ କାଜାଏ। ଚିୟାଃଚି ସବେନ୍ ମିପୀହୋଡ଼୍ ମାରାଙ୍ଗ୍ ୟାଜାକ୍ ଦାନ୍ ଆଡୋଃ ଦାଣେ ରାକାବ୍ ଲାଗିନ୍ ସାଲାଅଃୱାକୋ, ଏନାମେନ୍ତେ ନେୟା ଲାଗିତିଙ୍ଗ୍ ତାନାଃ ଚି ନେ ୟାଜାକ୍ ତାଃ ହଗି ରାକାବେ ଲାଗିନ୍ ଜାହାନାଃ ତାଇନା। ଆଗାର୍ ୟୀଶୁ ଅତେ ରେ ନାଆ ତାଇନ୍ ଲେନ୍ତେୟାଏ ଏଣ୍ଡେ ଚିଉଲାଅ ୟାଜାକ୍ କାଏ ହୋବାଜାନ୍ତେ, ଚିୟାଃଚି ମୁଶା ନାବୀ ରାଃ ଆଇନ୍ ଲେକାତେ ଦାନ୍ ରାକାବ୍ ୱାଲା ୟାହୁଦୀ ୟାଜାକ୍ କୋଦୋ ମେନାକୋୱା। ଇନ୍‍କୁ ସିର୍ମାଦିଶୁମ୍ ରେୟାଃ ଜିନିଷ୍‍କୋରାଃ ଜୋନୋକା ଆଡୋଃ ଉମ୍ବୁଲ୍ ରାଃ ସେୱା ରିକାତାନାକୋ, ଜେଲେକା ଅକୋଇମ୍ତାଙ୍ଗ୍ ମୁଶା ନାବୀ ତାମ୍‍ବୁ ବାଇ ରାଃ ତାଇନ୍ କେନାଏ, ଦୋ ଇନିଃକେ ନେ ଚେତାୱନୀ ନାମ୍‍ଜାନା ଚି, “ନେଲେମ୍, ଅକନ୍ ନାମୁନା ଆମ୍‍କେ ବୁରୁ ରେ ଦେଖାଅ ଲେନା, ଏନ୍‍ଲେକାଗି ସବେନାଃ ବାଇୟାମ୍।” ମେନ୍ଦୋ ଏନ୍ ୟାଜାକ୍ କୋଏତେ ଥିମ୍ବା ମାରାଙ୍ଗ୍ ୟାଜାକ୍ ରାଃ ସେୱା ୟୀଶୁ ମାସୀହ୍ କେ ନାମ୍‍ଜାନା, ଚିୟାଃଚି ଇନିଃ ମାରି ନିୟାମ୍‍ଥଲ୍ ଏତେ ହଗି ଥିମ୍ବା ବୁଗିନ୍ ନିୟାମ୍‍ଥଲ୍ ରାଃ ଥାଲାରେନିଃ ହୋବାଜାନାଏ, ଅକନାଃ ଆଡୋଃଗି ବୁଗିନ୍ କିରିୟା କୋରାଃ ହୋରାତେ ଥୋଲାକାନା। ଚିୟାଃଚି ଆଗାର୍ ଏନ୍ ସିଦା ନିୟାମ୍‍ଥଲ୍ ନିର୍ଦୋଷ୍ ହୋବାଜାନ୍ତେ, ଦୋ ଏଟାଃ ନିୟାମ୍‍ଥଲ୍ ଲାଗିନ୍ ଲାଗାତିଙ୍ଗ୍ କାହୋବାଜାନ୍ତେ। ମେନ୍ଦୋ ପାର୍ମେଶ୍ଵାର୍ ଇନ୍‍କୁୱାଃରେ ଦୋଷ୍ ଲାଗାଅ କେତେ କାଜିୟାକୋତାନାଏ, “ପ୍ରାଭୁ କାଜିତାନାଏ, ନେଲେପେ, ଏନ୍‍କାନ୍ ହୁଲାଙ୍ଗ୍ କୋ ହିଜୁଗା, ଚି ଇଙ୍ଗ୍ ଇସ୍ରାଏଲ୍ ରେନ୍ ଘାରାନା କୋଲୋଃ, ଆଡୋଃ ୟାହୁଦା କୋୱାଃ ଘାରାନା କୋଲୋଃ ନାୱା ନିୟାମ୍‍ଥଲ୍ ଥୋଲେୟାଇଙ୍ଗ୍। ନେୟା ଏନ୍ ନିୟାମ୍‍ଥଲ୍ ଲେକା କାତାଇନା, ଅକନାଃ ଇଙ୍ଗ୍ ଇନ୍‍କୁୱାଃ ଆପୁ-ହାଡ଼ାମ୍ କୋଲୋଃ ଏନ୍ ସାମାୟ୍ ଥୋଲ୍ ଲେଦାଇଙ୍ଗ୍, ଅକୋଇମ୍ତାଙ୍ଗ୍ ଇଙ୍ଗ୍ ଇନ୍‍କୁୱାଃ ତିଈ ସାବ୍ କେତେ ଇନ୍‍କୁକେ ମିଶାର୍ ଦିଶୁମ୍ ଏତେ ଅଡୋଙ୍ଗ୍ ଆଉକେଃ କୋୱାଇଙ୍ଗ୍; ଚିୟାଃଚି ଇନ୍‍କୁ ଇଙ୍ଗ୍ଆଃ ନିୟାମ୍‍ଥଲ୍ ରେ ବାଇକେତେ କାକୋ ତାଇନ୍ ଜାନା, ଏନାମେନ୍ତେ ଇଙ୍ଗ୍ ଇନ୍‍କୁକେ କାଇଙ୍ଗ୍ ନେଲ୍-ହୋରୋ କେଃକୋୱାଇଙ୍ଗ୍; ପ୍ରାଭୁ ନେୟାଗି ମେନ୍ତାନାଏ। ଆଡୋଃଗି ପ୍ରାଭୁ କାଜିୟାଏ, ଚି ଅକନ୍ ନିୟାମ୍‍ଥଲ୍ ଇଙ୍ଗ୍ ଏନ୍ ହୁଲାଙ୍ଗ୍ କୋରାଃ ତାୟୋମ୍ତେ ଇସ୍ରାଏଲ୍ ରେନ୍ ଘାରାନା କୋଲୋଃ ଥୋଲେୟାଇଙ୍ଗ୍, ଏନା ନେୟା ତାନାଃ ଚି ଇଙ୍ଗ୍ ଇଙ୍ଗ୍ଆଃ ଆଇନ୍ କେ ଇନ୍‍କୁୱାଃ ମୋନ୍ ରେ ଦୋହୋୟାଇଙ୍ଗ୍, ଆଡୋଃ ଏନାକେ ଇନ୍‍କୁୱାଃ ହିର୍‍ଦାୟ୍ ରେ ଅଲେୟାଇଙ୍ଗ୍, ଆଡୋଃ ଇଙ୍ଗ୍ ଇନ୍‍କୁୱାଃ ପାର୍ମେଶ୍ଵାର୍ ବାଇୟୋଗାଇଙ୍ଗ୍, ଆଡୋଃ ଇନ୍‍କୁ ଇଙ୍ଗ୍ଆଃ ହୋଡ଼ୋକୋ ହୋବାଅଃୱାକୋ। ଆଡୋଃ ସବେନ୍ ମିପୀହୋଡ଼୍‍କୋ ଆପାନାଃ ଦିଶୁମ୍ ରେନ୍ ହୋଡ଼ୋକୋକେ ଆଡୋଃ ଆପାନାଃ ହାଗାକୋକେ ନେୟା କାକୋ ଶିଖାଅ କୋୱାଃ, ଚି ଆମ୍ ପ୍ରାଭୁ କେ ନେଲ୍ ଉରୁମିମେ, ଚିୟାଃଚି ହୁଡିଙ୍ଗ୍ ଏତେ ମାରାଙ୍ଗ୍ ସାନ୍ ସବେନ୍ କୋ ଇଙ୍ଗ୍‍କେ ସାରିକେୟାକୋ। ଚିୟାଃଚି ଇଙ୍ଗ୍ ଇନ୍‍କୁୱାଃ ଏତ୍କାନାଃ କୋ ଛାମା କୋୱାଇଙ୍ଗ୍, ଆଡୋଃ ଇନ୍‍କୁୱାଃ ପାପ୍ କୋକେ ଆଡୋଃଗି କାଇଙ୍ଗ୍ ପାହୋମେୟା।” ନାୱା ନିୟାମ୍‍ଥଲ୍ କେ ମାଣ୍ଡାଅ ରାଃ ହୋରାତେ ଇନିଃ ପାହିଲା ନିୟାମ୍‍ଥଲ୍ କେ ମାରି କେଦାଏ; ହାର୍ ଅକନ୍ ଜିନିଷ୍ ମାରି ଆଡୋଃ ବାଗ୍‍ଡ଼ାଅ କାନୋଗା ଏନା ଛାଏମାନ୍ କେନୋଗୋ। ଏନ୍ ସିଦା ନିୟାମ୍‍ଥଲ୍ ରେହ ସେୱା ରାଃ ଆନାଚୁକୋ ତାଇକେନା, ଆଡୋଃ ନେଲେକା ପାବିତାର୍ ଜାଗା ତାଇକେନା ଅକନାଃ ନେ ଅତେଦିଶୁମ୍ ରେ ତାଇକେନା। ଚିୟାଃଚି ମିୟାଃ ତାମ୍‍ବୁ ବାଇଲେନା, ତାମ୍‍ବୁ ଭିତାର୍ ରେୟାଃ ଆୟାର୍ ଭାଗ୍ ରେ ଡିବ୍ରି, ଆଡୋଃ ଟେବୁଲ୍, ଆଡୋଃ ପାବିତାର୍ ଦାଣେ ହୋଲୋଙ୍ଗ୍ କୋ ତାଇକେନା; ଆଡୋଃ ଏନା ପାବିତାର୍ ଜାଗା କାଜିଅଃୱା। ତାମ୍‍ବୁ ରେୟାଃ ଏଟାଃ ଭାଗ୍ ପାର୍ଦା ଲିଜାଃ ରାଃ ତାୟୋମ୍ ପାରେ ତାଇକେନା, ଅକନାଃ ସବେନ୍ ଏତେ ପାବିତାର୍ ଜାଗା କାଜିୟୋଃୱା। ଏନାରେ ସୋନା ରାଃ ସୋୱାନ୍ ଧୁୱାନ୍ ବେଦୀ, ଆଡୋଃ ସବେନ୍ ପାଡ଼୍ ସୋନା ଦାଆ ଏତେ ଦାପ୍‍ଲାକାନ୍ ନିୟାମ୍‍ଥଲ୍ ରାଃ ସାନ୍ଦୁକ୍-ବାକ୍ସା ଆଡୋଃ ଏନ୍ ବାକ୍ସା ରେ ମାନ୍ନା ତେ ଫେରେଜାକାନ୍ ସୋନା ରାଃ ଚାଟୁ ଆଡୋଃ ହାରୁନ୍ ରାଃ ସୋଟା ଅକଣ୍ଡେ ବାହା ଯଅ ହୋବାଲେନ୍ ତାଇକେନା ଆଡୋଃ ନିୟାମ୍‍ଥଲ୍ ରାଃ ପାଟା ଦିରି ତାଇକେନା। ସାନ୍ଦୁକ୍ ରାଃ ଚେତାନ୍ ରେ ବାରିୟା ଯୁନୁଲ୍ କାରୁବ୍ କିନ୍ ତାଇକେନା, ଅକନ୍‍କିନ୍ ପାପ୍ କୋରାଃ ହାଲ୍ ଫେରେଃ ରାଃ ଢାକାନା ରେ ଉମ୍ବୁଲ୍ କେତେ ତାଇକେନାକିନ୍, ଇନ୍‍କୁୱାଃ ମିପୀୟାଃ କେତେ କାଜି ଲାଗିନ୍ତେ ନାଆ ସାମାୟ୍ ବାନୋଗା। ନେ ଜିନିଷ୍ କୋ ନେଲେକାତେ ବାଇଜାନା। ଏନ୍ ତାମ୍‍ବୁ ଭିତାର୍ ରେୟାଃ ଆୟାର୍ ଭାଗ୍ ରେ ୟାଜାକ୍ ସବେନ୍ ଇମ୍ତା ବୋଲୋ କେତେ ସେୱା କାମି ପୁରା ରିକାୟାଏ। ମେନ୍ଦୋ ତାମ୍‍ବୁ ଭିତାର୍ ରେୟାଃ ଏଟାଃ ଭାଗ୍ ରେ ଏସ୍କାର୍ ମାରାଙ୍ଗ୍ ୟାଜାକ୍ ଶିର୍ମା ରେ ମିଶା ଭାଇର୍ ସେନାଏ, ଆଡୋଃ ବେଗାର୍ ମାୟୋମ୍ ଇଦିକେତେ କାଏ ସେନାଏ, ଅକନାଃ ଇନିଃ ଆଜାଃ ଲାଗିନ୍ ଆଡୋଃ ହୋଡ଼ୋକୋୱାଃ କାସାରିକେତେ ଭୁଲ୍ ଲାଗିନ୍ ରାକାବେୟାଏ। ନେୟାଏତେ ପାବିତାର୍ ଆତ୍ମା ନେୟାଗି ଦେଖାଅତାନାଏ ଚି ଚିମ୍ତାଙ୍ଗ୍ ସାନ୍ତେ ତାମ୍‍ବୁ ରେୟାଃ ଆୟାର୍ ଭାଗ୍ ତିଙ୍ଗୁ କାନା, ଇମ୍ତାଙ୍ଗ୍ ସାନ୍ତେ ହୋଡ଼ୋକୋ ନାଙ୍ଗ୍ ସବେନ୍ ଏତେ ପାବିତାର୍ ଜାଗା ରାଃ ହୋରା କାଉଦୁବ୍ କାନା। ନେ ତାମ୍‍ବୁ ନାଆ ରାଃ ସାମାୟ୍ ଲାଗିନ୍ ମିୟାଃ ଜୋନୋକା ତାନାଃ; ଅକନାଃ ରେ ନେଲେକାନ୍ ଭେଁଟ୍ ହାର୍ ଦାଣେ ରାକାବୋଃତାନା, ଅକନାଃ ଏତେ ଆରାଧାନା ତାନ୍‍କୋୱାଃ ଆଟ୍‍କାର୍ ଉରୁମ୍ ମୋନ୍ କାଫାର୍ଚି ଧାଡ଼ିୟୋଗା। ଚିୟାଃଚି ଏନାକୋ ଏସ୍କାର୍ ଜୋମ୍ ନୁୱେ ରାଃ ଜିନିଷ୍‍କୋ ଆଡୋଃ ରାକାମ୍-ରାକାମ୍ ରାଃ ଉମେନେନ୍ ମାନାତିଙ୍ଗ୍ ଲୋଃ ହୋଡ଼ମୋ ଆନାଚୁକୋ ତାନାଃ, ଅକନାଃ ସୁଧ୍‍ରାଓ ରାଃ ସାମାୟ୍ ସାନ୍ ଲାଗିନ୍ ଠାହ୍‍ରାଓ କାନା। ମେନ୍ଦୋ ଚିମ୍ତାଙ୍ଗ୍ ମାସୀହ୍ ହିଜୁଃତାନ୍ ବୁଗିନ୍-ବୁଗିନ୍ ଜିନିଷ୍ କୋରାଃ ମାରାଙ୍ଗ୍ ୟାଜାକ୍ ହୋବାକେତେ ହିଜୁଃନାଏ, ଦୋ ଇନିଃ ଆଡୋଃଗି ମାରାଙ୍ଗ୍ ଆଡୋଃ ତେୟାର୍ କାନ୍ ତାମ୍‍ବୁ ହୋରାତେ, ଅକନାଃ ତିଈ ତେ ବାଇକାନ୍ ନାହାଲା ମାନେ ନେତାଃ ରାଃ ସିରିଜାଅକାନ୍ ନାହାଲା, ଆଡୋଃ ମେରୋମ୍ କୋୱାଃ ଆଡୋଃ ବାଛା କୋୱାଃ ମାୟୋମ୍ ଏତେ କାହା ମେନ୍ଦୋ ୟୀଶୁ ଆଜାଃଗି ମାୟୋମ୍ ହୋରାତେ, ମିଶାଗି ସବେନ୍ ଏତେ ପାବିତାର୍ ଜାଗା ରେ ବୋଲୋ ଜାନାଏ ହାର୍ ଜାନାଓ-ଜାନାଓ ରାଃ ଛୋଡ଼ାଓ ନାମ୍ କେଃବୁୱାଏ। ଚିୟାଃଚି ଚିମ୍ତାଙ୍ଗ୍ ମେରୋମ୍ କୋୱାଃ ଆଡୋଃ ଉରିଃ କୋୱାଃ ମାୟୋମ୍ ଆଡୋଃ ବାଛିୟା ରାଃ ତୋରେଃ ଆପାବିତାର୍ ହୋଡ଼ୋକୋୱାଃ ଚେତାନ୍ ରେ ହିର୍ଚି ଜାନ୍ ରେ ହୋଡ଼ମୋ ରାଃ ଫାର୍ଚି ଲାଗିନ୍ତେ ଇନ୍‍କୁକେ ପାବିତାର୍ ତାନାଏ, ଏଣ୍ଡେ ମାସୀହ୍ ରାଃ ମାୟୋମ୍ ଅକନିଃ ଆଏଃ ଆପାନ୍ କେ ଜାନାଓ-ଜାନାଓ ରାଃ ଆତ୍ମା ହୋରାତେ ପାର୍ମେଶ୍ଵାର୍ ରାଃ ନାଡ଼େଏ ନିର୍ଦୋଷ୍ ଦାଣେ ରାକାବ୍ କେଦାଏ, ଆପେୟାଃ ଆଟ୍‍କାର୍ ଉରୁମ୍ ମୋନ୍ କେ ଗୋଜାକାନ୍ତେୟାଃ କାମିକୋଏତେ ଚିନାଃ ମେନ୍ତେ କାଏ ଫାର୍ଚିୟାଏ ଏନାତେ ଆପେ ଜୀହିଃ ପାର୍ମେଶ୍ଵାର୍ ରାଃ ସେୱା ରିକାୟାପେ। ଏନାମେନ୍ତେ ଇନିଜାଃ ଗୋନୋଏଃ ସିଦା ନିୟାମ୍‍ଥଲ୍ ରାଃ ସାମାୟ୍ ରେ ପାପ୍ କୋଏତେ ଛୋଡ଼ାଓ ନାମେ ଲେକାତେ ରିକାଜାନା, ଏନାତେ କେଡ଼ାକାନ୍ ହୋଡ଼ୋକୋ କିରିୟା ହୋରାତେ ଜାନାଓ-ଜାନାଓ ରାଃ ହାନାଟିଙ୍ଗ୍ କୋ ନାମେକା, ମେନ୍ତେ ଇନିଃ ନାୱା ନିୟାମ୍‍ଥଲ୍ ରାଃ ଥାଲାରେନିଃ ତାନିଃ। ଚିୟାଃଚି ଅକ୍ତା ସାମ୍ପାତି ନାମେ ଅନୋଲ୍ ହୋବାକାନା ହେନ୍ତାଃ ଅଲ୍ କେଃ ନିଜାଃ ଗୋନୋଏଃ ହୋବା ଲାଗାତିଙ୍ଗ୍ ତାନାଃ। ନେଲେକାନ୍ ସାମ୍ପାତି ନାମେ ଅନୋଲ୍ ହୋଡ଼ୋକୋୱାଃ ଗୋନୋଏଃ ତାୟୋମ୍ତେ ପୋକ୍ତା ହୋବାୱା, ଚିୟାଃଚି ଚିମିନ୍ ସାନ୍ ଅଲେକେଃନିଃ ଜୀହିଃ ତାଇନାଏ ଇମିନ୍ ସାନ୍ ଏନାରାଃ କାମି ବାନୋଃୱା। ଏନାମେନ୍ତେଗି ସିଦା ନିୟାମ୍‍ଥଲ୍ ହ ବେଗାର୍ ମାୟୋମ୍ ତେ କାଥୋଲ୍ ଜାନା। ଚିୟାଃଚି ମୁଶା ନାବୀ ଚିମ୍ତା ସବେନ୍ ହୋଡ଼ୋକୋକେ ଆଇନ୍ ରାଃ ସବେନ୍ ଆନାଚୁ କୋକେ ଉଦୁବ୍ ଛାବା କେଃକୋୱାଏ, ଏନ୍ତେ ଇନିଃ ବାଛା କୋୱାଃ ଆଡୋଃ ମେରୋମ୍ କୋୱାଃ ମାୟୋମ୍ ଇଦିକେତେ, ଦାଆ ଆଡୋଃ ଆରାଃ ଉବ୍ ଆଡୋଃ ହିସୋପ୍ ଦାରୁ ରାଃ କୋତୋ ଲୋଃ, ଏନ୍ କିତାବ୍ ରେ ଆଡୋଃ ସବେନ୍ ହୋଡ଼ୋକୋ ଚେତାନ୍ ରେ ହିର୍ଚି କେଦାଏ। ଆଡୋଃ କାଜିକେଦାଏ, “ନେୟା ଏନ୍ ନିୟାମ୍‍ଥଲ୍ ରାଃ ମାୟୋମ୍ ତାନାଃ, ଅକନାଃ ରାଃ ଆନାଚୁ ପାର୍ମେଶ୍ଵାର୍ ଆପେ ଲାଗିନ୍ ଏମ୍ କାଦାଏ।” ହାର୍ ଏନ୍‍ଲେକାତେ ଇନିଃ ତାମ୍‍ବୁ ଆଡୋଃ ସେୱା ରିକାରାଃ ସବେନ୍ ଜିନିଷ୍ କୋରେ ମାୟୋମ୍ ହିର୍ଚି କେଦାଏ। ସାର୍ତି ଦୋ ନେୟା ତାନାଃ ଚି ଆଇନ୍ ଲେକାତେ ପ୍ରାୟ୍ ସବେନ୍ ଜିନିଷ୍‍କୋ ମାୟୋମ୍ ହୋରାତେ ଫାର୍ଚି ରିକାଅଃତାନା, ଆଡୋଃ ବେଗାର୍ ମାୟୋମ୍ ଲିଙ୍ଗୀ ପାପ୍ କୋରାଃ ଛାମା ବାନୋଗା। ଏନାମେନ୍ତେ ଲାଗାତିଙ୍ଗ୍ ତାନାଃ ଚି ସିର୍ମାଦିଶୁମ୍ ରେ ମେନାଗା ଜିନିଷ୍‍କୋ ରାଃ ଜୋନୋକା ନେ ଦାଣେ କୋ ହୋରାତେ ଫାର୍ଚି ହୋବାଅଃକା, ମେନ୍ଦୋ ସିର୍ମାଦିଶୁମ୍ ରେ ତାଇନ୍ ଜିନିଷ୍‍କୋ ନେୟାଏତେ ବୁଗିନ୍ ଦାଣେ କୋୱାଃ ହୋରାତେ ଫାର୍ଚି ଲାଗାତିଙ୍ଗ୍ଆ। ଚିୟାଃଚି ମାସୀହ୍ ଏନ୍ ତିଈ ତେ ବାଇକାନ୍ ମାରାଙ୍ଗ୍ ପାବିତାର୍ ଜାଗା ରେ କାଏ ବୋଲୋଜାନାଏ, ଅକନାଃ ଚି ସାର୍ତି ପାବିତାର୍ ଜାଗା ରାଃ ମିୟାଃ ଜୋନୋକା ତାନାଃ, ମେନ୍ଦୋ ସିର୍ମାଦିଶୁମ୍ ରେଗି ବୋଲୋଜାନାଏ, ଏନାତେ ଆବୁମାନ୍ କୋଲାଗିନ୍ ନାଆ ପାର୍ମେଶ୍ଵାର୍ ନାଡ଼େଏ ରେ ନେଲୋଗାଏ। ନେୟା କାହା ଚି ଇନିଃ ଆଏଃ ଆପାନ୍ କେ ଘାରି-ଘାରି ରାକାବେୟାଏ, ଜେଲେକା ମାରାଙ୍ଗ୍ ୟାଜାକ୍ ସବେନ୍ ଶିର୍ମା ରେ ଏଟାଃ କୋୱାଃ ମାୟୋମ୍ ଇଦିକେତେ ସବେନ୍ ଏତେ ପାବିତାର୍ ଜାଗା ରେ ବୋଲୋୱାଏ। ନେକାରେଦୋ ଅତେଦିଶୁମ୍ ରାଃ ସିର୍ଜାଅ ଏତେ ଇନିଃକେ ଘାରି-ଘାରି ଦୁକୁ ସାହାଅ ଲାଗାତିଙ୍ଗ୍ଅଃତେ। ମେନ୍ଦୋ ନାଆ ଯୁଗ୍ ରାଃ ଟୁଣ୍ଡୁ ରେ ଇନିଃ ମିଶାଗି ନେଲ୍ ଜାନାଏ, ଏନାତେ ଆଜାଃଗି ଦାଣେ ଏମ୍ ରାଃ ହୋରାତେ ପାପ୍ କେ ଆତୋମ୍ କେୟାଏ। ଆଡୋଃ ଜେଲେକା ହୋଡ଼ୋକୋ ଲାଗିନ୍ ମିଶା ଗୋଜୋଃ ହୋବାଅଃୱା ଏନା ଦୋହୋକାନା ଆଡୋଃ ଏନା ତାୟୋମ୍ତେ ବିଚାର୍ ହୋବାଅଃୱା। ଏନ୍ ଲେକାଗି ମାସୀହ୍ ହ ପୁରାଃଗି ହୋଡ଼ୋକୋୱାଃ ପାପ୍ କୋକେ ଗୋଅ ଇଦି ଲାଗିନ୍ ମିଶାଗି ଦାଣେ ଜାନାଏ; ଏନ୍ତେ ଆଡୋଃ-ମିଶା ପାପ୍ ଗୋଅ ଲାଗିନ୍ତେ କାହା ମେନ୍ଦୋ ଅକନ୍ ହୋଡ଼ୋକୋ ଆଏଃ କେ ନେଲ୍ ହୋରା ତାନାକୋ ଇନ୍‍କୁକେ ବାଞ୍ଚାଅ ଲାଗିନ୍ତେ ନେଲୋଗାଏ। ମୁଶା ନାବୀ ରାଃ ଆଇନ୍ ହିଜୁଃତାନ୍ ବୁଗିନ୍ ଜିନିଷ୍ କୋରାଃ ଉମ୍ବୁଲ୍ ତାନାଃ ମେନ୍ଦୋ ଏନାରାଃ ସାର୍ତି ଜିନିଷ୍ ନାହାଲା, ଏନାମେନ୍ତେ ଏନ୍ ମିୟାଃ ଲେକାନାଃ ଦାଣେ ରାଃ ହୋରାତେ ଅକନାଃ ସବେନ୍ ଶିର୍ମା ରାକାବୋଃ ତାନା, ପାର୍ମେଶ୍ଵାର୍ ରାଃ ନାଡ଼େଏ ହିଜୁଃତାନ୍ କୋକେ ଚିଉଲା ହ ପୁରାତେ ତେୟାର୍ କାଏ ଧାଡ଼ିୟା। କାରେଦୋ ଇନ୍‍କୁୱାଃ ଦାଣେ ରାକାବ୍ ତେୟାଃ ବାନ୍ଦ୍ କାହୋବାଜାନ୍ତେ? ଏନାମେନ୍ତେ ଚିମ୍ତା ଆରାଧାନା ତାନ୍ ନିଈ ମିଶା ରେଗି ଫାର୍ଚି ହୋବାଅଃତେ, ଏଣ୍ଡେ ଇନ୍‍କୁୱାଃ ଆଟ୍‍କାର୍ ଉରୁମ୍ ମୋନ୍ ଇନିଃକେ ପାପୀ କାଏ ବାଇତେୟାଃଏ। ମେନ୍ଦୋ ଏନ୍ ଦାଣେ କୋରାଃ ହୋରାତେ ସବେନ୍ ଶିର୍ମା ପାପ୍ କୋରାଃ ପାହୋମ୍ ହିଜୁଃୱା। ଚିୟାଃଚି ନେୟା ହୋବାଗି କାଧାଡ଼ିଅଃୱା ଚି ଉରିଃ ହାର୍ ମେରୋମ୍ କୋୱାଃ ମାୟୋମ୍ ପାପ୍ କୋକେ ଆତୋମେୟାଏ। ଏନାମେନ୍ତେ ମାସୀହ୍ ଅତେଦିଶୁମ୍ ରେ ହିଜୁଃ ସାମାୟ୍ ରେ ଆପୁ ପାର୍ମେଶ୍ଵାର୍ କେ କାଜିତାନାଏ, “ଦାଣେ ହାର୍ ଭେଁଟ୍ ଆମ୍ କାମ୍ ସାନାଙ୍ଗ୍ କେଦା, ମେନ୍ଦୋ ଇଙ୍ଗ୍‍କେ ମିୟାଃ ହୋଡ଼ମୋ ବାଇକେଦାମ୍ ଚି ଆମ୍ କେ ଦାଣେ ରାକାବେୟାଇଙ୍ଗ୍। ପାଶୁ ଦାଣେ ହାର୍ ପାପ୍ ଦାଣେ ତେ ଆମ୍ କାମ୍ ସୁକୁଜାନା। ଇମ୍ତାଙ୍ଗ୍ ଇଙ୍ଗ୍ କାଜିକେଦାଇଙ୍ଗ୍, ‘ନେଲେମ୍, ଇଙ୍ଗ୍ ହିଜୁଃ ଜାନାଇଙ୍ଗ୍, ପାବିତାର୍ ପୁଥି ରେ ଇଙ୍ଗ୍ଆଃ ବିଷାୟ୍ ରେ ଅଲାକାନା, ଏନାତେ ହେ ପାର୍ମେଶ୍ଵାର୍ ଆମାଃ ସାନାଙ୍ଗ୍ କେ ପୁରାୟାଇଙ୍ଗ୍।’ ” ସିଦା ଦୋ ଇନିଃ କାଜିକେଦାଏ, “ଆମ୍ ଦାଣେ କୋ ହାର୍ ଭେଁଟ୍ କୋ ହାର୍ ପାଶୁ ଦାଣେ କୋ ହାର୍ ପାପ୍ ଦାଣେ କୋ କାମ୍ ସାନାଙ୍ଗ୍ କେଦାମ୍ ହାର୍ ନାଦୋ ଏନାକୋଏତେ ସୁକୁ ଜାନାମ୍,” ନେ ଦାଣେ କୋଦୋ ମୁଶା ନାବୀ ରାଃ ଆଇନ୍ ଲେକାତେ ରାକାବୋଃ ତାନା। ଏନ୍ତେ ଇନିଃ କାଜିତାନାଏ, “ନେଲେମ୍ ଇଙ୍ଗ୍ ହିଜୁଃ କାନାଇଙ୍ଗ୍, ଏନାତେ ଆମାଃ ସାନାଙ୍ଗ୍ କେ ପୁରାୟାଇଙ୍ଗ୍,” ନେଲେକାତେ ଇନିଃ ସିଦା ତେୟାଃକେ ଆତୋମ୍ ତାନାଏ, ଏନ୍ତାଃରେ ଏଟାଃ ତେୟାଃକେ ତିଙ୍ଗୁୟାଏ। ଏନ୍ ସାନାଙ୍ଗ୍ ରାଃ ହୋରାତେ ଆବୁ ୟୀଶୁ ମାସୀହ୍ ରାଃ ଆୟାଃ ହୋଡ଼ମୋ କେ ମିଶାଗି ଦାଣେ ରାକାବ୍ ରାଃ ହୋରାତେ ପାବିତାର୍ କାନାବୁ। ସବେନ୍ ୟାହୁଦୀ ୟାଜାକ୍ ତିଙ୍ଗୁ କେତେ ସବେନ୍ ହୁଲାଙ୍ଗ୍ ସେୱା ୟାଏ, ହାର୍ ମିଃ ଲେକାନାଃ ଦାଣେ କେ ଅକନାଃ ପାପ୍ କୋକେ ଚିଉଲା ହ କାଏ ଆତୋମ୍ ଧାଡ଼ିୟା ଘାରି-ଘାରି ରାକାବେୟାଏ। ମେନ୍ଦୋ ମାସୀହ୍ ପାପ୍ ରାଃ ବାଦ୍‍ଲା ରେ ମିୟାଃ ଗି ଦାଣେ ସବେନ୍ ହୁଲାଙ୍ଗ୍ ଲାଗିନ୍ ରାକାବ୍ କେତେ ପାର୍ମେଶ୍ଵାର୍ ରାଃ ଜୋମ୍ ପାଡ଼୍ ସେନ୍ ଦୁବ୍‍ଜାନାଏ, ଆଡୋଃ ଏନ୍ ସାମାୟ୍ ଏତେଗି ନେୟା ନେଲ୍ ହୋରା ତାନାଏ ଚି, ଇନିଜାଃ ବାଇରୀକୋ ଇନିଜାଃ କାଟା ଲାଥାର୍ ରେନ୍ ଗାଣ୍ଡୁ ବାଇୟେନ୍ କାକୋ। ଚିୟାଃଚି ଇନିଃ ମିଶାଗି ରାକାବ୍ ରାଃ ହୋରାତେ ଇନ୍‍କୁକେ ଅକନ୍‍କୋ ପାବିତାର୍‍ଅଃ ତାନାକୋ ସବେନ୍ ହୁଲାଙ୍ଗ୍ ଲାଗିନ୍ ତେୟାର୍ କେଃକୋୱାଏ। ଆଡୋଃ ପାବିତାର୍ ଆତ୍ମା ହଗି ନେୟା ଗୋୱା ଏମ୍ ତାନାଏ; ଚିୟାଃଚି ଇନିଃ ସିଦାରେ ଗି କାଜିଲେଃ ତାଇନାଏ, “ପ୍ରାଭୁ କାଜି ତାନାଏ ଚି ଅକନ୍ ନିୟାମ୍‍ଥଲ୍ ଇଙ୍ଗ୍ ଏନ୍ ହୁଲାଙ୍ଗ୍ ରାଃ ତାୟୋମ୍ତେ ଇନ୍‍କୁ ଲୋଃ ଥୋଲେୟାଇଙ୍ଗ୍ ଏନା ନେୟା ତାନାଃ ଚି ଇଙ୍ଗ୍ ଇଙ୍ଗ୍ଆଃ ନିୟାମ୍ କୋକେ ଇନ୍‍କୁୱାଃ ହିର୍‍ଦାୟ୍ ରେ ଅଲେୟାଇଙ୍ଗ୍ ଆଡୋଃ ଇନ୍‍କୁୱାଃ ମୋନ୍ କୋରେ ଦୋହୋୟାଇଙ୍ଗ୍।” ଏନ୍ତେ ନେୟା କାଜିୟାଏ, “ଇଙ୍ଗ୍ ଇନ୍‍କୁୱାଃ ପାପ୍ କୋକେ ଆଡୋଃ ଇନ୍‍କୁୱାଃ ଆଧାର୍ମ୍ ରେୟାଃ କାମି କୋକେ ହାଡୋଃ ଚିଉଲାଅ କାଇଙ୍ଗ୍ ପାହୋମେୟା।” ଆଡୋଃ ଚିମ୍ତାଙ୍ଗ୍ ଇନ୍‍କୁକେ ଛାମା ନାମ୍ ଜାନା ଦୋ ଆଡୋଃ ପାପ୍ ଲାଗିନ୍ତେ ଦାଣେ ରାକାବ୍ ବାନୋଃୱା। ଏନାମେନ୍ତେ ହେ ହାଗାକୋ, ଚିମ୍ତାଙ୍ଗ୍ ଆବୁକେ ୟୀଶୁ ଆଃ ମାୟୋମ୍ ହୋରାତେ ଏନ୍ ନାୱା ହାର୍ ଜୀନିଃ ହୋରା ହୋବାକେତେ ସବେନ୍ ଏତେ ପାବିତାର୍ ଜାଗା ରେ ବୋଲୋ ଲାଗିନ୍ତେ ସାହାସ୍ ହୋବାକାନା। ଅକନାଃ ଇନିଃ ପାର୍ଦା ହୋବାକେତେ ମାନେ ଆଜାଃ ହୋଡ଼ମୋ ରାଃ ହୋରାତେ ଆବୁ ଲାଗିନ୍ ଖୋଲାଅ କେଦାଏ। ଆଡୋଃ ନେୟାମେନ୍ତେ ଚି ଆବୁୱାଃ ନେକା ମାରାଙ୍ଗ୍ ୟାଜାକ୍ ତାନିଃ, ଅକନିଃ ପାର୍ମେଶ୍ଵାର୍ ରାଃ ଅଡ଼୍ଆଃ ରେନ୍ ଆଧିକାରୀ ତାନିଃ। ଦୋ ହିଜୁଃପେ, ଆବୁ ସାର୍ତି ମୋନ୍ ତେ ଆଡୋଃ ପୁରା ବିଶ୍ଵାସ୍ ଲୋଃତେ, ଆଡୋଃ ଆଟ୍‍କାର୍ ଉରୁମ୍ ମୋନ୍ ରେୟାଃ ଦୋଷ୍ କେ ଆତୋମ୍ ଲାଗିନ୍ ହିର୍‍ଦାୟ୍ ରେ ହିର୍ଚିଏନ୍ କେତେ, ଆଡୋଃ ହୋଡ଼ମୋ କେ ଫାର୍ଚି ଦାଆ ତେ ଆବୁଙ୍ଗ୍ କେତେ ପାର୍ମେଶ୍ଵାର୍ ରାଃ ନାଡ଼େଏ ସେନାବୁ। ହିଜୁଃପେ ଆବୁ ଆବୁୱାଃ ଆଶ୍ରା ରେୟାଃ ମାନାତିଙ୍ଗ୍ କାଜି କେ କେଟେଃ ତେବୁ ସାବାକାଃ, ଚିୟାଃଚି ଅକଏ କିରିୟା ଏମା କାଦାଏ ଇନିଃ ବିଶ୍ଵାସେ ଲେକାନିଃ ତାନିଃ; ଆଡୋଃ ଦୁଲାଡ଼୍ ହାର୍ ବୁଗିନ୍ କାମି ରେ ଟିହରାଓ ଲାଗିନ୍ ଆବୁ ମିହୋଡ଼୍ ଏଟାଃନିଃ ଲାଗିନ୍ ବିଚାରେ କାବୁ, ଆଡୋଃ ମିହୋଡ଼୍ ଏଟାଃନିଃ ଲୋଃ ମିଃତାଃ ହୁଣ୍ଡିଏନ୍ ଆଲୋକାବୁ ବାଗେକା, ଜେଲେକା ଚି ଚିମିନାଙ୍ଗ୍ କୋ ରିକାତାନ୍ ଗିୟାକୋ, ମେନ୍ଦୋ ମିହୋଡ଼୍ ଏଟାଃନିଃ କେ ବୁଝାଅ କାତେକୋପେ, ଆଡୋଃ ଜେଲେକା-ଜେଲେକା ଏନ୍ ହୁଲାଙ୍ଗ୍ କେ ନାଡ଼େଏ ହିଜୁଃତାନ୍ ନେଲେୟାପେ ଏନ୍‍ଲେକା-ଏନ୍‍ଲେକା ଆଡୋଃଗି ଥିମ୍ବାତେ ନେୟା ରିକାଏପେ। ଚିୟାଃଚି ସାର୍ତି କେ ସାରିଜାନ୍ ରାଃ ତାୟୋମ୍ତେ ଆଗାର୍ ଆବୁ ସାରି-ସାରି ପାପ୍ କାତେୟାବୁ, ଏଣ୍ତେ ପାପ୍‍କୋ ଲାଗିନ୍ ଆଡୋଃ ଜାହାନ୍ ଦାଣେ ବାକି ବାନୋଃୱା। ମେନ୍ଦୋ ହାଁ, ବୋରୋୱାନ୍ ଦାଣ୍ଡ୍ ନାମେ କେ ନେଲ୍ ହୋରା ଆଡୋଃ ସେଙ୍ଗେଲ୍ ରାଃ ଯୁନୁଲ୍ ବାକି ମେନାଃ, ଅକନାଃ ବିରୋଧୀ କୋକେ ରୋଙ୍ଗୋ ତାକୋୱାଏ। ଚିମ୍ତାଙ୍ଗ୍ ଜେତାଏ ମୁଶା ନାବୀ ରାଃ ଆଇନ୍ କେ କାମାନାତିଙ୍ଗ୍ ତାନ୍ ନିଃ ଦାୟା କାଏ ନାମେୟାଏ, ହାର୍ ବାର୍ହୋଡ଼୍ ଚାହେ ଆପି ହୋଡ଼ ଗୋୱା ତାଇନୋଃ ରେଦୋ ଗୋଜୋଃ ୱାଏ, ଏଣ୍ତେ ଅକନିଃ ପାର୍ମେଶ୍ଵାର୍ ରାଃ ହୋନ୍ କେ କାଟା କୋରେ ତିକା ସେରେଦ୍ ନିଃ ଆଡୋଃ ନିୟାମ୍‍ଥଲ୍ ରାଃ ମାୟୋମ୍ କେ, ଅକନାଃ ଏତେ ଇନିଃ ପାବିତାର୍ ବାଇଲେନ୍ ତାଇକେନାଏ, ଏନାକେ ଆପାବିତାର୍ ଆଟ୍‍କାରେ ନିଃ, ହାର୍ ଆନୁଗ୍ରାହ୍ ରାଃ ଆତ୍ମା କେ ଆପ୍‍ମାନ୍ ରିକାଏ ନିଃ, ଚିମିନାଙ୍ଗ୍ ଥିମ୍ବା ଦାଣ୍ଡ୍ ନାମେ ନିଃ ବାଇୟୋଗାଏ; ଏନା ପାହୋମ୍ ଲେପେ? ଚିୟାଃଚି ଆବୁ ଇନିଃକେ ସାରିକାଇଜାବୁ, ଅକନିଃ କାଜିକାଦାଏ, “ବାଦ୍‍ଲି ଇଦି ଇଙ୍ଗ୍ଆଃ କାମି ତାନାଃ, ଇଙ୍ଗ୍ ଗି ବାଦ୍‍ଲା ଇଦିୟାଇଙ୍ଗ୍।” ଆଡୋଃଗି ନେୟା, ଚି “ପ୍ରାଭୁ ଆଜାଃ ହୋଡ଼ୋକୋୱାଃ ନ୍ୟାୟ ରିକାୟାଏ।” ଜୀହିଦ୍ ପାର୍ମେଶ୍ଵାର୍ ରାଃ ତିଈ ରେ ଉୟୁଗେନ୍ ବୋରୋୱାନ୍ କାଜି ତାନାଃ। ମେନ୍ଦୋ ଏନ୍ ସିଦା ହୁଲାଙ୍ଗ୍ କୋକେ ପାହୋମେପେ, ଅକନାଃ ରେ ଆପେ ମାସ୍କାଲ୍ ନାମ୍ କେତେ ଦୁକୁ ତାନ୍ ଇମ୍ତାରେୟାଃ ମାରାଙ୍ଗ୍ ଲାଡ଼ାଇ ରେ ବାଇକେତେ ତାଇଲେନାପେ। ମିଶା-ମିଶା ଦୋ ନେଲେକା ଚି ଆପେ ନିନ୍ଦା ହାର୍ ଦୁକୁ ସାହାତିଙ୍ଗ୍ ତାନ୍ ଲୋଃ ଲାନ୍ଦାଅଃ ନାଙ୍ଗ୍ ବାଇଜାନାପେ, ଆଡୋଃ ଏଟାଃ ଇମ୍ତା ରେ ନେକା ଚି ଆପେ ଏନ୍‍ଲେକାନ୍ ସେସେନ୍ କୋୱାଃ ଗାତି ହୋବାଜାନାପେ ଅକନ୍ କୋକେ ନେକା ରିକାଅଃ ତାଇନା। ଚିୟାଃଚି ଆପେ କୈଦୀ କୋଲୋଃ ଦୁକୁତାନ୍ ରେ ଦୁକୁ ଜାନାପେ, ହାର୍ ଆପେୟାଃ ସାମ୍ପାତି କେହ ରାଶିକା ତେ ରେଏଃ ଇଦି ରିକା କେଦାପେ; ଏନା ନେୟା ଆଟ୍‍କାର୍ କେତେ ଚି ଆପେୟାଃ ତାଃ ମିୟାଃ ଆଡୋଃଗି ବୁଗିନ୍ ହାର୍ ସବେନ୍ ହୁଲାଙ୍ଗ୍ ତାଇନୋଃ ତେୟାଃ ସାମ୍ପାତି ମେନାଃ। ଏନାମେନ୍ତେ ଆପାନାଃ ସାହାସ୍ ଆଲୋପେ ବାଗେୟା ଚିୟାଃଚି ଏନାକୋରାଃ ଯଅ ମାରାଙ୍ଗ୍ ମେନାଃ। ଚିୟାଃଚି ଆପେକେ ସାହାତିଙ୍ଗ୍ ଲାଗାତିଙ୍ଗ୍ ତାନାଃ, ଏନାତେ ପାର୍ମେଶ୍ଵାର୍ ରାଃ ସାନାଙ୍ଗ୍ କେ ପୁରା କେତେ ଆପେ କିରିୟା କାଜି ରାଃ ଯଅ ନାମେୟାପେ। “ଚିୟାଃଚି ନାଆ ହୁଡିଙ୍ଗ୍ ଏତେ ହୁଡିଙ୍ଗ୍ ସାମାୟ୍ ତାଇଜାନା, ହିଜୁଃନିଃ ହିଜୁଗାଏ ଆଡୋଃ କାଏ ଦେରିୟାଏ। ମେନ୍ଦୋ ଇଙ୍ଗ୍ଆଃ ଧାର୍ମୀ ହୋଡ଼ ବିଶ୍ଵାସ୍ ତେ ଜୀହିଃ ତାଇନାଏ, ହାର୍ ଆଗାର୍ ଇନିଃ ଇଙ୍ଗ୍ଆଃ ଚେତାନ୍ ରେ ବିଶ୍ଵାସ୍ ବାଗିତାଃ ରେଦୋ ଇଙ୍ଗ୍ଆଃ ମୋନ୍ ଇନିଃରେ କାଏ ସୁକୁଅଗା।” ମେନ୍ଦୋ ଆଲେ ବିଶ୍ଵାସ୍ ବାଗେ କେତେ ନାଶୋଃ ହୋଡ଼ୋକୋ ନାହାଲାଲେ, ମେନ୍ଦୋ ବିଶ୍ଵାସ୍ ତାନ୍ ହୋଡ଼ୋକୋ ହାର୍ ଏନାତେ ଜୀଉ ବାଞ୍ଚାଅ ନାମେକୋ ତାନ୍‍ଲେ। ନାଆ ବିଶ୍ଵାସ୍ ଦୋ ଆଶ୍ରାକାନ୍ ତେୟାଃ ଜିନିଷ୍ ରାଃ ପୋକ୍ତା ଆଡୋଃ କାନେଲ୍ କାନ୍ ତେୟାଃ ଜିନିଷ୍ ରାଃ ଆଟ୍‍କାର୍ ଉରୁମ୍ ତାନାଃ। ନେୟା କୋରାଃ ବିଷାୟ୍ ରେଗି ସିଦା ରେନ୍ ହାଡ଼ାମ୍ ହୋଡ଼ୋକୋୱାଃ ବୁଗିନ୍ ଗୋୱା ଏମାକାନା। ବିଶ୍ଵାସ୍ ତେଗି ଆବୁ ସାରିତାନାବୁ ଚି ସବେନ୍ ଅତେଦିଶୁମ୍ ପାର୍ମେଶ୍ଵାର୍ ରାଃ ବାଚାନ୍ ତେଗି ବାଇୟାକାନା। ଏନାମେନ୍ତେ ଅକନାଃକୋ ନେଲୋଃ ତାନା, ଏନା ନେଲାକାନ୍ ତେୟାଃ ଜିନିଷ୍ କୋଏତେ କାବାଇକାନା। ବିଶ୍ଵାସ୍ ତେଗି ହାବିଲ୍ ଆଜାଃ ହାଗା କୈନ୍ ଏତେ ହଗି ବୁଗିନ୍ ଦାଣେ ପାର୍ମେଶ୍ଵାର୍ ନାଙ୍ଗ୍ ରାକାବ୍ କେଦାଏ, ଆଡୋଃ ଏନା ହୋରାତେ ଧାର୍ମୀ ହୋଡ଼ ହୋବାନାଏ ମେନ୍ତେ ଗୋୱା ଏମ୍ ଜାନା, ଚିୟାଃଚି ପାର୍ମେଶ୍ଵାର୍ ଇନିଜାଃ ଦାଣେ ବିଷାୟ୍ ରେ ଗୋୱା ଏମ୍‍କେଦାଏ; ଆଡୋଃ ଇନିଃ ଗୋଏଃୟାନ୍ ରେହ ଏନାରାଃ ହୋରାତେ ନାଆ ସାନ୍ତେ ଆବୁ ଲୋଃ ବାକାଣ୍ ତାନାଏ। ବିଶ୍ଵାସ୍ ତେଗି ହାନୋକ୍ ଗୋନୋଏଃ ଆଲୋ ନେଲେକାଏ ମେନ୍ତେ ଇଦି ଜାନାଏ ଆଡୋଃ କାଏ ନାମ୍‍ଜାନା ଚିୟାଃଚି ପାର୍ମେଶ୍ଵାର୍ ଇନିଃକେ ଉଠାଓ ଇଦିକିଜାଏ ଆଡୋଃ ଇନିଃକେ ଉଠାଓ ଜାନ୍ ସିଦାରେ ଇନିଜାଃ ନେ ଗୋୱା ଏମ୍ ଲେନା ଚି ଆମ୍‍କେ ପାର୍ମେଶ୍ଵାର୍ ସୁକୁମେତାନାଏ। ଆଡୋଃ କାବିଶ୍ଵାସ୍‍ତାନ୍ କୋକେ ଇନିଃ କାଏ ସୁକୁୱାକୋୱା; ଚିୟାଃଚି ପାର୍ମେଶ୍ଵାର୍ ମେନାଇୟା, ହାର୍ ଆଏଃକେ ସାଙ୍ଗାରିତାନ୍ କୋକେ ଯଅ ଏମାକୋୱାଏ ମେନ୍ତେ ବିଶ୍ଵାସେ ଲାଗାତିଙ୍ଗ୍ଆ। ବିଶ୍ଵାସ୍ ତେଗି ନୁହ୍ ଏନ୍ କାଜିକୋ ବିଷାୟ୍ ରେ ଅକନାଃ ଏନ୍ ସାମାୟ୍ କାନେଲୋଃ ତାଇନା, ଏନାରାଃ ଚେତାଓ ନାମ୍ କେତେ ପାର୍ମେଶ୍ଵାର୍ ରାଃ ଆଚୁ ମାନାତିଙ୍ଗ୍ ତାନ୍ ଲୋଃ ଆଜାଃ ଅଡ଼୍ଆଃ ରେନ୍ କୋକେ ବାଞ୍ଚାଅ ଲାଗିନ୍ ଜାହାଜ୍ ବାଇକେଦାଏ, ହାର୍ ଆଜାଃ ବିଶ୍ଵାସ୍ ହୋରାତେ ଅତେଦିଶୁମ୍ ରେନ୍ କୋକେ ଦୋଷୀ ବାଇକେଃକୋୱାଏ, ଆଡୋଃ ଏନ୍ ଧାର୍ମୀ ହୋଡ଼ ରାଃ ହାନାଟିଙ୍ଗ୍ ନାମ୍ କେଦାଏ ଅକନାଃ ବିଶ୍ଵାସ୍ ଲେରେ ନାମୋଃୱା। ବିଶ୍ଵାସ୍ ତେଗି ଆବ୍ରାହାମ୍ ଚିମ୍ତାଙ୍ଗ୍ କେଡ଼ା ଜାନାଏ ଦୋ ଆନାଚୁ ମାନାତିଙ୍ଗ୍ କେତେ ନେକାନ୍ ଜାଗା ପାଡ଼୍ ସେନୋଃ ଜାନାଏ ଅକନାଃ ଇନିଃ ହାନାଟିଙ୍ଗ୍ ନାଙ୍ଗ୍ ନାମେ ରାଃ ତାଇକେନାଏ, ହାର୍ ନେୟାହ କାଏ ସାରିତାଇନାଏ ଚି ଅକ୍ତେ ସେନୋଃୱାଏ ଏଣ୍ଡେୟ ଅଡୋଙ୍ଗ୍ ଜାନାଏ। ବିଶ୍ଵାସ୍ ତେଗି ଇନିଃ କିରିୟା ଏମାକାନ୍ ଦିଶୁମ୍ ରେ, ଏଟାଃ ଦିଶୁମ୍ ରେନିଃ ଲେକା, ତାଇନ୍ କେତେ ଇସାହାକ୍ ଆଡୋଃ ୟାକୁବ୍ ଲୋଃ ଅକନ୍ କିନ୍ ଇନିଃ ଲୋଃ ଏନ୍ କିରିୟା ଏମାକାନ୍ ତେୟାଃ ରାଃ ହାନାଟିଙ୍ଗ୍ ନାମେକିନ୍ ତାଇକେନା, ଇନ୍‍କିନ୍ ଲୋଃ ତାମ୍‍ବୁ କୋରେ ତାଇନ୍ ତାଇକେନାଏ। ଚିୟାଃଚି ଇନିଃ ଏନ୍ ବାଇକାକାନ୍ ହାତୁ କେ ନେଲ୍ ହୋରା ତାଇକେନାଏ ଅକନାଃ ରାଃ ନାହି ମେନାଃ ଆଡୋଃ ଏନାକେ ଦୋହୋନିଃ ହାର୍ ବାବାଇନିଃ ପାର୍ମେଶ୍ଵାର୍ ତାନିଃ। ବିଶ୍ଵାସ୍ ତେଗି ସାରା ହୋନ୍ ଜାନାମେ ରାଃ ସାମାୟ୍ ସେନୋଃ ଜାନ୍ ରେହଗି ହୋନ୍ ଜାନାମେ ରାଃ ପେଡ଼େଏ ନାମ୍ କେଦାଏ, ଚିୟାଃଚି ଇନିଃ କିରିୟା ଏମେନିଃକେ ବିଶ୍ଵାସେ ଲେକାନିଃ ତାନିଃ ଆଟ୍‍କାର୍ କିଜାଏ। ଏନାମେନ୍ତେ ଆବ୍ରାହାମ୍ ଅକନିଃ ହୋନ୍ ଜାନାମେ କେ ନେଲେ ରେ ଥିମ୍ବାଗି ହାଡ଼ାମ୍ ଲେନ୍ ତାଇନାଏ, ଏନ୍ ମିହୋଡ଼୍ ହୋଡ଼ ତେଗି ରିମିଲ୍‍ଦିଶୁମ୍ ରେନ୍ ଇପିଲ୍ କୋ ଲେକା ଆଡୋଃ ସାମୁଦାର୍ ରେ ଫେରେଃକାନ୍ ଗିତିଲ୍ ଲେକା କାହିସାବ୍ ଧାଡ଼ି ଲେକା ବାଂଶ୍ ହୋବାୟାନାକୋ। ନେ ସବେନ୍ କୋ ବିଶ୍ଵାସ୍ ରେ ଗୋଏଃ ଜାନାକୋ; ଆଡୋଃ ଇନ୍‍କୁ କିରିୟାକାନ୍ ଜିନିଷ୍ କୋ କାକୋ ନାମ୍ କେଦା, ମେନ୍ଦୋ ଇନ୍‍କୁ ସାଙ୍ଗିନ୍ ଏତେଗି ନେଲ୍‍କେତେ ରାଶିକା ଜାନାକୋ ହାର୍ ମାନାତିଙ୍ଗ୍ କେଦାକୋ ଚି ଆବୁ ଅତେ ରେ ଏଟାଃ ଦିଶୁମ୍ ରେନ୍ କୋ ଲେକା ଆଡୋଃ ହୁଡିଙ୍ଗ୍ ସାମାୟ୍ (ରେନ୍ କୁପୁଲ୍ କୋ ଲେକା) ତାନ୍‍ବୁ। ଅକନ୍‍କୋ ନେକା କାଜି କାଜିୟାକୋ ଇନ୍‍କୁ ନେୟା ଉଦୁବ୍ ତାନାକୋ ଚି ଆକୋ ଆପାନାଃ ଦିଶୁମ୍ କେଗି ସାଙ୍ଗାର୍ ତାନାକୋ। ଆଡୋଃ ଅକନ୍ ଦିଶୁମ୍ ଏତେ ଇନ୍‍କୁ ଅଡୋଙ୍ଗ୍ କେତେ ହିଜୁଃ ଲେନାକୋ, ଆଗାର୍ ଏନ୍ ଦିଶୁମ୍ କେ ବିଚାରେ ତେକୋ ରେଦୋ ଇନ୍‍କୁ ରୁଆଡ଼େ ରାଃ ହୋରାକୋ ନାମେ ତେୟାଃକୋ ହୋନାଙ୍ଗ୍। ମେନ୍ଦୋ ଇନ୍‍କୁ ମିୟାଃ ବୁଗିନ୍ ମାନେ ସିର୍ମାଦିଶୁମ୍ କେ ନାମ୍ ସାନାଙ୍ଗ୍ ତାନାକୋ; ଏନାମେନ୍ତେ ପାର୍ମେଶ୍ଵାର୍ “ଆଇଙ୍ଗ୍ ଇନ୍‍କୁୱାଃ ପାର୍ମେଶ୍ଵାର୍ ମେନ୍ତେ କାଜିୟୋଃ ନାଙ୍ଗ୍ କାଇଙ୍ଗ୍ ଗିୟୁଗୋଃତାନା,” ଚିୟାଃଚି ଇନିଃ ଇନ୍‍କୁ ଲାଗିନ୍ତେ ମିୟାଃ ସାହାର୍ ବାଇକାଦାଏ। ବିଶ୍ଵାସ୍ ତେଗି ଆବ୍ରାହାମ୍ ହଗି ପାର୍ଖାଅ ଇମ୍ତାଙ୍ଗ୍, ଇସାହାକ୍ କେ ଦାଣେ ରାକାବ୍ କିଜାଏ; ଆଏଃକେ କିରିୟା କାଜି ନାମ୍ ଲେନା ହାର୍ କାଜିଲେନା ଚି “ଇସାହାକ୍ ଏତେ ଗି ଆମାଃ କିଲି ନୁତୁମୋଃୱାକୋ” ଏନାରେହଗି ଆଏଃ ଆୟାଃ ମିୟାଃଗି ହୋନ୍‍କଡ଼ା କେ ରାକାବ୍ ଏଟେଃଲିଜାଏ। ଚିୟାଃଚି ଇନିଃ ମାନାତିଙ୍ଗ୍ ଲେଦାଏ, ଚି ପାର୍ମେଶ୍ଵାର୍ ପେଡ଼େଜାନ୍ ତାନିଃ, ହାର୍ ଇନିଃକେ ଗୋଜାକାନ୍ କୋଏତେ ଜୀହିଃ ଧାଡ଼ିୟାଏ; ଏନ୍ ଜୋନୋକା କାଜି ଲେକାତେଗି ଆବ୍ରାହାମ୍ ଇସାହାକ୍ କେ ରୁଆଡ଼୍ ନାମ୍ କିଜାଏ। ବିଶ୍ଵାସ୍ ତେଗି ଇସାହାକ୍ ଆଜାଃ ବାରାନ୍ ହୋନ୍ କିନ୍‍କେ ୟାକୁବ୍ ଆଡୋଃ ଏସାଓ କେ ହିଜୁଃତାନ୍ କାଜି କୋରାଃ ବିଷାୟ୍ ରେ ଆଶିଷ୍ ଏମାଃକିନାଏ। ବିଶ୍ଵାସ୍ ତେଗି ୟାକୁବ୍ ଗୋଜୋଃ ଇମ୍ତା ଯୋଶେଫ୍ ରାଃ ବାରାନ୍ ହୋନ୍ କିନ୍‍କେ ମିହୋଡ଼୍-ମିହୋଡ଼୍ କେତେ ଆଶିଷ୍ ଏମ୍‍କେଦାଏ, ଆଡୋଃ ଆଜାଃ ସୋଟା ତେ ତିରୁବ୍ କେତେ ପାର୍ମେଶ୍ଵାର୍ କେ ଜୋହାର୍ କିଜାଏ। ବିଶ୍ଵାସ୍ ତେଗି ଯୋଶେଫ୍ ଦୋ, ଚିମ୍ତାଙ୍ଗ୍ ଇନିଃ ଗୋଜୋଃ ଚେତାନ୍ ତାଇକେନାଏ, ଦୋ ଇସ୍ରାଏଲୀ ହୋନ୍ କୋକେ ମିଶାର୍ ଦିଶୁମ୍ ଏତେ ଅଡୋଙ୍ଗ୍ ଲାଗିନ୍ କାଜି କେଦାଏ, ଆଡୋଃ ଆଜାଃ ଜାଙ୍ଗ୍ ରାଃ ବିଷାୟ୍ ରେ ଆନାଚୁ ଏମ୍‍କେଦାଏ। ବିଶ୍ଵାସ୍ ତେଗି ମୁଶା ନାବୀ ରାଃ ଏଙ୍ଗାଆପୁ କିନ୍ ଇନିଃକେ, ଜାନାମ୍ ହୋବାଜାନ୍ ତାୟୋମ୍ତେ ଆପି ମାହିନା ସାନ୍ତେ ଉକୁ ମାଣ୍ଡାଅ କିଜାକିନ୍; ଚିୟାଃଚି ଇନ୍‍କୁ ନେଲ୍ କେଦାକିନ୍ ଚି ହୋନ୍ ସୁନ୍ଦାର୍ ମେନାଇଜା, ଆଡୋଃ ଇନ୍‍କିନ୍ ରାଜା ରାଃ ଆନାଚୁ ତେ କାକିନ୍ ବୋରୋ କେଦା। ବିଶ୍ଵାସ୍ ତେଗି ମୁଶା ନାବୀ ସେଣାୟାନ୍ ଚି ଫିରୋନ୍ ରାଜା ରାଃ ହୋନ୍ତେ କୁଡ଼ି ଆଃ ହୋନ୍‍କଡ଼ା କାଜିଅଃ ତାନିଙ୍ଗ୍ ମେନ୍ତେ କାଏ ସୁକୁଜାନାଏ। ଚିୟାଃଚି ଇନିଃକେ ପାପ୍ ରେ ହୁଡିଙ୍ଗ୍ ହୁଲାଙ୍ଗ୍ ରାଃ ସୁକୁ ଜୋମ୍ ତେ ପାର୍ମେଶ୍ଵାର୍ ରାଃ ହୋଡ଼ୋ କୋଲୋଃ ଦୁକୁ ଜୋମ୍ ଥିମ୍ବା ବୁଗିନ୍ ଆଦା କିଜା। ଇନିଃ ମାସୀହ୍ ଲାଗିନ୍ତେ ଆପ୍‍ମାନ୍ ହୋବାଅଃ ତେୟାଃକେ ମିଶାର୍ ଦିଶୁମ୍ ରାଃ ଭାଣ୍ଡାର୍ ଏତେହ ମାରାଙ୍ଗ୍ ଆଟ୍‍କାର୍ କେଦାଏ, ଚିୟାଃଚି ଇନିଜାଃ ମେଏଃ ଯଅ ନାମେ ତେୟାଃ ପାଡ଼୍ ଲାଗାଅକାନ୍ ତାଇକେନା। ବିଶ୍ଵାସ୍ ତେଗି ରାଜା ରାଃ ଖିସ୍ କେ କାଏବୋରୋ କେତେ ଇନିଃ ମିଶାର୍ ଦିଶୁମ୍ କେ ବାଗିକେଦାଏ, ଚିୟାଃଚି ଇନିଃ କାନେଲାକାନ୍ ପାର୍ମେଶ୍ଵାର୍ କେ ନେଲ୍‍କାଃ ଲେକା ପୋକ୍ତା ତାଇଜାନାଏ। ବିଶ୍ଵାସ୍ ତେଗି ଇନିଃ ଫାସାହ୍ ପାରାବ୍ ଆଡୋଃ ମାୟୋମ୍ ହିର୍ଚି ରେୟାଃ ନିୟାମ୍ କେ ମାନାତିଙ୍ଗ୍ କେଦାଏ, ଏନାତେ ପାହିଲା ଜାନାମ୍ ହୋନ୍ କେ ନାଶ୍ ରିକାନିଃ ଇସ୍ରାଏଲୀ କୋ ଚେତାନ୍ ରେ ତିଈ କାଏ ଲାଗାଅୟାଏ। ବିଶ୍ଵାସ୍ ତେଗି ଇସ୍ରାଏଲୀ କୋ ଆରାଃ ସାମୁଦାର୍ ରେ ବୋଲୋ ଫାରୋମ୍ ଜାନାକୋ, ଜେଲେକା ରୋହଡ଼୍ ଅତେ ରେ; ହାର୍ ଅକୋଇମ୍ତାଙ୍ଗ୍ ମିଶାର୍ ରେନ୍ ହୋଡ଼ୋକୋ ଏନ୍‍ଲେକାଗି ରିକା ସାନାଙ୍ଗ୍ କେଦାକୋ ଦୋ ସବେନ୍ ଡୁବିଃ ଗୋଏଃ ଜାନାକୋ। ବିଶ୍ଵାସ୍ ତେଗି ୟାରିହୋ ସାହାର୍ ରାଃ ଘେରା-ଭିତ୍ କେ, ଅକୋଇମ୍ତାଙ୍ଗ୍ ସାତ୍ ଦିନ୍ ସାନ୍ତେ ବିୟୁର୍ କେଦାକୋ ଦୋ, ଏନା ଉୟୁଃ ଜାନା। ବିଶ୍ଵାସ୍ ତେଗି ରାହାବ୍ ବେଶ୍ୟା କୁଡ଼ି କାଜି କାମାନାତିଙ୍ଗ୍ କୋଲୋଃ ନାଶ୍ କାଏ ହୋବାଜାନା; ଚିୟାଃଚି ଇନିଃ ଯାସୁଶ୍ କୋକେ ବୁଗିନ୍ ତେ ମାଣ୍ଡାଅ ଲେଃକୋୱାଏ। ନାଆ ଆଡୋଃ ଚିନାଃ କାଜିୟାଇଙ୍ଗ୍? ଚିୟାଃଚି ସାମାୟ୍ ଛାବାକୋଃୱା ଆଗାର୍ ଇଙ୍ଗ୍ ଗିଦୋନ୍ ଆଃ, ଆଡୋଃ ବାରାକ୍ ଆଃ ଆଡୋଃ ସିମ୍‍ସୋନ୍ ଆଃ, ଆଡୋଃ ୟିଫ୍ତାହ୍ ରାଃ ଆଡୋଃ ଦାଉଦ୍ ରାଜା ରାଃ ଆଡୋଃ ଶାମୁଏଲ୍ ରାଃ ଆଡୋଃ ନାବୀ କୋୱାଃ କାଜି କୋ କାଜିୟାଇଙ୍ଗ୍। ଇନ୍‍କୁ ବିଶ୍ଵାସ୍ ରାଃ ଲେକାତେଗି ରାଇଜ୍ କୋକେ ଜିତାଅ ଜାନାକୋ; ଧାରାମ୍ ରାଃ କାମି କେଦାକୋ; କିରିୟାକାନ୍ ଜିନିଷ୍ କୋ ନାମ୍ କେଦାକୋ; କୁଲା କୋୱାଃ ମୋଚା ବାନ୍ଦ୍ କେଦାକୋ; ସେଙ୍ଗେଲ୍ ରେୟାଃ ପେଡ଼େଏ କେ ଇଣିଃ କେଦାକୋ; ତାଲ୍‍ୱାର୍ ରାଃ ଧାର୍ ତେ ବାଚାଓ ଜାନାକୋ; ନାରାଦୁରା କାନ୍ ଇମ୍ତା ରେ ପେଡ଼େଏ ନାମ୍ କେଦାକୋ; ଲାଡ଼ାଇ ରେକୋ ପେଡ଼େଏ ଧାଡ଼ିଜାନା; ଏଟାଃଦିଶୁମ୍ ରେନ୍ ଫୌଜ୍ କୋକେ ବିଡ଼ା ହାର୍-କେଃକୋୱାକୋ। କୁଡ଼ିକୋ ଆକୋୱାଃ ଗୋଜାକାନ୍ କୋକେ ଆଡୋଃଗି ଜୀନିଦ୍ ନାମ୍ କେଃକୋୱାକୋ; ଚିମିନାଙ୍ଗ୍ କୋ ଦୋ ମାଉର୍ ଜୋମ୍-ଜୋମ୍ କେତେ ଗୋଏଃ ଜାନାକୋ, ଆଡୋଃ ଛୋଡ଼ାଓ କାକୋ ସାନାଙ୍ଗ୍ କେଦା, ଏନାମେନ୍ତେ ଚି ବୁଗିନ୍ ଜୀବିନିରିଦ୍ ରେ ହାନାଟିଙ୍ଗ୍ କୋ ନାମେୟା। ଏଟାଃ ଚିମିନାଙ୍ଗ୍ କୋ ଦୋ ମାଜାକ୍ ବାଇଜାନ୍ ରେ, ଆଡୋଃ କୋଡ୍ରା ମାଉର୍ ଜୋମ୍ ରେ ମେନ୍ଦୋ ଥୋଲାକାନ୍ ରେ, ଆଡୋଃ ଜେଲ୍ ଅଡ଼୍ଆଃ ରେ ଆଦେର୍ ରାଃ ହୋରାତେ ପାର୍ଖାଅ ଜାନାକୋ। ଦିରି ଥେର୍ ରିକା ଜାନାକୋ; ଆରି ତେ ହାଃ ଜାନାକୋ; ଇନ୍‍କୁୱାଃ ପାରୀକ୍ଷା ହୋବାଜାନା; ତାଲ୍‍ୱାର୍ ତେ ଗୋଏଃ ଜାନାକୋ; ଇନ୍‍କୁ କାଙ୍ଗାଲ୍ କାନ୍ ରେ, ଆଡୋଃ ଦୁକୁ ରେ ଆଡୋଃ ଦୁକୁ ସାହାତିଙ୍ଗ୍ ତାନ୍ ଲୋଃ ମିଣ୍ଡୀ କୋୱାଃ ହାର୍ ମେରୋମ୍ କୋୱାଃ ଉହୁର୍ ତୁସିଙ୍ଗ୍ କେତେ ନେତେ ହାନ୍ତେ ହୋନୋର୍ ବାଡ଼ା କେଦାକୋ; ଆଡୋଃ ଟୋନାଙ୍ଗ୍ କୋରେ ହାର୍ ବୁରୁ କୋରେ ହାର୍ ଗୁଫା କୋରେ, ଆଡୋଃ ଅତେ ରେୟାଃ ଉଣ୍ଡୁଃ କୋରେ ହୋନୋର୍ ବାଡ଼ା କେଦାକୋ। ଅତେଦିଶୁମ୍ ଇନ୍‍କୁୱାଃ ନାମେ ଲେକା କାତାଇକେନା। ବିଶ୍ଵାସ୍ ରାଃ ଲେକାତେଗି ନେ ସବେନ୍ କୋୱାଃ ବିଷାୟ୍ ରେ ବୁଗିନ୍ ଗୋୱା ଏମାକାନା, ଏଣ୍ଡେ ହଗି ଇନ୍‍କୁକେ କିରିୟା କାନ୍ ଜିନିଷ୍‍କୋ କାନାମ୍ ଜାନା। ଚିୟାଃଚି ପାର୍ମେଶ୍ଵାର୍ ଆବୁୱାଃ ଲାଗିନ୍ତେ ସିଦା ତେଗି ମିୟାଃ ବୁଗିନ୍ କାଜି ମାଣ୍ଡାଅ କାଦାଏ, ଚି ଇନ୍‍କୁ ଆବୁୱାଃ ବେଗାର୍ କାକୋ ପୁରାଅଃୱା। ଏନାମେନ୍ତେ ଚିମ୍ତାଙ୍ଗ୍ ଗୋୱା କୋରାଃ ନିମିନାଙ୍ଗ୍ ମାରାଙ୍ଗ୍ ରିମିଲ୍ ଲେକା ଥିମ୍ବା ହୋଡ଼ୋକୋ ଆବୁକେ ବିୟୁର୍ କାଃବୁୱାଏ, ଏଣ୍ଡେ ହିଜୁଃପେ, ସବେନ୍ କେସେଃତାନ୍ କାଜିକୋକେ ହାର୍ ପାଶେ ତେୟାଃ ପାପ୍ କୋକେ ବାଗିୟାବୁ ହାର୍ ସାହାତିଙ୍ଗ୍ ତାନ୍ ଲୋଃ ଏନ୍ ନୀନିର୍ ରେ ଅକନାଃ ରେ ଆବୁକେ ନିର୍ ମେନାଃ ନିରେୟାବୁ, ଆଡୋଃ ବିଶ୍ଵାସ୍ ରେନ୍ ଆୟାର୍ ନିଃ ଆଡୋଃ ପୁରା ରିକାନିଃ ୟୀଶୁ ପାଡ଼୍ ନେଲ୍ କାତେୟାବୁ, ଅକନିଃ ଏନ୍ ସୁକୁରାଶିକା ଲାଗିନ୍ ଅକନାଃ ଇନିଜାଃ ଆୟୁର୍ ରେ ଦୋହୋଲେନା, ଗିୟୁଃ ରାଃ ଜାହାନ୍ କାଜି କାଏ ପାହୋମ୍ କେତେ କ୍ରୁଶ୍ ରାଃ ଦୁକୁ ସାହାତିଙ୍ଗ୍ କେଦାଏ, ଆଡୋଃ ପାର୍ମେଶ୍ଵାର୍ ରାଃ ସିଂହାସାନ୍ ରାଃ ଜୋମ୍ ପାଡ଼୍ ରେ ସେନ୍ କେତେ ଦୁବ୍ ଜାନାଏ। ଏନାମେନ୍ତେ ଇନିଃକେ ପାହୋମିପେ, ଅକନିଃ ଆଜାଃ ବିରୋଧ୍ ରେ ପାପୀ କୋୱାଃ ଇମିନ୍ ବିରୋଧ୍ କେ ସାହାଅ କେଦାଏ ଚି ଆପେ ନିରାଶ୍ ହୋବାକେତେ ସାହାସ୍ ଆଲୋପେ ବାଗିୟା। ଆପେ ପାପ୍ ବିରୋଧ୍ ରେ ଲାଡ଼ାଇ ତାନ୍ ଲୋଃ ଆପେୟାଃ ମାୟୋମ୍ ଲିଙ୍ଗୀଅଃ ସାନ୍ତେ ଏନାରେ ଏନ୍‍ଲେକା କାପେ ସାମ୍ନା କାଦା; ଆଡୋଃ ଆପେ ଏନ୍ ଉପ୍‍ଦେଶ୍ କେ, ଅକନାଃ ଆପେକେ ହୋନ୍‍କଡ଼ାକୋ ଲେକା ଏମୋଃତାନା ଏନାକେ ରିଡ଼ିଙ୍ଗ୍ ଜାନାପେ: “ହେ ଇଙ୍ଗ୍ଆଃ ହୋନ୍, ପ୍ରାଭୁ ଆଃ ଚେନେତାଅ କାଜିକେ ରାୱାଲ୍ କାଜି ମେନ୍ତେ ଆଲୋମ୍ ପାହୋମେ, ଆଡୋଃ ଚିମ୍ତାଙ୍ଗ୍ ଆମ୍‍କେ ଏଗେର୍ ମେରେ ସାହାସ୍ ଆଲୋମ୍ ବାଗିୟା। ଚିୟାଃଚି ପ୍ରାଭୁ ଅକନ୍ କୋକେ ଦୁଲାଡ଼୍ କୋୱାଏ, ଇନ୍‍କୁକେ ଚେନେତାଅ ଏମାକୋୱାଏ; ଆଡୋଃ ଅକନ୍ କୋକେ ହୋନ୍ ବାଇକୋୱାଏ ଇନ୍‍କୁକେ ହାଣ୍‍ସା କୋୱାଏ।” ଆପେ ଦୁକୁ କୋକେ ଚେନେତାଅ ନାମ୍ କେଃ ଲେକା ଆଟ୍‍କାର୍ କେତେ ସାହାତିଙ୍ଗ୍ କେପେ; ପାର୍ମେଶ୍ଵାର୍ ଆପେକେ ହୋନ୍ କୋ ଲେକା ସାରିକେତେ ଆପେ ଲୋଃ ରିକାୟାଏ। ଏନ୍‍କା ଅକନ୍ ହୋନ୍ ମେନାଇୟା ଅକନିଃକେ ଆଜାଃ ଆପୁ କାଏ ଚେନେତାଅ କାଇଜାଏ? ଆଗାର୍ ଏନ୍ ଚେନେତାଅ ଅକନାଃ ରାଃ ହାନାଟିଙ୍ଗ୍ ସବେନ୍ କୋ ନାମେ ତାନାକୋ, ଏନା ଆପେ କାପେ ମାନାକାଃ ରେଦୋ, ଆପେ ବ୍ୟାଭିଚାର୍ ରାଃ ହୋନ୍ କୋ ତାନ୍‍ପେ। ଆଡୋଃ ଚିମ୍ତାଙ୍ଗ୍ ଚି ଆବୁୱାଃ ହୋଡ଼ମୋ ରେୟାଃ ଆପୁ ହଗି ଆବୁକେ ଚେନେତାଅବୁ ତାଇକେନାକୋ ହାର୍ ଆବୁ ଇନ୍‍କୁକେ ମାଇନ୍ କେଃକୋୱାବୁ, ଏଣ୍ଡେ ଚିନାଃ ମେନ୍ତେ ଆବୁ ଆବୁୱାଃ ଆତ୍ମା କୋରାଃ ଆପୁ ଆଃ ଆଧିନ୍ ରେ ଆଡୋଃଗି କାବୁ ତାଇନା ଏନାତେ ଆବୁ ଜୀହିଃ ତାଇନାବୁ। ଇନ୍‍କୁ ଦୋ ଆପାନାଃ-ଆପାନାଃ ବିଚାର୍ ଲେକାତେ ହୁଡିଙ୍ଗ୍ ହୁଲାଙ୍ଗ୍ ଲାଗିନ୍ ଚେନେତାଅ କେଃବୁୱାକୋ, ମେନ୍ଦୋ ପାର୍ମେଶ୍ଵାର୍ ଆବୁୱାଃ ବୁଗିନାଃ ଲାଗିନ୍ତେ ରିକାୟାଏ, ଏନାତେ ଆବୁ ହଗି ଇନିଜାଃ ପାବିତାର୍ ରେ ହାନାଟିଙ୍ଗ୍ ନାମେୟାବୁ। ନାଆ ରେୟାଃ ସବେନ୍ ରାକାମ୍ ରାଃ ଚେନେତାଅ ରାଶିକାଅଃ ଲାଗିନ୍ତେ ନାହାଲା, ମେନ୍ଦୋ ଦୁକୁ ରାଃ କାଜିଗି ନେଲୋଃ ତାନା, ଏଣ୍ଡେ ରେହଗି ଅକନ୍ କୋ ଏନାକେ ସାହାତିଙ୍ଗ୍-ସାହାତିଙ୍ଗ୍ କେତେ ପୋକ୍ତା କେନୋଃତାନାକୋ, ଇନ୍‍କୁକେ ତାୟୋମ୍ତେ ଜୀଉସୁକୁ ଲୋଃ ଧାରାମ୍ ରାଃ ନାଲା ନାମୋଗା। ଏନାମେନ୍ତେ ନାରାଦୁରା ତିଈ କୋକେ ଆଡୋଃ ଥର୍ଥାରାଅଃତାନ୍ ମୁକ୍‍ଡ଼ି କୋକେ କେଟେଜେପେ। ଆଡୋଃ ଆପେୟାଃ କାଟାକୋ ଲାଗିନ୍ତେ ସୋଜ୍ ହୋରା ବାଇୟେପେ ଏନାତେ ଲାଙ୍ଗ୍ଡ଼ା କାନ୍ ନିଜାଃ କାଟା ଆଲୋ ବାଗ୍ଡ଼ାଅଃକା ମେନ୍ଦୋ ଆଡୋଃଗି ବୁଗିନୋଃକା। ସବେନ୍ କୋଲୋଃ ମେଶାନ୍ ତେ ତାଇୟୋଃପେ, ଆଡୋଃ ଏନ୍ ପାବିତାର୍ କେ ନାନାମ୍ ରାଃ ଦାଣା ରେ ତାଇୟୋଃପେ, ଏନା କାତାଇୟୋଃ ରେ ପ୍ରାଭୁ କେ ଜେତାଏ ଚିଉଲା ହ କାଏ ନେଲ୍ ଧାଡ଼ିୟାଏ। ହୋସିୟାର୍ ତେ ତାଇୟୋଃପେ, ନେକା ଆଲୋକା ହୋବାଅଃଚା ଚି ଜେତାଏ ପାର୍ମେଶ୍ଵାର୍ ରାଃ ଆନୁଗ୍ରାହ୍ ଏତେ ବାଞ୍ଚାଅ କେନୋଗାଏ, ୟାଦୋ ଜେତାନ୍ ହାଡ଼୍ଆଃ ରେହେଃ ଅଡୋଙ୍ଗ୍ କେତେ ଦୁକୁ ଏମାପେୟାଏ, ଆଡୋଃ ଏନାତେ ଥିମ୍ବାଗି ହୋଡ଼ୋକୋ ଆଶୁଦ୍ଧ୍ କେନୋଗାକୋ। ନେଲେକା ଆଲୋକା ହୋବାଅଃଚା ଚି ଜାହାନ୍ ହୋଡ଼ ବ୍ୟାଭିଚାରୀ, ୟାଦୋ ଏସାଓ ଲେକା ଆଧାର୍ମୀ ହୋବାୱାଏ, ଅକନିଃ ମିଶାଗି ଜୋଜୋମାଃ ରାଃ ବାଦ୍‍ଲି ରେ ଆଜାଃ ପାହିଲା ଜାନାମ୍ ରେୟାଃ ଆଧିକାର୍ କେ ଆଖ୍ରିଙ୍ଗ୍ ତାଦାଏ। ଆପେ ସାରିୟାପେ ଚି ତାୟୋମ୍ତେ ଚିମ୍ତାଙ୍ଗ୍ ଇନିଃ ଆଶିଷ୍ ନାନାମ୍ ସାନାଙ୍ଗ୍ କେଦାଏ ଇମ୍ତା ମେଏଃ ଦାଆ ଜୋରୋ-ଜୋରୋ କେତେ ଦାଣାବାଡ଼ା ରେହ ଆଶିଷ୍ ନାମ୍ ରାଃ ହୋରା କାଏ ନାମ୍ ଧାଡ଼ିକେଦାଏ ହାର୍ ମାନା ରିକା ଜାନାଏ। ଆପେ ଦୋପେ ଏନ୍ ବୁରୁ ନାଡ଼େଏ, ଅକନାଃ ଜୁଟିଃ ଧାଡ଼ିୟୋଃ ତାଇକେନା, ଆଡୋଃ ସେଙ୍ଗେଲ୍ ରେ ଜୁଲୋଃ ତାଇକେନା, ଆଡୋଃ ହେନ୍ଦେ ରିମିଲ୍ ହାର୍ ନୁବାଃ ଆଡୋଃ ମାରାଙ୍ଗ୍ ହୋୟୋ ନାଡ଼େଏ। ଆଡୋଃ ତୁର୍ହୀ ରାଃ ଷାଡି ହାର୍ କାଜିତାନ୍ ନିଜାଃ ନେଲେକାନ୍ ଆୱାଜ୍ ନାଡ଼େଏ ତାଃ କାପେ ହିଜୁଃ କାନା, ଅକନିଜାଃ ଆୟୁମ୍‍ତାନ୍ ହୋଡ଼ୋକୋ ଆର୍ଜି କେଦାକୋ, ଚି ନାଆ ଆଲେକେ ଆଡୋଃଗି ଆଲୋକାଜିଅଃକା। ଚିୟାଃଚି ଇନ୍‍କୁ ଏନ୍ ଆନାଚୁ କୋକେ କାକୋ ସାହାତିଙ୍ଗ୍ ଧାଡ଼ିକେଦା: “ଆଗାର୍ ଜେତାନ୍ ପାଶୁ ହ ବୁରୁ କେ ଜୁଟିଃ ରେଦୋ ଇନିଃ ରେ ଥେରୋଃକା।” ଆଡୋଃ ଏନ୍ ନେଲାକାନ୍ ଦାର୍ଶାନ୍ ଏନ୍‍ଲେକା ବୋରୋୱାନ୍ ତାଇକେନା ଚି ମୁଶା ନାବୀ କାଜିକେଦାଏ, “ଇଙ୍ଗ୍ ଥିମ୍ବାଗି ବୋରୋତାନିଙ୍ଗ୍ ହାର୍ ଥାର୍ଥାରାଅଃ ତାନିଙ୍ଗ୍।” ମେନ୍ଦୋ ଆପେ ସିୟୋନ୍ ବୁରୁ ନାଡ଼େଏ ତାଃ, ଆଡୋଃ ଜୀହିଃ ପାର୍ମେଶ୍ଵାର୍ ରାଃ ହାତୁ, ସିର୍ମାଦିଶୁମ୍ ରେୟାଃ ୟୀରୁଶାଲେମ୍ ନାଡ଼େଏ ଆଡୋଃ କାଲେକାଅଃ ସିର୍ମାଦାସୀ କୋୱାଃ ଆଡୋଃ ଏନ୍ ପାହିଲା ଜାନାମ୍ କୋୱାଃ ସାଧାରାନ୍ ଦୁନୁବ୍ ରେ ହାର୍ କାଲିସିୟା ରେ, ଅକନ୍ କୋୱାଃ ନୁତୁମ୍ ସିର୍ମାଦିଶୁମ୍ ରେ ଅଲାକାନା, ହାର୍ ସବେନ୍ କୋୱାଃ ବିଚାର୍ନିଃ ପାର୍ମେଶ୍ଵାର୍ ନାଡ଼େଏ ତାଃ, ଆଡୋଃ ତେୟାର୍ କାନ୍ ଧାର୍ମୀ କୋୱାଃ ଆତ୍ମାକୋତାଃ, ହାର୍ ନାୱା ନିୟାମ୍‍ଥଲ୍ ରାଃ ଥାଲାରେନିଃ ୟୀଶୁ, ହାର୍ ହିର୍ଚିକାନ୍ ତେୟାଃ ଏନ୍ ମାୟୋମ୍ ନାଡ଼େଏ ହିଜୁଃ କାନାପେ, ଅକନାଃ ହାବିଲ୍ ରାଃ ମାୟୋମ୍ ଏତେ ବୁଗିନ୍ କାଜି କାଜିୟାଏ। ହୋସିୟାର୍ ତାଇନ୍‍ପେ, ହାର୍ ଏନ୍ କାଜିତାନ୍ ନିଜାଃ କାଜିକେ ଆୟୁମ୍ ଲାଗିନ୍ତେ ଆଲୋପେ ମାନାୟା, ଚିୟାଃଚି ଏନ୍ ଇସ୍ରାଏଲୀ ହୋଡ଼ୋକୋ ଚିମ୍ତାଙ୍ଗ୍ ନେ ଅତେ ରେ ଚେତାୱନୀ ଏମ୍ ନିଜାଃ କାଜି କେ କାକୋ ଆୟୁମ୍ କିଜା ହାର୍ କାକୋ ବାଚାଓ ଧାଡ଼ିନା, ଦୋ ଆବୁ ସିର୍ମାଦିଶୁମ୍ ଏତେ ଚେତାୱନୀ ଏମ୍ ନିଜାଃ କାଜି କେ କାବୁ ଆୟୁମ୍ ଲେରେ ଚିଲ୍‍କା ବାଚାଅଃୱାବୁ? ଏନ୍ ସାମାୟ୍ ଦୋ ଇନିଜାଃ ଆୱାଜ୍ ଅତେ କେ ହିଲାଅ ତାଦାଏ, ମେନ୍ଦୋ ନାଆ ଇନିଃ ନେୟା କିରିୟା ଜୋମ୍ କାଦାଏ, “ଇଙ୍ଗ୍ ଆଡୋଃଗି ମିଶା ଅତେ କେ ଭାଇର୍ କାହା ରିମିଲ୍‍ଦିଶୁମ୍ କେ ହ ହିଲାଅ ତାଃଇଙ୍ଗ୍।” ଆଡୋଃ ନେ ବାକାଣ୍ ଆଡୋଃ ମିଶା ନେ କାଜି ଦେଖାଅ ତାନାଏ ଚି ଅକନ୍ ଜିନିଷ୍‍କୋ ହିଲାଅଃୱା, ଏନାକୋ ସିର୍ଜାଅକାନ୍ ଜିନିଷ୍ ତାନାଃ ମେନ୍ତେ ହିଲାଅ କେନୋଗା; ଏନାତେ ଅକନ୍ ଜିନିଷ୍‍କୋ କା ହିଲାଅଗା, ଏନାକୋ ବାଇକେତେ ତାଇନୋଗା। ଏନାମେନ୍ତେ ଆବୁ ନେଲେକା ରାଇଜ୍ କେ ନାମ୍ କେତେ ଅକନାଃ କାହିଲାଅଃୱା ଧାନ୍ୟାବାଦୀ ୟାବୁ, ହାର୍ ବୋରୋତାନ୍, ହାର୍ ମାଇନ୍ ତାନ୍ ଲୋଃ ପାର୍ମେଶ୍ଵାର୍ କେ ଏନ୍‍ଲେକା ଆରାଧାନା ୟାବୁ ଅକନାଃ ଏତେ ଇନିଃ ସୁକୁଅଃ ତାନାଏ; ଚିୟାଃଚି ଆବୁୱାଃ ପାର୍ମେଶ୍ଵାର୍ ରୋଙ୍ଗୋ ରିକାନିଃ ସେଙ୍ଗେଲ୍ ତାନିଃ। ହାଗା ଦୁଲାଡ଼୍ ରେ ବାଇକେତେ ତାଇନୋଃପେ। ପେଡ଼ାକୋୱାଃ ସେୱା-ସୁସାର୍ ଆଲୋପେ ରିଡ଼ିଙ୍ଗ୍ଏୟା, ଚିୟାଃଚି ନେଲେକାତେ ଚିମିନାଙ୍ଗ୍ କୋ କାସାରିକାନ୍ ରେ ସିର୍ମାଦାସୀ କୋକେ ମାଇନ୍-ସୁସାର୍ କେଦାକୋ। ବାନ୍ଦିଆକାନ୍ କୋକେ ପାହୋମ୍ କୋପେ, ଜେଲେକାଚି ଆପେ ହଗି ଇନ୍‍କୁ ଲୋଃ ବାନ୍ଦି କାନାପେ, ହାର୍ ଅକନ୍ କୋଲୋଃ ଏତ୍କାନାଃ ରିକାଅଃତାନା, ଇନ୍‍କୁକେ ହଗି ନେୟା ଆଟ୍‍କାର୍ କେତେ ପାହୋମ୍ କୋପେ, ଚି ଆବୁୱାଃ ହଗି ହୋଡ଼ମୋ ମେନାଃ। ଆଣାଦୀ ସବେନ୍ କୋୱାଃ ରେ ମାଇନାନ୍ କାଜି ହୁୟୋଃକା, ହାର୍ ଆଣାଦୀ ରାଃ ଡିସ୍ନା ଫାର୍ଚି ତାଇନୋଃକା; ଚିୟାଃଚି ପାର୍ମେଶ୍ଵାର୍ ବ୍ୟାଭିଚାରୀ କୋୱାଃ, ହାର୍ ଏଟାଃ କୁଡ଼ିକୋକେ ଆପ୍‍ଙ୍ଗିର୍ କୋୱାଃ ବିଚାର୍ ୟାଏ। ଟାକା-ପାଇସା ନାଙ୍ଗ୍ ଆଲୋପେ ହାୟାଅଃୱା, ହାର୍ ଆପେତାଃ ତାଇନ୍ ତେୟାଃ ଇମିନାଙ୍ଗ୍ ରେଗି ସୁକୁକାନୋଃପେ; ଚିୟାଃଚି ପାର୍ମେଶ୍ଵାର୍ ଆଏଃଗି କାଜିକାଦାଏ, “ଇଙ୍ଗ୍ ଆପେକେ ଚିଉଲାଅ କାଇଙ୍ଗ୍ ବାଗିୟା, ହାର୍ ଚିଉଲାଅ ଆପେକେ କାଇଙ୍ଗ୍ ହୁରାଙ୍ଗ୍ ପେୟା।” ଏନାମେନ୍ତେ ଆବୁ ବେଗାର୍ ବୋରୋତାନ୍ ଲୋଃ କାଜିଧାଡ଼ିୟାବୁ, “ପ୍ରାଭୁ ଇଙ୍ଗ୍ଆଃ ଦେଙ୍ଗାନିଃ, ଆଇଙ୍ଗ୍ କାଇଙ୍ଗ୍ ବୋରୋୟା; ହୋଡ଼ ଇଙ୍ଗ୍ଆଃ ଚିନାଃ ରିକା ଧାଡ଼ିୟାଏ।” ଅକନ୍ କୋ ଆପେୟାଃ ଆଗୁଆ ତାଇଲେନାକୋ, ହାର୍ ଅକନ୍ କୋ ଆପେକେ ପାର୍ମେଶ୍ଵାର୍ ରାଃ ବାଚାନ୍ ଉଦୁବ୍ କାଃପେୟାକୋ, ଇନ୍‍କୁକେ ପାହୋମ୍ କୋପେ; ଆଡୋଃ ଧ୍ୟାନ୍ ତେ ଇନ୍‍କୁୱାଃ ଜୀଦାନ୍ ସେସେନ୍ ରାଃ ଟୁଣ୍ଡୁ କେ ନେଲ୍‍କେତେ ଇନ୍‍କୁୱାଃ ବିଶ୍ଵାସ୍ କେ ଅତୋଙ୍ଗ୍ଏପେ। ୟୀଶୁ ମାସୀହ୍ ହୋଲା ହାର୍ ଇସିଙ୍ଗ୍ ହାର୍ ଜାନାଓ-ଜାନାଓ ମିଃଗି ତାଇନାଏ। ରାକାମ୍-ରାକାମ୍ ରାଃ ଏଟାଃ ଉପ୍‍ଦେଶ୍ କୋତେ ଆଲୋପେ ବେଦାଅଃୱା, ଚିୟାଃଚି ଆବୁୱାଃ ମୋନ୍ କେ ଆନୁଗ୍ରାହ୍ ହୋରାତେ କେଟେଃ ବୁଗିନାଃ ତାନାଃ, ଏନା ନିୟାମ୍ ମାନାତିଙ୍ଗ୍ ରେୟାଃ ଯୋଜୋମାଃ ତେ ଜାହାନାଃ ଲାଭ୍ ବାନୋଗା। ଆବୁୱାଃ ମିୟାଃ ନେକା ବେଦୀ ମେନାଃ, ଅକଣ୍ଡେ ଏତେ ଜୋଜୋମ୍ ରାଃ ଆଧିକାର୍ ଏନ୍ ହୋଡ଼ୋକୋକେ ବାନୋଗା, ଅକନ୍‍କୋ ତାମ୍‍ବୁ ରେ ସେୱା ତାନାକୋ। ଚିୟାଃଚି ଅକନ୍ ପାଶୁ କୋରାଃ ମାୟୋମ୍ କେ ମାରାଙ୍ଗ୍ ୟାଜାକ୍ ପାପ୍ ରାଃ ଦାଣେ ଲାଗିନ୍ତେ ସବେନ୍ ଏତେ ପାବିତାର୍ ଜାଗା ରେ ଇଦିୟାଏ, ଇନ୍‍କୁୱାଃ ହୋଡ଼ମୋ କେ ଡେରା ଏତେ ବାହାରି ରେ ଅଣ୍ଡୋରୋଃୱା। ଏନାମେନ୍ତେଗି, ୟୀଶୁ ହଗି ହୋଡ଼ୋକୋକେ ଆଜାଃ ମାୟୋମ୍ ହୋରାତେ ପାବିତାର୍ ବାଇକୋଲାଗିନ୍ ହାତୁ ରାଃ ଦୁହାର୍ ଏତେ ବାହ୍‍ରେ ରେ ଦୁକୁ ସାହାତିଙ୍ଗ୍ କେଦାଏ। ଏନାମେନ୍ତେ ଦେଲା, ଆବୁ ଇନିଜାଃ ନିନ୍ଦାକେ ସାହାତିଙ୍ଗ୍ ତାନ୍ ଲୋଃ ଡେରା ରାଃ ବାହାରି ଇନିଜାଃ ନାଡ଼େଏ ସେନାବୁ। ଚିୟାଃଚି ନେତାଃ ଆବୁୱାଃ ଲାଗିନ୍ତେ ସବେନ୍ ହୁଲାଙ୍ଗ୍ ତାଇନ୍ ରାଃ ସାହାର୍ ବାନୋଗା, ମେନ୍ଦୋ ଆବୁ ହିଜୁଃତାନ୍ ସାହାର୍ ରାଃ ଦାଣା ରେ ମେନାବୁୱା। ଏନାମେନ୍ତେ ଆବୁ ଇନିଜାଃ ହୋରାତେ ସ୍ତୁତି ରେୟାଃ ଦାଣେ, ମାନେ ଏନ୍ ମୋଚା ରେୟାଃ ଯଅ ଅକନାଃ ଇନିଜାଃ ନୁତୁମ୍ କେ ମାନାତିଙ୍ଗ୍ ତାନାକୋ, ପାର୍ମେଶ୍ଵାର୍ କେ ସାଦାଏ ରାକାବିୟାବୁ। ଏଟାଃକୋୱାଃ ବୁଗିନାଃ ରିକା ହାର୍ ସୁକୁ ମୋନ୍ ତେ ଦେଙ୍ଗା ଏହେମ୍ ଆଲୋପେ ରିଡ଼ିଙ୍ଗ୍ଏୟା, ଚିୟାଃଚି ପାର୍ମେଶ୍ଵାର୍ ନେଲେକାନ୍ ଦାଣେକୋଏତେ ସୁକୁଅଗାଏ। ଆପେକେ ଆତ୍ମାନ୍ କାଜି କୋରେ ଆୟାର୍ ଇଦିତାନ୍ ଆଗୁୱା କୋକେ ମାନାତିଙ୍ଗ୍ କୋପେ ହାର୍ ଇନ୍‍କୁୱାଃ ଆଧିନ୍ ରେ ତାଇନ୍‍ପେ, ଚିୟାଃଚି ଇନ୍‍କୁ ଏନ୍ ହୋଡ଼ୋକୋ ଲେକା ଆପେୟାଃ ଜୀଉ ଲାଗିନ୍ ହୋରୋ ତାନାକୋ ଅକନ୍ କୋକେ ହିସାବ୍ ଏମ୍ ହୋବାଅଃୱା; ଇନ୍‍କୁ ନେ କାମି କେ ସୁକୁ ତେ ରିକାଏକାକୋ, ଗେରାଙ୍ଗ୍ ତାନ୍ ଲୋଃ ଦୋ କାହା, ଚିୟାଃଚି ନେକା ରିକାଏ ରେ ଜେତାନ୍ ଲାଭ୍ ବାନୋଗା। ଆଲେୟାଃ ଲାଗିନ୍ ବିନ୍ତି କାତେପେ, ଚିୟାଃଚି ଆଲେକେ ଭାରୋସା ମେନାଃ ଚି ଆଲେୟାଃ ଆଟ୍‍କାର୍ ଉରୁମ୍ ମୋନ୍ ଫାର୍ଚି ମେନାଃ: ହାର୍ ଆଲେ ସବେନ୍ ବାକାଣ୍ ରେ ବୁଗିନ୍ ତେ ସେସେନ୍ ସାନାଙ୍ଗ୍ ତାନାଲେ। ବିନ୍ତିପେ ମେନ୍ତେ ଇଙ୍ଗ୍ ଆପେକେ ଆଡୋଃଗି ଆର୍ଜିପେ ତାନିଙ୍ଗ୍ ଚି ଇଙ୍ଗ୍ ସେକାଡ଼୍ ଗି ଆପେ ତାଃ ନାଡ଼େଏ ହିଜୁଃ ଧାଡ଼ିୟାଇଙ୍ଗ୍। ନାଆ ଜୀଉସୁକୁ ଏହେମ୍ ପାର୍ମେଶ୍ଵାର୍, ଆବୁୱାଃ ପ୍ରାଭୁ ୟୀଶୁ କେ ଅକନିଃଚି ମିଣ୍ଡୀ କୋୱାଃ ମାରାଙ୍ଗ୍ ହୋରୋନିଃ ତାନିଃ ଇନିଃକେ ଜାନାଓ-ଜାନାଓ ରେୟାଃ ନିୟାମ୍‍ଥଲ୍ ରାଃ ମାୟୋମ୍ ତେ ଗୋଜାକାନ୍ କୋଏତେ ଜୀହିଃ ରୁଆଡ଼୍ କିଜାଏ, ଇନିଃ ଆପେକେ ସବେନ୍ କାଜି କୋରେ ପୋକ୍ତାବାଇ ପେକାଏ, ଏନାତେ ଆପେ ଇନିଜାଃ ସାନାଙ୍ଗ୍ କେ ପୁରାୟାପେ, ହାର୍ ଅକନାଃ କୋ ଇନିଃକେ ସୁକୁୱାଇୟା, ଏନା ୟୀଶୁ ମାସୀହ୍ ରାଃ ହୋରାତେ ଆବୁ ରେ ଅମୋନେକାଏ। ଇନିଜାଃ ଗି ମାନାରାଙ୍ଗ୍ ଜାନାଓ-ଜାନାଓ ହୋବାଅଃକା। ଆମୀନ୍। ହେ ହାଗାକୋ, ଇଙ୍ଗ୍ ଆପେମାନ୍ କୋକେ ଆର୍ଜିପେ ତାନିଙ୍ଗ୍ ନେ ଉପ୍‍ଦେଶ୍ କେ ସାହାତିଙ୍ଗ୍ ଏପେ, ଚିୟାଃଚି ଇଙ୍ଗ୍ ଆପେକେ ହୁଡିଙ୍ଗ୍ ଲେକାନ୍ କାଜି ଆପେକେ ଅଲାକାଦିଙ୍ଗ୍। ଆପେ ନେୟା ସାରିପେ ଚି ଆବୁୱାଃ ହାଗା ତିମୁଥିୟୁସ୍ ଜେଲ୍ ଏତେ ରାଡ଼ାଜାନାଏ, ହାର୍ ଆଗାର୍ ଇନିଃ ସେକାଡ଼୍ ଗି ହିଜୁଃ ରେଦୋ ଇଙ୍ଗ୍ ଆଏଃ ଲୋଃ ଆପେ ତାଃ ନାପାମ୍ ନାଙ୍ଗ୍ ହିଜୁଗାଇଙ୍ଗ୍। ଆପେୟାଃ ସବେନ୍ ଆତ୍ମାନ୍ କାଜି କୋରେ ଆୟାର୍ ତାନ୍ ଆଗୁୱା କୋକେ ହାର୍ ସବେନ୍ ପାବିତାର୍ ହୋଡ଼ୋକୋକେ ଜୋହାର୍ ପେତାନିଙ୍ଗ୍। ଇଟାଲୀ ଦିଶୁମ୍ ରେନ୍ ବିଶ୍ଵାସୀକୋ ଆପେକେ ଜୋହାର୍ ପେତାନାକୋ। ଆପେ ସବେନ୍ କୋୱାଃ ରେ ଆନୁଗ୍ରାହ୍ ହୋବାକାତୋଃକା। ଆମୀନ୍। ପାର୍ମେଶ୍ଵାର୍ ରାଃ ହାର୍ ପ୍ରାଭୁ ୟୀଶୁ ମାସୀହ୍ ରାଃ ଦାସୀ ୟାକୁବ୍ ଆଃ ପାଡ଼େତେ ମାସୀହ୍ ୟାହୁଦୀ କୋୱାଃ ଏନ୍ ବାରା କିଲି କୋକେ ଅକନ୍‍କୋ ଛିତି ଛାନ୍ ହୋବାକେତେ ତାଇନ୍ ତାନାକୋ ଇନ୍‍କୁକେ ଜୋହାର୍। ହେ ଇଙ୍ଗ୍ଆଃ ହାଗାକୋ, ଚିମ୍ତାଙ୍ଗ୍ ଆପେ ରାକାମ୍ ରାଃ ପାରୀକ୍ଷା ରେ ଉୟୁଗୋଃ ୱାପେ, ଏଣ୍ଡେ ନେୟାକେ ପୁରାଃ ରାଶିକା ରାଃ କାଜି ମେନ୍ତେ ପାହୋମେପେ, ନେୟା ସାରିକେତେ ଚି ଆପେୟାଃ ବିଶ୍ଵାସ୍ ରାଃ ପାର୍ଖାଅ ହୋରାତେ ସାହାତିଙ୍ଗ୍ ହାରା ଇଦିଅଃତାନା। ମେନ୍ଦୋ ସାହାତିଙ୍ଗ୍ କେ ଆଜାଃ ପୁରା କାମି ରିକାନାଙ୍ଗ୍ ଏମେପେ ଏନାତେ ଆପେ ପୁରା ହାର୍ ପୋକ୍ତା କେନୋଃପେ, ହାର୍ ଆପେୟାଃ ରେ ଜେତାନ୍ କାଜି ରାଃ ଘାଟି ଆଲୋକା ହୋବାଅଃକା। ମେନ୍ଦୋ ଆଗାର୍ ଆପେ କୋଏତେ ଜେତାଏ କେ ସେଣା ରାଃ ଘାଟି ମେନାଃ ରେଦୋ ପାର୍ମେଶ୍ଵାର୍ ତେ ଆସିପେ, ଅକନିଃ ବେଗାର୍ ଏଗେର୍ ତାନ୍ ସବେନ୍ କୋକେ ପୁରା ମୋନ୍ ତେ ଏମେୟାଏ, ହାର୍ ଇନିଃକେ ଏମୋଗା। ମେନ୍ଦୋ ବିଶ୍ଵାସ୍ ତେ ଆସିକାଏ, ହାର୍ ଜାହାନାଃ ସାନ୍ଦେହ୍ ଆଲୋ ରିକାକାଏ, ଚିୟାଃଚି ସାନ୍ଦେହ୍ ରିକାନିଃ ସାମୁଦାର୍ ରାଃ ଲାହାର୍ ଲେକା ତାନିଃ ଅକନିଃ ହୋୟୋ ତେ ଆତୁଅଗାଏ ହାର୍ ଉଛ୍ଲାଅଗାଏ। ନେକାନ୍ ହୋଡ଼ ନେୟା ଆଲୋକାଏ ବୁଝାଅଃକାଏ ଚି ଇନିଃକେ ପ୍ରାଭୁ ତେ ଜାହାନାଃ ନାମୋଗା, ଏନ୍ ହୋଡ଼ ବାରିୟା ମୋନ୍ ତାନିଃ ହାର୍ ଆଜାଃ ସବେନ୍ ବାକାଣ୍ କୋରେ ଆସ୍ଥିର୍ ତାନିଃ। ଗାରିବ୍ ବିଶ୍ଵାସୀ ହାଗା କେ ରାଶିକାନ୍ ଚାହି ଜେ ପାର୍ମେଶ୍ଵାର୍ ଇନିଃ କେ ମାରାଙ୍ଗ୍ ବାଇକାଜାଏ, ହାର୍ ବିଶ୍ଵାସୀ କିଶାଣ୍ କେ ରାଶିକାନ୍ ଚାହି ଜେ ପାର୍ମେଶ୍ଵାର୍ ଇନିଃ କେ ମୋନ୍ ରେ ହୁଡିଙ୍ଗ୍ଏନ୍ ବାଇକାଜାଏ ଚିୟାଃଚି ଇନିଃ ତାସାଃ ରାଃ ବାହା ଲେକା ଗାସାର୍ ଅଗାଏ। ଚିୟାଃଚି ଶିଙ୍ଗି ତୁରୋଃ ତୋର୍ଷା ଥିମ୍ବା ଶିତୁମ୍ ଉୟୁଗୋଃୱା ହାର୍ ତାସାଃ କେ ରୋହଡ଼୍ ତାଆଏ, ହାର୍ ଏନାରାଃ ବାହା ଗାସାର୍ କୋଃୱା ଆଡୋଃ ଏନାରାଃ ସୁଗାଡ଼୍ ଛାବା କେନୋଗା। ଏନ୍‍ଲେକାଗି ବିଶ୍ଵାସୀ କିଶାଣ୍ ହୋଡ଼ ହଗି ଆଜାଃ ହୋରା ରେ ସେନ୍-ସେନ୍ ହାସା ରେ ମେଶା କେନୋଗାଏ। ଧାନ୍ୟା ଏନ୍ ହୋଡ଼ ତାନିଃ ଅକନିଃ ପାରୀକ୍ଷା ରେ ସ୍ଥିର୍ ତାଇନାଏ, ଚିୟାଃଚି ଇନିଃ ସାହାତିଙ୍ଗ୍ ଫାରୋମ୍ କେତେ ଜାନାଓ ଜୀଦାନ୍ ରାଃ ଏନ୍ ମୁକୁଟ୍ ନାମେୟାଏ ଅକନାଃ ପ୍ରାଭୁ ଆଜାଃ ଦୁଲାଡ଼୍‍ତାନ୍ କୋଲୋଃ କାଜିଥୋଲ୍ କାଦାଏ। ଚିମ୍ତାଙ୍ଗ୍ ଜେତାଏ ହୋଡ଼ ରାଃ ପାରୀକ୍ଷା ହୋବାଅଃ ତାନା ଦୋ, ଇନିଃ ନେୟା ଆଲୋ କାଜିକାଏ ଚି ଇଙ୍ଗ୍ଆଃ ପାରୀକ୍ଷା ପାର୍ମେଶ୍ଵାର୍ ପାଡ଼େତେ ହୋବାଅଃତାନା; ଚିୟାଃଚି ନାଦୋ ଖାରାପ୍ କାଜିକୋତେ ପାର୍ମେଶ୍ଵାର୍ ରାଃ ପାରୀକ୍ଷା ହୋବା ଧାଡ଼ିୟୋଃୱା, ହାର୍ ନାଦୋ ଇନିଃ ଜେତାୟାଃ ପାରୀକ୍ଷା ଆଏଃ ରିକାୟାଏ। ମେନ୍ଦୋ ମିମିୟାଦ୍ ହୋଡ଼ ଆପାନାଃ ଗି ଖାରାପ୍ ସାନାଙ୍ଗ୍ ରେ ଥାଇଃ କେତେ ହାର୍ ଫାନ୍ଦା ରେ ପାଶେ କେତେ ପାରୀକ୍ଷା ରେ ଉୟୁଗୋଃୱାକୋ। ଏନ୍ତେ ଏତ୍କାନ୍ ସାନାଙ୍ଗ୍ ହୋଡ଼ମୋ ସାବ୍ କେତେ ପାପ୍ କେ ସିର୍ଜାଅ ଏୟାଏ ହାର୍ ପାପ୍ ଚିମ୍ତାଙ୍ଗ୍ ହାରା କେନୋଗାଏ ଦୋ ଗୋନୋଏଃ କେ ଜାନାମ୍ ୟାଏ। ହେ ଇଙ୍ଗ୍ଆଃ ଦୁଲାଡ଼ାନ୍ ହାଗାକୋ, ଆଲୋପେ ହିହିଡ଼ୋଗା। ଚିୟାଃଚି ସବେନ୍ ବୁଗିନ୍ ବାର୍ଦାନ୍ ହାର୍ ସବେନ୍ ବୁଗିନ୍ ଦାନ୍ ସିର୍ମାଦିଶୁମ୍ ଏତେଗି ହିଜୁଗା, ହାର୍ ମାସ୍କାଲ୍ କୋରାଃ ଆପୁ ପାଡ଼େତେ ନାମୋଗା, ଅକନାଃ ରେ ନାଦୋ ବାଦ୍‍ଲାଅ ହୋବା ଧାଡ଼ିୟୋଃୱା ହାର୍ ନା ଆଦ୍‍ଲି ବାଦ୍‍ଲି ରାଃ ହୋରାତେ ଏନାରେ ଉମ୍ବୁଲ୍ ବାନୋଃୱା। ଇନିଃ ଆଜାଃଗି ସାନାଙ୍ଗ୍ ଲେକାତେ ଆବୁ କେ ସାର୍ତି ରାଃ ବାଚାନ୍ ହୋରାତେ ଜାନାମ୍ କେଃବୁୱାଏ, ଏନାତେ ଆବୁ ଇନିଜାଃ ବାଇକାନ୍ ଜିନିଷ୍ କୋଏତେ ମିଃ ରାକାମ୍ ରାଃ ପାହିଲା ଯଅ ହୋବାଅଃୱାବୁ। ହେ ଇଙ୍ଗ୍ଆଃ ଦୁଲାଡ଼ାନ୍ ହାଗାକୋ, ନେ ବାକାଣ୍ ଆପେ ସାରିକେପେ: ସବେନ୍ ମିପୀୟାଃ ହୋଡ଼ ସେକାଡ଼୍‍ଗୀ ଆୟୁମ୍ କାଏ ହାର୍ ଦେରି ତେ କାଜି କାଏ ହାର୍ ଦେରି ତେ ଖିସୋଃକାଏ, ଚିୟାଃଚି ହୋଡ଼ ରାଃ ଖିସ୍ ପାର୍ମେଶ୍ଵାର୍ ରାଃ ଧାରାମ୍ ହୋରା ରେ ସେସେନ୍ କାଏ ଏମେୟାଏ। ଏନାମେନ୍ତେ ସବେନ୍ କାଫାର୍ଚି କାଜିକୋକେ ହାର୍ ଏତ୍କାନ୍ କାଜିକୋକେ ବାଗିକେତେ, ପାର୍ମେଶ୍ଵାର୍ ରାଃ ଏନ୍ ବାଚାନ୍ କେ ଲେବେଃ ମୋନ୍ ଏତେ ଗ୍ରାହାନ୍ ଏପେ ଅକନାଃ ଆପେୟାଃ ରେ ହେର୍ କାନା ହାର୍ ଅକନାଃ ଆପେୟାଃ ଜୀଉ କେ ବାଞ୍ଚାଅ ଧାଡ଼ିୟାଏ। ମେନ୍ଦୋ ପାର୍ମେଶ୍ଵାର୍ ରାଃ ବାଚାନ୍ ରେ ସେସେନ୍ ନିଃ ବାଇଏନ୍ ପେ, ଆଡୋଃ ଖାଲି ଆୟୁମ୍ ନିଃ କାହା ଅକନିଃ ଆଏଃ ଆପାନ୍ କେଗି ଲୋଗୋ ୟାଏ। ଚିୟାଃଚି ଅକଏ ବାଚାନ୍ କେ ଆୟୁମ୍ ନିଃ ତାନିଃ ହାର୍ ଏନାରେ ସେସେନ୍ ନିଃ କାଏ ବାଇଏନ୍ ତାନାଏ, ଦୋ ଇନିଃ ଏନ୍ ହୋଡ଼ ଲେକା ମେନାଇଜା, ଅକନିଃ ଆଜାଃଗି ହୋଡ଼ମୋ ରାଃ ମେଏଃମୁହାଡ଼୍ କେ ଆଏନା ରେ ନେଲ୍ ତାନାଏ। ଏନାମେନ୍ତେ ଚି ଇନିଃ ଆଏଃ ଆପାନ୍ କେ ନେଲ୍‍କେତେ ସେନୋଃ କୋୱାଏ ହାର୍ ଇମ୍ତାଗି ରିଡ଼ିଙ୍ଗ୍ କୋଃୱାଏ ଚି ଆଏଃ ଚିଲ୍‍କା ନେଲୋଃ ତାଇକେନାଏ। ମେନ୍ଦୋ ଅକନ୍ ହୋଡ଼ ପାର୍ମେଶ୍ଵାର୍ ରାଃ ପୁରାକାନ୍ ଆଇନ୍ ରେ ଧ୍ୟାନ୍ କେତେ ତାଇନ୍ ତାନାଏ, ଇନିଃ ଆଜାଃ କାମି ରେ ଏନାଲାଗିନ୍ ଆଶିଷ୍ ନାମେୟାଏ ଚି ଆୟୁମ୍‍କେତେ କାଏ ରିଡ଼ିଙ୍ଗ୍ ତାନାଏ, ମେନ୍ଦୋ ଏନ୍‍ଲେକାଗି କାମି ତାନାଏ। ଆଗାର୍ ଜେତାଏ ଆଏଃ-ଆଏଃକେଗି ପାର୍ମେଶ୍ଵାର୍ କେ ମାନାତିଙ୍ଗ୍ ନିଃ ଆଟ୍‍କାର୍ ତାନାଏ ଆଡୋଃ ଆଜାଃ ଆଲାଙ୍ଗ୍ ରେ ଲାଗାମ୍ କାଏ ଏମେୟାଏ ମେନ୍ଦୋ ଆପାନାଃ ମୋନ୍ କେ ଲୋଗୋ ତାନାଏ, ଏଣ୍ଡେ ଇନିଜାଃ ଧାରାମ୍ କାମି ସାମାଗୀ ତାନାଃ। ଆବୁୱାଃ ପାର୍ମେଶ୍ଵାର୍ ଆଡୋଃ ଆପୁ ଆଃ ନାଡ଼େଏ ଫାର୍ଚି ହାର୍ ନିୟାର୍ ଧାରାମ୍ କାମି ନେୟା ତାନାଃ ଚି ଟୁରା ହାର୍ ବିଧୋବା କୋୱାଃ ଦୁକୁ ରେ ଇନ୍‍କୁକେ ଦେଙ୍ଗା କୋକାଏ, ହାର୍ ଆଏଃ-ଆପାନ୍ କେ ଅତେଦିଶୁମ୍ ଏତେ ଫାର୍ଚି ଜୀଦାନ୍ ତାଇନୋଃକାଏ। ହେ ଇଙ୍ଗ୍ଆଃ ହାଗାକୋ, ଆବୁୱାଃ ମାନାରାଙ୍ଗ୍ ଏତେ ଫେରେଜାକାନ୍ ପ୍ରାଭୁ ୟୀଶୁ ମାସୀହ୍ ରେ ଆପେୟାଃ ବିଶ୍ଵାସ୍ ମେଏଃମୁହାଡ଼୍ କେ ନେଲ୍ କେତେ ଆଲୋ ହୋବାଅଃକା। ପାହୋମ୍ ଲେପେ, ଆଗାର୍ ମିୟାଃ ହୋଡ଼ ସୋନା ରାଃ ମୁଦାମ୍ ହାର୍ ସୁନ୍ଦାର୍ ଲିଜାଃ ତୁସିଙ୍ଗ୍ କେତେ ଆପେୟାଃ ଦୁନୁବ୍ ରେ ହିଜୁଃୱାଏ, ହାର୍ ଆସି ଜୋମ୍ ନିଃ ମାଇଲା ଚେଚାଃ ଲିଜାଃ ତୁସିଙ୍ଗ୍ କାନ୍ ହିଜୁଃୱାଏ, ହାର୍ ଆପେ ଏନ୍ ସୁନ୍ଦାର୍ ଲିଜାଃ ତୁସିଙ୍ଗ୍ କାନ୍ ନିଜାଃ ମେଏଃମୁହାଡ଼୍ କେ ନେଲ୍‍କେତେ କାଜିୟାପେ, “ଆମ୍ ହେନ୍ତାଃ ବୁଗିନ୍ ଜାଗା ରେ ଦୁବ୍ ମେ,” ହାର୍ ଏନ୍ ଆସି ଜୋମ୍ ନିଃ କେ କାଜିୟାପେ, “ଆମ୍ ନେତାଃ ରେ ତିଙ୍ଗୁନ୍ ମେ,” ୟାଦୋ “ଇଙ୍ଗ୍ଆଃ କାଟା ନାଡ଼େଏ ରେ ଦୁବ୍ ମେ।” ଏଣ୍ଡେ ଚିନାଃ ଆପେ ଇନ୍‍କିନ୍ କେ ଏଟାଃ-ଏଟାଃ କାପେ ନେଲ୍ କେଦା ହାର୍ ଏତ୍କାନାଃ ପାହୋମ୍ କେତେ ବିଚାର୍ ରିକାନିଃ କାପେ ବାଇଜାନା? ହେ ଇଙ୍ଗ୍ଆଃ ଦୁଲାଡ଼୍ ହାଗାକୋ, ଆୟୁମେପେ। ଚିନାଃ ପାର୍ମେଶ୍ଵାର୍ ନେ ଅତେଦିଶୁମ୍ ରେନ୍ ରେଙ୍ଗେଃତାନ୍ କୋକେ କାଏ ସାଲା କେଃକୋୱାଏ ଚି ବିଶ୍ଵାସ୍ ରେ କିଶାଣେନ୍ ହାର୍ ଏନ୍ ରାଇଜ୍ ରାଃ ଆଧିକାରୀ ହୋବାଅଃ କାକୋ, ଅକନାଃ ଇନିଃ ଇନ୍‍କୁ ଲୋଃ କାଜିଥୋଲ୍ କାଦାଏ ଅକନ୍ କୋ ଇନିଃ ଲୋଃ ଦୁଲାଡ଼୍ ମାଣ୍ଡାଅ ତାନାକୋ? ମେନ୍ଦୋ ଆପେ ଏନ୍ ଆସିଜୋମ୍ ନିଜାଃ ଆପ୍‍ମାନ୍ କେଦାପେ। ଚିନାଃ କିଶାଣ୍ ହୋଡ଼ୋକୋ ଆପେୟାଃ ଚେତାନ୍ ରେ ଆତ୍ୟାଚାର୍ କାକୋ ରିକାୟା ହାର୍ ଇନ୍‍କୁଗି ଆପେକେ କାଚ୍‍ହାରି ରେ ଅର୍-ଅର୍ କେତେ ଚିନାଃ କାକୋ ଇଦିପେୟା? ଇନ୍‍କୁ ଏନ୍ ବୁଗିନ୍ ନୁତୁମ୍ ୟୀଶୁ କେ ଚିନାଃ କାକୋ ନିନ୍ଦାତାନା ଅକନିଜାଃ ହୋଡ଼ୋକୋ ଆପେ କାଜିଅଃ ତାନାପେ? ଏଣ୍ଡେହ ଆଗାର୍ ଆପେ ପାବିତାର୍ ପୁଥି ରାଃ ନେ ବାଚାନ୍ ଲେକା ଚି “ଆପେ ଆପେୟାଃ ନାଡ଼େଏ-ଜାପାଃ ରେନିଃ କେ ଆପାନ୍ ଲେକା ଦୁଲାଡ଼୍ ମାଣ୍ଡାଏପେ,” ସାର୍ତିଗୀ ଏନ୍ ପାର୍ମେଶ୍ଵାର୍ ରାଃ ରାଇଜ୍ ରାଃ ନିୟାମ୍ କେ ପୁରା ତାନାପେ, ଏଣ୍ଡେ ବେଶ୍ ରିକାତାନାପେ। ମେନ୍ଦୋ ଆଗାର୍ ଆପେ ମେଏଃମୁହାଡ଼୍ କେ ନେଲ୍ କେତେ କାମି ତାନାପେ ଦୋ ପାପ୍ ତାନାପେ; ଆଡୋଃ ମୁଶା ନାବୀ ରାଃ ଆଇନ୍ ଆପେକେ ପାପୀ ବାଇପେତାନାଏ। ଚିୟାଃଚି ଅକନ୍‍କୋ ମୁଶା ନାବୀ ରାଃ ଆଇନ୍ କେ ପୁରା ମାନାତିଙ୍ଗ୍ ତାନାକୋ ମେନ୍ଦୋ ମିୟାଃ କାଜି ରେ ଉୟୁଃଜାନ୍ ରେ ଇନିଃ ସବେନ୍ କାଜି କୋରେ ଦୋଷୀ ବାଇଜାନାଏ। ଏନାମେନ୍ତେ ଚି ପାର୍ମେଶ୍ଵାର୍ ଅକନିଃ ନେୟା କାଜିକେଦାଏ, “ଆପେ ବ୍ୟାଭିଚାର୍ ଆଲୋପେ ରିକାୟା,” ଇନିଃ ନେୟା ହଗି କାଜିକାଦାଏ, “ଆପେ ହୋଡ଼ ଆଲୋପେ ଗୋଏଃ କୋୱା,” ଏନାମେନ୍ତେ ଆଗାର୍ ଆମ୍ ବ୍ୟାଭିଚାର୍ ଦୋ କାମ୍ ରିକାକେଦା ମେନ୍ଦୋ ହୋଡ଼ ଗୋଏଃ କେଦାମ୍ ଏଣ୍ଡେ ହଗି ଆମ୍ ମୁଶା ନାବୀ ରାଃ ଆଇନ୍ କେ କାମାନାତିଙ୍ଗ୍ ନିଃ ବାଇ ଜାନାମ୍। ଆପେ ଏନ୍ ହୋଡ଼ୋକୋ ଲେକା ବାଚାନ୍ କାଜିପେ ଆଡୋଃ କାମି ହଗି ରିକାଏପେ, ଅକେୟାଃ ବିଚାର୍ ପାପ୍ ଏତେ ରାଡ଼ାକାନ୍ ରାଃ ଆଇନ୍ ଲେକାତେ ହୋବାୱା। ଚିୟାଃଚି ଅକଏ ଦାୟା କାଏ ରିକା କେଦାଏ, ଇନିଜାଃ ବିଚାର୍ ବେଗାର୍ ଦାୟା ତେ ହୋବାଅଃୱା, ଦାୟା ବିଚାର୍ ଚେତାନ୍ ରେ ଜିତାଅ କେନୋଗାଏ। ହେ ଇଙ୍ଗ୍ଆଃ ହାଗାକୋ, ଆଗାର୍ ଜେତାଏ କାଜିୟାଏ ଚି ଇଙ୍ଗ୍‍କେ ୟୀଶୁ ରେ ବିଶ୍ଵାସ୍ ମେନାଃ ମେନ୍ଦୋ ଇନିଃ କାମି କାଏ ରିକାତାନ୍ ରେଦୋ, ଏନାତେ ଚିକାନ୍ ଲାଭ୍? ଚିନାଃ ନେକା ବିଶ୍ଵାସ୍ ଇନିଃକେ ଚିଉଲାଅ ବାଞ୍ଚାଅ ଧାଡ଼ିୟାଏ? ଆଗାର୍ ଜେତାନ୍ ହାଗା ୟାଦୋ ମିଶି ତୁସିଙ୍ଗ୍ କାଏ ନାମ୍ ତାନ୍ ରେ ଆଡୋଃ ଇନ୍‍କୁ ସବେନ୍ ହୁଲାଙ୍ଗ୍ ଜୋଜୋମାଃ କାକୋ ନାମ୍ ଜୋମ୍ ତାନ୍ ରେ, ହାର୍ ଆପେ କୋଏତେ ଜେତାଏ ଇନ୍‍କୁକେ କାଜିୟାଏ, “ମାଜା ତେ ତାଇନୋଃପେ, ଆପେ ଉର୍ଗୁମ୍ ତାଇନୋଃପେ ଆଡୋଃ ଆଲୋପେ ରେଙ୍ଗେଜୋଃ,” ମେନ୍ଦୋ ଅକନ୍ ଜିନିଷ୍ କୋ ହୋଡ଼ମୋ ଲାଗିନ୍ ଦାର୍‍କାର୍ ମେନାଃ ଏନା ଇନ୍‍କୁକେ କାଏ ଏମେ ରେଦୋ ଏନ୍ କାଜି ରାଃ ଚିକାନ୍ ଲାଭ୍? ଏନ୍ ଲେକାଗି ବିଶ୍ଵାସ୍ ହଗି, ଆଗାର୍ କାମି ଲୋଃ କାହୋବାଅଃ ରେଦୋ ଏନା ଗୋଜାକାନ୍ ତାନାଃ। ମେନ୍ଦୋ ଜେତାଏ କାଜି ଧାଡ଼ିୟାଏ, “ଆମ୍‍କେ ବିଶ୍ଵାସ୍ ମେନାଃ ହାର୍ ଇଙ୍ଗ୍ ବୁଗିନ୍ କାମି-କାମି ତାନିଙ୍ଗ୍।” ଆମ୍ ଆମାଃ ବିଶ୍ଵାସ୍ ଇଙ୍ଗ୍‍କେ ବେଗାର୍ କାମି ତେଦୋ ଦେଖାଅ ଲେମ୍; ହାର୍ ଇଙ୍ଗ୍ ଇଙ୍ଗ୍ଆଃ ବିଶ୍ଵାସ୍ ଇଙ୍ଗ୍ଆଃ କାମି ରାଃ ହୋରାତେ ଆମ୍‍କେ ଦେଖାଅ ମେୟାଇଙ୍ଗ୍। ଆମ୍‍କେ ବିଶ୍ଵାସ୍ ମେନାଃ ଚି ମିହୋଡ଼୍ ଗି ପାର୍ମେଶ୍ଵାର୍ ମେନାଇଜା; ଆମ୍ ବେଶ୍ ରିକାତାନାମ୍। ବୋଙ୍ଗାଆତ୍ମା କୋ ହଗି ବିଶ୍ଵାସ୍ ମାଣ୍ଡାଅୟାକୋ, ଆଡୋଃ ଥାର୍ଥାରାଅଃ ୱାକୋ। ମେନ୍ଦୋ ହେ ନିର୍ବୁଦ୍ଧି ହୋଡ଼, ଚିନାଃ ଆମ୍ ନେୟା ହ କାମ୍ ସାରିୟା, ଚି କାମି ବେଗାର୍ ବିଶ୍ଵାସ୍ ସାମାଗୀ ତାନାଃ? ଚିମ୍ତାଙ୍ଗ୍ ଆବୁୱାଃ ଆପୁ ଆବ୍ରାହାମ୍ ଆଜାଃ ହୋନ୍ ଇସାହାକ୍ କେ ବେଦୀ ରେ ରାକାବ୍ କିଜାଏ, ଦୋ ଚିନାଃ ଇନିଃ କାମି ତେ ଧାର୍ମୀ କାଏ ବାଇଲେନାଏ? ଏନାତେ ଆମ୍ ନେଲ୍ କେଦାମ୍ ଚି ବିଶ୍ଵାସ୍ ଇନିଜାଃ କାମି ଲୋଃ ମେଶା କେତେ ପୋକ୍ତା କେଦାଏ ଆଡୋଃ କାମି ତେ ବିଶ୍ଵାସ୍ ପୁରା ଜାନା। ହାର୍ ପାବିତାର୍ ପୁଥି ରାଃ ନେ ବାଚାନ୍ ପୁରା ଜାନା: ଆବ୍ରାହାମ୍ ପାର୍ମେଶ୍ଵାର୍ କେ ବିଶ୍ଵାସ୍ କିଜାଏ, ହାର୍ ନେୟା ଇନିଃ ଲାଗିନ୍ ଧାରାମ୍ ଗିନ୍ତି ଜାନା; ହାର୍ ଇନିଃ ପାର୍ମେଶ୍ଵାର୍ ରାଃ ଗାତି କାଜି ଜାନାଏ। ନେଲେକାତେ ଆପେ ନେଲ୍ କେଦାପେ ଚି ହୋଡ଼ ବିଶ୍ଵାସ୍ ତେ ଭାଇର୍ କାହା, ମେନ୍ଦୋ କାମି କୋତେ ହଗି ଧାର୍ମୀ ହୋଡ଼ ବାଇୟୋଗାଏ। ଏନ୍‍ଲେକାଗି ରାହାବ୍ ବେଶ୍ୟା ହଗି, ଚିମ୍ତାଙ୍ଗ୍ ସାନ୍ଦେଶ୍ ଏହେମ୍ କୋକେ ଆଜାଃ ଅଡ଼୍ଆଃ ରେ ତାଇନ୍ ଏମାଃକୋୱାଏ, ହାର୍ ଏଟାଃ ହୋରା ତେ ବିଦା କେଃକୋୱାଏ, ଏଣ୍ଡେ ଚିନାଃ କାମି କୋତେ ଧାର୍ମୀ କୁଡ଼ି କାଏ ବାଇଜାନାଏ? ଏନାତେ ଜେଲେକା ହୋଡ଼ମୋ ଆତ୍ମା ବେଗାର୍ ଗୋଜାକାନା, ଏନ୍‍ଲେକାଗି ବିଶ୍ଵାସ୍ ହଗି କାମି ବେଗାର୍ ଗୋଜାକାନା। ହେ ଇଙ୍ଗ୍ଆଃ ହାଗାକୋ, ଆପେ କୋଏତେ ଥିମ୍ବାଗି ଉପ୍‍ଦେଶ୍ ଏହେମ୍ ନିଃ ଆଲୋପେ ବାଇୟୋଃ, ଚିୟାଃଚି ଆପେ ସାରିୟାପେ ଚି ଆବୁ ଉପ୍‍ଦେଶ୍ ଏହେମ୍ କୋ ଥିମ୍ବାଗି ବିଚାର୍ ଅଗାବୁ। ଏନାମେନ୍ତେ ଚି ଆବୁ ସବେନ୍ କୋ ଥିମ୍ବାଗି କାଜି ରେ ଥୋଦୋଃ ତାନାବୁ; ଅକଏ ବାଚାନ୍ ରେ କାଏ ଥୋଦୋଃ ତାନାଏ ଇନିଃଗି ପୁରା ସାରିକାନ୍ ହୋଡ଼ ତାନିଃ; ଆଡୋଃ ଆଜାଃ ସବେନ୍ ହୋଡ଼ମୋ ଚେତାନ୍ ରେ ହଗି ଲାଗାମ୍ ଲାଗାଅ ଧାଡ଼ିୟାଏ। ଚିମ୍ତା ଆବୁ ଆବୁୱାଃ ଆଧିନ୍ ରେ ଇଦିଲାଗିନ୍ ଶାଦୋମ୍ କୋକେ ମୋଚା ରେ ଲାଗାମ୍ ଲାଗାଅୟାବୁ, ଏଣ୍ଡେ ଆବୁ ଇନ୍‍କୁୱାଃ ଗୋଟା ହୋଡ଼ମୋ କେ ହଗି ବିୟୁର୍ ଧାଡ଼ିୟାବୁ। ନେଲେପେ, ଜାହାଜ୍ ହଗି, ଇମିନ୍ ମାରାଙ୍ଗ୍ ତାଇନ୍ ରେହ ହାର୍ ବେଶେ ଥିମ୍ବା ହୋୟୋ ତେ ଚାଲାଅଃ ତାନା, ଏଣ୍ତେ ରେହଗି ମିୟାଃ ହୁଡିଙ୍ଗ୍ ପାତ୍ୱାର୍ ଏତେ ଚାଲାଓନିଃ ଆଜାଃ ସାନାଙ୍ଗ୍ ଲେକାତେ ଇଦିଧାଡ଼ିୟାଏ। ଏନ୍‍ଲେକାଗି ଆଲାଙ୍ଗ୍ ହଗି ମିୟାଃ ହୋଡ଼ମୋ ରାଃ ହୁଡିଙ୍ଗ୍ ଭାଗ୍ ତାନାଃ ହାର୍ ମାରାଙ୍ଗ୍-ମାରାଙ୍ଗ୍ କାଜିକୋ କାଜିୟାଏ। ନେଲେପେ, କାଟିଃକାନ୍ ସେଙ୍ଗେଲ୍ ଏତେ ଚିମିନ୍ ମାରାଙ୍ଗ୍ ଟୋନାଙ୍ଗ୍ ରେ ସେଙ୍ଗେଲ୍ ଜୁଲ୍ କେନୋଃୱା। ଆଲାଙ୍ଗ୍ ହଗି ମିୟାଃ ସେଙ୍ଗେଲ୍ ଲେକା ତାନାଃ, ଆଲାଙ୍ଗ୍ ଆବୁୱାଃ ହୋଡ଼ମୋ ରେ ମିୟାଃ ଆଧାର୍ମ୍ ରାଃ ଅତେଦିଶୁମ୍ ପାଡ଼୍ ଇଦି ରାଃ ହୋରା ତାନାଃ ହାର୍ ପୁରା ହୋଡ଼ କେ ଶିତୃ ତାଆଏ, ଆଡୋଃ ଏନା ଜୀଦାନ୍ ରାଃ ହୋରା ରେ ସେଙ୍ଗେଲ୍ ଜୁଲ୍ ତାଆଏ, ଆଡୋଃ ଆଏଃଗି ନାରାକ୍ ଡୋଡା ରାଃ ସେଙ୍ଗେଲ୍ ଏତେ ଜୁଲ୍ କାତେଅଃୱା। ସବେନ୍ ଲେକାନ୍ ବୁରୁ ଜାନ୍ତୁ, ଅଡ଼େ, ହାର୍ ରେଙ୍ଗାଅତାନ୍ ଜାନ୍ତୁ, ହାର୍ ଦାଆ ଜାନ୍ତୁ କୋ ଦୋ ମାନ୍‍ୱା ହୋନ୍ କୋୱାଃ ଆଧିନ୍ ରେ ହୋବା ଧାଡ଼ିୟୋଃୱାକୋ ହାର୍ ହୋବା ଜାନାକୋ ହ, ମେନ୍ଦୋ ଆଲାଙ୍ଗ୍ କେ ମାନ୍‍ୱା ହୋନ୍ କୋଏତେ ଅକଏ ହଗି ଆଧିନ୍ ରେ ମାଣ୍ଡାଅ କାକୋ ଧାଡ଼ିୟା; ଏନା ମିୟାଃ ନେକାନ୍ ଖାରାପ୍ ଭାଗ୍ ତାନାଃ ଅକନାଃ ଚିମ୍ତାଅଗି କାଏ ହୋକାଅଃୱାଏ, ଏନା ଗୋଗୋଏଃ ବିଷ୍ ତେ ଫେରେଃ କାନା। ନେ ଆଲାଙ୍ଗ୍ ତେଗି ଆବୁ ପ୍ରାଭୁ ଆଡୋଃ ଆପୁ ଗାଃ ମାନାରାଙ୍ଗ୍ ବୁ ରିକାତାନା, ଆଡୋଃ ନେୟା ଏତେଗି ହୋଡ଼ୋକୋକେ ଅକନ୍ କୋଚି ପାର୍ମେଶ୍ଵାର୍ ରାଃ ଲେକା ବାଇକାନାକୋ ସାର୍ପାଅ କୋୱାବୁ। ମିୟାଃଗି ମୋଚା ଏତେଗି ଧାନ୍ୟାବାଦ୍ ଆଡୋଃ ସାର୍ପାଅ କାଜି ବାରାନାଃ ଅଡୋଙ୍ଗ୍ଅଃୱା। ହେ ଇଙ୍ଗ୍ଆଃ ହାଗାକୋ, ନେକା କା ହୋବାଅଃ ଚାହି। ଚିନାଃ ପାଝ୍ରା ରାଃ ମିୟାଃ ହୋରା ତେଗି ହେଡ଼େମ୍ ହାର୍ ବୁଲୁଙ୍ଗ୍ ଦାଆ ବାରାନାଃ ଅଡୋଙ୍ଗ୍ଅଃୱା? ହେ ଇଙ୍ଗ୍ଆଃ ହାଗାକୋ, ଚିନାଃ ଲୋୱା ଦାରୁ ରେ ଜୈତୁନ୍ ଯଅ ଯୋଃୱା, ୟାଦୋ ଆଙ୍ଗୁର୍ ନାଡ଼ି ରେ ଲୋୱା ଯଅ ଯଅଃ ଧାଡ଼ିୟୋଃୱା? ଏନ୍ ଲେକାଗି ବୁଲୁଙ୍ଗ୍ ପାଝ୍ରା ଏତେ ହେଡ଼େମ୍ ଦାଆ କାଅଡୋଙ୍ଗ୍ ଧାଡ଼ିୟୋଃୱା। ଆପେ କୋରେ ସେଣାନ୍ ହୋଡ଼ ହାର୍ ଆଟ୍‍କାର୍ ଉରୁମ୍ ଧାଡ଼ି ହୋଡ଼ ଅକଏ ତାନିଃ? ଅକଏ ଏନ୍‍ଲେକାନ୍ ହୋଡ଼ ତାନିଃ ଇନିଃ ଆଜାଃ କାମିକୋକେ ବୁଗିନ୍ ସେସେନ୍ ତେ ଏନ୍ ଲେବେଃ ଲୋଃ ଉଦୁବେ କାଏ ଅକନାଃ ସେଣା ଏତେ ସିର୍ଜାଅଃୱା। ମେନ୍ଦୋ ଆଗାର୍ ଆପେ ଆପାନାଃ-ଆପାନାଃ ମୋନ୍ ରେ ହାଡ଼୍ଆଃ ହିସିଙ୍ଗା ହାର୍ ଆପାନାଃ ସାନାଙ୍ଗ୍ କେ ପୁରାରିକା ମୋନ୍ ରେ ମାଣ୍ଡାଅୟାପେ, ଏଣ୍ଡେ ଆଲୋପେ ମାରାଙ୍ଗ୍ଏନା, ନାଦୋ ସାର୍ତି ରାଃ ବିରୋଧ୍ ରେ ଆଲୋପେ ଲୋଗୋୟା। ନେ ସେଣା ଏନା ନାହାଲା ଅକନାଃ ଚେତାନ୍ ଏତେ ଆଡ଼୍‍ଗୁଅଃ ତାନା, ମେନ୍ଦୋ ଅତେଦିଶୁମ୍ ରେୟାଃ, ହାର୍ କାଆତ୍ମାନ୍ ରେୟାଃ ହାର୍ ଶାଏତାନ୍ ଏତେ ତାନାଃ। ଚିୟାଃଚି ଅକତାଃ ରେ ହିସିଙ୍ଗା ହାର୍ ଆପାନାଃ ସାନାଙ୍ଗ୍ କେ ପୁରାରିକା ରାଃ ମୋନ୍ ତାଇନା, ଏନ୍ତାଃରେ ହାଲାଗୁଲା ହାର୍ ସବେନ୍ ରାକାମ୍ ରାଃ ଖାରାପ୍ କାମି ହଗି ହୋବାଅଃୱା। ମେନ୍ଦୋ ଅକନ୍ ସେଣା ଚେତାନ୍ ଏତେ ହିଜୁଗା ଏନା ସିଦା ଦୋ ଫାର୍ଚି ତାଇନା ହାର୍ ମେଶାଅଃ ଲେକାନ୍, ଲେବେଃ ହାର୍ ଶିବିଲ୍ ଲେକାନାଃ ହାର୍ ଦାୟା ହାର୍ ବୁଗିନ୍ ଯଅ କୋଏତେ ଲାଦିୟାକାନ୍ ହାର୍ କାବାଦ୍‍ଲା ଥାବୋଃୱା ହାର୍ ବେଗାର୍ ବେଦା ଲେକା ତାଇନା। ମେନେଶା ରିକାତାନ୍ କୋ ଧାରାମ୍ ହୋରା ରାଃ ଯଅ ମେନେଶା ତେ ହେରେ ୟାକୋ। ଆପେ ରେ ଲାପ୍ଡ଼ାଇ ହାର୍ ଝାଗ୍ଡ଼ା କୋତାଃ ଏତେ ହିଜୁଃଲେନା? ଚିନାଃ ଏନ୍ ସୁକୁ ରାଶିକା କୋଏତେ କାହା ଅକନାଃ ଆପେୟାଃ ହୋଡ଼ମୋ ରେ ଲାଡ଼ାଇଅଃ ତାନା? ଆପେ ହାୟା ପେ ମାଣ୍ତାଅ ତାନା, ମେନ୍ଦୋ ଆପେ କାପେ ନାମ୍ ତାନା; ଏନାମେନ୍ତେ ଆପେ ଗୋଏଃ ତାନାପେ। ଆପେ ହିସିଙ୍ଗା ତାନାପେ, ହାର୍ ଜେତ୍ନାଃ ଅଗି କାପେ ନାମ୍ ଧାଡ଼ିତାନା; ଏଣ୍ଡେ ଆପେ ଝାଗ୍ଡ଼ା ତାନାପେ ହାର୍ ଲାପ୍ଡ଼ାଇ ତାନାପେ। ଆପେକେ ଏନାମେନ୍ତେ କାନାମୋଃ ତାନା ଚିୟାଃଚି ଆପେ ପାର୍ମେଶ୍ଵାର୍ କେ କାପେ ଆସିତାନା। ଆପେ ପାର୍ମେଶ୍ଵାର୍ କେ ଆସି ତାନାପେ ହାର୍ କାପେ ନାମ୍ ତାନା, ଏନାମେନ୍ତେ ଚିୟାଃଚି ଏତ୍କାନ୍ ସାନାଙ୍ଗ୍ ତେ ଆସିତାନାପେ, ଏନାତେ ଆପେୟାଃ ଶିତୃ ସୁକୁ ରାଶିକା ରେ ଖାର୍ଚା ତାଃପେ। ହେ ବ୍ୟାଭିଚାରୀ ହୋଡ଼ୋକୋ, ଚିନାଃ ଆପେ କାପେ ସାରିୟା ଚି ଅତେଦିଶୁମ୍ ଲୋଃ ଗାତିନ୍ ପାର୍ମେଶ୍ଵାର୍ ଲୋଃ ବାଇରୀ ବାଇୟେନ୍ ତାନାଃ? ଏନାତେ ଅକଏ ଅତେଦିଶୁମ୍ ଲୋଃ ଗାତିନ୍ ବାଇ ସାନାଙ୍ଗ୍ ତାନାଏ, ଇନିଃ ଆଏଃ-ଆପାନ୍ କେ ପାର୍ମେଶ୍ଵାର୍ ରାଃ ବାଇରୀ ବାଇ ତାନାଏ। ଚିନାଃ ଆପେ ନେୟା ବୁଝାଅଃ ତାନାପେ ଚି ପାବିତାର୍ ପୁଥି ସାମାଗୀ କାଜି ତାନାଏ, “ଅକନ୍ ଆତ୍ମା କେ ଇନିଃ ଆବୁୱାଃ ଭିତାର୍ ରେ ମାଣ୍ତାଅ କାଦାଏ, ଚିନାଃ ଇନିଃ ନେକା ହାୟା ମାଣ୍ଡାଅୟାଏ, ଅକନାଃ ରାଃ ନାଲା ହିସିଙ୍ଗା ହୋବାଅଃୱା?” ଇନିଃ ଦୋ ଆଡୋଃଗି ଆନୁଗ୍ରାହ୍ ଏମେୟାଏ, ଏନାମେନ୍ତେ ନେୟା ଅଲାକାନା, “ପାର୍ମେଶ୍ଵାର୍ ମାରାଙ୍ଗେନ୍ ମୋନ୍ କୋୱାଃ ବିରୋଧ୍ ୟାଏ, ମେନ୍ଦୋ ମୋନ୍ ରେ ହୁଡିଙ୍ଗେନ୍ ମୋନ୍ କୋକେ ଆନୁଗ୍ରାହ୍ ଏମେୟାଏ।” ଏନାମେନ୍ତେ ପାର୍ମେଶ୍ଵାର୍ ରାଃ ଆଧିନ୍ କେନୋଃପେ; ହାର୍ ଶାଏତାନ୍ କେ ସାମ୍ନା ରିକାଏପେ, ଏଣ୍ଡେ ଇନିଃ ଆପେୟାଃ ନାଡ଼େଏ ଜେତେ ନିର୍ କେନୋଗାଏ। ପାର୍ମେଶ୍ଵାର୍ ରାଃ ନାଡ଼େଏ ହିଜୁଃପେ ଏଣ୍ଡେ ଇନିଜୋଗି ଆପେୟାଃ ନାଡ଼େଏ ହିଜୁଗାଏ। ହେ ପାପୀକୋ, ଆପେୟାଃ ତିଈ ଆବୁଙ୍ଗ୍ଏପେ; ହାର୍ ହେ ବାରିୟା ମୋନ୍ ହୋଡ଼ୋକୋ, ଆପେୟାଃ ମୋନ୍ କେ ପାବିତାର୍ ଏପେ। ଦୁକୁଅଃପେ, ହାର୍ ଗେରାଙ୍ଗ୍ ଏପେ, ହାର୍ ରାଆ ଏପେ। ଆପେୟାଃ ଲାନ୍ଦା ଗେରାଙ୍ଗ୍ ରେ ହାର୍ ଆପେୟାଃ ରାଶିକା ଉଦାସ୍ ରେ ବାଦ୍‍ଲାଅଃକା। ପ୍ରାଭୁ ଆଃ ନାଡ଼େଏ ରେ ମୋନ୍ ରେ ହୁଡିଙ୍ଗ୍ଏନ୍ ପେ ଏଣ୍ଡେ ଇନିଃ ଆପେକେ ମାରାଙ୍ଗ୍ ବାଇପେୟାଏ। ହେ ହାଗାକୋ, ମିହୋଡ଼୍ ଏଟାଃ ନିଜାଃ ଆଲୋପେ ବାଦ୍‍ନାମ୍ଏୟା। ଅକଏ ଆଜାଃ ହାଗା ରାଃ ବାଦ୍‍ନାମ୍ ରିକାୟାଏ ୟାଦୋ ହାଗା ରାଃ ଚେତାନ୍ ରେ ଦୋଷ୍ ଲାଗାଅୟାଏ, ଇନିଃ ପାର୍ମେଶ୍ଵାର୍ ରାଃ ଆଇନ୍ ରାଃ ବାଦ୍‍ନାମ୍ ତାନାଏ ହାର୍ ପାର୍ମେଶ୍ଵାର୍ ରାଃ ଆଇନ୍ ଚେତାନ୍ ରେ ଦୋଷ୍ ଲାଗାଅ ତାନାଏ; ହାର୍ ଆଗାର୍ ଆମ୍ ପାର୍ମେଶ୍ଵାର୍ ରାଃ ଆଇନ୍ ଚେତାନ୍ ଦୋଷ୍ ଏମ୍ ତାନାମ୍, ଏଣ୍ଡେ ଆମ୍ ପାର୍ମେଶ୍ଵାର୍ ରାଃ ଆଇନ୍ ରେ ସେସେନ୍ ନିଃ ନାହାଲାମ୍ ମେନ୍ଦୋ ଏନାରେ ବିଚାର୍ ରିକାନିଃ ବାଇଜାନାମ୍। ଆଇନ୍ ଏହେମ୍ ନିଈ ହାର୍ ବିଚାର୍ ରିକାନିଃ ଦୋ ମିହୋଡ଼୍ ଗି ତାନିଃ, ଅକଏ ବାଞ୍ଚାଅ ହାର୍ ନାଶ୍ ରିକା ରେ ପେଡ଼େଜାନ୍ ତାନିଃ। ମେନ୍ଦୋ ଆମ୍ ଅକଏ ତାନ୍‍ମେ, ଜେ ଆମାଃ ନାଡ଼େଏ-ଜାପାଃ ରେନ୍ ଚେତାନ୍ ରେ ଦୋଷ୍ ଲାଗାଅ ତାନାମ୍? ନାଆ ଆୟୁମେପେ, “ଆପେ ଜେ କାଜିୟାପେ, ଇସିଙ୍ଗ୍ ୟାଦୋ ଗାପା ଆଲେ ଜାହାନ୍ ଏଟାଃ ସାହାର୍ ରେ ସେନ୍‍କେତେ ଏନ୍ତାଃରେ ମିଃ ଶିର୍ମା ତାଇନାଲେ, ହାର୍ ବେପାର୍ କେତେ ଟାକା କାମିୟାଲେ।” ହାର୍ ନେୟା କାପେ ସାରିୟା ଚି ଗାପା ଚିନାଃ ହୋବାଅଃୱା। ଆୟୁମ୍ ଦୋ ଲେପେ, ଆପେୟାଃ ଜୀଦାନ୍ ଚିନାଃ ତାନାଃ? ଆପେ ଦୋ ସୁକୁଲ୍ ଲେକା ତାନ୍‍ପେ, ଅକନାଃ ଘାଡ଼ିକାଃ ନାଙ୍ଗ୍ ନେଲୋଃୱା ହାର୍ ଅଟାଙ୍ଗ୍ କେନୋଗା। ନେୟା ରାଃ ଉଲ୍‍ଟା ଆପେକେ ନେୟା କାଜି ଚାହି, “ଆଗାର୍ ପ୍ରାଭୁ ସାନାଙ୍ଗ୍ ରେଦୋ ଆଲେ ଜୀହିଦ୍ ତାଇନୋଗାଲେ, ହାର୍ ନେୟା ୟାଦୋ ଏନା କାମି ହଗି କାମିୟାଲେ।” ମେନ୍ଦୋ ନାଆ ଆପେୟାଃ ମାଇନେନ୍ କାଜିକୋରେଗି ମାରାଙ୍ଗ୍ଏନ୍ ତାନାପେ, ନେଲେକା ମାରାଙ୍ଗ୍ଏନ୍ ଠାଉକା ନାହାଲା। ଏନାମେନ୍ତେ ଅକଏ ବୁଗିନ୍ ରିକା ସାରିୟାଏ ହାର୍ କାଏ ରିକାତାନା, ଇନିଜାଃ ଲାଗିନ୍ ନେୟା ପାପ୍ ତାନାଃ। ହେ କିଶାଣ୍‍କୋ, ଆୟୁମ୍ ଦୋ ଲେପେ, ଆପେ ଆପେୟାଃ ଚେତାନ୍ ରେ ହିଜୁଃତାନ୍ ଦୁକୁ ନାଙ୍ଗ୍ କାଉରି-କାଉରି କେତେ ରାଆ ଏପେ। ଆପେୟାଃ ସାମ୍ପାତି କୋ ବାଗ୍‍ଡ଼ାଅ ଜାନା ହାର୍ ଆପେୟାଃ ଲିଜାଃ କୋକେ ତିଜୁକୋ ଜୋମ୍ କେଦାକୋ। ଆପେୟାଃ ସୋନା-ରୂପା ରେ ମୋର୍ଚା ସାବ୍ କେଦାଏ; ହାର୍ ଏନ୍ ମୋର୍ଚା ଆପେୟାଃ ଗୋୱା ଏମେୟାଏ ହାର୍ ସେଙ୍ଗେଲ୍ ଲେକା ଆପେୟାଃ ମାସ୍ ଜୋମେୟାଏ। ଆପେ ଆଖ୍ରୀ ହୁଲାଙ୍ଗ୍ କୋରେ ସାମ୍ପାତି ହୁଣ୍ତି କାଦାପେ। ନେଲେପେ, ଅକନ୍ ନାଲାତାନ୍ କୋ ଆପେୟାଃ ଅତେ ଇର୍ କେଦାକୋ, ଇନ୍‍କୁୱାଃ ଏନ୍ ନାଲା କେ ଅକନାଃ ଆପେ ଲୋଗୋ କେତେ ମାଣ୍ତାଅ କାଦାପେ ଇନ୍‍କୁ କାଉରି ତାନାକୋ, ହାର୍ ଇର୍ ତାନ୍ କୋୱାଃ କେଡ଼ା ପେଡ଼େଜାନ୍ ପ୍ରାଭୁ ରାଃ ଲୁତୁର୍ ସାନ୍ତେ ସେଟେର୍ ଜାନା। ଆପେ ଅତେ ରେ ସୁକୁ-ରାଶିକା ରେ ତାଇନ୍ ଜାନାପେ ହାର୍ ଥିମ୍ବାଗି ସୁକୁ ନାମ୍ କେଦାପେ; ଆପେ ମାଆ ହୁଲାଙ୍ଗ୍ ଲାଗିନ୍ତେ ଆପେୟାଃ ମୋନ୍ କେ ଆସୁଲ୍-ହାରା କେତେ ଏନାକେ ସୁକୁ ରେ ମାଣ୍ଡାଅ କେଦାପେ। ଆପେ ଧାର୍ମୀ ହୋଡ଼କେ ଦୋଷୀ ବାଇକେତେ ଗୋଏଃ କିଜାପେ, ଇନିଃ ଆପେୟାଃ ସାମ୍ନା କାଏ ରିକାତାନା। ଏନାମେନ୍ତେ ହେ ହାଗାକୋ, ପ୍ରାଭୁ ଆଃ ହିନିଜୁଃ ସାନ୍ତେ ସାହାତିଙ୍ଗ୍ କେତେ ତାଇନ୍‍ପେ। ନେଲେପେ, ଚାଷି ଅତେ ରାଃ ଗୋନୋଙ୍ଗାନ୍ ଯଅ ନାମେ ଲାଗିନ୍ତେ ନେଲ୍ ହୋରା ତାନ୍ ଲୋଃ ସିଦା ହାର୍ ତାୟୋମ୍ ଦାଆ ହିଜୁଃ ସାନ୍ତେ ନେଲ୍ ହୋରାୟାଏ। ଏନ୍ ଲେକାଗି, ଆପେ ହଗି ସାହାତିଙ୍ଗ୍ ଏପେ; ହାର୍ ଆପାନ୍ ମୋନ୍ କେ କେଟେଜେପେ, ଚିୟାଃଚି ପ୍ରାଭୁ ଆଃ ହିନିଜୁଃ ନାଡ଼େଏ ମେନାଃ। ହେ ହାଗାକୋ, ମିହୋଡ଼୍ ଏଟାଃ ନିଈ ରେ ଦୋଷ୍ ଆଲୋପେ ଲାଗାଅୟା, ଏନାତେ ଆପେ ଦୋଷୀ କାପେ ବାଇୟୋଗା, ନେଲେପେ, ବିଚାର୍‍ନିଃ ଦୁହାର୍ ରେ ତିଙ୍ଗୁ କାନାଏ। ହେ ହାଗାକୋ, ଅକନ୍ ନାବୀ କୋ ପ୍ରାଭୁ ଆଃ ନୁତୁମ୍ ରେ କାଜିକେଦାକୋ, ଇନ୍‍କୁକେ, ଦୁକୁ ଉଠାଓ ହାର୍ ସାହାତିଙ୍ଗ୍ କେଦାକୋ ମେନ୍ତେ ଜୋନୋକା ଲେକା ଆଟ୍‍କାର୍ କୋପେ। ନେଲେପେ, ଆଲେ ଦୁକୁ ସାହାତିଙ୍ଗ୍ ତାନ୍ କୋକେ ଧାନ୍ୟା କାଜିୟାଲେ। ଆପେ ଆୟୁବ୍ ରାଃ ଦୁକୁ ସାହାତିଙ୍ଗ୍ ବିଷାୟ୍ କେ ଦୋ ଆୟୁମ୍ କାଦାପେ, ଆଡୋଃ ପ୍ରାଭୁ ଆଃ ପାଡ଼େତେ ଅକନାଃ ଇନିଃକେ ଯଅ ନାମ୍‍ଜାନା ଏନାକେ ହଗି ସାରିକାଦାପେ, ଅକନାଃତେ ପ୍ରାଭୁ ଆଃ ଥିମ୍ବାଗି ଲିବୁଇ ହାର୍ ଦାୟା ନେଲୋଃ ତାନା। ମେନ୍ଦୋ ହେ ଇଙ୍ଗ୍ଆଃ ହାଗାକୋ, ସବେନ୍ ଏତେ ନେ ବାକାଣ୍ ମାରାଙ୍ଗ୍ ତାନାଃ ଚି କିରିୟା ଆଲୋପେ ଜୋମେୟା, ନା ସିର୍ମାଦିଶୁମ୍ ରାଃ, ନା ଅତେ ରାଃ, ନା ଜେତାନ୍ ଏଟାଃ ଜିନିଷ୍ ରାଃ; ମେନ୍ଦୋ ଆପେୟାଃ ବାକାଣ୍ ହାଁ ରାଃ ହାଁ, ହାର୍ କାହା ରାଃ କାହା ହୋବାଅଃକା, ଏନାତେ ଆପେ ଦାଣ୍ଡ୍ ନାମେ ଲେକାନ୍ କାପେ ବାଇୟୋଃୱା। ଆଗାର୍ ଆପେ ରେ ଜେତାଏ ଦୁକୁ ରେ ମେନାପେୟା, ଏଣ୍ଡେ ଇନିଃ ବିନ୍ତି କାଏ। ଆଗାର୍ ସୁକୁ ରେ ମେନାପେୟା, ଏଣ୍ଡେ ଇନିଃ ପାର୍ମେଶ୍ଵାର୍ ରାଃ ସ୍ତୁତି ରାଃ ଦୁରାଙ୍ଗ୍ଏକାଏ। ଆଗାର୍ ଆପେ ରେ ଜେତାଏ ରୋଗୀ କୋ ମେନାକୋୱା ରେଦୋ, କାଲିସିୟା ରାଃ ମାରିହୋଡ଼ୋକୋକେ କେଡ଼ା କୋପେ, ହାର୍ ଇନ୍‍କୁ ପ୍ରାଭୁ ଆଃ ନୁତୁମ୍ ତେ ଇନିଜାଃ ରେ ସୁନୁମ୍ ଗୋସୋଃ କେତେ ଇନିଜାଃ ଲାଗିନ୍ ବିନ୍ତି କାକୋ। ହାର୍ ବିଶ୍ଵାସ୍ ରାଃ ବିନ୍ତି ହୋରାତେ ବେମାର୍ ହୋବାଅଃତାନ୍ ନିଃ ବୁଗିନ୍ କେନୋଗାଏ ହାର୍ ପ୍ରାଭୁ ଇନିଃକେ ବେଶ୍ ତାଇୟାଏ, ହାର୍ ଆଗାର୍ ଇନିଃ ପାପ୍ ହଗି ରିକାକାଃ ରେଦୋ, ପାର୍ମେଶ୍ଵାର୍ ହଗି ଇନିଃକେ ଛାମା ତାଇୟାଏ। ଏନାମେନ୍ତେ ଆପେ ଆପେୟାଃ ରେ ମିହୋଡ଼୍ ଏଟାଃ ନିଜାଃ ନାଡ଼େଏ ରେ ଆପାନାଃ-ଆପାନାଃ ପାପ୍ କୋକେ ମାନାତିଙ୍ଗ୍ କେପେ; ହାର୍ ମିହୋଡ଼୍ ଏଟାଃ ନିଜାଃ ଲାଗିନ୍ ବିନ୍ତି ଏପେ, ଏନାତେ ପାର୍ମେଶ୍ଵାର୍ ଆପେକେ ବେଶ୍ ପେୟାଏ; ଧାର୍ମୀ ହୋଡ଼ ରାଃ ବିନ୍ତି ତେ ଥିମ୍ବାଗି ପେଡ଼େଜାନ୍ କାମିକୋ ହୋବା ଧାଡ଼ିୟୋଗା। ଏଲିୟା ନାବୀ ହ ଦୋ ଆବୁୱାଃ ଲେକା ଦୁକୁ-ସୁକୁ ସାହାତିଙ୍ଗ୍ ହୋଡ଼ ତାଇକେନାଏ; ହାର୍ ଇନିଃ ପୁରା ମୋନ୍ ତେ ବିନ୍ତି କେଦାଏ ଚି ଦାଆ ଆଲୋକା ଗାମାଏକା; ହାର୍ ଆପି ଶିର୍ମା ଥାଲା ସାନ୍ ଅତେ ରେ ଦାଆ କାଏ ଗାମା କେଦା। ଏନ୍ତେ ଇନିଃ ଆଡୋଃଗି ବିନ୍ତି କେଦାଏ, ଏଣ୍ଡେ ରିମିଲ୍‍ଦିଶୁମ୍ ଏତେ ଦାଆ ଗାମାଜାନା, ହାର୍ ଅତେ ଆଜାଃ ଯଅ ଆଉକେଦାଏ। ହେ ଇଙ୍ଗ୍ଆଃ ହାଗାକୋ, ଆଗାର୍ ଆପେ କୋଏତେ ଜେତାଏ ସାର୍ତି ରାଃ ହୋରା ଏତେ ଆଃ କେନୋଃରେ ହାର୍ ଜେତାଏ ଇନିଃକେ ରୁଆଡ଼୍ ଆୱି ରେଦୋ, ଇନିଃ ନେୟା ସାରିଲେକାଏ ଚି ଅକଏ ହଗି ଜାହାନ୍ ଆଦାକାନ୍ ପାପୀ କେ ରୁଆଡ଼୍ ଆୱି ରେଦୋ, ଇନିଃ ମିୟାଃ ଜୀଉ କେ ଗୋଜେନ୍ ଏତେ ବାଞ୍ଚାଅୟାଏ, ହାର୍ ଇନିଜାଃ ମିଃଥିମ୍ବା ପାପ୍ କୋକେ ହାରୁବ୍ କେୟାଏ। ପାତ୍ରାସ୍ ପାଡ଼େତେ ଅକନିଃ ୟୀଶୁ ମାସୀହ୍ ରାଃ କୁଲାକାନ୍ ଚେଲା ତାନିଃ, ଏନ୍ ପାର୍ଦେଶୀ କୋୱାଃ ନୁତୁମ୍ ରେ, ଅକନ୍‍କୋ ପୁନ୍ତୁସ୍, ଗାଲାତିୟା, କାପ୍ପଦୁକିୟା, ଆସିୟା, ଆଡୋଃ ବିତୁନିୟା ଜାଗା ରେ ଛିତି-ଛାନ୍ଦ୍ ହୋଇକେତେ ତାଇନୋଃ ତାନାକୋ। ଆଡୋଃ ପାର୍ମେଶ୍ଵାର୍ ଆପୁ ଆଃ ଆୟୁର୍ ତେଗି ସାରିତେୟାଃ ସେଣା ଲେକାତେ, ପାବିତାର୍ ଆତ୍ମା ରାଃ ପାବିତାର୍ ରିକାତେ ଆନାଚୁ ମାନାତିଙ୍ଗ୍ ଲାଗିନ୍ ଆଡୋଃ ୟୀଶୁ ମାସୀହ୍ ରାଃ ମାୟୋମ୍ କେ ହିର୍ଚିୟୋଃ ଲାଗିନ୍ ସାଲାକାନାକୋ। ଆପେକେ ଆନୁଗ୍ରାହ୍ ହାର୍ ଜୀଉସୁକୁ ଥିମ୍ବା ତେଗି ନାମ୍ କାତୋଃକା। ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ପାର୍ମେଶ୍ଵାର୍ ଆଡୋଃ ଆପୁ ରାଃ ଧାନ୍ୟାବାଦ୍ ହୋବାଅଃକା, ଅକନିଃ ୟୀଶୁ ମାସୀହ୍ କେ ଗୋଜାକାନ୍ ଏତେ ଜୀବିନିରିଦ୍ ରାଃ ହୋରାତେ, ଆଜାଃ ମାରାଙ୍ଗ୍ ଦାୟା ଏତେ ଆବୁକେ ଜୀନିଦ୍ ଆଶ୍ରା ଲାଗିନ୍ ନାୱା ଜାନାମ୍ ଏମ୍ କାଦାଏ, ମାନେ ମିୟାଃ କାଗୋଏଃ-ସୋୟାଅଃ ତେୟାଃ ଆଡୋଃ ଫାର୍ଚି ହାର୍ କାଗୋସୋ ତେୟାଃ ଆପେୟାଃ ଲାଗିନ୍ ସିର୍ମାଦିଶୁମ୍ ରେ ମାଣ୍ତାଅକାନା; ଇନ୍‍କୁକେ ପାର୍ମେଶ୍ଵାର୍ ରାଃ ପେଡ଼େଏ ବିଶ୍ଵାସ୍ ହୋରାତେ ଏନ୍ ବାଞ୍ଚାଅ ଲାଗିନ୍ତେ ହୋରୋ କୋତାନାଏ, ଅକନାଃ ହିଜୁଃ ସାମାୟ୍ ରେ ନେଲୋଗା। ନେୟା ଲାଗିନ୍ତେ, ଆପେ ରାଶିକାଅଃ ତାନାପେ, ଏଣ୍ଡେ ହ ନେୟା ଲାଗାତିଙ୍ଗ୍ ତାନାଃ, ଚି ହୁଡିଙ୍ଗ୍ ହୁଲାଙ୍ଗ୍ ଲାଗିନ୍ ରାକାମ୍ ରାଃ ପାରୀକ୍ଷା କୋରେ ଦୁକୁ ନାମେୟାପେ; ହାର୍ ନେୟା ନେୟାମେନ୍ତେ ହୋବାଅଃତାନାଃ ଚି ଆପେୟାଃ ଆଟ୍‍କାର୍ ଉରୁମାକାନ୍ ତେୟାଃ ବିଶ୍ଵାସ୍, ଅକନାଃ ସେଙ୍ଗେଲ୍ ରେ ବାଇକାନ୍ ନାଶୋଃତେୟାଃ ସୋନା ଏତେ ହଗି ଥିମ୍ବା ଗୋନୋଙ୍ଗାନ୍ ତାନାଃ, ୟୀଶୁ ମାସୀହ୍ ନେଲୋଃ ଇମ୍ତା ରେ ସାହାରାଅ ଆଡୋଃ ମାନାରାଙ୍ଗ୍ ଆଡୋଃ ମାଇନ୍ ରାଃ କାରାନ୍ ହୋବାଃୱା। ଆପେ ଇନିଃକେ କାପେ ନେଲ୍ କାଇଜା ଏଣ୍ଡେହ ଦୁଲାଡ଼୍ ମାଣ୍ତାଅ ତାନାପେ, ହାର୍ ନାଆ ଦୋ ଇନିଃକେ କାପେ ନେଲ୍ କାଇଜା ଏଣ୍ଡେ ରେହ ଇନିଃରେ ବିଶ୍ଵାସ୍ କେତେ ଏନ୍‍ଲେକା ସୁକୁ ଆଡୋଃ ଥିମ୍ବା ରାଶିକା ହୋବାଅଃ ତାନାପେ ଅକନାଃ କାଜିତେ ବାହାରି ଆଡୋଃ ମାନାରାଙ୍ଗ୍ ଏତେ ଫେରେଃ କାନ୍ ମେନାଃ; ଆଡୋଃ ଆପେୟାଃ ବିଶ୍ଵାସ୍ ରାଃ ଯଅ ମାନେ ଆତ୍ମା ରାଃ ବାଞ୍ଚାଅ ନାମ୍ ତାନାପେ। ନେ ବାଞ୍ଚାଅ ରାଃ ବିଷାୟ୍ ରେ ଏନ୍ ନାବୀ କୋ ଥିମ୍ବାଗି ଦାଣା-ବାଡ଼ା କେଦାକୋ ହାର୍ କୁଲି-ବାଡ଼ା କେଦାକୋ, ଅକନ୍‍କୋ ଏନ୍ ଆନୁଗ୍ରାହ୍ ରାଃ ବିଷାୟ୍ ରେ ଅକନାଃ ଆପେ ରେ ହୋବାଅଃ ରାଃ ତାଇକେନା, ଆୟାର୍‍କାଜି କାଜି ଲେଦାକୋ। ଇନ୍‍କୁ ନେ ବାକାଣ୍ କେ ନାନାମ୍ ଲାଗିନ୍ ଦାଣା କେଦାକୋ ଚି ମାସୀହ୍ ରାଃ ଆତ୍ମା ଅକନାଃ ଇନ୍‍କୁୱାଃ ଚେତାନ୍ ରେ ତାଇକେନା, ହାର୍ ଏନା ସିଦା ଏତେଗି ମାସୀହ୍ ରାଃ ଦୁକୁ କୋରାଃ ହାର୍ ଏନାରାଃ ତାୟୋମ୍ତେ ହୋବାଅଃ ତେୟାଃ ମାନାରାଙ୍ଗ୍ ରାଃ ଗୋୱା ଏମ୍ ତାଇକେନାଏ, ଏନା ଚିମ୍ତା ଆଡୋଃ ଚିଲ୍‍କାନ୍ ସାମାୟ୍ ପାଡ଼୍ ଚୁଣ୍ଡୁଲ୍ ଉଦୁବ୍ ତାଇକେନାଏ। ଇନ୍‍କୁ ରେ ନେୟା ଉଦୁବ୍ ଜାନା ଚି ଇନ୍‍କୁ ଆକୋୱାଃ କାହା ମେନ୍ଦୋ ଆପେୟାଃ ସେୱା ଲାଗିନ୍ତେ ନେ ବାକାଣ୍ କାଜି ତାଇକେନାକୋ, ଅକନାଃ ରାଃ ସାମାଚାର୍ ନାଆ ଆପେକେ ଇନ୍‍କୁ ହୋରାତେ ନାମ୍‍ଜାନା ଅକନ୍‍କୋ ପାବିତାର୍ ଆତ୍ମା ହୋରାତେ, ଅକନିଃ ସିର୍ମାଦିଶୁମ୍ ଏତେ କୁଲ୍‍ଲେନ୍ ତାଇକେନାଏ, ଆପେକେ ସୁସାମାଚାର୍ ଉଦୁବ୍ କେଦାଏ; ଆଡୋଃ ନେ ବାକାଣ୍ କୋକେ ସିର୍ମାଦାସୀକୋ ହ ଧ୍ୟାନ୍‍ତେ ନେନେଲ୍ ରାଃ ସାନାଙ୍ଗ୍ ମାଣ୍ଡାଅୟାକୋ। ନେୟାମେନ୍ତେ ଆପାନାଃ-ଆପାନାଃ ସେଣା ରାଃ ମାୟାଙ୍ଗ ଥୋଲ୍ କେତେ, ଆଡୋଃ ହୋସିଆର୍ ତାଇନ୍ କେତେ, ଏନ୍ ଆନୁଗ୍ରାହ୍ ରାଃ ପୁରା ଆଶ୍ରା ମାଣ୍ତାଏପେ ଅକନାଃ ୟୀଶୁ ମାସୀହ୍ ନେଲୋଃ ଇମ୍ତା ଆପେକେ ନାମୋଃ ନାଙ୍ଗ୍ ମେନାଃ। ଆନାଚୁ ମାନାତିଙ୍ଗ୍ ହୋନ୍ କୋ ଲେକା ଆପେୟାଃ କାସାରି ରାଃ ସାମାୟ୍ ରାଃ ମାରି ସାନାଙ୍ଗ୍ କୋ ଲେକା ଆଲୋପେ ବାଇୟେନା। ମେନ୍ଦୋ ଜେଲେକା ଆପେୟାଃ କେଡ଼ାନିଃ ପାବିତାର୍ ମେନାଇଃ, ଏନ୍‍ଲେକାଗି ଆପେ ହ ଆପେୟାଃ ସବେନ୍ ଚାଲ୍ ଚାଲାନ୍ ରେ ପାବିତାର୍ ବାଇୟେନ୍ ପେ। ଚିୟାଃଚି ପାବିତାର୍ ପୁଥି ରେ ଅଲାକାନା “ପାବିତାର୍ ବାଇୟେନ୍ ପେ, ଚିୟାଃଚି ଇଙ୍ଗ୍ ପାବିତାର୍ ମେନାଇଙ୍ଗ୍ ୟା।” ଆଡୋଃ ଚିମ୍ତାଙ୍ଗ୍ ଆପେ “ହେ ଆପୁ” କାଜିକେତେ ଇନିଃକେ ବିନ୍ତି ତାନାପେ, ଅକଏ ହୋଡ଼ୋକୋୱାଃ ମେଏଃମୁହାଡ଼୍ ନେଲ୍‍କେତେ କାହା ମେନ୍ଦୋ ମିପୀୟାଃ କୋୱାଃ କାମି କୋରାଃ ଲେକା ନ୍ୟାୟ ରିକାୟାଏ, ଦୋ ଆପେୟାଃ ପାର୍ଦେଶୀ ହୋବାକାନ୍ ରାଃ ସାମାୟ୍ ବୋରୋ ତେ ପାରୋମେପେ। ଚିୟାଃଚି ଆପେ ସାରିୟାପେ ଚି ଆପେୟାଃ ବେଲୁର୍ ଚାଲ୍ ଚାଲାନ୍ ଅକନାଃ ଆପୁତାତା କୋଏତେ ହିଜୁଃ ତାନା, ଏନାତେ ଆପେୟାଃ ଛୋଡ଼ାଓ ରୂପା-ସୋନା ମାନେ ନାଶୋଃ ତେୟାଃ ଜିନିଷ୍‍କୋୱାଃ ହୋରାତେ କାହୋବାଜାନା; ମେନ୍ଦୋ ନିର୍ଦୋଷ୍ ଆଡୋଃ ବେଦାଗ୍ ମିଣ୍ଡୀହୋନ୍, ମାନେ ମାସୀହ୍ ରାଃ ଗୋନୋଙ୍ଗାନ୍ ମାୟୋମ୍ ଏତେ ହୋବାଜାନା। ଇନିଜାଃ ସେଣା ଦୋ ଅତେଦିଶୁମ୍ ରାଃ ସିର୍ଜାଅ ସିଦାରେ ସାରି ଲେନ୍ତାଇକେନା, ମେନ୍ଦୋ ନାଆ ନେ ଟୁଣ୍ଡୁ ଯୁଗ୍ ରେ ଆପେୟାଃ ଲାଗିନ୍ ଉଦୁବ୍ ଜାନା। ମାସୀହ୍ ରାଃ ହୋରାତେ ଆପେ ଏନ୍ ପାର୍ମେଶ୍ଵାର୍ ଚେତାନ୍ ରେ ବିଶ୍ଵାସ୍ ତାନାପେ, ଅକନିଃ ୟୀଶୁ ମାସୀହ୍ କେ ଗୋଜାକାନ୍ କୋଏତେ ଜୀଉ ବିରିଃ କିଜାଏ ଆଡୋଃ ମାନାରାଙ୍ଗ୍ ଏମ୍‍କେଦାଏ ଚି ଆପେୟାଃ ବିଶ୍ଵାସ୍ ଆଡୋଃ ଆଶ୍ରା ପାର୍ମେଶ୍ଵାର୍ ରେ ହୋବାଅଃକା। ଏନାତେ ଚିମ୍ତାଙ୍ଗ୍ ଆପେ ହାଗାଦୁଲାଡ଼୍ ରାଃ କାଲୋଗୋ ଦୁଲାଡ଼୍ ଲାଗିନ୍ତେ ସାର୍ତି ରାଃ ମାନାତିଙ୍ଗ୍ ହୋରାତେ ଆପେୟାଃ ମୋନ୍ କୋକେ ପାବିତାର୍ କାଦାପେ, ଦୋ ଗୋଟା ମୋନ୍ ତେ ମିହୋଡ଼୍ ଏଟାଃ ନିଃକେ ଥିମ୍ବା ଦୁଲାଡ଼୍ ମାଣ୍ତାଏପେ। ଚିୟାଃଚି ଆପେ ନାଶୋଃତେୟାଃ କାହା ମେନ୍ଦୋ କାଗୋଜୋଃତେୟାଃ ହିତା ଏତେ, ପାର୍ମେଶ୍ଵାର୍ ରାଃ ଜୀହିଃ ଆଡୋଃ ଜାନାଓ ତାଇନ୍ ତେୟାଃ ବାଚାନ୍ ଲୋଃ ନାୱା ଜାନାମ୍ ନାମ୍ କାଦାପେ। ଚିୟାଃଚି “ସବେନ୍ ଜୀଉ ତାସାଃ ଲେକା ତାନ୍‍କୋ, ଆଡୋଃ ଏନାରାଃ ସବେନ୍ ସୁଗାଡ଼୍ ତାସାଃ ରାଃ ବାହାକୋ ଲେକା ତାନାଃ। ତାସାଃ ରୋହଡ଼୍ କେନୋଃୱା ଆଡୋଃ ବାହା କୋଟା କେନୋଃୱା, ମେନ୍ଦୋ ପ୍ରାଭୁ ରାଃ ବାଚାନ୍ ଯୁଗ୍-ଯୁଗ୍ ବାଇକେତେ ତାଇନୋଗା।” ଆଡୋଃ ନେୟା ଗି ସୁସାମାଚାର୍ ରାଃ ବାଚାନ୍ ତାନାଃ ଅକନାଃ ଆପେକେ ଉଦୁବାକାନ୍ ତାଇକେନା। ଏନାମେନ୍ତେ ସବେନ୍ ଲେକାନାଃ ଖିସ୍ କୋକେ ଆଡୋଃ ଲୋଗୋ କାମି ଆଡୋଃ ବେଦାମୋନ୍ ଆଡୋଃ ହିସିଙ୍ଗା ଆଡୋଃ ନିନ୍ଦା କୋକେ ଆତୋମ୍ କେତେ, ନାୱା ଜାନାମ୍ ହୋନ୍ କୋ ଲେକା ଫାର୍ଚି ଆତ୍ମାନ୍ ତୋୱା ରାଃ ସାନାଙ୍ଗ୍ ଏପେ, ଏନାତେ ଏନ୍ ହୋରାତେ ବାଞ୍ଚାଅ ନାମ୍ ଲାଗିନ୍ତେ ହାରା ଇଦିଅଃପେ, ଚିୟାଃଚି ଆପେ ପ୍ରାଭୁ କେ ବୁଗିନ୍ ତାନିଃ ମେନ୍ତେ ଏନାରାଃ ରାଃ ଶିବିଲ୍ କେ ଚାଖା ଛାବାକାଦାପେ। ଇନିଜାଃ ନାଡ଼େଏ ହିଜୁଃକେତେ, ଅକନିଃକେ ହୋଡ଼ୋକୋ ଦୋ ଏଣ୍ଡାଃ ଲିଜାକୋ ମେନ୍ଦୋ ପାର୍ମେଶ୍ଵାର୍ ରାଃ ନାଡ଼େଏ ସାଲାକାନ୍ ଆଡୋଃ ଗୋନୋଙ୍ଗାନ୍ ଜୀହିଃ ଦିରି ତାନିଃ, ଆପେ ହଗି ଜୀହିଃ ଦିରିକୋ ଲେକା ଆତ୍ମାନ୍ ଅଡ଼୍ଆଃ ବାଇୟୋଃ ତାନାପେ, ଅକନାଃ ଏତେ ପାବିତାର୍ ୟାଜାକ୍ ବାଇକେତେ, ନେଲେକାନ୍ ଆତ୍ମାନ୍ ଦାଣେ ରାକାବେପେ ଅକନାଃ ୟୀଶୁ ମାସୀହ୍ ରାଃ ହୋରାତେ ପାର୍ମେଶ୍ଵାର୍ କେ ଗ୍ରାହାନ୍ ହୁୟୋଗା। ଏନାମେନ୍ତେ ପାବିତାର୍ ପୁଥି ରେ ହଗି ଅଲାକାନା: “ନେଲେପେ, ଇଙ୍ଗ୍ ସିୟୋନ୍ ସାହାର୍ ରେ କୋନା ରେୟାଃ ସାଲାକାନ୍ ହାର୍ ଗୋନୋଙ୍ଗାନ୍ ନେଓ-ଦିରି ମାଣ୍ଡାଅ ତାନିଙ୍ଗ୍; ହାର୍ ଜେତାଏଗି ଇନିଃ ରେ ବିଶ୍ଵାସ୍ ୟାଏ, ଇନିଃ ଜାହାନ୍ ଲେକାତେ କାଏ ଗିୟୁଗୋୱାଏ।” ଏନାତେ, ଆପେୟାଃ ଲାଗିନ୍ ଅକନ୍‍କୋ ବିଶ୍ଵାସ୍ ତାନାପେ ନେୟା ଗୋନୋଙ୍ଗାନ୍ ଦିରି ତାନାଃ, ମେନ୍ଦୋ ଅକନ୍‍କୋ କାକୋ ବିଶ୍ଵାସ୍ ତାନା ଇନ୍‍କୁ ନାଙ୍ଗ୍, “ଅକନ୍ ଦିରି କେ ରାଜମିସ୍ତ୍ରୀ କୋ ଏଣ୍ଡାଃ ଲେଦାକୋ, ଏନାଗି କୋନା ରାଃ ମୁଖ୍ୟା ନେଓ-ଦିରି ହୋବାଜାନା,” ଆଡୋଃ, “ଥୋଦୋଃ ରାଃ ଦିରି ହାର୍ ଠୋକାର୍ ଉୟୁଗେନ୍ ରାଃ ମାରାଙ୍ଗ୍ ସେରେଙ୍ଗ୍ ହୋଇଜାନା।” ଚିୟାଃଚି ଇନ୍‍କୁ ଦୋ ବାଚାନ୍ କେ କାକୋ ମାନାତିଙ୍ଗ୍ କେତେ ଥୋଦୋଃ ତାନାକୋ ହାର୍ ନେୟାଲାଗିନ୍ ଗି ଇନ୍‍କୁ ଠାହ୍‍ରାଓ ଲେନାକୋ। ମେନ୍ଦୋ ଆପେ ମିୟାଃ ସାଲାକାନ୍ ଜାତି ରେନ୍ କୋ, ଆଡୋଃ ରାଜା-ପାଦ୍ ରେନ୍ ୟାଜାକ୍ କୋ, ହାର୍ ପାବିତାର୍ ହୋଡ଼ୋକୋ, ଆଡୋଃ (ପାର୍ମେଶ୍ଵାର୍ ଗାଃ) ଆପାନାଃ ହୋଡ଼ୋକୋ ତାନ୍‍ପେ, ଏନାଲାଗିନ୍ତେ ଚି ଅକନିଃ ଆପେକେ ନୁବାଃ ଏତେ ଆୟାଃ ଆକ୍‍ଦାନ୍ଦା ମାସ୍କାଲ୍ ରେ କେଡ଼ାକେଦାଏ, ଇନିଜାଃ ଗୁନ୍ ଦେଖାଅ ଏପେ। ଆପେ ସିଦା ଦୋ ଜେତ୍ନାଅଃ କାପେ ତାଇକେନା ମେନ୍ଦୋ ନାଆ ପାର୍ମେଶ୍ଵାର୍ ରାଃ ହୋଡ଼ୋକୋ ତାନ୍‍ପେ; ଆପେୟାଃ ରେ ଦାୟା କାହୋବାଲେନା ମେନ୍ଦୋ ନାଆ ଆପେୟାଃ ରେ ଦାୟା ହୋବାକାନା। ହେ ଦୁଲାଡ଼୍‍କୋ, ଇଙ୍ଗ୍ ଆପେକେ ଆର୍ଜିପେ ତାନିଙ୍ଗ୍ ଚି ଆପେ ଆପାନ୍ କେ ଏଟାଃ ଦିଶୁମ୍ ରେନ୍ ଆଡୋଃ ହୁଡିଙ୍ଗ୍ ଦିନ୍ ଲାଗିନ୍ ହୋନୋର୍ ହିଜୁଃକାନ୍ ସାରିକେତେ ନେ ଅତେଦିଶୁମ୍ ରେ ଏନ୍ ହୋଡ଼ମୋ ରାଃ ଏତ୍କାନ୍ ସାନାଙ୍ଗ୍ କୋଏତେ ଅକନାଃ ଆତ୍ମା ଲୋଃ ଲାଡ଼ାଇ ରିକାୟାଏ, ଏନାତେ ବାଚାଓ କେତେ ତାଇଅଃପେ। ଏଟାଃଜାତିକୋ ତାଃରେ ଆପେୟାଃ ଚାଲ୍-ଚାଲାନ୍ ବୁଗିନ୍ ତାଇୟୋଃକା; ଏନାତେ ଅକନ୍–ଅକନ୍ କାଜି କୋରେ ଇନ୍‍କୁ ଆପେକେ ଖାରାପ୍ କାମିତାନ୍ ହୋଡ଼ୋକୋ ମେନ୍ତେ କାଜିକେତେ ବାଦ୍‍ନାମ୍ ପେତାନାକୋ, ଇନ୍‍କୁ ଆପେୟାଃ ବୁଗିନ୍ କାମି କୋକେ ନେଲ୍‍କେତେ ଏନାକୋରାଃ ଲାଗିନ୍ତେଗି ବୁଗିନ୍-ବିଚାର୍ ହୁଲାଙ୍ଗ୍ ରେ ପାର୍ମେଶ୍ଵାର୍ ରାଃ ମାନାରାଙ୍ଗ୍‍ୟାକୋ। ପ୍ରାଭୁ ଲାଗିନ୍ ହୋଡ଼ୋକୋୱାଃ ପାଡ଼େତେ ଠାହ୍‍ରାଓକାନ୍ ସବେନ୍ ଯୋଗାଡ଼ରିକା ନିଜାଃ ଆଧିନ୍ ରେ ତାଇନୋଃପେ, ରାଜା ରାଃ ନେୟାଲାଗିନ୍ ଚି ଇନିଃ ସବେନ୍ କୋଏତେ ମାରାଙ୍ଗ୍ ପାଦ୍ ରେ ଦୁବ୍ କାନାଏ, ଆଡୋଃ ହାକିମ୍ କୋୱାଃ, ଚିୟାଃଚି ଇନ୍‍କୁ ଖାରାପ୍ କାମିତାନ କୋକେ ଦାଣ୍ଡ୍ ଏମ୍ ନାଙ୍ଗ୍ ଆଡୋଃ ବୁଗିନ୍ କାମିତାନ୍ କୋ ନାଙ୍ଗ୍ ସାହାରାଅ ଲାଗିନ୍ ରାଜା ରାଃ କୁଲ୍ କାନ୍ କୋ ତାନ୍‍କୋ। ଚିୟାଃଚି ପାର୍ମେଶ୍ଵାର୍ ରାଃ ସାନାଙ୍ଗ୍ ନେୟା ତାନାଃ ଚି ଆପେ ବେଶ୍ କାମି ରିକା ରାଃ ହୋରାତେ ନିର୍ବୁଦ୍ଧି ହୋଡ଼ୋକୋୱାଃ କାସେଣାନ୍ ରାଃ କାଜି କୋକେ ବାନ୍ଦ୍ ତାପେ। ଆପେ ଆପାନ୍‍କେ ରାଡ଼ାକାନ୍ ଲେକା ସାରିପେ, ମେନ୍ଦୋ ଆପେୟାଃ ନେ ରାଡ଼ାକାନ୍ କେ ଖାରାପ୍ କାମି ଲାଗିନ୍ ଦାଲୋବୋଃ ଲାଗିନ୍ତେ ଆଲୋପେ ବାଇୟା; ମେନ୍ଦୋ ଆପେ ଆପାନ୍ କେ ପାର୍ମେଶ୍ଵାର୍ ରାଃ ଦାସୀ ସାରିକେତେ ସେନେପେ। ସବେନ୍ କୋକେ ମାଇନ୍ କୋପେ, ହାଗାକୋ ଲୋଃ ଦୁଲାଡ଼୍ ଏପେ, ପାର୍ମେଶ୍ଵାର୍ କେ ବୋରୋଇପେ, ରାଜା କେ ମାଇନ୍ ଏପେ। ହେ ଦାସୀକୋ, ସବେନ୍ ଲେକାନାଃ ମାଇନ୍ ହାର୍ ଆଚୁ ମାନାତିଙ୍ଗ୍ ତାନ୍ ଲୋଃ ଆପେୟାଃ ଗୋମ୍‍କେ କୋୱାଃ ଆଧିନ୍ ରେ ତାଇନ୍‍ପେ, ଇନ୍‍କୁୱାଃ ଭାଇର୍ କାହା ଅକନ୍ କୋ ବେଶ୍ ଆଡୋଃ ଲେବେଃ ମେନାକୋୱା ମେନ୍ଦୋ ଇନ୍‍କୁୱାଃ ହଗି ଅକନ୍ କୋ ଟେଢ଼ା ହୋଡ଼ ତାନ୍‍କୋ। ଚିୟାଃଚି ଆଗାର୍ ଜେତାଏ ପାର୍ମେଶ୍ଵାର୍ ନେଲ୍ ତାନାଏ ଏନାକେ ସାରିତାନ୍ ଲୋଃ କାଏଗାଲ୍ତି ରିକା କାଦାଏ ଏଣ୍ଡେ ରେହ ଦୁକୁ ସାହାତିଙ୍ଗ୍ ତାନାଏ ଏଣ୍ଡେ ଦୋ ନେୟା ବେଶ୍ ତାନାଃ। ଚିୟାଃଚି ଆଗାର୍ ଆପେ ଗାଲ୍ତି ରିକା କେତେ ମାଉର୍ ଜୋମ୍ କେଦାପେ ହାର୍ ସାହାତିଙ୍ଗ୍ କେଦାପେ, ଦୋ ନେୟା ରେ ଚିକାନ୍ ମାରାଙ୍ଗ୍ କାଜି ତାନାଃ? ମେନ୍ଦୋ ଆଗାର୍ ବେଶ୍ କାମି ରିକା କେତେ ଦୁକୁ ନାମ୍ ତାନାପେ ହାର୍ ସାହାତିଙ୍ଗ୍ ତାନାପେ, ଦୋ ନେୟା ପାର୍ମେଶ୍ଵାର୍ ନାଡ଼େଏ ସାହାରାଅ କାଜି ତାନାଃ। ଆଡୋଃ ଆପେ ନେୟାଲାଗିନ୍ ଗି କେଡ଼ା କାନାପେ, ଚିୟାଃଚି ମାସୀହ୍ ହଗି ଆପେୟାଃ ଲାଗିନ୍ ଦୁକୁ ସାହାତିଙ୍ଗ୍ କେତେ ଆପେକେ ମିୟାଃ ନାମୁନା ଏମ୍ କାଦାଏ ଚି ଆପେ ହଗି ଆଜାଃ କାଟା-ମାଣ୍ଡା କୋରେ ସେନେପେ। ଇନିଃ ନାଦୋ ପାପ୍ କେଦାଏ ଆଡୋଃ ନାଦୋ ଆୟାଃ ମୋଚା ତେ ବେଦା ରାଃ ଜେତାନ୍ ବାକାଣ୍ ଅଡୋଙ୍ଗ୍ ଜାନା। ଇନିଃ ଏଗେର୍ ଆୟୁମ୍‍କେତେ କାଏ ଏଗେର୍ କୋତାଇନା, ଆଡୋଃ ଦୁକୁ ସାହାତିଙ୍ଗ୍ କେତେ ଅକଏକେ ହଗି କାଏ ଧାମ୍‍କାଅ କୋତାଇନାଏ, ମେନ୍ଦୋ ଆଏଃ ଆପାନ୍ କେ ସାର୍ତି ବିଚାର୍ ନିଜାଃ ତିଈ ରେ ଜିମାଅଃ ତାଇନାଏ। ଇନିଃ ଆଏଃ ଗି ଆବୁୱାଃ ପାପ୍ କୋକେ ଆଜାଃ ହୋଡ଼ମୋ ରେ ଇଦିକେତେ କ୍ରୁଶ୍ ରେ ରାକାବ୍ ଜାନାଏ, ଅକନାଃ ଏତେ ଆବୁ ପାପ୍‍କୋ ଲାଗିନ୍ ଗୋଏଃ କେତେ ଧାରାମ୍ ଲାଗିନ୍ ଜୀହିଦୋଃ କାବୁ: ଇନିଜାଃ ଘାଅ ହୋବା ଜାନ୍ତେ ଆପେ ବେଶ୍ ଜାନାପେ। ଆପେ ସିଦା ଆଦାକାନ୍ ମିଣ୍ଡୀକୋ ଲେକା ତାଇକେନାପେ, ମେନ୍ଦୋ ନାଆ ଆପେୟାଃ ଜୀଉ କୋରାଃ ଗୁପୀନିଃ ଆଡୋଃ ହୋରୋନିଃ ତାଃ ରୁଆଡ଼୍ ହିଜୁଃ କାନାପେ। ହେ ଆଣାଦୀକାନ୍ କୁଡ଼ିକୋ, ଆପେ ହଗି ଏନ୍ ଲେକାଗି ଆପେୟାଃ କଡ଼ାକୋୱାଃ ଆଧିନ୍ ରେ ତାଇଅଃପେ, ଏନାମେନ୍ତେ ଚି ଇନ୍‍କୁ ଏତେ ଆଗାର୍ ଜେତାଏ ନେକା ମେନିଜା ଅକଏ ବାଚାନ୍ କେ କାଏ ମାନାତିଙ୍ଗ୍ ୟାଏ, ଏଣ୍ଡେ ହ ଆପେୟାଃ ବୋରୋ ଲୋଃ ପାବିତାର୍ ଜୀଦାନ୍ ସେସେନ୍ କେ ନେଲ୍‍କେତେ ବେଗାର୍ ବାଚାନ୍ ତେ ଆପାନାଃ-ଆପାନାଃ ଆଣାଦୀକାନ୍ କୁଡ଼ି କୋୱାଃ ଜୀଦାନ୍ ସେସେନ୍ ରାଃ ହୋରାତେ ଥାଇଜୋଃ କାକୋ। ଆପେୟାଃ ଶିଙ୍ଗାର୍ ବାହାରି ନେଲୋଃକା ମେନ୍ତେ ଆଲୋ ତାଇନୋଃକା, ମାନେ ଉବ୍ ଗାଲାଙ୍ଗେନ୍, ଆଡୋଃ ସୋନା ରାଃ ଗାହାନା ତୁସିଙ୍ଗେନ୍, ୟାଦୋ ରାକାମ୍-ରାକାମ୍ ରାଃ ଲିଜାଃ ତୁସିଙ୍ଗେନ୍, ମେନ୍ଦୋ ଆପେୟାଃ ମୋନ୍ ରାଃ ଉକୁକାନ୍ ଆଡୋଃ ଲୁକୁକାନ୍ ହୋଡ଼, ନାରାମ୍ ହାର୍ ଲେବେଃ ମୋନ୍ ରାଃ କାଗୋଜୋଃତେୟାଃ ବୁଗିନ୍ ତୁସିଙ୍ଗେନ୍ ତେ ତାଇନୋଃକା, ଚିୟାଃଚି ପାର୍ମେଶ୍ଵାର୍ ରାଃ ନେପେଲ୍ ରେ ଏନାରାଃ ଗୋନୋଙ୍ଗ୍ ମାରାଙ୍ଗ୍ ତାନାଃ। ସିଦା ସାମାୟ୍ ରେନ୍ ପାବିତାର୍ କୁଡ଼ିକୋ ହଗି ଅକନ୍ କୋ ପାର୍ମେଶ୍ଵାର୍ ଚେତାନ୍ ରେ ଆଶ୍ରା ମାଣ୍ଡାଅ ତାଇନାକୋ, ଆକୋ ଆପାନ୍ କେ ନେଲେକାଗି ସିଙ୍ଗାରେନ୍ ହାର୍ ଆକୋୱାଃ-ଆକୋୱାଃ ଆଣାଦୀକାନ୍ କଡ଼ାକୋୱାଃ ଆଧିନ୍ ତାଇନୋଃ ତାଇକେନାକୋ। ଜେଲେକା ସାରା ଆବ୍ରାହାମ୍ ରାଃ ଆନାଚୁ ରେ ତାଇକେନାଏ ଆଡୋଃ ଇନିଃକେ ଗୋମ୍‍କେ କାଜି ତାଇନାଏ। ନେଲେକାଗି ଆପେ ହ ଆଗାର୍ ବୁଗିନାଃ ରିକାୟାପେ ଆଡୋଃ ଜାହାନ୍ ଲେକାନାଃ ବୋରୋତେ କାପେ ବୋରୋୟା, ଏଣ୍ଡେ ସାରା ରାଃ କୁଡ଼ିହୋନ୍ କୋ ଲେକା ହୁୟୋଃୱାପେ। ଏନ୍‍ଲେକାଗି କଡ଼ାକୋ ଆପେ ହଗି ସେଣା ଲେକାତେ ଆପେୟାଃ ଆଣାଦୀକାନ୍ କୁଡ଼ି କୋଲୋଃ ଜୀଦାନ୍ ଜିଦୋଃ ପେ, ହାର୍ କୁଡ଼ି କେ ଆପେୟାଃତେ ନାରାଦୁରା ଆଟ୍‍କାର୍ କେତେ ଇନିଃକେ ମାଇନ୍ ଏପେ, ନେୟା ବୁଝାଅଃପେ ଚି “ଆଲାଙ୍ଗ୍ ବାରାନ୍ କିନ୍ ଜୀଦାନ୍ ରାଃ ଆନୁଗ୍ରାହ୍ ରାଃ ଦାନ୍ ରାଃ ହାନାଟିଙ୍ଗ୍ ତାନ୍ ଲେ”, ଏନାଏତେ ଆପେୟାଃ ବିନ୍ତି ଆଲୋକା ରୋକାଅଃକା। ଏନାତେ ସବେନ୍ କୋ ମିୟାଃ ମୋନ୍ ଆଡୋଃ କିର୍ପା ରିକାନିଃ ଆଡୋଃ ହାଗା ଦୁଲାଡ଼୍ ମାଣ୍ଡାଅନିଃ, ଆଡୋଃ ଦାୟାନିଃ ଆଡୋଃ ଲେବେଃ ମୋନ୍ ବାଇୟୋଃପେ। ଏତ୍କାନାଃ ରାଃ ବାଦ୍‍ଲା ରେ ଏତ୍କାନ୍ ଆଲୋପେ ରିକାୟା ଆଡୋଃ ଏଗେର୍ ରାଃ ବାଦ୍‍ଲା ରେ ଆଲୋପେ ଏଗେର୍ ୟା; ମେନ୍ଦୋ ନେୟାରାଃ ବାଦ୍‍ଲା ଆଶିଷ୍ ଗି ଏମାକୋପେ, ଚିୟାଃଚି ଆପେ ଆଶିଷ୍ ରାଃ ହାନାଟିଙ୍ଗ୍ ନାମ୍ ଲାଗିନ୍ତେ କେଡ଼ା କାନାପେ। ଚିୟାଃଚି “ଜାହାଁଏ ହଗି ସୁକୁ ଜୀଦାନ୍ ସାନାଙ୍ଗ୍ ତାନାଏ ହାର୍ ବୁଗିନ୍ ହୁଲାଙ୍ଗ୍‍କୋ ନେନେଲ୍ ସାନାଙ୍ଗ୍ ତାନାଏ, ଇନିଃ ଆୟାଃ ଆଲାଙ୍ଗ୍ କେ ଏତ୍କାନାଃ ତେ, ହାର୍ ଆୟାଃ ମୋଚା କେ ଲୋଗୋ କାଜିକୋ କାଜିଏତେ ହୋକା-କାଏ। ଇନିଃ ଏତ୍କାନାଃ ତେ ଫାର୍କାନ୍ କାଏ ହାର୍ ବୁଗିନାଃ ଗି ରିକା କାଏ; ଇନିଃ ଜୀଉସୁକୁ କେ ଦାଣା କାଏ, ହାର୍ ଏନାକେ ଅତୋଙ୍ଗ୍ ରେ ତାଇନୋଃକାଏ। ଚିୟାଃଚି ପ୍ରାଭୁ ରାଃ ମେଏଃ ଧାର୍ମୀ କୋକେ ନେଲ୍ କାତେକୋୱାଃଏ, ଆଡୋଃ ଇନିଜାଃ ଲୁତୁର୍ ଇନ୍‍କୁୱାଃ ବିନ୍ତି ପାଡ଼୍ ଲାଗାଅକାନ୍ ତାଇନୋଃୱା; ମେନ୍ଦୋ ପ୍ରାଭୁ ଆଃ ମେଏଃମୁହାଡ଼୍ ଏତ୍କାନ୍ ରିକାତାନ୍ କୋୱାଃ ବିରୁଦ୍ଧ୍ ରେ ତାଇନୋଃୱା।” ଆଗାର୍ ଆପେ ବୁଗିନ୍ ରିକା ଲାଗିନ୍ ସେକାଡ଼୍ ତାଇନୋଃୱାପେ ଏଣ୍ଡେ ଅକଏ ଆପେୟାଃ ଏତ୍କାନାଃ ରିକାୟାଏ? ଆଗାର୍ ଆପେ ଧାରାମ୍ ଲାଗିନ୍ ଦୁକୁ ହ ସାହାତିଙ୍ଗ୍ ୟାପେ, ଏଣ୍ଡେ ସୁକୁତାନ୍ ଗି ତାଇନାପେ; ମେନ୍ଦୋ ହୋଡ଼ୋକୋୱାଃ ବୋତୋଙ୍ଗ୍ ଏତେ ଆଲୋପେ ବୋରୋୟା, ଆଡୋଃ ଆଲୋପେ ଆକ୍‍ବାକାଅଃୱା, ମେନ୍ଦୋ ମାସୀହ୍ କେ ପ୍ରାଭୁ ସାରିକେତେ ଆପାନାଃ-ଆପାନାଃ ମୋନ୍ ରେ ପାବିତାର୍ ସାରିପେ। ଜେତାଏ ହଗି ଆପେକେ ଆପେୟାଃ ଆଶ୍ରା ରାଃ ବିଷାୟ୍ ରେ ଜାହାନାଃ କୁଲିୟାଏ, ଇନିଃକେ କାଜିରୁଆଡ଼୍ ଲାଗିନ୍ ସବେନ୍ ଇମ୍ତା ସେକାଡ଼୍‍କାନ୍ ତାଇନୋଃପେ, ମେନ୍ଦୋ ଲେବେଃ ଲେକାତେ ହାର୍ ବୋରୋତାନ୍ ଲୋଃ; ଆଡୋଃ ଆଟ୍‍କାର୍ ଉରୁମ୍ ସେଣା କେ ହଗି ବୁଗିନ୍ ମାଣ୍ଡାଏପେ, ଏନାମେନ୍ତେ ଚି ଅକନ୍ କାଜି କୋରାଃ ବିଷାୟ୍ ରେ ଆପେୟାଃ ବାଦ୍‍ନାମି ହୋବାଅଃ ତାନା ଏନାକୋରାଃ ବିଷାୟ୍ ରେ ଇନ୍‍କୁ, ଅକନ୍ କୋ ମାସୀହ୍ ରେ ଆପେୟାଃ ବୁଗିନ୍ ସେସେନ୍ କେ ହିଲାଙ୍ଗ୍ ତାନାକୋ, ଗିୟୁଗୋଃ କାକୋ। ଚିୟାଃଚି ଆଗାର୍ ପାର୍ମେଶ୍ଵାର୍ ରାଃ ନେୟାଗି ସାନାଙ୍ଗ୍ ତାନାଃ ଚି ଆପେ ବୁଗିନ୍ ରିକା ଲାଗିନ୍ତେ ଦୁକୁ ସାହାତିଙ୍ଗ୍ଏପେ, ଏଣ୍ଡେ ଦୋ ନେ ଏତ୍କାନାଃ ରିକା ଏତେ ଦୁକୁ ସାହାତିଙ୍ଗ୍ ବୁଗିନ୍ ତାନାଃ। ଏନାମେନ୍ତେ ଚି ମାସୀହ୍ ହଗି, ମାନେ ଆଧାର୍ମୀ କୋ ଲାଗିନ୍ ଧାର୍ମୀ, ସବେନ୍ ହୋଡ଼ୋକୋୱାଃ ପାପ୍‍କୋ ଲାଗିନ୍ ମିଶାଗି ଗୋଏଃ ଜାନାଏ, ଏନାତେ ଆବୁକେ ପାର୍ମେଶ୍ଵାର୍ ରାଃ ନାଡ଼େଏ ସେଟେର୍ ବୁୱାଏ; ଇନିଃ ହୋଡ଼ମୋ ଲେକାତେ ଦୋ ଗୋଏଃ ଜାନାଏ, ମେନ୍ଦୋ ଆତ୍ମା ଲେକାତେ ଜୀହିଦ୍ ଜାନାଏ। ଏନାରେଗି ଇନିଃ ସେନ୍‍କେତେ ବାନ୍ଦିକାନ୍ ଆତ୍ମା କୋକେ ହଗି ପାର୍ଚାର୍ କେଦାଏ, ଅକନ୍‍କୋ ଏନ୍ ସିଦା ସାମାୟ୍ ରେ ଆନାଚୁ କାକୋ ମାନାତିଙ୍ଗ୍ କେଦା, ଚିମ୍ତା ପାର୍ମେଶ୍ଵାର୍ ନୁହ୍ ରାଃ ହୁଲାଙ୍ଗ୍ ରେ ସାହାତିଙ୍ଗ୍ କେତେ ହୋରୋ କେଦାଏ, ହାର୍ ଜାହାଜ୍ ବାଇୟୋଃ ତାଇକେନା, ଅକୋଣ୍ଡେରେ ଦୁବ୍ କେତେ ହୁଡିଙ୍ଗ୍ ଗି ହୋଡ଼ୋକୋ ମାନେ ଆଠ୍ ଝାନ୍ ହୋଡ଼ ଦାଆ ଏତେ ବାଚାଓ ଜାନାକୋ। ହାର୍ ଏନ୍ ଦାଆ ରାଃ ଜୋନୋକା ହଗି, ମାନେ ବାପ୍ତିସ୍ମା, ୟୀଶୁ ମାସୀହ୍ ରାଃ ଜୀବିନିରିଦ୍ ହୋରାତେ, ନାଆ ଆପେକେ ବାଞ୍ଚାଅ ପେ ତାନାଏ; ନେୟାତେ ହୋଡ଼ମୋ ରାଃ ମାଇଲା ସାଫା ରିକା ନାହାଲା, ମେନ୍ଦୋ ଫାର୍ଚି ଆଟ୍‍କାର୍ ଉରୁମ୍ ସେଣା ତେ ପାର୍ମେଶ୍ଵାର୍ ରାଃ ଆଧିନ୍ ରେ ହୋବାକେନୋଃ ତାନାଃ। ଇନିଃ ସିର୍ମାଦିଶୁମ୍ ତେ ସେନ୍‍କେତେ ପାର୍ମେଶ୍ଵାର୍ ରାଃ ଜୋମ୍ ତିଈ ପାଡ଼୍ ଦୁବ୍ ଜାନାଏ; ଆଡୋଃ ସିର୍ମାଦାସୀକୋ ଆଡୋଃ ଆଧିକାରୀକୋ ଆଡୋଃ ପେଡ଼େଜାନ୍‍କୋ ଆୟାଃ ଆଧିନ୍ ରିକା ଜାନାକୋ। ଏନାମେନ୍ତେ ଯାବ୍ ଚି ମାସୀହ୍ ହୋଡ଼ମୋ ରେ ତାଇକେତେ ଦୁକୁ ସାହାଅ କେଦାଏ ଦୋ ଆପେ ହ ଏନ୍‍ଲେକାଗି ମୋନ୍ ତେ ହୋବାକେତେ ଏନାକେ ହାତ୍ୟାର୍ ବାଇୟେପେ, ଚିୟାଃଚି ଅକଏ ମାସୀହ୍ ନାଙ୍ଗ୍ ହୋଡ଼ମୋ ରେ ଦୁକୁ ସାହାଅ କେଦାଏ ଇନିଃ ପାପ୍ କାମି କେ ବାଗେ ତାଦାଏ, ଏନାତେ ଆୟୁର୍ ତେ ନେ ଅତେ ରେ ଆପାନାଃ ଜୀଦାନ୍ ରାଃ ସାରେଜାକାନ୍ ହୁଲାଙ୍ଗ୍ କୋକେ ହୋଡ଼ମୋ ରାଃ ଏତ୍କାନ୍ ସାନାଙ୍ଗ୍ କୋ ଲେକାତେ କାହା ମେନ୍ଦୋ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ଜୀଦୋଃୱାଏ। ଚିୟାଃଚି ଏଟାଃଜାତି କୋୱାଃ ସାନାଙ୍ଗ୍ ଲେକା କାମି ରିକା, ଆଡୋଃ ବ୍ୟାଭିଚାର୍ ରେ ତାଇନୋଃ, ଏତ୍କାନ୍ ସାନାଙ୍ଗ୍, ବୁନୁଲ୍, ଏତ୍କାନ୍ ରିଜ୍-ରାଙ୍ଗ୍ ରେ ରାଶିକାଏନ୍, ଥିମ୍ବାଗି ଇଲିଆରଖି ନୁ, ଆଡୋଃ ହିଲାଙ୍ଗାନ୍ ମୂର୍ତିପୂଜା ରେ ଅକେଣ୍ଡେ ରେ ଆବୁ ସିଦା ସାମାୟ୍ ଆଃଦ୍ କେଦାବୁ, ହେନାକୋ ଢେର୍ ହୋବାଜାନା। ନେୟାତେ ଇନ୍‍କୁ ଆକ୍‍ଦାନ୍ଦାଅଃ ୱାକୋ, ଚି ଆପେ ନେକାନ୍ ପୁରା ଏତ୍କାନ୍ ସେସେନ୍ ରେ ଇନ୍‍କୁ ଲୋଃ କାପେ ଗାତିୟୋଃୱା, ଆଡୋଃ ଏନାମେନ୍ତେ ଇନ୍‍କୁ ରାକାମ୍ ରାଃ ବାଦ୍‍ନାମ୍ କାଜି କାଜିୟାକୋ; ମେନ୍ଦୋ ଇନ୍‍କୁ ଇନିଃକେ ଅକଏ ଜୀହିଦ୍ ତାନ୍ କୋୱାଃ ହାର୍ ଗୋଜାକାନ୍ କୋୱାଃ ବିଚାର୍ ଲାଗିନ୍ ସେକାଡ଼୍ ମେନାଇଜା, ହିସାବ୍ ଏମେୟାକୋ। ଚିୟାଃଚି ଗୋଜାକାନ୍ ବିଶ୍ଵାସୀ କୋକେ ହ ଚିମ୍ତାଙ୍ଗ୍ ଜୀହିଃ ତାଇକେନାକୋ ସୁସାମାଚାର୍ ନେୟାମେନ୍ତେ ଉଦୁବ୍ ଜାନା, ଚି ହୋଡ଼ମୋ ରେଦୋ ହୋଡ଼ୋକୋ ଲେକା ଇନ୍‍କୁୱାଃ ବିଚାର୍ ହୋବାଅଃକା, ମେନ୍ଦୋ ଆତ୍ମା ରେ ଇନ୍‍କୁ ପାର୍ମେଶ୍ଵାର୍ ମୋନେ ଲେକାତେ ଜୀହିଃ ତାଇନାକୋ। ସବେନ୍ କାଜି କୋରାଃ ଟୁଣ୍ଡୁ ସେକାଡ଼୍‍ଗୀ ହୋବାଅଃ ରାଃ ମେନାଃ; ଏନାମେନ୍ତେ ବୁଗିନ୍ ମୋନ୍ ତେ ପାହୋମେପେ ହାର୍ ମୋନ୍ କେ ବୁଝାଅ କେତେ ବିନ୍ତି ଲାଗିନ୍ତେ ଏୟୋନ୍ କାନ୍ ତାଇନ୍‍ପେ। ସବେନାଃ ତେ ଠାଉକା କାଜି ନେୟା ତାନାଃ ଚି ମିହୋଡ଼୍ ଏଟାଃ ନିଈ ଲୋଃ ଥିମ୍ବା ଦୁଲାଡ଼୍ ଦୋହୋଏପେ, ଚିୟାଃଚି ଦୁଲାଡ଼୍ ଥିମ୍ବାଗି ପାପ୍ କୋକେ ହାରୁବ୍ ତାଆଏ। ସୁକୁ ମୋନ୍ ତେ ମିହୋଡ଼୍ ଏଟାଃ ନିଃକେ ପେଡ଼ାକୋ ଲେକା ସେୱା-ମାଇନ୍ ଏପେ। ଅକଏକେ ଅକନ୍ ବାର୍ଦାନ୍ ନାମାକାନା, ଇନିଃ ଏନାକୋ ପାର୍ମେଶ୍ଵାର୍ ରାଃ ରାକାମ୍-ରାକାମ୍ ରାଃ ଆନୁଗ୍ରାହ୍ ରାଃ ବୁଗିନ୍ ଭାଣ୍ଡାରୀ କୋୱାଃ ଲେକା ମିହୋଡ଼୍ ଏଟାଃ ନିଜାଃ ସେୱା ରିକାଏପେ। ଆଗାର୍ ଜାହାଁଏ କାଜି ରେଦୋ, ନେକା କାଜିଚାଏ ଚି ପାର୍ମେଶ୍ଵାର୍ ରାଃ ବାଚାନ୍ ତାନାଃ; ଆଗାର୍ ଜାହାଁଏ ସେୱା ରିକାୟାଏ, ଏଣ୍ଡେ ଏନ୍ ପେଡ଼େଏ ଲେକାତେ ରିକା ଚାଏ ଅକନାଃ ପାର୍ମେଶ୍ଵାର୍ ଏମ୍ ତାନାଏ; ଅକନାଃ ତେ ସବେନ୍ ବାକାଣ୍ ରେ ୟୀଶୁ ମାସୀହ୍ ରାଃ ହୋରାତେ, ପାର୍ମେଶ୍ଵାର୍ ରାଃ ମାନାରାଙ୍ଗ୍ ଉଦୁବଃଚା। ମାନାରାଙ୍ଗ୍ ଆଡୋଃ ପେଡ଼େଏ ଜାନାଓ-ଜାନାଓ ଇନିଜାଃ ଗି ତାନାଃ। ଆମୀନ୍। ହେ ଦୁଲାଡ଼୍‍କୋ, ଅକନ୍ ଦୁକୁ ଲେକାନାଃ ସେଙ୍ଗେଲ୍ ଆପେକେ ପାର୍ଖାଅ ଲାଗିନ୍ ଆପେୟାଃ ଚେତାନ୍ ରେ ଜୁଲାକାନା, ଏନାତେ ଆଲୋପେ ଆକଦାନ୍ଦାଅଃ ୱା ଚି ଚିଉଲା ହ କାଆୟୁମ୍ କାନ୍ କାଜି ଆପେୟାଃ ରେ ହୋବାଅଃ ତାନା। ମେନ୍ଦୋ ଜେଲେକା-ଜେଲେକା ମାସୀହ୍ ରାଃ ଦୁକୁ ରେ ମେଶାଅଃ ତାନାପେ, ରାଶିକାଅଃ ପେ, ଏନାତେ ଇନିଜାଃ ମାନାରାଙ୍ଗ୍ ହୋବାଅଃ ରାଃ ସାମାୟ୍ ରେହ ରାଶିକା ଆଡୋଃ ଥିମ୍ବାଗି ସୁକୁ ତାଇନୋଃ ୱାପେ। ଆଡୋଃ ଆଗାର୍ ମାସୀହ୍ ରାଃ ନୁତୁମ୍ ଚାଲ୍ତେ ଆପେକେ ନିନ୍ଦା ରିକାଅଃତାନା ଏଣ୍ଡେ ଆପେ ସୁକୁତାନଗି ତାନ୍‍ପେ, ଚିୟାଃଚି ମାନାରାଙ୍ଗ୍ ରାଃ ଆତ୍ମା, ଅକନିଃ ପାର୍ମେଶ୍ଵାର୍ ରାଃ ଆତ୍ମା ତାନିଃ, ଆପେ ରେ ଉମ୍ବୁଲ୍ ତାନାଏ। ଆପେ ହେତେ ଜାହାଁଏ ହୋଡ଼ ହାତ୍ୟାରା ୟାଦୋ କୁମ୍ଡ଼ୁ ୟାଦୋ ଗୁନାଃ କାମିନିଃ ହୋବାଅଃ ରେହ, ୟାଦୋ ଏଟାଃ କୋୱାଃ କାମି ରେ ତିଈ ସାଜୁ ଚାଲ୍ତେ ଦୁକୁ କାଏ ନାମ୍ ତାନାଏ। ମେନ୍ଦୋ ଆଗାର୍ ଖ୍ରୀଷ୍ଟିୟାନ୍ ହୋବାକାନ୍ ରାଃ ଚାଲ୍ତେ ଦୁକୁ ନାମ୍ ତାନାଏ, ଏଣ୍ଡେ ଆଲୋ ଗିୟୁଗୋଃକାଏ, ମେନ୍ଦୋ ନେ କାଜି ଲାଗିନ୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକା ଚାଏ। ଚିୟାଃଚି ହେନ୍ ସାମାୟ୍ ହିଜୁଃ ସେଟେର୍ କାନା ଚି ସିଦା ପାର୍ମେଶ୍ଵାର୍ ରାଃ ହୋଡ଼ୋକୋୱାଃ ନ୍ୟାୟ ହୋବାଅଃକା; ଆଡୋଃ ଯାବ୍ ଚି ବିଚାର୍ ରାଃ ଏଟେଃ ଆବୁ ତେଗି ହୋବାଃୱା ଏଣ୍ଡେ ହିନ୍‍କୁୱାଃ ଚିନାଃ ହାଲ୍ ହୋବାଃୱା ଅକନ୍ କୋ ପାର୍ମେଶ୍ଵାର୍ ରାଃ ସୁସାମାଚାର୍ କେ କାକୋ ମାନାତିଙ୍ଗ୍ ତାନା? ଆଡୋଃ “ଆଗାର୍ ଧାର୍ମୀ ହୋଡ଼ ଗି କେଣ୍ଟେଃ ତେ ବାଞ୍ଚାଅ ନାମେୟାଏ, ଏଣ୍ଡେ ପାର୍ମେଶ୍ଵାର୍ କେ କାଏ ବୋରୋତାନ୍ କୋୱାଃ ହାର୍ ପାପୀ କୋୱାଃ ଚିନାଃ ହୋବାୱା?” ଏନାମେନ୍ତେ ଅକନ୍ କୋ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ଦୁକୁ ସାହାଅ ତାନାକୋ, ଇନ୍‍କୁ ବୁଗିନାଃ ରିକାତାନ୍ ଲୋଃ ଆକୋୱାଃ-ଆକୋୱାଃ ଜୀଉ କେ ବିଶ୍ଵାସେ ଲେକାନିଃ ଶିର୍ଜାଅନିଜାଃ ତିଈ ରେ ସୋମ୍ପାଅୱେ କାକୋ। ଆପେ ଥାଲା ରେ ଅକନ୍ କୋ ମାରିହୋଡ଼ୋକୋ ତାନ୍‍କୋ, ଇଙ୍ଗ୍ ଇନ୍‍କୁୱାଃ ଲେକା ମାରିହୋଡ଼ ଆଡୋଃ ମାସୀହ୍ ରାଃ ଦୁକୁ କୋରାଃ ଗୋୱା ହୋବାକେତେ ହାର୍ ହିଜୁଃ ତେୟା ମାନାରାଙ୍ଗ୍ ରେ ମେନେଶା ହୋବାକେତେ ହିନ୍‍କୁକେ ନେୟା ବୁଝାଅକୋ ତାନିଙ୍ଗ୍। ଚି ପାର୍ମେଶ୍ଵାର୍ ରାଃ ଏନ୍ ଗୋଟ୍ ରାଃ, ଅକନାଃ ଆପେୟାଃ ଥାଲା ରେ ମେନାଃ ଏନାକେ ହୋରୋୟେପେ; ଆଡୋଃ ନେୟା ଦାବାବ୍ ଏତେ କାହା ମାଗାର୍ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ରାଶିକାତାନ୍ ଲୋଃ, ଆଡୋଃ ଟାକା-ପାଇସା ହାୟା ଲାଗିନ୍ତେ କାହା ମାଗାର୍ ମୋନ୍ ଲାଗାଅ କେତେ ରିକାଏପେ। ଅକନ୍ ହୋଡ଼ୋକୋ ଆପେକେ ଜିମା ଏମାକାନାକୋ, ଇନ୍‍କୁୱାଃ ଚେତାନ୍ ରେ ଆଧିକାର୍ ଆଲୋପେ ଜାତାଅୟା, ମେନ୍ଦୋ ଗୋଟ୍ ଲାଗିନ୍ତେ ନାମୁନା ବାଇୟେନ୍ ପେ। ଚିମ୍ତା ମୁଖିୟା ହୋରୋନିଃ ନେଲୋଗାଏ, ଏଣ୍ଡେ ଆପେକେ ମାନାରାଙ୍ଗ୍ ରାଃ ମୁକୁଟ୍ ଏମୋଗା ଅକନାଃ କା ଗୋସୋଓଗା। ନେୟାଲେକାତେ ହେ ନାୱଜାୱାନ୍ କୋ, ଆପେ ହ ମାରିହୋଡ଼ୋକୋ କୋୱାଃ ଆଧିନ୍ ରେ ତାଇନ୍‍ପେ, ମେନ୍ଦୋ ଆପେ ସବେନ୍ ମିପୀୟାଃ ମିହୋଡ଼୍ ଏଟାଃ ନିଈ କେ ସେୱା ଲାଗିନ୍ ଲେବେଃ ମୋନ୍ ତେ ମାୟାଙ୍ଗ୍ ଥୋଲ୍ ତାଇନୋଃପେ। ଚିୟାଃଚି “ପାର୍ମେଶ୍ଵାର୍ ମାରାଙ୍ଗେନ୍ ମୋନ୍ କୋୱାଃ ବିରୋଧ୍ ରିକାୟାଏ, ମେନ୍ଦୋ ହୁଡିଙ୍ଗେନ୍ ମୋନ୍ କୋକେ ଆନୁଗ୍ରାହ୍ ରିକାୟାଏ।” ଏନାମେନ୍ତେ ପାର୍ମେଶ୍ଵାର୍ ରାଃ ପେଡ଼େଜାନ୍ ତିଈ ଲାଥାର୍ ରେ ଲେବେଃମୋନ୍ ତେ ତାଇନ୍‍ପେ, ଏନାତେ ଇନିଃ ଆପେକେ ଠିକ୍ ସାମାୟ୍ ରେ ହାରାପେୟାଏ। ଆପେୟାଃ ସବେନ୍ ଚିନ୍ତା ଇନିଜାଃ ଚେତାନ୍ ରେ ବାଗିତାପେ, ଚିୟାଃଚି ଇନିଃକେ ଆପେୟାଃ ଧ୍ୟାନ୍ ମେନାଃ। ହୋସିଆର୍ ତାଇନ୍‍ପେ, ଆଡୋଃ ଏୟୋନ୍ କାନୋଃପେ; ଚିୟାଃଚି ଆପେୟାଃ ବିରୋଧୀ ଶାଏତାନ୍ ଗୁଲ୍‍ତାନ୍ କୁଲ୍ଲା ଲେକା ନେ ଦାଣା ରେ ମେନାଇଜା ଚି ଅକଏକେ ଚାଗାଡ଼୍ ଜୋମୀୟାଏ। ବିଶ୍ଵାସ୍ ରେ କେଟେଏଃ କେତେ, ଆଡୋଃ ନେୟା ସାରିକେତେ ଇନିଜାଃ ସାମ୍ନା ରିକାଏପେ ଚି ଆପେୟାଃ ହାଗାକୋ ଅକନ୍ କୋ ନେ ଅତେଦିଶୁମ୍ ରେ ମେନାକୋୱା ଇନ୍‍କୁ ନେଲେକାଗି ଦୁକୁ ସାହାଅ ତାନାକୋ। ନାଆ ପାର୍ମେଶ୍ଵାର୍ ଅକନିଃ ସବେନ୍ ଆନୁଗ୍ରାହ୍ ରାଃ ଏହେମ୍ ନିଈ ତାନିଃ, ଅକନିଃ ଆପେକେ ମାସୀହ୍ ରେ ଆଜାଃ ଜାନାଓ-ଜାନାଓ ମାନାରାଙ୍ଗ୍ ଲାଗିନ୍ କେଡ଼ାକେଃପେୟାଏ, ଆପେୟାଃ ହୁଡିଙ୍ଗ୍ ସାମାୟ୍ ରାଃ ଦୁକୁ ସାହାଅ ତାୟୋମ୍ତେ ଆଏଃ ଗି ଆପେକେ ପୋକ୍ତା ହାର୍ କେଟେଃ ଆଡୋଃ ପେଡ଼େଜାନ୍ ବାଇପେୟାଏ। ଇନିଜାଃ ଗି ରାଇଜ୍ ଜାନାଓ-ଜାନାଓ ହୋବାଅଃକା। ଆମୀନ୍। ଇଙ୍ଗ୍ ସିଲ୍‍ବାନୁସ୍ ରାଃ ତିଈ ତେ, ଅକନିଃ କେ ବିଶ୍ଵାସେ ଲେକାନିଃ ହାଗା ମେନ୍ତେ ସାରିୟାଇଙ୍ଗ, ହୁଡିଙ୍ଗ୍ ଲେକା ଅଲ୍ କେତେ ଆପେକେ ବୁଝାଅ କାଦିଙ୍ଗ୍, ହାର୍ ନେୟା ଗୋୱା ଏମାକାଦିଙ୍ଗ୍ ଚି ପାର୍ମେଶ୍ଵାର୍ ରାଃ ସାର୍ତି ଆନୁଗ୍ରାହ୍ ନେୟାଗି ତାନାଃ, ନେଣ୍ଡେ ଗି ବାଇକେତେ ତାଇନୋଃପେ। ଅକନ୍ କୋ ବେବିଲୋନ୍ ସାହାର୍ ରେ ଆପେ ଲେକା ସାଲାକାନ୍ ହୋଡ଼ୋକୋ ମେନାକୋୱା, ଇନ୍‍କୁ ଆଡୋଃ ମାର୍କୁସ୍ ଅକନିଃ ଇଙ୍ଗ୍ଆଃ ହୋନ୍ ଲେକା ତାନିଃ ଆପେକେ ଜୋହାର୍ କାଜିତାନାକୋ। ଦୁଲାଡ଼୍ ରାଃ ଚୁମା ତେ ମିହୋଡ଼୍ ଏଟାଃ ନିଈ କେ ଜୋହାର୍ ରିକାଏପେ। ଆପେ ସବେନ୍ କୋକେ, ଅକନ୍ କୋ ମାସୀହ୍ ରେ ମେନାପେୟା, ଜୀଉସୁକୁ ନାମ୍ କାତୋଃଚା। ଶିମୋନ୍ ପାତ୍ରାସ୍ ପାଡ଼େତେ ଅକନିଃ ୟୀଶୁ ମାସୀହ୍ ରାଃ ଦାସୀ ହାର୍ କୁଲାକାନ୍ ଚେଲା ତାନିଃ, ଏନ୍ ହୋଡ଼ୋକୋୱାଃ ନୁତୁମ୍ ରେ ଅକନ୍‍କୋ ଆବୁୱାଃ ପାର୍ମେଶ୍ଵାର୍ ହାର୍ ବାଞ୍ଚାଅନିଃ ୟୀଶୁ ମାସୀହ୍ ରାଃ ଧାରାମ୍ ହୋରାତେ ଆବୁୱାଃ ଲେକା ଥିମ୍ବା ଗୋନୋଙ୍ଗାନ୍ ବିଶ୍ଵାସ୍ ନାମ୍ କାଦାକୋ। ପାର୍ମେଶ୍ଵାର୍ ପାଡ଼େତେ ହାର୍ ଆବୁୱାଃ ପ୍ରାଭୁ ୟୀଶୁ ରାଃ ନେଲ୍ଉରୁମ୍ ରାଃ ହୋରାତେ ଆନୁଗ୍ରାହ୍ ହାର୍ ଜୀଉସୁକୁ ଆପେ ରେ ଥିମ୍ବା ତେଗି ହାରା ଇଦିଅଃକା। ଚିୟାଃଚି ଇନିଜାଃ ପାର୍ମେଶ୍ଵାର୍ ପେଡ଼େଏ ସବେନାଃ କେ ଅକନାଃ ଜୀଦାନ୍ ହାର୍ ଭାକ୍ତି ରେ ଲାଗାତିଙ୍ଗ୍, ଆବୁକେ ଇନିଜାଃ ଗି ନେଲ୍ଉରୁମ୍ ହୋରାତେ ଏମାକାଃ ବୁୱାଏ, ଅକନିଃ ଆବୁକେ ଆଜାଃ ଗି ମାନାରାଙ୍ଗ୍ ହାର୍ ବୁଗିନ୍ ଗୁନ୍ ରାଃ ହୋରାତେ କେଡ଼ା କାଃବୁୱାଏ। ନେ ସବେନାଃ ହୋରାତେ ଇନିଃ ଆବୁକେ ଗୋନୋଙ୍ଗାନ୍ ହାର୍ ଥିମ୍ବାଗି ମାରାଙ୍ଗ୍ କିରିୟା ଏମ୍ କାଦାଏ; ଏନାତେ ନେୟା ରାଃ ହୋରାତେ ଆପେ ଏନ୍ ସୋୟାଅଃ ତେୟାଃ ତେ ବାଗେ କେତେ, ଅକନାଃ ଅତେଦିଶୁମ୍ ରାଃ ଶିତୃ ସାନାଙ୍ଗ୍ ତେ ହୋବାଅଃୱା, ପାର୍ମେଶ୍ଵାର୍ ରାଃ ଜାତି ରେୟାଃ ହାନାଟିଙ୍ଗ୍ ରେ ମେଶା କେନୋଃପେ। ନେୟାମେନ୍ତେ ଆପେ ସବେନ୍ ଲେକାତେ ଯାତାନ୍ ତେ ଆପେୟାଃ ବିଶ୍ଵାସ୍ ରେ ବୁଗିନ୍ ଗୁନ୍, ହାର୍ ବୁଗିନ୍ ଗୁନ୍ ହୋରାତେ ସେଣାନ୍, ହାର୍ ସେଣାନ୍ ହୋରାତେ ମୋନ୍ କେ ବୁଝାଏପେ, ଆଡୋଃ ମୋନ୍ କେ ବୁଝାଅଃ ହୋରାତେ ତେ ପୋକ୍ତାଅଃପେ, ହାର୍ ପୋକ୍ତାଅଃ ହୋରାତେ ଭାକ୍ତି, ହାର୍ ଭାକ୍ତି ଏତେ ହାଗା ଦୁଲାଡ଼୍ ହାର୍ ହାଗା ଦୁଲାଡ଼୍ ହୋରାତେ ଦୁଲାଡ଼୍ ରେ ହାରା ଇଦିଅଃପେ। ଚିୟାଃଚି ଆଗାର ନେ ବାକାଣ୍ କୋ ଆପେୟାଃ ତାଃରେ ନାଆ ତାଇନୋଃ ରେଦୋ ହାର୍ ହାରା ଇଦିଅଃତାନା, ଦୋ ଆପେକେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ନେଲ୍ଉରୁମ୍ ରେ ସାମାଗୀ ହାର୍ କାଯୋଅକାନ୍ ଲେକା କାଏରିକାପେୟାଏ। ଚିୟାଃଚି ଅକେୟାଃ ରେ ନେ ବାକାଣ୍ କୋ ବାନୋଗା, ହିନିଃ ଆନ୍ଧ୍ରା ତାନିଃ ହାର୍ କାଟିଃ-କାଟିଃ ନେଲେୟାଏ। ହାର୍ ଆଜାଃ ସିଦା ତେୟାଃ ପାପ୍ କୋଏତେ ଚାପିନ୍ ଲାଗିନ୍ ରିଡ଼ିଙ୍ଗ୍ କାନାଏ। ନେୟାମେନ୍ତେ ହେ ହାଗାକୋ, ଆପେୟାଃ କେଡ଼ାକାନ୍ କେ ହାର୍ ସାଲାକାନ୍ କେ ପୋକ୍ତା ଲାଗିନ୍ ବୁଗିନ୍ ତେ କୋଷିସ୍ ରିକାଏପେ, ଚିୟାଃଚି ନେକା ରିକାୟାପେ ଏଣ୍ଡେ ଚିଉଲା ହ ଠୋକାର୍ କାପେ ଜୋମେୟା। ମେନ୍ଦୋ ନେଲେକାତେ ଆପେ ଆବୁୱାଃ ପ୍ରାଭୁ ହାର୍ ବାଞ୍ଚାଅନିଃ ୟୀଶୁ ମାସୀହ୍ ରାଃ ଜାନାଓ ରାଇଜ୍ ରେ ମାରାଙ୍ଗ୍ ମାଇନାନ୍ ଲୋଃ ବୋଲୋ ଧାଡ଼ିୟାପେ। ନେୟାଲାଗିନ୍ ଆପେ ନେ ବାକାଣ୍‍କୋ ସାରିୟାପେ ଏଣ୍ଡେରେ ହଗି, ହାର୍ ଅକନ୍ ସାର୍ତି ବାଚାନ୍ ଆପେକେ ନାମ୍ କାନା ଏଣ୍ଡେ ରେ ବାଇକେତେ ତାଇନୋଃ ୱାପେ, ଏଣ୍ଡେ ହଗି ଇଙ୍ଗ୍ ଆପେକେ ନେ ବାକାଣ୍ କୋରାଃ ମୋନେ ରିକା ଲାଗିନ୍ ସବେନ୍ ଇମ୍ତା ସାପ୍ଡ଼ାଅ ତାଇନୋଗାଇଙ୍ଗ୍। ଇଙ୍ଗ୍ ନେୟା ଇଙ୍ଗ୍ଆଃ ଲାଗିନ୍ ଠାଉକା ଆଟ୍‍କାର୍ ତାନିଙ୍ଗ୍ ଚି ଚିମ୍ତାଙ୍ଗ୍ ସାନ୍ ଇଙ୍ଗ୍ ଇଙ୍ଗ୍ଆଃ ହୋଡ଼ମୋ ରେ ଡେରା ଅଡ଼୍ଆଃ ଲେକା ଜୀହିଦୋଃ ତାନିଙ୍ଗ୍ ଇମ୍ତାଙ୍ଗ୍ ସାନ୍ ଆପେକେ ମୋନେ ରିକା-ରିକା କେତେ ଫେରେଃ କାତେ ପେୟାଇଙ୍ଗ୍। ଚିୟାଃଚି ଇଙ୍ଗ୍ ନେୟା ସାରି ତାନାଇଙ୍ଗ୍ ଚି ଇଙ୍ଗ୍ ଜାଲ୍‍ଦିଗି ଗୋଜୋଗାଇଙ୍ଗ୍, ଜେଲେକା ଚି ଆବୁୱାଃ ପ୍ରାଭୁ ୟୀଶୁ ମାସୀହ୍ ଇଙ୍ଗ୍ କେ ଉଦୁବ୍ ଛାବା କାଦିଙ୍ଗ୍ଆଏ। ଏନାମେନ୍ତେ ଇଙ୍ଗ୍ ନେକା କୋଷିସ୍ ୟାଇଙ୍ଗ୍ ଚି ଇଙ୍ଗ୍ଆଃ ସେନୋଃ ତାୟୋମ୍ତେ ଆପେ ନେ ସବେନ୍ ବାକାଣ୍ କୋକେ ସବେନ୍ ଇମ୍ତାଙ୍ଗ୍ ପାହୋମ୍ ଧାଡ଼ିୟାପେ। ଚିୟାଃଚି ଚିମ୍ତାଙ୍ଗ୍ ଆଲେ ଆପେକେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ପେଡ଼େଏ ରାଃ ହାର୍ ହିନିଜୁଃ ରାଃ ସାମାଚାର୍ ଏମ୍ ଲେଦାଲେ, ଦୋ ଏନା ଚାଲାକି କେତେ ବାଇକାନ୍ କାହାନୀ କୋରାଃ ଲେକା କାତାଇକେନା ମେନ୍ଦୋ ଆଲେ ଖୁଦ୍ ଗି ଇନିଜାଃ ମାନାରାଙ୍ଗ୍ ପେଡ଼େଏ କେ ମେଏଃ ତେ ନେଲ୍ ଲେଦାଲେ। ଚିୟାଃଚି ଚିମ୍ତା ଇନିଃ ପାର୍ମେଶ୍ଵାର୍ ଆପୁ ତେ ମାଇନ୍ ହାର୍ ମାନାରାଙ୍ଗ୍ ନାମ୍ କେଦାଏ ହାର୍ ଏନ୍ ସବେନାଃ ଏତେ ମାନାରାଙ୍ଗ୍ ପେଡ଼େଏ ଏତେ ନେୟା ଆୱାଜ୍ ହିଜୁଃଲେନା, “ନିଈ ଇଙ୍ଗ୍ଆଃ ଦୁଲାଡ଼୍ ହୋନ୍‍କଡ଼ା ତାନିଃ, ଅକନିଃତେ ଇଙ୍ଗ୍ ସୁକୁ ମେନାଇଙ୍ଗ୍‍ୟା।” ଚିମ୍ତାଙ୍ଗ୍ ଆଲେ ଇନିଜାଃ ଲୋଃ ପାବିତାର୍ ବୁରୁ ରେ ତାଇକେନାଲେ ଇମ୍ତା ସିର୍ମାଦିଶୁମ୍ ଏତେ ନେ ଆୱାଜ୍ ହିଜୁଃତାନ୍ ଆୟୁମ୍ କେଦାଲେ। ଆବୁୱାଃ ନାଡ଼େଏ ରେ ଅକନ୍ ନାବୀକୋୱାଃ ବାଚାନ୍ ମେନାଃ, ଏନା ନେ ଘାଟ୍ନା ହୋବାଅଃତେ ପୋକ୍ତା ଠାହ୍‍ରାଓ ଜାନା। ଆପେ ନେୟା ବେଶ୍ ରିକାତାନାପେ ଚି ଅକନାଃ ନେୟା ବୁଝାଅ କେତେ ଏନାରେ ମୋନ୍ ଲାଗାଅ ତାନାପେ ଚି ଏନା ମିୟାଃ ବାତୀ ତାନାଃ, ଅକନାଃ ନୁବାଃ ଜାଗା ରେ ହେନ୍ ସାମାୟ୍ ସାନ୍ ମାସ୍କାଲ୍ ଏମ୍ କାତେୟାଏ ଚିମିନ୍ ସାନ୍ ଚି ଶିଙ୍ଗି କା ତୁରୋଗା ହାର୍ ସେତାଃ ରାଃ ଇପିଲ୍ ଆପେୟାଃ ମୋନ୍ ରେ କା ତୁରୋଗା। ମେନ୍ଦୋ ସିଦା ନେୟା ସାରିଲେପେ ଚି ପାବିତାର୍ ପୁଥି ରାଃ ଜେତାନ୍ ଆୟାର୍ କାଜି ହ ଜାହେଁୟାଃ ଆପାନାଃଗି ପାହୋମ୍ ଲେକାତେ ପୁରା କାହୋବାଅଃୱା, ଚିୟାଃଚି ଜାହାନ୍ ଗି ଆୟାର୍‍କାଜି ହୋଡ଼ୋକୋୱାଃ ସାନାଙ୍ଗ୍ ଲେକାତେ ଚିଉଲା ହ କାହୋବାକାନା, ମେନ୍ଦୋ ପାବିତାର୍ ହୋଡ଼ ପାବିତାର୍ ଆତ୍ମା ରାଃ ହୋରାତେ ଫେରେଃ କେତେ ପାର୍ମେଶ୍ଵାର୍ ପାଡ଼େତେ କାଜି ତାଇକେନାକୋ। ଜେଲେକା ଏନ୍ ହୋଡ଼ୋକୋୱାଃ ରେ ହିହିଡ଼୍ ନାବୀ କୋ ତାଇକେନାକୋ, ଏନ୍‍ଲେକା ଆପେୟାଃ ଥାଲା ରେହ ହିହିଡ଼୍ ଶିଖାଅତାନ୍ କୋ ହୋବାଅଃୱାକୋ, ଅକନ୍‍କୋ ନାଶ୍ ରିକାତେୟାଃ ଏତ୍କାନ୍ ହୋରା କେ ଉକୁ-ଉକୁ ତେ ଉଦୁବ୍ ୟାକୋ, ଆଡୋଃ ଏନ୍ ପେଡ଼େଜାନ୍ ପ୍ରାଭୁ କେ ଅକନିଃ ଇନ୍‍କୁକେ କିରିଙ୍ଗ୍ କାଃକୋୱାଏ ମାନା ୟାକୋ, ହାର୍ ଆକୋ ଆପାନ୍ କେ ସେକାଡ଼୍ ଗି ବିନାଶ୍ ରେ ଉୟୁଗେୟାକୋ। ଆଡୋଃ ଥିମ୍ବାଗି ଆକୋକେ ବିଶ୍ଵାସୀ କାଜିୟୋଃତାନ୍ ହୋଡ଼ୋକୋ ହିହିଡ଼୍ ଶିଖାଅତାନ୍ କୋୱା ଲେକା ଶିତୃ ସାନାଙ୍ଗ୍ କାମିକୋ ରିକା ୟାକୋ, ଇନ୍‍କୁୱାଃ ଚାଲ୍ତେ ସାର୍ତି ରାଃ ହୋରା ରାଃ ନିନ୍ଦା ରିକାଅଗା। ଇନ୍‍କୁ ପାଇସା ଟାକା ରାଃ ହାୟା ତେ କାଜିକୋକେ ବାଇକେତେ ଆପେକେ ଆକୋୱାଃ ଫାଏଦା ଲାଗିନ୍ ବାଇପେୟାକୋ, ଆଡୋଃ ଅକନ୍ ଦାଣ୍ଡ୍ ରାଃ ଆନାଚୁ ଇନ୍‍କୁୱାଃ ରେ ସିଦା ଏତେ ଗି ହୋବାଚୁକାଅକାନା ଏନାରାଃ ହିଜୁଃ ରେ ଜାହାନ୍ ଦେରି ବାନୋଗା, ଆଡୋଃ ଇନ୍‍କୁୱାଃ ବିନାଶ୍ କାଏ ଦୁଣୁମୋଃୱାଏ। ଚିୟାଃଚି ଚିମ୍ତାଙ୍ଗ୍ ପାର୍ମେଶ୍ଵାର୍ ଏନ୍ ସିର୍ମାଦାସୀ କୋକେ ଅକନ୍‍କୋ ପାପ୍ ରିକା କେଦାକୋ କାଏ ବାଗେ କେଃକୋୱାଏ, ମେନ୍ଦୋ ନାରାକ୍ ରେ କୁଲ୍‍କେତେ ନୁବାଃ ଗାଡା ରେ ସାଜୁତାଃକୋୱାଏ ଏନାତେ ବିଚାର୍ ହୁଲାଙ୍ଗ୍ ସାନ୍ତେ ବାନ୍ଦି ତାଇନ୍ ଚାକୋ; ଆଡୋଃ ମାରି ଯୁଗ୍ ରେନ୍ ଅତେଦିଶୁମ୍ କେହ କାଏ ବାଗେ କେଦା ମେନ୍ଦୋ ପାର୍ମେଶ୍ଵାର୍ କେ କାକୋ ବୋରୋଇତାନ୍ ଅତେଦିଶୁମ୍ ରେ ମାରାଙ୍ଗ୍ ଡୁବା-ଦାଆ କୁଲ୍ କେଦାଏ, ମେନ୍ଦୋ ଧାରାମ୍ ରାଃ ପାର୍ଚାର୍ ନୁହ୍ ଲୋଃ ମେଶା କେତେ ଆଠ୍ ଝାନ୍ ହୋଡ଼ୋକୋକେ ବାଞ୍ଚାଅ କେଃକୋୱାଏ; ଆଡୋଃ ସାଦୋମ୍ ହାର୍ ଆମୋରା ରେନ୍ ହାତୁ କୋକେ ନାଶୋଃକା ମେନ୍ତେ ନେକା ଦାଣ୍ଡ୍ ରାଃ ଆଚୁ ଏମ୍‍କେଦାଏ ଚି ଇନ୍‍କୁକେ ଅଣ୍ଡୋର୍ ଜୁଲ୍ କେତେ ତରେଃ ରେ ମେଶା କେଦାଏ ଏନାତେ ହିଜୁଃ ସାମାୟ୍ ରେନ୍ ପାର୍ମେଶ୍ଵାର୍ କେ କାକୋ ବୋରୋଇତାନ୍ ହୋଡ଼ୋକୋ ନାଙ୍ଗ୍ ଇନ୍‍କୁ କେ ମିୟାଃ ଜୋନୋକା କାଜି ଲେକା ବାଇକେଃକୋୱାଏ, ଆଡୋଃ ଧାର୍ମୀ ଲୁତ୍ କେ ଅକନିଃ ଆଧାର୍ମୀ କୋୱାଃ ଏତ୍କାନ୍ ଜୀଦାନ୍ ସେସେନ୍ ତେ ଥିମ୍ବା ଦୁକୁଅଃ ତାଇକେନାଏ ଛୋଡ଼ାଓ କିଜାଏ। (ଚିୟାଃଚି ଏନ୍ ଧାର୍ମୀ ଇନ୍‍କୁୱାଃ ଥାଲା ରେ ତାଇନ୍ ତାନ୍‍ଲୋଃ ଆଡୋଃ ଇନ୍‍କୁୱାଃ ଆଧାର୍ମ୍ ରାଃ କାମି କୋକେ ନେଲ୍-ନେଲ୍‍କେତେ ଆଡୋଃ ଆୟୁମ୍ ଆୟୁମ୍‍କେତେ, ସବେନ୍ ହୁଲାଙ୍ଗ୍ ଆଜାଃ ସାର୍ତି ମୋନ୍ ରେ ଦୁକୁ ନାମ୍ ତାଇକେନାଏ)। ଦୋ ପ୍ରାଭୁ ପାର୍ମେଶ୍ଵାର୍ ଆଏଃକେ ବୋରୋତାନ୍ କୋକେ ପାରୀକ୍ଷା ଏତେ ଅଡୋଙ୍ଗ୍ ହାର୍ ଆଧାର୍ମୀ କୋକେ ବିଚାର୍ ହୁଲାଙ୍ଗ୍ ସାନ୍ତେ ଦାଣ୍ଡ୍ ଆଚୁ ଏମେ କୋନାଙ୍ଗ୍ ମାଣ୍ତାଅ ହ ସାରିୟାଏ, ଖାସ୍ କେତେ ହିହିଡ଼୍ ଶିଖାଅତାନ୍ କୋକେ ଅକନ୍‍କୋ ଶିତୃ ସାନାଙ୍ଗ୍ କୋରାଃ ଦୋୟା ରେ ହୋଡ଼ମୋ ରାଃ ପାପୀ ସାନାଙ୍ଗ୍ ଲେକାତେ ସେସେନାକୋ ଆଡୋଃ ରାଇଜ୍ ତାନ୍ ପେଡ଼େଏ କେ ନିନ୍ଦା ୟାକୋ। ଇନ୍‍କୁ ସେଠ୍ରା, ଆଡୋଃ ଜୀଦ୍ଧି ତାନ୍‍କୋ, ଆଡୋଃ ମାନାରାଙ୍ଗ୍ ରେନ୍ ସିର୍ମାଦାସୀ କୋକେ ନିନ୍ଦା-ଦୋଷ୍ ରିକାଲାଗିନ୍ତେ କାକୋ ବୋରୋୟା। ସିର୍ମାଦାସୀକୋ ହିହିଡ଼୍ ଶିଖାଅତାନ୍ କୋଏତେ କେଟେଃ ହାର୍ ପେଡ଼େଏ ରେ ମାରାଙ୍ଗ୍ ମେନାକୋୱା, ଏଣ୍ଡେ ରେହ, ପ୍ରାଭୁ ଆଃ ନାଡ଼େଏ ରେ ଶିଖାଅତାନ୍ କୋକେ ରାକାମ୍ ରାଃ ନିନ୍ଦା-ଦୋଷ୍ କାକୋ ଲାଗାଅୟା। ମେନ୍ଦୋ ନେ ହୋଡ଼ୋକୋ କାସେଣାନ୍ ପାଶୁକୋ ଲେକା ତାନ୍‍କୋ, ଅକନ୍‍କୋ ସାବୋଃ ନାଙ୍ଗ୍ ଆଡୋଃ ନାଶ୍ ହୋବାଅଃ ଲାଗିନ୍ ସିର୍ଜାଅ କାନାକୋ; ଆଡୋଃ ଅକନ୍ କାଜିକେ ସାରିଗି କାକୋ ସାରିକାଦା ଏନାରାଃ ବିଷାୟ୍ ରେ ଏଟାଃ କୋକେ ରାକାମ୍ ରାଃ ନିନ୍ଦା-ଦୋଷ୍ କାଜିୟାକୋ, ଇନ୍‍କୁ ଆକୋୱାଃ ଗି ସୋୟାଅଃ ତାନ୍ ରେ ଆକୋଗି ସୋୟା କେନୋଗାକୋ। ଏଟାଃ କୋୱାଃ ବୁରାଇ ରିକାଏ ରାଃ ବାଦ୍‍ଲି ଇନ୍‍କୁୱାଃଗି ବୁରାଇ ହୋବାଅଃୱା। ଇନ୍‍କୁକେ ଶିଙ୍ଗି ତିକିନ୍ ନୁ-ବୁଲୋଃ କେତେ ଏତ୍କାନ୍ ତେୟାଃ ରେ ମାଜାକୋୱା। ନେକାନ୍ କୋ ଚାଦାଃ ବୁଦାଃ ହାର୍ ଦୋଷୀ ତାନ୍ କୋ; ଚିମ୍ତାଙ୍ଗ୍ ଆକୋ ଆପେ ଲୋଃ ଜୋମ୍ ନୁୱେ ୟାକୋ, ଦୋ ଆକୋୱାଃ ପାଡ଼େତେ ଦୁଲାଡ଼୍ ରେୟାଃ ଭୋଜ୍ ମାଣ୍ଡାଅ କେତେ ବୁଲୋଃ କେତେ ଏତ୍କାନ୍ ତେୟାଃ ରେ ମାଜା ଇଦି ୟାକୋ। ଇନ୍‍କୁୱାଃ ମେଏଃ ରେ ବ୍ୟାଭିଚାର୍ ଫେରେଃ ତାଇନା, ଆଡୋଃ ଇନ୍‍କୁ ପାପ୍ କାକୋ ରିକାଏ ରେ କାକୋ ହୋକା ଧାଡ଼ିୟୋଃୱା। ଇନ୍‍କୁ ସାଲ୍‍ସାନ୍ତ୍ କାକୋ ତାଇନ୍ ତାନ୍ କୋୱାଃ ମୋନ୍ କୋକେ ଫୁସ୍‍ଲାଅ କୋୱାକୋ। ଇନ୍‍କୁୱାଃ ମୋନ୍ କୋ ଟାକା-ପାଇସା ରାଃ ହାୟା ରେ ଗିନି କାନାକୋ; ଇନ୍‍କୁ ସାର୍ପାଅକାନ୍ ହୋନ୍ କୋ ତାନ୍‍କୋ। ଇନ୍‍କୁ ସୋଜ୍ ହୋରା କେ ବାଗେ କେତେ ଆଦା କାନାକୋ, ଆଡୋଃ ବାଓର୍ ରାଃ ହୋନ୍ ବିଲାମ୍ ରାଃ ହୋରା କେ ସାବ୍ କାଦାକୋ, ଅକନିଃ ଆଧାର୍ମ୍ ରାଃ ନାଲା କେ ଦୁଲାଡ଼୍ କେଦାଏ। ମେନ୍ଦୋ ଇନିଜାଃ ଭୁଲ୍ ରିକା ଲାଗିନ୍ତେ ଏଗେର୍ ନାମ୍ କେଦାଏ, ନେତାଃ ସାନ୍ତେ ଚି କୋକୋ ଗାଧା ହୋଡ଼ୋକୋୱାଃ ଲେକା ବାକାଣ୍ କେତେ ଏନ୍ ନାବୀ କେ ଇନିଜାଃ ବେଲୁର୍ ତେ ରକାଅ କିଜାଏ। ନେ ହୋଡ଼ୋକୋ ଆଞ୍ଜେଃ କୁଆଁ, ଆଡୋଃ ଅଟାଙ୍ଗ୍‍ତାନ୍ ରିମିଲ୍ ତାନ୍‍କୋ, ଇନ୍‍କୁ ଲାଗିନ୍ କାଟୁଣ୍ଡୁ ନୁବାଃ ବାଇକାନା। ଇନ୍‍କୁ ସାମାଗୀ ଘାମାଣ୍ଡ୍ ରାଃ କାଜିକୋ କାଜିକେତେ ଶିତୃ ସାନାଙ୍ଗ୍ କାମି ରାଃ ହୋରାତେ, ଏନ୍ ହୋଡ଼ୋକୋକେ ହୋଡ଼ମୋ ରାଃ ପାପ୍ ସାନାଙ୍ଗ୍ କୋରେ ପାଶେ ତାକୋୱାକୋ, ଅକନ୍‍କୋ ଆଦାକାନ କୋଏତେ ନାଆ ଅଡୋଙ୍ଗଅଃ ତାଇକେନାକୋ। ହିହିଡ଼୍ ଶିଖାଅତାନ୍ କୋ ଇନ୍‍କୁକେ କାଜିକୋୱାକୋ ଚି ଇନ୍‍କୁ ଜାହାନାଃ ଗି ସାନାଙ୍ଗ୍ ଏନା ରିକା ଧାଡ଼ିୟାକୋ, ମେନ୍ଦୋ ଆକୋଗି ସୋୟାଅଃତାନ୍ ରାଃ ଦାସୀ ତାନ୍‍କୋ, ଚିୟାଃଚି ଅକନ୍ ହୋଡ଼ ଅକନାଃ ଏତେ ହାରାଅ ଜାନାଏ ଇନିଃ ଏନାରାଃ ଦାସୀ ବାଇ କେନୋଃ ତାନାଏ। ଚିମ୍ତାଙ୍ଗ୍ ଇନ୍‍କୁ ପ୍ରାଭୁ ହାର୍ ବାଞ୍ଚାଅନିଃ ୟୀଶୁ ମାସୀହ୍ କେ ନେଲ୍ ଉରୁମ୍ ରାଃ ହୋରାତେ ଅତେଦିଶୁମ୍ ରାଃ ରାକାମ୍-ରାକାମ୍ ରାଃ ଏତ୍କାନ୍ କାମିକୋଏତେ ଅଡୋଙ୍ଗ୍ ଜାନାକୋ, ହାର୍ ଆଡୋଃଗି ଏନାରେ ପାଶେ କେତେ ହାରାଅ କୋଃତାନାକୋ, ଏଣ୍ଡେ ଦୋ ଇନ୍‍କୁୱାଃ ତାୟୋମ୍ ରାଃ ଦାଶା ସିଦା ଏତେ ହଗି ଖାରାପ୍ ହୋବାଜାନା। ଚିୟାଃଚି ଆକୋକେ ଜିମା ଲେନ୍ ତାଇନା ଏନ୍ ପାବିତାର୍ ଆନାଚୁ କେ ବାଗି ତେୟାଃତେ, ଧାରାମ୍ ରାଃ ହୋରା କେ କାକୋ ସାରିଲେନ୍ତେୟାଃ ଏନାଗି ଇନ୍‍କୁ ଲାଗିନ୍ ବୁଗିନାଃ ତାଇକେନା। ଇନ୍‍କୁୱାଃ ରେ ନେ ଜୋନୋକା କାଜି ଠିକ୍ ଦୁବୋଃତାନା, “ସେତା ଆଜାଃ ଉଷାଡ଼୍ ଜାଲେ ନାଙ୍ଗ୍ ରୁଆଡ଼ାଏ ହାର୍ ଚାପିଉମେନ୍ କାନ୍ ଶୂକ୍ରୀ ଲସୋଃ ରେ ବାଟି ଲାଗିନ୍ ହାଡୋଃଗି ସେନୋଃ କୋୱାଏ।” ହେ ଦୁଲାଡ଼୍‍କୋ, ନାଆ ଇଙ୍ଗ୍ ଆପେକେ ନେ ଏଟାଃ ଚିଠି ଅଲ୍ ପେତାନିଙ୍ଗ୍, ଆଡୋଃ ବାରାନାଃ ରେ ମୋନେ ରିକା କେତେ ଆପେୟାଃ ଫାର୍ଚି ମୋନ୍ କେ ଏୟୋନ୍ ପେତାନିଙ୍ଗ୍। ଏନାତେ ଆପେ ଏନ୍ କାଜିକୋକେ ଅକନାଃ ପାବିତାର୍ ନାବୀ କୋ ସିଦା ଏତେ କାଜିକାଦାକୋ, ଆଡୋଃ ପ୍ରାଭୁ ହାର୍ ବାଞ୍ଚାଅନିଃ ରାଃ ଏନ୍ ଆନାଚୁ କେ ପାହୋମେପେ ଅକନାଃ ଆପେୟାଃ କୁଲାକାନ୍ ଚେଲା କୋୱାଃ ହୋରାତେ ଏମ୍ ଲେନ୍ ତାଇକେନା। ସିଦା ନେୟା ସାରିଲେପେ ଚି ଆଖ୍ରି ହୁଲାଙ୍ଗ୍ କୋରେ ଲାନ୍ଦା-ଆପ୍‍ମାନ୍ ହୋଡ଼ୋକୋ ହିଜୁଗାକୋ ଅକନ୍ କୋ ଆକୋୱାଃଗି ସାନାଙ୍ଗ୍ କୋରାଃ ଲେକାତେ ସେସେନାକୋ। ହାର୍ କାଜିୟାକୋ, “ଇନିଜାଃ ହିନିଜୁଃ ରାଃ କିରିୟା କାଜି କୋତାଃ ସେନୋଃ ଜାନା? ଚିୟାଃଚି ଅକହୁଲାଙ୍ଗ୍ ଏତେ ଆପୁ-ତାତାକୋ ଗୋଏଃ ଜାନାକୋ, ସବେନାଃ ଏନ୍ ହୁଲାଙ୍ଗ୍ ଏତେ ଏନ୍‍ଲେକାଗି ମେନାଃ ଚିଲ୍‍କା ସିର୍ଜାଅ ରାଃ ସୁରୁତେ ତାଇକେନା?” ଇନ୍‍କୁ ଦୋ ସାରି-ସାରିକେତେ ନେୟା ରିଡ଼ିଙ୍ଗ୍ ଜାନାକୋ ଚି ପାର୍ମେଶ୍ଵାର୍ ରାଃ ବାଚାନ୍ ରାଃ ହୋରାତେ ରିମିଲ୍‍ଦିଶୁମ୍ ମୁନୁଏତେ ବାଇକାନ୍ ମେନାଃ ଆଡୋଃ ଅତେ ଅଗି ଦାଆ ଏତେ ବାଇ ଅଡୋଙ୍ଗ୍ ଜାନା ହାର୍ ଅତେ ଦାଆ ଏତେ ଆଲାଗ୍ ଜାନା। ନେ ଦାଆ ରେଗି ଏନ୍ ସାମାୟ୍ ରାଃ ଅତେଦିଶୁମ୍ ଦାଆ ରେ ଡୁବିଃ କେତେ ନାଶ୍ ଜାନା। ମେନ୍ଦୋ ନାଆ ସାମାୟ୍ ରାଃ ରିମିଲ୍‍ଦିଶୁମ୍ ହାର୍ ଅତେ ଏନ୍ ବାଚାନ୍ ଲୋଃ ତେଗି ନେୟାମେନ୍ତେ ମାଣ୍ତାଅ କାନା, ଚି ଜୁଲୋଗା; ଆଡୋଃ ପାର୍ମେଶ୍ଵାର୍ କେ କାକୋ ବୋରୋଇତାନ୍ ନେ ହୋଡ଼ୋକୋୱାଃ ବିଚାର୍ ହାର୍ ନାଶ୍ ହୁଲାଙ୍ଗ୍ ସାନ୍ତେ ନେକାଗି ମାଣ୍ତାଅ କାନ୍ ତାଇନୋଗା। ହେ ଦୁଲାଡ଼୍‍କୋ, ନେ କାଜି ଆପେ ତେ ଆଲୋ ଉକୁ କାନୋଃଚା ଚି ପ୍ରାଭୁ ତାଃ ମୁଶିଙ୍ଗ୍ ହାଜାର୍ ଶିର୍ମା ଲେକା ହାର୍ ହାଜାର୍ ଶିର୍ମା ମୁଶିଙ୍ଗ୍ ଲେକା ମେନାଃ। ପ୍ରାଭୁ ଆଜାଃ କିରିୟା କାଜି ରାଃ ବିଷାୟ୍ ରେ କାଏ ଦେରିୟାଏ, ଜେଲେକା ଦେରି ମେନ୍ତେ ଚିମିନାଙ୍ଗ୍ ହୋଡ଼ୋକୋ ବୁଝାଅଃ ତାନାକୋ; ମାଗାର୍ ଆପେୟାଃ ବିଷାୟ୍ ରେ ସାହାତିଙ୍ଗ୍ ତାନାଏ, ଆଡୋଃ କାଏ ସାନାଙ୍ଗାଏ ଚି ଜେତାଏ ନାଶୋଃକାକୋ, ମେନ୍ଦୋ ନେୟା ଚି ସବେନ୍ କୋକେ ପାପ୍ କାମି ବାଗେ ରାଃ ସାମାୟ୍ ନାମୋଃକା। ମେନ୍ଦୋ ପ୍ରାଭୁ ଆଃ ହୁଲାଙ୍ଗ୍ କୁମ୍ଡ଼ୁ ଲେକା ହିଜୁଗା, ଏନ୍ ହୁଲାଙ୍ଗ୍ ରିମିଲ୍‍ଦିଶୁମ୍ ମାରାଙ୍ଗ୍ ଘାଡ଼୍‍ଘାଡ଼୍ଅ ଆୱାଜ୍ ତେ ଗେନା ଇଦିୟୋଃୱା, ଆଡୋଃ ରିମିଲ୍‍ଦିଶୁମ୍ ରେୟାଃ ଶିଙ୍ଗି, ଚାଣ୍ଡୁଃ, ଇପିଲ୍ କୋ ବେଶେ ଗି ଲୋଲୋ କେତେ ଗାଲାଅ କେନୋଗା ଆଡୋଃ ଅତେ ହାର୍ ଏନାରେ କାମିକାନ୍ତେୟାଃ ହୋଡ଼ୋକୋୱାଃ କାମି ରାଃ ବିଚାର୍ ରିକାଅଗା। ଯାବ୍ ଚି ନେ ସବେନ୍ ଜିନିଷ୍‍କୋ ନେଲେକା ଗାଲାଅ ରାଃ ମେନାଃ, ଦୋ ଆପେକେ ପାବିତାର୍ ତେ ସେସେନ୍ ଆଡୋଃ ପାର୍ମେଶ୍ଵାର୍ କେ ବୋରୋଇତାନ୍ ରାଃ ଜୀଦାନ୍ ରେ ଚିଲ୍‍କାନ୍ ହୋଡ଼ ହୋବାଅଃ ଚାହି, ଆଡୋଃ ପାର୍ମେଶ୍ଵାର୍ ରାଃ ଏନ୍ ହୁଲାଙ୍ଗ୍ ରାଃ ହୋରାକେ ଅକନ୍ ଲେକାତେ ନେଲ୍ ହୋରା କାତେ ଚାହି ହାର୍ ଇନିଜାଃ ସେକାଡ଼୍ ଗି ହିନିଜୁଃ ଲାଗିନ୍ ବୁଗିନାଃ କାମି ରିକା ଚାହି, ଏନ୍ ହୁଲାଙ୍ଗ୍ ପାର୍ମେଶ୍ଵାର୍ ରିମିଲ୍‍ଦିଶୁମ୍ କେ ସେଙ୍ଗେଲ୍ ତେ ଗାଲାଅ ତାଆଏ, ଆଡୋଃ ରିମିଲ୍‍ଦିଶୁମ୍ ରେୟାଃ ଶିଙ୍ଗି, ଚାଣ୍ଡୁଃ, ଇପିଲ୍ କୋକେ ଥିମ୍ବାଗି ଲୋଲୋ କେତେ ଗାଲାଅ ତାଆଏ। ମେନ୍ଦୋ ଇନିଜାଃ କିରିୟା କାଜି ରାଃ ଲେକାତେ ଆବୁ ମିୟାଃ ନାୱା ରିମିଲ୍‍ଦିଶୁମ୍ ଆଡୋଃ ନାୱା ଅତେ ରାଃ ଆଶ୍ରା ନେଲ୍ ତାନାବୁ ଅକନାଃ ରେ ଧାର୍ମୀ ହୋଡ଼ୋକୋ ତାଇନୋଗାକୋ। ଏନାମେନ୍ତେ, ହେ ଦୁଲାଡ଼୍‍କୋ, ଯାବ୍ ଚି ଆପେ ନେ କାଜି କୋରାଃ ଆଶ୍ରା ନେଲ୍ ତାନାପେ, ଏଣ୍ଡେ ବୁଗିନାଃ ରିକାଏପେ ଚି ଆପେ ଜୀଉସୁକୁ ଲୋଃ ଇନିଜାଃ ନାଡ଼େଏ ବେଦାଗ୍ ଆଡୋଃ ନିର୍ଦୋଷ୍ ହୋବାଅଃ ୱାପେ, ଆଡୋଃ ଆବୁୱାଃ ପ୍ରାଭୁ ରାଃ ସାହାତିଙ୍ଗ୍ ରାଃ ମାନେ ନେୟା ତାନାଃ ଚି ହୋଡ଼ୋକୋ ପାପ୍ କାମି ବାଗେ କେତେ ବାଞ୍ଚାଅ ନାମେ କାକୋ, ଜେଲେକା ଆବୁୱାଃ ଦୁଲାଡ଼୍ ହାଗା ପାଉଲୁସ୍ ହଗି ଏନ୍ ସେଣା ରାଃ ଲେକାତେ ଅକନାଃ ଇନିଃକେ ନାମ୍‍ଜାନା, ଆପେକେ ଅଲାକାଦାଏ। ଏନ୍‍ଲେକାଗି ଇନିଃ ଆଜାଃ ସବେନ୍ ଚିଠିକୋ ରେ ହଗି ନେ କାଜି କୋରାଃ ବିଷାୟ୍ ରେ କାଜିକାଦାଏ, ଏନାକୋଏତେ ଚିମିନାଙ୍ଗ୍ କାଜିକୋ ନେକା ମେନାଃ ଚି ଏନାକୋ ବୁଝାଅନ୍ କାଠିନ୍ ଗିୟା, ଆଡୋଃ କାଶିଖାଅ ପାଢ଼ାଅକାନ୍ ଆଡୋଃ ଉଲିଃଚୁଲିଃ ହୋଡ଼ୋକୋ ଏନାରାଃ ମାନେ କେ ହଗି ପାବିତାର୍ ପୁଥି କୋରେୟାଃ ଏଟାଃ କାଜିକୋ ଲେକା ଥାଇଃ ଜିଲିଙ୍ଗ୍ କେତେ ଆକୋୱାଃଗି ନାଶ୍ ରାଃ ହୋରା ବାଇତାନାକୋ। ଏନାମେନ୍ତେ ହେ ଦୁଲାଡ଼୍‍କୋ, ଆପେ ସିଦା ଏତେ ଗି ନେ କାଜିକୋକେ ସାରିକେତେ ହୁସିୟାର ତାଇନ୍‍ପେ, ଏନାତେ ଆଧାର୍ମୀ କୋୱାଃ ହିହିଡ଼୍ ରେ ପାଶେ କେତେ ଆପେୟାଃ ବାଇକାନ୍ କେ ଆଲୋଜାଃ ଚିପେ ଆଦେୟା। ମେନ୍ଦୋ ଆବୁୱାଃ ପ୍ରାଭୁ ଆଡୋଃ ବାଞ୍ଚାଅନିଃ ୟୀଶୁ ମାସୀହ୍ ରାଃ ଆନୁଗ୍ରାହ୍ ଆଡୋଃ ଉରୁମ୍ ରେ ମାରାଙ୍ଗ୍ ଇଦିଅଃପେ। ଇନିଜାଃ ଗି ମାନାରାଙ୍ଗ୍ ନାଆ ହଗି ହୋବାଅଃକା, ଆଡୋଃ ଜାନାଓ-ଜାନାଓ ଜାକେଦ୍ ହୋବାକାତୋଃକା। ଆମୀନ୍। ଏନ୍ ଜୀଦାନ୍ ରାଃ ବାଚାନ୍ ରାଃ ବିଷାୟ୍ ରେ ଅକନାଃ ମୁନୁ ଏତେ ତାଇନ୍ କେନା, ଅକନାଃକେ ଆଲେ ଆୟୁମ୍ କେଦାଲେ, ହାର୍ ଅକନାଃକେ ଆଲେ ମେଏଃ ତେ ନେଲ୍ କେଦାଲେ, ମେନ୍ଦୋ ଅକନାଃକେ ଆଲେ ଧ୍ୟାନ୍‍ତେ ନେଲ୍ କେଦାଲେ ଆଡୋଃ ତିଈ ତେ ଜୁଟିଃ କେଦାଲେ। ନେ ଜୀଦାନ୍ ନେଲ୍ ଜାନା, ହାର୍ ଆଲେ ଏନାକେ ନେଲ୍ କେଦାଲେ ଆଡୋଃ ଏନାରାଃ ଗୋୱା ଏମ୍ ତାନାଲେ, ହାର୍ ଆପେକେ ଏନ୍ ଜାନାଓ ଜୀଦାନ୍ ରାଃ ସାମାଚାର୍ ଉଦୁବ୍ ତାନାଲେ ଅକନାଃ ଆପୁ ଲୋଃ ତାଇକେନା ହାର୍ ଆଲେୟାଃ ରେ ନେଲ୍ ଜାନା। ଅକନାଃକେ ଆଲେ ନେଲ୍ କେଦାଲେ ହାର୍ ଆୟୁମ୍ କେଦାଲେ ଏନାରାଃ ସାମାଚାର୍ ଆପେ କେହ ଏମ୍ ତାନାଲେ, ଏନାମେନ୍ତେ ଚି ଆପେ ହ ଆଲେ ଲୋଃ ମିଃରେ ତାଇନୋଃପେ, ହାର୍ ଆବୁୱାଃ ନେ ମିଃରେ ତାଇନୋଃ ଆପୁ ଲୋଃ ହାର୍ ଇନିଜାଃ ହୋନ୍ ୟୀଶୁ ମାସୀହ୍ ଲୋଃ ମେନାଃ। ହାର୍ ନେ କାଜି ଆଲେ ନେୟାମେନ୍ତେ ଅଲ୍ ତାନାଲେ ଚି ଆବୁୱାଃ ରାଶିକା ପୁରାଅଃକା। ଅକନ୍ ସାମାଚାର୍ ଆଲେ ଆଜାଃତେ ଆୟୁମ୍ କେଦାଲେ, ଆଡୋଃ ଆପେକେ ଉଦୁବ୍ ତାନାଲେ, ଏନା ନେୟା ତାନାଃ ଚି ପାର୍ମେଶ୍ଵାର୍ ମାସ୍କାଲ୍ ତାନିଃ ଆଡୋଃ ଇନିଜାଃ ରେ କାଟିଜୋ ନୁବାଃ ବାନୋଃ। ଆଗାର୍ ଆବୁ କାଜିତାନାବୁ ଚି ଇନିଃ ଲୋଃ ଆବୁୱାଃ ମିଃରେ ତାଇନୋଃ ମେନାଃ ମେନ୍ଦୋ ଆଡୋଃଗି ନୁବାଃ ରେ ସେନ୍ ତାନାବୁ, ଏଣ୍ଡେ ଆବୁ ହିଡ଼୍ ତାନାବୁ, ହାର୍ ସାର୍ତି ରେ କାବୁ ସେସେନ୍ ତାନା; ମେନ୍ଦୋ ଆଗାର୍ ଚିଲ୍‍କା ଇନିଃ ମାସ୍କାଲ୍ ରେ ମେନିଜା, ଏନ୍‍ଲେକାଗି ଆବୁ ହ ମାସ୍କାଲ୍ ରେ ସେନ୍ ତାନାବୁ, ଏଣ୍ଡେ ମିହୋଡ଼୍ ଏଟାଃ ନିଈ ଲୋଃ ମିଃରେ ତାଇନୋଃ ତାନାବୁ, ହାର୍ ଇନିଜାଃ ହୋନ୍ ୟୀଶୁ ରାଃ ମାୟୋମ୍ ଆବୁକେ ସବେନ୍ ପାପ୍ କୋଏତେ ଫାର୍ଚି ବୁତାନାଏ। ଆଗାର୍ ଆବୁ କାଜିତାନାବୁ ଚି ଆବୁୱାଃ ରେ କାଟିଜୋ ପାପ୍ ବାନୋଃ, ଏଣ୍ଡେ ଆବୁ ଆପାନ୍ କେ ଲୋଗୋ ତାନାବୁ, ହାର୍ ଆବୁୱାଃ ରେ ସାର୍ତି ବାନୋଃ। ଆଗାର୍ ଆବୁ ଆବୁୱାଃ ପାପ୍ କୋକେ ମାନାତିଙ୍ଗ୍ କେୟାବୁ, ଏଣ୍ଡେ ଇନିଃ ଆବୁୱାଃ ପାପ୍ କୋକେ ଛାମା ରିକା, ହାର୍ ଆବୁକେ ସବେନ୍ ଆଧାର୍ମ୍ ତେ ଫାର୍ଚି ରିକାଏ ରେ ବିଶ୍ଵାସେ ଲେକାନିଃ ହାର୍ ଧାର୍ମୀ ତାନିଃ। ଆଗାର୍ ଆବୁ କାଜିତାନାବୁ ଚି ଆବୁ କାବୁ ପାପ୍ କାଦା, ଏଣ୍ଡେ ପାର୍ମେଶ୍ଵାର୍ କେ ଝୁଠା ବାଇତାନାବୁ, ହାର୍ ଇନିଜାଃ ବାଚାନ୍ ଆବୁୱାଃ ରେ ବାନୋଃ। ହେ ଇଙ୍ଗ୍ଆଃ ହୋନ୍‍କୋ, ଇଙ୍ଗ୍ ନେ କାଜି ଆପେକେ ନେୟା ଲାଗିନ୍ତେ ଅଲ୍ ତାନିଙ୍ଗ୍ ଚି ଆପେ ପାପ୍ ଆଲୋପେ ରିକାଏ, ହାର୍ ଅକଏ ଆଗାର୍ ପାପ୍ ୟାଏ, ଏଣ୍ଡେ ଆପୁ ପାର୍ମେଶ୍ଵାର୍ ତାଃ ଆବୁୱାଃ ମିହୋଡ଼୍ ଦେଙ୍ଗା ଏହେମ୍ ନିଃ ମେନାଇଜା, ମାନେ ଧାର୍ମୀ ୟୀଶୁ ମାସୀହ୍; ହାର୍ ଇନିଃଗି ଆବୁୱାଃ ପାପ୍ କୋରାଃ ହାଲ୍ ଫେରେଃ ନିଃ ତାନିଃ, ହାର୍ ଖାଲି ଆବୁୱାଃ ଭାଇର୍ କାହା, ମେନ୍ଦୋ ସବେନ୍ ଅତେଦିଶୁମ୍ ରାଃ ପାପ୍ କୋରାଃ ଲାଗିନ୍ ହ। ଆଗାର୍ ଆବୁ ଇନିଜାଃ ଆନାଚୁ କୋକେ ମାନାତିଙ୍ଗ୍ ୟାବୁ, ଏଣ୍ଡେ ଏନାତେ ଆବୁ ସାରିକେୟାବୁ ଚି ଆବୁ ଇନିଃକେ ସାରି କିଜାବୁ। ଅକଏ ନେୟା କାଜିୟାଏ, “ଇଙ୍ଗ୍ ଇନିଃକେ ସାରିତାଦିଙ୍ଗ୍,” ହାର୍ ଇନିଜାଃ କାଜିକୋକେ କାଏ ମାନାତିଙ୍ଗାଏ, ଇନିଃ ହିହିଡ଼୍‍ନିଃ ତାନିଃ ହାର୍ ଇନିଜାଃ ରେ ସାର୍ତି ବାନୋଃୱା। ମେନ୍ଦୋ ଅକଏ ଇନିଜାଃ ବାଚାନ୍ କେ ମାନାତିଙ୍ଗ୍ ୟାଏ, ଇନିଜାଃ ରେ ସାର୍ତିଗୀ ପାର୍ମେଶ୍ଵାର୍ ରାଃ ଦୁଲାଡ଼୍ ପୁରାଜାନା। ଆବୁ ନେୟାତେ ଗି ସାରିୟାବୁ, ଚି ଆବୁ ଇନିଃ ରେ ମେନାବୁୱା। ଅକଏ ନେୟା କାଜିୟାଏ ଚି ଇଙ୍ଗ୍ ଇନିଃରେ ବାଇ ତାଇନୋଃୱାଇଙ୍ଗ୍, ଇନିଃକେ ଲାଗାତିଙ୍ଗ୍ ମେନାଃ ଚି ଆଏଃ ହଗି ଏନ୍‍ଲେକାଗି ଜୀଦାନ୍ ସେନେନ୍ କାଏ ଜେଲେକା ମାସୀହ୍ ଜୀହିଦୋଃ ତାଇକେନାଏ। ହେ ଦୁଲାଡ଼୍‍କୋ, ଇଙ୍ଗ୍ ଆପେକେ ଜାହାନ୍ ନାୱା ଆନାଚୁ କାଇଙ୍ଗ୍ ଅଲ୍ ପେତାନା, ମେନ୍ଦୋ ଏନ୍ ମାରି ଆନାଚୁ ଗି ଅକନାଃ ମୁନୁଏତେ ଆପେକେ ନାମ୍ କାନା, ନେୟା ମାରି ଆନାଚୁ ଏନ୍ ବାଚାନ୍ ତାନାଃ ଅକନାଃ ଆପେ ଆୟୁମ୍ କାଦାପେ। ଏଣ୍ଡେୟ ଇଙ୍ଗ୍ ଆପେକେ ନାୱା ଆନାଚୁ ଅଲ୍ ତାନାଇଙ୍ଗ୍, ହାର୍ ନେୟା ଇନିଃରେ ହାର୍ତେ ଆପେୟାଃ ରେ ସାର୍ତି ହୋବାଅଃତାନା, ଚିୟାଃଚି ନୁବାଃ ଆତୋମୋଃ ତାନା ଆଡୋଃ ସାର୍ତି ରାଃ ମାସ୍କାଲ୍ ନାଆ ଚାମ୍‍କାଅଃ ତାନା। ଅକଏ ନେୟା କାଜିୟାଏ ଚି ଇଙ୍ଗ୍ ମାସ୍କାଲ୍ ରେ ମେନାଇଙ୍ଗ୍‍ୟା, ହାର୍ ଆଜାଃ ହାଗା ଲୋଃ ଖିସ୍ ମାଣ୍ଡାଅୟାଏ, ଇନିଃ ନାଆ ସାନ୍ତେ ନୁବାଃ ରେଗି ମେନାଇଜା। ଜେତାଏ ଆଜାଃ ହାଗାକୋକେ ଦୁଲାଡ଼୍ କୋୱାଏ ଇନିଃ ମାସ୍କାଲ୍ ରେ ତାଇନୋଃ ତାନାଏ, ହାର୍ ଥୋଦୋଃ ରାଃ ଜାହାନ୍ କାଜି ବାନୋଗା। ମେନ୍ଦୋ ଜେତାଏ ଆଜାଃ ହାଗା କେ ଖିସ୍ ମାଣ୍ଡାଅ ତାନାଏ ଇନିଃ ନୁବାଃ ରେ ମେନାଇଜା ହାର୍ ନୁବାଃ ରେ ସେସେନ୍ ତାନାଏ, ହାର୍ କାଏ ସାରିତାନାଏ ଚି କୋତାଃ ସେନ୍ ତାନାଏ, ଚିୟାଃଚି ନୁବାଃ ଇନିଜାଃ ମେଏଃ କେ ଆନ୍ଧା ବାଇକାଦାଏ। ହେ ହୋନ୍‍କୋ, ଇଙ୍ଗ୍ ଆପେକେ ନେୟାମେନ୍ତେ ଅଲ୍ ତାନାଇଙ୍ଗ୍ ଚି ୟୀଶୁ ମାସୀହ୍ ନୁତୁମ୍ ତେ ଆପେୟାଃ ପାପ୍ ଛାମା କାନା। ହେ ଆପୁକୋ, ଇଙ୍ଗ୍ ଆପେକେ ନେୟାମେନ୍ତେ ଅଲ୍ ତାନାଇଙ୍ଗ୍ ଚି ଅକଏ ମୁନୁ ଏତେଗି ମେନାଇଜା ଆପେ ଇନିଃକେ ସାରିୟାପେ। ହେ ଜାୱାନ୍‍କୋ, ଇଙ୍ଗ୍ ଆପେକେ ନେୟାମେନ୍ତେ ଅଲ୍ ତାନାଇଙ୍ଗ୍ ଚି ଆପେ ଏନ୍ ଦୁଷ୍ଟ ଶାଏତାନ୍ ତେ ଜିତାଅ କାନାପେ। ହେ କଡ଼ା ହୋନ୍‍କୋ, ଇଙ୍ଗ୍ ଆପେକେ ନେୟାମେନ୍ତେ ଅଲ୍ ତାନାଇଙ୍ଗ୍ ଚି ଆପେ ଆପୁ କେ ସାରିକାଇଜାପେ। ହେ ଆପୁକୋ, ଇଙ୍ଗ୍ ଆପେକେ ନେୟାମେନ୍ତେ ଅଲ୍ କାଦାଇଙ୍ଗ୍ ଚି ଅକଏ ମୁନୁ ଏତେ ମେନାଇଜା ଆପେ ଇନିଃକେ ସାରିକାଇଜାପେ। ହେ ଜାୱାନ୍‍କୋ, ଇଙ୍ଗ୍ ଆପେକେ ନେୟାମେନ୍ତେ ଅଲ୍ କାଦାଇଙ୍ଗ୍ ଚି ଆପେ ପେଡ଼େଜାନ୍ ତାନ୍‍ପେ, ହାର୍ ପାର୍ମେଶ୍ଵାର୍ ରାଃ ବାଚାନ୍ ଆପେୟାଃ ରେ ମେନାଃ ହାର୍ ଆପେ ଏନ୍ ଦୁଷ୍ଟ ଶାଏତାନ୍ ଚେତାନ୍ ରେ ଜିତାଅ କାନାପେ। ଆପେ ନାଦୋ ଅତେଦିଶୁମ୍ ତେ ହାର୍ ନା ଅତେଦିଶୁମ୍ ରେୟାଃ ଜିନିଷ୍ କୋକେ ଦୁଲାଡ଼୍ ଏପେ। ଆଗାର୍ ଜେତାଏ ଅତେଦିଶୁମ୍ ତେ ଦୁଲାଡ଼୍ ମାଣ୍ଡାଅୟାଏ ଏଣ୍ଡେ ଇନିଜାଃ ରେ ଆପୁ ପାର୍ମେଶ୍ଵାର୍ ରାଃ ଦୁଲାଡ଼୍ ବାନୋଃ। ଚିୟାଃଚି ଅକନାଃକୋ ଅତେଦିଶୁମ୍ ରେ ମେନାଃ, ମାନେ ହୋଡ଼ମୋ ରାଃ ସାନାଙ୍ଗ୍ ହାର୍ ମେଏଃ ରାଃ ସାନାଙ୍ଗ୍ ହାର୍ ଜୀଦାନ୍ ରାଃ ସାମା ମାନାରାଙ୍ଗ୍, ଏନା ଆପୁ ପାଡ଼େତେ ଦୋ ନାହାଲା ମେନ୍ଦୋ ଅତେଦିଶୁମ୍ ପାଡ଼େତେ ଗି ତାନାଃ। ଅତେଦିଶୁମ୍ ହାର୍ ଏନାରାଃ ସାନାଙ୍ଗ୍ କୋ ବାରାନାଃ ମେଟାଅ କେନୋଗା, ମେନ୍ଦୋ ଅକଏ ପାର୍ମେଶ୍ଵାର୍ ରାଃ ସାନାଙ୍ଗ୍ ରେ ସେସେନାଏ ଇନିଃ ଜାନାଓ ବାଇ ତାଇନୋଗାଏ। ହେ ହୋନ୍‍କୋ, ନେୟା ଆଖ୍ରୀ ସାମାୟ୍ ତାନାଃ; ହାର୍ ଜେଲେକା ଆପେ ଆୟୁମ୍ କାଦାପେ ଚି ମାସୀହ୍ ବିରୋଧୀ ହିଜୁଃ ରାଃ ମେନାଇଜା, ଏନାରାଃ ଲେକାତେ ନାଆ ହଗି ଥିମ୍ବାଗି ମାସୀହ୍ ବିରୋଧୀକୋ ବିରିଃ କାନାକୋ; ନେୟାତେ ଆବୁ ସାରିୟାବୁ ଚି ନେୟା ଆଖ୍ରୀ ସାମାୟ୍ ତାନାଃ। ଇନ୍‍କୁ ଦୋ ଆବୁତେଗି ଅଡୋଙ୍ଗ୍ କାନାକୋ, ମେନ୍ଦୋ ଆବୁ ଥାଲା ରେନ୍ କାକୋ ତାଇନ୍ କେନା, ଚିୟାଃଚି ଆଗାର୍ ଇନ୍‍କୁ ଆବୁୱାଃ ଥାଲା ରେନ୍ କୋ ତାଇନ୍‍ତେ, ଏଣ୍ଡେ ଦୋ ଆବୁଲୋଃ ତାଇନ୍ ଜାନ୍ତେ, ମେନ୍ଦୋ ନେୟାଲାଗିନ୍ତେ ଅଡୋଙ୍ଗ୍ ଜାନାକୋ ଚି ନେୟା ଉଦୁବୋଃକା ଚି ଇନ୍‍କୁ ସବେନ୍ ଆବୁ ଥାଲା ରେନ୍ କୋଏତେ ନାହାଲାକୋ। ମେନ୍ଦୋ ଆପେୟାଃ ଦୋ ଏନ୍ ପାବିତାର୍ ନିଃତେ ଆଭିଷେକ୍ ହୋବାକାନା ହାର୍ ଆପେ ସବେନାଃ ସାରି ତାନାପେ। ଇଙ୍ଗ୍ ଆପେକେ ନେୟାମେନ୍ତେ କାଇଙ୍ଗ୍ ଅଲାକାଦା ଚି ଆପେ ସାର୍ତି କେ କାପେ ସାରିତାନା, ମେନ୍ଦୋ ନେୟାମେନ୍ତେ ଚି ଏନାକେ ସାରି ତାନାପେ, ହାର୍ ଏନାମେନ୍ତେ ଚି ଜେତାନ୍ ଲୋଗୋ, ସାର୍ତି ଏତେ କାହିଜୁଗା। ଲୋଗୋନିଃ ଅକଏ ତାନିଃ? ଇନିଃଗି ଅକଏ ୟୀଶୁ କେ ମାସୀହ୍ ତାନିଃ ମେନ୍ତେ ମାନା ତାନାଏ; ହାର୍ ମାସୀହ୍ ବିରୋଧୀ ଇନିଃଗି ତାନିଃ, ଅକଏ ଆପୁ ପାର୍ମେଶ୍ଵାର୍ ହାର୍ ହୋନ୍ କେ ମାନା ତାନାଏ। ଅକଏ ହୋନ୍ କେ ମାନା ତାନାଏ ଇନିଜାଃ ନାଡ଼େଏ ରେ ଆପୁ ପାର୍ମେଶ୍ଵାର୍ ହ ବାଙ୍ଗୁଇଜା, ଅକଏ ହୋନ୍ କେ ମାନାତିଙ୍ଗ୍ କେତାନାଏ ଇନିଜାଃ ନାଡ଼େଏ ରେ ଆପୁ ପାର୍ମେଶ୍ଵାର୍ ହଗି ମେନାଇଜା। ଅକନାଃ ଆପେ ମୁନୁ ଏତେ ଆୟୁମ୍ କାଦାପେ, ଏନାଗି ଆପେ ରେ ବାଇକାନ୍ ତାଇନୋଃକା, ଅକନାଃ ଆପେ ମୁନୁ ଏତେ ଆୟୁମ୍ କାଦାପେ ଆଗାର୍ ଏନା ଆପେ ରେ ବାଇୟାକାନ୍ ତାଇନୋଗା ଦୋ ଆପେ ହଗି ହୋନ୍ ରେ ହାର୍ ଆପୁ ପାର୍ମେଶ୍ଵାର୍ ରେ ବାଇକାନ୍ ତାଇନୋଗାପେ। ହାର୍ ଅକନାଃ ଇନିଃ ଆବୁକେ କାଜିଏମ୍ କାଦାଏ ଏନା ଜାନାଓ ଜୀଦାନ୍ ତାନାଃ। ଇଙ୍ଗ୍ ନେ କାଜିକୋ ଆପେକେ ଇନ୍‍କୁୱାଃ ବିଷାୟ୍ ରେ ଅଲାକାଦିଙ୍ଗ୍, ଅକନ୍‍କୋ ଆପେକେ ଲୋଗୋ ସାନାଙ୍ଗ୍‍ପେ ତାନାକୋ; ମେନ୍ଦୋ ଆପେୟାଃ ଏନ୍ ଆଭିଷେକ୍ ଅକନାଃ ଇନିଜାଃ ପାଡ଼େତେ ହୋବାକାନା, ଆପେୟାଃ ରେ ବାଇୟାକାନ୍ ମେନାଃ, ହାର୍ ଆପେକେ ନେୟାରାଃ ଲାଗାତିଙ୍ଗ୍ ବାନୋଗା ଚି ଜେତାଏ ଆପେ କେ ଶିଖାଅ ପେୟାଏ, ମେନ୍ଦୋ ଜେଲେକା ଏନ୍ ଆଭିଷେକ୍ ଅକନାଃ ଇନିଜାଃ ପାଡ଼େତେ ହୋବାକାନା ଆପେକେ ସବେନ୍ କାଜିକୋ ଶିଖାଅପେ ତାନାଏ, ହାର୍ ନେୟା ସାର୍ତି ତାନାଃ ହାର୍ ଲୋଗୋ ନାହାଲା, ହାର୍ ଜେଲେକା ଇନିଃ ଆପେକେ ଶିଖାଅ କାଃପେୟାଏ ଏନ୍‍ଲେକାଗି ଆପେ ଇନିଜାଃ ରେ ବାଇୟାକାନ୍ ତାଇନୋଃପେ। ଏନାତେ ହେ ହୋନ୍‍କୋ, ଇନିଜାଃ ରେ ବାଇତାଇନୋଃପେ ଚିମ୍ତାଙ୍ଗ୍ ଇନିଃ ଉଦୁବୋଗାଏ ଏଣ୍ଡେ ଆବୁକେ ସାହାସ୍ ନାମୋଗା ହାର୍ ଆବୁ ଇନିଜାଃ ହିନିଜୁଃ ରେ ଇନିଜାଃ ନାଡ଼େଏ ରେ କାବୁ ଗିୟୁଗୋଗା। ଆଗାର୍ ଆପେ ସାରି ତାନାପେ, ଚି ଇନିଃ ଧାର୍ମୀ ତାନିଃ, ଏଣ୍ଡେ ନେୟା ହଗି ସାରି ତାନାପେ ଚି ଅକଏ ଧାରାମ୍ ରାଃ କାମି ରିକା ତାନାଏ ଇନିଃ ଇନିଜେତେଗି ଜାନାମ୍ କାନାଏ। ନେଲେପେ, ଆପୁ ଆବୁକେ ଚିଲ୍‍କା ଦୁଲାଡ଼୍ କେଃବୁଆଏ ଏନାତେ ଆବୁ ପାର୍ମେଶ୍ଵାର୍ ରାଃ ହୋନ୍‍କୋ କାଜିନାବୁ; ହାର୍ ଆବୁ ତାନ୍‍ବୁ। ମେନ୍ଦୋ ଅତେଦିଶୁମ୍ ରେନ୍ ହୋଡ଼ୋକୋ ଆବୁକେ କାକୋ ସାରିବୁତାନା, ଚିୟାଃଚି ଇନ୍‍କୁ ପାର୍ମେଶ୍ଵାର୍ କେହ କାକୋ ସାରିକିଜା। ହେ ଦୁଲାଡ଼୍ କୋ, ନାଆ ଆବୁ ପାର୍ମେଶ୍ଵାର୍ ରାଃ ହୋନ୍‍କୋ ତାନ୍‍ବୁ, ହାର୍ ନାଆ ସାନ୍ ନେୟା କା ସାରିକାନା ଚି ଆବୁ ଚିନାଃ ହୋବାଅଃୱାବୁ! ନିମିନ୍ ସାରିୟାଲେ ଚି ଚିମ୍ତା ଇନିଃ ନେଲୋଗାଏ ଏଣ୍ଡେ ଆବୁ ଇନିଜାଃ ଲେକା ହୋବାଅଃୱାବୁ, ଚିୟାଃଚି ଇନିଃକେ ଏନ୍‍ଲେକାଗି ନେଲିୟାବୁ ଜେଲେକା ଇନିଃ ମେନାଇଜା। ହାର୍ ଅକଏ ମାସୀହ୍ ରେ ନେୟା ଆଶ୍ରା ମାଣ୍ଡାଅୟାଏ, ଇନିଃ ଆଏଃ ଆପାନ୍ କେ ଏନ୍‍ଲେକାଗି ପାବିତାର୍ ରିକାୟାଏ ଜେଲେକା ଇନିଃ ପାବିତାର୍ ତାନିଃ। ଜାହାଁଏଗି ପାପ୍ ରିକା ତାନାଏ, ଇନିଃ ପାର୍ମେଶ୍ଵାର୍ ରାଃ ଆଇନ୍ ରାଃ ବିରୋଧ୍ ତାନାଏ, ହାର୍ ପାପ୍ ଦୋ ଆଇନ୍ ରାଃ ବିରୋଧ୍ ତାନାଃ। ଆପେ ସାରିୟାପେ ଚି ଇନିଃ ନେୟାଲାଗିନ୍ତେ ନେଲ୍ ଜାନାଏ ଚି ପାପ୍ କୋକେ ଇଦି କେୟାଏ, ହାର୍ ଇନିଃ କାଏ ପାପ୍ ୟାଏ। ଜାହାଁଏଗି ଇନିଃ ରେ ବାଇକେତେ ତାଇନୋଗାଏ; ଇନିଃ ପାପ୍ କାଏ ରିକାକାତେୟାଏ; ଅକଏ ପାପ୍ ରିକାକାତେୟାଏ, ଇନିଃ ନାଦୋ ଇନିଃକେ ନେଲ୍ କାଇଯାଏ ହାର୍ ନା ଇନିଃକେ ସାରିକାଇଜାଏ। ହେ ହୋନ୍‍କୋ, ଜେତାୟାଃ ହିହିଡ଼୍ ରେ ଆଲୋପେ ହିଡ଼ୋଗା। ଜେତାଏ ଧାରାମ୍ ରାଃ କାମି ରିକାୟାଏ, ଇନିଃ ଇନିଜାଃ ଲେକା ଧାର୍ମୀ ତାନିଃ। ଜାହାଁଏଗି ପାପ୍ ରିକାୟାଏ ଇନିଃ ଶାଏତାନ୍ ପାଡ଼େତେ ତାନିଃ, ଶାଏତାନ୍ ସୁରୁଏତେ ଗି ପାପ୍ ତୋରା ହିଜୁଃ ତାନାଏ। ପାର୍ମେଶ୍ଵାର୍ ରାଃ ହୋନ୍ ଏନାଲାଗିନ୍ତେ ନେଲ୍ ଜାନାଏ ଚି ଶାଏତାନ୍ ରାଃ କାମି କୋକେ ନାଷ୍ଟ୍ ରିକାୟାଏ। ଜାହାଁଏଗି ପାର୍ମେଶ୍ଵାର୍ ଏତେ ଜାନାମ୍ କାନାଏ, ଇନିଃ ପାପ୍ କାଏ ରିକାକାତେୟାଏ; ଚିୟାଃଚି ଇନିଜାଃ ରେ ପାର୍ମେଶ୍ଵାର୍ ରାଃ ଚାରିତାର୍ ଇନିଃ ରେ ବାଇକେତେ ତାଇନା; ହାର୍ ଇନିଃ ପାପ୍ ରିକାଗୀ କାଏ ଧାଡ଼ିୟାଏ, ଚିୟାଃଚି ପାର୍ମେଶ୍ଵାର୍ ଏତେ ଜାନାମ୍ କାନାଏ। ନେୟା ତେଗି ପାର୍ମେଶ୍ଵାର୍ ରାଃ ସାନ୍ତାନ୍ ହାର୍ ଶାଏତାନ୍ ରାଃ ସାନ୍ତାନ୍ ସାରିଃୱାକୋ, ଜାହାଁଏଗି ଧାରାମ୍ ରାଃ କାମି କାଏ ରିକାୟାଏ ଇନିଃ ପାର୍ମେଶ୍ଵାର୍ ଏତେ ନାହାଲାଏ, ହାର୍ ନା ଇନିଃ ଅକଏ ଆଜାଃ ହାଗା କେ କାଏ ଦୁଲାଡ଼୍ ତାନାଏ। ଚିୟାଃଚି ଅକନ୍ ସାମାଚାର୍ ଆପେ ସୁରୁଏତେ ଆୟୁମ୍ କାଦାପେ, ଏନା ନେୟା ତାନାଃ ଚି ଆବୁ ମିହୋଡ଼୍ ଏଟାଃ ନିଈତେ ଦୁଲାଡ଼୍ ମାଣ୍ଡାଅ କାବୁ। ହାର୍ ଆଦାମ୍ ରାଃ ହୋନ୍‍କଡ଼ା କୈନ୍ ଲେକା ଆଲୋପେ ବାଇୟୋଃ ଅକନିଃ ଏନ୍ ଦୁଷ୍ଟ ଶାଏତାନ୍ ଏତେ ତାଇକେନାଏ, ହାର୍ ଅକନିଃ ଆଜାଃ ହାଗା କେ ଗୋଏଃ କିଜାଏ। ହାର୍ ଇନିଃକେ ଚିନାଃ ମେନ୍ତେ ଗୋଏଃ କିଜାଏ? ଏନାଲାଗିନ୍ତେ ଚି ଇନିଜାଃ କାମିକୋ ଖାରାପ୍ ତାଇକେନା, ହାର୍ ଇନିଜାଃ ହାଗା ରାଃ କାମି ଧାରାମ୍ ରାଃ ତାଇକେନା। ହେ ହାଗାକୋ, ଆଗାର୍ ଅତେଦିଶୁମ୍ ରେନ୍ ହୋଡ଼ୋକୋ ଆପେକେ ଖିସ୍ ପେୟାକୋ ଏଣ୍ଡେ ଆଲୋପେ ଆକ୍‍ଦାନ୍ଦାଅଃୱା। ଆବୁ ସାରିୟାବୁ ଚି ଆବୁ ଗୋନୋଏଃ ତେ ଫାରୋମ୍ କେତେ ଜୀଦାନ୍ ରେ ସେଟେର୍ କାନାବୁ; ଚିୟାଃଚି ଆବୁ ହାଗା କୋଲୋଃ ଦୁଲାଡ଼୍ ମାଣ୍ଡାଅୟାବୁ। ଅକଏ ଦୁଲାଡ଼୍ କାଏ ମାଣ୍ଡାଅୟାଏ ଇନିଃ ଗୋଜାକାନ୍ ଲେକା ତାଇନୋଗାଏ। ଅକଏ ଆଜାଃ ହାଗା କେ ଖିସ୍ ମାଣ୍ଡାଅୟାଏ, ଇନିଃ ଗୋଗୋଏଃନିଃ ତାନିଃ, ଆଡୋଃ ଆପେ ସାରିୟାପେ ଚି ଜେତାଏ ଗୋଗୋଏଃନିଃ ତାଃରେ ଜାନାଓ ଜୀଦାନ୍ କାତାହିନା। ଆବୁ ଦୁଲାଡ଼୍ ନେୟାତେଗି ସାରିକେଦାବୁ, ଚି ୟୀଶୁ ମାସୀହ୍ ଆବୁଲାଗିନ୍ ଆଜାଃ ଜୀଉ ଏମ୍‍କେଦାଏ; ହାର୍ ଆବୁ କେହ ହାଗାକୋ ନାଙ୍ଗ୍ ଜୀଉ ଏମ୍ ଚାହି। ମାଗାର୍ ଅକେୟାଃ ତାଃ ଅତେଦିଶୁମ୍ ରାଃ ସାମ୍ପାତିକୋ ମେନାଃ ହାର୍ ଇନିଃ ଆଜାଃ ହାଗା କେ ରେଙ୍ଗେଃ ନେଲ୍‍କେତେ ଇନିଜାଃ ଚେତାନ୍ ରେ କାଏ ଲିବୁଇ ତାନା, ଏଣ୍ଡେ ଇନିଜାଃ ରେ ପାର୍ମେଶ୍ଵାର୍ ରାଃ ଦୁଲାଡ଼୍ ଚିଲ୍‍କା ବାଇତାଇନ୍ ଧାଡ଼ିୟୋଃୱା? ହେ ହୋନ୍‍କୋ, ଆବୁ କାଜି ହାର୍ ମୋଚା ତେ ଭାଇର୍ କାହା, ମେନ୍ଦୋ କାମି ହାର୍ ସାର୍ତି ଲୋଃତେ ଦୁଲାଡ଼୍ ମାଣ୍ଡାଅ କାବୁ। ନେୟା ତେଗି ଆବୁ ସାରିୟାବୁ ଚି ଆବୁ ସାର୍ତି ରାଃ ତାନ୍‍ବୁ; ଆଡୋଃ ଅକନ୍ କାଜି ରେ ଆବୁୱାଃ ମୋନ୍ ଆବୁକେ ଦୋଷୀ ୟାଏ, ଏନା ବିଷାୟ୍ ରେ ଆବୁ ଇନିଜାଃ ନାଡ଼େଏ ରେ ଆବୁୱାଃ-ଆବୁୱାଃ ମୋନ୍ କେ କେଟେଃ ଧାଡ଼ିୟାବୁ; ଚିୟାଃଚି ପାର୍ମେଶ୍ଵାର୍ ଆବୁୱାଃ ମୋନ୍ ତେହଗି ମାରାଙ୍ଗ୍ ତାନିଃ, ହାର୍ ସବେନାଃ ସାରିୟାଏ। ହେ ଦୁଲାଡ଼୍ କୋ, ଆଗାର୍ ଆବୁୱାଃ ମୋନ୍ ଆବୁକେ କାଏ ଦୋଷ୍ ଏମ୍ ତାନାଏ, ଏଣ୍ଡେ ଆବୁକେ ପାର୍ମେଶ୍ଵାର୍ ରାଃ ନାଡ଼େଏ ରେ ସାହାସ୍ ହୋବାୱା; ହାର୍ ଅକନାଃକୋ ଆବୁ ଆସିତାନାବୁ, ଏନା ଆବୁକେ ଇନିଃ ତାଃତେ ନାମୋଃତାନା, ଚିୟାଃଚି ଆବୁ ଇନିଜାଃ ଆନାଚୁ କୋକେ ମାନାତିଙ୍ଗ୍ ତାନାବୁ ହାର୍ ଅକନାଃ ପାର୍ମେଶ୍ଵାର୍ କେ ବେଶ୍ ସାନାଙ୍ଗ୍ଇ ତାନା ଏନାକୋଗି ରିକାତାନାବୁ। ଇନିଜାଃ ଆନାଚୁ ନେୟା ତାନାଃ ଚି ଆବୁ ଇନିଜାଃ ହୋନ୍ ୟୀଶୁ ମାସୀହ୍ ରାଃ ନୁତୁମ୍ ରେ ବିଶ୍ଵାସ୍ ଦହୟାବୁ, ହାର୍ ଜେଲେକା ଇନିଃ ଆବୁକେ ଆନାଚୁ ଏମାକାଦାଏ ଏନ୍‍ଲେକାଗି ଆବୁ ଥାଲା କୋରେ ଦୁଲାଡ଼୍ ମାଣ୍ଡାଅୟାବୁ। ଅକଏ ଇନିଜାଃ ଆନାଚୁ କେ ମାନାତିଙ୍ଗ୍ ତାନାଏ, ଇନିଃ ପାର୍ମେଶ୍ଵାର୍ ରେ, ହାର୍ ପାର୍ମେଶ୍ଵାର୍ ଇନିଜାଃ ରେ ବାଇ ତାଇନୋଃୱାଏ; ହାର୍ ଏନାତେଗୀ, ମାନେ ଏନ୍ ପାବିତାର୍ ଆତ୍ମା ତେ ଅକନିଃ କେ ଇନିଃ ଆବୁକେ ଏମାକାଃବୁୱାଏ, ଆବୁ ସାରିୟାବୁ ଚି ଇନିଃ ଆବୁୱାଃ ରେ ବାଇତାଇନୋଃ ତାନାଏ। ହେ ଦୁଲାଡ଼୍ କୋ, ସବେନ୍ ଆତ୍ମା କେ ଆଲୋପେ ପାତିୟା; ମେନ୍ଦୋ ଆତ୍ମା କୋକେ ସାରିଉରୁମ୍ କୋପେ ଚି ଇନ୍‍କୁ ପାର୍ମେଶ୍ଵାର୍ ପାଡ଼େତେ ତାନ୍‍କୋ ଚି କାହା: ଚିୟାଃଚି ଥିମ୍ବାଗି ହିହିଡ଼୍ ନାବୀ କୋ ଅତେଦିଶୁମ୍ ରେ ଅଡୋଙ୍ଗ୍ କାନାକୋ। ପାର୍ମେଶ୍ଵାର୍ ରାଃ ଆତ୍ମା ଆପେ ନେଲେକାତେ ନେଲ୍ଉରୁମ୍ ଧାଡ଼ିୟାପେ; ଅକନ୍ ଆତ୍ମା ମାନାତିଙ୍ଗ୍ କେୟାଏ ଚି ୟୀଶୁ ମାସୀହ୍ ହୋଡ଼ମୋ ରେ ହୋବା କେତେ ହିଜୁଃ କାନାଏ ଇନିଃ ପାର୍ମେଶ୍ଵାର୍ ପାଡ଼େତେ ତାନିଃ। ହାର୍ ଅକନ୍ ଆତ୍ମା ୟୀଶୁ କେ କାଏ ମାନାତିଙ୍ଗ୍ ତାନାଏ, ଇନିଃ ପାର୍ମେଶ୍ଵାର୍ ପାଡ଼େତେ ନାହାଲି; ହାର୍ ଇନିଃଗି ମାସୀହ୍ ବିରୋଧୀ ରାଃ ଆତ୍ମା ତାନିଃ, ଅକନାଃ ବିଷାୟ୍ ରେ ଆପେ ଆୟୁମ୍ ଛାବା କାଦାପେ ଚି ଇନିଃ ହିଜୁଃ ରାଃ ମେନାଇଜା, ହାର୍ ନାଆ ଅଗି ଅତେଦିଶୁମ୍ ରେ ମେନାଇଜା। ହେ ହୋନ୍‍କୋ, ଆପେ ପାର୍ମେଶ୍ଵାର୍ ରାଃ ତାନ୍‍ପେ, ହାର୍ ଆପେ ଇନ୍‍କୁୱାଃ ଚେତାନ୍ ରେ ଜିତାଅ କାନାପେ; ଚିୟାଃଚି ଅକଏ ଆପେୟାଃ ରେ ମେନାଇଜା ଇନିଃ ହିନିଜେତେ ମାରାଙ୍ଗ୍ ତାନିଃ ଅକଏ ଅତେଦିଶୁମ୍ ରେ ମେନାଇଜା। ଇନ୍‍କୁ ଅତେଦିଶୁମ୍ ରେନ୍ ତାନ୍‍କୋ, ଏନାମେନ୍ତେ ଇନ୍‍କୁ ଅତେଦିଶୁମ୍ ରାଃ କାଜିକୋ କାଜିୟା, ହାର୍ ଅତେଦିଶୁମ୍ ରେନ୍ ହୋଡ଼ୋକୋ ଇନ୍‍କୁୱାଃ ଆୟୁମେୟାକୋ। ଆବୁ ପାର୍ମେଶ୍ଵାର୍ ରାଃ ତାନ୍‍ବୁ। ଅକଏ ପାର୍ମେଶ୍ଵାର୍ କେ ସାରିୟାଏ, ଇନିଃ ଆବୁୱାଃ ଆୟୁମେୟାଏ; ଅକଏ ପାର୍ମେଶ୍ଵାର୍ କେ କାଏ ସାରିୟାଏ ଇନିଃ ଆବୁୱାଃ କାଏ ଆୟୁମେୟାଏ। ନେଲେକା ଆବୁ ସାର୍ତି ରାଃ ଆତ୍ମା ହାର୍ ହିହିଡ଼୍ ରାଃ ଆତ୍ମା କେ ନେଲ୍ଉରୁମ୍ ଧାଡ଼ିୟାବୁ। ହେ ଦୁଲାଡ଼୍‍କୋ, ଆବୁ ଆବୁୱାଃ ଥାଲା ରେ ଦୁଲାଡ଼୍‍ବୁ ମାଣ୍ତାଅକା; ଚିୟାଃଚି ଦୁଲାଡ଼୍ ପାର୍ମେଶ୍ଵାର୍ ଏତେ ତାନାଃ। ଅକଏ ଦୁଲାଡ଼େୟାଏ ଇନିଃ ପାର୍ମେଶ୍ଵାର୍ ଏତେ ଜାନାମ୍ କାନାଏ ହାର୍ ପାର୍ମେଶ୍ଵାର୍ କେ ସାରିୟାଏ। ଅକଏ କାଏ ଦୁଲାଡ଼େୟାଏ ଇନିଃ ପାର୍ମେଶ୍ଵାର୍ କେ କାଏ ସାରିୟାଏ, ଚିୟାଃଚି ପାର୍ମେଶ୍ଵାର୍ ଦୁଲାଡ଼୍ ତାନିଃ। ଅକନ୍ ଦୁଲାଡ଼୍ ପାର୍ମେଶ୍ଵାର୍ ଆବୁ ଲୋଃ ମାଣ୍ତାଅ ତାନାଏ, ଏନା ନେୟାତେ ଉଦୁବ୍ ଜାନା ଚି ପାର୍ମେଶ୍ଵାର୍ ଆଜାଃ ମିୟାଃଗି ହୋନ୍‍କଡ଼ା କେ ଅତେଦିଶୁମ୍ ରେ କୁଲ‍୍‍କିଜାଏ ଏନାତେ ଆବୁ ଇନିଜାଃ ହୋରାତେ ଜୀଦାନ୍ ନାମେୟାବୁ। ଦୁଲାଡ଼୍ ନେୟାତେ ନାହାଲା ଚି ଆବୁ ପାର୍ମେଶ୍ଵାର୍ କେ ଦୁଲାଡ଼୍ କିଜାବୁ, ମେନ୍ଦୋ ନେୟା ରେ ମେନାଃ, ଚି ଇନିଃ ଆବୁକେ ଦୁଲାଡ଼୍ କେଃବୁୱାଏ ହାର୍ ଆବୁୱାଃ ପାପ୍ କୋରାଃ ହାଲ୍ ଫେରେଃ ଲାଗିନ୍ତେ ଆଜାଃ ହୋନ୍ କେ କୁଲ‍୍‍କିଜାଏ। ହେ ଦୁଲାଡ଼୍‍କୋ, ଚିମ୍ତାଙ୍ଗ୍ ପାର୍ମେଶ୍ଵାର୍ ଆବୁକେ ନେଲେକା ଦୁଲାଡ଼୍ କେଦାଏ, ଏଣ୍ଡେ ଆବୁକେ ହଗି ଆବୁ ଥାଲା ରେ ଦୁଲାଡ଼୍ ମାଣ୍ତାଅ ଲାଗାତିଙ୍ଗ୍ ମେନାଃ। ପାର୍ମେଶ୍ଵାର୍ କେ ଜେତାଏ ଚିଉଲା ହ କାଏ ନେଲ୍ କାଇଜା: ଆଗାର୍ ଆବୁ ଆବୁୱାଃ ଥାଲା ରେ ଦୁଲାଡ଼୍ ମାଣ୍ତାଅୟାବୁ, ଏଣ୍ଡେ ପାର୍ମେଶ୍ଵାର୍ ଆବୁୱାଃ ରେ ବାଇ ତାଇନୋଗାଏ ହାର୍ ଇନିଜାଃ ଦୁଲାଡ଼୍ ଆବୁୱାଃ ରେ ପୁରା ହୋବାଜାନା। ନେୟାତେଗି ଆବୁ ସାରିୟାବୁ, ଚି ଆବୁ ଇନିଃ ରେ ବାଇ ତାଇନାବୁ, ହାର୍ ଇନିଃ ଆବୁରେ, ଚିୟାଃଚି ଇନିଃ ଆଜାଃ ପାବିତାର୍ ଆତ୍ମା ଏତେ ଆବୁକେ ଏମାକାଃବୁୱାଏ। ଆବୁ ନେଲ୍ ଛାବା କାଦାବୁ ହାର୍ ଗୋୱା ଏମ୍ ତାନାବୁ ଚି ଆପୁ ହୋନ୍‍କଡ଼ା କେ ଅତେଦିଶୁମ୍ ରାଃ ବାଞ୍ଚାଅନିଃ ବାଇକେତେ କୁଲ୍ କିଜାଏ। ଅକଏ ହଗି ନେୟା ମାନାତିଙ୍ଗ୍ କେୟାଏ ଚି ୟୀଶୁ ପାର୍ମେଶ୍ଵାର୍ ରାଃ ହୋନ୍ ତାନିଃ, ପାର୍ମେଶ୍ଵାର୍ ଇନିଃ ରେ ବାଇ ତାଇନୋଗାଏ ହାର୍ ଇନିଃ ପାର୍ମେଶ୍ଵାର୍ ରେ। ଅକନ୍ ଦୁଲାଡ଼୍ ପାର୍ମେଶ୍ଵାର୍ ଆବୁ ଲୋଃ ମାଣ୍ତାଅୟାଏ, ଏନାକେ ଆବୁ ସାରିକେଦାବୁ ହାର୍ ଆବୁକେ ଇନିଜାଃ ରେ ବିଶ୍ଵାସ୍ ମେନାଃ। ପାର୍ମେଶ୍ଵାର୍ ଦୁଲାଡ଼୍ ତାନିଃ, ହାର୍ ଅକଏ ଦୁଲାଡ଼୍ ରେ ବାଇ ତାଇନୋଗାଏ ଇନିଃ ପାର୍ମେଶ୍ଵାର୍ ରେ ବାଇ ତାଇନୋଗାଏ, ହାର୍ ପାର୍ମେଶ୍ଵାର୍ ଇନ୍‍କୁ ରେ ବାଇ ତାଇନୋଗାଏ। ନେୟାଏତେ ଗି ଦୁଲାଡ଼୍ ଆବୁୱାଃ ରେ ପୁରା ଜାନା ଚି ଆବୁକେ ବିଚାର୍ ହୁଲାଙ୍ଗ୍ ରେ ସାହାସ୍ ହୋବାଅଃକା; ଚିୟାଃଚି ଜେଲେକା ଇନିଃ ମେନାଇଜା ଏନ୍‍ଲେକାଗି ଅତେଦିଶୁମ୍ ରେ ଆବୁ ହଗି ମେନାବୁୱା। ଦୁଲାଡ଼୍ ରେ ବୋରୋ ବାନୋଗା, ମେନ୍ଦୋ ସାର୍ତି ଦୁଲାଡ଼୍ ବୋରୋ କେ ସାଙ୍ଗିନ୍ ତାଆଏ; ଚିୟାଃଚି ବୋରୋ ଦାଣ୍ଡ୍ ନାମେ ଲାଗିନ୍ତେ ତାଇନା, ହାର୍ ଅକଏ ବୋରୋୟାଏ ଇନିଃ ସାର୍ତି ଦୁଲାଡ଼୍ ରେ ବାଙ୍ଗୁଇଜା। ଆବୁ ନେୟାମେନ୍ତେ ଦୁଲାଡ଼୍ ତାନାବୁ, ଚି ସିଦା ଇନିଃ ଆବୁ ଲୋଃ ଦୁଲାଡ଼୍ କେଦାଏ। ଆଗାର୍ ଜେତାଏ କାଜିୟାଏ, “ଇଙ୍ଗ୍ ପାର୍ମେଶ୍ଵାର୍ ଲୋଃ ଦୁଲାଡ଼୍ ମାଣ୍ତାଅ ତାନାଇଙ୍ଗ୍,” ମେନ୍ଦୋ ଆଜାଃ ହାଗା କେ ଖିସ୍ ମାଣ୍ତାଅୟାଏ ଏଣ୍ଡେ ଇନିଃ ଲୋଗୋନିଃ ତାନିଃ; ଚିୟାଃଚି ଅକଏ ଆଜାଃ ହାଗା କେ ଅକନିଃକେ ଇନିଃ ନେଲ୍ କାଇଜାଏ ଦୁଲାଡ଼୍ କାଏ ମାଣ୍ତାଅ ତାନାଏ, ଏଣ୍ଡେ ଇନିଃ ପାର୍ମେଶ୍ଵାର୍ କେ ହଗି ଅକନିଃକେ ଇନିଃ କାଏ ନେଲ୍ କାଇଜାଏ, ଦୁଲାଡ଼୍ କାଏ ମାଣ୍ତାଅ ଧାଡ଼ିୟାଏ। ହାର୍ ଇନିଃତେ ଆବୁକେ ନେୟା ଆନାଚୁ ନାମ୍ କାନା, ଚି ଜାହାଁଏ ହ ପାର୍ମେଶ୍ଵାର୍ ଲୋଃ ଦୁଲାଡ଼୍ ମାଣ୍ତାଅୟାଏ ଇନିଃ ଆଜାଃ ହାଗା ଲୋଃ ହଗି ଦୁଲାଡ଼୍ ମାଣ୍ତାଅକାଏ। ଅକେୟାଃ ନେୟା ବିଶ୍ଵାସ୍ ମେନାଃ ଚି ୟୀଶୁ ଗି ମାସୀହ୍ ତାନିଃ, ଇନିଃ ପାର୍ମେଶ୍ଵାର୍ ଏତେ ଜାନାମ୍ କାନାଏ; ହାର୍ ଜାହାଁଏଗି ପାର୍ମେଶ୍ଵାର୍ ଆପୁ ଲୋଃ ଦୁଲାଡ଼୍ ମାଣ୍ଡାଅୟାଏ, ଇନିଃ ହିନ୍‍କୁ କେ ହଗି ଦୁଲାଡ଼୍ ମାଣ୍ତାଅୟାଏ ଅକନ୍ ହୋନ୍‍କୋ ପାର୍ମେଶ୍ଵାର୍ ଏତେ ଜାନାମ୍ କାନାକୋ। ଚିମ୍ତାଙ୍ଗ୍ ଆବୁ ପାର୍ମେଶ୍ଵାର୍ କେ ଦୁଲାଡ଼୍ ମାଣ୍ଡାଅୟାବୁ, ହାର୍ ଇନିଜାଃ ଆନାଚୁ କୋକେ ମାନାତିଙ୍ଗ୍ ତାନାବୁ, ଏଣ୍ଡେ ନେୟା ଏତେଗି ଆବୁ ସାରିଧାଡ଼ିୟାବୁ ଚି ଆବୁ ପାର୍ମେଶ୍ଵାର୍ ରାଃ ହୋନ୍‍କୋକେ ଦୁଲାଡ଼୍ କୋତାନାବୁ। ଚିୟାଃଚି ପାର୍ମେଶ୍ଵାର୍ ଲୋଃ ଦୁଲାଡ଼୍ ମାଣ୍ତାଅ ନେୟା ତାନାଃ ଚି ଆବୁ ଇନିଜାଃ ଆନାଚୁ କୋକେ ମାନାତିଙ୍ଗ୍ ୟାବୁ; ହାର୍ ଇନିଜାଃ ଆନାଚୁକୋ ହାମ୍ବାଲ୍ ବାନୋଗା। ଚିୟାଃଚି ଅକଏ ହଗି ପାର୍ମେଶ୍ଵାର୍ ତେ ଜାନାମ୍ କାନାଏ, ଇନିଃ ଅତେଦିଶୁମ୍ ରେ ଜିତାଅ ଧାଡ଼ିୟାଏ, ହାର୍ ଏନ୍ ଜିତାଅ ଅକନାଃ ଅତେଦିଶୁମ୍ ରେ ଜିତାଅଃ ଧାଡ଼ିୟୋଃୱା ଏନା ଆବୁୱାଃ ବିଶ୍ୱାସ୍ ତାନାଃ। ଅତେଦିଶୁମ୍ ରେ ଜିତାଅ ଧାଡ଼ିନିଃ ଅକଏ ତାନିଃ? ଖାଲି ଇନିଃ ଅକେୟାଃ ନେୟା ବିଶ୍ଵାସ୍ ମେନାଃ ଚି ୟୀଶୁ, ପାର୍ମେଶ୍ଵାର୍ ରାଃ ହୋନ୍ ତାନିଃ। ନିଈଗି ତାନିଃ ଅକନିଃ ଦାଆ ହାର୍ ମାୟୋମ୍ ରାଃ ହୋରାତେ ହିଜୁଃ ଲେନାଏ, ମାନେ ୟୀଶୁ ମାସୀହ୍: ଇନିଃ ଖାଲି ଦାଆ ରାଃ ହୋରାତେ କାହା ମେନ୍ଦୋ ଦାଆ ହାର୍ ମାୟୋମ୍ ବାରାନାଃ ହୋରାତେ ହିଜୁଃଲେନାଏ। ହାର୍ ଅକଏ ଗୋୱା ଏମ୍ ତାନାଏ, ଇନିଃ ପାବିତାର୍ ଆତ୍ମା ତାନିଃ, ଚିୟାଃଚି ଆତ୍ମା ସାର୍ତି ତାନିଃ। ଗୋୱା ଏହେମ୍‍କୋ ଦୋ ଆପିୟା ତାନ୍‍କୋ ଆତ୍ମା ହାର୍ ଦାଆ ହାର୍ ମାୟୋମ୍ ହାର୍ ଆପିୟାକୋ ମିୟାଃ ବାକାଣ୍ ରେଗି ରାଜି ମେନାକୋୱା। ଚିମ୍ତାଙ୍ଗ୍ ଆବୁ ହୋଡ଼ୋକୋୱାଃ ଗୋୱା କୋକେ ମାନାତିଙ୍ଗ୍ କେତାନାବୁ, ଦୋ ପାର୍ମେଶ୍ଵାର୍ ରାଃ ଗୋୱା ଦୋ ଏନାତେହ ମାରାଙ୍ଗ୍ ତାନାଃ; ହାର୍ ପାର୍ମେଶ୍ଵାର୍ ରାଃ ଗୋୱା ନେୟା ତାନାଃ ଚି ଇନିଃ ଆଜାଃ ହୋନ୍‍କଡ଼ା ବିଷାୟ୍ ରେ ଗୋୱା ଏମ୍‍କେଦାଏ। ଅକଏ ପାର୍ମେଶ୍ଵାର୍ ରାଃ ହୋନ୍ ରେ ବିଶ୍ଵାସ୍ ତାନାଏ ଇନିଃ ଆଜାଃ ରେଗି ଗୋୱା ମାଣ୍ତାଅୟାଏ। ଅକଏ ପାର୍ମେଶ୍ଵାର୍ କେ କାଏ ବିଶ୍ଵାସ୍ କେଦାଏ ଇନିଃ ପାର୍ମେଶ୍ଵାର୍ କେ ହିହିଡ଼୍ ନିଃ ବାଇକିଜାଏ, ଚିୟାଃଚି ଇନିଃ ଏନ୍ ଗୋୱା ରେ କାଏ ବିଶ୍ଵାସ୍ କେଦା ଅକନାଃ ପାର୍ମେଶ୍ଵାର୍ ଆଜାଃ ହୋନ୍‍କଡ଼ା ବିଷାୟ୍ ରେ ଏମ୍ କେଦାଏ। ହାର୍ ଏନ୍ ଗୋୱା ନେୟା ତାନାଃ ଚି ପାର୍ମେଶ୍ଵାର୍ ଆବୁକେ ଜାନାଓ ଜୀଦାନ୍ ଏମାକାଃବୁୱାଏ। ହାର୍ ନେ ଜାନାଓ ଜୀଦାନ୍ ଇନିଜାଃ ହୋନ୍‍କଡ଼ା ରେ ମେନାଃ। ଅକେୟାଃ ତାଃ ହୋନ୍‍କଡ଼ା ମେନାଇଜା, ଇନିଜାଃ ତାଃ ଜାନାଓ ଜୀଦାନ୍ ମେନାଃ; ହାର୍ ଅକଏ ତାଃ ପାର୍ମେଶ୍ଵାର୍ ରାଃ ହୋନ୍ ବାଙ୍ଗୁଇଜା, ଇନିଜାଃ ତାଃ ଜାନାଓ ଜୀଦାନ୍ ହଗି ବାନୋଗା। ଇଙ୍ଗ୍ ଆପେକେ ପାର୍ମେଶ୍ଵାର୍ ରାଃ ହୋନ୍ ନୁତୁମ୍ ରେ ବିଶ୍ୱାସ୍ ତାନ୍ କୋକେ, ଏନାମେନ୍ତେ ଅଲାକାଦିଙ୍ଗ୍ ଚି ଆପେ ସାରିପେ ଚି ଜାନାଓ ଜୀଦାନ୍ ଆପେୟାଃ ତାନାଃ। ହାର୍ ଆବୁକେ ଇନିଜାଃ ନାଡ଼େଏ ରେ ଅକନ୍ ସାହାସ୍ ହୋବାଅଃ ତାନା, ଏନା ନେୟା ତାନାଃ; ଚି ଆଗାର୍ ଆବୁ ଇନିଜାଃ ସାନାଙ୍ଗ୍ ଲେକାତେ ଆସିତାନାବୁ, ଏଣ୍ଡେ ଦୋ ଇନିଃ ଆବୁୱାଃ ଆୟୁମେୟାଏ। ଚିମ୍ତାଙ୍ଗ୍ ଆବୁ ସାରିତାନାବୁ ଚି ଅକନାଃ ଆବୁ ପାର୍ମେଶ୍ଵାର୍ କେ ଆସିତାନାବୁ ଇନିଃ ଆବୁୱାଃ ଆୟୁମେତାନାଏ, ଏଣ୍ଡେ ଦୋ ନେୟାହଗି ସାରିତାନାବୁ ଚି ଅକନାଃକୋ ଆବୁ ଇନିଃତେ ଆସିକେଦାବୁ, ଏନା ନାମା କାଦାବୁ। ଆଗାର୍ ଜେତାଏ ଆଜାଃ ହାଗା କେ ଏନ୍‍ଲେକା ପାପ୍ ରିକାତାନ୍ ନେଲିୟାଏ ଅକନାଃ ରାଃ ଯଅ ଗୋନୋଏଃ ନାହାଲା, ଏଣ୍ଡେ ବିନ୍ତି କାଏ, ହାର୍ ପାର୍ମେଶ୍ଵାର୍ ଇନିଃକେ ଇନିଜାଃ ଲାଗିନ୍, ଅକନ୍ କୋ ନେଲେକା ପାପ୍ କାଦାକୋ ଅକନାଃ ରାଃ ଯଅ ଗୋନୋଏଃ କାନାମୋଗା, ଜୀଦାନ୍ ଏମେୟାଏ। ପାପ୍ ଏନ୍ ଲେକାହଗି ହୋବାଅଃୱା ଅକନାଃ ରାଃ ଯଅ ଗୋନୋଏଃ ତାନାଃ; ଏନାରାଃ ବିଷାୟ୍ ରେ ଇଙ୍ଗ୍ ବିନ୍ତି ରିକାଲାଗିନ୍ କାଇଙ୍ଗ୍ କାଜିତାନା। ସବେନ୍ ରାକାମ୍ ରାଃ ଏତ୍କାନ୍ କାମି ଦୋ ପାପ୍ ତାନାଃ, ମେନ୍ଦୋ ଏନ୍‍ଲେକା ପାପ୍ ହଗି ମେନାଃ, ଅକନାଃ ରାଃ ଯଅ ଗୋନୋଏଃ ନାହାଲା। ଆବୁ ସାରିତାନାବୁ, ଚି ଜେତାଏ ହଗି ପାର୍ମେଶ୍ଵାର୍ ଏତେ ଜାନାମ୍ କାନାଏ, ଇନିଃ ପାପ୍ କାଏ ରିକାୟାଏ, ମେନ୍ଦୋ ୟୀଶୁ ଅକଏ ପାର୍ମେଶ୍ଵାର୍ ଏତେ ଜାନାମ୍ କାନାଏ, ଇନିଃକେ ଆଏଃ ବାଞ୍ଚାଅୱିୟାଏ; ହାର୍ ଏନ୍ ଦୁଷ୍ଟ ଶାଏତାନ୍ ଇନିଃକେ ଜୁଟିଃ କାଏ ଧାଡ଼ିୟାଏ। ଆବୁ ସାରିତାନାବୁ, ଚି ଆବୁ ପାର୍ମେଶ୍ଵାର୍ ଏତେ ତାନ୍‍ବୁ, ହାର୍ ସବେନ୍ ଅତେଦିଶୁମ୍ ଏନ୍ ଦୁଷ୍ଟ ଶାଏତାନ୍ ରାଃ ଆଧିନ୍ ରେ ମେନାଃ। ଆବୁ ନେୟା ହଗି ସାରିତାନାବୁ ଚି ପାର୍ମେଶ୍ଵାର୍ ରାଃ ହୋନ୍ ହିଜୁଃକାନାଏ ହାର୍ ଇନିଃ ଆବୁକେ ସେଣା ଏମ୍ କାଦାଏ ଚି ଆବୁ ଏନ୍ ସାର୍ତି ପାର୍ମେଶ୍ଵାର୍ କେ ନେଲ୍ଉରୁମିକାବୁ; ହାର୍ ଆବୁ ଏଣ୍ତେରେ ଅକନ୍ ସାର୍ତି ମେନାଃ, ମାନେ ଇନିଜାଃ ହୋନ୍‍କଡ଼ା ୟୀଶୁ ମାସୀହ୍ ରେ ତାଇନୋଃ ତାନାବୁ। ସାର୍ତି ପାର୍ମେଶ୍ଵାର୍ ହାର୍ ଜାନାଓ ଜୀଦାନ୍ ନେୟାଗି ତାନାଃ। ହେ ହୋନ୍‍କୋ, ଆପେ ଆପାନ୍ କେ ମୂର୍ତି କୋଏତେ ବାଚାଓ କେତେ ତାଇନ୍‍ପେ। ଇଙ୍ଗ୍ ଯୋହାନ୍ କାଲିସିୟା ରେନ୍ ମାରିହୋଡ଼ ଲେକାତେ ଏନ୍ ପାର୍ମେଶ୍ଵାର୍ ଏତେ ସାଲାକାନ୍ ମିଶି ହାର୍ ଇନିଜାଃ ହୋନ୍ କୋୱାଃ ନୁତୁମ୍ ରେ, ଅକନ୍ କୋଲୋଃ ଇଙ୍ଗ୍ ସାର୍ତି ଦୁଲାଡ଼୍ ମାଣ୍ଡାଅ ତାନିଙ୍ଗ୍, ହାର୍ ଏସ୍କାର୍ ଇଙ୍ଗ୍ ଭାଇର୍ କାହା ମେନ୍ଦୋ ଏନ୍ ସବେନ୍ କୋ ହଗି ଦୁଲାଡ଼୍ ମାଣ୍ଡାଅୟାକୋ ଅକନ୍‍କୋ ସାର୍ତି କେ ସାରିୟାକୋ; ଏନ୍ ସାର୍ତି ଅକନାଃ ଆବୁୱାଃ ରେ ବାଇ ତାଇନୋଃ ତାନା, ହାର୍ ସବେନ୍ ହୁଲାଙ୍ଗ୍ ଆବୁୱାଃ ଲୋଃ ବାଇକେତେ ତାଇନୋଗା; ପାର୍ମେଶ୍ଵାର୍ ଆପୁ, ହାର୍ ଆପୁ ଗାଃ ହୋନ୍ ୟୀଶୁ ମାସୀହ୍ ପାଡ଼େତେ ଆନୁଗ୍ରାହ୍ ହାର୍ ଦାୟା ହାର୍ ଜୀଉସୁକୁ, ସାର୍ତି ହାର୍ ଦୁଲାଡ଼୍ ଲୋଃ ଆବୁୱାଃ ଲୋଃ ତାଇନୋଗା। ଇଙ୍ଗ୍ ଥିମ୍ବାଗି ରାଶିକା ଜାନିଙ୍ଗ୍ ଚିମ୍ତା ଇଙ୍ଗ୍ ଆମାଃ ଚିମିନ୍ ହୋନ୍ କୋକେ ଏନ୍ ଆନାଚୁ ରାଃ ଲେକାତେ ସାର୍ତି ରେ ସେସେନ୍ ତାନ୍ ନାମ୍ କେଃକୋୱାଇଙ୍ଗ୍, ଅକନାଃ ଆବୁକେ ଆପୁ ପାଡ଼େତେ ନାମ୍ ଲେନା। ନାଆ ହେ ପାର୍ମେଶ୍ଵାର୍ ଏତେ ସାଲାକାନ୍ ମିଶି, ଇଙ୍ଗ୍ ଆମ୍‍କେ ଜାହାନ୍ ନାୱା ଆନାଚୁ କାହା, ମେନ୍ଦୋ ଏନାଗି ଅକନାଃ ମୁନୁ ଏତେ ଆବୁୱାଃ ନାଡ଼େଏ ରେ ମେନାଃ, ଅଲ୍ ତାନିଙ୍ଗ୍; ହାର୍ ଆମ୍ କେ ଆର୍ଜି ମେତାନିଙ୍ଗ୍ ଚି ଆବୁ ମିହୋଡ଼୍ ଏଟାଃ ନିଈ ଲୋଃ ଦୁଲାଡ଼୍ ମାଣ୍ଡାଅକାବୁ। ହାର୍ ସାର୍ତି ଦୁଲାଡ଼୍ ନେୟା ତାନାଃ ଚି ଆବୁ ଇନିଜାଃ ଆନାଚୁ କୋରାଃ ଲେକାତେ ସେସେନ୍ କାବୁ; ନେୟା ଏନ୍ ଆନାଚୁ ଗି ତାନାଃ ଅକନାଃ ଆପେ ମୁନୁ ଏତେ ଆୟୁମ୍ କାଦାପେ, ହାର୍ ଆପେକେ ନେୟା ରେ ସେସେନ୍ ହଗି ଲାଗାତିଙ୍ଗ୍ ମେନାଃ। ଚିୟାଃଚି ଥିମ୍ବାଗି ନେକାନ୍ ହିହିଡ଼୍ ହୋଡ଼ୋକୋ ଅତେଦିଶୁମ୍ ରେ ଅଡୋଙ୍ଗ୍ ହିଜୁଃକାନାକୋ, ଅକନ୍‍କୋ ନେୟା କାକୋ ମାନାତିଙ୍ଗ୍‍ୟା ଚି ୟୀଶୁ ମାସୀହ୍ ହୋଡ଼ମୋ ରେ ହୋବା କେତେ ହିଜୁଃ ଲେନାଏ; ହିହିଡ଼୍ ନିଃ ହାର୍ ମାସୀହ୍ ବିରୋଧୀ ନିଃଗି ତାନିଃ। ଆପାନାଃ ବିଷାୟ୍ ରେ ହୋସିଆର୍ ତାଇନ୍‍ପେ, ଚି ଅକନ୍ କାମି ଆଲେ ରିକାକାଦାଲେ ଏନାକେ ଆପେ ଆଲୋପେ ଆଦେୟା, ମେନ୍ଦୋ ଏନାରାଃ ପୁରା ଯଅ ନାମେପେ। ଜାହାଁଏଗି ମାସୀହ୍ ରାଃ ଶିଖାଅ ଆଡ଼ି ତେ ଆୟୁର୍ ସେନୋଃକୋୱାଏ, ହାର୍ ଏନାରେ କାଏ ବାଇ ତାଇନୋଗାଏ, ଇନିଜାଃ ତାଃ ପାର୍ମେଶ୍ଵାର୍ ବାଙ୍ଗୁଇଜା; ଜାହାଁଏଗି ଇନିଜାଃ ଶିଖାଅ ଆଡ଼ି ରେ ବାଇକେତେ ତାଇନାଏ, ଇନିଜାଃ ତାଃ ଆପୁ ହଗି ମେନାଇଜା ହାର୍ ହୋନ୍‍କଡ଼ା ହଗି। ଆଗାର୍ ଜେତାଏ ଆପେୟାଃ ନାଡ଼େଏ ରେ ହିଜୁଗାଏ ହାର୍ ନେ ଶିଖାଅ କାଏ ଏମ୍ ରେଦୋ, ଇନିଃକେ ନାଦୋ ଅଡ଼୍ଆଃ ରେ ହିଜୁଃ ରିକାୟିପେ ଆଡୋଃ ନା ଜୋହାର୍ ଇପେ। ଚିୟାଃଚି ଜେତାଏ ନେକାନ୍ ହୋଡ଼ କେ ଜୋହାରିୟାଏ, ଇନିଃ ଇନିଜାଃ ଖାରାପ୍ କାମି କୋରେ ମେଶା କେନୋଗାଏ। ଇଙ୍ଗ୍‍କେ ବେଶେ ଥିମ୍ବା କାଜିକୋ ଆପେକେ ଅହଲ୍ ମେନାଃ, ମେନ୍ଦୋ କାଗାଜ୍ ଆଡୋଃ ସିହାଇ ତେ ଅହଲ୍ କାଇଙ୍ଗ୍ ସାନାଙ୍ଗ୍ ତାନା; ମେନ୍ଦୋ ଆଶ୍ରା ମେନାଃ ଚି ଇଙ୍ଗ୍ ଆପେୟାଃ ତାଃ ସେନାଇଙ୍ଗ୍ ହାର୍ ଆମ୍ନା-ସାମ୍ନା ରେ ବାକାଣ୍ ୟାଇଙ୍ଗ୍, ଏନାତେ ଆବୁୱାଃ ରାଶିକା ପୁରାଅଃକା। ଆମାଃ ସାଲାକାନ୍ ମିଶି ଗାଃ ହୋନ୍ କୋ ଆମ୍‍କେ ଜୋହାର୍ ମେତାନାକୋ। ଇଙ୍ଗ୍ ଯୋହାନ୍ କାଲିସିୟା ରେନ୍ ମାରିହୋଡ଼ ଲେକାତେ ଏନ୍ ଦୁଲାଡ଼୍ ଗାୟୁସ୍ ରାଃ ନୁତୁମ୍ ରେ, ଅକନିଃକେ ଇଙ୍ଗ୍ ସାର୍ତି ଦୁଲାଡ଼୍ ମାଣ୍ଡାଅ ତାନିଙ୍ଗ୍। ହେ ଦୁଲାଡ଼୍, ଇଙ୍ଗ୍ଆଃ ନେୟା ବିନ୍ତି ତାନାଃ ଚି ଜେଲେକା ଆମ୍ ଆତ୍ମିକ୍ ରେ ହାରାଇଦିଅଃ ତାନାମ୍, ଏନ୍‍ଲେକାଗି ଆମ୍ ସବେନ୍ କାଜି କୋରେ ହାରାଇଦିଅଃମେ ଆଡୋଃ ବେଶ୍ ବୁଗିନ୍ ତାଇନୋଃମେ। ଚିୟାଃଚି ଚିମ୍ତା ହାଗାକୋ ହିଜୁଃକେତେ ଆମାଃ ଏନ୍ ସାର୍ତି ରାଃ ଗୋୱା ଏମ୍‍କେଦାକୋ, ଅକନାଃ ରେ ଆମ୍ ସାର୍ତି ତେଗି ସେସେନ୍ ତାନାମ୍, ଦୋ ଇଙ୍ଗ୍ ଥିମ୍ବା ରାଶିକା ଜାନିଙ୍ଗ୍। ଇଙ୍ଗ୍‍କେ ନେୟାତେ ଥିମ୍ବା ଆଡୋଃ ଜେତାନ୍ ରାଶିକା ବାନୋଃ ଚି ଇଙ୍ଗ୍ ଆୟୁମେୟାଇଙ୍ଗ୍, ଯେ ଇଙ୍ଗ୍ଆଃ ହୋନ୍‍କୋ ସାର୍ତି ରେ ସେସେନ୍ ତାନାକୋ। ହେ ଦୁଲାଡ଼୍, ଅକନାଃକୋ ଆମ୍ ଏନ୍ ହାଗାକୋ ଲୋଃ ରିକାତାନାମ୍, ଅକନ୍‍କୋ ପାର୍ଦେଶୀ ତାନ୍‍କୋ, ଏନାକେ ବିଶ୍ଵାସେ ଲେକାନିଃ ଲେକା ହୋବାକେତେ ରିକାତାନାମ୍। ଇନ୍‍କୁ କାଲିସିୟା ରାଃ ନାଡ଼େଏ ରେ ଆମାଃ ଦୁଲାଡ଼୍ ରାଃ ଗୋୱା ଏମ୍‍କେଦାକୋ। ଆଗାର୍ ଆମ୍ ଇନ୍‍କୁକେ ଏନ୍‍ଲେକା ବିଦାକୋୱାମ୍ ଜେଲେକା ପାର୍ମେଶ୍ଵାର୍ ରାଃ ହୋଡ଼ୋକୋ ଲାଗିନ୍ ବେଶ୍ ତାନାଃ ଏଣ୍ଡେ ବେଶ୍ ରିକାୟାମ୍। ଚିୟାଃଚି ଇନ୍‍କୁ ଏନ୍ ନୁତୁମ୍ ଲାଗିନ୍ତେ ଅଡୋଙ୍ଗ୍ କାନାକୋ, ହାର୍ ଆବିଶ୍ଵାସୀ କୋଏତେ ଜେତ୍ନାଃ କାକୋ ଇଦିୟା। ଏନାମେନ୍ତେ ନେକାନ୍ କୋକେ ସ୍ଵାଗାତ୍ ରିକାଚାହି, ଏନାତେ ଆବୁ ହ ସାର୍ତି ଲାଗିନ୍ତେ ଇନ୍‍କୁ ଲୋଃ ଗାତିକାମିତାନ୍ ହୋବାଅଃୱାବୁ। ଇଙ୍ଗ୍ କାଲିସିୟା କେ ଚିଠି ଅଲ୍ ଲେଦାଇଙ୍ଗ୍; ମାଗାର୍ ଦିୟୁତ୍ରିଫେସ୍ ଅକନିଃ ଇନ୍‍କୁରେ ମାରାଙ୍ଗ୍ ବାଇୟେନ୍ ସାନାଙ୍ଗ୍ ତାଇନାଏ, ଆଲେକେ କାଏ ଗ୍ରାହାନ୍ ଲେତାନା। ଏନାମେନ୍ତେ ଚିମ୍ତାଙ୍ଗ୍ ଇଙ୍ଗ୍ ହିଜୁଗାଇଙ୍ଗ୍ ଏଣ୍ଡେ ଇନିଜାଃ କାମି କୋରାଃ ଅକନାଃ ଇନିଃ ରିକା ତାନାଏ, ମୋନେ ରିକାୟାଇଙ୍ଗ୍, ଚି ଇନିଃ ଆଲେୟାଃ ବିଷାୟ୍ ରେ ଖାରାପ୍-ଖାରାପ୍ କାଜି ରେ ଏଗେର୍ ୟାଏ, ହାର୍ତେ ନେୟା ରେ ହଗି କାଏ ଆସ୍‍ଦିଅଃ ତାନାଏ ହାର୍ ବିଶ୍ଵାସୀ ହାଗା କୋକେ ହ କାଏ ଗ୍ରାହାନ୍ କୋତାନାଏ, ହାର୍ ଅକନ୍ କୋ ଗ୍ରାହାନ୍ ସାନାଙ୍ଗ୍ ତାନାକୋ, ଇନ୍‍କୁକେ ମାନା କୋୱାଏ; ହାର୍ କାଲିସିୟା ତେ ଅଡୋଙ୍ଗ୍ ତାକୋୱାଏ। ହେ ଦୁଲାଡ଼୍, ଏତ୍କାନାଃ କାହା, ମେନ୍ଦୋ ବୁଗିନାଃ ହୋରାକେ ସାବେପେ। ଅକଏ ବୁଗିନାଃ ରିକାୟାଏ, ଇନିଃ ପାର୍ମେଶ୍ଵାର୍ ପାଡ଼େତେ ତାନିଃ; ମେନ୍ଦୋ ଅକଏ ଏତ୍କାନାଃ ରିକାୟାଏ, ଇନିଃ ପାର୍ମେଶ୍ଵାର୍ କେ କାଏ ନେଲ୍ କାଇଜା। ଦିମେତ୍ରୀୟୁସ୍ ରାଃ ବିଷାୟ୍ ରେ ସବେନ୍ କୋ, ମେନ୍ଦୋ ସାର୍ତି ହ ଆଏଃ ଗି ଗୋୱା ଏମ୍‍କେଦାଏ; ହାର୍ ଆଲେ ହଗି ଗୋୱା ଏମ୍ ତାନାଲେ, ଆଡୋଃ ଆମ୍ ସାରିତାନାମ୍ ଚି ଆଲେୟାଃ ଗୋୱା ସାର୍ତି ତାନାଃ। ଇଙ୍ଗ୍‍କେ ଆମ୍‍କେ ବେଶେ ଥିମ୍ବାଗି ଅହଲ୍ ଦୋ ତାଇକେନା; ମେନ୍ଦୋ ସିହାଇ ହାର୍ କାଲାମ୍ ତେ ଅହଲ୍ କାଇଙ୍ଗ୍ ସାନାଙ୍ଗ୍ ତାନା। ମେନ୍ଦୋ ଇଙ୍ଗ୍‍କେ ଆଶ୍ରା ମେନାଃ ଚି ଆମାଃ ଲୋଃ ସେକାଡ଼୍ ଗି ନାପାମାଇଙ୍ଗ୍, ଇମ୍ତା ଆଲାଙ୍ଗ୍ ଆମ୍ନା-ସାମ୍ନା ରେ ବାକାଣ୍ ୟାଲାଙ୍ଗ୍। ଆମ୍‍କେ ଜୀଉସୁକୁ ନାମ୍ ଇଦିଅଃକା। ନେତାଃ ରେନ୍ ଗାତିକୋ ଆମ୍‍କେ ଜୋହାର୍ ମେତାନାକୋ, ହେନ୍ତାଃ ରେନ୍ ଗାତିକୋକେ ନୁତୁମ୍ ସାବ୍-ସାବ୍ କେତେ ଜୋହାର୍ କାଜି ତାକୋମେ। ୟାହୁଦା ପାଡ଼େତେ ଅକନିଃ ୟୀଶୁ ମାସୀହ୍ ରାଃ ଦାସୀ ଆଡୋଃ ୟାକୁବ୍ ରାଃ ହାଗା ତାନିଃ, ଏନ୍ କେଡ଼ାକାନ୍ କୋୱାଃ ନୁତୁମ୍ ରେ ଅକନ୍‍କୋ ପାର୍ମେଶ୍ଵାର୍ ଆପୁ ରାଃ ଦୁଲାଡ଼ାନ୍ ତାନ୍‍କୋ ହାର୍ ୟୀଶୁ ମାସୀହ୍ ତେ ହୋରୋ ମାଣ୍ଡାଅକାନ୍ ତାନ୍‍କୋ। ଦାୟା ଆଡୋଃ ଜୀଉସୁକୁ ଆଡୋଃ ଦୁଲାଡ଼୍ ଆପେକେ ମିଃଥିମ୍ବା ତେ ନାମୋଃ କାତେୟୋଃଚା। ହେ ଦୁଲାଡ଼ାନ୍ କୋ, ଚିମ୍ତାଙ୍ଗ୍ ଇଙ୍ଗ୍ ଆପେକେ ଏନ୍ ବାଞ୍ଚାଅ ବିଷାୟ୍ ରେ ଅଲେଲାଗିନ୍ ଥିମ୍ବାଗି ସାନାଙ୍ଗ୍ ତାଇକେନାଇଙ୍ଗ୍ ଅକନାଃ ରେ ଆବୁ ସବେନ୍ କୋ ମେଶା କାନାବୁ, ଦୋ ଇଙ୍ଗ୍ ଆପେକେ ନେୟା ବୁଝାଅ ଜାରୁରୀ ମେନ୍ତେ ଆଟ୍‍କାର୍ କେଦିଙ୍ଗ୍ ଚି ଏନ୍ ବିଶ୍ଵାସ୍ ଲାଗିନ୍ତେ ପୁରା କୋଷିସ୍ ଏପେ ଅକନାଃ ପାବିତାର୍ ହୋଡ଼ୋକୋକେ ମିଶା ଭାଇର୍ ଜିମାକାନ୍ ତାଇକେନା। ଚିୟାଃଚି ଚିମିନାଙ୍ଗ୍ ନେକାନ୍ ହୋଡ଼ୋକୋ ହାପାତେ ଆବୁଲୋଃ ମେଶା କାନାକୋ, ଅକନ୍ କୋୱାଃ ନେ ଦାଣ୍ଡ୍ ରାଃ ବିଷାୟ୍ ରେ ସିଦା ସାମାୟ୍ ରେଗି ଅଲାକାନ୍ ତାଇକେନା; ନିକୁ ପାର୍ମେଶ୍ଵାର୍ କେ କାମାନାତିଙ୍ଗ୍ ହୋଡ଼ୋକୋ ତାନ୍‍କୋ, ଆଡୋଃ ଆବୁୱାଃ ପାର୍ମେଶ୍ଵାର୍ ରାଃ ଆନୁଗ୍ରାହ୍ କେ ସିଣିଇ କାମି ରେ ବାଦ୍‍ଲାଅ ତାଃକୋ, ହାର୍ ଆବୁୱାଃ ମିୟାଃ ଭାଇର୍ ଗୋମ୍‍କେ ଆଡୋଃ ପ୍ରାଭୁ ୟୀଶୁ ମାସୀହ୍ କେ ମାନା ୟାକୋ। ମେନ୍ଦୋ ଆପେ ସବେନ୍ କାଜି ମିଶା ସାରି ଛାବା କାଦାପେ, ଏଣ୍ଡେ ହ ଇଙ୍ଗ୍ ଆପେକେ ନେ କାଜି ରାଃ ମୋନେ ରିକା ସାନାଙ୍ଗ୍ ତାନିଙ୍ଗ୍ ଚି ପ୍ରାଭୁ ଇସ୍ରାଏଲ୍ ଜାତିରେନ୍ ହୋଡ଼ୋକୋକେ ମିଶାର୍ ଦିଶୁମ୍ ଏତେ ରାଡ଼ା ଆଉକେଃ ତାୟୋମ୍ତେ କାବିଶ୍ଵାସ୍‍ତାନ୍ କୋକେ ନାଷ୍ଟ୍ ତାଃକୋୱାଏ। ହାର୍ ଅକନ୍ ସିର୍ମାଦାସୀକୋ ଆକୋୱାଃ ପାଦ୍ କେ ବାଇକେତେ କାକୋ ଦୋହୋକେଦା ଏନ୍ତେ ଆକୋ ଆକୋୱାଃ ତାହିନ୍ ଜାଗା କେ ବାଗେ କେଦାକୋ, ଇନିଃ ଇନ୍‍କୁ କେହ ହେନ୍ ବୋରୋୱାନ୍ ହୁଲାଙ୍ଗ୍ ରାଃ ବିଚାର୍ ଲାଗିନ୍ ନୁବାଃ ରେ, ଅକନାଃ ସବେନ୍ ହୁଲାଙ୍ଗ୍ ଲାଗିନ୍ ତାନାଃ, ଥୋନୋଲ୍ ରେ ଦୋହୋ କାଃକୋୱାଏ। ଜେଲେକାତେ ସାଦୋମ୍ ଆଡୋଃ ଆମୋରା ସାହାର୍ ଆଡୋଃ ଏନାରାଃ ନାଡ଼େଏ ଜାପାଃ ହାତୁକୋ, ଅକନ୍‍କୋ ନିକୁୱାଃ ଲେକା ବ୍ୟାଭିଚାରୀ ହୋବା ଲେନ୍ ତାଇକେନାକୋ ଆଡୋଃ ଏଟାଃ କୋୱାଃ ହୋଡ଼ମୋ ଦୋୟା ତେ ହୋବାଲେନ୍ ତାଇକେନାକୋ, ଜାନାଓ ରାଃ ସେଙ୍ଗେଲ୍ ରାଃ ଦାଣ୍ଡ୍ ରେ ଉୟୁଃକେତେ ଜୋନୋକା ବାଇଜାନାକୋ। ଏନ୍‍ଲେକାଗି ନେ କୁମୁ ନେଲ୍‍ତାନ୍ କୋ ହ ଆକୋ ଆକୋୱାଃ ହୋଡ଼ମୋ କେ ଆଶୁଦ୍ଧ୍ ୟାକୋ, ଆଡୋଃ ଆଧିକାର୍ ନାମାକାନ୍ କୋକେ କାକୋ ଗ୍ରାହାନ୍ କୋୱା; ଆଡୋଃ ମାନାରାଙ୍ଗ୍ ରେନ୍ ସିର୍ମାଦାସୀ କୋକେ ହିନ୍‍ସାତି କୋୱାକୋ। ମେନ୍ଦୋ ପ୍ରାଧାନ୍ ସିର୍ମାଦାସୀ ମୀଖାଇଲ୍, ଚିମ୍ତା ଶାଏତାନ୍ ଲୋଃ ମୁଶା ରାଃ ମାଣା ବିଷାୟ୍ ରେ କୁଲିକାପାଜି ରିକା କେଦାଏ, ଦୋ ହିନିଃକେ ହିନ୍‍ସାତି କାଜିକେତେ ଦୋଷ୍ ଏହେମ୍ କାଏ ସାହାସ୍ କେଦାଏ; ମେନ୍ଦୋ ନେୟା କାଜିକେଦା, “ପ୍ରାଭୁ ଆମ୍‍କେ ଏଗେର୍ ମେଚାଏ।” ମେନ୍ଦୋ ନେ ହୋଡ଼ୋକୋ ଅକନ୍ କାଜିକେ କାକୋ ସାରିୟା, ଏନାକୋକେ ହିନ୍‍ସାତି କାଜିୟାକୋ, ଆଡୋଃ ଅକନ୍ କାଜିକୋକେ ବେଗାର୍ ସାରିଧାଡ଼ି ପାଶୁକୋ ଲେକା ଜାତିତେଗି ସାରିୟାକୋ, ଏନ୍ ଲେକାତେ ଆକୋ ଆପାନ୍ କେ ନାଷ୍ଟ୍‍ୟାକୋ। ଇନ୍‍କୁୱାଃ ରେ ହାୟ୍! ଚିୟାଃଚି ଇନ୍‍କୁ କୈନ୍ ଲେକା ସେସେନାକୋ, ଆଡୋଃ ନାଲା ନାମେ ଲାଗିନ୍ ବିଲାମ୍ ଲେକା ବାଗ୍‍ଡ଼ାଅ ଜାନାକୋ, ହାର୍ କୋରାହ୍ କୋ ଲେକା ବିରୋଧ୍ କେତେ ନାଷ୍ଟ୍ ଜାନାକୋ। ନେକାନ୍ କୋ ଆପେୟାଃ ଦୁଲାଡ଼୍ ସାଭା କୋରେ ଆପେ ଲୋଃ ଜୋମ୍-ନୁୱେ ୟାକୋ, ନେକୋ ସାମୁଦାର୍ ରେ ଉକୁକାନ୍ ମାରାଙ୍ଗ୍ ଦିରି ଲେକା ତାନ୍‍କୋ, ଆଡୋଃ ବେଗାର୍ ବୋରୋତେ ଆକୋୱାଃଗି ଲାହେଃ ଫେରେଜେୟାକୋ ଏନ୍‍କାନ୍ ଗୁପୀନିଃ ତାନ୍‍କୋ; ଇନ୍‍କୁ ବେଗାର୍ ଦାଆ ରାଃ ରିମିଲ୍ ତାନ୍‍କୋ, ଅକନାଃକେ ହୋୟୋ ଅଟାଙ୍ଗ୍ ଇଦି କେୟାଏ, ସାକାମ୍ ଗାଷାରେନ୍ ସାମାୟ୍ ରାଃ କାଯୋଅଃ ତେୟାଃ ଦାରୁ ତାନ୍‍କୋ, ଅକନ୍‍କୋ ରେହେଃ ତେ ଥାଇଜା କାନାକୋ ଆଡୋଃ ବାର୍ସା ଗୋଜାକାନାକୋ। ନେକାନ୍ କୋ ସାମୁଦାର୍ ରାଃ ଜୋର୍ ତେୟାଃ ଲାହାଡ଼ି ତାନ୍‍କୋ, ଅକଏକୋ ଆକୋୱାଃ ଗିୟୁଗେନ୍ ତେୟାଃ ବଟ ଉଛ୍ଲାଅ ୟାକୋ, ନେକୋ ହୋନୋର୍ ବାଡ଼ାତାନ୍ ଇପିଲ୍ ତାନ୍‍କୋ, ଅକନ୍ କୋ ଲାଗିନ୍ ସବେନ୍ ହୁଲାଙ୍ଗ୍ ରାଃ କୁଲ୍-କୁଲ୍ ନୁବାଃ ମାଣ୍ଡାଅୱା କାନା। ହାର୍ ହାନୋକ୍ ହଗି ଅକନିଃ ଆଦାମ୍ ରାଃ ସାତ୍‍ୱା ପିଢ଼ୀ ରେନ୍ ତାଇକେନାଏ, ଇନ୍‍କୁୱାଃ ବିଷାୟ୍ ରେ ନେୟା ଆୟାର୍‍କାଜି କାଜିକେଦାଏ, “ନେଲେପେ, ପ୍ରାଭୁ ଆଜାଃ ଲାଖୋ ପାବିତାର୍ କୋୱାଃ ଲୋଃ ହିଜୁଃନାଏ। ଏନାତେଚି ସବେନ୍ କୋୱାଃ ବିଚାର୍ ରିକାୟାଏ, ଆଡୋଃ ସବେନ୍ କାମାନାତିଙ୍ଗ୍ ତାନ୍ କୋକେ ଆକୋୱାଃ କାମାନାତିଙ୍ଗ୍ ରାଃ ସବେନ୍ କାମି ରାଃ ବିଷାୟ୍ ରେ, ଅକନାଃ ହିନ୍‍କୁ କାମାନାତିଙ୍ଗ୍ ତାନ୍ ହୋବା କେତେ ରିକା କାଦାକୋ, ଆଡୋଃ ଏନ୍ ସବେନ୍ ହାଡ଼୍ଆଃ କାଜି କୋରାଃ ବିଷାୟ୍ ରେ ଅକନାଃ କାମାନାତିଙ୍ଗ୍ ତାନ୍ ପାପୀକୋ ଇନିଜାଃ ବିରୋଧ୍ ରେ କାଜିକେଦାକୋ, ଦୋଷୀ ବାଇକୋୱାଏ।” ନିକୁ ଦୋ କାକୋସୁକୁଅଃୱା, ନାମାକାନ୍ ହାନାଟିଙ୍ଗ୍ ରେହଗି ହିନ୍‍ସାତି ୟାକୋ, ଆଡୋଃ ଆକୋୱାଃ ଏତ୍କାନ୍ ସାନାଙ୍ଗ୍ ଲେକା ସେସେନ୍ ତାନ୍ ତାନ୍‍କୋ, ଆଡୋଃ ଆକୋୱାଃ ମୋଚା ତେ ଆପାନାଃ ଘାମାଣ୍ଡ୍ କାଜିକୋ କାଜିୟାକୋ, ଆଡୋଃ ଆକୋୱାଃ ଲାଭ୍ ଲାଗିନ୍ ମୋଚା ନେନେଲ୍ ମାନାରାଙ୍ଗ୍ କୋ ରିକା ୟାକୋ। ହେ ଦୁଲାଡ଼ାନ୍ କୋ, ଆପେ ନେ କାଜିକୋକେ ମୋନେ ରେ ଦହଏପେ; ଅକନାଃ କେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ କୁଲାକାନ୍ ଚେଲାକୋ ସିଦା ଏତେ କାଜି ଛାବା କାଦାକୋ। ଇନ୍‍କୁ ଆପେକେ କାଜି ତାଇକେନାକୋ, “ଚି ଆଖ୍ରୀ ହୁଲାଙ୍ଗ୍ କୋରେ ନେଲେକାନ୍ ଲାନ୍ଦା-ଆପ୍‍ମାନ୍ ହୋଡ଼ୋକୋ ହୋବାୱାକୋ, ଅକନ୍‍କୋ ଆକୋୱାଃ କାମାନାତିଙ୍ଗ୍ ରାଃ ଏତ୍କାନ୍ ସାନାଙ୍ଗ୍ ଲେକାକୋ ସେନେୟାକୋ।” ନେକାନ୍ କୋ ଇନ୍‍କୁ ତାନ୍‍କୋ, ଅକନ୍ କୋ ବାଗ୍‍ଡ଼ାଅ କେତେ ଆପେକେ ହାଟିଙ୍ଗ୍ ପେୟାକୋ; ନିକୁ ହୋଡ଼ମୋ ଲେକା ତାଇନ୍ ହୋଡ଼ୋକୋ ତାନ୍‍କୋ, ଅକେୟାଃ ରେ ପାର୍ମେଶ୍ଵାର୍ ରାଃ ଆତ୍ମା ବାନୋଃ। ମେନ୍ଦୋ ହେ ଦୁଲାଡ଼ାନ୍ କୋ, ଆପେ ଆପେୟାଃ ପାବିତାର୍ ବିଶ୍ଵାସ୍ ରେ ହାରା ଇଦିୟୋଃତାନ୍ ଲୋଃ ଆଡୋଃ ପାବିତାର୍ ଆତ୍ମା ଲୋଃ ବିନ୍ତି ତାନ୍ ଲୋଃ, ଆପେ ଆପାନ୍ କେ ପାର୍ମେଶ୍ଵାର୍ ରାଃ ଦୁଲାଡ଼୍ ରେ ବାଇକେତେ ଦୋହୋ ଏପେ; ଆଡୋଃ ଜାନାଓ ଜୀଦାନ୍ ଲାଗିନ୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ଦାୟା କେ ନେଲ୍‍ହୋରା କାତେପେ। ହାର୍ ଇନ୍‍କୁ ଲାଗିନ୍ ଅକଏକୋ ସାନ୍ଦେହ୍ ରେ ମେନାକୋୱା ଦାୟା ରିକାଏପେ; ହାର୍ ଥିମ୍ବାଗି ହୋଡ଼ୋକୋକେ ସେଙ୍ଗେଲ୍ ଏତେ ଥାଇଃ ଅଡୋଙ୍ଗ୍ କୋପେ ହାର୍ ବାଞ୍ଚାଅ କୋପେ; ଆଡୋଃ ଥିମ୍ବାଗି ହୋଡ଼ୋକୋକେ ଦାୟା କୋପେ ମେନ୍ଦୋ ବୋରୋତାନ୍ ଲୋଃ, ହାର୍ ହେନ୍ ଲିଜାଃ କେହ ହିଲାଙ୍ଗ୍ ଏପେ ଅକନାଃ ହୋଡ଼ମୋ ହୋରାତେ ମାଇଲା ହୋବାକାନା। ନାଆ ଅକନାଃ ଆପେକେ ଠୋକାର୍ ଜୋମେତେ ବାଚାଓ ଧାଡ଼ିପେୟାଏ, ଆଡୋଃ ଆପେୟାଃ ମାନାରାଙ୍ଗ୍ ରାଃ ଫେରେଃ ନାଡ଼େଏ ରେ ଖୁସ୍ ଆଡୋଃ ନିର୍ଦୋଷ୍ ବାଇକେତେ ତିଙ୍ଗୁ ଧାଡ଼ିପେୟାଏ, ଏନ୍ ଏସ୍କାର୍ ଭାଇର୍ ପାର୍ମେଶ୍ଵାର୍ ଆବୁୱାଃ ବାଞ୍ଚାଅନିଃ ରାଃ ମାନାରାଙ୍ଗ୍ ଆଡୋଃ ମାଇନ୍ ଆଡୋଃ ପେଡ଼େଏ ଆଡୋଃ ଆଧିକାର୍, ଆବୁୱାଃ ପ୍ରାଭୁ ୟୀଶୁ ମାସୀହ୍ ହୋରାତେ ଜେଲେକା ଜାନାଓ ଏତେ ହାର୍ ନାଆ ହ ମେନାଃ, ଆଡୋଃ ଜାନାଓ-ଜାନାଓ ତାଇନୋଃକା। ଆମୀନ୍। ୟୀଶୁ ମାସୀହ୍ ରାଃ ଉଦୁବ୍‍କାଜି, ଅକନାଃ ଇନିଃକେ ପାର୍ମେଶ୍ଵାର୍ ନେୟାମେନ୍ତେ ଏମ୍‍କିଜାଏ ଚି ଆଜାଃ ଦାସୀକୋକେ ଏନ୍ କାଜିକୋ, ଅକନାଃ ସେକାଡ଼୍ ହୋବାଅଃ ଲାଗାତିଙ୍ଗ୍ ମେନାଃ, ଦେଖାଅୟାଏ; ଆଡୋଃ ଇନିଃ ଆଜାଃ ସିର୍ମାଦାସୀ କେ କୁଲ୍ କେତେ ଇନିଜାଃ ହୋରାତେ ଆଜାଃ ଦାସୀ ଯୋହାନ୍ କେ ଉଦୁବ୍‍କିଜାଏ, ଅକନିଃ ପାର୍ମେଶ୍ଵାର୍ ରାଃ ବାଚାନ୍ ଆଡୋଃ ୟୀଶୁ ମାସୀହ୍ ରାଃ ଗୋୱା, ମାନେ ଅକନାଃକୋ ଇନିଃ ନେଲ୍ କେଃତାଇନାଏ ଏନାକୋରାଃ ଗୋୱା ଏମ୍‍କେଦାଏ। ଧାନ୍ୟା ତାନିଃ ଇନିଃ ଅକନିଃ ନେ ଆୟାର୍‍କାଜି ରାଃ ବାଚାନ୍ କୋକେ ପାଢ଼ାଅଃତାନାଏ, ଆଡୋଃ ଧାନ୍ୟା ଇନ୍‍କୁ ତାନ୍‍କୋ ଅକନ୍‍କୋ ଆୟୁମ୍ ତାନାକୋ ହାର୍ ନେଣ୍ଡେ ରେୟାଃ ଅଲାକାନ୍ କାଜିକୋକେ ମାନାତିଙ୍ଗ୍ ତାନାକୋ; ଚିୟାଃଚି ସାମାୟ୍ ନାଡ଼େଏ ଗିୟା। ଯୋହାନ୍ ପାଡ଼େତେ ଆସିୟା ରାଇଜ୍ ରାଃ ସାତ୍ ଠୁ କାଲିସିୟା କୋୱାଃ ନୁତୁମ୍ ରେ ନେ ଚିଠି: ପାର୍ମେଶ୍ଵାର୍ ପାଡ଼େତେ ଅକନିଃ ମେନାଇଜା ଆଡୋଃ ଅକନିଃ ତାଇକେନାଏ ଆଡୋଃ ଅକନିଃ ହିଜୁଗାଏ; ଆଡୋଃ ଏନ୍ ସାତ୍ ଠୁ ଆତ୍ମା କୋୱାଃ ପାଡ଼େତେ ଅକନ୍ କୋ ଇନିଜାଃ ସିଂହାସାନ୍ ରାଃ ନାଡ଼େଏ ରେ ମେନାକୋୱାଃ, ଆଡୋଃ ୟୀଶୁ ମାସୀହ୍ ରାଃ ହୋରାତେ ଅକନିଃ ବିଶ୍ୱାସେ ଲେକାନିଃ ଗୋୱା ଆଡୋଃ ଗୋଜାକାନ୍ କୋଏତେ ଜୀଉ ବିରିଦାକାନ୍ କୋରେ ସୀଦାନିଃ ତାନିଃ ଆଡୋଃ ଅତେ ରେନ୍ ରାଜା କୋୱାଃ ହାକିମ୍ ତାନିଃ, ଆପେକେ ଆନୁଗ୍ରାହ୍ ହାର୍ ଜୀଉସୁକୁ ନାମ୍ ଇଦିୟୋଃକା। ଇନିଃ ଆବୁ ଲୋଃ ଦୁଲାଡ଼୍ ମାଣ୍ଡାଅ ୟାଏ, ଆଡୋଃ ଇନିଃ ଆଜାଃ ମାୟୋମ୍ ରାଃ ହୋରାତେ ଆବୁକେ ପାପ୍ କୋଏତେ ଛୋଡ଼ାଓ କାଃବୁୱାଏ, ଆଡୋଃ ଆବୁକେ ମିୟାଃ ରାଇଜ୍ ଆଡୋଃ ଆଜାଃ ଆପୁ ପାର୍ମେଶ୍ଵାର୍ ଲାଗିନ୍ ୟାଜାକ୍ ହ ବାଇ କେଃବୁଆଏ; ଇନିଜାଃ ଗି ମାନାରାଙ୍ଗ୍ ଆଡୋଃ ପେଡ଼େଏ ଜାନାଓ-ଜାନାଓ ଜାକେଦ୍ ତାହିନୋଃକା। ଆମୀନ୍। ନେଲିପେ, ଇନିଃ ରିମିଲ୍ ଲୋଃ ହିଜୁଃ ରାଃ ମେନିଜା, ଆଡୋଃ ସବେନ୍ ହୋଡ଼ୋକୋ ମେଏଃତେ ଇନିଃକେ ନେଲିୟାକୋ, ନେକାଚି ଅକନ୍‍କୋ ଇନିଃକେ ହୋଟୋର୍ ଲିଜାକୋ ଇନ୍‍କୁହଗି ମେଏଃ ତେ ନେଲିୟାକୋ, ଆଡୋଃ ଅତେ ରେନ୍ ସବେନ୍ କିଲିରେନ୍ କୋ ଇନିଜାଃ ଚାଲ୍ତେ କୁଡ଼ାମ୍ ବିଡ଼ା ତାନ୍‍ଲୋଃ ରାଆୟାକୋ। ହାଁ। ଆମୀନ୍। ପ୍ରାଭୁ ପାର୍ମେଶ୍ଵାର୍, ଅକନିଃ ମେନାଇଜା ଆଡୋଃ ଅକନିଃ ତାଇକେନାଏ ଆଡୋଃ ଅକନିଃ ହିଜୁଃ ରାଃ ମେନାଇଜା, ଅକନିଃ ସବେନ୍ ଏତେ ପେଡ଼େଜାନ୍ ତାନିଃ, ନେୟା କାଜିତାନାଏ, “ଇଙ୍ଗ୍ ଗି ଆଲ୍‍ଫା ଆଡୋଃ ଓମେଗା, ଇଙ୍ଗ୍ ଗି ଏନେଟେଃ ଆଡୋଃ ଟୁଣ୍ଡୁ ତାନିଙ୍ଗ୍।” ଇଙ୍ଗ୍ ଯୋହାନ୍, ଅକନିଃ ଆପେୟାଃ ଲେକା ବିଶ୍ଵାସୀ ହାଗା ଆଡୋଃ ୟୀଶୁ ରାଃ ଦୁକୁ ଆଡୋଃ ରାଇଜ୍ ଆଡୋଃ ସାହାତିଙ୍ଗ୍ ରେ ଆପେୟାଃ ଗାତି ତାନିଙ୍ଗ୍, ପାର୍ମେଶ୍ଵାର୍ ରାଃ ବାଚାନ୍ ଆଡୋଃ ୟୀଶୁ ଆଃ ଗୋୱା ଫେରେଃ ଲାଗିନ୍ତେ ପାତ୍‍ମୁସ୍ ନୁତୁମ୍ ଟାପୁ ରେ ତାଇକେନାଇଙ୍ଗ୍। ଇଙ୍ଗ୍ ପ୍ରାଭୁ ଆଃ ହୁଲାଙ୍ଗ୍ ରେ ପାବିତାର୍ ଆତ୍ମା ରେ ତାଇକେନାଇଙ୍ଗ୍, ଆଡୋଃ ଇଙ୍ଗ୍ଆଃ ଦୋୟାରେ ତୁର୍ହୀ ବାଜା ରାଃ ଷାଡି ଲେକା ମାରାଙ୍ଗ୍ ଆୱାଜ୍ ନେୟା କାଜିତାନ୍ ଆୟୁମ୍ କେଦାଇଙ୍ଗ୍, “ଅକନାଃ କୋ ଆମ୍ ନେଲ୍ ତାନାମ୍ ଏନାକୋ ପୁଥି ରେ ଅଲ୍ କେତେ ସାତ୍ ଠୁ କାଲିସିୟା କୋତାଃ କୁଲ୍ ତାମ୍, ମାନେ ଇଫିସୁସ୍ ସାହାର୍, ଆଡୋଃ ସ୍ମୁର୍‍ନା ସାହାର୍, ଆଡୋଃ ପିର୍ଗାମୁମ୍ ସାହାର୍, ଆଡୋଃ ଥୁୱାଥିରା ସାହାର୍, ଆଡୋଃ ସାର୍‍ଦିସ୍ ସାହାର୍, ଆଡୋଃ ଫିଲାଦେଲ୍‍ଫିୟା ସାହାର୍, ଆଡୋଃ ଲୌଦିକିୟା ସାହାର୍ ରେନ୍ କୋକେ।” ଇମ୍ତା ଇଙ୍ଗ୍ ଇନିଃକେ, ଅକନିଃ ଇଙ୍ଗ୍‍କେ କାଜି ତାଇନାଏ, ନେନେଲ୍ ଲାଗିନ୍ତେ ଇଙ୍ଗ୍ଆଃ ମେଏଃମୁହାଡ଼୍ କେ ବିୟୁର୍ କେଦାଇଙ୍ଗ୍; ହାର୍ ଦୋୟାତେ ବିୟୁର୍ କେତେ ଇଙ୍ଗ୍ ସୋନା ରାଃ ସାତ୍ ମାସ୍କାଲ୍ ଖୁଣ୍ଟୁ ନେଲ୍ କେଦାଇଙ୍ଗ୍, ହାର୍ ଏନ୍ ମାସ୍କାଲ୍ ଖୁଣ୍ଟୁ କୋରାଃ ଥାଲା ରେ ମାନ୍‍ୱା ରାଃ ହୋନ୍ ଲେକା ମିୟାଃ ହୋଡ଼ କେ ନେଲ୍ କିଜାଇଙ୍ଗ୍, ଅକନିଃ କାଟାସାନ୍ତେ ଲିଜାଃ ତୁସିଙ୍ଗାକାନ୍ ଆଡୋଃ କୁଡ଼ାମ୍ ରେ ସୋନା ରାଃ କାଶ୍ନା ଥୋଲାକାନ୍ ତାଇନାଏ। ଇନିଜାଃ ବୋଅ ଆଡୋଃ ଉବ୍ ପୁଣ୍ଡୀ ତୁଲାମ୍ ଲେକା ମେନ୍ଦୋ ଆରିଲ୍ ଲେକା ପୁଣ୍ଡୀ ତାଇକେନା, ଆଡୋଃ ଇନିଜାଃ ମେଏଃ ସେଙ୍ଗେଲ୍ ରାଃ ଯୁନୁଲ୍ ଲେକା ତାଇକେନା। ଇନିଜାଃ କାଟା ବୁଗିନ୍ ପିତାଲ୍ ଲେକା ତାଇକେନା ଅକନାଃ ଜେଲେକା ଭାଟି ରେ ଜୁଲ୍ ସାଫାକାନା, ଆଡୋଃ ଇନିଜାଃ ଆୱାଜ୍ ଥିମ୍ବାଗି ଦାଆ ରାଃ ଆୱାଜ୍ ଲେକା ତାଇକେନା। ଇନିଃ ଆଜାଃ ଜୋମ୍ ତିଈ ରେ ସାତ୍‍ଠୁ ଇପିଲ୍ କୋକେ ଇଦିଲେଦାଏ, ଆଡୋଃ ଇନିଜାଃ ମୋଚା ଏତେ ବାରାନ୍ ପାଡ଼୍ ଧାର୍ କାନ୍ ଲେସେର୍ ତାଲ୍‍ୱାର୍ ଅଡୋଙ୍ଗଅଃ ତାଇନା। ଇନିଜାଃ ମେଏଃମୁହାଡ଼୍ ନେକା ଜୁଲୋଃ ତାଇକେନା, ଜେଲେକା ତିକିନ୍ ଶିଙ୍ଗି ଇମ୍ତାରାଃ ଶିତୁମ୍ ଚାମ୍‍କାଅଃୱା। ଚିମ୍ତା ଇଙ୍ଗ୍ ଇନିଃକେ ନେଲ୍ କିଜାଇଙ୍ଗ୍ ଦୋ ଇନିଜାଃ କାଟା ରେ ଗୋଏଃକାନ୍ ଲେକାଇଙ୍ଗ୍ ଉୟୁଃଜାନା। ଇନିଃ ଇଙ୍ଗ୍ଆଃ ରେ ଆଜାଃ ଜୋମ୍ ତିଈ ମାଣ୍ତାଅ କେତେ କାଜିକେଦାଏ, “ଆଲୋମ୍ ବୋରୋୟା; ଇଙ୍ଗ୍ ସିଦା ଆଡୋଃ ତାୟୋମ୍ ରେନିଃ ଆଡୋଃ ଜୀହିଃ ଗିୟାଇଙ୍ଗ୍; ଇଙ୍ଗ୍ ଗୋଏଃ ଲେନାଇଙ୍ଗ୍, ଆଡୋଃ ନାଆ ନେଲେମ୍ ଇଙ୍ଗ୍ ଜାନାଓ-ଜାନାଓ ଲାଗିନ୍ ଜୀହିଃ ମେନାଇଙ୍ଗ୍; ଆଡୋଃ ଗୋନୋଏଃ ହାର୍ ପାତାଲ୍ ରାଃ ଚାଭି ଇଙ୍ଗ୍ ତାଃ ରେୟା। ଏନାମେନ୍ତେ ଅକନ୍ କାଜିକୋ ଆମ୍ ନେଲ୍ କେଦାମ୍ ଆଡୋଃ ଅକନ୍ କାଜିକୋ ହୋବାଅଃ ତାନା ଆଡୋଃ ଅକନ୍ କାଜିକୋ ନେୟାରାଃ ତାୟୋମ୍ତେ ହୋବାଅଃ ରାଃ ମେନାଃ, ଏନା ସବେନାଃ କୋକେ ଅଲେମ୍। ମାନେ ଏନ୍ ସାତ୍ ଇପିଲ୍ କୋୱାଃ ଉକୁକାନ୍ କାଜି ଅକନାଃ ଆମ୍ ଇଙ୍ଗ୍ଆଃ ଜୋମ୍ ତିଈ ରେ ନେଲ୍ ଲେଦାମ୍, ଆଡୋଃ ଏନ୍ ସାତ୍ ସୋନା ରାଃ ମାସ୍କାଲ୍ ଖୁଣ୍ଟୁ କୋରାଃ ଉକୁକାନ୍ କାଜି: ଏନ୍ ସାତ୍ ଇପିଲ୍ କୋ ସାତ୍ କାଲିସିୟା କୋୱାଃ ସାନ୍ଦେଶ୍ ଏହେମ୍ ନିଈ କୋ ତାନ୍‍କୋ, ଆଡୋଃ ଏନ୍ ସାତ୍ ମାସ୍କାଲ୍ ଖୁଣ୍ଟୁ କୋ ସାତ୍ କାଲିସିୟା ତାନ୍‍କୋ।” ଇଫିସୁସ୍ ସାହାର୍ ରାଃ କାଲିସିୟା ରେନ୍ ସାନ୍ଦେଶ୍ ଏହେମ୍ ନିଈକେ ନେୟା ଅଲେମ୍: “ଅକନିଃ ସାତ୍ ଇପିଲ୍ କୋକେ ଆଜାଃ ଜୋମ୍ ତିଈ ରେ ସାବାକାଦାଏ, ଆଡୋଃ ସୋନା ରାଃ ସାତ୍ ମାସ୍କାଲ୍ ଖୁଣ୍ଟୁ କୋ ଥାଲା ରେ ସେନ୍ ବାଡ଼ା ତାନାଏ, ଇନିଃ ନେୟା କାଜିତାନାଏ ଚି, ଇଙ୍ଗ୍ ଆମାଃ କାମି, ଆଡୋଃ ଆମାଃ ପାରିଶ୍ରାମ୍, ଆଡୋଃ ଆମାଃ ସାହାତିଙ୍ଗ୍ କେ ସାରିୟାଇଙ୍ଗ୍; ଆଡୋଃ ନେୟା ହ ଚି ଆମ୍ ଖାରାପ୍ ହୋଡ଼ୋକୋକେ ନେଲ୍ କାମ୍ ସାହାତିଙ୍ଗ୍ ଧାଡ଼ିକୋୱା, ଆଡୋଃ ଅକନ୍‍କୋ ଆପାନ୍ କେ କୁଲାକାନ୍ ଚେଲା ମେନ୍ତେ କାଜିୟୋଃ ତାନାକୋ, ହାର୍ ନାହାଲାକୋ, ଇନ୍‍କୁକେ ଆମ୍ ଆଟ୍‍କାର୍ ଉରୁମ୍ କେତେ ହିହିଡ଼୍‍କୋ ମେନ୍ତେ ନାମ୍ କେଃକୋୱାମ୍। ଆମ୍ ସାହାତିଙ୍ଗ୍ ତାନାମ୍, ଆଡୋଃ ଇଙ୍ଗ୍ଆଃ ନୁତୁମ୍ ଲାଗିନ୍ ଦୁକୁ ସାହାଅ-ସାହାଅ କେତେ କାମ୍ ଲାଗାକାନା। ମେନ୍ଦୋ ଇଙ୍ଗ୍ ଆମାଃ ମିୟାଃ କାଜିତେ କାଇଙ୍ଗ୍ ସୁକୁଅଃତାନା ଚି ଆମ୍ ଆମାଃ ସିଦା ଲେକା ଦୁଲାଡ଼୍ କେ ବାଗେ କାଦାମ୍। ଏନାଲାଗିନ୍ତେ ପାହୋମେମ୍ ଚି ଆମ୍ କୋତାଃ ଏତେ ଉୟୁଃ କାନାମ୍, ଆଡୋଃ ପାପ୍ କାମି ବାଗେ ମେ ଆଡୋଃ ସିଦା ଲେକାଗି କାମିମେ। ଆଗାର୍ ଆମ୍ ପାପ୍ କାମି କାମ୍ ବାଗେୟା, ଏଣ୍ଡେ ଇଙ୍ଗ୍ ଆମ୍ ତାଃ ହିଜୁଃକେତେ ଆମାଃ ମାସ୍କାଲ୍ ଖୁଣ୍ଟୁ କେ ଆଜାଃ ଜାଗା ଏତେ ଆତୋମ୍ ତାଃଇଙ୍ଗ୍। ମେନ୍ଦୋ ହାଁ, ଆମ୍ ରେ ନେ କାଜିଦୋ ମେନାଃ ଚି ଆମ୍ ନିକୁଲାଇତାନ୍ କୋୱାଃ କାମି କୋକେ ହିଲାଙ୍ଗ୍ କୋ ତାନାମ୍। ଅକଏକୋକେ ଇଙ୍ଗ୍ ହଗି ହିଲାଙ୍ଗ୍ କୋ ତାନାଇଙ୍ଗ୍। ଅକେୟାଃ ଲୁତୁର୍ ମେନାଃ ଇନିଃ ଆୟୁମେଚାଏ ଚି ପାବିତାର୍ ଆତ୍ମା କାଲିସିୟା କୋତେ ଚିନାଃ କାଜି ତାନାଏ। ଅକଏ ଜିତାଅୱାଏ, ଇଙ୍ଗ୍ ଇନିଃକେ ଏନ୍ ଜୀଦାନ୍ ରାଃ ଦାରୁ ଏତେ ଅକନାଃ ପାର୍ମେଶ୍ଵାର୍ ରାଃ ସିର୍ମାଦିଶୁମ୍ ରେୟାଃ ବାଗିଚା ରେ ମେନାଃ, ଯଅ ଜୋମେ ଲାଗିନ୍ ଏମାଇୟାଇଙ୍ଗ୍।” ସ୍ମୁର୍‍ନା ରାଃ କାଲିସିୟା ରେନ୍ ସାନ୍ଦେଶ୍ ଏହେମ୍ ନିଈକେ ନେୟା ଅଲେମ୍: ଅକନିଃ ସିଦା ଆଡୋଃ ତାୟୋମ୍ ରେନିଃ ତାନିଃ, ଅକଏ ଗୋଏଃ ଲେନ୍ତାଇନାଏ ଆଡୋଃ ଜୀହିଃ ରୁଆଡ଼୍ କାନାଏ, ଇନିଃ ନେୟା କାଜି ତାନାଏ ଚି, ଇଙ୍ଗ୍ ଆମାଃ କାଲ୍‍ପାଅନ୍ କେ ଆଡୋଃ ଗାରିବ୍‍କାନ୍ କେ ସାରିୟାଇଙ୍ଗ୍ (ମେନ୍ଦୋ ଆମ୍ କିଶାଣ୍ ତାନ୍‍ମେ), ଆଡୋଃ ଅକନ୍ ହୋଡ଼ୋକୋ ଆକୋ ଆପାନ୍ କେ ୟାହୁଦୀ କାଜିୟୋଃ ତାନାକୋ ଆଡୋଃ ନାହାଲାକୋ, ମେନ୍ଦୋ ଶାଏତାନ୍ ରାଃ ଦାଲ୍ ରେନ୍ ତାନ୍‍କୋ, ଇନ୍‍କୁୱାଃ ନିନ୍ଦା ବାକାଣ୍ କେହ ସାରିତାନିଙ୍ଗ୍। ଅକନ୍ ଦୁକୁ ଆମ୍‍କେ ସାହାତିଙ୍ଗ୍ ହୋବାୱାଃ, ଏନାକେ ଆଲୋମ୍ ବୋରୋୟା। ଚିୟାଃଚି ନେଲିପେ, ଶାଏତାନ୍ ଆପେ କୋଏତେ ଚିମିନାଙ୍ଗ୍ କୋକେ ଜେହେଲ୍ ଅଡ଼୍ଆଃ ରେ ଆଦେର୍ ରାଃ ଚେତାନ୍ ରେ ମେନାଇଜା ଏନାତେ ଆପେ ପାର୍ଖାଅଃ ୱାପେ; ଆଡୋଃ ଆପେକେ ଦାଶ୍ ଦିନ୍ ସାନ୍ ସାତାଅ ସାହାତିଙ୍ଗ୍ ହୋବାୱା। ଜୀଉ ସେନୋଃ ସାନ୍ତେ ବିଶ୍ୱାସେ ଲେକାନିଃ ତାଇନ୍ ମେ, ଏଣ୍ଡେ ଇଙ୍ଗ୍ ଆମ୍‍କେ ଜୀଦାନ୍ ରାଃ ମୁକୁଟ୍ ଏମାମେୟାଇଙ୍ଗ୍। ଅକେୟାଃ ଲୁତୁର୍ ମେନାଃ ଇନିଃ ଆୟୁମେଚାଏ ଚି ପାବିତାର୍ ଆତ୍ମା କାଲିସିୟାକୋକେ ଚିନାଃ କାଜି ତାନାଏ। ଅକଏ ଜିତାଅୱାଏ, ଇନିଃକେ ଏଟାଃ ଗୋନୋଏଃ ତେ ହାନି କାସେଟେରା। ପିର୍ଗାମୁମ୍ ସାହାର୍ ରାଃ କାଲିସିୟା ରେନ୍ ସାନ୍ଦେଶ୍ ଏହେମ୍ ନିଈକେ ନେୟା ଅଲେମ୍: “ଅକନିଃତାଃ ବାରାନ୍ ପାଡ଼୍ ଧାର୍ ହାର୍ ଲେସେରାକାନ୍ ତାଲ୍‍ୱାର୍ ମେନାଃ, ଇନିଃ ନେୟା କାଜି ତାନାଏ ଚି, ଇଙ୍ଗ୍ ନେୟା ସାରିୟାଇଙ୍ଗ୍ ଚି, ଆମ୍ ଏନ୍ତାଃ ତାଇନ୍ ତାନାମ୍ ଅକ୍ତାଃରେ ଶାଏତାନ୍ ରାଃ ସିଂହାସାନ୍ ମେନାଃ; ଆମ୍ ଇଙ୍ଗ୍ଆଃ ନୁତୁମ୍ ରେ ବାଇକେତେ ତାଇନୋଃ ତାନାମ୍, ଆଡୋଃ ଇଙ୍ଗ୍ଆଃ ରେ ବିଶ୍ଵାସ୍ ରିକା ଲାଗିନ୍ତେ ଏନ୍ ହୁଲାଙ୍ଗ୍ କୋରେ ହଗି ତାୟୋମ୍ କାମ୍ ରୁଆଡ଼୍ ଜାନା ଅକଣ୍ତେରେ ଇଙ୍ଗ୍ଆଃ ବିଶ୍ୱାସେ ଲେକାନିଃ ଗୋୱା ଆନ୍ତିପାସ୍, ଆପେୟାଃ ଥାଲା ରେ ଏନ୍ ଜାଗା ରେ ଗୋଏଃ ରିକାଜାନାଏ ଅକତାଃରେ ଶାଏତାନ୍ ତାଇନୋଃୱାଏ। ମେନ୍ଦୋ ଇଙ୍ଗ୍ ଆମାଃ ମିୟାଃ ବାରିୟା କାଜିତେ କାଇଙ୍ଗ୍ ସୁକୁଅଃତାନା, ଚିୟାଃଚି ଆମାଃ ନେତାଃ ରେ ଚିମିନାଙ୍ଗ୍ ନେକା ମେନାକୋୱା, ଅକନ୍ କୋ ବିଲାମ୍ ନାବୀ ରାଃ ଶିଖାଅ କେ ମାନାତିଙ୍ଗ୍ ତାନାକୋ, ଅକନିଃ ବାଲାକ୍ ରାଜା କେ ଇସ୍ରାଏଲୀକୋ ଚିଲ୍‍କାତେ ପାର୍ମେଶ୍ଵାର୍ ଚେତାନ୍ ରେ ବିଶ୍ଵାସ୍ ବାଗେ ୟାକୋ ଏନ୍ତେ ଇନ୍‍କୁ ମୂର୍ତି କୋୱାଃ ନୁତୁମ୍ ରେ ରାକାବାକାନ୍ ଜିନିଷ୍‍କୋକେ ଜୋମେୟାକୋ ଆଡୋଃ ବ୍ୟାଭିଚାର୍ ୟାକୋ ଏନା ଶିଖାଅ କେଦାଏ। ଏନ୍‍ଲେକାଗି ଆମାଃ ନେତାଃ ରେ ଚିମିନାଙ୍ଗ୍ କୋ ମେନାକୋୱା, ଅକନ୍‍କୋ ନିକୁଲାଇତାନ୍ କୋୱାଃ ଶିଖାଅ କେ ମାନାତିଙ୍ଗ୍ ତାନାକୋ। ଏନାମେନ୍ତେ ପାପ୍ କାମି ବାଗେ ମେ, କାରେଦୋ ଇଙ୍ଗ୍ ଆମ୍ ତାଃ ସେକାଡ଼୍ ଗି ହିଜୁଃକେତେ ଇଙ୍ଗ୍ଆଃ ମୋଚା ରାଃ ତାଲ୍‍ୱାର୍ ତେ ଇନ୍‍କୁ ଲୋଃ ଲାଡ଼ାଇ ୟାଇଙ୍ଗ୍। ଅକେୟାଃ ଲୁତୁର୍ ମେନାଃ ଇନିଃ ଆୟୁମେଚାଏ ଚି ପାବିତାର୍ ଆତ୍ମା କାଲିସିୟାକୋକେ ଚିନାଃ କାଜି ତାନାଏ। ଅକଏ ଜିତାଅୱାଏ, ଇନିଃକେ ଇଙ୍ଗ୍ ଉକୁକାନ୍ ମାନ୍ନା ଏତେ ଇନିଃକେ ଏମାଇୟାଇଙ୍ଗ୍, ଆଡୋଃ ଇନିଃକେ ମିୟାଃ ପୁଣ୍ଡୀ ଦିରି ହଗି ଏମାଇୟାଇଙ୍ଗ୍; ଆଡୋଃ ଏନ୍ ଦିରି ରେ ମିୟାଃ ନୁତୁମ୍ ଅଲାକାନ୍ ତାଇନୋଃୱା, ଏନାଦୋ ନାମେନିଃ କେ ବାଗିକେତେ ଜେତାଏ କାକୋ ସାରିୟା।” ଥୁୱାଥିରା ସାହାର୍ ରାଃ କାଲିସିୟା ରେନ୍ ସାନ୍ଦେଶ୍ ଏହେମ୍ ନିଈକେ ନେୟା ଅଲେମ୍: ପାର୍ମେଶ୍ଵାର୍ ରାଃ ହୋନ୍ ଅକନିଜାଃ ମେଏଃ ସେଙ୍ଗେଲ୍ ରାଃ ଯୁନୁଲ୍ ଲେକା, ଆଡୋଃ ଅକନିଜାଃ କାଟା ଜୁଲ୍ ସାଫାକାନ୍ ବୁଗିନ୍ ପିତାଲ୍ ଲେକା ମେନାଃ, ଇନିଃ ନେୟା କାଜି ତାନାଏ ଚି, ଇଙ୍ଗ୍ ଆମାଃ କାମି କୋକେ, ଆମାଃ ଦୁଲାଡ଼୍ ଆଡୋଃ ବିଶ୍ଵାସ୍ ଆଡୋଃ ସେୱା ଆଡୋଃ ସାହାତିଙ୍ଗ୍, କେ ସାରିୟାଇଙ୍ଗ୍ ଆଡୋଃ ନେୟା ହଗି ଚି ଆମାଃ ସିଦା ରାଃ କାମିକୋ ହେତେ ହ ନାଆ ରାଃ କାମି ବାଢ଼ାଅ କେତେ ମେନାଃ। ମେନ୍ଦୋ ଇଙ୍ଗ୍ ଆମାଃ ମିୟାଃ କାଜିତେ କାଇଙ୍ଗ୍ ସୁକୁଅଃତାନା ଚି, ଆମ୍ ଏନ୍ କୁଡ଼ି ଇଜେବେଲ୍ କେ ତାଇନ୍ ଇଚାଇତାନାମ୍ ଅକନିଃ ଆଏଃ ଆପାନ୍ କେ ନାବୀ ତାନ୍‍କିନ୍ ମେନ୍ତେ ଉଦୁବେନ୍ ତାନାଏ, ଆଡୋଃ ଇଙ୍ଗ୍ଆଃ ଦାସୀକୋକେ ବ୍ୟାଭିଚାର୍ ଲାଗିନ୍ ଆଡୋଃ ମୂର୍ତିକୋୱାଃ ଆୟୁର୍ ରେ ରାକାବାକାନ୍ ଜିନିଷ୍‍କୋକେ ଜୋଜୋମ୍ ଶିଖାଅ କେତେ ବେଦାବାଡ଼ାକୋ ତାନାଏ। ଇଙ୍ଗ୍ ଇନିଃକେ ପାପ୍ କାମି ବାଗେ କେତେ ସାଙ୍ଗିନୋଃ କାଏ ମେନ୍ତେ ସାମାୟ୍ ଏମ୍ ଲିଜାଇଙ୍ଗ୍, ମେନ୍ଦୋ ଇନିଃ ଆଜାଃ ବ୍ୟାଭିଚାର୍ କେ କାଏ ବାଗେ ସାନାଙ୍ଗ୍ ତାନାଏ। ନେଲେମ୍, ଇଙ୍ଗ୍ ଇନିଃକେ ବେମାର୍ ରେ ଉୟୁଗିୟାଇଙ୍ଗ୍; ଆଡୋଃ ଅକନ୍‍କୋ ଇନିଃ ଲୋଃ ବ୍ୟାଭିଚାର୍ ତାନାକୋ ଆଗାର୍ ଇନ୍‍କୁ ହଗି ଏନ୍ ଲେକାନ୍ ପାପ୍ କାମିକୋକେ ବାଗି କାକୋ ସାନାଙ୍ଗ୍ ତାନା ରେଦୋ ଇଙ୍ଗ୍ ଇନ୍‍କୁକେ ମାରାଙ୍ଗ୍ କାଲ୍‍ପାଅଃ ରେଙ୍ଗ୍ ଉୟୁଃକୋୱା। ଇଙ୍ଗ୍ ଆଏଃକେ ଅତୋଙ୍ଗ୍ ତାନ୍ କୋକେ ଗୋଏଃ କୋୱାଇଙ୍ଗ୍; ଏଣ୍ତେ ସବେନ୍ କାଲିସିୟାକୋ ରେନ୍ କୋ ସାରିକେୟାକୋ ଚି ହିର୍‍ଦାୟ୍ ହାର୍ ମୋନ୍ କେ ଆଟ୍‍କାର୍ ଉରୁମ୍ ନିଈ ଇଙ୍ଗ୍ ଗି ତାନାଇଙ୍ଗ୍, ଆଡୋଃ ଇଙ୍ଗ୍ ଆପେ କୋଏତେ ସବେନ୍ ମିପୀହୋଡ଼୍ କେ ଆପେୟାଃ କାମି କୋରାଃ ଲେକାତେ ବାଦ୍‍ଲା ଏମାପେୟାଇଙ୍ଗ୍। ମେନ୍ଦୋ ଆପେ ଥୁୱାଥିରା ସାହାର୍ ରାଃ ସାରେଜାକାନ୍ ହୋଡ଼ୋକୋକେ, ଚିମିନ୍ କୋ ନେ ଶିଖାଅ କେ କାକୋ ମାନାତିଙ୍ଗ୍ ତାନା ଆଡୋଃ ଏନ୍ କାଜିକୋକେ ଅକନାଃକେ ଶାଏତାନ୍ ରାଃ ଈକିର୍ କାଜିକୋ କାଜିୟାକୋ ଏନା କାକୋ ସାରିୟା, ଆପେକେ ନେୟା କାଜିପେ ତାନିଙ୍ଗ୍ ଚି ଇଙ୍ଗ୍ ଆପେ ରେ ଆଡୋଃ ହାମ୍ବାଲ୍ କାଇଙ୍ଗ୍ ଏମାପେୟା। ମେନ୍ଦୋ ହାଁ, ଅକନାଃକୋ ଆପେତାଃ ରେ ମେନାଃ ଏନାକୋକେ ଇଙ୍ଗ୍ଆଃ ହିଜୁଃ ସାନ୍ତେ ସାବାକାପେ। ଅକଏ ଜିତାଅୱାଏ ଆଡୋଃ ଇଙ୍ଗ୍ଆଃ କାମିକୋ ଲେକା ଟୁଣ୍ଡୁ ସାନ୍ ରିକା କୋତେୟାଏ, ଇଙ୍ଗ୍ ଇନିଃକେ ଜାତି-ଜାତି ରେନ୍ ହୋଡ଼ୋକୋୱାଃ ରେ ଆଧିକାର୍ ଏମାକୋୱାଇଙ୍ଗ୍, ଆଡୋଃ ଇନିଃ ମେଣେଏଃ ରାଃ ରାଇଜ୍ ସଟାକେ ଇଦିତାନ୍ ଲୋଃ ଇନ୍‍କୁ ଚେତାନ୍ ରେ ରାଇଜ୍ ୟାଏ, ଜେଲେକା କୁମ୍ଭାର୍ ରାଃ ହାସା ରେୟାଃ ଚାଟୁ ରାପୁଃ କେନୋଗା: ଇଙ୍ଗ୍ ହଗି ଏନ୍‍ଲେକା ଆଧିକାର୍ ଇଙ୍ଗ୍ଆଃ ଆପୁ ତାଃତେ ନାମ୍ କାଦାଇଙ୍ଗ୍; ଆଡୋଃ ଇଙ୍ଗ୍ ଇନିଃକେ ସେତାଃ ରାଃ ଇପିଲ୍ ଏମାଇୟାଇଙ୍ଗ୍। ଅକେୟାଃ ଲୁତୁର୍ ମେନାଃ ଇନିଃ ଆୟୁମେଚାଏ ଚି ପାବିତାର୍ ଆତ୍ମା କାଲିସିୟା କୋକେ ଚିନାଃ କାଜି ତାନାଏ। ସାର୍‍ଦିସ୍ ସାହାର୍ ରେନ୍ କାଲିସିୟା ରାଃ ସାନ୍ଦେଶ୍ ଏହେମ୍ ନିଈକେ ନେୟା ଅଲେମ୍: “ଅକନିଃ ତାଃରେ ପାର୍ମେଶ୍ଵାର୍ ରାଃ ସାତ୍‍ଠୁ ଆତ୍ମାକୋ ଆଡୋଃ ସାତ୍‍ଠୁ ଇପିଲ୍ କୋ ମେନାଃ, ଇନିଃ ନେୟା କାଜିତାନାଏ ଚି ଇଙ୍ଗ୍ ଆମାଃ କାମି କୋକେ ସାରିୟାଇଙ୍ଗ୍: ଆମ୍ ଜୀହିଃ ମେନାମା ମେନ୍ତେ ଦୋ କାଜିୟୋଃ ତାନାମ୍, ମେନ୍ଦୋ ଗୋଜା କାନାମ୍। ଏୟୋନୋଃମେ! ଆଡୋଃ ଏନ୍ ଜିନିଷ୍‍କୋକେ ଅକନାଃ ସାରେଜାକାନା ହାର୍ ଅକନାଃ ଗୋଜୋଃ ଲେକା ମେନାଃ, ଏନାକୋକେ ପୋକ୍ତା ରିକାଏମେ; ଚିୟାଃଚି ଇଙ୍ଗ୍ ଆମାଃ ଜେତାନ୍ କାମି କୋକେ ପାର୍ମେଶ୍ଵାର୍ ରାଃ ନାଡ଼େଏ ରେ ପୁରା କାଇଙ୍ଗ୍ ନାମ୍ କାଦା। ଏନାମେନ୍ତେ ପାହୋମେମେ, ଚି ଆମ୍ ଚିଲ୍‍କା ଶିଖାଅ ଲେନାମ୍ ଆଡୋଃ ଆୟୁମ୍ ଲେଦାମ୍, ହାର୍ ଏନା କୋକେ ମାନାତିଙ୍ଗ୍ ଏମ୍, ଆଡୋଃ ପାପ୍ କାମି ବାଗେ ମେ। ଆଗାର୍ ଆମ୍ ଏୟୋନ୍‍କାନ୍ କାମ୍ ତାଇନୋଃୱା ଏଣ୍ଡେ ଇଙ୍ଗ୍ କୁମ୍ଡ଼ୁ ଲେକା ହିଜୁଃ କେନୋଗାଇଙ୍ଗ୍, ଆଡୋଃ ଆମ୍ ଚିଉଲା ହ କାମ୍ ସାରିଧାଡ଼ିୟା ଚି ଇଙ୍ଗ୍ ଅକୋଇମ୍ତାଙ୍ଗ୍ ଆମ୍ ତାଃ ହିଜୁଃ କେନୋଗାଇଙ୍ଗ୍। ମେନ୍ଦୋ ହାଁ, ସାର୍‍ଦିସ୍ ସାହାର୍ ରେ ଆମ୍ତାଃ ଚିମିନାଙ୍ଗ୍ ନେକା ହୋଡ଼ୋକୋ ମେନାକୋୱା ଅକନ୍‍କୋ ଆକୋୱାଃ-ଆକୋୱାଃ ଲିଜାଃ କୋକେ କାକୋ ଆଶୁଦ୍ଧ୍ ରିକାକାଦା, ଇନ୍‍କୁ ପୁଣ୍ଡୀ ଲିଜାଃ ତୁସିଙ୍ଗ୍ କେତେ ଇଙ୍ଗ୍ ଲୋଃ ହୋନୋର୍ ୟାକୋ, ଚିୟାଃଚି ଇନ୍‍କୁ ନେୟା ନାମେ ଲେକାନ୍ କୋ ତାନ୍‍କୋ। ଅକନିଃ ଜିତାଅୱାଏ ଇନିଃକେ ନେକାଗି ପୁଣ୍ଡୀ ଲିଜାଃ ତୁସିଙ୍ଗ୍ ଅଗା, ଆଡୋଃ ଇଙ୍ଗ୍ ଇନିଜାଃ ନୁତୁମ୍ ଜୀଦାନ୍ ରେୟାଃ କିତାବ୍ ଏତେ ଚିଉଲା ହ କାଇଙ୍ଗ୍ ହାଦେୟା; ମେନ୍ଦୋ ଇନିଜାଃ ନୁତୁମ୍ ଇଙ୍ଗ୍ଆଃ ଆପୁ ଆଡୋଃ ଆଜାଃ ସିର୍ମାଦାସୀ କୋୱାଃ ସାମାନାଙ୍ଗ୍ ରେ ମାନାତିଙ୍ଗ୍ କେୟାଇଙ୍ଗ୍। ଅକେୟାଃ ଲୁତୁର୍ ମେନାଃ ଇନିଃ ଆୟୁମେଚାଏ ଚି ପାବିତାର୍ ଆତ୍ମା କାଲିସିୟା କୋକେ ଚିନାଃ କାଜି ତାନାଏ।” ଫିଲାଦେଲ୍‍ଫିୟା ସାହାର୍ ରେନ୍ କାଲିସିୟା ରାଃ ସାନ୍ଦେଶ୍ ଏହେମ୍ ନିଈକେ ନେୟା ଅଲେମ୍: “ଅକନିଃ ପାବିତାର୍ ହାର୍ ସାର୍ତି ତାନିଃ, ଆଡୋଃ ଅକନିଃ ଦାଉଦ୍ ରାଃ ଚାଭି ମାଣ୍ଡାଅ ୟାଏ, ଅକନିଜାଃ ଖଲାଅ କାନ୍‍କେ ଜେତାଏ ବାନ୍ଦ୍ କାଏ ଧାଡ଼ିୟା ଆଡୋଃ ବାନ୍ଦ୍ କାନ୍‍କେ ଜେତାଏ ଖଲାଅ କାଏ ଧାଡ଼ିୟା, ଇନିଃ ନେୟା କାଜି ତାନାଏ ଚି, ଇଙ୍ଗ୍ ଆମାଃ କାମି କୋକେ ସାରିୟାଇଙ୍ଗ୍; ନେଲେମ୍, ଇଙ୍ଗ୍ ଆମାଃ ନାଡ଼େଏ ରେ ମିୟାଃ ନିଜାକାନ୍ ଦୁହାର୍ ମାଣ୍ଡାଅ କାଦିଙ୍ଗ୍, ଅକନାଃକେ ଜେତାଏ ବାନ୍ଦ୍ କାଏ ଧାଡ଼ିୟା; ଆମାଃ ପେଡ଼େଏ କାଟିଃ କାନ୍ ଗି ଦୋ ମେନାଃ, ଏଣ୍ଡେ ହ ଆମ୍ ଇଙ୍ଗ୍ଆଃ ବାଚାନ୍ କେ ମାନାତିଙ୍ଗ୍ କେଦାମ୍ ଆଡୋଃ ଇଙ୍ଗ୍ଆଃ ନୁତୁମ୍ କେ କାମ୍ ମାନା କେଦା। ନେଲେମ୍, ଇଙ୍ଗ୍ ଶାଏତାନ୍ ରାଃ ଏନ୍ ମାଣ୍ଡ୍‍ଲୀ କୋକେ ଆମାଃ ଆଧିକାର୍ ରେ ଜିମା ତାକୋୱାଇଙ୍ଗ୍ ଅକନ୍‍କୋ ୟାହୁଦୀ କାଜିୟୋଃ ତାନାକୋ, ମେନ୍ଦୋ ନାହାଲାକୋ ହାର୍ ଲୋଗୋତାନାକୋ, ନେଲେମ୍ ଇଙ୍ଗ୍ ନେକା ବାଇକୋୱାଇଙ୍ଗ୍ ଚି ଇନ୍‍କୁ ହିଜୁଃକେତେ ଆମାଃ କାଟାସୁବା ରେ ଉୟୁଗାକୋ, ଆଡୋଃ ନେୟା ସାରିକେୟାକୋ ଚି ଇଙ୍ଗ୍ ଆମାଃ ଲୋଃ ଦୁଲାଡ଼୍ ମାଣ୍ଡାଅ କାଦିଙ୍ଗ୍। ଆମ୍ ଇଙ୍ଗ୍ଆଃ ସାହାତିଙ୍ଗ୍ ରାଃ ବାକାଣ୍ କେ ମାଣ୍ଡାଅ କାଦାମ୍, ଏନାମେନ୍ତେ ଇଙ୍ଗ୍ ହ ଆମ୍‍କେ ପାରୀକ୍ଷା ରାଃ ଏନ୍ ସାମାୟ୍ ରେ ବାଚାଓ ମେୟାଇଙ୍ଗ୍ ଅକନାଃ ଅତେଦିଶୁମ୍ ରେ ତାଇନ୍ ତାନ୍ କୋୱାଃ ପାରୀକ୍ଷା ଲାଗିନ୍ତେ ଗୋଟା ଅତେଦିଶୁମ୍ ରେ ହିଜୁଃ ରାଃ ମେନାଃ। ଇଙ୍ଗ୍ ସେକାଡ଼୍ ଗି ହିଜୁଃ ତାନିଙ୍ଗ୍; ଅକନାଃ କୋ ଆମ୍ତାଃ ରେ ମେନାଃ ଏନାକୋ ସାବାକାମ୍ ଚି ଜେତାଏ ଆମାଃ ମୁକୁଟ୍ କେ ଆଲୋ ରେଜେ ଚାଏ। ଅକଏ ଜିତାଅୱାଏ ଇନିଃକେ ଇଙ୍ଗ୍ ଇଙ୍ଗ୍ଆଃ ପାର୍ମେଶ୍ଵାର୍ ରାଃ ମାନ୍ଦିର୍ ରେ ମିୟାଃ ଖୁଣ୍ଟୁ ବାଇୟାଇଙ୍ଗ୍, ହାର୍ ଇନିଃ ଆଡୋଃ ଚିଉଲା ହ ବାହାରି କାଏ ଅଡୋଙ୍ଗ୍ ଅଗାଏ; ଆଡୋଃ ଇଙ୍ଗ୍ ଇଙ୍ଗ୍ଆଃ ପାର୍ମେଶ୍ଵାର୍ ରାଃ ନୁତୁମ୍ ହାର୍ ଇଙ୍ଗ୍ଆଃ ପାର୍ମେଶ୍ଵାର୍ ରାଃ ସାହାର୍ ମାନେ ନାୱା ୟୀରୁଶାଲେମ୍ ରାଃ ନୁତୁମ୍, ଅକନାଃ ଇଙ୍ଗ୍ଆଃ ପାର୍ମେଶ୍ଵାର୍ ରାଃ ସିର୍ମାଦିଶୁମ୍ ତାଃଏତେ ଆଡ଼୍‍ଗୁନ୍ ରାଃ ମେନାଃ, ଆଡୋଃ ଇଙ୍ଗ୍ଆଃ ନାୱା ନୁତୁମ୍ ଏଣ୍ତେ ରେ ଅଲେୟାଇଙ୍ଗ୍। ଅକେୟାଃ ଲୁତୁର୍ ମେନାଃ ଇନିଃ ଆୟୁମ୍ ଲେଚାଏ ଚି ପାବିତାର୍ ଆତ୍ମା କାଲିସିୟାକୋକେ ଚିନାଃ କାଜି ତାନାଏ।” ଲୌଦିକିୟା ସାହାର୍ ରେନ୍ କାଲିସିୟା କେ ସାନ୍ଦେଶ୍ ଏହେମ୍ ନିଈକେ ନେୟା ଅଲେମ୍: “ଅକନିଃ ଆମୀନ୍ ଆଡୋଃ ବିଶ୍ୱାସେ ଲେକାନିଃ ଆଡୋଃ ସାର୍ତି ଗୋୱା ତାନିଃ, ହାର୍ ପାର୍ମେଶ୍ଵାର୍ ରାଃ ସିର୍ଜାଅକାନ୍ ରାଃ ଏନେଟେଃ କାଜି ତାନିଃ, ଇନିଃ ନେୟା କାଜିତାନାଏ ଚି, ଇଙ୍ଗ୍ ଆମାଃ କାମି କୋକେ ସାରିୟାଇଙ୍ଗ୍ ଚି ଆମ୍ ନାଦୋ ଠାଣ୍ତା ମେନାମା ନାଦୋ ଲୋଲୋ: ବୁଗିନାଃ ହୋବାଅଃ ତେୟାଃ ଚି ଆମ୍ ଠାଣ୍ତା ୟାଦୋ ଲୋଲୋ ତାଇନ୍ ତେମ୍। ଏନାମେନ୍ତେ, ଚିୟାଃଚି ଆମ୍ ଉର୍ଗୁମ୍ ମେନାମେୟା, ନାଦୋ ଠାଣ୍ତା ମେନାମେୟା, ଆଡୋଃ ନାଦୋ ଲୋଲୋ, ଇଙ୍ଗ୍ ଆମ୍‍କେ ଇଙ୍ଗ୍ଆଃ ମୋଚା ଏତେ ଉଷାଡ଼୍ ଅଡୋଙ୍ଗ୍ ମେୟାଇଙ୍ଗ୍। ଆମ୍ କାଜିୟାମ୍ ଚି ଇଙ୍ଗ୍ କିଶାଣ୍ ତାନିଙ୍ଗ୍ ହାର୍ ଧାନ୍ କୋଏତେ ଫେରେଃ କାନାଇଙ୍ଗ୍ ଆଡୋଃ ଇଙ୍ଗ୍‍କେ ଜେତାନ୍ ଜିନିଷ୍‍କୋ ରାଃ ଘାଟି ବାନୋଗା; ଆଡୋଃ ନେୟା କାମ୍ ସାରିୟାମ୍ ଚି ଆମ୍ ସାମାକାନ୍, ଆଡୋଃ ଦୁକୁୱାକାନ୍, ଆଡୋଃ ରେଙ୍ଗେଃତାନ୍, ଆଡୋଃ ଆନ୍ଧା, ଆଡୋଃ ଲିଜାଃ ବାନୋଃ ଲେକାନିଃ ତାନ୍‍ମେ। ଏନାମେନ୍ତେ ଇଙ୍ଗ୍ ଆମ୍‍କେ ରୋଜୋଟ୍ ଏମାମେତାନିଙ୍ଗ୍ ଚି ସେଙ୍ଗେଲ୍ ରେ ସାଫା କାନ୍ ସୋନା ଇଙ୍ଗ୍ଆଃ ତେ କିରିଙ୍ଗ୍ କେମେ ଚି ଆମ୍ କିଶାଣ୍ କେନୋଃମ୍, ପୁଣ୍ଡୀ ଲିଜାଃ ଇଦିକେମ୍ ଏନାତେ ଏନା ତୁସିଙ୍ଗ୍ କେତେ ଆମ୍‍କେ ଆମାଃ ଲିଜାଃ ବାନୋଃ ଲେକାନାଃ ରାଃ ଗିୟୁଃ କାହୋବାୱା, ଆଡୋଃ ଆମାଃ ମେଏଃ ରେ ଲାଗାଅ ଲାଗିନ୍ତେ ମେଏଃରାନୁ ଇଦିକେମ୍ ଏନାତେ ଆମ୍ ନେନେଲ୍ ଧାଡ଼ିୟାମ୍। ଇଙ୍ଗ୍ ଅକନ୍-ଅକନ୍ କୋକେ ଦୁଲାଡ଼୍ କୋୱାଇଙ୍ଗ୍, ଏନ୍ ସବେନ୍ କୋକେ ଏଗେର୍ ଚେତାଓ କୋୱାଇଙ୍ଗ୍; ଆଡୋଃ ଶାଜାଇ ଏମା କୋୱାଇଙ୍ଗ୍; ଏନାମେନ୍ତେ ଉତ୍ସାହି ବାଇୟେନ୍ ମେ ଆଡୋଃ ପାପ୍ କାମି ବାଗେ ମେ। ନେଲେମ୍, ଇଙ୍ଗ୍ ଦୁହାର୍ ତାଃରେ ତିଙ୍ଗୁକାନ୍ ଟୋଃ-ଟୋଃ ତାନିଙ୍ଗ୍; ଆଗାର୍ ଜେତାଏ ଇଙ୍ଗ୍ଆଃ ଷାଡି ଆୟୁମ୍‍କେତେ ଦୁହାର୍ ଖୋଲାଅୟାଏ, ରେଦୋ ଇଙ୍ଗ୍ ଇନିଜାଃ ନାଡ଼େଏ ଭିତାର୍ ହିଜୁଃକେତେ ଇନିଜାଃ ଲୋଃ ଜୋମେ ୟାଇଙ୍ଗ୍ ହାର୍ ଇନିଃ ଇଙ୍ଗ୍ଆଃ ଲୋଃ। ଅକଏ ଜିତାଅୱାଏ ଇଙ୍ଗ୍ ଇନିଃକେ ଇଙ୍ଗ୍ଆଃ ଲୋଃ ଇଙ୍ଗ୍ଆଃ ସିଂହାସାନ୍ ରେ ଦୁବିୟାଇଙ୍ଗ୍, ଜେଲେକା ଇଙ୍ଗ୍ ହ ଜିତାଅ କେତେ ଇଙ୍ଗ୍ଆଃ ଆପୁ ଲୋଃ ଇନିଜାଃ ସିଂହାସାନ୍ ରେ ଦୁବ୍ ଜାନାଇଙ୍ଗ୍। ଅକେୟାଃ ଲୁତୁର୍ ମେନାଃ ଇନିଃ ଆୟୁମ୍ ଲେଚାଏ ଚି ପାବିତାର୍ ଆତ୍ମା କାଲିସିୟା କୋକେ ଚିନାଃ କାଜିତାନାଏ।” ନେ କାଜି କୋରାଃ ତାୟୋମ୍ତେ ଇଙ୍ଗ୍ ଆରିଃ କେଦାଇଙ୍ଗ୍, ଦୋ ଚିନାଃ ନେଲ୍ ତାନିଙ୍ଗ୍ ଚି ସିର୍ମାଦିଶୁମ୍ ରେ ମିୟାଃ ଦୁହାର୍ ନିଜାକାନା, ଆଡୋଃ ଅକନାଃକେ ଇଙ୍ଗ୍ ସିଦା ତୁର୍ହୀ ରାଃ ଆୱାଜ୍ ଲେକା ଇଙ୍ଗ୍ଆଃ ଲୋଃ ବାକାଣ୍ ତାନ୍ ଆୟୁମ୍ ଲେଦାଇଙ୍ଗ୍, ହେନାଗି କାଜିତାନାଏ, “ନେତାଃ ଚେତାନ୍ ହିଜୁଃମେ; ଆଡୋଃ ଇଙ୍ଗ୍ ଏନ୍ କାଜିକୋ ଦେଖାଅମେୟାଇଙ୍ଗ୍, ଅକନାଃକୋ ନେ କାଜି କୋରାଃ ତାୟୋମ୍ତେ ହୋବାଅଃ ଲାଗାତିଙ୍ଗ୍ ମେନାଃ।” ଇମ୍ତାଗି ଇଙ୍ଗ୍ ପାବିତାର୍ ଆତ୍ମା ରେ ହିଜୁଃ ଜାନିଙ୍ଗ୍; ଆଡୋଃ ଚିନାଃ ନେଲ୍ ତାନିଙ୍ଗ୍ ଚି ମିୟାଃ ସିଂହାସାନ୍ ସିର୍ମାଦିଶୁମ୍ ରେ ମାଣ୍ଡାୱା କାନା, ଆଡୋଃ ଏନ୍ ସିଂହାସାନ୍ ରେ ଜେତାଏ ଦୁବା କାନାଏ। ଅକନିଃ ଏଣ୍ତେ ରେ ଦୁବା କାନାଏ ଇନିଃ ୟାଶାବ୍ ହାର୍ ମାଣି ଦିରିକୋ ଲେକା ନେଲୋଃ ତାନାଏ, ଆଡୋଃ ଏନ୍ ସିଂହାସାନ୍ ରାଃ ସବେନ୍ ପାଡ଼୍ ମିୟାଃ ମାର୍କାତ୍ ଲେକା ମିୟାଃ ରିମିଲ୍‍ଧାନୁ ନେଲୋଃ ତାନା। ଏନ୍ ସିଂହାସାନ୍ ରାଃ ସବେନ୍ ପାଡ଼୍ ଚୋବିଶ୍ ଠୁ ସିଂହାସାନ୍ ମେନାଃ; ଆଡୋଃ ଏନ୍ ସିଂହାସାନ୍ କୋରେ ଚୋବିଶ୍ ମାରିହୋଡ଼ୋ କୋ ପୁଣ୍ଡୀ ଲିଜାଃ ତୁସିଙ୍ଗ୍ କେତେ ଦୁବା କାନାକୋ, ଆଡୋଃ ଇନ୍‍କୁୱାଃ ବୋଅ କୋରେ ସୋନା ରାଃ ମୁକୁଟ୍ ମେନାଃ। ଆଡୋଃ ଏନ୍ ସିଂହାସାନ୍ ଏତେ ବିଜ୍‍ଲୀକୋ ହାର୍ ରିମିଲ୍ ଷାଡି ଅଡୋଙ୍ଗ୍ଅଃୱା ଆଡୋଃ ସିଂହାସାନ୍ ନାଡ଼େଏ ରେ ସେଙ୍ଗେଲ୍ ରାଃ ସାତ୍ ଦିୟା ଜୁଲୋଃ ତାନା, ଏନାକୋ ପାର୍ମେଶ୍ଵାର୍ ରାଃ ସାତ୍ ଆତ୍ମାକୋ ତାନାଃ, ଆଡୋଃ ଏନ୍ ସିଂହାସାନ୍ ନାଡ଼େଏ ରେ ମାଣି ଦିରିଲେକା ସାଫା କାଁଚ୍ ରାଃ ସାମୁଦାର୍ ମେନାଃ। ସିଂହାସାନ୍ ରାଃ ଥାଲା ରେ ଆଡୋଃ ସିଂହାସାନ୍ ରାଃ ସବେନ୍ ପାଡ଼୍ ଚାଇର୍ ଝାନ୍ ଜାନ୍ତୁକୋ ମେନାକୋୱା, ଅକନ୍ କୋୱାଃ ଆୟୁର୍ ତାୟୋମ୍ ମେଏଃଗି ମେଏଃକୋ ମେନାଃ। ସିଦା ଜାନ୍ତୁ ନିଈ କୁଲ୍ଲା ଲେକା ମେନାଇଜା, ଆଡୋଃ ଏଟାଃ ନିଈ ବାଛା ଲେକା ମେନାଇଜା, ତିସ୍ରା ଜାନ୍ତୁ ନିଜାଃ ମେଏଃମୁହାଡ଼୍ ହୋଡ଼ ଲେକା ମେନାଃ, ଆଡୋଃ ଚାଉଥା ନିଈ ଆପୀର୍ତାନ୍ ଗିଦି ଲେକା ମେନାଇଜା। ହାର୍ ଏନ୍ ଚାଇର୍ ଝାନ୍ ଜାନ୍ତୁ କୋରାଃ ଛାଅ-ଛାଅ ଆପ୍‍ରୋବ୍ କୋ ମେନାଃ, ଆଡୋଃ ଚାଇରୋ ପାଡ଼୍ ହାର୍ ଭିତାର୍ ମେଏଃଗି ମେଏଃକୋ ମେନାଃ; ଆଡୋଃ ହିନ୍‍କୁ ନିଦା-ଶିଙ୍ଗି ବେଗାର୍ ଆରାମ୍ କେତେ ନେୟା କାଜିତାନ୍ ତାଇକେନାକୋ, “ପାବିତାର୍, ପାବିତାର୍, ପାବିତାର୍ ପ୍ରାଭୁ ପାର୍ମେଶ୍ଵାର୍, ସବେନ୍ ଏତେ ପେଡ଼େଜାନ୍, ଅକନିଃ ତାଇକେନାଏ ଆଡୋଃ ଅକନିଃ ମେନାଇଜା ଆଡୋଃ ଅକନିଃ ହିଜୁଃ ରାଃ ମେନାଇଜା।” ଚିମ୍ତା ଏନ୍ ଜାନ୍ତୁକୋ ଇନିଜାଃ ଅକନିଃ ସିଂହାସାନ୍ ରେ ଦୁବା କାନାଏ, ଆଡୋଃ ଅକନିଃ ଜାନାଓ-ଜାନାଓ ଜାକେଦ୍ ଜୀହିଃ ମେନାଇଜା, ମାନାରାଙ୍ଗ୍ ହାର୍ ମାଇନ୍ ହାର୍ ଧାନ୍ୟାବାଦ୍ ରିକା ୟାକୋ; ଇମ୍ତା ଚୋବିଶ୍ ମାରିହୋଡ଼ୋକୋ ସିଂହାସାନ୍ ରେ ଦୁବାକାନ୍ ନିଜାଃ ନାଡ଼େଏ ରେ ଅବୋରେନାକୋ, ଆଡୋଃ ଇନିଃକେ ଅକନିଃ ଜାନାଓ-ଜାନାଓ ଜାକେଦ୍ ଜୀହିଃ ମେନାଇଜା, ଜୋହାରି ୟାକୋ; ଆଡୋଃ ଇନ୍‍କୁ ଆକୋୱାଃ-ଆକୋୱାଃ ମୁକୁଟ୍ କେ ସିଂହାସାନ୍ ରାଃ ନାଡ଼େଏ ରେ ନେୟା କାଜିତାନ୍ ଲୋଃ ମାଣ୍ଡାଅୟାକୋ, “ହେ ଆବୁୱାଃ ପ୍ରାଭୁ ହାର୍ ପାର୍ମେଶ୍ଵାର୍, ଆମ୍ ଗି ମାନାରାଙ୍ଗ୍ ହାର୍ ମାଇନ୍ ହାର୍ ପେଡ଼େଏ ନାମେ ଲେକାନିଃ ତାନ୍‍ମେ; ଚିୟାଃଚି ଆମ୍ ଗି ସବେନ୍ ଜିନିଷ୍‍କୋକେ ବାଇକାଦାମ୍ ଆଡୋଃ ଏନାକୋ ଆମାଃ ଗି ସାନାଙ୍ଗ୍ ଲେକାତେ ତାଇକେନା ଆଡୋଃ ବାଇଜାନା।” ଅକନିଃ ସିଂହାସାନ୍ ରେ ଦୁବାକାନ୍ ତାଇକେନାଏ, ଇଙ୍ଗ୍ ଇନିଜାଃ ଜୋମ୍ ତିଈ ରେ ମିୟାଃ ପୁଥି ନେଲ୍ କେଦାଇଙ୍ଗ୍ ଏନା ଭିତାର୍ ଆଡୋଃ ବାହାରି ବାରାନ୍ ପାଡ଼୍ ରେ ଅଲାକାନ୍ ତାଇକେନା, ଆଡୋଃ ଏନା ସାତ୍ ମୋହାର୍-ଛାପ୍ ତେ ବାନ୍ଦ୍‍କାନ୍ ତାଇକେନା। ଆଡୋଃ ଇଙ୍ଗ୍ ମିହୋଡ଼୍ ପେଡ଼େଜାନ୍ ସିର୍ମାଦାସୀ କେ ନେଲ୍ କିଜାଇଙ୍ଗ୍ ଇନିଃ କାଉରି ତାନ୍ ଲୋଃ ନେୟା ଉଦୁବ୍ ତାଇକେନାଏ, “ନେ ପୁଥି କେ ଖଲାଅ ଆଡୋଃ ଏନାରାଃ ମୋହାର୍-ଛାପ୍ କୋକେ ରାଡ଼ା ଲେକାନିଃ ଅକଏ ମେନାଇଜା?” ମେନ୍ଦୋ ନାଦୋ ସିର୍ମାଦିଶୁମ୍ ରେ, ନାଦୋ ଅତେ ରେ, ନାଦୋ ଅତେ ରାଃ ଲାଥାର୍ ଏନ୍ ପୁଥି କେ ଖଲାଅ ୟାଦୋ ଏନାକେ ଆରିଃ ଲେକାନିଃ ଜେତାଏ କାଏ ନାମ୍ ଜାନାଏ। ଏନ୍ତେ ଇଙ୍ଗ୍ ମୁରୁକ୍ ଗି ରାଆ କେଦାଇଙ୍ଗ୍, ଚିୟାଃଚି ଏନ୍ ପୁଥି କେ ଖଲାଅ ୟାଦୋ ଏନାକେ ଆରିଃ ଲେକାନିଃ ଜେତାଏ କାଏ ନାମ୍‍ଜାନାଏ। ଏନ୍ତେ ଏନ୍ ମାରିହୋଡ଼ୋକୋ ଏତେ ମିହୋଡ଼୍ ଇଙ୍ଗ୍‍କେ କାଜିକେଦିଙ୍ଗ୍ଆଏ, “ଆଲୋମ୍ ରାଆୟା; ନେଲେମ୍, ୟାହୁଦା ରାଃ କିଲି ରେନ୍ କୋୱାଃ ଏନ୍ କୁଲ୍ଲା ଅକନିଃ ଦାଉଦ୍ ରାଃ ରେହେଃ ତାନିଃ, ଏନ୍ ପୁଥି କେ ଖଲାଅ ଆଡୋଃ ଏନାରାଃ ସାତ୍ ମୋହାର୍-ଛାପ୍ କୋକେ ରାଡ଼ା ଲାଗିନ୍ ଜିତାଅ କାନାଏ।” ଇମ୍ତା ଇଙ୍ଗ୍ ଏନ୍ ସିଂହାସାନ୍ ଆଡୋଃ ଚାଇର୍ ଜାନ୍ତୁ କୋୱାଃ ଆଡୋଃ ଏନ୍ ମାରିହୋଡ଼ୋ କୋୱାଃ ଥାଲା ରେ, ମିୟାଃ ଗୋଏଃ ରିକାଲେନ୍ ଲେକା ମିଣ୍ଡୀହୋନ୍ ତିଙ୍ଗୁକାନ୍ ନେଲ୍ କେଦାଇଙ୍ଗ୍। ଇନିଜାଃ ସାତ୍‍ଠୁ ଦିରିଙ୍ଗ୍ ଆଡୋଃ ସାତ୍‍ଠୁ ମେଏଃ ତାଇକେନା; ନେୟା ପାର୍ମେଶ୍ଵାର୍ ରାଃ ସାତ୍‍ଠୁ ଆତ୍ମାକୋ ତାନ୍‍କୋ ଅକନ୍‍କୋ ଗୋଟା ଅତେ ରେ କୁଲାକାନାକୋ। ଇନିଃ ହିଜୁଃକେତେ ସିଂହାସାନ୍ ରେ ଦୁବାକାନ୍ ନିଜାଃ ଜୋମ୍ ତିଈ ତେ ଏନ୍ ପୁଥି କେ ଇଦିକେଦାଏ। ଚିମ୍ତା ଇନିଃ ପୁଥି କେ ଇଦିକେଦାଏ, ଇମ୍ତା ଏନ୍ ଚାଇର୍ ଜାନ୍ତୁ କୋ ଆଡୋଃ ଚୋବିଶ୍ ମାରିହୋଡ଼ୋକୋ ଏନ୍ ମିଣ୍ଡୀହୋନ୍ ରାଃ ନାଡ଼େଏ ରେ ଅବୋର୍ ଜାନାକୋ। ଇନ୍‍କୁୱାଃ ସବେନ୍ ତିଈ କୋରେ ବୀଣା ଆଡୋଃ ବୁଗିନ୍ ସୋୱାନ୍ ଧୁୱାନ୍ ଏତେ ଫେରେଃ କାନ୍ ସୋନା ରାଃ ଡୁଭ୍‍ନୀକୋ ତାଇକେନା, ଅକନାଃ ପାବିତାର୍ ହୋଡ଼ୋକୋୱାଃ ବିନ୍ତି କୋ ତାନାଃ। ଇନ୍‍କୁ ନେ ନାୱା ଦୁରାଙ୍ଗ୍-ଦୁରାଙ୍ଗ୍ କେଦାକୋ, “ଆମ୍ ନେ ପୁଥି କେ ଇଦି, ଆଡୋଃ ନେୟା ରାଃ ମୋହାର୍-ଛାପ୍ କୋକେ ରାଡ଼ାଏ ଲେକାନିଃ ତାନ୍‍ମେ; ଚିୟାଃଚି ଆମ୍ ଗୋଏଃ ରିକାୟାନାମ୍ ଏନ୍ତେ ଆମାଃ ମାୟୋମ୍ ତେ ସବେନ୍ କିଲି ରେନ୍ ଆଡୋଃ ଭାଷା ରେନ୍ ଆଡୋଃ ହୋଡ଼ୋକୋ ଏତେ ଆଡୋଃ ଦିଶୁମ୍ କୋଏତେ ପାର୍ମେଶ୍ଵାର୍ ଲାଗିନ୍ ହୋଡ଼ୋକୋକେ କିରିଙ୍ଗ୍ କାଃକୋୱାମ୍, ଆଡୋଃ ଇନ୍‍କୁକେ ଆବୁୱାଃ ପାର୍ମେଶ୍ଵାର୍ ନାଙ୍ଗ୍ ମିୟାଃ ରାଇଜ୍ ହୋବାନାଙ୍ଗ୍ ଆଡୋଃ ସେୱା ନାଙ୍ଗ୍ ୟାଜାକ୍ ବାଇକେଃକୋୱାମ୍; ଆଡୋଃ ଇନ୍‍କୁ ଅତେ ରେ ରାଇଜ୍ ୟାକୋ।” ଏନ୍ତେ ଇଙ୍ଗ୍ ଆଡୋଃଗି ନେଲ୍ କେଦାଇଙ୍ଗ୍ ଚି ଏନ୍ ସିଂହାସାନ୍ ରାଃ ଆଡୋଃ ଜାନ୍ତୁକୋୱାଃ ଆଡୋଃ ଏନ୍ ମାରିହୋଡ଼ୋ କୋୱାଃ ସବେନ୍ ପାଡ଼୍ ରେ ମିଃଥିମ୍ବା ସିର୍ମାଦାସୀ କୋୱାଃ ଆୱାଜ୍ ଆୟୁମ୍ କେଦାଇଙ୍ଗ୍, ଅକନ୍ କୋୱାଃ ହିସାବ୍ ଲାଖ୍-ଲାଖ୍ ଆଡୋଃ କାରୋଡ଼-କାରୋଡ଼ ତାଇକେନା, ଆଡୋଃ ଇନ୍‍କୁ କାଉରି କେତେ କାଜି ତାଇକେନାକୋ, “ଗୋଏଃ ରିକାୟାନ୍ ମିଣ୍ଡୀହୋନ୍ ଗି ପେଡ଼େଜାନ୍ ଆଡୋଃ ଧାନ୍ ଆଡୋଃ ସେଣା ଆଡୋଃ ପେଡ଼େଏ ଆଡୋଃ ମାଇନ୍ ଆଡୋଃ ମାନାରାଙ୍ଗ୍ ଆଡୋଃ ଧାନ୍ୟାବାଦ୍ ନାମେ ଲେକାନିଃ ତାନିଃ!” ଏନ୍ତେ ଇଙ୍ଗ୍ ସିର୍ମାଦିଶୁମ୍ ରେ ଆଡୋଃ ଅତେ ରେ ଆଡୋଃ ଅତେ ରାଃ ଲାଥାର୍ ରେ ଆଡୋଃ ସାମୁଦାର୍ ରାଃ ସବେନ୍ ବାଇୟାକାନ୍ ଜିନିଷ୍‍କୋକେ, ଆଡୋଃ ସବେନାଃ କେ ଅକନାଃ ଏଣ୍ଡେରେ ମେନାଃ, ନେୟା କାଜିତାନ୍ ଆୟୁମ୍ କେଦାଇଙ୍ଗ୍, “ଅକନିଃ ସିଂହାସାନ୍ ରେ ଦୁବାକାନାଏ ଇନିଜାଃ ଆଡୋଃ ମିଣ୍ଡୀହୋନ୍ ରାଃ ଧାନ୍ୟାବାଦ୍ ଆଡୋଃ ମାଇନ୍ ଆଡୋଃ ମାନାରାଙ୍ଗ୍ ଆଡୋଃ ରାଇଜ୍ ଜାନାଓ-ଜାନାଓ ଗି ତାଇନୋଃକା!” ଆଡୋଃ ଏନ୍ ଚାଇର୍ ଜାନ୍ତୁକୋ ଆମୀନ୍ କାଜିକେଦାକୋ, ଆଡୋଃ ମାରିହୋଡ଼ୋକୋ ଇକ୍ଡ଼ୁମ୍ ଅବୋର୍ କେତେ ଜୋହାର୍ କିଜାକୋ। ଏନା ତାୟୋମ୍ତେ ଇଙ୍ଗ୍ ନେଲ୍ କେଦାଇଙ୍ଗ୍ ଚି ମିଣ୍ଡୀହୋନ୍ ଏନ୍ ସାତ୍‍ଠୁ ମୋହାର୍-ଛାପ୍ କୋଏତେ ମିୟାଃ କେ ଖୋଲାଅ କେଦାଏ; ଆଡୋଃ ଏନ୍ ଚାଇର୍ ଝାନ୍ ଜାନ୍ତୁକୋଏତେ ମିହୋଡ଼୍ ନିଃକେ ରିମିଲ୍-ଷାଡି ଲେକା କାଉରିତାନ୍ ଆୟୁମ୍ କେଦାଇଙ୍ଗ୍, “ଦେଲା ହିଜୁଃମେ!” ଇଙ୍ଗ୍ ଆରିଃ କେଦାଇଙ୍ଗ୍, ଆଡୋଃ ନେଲେପେ, ମିୟାଃ ପୁଣ୍ଡୀ ଶାଦୋମ୍ ତାଇକେନାଏ, ଆଡୋଃ ଇନିଃ ରେ ଦୁବାକାନ୍ ନିଃ ଧାନୁ ସାବାକାଦାଏ, ଆଡୋଃ ଇନିଃକେ ମିୟାଃ ମୁକୁଟ୍ ଏମ୍ ଜାନା, ଆଡୋଃ ଇନିଃ ଜିତାଅତାନ୍ ଲୋଃ ଅଡୋଙ୍ଗ୍ ନାଏ ଚି ଆଡୋଃଗି ଜିତାଅୱାଏ। ଚିମ୍ତା ମିଣ୍ଡୀହୋନ୍ ଏଟାଃ ମୋହାର୍-ଛାପ୍ କେ ଖୋଲାଅ କେଦାଏ, ଇମ୍ତା ଇଙ୍ଗ୍ ଏଟାଃ ଜାନ୍ତୁକେ ନେୟା କାଜିତାନ୍ ଆୟୁମ୍ କିଜାଇଙ୍ଗ୍, “ଦେଲା ହିଜୁଃମେ!” ଏନ୍ତେ ଆଡୋଃ ମିୟାଃ ଶାଦୋମ୍ ଅଡୋଙ୍ଗ୍ ନାଏ ଅକନିଃ ଆରାଃ ରାଙ୍ଗ୍ ରେନ୍ ତାଇକେନାଏ; ଇନିଃ ରେ ଦୁବାକାନ୍ ନିଃକେ ନେୟା ଆଧିକାର୍ ଏମ୍ ଜାନା ଚି ଅତେ ଏତେ ଜୀଉସୁକୁ କେ ଉଠାଓଇଦି କେୟାଏ, ଏନାତେ ହୋଡ଼ୋକୋ ମିହୋଡ଼୍ ଏଟାଃନିଃକେ ଗୋଜିୟାଏ; ଆଡୋଃ ଇନିଃକେ ମିୟାଃ ମାରାଙ୍ଗ୍ ତାଲ୍‍ୱାର୍ ଏମ୍ ଜାନା। ଚିମ୍ତା ମିଣ୍ଡୀହୋନ୍ ତିସ୍ରା ମୋହାର୍-ଛାପ୍ କେ ଖୋଲାଅକେଦାଏ, ଇମ୍ତା ଇଙ୍ଗ୍ ତିସ୍ରା ଜାନ୍ତୁ କେ ନେୟା କାଜିତାନ୍ ଆୟୁମ୍ କିଜାଇଙ୍ଗ୍, “ଦେଲା ହିଜୁଃମେ!” ଇଙ୍ଗ୍ ଆରିଃ କେଦାଇଙ୍ଗ୍, ଆଡୋଃ ନେଲେପେ, ମିୟାଃ ହେନ୍ଦେ ଶାଦୋମ୍ ତାଇକେନାଏ, ଆଡୋଃ ଇନିଃ ରେ ଦୁବାକାନ୍ ନିଜାଃ ତିଈ ରେ ତୁଲା ଲାଗିନ୍ତେ ମିୟାଃ ତାରାଜୁ ତାଇକେନା; ଆଡୋଃ ଇଙ୍ଗ୍ ଏନ୍ ଚାଇର୍ ଝାନ୍ ଜାନ୍ତୁ କୋୱାଃ ଥାଲା ଏତେ ନେ କାଜି କାଜିତାନ୍ ଆୟୁମ୍ କେଦାଇଙ୍ଗ୍, “ମିୟାଃ ଦିନାର୍ ରେ ମିଃ ନାପ୍ ଗହମ୍, ଆଡୋଃ ମିୟାଃ ଦିନାର୍ ରେ ଆପି ନାପ୍ ଜାଓ, ମେନ୍ଦୋ ସୁନୁମ୍ ଆଡୋଃ ଆଙ୍ଗୁର୍ ରାଶି କେ ଆଲୋମ୍ ବାଗ୍ଡ଼ାଅୟା।” ଚିମ୍ତା ଇନିଃ ଚୌଥା ମୋହାର୍-ଛାପ୍ କେ ଖୋଲାଅ କେଦାଏ, ଇମ୍ତା ଇଙ୍ଗ୍ ଚୌଥା ଜାନ୍ତୁ କେ ନେୟା କାଜିତାନ୍ ଆୟୁମ୍ କିଜାଇଙ୍ଗ୍, “ଦେଲା ହିଜୁଃମେ!” ଇଙ୍ଗ୍ ଆରିଃ କେଦାଇଙ୍ଗ୍, ଆଡୋଃ ନେଲେପେ, ମିୟାଃ ସାସାଙ୍ଗ୍ ଗି ଶାଦୋମ୍ ତାଇକେନାଏ, ଆଡୋଃ ଇନିଃ ରେ ଦୁବାକାନ୍ ନିଜାଃ ନୁତୁମ୍ ଗୋନୋଏଃ ତାଇଲେନା, ହାର୍ ପାତାଲ୍ ଇନିଃକେ ଦୋୟା-ଦୋୟା ଅତୋଙ୍ଗ୍ କିଜାଏ, ଆଡୋଃ ଇନ୍‍କିନ୍ କେ ଅତେ ରାଃ ଚାଇର୍ ହାନାଟିଙ୍ଗ୍ ତେ ମିୟାଃ ରେ ନେୟା ଆଧିକାର୍ ଏମ୍ ଜାନା ଚି ତାଲ୍‍ୱାର୍, ଆଡୋଃ ଆକାଲ୍ ଆଡୋଃ ଗୋନୋଏଃ, ଆଡୋଃ ଅତେ ରେନ୍ ଟୋନାଙ୍ଗ୍-ପାଶୁ କୋୱାଃ ହୋରାତେ ହୋଡ଼ୋକୋକେ ଗୋଏଃ କୋୱାକୋ। ଚିମ୍ତା ମିଣ୍ଡୀହୋନ୍ ପାଞ୍ଚ୍ ୱା ମୋହାର୍-ଛାପ୍ ଖୋଲାଅ କେଦାଏ, ଇମ୍ତା ଇଙ୍ଗ୍ ବେଦୀ ରାଃ ଲାଥାର୍ ରେ ଇନ୍‍କୁୱାଃ ଜୀଉକୋକେ ନେଲ୍ କେଃକୋୱାଇଙ୍ଗ୍ ଅକନ୍‍କୋ ପାର୍ମେଶ୍ଵାର୍ ରାଃ ବାଚାନ୍ ଲାଗିନ୍ତେ ଆଡୋଃ ଏନ୍ ଗୋୱା ଫେରେଃ ଲାଗିନ୍ତେ ଅକନାଃ ଇନ୍‍କୁ ଏମ୍ ତାନ୍ ଇମ୍ତା ଗୋଏଃ ରିକାଲେନ୍ ତାଇକେନାକୋ। ଇନ୍‍କୁ ଉଁଚା ଆୱାଜ୍ ତେ କେଡ଼ାତାନ୍ ଲୋଃ କାଜିକେଦାକୋ, “ହେ ଗୋମ୍‍କେ, ହେ ପାବିତାର୍ ଆଡୋଃ ସାର୍ତି; ଆମ୍ ଚିଉଲା ସାନ୍ତେ କାମ୍ ବିଚାର୍ ୟା? ଆଡୋଃ ଅତେ ରେ ତାଇତାନ୍ କୋଏତେ ଆଲେୟାଃ ମାୟୋମ୍ ରାଃ ବାଦ୍‍ଲା ଚିଉଲା ସାନ୍ତେ କାମ୍ ଇଦିୟା?” ଇନ୍‍କୁ ସବେନ୍ ମିପୀୟାଃ କୋକେ ପୁଣ୍ଡୀ ଲିଜାଃ ଏମ୍ ଜାନା, ଆଡୋଃ ଇନ୍‍କୁକେ କାଜି ଜାନା ଚି ଆଡୋଃ କାଟିଃ ସାମାୟ୍ ସାନ୍ତେ ହୋରୋଏପେ, ଚିମିନ୍ ସାନ୍ତେ ଚି ଆପେୟାଃ ଗାତି ଦାସୀକୋ ଆଡୋଃ ହାଗାକୋ ଅକନ୍‍କୋ ଆପେଲେକା ଗୋଜୋଃ ରାଃ ମେନାକୋୱା ଇନ୍‍କୁୱାଃ ହ ଗିନ୍ତି କାପୁରାଅଃୱା। ଚିମ୍ତା ମିଣ୍ଡୀହୋନ୍ ଛାଟ୍‍ୱା ମୋହାର୍-ଛାପ୍ ଖୋଲାଅ କେଦାଏ, ଇମ୍ତା ଇଙ୍ଗ୍ ନେଲ୍ କେଦାଇଙ୍ଗ୍ ଚି ମିୟାଃ ମାରାଙ୍ଗ୍ ଅତେହିଲାଅ ହୋବାଜାନା, ଆଡୋଃ ଶିଙ୍ଗି କାମ୍ବଡ଼ା ଲେକା ହେନ୍ଦେ ଆଡୋଃ ଗୋଟା ଚାଣ୍ଡୁଃ ମାୟୋମ୍ ଲେକା ହୋବାଜାନା। ହାର୍ ରିମିଲ୍‍ଦିଶୁମ୍ ରେନ୍ ଇପିଲ୍ କୋ ଅତେ ରେ ନେକା ଉୟୁଃ ଜାନାକୋ ଜେଲେକା ମାରାଙ୍ଗ୍ ହୋୟୋ ତେ ହିଲାଅଃତାନ୍ ଇମ୍ତା ଲୋୱା ଦାରୁ ଏତେ ବେରେଲ୍ ଯଅକୋ କୋଟା କେନୋଗା। ରିମିଲ୍‍ଦିଶୁମ୍ ନେଲେକା ଆତୋମ୍ ଜାନା ଜେଲେକା ପୁଥି ଚିଠି ଲାଟୁମୋଃୱା; ଆଡୋଃ ସବେନ୍ ମିପୀୟାଃ ବୁରୁ ଆଡୋଃ ଟାପୁ, ଆପାନାଃ-ଆପାନାଃ ଜାଗା ତେ ଗେନାଜାନା। ଏନ୍ତେ ଅତେ ରେନ୍ ରାଜାକୋ, ଆଡୋଃ ପ୍ରାଧାନ୍ କୋ, ଆଡୋଃ ମୁଖିୟାକୋ, ଆଡୋଃ କିଶାଣ୍ କୋ ଆଡୋଃ ପେଡ଼େଜାନ୍ ହୋଡ଼ୋକୋ, ଆଡୋଃ ସବେନ୍ ମିପୀହୋଡ଼୍ ଦାସୀକୋ ଆଡୋଃ ବେଗାର୍ ଦାସୀକୋ ବୁରୁ ରାଃ ଲାପାଙ୍ଗା କୋରେ ଆଡୋଃ ଚାଟାନ୍ କୋରେ ଉକୁ ଜାନାକୋ, ଆଡୋଃ ବୁରୁକୋକେ ଆଡୋଃ ଚାଟାନ୍ କୋକେ କାଜିକେଦାକୋ, “ଆଲେୟାଃ ଚେତାନ୍ ରେ ଉୟୁଗୋଃପେ; ଆଡୋଃ ଆଲେକେ ଇନିଜାଃ ମୋଚା ଏତେ ଅକନିଃ ସିଂହାସାନ୍ ରେ ଦୁବାକାନାଏ, ଆଡୋଃ ମିଣ୍ଡୀହୋନ୍ ରାଃ ଖିସ୍ ଏତେ ଆଲେକେ ଉକୁକେପେ। ଚିୟାଃଚି ଇନିଜାଃ ଖିସ୍ ରାଃ ବୋରୋୱାନ୍ ହୁଲାଙ୍ଗ୍ ହିଜୁଃ ସେଟେର୍ କାନା, ନାଆ ଅକଏ ତାଇନ୍ ଧାଡ଼ିୟାଏ?” ନେୟାରାଃ ତାୟୋମ୍ତେ ଇଙ୍ଗ୍ ଅତେ ରାଃ ଚାଇରୋ କୋନା ପାଡ଼୍ ଚାଇର୍ ଝାନ୍ ସିର୍ମାଦାସୀ କୋକେ ତିଙ୍ଗୁକାନ୍ ନେଲ୍ କେଃକୋୱାଇଙ୍ଗ୍। ଇନ୍‍କୁ ଅତେ ରେୟାଃ ଚାଇର୍ ଠୁ ହୋୟୋକୋକେ ଛେକାଃ ଲେଦାକୋ ଏନାତେ ଅତେ ରେ, ୟାଦୋ ସାମୁଦାର୍ ରେ, ୟାଦୋ ଜେତାନ୍ ଦାରୁ ରେ ହୋୟୋ କାଠୋଗୋଗା। ଏନ୍ତେ ଇଙ୍ଗ୍ ଆଡୋଃ ମିୟାଃ ସିର୍ମାଦାସୀ କେ ଜୀହିଃ ପାର୍ମେଶ୍ଵାର୍ ରାଃ ମୋହାର୍-ଛାପ୍ ଇଦିତାନ୍ ଲୋଃ ପୂରୁବ୍ ଏତେ ଚେତାନ୍ ପାଡ଼୍ ହିଜୁଃ ନେଲ୍ କେଦାଇଙ୍ଗ୍, ଇନିଃ ଏନ୍ ଚାଇର୍ ଝାନ୍ ସିର୍ମାଦାସୀ କୋକେ ଅକନ୍ କୋକେ ଅତେ ଆଡୋଃ ସାମୁଦାର୍ ରାଃ ହାନି ରିକାଲାଗିନ୍ତେ ଆଧିକାର୍ ଏମ୍ ଲେନ୍ ତାଇନା, ଇନ୍‍କୁକେ କାଉରି କେତେ କାଜିକେଃକୋୱାଏ; “ଚିମିନ୍ ସାନ୍ତେ ଆଲେ ଆଲେୟାଃ ପାର୍ମେଶ୍ଵାର୍ ରାଃ ଦାସୀକୋୱାଃ ମୋଲୋଙ୍ଗ୍ କୋରେ ଛାପ୍ କାଲେ ଲାଗାଅୟା, ଇମିନ୍ ସାନ୍ତେ ଅତେ ଆଡୋଃ ସାମୁଦାର୍ ଆଡୋଃ ଦାରୁ କୋକେ ହାନି ଆଲୋପେ ରିକାୟା।” ଅକନ୍ କୋୱାଃ ରେ ମୋହାର୍-ଛାପ୍ ଏମ୍ ଜାନା, ଇଙ୍ଗ୍ ଇନ୍‍କୁୱାଃ ଗିନ୍ତି ଆୟୁମ୍ କେଦାଇଙ୍ଗ୍, ମାନେ ଇସ୍ରାଏଲୀ ହୋନ୍ କୋୱାଃ ସବେନ୍ କିଲି ରେନ୍ କୋଏତେ ଏକ୍ ଲାଖ୍ ଚାୱାଲିସ୍ ହାଜାର୍ କୋୱାଃ ରେ ମୋହାର୍-ଛାପ୍ ଲାଗାଅ ଜାନା: ୟାହୁଦା ରାଃ କିଲି କୋଏତେ ବାରା ହାଜାର୍ କୋରେ ମୋହାର୍-ଛାପ୍ ଏମ୍ ଜାନା, ରୁବେନ୍ ରାଃ କିଲି କୋଏତେ ବାରା ହାଜାର୍ କୋରେ, ଗାଦ୍ ରାଃ କିଲି କୋଏତେ ବାରା ହାଜାର୍ କୋରେ, ଆଶେର୍ ରାଃ କିଲି କୋଏତେ ବାରା ହାଜାର୍ କୋରେ, ନାପ୍ତାଲୀ ରାଃ କିଲି କୋଏତେ ବାରା ହାଜାର୍ କୋରେ, ମାନାଶେହ୍ ରାଃ କିଲି କୋଏତେ ବାରା ହାଜାର୍ କୋରେ, ଶିମୋନ୍ ରାଃ କିଲି କୋଏତେ ବାରା ହାଜାର୍ କୋରେ, ଲେବୀ ରାଃ କିଲି କୋଏତେ ବାରା ହାଜାର୍ କୋରେ, ଇସ୍ସାକାର୍ ରାଃ କିଲି କୋଏତେ ବାରା ହାଜାର୍ କୋରେ, ଜାବୁଲୁନ୍ ରାଃ କିଲି କୋଏତେ ବାରା ହାଜାର୍ କୋରେ, ଯୋଶେଫ୍ ରାଃ କିଲି କୋଏତେ ବାରା ହାଜାର୍ କୋରେ, ଆଡୋଃ ବେନ୍ୟାମିନ୍ ରାଃ କିଲି କୋଏତେ ବାରା ହାଜାର୍ କୋରେ ମୋହାର୍-ଛାପ୍ ଏମ୍ ଜାନା। ନେୟାରାଃ ତାୟୋମ୍ତେ ଇଙ୍ଗ୍ ଆରିଃ କେଦାଇଙ୍ଗ୍, ହାର୍ ନେଲେପେ, ସବେନ୍ ଦିଶୁମ୍ ରେନ୍ କୋଏତେ ଆଡୋଃ କିଲି ରେନ୍ କୋଏତେ ଆଡୋଃ ହୋଡ଼ୋକୋ ଏତେ ଆଡୋଃ ଭାଷା କୋଏତେ ମିୟାଃ ନେକାନ୍ ମାରାଙ୍ଗ୍ ଭିଡ଼୍, ଅକନାଃକେ ଜେତାଏ ହିସାବ୍ କାକୋ ଧାଡ଼ି ତାଇନାଏ, ପୁଣ୍ଡୀ ଲିଜାଃ ତୁସିଙ୍ଗ୍ କେତେ ଆଡୋଃ ଆକୋୱାଃ ତିଈ କୋରେ କିତା କୋରାଃ କୋତୋକୋ ସାବ୍ କେତେ ସିଂହାସାନ୍ ରାଃ ନାଡ଼େଏ ରେ ଆଡୋଃ ମିଣ୍ଡୀହୋନ୍ ରାଃ ନାଡ଼େଏ ରେ ତିଙ୍ଗୁ ଲେନାକୋ। ଆଡୋଃ ମାରାଙ୍ଗ୍ ଆୱାଜ୍ ତେ କାଉରି କେତେ କାଜିକେଦାକୋ, “ବାଞ୍ଚାଅ ଲାଗିନ୍ତେ ଆବୁୱାଃ ପାର୍ମେଶ୍ଵାର୍ ରାଃ, ଅକନିଃ ସିଂହାସାନ୍ ରେ ଦୁବ୍ କାନାଏ, ଆଡୋଃ ମିଣ୍ଡୀହୋନ୍ ରାଃ ଜାଏ-ଜାଏ ହୋବାଅଃକା!” ହାର୍ ସବେନ୍ ସିର୍ମାଦାସୀକୋ ଏନ୍ ସିଂହାସାନ୍ ରାଃ ଆଡୋଃ ମାରିହୋଡ଼ୋକୋୱାଃ ଆଡୋଃ ଚାଇର୍ ଝାନ୍ ଜାନ୍ତୁ କୋୱାଃ ସବେନ୍ ପାଡ଼୍ ତିଙ୍ଗୁ ଲେନାକୋ; ଆଡୋଃ ଇନ୍‍କୁ ସିଂହାସାନ୍ ରାଃ ନାଡ଼େଏ ଅବୋର୍ ଜାନାକୋ ଆଡୋଃ ପାର୍ମେଶ୍ଵାର୍ କେ ଜୋହାର୍ କେତେ କାଜିକେଦାକୋ, “ଆମୀନ୍! ଆବୁୱାଃ ପାର୍ମେଶ୍ଵାର୍ ରାଃ ସ୍ତୁତି, ହାର୍ ମାନାରାଙ୍ଗ୍, ହାର୍ ସେଣା, ହାର୍ ଧାନ୍ୟାବାଦ୍, ମାଇନ୍ ଆଡୋଃ ପେଡ଼େଏ ହାର୍ ଆଧିକାର୍ ଜାନାଓ-ଜାନାଓ ବାଇତାଇନୋଃକା। ଆମୀନ୍!” ଏନ୍ତେ ମାରିହୋଡ଼ୋ କୋଏତେ ମିହୋଡ଼୍ ଇଙ୍ଗ୍‍କେ କାଜିକେଦାଏ, “ନେ ପୁଣ୍ଡୀ ଲିଜାଃ ତୁସିଙ୍ଗ୍ କାନ୍ କୋ ଅକଏକୋ ତାନ୍‍କୋ? ଆଡୋଃ କୋତାଃ ଏତେ ହିଜୁଃ କାନାକୋ?” ଇଙ୍ଗ୍ ଇନିଃକେ କାଜିକେଦାଇଙ୍ଗ୍, “ହେ ସାହେବ୍ ଆମ୍ ଗି ସାରିୟାମ୍।” ଇନିଃ ଇଙ୍ଗ୍‍କେ କାଜିକେଦାଏ, “ନିକୁ ଇନ୍‍କୁ ତାନ୍‍କୋ, ଅକନ୍ କୋ ଏନ୍ ମାରାଙ୍ଗ୍ ଦୁକୁ ଏତେ ଅଡୋଙ୍ଗ୍ କେତେ ହିଜୁଃ କାନାକୋ; ନିକୁ ଆପାନାଃ-ଆପାନାଃ ଲିଜାଃ ମିଣ୍ଡୀହୋନ୍ ରାଃ ମାୟୋମ୍ ରେ ଚାପିକେତେ ପୁଣ୍ଡୀ କାଦାକୋ। ନେୟାମେନ୍ତେ ଇନ୍‍କୁ ପାର୍ମେଶ୍ଵାର୍ ଆଃ ସିଂହାସାନ୍ ରାଃ ନାଡ଼େଏ ରେ ମେନାକୋୱା, ଆଡୋଃ ଇନିଜାଃ ମାନ୍ଦିର୍ ରେ ନିଦା-ଶିଙ୍ଗି ଇନିଜାଃ ସେୱାତାନାକୋ, ଆଡୋଃ ଅକନିଃ ସିଂହାସାନ୍ ରେ ଦୁବ୍ କାନାଏ, ଇନିଃ ଇନ୍‍କୁୱାଃ ଚେତାନ୍ ରେ ଆପାନାଃ ଡେରା ପାସ୍ରାଅୟାଏ। ଇନ୍‍କୁ ଆୟୁର୍ ତେ ରେଙ୍ଗେଃ ଆଡୋଃ ତେତାଙ୍ଗ୍ କାକୋ ହୋବାଃୱା; ନାଦୋ ଇନ୍‍କୁୱାଃ ରେ ଶିତୁମ୍, ନାଦୋ ଜେତାନ୍ ଲୋଲୋ ଉୟୁଗୋଗା। ଚିୟାଃଚି ମିଣ୍ଡୀହୋନ୍ ଅକନିଃ ସିଂହାସାନ୍ ରାଃ ଥାଲା ରେ ମେନାଇଜା, ଇନ୍‍କୁକେ ହୋରୋ କୋୱାଏ। ଆଡୋଃ ଇନ୍‍କୁକେ ଜୀଦାନ୍ ରାଃ ଦାଆ ରାଃ ପାଝ୍ରା ନାଡ଼େଏ ରେ ଇଦିକୋୱାଏ, ଆଡୋଃ ପାର୍ମେଶ୍ଵାର୍ ଇନ୍‍କୁୱାଃ ମେଏଃ କୋଏତେ ସବେନ୍ ମେଏଃଦାଆ କୋକେ ଜଅଃ ତାଆଏ।” ଚିମ୍ତା ଇନିଃ ସାତ୍‍ୱା ମୋହାର୍-ଛାପ୍ ଖୋଲାଅ କେଦାଏ, ଇମ୍ତା ସିର୍ମାଦିଶୁମ୍ ରେ ଆଧା ଘାଣ୍ଟା ଲେକା ସୁନ୍-ସାନ୍ ହୋବାଜାନା। ଏନା ତାୟୋମ୍ତେ ଇଙ୍ଗ୍ ଏନ୍ ସାତ୍ ଝାନ୍ ସିର୍ମାଦାସୀ କୋକେ ଅକନ୍‍କୋ ପାର୍ମେଶ୍ଵାର୍ ରାଃ ସାମ୍ନାଙ୍ଗ୍ ତିଙ୍ଗୁକାନ୍ ତାଇନୋଃୱାକୋ, ନେଲ୍ କେଃକୋୱାଇଙ୍ଗ୍, ଆଡୋଃ ଇନ୍‍କୁକେ ସାତ୍‍ଠୁ ତୁର୍ହୀ ଏମ୍ ଜାନା। ଏନ୍ତେ ଆଡୋଃ ମିୟାଃ ସିର୍ମାଦାସୀ ସୋନା ରାଃ ଧୁୱାନ୍-ଥାଡ଼ି ସାବ୍ କେତେ ହିଜୁଃ ଲେନାଏ, ଆଡୋଃ ବେଦୀ ରାଃ ନାଡ଼େଏ ରେ ତିଙ୍ଗୁ ଜାନାଏ, ଆଡୋଃ ଇନିଃକେ ଥିମ୍ବାଗି ଧୁୱାନ୍ ଏମ୍ ଜାନା ଚି ସବେନ୍ ପାବିତାର୍ ହୋଡ଼ୋକୋୱାଃ ବିନ୍ତି କୋଲୋଃ ସୋନା ରାଃ ଏନ୍ ବେଦୀ ଚେତାନ୍ ରେ, ଅକନାଃ ସିଂହାସାନ୍ ରାଃ ନାଡ଼େଏ ରେ ମେନାଃ ରାକାବ୍ ୟାଏ। ଆଡୋଃ ଏନ୍ ଧୁୱାନ୍ ରାଃ ସୁକୁଲ୍ ପାବିତାର୍ ହୋଡ଼ୋକୋୱାଃ ବିନ୍ତି କୋଲୋଃ ସିର୍ମାଦାସୀ ରାଃ ତିଈ ତେ ପାର୍ମେଶ୍ଵାର୍ ରାଃ ନାଡ଼େଏ ରେ ସେଟେର୍ ଜାନା। ଏନ୍ତେ ସିର୍ମାଦାସୀ ଧୁୱାନ୍-ଥାଡ଼ି ଇଦିକେତେ ଏନାରେ ବେଦୀ ରାଃ ସେଙ୍ଗେଲ୍ ଫେରେଃ କେଦାଏ, ଏନ୍ତେ ଅତେ ରେ ଦୁଲ୍ ତାଦାଏ, ଆଡୋଃ ରିମିଲ୍-ଷାଡି ଆଡୋଃ ଆୱାଜ୍ ଆଡୋଃ ବିଜ୍‍ଲୀ କୋ ଆଡୋଃ ଭୂକାମ୍ପ୍ ହୋବା ଏଟେଃ ଜାନା। ଏନ୍ତେ ଏନ୍ ସାତ୍ ଝାନ୍ ସିର୍ମାଦାସୀକୋ ଅକନ୍ କୋତାଃ ସାତ୍‍ଠୁ ତୁର୍ହୀ ତାଇକେନା, ଏନାକୋକେ ଅଙ୍ଗ୍ ଲାଗିନ୍ ସେକାଡ଼୍ ଜାନାକୋ। ସିଦା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଆଡୋଃ ମାୟୋମ୍ ତେ ମେଶାକାନ୍ ଆରିଲ୍ ଆଡୋଃ ସେଙ୍ଗେଲ୍ ସିର୍ଜାଅ ଜାନା, ଆଡୋଃ ଅତେ ରେ ଦୁଲ୍ ଜାନା; ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଅତେ ଜୁଲ୍ ଜାନା, ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଦାରୁ କୋ ଜୁଲ୍ ଜାନା, ଆଡୋଃ ସବେନ୍ ତାସାଃ କୋହ ଜୁଲ୍ ଜାନା। ଏଟାଃ ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଇମ୍ତା ସେଙ୍ଗେଲ୍ ଲେକା ଜୁଲୋଃତାନ୍ ମିୟାଃ ମାରାଙ୍ଗ୍ ବୁରୁ ସାମୁଦାର୍ ରେ ହୁରାଙ୍ଗ୍ ଜାନା, ଆଡୋଃ ସାମୁଦାର୍ ରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ମାୟୋମ୍ ବାଇଜାନା। ଆଡୋଃ ସାମୁଦାର୍ ରେନ୍ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଜାନ୍ତୁ କୋ ଗୋଏଃ ଜାନାକୋ, ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଜାହାଜ୍ କୋ ନାଷ୍ଟ୍ ଜାନା। ତିସ୍ରା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଏନ୍ତେ ମିୟାଃ ମାରାଙ୍ଗ୍ ଇପିଲ୍ ଅକନାଃ ଦିମି ଲେକା ଜୁଲୋଃ ତାଇକେନା, ସିର୍ମାଦିଶୁମ୍ ଏତେ ଉୟୁଃଜାନା, ଆଡୋଃ ନାଈ କୋରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ କୋରେ ଆଡୋଃ ଦାଆ ରାଃ ପାଝ୍ରା କୋରେ ଉୟୁଃଜାନା। ଏନ୍ ଇପିଲ୍ ରାଃ ନୁତୁମ୍ ନାଗ୍‍ଦୋନା ତାନାଃ, ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଦାଆ ନାଗ୍‍ଦୋନା ଲେକା ହାଡ଼୍ଆଃ ହୋବାଜାନା। ଆଡୋଃ ଥିମ୍ବାଗି ହୋଡ଼ୋକୋ ଏନ୍ ଦାଆ ରାଃ ହାଡ଼୍ଆଃ ହୋବାତେ ଗୋଏଃ ଜାନାକୋ। ଚାଉଥା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଆଡୋଃ ଶିଙ୍ଗି ରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଆଡୋଃ ଚାଣ୍ଡୁଃ ରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଆଡୋଃ ଇପିଲ୍ କୋରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ କେ ବିଡ଼ା ଜାନା, ନେତାଃ ସାନ୍ତେ ଚି ଏନାରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଭାଗ୍ ରେ ନୁବାଃ ଜାନା, ଆଡୋଃ ସିଂଙ୍ଗ୍‍ସାଟୁବ୍ ରେୟାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ରେ କାମାର୍ଶାଲ୍ ୟାନା, ହାର୍ ଏନ୍‍ଲେକାଗି ନିଦା ରେହ ହୋବାଜାନା। ଏନ୍ତେ ଚିମ୍ତାଙ୍ଗ୍ ଇଙ୍ଗ୍ ଆଡୋଃ ନେଲ୍ କେଦାଇଙ୍ଗ୍, ଇମ୍ତା ରିମିଲ୍‍ଦିଶୁମ୍ ରାଃ ଥାଲା ରେ ମିୟାଃ ଗିଦ୍ଦ କେ ଆପିର୍ ତାନ୍ ହାର୍ ଜୋର୍ତେ କାଉରିତାନ୍ ନେୟା ଆୟୁମ୍ କେଦାଇଙ୍ଗ୍, “ଏନ୍ ଆପିୟା ସାରେଜାକାନ୍ ସିର୍ମାଦାସୀ କୋୱାଃ ତୁର୍ହୀ ରାଃ ଷାଡି ଚାଲ୍ତେ ଅକନ୍ କୋୱାଃ ଅଙ୍ଗ୍ ନାଆ ବାକି ମେନାଃ, ଅତେ ରେ ତାଇନ୍ ତାନ୍ କୋୱାଃ ଚେତାନ୍ ରେ ହାୟ୍, ହାୟ୍, ହାୟ୍!” ଚିମ୍ତାଙ୍ଗ୍ ପାଞ୍ଚ୍ ୱା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଇମ୍ତା ଇଙ୍ଗ୍ ରିମିଲ୍‍ଦିଶୁମ୍ ତେ ଅତେ ରେ ମିୟାଃ ଇପିଲ୍ ଉୟୁଃତାନ୍ ନେଲ୍ କେଦାଇଙ୍ଗ୍, ହାର୍ ଇନିଃକେ କାସୋଙ୍ଗ୍ଅଃ ଡୋଡା ରାଃ ଚାଭି ଏମ୍ ଜାନା। ଇନିଃ କାସୋଙ୍ଗ୍ଅଃ ଡୋଡା କେ ଖୋଲାଅ କେଦାଏ, ଆଡୋଃ ଡୋଡାଏତେ ମାରାଙ୍ଗ୍ ଭାଟି ଲେକା ସୁକୁଲ୍ ଅଡୋଙ୍ଗ୍ ଜାନା, ଆଡୋଃ ଡୋଡା ରାଃ ସୁକୁଲ୍ ଏତେ ଶିଙ୍ଗି ଆଡୋଃ ହୋୟୋ ନୁବାଃହେରେଙ୍ଗ୍ ଜାନା। ଏନ୍ ସୁକୁଲ୍ କୋଏତେ ଅତେ ରେ ସୋନ୍‍ସରୋଦ୍ କୋ ଅଡୋଙ୍ଗ୍ ଜାନାକୋ ଆଡୋଃ ଇନ୍‍କୁକେ ଅତେ ରେନ୍ ମାର୍ମାର୍ କୋ ଲେକା ପେଡ଼େଏ ଏମ୍ ଜାନା। ଇନ୍‍କୁକେ କାଜି ଜାନା ଚି ନା ଅତେ ରେୟାଃ ତାସାଃ କୋକେ, ନା ହାରିୟାର୍ ସାଗେନ୍ କୋକେ, ନା ଜେତାନ୍ ଦାରୁ କୋକେ ଆଲୋ ହାନି ରିକାଏକାକୋ, ଏନ୍ ହୋଡ଼ୋକୋକେ ଭାଇର୍ ହାନି ସେଟେର୍ କାକୋ ଅକନ୍ କୋୱାଃ ମୋଲୋଙ୍ଗ୍ ରେ ପାର୍ମେଶ୍ଵାର୍ ରାଃ ମୋହାର୍-ଛାପ୍ ବାନୋଗା। ଆଡୋଃ ଇନ୍‍କୁକେ ହୋଡ଼ୋକୋକେ ଗୋଏଃ ଲାଗିନ୍ ଦୋ କାହା, ମେନ୍ଦୋ ପାଞ୍ଚ୍ ମାହିନା ସାନ୍ତେ ହୋଡ଼ୋକୋକେ ହାସୁ ଏମ୍ ରାଃ ଆଧିକାର୍ ଏମ୍ ଜାନା; ଆଡୋଃ ଇନ୍‍କୁୱାଃ ହାସୁ ନେକା ତାଇକେନା, ଜେଲେକା ମାର୍ମାର୍ କୋୱାଃ ତୁଡ଼୍ ତେ ହୋଡ଼ୋକୋକେ ହୋବାୱାଃ। ଏନ୍ ହୁଲାଙ୍ଗ୍ କୋରେ ହୋଡ଼ୋକୋ ଗୋନୋଏଃ କେ ଦାଣା ୟାକୋ, ଆଡୋଃ କାକୋ ନାମେୟା, ଆଡୋଃ ଗୋଜୋଃ ଲାଗିନ୍ ସାନାଙ୍ଗାକୋ, ଆଡୋଃ ଗୋନୋଏଃ ଇନ୍‍କୁତେ ଆତୋମୋଗା। ଏନ୍ ସୋନ୍‍ସରୋଦ୍ କୋ ଲାଡ଼ାଇ ଲାଗିନ୍ ବାଇକାନ୍ ଶାଦୋମ୍ କୋୱାଃ ଲେକା ନେଲୋଃ ତାଇକେନାକୋ, ଆଡୋଃ ଇନ୍‍କୁୱାଃ ବୋଅ ରେ ସୋନା ରାଃ ମୁକୁଟ୍ ଲେକା ତାଇକେନା; ଆଡୋଃ ଇନ୍‍କୁୱାଃ ମେଏଃ ମୁହାଡ଼୍ ହୋଡ଼ୋକୋ ଲେକା ତାଇକେନା। ଇନ୍‍କୁୱାଃ ଉବ୍ କୁଡ଼ି କୋୱାଃ ଉବ୍ ଲେକା, ହାର୍ ଡାଟା କୁଲ୍ଲା କୋୱାଃ ଡାଟା ଲେକା ତାଇକେନା। ଇନ୍‍କୁ ମେଣେଏଃ ରାଃ ଝୀଲାମ୍ ଲେକା ତୁସିଙ୍ଗ୍ ଲେନାକୋ, ଆଡୋଃ ଇନ୍‍କୁୱାଃ ଆପ୍‍ରୋବ୍ କୋୱାଃ ଷାଡି ନେଲେକା ତାଇକେନା ଜେଲେକା ଥିମ୍ବାଗି ରାଥ୍ କୋ ଆଡୋଃ ଶାଦୋମ୍ କୋ ଲାଡ଼ାଇ ରେ ନିରେ ୟାକୋ। ଇନ୍‍କୁୱାଃ ଚାଲୋମ୍ ମାର୍ମାର୍ କୋୱାଃ ଲେକା ତାଇକେନା, ଆଡୋଃ ଏଣ୍ତେ ରେ ତୁନୁଡ଼୍ ତାଇକେନା, ଆଡୋଃ ଇନ୍‍କୁକେ ପାଞ୍ଚ୍ ମାହିନା ସାନ୍ତେ ହୋଡ଼ୋକୋକେ ହାସୁ ସେଟେର୍ ଲାଗିନ୍ ପେଡ଼େଏ ନାମ୍ ଲେନ୍ ତାଇକେନା, ଏନା ଇନ୍‍କୁୱାଃ ଚାଲୋମ୍ କୋରେ ତାଇକେନା। କାସୋଙ୍ଗ୍ଅଃ ଡୋଡା ରାଃ ଶାଏତାନ୍ ଦାସୀ ଇନ୍‍କୁୱାଃ ରେ ରାଜା ତାଇନ୍ କେନାଏ, ଇନିଜାଃ ନୁତୁମ୍ ଇବ୍ରାନୀ ବାକାଣ୍ ରେ ଆବଡୋନ୍ ଆଡୋଃ ୟୁନାନୀ ବାକାଣ୍ ରେ ଆପୁଲ୍ୟୋନ୍ ତାନାଃ। ମିୟାଃ ବିପାତୀ ଫାରୋମ୍ ଜାନା, ଆଡୋଃ ନେୟା ରାଃ ତାୟୋମ୍ତେ ଆଡୋଃ ବାରିୟା ହିଜୁଃ ରାଃ ମେନାଃ। ଚିମ୍ତା ଛାଟ୍‍ୱା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଇମ୍ତା ଏନ୍ ସୋନା ରାଃ ବେଦୀ ଅକନାଃ ପାର୍ମେଶ୍ଵାର୍ ରାଃ ନାଡ଼େଏ ମେନାଃ ଇନିଜାଃ ଦିରିଙ୍ଗ୍ କୋଏତେ ଇଙ୍ଗ୍ ନେଲେକା ଆୱାଜ୍ ଆୟୁମ୍ କେଦାଇଙ୍ଗ୍। ଜେଲେକା ଏନ୍ ଛାଟ୍‍ୱା ସିର୍ମାଦାସୀ ତେ, ଅକନିଃତାଃ ତୁର୍ହୀ ତାଇକେନା, କାଜି ତାନାଏ, “ଏନ୍ ଚାଇର୍ ଝାନ୍ ସିର୍ମାଦାସୀ କୋକେ ଅକନ୍‍କୋ ମାରାଙ୍ଗ୍ ନାଈ ଫୁରାତ୍ ରାଃ ନାଡ଼େଏ ରେ ଥୋଲାକାନାକୋ, ରାଡ଼ା ତାକୋପେ।” ଆଡୋଃ ଏନ୍ ଚାଇର୍ ଝାନ୍ ସିର୍ମାଦାସୀ କୋ ରାଡ଼ା ଜାନାକୋ ଅକନ୍‍କୋ ଏନ୍ ସାମାୟ୍ ଆଡୋଃ ହୁଲାଙ୍ଗ୍ ଆଡୋଃ ମାହିନା ଆଡୋଃ ଶିର୍ମା ଲାଗିନ୍ ହୋଡ଼ୋକୋୱାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ କୋକେ ଗୋଏଃ ଲାଗିନ୍ତେ ତେୟାର୍ ଲେନାକୋ। ଇନ୍‍କୁୱାଃ ଶାଦୋମ୍ ଚାଲାଅତାନ୍ କୋୱାଃ ଗିନ୍ତି ବିଶ୍ କାରୋଡ଼୍ ତାଇକେନା; ଇଙ୍ଗ୍ ଇନ୍‍କୁୱାଃ ଗିନ୍ତି ଆୟୁମ୍ କେଦାଇଙ୍ଗ୍। ଇଙ୍ଗ୍ କେ ନେ ଦାର୍ଶାନ୍ ରେ ଶାଦୋମ୍ କୋ ହାର୍ ଏନା ରେ ଦୁବାକାନ୍ କୋ ନେକା ନେଲ୍ ଜାନାକୋ ଅକନ୍ କୋୱାଃ କୁଡ଼ାମ୍ ରେୟାଃ ମେଣେଏଃ ଲିଜାଃ ସେଙ୍ଗେଲ୍ ହାର୍ ଲୀଲ୍ ହାର୍ ଗାନ୍ଧାକ୍ ଲେକା ତାଇକେନା ଆଡୋଃ ଏନ୍ ଶାଦୋମ୍ କୋୱାଃ ବୋଅ କୁଲ୍ଲା ରାଃ ବୋଅ ଲେକା ତାଇକେନା, ଆଡୋଃ ଇନ୍‍କୁୱାଃ ମୋଚା ଏତେ ସେଙ୍ଗେଲ୍, ସୁକୁଲ୍ ହାର୍ ଗାନ୍ଧାକ୍ ଅଡୋଙ୍ଗ୍ଅଃ ତାଇକେନା। ନେ ଆପି ମାହାମାରୀକୋ ମାନେ ସେଙ୍ଗେଲ୍ ଆଡୋଃ ସୁକୁଲ୍ ଆଡୋଃ ଗାନ୍ଧାକ୍ ତେ, ଅକନାଃ ଇନ୍‍କୁୱାଃ ମୋଚା ଏତେ ଅଡୋଙ୍ଗ୍ଅଃ ତାଇକେନା ହୋଡ଼ୋକୋୱାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଗୋଏଃ ଜାନାକୋ। ଚିୟାଃଚି ଏନ୍ ଶାଦୋମ୍ କୋୱାଃ ପେଡ଼େଏ ଇନ୍‍କୁୱାଃ ମୋଚା ହାର୍ ଇନ୍‍କୁୱାଃ ଚାଆଲୋମ୍ ରେ ତାଇକେନା; ଚିୟାଃଚି ଇନ୍‍କୁୱାଃ ଚାଆଲୋମ୍ ବିଙ୍ଗ୍ କୋୱାଃ ଲେକା ତାଇକେନା, ଆଡୋଃ ଏନ୍ ଚାଆଲୋମ୍ ରାଃ ବୋଅ ହଗି ତାଇକେନା, ଆଡୋଃ ଏନାକୋ ତେଗି ଇନ୍‍କୁ ହାସୁ ଏମ୍ ତାଇକେନାକୋ। ସାରେଜାକାନ୍ ହୋଡ଼ୋକୋ ଅକନ୍‍କୋ ଏନ୍ ମାହାମାରୀ ତେ କାକୋ ଗୋଏଃ ଲେନାକୋ, ଆକୋୱାଃ ତିଈ ରାଃ କାମି କୋଏତେ ପାପ୍ କାମି କାକୋ ବାଗେ କେଦା, ଇନ୍‍କୁ ବୋଙ୍ଗାଆତ୍ମା କୋୱାଃ ଆଡୋଃ ସୋନା ହାର୍ ରୂପା ହାର୍ ପିତାଲ୍ ହାର୍ ଦିରି ହାର୍ ସାହାନ୍ ରେୟାଃ ମୂର୍ତି କୋକେ ସେୱା ନାଙ୍ଗ୍ କାକୋ ବାଗିକେଦା, ଅକନାଃ ଚି ନେଲ୍, ହାର୍ ଆୟୁମ୍, ହାର୍ ସେନ୍ କାଏ ଧାଡ଼ିୟାଏ; ଇନ୍‍କୁ ହୋଡ଼ ଗୋଗୋଏଃ ହାର୍ ଦେଓଁଣା କାମି, ହାର୍ ଆପ୍‍ଙ୍ଗିର୍ ହାର୍ କୁମ୍ଡ଼ୁ କାମି ଏନାକୋ ଇନ୍‍କୁ କାକୋ ବାଗି କେଦା। ଏନା ତାୟୋମ୍ତେ ଇଙ୍ଗ୍ ଆଡୋଃ ମିୟାଃ ପେଡ଼େଜାନ୍ ସିର୍ମାଦାସୀ କେ ରିମିଲ୍ କେ ଉୟୁକାନ୍ ସିର୍ମାଦିଶୁମ୍ ଏତେ ଆଡ଼୍‍ଗୁତାନ୍ ନେଲ୍ କିଜାଇଙ୍ଗ୍। ଇନିଜାଃ ବୋଅ ରେ ରିମିଲ୍‍ଧାନୁ ତାଇକେନା। ଇନିଜାଃ ମେଏଃ ମୁହାଡ଼୍ ଶିଙ୍ଗି ଲେକା ହାର୍ ଇନିଜାଃ କାଟା ସେଙ୍ଗେଲ୍ ରାଃ ଖୁଣ୍ଟୁ ଲେକା ତାଇକେନା। ଆଡୋଃ ଇନିଜାଃ ତିଈ ରେ ହୁଡିଙ୍ଗ୍ ପୁଥି ତାଇକେନା ଏନା ଖୋଲାଅକାନ୍ ତାଇକେନା। ଇନିଃ ଆଜାଃ ଜୋମ୍ କାଟା କେ ସାମୁଦାର୍ ରେ ହାର୍ ଲେଙ୍ଗା କାଟା କେ ଅତେ ରେ ଦୋହୋ କେଦାଏ, ହାର୍ ନେକା ମାରାଙ୍ଗ୍ ଆୱାଜ୍ ତେ କାଉରି କେଦାଏ, ଜେଲେକା କୁଲ୍ଲା କାଉରି ୟାଏ; ଆଡୋଃ ଚିମ୍ତାଙ୍ଗ୍ ଇନିଃ କାଉରି କେଦାଏ ଇମ୍ତାଙ୍ଗ୍ ସାତ୍ ରିମିଲ୍ ଷାଡି ଆୟୁମ୍ ଜାନା। ଚିମ୍ତାଙ୍ଗ୍ ସାତ୍ ରିମିଲ୍ ଷାଡି ଆୟୁମ୍ ଜାନା, ଇମ୍ତା ଇଙ୍ଗ୍ ଅଲ୍ ନାମ୍ ତାଇକେନାଇଙ୍ଗ୍, ମେନ୍ଦୋ ଇଙ୍ଗ୍ ସିର୍ମାଦିଶୁମ୍ ଏତେ ନେ କାଜି ଆୟୁମ୍ କେଦିଙ୍ଗ୍, “ଅକନ୍ କାଜିକୋ ଏନ୍ ସାତ୍ ରିମିଲ୍ ଷାଡି କୋଏତେ ଆୟୁମ୍ କେଦାମ୍ ଏନାକୋକେ ମୋହାର୍-ଛାପ୍ ତାମେ, ହାର୍ ଆଲୋମ୍ ଅଲେୟା।” ଅକନ୍ ସିର୍ମାଦାସୀ କେ ଇଙ୍ଗ୍ ସାମୁଦାର୍ ଆଡୋଃ ଅତେ ରେ ତିଙ୍ଗୁକାନ୍ ନେଲ୍ ଲିଜାଇଙ୍ଗ୍, ଇନିଃ ଆଜାଃ ଜୋମ୍ ତିଈ କେ ସିର୍ମାଦିଶୁମ୍ ପାଡ଼୍ ଉଠାଓକେଦାଏ। ହାର୍ ଅକନିଃ ଜାନାଓ-ଜାନାଓ ଜୀହିଃ ମେନାଇଜା, ଆଡୋଃ ଅକନିଃ ରିମିଲ୍‍ଦିଶୁମ୍ କେ ଆଡୋଃ ଅକନାଃକୋ ଏଣ୍ତେରେୟା, ଆଡୋଃ ଅତେ କେ ଆଡୋଃ ଅକନାଃକୋ ଏଣ୍ତେରେୟା, ଆଡୋଃ ସାମୁଦାର୍ କେ ଆଡୋଃ ଅକନାଃକୋ ଏଣ୍ତେରେୟା ବାଇକାଦାଏ, ଇନିଜାଃ ଗି କିରିୟା ଜୋମ୍ କେତେ କାଜିକେଦାଏ, “ଆଡୋଃ ନାଆ କାଦେରିୟୋଗା। ମେନ୍ଦୋ ସାତ୍ ୱା ସିର୍ମାଦାସୀ ରାଃ ତୁର୍ହୀ ଅଙ୍ଗ୍ ଇମ୍ତା ହୋବାଅଃ ତେୟାଃ ଷାଡି ହୁଲାଙ୍ଗ୍ କୋରେ ପାର୍ମେଶ୍ଵାର୍ ରାଃ ଉକୁକାନ୍ ଏନ୍ ସୁସାମାଚାର୍ ଲେକାତେ ଅକନାଃ ଇନିଃ ଆୟାଃ ଦାସୀ ନାବୀ କୋକେ ଏମ୍ ଲେଦାଏ, ଏନା ପୁରାଅଗା।” ଅକନ୍ ଷାଡି କେ ଇଙ୍ଗ୍ ସିର୍ମାଦିଶୁମ୍ ଏତେ କାଜିତାନ୍ ଆୟୁମ୍ ଲେଦାଇଙ୍ଗ୍, ଏନା ଆଡୋଃଗି ଇଙ୍ଗ୍ ଲୋଃ ବାକାଣ୍ କେଦାଏ, “ଜୁ ସେନ୍ ମେ, ଅକନ୍ ସିର୍ମାଦାସୀ ସାମୁଦାର୍ ଆଡୋଃ ଅତେ ରେ ତିଙ୍ଗୁ କାନାଏ, ଇନିଜାଃ ତିଈ ରେ ମେନାଃ ଏନ୍ ଖୋଲାଅକାନ୍ ପୁଥି କେ ଇଦି କେମ୍।” ଇଙ୍ଗ୍ ସିର୍ମାଦାସୀ ରାଃ ନାଡ଼େଏ ସେନ୍ କେତେ କାଜିକେଦାଇଙ୍ଗ୍, “ନେ ଏନ୍ ହୁଡିଙ୍ଗ୍ ପୁଥି କେ ଇଙ୍ଗ୍‍କେ ଏମାଇଙ୍ଗ୍ ମେ।” ଇନିଃ ଇଙ୍ଗ୍‍କେ କାଜିକେଦାଏ, “ନେ ଇଦିମେ, ହାର୍ ଜୋମେମେ; ନେୟା ଆମାଃ ଲାହେଃ ରେ ହାଡ଼୍ଆଃ ମେୟା ମେନ୍ଦୋ ଆମାଃ ମୋଚା ରେ ଉରୁମ୍ ସୁକୁ ଲେକା ହେଡ଼େମ୍ ଆଦା ମେୟା।” ଏନ୍ତେ ଇଙ୍ଗ୍ ଏନ୍ ହୁଡିଙ୍ଗ୍ ପୁଥି କେ ଏନ୍ ସିର୍ମାଦାସୀ ରାଃ ତିଈ ତେ ଇଦିକେତେ ଜୋମ୍ ତାଦାଇଙ୍ଗ୍। ଏନା ଇଙ୍ଗ୍ଆଃ ମୋଚା ରେ ଉରୁମ୍ ସୁକୁ ଲେକା ହେଡ଼େମ୍ ଦୋ ଆଦା କିଦିଙ୍ଗ୍ଆ, ମେନ୍ଦୋ ଚିମ୍ତା ଇଙ୍ଗ୍ ଏନାକେ ଜୋମ୍ କେଦାଇଙ୍ଗ୍, ଦୋ ଇଙ୍ଗ୍ଆଃ ଲାହେଃ ହାଡ଼୍ଆଃ ଜାନା। ଏନ୍ତେ ଇଙ୍ଗ୍‍କେ ନେୟା କାଜି ଜାନା, “ଆମ୍‍କେ ଥିମ୍ବା ହୋଡ଼ୋକୋକେ ଆଡୋଃ ଜାତିକୋକେ, ଆଡୋଃ ଆଲାଗ୍-ଆଲାଗ୍ ଭାଷା କାଜିତାନ୍ କୋକେ ଆଡୋଃ ରାଜା କୋ ନାଙ୍ଗ୍ ଆଡୋଃଗି ମିଶା ଆୟାର୍‍କାଜି କାଜି ଲାଗାତିଙ୍ଗ୍ଆ।” ଏନ୍ତେ ଇଙ୍ଗ୍‍କେ ସୋଙ୍ଗ୍ ଲାଗିନ୍ତେ ମିୟାଃ ମାଆସୋଟା ଲେକା ସୋଙ୍ଗ୍-ସୋଟା ଏମ୍ ଜାନା, ଆଡୋଃ ଜେତାଏ ମିହୋଡ଼୍ କାଜିକେଦାଏ, “ବିରିଃମେ, ପାର୍ମେଶ୍ଵାର୍ ରାଃ ମାନ୍ଦିର୍ ଆଡୋଃ ବେଦୀ କେ ସୋଙ୍ଗ୍ଏମେ, ଆଡୋଃ ଏନାରେ ସୁସାର୍ ତାନ୍ କୋକେ ଲେକାକୋମେ। ମେନ୍ଦୋ ମାନ୍ଦିର୍ ରାଃ ବାହାରି ରାଃ ରାଚା କେ ବାଗେ ତାମେ; ଏନାକେ ଆଲୋମ୍ ସୋଙ୍ଗ୍ଏୟା ଚିୟାଃଚି ଏନା ଏଟାଃଜାତି କୋକେ ଏମ୍ କାନା, ଆଡୋଃ ଇନ୍‍କୁ ପାବିତାର୍ ସାହାର୍ କେ ବାୟାଲିଶ୍ ମାହିନା ସାନ୍ତେ କାଟା ଲାଥାର୍ ରେ ତିକା ସେରେଦ୍ ୟାକୋ। ଇଙ୍ଗ୍ ଇଙ୍ଗ୍ଆଃ ବାରିୟା ଗୋୱା କିନ୍‍କେ ନେୟା ଆଧିକାର୍ ଏମା କିନାଇଙ୍ଗ୍ ଚି କାମ୍ବଡ଼ା ଲେକା ଦୁକୁ ଲିଜାଃ ତୁସିଙ୍ଗ୍ କେତେ ଏକ୍ ହାଜାର୍ ଦୁଇ ଶାଅ ସାଠ୍ ଦିନ୍ ସାନ୍ତେ ଆୟାର୍‍କାଜି କାଜିୟାକିନ୍।” ନିକିନ୍ ଏନ୍ ବାରିୟା ଜାଏତୁନ୍ ଦାରୁ ଆଡୋଃ ବାରିୟା ମାସ୍କାଲ୍ ଖୁଣ୍ଟୁ ତାନ୍‍କିନ୍, ଅକନ୍‍କିନ୍ ଅତେ ରେନ୍ ପ୍ରାଭୁ ଆଃ ନାଡ଼େଏ ରେ ତିଙ୍ଗୁଆକାନ୍ ତାଇନାକିନ୍। ଆଡୋଃ ଆଗାର୍ ଜେତାଏ ଇନ୍‍କିନ୍ କେ ହାନି ରିକା ସାନାଙ୍ଗ୍ଆଏ, ଏଣ୍ଡେ ଇନ୍‍କୁୱାଃ ମୋଚା ଏତେ ସେଙ୍ଗେଲ୍ ଅଡୋଙ୍ଗ୍ କେତେ ଇନ୍‍କୁୱାଃ ବାଇରୀ କୋକେ ଅଣ୍ଡୋର୍ କେତେ ତୋରେଃ ବାଇକୋତାନାଏ; ହାର୍ ଆଗାର୍ ଜେତାଏ ଇନ୍‍କିନ୍ କେ ହାନି ରିକା ସାନାଙ୍ଗ୍ ତାନାକୋ, ଏଣ୍ଡେ ନେଲେକା ତେଗି ଜାରୁର୍ ଗୋଜୋଗାକୋ। ଇନ୍‍କିନ୍ କେ ଆଧିକାର୍ ନାମାକାନା ଚି ରିମିଲ୍‍ଦିଶୁମ୍ କେ ବାନ୍ଦ୍ ୟାକୋ, ଏନାତେ ଇନ୍‍କିନାଃ ଆୟାର୍‍କାଜି ହୁଲାଙ୍ଗ୍ କୋରେ ଦାଆ କା ଗାମାୱା; ଆଡୋଃ ଇନ୍‍କିନ୍ କେ ସବେନ୍ ଦାଆ କୋରେ ଆଧିକାର୍ ନାମାକାନା ଚି ଏନାକେ ମାୟୋମ୍ ବାଇକେୟାକୋ, ଆଡୋଃ ଚିମ୍ତାଙ୍ଗ୍ ସାନାଙ୍ଗ୍ ୟାକୋ ଇମ୍ତାଙ୍ଗ୍ ଅତେ ରେ ସବେନ୍ ରାକାମ୍ ରାଃ ମାହାମାରୀ ଆଉୱେୟାକୋ। ଚିମ୍ତାଙ୍ଗ୍ ଇନ୍‍କିନ୍ ଗୋୱା ଏମ୍ ଛାବାୟାକୋ, ଇମ୍ତା ଏନ୍ ପାଶୁ ଅକନିଃ କାସୋଙ୍ଗ୍ଅଃ ଡୋଡା ଏତେ ଅଡୋଙ୍ଗ୍ଅଗାଏ, ଇନ୍‍କିନ୍ ଲୋଃ ଲାପାଡ଼ାଇ କେତେ ଇନ୍‍କିନ୍ ଏତେ ଜିତାଅଗାଏ ହାର୍ ଇନ୍‍କିନ୍ କେ ଗୋଏଃ ତାକୋୱାଏ। ଇନ୍‍କିନାଃ ମାଣା ଏନ୍ ମାରାଙ୍ଗ୍ ସାହାର୍ ରାଃ ହୋରା ରେ ଉୟୁଃକାନ୍ ତାଇନୋଗା, ଅକନାଃ ଆତ୍ମାନ୍ ଲେକାତେ ସାଦୋମ୍ ହାର୍ ମିଶାର୍ ଦିଶୁମ୍ କାଜିୟୋଃୱା, ଅକ୍ତାଃ ଇନ୍‍କୁୱାଃ ପ୍ରାଭୁ ହଗି କ୍ରୁଶ୍ ରେ ରାକାବ୍ ଲେନ୍ ତାଇକେନାଏ। ସବେନ୍ ହୋଡ଼ୋକୋ ଆଡୋଃ କିଲି ରେନ୍ କୋ ଆଡୋଃ ଭାଷା ରେନ୍ କୋ ଆଡୋଃ ଦିଶୁମ୍ ରେନ୍ ହୋଡ଼ୋକୋ ଇନ୍‍କିନାଃ ମାଣା କେ ସାଡ଼େ ତିନ୍ ଦିନ୍ ସାନ୍ତେ ନେଲ୍ କାତେୟାକୋ, ଆଡୋଃ ଇନ୍‍କିନାଃ ମାଣା କେ କାବାର୍ ରେ ମାଣ୍ତାଅ କାକୋ ଏମେୟା। ଅତେଦିଶୁମ୍ ରେ ତାଇନ୍ ତାନ୍‍କୋ ଇନ୍‍କିନାଃ ଗୋଏଃ ଜାନ୍ତେ ରାଶିକାୱାକୋ ଆଡୋଃ ସୁକୁଅଃୱାକୋ, ଆଡୋଃ ମିହୋଡ଼୍ ଏଟାଃ ନିଃତାଃ ଭେଁଟ୍ କୁପୁଲୋୱାକୋ, ଚିୟାଃଚି ନେ ବାରାନ୍ ନାବୀ କିନ୍ ନେ ଅତେ ରେ ତାଇନ୍ ତାନ୍ କୋକେ ସାତାଅ ଲେଃ ତାଇକେନାକୋ। ମେନ୍ଦୋ ସାଡ଼େ ତିନ୍ ଦିନ୍ ରାଃ ତାୟୋମ୍ତେ ପାର୍ମେଶ୍ଵାର୍ ପାଡ଼େତେ ଜୀନିଦ୍ ରେୟାଃ ସାହେଃ ଇନ୍‍କିନାଃରେ ବୋଲୋଜାନା, ଆଡୋଃ ଇନ୍‍କିନ୍ ଆକିନାଃ କାଟା ତେ ତିଙ୍ଗୁ ଜାନାକିନ୍, ଆଡୋଃ ଇନ୍‍କିନ୍ କେ ନେନେଲ୍ ତାନ୍ କୋୱା ରେ ବେଶେ ବୋରୋ ବୋଲୋଜାନା। ଏନ୍ତେ ଇନ୍‍କିନ୍ କେ ସିର୍ମାଦିଶୁମ୍ ଏତେ ମିୟାଃ ମାରାଙ୍ଗ୍ ଆୱାଜ୍ ଆୟୁମ୍ ଜାନା “ନେତାଃ ଚେତାନ୍ ହିଜୁଃବେନ୍!” ନେୟା ଆୟୁମ୍ କେତେ ଇନ୍‍କିନ୍ ରିମିଲ୍ ରେ ରାକାବ୍ କେତେ ଆକିନାଃ ବାଇରୀ କୋୱାଃ ନେପେଲ୍‍ ରେ ସିର୍ମାଦିଶୁମ୍ ତେ ରାକାବ୍ ଜାନାକିନ୍। ଏନ୍ ଇମ୍ତାଗି ମିୟାଃ ମାରାଙ୍ଗ୍ ଭୁଇଁଡଲ୍ ହୋବାଜାନା, ଆଡୋଃ ସାହାର୍ ରାଃ ଦାଶ୍ ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଉୟୁଃଜାନା; ଆଡୋଃ ଏନ୍ ଭୁଇଁଡଲ୍ ତେ ସାତ୍ ହାଜାର୍ ହୋଡ଼ୋକୋ ଗୋଏଃ ଜାନାକୋ, ଆଡୋଃ ସାରେଜାକାନ୍ କୋ ବୋରୋ ଜାନାକୋ ଆଡୋଃ ସିର୍ମାଦିଶୁମ୍ ରେନ୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକା କେଦାକୋ। ଏଟାଃ ବିପାତୀ ହୋବାଛାବାଜାନା; ନେଲେପେ, ତିସ୍ରା ବିପାତୀ ସେକାଡ଼୍ ଗି ହିଜୁଃ ରାଃ ମେନାଃ। ଚିମ୍ତାଙ୍ଗ୍ ସାତ୍‍ୱା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଇମ୍ତା ସିର୍ମାଦିଶୁମ୍ ରେ ନେ ବିଷାୟ୍ ରେ ମାପ୍‍ରାଙ୍ଗ୍-ମାପ୍‍ରାଙ୍ଗ୍ ଆୱାଜ୍ ହୋବାଜାନା ଏନା କାଜିକେଦାଏ: “ଅତେଦିଶୁମ୍ ରାଃ ରାଇଜ୍ ଆବୁୱାଃ ପ୍ରାଭୁ ଆଃ ଆଡୋଃ ଇନିଜାଃ ମାସୀହ୍ ରାଃ ହୋବାଜାନା, ଆଡୋଃ ଇନିଃ ଜାନାଓ-ଜାନାଓ ନାଙ୍ଗ୍ ରାଇଜ୍ ଏୟାଏ।” ଏନ୍ତେ ଚୋବିଶ୍ ଝାନ୍ ମାରିହୋଡ଼ୋକୋ ଅକନ୍‍କୋ ଚି ପାର୍ମେଶ୍ଵାର୍ ରାଃ ନାଡ଼େଏ ରେ ଆପାନାଃ-ଆପାନାଃ ସିଂହାସାନ୍ ରେ ଦୁବ୍ ଲେନ୍ ତାଇନାକୋ, ଅବୋର୍ ଜାନାକୋ ଆଡୋଃ ପାର୍ମେଶ୍ଵାର୍ କେ ଜୋହାର୍ କେତେ, ନେୟା କାଜିକେଦାକୋ, “ହେ ସବେନ୍ ଏତେ ପେଡ଼େଜାନ୍ ପ୍ରାଭୁ ପାର୍ମେଶ୍ଵାର୍, ଅକନିଃ ମେନାଇଜା ଆଡୋଃ ଅକନିଃ ତାଇକେନାଏ, ଆଲେ ଆମ୍ କେ ଧାନ୍ୟାବାଦ୍ ମେତାନାଲେ ଚି ଆମ୍ ଆମାଃ ମାରାଙ୍ଗ୍ ପେଡ଼େଏ କେ କାମି ରେ ଆଉକେତେ ରାଇଜ୍ ଏଟେଃ କେଦାମ୍। ଏଟାଃଜାତି କୋ ଖିସ୍ ଜାନାକୋ, ମେନ୍ଦୋ ଆମ୍ ଖିସ୍ ତେ କାଉରି କେଦାମ୍, ଆଡୋଃ ଏନ୍ ସାମାୟ୍ ହିଜୁଃ ଥେବାଃ କାନା ଚି ଗୋଜାକାନ୍ କୋୱାଃ ବିଚାର୍ ରିକାଅଗା, ଆଡୋଃ ଆମାଃ ଦାସୀ ନାବୀ କୋକେ ଆଡୋଃ ପାବିତାର୍ ହୋଡ଼ୋକୋକେ ଆଡୋଃ, ଏନ୍ ହୁପୁଡିଙ୍ଗ୍-ମାପ୍‍ରାଙ୍ଗ୍ କୋକେ ଅକନ୍‍କୋ ଆମାଃ ନୁତୁମ୍ ତେ ବୋରୋତାନାକୋ, ଇନ୍‍କୁକେ ବାଦ୍‍ଲା ଏମୋଃକା, ଆଡୋଃ ଅତେ କେ ବାଗ୍‍ଡ଼ାଅ ତାନ୍ କୋକେ ନାଶ୍ ରିକାଅଃଚା।” ଏନା ତାୟୋମ୍ତେ ପାର୍ମେଶ୍ଵାର୍ ରାଃ ଏନ୍ ମାନ୍ଦିର୍ ସିର୍ମାଦିଶୁମ୍ ରେ ନିଃଜାନା, ଆଡୋଃ ଇନିଜାଃ ମାନ୍ଦିର୍ ରେ ଆଜାଃ ନିୟାମ୍‍ଥଲ୍ ରାଃ ସାନ୍ଦୁକ୍-ବାକ୍ସା ନେଲ୍ ଜାନା; ଆଡୋଃ ବିଜ୍‍ଲୀକୋ ଆଡୋଃ ଆୱାଜ୍ କୋ ଆଡୋଃ ରିମିଲ୍ ଷାଡି କୋ ଆଡୋଃ ଭୁଇଁଡଲ୍ ହୋବାଜାନା ଆଡୋଃ ବେଶେ ଆରିଲ୍ ଦାଆ ଗାମାଜାନା। ଏନ୍ତେ ରିମିଲ୍‍ଦିଶୁମ୍ ରେ ମିୟାଃ ମାରାଙ୍ଗ୍ ଚିହ୍ନା ନେଲ୍ ଜାନା ମାନେ ମିୟାଃ କୁଡ଼ି ଅକନିଃ ଶିଙ୍ଗି କେ ତୁସିଙ୍ଗ୍ ଲେନ୍ ତାଇକେନାଏ, ଆଡୋଃ ଚାଣ୍ଡୁଃ ଆଜାଃ କାଟା ଲାଥାର୍ ରେ ତାଇକେନା, ଆଡୋଃ ଇନିଜାଃ ବୋଅ ରେ ବାରାଠୁ ଇପିଲ୍ କୋରାଃ ମୁକୁଟ୍ ତାଇଲେନା। ଇନିଃ ହୋଡ଼ମୋ ରେ ତାଇକେନାଏ ଆଡୋଃ କାଉରି ତାଇକେନାଏ ଚିୟାଃଚି ବୁଗିୟୋଃ ରାଃ ଦୁକୁ ସାହାତିଙ୍ଗ୍ ତାଇକେନାଏ। ମିୟାଃ ଆଡୋଃଗି ଚିହ୍ନା ରିମିଲ୍‍ଦିଶୁମ୍ ରେ ନେଲ୍ ଜାନା; ହାର୍ ନେଲେପେ, ମିୟାଃ ମାରାଙ୍ଗ୍ ଆରାଃ ଆଜ୍‍ଗାର୍ ବିଙ୍ଗ୍ ତାଇକେନାଏ, ଅକନିଜାଃ ସାତ୍ ଠୁ ବୋଅ ଆଡୋଃ ଦାଶ୍ ଠୁ ଦିରିଙ୍ଗ୍ ତାଇଲେନା, ଆଡୋଃ ଇନିଜାଃ ବୋଅ ରେ ସାତ୍ ଠୁ ରାଜ୍ ମୁକୁଟ୍ ତାଇକେନା। ଇନିଜାଃ ଚାଃଲୋମ୍ ରିମିଲ୍‍ଦିଶୁମ୍ ରାଃ ଇପିଲ୍ କୋରାଃ ଆପିୟା ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ କେ ଥାଇଃ କେତେ ଅତେ ରେ ଉୟୁଃ ତାଦାଏ। ଏନ୍ ଆଜ୍‍ଗାର୍ ବିଙ୍ଗ୍ ଏନ୍ କୁଡ଼ି ରାଃ ନାଡ଼େଏ ରେ ଅକନିଃ ବୁଗିୟୋଃ ରାଃ ତାଇକେନାଏ, ତିଙ୍ଗୁ ଜାନାଏ ଚି ଚିମ୍ତାଙ୍ଗ୍ ଇନିଃ ହୋନ୍ ଜାନାମିୟାଏ ଇମ୍ତା ଏନ୍ ହୋନ୍ କେ ଉଃଦ୍ କିୟାଏ। ଇନିଃ କୋଡ଼ାହୋନ୍ ଜାନାମ୍ କିଜାଏ ଅକନିଃ ମେଣେଏଃ ରାଃ ରାଡ଼୍ ତେ ସବେନ୍ ଜାତି କୋରେ ରାଇଜ୍ ରିକା ରାଃ ତାଇକେନାଏ। ଆଡୋଃ ଏନ୍ ହୋନ୍ ରେଏଃ ଇଦି ଜାନାଏ ହାର୍ ପାର୍ମେଶ୍ଵାର୍ ତାଃ ହାର୍ ଆଜାଃ ସିଂହାସାନ୍ ନାଡ଼େଏ ତାଃ ସେଟେର୍ ରିକା ଜାନାଏ। ଆଡୋଃ ଏନ୍ କୁଡ଼ି ଏନ୍ ସୁନ୍‍ସାନ୍ ଜାଗା ରେ ନିର୍ ଜାନାଏ ଅକ୍ତାଃ ପାର୍ମେଶ୍ଵାର୍ ପାଡ଼େତେ ଇନିଜାଃ ଲାଗିନ୍ତେ ଜାଗା ବାଇକାନ୍ ତାଇକେନା, ଏନାତେ ଇନିଃ ଏକ୍ ହାଜାର୍ ଦୁଇ ଶାଅ ସାଠ୍ ଦିନ୍ ସାନ୍ତେ ଆସୁଲୋଃ ୱାଏ। ଆଡୋଃ ସିର୍ମାଦିଶୁମ୍ ରେ ଲାପଡ଼ାଇ ହୋବାଜାନା, ମୀଖାଇଲ୍ ଆଡୋଃ ଆଜାଃ ସିର୍ମାଦାସୀକୋ ଆଜ୍‍ଗାର୍ ଲୋଃ ଲାପଡ଼ାଇ ଲାଗିନ୍ତେ ଅଡୋଙ୍ଗ୍ ଜାନାକୋ; ହାର୍ ଆଜ୍‍ଗାର୍ ବିଙ୍ଗ୍ ଆଡୋଃ ଇନିଜାଃ ଦାସୀକୋ ଇନିଃ ଲୋଃ ଲାଡ଼ାଇ ଜାନାକୋ, ମେନ୍ଦୋ କାକୋ ଜିତାଅଧାଡ଼ିଜାନା, ଆଡୋଃ ସିର୍ମାଦିଶୁମ୍ ରେ ଇନ୍‍କୁୱାଃ ଲାଗିନ୍ ଆଡୋଃ ଜାଗା କାନାମ୍ ଜାନା। ଇମ୍ତା ଏନ୍ ମାରାଙ୍ଗ୍ ଆଜ୍‍ଗାର୍ ବିଙ୍ଗ୍ ମାନେ ଏନ୍ ମାରି ବିଙ୍ଗ୍ ଅକନିଃ ଇବ୍‍ଲିଶ୍ ହାର୍ ଶାଏତାନ୍ କାଜିଅଃ ତାଇନାଏ ଆଡୋଃ ସବେନ୍ ଅତେଦିଶୁମ୍ କେ ହିଡ଼୍‍କୋତାଇନାଏ, ଅତେ ରେ ଉୟୁଃ ରିକା ଜାନାଏ, ଏନ୍ତେ ଇନିଜାଃ ଶାଏତାନ୍ ଦାସୀକୋ ଇନିଃ ଲୋଃ ଉୟୁଃ ରିକା ଜାନାକୋ। ଏନ୍ତେ ଇଙ୍ଗ୍ ସିର୍ମାଦିଶୁମ୍ ରେ ନେ ମାରାଙ୍ଗ୍ ଆୱାଜ୍ ତେ କାଜିତାନ୍ ଆୟୁମ୍ କେଦିଙ୍ଗ୍, “ନାଆ ଆବୁୱାଃ ପାର୍ମେଶ୍ଵାର୍ ରାଃ ବାଞ୍ଚାଅ ଆଡୋଃ ପେଡ଼େଏ ଆଡୋଃ ରାଇଜ୍ ଆଡୋଃ ଆଜାଃ ମାସୀହ୍ ରାଃ ଆଧିକାର୍ ନେଲ୍ ଜାନା, ଚିୟାଃଚି ଆବୁୱାଃ ହାଗା କୋରେ ଦୋଷ୍ ଲାଗାଅନିଃ, ଅକନିଃ ନିଦା ଶିଙ୍ଗି ଆବୁୱାଃ ପାର୍ମେଶ୍ଵାର୍ ରାଃ ନାଡ଼େଏ ରେ ଇନ୍‍କୁୱାଃ ରେ ଦୋଷ୍ ଲାଗାଅ କୋତାଇକେନାଏ, ଇନିଃ ଉୟୁଃ ରିକା ଜାନାଏ।” ଇନ୍‍କୁ ମିଣ୍ଡୀହୋନ୍ ରାଃ ମାୟୋମ୍ ହୋରାତେ ଆଡୋଃ ଆପାନାଃ ଗୋୱା ରାଃ ବାଚାନ୍ ଲାଗିନ୍ତେ ଇନିଃତେ ଜିତାଅ ଜାନାକୋ, ଆଡୋଃ ଇନ୍‍କୁ ଆକୋୱାଃ ଜୀଉକୋକେ କାକୋ ଦୁଲାଡ଼୍ କେଦା, ନେତାଃ ସାନ୍ତେ ଚି ଗୋନୋଏଃ ହ ସାହାତିଙ୍ଗ୍ କେଦାକୋ। ଏନାମେନ୍ତେ ହେ ସିର୍ମାଦିଶୁମ୍ ହାର୍ ଏନ୍ତାଃ ରେ ତାଇନ୍ ତାନ୍ କୋ ସୁକୁଅଃପେ; ହେ ଅତେ ହାର୍ ସାମୁଦାର୍, ଆପେୟାଃ ଚେତାନ୍ ରେ ହାୟ୍! ଚିୟାଃଚି ଶାଏତାନ୍ ଥିମ୍ବାଗି ଖିସ୍ ତାନ୍ ଲୋଃ ଆପେୟାଃ ତାଃ ଆଡ଼୍‍ଗୁ କାନାଏ, ଚିୟାଃଚି ଆଏଃ ସାରିତାନାଏ ଚି ଆଜାଃ ଆଡୋଃ ହୁଡିଙ୍ଗ୍ କାନ୍ ଗି ସାମାୟ୍ ମେନାଃ। ଚିମ୍ତାଙ୍ଗ୍ ଆଜ୍‍ଗାର୍ ବିଙ୍ଗ୍ ନେଲ୍‍କେଦାଏ ଚି ଇଙ୍ଗ୍ ଅତେ ରେ ଉୟୁଃ ରିକା ଜାନିଙ୍ଗ୍, ଏଣ୍ଡେ ଏନ୍ କୁଡ଼ି କେ ଅକନିଃ କୋଡ଼ାହୋନ୍ ଜାନାମ୍ ଲିଜାଏ, ସାତାଅ କିଜାଏ। ମେନ୍ଦୋ ଏନ୍ କୁଡ଼ି କେ ମାରାଙ୍ଗ୍ ଗିଦ୍ଦ ରାଃ ବାରିୟା ଆପ୍‍ରୋବ୍ ଲେକା ଏମ୍ ଜାନା, ଏନାତେ ବିଙ୍ଗ୍ ରାଃ ନାଡ଼େଏ ଏତେ ଆପିର୍ କେତେ ସୁନ୍‍ସାନ୍ ଜାଗା ରାଃ ଏନ୍ ଜାଗା ତାଃ ସେଟେର୍ କୋଃଚାଏ, ଅକ୍ତାଃ ଇନିଃ ମିୟାଃ ସାମାୟ୍ ଆଡୋଃ ସାମାୟ୍ କୋ ନାଙ୍ଗ୍, ଆଡୋଃ ଆଧା ସାମାୟ୍ ସାନ୍ ଆସୁଲୋଃ କାଏ। ଆଡୋଃ ବିଙ୍ଗ୍ ଏନ୍ କୁଡ଼ି ରାଃ ତାୟୋମ୍ ରେ ଆୟାଃ ମୋଚା ଏତେ ନାଇଗାଡା ରାଃ ଦାଆ ଲେକା ଦାଆ ତେ ଆତୁଇଦିକିୟାଏ ମେନ୍ତେ ଦାଆ ଆଡ଼ାଆଃ କେଦାଏ। ମେନ୍ଦୋ ଅତେ ଏନ୍ କୁଡ଼ି କେ ଦେଙ୍ଗା କିଜାଏ, ଆଡୋଃ ଆଜାଃ ମୋଚା ଖଲାଅ କେତେ ଏନ୍ ନାଇଗାଡା ରାଃ ଦାଆ କେ ଅକନାଃ କେ ଆଜ୍‍ଗାର୍ ବିଙ୍ଗ୍ ଆଜାଃ ମୋଚା ତେ ଆଡ଼ାଆଃ ଲେଦାଏ ଏନାକେ ନୁ ତାଦାଏ। ଏନ୍ତେ ଆଜ୍‍ଗାର୍ ବିଙ୍ଗ୍ ଏନ୍ କୁଡ଼ି କେ ଖିସ୍ ଜାନାଏ, ଆଡୋଃ ଇନିଜାଃ ସାରେଜାକାନ୍ ହୋନ୍ କୋକେ, ଅକନ୍‍କୋ ପାର୍ମେଶ୍ଵାର୍ ରାଃ ଆନାଚୁ କୋକେ ମାନାତିଙ୍ଗ୍ ତାଇକେନାକୋ ଆଡୋଃ ୟୀଶୁ ରାଃ ଗୋୱା ଏମ୍ ଲାଗିନ୍ତେ ବାଇକେତେ ତାଇନ୍ ଲେନାକୋ, ଇନ୍‍କୁଲୋଃ ଲାଡ଼ାଇ ଲାଗିନ୍ତେ ସେନ୍ ଜାନାଏ। ଆଡୋଃ ଇନିଃ ସାମୁଦାର୍ ରେୟାଃ ଗିତିଲ୍ ରେ ସେନ୍ କେତେ ତିଙ୍ଗୁ ଜାନାଏ। ନେୟାରାଃ ତାୟୋମ୍ତେ ଇଙ୍ଗ୍ ମିୟାଃ ପାଶୁ କେ ସାମୁଦାର୍ ଏତେ ଅଡୋଙ୍ଗ୍‍ତାନ୍ ନେଲ୍ କିଜାଇଙ୍ଗ୍, ଅକନିଜାଃ ଦାଶ୍ ଠୁ ଦିରିଙ୍ଗ୍ ଆଡୋଃ ସାତ୍‍ଠୁ ବୋଅ ତାଇକେନା। ଇନିଜାଃ ଦିରିଙ୍ଗ୍ କୋରେ ଦାଶ୍ ଠୁ ରାଜ୍ ମୁକୁଟ୍ ହାର୍ ଇନିଜାଃ ବୋଅ କୋରେ ପାର୍ମେଶ୍ଵାର୍ କେ ନିନ୍ଦା ରାଃ ନୁତୁମ୍ କୋ ଅଲାକାନ୍ ତାଇକେନା। ଅକନ୍ ପାଶୁ କେ ଇଙ୍ଗ୍ ନେଲ୍ କେଦାଇଙ୍ଗ୍ ଇନିଃ ଚିତାବାଘ୍ ଲେକା ତାଇକେନାଏ, ଆଡୋଃ ଇନିଜାଃ କାଟାକୋ ଭାଲୁ ରାଃ କାଟାକୋ ଲେକା, ଆଡୋଃ ମୋଚା କୁଲ୍ଲା ଲେକା ତାଇକେନା। ଏନ୍ ଆଜ୍‍ଗାର୍ ବିଙ୍ଗ୍ ଆଜାଃ ପେଡ଼େଏ ହାର୍ ଆଜାଃ ସିଂହାସାନ୍ ଆଡୋଃ ମାରାଙ୍ଗ୍ ଆଧିକାର୍ ଇନିଃକେ ଏମ୍ କିଜାଏ। ଇଙ୍ଗ୍ ଇନିଜାଃ ବୋଅକୋଏତେ ମିୟାଃ ରେ ନେକାନ୍ ମାରାଙ୍ଗ୍ ଘାଅ ହୋବାକାନ୍ ନେଲ୍ କେଦାଇଙ୍ଗ୍ ଜେଲେକାଚି ଇନିଃ ଗୋଜୋଃ ରାଃ ଚେତାନ୍ ରେ ମେନାଇଜା, ଆଡୋଃ ଆଜାଃ ଏନ୍ ଜୀଉ ଇଦିଲେକାନାଃ ଘାଅ ବେଶ୍ ଜାନା, ଆଡୋଃ ସବେନ୍ ଅତେ ରେନ୍ ହୋଡ଼ୋକୋ ଏନ୍ ପାଶୁ ରାଃ ତାୟୋମ୍-ତାୟୋମ୍ ଆକ୍‍ଦାନ୍ଦା ତାନ୍ ଲୋଃ ସେନ୍ ଜାନାକୋ। ହୋଡ଼ୋକୋ ଆଜ୍‍ଗାର୍ ବିଙ୍ଗ୍ କେ ପୂଜା କିଜାକୋ, ଚିୟାଃଚି ଇନିଃ ପାଶୁ କେ ଆଜାଃ ଆଧିକାର୍ ଏମ୍ ଲିଜାଏ, ଆଡୋଃ ନେୟା କାଜିକେତେ ପାଶୁ ରାଃ ପୂଜା କେଦାକୋ, “ନେ ପାଶୁ ଲେକା ଅକଏ ତାନିଃ? ଅକଏ ନିଃତେ ଲାପଡ଼ାଇ ଧାଡ଼ିୟାଏ?” ଏନ୍ ପାଶୁ କେ ମାପ୍‍ରାଙ୍ଗ୍-ମାପ୍‍ରାଙ୍ଗ୍ ଘାମାଣ୍ଡ୍ କାଜିକୋ କାଜି ଲାଗିନ୍ତେ ଆଡୋଃ ନିନ୍ଦା ରିକାଲାଗିନ୍ତେ ଇନିଃକେ ମିୟାଃ ମୋଚା ଏମ୍ ଜାନା, ହାର୍ ଇନିଃକେ ବାୟାଲିଶ୍ ମାହିନା ସାନ୍ତେ କାମି ରିକା ନାଙ୍ଗ୍ ଆଧିକାର୍ ଏମ୍ ଜାନା। ଇନିଃ ପାର୍ମେଶ୍ଵାର୍ ରାଃ ନିନ୍ଦା ରିକା ଲାଗିନ୍ତେ ମୋଚା ଖଲାଅ କେଦାଏ ଚି ଇନିଜାଃ ନୁତୁମ୍ ଆଡୋଃ ଇନିଜାଃ ତାମ୍‍ବୁ କେ ମାନେ ସିର୍ମାଦିଶୁମ୍ ରେ ତାଇତାନ୍ କୋୱାଃ ନିନ୍ଦା ରିକାୟାଏ। ଇନିଃକେ ନେୟା ହଗି ଆଧିକାର୍ ଏମ୍ ଜାନା ଚି ପାବିତାର୍ ହୋଡ଼ୋକୋ ଲୋଃ ଲାଡ଼ାଇ ୟାଏ ଆଡୋଃ ଇନ୍‍କୁ ତେ ଜିତାଅୱାଏ, ଆଡୋଃ ଇନିଃକେ ସବେନ୍ କିଲିକୋ, ଆଡୋଃ ହୋଡ଼ୋକୋ ଆଡୋଃ ଭାଷା କୋ ଆଡୋଃ ଦିଶୁମ୍ କୋ ଚେତାନ୍ ରେ ଆଧିକାର୍ ଏମ୍ ଜାନା। ଅତେଦିଶୁମ୍ ରେନ୍ ତାଇନ୍ ତାନ୍ ଏନ୍ ସବେନ୍ କୋ, ଅକନକୋୱାଃ ନୁତୁମ୍ ଏନ୍ ମିଣ୍ଡୀହୋନ୍ ରାଃ ଜୀଦାନ୍ ରେୟାଃ କିତାବ୍ ରେ କାଅଲାକାନା, ଅକନିଃ ଅତେଦିଶୁମ୍ ରାଃ ଏନେଟେଃ ସାମାୟ୍ ଏତେ ଗୋଏଃ କାନାଏ, ଏନ୍ ପାଶୁ କେ ଜୋହାରିୟାକୋ। ଅକେୟାଃ ଲୁତୁର୍ ମେନାଃ ଇନିଃ ଆୟୁମେ କାଏ। ଅକଏକେ ବାନ୍ଦି ରେ ଉୟୁଗେନ୍ ମେନାଃ ଇନିଃ ବାନ୍ଦି ରେ ଉୟୁଗୋଗାଏ, ଅକଏ ତାଲ୍‍ୱାର୍ ତେ ଗୋଜୋଗାଏ, ଇନିଃ ତାଲ୍‍ୱାର୍ ତେ ଗୋଜୋଃ ଲାଗାତିଙ୍ଗ୍ଆ। ପାବିତାର୍ ହୋଡ଼ୋକୋୱାଃ ସାହାତିଙ୍ଗ୍ ଆଡୋଃ ବିଶ୍ଵାସ୍ ନେତାଃ ରେ ମେନାଃ। ଏନ୍ତେ ଇଙ୍ଗ୍ ଆଡୋଃ ମିୟାଃ ପାଶୁ କେ ଅତେ ଏତେ ଅଡୋଙ୍ଗ୍ ତାନ୍ ନେଲ୍ କିଜାଇଙ୍ଗ୍, ଇନିଜାଃ ମିଣ୍ଡୀହୋନ୍ ଲେକା ବାରିୟା ଦିରିଙ୍ଗ୍ ତାଇକେନା, ହାର୍ ଇନିଃ ଆଜ୍‍ଗାର୍ ବିଙ୍ଗ୍ ଲେକା କାଜି ତାଇକେନାଏ। ଇନିଃ ଏନ୍ ସିଦା ପାଶୁ ରାଃ ସବେନ୍ ଆଧିକାର୍ ଇନିଜାଃ ନାଡ଼େଏ କାମି ରେ ଆଉ ତାଇକେନାଏ; ଆଡୋଃ ଅତେ ହାର୍ ଏଣ୍ଡେରେ ତାଇତାନ୍ କୋଏତେ ଏନ୍ ସିଦା ରେନ୍ ପାଶୁ ରାଃ, ଅକନିଜାଃ ଜୀଉ ଇଦିଲେକାନାଃ ଘାଅ ବେଶ୍ ହୋବାଲେନ୍ ତାଇକେନା, ପୂଜା ରିକାକୋ ତାଇକେନାଏ। ଇନିଃ ମାପ୍‍ରାଙ୍ଗ୍-ମାପ୍‍ରାଙ୍ଗ୍ ଚିହ୍ନା କୋ ଦେଖାଅ ତାଇକେନାଏ, ନେତାଃ ସାନ୍ତେ ଚି ହୋଡ଼ୋକୋୱାଃ ନାଡ଼େଏ ରେ ସିର୍ମାଦିଶୁମ୍ ଏତେ ଅତେ ରେ ସେଙ୍ଗେଲ୍ ଗାମା କେ ତାଇକେନାଏ। ଏନ୍ ଚିହ୍ନା କୋରାଃ ହୋରାତେ, ଅକନାଃକୋ ଏନ୍ ପାଶୁ ରାଃ ନାଡ଼େଏ ରେ ଦେଖାଅ ଲାଗିନ୍ ଆଧିକାର୍ ଇନିଃକେ ଏମ୍ ଲେନ୍ ତାଇକେନା, ଇନିଃ ଅତେ ରେନ୍ ତାଇତାନ୍ କୋକେ ହିଡ଼୍‍କୋ ତାଇକେନାଏ ଆଡୋଃ ଅତେ ରେନ୍ ତାଇନ୍ ତାନ୍ କୋକେ କାଜିକୋ ତାଇନାଏ ଚି ଅକନ୍ ପାଶୁ କେ ତାଲ୍‍ୱାର୍ ଠୋଅ ଲେନ୍ ତାଇକେନା ଇନିଃ ଜୀହିଃ ଜାନାଏ, ଇନିଜାଃ ମୂର୍ତି ବାଇୟେପେ। ଇନିଃକେ ଏନ୍ ପାଶୁ ରାଃ ମୂର୍ତି ରେ ଜୀଉ ଏମେରାଃ ଆଧିକାର୍ ଏମ୍ ଜାନା ଏନାତେ ପାଶୁ ରାଃ ମୂର୍ତି ବାକାଣ୍ ଧାଡ଼ିୟାଏ, ଆଡୋଃ ଚିମିନାଙ୍ଗ୍ ହୋଡ଼ୋକୋ ଏନ୍ ପାଶୁ ରାଃ ମୂର୍ତି କେ କାକୋ ପୂଜାୟା, ଇନ୍‍କୁକେ ଗୋଏଃ ରିକା କୋୱାଏ। ଇନିଃ ହୁପୁଡିଙ୍ଗ୍-ମାପ୍‍ରାଙ୍ଗ୍, କିଶାଣ୍‍କାନ୍-ଗାରିବ୍ କାନ୍, ଗୋମ୍‍କେ-ଦାସୀ ସବେନ୍ କୋୱାଃ ଜୋମ୍ ତିଈ ରେ ଚାହେ ଇନ୍‍କୁୱାଃ ମୋଲୋଙ୍ଗ୍ ରେ ମିୟାଃ-ମିୟାଃ ଛାପ୍ ଇଦିନାଙ୍ଗ୍ ଜାବ୍ରାଇ କେଃକୋୱାଏ, ଏନାତେ ଅକନିଜାଃ ରେ ଛାପ୍ ମାନେ ଏନ୍ ପାଶୁ ରାଃ ନୁତୁମ୍ ଚାହେ ଇନିଜାଃ ନୁତୁମ୍ ରାଃ ହିସାବ୍ ମେନାଃ, ଇନିଃକେ ବାଗେ କେତେ ଏଟାଃ ଜେତାଏ କିରିଙ୍ଗ୍-ଆଖ୍ରିଙ୍ଗ୍ କାକୋ ଧାଡ଼ିୟା। ସେଣା ନେଣ୍ଡେ ରେଗି ମେନାଃ: ଅକେୟାଃ ସେଣା ମେନାଃ ଇନିଃ ନେ ପାଶୁ ରାଃ ହିସାବ୍ କେ ଲେକାଚାଏ, ଚିୟାଃଚି ଏନା ହୋଡ଼ ରାଃ ହିସାବ୍ ତାନାଃ, ଆଡୋଃ ଇନିଜାଃ ହିସାବ୍ ଛାଅ ଶୋ ଛେୟାଶାଠ୍ ତାନାଃ। ଏନା ତାୟୋମ୍ତେ ଇଙ୍ଗ୍ ନେଲ୍ କାଦାଇଙ୍ଗ୍, ହାର୍ ନେଲେପେ, ଏନ୍ ମିଣ୍ଡୀହୋନ୍ ସିୟୋନ୍ ବୁରୁ ରେ ତିଙ୍ଗୁ କାନାଏ, ହାର୍ ଇନିଜାଃ ଲୋଃ ଏକ୍ ଲାଖ୍ ଚୌୱାଲିସ୍ ହାଜାର୍ ଝାନ୍ ହୋଡ଼ୋକୋ ମେନାକୋୱା, ଅକନ୍ କୋୱା ମୋଲୋଙ୍ଗ୍ ରେ ଇନିଜାଃ ଆଡୋଃ ଇନିଜାଃ ଆପୁ ରାଃ ନୁତୁମ୍ ଅଲାକାନା। ଆଡୋଃ ସିର୍ମାଦିଶୁମ୍ ଏତେ ଇଙ୍ଗ୍‍କେ ମିୟାଃ ନେକା ଆୱାଜ୍ ଆୟୁମ୍ ଜାନା ଅକନାଃଚି ଥିମ୍ବାଗି ଦାଆ ଉୟୁଗୋଃତାନ୍ ଲେକା ଆଡୋଃ ମାରାଙ୍ଗ୍ ରିମିଲ୍ ଷାଡି ଲେକା ତାଇକେନା। ଆଡୋଃ ଅକନ୍ ଷାଡି ଇଙ୍ଗ୍ ଆୟୁମ୍ କେଦାଇଙ୍ଗ୍ ଏନା ନେକା ତାଇକେନା ଜେଲେକାଚି ବୀଣା ସାଡିତାନ୍ କୋ ବୀଣା ଷାଡି ତାନାକୋ। ହାର୍ ଇନ୍‍କୁ ସିଂହାସାନ୍ ରାଃ ନାଡ଼େଏ ଆଡୋଃ ଚାଇର୍ ଝାନ୍ ଜାନ୍ତୁ କୋୱାଃ ଆଡୋଃ ମାରିହୋଡ଼ୋକୋୱାଃ ନାଡ଼େଏ ରେ ମିୟାଃ ନାୱା ଦୁରାଙ୍ଗ୍-ଦୁରାଙ୍ଗ୍ ତାଇନ୍ କେନାକୋ। ହାର୍ ଏନ୍ ଏକ୍ ଲାଖ୍ ଚୌୱାଲିସ୍ ହାଜାର୍ ଝାନ୍ ହୋଡ଼ୋକୋକେ ବାଗିକେତେ, ଅକନ୍ କୋ ଅତେଦିଶୁମ୍ ଏତେ କିରିଙ୍ଗ୍ କାନ୍ ତାଇକେନାକୋ, ଜେତାଏ ହ ଏନ୍ ଦୁରାଙ୍ଗ୍ କେ ଶିଖାଅ କାକୋ ଧାଡ଼ି ତାଇନା। ନିକୁ ଇନ୍‍କୁ ତାନ୍‍କୋ, ଅକନ୍‍କୋ କୁଡ଼ିକୋ ଲୋଃ କାକୋ ଆଶୁଦ୍ଧ୍‍କାନା, ମେନ୍ଦୋ ଡିଣ୍ଡା ଗିୟାକୋ, ନିକୁ ଇନ୍‍କୁଗି ତାନ୍‍କୋ, ଅକନକୋଚି କୋତାଃ-କୋତାଃ ମିଣ୍ଡୀହୋନ୍ ସେନ୍ ତାନାଏ, ଇନିଃକେ ଇନ୍‍କୁ ଅତୋଙ୍ଗି ତାନାକୋ; ନିକୁ ଦୋ ପାର୍ମେଶ୍ଵାର୍ ଲାଗିନ୍ତେ ସିଦା ଯଅ ଲେକା ହୁୟୋଃ ଲାଗିନ୍ତେ ହୋଡ଼ୋକୋ ଥାଲା ଏତେ କିରିଙ୍ଗ୍ କାନାକୋ। ଇନ୍‍କୁୱାଃ ମୋଚା ଏତେ ଚିଉଲା ହ ଲୋଗୋ କାଅଡୋଙ୍ଗ୍ କାନା, ଇନ୍‍କୁ ନିର୍ଦୋଷ୍ ମେନାକୋୱା। ଏନ୍ତେ ଇଙ୍ଗ୍ ମିୟାଃ ଏଟାଃ ସିର୍ମାଦାସୀ କେ ରିମିଲ୍‍ଦିଶୁମ୍ ରାଃ ଥାଲା ରେ ଆପିର୍ ତାନ୍ ନେଲ୍ କିଜାଇଙ୍ଗ୍, ଅକନିଃତାଃ ରେ ଅତେ ରେ ତାଇନ୍ ତାନ୍ ସବେନ୍ ଦିଶୁମ୍ ରେନ୍ ଆଡୋଃ କିଲି ରେନ୍ ଆଡୋଃ ଭାଷା ରେନ୍ ଆଡୋଃ ହୋଡ଼ୋକୋ ନାଙ୍ଗ୍ ଉଦୁବ୍ ଲାଗିନ୍ତେ ଜାନାଓ-ଜାନାଓ ରେୟାଃ ସୁସାମାଚାର୍ ତାଇକେନା। ଇନିଃ କାଉରି କେତେ କାଜିକେଦାଏ, “ପାର୍ମେଶ୍ଵାର୍ କେ ବୋରୋଇପେ, ଆଡୋଃ ଇନିଜାଃ ମାନାରାଙ୍ଗ୍ ଏପେ, ଚିୟାଃଚି ଇନିଜାଃ ବିଚାର୍ ରିକା ରାଃ ସାମାୟ୍ ଥେବାଃକାନା; ଆଡୋଃ ଇନିଜାଃ ଆରାଧାନା ଏପେ, ଅକନିଃ ରିମିଲ୍‍ଦିଶୁମ୍ ଆଡୋଃ ଅତେ ଆଡୋଃ ସାମୁଦାର୍ ଆଡୋଃ ଦାଆ ରାଃ ପାଝ୍ରା ବାଇ କାଦାଏ।” ନେୟାରାଃ ତାୟୋମ୍ତେ ଆଡୋଃ ଏଟାଃ ମିୟାଃ ସିର୍ମାଦାସୀ ନେୟା କାଜିତାନ୍ ହିଜୁଃନାଏ, “ଉୟୁଃଜାନା, ଏନ୍ ମାରାଙ୍ଗ୍ ବେବିଲୋନ୍ ଉୟୁଃଜାନା, ଅକନିଃ ଆପାନାଃ ବ୍ୟାଭିଚାର୍ କାମି ରେୟାଃ ଖିସ୍ ରାଃ ବୁଲୋଃତେୟାଃ ଆଙ୍ଗୁର୍ ରାଶି ସବେନ୍ ଜାତିକୋକେ ଆନୁ କାଃକୋୱାଏ।” ଏନା ତାୟୋମ୍ତେ ଆଡୋଃ ମିୟାଃ, ତିସ୍ରା, ସିର୍ମାଦାସୀ ଜୋର୍ତେ କାଉରି କେତେ ନେୟା କାଜିତାନ୍ ଲୋଃ ହିଜୁଃଜାନାଏ, “ଆଗାର୍ ଅକଏ ଏନ୍ ପାଶୁ ଆଡୋଃ ଇନିଜାଃ ମୁର୍ତ୍ତି କେ ପୂଜା ୟାଏ, ଆଡୋଃ ଆପାନାଃ ମୋଲୋଙ୍ଗ୍ ରେ ଚାହେ ଆପାନାଃ ତିଈ ରେ ଇନିଜାଃ ଛାପ୍ ଇଦିୟାଏ, ଇନିଃ ପାର୍ମେଶ୍ଵାର୍ ରାଃ ବେଶେ ଖିସ୍ କାନ୍ ତେୟାଃ କାମେଶାକାନ୍ ଆଙ୍ଗୁର୍ ରାଶି କେ, ଅକନାଃ ଇନିଜାଃ ଖିସ୍ ରାଃ ଡୁଭ୍‍ନୀ ରେ ଦୁଲାକାନା, ଏନାକେ ନୁୱେୟାଏ ଆଡୋଃ ପାବିତାର୍ ସିର୍ମାଦାସୀ କୋୱାଃ ଆଡୋଃ ମିଣ୍ଡୀହୋନ୍ ରାଃ ନେପେଲ୍ ରେ ସେଙ୍ଗେଲ୍ ଆଡୋଃ ଗାନ୍ଧାକ୍ ରେ କାଲ୍‍ପାଅଃୱାଏ। ଇନ୍‍କୁୱାଃ କାଲ୍‍ପାଅଃ ରେୟାଃ ସୁକୁଲ୍ ଜାନାଓ-ଜାନାଓ ରାକାବ୍ କାତୋୱା, ଆଡୋଃ ଅକନ୍ କୋ ଏନ୍ ପାଶୁ ଆଡୋଃ ଇନିଜାଃ ମୁର୍ତ୍ତି କେ ପୂଜା ୟାକୋ, ଆଡୋଃ ଅକନ୍ କୋ ଇନିଜାଃ ନୁତୁମ୍ ରେୟାଃ ଛାପ୍ ଇଦିନାକୋ, ଇନ୍‍କୁକେ ନିଦା ଶିଙ୍ଗି ସାଥାଅ କାନାମୋଗା।” ପାବିତାର୍ ହୋଡ଼ୋକୋୱାଃ ସାହାତିଙ୍ଗ୍ ନେତାଃ ରେ ମେନାଃ, ଅକନ୍‍କୋ ପାର୍ମେଶ୍ଵାର୍ ରାଃ ଆନାଚୁ କୋକେ ମାନାତିଙ୍ଗ୍ ୟାକୋ ଆଡୋଃ ୟୀଶୁ ରେ ବିଶ୍ୱାସ୍ ମାଣ୍ଡାଅୟାକୋ। ଏନ୍ତେ ଇଙ୍ଗ୍ ସିର୍ମାଦିଶୁମ୍ ଏତେ ନେ କାଜି ଆୟୁମ୍ କେଦାଇଙ୍ଗ୍, “ଅଲେମ୍, ପ୍ରାଭୁ ରେ ବିଶ୍ଵାସ୍ ତାନ୍ ଲୋଃ ଅକନ୍ କୋ ଗୋଜୋଃ ତାନାକୋ, ଇନ୍‍କୁ ନାଆ ଏତେ ଧାନ୍ୟା ତାନ୍‍କୋ।” ଆତ୍ମା କାଜିତାନାଏ, “ହାଁ, ଚିୟାଃଚି ଇନ୍‍କୁ ସବେନ୍ କାମି କୋଏତେ ସାଥାଅ ନାମେୟାକୋ, ହାର୍ ଇନ୍‍କୁୱାଃ କାମି ଇନ୍‍କୁ ଲୋଃ ଅତୋଙ୍ଗ୍ ଇଦିତାନାଏ।” ଇଙ୍ଗ୍ ନେଲ୍ କେଦାଇଙ୍ଗ୍, ଆଡୋଃ ନେଲେପେ, ମିୟାଃ ମାସ୍କାଲ୍ ରିମିଲ୍ ମେନାଃ, ଆଡୋଃ ଏନ୍ ରିମିଲ୍ ରେ ମାନ୍‍ୱା ରାଃ ହୋନ୍ ଲେକା ଜେତାଏ ଦୁବ୍ କାନାଏ, ଅକନିଜାଃ ବୋଅ ରେ ସୋନା ରାଃ ମୁକୁଟ୍ ଆଡୋଃ ତିଈ ରେ ଲେସେର୍ ଦାତ୍ରୋମ୍ ମେନାଃ। ଏନ୍ତେ ଆଡୋଃ ମିୟାଃ ସିର୍ମାଦାସୀ ମାନ୍ଦିର୍ ଏତେ ଅଡୋଙ୍ଗ୍ କେତେ ଇନିଃକେ, ଅକନିଃ ରିମିଲ୍ ରେ ଦୁବ୍ ଲେନ୍ ତାଇକେନାଏ କାଉରି କେତେ କେଡ଼ା କିଜାଏ “ଆମାଃ ଦାତ୍ରୋମ୍ ଲାଗାଏମ୍ ହାର୍ ଇରେମ୍, ଚିୟାଃଚି ଇରୋଃ ରାଃ ସାମାୟ୍ ଥେବାଃ କାନା, ଚିୟାଃଚି ଅତେ ରାଃ ଯଅ ମାତା ଛାବାକାନା।” ଏନାମେନ୍ତେ ଅକଏ ରିମିଲ୍ ରେ ଦୁବ୍ ଲେନାଏ ଇନିଃ ଅତେ ରେ ଆଜାଃ ଦାତ୍ରୋମ୍ ତେ ଇର୍ କେଦାଏ, ଆଡୋଃ ଅତେ ଇର୍ ଜାନା। ଏନ୍ତେ ଆଡୋଃ ମିୟାଃ ସିର୍ମାଦାସୀ ଏନ୍ ମାନ୍ଦିର୍ ଏତେ ଅଡୋଙ୍ଗ୍ ନାଏ ଅକନାଃ ସିର୍ମାଦିଶୁମ୍ ରେ ମେନାଃ, ହାର୍ ଇନିଃତାଃ ରେହ ଲେସେର୍ ଦାତ୍ରୋମ୍ ତାଇଲେନା। ଏନ୍ତେ ଆଡୋଃ ମିୟାଃ ସିର୍ମାଦାସୀ, ଅକନିଃକେ ସେଙ୍ଗେଲ୍ ଚେତାନ୍ ରେ ଆଧିକାର୍ ତାଇଲେନା, ବେଦୀ ଏତେ ଅଡୋଙ୍ଗ୍‍ନାଏ, ଆଡୋଃ ଅକନିଃତାଃ ରେ ଲେସେର୍ ଦାତ୍ରୋମ୍ ତାଇଲେନା ଇନିଃକେ କାଉରି କେତେ କେଡ଼ାକିଜାଏ, “ଆମାଃ ଲେସେର୍ ଦାତ୍ରୋମ୍ ଲାଗାଅ କେତେ ଅତେ ରେୟାଃ ଆଙ୍ଗୁର୍ ନାଡ଼ି ରାଃ ଯୋଥା କୋକେ ହାଦେମ୍, ଚିୟାଃଚି ଏନ୍ ଆଙ୍ଗୁର୍ ମାତା ଛାବାକାନା।” ଏନ୍ତେ ଏନ୍ ସିର୍ମାଦାସୀ ଅତେ ରେ ଆଜାଃ ଦାତ୍ରୋମ୍ ଲାଗାଅ କେଦାଏ ଆଡୋଃ ଅତେ ରେୟାଃ ଆଙ୍ଗୁର୍ ନାଡ଼ି ରାଃ ଯଅକୋ ହାଃ କେତେ ଆଜାଃ ପାର୍ମେଶ୍ଵାର୍ ରାଃ ବେଶେ ଖିସ୍ କାନ୍ ତେୟାଃ ମାରାଙ୍ଗ୍ ରାଶିକୁଣ୍ଡା ରେ ସାଜୁତାଦାଏ; ଆଡୋଃ ସାହାର୍ ରାଃ ବାହାରି ରେ ଏନ୍ ରାଶିକୁଣ୍ଡା ରେ ଆଙ୍ଗୁର୍ ତିକାଜାନା, ଆଡୋଃ ରାଶିକୁଣ୍ଡା ଏତେ ନିମିନ୍ ମାୟୋମ୍ ଲିଙ୍ଗୀ ଅଡୋଙ୍ଗ୍ ଜାନା ଚି ଶାଦୋମ୍ କୋୱାଃ ଲାଗାମ୍ ସାନ୍ତେ ସେଟେର୍ ଜାନା, ହାର୍ ଶାଅ କୋଶ୍ ସାନ୍ତେ ଲିଙ୍ଗୀ ଜାନା। ଏନା ତାୟୋମ୍ତେ ଇଙ୍ଗ୍ ସିର୍ମାଦିଶୁମ୍ ରେ ଆଡୋଃ ମିୟାଃ ମାରାଙ୍ଗ୍ ହାର୍ ଆକ୍‍ଦାନ୍ଦା ଚିହ୍ନା ନେଲ୍ କେଦାଇଙ୍ଗ୍, ମାନେ ସାତ୍ ଝାନ୍ ସିର୍ମାଦାସୀ କୋକେ ଅକନ୍ କୋତାଃ ସାତ୍‍ଠୁ ଟୁଣ୍ଡୁ ମାହାମାରୀକୋ ତାଇଲେନା, ଚିୟାଃଚି ଏନାକୋରାଃ ଟୁଣ୍ଡୁ ହୋବାକୋଃ ରେ ପାର୍ମେଶ୍ଵାର୍ ରାଃ ଖିସ୍ ଟୁଣ୍ଡୁ କୋଃୱା। ଏନ୍ତେ ଇଙ୍ଗ୍ ସେଙ୍ଗେଲ୍ ରେ ମେଶାକାନ୍ କାଞ୍ଚ ଲେକାନାଃ ମିୟାଃ ସାମୁଦାର୍ ନେଲ୍ କେଦାଇଙ୍ଗ୍, ହାର୍ ଅକନ୍ କୋ ଏନ୍ ପାଶୁ ଏତେ, ଆଡୋଃ ଏନ୍ ମୂର୍ତି ଏତେ, ଆଡୋଃ ଇନିଜାଃ ନୁତୁମ୍ ରାଃ ହିସାବ୍ ଚେତାନ୍ ରେ ଜିତାଅ ଲେନାକୋ, ଇନ୍‍କୁ ଏନ୍ କାଞ୍ଚ ରାଃ ସାମୁଦାର୍ ନାଡ଼େଏ ପାର୍ମେଶ୍ଵାର୍ ରାଃ ବୀଣାକୋକେ ସାବ୍ କେତେ ତିଙ୍ଗୁକାନ୍ ନେଲ୍ କେଃକୋୱାଇଙ୍ଗ୍। ଇନ୍‍କୁ ପାର୍ମେଶ୍ଵାର୍ ରାଃ ଦାସୀ ମୁଶା ନାବୀ ରାଃ ଦୁରାଙ୍ଗ୍ କେ, ଆଡୋଃ ମିଣ୍ଡୀହୋନ୍ ରାଃ ଦୁରାଙ୍ଗ୍ କେ ଦୁରାଙ୍ଗ୍-ଦୁରାଙ୍ଗ୍ କେତେ କାଜିତାଇନାକୋ, “ହେ ସବେନ୍ ଏତେ ପେଡ଼େଜାନ୍ ପ୍ରାଭୁ ପାର୍ମେଶ୍ଵାର୍, ଆମାଃ କାମିକୋ ମାପ୍‍ରାଙ୍ଗ୍, ହାର୍ ଆକ୍‍ଦାନ୍ଦା ମେନାଃ; ହେ ଜାନାଓ-ଜାନାଓ ରେନ୍ ରାଜା, ଆମାଃ ହୋରା ଠିକ୍ ଆଡୋଃ ସାର୍ତି ତାନାଃ। ହେ ପ୍ରାଭୁ, ଅକଏ ଆମ୍‍କେ କାଏ ବୋରୋୟାଏ ଆଡୋଃ ଆମାଃ ନୁତୁମ୍ ରାଃ ମାନାରାଙ୍ଗ୍ କାଏ ରିକାୟାଏ? ଚିୟାଃଚି ଆମ୍ ଭାଇର୍ ଗି ପାବିତାର୍ ତାନ୍‍ମେ। ସବେନ୍ ଜାତିରେନ୍ କୋ ହିଜୁଃକେତେ ଆମାଃ ନାଡ଼େଏ ଜୋହାର୍ ମେୟାକୋ, ଚିୟାଃଚି ଆମାଃ ଧାରାମ୍ ରାଃ କାମି ଉଦୁବାକାନା।” ନେୟାରାଃ ତାୟୋମ୍ତେ ଇଙ୍ଗ୍ ନେଲ୍ କେଦାଇଙ୍ଗ୍ ଚି ସିର୍ମାଦିଶୁମ୍ ରେ ଗୋୱା-ତାମ୍‍ବୁ ରାଃ ମାନ୍ଦିର୍ ଖଲାଅଜାନା; ଆଡୋଃ ଏନ୍ ସାତ୍ ଝାନ୍ ସିର୍ମାଦାସୀକୋ ଅକନ୍ କୋତାଃ ସାତ୍‍ଠୁ ମାହାମାରୀ କୋ ତାଇକେନା, ପୁଣ୍ଡୀ ନିରାଲ୍ ଆଡୋଃ ମାସ୍କାଲାନ୍ ଲିଜାଃ ତୁସିଙ୍ଗାକାନ୍ ହାର୍ କୁଡ଼ାମ୍ ରେ ସୋନା ରାଃ କାଶ୍ନା ଥୋଲାକାନ୍ ମାନ୍ଦିର୍ ଏତେ ଅଡୋଙ୍ଗ୍ ନାକୋ। ଏନ୍ତେ ଏନ୍ ଚାଇର୍ ଝାନ୍ ଜାନ୍ତୁ କୋଏତେ ମିହୋଡ଼୍ ନିଃ, ଏନ୍ ସାତ୍ ଝାନ୍ ସିର୍ମାଦାସୀ କୋକେ ପାର୍ମେଶ୍ଵାର୍ ରାଃ, ଅକନିଃ ଜାନାଓ-ଜାନାଓ ଜୀହିଃ ମେନାଇଜା, ଇନିଜାଃ ଥିମ୍ବାଗି ଖିସ୍ ତେ ଫେରେଃ କାନ୍ ତେୟାଃ ସାତ୍‍ଠୁ ସୋନା ରାଃ ଡୁଭ୍‍ନୀ କେ ଏମାଃକୋୱାଏ। ଆଡୋଃ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଆଡୋଃ ଇନିଜାଃ ପେଡ଼େଏ ତେ ମାନ୍ଦିର୍ ସୁକୁଲ୍ ତେ ଫେରେଃ ଜାନା, ହାର୍ ଚିମିନ୍ ଜାକେଦ୍ ଏନ୍ ସାତ୍ ଝାନ୍ ସିର୍ମାଦାସୀ କୋୱାଃ ସାତ୍‍ଠୁ ମାହାମାରୀ କୋ କାପୁରାଜାନା, ଇମିନ୍ ଜାକେଦ୍ ସାନ୍ ମାନ୍ଦିର୍ ରେ ଜେତାଏ ହ କାକୋ ବୋଲୋ ଧାଡ଼ିଜାନା। ଏନ୍ତେ ଇଙ୍ଗ୍ ମାନ୍ଦିର୍ ରେ ମିହୋଡ଼୍ କେ ମାରାଙ୍ଗ୍ ଆୱାଜ୍ ତେ ଏନ୍ ସାତ୍ ଝାନ୍ ସିର୍ମାଦାସୀ କୋକେ ନେୟା କାଜିତାନ୍ ଆୟୁମ୍ କେଦାଇଙ୍ଗ୍, “ଜୁ ସେନ୍‍ପେ, ପାର୍ମେଶ୍ଵାର୍ ରାଃ ଥିମ୍ବାଗି ଖିସ୍ ରେୟାଃ ସାତ୍‍ଠୁ ଡୁଭ୍‍ନୀ କୋକେ ଅତେ ରେ ଦୁଲ୍ ତାପେ।” ଏନାମେନ୍ତେ ସିଦା ସିର୍ମାଦାସୀ ନିଃ ସେନ୍ କେତେ ଆଜାଃ ଡୁଭ୍‍ନୀ ଅତେ ରେ ଦୁଲ୍ କେଦାଏ। ଏଣ୍ଡେ ଏନ୍ ହୋଡ଼ୋକୋୱାଃ ରେ, ଅକନ୍ କୋୱାଃ ରେ ପାଶୁ ରାଃ ଛାପ୍ ତାଇକେନା ହାର୍ ଅକନ୍ କୋ ଇନିଜାଃ ମୂର୍ତି ରାଃ ପୂଜା ତାଇନାକୋ, ଇନ୍‍କୁୱାଃ ରେ ମିଃ ଲେକାନାଃ ଖାରାପ୍ ଆଡୋଃ ଖୋବ୍ ଗି ହାସୁ ତେୟାଃ ଗୁଡ଼ା ଅଡୋଙ୍ଗ୍ ଜାନା। ଏଟାଃ ସିର୍ମାଦାସୀ ଆଜାଃ ଡୁଭ୍‍ନୀ ସାମୁଦାର୍ ରେ ଦୁଲ୍ କେଦାଏ, ହାର୍ ଏନା ଗୋଜାକାନ୍ ହୋଡ଼ୋକୋୱାଃ ମାୟୋମ୍ ଲେକା ବାଇଜାନା, ଆଡୋଃ ସାମୁଦାର୍ ରେ ତାଇନ୍ ତାନ୍ ସବେନ୍ ଜୀଉମେନାଃ କୋ ଗୋଏଃ ଜାନାକୋ। ତିସ୍ରା ସିର୍ମାଦାସୀ ଆଜାଃ ଡୁଭ୍‍ନୀ ନାଈ କୋରେ ଆଡୋଃ ଦାଆ ରାଃ ପାଝ୍ରା କୋରେ ଦୁଲ୍ କେଦାଏ, ଆଡୋଃ ଏନାକୋ ମାୟୋମ୍ ବାଇଜାନା। ଏନ୍ତେ ଇଙ୍ଗ୍ ଦାଆ ଚେତାନ୍ ରେ ଆଧିକାର୍ ଏମାକାନ୍ ସିର୍ମାଦାସୀ କେ ନେୟା କାଜିତାନ୍ ଆୟୁମ୍ କିଜାଇଙ୍ଗ୍, “ହେ ପାବିତାର୍, ଆମ୍ ଅକନିଃ ମେନାମେୟା ଆଡୋଃ ଆମ୍ ଅକନିଃ ତାଇକେନାମ୍, ଆମ୍ ବିଚାର୍ନିଃ ତାନ୍‍ମେ ଆଡୋଃ ଆମ୍ ନେୟା ବିଚାର୍ କାଦାମ୍। ଚିୟାଃଚି ଅକନ୍‍କୋ ଆମାଃ ପାବିତାର୍ ହୋଡ଼ୋକୋୱାଃ ଆଡୋଃ ନାବୀ କୋୱାଃ ମାୟୋମ୍ ଲିଙ୍ଗୀ ଲେଦାକୋ, ଆଡୋଃ ଆମ୍ ଇନ୍‍କୁକେ ମାୟୋମ୍ ଆନୁ କେଃକୋୱାମ୍; ଚିୟାଃଚି ଇନ୍‍କୁ ଏନା ନାମେ ଲେକାନାଃଗି ତାନ୍‍କୋ।” ଆଡୋଃଗି ଇଙ୍ଗ୍ ବେଦୀ ଏତେ ମିହୋଡ଼୍ ନିଃକେ ନେୟା କାଜିତାନ୍ ଆୟୁମ୍ କିଜାଇଙ୍ଗ୍, “ହାଁ, ହେ ସବେନ୍ ଏତେ ପେଡ଼େଜାନ୍ ପ୍ରାଭୁ ପାର୍ମେଶ୍ଵାର୍ ଆମାଃ ବିଚାର୍ ଠିକ୍ ଆଡୋଃ ସାର୍ତି ତାନାଃ।” ଚାଉଥା ସିର୍ମାଦାସୀ ଆଜାଃ ଡୁଭ୍‍ନୀ ଶିଙ୍ଗି ଚେତାନ୍ ରେ ଦୁଲ୍ ତାଦାଏ, ଆଡୋଃ ଶିଙ୍ଗି କେ ହୋଡ଼ୋକୋକେ ସେଙ୍ଗେଲ୍ ତେ ଅଣ୍ଡୋର୍ ରାଃ ଆଧିକାର୍ ଏମ୍ ଜାନା। ହୋଡ଼ୋକୋ ଥିମ୍ବା ଲୋଲୋ ଏତେ ଅଣ୍ଡୋର୍ ଜାନାକୋ, ଆଡୋଃ ପାର୍ମେଶ୍ଵାର୍ ରାଃ ନୁତୁମ୍ କେ ଅକନିଃକେ ନେ ମାହାମାରୀକୋ ଚେତାନ୍ ରେ ଆଧିକାର୍ ମେନାଃ, ଇନିଜାଃ ନିନ୍ଦା କେଦାକୋ ମେନ୍ଦୋ ଇନିଜାଃ ମାନାରାଙ୍ଗ୍ ଲାଗିନ୍ତେ ପାପ୍ କାମି କାକୋ ବାଗେ କେଦା। ପାଞ୍ଚ୍ ୱା ସିର୍ମାଦାସୀ ଆଜାଃ ଡୁଭ୍‍ନୀ ଏନ୍ ପାଶୁ ରାଃ ସିଂହାସାନ୍ ଚେତାନ୍ ରେ ଦୁଲ୍ କେଦାଏ, ଆଡୋଃ ଇନିଜାଃ ରାଇଜ୍ ରେ ନୁବାଃ ହୋବାଜାନା। ହୋଡ଼ୋକୋ ହାସୁ ତେ ଆକୋୱାଃ-ଆକୋୱାଃ ଆଲାଙ୍ଗ୍ କେ ହାବ୍ ଏଟେଃ କେଦାକୋ, ହାର୍ ଆକୋୱାଃ ହାସୁ କୋୱାଃ ହାର୍ ଗୁଡ଼ା କୋୱାଃ ଚାଲ୍ତେ ସିର୍ମାଦିଶୁମ୍ ରେନ୍ ପାର୍ମେଶ୍ଵାର୍ କେ ନିନ୍ଦା କିଜାକୋ; ମେନ୍ଦୋ ଆକୋୱାଃ-ଆକୋୱାଃ କାମି କୋଏତେ ପାପ୍ ରିକା କାକୋ ବାଗେ କେଦା। ଛାଟ୍‍ୱା ସିର୍ମାଦାସୀ ଆଜାଃ ଡୁଭ୍‍ନୀ ମାରାଙ୍ଗ୍ ନାଈ ଫୁରାତ୍ ରେ ଦୁଲ୍ କେଦାଏ, ଆଡୋଃ ଏଣ୍ଡେରାଃ ଦାଆ ଆଞ୍ଜେଃ ଜାନା ଏନାତେ ପୂରୁବ୍ ଦିଶା ରେନ୍ ରାଜାକୋ ନାଙ୍ଗ୍ ହୋରା ବାଇୟୋଃୱା। ଏନ୍ତେ ଇଙ୍ଗ୍ ଏନ୍ ଆଜ୍‍ଗାର୍ ବିଙ୍ଗ୍ ରାଃ ମୋଚା ଏତେ, ହାର୍ ଏନ୍ ପାଶୁ ରାଃ ମୋଚା ଏତେ ହାର୍ ଏନ୍ ହିହିଡ଼୍ ନାବୀ ରାଃ ମୋଚା ଏତେ ଆପିୟା ବୋଙ୍ଗାଆତ୍ମା କୋକେ ଚୋକେକୋ ଲେକା ଅଡୋଙ୍ଗ୍ ତାନ୍ ନେଲ୍ କେଃକୋୱାଇଙ୍ଗ୍। ନିକୁ ଆକ୍‍ଦାନ୍ଦା କାମି ଦେଖାଅ ୱାଲା ବୋଙ୍ଗାଆତ୍ମା କୋ ତାନ୍‍କୋ, ଅକନ୍ କୋ ଗୋଟା ଅତେଦିଶୁମ୍ ରେନ୍ ରାଜା କୋତାଃ ନେଲାଗିନ୍ ଅଡୋଙ୍ଗ୍ କେତେ ସେନ୍ ତାନାକୋ, ଚି ଇନ୍‍କୁକେ ସବେନ୍ ଏତେ ପେଡ଼େଜାନ୍ ପାର୍ମେଶ୍ଵାର୍ ରାଃ ଏନ୍ ମାରାଙ୍ଗ୍ ହୁଲାଙ୍ଗ୍ ରାଃ ଲାଡ଼ାଇ ଲାଗିନ୍ତେ ହୁଣ୍ଡୀକୋୱାକୋ। “ନେଲେମ୍, ଇଙ୍ଗ୍ କୁମ୍ଡ଼ୁ ଲେକା ହିଜୁଃ ତାନିଙ୍ଗ୍; ଧାନ୍ୟା ଇନିଃ ତାନିଃ, ଅକନିଃ ଏୟୋନାକାନ୍ ତାଇନ୍ ତାନାଏ, ହାର୍ ଆଜାଃ ଲିଜାଃ କେ ସାମ୍ଭ୍ଡ଼ାଅ ମାଣ୍ଡାଅ ତାନାଏ ଏନାତେ ଇନିଃ ଲିଜାଃ ରାଡ଼ାୟାନ୍ ଲେକା କାଏ ହୋନୋର୍ ୟାଏ, ହାର୍ ହୋଡ଼ୋକୋ ଇନିଜାଃ ଗିୟୁଃକେ କାକୋ ନେଲିୟା।” ଏନ୍ତେ ଇନ୍‍କୁ ରାଜାକୋକେ ଏନ୍ ଜାଗା ତାଃ ହୁଣ୍ଡି କେଃକୋୱାକୋ ଅକନାଃ ଇବ୍ରାନୀ ବାକାଣ୍ ତେ ହାର୍-ମାଗିଦୋନ୍ କାଜିଅଃୱା। ସାତ୍ ୱା ସିର୍ମାଦାସୀ ଆଜାଃ ଡୁଭ୍‍ନୀ ହୋୟୋ ରେ ଦୁଲ୍ କେଦାଏ, ଆଡୋଃ ମାନ୍ଦିର୍ ରାଃ ସିଂହାସାନ୍ ତେ ନେ ଜୋର୍ତେ କାଜି ଆୟୁମ୍ ଜାନା, “ହୋବାୟାନା!” ଏନ୍ତେ ବିଜ୍‍ଲୀକୋ ଚାମ୍‍କାଓ ଜାନା, ଆୱାଜ୍ ୟାନା ଆଡୋଃ ରିମିଲ୍ ସାଡିଜାନା, ହାର୍ ମିୟାଃ ନେକା ମାରାଙ୍ଗ୍ ଅତେହିଲାଅ ହୋବାଜାନା ଯେ, ଅକହୁଲାଙ୍ଗ୍ ଏତେ ହୋଡ଼ ନେ ଅତେ ରେ ସିର୍ଜାଅ ଲେନାଏ, ଏନ୍ ହୁଲାଙ୍ଗ୍ ଏତେ ନେଲେକା ମାରାଙ୍ଗ୍ ଅତେହିଲାଅ ଚିଉଲା ହ କାହୋବାଲେନା। ନେୟାତେ ଏନ୍ ମାରାଙ୍ଗ୍ ସାହାର୍ ଆପି ଖାଣ୍ଡା ହୋବାଜାନା, ଆଡୋଃ ଗୋଟା ଅତେଦିଶୁମ୍ ରାଃ ସାହାର୍ କୋ ଧାଶୁଡ଼୍‍ଜାନା; ଆଡୋଃ ପାର୍ମେଶ୍ଵାର୍ ତାଃ ଏନ୍ ମାରାଙ୍ଗ୍ ବେବିଲୋନ୍ ରାଃ ପାହୋମ୍ ହୋବାଜାନା ଚି ଇନିଃ ଆଜାଃ ଖିସ୍ ତେ ଜୁଲୋଃ ରାଃ ବୁଲୋଃତେୟାଃ ଆଙ୍ଗୁର୍ ରାଶି କେ ଇନିଃକେ ଆନୁଇୟାଏ। ଆଡୋଃ ସବେନ୍ ଟାପୁ କୋ ଆଜାଃ ଜାଗା ଏତେ ହିଲାଅଜାନା, ଆଡୋଃ ବୁରୁ‍କୋ କାନାମ୍‍ଜାନା। ରିମିଲ୍‍ଦିଶୁମ୍ ଏତେ ହୋଡ଼ୋକୋୱାଃ ରେ ମିୟାଃ-ମିୟାଃ ମାନ୍ ଓଜାନ୍ ରାଃ ମାପ୍‍ରାଙ୍ଗ୍ ଆରିଲ୍ ଉୟୁଃଜାନା, ହାର୍ ହୋଡ଼ୋକୋ ଆରିଲ୍ ରାଃ ମାହାମାରୀ ଚାଲ୍ତେ ପାର୍ମେଶ୍ଵାର୍ କେ ନିନ୍ଦା କିଜାକୋ, ଚିୟାଃଚି ନେ ବିପାତୀ ଥିମ୍ବାଗି ବୋରୋୱାନ୍ ତାଇକେନା। ଏନ୍ତେ ସାତ୍ ଝାନ୍ ସିର୍ମାଦାସୀ କୋତାଃ ରେ ଅକନ୍ ସାତ୍ ଠୁ ଡୁଭ୍‍ନୀ ତାଇକେନା, ଇନ୍‍କୁ ଏତେ ମିହୋଡ଼୍ ନିଃ ହିଜୁଃକେତେ ଇଙ୍ଗ୍‍କେ ନେୟା କାଜିକେଦାଏ, “ନେତେ ହିଜୁଃମେ, ଇଙ୍ଗ୍ ଆମ୍‍କେ ଏନ୍ ମାରାଙ୍ଗ୍ ବେଶ୍ୟା ରାଃ ଦାଣ୍ଡ୍ କେ ଦେଖାଅ ମେୟାଇଙ୍ଗ୍, ଅକନିଃ ବେଶେ ଥିମ୍ବା ଦାଆ ଚେତାନ୍ ରେ ଦୁବାକାନାଏ। ଅକନିଃ ଲୋଃ ଅତେ ରେନ୍ ରାଜା କୋ ବ୍ୟାଭିଚାର୍ କେଦାକୋ; ଆଡୋଃ ଅତେ ରେନ୍ ତାଇନ୍ ତାନ୍‍କୋ ଇନିଜାଃ ବ୍ୟାଭିଚାର୍ ରାଃ ଆଙ୍ଗୁର୍ ରାଶି ତେ ବୁଲ୍ ଛାବାଲେନ୍ ତାଇକେନାକୋ।” ଏନ୍ତେ ଇନିଃ ଇଙ୍ଗ୍‍କେ ପାବିତାର୍ ଆତ୍ମା ରେ ସୁନ୍‍ସାନ୍ ଜାଗା ତେ ଇଦି କିଦିଙ୍ଗ୍ ୟାଏ, ଆଡୋଃ ଇଙ୍ଗ୍ ଆରାଃ ରାଙ୍ଗ୍ ରାଃ ପାଶୁ ଚେତାନ୍ ରେ ମିୟାଃ କୁଡ଼ି କେ ଦୁବାକାନ୍ ନେଲ୍ କିଜାଇଙ୍ଗ୍, ଏନ୍ ପାଶୁ ନିନ୍ଦା ରାଃ ନୁତୁମ୍ ରେ ଫେରେଜାକାନ୍ ତାଇକେନାଏ ଆଡୋଃ ଇନିଜାଃ ସାତ୍‍ଠୁ ବୋଅ ଆଡୋଃ ଦାଶ୍ ଠୁ ଦିରିଙ୍ଗ୍ ତାଇକେନା। ଏନ୍ କୁଡ଼ି ଟୋକୋ ରାଙ୍ଗ୍ ଆଡୋଃ ଆରାଃ ରାଙ୍ଗ୍ ରାଃ ଲିଜାଃ ତୁସିଙ୍ଗ୍ ଲେନ୍ ତାଇକେନାଏ, ହାର୍ ସୋନାକୋଏତେ ଆଡୋଃ ବେଶେ ଗୋନୋଙ୍ଗ୍ ମାଣିକୋଏତେ ଆଡୋଃ ମୋତିକୋଏତେ ସିଙ୍ଗାରାକାନ୍ ତାଇକେନାଏ, ହାର୍ ଇନିଜାଃ ତିଈ ରେ ମିୟାଃ ସୋନା ରାଃ ଡୁଭ୍‍ନୀ ତାଇକେନା ଅକନାଃ ହିଲାଙ୍ଗ୍ ଜିନିଷ୍ କୋଏତେ ଆଡୋଃ ଇନିଜାଃ ବ୍ୟାଭିଚାର୍ ରାଃ କାଫାର୍ଚି ଜିନିଷ୍ କୋଏତେ ଫେରେଜାକାନ୍ ତାଇକେନା। ଇନିଜାଃ ମୋଲୋଙ୍ଗ୍ ରେ ନେ ନୁତୁମ୍ ଅଲ୍ ଲେନ୍ତାଇକେନା, “‘ଉକୁକାନ୍ କାଜି’ ମାରାଙ୍ଗ୍ ବେବିଲୋନ୍ ଅତେ ରେନ୍ ବେଶ୍ୟା କୋୱାଃ ଆଡୋଃ ହିଲାଙ୍ଗ୍ ଜିନିଷ୍ କୋରାଃ ଏଙ୍ଗା।” ଇଙ୍ଗ୍ ଏନ୍ କୁଡ଼ି କେ ପାବିତାର୍ ହୋଡ଼ୋକୋୱାଃ ମାୟୋମ୍ ଆଡୋଃ ୟୀଶୁ ରାଃ ଗୋୱା କୋୱାଃ ମାୟୋମ୍ କେ ନୁକେତେ ବୁଲାକାନ୍ ନେଲ୍ କିଜାଇଙ୍ଗ୍; ଇନିଃକେ ନେଲ୍‍କେତେ ଇଙ୍ଗ୍ ଆକ୍‍ଦାନ୍ଦା ଜାନାଇଙ୍ଗ୍। ଏନ୍ତେ ଏନ୍ ସିର୍ମାଦାସୀ ଇଙ୍ଗ୍‍କେ କାଜିକେଦାଏ, “ଆମ୍ ଚିନାଃ ମେନ୍ତେମ୍ ଆକ୍‍ଦାନ୍ଦା ଜାନା? ଇଙ୍ଗ୍ ଏନ୍ କୁଡ଼ି ଆଡୋଃ ଏନ୍ ପାଶୁ ରାଃ ଅକନିଃରେ ଇନିଃ ଦୁବାକାନାଏ ଆଡୋଃ ଅକନିଜାଃ ସାତ୍‍ଠୁ ବୋଅ ଆଡୋଃ ଦାଶ୍ ଠୁ ଦିରିଙ୍ଗ୍ ମେନାଃ, ଏନାକୋରାଃ ଉକୁକାଜି କେ ଆମ୍‍କେ ଉଦୁବ୍ ମେତାନିଙ୍ଗ୍। ଅକନ୍ ପାଶୁ ଆମ୍ ନେଲ୍ କେଦାମ୍, ଇନିଃ ସିଦା ଦୋ ତାଇକେନାଏ ମେନ୍ଦୋ ନାଆ ବାଙ୍ଗୁଇଜା, ହାର୍ କାସୋଙ୍ଗ୍ଅଃ ଡୋଡା ଏତେ ଅଡୋଙ୍ଗ୍ କେତେ ବିନାଶ୍ ରେ ଉୟୁଗୋୱାଏ; ଆଡୋଃ ଅତେ ରେନ୍ ତାଇନ୍ ତାନ୍‍କୋ ଅକନ୍ କୋୱାଃ ନୁତୁମ୍ ଅତେଦିଶୁମ୍ ରାଃ ଏନେଟେଃ ରାଃ ସାମାୟ୍ ଏତେ ଜୀଦାନ୍ ରାଃ କିତାବ୍ ରେ କାଅଲାକାନା, ନେ ପାଶୁ କେ ନେଲ୍‍କେତେ ଅକନିଃ ସିଦା ତାଇକେନାଏ ଆଡୋଃ ନାଆ ବାଙ୍ଗୁଇଜା ହାର୍ ହାଡୋଃ ହିଜୁଃକେନୋଗାଏ, ଆକ୍‍ଦାନ୍ଦାଅଃ ୱାକୋ। ନେୟା ସାରିନ୍ ଲାଗିନ୍ ମିୟାଃ ସେଣାନ୍ ମୋନ୍ ଦାର୍‍କାର୍ ମେନାଃ, ଏନ୍ ସାତ୍‍ଠୁ ବୋଅ ସାତ୍‍ଠୁ ବୁରୁ‍କୋ ତାନାଃ ଅକନାଃ ରେ ଏନ୍ କୁଡ଼ି ଦୁବାକାନାଏ। ଇନ୍‍କୁ ସାତ୍ ଝାନ୍ ରାଜାକୋ ହଗି ତାନ୍‍କୋ, ପାଞ୍ଚ୍ ଝାନ୍ କୋ ଦୋ ଗୋଏଃ ଜାନାକୋ, ଆଡୋଃ ମିହୋଡ଼୍ ମେନାଇଜା, ଆଡୋଃ ମିହୋଡ଼୍ ନାଆସାନ୍ କାଏ ହିଜୁଃକାନାଏ, ହାର୍ ଚିମ୍ତାଙ୍ଗ୍ ହିଜୁଗାଏ ଦୋ ହୁଡିଙ୍ଗ୍ ସାମାୟ୍ ସାନ୍ତେ ଇନିଜାଃ ତାଇନୋଃ ଲାଗାତିଙ୍ଗ୍ ମେନାଃ। ଅକନ୍ ପାଶୁ ସିଦା ତାଇକେନାଏ, ଆଡୋଃ ନାଆ ବାଙ୍ଗୁଇଜା, ଇନିଃଗି ଆଠ୍‍ୱା ରାଜା ତାନିଃ ହାର୍ ଏନ୍ ସାତ୍ ଝାନ୍ କୋଲେକା ନିଈ ତାନିଃ, ହାର୍ ଇନିଃ ବିନାଶ୍ ରେ ଉୟୁଗୋୱାଏ। ଅକନ୍ ଦାଶ୍ ଠୁ ଦିରିଙ୍ଗ୍ କୋ ଆମ୍ ନେଲ୍ କାଦାମ୍ ଇନ୍‍କୁ ଦାଶ୍ ଝାନ୍ ରାଜାକୋ ତାନ୍‍କୋ ଅକନ୍ କୋଚି ନାଆ ସାନ୍ ରାଇଜ୍ କାକୋ ନାମ୍ କାଦା, ମେନ୍ଦୋ ଏନ୍ ପାଶୁ ଲୋଃ ହୁଡିଙ୍ଗ୍ ସାମାୟ୍ ଲାଗିନ୍ ରାଜାକୋ ଲେକା ଆଧିକାର୍ ନାମେୟାକୋ। ନିକୁ ସବେନ୍ ମିୟାଃଗି କାଜି ରେ ରାଜିୟୋଃୱାକୋ, ହାର୍ ଇନ୍‍କୁ ଆକୋୱାଃ-ଆକୋୱାଃ ପେଡ଼େଏ ଆଡୋଃ ଆଧିକାର୍ ଏନ୍ ପାଶୁ କେ ଏମାଇୟାକୋ। ଇନ୍‍କୁ ମିଣ୍ଡୀହୋନ୍ ଲୋଃ ଲାଡ଼ାଇୟାକୋ, ହାର୍ ମିଣ୍ଡୀହୋନ୍ ଇନ୍‍କୁ ଲୋଃ ଜିତାଅ କୋଃୱାଏ, ଚିୟାଃଚି ଇନିଃ ପ୍ରାଭୁକୋୱାଃ ପ୍ରାଭୁ ଆଡୋଃ ରାଜାକୋୱାଃ ରାଜା ତାନିଃ, ହାର୍ ଅକନ୍ କୋ କେଡ଼ା କାନାକୋ ଆଡୋଃ ସାଲାକାନାକୋ ଆଡୋଃ ବିଶ୍ୱାସେ ଲେକାନ୍ କୋ ତାନ୍‍କୋ ଇନ୍‍କୁ ହଗି ଇନିଜାଃ ଲୋଃ ଜିତାଅ ୱାକୋ।” ଏନ୍ତେ ସିର୍ମାଦାସୀ ଇଙ୍ଗ୍‍କେ କାଜିକେଦାଏ, “ଅକନ୍ ଦାଆ ଆମ୍ ନେଲ୍ କେଦାମ୍, ଅକ୍ତାଃ ଏନ୍ ବେଶ୍ୟା ଦୁବାକାନାଏ, ଇନ୍‍କୁ ହୋଡ଼ୋକୋ ଆଡୋଃ କିଲି ରେନ୍ କୋ ଆଡୋଃ ଦିଶୁମ୍ ରେନ୍ କୋ ଆଡୋଃ ଭାଷା ରେନ୍ କୋ ତାନ୍ କୋ। ଅକନ୍ ଦାଶ୍ ଠୁ ଦିରିଙ୍ଗ୍ ଆମ୍ ନେଲ୍ କେଦାମ୍, ଇନ୍‍କୁ ଆଡୋଃ ପାଶୁ ଏନ୍ ବେଶ୍ୟା ଲୋଃ ଖିସ୍ ମାଣ୍ଡାଅ ୟାକୋ, ହାର୍ ଇନିଜାଃ ସବେନାଃ ଇଦିକେୟାକୋ ଆଡୋଃ ଲିଜାଃ କାଏତୂସୀଙ୍ଗ୍ କାନ୍ ଲେକା ବାଇତାଇୟାକୋ, ହାର୍ ଇନିଜାଃ ମାସ୍ ଜୋମେୟାକୋ, ହାର୍ ଇନିଃକେ ସେଙ୍ଗେଲ୍ ରେ ଜୁଲ୍ ତାଇୟାକୋ। ଚିୟାଃଚି ପାର୍ମେଶ୍ଵାର୍ ଇନ୍‍କୁୱାଃ ମୋନ୍ ରେ ନେୟା ସାଜୁୟାଏ ଚି ଇନ୍‍କୁ ଆଜାଃ ସାନାଙ୍ଗ୍ କେଗି ପୁରାୟାକୋ, ଆଡୋଃ ଚିମିନାଙ୍ଗ୍ ସାନ୍ତେ ପାର୍ମେଶ୍ଵାର୍ ରାଃ ବାଚାନ୍ କାପୁରାଲେନୋଗା ଇମ୍ତାଙ୍ଗ୍ ସାନ୍ତେ ଇନ୍‍କୁ ମିୟାଃଗି କାଜି ରେ ରାଜିୟୋଃୱାକୋ ହାର୍ ଆପାନାଃ-ଆପାନାଃ ରାଇଜ୍ ପାଶୁ କେ ଏମେୟାକୋ। ଏନ୍ କୁଡ଼ି, ଅକନିଃକେ ଆମ୍ ନେଲ୍ କିଜାମ୍, ଇନିଃ ମାରାଙ୍ଗ୍ ସାହାର୍ ତାନିଃ, ଅକନିଃ ଅତେ ରେନ୍ ରାଜାକୋ ଚେତାନ୍ ରେ ରାଇଜ୍ ତାନାଏ।” ନେୟା ରାଃ ତାୟୋମ୍ତେ ମିହୋଡ଼୍ ସିର୍ମାଦାସୀ କେ ସିର୍ମାଦିଶୁମ୍ ଏତେ ଆଡ଼୍‍ଗୁନ୍ ତାନ୍ ନେଲ୍ କିଜାଇଙ୍ଗ୍, ଅକନିଃକେ ମାରାଙ୍ଗ୍ ଆଧିକାର୍ ନାମ୍ ଲେନା; ଆଡୋଃ ଅତେ ଇନିଜାଃ ଯୁନୁଲ୍ ତେ ମାସ୍କାଲ୍ ଜାନା। ଇନିଃ କାଉରି କେତେ କାଜିକେଦାଏ, “ଉୟୁଃଜାନା, ମାରାଙ୍ଗ୍ ବେବିଲୋନ୍ ସାହାର୍ ଉୟୁଃଜାନା! ଏନା ବୋଙ୍ଗାଆତ୍ମା କୋୱାଃ ଅଡ଼୍ଆଃ, ହାର୍ ସବେନ୍ ବୋଙ୍ଗାଆତ୍ମା କୋୱାଃ ଡେରା, ଆଡୋଃ ସବେନ୍ ଆଶୁଦ୍ଧ୍ ଆତ୍ମା କୋୱାଃ ଡେରା, ଆଡୋଃ ସବେନ୍ ଆଶୁଦ୍ଧ୍ ହାର୍ ହିଲାଙ୍ଗାନ୍ ଅଡ଼େ କୋୱାଃ ଡେରା ବାଇଜାନା। ଚିୟାଃଚି ଇନିଜାଃ ବ୍ୟାଭିଚାର୍ ରାଃ ବୋରୋୱାନ୍ ଆଙ୍ଗୁର୍ ରାଶି ରାଃ ହୋରାତେ ସବେନ୍ ଜାତିରେନ୍ କୋ ବୁଲାକାନାକୋ। ହାର୍ ଅତେ ରେନ୍ ରାଜାକୋ ଇନିଜାଃ ଲୋଃ ବ୍ୟାଭିଚାର୍ ରିକାକାଦାକୋ; ହାର୍ ଅତେ ରେନ୍ ବେପାରୀ କୋ ଇନିଜାଃ ସୁକୁ-ଜୋମ୍ ହାର୍ ଟାକା ରାଃ ପେଡ଼େଏ ରାଃ ଥିମ୍ବା ଲେକାତେ କିଶାଣ୍ କାନାକୋ।” ଏନ୍ତେ ଇଙ୍ଗ୍ ସିର୍ମାଦିଶୁମ୍ ଏତେ ଆଡୋଃ ମିୟାଃ କାଜି ଆୟୁମ୍ କେଦାଇଙ୍ଗ୍, “ହେ ଇଙ୍ଗ୍ଆଃ ହୋଡ଼ୋକୋ, ଇନିଜେତେ ଅଡୋଙ୍ଗ୍ କେନୋଃପେ ଏଣ୍ଡେ ଆପେ ଇନିଜାଃ ପାପ୍ କୋରେ କାପେ ଗାତିୟୋଃୱା, ଆଡୋଃ ଇନିଜାଃ ଚେତାନ୍ ରେ ହୋବୋଅଃ ତେୟାଃ ମାହାମାରୀ କୋଏତେ ଜେତ୍ନାଃ ଆପେ ରେ କାଉୟୁଗୋଗା। ଚିୟାଃଚି ଇନିଜାଃ ପାପ୍ କୋ ଥିମ୍ବାଗି ହୁଣ୍ଡି ଜାନ୍ତେ ସିର୍ମାଦିଶୁମ୍ ସାନ୍ତେ ଥେବାଃକାନା, ଆଡୋଃ ଇନିଜାଃ ଏତ୍କାନାଃ କୋ ପାର୍ମେଶ୍ଵାର୍ ନାଡ଼େଏ ପାହୋମ୍ ହିଜୁଃ କାନା। ଜେଲେକା ଇନିଃ ଆପେକେ ଏମାକାଃପେୟାଏ ଏନ୍‍ଲେକାଗି ଇନିଃକେ ଏମାଇପେ, ହାର୍ ଇନିଜାଃ କାମି କୋରାଃ ଲେକାତେ ଇନିଃକେ ବାର୍-ଗୁନା ବାଦ୍‍ଲା ଏମାଇପେ; ଅକନ୍ ଡୁଭ୍‍ନୀ ରେ ଇନିଃ ଫେରେଃ ଲେଦାଏ ଏନାରେଗି ଇନିଜାଃ ଲାଗିନ୍ତେ ବାର୍-ଗୁନା ଫେରେଃ ତାପେ। ଚିମିନାଙ୍ଗ୍ ଇନିଃ ଆପାନ୍ କେ ମାନାରାଙ୍ଗ୍ କେଦାଏ ହାର୍ ସୁକୁ-ଜୋମ୍ ରେ ତାଇଜାନାଏ, ଇମିନାଙ୍ଗ୍ ଇନିଃକେ ହାସୁ ଆଡୋଃ ଦୁକୁ ଏମାଇପେ; ଚିୟାଃଚି ଇନିଃ ଆପାନାଃ ମୋନ୍ ରେ ପାହୋମ୍ ତାନାଏ, ‘ଇଙ୍ଗ୍ ରାନୀ ଲେକା ଦୁବ୍ କାନାଇଙ୍ଗ୍, କାଇଙ୍ଗ୍ ବିଧୋବା କାନା; ହାର୍ ଦୁକୁ ରେ ଚିଉଲା ହ କାଇଙ୍ଗ୍ ଉୟୁଗୋଃୱା।’ ଏନାମେନ୍ତେ ମୁଶିଙ୍ଗ୍ ରେଗି ଇନିଜାଃ ଚେତାନ୍ ରେ ମାହାମାରୀକୋ ହିଜୁଃ କେନୋଗା, ମାନେ ଗୋନୋଏଃ, ଆଡୋଃ ଦୁକୁ, ଆଡୋଃ ଆକାଲ୍; ଆଡୋଃ ଇନିଃ ଏନ୍ ସେଙ୍ଗେଲ୍ ରେ ଅଣ୍ଡୋର୍ ତୋରେଃ କେନୋଗାଏ, ଚିୟାଃଚି ଇନିଜାଃ ବିଚାର୍‍ନିଃ ପ୍ରାଭୁ ପାର୍ମେଶ୍ଵାର୍ ସବେନ୍ ଏତେ ପେଡ଼େଜାନ୍ ତାନିଃ।” “ଅତେ ରେନ୍ ରାଜାକୋ ଅକନ୍‍କୋ ଇନିଃ ଲୋଃ ବ୍ୟାଭିଚାର୍ କେଦାକୋ ଆଡୋଃ ସୁକୁ-ଜୋମ୍ କେଦାକୋ, ଚିମ୍ତାଙ୍ଗ୍ ଇନିଜାଃ ଜୁଲୋଃତାନ୍ ରାଃ ସୁକୁଲ୍ ନେଲେୟାକୋ, ଇମ୍ତା ଇନିଃ ଲାଗିନ୍ ରାଆୟାକୋ, ଆଡୋଃ କୁଡ଼ାମ୍ ବିଡ଼ାତାନ୍ ଲୋଃ ଦୁକୁୱାକୋ। ଆଡୋଃ ଇନିଜାଃ କାଲ୍‍ପାଅଃ କେ ବୋରୋ କେତେ ଇନ୍‍କୁ ଥିମ୍ବାଗି ସାଙ୍ଗିନ୍ ତିଙ୍ଗୁ କେତେ କାଜିୟାକୋ, ‘ହେ ମାରାଙ୍ଗ୍ ସାହାର୍, ବେବିଲୋନ୍! ହେ ପେଡ଼େଜାନ୍ ସାହାର୍, ହାୟ୍! ହାୟ୍! ଘାଡ଼ିକାଃ ରେଗି ଆମ୍‍କେ ଦାଣ୍ଡ୍ ନାମ୍‍ଜାନା।’ ” “ଅତେ ରେନ୍ ବେପାରୀକୋ ଇନିଃ ଲାଗିନ୍ତେ ରାଆୟାକୋ ଆଡୋଃ କାଲ୍‍ପାଅଃୱାକୋ, ଚିୟାଃଚି ନାଆ ଜେତାଏ ଇନ୍‍କୁୱାଃ ସାମାନ୍ କାକୋ କିରିଙ୍ଗ୍‍ୟା; ମାନେ ସୋନା, ରୂପା, ଗୋନୋଙ୍ଗାନ୍ ଦିରି, ମୋତି, ଆଡୋଃ ପୁଣ୍ଡୀ ନିରାଲ୍ ଲିଜାଃ, ଟୋକୋ ରାଙ୍ଗ୍ ରାଃ ଲିଜାଃ, ରେଶାମ୍ ଲିଜାଃ ହାର୍ ଆରାଃ ରାଙ୍ଗ୍ ରାଃ ଲିଜାଃକୋ, ଆଡୋଃ ସବେନ୍ ରାକାମ୍ ରାଃ ସୋୱାନ୍ ସାହାନ୍ କୋ ଆଡୋଃ ହାଥୀ ଡାଟା ରେୟାଃ ସବେନ୍ ଲେକାନାଃ ଜିନିଷ୍‍କୋ, ଆଡୋଃ ଗୋନୋଙ୍ଗାନ୍ ସାହାନ୍ ଆଡୋଃ ପିତାଲ୍ ଆଡୋଃ ମେଣେଏଃ ଆଡୋଃ ସାଙ୍ଗ୍‍ମାର୍ମାର୍ ରେୟାଃ ସବେନ୍ ଲେକାନାଃ ସାମାନ୍ କୋ, ଆଡୋଃ ଦାଲ୍‍ଚିନି, ମାଶାଲା, ଧୁୱାନ୍, ସୋୱାନ୍ ସୁନୁମ୍, ଲୋବାନ୍, ଆଙ୍ଗୁର୍ ରାଶି, ଜାଇତୁନ୍ ସୁନୁମ୍, ମାଏଦା, ଗହମ୍, ଉରିଃ-ମେରୋମ୍ କୋ, ମିଣ୍ଡୀକୋ, ଶାଦୋମ୍ କୋ, ରାଥ୍ କୋ ଆଡୋଃ ଦାସୀକୋ ଆଡୋଃ ହୋଡ଼ୋ କୋୱାଃ ଜୀଉ। ନାଆ ଆପେୟାଃ ମୋନ୍ କେ ସୁକୁତେୟାଃ ଯଅକୋ ଆପେ ତାଃଏତେ ସେନୋଃତାନା, ଆଡୋଃ ଶିବିଲ୍ ଜିନିଷ୍ କୋ ହାର୍ ସାମା ରାଃ ଜିନିଷ୍ କୋ ଆପେ ତାଃଏତେ ସାଙ୍ଗିନ୍ ଜାନା, ଆଡୋଃ ଏନା ଚିଉଲା ହ କାନାମୋଗା। ନେ ଜିନିଷ୍ କୋରାଃ ବେପାରୀ କୋ ଅକନ୍‍କୋ ଏନାରାଃ ହୋରାତେ କିଶାଣ୍ ଲେନ୍ ତାଇକେନାକୋ, ଇନିଜାଃ କାଲ୍‍ପାଅଃ କେ ବୋରୋ କେତେ ସାଙ୍ଗିନ୍ ରେ ତିଙ୍ଗୁନାକୋ, ଆଡୋଃ ରାଆତାନ୍ ଲୋଃ ଆଡୋଃ କାଲ୍‍ପାଅଃ ତାନ୍ ଲୋଃ କାଜିୟାକୋ, ‘ହାୟ୍! ହାୟ୍! ନେ ମାରାଙ୍ଗ୍ ସାହାର୍ ଅକନାଃ ପୁଣ୍ଡୀ ନିରାଲ୍ ଲିଜାଃ, ଆଡୋଃ ଟୋକୋ ରାଙ୍ଗ୍ ରାଃ ଲିଜାଃ ଆଡୋଃ ଆରାଃ ରାଙ୍ଗ୍ ରାଃ ଲିଜାଃ ତୁସିଙ୍ଗ୍ ଲେନ୍ ତାଇକେନାଏ, ହାର୍ ସୋନା କୋଏତେ ହାର୍ ଗୋନୋଙ୍ଗାନ୍ ଦିରି କୋଏତେ ହାର୍ ମୋତି କୋଏତେ ସିଙ୍ଗାରାକାନ୍ ତାଇକେନାଏ; ଘାଡ଼ିକାଃ ରେଗି ଇନିଜାଃ ନିମିନ୍ ଥିମ୍ବା ଧାନ୍ କୋ ନାଷ୍ଟ୍ ଜାନା।’ ହାର୍ ସବେନ୍ ଦାଆ ଜାହାଜ୍ ରେନ୍ ଗୋମ୍‍କେକୋ ଆଡୋଃ ଦାଆ ଜାହାଜ୍ ରେ ହିଜୁଃ-ସେନୋଃ ହୋଡ଼ୋକୋ ଆଡୋଃ ଦାଆ ଜାହାଜ୍ ରେ କାମିତାନ୍ ହୋଡ଼ୋକୋ, ଆଡୋଃ ଅକନ୍ କୋ ସାମୁଦାର୍ ଏତେ କାମି କେତେ ଜୀହୁଦୋଃତାନ୍ କୋ, ସବେନ୍ କୋ ସାଙ୍ଗିନ୍ ରେ ତିଙ୍ଗୁ ଜାନାକୋ, ଆଡୋଃ ଏନାରାଃ ଜୁଲୋଃତେୟାଃ ରାଃ ସୁକୁଲ୍ କେଃ ନେଲ୍ ତାନ୍ ଲୋଃ କାଜିକେଦାକୋ, ‘ନେ ମାରାଙ୍ଗ୍ ହାତୁ ଲେକା ଅକନ୍ ହାତୁ ମେନାଃ?’ ଆଡୋଃ ଇନ୍‍କୁ ଆପାନାଃ-ଆପାନାଃ ବୋଅ ରେ ଧୂଡ଼ି ହିର୍ଚିୟୋଃ ୱାକୋ, ଆଡୋଃ ରାଆ ତାନ୍ ଲୋଃ ହାର୍ କାଲ୍‍ପାଅଃ ତାନ୍ ଲୋଃ କାଉରି-କାଉରି କେତେ କାଜିୟାକୋ, ‘ହାୟ୍! ହାୟ୍! ନେ ମାରାଙ୍ଗ୍ ହାତୁ ଅକନିଜାଃ ସାମ୍ପାତି କୋରାଃ ହୋରାତେ ସାମୁଦାର୍ ରେନ୍ ଜାହାଜ୍ କୋରାଃ ଗୋମ୍‍କେ କୋ କିଶାଣ୍ ହୋବାଲେନ୍ ତାଇକେନାକୋ, ଇନ୍‍କୁ ଘାଡ଼ିକାଃ ରେଗି ଉଜ୍ଡ଼ାଅ ଜାନାକୋ।’ ହେ ସିର୍ମାଦିଶୁମ୍ ରେନ୍‍କୋ, ଆଡୋଃ ହେ ପାବିତାର୍ ହୋଡ଼ୋକୋ, ଆଡୋଃ କୁଲାକାନ୍ ଚେଲାକୋ ଆଡୋଃ ନାବୀ କୋ ଇନିଜାଃ ଉୟୁଗୋଃତେ ରାଶିକାଅଃପେ, ଚିୟାଃଚି ପାର୍ମେଶ୍ଵାର୍ ବିଚାର୍ ରିକା କେତେ ଇନିଜେତେ ଆପେୟାଃ ବାଦ୍‍ଲା ଇଦିକେଦାଏ!” ଏନ୍ତେ ମିହୋଡ଼୍ ପେଡ଼େଜାନ୍ ସିର୍ମାଦାସୀ ମାରାଙ୍ଗ୍ ଚାକି ରାଃ ଦିରିପାଟା ଲେକା ମିୟାଃ ଦିରି ଉଠାଓକେଦାଏ, ଆଡୋଃ ନେୟା କାଜିତାନ୍ ଲୋଃ ସାମୁଦାର୍ ରେ ଦୁଡ଼ିଙ୍ଗ୍ କେଦାଏ, “ମାରାଙ୍ଗ୍ ହାତୁ ବେବିଲୋନ୍ ନେଲେକାଗି ମାରାଙ୍ଗ୍ ପେଡ଼େଏ ତେ ଉୟୁଗୋଗା, ହାର୍ ଏନା ଚିଉଲା ହ ଆଡୋଃ କାନାମୋଗା। ବୀଣା ସାଡିତାନ୍ କୋ, ଆଡୋଃ ଦୁରାଙ୍ଗ୍ ତାନ୍ କୋ, ମୂର୍ଲି ସାଡିତାନ୍ କୋ, ଆଡୋଃ ତୁର୍ହୀ ଅଙ୍ଗ୍ ତାନ୍ କୋୱାଃ ଷାଡି ଆଡୋଃଗି ଚିଉଲା ହ ଆମାଃ ରେ କାଆୟୁମୋଗା; ଆଡୋଃ ଜାହାନ୍ କାର୍‍ଖାନା ରେନ୍ ଜେତାନ୍ କାରୀଗାର୍ ହଗି ଆଡୋଃଗି ଆମାଃ ରେ ଚିଉଲା ହ କାକୋ ନାମୋଗା; ଚାକି କେ ଚାଲାଓ ରେୟାଃ ଷାଡି ଆଡୋଃଗି ଆମାଃ ରେ ଚିଉଲା ହ କାଆୟୁମୋଗା; ଆଡୋଃ ବାତୀ କୋରାଃ ମାର୍ଶାଲ୍ ଆଡୋଃଗି ଆମାଃ ରେ ଚିଉଲା ହ କାମାସ୍କାଲ୍ଅଗା, ହାର୍ ନାୱା କଡ଼ା ଆଡୋଃ ନାୱା କୁଡ଼ି କୋୱାଃ ଷାଡି ଆଡୋଃଗି ଚିଉଲା ହ ଆମାଃ ରେ କାଆୟୁମୋଗା; ଚିୟାଃଚି ଆମାଃ ବେପାରୀକୋ ଅତେ ରେନ୍ ମାପ୍‍ରାଙ୍ଗ୍ କୋ ତାଇକେନାକୋ, ଆଡୋଃ ଆମାଃ ଟୋହ୍ନା କାମି ତେ ସବେନ୍ ଜାତି ରେନ୍ କୋ ହିହିଡ଼୍‍ଲେନ୍ ତାଇକେନାକୋ। ନାବୀ କୋୱାଃ ହାର୍ ପାବିତାର୍ ହୋଡ଼ୋକୋୱାଃ, ଆଡୋଃ ଅତେ ରେ ସବେନ୍ ଗୋଏଃ ରିକାକାନ୍ କୋୱାଃ ମାୟୋମ୍ ଏନାରେଗି ନାମା କାନା।” ନେୟାରାଃ ତାୟୋମ୍ତେ ଇଙ୍ଗ୍ ସିର୍ମାଦିଶୁମ୍ ରେ ଥିମ୍ବାଗି ହୋଡ଼ୋକୋ କାଉରିତାନାକୋ ଲେକା ଆୟୁମ୍ କେଦାଇଙ୍ଗ୍, “ହାଲେଲୁୟାହ୍! ବାଞ୍ଚାଅ ଆଡୋଃ ମାନାରାଙ୍ଗ୍ ହାର୍ ପେଡ଼େଏ ଆବୁୱାଃ ପାର୍ମେଶ୍ଵାର୍ ରାଃଗି ତାନାଃ। ଚିୟାଃଚି ଇନିଜାଃ ବିଚାର୍ ସାର୍ତି ଆଡୋଃ ଠିକ୍ ତାନାଃ। ଇନିଃ ଏନ୍ ମାରାଙ୍ଗ୍ ବେଶ୍ୟା କେ, ଅକନିଃ ଆଜାଃ ବ୍ୟାଭିଚାର୍ ତେ ଅତେ କେ ଖାରାପ୍ ରିକା ତାଇକେନାଏ, ଇନିଜାଃ ବିଚାର୍ କେଦାଏ ଆଡୋଃ ଇନିଜେତେ ଆଜାଃ ଦାସୀକୋୱାଃ ମାୟୋମ୍ ରାଃ ବାଦ୍‍ଲା ଇଦି କେଦାଏ।” ଏନ୍ତେ ଆଡୋଃମିଶା ଇନ୍‍କୁ କାଜିକେଦାକୋ, “ହାଲେଲୁୟାହ୍! ଇନିଜାଃ ଜୁଲୋଃ ତେୟାଃ ସୁକୁଲ୍ ଜାନାଓ-ଜାନାଓ ବୀରିଦା।” ଇମ୍ତା ଚୋବିଶ୍ ଝାନ୍ ମାରିହୋଡ଼ୋକୋ ଆଡୋଃ ଚାଇର୍ ଝାନ୍ ଜାନ୍ତୁକୋ ଅବୋର୍ କେତେ ଅକନିଃ ସିଂହାସାନ୍ ରେ ଦୁବାକାନ୍ ତାଇକେନାଏ ଏନ୍ ପାର୍ମେଶ୍ଵାର୍ କେ ଜୋହାର୍ କିଜାକୋ। ଏନ୍ତେ କାଜିକେଦାକୋ, “ଆମୀନ୍! ହାଲେଲୁୟାହ୍!” ଏନ୍ତେ ସିଂହାସାନ୍ ଏତେ ମିୟାଃ ଆୱାଜ୍ ଅଡୋଙ୍ଗ୍ ଜାନା, “ହେ ଆବୁୱାଃ ପାର୍ମେଶ୍ଵାର୍ କେ ସବେନ୍ ବୋରୋତାନ୍ ଦାସୀକୋ, ଚିନାଃ ହୁପୁଡିଙ୍ଗ୍ କୋ, ଚିନାଃ ମାପ୍‍ରାଙ୍ଗ୍ କୋ; ଆପେ ସବେନ୍ ଇନିଜାଃ ସ୍ତୁତି ରିକାଏପେ।” ଏନ୍ତେ ଇଙ୍ଗ୍ ଥିମ୍ବାଗି ହୋଡ଼ୋକୋୱାଃ ଆୱାଜ୍ ଲେକା ଆଡୋଃ ଥିମ୍ବାଗି ଦାଆ ରାଃ ଆୱାଜ୍ ଲେକା ଆଡୋଃ ରିମିଲ୍-ଷାଡି ଲେକା ମାରାଙ୍ଗ୍ ଆୱାଜ୍ ଆୟୁମ୍ କେଦାଇଙ୍ଗ୍: “ହାଲେଲୁୟାହ୍! ଚିୟାଃଚି ପ୍ରାଭୁ ଆବୁୱାଃ ପାର୍ମେଶ୍ଵାର୍ ସବେନ୍ ଏତେ ପେଡ଼େଜାନ୍ ରାଇଜ୍ ତାନାଏ। ଦେଲାବୁ, ରାଶିକାନା ହାର୍ ସୁକୁଅଃୱା, ଆଡୋଃ ଇନିଃକେ ମାଇନିୟା, ଚିୟାଃଚି ମିଣ୍ଡୀହୋନ୍ ରାଃ ଆଣାଦୀ ସେଟେର୍ କାନା, ହାର୍ ଇନିଜାଃ ନାୱା କୁଡ଼ି ଆଏଃ ଆପାନ୍ କେ ସାପ୍ଡ଼ାଅ କାନାଏ। ଇନିଃକେ ପୁଣ୍ଡୀ ନିରାଲ୍ ହାର୍ ଚାମ୍‍କାଅଃ ତେୟାଃ କେ ତୁସିଙ୍ଗେନ୍ ରାଃ ଆଧିକାର୍ ଏମ୍ ଜାନା,” ଚିୟାଃଚି ଏନ୍ ପୁଣ୍ଡୀ ନିରାଲ୍ ରାଃ ମାନେ ପାବିତାର୍ ହୋଡ଼ୋ କୋୱାଃ ଧାରାମ୍ ରାଃ କାମି ତାନାଃ। ଏନ୍ତେ ସିର୍ମାଦାସୀ ଇଙ୍ଗ୍‍କେ କାଜିକେଦାଏ, “ନେୟା ଅଲେମ୍, ଚି ଧାନ୍ୟା ଇନ୍‍କୁ ତାନ୍‍କୋ, ଅକନ୍ କୋ ମିଣ୍ଡୀହୋନ୍ ରାଃ ଆଣାଦୀ ରେୟାଃ ଭୋଜ୍ ରେ କେଡ଼ା କାନାକୋ।” ହାର୍ ଇନିଃ ଆଡୋଃଗି ଇଙ୍ଗ୍‍କେ କାଜିକେଦାଏ, “ନେ ବାଚାନ୍ ପାର୍ମେଶ୍ଵାର୍ ରାଃ ସାର୍ତି ବାଚାନ୍ ତାନାଃ।” ଇମ୍ତାଙ୍ଗ୍ ଇଙ୍ଗ୍ ଇନିଃକେ ଜୋହାରି ଲାଗିନ୍ ଇନିଜାଃ କାଟାସୁବା ରେ ଇକ୍ଡ଼ୁମ୍ କେଦାଇଙ୍ଗ୍। ଇନିଃ ଇଙ୍ଗ୍‍କେ କାଜିକେଦାଏ, “ନେଲେମ୍, ନେଲେକା ଆଲୋମ୍ ରିକାଏ, ଇଙ୍ଗ୍ ଆମାଃ ଆଡୋଃ ଆମାଃ ବିଶ୍ଵାସୀ ହାଗା କୋୱାଃ ଗାତି ଦାସୀ ତାନିଙ୍ଗ୍, ଅକନ୍ କୋ ୟୀଶୁ ଆଃ ଗୋୱା ଏମ୍ ଲାଗିନ୍ ସବେନ୍ ଇମ୍ତା ସେକାଡ଼୍ ମେନାକୋୱା। ପାର୍ମେଶ୍ଵାର୍ କେଗି ଇକ୍ଡ଼ୁମ୍ କେତେ ଜୋହାରି ମେ।” ଚିୟାଃଚି ୟୀଶୁ ରାଃ ଗୋୱା ଏହେମ୍ ନାବୀ କୋୱାଃ ଆତ୍ମା ତାନାଃ। ଏନ୍ତେ ଇଙ୍ଗ୍ ସିର୍ମାଦିଶୁମ୍ କେ ଖଲାଅକାନ୍ ନେଲ୍ କେଦାଇଙ୍ଗ୍, ଆଡୋଃ ନେଲ୍ ତାନିଙ୍ଗ୍ ଚି ମିୟାଃ ପୁଣ୍ଡୀ ଶାଦୋମ୍ ମେନିଜା; ଆଡୋଃ ଇନିଃ ରେ ମିହୋଡ଼୍ ଦୁବାକାନାଏ, ଅକନିଃ ବିଶ୍ଵାସେ ଲେକାନିଃ ଆଡୋଃ ସାର୍ତି କାଜିୟୋଃୱାଏ; ହାର୍ ଇନିଃ ଧାରାମ୍ ଲୋଃ ବିଚାର୍ ଆଡୋଃ ଲାଡ଼ାଇ ତାନାଏ। ଇନିଜାଃ ମେଏଃ ସେଙ୍ଗେଲ୍ ଜୁଲୋଃତାନ୍ ଲେକା ନେଲ୍ ଜାନା, ଆଡୋଃ ଇନିଜାଃ ବୋଅ ରେ ମିଃଥିମ୍ବା ରାଜ୍ ମୁକୁଟ୍ ତାଇକେନା। ଇନିଜାଃ ରେ ମିୟାଃ ନୁତୁମ୍ ଅଲାକାନ୍ ତାଇକେନା, ଏନା ଇନିଃକେ ବାଗି କେତେ ଜେତାଏ କାକୋ ସାରିୟା। ଇନିଃ ମାୟୋମ୍ ହିର୍ଚିକାନ୍ ଲିଜାଃ ତୁସିଙ୍ଗ୍ କାନାଏ, ଆଡୋଃ ଇନିଜାଃ ନୁତୁମ୍ ପାର୍ମେଶ୍ଵାର୍ ରାଃ ବାଚାନ୍ ତାନାଃ। ସିର୍ମାଦିଶୁମ୍ ରେନ୍ ସେନାକୋ ପୁଣ୍ଡୀ ଶାଦୋମ୍ କୋରେ ଦୁବ୍ କେତେ ଆଡୋଃ ପୁଣ୍ଡୀ ହାର୍ ସାଫା ଚାମ୍‍କାଅଃ ତେୟାଃ ତୁସିଙ୍ଗ୍ କେତେ ଇନିଃକେ ଅତୋଙ୍ଗ୍ କିଜାକୋ। ଜାତି-ଜାତି କୋକେ ଗୋଗୋଏଃ ଲାଗିନ୍ ଇନିଜାଃ ମୋଚା ଏତେ ମିୟାଃ ଲେସେର୍ ତାଲ୍‍ୱାର୍ ଅଡୋଙ୍ଗ୍ଅଃ ତାନା। ଇନିଃ ମେଣେଏଃ ରାଃ ସୋଟା ଇଦିକେତେ ଇନ୍‍କୁୱାଃ ରେ ରାଇଜ୍ ୟାଏ, ଆଡୋଃ ଇନିଃ ସବେନ୍ ଏତେ ପେଡ଼େଜାନ୍ ପାର୍ମେଶ୍ଵାର୍ ରାଃ ବୋରୋୱାନ୍ ଜୁଲ୍‍ତାନ୍ ଖିସ୍ ରେୟାଃ ଆଙ୍ଗୁର୍ ରାଶି ରାଃ ଡୋଡା ରେ ଆଙ୍ଗୁର୍ କେ ତିକା ସେରେଦେୟାଏ। ଇନିଜାଃ ଲିଜାଃ ହାର୍ ଜାଙ୍ଗ୍ ରେ ନେ ନୁତୁମ୍ ଅଲାକାନା: “ରାଜାକୋୱାଃ ରାଜା ଆଡୋଃ ପ୍ରାଭୁକୋୱାଃ ପ୍ରାଭୁ।” ଏନ୍ତେ ଇଙ୍ଗ୍ ମିୟାଃ ସିର୍ମାଦାସୀ କେ ଶିଙ୍ଗି ରେ ତିଙ୍ଗୁକାନ୍ ନେଲ୍ କିଜାଇଙ୍ଗ୍। ଇନିଃ ମାରାଙ୍ଗ୍ ଆୱାଜ୍ ରେ କାଉରି କେତେ ରିମିଲ୍‍ଦିଶୁମ୍ ରେୟାଃ ଥାଲା ରେ ଆପିର୍ ତାନ୍ ସବେନ୍ ଅଡ଼େ କୋକେ କାଜିକେଦାଏ, “ହିଜୁଃପେ, ପାର୍ମେଶ୍ଵାର୍ ରାଃ ମାରାଙ୍ଗ୍ ଭୋଜ୍ ଲାଗିନ୍ତେ ହୁଣ୍ତିଅଃପେ, ଏନାତେ ଆପେ ରାଜାକୋୱାଃ ମାସ୍, ଆଡୋଃ ମୁଖିୟାକୋୱାଃ ମାସ୍ ଆଡୋଃ ପେଡ଼େଜାନ୍ କଡ଼ା ହୋଡ଼ୋକୋୱାଃ ମାସ୍ ହାର୍ ଶାଦୋମ୍ କୋୱାଃ ଆଡୋଃ ଇନ୍‍କୁୱାଃ ରେ ଦୁବାକାନ୍ କୋୱାଃ ମାସ୍, ଆଡୋଃ ଚିନାଃ କାଦାସୀକାନ୍ କୋୱାଃ, ଚିନାଃ ଦାସୀକାନ୍ କୋୱାଃ, ଚିନାଃ ହୁପୁଡିଙ୍ଗ୍ କୋୱାଃ ଚିନାଃ ମାପ୍‍ରାଙ୍ଗ୍, ସବେନ୍ ହୋଡ଼ୋକୋୱାଃ ମାସ୍ ଜୋମେପେ।” ଏନ୍ତେ ଇଙ୍ଗ୍ ଏନ୍ ପାଶୁ କେ, ଆଡୋଃ ଅତେ ରେନ୍ ରାଜାକୋକେ ଆଡୋଃ ଇନ୍‍କୁୱାଃ ସିପାହୀକୋକେ ଏନ୍ ଶାଦୋମ୍ ରେ ଦୁବାକାନ୍ କୋଲୋଃ, ହାର୍ ଇନିଜାଃ ସିପାହୀକୋ ଲୋଃ ଲାଡ଼ାଇ ଲାଗିନ୍ ହୁଣ୍ଡିକାନ୍ ନେଲ୍‍କେଦାଇଙ୍ଗ୍। ଏନ୍ ପାଶୁ ଆଡୋଃ ଇନିଜାଃ ଲୋଃ ଏନ୍ ହିହିଡ଼୍ ନାବୀ ସାବ୍ ଜାନାଏ, ଅକନିଃ ଇନିଜାଃ ନାଡ଼େଏ ରେ ନେଲେକା ଚିହ୍ନା କୋ ଦେଖାଅ ଲେଦାଏ, ଅକନାଃତେ ଇନିଃ ଇନ୍‍କୁକେ ହିଡ଼୍ ଲେଃକୋ ତାଇନାଏ ଅକନ୍ କୋୱାଃ ରେ ଏନ୍ ପାଶୁ ରାଃ ଛାପ୍ ତାଇକେନା ଆଡୋଃ ଅକନ୍ କୋ ଇନିଜାଃ ମୂର୍ତି ରାଃ ପୂଜା ତାଇକେନାକୋ। ନେ ବାରାନ୍ କିନ୍ ଜୀନିଃ-ଜୀନିଃଗି ଏନ୍ ସେଙ୍ଗେଲ୍ ରାଃ ଗାଡା ରେ, ଅକନାଃ ଚି ଗାନ୍ଧାକ୍ ତେ ଜୁଲୋଃତାନା, ହୁରାଙ୍ଗ୍ଅଗାକୋ। ସାରେଜାକାନ୍ ହୋଡ଼ୋକୋ ଏନ୍ ଶାଦୋମ୍ ରେ ଦୁବାକାନ୍ ନିଜାଃ ତାଲ୍‍ୱାର୍ ତେ, ଅକନାଃ ଇନିଜାଃ ମୋଚା ତେ ଅଡୋଙ୍ଗ୍ଅଃ ତାଇକେନା, ଗୋଏଃ ଜାନାକୋ; ଆଡୋଃ ସବେନ୍ ଅଡ଼େକୋ ଇନ୍‍କୁୱାଃ ମାସ୍ ତେ ବିଇ ଜାନାକୋ। ଏନା ତାୟୋମ୍ତେ ଆଡୋଃ ଇଙ୍ଗ୍ ମିୟାଃ ସିର୍ମାଦାସୀ କେ ସିର୍ମାଦିଶୁମ୍ ଏତେ ଆଡ଼୍‍ଗୁତାନ୍ ନେଲ୍ କିଜାଇଙ୍ଗ୍, ଅକନିଜାଃ ତିଈ ରେ କାସୋଙ୍ଗ୍ଅଃ ଡୋଡା ରାଃ ଚାଭି ହାର୍ ମିୟାଃ ମାରାଙ୍ଗ୍ ସିକିଡ଼ି ତାଇକେନା। ଇନିଃ ଏନ୍ ଆଜ୍‍ଗାର୍ ବିଙ୍ଗ୍ କେ, ମାନେ ଏନ୍ ମାରି ବିଙ୍ଗ୍ କେ ଅକନିଃ ଇବ୍‍ଲିଶ୍ ଆଡୋଃ ଶାଏତାନ୍ ତାନିଃ, ସାବ୍ କେତେ ଏକ୍ ହାଜାର୍ ଶିର୍ମା ଲାଗିନ୍ତେ ଥୋଲ୍ କିଜାଏ, ଇନିଃକେ କାସୋଙ୍ଗ୍ଅଃ ଡୋଡା ରେ ହୁରାଙ୍ଗ୍ କେତେ ବାନ୍ଦ୍ ତାଦାଏ ହାର୍ ଏଣ୍ତେ ରେ ମୋହାର୍-ଛାପ୍ ଲାଗାଅ ତାଦାଏ, ଏନାତେ ଇନିଃ ହାଜାର୍ ଶିର୍ମା ଛାବାଅଃ ସାନ୍ତେ ଜାତି-ଜାତି ରେନ୍ ହୋଡ଼ୋକୋକେ ଆଡୋଃ କାଏ ହିହିଡ଼୍ ଧାଡ଼ିକୋୱାଏ। ନେୟା ରାଃ ତାୟୋମ୍ତେ ଲାଗାତିଙ୍ଗ୍ ମେନାଃ ଚି ଇନିଃ ହୁଡିଙ୍ଗ୍ ସାମାୟ୍ ଲାଗିନ୍ତେ ଆଡୋଃମିଶା ରାଡ଼ାଅଃକାଏ। ଏନ୍ତେ ଇଙ୍ଗ୍ ସିଂହାସାନ୍ ନେଲ୍ କେଦିଙ୍ଗ୍, ହାର୍ ଏଣ୍ତେରେ ହୋଡ଼ୋକୋ ଦୁବ୍ ଜାନାକୋ, ହାର୍ ଇନ୍‍କୁକେ ବିଚାର୍ ରିକାଲାଗିନ୍ ଆଧିକାର୍ ଏମ୍ ଜାନା। ଇଙ୍ଗ୍ ଇନ୍‍କୁୱାଃ ଆତ୍ମାକୋକେ ହ ନେଲ୍ କେଦିଙ୍ଗ୍, ଅକନ୍ କୋୱାଃ ବୋଅ ୟୀଶୁ ରାଃ ଗୋୱା ଏହେମ୍ ହାର୍ ପାର୍ମେଶ୍ଵାର୍ ରାଃ ବାଚାନ୍ ଲାଗିନ୍ତେ ମାଆକାନ୍ ତାଇକେନା, ହାର୍ ଅକନ୍ କୋ ନାଦୋ ଏନ୍ ପାଶୁ ରାଃ, ହାର୍ ନାଦୋ ଇନିଜାଃ ମୁର୍ତ୍ତି କେ ପୂଜା ଲେଦାକୋ, ହାର୍ ନାଦୋ ଇନିଜାଃ ଛାପ୍ ଆକୋୱାଃ ମୋଲୋଙ୍ଗ୍ କୋରେ ହାର୍ ତିଈ କୋରେ ଇଦିଲେଦାକୋ। ଇନ୍‍କୁ ଜୀହିଃ କେତେ ମାସୀହ୍ ଲୋଃ ହାଜାର୍ ଶିର୍ମା ସାନ୍ତେ ରାଇଜ୍ କେଦାକୋ। ଚିମ୍ତାଙ୍ଗ୍ ସାନ୍ତେ ନେ ହାଜାର୍ ଶିର୍ମା କାପୁରାଜାନା ଇମ୍ତା ସାନ୍ତେ ଗୋଜାକାନ୍ କୋଏତେ ସାରେଜାକାନ୍ କୋ କାକୋ ଜୀହିଃ ଜାନା। ନେୟା ଦୋ ସିଦା ଜୀବିନିରିଦ୍ ତାନାଃ। ଧାନ୍ୟା ହାର୍ ପାବିତାର୍ ଏନ୍ ହୋଡ଼ ତାନିଃ, ଅକନିଃ ନେ ସିଦା ଜୀବିନିରିଦ୍ ରେୟାଃ ହାନାଟିଙ୍ଗ୍ ନାମ୍ ତାନାଏ। ନେକାନ୍ କୋୱାଃ ରେ ଏଟାଃ ଗୋନୋଏଃ ରାଃ ଜେତାନ୍ ପେଡ଼େଏ ବାନୋଗା, ମେନ୍ଦୋ ଇନ୍‍କୁ ପାର୍ମେଶ୍ଵାର୍ ହାର୍ ମାସୀହ୍ ରାଃ ୟାଜାକ୍ ବାଇ କେନୋଗାକୋ, ଆଡୋଃ ଇନିଃ ଲୋଃ ହାଜାର୍ ଶିର୍ମା ସାନ୍ତେ ରାଇଜ୍ ୟାକୋ। ଚିମ୍ତାଙ୍ଗ୍ ହାଜାର୍ ଶିର୍ମା ପୁରାଛାବା କେନୋଗା, ଇମ୍ତା ଶାଏତାନ୍ ଥୋଲାକାନ୍ ଏତେ ରାଡ଼ାଅଗାଏ। ଇନିଃ ଏନ୍ ଜାତିକୋକେ ଅକନ୍ କୋ ଅତେ ରେନ୍ ସବେନ୍ ପାଡ଼୍ ତାଇନାକୋ, ମାନେ ଗୋଗ୍ ଆଡୋଃ ମାଗୋଗ୍ କୋକେ ଅକନ୍ କୋୱାଃ ଗିନ୍ତି ସାମୁଦାର୍ ରାଃ ଗିତିଲ୍ ଲେକା ତାଇନା, ଇନ୍‍କୁକେ ଉସ୍କାଅ କେତେ ଲାପ୍ଡ଼ାଇ ଲାଗିନ୍ତେ ହୁଣ୍ଡିଏନ୍ ଲାଗିନ୍ ଅଡୋଙ୍ଗୋଗାଏ। ଇନ୍‍କୁ ଗୋଟା ଅତେ ରେ ସେନ୍ କେତେ ପାର୍ମେଶ୍ଵାର୍ ରାଃ ହୋଡ଼ୋକୋୱାଃ ଡେରା କେ ହାର୍ ଆଏଃ ଦୁଲାଡ଼୍‍ତାନ୍ ସାହାର୍ କେ କେସେଃ-ବିୟୁର୍ କେୟାକୋ; ମେନ୍ଦୋ ସେଙ୍ଗେଲ୍ ସିର୍ମାଦିଶୁମ୍ ତେ ହିଜୁଃ କେତେ ଇନ୍‍କୁକେ ଅଣ୍ଡୋର୍ ତୋରେଃ ତାକୋୱାଏ। ଇନ୍‍କୁୱାଃ ହିହିଡ଼୍‍ନିଃ ଶାଏତାନ୍ ସେଙ୍ଗେଲ୍ ହାର୍ ଗାନ୍ଧାକ୍ ରେୟାଃ ଏନ୍ ସାମୁଦାର୍ ରେ ହୁରାଙ୍ଗ୍ଅଗାଏ, ହେନ୍ତାଃରେ ଏନ୍ ପାଶୁ ହାର୍ ହିହିଡ଼୍ ନାବୀ ହ କିନ୍ ତାଇନା; ହାର୍ ଇନ୍‍କୁ ନିଦା-ଶିଙ୍ଗି ଜାନାଓ-ଜାନାଓ ହାସୁ ତେ କାଲ୍‍ପାଅଃ କାତୋୱାକୋ। ଏନ୍ତେ ଇଙ୍ଗ୍ ମିୟାଃ ମାରାଙ୍ଗ୍ ପୁଣ୍ଡୀ ସିଂହାସାନ୍ ହାର୍ ଇନିଃକେ, ଅକନିଃ ଏନାରେ ଦୁବାକାନାଏ, ନେଲ୍ କିଜାଇଙ୍ଗ୍; ଇନିଜାଃ ନାଡ଼େଏ ତେ ଅତେ ହାର୍ ରିମିଲ୍‍ଦିଶୁମ୍ ନିର୍ ଜାନା, ଆଡୋଃ ଏନାକୋ ଲାଗିନ୍ ଜାଗା କାନାମ୍‍ଜାନା ଏନ୍ତେ ଇଙ୍ଗ୍ ହୁପୁଡିଙ୍ଗ୍ ମାପ୍‍ରାଙ୍ଗ୍ ସବେନ୍ ଗୋଜାକାନ୍ ହୋଡ଼ୋକୋକେ ସିଂହାସାନ୍ ନାଡ଼େଏ ରେ ତିଙ୍ଗୁକାନ୍ ନେଲ୍ କେଦାଇଙ୍ଗ୍, ହାର୍ କିତାବ୍ କୋ ଖଲାଅନା; ଏନ୍ତେ ଆଡୋଃ ମିୟାଃ କିତାବ୍ ଖଲାଅନା, ମାନେ ଜୀଦାନ୍ ରାଃ କିତାବ୍; ଆଡୋଃ ଜେଲେକା ଏନ୍ କିତାବ୍ କୋରେ ଅଲାକାନ୍ ତାଇକେନା, ଏନ୍ ଲେକାଗି ଇନ୍‍କୁୱାଃ କାମି କୋରାଃ ଲେକାତେ ଗୋଜାକାନ୍ କୋୱାଃ ବିଚାର୍ ରିକାଜାନା। ସାମୁଦାର୍ ଏନ୍ ଗୋଜାକାନ୍ କୋକେ ଅକନ୍ କୋ ଏଣ୍ଡେରେ ତାଇକେନାକୋ ଏମ୍‍ତାଃକୋୱାଏ, ହାର୍ ଗୋନୋଏଃ ଆଡୋଃ ପାତାଲ୍ ଏନ୍ ଗୋଜାକାନ୍ କୋକେ ଅକନ୍ କୋ ଆକିନ୍ ରେ ତାଇକେନାକୋ ଏମ୍ ରୁଆଡ଼୍ କେଃକୋୱାକିନ୍, ହାର୍ ଇନ୍‍କୁ ଏତେ ମିପୀୟାଃ କୋୱାଃ ଆପାନ୍-ଆପାନ୍ କାମିକୋ ଲେକାତେ ବିଚାର୍ ରିକାଜାନା। ଗୋନୋଏଃ ଆଡୋଃ ପାତାଲ୍ ସେଙ୍ଗେଲ୍ ରାଃ ସାମୁଦାର୍ ରେ ହୁରାଙ୍ଗ୍ ଜାନା। ନେ ସେଙ୍ଗେଲ୍ ରାଃ ସାମୁଦାର୍ ଏଟାଃ ଗୋନୋଏଃ ତାନାଃ; ଆଡୋଃ ଅକେୟାଃ ନୁତୁମ୍ ଜୀଦାନ୍ ରାଃ କିତାବ୍ ରେ ଅଲାକାନ୍ କାନାମ୍‍ଜାନା, ଇନିଃ ସେଙ୍ଗେଲ୍ ରାଃ ସାମୁଦାର୍ ରେ ହୁରାଙ୍ଗ୍ ଜାନାଏ। ଏନା ତାୟୋମ୍ତେ ଇଙ୍ଗ୍ ନାୱା ରିମିଲ୍‍ଦିଶୁମ୍ ଆଡୋଃ ନାୱା ଅତେ କେ ନେଲ୍ କେଦାଇଙ୍ଗ୍, ଚିୟାଃଚି ସିଦା ରେୟାଃ ରିମିଲ୍‍ଦିଶୁମ୍ ଆଡୋଃ ଅତେ କାତାଇନ୍ କେନା, ଆଡୋଃ ସାମୁଦାର୍ ହଗି କାତାଇନ୍ କେନା। ଆଡୋଃ ଇଙ୍ଗ୍ ପାବିତାର୍ ସାହାର୍ ନାୱା ୟୀରୁଶାଲେମ୍ କେ ସିର୍ମାଦିଶୁମ୍ ତେ ପାର୍ମେଶ୍ଵାର୍ ତାଃଏତେ ଆଡ଼୍‍ଗୁତାନ୍ ନେଲ୍ କେଦାଇଙ୍ଗ୍। ଏନା ଏନ୍ ନାୱାକୁଡ଼ି ଲେକା ତାଇନ୍ କେନାଏ, ଅକନିଃ ଆଜାଃ କଡ଼ା ଲାଗିନ୍ତେ ସିଙ୍ଗାରାକାନ୍ ତାଇନାଏ। ଏନ୍ତେ ଇଙ୍ଗ୍ ସିଂହାସାନ୍ ତାଃଏତେ ଜେତାଏ ମିହୋଡ଼୍ କେ ମାରାଙ୍ଗ୍ ଆୱାଜ୍ ତେ ନେୟା କାଜିତାନ୍ ଆୟୁମ୍ କେଦାଇଙ୍ଗ୍, “ନେଲେମ୍, ପାର୍ମେଶ୍ଵାର୍ ରାଃ ଡେରା ହୋଡ଼ୋକୋୱାଃ ରେ ମେନାଃ। ଇନିଃ ଇନ୍‍କୁ ଲୋଃ ଡେରାୟାଏ, ଆଡୋଃ ଇନ୍‍କୁ ଆଜାଃ ହୋଡ଼ୋକୋ ହୁୟୋଗାକୋ, ଆଡୋଃ ପାର୍ମେଶ୍ଵାର୍ ଆଏଃ ଇନ୍‍କୁ ଲୋଃ ତାଇନୋଗାଏ ଆଡୋଃ ଇନ୍‍କୁୱାଃ ପାର୍ମେଶ୍ଵାର୍ ହୁୟୋଗାଏ। ଇନିଃ ଇନ୍‍କୁୱାଃ ମେଏଃ କୋଏତେ ସବେନ୍ ମେଏଃ ଦାଆ କେ ଜଅଃ ତାଆଏ; ହାର୍ ନେୟାରାଃ ତାୟୋମ୍ତେ ଗୋନୋଏଃ କାତାଇନା, ଆଡୋଃ ଦୁକୁ କାତାଇନା; ଗେରାଙ୍ଗ୍ କାତାଇନା, ନା ହାସୁ ତାଇନା; ଚିୟାଃଚି ମାରି କାଜିକୋ ଛାବାଜାନା।” ଅକନିଃ ସିଂହାସାନ୍ ଚେତାନ୍ ରେ ଦୁବ୍ ଲେନାଏ, ଇନିଃ କାଜିକେଦାଏ, “ନେଲେମ୍, ଇଙ୍ଗ୍ ସବେନାଃ କେ ନାୱା ବାଇତାନିଙ୍ଗ୍।” ଏନ୍ତେ ଇନିଃ କାଜିକେଦାଏ, “ଅଲ୍ କେମ୍, ଚିୟାଃଚି ନେ ବାଚାନ୍ ବିଶ୍ଵାସେ ଲେକାନାଃ ହାର୍ ସାର୍ତି ତାନାଃ।” ଆଡୋଃ ଇନିଃ ଇଙ୍ଗ୍‍କେ କାଜିକେଦାଏ, “ନେ କାଜିକୋ ପୁରା ଛାବାଜାନା। ଇଙ୍ଗ୍ ଆଲ୍‍ଫା ଆଡୋଃ ଓମେଗା, ଏନେଟେଃ ଆଡୋଃ ଟୁଣ୍ଡୁ ତାନିଙ୍ଗ୍। ଇଙ୍ଗ୍ ତେତାଙ୍ଗ୍ ତାନ୍ ନିଃକେ ଜୀଦାନ୍ ରାଃ ଦାଆ ରେୟାଃ ପାଝ୍ରା ଏତେ ବେଗାର୍ ଗୋନୋଙ୍ଗ୍ ଏତେ ଆନୁଇୟାଇଙ୍ଗ୍। ଅକନିଃ ଜିତାଅଃୱାଏ ଇନିଃଗି ନେ ଜିନିଷ୍ କୋ ନାମେୟାଏ, ଆଡୋଃ ଇଙ୍ଗ୍ ଇନିଜାଃ ପାର୍ମେଶ୍ଵାର୍ ବାଇୟୋଗାଇଙ୍ଗ୍, ଆଡୋଃ ଇନିଃ ଇଙ୍ଗ୍ଆଃ ହୋନ୍‍କଡ଼ା ବାଇୟୋଗାଏ। ମେନ୍ଦୋ ବୋରୋତାନ୍ କୋ, ଆଡୋଃ ଆବିଶ୍ଵାସୀକୋ, ଆଡୋଃ ସିତ୍ରୁକୋ, ଆଡୋଃ ହୋଡ଼ ଗୋଗୋଏଃକୋ, ଆଡୋଃ ବ୍ୟାଭିଚାରୀକୋ, ଆଡୋଃ ଦେଓଁଣା ସେୱାତାନ୍ କୋ, ଆଡୋଃ ମୁର୍ତ୍ତିପୂଜାତାନ୍ କୋ, ଆଡୋଃ ସବେନ୍ ଲୋଗୋ ତାନ୍ କୋୱାଃ ହାନାଟିଙ୍ଗ୍ ଏନ୍ ସାମୁଦାର୍ ରେ ନାମୋଗା, ଅକନାଃ ସେଙ୍ଗେଲ୍ ଆଡୋଃ ଗାନ୍ଧାକ୍ ରେ ଜୁଲ୍ କାତେୟଃୱା: ନେୟା ଏଟାଃ ଗୋନୋଏଃ ତାନାଃ।” ଏନା ତାୟୋମ୍ତେ ଆଡୋଃ ଅକନ୍ ସାତ୍ ଝାନ୍ ସିର୍ମାଦାସୀ କୋତାଃ ସାତ୍ ଠୁ ଟୁଣ୍ଡୁ ମାହାମାରୀ କୋତେ ଫେରେଜାକାନ୍ ସାତ୍‍ଠୁ ଡୁଭ୍‍ନୀ ତାଇକେନା, ଇନ୍‍କୁ ଏତେ ମିହୋଡ଼୍ ଇଙ୍ଗ୍ଆଃ ନାଡ଼େଏ ହିଜୁଃ ଜାନାଏ, ଆଡୋଃ ଇଙ୍ଗ୍ଆଃ ଲୋଃ ବାକାଣ୍ କେତେ କାଜିକେଦାଏ, “ନେତେ ହିଜୁଃମେ, ଇଙ୍ଗ୍ ଆମ୍‍କେ ନାୱାକୁଡ଼ି ମାନେ ମିଣ୍ଡୀହୋନ୍ ରାଃ କୁଡ଼ି କେ ଦେଖାଅ ମେୟାଇଙ୍ଗ୍।” ହାର୍ ଇନିଃ ଇଙ୍ଗ୍‍କେ ଆତ୍ମା ରେ ମିୟାଃ ମାରାଙ୍ଗ୍ ଆଡୋଃ ସାଲାଙ୍ଗୀ ବୁରୁ ଚେତାନ୍ ରେ ଇଦି କିଦିଙ୍ଗାଏ, ଆଡୋଃ ପାବିତାର୍ ସାହାର୍ ୟୀରୁଶାଲେମ୍ କେ ସିର୍ମାଦିଶୁମ୍ ଏତେ ପାର୍ମେଶ୍ଵାର୍ ତାଃଏତେ ଆଡ଼୍‍ଗୁତାନ୍ ଦେଖାଅକେଦାଏ। ପାର୍ମେଶ୍ଵାର୍ ରାଃ ମାନାରାଙ୍ଗ୍ ଏନାରେ ତାଇନ୍ କେନା, ହାର୍ ଏନାରାଃ ମାସ୍କାଲ୍ ଥିମ୍ବାଗି ଗୋନୋଙ୍ଗାନ୍ ଦିରି, ମାନେ ମାଣି ଦିରିକୋ ଲେକା ୟାଶାବ୍ ଲେକାନାଃ ସାଫା ତାଇନ୍ କେନା। ଏନାରାଃ ଘେରା-ଭିତ୍ ଥିମ୍ବାଗି ସାଲାଙ୍ଗୀ ତାଇକେନା, ଆଡୋଃ ଏନାରାଃ ବାରାଠୁ ଦୁହାର୍ ଆଡୋଃ ଦୁହାର୍ କୋରେ ବାରାଝାନ୍ ସିର୍ମାଦାସୀ କୋ ତାଇକେନାକୋ; ହାର୍ ଏନ୍ ଦୁହାର୍ କୋରେ ଇସ୍ରାଏଲୀ କୋୱାଃ ବାରାଠୁ କିଲି କୋୱାଃ ନୁତୁମ୍ ଅଲାକାନ୍ ତାଇକେନା। ପୁରାବ୍ ଦିଶା ପାଡ଼୍ ଆପିୟା ଦୁହାର୍, ଉତ୍ତାର୍ ଦିଶା ପାଡ଼୍ ଆପିୟା ଦୁହାର୍, ଦାଖିନ୍ ପାଡ଼୍ ଆପିୟା ଦୁହାର୍, ଆଡୋଃ ପାଶ୍ଚିମ୍ ପାଡ଼୍ ଆପିୟା ଦୁହାର୍ ତାଇକେନା। ସାହାର୍ କେ ଘେରାକାନ୍ ଘେରା-ଭିତ୍ ରାଃ ବାରାଠୁ ନାହି ଦିରି ତାଇକେନା, ଆଡୋଃ ଏଣ୍ତେ ରେ ମିଣ୍ଡୀହୋନ୍ ରାଃ ବାରାଝାନ୍ କୁଲାକାନ୍ ଚେଲା କୋୱାଃ ବାରାଠୁ ନୁତୁମ୍ ଅଲାକାନ୍ ତାଇକେନା। ଏନ୍ ସିର୍ମାଦାସୀ ଅକନିଃ ଇଙ୍ଗ୍ଆଃ ଲୋଃ ବାକାଣ୍ ତାଇକେନାଏ ଇନିଃତାଃ ସାହାର୍ କେ ହାର୍ ଏନାରାଃ ଦୁହାର୍ କୋକେ ସୋଙ୍ଗେ ଲାଗିନ୍ତେ ମିୟାଃ ସୋନା ରାଃ ସୋଙ୍ଗ୍-ସୋଟା ତାଇକେନା। ଏନ୍ ସାହାର୍ ଚାଇର୍ କୋନା ବାଇଲେନ୍ ତାଇକେନା ଆଡୋଃ ଏନାରାଃ ଜିଲିଙ୍ଗ୍, ଚାକାର୍ ମିଃଗି ତାଇକେନା; ଆଡୋଃ ଇନିଃ ଏନ୍ ସୋଙ୍ଗ୍-ସୋଟା ତେ ସାହାର୍ କେ ସୋଙ୍ଗ୍ କେଦାଏ, ହାର୍ ସାତ୍ ଶାଅ ପାଚାଶ୍ କୋସ୍ ହୋବାଜାନା: ଏନାରାଃ ଜିଲିଙ୍ଗ୍ ହାର୍ ଚାକାର୍ ହାର୍ ସାଲାଙ୍ଗୀ ମିଃଗି ତାଇକେନା। ଇନିଃ ଏନାରାଃ ଘେରା-ଭିତ୍ କେ ହୋଡ଼ୋକୋୱାଃ ଲେକାତେ ମାନେ ସିର୍ମାଦାସୀ ରାଃ ନାପ୍ ତେୟାଃକେ ସୋଙ୍ଗ୍ ଲେରେ, ଏନା ଏକ୍ ଶାଅ ଚାୱାଲିସ୍ ତିଈ ହୋବାନା। ଏଣ୍ଡେରାଃ ଘେରା-ଭିତ୍ ୟାଶାବ୍ ଦିରି ତେ ବାଇଲେନା, ହାର୍ ସାହାର୍ ନେଲେକାନ୍ ଫାର୍ଚି ସୋନା ରାଃ ତାଇକେନା ଅକନାଃଚି ସାଫା କାଁଚ୍ ଲେକା ତାଇନା। ଏନ୍ ସାହାର୍ ରେୟାଃ ନାହି ଦିରିକୋ ସବେନ୍ ଲେକାନାଃ ଗୋନୋଙ୍ଗାନ୍ ଦିରି କୋଏତେ ସିଙ୍ଗାରାକାନ୍ ତାଇକେନା, ସିଦା ନାହୀଦିରି ୟାଶାବ୍ ରାଃ, ଏଟାଃ ନିଲ୍‍ମାଣି ରାଃ, ତିସ୍ରା ଲାଲଡ଼ି ରାଃ, ଚାଉଥା ମାର୍କାତ୍ ରାଃ, ପାଞ୍ଚ୍ ୱା ଗୋମେଦାକ୍ ରାଃ, ଛାଟ୍‍ୱା ମାଣିକ୍ୟ ରାଃ, ସାତ୍‍ୱା ପିତ୍‍ମାଣି ରାଃ, ଆଠ୍‍ୱା ପେରୋଜ୍ ରାଃ, ନାୱା ପୁଖ୍‍ରାଜ୍ ରାଃ, ଦାଶ୍ ୱା ଲାହସାନିଏ ରାଃ, ଏଗାର୍ ୱା ଧୁମ୍ରକାନ୍ତ ରାଃ ଆଡୋଃ ବାର୍ ୱା ୟାକୁତ୍ ରାଃ ତାଇକେନା। ବାରାଠୁ ଦୁହାର୍ କୋ ବାରା ମୋତି କୋଏତେ ତାଇକେନା; ମିମିୟାଃ-ମିମିୟାଃ ଦୁହାର୍ ମିୟାଃ-ମିୟାଃ ମୋତି ତେ ବାଇକାନ୍ ତାଇକେନା। ସାହାର୍ ରେୟାଃ ହୋରା ସାଫା କାଁଚ୍ ଲେକା ଫାର୍ଚି ସୋନା ରାଃ ତାଇକେନା। ଇଙ୍ଗ୍ ଏନ୍ ସାହାର୍ ରେ ଜେତାନ୍ ମାନ୍ଦିର୍ କାଇଙ୍ଗ୍ ନେଲ୍ କେଦା, ଚିୟାଃଚି ସବେନ୍ ଏତେ ପେଡ଼େଜାନ୍ ପ୍ରାଭୁ ପାର୍ମେଶ୍ଵାର୍ ଆଡୋଃ ମିଣ୍ଡୀହୋନ୍ ଏଣ୍ତେ ରେନ୍ ମାନ୍ଦିର୍ ତାନ୍‍କିନ୍। ଏନ୍ ସାହାର୍ ରେ ଶିଙ୍ଗି ଆଡୋଃ ଚାଣ୍ଡୁଃ ରାଃ ମାସ୍କାଲ୍ ଦାର୍‍କାର୍ ବାନୋଗା, ଚିୟାଃଚି ପାର୍ମେଶ୍ଵାର୍ ରାଃ ମାନାରାଙ୍ଗ୍ ତେଗି ଏନା ମାସ୍କାଲ୍ ହୋବାଅଃତାନା, ଆଡୋଃ ମିଣ୍ଡୀହୋନ୍ ଏନାରେୟାଃ ବାତୀ ତାଇକେନାଏ। ଜାତି-ଜାତି ରେନ୍ ହୋଡ଼ୋକୋ ଇନିଜାଃ ମାସ୍କାଲ୍ ରେ ସେନେୟାକୋ, ଆଡୋଃ ଅତେ ରେନ୍ ରାଜାକୋ ଆପାନାଃ-ଆପାନାଃ ମାନାରାଙ୍ଗ୍ ରେୟାଃ ଜିନିଷ୍ କୋ ଏନ୍ ସାହାର୍ ରେ ଆଉୱେୟାକୋ। ଏନାରାଃ ଦୁହାର୍ ଶିଙ୍ଗି ଇମ୍ତାଙ୍ଗ୍ ହ ଚିଉଲା କାବାନ୍ଧ୍ ଅଗା, ଆଡୋଃ ଏନ୍ତାଃରେ କାନୁବାଗୋଗା। ହୋଡ଼ୋକୋ ଜାତି-ଜାତି ରେୟାଃ ମାନାରାଙ୍ଗ୍ ଆଡୋଃ ମାଇନୋଃ ରାଃ ଜିନିଷ୍ କୋକେ ଏନ୍ତାଃ ଆଉୱେୟାକୋ। ମେନ୍ଦୋ ଏନ୍ତାଃ ରେ ଜେତାନ୍ ଆପାବିତାର୍ ଜିନିଷ୍ କୋ, ଚାହେ ହିଲାଙ୍ଗ୍ କାମିତାନ୍ କୋ, ଚାହେ ହିହିଡ଼୍‍ତାନ୍ କୋ ଜାହାନ୍ ଲେକାତେ ହ କାକୋ ବୋଲୋ ଧାଡ଼ିୟା, ମେନ୍ଦୋ ଇନ୍‍କୁ ଭାଇର୍ ବୋଲୋୱାକୋ ଅକନ୍ କୋୱାଃ ନୁତୁମ୍ ମିଣ୍ଡୀହୋନ୍ ରାଃ ଜୀଦାନ୍ ରେୟାଃ କିତାବ୍ ରେ ଅଲାକାନା। ଏନା ତାୟୋମ୍ତେ ଇନିଃ ଇଙ୍ଗ୍‍କେ ମାଣି ଦିରିଲେକା ସାଫା ଚାମ୍‍କାଅଃତାନ୍ ଜୀଦାନ୍ ରାଃ ଦାଆ ରେୟାଃ ନାଈ ଦେଖାଅ କେଦିଙ୍ଗାଏ, ଅକନାଃ ପାର୍ମେଶ୍ଵାର୍ ହାର୍ ମିଣ୍ଡୀହୋନ୍ ରାଃ ସିଂହାସାନ୍ ଏତେ ଅଡୋଙ୍ଗ୍ କେତେ, ଏନ୍ ସାହାର୍ ରେୟାଃ ହୋରା ରାଃ ଥାଲା ରେ ନାଈ ଲିଙ୍ଗୀ ଇଦିଅଃ ତାଇକେନା। ନାଈ ରାଃ ବାରାନ୍ ପାଡ଼୍ ରେ ଜୀଦାନ୍ ରାଃ ଦାରୁ ତାଇକେନା; ଏଣ୍ତେରେ ବାରା ରାକାମ୍ ରାଃ ଯଅ ଯଅଃ ତାଇକେନା, ହାର୍ ଏନା ସବେନ୍ ମାହିନା ଯଅଃ ତାଇକେନା; ହାର୍ ଏନ୍ ଦାରୁ ରାଃ ସାକାମ୍ କୋଏତେ ଜାତି-ଜାତି ରେନ୍ ହୋଡ଼ୋକୋ ବେଶ୍ ହୋବାଅଃ ତାଇକେନାକୋ। ଆଡୋଃ ଜେତାଏ କାଏ ସାର୍ପାଅଗାଏ, ହାର୍ ପାର୍ମେଶ୍ଵାର୍ ହାର୍ ମିଣ୍ଡୀହୋନ୍ ରାଃ ସିଂହାସାନ୍ ଏନ୍ ସାହାର୍ ରେ ତାଇନା ହାର୍ ଇନିଜାଃ ଦାସୀ କୋ ଆଏଃକେ ସେୱା ୟାକୋ। ଇନ୍‍କୁ ଆଜାଃ ମେଏଃମୁହାଡ଼୍ ନେଲେୟାକୋ, ହାର୍ ଆଜାଃ ନୁତୁମ୍ ଇନ୍‍କୁୱାଃ ମୋଲୋଙ୍ଗ୍ ରେ ଅଲାକାନ୍ ତାଇନୋଗା। ଆଡୋଃ ନୁବାଃ କାହୋବାଅଃୱା, ହାର୍ ଇନ୍‍କୁକେ ବାତୀ ହାର୍ ଶିଙ୍ଗି ରେୟାଃ ମାର୍ଶାଲ୍ ରାଃ ଦାର୍‍କାର୍ କାହୋବାଅଃୱା, ଚିୟାଃଚି ପ୍ରାଭୁ ପାର୍ମେଶ୍ଵାର୍ ଇନ୍‍କୁକେ ମାସ୍କାଲ୍ କୋୱାଏ, ହାର୍ ଇନ୍‍କୁ ଜାନାଓ-ଜାନାଓ ରାଇଜ୍ ୟାକୋ। ଏନ୍ତେ ଇନିଃ ଇଙ୍ଗ୍‍କେ କାଜିକେଦାଏ, “ନେ କାଜିକୋ ବିଶ୍ୱାସେ ଲେକାନାଃ ହାର୍ ସାର୍ତି ତାନାଃ। ପ୍ରାଭୁ ଅକନିଃ, ନାବୀ କୋୱାଃ ଆତ୍ମା କୋୱାଃ ପାର୍ମେଶ୍ଵାର୍ ତାନିଃ, ଆଜାଃ ସିର୍ମାଦାସୀ କୋକେ ନେୟାମେନ୍ତେ କୁଲ୍ କେଃକୋୱାଏ ଚି ଆଜାଃ ଦାସୀ କୋକେ ଏନ୍ କାଜିକୋ, ଅକନାଃ ସେକାଡ଼୍ ଗି ପୁରାହୋବାଅଃ ରାଃ ଲାଗାତିଙ୍ଗ୍ ମେନାଃ, ଦେଖାଅ କାଏ। ନେଲେପେ, ଇଙ୍ଗ୍ ସେକାଡ଼୍ ଗି ହିଜୁଃ ତାନିଙ୍ଗ୍! ଧାନ୍ୟା ଇନିଃ ତାନିଃ, ଅକଏ ନେ କିତାବ୍ ରାଃ ଆୟାର୍‍କାଜି ରାଃ କାଜିକୋକେ ମାନାତିଙ୍ଗ୍ ତାନାଏ।” ଇଙ୍ଗ୍ ଏନ୍ ଯୋହାନ୍ ଗି ତାନିଙ୍ଗ୍, ଅକନିଃ ନେ କାଜିକୋ ଆୟୁମ୍ ତାଇନାଇଙ୍ଗ୍ ହାର୍ ନେଲ୍ ତାଇନାଇଙ୍ଗ୍। ଚିମ୍ତାଙ୍ଗ୍ ଇଙ୍ଗ୍ ଆୟୁମ୍ କେଦାଇଙ୍ଗ୍ ହାର୍ ନେଲ୍ କେଦାଇଙ୍ଗ୍, ଇମ୍ତା ଅକନ୍ ସିର୍ମାଦାସୀ ଇଙ୍ଗ୍‍କେ ନେ କାଜିକୋ ଦେଖାୱିଙ୍ଗ୍ ତାଇନାଏ, ଇଙ୍ଗ୍ ଇନିଜାଃ କାଟା ତାଃରେ ଜୋହାର୍ ଲାଗିନ୍ତେ ଅବୋର୍ ଜାନିଙ୍ଗ୍। ମେନ୍ଦୋ ଇନିଃ ଇଙ୍ଗ୍‍କେ କାଜିକେଦାଏ, “ନେଲେମ୍, ନେକା ଆଲୋମ୍ ରିକାଏ, ଚିୟାଃଚି ଇଙ୍ଗ୍ ଆମାଃ, ଆଡୋଃ ଆମାଃ ହାଗା ନାବୀ କୋୱାଃ, ଆଡୋଃ ନେ କିତାବ୍ ରାଃ ବାଚାନ୍ କୋକେ ମାନାତିଙ୍ଗ୍ ତାନ୍ କୋୱାଃ ଗାତି ଦାସୀ ତାନିଙ୍ଗ୍। ପାର୍ମେଶ୍ଵାର୍ କେଗି ଜୋହାରି ମେ।” ଏନ୍ତେ ଇନିଃ ଇଙ୍ଗ୍‍କେ କାଜିକେଦାଏ, “ନେ କିତାବ୍ ରେୟାଃ ଆୟାର୍‍କାଜି କୋକେ ଆଲୋମ୍ ମୋହାର୍ ବାନ୍ଦ୍ ୟା; ଚିୟାଃଚି ସାମାୟ୍ ନାଡ଼େଏଃ ଗିୟା। ଅକଏ ଏତ୍କାନାଃ ରିକା ତାନାଏ ଇନିଃ ଏତ୍କାନାଃ ରିକା କାତେକାଏ; ହାର୍ ଅକଏ ସିତ୍ରୁ ମେନାଇଜା, ଇନିଃ ସିତ୍ରୁକାନ୍ ଗି ତାଇନ୍ କାଏ; ହାର୍ ଅକଏ ଧାର୍ମୀ ତାନିଃ, ଇନିଃ ଧାର୍ମୀଗି ତାଇନ୍ କାଏ; ହାର୍ ଅକଏ ପାବିତାର୍ ତାନିଃ; ଇନିଃ ପାବିତାର୍ ଗି ତାଇନ୍ କାଏ।” “ନେଲେପେ, ଇଙ୍ଗ୍ ସେକାଡ଼୍ ଗି ହିଜୁଃ ତାନିଙ୍ଗ୍; ଆଡୋଃ ସବେନ୍ ମିପୀୟାଃ କୋୱାଃ କାମି ଲେକାତେ ବାଦ୍‍ଲା ଏମ୍ ଲାଗିନ୍ତେ ଯଅ ଇଙ୍ଗ୍ ତାଃରେ ମେନାଃ। ଇଙ୍ଗ୍ ଆଲ୍‍ଫା ଆଡୋଃ ଓମେଗା, ଇଙ୍ଗ୍ ଗି ସୀଦାନିଃ ହାର୍ ତାୟୋମ୍ ନିଃ, ଏନେଟେଃ ଆଡୋଃ ଟୁଣ୍ଡୁ ତାନିଙ୍ଗ୍। ଧାନ୍ୟା ଇନ୍‍କୁ ତାନ୍‍କୋ, ଅକନ୍ କୋ ଆପାନାଃ ଲିଜାଃ ଆବୁଙ୍ଗ୍ ଚାପି କେ ତାନାକୋ, ଚିୟାଃଚି ଇନ୍‍କୁକେ ଜୀଦାନ୍ ରାଃ ଦାରୁ ରେୟାଃ ଯଅ ଜୋମ୍ ଲାଗିନ୍ତେ ଆଧିକାର୍ ନାମୋଗା, ହାର୍ ଇନ୍‍କୁ ଦୁହାର୍ ହୋବାକେତେ ସାହାର୍ ରେ ବୋଲୋୱାକୋ। ମେନ୍ଦୋ ସେତାକୋ, ହାର୍ ଦେଓଁଣା ପୂଜାତାନ୍ କୋ, ହାର୍ ବ୍ୟାଭିଚାରୀ କୋ, ହାର୍ ହୋଡ଼ ଗୋଗୋଏଃକୋ, ହାର୍ ମୁର୍ତ୍ତି ପୂଜାତାନ୍ କୋ, ହାର୍ ହିହିଡ଼୍ ନାଙ୍ଗ୍ ସୁକୁଅଃ ତାନ୍ କୋ ହାର୍ ହିହିଡ଼୍ ଶିଖାଅଃ ତାନ୍ କୋ ବାହାରି ରେ ତାଇନାକୋ।” “ଇଙ୍ଗ୍ ୟୀଶୁ ଇଙ୍ଗ୍ଆଃ ସିର୍ମାଦାସୀ କେ ନେୟାମେନ୍ତେ କୁଲ୍ କିଜାଇଙ୍ଗ୍ ଚି ଆପେୟାଃ ଆୟୁର୍ ରେ କାଲିସିୟା କୋକେ ନେ କାଜି କୋରାଃ ଗୋୱା ଏମେୟାଏ। ଇଙ୍ଗ୍ ଦାଉଦ୍ ରାଃ ରେହେଃ ହାର୍ କିଲି ରେନ୍, ହାର୍ ସେତାଃ ଇମ୍ତାରାଃ ଚାମ୍‍କାଅଃତାନ୍ ଇପିଲ୍ ତାନିଙ୍ଗ୍।” ପାବିତାର୍ ଆତ୍ମା ଆଡୋଃ ନାୱା-କୁଡ଼ି ବାରାନ୍ କିନ୍ କାଜିତାନାକିନ୍, “ଦେଲା!” ଆଡୋଃ ଆୟୁମ୍ ତାନ୍‍କୋ ହଗି କାଜିଚାକୋ, “ଦେଲା!” ଅକଏ ତେତାଙ୍ଗ୍ଅଃ ତାନାଏ, ହାର୍ ଅକଏ ସାନାଙ୍ଗ୍ ତାନାଏ ଇନିଃ ଜୀଦାନ୍ ରାଃ ଦାଆ ସାମା ତେଗି ଇଦିକାଏ। ଇଙ୍ଗ୍ ସବେନ୍ ମିପୀୟାଃ କୋକେ, ଅକନିଃ ନେ କିତାବ୍ ରେୟାଃ ଆୟାର୍‍କାଜି ରାଃ କାଜିକୋ ଆୟୁମ୍ ତାନାଏ, ଗୋୱା ଏମାକୋ ତାନିଙ୍ଗ୍: ଆଗାର୍ ଜେତାନ୍ ହୋଡ଼ ନେ କାଜିକୋରେ ଜାହାନାଃ ମେଶାୟାଏ ଏଣ୍ଡେ ପାର୍ମେଶ୍ଵାର୍ ଏନ୍ ମାହାମାରୀକୋ, ଅକନାଃ ନେ କିତାବ୍ ରେ ଅଲାକାନା ଏନାକୋ ଇନିଃକେ ଏମାଇୟାଏ। ଆଗାର୍ ଜେତାଏ ନେ ଆୟାର୍‍କାଜି ରେୟାଃ କିତାବ୍ ରାଃ କାଜିକୋ ଏତେ ଜାହାନାଃ ମେଟାଅୟାଏ, ଏଣ୍ଡେ ପାର୍ମେଶ୍ଵାର୍ ଏନ୍ ଜୀଦାନ୍ ରାଃ ଦାରୁ ହାର୍ ପାବିତାର୍ ସାହାର୍ ଏତେ, ଅକନାଃ ନେ କିତାବ୍ ରେ କାଜିୟାକାନା, ଏନାରେ ଇନିଜାଃ ହାନାଟିଙ୍ଗ୍ କେ ମେଟାଅ କେୟାଏ। ଅକନିଃ ନେ କାଜି କୋରାଃ ଗୋୱା ଏମ୍ ତାନାଏ, ଇନିଃ ନେୟା କାଜିତାନାଏ, “ହାଁ, ଇଙ୍ଗ୍ ସେକାଡ଼୍ ଗି ହିଜୁଃ ତାନିଙ୍ଗ୍।” ଆମୀନ୍। ହେ ପ୍ରାଭୁ ୟୀଶୁ ହିଜୁଃ ମେ! ପ୍ରାଭୁ ୟୀଶୁ ରାଃ ଆନୁଗ୍ରାହ୍ ପାବିତାର୍ ହୋଡ଼ୋକୋ ଲୋଃ ତାଇନୋଃକା। ଆମୀନ୍।