یِسُوع مسِیح داؤد دے پُتر ابرہام دے پُتر دا شجرہ۔ ابرہام توں اِضحاق جمّیا۔ تے اِضحاق توں یعقُوب جمّیا۔ تے یعقُوب توں یہُوداہ تے اوہدے بھرا جمّے۔ تے یہُوداہ توں فارص تے زارح تمر ولّ جمّے۔ تے فارص توں حِصرُون جمّیا۔ تے حِصرُون توں رام جمّیا۔ تے رام توں عمّینداب جمّیا۔ تے عمّینداب توں نحسون جمّیا۔ تے نحسون توں سلمون جمّیا۔ تے سلمون توں راحب ولّ بوعز جمّیا۔ تے بوعز توں عوبید رُوت ولّ جمّیا۔ تے عوبید توں یسّی جمّیا۔ تے یسّی توں داؤد بادشاہ جمّیا۔ تے داؤد دے گھر سُلیمان اوہدے ولّ جمّیا۔ جیہڑی اگّے اُورِیّاہ دی بیوی سی تے سُلیمان توں رحُبِعام جمّیا۔ تے رحُبِعام توں اَبیّاہ جمّیا۔ تے اَبیّاہ توں آسا جمّیا۔ تے آسا توں یہوسفط جمّیا۔ تے یہوسفط توں یُورام جمّیا۔ تے یُورام توں عُزِّیاہ جمّیا۔ تے عُزِّیاہ توں یُوتام جمّیا۔ تے یُوتام توں آخز جمّیا۔ تے آخز توں حِزقیاہ جمّیا۔ تے حِزقیاہ توں منسّی جمّیا۔ تے منسّی توں امُون جمّیا۔ تے امُون توں یُوسیاہ جمّیا۔ تے بابل وِچ کھڑے جان دے ویلے یُوسیاہ دے گھر یکُونیاہ تے اوہدے بھرا جمّے۔ تے بابل وِچ کھڑے جان توں پِچّھے یکُونیاہ توں سیالتی ایل جمّیا تے سیالتی ایل توں زَرُبّابُل جمّیا۔ تے زَرُبّابُل توں اَبِیہُود جمّیا۔ تے اَبِیہُود توں اِلیاقِیم جمّیا۔ تے اِلیاقِیم توں عازور جمّیا۔ تے عازور توں صدوق جمّیا۔ تے صدوق توں اخیم جمّیا۔ تے اخیم توں اِلیہُود جمّیا۔ تے اِلیہُود توں الیعزر جمّیا۔ تے الیعزر توں متّان جمّیا۔ تے متّان توں یعقُوب جمّیا۔ تے یعقُوب توں یُوسف جمّیا۔ جیہڑا مریم دا گھر والا سی جِہدے ولّ یِسُوع جیہڑا مسِیح اکھواؤندا اے جمّیا۔ سو ابرہام توں لے کے داؤد تِیکر سبھ چودہ پِیڑھیاں نیں۔ تے داؤد توں لے کے بابل نُوں کھڑے جان تِیکر چودہ پِیڑھیاں نیں۔ تے بابل نُوں کھڑے جان دے ویلیوں لے کے مسِیح تِیکر چودہ پِیڑھیاں نیں۔ تے یِسُوع مسِیح دا جمّنا ایویں ہویا پئی جد اوہدی ماں مریم دی یُوسف نال کُڑمائی ہوئی تَد اوہناں دے اکٹّھے ہون توں پہلاں جاپیا پئی اوہ پاک رُوح ولّوں جنّن والی اے۔ تَد اوہدے گھر والے یُوسف جیہڑا نیک بندہ سی تے اوہنوں بدنام کرنا نئیں سی چاہندا۔ ایہہ صلاح کِیتی پئی چُپ کِیتاں اوہنوں چھڈ دیاں۔ پر جد اوہ ایہناں گلّاں دی سوچ وچار کر دا سی۔ ویکھو خُداوند دے فرِشتے سُفنے وِچ اوہنوں وکھالی دے کے آکھیا۔ اَے یُوسف داؤد دے پُتر۔ تُوں اپنی بیوی مریم نُوں اپنے کول لیاؤن توں نا ڈر۔ کیوں جو جیہڑا اوہدے گربھ وِچ ہویا ایہہ پاک رُوح توں اے۔ اوہ پُتر جمّے گی۔ تے تُوں اوہدا ناں یِسُوع رکھّیں کیوں جو اوہو اپنے لوکاں نُوں اوہناں دے گُناہاں توں بچائے گا۔ ایہہ سبھ کُجھ ایس لئی ہویا پئی اوہ گلّ جیہڑی خُداوند پیغمبر دی زبانی آکھی سی پُوری ہوئے پئی۔ ”ویکھو اِک کواری جمّن والی ہوئے گی تے اوہدے ولّ پُتر ہوئے گا۔ تے اوہدا ناں عمانوایل رکھن گے۔ جِہدا مطلب اے خُدا ساڈے نال۔“ تے یُوسف نے جاگ کے جیویں خُداوند دے فرِشتے اوہنوں آکھیا سی اِنجے ای کِیتا۔ تے اپنی بیوی نُوں اپنے گھر لیاندا۔ تے اوہدے نیڑے نا گیا جد تِیکر اوس پُتر نا جمّیا۔ تے اوس اوہدا ناں یِسُوع رکھیا۔ تے جد یِسُوع ہیرودیس بادشاہ دے ویلے یہُودیہ دے بَیت لحم وِچ جمّیا۔ تے ویکھو نجُومِیاں چڑھدے پاسیوں یرُوشلِیم وِچ آ کے آکھیا۔ پئی یہُودِیاں دا بادشاہ جیہڑا جمّیا اے اوہ کِتّھے وے؟ کیوں جو اساں چڑھدے پاسے اوہدا تارا ویکھیا اے تے اوہنوں سجدہ کرن آئے آں۔ ایہہ گلّ سُن کے ہیرودیس بادشاہ گھابر گیا۔ تے سارا یرُوشلِیم اوہدے نال۔ تے اوس سارے سردار کاہِناں تے قوم دے فقِیہاں نُوں اکٹّھیاں کر کے اوہناں نُوں پُچھیا۔ پئی مسِیح کِتّھے جمّے گا؟ اوہناں نیں اوہنوں آکھیا یہُودیہ دے بَیت لحم وِچ۔ کیوں جو پیغمبر دی راہِیں ایس طرح لِکھیا ہویا اے۔ پئی اے بَیت لحم یہُوداہ دے دیس توں یہُوداہ دیاں سرداراں وِچوں کِسے طرح نِکّا نئیں کیوں جو تیرے وِچوں اِک سردار نِکلے گا جیہڑا میری قوم اِسرائیل دی راکھی کرے گا۔ تَد ہیرودیس نجُومِیاں نُوں پڑدے نال سدّیا تے اوہناں کولوں ٹھیک پَتا لیا پئی تارا کدوں وکھالی دِتّا۔ تے اوس اوہناں نُوں ایہہ آکھ کے بَیت لحم نُوں گھلّیا پئی جاؤ جا کے اوس بال دا چنگی طرح پتا کرو۔ تے جد تُسی اوہنوں لَبّھ لوؤ تَد مُڑ کے مَینُوں خبر دیو۔ تاں جو مَیں وی جا کے اوہنوں سجدہ کراں۔ تے بادشاہ دی گلّ سُن کے اوہ ٹُرپَئے۔ تے ویکھو اوہ تارا جیہڑا اوہناں چڑھدے پاسے ویکھیا سی اوہناں دے اگّے اگّے ٹُر دا گیا تے جِتّھے اوہ بال سی اوس تھاں دے اُتّے جا کھلوتا۔ تے تارے نُوں ویکھ کے اوہ بڑے خُوش ہوئے۔ تے اوہناں اوس گھر دے اندر جا کے بال نُوں اوہدی ماں مریم دے نال ویکھیا۔ تے پَیرِیں پَے کے اوہنوں سجدہ کِیتا۔ تے اپنیاں تھیلِیاں کھول کے سونا تے لوبان تے مُر اوہدی نذر کِیتا۔ تے سُفنے وِچ خبر پا کے پئی ہیرودیس دے کول مُڑ نا جان۔ اوہ ہوری راہ اپنے دیس نُوں مُڑ گئے۔ جد اوہ ٹُر گئے سن تے ویکھو خُداوند دے فرِشتے یُوسف نُوں سُفنے وِچ وکھالی دے کے آکھیا اُٹھ مُنڈے تے اوہدی ماں نُوں نال لے تے مِصر وِچ نَسّ جا۔ تے جِنّاں چِر مَیں تینُوں نا آکھاں اوتھے ای رہو کیوں جو ہیرودیس مُنڈے نُوں لَبھّے گا پئی اوہنوں مار سُٹّے۔ تَد اوہ اُٹھ کے مُنڈے تے اوہدی ماں نُوں نال لے کے راتوں رات مِصر نُوں ٹُر پیا۔ تے ہیرودیس دے مرن تِیکر اوتھے ای رہیا۔ تاں جو اوہ گلّ جیہڑی خُداوند پیغمبر دی راہِیں آکھی سی پُوری ہوئے۔ پئی مَیں اپنے پُتر نُوں مِصروں سدّیا۔ جد ہیرودیس ویکھیا پئی نجُومِیاں میرے نال مخَول کِیتا اوہ بڑا غُصّے ہویا تے بندہ گھل کے ساریاں مُنڈیاں نُوں جیہڑے بَیت لحم تے اوہدے آلے دوالے وِچ سن دو ورھیاں دِیاں تے اودُوں نِکّیاں نُوں مروا سُٹّیا یعنی اوس ویلے دے حِساب دے سببّوں جیہڑا اوس نجُومِیاں کولوں پَکّی طرح پُچھیا ہویا سی۔ تَد اوہ جو یِرمیاہ پیغمبر دی راہِیں آکھیا گیا سی پُورا ہویا۔ پئی۔ رامہ وِچ اِک اواز سُنائی دیندی سی رون تے بڑے سیاپے دی۔ پئی راخِل اپنے بچّیاں نُوں روندی اے تے تسلّی نئیں چاہندی۔ کیوں جو اوہ ہَین نئیں۔ جد ہیرودیس مر گیا تَد ویکھو خُداوند دے فرِشتے مِصر وِچ یُوسف نُوں سُفنے وِچ وکھالی دے کے آکھیا۔ اُٹھ مُنڈے نُوں تے اوہدی ماں نُوں نال لے کے اِسرائیل دے دیس وِچ جا۔ کیوں جو جیہڑے لوک مُنڈے دی جان دے وَیری سن اوہ مر گئے نیں۔ تَد اوہ اُٹھیا تے مُنڈے تے اوہدی ماں نُوں نال لے کے اِسرائیل دے دیس وِچ آیا۔ پر جد سُنیا پئی اَرخلاؤس اپنے پئیو ہیرودیس دے تھاں یہُودیہ وِچ راج کر دا اے تَد اوتھے جان توں ڈریا پر سُفنے وِچ خبر پا کے گلِیل دے علاقے ولّ ٹُر پیا۔ تے ناصرۃ ناں اِک نگّر وِچ جا وسّیا۔ تاں جو اوہ جیہڑا پیغمبر آکھیا سی پُورا ہوئے پئی اوہ ناصری اکھوائے گا۔ اونہی دِنیں یُوحنّا بپتِسمہ دین والا یہُودیہ دے بیابان وِچ آیا تے منادی کر کے۔ آکھن لگّا تَوبہ کرو کیوں جو اسمان دی بادشاہی نیڑے آگئی اے۔ کیوں جو ایہہ اوہی اے جِہدی یسعیاہ پیغمبر گلّ کِیتی سی پئی بیابان وِچ اِک ہوکا دین والے دی اواز آؤندی اے۔ پئی خُداوند دا راہ تیار کرو۔ اوہدے راہاں نُوں سِدّھیاں بناؤ۔ تے یُوحنّا دے اپنے کپڑے اُوٹھ دی جَت دے سن۔ تے چَمّ دی پیٹی اوہدے لکّ دوالے سی تے اوہدی خُوراک مکڑی تے بیابان دا شہد سی۔ تَد یرُوشلِیم تے سارا یہُودیہ تے یَردن دے سارے علاقہ دے لوک اوہدے کول ٹُر آئے۔ تے اپنے گُناہاں دا اِقرار کر کے یَردن ندی وِچ اوہدے ہتھّوں بپتِسمہ لیا۔ پر جد اوس ویکھیا پئی بتھیرے فریسی تے صدوقی میرے کول بپتِسمہ لین آوندے نیں تَد اوس اوہناں نُوں آکھیا سپّاں دے بچّیو! تُہانوں آؤن والے غضبوں بھجنا کِس دسیا؟ تُسی تَوبہ جوگا پَھل لیاؤ تے اپنے دِلاں وِچ ایس گلّ دا خیال نا کرو پئی ابرہام ساڈا پئیو اے کیوں جو مَیں تُہانوں آکھنا آں پئی خُدا ایہناں پتّھراں وِچوں ابرہام دے لئی اولاد پَیدا کر سکدا اے۔ پر ہُن رُکھّاں دی جڑ اُتّے کُہاڑا رکھیا ہویا اے سو جیہڑا جیہڑا رُکھّ ہَچھّا پَھل نئیں لیاؤندا اوہ وَڈّھیا جاندا تے اَگ وِچ سُٹّیا جاندا اے۔ مَیں تے تُہانوں تَوبہ دے واسطے پانی نال بپتِسمہ دینا آں۔ پر اوہ جیہڑا میرے پِچّھے آؤندا اے مَیتھوں زوراور اے۔ اوہدی جُتّی چُکن دے مَیں لائق نئیں آں۔ اوہ ای تُہانوں پاک رُوح تے اَگ نال بپتِسمہ دیوے گا۔ اوہدا چھج اوہدے ہتّھ وِچ اے۔ تے اوہ اپنے کھلواڑے نُوں چنگی طرح صاف کرے گا۔ تے اپنی کنک نُوں کوٹھی وِچ جمع کرے گا پر تُوڑی نُوں اوس اَگ نال ساڑ دے گا۔ جیہڑی کدی نئیں بُجھدی۔ تَد یِسُوع گلِیل توں یَردن دے کنڈھے یُوحنّا کول آیا پئی اوہدے ہتھّوں بپتِسمہ لَئے پر یُوحنّا اوہنوں ایہہ آکھ کے روکیا پئی مَینُوں تَیتھوں بپتِسمہ لین دی لوڑ اے تے تُوں میرے کول آیا ایں؟ تے یِسُوع اوہنوں جواب دِتّا۔ حالی تے ہون دے کیوں جو سانُوں چاہیدا ایہہ پئی ایسے طرح ساری راست بازی نُوں پُورا کریئے۔ تَد اوس ہون دِتّا۔ تے یِسُوع بپتِسمہ لے کے جھٹ پانیوں باہر نِکل آیا۔ تے ویکھو اسمان اوہدے لئی کُھل گیا تے اوس خُدا دے رُوح نُوں کبُوتر وانگُوں اُتر دیاں تے اپنے اُتّے آؤندیاں ویکھیا۔ تے ویکھو اسماناں توں اِک اواز آئی پئی ایہہ میرا پیارا پُتر اے جِس توں مَیں بڑا خُوش آں۔ اوس ویلے رُوح یِسُوع نُوں بیابان وِچ لے گیا پئی ابلیس کولوں ازمایا جائے۔ تے جد اوہنے چالی دِن تے چالی رات روزہ رکھ لیا سی فیر اوہنوں بُھکھ لگّی۔ تَد ازمان والے نیڑے آ کے اوہنوں آکھیا جے تُوں خُدا دا پُتر ایں تے آکھ پئی ایہہ پتّھر روٹِیاں بن جان۔ پر اوس جواب دِتّا لِکھیا ہویا اے پئی بندہ نِری روٹی نال ای جِیوندا نئیں رہے گا پر ہر اِک گلّ نال جیہڑی خُدا دے مُنھوں نِکل دی اے۔ فیر ابلیس اوہنوں مُقدّس شہر وِچ نال لے گیا تے ہیکل دے کِنگرے اُتّے کھلھار کے آکھیا۔ جے تُوں خُدا دا پُتر ایں تے اپنے آپ نُوں ہیٹھاں ڈیگ دے کیوں جو لِکھیا ہویا اے۔ پئی اوہ اپنے فرِشتیاں نُوں تیری بابت حُکم دے گا تے اوہ ہتّھاں اُتّے تینُوں چُک لین گے۔ پئی کِتے پتّھر نال تیرے پَیر نُوں سَٹ نا لگّے۔ یِسُوع اوہنوں آکھیا اے وی لِکھیا ہویا اے پئی تُوں خُداوند اپنے خُدا نُوں نا ازما۔ فیر ابلیس اِک بڑے اُچّے پہاڑ اُتّے اوہنوں لے گیا تے دُنیا دِیاں سارِیاں بادشاہیاں تے اوہناں دی شان شوکت اوہنوں وکھائی۔ تے اوہنوں آکھیا ایہہ سبھ کُجھ مَیں تینُوں دیاں گا جے تُوں نِیواں ہو کے مَینُوں سجدہ کریں۔ تَد یِسُوع اوہنوں آکھیا اَے شیطان دُراڈے ہو جا۔ کیوں جو لِکھیا ہویا ایہہ پئی تُوں خُداوند اپنے خُدا نُوں سجدہ کر۔ تے نِری اوسے دی بندگی کر۔ تَد ابلیس اوہنوں چھڈ گیا تے ویکھو فرِشتیاں کول آ کے اوہدی خِدمت کِیتی۔ تے ایہہ سُن کے پئی یُوحنّا پھڑیا گیا اے اوہ گلِیل نُوں ٹُرپیا۔ تے ناصرۃ نُوں چھڈ کے کَفرنحُوم وِچ جیہڑا سمُندر دے کنڈھے زبُولُون تے نفتالی دِیاں حداں وِچ اے جا رہیا۔ تاں جو یسعیاہ نبی دی گلّ پُوری ہوئے پئی۔ زبُولُون دی دھرتی تے نفتالی دی دھرتی غیر قوماں دا گلِیل سمُندر دے راہ یَردنوں پار۔ اوہناں لوکاں جیہڑے ہنیرے وِچ بَیٹھے ہوئے سن بڑا چانن ویکھیا تے مَوت دے دیس تے چھاں وِچ بَیٹھیاں ہویاں اُتّے چانن چمکیا۔ اوس ویلے توں یِسُوع منادی کرنی تے ایہہ آکھنا شُروع کِیتا پئی تَوبہ کرو کیوں جو اسمان دی بادشاہی نیڑے آگئی اے۔ تے گلِیل دے سمُندر دے کنڈھے پِھردیاں ہویاں اوس دو بھراواں نُوں اِک شمعُون جیہڑا پطرس اکھواؤندا ایہہ تے اوہدے بھرا اندریاس نُوں سمُندر وِچ جال پاندیاں ویکھیا۔ کیوں جو اوہ مچھّیاں پھڑن والے سن۔ تے اوہناں نُوں آکھیا میرے مگر آؤ۔ تے مَیں تُہانوں بندیاں نُوں پھڑن والے بناواں گا۔ تے اوہ جھٹ جالاں نُوں چھڈ کے اوہدے مگر ٹُر پئے۔ تے اوتھوں اگّے وَدّھ کے اوس ہور دو بھراواں نُوں زبدی دے پُتر یعقُوب تے اوہدے بھرا یُوحنّا نُوں ویکھیا پئی اوہ بیڑی وِچ اپنے پئیو زبدی دے نال اپنیاں جالاں نُوں گنڈھ رہے سن۔ تے اوس اوہناں نُوں سدّیا۔ تے اوہ جھٹ بیڑی نُوں تے اپنے پئیو نُوں چھڈ کے اوہدے مگر ٹُر پئے۔ تے یِسُوع اوہناں دے عِبادتخانیاں وِچ سِکھاؤندا تے بادشاہی دی خُوشخبری دی منادی کر دا تے لوکاں دیاں ساریاں روگاں تے سارِیاں ماندگِیاں نُوں چَنگا کر دا ہویا سارے گلِیل وِچ پِھردا گیا۔ تے سارے سُوریہ وِچ اوہدی دُھم پَے گئی تے لوکاں نیں ساریاں بِیماراں نُوں جیہڑے کئی طرح دے روگاں تے دُکھاں وِچ پَھسے ہوئے سن جِنہاں نُوں بدرُوحاں چمبڑیاں ہویاں سن۔ تے مِرگی والیاں۔ تے ادھرلنگیاں نُوں اوہدے کول لیاندا تے اوس اوہناں نُوں چَنگیاں کِیتا۔ تے وڈّیاں وڈّیاں بِھیڑاں گلِیل توں تے دِکَپُلِس تے یرُوشلِیم تے یہُودیہ توں تے یَردن دے پاروں اوہدے مگر ٹُر پئیاں۔ تے بِھیڑ نُوں ویکھ کے اوہ پہاڑ اُتّے چڑھ گیا تے جد بَہہ گیا اوہدے شاگِرد اوہدے کول آئے۔ تے اوہ اپنا مُنھ کھول کے اوہناں نُوں ایہہ آکھ کے سکھان لگّا۔ دھنّ نیں اوہ جیہڑے دِل دے غرِیب نیں کیوں جو اسمان دی بادشاہی اوہناں دی اے۔ دھنّ نیں اوہ جیہڑے غمگِین نیں کیوں جو اوہناں نُوں تسلّا دِتّی جائے گی۔ دھنّ نیں اوہ جیہڑے حلِیم نیں کیوں جو اوہ زمین دے وارث ہون گے۔ دھنّ نیں اوہ جیہڑے راستبازی دے بُھکھے تے تریہائے نیں کیوں جو اوہ رجائے جان گئے۔ دھنّ نیں اوہ جیہڑے رحمدِل نیں کیوں جو اوہناں اُتّے رَحم کِیتا جائے گا۔ دھنّ نیں اوہ جیہڑے دِل دے صاف نیں کیوں جو اوہ خُدا نُوں ویکھن گے۔ دھنّ نیں اوہ جیہڑے صُلح کران والے نیں کیوں جو اوہ خُدا دے پُتر اکھوان گے۔ دھنّ نیں اوہ جیہڑے راستبازی دی خاطر ستائے گئے نیں کیوں جو اسمان دی بادشاہی اوہناں دی اے۔ دھنّ ہو تُسی جد میری خاطر تُہانوں ملامت کرن گے تے ستان گے تے جُھوٹھ مُوٹھ ہر طرح دِیاں بُریائِیاں تُہاڈے اُتّے بکن گے۔ خُوش ہو تے چھالاں مارو کیوں جو اسمان وِچ تُہاڈا بدلہ بڑا اے۔ ایس کر کے پئی اوہناں پیغمبراں نُوں جیہڑے تُہاڈے توں اگّے سن ایسے طرح ستایا سی۔ تُسی زمین دا لُون اوہ پر جے لُون بے سوادا ہو جائے تے اوہ کیہڑی شے نال سلُونا کِیتا جائے گا؟ اوہ فیر کِسے کمّ دا نا رہیا بِناں ایس دے پئی باہر سُٹّیا جائے تے لوکاں دے پیراں ہیٹھاں لتاڑیا جائے۔ تُسی دُنیا دا چانن اوہ۔ جیہڑا نگّر پہاڑ اُتّے وَسدا اے سو چُھپ نئیں سکدا۔ تے نا دِیوا بال کے لوک اوہنوں ٹوپے ہیٹھ رکھ دیندے نیں۔ پر دیوڑی اُتّے رکھدے نیں۔ تے اوہ سبھناں نُوں جیہڑے گھر وِچ نیں چانن دیندا اے۔ ایسے طرح تُہاڈا چانن بندیاں دے سامھنے چمکے۔ تاں جو اوہ تُہاڈے بھلے کمّاں نُوں ویکھن تے تُہاڈے باپ دی جیہڑا اسمان وِچ اے وڈیائی کرن۔ ایہہ خیال نا کرو پئی مَیں توریت نُوں یا پیغمبراں نُوں کھنڈن آیا۔ مَیں کھنڈن نئیں سگوں پُوریاں کرن نُوں آیا آں۔ کیوں جو مَیں تُہانوں سَچ آکھنا آں پئی جِچر اسمان تے زمین ٹل نا جان توریت دا اِک نُقطہ یا اِک شوشہ کدی نا ٹلے گا جد تِیکر سبھ کُجھ پُورا نا ہوئے۔ سو جو کوئی ایہناں چھوٹیاں توں چھوٹے حُکماں وِچوں اِک حُکم نُوں وی توڑے تے اوسے طرح لوکاں نُوں سِکھاوے۔ اسمان دی بادشاہی وِچ اوہ سبھناں توں نِکّا اکھوائے گا۔ پر جو کوئی عمل کرے تے نالے سکھالے اوہی اسمان دی بادشاہی وِچ وَڈا اکھوائے گا۔ مَیں تُہانوں دسنا آں پئی جے تُہاڈی راستبازی فقِیہاں تے فرِیسیاں دی راستبازی نالوں وَدّھ نا جائے گی تُسی اسمان دی بادشاہی وِچ کدی وی نا جاؤ گے۔ تُسی سُنیا اے پئی اگلیاں نُوں آکھیا گیا سی پئی تُوں خُون نا کر تے جیہڑا خُون کرے گا۔ اوہ عدالت وِچ سزا دے لائق ہوئے گا۔ پر مَیں تُہانوں آکھنا آں پئی جیہڑا کوئی اپنے بھرا اُتّے غُصّہ کرے۔ عدالت وِچ سزا دے لائق ہوئے گا۔ تے جیہڑا اپنے بھرا نُوں آکھے گا مُورکھا اوہ صدر عدالت وِچ سزا دے لائق ہوئے گا۔ پر جیہڑا آکھے گا بیواقوفا۔ اَگ دے دوزخ دے لائق ہوئے گا۔ سو جے قُربان گاہ دے اُتّے قُربانی چڑھاؤندیاں تینُوں چیتا آ جاوے پئی تیرے بھرا دا تیرے اُتّے دعویٰ اے۔ تے اوتھے ای اپنی قُربانی قُربان گاہ دے سامھنے چھڈ کے ٹُر جا۔ پہلاں اپنے بھرا نال میل کر تے فیر آ کے اپنی قُربانی چڑھا۔ تُوں اپنے مُدّعی نال راہ وِچ ای چھیتی راضی ہو جا۔ کِتے ایویں نا ہوئے پئی مُدّعی تینُوں حاکم دے حوالے کرے تے حاکم تینُوں پیادے دے حوالے کرے تے تُوں قیدخانے وِچ سُٹّیا جاویں۔ مَیں تینُوں سَچ آکھنا آں پئی جِچر تُوں دمڑی دمڑی دے نا لئیں تُوں اوتھوں کِسے طرح نا چُھٹیں گا۔ تُسی سُنیا ایہہ پئی آکھیا گیا سی پئی تُوں زنا نا کر۔ پر مَیں تُہانوں آکھنا آں پئی جیہڑا کوئی بُری نِیّت نال کِسے عورت ولّ ویکھدا اے سو اوس اپنے مَنوں اوہدے نال زنا کر لیا اے۔ تے جے تیری سَجّی اَکھ تینُوں ٹھوکر کھوائے تے اوہنوں کڈھ کے پرھاں سُٹ دے کیوں جو تیرے لئی ایہو چَنگا اے پئی تیرے انگاں وِچوں اِک دا ناس ہوئے تے تیرا سارا بدن جہنّم وِچ سُٹّیا نا جاوے۔ تے جے تیرا سَجّا ہتّھ تینُوں ٹھوکر کھوائے تے اوہنوں وَڈّھ کے پرھاں سُٹ دے۔ کیوں جو تیرے لئی ایہو چَنگا اے پئی تیرے انگاں وِچوں اِک دا ناس ہوئے۔ تے تیرا سارا بدن جہنّم وِچ نا جاوے۔ تے ایہہ آکھیا گیا سی پئی جو کوئی اپنی بُڈّھی نُوں چھڈ دے اوہ اوہنوں طلاق نامہ لِکھ دیوے۔ پر مَیں تُہانوں آکھنا آں پئی جیہڑا کوئی اپنی بُڈّھی نُوں زنا دے بِناں کِسے ہور سبّب نال چھڈ دیوے اوہ اوہدے کولوں زنا کراؤندا اے تے جیہڑا اوس چھڈی ہوئی نال ویاہ کرے اوہ زنا کر دا اے۔ فیر تُسی سُنیا ایہہ پئی وڈّیاں نُوں آکھیا گیا سی تُوں جُھوٹھی سَونہہ نا چُک۔ پر اپنیاں سَونہاں خُداوند دے لئی پُوریاں کر۔ پر مَیں تُہانوں آکھنا آں پئی کدی وی سَونہہ نا چُکنا۔ نا اسمان دی کیوں جو اوہ خُدا دا تخت اے۔ تے نا زمین دی کیوں جو اوہ اوہدے پیراں دی چَونکی اے تے نا یرُوشلِیم دی کیوں جو اوہ وڈّے بادشاہ دا شہر اے۔ نا اپنے سِر دی سَونہہ چُک کیوں جو تُوں اِک وال نُوں وی چِٹّا یا کالا نئیں کر سکدا۔ پر تُہاڈی گلّ ہاں دی ہاں تے ناں دی ناں ہوئے۔ تاں جو کُجھ ایہدے نالوں وَدّھ اے سو بُرے توں ہوندا اے۔ تُسی سُنیا اے پئی ایہہ آکھیا گیا اے اَکھ دے بدلے اَکھ تے دَند دے بدلے دَند۔ پر مَیں تُہانوں آکھنا آں پئی بُرے دا سامنا نا کرو سگوں جو کوئی تیری سَجّی گلھ اُتّے چپیڑ مارے دُوجی وی اوہدے ولّ کر دے۔ تے جیہڑا تیرے اُتّے عرضی پا کے تیرا کُرتا کھو لینا چاہے تُوں چوغہ وی اوہنوں لین دے۔ تاں جو کوئی تینُوں اِک مِیل وگار لے جاوے اوہدے نال دو مِیل لگا جا۔ تے جیہڑا تَیتھوں منگے اوہنوں دے تے جیہڑا تَیتھوں اُدھار لینا چاہے اوہدے توں مُنھ نا موڑ۔ تُسی سُنیا اے پئی آکھیا گیا سی پئی تُوں اپنے گوانڈھی نُوں پیار کر تے اپنے دُشمن نال وَیر رکھ۔ پر مَیں تُہانوں آکھنا آں پئی دُشمناں نال پیار کرو تے جیہڑے تُہانوں دُکھ دین اوہناں دی خَیر منگو۔ تاں جو تُسی اپنے باپ دے جیہڑا اسمان وِچ اے پُتر بن جاؤ کیوں جو اوہ تے اپنے سُورج نُوں بُریاں تے بھلیاں اُتّے چڑھاندا اے۔ نالے نیکاں تے بداں اُتّے مینہ وساؤندا اے۔ کیوں جو جے تُسی اوہناں نُوں پیار کرو جیہڑے تُہانوں پیار کر دے نیں تے کِیہ اِنعام تُہانوں مِلنا اے؟ محصُولئے وی ایہو نئیں کر دے؟ تے جے تُسی اپنے بھراواں نُوں ای سلام کرو تے تُسی کِیہ وَدّھ کِیتا اے؟ غیر قوم وی ایہو نئیں کر دے۔ سو تُسی کامِل ہوؤو جیویں تُہاڈا اسمانی باپ کامِل اے۔ خبردار ہو پئی تُسی اپنی نیکی نُوں لوکاں دے سامھنے وکھان لئی نا کرو۔ نئیں تے تُہاڈے باپ کولوں جیہڑا اسمان اُتّے اے تُہانوں کوئی اِنعام نئیں مِلے گا۔ سو جد تُوں خَیرات کریں اپنے اگّے تُرہی نا وجا جیویں مکّار عبادت خانیاں تے بزاراں وِچ ایس کر کے کر دے نیں پئی لوک اوہناں دی وڈیائی کرن۔ مَیں تُہانوں سَچ آکھنا آں پئی اوہناں اپنا اِنعام پالیا۔ پر جد تُوں خَیرات کرنا ایں تے تیرے کھبّے ہتّھ نُوں خبر نا ہوئے پئی تیرا سَجّا ہتّھ کِیہ کر دا اے۔ تاں جو تیری خَیرات پڑدے وِچ ہوئے تے تیرا باپ جیہڑا پڑدے وِچ ویکھ لَیندا اے تینُوں بدلہ دیوے گا۔ تے جد تُسی دُعا منگو تے مکّاراں وانگُوں نا ہوؤ کیوں جو اوہ عبادت خانیاں وِچ تے چَونکاں دیاں موڑاں اُتّے کھلو کے دُعا منگنی پسند کر دے نیں۔ پئی لوک اوہناں نُوں ویکھن۔ مَیں تُہانوں سَچ آکھنا آں پئی اوہناں اپنا اِنعام پالیا۔ پر تُوں جد دُعا منگیں تَد اپنی کوٹھڑی وِچ جا تے بُوہا مار کے اپنے باپ توں جیہڑا پڑدے وِچ اے دُعا منگ تے تیرا باپ جیہڑا پڑدے وِچ ویکھ لَیندا اے تینُوں بدلہ دے گا۔ دُعا منگدیاں ہورناں قوماں وانگُوں بَک بَک نا کرو کیوں جو اوہ سمجھدے نیں پئی ساڈے بوہتا بولن نال ساڈی سُنی جائے گی۔ سو تُسی اوہناں وانگُوں نا ہوؤ کیوں جو تُہاڈا باپ تُہاڈے منگن توں پہلاں ای جان دا اے پئی تُہانوں کیہڑیاں کیہڑیاں شیواں دی لوڑ اے۔ سو تُسی ایس طرح دُعا منگو۔ اے ساڈے باپ جو اسماناں اُتّے ایں۔ تیرا ناں پاک مَنّیا جائے۔ تیرا راج آوے۔ تیری مرضی جیویں اسماناں اُتّے پُوری ہوندی اے زمین اُتّے وی ہوئے۔ ساڈی روز دی روٹی اَج سانُوں دے۔ تے ساڈیاں قصوراں نُوں بخش دے جیویں اساں اپنے قصورواراں نُوں بخش دِتّا اے۔ تے سانُوں ازمایش وِچ نا لیا۔ سگوں بُریائی توں بچا [کیوں جو بادشاہی تے قُدرت تے جلال ہمیشہ تِیکر تیرے ای نیں۔ آمِین۔] کیوں جو جے تُسی لوکاں نُوں اوہناں دِیاں تقصِیراں بخشو گے تے تُہاڈا اسمانی باپ تُہانوں وی بخشے گا۔ پر جے تُسی لوکاں نُوں اوہناں دِیاں تقصِیراں نا بخشو گے۔ تے تُہاڈا باپ وی تُہاڈیاں تقصِیراں نا بخشے گا۔ تے جد تُسی روزہ رکھو مکّاراں وانگُوں اپنا مُنھ اُداس نا بناؤ کیوں جو اوہ ایس لئی اپنا مُنھ وگاڑ دے نیں پئی لوکاں نُوں روزہ رکھّے ہوئے معلُوم ہون۔ مَیں تُہانوں سَچ آکھنا آں پئی اوہناں اپنا اِنعام پالیا۔ پر تُوں جدوں روزہ رکھّیں اپنے سِر نُوں تیل مَل تے مُنھ دھو۔ پئی تُوں بندیاں نُوں نئیں پر اپنے باپ نُوں جیہڑا پڑدے وِچ اے روزہ رکھیا ہویا معلُوم ہوئیں تے تیرا باپ و جیہڑا پڑدے وِچ ویکھ لَیندا اے تینُوں بدلہ دیوے گا۔ زمین اُتّے اپنے لئی خزانہ اکٹّھا نا کرو جِتّھے کِیڑا تے جنگال خراب کر دے تے جِتّھے چور وی سَنّھ مار دے تے چُرا لے جاندے نیں۔ پر اسمان اُتّے اپنے لئی خزانہ اکٹّھا کرو۔ جِتّھے نا کِیڑا نا جنگال خراب کر دا اے تے جِتّھے چور نا سَنّھ مار دے تے نا چُرا لے جاندے نیں۔ کیوں جو جِتّھے تیرا خزانہ ایہہ اوتھے ای تیرا دِل وی ہوئے گا۔ بدن دا دِیوا اَکھ اے سو جیکر تیری اَکھ صاف ہوئے تے تیرا سارا بدن چاننا ہوئے گا۔ پر جیکر تیری اَکھ بُری ہوئے تے تیرا سارا بدن ہنیرا ہوئے گا۔ سو جے تیرا اندر دا چانن ہنیرا ہوئے تے کیڈا وَڈا ہنیرا ہویا؟ کوئی بندہ دو مالکاں دی سیوا نئیں کر سکدا ایس لئی پئی یا اِک نال وَیر رکھّے گا تے دُوجے نال پیار یا اِک نال مِلیا رہے گا تے دُوجے نُوں کُجھ نا سمجھے گا۔ تُسی خُدا تے دَولت دو آں دی سیوا نئیں کر سکدے۔ ایس کر کے مَیں تُہانوں آکھنا آں پئی اپنی جان دا فِکر نا کرو پئی اسی کِیہ کھاواں گے یا کِیہ پِیاں گے تے نا اپنے بدن دا پئی کِیہ پاواں گے؟ جان خُوراک نالوں تے بدن کپڑیاں نالوں وَدّھ نئیں ایہہ؟ وَا دیاں پنچھیاں ولّ ویکھو پئی اوہ نا بِیجدے نا وَڈّھ دے تے نا کوٹھِیاں وِچ جمع کر دے نیں۔ تے وی تُہاڈا اسمانی باپ اوہناں نُوں پالدا اے۔ بھلا تُسی اوہناں نالوں قدر والے نئیں اوہ؟ تُہاڈے وِچوں اوہ کون اے جیہڑا فِکر کرن نال اپنا قد اِک ہتّھ وَدّھا سکدا اے؟ تے کپڑیاں دا کاہِنُوں فِکر کر دے اوہ بیابان دیاں پُھلّاں توں مَت لوؤ پئی اوہ کِیہ کر وَدھدے نیں۔ اوہ نا محنت کر دے نا کَتّدے نیں۔ پر مَیں تُہانوں آکھنا آں پئی سُلیمان وی اپنی ساری شان وِچ ایہناں وِچوں اِک جیہا نئیں سی پاندا ہوندا۔ سو اَے تھوڑے اِیمان والیو جد خُدا بیابانی گھاہ نُوں ایس طرح پواندا اے جیہڑا اَج ای اے تے بھلکے بھٹّھی وِچ جھوکیا جاندا اے تُہانوں سگوں ضرُور نا پوائے گا؟ سو تُسی فِکر کر کے ایہہ نا آکھو پئی اسی کِیہ کھایئے یاں کِیہ پِیئے یا کِیہ پائیے۔ کیوں جو ایہناں سارِیاں شیواں نُوں غیر قوماں لَبّھدیاں نیں۔ تے تُہاڈا اسمانی باپ جاندا اے پئی تُہانوں ایہناں سبھناں شیواں دی لوڑ اے۔ پر تُسی پہلاں اوہدی بادشاہی تے سچیائی نُوں لَبّھو۔ تَد ایہہ سارِیاں شیواں وی تُہانوں دِتّیاں جان گِیاں۔ سو کل دے لئی فِکر نا کرو کیوں جو کل اپنے لئی آپ فِکر کرے گا اَج دا دُکھ اَج لئی بہتیرا اے۔ الزام نا لاؤ پئی تُہاڈے اُتّے الزام نا لگّے۔ کیوں جو جیویں تُسی الزام لاندے ہو تُہاڈے اُتّے وی الزام لگّن گے۔ تے جِس ناپ نال تُسی ناپدے ہو اوسے نال تُہاڈے لئی ناپیا جاوے گا۔ تے اوس ککھ نُوں جیہڑا تیرے بھرا دی اَکھ وِچ اے تُوں کیوں ویکھنا ایں۔ تے اوس چھتیر ولّ جیہڑی تیری اپنی اَکھ وِچ اے دھیان نئیں کر دا؟ یا تُوں کیہڑے مُنھ نال اپنے بھرا نُوں آکھیں گا۔ ”لیا تیری اَکھ وِچوں ککھ کڈھاں۔“ تے ویکھ تیری اپنی اَکھ وِچ چھتیر اے۔ اَے مکّارا۔ پہلاں ایس چھتیر نُوں اپنی اکھّوں کڈھ لے۔ تَد چنگی طرح ویکھ کے تُوں اپنے بھرا دی اکھّوں اوس ککھ نُوں کڈھ سکیں گا۔ پاک شے کُتّیاں نُوں نا دیو تے نا اپنیاں موتِیاں نُوں سُؤراں اگّے سُٹّو۔ اجیہا نا ہوئے پئی اوہ اوہناں نُوں پیراں ہیٹھ لتاڑن تے مُڑ کے تُہانوں پاڑ سُٹّن۔ منگو تے تُہانوں دِتّا جائے گا لَبّھو تے مِلے گا۔ کھڑکاؤ تے تُہاڈے لئی کھو لیا جائے گا۔ کیوں جو ہر اِک منگن والا پا لَیندا اے تے لَبّھن والے نُوں لَبّھ پَیندا اے۔ تے کھڑکان والے لئی کھولیا جائے گا۔ یا تُہاڈے وِچوں اوہ کیہڑا بندہ ایہہ پئی اوہدا پُتر اوہدے توں روٹی منگے تے اوہنوں پتّھر دیوے گا؟ یا جے مچّھی منگے اوہنوں سَپّ دیوے گا؟ سو جدوں تُسی جیہڑے بُرے ہو اپنیاں بچّیاں نُوں چَنگیاں شیواں دینیاں جان دے ہو تے تُہاڈا باپ جیہڑا اسمان اُتّے اے اوہناں نُوں جیہڑے اوہدے کولوں منگدے نیں۔ چَنگیاں شیواں ضرُور دے گا۔ ایس کر کے سبھو کُجھ جو تُسی چاہندے ہو پئی لوک تُہاڈے نال کرن اوہ ای اوہناں نال تُسی وی کرو کیوں جو توریت تے نبیاں دی تعلِیم ایہو ای اے۔ بِھیڑے بُوہے راہ وڑو۔ کیوں جو موکلا اے اوہ بُوہا تے کُھلا اے اوہ راہ جیہڑا بربادی نُوں پُہنچاندا اے۔ تے بُہتے نیں جیہڑے اوتھوں وی وڑدے نیں۔ کیوں جو بِھیڑا اے اوہ بُوہا تے سَوڑا اے اوہ راہ جیہڑا زِندگی نُوں پُہنچاندا اے۔ تے جیہڑے اوہنوں لبّھدے نیں تھوڑے نیں۔ جُھوٹھے پیغمبراں توں خبردار رہو جیہڑے تُہاڈے کول بھیڈاں دے بھیس وِچ آوندے نیں پر وِچوں پاڑن والے بگھیاڑ نیں۔ تُسی اوہناں دے پَھلاں توں اوہناں نُوں پچھانوں گے۔ ملہیاں توں داکھاں یا پوہلیاں توں ہِجیراں لوک اکٹّھیاں کر دے نیں؟ ایسے طرح ہر اِک چنگے رُکھّ نُوں چَنگا تے بُرے رُکھّ نُوں بُرا پَھل لگدا اے۔ چَنگا رُکھّ بُرا پَھل نئیں لیا سکدا اے تے نا بُرا رُکھّ چَنگا پَھل لیا سکدا اے۔ ہر اِک رُکھّ جیہڑا چَنگا پَھل نئیں لیاؤندا اوہ وَڈّھیا جاندا تے اَگ وِچ سُٹّیا جاندا اے۔ سو تُسی اوہناں دے پَھلاں توں اوہناں نُوں پچھانوں گے۔ نا ہر کوئی جیہڑا مَینُوں خُداوند خُداوند آکھدا اے اسمان دی بادشاہی وِچ وڑے گا پر اوہ جیہڑا میرے باپ دی جو اسمان اُتّے اے مرضی پُوری کر دا اے۔ اوس دِہاڑے بتھیرے مَینُوں آکھن گے خُداوندا خُداوندا تیرا ناں لے کے نبُوّتاں اساں نئیں سن کِیتیاں؟ تے تیرا ناں لے کے بدرُوحاں نئیں کڈِھیاں؟ تے تیرا ناں لے کے ڈھیر سارِیاں کراماتاں نئیں وکھائیاں؟ تے مَیں اوہناں نُوں تَد صاف آکھاں گا پئی مَیں کدی تُہانوں نئیں جانیا۔ اَے شریعت توڑن والیو مَیتھوں دُراڈے ہو جاؤ۔ سو جیہڑا کوئی میرِیاں ایہناں گلّاں نُوں سُندا تے اوہناں نُوں کر دا اے اوہ اِک عقل والے بندے وانگر سمجھیا جائے گا جِس پتّھر اُتّے اپنا گھر بنایا۔ تے مینہ وسّیا تے ہڑ آئے تے ہنیرِیاں وَگِیاں تے اوس گھر اُتّے سٹّاں مارِیاں تے اوہ نا ڈِگّیا کیوں جو اوہدی نِینّھ پتّھر اُتّے رکھی گئی سی۔ تے جیہڑا کوئی میرِیاں ایہہ گلّاں سُن کے اوہناں نُوں نئیں کر دا سو اِک مُورکھ وانگر سمجھیا جائے گا۔ جِس اپنا گھر ریت اُتّے بنایا۔ تے مینہ وسّیا تے ہڑ آئے تے ہنیرِیاں وَگِیاں تے اوس گھر نُوں دھکّا ماریا تے اوہ ڈَھے پیا تے اوہدا ڈِگّنا بُرا ہویا۔ تے ایویں ہویا پئی جد یِسُوع ایہناں گلّاں نُوں مُکالیا تَد بِھیڑ اوہدی تعلِیم توں حَیران ہوئی۔ کیوں جو اوہ اوہناں دے فقِیہاں وانگر نئیں سگوں اختیار والے وانگر اوہناں نُوں سِکھاؤندا سی۔ تے جد اوہ اوس پہاڑوں اُتریا بتھیرے لوک اوہدے مگر ٹُر پئے۔ تے ویکھو اِک کوڑھے اگّے ہو کے اوہنوں سجدہ کر کے آکھیا خُداوندا جے تُوں چاہیں تے مَینُوں پاک صاف کر سکنا ایں۔ تے ہتّھ وَدّھا کے اوس اوہنوں چُھوئیا تے آکھیا مَیں چاہناں آں۔ تُوں پاک صاف ہو جا۔ تے اوسے ویلے اوہدا کوڑھ صاف ہوگیا۔ تے یِسُوع اوہنوں آکھیا خبردار کِسے نُوں نا دسیں۔ پر جا کے اپنا آپ کاہِن نُوں وکھا۔ تے جیہڑی نذر مُوسیٰ نے ٹھیرائی اے۔ چڑھا۔ تاں جو اوہناں لئی گواہی ہوئے۔ تے جد اوہ کَفرنحُوم وِچ اَپڑیا اِک صُوبیدار اوہدے کول آیا۔ تے اوہدی مِنّت کر کے آکھیا پئی۔ اَے خُداوند میرا نوکر جھولے دا ماریا گھر وِچ پیا ڈاہڈا تڑپھدا اے۔ تے اوس اوہنوں آکھیا مَیں آ کے اوہنوں چَنگا کراں گا۔ تَد صُوبیدار جواب دِتّا۔ خُداوند مَیں ایس لائق کِتّھوں ہویا پئی تُوں میری چھت ہیٹھاں آویں؟ پر نِرا کلام کر تے میرا نوکر چَنگا ہو جائے گا۔ کیوں جو مَیں وی نوکر ہاں۔ سپاہی میرے حُکم وِچ نیں۔ تے مَیں اِک نُوں آکھنا آں پئی جا تے اوہ جاندا اے۔ تے دُوجے نُوں آ۔ تے اوہ آؤندا اے۔ تے اپنے غلام نُوں پئی ایہہ کمّ کر۔ تے اوہ کر دا اے۔ تے یِسُوع ایہہ سُن کے تعجُّب کِیتا۔ تے اوہناں نُوں جیہڑے مگر مگر آوندے سن آکھیا۔ مَیں تُہانوں سَچ آکھنا آں پئی اِسرائیل وِچ دی مَیں اینا اِیمان نئیں ویکھیا۔ تے مَیں تُہانوں آکھنا آں پئی بتھیرے چڑھدیوں تے لہندیوں آؤن گے تے ابرہام تے اِضحاق تے یعقُوب دے نال اسمان دی بادشاہی وِچ بَیٹھن گے۔ پر بادشاہی دے فرزند باہر لے ہنیرے وِچ سُٹّے جان گے۔ اوتھے رونا تے کچیچیاں وٹنا ہوئے گا۔ تے یِسُوع صُوبیدار نُوں آکھیا۔ جا تے جِہیا تُوں یقِین کِیتا اوہی تیرے لئی ہوئے۔ تے اوہ نوکر اوسے گھڑی چَنگا ہوگیا۔ تے یِسُوع پطرس دے گھر وِچ آ کے اوہدی سَس نُوں تاپ نال پَیاں ہویاں ویکھیا۔ تے اوہنے اوہدا ہتّھ چُھوئیا تے تاپ لیَہہ گئی۔ تے اوس اُٹھ کے اوہدی سیوا کِیتی۔ تے جد شام پئی لوک بتھیریاں بد رُوح چمبڑیاں ہویاں نُوں اوہدے کول لے آئے۔ تے اوس اوہناں رُوحاں نُوں کلام ای نال باہر کڈھ دِتّا تے ساریاں بِیماراں نُوں چَنگا کِیتا۔ تاں جو اوہ گلّ جیہڑی یسعیاہ بنی آکھی سی پُوری ہوئے۔ پئی اوس آپ ساڈیاں ماندگِیاں لے لئیاں۔ تے ساڈیاں روگاں نُوں چُک لیا۔ تے جد یِسُوع اپنے چَوفیرے بڑی خلقت ویکھی تَد اوس پار چَلّن دا حُکم دِتّا۔ تے اِک فقِیہ اگّے ہو کے اوہنوں آکھیا۔ اَے اُستاد جِتّھے کِتّھے تُوں جائیں مَیں تیرے مگر چلاں گا۔ تے یِسُوع اوہنوں آکھیا لُومبڑِیاں کول گھورنے تے وَا دیاں پنچھیاں کول آہلنے۔ پر اِبنِ آدم کول تھاں نئیں اے جِتّھے سِر دھرے۔ تے شاگِرداں وِچوں اِک ہور نے اوہنوں آکھیا۔ خُداوندا اجازت دے مَیں پہلاں جا کے اپنے پئیو نُوں دفناواں۔ پر یِسُوع اوہنوں آکھیا میرے مگر ٹُر آ۔ تے مُردیاں نُوں اپنے مُردے دفناں دے۔ تے جد اوہ بیڑی اُتّے چڑھیا اوہدے شاگِرد اوہدے مگر آئے۔ تے ویکھو سمُندر وِچ ایڈی ہنیری آئی پئی بیڑی ٹَھلّاں وِچ لُکدی جاندی سی۔ پر اوہ آپ سُتّا پیا سی۔ تے اوہناں کول آ کے اوہنوں اُٹھایا تے آکھیا خُداوندا بچا۔ اسی مر چلّے آں۔ تے اوس اوہناں نُوں آکھیا اَے تھوڑے اِیمان والیو! تُسی ڈر دے کیوں ہو؟ تَد اوس اُٹھ کے وَا تے سمُندر نُوں جِھڑکیا تے بڑا امن ہوگیا۔ تے اوہ لوک تعجُّب کر کے آکھن لگّے پئی ایہہ کِس طرح دا بندہ اے پئی وَا تے سمُندر وی اوہدی مَن دے نیں۔ تے جد پار جا کے اوہ گدرینِیاں دے دیس وِچ اَپڑیا اوہنوں دو بندے جِنہاں وِچ بدرُوحاں سن۔ قبراں وِچوں نِکل کے آ مِلے تے اوہ اَیڈے ڈاہڈے سن پئی کوئی اوس راہوں لنگھ نئیں سی سکدا۔ تے ویکھو اوہناں چِیک مار کے آکھیا۔ اَے خُدا دے پُتر تیرا ساڈے نال کِیہ واسطہ؟ تُوں ویلے توں پہلاں ای سانُوں دُکھ دین نُوں ایتھے آگیا ایں؟ تے اوہناں توں دُراڈے بتھیرے سُؤراں دا اِجّڑ چُگدا سی۔ سو بدرُوحاں ایہہ آکھ کے اوہدی مِنّت کِیتی جے تُوں سانُوں کڈھناں ایں تے سانُوں اوہناں سُؤراں دے اِجّڑ وِچ گھل دے۔ تے اوس اوہناں نُوں آکھیا جاؤ۔ تے اوہ نِکل کے سُؤراں وِچ جاوڑیاں۔ تے ویکھو سارا اِجّڑ ڈھائے اُتّوں سمُندر وِچ سِر توڑ بھجیا تے پانی وِچ ڈُب مریا۔ تَد چران والے نَسّ گئے تے نگّر وِچ جا کے سارا حال دسیا۔ تے نالے بدرُوحاں والیاں دا حال وی۔ تے ویکھو سارا شہر یِسُوع نُوں اگّوں والی مِلن نُوں نِکلیا تے اوہنوں ویکھ کے اوہدی مِنّت کِیتی پئی ساڈیاں حداں توں باہر ٹُرجا۔ فیر بیڑی اُتّے چڑھ کے اوہ پار لنگھیا تے اپنے شہر نُوں آیا۔ تے ویکھو اِک چولے دے مارے ہوئے نُوں مَنجی اُتّے پیا ہویا اوہدے کول لیائے۔ تے یِسُوع اوہناں دا اِیمان ویکھ کے اوس چولے دے مارے ہوئے نُوں آکھیا پُتر خاطرجمع رکھ تیرے گُناہ بخشے گئے۔ تے ویکھو کئیاں فقِیہاں اپنے دِلاں وِچ آکھیا پئی ایہہ کُفر بولدا اے۔ تے یِسُوع اوہناں دیاں خیالاں نُوں بُجھ کے آکھیا تُسی کاہِنُوں اپنے دِلاں وِچ بُرے خیال کر دے ہو؟ کیہڑی گلّ آکھنی سوکھی اے ایہہ پئی تیرے گُناہ بخشے گئے یا ایہہ پئی اُٹھ تے ٹُرن لگ پَو۔ پر ایس لئی پئی تُسی جانو پئی اِبنِ آدم نُوں زمین اُتّے گُناہ بخشن دا اختیار اے۔ (تَد اوس چولے دے مارے ہوئے نُوں آکھیا) اُٹھ اپنی مَنجی چُک لے تے اپنے گھر ٹُر جا۔ تے اوہ اُٹھ کے اپنے گھر نُوں ٹُر گیا۔ تے لوک ویکھ کے ڈر گئے تے خُدا دی وڈیائی کِیتی پئی اوس اجیہا اختیار بندیاں نُوں دِتّا۔ جد یِسُوع اوتھوں لنگھ کے اگہاں گیا اوس اِک شخص نُوں جِہدا ناں متّی سی محصُول دی چَوکی اُتّے بَیٹھیاں ویکھیا تے اوہنوں آکھیا میرے مگر ٹُرپَو تے اوہ اُٹھ کے اوہدے مگر ٹُرپیا۔ فیر اِنج ہویا جدوں اوہ گھر وِچ روٹی کھان بَیٹھا ہویا سی تے ویکھو بتھیرے محصُولئے تے گُنہگار آ کے یِسُوع تے اوہدے شاگِرداں نال بَہہ گئے۔ تے فرِیسیاں ویکھ کے اوہدے شاگِرداں نُوں آکھیا تُہاڈا اُستاد محصُولِیاں تے گُناہِیاں دے نال کیوں کھاندا اے؟ اوس ایہہ سُن کے آکھیا نَوِیاں نرویاں نُوں حکِیم دی لوڑ نئیں سگوں مَندیاں نُوں۔ پر تُسی جا کے ایہدا مطلب سمجھو پئی مَیں قُربانی نُوں نئیں چاہندا سگوں رَحم نُوں چاہناں آں کیوں جو مَیں نیکاں نُوں سَدّن لئی نئیں آیا سگوں گُناہِیاں نُوں۔ تَد یُوحنّا دے شاگِرد اوہدے کول آ کے آکھن لگّے پئی اسی تے فریسی اکثر روزہ رکھنے آں پر تیرے شاگِرد کیوں روزہ نئیں رکھ دے؟ تے یِسُوع اوہناں نُوں آکھیا جِنّاں چِر لاڑا اوہناں دے نال اے جانجی غم کر سکدے نیں؟ پر اوہ دِن آؤن گے جد لاڑا اوہناں توں نِکھیڑیا جائے گا تے تَد اوہ روزہ رکھ لین گے۔ کورے کپڑے دی ٹاکی پرانے کپڑے نُوں کوئی نئیں لاندا۔ کیوں جو اوہ ٹاکی کپڑے نُوں کھِچّ لَیندی ایہہ تے لنگار ہور وی وَدّھ جاندا اے۔ تے نواں انگور دا رَس پرانیاں مشکاں وِچ لوک نئیں بھردے۔ تے جے بھرن تے مشکاں پاٹ جان گِیاں تے انگور دا رَس وَگ جائے گا۔ تے مشکاں دا ناس ہو جائے گا۔ پر نواں انگور دا رَس نَوِیاں مشکاں وِچ بھردے نیں تے اوہ دوویں بچے رہندے نیں۔ جد اوہ اوہناں نُوں ایہہ گلّاں پیا آکھدا سی ویکھو اِک سردار آ کے اوہنوں سجدہ کِیتا تے آکھیا میری دِھی ہُنے ای مر گئی اے پر تُوں آ کے اوہدے اُتّے ہتّھ رکھ تے اوہ جِیو پَوے گی۔ تے یِسُوع اُٹھ کے اپنے شاگِرداں دے نال اوہدے مگر ٹُر پیا۔ تے ویکھو اِک زنانی نے جِہنُوں باراں ورھیاں دا لہو آؤندا سی اوہدے پِچّھوں دی آ کے اوہدے کپڑے دی کنّی چُھوئی۔ کیوں جو اوس اپنے جی وِچ آکھیا سی جے مَیں نِرا اوہدا کپڑا چُھو لَواں تے ولّ ہو جاواں گی۔ تَد یِسُوع بَھوں کے اوہنوں ویکھیا تے آکھیا۔ دِھئے خاطرجمع رکھ تیرے اِیمان تینُوں ولّ کِیتا اے تے اوہ زنانی اوسے گھڑیوں ولّ کِیتی گئی۔ تے جدوں یِسُوع سردار دے گھر اَپڑیا اوس بانسری بجان والیاں تے بِھیڑ نُوں رَولا پاندیاں ویکھیا۔ تے آکھیا لانبھے ہو جاؤ کیوں جو کُڑی موئی نئیں پر سُتّی ہوئی اے۔ تے اوہ اوہدے اُتّے ہسّے۔ پر جد بِھیڑ باہر کڈھی گئی اوس اندر جا کے اوہدا ہتّھ پھڑیا تے اوہ کُڑی اُٹھی۔ تے ایہہ خبر سارے دیس وِچ پھیل گئی۔ تے جد یِسُوع اوتھوں لنگھدا جاندا سی دو اَنھے اوہدے مگر ٹُرپَئے تے ڈنڈ پا کے آکھن لگّے۔ اَے داؤد دے پُتر ساڈے اُتّے رَحم کر۔ تے جد اوہ گھر دے اندر آگیا اوہ اَنھے اوہدے کول آئے۔ تے یِسُوع اوہناں نُوں آکھیا۔ تُہانوں یقِین اے پئی مَیں ایہہ کمّ کر سکنا آں؟ اوہ اوہنوں آکھن لگّے ہاں خُداوندا۔ تَد اوس اوہناں دِیاں اَکھّیاں نُوں ایہہ آکھ کے چُھوئیا پئی جِہیا تُہاڈا اِیمان اے ایویں ای تُہاڈے لئی ہوئے۔ تے اوہناں دِیاں اَکھّیاں کُھل گِئیاں۔ تے یِسُوع تاکِید نال اوہناں نُوں آکھیا۔ خبردار کوئی نا جانے۔ پر اوہناں باہر جا کے اوس سارے دیس وِچ اوہنوں مشہُور کِیتا۔ تے ایہہ اجے باہر پئے جاندے سن تے ویکھو لوک اِک گُنگے نُوں جِہدے وِچ بدرُوح سی اوہدے کول لیائے۔ تے جد بدرُوح کڈھی گئی تَد گُنگا گلّاں کرن لگ پیا۔ تے بِھیڑ حَیران ہو کے آکھن لگّی۔ پئی اجیہی گلّ اِسرائیل وِچ کدی نئیں سی ویکھی گئی۔ پر فرِیسیاں آکھیا۔ اوہ تے بدرُوحاں دے سردار دی مدد نال بدرُوحاں نُوں کڈھدا اے۔ تے یِسُوع اوہناں دیاں عبادت خانیاں وِچ تعلِیم دیندا تے بادشاہی دی خُوشخبری دی منادی کر دا تے سبھ دُکھ دَرد تے سارے روگاں نُوں دُور کر دا ہویا ساریاں نگراں تے پِنڈاں وِچ پِھریا تے بِھیڑ نُوں ویکھ کے اوہنوں اوہناں اُتّے ترس آیا کیوں جو اوہ اوہناں بھیڈاں وانگر اَوکھیاں تے کھِنڈیاں ہویاں سن جِنہاں دا ایّالی نا ہوئے۔ تَد اوہ اپنے شاگِرداں نُوں آکھن لگّا فصل تے بُہت اے پر کامے تھوڑے نیں۔ ایس لئی فصل دے مالک دی مِنّت کرو پئی اوہ اپنی فصل لئی کامیاں نُوں گھل دے۔ تے اوس اپنے باراں شاگِرداں نُوں کول سَدّ کے اوہناں نُوں اختیار دِتّا پئی پلِیت رُوحاں نُوں کڈھن تے سبھ دُکھ دَرد تے سارے روگ نُوں دُور کرن۔ تے باراں رسُولاں دے نال ایہہ نیں۔ پہلا شمعُون جیہڑا پطرس اکھواؤندا اے۔ تے اندریاس اوہدا بھرا۔ زبدی دا پُتر یعقُوب تے یُوحنّا اوہدا بھرا۔ فِلپُّس تے برتُلمائی تُوما تے متّی محصُولِیہ۔ حلفئی دا پُتر یعقُوب تے تدّی۔ شمعُون قنانی تے یہُوداہ اِسکریُوتی جِس اوہنوں پھڑوا وی دِتّا۔ ایہناں باراں نُوں یِسُوع ایہہ حُکم دے کے گھلّیا پئی غیر قوماں دے راہ نا جانا تے نا سامریاں دے کِسے نگّر وِچ جانا۔ سگوں اِسرائیل دے گھرانے دِیاں گواچائیاں ہویاں بھیڈاں کول جاؤ۔ تے جاندے جاندے ایہہ منادی کرو۔ پئی ”اسمان دی بادشاہی نیڑے آگئی اے۔“ روگِیاں نُوں ولّ کرو مُردیاں نُوں جواؤ۔ کوڑھیاں نُوں پاک صاف کرو۔ بدرُوحاں نُوں کڈھو تُہانوں مُفت مِلیا اے مُفت ای دیو۔ نا سونا نا رُپیا نا تانبا گُھٹ کے اپنے لکّ نال بنھنو۔ تے نا راہ لئی جھولی لوؤ نا دو جَھگّے۔ نا جُتِّیاں تے نا سوٹا۔ کیوں جو کاماں اپنی روٹی دا حقدار اے۔ تے جِس شہر یا پِنڈ وِچ جاؤ پَتا لوؤ پئی ایس تھاں وِچ کون لائق اے تے جِنّاں چِر تُسی ٹُر نا پَو اوتھے ای رہو۔ تے گھر دے اندر وڑن لگِیاں اوہنوں سلام کرو۔ تے جے اوہ گھر لائق ہوئے تے تُہاڈی برکت اوہنوں پہنچے۔ تے جے نالائق ہوئے تَد تُہاڈی برکت تُہانوں مُڑ آوے۔ تے جے کوئی تُہانوں قبول نا کرے نا تُہاڈیاں گلّاں سُنے تے اوس گھروں یا اوس شہروں نِکل دیاں ای اپنے پیراں دی دُھوڑ جھاڑ دیو۔ مَیں تُہانوں سَچ آکھنا آں پئی عدالت دے دِن اوس نگّر نالوں سدُوم تے عمُورہ دے دیس دی سزا گھٹ ہوئے گی۔ ویکھو مَیں تُہانوں ایس طرح گھلّنا آں جیہا بھیڈاں نُوں بگھیاڑاں دے وِچ۔ سو سپّاں وانگر ہُشیار ہوؤ تے کبُوتراں وانگر بھولے۔ پر بندیاں توں خبردار رہو کیوں جو اوہ تُہانوں مجلسیاں دے حوالے کرن گے تے اپنے عبادت خانیاں وِچ کولڑے مارن گے۔ تے تُسی حاکماں تے بادشاہاں دے اگّے میری خاطر کھڑے ہو جاؤ گے تاں جو اوہناں نُوں تے غیر قوماں نُوں وی گواہی ہوئے۔ پر جدوں اوہ تُہانوں حوالے کرن گے تے فِکر نا کرو پئی کِس طرح یا کِیہ بولو گے۔ کیوں جو کُجھ تُسی بولنا ہوئے گا سو اوسے گھڑی تُہانوں دسیا جائے گا۔ کیوں جو بولن والے تُسی نئیں ہو۔ پر تُہاڈے باپ دا رُوح۔ جیہڑا تُہاڈے وِچ بولدا اے۔ بھرا بھرا نُوں مَوت لئی پھڑوائے گا تے پئیو پُتر نُوں تے پُتر اپنے ماپیاں دا سامنا کرن گے تے اوہناں نُوں مروا سُٹّن گے۔ تے میرے ناں کر کے سبھ لوک تُہاڈے نال وَیر رکھن گے۔ پر جو کوئی اخِیر توڑی قیم رہے گا سو ای بچایا جائے گا۔ جد اوہ تُہانوں اِک شہر وِچ دُکھ دین تے دُوجے وِچ بھج جاؤ۔ کیوں جو مَیں تُہانوں سَچ آکھنا آں پئی تُسی اِسرائیل دے شہراں نُوں مُکانہ لوؤ گے جو اِبنِ آدم آ جائے گا۔ شاگِرد اپنے اُستاد نالوں وَڈا نئیں تے نا نوکر اپنے مالک نالوں۔ اینا وی بُہت اے پئی شاگِرد اپنے اُستاد جیہا تے نوکر اپنے مالک جِہیا ہوئے۔ جد اوہناں گھر دے مالک نُوں بَعلزبُول آکھیا تے اوہدے گھر دیاں نُوں ضرُور ای آکھن گے؟ سو تُسی اوہناں کولوں نا ڈرو۔ کیوں جو کوئی شے ڈھکی ہوئی نئیں جیہڑی ظاہر نا کِیتی جائے گی تے نا لُکی ہوئی۔ جیہڑی جانی نا جائے گی۔ جو کُجھ مَیں ہنیرے وِچ تُہانوں آکھنا آں تُسی چانن وِچ دسو۔ تے جو کُجھ کنّ وِچ سُندے ہو اوہدی کوٹھیاں اُتّے چڑھ کے منادی کرو۔ تے اوہناں توں نا ڈرو جیہڑے بدن نُوں مار سُٹّدے تے رُوح نُوں نئیں مار سکدے۔ سگوں اوہدے توں ڈرو جیہڑا بدن تے رُوح دوہاں دا جہنّم وِچ ناس کر سکدا اے۔ اِک پَیسے دِیاں دو چِڑیاں نئیں وِکدِیاں؟ تے اوہناں وِچوں اِک وی تُہاڈے باپ دی مرضی بِناں زمین اُتّے نئیں ڈِگّدی۔ پر تُہاڈے سِر دے وال وی سبھ گِنے ہوئے نیں۔ سو تُسی نا ڈرو۔ تُسی بتھیریاں چِڑیاں نالوں بُہتے مُل دے ہو۔ جیہڑا کوئی بندیاں دے اگّے میرا اِقرار کرے گا۔ مَیں وی اوہدا اپنے باپ دے اگّے جیہڑا اسمان اُتّے اے اِقرار کراں گا۔ پر جیہڑا کوئی بندیاں دے اگّے میرا اِنکار کرے گا مَیں وی اپنے باپ دے اگّے جیہڑا اسمان اُتّے اے اوہدا اِنکار کراں گا۔ ایہہ نا سمجھو پئی مَیں زمین اُتّے امن کران آیا ہاں۔ مَیں امن کران نئیں۔ سگوں تلوار چلان آیا ہاں۔ کیوں جو مَیں آیا پئی بندے نُوں اوہدے پئیو توں۔ تے دِھی نُوں ماں توں۔ تے نُونہہ نُوں سَس توں نکھیڑاں۔ تے بندے دے وَیری اوہدے گھر ای دے لوک ہون گے۔ جیہڑا پئیو یا ماں نُوں میرے نالوں وَدّھ پیار کر دا اے اوہ میرے کمّ دا نئیں اے۔ تے جیہڑا پُتر یا دِھی نُوں میرے نالوں وَدّھ پیار کر دا اے اوہ میرے کمّ دا نئیں۔ تے جیہڑا اپنی صلِیب چُک کے میرے مگر نئیں آؤندا اوہ میرے لائق نئیں اے۔ جِس اپنی جان نُوں لَبّھ لیا اوہ اوہنوں گوائے گا۔ پر جِس میرے واسطے اپنی جان نُوں گوایا اوہ اوہنوں لَبّھ لے گا۔ جیہڑا تُہانوں قبول کر دا اے مَینُوں قبول کر دا اے۔ تے جیہڑا مَینُوں قبول کر دا اے میرے گھلّن والے نُوں قبول کر دا اے۔ جیہڑا نبی دے ناں اُتّے نبی نُوں قبول کر دا اے اوہنوں نبی دا اَجر مِلے گا۔ تے جیہڑا نیک بندے دے ناں اُتّے نیک بندے نُوں قبول کر دا اے اوہنوں نیک بندے دا اَجر مِلے گا۔ تاں جو کوئی ایہناں نِکّیاں وِچوں اِک نُوں شاگِرد دے ناں اُتّے نِرا ٹھنڈے پانی دا کٹورا پِیائے مَیں تُہانوں سَچ آکھنا آں اوہ اپنا اَجر کدی نا گوائے گا۔ تے اینج ہویا پئی جد یِسُوع اپنے باراں شاگِرداں نُوں حُکم دے دِتّا تَد اوہ اوہناں دے شہراں وِچ تعلِیم دین تے منادی کرن نُوں اوتھوں ٹُرپیا۔ تے یُوحنّا قیدخانے وِچ مسِیح دیاں کمّاں دا حال سُن کے اپنے شاگِرداں دی راہِیں اوہنوں اکھوا گھلّیا پئی۔ اوہ جیہڑا آؤن والا سی تُوں ای ایں یا اسی کِسے ہور نُوں اُڈِیکئے؟ تے یِسُوع اوہناں نُوں جواب دِتّا۔ پئی جو کُجھ تُسی سُندے تے ویکھدے ہو یُوحنّا نُوں جا کے دسو۔ پئی اَنھے ویکھدے تے لنگے ٹُردے پِھردے۔ کوڑھے پاک صاف کِیتے جاندے نیں تے بولے سُندے تے مُردے جوالے جاندے نیں۔ تے غرِیباں نُوں خُوشخبری سُنائی جاندی اے۔ تے دھنّ اوہ اے جیہڑا میرے سبّب ٹھوکر نئیں کھاندا۔ تے جد اوہ ٹُر گئے یِسُوع یُوحنّا دی بابت لوکاں نُوں آکھن لگّا پئی تُسی بیابان وِچ کِیہ ویکھن گئے سو؟ اِک وَا نال ہِلدے کانے نُوں؟ پر تُسی کِیہ ویکھن گئے سو؟ اِک چنگے کپڑے پائے ہوئے بندے نُوں؟ ویکھو جیہڑے چنگے کپڑے پاندے نیں اوہ بادشاہاں دے محلّاں وِچ نیں۔ پر تُسی کاہِنُوں باہر گئے سو؟ اِک نبی نُوں ویکھن لئی۔ ہاں مَیں تُہانوں آکھنا آں سگوں نبی نالوں وڈّے نُوں۔ اوہ اوہو ای اے جِہدی بابت لِکھیا ہویا اے پئی ویکھو مَیں اپنا رسُول تیرے اگّے اگّے گھلّنا آں۔ اوہ تیرا راہ تیرے اگّے تیار کرے گا۔ مَیں تُہانوں سَچ آکھنا آں پئی اوہناں وِچوں جیہڑے عَورتاں توں جمّے نیں یُوحنّا بپتِسمہ دین والے نالوں وَڈا کوئی وی نئیں اُٹھیا۔ پر جیہڑا اسمان دی بادشاہی وِچ نِکّا اے اوہ اوہدے نالوں وَڈا اے۔ تے یُوحنّا بپتِسمہ دین والے دیاں دِناں توں لے کے ہُن تِیکر اسمان دی بادشاہی اُتّے زوراوری ہوندی اے تے زوراور لوک اوہنوں زبردستی مَل لَیندے نیں۔ کیوں جو سارے نبی تے توریت وی یُوحنّا تِیکر نبُوّت کر دے آئے سن۔ تے ایلیّاہ جیہڑا آؤن والا سی ایہو اے۔ چاہو تے مَنّو۔ جیہڑا سُنن واسطے کنّ رکھدا اے سو سُنے۔ پر مَیں ایس زمانے دیاں لوکاں نُوں کِہدے وانگر آکھاں؟ اوہ تے اوہناں مُنڈیاں جیہے نیں جیہڑے بازاراں وِچ بَہہ کے اپنے یاراں نُوں اَوازاں مار کے آکھدے نیں۔ پئی اساں تُہاڈے لئی بانسری وَجائی پر تُسی نا نچّے۔ اساں سیاپے کِیتے پر تُسی نا پِٹّے۔ کیوں جو یُوحنّا نا کھاندا نا پَیندا آیا۔ تے اوہ آکھدے نیں پئی اوہدے وِچ بدرُوح اے۔ اِبنِ آدم کھاندا پَیندا آیا۔ تے اوہ آکھدے نیں پئی ویکھو کھاؤُ تے شرابی بندہ۔ محصُولِیاں تے گُناہِیاں دا یار۔ پر دانائی اپنیاں کمّاں توں سَچّی ٹھہری۔ تَد اوہناں سبھناں شہراں نُوں جِنہاں وِچ اوہ دِیاں بتھیریاں کراماتاں کِیتیاں ہویاں سن ملامت کرن لگّا۔ ایس کر کے پئی اوہناں تَوبہ نئیں سی کِیتی۔ ہائے تینُوں خُرازِین ہائے تینُوں بَیت صَیدا۔ کیوں جو اوہ کراماتاں جیہڑیاں تُہاڈے وِچ ہویاں سن جیکر صُور تے صَیدا وِچ ہوندیاں تے ترپّڑ پا کے تے سواہ وِچ بَیہہ کے اوہ کدوں دی تَوبہ کر لَیندے۔ پر مَیں تُہانوں آکھنا آں۔ پئی عدالت دے دِن تُہاڈے نالوں صُور تے صَیدا دا سُکھلّ ہوئے گا۔ تے اَے کَفرنحُوم تُوں اسمان تِیکر اُچّا کِیتا جائیں گا؟ تُوں تے پاتال تِیکر نِیواں کِیتا جائیں گا کیوں جو ایہہ کراماتاں جیہڑیاں تیرے وِچ ہویاں نیں جے سدُوم وِچ ہوندیاں۔ تے اوہ اَج تِیکر رہ جاندا۔ پر مَیں تُہانوں آکھنا آں پئی عدالت دے دِن تیرے نالوں سدُوم دیس واسطے سُکھلّ ہوئے گا۔ اوس ویلے یِسُوع نے جواب وِچ آکھیا۔ اَے باپ اسمان تے زمین دے خُداوند مَیں تیری وڈیائی کرنا آں پئی تُوں ایہناں گلّاں نُوں داناواں تے سیانیاں توں لُکایا۔ تے اَنجانیاں اُتّے ظاہر کِیتا۔ ہاں اَے باپ کیوں جو ایسے طرح تینُوں چَنگا لگّا۔ سارِیاں شیواں میرے باپ توں مَینُوں سونپِیاں گِیئاں۔ تے کوئی پُتر نُوں نئیں جان دا پر باپ۔ تے نا باپ نُوں کوئی جان دا اے پر پُتر۔ تے اوہ جِہدے اُتّے پُتر اوہنوں ظاہر کرنا چاہے۔ اَے سارے لوکو جیہڑے محنت کر دے تے بھار ہیٹھ دبّے پئے ہو۔ میرے کول آؤ تے مَیں تُہانوں آرام دیاں گا۔ میری پنجالی اپنے اُتّے رکھ لوؤ تے میرے توں سِکھّو کیوں جو مَیں حلِیم تے دِل دا غرِیب آں تے تُسی اپنیاں جِیاں وِچ آرام پاؤ گے۔ کیوں جو میری پنجالی سُکھلّی تے میرا بھار ہَولا اے۔ اوس ویلے یِسُوع سبت دے دِن پَیلِیاں وِچوں دی لنگھیا تے اوہدے شاگِرداں نُوں بُھکھ لگّی ہوئی سی۔ تے اوہ سِٹّے توڑ توڑ کے چَبّن لگّے۔ تے فرِیسیاں ایہہ ویکھ کے اوہنوں آکھیا۔ ویکھ تیرے شاگِرد اوہ کمّ پَے کر دے نیں جیہڑا سبت نُوں کرنا روا نئیں۔ پر اوس اوہناں نُوں آکھیا تُسی نئیں پڑھیا پئی داؤد نے کِیہ کِیتا جدوں اوہ تے اوہدے ساتھی بُھکھے سن۔ اوہ کِس طرح خُدا دے گھر وِچ گیا تے چڑھاوے دِیاں روٹِیاں کھادِیاں جیہڑیاں نا اوہنوں نا اوہدے ساتھِیاں نُوں پر نِریاں کاہِناں نُوں کھانِیاں روا سن۔ یا تُسی توریت وِچ نئیں پڑھیا پئی کاہِن سبت دے دِن ہیکل دے وِچ سبت نُوں توڑ دیندے نیں۔ تے بے دوسے رہندے نیں۔ پر مَیں تُہانوں آکھنا آں پئی ہیکل نالوں ایتھے اِک وَڈا اے۔ تے جیکر تُسی سمجھدے پئی ایہہ کِیہ گلّ اے۔ پئی ”مَیں قُربانی نُوں نئیں چاہندا پر رَحم نُوں چاہناں آں۔“ تے تُسی بے گُناہِیاں اُتّے الزام نا لاندے۔ کیوں جو اِبنِ آدم سبت دا خُداوند اے۔ تے اُتّوں ٹُرکے اوہ اوہناں دے عبادت خانے وِچ گیا۔ تے ویکھو اِک بندہ سی جِہدا ہتّھ سُکّیا ہویا سی۔ تے اوہناں ایس مطلب نال پئی اوہدے اُتّے عیب لان ایہہ آکھ کے اوہدے کولوں پُچھیا۔ سبت دے دِن بندے نُوں چَنگا کرنا روا اے؟ تے اوس اوہناں نُوں آکھیا پئی تُہاڈے وِچوں کیہڑا بندہ اے جِہدے کول اِک بھیڈ ہوئے تے اوہ سبت دے دِن ٹوئے وِچ ڈِگّ پَوے۔ اوہ اوہنوں پَھڑکے نا کڈھے گا؟ سو بندہ بھیڈ نالوں کِنّاں وَدّھ چَنگا اے۔ ایس لئی سبت دے دِن بھلا کرنا روا اے۔ تَد اوہ اوس بندے نُوں آکھن لگّا اپنا ہتّھ وَدّھا۔ تے اوس وَدھایا تے اوہ دُوجے وانگر فیر چَنگا ہوگیا۔ تَد فرِیسیاں باہر جا کے اوہدے خلاف صلاح کِیتی پئی اوہنوں کِس طرح مار سُٹّیئے۔ تے یِسُوع ایہہ سمجھ کے اوتھوں ٹُر گیا۔ تے بتھیرے لوک اوہدے مگر ٹُر پئے۔ تے اوس اوہناں سبھناں نُوں ولّ کِیتا۔ تے اوس اوہناں نُوں تاکِید کِیتی پئی مَینُوں مشہُور نا کرنا۔ تاں جو اوہ گلّ جیہڑی یسعیاہ نبی دی راہِیں آکھی گئی سی پُوری ہوئے۔ پئی ویکھو میرا بندہ جِہنُوں مَیں چُنیا۔ میرا پیارا جِہدے توں میرا جی خُوش اے مَیں اپنا رُوح اوہدے اُتّے رکھاں گا تے اوہ غیر قوماں نُوں نیاں دی خبر کرے گا۔ اوہ نا جھگڑا کرے گا۔ تے نا اُچّی بولے گا تے نا کوئی اوہدی اواز چَونکاں وِچ سُنے گا۔ مِدّھے ہوئے کانے نُوں اوہ نئیں بھنّے گا۔ تے دُھکھدی ہوئی سن نُوں نئیں بُجھائے گا۔ جد تِیکر اوہ نیاں دی فتح نا کرا دیوے۔ تے اوہدے ناں اُتّے غیر قوماں آسرا رکھن گِئیاں۔ تَد اِک بدرُوح والا بندہ جیہڑا اَنھا تے گُونگا سی اوہدے کول لیاندا گیا۔ تے اوس اوہنوں چَنگا کِیتا تے اوہ گُونگا بولن تے ویکھن لگ پیا۔ تے ساریاں لوکاں تعجُّب کر کے آکھیا! ایہہ داؤد دا پُتر نئیں؟ پر فرِیسیاں سُن کے آکھیا۔ ایہہ بدرُوحاں نُوں نئیں کڈھدا پر بدرُوحاں دے سردار بَعلزبُول دی مدد نال۔ تے اوس اوہناں دیاں خیالاں نُوں بُجھ کے اوہناں نُوں آکھیا ہر اِک راج جِہدے وِچ پُھٹ پَے جاوے سو اُجّڑ جاندا اے۔ تے ہر اِک شہر یا گھر جِہدے وِچ پُھٹ پَے جاوے اوہ قیم نئیں رہے گا۔ تے جے شیطان شیطان نُوں کڈھدا اے تے اوہدے اپنے آپ وِچ ای پُھٹ پئی اے فیر اوہدا راج کِیویں قیم رہے گا۔ تے جے مَیں بَعلزبُول دی مدد نال بدرُوحاں نُوں کڈھناں آں۔ تے تُہاڈے پُتر کِہدی مدد نال کڈھدے نیں؟ بس اوہی تُہاڈی مُنصفی کرن گے۔ پر جے مَیں خُدا دے رُوح نال بدرُوحاں نُوں کڈھناں آں۔ تے خُدا دی بادشاہی بے شک تُہاڈے کول آ پہنچی اے۔ یا کوئی کِسے زوراور بندے دے گھر وِچ کِس طرح اندر وڑ کے اوہدا مال لُٹ سکدا اے۔ جے پہلاں اوہ اوس زوراور نُوں بَنّھ نا لَئے۔ تے تَد اوہدا گھر لُٹّے گا۔ جیہڑا میرے نال نئیں میرے برخلاف اے تے جیہڑا میرے نال اکٹّھا نئیں کر دا سو کھِلار دا اے۔ ایس لئی مَیں تُہانوں آکھنا آں پئی ہر اِک گُناہ تے کُفر بندیاں نُوں بخشیا جائے گا پر اوہ کُفر جیہڑا رُوح دے حق وِچ ہوئے بخشیا نا جائے گا۔ تے جیہڑا کوئی اِبنِ آدم دے برخلاف کوئی گلّ کرے اوہ اوہنوں بخشیا جائے گا۔ پر جیہڑا پاک رُوح دے برخلاف بولے اوہنوں بخشیا نا جائے گا۔ نا ایس جہان وِچ نا اگلے جہان وِچ۔ یا تے رُکھّ چَنگا بناؤ تے اوہدے پَھل نُوں وی چَنگا۔ یا رُکھّ ماڑا بناؤ تے اوہدے پَھل نُوں وی ماڑا۔ کیوں جو رُکھّ اپنے پَھل توں پِچھانیا جاندا اے۔ سپّاں دے بچّیو تُسی بُرے ہو کے کِس طرح چَنگیاں گلّاں کر سکدے ہو؟ کیوں جو جیہڑا مَن وِچ بھریا ہویا اے مُنھ اُتّے آؤندا اے۔ کھرا بندہ اپنے کھرے خزانے وِچوں کھرِیاں گلّاں کڈھدا اے۔ تے بُرا بندہ بُرے خزانے وِچوں بُریاں گلّاں کڈھ دا اے۔ پر مَیں تُہانوں آکھنا آں پئی ہر اِک وادھی گلّ جیہڑی لوکی بولن گے عدالت دے دِن اوہ اوہدا حِساب دین گے۔ کیوں جو تُوں اپنیاں گلّاں توں سَچّا تے اپنیاں گلّاں توں مُجرم ٹھیرایا جائیں گا۔ تَد بعضیاں فقِیہاں تے فرِیسیاں اوہنوں جواب دے کے آکھیا اَے اُستاد اسی تَیتھوں کوئی نِشان ویکھنا چاہنے آں۔ پر اوس اوہناں نُوں جواب دِتّا پئی بُرے تے زناکار لوک نِشان لبّھدے نیں۔ پر اوہناں نُوں کوئی نِشان دِتّا نا جاوے گا۔ بِناں یُوناہ نبی دے نِشان دے۔ کیوں جو جیویں یُوناہ تِنّ رات دِن مچّھی دے ڈِھڈ وِچ رہیا اوسے طرح اِبنِ آدم تِنّ رات دِن زمین دے اندر رہے گا۔ نِینوہ دے لوک عدالت وِچ ایس زمانے دے لوکاں نال اُٹھن گے تے ایہناں نُوں مُجرم ٹھہران گے کیوں جو اوہناں یُوناہ دی منادی سُن کے تَوبہ کر لئی۔ تے ویکھو یُوناہ نالوں ایتھے اِک وَڈا اے۔ دَکھّن دی رانی ایس زمانے دیاں لوکاں نال عدالت دے دِن اُٹھے گی۔ تے اوہناں نُوں مُجرم ٹھیرائے گی۔ کیوں جو اوہ تے سُلیمان دی دانائی سُنن لئی زمین دِیاں حداں توں آئی۔ تے ویکھو ایتھے سُلیمان نالوں وی اِک وَڈا اے۔ پلِیت رُوح جد بندیوں باہر نِکل گئی ہوئے تے سُکّیاں تھانواں وِچ آرام لَبھّدی پِھردی اے۔ پر نئیں پاندی۔ تَد آکھدی اے مَیں اپنے گھر نُوں جِتّھوں نِکلی ساں مُڑ جاواں گی۔ تے آ کے اوہنوں ویہلا تے جھاڑیا سنواریا ہویا ویکھدی اے۔ تَد اوہ جاندی اے تے ہور سَتّ رُوحاں اپنے نالوں بُریاں نال لیاؤندی اے تے اوہ وِچ وڑ کے اوتھے وسدِیاں نیں۔ تے اوس شخص دا پِچّھلا حال پہلے نالوں بَھیڑا ہو جاندا اے۔ ایس بُرے زمانے دے لوکاں دا وی ایہو جِہیا حال ہوئے گا۔ اجے اوہ لوکاں نال گلّاں پیا کر دا سی تے ویکھو اوہدی ماں تے بھرا باہر کھلوتے ہوئے اوہدے نال گلّ کرنی چاہندے سن۔ تے کِسے اوہنوں آکھیا ویکھ تیری ماں تے تیرے بھرا باہر کھلوتے ہوئے نیں تے تیرے نال گلّ کرنی چاہندے نیں۔ پر اوس دسن والے نُوں جواب دِتّا کون اے میری ماں تے کون نیں میرے بھرا۔ تے اپنے شاگِرداں ولّ اپنا ہتّھ کر کے آکھیا ویکھو میری ماں تے میرے بھرا۔ کیوں جو جیہڑا کوئی میرے باپ دی جیہڑا اسماناں وِچ اے مرضی نُوں پُورا کر دا اے اوہو اے میرا بھرا تے بھین تے ماں۔ اوسے دِن یِسُوع گھروں نِکل کے سمُندر دے کنڈھے جا بَیٹھا۔ تے اوہدے کول بڑی بِھیڑ اکٹّھی ہوگئی۔ ایس کر کے اوہ آپ بیڑی اُتّے چڑھ بَیٹھا۔ تے ساری بِھیڑ کنڈھے اُتّے کھلوتی رہی۔ تے تمثِیلاں دے دے کے اوس اوہناں نُوں بُہت سارِیاں گلّاں دسیاں۔ پئی ویکھو اِک بِیجن والا بی بِیجن نُوں نِکلیا۔ تے اوہدے بِیجدیاں بِیجدیاں کُجھ دانے راہ دے کنڈھے ڈِگّ پئے۔ تے پنچھی آ کے اوہناں نُوں چُگ گئے۔ تے ہور کُجھ پتّھراں والی زمین اُتّے ڈِگّ پئے جِتّھے اوہناں نُوں بُہت مِٹّی نا مِلی تے بُہتی مِٹّی نا مِلن کر کے اوہ چھیتی اُگ تے پئے۔ پر جدوں دُھپ چڑھی اوہ جُھلس گئے۔ تے جڑ نا ہون دے سبّب کر کے سُک گئے۔ تے ہور کُجھ ملہیاں وِچ ڈِگّے۔ تے ملہیاں نیں وَدّھ کے اوہناں نُوں دَبا لیا۔ تے ہور کُجھ چنگی زمین اُتّے ڈِگّے تے پَھل دِتّا۔ کُجھ سَو گُنا کُجھ سَٹّھ گُنا۔ کُجھ تَرِیہہ گُنا۔ جِہدے کنّ ہون سو سُنے۔ تے شاگِرداں کول آ کے اوہنوں آکھیا۔ تُوں تمثِیلاں وِچ اوہناں نال کیوں گلّاں کرنا ایں؟ اوس اوہناں نُوں جواب دِتّا تے آکھیا۔ اسمان دی بادشاہی دے بھیتاں نُوں جان لینا تُہانوں بخشیا گیا اے۔ پر ایہناں نُوں ایہہ بخشیا نئیں گیا۔ ایس لئی جِہدے کول اے اوہنوں دِتّا جائے گا۔ تے اوہدا بڑا وادھا ہو جائے گا۔ پر جِہدے کول نئیں اے اوہدے کولوں اوہ وی جو کُجھ اوہدے کول اے لے لیا جائے گا۔ مَیں اوہناں نال تمثِیلاں وِچ ایس لئی گلّاں کرنا آں پئی اوہ ویکھدے ہوئے نئیں ویکھدے تے سُندے ہوئے نئیں سُندے تے نا سمجھدے نیں۔ تے اوہناں اُتّے یسعیاہ دی نبُوّت پُوری ہوئی۔ پئی کنّاں نال تے سُنو گے پر کَدے وی نئیں سمجھو گے تے ویکھدے ہوئے ویکھو گے پر کَدے وی نئیں بجھُو گے۔ کیوں جو ایس قوم دا دِل موٹا ہوگیا اے۔ تے کنّاں توں اوہ اُچّا سُندے نیں تے اوہناں اپنیاں اَکھّیاں مِیٹ لئیاں نیں۔ کِتے ایہہ نا ہوئے پئی اَکھّیاں نال ویکھن تے کنّاں نال سُنن تے دِل نال سمجھن تے پرت آؤن تے مَیں اوہناں نُوں ولّ کر دیاں۔ پر دھنّ نیں تُہاڈیاں اَکھّیاں کیوں جو اوہ ویکھدِیاں نیں تے تُہاڈے کنّ کیوں جو اوہ سُندے نیں۔ ایس لئی پئی مَیں تُہانوں سَچ آکھنا آں پئی بتھیرے نبی تے نیک بندے ایس گلّ دی چاہ کر دے گئے پئی جو کُجھ تُسی ویکھدے ہو ویکھن پر اوہناں نئیں ویکھیا۔ تاں جو کُجھ تُسی سُندے ہو سُنن پر نئیں سُنیا۔ سو تُسی بِیجن والے دی تمثِیل سُنو۔ جد کوئی بادشاہی دا کلام سُندا اے تے سمجھدا نئیں تَد اوہدے مَن وِچوں جو کُجھ بِیجیا ہویا سی اوہ بُرا آ کے کھو لے جاندا اے۔ ایہہ اوہ اے جیہڑا راہ دے کنڈھے بِیجیا گیا سی۔ تے جیہڑا پتّھریلی زمین وِچ بِیجیا گیا۔ سو اوہ اے۔ جیہڑا کلام سُندا تے جھٹ خُوشی نال اوہنوں مَن لَیندا اے۔ اوہ تے جڑ اپنے وِچ نئیں رکھدا پر تھوڑا چِر رہندا اے۔ تے کلام دے سبّب دُکھ یا ظُلم ہوندیاں ای جھٹ اوہ ٹھوکر کھاندا اے۔ تے اوہ جیہڑا ملہیاں وِچ بِیجیا گیا سو اوہ اے جیہڑا کلام سُندا اے تے زمانے دی سوچ فِکر تے دَولت دا دھوکھا کلام نُوں دَبا لَیندا اے تے اوہ اپّھل ہو جاندا اے۔ تے اوہ جیہڑا چنگی زمین وِچ بِیجیا گیا سو اوہ اے جیہڑا کلام سُندا تے سمجھدا اے اوہ ضرُور پَھل لیاؤندا اے۔ تے پَیداواری دیندا اے۔ کوئی سَو گُنا کوئی سَٹّھ گُنا۔ کوئی تَرِیہہ گُنا۔ اوس ہور اِک تمثِیل لے کے اوہناں نُوں آکھیا۔ پئی اسمان دی بادشاہی اوس بندے وانگر اے جِس اپنی پَیلی وِچ چَنگا بی بِیجیا۔ پر جد لوک سَوں گئے تَد اوہدا وَیری آیا تے کنک دے وِچ کَوڑے دانے وی بِیج کے ٹُر گیا۔ تے جد انگُوری نِکلی تے سِٹّے لگّے تَد کَوڑا بُوٹا وی دِس پیا۔ تَد نَوکراں گھر دے مالک کول جا کے اوہنوں آکھیا اَے خُداوند تُوں اپنی پَیلی وِچ چَنگا بی نئیں سی بِیجیا فیر کَوڑے بُوٹے کِتّھوں آئے؟ اوس اوہناں نُوں آکھیا کِسے وَیری بندے ایہہ کمّ کِیتا اے۔ نوکر اوہنوں آکھن لگّے مرضی ہوئے تے اسی جا کے اوہناں نُوں اکٹّھا کریئے۔ اوس آکھیا پئی نا۔ کِتے ایویں نا ہوئے پئی کَوڑے بُوٹیاں نُوں کٹھِیاں کر دیاں تُسی کنک نُوں اوہدے نال ای پُٹ لوؤ۔ واڈھی تِیکر دوہاں نُوں رَلے مِلے وَدھن دیو۔ تے واڈھی دے ویلے مَیں وَڈّھن والیاں نُوں آکھاں گا پئی کَوڑے بُوٹیاں نُوں پہلاں اکٹّھا کرو تے ساڑن لئی اوہناں دِیاں بھریاں بنا دیو تے کنک نُوں میری کوٹھی وِچ جمع کرو۔ اوس اِک ہور تمثِیل دِتّی تے اوہناں نُوں آکھیا پئی اسمان دی بادشاہی اوس رائی دے دانے وانگر اے۔ جِہنُوں اِک بندے لے کے اپنی پَیلی وِچ بِیجیا۔ اوہ تے بے شک سبھناں بِیّاں نالوں نِکّا اے پر جدوں اوہ وَدّھ جاندا اے اوہ سبزیاں نالوں وَڈا ہو جاندا ایہہ۔ تے رُکھّ بن جاندا اے۔ ایتھوں تِیکر پئی اسمان دے پکھیرُو آ کے اوہدیاں ٹہنِیاں وِچ آہلنے بناندے نیں۔ اوس اوہناں نُوں اِک ہور تمثِیل آکھی پئی اسمان دی بادشاہی خمیر وانگر اے جِہنُوں اِک زنانی نے لے کے آٹے دے تِنّاں ٹوپیاں وِچ رَلا چھڈیا۔ ایتھوں تِیکر پئی سارا خمیر ہوگیا۔ ایہہ سارِیاں گلّاں یِسُوع تمثِیلاں نال لوکاں نُوں آکھیاں تے تمثِیل بِناں اوہناں نُوں کُجھ نا آکھیا۔ تاں جو جو کُجھ نبی دی راہِیں آکھیا گیا ہویا سی اوہ پُورا ہوئے پئی مَیں تمثِیلاں نال مُنھ کھولاں گا مَیں تے اوہ گلّاں مُنھوں کڈھاں گا جیہڑیاں دُنیا دے مُڈھوں لُکِیاں ہویاں سن۔ تَد اوہ بِھیڑ نُوں چھڈ کے گھر دے اندر گیا۔ تے اوہدے شاگِرداں اوہدے کول آ کے آکھیا پئی پَیلی دے کَوڑے بُوٹیاں دی تمثِیل سانُوں کھول کے دس۔ اوس جواب دِتّا۔ چنگے بی دا بِیجن والا اِبنِ آدم اے۔ تے پَیلی دُنیا اے جیہڑا چَنگا بی اے اوہ بادشاہی دے پُتر نیں۔ تے کَوڑے بُوٹے بُرے دے پُتر نے۔ تے اوہ وَیری جِس اوہناں نُوں بِیج دِتّا سی ابلیس اے۔ واڈھی دا ویلا زمانے دا اخِیر اے۔ تے وَڈّھن والے فرِشتے نیں۔ سو جیویں کَوڑے بُوٹے اکٹّھے کر کے اَگ وِچ پُھوکے جاندے نیں۔ اجیہا ای زمانے دے اخِیر نُوں ہوئے گا۔ اِبنِ آدم اپنیاں فرِشتیاں نُوں گھلّے گا تے اوہ اوہدی بادشاہی وِچوں سارِیاں ٹھوکر کھوان والِیاں شیواں تے بدکاراں نُوں اکٹّھیاں کرن گے۔ تے اوہناں نُوں بَھکھدی بھٹّھی وِچ سُٹ دین گے۔ اوتھے رونا تے کچیچیاں وٹنا ہوئے گا۔ تَد نیک لوک اپنے باپ دی بادشاہی وِچ سُورج وانگُوں چمکن گے۔ جِہدے کنّ ہون سو سُنے۔ اسمان دی بادشاہی اِک خزانے وانگُوں اے جیہڑا پَیلی وِچ لُکایا ہویا سی۔ تے اوہنوں کِسے شخص لَبّھ کے لُکا رکھیا۔ تَد خُوشی دے مارے اوس اپنا سبھ کُجھ جا کے ویچ دِتّا تے اوس پَیلی نُوں مُل لے لیا۔ فیر اسمان دی بادشاہی اِک بیپاری وانگُوں اے جیہڑا چنگے موتِیاں نُوں لَبّھدا پِھردا سی۔ جد اوہنوں اِک وڈّے مُل دا موتی لَبّھ گیا تَد اوس اپنا سبھ کُجھ ویچیا تے اوہنوں مُل لے لیا۔ فیر اسمان دی بادشاہی اوس جال وانگُوں اے جیہڑا سمُندر وِچ سُٹّیا گیا تے سارِیاں جِنساں اکٹّھیاں کر لیاؤندا اے۔ جد اوہ بھر گیا تَد اوہناں نُوں کنڈھے اُتّے لیاندا تے بَیہہ کے چَنگیاں نُوں بھانڈیاں وِچ جمع کِیتا تے نکمّیاں نُوں سُٹ چھڈیا۔ زمانے دے اخِیر وِچ ایسے طرح ہوئے گا۔ فرِشتے نِکلن گے تے بُریاں نُوں نیکاں توں اَڈ کرن گے۔ تے اوہناں نُوں بَھکھدی بھٹّھی وِچ سُٹ دین گے اوتھے رونا تے کچیچیاں وٹنا ہوئے گا۔ ایہہ سارِیاں گلّاں تُسی سمجھ لئیاں نیں؟ اوہناں اوہنوں آکھیا ہاں۔ اوس اوہناں نُوں آکھیا ایس کر کے ہر اِک فقِیہ جیہڑا اسمان دی بادشاہی دا شاگِرد بن گیا اے اوہ اوس گھر دے مالک وانگر اے جیہڑا اپنے خزانے وِچوں نَوِیاں تے پرانیاں شیواں کڈھ لیاؤندا اے۔ تے ایویں ہویا پئی جد یِسُوع ایہہ تمثِیلاں مُکائِیاں تَد اوہ اوتھوں ٹُرپیا۔ تے اپنے وطن وِچ آ کے اوہ اوہناں دے عبادت خانے وِچ اجیہی تعلِیم دیندا سی پئی اوہ حَیران ہوگئے تے آکھن لگّے۔ پئی ایہنوں ایہہ دانائی تے ایہہ کراماتاں کِتّھوں آگئیاں؟ ایہہ ترکھان دا پُتر نئیں اے۔ تے اوہدی ماں نُوں مریم نئیں آکھدے؟ تے اوہدے بھرا یعقُوب تے یُوسف تے شمعُون تے یہُوداہ نئیں۔ تے اوہدیاں سارِیاں بھیناں ساڈے کول نئیں؟ فیر اوہنوں ایہہ سبھ کُجھ کِتّھوں آگیا؟ تے اوہناں اوہدے کولوں ٹھوکر کھادِی پر یِسُوع اوہناں نُوں آکھیا پئی نبی اپنے وطن تے اپنے گھر دے بِناں کِتے بے قدر نئیں اے۔ تے اوس اوہناں دی بے اِیمانی دے سبّب اوتھے بتھیریاں کراماتاں نا کِیتیاں۔ اوس ویلے چوتھائی مُلک دے حاکم ہیرودیس یِسُوع دی مشہُوری سُنی۔ تے اوس اپنے نَوکراں نُوں آکھیا پئی ایہہ یُوحنّا بپتِسمہ دین والا اے۔ اوہ مُردیاں وِچوں جی اُٹھیا اے تے ایس لئی ایہہ کراماتاں اوہدے ہتھّوں کِیتیاں جاندِیاں نیں۔ کیوں جو ہیرودیس اپنے بھرا فِلپُّس دی بیوی ہیرودیاس دے سبّب یُوحنّا نُوں پھڑ کے بَدّھا تے قید وِچ پا دِتّا سی۔ کیوں جو یُوحنّا اوہنوں آکھیا سی پئی اوہنوں رکھنا تیرے لئی روا نئیں اے۔ تے جد اوہ چاہندا سی پئی اوہنوں مروا سُٹّاں اوہ لوکاں توں ڈریا کیوں جو اوہ اوہنوں نبی مَن دے سن۔ پر جد ہیرودیس دا جنم دِن آیا تَد ہیرودیاس دی دِھی سبھناں دے اگّے نچ کے ہیرودیس نُوں خُوش کِیتا۔ اوس ویلے اوس سَونہہ کھا کے جو کُجھ اوہ منگے سو ای دین دا اِقرار کِیتا۔ اوس اپنی ماں دی چُک نال آکھیا پئی مَینُوں ایتھے تھال وِچ یُوحنّا بپتِسمہ دین والے دا سِر منگوا دے۔ تے بادشاہ اُداس ہویا۔ پر اپنیاں سَونہاں دے سبّب تے اوہناں لوکاں کر کے جیہڑے اوہدے نال بَیٹھے ہوئے سن دین دا حُکم کِیتا۔ تے بندہ گھل کے قیدخانے وِچ یُوحنّا دا سِر وَڈّھوایا۔ تے اوہدا سِر تھال وِچ لیاندا گیا تے کُڑی نُوں دِتّا گیا۔ تے اوہ اپنی ماں کول لے آئی۔ تے اوہدے شاگِرداں آ کے لوتھ نُوں چُک لیا تے دَفنا دِتّا تَد جا کے یِسُوع نُوں خبر دِتّی۔ جد یِسُوع ایہہ سُنیا تَد اوہ اوتھوں بیڑی اُتّے چڑھ کے اِک اُجاڑ تھاں وِچ وکھرا ٹُر گیا تے لوک ایہہ سُن کے شہراں وِچ پَیدل اوہدے مگر ٹُر پئے۔ تے اگانہہ نِکل کے اوس بڑی بِھیڑ ویکھی۔ تے اوہناں اُتّے ترس کھادا تے اوہناں دے روگِیاں نُوں چَنگا کِیتا۔ تے جیویں شام ہوئی شاگِرداں اوہدے کول آ کے آکھیا۔ ایہہ تھاں اُجاڑ ایہہ تے ویلا ہُن لنگھ گیا اے۔ لوکاں نُوں گھل دے پئی پِنڈاں وِچ جا کے اپنے لئی کھانا مُل لین۔ پر یِسُوع نے اوہناں نُوں آکھیا جان دی کوئی لوڑ نئیں اے۔ تُسی ای اوہناں نُوں کھان نُوں دیو۔ پر اوہ اوہنوں آکھن لگّے پئی ایتھے ساڈے کول نِریاں پنج روٹِیاں تے دو مچھّیاں نیں۔ اوس آکھیا اوہناں نُوں ایتھے میرے کول لیاؤ۔ تے لوکاں نُوں گھا اُتّے بَہہ جان دا حُکم دِتّا تَد اوس اوہناں پنجاں روٹِیاں تے دو مچھّیاں نُوں لے لیا تے اسمان ولّ ویکھ کے برکت منگی۔ تے توڑ کے روٹِیاں شاگِرداں نُوں دِتّیاں۔ تے شاگِرداں لوکاں نُوں دِتّیاں۔ تے ساریاں کھادِیاں تے رَجّ گئے تے وادُھو ٹُکّراں دِیاں باراں بھریاں ہویاں ٹوکریاں چُکیاں۔ تے زنانِیاں تے بالاں دے بِناں کھان والے پنج ہزار بندے سن۔ تے اوسے ویلے اوس شاگِرداں نُوں پَکّی کِیتی پئی بیڑی اُتّے چڑھ کے جد تِیکر اوہ آپ لوکاں نُوں وِداع نا کر لَئے اگّے اگّے پار جان۔ تے جد اوس لوکاں نُوں ٹور دِتّا سی تے اوہ آپ اکلّا ای دُعا منگن لئی پہاڑ اُتّے چڑھ گیا۔ تے جد شام پَے گئی اوہ اوتھے اکلّا سی۔ پر بیڑی سمُندر وِچ اَپڑ کے ٹَھلّاں نال ڈول دی سی۔ کیوں جو وَا سامھنی سی۔ تے رات دے چوتھے پَہر اوہ سمُندر دے اُتّے ٹُردا ٹُردا اوہناں دے کول آیا۔ تے جد شاگِرداں اوہنوں سمُندر دے اُتّے ٹُردیاں ویکھیا تَد ٹھٹھنبر کے آکھن لگّے پئی ایہہ بُھوتنا اے تے ڈر دے نال چِچلان لگّے۔ پر اونویں یِسُوع اوہناں نال کُو پیا تے آکھیا خاطرجمع رکھو۔ مَیں آں ناں ڈرو۔ تَد پطرس اوہنوں جواب دِتّا پئی خُداوندا جے تُوں ایں تے حُکم کر پئی مَیں پانی دے اُتّوں دی تیرے کول آ جاواں۔ اوس آکھیا آجا۔ تَد پطرس بیڑیوں اُتر کے یِسُوع کول جان لئی پانی اُتّے ٹُرپیا۔ پر وَا ویکھ کے ڈریا تے جد ڈُبن لگّا تَد چچلا کے آکھیا خُداوند مَینُوں بچا لے۔ جھٹ یِسُوع ہتّھ وَدّھا کے اوہنوں پھڑ لیا۔ تے اوہنوں آکھن لگّا اوہ تھوڑے اِیمان والیا تُوں کاہِنُوں شک کِیتا؟ تے جد اوہ بیڑی اُتّے چڑھ بَیٹھے تے وَا کھلو گئی۔ تے جیہڑے لوک بیڑی وِچ سن اوہنوں سجدہ کر کے آکھن لگّے سَچ مُچ تُوں خُدا دا پُتر ایں۔ تے اوہ پار لنگھ کے گنّیسرت دی زمین نُوں آئے۔ تے اوس تھاں دے لوکاں اوہنوں سِہان کے اوس سارے علاقے وِچ اکھوا گھلّیا۔ تے ساریاں روگِیاں نُوں اوہدے کول لیاندا۔ تے اوہناں اوہدی مِنّت کِیتی پئی نِرا اوہدے کپڑے دا پلّا چُھو لین۔ تے جِنّیاں چُھوئیا سارے چنگے ہو گئے۔ تَد فریسی تے فقِیہ یِسُوع کول یرُوشلیِموں آ کے آکھن لگّے۔ تیرے شاگِرد وڈّیاں دی رِیت رِوایت نُوں کاہِنُوں ٹال دیندے نیں؟ پئی روٹی کھان دے ویلے ہتّھ نئیں دھوندے۔ اوس اوہناں نُوں جواب دِتّا۔ تُسی وی کاہِنُوں اپنی رِیت رِوایت دے سبّب خُدا دے حُکم نُوں ٹال دیندے اوہ۔ کیوں جو خُدا حُکم دے کے آکھیا پئی ماں پئیو دی عِزّت کر۔ تے جیہڑا پئیو یا ماں نُوں مَندا بولے اوہ جانوں ماریا جاوے۔ پر تُسی آکھدے ہو پئی جیہڑا کوئی پئیو یا ماں نُوں آکھے پئی جو کُجھ مَیتھوں تینُوں فائدہ سی سو خُدا دی نذر ہوگیا۔ اوہ بے شک اپنے باپ دی عِزّت نا کرے۔ ایس لئی تُساں اپنی رِیت رِوایت دے سبّب خُدا دے کلام نُوں رَدّ کِیتا۔ مکّارو! یسعیاہ تُہاڈے حق وِچ کنّی چنگی نبُوّت کِیتی۔ پئی ایہہ لوک بُلّاں نال میری عِزّت کر دے نیں پر اوہناں دا دِل مَیتھوں دُور اے۔ اوہ بے فائدہ میری عبادت کر دے نیں جیہڑے بندیاں دیاں حُکماں دی تعلِیم دیندے نیں۔ تے اوس لوکاں نُوں کول سَدّ کے اوہناں نُوں آکھیا۔ گلّ سُنو۔ تے سمجھو۔ جیہڑی شے مُنھ وِچ جاندی اے بندے نُوں پلِیت نئیں کر دی۔ پر اوہ جیہڑی مُنھوں باہر آؤندی اے اوہو ای بندے نُوں پلِیت کر دی اے۔ تَد اوہدے شاگِرد نیڑے آ کے اوہنوں آکھن لگّے تینُوں پتا اے پئی فرِیسیاں نیں ایہہ گلّ سُن کے ٹھوکر کھادِی اے؟ اوس جواب دِتّا پئی ہر اِک بُوٹا جیہڑا میرے اسمانی باپ نئیں لایا سو جڑاں سَنے پُٹیا جائے گا۔ اوہناں نُوں جان دیو۔ اوہ تے اَنھیاں دے اَنھے راہ دسن والے نیں۔ تے جے اَنھا اَنھے نُوں راہ دسے تے دونویں ٹوئے وِچ ڈِگّ پَین گے۔ تے پطرس اگّوں اوہنوں آکھیا سانُوں ایس تمثِیل دا مطلب دس۔ اوس آکھیا بھلا تُسی وی اجے انجان ہو؟ تُہانوں ایہہ معلُوم نئیں پئی سبھ کُجھ جو مُنھ وِچ جاندا اے سو ڈِھڈ وِچ پَیندا تے رُوڑی اُتّے سُٹّیا جاندا اے؟ پر جیہڑیاں گلّاں مُنھوں باہر آؤندیاں نیں سو دِل وِچوں نِکل دِیاں نیں۔ تے اوہ ای بندے نُوں پلِیت کر دیاں نیں۔ کیوں جو بُرے خیال۔ خُون۔ زناکارِیاں۔ حرامکاریاں۔ چوریاں۔ جُھوٹھی گواہِیاں۔ کُفر۔ دِلوں ای نِکل دے نیں۔ ایہو کمّ بندے نُوں پلِیت کر دے نیں پر اَن دھوتی ہتّھِیں روٹی کھانی بندے نُوں پلِیت نئیں کر دی۔ تے یِسُوع اوتھوں ٹُر کے صُور تے صَیدا دے علاقے وِچ گیا۔ تے ویکھو اِک کِنعانی عورت اوس پاسے ولّوں آ کے چچلا کے آکھن لگّی پئی اَے خُداوند داؤد دے پُتر میرے اُتّے رَحم کر۔ میری دِھی دا بھوت چمبڑن دے سبّب بُرا حال اے۔ پر اوس اوہنوں کُجھ جواب نا دِتّا۔ تَد اوہدے شاگِرداں نیں اوہدے کول آ کے عرض کِیتی پئی اوہنوں وِداع کر کیوں جو اوہ ساڈے مگر کُرلاؤندی اے۔ پر اوس جواب دِتّا۔ مَیں اِسرائیل دے گھر دِیاں گواچائیاں ہویاں بھیڈاں دے باہجوں ہور کِسے ولّ نئیں گھلّیا گیا۔ پر اوہ آئی تے اوہدے اگّے سجدہ کر کے آکھیا۔ خُداوند میری مدد کر۔ تَد اوس جواب دِتّا بچّیاں دی روٹی لے کے کُتّیاں اگّے سُٹّنی چنگی نئیں۔ اوس آکھیا ہاں خُداوند پر کُتّے وی اپنے مالکاں دے میز توں ڈِگّے ہوئے بھورے بھارے کھالَیندے نیں۔ تَد یِسُوع اوہنوں جواب دِتّا۔ اَے بی بی تیرا اِیمان بڑا اے جو جیویں تُوں چاہنی ایں تیرے لئی تویں ای ہوئے۔ اوسے گھڑی اوہدی دِھی چنگی بھلی ہوگئی۔ فیر یِسُوع اوتھوں ٹُرکے گلِیل دے سمُندر دے نیڑے آیا۔ تے پہاڑ اُتّے چڑھ کے اوتھے بَہہ گیا۔ تے بتھیرے لوک لَنگیاں اَنھیاں گُونگیاں ٹُنڈیاں تے ہور بتھیریاں بِیماراں نُوں اپنے نال لے کے اوہدے کول آئے۔ تے اوہناں نُوں اوہدے پیراں کول سُٹّیا۔ تے اوس اوہناں نُوں چَنگا کِیتا۔ ایتھوں توڑی پئی لوک ویکھ کے حَیران ہوگئے۔ پئی گُونگے بولدے نیں۔ ٹُنڈے چنگے ہوندے نیں۔ تے لنگے ٹُردے پِھردے نیں۔ تے اَنھے سُجاکھے ہو جاندے نیں۔ تے اوہناں اِسرائیل دے خُدا دی وڈیائی کِیتی۔ تَد یِسُوع اپنے شاگِرداں نُوں اپنے کول سَدّ کے آکھیا مَینُوں لوکاں اُتّے ترس آؤندا اے کیوں جو اوہ تِنّاں دِناں توں میرے نال نیں۔ تے اوہناں دے کول کھان نُوں کُجھ نئیں تے مَیں اوہناں نُوں بُھکھیاں ٹورنا نئیں چاہندا۔ کِتے اجیہا نا ہوئے پئی رہ وِچ ای ماندے پَے جان۔ تے شاگِرداں اوہنوں آکھیا۔ اُجاڑ وِچ اینِیاں روٹِیاں کِتّھوں سانُوں ہتّھ آؤن پئی ایڈی بِھیڑ نُوں رجایئے۔ تَد یِسُوع اوہناں نُوں آکھیا تُہاڈے کول کِنیاں روٹِیاں نیں؟ اوہناں آکھیا سَتّ نالے کُجھ نِکّیاں مچھّیاں۔ تے اوس لوکاں نُوں زمین اُتّے بیہن دا حُکم دِتّا۔ تے اوس اوہناں ستّاں روٹِیاں تے مچھّیاں نُوں لیا۔ تے شُکر کر کے توڑیاں۔ تے شاگِرداں نُوں دِتّیاں۔ تے شاگِرداں لوکاں نُوں۔ تے اوہناں سبھناں نیں کھادا تے رَجّ گئے۔ تے وَدھیاں ہویاں ٹُکّراں دے بھرے ہوئے سَتّ ٹوکرے چُکے۔ تے کھاون والے بِناں بُڈِّھیاں تے بالاں دے چار ہزار مرد سن۔ تے خلقت نُوں وِداع کر کے اوہ بیڑی اُتّے چڑھ گیا۔ تے مگدَن دے علاقے وِچ آیا۔ فیر فرِیسیاں تے صدوقیاں آ کے اوہدے ازمان لئی اوہدے اگّے عرض کِیتی پئی سانُوں اسمانوں اِک نِشان وکھا۔ پر اوس اوہناں نُوں جواب دِتّا پئی ”جد شام پَیندی اے تُسی آکھدے ہو کھرا ہو جائے گا۔ کیوں جو اسمان لال اے۔“ تے سرگھی ویلے آکھدے ہو۔ ”پئی اَج ہنیری وگے گی کیوں جو اسمان لال تے گہرا اے۔“ اسمان دی ڈول دی جاچ کرنی تُہانوں آؤندی اے پر سمیاں دے نِشان تُسی معلُوم نئیں کر سکدے؟ بُرے تے زناکار لوک نِشان لبّھدے نیں۔ پر ایہناں نُوں یُوناہ دے نِشان دے سِوا کوئی نِشان دِتّا نا جائے گا تے اوہ اوہناں نُوں چھڈ کے ٹُرگیا۔ تے شاگِرد پار پہنچے تے روٹی نال لینی بُھل گئے سن۔ تے یِسُوع نے اوہناں نُوں آکھیا خبردار فرِیسیاں تے صدوقیاں دے خمیر توں ہُشیار رہو۔ تے اوہ آپو وِچ وچار کر کے آکھن لگّے اسی روٹی جو نئیں لیائے۔ پر یِسُوع ایہہ معلُوم کر کے آکھیا اَے تھوڑے اِیمان والیو تُسی کیوں آپو وِچ وچار کر دے ہو پئی روٹی اسی نال نئیں لیائے۔ اجے تُسی نئیں سمجھدے؟ تے پنجاں ہزاراں تے پنجاں روٹِیاں دی گلّ تُہانوں یاد نئیں نالے ایہہ پئی کِنیاں ٹوکریاں تُساں چُکیاں سن؟ تے نا اوہناں چَوہاں ہزاراں دِیاں ستّاں روٹِیاں دی گلّ۔ تے تُساں کِنے ٹوکرے چُک لَئے سن۔ تُسی کیوں نئیں سمجھدے ہو پئی مَیں تُہاڈے نال روٹِیاں دی گلّ نئیں کِیتی سی؟ پر فرِیسیاں تے صدوقیاں دے خمیر توں ہُشیار رہو۔ تَد اوہناں نُوں سمجھ آئی پئی اوس روٹی دے خمیر توں نئیں پر فرِیسیاں تے صدوقیاں دی تعلِیم توں ہُشیار رہن نُوں آکھیا سی۔ تے یِسُوع نے قَیصریہ فِلپّی دے علاقے وِچ آ کے اپنے شاگِرداں نُوں پُچھیا پئی لوک کِیہ آکھدے نیں پئی اِبنِ آدم کون اے؟ اوہ آکھن لگّے کئی تے یُوحنّا بپتِسمہ دین والا آکھدے نیں تے کئی ایلیّاہ تے ہور یِرمیاہ یا نبیاں وِچوں کوئی اِک۔ اوہ اوہناں نُوں آکھن لگّا پر تُسی کِیہ آکھدے ہو پئی مَیں کون آں؟ شمعُون پطرس نے جواب دے کے آکھیا۔ تُوں تے مسِیح ایں زِندہ خُدا دا پُتر۔ یِسُوع اوہنوں جواب دے کے آکھیا دھنّ ایں تُوں شمعُون یُوناہ دے پُتر کیوں جو جِسم تے لہو ایہہ گلّ تینُوں نئیں دسی پر میرے باپ جیہٹرا اسماناں وِچ اے۔ تے مَیں وی تینُوں آکھنا آں پئی تُوں پطرس ایں تے مَیں ایس پتّھر اُتّے اپنی کلِیسیا بناواں گا تے پاتال دا اوہدے اُتّے وَس نا چلّے گا۔ مَیں اسمان دی بادشاہی دِیاں کُنجیاں تینُوں دیاں گا۔ تاں جو کُجھ تُوں زمین اُتّے بنھے گا اسمان وِچ بَدّھا جائے گا تاں جو کُجھ تُوں زمین اُتّے کھولیں گا اسمان وِچ کھولیا جائے گا۔ تَد اوس شاگِرداں نُوں پَکّی کِیتی پئی کِسے نُوں نا آکھن پئی اوہ مسِیح اے۔ اوس ویلے توں یِسُوع اپنے شاگِرداں نُوں دسن لگّا پئی ضرُور اے۔ پئی مَیں یرُوشلِیم نُوں جاواں تے بزُرگاں تے سردار کاہِناں تے فقِیہاں کولوں بُہت دُکھ جھلّاں تے ماریا جاواں تے ترِیجے دِہاڑے جی اُٹھاں۔ تَد پطرس اوہنوں اِک پاسے لے جا کے جِھڑکن لگّا تے آکھیا اَے خُداوندا تیری خَیر ہوئے۔ ایہہ تیرے نال کدی نا ہوئے گا۔ اوس پرت کے پطرس نُوں آکھیا اوہ شیطاناں پِچّھے ہَٹ تُوں میرے لئی ٹھوکر ایں کیوں جو تُوں خُدا دی نئیں پر بندیاں دِیاں گلّاں دا دھیان رکھنا ایں۔ تَد یِسُوع نے اپنے شاگِرداں نُوں آکھیا۔ جے کوئی میرے پِچّھے آؤنا چاہے تے اپنے آپ دا اِنکار کرے تے اپنی صلِیب چُک کے میرے مگر ٹُر پئے۔ کیوں جو جیہڑا کوئی اپنی جان بچانی چاہے اوہ اوہنوں گوائے گا پر جیہڑا کوئی میرے لئی اپنی جان گوا دیوے اوہ اوہنوں لَبھّے گا۔ بندے نُوں کِیہ فائدہ اے جے ساری دُنیا نُوں کماوے تے اپنی جان نُوں گوا دیوے؟ تے بندہ اپنی جان دے بدلے کِیہ دیوے گا؟ کیوں جو اِبنِ آدم اپنے باپ دے جلال وِچ اپنے فرِشتیاں دے نال آوے گا۔ تے اوس ویلے ہر اِک نُوں اوہدی کرنی دے سبّبوں پَھل دیوے گا۔ مَیں تُہانوں سَچ آکھنا آں پئی ایہناں وِچوں جیہڑے ایتھے کھلوتے ہوئے نیں کئی نیں جیہڑے مَوت دا سواد نا لین گے۔ جد تِیکر اِبنِ آدم نُوں اوہدی بادشاہی وِچ آؤندیاں نا ویکھ لین گے۔ تے چھِئیاں دِناں پِچّھوں یِسُوع پطرس تے یعقُوب تے اوہدے بھرا یُوحنّا نُوں نال لیا۔ تے اوہناں نُوں اِک اُچّے پہاڑ اُتّے وکھری تھاں لے گیا۔ تے اوہدا رُوپ اوہناں دے سامھنے بدل گیا۔ تے اوہدا مُنھ سُورج وانگُوں چمکیا۔ تے اوہدے کپڑے چانن وانگُوں چِٹّے ہوگئے۔ تے ویکھو مُوسیٰ تے ایلیّاہ اوہدے نال گلّاں کر دے اوہناں نُوں وکھالی دِتّے۔ تَد پطرس نیں یِسُوع نُوں آکھیا خُداوندا ساڈے لئی ایتھے رہنا چَنگا اے جے تُوں چاہیں تے مَیں تِنّ ڈیرے ایتھے بناواں۔ اِک تیرے لئی تے اِک مُوسیٰ لئی۔ تے اِک ایلیّاہ لئی۔ اوہ تے اجے پیا بول دا ای سی تے ویکھو اِک نُورانی بدّل اوہناں اُتّے چھاں کِیتی۔ تے بدّل وِچوں اِک اواز ایہہ آکھدی آئی پئی ”ایہہ میرا پیارا پُتر اے جِس توں مَیں خُوش آں۔ اوہدی سُنو۔“ تے شاگِرد ایہہ سُن کے مُنھدڑے مُنھ ڈِگّ پئے تے بُہت ڈر گئے۔ تَد یِسُوع نیڑے آ کے اوہناں نُوں چُھوئیا تے آکھیا اُٹھو تے نا ڈرو۔ اوہناں اپنیاں اَکھّیاں چُک کے ہور کِسے نُوں نئیں پر یِسُوع نُوں اکلّا ویکھیا۔ جد اوہ پہاڑوں پئے اُتر دے سن یِسُوع اوہناں نُوں حُکم کِیتا پئی جد تِیکر اِبنِ آدم مُردیاں وِچوں جی نا اُٹھے۔ جو کُجھ تُساں ویکھیا اے اوہدا ذِکر کِسے اگّے نا کرنا۔ تے اوہدے شاگِرداں نیں اوہنوں پُچھیا فیر فقِیہ کیوں آکھدے نیں پئی ایلیّاہ دا پہلاں آؤنا ضرُور اے؟ اوس جواب دِتّا ایلیّاہ تے ٹھیک آوے گا تے سبھ کُجھ فیر بحال کرے گا۔ پر مَیں تُہانوں آکھنا آں پئی ایلیّاہ تے ہُن آوی گیا تے اوہناں اوہنوں نئیں سیانیاں۔ سگوں جو کُجھ دِل کِیتا سو اوہدے نال کِیتا۔ ایسے طرح اِبنِ آدم اوہناں دی ہتّھِیں دُکھ پاوے گا۔ تَد شاگِرداں نیں سمجھیا پئی اوس ساڈے نال یُوحنّا بپتِسمہ دین والے دی گلّ کِیتی اے۔ تے جد اوہ بِھیڑ دے کول اَپڑے اِک بندہ اوہدے کول آیا تے اوہدے اگّے گوڈے نواکے آکھن لگّا۔ خُداوند۔ میرے پُتر اُتّے رَحم کر کیوں جو اوہنوں مِرگی پَیندی اے تے اوہنوں بڑی تکلیف ہوندی اے۔ اوہ تے بہتیری واری اَگ وِچ ڈِگّ پَیندا اے۔ تے پانی وِچ بہتیری واری۔ تے مَیں تیرے شاگِرداں کول اوہنوں لیایا ساں پر اوہ اوہنوں چَنگا نئیں کر سکے۔ تَد یِسُوع نے جواب دِتّا۔ اَے بے اِیمان اَڑبنگی نسل مَیں کدوں تِیکر تُہاڈے نال ہوواں گا مَیں کدوں تِیکر تُہاڈی برداشت کراں گا؟ اوہنوں ایتھے میرے کول لیاؤ۔ تے یِسُوع اوہنوں جِھڑکیا۔ تے بدرُوح اوہدے وِچوں نِکل گئی۔ تے نوکر اوسے گھڑیوں چَنگا ہوگیا۔ تَد شاگِرداں نیں یِسُوع کول وَکھریاں ہو کے آکھیا۔ اسی اوہنوں کیوں کڈھ نا سکے؟ تے اوس اوہناں نُوں آکھیا اپنے اِیمان دی کمزوری دے سبّب کیوں جو مَیں تُہانوں ٹھیک آکھنا آں پئی جے تُہاڈا اِیمان رائی دے دانے جِنّاں وی ہوئے تے تُسی ایس پہاڑ نُوں آکھو گے۔ ”ایدھروں ہَٹ کے اوتھے ٹُرجا“ تے اوہ ٹُر جائے گا۔ تے تُہاڈے اگّے کوئی کمّ اَنہونا نا ہوئے گا۔ [پر ایہہ قِسم دُعا دے بِناں ہور کِسے طرح نئیں نِکل سکدی۔] تے جد اوہ گلِیل وِچ رہندے سن یِسُوع اوہناں نُوں آکھیا اِبنِ آدم بندیاں دے حوالے کِیتا جائے گا۔ تے اوہ اوہنوں مار سُٹّن گے تے ترِیجے دِہاڑے اوہ اُٹھایا جائے گا۔ تَد اوہ بُہت اُداس ہوئے۔ تے جد اوہ کَفرنحُوم وِچ آئے۔ ادھا مِثقال لین والِیاں پطرس نُوں آکھیا۔ تُہاڈا اُستاد ادھا مِثقال نئیں دیندا؟ اوہ آکھن لگّا آہو دیندا اے تے جد اوہ گھر آیا یِسُوع اگّوں ای اوہنوں آکھیا شمعُون تُوں کِیہ سمجھنا ایں پئی دُنیا دے بادشاہ کِنّاں کولوں چُنگی یا محصُول لَیندے نیں؟ اپنیاں پُتراں کولوں یا پرایاں کولوں۔ جد اوس آکھیا پئی پرایاں کولوں۔ یِسُوع نیں اوہنوں آکھیا۔ فیر تے پُتر مُعاف ہوئے۔ پر ایس کر کے پئی ساڈے توں اوہناں نُوں ٹھوکر نا لگّے تُوں جا کے سمُندر وِچ کُنڈی سُٹ تے جیہڑی مچّھی پہلاں نِکلے تُوں پَھڑلَے۔ تے اوہدا مُنھ کھول تے تینُوں اِک مِثقال لَبھّے گا۔ اوہنوں لے کے میرے تے اپنے واسطے اوہناں نُوں دے۔ اوسے گھڑی شاگِرد یِسُوع کول آ کے آکھن لگّے پئی اسمان دی بادشاہی وِچ ساریاں نالوں وَڈیرا کون اے۔ تَد اوس اِک مُنڈا سدّیا تے اوہنوں اوہناں دے وِچکار کھلا کِیتا۔ تے آکھیا مَیں تُہانوں سَچ آکھنا آں پئی جے تُسی نا مُڑو تے بچّیاں وانگُوں نا بنو تُسی اسمان دی بادشاہی وِچ کدی نا وڑو گے۔ سو جیہڑا کوئی اپنے آپ نُوں ایس بال وانگُوں نِیویاں کرے سو ای اسمان دی بادشاہی وِچ وَڈیرا اے۔ تے جیہڑا کوئی ایہو جیہے بال نُوں میرے ناں دے سبّب کر کے قبول کرے سو مَینُوں قبول کر دا اے۔ پر جیہڑا کوئی ایہناں نِکّیاں وِچوں جیہڑے میرے اُتّے اِیمان لیاؤندے نیں۔ اِک نُوں ٹھوکر لائے۔ اوس شخص دے لئی چَنگا ایہو اے پئی چکّی دا پُڑ اوہدے گلّ وِچ بَدّھا جائے تے اوہ سمُندر دے ڈُونگھے تھاں ڈوبیا جاوے۔ افسوس دُنیا اُتّے ٹھوکراں دے سبّب۔ ٹھوکراں دا لگناں تے ضرُور اے پر افسوس اوس بندے اُتّے جِہدی راہِیں ٹھوکر لگدی اے۔ تے جے تیرا ہتّھ یا تیرا پَیر تینُوں ٹھوکر لائے اوہنوں وَڈّھ کے اپنے کولوں سُٹ دے۔ ٹُنڈیاں یا لَنگیاں ہو کے زِندگی وِچ داخل ہونا تیرے لئی ایس نالوں چَنگا اے پئی تُوں دو ہتّھ یا دو پَیر ہوندیاں ہمیشہ دی اَگ وِچ سُٹّیا جاویں۔ تے جے تیری اَکھ تینُوں ٹھوکر لائے اوہنوں کڈھ کے اپنے کولوں سُٹ دے۔ کانیاں ہو کے زِندگی وِچ داخل ہونا تیرے لئی ایس نالوں چَنگا اے پئی دو اَکھّیاں ہوندیاں تُوں اَگ دے دوزخ وِچ سُٹّیا جاویں۔ خبردار ایہناں نِکّیاں وِچوں کِسے نُوں ماڑا نا جانو۔ کیوں جو مَیں تُہانوں آکھنا آں۔ پئی اوہناں دے فرِشتے اسماناں وِچ ہمیشہ میرے باپ دا مُنھ جیہڑا اسماناں وِچ اے ویکھدے نیں۔ [کیوں جو اِبنِ آدم گواچے ہویاں نُوں لَبّھن تے بچان آیا اے۔] تُسی کِیہ سمجھدے اوہ جے کر کِسے بندے دِیاں سَو بھیڈاں ہون تے اوہناں وِچوں اِک گواچ جاوے اوہ اوہناں نڑنّویاں نُوں چھڈ کے تے پہاڑاں اُتّے جا کے اوس گواچی ہوئی نُوں نا لَبھّے گا؟ تے جے کر اجیہا ہوئے پئی اوہ اوہنوں لَبّھ لیاوے مَیں تُہانوں سَچ آکھنا آں پئی اوسے دے لئی اوہ بوہتا خُوش ہوندا اے۔ اوہناں نڑنّویاں نالوں جیہڑیاں گواچیاں نئیں سن۔ ایسے طرح تُہاڈے باپ دی جیہڑا اسماناں اُتّے اے مرضی نئیں اے پئی ایہناں نِکّیاں وِچوں اِک وی برباد ہوئے۔ تے جے تیرا بھرا تیرا گُناہ کرے تُوں جا اوہدے نال ہو کے اوہنوں وَکھریاں سمجھا۔ جے کر اوہ تیری سُنے تے تُوں اپنے بھرا نُوں کھٹ لیا۔ پر جے کر اوہ تیری نا سُنے تے اپنے نال ہور اِک یا دو لے تاں جو دو یا تِنّ گواہاں دے مُنھوں ہر اِک گلّ ثبُوت ہو جائے۔ تے جے کر اوہ اوہناں دی گلّ نا مَنّے تے کلِیسیا نُوں آکھ۔ پر جے کلِیسیا دی وی نا مَنّے تے اوہ تیرے لئی اجیہا ہوئے جِہیا کوئی غیر قوم یا محصُولیا۔ مَیں تُہانوں سَچ آکھنا آں پئی جو کُجھ تُسی زمین اُتّے بَنّھو گے سو اسمان وِچ بَدّھا جائے گا۔ تاں جو کُجھ تُسی زمین اُتّے کھولو گے سو اسمان وِچ کھولیا جائے گا۔ فیر مَیں تُہانوں آکھنا آں جے تُہاڈے وِچوں زمین اُتّے دو کِسے کمّ واسطے رَل کے دُعا منگن گے اوہ میرے باپ ولّوں جیہڑا اسماناں وِچ اے اوہناں دے لئی کِیتا جائے گا۔ کیوں جو جِتّھے دو یا تِنّ میرے ناں اُتّے اکٹّھے نیں اوتھے مَیں اوہناں دے وِچ آں۔ تَد پطرس نیں کول آن کے اوہنوں آکھیا خُداوندا میرا بھرا کِنی واری میری تقصِیر کر دا جاوے تے مَیں اوہنوں مُعاف کراں؟ سَتّ واری تِیکر؟ یِسُوع اوہنوں آکھیا مَیں سَتّ واری تِیکر نئیں آکھدا پر ستہراں دی سَتّ واری تِیکر۔ کیوں جو اسمان دی بادشاہی اِک بادشاہ وانگُوں اے جیہڑا اپنے نَوکراں توں لیکھا لینا چاہندا سی۔ جد لیکھا لین لگّا اِک نُوں اوہدے کول لے آندا جیہڑا دَس ہزار توڑیاں دا قرضئی سی۔ پر دین نُوں اوہدے پلّے کُجھ نئیں سی۔ اوہدے مالک حُکم دِتّا پئی اوہ تے اوہدی بیوی تے اوہدے بال بچّے تے سبھ جو کُجھ اوہدا ہوئے ویچیا جائے تے قرض بھر لیا جائے۔ تَد اوس نوکر نے پَیرِیں پَے کے مَتّھا ٹیکیا تے آکھیا خُداوندا مَینُوں مُہلت دے تے مَیں تیرا سبھ کُجھ بھر دیاں گا۔ اوس نوکر دے مالک نُوں رَحم آیا تے اوس اوہنوں چھڈ دِتّا تے قرض وی اوہنوں بخش دِتّا۔ پر جد اوہ نوکر باہر نِکلیا تے اوہدے نال دیاں نَوکراں وِچوں اِک اوہنوں لَبّھ پیا جیہڑا اوہدا سَو دینار دا قرضدار سی۔ اوس اوہنوں پھڑ کے اوہدا سَنگھ گُھٹیا تے آکھیا دے جو تُوں میرا دینا اے۔ تَد اوہدے نال دے نوکر پَیرِیں پَے کے اوہدی مِنّت کِیتی پئی مَینُوں مُہلت دے مَیں تیرا قرض دیاں گا۔ پر اوس نا مَنّیا سگوں جا کے اوہنوں قید وِچ پا دِتّا جد تِیکر اوہ قرض نا لاہ دے۔ سو جد اوہدے نال دیاں نَوکراں ایہہ حال ویکھیا تَد اوہناں بڑا غم کھادا تے جا کے اپنے مالک اگّے ساری حِقیقت دسی۔ تَد اوہدے مالک اوہنوں اپنے کول سَدّ کے آکھیا اَے شرِیر نوکر مَیں تینُوں اوہ قرض سارا چھڈ دِتّا۔ جد تُوں میری مِنّت کِیتی۔ ایہہ تینُوں نئیں سی چاہیدا پئی جیویں مَیں تیرے اُتّے رَحم کِیتا اینج ای تُوں وی اپنے نال دے نوکر اُتّے رَحم کر دا؟ سو اوہدے مالک غُصّے ہو کے اوہنوں دُکھ دین والیاں دے حوالے کِیتا جِنّاں چِر اوہ سارا قرض بھر نا دے۔ ایسے طرح میرا اسمانی باپ تُہاڈے نال وی کرے گا۔ جے تُسی سبھ اپنے اپنے بھراواں نُوں اپنے دِلوں مُعاف نا کرو۔ تے جد یِسُوع ایہہ گلّاں مُکائِیاں تے اینج ہویا پئی اوہ گلِیلوں ٹُرپیا۔ تے یَردن دے پار یہُودیہ دِیاں حداں وِچ آیا۔ تے بتھیرے لوک اوہدے مگر ٹُر پئے۔ تے اوس اوہناں نُوں اوتھے ای چَنگا کِیتا۔ تے فریسی اوہدے ازمان لئی اوہدے کول آئے۔ تے اوہنوں آکھیا ایہہ روا اے پئی بندہ کِسے وی گلّوں اپنی بیوی نُوں چھڈ دیوے؟ اوس اوہناں نُوں جواب دِتّا۔ تُساں نئیں پڑھیا پئی جِس اوہناں نُوں بنایا اوس اوہناں نُوں مُڈھوں نَر تے ناری پَیدا کِیتا۔ تے آکھیا ”ایس لئی بندہ اپنے ماں پئیو نُوں چھڈ دے گا تے اپنی بیوی نال مِلیا رہے گا۔ تے اوہ دوویں اِک بدن ہو جان گے۔“ ایس کر کے اوہ دو نا رہے پر اِک ای بدن نیں سو جِہنُوں خُدا نے جوڑیا اے اوہنوں بندہ وَکھ نا کرے۔ اوہ اوہنوں آکھن لگّے فیر مُوسیٰ نے کیوں حُکم دِتّا پئی طلاق نامہ دے کے اوہنوں چھڈ دے؟ اوہ اوہناں نُوں آکھن لگّا مُوسیٰ تے تُہاڈی سخت دِلی دے سبّب تُہانوں اپنیاں وَوہٹِیاں نُوں چھڈ دین دی اجازت دِتّی پر مُڈھوں ایس طرح نئیں سی ہویا۔ تے مَیں تُہانوں آکھنا آں پئی جیہڑا کوئی اپنی بیوی نُوں زناکاری دے سِوا ہور کِسے گلّ بدلے چھڈ دیوے تے دُوجی نال ویاہ کرے اوہ زنا کر دا اے تے جیہڑا اوس چھڈی ہوئی نُوں ویاہے اوہ زنا کر دا اے۔ شاگِرد اوہنوں آکھن لگّے۔ جے بیوی نال بندے دا ایہہ حال اے تے ویاہ کرنا ای چَنگا نئیں۔ پر اوس اوہناں نُوں آکھیا سبھے ایس گلّ نُوں قبول نئیں کر سکدے۔ پر جِنہاں نُوں دِتّا گیا اے۔ کیوں جو بعض کُھسرے اجیہے نیں جیہڑے ماں دے گربھوں اجیہے جمّے نیں۔ تے اجیہے کُھسرے نیں جِنہاں نُوں بندیاں کھُسریاں کر دِتّا۔ تے اجیہے کُھسرے وی نیں جِنہاں اسمان دی بادشاہی دی خاطر اپنے آپ نُوں کھُسریاں کر لیا اے۔ جیہڑا قبول کر سکدا اے اوہ ای قبولے۔ اوس ویلے اوہدے کول بال لیاندے گئے پئی اوہ اوہناں اُتّے ہتّھ رکھّے تے دُعا کرے۔ شاگِرداں اوہناں نُوں جِھڑکیا۔ پر یِسُوع آکھیا بچّیاں نُوں کُجھ نا آکھو تے نا اوہناں نُوں میرے کول آؤن توں روکو کیوں جو اسمان دی بادشاہی ایہو جِہیاں دی اے۔ تے اوہ اوہناں اُتّے ہتّھ رکھ کے اوتھوں ٹُرگیا۔ تے ویکھو اِک بندے نے اوہدے کول آن کے آکھیا اَے اُستاد مَیں کیہڑا بھلا کمّ کراں پئی ہمیشہ دی زِندگی مَینُوں مِلے؟ اوس اوہنوں آکھیا بھلیائی دی بابت مَیتھوں کیوں پُچھنا ایں؟ بھلا تے اِک ای اے۔ پر جے تُوں زِندگی وِچ داخل ہونا چاہنا ایں۔ تے حُکماں نُوں مَن۔ اوس اوہنوں آکھیا کیہڑیاں نُوں؟ یِسُوع آکھیا ایہہ پئی تُوں خُون نا کر۔ زنا نا کر۔ چوری نا کر۔ جُھوٹھی گواہی نا دے۔ اپنے ماں باپ دی عِزّت کر۔ تے اپنے گوانڈھی نُوں اپنے جِہیا پیار کر۔ اوہ جوان اوہنوں آکھن لگّا مَیں ایہناں سارِیاں گلّاں نُوں مَندا آیا آں۔ اجے ہور کاہدے وِچ مَیں گھٹ آں۔ یِسُوع نے اوہنوں آکھیا جے تُوں کامِل ہونا چاہنا ایں تے جا کے اپنا سبھ کُجھ ویچ تے غرِیباں نُوں دے تے تینُوں اسمان اُتّے خزانہ مِلے گا۔ تَد آ کے میرے مگر ٹُر پَو۔ جد اوس جوان ایہہ گلّ سُنی تَد اُداس ہو کے ٹُر گیا۔ کیوں جو اوہ بڑا مالدار سی۔ تَد یِسُوع اپنے شاگِرداں نُوں آکھیا مَیں تُہانوں سَچ آکھنا آں پئی دَولتمند بندہ اسمان دی بادشاہی وِچ مُشکل نال داخل ہوئے گا۔ تے فیر مَیں تُہانوں آکھنا آں پئی سُوئی دے نکّے وِچوں اُوٹھ دا لنگھناں ایس نالوں سوکھالا اے پئی دَولتمند بندہ خُدا دی بادشاہی وِچ داخل ہوئے۔ ایہہ سُن کے شاگِرد بڑے حَیران ہوئے تے آکھن لگّے فیر کون نجات پا سکدا اے؟ یِسُوع اوہناں چَنگا ویکھ کے آکھیا بندیاں توں ایہہ گلّ اَنہونی اے۔ پر خُدا توں سبھ کُجھ ہوسکدا اے۔ تَد پطرس نے جواب دِتّا۔ ویکھ اساں سبھ کُجھ چھڈیا تے تیرے مگر ٹُر پئے آں فیر سانُوں کِیہ مِلے گا؟ یِسُوع اوہناں نُوں آکھیا مَیں تُہانوں سَچ آکھنا آں پئی جد اِبنِ آدم نَوِیں پَیدایش وِچ اپنے جلال دے تخت اُتّے بَہے گا تُسی وی جیہڑے میرے مگر ٹُر پئے ہو باراں تختاں اُتّے بَہو گے تے اِسرائیل دے باراں گھرانیاں دی عدالت کرو گے۔ تے جِنہاں گھراں یا بھراواں یا بھیناں یا ماپیاں یا بال بچّیاں یا زمین نُوں میرے ناں دی خاطر چھڈ دِتّا اے اوہنوں سَو حِصّے وَدّھ مِلے گا۔ تے اوہ ہمیشہ دی زِندگی دا وارث ہوئے گا۔ پر بتھیرے جیہڑے پِچّھلے نیں پہلے ہون گے۔ تے پہلے پِچّھلے ہون گے۔ کیوں جو اسمان دی بادشاہی اِک گھر دے مالک وانگر اے۔ جیہڑا سویلے باہر نِکل گیا پئی اپنے انگور دے باغ وِچ مزدُوری اُتّے کامے لائے۔ تے جد اوس کامیاں نال اِک اِک دینار دِہاڑی چُکا لیا تَد اوہناں نُوں اپنے باغ وِچ گھل دِتّا۔ تے پہر دِن چڑھے باہر جا کے اوس ہورناں نُوں بازار وِچ ویہلیاں کھلوتے ویکھیا۔ تے اوہناں نُوں آکھیا تُسی وی انگور دے باغ وِچ جاؤ تاں جو کُجھ حق ہوئے گا مَیں تُہانوں دیاں گا تے اوہ ٹُر پئے۔ فیر اوس دُوجے تے تِیجے پَہر باہر جا کے ایسے طرح کِیتا۔ تے اِک گھنیٹا دِن رہندیاں اوس ہورناں نُوں کھلوتیاں ویکھیا تے اوہناں نُوں آکھیا۔ تُسی کیوں سارا دِن ایتھے ویہلے کھلوتے رہے اوہ؟ اوہ اوہنوں آکھن لگّے۔ ایس لئی پئی سانُوں کِسے دِہاڑی نئیں لایا۔ اوہ اوہناں نُوں آکھن لگّا تُسی وی انگور دے باغ وِچ جاؤ۔ تے جد شام پئی تَد انگور دے باغ دے مالک اپنے مُختِیار نُوں آکھیا۔ کامیاں نُوں سَدّ تے پِچّھلیاں توں لے کے پہلیاں تِیکر اوہناں نُوں مزدُوری دے۔ تے جد اوہ آئے جیہڑے گھنیٹا دِن رہندیاں کمّ لگّے سن۔ اوہناں نُوں اِک اِک دینار مِلیا۔ تے جد پہلے آئے اوہناں ایہہ سمجھیا پئی سانُوں وَدّھ مِلے گا۔ پر اوہناں نُوں وی اِک اِک دینار مِلیا۔ تے اوہنوں لے کے اوہ گھر دے مالک اُتّے کُڑ کُڑائے تے آکھیا۔ پئی ایہناں پِچّھلیاں تے اِکّو ای گھڑی کمّ کِیتا تے تُوں اوہناں نُوں ساڈے برابر کر دِتّا جِنہاں سارے دِن دا بھار تے دُھپ سہی۔ پر اوس اوہناں وِچوں اِک نُوں جواب دے کے آکھیا بھرا مَیں تیرے نال کوئی بے انصافی نئیں کر دا۔ تیرا میرے نال اِک دینار نئیں سی چُکیا؟ جو تیرا اے سو لے۔ تے ٹُرجا۔ پر میری مرضی اے پئی جِنّاں تینُوں دیناں اوناں ای ایس پِچّھلے نُوں وی دیاں۔ میرا اختیار نئیں اے پئی مَیں اپنے مال نال جو چاہاں سو کراں؟ یا تیری اَکھ ایس کر کے بُری اے پئی مَیں چَنگا آں؟ ایسے طرح پِچّھلے پہلے ہون گے تے پہلے پِچّھلے ہون گے۔ تے یِسُوع یرُوشلِیم نُوں جاندِیاں ہویاں باراں شاگِرداں نُوں وَکھریاں لے گیا تے راہ وِچ اوہناں نُوں آکھیا۔ ویکھو اسی یرُوشلِیم نُوں جانے آں تے اِبنِ آدم سردار کاہِناں تے فقِیہاں دے حوالے کِیتا جائے گا تے اوہ اوہدے اُتّے مَوت دا فتویٰ دین گے۔ تے اوہنوں غیر قوماں دے حوالے ایس کر کے کرن گے۔ پئی اوہنوں ٹھٹّھے کروان تے کولڑے مروان تے صلِیب اُتّے چڑھوان۔ تے ترِیجے دِہاڑے اوہ اُٹھا لیا جائے گا۔ اوس ویلے زبدی دے پُتراں دی ماں اپنے پُتراں سَنے اوہدے کول آئی تے اوہدے اگّے اِک عرض کِیتی۔ اوس اوہنوں آکھیا تُوں کِیہ چاہنی ایں۔ اوہ اوہنوں آکھن لگّی۔ تُوں حُکم دے پئی میرے ایہہ دوویں پُتر اِک تیرے سَجّے تے اِک تیرے کھبّے تیری بادشاہی وِچ بَہین۔ یِسُوع جواب دے کے آکھیا۔ تُسی نئیں سمجھدے پئی کِیہ منگدے اوہ۔ اوہ پیالہ جِہنُوں مَیں پِینا اے تُسی پی سکدے اوہ؟ اوہ اوہنوں آکھن لگّے ہاں پی سکنے آں۔ اوہ اوہناں نُوں آکھن لگّا۔ میرا پیالہ تے تُسی ضرُور پِیو گے پر سَجّے تے کبھّے بہانا میرے ہتّھ وِچ نئیں اے پئی کِسے نُوں دے دیاں۔ پر اوہناں نُوں بخشیا جائے گا جِنہاں واسطے میرے باپ کولوں مُقرّر کِیتا گیا اے۔ تے دَساں نیں سُن کے اوہناں دوہاں بھراواں دی بابت بُہت غُصّہ کِیتا۔ پر یِسُوع اوہناں نُوں اپنے کول سَدّ کے آکھیا تُسی جان دے اوہ پئی غیر قوماں دے حاکم اوہناں اُتّے دابا پاندے نیں تے اوہناں دے وڈّے لوک اوہناں اُتّے دَھونس جماندے نیں۔ اجیہا تُہاڈے وِچ نا ہوئے گا۔ سگوں جیہڑا کوئی تُہاڈے وِچ وَڈا بننا چاہے سو تُہاڈا ٹہلیا ہوئے گا۔ تے جیہڑا کوئی تُہاڈے وِچ سردار ہونا چاہے سو تُہاڈا کاماں ہوئے گا۔ جیویں اِبنِ آدم سیوا کران نئیں سگوں سیوا کرن تے بتھیریاں دے تھاں ڈنڈ بھرن نُوں اپنی جان دین آیا اے۔ تے یرِیحُو توں نِکل دیاں اوہدے پِچّھے بڑی بِھیڑ ہو ٹُری۔ تے ویکھو دواَنّھے بندے راہ دے کنڈھے بَیٹھے ہوئے سن۔ جد اوہناں ایہہ سُنیا پئی یِسُوع لنگھدا جاندا اے تے چلّا کے بولے اَے خُداوند داؤد دے پُتر ساڈے اُتّے رَحم کر۔ تے لوکاں نیں اوہناں نُوں جِھڑکیا پئی چُپ کر جان۔ پر اوہناں ہور وی چلّا کے آکھیا۔ اَے خُداوند داؤد دے پُتر ساڈے اُتّے رَحم کر۔ تَد یِسُوع کھلو گیا تے اوہناں نُوں سَدّ کے آکھیا تُسی کِیہ چاہندے ہو پئی مَیں تُہاڈے لئی کراں؟ اوہ اوہنوں آکھن لگّے خُداوندا ساڈیاں اَکھّیاں کُھل جان۔ تے یِسُوع ترس کھا کے اوہناں دِیاں اَکھّیاں نُوں چُھوئیا تے اوسے ویلے اوہ سُجاکھے ہوگئے۔ تے اوہدے مگر ٹُر پئے۔ تے جد اوہ یرُوشلِیم دے نیڑے اَپڑے تے بَیت فگے وِچ زَیتُوناں دے پہاڑ کول آئے تَد یِسُوع دو شاگِرداں نُوں گھلّیا۔ تے اوہناں نُوں آکھیا۔ تُسی سامھنے والے پِنڈ وِچ جاؤ۔ تے وڑدیاں سار تُہانوں اِک کھوتی بَدّھی ہوئی مِلے گی تے بچّہ اوہدے نال۔ اوہنوں کھول کے میرے کول لے آؤ۔ تے جے کوئی تُہانوں کُجھ آکھے تے آکھنا پئی خُداوند نُوں اوہناں دی لوڑ اے تے جھٹ اوہ اوہناں نُوں گھل دے گا۔ ایہہ ایس لئی ہویا پئی اوہ گلّ جیہڑی نبی دی راہِیں آکھی گئی سی پُوری ہوئے۔ پئی صِیُّون دی دِھی نُوں آکھو۔ ویکھ تیرا بادشاہ تیرے کول آؤندا اے اوہ حلِیم اے تے کھوتے اُتّے چڑھیا سگوں کھوتی دے بچّے اُتّے۔ سو شاگِرداں جا کے جیویں یِسُوع نے اوہناں نُوں حُکم دِتّا سی اوسے طرح کِیتا۔ تے کھوتی تے بچّے نُوں لے آؤندا تے اوہناں اپنے کپڑے اوہناں دے اُتّے پا دِتّے۔ تے اوہ اوہناں دے اُتّے چڑھ بَیٹھا۔ تے بِھیڑ وِچوں بتھیریاں اپنے کپڑے راہ وِچ وچھائے تے ہوراں رُکھّاں دِیاں ٹہنِیاں دَڈھ کے راہ وِچ وچھا دِتّیاں۔ تے بِھیڑ جیہڑی اوہدے اگّے پِچّھے چلّی جاندی سی اُچّی اواز نال آکھدی سی ”ہوشعنا داؤد دے پُتر نُوں۔ دھنّ اے اوہ جیہڑا خُداوند دے ناں اُتّے آؤندا اے اسماناں وِچ ہوشعنا۔“ تے جد اوہ یرُوشلِیم وِچ وڑیا تاں سارا شہر ایہہ آکھ کے ہِل گیا پئی ایہہ کون اے؟ تے بِھیڑ آکھن لگّی۔ ایہہ اوہ نبی اے یِسُوع گلِیل دے ناصرۃ دا۔ تے یِسُوع خُدا دی ہیکل وِچ گیا تے ساریاں نُوں باہر کڈھ دِتّا جیہڑے ہیکل وِچ وَنج بِپار کر دے سن تے صرّافاں دے تختے تے کبُوتر ویچن والیاں دِیاں چَونکِیاں اُلٹا سُٹِّیاں۔ تے اوہناں نُوں آکھن لگّا پئی لِکھیا ہویا اے ”میرا گھر دُعا بندگی دا گھر اکھوائے گا“ پر تُسی اوہنوں ڈاکُوؤاں دی کھوہ بناندے اوہ۔ تے ہیکل دے اندر اَنھے تے گُونگے اوہدے کول آئے تے اوس اوہناں نُوں چَنگا کِیتا۔ پر جد سردار کاہِناں تے فقِیہاں نیں اوہناں اچرج کمّاں نُوں ویکھیا جیہڑے اوس کِیتے تے نالے ہیکل وِچ اوہناں مُنڈیاں نُوں جیہڑے اُچّی اُچّی آکھدے سن ”داؤد دے پُتر نُوں ہوشعنا۔“ تَد اوہناں نُوں غُصّہ چڑھیا۔ تے اوہنوں آکھیا تُوں سُننا ایں پئی ایہہ کِیہ آکھدے نیں؟ یِسُوع اوہناں نُوں آکھیا ہاں۔ تُساں کدی ایہہ نئیں پڑھیا پئی نیانیاں تے دُدّھ پِین والیاں دے مُنھوں تُوں وڈیائی پُوری کرائی۔ تے اوہناں نُوں چھڈ کے اوہ شہروں باہر بَیت عَنِیاہ نُوں گیا تے اوتھے رات رہیا۔ تے سویرے شہر نُوں پرتدیاں ہویاں اوہنوں بُھکھ لگّی۔ تے راہ دے کنڈھے اِک ہنجیر دا بُوٹا دیکھ کے اوہدے کول گیا تے اوہدے وِچ بِناں پَتّراں دے ہور کُجھ نا مِلیا تے اوہنوں آکھیا ہُن توں لے کے تیرے اُتّے کدی وی پَھل نا ہوئے تے اوسے ویلے ہنجیر دا بُوٹا سُک گیا۔ تے شاگِرداں نیں ویکھ کے تے تعجُّب کر کے آکھیا۔ کیڈی چھیتی ایہہ ہنجیر دا بُوٹا سُک گیا؟ تے یِسُوع اوہناں نُوں جواب دِتّا۔ مَیں تُہانوں سَچ آکھنا آں پئی جے کر یقِین کرو تے شک نا کرو تے تُسی نِرا ایہو ای نا کرو گے جیویں ہنجیر دے بُوٹے نال ہویا۔ پر جے ایس پہاڑ نُوں وی آکھو گے پئی اُٹھ تے سمُندر وِچ جا پَو تے ہو جائے گا۔ تے سبھ کُجھ جو تُسی یقِین کر کے دُعا وِچ منگو گے۔ سو تُہانوں مِلے گا۔ تے جد اوہ ہیکل وِچ آیا تے تعلِیم پیا دیندا سی تَد سردار کاہِن تے قوم دے بزُرگ اوہدے کول آئے تے آکھن لگّے۔ تُوں کیہڑے اختیار نال ایہہ کمّ کرنا ایں؟ تے کِس ایہہ اختیار تینُوں دِتّا اے؟ یِسُوع اوہناں نُوں جواب دِتّا۔ مَیں وی تُہاڈے توں اِک گلّ پُچھناں آں جے تُسی اوہ مَینُوں دسو گے تے مَیں وی تُہانوں دساں گا پئی کیہڑے اختیار نال ایہہ کمّ کرنا آں۔ یُوحنّا دا بپتِسمہ کِتّھوں سی اسمانوں یا بندیاں ولّوں؟ تے اوہناں ایہہ اوہ آپو وِچ وچار کِیتی پئی جے اسی آکھئے اسمانوں تَد اوہ سانُوں آکھے گا۔ فیر تُسی اوہنوں کیوں نئیں مَنّیا؟ پر جے آکھئے۔ بندیاں ولّوں تے لوکاں کولوں ڈرنے آں کیوں جو سبھے یُوحنّا نُوں نبی مَن دے نیں۔ تَد اوہناں یِسُوع نُوں جواب دِتّا اسی نئیں جان دے۔ اوس وی اوہناں نُوں آکھیا مَیں وی تُہانوں نئیں دِسدا پئی کیہڑے اختیار نال مَیں ایہہ کمّ کرنا آں۔ پر تُسی کِیہ سمجھدے اوہ؟ کِسے بندے دے دو پُتر سن تے اوس وڈّے کول آ کے آکھیا پُتر جا کے اَج انگور دے باغ وِچ کمّ کر۔ اوس جواب دِتّا میرا جی نئیں کر دا پر مگروں پچھتا کے اوہ ٹُر گیا۔ فیر دُوجے کول آ کے ایسے طرح آکھیا۔ اوس جواب دِتّا خُداوند مَیں جاناں آں۔ پر گیا نئیں۔ اوہناں دوہاں وِچوں کِس پئیو دی مرضی پُوری کِیتی؟ اوہ آکھن لگّے پہلے نے۔ یِسُوع اوہناں نُوں آکھیا۔ مَیں تُہانوں سَچ آکھنا آں پئی محصُولئے تے کسبیاں تُہاڈے توں اگّے خُدا دی بادشاہی وِچ جاندے نیں۔ کیوں جو یُوحنّا نیکی دے راہ اُتّے تُہاڈے کول آیا تے تُساں اوہنوں نا مَنّیا پر محصُولِیاں تے کسبیاں نیں اوہنوں مَن لیا۔ پر تُسی ایہہ ویکھ کے مگروں وی نئیں پچھتائے پئی اوہنوں مَن لَیندے۔ اِک ہور تمثِیل سُنو۔ اِک بندہ گھر دا مالک سی جِس انگور دا باغ لایا۔ تے اوہدے چَوفیرے واڑ کِیتی۔ تے اوہدے وِچ رَس لئی حوض بنایا۔ تے بُرج اُساریا۔ تے مالِیاں نُوں ٹھیکے دے کے پردیس ٹُرگیا۔ تے جد پَھل دی بہار نیڑے آئی اوس اپنے نَوکراں نُوں مالِیاں کول اوہدا پَھل لین واسطے گھلّیا۔ تے مالِیاں اوہدے نَوکراں نُوں پھڑ کے کِسے نُوں کُٹّیا۔ کِسے نُوں وَڈّھیا تے کِسے نُوں پتّھر مارے۔ فیر اوس ہور نَوکراں نُوں گھلّیا جیہڑے اگلیاں نالوں وَدھیرے سن تے اوہناں نیں اوہناں نال وی اوسے طرح کِیتا۔ پر اوڑک نُوں اوس نے اپنا پُتر اوہناں کول ایہہ آکھ کے گھلّیا پئی اوہ میرے پُتر دی تے عِزّت کرن گے۔ جد مالِیاں نیں پُتر نُوں ویکھیا تَد آپو وِچ آکھن لگّے۔ وارث تے ایہو اے۔ آؤ ایہنوں مار سُٹّیئے تے اوہدی وِرثہ سانبھ لَئے۔ تے اوہنوں پَھڑکے انگور دے باغوں بَنّے کڈھیا تے مار سُٹّیا۔ سو جد باغ دا مالک آوے گا اوہناں مالِیاں نال اوہ کِیہ کرے گا؟ اوہ اوہنوں آکھن لگّے اوہناں بُریاں دا بُری طرح ناس کرے گا۔ تے انگور دا باغ ہورناں مالِیاں نُوں سونپے گا۔ جیہڑے ویلے سر اوہنوں پَھل پُچاؤن گے۔ یِسُوع اوہناں نُوں آکھیا تُساں کِتاباں وِچ کدی نئیں پڑھیا پئی جیہڑے پتّھر نُوں راجاں نیں ناپسند کِیتا اوہی نُکّر دا سِرا بنایا گیا؟ ایہہ گلّ خُداوند ولّوں ہوئی تے ساڈی نظر وِچ اچرج اے۔ ایس لئی مَیں تُہانوں آکھنا آں پئی خُدا دی بادشاہی تُہاڈے توں کُھوئی جائے گی۔ تے اوس قوم نُوں بخشی جائے گی جیہڑی اوہدا پَھل لِیائیا کرے۔ تے جیہڑا کوئی ایس پتّھر اُتّے ڈِگّ پَوے سو چُور چُور ہو جائے گا پر جِہدے اُتّے اوہ ڈِگّے اوہنوں گھٹے وانگُوں اُڈائے گا۔ تے جد سردار کاہِناں تے فرِیسیاں نیں اوہدیاں ایہہ تمثِیلاں سُنیاں تَد اوہناں نُوں معلُوم ہویا پئی اوہ تے ساڈی بابت پیا آکھدا اے۔ تے جد اوہ اوہنوں پَھڑنا چاہندے سن لوکاں توں ڈر دے سن کیوں جو اوہ اوہنوں نبی مَن دے سن۔ تے یِسُوع نیں فیر تمثِیلاں وِچ اوہناں نُوں جواب دِتّا۔ پئی اسمان دی بادشاہی اِک بادشاہ وانگر اے جِس اپنے پُتر دا ویاہ کِیتا۔ تے اوس اپنے نَوکراں نُوں گھلّیا۔ پئی میلِیاں نُوں ویاہ وِچ سَدّن۔ پر اوہ آؤن نُوں راضی نا ہوئے۔ فیر اوس ہور نَوکراں نُوں ایہہ آکھ کے گھلّیا۔ پئی میلِیاں نُوں آکھو۔ پئی ویکھو مَیں اپنا کھانا تیار کر لیا اے میرے ڈھگّے تے پلے ہوئے جنَور کُہس گئے نیں تے سبھو کُجھ تیار اے۔ تُسی ویاہ وِچ آؤ۔ پر اوہ بے پرواہی کر کے چلّے گئے۔ اِک اپنی پَیلی ولّ دُوجا اپنے وَنج بِپار نُوں۔ تے باقِیاں نیں اوہدے نَوکراں نُوں پھڑیا تے اوہناں دی پَتّ لاہی تے مار سُٹّیا۔ تَد بادشاہ نُوں غُصّہ آیا تے اوس اپنی فَوج نُوں گھل کے اوہناں خُونِیاں دا ناس کروا دِتّا تے اوہناں دا شہر پُھوک دِتّا۔ تے اپنے نَوکراں نُوں آکھیا ویاہ تے تیار اے پر میلی نالائق نِکلے۔ سو تُسی چورستیاں وِچ جاؤ تے جِنّے تُہانوں مِلن ویاہ وِچ سَدّ لیاؤ۔ تے اوہ نوکر باہر جا کے راہاں اُتّے بُرے بھلے جِنّے ٹکّرے سبھناں نُوں اکٹّھے کر کے لے آئے تے ویاہ والا گھر پَروہنیاں نال بھر گیا۔ تے جد بادشاہ پَروہنیاں نُوں ویکھن لئی اندر آیا اوس اِک بندے نُوں اوتھے ویکھیا جِس ویاہ والا کپڑا پایا ہویا نئیں سی۔ تے اوہنوں آکھن لگّا بھرا تُوں ویاہ والے کپڑے باہجوں ایتھے کِیویں آ وڑیا۔ اوہ تے چُپ رہ گیا۔ تَد بادشاہ نَوکراں نُوں آکھیا۔ ایہدے ہتّھ پَیر بَنّھ کے ایہنوں باہر ہنیرے وِچ سُٹ آؤ۔ اوتھے رونا تے کچیچیاں وٹنا ہوئے گا۔ کیوں جو سَدّے ہوئے تے بُہت نیں پر چُنے ہوئے تھوڑے۔ تَد فرِیسیاں جا کے صلاح کِیتی پئی کِسے طرح اوہنوں گلّاں وِچ پھسایئے۔ تے اوہناں اپنیاں شاگِرداں نُوں ہیرودیاں سَنے اوہدے کول گھلّیا پئی اوہنوں آکھن اَے اُستاد سانُوں معلُوم اے۔ پئی تُوں سَچّا ایں تے سچیائی نال خُدا دا راہ دسنا ایں تے تینُوں کِسے دی پرواہ نئیں کیوں جو تُوں بندیاں دے مُنھ دا لحاظ نئیں کر دا۔ سانُوں دس تُوں کِیہ سمجھنا ایں۔ پئی قَیصر نُوں جزیہ دینا چاہیدا اے کہ نئیں؟ پر یِسُوع نے اوہناں دی شرارت جاچ کے آکھیا اَے مکّارو تُسی مَینُوں کیوں ازماؤندے اوہ؟ جزیے دا سِکّہ مَینُوں وکھاؤ۔ اوہ اوہدے کول اِک دینار لے آئے۔ تے اوس اوہناں نُوں آکھیا۔ ایہہ مُورت تے ایہہ لِکھت کِہدی اے؟ اوہ اوہنوں آکھن لگّے قَیصر دی۔ تَد اوہ اوہناں نُوں آکھن لگّا۔ فیر جو قَیصر دا اے قَیصر نُوں دیو تاں جو خُدا دا اے خُدا نُوں۔ تے اوہناں ایہہ سُن کے تعجُّب کِیتا تے اوہنوں چھڈ کے ٹُر گئے۔ اوسے دِن صدوقی جیہڑے آکھدے نیں پئی قیامت نئیں ہونی اوہدے کول آئے تے ایہہ آکھ کے اوہدے کولوں سوال پُچھیا۔ پئی اَے اُستاد! مُوسیٰ نے آکھیا سی پئی جد کوئی بے اولادا مر جائے تَد اوہدا بھرا اوہدی بیوی نُوں کر لَئے تے اپنے بھرا دے لئی نسل پَیدا کرے۔ سو ساڈے وِچ سَتّ بھرا سن۔ تے پہلا ویاہ کر کے مر گیا پر اوہدی کوئی نسل نئیں سی اوہ اپنی بیوی نُوں اپنے بھرا لئی چھڈ گیا۔ تے ایسے طرح دُوجے کِیتا تے تِیجے وی ستویں تِیکر۔ تے ساریاں دے پِچّھوں اوہ عورت وی مر گئی۔ سو قیامت نُوں ایہہ اوہناں ستّاں وِچوں کِہدی بیوی ہوئے گی؟ کیوں جو ساریاں اوہنوں کِیتا سی۔ تے یِسُوع اوہناں نُوں جواب دِتّا۔ تُسی گُمراہ اوہ کیوں جو تُسی کِتاباں تے خُدا دی قُدرت توں ناواقِف اوہ۔ کیوں جو قیامت وِچ نا ویاہ کر دے نیں تے نا ویاہے جاندے نیں۔ پر اسمان دے فرِشتیاں وانگُوں نیں۔ پر مُردیاں دی قیامت دی بابت تُساں ایہہ نئیں پڑھیا جو خُدا تُہانوں آکھیا۔ پئی ”مَیں ابرہام دا خُدا تے اِضحاق دا خُدا تے یعقُوب دا خُدا آں“ خُدا مُردیاں دا نئیں پر جِیوندیاں دا خُدا اے۔ تے لوک ایہہ سُن کے اوہدی تعلِیم توں حَیران ہوگئے۔ تے فرِیسیاں جد سُنیا پئی اوس صدوقیاں دا مُنھ بند کر دِتّا تَد اوہ اِک تھاں اکٹّھے ہوگئے۔ تے اوہناں وِچوں اِک نیں جیہڑا شریعت سکھان والا سی اوہدے ازمان لئی سوال پُچھیا۔ پئی اَے اُستاد شریعت وِچ وَڈا حُکم کیہڑا اے۔ اوس اوہنوں آکھیا پئی تُوں خُداوند اپنے خُدا نُوں اپنے سارے دِل نال تے اپنی ساری جان نال تے اپنی ساری عقل نال پیار کر۔ وَڈا تے پہلا حُکم ایہو ای اے۔ تے دُوجا جیہڑا اوہدے وانگُوں ایہہ اے پئی تُوں اپنے گوانڈھی نُوں اپنے جِہیا پیار کر۔ ایہناں دوہاں حُکماں وِچ ساری شریعت تے نبی آ جاندے نیں۔ تے جدوں فریسی اکٹّھے ہوئے یِسُوع اوہناں کولوں ایہہ آکھ کے سوال پُچھیا۔ پئی مسِیح دی بابت تُہاڈا کِیہ خیال اے۔ اوہ کِہدا پُتر اے؟ اوہ اوہنوں آکھن لگّے داؤد دا۔ اوہ اوہناں نُوں آکھن لگّا۔ فیر کِس طرح داؤد رُوح دی راہِیں اوہنوں ایہہ آکھ کے خُداوند آکھدا اے؟ پئی خُداوند نے میرے خُداوند نُوں آکھیا تُوں میرے سَجّے پاسے بَیہہ جا جد تِیکر مَیں تیرے وَیرِیاں نُوں تیرے پیراں ہیٹھ نا کر دیواں۔ سو جد داؤد اوہنوں خُداوند آکھدا اے۔ تے اوہ اوہدا پُتر کِیویں ہویا؟ پر ایس گلّ دا جواب کوئی اوہنوں دے نا سکیا۔ تے نا اوس دِن توں کِسے دا حَوصلہ پیا پئی اوہدے کولوں سوال پُچھے۔ تَد یِسُوع نے لوکاں نُوں تے اپنے شاگِرداں نُوں آکھیا۔ پئی فقِیہ تے فریسی مُوسیٰ دی گدّی اُتّے بَیٹھے ہوئے نیں۔ ایس لئی سبھ کُجھ جو اوہ تُہانوں آکھن تُسی عمل کرو تے مَنّو پر اوہناں جیہے کمّ نا کرو کیوں جو اوہ آکھدے نیں پر عمل نئیں کر دے۔ ہاں اوہ بھاریاں پَنڈاں جیہڑیاں اَوکھیاں چُکیاں جاندِیاں نیں بَنّھ چھڈ دے نیں۔ تے بندیاں دے موڈھیاں اُتّے رکھدے نیں۔ پر آپ اوہ اپنی اُنگل نال اوہناں نُوں کھِس کانا نئیں چاہندے۔ تے اوہ اپنے سارے کمّ لوکاں نُوں وکھان لئی کر دے نیں اوہ تے اپنے تعویذ چَوڑے تے اپنے چوغے دی جھالر وڈّی بناندے نیں۔ تے مہمانِیاں وِچ اُچّے تھاں تے عبادت خانیاں وِچ اگلیاں کُرسِیاں چاہندے نیں۔ تے بازاراں وِچ سلام لین تے لوکاں کولوں ربّی اکھوان دے بُھکھے نیں۔ پر تُسی ربّی نا اکھواؤ۔ کیوں جو اِک ای تُہاڈا اُستاد اے تے تُسی سارے بھرا اوہ۔ تے زمین اُتّے کِسے نُوں اپنا پئیو نا آکھو۔ کیوں جو اِک اے تُہاڈا باپ جیہڑا اسماناں اُتّے اے۔ تے نا تُسی ہادی اکھواؤ کیوں جو اِک اے تُہاڈا ہادی یعنی مسِیح۔ پر جیہڑا تُہاڈے وِچوں وَڈا اے سو تُہاڈا خادم ہوئے گا۔ تے جیہڑا کوئی اپنے آپ نُوں اُچیاں کرے گا سو نِیواں کِیتا جائے گا تے جیہڑا کوئی اپنے آپ نُوں نِیویاں کرے گا۔ سو اُچّا کِیتا جائے گا۔ پر ہائے افسوس تُہاڈے اُتّے فقِیہو تے فرِیسیو مکّارو۔ ایس لئی پئی تُسی اسمان دی بادشاہی نُوں لوکاں اُتّے بند کر دے اوہ۔ تُسی تے نا آپ وِچ وڑدے تے نا وڑن والیاں نُوں وڑن دیندے اوہ۔ [ہائے افسوس تُہاڈے اُتّے فقِیہو تے فرِیسیو مکّارو ایس لئی پئی تُسی بیوہ عَورتاں دے گھراں نُوں نِگل جاندے اوہ تے وکھالن لئی لمبی چَوڑی نماز پڑھدے اوہ۔ تُہانوں بُہتی سزا مِلے گی۔] پر ہائے افسوس تُہاڈے اُتّے فقِیہو تے فرِیسیو مکّارو ایس لئی پئی تُسی اِک بندے نُوں اپنے دین وِچ لے آؤن واسطے سمُندر تے زمین گاہ مار دے اوہ جد آگیا تے تُسی اوہنوں اپنے نالوں دُونا جہنّم دا پُتر بناندے اوہ۔ پر ہائے افسوس تُہاڈے اُتّے اَنھے راہ دسن والیو جیہڑے آکھدے ہو پئی ”جے کوئی ہیکل دی سَونہہ چُکے تے کوئی گلّ نئیں پر جے کوئی ہیکل دے سونے دی سَونہہ چُکے تے پُوری کرنی پَوے گی۔“ مُورکھو تے اَنھیو۔ وَڈا کیہڑا اے؟ سونا؟ کہ ہیکل جِس سونے نُوں پاک کِیتا اے؟ ”تے جے کوئی قُربان گاہ دی سَونہہ چُکے تے کوئی گلّ نئیں۔ پر جے کوئی اوس چڑھاوے دی جیہڑا اوہدے اُتّے اے سَونہہ چُکے تے اوہنوں پُوری کرنی پَوے گی۔“ اوہ اوہدا دین دار اے۔ اَنھیو وَڈا کیہڑا اے چڑھاوا کہ قُربان گاہ جیہڑی چڑھاوے نُوں پاک کر دی اے؟ ایس لئی جیہڑا قُربان گاہ دی سَونہہ چُکدا اے۔ اوہ اوہدی تے نالے سارِیاں شیواں دی وی جیہڑیاں اوہدے اُتّے نیں سَونہہ چُکدا اے۔ تے جیہڑا ہیکل دی سَونہہ چُکدا اے اوہ اوہدی تے نالے اوہدی وی جیہڑا ہیکل وِچ رہندا اے سَونہہ چُکدا اے۔ تے جیہڑا اسمان دی سَونہہ چُکدا اے۔ اوہ خُدا دے تخت دی تے اوہدے اُتّے بیہن والے دی وی سَونہہ چُکدا اے۔ ہائے افسوس تُہاڈے اُتّے فقِیہو تے فرِیسیو مکّارو ایس لئی پئی تُسی پُودنے تے سونف تے زِیرے دے اُتّے دَہ یکّی لاندے اوہ۔ پر شریعت دِیاں بھاریاں بھاریاں گلّاں نُوں یعنی عدالت تے رَحم تے اِیمان نُوں تُساں چھڈ دِتّا اے۔ چاہیدا سی پئی تُسی ایہناں نُوں کر دے تے اوہناں نُوں وی نا چھڈ دے۔ اَنھے راہ دسن والیو جیہڑے مچھر نُوں پُن کے کڈھ چھڈ دے ہو تے اُوٹھ نُوں لنگھا جاندے اوہ۔ ہائے افسوس تُہاڈے اُتّے فقِیہو تے فرِیسیو مکّارو۔ تُسی کٹورے تے تھالی نُوں باہروں صاف کر دے ہو پر اوہ اندروں لُٹ تے بدپرہیزی نال بھرے ہوئے نیں۔ اَے اَنھے فریسی پہلاں کٹورے تے تھالی دا اندر صاف کر تاں جو اوہ باہروں وی صاف ہو جاوے۔ ہائے افسوس تُہاڈے اُتّے فقِیہو تے فرِیسیو مکّارو۔ ایس لئی پئی تُسی چُونے گج قبراں وانگُوں ہو جیہڑیاں باہروں تے بڑیاں سوہنِیاں جاپدیاں نیں۔ پر اندروں مُردیاں دِیاں ہڈِّیاں نال تے ہر طرح دی پلِیتی نال بھریاں ہویاں نیں۔ ایسے طرح تُسی وی باہروں تے لوکاں نُوں نیک جاپدے اوہ۔ پر اندروں مکر تے بے دِینی نال بھرے ہوئے اوہ۔ ہائے افسوس تُہاڈے اُتّے فقِیہو تے فرِیسیو مکّارو۔ ایس لئی پئی تُسی نبیاں دِیاں قبراں بناندے ہو تے نیکاں دیاں مقبریاں نُوں سنوار دے اوہ۔ تے آکھدے ہو پئی جے اسی اپنے پئیو دادیاں دے دِناں وِچ ہوندے تے اسی اوہناں نال نبیاں دے خُون وِچ شریک نا ہوندے۔ سو تُسی آپ اپنے اُتّے گواہ بن دے ہو پئی اسی اوہناں لوکاں دے پُتر آں جِنہاں نبیاں نُوں مار سُٹّیا۔ اپنے پئیو دادیاں دے پَیمانے نُوں بھر دیو۔ اَے سپّو۔ سپّاں دے بچّیو۔ تُسی جہنّم دی سزا توں کِس طرح بھجو گے؟ ایس کر کے ویکھو مَیں نبیاں تے داناواں تے فقِیہاں نُوں تُہاڈے کول گھلّنا آں۔ اوہناں وِچوں کئیاں نُوں تُسی مار سُٹّو گے تے صلِیب دیؤگے۔ تے کئیاں نُوں اپنے عبادت خانیاں وِچ کولڑے مارو گے تے شہروں شہر بھجا کے اَوکھیاں کرو گے۔ تاں جو نیکاں دا لہو جِنّاں زمین اُتّے وگایا گیا نیک ہابل دے لہو توں لے کے برکیاہ دے پُتر زکریاہ دے لہو تِیکر جِہنُوں تُساں ہیکل تے قُربان گاہ دے وِچکار مار دِتّا سی۔ سبھو تُہاڈے اُتّے آ جاوے۔ مَیں تُہانوں سَچ آکھنا آں ایہہ سبھ کُجھ ایس زمانے دے لوکاں اُتّے آوے گا۔ اَے یرُوشلِیم اَے یرُوشلِیم نبیاں نُوں مار سُٹّن والی تے اوہناں نُوں پتّھراؤ کرن والی جیہڑے تیرے کول گھلّے گئے سن۔ کِنی واری مَیں چاہندا ساں پئی تیرے بچّیاں نُوں اوسے طرح اکٹّھے کراں۔ جیویں کُکّڑی اپنے چُوچیاں نُوں کھنباں ہیٹھ اکٹّھے کر دی اے پر تُسی نئیں سو چاہندے۔ ویکھو تُہاڈا گھر تُہاڈے لئی اُجاڑ چھڈیا جاندا اے۔ کیوں جو مَیں تُہانوں آکھنا آں پئی ہُن توں تُسی مَینُوں فیر نا ویکھو گے جد توڑی ایہہ نا آکھو گے پئی دھنّ اے اوہ جیہڑا خُداوند دے ناں اُتّے آؤندا اے۔ تے یِسُوع ہیکلوں نِکل کے لگا جاندا سی تے شاگِرد اوہدے کول آئے پئی ہیکل دِیاں عمارتاں اوہنوں دسن۔ پر اوس اوہناں نُوں ایہہ جواب دِتّا۔ تُسی ایہہ سارِیاں شیواں نئیں ویکھدے؟ مَیں تُہانوں سَچ آکھنا آں ایتھے پتّھر دے اُتّے پتّھر چھڈیا نئیں جاناں جیہڑا ڈیگیا نا جائے گا۔ تے جد اوہ زَیتُوناں دے پہاڑ اُتّے بَیٹھا ہویا سی اوہدے شاگِرداں وَکھریاں ہو کے اوہدے کولوں پُچھیا۔ سانُوں دس ایہہ گلّاں کدوں ہون گِیاں؟ تے تیرے آؤن دا تے ایس زمانے دے مُک جان دا کِیہ نِشان اے؟ تے یِسُوع اوہناں نُوں جواب دِتّا۔ پئی ویکھو تُہانوں کوئی گُمراہ نا کرے۔ کیوں جو بتھیرے میرے ناں اُتّے ایہہ آکھدے ہوئے آؤن گے پئی ”مَیں مسِیح آں۔“ تے بتھیریاں نُوں گُمراہ کر دین گے۔ تے تُسی لڑائِیاں تے لڑائِیاں دِیاں افواواں سُنوں گے۔ خبردار کِتے گھابر نا جانا۔ کیوں جو ایہہ گلّاں تے ہونیاں ای نیں۔ پر اخِیر اجے نئیں اے۔ کیوں جو قوم قوم دے تے بادشاہی بادشاہی دے برخلاف اُٹھ کھلووے گی۔ تے تھاں تھاں کال تے بھونچال ہون گے۔ پر ایہہ سارِیاں شیواں مُصِیبتاں دا شُروع ای ہون گِیاں۔ تَد اوہ تُہانوں دُکھ دین لئی پھڑوا دین گے تے تُہانوں مار سُٹّن گے تے میرے ناں دے سبّب سارِیاں قوماں تُہاڈے نال وَیر رکھن گِیاں۔ تے اوس ویلے بتھیرے ٹھوکر کھا جان گے۔ تے اِک دُوجے نُوں پھڑوا دین گے تے اِک دُوجے نال وَیر رکھن گے۔ تے بُہت جُھوٹھے نبی اُٹھن گے تے بتھیریاں نُوں بد راہ کر دین گے۔ تے بے دِینی وَدّھ جان نال بتھیریاں دی مُحبّت ٹھنڈی ہو جاوے گی۔ پر جیہڑا اخِیر توڑی قیم رہے گا سو ای نجات پائے گا۔ تے بادشاہی دی ایس خُوشخبری دی منادی ساری دُنیا وِچ کِیتی جائے گی۔ تاں جو سارِیاں قوماں نُوں گواہی ہوئے تَد اخِیر ہوئے گا۔ سو جِس ویلے تُسی اوس اُجاڑن والی گندی شے نُوں جِہدی خبر دانی ایل نبی دِتّی اے پاک مکان وِچ کھلوتی ہوئی ویکھو گے (جو پڑھے سو سمجھ لَوے۔) تَد اوہ جیہڑے یہُودیہ وِچ ہون پہاڑاں اُتّے بھج جان۔ جیہڑا کوٹھے اُتّے ہوئے اپنے گھر دا اسباب کڈھن واسطے ہیٹھاں نا اُترے۔ تے جیہڑا پَیلی وِچ ہوئے اپنے کپڑے لین نُوں پِچھّاں نا مُڑے۔ پر افسوس اوہناں اُتّے جیہڑیاں اوہناں دِناں وِچ جمّن والیاں تے جیہڑیاں دُدّھ چُنگھان والِیاں ہون گِیاں۔ سو دُعا منگو پئی تُہاڈا بھجنا نا سِیال وِچ تے نا سبت دے دِن ہوئے۔ کیوں جو اوس ویلے ایڈی بھاری مُصِیبت ہوئے گی جیہڑی دُنیا دے مُڈھوں لے کے ہُن تِیکر نا ہوئی۔ تے نا کَدے ہوئے گی۔ تے جے اوہ دِن گھٹائے نا جاندے تے اِک جی وی نا بچدا پر چُنیاں ہویاں دی خاطر اوہ دِن گھٹائے جان گے۔ اوس ویلے جے کوئی تُہانوں آکھے پئی ویکھو مسِیح ایتھے یا اوتھے وے تے سَچ نا مَنّو۔ کیوں جو جُھوٹھے مسِیح تے جُھوٹھے پیغمبر اُٹھن گے۔ تے بھارے نِشان تے کراماتاں وکھان گے۔ اجیہے پئی جے ہو سکے تے اوہ چُنیاں ہویاں نُوں وی گُمراہ کر لین۔ ویکھو مَیں تُہانوں اگیترے دس دِتّا اے۔ ایس لئی جے تُہانوں آکھن پئی ویکھو اوہ بیابان وِچ اے تے باہر نا جانا۔ جے آکھن ویکھو اندرلیاں کوٹھڑِیاں وِچ اے تے نا مَنّو۔ کیوں جو جیویں بِجلی چڑھدیوں نِکل کے لہندے تِیکر لِشک مار دی اے اونویں ای اِبنِ آدم دا آؤنا ہوئے گا۔ جِتّھے کِتّھے مُردار اے اوتھے ای گِرجھاں اکٹّھیاں ہون گِیاں۔ تے اوہناں دِناں دی مُصِیبت دے پِچّھوں جھٹ سُورج ہنیرا ہو جائے گا۔ تے چَنّ اپنا چانن نئیں دیوے گا تے تارے اسمانوں ڈِگّ پَین گے۔ تے اسمان دِیاں قُوّتاں ہلائِیاں جان گِیاں۔ تے اوس ویلے اِبنِ آدم دا نِشان اسمان اُتّے نظر آوے گا تے تَد زمین دے سارے گھرانے پِٹن گے تے اِبنِ آدم نُوں قُدرت تے بڑے جلال نال اسمان دیاں بدّلاں اُتّے آؤندیاں ویکھین گے۔ تے تُرہی دی بڑی اواز نال اوہ اپنے فرِشتیاں نُوں گھلّے گا تے اوہ اوہدیاں چُنیاں ہویاں نُوں اسمان دے ایس سِرے توں لے کے اوس سِرے تِیکر چَوہاں گُٹّھاں توں اکٹّھے کرن گے۔ ہُن ہنجیر دے رُکھّ توں تمثِیل سِکھّو پئی جد اوہدی ٹہنی نرم ہوندی اے تے پَتّر پُھٹدے نیں تُسی جان لَیندے ہو پئی گرمی دی بہار نیڑے اے۔ ایسے طرح جد تُسی ایہہ سبھ کُجھ ویکھو تَد جان لوؤ پئی اوہ نیڑے سگوں بُوہے اُتّے اے۔ مَیں تُہانوں سَچ آکھنا آں۔ پئی ایہہ پِیڑھی گُذر نئیں جائے گی۔ جد تِیکر ایہہ سبھو کُجھ نا ہو جائے۔ اسمان تے زمین ٹل جان گے پر میرِیاں گلّاں کدی نا ٹلن گِیاں۔ پر اوس دِن تے اوس گھڑی نُوں باپ دے سِوا کوئی نئیں جاندا نا اسماناں دے فرِشتے تے نا پُتر۔ پر جیویں نُوح دے دِن سن اوسے طرح اِبنِ آدم دا آؤنا ہوئے گا۔ کیوں جو جیویں اوہناں دِناں وِچ جھکھڑ توں اگّے لوک کھاندے پِیندے تے ویاہ کر دے تے کراندے سن اوس دِن تِیکر پئی نُوح بیڑی اُتّے چڑھ گیا۔ تے اوہناں نُوں خبر نا ہوئی جد تِیکر جھکھڑ آ کے اوہناں سبھناں نُوں روہڑ کے نا لے گیا۔ ایسے طرح اِبنِ آدم دا آؤنا ہوئے گا۔ اوس ویلے دو جَنے پَیلی وِچ ہون گے اِک پھڑیا تے دُوجا چھڈیا جائے گا۔ دو زنانِیاں چکّی پِیہندیاں ہون گِیاں۔ اِک پَھڑی تے دُوجی چھڈی جائے گی۔ ایس لئی جاگدے رہو پئی تُسی نئیں جان دے پئی تُہاڈا خُداوند کیہڑے دِن آؤندا اے۔ پر ایہہ جانو پئی جے گھر دے مالک نُوں خبر ہوندی پئی چور کیہڑے پَہر آوے گا۔ تے جاگدا رہندا تے اپنے گھر نُوں سَنّھ لگّن نا دیندا۔ ایس کر کے تُسی وی تیار رہو۔ کیوں جو جِس گھڑی تُہانوں کوئی چِت چیتا نا ہوئے اوس گھڑی اِبنِ آدم آوے گا۔ فیر اوہ وفادار تے سیانا نوکر کیہڑا اے پئی جِہنُوں اوہدے مالک اپنے سارے سیوا کرن والیاں اُتّے مُختِیار کِیتا پئی ویلے سر اوہناں نُوں رست دیوے؟ دھنّ اے اوہ نوکر جِہنُوں اوہدا مالک جد آوے اجیہا ای کر دیاں ویکھے۔ مَیں تُہانوں سَچ آکھنا آں اوہ اوہنوں اپنے سبھ مال اُتّے مُختِیار کر دے گا۔ پر جے اوہ خراب نوکر اپنے دِل وِچ آکھے پئی میرا مالک چِر لاندا اے۔ تے اپنے نال دیاں نَوکراں نُوں مارن لگّے تے شرابیاں نال کھائے پئے۔ تاں اوس نوکر دا مالک اجیہے دِن آوے گا جد اوہنوں اوہدی اُڈِیک نئیں اے۔ تے اجیہی گھڑی پئی اوہ نا جانے۔ تے اوہنوں دو ٹوٹے کر دے گا۔ تے اوہدا حِصّہ مکّاراں نال ٹھیراوے گا اوتھے رونا تے کچیچیاں وٹنا ہوئے گا۔ اوس ویلے اسمان دی بادشاہی دَساں کوارِیاں وانگر ہوئے گی جیہڑیاں اپنیاں مسالاں لے کے لاڑے دے مِلن نُوں نِکلیاں۔ تے اوہناں وِچوں پنج مُورکھ تے پنج ہُشیار سن۔ کیوں جو جیہڑیاں مُورکھ سن اوہناں اپنیاں مسالاں تے لے لئیاں۔ پر تیل اپنے نال نا لیا۔ پر ہُشیاراں نیں اپنیاں اپنیاں بھانڈیاں وِچ مسالاں ناں تیل لے لیا۔ تے جد لاڑے چِر لایا۔ سبھے انگھلاؤن لگ پئیاں تے سو گِئیاں۔ پر اَدھی رات نُوں رَولا پیا پئی لاڑا آؤندا اے اوہدی اگّوں والی لئی چلّو۔ تَد اوہناں سارِیاں کوارِیاں اُٹھ کے آپو اپنیاں مسالاں ٹھیک کِیتیاں۔ تَد مُورکھاں نیں ہُشیاراں نُوں آکھیا۔ اپنے تیل وِچوں سانُوں وی دیو کیوں جو ساڈیاں مسالاں بُجھدیاں جاندِیاں نیں۔ پر ہُشیاراں ایہہ جواب دِتّا نا۔ کِتے ساڈے تے تُہاڈے لئی تُھڑ نا جائے تُسی ویچن والیاں کول جا کے اپنے لئی مُل لوؤ۔ تے جد اوہ مُل لین گِیئاں لاڑا آگیا۔ تے جیہڑیاں تیار سن اوہدے نال ویاہ وِچ اندر گِئیاں تے بُوہا ماریا گیا۔ تے مگروں دُوجیاں کوارِیاں وی آئِیاں تے آکھن لِگئیاں پئی خُداوندا خُداوندا ساڈے لئی بُوہا کھول دے۔ پر اوس اوہناں نُوں جواب دِتّا۔ مَیں تُہانوں سَچ آکھنا آں پئی مَیں نئیں تُہانوں جاندا۔ ایس لئی جاگدے رہو کیوں جو اوس دِن تے اوس گھڑی نُوں تُسی نئیں جان دے۔ کیوں جو جیویں اِک بندے نے پردیس نُوں جان لگیاں اپنے گھر دیاں نَوکراں نُوں سدّیا تے اپنا مال اوہناں نُوں سونپیا۔ تے اِک نُوں اوس پنج توڑے دِتّے۔ دُوجے نُوں دو۔ تے ترِیجے نُوں اِک۔ ہر اِک نُوں اوہدی اپنی لیاقت سیتی۔ تے پردیس ٹُرگیا۔ سو جِس پنج توڑے لَئے سن اوس جا کے اوہناں نال بیوپار کِیتا۔ تے پنج توڑے ہور کمائے۔ ایسے طرح اوس وی جِس دو لَئے سن دو ہور کھٹّے۔ پر جِس اِک لیا سی اوس جا کے زمین پُٹی۔ تے اپنے مالک دے رُپئے نُوں لُکا دِتّا۔ تے بُہت چِر پِچّھوں اوہناں نَوکراں دا مالک آیا تے اوہناں کولوں لیکھا لین لگّا۔ سو جِس پنج توڑے لَئے سن اوس نیڑے آ کے ہور پنج توڑے اگّے لیا رکھّے تے آکھیا خُداوند تُوں مَینُوں پنج توڑے سونپ دِتّے سن۔ ویکھ مَیں پنج توڑے ہور کھٹ لَئے نیں۔ اوہدے مالک نے اوہنوں آکھیا شاواشے چنگیا تے وفادار نوکرا۔ تُوں تے تھوڑے وِچ وفادار نِکلیا۔ مَیں تینُوں بتھیرے اُتّے اختیار دیاں گا۔ تُوں اپنے مالک دی خُوشی وِچ داخل ہو۔ تے جِس دو توڑے لَئے سن اوس وی نیڑے آ کے آکھیا خُداوند تُوں مَینُوں دو توڑے دِتّے سن۔ ویکھ مَیں دو توڑے ہور کھٹ لَئے نیں۔ اوہدے مالک اوہنوں آکھیا شاواشے چنگیا تے وفادار نوکرا۔ تُوں تے تھوڑے وِچ وفادار نِکلیوں۔ مَیں تینُوں بتھیرے اُتّے اختیار دیاں گا۔ تُوں اپنے مالک دی خُوشی وِچ داخل ہو۔ فیر جِس اِک توڑا لیا سی اوس وی نیڑے آ کے آکھیا خُداوند مَیں تینُوں جان دا ساں پئی تُوں کرڑا بندہ ایں جِتّھے تُوں نئیں بِیجیا اوتھوں تُوں وَڈّھنا ایں۔ تے جِتّھے تُوں نئیں کھلاریا۔ اوتھوں اکٹّھا کرنا ایں۔ سو مَیں ڈریا تے تیرے توڑے نُوں زمین وِچ لُکا دِتّا ویکھ تیرا تینُوں لَبّھ گیا۔ پر اوہدے مالک اوہنوں جواب دِتّا۔ اَے بَھیڑے تے نکمّے نوکر تُوں جان دا سَیں پئی جِتّھے مَیں نئیں بِیجیا اوتھوں وَڈّھنا آں تے جِتّھے مَیں نئیں کھلاریا اوتھوں اکٹّھا کرنا آں۔ ایس لئی تینُوں چاہیدا سی پئی میرے رُپئے ساہُوکاراں نُوں دیندوں۔ تاں جو مَیں آ کے اپنا مال بیاج سَنے لے لَیندا۔ سو اوہدے کولوں ایہہ توڑا کھوہ کے جیہدے کول دَس توڑے نیں اوہنوں دے دیو۔ کیوں جو ہر اِک جیہدے کول کُجھ اے اوہنوں دِتّا جائے گا۔ تے اوہدا وادھا ہو جائے گا۔ پر جیہدے کول نئیں اوہدے کولوں جو کُجھ اوہدا اے اوہ وی کھوہ لیا جائے گا۔ تے ایس نکمّے نوکر نُوں باہر ہنیرے وِچ سُٹ دیو۔ اوتھے رونا تے کچیچیاں وٹنا ہوئے گا۔ جد اِبنِ آدم اپنے جلال وِچ آوے گا تے سارے فرِشتے اوہدے نال تَد اوہ اپنے جلال دے تخت اُتّے بَہے گا۔ تے سارِیاں قوماں اوہدے اگّے اکٹّھیاں کِیتیاں جان گِیاں۔ تے جیویں ایّالی بھیڈاں نُوں بکرِیاں توں وَکھریاں کر لَیندا اے تیویں اوہ اوہناں نُوں اِک دُوجے توں وَکھ کرے گا۔ تے بھیڈاں نُوں اپنے سَجّے تے بکرِیاں نُوں اپنے کھبّے پاسے کھلا کرے گا۔ تَد بادشاہ اپنے سَجّے پاسے والیاں نُوں آکھے گا اَے میرے باپ دے مُبارک لوکو آؤ۔ اوس بادشاہی دے وارث بنو جیہڑی دُنیا دے مُڈھوں ای تُہاڈے لئی تیار کِیتی گئی سی۔ کیوں جو مَیں بُھکھا ساں تے تُساں مَینُوں کھان نُوں دِتّا مَیں تریہایا ساں تُساں مَینُوں پانی پیایا۔ مَیں اوپرا ساں تے تُساں مَینُوں اپنے گھر رکھیا۔ ننگا ساں تے تُساں مَینُوں کپڑا دِتّا۔ مَیں ماندا ساں تے تُساں میری خبر لئی۔ مَیں قید وِچ ساں تے تُسی میرے کول آئے۔ تَد نیک لوک اوہنوں جواب دین گے خُداوندا کدوں اساں تینُوں بُھکیاں ویکھیا تے کھوایا؟ یا تریہایا تے تینُوں پیایا؟ کدوں اساں تینُوں اوپرا ویکھیا تے اپنے گھر رکھیا۔ ننگا ویکھیا تے کپڑا دِتّا؟ اساں کدوں تینُوں ماندا یا قید وِچ ویکھیا تے تیرے کول آئے؟ تے بادشاہ اوہناں نُوں جواب وِچ آکھے گا۔ مَیں تُہانوں سَچ آکھنا آں پئی جد تُساں میرے ایہناں سبھناں توں نِکّیاں بھراواں وِچوں اِک نال ایہہ کِیتا تے میرے نال کِیتا۔ تَد اوہ کھبّے پاسے والیاں نُوں وی آکھے گا۔ اَے لعنتیؤ میرے اگّوں اوس ہمیشہ دی اَگ وِچ جاؤ جیہڑی ابلیس تے اوہدیاں فرِشتیاں دے لئی تیار کِیتی ہوئی اے۔ کیوں جو مَیں بُھکھا ساں تے تُساں مَینُوں کھان نُوں نا دِتّا۔ مَیں تریہایا ساں تے تُساں مَینُوں نا پیایا۔ مَیں اوپرا ساں تے تُساں مَینُوں اپنے گھر نا رکھیا۔ ننگا ساں تے تُساں مَینُوں کپڑا نا دِتّا۔ ماندا تے قید وِچ ساں تُساں میری خبر نا لئی۔ تَد اوہ وی جواب دین گے۔ خُداوندا کدوں اساں تینُوں بُھکھیاں یا تریہایاں یا اوپریاں یا ننگِیاں یا ماندیاں یا قید وِچ ویکھیا تے تیری سیوا نئیں کِیتی؟ تَد اوہ اوہناں نُوں جواب دیوے گا۔ پئی مَیں تُہانوں سَچ آکھنا آں پئی جد تُساں ایہناں سبھناں توں نِکّیاں وِچوں اِک نال ایہہ نئیں کِیتا تے میرے نال وی نئیں کِیتا۔ تے اوہ ہمیشہ دی سزا وِچ جان گے۔ پر نیک ہمیشہ دی زِندگی وِچ۔ تے ایویں ہویا پئی جد یِسُوع ایہہ سارِیاں گلّاں مُکائِیاں۔ اوس اپنے شاگِرداں نُوں آکھیا۔ تُسی جان دے اوہ۔ پئی دو دِناں دے پِچّھوں فسح دی عید ہوئے گی تے اِبنِ آدم صلِیب دِتّے جان دے واسطے حوالے کِیتا جاندا اے۔ تَد سردار کاہِن تے قوم دے بزُرگ کائفا ناں سردار کاہِن دے وِہڑے وِچ جمع ہوئے۔ تے صلاح کِیتی پئی یِسُوع نُوں فریب نال پَھڑکے مار سُٹئے۔ پر اوہناں آکھیا پئی عید دے دِن نُوں نئیں۔ متے لوکاں وِچ بلوا ہو جائے۔ تے جد یِسُوع بَیت عَنِیاہ وِچ شمعُون کوڑھے دے گھر وِچ سی۔ اِک زنانی اوہدے کول آئی جیہدے کول اِک بڑے مُل والے عِطر دی سنگِ مَرمَر دی عِطردانی سی۔ اوس اوہنوں اوہدے سِر اُتّے جد اوہ کھانا پیا کھاندا سی اُلٹا دِتّا۔ پر شاگِرد ایہہ ویکھ کے بڑے کھِج گئے۔ تے آکھن لگّے۔ ایہہ نُقصان کاہِنُوں ہویا؟ ایہہ عِطر بڑے مُل نُوں وِک سکدا تے غرِیباں نُوں دِتّا جا سکدا سی۔ پر یِسُوع نے ایہہ جان کے اوہناں نُوں آکھیا ایس زنانی نُوں کیوں دُکھ دیندے اوہ کیوں جو اوس میرے نال چَنگا کمّ کِیتا اے۔ غرِیب لوک تے سدا تُہاڈے نال نیں۔ پر مَیں سدا تُہاڈے نال نئیں آں۔ پئی ایہہ جو اوس میرے بدن اُتّے عِطر پایا سو کفنان دفنان لئی کِیتا اے۔ مَیں تُہانوں سَچ آکھنا آں پئی سارے جہان وِچ جِتّھے کِتّھے ایس خُوشخبری دی منادی ہوئے گی اوتھے ایہہ وی جو اوس کِیتا اے اوہدی یادگیری لئی آکھیا جائے گا۔ تَد اوہناں باراں وِچوں اِک نے جِہدا ناں یہُوداہ اِسکریُوتی سی سردار کاہِناں کول جا کے آکھیا۔ جے اوہنوں مَیں تُہانوں پھڑوا دیاں تے تُسی مَینُوں کِیہ دیو گے؟ تے اوہناں اوہنوں تَرِیہہ رُپئے تول دِتّے۔ تے اوسے ویلے توں اوہ داء لَبّھدا سی پئی اوہنوں پھڑوا دیاں۔ تے فطِیری روٹِیاں دی عید دے پہلے دِن شاگِرداں نیں یِسُوع کول آ کے آکھیا۔ تُوں کِتّھے چاہنا ایں پئی اسی تیرے کھان لئی فسح تیار کریئے؟ تَد اوس آکھیا شہر وِچ فلانے بندے دے کول جا کے اوہنوں آکھو پئی اُستاد آکھدا اے۔ پئی میرا ویلا نیڑے آگیا اے۔ مَیں تیرے گھر اپنے شاگِرداں نال فسح دی عید کرنی اے۔ تے جیویں یِسُوع نے اوہناں نُوں حُکم دِتّا سی اوہناں کِیتا۔ تے فسح تیار کِیتی۔ تے شام ویلے اوہ اپنے باراں شاگِرداں نال کھانا کھان بَیٹھا ہویا سی۔ تے جد اوہ پئے کھاندے سن اوس آکھیا مَیں تُہانوں سَچ آکھنا آں پئی تُہاڈے وِچوں اِک مَینُوں پھڑوائے گا۔ تَد اوہ بُہت اُداس ہوئے تے ہر اِک اوہنوں آکھن لگّا خُداوندا مَیں آں؟ اوس جواب دِتّا۔ جِس میرے نال تھالی وِچ ہتّھ پایا اے۔ اوہ مَینُوں پھڑوائے گا۔ اِبنِ آدم تے جان دا اے جیویں اوہدے حق وِچ لِکھیا ہویا اے۔ پر ہائے افسوس اوس بندے اُتّے جیہدی راہِیں اِبنِ آدم پھڑوایا جاندا اے۔ اوس بندے لئی بھلا ہوندا جے اوہ نا جمدا۔ تَد یہُوداہ جیہڑا اوہدا پھڑان والا سی بولیا اَے اُستاد مَیں آں؟ اوس اوہنوں آکھیا تُوں آپ آکھ دِتّا۔ تے جد اوہ پئے کھاندے سن تَد یِسُوع روٹی لئی تے برکت دے کے توڑی تے شاگِرداں نُوں دے کے آکھیا۔ لوؤ کھاؤ ایہہ میرا بدن اے۔ تے اوس پیالہ لے کے شُکر کِیتا تے اوہناں نُوں دے کے آکھیا تُسی سارے ایہدے وِچوں پِیو۔ کیوں جو عہد دا ایہہ میرا اوہ لہو اے۔ جیہڑا بتھیریاں دی خاطر گُناہاں دی مُعافی لئی وگایا جاندا اے۔ تے مَیں تُہانوں آکھنا آں پئی ایدوں اگّے مَیں ایس انگور دی رَس نُوں نا پِیاں گا اوس دِن تِیکر جدوں اپنے باپ دی بادشاہی وِچ مَیں اوہنوں تُہاڈے نال نَوِیں سِروں نا پِیاں۔ تے گِیت گا کے اوہ زَیتُوناں دے پہاڑ نُوں نِکل گئے۔ تَد یِسُوع اوہناں نُوں آکھیا اَج رات تُسی میری بابت ٹھوکر کھاؤ گے کیوں جو ایہہ لِکھیا اے۔ ”پئی مَیں آجڑی نُوں ماراں گا تے اِجّڑ دِیاں بھیڈاں کھِلّر جان گِیاں۔“ پر مَیں اپنے جی اُٹھن دے مگروں تُہاڈے توں اگّے گلِیل نُوں جاواں گا۔ تَد پطرس اوہنوں جواب دِتّا۔ بھانویں سارے تیری بابت ٹھوکر کھان پر مَیں ٹھوکر کدی نا کھاواں گا۔ یِسُوع اوہنوں آکھیا مَیں تینُوں سَچ آکھنا آں پئی تُوں اَج رات کُکّڑ دی بانگ دین توں پہلاں تِنّ واری میرا اِنکار کریں گا۔ پطرس نے اوہنوں آکھیا بھانویں تیرے نال مَینُوں مرنا وی پَوے تاں وی مَیں تیرا اِنکار کدی نا کراں گا۔ تے سارے شاگِرد ایسے طرح آکھن لگّے۔ تَد یِسُوع اوہناں دے نال گتسمنی ناں اِک جگہ وِچ آیا تے اپنے شاگِرداں نُوں آکھیا تُسی ایتھے بَہو جِنّاں چِر مَیں اوتھے جا کے دُعا منگاں۔ تے پطرس تے زبدی دے دوہاں پُتراں نُوں نال لے کے اوہ دُکھی تے بُہت غمگِین ہون لگّا۔ تَد اوہ اوہناں نُوں آکھن لگّا میرا جی بُہت دُکھی اے مرن دے درجہ تِیکر۔ تُسی ایتھے ٹھیرو تے میرے نال جاگدے رہو۔ تے تھوڑا اگّے وَدّھ کے مُنھ پرنے ڈِگّ پیا۔ تے دُعا منگدیاں ہویاں ایہہ آکھیا اَے میرے باپ جیکر ہو سکے تے ایہہ پیالہ مَیتھوں ٹل جائے۔ تے وی نا جیویں مَیں چاہناں آں پر جیویں تُوں چاہنا ایں۔ فیر اوہ شاگِرداں کول آیا تے اوہناں نُوں سُتّیاں ہویاں ویکھ کے پطرس نُوں آکھیا۔ اِنج تُسی اِک گھڑی وی میرے نال نا جاگ سکے؟ جاگو تے دُعا منگو تاں جو تُسی ازمایش وِچ نا پَوو۔ رُوح تے تیار اے پر بدن کمزور اے۔ فیر اوس دُوجی وار جا کے دُعا منگی تے آکھیا اَے میرے باپ جیکر ایہہ میرے پِیتیاں بِناں میرے توں نئیں ٹل سکدا تے تیری مرضی ہوئے۔ تے اوس فیر آ کے اوہناں نُوں سُتّیاں ہویاں ویکھیا کیوں جو اوہناں دِیاں اَکھّیاں بھاریاں ہویاں ہویاں سن۔ تے اوہناں نُوں فیر چھڈ کے اوہ ٹُر گیا۔ تے ترِیجی واری مُڑ اوہی گلّ آکھ کے دُعا منگی۔ تَد شاگِرداں کول آیا تے اوہناں نُوں آکھیا۔ ہُن سُتّے رہو تے آرام کرو۔ ویکھو ویلا آگیا اے تے اِبنِ آدم گُنہگاراں دے ہتّھ پھڑوایا جاندا اے۔ اُٹھو چلّئے ویکھو میرا پھڑان والا نیڑے آگیا اے۔ تے اوہ اجے پیا آکھدا ای سی تے ویکھو یہُوداہ جیہڑا اوہناں باراں وِچوں اِک سی آگیا تے سردار کاہِناں تے لوکاں دے بزُرگاں دے ولّوں اِک وڈّی بِھیڑ تلواراں تے ڈانگاں لے کے اوہدے نال آ پہنچی۔ تے اوہدے پھڑان والے نے اوہناں نُوں ایہہ آکھ کے پَتا دِتّا سی پئی جِہنُوں مَیں چُمّاں گا اوہو ای اے۔ اوہنوں پھڑ لینا۔ تے سِدّھیاں یِسُوع کول آ کے اوس آکھیا۔ ”اَے ربّی سلام۔“ تے اوہنوں چُمّیاں۔ تے یِسُوع نے اوہنوں آکھیا بھرا جِس کمّ واسطے تُوں آیا ایں کر لے۔ تَد اوہناں نیڑے آ کے یِسُوع نُوں پھڑ لیا۔ تے ویکھو یِسُوع دے ساتھِیاں وِچوں اِک نے ہتّھ وَدّھا کے اپنی تلوار کھِچّی تے سردار کاہِن دے غلام نُوں مار کے اوہدا کنّ اُڈا دِتّا۔ تَد یِسُوع اوہنوں آکھیا اپنی تلوار میان کر کیوں جو جیہڑے تلوار کھِچّ دے نیں تلوار نال مارے جان گے۔ تُوں ایہہ سمجھنا ایں پئی مَیں اپنے باپ دی مِنّت نئیں کر سکدا تے اوہ باراں نالوں وی وَدّھ فرِشتیاں دِیاں فَوجاں میرے کول ہُنے حاضر نا کرے گا؟ فیر اوہ نوِشتے پئی ایسے طرح ہونا ضرُور اے؟ کِیویں پُورے ہوندے؟ اوسے ویلے یِسُوع لوکاں نُوں آکھیا تُسی مَینُوں چور سمجھ کے تلواراں تے ڈانگاں لے کے پھڑن لئی باہر نِکلے ہو؟ مَیں روز ہیکل وِچ بَہہ کے تعلِیم دیندا ساں تے تُساں مَینُوں نا پھڑیا۔ پر ایہہ سبھ کُجھ ایس لئی ہویا پئی نبیاں دے نوِشتے پُورے ہون۔ تَد سارے شاگِرد اوہنوں چھڈ کے بھج گئے۔ تے یِسُوع نُوں پھڑن والے اوہنوں کائفا ناں سردار کاہِن کول لے گئے۔ جِتّھے فقِیہ تے بزُرگ اکٹّھے ہوئے ہوئے سن۔ تے پطرس دُور دُور اوہدے مگر مگر سردار کاہِن دے وِہڑے تِیکر گیا تے اندر جا کے پیادیاں نال بَہہ گیا پئی اخِیر نُوں ویکھے۔ تے سردار کاہِن تے ساری پنچایت یِسُوع دے برخلاف جُھوٹھی گواہی لبّھدے سن پئی اوہنوں جانوں مارن۔ پر نا لَبّھی بھانویں جُھوٹھے گواہ بتھیرے آئے۔ پر اوڑک نُوں دو جِنّیاں اگّے ہو کے آکھیا۔ پئی اوس آکھیا اے۔ پئی مَیں خُدا دی ہیکل نُوں ڈھا سکنا آں تے تِنّاں دِناں وِچ بنا وی سکنا آں۔ تے سردار کاہِن اُٹھ کھلو کے اوہنوں آکھیا۔ تُوں کُجھ جواب نئیں دیندا؟ ایہہ تیرے خلاف کِیہ گواہی دیندے نیں؟ پر یِسُوع چُپ ای کر رہیا۔ تے سردار کاہِن اوہنوں آکھیا مَیں تینُوں زِندہ خُدا دی سَونہہ دیناں آں پئی جے تُوں مسِیح خُدا دا پُتر ایں تے سانُوں دس۔ یِسُوع اوہنوں آکھیا تُوں آپے آکھ دِتّا اے فیر وی مَیں تُہانوں آکھنا آں پئی ایدوں اگّے تُسی اِبنِ آدم نُوں قُدرت دے سَجّے ہتّھ بَیٹھیاں ہویاں تے اسمان دے بدّلاں اُتّے آؤندیاں ویکھو گے۔ تَد سردار کاہِن اپنے کپڑے پاڑ کے آکھیا ایس کُفر آکھیا اے۔ ہُن سانُوں گواہاں دی کِیہ لوڑ اے؟ لوؤ ہُن تُساں وی کُفر سُن لیا اے۔ تُہانوں کِیہ سُجھدا اے۔ اوہناں جواب دے کے آکھیا اوہ مَوت دے لائق اے۔ تَد اوہناں اوہدے مُنھ اُتّے تُھکیا تے اوہنوں مُکّے مارے تے ہورناں نیں دَھپّے مار کے آکھیا۔ مسِیحا سانُوں نبُوّت نال دس تینُوں کِس ماریا؟ تے پطرس باہر ویہڑے وِچ بَیٹھا ہویا سی تے اِک ٹہلن اوہدے کول آ کے آکھیا تُوں وی گلِیلی یِسُوع نال سَیں۔ اوس سبھناں دے سامھنے مُکّر کے آکھیا مَیں نئیں جاندا پئی تُوں کِیہ آکھنی ایں۔ تے جد اوہ باہر ڈیوڑھی وِچ گیا تاں دُوجی اوہنوں ویکھیا۔ تے اوہ اوہناں نُوں جیہڑے اوتھے سن آکھن لگّی ایہہ وی یِسُوع ناصری دے نال سی۔ تَد اوہ سَونہہ چُک کے فیر مُکّر پیا پئی مَیں اوس بندے نُوں نئیں جان دا۔ تے تھوڑے چِر پِچّھوں اوہناں نیں جیہڑے اوتھے کھلوتے سن پطرس دے کول جا کے آکھیا ٹھیک تُوں وی اوہناں وِچوں ایں۔ تیری بولی پئی دسدی اے۔ تَد اوہ لعنتاں پان تے سَونہہ چُکن لگ پیا۔ پئی مَیں اوس شخص نُوں نئیں جان دا تے اونویں کُکّڑ نے بانگ دِتّی۔ تدوں پطرس نُوں یِسُوع دی اوہ گلّ جیہڑی اوس اوہنوں آکھی سی یاد آئی۔ پئی کُکّڑ دے بانگ دین توں پہلاں تُوں میرا تِنّ واری اِنکار کریں گا۔ تے اوہ باہر جا کے ڈھائیں مار مار کے رویا۔ جدوں دِن چڑھیا سارے سردار کاہِناں تے قوم دے بزُرگاں نیں یِسُوع دے برخلاف صلاح پَکّائی پئی اوہنوں جانوں مارن۔ تے اوہنوں بَنّھ کے لے گئے۔ تے پِیلاطُس حاکم دے حوالے کر دِتّا۔ تَد یہُوداہ جِس اوہنوں پھڑوایا سی ایہہ ویکھ کے پئی اوہدے اُتّے سزا دا حُکم ہوگیا اے۔ پچھتایا۔ تے اوہ تَرِیہہ رُپئے سردار کاہِناں تے بزُرگاں دے کول موڑ لیایا۔ تے آکھیا مَیتھوں گُناہ ہوگیا اے۔ پئی بے قصور نُوں مروان لئی پھڑوا دِتّا۔ پر اوہناں آکھیا سانُوں کِیہ؟ تُوں جان۔ تَد اوہ رُپئے ہیکل وِچ سُٹ کے ٹُرگیا تے جا کے آپ پھاہ لے لیا۔ تے سردار کاہِناں رُپئے لے کے آکھیا۔ پئی ایہناں نُوں خزانے وِچ پانا روا نئیں اے کیوں جو خُون دا مُل اے۔ تے اوہناں صلاح کر کے اوہناں نال گھمیار دی پَیلی پردیسیاں دے دَبّن لئی مُل لے لئی۔ ایس کر کے اَج تِیکر اوہ پَیلی خُون دی پَیلی اکھواؤندی اے۔ تَد اوہ گلّ پُوری ہوئی جیہڑی یِرمیاہ نبی دی راہِیں آکھی گئی سو پئی اوہناں تَرِیہہ رُپئے لَئے اوہدا مُل جیہڑا پایا گیا سی (اوہدا مُل بنی اِسرائیل وِچوں کئیاں نیں پا دِتّا سی۔) تے گھمیار دی پَیلی واسطے اوہناں دے دِتّا۔ جیویں خُداوند نیں مَینُوں حُکم کِیتا سی۔ تے یِسُوع حاکم دے اگّے کھلا سی تے حاکم نے اوہدے توں ایہہ پُچھیا۔ تُوں یہُودِیاں دا بادشاہ ایں؟ تے یِسُوع اوہنوں آکھیا تُوں آکھنا ایں۔ تے جد سردار کاہِن تے بزُرگ اوہدے اُتّے پئے الزام لاندے سن اوہ کُجھ جواب نئیں سی دیندا۔ تَد پِیلاطُس اوہنوں آکھیا تُوں سُندا نئیں پئی ایہہ تیرے برخلاف کِنیاں گواہِیاں دیندے نیں؟ پر اوس اوہنوں اِک گلّ دا وی جواب نا دِتّا۔ ایتھوں تِیکر پئی حاکم بڑا تعجُّب کِیتا۔ تے حاکم دا دستُور سی۔ پئی عید نُوں لوکاں دی خاطر اِک قیدی جِہنُوں اوہ چاہن چھڈ دا ہوندا سی۔ تے اودُوں اوہناں دا برابّا ناں اِک مشہُور قیدی سی۔ سو جد اوہ اکٹّھے ہوئے پِیلاطُس اوہناں نُوں آکھیا۔ تُسی کِنوں چاہندے ہو پئی مَیں تُہاڈی خاطر چھڈ دیاں؟ برابّا نُوں یا یِسُوع نُوں جیہڑا مسِیح اکھواؤندا اے؟ کیوں جو اوہ جان دا سی پئی اوہناں کھار دے مارے اوہنوں حوالے کِیتا ہویا اے۔ تے جد اوہ عدالت دے تخت اُتّے بَیٹھا ہویا سی اوہدی بیوی اوہنوں اکھوا گھلّیا پئی تُوں اوس نیک بندے نال کُجھ واسطہ نا رکھّیں کیوں جو اَج سُفنے وِچ مَیں اوہدے سبّب بڑا دُکھ پایا اے۔ پر سردار کاہِناں تے بزُرگاں لوکاں نُوں چُکیا پئی برابّا نُوں منگ لین تے یِسُوع نُوں مروا سُٹّن۔ فیر حاکم اوہناں نُوں جواب دِتّا تُسی دوہاں وِچوں کِنوں چاہندے اوہ۔ پئی مَیں تُہاڈے واسطے چھڈ دیاں؟ اوہ آکھن لگّے برابّا نُوں۔ پِیلاطُس نے اوہناں نُوں آکھیا۔ فیر یِسُوع نُوں جیہڑا مسِیح اکھواؤندا اے مَیں کِیہ کراں؟ اوہ سارے آکھن لگّے اوہنوں صلِیب دے۔ اوس آکھیا کیوں اوس کِیہ بُریائی کِیتی اے؟ پر اوہناں نیں ہور وی ڈنڈ پا کے آکھیا ایہنوں صلِیب دے؟ جد پِیلاطُس ویکھیا پئی کُجھ نئیں بن دا سگوں ہور وی رَولا پَیندا جاندا اے تَد اوس پانی لے کے لوکاں دے سامھنے اپنے ہتّھ دھوتے۔ تے آکھیا۔ مَیں ایس نیک بندے دے خُون توں بے گُناہ ہاں۔ تُسی جانو۔ تے ساریاں لوکاں جواب دِتّا۔ اوہدا خُون ساڈے تے ساڈی اولاد دے سِرے اُتّے ہوئے۔ تَد اوس برابّا نُوں اوہناں دی خاطر چھڈ دِتّا تے یِسُوع نُوں کولڑے مار کے حوالے کِیتا۔ پئی صلِیب اُتّے چڑھایا جائے۔ تَد حاکم دے سپاہیاں نیں یِسُوع نُوں دیوان خانے وِچ لے جا کے ساری پلٹن اوہدے دوالے اکٹّھی کِیتی۔ تے اوہدے کپڑے لاہ کے قِرمزی چوغہ اوہنوں پایا۔ تے کنڈیاں دا تاج بنا کے اوہدے سِر اُتّے رکھیا۔ تے اِک کانا اوہدے سَجّے ہتّھ وِچ دِتّا تے اوہدے اگّے گوڈے نواکے تے اوہنوں ٹھٹّھا مار کے آکھیا اَے یہُودِیاں دے بادشاہ سلام۔ تے اوہناں اوہدے اُتّے تُھکیا۔ تے کانا لے کے اوہدے سِر اُتّے ماریا۔ تے اوہناں جد ٹھٹّھا کر لیا۔ تے اوہناں نیں اوس چوغے نُوں اوہدے اُتّوں لاہ لیا۔ تے اوہدے اپنے کپڑے اوہنوں پا کے اوہنوں سُولی اُتّے چڑھان لے گئے۔ تے جدوں اوہ باہر جاندے سن اوہناں نُوں اِک کُرینی بندہ شمعُون ناں ٹکّریا۔ اوہناں اوہنوں وگاری پھڑیا پئی اوہدی صلِیب چُک کے لے چلّے۔ تے جد اوہ اوس تھاں جِہدا ناں گُلگُتا سی جیہڑی کھوپڑی دی تھاں اکھواؤندی اے اَپڑے۔ اوہناں انگور دی رَس وِچ پِتّا رَلا کے اوہنوں پِین لئی دِتّی۔ تے جد اوس چکھّی اوہ پِینا نئیں سی چاہندا۔ تے جد اوہناں اوہنوں صلِیب اُتّے چڑھایا۔ تَد گُنے پا کے اوہدے کپڑے ونڈ لَئے۔ تے بَہہ کے اوس تھاں اوہدی راکھی کِیتی۔ تے سِروں اُتّے کر کے اوہناں اوہدا الزام لکھا کے ٹنگ دِتّا ایہہ یِسُوع یہُودِیاں دا بادشاہ اے۔ اودُوں ای اوہناں اوہدے نال دو ڈاکُو صلِیب اُتّے چڑھائے۔ اِک سَجّے تے اِک کھبّے پاسے۔ تے جیہڑے لنگھدے جاندے سن مِہنا مار کے تے سِر ہِلاہِلا کے آکھدے سن۔ تُوں جیہڑا ہیکل نُوں ڈھا کے تِنّاں دِناں وِچ بنانا ایں۔ اپنے آپ نُوں بچا لے۔ جے تُوں خُدا دا پُتر ایں۔ تے صلِیب اُتّوں اُتر آ۔ ایسے طرح سردار کاہِناں وی فقِیہاں تے بزُرگاں سَنے مِل کے ٹھٹّھا ماریا تے آکھیا۔ اوس ہورناں نُوں بچایا۔ پر اپنے نُوں نئیں بچا سکدا۔ ایہہ تے اِسرائیل دا بادشاہ اے صلِیبوں ہُن اُتر آوے تے اسی اوہدے اُتّے اِیمان لیاواں گے۔ اوہ خُدا اُتّے بھروسا رکھدا اے۔ جے اوہ اوہنوں چاہندا اے تَد ہُن اوہنوں چھڈاوے کیوں جو اوس آکھیا۔ پئی مَیں خُدا دا پُتر آں۔ تے اوہ ڈاکُو وی جیہڑے اوہدے نال صلِیب اُتّے چڑھائے گئے سن ایہو ای طعنہ مار دے سن۔ تے دوپہروں لے کے ترِیجے پَہر تِیکر ساری زمین اُتّے ہنیرا ہوگیا۔ تے ترِیجے پَہر یِسُوع اُچّی اواز نال پُکار کے آکھیا۔ ”ایلی ایلی لما شبقتنی۔“ جیہدے معنے ایہہ نیں اَے میرے خُدا اَے میرے خُدا تُوں مَینُوں کیوں چھڈ دِتّا؟ تے اوہناں وِچوں جیہڑے اوتھے کھلوتے سن کئیاں ایہہ سُن کے آکھیا پئی اوہ ایلیّاہ نُوں اَوازاں مار دا اے۔ تے جھٹ اوہناں وِچوں اِک نیں بھج کے سپنج لیا تے سر کے وِچ بھیویاں تے کانے اُتّے رکھ کے اوہنوں پیایا۔ پر دُوجیاں آکھیا رہن دے ویکھئے ایلیّاہ اوہنوں بچان واسطے آؤندا اے کہ نئیں۔ تے یِسُوع فیر اُچّی اواز نال چلّا کے جان دِتّی۔ تے ویکھو ہیکل دا پڑدا اُپروں لے کے ہیٹھاں تِیکر پاٹ گیا تے زمین کمبی۔ تے پتّھر تِڑک گئے۔ تے قبراں کُھل گِئیاں تے پاک لوکاں دِیاں جیہڑے سُتّے پئے سن لوتھاں جوائیاں گِئیاں۔ تے اوہدے جی اُٹھن دے پِچّھوں اوہ قبراں وِچوں نِکل کے پاک شہر وِچ جاوڑیاں تے بتھیریاں نُوں وکھالی دِتّی۔ تے صُوبیدار تے اوہدے نال دے جیہڑے یِسُوع دی راکھی کر دے سن بُھچال تے سارا حال ویکھ کے بُہت ڈر گئے تے آکھن لگّے ایہہ سَچ مُچ خُدا دا پُتر سی۔ تے اوتھے بتھیریاں زنانِیاں دُوروں پئیاں ویکھ دِیاں سن۔ جیہڑیاں یِسُوع دی ٹہل سیوا کر دیاں اوہدے مگر مگر گلِیلوں آئِیاں ہویاں سن۔ اوہناں وِچ مریم مگدلِینی سی۔ تے نالے اوہ مریم جیہڑی یعقُوب تے یُوسف دی ماں سی تے نالے زبدی دے پُتراں دی ماں۔ تے جد شام پئی۔ اِک دَولتمند بندہ ارِمَتِیاہ دا جِہدا ناں یُوسف سی آیا تے اوہ آپ وی یِسُوع دا شاگِرد سی۔ اوس پِیلاطُس کول جا کے یِسُوع دی لوتھ منگی۔ تَد پِیلاطُس نے حُکم کِیتا پئی اوہ دِتّی جاوے۔ تے یُوسف لوتھ نُوں لے کے اوہنوں صاف مَلمَل دا کفن دِتّا۔ تے اپنی نَوِیں قبر وِچ جیہڑی اوس نے پتّھر وِچ کُھدوائی ہوئی سی دفنایا۔ تے اِک وَڈا سارا پتّھر قبر دے مُنھ اُتّے دھرکے ٹُرگیا۔ تے مریم مگدلِینی تے دُوجی مریم اوتھے قبر دے سامھنے بَیٹھیاں ہویاں سن۔ تے اگلے بَھلک جیہڑا تیاری دے دِن دے پِچّھوں اے سردار کاہِن تے فریسی اکٹّھے ہو کے پِیلاطُس دے کول آئے۔ تے آکھن لگّے سانُوں یاد اے۔ پئی اوہ فریبی اپنے جِیوندے جی آکھ گیا سی پئی مَیں تِنّاں دِناں پِچّھوں جی اُٹھاں گا۔ ایس لئی حُکم کر پئی ترِیجے دِن تِیکر قبر دا پَکّ کِیتا جائے۔ متے اوہدے شاگِرد آ کے اوہنوں چُرا لے جان تے مُڑ لوکاں نُوں آکھن پئی اوہ مُردیاں وِچوں جی اُٹھیا اے تے پِچّھلی بُھل پہلی نالوں بُری ہو جاوے گی۔ پِیلاطُس نے اوہناں نُوں آکھیا تُہاڈے کول پہرے والے نیں جاؤ جِیکُوں سمجھو اوہدا پَکّ کرو۔ تَد اوہ گئے تے پہرے والیاں دے نال اوہناں پتّھر اُتّے مُہر لائی تے قبر دا پَکّ کِیتا۔ سبت دے اخِیری ویلے۔ ہفتے دے پہلے دِن جدوں دِن چڑھن والا سی۔ تَد مریم مگدلِینی تے دُوجی مریم قبر نُوں ویکھن آئِیاں۔ تے ویکھو اِک بڑا بُھچال آیا ایس لئی پئی خُداوند دا فرِشتہ اسمانوں اُتر کے نیڑے آیا۔ تے اوس پتّھر نُوں رِیہڑ کے اوہدے اُتّے بَہہ گیا۔ اوہدی صُورت بِجلی جیہی سی تے اوہدی پوشاک برف جیہی چِٹّی سی۔ تے اوہدے ڈر نال راکھے کنب گئے مُردیاں وانگُوں ہوگئے۔ پر فرِشتے زنانِیاں نُوں اگّوں آکھیا۔ تُسی نا ڈرو۔ کیوں جو مَیں جاننا آں پئی تُسی یِسُوع نُوں جیہڑا صلِیب اُتّے چڑھایا گیا سی لَبّھ دِیاں اوہ۔ اوہ ایتھے نئیں اے کیوں جو جیویں اوس آکھیا سی اوہ جی اُٹھیا اے آؤ اوہ جگہ ویکھو جِتّھے خُداوند پیا ہویا سی۔ تے چھیتی جا کے اوہدے شاگِرداں نُوں آکھو۔ پئی اوہ مُردیاں وِچوں جی اُٹھیا اے تے ویکھو اوہ تُہاڈے اگّے گلِیل نُوں جاندا اے۔ اوہنوں تُسی اوتھے ویکھو گے لوؤ مَیں تُہانوں دس دِتّا۔ تے اوہ ڈر تے بڑی خُوشی نال قبر کولوں چھیتی ٹُرگِئیاں تے اوہدے شاگِرداں نُوں خبر دین بھجیاں گِئیاں۔ تے ویکھو یِسُوع اوہناں نُوں اگّوں ہو کے مِلیا تے آکھیا سلام۔ تے اوہناں اوہدے کول آ کے اوہدے پَیر پھڑے۔ تے اوہنوں سجدہ کِیتا۔ تَد یِسُوع اوہناں نُوں آکھیا ڈرو نا۔ جاؤ میرے بھراواں نُوں آکھو پئی گلِیل نُوں جان تے اوہ اوتھے مَینُوں ویکھن گے۔ جد اوہ لگِیاں جاندِیاں سن ویکھو پہرے والیاں وِچوں کئیاں شہر وِچ جا کے سبھ کُجھ جو ہویا سی سردار کاہِناں نُوں دسیا۔ تے اوہناں بزُرگاں نال اکٹّھ کر کے آپو وِچ صلاح کِیتی تے سپاہیاں نُوں بُہت سارا رُپیا دِتّا تے آکھیا۔ تُساں ایہہ آکھنا پئی ساڈے سُتّیاں ہویاں اوہدے شاگِرد رات نُوں آئے تے اوہنوں چوری کڈھ کے لے گئے۔ تے جے ایہہ گلّ حاکم دے کنّاں تِیکر اَپڑے گی۔ تے اسی اوہنوں منالاں گے۔ تے تُہاڈا فِکر لاہ دیاں گے۔ تے اوہناں رُپئے لے کے اوہ ای کِیتا۔ جیویں اوہناں نُوں سکھایا گیا سی تے ایہہ گلّ یہُودِیاں وِچ مشہُور کِیتی گئی تے اَج تِیکر لگی آؤندی اے۔ پر یارھاں شاگِرد گلِیل نُوں ٹُر گئے۔ اوس پہاڑ ولّ جِتّھے یِسُوع اوہناں نال ٹھہرایا ہویا سی۔ تے اوہناں اوہنوں ویکھ کے سجدہ کِیتا۔ پر بعضیاں نیں شک کِیتا۔ تے یِسُوع کول آ کے اوہناں دے نال گلّ کِیتی۔ تے آکھیا پئی اسمان وِچ تے زمین اُتّے سارا اختیار مَینُوں دِتّا گیا اے۔ ایس کر کے تُسی جاؤ تے سارِیاں قوماں نُوں شاگِرد بناؤ۔ تے باپ تے پُتر تے پاک رُوح دے نال اُتّے اوہناں نُوں بپتِسمہ دیو۔ تے اوہناں نُوں سکھاؤ پئی اوہناں سارِیاں گلّاں دی پالنا کرن جِنہاں دا مَیں تُہانوں حُکم دِتّا سی۔ تے ویکھو دُنیا دے اخِیر تِیکر ہر ویلے مَیں تُہاڈے نال آں۔ آمِین۔ خُدا دے پُتر یِسُوع مسِیح دی اِنجِیل دا مُڈھ۔ جیہا یسعیاہ نبی دی کتاب وِچ لِکھیا اے۔ پئی ویکھ مَیں اپنے رسُول نُوں تیرے اگّے گھلّنا آں۔ اوہ تیرا راہ بنا دے گا۔ بیابان وِچ اِک ہوکا دین والے دی اواز پئی خُداوند دی راہ نُوں تیار کرو۔ تے اوہدے رستیاں نُوں سِدّھیاں کرو۔ یُوحنّا آیا۔ جیہڑا بیابان وِچ بپتِسمہ دیندا تے گُناہاں دی مُعافی دے لئی تَوبہ دے بپتِسمہ دی منادی کر دا سی۔ تے یہُودیہ دا سارا دیس تے یرُوشلِیم دے سارے رہن والے اوہدے کول لگے آوندے سن۔ تے اوہناں اپنے گُناہاں نُوں مَن کے یَردن ندی وِچ اوہدے ہتھّوں بپتِسمہ لیا۔ تے یُوحنّا اُوٹھ دے والاں دی پوشاک پاندا سی تے چَمّ دی پیٹی اوہدے لکّ دوالے سی۔ تے بیابان دا شہد کھاندا سی۔ تے اوہ منادی کر دا سی۔ پئی میرے پِچّھے اِک مَیتھوں زوراور آؤندا اے۔ تے مَیں نِیؤں کے اوہدی جُتّی دی وَدّھری کھولن دے لائق نئیں۔ مَیں تُہانوں پانی نال بپتِسمہ دِتّا اے۔ پر اوہ تُہانوں پاک رُوح نال بپتِسمہ دیوے گا۔ تے اونہی دِنیں ایویں ہویا پئی یِسُوع گلِیل دے ناصرۃ توں آیا تے یَردن وِچ یُوحنّا دے ہتھّوں بپتِسمہ لیا۔ تے پانیوں نِکلدیاں سار اوس اسماناں نُوں کُھلدیاں تے رُوح نُوں کبُوتر وانگُوں اپنے اُتّے اُتر دیاں ویکھیا۔ تے اسمانوں اِک اواز آئی۔ پئی تُوں میرا پیارا پُتر ایں۔ تَیتھوں مَیں راضی آں۔ تے رُوح نے اونویں بیابان ولّ اوہنوں گھلّیا۔ تے بیابان وِچ چالی دِن شیطان اوہنوں ازماؤندا رہیا۔ تے اوہ بیابانی جنَوراں دے نال رہندا سی تے فرِشتے اوہدی سیوا کر دے سن۔ تے یُوحنّا دے پھڑے جان دے پِچّھوں یِسُوع خُدا دی اِنجِیل دی منادی کر دا تے ایہہ آکھدا گلِیل وِچ آیا۔ پئی ویلا آگیا اے تے خُدا دی بادشاہی نیڑے آگئی اے۔ تَوبہ کرو۔ تے اِنجِیل اُتّے اِیمان لیاؤ۔ تے گلِیل دے سمُندر دے کنڈھے اُتّے پِھردیاں اوس شمعُون دے بھرا اندریاس نُوں سمُندر وِچ جال پاؤندیاں ویکھیا۔ کیوں جو اوہ مچھّیاں دے شِکاری سن۔ تے یِسُوع نے اوہناں نُوں آکھیا۔ میرے مگر ٹُرے آؤ تے مَیں تُہانوں بندیاں نُوں پھڑن والے بناواں گا۔ تے اوہ جھٹ جالاں نُوں چھڈ کے اوہدے مگر ٹُر پئے۔ تے تھوڑی دُراڈے اگّے وَدّھ کے اوس زبدی دے پُتر یعقُوب تے اوہدے بھرا یُوحنّا نُوں ویکھیا۔ پئی اوہ بیڑی وِچ جالاں نُوں ٹھیک پئے کر دے سن۔ اونویں اوہناں نُوں سدّیا تے اوہ اپنے پئیو زبدی نُوں بیڑی وِچ کامیاں دے نال چھڈ کے اوہدے مگر ٹُر پئے۔ تے اوہ کَفرنحُوم اَپڑے۔ تے اوہ اوسے ویلے عبادت خانے وِچ جا کے تعلِیم دین لگّا۔ تے اوہ اوہدی تعلِیم توں حَیران ہوئے کیوں جو اوہ اوہناں نُوں فقِیہاں وانگُوں نئیں پر اختیار والے وانگُوں تعلِیم دیندا سی۔ تے اوسے ویلے اوہناں دے عبادت خانے وِچ اِک بندہ سی۔ جِہنُوں پلِیت رُوح چمبڑی ہوئی سی۔ تے اوس اُچّی اواز نال آکھیا۔ پئی۔ اَے یِسُوع ناصری۔ تیرا ساڈے نال کِیہ لاگا اے؟ تُوں ساڈا ناس کرن آیا ایں۔ مَیں تینُوں جاننا آں۔ پئی تُوں کون ایں۔ خُدا دا قُدُّوس۔ تے یِسُوع اوہنوں جِھڑک کے آکھیا۔ چُپ رہو تے ایہدے وِچوں نِکل جا۔ تَد پلِیت رُوح اوہنوں مروڑ کے تے چِیکاں مار دی اوہدے وِچوں نِکل گئی۔ تے سارے لوک اَیڈے حَیران ہوئے پئی آپو وِچ چَرچا کرن لگّے پئی ایہہ کِیہ اے؟ اِک نَوِیں تعلِیم اے! پئی اوہ پلِیت رُوحاں نُوں وی اختیار نال حُکم کر دا اے۔ تے اوہ اوہنوں مَن لَیندیاں نیں۔ اونویں ای گلِیل دے سارے علاقے وِچ اوہدی دُھم سبھنیں تھائِیں پَے گئی۔ تے اوہ اوسے ویلے عبادت خانیوں باہر جا کے یعقُوب تے یُوحنّا نال شمعُون تے اندریاس دے گھر آئے۔ تے شمعُون دی سَس تاپ نال پئی ہوئی سی۔ تے اوہناں نیں جھٹ اوہنوں اوہدی خبر دِتّی۔ تے اوس کول آ کے اوہنوں ہتھّوں پھڑ کے اُٹھا لیا تے اوہدی تاپ لیَہہ گئی۔ تے اوس اوہناں دی سیوا کِیتی۔ شام دے ویلے جد سُورج ڈُب گیا۔ ساریاں بِیماراں نُوں تے جِنہاں نُوں بد رُوحاں دا سایہ سی اوہدے کول لیائے۔ تے سارا شہر بُوہے اُتّے اکٹّھا ہویا سی۔ تے اوس بتھیریاں نُوں جیہڑے وَکھو وَکھ بیماریاں وِچ پئے سن ولّ کِیتا۔ تے بتھیریاں بد رُوحاں کڈھ دِیتّاں۔ تے بد رُوحاں نُوں بولن نا دِتّا۔ کیوں جو اوہناں اوہنوں پچھان لیا سی۔ تے اوہ مُنھ ہنیرے کُجھ رات رہندیاں اُٹھیا۔ تے باہر نِکل کے اِک اُجاڑ تھاں وِچ گیا۔ تے اوتھے دُعا کِیتی۔ تے شمعُون تے اوہدے ساتھی اوہدے پِچّھے گئے۔ جد اوہناں اوہنوں لَبّھ لیا۔ تے اوہنوں آکھیا پئی تینُوں سبھے بھالدے نیں۔ تے اوس اوہناں نُوں آکھیا۔ آؤ ہور کِتے نیڑے شہراں وِچ چلّئے پئی مَیں اوتھے وی منادی کراں۔ کیوں جو مَیں ایسے لئی نِکلیا آں۔ تے اوہ سارے گلِیل وِچ اوہناں دے عبادت خانیاں وِچ منادی کر دا تے بدرُوحاں نُوں کڈھدا گیا۔ تے اِک کوڑھا اوہدے کول آیا۔ تے اوہدی مِنّت کر کے اوہدے اگّے گوڈے نواکے آکھیا۔ جے تُوں چاہیں تے مَینُوں پاک صاف کر سکدا ایں۔ تے اوس ترس کھا کے اپنا ہتّھ وَدھایا۔ تے اوہنوں چُھوئیا۔ تے آکھیا۔ مَیں چاہناں آں تُوں پاک صاف ہو جا۔ تے اونویں اوہدا کوڑھ جاندا رہیا تے اوہ پاک صاف ہوگیا۔ تَد اوس اوہنوں تاکِید کر کے اوسے ویلے ٹور دِتّا۔ تے اوہنوں آکھیا۔ ویکھ! تُوں کِسے نُوں کُجھ نا دسیں۔ پر جا تے اپنا آپ کاہِن نُوں وکھا تے اوہ چڑھاوا جِہدا مُوسیٰ نے حُکم کِیتا اپنے پاک ہون دی بابت چاڑھ۔ تاں جو اوہناں لئی گواہی ہوئے۔ پر باہر جا کے اوس بُہت بولن تے ایس گلّ نُوں ایڈا مشہُور کرنا شُروع کِیتا۔ پئی یِسُوع فیر شہر وِچ کُھلّم کُھلا وڑ نا سکیا۔ پر باہر اُجاڑ تھانواں وِچ رہیا۔ تے لوک چار چَوفیریوں اوہدے کول آوندے ہوندے سن۔ تے کَیّاں دِناں پِچّھوں جد اوہ کَفرنحُوم وِچ فیر آیا۔ تے سُنیاں گیا سی پئی اوہ گھر وِچ اے۔ تے اینے لوک اکٹّھے ہوئے پئی بُوہے دے اگّے وی تھاں نا رہیا۔ تے اوس اوہناں نُوں کلام سُنایا۔ تے اوہ مفلُوج ہوئے نُوں چَوہاں بندیاں کولوں چُکوا کے اوہدے کول لیائے۔ تے جد اوہ بِھیڑ دے سبّب کر کے اوہدے نیڑے نا آسکے۔ تَد اوہناں اوس چھت وِچ جِتّھے اوہ سی مگّھ کِیتا۔ تے جدوں اُدھیڑ چُکے تے اوس مَنجی نُوں جِہدے اُتّے مفلُوج پیا سی اُتار دِتّا۔ تے یِسُوع اوہناں دا اِیمان ویکھ کے اوس مفلُوج نُوں آکھیا۔ بچّیا! تیرے گُناہ مُعاف کِیتے گئے۔ پر کئی فقِیہ اوتھے بَیٹھے اپنے مَن وِچ وچار کر دے سن پئی۔ ایہہ کیوں ایس طرح بولدا اے؟ کُفر بَکدا اے۔ اِک خُدا باہجوں کون گُناہ مُعاف کر سکدا اے؟ تے اوسے ویلے یِسُوع اپنے رُوح نال معلُوم کر کے پئی اوہ اپنے مَناں وِچ ایویں وچار کر دے نیں۔ اوہناں نُوں آکھیا۔ تُسی کاہِنُوں اپنے دِل وِچ اجیہا وچار کر دے اوہ؟ ایس مفلُوج نُوں کِیہ آکھنا سوکھا اے۔ ایہہ پئی تیرے گُناہ مُعاف ہوئے یاں ایہہ آکھنا۔ پئی اُٹھ تے اپنی مَنجی چُک تے ٹُر پھر؟ پر ایس لئی پئی تُسی جانو۔ پئی اِبنِ آدم نُوں زمین اُتّے گُناہ مُعاف کرن دا اختیار اے۔ (اوہنے اوس مفلُوج نُوں آکھیا۔) مَیں تینُوں آکھنا آں۔ اُٹھ اپنی مَنجی چُک کے اپنے گھر نُوں ٹُر جا۔ تے اوہ اُٹھیا تے مَنجی چھیتی نال چُک کے اوہناں سبھناں دے سامھنے نِکل گیا۔ تَد سارے حَیران ہوگئے۔ تے خُدا دی وڈیائی کر کے آکھن لگّے پئی اساں ایس طرح دی گلّ کدی نئیں ویکھی۔ تے اوہ فیر سمُندر دے کنڈھے اُتّے گیا تے ساری بِھیڑ اوہدے کول آئی۔ تے اوس اوہناں نُوں تعلِیم دِتّی۔ تے جاندے ہوئے اوس حلفئی دے پُتر لاوی نُوں محصُول دی چَوکی اُتّے بَیٹھیاں ویکھیا۔ تے اوہنوں آکھیا پئی میرے پِچّھے ٹُر آ۔ سو اوہ اُٹھیا تے اوہدے پِچّھے ٹُر پیا۔ تے ایویں ہویا پئی جدوں اوہدے گھر وِچ روٹی کھان بَیٹھا۔ تے بتھیرے محصُولئے تے گُنہگار یِسُوع تے اوہدے شاگِرداں نال بَہہ گئے۔ کیوں جو اوہ بتھیرے سن۔ تے اوہدے مگر ٹُر آئے سن۔ تے جد فرِیسیاں دے فقِیہاں نیں اوہنوں محصُولِیاں تے گُنہگاراں نال کھاندیاں ویکھیا۔ تَد اوہدے چیلیاں نُوں آکھیا پئی اوہ محصُولِیاں تے گُنہگاراں دے نال کھاندا پَیندا اے۔ تے یِسُوع سُن کے اوہناں نُوں آکھیا۔ پئی تگڑیاں نُوں حکِیم دی لوڑ نئیں پر روگِیاں نُوں لوڑ اے۔ مَیں نیکاں نُوں نئیں پر گُناہِیاں نُوں سَدّن آیا آں۔ تے یُوحنّا دے شاگِرد تے فریسی روزہ رکھدے سن۔ تے اوہناں آ کے اوہنوں آکھیا پئی یُوحنّا دے شاگِرد تے فرِیسیاں دے شاگِرد کیوں روزہ رکھدے نیں۔ پر تیرے شاگِرد نئیں رکھدے؟ تے یِسُوع اوہناں نُوں آکھیا۔ پئی جد تِیکر لاڑا جانجیاں دے نال اے۔ اوہ روزہ رکھ سکدے نیں؟ پر اوہ دِن آؤن گے جد لاڑا اوہناں توں اَڈ کِیتا جائے گا۔ تَد اوس دِن اوہ روزہ رکھن گے۔ پرانے کپڑے نُوں کورے کپڑے دی ٹاکی کوئی نئیں لاندا۔ جے لاوے وی تے اوہ لائی ہوئی ٹاکی اوس توں کُجھ کھِچّ لَیندی اے یعنی نَوِیں پرانے توں تے لنگار وَدّھ جاندا اے۔ تے نَوِیں انگور دے رَس نُوں پرانیاں مشکاں وِچ کوئی نئیں بھردا۔ جے بھرے وی تے رَس مشکاں نُوں پاڑ دے گا۔ تے انگور دا رَس تے مشکاں دوہاں دا ناس ہو جاندا اے۔ پر نَوِیں انگور دے رَس نُوں نَوِیاں مشکاں وِچ بھر دے نیں۔ تے ایویں ہویا پئی اوہ سبت دے دِن پَیلِیاں وِچوں لنگھ دا پیا سی۔ تے اوہدے شاگِرد راہ وِچ سِٹّے توڑن لگّے۔ تے فرِیسیاں نیں اوہنوں آکھیا۔ ویکھ۔ ایہہ سبت دے دِن کیوں اوہ کمّ کر دے نیں جِہدا کرنا روا نئیں اے؟ تے اوس اوہناں نُوں آکھیا۔ تُساں کدی نئیں پڑھیا پئی جدوں داؤد نُوں لوڑ پئی۔ تے اوہنوں تے اوہدے سَنگیاں نُوں بُھکھ لگّی۔ تے اوس کِیہ کِیتا۔ پئی اوہ کِیویں سردار کاہِن اَبیاتر دے ویلے خُدا دے گھر وِچ گیا۔ تے چڑھاوے دِیاں روٹِیاں کھا لئیاں۔ جِنہاں دا کھانا کاہِناں دے بِناں ہور کِسے نُوں روا نئیں سی۔ تے اپنے سَنگیاں نُوں وی دِتّیاں؟ تے اوس اوہناں نُوں آکھیا۔ پئی سبت دا دِن اِنسان دے لئی بنیا اے۔ نا اِنسان سبت دے لئی۔ ایس لئی اِبنِ آدم سبت دے دِن دا وی مالک اے۔ تے اوہ عبادت خانے وِچ فیر گیا۔ تے اوتھے اِک بندہ سی جِہدا ہتّھ سُکّا ہو یا سی۔ تے اوہ اوہدی تاک وِچ لگّے ہوئے سن۔ پئی جیکر اوہ سبت دے دِن اوہنوں ولّ کرے تے اسی اوہدے اُتّے نالش کریئے۔ تے اوہنے اوس بندے نُوں جِہدا ہتّھ سُکّا ہویا سی آکھیا۔ پئی وِچکار کھلو جا۔ تَد اوس اوہناں نُوں آکھیا۔ سبت دے دِن بھلے کمّ کرنے روا نیں یا بُرے کمّ؟ جان بچانی یا جان مارنی؟ پر اوہ چُپ ای رہے تَد اوس اوہناں دی سخت دِلی دے سبّب اُداس ہو کے غُصّے دی نظر نال اوہناں ولّ ویکھیا تے اوس بندے نُوں آکھیا اپنا ہتّھ وَدّھا۔ تے اوس وَدھایا تے اوہدا ہتّھ ٹھیک ہوگیا۔ تَد فرِیسیاں باہر جا کے اوسے ویلے ہیرودیاں نال اوہدے برخلاف صلاح کِیتی پئی کِیویں اوہنوں مار سُٹّیئے۔ تے یِسُوع اپنے شاگِرداں سَنے سمُندر ولّ ٹُر گیا تے گلِیل توں بڑی خلقت مگر ٹُر پئی۔ تے یہُودیہ تے یرُوشلِیم تے اِدومَیہ تے یَردن دے پاروں تے صُور تے صَیدا دے آلے دَوالیوں وی اِک وڈّی بِھیڑ ایہہ خبر سُن کے پئی اوہ کیڈے وڈّے کمّ کر دا اے اوہدے کول آئی۔ تے اوس اپنے شاگِرداں نُوں آکھیا پئی بِھیڑ دے سبّب اِک بیڑی میرے لئی تیار رہے پئی لوک مَینُوں تنگ نا کرن۔ کیوں جو اوس بتھیریاں نُوں ولّ کِیتا سی۔ ایتھوں تِیکر پئی جیہڑے لوک سخت بیمار سن اوہنوں چُھون لئی اوہدے اُتّے ڈِگّدے جاندے سن۔ تے پلِیت رُوحاں جد اوہنوں ویکھدِیاں سن اوہدے اگّے ڈِگّ پَیندیاں سن تے چِیکاں مار کے آکھدیاں سن۔ تُوں خُدا دا پُتر ایں۔ تے اوس اوہناں نُوں بڑی تاکِید کِیتی پئی مَینُوں مشہُور نا کرو۔ فیر اوس اِک پہاڑ اُتّے چڑھ کے جِنہاں نُوں آپ چاہندا سی اوہناں نُوں کول سدّیا۔ تے اوہ اوہدے کول گئے۔ تے اوس باراں نُوں مُقرّر کِیتا پئی اوہدے نال رہن۔ تے اوہ اوہناں نُوں گھلّے۔ پئی منادی کرن۔ تے نالے بدرُوحاں نُوں کڈھن دی قُدرت رکھن۔ تے اوس شمعُون دا ناں پطرس وی رکھیا۔ تے زبدی دا پُتر یعقُوب تے یعقُوب دا بھرا یُوحنّا۔ جِنہاں دوآں دا ناں بُوانِرگِس یعنی گرج دے پُتر رکھیا۔ تے اندریاس تے فِلپُّس۔ تے برتُلمائی تے متّی۔ تے تُوما تے حلفئی دا پُتر یعقُوب تے تدّی۔ تے شمعُون قنانی۔ تے یہُوداہ اِسکریُوتی جِس اوہنوں پھڑوا وی دِتّا۔ تے اوہ گھر آیا۔ تے اینی بِھیڑ فیر اکٹّھی ہوئی پئی اوہ روٹی وی نا کھا سکے۔ جد اوہدے سَنگیاں ایہہ حال سُنیا تَد اوہنوں قابُو کرن لئی نِکلے۔ کیوں جو اوہناں آکھیا پئی اوہ سَودائی اے۔ تے فقِیہ جیہڑے یرُوشلِیم توں آئے سن آکھن لگّے پئی اوہ بَعلزبُول نال مِلیا ہویا اے۔ تے بدرُوحاں دے سردار دی مدد نال بدرُوحاں نُوں کڈھدا اے۔ اوس اوہناں نُوں کول سَدّ کے تمثِیلاں وِچ آکھیا پئی شیطان شیطان نُوں کِیویں کڈھ سکدا اے؟ تے جیکر کِسے راج وِچ پُھٹ پَے جاوے۔ تے اوہ راج قیم نئیں رہ سکدا۔ تے جے کِسے گھر وِچ پُھٹ پَے جاوے تے اوہ گھر قیم نا رہ سکے گا۔ تے جے شیطان اپنے ای مُقابلے اُتّے اُٹھ کھلووے۔ تے اوہدے وِچ پُھٹ پَے جاوے تے اوہ قیم نئیں رہ سکدا۔ سگوں اوہدا اوڑک ہوندا اے۔ پر زوراور بندے دے گھر وِچ کوئی اوہدا اسباب لُٹّن لئی وڑ نئیں سکدا۔ جد تِیکر پہلاں اوس زوراور نُوں بَنّھ نا لَوے۔ تَد ای اوہ اوہدا گھر لُٹّے گا۔ مَیں تُہانوں سَچ آکھنا آں پئی بنی آدم دے سارے گُناہ تے کُفر جِنّے اوہ بکن گے۔ مُعاف کِیتے جان گے۔ پر اوہ جیہڑا پاک رُوح دے حق وِچ کُفر بولے۔ اوہنوں کدی وی مُعافی نئیں مِلدی۔ سگوں ہمیشہ دے گُناہ دا مُجرم اے۔ کیوں جو اوہناں آکھیا سی پئی پلِیت رُوح اوہدے وِچ اے۔ تے اوہدی ماں تے اوہدے بھرا آئے تے باہر کھلو کے اوس نُوں سدّیا۔ تے بِھیڑ اوہدے چَوفیرے بَیٹھی ہوئی سی۔ تے لوک اوہنوں آکھن لگّے پئی ویکھ۔ تیری ماں تے تیرے بھرا باہر تینُوں مِلنا چاہندے نیں۔ اوس اوہناں نُوں جواب دے کے آکھیا۔ کون اے میری ماں تے میرے بھرا؟ تے اوہناں ولّ جیہڑے اوہدے آلے دوالے بَیٹھے ہوئے سن نِگاہ کر کے اوس آکھیا۔ ویکھو۔ میری ماں تے میرے بھرا ایہہ نیں۔ کیوں جو جیہڑا کوئی خُدا دی مرضی اُتّے چلّے اوہ ای میرا بھرا تے بھین تے ماں اے۔ تے اوہ فیر سمُندر دے کنڈھے تعلِیم دین لگّا تے ایڈی وڈّی بِھیڑ اوہدے کول اکٹّھی ہوئی پئی اوہ سمُندر وِچ اِک بیڑی اُتّے چڑھ بَیٹھا۔ تے ساری بِھیڑ خُشکی اُتّے سمُندر دے کنڈھے رہی۔ تَد اوس اوہناں نُوں تمثِیلاں وِچ بتھیریاں گلّاں سِکھائِیاں۔ تے اپنی تعلِیم وِچ اوہناں نُوں آکھیا۔ سُنو! ویکھو اِک بِیجن والا بِیجن نُوں نِکلیا۔ تے اوہدے بی پاندیاں ایویں ہویا پئی کُجھ راہ دے کنڈھے کِر پیا۔ تے پنچھی آ کے اوہنوں چُگ گئے۔ تے ہور کُجھ پتّھریلی زمین اُتّے کِریا۔ جِتّھے اوہنوں بُہت مِٹّی نا مِلی تے بُہتی مِٹّی نا مِلن کر کے اوہ چھیتی اُگ پیا۔ پر جد سُورج چڑھیا تے اوہ جُھلس گیا۔ تے جڑ نا ہون دے سبّب سُک گیا۔ تے ہور کُجھ ملہیاں وِچ کِریا۔ تے ملہیاں وَدّھ کے اوہنوں دَبا لیا۔ تے اوہ نا پَھلیا۔ تے ہور کُجھ چنگی زمین وِچ کِریا۔ تے اُگیا تے وَدّھ کے پَھلیا کُجھ تَرِیہہ گُنا۔ کُجھ سَٹّھ گُنا۔ کُجھ سَو گُنا۔ تَد اوس آکھیا جِہدے سُنن دے کنّ ہون سو سُنے۔ تے جد اوہ اکلّا ہو یا تے اوہدے نال دیاں باراں سَنے اوہدے کولوں تمثِیلاں ولّوں پُچھیا۔ تے اوس اوہناں نُوں آکھیا۔ خُدا دی بادشاہی دا بھید تُہانوں دِتّا گیا اے پر اوہناں دے لئی جیہڑے باہر نیں سارِیاں گلّاں تمثِیلاں وِچ ہوندیاں نیں۔ پئی اوہ ویکھن نُوں تے ویکھن پر اوہناں نُوں سُجھّے نا۔ تے سُنن نُوں تے سُنن پر اوہ بُجھّن نا۔ تے اجیہا نا ہوئے پئی اوہ کدی مُڑ آؤن تے اوہناں نُوں مُعافی مِلے۔ تے اوس اوہناں نُوں آکھیا۔ تُسی ایہہ تمثِیل نئیں سمجھدے تے سارِیاں تمثِیلاں نُوں کِیویں سمجھو گے؟ بِیجن والا کلام بِیجدا اے۔ تے راہ دے کنڈھے والے جِتّھے کلام بِیجیا جاندا اے سو اوہ لوک نیں۔ پئی جد اوہناں نیں سُن لیا۔ تَد شیطان اونویں آ کے اوس کلام نُوں لے جاندا اے جیہڑا اوہناں وِچ بِیجیا گیا سی۔ تے ایسے طرح جیہڑے پتّھریلیاں تھانواں وِچ بِیجے جاندے نیں سو اوہ نیں۔ جیہڑے کلام نُوں سُندیاں سار خُوشی نال مَن لَیندے نیں۔ تے اپنے وِچ جڑ نئیں رکھ دے۔ پر تھوڑا چِر رہندے نیں۔ تے جد کلام صدقے تکلیف پاندے یا ستائے جاندے نیں۔ تے جھٹ ٹھوکر کھاندے نیں۔ تے ہور نیں جیہڑے ملہیاں وِچ بِیجے جاندے نیں۔ ایہہ اوہ لوک نیں جِنہاں کلام سُنیا۔ تے دُنیا دے فِکر۔ تے دَولت دا دھوکھا۔ تے ہورناں شیواں دا لالچ آ کے کلام نُوں دَبا لَیندا اے۔ تے اوہ اپّھل ہو جاندا اے۔ تے جیہڑے چنگی زمین وِچ بِیجے گئے سن۔ سو اوہ لوک نیں جیہڑے کلام نُوں سُندے۔ تے قبول کر دے۔ تے پَھل لیاؤندے نیں۔ کُجھ تَرِیہہ گُنا۔ کُجھ سَٹّھ گُنا۔ کُجھ سَو گُنا۔ تے اوس اوہناں نُوں آکھیا۔ کِیہ دِیوے نُوں ٹوپے دے ہیٹھ یا مَنجی دے ہیٹھ رکھن لئی لیاؤندے نیں؟ تے ڈیوڑی اُتّے رکھن واسطے نئیں؟ کیوں جو کوئی شے چُھپی نئیں جیہڑی سامھنے نا آوے۔ تے نا لُکائی گئی پر ایس لئی پئی ظاہر ہوئے۔ جے کِسے دے سُنن دے کنّ ہون تے سُنے۔ تے اوس اوہناں نُوں آکھیا۔ خبردار رہو پئی تُسی کِیہ سُندے اوہ۔ جِس ناپ نال تُسی مِندے ہو اوسے ناپ نال تُہاڈے لئی مِنیا جائے گا۔ تے تُہانوں ودِھیک دِتّا جائے گا۔ ایس لئی پئی جِہدے کول اے اوہنوں دِتّا جائے گا۔ تے جِہدے کول نئیں اے اوہدے توں جو کُجھ اے سو اوہ وی لے لیا جائے گا۔ تے اوس آکھیا خُدا دی بادشاہی اِنج اے۔ جیویں کوئی جَنا زمین اُتّے بی پاوے۔ تے راتِیں سویں تے دِنیں جاگے۔ تے بی اُگ پَوے تے وَدھے۔ پر اوہ نئیں جان دا پئی کِس طرح۔ زمین تے اپنے آپ پَھل لے آؤندی اے۔ پہلاں انگُوری۔ فیر سِٹّا فیر سِٹّے وِچ ثابت دانہ۔ تے جد پَھل پکّ گیا تَد اوہ اونویں داتری لاندا اے پئی واڈھی دا ویلا آگیا اے۔ تے اوس آکھیا۔ اسی خُدا دی بادشاہی نُوں کِہدے وانگ دسیئے۔ یا اوہدے لئی کیہڑی تمثِیل لیا دیئے؟ اوہ رائی دے دانے وانگُوں اے۔ پئی جد زمین وِچ بِیجیا جاندا اے۔ بھانویں زمین دے ساریاں بِیّاں نالوں نِکّا اے۔ پر جد بِیجیا گیا تَد اُگدا اے تے سارِیاں سبزیاں نالوں وَڈا ہو جاندا اے۔ تے وڈّیاں ٹہنِیاں کڈھ دا اے۔ ایتھوں تِیکر پئی اسمان دے پنچھی اوہدی چھانویں وسیرا کر سکدے نیں۔ تے ایہو جِہیاں بتھیریاں تمثِیلاں وِچ اوہناں دے سُنن دی سمجھ دے سببّوں اوہ اوہناں نُوں کلام سُناندا سی۔ تے تمثِیل بِناں اوہ اوہناں نال نئیں سی بولدا۔ تے اکلّا ہو کے اپنے شاگِرداں نُوں سارِیاں گلّاں کھول کے دسدا سی۔ تے اوسے دِن جد شام ہوئی اوس اوہناں نُوں آکھیا پئی اسی پار چلّئے۔ تے بِھیڑ نُوں چھڈ کے اوہ اوہنوں جیویں اوہ سی بیڑی اُتّے نال لے گئے۔ تے ہور وی بیڑیاں اوہدے نال سن۔ تَد بڑی ہنیری وَگّی۔ تے ٹَھلّاں بیڑی اُتّے ایتھوں تِیکر لگِیاں۔ پئی بیڑی پانی نال بھر چلّی سی۔ تے اوہ بیڑی دے پِچّھلے سِرے ولّ سرہانا رکھ کے سُتّا پیا سی۔ تَد اوہناں اوہنوں جگایا تے اوہنوں آکھیا۔ اے اُستاد تینُوں فِکر نئیں پئی اسی مر چلّے آں؟ تَد اوس اُٹھ کے وَا نُوں دَبکایا تے سمُندر نُوں آکھیا۔ چُپ کر تھم جا۔ تَد وَا تھم گئی تے بڑا آرام ہوگیا۔ فیر اوہناں نُوں آکھیا تُسی کاہِنُوں ڈر دے اوہ؟ تُسی ہُن تِیکر اِیمان نئیں رکھدے؟ تے اوہناں نُوں بڑا ڈر لگّا۔ تے آپو وِچ آکھن لگّے پئی ایہہ کون اے۔ پئی اوہدی وَا تے سمُندر وی مَن دے نیں؟ تے اوہ سمُندر دے پار گراسِینیاں دے دیس وِچ اَپڑے۔ تے جدوں اوہ بیڑی اُتّوں اُتریا۔ تے اونویں اِک بندہ جِہنُوں پلِیت رُوح چمبڑی ہوئی سی قبراں وِچوں نِکل کے اوہنوں آ مِلیا۔ اوہ قبراں وِچ وَسدا سی۔ تے ہُن کوئی اوہنوں سنگلاں نال وی جکڑ نئیں سی سکدا۔ کیوں جو اوہ کئی واری بیڑیاں تے سنگلاں نال جکڑیا گیا سی۔ تے اوس سنگلاں نُوں توڑ سُٹّیا۔ تے بیڑیاں نُوں ٹوٹے ٹوٹے کر دِتّا تے کوئی اوہنوں قابُو نئیں سی کر سکدا۔ تے اوہ ہمیشہ دِن رات قبراں تے پہاڑاں وِچ چِیکاں مار دا تے اپنے آپ نُوں پتّھراں نال وَڈھدا ہوندا سی۔ پر جیؤں اوس یِسُوع نُوں دُوروں ویکھیا تیؤں دَوڑیا۔ تے اوہنوں سجدہ کِیتا۔ تے اُوچی اواز نال پُکار کے آکھیا میرا تیرا کِیہ لاگا؟ یِسُوع خُدا تعالیٰ دے پُتر۔ تینُوں خُدا دی سَونہہ دینا آں۔ مَینُوں دُکھ نا دے۔ کیوں جو اوس اوہنوں آکھیا سی۔ اَے پلِیت رُوح ایس بندے وِچوں نِکل جا۔ فیر اوس اوہنوں پُچھیا پئی تیرا کِیہ ناں اے؟ اوس اوہنوں آکھیا۔ میرا ناں لشکر اے۔ کیوں جو اسی بتھیرے آں۔ تے اوس اوہدیاں بُہت مِنّتاں کِیتیاں پئی سانُوں ایس دیس وِچوں نا کڈھ۔ تے اوتھے پہاڑاں دے نیڑے سُؤراں دا اِک بڑا اِجّڑ چُگدا سی۔ تے اوہناں اوہدی مِنّت کر کے آکھیا۔ پئی سانُوں سُؤراں دے وِچ گھل دے پئی اسی اوہناں دے وِچ جاوَڑیئے۔ تے اوس اوہناں نُوں جان دِتّا۔ تے پلِیت رُوحاں نِکل کے سُؤراں وِچ وڑگیّاں۔ تے اِجّڑ کھڈ اُتّوں سِر توڑ بھج کے سمُندر وِچ جا ڈِگّیا۔ اوہ گنتری وِچ دو ہزار سن۔ تے اوہ سمُندر وِچ ڈُب موئے۔ تے اوہناں دے چارن والیاں نَسّ کے شہر تے پِنڈاں وِچ خبر دِتّی۔ تے لوک ویکھن آئے۔ پئی کِیہ کِیہ ہویا۔ تے یِسُوع دے کول آ کے اوس دِیوانے نُوں جِہدے وِچ بدرُوحاں دا لشکر سی۔ بَیٹھیاں۔ ہویاں تے کپڑے پایاں ہویاں۔ تے سُرت سمبھالیاں ہویاں ویکھیا۔ تے ڈر گئے۔ تے جِنہاں ایہہ ویکھیا سی اوس دِیوانے دا حال تے سُؤراں دا حال دسیا۔ تَد اوہ اوہدی مِنّت کرن لگّے پئی ساڈی حدّوں باہر چلیا جا۔ تے جدوں اوہ بیڑی اُتّے چڑھن لگّا اوس جِہنُوں بدرُوحاں چمبڑیاں ہویاں سن۔ اوہدے نال رہن واسطے اوہدے اگّے عرض کِیتی۔ تے اوس اوہنوں اجازت نا دِتّی پر اوہنوں آکھیا۔ پئی اپنے گھر اپنیاں کول جا۔ تے اوہناں نُوں دس۔ پئی خُداوند نے تیرے لئی کیڈے وڈّے کمّ کِیتے نیں۔ تے تیرے اُتّے دَیا کِیتی۔ تے اوہ ٹُرپیا تے دِکَپُلِس دے دیس وِچ منادی کرنی شُروع کِیتی۔ پئی یِسُوع اوہدے لئی کیڈے کمّ کِیتے۔ تے سارے لوک حَیران ہوئے۔ تے جدوں یِسُوع بیڑی اُتّے فیر پار لنگھیا۔ تے وڈّی بِھیڑ اوہدے کول اکٹّھی ہوئی۔ تے اوہ سمُندر دے کنڈھے اُتّے سی۔ تے عبادت خانے دے سرداراں وِچوں یائِیر ناں اِک بندہ آیا تے اوہنوں ویکھ کے اوہدے پَیرِیں پیا۔ تے اوہدی بُہت مِنّت کِیتی۔ پئی میری نِکّی دِھی پئی مر دی اے چَل کے اوہدے اُتّے ہتّھ رکھ پئی اوہ چنگی ہوئے تے جیوندی رہے۔ تَد اوہ اوہدے نال گیا۔ تے بڑی بِھیڑ اوہدے مگر ٹُرپئی تے اوہدے اُتّے ڈِگّدی پئی سی۔ تے اِک زنانی جِہنُوں باراں ورھیاں توں لہو آؤندا سی۔ تے اوس بُہت حکیماں دے ہتھّوں بڑا دُکھ پایا۔ تے اپنا سارا مال خرچ کر دِتّا سی۔ پر کُجھ وی آرام نا پایا۔ سگوں اوہدا ہور وی ماڑا حال ہوگیا سی۔ اوہ یِسُوع دی خبر سُن کے بِھیڑ وِچ اوہدے پِچّھوں دی ہو کے آئی۔ تے اوہدا کپڑا چُھوئیا۔ کیوں جو اوہ آکھدی سی۔ پئی جے مَیں اوہدا کپڑا ای چُھو لَواں تے چنگی ہو جاواں گی۔ تے اونویں ای اوہدے لہو دا سُنب سُک گیا۔ تے اوس اپنے بدن توں معلُوم کر لیا۔ پئی مَیں ایس بلا توں چُھٹی۔ تَد یِسُوع نے اوسے ویلے اپنے وِچ جان کے پئی میرے وِچوں قُوّت نِکلی بِھیڑ ولّ مُڑ کے آکھیا۔ میرے کپڑیاں نُوں کِس چُھوئیا؟ تے اوہدے شاگِرداں اوہنوں آکھیا۔ تُوں ویکھنا ایں۔ پئی بِھیڑ تینُوں دَباندی پئی اے فیر تُوں آکھنا ایں پئی مَینُوں کِس چُھوئیا؟ تَد اوس چَوفیرے نظر ماری پئی ایس کمّ دے کرن والی نُوں ویکھے۔ پر اوہ زنانی جدوں اوہنوں معلُوم ہویا پئی میرے اُتّے کِیہ گُذریا اے تے ڈردی تے کمبدی آئی تے اوہدے اگّے ڈِگّ پئی۔ تے ساری حِقیقت اوہنوں دس دِتّی۔ تے اوس اوہنوں آکھیا۔ دِھیے تیرے اِیمان نے تینُوں ولّ کِیتا اے سلامت ٹُر جا تے اپنی بلا توں بچی رہو۔ اوہ اجے بولدا ای سی پئی عبادت خانے دے سردار دے گھروں لوکاں آ کے آکھیا۔ تیری دِھی مر گئی۔ ہُن تُوں اُستاد نُوں کیوں ہور اَوکھیاں کرنا ایں؟ پر یِسُوع اوس گلّ دی جو اوہ آکھدے سن پرواہ نا کر کے عبادت خانے دے سردار نُوں آکھیا۔ نا ڈر صرف اِیمان رکھ۔ تے اوس بِناں پطرس۔ تے یعقُوب۔ تے یعقُوب دے بھرا یُوحنّا دے ہور کِسے نُوں اپنے نال نا آؤن دِتّا۔ جد اوہ عبادت خانے دے سردار دے گھر پہنچے تَد اوس رَولا پیا ہویا تے لوکاں نُوں روندے کُرلاؤندے ویکھیا۔ تے اندر جا کے اوہناں نُوں آکھیا پئی تُسی کاہدے لئی رَولا پاندے تے روندے ہو؟ کُڑی موئی نئیں پر سُتّی ہوئی اے۔ تے اوہ اوہدے اُتّے ہسّے پر اوہ سبھناں نُوں باہر کڈھ کے کُڑی دے پئیو تے اوہدی ماں تے اپنے ساتھِیاں نُوں نال لے کے جِتّھے کُڑی سی اوتھے اندر گیا۔ تے اوس کُڑی دا ہتّھ پھڑ کے اوہنوں آکھیا تلیتا قُومی۔ جیہدے معنے ایہہ نیں۔ کُڑیئے مَیں تینُوں آکھنا آں اُٹھ۔ تے جھٹ کُڑی اُٹھ کھلوتی تے ٹُرن پِھرن لگ پئی۔ کیوں جو اوہ باراں ورھیاں دی سی۔ تَد اوہ اونویں بڑے ای حَیران ہوئے۔ تے اوس اوہناں نُوں بڑی تاکِید کِیتی پئی ایہہ گلّ کوئی نا جانے تے آکھیا۔ اوہنوں کُجھ کھان نُوں دیو۔ تے اوہ اوتھوں ٹُر پیا۔ تے اپنے دیس وِچ آیا۔ تے اوہدے شاگِرد اوہدے مگر لگ پئے۔ تے جد سبت دا دِن ہویا تَد اوہ عبادت خانے وِچ تعلِیم دین لگّا تے بتھیرے سُنن والِیاں حَیران ہو کے آکھیا پئی ایہہ گلّاں اوہنوں کِتّھوں آئِیاں؟ تے ایہہ کہی دانائی اے جو اوہنوں دِتّی گئی؟ تے ایہو جیہیاں کراماتاں جیہڑیاں اوہدے ہتھّوں ہوندیاں نیں کِیہ نیں؟ ایہہ اوہ ترکھان نئیں اے مریم دا پُتر۔ تے یعقُوب تے یوسیس تے یہُوداہ تے شمعُون دا بھرا؟ تے اوہدیاں بھیناں ایتھے ساڈے کول نئیں نیں؟ تے اوہناں اوہدے توں ٹھوکر کھادِی۔ تے یِسُوع اوہناں نُوں آکھیا نبی کِتے بے قدر نئیں اے سِوا اپنے دیس وِچ۔ تے اپنے انگاں ساکاں تے اپنے گھر وِچ۔ تے اوہ کوئی کرامات اوس تھاں نا وکھال سکیا بِناں ایس دے پئی تھوڑے جیہے روگِیاں اُتّے ہتّھ رکھ کے اوہناں نُوں ولّ کِیتا۔ تے اوس اوہناں دی بے اِیمانی اُتّے تعجُّب کِیتا۔ تے آلے دوالے دے پِنڈاں وِچ اوہ تعلِیم دیندا پِھریا۔ تے اوس باراں نُوں کول سدّیا تے اوہناں نُوں دو دو کر کے گھلّنا شُروع کِیتا۔ تے اوہناں نُوں پلِیت رُوحاں اُتّے اختیار دِتّا۔ تے اوہناں نُوں حُکم کِیتا پئی راہ دے لئی سوٹی دے بِناں ہور کُجھ نا لوؤ۔ نا روٹی نا جھولی نا لکّ نال پَیسے بنھّو۔ پر جُتّی پاؤ تے دو کُڑتے نا پاؤ۔ تے اوس اوہناں نُوں آکھیا پئی جِتّھے تُسی کِسے گھر وِچ جاؤ۔ اوتھے ای ٹِکو۔ جِنّاں چِر اوتھوں نا ٹُر پَو۔ تے جِتّھے کِتّھے تُہانوں رہن نا دین۔ تے لوک تُہاڈی نا سُنن تے اوتھوں نِکلدیاں اپنے پیراں دا گھٹّا جھاڑ سُٹّو۔ پئی اوہناں اُتّے گواہی ہوئے۔ تے باہر جا کے اوہناں منادی کِیتی پئی لوک تَوبہ کرن۔ تے اوہناں بتھیریاں بدرُوحاں نُوں کڈھ دِتّا۔ تے بتھیریاں روگِیاں نُوں تیل مَل کے ولّ کِیتا۔ تے ہیرودیس بادشاہ نُوں خبر پہنچی۔ اوہدا ناں جو مشہُور ہوگیا سی۔ تے اوس آکھیا۔ پئی یُوحنّا بپتِسمہ دین والا مُردیاں وِچوں جی اُٹھیا اے۔ ایس لئی کراماتاں اوہدے ہتھّوں ہوندیاں نیں۔ دُوجے آکھدے سن ایہہ ایلیّاہ اے۔ تے دُوجے۔ پئی اِک نبی اے ہورناں نبیاں وانگُوں۔ پر ہیرودیس نے سُن کے آکھیا ایہہ یُوحنّا اے۔ جِہدا مَیں سِر وَڈّھوایا سی۔ اوہو جی اُٹھیا اے۔ کیوں جو ہیرودیس اپنے بھرا فِلپُّس دی بیوی ہیرودیاس دے سبّب جِہنُوں اوس ویاہ لیا سی۔ آپے بندے گھل کے یُوحنّا نُوں پھڑوایا۔ تے قیدخانے وِچ اوہنوں بند کِیتا سی۔ ایس لئی پئی یُوحنّا نے ہیرودیس نُوں آکھیا سی۔ پئی اپنے بھرا دی بیوی نُوں رکھنا تینُوں روا نئیں۔ تے ہیرودیاس اوہدے نال وَیر رکھ دی تے اوہنوں جانوں مارنا چاہندی سی۔ پر وَس نئیں سی چلدا۔ کیوں جو ہیرودیس یُوحنّا نُوں نیک تے پاک بندہ جان کے اوہدے توں ڈردا تے اوہنوں بچائی رکھدا سی۔ تے اوہدی سُن کے بڑا حَیران ہوندا سی۔ تے خُوشی نال اوہدی سُندا ہوندا سی۔ تے موقعہ دا دیہاڑا آگیا۔ پئی ہیرودیس اپنے جنم دِن اُتّے وڈّے وڈّے امِیراں تے صُوبیداراں تے گلِیل دے رئیساں دی ضیافت کِیتی۔ تے جد ہیرودیاس دی دِھی آپ اندر آ کے نچّی۔ تے ہیرودیس تے اوہدے نال بیہن والیاں نُوں خُوش کِیتا۔ تے بادشاہ نے کُڑی نُوں آکھیا۔ جو چاہیں تُوں مَیتھوں منگ۔ مَیں تینُوں دیاں گا۔ تے اوہدے نال سَونہہ کھا دی پئی جو کُجھ تُوں مَیتھوں منگیں گی۔ مَیں اپنے ادھے راج تِیکر وی تینُوں دے دیاں گا۔ تے اوس باہر جا کے اپنی ماں نُوں آکھیا۔ پئی مَیں کِیہ منگاں؟ اوہ آکھن لگّی۔ یُوحنّا بپتِسمہ دین والے دا سِر۔ تَد اوہ اوسے ویلے بادشاہ دے کول چھیتی نال اندر گئی تے عرض کِیتی پئی مَیں چاہنی آں۔ تُوں یُوحنّا بپتِسمہ دین والے دا سِر مَینُوں ہُنے تھال وِچ دے دے۔ تے بادشاہ بُہت اُداس ہویا۔ پر اوہ اپنی سَونہہ تے مجلس دی خاطر اوہنوں نا نئیں سی کرنا چاہندا۔ تَد بادشاہ اوسے ویلے سپاہی نُوں حُکم دے کے گھلّیا پئی اوہدا سِر لیا دے تے اوس جا کے اوہدا سِر قیدخانے وِچ وَڈّھیا۔ تے اِک تھال وِچ رکھ کے لیاندا۔ تے کُڑی نُوں دِتّا تے کُڑی نیں اوہ اپنی ماں نُوں دِتّا۔ تے اوہدے شاگِرد سُن کے آئے تے اوہدی لوتھ چُک کے اوہناں قبر وِچ رکھی۔ فیر رسُول یِسُوع دے کول اکٹّھے ہوئے۔ جو کُجھ اوہناں کِیتا تے جو کُجھ تعلِیم دِتّی سی سبھ کُجھ اوہنوں دسیا۔ تَد اوس اوہناں نُوں آکھیا۔ تُسی آپ وکھرے ہو کے اُجاڑ تھاں ٹُر چلّو۔ تے ذرا آرام کرو۔ ایس لئی پئی آؤن جان والے بُہت سن۔ تے روٹی کھان دی وی ویہل نئیں سی ہوندی۔ تَد اوہ بیڑی اُتّے چڑھ کے اِک اُجاڑ تھاں وِچ وکھرے چلّے گئے۔ پر لوکاں اوہناں نُوں جاندِیاں ویکھیا۔ تے بتھیریاں سنجھان لیا۔ تے سارے شہراں توں پَیدل اودھر نُوں اکٹّھے دَوڑے۔ تے اوہناں توں اگّے اَپڑے۔ تے یِسُوع بڑی خلقت ویکھی۔ تے اوہنوں اوہناں اُتّے ترس آیا۔ کیوں جو اوہ بھیڈاں وانگُوں سن۔ جِنہاں دا ایّالی نا ہوئے۔ تے اوس اوہناں نُوں بتھیریاں گلّاں سِکھانِیاں شُروع کِیتیاں۔ تے جد دِن بُہت ڈھل گیا۔ اوہدے شاگِرداں نیں اوہدے کول آ کے آکھیا ایہہ تھاں اُجاڑ اے۔ تے ہُن کویلا ہوگیا اے۔ ایہناں نُوں وِداع کر۔ پئی اوہ آلے دوالے دے پِنڈاں تے ڈیریاں وِچ جا کے اپنے لئی کُجھ کھان نُوں مُل لین۔ اوس اوہناں نُوں جواب دے کے آکھیا۔ تُسی آپے ایہناں نُوں کھان نُوں دیو۔ تَد اوہناں اوہنوں آکھیا۔ اسی دو سَو دیناراں دِیاں روٹِیاں جا کے مُل لیائے تے اوہناں نُوں کھوا لَئے؟ اوس اوہناں نُوں آکھیا۔ تُہاڈے کول کِنیاں روٹِیاں نیں۔ جا کے ویکھو؟ تے اوہناں معلُوم کر کے آکھیا۔ پنج روٹِیاں تے دو مچھّیاں نیں۔ تَد اوس اوہناں نُوں حُکم دِتّا۔ پئی اوہ سبھے ہرے گھاہ اُتّے جُنڈِیاں ہو کے بَہہ جان۔ تے اوہ سَوسَو تے پنجاہ پنجاہ ہو کے پالو پال ہو بَیٹھے۔ تَد اوس اوہناں پنجاں روٹِیاں تے دو مچھّیاں نُوں لیا۔ تے اسمان ولّ ویکھیا۔ تے برکت منگ کے روٹِیاں توڑیاں۔ تے لوکاں دے اگّے رکھن لئی شاگِرداں نُوں دِتّیاں۔ تے دو مچھّیاں اوس اوہناں سبھناں نُوں وَنڈِیاں۔ تے سارے کھا کے رَجّ گئے۔ تے اوہناں ٹُکّراں نال باراں ٹوکریاں بھریاں ہویاں چُکیاں۔ تے کُجھ مچھّیاں وِچوں وی چُکیاں۔ تے روٹِیاں دے کھان والے پنج ہزار بندے سن۔ تے اونویں اوس اپنے شاگِرداں نُوں پَکّی کِیتی۔ پئی جد تِیکر مَیں بِھیڑ نُوں وِداع نا کراں۔ تُسی بیڑی اُتّے چڑھ کے میرے اگّے بَیت صَیدا نُوں پار جاؤ۔ تے جد اوس اوہناں نُوں ٹور دِتّا۔ اوہ پہاڑ اُتّے دُعا منگن نُوں گیا۔ تے جد شاماں پئیاں تے بیڑی سمُندر دے وِچکار سی۔ تے اوہ اکلّا خُشکی اُتّے سی۔ تے جد اوس اوہناں نُوں چپّے لان وِچ اَوکھیاں ویکھیا کیوں جو وَا سامھنی سی تَد پِچّھلے پہر رات نُوں سمُندر اُتّے ٹُردیاں اوہناں ولّ آیا۔ تے اوہناں توں اگّے وَدھن لگّا۔ پر اوہناں اوہنوں سمُندر اُتّے ٹُردیاں ویکھ کے بُھوتنا جانیا۔ تے ڈڈِیّا اُٹھے۔ کیوں جو ساریاں اوہنوں ویکھیا۔ تے گھبرا گئے۔ پر اوس اونویں اوہناں نال گلّ کِیتی۔ تے اوہناں نُوں آکھیا۔ خاطرجمع رکھو۔ مَیں آں۔ نا ڈرو۔ فیر اوہ اوہناں نال بیڑی اُتّے چڑھ گیا۔ تے وَا کھلو گئی۔ تَد اوہ اپنے دِلاں وِچ ڈاہڈے حَیران ہوئے۔ ایس لئی پئی اوہناں نیں اوہناں روٹِیاں دی گلّ نئیں سی سمجھی پر اوہناں دے دِل سُنّ ہوئے ہوئے سن۔ تے اوہ پار لنگھ کے گنّیسرت دے دیس وِچ اَپڑے تے بیڑی نُوں کنڈھے اُتّے لایا۔ تے جد اوہ بیڑیوں لتّھے تے لوکاں اوہنوں جھٹ سیان لیا۔ تے اوس سارے دیس وِچ دَوڑ بھج کر کے بِیماراں نُوں مَنجِیاں اُتّے پا کے جِتّھے جِتّھے اوہناں سُنیاں پئی اوہ ہوندا اے اوتھے اوتھے ای لئی پِھرے۔ تے جِتّھے کِتّھے اوہ گِرانواں یا شہراں یا پِنڈاں نُوں جاندا سی اوتھے لوک ماندیاں نُوں بازاراں وِچ لیا پاندے تے اوہدیاں مِنّتاں کر دے سن۔ پئی اوہدے کپڑے دے پلّے نُوں ای چُھو لین۔ تے جِنّیاں اوہنوں چُھوئیا سو چنگے ہوگئے۔ فیر فریسی تے کئی فقِیہ اوہدے کول جمع ہوئے۔ اوہ یرُوشلِیم توں آئے سن۔ تے اوہناں اوہدے کئیاں شاگِرداں نُوں ویکھیا پئی اوہ مَیلے بِناں دھوتے ہتّھاں نال روٹی کھاندے نیں۔ کیوں جو فریسی تے سارے یہُودی وڈّیاں دی رِیت نُوں مَن کے جد تِیکر ہتّھاں نُوں مَل مَل کے نا دھو لین۔ کھاندے نئیں۔ تے بازاروں آ کے نئیں کھاندے جِنّاں چِر نہا نا لین۔ تے ہور بتھیریاں گلّاں نیں جیہڑیاں اوہناں مَنّن لئی قبول کِیتیاں نیں۔ جیہا کٹوریاں تے لوٹیاں تے پِتّل دے بھانڈیاں دا دھونا۔ تے فرِیسیاں تے فقِیہاں اوہنوں پُچھیا۔ پئی تیرے شاگِرد وڈّیاں دی رِیت اُتّے کیوں نئیں ٹُر دے سگوں پلید ہتّھِیں روٹی کھاندے نیں۔ اوس اوہناں نُوں آکھیا۔ یسعیاہ نے تُساں رِیاکاراں دی بابت خُوب نبُوّت کِیتی۔ جیہا لِکھیا اے پئی ایہہ لوک مُنھوں میری عِزّت کر دے نیں۔ پر اوہناں دے دِل مَیتھوں دُور نیں۔ تے اوہ بے فائدہ میری عبادت کر دے نیں۔ اوہ بندیاں دے حُکماں دی تعلِیم دیندے نیں۔ تُسی خُدا دے حُکم نُوں چھڈ کے بندیاں دی رِیت نُوں پھڑ لَیندے اوہ۔ تے اوس اوہناں نُوں آکھیا۔ تُسی اپنی رِیت نُوں قیم رکھن واسطے خُدا دے حُکم دی چنگی طرح بے قدری کر دے اوہ۔ کیوں جو مُوسیٰ نیں آکھیا۔ پئی اپنے پئیو تے اپنی ماں دی قدر کر۔ تے جیہڑا پئیو یا ماں نُوں مَندا بولے اوہ جانوں ماریا جائے۔ پر تُسی آکھدے ہو پئی جے کر بندہ پئیو یا ماں نُوں آکھے۔ پئی جیہڑا حق میرے کولوں تینُوں آسکدا سی سو قُربان یعنی چڑھاوا ہوگیا۔ تُسی فیر اوہنوں اوہدے پئیو یا اوہدی ماں دے لئی کُجھ کرن نئیں دیندے اوہ۔ ایسے طرح تُسی خُدا دے کلام نُوں اپنی رِیت نال جِہنُوں تُساں جاری کِیتا اے۔ جُھوٹھیاں کر دے اوہ۔ تے ہور بتھیرے ایہو جیہے کمّ تُسی کر دے اوہ۔ تے اوس لوکاں نُوں فیر کول سَدّ کے آکھیا۔ تُسی سارے میری سُنو تے سمجھو۔ اجیہی کوئی شے بندے دے باہر نئیں اے جیہڑی اوہدے اندر جا کے اوہنوں پلِیت کر سکے۔ پر جیہڑیاں شیواں اوہدے اندروں نِکلدیاں نیں سو ای بندے نُوں پلِیت کر دیاں نیں۔ [جِہدے سُنن دے کن ہون سو سُنے۔] جد اوہ بِھیڑ دے کولوں گھر وِچ گیا۔ اوہدے شاگِرداں اوہنوں اوہ تمثِیل پُچھی۔ تے اوس اوہناں نُوں آکھیا۔ تُسی وی اجیہے بے سمجھ ہو تُسی نئیں سمجھدے پئی جو کُجھ باہروں بندے دے اندر جاندا اے۔ اوہنوں پلِیت نئیں کر سکدا۔ کیوں جو اوہ اوہدے مَن وِچ نئیں پُہنچدا۔ پر ڈِھڈ وِچ جاندا اے۔ تے رُوڑی اُتّے سُٹّیا جاندا اے؟ ایہہ آکھ کے اوس ساری خُوراک نُوں پاک ٹھیرایا۔ فیر اوس آکھیا۔ پئی جو بندے دے اندروں نِکلدا اے اوہو بندے نُوں پلِیت کر دا اے۔ کیوں جو اندروں یعنی بندیاں دے مُنھوں ای بُرے خیال نِکلدے نیں۔ حرامکاریاں چوریاں۔ خُون۔ زناکارِیاں۔ لالچ۔ شرارتاں۔ فریب۔ مسَتی۔ بُری نظر۔ کُفر۔ شیخی۔ بے عقلی۔ ایہہ سارِیاں بُریاں شیواں اندروں نِکلدیاں تے بندے نُوں پلِیت کر دیاں نیں۔ تے اوتھوں اُٹھ کے صُور تے صَیدا دِیاں حداں وِچ گیا۔ تے اِک گھر وِچ جا کے چاہندا سی پئی کِسے نُوں خبر نا ہوئے۔ پر اوہ چُھپ نا سکیا۔ کیوں جو اِک زنانی جیہدی نِکّی دِھی نُوں اِک پلِیت رُوح چمبڑی ہوئی سی۔ اونویں اوہدی خبر سُن کے آئی۔ تے اوہدے پَیرِیں پئی۔ اوہ زنانی یُونانی تے جنم دی سُورُفِینیکی سی۔ اوس اوہدے اگّے عرض کِیتی پئی اوہ اوہدی دِھی وِچوں بدرُوح نُوں کڈھے۔ پر اوس اوہنوں آکھیا۔ پہلاں بچّیاں نُوں رَجّن دے کیوں جو بچّیاں دی روٹی لے کے کتُوریاں اگّے سُٹّنی نئیں چاہیدی۔ اوس اوہنوں آکھیا۔ آں خُداوند پر کتُورے وی تے میز دے ہیٹھوں بچّیاں دا رہیاکھیا کھاندے نیں۔ تَد اوس اوہنوں آکھیا ایس گلّ پِچّھے ٹُرجا۔ تیری دِھی وِچوں بدرُوح نِکل گئی اے۔ تے گھر جا کے اوس ویکھیا پئی کُڑی مَنجی اُتّے لمّی پئی اے۔ تے بدرُوح نِکل گئی اے۔ تے فیر اوہ صُور دِیاں حداں توں نِکلیا تے صَیدا دے راہ دِکَپُلِس دِیاں حداں دے وِچوں دی ہو کے گلِیل دے سمُندر نُوں آیا۔ تے لوکاں اِک بولے نُوں جیہدی جِیبھ تھتھلاندی سی۔ اوہدے کول لیا کے اوہدی مِنّت کِیتی پئی اوہ اوہدے اُتّے ہتّھ رکھّے۔ تے اوہ اوہنوں بِھیڑ توں وکھرا لے گیا۔ تے اپنیاں اُنگلیاں اوہدے کنّاں وِچ دِتّیاں۔ تے تُھک کے اوہدی جِیبھ نُوں چُھوئیا۔ تے اسمان ولّ ویکھ کے ہَوکا بھریا۔ تے اوہنوں آکھیا۔ اِفّتّح یعنی کُھل جا۔ تے اوہدے کنّ کُھل گئے تے اوہدی جِیبھ دی گنڈھ کُھل گئی تے اوہ صاف بولن لگّا۔ تے اوس اوہناں نُوں تاکِید کِیتی پئی کِسے نُوں ناں دسنا۔ پر جِنّی اوس اوہناں نُوں تاکِید کِیتی اوناں ای سگوں اوہ اوس گلّ نُوں ہور وی بُہت مشہُور کر دے رہے۔ تے لوکاں بڑے حَیران ہو کے آکھیا۔ ایس سبھ کُجھ چَنگا کِیتا اے۔ پئی بولیاں نُوں سُنن دی تے گُونگیاں نُوں بولن دی طاقت دیندا اے۔ اوہناں دِناں وِچ جدوں فیر وڈّی بِھیڑ اکٹّھی ہوگئی۔ تے اوہناں کول کھان نُوں کُجھ نئیں سی۔ تے اوس اپنے شاگِرداں نُوں کول سَدّ کے اوہناں نُوں آکھیا۔ مَینُوں لوکاں اُتّے ترس آؤندا اے۔ کیوں جو ہُن تَرے دِن ہوئے نیں پئی اوہ میرے نال رہے نیں۔ تے اوہناں کول کُجھ کھان نُوں نئیں اے۔ تے جے مَیں اوہناں نُوں بُھکھیاں گھر نُوں ٹوراں۔ تے راہ وِچ ای ماندے پَے جان گے۔ تے اوہناں وِچوں کئی دُوروں آئے ہوئے نیں۔ تے اوہدے شاگِرداں اوہنوں جواب دِتّا پئی کِتّھوں ایس اُجاڑ وِچ کوئی ایہناں نُوں روٹی نال رَجّا سکے گا؟ تے اوس اوہناں توں پُچھیا پئی تُہاڈے کول کِنیاں روٹِیاں نیں۔ اوہ آکھن لگّے سَتّ۔ فیر اوس لوکاں نُوں حُکم کِیتا پئی زمین اُتّے بَہہ جان۔ تے اوس اوہی سَتّ روٹِیاں لئیاں تے شُکر کر کے توڑیاں تے اپنے شاگِرداں نُوں دِتّیاں۔ پئی اوہ اوہناں دے اگّے رکھن تے اوہناں نیں لوکاں دے اگّے رکھ دِتّیاں۔ اوہناں دے کول تھوڑیاں جِہیاں نِکّیاں مچھّیاں سن۔ سو اوس اوہناں اُتّے برکت منگ کے آکھیا۔ پئی ایہہ وی اوہناں دے اگّے رکھو۔ سو اوہناں کھادا تے رَجّ گئے۔ تے بچیاں ہویاں ٹُکّراں نال اوہناں سَتّ ٹوکرے بھرے ہوئے چُک لَئے۔ تے اوہ چار کُو ہزار بندے سن۔ فیر اوس اوہناں نُوں ٹور دِتّا۔ تے اوہ اپنے شاگِرداں دے نال اونویں بیڑی اُتّے چڑھ کے دَلَمنُوتہ دے دیس وِچ آیا۔ تے فریسی نِکلے تے اوہدے ازمان لئی اسمان ولّوں اوہدے توں نِشان منگ کے اوہدے نال جھگڑا کرن لگّے۔ تے اوس اپنے دِلوں ہَوکا بھرکے آکھیا۔ ایس زمانے دے لوک کیوں نِشان منگدے نیں۔ مَیں تُہانوں سَچ آکھنا آں۔ پئی ایس زمانے دے لوکاں نُوں کوئی نِشان دِتّا نا جائے گا۔ تے اوہناں نُوں چھڈ کے فیر بیڑی اُتّے چڑھیا۔ تے پار ٹُر گیا۔ تے اوہ روٹی لینی بُھل گئے سن۔ تے بیڑی وِچ بِناں اِک روٹی دے اوہناں کول کُجھ نئیں سی۔ تے اوس اوہناں نُوں آکھیا۔ پئی خبردار۔ فرِیسیاں دے خمیر توں۔ تے ہیرودیس دے خمیر توں ہُشیار رہو۔ تَد اوہ آپو وِچ چَرچا کر کے آکھن لگّے۔ ساڈے کول روٹی جو نئیں اے۔ یِسُوع ایہہ جان کے اوہناں نُوں آکھیا۔ تُسی کیوں چَرچا کر دے اوہ۔ پئی ساڈے کول روٹی نئیں؟ تُسی اجے نئیں جان دے تے نا سمجھدے اوہ۔ تُہاڈا مَن سُنّ ہویا اے؟ اَکھّیاں ہوندیاں نئیں ویکھدے تے کنّ ہوندیاں نئیں سُندے؟ تے تُہانوں یاد نئیں؟ جد مَیں پنج روٹِیاں پنج ہزار لئی توڑیاں تَد تُساں ٹُکّراں دِیاں کِنیاں ٹوکریاں بھریاں ہویاں چُکیاں؟ اوہناں اوہنوں آکھیا۔ باراں۔ تے جد سَتّ روٹِیاں چَوہاں ہزاراں لئی توڑیاں۔ تَد تُساں ٹُکّراں دے کِنے ٹوکرے بھر کے چُکے؟ اوہناں آکھیا۔ سَتّ۔ تَد اوس اوہناں نُوں آکھیا۔ اجے تُہانوں سمجھ نئیں آؤندی؟ فیر اوہ بَیت صَیدا وِچ آئے۔ تے لوک اِک اَنھے نُوں اوہدے کول لیائے۔ تے اوہدی مِنّت کِیتی۔ پئی اوہنوں چُھوئے۔ تے اوہ اَنھے دا ہتّھ پھڑ کے اوہنوں پِنڈوں باہر لے گیا۔ تے اوہدیاں اَکھّیاں وِچ تُھک کے اوہدے اُتّے ہتّھ رکھیا۔ تے اوہنوں پُچھیا۔ پئی تینُوں کُجھ دِسدا اے؟ تے اوس نظر کر کے آکھیا۔ مَیں بندیاں نُوں ویکھنا آں پئی اوہ بُوٹیاں وانگُوں ٹُر دے ہوئے مَینُوں دِسدے نیں۔ تَد اوس فیر اوہدیاں اَکھّیاں اُتّے ہتّھ رکھّے تے اوس بنا کے ویکھیا۔ تے اوہ سُجاکھا ہوگیا۔ تے سبھ کُجھ صاف صاف ویکھن لگّا۔ تے اوس اوہنوں ایہہ آکھ کے اوہدے گھر نُوں گھل دِتّا۔ پئی تُوں پِنڈ وِچ وی نا وڑِیں۔ تَد یِسُوع تے اوہدے شاگِرد قَیصریہ فِلپّی دے پِنڈاں وِچ گئے۔ تے راہ وِچ اوس اپنے شاگِرداں کولوں ایہہ پُچھیا۔ پئی لوک کِیہ آکھدے نیں پئی مَیں کون آں؟ تے اوہناں اوہنوں آکھیا۔ یُوحنّا بپتِسمہ دین والا تے کئی ایلیّاہ تے کئی نبیاں وِچوں اِک۔ فیر اوس اوہناں نُوں پُچھیا۔ تُسی کِیہ آکھدے ہو پئی مَیں کون آں؟ پطرس نے اوہنوں جواب دے کے آکھیا۔ تُوں مسِیح ایں۔ تَد اوس اوہناں نُوں تاکِید کِیتی پئی میری ولّوں کِسے نُوں نا دسو۔ فیر اوہ اوہناں نُوں سکھالن لگّا پئی ضرُور اے۔ پئی اِبنِ آدم بُہت دُکھ جھلّے۔ تے اوہ بزُرگاں تے سردار کاہِناں تے فقِیہاں توں رَدّ کِیتا جائے۔ تے جانوں ماریا جائے۔ تے تِنّاں دِناں پِچّھوں جی اُٹھے۔ تے اوس ایہہ گلّ کھول کے دسی تَد پطرس اوہنوں اِک پاسے لے جا کے اوہنوں جِھڑکن لگّا۔ پر اوس مُنھ پھیر لیا۔ تے اپنے شاگِرداں ولّ ویکھ کے پطرس نُوں جِھڑکیا۔ تے آکھیا۔ اَے شیطان میرے اگّوں دُراڈے ہو جا۔ کیوں جو تُوں خُدا دِیاں گلّاں دا نئیں پر بندیاں دِیاں گلّاں دا دھیان رکھنا ایں۔ تَد اوس بِھیڑ نُوں اپنے شاگِرداں سَنے کول سدّیا تے اوہناں نُوں آکھن لگّا پئی جے کوئی میرے پِچّھے آؤنا چاہے۔ اوہ اپنا اِنکار کرے تے اپنی صلِیب چُک کے میرے مگر ٹُر پئے۔ کیوں جو جیہڑا اپنی جان بچانی چاہے سو اوہنوں گوائے گا۔ پر جیہڑا میرے لئی تے اِنجِیل دے لئی اپنی جان گنواوے سو اوہنوں بچاوے گا۔ کیوں جو بندے نُوں کِیہ فائدہ ہوئے گا۔ جے ساری دُنیا نُوں کماوے تے اپنی جان دا نُقصان کرے۔ بندہ اپنی جان دے بدلے کِیہ دیوے؟ کیوں جو جیہڑا ایس زنا ایں تے گُنا ایں پِیڑھی دے وِچ مَیتھوں تے میرے کلام توں شرمائے گا۔ اِبنِ آدم وی اوہدے توں شرمائے گا۔ جِس ویلے اوہ اپنے باپ دے جلال نال پاک فرِشتیاں دے نال آوے گا۔ تے اوس اوہناں نُوں آکھیا۔ مَیں تُہانوں سَچ آکھنا آں پئی بعضے جیہڑے ایتھے کھلوتے نیں۔ جد تِیکر خُدا دی بادشاہی نُوں قُدرت نال آیا نا ویکھن گے کدی مَوت دا سواد نا لین گے۔ تے چِھیئاں دِناں پِچّھوں یِسُوع پطرس تے یعقُوب تے یُوحنّا نُوں نال لیا۔ تے اوہناں نُوں اِک اُچّے پہاڑ اُتّے وکھرا اکلّیاں لے گیا۔ تے اوہدا رُوپ اوہناں دے سامھنے بدل گیا۔ تے اوہدے کپڑے لِشکن لگّے تے بڑے چِٹّے ہوگئے۔ اجیہے پئی دُنیا وِچ کوئی دھوبی ایہو جیہے چِٹّے نئیں کر سکدا۔ تَد ایلیّاہ مُوسیٰ دے نال اوہناں نُوں وکھالی دِتّا۔ تے اوہ یِسُوع دے نال گلّاں کر دے سن۔ تَد پطرس یِسُوع نُوں آکھیا۔ اَے ربّی ساڈا ایتھے رہنا چَنگا اے۔ تے اسی تَرے ڈیرے بنائیے۔ اِک تیرے لئی۔ تے اِک مُوسیٰ لئی۔ تے اِک ایلیّاہ دے لئی۔ کیوں جو اوہ نئیں سی جان دا پئی اگّوں کِیہ جواب دے۔ کیوں جو اوہ وَاہوَا ڈر گئے سن۔ تَد اِک بدّل آیا۔ تے اوہناں اُتّے چھاں کِیتی۔ تے بدّل وِچوں اِک اواز آئی۔ پئی ایہہ میرا پیارا پُتر اے۔ اوہدی سُنو۔ تے اوسے ویلے اوہناں چَوفیرے دھیان کر کے بِناں اکلّے یِسُوع دے فیر ہور کِسے نُوں اپنے نال نا ویکھیا۔ تے پہاڑوں اُتر دیاں اوس اوہناں نُوں حُکم کِیتا پئی جو کُجھ تُساں ویکھیا جد تِیکر اِبنِ آدم مُردیاں وِچوں جی نا اُٹھے۔ تَد تِیکر کِسے نُوں نا دسنا۔ تے اوہناں ایس گلّ نُوں آپو وِچ رکھیا۔ تے اِک دُوجے نال چَرچا کر دے سن پئی مُردیاں وِچوں جی اُٹھنا کِیہ اے؟ تے اوہناں ایہہ اوہنوں پُچھیا پئی فقِیہ تے آکھدے نیں پئی پہلے ایلیّاہ دا آنا ضرُوری اے۔ تے اوس اوہناں نُوں آکھیا۔ ایلیّاہ تے ٹھیک پہلاں آن کے سبھ کُجھ سُدھار دا اے۔ تے اِبنِ آدم دے حق وِچ کِیویں لِکھیا اے۔ پئی اوہ بڑا دُکھ جھلّے گا تے ناچیز سمجھیا جائے گا۔ پر مَیں تُہانوں آکھنا آں۔ پئی ایلیّاہ آ وی گیا اے۔ تے نالے جیہا اوہدے حق وِچ لِکھیا گیا اے۔ اوہناں دا جو کُجھ دِل کِیتا سو ای اوہدے نال کِیتا۔ تے جد شاگِرداں کول آئے تے اوہناں دے چَوفیرے بڑی بِھیڑ تے فقِیہاں نُوں اوہناں دے نال بحث کر دیاں ویکھیا۔ تے اونویں ساری بِھیڑ اوہنوں ویکھ کے بڑی حَیران ہوئی۔ تے لوکاں نیں اوہدے ولّ دَوڑ کے اوہنوں سلام کِیتا۔ تَد اوس اوہناں نُوں پُچھیا تُسی ایہناں نال کِیہ بحث کر دے ہو؟ تے بِھیڑ وِچوں اِک نیں اوہنوں جواب دِتّا۔ اَے اُستاد۔ مَیں اپنے پُتر نُوں تیرے کول لیاندا اے۔ اوہنوں گونگی رُوح چمبڑی ہوئی اے۔ تے اوہ جِتّھے کِتے اوہنوں پھڑ دی اے اوتھے ای پٹکا دیندی اے۔ تے اوہ جھگ چھڈ دا اے۔ تے دَند پِیہندا اے۔ تے سُکدا جاندا اے۔ تے مَیں تیرے شاگِرداں نُوں آکھیا سی پئی اوہ اوہنوں کڈھ دین۔ تے اوہ اوہنوں کڈھ نا سکے۔ اوس جواب دے کے اوہناں نُوں آکھیا۔ اے بے اعتبار قوم؟ مَیں کد تِیک تُہاڈے نال رہاں گا؟ کد تِیکر تُہاڈی سہاں گا؟ اوہنوں میرے کول لیاؤ۔ تے اوہناں اوہنوں اوہدے کول لیاندا۔ تے جد اوس اوہنوں ویکھیا اونویں رُوح اوہنوں مروڑیا۔ تے اوہ زمین اُتّے ڈِگّا۔ تے جھگ چھڈ کے لیٹن لگّا۔ تَد اوس اوہدے پئیو کولوں پُچھیا کِنے کُو چِر توں ایہدا ایہہ حال ہویا اے؟ اوس آکھیا۔ نِکّے ہوندیاں توں۔ تے اوس اوہنوں بہتیری واری ایہدا ناس کرن لئی اَگ وِچ تے پانی وِچ وی سُٹّیا۔ پر جے تُوں کُجھ کر سکنا ایں تے ساڈے اُتّے ترس کھا کے ساڈی مدد کر۔ یِسُوع اوہنوں آکھیا۔ جے تُوں کر سکنا ایں؟ اِیمان لیان والے لئی تے سبھ کُجھ ہوسکدا اے۔ اوس مُنڈے دے پئیو نے اونویں اُچّی اواز نال آکھیا۔ مَیں اِیمان لیاؤنا واں۔ میرے اِیمان دے گھاٹے دا علاج کر۔ جد یِسُوع نے ویکھیا پئی لوک بھج کے اکٹّھے ہوندے جاندے نیں۔ تَد اوس پلِیت رُوح نُوں جِھڑکیا۔ تے اوہنوں آکھیا۔ اَے گونگی بولی رُوح۔ مَیں تینُوں حُکم کرنا آں۔ ایہدے وِچوں باہر نِکل۔ تے اوہدے وِچ مُڑ کدی نا وڑِیں۔ اوہ چِیک مار کے تے اوہنوں بُہت مروڑ کے اوہدے وِچوں نِکل گئی۔ تے اوہ مُنڈا مُردے وانگُوں ہوگیا۔ ایتھوں تِیکر پئی بتھیریاں آکھیا اوہ مر گیا اے۔ تَد یِسُوع اوہدا ہتّھ پَھڑکے اوہنوں اُٹھا لیا۔ تے اوہ اُٹھ کھلوتا۔ تے جد اوہ گھر وِچ آیا۔ اوہدے شاگِرداں نیں وَکھ ہو کے اوہدے اگّے عرض کِیتی۔ پئی اسی اوہنوں کیوں نا کڈھ سکے۔ اوس اوہناں نُوں آکھیا۔ ایہہ قِسم دُعا بِناں کِسے ہور طرح نئیں نِکل سکدی۔ تے اوتھوں ٹُر کے اوہ گلِیل وِچوں دی لنگھ گئے۔ تے اوہ نئیں چاہندا سی پئی کِسے نُوں خبر ہوئے۔ ایس لئی پئی اوہ اپنے شاگِرداں نُوں سِکھالدا۔ تے اوہناں نُوں آکھدا سی پئی اِبنِ آدم بندیاں دے ہتّھِیں پھڑوایا جاندا اے۔ تے اوہ اوہنوں مار سُٹّن گے تے مر جان توں تَرے دِن پِچّھوں اوہ فیر جی اُٹھے گا۔ پر اوہناں ایہہ گلّ نا سمجھی۔ تے اوہنوں پچُھّن لئی ڈر دے سن۔ تے اوہ کَفرنحُوم وِچ آئے تے جد اوہ گھر وِچ سی اوس اوہناں کولوں پُچھیا۔ پئی تُسی راہ وِچ کِیہ گلّ بات کر دے سو۔ پر اوہ چُپ ای رہے کیوں جو اوہناں وٹے اِک دُوجے نال ایہہ بحث کِیتی سی پئی وَڈا کیہڑا اے؟ تے اوس بَہہ کے اوہناں باراں نُوں سدّیا۔ تے اوہناں نُوں آکھیا۔ جے کوئی پہلا ہونا چاہے تے اوہ سبھناں توں پِچّھلا۔ تے ساریاں دا کاماں ہوئے۔ تے اوس اِک بال نُوں لے کے اوہناں دے وِچکار کھلھاریا؟ تے اوہنوں کُچھّڑ چُک کے اوہناں نُوں آکھیا۔ جو کوئی میرے ناں کر کے ایہو جیہے بالاں وِچوں اِک نُوں قبول کر دا اے۔ سو مَینُوں قبول کر دا اے۔ تاں جو کوئی مَینُوں قبول کر دا اے۔ سو مَینُوں نئیں پر اوہنوں جِس مَینُوں گھلّیا قبول کر دا اے۔ یُوحنّا اوہنوں آکھیا۔ اُستاد۔ اساں اِک نُوں تیرا ناں لے کے پلِیت رُوحاں نُوں کڈھدیاں ویکھیا۔ تے اساں اوہنوں منع کِیتا۔ کیوں جو اوہ ساڈے پیچھے نئیں سی ٹُر دا۔ پر یِسُوع آکھیا۔ اوہنوں نا منع کرو۔ کیوں جو اجیہا کوئی نئیں۔ جیہڑا میرا ناں لے کے کرامات وکھالے۔ تے مَینُوں چھیتی بُرا آکھ سکے۔ کیوں جو جیہڑا ساڈا مخالف نئیں سو ساڈے ولّ اے۔ کیوں جو جیہڑا اِک کٹورا پانی تُہانوں پِیا دے ایس کر کے پئی تُسی مسِیح دے اوہ۔ مَیں تُہانوں سَچ آکھنا آں۔ پئی اوہ اپنا پَھل پائے بِناں کدی نا رہے گا۔ تے جے کوئی ایہناں نِکّیاں وِچوں جیہڑے میرے اُتّے اِیمان لیاؤندے نیں اِک نُوں ٹھوکر کھوائے۔ اوہدے لئی ایہہ چَنگا سی پئی چکّی دا پُڑ اوہدے گلّ وِچ پایا جاندا تے اوہ سمُندر وِچ سُٹّیا جاندا۔ تے جے تیرا ہتّھ تینُوں ٹھوکر کھوا وے اوہنوں وَڈّھ سُٹ۔ زِندگی وِچ ٹُنڈا ہو کے وڑنا ایہدے نالوں چَنگا اے۔ پئی دو ہتّھ ہوندیاں تُوں جہنّم دی اوس اَگ وِچ سُٹّیا جائیں جیہڑی بُجھدی نئیں۔ [جِتّھے اوہناں دا کِیڑا نئیں مر دا۔ تے اَگ نئیں بُجھدی۔] تے جے تیرا پَیر تینُوں ٹھوکر کھوائے اوہنوں وَڈّھ سُٹ۔ زِندگی وِچ لَنگیاں ہو کے وڑنا تیرے لئی ایہدے نالوں چَنگا اے پئی دو پَیر ہوندیاں جہنّم وِچ سُٹّیا جائیں۔ [جِتّھے اوہناں دا کِیڑا نئیں مر دا۔ تے اَگ نئیں بُجھدی۔] تے جے تیری اَکھ تینُوں ٹھوکر کھوائے۔ تے اوہنوں کڈھ سُٹ۔ خُدا دی بادشاہی وِچ کانیاں ہو کے وڑنا تیرے لئی ایہدے نالوں چَنگا اے پئی دو اَکھّیاں ہوندیاں جہنّم وِچ سُٹّیا جائیں۔ جِتّھے اوہناں دا کِیڑا نئیں مر دا۔ تے اَگ نئیں بُجھدی۔ کیوں جو ہر کوئی اَگ نال سلُونا کِیتا جائے گا [تے ہر اِک قُربانی لُون نال سلُونی کِیتی جائے گی۔] لُون چنگی شے اے۔ پر جیکر لُون بے سوادا ہو جائے تے کاہدے نال اوہنوں مزیدار کرو گے؟ سو اپنے وِچ لُون رکھو تے آپو وِچ مِلے رہو۔ تے اوہ اوتھوں اُٹھ کے یہُودیہ دِیاں حداں وِچ تے یَردن دے پار آیا تے بُہت لوک اوہدے کول فیر اکٹّھے ہوئے۔ تے اوہ اپنے دستُور دے سببّوں فیر اوہناں نُوں تعلِیم دین لگّا۔ فرِیسیاں اوہدے کول آ کے اوہدے ازمان لئی اوہدے توں سوال پُچھیا۔ پئی شوہر نُوں روا اے پئی بیوی نُوں چھڈ دے اوس اوہناں نُوں جواب دے کے آکھیا۔ پئی مُوسیٰ تُہانوں کِیہ حُکم دِتّا؟ اوہ آکھن لگّے مُوسیٰ تے اجازت دِتّی پئی طلاق لِکھ کے چھڈ دین یِسُوع نے اوہناں نُوں آکھیا۔ تُہاڈی سخت دِلی دے سبّب اوس تُہاڈے واسطے ایہہ حُکم لِکھیا پر خلقت دے مُڈھوں اوس اوہناں نُوں نَر تے ناری بنایا۔ ایس کر کے بندہ اپنے ماں پئیو نُوں چھڈے گا تے اپنی بیوی نال مِلیا رہے گا۔ تے اوہ دو نَوِیں اِک بدن ہون گے۔ سو اوہ اگّے نُوں دو نا رہے پر اِک بدن نیں۔ سو جِہنُوں خُدا جوڑ دِتّا اوہنوں بندہ اَڈ نا کرے۔ تے گھر وِچ شاگِرداں نیں ایس گلّ دی بابت فیر اوہدے توں پُچھیا۔ تے اوس اوہناں نُوں آکھیا۔ پئی جے کوئی اپنی بیوی نُوں چھڈے تے دُوجی نال ویاہ کرے اوہ اوہدے حق وِچ زنا کر دا اے۔ تے جیکر اوہ آپ اپنے گھر والے نُوں چھڈے تے دُوجے نال ویاہ کرے۔ اوہ وی زنا کر دی اے۔ تے لوک نِکّے بچّیاں نُوں اوہدے کول لیائے پئی اوہ اوہناں نُوں چُھوئے۔ پر شاگِرداں اوہناں نُوں جِھڑکیا۔ یِسُوع ایہہ ویکھ کے بُہت ناراض ہویا۔ تے اوہناں نُوں آکھیا۔ بالاں نُوں میرے کول آؤن دیو۔ اوہناں نُوں نا روکو۔ کیوں جو خُدا دی بادشاہی ایہناں جیہاں دی اے۔ مَیں تُہانوں سَچ آکھنا آں۔ پئی جو کوئی خُدا دی بادشاہی نُوں بال وانگُوں نا مَنّے اوہ اوہدے اندر کَدے نئیں جائے گا۔ تے اوس اوہناں نُوں کُچھّڑ چُکیا تے اوہناں اُتّے ہتّھ فیر کے اوہناں نُوں برکت دِتّی۔ تے جد اوہ راہ وِچ لگا جاندا سی اِک بندہ اوہدے کول آیا۔ تے اوہدے اگّے گوڈے نواکے اوہنوں پُچھیا اَے نیک اُستاد مَیں کِیہ کراں پئی ہمیشہ دی زِندگی دا وارث ہوواں؟ یِسُوع اوہنوں آکھیا۔ تُوں مَینُوں نیک کاہِنُوں آکھنا ایں؟ کوئی نیک نئیں اے بِناں خُدا دے۔ تُوں حُکماں نُوں جاننا ایں۔ خُون نا کر۔ زنا نا کر۔ چوری نا کر۔ جُھوٹھی گواہی نا دے۔ فریب نا دے۔ اپنے ماں پئیو دی عِزّت کر۔ اوس اوہنوں آکھیا اَے اُستاد۔ ایہناں سارِیاں گلّاں نُوں مَیں اپنے نِکّیاں ہوندیاں توں مَندا آیا ہاں۔ یِسُوع اوہدے ولّ ویکھ کے اوہنوں پیار کِیتا۔ تے اوہنوں آکھیا تیرے وِچ اِک گلّ دا گھاٹا اے۔ جا۔ تے جو کُجھ تیرا اے۔ ویچ تے غرِیباں نُوں دے۔ تے تینُوں اسمان وِچ خزانہ مِلے گا۔ تے آ۔ میرے پِچّھے ٹُر پَو۔ اوہ ایس گلّوں بَھیڑا پیا۔ تے اُداس ہو کے ٹُرگیا۔ کیوں جو اوہ بڑا مال دار سی۔ تے یِسُوع چَوفیرے ویکھ کے اپنے شاگِرداں نُوں آکھیا۔ خُدا دی بادشاہی وِچ مالداراں دا وڑنا کِنّاں اَوکھا اے۔ تے شاگِرد اوہدیاں گلّاں توں حَیران ہوئے۔ یِسُوع فیر اوہناں نُوں آکھیا۔ بچّیو۔ جیہڑے لوک دَولت اُتّے آسرا رکھدے نیں اوہناں لئی خُدا دی بادشاہی وِچ وڑنا بڑا ای اَوکھا اے۔ سُوئی دے نکّے وِچوں اُوٹھ دا لنگھناں ایہدے نالوں سُکھالا اے پئی دَولت مند خُدا دی بادشاہی وِچ وڑے۔ تے اوہ بڑے ای حَیران ہو کے اوہنوں آکھن لگّے فیر کِہدی نجات ہو سکدی اے؟ یِسُوع اوہناں ولّ ویکھ کے آکھیا۔ بندیاں کولوں ایہہ اَنہونا اے۔ پر خُدا کولوں نئیں۔ خُدا توں تے سبھ کُجھ ہوسکدا اے۔ پطرس اوہنوں آکھن لگّا۔ ویکھ اساں سبھ کُجھ چھڈیا تے تیرے مگر ٹُر پئے۔ یِسُوع آکھیا۔ مَیں تُہانوں سَچ آکھنا آں اجیہا کوئی نئیں پئی جِس گھر یا بھراواں یا بھیناں یا ماں یا پئیو یا بال بچّیاں یا زمین نُوں میرے تے اِنجِیل دے لئی چھڈیا اے تے ہُن ایس سَمے وِچ اوہ سَو حِصّے وَدّھ نا پاوے۔ گھر تے بھراواں تے بھیناں تے مانواں تے بال بچّیاں تے زمیناں نُوں۔ پر دُکھاں نال۔ تے آؤن والے زمانے وِچ ہمیشہ دی زِندگی۔ پر بتھیرے جیہڑے پہلے نیں پِچّھلے ہون گے۔ تے پِچّھلے پہلے۔ تے اوہ یرُوشلِیم دے راہ جاندے سن۔ تے یِسُوع اوہناں دے اگّے اگّے ٹُردا جاندا سی۔ تے اوہ حَیران ہوئے تے مگر آؤن والے ڈر دے سن۔ تے فیر اوہ باراں نُوں نال لے کے جو کُجھ اوہدے اُتّے ہونا سی۔ اوہناں نُوں دسن لگّا۔ پئی ویکھو۔ اسی یرُوشلِیم نُوں جانے آں۔ تے اِبنِ آدم سردار کاہِناں تے فقِیہاں دے حوالے کِیتا جائے گا۔ تے اوہ اوہنوں مار سُٹّن دا حُکم دین گے۔ تے اوہنوں غیر قوماں دے حوالے کرن گے۔ تے اوہ اوہدے نال مخَول کرن گے۔ تے اوہدے اُتّے تُھکن گے۔ تے اوہنوں کولڑے مارن گے۔ تے قتل کرن گے۔ تے تِنّاں دِناں پِچّھوں اوہ فیر جی اُٹھے گا۔ تَد زبدی دے پُتراں یعقُوب تے یُوحنّا اوہدے کول آ کے اوہنوں آکھیا۔ اَے اُستاد۔ اسی چاہنے آں۔ پئی جو کُجھ تَیتھوں منگِئے سو اوہ ای تُوں ساڈے لئی کریں۔ اوس اوہناں نُوں آکھیا۔ تُسی کِیہ چاہندے اوہ۔ پئی مَیں تُہاڈے لئی کراں؟ اوہناں اوہنوں آکھیا۔ سانُوں ایہہ بخش پئی اسی اِک تیرے سَجّے تے اِک کھبّے تیرے جلال وِچ بَیٹھے۔ یِسُوع اوہناں نُوں آکھیا۔ تُسی نئیں جان دے پئی کِیہ منگدے اوہ۔ بھلا تُسی ایہہ پیالہ پی سکدے ہو جیہڑا مَیں پِینا اے؟ یا اوہ بپتِسمہ جیہڑا مَیں لینا اے۔ تُسی لے سکدے ہو؟ اوہناں اوہنوں آکھیاں ساتھوں ہو سکدا اے۔ یِسُوع اوہناں نُوں آکھیا۔ جیہڑا پیالہ مَیں پِینا اے تُسی پِیو گے۔ تے جیہڑا بپتِسمہ مَیں لینا اے تُسی لوؤ گے۔ پر اوہناں دے بِناں جِنہاں لئی تیار کِیتا گیا اے۔ کِسے نُوں اپنے سَجّے یا کھبّے بہالنا میرا کمّ نئیں اے۔ تے جدوں دَساں شاگِرداں نیں ایہہ سُنیا۔ تے اوہ یعقُوب تے یُوحنّا نال غُصّے ہون لگّے۔ تَد یِسُوع اوہناں نُوں اپنے کول سَدّ کے آکھیا۔ تُسی جان دے اوہ۔ پئی جیہڑے غیر قوماں دے حاکم گِنے جاندے نیں۔ اوہ اوہناں اُتّے دابا پاندے نیں۔ تے اوہناں دے وڈّے لوک اوہناں اُتّے دَھونس جماندے نیں۔ پر تُہاڈے وِچ اجیہا نئیں اے۔ سگوں جیہڑا تُہاڈے وِچ وَڈا ہونا چاہے۔ سو تُہاڈا کاماں ہوئے۔ تے تُہاڈے وِچوں جیہڑا سردار بننا چاہے۔ سو ساریاں دا نوکر بنے۔ ایس کر کے پئی اِبنِ آدم وی سیوا کران نئیں سگوں سیوا کرن تے بتھیریاں دے تھاں ڈنڈ بھرن نُوں اپنی جان دین آیا اے۔ تے اوہ یرِیحُو وِچ آئے۔ تے جد اوہ تے اوہدے شاگِرد تے اِک وڈّی بِھیڑ یرِیحُو توں نِکلی تے تِمائی دا پُتر برتِمائی اِک اَنھا منگتا راہ دے کنڈے بَیٹھا ہویا سی۔ تے ایہہ سُن کے پئی اوہ یِسُوع ناصری اے۔ اُچّی اُچّی آکھن لگّا۔ اَے داؤد دے پُتر یِسُوع میرے اُتّے رَحم کر۔ تے بتھیریاں اوہنوں جِھڑکیا پئی چُپ کر پر اوس ہور وی زور نال پُکاریا۔ پئی اَے داؤد دے پُتر۔ میرے اُتّے رَحم کر۔ تَد یِسُوع کھلو کے آکھیا پئی اوہنوں سَدّ لوؤ۔ تے اوہناں اوس اَنھے نُوں ایہہ آکھ کے سدّیا پئی حَوصلہ کر۔ اُٹھ اوہ تینُوں سدّدا اے۔ اوہ اپنا کپڑا سُٹ کے اُٹھ کھلوتا۔ تے یِسُوع کول آیا۔ تے یِسُوع اوہنوں آکھیا۔ تُوں کِیہ چاہنا ایں۔ پئی مَیں تیرے لئی کراں؟ اوس اَنھے اوہنوں آکھیا۔ اَے اُستاد ایہہ پئی مَیں سوجاکھا ہو جاواں۔ یِسُوع اوہنوں آکھیا جا تیرے اِیمان تینُوں بچایا۔ اونویں ای اوہ سُجاکھا ہوگیا تے راہ وِچ اوہدے مگر ٹُر پیا۔ تے جد یرُوشلِیم دے نیڑے زَیتُون دے پہاڑ کول بَیت فگے تے بَیت عَنِیاہ تِیکر پہنچے۔ تے اوس اپنے شاگِرداں وِچوں دو بندیاں نُوں گھلّیا۔ تے اوہناں نُوں آکھیا۔ اوس پِنڈ نُوں جاؤ۔ جیہڑا تُہاڈے سامھنے اے تے اوہدے وِچ وڑدیاں سار اِک کھوتی دے بچّے نُوں بَدّھا ہویا تُسی ویکھو گے۔ جیہدے اُتّے کدی کوئی سوار نئیں ہویا۔ اوہنوں کھول لیاؤ۔ تے جے کوئی تُہانوں آکھے۔ تُسی ایہہ کیوں کر دے ہو؟ تے آکھنا خُداوند نُوں ایہدی لوڑ اے۔ تے اوہ جھٹ پَٹ مُڑ اوہنوں ایتھے پرتا دے گا۔ تے اوہ گئے۔ تے کھوتی دے بچّے نُوں باہر دروازے دے کول گلی وِچ بَدّھا ہویا ویکھیا تے اوہنوں کھولیا۔ تے کئیاں اوہناں وِچوں جیہڑے اوتھے کھلوتے سن اوہناں نُوں آکھیا۔ تُسی کِیہ کر دے اوہ۔ پئی کھوتی دے بچّے نُوں کھول دے اوہ؟ تے اوہناں جیہا یِسُوع آکھیا سی اوہناں نُوں آکھیا۔ تے اوہناں نیں اوہناں نُوں جان دِتّا۔ تے اوہ اوس بچّے نُوں یِسُوع کول لے آئے۔ تے اپنے کپڑے اوہدے اُتّے پائے۔ تے اوہ اوہدے اُتّے چڑھ بَیٹھا۔ تے بتھیریاں اپنے کپڑے راہ وِچ وچھائے تے ہورناں پَیلِیاں وِچوں پَتّر توڑ کے اوہناں دا فرش وچھا دِتّا۔ تے اوہ جیہڑے اگّے اگّے جاندے تے مگر آوندے سن اُچّی اُچّی آکھدے سن۔ ہوشعنا۔ دھنّ اوہ جیہڑا خُدا دے ناں اُتّے آؤندا اے۔ دھنّ ساڈے پئیو داؤد دی بادشاہی۔ جیہڑی آؤندی اے۔ اسماناں وِچ ہوشعنا۔ تے یرُوشلِیم اَپڑ کے ہیکل وِچ گیا۔ تے جد اوس چَواں پاسے سبھ کُجھ ویکھ لیا۔ تَد اوہ باراں نال بَیت عَنِیاہ نُوں گیا۔ ایس لئی اودُوں شام دا ویلا سی۔ تے اگلے دِن جد اوہ بَیت عَنِیاہ توں باہر آئے تَد اوہنوں بُھکھ لگّی۔ تے ہنجیر دا اِک رُکھّ پَتّراں نال لدّیاں ہویا دُوروں ویکھ کے گیا۔ پئی شاید اوہدے وِچوں کُجھ ہتّھ آوے۔ تے جد اوہدے نیڑے آیا تے پَتّراں دے بِناں اوہدے وِچ کُجھ نا لَبّھیا۔ کیوں جو ہنجیراں دی رُت نئیں سی۔ تَد اوس آکھیا۔ تَیتھوں کوئی کَدے وی پَھل نا کھاوے۔ تے اوہدے شاگِرداں ایہہ گلّ سُنی۔ فیر اوہ یرُوشلِیم وِچ آئے۔ تے اوہ ہیکل دے اندر جا کے اوہناں نُوں جیہڑے ہیکل وِچ ویچدے تے مُل لَیندے سن۔ باہر کڈھن لگّا۔ تے صرّافاں دے تختے تے کبُوتر ویچن والیاں دِیاں چَوکِیاں اُلٹا دِتّیاں۔ تے کِسے نُوں ہیکل وِچوں دی بھانڈا لے کے لنگھن نا دِتّا۔ تے تعلِیم دے کے اوہناں نُوں آکھیا۔ ایہہ نئیں لِکھیا اے۔ پئی میرا گھر سارِیاں قوماں دے لئی دُعا دا گھر اکھوائے گا؟ پر تُساں اوہنوں ڈاکُوؤاں دی کھوہ بنا دِتّا اے۔ تے سردار کاہِن تے فقِیہ ایہہ سُن کے سوچ وِچ پئے۔ پئی اوہدا ناس کِیویں کریئے۔ کیوں جو اوہدے کولوں ڈردے سن۔ ایس لئی پئی سارے لوک اوہدی تعلِیم توں حَیران ہو گئے سن۔ تے شام پَیاں اوہ شہروں باہر جاندا ہوندا سی۔ تے سویرے اوہناں اودھروں دی لنگھدیاں ہویاں ویکھیا۔ پئی ہنجیر دا رُکھّ جڑوں سُک گیا اے۔ تے پطرس چیتا کر کے اوہنوں آکھیا۔ اَے ربّی۔ ویکھ ہنجیر دا رُکھّ جِہنُوں تُوں لعنت دِتّی سُک گیا اے۔ تے یِسُوع جواب دے کے اوہناں نُوں آکھیا خُدا اُتّے اِیمان لیاؤ۔ مَیں تُہانوں سَچ آکھنا آں پئی جو کوئی ایس پہاڑ نُوں آکھے پئی اُٹھ تے سمُندر وِچ جا پَو۔ تے اپنے مَن وِچ شک نا لیاوے۔ پر یقِین کرے۔ پئی جو کُجھ آکھنا آں اوہ ہوندا اے سو اوہدے لئی ہوئے گا۔ ایس لئی مَیں تُہانوں آکھنا آں۔ پئی دُعا منگدیاں سبھ کُجھ جو تُسی منگدے اوہ۔ یقِین کرو پئی اوہ تُہانوں لَبّھ گیا۔ تے تُہاڈے لئی ہو جائے گا۔ تے جد کدی تُسی کھلو کے دُعا منگدے اوہ۔ جیکر تُہاڈا کِسے اُتّے گِلہ ہوئے۔ اوہنوں مُعاف کرو۔ تاں جو تُہاڈا باپ وی جیہڑا اسماناں اُتّے اے تُہاڈے قصوراں نُوں مُعاف کرے۔ [تے جے تُسی مُعاف نا کرو گے تے تُہاڈا باپ وی جیہڑا اسماناں اُتّے اے مُعاف نا کرے گا۔] تے اوہ فیر یرُوشلِیم وِچ آئے۔ تے جد اوہ ہیکل وِچ پِھردا سی۔ تَد سردار کاہِن تے فقِیہ تے بزُرگ اوہدے کول آئے۔ تے اوہنوں آکھن لگّے۔ پئی تُوں کیہڑے اختیار نال ایہہ کمّ کرنا ایں؟ یا کِس ایہہ کمّ کرن دا تینُوں اختیار دِتّا؟ یِسُوع اوہناں نُوں آکھیا۔ مَیں تُہاتھوں اِک گلّ پُچھنا آں تُسی مَینُوں جواب دیو۔ تے مَیں تُہانوں دساں گا۔ پئی کیہڑے اختیار نال ایہہ کمّ کرنا آں۔ یُوحنّا دا بپتِسمہ اسمان ولّوں سی یا بندیاں ولّوں؟ مَینُوں جواب دیو۔ تے اوہناں آپو وِچ وچار کرے آکھیا۔ جے آکھئے اسمان ولّوں۔ تے اوہ آکھے گا فیر تُساں اوہدا یقِین کیوں نا کِیتا؟ پر جے آکھیئے پئی بندیاں ولّوں۔ تے اوہ لوکاں کولوں ڈر دے سن۔ ایس لئی پئی سبھے یُوحنّا نُوں سَچّی مُچّی نبی مَن دے سن۔ تے اوہناں یِسُوع نُوں جواب دِتّا۔ اسی نئیں جان دے۔ یِسُوع اوہناں نُوں آکھیا۔ مَیں وی تُہانوں نئیں دسدا۔ پئی کیہڑے اختیار نال مَیں ایہہ کمّ کرنا آں۔ فیر اوہ اوہناں نُوں تمثِیلاں دے کے آکھن لگّا پئی اِک بندے انگور دا باغ لایا۔ تے اوہدے دوالے واڑ کِیتی تے کھڈا کڈھیا۔ تے بُرج بنایا۔ تے اوہنوں مالِیاں نُوں ٹھیکے اُتّے دے کے پردیس ٹُر گیا۔ تے رُت سر اوس اِک نوکر مالِیاں کول گھلّیا۔ پئی مالِیاں کولوں باغ دے پَھل وِچوں کُجھ لیاوے۔ تے اوہناں اوہنوں پَھڑکے کُٹّیا تے سَکھنے ہتّھ موڑ دِتّا۔ تے اوس دُوجی واری اِک ہور نوکر نُوں اوہناں کول گھلّیا۔ اوہناں اوہدا سِر پاڑیا۔ تے اوہدی پَتّ لاہ دِتّی۔ تے اوس اِک ہور نُوں گھلّیا۔ تے اوہناں اوہنوں مار سُٹّیا۔ تے ہور بتھیریاں نُوں گھلّیا اوہناں کئیاں نُوں کُٹّیا تے کئیاں نُوں مار سُٹّیا۔ ہُن اوہدے کول اِک سی۔ اوہدا پیارا پُتر۔ اوڑک اوس اوہنوں وی اوہناں کول ایہہ آکھ کے گھلّیا۔ پئی اوہ میرے پُتر دی تے عِزّت کرن گے۔ پر اوہناں مالِیاں آپو وِچ آکھیا۔ وارث ایہو ای اے۔ آؤ اسی اوہنوں مار سُٹّیئے۔ تے وِرثہ ساڈا ہو جائے گا۔ تے اوہناں اوہنوں پَھڑکے مار دِتّا۔ تے انگور دے باغوں کڈھ کے اوہنوں باہر سُٹّیا۔ ہُن باغ دا مالک کِیہ کرے گا؟ اوہ آوے گا۔ تے اوہناں مالِیاں نُوں جانوں مار کے انگور دا باغ ہور ناں نُوں دے دے گا۔ تُساں ایہہ نوِشتہ وی نئیں پڑھیا۔ پئی جِس پتّھر نُوں راجاں نیں ناپسند کِیتا۔ اوہو ای گُٹّھ دا سِرا بنیا؟ ایہہ خُداوند دے ولّوں ہویا۔ تے ساڈی نظر وِچ اچرج اے۔ تے اوہ اوہدے پھڑن دا موقعہ لبّھدے سن۔ پر لوکاں کولوں ڈرے۔ کیوں جو اوہناں جان لیا۔ پئی اوس ایہہ تمثِیل ساڈے اُتّے آکھی سی۔ تے اوہنوں چھڈ کے ٹُر گئے۔ تے اوہناں فرِیسیاں تے ہیرودیاں وِچوں کئیاں نُوں اوہدے کول گھلّیا۔ پئی اوہنوں گلّاں دی پھاہی وِچ پَھسان۔ تے اوہناں اوہدے کول آ کے آکھیا۔ پئی اَے اُستاد۔ اسی جاننے آں پئی تُوں سَچّا ایں۔ تے تینُوں کِسے دی پرواہ نئیں۔ کیوں جو تُوں بندیاں دا لحاظ نئیں کر دا۔ پر تُوں سچیائی نال خُدا دا راہ دسنا ایں۔ قَیصر نُوں جزیہ دینا چاہیدا اے یا نئیں؟ اسی دئیے یا نا دئیے؟ پر اوس اوہناں دا مکر جان کے اوہناں نُوں آکھیا۔ مَینُوں کیوں ازماؤندے اوہ؟ دینار میرے کول لیاؤ۔ پئی مَیں ویکھاں۔ سو اوہناں لیاندا تے اوس اوہناں نُوں آکھیا۔ ایہہ مُورت تے حرف کِہدے نیں؟ اوہناں آکھیا۔ قَیصر دے۔ تَد یِسُوع اوہناں نُوں آکھیا جیہڑیاں شیواں قَیصر دِیاں نیں۔ سو قَیصر نُوں دیو۔ تے جیہڑیاں خُدا دِیاں نیں خُدا نُوں دیو تے اوہ اوہدے توں بُہت حَیران ہوئے۔ تے صدوقی جیہڑے آکھدے نیں پئی قیامت نئیں ہونی۔ اوہدے کول آئے۔ تے ایہہ سوال کِیتا۔ پئی اَے اُستاد۔ ساڈے لئی مُوسیٰ لِکھیا اے۔ پئی جے کِسے دا بھرا مر جائے۔ تے اوہدی بیوی رہ جائے۔ تے اولاد نا ہوئے۔ تے اوہدا بھرا اوہدی بیوی نُوں کر لَوے۔ تے اپنے بھرا لئی اولاد پَیدا کرے۔ سَتّ بھرا سن۔ تے پہلے بیوی کِیتی۔ تے بے اولاد مر گیا۔ تے دُوجے اوہنوں کِیتا۔ تے بے اولاد مر گیا۔ تے ایسے طرح ترِیجا وی۔ تے سَتّے بے اولادے مر گئے۔ ساریاں دے پِچّھوں اوہ زنانی وی مر گئی۔ قیامت نُوں اوہ اوہناں وِچوں کِہدی بیوی ہوئے گی؟ کیوں جو اوہ ستّاں دے گھر وَسّی سی۔ یِسُوع اوہناں نُوں آکھیا۔ تُسی ایس کر کے بھُلیکھے وِچ نئیں پئے ہو! پئی نا کِتاباں نُوں تے نا خُدا دی قُدرت نُوں جان دے ہو؟ پئی جد اوہ مُردیاں وِچوں اُٹھن گے نا ویاہ کرن گے نا ویاہے جان گے۔ سگوں اسمان دے فرِشتیاں وانگُوں ہون گے۔ پر مُردیاں دی بابت پئی اوہ جی اُٹھدے نیں تُساں مُوسیٰ دی کتاب وِچ جھاڑی دی گلّ وِچ پڑھیا نئیں پئی خُدا نے اوہنوں کِیویں آکھیا پئی مَیں ابرہام دا خُدا تے اِضحاق دا خُدا تے یعقُوب دا خُدا آں۔ اوہ مُردیاں دا خُدا نئیں سگوں جِیوندیاں دا خُدا اے۔ تُسی بڑی بُھل وِچ پئے ہوئے اوہ۔ تَد فقِیہاں وِچوں اِک اوہدے کول آیا۔ تے جد اوہناں دی بحث سُنی۔ تے سمجھیا۔ پئی اوس اوہناں نُوں خُوب جواب دِتّا تے اوہدے توں پُچھیا۔ پئی ساریاں حُکماں وِچوں پہلا کیہڑا اے۔ یِسُوع اوہنوں جواب دِتّا پہلا ایہہ اے۔ پئی سُن اِسرائیل۔ خُداوند ساڈا خُدا اِک ای خُداوند اے۔ تے تُوں خُداوند اپنے خُدا نُوں اپنے سارے دِل نال تے اپنی ساری جان نال تے اپنی ساری عقل نال تے اپنے سارے زور نال پیار کر۔ دُوجا ایہہ اے۔ تُوں اپنے گوانڈھی نُوں اپنے جِہیا پیار کر۔ ایہناں نالوں وَڈا کوئی حُکم نئیں اے۔ تَد اوس فقِیہ اوہنوں آکھیا۔ ٹھیک اَے اُستاد۔ تُوں سَچ آکھیا۔ پئی اوہ اِک ای اے۔ تے اوہدے باہجوں ہور کوئی نئیں اے۔ تے سارے دِل نال تے ساری سمجھ نال تے سارے زور نال اوہنوں پیار کرنا تے گوانڈھی نُوں اپنے جیہا پیار کرنا سارِیاں قُربانِیاں جیہڑیاں اَگ اُتّے ساڑِیاں جاندِیاں نیں تے چڑھاویاں نالوں وڈّی گلّ اے۔ تے جدوں یِسُوع ویکھیا پئی اوس عقل نال جواب دِتّا تے اوس آکھیا تُوں خُدا دی بادشاہی توں دُراڈے نئیں ایں تے ایدوں اگّوں کِسے دا حَوصلہ نا پیا پئی اوہدے توں سوال پُچھے۔ تے یِسُوع ہیکل وِچ تعلِیم دیندیاں آکھیا۔ پئی فقِیہ کِیویں آکھدے نیں پئی مسِیح داؤد دا پُتر اے؟ داؤد پاک رُوح دی راہِیں آکھیا۔ پئی خُداوند نیں میرے خُداوند نُوں آکھیا پئی تُوں میرے سَجّے پاسے بَہو۔ جد تِیکر مَیں تیرے وَیرِیاں نُوں تیرے پَیر رکھن دی چَوکی نا کراں۔ داؤد تے آپ اوہنوں خُداوند آکھدا اے۔ فیر اوہ اوہدا پُتر کِتّھوں ہویا؟ تے عام خاص خُوشی نال اوہدی سُندے سن۔ تے اوس اپنی تعلِیم وِچ آکھیا پئی فقِیہاں توں ہُشیار رہو۔ جیہڑے لمّے کپڑے پا کے ٹُرنا پِھرنا تے بازاراں وِچ سلام لینا پسند کر دے نیں۔ تے عبادت خانیاں وِچ اگلیاں کُرسِیاں تے ضیافت والے گھراں وِچ اُچّے تھاں چاہندے نیں۔ اوہ بیوہ عَورتاں دے گھراں نُوں نِگل جاندے نیں۔ تے وکھالن لئی لمبی چَوڑی نماز پڑھدے نیں۔ اوہناں نُوں بُہتی سزا مِلے گی۔ تے اوہ ہیکل دے خزانے دے سامھنے بَہہ کے ویکھدا سی پئی لوک خزانے وِچ کِیویں پَیسے پاندے نیں تے بتھیرے بختاوراں بتھیرا کُجھ پایا۔ تے اِک غرِیب بیوہ نے آ کے دو دَمڑِیاں پائیاں جِنہاں دا اِک دھیلا ہوندا اے۔ تے اوس اپنے شاگِرداں نُوں کول سَدّ کے آکھیا۔ مَیں تُہانوں سَچ آکھنا آں۔ پئی ایس غرِیب بیوہ اوہناں سبھناں نالوں جیہڑے خزانے وِچ پاندے نیں بُہتا پا دِتّا۔ کیوں جو سبھناں اپنی بچت وِچوں پایا۔ پر اوس اپنی تُھڑ وِچوں جو کُجھ اوہدے کول سی۔ اپنی ساری پُونجی پا دِتّی۔ تے جدوں اوہ ہیکل وِچوں باہر پیا جاندا سی۔ اوہدے شاگِرداں وِچوں اِک آکھیا۔ اَے اُستاد۔ ویکھ ایہہ کِہو جیہے پتّھر تے کِہو جِہیاں عمارتاں نیں۔ تے یِسُوع اوہنوں آکھیا۔ تُوں ایہناں وڈّیاں عمارتاں نُوں ویکھنا ایں۔ ایتھے پتّھر اُتّے پتّھر نا چھڈیا جائے گا۔ جیہڑا ڈیگیا نا جائے۔ تے جد اوہ زَیتُون دے پہاڑ اُتّے ہیکل دے سامھنے بَیٹھا سی۔ پطرس تے یعقُوب تے یُوحنّا تے اندریاس اکلّیاں ہو کے اوہدے توں پُچھیا۔ پئی سانُوں دس ایہہ گلّاں کدوں ہون گِیاں۔ تے اوس سَمے دا کِیہ پتا اے۔ جدوں ایہہ سبھ پُوریاں ہون اُتّے آؤن گِیاں؟ یِسُوع اوہناں نُوں آکھن لگّا۔ ہُشیار رہو۔ پئی تُہانوں کوئی بُھلاوے وِچ نا پاوے۔ بتھیرے میرے ناں اُتّے ایہہ آکھدے آؤن گے۔ پئی مَیں اوہو ای آں۔ تے بتھیریاں نُوں بُھلان گے۔ تے جد لڑائِیاں تے لڑائِیاں دِیاں افواواں سُنو تے گھبرا نا جانا ایہناں گلّاں دا ہونا ضرُور اے پر اجے اخِیر نئیں۔ کیوں جو قوم قوم اُتّے۔ تے بادشاہی بادشاہی اُتّے چڑھائی کرے گی۔ تھاں تھاں بھوچال آؤن گے تے کال پَین گے۔ ایہہ گلّاں مُصِیبتاں دا شُروع اے۔ پر تُسی خبردار رہو۔ کیوں جو اوہ تُہانوں مجلسیاں دے حوالے کرن گے۔ تے عبادت خانیاں وِچ تُسی مار کھاؤ گے۔ تے حاکماں تے بادشاہاں دے اگّے میرے سببّوں کھلے کِیتے جاؤ گے۔ تاں جو اوہناں دے لئی گواہی ہوئے۔ تے ضرُور اے۔ پئی سارِیاں قوماں دے اگّے اِنجِیل دی منادی پہلاں کِیتی جائے۔ تے جدوں تُہانوں پھڑوا کے لے جان گے۔ تے پہلاں ای فِکر نا کرنا۔ پئی اسی کِیہ آکھاں گے۔ پر جو کُجھ اوس گھڑی تُہانوں بخشیا جائے۔ سو ای۔ آکھنا۔ کیوں جو آکھن والے تُسی نئیں اوہ۔ پر پاک رُوح۔ تے بھرا بھرا نُوں۔ تے پئیو بچّے نُوں مروان لئی پھڑان گے۔ تے بچّے اپنے ماپیاں دا سامنا کرن گے۔ تے اوہناں نُوں مار سُٹّن گے۔ تے میرے ناں دے سبّب سبھ لوک تُہاڈے وَیری ہون گے۔ پر جو کوئی اخِیر توڑی قیم رہے گا۔ سو ای نجات پائے گا۔ تے جِس ویلے اوس اُجاڑن والی ناپاک شے نُوں اوس تھاں کھلوتی ویکھو۔ جِتّھے اوہدا ہونا نئیں چاہیدا (پڑھن والا سمجھ لَئے) تَد اوہ جیہڑے یہُودیہ وِچ ہون پہاڑاں نُوں بھج جان۔ تے اوہ جیہڑا کوٹھے اُتّے ہوئے ہیٹھاں نا اُترے۔ تے اپنے گھروں کُجھ کڈھن لئی اندر نا وڑے۔ تے جیہڑا پَیلی وِچ ہوئے۔ اپنے کپڑے لین نُون پِچھّاں نا مُڑے۔ پر افسوس اوہناں اُتّے۔ جیہڑیاں اوہناں دِناں وِچ جمّن والیاں تے دُودھ چُنگھان والیاں ہون۔ تُسی دُعا منگو پئی ایہہ سِیال وِچ نا ہوئے۔ کیوں جو اوہناں دِناں وِچ ایڈی مُصِیبت ہوئے گی۔ پئی خلقت دے مُڈھوں لے کے جِہنُوں خُدا بنایا اے۔ ہُن تِیکر نا ہوئی اے۔ تے نا کدی ہوئے گی۔ تے جیکر خُداوند اوہناں دِناں نُوں نا گھٹاؤندا۔ تے اِک بندہ وی نا بچدا۔ پر اوہناں چُنیاں ہویاں دی خاطر جِنہاں نُوں اوس چُنیا اے۔ اوس اوہناں دِناں نُوں گھٹایا۔ تے اوس ویلے جے کوئی تُہانوں آکھے۔ پئی ویکھو۔ مسِیح ایتھے اے۔ یا ویکھو اوتھے اے۔ تے سَچ نا مننّاں۔ کیوں جو جُھوٹھے مسِیح تے جُھوٹھے نبی اُٹھن گے۔ تے نِشان تے اچرج کمّ وکھان گے۔ تاں جو جے ہو سکے اوہ چُنیاں ہویاں نُوں بُھلان۔ پر تُسی خبردار اوہ۔ دیکھو۔ مَیں تُہانوں پہلاں ای سبھو کُجھ دس دِتّا اے۔ پر اوہناں دِناں وِچ اوس مُصِیبت دے پِچّھوں سُورج ہنیر ہو جاوے گا۔ تے چَنّ اپنی روشنی نا دے گا۔ تے اسمانوں تارے ڈِگّ پَین گے تے قُوّتاں جیہڑیاں اسماناں وِچ نیں ہلائِیاں جان گِیاں۔ تے اوس ویلے اِبنِ آدم نُوں بڑی قُدرت تے جلال نال بدّلاں اُتّے آؤندیاں ویکھن گے۔ تے اوس ویلے اوہ فرِشتیاں نُوں گھلّے گا۔ تے چَوہاں گُٹّھاں توں زمین دی حدّوں اسمان دی حد تِیکر اپنے چُنیاں ہویاں نُوں اکٹّھے کرے گا۔ فیر ہنجیر دے بُوٹے توں تمثِیل سِکھّو جد اوہدی ٹہنی نرم ہوندی تے پَتّر پُھٹدے نیں۔ تے جان لَیندے ہو پئی گرمی دی رُت آئی اے۔ ایسے طرح تُسی وی جدوں ایہہ گلّاں ہوندیاں ویکھو۔ تے جانو پئی اوہ نیڑے۔ سگوں بُوہے اُتّے اے۔ مَیں تُہانوں سَچ آکھنا آں پئی جد تِیکر ایہہ سبھ کُجھ نا ہو لَوے ایس زمانے دے لوک گُذر نا جان گے۔ اسمان تے زمین ٹل جان گے۔ پر میرِیاں گلّاں کَدے نا ٹلن گِیاں۔ پر اوس دِن یا اوس گھڑی دی بابت بِناں باپ دے کوئی نئیں جان دا نا تے فرِشتے اسمان وِچ۔ تے نا پُتر۔ خبردار رہو۔ جاگدے رہو۔ تے دُعا منگو۔ کیوں جو تُسی نئیں جان دے پئی اوہ ویلا کدوں ہوئے گا۔ ایہہ اِک پردیس وِچ گئے ہوئے بندے وانگر اے جِس گھروں نِکلدے ویلے اپنے نَوکراں نُوں اختیار دِتّا۔ ہر اِک نُوں اوہدا کمّ دس دِتّا تے دربان نُوں حُکم کِیتا پئی جاگدا رہے۔ سو جاگدے رہو کیوں جو تُسی نئیں جان دے۔ پئی گھر دا مالک کیہڑے ویلے آؤندا اے۔ شام نُوں یاد اَدھی رات نُوں یا کُکّڑ دی بانگ ویلے۔ یا سویرے۔ اجیہا نا ہوئے پئی آ کے اوہ تُہانوں سُتّیاں پاوے۔ تے جو کُجھ مَیں تُہانوں آکھنا آں سو ساریاں نُوں آکھنا آں۔ جاگدے رہو۔ دو دِناں پِچّھوں فسح تے پتِیری روٹی دی عید سی۔ تے سردار کاہِن تے فقِیہ کھوج وِچ لگّے ہوئے سن پئی اوہنوں کِیویں داء نال پھڑ کے جانوں مارِیئے۔ اوہناں آکھیا۔ عید دے دِن نئیں۔ کِتے لوکاں وِچ ہَلّا گُلّا نا ہوئے۔ تے جد اوہ بَیت عَنِیاہ وِچ شمعُون کوڑھے دے گھر کھان بَیٹھا سی۔ اِک عورت بڑے مُل والا وال چھڑ دا کھرا عِطر شِیشی وِچ لیاندا۔ تے شِیشی نُوں توڑ کے اوہدے سِر اُتّے ڈوہلیا۔ تَد کئی اپنے مَن وِچ کھِجدے سن پئی عِطر دا ایس طرح کاہِنُوں نُقصان ہویا۔ کیوں جو ایہہ عِطر تِنّ سَو دینار توں وَدّھ وِک کے غرِیباں نُوں دِتّا جا سکدا سی۔ تے اوہ اوہنوں جِھڑکن لگّے۔ پر یِسُوع آکھیا۔ اوہنوں چھڈ دیو۔ کیوں اوہنوں دُکھ دیندے اوہ۔ اوس میرے نال ہَچھّا ورتاوا کِیتا۔ کیوں جو غرِیب لوک ہمیش تُہاڈے نال نیں تے جد چاہو اوہناں دا بھلا کر سکدے اوہ۔ پر مَیں ہمیش تُہاڈے نال نئیں آں۔ جو کُجھ اوہدے توں بن پیا۔ اوس کِیتا۔ اوس پہلاں لئی میرے بدن اُتّے میرے کفنان دفنان لئی عِطر لا دِتّا۔ تے مَیں تُہانوں سَچ آکھنا آں۔ پئی ساری دُنیا وِچ جِتّھے کِتّھے اِنجِیل دی منادی کِیتی جائے گی اوتھے ایہدا وی جو ایس کِیتا اے اوہدی یادگیری دے لئی ذِکر ہوئے گا۔ تے یہُوداہ اِسکریُوتی جیہڑا باراں وِچوں اِک سی۔ سردار کاہِناں دے کول ٹُر گیا۔ تاں جو اوہنوں اوہناں دے حوالے کرے۔ اوہ ایہہ سُن کے خُوش ہوئے۔ تے اوہنوں رُپئے دین دا اِقرار کِیتا تے اوہ کھوج وِچ لگّا۔ پئی کِسے طرح داء لگّے تے اوہنوں پھڑوا دے۔ تے پتِیری روٹی دی عید دے پہلے دِن جدوں فسح ذِبح کر دے سن۔ اوہدے شاگِرداں اوہنوں آکھیا تُوں کِتّھے چاہنا ایں پئی اسی جا کے تیرے فسح کھان لئی تیاری کریئے؟ تے اوس اپنے شاگِرداں وِچوں دُونہہ نُوں گھلّیا تے اوہناں نُوں آکھیا۔ پئی شہر وِچ جاؤ تے اِک بندہ پانی دا گھڑا چُکیا ہویا تُہانوں مِلے گا۔ اوہدے مگر ٹُرپَو۔ تے جِس گھر وِچ اوہ جائے اوس گھر دے مالک نُوں آکھو اُستاد آکھدا اے۔ میرے اُترن دا تھاں کِتّھے اے۔ جِتّھے مَیں اپنے شاگِرداں نال فسح کھانواں۔ تے اوہ اِک موکلا چُبارہ فرش وِچھایا تے سنواریا ہویا تُہانوں وکھائے گا۔ اوتھے ساڈے لئی تیار کرو۔ تے شاگِرد ٹُر گئے۔ تے شہر وِچ آئے۔ تے جیویں اوس دسیا سی۔ اوسے طرح ویکھیا۔ تے فسح تیار کِیتا۔ جد شام ہوئی اوہ باراں دے نال آیا۔ تے جد اوہ بَہہ کے کھان لگّے۔ تے یِسُوع آکھیا۔ مَیں تُہانوں سَچ آکھنا آں۔ پئی تُہاڈے وِچوں اِک جیہڑا میرے نال کھاندا اے۔ مَینُوں پھڑوائے گا۔ اوہ اُداس ہون تے اِک اِک کر کے اوہنوں آکھن لگّے۔ مَیں آں؟ اوس اوہناں نُوں آکھیا باراں وِچوں اِک جَنا۔ جیہڑا میرے نال تھال وِچ ہتّھ پاندا اے۔ سو ای اے۔ کیوں جو اِبنِ آدم تے جان دا اے۔ جیویں اوہدے حق وِچ لِکھیا اے پر افسوس اوس بندے اُتّے جِہدی راہِیں اِبنِ آدم پھڑوایا جاندا اے۔ اوس بندے لئی چَنگا ہوندا جے اوہ نا جمدا۔ تے جد اوہ پئے کھاندے سن اوس روٹی لئی تے برکت منگ کے توڑی۔ تے اوہناں نُوں دے کے آکھیا۔ لوؤ ایہہ میرا بدن اے۔ تے اوس پیالہ لے کے شُکر کِیتا۔ تے اوہناں نُوں دِتّا۔ تے سبھناں اوہدے وِچوں پِیتا۔ تے اوس اوہناں نُوں آکھیا۔ ایہہ میرا عہد دا لہو اے۔ جیہڑا بتھیریاں لئی وگایا جاندا اے۔ مَیں تُہانوں سَچ آکھنا آں پئی مَیں فیر انگور دا رَس کَدے نا پِیاں گا۔ جِس دِن تِیکر خُدا دی بادشاہی وِچ اوہ نواں نا پِیواں۔ فیر اوہ خُدا دی تعرِیف گاؤں کے زَیتُون دے پہاڑ نُوں گئے۔ تے یِسُوع اوہناں نُوں آکھیا پئی تُسی سارے ٹھوکر کھاؤ گے۔ کیوں جو لِکھیا اے پئی مَیں ایّالی نُوں ماراں گا تے بھیڈاں کھِلّر جان گِیاں۔ پر مَیں اپنے جی اُٹھن دے پِچّھوں تُہاتھوں اگّے گلِیل نُوں جان گا۔ تَد پطرس اوہنوں آکھیا۔ بھانویں سارے ای ٹھوکر کھان۔ پر مَیں نئیں کھاں گا۔ تے یِسُوع اوہنوں آکھیا مَیں تینُوں سَچ آکھنا آں۔ پئی اَج ایسے رات کُکّڑ دے دو وار بانگ دین توں پہلاں تُوں تَرے وار میرا اِنکار کریں گا۔ تَد اوس بڑے جوش نال آکھیا۔ جے تیرے نال مَینُوں مرنا پَوے تے وی کَدے تیرا اِنکار نا کراں گا۔ تے سارے ایسے طرح آکھن لگّے۔ فیر اوہ گتسمنی ناں اِک تھاں آئے۔ تے اوس اپنے شاگِرداں نُوں آکھیا۔ جد تِیکر مَیں دُعا منگاں تُسی ایتھے بَیٹھے رہو۔ تے پطرس تے یعقُوب تے یُوحنّا نُوں اپنے نال لیا۔ تے حَیران پریشان تے بُہت دلگِیر ہون لگّا۔ تے اوس اوہناں نُوں آکھیا۔ میرا جی بُہت اُداس اے۔ سگوں مرن وانگر حال اے۔ تُسی ایتھے ٹھیرو تے جاگدے رہو۔ تے اوہ تھوڑا اگّے وَدّھ کے زمین اُتّے ڈِگّ پیا۔ تے دُعا منگی۔ پئی جے ہوسکے ایہہ گھڑی مَیتھوں ٹل جائے۔ تے اوس آکھیا۔ ابّا یعنی اے باپ سبھ کُجھ تَیتھوں ہوسکدا اے۔ ایس پیالے نُوں میرے کولوں ہٹا دے۔ پر اوہ نا ہوئے جو مَیں چاہناں آں۔ سگوں اوہ جو تُوں چاہنا ایں۔ فیر اوہ آیا۔ تے اوہناں نُوں سُتّے ہوئے ویکھیا۔ تے پطرس نُوں آکھیا۔ شمعُون تُوں سُتّا ہویا ایں؟ تَیتھوں اِک گھڑی وی جاگن نئیں ہویا۔ جاگو تے دُعا منگو پئی تُسی ازمایش وِچ نا پَوو۔ رُوح تے تیار اے پر بدن کمزور اے۔ تے اوہ فیر گیا۔ تے اوہو گلّ آکھ کے دُعا منگی۔ تے فیر آ کے اوس اوہناں نُوں سُتّیاں ویکھیا کیوں جو اوہناں دِیاں اَکھّیاں نِیندر نال بھریاں ہویاں سن۔ تے اوہ نئیں جان دے سن پئی اوہنوں کِیہ جواب دین؟ تے اوہ ترِیجی وار آیا۔ تے اوہناں نُوں آکھیا۔ ہُن سُتّے رہو۔ تے آرام کرو۔ بس ہُن ویلا آگیا اے۔ ویکھو اِبنِ آدم گُنہگاراں دے حوالے کِیتا جاندا اے۔ اُٹھو چلّئے۔ ویکھو میرا پھڑان والا نیڑے آیا اے۔ تے جدوں اجے اوہ بولدائی سی۔ اوسے ویلے یہُوداہ جیہڑا باراں وِچوں اِک سی آگیا۔ تے سردار کاہِناں تے فقِیہاں تے بزُرگاں ولّوں اِک بِھیڑ تلواراں تے لاٹھِیاں لئی ہوئی اوہدے نال سی۔ تے اوہدے پھڑان والے نیں اوہناں نُوں ایہہ پَتا دِتّا سی۔ پئی جِہنُوں مَیں چُمّاں۔ اوہو اے۔ اوہنوں پھڑ کے تگڑائی نال لے جاؤ۔ سو جد اوہ آگیا۔ اونویں اوہدے کول آ کے آکھیا۔ اے ربّی۔ تے اوہنوں چُمّ لیا۔ تَد اوہناں اوہدے اُتّے ہتّھ پائے تے اوہنوں پھڑ لیا۔ تے اوہناں وِچوں جیہڑے اوتھے کھلوتے سن۔ اِک نیں اپنی تلوار کھِچّ لئی تے سردار کاہِن دے نوکر نُوں ماری۔ تے اوہدا کنّ اُڈا دِتّا۔ تے یِسُوع اوہناں نُوں آکھیا۔ پئی تلواراں تے لاٹھِیاں لے کے تُسی مَینُوں چور وانگُوں پھڑن نِکلے ہو؟ مَیں تے روز ہیکل وِچ تُہاڈے کول ساں۔ تے تعلِیم دیندا ساں۔ تے تُساں مَینُوں نا پھڑیا۔ پر ایہہ ایس لئی ہویا۔ پئی نوِشتے پُورے ہو جان۔ تے سارے اوہنوں چھڈ کے بھج گئے۔ تے اِک جوان جِس مَلمَل دا کپڑا اپنے ننگے بدن اُتّے لیا ہویا سی۔ اوہدے مگر ٹُر پیا۔ تے لوکاں اوہنوں پھڑیا۔ پر اوہ کپڑا چھڈ کے ننگا بھج گیا۔ تے اوہ یِسُوع نُوں سردار کاہِن دے کول لے گئے تے سارے سردار کاہِن تے بزُرگ تے فقِیہ اوہدے کول اکٹّھے ہوئے۔ تے پطرس دُوروں اوہدے پِچّھے پِچّھے سردار کاہِن دے وِہڑے دے اندر تِیکر ٹُرگیا۔ تے پیادیاں دے نال بَہہ کے اَگ سیکن لگّا۔ تے سردار کاہِن تے ساری مجلس یِسُوع اُتّے اوہنوں مارن لئی گواہی لبّھدے سن۔ پر نا لَبّھی۔ بتھیرے اوہدے اُتّے جُھوٹھے گواہ بُھگتے۔ پر اوہناں دی گواہی رَلدی نئیں سی۔ تے کئیاں اُٹھ کے ایہہ آکھ کے اوہدے اُتّے گواہی دِتّی۔ پئی اساں اوہنوں ایہہ آکھدیاں سُنیاں پئی مَیں ایس ہیکل نُوں جیہڑی ہتّھ نال بنائی ہوئی اے ڈھا دیاں گا۔ تے تِنّاں دِناں دے اندر اندر اِک ہور نُوں بناواں گا۔ جیہڑی ہتّھاں دی بنائی ہوئی نا ہوئے۔ تَد وی اوہناں دی گواہی اِکّو جِہی نئیں سی۔ تے سردار کاہِن وِچکار کھلو گیا تے یِسُوع نُوں ایہہ پُچھیا۔ پئی تُوں کُجھ جواب نئیں دیندا؟ ایہہ تیرے اُتّے کِیہ گواہی دیندے نیں؟ پر اوہ چُپ ای کر رہیا تے کُجھ جواب نا دِتّا۔ سردار کاہِن نیں فیر اوہنوں پُچھیا۔ تے اوہنوں آکھیا۔ تُوں مسِیح ایں۔ اوس مُبارک دا پُتر؟ یِسُوع آکھیا۔ مَیں آں۔ تے تُسی اِبنِ آدم نُوں قُدرت دے سَجّے ہتّھ بَیٹھیاں ہویاں تے بدّلاں نال آؤندیاں ویکھو گے۔ تَد سردار کاہِن اپنے کپڑے پاڑ کے آکھیا۔ بس ہُن سانُوں ہورناں گواہاں دی کِیہ لوڑ اے؟ تُساں کُفر سُنیا۔ تُہانوں کِیہ معلُوم ہوندا اے؟ تَد اوہناں سبھناں اوہنوں مَوت دے لائق ہون دا فتویٰ دِتّا۔ تَد کئی اوہدے اُتّے تُھکن تے اوہدا مُنھ ڈھکن تے اوہنوں دَھپھے مارن تے اوہنوں آکھن لگّے۔ نبُوّت نال دس۔ تے پیادیاں اوہنوں چپیڑاں مار کے پھڑ لیا۔ تے جدوں پطرس ہیٹھاں وِہڑے وِچ سی۔ سردار کاہِن دِیاں ٹہلناں وِچوں اِک آئی۔ تے پطرس نُوں اَگ سیکدیاں ویکھ کے اوہدے ولّ نظر کِیتی تے آکھیا تُوں وی یِسُوع ناصری دے نال سائیں۔ پر اوہ مُکّر کے بولیا۔ مَیں نا جان دا نا سمجھنا آں۔ پئی تُوں کِیہ آکھنی ایں تے اوہ باہر ڈیوڑھی وِچ ٹُر گیا۔ تے کُکّڑ بانگ دِتّی۔ تے ٹہلن اوہنوں ویکھ کے فیر اوہناں نُوں جیہڑے کول کھلوتے سن آکھن لگّی۔ ایہہ اوہناں وِچوں اِک اے۔ پر اوہ فیر مُکّر گیا تے فیر تھوڑے چِر پِچّھوں جیہڑے کول کھلوتے سن اوہناں پطرس نُوں آکھیا ٹھیک تُوں اوہناں وِچوں ایں کیوں جو تُوں گلِیلی ایں۔ پر اوہ لعنت کرن تے سَونہہ کھان لگّا۔ پئی مَیں اوس بندے نُوں۔ جِہدی گلّ تُسی کر دے ہو نئیں جان دا۔ تے اونویں کُکّڑ دُوجی وار بانگ دِتّی۔ تے پطرس نُوں اوہ گلّ یاد آئی جیہڑی یِسُوع اوہنوں آکھی سی۔ پئی کُکّڑ دے دو وار بانگ دین توں پہلاں تُوں تَرے وار میرا اِنکار کریں گا تے اوہ اوس گلّ نُوں سوچ کے رون لگّا۔ تے سویرے ای سردار کاہِناں نیں بزُرگاں تے فقِیہاں نُوں اپنے نال رَلا کے تے ساری مجلس نے صلاح کر کے یِسُوع نُوں بَدّھا۔ تے اوہنوں لے جا کے پِیلاطُس دے حوالے کِیتا۔ تے پِیلاطُس اوہدے توں پُچھیا۔ یہُودِیاں دا بادشاہ تُوں ای ایں؟ اوس اوہنوں جواب دِتّا۔ تُوں آپے آکھ دِتّا اے۔ تے سردار کاہِناں اوہدے اُتّے بُہت نالشاں کِیتیاں۔ پِیلاطُس اوہنوں فیر پُچھیا پئی تُوں کُجھ جواب نئیں دیندا؟ ویکھ اوہ تیرے اُتّے کِنیاں نالشاں کر دے نیں۔ پر یِسُوع فیر کُجھ جواب نا دِتّا۔ ایتھوں تِیکر پئی پِیلاطُس تعجُّب کِیتا۔ تے اوہ عید اُتّے اِک قیدی جِہدے لئی اوہ عرض کرن۔ اوہناں دی خاطر چھڈ دا ہوندا سی۔ تے برابّا ناں اِک بندہ قیدے پیا ہویا سی۔ اوہناں فسادِیاں دے نال جِنہاں فساد وِچ خُون کِیتا سی۔ تے لوک نیڑے جا کے عرض کرن لگّے پئی دستُور دے سببّوں ساڈے لئی کر۔ پِیلاطُس اوہناں نُوں جواب دِتّا۔ پئی تُسی چاہندے ہو پئی مَیں یہُودِیاں دے بادشاہ نُوں چھڈ دیاں؟ کیوں جو اوس معلُوم کِیتا پئی سردار کاہِناں کھار دے مارِیاں اوہنوں حوالے کِیتا سی۔ پر سردار کاہِناں لوکاں نُوں چُکیا پئی برابّا نُوں ای اوہناں دی خاطر چھڈ دیوے۔ تَد پِیلاطُس مُڑ اوہناں نُوں آکھیا۔ فیر جِہنُوں تُسی یہُودِیاں دا بادشاہ آکھدے اوہ۔ اوہدے نال مَیں کِیہ کراں؟ اوہ فیر اُچّی اُچّی آکھن لگّے اوہنوں صلِیب اُتّے چاڑھ۔ پِیلاطُس اوہناں نُوں آکھیا کیوں۔ اوس کِیہ بُرائی کِیتی اے؟ پر اوہ ہور وی زور نال بولے اوہنوں صلِیب اُتّے چاڑھ۔ تَد پِیلاطُس ایس اِرادے نال پئی لوکاں نُوں راضی کرے برابّا نُوں اوہناں دے لئی چھڈ دِتّا۔ تے یِسُوع نُوں کولڑے مروا کے حوالے کِیتا۔ پئی صلِیب اُتّے چاڑھیا جائے۔ تے سپاہی اوس وَیڑے وِچ جیہڑا حاکم دی کچہری اے۔ اوہنوں لے گئے تے ساری ٹولی نُوں سَدّ کے اکٹّھا کِیتا۔ تے اوہناں اوہنوں لال کپڑے پائے تے کنڈیاں دا تاج بنا کے اوہدے سِر اُتّے رکھیا۔ تے اوہنوں سلام کرن لگّے۔ پئی یہُودِیاں دے بادشاہ سلام۔ تے اوہ اوہدے سِر اُتّے کانے مار دے تے اوہدے اُتّے تُھکدے تے گوڈے نواکے اوہنوں مَتّھا ٹیکدے رہے۔ تے جد اوہدے نال ٹھٹّھے کر لَئے تے اوہدے توں لال کپڑے لاہ لَئے۔ تے اوہدے اپنے کپڑے اوہنوں پا دِتّے۔ تے اوہنوں صلِیب اُتّے چاڑھن لئی باہر لے گئے۔ تے اوہناں سکندر تے رُوفس دے پئیو شمعُون ناں اِک کُرینی بندے نُوں جیہڑا پِنڈوں آؤندیاں اوتھوں دی پیا لنگھدا سی۔ بیگار پھڑیا۔ پئی اوہدی صلِیب چُک کے لے چلّے۔ تے اوہ اوہنوں اِک تھاں۔ گُلگُتا ناں جِہدا مطلب کھوپڑی دا تھاں اے۔ لے آئے۔ تے اوہنوں انگور دی رَس مُر نال مِلائی ہوئی دین لگّے۔ پر اوس نا لئی۔ تے اوہنوں صلِیب اُتّے چاڑھیا۔ تے اوہدے کپڑے ونڈن لئی گُنے پائے پئی کِنوں کِنوں مِلن۔ تے پہر دِن چڑھیا سی تے اوہناں اوہنوں صلِیب اُتّے چاڑھیا۔ تے اوہدا الزام اوہدے اُتّے ایہہ لِکھیا ہویا سی۔ یہُودِیاں دا بادشاہ۔ تے اوہناں اوہدے نال دو ڈاکُو اِک نُوں اوہدے سَجّے تے اِک نُوں اوہدے کھبّے ہتّھ صلِیب اُتّے چاڑھیا۔ [تدوں ایس مضمُون دا اوہ نوِشتہ کہ اوہ بدکاراں دے وِچ گِنیا گیا پُورا ہویا۔] تے آؤن جان والیاں اوہنوں مِہنا ماریا۔ تے سِر ہلا کے آکھیا۔ واہ تُوں جیہڑا ہیکل نُوں ڈھانا تے تَرے دِناں وِچ بنانا ایں۔ اپنے آپ نُوں صلِیبوں اُتر کے بچا لے۔ ایسے طرح سردار کاہِن وی آپو وِچ فقِیہاں نال مِل کے ٹھٹّھہ مار کے آکھن لگّے۔ ایس ہورناں نُوں بچایا۔ اپنے آپ نُوں نئیں بچا سکدا اے۔ اِسرائیل دا بادشاہ مسِیح ہُنے صلِیبوں ہیٹھاں اُتر آوے۔ تے اسی ویکھئے۔ تے اِیمان لیائے۔ تے جیہڑے اوہدے نال صلِیب اُتّے چاڑھے گئے اوہنوں مِہنے مار دے سن۔ تے دوپہر دے ویلے سارے دیس اُتّے ہنیرا ہوگیا۔ تے ترِیجے پَہر تِیکر رہیا۔ تے ترِیجے پَہر نُوں یِسُوع اُچّی اواز نال پُکاریا۔ اِلوہی اِلوہی۔ لما شبقتنی۔ جِہدا مطلب ایہہ اے۔ اے میرے خُدا۔ اے میرے خُدا! تُوں مَینُوں کیوں چھڈ دِتّا اے۔ تے کئی اوہناں وِچوں جیہڑے نیڑے کھلوتے سن۔ ایہہ سُن کے آکھن لگّے۔ ویکھو۔ اوہ ایلیّاہ نُوں اواز مار دا اے۔ تے کِسے دَوڑ کے اسپنج نُوں سر کے نال بھیوں کے اِک کانے نال بَدّھا۔ تے ایہہ آکھ کے اوہنوں چُپایا۔ پئی کھلو جاؤ ویکھئے ایلیّاہ اوہنوں اُتارن لئی آؤندا اے کہ نئیں۔ تَد یِسُوع اُچّی اواز نال دَم دے دِتّا۔ تے ہیکل دا پردہ اُتّوں لے کے ہیٹھاں تِیکر پاٹ گیا۔ تے اوس صُوبیدار جیہڑا اوہدے سامھنے کول کھلوتا سی جدوں ویکھیا پئی اوس ایویں دَم دِتّا۔ تے آکھیا۔ ٹھیک ایہہ خُدا دا ای پُتر سی۔ تے کئی عَورتاں دُوروں ویکھدِیاں سن۔ اوہناں وِچوں مریم مگدلِینی۔ تے نِکّے یعقُوب تے یوسیس دی ماں مریم تے سلومی سی۔ جدوں اوہ گلِیل وِچ سی ایہہ اوہدے مگر ٹُردیاں تے سیوا کر دیاں ہوندیاں سن تے ہور وی بتھیریاں عَورتاں جیہڑیاں یرُوشلِیم نُوں اوہدے نال آئِیاں سن۔ تے جان لَوہڈا ویلا ہویا۔ ایس کر کے پئی اوہ تیاری دا دِن سی۔ جیہڑا سبت توں پہلے ہوندا اے۔ تے یُوسف ارِمَتِیاہ دا اِک عِزّت والا صلاحکار جیہڑا آپ وی خُدا دی بادشاہی دی اُڈِیک وِچ سی آیا۔ تے تگڑا ہو کے پِیلاطُس کول اندر گیا۔ تے یِسُوع دی لوتھ منگی۔ تے پِیلاطُس حَیران ہویا۔ پئی ایڈی چھیتی اوہ مر گیا اے۔ تے صُوبیدار نُوں سَدّ کے پُچھیا۔ اوہنوں مریاں کُجھ چِر ہوگیا؟ تے صُوبیدار کولوں معلُوم کر کے لوتھ یُوسف نُوں دَوا دِتّی۔ اوس مَلمَل دا کپڑا مُل لیا تے لوتھ نُوں اُتار کے مَلمَل وِچ وھلیٹ کے کفنایا۔ تے اِک قبر وِچ جیہڑی پتّھر وِچ کُھدوائی گئی سی اوہنوں دفنایا۔ تے قبر دے مُنھ اُتّے اِک پتّھر ریڑھ کے رکھ دِتّا۔ مریم مگدلِینی تے مریم یوسیس دی ماں اوس تھاں نُوں جِتّھے اوہ دفنایا گیا سی ویکھدِیاں سن۔ تے جد سبت دا دِن گُذر گیا۔ تے مریم مگدلِینی تے یعقُوب دی ماں مریم تے سلومی نے خوشبو والِیاں شیواں مُل لیّاں۔ پئی جا کے اوہدے اُتّے مِلن۔ تے ہفتے دے پہلے دِن بُہت سویرے سُورج چڑھدیاں ای اوہ قبر اُتّے آئِیاں۔ تے آپو وِچ آکھدیاں سن۔ پئی ساڈے لئی پتّھر نُوں قبر دے مُنھوں کون ریڑھ کے لانبھے کرے گا؟ تے جد اوہناں نِگاہ کِیتی تے اوس پتّھر نُوں لانبھے ریڑھیا ہویا ویکھیا۔ پئی اوہ بُہت بھارا سی۔ تے قبر وِچ جا کے اوہناں اِک جوان نُوں چِٹّے کپڑے پایاں ہویاں سَجّے پاسے بَیٹھا ویکھیا۔ تے اوہ گھبرا گِئیاں۔ اوس اوہناں نُوں آکھیا۔ نا گھبراؤ تُسی یِسُوع ناصری نُوں جیہڑا صلِیب اُتّے چاڑھیا گیا سی لَبّھدیاں اوہ۔ اوہ تے جی اُٹھیا اے۔ اوہ ایتھے نئیں اے ویکھو ایہہ اوہ تھاں اے۔ جِتّھے اوہناں اوہنوں رکھیا سی۔ پر جاؤ اوہدے شاگِرداں تے پطرس نُوں آکھو پئی اوہ تُہاتھوں اگّے گلِیل نُوں جاندا اے۔ تُسی اوتھے اوہنوں ویکھو گے۔ جیویں اوس تُہانوں آکھیا سی۔ تے اوہ نِکل کے قبر کولوں نَسّیاں۔ کیوں جو اوہ کنبدِیاں تے گھابر دیاں سن تے ڈردِیاں مارِیاں کِسے نُوں کُجھ نا آکھیا۔ تے ہفتے دے پہلے دِن اوس سویرے جی اُٹھ کے پہلاں مریم مگدلِینی نُوں جِہدے وِچوں اوس سَتّ بدرُوحاں نُوں کڈھیا سی وکھالی دِتّا۔ اوس جا کے اوہدے ساتھِیاں نُوں جیہڑے غم کر دے تے روندے سن خبر دِتّی۔ تے اوہناں ایہہ سُن کے پئی اوہ جِیوندا اے تے اوہنوں وکھالی دِتّا۔ سَچ نا مَنّیا۔ اوہدے پِچّھوں اوس ہور رُوپ وِچ اوہناں وِچوں دوبندیاں نُوں جدوں اوہ پَینڈا کر دیاں پِنڈاں وِچوں لنگھدے جاندے سن وکھالی دِتّا۔ تے اوہناں جا کے باقی دیاں نُوں خبر دِتّی پر اوہناں ایہناں دا وی سَچ نا مَنّیا۔ ایدوں پِچّھے اوس یارھاں نُوں جد اوہ کھان بَیٹھے سن وکھالی دِتّی تے اوہناں دی بے یقیِنی تے سخت دِلی دا اُلاہما دِتّا ایس لئی پئی جِنہاں اوہنوں جی اُٹھیا ہویاں ویکھیا سی۔ اوہناں لوکاں دا اوہناں سَچ نا مَنّیا۔ تے اوس اوہناں نُوں آکھیا۔ تُسی ساری دُنیا وِچ جا کے ساری خلقت دے اگّے اِنجِیل دی منادی کرو۔ جیہڑا اِیمان لیاؤندا تے بپتِسمہ پاندا اے۔ سو ای نجات پاوے گا۔ تے جیہڑا اِیمان نئیں لیاؤندا۔ اوہ مُجرم کِیتا جاوے گا۔ تے اِیمان لیاؤن والیاں وِچ ایہہ مُعجزے ہون گے۔ پئی اوہ میرا ناں لے کے بدرُوحاں نُوں کڈھن گے۔ تے نَوِیاں نَوِیاں بولیاں بولن گے۔ اوہ سپّاں نُوں چُک لین گے۔ تے جے کُجھ زہر والی شے پی وی لین تے اوہناں دا کُجھ نئیں وگڑے گا۔ اوہ روگِیاں اُتّے ہتّھ رکھن گے۔ تے اوہ چنگے ہو جان گے۔ فیر خُداوند یِسُوع اوہناں نال کلام مُکا کے اسمان اُتّے اُٹھا لیا گیا۔ تے خُدا دے سَجّے ہتّھ جا بَیٹھا۔ تے اوہناں باہر جا کے ہر تھاں منادی کِیتی۔ تے خُداوند اوہناں دے نال ہو کے کمّ کر دا تے کلام نُوں اوہناں مُعجزیاں دے راہِیں جیہڑے نال نال ہوندے سن ثابت کر دا سی۔ آمِین۔ جدوں بُہت ساریاں ایس کمّ نُوں ہتّھ پایا۔ پئی جیہڑیاں گلّاں ساڈے وِچ پُوریاں ہویاں نیں اوہناں دا ٹھیک بیان کرن۔ جیویں اوہناں بندیاں ساڈے تِیکر اپڑائیاں جیہڑے شُروع توں لے کے اَکھّیں ویکھن والے گواہ تے کلام دی خِدمت کرن والے سن۔ تے اَے بزُرگ تھِیُفِلُس مَیں وی سارِیاں گلّاں دا ٹھیک ٹھیک پَتا لاکے مناسب سمجھیا پئی تیرے لئی ترتیب نال لِکھاں۔ تاں جو جیہڑیاں گلّاں دی تُوں تعلِیم پائی اے اوہناں دی پُختیائی تینُوں پَتا لگ جاوے۔ یہُودیہ دے بادشاہ ہیرودیس دے دِناں وِچ اَبیّاہ دے فریق وِچوں زکریاہ ناں دا اِک کاہِن سی۔ تے اوہدی گھر والی ہارُون دی اولاد وِچوں سی تے اوہدا ناں اِلیشِبَع سی۔ اوہ دوویں خُدا دے اگّے نیک سن۔ تے خُداوند دے سارے حُکماں تے قانُوناں اُتّے بے عیب چَلّن والے سن۔ تے اوہناں دی اولاد نئیں سی۔ کیوں جو اِلیشِبَع بانجھ سی۔ تے اوہ دوویں ہُن وڈّی عُمر دے ہوگئے سن۔ تے ایویں ہویا پئی جدوں اوہ خُدا دے اگّے اپنے فریق دی واری سِر کہانت دی خِدمت کر دا سی۔ تے کاہِنی دے دستُور دے مُوافق گُنا اوہدے ناں دا نِکلیا پئی خُداوند دی ہیکل وِچ جا کے خوشبو ساڑے۔ تے خوشبو ساڑن دے ویلے لوکاں دی ساری جماعت باہر وار دُعا پئی منگدی سی۔ تَد خُداوند دا فرِشتہ خوشبو ساڑن دی تھاں دے سَجّے پاسے کھلوتا ہویا اوہنوں وکھالی دِتّا۔ تے زکریاہ ویکھ کے گھابر گیا تے ڈر گیا۔ پر فرِشتے اوہنوں آکھیا زکریاہ نا ڈر۔ کیوں جو تیری مِنّت سُنی گئی تے تیری گھر والی اِلیشِبَع تیرے لئی پُتر جمّے گی تے تُوں اوہدا ناں یُوحنّا رکھّیں۔ تے تُوں خُوشی نال نہال ہوویں گا تے اوہدے جمّن نال بتھیرے لوک خُوش ہون گے۔ کیوں جو خُداوند دی نظر وِچ اوہ بزُرگ ہوئے گا۔ تے اوہ انگور دی رَس تے نشہ نا پِیوے گا۔ تے اوہ اپنی ماں دی کُکّھوں ای پاک رُوح نال بھر جائے گا۔ تے اِسرائیل دی اولاد وِچوں بتھیریاں نُوں خُداوند اوہناں دے خُدا ولّ موڑے گا۔ تے اوہ ایلیّاہ دی رُوح تے قُدرت نال اوہدے اگّے اگّے چلّے گا تاں جو پئیواں دے دِلاں نُوں بچّیاں ولّ تے نافرماناں نُوں نیکاں دی دانائی ولّ موڑے۔ تے خُداوند دے لئی اِک سُدھاری ہوئی قوم تیار کرے۔ تے زکریاہ نے فرِشتے نُوں آکھیا مَیں ایہہ کِیویں جاناں؟ کیوں جو مَیں اِک بُڈّھا بندا ہاں تے میری گھر والی بُہت عُمر والی اے۔ فرِشتے اوہنوں جواب دِتّا۔ مَیں جبرائیل آں جیہڑا خُدا دے حضُور کھلونا واں تے مَیں گھلّیا گیا آں پئی تیرے نال کلام کراں تے ایہہ خُوشی دی خبر تینُوں سُناواں۔ تے ویکھ جِس دِن تِیکر ایہہ گلّاں پُوریاں نا ہو جان۔ توں گُونگا ای روّیں گا تے بول نئیں سکیں گا۔ ایس لئی پئی تُوں میرِیاں گلّاں نُوں نئیں مَنّیا۔ جیہڑیاں اپنے ویلے سر پُوریاں ہون گِیاں۔ تے لوک زکریاہ دا راہ پئے ویکھ دے سن۔ تے ہیکل وِچ چِر لان دی وجہ توں اوہدے تے حَیران ہوئے۔ تے جد باہر آیا اوہ اوہناں نال گلّ نا کر سکیا تَد اوہناں معلُوم کِیتا پئی ہیکل وِچ اوہنے کوئی رویا ویکھیا اے۔ تے اوہ اوہناں نُوں سَینتاں کر دا سی تے گُونگا ای رہیا۔ تے ایویں ہویا پئی جدوں اوہدی خِدمت دے دِن پُورے ہوگئے تے اوہ اپنے گھر گیا۔ تے ایہناں دِناں دے پِچّھوں اوہدی گھر والی اِلیشِبَع نُوں گربھ ہویا۔ تے اوس ایہہ آکھ کے اپنے آپ نُوں پنج مہینے لُکا چھڈیا۔ پئی جدوں خُداوند میری شرمساری دھون لئی میرے اُتّے دھیان کِیتا اونہی دِنیں اوس میرے نال اِنج کِیتا۔ تے چھیویں مہینے جبرائیل فرِشتہ خُدا ولّوں گلِیل دے شہر ناصرۃ نُوں۔ اِک کواری کول گھلّیا گیا جِہدی منگنی داؤد دے گھرانے دے یُوسف ناں اِک بندے نال ہوئی سی۔ تے اوس کواری دا ناں مریم سی۔ تے اوس اوہدے کول اندر آ کے آکھیا۔ سلام تینُوں جِہدے اُتّے فضل ہویا اے۔ خُداوند تیرے نال اے۔ پر اوہ ایس گلّ اُتّے بُہت گھابر گئی تے سوچن لگّی پئی ایہہ کیہو جیہا سلام اے۔ تَد فرِشتے اوہنوں آکھیا اَے مریم نا ڈر کیوں جو تُوں خُدا دے ولّوں فضل پایا۔ تے ویکھ تُوں حاملہ ہوویں گی تے پُتر جمّیں گی تے اوہدا ناں یِسُوع رکھّیں گی۔ اوہ بزُرگ ہوئے گا تے خُدا تعالیٰ دا پُتر اکھوائے گا تے خُداوند خُدا اوہدے پئیو داؤد دا تخت اوہنوں دیوے گا۔ تے اوہ سدا تِیکر یعقُوب دے گھرانے اُتّے بادشاہی کرے گا تے اوہدی بادشاہی دا انت نا ہوئے گا۔ تَد مریم فرِشتے نُوں آکھیا ایہہ کِیویں ہوسکدا اے جد کہ مَیں مرد نُوں جان دی ای نئیں؟ تے فرِشتے اوہنوں جواب دِتّا پئی پاک رُوح تیرے اُتّے اُترے گا تے خُدا تعالیٰ دی قُدرت تیرے اُتّے پر چھاواں کرے گی۔ ایس واسطے اوہ قُدُّوس جیہڑا جمّے گا خُدا دا پُتر اکھوائے گا۔ تے ویکھ اِلیشِبَع تیری ساک۔ اوہنوں وی بُڈّھاپے وِچ پُتر ہون والا اے تے اوہ جیہڑی بانجھ اکھواؤندی سی ایہہ اوہدا چھیواں مہِینہ اے۔ کیوں جو کوئی وی گلّ خُدا دے وسوں باہر نئیں۔ تَد مریم آکھیا ویکھ مَیں خُداوند دی بندی آں۔ میرے نال تیرے آکھے دے سببّوں ہوئے تے فرِشتہ اوہدے کولوں ٹُرگیا۔ تے مریم ایہناں ای دِناں وِچ اُٹھی تے چھیتی نال پہاڑی مُلک وِچ یہُوداہ دے اِک شہر نُوں گئی۔ تے زکریاہ دے گھر اندر آ کے اِلیشِبَع نُوں سلام کِیتا۔ تے ایویں ہویا پئی جیویں ای اِلیشِبَع نے مریم دا سلام سُنیا تیؤں بچّہ اوہدی کُکھ وِچ اُچھل پیا تے اِلیشِبَع پاک رُوح نال بھر گئی۔ تے زور نال اُچّی اواز وِچ آکھیا۔ تُوں زنانِیاں وِچوں مُبارک ایں تے مُبارک اے تیرے پیٹ دا پَھل۔ تے میرے نال ایہہ کِیویں ہویا پئی میرے خُداوند دی ماں میرے کول آئی؟ کیوں جو ویکھ تیرے سلام دی اواز میرے کنِّیں پَیندیاں سار ای بچّہ میری کُکھ وِچ خُوشی نال اُچھلیا۔ تے مُبارک اے اوہ جیہڑی اِیمان لیائی کیوں جو جو کُجھ خُداوند ولّوں اوہنوں آکھیا گیا اے سو پُورا ہوئے گا۔ تے مریم آکھیا میری جان خُداوند دی وڈیائی کر دی اے۔ تے میری رُوح میرے بچان والے خُدا توں خُوش ہوئی۔ کیوں جو اوس اپنی بندی دی غرِیبی اُتّے دھیان کِیتا۔ تے ویکھ ایدوں اگّے سارِیاں پِیڑھیاں مَینُوں مُبارک آکھن گِئیاں۔ کیوں جو اوہ جیہڑا قادر اَے اوس میرے لئی وڈّے کمّ کِیتے نیں۔ تے اوہدا ناں قُدُّوس اے۔ تے اوہدی مِہر اوہناں اُتّے جیہڑے اوہدے توں ڈر دے نیں۔ پِیڑھیوں پِیڑھی اے۔ اوس اپنی بانہہ نال زور وکھایا۔ تے مان والیاں نُوں کھِنڈا دِتّا جیہڑے اپنے دِلاں وِچ اُچّے خیال کر دے سن۔ اوس زور والیاں نُوں تختوں لاہ دِتّا تے نِیویاں نُوں اُچیاں کِیتا۔ اوس بُھکھیاں نُوں چَنگیاں شیواں نال رجایا تے بختاوراں نُوں سکھنی ہتّھِیں موڑ دِتّا۔ اوس اپنے بندے اِسرائیل دی مدد کِیتی تاں جو اپنے رَحم نُوں یاد کرے۔ جیہڑا ابرہام تے اوہدی اولاد دے اُتّے ہمیشہ تِیکر رہے گا۔ جیویں اوس ساڈے پئیو دادیاں نُوں آکھیا سی۔ تے مریم اوہدے کول تِنّ کُو مہینے رہی تے فیر اپنے گھر مُڑ گئی۔ تے اِلیشِبَع دا ویلا پُورا ہویا پئی بچّہ جمّے۔ تے اوس پُتر جمّیا۔ تے اوہدے گوانڈِھیاں تے ساکاں سُنیا پئی خُداوند اوہدے اُتّے بڑی مِہر کِیتی۔ تے اوہناں اوہدے نال خُوشی کِیتی۔ تے اٹھویں دِن ایویں ہویا پئی اوہ مُنڈے نُوں سُنتی بہان آئے۔ تے اوہدا ناں اوہدے باپ دے ناں اُتّے زکریاہ رکھن لگّے۔ پر اوہدی ماں جواب دِتّا پئی نا سگوں اوہ یُوحنّا اکھوائے گا۔ تے اوہناں اوہنوں آکھیا تیرے ساکاں وِچوں کوئی ایس ناں دا نئیں اکھواؤندا۔ تَد اوہناں اوہدے پئیو ولّ سَینتاں کِیتیاں پئی اوہ اوہدا کِیہ ناں رکھنا چاہندا اے۔ تے اوس پھٹّی منگا کے ایویں لِکھیا پئی اوہدا ناں یُوحنّا اے۔ تے سبھناں تعجُّب کِیتا۔ جھٹ اوہدا مُنھ کُھل گیا تے اوہدی زبان چَل پئی تے اوہ خُدا دی وڈیائی کر دا بول پیا۔ تے آلے دوالے دے رہن والے سبھ ڈر گئے۔ تے یہُودیہ دے سارے پہاڑی مُلک وِچ ایہناں سبھناں گلّاں دا چَرچا ہوگیا۔ تے ساریاں سُنن والیاں اوہناں نُوں اپنے دِلاں وِچ سوچ کے ایہہ آکھیا پئی ایہہ مُنڈا کِیویں دا ہوئے گا؟ ایس لئی پئی خُداوند دا ہتّھ اوہدے نال سی۔ تے اوہدا پئیو زکریاہ پاک رُوح نال بھر گیا تے نبُوّت کر کے آکھن لگّا۔ خُداوند اِسرائیل دا خُدا مُبارک ہوئے کیوں جو اوس اپنے لوکاں اُتّے نظر کِیتی تے اوہناں دا چُھٹکارا کر دِتّا۔ تے اپنے بندے داؤد دے گھر وِچ ساڈے لئی نجات دا اِک سِنگ کھلار دِتّا۔ (جِہیا اوس اپنے پاک نبیاں دی زبانی آکھیا جیہڑے دُنیا دے مُڈھوں ہوندے آئے نیں۔) پئی سانُوں ساڈے دُشمناں توں تے ساڈے سارے وَیرِیاں دے ہتھّوں خلاصی دِتّی۔ تاں جو ساڈھے پئیو دادیاں اُتّے رَحم کرے تے اپنے پاک عہد نُوں یاد رکھّے۔ یعنی اوس سَونہہ نُوں جیہڑی اوس ساڈے پئیو ابرہام نال کھادِی سی۔ پئی سانُوں ایہہ بخشے گا پئی اسی اپنیاں وَیرِیاں دے ہتھّوں چُھٹ کے۔ پاکیزگی تے نیکی نال ساری عُمر اوہدے حضُور بے دھڑک اوہدی عبادت کریئے۔ تے اَے مُنڈیا تُوں خُدا تعالیٰ دا نبی اکھوائیں گا کیوں جو تُوں خُداوند دے راہ تیار کرن لئی اوہدے اگّے اگّے چلّیں گا۔ تاں جو اوہدے لوکاں نُوں نجات دا عِلم دیویں۔ جیہڑی اوہناں نُوں گُناہ دی مُعافی توں مِلے۔ ایہہ ساڈے خُدا دے رَحم توں ہوئے گا جِہدے سبّب اسمان توں ساڈے اُتّے سُورج چڑھے گا۔ تاں جو اوہناں نُوں چانن دیوے جیہڑے ہنیرے تے مَوت دے پر چھاویں وِچ بَیٹھے ہوئے نیں۔ تے ساڈے قدماں نُوں سلامتی دی راہ پائے۔ تے اوہ بال وَدھدا گیا۔ تے رُوح وِچ زور پھڑدا گیا۔ تے اِسرائیل اُتّے اپنے ظاہر ہون دے دِن تِیکر بیاباناں وِچ رہیا۔ تے اوہناں دِناں وِچ ایویں ہویا پئی قَیصر اَوگُوستُس ولّوں حُکم جاری ہویا پئی ساری دُنیا دے لوکاں دے ناں لِکھے جان۔ ایہہ پہلی مردم شُماری سی جیہڑی سُوریہ دے حاکم کورنِیُس دے ویلے وِچ ہوئی۔ تَد سبھ لوک اپنے اپنے شہر نُوں ناں لکھان گئے۔ تے یُوسف وی گلِیل دے ناصرۃ شہر وِچوں اُٹھ کے داؤد دے شہر بَیت لحم نُوں گیا۔ ایس لئی پئی اوہ داؤد دے گھرانے تے اولاد وِچوں سی جیہڑا یہُودیہ وِچ اے۔ تاں جو اوہ مریم دے نال جیہڑی اوہدی منگ سی۔ تے اوہنوں اُمّیدواری سی۔ اپنا ناں لکھاوے۔ تے ایویں ہویا پئی اوہناں دے اوتھے ہوندیاں اوہدے گربھ دے دِن پُورے ہوگئے۔ تے اوس اپنا پلیٹھی دا پُتر جمّیا۔ تے اوہنوں پوتڑیاں وِچ لویٹ کے کُھرلی وِچ رکھیا کیوں جو سَراں وِچ اوہناں نُوں تھاں نئیں سی مِلیا۔ تے اوس دیس وِچ ایّالی سن جیہڑے جُوہ وِچ رہ کے رات نُوں اپنے اِجّڑاں دی راکھی لئی پَہرا پئے دیندے سن۔ تے خُداوند دا فرِشتہ اوہناں دے کول آ کے کھلو گیا۔ تے خُداوند دا نُور اوہناں دے چَوفیرے چمکیا تے اوہ بڑے ای ڈر گئے۔ تَد فرِشتے اوہناں نُوں آکھیا ڈرو نئیں کیوں جو ویکھو مَیں تُہانوں بڑی خُوشی دی خبر سُناناں آں جیہڑی ساری قوم لئی ہوئے گی۔ پئی داؤد دے شہر وِچ اَج تُہاڈے لئی اِک نجات دین والا پَیدا ہویا اے جو مسِیح خُداوند اے۔ تے تُہاڈے لئی ایہہ نشانی اے پئی تُسی اِک نِیانے نُوں پوتڑیاں وِچ وھلیٹیا تے کُھرلی وِچ پیا ہویا ویکھو گے۔ تے اِک دم فرِشتے دے نال اسمانی فَوج دا اِک جتھا ہوگیا جیہڑا خُدا دی وڈیائی کر دا تے ایویں آکھدا سی۔ پئی اسماناں اُتّے خُدا دی وڈیائی تے زمین اُتّے اوہناں لوکاں وِچ صُلح جِنہاں نال اوہ راضی اے۔ تے ایویں ہویا پئی جد فرِشتے اوہناں کولوں اسمان نُوں ٹُر گئے تے ایّالیاں آپو وِچ آکھیا۔ پئی چلّو ہُن اسی بَیت لحم تِیکر چلیئے تے ایس گلّ نُوں جیہڑی ہوئی اے ویکھئے جِہدی خُداوند سانُوں خبر دِتّی اے۔ تَد اوہناں چھیتی آ کے مریم تے یُوسف نُوں تے نالے نِیانے نُوں کُھرلی وِچ پیا ہویا ویکھیا۔ تے ویکھ کے اوہناں اوس گلّ نُوں جیہڑی ایس بال دے حق وِچ اوہناں نُوں آکھی گئی سی دُھما دِتّا۔ تے سارے جِنہاں اوہناں گلّاں نُوں سُنیا جیہڑیاں ایّالیاں اوہناں نُوں سُنائیاں سن۔ حَیران ہوئے۔ پر مریم اوہناں سبھناں گلّاں نُوں اپنے مَن وِچ رکھ کے سوچ کر دی رہی۔ تے ایّالی جیویں اوہناں نُوں دسیا گیا سی اوسے طرح سارا حال ویکھ تے سُن کے خُدا دی تعرِیف تے وڈیائی کر دے ہوئے مُڑ گئے۔ تے جدوں اوہدے سُنتی بہان دے اَٹھ دِن پُورے ہوئے تے اوہدا ناں یِسُوع رکھیا گیا۔ جیہڑا اوہدے گربھ وِچ پَین توں پہلاں فرِشتے نے رکھیا سی۔ تے جد مُوسیٰ دی شریعت دے سببّوں اوہناں دے پاک ہون دے دِن پُورے ہوئے تَد اوہنوں خُداوند دے اگّے حاضر کرن لئی یرُوشلِیم وِچ لیائے۔ (جیویں خُداوند دی شریعت وِچ لِکھیا ہویا اے پئی ہر اِک پلیٹھا نَر خُداوند لئی مُقدّس اکھوائے گا۔) تے اوس گلّ دے سببّوں جیہڑی خُداوند دی شریعت وِچ آکھی گئی اے پئی اِک جوڑا کُھمریاں دا یاں دو بچّے کبُوتراں دے قُربانی چڑھان۔ تے ویکھو یرُوشلِیم وِچ شمعُون ناں اِک بندہ سی۔ تے اوہ نیک تے دِیندار سی تے اوہ اِسرائیل دی تسلّی دی اُڈِیک وِچ سی۔ تے رُوحُ القُدس اوہدے اُتّے سی۔ اوہدے اُتّے رُوحُ القُدس نے ظاہر کِیتا ہویا سی۔ پئی جد تِیکر تُوں خُداوند دے مسِیح نُوں ویکھ نا لَویں۔ تُوں مَوت نُوں نئیں ویکھیں گا۔ تے اوہ رُوح دی ہدایت نال ہیکل وِچ آیا تے جِس ویلے ماں پئیو اوس بچّے یِسُوع نُوں اندر پئے لیاؤندے سن پئی اوہدے لئی شریعت دی رِیت پُوری کرن۔ تَد اوس اوہنوں اپنے ہتّھاں اُتّے چُک لیا تے خُدا دی وڈیائی کر کے آکھیا۔ پئی اَے مالک ہُن تُوں اپنے بندے نُوں اپنے سُخن دے سببّوں سلامتی نال وِداع کرنا ایں۔ کیوں جو میرِیاں اَکھّیاں تیری نجات ویکھی اے۔ جیہڑی تُوں ساریاں لوکاں دے سامھنے تیار کِیتی اے۔ غیر قوماں واسطے معرفتی نُور تے تیری اُمّت اِسرائیل دا جلال۔ اوہدا پئیو تے اوہدی ماں اوہناں گلّاں توں جیہڑیاں اوہدے حق وِچ آکھیاں گِئیاں سن حَیران ہوندے رہے۔ تے شمعُون اوہناں نُوں خبر دِتّی تے اوہدی ماں مریم نُوں آکھیا ویکھ ایہہ مُنڈا اِسرائیل وِچ بتھیریاں دے ڈِگّن تے اُٹھن لئی مُقرّر کِیتا ہویا اے۔ تے نالے اجیہا نِشان ہون لئی جِہدی مخالفت کِیتی جائے گی۔ سگوں تیری اپنی جان وِچوں وی تلوار لنگھ جائے گی تاں جو بتھیریاں دے مَناں دِیاں سوچاں کُھل جان۔ تے آشر دے گھرانے وِچوں حنّاہ ناں فنوایل دی دِھی اِک نَبِیہ سی۔ اوہ وڈّی عُمر دی سی۔ تے اوس اپنے کوار پُنے دے پِچّھوں اپنے بندے نال سَتّ ورھے کٹّے سن۔ تے اوہ چَوراسِیاں ورھیاں توں بیوہ سی۔ تے ہیکل نُوں نئیں سی چھڈ دی پر رات دِنے روزیاں تے دُعاواں نال خُدا دی بندگی کر دی سی۔ تے اوس وی اوسے ویلے آ کے خُدا دا شُکر کِیتا تے اوہناں سبھناں نال اوہدا ذِکر کِیتا جیہڑے یرُوشلِیم وِچ چُھٹکارے نُوں پئے اُڈِیک دے سن۔ تے جد خُداوند دی شریعت دے سببّوں اوہناں سبھ کُجھ پُورا کِیتا تے اوہ گلِیل ولّ اپنے شہر ناصرۃ نُوں مُڑ گئے۔ تے اوہ مُنڈا وَدھدا تے زور پَھڑکے دانائی نال بھردا گیا تے خُدا دا فضل اوہدے اُتّے سی۔ تے اوہدے ماں پئیو ورھے دے ورھے عید فسح اُتّے یرُوشلِیم نُوں جان دے ہوندے سن۔ تے جد اوہ باراں ورھیاں دا ہویا تَد اوہ عید دی رسم مُوجِب گئے۔ تے اوہناں دِناں نُوں پُوریاں کر کے جد اوہ مُڑن لگّے۔ اوہ مُنڈا یِسُوع یرُوشلِیم وِچ رہ گیا۔ تے اوہدے ماں پئیو نُوں پَتا نا لگّا۔ پر ایہہ سمجھ کے پئی اوہ ساک لوکاں دے نال اے اِک منزل نِکل گئے۔ تے اوہنوں اپنے ساکاں تے جان پچھاناں وِچ لبّھدے پِھرے۔ تے جد نا لَبّھیا تاں اوہنوں لبّھدے ہوئے یرُوشلِیم نُوں مُڑ گئے۔ تے تِنّاں دِناں پِچّھوں ایویں ہویا پئی اوہناں اوہنوں اُستاداں دے وِچ کار بَیٹھیاں تے اوہناں دی سُندیاں نالے اوہناں توں سوال پُچھدیاں ہیکل دے وِچ لَبّھیا۔ تے سارے سُنن والے اوہدی سمجھ اُتّے تے اوہدے جواباں توں حَیران ہوندے سن۔ تے اوہنوں ویکھ کے اوہ بڑے حَیران ہوئے تے اوہدی ماں اوہنوں آکھیا۔ پُتر تُوں ساڈے نال ایہہ کِیہ کِیتا؟ ویکھ تیرا پئیو تے مَیں وی پریشانی کر دے ہوئے تینُوں لبّھدے پِھردے ساں۔ تے اوس اوہناں نُوں آکھیا تُسی مَینُوں کاہِنُوں لبّھدے سو تُسی نئیں سو جاندے پئی مَینُوں اپنے باپ دیاں کمّاں وِچ رُدھیاں رہناں ضرُور اے۔ تے اوہ اوس گلّ نُوں جیہڑی اوس اوہناں نُوں آکھی سی نا سمجھے۔ تے اوہ اوہناں دے نال ٹُرکے ناصرۃ نُوں آیا۔ تے اوہناں دی تابعداری وِچ رہیا۔ تے اوہدی ماں سبھناں گلّاں نُوں اپنے دِل وِچ رکھ چھڈیا۔ تے یِسُوع دانائی تے قد وِچ تے خُدا تے بندیاں دے اگّے فضل وِچ وَدھدا گیا۔ تِبرِیُس قَیصر دے راج دے پندرھویں ورھے وِچ جِس ویلے پُنطِیُس پِیلاطُس یہُودیہ دا حاکم سی۔ تے ہیرودیس گلِیل دا حاکم سی تے اوہدا بھرا فِلپُّس اِتُوریہَّ تے ترخونیتِس دے مُلک دا۔ تے لِسانیاس اَبِلینے دا حاکم سی۔ جدوں حنّا تے کائفا سردار کاہِن سن اوس ویلے خُدا دا کلام زکریاہ دے پُتر یُوحنّا اُتّے اُجاڑ وِچ اُتریا۔ تے اوہ یَردن دے سارے آلے دوالے دے دیس وِچ آ کے گُناہاں دی مُعافی لئی تَوبہ دے بپتِسمہ دی منادی کرن لگّا۔ جیویں یسعیاہ نبی دے کلام دی کتاب وِچ لِکھیا ہویا اے۔ پئی اُجاڑ وِچ ہوکا دین والے دی اواز۔ خُداوند دی راہ نُوں تیار کرو اوہدے رستیاں نُوں سِدّھیاں بناؤ۔ ہر اِک کھڈ بھری جائے گی تے ہر اِک پہاڑ تے ٹِبّا نِیواں کِیتا جائے گا۔ تے جیہڑا ڈِنگا اے۔ سِدّھا تے اُچّا نِیواں اے پدرا بنے گا۔ تے ساری خلقت خُدا دی نجات ویکھے گی۔ تَد اوہناں بِھیڑاں نُوں جیہڑیاں اوہدے ہتھّوں بپتِسمہ لین لئی نِکل آئِیاں سن اوہ آکھن لگّا اے سپّاں دے بچّیو تُہانوں کِس دسیا پئی آن والے غضب توں بھجو۔ سو تَوبہ دے لائق پَھل لیاؤ تے اپنے مَناں وِچ ایہہ نا آکھو پئی ابرہام ساڈا پئیو اے۔ ایس لئی مَیں تُہانوں آکھنا آں پئی ابرہام دے لئی خُدا ایہناں پتّھراں توں اولاد پَیدا کر سکدا اے۔ تے نالے ہُن رُکھّاں دی جڑ اُتّے کُہاڑا دھریا ہویا اے۔ سو جیہڑا رُکھّ چَنگا پَھل نئیں لیاؤندا اوہ وَڈّھیا جاندا تے اَگ وِچ سُٹّیا جاندا اے۔ تے لوکاں اوہدے توں ایہہ پُچھیا پئی اسی فیر کِیہ کریئے؟ اوس اوہناں نُوں جواب دِتّا پئی جِہدے کول دو جَھگّے ہون اوہ اوہنوں دے دیوے جِہدے کول نئیں اے۔ تے جِہدے کول کھان نُوں ہوئے اوہ وی اینج ای کرے۔ تے محصُولئے وی بپتِسمہ لین نُوں آئے تے اوہنوں آکھیا اَے اُستاد اسی کِیہ کریئے؟ اوس اوہناں نُوں آکھیا جیہڑا تُہاڈے لئی مُقرّر اے۔ اوہدے توں وَدّھ نا لوؤ۔ تے سپاہیاں وی اوہدے کولوں پُچھیا پئی اسی کِیہ کریئے؟ اوس اوہناں نُوں آکھیا کِسے اُتّے ظُلم نا کرو کِسے کولوں ناحق نا لوؤ۔ تے اپنی تنخواہ اُتّے راضی رہو۔ تے جد لوک اُڈِیک وِچ سن تے سبھے یُوحنّا دی بابت اپنے دِلاں وِچ سوچدے سن پئی شاید ایہہ مسِیح نا ہوئے۔ تَد یُوحنّا نے سبھناں نُوں جواب دِتّا مَیں تے تُہانوں پانی نال بپتِسمہ دینا آں۔ پر میرے نالوں اِک ودِھیک طاقت والا آؤندا اے۔ جِہدی جُتّی دی مَیں وَدّھری کھولن جوگا نئیں آں۔ اوہ تُہانوں پاک رُوح تے اَگ نال بپتِسمہ دیوے گا۔ اوہدا چھج اوہدے ہتّھ وِچ اے۔ پئی اوہ اپنے کھلواڑے نُوں چنگی طرح صاف کرے۔ تے دانے اپنی کوٹھی وِچ جمع کرے تے تُوڑی نُوں اوس اَگ نال ساڑے گا۔ جیہڑی بُجھّن والی نئیں اے۔ تے اوہ بتھیریاں ہور نصِیحتاں دے دے کے لوکاں نُوں خُوشخبری سُناندا رہیا۔ پر چوتھائی مُلک دے حاکم ہیرودیس نے۔ جد یُوحنّا اوہدے بھرا دی گھر والی ہیرودیاس دی بابت تے اوہناں سارِیاں بُرائیاں دی بابت جیہڑیاں ہیرودیس کِیتیاں سن اوہنوں ملامت کِیتی۔ سبھناں توں وَدّھ ایہہ بُریائی وی کِیتی۔ پئی یُوحنّا نُوں قیدے پایا۔ جد ساریاں لوکاں بپتِسمہ لے لیا سی۔ تے یِسُوع وی بپتِسمہ لے کے دُعا پیا منگدا سی۔ تے ایویں ہویا پئی اسمان کُھل گیا۔ تے رُوحُ القُدس کبُوتر وانگر اوہدے اُتّے اُتریا تے اسمان توں اِک اواز آئی۔ پئی ”تُوں میرا پیارا پُتر ایں تَیتھوں مَیں راضی ہاں۔“ تے جد یِسُوع آپ سکھالن لگّا تدوں اوہ تیہیاں ورھیاں دا سی۔ تے اوہ (لوکاں دی سمجھ وِچ) یُوسف دا پُتر سی۔ تے اوہ عیلی دا۔ تے اوہ متّات دا۔ تے اوہ لاوی دا۔ تے اوہ ملکی دا۔ تے اوہ ینّا دا۔ تے اوہ یُوسف دا۔ تے اوہ مَتّتِیاہ دا۔ تے اوہ عامُوس دا۔ تے اوہ ناحُوم دا۔ تے اوہ اسلیاہ دا۔ تے اوہ نوگہ دا۔ تے اوہ ماعَت دا۔ تے اوہ مَتّتِیاہ دا۔ تے اوہ شِمعی دا۔ تے اوہ یوسیخ دا۔ تے اوہ یوداہ دا۔ تے اوہ یُوحنّا دا۔ تے اوہ ریسا دا۔ تے اوہ زَرُبّابُل دا۔ تے اوہ سیالتی ایل دا۔ تے اوہ نیری دا۔ تے اوہ ملکی دا۔ تے اوہ اَدّی دا۔ تے اوہ قوسام دا۔ تے اوہ اِلمودام دا۔ تے اوہ عیر دا۔ تے اوہ یشُوع دا۔ تے اوہ الیعزر دا۔ تے اوہ یورِیم دا۔ تے اوہ متّات دا۔ تے اوہ لاوی دا۔ تے اوہ شمعُون دا۔ تے اوہ یہُوداہ دا۔ تے اوہ یُوسف دا۔ تے اوہ یُونان دا۔ تے اوہ اِلیاقِیم دا۔ تے اوہ مِلے آہ دا۔ تے اوہ مِنّاہ دا۔ تے اوہ متَّتاہ دا۔ تے اوہ ناتن دا۔ تے اوہ داؤد دا۔ تے اوہ یسّی دا۔ تے اوہ عوبید دا۔ تے اوہ بوعز دا۔ تے اوہ سلمون دا۔ تے اوہ نحسون دا۔ تے اوہ عمّینداب دا۔ تے اوہ ارنی دا۔ تے اوہ حِصرُون دا۔ تے اوہ فارص دا۔ تے اوہ یہُوداہ دا۔ تے اوہ یعقُوب دا۔ تے اوہ اِضحاق دا۔ تے اوہ ابرہام دا۔ تے اوہ تارہ دا۔ تے اوہ نحُور دا۔ تے اوہ سرُوج دا۔ تے اوہ رعُو دا۔ تے اوہ فلج دا۔ تے اوہ عِبر دا۔ تے اوہ سلح دا۔ تے اوہ قینان دا۔ تے اوہ اَرفکسد دا۔ تے اوہ سِم دا۔ تے اوہ نُوح دا۔ تے اوہ لمک دا۔ تے اوہ متُوسِلح دا۔ تے اوہ حنوک دا۔ تے اوہ یارِد دا۔ تے اوہ مَہلل ایل دا۔ تے اوہ قینان دا۔ تے اوہ انُوس دا۔ تے اوہ سیت دا۔ تے اوہ آدم دا۔ تے اوہ خُدا دا سی۔ تے یِسُوع رُوحُ القُدس نال بھریا ہویا یَردن توں مُڑیا۔ تے رُوح دی ہدایت نال بیابان پِھردا رہیا۔ چاھلیاں دِناں تِیکر ابلیس اوہنوں ازماؤندا رہیا تے اونہی دِنیں اوس کُجھ نا کھاہدا تے جد اوہ دِن پُورے ہوگئے تے اوہ بُھکھا ہویا۔ تے ابلیس اوہنوں آکھیا پئی جے تُوں خُدا دا پُتر ایں تے ایس پتّھر نُوں آکھ پئی روٹی بن جائے۔ یِسُوع اوہنوں جواب دِتّا لِکھیا ہویا اے۔ پئی بندہ نِری روٹی نال ای جِیوندا نئیں رہوے گا۔ تَد اوس اوہنوں اِک اُچّے تھاں لے جا کے دُنیا دِیاں سارِیاں بادشاہیاں اِک پلکارے وِچ وکھالِیاں۔ تے شیطان اوہنوں آکھیا تینُوں مَیں ایہہ سارا اختیار تے اوہناں دی شان شوکت دیاں گا۔ کیوں جو ایہہ میرے وَس وِچ کِیتا گیا اے تے جِہنُوں چاہناں آں اوہنوں دینا واں۔ سو جے تُوں میرے اگّے سجدہ کریں تے سبھو تیرا ہوئے گا۔ یِسُوع اوہنوں جواب دِتّا۔ لِکھیا ہویا اے۔ پئی تُوں خُداوند اپنے خُدا نُوں سجدہ کر۔ تے اوسے اکلّے دی سیوا کر۔ تے اوہ اوہنوں یرُوشلِیم دے اندر لے گیا۔ تے ہیکل دے کِنگرے اُتّے کھلار کے اوہنوں آکھیا جے تُوں خُدا دا پُتر ایں۔ تے ایتھوں اپنے آپ نُوں ڈیگ دے۔ کیوں جو لِکھیا ہویا اے پئی اوہ تیری بابت اپنے فرِشتیاں نُوں حُکم کرے گا۔ پئی تیری راکھی کرن۔ تے ایہہ وی پئی اوہ تینُوں ہتّھاں اُتّے چُک لین گے متاں تیرے پَیر نُوں پتّھر نال سَٹ لگّے۔ یِسُوع اوہنوں جواب دِتّا۔ ایہہ آکھیا گیا اے۔ پئی خُداوند اپنے خُدا دی ازمایش نا کر۔ تے ابلیس جد ساری ازمایش کر لئی۔ تاں کُجھ چِر تِیکر اوہدے توں دُراڈے رہیا۔ تے یِسُوع رُوح دی قُدرت نال گلِیل دیس نُوں مُڑیا تے سارے آلے دوالے دے مُلک وِچ اوہدیاں دُھمّاں پَے گِئیاں۔ تے اوہ اوہناں دیاں عبادت خانیاں وِچ سِکھاؤندا رہیا۔ تے سارے لوکاں کولوں اوہدی وڈیائی ہوئی۔ فیر اوہ ناصرۃ نُوں آیا جِتّھے پلیا سی تے اپنے دستُور دے سببّوں سبت دے دِن عبادت خانے وِچ گیا تے پڑھن لئی کھلو گیا۔ تے یسعیاہ نبی دی کتاب اوہنوں دِتّی گئی۔ تے کتاب کھول کے اوس اوہ تھاں کڈھی جِتّھے ایہہ لِکھیا ہویا سی۔ پئی۔ خُداوند دا رُوح میرے اُتّے اے اوس ایس کر کے مَینُوں مسَح کِیتا پئی غرِیباں نُوں خُوشخبری دیاں اوس مَینُوں گھلّیا پئی قیدِیاں نُوں چُھٹکارے دی تے اَنھیاں نُوں سُجاکھا ہون دی خبر سُناواں۔ تے مارِیاں کُٹّیاں نُوں خلاصی دیاں۔ تے خُداوند دی منظُوری دے ورھے دی خبر سُناواں۔ تے کتاب بند کر کے ٹہلئے نُوں دِتّی تے بَہہ گیا۔ تے جِنّے عبادت خانے وِچ سن ساریاں دی نِگاہ اوہدے اُتّے لگّی ہوئی سی۔ تَد اوہ اوہناں نُوں آکھن لگّا۔ پئی اَج ایہہ نوِشتہ تُہاڈے سامھنے پُورا ہو گیا ہے۔ تے ساریاں اوہدے اُتّے گواہی دِتّی۔ تے اوہناں فضل والِیاں گلّاں توں جیہڑیاں اوہدے مُنھوں نِکلدیاں سن حَیران ہو کے آکھیا۔ ایہہ یُوسف دا پُتر نئیں اے؟ اوس اوہناں نُوں آکھیا تُسی ایہہ اکھان ضرُور میرے اُتّے آکھو گے۔ پئی اَے حکیماں اپنے آپ نُوں چَنگیاں کر جو کُجھ اساں کَفرنحُوم وِچ کر دیاں سُنیاں ایتھے اپنے وطن وِچ وی کر۔ تے اوس آکھیا مَیں تُہانوں سَچ آکھنا آں۔ پئی کوئی نبی اپنے وطن وِچ منظُور نئیں ہوندا۔ مَیں تُہانوں سَچ آکھنا آں۔ پئی جد ایلیّاہ دے ویلے ساڈھیاں تِنّاں ورھیاں تِیکر اسمان بند رہیا۔ پئی سارے مُلک وِچ بڑا کال پیا تَد اِسرائیل وِچ بتھیریاں بیوہ زنانِیاں سن۔ پر ایلیّاہ اوہناں وِچوں کِسے کول نا گھلّیا گیا۔ پر مُلک صَیدا دے شہر صارپت نُوں اِک بیوہ زنانی دے کول۔ تے اِلیشع نبی دے ویلے بتھیرے کوڑھے اِسرائیل وِچ سن پر اوہناں وِچوں کوئی پاک صاف نا کِیتا گیا بِناں نعمان سَوریانی دے۔ تے جیہڑے عبادت خانے وِچ سن اوہ سبھ ایہناں گلّاں نُوں سُن دیاں غُصّے نال بھر گئے۔ تے اُٹھ کھلوتے تے اوہنوں شہروں باہر دِھک کے اوس پہاڑی دی چوٹی تِیکر جِہدے اُتّے اوہناں دا شہر وَسدا سی ایس لئی لے گئے پئی اوہنوں سِر پرنے سُٹ دین۔ پر اوہناں وِچوں دی لنگھ کے اوہ ٹُرگیا۔ تے اوہ گلِیل دے اِک شہر کَفرنحُوم نُوں گیا تے سبت دے دِن اوہناں نُوں سِکھالدا رہیا۔ تے لوک اوہدی تعلِیم توں حَیران سن کیوں جو اوہدا کلام اختیار نال سی۔ تے عبادت خانے وِچ اِک بندہ سی جِہدے وِچ پلِیت رُوح سی۔ اوس اُچّی اُچّی آکھیا۔ اَے یِسُوع ناصری ساڈا تیرا کِیہ لاگا۔ تُوں ساڈا ناس کرن آیا ایں؟ مَیں تینُوں جاننا آں پئی تُوں کون ایں۔ خُدا دا قُدُّوس۔ یِسُوع اوہنوں جِھڑک کے آکھیا چُپ کر تے ایہدے وِچوں نِکل جا۔ تے بدرُوح نے اوہنوں وِچکار مروڑ کے سُٹّیا اوہدے وِچوں نِکل گئی۔ تے اوہدا کُجھ نُقصان نا کِیتا۔ تے ساریاں نُوں حَیرانی ہوئی تے اوہ آپو وِچ ایہہ آکھن لگّے ایہہ کیہو جِہیا کلام اے پئی اوہ اختیار تے قُدرت نال پلِیت رُوحاں اُتّے حُکم کر دا اے تے اوہ نِکل جاندِیاں نیں؟ تے اوس علاقے دی ہر تھاں اوہدیاں دُھمّاں پَے گِئیاں۔ فیر اوہ عبادت خانیوں اُٹھ کے شمعُون دے گھر گیا۔ تے شمعُون دی سَس نُوں بڑا تاپ چڑھیا ہویا سی تے اوہناں اوہدے لئی اوہدے اگّے عرض کِیتی۔ تَد اوس اوہدے کول کھلو کے تاپ نُوں جِھڑکیا تے اوہ لَہہ گیا۔ تے اوہ اوسے ویلے اُٹھ کے اوہناں دی سیوا کرن لگّی۔ تے جد سُورج ڈُب گیا تَد سارے جِنہاں کول کِسے طرح دے بیمار لوک سن اوہناں نُوں اوہدے کول لیائے تے اوس اوہناں وِچوں ہر اِک اُتّے ہتّھ رکھ کے چَنگا کِیتا۔ تے بتھیریاں وِچوں بدرُوحاں چِیکاں مار کے تے ایہہ آکھ کے نِکل آئِیاں پئی تُوں خُدا دا پُتر ایں۔ پر اوس اوہناں نُوں جِھڑک کے کُون نا دِتّا۔ کیوں جو جان دِیاں سن پئی اوہ مسِیح اے۔ تے جد دِن چڑھیا اوہ نِکل کے اُجاڑ وِچ گیا تے بتھیرے لوک لبّھدے لبّھدے اوہدے کول آئے۔ تے اوہنوں روکیا پئی ساڈھے کولوں نا جائے۔ پر اوس اوہناں نُوں آکھیا مَینُوں ضرُور اے۔ پئی ہور شہراں وِچ وی خُدا دی بادشاہی دی خُوش خبری سُناواں۔ کیوں جو مَیں ایسے لئی گھلّیا گیا آں۔ تے اوہ گلِیل دے عبادت خانیاں وِچ منادی کر دا رہیا۔ تے جد بِھیڑ اوہدے اُتّے ڈِگّدی جاندی سی تے خُدا دا کلام سُندی سی تَد ایویں ہویا پئی اوہ گنّیسرت دی جِھیل دے کنڈھے کھلوتا ہویا سی۔ تے اوس جِھیل دے کنڈھے دو بیڑیاں لگِیاں ہویاں ویکھیاں پر مچھیرے اوہناں اُتّوں اُترے ہوئے اپنے جال پئے دھوندے سن۔ اوس اوہناں بیڑیاں وِچوں اِک اُتّے جیہڑی شمعُون دی سی چڑھ کے اوہنوں آکھیا پئی کنڈھیوں ذرا ہٹا لے۔ تے بَیہہ کے بیڑی اُتّوں لوکاں نُوں تعلِیم دین لگّا۔ تے جد گلّاں مُکالیاں تے شمعُون نُوں آکھیا ڈُونگھے پانی لے چَل تے شِکار لئی اپنے جال سُٹّو۔ شمعُون جواب دِتّا۔ خُداوند اساں ساری رات محنت کِیتی پر کُجھ نئیں پھڑیا۔ تے وی تیرے آکھے جال سُٹّناں۔ تے جد اوہناں ایہہ کِیتا تے ڈھیر سارِیاں مچھّیاں گھیر لَیاں تے اوہناں دے جال پاٹن لگّے۔ تَد اوہناں اپنے سَنگیاں نُوں جیہڑے دُوجی بیڑی اُتّے سن سینت ماری پئی آؤ تے ساڈی مدد کرو۔ اوہ آئے تے دونویں بیڑیاں اینِیاں بھر دِتّیاں پئی ڈُبن لگِیاں۔ شمعُون پطرس ایہہ ویکھ کے یِسُوع دے پَیرِیں پَے کے آکھیا۔ اَے خُداوند میرے کولوں ٹُرجا کیوں جو مَیں گُنہگار بندہ آں۔ کیوں جو مچھّیاں دے ڈھیر دے سبّب جیہڑیاں اوہناں پَھڑیاں سن۔ اوہ وی تے اوہدے سارے سنگی بُہت گھابرے ہوئے سن۔ تے ایسے طرح زبدی دے پُتر یعقُوب تے یُوحنّا جیہڑے شمعُون دے سنگی سن۔ تَد یِسُوع شمعُون نُوں آکھیا۔ نا ڈر ایدوں اگّے تُوں بندیاں نُوں پھڑن والا بنے گا۔ اوہ بیڑیاں کنڈھے اُتّے کھِچّ لیائے تے سبھ کُجھ چھڈ کے اوہدے مگر ٹُر پئے۔ تے ایویں ہویا جد اوہ اِک شہر وِچ سی تَد ویکھو اِک بندہ کوڑھ دا بھریا ہویا سی۔ تے یِسُوع نُوں ویکھ کے اوہ مُنھ پرنے ڈِگّا تے اوہدی مِنّت کر کے آکھیا خُداوندا جے تُوں چاہیں تے مَینُوں پاک صاف کر سکنا ایں۔ تے اوس ہتّھ وَدّھا کے اوہنوں چُھوئیا تے آکھیا مَیں چاہناں آں تُوں پاک صاف ہو جا۔ تے اوسے ویلے کوڑھ اوہدے تُھوں جاندا رہیا۔ تے اوس اوہنوں تاکِید کِیتی۔ پئی کِسے نُوں نا دسیں پر جا کے اپنا آپ کاہِن نُوں وکھا تے اپنے پاک صاف ہو جان لئی مُوسیٰ دے حُکم دے سببّوں نذر چڑھا۔ تاں جو اوہناں لئی گواہی ہوئے۔ پر اوہدی ہور وی دُھم پَے گئی۔ تے بڑی خلقت اکٹّھی ہوئی پئی سُنن تے اپنیاں روگاں توں چنگے ہون۔ پر اوہ اُجاڑاں وِچ اکلّا جا کے دُعا منگدا ہوندا سی۔ تے اِک دِن ایویں ہویا پئی جِس ویلے اوہ پیا سِکھاؤندا سی فریسی تے شریعت دے سکھالن والے جیہڑے گلِیل دے ہر اِک پِنڈ تے یہُودیہ تے یرُوشلِیم توں آئے سن اوتھے بَیٹھے ہوئے سن تے خُداوند دی قُدرت شفا دین لئی اوہدے نال سی۔ تے ویکھو کئی بندے مَنجی اُتّے چُک کے اِک بندے نُوں جیہڑا جھولے دا ماریا ہویا سی لئی آوندے سن تے حیلہ کر دے سن پئی اوہنوں اندر لیاوے تے اوہدے اگّے رکھیے۔ تے جد بِھیڑ دے سببّوں اوہنوں اندر لے جان دا راہ نا لَبھّا تے اوہ کوٹھے اُتّے چڑھ گئے تے کھپریلاں دے وِچوں دی اوہنوں مَنجی سَنے وِچکار یِسُوع دے اگّے لمکا دِتّا۔ اوس اوہناں دا اِیمان ویکھ کے آکھیا اے بندیا تیرے گُناہ بخشے گئے۔ تَد فقِیہ تے فریسی ایہہ آکھ کے پُھس پُھسان لگّے پئی ایہہ کُفر بکن والا کون اے؟ خُدا باہجوں گُناہاں نُوں کون بخش سکدا اے؟ یِسُوع اوہناں دا خیال جان کے اوہناں نُوں آکھیا تُسی اپنے دِلاں وِچ کِیہ سوچدے ہو۔ کیہڑی گلّ اسان اے۔ ایہہ آکھنا پئی تیرے گُناہ بخشے گئے یا ایہہ آکھنا پئی اُٹھ تے ٹُر پھر۔ پر ایس لئی پئی تُسی جانو پئی اِبنِ آدم نُوں دھرتی اُتّے گُناہ بخشن دا اختیار اے (اوس مفلُوج نُوں آکھیا) مَیں تینُوں آکھنا آں پئی اُٹھ تے اپنی مَنجی لے کے گھر جا۔ اوہ اوسے ویلے اوہناں دے اگّے اُٹھیا تے جِہدے اُتّے پیا ہویا سی اوہنوں چُک کے خُدا دی وڈیائی کر دا ہویا اپنے گھر ٹُر گیا۔ تَد اوہ سارے بڑے حَیران ہوئے تے خُدا دی وڈیائی کرن لگّے۔ تے بڑے ڈر کے آکھن لگّے اَج اساں اچرج کمّ ویکھے۔ تے ایہناں گلّاں دے پِچّھوں اوہ باہر نِکلیا تے اِک محصُولئے نُوں جِہدا ناں لاوی سی چونگی دے چبُوترے اُتّے بَیٹھیاں ہویاں ویکھیا۔ تے اوہنوں آکھیا میرے مگر ٹُر آ۔ تے اوہ سبھ کُجھ چھڈ کے اُٹھ بَیٹھا تے اوہدے مگر ٹُرپیا۔ تے لاوی اپنے گھر وِچ اوہدی خاطر وڈّی ضیافت کِیتی تے محصُولِیاں تے ہورناں دی جیہڑے اوہدے نال کھان بَیٹھے سن بڑی بِھیڑ سی۔ تَد فریسی تے اوہناں دے فقِیہ اوہدے شاگِرداں اُتّے کُڑ کُڑا کے آکھن لگّے پئی تُسی کاہِنُوں محصُولِیاں تے گُناہِیاں نال کھاندے پِیندے ہو؟ تے یِسُوع اوہناں نُوں جواب دِتّا۔ پئی بھلیاں چَنگیاں نُوں نئیں۔ پر بِیماراں نُوں حکِیم دی لوڑ اے۔ مَیں نیکاں نُوں نئیں پر گُناہِیاں نُوں تَوبہ لئی سَدّن آیا آں۔ تے اوہناں اوہنوں آکھیا پئی یُوحنّا دے شاگِرد بُہت روزہ رکھدے تے دُعا منگ دے نیں تے ایسے طرح فرِیسیاں دے وی۔ پر تیرے شاگِرد کھاندے پِیندے نیں۔ تے یِسُوع اوہناں نُوں آکھیا جانجیاں توں جِنّاں چِر لاڑا اوہناں دے نال اے۔ تُسی روزہ رکھّوا سکدے اوہ؟ پر اوہ دِن آؤن گے جد لاڑا اوہناں توں وَکھ کِیتا جائے گا۔ تے اونہی دِنیں اوہ روزہ رکھن گے۔ تے اوس اوہناں نُوں اِک تمثِیل وی دسی۔ پئی نَوِیں کپڑے وِچوں ٹاکی پاڑ کے پرانے کپڑے اُتّے کوئی نئیں لاندا۔ جے لاوے وی تے نواں وی پاٹے گا تے نالے نَوِیں دی ٹاکی پرانے نال مِلے گی نئیں۔ تے انگور دی نَوِیں رَس پرانیاں مشکاں وِچ کوئی نئیں بھردا جے بھرے وی تے نَوِیں رَس مشکاں نُوں پاڑے گی۔ تے آپ ڈُلھ جائے گی تے مشکاں دا وی ناس ہوئے گا۔ سگوں انگور دی نَوِیں رَس نَوِیاں مشکاں وِچ بھرنی چاہیدی اے۔ تے انگور دی پرانی رَس پی کے کوئی نَوِیں نئیں چاہندا کیوں جو اوہ آکھدا اے۔ پئی پرانی چنگی اے۔ تے اِک سبت دے دِن ایویں ہویا پئی اوہ پَیلِیاں دے وِچوں دی لگا جاندا سی تے اوہدے شاگِرد سِٹّے توڑ توڑ کے تے ہتّھاں نال مَل مَل کے چَبدے جاندے سن۔ پر فرِیسیاں وِچوں کئیاں آکھیا تُسی کیوں اوہ کمّ کر دے ہو جیہڑا سبت دے دِن کرنا روا نئیں اے؟ یِسُوع اوہناں نُوں جواب دِتّا۔ تُساں ایہہ وی نئیں پڑھیا پئی داؤد نے کِیہ کِیتا جدوں اوہ آپ تے اوہدے سنگی بُھکھے سن؟ پئی اوہ کِس طرح خُدا دے گھر وِچ گیا۔ تے نذر دِیاں روٹِیاں جِنہاں دا کھانا کاہِناں دے بِناں ہورناں نُوں روا نئیں سی لے کے کھادِیاں تے اپنے سَنگیاں نُوں وی دِتّیاں۔ تے اوس اوہناں نُوں آکھیا پئی اِبنِ آدم سبت دا مالک اے۔ تے ہوری سبت نُوں ایویں ہویا پئی اوہ عبادت خانے وِچ جا کے تعلِیم دین لگّا تے اوتھے اِک بندہ سی جِہدا سَجّا ہتّھ سُکّیا ہویا سی۔ تَد فقِیہ تے فریسی اوہدی سُوہ وِچ لگّے پئی ویکھئے اوہ سبت دے دِن چَنگا کرے گا یا نئیں تاں جو اوہدے اُتّے نالش کرن دا داء ہتّھ آوے۔ پر اوہنوں اوہناں دے مَن دِیاں دلِیلاں پتا سن۔ تے اوس سُکّے ہتّھ والے نُوں آکھیا۔ اُٹھ تے وِچکار کھلو۔ اوہ اُٹھ کھلوتا۔ تَد یِسُوع نے اوہناں نُوں آکھیا مَیں تُہانوں پُچھناں آں پئی سبت دے دِن نُوں کِیہ روا اے۔ بھلیائی کرنی یا بُریائی کرنی؟ جان بچانی یا اوہدا ناس کرنا؟ تے اوہناں ساریاں ولّ چَوفیرے ویکھ کے اوہنوں آکھیا اپنا ہتّھ وَدّھا۔ اوس وَدھایا تے اوہدا ہتّھ ٹھیک ہوگیا۔ تَد اوہناں بڑے غُصّے ہو کے آپو وِچ آکھیا پئی یِسُوع نال کِیہ کریئے۔ تے اونہی دِنیں اینج ہویا پئی اوہ پہاڑ اُتّے دُعا منگن گیا تے خُدا اگّے دُعا منگدیاں ساری رات کٹّی۔ تے جد دِن چڑھیا تَد اوس اپنے شاگِرداں نُوں کول سَدّ کے اوہناں وِچوں باراں نُوں چُنیا تے اوہناں نُوں رسُول وی آکھیا۔ شمعُون جِہدا ناں پطرس وی رکھیا تے اوہدا بھرا اندریاس تے یعقُوب تے یُوحنّا۔ تے فِلپُّس تے برتُلمائی۔ تے متّی تے تُوما تے حلفئی دا پُتر یعقُوب تے شمعُون جِہنُوں کُنس والا آکھدے سن۔ تے یعقُوب دا پُتر یہُوداہ۔ تے یہُوداہ اِسکریُوتی جیہڑا اوہدا پھڑان والا ہویا۔ تے اوہناں نال اُتر کے اوہ میدان وِچ کھلو گیا۔ تے اوہدے شاگِرداں دی بڑی بِھیڑ سی۔ تے لوکاں دی بڑی خلقت جیہڑی سارے یہُودیہ تے یرُوشلِیم تے صُور تے صَیدا دے سمُندر دے کنڈھیوں ایس لئی آئی پئی اوہ اوہدی سُنن تے اپنے اپنے روگاں توں چنگے ہون۔ تے جیہڑے پلِیت رُوحاں دے دُکھی سن چنگے کِیتے گئے۔ تے ساری بِھیڑ چاہندی سی پئی اوہنوں چُھوئے کیوں جو قُدرت اوہدے وِچوں نِکل دی سی۔ تے سبھناں نُوں چَنگا کر دی سی۔ فیر اوس اپنے شاگِرداں اُتّے نظر کر کے آکھیا دھنّ ہو تُسی جیہڑے کنگال اوہ کیوں جو خُدا دی بادشاہی تُہاڈی اے۔ دھنّ ہو تُسی جیہڑے ہُن بُھکھے اوہ کیوں جو رجائے جاؤ گے۔ دھنّ ہو تُسی جیہڑے ہُن روندے اوہ کیوں جو ہَسّو گے۔ دھنّ ہو تُسی جد اِبنِ آدم دے سبّب بندے تُہاڈے نال وَیر رکھن گے تے تُہانوں باہر کڈھ دین گے تے ملامت کرن گے تے تُہاڈا ناں بُرا جانن گے۔ اوس دِن خُوشی کرنا تے چھالاں مارنا ایس لئی پئی اسمان اُتّے تُہاڈا بڑا اَجر اے۔ کیوں جو نبیاں نال اوہناں دے وَڈّھے ایسے طرح کر دے سن۔ پر تُہاڈے اُتّے افسوس جیہڑے دَولت مند اوہ۔ کیوں جو تُساں اپنی تسلّی لے لئی اے۔ تُہاڈے اُتّے افسوس جیہڑے ہُن رجّے ہوئے ہو۔ کیوں جو تُسی بُھکھے ہوؤگے۔ تُہاڈے اُتّے افسوس جیہڑے ہُن ہسدے اوہ کیوں جو تُہانوں غم لگّے گا تے تُسی روؤ گے۔ افسوس تُہاڈے اُتّے جد سبھ لوک تُہانوں بھلا آکھن کیوں جو جُھوٹھے نبیاں نال اوہناں دے وَڈّھے ایسے طرح کر دے سن۔ پر تُہانوں جیہڑے سُندے ہو مَیں آکھنا آں پئی اپنے دُشمناں نُوں پیار کرو۔ جیہڑے تُہاڈے نال وَیر رکھن اوہناں دا بھلا کرو۔ جیہڑے تُہانوں بد دُعا دین اوہناں نُوں دُعا دیو۔ جیہڑے تُہاڈی پَتّ لاہن اوہناں لئی دُعا کرو۔ جیہڑا تیری اِک گلھ اُتّے چپیڑ مارے اوہدے ولّ دُوجی وی پھیر دے۔ تے جیہڑا تیرا چوغہ کھو لَوے کُرتا لین توں وی اوہنوں نا ڈَک۔ ہر کِسے نُوں جیہڑا تَیتھوں منگے دے تے اوہدے توں جیہڑا تیرا مال کھو لَوے مُڑ نا منگ۔ تے جیہو جیہا تُسی چاہندے ہو پئی لوک تُہاڈے نال کرن اوہناں نال تُسی وی اونج ای کرو۔ جے تُسی اوہناں نُوں جیہڑے تُہانوں پیار کر دے نیں پیار کرو تاں تُہاڈا کاہدا احسان اے؟ کیوں جو گُناہیں وی اپنے پیار کرن والیاں نُوں پیار کر دے نیں۔ تے جے تُسی اوہناں دا جیہڑے تُہاڈا بھلا کر دے نیں بھلا کرو۔ تے تُہاڈا کاہدا احسان اے؟ کیوں جو گُنہگار وی ایسے طرح کر دے نیں۔ تے جے تُسی اوہناں نُوں اُدھار دیو جِنہاں کولوں لین دی آس اے۔ تے تُہاڈا کاہدا احسان اے؟ گُنہگار وی گُناہِیاں نُوں اُدھار دیندے نیں تاں جو مُڑاونا ای لے لین۔ پر اپنے وَیرِیاں نال پیار کرو تے اوہناں دا بھلا کرو تے کُجھ مُڑ نا لین دی آس رکھ کے اُدھار دیو۔ تے تُہاڈا اَجر وَڈا ہوئے گا۔ تے تُسی خُدا تعالیٰ دے پُتر ہوؤگے۔ کیوں جو اوہ تے ناشکریاں تے شریراں لئی وی مہربان اے۔ جیویں تُہاڈا باپ رحیم اے تُسی وی رَحم دِل ہوؤ۔ تے عیب نا لاؤ تاں جو تُہاڈے اُتّے وی عیب نا لایا جائے۔ تے مُجرم نا ٹھہراؤ۔ تاں جو تُسی وی مُجرم نا ٹھہرائے جاؤ۔ رہا کرو۔ تے تُسی وی رہا ہوؤگے۔ دیو تاں تُہانوں دِتّا جائے گا۔ چَنگا ناپ گُھٹ گُھٹ کے ہِلاہِلا کے مُونہا مُنھ بھر کے تُہاڈی جھولی پان گے۔ کیوں جو جِس ماپ نال تُسی مِندے ہو اوسے نال تُہاڈے لئی وی مِنیا جائے گا۔ تے اوس اوہناں نُوں اِک تمثِیل وی سُنائی۔ کِیہ اَنھا اَنھے نُوں راہ پا سکدا اے؟ دونویں ٹوئے وِچ نا ڈِگّن گے؟ شاگِرد اُستاد نالوں وَڈا نئیں۔ پر ہر کوئی جد کامِل ہویا۔ تَد اپنے اُستاد جِہیا ہوئے گا۔ تے تُوں اوس ککھ نُوں جیہڑا تیرے بھرا دی اَکھ وِچ اے۔ کاہِنُوں ویکھنا ایں۔ پر اوس چھتیر ولّ جیہڑی تیری اپنی اَکھ وِچ اے دھیان نئیں کر دا؟ یا تُوں کِیویں اپنے بھرا نُوں آکھ سکنا ایں بھراوا ککھ نُوں جیہڑا تیری اَکھ وِچ اے مَینُوں کڈھن دے۔ پر آپ اوس چھتیر نُوں جیہڑی تیری اَکھ وِچ اے نئیں ویکھدا؟ اَے مکّارا پہلاں چھتیر نُوں اپنی اَکھ وِچوں کڈھ۔ تَد ککھ نُوں اپنے بھرا دی اَکھ وِچوں تُوں چنگی طرح ویکھ کے کڈھ سکیں گا۔ کیوں جو کوئی چَنگا رُکھّ نئیں اے۔ جِہنُوں ماڑا پَھل لگّے۔ تے نا کوئی ماڑا رُکھّ اے۔ جِہنُوں چَنگا پَھل لگّے۔ کیوں جو ہر اِک رُکھّ اپنے پَھلوں سیاتا جاندا اے۔ ایس لئی پئی ملہیاں توں ہنجیراں اکٹّھیاں نئیں کر دے تے نا جھاڑی توں انگور توڑ دے نیں۔ کھرا بندہ اپنے دِل دے کھرے خزانیؤں کھرِیاں گلّاں لیاؤندا اے تے بُرا بندہ اپنے بُرے خزانیؤں بُریاں گلّاں لیاؤندا اے۔ کیوں جو جو کُجھ دِل وِچ بھریا ہویا اے۔ اوہی اوہدے مُنھ اُتّے آؤندا اے۔ تے تُسی کیوں مَینُوں خُداوند خُداوند آکھدے ہو۔ تے میرے آکھے نئیں لگدے؟ جیہڑا میرے کول آؤندا اے تے میرِیاں گلّاں سُن کے اوہناں نُوں مَندا اے۔ مَیں تُہانوں دساں گا پئی اوہ کِہدے وانگر اے۔ اوہ اوس بندے وانگر اے۔ جِس گھر بنان لگیاں ڈُوہنگا پَٹ پَٹ کے پتّھر اُتّے نِیہہ رکھی۔ جد ہڑ آیا تے چھلّاں اوس گھر اُتّے زور ماریا۔ پر اوہنوں ہلا نا سکیاں۔ کیوں جو اوہ چنگی طرح بنایا ہویا سی۔ تے اوہ جیہڑا سُن کے نئیں مَندا اوس بندے وانگر اے۔ جِس بِناں نِیہہ دے زمین اُتّے گھر بنایا۔ اوہدے اُتّے چھلّاں نیں زور ماریا تے اوہ اونویں ای ڈَھے پیا۔ تے اوس گھر دی پُوری بربادی ہوئی۔ تے جد اوس اپنیاں سارِیاں گلّاں لوکاں نُوں سُنا لئیاں۔ تَد کَفرنحُوم وِچ آیا۔ تے کِسے صُوبیدار دا نوکر جیہڑا اوہنوں پیارا سی بیماری نال مرن والا سی۔ اوس یِسُوع دی خبر سُن کے یہُودِیاں دیاں کئیاں بزُرگاں نُوں اوہدے کول گھل کے اوہدے اگّے عرض کِیتی پئی آ کے میرے نوکر نُوں بچا۔ تے اوہناں یِسُوع کول اَپڑ دیاں ای اوہدی بڑی مِنّت کر کے آکھیا پئی اوہ ایس لائق اے پئی تُوں اوہدے لئی ایہہ کمّ کریں۔ کیوں جو اوہ ساڈی قوم نُوں پیار کر دا اے تے ساڈے عبادت خانے نُوں اوسے ای بنوایا۔ یِسُوع اوہناں دے نال ٹُرپیا۔ تے جدوں اوہ گھر دے نیڑے اَپڑیا۔ تَد صُوبیدار نے دوستاں نُوں اوہنوں ایہہ آکھن لئی اوہدے کول گھلّیا پئی خُداوند کھیچل نا کر کیوں جو مَیں ایس لائق نئیں پئی تُوں میری چھت ہیٹھاں آویں۔ ایس کر کے ای مَیں اپنے آپ نُوں ایس لائق نا جانیا۔ پئی تیرے کول آواں۔ نِرا آکھ ای دے تے میرا نوکر شفا پائے گا۔ کیوں جو مَیں وی کِسے دے اختیار وِچ آں تے سپاہی میرے آکھے وِچ نیں۔ جد مَیں ایس نُوں آکھنا آں پئی جا اوہ جاندا اے۔ تے کِسے ہور نُوں پئی آ اوہ آؤندا اے۔ تے اپنے نوکر نُوں پئی ایویں کر اوہ کر دا اے۔ یِسُوع نے ایہہ سُن کے اوہدے اُتّے تعجُّب کِیتا تے مُڑ کے بِھیڑ نُوں جیہڑی اوہدے مگر آؤندی سی۔ آکھیا مَیں تُہانوں آکھنا آں پئی اجیہا اِیمان مَیں اِسرائیل وِچ وی نئیں ویکھیا۔ تے اوہ جیہڑے گھلّے گئے سن۔ جد گھر وِچ مُڑ آئے۔ تے اوس نوکر نُوں تگڑا ویکھیا۔ تے تھوڑے چِر پِچّھوں اجیہا ہویا۔ پئی اوہ ناِئن ناں شہر نُوں گیا تے اوہدے شاگِرد تے وڈّی بِھیڑ اوہدے نال ٹُری جاندی سی۔ جد اوہ شہر دے بُوہے دے نیڑے اَپڑیا۔ تے ویکھو اِک مُردے نُوں باہر لئی جاندے سن۔ جیہڑا اپنی ماں دا اکلّا پُتر سی۔ تے اوہ عورت بیوہ سی۔ تے شہر دے بتھیرے لوک اوہدے نال سن۔ تے اوہنوں ویکھ کے خُداوند نُوں اوہدے اُتّے ترس آیا۔ تے اوہنوں آکھیا رو نا۔ تے اگانہہ ہو کے جنازے نُوں چُھوئیا۔ تے چُکن والے کھلو گئے۔ تَد اوس آکھیا۔ اَے جوان مَیں تینُوں آکھنا آں۔ اُٹھ۔ تے اوہ مُردہ اُٹھ بَیٹھا تے بولن لگ پیا۔ اوس اوہنوں اوہدی ماں دے حوالے کِیتا۔ تے ساریاں خَوف کھادا تے خُدا دی وڈیائی کر کے آکھن لگّے پئی وَڈا نبی ساڈے وِچ اُٹھیا اے۔ تے خُدا اپنی اُمّت اُتّے نِگاہ کِیتی اے۔ تے اوہدی بابت ایہہ گلّ سارے یہُودیہ تے سارے آلے دوالے دے مُلک وِچ مشہُور ہو گئی۔ تے یُوحنّا دے شاگِرداں ایہناں سارِیاں گلّاں دی خبر اوہنوں کر دِتّی۔ تے یُوحنّا اپنے شاگِرداں وِچوں دو نُوں سَدّ کے خُداوند نُوں اکھوا گھلّیا۔ پئی جیہڑا آؤن والا اے۔ اوہ تُوں ای ایں یا اسی کِسے ہور نُوں اُڈِیکئے؟ اوہناں بندیاں اوہدے کول اَپڑ کے آکھیا سانُوں یُوحنّا بپتِسمہ دین والے تیرے کولوں پچُھّن نُوں گھلّیا اے۔ پئی جیہڑا آؤن والا اے اوہ تُوں ای ایں یا اسی کِسے ہور نُوں اُڈِیکئے؟ اوہنے اوسے ویلے بتھیریاں نُوں روگاں تے بلاواں تے بُریاں رُوحاں توں شفا دیتی۔ تے بتھیریاں اَنھیاں نُوں سوجاکھِیاں کِیتا۔ تے اوس اوہناں نُوں جواب دِتّا۔ پئی جو کُجھ تُساں ویکھیا تے سُنیاں اے۔ جا کے یُوحنّا نُوں دسو پئی اَنھے ویکھ دے نیں۔ لنگے ٹُردے نیں۔ کوڑھے پاک صاف کِیتے جاندے نیں۔ تے بولے سُندے نیں۔ مُردے جوالے جاندے نیں۔ غرِیباں نُوں خُوشخبری سُنائی جاندی اے۔ تے دھنّ اوہ اے جیہڑا میرے وِچ ٹھوکر دا سبّب نا پاوے۔ جد یُوحنّا دے گھلّے ہوئے ٹُر گئے۔ تَد اوہ یُوحنّا دی بابت لوکاں نُوں آکھن لگّا پئی تُسی اُجاڑ وِچ کِیہ ویکھن نُوں گئے سو؟ اِک کانا جیہڑا وَا نال ہِلدا اے؟ فیر تُسی کِیہ ویکھن نُوں گئے سو؟ اِک بندہ جِس سُچے کپڑے پائے ہوئے نیں؟ ویکھو اوہ جیہڑے سوہنے کپڑے پاندے تے وڈّی شان وِچ رہندے نیں۔ سو بادشاہاں دے محلّاں وِچ ہوندے نیں۔ فیر تُسی کِیہ ویکھن نُوں گئے سو؟ اِک نبی نُوں؟ ہاں مَیں تُہانوں آکھنا آں سگوں نبی نالوں وی وَڈا۔ ایہہ اوہو اے جِہدے حق وِچ لِکھیا ہویا اے پئی ویکھ مَیں اپنے ہلکارے نُوں تیرے اگّے گھلّنا آں جیہڑا تیرے اگّے تیری راہ نُوں تیار کرے گا۔ مَیں تُہانوں آکھنا آں پئی اوہناں وِچوں جیہڑے عَورتاں توں جمّے یُوحنّا نالوں کوئی وَڈا نئیں اے۔ پر جیہڑا خُدا دی بادشاہی وِچ نِکّا اے۔ اوہ اوہدے نالوں وَڈا اے۔ تے ساریاں لوکاں تے مصُولیاں وی سُن کے خُدا نُوں سَچّا مَنّیا کیوں جو اوہناں یُوحنّا دا بپتِسمہ لیا۔ پر فرِیسیاں تے شریعت دے سکھالن والیاں نیں خُدا دی صلاح نُوں اپنے ولّوں ماڑیاں جانیا کیوں جو اوہناں اوہدے کولوں بپتِسمہ نا لیا۔ ایس زمانے دے لوکاں نُوں مَیں کیہو جیہا آکھاں۔ تے اوہ کِہدے وانگر نیں؟ اوہ اوہناں مُنڈیاں وانگر نیں جیہڑے بازار وِچ بَہہ کے اِک دُوجے نُوں اَوازاں مار کے آکھدے نیں پئی اساں تُہاڈے لئی بانسری وَجائی تے تُسی نا نچّے۔ اسی پِٹّے تے تُسی نا روئے۔ کیوں جو یُوحنّا بپتِسمہ دین والا نا روٹی کھاندا آیا۔ نا انگور دی رَس پَیندا تے تُسی آکھدے ہو پئی اوہدے نال اِک بد رُوح اے۔ اِبنِ آدم کھاندا پَیندا آیا اے۔ تے تُسی آکھدے ہو پئی ویکھو اِک کھاؤُ تے شرابی بندہ مصُولیاں تے گُناہِیاں دا یار۔ پر حِکمت اپنے ساریاں بچّیاں ولّوں سَچّی مِتھی گئی۔ تے کِسے فریسی اوہدے اگّے عرض کِیتی پئی میرے نال کھانا کھا۔ تے اوہ فریسی دے گھر جا کے کھان بَیٹھا۔ تے ویکھو اِک بدچلن زنانی جیہڑی اوس شہر دی سی جد جانیا پئی اوہ فریسی دے گھر کھان بَیٹھا اے۔ سنگِ مَرمَر دی شِیشی وِچ عِطر لیائی۔ تے پِچّھے ولّ اوہدے پیراں کول کھلو کے روندی روندی اَتھرُواں نال اوہدے پَیر بِھیون لگّی۔ تے اپنے سِر دیاں والاں نال پُونجھ کے اوہدے پیراں نُوں بُہت چُمّیا تے عِطر مَلیا۔ تے اوہ فریسی جِس اوہدی دعوت کِیتی سی ایہہ ویکھ کے دِل وِچ آکھن لگّا پئی جے ایہہ بندہ نبی ہوندا تاں جان لَیندا پئی زنانی جیہڑی اوہنوں چھوندی اے کون اے تے کِس طرح دی اے۔ کیوں جو اوہ بد چَلّن اے۔ تے یِسُوع اوہنوں آکھیا اَے شمعُون مَیں تینُوں کُجھ آکھنا اے اوس آکھیا اَے اُستاد آکھ۔ کِسے ساہوکار دے دو قرضئی سن۔ اِک پنج سَو دیناراں دا تے دُوجا پنجاہاں دا۔ جد اوہناں دے ہتّھ پلّے دین نُوں کُجھ نا رہیا اوس دوہاں نُوں بخش چھڈیا۔ ہُن اوہناں وِچوں کیہڑا اوہنوں وَدّھ پیار کرے گا؟ شمعُون جواب دِتّا میرے خیال وِچ اوہ جِہنُوں اوس وَدّھ بخشیا۔ اوس اوہنوں آکھیا تُوں ٹھیک فیصلہ کِیتا۔ تے اوس زنانی ولّ مُنھ کر کے شمعُون نُوں آکھیا۔ تُوں ایس زنانی نُوں ویکھنا ایں؟ مَیں تیرے گھر آیا تُوں میرے پیراں لئی پانی نا دِتّا۔ پر ایس میرے پَیر اَتھرُواں نال بھیویں۔ تے اپنے والاں نال پُونجھے۔ تُوں مَینُوں نا چُمّیا۔ پر جدوں دا مَیں آیا آں ایس میرے پیراں نُوں چُمّنا نئیں چھڈیا۔ تُوں میرے سِر نُوں تیل نا لایا۔ پر ایس میرے پیراں نُوں عِطر مَلیا۔ ایس لئی مَیں تینُوں آکھنا آں اوہدے گُناہ جیہڑے بُہت نیں مُعاف ہوئے۔ کیوں جو ایس وَدّھ پیار کِیتا۔ پر جِہدے تھوڑے مُعاف ہوئے اوہ تھوڑا پیار کر دا اے۔ تے اوس زنانی نُوں آکھیا تیرے گُناہ مُعاف ہوئے۔ تَد اوہ جیہڑے اوہدے نال کھان بَیٹھے سن دِل وِچ آکھن لگّے۔ پئی ایہہ کون اے جیہڑا گُناہاں نُوں وی مُعاف کر دا اے؟ پر اوہنے زنانی نُوں آکھیا تیرے اِیمان تینُوں بچایا اے۔ سلامتی نال ٹُر جا۔ تے ایہدے تھوڑے چِر پِچّھوں ایویں ہویا۔ پئی اوہ منادی کر دا تے خُدا دی بادشاہی دی خُوش خبری سُناندا ہویا شہروں شہر تے پِنڈوں پِنڈ پِھرن لگّا تے اوہ باراں اوہدے نال سن۔ تے کئی زنانِیاں جیہڑیاں بُریاں رُوحاں تے ماندگِیاں توں چَنگیاں کِیتیاں گِئیاں سن جیویں کہ مریم جیہڑی مگدلِینی اکھواؤندی سی۔ جِہدے وِچوں سَتّ بدرُوحاں نِکل گِئیاں سن۔ تے یُوأنہ ہیرودیس دے گھر دے مُختِیار خوزہ دی گھر والی تے سُوسنّاہ۔ تے ہور بتھیریاں سن جیہڑیاں اپنے مال نال اوہناں دی سیوا کر دیاں سن۔ تے جد بڑی خلقت اکٹّھی ہوئی تے شہر شہر دے لوک اوہدے کول لگے آوندے سن تَد اوس تمثِیل دے کے آکھیا۔ اِک بِیجن والا اپنا بی بِیجن نُوں نِکلیا تے بِیجدیاں بِیجدیاں کُجھ راہ دے کنڈھے کِریا تے پیراں ہیٹھاں مدھولیا گیا۔ تے وَا دے پنچھیاں اوہنوں چُگ لیا۔ تے کُجھ پتّھریلی زمین اُتّے ڈِگّ پیا۔ تے اُگدیاں ای سُک گیا۔ کیوں جو اوہنوں وَتّر نا مِلیا۔ تے ہور کُجھ ملہیاں وِچ کِریا تے ملہیاں نیں نال ای نال وَدّھ کے اوہنوں دَبّ لیا۔ تے کُجھ چنگی زمین وِچ کِریا۔ تے اُگ کے سَو گُنا پَھلیا۔ ایہہ آکھ کے اوہ اُچّی اُچّی بولیا۔ پئی جِہدے کنّ سُنن والے ہون اوہ سُنے۔ تے اوہدے شاگِرداں اوہنوں پُچھیا ایہہ کِیہ تمثِیل اے؟ اوس آکھیا خُدا دی بادشاہی دے بھیتاں دی سمجھ تُہانوں دِتّی گئی اے۔ پر ہورناں نُوں تمثِیلاں وِچ پئی اوہ ویکھ دیاں نا ویکھن تے سُندیاں نا سمجھن۔ تمثِیل تے ایویں اے پئی بی خُدا دا کلام اے۔ راہ دے کنڈھے والے اوہ نیں جِنہاں سُنیاں مگروں ابلیس آؤندا تے کلام نُوں اوہناں دے مَنوں کڈھ لے جاندا اے تاں جو ایہہ نا ہوئے پئی اِیمان لیا کے اوہ نجات پان۔ تے پتّھریلی زمین اُتّے دے اوہ نیں جیہڑے سُن کے خُوشی نال کلام نُوں مَن لَیندے نیں پر اوہ جڑ نئیں رکھ دے۔ کُجھ چِر اِیماندار رہ کے ازمایش دے ویلے پھر جاندے نیں۔ تے جیہڑا ملہیاں وِچ کِریا سو اوہ نیں جِنہاں سُن لیا تے راہ ٹُر دیاں ٹُردیاں زِندگی دی فِکر تے دَولت تے مَوجاں وِچ پَھس جاندے نیں۔ تے اوہناں دا پَھل پکدا نئیں۔ پر چنگی زمین والے اوہ نیں جیہڑے چنگے تے کھرے دِل نال جد سُن لَیندے نیں تے کلام نُوں سانبھی رکھ دے۔ تے صبر نال پَھل لاؤندے نیں۔ کوئی بندہ دِیوا بال کے اوہنوں بھانڈے تھلے نئیں لُکاندا نا مَنجی ہیٹھ رکھدا اے۔ پر ڈیوڑی اُتّے رکھدا اے۔ تاں جو اندر وڑن والے چانن ویکھن۔ کیوں جو کُجھ اوہلے نئیں جیہڑا اُجاگر نا کِیتا جائے گا۔ تے نا کُجھ لکُیا ہویا اے جیہڑا جانیا نا جائے گا۔ تے اُجاگر نا کِیتا جائے گا۔ ایس لئی خبردار رہو۔ پئی تُسی کِیویں سُندے اوہ کیوں جو جِہدے کول اے اوہنوں دِتّا جائے گا۔ تے جِہدے کول نئیں۔ اوہدے توں اوہ وی کھوہ لیا جائے گا۔ جیہڑا اوہ اپنا سمجھدا اے۔ تَد اوہدی ماں تے بھرا اوہدے کول آئے۔ تے بِھیڑ دے سبّب اوہنوں مِل نا سکے۔ تے اوہنوں سنیہا مِلیا پئی تیری ماں تے تیرے بھرا باہر کھلوتے ہوئے تینُوں مِلنا چاہندے نیں۔ اوس اوہناں نُوں جواب دِتّا میری ماں تے میرے بھرا ایہہ نیں جیہڑے خُدا دے کلام نُوں سُندے تے عمل کر دے نیں۔ تے اِک دِن ایویں ہویا پئی اوہ آپ تے اوہدے شاگِرد بیڑی اُتّے چڑھے تے اوس اوہناں نُوں آکھیا جِھیلوں پار چلّئے۔ تے بیڑی نُوں چھڈ دِتّوں نیں۔ تے جد بیڑی لگی جاندی سی اوہ سَوں گیا۔ تے جِھیل وِچ وڈّی ہنیری آئی تے بیڑی پانی نال بھر جان لگّی۔ تے اوہ خطرے وِچ پئے۔ اوہناں کول جا کے اوہنوں جگایا تے آکھیا۔ اَے مالک اَے مالک اسی مر چلّے آں۔ تَد اوس اُٹھ کے وَا تے پانی دِیاں ٹھاٹھاں نُوں دابا ماریا تے اوہ تھم گِئیاں تے آرام ہویا۔ تے اوس اوہناں نُوں آکھیا تُہاڈا اِیمان کِتّھے اے۔ اوہ ڈر گئے تے حَیران ہو کے آپو وِچ آکھن لگّے۔ ایہہ کون اے۔ جیہڑا وَا تے پانی اُتّے وی حُکم کر دا اے۔ تے اوہ اوہدی مَن دے نیں؟ تے اوہ گراسِینیاں دے علاقے وِچ جیہڑا گلِیل دے سامھنے اوس پاسے اے۔ بیڑی وِچ اَپڑے۔ تے جد اوہ کنڈھے اُتّے اُتریا تے شہر دا اِک بندہ ٹکّریا جَنّہوں بدرُوحاں چمبڑیاں ہویاں سن۔ تے اوہ بڑے چِر توں کپڑے نئیں سی پاندا تے گھر وِچ نئیں سگوں قبراں وِچ رہندا ہوندا سی۔ جد اوس یِسُوع نُوں ویکھیا تَد چیکدیاں ہویاں اوہدی پَیرِیں ڈِگّ پیا تے اُچّی اُچّی آکھیا۔ اَے یِسُوع خُدا تعالیٰ دے پُترا میرا تیرا کِیہ لاگا؟ تیری مِنّت کرنا ہاں۔ پئی مَینُوں اَوکھیاں نا کر۔ کیوں جو اوہنے پلِیت رُوح نُوں حُکم دِتّا سی پئی ایس بندے وِچوں نِکل جا۔ کیوں جو اوس بڑی واری اوہنوں پھڑیا سی تے اوہ سنگلاں تے بیڑیاں نال جکڑیا ہویا پہرے وِچ رہندا سی پر سنگلاں نُوں توڑ دا سی۔ تے اوہ بدرُوح اوہنوں بیاباناں وِچ بھجائی پِھردی سی۔ یِسُوع اوہنوں پُچھیا تیرا کِیہ ناں اے؟ اوس آکھیا لشکر۔ کیوں جو بُہت سارِیاں بدرُوحاں اوہدے وِچ وڑِیاں ہویاں سن۔ اوہناں اوہدی مِنّت کِیتی پئی سانُوں کھڈے وِچ جان دا حُکم نا کر۔ اوس تھاں سُؤراں دا اِجّڑ پہاڑ اُتّے چَردا پیا سی۔ اوہناں اوہدی مِنّت کِیتی پئی سانُوں اجازت دے۔ پئی اوہناں دے وِچ جا وڑِیئے۔ اوس اوہناں نُوں اجازت دِتّی۔ تے بدرُوحاں اوس بندے وِچوں نِکل کے سُؤراں وِچ جا وڑِیاں۔ تے اِجّڑ کھڈ اُتّوں جِھیل وِچ چھالاں مار کے ڈُب گیا۔ چران والے ایہہ حال ویکھ کے بَھجّے تے شہر تے پِنڈاں وِچ خبر کِیتی۔ تَد اوہ اوہدا حال ویکھن نُوں نِکلے۔ تے یِسُوع کول آئے تے اوس بندے نُوں جِہدے وِچوں بدرُوحاں نِکلیاں سن۔ کپڑے پائے تے سُرت سمبھالی یِسُوع دے پیراں کول بَیٹھیاں ویکھیا۔ تے اوہ ڈر گئے۔ تَد ویکھن والیاں اوہناں نُوں خبر دِتّی۔ پئی اوہ جِہدے وِچ بدرُوحاں سن۔ کِیویں چَنگا کِیتا گیا۔ تے گراسِینیاں دے آلے دوالے دے علاقے دیاں ساریاں لوکاں اوہدے اگّے مِنّت کِیتی پئی ساڈے کولوں ٹُرجا۔ کیوں جو اوہناں نُوں بڑا ڈر پَے گیا سی۔ تے اوہ بیڑی اُتّے چڑھ کے مُڑ گیا۔ تے اوس بندے جِہدے وِچوں بدرُوحاں نِکلیاں سن۔ اوہدے اگّے عرض کِیتی۔ پئی مَینُوں اپنے نال رہن دے۔ پر اوس اوہنوں وِداع کر کے آکھیا۔ پئی۔ اپنے گھر نُوں مُڑ جا تے جِنّے کمّ خُدا تیرے نال کِیتے نیں اوہ دسیں۔ اوہ منادی کر دا کر دا ٹُر گیا۔ پئی یِسُوع میرے لئی کیڈے کیڈے کمّ کِیتے۔ تے جد یِسُوع مُڑی آؤندا سی تَد لوکاں اوہنوں خُوشی نال قبول کِیتا۔ کیوں جو سبھو اوہدا راہ اُڈِیکدے سن۔ تے ویکھو یائِیر ناں اِک بندہ آیا جیہڑا عبادت خانے دا سردار سی اوس یِسُوع دی پَیرِیں پَے کے اوہدی مِنّت کِیتی۔ پئی میرے گھر چَل۔ کیوں جو اوہدی باراں کُو ورھیاں دی اِکّو کُڑی سی تے اوہ مرن والی سی۔ جد جان لگّا تَد خلقت اوہدے اُتّے ڈِگّ ڈِگّ پَیندی سی۔ تے اِک زنانی جِہنُوں باراں ورھیاں توں لہو آؤندا سی تے جِس اپنی ساری پُونجی حکیماں اُتّے خرچ کِیتی پر کِسے توں تگڑی نا ہو سکی۔ اوہدے مگر آ کے اوہدے کپڑے دا پلّا چُھوئیا۔ تے اوسے ویلے اوہدا لہو وَگنا بند ہوگیا۔ تَد یِسُوع آکھیا کِس مَینُوں چُھوئیا جد ساریاں نا کِیتی۔ پطرس تے اوہدے نال دیاں آکھیا۔ اَے مالک بِھیڑ تینُوں دَباندی تے تیرے اُتّے ڈِگّدی اے۔ پر یِسُوع آکھیا۔ کِسے تے مَینُوں چُھوئیا۔ اے کیوں جو مَیں جاننا آں۔ پئی قُدرت مَیتھوں نِکلی اے۔ جد اوس زنانی ویکھیا پئی مَیں لُک نئیں سکدی۔ تَد کمبدی ہوئی آئی۔ تے اوہدی پَیرِیں ڈِگّ کے ساریاں لوکاں دے سامھنے دسیا پئی کیہڑی گلّوں اوہنوں چُھوئیا۔ تے کِیویں اوسے ویلے چنگی ہوگئی۔ اوس اوہنوں آکھیا۔ دِھیے تیرے اِیمان تینُوں بچایا۔ سلامتی نال ٹُر جا۔ تے اجے اوہ ایہہ آکھدا ای پیا سی پئی عبادت خانے دے سردار دے گھروں اِک نے آ کے آکھیا۔ پئی تیری دِھی مر گئی۔ اُستاد نُوں اَوکھیاں نا کر۔ یِسُوع سُن کے اوہنوں جواب دِتّا۔ ڈر نا صرف اِیمان لِئیا تے اوہ بچ جائے گی۔ تے اوس اوہدے گھر اَپڑ کے پطرس تے یُوحنّا تے یعقُوب تے اوس کُڑی دے ماں پئیو دے بِناں کِسے نُوں اپنے نال اندر نا آن دِتّا۔ تے سارے اوہدے لئی روندے پِٹدے سن پر اوس آکھیا۔ نا روؤ۔ اوہ مر نئیں گئی بس سُتّی پئی اے۔ اوہ اوہدے اُتّے ہسّن لگّے۔ کیوں جو جان دے سن پئی اوہ مر گئی اے۔ پر اوس اوہدا ہتّھ پھڑ کے اُچّی آکھیا۔ کُڑیئے اُٹھ۔ تے اوہدی رُوح فیر آئی تے اوسے ویلے اوہ اُٹھ کھلوتی تے یِسُوع حُکم دِتّا پئی اوہنوں کھان لئی کُجھ دِتّا جاوے۔ تے اوہدے ماں پئیو حَیران ہوئے۔ پر اوس اوہناں نُوں تاکِید کِیتی۔ پئی جیہڑا حال گُذریا اے۔ کِسے نُوں نا دسیو۔ اوس باراں شاگِرداں نُوں اکٹّھیاں سَدّ کے اوہناں نُوں سارِیاں بدرُوحاں اُتّے قُدرت تے اختیار دِتّا۔ تے روگاں دے دُور کرن واسطے وی۔ تے اوہناں نُوں خُدا دی بادشاہی دی منادی کرن نُوں تے روگِیاں نُوں تگڑا کرن نُوں گھلّیا۔ تے اوہناں نُوں آکھیا پئی راہ لئی کُجھ نا لئیو۔ نا سوٹی نا جھولی نا روٹی نا رُپیا پیسہ نا دو دو کُڑتے رکھو۔ تے جِس کِسے گھر وڑو اوتھے ای رہو تے اوتھوں ای ٹُر پَوو۔ تے جیہڑے تُہانوں نا قبولن اوس شہروں باہر جاندِیاں اپنے پیراں دا گھٹّا اوہناں اُتّے گواہی لئی جھاڑ دیو۔ اوہ جا کے پِنڈ پِنڈ ہر تھاں خُوش خبری سُناندے تے چَنگا کر دے پِھرے۔ تے چوتھائی مُلک دے حاکم ہیرودیس نے سارا حال سُنیا۔ تے گھبرا گیا۔ ایس لئی پئی آکھدے سن پئی یُوحنّا مُردیاں وِچوں جی اُٹھیا اے۔ تے کئی آکھدے سن پئی ایلیّاہ نے وکھالی دِتّی اے۔ تے ہور آکھدے سن پئی اگلے نبیاں وِچوں کوئی فیر اُٹھیا اے۔ پر ہیرودیس آکھیا یُوحنّا دا سِر تے مَیں وَڈّھ سُٹّیا اے۔ ایہہ کون اے جِہدی بابت اجیہاں گلّاں سُننا آں؟ تے اوہ اوہدے ویکھن دا موقع لَبّھ دا سی۔ تے رسُولاں مُڑ آ کے جو کُجھ کِیتا سی اوہنوں دسیا تے اوہ اوہناں نُوں اپنے نال لے کے وکھرا بَیت صَیدا ناں دے شہر وِچ گیا۔ ایہہ معلُوم کر کے بڑی خلقت اوہدے مگر ٹُری تے اوس اوہناں نُوں خُوشی نال قبول کِیتا۔ تے اوہناں نال خُدا دی بادشاہی دِیاں گلّاں کِیتیاں۔ تے جِنہاں نُوں تگڑے ہون دی لوڑ سی۔ اوہناں نُوں چَنگا کِیتا۔ تے جد دِن ڈُبن لگّا اوہناں باراں نیں آ کے اوہنوں آکھیا پئی لوکاں نُوں وِداع کر تاں جو آلے دوالے دے پِنڈاں تے ڈیریاں وِچ جا کے رہن تے اَن پانی لَبّھ لین کیوں جو ایتھے اسی اُجاڑ تھاں وِچ آں۔ پر اوس اوہناں نُوں آکھیا تُسی اوہناں نُوں آپے کھوالو۔ اوہناں آکھیا پئی ساڈے کول پنجاں روٹِیاں تے دو مچھّیاں باہجوں ہور کُجھ نئیں اے۔ پئی اسی جا کے ایہناں ساریاں لوکاں لئی کھانا مُل لیائے۔ کیوں جو اوہ پنج کُو ہزار سن۔ اوس اپنے شاگِرداں نُوں آکھیا۔ اوہناں نُوں کوئی پنجاہ پنجاہ دی پال بٹھال دئیو۔ اوہناں اوسے طرح کِیتا تے ساریاں نُوں بٹھا لیا۔ تَد اوس اوہناں پنجاں روٹِیاں تے دو مچھّیاں نُوں لے کے اسمان ولّ ویکھ کے اوہناں اُتّے برکت منگی۔ تے توڑ کے اپنے شاگِرداں نُوں دیندا رہیا پئی لوکاں دے اگّے رکھن۔ تے اوہناں کھادا تے سارے رَجّ گئے۔ تے بچیاں ہویاں ٹُکّراں دِیاں باراں ٹوکریاں چُکیاں گِئیاں۔ تے ایویں ہویا جد اوہ اکلّا ہو کے دُعا پیا منگدا سی۔ تے شاگِرد اوہدے نال سن۔ اوس اوہناں کولوں ایہہ پُچھیا۔ پئی لوک مَینُوں کِیہ آکھدے نیں۔ پئی مَیں کون آں؟ اوہناں جواب دِتّا پئی یُوحنّا بپتِسمہ دین والا تے ہور ایلیّاہ تے ہور آکھدے نیں پئی اگلے نبیاں وِچوں کوئی جی اُٹھیا اے۔ اوس اوہناں نُوں آکھیا تُسی کِیہ آکھدے اوہ۔ پئی مَیں کون آں؟ پطرس جواب دِتّا۔ خُدا دا مسِیح۔ اوس اوہناں نُوں تاکِید کِیتی پئی ایہہ کِسے نُوں نا دسیو۔ تے آکھیا پئی ضرُور اے پئی اِبنِ آدم بڑے دُکھ سہے۔ تے بزُرگاں تے سردار کاہِناں تے فقِیہاں توں ردّیا جائے۔ تے جانوں ماریا جائے۔ تے ترِیجے دِہاڑے جوالیا جائے۔ تے اوس ساریاں نُوں آکھیا جے کوئی چاہے۔ پئی میرے مگر آئے تے اپنے آپ دا اِنکار کرے۔ تے نِت دِہاڑے اپنی صلِیب چُک کے میرے مگر لگ پئے۔ ایس لئی پئی جے کوئی اپنی جان بچانی چاہوے۔ اوہ اوہنوں گوائے گا۔ پر جے کوئی میری خاطر اپنی جان گوائے۔ اوہو اوہنوں بچائے گا۔ جے بندہ ساری دُنیا نُوں کماوے تے اپنی جان گوائے یا اوہدا نُقصان کرے تے اوہنوں کِیہ فائدہ ہوئے گا۔ کیوں جو جیہڑا مَیتھوں تے میرِیاں گلّاں توں شرمائے گا اِبنِ آدم وی جدوں اوہ اپنے تے باپ تے پاک فرِشتیاں دے جلال وِچ آئے گا اوہدے توں شرمائے گا۔ پر مَیں تُہانوں سَچ آکھنا آں پئی ایتھے کھلون والیاں وِچوں کئی اِک نیں جیہڑے جد تِیکر خُدا دی بادشاہی نُوں ویکھ نا لین اُکّا مَوت دا سواد نا لین گے۔ تے اوہناں گلّاں دے اَٹھاں کُو دِناں پِچّھوں اجیہا ہویا جد پطرس تے یُوحنّا تے یعقُوب نُوں نال لے کے اوہ پہاڑ اُتّے دُعا منگن نُوں چڑھیا۔ تے دُعا منگ دیاں ای اوہدے چِہرے دا رُوپ بدل گیا۔ تے اوہدے کپڑے چِٹّے لِشکن والے ہوگئے۔ تے ویکھو دو بندے جیہڑے مُوسیٰ تے ایلیّاہ سن اوہدے نال گلّاں پئے کر دے سن۔ ایہہ جلال وِچ وکھالی دے کے اوہدے کُوچ کرن دا ذِکر کر دے سن۔ جیہڑا یرُوشلِیم وِچ ہون والا سی۔ پر پطرس تے اوہدے سنگی نِیندر نال بھرے سن۔ جد چنگی طرح جاگ پئے تے اوہدے جلال تے اوہناں دوہاں جِنّیاں نُوں اوہدے نال کھلوتیاں ہویاں دیکھیا۔ تے اجیہا ہویا پئی جد اوہ اوہدے توں وَکھ ہون لگّے۔ تَد پطرس یِسُوع نُوں آکھیا۔ اَے مالک ساڈا ایتھے رہنا چَنگا اے۔ سو اسی تِنّ ڈیرے بنائیے اِک تیرے لئی۔ تے اِک مُوسیٰ تے اِک ایلیّاہ دے لئی تے اوہنوں پتا نئیں سی۔ پئی مَیں کِیہ آکھنا آں۔ اوہ ایہہ آکھدا ای سی۔ پئی بدّل آیا تے اوہناں اُتّے چھاں کِیتی۔ تے بدّل وِچ وڑدیاں اوہ ڈر گئے۔ تے بدّلوں اِک اواز آئی پئی ایہہ میرا چُنیا ہویا پُتر اے۔ اوہدی سُنو۔ تے اواز آؤندیاں ای یِسُوع اکلّا لَبھّا تے اوہ چُپ کر رہے تے اونہی دِنیں کِسے نُوں نا دسیا پئی اساں کِیہ کُجھ ویکھیا اے۔ تے اگلے دِن ایویں ہویا پئی جد اوہ پہاڑوں اُترے تَد بڑی بِھیڑ اوہنوں آ مِلی۔ تے ویکھو بِھیڑ وِچوں اِک بندے اُچّی اُچّی آکھیا اَے اُستاد مَیں تیری مِنّت کرنا آں۔ میرے پُتر اُتّے نِگاہ کر پئی اوہ میرا اکلّا اے۔ تے ویکھو اِک بدرُوح اوہنوں پھڑ لَیندی اے تے اوہ اِک دم چِیکن لگ پَیندا اے تے اوہنوں اجیہا مروڑ دی اے۔ پئی اوہنوں جھگ آ جاندی اے۔ تے اوہنوں مِدّھ کے مَساں ای چھڈ دی اے۔ تے مَیں تیرے شاگِرداں دی مِنّت کِیتی پئی اوہنوں کڈھن پر اوہ کڈھ نا سکے۔ تَد یِسُوع جواب وِچ آکھیا اَے بے اعتباری تے پُٹھی قوم مَیں کِنّاں چِر تُہاڈے نال رہاں گا تے تُہاڈی سہاں گا؟ اپنے پُتر نُوں اُرے لیا۔ اجے اوہ پیا آؤندا ای سی پئی بد رُوح نے اوہنوں پھٹک کے مروڑیا۔ پر یِسُوع اوس پلِیت رُوح نُوں دابا ماریا تے مُنڈے نُوں چَنگا کِیتا۔ تے اوہنوں مُڑ اوہدے پئیو نُوں دِتّا۔ تے سارے خُدا دی شان توں حَیران ہوئے۔ پر جد سارے لوک اوہناں ساریاں کمّاں ولّوں جیہڑے اوس کِیتے حَیران ہوندے سن۔ اوس اپنے شاگِرداں نُوں آکھیا۔ پئی۔ تُسی ایہناں گلّاں نُوں اپنے کنّاں نال سُن چھڈو۔ کیوں جو اِبنِ آدم بندیاں دے ہتّھاں وِچ پھڑوایا جان والا اے۔ پر اوہناں ایہہ گلّ نا سمجھی۔ تے اوہ اوہناں توں لُکائی گئی تاں جو اوہ اوہنوں نا بُجھّن۔ تے اوہ اوہنوں ایس گلّ دی بابت پچُھّن توں ڈر دے سن۔ فیر اوہ آپو وِچ بحث کرن لگّے پئی ساڈے وِچ وَڈا کیہڑا اے؟ یِسُوع اوہناں دے مَناں دے خیالاں نُوں معلُوم کر کے اِک نِیانے نُوں لیا تے اوہنوں اپنے کول کھلھاریا تے اوہناں نُوں آکھیا۔ جیہڑا ایس نِیانے نُوں میرے ناں اُتّے قبولے مَینُوں قبولدا اے۔ تے جیہڑا مَینُوں قبولے میرے گھلّن والے نُوں قبولدا اے۔ کیوں جو جیہڑا تُہاڈے ساریاں وِچوں نِکّا اے اوہو وَڈا اے۔ یُوحنّا جواب دِتّا اَے مالک اساں کِسے نُوں تیرے ناں اُتّے بدرُوحاں کڈھ دیاں ویکھیا تے اوہنوں ڈَک دِتّا کیوں جو اوہ ساڈے نال تیرے مگر نئیں ٹُردا۔ پر یِسُوع اوہنوں آکھیا نا ڈَکو۔ کیوں جو جیہڑا تُہاڈے خلاف نئیں اوہ تُہاڈے ولّ اے۔ تے جد اوہ دِن نیڑے ڈُھکے پئی اوہ اُتّے چُک لیا جائے تے اجیہا ہویا۔ پئی اوس پَکّی طرح یرُوشلِیم ولّ جان لئی اپنا رُخ کِیتا۔ تے اوس اپنے اگّے لاگی گھلّے۔ اوہ ٹُرکے سامریاں دے پِنڈ وِچ جاوڑے۔ پئی اوہدے واسطے تیاری کرن۔ تے اوہناں اوہنوں نا قبولیا کیوں جو اوہدا رُخ یرُوشلِیم ولّ جان نُوں سی۔ اوہدے شاگِرد یعقُوب تے یُوحنّا نے ایہہ ویکھ کے آکھیا۔ اے خُداوند مرضی کِیہ اے پئی اسی حُکم دئیے۔ پئی اسمانوں اَگ آوے تے ایہناں دا ناس کرے؟ [جیویں ایلیّاہ نے کِیتا۔] اوس مُڑ کے اوہناں نُوں جِھڑکیا۔ [تے آکھیا پئی تُسی نئیں جان دے پئی تُسی کیویں دی رُوح دے ہو۔ کیوں جو اِبنِ آدم لوکاں دی جان برباد کرن نئیں سگوں بچان آیا] تَد اوہ ہور پِنڈ نُوں ٹُر گئے۔ تے جد اوہ راہ وِچ لگے جاندے سن۔ تے کِسے اوہنوں آکھیا جِتّھے تُوں جائیں۔ مَیں تیرے مگر چلاں گا۔ یِسُوع اوہنوں آکھیا لُومبڑِیاں دے گھورنے تے وَا دیاں پینچھیاں دے آہلنے نیں۔ پر اِبنِ آدم لئی کُجھ نئیں جِتّھے اپنا سِر رکھّے۔ فیر اوہنے اِک ہور نُوں آکھیا میرے مگر ٹُر۔ پر اوس آکھیا اَے خُداوند مَینُوں اجازت دے۔ پئی پہلاں جا کے اپنے پئیو نُوں دفن کراں۔ اوس اوہنوں آکھیا۔ مُردیاں نُوں اپنے مُردے دفنان دے۔ پر تُوں جا کے خُدا دی بادشاہی دی خبر سُنا۔ اِک ہور نے وی آکھیا اَے خُداوند۔ مَیں تیرے مگر ٹُراں گا۔ پر پہلاں مَینُوں اجازت دے۔ پئی اپنے گھر دے لوکاں توں وِداع ہو آواں۔ یِسُوع اوہنوں آکھیا کوئی نئیں اے جیہڑا ہَل اُتّے ہتّھ رکھ کے پِچھّاں ویکھے تے اوہ خُدا دی بادشاہی دے لائق ہوئے۔ ایہناں گلّاں دے پِچّھوں خُداوند ستّر بندے ہور مُقرّر کِیتے تے اوہناں نُوں اپنے اگّے ہر شہر تے ہر تھاں جِتّھے آپ جان والا سی دو دو کر کے گھلّیا۔ تے اوہناں نُوں آکھیا۔ پئی فصل تے بُہت اے۔ پر واڈھے تھوڑے نیں۔ ایس لئی فصل دے مالک دی مِنّت کرو۔ پئی اوہ فصل نُوں وَڈّھن لئی واڈھے گھل دیوے۔ جاؤ۔ ویکھو مَیں تُہانوں بگھیاڑاں وِچ لیلیاں وانگُوں گھَلّناں آں۔ نا بٹوا لے جاؤ نا جھولی نا جُتِّیاں۔ تے راہ وِچ کِسے نُوں سلام نا کرو۔ تے جِس کِسے گھر وِچ وڑو۔ پہلاں آکھو پئی ایس گھر دی سلامتی ہوئے۔ تے جے کوئی سلامتی دا پُتر اوتھے ہوئے تُہاڈا سلام اوہدے اُتّے ٹھیرے گا۔ نئیں تے تُہاڈے اُتّے مُڑ آئے گا۔ تے اوسے گھر وِچ رہو تاں جو کُجھ اوہناں ولّوں مِلے کھاؤ پِیو۔ کیوں جو مزدُوری مزدُور دا حق اے۔ گھر گھر نا پِھرو۔ تے جِس شہر وِچ وڑو تے اوہ شہر تُہانوں قبولے تاں جو کُجھ تُہاڈے اگّے رکھیا جائے کھاؤ۔ اوس تھاں دے روگِیاں نُوں ولّ کرو۔ تے اوہناں نُوں ایہہ آکھو۔ پئی خُدا دی بادشاہی تُہاڈے نیڑے آئی اے۔ تے جِس کِسے شہر وِچ وڑو تے اوہ شہر تُہانوں نا قبولے تے اوہدیاں بازاراں وِچ جا کے آکھو۔ پئی تُہاڈے شہر دا گھٹّا وی جیہڑا ساڈے پیراں اُتّے پیا اے۔ اسی تُہاڈے سامھنے جھاڑ دینے آں۔ پر ایہہ جان لو پئی خُدا دی بادشاہی نیڑے آگئی اے۔ مَیں تُہانوں آکھنا آں پئی اوس دِن سدُوم دا حال اوس شہر نالوں بُہتا سوکھا ہوئے گا۔ خُرازِین افسوس تیرے اُتّے۔ بَیت صَیدا افسوس تیرے اُتّے۔ کیوں جو اوہ کراماتاں جیہڑیاں تُہاڈے وِچ وکھائیاں گِئیاں سن جے صُور تے صَیدا وِچ وکھالِیاں جاندِیاں۔ تے اوہ ترپّڑ اپنے اُتّے لے کے تے سواہ وِچ بَیہہ کے کدوں دی تَوبہ کر لَیندے۔ پر صُور تے صَیدا لئی تُہاڈے نالوں عدالت وِچ سوکھا ہوئے گا۔ تے اَے کَفرنحُوم کِیہ تُوں اسمان تِیکر اُچّا کِیتا جائیں گا؟ نئیں تُوں سگوں پاتال تِیکر اُتاریا جائیں گا۔ جیہڑا تُہاڈی سُندا اے۔ میری سُندا اے۔ جیہڑا تُہانوں رَدّ کر دا اے اوہ مَینُوں رَدّ کر دا اے۔ تے جیہڑا مَینُوں رَدّ کر دا اے اوہ میرے گھلّن والے نُوں رَدّ کر دا اے۔ اوہ ستّر خُوشی نال مُڑ آئے تے آ کے آکھیا۔ اَے خُداوند تیرے ناں اُتّے بد رُوحاں وی ساڈے وَس وِچ نیں۔ تَد اوس اوہناں نُوں آکھیا۔ مَیں شیطان نُوں بِجلی وانگُوں اسمانوں ڈِگّیا ویکھیا۔ ویکھو مَیں تُہانوں اختیار دِتّا اے۔ پئی سپّاں تے ٹھوہیاں نُوں لتاڑو تے وَیری دی ساری طاقت نُوں۔ تے کوئی شے کدی تُہاڈا نُقصان نا کرے گی۔ تَد وی ایس اُتّے خُوش نا ہو پئی رُوحاں تُہاڈے وَس وِچ نیں پر خُوشی کرو۔ پئی تُہاڈے ناں اسمانِیں لِکھے ہوئے نیں۔ اوسے گھڑی اوس پاک رُوح وِچ خُوش ہو کے آکھیا۔ اَے باپ اسمان تے زمین دے خُداوند مَیں تیری وڈیائی کرنا آں پئی تُوں ایہناں گلّاں نُوں عقل والیاں سیانیاں توں لُکایا۔ تے نیانیاں اُتّے اوہناں نُوں ظاہر کِیتا۔ ہاں اَے باپ ایسے طرح ای تینُوں چَنگا لگّا۔ سبھ کُجھ میرے باپ ولّوں مَینُوں دِتّا گیا اے۔ تے کوئی پُتر نُوں بِناں باپ دے نئیں جان دا۔ پئی اوہ کون اے۔ تے نا کوئی باپ نُوں جان دا اے پئی اوہ کون اے۔ بِناں پُتر دے۔ تے اوہ جِہدے اُتّے پُتر اوہنوں ظاہر کرنا چاہے۔ تے شاگِرداں ولّ دھیان کر کے اوہناں نُوں اوہلے وِچ آکھیا دھنّ اوہ اَکھّیاں جیہڑیاں ایہہ ویکھدِیاں نیں۔ جو کُجھ تُسی پئے ویکھدے اوہ۔ کیوں جو مَیں تُہانوں آکھنا آں پئی بتھیرے نبیاں تے بادشاہاں چاہ کِیتی پئی جو کُجھ تُسی ویکھدے اوہ۔ سو ویکھن۔ پر نا ویکھیا۔ تاں جو کُجھ تُسی سُن دے اوہ۔ سو سُنن۔ پر نا سُنیا۔ تے ویکھو اِک شریعت دا سکھالن والا اُٹھیا تے ایہہ آکھ کے اوہدی ازمایش کِیتی پئی اَے اُستاد مَیں کِیہ کراں۔ پئی ہمیشہ دی زِندگی دا وارث ہوواں؟ اوس اوہنوں آکھیا۔ توریت وِچ کِیہ لِکھیا ہویا اے تُوں کِیویں پڑھنا ایں؟ اوس جواب دِتّا پئی تُوں خُداوند نُوں جیہڑا تیرا خُدا اے اپنے سارے دِل تے اپنی ساری جان تے اپنے سارے زور تے اپنی ساری عقل نال پیار کر۔ تے اپنے گوانڈھی نُوں اپنے جِہیا۔ اوس اوہنوں آکھیا۔ تُوں ٹھیک جواب دِتّا ایہو کر تے جیویں گا۔ پر اوس ایس مطلب نال پئی اپنے آپ نُوں سَچّا ٹھہراوے۔ یِسُوع نُوں آکھیا۔ فیر میرا گوانڈھی کیہڑا ہویا۔ یِسُوع آکھیا اِک بندہ یرُوشلیِموں یرِیحُو نُوں پیا جاندا سی تے ڈاکُوؤاں وِچ جا پیا۔ اوہناں اوہنوں ننگا کر کے مارکُٹ کِیتی تے ادھ موئیا چھڈ کے ٹُر گئے۔ سبّب نال اِک کاہِن اوسے راہ لگا جاندا سی تے اوہنوں ویکھ کے پریوں دی لنگھ گیا۔ تے ایسے طرح اِک لاوی وی اوس تھاں آیا تے اوہ وی اوہنوں ویکھ کے پریوں لنگھ گیا۔ پر اِک سامری راہی اوسے تھاں آیا تے اوہنوں ویکھ کے ترس کھادا۔ تے اوہدے کول گیا تے اوہدے زخماں نُوں تیل تے رَس پا کے بَدّھا۔ تے اپنے جنَور اُتّے بہا کے اوہنوں سَراں وِچ لے گیا تے اوہدی خبرداری کِیتی۔ تے اگلے دیہاڑے دو دینار کڈھ کے بھٹیاری نُوں دِتّے۔ تے آکھیا تُوں ایہدی خبر رکھّیں۔ تے جو کُجھ تیرا ہور لگّے مَیں مُڑ دا ہویا تینُوں دے دیاں گا۔ ہُن تیری سمجھ وِچ ایہناں تِنّاں وِچوں اوس بندے دا جیہڑا ڈاکُوؤاں وِچ جا پیا سی کیہڑا گوانڈھی بنیا۔ اوہ آکھن لگّا۔ اوہ جِس اوہدے اُتّے مِہربانی کِیتی۔ یِسُوع اوہنوں آکھیا جا تُوں وی ایویں ای کر۔ تے اِنج ہویا پئی اوہ جاندِیاں اِک پِنڈ وِچ اَپڑے تے مرتھا ناں دی اِک زنانی اوہنوں اپنے گھر اُتاریا۔ تے اوہدی اِک بھین مریم ناں سی۔ اوہ یِسُوع دے پیراں کول بَہہ کے اوہدا کلام پئی سُن دی سی۔ پر مرتھا بُہت خِدمت دے سبّب گھابر گئی سی تے سامھنے ہو کے آکھیا اَے خُداوندا تینُوں کُجھ پرواہ نئیں اے۔ پئی میری بھین نے مَینُوں اکلّیاں سیوا کرن لئی چھڈ دِتّا؟ اوہنوں آکھ پئی میری مدد کر کے۔ تَد یِسُوع اوہنوں جواب دِتّا مرتھا مرتھا! تُوں کِنیاں بھوتیاں شیواں دی فِکر وِچ پَے کے گھابر گئی ایں۔ پر اِکّو شے دی لوڑ اے۔ مریم تے چَنگا حِصّہ پسند کِیتا اے۔ اوہ اوہدے توں کھوہیا نا جاوے گا۔ تے ایویں ہویاں پئی اوہ کِسے تھاں دُعا منگدا سی۔ جد منگ لئی تے اوہدے شاگِرداں وِچوں اِک نے اوہنوں آکھیا۔ اے خُداوندا سانُوں دُعا منگنی سِکھا جیویں یُوحنّا وی اپنے شاگِرداں نُوں سِکھا لیا۔ اوس اوہناں نُوں آکھیا۔ جد تُسی دُعا منگو۔ تے آکھو۔ اے باپ تیرا ناں پاک مَنّیا جائے۔ تیری بادشاہی آوے۔ ساڈی روز دی روٹی روز سانُوں دے۔ تے ساڈیاں تقصِیراں نُوں بخش دے۔ کیوں جو اسی اپنے ہر قرضئی نُوں بخش دینے آں۔ تے سانُوں ازمایش وِچ نا لیا۔ تے اوس اوہناں نُوں آکھیا تُہاڈے وِچ کیہڑا اے جِہدا دوست ہوئے۔ تے اوہ اَدھی راتِیں اوہدے کول جا کے آکھے اَے دوستا مَینُوں تَرے روٹِیاں اُدھاریاں دے۔ کیوں جو میرا اِک دوست پَینڈا کر کے میرے کول آیا ہویا اے۔ تے میرے کول کُجھ نئیں پئی اوہدے اگّے رکھاں۔ تے اوہ اندروں جواب دے کے آکھے مَینُوں اَوکھیاں نا کر۔ ہُن بُوہا وَجّیا ہویا اے تے میرے بال میرے نال وچھاؤنے اُتّے نیں۔ مَیں اُٹھ کے تینُوں دے نئیں سکدا۔ مَیں تُہانوں آکھنا آں بھانویں اوہدا دوست ہون دے سبّب کر کے اوہ اُٹھ کے نا دیوے۔ پر اوہدے بے شرم ہون مارِیاں اوہ اُٹھے گا۔ تے جِنّیاں لوڑ نیں اوہنوں دیوے گا۔ تے مَیں تُہانوں آکھنا آں منگو تے تُہانوں دِتّا جائے گا۔ لَبّھو تے تُسی پاؤ گے۔ کھڑکاؤ تاں تُہاڈے لئی کھولیا جائے گا۔ کیوں جو جیہڑا منگدا اے پا لَیندا اے۔ تے جیہڑا لَبّھدا اے۔ اوہنوں لَبّھ جاندا اے۔ تے جیہڑا کھڑکاؤندا اے۔ اوہدے واسطے کھولیا جائے گا۔ تُہاڈے وِچوں کیہڑا پئیو اے۔ پئی جے اوہدا پُتر روٹی منگے۔ تے اوہنوں پتّھر دیوے۔ مچّھی منگے تے مچّھی دی تھاں اوہنوں سَپّ دیوے۔ جے آنڈا منگے تے اوہنوں ٹُھوہاں دیوے؟ سو جے تُسی بُرے ہو کے اپنے بالاں نُوں چَنگیاں شیواں دیناں جان دے ہو۔ تے اوہ باپ جیہڑا اسمان دا اے اوہناں نُوں جیہڑے اوہدے توں منگدے نیں۔ پاک رُوح ضرُور دیوے گا۔ تے اوہ اِک گُنگی بدرُوح نُوں پیا کڈھ دا سی تے اینج ہویا۔ پئی جد بدرُوح نِکل گئی اوہ گُنگا بول پیا تے لوک حَیران ہوئے۔ پر کئی اوہناں وِچوں آکھن لگّے۔ پئی اوہ تے بد رُوحاں دے سردار بَعلزبُول دی ولّوں بدرُوحاں نُوں کڈھ دا اے۔ تے ہورناں ازمایش لئی اوہدے توں اِک اسمانی نِشان منگیا۔ پر اوس اوہناں دے خیالاں نُوں جان کے اوہناں نُوں آکھیا ہر اِک راج جِہدے وِچ پُھٹ پئے۔ برباد ہو جاندا اے۔ تے اوہ گھر جِہدے وِچ پُھٹ پئے اُجّڑ جاندا اے۔ سو جے شیطان اپنے ای برخلاف ہو جائے تے اوہدا راج کِیویں قیم رہے گا؟ کیوں جو تُسی آکھدے ہو پئی۔ مَیں بد رُوحاں نُوں بَعلزبُول دے ولّوں کڈھناں آں۔ تے جے مَیں بَعلزبُول دے ولّوں بد رُوحاں نُوں کڈھ نا آں تاں دسوں تُہاڈے پُتر کِدے ولّوں کڈھدے نیں؟ بس اوہ تُہاڈا نبیڑا کرن گے۔ پر جے مَیں خُدا دی اُنگلی نال بد رُوحاں نُوں کڈھناں آں۔ تے خُدا دا راج تُہاڈے کول آ پہنچیا۔ جد کوئی زوراور بندہ ہتّھیار بَنّھ کے اپنے گھر دا پَہرا دیوے تے اوہدے مال دی حفاظت ہوندی اے۔ پر جد اوہدے نالوں کوئی زوراور اوہدے اُتّے حملہ کر کے جِتّے۔ تے سارے ہتّھیار جِہدے اُتّے اوہدا مان سی اوہ کھوہ لَیندا اے۔ تے اوہدا مال لُٹ کے ونڈ دیندا اے۔ جیہڑا میرے نال نئیں اے اوہ میرے خلاف اے۔ تے جیہڑا میرے نال اکٹّھا نئیں کر دا۔ سو کھِلار دا اے۔ جد پلِیت رُوح بندے وِچوں نِکل دی اے۔ تے اوہ سُکّیاں تھانواں وِچ آرام لَبھّدی پِھردی اے۔ تے نا لَبّھ کے آکھ دی اے پئی مَیں اپنے گھر نُوں جِتّھوں نِکلی آں مُڑ جاواں گی۔ تے آ کے اوہنوں جھاڑیا تے سنواریا ہویا ویکھدی اے۔ تَد اوہ جاندی تے اپنے نالوں بُریاں ہور سَتّ رُوحاں نُوں نال لیاؤندی اے۔ تے اوہ وِچ وڑ کے اوتھے وسدِیاں نیں۔ تے اوس بندے دا پِچّھلا حال پہلے نالوں بَھیڑا ہو جاندا اے۔ تے جد اوہ ایہہ گلّاں پیا کر دا سی تے اینج ہویا۔ پئی اِک زنانی نے بِھیڑ وِچوں اُچّی اُچّی اوہنوں آکھیا دھنّ اے اوہ کُکھ جِہدے وِچ تُوں رِہئیا۔ تے اوہ چھاتی جیہڑی تُوں چُنگھی۔ پر اوس آکھیا ہاں سگوں بُہتے دھنّ اوہ نیں جیہڑے خُدا دا کلام سُندے تے اوہدے اُتّے عمل کر دے نیں۔ جد بِھیڑ اوہدے کول جمع پئی ہوندی سی اوہ آکھن لگّا پئی ایس زمانے دے لوک بُرے نیں اوہ نِشان لبّھدے نیں پر یُوناہ دے نِشان دے سِوا ہور کوئی نِشان اوہناں نُوں دِتّا نا جائے گا۔ کیوں جو جیویں یُوناہ نِینوہ دے لوکاں لئی نِشان ہویا اوسے طرح اِبنِ آدم وی ایس زمانے دے لوکاں لئی ہوئے گا۔ دَکھّن دی رانی عدالت وِچ ایس زمانے دیاں لوکاں نال اُٹھے گی۔ تے اوہناں نُوں مُجرم کرے گی۔ کیوں جو اوہ تے سُلیمان دی حِکمت سُنن لئی زمین دِیاں حداں توں آئی۔ تے ویکھو اِک جیہڑا سُلیمان نالوں وَڈا اے۔ ایتھے موجُود اے۔ نِینوہ دے لوک عدالت وِچ ایس زمانے دے لوکاں نال اُٹھن گے۔ تے اوہناں نُوں مُجرم کرن گے۔ کیوں جو اوہناں یُوناہ دی منادی سُن کے تَوبہ کِیتی۔ تے ویکھو۔ اِک جیہڑا یُوناہ نالوں وَڈا اے۔ ایتھے موجُود اے۔ کوئی دِیوا بال کے اوہلے یا ٹوپے ہیٹھ نئیں رکھدا۔ سگوں ڈیوڑی اُتّے رکھدا اے۔ تاں جو اندر آن والے چانن ویکھن۔ تیری اَکھ تیرے بدن دا دِیوا اے۔ جد تیری اَکھ صاف اے۔ تے تیرا سارا بدن وی چاننا اے۔ تے جد خراب اے۔ تے تیرا بدن وی ہنیرا اے۔ ویکھ فیر متے تیرے اندر دا چانن ہنیرا نا ہوئے۔ سو جے تیرا سارا بدن چاننا ہوئے تے کوئی انگ ہنیرا نا رہے۔ تے سارا چاننا ہوئے گا۔ جیویں دِیوا اپنی روشنی نال تینُوں چانن دیندا اے۔ جد اوہ گلّ پیا کر دا سی کِسے فریسی اوہدے کول عرض کِیتی۔ پئی اَج میری روٹی کھا۔ تَد اوہ اندر جا کے کھان بَیٹھا۔ تے فریسی ویکھ کے حَیران ہویا پئی اوہ کھان توں پہلاں کیوں نئیں نہاتا۔ پر خُداوند اوہنوں آکھیا۔ اَے فرِیسیو۔ تُسی کٹورا تے تھال باہروں تے صاف کر دے اوہ۔ پر تُہاڈے اندر لُٹ تے بُریائی بھری ہوئی اے۔ نادانوں جِس باہر نُوں بنایا اوس اندر نُوں وی نئیں بنایا؟ پر ہاں اندرلیاں شیواں خَیرات کرو۔ تے ویکھو سبھ کُجھ تُہاڈے لئی پاک اے۔ پر اَے فرِیسیو! تُہاڈے اُتّے افسوس پئی تُسی پُودنے تے زِیرے تے ہر اِک سبزی دا دسواں حِصّہ دیندے ہو۔ تے انصاف تے خُدا دی مُحبّت نُوں چھڈ دیندے ہو۔ چاہیدا سی پئی ایہناں نُوں کر دے۔ تے اوہناں نُوں وی نا چھڈ دے۔ اَے فرِیسیو! تُہاڈے اُتّے افسوس۔ پئی تُسی عبادت خانیاں وِچ اُچیاں کُرسِیاں تے بازاراں وِچ سلام چاہندے ہو۔ تُہاڈے اُتّے افسوس۔ پئی تُسی اوہناں قبراں وانگر ہو جیہڑیاں دِسدیاں نئیں۔ تے لوک اوہناں دے اُتّے ٹُردے پِھردے بے خبر رہندے نیں۔ تَد شریعت دے سکھالن والیاں وِچوں کِسے اِک اوہنوں جواب دِتّا اَے اُستاد! ایہہ آکھ کے تُوں ساڈی وی بے عِزّتی کرنا ایں۔ اوس آکھیا اَے شریعت دے سکھالن والیو! تُہاڈے اُتّے وی افسوس۔ پئی تُسی ایہو جیہے بھار بندیاں اُتّے لَدّ دے اوہ جیہڑے مَساں چُکے جاندے نیں تے آپ اپنی اِک اُنگل نال اوہناں بھاراں نُوں نئیں ہلاؤندے۔ تُہاڈے اُتّے افسوس پئی تُسی نبیاں دِیاں قبراں بناندے اوہ۔ تے تُہاڈے وڈّیاں نیں اوہناں نُوں مار سُٹّیا سی۔ سو تُسی اپنے وڈّیاں دے کمّاں دے گواہ اوہ۔ تے اوہناں اُتّے راضی ہوندے اوہ۔ کیوں جو اوہناں تے اوہناں نُوں قتل کِیتا تے تُسی اوہناں دِیاں قبراں بناندے اوہ۔ ایسے لئی خُدا دی حِکمت نے وی آکھیا اے پئی مَیں نبیاں تے رسُولاں نُوں اوہناں کول گھلاں گی تے اوہ اوہناں وِچوں کئیاں نُوں مار سُٹّن گے تے کئیاں نُوں ستان گے۔ تاں جو سارے نبیاں دا خُون جیہڑا دُنیا دے مُڈھوں ڈوہلیا گیا۔ سو ایس زمانے توں بھریا جائے۔ ہابل دے خُون توں لے کے زکریاہ دے خُون تِیکر جیہڑا قُربان گاہ تے ہیکل دے وِچکار ماریا گیا۔ مَیں تُہانوں سَچ آکھنا آں پئی ایسے زمانے توں پُچھ پرتیت کِیتی جائے گی۔ اَے شریعت سکھالن والیو تُہاڈے اُتّے افسوس پئی تُساں گیان دی کُنجی کھو لئی۔ تُسی آپ وی اندر نا گئے۔ تے اندر جان والیاں نُوں وی روکیا۔ تے جد اوہ اوتھوں نِکلن لگّا تے فقِیہ تے فریسی پیڑی طرح اوہدے گل پَین لگّے تے بتھیریاں گلّاں دی بابت اوہدے نال بحث شُروع کِیتی۔ تے اوہدی سُوہ وِچ ایس آس اُتّے سن۔ پئی اوہدے مُنھوں کوئی گلّ پھڑ لئیے۔ اینے وِچ جد ہزاراں بندیاں دی بِھیڑ جمع ہوگئی۔ ایتھوں تِیکر پئی اِک دُوجے اُتّے ڈِگّدے پئے سن۔ تَد اوس ساریاں توں پہلاں اپنے شاگِرداں نُوں ایہہ آکھنا شُروع کِیتا پئی فرِیسیاں دے خمیر توں جیہڑا مکر اے ہُشیار رہو۔ کیوں جو کوئی شے ڈھکی ہوئی نئیں اے جیہڑی کھولی نا جائے گی تے نا کوئی شے لُکی ہوئی اے۔ جیہڑی جانی نا جائے گی۔ ایس لئی پئی جیہڑیاں گلّاں تُساں ہنیرے وِچ آکھیاں نیں سو اوہ چاننے سُنائیاں جان گِیاں تے جو کُجھ تُساں کوٹھڑِیاں وِچ کنّوں کنّ بولیا اے۔ سو کوٹھیاں اُتّے اوہدا ڈھنڈورا کِیتا جائے گا۔ مَیں تُہانوں جیہڑے میرے دوست ہو۔ ایہہ آکھنا آں۔ پئی اوہناں کولوں نا ڈرو جیہڑے بدن نُوں مار سُٹ دے نیں تے اوہدے مگروں ہور کُجھ نئیں کر سکدے۔ پر مَیں تُہانوں دسنا آں پئی تُہانوں کِدے کولوں ڈرنا چاہیدا اے اوسے کولوں ڈرو جیہڑا اختیار رکھدا اے پئی مارن دے مگروں جہنّم وِچ سُٹ دیوے ہاں مَیں تُہانوں آکھنا آں۔ اوسے کولوں ڈرو۔ دو پَیسِیاں دِیاں پنج چِڑیاں نئیں وِکدِیاں؟ پر اوہناں وِچوں اِک وی خُدا دی درگاہے وساری ہوئی نئیں اے۔ سگوں تُہاڈے سِر دے سبھ وال وی گِنے ہوئے نیں۔ ڈرو نا بتھیریاں چِڑیاں نالوں تُہاڈی وَدّھ قدر اے۔ تے مَیں تُہانوں آکھنا آں۔ پئی ہر اِک جیہڑا بندیاں اگّے میرا اِقرار کرے گا۔ اِبنِ آدم وی خُدا دے فرِشتیاں اگّے اوہدا اِقرار کرے گا۔ پر جیہڑا بندیاں اگّے میرا اِنکار کرے۔ خُدا دے فرِشتیاں دے اگّے اوہدا اِنکار کِیتا جائے گا۔ تے ہر اِک جیہڑا اِبنِ آدم دے برخلاف گلّ آکھے گا اوہنوں مُعاف کِیتا جائے گا۔ پر جیہڑا پاک رُوح دے حق وِچ کُفر بولے اوہنوں مُعاف نا کِیتا جائے گا۔ تے جد اوہ تُہانوں عبادت خانیاں وِچ تے حاکماں تے اختیار والیاں دے اگّے لے جان تے فِکر نا کرو۔ پئی اسی کِس طرح دا یا کِیہ عُذر کریئے۔ یا کِیہ آکھیئے۔ کیوں جو پاک رُوح اوسے گھڑی تُہانوں سکھالے گا۔ پئی کِیہ آکھنا چاہیدا اے۔ تے بِھیڑ وِچوں کِسے اوہنوں آکھیا اَے اُستاد میرے بھرا نُوں آکھ پئی وِرثہ مَینُوں ونڈ دے۔ پر اوس اوہنوں آکھیا کِس مَینُوں تُہاڈے اُتّے قاضی یا ونڈن والا بنایا؟ تے اوس اوہناں نُوں آکھیا خبردار رہو تے ہر قِسم دے لالچ توں بچے رہو۔ کیوں جو کِسے دی زِندگی اوہدے مال دے وادھے نال نئیں اے۔ تے اوس اوہناں نُوں اِک تمثِیل سُنائی پئی کِسے دَولت مند دِیاں پَیلِیاں وِچ بڑی فصل ہوئی۔ اوہ اپنے دِل وِچ وچار کر کے آکھن لگّا۔ پئی مَیں کِیہ کراں۔ کیوں جو میرے کول تھاں نئیں جِتّھے اپنی کھیتی جمع کراں؟ تے اوس آکھیا مَیں اینج کراں گا پئی اپنیاں کوٹھِیاں ڈھاواں گا۔ تے وڈّیاں بناواں گا تے اوتھے اپنا سارے دانے تے اپنا مال جمع کراں گا۔ تے اپنی جان نُوں آکھاں گا۔ اَے جان تیرے کول بُہت سارا مال کئیاں ورھیاں لئی پیا ہویا اے مَوج کر کھا پی خُوش رہو۔ پر خُدا اوہنوں آکھیا اَے نادان اَجّو رات نُوں تیری جان تَیتھوں منگی جاندی اے۔ سو جو کُجھ تُوں تیار کِیتا اے۔ اوہ کِدا ہوئے گا؟ ایسے طرح اوہ اے جیہڑا اپنے لئی خزانہ اکٹّھا کر دا اے۔ تے خُدا اگّے دَولت مند نئیں اے۔ تے اوس اپنے شاگِرداں نُوں آکھیا۔ مَیں ایس کر کے تُہانوں آکھنا آں پئی اپنی جان دا فِکر نا کرو۔ پئی اسی کِیہ کھاواں گے۔ تے نا اپنے بدن دا پئی کِیہ پاواں گے۔ کیوں جو جان خُوراک نالوں تے بدن پوشاک نالوں وَدّھ کے اے۔ کانواں ولّ دھیان کرو۔ نا اوہ بِیجدے نا وَڈّھدے نیں نا اوہناں کول کوٹھا نا کھلواڑہ اے۔ تے خُدا اوہناں نُوں پالدا اے۔ تُہاڈی قدر پنچھیاں نالوں کِنی بوہتی اے۔ کون اے تُہاڈے وِچوں جیہڑا فِکر کر کے اپنا قد اِک ہتّھ وَدّھا سکے؟ سو جد نِکّے توں نِکّا کمّ نئیں کر سکدے۔ تے کیوں ہورناں شیواں دی فِکر کر دے ہو۔ پُھلّاں ولّ دھیان کرو پئی اوہ کِیویں وَدھدے نیں۔ اوہ نا محنت کر دے نیں نا کَتّدے نیں۔ پر مَیں تُہانوں آکھنا آں۔ پئی سُلیمان وی اپنی ساری شان وِچ ایہناں وِچوں اِک ورگا وی نئیں سی پاندا۔ خُدا جد اوس گھاہ نُوں جیہڑا اَج اے تے بھلکے بھٹّھی وِچ واڑِیاں جاندا اے۔ ایس طرح دی پاندا اے۔ تے اَے گھٹ اِیمان والیو۔ اوہ تُہانوں کِنّاں وَدّھ نا پائے گا۔ تے تُسی ایس گلّ دی بھال نا کرو۔ پئی اسی کِیہ کھاواں گے۔ تے کِیہ پِیاں گے۔ تے دلِیلاں وِچ نا پَوو۔ کیوں جو ایہناں سارِیاں شیواں دی بھال دُنیا دِیاں قوماں کر دیاں نیں۔ پر تُہاڈا باپ جان دا اے۔ پئی تُہانوں ایہناں دی لوڑ اے۔ سگوں اوہدی بادشاہی دی بھال کرو۔ تے تُہانوں ایہہ شیواں وی مل جان گِیاں۔ اَے چھوٹے اِجّڑ نا ڈر۔ کیوں جو تُہاڈے باپ نُوں پسند آیا۔ پئی تُہانوں بادشاہی دیوے۔ اپنا مال ویچ کے خَیرات کرو تے اپنے لئی اوہ بٹوے بناؤ جیہڑے پرانے نئیں ہوندے۔ تے اوہ خزانہ جیہڑا تُھڑدا نئیں مطلب اسماناں دے وِچ جِتّھے چور نیڑے نئیں آؤندا تے نا کِیڑا خراب کر دا اے۔ کیوں جو جِتّھے تُہاڈا خزانہ اے۔ اوتھے تُہاڈا دِل لگّا رہے گا۔ تُہاڈے لکّ بَدّھے تے تُہاڈے دِیوے بَلدے رہن۔ تے تُسی آپ اوہناں بندیاں وانگر ہو جیہڑے اپنے مالک دا راہ اُڈِیکدے نیں۔ پئی اوہ کدوں ویاہ توں مُڑ آوے گا۔ تاں جو اوہ آوے تے کھڑکاوے اونویں ای اوہدے لئی بُوہا کھول دین۔ دھنّ نیں اوہ نوکر جِنہاں دا مالک آ کے اوہناں نُوں جاگدیاں ویکھے۔ مَیں تُہانوں سَچ آکھنا آں۔ پئی اوہ آپ لکّ بَنّھ کے کھان لئی اوہناں نُوں بٹھائے گا۔ تے کول آ کے اوہناں دی سیوا کرے گا۔ تے بھانویں اوہ دُوجے یا ترِیجے پَہر نُوں آوے تے ایس طرح ویکھے تے اوہ دھنّ نیں۔ تے ایہہ جانو پئی جے گھر دے مالک نُوں پتا ہوندا پئی چور کیہڑی گھڑی آوے گا۔ تے جاگدا رہندا تے اپنے گھر نُوں سَنّھ لگّن نا دیندا۔ تُسی وی تیار رہو۔ پئی جِس گھڑی تُہانوں خیال نا ہوئے گا۔ اِبنِ آدم آ جاوے گا۔ تَد پطرس آکھیا اَے خُداوند۔ تُوں ایہہ تمثِیل سانُوں ای آکھنا ایں یا ساریاں نُوں؟ خُداوند آکھیا کیہڑا اے اوہ اعتباری تے داناکار مُختِیار جِہنُوں مالک اپنے نَوکراں اُتّے مُقرّر کرے۔ پئی ویلے سر رسد ونڈ دیوے؟ دھنّ اے اوہ نوکر جِہنُوں اوہدا مالک آ کے ایسے طرح کر دیاں ویکھے۔ مَیں تُہانوں سَچ آکھنا آں پئی اوہ اوہنوں اپنے سارے مال اُتّے مُقرّر کرے گا۔ پر جے کر اوہ نوکر اپنے جی وِچ آکھے۔ پئی میرا مالک آؤن وِچ چِر لاندا اے۔ تے ٹہلئے ٹہلناں نُوں مارنا شُروع کرے۔ تے کھان پِین تے مست ہون لگّے۔ تے اوس نوکر دا مالک اوس دِن جدوں اوہنوں اُڈِیک نا ہوئے تے اوس گھڑی جِہدا اوہنوں پتا نا ہوئے آوے گا۔ تے اوہنوں بڑے کولڑے لا کے اوہنوں بے اِیماناں وِچ رلائے گا۔ تے اوہ نوکر جِس اپنے مالک دی مرضی جانی پر تیار نا رہیا۔ نا اوہدی مرضی دے سببّوں کمّ کِیتا بڑی مار کھائے گا۔ پر جِس نا جانیا۔ تے مار کھان دا کمّ کِیتا اوہ تھوڑی مار کھائے گا۔ سو جِس کِسے نُوں بوہتا دِتّا جائے گا اوہدے کولوں بُہت پُچھ ہوئے گی۔ تے جِہنُوں بُہت سپُرد ہویا اوہدے توں وَدّھ منگیا جائے گا۔ مَیں زمین اُتّے اَگ لان آیا آں۔ تے جے کر لگ گئی ہوندی۔ تے مَیں بڑا خُوش ہوندا۔ پر مَیں اِک بپتِسمہ لینا اے۔ تے جِنّاں چِر اوہ پُورا نا ہوئے مَیں بڑا اَوکھا رہاں گا۔ تُہاڈا کِیہ خیال اے۔ پئی مَیں زمین اُتّے میل کران آیا آں؟ نئیں مَیں تُہانوں آکھنا آں۔ سگوں جُدائی کران۔ کیوں جو ایدوں اگّے اِک گھر دے پنجاں بندیاں وِچ جُدائی ہوئے گی تَرے دوہاں دے تے دو تِنّاں دے برخلاف۔ پئیو پُتر دے خلاف ہوئے گا۔ تے پُتر پئیو دے۔ ماں دِھی دے تے دِھی ماں دے۔ سَس نُونہہ دے۔ تے نُونہہ سَس دے برخلاف۔ اوہنے بِھیڑ نُوں ایہہ وی آکھیا پئی جدوں تُسی بدّل لہندے پاسیوں چڑھدا ویکھ دے اوہ۔ تے اونویں آکھدے ہو۔ پئی مینہ آؤندا اے۔ تے اوسے طرح ہوندا اے۔ تے جد دَکھّن دی وَا وَگدی اے۔ تے آکھدے ہو۔ پئی سیک ہوئے گا۔ تے اوہ ہوندا اے۔ اَے مکّارو زمین اسمان دے رنگاں دا جاچناں تُہانوں آؤندا اے۔ ایس سَمے دی جاچ کرنی کیوں نئیں آؤندی؟ تے تُسی اپنے ولّوں کیوں فیصلہ نئیں کر دے۔ پئی حق کِیہ اے۔ تے جد تُوں حاکم دے سامھنے اپنے مُدّعی نال جانا ایں تے راہ وِچ اوہدے کولوں چُھٹ جان دا حیلہ کر۔ کِتے اِنج نا ہوئے پئی اوہ تینُوں حاکم دے اگّے کھِچّ کھڑے۔ تے حاکم تینُوں سپاہی دے حوالے کرے۔ تے سپاہی تینُوں قیدے پا دیوے۔ مَیں تینُوں آکھنا آں جد تِیکر کَوڈی کَوڈی نا بھریں تُوں اوتھوں نا چُھٹیں گا۔ اوس ویلے کئی اِک اوتھے آئے سن جیہڑے اوہنوں اوہناں گلِیلِیاں دی بارے خبر دیندے سن جِنہاں دا خُون پِیلاطُس اوہناں دِیاں قُربانِیاں دے نال مِلایا سی۔ تے اوس جواب دِتّا۔ تُسی کِیہ سمجھدے ہو۔ پئی ایہہ گلِیلی ساریاں گلِیلِیاں نالوں وَدّھ گُناہیں سن پئی اوہناں اِنج دُکھ پایا اے؟ مَیں تُہانوں آکھنا آں پئی نئیں۔ پر جے تُسی تَوبہ نا کرو۔ تے تُسی سبھو ایسے طرح ہلاک ہوؤگے۔ یا اوہ اٹھاراں جِنہاں اُتّے شِیلوخ وِچ بُرج ڈِگّا تے اوہناں نُوں مار دِتّا تُسی سمجھدے اوہ۔ پئی یرُوشلِیم دے سارے رہن والیاں نالوں اوہ وَدّھ تقصِیری سن؟ مَیں تُہانوں آکھنا آں نئیں۔ پر جے تُسی تَوبہ نا کرو تے سبھو ایسے طرح ہلاک ہوؤگے۔ تے اوس ایہہ تمثِیل آکھی پئی کِسے دے انگور دے باغ وِچ اِک ہنجیر دا رُکھّ لایا ہویا سی تے اوہ پَھل لَبّھن نُوں آیا۔ پر نا لَبھّا۔ تَد اوس مالی نُوں آکھیا ویکھ تِنّاں ورھیاں توں مَیں آ کے ایس انجِیر دے بُوٹے اُتّے پَھل لبّھنا آں پر نئیں لَبّھ دا۔ ایہنوں وَڈّھ سُٹ۔ ایہہ کاہِنُوں زمین نُوں وی روکے۔ اوس جواب دِتّا۔ اَے مالک! ایس سال وی اوہنوں رہن دے تاں جو مَیں اوہدے دوالے گوڈی کراں تے رُوڑی پاواں۔ تے جے اوہ اگّے نُوں پَھل دیوے تے خَیر۔ نئیں تے اوہنوں وَڈّھا چھڈیں۔ تے سبت دے دِن اوہ عبادت خانے وِچ تعلِیم پیا دیندا سی۔ تے ویکھو اِک زنانی سی جِہنُوں اٹھاراں ورھیاں توں کمزور کرن والی رُوح چمبڑی ہوئی سی تے اوہ کُبّی ہوگئی سی تے کِسے طرح نال اوہ سِدّھی نئیں سی ہو سکدی۔ یِسُوع اوہنوں ویکھ کے کول سدّیا تے اوہنوں آکھیا۔ اَے بی بی تُوں اپنی کمزوریوں چُھٹ گئی ایں۔ تے اپنے ہتّھ اوہدے اُتّے رکھّے۔ تے اوسے ویلے اوہ سِدّھی ہوگئی۔ تے خُدا دی وڈیائی کرن لگّی۔ تَد عبادت خانے دا سردار ایس لئی پئی یِسُوع سبت دے دِن چَنگا کِیتا غُصّے ہو کے لوکاں نُوں آکھن لگّا۔ پئی چھ دِن نیں جِنہاں وِچ کمّ کرنا چاہیدا اے۔ سو اوہناں وِچ آ کے علاج کراؤ۔ نا سبت دے دِن۔ خُداوند نے اوہنوں جواب وِچ آکھیا۔ اَے مکّارو! تُہاڈے وِچوں ہر کوئی سبت دے دِن اپنے ڈھگّے یا کھوتے نُوں کُھرلیوں نئیں کھولدا تے پانی ڈاہن نُوں نئیں لے جاندا؟ ایس زنانی نُوں جیہڑی ابرہام دی دِھی اے جِہنُوں شیطان اٹھاراں ورھیاں توں بَنّھ رکھیا سی۔ اوہنوں سبت دے دِن ایس بند توں چھڈاؤنا نئیں سی چاہیدا؟ تے جد اوہ ایہہ گلّاں پیا کر دا سی۔ اوہدے سارے مخالف شرمندے ہوئے تے سارے لوک اوہناں جلال والیاں کمّاں دے سبّب جیہڑے اوس کِیتے خُوش سن۔ اوس آکھیا خُدا دی بادشاہی کِدے وانگر اے؟ تے مَیں اوہنوں کِدے وانگر آکھاں؟ اوہ رائی دے دانے وانگر اے۔ جِہنُوں کِسے بندے لے کے باغ وِچ سُٹّیا تے اوہ وَدّھیا تے وَڈا رُکھّ بن گیا۔ تے اسمان دے پنچھیاں اوہدی ٹہنِیاں اُتّے آہلنے بنائے۔ فیر اوس آکھیا مَیں خُدا دی بادشاہی نُوں کِہدے وانگر آکھاں؟ اوہ خمیر وانگر اے۔ جِہنُوں اِک زنانی لے کے تِنّ ٹوپے آٹے وِچ مِلایا۔ ایتھوں تِیکر پئی اوہ سارا خمیر ہوگیا۔ تے اوہ یرُوشلِیم دے سفر وِچ شہر شہر پِنڈ پِنڈ تعلِیم دیندا جاندا سی۔ تَد اوہنوں کِسے آکھیا۔ اَے خُداوندا۔ کِیہ نجات پان والے تھوڑے نیں؟ اوس اوہناں نُوں آکھیا۔ دِلوں کوشش کرو۔ پئی بِھیڑے بُوہے توں وڑو۔ کیوں جو مَیں تُہانوں آکھناں آں۔ پئی بتھیرے وڑنا چاہن گے پر وڑ نا سکن گے۔ جدوں گھر دے مالک اُٹھ کے بُوہا مار لیا۔ تے تُسی باہر کھلو کے بُوہا کھڑکاندیاں ایہہ آکھن لگّو۔ پئی اَے خُداوندا۔ ساڈے لئی کھول دے۔ تے اوہ تُہانوں جواب دے گا۔ پئی مَیں تُہانوں نئیں جان دا پئی کِتّھوں دے ہو۔ تَد تُسی آکھن لگّو گے۔ پئی اساں تے تیرے سامھنے کھادا پِیتا تے تُوں ساڈیاں بازاراں وِچ تعلِیم دِتّی۔ پر اوہ آکھے گا۔ مَیں تُہانوں آکھنا آں مَیں نئیں جان دا پئی تُسی کِتّھوں دے ہو۔ اَے سارے بدکارو۔ میرے کولوں دُراڈے ہو جاؤ۔ اوس تھاں رونا تے کچیچیاں وٹنا ہوئے گا۔ جد ابرہام نُوں تے اِضحاق نُوں تے یعقُوب نُوں تے سارے نبیاں نُوں خُدا دی بادشاہی وِچ شریک تے اپنے آپ نُوں باہر کڈھیاں ہویا ویکھو گے۔ تے لوک چڑھدیوں لہندیوں تے پہاڑوں دکھنوں آؤن گے۔ تے خُدا دی بادشاہی وِچ بیہن گے۔ تے دھیان کرو پئی کئی چھیکڑلے نیں جیہڑے پہلے ہون گے۔ تے کئی پہلے نیں جیہڑے چھیکڑلے ہون گے۔ اوسے گھڑی کئی فرِیسیاں آ کے اوہنوں آکھیا۔ چَل نِکل تے ایتھوں ٹُر جا۔ کیوں جو ہیرودیس تینُوں جانوں مارنا چاہندا اے۔ اوس اوہناں نُوں آکھیا جا کے اوس لُومبڑ نُوں آکھو پئی ویکھ مَیں بدرُوحاں نُوں کڈھناں آں تے اَج تے بھلکے چَنگا پیا کرنا آں۔ تے ترِیجے دِن نُوں پُورا ہو جاواں گا۔ پر مَینُوں ضرُور اے۔ پئی اَج تے بھلکے تے پرسوں اپنی راہ ٹُراں۔ کیوں جو ہو نئیں سکدا۔ پئی نبی یرُوشلِیم توں باہر ماریا جائے۔ اَے یرُوشلِیم۔ اَے یرُوشلِیم۔ جیہڑی نبیاں نُوں مار سُٹّنی ایں۔ تے اوہناں نُوں پتّھراؤ کرنی ایں جیہڑے تیرے کول گھلّے گئے نیں۔ مَیں کِنی ای واری چاہیا۔ پئی جیویں کُکّڑی اپنے چُوچیاں نُوں کھنباں ہیٹھ اکٹّھے کر دی اے۔ مَیں تیرے بالاں نُوں اکٹّھیاں کراں۔ پر تُوں نئیں چاہندی سَیں۔ ویکھو تُہاڈا گھر تُہاڈے لئی اُجاڑ چھڈیا جاندا اے۔ تے مَیں تُہانوں آکھنا آں۔ ہُن توں لے کے تُسی مَینُوں نا ویکھو گے جد توڑی ایہہ نا آکھو گے۔ پئی دھنّ اے اوہ جیہڑا خُداوند دے ناں اُتّے آؤندا اے۔ تے ایویں ہویا پئی اوہ سبت دے دِن فرِیسیاں دے کِسے سردار دے گھر روٹی کھان گیا۔ تے اوہ اوہدی سُوہ وِچ سن۔ تے ویکھو اِک اوہدے سامھنے سی جِہنُوں جلودھر سی۔ تے شریعت دے سکھالن والیاں تے فرِیسیاں نُوں یِسُوع آکھیا۔ سبت دے دِن چَنگا کرنا جائز اے۔ کہ نئیں؟ تے اوہ چُپ کر رہے۔ تَد اوس اوہنوں لے کے چَنگا کِیتا تے اوہنوں بھیج دِتّا۔ تے اوس اوہناں نُوں آکھیا۔ تُہاڈے وِچوں کیہڑا اے جِہدا کھوتا یا ڈھگّا کُھوہ وِچ ڈِگّیا ہوئے۔ تے اوہ اوہنوں سبت دے دِن چھیتی نال نا کڈھے؟ تے اوہ ایہناں گلّاں دا جواب نا دے سکے۔ تے جد اوس پَروہنیاں نُوں ویکھیا۔ پئی اوہ کِیویں عِزّت والی تھاں چُن لَیندے سن۔ تَد ایہہ تمثِیل دے کے اوہناں نُوں آکھیا۔ جد کوئی تینُوں ویاہ وِچ سَدّے تے عِزّت والی تھاں نا جا بَہو۔ خبرے اوس تیرے نالوں کِسے وڈّے نُوں نا سدّیا ہوئے؟ تے اوہ جِنّہے تینُوں تے اوہنوں سدّیا اے۔ آ کے تینُوں آکھے ایہدے لئی تھاں چھڈ۔ تے تَد شرمندہ ہو کے تینُوں ساریاں توں پچھا نا بہنا پَوے۔ سگوں جد تُوں سدّیا گِئیوں تے ساریاں توں پِچّھلے تھاں جا بَہہ۔ تاں جو جِنّہے تینُوں سدّیا اے جد آوے۔ اوہ تینُوں آکھے اَے دوست آ اگانہہ ہو بَہو۔ تَد اوہناں ساریاں دی نظر وِچ جیہڑے تیرے نال کھان بَیٹھے نیں۔ تیری بڑی عِزّت ہوئے گی۔ کیوں جو ہر اِک جیہڑا اپنے آپ نُوں اُچیاں کر دا اے۔ سو نِیواں کِیتا جائے گا۔ تے جیہڑا اپنے آپ نُوں نِیواں کر دا اے۔ اوہ اُچّا کِیتا جائے گا۔ تَد اوس اوہنوں وی جِس اوہنوں سدّیا سی آکھیا جد تُوں دِنیں یا راتِیں روٹی تیار کریں تے نا اپنے دوستاں تے نا اپنے بھراواں نا اپنے ساکاں تے نا دَولت مند گوانڈِھیاں نُوں سدِّیں۔ کِتے اِنج نا ہوئے پئی اوہ وی تینُوں سَدّن۔ تے تینُوں بدلہ مِل جائے۔ سگوں جد تُوں اکٹّھ کریں تے غرِیباں لُولیاں لَنگیاں تے اَنھیاں نُوں سدِّیں۔ تَد تُوں مُبارک ہوویں گا کیوں جو اوہناں دے پلّے کُجھ نئیں اے۔ پئی تینُوں بدلہ دین۔ سو تینُوں نیکاں دی قیامت وِچ بدلہ دِتّا جائے گا۔ تے اوہناں وِچوں جیہڑے اوہدے نال کھان بَیٹھے سن اِک ایہہ سُن کے اوہنوں آکھیا۔ دھنّ اے اوہ جیہڑا خُدا دی بادشاہی وِچ روٹی کھائے گا۔ پر اوس اوہنوں آکھیا کِسے بندے نے چوکھی روٹی پکائی تے بتھیریاں نُوں سدّیا۔ تے کھان دے ویلے اپنے نوکر نُوں گھلّیا۔ پئی سدّیاں ہویاں نُوں آکھے۔ پئی آؤ کیوں جو ہُن روٹی تیار اے۔ تے اوہ سارے مل کے عُذر کرن لگّے پہلے نے اوہنوں آکھیا مَیں تے پَیلی مُل لئی اے۔ مَینُوں لوڑ اے پئی اوہنوں ویکھن جاواں۔ میری عرض اے پئی مَینُوں رہن دے۔ تے دُوجے آکھیا۔ مَیں پنج جوگاں ڈھگّے مُل لَئے نیں۔ اوہناں نُوں واہ کے ویکھن جاناں اے۔ میری عرض اے پئی مَینُوں رہن دے۔ تے ترِیجے آکھیا مَیں ویاہ کِیتا اے تے ایس واسطے مَیں آ نئیں سکدا۔ سو نوکر جا کے اپنے مالک نُوں ایہناں گلّاں دی خبر سُنائی۔ تَد غُصّے ہو کے گھر دے مالک اپنے نوکر نُوں آکھیا۔ چھیتی نال نِکل کے شہر دیاں چَوکاں تے گلِیاں وِچ جا۔ تے غرِیباں تے لُولیاں تے لَنگیاں تے اَنھیاں نُوں ایتھے اندر لے آ۔ تے نوکر آکھیا اَے مالک۔ جیویں تُوں حُکم دِتّا۔ تِہا ای ہویا تے اجے وی تھاں اے۔ مالک نوکر نُوں آکھیا۔ سڑکاں تے بنّیاں ولّ جا تے دھکّے نال لوکاں نُوں اندر لے آ۔ پئی میرا گھر بھر جائے۔ کیوں جو مَیں تُہانوں آکھنا آں پئی اوہناں بندیاں وِچوں جیہڑے سَدّے گئے سن کوئی میرا کھانا نا چکھّے گا۔ تے بڑی خلقت اوہدے نال ٹُری جاندی سی تے اوس پِچھّاں مُڑ کے اوہناں نُوں آکھیا۔ جے کوئی میرے ولّ آوے۔ تے اپنے پئیو تے ماں نال تے بیوی تے بالاں نال تے بھراواں تے بھیناں نال سگوں اپنی ای جان نال وی وَیر نا رکھّے۔ اوہ میرا شاگِرد نئیں ہوسکدا۔ جیہڑا اپنی صلِیب چُک کے میرے مگر نا آوے۔ میرا شاگِرد نئیں ہو سکدا۔ تُہاڈے وِچوں کیہڑا اے۔ جِس بُرج اُسارن دی دلیل کِیتی ہوئے تے پہلاں بَہہ کے خرچے دا حِساب نا کرے۔ پئی اوہنوں تیار کر سَکاں گا کہ نئیں؟ کِتے اجیہا نا ہوئے پئی جد اوس نِینّھ رکھی تے کمّ نُوں مُکا نا سکیا۔ تے سارے ویکھن والے اوہدے اُتّے ایہہ آکھ کے ہسّن۔ پئی ایس بندے اُساری شُروع کِیتی۔ پر مُکا نا سکیا۔ کیہڑا بادشاہ دُوجے بادشاہ نال جد لڑائی نُوں جاوے۔ پہلاں بَہہ کے صلاح نا کرے گا۔ پئی مَیں دَس ہزار لے کے اوہدے نال لڑ سَکاں گا کہ نئیں۔ جیہڑا وِیہہ ہزار لے کے میرے اُتّے چڑھ آؤندا اے؟ نئیں تے جدوں دُوجا اجے دُراڈے ای اے اوہ لاگی گھل کے صُلح صفائی دِیاں شرطاں پُچھے گا۔ سو ایسے طرح تُہاڈے وِچوں بھانویں کوئی ہوئے جیہڑا اپنا سبھو کُجھ چھڈ نا دے اوہ میرا شاگِرد نئیں ہو سکدا۔ لُون تے چنگی شے اے پر جے لُون دا سواد وِگڑ جائے۔ تے اوہ کاہدے نال سوادلا کِیتا جائے گا؟ نا اوہ زمین دے تے نا رُوڑی دے کمّ دا رہیا۔ لوکی اوہنوں باہر سُٹ چھڈ دے نیں۔ جِہدے سُنن دے کنّ ہون سُنے۔ تَد سارے محصُولئے تے گُنہگار لوک اوہدی سُنن لئی اوہدے نیڑے آوندے سن۔ تے فریسی تے فقِیہ بُڑبُڑ کر کے آکھن لگّے پئی ایہہ بندہ گُناہِیاں نُوں قبولدا تے اوہناں نال کھاندا اے۔ تَد اوس اوہناں نُوں ایہہ تمثِیل سُنائی۔ پئی تُہاڈے وِچوں کیہڑا بندہ اے۔ جِہدِیاں سَو بھیڈاں ہون تے اوہناں وِچوں اِک گواچ جائے۔ تے اوہ نڑنّویاں نُوں اُجاڑ وِچ چھڈ کے اوس گواچی ہوئی دے مگر نا جائے جد تِیکر نا لَبھّے۔ تے لَبّھ کے خُوشی نال اپنے موڈھیاں اُتّے رکھ نا لَئے۔ تے جد گھر اَپڑے دوستاں تے گوانڈِھیاں نُوں سَدّ کے اوہناں نُوں نا آکھے پئی میرے نال خُوشی کرو۔ کیوں جو مَیں اپنی گواچی ہوئی بھیڈ لَبّھی۔ مَیں تُہانوں آکھنا آں۔ پئی ایسے طرح اسمان وِچ اِک تَوبہ کرن والے گُنہگار دے سبّب نڑنّویاں نیکاں نالوں جِنہاں نُوں تَوبہ دی لوڑ نئیں اے۔ وَدّھ خُوشی ہوئے گی۔ یا کیہڑی زنانی اے جَدے کول دَس دِرم ہون جے اوہدے کولوں اِک گواچ جائے تے اوہ دِیوا بال کے گھر نُوں نا ہُونجے۔ تے کوشش نال لَبھّدی نا رہے جِنّاں چِکر اوہنوں لَبّھ نا لیئے؟ تے جد لَبّھ لیئے سہیلیاں تے گوانڈِھیاں نُوں سَدّ کے نا آکھے پئی میرے نال خُوشی کرو۔ کیوں جو مَیں اپنا گواچیا دِرم لَبّھ لیا۔ ایسے طرح مَیں تُہانوں آکھنا آں پئی خُدا دے فرِشتیاں دے اگّے اِک تَوبہ کرن والے گُنہگار دی بابت بُہت خُوشی ہوندی اے۔ فیر اوس آکھیا کِسے بندے دے دو پُتر سن۔ اوہناں وِچوں نِکّے پئیو نُوں آکھیا۔ اَے ابّا! وِرثہ دا حِصّہ جیہڑا مَینُوں آؤندا اے۔ مَینُوں دے دے۔ اوس اپنا مال اوہناں نُوں ونڈ دِتّا۔ تے تھوڑے دِناں پِچّھوں نِکّے پُتر سبھو کُجھ اکٹّھیاں کِیتا تے دُوردراڈے دیس ٹُرگیا۔ تے اوتھے اپنا مال بدچلنی وِچ اُڈا دِتّا۔ تے جد اوہنے سارا خرچ کر لیا۔ تَد اوس دیس وِچ ڈاڈھا کال پیا۔ تے اوہنوں تُھڑ آؤن لگّی۔ تَد اوس مُلک دے کِسے واسی دے کول جا رہیا۔ تے اوس اوہنوں اپنیاں پَیلِیاں وِچ سُؤر چارن گھلّیا۔ تے اوہدا جی کر دا سی پئی مَیں اوہناں پَھلِیاں نال جیہڑیاں سُؤر کھاندے نیں اپنا ڈِھڈ بھراں تے کوئی اوہنوں کُجھ نئیں سی دیندا۔ تَد اوس ہوش وِچ آ کے آکھیا میرے پئیو دے کئیاں مزدُوراں نُوں لوڑ توں وَدّھ روٹِیاں مِل دِیاں نیں تے مَیں ایتھے بُھکھا پیا مرنا۔ مَیں اُٹھ کے اپنے پئیو کول جاواں گا۔ تے اوہنوں آکھاں گا۔ پئی اَے پئیو مَیں اسمان دا تے تیرا گُناہ کِیتا اے۔ تے ہُن مَیں ایس گلّ جوگا وی نئیں۔ پئی فیر تیرا پُتر اکھواواں۔ مَینُوں اپنے مزدُوراں وِچوں اِک جِہیا بنا۔ تَد اُٹھ کے اوہ اپنے پئیو ولّ ٹُر پیا تے اوہ اجے دُراڈے ای سی۔ پئی اوہنوں ویکھ کے اوہدے پئیو نُوں ترس آیا۔ تے دَوڑ کے اوہنوں گل نال لایا تے مُنھ سِر چُمّیا۔ پُتر اوہنوں آکھیا اَے پئیو مَیں اسمان دا تے تیرا گُناہ کِیتا اے۔ تے ہُن مَیں ایس گلّ جو گا وی نئیں رہیا پئی فیر تیرا پُتر اکھواواں۔ پئیو اپنے ٹہلِیاں نُوں آکھیا چنگے توں چنگے کپڑے چھیتی کڈھ لیاؤ۔ تے اوہنوں پاؤ۔ تے اوہدی ہتّھِیں چھاپ تے پَیرِیں جُتّی پاؤ۔ تے پلیا ہویا وَچّھا لیا کے حلال کرو پئی کھائیے تے خُوشی کریئے۔ کیوں جو میرا ایہہ پُتر مر گیا سی۔ سو جی پیا اے اوہ گواچ گیا سی ہُن لَبّھ گیا اے۔ تَد اوہ خُوشی کرن لگّے۔ تے اوہدا وَڈا پُتر باہر پَیلِیاں وِچ سی تے اوس گھر دے نیڑے آؤندیاں آؤندیاں گاؤن وجان تے نچّن دی اواز سُنی۔ تَد اِک نوکر نُوں سَدّ کے پُچھیا۔ پئی ایہہ کِیہ پیا ہوندا اے؟ اوس اوہنوں آکھیا پئی تیرا بھرا آیا اے تے تیرے پئیو پلے ہوئے وَچّھے نُوں حلال ایس لئی کِیتا اے۔ پئی اوہنوں بھلا چَنگا پایا۔ پر اوہ رُسّ پیا تے اندر جان نُوں راضی نا ہویا۔ تَد اوہدا پئیو باہر آ کے اوہنوں منان لگّا۔ اوس اپنے پئیو نُوں جواب دِتّا ویکھاں۔ اینے ورھیاں توں مَیں تیری سیوا کرنا واں کدی تیرے حُکموں باہر نئیں گیا پر تُوں کدی اِک لیلا وی مَینُوں نا دِتّا۔ پئی اپنے دوستاں نال خُوشی کراں۔ تے جِس ویلے تیرا ایہہ پُتر آیا۔ جِس تیرا مال کنجرِیاں دے نال اُڈایا تے تُوں اوہدے لئی پلے ہوئے وَچّھے نُوں حلال کرایا۔ اوس اوہنوں آکھیا۔ پُتر تُوں سدا میرے نال ایں تے جو کُجھ میرا اے۔ سو تیرا اے۔ پر خُوش ہونا تے خُوشی کرنی چاہی دی سی۔ کیوں جو تیرا ایہہ بھرا مر گیا سی۔ ہُن جی پیا اے۔ اوہ گواچ گیا سی تے ہُن لَبّھ گیا اے۔ تے اوس شاگِرداں نُوں وی آکھیا پئی اِک دَولت مند بندہ سی جِہدا اِک مُختِیار سی تے لوکاں اوہدے کول اوہدا گِلہ کِیتا۔ پئی ایہہ تیرا مال اُڈاؤندا اے۔ تَد اوس اوہنوں سَدّ کے آکھیا۔ ایہہ کِیہ اے۔ جو مَیں تیرے حق وِچ سُننا آں؟ اپنی مُختیاری دا حِساب دے۔ کیوں جو تُوں اگّے نُوں مُختِیار نئیں رہ سکدا۔ اوس مُختِیار اپنے جی وِچ آکھیا۔ مَیں کِیہ کراں؟ کیوں جو میرا مالک مُختیاری مَیتھوں کھو لَیندا اے۔ اودھر کَہی مَیتھوں ماری نئیں جاندی تے منگدیاں شرم آؤندی اے۔ مَیں جان گیا۔ پئی کِیہ کراں گا تاں جو جِس ویلے مُختیارِیوں ہٹایا جاواں لوک مَینُوں اپنے گھراں وِچ جگہ دین۔ تَد اپنے مالک دے قرضئِیاں نُوں اِک اِک کر کے اپنے کول سدّیا تے پہلے کولوں پُچھیا۔ پئی تُوں میرے مالک دا کِنّاں دینا اے؟ اوہ آکھن لگّا سَو کُپّے تیل۔ تَد اوس اوہنوں آکھیا اپنا کھاتہ لے کے بَہہ کے چھیتی پنجاہ لِکھ دے۔ فیر دُوجے نُوں آکھیا۔ تُوں کِنّاں دینا اے؟ اوس آکھیا۔ سَو مَن کنک۔ اوس اوہنوں آکھیا اپنا کھاتہ لے تے اَسّی لِکھ دے۔ تے مالک نیں بے اِیمان مُختِیار دی وڈیائی کِیتی۔ پئی اوہنے ہُشیاری کِیتی۔ کیوں جو ایس جہان دے فرزند اپنے ساتھِیاں نال کمّاں وِچ نُور دے فرزنداں نالوں وَدّھ ہُشیار نیں۔ تے مَیں تُہانوں آکھنا آں۔ پئی بُرائی دی دَولت دے وسیلے اپنے لئی دوست بناؤ تاں جو جِس ویلے ایہہ مُک جائے گی تدوں اوہ ہمیشہ دے ڈیریاں وِچ تُہانوں جگہ دین۔ جیہڑا ساریاں نالوں نِکّیاں گلّاں وِچ وفادار اے اوہ بُہتے وِچ وی وفادار اے تے جیہڑا ساریاں نالوں نِکّیاں گلّاں وِچ بے اِیمان اے۔ اوہ بُہتے وِچ وی بے اِیمان اے۔ سو جے تُسی جُھوٹھی دَولت وِچ وفادار نا ہوئے۔ تے سَچّی دَولت تُہانوں کون سونپے گا؟ تے جے تُسی پرائے دے مال وِچ وفادار نا ہوئے تے تُہاڈا اپنا ای مال تُہانوں کون دیوے گا؟ کوئی نوکر دو مالکاں دی خِدمت نئیں کر سکدا۔ ایس لئی پئی اوہ اِک نال وَیر رکھّے گا تے دُوجے نال مُحبّت یا اِک نال مِلیا رہے گا۔ تے دُوجے نُوں کُجھ نا سمجھے گا تُسی خُدا دی تے دَولت دوہاں دی خِدمت نئیں کر سکدے ہو۔ تے فریسی جیہڑے رُپئیاں دے لالچی سن اوہناں سارِیاں گلّاں نُوں سُن کے اوہدے اُتّے مخَول کرن لگّے۔ تَد اوس اوہناں نُوں آکھیا تُسی اوہ لوک ہو۔ جیہڑے بندیاں اگّے اپنے آپ نُوں نیک بناندے ہو۔ پر خُدا تُہاڈے دِلاں دِیاں جان دا اے۔ کیوں جو جیہڑی شے بندیاں دی سمجھ وِچ قدر والی اے۔ سو خُدا دے اگّے کرہتی اے۔ توریت تے نبی یُوحنّا تائیں سن اوس ویلے توں خُدا دی بادشاہی دی خُوش خبری دِتّی جاندی اے۔ تے ہر اِک زور مار کے اوہدے وِچ وڑ دا اے۔ پر اسمان تے زمین دا ٹل جانا توریت دے اِک شوشے دے مِٹ جان نالوں سوکھا اے۔ جیہڑا وی اپنی بیوی نُوں چھڈ کے دُوجی نال ویاہ کرے۔ اوہ زنا کر دا اے۔ تے جیہڑا چھڈی ہوئی زنانی نُوں ویاہے اوہ زنا کر دا اے۔ اِک دَولت مند بندہ سی جیہڑا لال رنگ دے تے چنگے سُوتی کپڑے پاندا تے روز شان شوکت نال عَیش کر دا سی۔ تے لعزر ناں دا اِک غرِیب بندہ پھوڑیاں دا بھریا ہویا اوہدے بُوہے اُتّے رکھیا جاندا سی۔ تے اوہدی چاہ سی پئی مَیں اوہناں بھوریاں نال اپنا ڈِھڈ بھراں جیہڑے دَولت مند دے میز اوتھوں ڈِگّدے نیں۔ سگوں کُتّے وی آ کے اوہدے پھوڑیاں نُوں چَٹدے سن۔ تے اِنج ہویا پئی اوہ غرِیب مر گیا۔ تے فرِشتیاں اوہنوں ابرہام دی کُچھّڑ وِچ لے جا رکھیا۔ تے دَولت مند وی مویا تے دَبّیا گیا۔ تے پاتال وِچ ڈاڈھے عذاب وِچ پَے کے اوس اَکھّیاں چُکیاں۔ تے ابرہام نُوں دُوروں ویکھیا تے اوہدی کُچھّڑ لعزر نُوں۔ تے اوس اواز مار کے آکھیا۔ اَے پئیو ابرہام میرے اُتّے رَحم کر تے لعزر نُوں گھل پئی اپنی اُنگلی دا پوٹا پانی نال بھیوں کے میری جِیبھ ٹھنڈی کرے کیوں جو مَیں ایس اَگ وِچ تڑپنا آں۔ تَد ابرہام آکھیا پُتر یاد کر پئی جِیوندیاں جی تینُوں چَنگیاں شیواں مِلیاں تے ایسے طرح لعزر نُوں مَندِیاں شیواں مِلیاں سو ہُن اوہنوں ایتھے تسلّی مِلدی اے تے تُوں تڑپنا ایں۔ تے ایہناں سارِیاں گلّاں دے بِناں ساڈے تُہاڈے وِچ اِک وڈّی کھڈ پئی ہوئی اے پئی اوہ جیہڑے ایتھوں تُہاڈے ولّ لنگھناں چاہن اوہ نا لنگھ سکن۔ تے نا اودھروں کوئی ساڈے ولّ اُراں آوے۔ تَد اوس آکھیا فیر اَے باپ میری مِنّت اے۔ پئی تُوں اوہنوں میرے پئیو دے گھر گھل۔ کیوں جو میرے پنج بھرا نیں۔ تاں جو اوہناں دے اگّے اوہ گواہی دیوے۔ اجیہا نا ہوئے پئی اوہ وی ایس عذاب والے تھاں وِچ آؤن۔ ابرہام اوہنوں آکھیا اوہناں کول مُوسیٰ تے بنی نیں۔ سو اوہ اوہناں دی سُنن۔ اوس آکھیا نئیں اَے باپ ابرہام سگوں جے کوئی مُردیاں وِچوں اوہناں دے کول جائے تے اوہ تَوبہ کرن گے۔ اوس اوہنوں آکھیا۔ جے مُوسیٰ تے نبیاں دی نئیں سُندے۔ تے بھانویں مُردیاں وِچوں کوئی جی وی اُٹھے۔ اوہ نا مَنّن گے۔ فیر اوہنے اپنے شاگِرداں نُوں آکھیا ایہہ نئیں ہوسکدا پئی ٹھوکراں نا لگّن۔ پر افسوس اوس بندے اُتّے جِہدی راہِیں اوہ لگ دِیاں نیں۔ جے چکّی دا پُڑ اوہدے گل پایا جاندا تے اوہ سمُندر وِچ سُٹّیا جاندا تے اوہدے لئی ایس نالوں چَنگا سی پئی اوہ ایہناں نِکّیاں وِچوں اِک نُوں ٹھوکر کھوائے۔ خبردار رہو۔ جے تیرا بھرا گُناہ کرے اوہنوں سمجھا دے۔ تے جے تَوبہ کرے اوہنوں مُعاف کر۔ تے جے اِک دِن وِچ سَتّ واری اوہ تیرا گُناہ کرے تے سَتّے واری تیرے کول مُڑ آ کے آکھے مَیں تَوبہ کرناں آں تے اوہنوں مُعاف کر۔ تے رسُولاں خُداوند نُوں آکھیا ساڈا اِیمان وَدّھا۔ خُداوند آکھیا۔ جے تُہاڈے وِچ رائی دے دانے جِنّاں اِیمان ہوندا۔ تے جے تُسی ایس تُوت دے بُوٹے نُوں آکھدے۔ پئی جڑوں پُٹیا جا تے سمُندر دے وِچ جا لگ۔ تے اوہ تُہاڈے آکھے لگدا۔ تے تُہاڈے وِچوں کون اے۔ جِہدا نوکر ہَل واہ کے تے اِجّڑ چار کے پَیلیوں آوے۔ تے آوندے نُوں ایہہ آکھے۔ پئی چھیتی نال آ تے کھان لئی بَہہ جا؟ سگوں اوہنوں ایہہ نا آکھے گا۔ پئی میرے لئی پکا۔ تے جد تِیکر کھا پی نا لواں۔ لکّ بَنّھ کے میری سیوا کر۔ تے ایہہ کمّ مُکا کے مگروں تُوں وی کھا پی لَویں۔ اوہ اوس نوکر دا احسان مَندا اے۔ پئی اوس اوہدا حُکم مَنّیا؟ ایسے طرح تُسی وی حُکم نُوں مَن کے آکھو۔ پئی اسی نکمّے نوکر آں۔ جو کُجھ ساڈے اُتّے فرض سی۔ سو ای کِیتا اے۔ تے اجیہا ہویا پئی یرُوشلِیم نُوں جاندِیاں ہویاں اوہ سامریہ تے گلِیل دے وِچوں دی لنگھیا۔ تے اِک پِنڈ وِچ وڑدیاں سار دَس کوڑھے اوہنوں مِلے جیہڑے دُراڈے کھلوتے رہے۔ تے اوہناں اُچّی اُچّی آکھیا۔ اَے یِسُوع اَے مالک ساڈے اُتّے رَحم کر۔ تے اوس ویکھ کے اوہناں نُوں آکھیا۔ جاؤ جا کے اپنا آپ کاہِناں نُوں وکھاؤ۔ تے اجیہا ہویا پئی اوہ جاندے ہوئے پاک صاف ہوگئے۔ تے اوہناں وِچوں جد اِک نُوں معلُوم ہویا۔ پئی مَیں ولّ ہوگیا آں تَد بڑی اواز نال خُدا دی وڈیائی کر دا ہویا مُڑیا۔ تے یِسُوع دے پیراں اُتّے مُنھ پرنے ڈِگّ کے اوہدا شُکر کِیتا۔ تے اوہ بندہ سامری سی۔ یِسُوع جواب وِچ آکھیا۔ دَسے پاک صاف نا ہوئے۔ فیر اوہ نَو کِتّھے نیں؟ ایس اوپرے بندے باہجوں ہور نا ٹکّرے جیہڑے مُڑ کے خُدا دی وڈیائی کر دے؟ تے اوہنوں آکھیا اُٹھ کے ٹُر جا تیرے اِیمان تینُوں بچایا اے۔ تے جد فرِیسیاں اوہنوں پُچھیا پئی خُدا دی بادشاہی کدوں آوے گی۔ اوس جواب دے کے اوہناں نُوں آکھیا۔ خُدا دی بادشاہی وکھائی دے کے نئیں آؤندی۔ تے نا لوک آکھن گے پئی ویکھ ایتھے اے یا اوتھے اے۔ کیوں جو ویکھو خُدا دی بادشاہی تُہاڈے وِچ ای اے۔ تے اوس شاگِرداں نُوں آکھیا۔ اوہ دِن آؤندا اے۔ جد تُسی چاہ کرو گے۔ پئی اِبنِ آدم دے دِناں وِچوں اِک نُوں ویکھو تے نا ویکھو گے۔ تے لوک تُہانوں آکھن گے۔ ویکھو اوتھے اے یا ویکھو ایتھے اے تُسی نا جائیو۔ تے اوہناں دے مگر نا ٹُرئیو۔ کیوں جو جیویں بِجلی اپنا لشکارا اسمان دے ہیٹھ اِک پاسیوں لشکا کے دُوجے پاسے توڑی پاندی اے۔ اوسے طرح اِبنِ آدم اپنے دِن وِچ ہوئے گا۔ پر پہلاں اوہنوں ضرُور اے۔ پئی بڑے دُکھ سہے تے ایس زمانہ دے لوکاں توں ردّیا جائے۔ تے جیویں نُوح دے دِنیں ہویا سی اوسے طرح اِبنِ آدم دے دِناں وِچ وی ہوئے گا۔ لوک کھاندے پِیندے ویاہ کر دے تے ویاہے جاندے سن۔ اوس دِن تِیکر جد نُوح بیڑی اُتّے چڑھیا۔ تے طوفان ساریاں دا ناس کِیتا۔ جیویں لُوط دے دِنیں ہویا سی پئی لوک کھاندے پِیندے لین دین کر دے رُکھّ لاندے تے گھر بناندے سن۔ پر جِس دِن لُوط سدُوموں نِکلیا۔ اَگ تے گندھک اسمانوں وَسّی تے ساریاں دا ناس کِیتا۔ جِس دِن اِبنِ آدم ظاہر کِیتا جاندا اے۔ ایسے طرح ہوئے گا۔ اوس دِن اوہ جیہڑا کوٹھے اُتّے ہوئے تے اوہدا سامان گھر وِچ ہوئے اوہدے چُکن نُوں ہیٹھاں نا اُترے۔ تے ایسے طرح جیہڑا پَیلی وِچ اے پِچھّاں نا مُڑے۔ لُوط دی بیوی نُوں یاد کرو۔ جِس کِسے دی اپنی جان بچان دی مُراد ہوئے۔ اوہ اوہنوں گوائے گا تے جیہڑا اوہنوں گوائے سو اوہنوں جِیوندا رکھّے گا۔ مَیں تُہانوں آکھنا آں پئی اوس رات اِک مَنجی اُتّے دو بندے ہون گے۔ اِک لے لیا جاوے گا۔ تے دُوجا چھڈیا جاوے گا۔ تے دو زنانِیاں اکٹّھیاں چکّی پِینہدیاں ہون گِیاں۔ اِک لئی جاوے گی۔ تے دُوجی چھڈی جاوے گی۔ [دو بندے پَیلِیاں وِچ ہون گے۔ اِک لے لیا جائے گا تے اِک چھڈ دِتّا جائے گا۔] تَد اوہناں اوہنوں جواب دِتّا۔ اَے خُداوند کِتّھے؟ اوس اوہناں نُوں آکھیا جِتّھے مُردار اے۔ اوتھے گِرجھاں وی اکٹّھیاں ہون گِئیاں۔ فیر اوس اوہناں نُوں ایس مطلب لئی اِک تمثِیل سُنائی۔ پئی سدا دُعا وِچ لگّے رہن۔ ڈِھلّے نا ہون۔ پئی کِسے شہر وِچ اِک قاضی سی نا اوہ خُدا توں ڈر دا سی تے نا بندے دی پرواہ کر دا سی۔ تے اوسے شہر وِچ اِک بیوہ سی جیہڑی اوہدے کول آ کے آکھدی ہوندی سی۔ پئی نیاں کر کے مَینُوں میرے مُدّعی توں بچا۔ تے کُجھ چِر تِیک اوس نا مَنّیا۔ مگروں اپنے دِل وِچ آکھیا۔ بھانویں مَیں نا خُدا توں ڈرنا تے نا بندے دی پرواہ کرنا آں۔ تے وی ایس کر کے پئی ایہہ بیوہ مَینُوں اَوکھیاں کر دی اے۔ مَیں اوہدا نیاں کراں گا۔ اجیہا نا ہوئے پئی اوہ گھڑی مُڑی آؤن نال میرا سِر کھا جاوے۔ تے خُداوند آکھیا سُنو ایہہ بے انصاف قاضی کِیہ آکھدا اے۔ خُدا اپنے چُنیاں ہویاں لوکاں دا جیہڑے دِنیں راتِیں اوہنوں فریاد کر دے نیں نیاں نا کرے گا؟ کِیہ اوہ اوہناں دا چوکھا چِر لاؤندا اے؟ مَیں تُہانوں آکھنا آں پئی اوہ چھیتی اوہناں دا نیاں کرے گا۔ پر جدوں اِبنِ آدم آوے گا دسو اوہ زمین اُتّے۔ اِیمان ویکھے گا؟ فیر اوس کئیاں نُوں۔ جیہڑے اپنے اُتّے بھروسا رکھدے سن۔ پئی اسی نیک آں تے جیہڑے ہورناں نُوں ماڑیاں جاندے سن۔ ایہہ تمثِیل سُنائی۔ پئی دو بندے ہیکل وِچ دُعا منگن گئے۔ اِک فریسی سی تے دُوجا محصُولیا۔ فریسی کھلو کے اپنے جی وِچ ایویں دُعا منگن لگّا۔ اَے خُدا مَیں تیرا شُکر کرنا آں پئی مَیں ہورناں لوکاں وانگُوں لُٹیرا ظالم زانی یا ایس محصُولئے جِہیا نئیں آں۔ مَیں تے ہفتے وِچ دو واری روزہ رکھناں آں مَیں اپنی ساری کمائی دا دسواں حِصّہ دینا آں۔ پر محصُولئے دُوروں کھلو کے اینا وی نئیں چاہیا۔ پئی اسمان ولّ اَکھّیاں کرے۔ سگوں پِٹ پِٹ کے ایہہ آکھدا سی۔ پئی اَے خُدا مَیں جو گُناہیں ہاں میرے اُتّے رَحم کر۔ مَیں تُہانوں آکھنا آں۔ پئی ایہہ بندے دُوجے نالوں ودِھیک نیک ہو کے اپنے گھر گیا۔ کیوں جو جیہڑا کوئی اپنے آپ نُوں اُچیاں کر دا اے۔ نِیواں کِیتا جائے گا۔ پر جیہڑا اپنے آپ نُوں نِیواں کر دا اے اوہ اُچّا کِیتا جائے گا۔ تے لوک اپنے نِکّے بالاں نُوں اوہدے کول لیائے پئی اوہ اوہناں اُتّے ہتّھ رکھّے تے شاگِرداں ویکھ کے اوہناں نُوں جِھڑکیا۔ پر یِسُوع بالاں نُوں اپنے کول سَدّ کے آکھیا۔ پئی بالاں نُوں میرے کول آؤن دیو تے اوہناں نُوں روکو نا۔ کیوں جو خُدا دی بادشاہی ایہو جِہیاں دی اے۔ مَیں تُہانوں سَچ آکھنا آں پئی جیہڑا خُدا دی بادشاہی نُوں بچّے وانگُوں قبول نا کرے۔ اوہ اوہدے وِچ کدی نا وڑے گا۔ تے کِسے سردار نے اوہنوں ایہہ پُچھیا۔ پئی اَے نیک اُستاد مَیں کِیہ کراں پئی مَینُوں ہمیشہ دی زِندگی دا وِرثہ مِلے؟ یِسُوع اوہنوں آکھیا۔ تُوں کیوں مَینُوں نیک آکھنا ایں؟ بِناں اِک دے جیہڑا خُدا اے کوئی نیک نئیں اے۔ تُوں حُکماں نُوں تے جانناں ایں۔ پئی زنا نا کر۔ خُون نا کر۔ چوری نا کر۔ جُھوٹھی گواہی نا دے۔ اپنے ماں پئیو دی عِزّت کر۔ اوس آکھیا۔ ایہہ سبھو مَیں اپنے نِکّیاں ہوندیاں توں مَندا آیا آں۔ یِسُوع سُن کے اوہنوں آکھیا۔ تے وی اجے تیرے وِچ اِک گلّ دی کسر اے۔ اپنا سبھ کُجھ ویچ تے غرِیباں نُوں دے دے تے تینُوں اسمان وِچ خزانہ مِلے گا۔ تے آ کے میرے مگر ٹُر پَو۔ اوہ ایہہ سُن کے اُداس ہویا۔ کیوں جو اوہ بڑا ای دَولت والا سی۔ یِسُوع اوہنوں ویکھ کے آکھیا مالداراں دا خُدا دی بادشاہی وِچ وڑنا بڑا اَوکھا اے۔ کیوں جو سُوئی دے نکّے وِچ اُوٹھ دا لنگھ جانا اوہدے نالوں سوکھا اے پئی دَولت والا خُدا دی بادشاہی وِچ داخل ہوئے۔ تے سُنن والیاں آکھیا تے فیر کون بچ سکدا اے؟ اوس آکھیا پئی بندیاں دے اگّے جو اَنہونا اے۔ اوہ خُدا اگّے ہوسکدا اے۔ تَد پطرس آکھیا ویکھ اسی سبھ کُجھ چھڈ کے تیرے مگر ٹُر پئے آں۔ اوس اوہناں نُوں آکھیا۔ مَیں تُہانوں سَچ آکھنا آں پئی اِنج کوئی نئیں اے جِنّہے گھر یا بیوی یا بھراواں یا ماں پئیو یا اولاد نُوں خُدا دی بادشاہی دی خاطر چھڈ دِتّا اے۔ تے ایس زمانے وِچ ایہناں نالوں کِنّاں ای ودِھیک تے اگلے جہان وِچ سدا دی زِندگی نا پاوے۔ تے اوس باراں نُوں نال لے کے اوہناں نُوں آکھیا ویکھو اسی یرُوشلِیم نُوں جانے آں تاں جو کُجھ نبیاں دی راہِیں لِکھیا ہویا اے اِبنِ آدم دے حق وِچ سبھو پُورا ہوئے گا۔ کیوں جو اوہ غیر قوماں دے حوالے کِیتا جائے گا۔ تے لوک اوہنوں مخَول کرن گے تے بے عِزّت کرن گے۔ تے اوہدے اُتّے تُھکن گے۔ تے اوہنوں کولڑے مار کے مار سُٹّن گے۔ تے ترِیجے دِہاڑے اوہ جی اُٹھے گا۔ پر اوہ اوہناں وِچوں اِک گلّ وی نا سمجھے۔ تے ایہہ گلّ اوہناں توں لُکی رہی تے جیہڑیاں گلّاں آکھیاں گِئیاں سن اوہناں نا سمجھِیاں۔ تے یرِیحُو دے نیڑے اوہدے اَپڑ دیاں ای ایویں ہویا پئی اِک اَنھا راہ دے کنڈھے بَیٹھا خَیر منگدا سی۔ اوس بِھیڑ لنگھ دی دا کھڑاک سُن کے پُچھیا۔ پئی ایہہ کِیہ اے؟ تَد اوہناں اوہنوں دسیا۔ پئی یِسُوع ناصری جان دا اے۔ اوس اواز ماری پئی اَے یِسُوع داؤد دے پُتر میرے اُتّے رَحم کر۔ تے اگّے جان والیاں اوہنوں دھمکایا پئی چُپ کر۔ پر اوس ہور وی زور نال سدّیا۔ پئی اَے داؤد دے پُتر میرے اُتّے رَحم کر۔ تَد یِسُوع کھلو کے آکھیا۔ پئی اوہنوں میرے کول لیاؤ۔ جد اوہ نیڑے آیا تے اوس اوہنوں پُچھیا۔ پئی تُوں کِیہ چاہنا ایں۔ پئی مَیں تیرے لئی کراں؟ اوس آکھیا خُداوندا پئی مَیں سُجاکھا ہو جاواں۔ یِسُوع اوہنوں آکھیا سُجاکھا ہو جا تیرے اِیمان تینُوں چَنگا کِیتا اے۔ اوہ اوسے ویلے سُجاکھا ہوگیا۔ تے خُدا دی وڈیائی کر دا ہویا اوہدے مگر ٹُر پیا تے ساریاں لوکاں ویکھ کے خُدا دی وڈیائی کِیتی۔ تے اوہ یرِیحُو دے وِچوں دی لنگھدا جاندا سی۔ تے ویکھو زکائی ناں دا اِک بندہ سی اوہ محصُولِیاں دا سردار سی تے دَولت مند وی سی۔ تے اوہ موقع لَبّھدا سی۔ پئی یِسُوع نُوں ویکھے پئی اوہ کون اے پر بِھیڑ دے سببّوں اوہدی کُجھ پیش نا چلّی۔ کیوں جو اوہ قد دا مدھرا سی۔ تَد اگانہہ بھج کے اوہ اِک گُولر دے رُکھّ اُتّے چڑھ گیا پئی ویکھے۔ کیوں جو اوس اوسے رستیوں لنگھناں سی۔ تے جد یِسُوع اوس تھاں اَپڑیا تے اُتانہہ دھیان کر کے اوہنوں آکھیا۔ اے زکائی چھیتی کر کے تھلے آ کیوں جو اَج مَینُوں تیرے گھر رہنا ضرُور اے۔ تَد اوہ چھیتی اُتریا تے خُوشی نال اوہنوں قبول کِیتا۔ تے سارے ایہہ ویکھ کے بُڑبُڑ کرن لگّے۔ پئی اوہ اِک گُنہگار بندے دے گھر جا اُتریا اے۔ پر زکائی کھلو کے خُداوند نُوں آکھیا۔ اَے خُداوند ویکھ مَیں اپنا ادھا مال غرِیباں نُوں دینا آں۔ تے جے کِسے کولوں کُجھ ناحق لے لیا اے۔ مَیں اوہدا چَوناں بھر دینا آں۔ یِسُوع اوہنوں آکھیا۔ اَج ایس گھر وِچ نجات آئی اے۔ ایس لئی پئی ایہہ وی ابرہام دا پُتر اے۔ کیوں جو اِبنِ آدم گواچے ہویاں نُوں لَبّھن تے بچان آیا اے۔ تے جد اوہ ایہہ گلّاں پئے سُندے سن اوس اِک ہور تمثِیل ایس لئی سُنائی پئی اوہ یرُوشلِیم دے نیڑے سی۔ تے اوہ لوک خیال کر دے سن پئی خُدا دی بادشاہی ہُنے ظاہر ہون لگّی اے۔ سو اوس آکھیا۔ اِک امیر دُراڈے دے دیس نُوں گیا۔ پئی اپنے لئی بادشاہی لے کے مُڑ آوے۔ اوس اپنے دَس نَوکراں نُوں سَدّ کے اوہناں نُوں دَس اشرفیاں دِتّیاں تے اوہناں نُوں آکھیا میرے آؤندیاں تِیکر بیوپار کرو۔ پر اوہدے شہری اوہدے نال وَیر رکھدے سن تے اوہدے مگروں قاصداں دی ہتّھِیں اکھوا گھلّیا پئی اسی نئیں چاہندے پئی ایہہ ساڈے اُتّے بادشاہی کرے۔ تے ایویں ہویا جد اوہ بادشاہی لے کے واپس آگیا تے اوہناں نَوکراں نُوں جِنہاں نُوں رُپئے دِتّے سن سَداوا گھلّیا پئی پتا کرے پئی لین دین کر کے اوہناں کِیہ کمایا۔ تَد پہلے آ کے آکھیا اَے خُداوند تیری اشرفی توں دَس ہور اشرفیاں ہور کمائِیاں۔ تے اوس اوہنوں آکھیا۔ شاواشے! چنگے نوکر ایس لئی پئی تُوں بُہت تھوڑے وِچ وفادار نِکلیوں دَساں شہراں اُتّے تُوں مُختِیار ہو۔ تے دُوجے آ کے آکھیا۔ اَے خُداوند تیری اشرفی نے پنج اشرفیاں کمائِیاں۔ اوس اوہنوں وی آکھیا تُوں وی پنجاں شہراں اُتّے حاکم ہو۔ تے اِک ہور نے آ کے آکھیا۔ اَے خُداوند ایہہ تیری اشرفی جِہنُوں مَیں رُومال وِچ رکھ چھڈیا اے۔ کیوں جو مَیں تَیتھوں ڈر دا ساں ایس لئی پئی تُوں کرڑا بندہ ایں۔ جو کُجھ تُوں نئیں دھریا سو چُکنا ایں۔ تے جو کُجھ نئیں بِیجیا اوہ وَڈّھنا ایں۔ اوس اوہنوں آکھیا۔ اَے بَھیڑے نوکر مَیں تیرا فیصلہ تیرے ای مُنھوں کرنا آں۔ جد تُوں جان دا ساں پئی مَیں کرڑا بندہ آں۔ تے جو کُجھ نئیں دھریا سو چُکناں آں تے جو کُجھ نئیں بِیجیا سو وَڈّھنا آں۔ فیر تُوں میرے رُپئیاں نُوں ساہوکار کول کیوں نا رکھیا پئی مَیں آ کے اوہناں نُوں بیاج سَنے لَیندا؟ تے اوس کول کھلوتے ہویاں نُوں آکھیا پئی اوہ اشرفی ایہدے کولوں لے لوؤ تے دَس اشرفیاں والے نُوں دے دیو۔ (تَد اوہناں اوہنوں آکھیا۔ اَے خُداوند۔ اوہدے کول دَس اشرفیاں تے ہے نیں۔) مَیں تُہانوں آکھنا آں۔ پئی جِس کِسے کول اے اوہنوں دِتّا جائے گا۔ تے جِہدے کول نئیں اے اوہدے توں جو کُجھ اوہدے کول اے اوہ وی کھوہ لیا جائے گا۔ پر میرے اوہناں وَیرِیاں نُوں جیہڑے نئیں چاہندے سن پئی مَیں اوہناں اُتّے بادشاہی کراں۔ ایتھے لیاؤ تے اوہناں نُوں میرے سامھنے قتل کرو۔ تے ایہہ گلّاں آکھ کے اوہ یرُوشلِیم ولّ جاندِیاں ہویاں اگانہہ ٹُریا۔ تے اجیہا ہویا جد بَیت فگے تے بَیت عَنِیاہ دے نیڑے اوس پہاڑ کول جِہیڑا زَیتُون اکھواؤندا اے اَپڑیا تَد اوس شاگِرداں وِچوں دو نُوں ایہہ آکھ کے گھلّیا۔ پئی سامھنے دے پِنڈ وِچ جاؤ۔ تے اوہدے وِچ وڑدیاں اِک کھوتی دا بچّہ جِہدے اُتّے کدی کوئی سوار نئیں ہویا۔ بَدّھا ہویا ویکھو گے اوہنوں کھول لیاؤ۔ تے جے کوئی تُہانوں پُچھے۔ پئی کاہِنُوں کھولدے ہو؟ اوس نُوں ایس طرح آکھو پئی خُداوند نُوں ایہدی لوڑ اے۔ سو جیہڑے گھلّے ہوئے سن اوہ گئے تے جِہیا اوس اوہناں نُوں آکھیا سی تیہا ای ویکھیا۔ تے جد کھوتی دا بچّہ کھولن لگّے۔ اوہدے مالکاں اوہناں نُوں آکھیا۔ بچّے نُوں کاہِنُوں کھول دے ہو؟ اوہناں آکھیا خُداوند نُوں ایہدی لوڑ اے۔ تے اوہ اوہنوں یِسُوع کول لیائے تے اپنے کپڑے اوس بچّے اُتّے پا کے یِسُوع نُوں چاڑھ لیا۔ جد اوہ جاندا پیا سی اوہناں اپنے کپڑے راہ وِچ وچھائے۔ تے جد اوہ شہروں نیڑے زَیتُون دے پہاڑ دی اُترائی اُتّے اَپڑیا اوہدے شاگِرداں دی بِھیڑ اوہناں سبھناں کراماتاں دے سبّب جیہڑیاں اوہناں ویکھیاں سن خُوش ہو کے بڑی اواز نال خُدا دی وڈیائی کرن لگّی۔ پئی دھنّ اوہ بادشاہ جیہڑا خُداوند دے ناں اُتّے آؤندا اے۔ اسمان وِچ صُلح تے عالمِ بالا وِچ جلال۔ تے بِھیڑ وِچوں کئیاں فرِیسیاں اوہنوں آکھیا اَے اُستاد اپنے شاگِرداں نُوں جِھڑک۔ تے اوس جواب دِتّا مَیں تُہانوں آکھنا آں جے ایہہ چُپ کر رہن تے پتّھر بول اُٹھن گے۔ تے جد اوہ نیڑے آیا۔ تے شہر نُوں ویکھ کے اوہدے اُتّے رویا۔ تے آکھیا کینا چَنگا ہوندا جے تُوں اپنے ایسے دِن وِچ اوہناں گلّاں نُوں جان دا جیہڑیاں سلامتی دِیاں نیں۔ پر ہُن اوہ تیریاں اَکھّیاں توں لُک گِئیاں نیں۔ کیوں جو اوہ دِن تیرے اُتّے آؤن گے پئی تیرے وَیری تیرے دوالے مورچہ بَنّھ کے تے گھیرا پا کے تینُوں سبھنیں پاسیں قابُو کرن گے۔ تے تینُوں تے تیری اولاد نُوں جیہڑے تیرے اندر نیں گھٹے وِچ رُلاؤن گے تے اوہ تیرے اندروں کِسے پتّھر اُتّے پتّھر نا چھڈن گے ایس لئی پئی تُوں اوس ویلے نُوں نا سہاتا۔ جد تیرے اُتّے نظر سی۔ تَد ہیکل دے اندر وڑ کے اوہ ویچن والیاں نُوں کڈھن لگّا۔ تے اوہناں نُوں ایہہ آکھیا پئی لِکھیا ہویا اے پئی میرا گھر دُعا دا گھر اے۔ پر تُساں اوہنوں ڈاکُوؤاں دی کھوہ بنایا۔ تے اوہ روز دِہاڑے ہیکل وِچ تعلِیم دیندا سی پر سردار کاہِن تے فقِیہ تے قوم دے سردار اوہنوں قتل کرن دا داء لبّھدے سن۔ تے موقعہ نا لَبھّا۔ پئی کِس طرح کرن۔ کیوں جو سارے لوک بڑی چاہ نال اوہدی سُندے سن۔ تے اونہی دِنیں اِک دِن جد اوہ ہیکل وِچ لوکاں نُوں تعلِیم دیندا تے اِنجِیل سُناندا سی۔ اِنج ہویا پئی سردار کاہِن تے فقِیہ بزُرگاں نال اوہدے سامھنے کھلوتے۔ تے اوہنوں آکھن لگّے۔ سانُوں دس تُوں کیہڑے اختیار نال ایہہ کمّ کرنا ایں۔ یا کِس تینُوں ایہہ اختیار دِتّا اے؟ اوس اوہناں نُوں جواب دِتّا مَیں وی تُہانوں اِک گلّ پُچھنا آں مَینُوں دسو۔ یُوحنّا دا بپتِسمہ اسمانوں سی یا اِنسان ولّوں؟ اوہناں آپو وِچ ایہہ صلاح کِیتی پئی جے آکھیئے اسمانوں۔ تے اوہ ایہہ آکھے گا تُساں اوہنوں کیوں نا مَنّیا؟ تے جے آکھیئے اِنسان ولّوں تے سارے لوک سانُوں مارن گے۔ کیوں جو اوہناں دا یقِین اے۔ پئی یُوحنّا نبی سی۔ سو اوہناں جواب دِتّا سانُوں نئیں پتا۔ پئی اوہ کِتّھوں دا سی۔ تے یِسُوع اوہناں نُوں آکھیا۔ مَیں وی تُہانوں نئیں دسدا۔ پئی کیہڑے اختیار نال مَیں ایہہ کمّ کرنا آں۔ فیر اوہ لوکاں نُوں ایہہ تمثِیل سُنان لگّا پئی اِک بندے انگور دا باغ لایا تے اوہنوں مالِیاں دے ہتّھ ٹھیکے دے کے بڑے چِر لئی پردیس ٹُرگیا۔ تے بہار سر اِک نوکر نُوں مالِیاں کول گھلّیا۔ تاں جو اوہ انگور دے باغ دے پَھل وِچوں اوہنوں دین۔ پر مالِیاں اوہنوں مارکُٹ کے سَکھنیاں موڑ دِتّا۔ تے فیر اوس دُوجا نوکر گھلّیا۔ اوہناں اوہنوں وی مارکُٹ کے تے بے عِزّت کر کے سَکھنیاں موڑ دِتّا۔ تے فیر اوس ترِیجا گھلّیا۔ اوہناں لُہولُہان کر کے اوہنوں وی باہر کڈھ دِتّا۔ تَد اوس باغ دے مالک آکھیا۔ مَیں کِیہ کراں؟ مَیں اپنے پیارے پُتر نُوں گھلاں گا۔ کھورے اوہ اوہدا لحاظ کرن۔ جد مالِیاں اوہنوں ویکھیا تے آپو وِچ صلاح کر کے آکھیا۔ پئی ایہہ وارث اے ایہنوں مار سُٹّیئے۔ پئی وِرثہ ساڈا ہو جاوے۔ تَد اوہنوں باغوں باہر کڈھ کے مار سُٹّیا۔ ہُن باغ دا مالک اوہناں نال کِیہ کرے گا؟ اوہ آوے گا تے اوہناں مالِیاں دا ناس کرے گا۔ تے انگور دا باغ ہورناں نُوں دے وے گا۔ اوہناں ایہہ سُن کے آکھیا۔ خُدا نا کرے۔ تَد اوس اوہناں ولّ ویکھ کے آکھیا۔ فیر ایہہ کِیہ لِکھیا ہویا اے۔ پئی اوہ پتّھر جِہنُوں راجاں ناپسند کِیتا اوہی گُٹّھ دا سِرا ہوگیا؟ جیہڑا اوس پتّھر اُتّے ڈِگّے ٹوٹے ٹوٹے ہو جائے گا۔ تے جِہدے اُتّے اوہ ڈِگّے اوہنوں پِیہہ سُٹّے گا۔ تَد سردار کاہِناں تے فقِیہاں موقع لَبّھیا۔ پئی اوسے گھڑی اوہدے اُتّے ہتّھ پان۔ پر لوکاں توں ڈر دے سن کیوں جو اوہناں جان لیا پئی اوس ایہہ تمثِیل ساڈے اُتّے آکھی اے۔ تے اوہ اوہدی سُوہ وِچ سن تے جاسُوساں نُوں گھلّیا۔ پئی نیک بن کے اوہدی گلّ پھڑن تاں جو اوہنوں حاکم دے اختیار تے وَس وِچ کر دین۔ تَد اوہناں اوہنوں ایہہ پُچھیا پئی اَے اُستاد سانُوں معلُوم اے۔ پئی تُوں ٹھیک آکھدا تے سکھانا ایں۔ تے کِسے دی طرفداری نئیں کر دا۔ سگوں سچیائی نال خُدا دا راہ دسنا ایں۔ سانُوں قَیصر نُوں جزیہ دینا جائز اے کہ نئیں؟ پر اوس اوہناں دا مکر جان کے اوہناں نُوں آکھیا۔ مَینُوں اِک دینار وکھاؤ۔ اوہدے اُتّے کِدی مُورت تے ناں اے؟ اوہناں آکھیا قَیصر دے۔ اوس اوہناں نُوں آکھیا بس فیر جو کُجھ قَیصر دا اے قَیصر نُوں دیو۔ تے جو خُدا دا اے خُدا نُوں۔ تے اوہ لوکاں اگّے اوس گلّ نُوں پھڑ نا سکے۔ تے اوہدے جواب توں حَیران ہو کے چُپ کر گئے۔ تَد صدوقیاں وِچوں جیہڑے قیامت دے مُنکر نیں۔ کئیاں اوہدے کول آ کے اوہنوں ایہہ آکھ کے پُچھیا۔ پئی اَے اُستاد مُوسیٰ ساڈے لئی لِکھیا اے پئی جے کِسے دا وِیاہیا ہویا بھرا بے اولاد مر جائے تے اوہدا بھرا اوہدی بیوی نُوں لے لَئے۔ تے اپنے بھرا لئی نسل قیم کرے۔ سو سَتّ بھرا سن تے پہلا بیوی کر کے بے اولاد مر گیا۔ تے دُوجا وی۔ تے ترِیجے اوہنوں لے لیا۔ ایسے طرح سَتّے ای بے اولاد مر گئے۔ مگروں اوہ زنانی وی موئی۔ سو قیامت نُوں اوہ اوہناں وِچوں کدی بیوی ہوئے گی؟ کیوں جو اوہ ستّاں دے گھر وَسّی سی۔ تے یِسُوع اوہناں نُوں آکھیا۔ ایس دُنیا دے فرزند ویاہ کر دے تے ویاہے جاندے نیں۔ پر جیہڑے لوک ایس لائق سمجھے گئے نیں۔ پئی اوس دُنیا نُوں حاصِل کرن۔ تے مُردیاں وِچوں جی اُٹھن۔ اوہ نا ویاہ کر دے نا ویاہے جاندے نیں۔ تے اوہ مُڑ نئیں مر سکدے۔ کیوں جو اوہ فرِشتیاں جیہے نیں۔ تے قیامت دے پُتر ہو کے خُدا دے وی پُتر نیں۔ تے ایہہ گلّ پئی مُردے جی اُٹھ دے نیں۔ مُوسیٰ وی جھاڑی والے ذِکر وِچ دسیا اے۔ جدوں اوہ خُداوند نُوں ابرہام دا خُدا تے اِضحاق دا خُدا تے یعقُوب دا خُدا آکھدا اے۔ پر خُدا مُردیاں دا خُدا نئیں سگوں جِیوندیاں دا اے۔ کیوں جو سارے اوہدے واسطے جِیوندے نیں۔ تے کئی فقِیہاں اوہنوں آکھیا۔ پئی اَے اُستاد تُوں بڑا چَنگا آکھیا۔ کیوں جو اوہناں نُوں فیر کُجھ سوال پچُھّن دا حَوصلہ نا پیا۔ تے اوس اوہناں نُوں آکھیا لوک کِیہ آکھدے نیں پئی مسِیح داؤد دا پُتر اے؟ کیوں جو داؤد زبُور دی کتاب وِچ آپے آکھدا اے پئی خُداوند نے میرے خُداوند نُوں آکھیا۔ میرے سَجّے ہتّھ بَیٹھ۔ جد تِیکر مَیں تیرے وَیرِیاں نُوں تیرے پَیر رکھن دی چَوکی نا کر دَواں۔ سو داؤد تے اوہنوں خُداوند آکھدا اے۔ فیر اوہ پُتر کِیویں ہویا؟ تَد سارے لوکاں دے سُندیاں اوس اپنے شاگِرداں نُوں آکھیا۔ پئی فقِیہاں ولّوں خبردار رہو جیہڑے لمبا چوغہ پا کے پِھرنا چاہندے نیں۔ تے بازاراں وِچ سلاماں دا تے عبادت خانیاں وِچ پہلیاں کُرسِیاں تے ضِیافتاں وِچ اُچیاں تھانواں دا شَوق رکھ دے نیں۔ اوہ بیوہ عَورتاں دے گھراں نُوں نِگل جاندے۔ تے وکھالن لئی لمبی چَوڑی دُعاواں کر دے نیں۔ اوہناں لئی بُہتی سزا دا حُکم ہوئے گا۔ تے اوس نِگاہ کر کے دَولت منداں نُوں ویکھیا پئی اپنیاں نذراں ہیکل دے خزانے وِچ پئے پاندے سن۔ تے اِک غرِیب بیوہ نُوں دو دَمڑِیاں پاندیاں ویکھیا۔ تے آکھیا مَیں تُہانوں سَچ آکھنا آں۔ پئی ایس غرِیب بیوہ ساریاں توں وَدّھ پایا۔ کیوں جو ایہناں ساریاں اپنے مال دی ودِھیک وِچوں نذر کِیتا پر اوس اپنی تُھڑ وِچوں ساری پُونجی جیہڑی اوہدی ہے سی پا دِتّی۔ تے جد ہیکل دی بابت کُجھ لوک آکھ دے سن پئی اوہ سوہنے پتّھراں تے چڑھاویاں نال سنواری ہوئی اے۔ اوس آکھیا۔ ایہہ جو کُجھ تُسی ویکھدے ہو اوہ دِن آؤن گے جدوں ایس تھاں پتّھر اُتّے پتّھر نا چھڈیا جائے گا جیہڑا ڈیگیا نا جائے گا۔ تے اوہناں اوہنوں ایہہ پُچھیا اے اُستاد فیر ایہہ گلّاں کدوں ہون گِیاں تے جد ایہہ ہون والِیاں ہون اودُوں دا کِیہ پَتا ہوئے گا؟ اوس آکھیا خبردار۔ پئی دھوکھا نا کھاؤ۔ کیوں جو بتھیرے میرے ناں اُتّے آؤن گے تے آکھن گے پئی مَیں اوہو ای آں۔ تے ویلا آگیا اے۔ اوہناں دے مگر نا لگناں۔ تے جد لڑائِیاں تے فساداں دی خبر سُنو گے تے گھابر نا جاناں۔ کیوں جو ایہناں گلّاں دا پہلاں آؤنا ضرُور اے پر اوس ویلے اخِیر جھٹ پَٹ نا آوے گی۔ فیر اوس اوہناں نُوں آکھیا۔ پئی قوم قوم اُتّے تے بادشاہی بادشاہی اُتّے چڑھ آوے گی۔ تے بڑے بُھچال تے تھائِیں تھائِیں کال تے مَرِیاں پَین گِیاں تے اسمانوں ڈراؤنِیاں شیواں تے بڑے عجائِب نِشان ظاہر ہون گے۔ پر ایہناں سارِیاں گلّاں توں پہلاں لوک تُہاڈے اُتّے میرے ناں دی خاطر ہتّھ پان گے۔ تے تُہانوں دُکھ دین گے۔ تے عبادت خانیاں دی عدالت دے حوالے کرن گے تے قید کرن گے تے بادشاہاں تے حاکماں کول دھرُون گے۔ ایہہ تُہاڈے لئی گواہی ہوئے گی۔ سو اپنے دِلاں وِچ پَکّی کر لو پئی اسی جواب دین لئی پہلاں فِکر نا کریئے۔ ایس لئی پئی مَیں تُہانوں اجیہی زبان تے حِکمت دیاں گا جِہدے اگّے تُہاڈے وَیری نا بول سکن نا کھلو سکن۔ تے ماں پئیو تے بھرا تے ساک تے دوست وی تُہانوں پھڑن گے تے تُہاڈے وِچوں کئیاں نُوں مروا چھڈن گے۔ تے میرے ناں دے سبّب سارے لوک تُہاڈے نال وَیر رکھن گے۔ پر تُہاڈے سِر دا اِک وال وی وِنگا نا ہوئے گا۔ تے اپنے صبر وِچ ای تُسی اپنیاں جاناں نُوں بچاؤ گے۔ تے جد تُسی یرُوشلِیم نُوں فَوجاں نال گھیریا ہویا ویکھو گے تے جان لوؤ پئی اوہدا ناس ہون والا اے۔ تَد اوہ جیہڑے یہُودیہ وِچ ہون پہاڑاں اُتّے بھج جان تے اوہ جیہڑے یرُوشلِیم وِچ ہون کِتے دُراڈے نَسّ جان۔ تے اوہ جیہڑے پِنڈاں وِچ ہون اوہدے اندر نا آؤن۔ کیوں جو اوہ دِن بدلہ لین دے نیں۔ جِنہاں وِچ اوہ سبھ کُجھ جو لِکھیا ہویا اے پُورا ہوئے۔ پر افسوس اوہناں اُتّے جیہڑیاں اوہناں دِناں وِچ جمّن والِیاں تے دُدّھ پیان والِیاں ہون کیوں جو زمین اُتّے بڑی تنگی تے ایس قوم اُتّے غضب پئے گا۔ تے اوہ تلوار نال مر جان گے۔ تے قید ہو کے سارِیاں قوماں وِچ پہنچائے جان گے۔ تے جد توڑی غیر قوماں دا ویلا پُورا نا ہو جائے یرُوشلِیم غیر قوماں توں لتاڑیا جائے گا۔ تے سُورج تے چَنّ تے تاریاں وِچ نِشان نظر آؤن گے تے زمین اُتّے قوماں نُوں مُصِیبت پئے گی۔ کیوں جو اوہ سمُندر تے اوہدیاں ٹھاٹھاں دے شور نال گھابر جان گے۔ تے ڈردے مارِیاں تے دُنیا اُتّے آؤن والِیاں بلاواں دی اُڈِیک نال لوکاں دی جان وِچ جان نا رہے گی۔ ایس لئی پئی اسمان دِیاں طاقتاں ہلائِیاں جان گِیاں۔ تَد اوہ اِبنِ آدم نُوں بدّل وِچ قُدرت تے بڑے جلال نال آؤندیاں ویکھن گے۔ تے جد ایہہ گلّاں ہون لگّن تَد سِدّھے ہو کے اپنے سِر اُتانہہ چُکو۔ ایس لئی پئی تُہاڈی خلاصی نیڑے آگئی اے۔ تے اوس اوہناں نُوں اِک تمثِیل سُنائی۔ پئی ہنجیر نُوں تے ساریاں رُکھّاں نُوں ویکھو۔ اوہناں نُوں پُنگر دیاں ای ویکھ کے تُسی آپے جان دے ہو پئی ہُن گرمِیاں نیڑے آگئیاں۔ اوسے طرح جد ایہناں گلّاں نُوں ہوندیاں ویکھو تے جانو پئی خُدا دی بادشاہی نیڑے آئی۔ مَیں تُہانوں سَچ آکھنا آں پئی جد تِیکر ایہہ سبھ کُجھ ہو نا لَوے ایہہ پِیڑھی نا مُکے گی۔ اسمان تے زمین ٹل جان گے۔ پر میرِیاں گلّاں کدی نا ٹلن گِیاں۔ پر ہُشیار رہو۔ کِتے تُہاڈے دِل بوہتا کھان پِین تے نشئی ہون تے زِندگی دی فِکراں نال بھارے نا ہو جان۔ تے اوہ دِہاڑا تُہاڈے اُتّے پھاہی وانگُوں جھٹ پَٹ آ پَوے۔ ایس لئی پئی اوہ ساری زمین دے سبھناں رہن والیاں اُتّے آپَوے گا۔ پر ہر ویلے جاگدے رہو تے دُعا منگو پئی تُسی ایہناں سارِیاں شیواں توں جیہڑیاں ہون والِیاں نیں بچ سکو۔ تے اِبنِ آدم دے اگّے کھلو سکو۔ تے روز اوہ ہیکل وِچ تعلِیم دیندا سی۔ تے رات نُوں باہر جا کے اوس پہاڑ اُتّے جیہڑا زَیتُون اکھواؤندا اے۔ ٹِکدا ہوندا سی۔ تے سارے لوک اوہدی سُنن لئی ہیکل وِچ اوہدے کول سویرے آوندے سن۔ تے فطِیری روٹی دی عید جِہنُوں فسح آکھدے نیں نیڑے آئی۔ تے سردار کاہِن تے فقِیہ داء لبّھدے سن۔ پئی اوہنوں کِس طرح مار سُٹّن۔ کیوں جو اوہ لوکاں توں ڈر دے سن۔ تَد یہُوداہ وِچ جیہڑا اِسکریُوتی اکھواؤندا تے جیہڑا باراں دی گنتری وِچ سی شیطان سمایا۔ تے اوس جا کے سردار کاہِناں تے صُوبیداراں نال صلاح کِیتی پئی اوہنوں کِیویں اوہناں دے حوالے کرے۔ تے اوہ خُوش ہوئے تے اوہدے نال رُپئے دین دا اِقرار کِیتا۔ تے اوس مَن لیا تے موقع لَبّھدا سی پئی جد بِھیڑ نا ہوئے اودُوں اوہنوں اوہناں دے حوالے کر دے۔ تَد فطِیری روٹِیاں دا دِن آیا۔ جِہدے وِچ فسح حلال کرنا سی۔ تے اوس پطرس تے یُوحنّا نُوں ایہہ آکھ کے گھلّیا۔ پئی جا کے ساڈے لئی فسح تیار کرو۔ پئی اسی کھائیے۔ اوہناں اوہنوں آکھیا۔ تُوں کِتّھے چاہنا ایں پئی اسی تیار کریئے؟ اوس اوہناں نُوں آکھیا۔ جد شہر وِچ تُسی وڑو گے ویکھو اِک بندہ پانی دا گھڑا چُکیا ہویا تُہانوں ٹکّرے گا۔ اوہ جِس گھر وِچ جائے اوہدے مگر جاؤ۔ تے گھر دے مالک نُوں آکھو اُستاد تینُوں آکھدا اے۔ پئی پَروہنیاں دی تھاں کِتّھے اے جِتّھے مَیں اپنے شاگِرداں نال فسح کھاواں؟ تے اوہ آپ اِک وَڈا چوبارا تیار ہویا تُہانوں وکھالے گا۔ اوتھے تیار کرو۔ اوہناں جا کے جِہیا اوس اوہناں نُوں دسیا سی ویکھیا۔ تے فسح تیار کِیتی نیں۔ تے جد ویلا آگیا اوہ بَہہ گیا تے رسُول اوہدے نال۔ تے اوہناں نُوں آکھیا۔ مَینُوں بڑی چاہ سی پئی دُکھ سہن توں پہلاں ایہہ فسح تُہاڈے نال کھانواں۔ کیوں جو مَیں تُہانوں آکھنا آں۔ پئی مَیں ایہہ کدی نا کھانواں گا جد تِیکر خُدا دی بادشاہی وِچ اوہ پُورا نا ہوئے۔ تے پیالہ لے کے شُکر کِیتا تے آکھیا ایہہ نُوں پھڑو تے آپو وِچ ونڈ لو۔ کیوں جو مَیں تُہانوں آکھنا آں پئی ایدوں اگّے مَیں انگور دی رَس کدی نا پِیاں گا جد تِیکر خُدا دی بادشاہی نا آوے۔ تے روٹی لئی تے شُکر کر کے توڑی تے ایہہ آکھ کے اوہناں نُوں دِتّی پئی ایہہ میرا بدن اے۔ جیہڑا تُہاڈے واسطے دِتّا جاندا اے۔ ایہہ میری یادگیری لئی کریا کرو۔ تے ایسے طرح کھان دے مگروں اوس پیالے نُوں ایہہ آکھ کے دِتّا۔ پئی ایہہ پیالہ میرے لہو وِچ جیہڑا تُہاڈے لئی وگایا جاندا اے نواں عہد اے۔ پر ویکھو میرے پھڑان والے دا ہتّھ میرے نال میز اُتّے اے۔ کیوں جو اِبنِ آدم جاندا اے جیویں اوہدے لئی ٹھیرایا گیا اے۔ پر افسوس اوس بندے اُتّے جِہدی راہِیں اوہ پھڑوایا جاندا اے۔ تے اوہ آپو وِچ پچُھّن لگّے پئی ساڈے وِچوں اوہ کیہڑا اے جیہڑا ایہہ کمّ کرے گا؟ تے اوہناں وِچ جھگڑا وی پیا پئی ساڈے وِچوں کیہڑا وَڈا مَنّیا جاندا اے؟ اوس اوہناں نُوں آکھیا پئی غیر قوماں دے بادشاہ اوہناں اُتّے حکُومت چلاؤندے نیں۔ تے جیہڑے لوک اوہناں اُتّے اختیار رکھدے نیں سو غرِیب پرور اکھواؤندے نیں۔ پر تُہاڈا اوہ حال نئیں۔ سگوں تُہاڈے وِچ جیہڑا وَڈا اے اوہ نِکّے وانگر تے جیہڑا سردار اے اوہ ٹہلئے وانگر اے۔ کیوں جو وَڈا کیہڑا اے۔ اوہ جیہڑا کھان بَیٹھا۔ یا اوہ جیہڑا سیوا کر دا اے؟ اوہ نئیں جیہڑا کھان بَیٹھا اے؟ پر مَیں تُہاڈے وِچ ٹہلئے وانگر آں۔ تُسی اوہو ای اوہ جیہڑے میرِیاں ازمایشاں وِچ برابر میرے نال رہے اوہ۔ تے جیویں میرے باپ میرے لئی اِک بادشاہی ٹھیرائی مَیں تُہاڈے لئی ٹھہرانا آں۔ تاں جو میری بادشاہی وِچ میرے میز اُتّے کھاؤ پِیو۔ تے تُسی تختاں اُتّے بَہہ کے اِسرائیل دے باراں قبیلیاں دا نیاں کرو گے۔ اَے شمعُون اَے شمعُون ویکھ شیطان نے تُساں لوکاں نُوں منگیا۔ پئی کنک وانگُوں تُہانوں چھٹّے۔ پر مَیں تیرے لئی دُعا کِیتی۔ پئی تیرا اِیمان جاندا نا رہے۔ تے جد تُوں مُڑ پئیں تے اپنے بھراواں نُوں تگڑیاں کریں۔ اوس اوہنوں آکھیا اَے خُداوند تیرے نال مَیں تیار آں بھانویں قید نُوں تے مَوت نُوں جانا پَوے۔ اوس آکھیا پطرس مَیں تینُوں آکھنا آں پئی کُکّڑ دے بانگ دین توں پہلاں تُوں تَرے واری میرا اِنکار کریں گا پئی مَیں اینوں نئیں جان دا۔ تے اوس اوہناں نُوں آکھیا جِس ویلے مَیں تُہانوں بٹوے تے جھولی تے جُتِّیاں بِناں گھل دِتّا تَد تُہانوں کِسے شے دی تھوڑ تے نئیں سی؟ اوہ آکھن لگّے کِسے دی نئیں۔ تَد اوس اوہناں نُوں آکھیا پر ہُن جِہدے کول بٹوا ہوئے سو لے لَئے تے ایسے طرح جھولی وی۔ تے جِہدے کول نا ہوئے اوہ اپنا کپڑا ویچ کے تلوار مُل لَوے۔ کیوں جو مَیں تُہانوں آکھنا آں۔ پئی ایہہ جو لِکھیا ہویا اے پئی اوہ بُریاں وِچ گِنیا گیا۔ میرے حق اندر پُورا ہونا ضرُور اے۔ کیوں جو کُجھ میرے نال تعلق رکھدا اے سو پُورا ہونا اے۔ اوہناں آکھیا اَے خُداوند ویکھ ایتھے دو تلواراں تے ہے نیں۔ اوس اوہناں نُوں آکھیا۔ ایہہ بتھیریاں نیں۔ تے اوہ باہر نِکل کے اپنے دستُور دے سببّوں زَیتُون دے پہاڑ نُوں گیا۔ تے شاگِرد وی اوہدے مگر ٹُرپَئے۔ تے اوس تھاں اَپڑ کے اوس اوہناں نُوں آکھیا۔ دُعا کرو پئی ازمایش وِچ نا پَوو۔ تے آپی اوہناں توں کوئی ڈھیم دی مار دی وِتھ جِنّاں وکھرا ہوگیا تے گوڈے نواکے دُعا منگی۔ پئی اَے باپ جے تُوں چاہیں تے ایس پیالے نُوں میرے کولوں ہٹا دے۔ فیر وی میری مرضی نئیں پر تیری مرضی ہوئے۔ تے اسمانوں اِک فرِشتے اوہنوں وکھالی دِتّی۔ اوہ اوہنوں طاقت دیندا سی۔ فیر اوہ بُہت پریشان ہو کے بڑی تانگھ نال دُعا منگن لگّا تے اوہدا مُڑھکا لہو دے تُبکیاں وانگُوں زمین اُتّے ڈِگّدا سی۔ تے دُعا توں اُٹھ کے اوہ شاگِرداں دے کول آیا تے اوہناں نُوں غم دیاں مارِیاں سُتّیاں ہویاں ویکھیا۔ تے اوہناں نُوں آکھیا تُسی کاہِنُوں سَوندے اوہ؟ اُٹھ کے دُعا منگو۔ پئی ازمایش وِچ نا پَوو۔ اوہ اجے بولدا ای سی پئی ویکھو اِک بِھیڑ آئی تے باراں وِچوں اِک جیہڑا یہُوداہ اکھواؤندا سی اوہناں دے اگّے اگّے آؤندا سی۔ تے اوہ یِسُوع دے کول آیا پئی اوہنوں چُمّے۔ پر یِسُوع اوہنوں آکھیا یہُوداہ تُوں چُمّ کے اِبنِ آدم نُوں پھڑانا ایں؟ جد اوہدے آلے دوالے والیاں ویکھیا پئی کِیہ ہون لگّا تے آکھیا اَے خُداوند اسی تلوار چلائیے۔ تے اوہناں وِچوں اِک نے سردار کاہِن دے غلام اُتّے چلا کے اوہدا سَجّا کنّ اُڈا دِتّا۔ یِسُوع جواب دِتّا۔ ہُن صبر کرو۔ تے اوہدا کنّ چُھو کے اوہنوں چَنگا کِیتا۔ تَد یِسُوع سردار کاہِناں تے ہیکل دے صُوبیداراں تے بزُرگاں نُوں جیہڑے اوہدے اُتّے چڑھ آئے سن آکھیا۔ تُسی مَینُوں چور سمجھ کے تلواراں تے ڈانگاں لے کے نِکلے ہوئے ہو؟ جد مَیں روز ہیکل وِچ تُہاڈے نال ساں تُساں میرے اُتّے ہتّھ نا پائے پر ایہہ تُہاڈی گھڑی تے ہنیرے دا اختیار اے۔ تَد اوہ اوہنوں پھڑ کے لے آئے۔ تے سردار کاہِن دے گھر وِچ لے گئے۔ تے پطرس ڈردا ڈردا مگر ٹُریا جاندا سی۔ تے جد اوہ ویہڑے دے اندر اَگ بال کے اکٹّھے بَیٹھے ہوئے سن تَد پطرس اوہناں وِچ بَہہ گیا۔ تے اِک ٹہلن اوہنوں لو وِچ بَیٹھیا ویکھیا۔ تے اوہدے ولّ چنگی طرح دھیان کر کے آکھیا۔ ایہہ وی اوہدے نال سی۔ پر اوہ مُکّر گیا تے آکھیا اَے بی بی مَیں اوہنوں نئیں جان دا۔ تھوڑے چِر مگروں ہور کِسے اوہنوں ویکھ کے آکھیا۔ تُوں وی اوہناں وِچوں ایں۔ پطرس آکھیا اوہ پائی مَیں اوہناں وِچوں نئیں آں۔ تے گھڑی کُو مگروں ہور کِسے نے پَکّی کر کے آکھیا پئی بے شک ایہہ وی اوہدے نال سی۔ کیوں جو اوہ گلِیلی بندہ اے۔ پطرس آکھیا اوہ پائی مَیں نئیں سمجھدا پئی تُوں کِیہ آکھنا ایں۔ تے اوہ اجے بولدا ای پیا سی پئی جھٹ کُکّڑ نے بانگ دِتّی۔ تَد خُداوند مُڑ کے پطرس ولّ ویکھیا۔ تے پطرس نُوں خُداوند دی اوہ گلّ یاد آئی۔ جیہڑی اوس اوہنوں آکھی سی پئی اَج کُکّڑ دے بانگ دین توں پہلاں تُوں میرا تَرے واری اِنکار کریں گا۔ اوہ باہر ٹُر گیا تے بڑا رویا۔ تے اوہ بندے جِنہاں یِسُوع نُوں پھڑیا ہویا سی۔ اوہنوں مخَول کر دے تے مار دے سن۔ تے اوہ اوہدیاں اَکھّیاں بَنّھ کے اوہنوں ایہہ پُچھ دے سن پئی نبُوّت کر کے دس تینُوں کِس ماریا؟ تے طعنہ مار کے ہور کئی سارِیاں گلّاں اوہ دے برخلاف آکھیاں۔ تے جد دِن چڑھیا تے قوم دے بزُرگاں دی جماعت اکٹّھی ہوئی۔ سردار کاہِن وی تے فقِیہ وی۔ تے اوہنوں اپنی وڈّی پنچایت وِچ لیا کے آکھیا۔ جے تُوں مسِیح ایں۔ تے سانُوں دس۔ اوس اوہناں نُوں آکھیا جے مَیں تُہانوں دساں تُسی کدی نا مَنّو گے۔ تے جے پُچھاں کدی جواب نا دیو گے۔ ہُن توں اگّے اِبنِ آدم خُدا دی قُدرت دے سَجّے ہتّھ بَیٹھا رہے گا۔ تَد ساریاں آکھیا تُوں خُدا دا پُتر ایں؟ اوس اوہناں نُوں آکھیا۔ تُسی آکھدے ہو کیوں جو مَیں ہاں۔ تَد اوہناں آکھیا سانُوں ہور گواہی دی ہُن کِیہ لوڑ؟ اساں آپ جو اوہدے مُنھوں سُنیا۔ تے اوہناں دی ساری جماعت اُٹھی تے اوہنوں پِیلاطُس کول لے گئی۔ تے اوہناں اوہدے اُتّے نالشاں کرنِیاں شُروع کِیتیاں پئی اساں ایہنوں ویکھیا پئی ساڈی قوم نُوں ورغلاؤندا اے۔ تے منع کر دا اے پئی قَیصر نُوں جزیہ نا دین۔ نالے آکھدا اے۔ پئی مَیں آپ مسِیح بادشاہ آں۔ تے پِیلاطُس اوہنوں ایہہ پُچھیا تُوں یہُودِیاں دا بادشاہ ایں؟ اوس اوہنوں جواب دِتّا تُوں آپے آکھنا ایں۔ پِیلاطُس سردار کاہِناں تے عام لوکاں نُوں آکھیا مَیں ایس بندے وِچ کُجھ قصور نئیں ویکھدا۔ پر اوہناں ہور وی زور لاکے آکھیا۔ پئی سارے یہُودیہ وِچ سگوں گلِیل توں لے کے ایس جگہ تِیکر سِکھال سِکھال کے ایہہ لوکاں نُوں چُک دا اے۔ پِیلاطُس ایہہ گلّ سُن کے پُچھیا۔ ایہہ بندہ گلِیلی اے؟ تے جد پتا لگّا پئی ہیرودیس دے علاقیوں اے۔ تَد اوہنوں ہیرودیس دے کول گھلّیا۔ کیوں جو اوہ وی اونہی دِنیں یرُوشلِیم وِچ سی۔ تے ہیرودیس یِسُوع نُوں ویکھ کے بڑا راضی ہویا کیوں جو اوہ چروکنا اوہنوں ویکھنا چاہندا سی۔ ایس کر کے پئی اوس اوہدی افواہ سُنی۔ تے اوہنوں آس سی۔ پئی مَیں اوہدے ہتھّوں کوئی کرامات ویکھاں۔ تے اوس اوہدے توں بتھیریاں گلّاں پُچھیاں۔ پر اوس اوہنوں کُجھ جواب نا دِتّا۔ تے سردار کاہِن تے فقِیہ کھلو کے اوہدے اُتّے زور شور نال نالش کر دے رہے۔ جد ہیرودیس اپنے سپاہیاں سمیت اوہنوں بے عِزّت کِیتا تے ٹھٹّھا ماریا تَد چمکدی پوشاک پا کے اوہنوں مُڑ پِیلاطُس کول گھلّیا۔ تے اوسے دِن ہیرودیس تے پِیلاطُس آپو وِچ یار بن گئے۔ کیوں جو اگّے اوہناں وِچ وَیر سی۔ تے پِیلاطُس سردار کاہِناں تے سرداراں تے لوکاں نُوں اکٹّھے سَدّ کے۔ اوہناں نُوں آکھیا۔ تُسی ایس بندے نُوں میرے کول ایس واسطے لیائے ہو پئی لوکاں نُوں ورغلاؤندا اے۔ تے ویکھو مَیں تُہاڈے اگّے چنگی طرح دریافت کِیتا تے جیہڑیاں گلّاں دی بابت تُسی ایہدے اُتّے نالش کر دے اوہ۔ ایس بندے وِچ مَیں کُجھ قصور نا ڈِٹّھا۔ تے نا ہیرودیس کیوں جو اوس اوہنوں ساڈے کول موڑ گھلّیا۔ تے ویکھو اوس کوئی اجیہا کمّ نئیں کِیتا جیہڑا قتل دے لائق ہوئے۔ سو مَیں اوہنوں کولڑے مروا کے چھڈ دیاں گا۔ [اوہنوں ہر عید نُوں ضرُور سی کہ کِسے نُوں اوہناں لئی چھڈ دیوے۔] تَد ساریاں دے سارے ڈنڈ پا کے بول اُٹھے۔ پئی ایہنوں دفع کر تے ساڈے واسطے برابّا نُوں چھڈ دے۔ (اوہ تے کِسے فساد دے سبّب جیہڑا شہر وِچ ہویا سی تے خُون کرن دے سبّب قید وِچ پیا سی۔) تے پِیلاطُس فیر اوہناں نال گلّاں کِیتیاں ایہہ چاہ کے پئی مَیں یِسُوع نُوں چھڈ دیاں۔ پر اوہ چلّا کے بولے۔ اوہنوں صلِیب دے صلِیب دے۔ ترِیجی وار اوس اوہناں نُوں آکھیا کیوں ایس کِیہ بُریائی کِیتی۔ مَیں اوہدے وِچ قتل دا کوئی سبّب نئیں ویکھیا ایس لئی مَیں اوہنوں کولڑے مروا کے چھڈ دیاں گا۔ پر اوہ اوہدے مگر پَے گئے تے اُچّی اُچّی منگ کر دے رہے پئی اوہ صلِیب دِتّا جائے۔ تے اوہناں دِیاں اَوازاں زور پا گِئیاں۔ تَد پِیلاطُس حُکم کِیتا پئی اوہناں دی منگ دے سببّوں کِیتا جائے۔ تے اوس بندے نُوں جیہڑا فساد تے خُون دے سبّب قیدے پایا ہویا سی۔ جِہنُوں اوہ منگدے سن اوہنوں چھڈ دِتّا۔ پر یِسُوع نُوں اوہناں دی مرضی اُتّے حوالے کِیتا۔ تے جد اوہنوں لئی جاندے سن تے شمعُون ناں اِک کُرینی بندے نُوں پِنڈوں آؤندیاں پھڑ کے صلِیب چُکائی پئی یِسُوع دے مگر مگر لے چلّے۔ تے لوکاں دی وڈّی بِھیڑ تے کئی زنانِیاں جیہڑیاں اوہدے واسطے پِٹدِیاں تے روندیاں سن اوہدے پِچّھے پِچّھے ٹُرے۔ یِسُوع اوہناں ولّ مُڑ کے آکھیا اَے یرُوشلِیم دی دِھئیو مَینُوں نا روؤ سگوں اپنے آپ نُوں روؤ تے اپنے بچّیاں نُوں۔ ایس لئی پئی ویکھو اوہ دِن آؤنے نیں جدوں اوہ آکھن گے دھنّ اوہ نیں جیہڑیاں نئیں پَھلیاں تے اوہ کُکھاں جِنہاں نئیں جمّیاں تے اوہ چھاتیاں جِنہاں دُدّھ نئیں پیایا۔ تَد پہاڑاں نُوں آکھن گے پئی ساڈے اُتّے ڈِگّ پَوو۔ تے ٹِبّیاں نُوں پئی سانُوں لُکاؤ۔ کیوں جو جدوں ہرے رُکھّ نال اِنج کر دے نیں تے سُکّے نال ضرُور ای کرن گے۔ تے ہور دو بندیاں نُوں وی جیہڑے بدکار سن لئی جاندے سن پئی اوہدے نال مارے جان۔ تے جد اوہ اوس تھاں اُتّے اَپڑے۔ جیہڑی کھوپڑی اکھواؤندی سی۔ تے اوہناں اوتھے اوہنوں سُولی چاہڑیا۔ تے بدکاراں نُوں وی اِک سَجّے دُوجا کھبّے پاسے۔ تے یِسُوع آکھیا اَے پئیو ایہناں نُوں مُعاف کر۔ کیوں جو ایہہ نئیں جان دے پئی کِیہ کر دے نیں۔ تے اوہناں اوہدے کپڑے ونڈ کے گُنے پائے۔ تے لوک کھلو کے پئے ویکھدے سن تے سردار وی مخَول کر کر کے آکھدے سن۔ پئی ہور ناں نُوں اوس بچایا۔ جے ایہہ خُدا دا مسِیح تے اوہدا چُنیا ہویا اے تے اپنے آپ نُوں بچاوے۔ تے سپاہیاں وی اوہدے نال ٹھٹّھا کِیتا۔ تے اگانہہ ہو کے سِرکہ وکھال کے۔ آکھیا۔ جے تُوں یہُودِیاں دا بادشاہ ایں تے اپنے آپ نُوں بچا۔ تے اوہدے اُتّے ایہہ نوِشتہ لایا۔ پئی یہُودِیاں دا بادشاہ ایہو اے۔ تے جیہڑے بدکار ٹنگے گئے سن اوہناں وِچوں اِک نے اوہنوں مِہنا مار کے آکھیا تُوں مسِیح نئیں ایں؟ تُوں اپنے آپ نُوں تے سانُوں وی بچا۔ پر دُوجے اوہنوں جِھڑک کے جواب دِتّا۔ تینُوں خُدا توں وی ڈر نئیں آؤندا پئی ٹھیک اوہو جیہی سزا بُھگتنا ایں؟ تے سانُوں ایہہ انصاف نال مِلیا اے۔ کیوں جو اسی اپنی کرنی دا پَھل پانے آں پر ایس کوئی بُرا کمّ نئیں کِتیا۔ تے اوس آکھیا اَے یِسُوع جدوں تُوں اپنی بادشاہی وِچ آویں تے میرا چیتا رکھّیں۔ یِسُوع اوہنوں آکھیا مَیں تینُوں سَچ آکھنا آں پئی اَج تُوں میرے نال بہشت وِچ ہوئیں گا۔ تے ہُن دوپہر دے قریب سی تے ساری زمین اُتّے ہنیرا ہوگیا۔ تے لَوہڈے ویلے تِیکر رہیا۔ سُورج گواچ گیا تے ہیکل دا پردہ وِچکاروں پاٹ گیا۔ تے یِسُوع بڑی اواز نال پُکار کے آکھیا۔ اَے باپ مَیں اپنے رُوح نُوں تیرے ہتّھِیں سونپنا آں تے ایہہ آکھ کے دَم چھڈ دِتّا۔ تے صُوبیدار ایہہ حال ویکھ کے خُدا دی وڈیائی کِیتی تے آکھیا بے شک ایہہ بندہ نیک سی۔ تے سارے لوک جیہڑے ساری گلّ نُوں ویکھن لئی اکٹّھے ہوئے سن ایہہ حال ویکھ کے پِٹدے ہوئے مُڑے۔ تے اوہدے سارے جانُوں تے اوہ زنانِیاں جیہڑیاں اوہدے نال گلِیلوں اوہدے مگر آئِیاں سن۔ اوہ دُراڈے کھلو کے ایہہ حال پئیاں ویکھدِیاں سن۔ تے ویکھو یُوسف ناں اِک پینچ بندہ جیہڑا چَنگا تے نیک بندہ سی۔ تے اوہ اوہناں دی صلاح تے کمّ وِچ شریک نئیں سی۔ اوہ یہُودِیاں دے ارِمَتِیاہ شہر دا سی۔ تے آپ خُدا دی بادشاہی دی اُڈِیک رکھدا سی۔ اوس پِیلاطُس کول جا کے یِسُوع دی لوتھ منگی۔ تے اوہنوں لاہ کے مَلمَل دے کپڑے وِچ وھلیٹیا۔ تے اِک قبر وِچ رکھ دِتّا جیہڑی چٹان وِچ پُٹی ہوئی سی۔ جِہدے وِچ کدی کوئی اجے نئیں سی پیا۔ تے تیاری دا دِن سی۔ تے سبت دا دِن شُروع ہون لگّا۔ تے اوہناں زنانِیاں جیہڑیاں اوہدے نال گلِیلوں آئِیاں سن مگر مگر ٹُر کے قبر نُون ویکھیا۔ تے ایہہ وی پئی اوہدی لاش کِس طرح رکھی گئی سی۔ تے مُڑ کے خوشبو والے مصالے تے عِطر نُوں تیار کِیتا پر سبت دے دِن حُکم دے سببّوں آرام کِیتا۔ تے اوہ ہفتے دے پہلے دِن مُنھ ہنیرے مصالیاں نُوں جیہڑے اوہناں تیار کِیتے سن نال لے کے قبر اُتّے آئِیاں۔ تے اوہناں پتّھر نُوں قبر توں رہڑیا ہویا ویکھیا۔ پر اندر وڑ کے خُداوند یِسُوع دی لاش نا ویکھی۔ تے ایویں ہویا جد اوہ ایس گلّے حَیران سن تے ویکھو دو بندے چمکن والے کپڑے پائے ہوئے اوہناں دے کول آکھلوتے۔ جد اوہ ڈر گِئیاں تے سِر زمین ولّ ہیٹھاں کِیتے۔ تَد اوہناں نیں اوہناں نُوں آکھیا پئی جِیوندے نُوں مویاں وِچ تُسی کیوں لَبّھدیاں ہو؟ اوہ ایتھے نئیں اے سگوں جی اُٹھیا اے۔ چیتا کرو پئی جد اوہ اجے گلِیل وِچ سی اوس تُہانوں کِس طرح آکھیا سی۔ ضرُور اے پئی اِبنِ آدم گُناہِیاں دے حوالے کِیتا جائے۔ تے صلِیب دِتّا جائے۔ تے ترِیجے دیہاڑے جی اُٹھے۔ تے اوہدیاں گلّاں اوہناں نُوں یاد آئِیاں۔ تے قبروں مُڑ کے اوہناں یارھاں نُوں تے ہور ساریاں نُوں اوہناں سبھناں گلّاں دی خبر دِتّی۔ جِنہاں رسُولاں نُوں ایہہ گلّاں آکھیاں اوہ مریم مگدلِینی تے یُوأنہ تے یعقُوب دی ماں مریم تے اوہناں دے نال دِیاں ہور زنانِیاں سن۔ پر ایہہ گلّاں اوہناں دے اگّے قِصّیاں وانگُوں معلُوم ہویاں تے اوہناں نیں اوہناں دا یقِین نا کِیتا۔ تَد پطرس اُٹھ کر قبر ولّ نَسّیا تے جھاتی ماری تے نِرا کفن ای کفن ویکھیا۔ تے حَیران ہو کے پئی کِیہ ہوگیا اے۔ اوہ اپنے گھر نُوں ٹُرگیا۔ تے ویکھو اوسے دِن اوہناں وِچوں دوجنے اِمّاؤس ناں دے اِک پِنڈ ولّ جاندے سن جیہڑا یرُوشلِیم توں سَتّ مِیل اے۔ تے اوہناں سارِیاں گلّاں دی بابت جیہڑیاں ہویاں سن آپو وِچ گلّ بات کر دے جاندے سن۔ تے اجیہا ہویا پئی جد اوہ گلّ بات تے پُچھ پاچھ کر دے سن۔ تے یِسُوع وی آپ نیڑے آ کے اوہناں دے نال ٹُر پیا۔ پر اوہناں دِیاں اَکھّیاں بند کِیتیاں ہویاں سن پئی اوہنوں نا سہانن۔ اوس اوہناں نُوں آکھیا ایہہ کِیہ گلّاں نیں جیہڑیاں تُسی آپو وِچ ٹُرے جاندے کر دے ہو؟ تے اوہ اُداس جیہے ہو کے کھلو گئے۔ تَد اِک نے جِہدا ناں کلِیُپاس سی جواب وِچ اوہنوں آکھیا۔ نِرا تُوں ای یرُوشلِیم وِچ اِک اوپرا ایں۔ جیہڑا نئیں جان دا۔ پئی ایہنی دِنیں اوتھے کِیہ ورت گیا اے؟ تے اوس اوہناں نُوں آکھیا کِیہ ورتیا ہے؟ اوہناں اوہنوں آکھیا یِسُوع ناصری دی بابت جیہڑا خُدا تے ساری قوم دے اگّے کمّ تے کلام وِچ قُدرت والا نبی سی۔ تے کِس طرح سردار کاہِناں تے ساڈے سرداراں قتل دے حُکم لئی اوہنوں پھڑا دِتّا۔ تے اوہنوں صلِیب دِتّی۔ پر سانُوں آس سی پئی ایہہ اوہو اے۔ جیہڑا اِسرائیل نُوں چُھٹکارا دے گا تے ایہناں سارِیاں گلّاں دے سِوا ایس حال گُذرے نُوں ہُن ترِیجا دِن جاندا اے۔ نالے ساڈے وِچوں کئی زنانِیاں سانُوں گھبرا رکھیا اے۔ جیہڑیاں بُہت سویرے قبر اُتّے گِئیاں۔ تے جد اوہدی لاش اوہناں نُوں نئیں لَبّھی تَد اوہ ایہہ آکھدیاں آئِیاں پئی اساں فرِشتیاں نُوں رویا وِچ ویکھیا۔ اوہناں آکھیا پئی اوہ جِیوندا اے۔ تے ساڈے نال دیاں وِچوں کئی اِک قبر اُتّے گئے۔ تے ٹھیک جِہیا زنانِیاں آکھیا سی سو ڈِٹّھا۔ پر اوہنوں نا ڈِٹّھا۔ تَد اوس اوہناں نُوں آکھیا۔ اَے بے عقلو نبیاں دِیاں گلّاں نُوں مَنّن وِچ سُست دِلو۔ ایہہ گلّ ضرُوری نئیں سی پئی مسِیح ایہناں ساریاں دُکھاں نُوں سہہ کے اپنے جلال وِچ داخل ہوئے؟ تے مُوسیٰ تے سارے نبیاں توں شُروع کر کے سارِیاں کِتاباں وِچ جِنّیاں گلّاں اوہدی بابت لِکھیاں ہویاں نیں اوہناں نُوں سمجھا دِتّیاں۔ تے جِس پِنڈ اوہناں جانا سی اوہ اوہدے نیڑے اَپڑ گئے۔ تے اوس اگّے وَدھن نُوں کِیتا۔ تَد اوہناں ایہہ آکھ کے زور دِتّا۔ پئی ساڈے نال رہو۔ کیوں جو شام ہو چلّی اے۔ تے ہُن دِن لَہہ گیا اے تے اوہ اوہناں دے نال رہن نُوں اندر گیا۔ تے جد اوہ اوہناں دے نال کھان بَیٹھا سی۔ ایویں ہویا پئی اوس روٹی لئی تے برکت دے کے توڑی تے اوہناں نُوں دین لگّا۔ تَد اوہناں دِیاں اَکھّیاں کُھل گِئیاں تے اوہناں اوہنوں سِہاتا۔ تے اوہ اوہناں دی نظر توں غائب ہوگیا۔ تَد اوہ آپو وِچ آکھن لگّے پئی جدوں اوہ وٹے ساڈے نال گلّاں کر دا تے کِتاباں دے بھید ساڈے لئی کھولدا سی؟ تدوں ساڈا دِل جوش نئیں سی مار دا؟ تے اوہ اوسے گھڑی اُٹھ کے یرُوشلِیم نُوں پرت گئے تے یارھاں نُوں تے اوہناں دیاں نال دیاں نُوں اکٹّھیاں ڈِٹّھا۔ اوہ پئے آکھدے سن۔ پئی خُداوند سَچّی مُچیّں جی اُٹھیا اے۔ تے شمعُون نُوں وکھالی دِتّی۔ تَد اوہناں اپنے راہ دا حال دسیا تے ایہہ وی پئی اوہ روٹی دے توڑن ویلے ساتھوں کِس طرح سہاتا گیا۔ اوہ ایہہ گلّاں پئے کر دے ای سن پئی اوہ آپ اوہناں دے وِچ آ کے کھلو گیا تے اوہناں نُوں آکھیا تُہاڈی سلامتی ہوئے۔ پر اوہ حَیران ہو کے تے خَوف کھا کے سمجھے۔ پئی اسی کِسے رُوح نُوں ویکھنے آں۔ تے اوس اوہناں نُوں آکھیا۔ تُسی کیوں گھبراؤندے ہو؟ تے کاہِنُوں تُہاڈے دِل وِچ شک پَیندا اے؟ ویکھو میرے ہتّھاں تے پیراں نُوں پئی مَیں ای آں۔ مَینُوں ہتّھ لاکے ویکھو۔ کیوں جو رُوح دا گوشت تے ہڈِّیاں نئیں ہوندیاں۔ جیویں میرے وِچ تُسی ویکھدے ہو۔ تے ایہہ آکھ کے اوہناں نُوں اپنے ہتّھ پَیر وکھائے۔ تے جد اجے خُوشی دے مارِیاں اوہناں نُوں یقِین نئیں سی آیا۔ تے اوہ تعجُّب پئے کر دے سن۔ اوس اوہناں نُوں آکھیا۔ تُہاڈے کول کُجھ کھان نُوں ایتھے اے؟ تَد اوہناں بُجھّی ہوئی مچّھی دا اِک ڈکرا دِتّا۔ تے اوس لے کے اوہناں دے سامھنے کھادا۔ تَد اوس اوہناں نُوں آکھیا ایہہ میرِیاں اوہ گلّاں نیں جیہڑیاں تُہاڈے نال ہوندیاں ہویاں مَیں تُہانوں آکھیاں پئی اوہناں سبھناں گلّاں دا پُورا ہونا ضرُور اے۔ جیہڑیاں مُوسیٰ دی توریت تے نبیاں دِیاں کِتاباں تے زبُوراں وِچ میری بارے لِکھیاں ہویاں نیں۔ تَد اوس اوہناں دا ذہن کھول دِتّا۔ پئی کِتاباں نُوں سمجھ لین۔ تے اوہناں نُوں آکھیا۔ ایویں لِکھیا اے۔ پئی مسِیح دُکھ جھلّے گا۔ تے ترِیجے دِہاڑے مُردیاں وِچوں جی اُٹھے گا۔ تے یرُوشلِیم توں شُروع کر کے سارِیاں قوماں وِچ تَوبہ تے گُناہاں دی مُعافی دی منادی اوہدے ناں اُتّے کِیتی جائے گی۔ تُسی ایہناں گلّاں دے گواہ ہو۔ تے ویکھو مَیں اپنے باپ دے وعدہ نُوں تُہاڈے اُتّے گھلّنا آں۔ پر تُسی شہر وِچ بَیٹھے رہو۔ جد تِیکر عالمِ بالا توں تُہانوں قُدرت دے لباس نا مِلے۔ تَد اوہ اوہناں نُوں شہروں باہر بَیت عَنِیاہ دے سامھنے لے گیا تے اپنے ہتّھ چُک کے اوہناں نُوں برکت دِتّی۔ تے ایویں ہویا پئی جد اوہناں نُوں برکت پیا دیندا سی۔ تے اوہ اوہناں توں وَکھ ہویا۔ تے اسمان اُتّے چُکیا گیا۔ تے اوہناں اوہنوں سجدہ کِیتا۔ تے بڑی خُوشی نال یرُوشلِیم نُوں مُڑے۔ تے ہر ویلے ہیکل وِچ خُدا دی حمد کر دے رہے۔ مُڈھوں کلام سی تے کلام خُدا دے نال سی تے کلام خُدا سی۔ ایہو ازلوں خُدا دے نال سی۔ سارِیاں شیواں اوہدی راہِیں پَیدا ہویاں۔ تے بِناں اوہدے اِک شے وی پَیدا نا ہوئی جیہڑی پَیدا ہوئی اے۔ زِندگی اوہدے وِچ سی تے اوہ زِندگی لوکاں دا چانن سی۔ تے چانن ہنیرے وِچ چمکدا اے۔ تے ہنیرے نیں اوہنوں نا پِچھانیا۔ اِک بندہ خُدا دا گھلّیا ہویا سی۔ اوہدا ناں یُوحنّا سی۔ اوہ گواہی دے لئی آیا پئی چانن دی بابت گواہی دے۔ تاں جو سبھ لوک اوہدی راہِیں اِیمان لیاؤن۔ اوہ چانن اوہ آپ نئیں سی پر اوس چانن دی گواہی دین آیا سی۔ اصل چانن جیہڑا ہر اِک بندے نُوں چانن دیندا اے دُنیا وِچ آؤن والا سی۔ اوہ دُنیا وِچ سی تے دُنیا اوہدی راہِیں پَیدا ہوئی۔ تے دُنیا اوہنوں نا جانیا۔ اوہ اپنیاں کول آیا تے اوہناں اوہنوں قبول نا کِیتا۔ پر جِنّیاں اوہنوں قبول کِیتا اوس اوہناں نُوں حق دِتّا پئی خُدا دے پُتر بن جان یعنی اوہناں نُوں جیہڑے اوہدے ناں اُتّے اِیمان لیاؤندے نیں۔ اوہ نا لہو توں نا بدن دی چاہ توں نا اِنسان دی چاہ توں پر خُدا توں پَیدا ہوئے سن۔ تے جِسم لیا تے فضل تے سچیائی نال بھرپُور ہو کے ساڈے کول ڈیرہ کِیتا۔ تے اساں اُسدا اجیہا جلال ویکھیا جیویں باپ دے اِکلَوتے دا جلال۔ یُوحنّا اوہدے حق وِچ گواہی دِتّی تے پُکار کے آکھیا پئی ایہو سی جِہدی گلّ مَیں کر دا ساں پئی اوہ جیہڑا میرے پِچّھوں آیا اے مَیتھوں اگیترا ہویا اے کیوں جو اوہ مَیتھوں پہلاں سی۔ تے اوہدی بھرپُوری وِچوں اساں سبھناں نُوں مِلیا یعنی فضل اُتّے فضل۔ کیوں جو شریعت مُوسیٰ دی راہِیں دِتّی گئی سی۔ پر فضل تے سچیائی یِسُوع مسِیح دی راہِیں آئی۔ خُدا نُوں کدی کِسے نئیں ڈِٹّھا پر اِکلَوتے پُتر نیں جیہڑا باپ دی گدّ وِچ اے اوہنوں ظاہر کِیتا۔ تے یُوحنّا دی گواہی ایہہ اے پئی جِس ویلے یہُودِیاں نیں کاہِناں تے لاویاں نُوں یرُوشلِیم توں گھلّیا پئی پچُھّن تُوں کون ایں؟ تے اوس اِقرار کِیتا تے مُکّریا نئیں تے اِقرار کِیتا پئی مَیں مسِیح نئیں آں۔ تے اوہناں اوہنوں پُچھیا۔ فیر تُوں کون ایں؟ تُوں ایلیّاہ ایں؟ اوس آکھیا مَیں نئیں آں۔ تُوں اوہ نبی ایں؟ اوس جواب دِتّا نئیں۔ تَد اوہناں اوہنوں آکھیا تُوں ایں کون؟ تاں جو اسی اپنے گھلّن والیاں نُوں جواب دئیے۔ تُوں اپنے آپ نُوں کِیہ دسنا ایں؟ اوس آکھیا مَیں جیویں یسعیاہ نبی آکھیا سی۔ اُجاڑ وِچ اِک ہوکا دین والے دی اواز ہاں پئی خُداوند دے راہ نُوں سِدّھا کرو۔ تے اوہ فرِیسیاں ولّوں گھلّے ہوئے سن۔ تے اوہناں اوہدے توں پُچھ کے اوہنوں آکھیا جے تُوں نا مسِیح ایں نا ایلیّاہ تے نا اوہ نبی تے فیر بپتِسمہ کیوں دینا ایں؟ یُوحنّا اوہناں نُوں جواب دِتّا پئی مَیں تے پانی نال بپتِسمہ دینا آں۔ تُہاڈے وِچ اِک کھلوتا ہویا اے جِہنُوں تُسی نئیں جان دے۔ اوہ میرے پِچّھے آؤندا اے۔ اوہدی جُتّی دی وَدّھری کھولن دے مَیں لائق نئیں۔ ایہہ گلّاں بَیت عَنِیاہ وِچ یَردنوں پار ہویاں جِتّھے یُوحنّا بپتِسمہ دیندا سی۔ دُوجے دِن یُوحنّا یِسُوع نُوں اپنے ولّ آؤندیاں ویکھ کے آکھیا ویکھو خُدا دا برّہ جیہڑا دُنیا دا گُناہ چُک لے جاندا اے۔ ایہہ اوہو اے جِہدی بابت مَیں آکھیا سی پئی اِک بندہ میرے پِچّھے آؤندا اے۔ جیہڑا مَیتھوں اگیترا ہوگیا اے کیوں جو اوہ مَیتھوں پہلاں سی۔ تے مَیں تے اوہنوں جان دا نئیں ساں۔ پر مَیں ایس لئی پانی نال بپتِسمہ دیندا آیا تاں جو اوہ اِسرائیل اُتّے ظاہر ہوئے۔ تے یُوحنّا ایہہ آکھ کے گواہی دِتّی پئی مَیں رُوح نُوں کبُوتر وانگُوں اسمانوں اُتر دیاں ویکھیا اے۔ تے اوہ اوہدے اُتّے آ ٹھیریا۔ تے مَیں اوہنوں جان دا نئیں ساں پر جِس مَینُوں گھلّیا سی پئی پانی نال بپتِسمہ دیاں اوس مَینُوں آکھیا سی پئی جِہدے اُتّے تُوں رُوح نُوں اُتر دیاں تے اوہدے اُتّے ٹھیر دیاں ویکھیں اوہو ای اے جیہڑا پاک رُوح نال بپتِسمہ دیندا اے۔ تے مَیں ویکھیا تے گواہی دِتّی اے پئی اوہ خُدا دا پُتر اے۔ فیر دُوجے دِن یُوحنّا تے اوہدیاں شاگِرداں وِچوں دو کھلوتے ہوئے سن۔ تے اوس یِسُوع نُوں جاندِیاں ویکھ کے آکھیا ویکھو خُدا دا لیلا۔ تے اوہناں دوہاں شاگِرداں اوہنوں ایہہ گلّ کر دیاں سُنیا تے یِسُوع دے مگر ٹُر پئے۔ تَد یِسُوع مُڑ کے تے اوہناں نُوں مگر آؤندیاں ویکھ کے اوہناں نُوں آکھیا تُسی کِیہ لبّھدے ہو؟ اوہناں اوہنوں آکھیا اے ربّی (جِہدا مطلب ایہہ اے اَے اُستاد) تُوں کِتّھے رہناں ایں؟ اوس اوہناں نُوں آکھیا آؤ ویکھو۔ سو اوہ آئے تے جِتّھے اوہ رہندا سی ویکھیا تے اوس دِہاڑے اوہدے کول رہئے۔ اوہ دسویں کُو گھنٹے سی۔ اوہناں دوہاں وِچوں جیہڑے یُوحنّا کولوں سُن کے اوہدے مگر ٹُر پئے سن اِک شمعُون پطرس دا بھرا اندریاس سی۔ اوس پہلاں اپنے سَکّے بھرا شمعُون نُوں لَبّھ کے اوہنوں آکھیا پئی اساں نُوں خُرستُس یعنی مسِیح مل گیا اے۔ تے اوہ اوہنوں یِسُوع کول لِیائیا۔ یِسُوع اوہدے ولّ ویکھ کے آکھیا تُوں یُوحنّا دا پُتر شمعُون ایں۔ تُوں کیفا یعنی پطرس اے اکھوائیں گا۔ اگلے بَھلک اوہ گلِیل دے دیس نُوں جانا چاہندا سی۔ تے فِلپُّس نُوں لَبّھیا تے یِسُوع اوہنوں آکھیا میرے مگر ٹُر پَو۔ فِلپُّس بَیت صَیدا دا سی جیہڑا اندریاس تے پطرس دا شہر اے۔ فِلپُّس نیں نتنی ایل نُوں لَبّھ کے اوہنوں آکھیا۔ جِہدی گلّ توریت وِچ مُوسیٰ تے نبیاں نیں لِکھی ہوئی اے اوہنوں اساں لَبّھ لیا اے۔ اوہ یِسُوع ناصری یُوسف دا پُتر اے۔ تے نتنی ایل اوہنوں آکھیا کِیہ ناصرۃ وِچوں کوئی چنگی شے نِکل سکدی اے؟ فِلپُّس اوہنوں آکھیا۔ آ تے ویکھ لے۔ یِسُوع نتنی ایل نُوں اپنے ولّ آؤندیاں ویکھ کے اوہدی بابت آکھیا۔ ویکھو ایہہ اصل اِسرائیلی اے جِہدے وِچ مکر نئیں۔ نتنی ایل اوہنوں آکھیا تُوں میرا کِتّھوں دا واقف ایں؟ یِسُوع اوہنوں جواب دِتّا۔ فِلپُّس دے تینُوں سَدّن توں پہلاں جدوں تُوں ہنجیر دے بُوٹے ہیٹھ سَیں مَیں تینُوں ویکھ لیا سی۔ نتنی ایل اوہنوں جواب دِتّا۔ اَے ربّی تُوں تے خُدا دا پُتر ایں۔ تُوں تے اِسرائیل دا بادشاہ ایں۔ یِسُوع اوہنوں جواب دِتّا تُوں ایس لئی اِیمان لیاؤنا ایں پئی مَیں تینُوں آکھیا پئی مَیں تینُوں ہنجیر دے بُوٹے ہیٹھ ویکھیا؟ تُوں ایہناں توں وی وَھڈِیاں گلّاں ویکھیں گا۔ تے ترِیجے دِن قانایِ گلِیل وِچ اِک ویاہ ہویا۔ تے یِسُوع دی ماں اوتھے سی۔ تے یِسُوع تے اوہدے شاگِرد وی ایس ویاہ وِچ سَدّے گئے سن۔ تے جدوں انگور دی رَس مُک گئی۔ یِسُوع دی ماں اوہنوں آکھیا پئی اوہناں دے کول انگُوری رَس نئیں اے۔ یِسُوع اوہنوں آکھیا۔ بی بی! میرا تیرا کِیہ لاگا اے؟ اجے میرا ویلا نئیں آیا۔ اوہدی ماں نَوکراں نُوں آکھیا جو کُجھ اوہ تُہانوں آکھے سو کرو۔ تے اوس تھاں پتّھر دے چھ مَٹ یہُودِیاں دے نہاؤن دھون دی رسم دے سببّوں دھرے ہوئے سن پئی ہر اِک وِچ دو یا تِنّ تِنّ مَن پَیندے سن۔ یِسُوع اوہناں نُوں آکھیا مٹکیاں نُوں پانی نال بھر دیو۔ سو اوہناں نیں اوہناں مٹکیاں نُوں کنڈھیاں تِیکر بھر دِتّا۔ تے اوس اوہناں نُوں آکھیا ہُن کڈھ کے مجلس دے سردار کول لے جاؤ۔ تے اوہ لے گئے۔ تے جد مجلس دے سردار اوس پانی نُوں چَکھّیا جیہڑا انگور دا رَس بن گیا سی تے نئیں جان دا سی پئی ایہہ کِتّھوں آئی اے (پر نوکر جِنہاں پانی کڈھیا سی جان دے سن) تَد مجلس دے سردار نیں لاڑے نُوں سَدّ کے اوہنوں آکھیا۔ پئی ہر اِک بندہ انگور دے چنگے رَس نُوں پہلاں اگّے رکھدا اے۔ تے ماڑی نُوں اودُوں جد لوک نشے وِچ آ جاندے نیں۔ پر تُوں تے چَنگا رَس ہُن تِیکر رکھ چھڈیا اے۔ ایہہ پہلی کرامات یِسُوع نیں گلِیل دے قانا وِچ کِیتی تے اپنا جلال ظاہر کِیتا تے اوہدیاں شاگِرداں اوہدے اُتّے اِیمان لیاندا۔ ایدوں پِچّھوں اوہ تے اوہدی ماں تے بھرا تے اوہدے شاگِرد کَفرنحُوم نُوں گئے۔ تے اوتھے کُجھ دِن رہے۔ تے یہُودِیاں دی عید فسح نیڑے سی تے یِسُوع یرُوشلِیم نُوں گیا۔ تے ہیکل وِچ بَلد تے بھیڈاں تے کبُوتر ویچن والیاں تے صرّافاں نُوں بَیٹھیاں ہویاں ویکھیا۔ تَد اوس رَسّیاں دا کولڑا وَٹ کے ساریاں نُوں ہیکل وِچوں کڈھ دِتّا۔ نالے بھیڈاں تے ڈنگراں نُوں۔ تے صرّافاں دے ٹِکے کھِلار دِتّے تے تختے اُلٹا سُٹّے تے کبُوتر ویچن والیاں نُوں آکھیا ایہناں شیواں نُوں ایتھوں چُک لَئو میرے باپ دے گھر نُوں بِپار دا گھر نا بناؤ۔ اوہدے شاگِرداں نُوں یاد آگیا پئی لِکھیا ہویا اے۔ تیرے گھر دی غیرت مَینُوں کھا جائے گی۔ تَد یہُودِیاں اوہنوں جواب دِتّا۔ تُوں سانُوں کِیہ نِشان وِکھانا ایں۔ پئی ایہہ کمّ کرنا ایں؟ یِسُوع اوہناں نُوں جواب دِتّا۔ ایس ہیکل نُوں ڈھا دیو تے مَیں اوہنوں تِنّاں دِناں وِچ کھلا کراں گا۔ تَد یہُودِیاں آکھیا۔ چھتالیاں ورھیاں وِچ ایہہ ہیکل بنی سی تے تُوں اوہنوں تِنّاں دِناں وِچ کھلا کریں گا؟ پر اوس اپنے بدن دی ہیکل دی بابت آکھیا سی۔ سو جد اوہ مُردیاں وِچوں جی اُٹھیا تَد اوہدیاں شاگِرداں نُوں یاد آیا پئی اوس ایہی آکھیا سی۔ تے پاک کتاب دا تے اوس گلّ دا جیہڑی یِسُوع آکھی سی یقِین کِیتا۔ تے فسح دے ویلے عید وِچ جد اوہ یرُوشلِیم وِچ سی بتھیریاں اوہناں کراماتاں نُوں ویکھ کے جیہڑیاں اوس وکھالِیاں سن اوہدے ناں اُتّے اِیمان لیاندا۔ پر یِسُوع اپنے آپ دا اوہناں اُتّے وساہ نئیں سی کر دا کیوں جو اوہ ساریاں نُوں جان دا سی۔ تے اوہنوں لوڑ نئیں سی پئی کوئی اِنسان دی گواہی دیوے ایس لئی پئی اوہ آپ جان دا سی پئی اِنسان دے دِل وِچ کِیہ اے۔ تے فرِیسیاں وِچوں اِک بندہ نِیکُدِیمُس کر کے یہُودِیاں دا اِک سردار سی۔ اوہ رات دے ویلے اوہدے کول آیا تے اوہنوں آکھیا اَے ربّی اسی جاننے آں پئی تُوں خُدا ولّوں اُستاد ہو کے آیا ایں کیوں جو ایہہ کراماتاں جیہڑیاں تُوں کرنا ایں کوئی نئیں کر سکدا جے خُدا اوہدے نال نا ہوئے۔ یِسُوع اوہنوں جواب دِتّا مَیں تینُوں سَچ سَچ آکھنا آں کوئی بندہ جے نَوِیں سِریوں نا جمّے اوہ خُدا دی بادشاہی نُوں ویکھ نئیں سکدا۔ نِیکُدِیمُس اوہنوں آکھیا بندہ جد بُڈّھا ہوگیا تے اوہ کِیویں جَم سکدا اے؟ کوئی اپنی ماں دے ڈِھڈ وِچ دُوجی وار جا سکدا اے تے جَم سکدا اے؟ یِسُوع جواب دِتّا مَیں تینُوں سَچ سَچ آکھنا آں جے کوئی پانی تے رُوح تُھوں نا جمّے اوہ خُدا دی بادشاہی وِچ وڑ نئیں سکدا۔ جیہڑا جِسم توں جمّیا اوہ جِسم اے تے جیہڑا رُوح توں جمّیا اوہ رُوح اے۔ اچنبے وِچ نا پَوو پئی مَیں تینُوں آکھیا پئی تُہانوں نَوِیں سِریوں جمّنا ضرُور اے۔ وَا جِدھر نُوں چاہندی اے وَگدی اے تے تُوں اوہدی اواز سُننا ایں پر نئیں جان دا پئی اوہ کِتّھوں آؤندی تے کِدھر نُوں جاندی اے۔ جیہڑا کوئی رُوح توں جمّیا ایہو جیہائی اے۔ نِیکُدِیمُس اوہنوں آکھیا۔ ایہہ گلّاں کِیویں ہو سکدِیاں نیں؟ یِسُوع اوہنوں جواب دِتّا تُوں اِسرائیلیاں دا اُستاد ہو کے ایہہ گلّاں نئیں جان دا؟ مَیں تینُوں سَچ سَچ آکھنا آں پئی جو کُجھ اسی جاننے آں سو بولنے آں تے جِہنُوں اساں ویکھیا اے اوہدی گواہی دینے آں تُسی ساڈی گواہی قبول نئیں کر دے اوہ۔ جدوں مَیں تُہانوں زمین دِیاں گلّاں دسیاں نیں تے تُسی نئیں مَن دے تدوں تُسی کِیویں مَنّو گے جے مَیں اسمان دِیاں گلّاں تُہانوں دساں؟ تے اسمان اُتّے کوئی نئیں چڑھیا اوہدے سِوا جیہڑا اسمانوں لتّھا اے۔ یعنی اِبنِ آدم جیہڑا اسمان دے وِچ اے۔ تے جیویں مُوسیٰ نیں سَپّ نُوں بیابان وِچ اُچّا کِیتا اوسے طرح ضرُور اے پئی اِبنِ آدم وی اُچّا کِیتا جائے۔ تاں جو جیہڑا کوئی اِیمان لیاوے اوہنوں اوہدے وِچ سدا دی زِندگی مِلے۔ کیوں جو خُدا دُنیا نُوں اجیہا پیار کِیتا پئی اوس اپنا اِکلَوتا پُتر بخشیا تاں جو جیہڑا اوہدے اُتّے اِیمان لیاوے اوہ ہلاک نا ہوئے سگوں اوہنوں سدا دی زِندگی مِلے۔ کیوں جو خُدا اپنے پُتر نُوں دُنیا وِچ ایس لئی نئیں گھلّیا پئی دُنیا دی عدالت کرے سگوں ایس لئی پئی دُنیا اوہدے سببّوں بچ جائے۔ جیہڑا اوہدے اُتّے اِیمان لیاؤندا اے۔ عدالت وِچ نئیں آؤندا جیہڑا اِیمان نئیں لیاؤندا عدالت وِچ ہُنے آگیا اے کیوں جو خُدا دے اِکلَوتے پُتر دے ناں اُتّے اوہ اِیمان نئیں لِیائیا اے۔ تے عدالت ایہی اے۔ پئی چانن دُنیا وِچ آیا اے تے بندیاں ہنیرے نُوں چانن نالوں وَدّھ پیار کِیتا ایس کر کے پئی اوہناں دے کمّ بَھیڑے سن۔ کیوں جو جیہڑا کوئی بُریائی کر دا اے۔ چانن نال وَیر رکھدا اے تے چانن کول نئیں آؤندا۔ کِتے ایویں نا ہوئے پئی اوہدیاں کمّاں دی ملامت کِیتی جائے۔ پر اوہ جیہڑا حق کر دا اے چانن دے کول ایس لئی آؤندا اے پئی اوہدے کمّ ظاہر ہون پئی خُدا وِچ کِیتے گئے نیں۔ ایدوں پِچّھے یِسُوع تے اوہدے شاگِرد یہُودیہ دے دیس وِچ آئے تے اوہ اوہناں دے نال اوتھے رہیا تے بپتِسمہ دیندا سی۔ تے یُوحنّا وی شالِیم دے نیڑے عینون وِچ بپتِسمہ دیندا سی ایس لئی پئی اوس تھاں بُہت پانی سی۔ تے لوک آوندے تے بپتِسمہ لَیندے سن۔ کیوں جو یُوحنّا اجے تِیکر قیدخانے وِچ نئیں سی پایا گیا۔ تَد یُوحنّا دے شاگِرداں دی کِسے یہُودی نال نہاؤن دھون اُتّے بحث ہوئی۔ تے اوہ یُوحنّا کول آئے تے اوہنوں آکھن لگّے اَے اُستاد اوہ جیہڑا یَردنوں پار تیرے نال سی جِہدی تُوں گواہی دِتّی اے ویکھ اوہ بپتِسمہ دیندا اے۔ تے سارے اوہدے کول آوندے نیں۔ یُوحنّا آکھیا بندہ کُجھ نئیں کر سکدا جِنّاں چِر اوہنوں اسمانوں دِتّا نا جاوے۔ تُسی آپ ای میری گواہی دیندے ہو پئی مَیں آکھیا سی پئی مَیں مسِیح نئیں آں پر اوہدے اگّے گھلّیا ہویا آں۔ جِہدے کول وَوہٹی اے اوہو لاڑا ہوندا اے پر لاڑے دا یار جیہڑا کھلو کے اوہدی گلّ سُندا اے لاڑے دی اواز نال بڑا خُوش ہوندا اے۔ سو میری ایہہ خُوشی پُوری ہوئی اے۔ ضرُور اے پئی اوہ وَدھے تے مَیں گھٹاں۔ اوہ جیہڑا اُتّوں آؤندا اے ساریاں توں اُتّے اے اوہ جیہڑا زمِینوں اے زمین ای دا اے تے زمین دی گلّ کر دا اے۔ اوہ جیہڑا اسمانوں آؤندا اے ساریاں توں اُتّے اے۔ تاں جو کُجھ اوس ویکھیا تے سُنیا اوہدی گواہی دیندا اے۔ تے اوہدی گواہی کوئی نئیں مَندا۔ جِس اوہدی گواہی مَنّی اے اوہنے اوس گلّ اُتّے مُہر کِیتی اے۔ پئی خُدا سَچّا اے۔ کیوں جو جِہنُوں خُدا گھلّیا اوہ خُدا دِیاں گلّاں کر دا اے۔ ایس لئی پئی اوہ رُوح مِن کے نئیں دیندا۔ باپ پُتر نُوں پیار کر دا اے تے اوس سارِیاں شیواں اوہدے ہتّھ وِچ کر دِتّیاں نیں۔ جیہڑا پُتر اُتّے اِیمان لیاؤندا اے سدا دی زِندگی اوہدی اے۔ پر جیہڑا پُتر نُوں نئیں مَندا اوہ تے زِندگی نئیں ویکھے گا سگوں خُدا دا قَہر اوہدے اُتّے رہندا اے۔ سو جد خُداوند نُوں معلُوم ہویا پئی فرِیسیاں ایہہ سُنیا پئی یِسُوع یُوحنّا نالوں وَدّھ شاگِرد بناندا اے تے بپتِسمہ دیندا اے۔ (بھانویں یِسُوع آپے تے نئیں پر اوہدے شاگِرد بپتِسمہ دیندے سن۔) تَد اوہ یہُودیہ نُوں چھڈ کے فیر گلِیل نُوں ٹُر گیا۔ تے اوہنوں سامریہ دے وِچوں ہو کے جانا ضرُور سی۔ تَد سُوخار ناں سامریہ دے اِک شہر آیا اوس تھاں دے نیڑے جیہڑی یعقُوب اپنے پُتر یُوسف نُوں دِتّی سی۔ تے یعقُوب دا کُھوہ اوتھے ای سی۔ سو یِسُوع پَینڈا کر دیاں کر دیاں تھَکّا ہویا ایویں کُھوہ اُتّے بَہہ گیا۔ ایہہ دوپہر کُو دا ویلا سی۔ تَد سامریہ دی اِک عورت پانی بھرن آئی۔ یِسُوع اوہنوں آکھیا مَینُوں پانی پیا۔ کیوں جو اوہدے شاگِرد کھانا مُل لین نُوں شہر وِچ گئے ہوئے سن۔ تَد اوہ سامری عورت اوہنوں آکھن لگّی تُوں یہُودی ہو کے میرے کولوں جیہڑی سامری آں پانی کِس طرح منگنا ایں؟ (ایس لئی پئی یہُودی لوک سامریاں نال نئیں وَرتدے۔) یِسُوع اوہنوں آکھیا جے تُوں خُدا دی بخشِش نُوں جان دِیوں تے ایہہ وی جان دِیوں پئی اوہ کون اے جیہڑا تینُوں آکھدا اے پئی مَینُوں پانی پیا تاں تُوں اوہدے کولوں مَنگدِیوں تے اوہ تینُوں جیون دا پانی دیندا۔ اوہ عورت اوہنوں آکھن لگّی۔ جناب تواڈے کول تے ڈول وی نئیں اے تے کُھوہ ڈونگھا اے فیر اوہ جیون دا پانی تواڈے کول کِتّھوں آیا؟ تُوں ساڈے پئیو یعقُوب نالوں وَڈا ایں جِہنے ایہہ کُھوہ سانُوں دِتّا تے آپ تے اوہدی آل اولاد تے اوہدے ڈنگراں اوہدے وِچوں پِیتا؟ یِسُوع اوہنوں آکھیا۔ ایس پانی نُوں جیہڑا پِیوے فیر تریہایا ہوئے گا۔ پر جیہڑا اوس پانی توں پِیوے جیہڑا مَیں اوہنوں دیاں گا۔ اوہ کدی تریہایا نا ہوئے گا۔ پر جیہڑا پانی مَیں اوہنوں دیاں گا۔ اوہ اوہدے وِچ اِک چشمہ بن جاوے گا جیہڑا سدا دی زِندگی لئی وگدا رہے گا۔ عورت اوہنوں آکھن لگّی۔ جناب اوہ پانی مَینُوں دے پئی مَیں ترِہائی نا ہوواں تے نا ایتھوں تِیکر بھرن نُوں آیا کراں۔ یِسُوع اوہنوں آکھیا جا اپنے بندے نُوں سَدّ تے ایتھے آ۔ عورت اوہنوں آکھیا میرا کوئی بندہ نئیں اے۔ یِسُوع اوہنوں آکھیا تُوں ٹھیک آکھیا پئی میرا کوئی بندہ نئیں اے۔ کیوں جو تُوں پنج بندے کر بَیٹھی ایں تے جِہنُوں تُوں ہُن رکھیا ہویا اے اوہ تیرا بندہ نئیں اے تُوں سَچ آکھیا اے۔ عورت اوہنوں آکھن لگّی اَے خُداوند مَینُوں معلُوم ہوندا اے پئی تُوں نبی ایں۔ ساڈے وڈّیاں ایس پہاڑ اُتّے بندگی کِیتی پر تُسی آکھدے ہو پئی اوہ تھاں جِتّھے بندگی کرنی چاہیدی اے یرُوشلِیم وِچ اے۔ یِسُوع اوہنوں آکھیا بی بی! میری گلّ مَن۔ اوہ ویلا آؤندا اے جدوں نا ایس پہاڑ اُتّے تے نا یرُوشلِیم وِچ تُسی باپ دی بندگی کرو گے۔ تُسی جِہنُوں نئیں جان دے اوہدی بندگی کر دے ہو۔ اسی جِہنُوں جاننے آں اوہدی بندگی کرنے آں۔ ایس لئی پئی نجات یہُودِیاں وِچوں اے۔ پر ویلا آؤندا اے تے ہُنے اے جدوں سَچّے بَھگت رُوح تے سچیائی نال باپ دی بندگی کرن گے کیوں جو باپ اجیہاں نُوں چاہندا اے۔ پئی اوہدی بندگی کرن۔ خُدا رُوح اے تے جیہڑے اوہدی بندگی کر دے نیں اوہناں نُوں چاہیدا اے۔ پئی رُوح تے سچیائی نال بندگی کرن۔ عورت اوہنوں آکھن لگّی مَیں جاننی آں پئی مسِیح جِہنُوں خُرستُس آکھدے نیں آؤن والا اے تے اوہ جد آوے گا سانُوں سارِیاں گلّاں دی خبر دیوے گا۔ یِسُوع اوہنوں آکھن لگّا۔ مَیں جیہڑا تیرے نال بولنا آں اوہو ای آں۔ اینے نُوں اوہدے شاگِرد آگئے تے حَیران ہوئے پئی اوہ عورت نال گلّاں کر دا اے۔ تَد وی کِسے نا آکھیا پئی تُوں کِیہ چاہنا ایں؟ یا تُوں کیوں اوہدے نال گلّاں کرنا ایں؟ تَد عورت اپنا گھڑا چھڈ کے شہر وِچ گئی تے لوکاں نُوں آکھن لگّی۔ آؤ۔ اِک بندے نُوں ویکھو جِہنے جو کُجھ مَیں کِیتا اے۔ سبھو مَینُوں دس دِتّا۔ کِیہ ایہہ ای مسِیح نئیں؟ اوہ لوک شہروں نِکل کے اوہدے کول آؤن لگّے۔ اینے وِچ شاگِرداں عرض کِیتی پئی اَے ربّی کُجھ کھا لے۔ پر اوس اوہناں نُوں آکھیا میرے کول کھان واسطے اجیہا کھانا اے جِہنُوں تُسی نئیں جان دے۔ ایس کر کے شاگِرد آپو وِچ آکھن لگّے کوئی اوہنوں کھان نُوں تے نئیں دے گیا؟ یِسُوع اوہناں نُوں آکھیا میرا کھانا ایہہ اے پئی اپنے گھلّن والے دی مرضی اُتّے چلاں تے اوہدا کمّ پُورا کراں۔ تُسی نئیں آکھدے پئی چَوہاں مہِینیاں نُوں واڈھی ہوئے گی؟ ویکھو مَیں تُہانوں آکھنا آں اپنیاں اَکھّیاں چُکو تے پَیلِیاں نُوں ویکھو پئی اوہ واڈھی لئی ہُن وی پکّیاں نیں۔ وَڈّھن والے نُوں مزدُوری مِلدی اے تے اوہ سدا دی زِندگی لئی پَھل اکٹّھا کر دا اے تاں جو بِیجن والا تے وَڈّھن والا رَل کے خُوشی کرن۔ تے اوہدے اُتّے ایہہ اکھان ٹھیک آؤندا اے پئی ”بِیجے کوئی تے وَڈّھے کوئی۔“ مَیں تُہانوں اوہدے وَڈّھن نُوں گھلّیا جِہدی تُساں محنت نئیں کِیتی اے۔ ہورناں محنت کِیتی تے تُسی اوہناں دی محنت وِچ رَل گئے ہو۔ تے اوس شہر وِچوں بتھیرے سامری لوک اوس عورت دی گواہی دے سبّب اوہدے اُتّے اِیمان لیائے پئی اوس آکھیا جو کُجھ مَیں کِیتا اوس سبھو کُجھ مَینُوں دس دِتّا۔ سو سامری جد اوہدے کول آئے تَد عرض کِیتی پئی ساڈے کول ای رہو۔ تے اوہ دو دِن اوتھے رہیا۔ تے ہور بتھیرے اوہدے کلام دے سبّب اِیمان لیائے۔ تے اوہناں عورت نُوں آکھیا ہُن تیرے ای آکھن نال اسی نئیں مَن دے ایس لئی پئی اساں آپی سُنیا اے۔ تے معلُوم کِیتا پئی ایہہ ٹھیک دُنیا دا بچاؤن والا اے۔ تے اوہناں دوہاں دِناں پِچّھوں اوہ اوتھوں گلِیل نُوں ٹُر گیا۔ کیوں جو یِسُوع آپ گواہی دِتّی پئی نبی دی اپنے وطن وِچ عِزّت نئیں۔ سو جد اوہ گلِیل وِچ آگیا تَد ایس واسطے گلِیلِیاں اوہنوں قبول کِیتا پئی اوہناں سبھ کُجھ جو اوس عید دے ویلے یرُوشلِیم وِچ کِیتا سی ویکھیا ہویا سی۔ کیوں جو اوہ وی عید نُوں گئے سن۔ فیر یِسُوع مُڑ گلِیل دے قانا نُوں آیا جِتّھے اوس پانی توں انگور دا رَس بنایا سی۔ اوتھے اِک سردار سی جِہدا پُتر کَفرنحُوم وِچ ماندا سی۔ جد اوس سُنیا پئی یِسُوع یہُودیہ توں گلِیل نُوں آیا اے تے اوہدے کول جا کے عرض کِیتی پئی چَل کے میرے پُتر نُوں ولّ کر دے کیوں جو اوہ مرن لگّا سی۔ تَد یِسُوع اوہنوں آکھیا جے تُسی مُعجزے تے کراماتاں نا ویکھو گے تے اِیمان نئیں لیاؤ گے۔ اوس سردار اوہنوں آکھیا اَے خُداوند میرے بچّے دے مرن توں پہلاں چَل۔ یِسُوع اوہنوں آکھیا جا تیرا پُتر جِیوندا اے۔ اوس بندے ایس گلّ اُتّے جیہڑی یِسُوع اوہنوں آکھی سی یقِین کِیتا تے ٹُر پیا۔ اوہ اجے لگا جاندا ای سی پئی اوہدے نوکر اوہنوں اگّوں آ کے مِلے۔ تے خبر دِتّی پئی تیرا پُتر جِیوندا اے۔ تَد اوس اوہناں توں اوہ گھڑی پُچھی جِہدے وِچ اوہ چَنگا ہون لگ پیا سی۔ تے اوہناں اوہنوں آکھیا پئی کل ستوِیں گھڑی اوہدی کَس لَہہ گئی۔ تَد پئیو نُوں معلُوم ہویا پئی اوہ اوہو گھڑی سی جد یِسُوع مَینُوں آکھیا سی تیرا پُتر جِیوندا اے۔ سو اوس آپ تے اوہدے سارے ٹبّر اِیمان لیاندا۔ ایہہ دُوجا مُعجزہ اے جیہڑا یِسُوع یہُودیہ توں گلِیل وِچ آ کے کِیتا۔ اوہدے بعدوں یہُودِیاں دی عید سی۔ تے یِسُوع یرُوشلِیم نُوں گیا۔ تے یرُوشلِیم وِچ بھیڈاں والے دروازے دے کول اِک حوض اے جِہنُوں عِبرانی بولی وِچ بَیتِ حسدا آکھدے نیں جِہدے پنج برانڈے نیں۔ اوہناں وِچ روگِیاں تے اَنھیاں تے لَنگیاں تے سُکّیاں ہویاں دی بِھیڑ [جیہڑی پانی دے ہِلن دی اوڈِیک وِچ] پئی رہندی سی۔ [کیوں جو خُداوند دا فرِشتہ حوض اُتّے اُتر کے پانی ہلاؤندا ہوندا سی۔ پانی ہِلدیاں ای جیہڑا وی پہلاں اُتر دا سو اوہ شفا پاندا بھانویں اوہدی کوئی وی بیماری کیوں نا ہوندی۔] تے اوتھے اِک بندہ سی جیہڑا اٹھِتّیاں ورھیاں توں روگی سی۔ یِسُوع اوہنوں پیا ہویا ویکھ کے تے ایہہ جان کے پئی اوہ چروکنا پیا ہویا اے۔ اوہنوں آکھیا تُوں ولّ ہونا چاہنا ایں؟ اوس روگی اوہنوں جواب دِتّا اَے خُداوند میرا کوئی بندے نئیں پئی جدوں پانی ہلایا جائے تے مَینُوں حوض وِچ اُتار دے پر جِنّاں چِر مَیں جانا آں۔ دُوجا مَیتھوں پہلاں اُتر پَیندا اے۔ یِسُوع اوہنوں آکھیا اُٹھ تے اپنی مَنجی چُک تے ٹُر پَو۔ اوسے ای ویلے اوہ بندہ چَنگا ہوگیا تے اپنی مَنجی چُک کے ٹُر پیا۔ تے اوس دِن سبت سی۔ ایس کر کے یہُودِیاں اوہنوں جیہڑا چَنگا ہویا سی آکھیا اَج سبت دا دِن اے تینُوں مَنجی چُکنی نئیں چاہیدی۔ اوس اوہناں نُوں جواب دِتّا پئی جِس مَینُوں چَنگا کِیتا اوسے مَینُوں آکھیا ”اپنی مَنجی چُک تے ٹُر پَو۔“ تَد اوہناں اوہنوں پُچھیا اوہ کیہڑا بندہ اے جِس تینُوں آکھیا پئی اپنی مَنجی چُک تے ٹُرپَو؟ پر اوہ جیہڑا ولّ ہویا سی۔ نئیں سی جان دا پئی اوہ کون اے۔ کیوں جو اوس تھاں بِھیڑ سی تے ایس واسطے یِسُوع لاہنبے ہوگیا سی۔ اوہدے بعدوں یِسُوع اوہنوں ہیکل وِچ ویکھ کے اوہنوں آکھیا ویکھ تُوں چَنگا ہوگیا ایں مُڑ گُناہ نا کریں۔ متے تیرے اُتّے ایدوں وی بُہتی خرابی آ پَوے۔ اوہ بندہ ٹُر گیا تے یہُودِیاں نُوں خبر دِتّی پئی جِس مَینُوں چَنگا کِیتا سی اوہ یِسُوع اے۔ تے ایس گلّے یہُودی یِسُوع دے مگر پئے۔ کیوں جو اوہ اجیہے کمّ سبت نُوں کر دا سی۔ پر یِسُوع جواب دِتّا پئی میرا باپ ہُن تِیکر کمّ کر دا اے تے مَیں وی کمّ کرنا آں۔ ایس لئی یہُودی ہور وی وَدّھ کے اوہدے مارن دا داء لبّھدے سن۔ کیوں جو اوس نا نِرا سبت نُوں توڑ دِتّا پر ایہہ وی پئی خُدا نُوں خاص اپنا باپ آکھ کے اپنے آپ نُوں خُدا دے برابر کِیتا۔ ایس واسطے یِسُوع اوہناں نُوں جواب دِتّا مَیں تُہانوں سَچ سَچ آکھنا آں پئی پُتر آپ توں کُجھ نئیں کر سکدا پر جو کُجھ اوہ باپ نُوں کر دیاں ویکھدا اے۔ کیوں جو جیہڑے کمّ اوہ کر دا اے پُتر وی اوسے طرح کر دا اے۔ کیوں جو باپ پُتر نُوں پیار کر دا اے تے سارے کمّ جیہڑے اوہ آپ کر دا اے اوہنوں وکھاؤندا اے۔ تے اوہ اوہناں نالوں وڈّے کمّ اوہنوں وکھا لے گا پئی تسِیں اچنبے وِچ نا پَوو۔ کیوں جو جیویں باپ مُردیاں نُوں اُٹھاندا تے جوالدا اے اونویں پُتر وی جِنہاں نُوں چاہندا اے جوالدا اے۔ کیوں جو باپ کِسے دی عدالت نئیں کر دا۔ پر اوس ساری عدالت پُتر دے سپُرد کِیتی اے۔ تاں جو سبھ لوک پُتر دی عِزّت کرن جیویں باپ دی عِزّت کر دے نیں۔ جیہڑا پُتر دی عِزّت نئیں کر دا اوہ باپ دی وی جِس اوہنوں گھلّیا عِزّت نئیں کر دا۔ مَیں تُہانوں سَچ سَچ آکھنا آں پئی اوہ جیہڑا میرا کلام سُندا اے تے اوہدے اُتّے جِس مَینُوں گھلّیا اے اِیمان لیاؤندا اے سدا دی زِندگی اوہدی اے۔ تے اوہ عدالت وِچ نئیں آؤندا سگوں مَوت توں لنگھ کے اوہ زِندگی وِچ جا اَپڑیا اے۔ مَیں تُہانوں سَچ سَچ آکھنا آں پئی اوہ گھڑی آؤندی اے تے ہُن ای اے جدوں مُردے خُدا دے پُتر دی اواز سُنن گے تے جیہڑے سُنن گے جِیو پَین گے۔ کیوں جو جیویں باپ اپنے وِچ زِندگی رکھدا اے اوسے طرح اوس پُتر نُوں وی دِتّا پئی اپنے وِچ زِندگی رکھّے۔ تے اوہنوں اختیار دِتّا پئی عدالت کرے ایس لئی پئی اوہ اِبنِ آدم اے۔ ایس گلّوں حَیران نا اوہ۔ کیوں جو اوہ گھڑی آؤندی اے جدوں سارے جیہڑے قبراں وِچ نیں اوہدی اواز سُنن گے۔ تے باہر نِکل آؤن گے۔ جِنہاں نیکی کِیتی زِندگی دی قیامت لئی۔ تے جِنہاں بَھیڑے کمّ کِیتے عدالت دی قیامت دے لئی۔ مَیں اپنے آپ کُجھ نئیں کر سکدا۔ جیویں مَیں سُننا آں اوسے طرح عدالت کرنا آں تے میری عدالت سَچّی اے۔ کیوں جو مَیں اپنی مرضی نُوں نئیں لَبّھدا پر اوہدی مرضی نُوں جِس مَینُوں گھلّیا اے۔ جے مَیں اپنے حق وِچ گواہی دیاں تے میری گواہی سَچّی نئیں۔ اِک ہور اے جیہڑا میرے حق وِچ گواہی دیندا اے تے مَیں جاننا آں پئی جیہڑی گواہی اوہ میرے حق وِچ دیندا اے سو سَچّی اے۔ تُساں یُوحنّا ولّ سنیہا گھلّیا تے اوس سچیائی اُتّے گواہی دِتّی اے۔ مَیں تے بندیاں ولّوں گواہی نئیں لَیندا پر مَیں ایہہ گلّاں آکھنا آں تاں جو تُسی بچ جاؤ۔ اوہ اِک بلدا ہویا تے چمکدا ہویا دِیوا سی۔ تے تُسی گھڑی تِیکر اوہدے چانن وِچ خُوش رہنا چاہندے سو۔ پر میرے کول جیہڑی گواہی اے اوہ یُوحنّا دی گواہی توں وڈّی اے کیوں جو جیہڑے کمّ باپ میرے سپُرد کِیتے پئی مَیں اوہناں نُوں پُوریاں کراں یعنی ایہو کمّ جیہڑے مَیں کرنا آں اوہ میرے حق وِچ گواہی دیندے نیں پئی باپ مَینُوں گھلّیا اے۔ تے باپ جِس مَینُوں گلیّا اوس ای میرے حق وِچ گواہی دِتّی اے۔ تُساں تے نا کَدے اوہدی اواز سُنی اے تے نا اوہدی شکل ویکھی اے۔ تے اوہدا کلام تُہاڈے وِچ نئیں رہندا کیوں جو جِہنُوں اوس گھلّیا تُسی اوہنوں نئیں مَن دے۔ تُسی نوِشتیاں نُوں پھولدے رہندے ہو۔ کیوں جو تُسی سمجھدے ہو پئی اوہناں وِچ تُہاڈے لئی سدا دی زِندگی اے۔ تے ایہہ اوہی نیں جیہڑے میرے حق وِچ گواہی دیندے نیں۔ تے تُسی میرے کول زِندگی لین نُوں آؤنا نئیں چاہندے ہو۔ مَیں بندیاں کولوں وڈیائی نئیں چاہندا۔ پر مَیں تُہانوں جاننا آں پئی تُسی خُدا دی مُحبّت اپنے وِچ نئیں رکھدے۔ مَیں اپنے باپ دے ناں اُتّے آیا آں تے تُسی مَینُوں قبول نئیں کر دے۔ جے ہور کوئی اپنے ای ناں اُتّے آوے اوہنوں تُسی قبول کر لوؤ گے۔ تُسی کِیویں اِیمان لیا سکدے ہو جیہڑے اِک دُوجے توں وڈیائی لَیندے ہو تے اوس وڈیائی نُوں جیہڑی اکلّے خُدا ولّوں آؤندی اے نئیں لبّھدے۔ ایہہ نا سمجھو پئی مَیں باپ اگّے تُہاڈے اُتّے الزام لاواں گا۔ اِک اے تُہاڈے اُتّے الزام لان والا یعنی مُوسیٰ جِہدے اُتّے تُساں بھروسا رکھیا ہویا اے۔ کیوں جو جے تُسی مُوسیٰ نُوں مَن دے تے مَینُوں وی مَن دے ایس لئی پئی اوسے میرے حق وِچ لِکھیا۔ پر جد تُسی اوہدیاں نوِشتیاں نُوں نئیں مَن دے تے میرِیاں گلّاں کِیویں مَنّو گے؟ ایہناں گلّاں دے بعدوں یِسُوع گلِیل دے سمُندروں یعنی تِبریاس دے سمُندروں پار گیا۔ تے بڑی بِھیڑ اوہدے مگر ہو ٹُری۔ ایس لئی پئی اوہناں اوہ مُعجزے ویکھے جیہڑے اوس بِیماراں اُتّے کِیتے سن۔ تَد یِسُوع پہاڑ اُتّے چڑھ کے اپنے شاگِرداں نال اوتھے بَیہہ گیا۔ تے فسح جیہڑی یہُودِیاں دی عید اے نیڑے سی۔ تَد یِسُوع اپنیاں اَکھّیاں چُک کے ویکھیا پئی بڑی بِھیڑ میرے کول پئی آؤندی اے۔ تے فِلپُّس نُوں آکھیا پئی اسی ایہناں دے کھان لئی روٹِیاں کِتّھوں مُل لئیے؟ تے اوس ایہہ گلّ اوہنوں ازمان لئی آکھی سی کیوں جو اوہ آپ جان دا سی پئی مَیں کِیہ کراں گا۔ فِلپُّس اوہنوں جواب دِتّا پئی دو سَو دینار دِیاں روٹِیاں ایہناں لئی پُوریاں نئیں ہون گِیاں پئی ہر اِک نُوں تھوڑی جیہی وی ہتّھ لگّے۔ اوہدے شاگِرداں وِچوں اِک شمعُون پطرس دا بھرا اندریاس اوہنوں آکھن لگّا۔ ایتھے اِک مُنڈا اے جِہدے کول جَواں دِیاں پنج روٹِیاں تے دو مچھّیاں نیں پر اینِیاں بندیاں واسطے ایہہ کِیہ نیں؟ یِسُوع آکھیا پئی لوکاں نُوں بہا دیو۔ تے اوس تھاں بڑا گھاہ سی۔ سو گنتری وِچ پنج کُو ہزار بندے بَیہہ گئے۔ تے یِسُوع روٹِیاں لئیاں تے شُکر کر کے بَیٹھیاں ہویاں نُوں ونڈ دِتّیاں تے ایویں مچھّیاں وِچوں جِنّی جِنّی اوہ چاہندے سن۔ تے جد اوہ رَجّ گئے اوہ اپنے شاگِرداں نُوں آکھن لگّا پئی بچیاں ہویاں ٹُکّراں نُوں اکٹّھے کرو پئی کُجھ خراب نا ہو جائے۔ سو اوہناں اکٹّھے کر لَئے تے جَواں دِیاں پنجاں روٹِیاں دے ٹُکّراں نال جیہڑے کھان والیاں توں وَدّھ رہے سن۔ باراں ٹوکریاں بھریاں۔ تَد اوہناں لوکاں ایہہ مُعجزہ جیہڑا اوس کِیتا ویکھ کے آکھیا۔ بِناں شک اوہ نبی جیہڑا دُنیا وِچ آؤن والا اے ایہو اے۔ سو جد یِسُوع نُوں معلُوم ہویا پئی اوہ آ کے مَینُوں بدوبدی بادشاہ بنونا چاہندے نیں تَد آپ اکلّا پہاڑ نُوں مُڑ ٹُر گیا۔ تے جدوں شام ہوئی اوہدے شاگِرد سمُندر ولّ اُتر گئے۔ تے بیڑی وِچ چڑھ کے سمُندر دے پرلے پاسے کَفرنحُوم نُوں ٹُرپَئے۔ تے ہُن ہنیرا ہو پیا سی تے یِسُوع اوہناں کول اجے نئیں سی آیا۔ تے بڑی ہنیری دے سببّوں سمُندر ٹھاٹھاں مارن لگّا۔ تے جد اوہ دو تِنّ کوہ ٹھِلّے ای سن تَد اوہناں یِسُوع نُوں سمُندر اُتّے ٹُر دیاں تے بیڑی دے نیڑے آؤندیاں ویکھیا تے ڈر گئے۔ پر اوہ اوہناں نُوں آکھن لگّا مَیں ای آں ڈرو نا۔ تَد اوہ اوہنوں بیڑی تے چڑھان نُوں راضی ہوئے۔ تے بڑی چھیتی نال بیڑی اوس تھاں جِتّھے جانا سی اَپڑ گئی۔ دُوجے دِن جد اوس بِھیڑ نے جیہڑی سمُندر دے اوس پار کھلوتی سی ویکھیا پئی ایس جگہ اِک چھوٹی جیہی بیڑی دے بِناں ہور کوئی بیڑی نئیں اے۔ تے ایہہ وی پئی یِسُوع اپنے شاگِرداں نال بیڑی اُتّے نئیں گیا۔ پر اوہدے شاگِرد اکلّے ٹُر گئے سن۔ (پر ہور چھوٹیاں بیڑیاں تِبریاسوں اوس تھاں دے نیڑے آئِیاں جِتّھے خُداوند دے شُکر کرن بعد اوہناں روٹِیاں کھادِیاں سن۔) سو جد لوکاں ویکھیا پئی ایتھے نا یِسُوع تے نا اوہدے شاگِرد نیں تَد اوہ وی بیڑیاں وِچ چڑھ کے یِسُوع نُوں لَبّھن لئی کَفرنحُوم نُوں آئے۔ تے اوہناں اوہنوں سمُندروں پار لَبّھ کے آکھیا اَے ربّی تُوں ایتھے کدوں آیا؟ یِسُوع اوہناں نُوں آکھیا۔ مَیں تُہانوں سَچ سَچ آکھنا آں تُسی مَینُوں ایس واسطے نئیں لبّھدے پئی تُساں کراماتاں ویکھیاں۔ پر ایس واسطے پئی اوہناں روٹِیاں وِچوں کھا کے تُسی رَجّ گئے۔ فنا ہون والے کھانے لئی محنت نا کرو پر اوس کھانے لئی جیہڑا سدا دی زِندگی تِیکر رہن والا اے جیہڑا اِبنِ آدم تُہانوں دیوے گا کیوں جو خُدا جیہڑا باپ اے اوس اوہدے اُتّے مُہر کر دِتّی اے۔ تَد اوہناں اوہنوں آکھیا اسی کِیہ کریئے پئی خُدا دے کمّ ساتھوں ہون؟ یِسُوع اوہناں نُوں جواب دِتّا خُدا دا کمّ ایہہ اے پئی تُسی اوہدے اُتّے جِہنُوں اوس گھلّیا اے اِیمان لیاؤ۔ تَد اوہناں اوہنوں آکھیا فیر تُوں کیہڑی کرامات کرنا ایں؟ پئی اسی دیکھئے تے تینُوں مَنّئے تُوں کِیہ کرنا ایں؟ ساڈے وڈّیاں بیابان وِچ مَن کھادا جیویں آکھیا ہویا اے پئی اوس اوہناں نُوں اسمانوں روٹی کھان نُوں دِتّی۔ تَد یِسُوع اوہناں نُوں آکھیا۔ مَیں تُہانوں سَچ سَچ آکھنا آں پئی مُوسیٰ تُہانوں اسمانوں روٹی نئیں دِتّی پر میرا باپ تُہانوں اسمانوں سَچّی روٹی دیندا اے۔ کیوں جو خُدا دی روٹی اوہ اے جیہڑی اسمانوں لہندی اے تے دُنیا نُوں زِندگی دیندی اے۔ تَد اوہناں اوہنوں آکھیا ایہہ روٹی سانُوں سدا دَیا کر۔ یِسُوع اوہناں نُوں آکھیا زِندگی دی روٹی مَیں آں جیہڑا میرے کول آؤندا اے بُھکھا نا ہوئے گا۔ تے جیہڑا میرے اُتّے اِیمان لیاؤندا اے کدی وی تریہایا نا ہوئے گا۔ پر مَیں تُہانوں آکھ دِتّا اے پئی تُساں مَینُوں ویکھیا اے۔ تَد وی اِیمان نئیں لیاؤندے۔ سبھ کُجھ جو باپ مَینُوں دیندا اے میرے ولّ آوے گا تے جیہڑا میرے کول آؤندا اے اوہنوں مَیں کَدے وی باہر نا کڈھاں گا۔ کیوں جو مَیں اسمانوں اپنی مرضی پُوری کرن نُوں نئیں لتّھا آں۔ پر اوہدی مرضی جِس مَینُوں گھلّیا اے۔ تے جِس مَینُوں گھلّیا اے اوہدی ایہہ مرضی اے پئی جو کُجھ اوس مَینُوں دِتّا اے اوہدے وِچوں مَیں کُجھ نا گواواں پر اخِیری دِن فیر زِندہ کراں۔ کیوں جو میرے باپ دی ایہہ مرضی اے پئی جیہڑا پُتر نُوں ویکھدا اے تے اوہدے اُتّے اِیمان لیاؤندا اے سدا دی زِندگی اوہنوں مِلے۔ تے اخِیری دِن مَیں اوہنوں فیر زِندہ کراں گا۔ تَد ایس لئی پئی اوس آکھیا۔ ”اوہ روٹی جیہڑی اسمانوں لتّھی مَیں آں۔“ یہُودی اوہدی بابت کُڑکُڑان لگّے۔ تے آکھن لگّے ایہہ یِسُوع یُوسف دا پُتر نئیں اے جِہدے ماں پئیو نُوں اسی جاننے آں؟ اوہ ہُن کِیویں آکھدا اے پئی مَیں اسمانوں لتّھا آں؟ یِسُوع اوہناں نُوں آکھیا آپو وِچ نا کُڑکُڑاؤ۔ میرے کول کوئی نئیں آسکدا جے باپ جِس مَینُوں گھلّیا اے اوہنوں نا کھِچّے۔ تے اخِیری دِن مَیں اوہنوں فیر زِندہ کراں گا۔ نبیاں دِیاں کِتاباں وِچ ایہہ لِکھیا ہویا اے پئی اوہ سبھ خُدا دے سِکھائے ہوئے ہون گے ہر اِک جِس باپ کولوں سُنیا تے سِکھیا میرے کول آؤندا اے۔ ایہہ نا سمجھو پئی کِسے باپ نُوں ویکھیا اے۔ بِناں اوہدے جیہڑا خُدا ولّوں اے اوس باپ نُوں ویکھیا اے۔ مَیں تُہانوں سَچ سَچ آکھنا آں پئی جیہڑا میرے اُتّے اِیمان لیاؤندا اے سدا دی زِندگی اوہدی اے۔ زِندگی دی روٹی مَیں آں۔ تُہاڈے وڈّیاں بیابان وِچ مَن کھادا تے مر گئے۔ اوہ روٹی جیہڑی اسمانوں لہندی اے ایہہ اے پئی بندہ اوہدے وِچوں کھائے تے نا مرے۔ زِندگی دی روٹی مَیں آں جیہڑی اسمانوں لتّھی اے جے کوئی ایس روٹی وِچوں کھائے سدا تِیکر جئے گا۔ سگوں جیہڑی روٹی مَیں دُنیا دی زِندگی لئی دیاں گا اوہ میرا گوشت اے۔ ایس واسطے یہُودی آپو وِچ جھگڑن لگّے پئی ایہہ اپنا گوشت کِیویں سانُوں کھان نُوں دے سکدا اے؟ تَد یِسُوع اوہناں نُوں آکھیا مَیں تُہانوں سَچ سَچ آکھنا آں۔ جے تُسی اِبنِ آدم دا گوشت نا کھاؤ تے اوہدا لہو نا پِیو تُہاڈے اپنے وِچ زِندگی اے نئیں۔ اوہ جیہڑا میرا گوشت کھاندا تے میرا لہو پَیندا اے سدا دی زِندگی اوہدی اے۔ تے اخِیری دِن مَیں اوہنوں زِندہ کراں گا ایس لئی پئی میرا گوشت اصل کھان والی شے تے میرا لہو اصل پِین والی شے اے۔ اوہ جیہڑا میرا گوشت کھاندا تے میرا لہو پَیندا اے میرے وِچ رہندا اے تے مَیں اوہدے وِچ۔ جیویں باپ جیہڑا جِیوندا اے مَینُوں گھلّیا تے مَیں باپ دے سبّب جِیوناں آں۔ اوہ وی جیہڑا مَینُوں کھاندا اے میرے سبّب جیوے گا۔ روٹی جیہڑی اسمانوں لتّھی ایہہ اے۔ اجیہی نئیں جیہڑی وڈّیاں کھادِی تے مر گئے۔ جیہڑا ایس روٹی نُوں کھائے سدا جیوے گا۔ اوس ایہہ گلّاں کَفرنحُوم دے عبادت خانے وِچ سِکھاندیاں ہویاں آکھیاں۔ تَد اوہدے شاگِرداں وِچوں بہتیریاں سُن کے آکھیا ایہہ گلّ سخت اے اوہنوں کون سُن سکدا اے؟ پر یِسُوع اپنے آپ جان کے پئی میرے شاگِرد ایس گلّ اُتّے کُڑکُڑاؤندے نیں۔ اوہناں نُوں آکھیا ایہدے توں تُہانوں ٹھوکر لگدی اے۔ جے تُسی اِبنِ آدم نُوں اوس تھاں جِتّھے پہلاں سی چڑھدیاں ویکھو تَد کِیہ ہوئے گا؟ جوالن والی تے رُوح اے جِسم توں کُجھ فائدہ نئیں۔ جیہڑیاں گلّاں مَیں تُہانوں آکھیاں نیں۔ اوہ رُوح نیں تے زِندگی وی نیں۔ پر تُہاڈے وِچ کئی نیں جیہڑے اِیمان نئیں لیاؤندے۔ کیوں جو یِسُوع مُڈھوں جان دا سی پئی کیہڑے نیں جیہڑے اِیمان نئیں لیاؤندے۔ تے کون اے جیہڑا مَینُوں پھڑواوے گا۔ تے اوس آکھیا مَیں ایس ای واسطے تُہانوں ایہہ گلّ آکھی اے پئی کوئی میرے کول نئیں آسکدا۔ جے باپ توں اوہنوں بخشیا نا گیا ہوئے۔ ایس گلّ توں بتھیرے اوہدے شاگِرداں وِچوں پِچھّاں مُڑ گئے تے فیر اوہدے نال نا چلّے۔ تَد یِسُوع باراں نُوں آکھیا تُسی وی ٹُر جانا چاہندے ہو؟ شمعُون پطرس اوہنوں جواب دِتّا اَے خُداوند اسی کیہدے کول جائیے؟ سدا دی زِندگی دِیاں گلّاں تے تیرے کول نیں۔ اسی اِیمان لیائے تے جان گئے آں پئی خُدا دا قُدُّوس تُوں ای ایں۔ یِسُوع اوہناں نُوں جواب دِتّا مَیں تُہانوں باراں نُوں نئیں سی چُنیا؟ تے تُہاڈے وِچوں اِک جَنا شیطان اے۔ اوس شمعُون اِسکریُوتی دے پُتر یہُوداہ دی گلّ کِیتی۔ ایس لئی پئی اوسے اوہنوں پھڑوانا سی۔ تے باراں وِچوں اِک سی۔ تے ایدوں بعد یِسُوع گلِیل وِچ پِھردا رہیا کیوں جو یہُودیہ دیس وِچ اوس پِھرنا پسند نا کِیتا ایس کر کے پئی یہُودی اوہدے مارن لئی داء لبّھدے سن۔ تے یہُودِیاں دی عِیدِ خیام نیڑے سی۔ سو اوہدے بھراواں اوہنوں آکھیا ایتھوں نِکل کے یہُودیہ نُوں جا۔ پئی تیرے شاگِرد وی اوہناں کمّاں نُوں ویکھن جیہڑے تُوں کرنا ایں۔ کیوں جو کوئی اوہلے وِچ کُجھ نئیں کر دا اے تے چاہندا اے پئی مَیں آپ مشہُور ہوواں۔ جے تُوں ایہہ کمّ کرناں ایں تے اپنے آپ نُوں دُنیا اُتّے ظاہر کر۔ کیوں جو اوہدیاں بھراواں اوہدے اُتّے اِیمان نئیں سی لیاندا۔ سو یِسُوع اوہناں نُوں آکھیا میرا ویلا اجے نئیں آیا پر تُہاڈا ویلا ہمیش تیار رہندا اے۔ دُنیا تُہاڈے نال وَیر نئیں رکھ سکدی۔ پر میرے نال ایس لئی رکھدی اے کیوں جو مَیں اوہدے حق وِچ گواہی دینا آں پئی اوہدے کمّ بُرے نیں۔ تُسی عید نُوں جاؤ مَیں ایس عید نُوں اجے نئیں جاندا۔ کیوں جو میرا ویلا اجے پُورا نئیں ہویا اے۔ اوہناں نُوں ایہہ گلّاں آکھ کے اوہ گلِیل وِچ ای رہیا۔ پر جدوں اوہدے بھرا عید نُوں ٹُر گئے اوہ وی گیا۔ کُھلّم کُھلا نئیں پر چُھپ کے۔ سو یہُودی عید وِچ اوہنوں لَبّھن لگّے۔ تے آکھیا اوہ کِتّھے اے؟ تے اوہدی بابت بُہت لوکاں وِچ اوہدے مارِیاں بڑی بُڑبُڑ ہوئی۔ کئی آکھدے سن اوہ چَنگا بندہ اے۔ تے کئی آکھدے سن نئیں سگوں اوہ لوکاں نُوں بے راہ کر دا اے۔ تَد وی یہُودِیاں دے ڈر دے مارِیاں اوہدی بابت کُھلّم کُھلا کوئی کُجھ نا بولیا۔ پر جد اَدھی کُو عید رہندی سی یِسُوع ہیکل وِچ جا کے سکھالن لگّا۔ ایس واسطے یہُودِیاں تعجُّب کر کے آکھیا پئی ایس بندے نُوں بِناں سِکھیاں نوِشتیاں دا عِلم کِتّھوں آیا؟ تَد یِسُوع اوہناں نُوں جواب دِتّا۔ میری تعلِیم میری نئیں پر میرے گھلّن والے دی اے۔ جے کوئی اوہدی مرضی تے چلنا چاہندا اے اوہ ایس تعلِیم نُوں جانے گا پئی خُدا ولّوں اے یا مَیں اپنے ولّوں بولنا آں۔ جیہڑا اپنے ولّوں بولدا اے۔ اپنی وڈیائی چاہندا اے پر اوہ جیہڑا اپنے گھلّن والے دی وڈیائی چاہندا اے اوہی سَچّا اے تے اوہدے وِچ کھوٹ نئیں اے۔ کِیہ مُوسیٰ تُہانوں شریعت نئیں دِتّی؟ تَد وی تُہاڈے وِچوں کوئی شریعت اُتّے نئیں ٹُردا۔ تُسی کاہِنُوں میرے مار سُٹّن دے مگر پئے ہوئے ہو؟ لوکاں جواب دِتّا تینُوں بد رُوح چمبڑی ہوئی اے کون تیرے مار سُٹّن دے مگر پیا ہویا اے؟ یِسُوع اوہناں نُوں جواب دِتّا مَیں اِک کمّ کِیتا تے تُسی سبھو اچنبے وِچ پئے ہوئے اوہ۔ ایس لئی مُوسیٰ تُہانوں سُنتی بہان دا حُکم دِتّا اے (بھانویں اوہ مُوسیٰ ولّوں نئیں پر وڈّیاں ولّوں اے سی) تے تُسی سبت دے دِن بندے نُوں سُنتی بہاندے ہو۔ جد سبت دے دِن بندہ سُنتی بہندا اے پئی کِتے مُوسیٰ دی شریعت ٹُٹ نا جائے۔ تُسی ایس لئی میرے اُتّے غُصّے ہوندے ہو پئی مَیں بندے نُوں سبت دے دِن پُورا چَنگا کِیتا؟ ویکھن لیکھے نیاں نا کرو پر سَچّا نیاں کرو۔ تَد بعضے یرُوشلِیمیاں آکھیا ایہہ اوہو نئیں اے جِہدے مار سُٹّن دے مگر پئے ہوئے نیں؟ پر ویکھو اوہ تے کھُلاّکھُلی بولدا اے تے اوہ اوہنوں کُجھ نئیں آکھدے۔ ایہہ ہو سکدا اے پئی سردار سَچ مُچ سمجھ گئے نیں۔ پئی ایہہ مسِیح اے؟ ایہنوں تے اسی جاننے آں پئی کِتّھوں دا اے۔ پر مسِیح جد آوے گا کِسے نُوں معلُوم نئیں پئی اوہ کِتّھوں دا اے۔ ایس واسطے یِسُوع ہیکل وِچ سکھالن ویلے زور نال آکھیا۔ تُسی نالے مَینُوں جان دے ہو تے نالے ایہہ وی جان دے ہو مَیں کِتّھوں دا ہاں۔ تے مَیں اپنے ولّوں نئیں آیا آں۔ پر میرا گھلّن والا جِہنُوں تُسی نئیں جان دے سَچّا اے۔ مَیں اوہنوں جاننا آں کیوں جو مَیں اوہدے ولّوں آں تے اوس مَینُوں گھلّیا۔ تَد اوہ چاہندے سن پئی اوہنوں پھڑ لین۔ پر ایس گلّے کِسے اوہنوں ہتّھ نا پایا۔ پئی اوہدا ویلا اجے نئیں سی آیا۔ پر لوکاں وِچوں بتھیرے ایہہ آکھ کے اوہنوں مَن گئے پئی مسِیح جد آئے گا ایہناں نالوں وَدّھ مُعجزے کرے گا۔ جیہڑے ایس کِیتے نیں؟ فرِیسیاں سُنیا پئی لوک اوہدے مارِیاں اِنج بُڑبُڑ کر دے نیں۔ تَد فرِیسیاں تے سردار کاہِناں پیادیاں نُوں گھلّیا پئی اوہنوں پھڑ لین۔ تَد یِسُوع آکھیا ہور اجے تھوڑا چِر مَیں تُہاڈے نال آں تے جِس مَینُوں گھلّیا مَیں اوہدے کول جانا آں۔ تُسی مَینُوں ڈُھونڈو گے پر نئیں لَبّھو گے۔ تے جِتّھے مَیں آں تُسی نئیں آسکدے۔ تَد یہُودی آپو وِچ آکھن لگّے پئی اوہ کِتّھے جائے گا۔ پئی اسی اوہنوں نا لَبّھ سَکاں گے۔ اوہ اوہناں کول جائے گا جیہڑے یُونانِیاں وِچ کھِلّرے ہوئے نیں۔ تے یُونانِیاں نُوں سکھالے گا؟ ایہہ کِیہ گلّ اے جیہڑی اوس آکھی پئی تُسی مَینُوں ڈُھونڈو گے؟ پر مَینُوں لَبّھ نئیں سکو گے۔ تے جِتّھے مَیں آں تُسی نئیں آسکدے؟ چھیکڑلے دِن جیہڑا عید دا خاص دِن اے یِسُوع کھلو گیا تے اُچّی اُچّی آکھن لگّا جے کوئی تریہایا ہوئے تے میرے کول آئے تے پِیئے۔ اوہ جیہڑا میرے اُتّے اِیمان لیاؤندا اے جیہا کتابِ مُقدّس آکھدی اے اوہدے ڈِھڈ وِچوں جیون دے پانی دِیاں ندیاں وَگن گِیاں۔ پر اوہنے ایہہ رُوح دی بابت آکھیا سی جیہڑا اوہدے مَنّن والیاں نُوں مِلنا سی۔ ایس لئی پئی اجے تِیکر رُوح نئیں سی مِلیا۔ کیوں جو یِسُوع اجے اپنے جلال نُوں نا سی پہنچیا۔ تے لوکاں وِچوں بعضیاں جد ایہہ گلّاں سُنیاں۔ تَد آکھیا سَچ مُچ ایہو اوہ نبی اے۔ ہورناں آکھیا پئی ایہہ مسِیح اے۔ پر کئیاں آکھیا مسِیح گلِیلوں آؤندا اے؟ پاک کتاب نئیں دسدی پئی مسِیح داؤد دی نسلوں تے بَیت لحم دے پِنڈ ولّوں آوے گا۔ جِتّھوں دا داؤد سی؟ سو لوکاں وِچ اوہدی بابت پُھٹ پَے گئی۔ تے اوہناں وِچوں کئی چاہندے سن پئی اوہنوں پھڑیئے پر کِسے اوہنوں ہتّھ نا پایا۔ تَد اوہ سپاہی سردار کاہِناں تے فرِیسیاں کول آئے تے اوہناں نیں اوہناں نُوں آکھیا۔ تُسی اوہنوں کیوں نئیں لیائے؟ پیادیاں جواب دِتّا پئی کوئی بندہ کَدے ایس طرح نئیں بولیا۔ تَد فرِیسیاں اوہناں نُوں آکھیا۔ تُسی وی بے راہ ہوگئے اوہ۔ سرداراں یا فرِیسیاں وِچوں کِسے اوہنوں مَنّیا اے؟ پر اوہ عام لوک جیہڑے شریعت نُوں نئیں جان دے لعنتی نیں۔ اوہناں وِچوں اِک نِیکُدِیمُس جیہڑا پہلاں وی اوہدے کول آیا سی اوہناں نُوں آکھن لگّا۔ کِیہ ساڈی شریعت ایدوں پہلاں پئی کِسے دا عُذر نا سُنے تے معلُوم نا کرے۔ پئی ایہہ کِیہ کر دا اے فتویٰ دیندی اے؟ اوہناں اوہنوں آکھیا تُوں وی گلِیلوں ایں لَبّھ کے دس؟ تے ویکھ پئی گلِیلوں کوئی نبی نئیں اُٹھ دا۔ [تے ہر اِک آپو اپنے گھر نُوں ٹُرگیا۔ پر یِسُوع زَیتُون دے پہاڑ نُوں گیا۔ تے سویرے فیر ہیکل نُوں گیا۔ تے سارے لوک اوہدے کول آئے۔ تے اوہ بَیہہ کے اوہناں نُوں سکھالن لگّا۔ تَد فقِیہ تے فریسی اِک زنانی نُوں لیائے جیہڑی زنا کر دیاں پَھڑی گئی سی تے اوہنوں وِچکار کھلار کے۔ اوہنوں آکھیا اَے اُستاد ایہہ زنانی زنا کر دیاں ٹھیک ویلے سر پَھڑی گئی اے۔ ہُن شریعت وِچ مُوسیٰ نیں سانُوں حُکم دِتّا پئی ایہو جیہاں نُوں پتّھراں نال مار سُٹّو۔ سو تُوں ایہدی بابت کِیہ آکھنا ایں؟ پر اوہناں اوہنوں ازمان لئی ایہہ گلّ کِیتی سی پئی اوہدے اُتّے نالش کرن دا موقع مِلے۔ پر یِسُوع ہیٹھاں نِیؤں کے اُنگل نال زمین اُتّے لِکھن لگّا۔ جد اوہ اوہنوں پُچھدے ای جاندے سن اوس اُتانہہ ہو کے اوہناں نُوں آکھیا۔ جیہڑا تُہاڈے وِچوں بے گُناہ ہوئے اوہو پہلاں پتّھر اوہدے اُتّے مارے۔ تے فیر ہیٹھاں نِیؤں کے زمین اُتّے لِکھن لگّا اوہ ایہہ سُن کے وڈّیاں توں لے کے نِکّیاں تِیکر اِک اِک کر کے ٹُر گئے۔ تے یِسُوع اکلّا رہ گیا تے زنانی اوتھے ای وِچکار رہ گئی۔ جد یِسُوع اُتانہہ ہو کے زنانی دے بِناں کِسے نُوں نا ویکھیا۔ تے اوہنوں آکھیا۔ اَے عورت اوہ لوک کِتّھے نیں؟ کِسے نیں تیرے اُتّے فتویٰ نئیں دِتّا؟ تے اوس آکھیا اَے خُداوند کِسے وی نئیں۔ تَد یِسُوع اوہنوں آکھیا مَیں وی تیرے اُتّے فتویٰ نئیں دیندا۔ ٹُر جا تے ایدوں اگّے مُڑ کدی گُناہ نا کریں۔] تَد یِسُوع فیر اوہناں نُوں آکھیا۔ دُنیا دا چانن مَیں آں۔ اوہ جیہڑا میرے مگر آؤندا اے ہنیرے وِچ نئیں ٹُرے گا سگوں اوہنوں زِندگی دا چانن مِلے گا۔ تَد فرِیسیاں آکھیا اپنے حق وِچ تُوں آپ گواہی دینا ایں۔ تیری گواہی سَچّی نئیں۔ یِسُوع اوہناں نُوں آکھیا۔ بھانویں مَیں آپ اپنے حق وِچ گواہی دینا آں تے وی میری گواہی سَچّی اے کیوں جو مَیں جاننا آں پئی کِدھروں آیا تے کِدھر نُوں جانا آں۔ پر تُسی نئیں جان دے پئی کِدھروں آیا آں تے کِدھر نُوں جاناں آں۔ تُسی جِسم دے مطابق فیصلہ کر دے اوہ۔ مَیں کِسے دا فیصلہ نئیں کر دا۔ تے جے مَیں فیصلہ کرنا آں تے میرا فیصلہ سَچّا اے کیوں جو مَیں اکلّا نئیں آں پر مَیں تے باپ جِس مَینُوں گھلّیا۔ تُہاڈی شریعت وِچ لِکھیا اے پئی دو بندیاں دی گواہی سَچّی ہوندی اے۔ مَیں آں جیہڑا اپنے حق وِچ گواہی دینا آں تے باپ جِس مَینُوں گھلّیا اے میرے حق وِچ گواہی دیندا اے۔ تَد اوہناں اوہنوں آکھیا کِتّھے اے تیرا باپ؟ یِسُوع جواب دِتّا نا تُسی مَینُوں جان دے ہو تے نا میرے باپ نُوں جے تُسی مَینُوں جان دے تے میرے باپ نُوں وی جان دے۔ اوس ہیکل دے وِچ تعلِیم دیندیاں ہویاں ایہہ گلّاں خزانے وِچ آکھیاں۔ تے کِسے اوہنوں نا پھڑیا کیوں جو اوہدا ویلا اجے نئیں سی آیا۔ تَد اوس فیر اوہناں نُوں آکھیا مَیں جاناں آں۔ تے تُسی مَینُوں لَبّھو گے تے اپنے گُناہ وِچ مرو گے۔ جِتّھے مَیں جانا آں تُسی نئیں آسکدے۔ تَد یہُودِیاں آکھیا اوہ اپنے آپ نُوں مار سُٹّے گا جیہڑا آکھدا اے پئی جِتّھے مَیں جاناں آں تُسی نئیں آسکدے؟ تے اوس اوہناں نُوں آکھیا تُسی ہیٹھوں ہو مَیں اُتّوں آں۔ تُسی ایس دُنیا توں ہو مَیں ایس دُنیا توں نئیں۔ ایس کر کے مَیں تُہانوں آکھیا پئی تُسی اپنے گُناہاں وِچ مرو گے کیوں جو جے تُسی نئیں مَنّو گے پئی مَیں اوہو آں تے تُسی اپنے گُناہاں وِچ مرو گے۔ تَد اوہناں اوہنوں آکھیا تُوں ایں کون؟ یِسُوع اوہناں نُوں آکھیا۔ اوہ جیہڑا مَیں تُہانوں مُڈھوں دسدا آیا۔ مَینُوں تُہاڈی بابت بُہت کُجھ بولنا تے فیصلہ کرنا اے۔ پر میرا گھلّن والا سَچّا اے۔ تے جیہڑیاں گلّاں مَیں اوہدے کولوں سُنیاں نیں سو ای مَیں دُنیا وِچ بولنا آں۔ اوہناں نُوں پَتا نا لگّا پئی اوہ ساڈے نال باپ دی گلّ کر دا اے۔ ایس لئی یِسُوع آکھیا جد تُسی اِبنِ آدم نُوں اُچیاں کرو گے تَد تُہانوں پتا لگّے گا پئی مَیں اوہ آں تے ایہہ پئی مَیں اپنے ولّوں کُجھ نئیں کر دا آں۔ پر جیویں باپ مَینُوں سکھالیا مَیں ایہہ گلّاں کر دا آں۔ تے میرا گھلّن والا میرے نال اے اوس مَینُوں اکلّا نئیں چھڈیا کیوں جو مَیں ہمیش اوہ ای کمّ کرنا آں جیہڑے اوہنوں چنگے لگدے نیں۔ جد اوہ ایہہ گلّاں پیا آکھدا سی بتھیرے اوہدے اُتّے اِیمان لیائے۔ تَد یِسُوع اوہناں یہُودِیاں نُوں جیہڑے اوہدے اُتّے اِیمان لیائے سن آکھیا۔ جے تُسی میرے کلام وِچ رہو گے تَد تُسی سَچ مُچ میرے شاگِرد بنو گے۔ تے تُسی سچیائی نُوں جانو گے تے سچیائی تُہانوں اَزاد کرے گی۔ اوہناں اوہنوں آکھیا اسی ابرہام دی نسل آں تے کَدے کِسے دے غلام نئیں ساں ہوئے۔ تُوں کِیویں آکھنا ایں پئی تُسی اَزاد ہوؤ گے؟ یِسُوع جواب دِتّا۔ مَیں تُہانوں سَچ سَچ آکھنا آں جیہڑا کوئی گُناہ کر دا اے گُناہ دا غلام اے تے غلام ہمیش گھر وِچ نئیں رہندا پر پُتر سدا رہندا اے۔ تے جے پُتر تُہانوں اَزاد کرے گا تے تُسی ٹھیک اَزاد ہوؤگے۔ مَیں جاننا آں پئی تُسی ابرہام دی نسل اوہ۔ تَد وی تُسی میرے مارن دا راہ لبّھدے اوہ۔ کیوں جو میرے کلام نُوں تُہاڈے وِچ تھاں نئیں مِلدا۔ جو کُجھ مَیں اپنے باپ کول ویکھیا اے اوہو مَیں بولنا آں۔ تے تُسی اوہو کر دے ہو جیہڑا تُساں اپنے پئیو کولوں سُنیا اے۔ اوہناں اوہنوں آکھیا ساڈا پئیو ابرہام اے۔ یِسُوع اوہناں نُوں آکھیا جے تُسی ابرہام دی اولاد ہوندے تے ابرہام جیہے کمّ کر دے۔ پر ہُن میرے جیہے بندے نُوں مارنا چاہندے اوہ جِس تُہانوں ایہہ سَچّی گلّ دسی اے۔ جیہڑی مَیں خُدا کولوں سُنی۔ ابرہام اجیہا نئیں کِیتا۔ تُسی اپنے پئیو دے کمّ کر دے اوہ۔ اوہناں اوہنوں آکھیا اسی حرامدے نئیں جمّے۔ ساڈا اِک باپ اے یعنی خُدا۔ یِسُوع اوہناں نُوں آکھیا جے خُدا تُہاڈا باپ ہوندا تے تُسی مَینُوں پیار کر دے۔ کیوں جو مَیں خُدا توں نِکلیا تے آیا آں۔ تے مَیں آپ توں نئیں آیا آں پر اوس مَینُوں گھلّیا۔ تُسی میرِیاں گلّاں کیوں نئیں سمجھدے؟ ایس لئی پئی تُسی میرے کلام نُوں نئیں سُن سکدے۔ تُسی اپنے پئیو ابلیس توں ہو تے اپنے پئیو دِیاں خواہشاں نُوں پُورا کرنا چاہندے اوہ۔ اوہ مُڈھوں ای خُونی سی تے سچیائی اُتّے کھلوتا نا رہیا کیوں جو اوہدے وِچ سچیائی اے نئیں۔ جدوں اوہ جُھوٹھ بولدا اے اوہ اپنے ای ولّوں بولدا اے کیوں جو اوہ جُھوٹھا اے تے جُھوٹھ دا پئیو اے۔ پر تُسی مَینُوں ایس گلّے نئیں مَن دے کیوں جو مَیں سَچ آکھنا آں۔ تُہاڈے وِچوں کون اے جیہڑا میرے اُتّے گُناہ ثابت کر دا اے جے مَیں سَچ آکھنا آں تُسی مَینُوں کیوں نئیں مَن دے؟ اوہ جیہڑا خُدا توں اے خُدا دِیاں گلّاں سُندا اے تُسی ایس کر کے نئیں سُندے کیوں جو خُدا توں نئیں ہو۔ یہُودِیاں نیں جواب دِتّا اساں ٹھیک نئیں آکھیا پئی تُوں سامری ایں تے تینُوں بد رُوح چمبڑی ہوئی اے؟ یِسُوع جواب دِتّا۔ میرے وِچ بد رُوح نئیں پر مَیں اپنے باپ دی عِزّت کرنا آں تے تُسی میری بے عِزّتی کر دے ہو۔ پر مَیں اپنا جلال نئیں لَبّھدا۔ اِک اے جیہڑا لَبّھدا تے فیصلہ کر دا اے۔ مَیں تُہانوں سَچ سَچ آکھنا آں۔ جے کوئی میرِیاں گلّاں نُوں مَنّے اوہ مَوت نُوں کدی وی نئیں ویکھے گا۔ تَد یہُودِیاں اوہنوں آکھیا ہُن اساں جان لیا اے پئی تیرے وِچ بد رُوح اے۔ ابرہام نیں بنی تے مر گئے پر تُوں آکھنا ایں پئی جیہڑا میرِیاں گلّاں نُوں مَنّے اوہ کدی وی مَوت دا سواد نا لَئے گا۔ تُوں ساڈے پئیو ابرہام نالوں وَڈا ایں؟ اوہ تے مر گیا اے تے نبی وی مر گئے تُوں اپنے آپ نُوں کِیہ بنانا ایں؟ یِسُوع جواب دِتّا جے مَیں اپنے آپ نُوں وڈیاواں تے میری وڈیائی کُجھ نئیں اے۔ پر میری وڈیائی میرا باپ کر دا اے جِہنُوں تُسی آکھدے ہو پئی اوہ ساڈا خُدا اے۔ تے تُساں اوہنوں نئیں پِچھانیا اے پر مَیں اوہنوں جاننا آں۔ تے جے مَیں آکھاں پئی مَیں اوہنوں نئیں جان دا تے تُہاڈے وانگُوں جُھوٹھا ہوواں گا۔ پر مَیں اوہنوں جاننا آں تے اوہدے کلام نُوں مَنّنا آں۔ تُہاڈا پئیو ابرہام بڑا ای خُوش سی پئی میرا دِن ویکھے تے اوس ویکھیا تے خُوش ہویا۔ تَد یہُودِیاں اوہنوں آکھیا تُوں اجے تِیکر پنجاہاں ورھیاں دا نئیں ہویا تُوں ابرہام نُوں ڈِٹّھا اے؟ یِسُوع اوہناں نُوں آکھیا مَیں تُہانوں سَچ سَچ آکھنا آں۔ ایدوں پہلاں پئی ابرہام سی مَیں آں۔ تَد اوہناں اوہنوں مارن لئی پتّھر چُکے۔ پر یِسُوع لُک گیا تے ہیکلوں باہر نِکل گیا۔ تے اوس لنگھدیاں ہویاں اِک جماندرُو اَنھے نُوں ویکھیا۔ تے اوہدے شاگِرداں اوہنوں پُچھیا پئی اَے ربّی کِس گُناہ کِیتا۔ ایس یا ایہدے ماپیاں پئی ایہہ اَنھا جمّیا؟ یِسُوع جواب دِتّا۔ گُناہ نا تے ایس کِیتا نا ایہدے ماپیاں نیں پر ایس لئی پئی خُدا دے کمّ اوہدے وِچ ظاہر ہون۔ جد تِیکر دِن اے سانُوں اوہدے کمّ کرنے پَیندے نیں جِس مَینُوں گھلّیا اے۔ رات آؤندی اے جد کوئی کمّ نئیں کر سکدا جد تِیکر مَیں دُنیا وِچ آں مَیں دُنیا دا چانن آں۔ ایہہ آکھ کے اوس زمین اُتّے تُھکیا تے تُھک نال مِٹّی گُتّھی تے اوہدیاں اَکھّیاں اُتّے اوہ مِٹّی لمِب دِتّی۔ تے اوہنوں آکھیا جا شِیلوخ دے حوض وِچ (جِہدا مطلب گھلّیا ہویا اے) نہا۔ تَد اوہ جا کے نہاتا تے سُجاکھا ہو کے آیا۔ تَد گوانڈِھیاں تے اوہناں وی جِنہاں اوہنوں بھیکھ منگدیاں ویکھیا سی آکھیا ایہہ اوہو نئیں اے جیہڑا بَیہہ کے منگدا ہوندا سی؟ ہورناں آکھیا پئی ایہہ اوہی اے۔ ہورناں آکھیا نئیں پر اوہدے وانگر اے۔ پر اوس آکھیا۔ مَیں اوہی آں۔ تَد لوکاں اوہنوں آکھیا۔ فیر تیریاں اَکھّیاں کِیویں کُھل گِئیاں؟ اوس جواب دِتّا اِک بندے جِہنُوں یِسُوع آکھدے نیں اوس مِٹّی گُنّھ کے میرِیاں اَکھّیاں اُتّے لیپ کِیتا تے مَینُوں آکھیا جا شِیلوخ دے حوض وِچ نہا۔ مَیں گیا تے نہاتا تے ویکھن لگّا۔ تَد اوہناں اوہنوں پُچھیا اوہ کِتّھے اے؟ اوس آکھیا مَیں نئیں جان دا۔ اوہ اوہنوں جیہڑا پہلاں اَنھا سی فرِیسیاں کول لیائے۔ تے جِس دِن یِسُوع مِٹّی گُنّھ کے اوہدیاں اَکھّیاں کھولِیاں سبت دا دِن سی۔ ایس لئی فیر فرِیسیاں وی اوہنوں پُچھیا پئی تُوں کِیویں ویکھن لگ پیا؟ اوس اوہناں نُوں آکھیا۔ اوس میرِیاں اَکھّیاں اُتّے مِٹّی لائی تے مَیں نہاتا تے سُجاکھا آں۔ تَد فرِیسیاں وِچوں کئیاں آکھیا پئی ایہہ بندہ ربّ ولّوں نئیں اے کیوں جو اوہ سبت نُوں نئیں مَندا۔ پر ہورناں آکھیا گُناہگار بندہ کِیویں ایہو جِہیاں کراماتاں وکھا سکدا اے؟ تے اوہناں وِچ پُھٹ پئی۔ تَد اوہناں اوس اَنھے نُوں آکھیا تُوں اوہدے حق وِچ کِیہ آکھنا ایں اوس تیریاں اکھّاں جو کھولِیاں؟ اوس آکھیا اوہ نبی اے۔ پر یہُودِیاں اوہدی بابت سَچ نا مَنّیا پئی اوہ اَنھا سی تے فیر ویکھن لگّا جِنّاں چِر اوس سُجاکھے ہوئے دے ماپیاں نُوں سَدّ کے۔ اوہناں کولوں ایہہ پُچھ نا لیا پئی ایہو تُہاڈا پُتر اے جیہڑا تُسی آکھدے ہو پئی اَنھا جمّیا سی؟ فیر ہُن کِیویں ویکھدا اے؟ اوہدے ماپیاں اوہناں نُوں جواب دِتّا اسی جاننے آں پئی ایہہ ساڈا پُتر اے تے اَنھا جمّیا سی۔ پر ایہہ سانُوں پتا نئیں پئی ہُن کِس طرح ویکھدا اے تے نا سانُوں خبر اے پئی ہُن کِس اوہدیاں اَکھّیاں کھول دِتّیاں نیں۔ اوہنوں پُچھو اوہ جوان اے اپنا حال اوہ آپے دسے گا۔ ایہہ گلّاں اوہدے ماپیاں ایس واسطے آکھیاں کیوں جو اوہ یہُودِیاں کولوں ڈر دے سن۔ ایس لئی پئی یہُودِیاں آپو وِچ ایکا کِیتا ہویا سی پئی جیہڑا کوئی اوہنوں مسِیح آکھے عبادتخانیوں کڈھیا جائے۔ تَدے اوہدے ماپیاں آکھیا سی اوہ جوان اے۔ اوہنوں پُچھو۔ تَد دُوجی واری اوہناں اوس بندے نُوں جیہڑا اَنھا سی سَدّ کے آکھیا۔ ربّ دی وڈیائی کر۔ اسی جاننے آں پئی ایہہ گُناہگار بندہ اے۔ اوس جواب دِتّا مَیں نئیں جان دا پئی اوہ گُناہگار اے کہ نئیں۔ پر اِک گلّ مَیں جاننا آں پئی مَیں اَنھا ساں تے ہُن سُجاکھا آں۔ تَد اوہناں اوہنوں آکھیا اوس تینُوں کِیہ کِیتا؟ اوس تیریاں اَکھّیاں کِس طرح کھولِیاں؟ اوس اوہناں نُوں جواب دِتّا مَیں ہُنے تُہانوں دسیا اے تے تُساں سُنیا نئیں مُڑ تُسی کاہدے لئی سُننا چاہندے اوہ۔ تُسی وی اوہدے شاگِرد تے بننا نئیں چاہندے؟ تَد اوہناں اوہنوں پھٹکاریا تے آکھیا۔ تُوں ای اوہدا شاگِرد ایں پر اسی تے مُوسیٰ دے شاگِرد آں۔ سانُوں معلُوم اے پئی خُدا مُوسیٰ نال کلام کِیتا ہے پر ایہنوں اسی نئیں جان دے پئی ایہہ کِتّھوں دا اے۔ اوس بندے اوہناں نُوں جواب دِتّا ایہہ تے اچرج گلّ اے پئی تُسی نئیں جان دے پئی اوہ کِتّھوں دا اے تے اوس میرِیاں اَکھّیاں کھول دِتّیاں۔ اسی جاننے آں پئی خُدا گُناہگار دی نئیں سُندا پر جے کوئی خُدا دا بَھگت ہوئے تے اوہدی مرضی اُتّے چلّے۔ اوہ اوہدی سُندا اے۔ دُنیا دے شُروع توں نئیں سُنیا گیا پئی کِسے جماندرُو اَنھے دِیاں اَکھّیاں کھولِیاں ہون۔ جے اوہ بندہ خُدا ولّوں نا ہوندا تے کُجھ نا کر سکدا۔ اوہناں اوہنوں جواب وِچ آکھیا تُوں تے گُناہاں وِچ جمّیا سائیں تے سانُوں سکھانا ایں؟ تے اوہنوں باہر کڈھ دِتّا۔ یِسُوع سُنیا پئی اوہناں اوہنوں کڈھ دِتّا۔ تے اوہنوں لَبّھ کے آکھیا تُوں خُدا دے پُتر اُتّے اِیمان لیاؤنا ایں؟ اوس آکھیا اَے خُداوند اوہ کیہڑا اے پئی مَیں اوہدے اُتّے اِیمان لیاواں؟ یِسُوع اوہنوں آکھیا تُوں تے اوہنوں ویکھیا اے تے اوہ اوہو اے جیہڑا تیرے نال گلّاں کر دا اے۔ اوس آکھیا اَے خُداوند مَیں اِیمان لیاؤنا واں۔ تے اوس اوہنوں سجدہ کِیتا۔ تے یِسُوع آکھیا ایس دُنیا وِچ مَیں عدالت کرن آیا آں پئی اوہ جِنہاں نُوں نئیں دِسدا ویکھن تے جِنہاں نُوں دِسدا اے اَنھے ہو جان۔ اوہناں فرِیسیاں جیہڑے اوہدے نال سن ایہہ سُن کے اوہنوں آکھیا اسی وی اَنھے آں؟ یِسُوع اوہناں نُوں آکھیا جے تُسی اَنھے ہوندے تے تُہاڈا گُناہ نا ہوندا۔ پر ہُن تُسی آکھدے ہو پئی سانُوں دِسدا اے۔ تُہاڈا گُناہ تُہاڈے ذِمّے رہندا اے۔ مَیں تُہانوں سَچ سَچ آکھنا آں۔ جیہڑا بھیڈاں دے واڑے وِچ بُوہے راہ نئیں وڑ دا پر کِسے ہور پاسیوں ٹپدا آؤندا اے اوہ چور تے ڈاکُو اے۔ پر جیہڑا بُوہے راہ وڑ دا اے۔ اوہ بھیڈاں دا ایّالی اے۔ چوکیدار اوہدے واسطے بُوہا کھولدا اے۔ تے بھیڈاں اوہدی اواز سُندیاں نیں۔ تے اوہ اپنیاں بھیڈاں نُوں ناں لَیکے سَدّ دا اے۔ تے اوہناں نُوں باہر لے جاندا اے۔ جد اوہ اپنیاں سارِیاں بھیڈاں نُوں باہر کڈھدا اے تے اوہناں دے اگّے لگ ٹُردا اے تے بھیڈاں اوہدے مگر ٹُرپیندیاں نیں کیوں جو اوہ اوہدی اواز پچھاندیاں نیں۔ تے اوہ اوپرے دے مگر نئیں جانِگیاں سگوں اوہدے کولوں بَھجّن گِیاں۔ کیوں جو اوہ اوپریاں دی اواز نئیں پچھاندیاں۔ یِسُوع ایہہ تمثِیل اوہناں نُوں دسی پر اوہناں نئیں سمجھیا پئی ایہہ گلّاں کِیہ نیں جیہڑیاں اوس اوہناں نُوں آکھیاں۔ سو یِسُوع اوہناں نُوں فیر آکھیا مَیں تُہانوں سَچ سَچ آکھنا آں۔ بھیڈاں دا بُوہا مَیں آں۔ سارے جِنّے مَیتھوں پہلاں آئے چور تے ڈاکُو نیں۔ پر بھیڈاں اوہناں دی نئیں سُنی۔ بُوہا مَیں آں۔ جیہڑا میری راہِیں وڑے اوہ بچ جائے گا۔ تے اندر باہر آیا جایا کرے گا تے کھانا پائے گا۔ چور بِناں چوری کرن تے کوہن تے چَوڑ کرن توں بِناں نئیں آؤندا۔ مَیں ایس لئی آیا ہاں پئی اوہناں کول جیون ہوئے تے بُہتا چوکھا ہوئے؟ سگوں بُہتا اوہناں نُوں مِلے۔ چَنگا ایّالی مَیں آں۔ چَنگا ایّالی بھیڈاں لئی اپنی جان دیندا اے۔ پر مزدُور تے اوہ جیہڑا ایّالی نئیں اے تے نا بھیڈاں اوہدیاں اپنیاں نیں۔ بگھیاڑ نُوں آؤندیاں ویکھدا تے بھیڈاں نُوں چھڈ کے نَسّ جاندا اے تے بگھیاڑ اوہناں نُوں پاڑ دا تے وکھیر دیندا اے۔ کیوں جو اوہ مزدُور اے تے اوہنوں بھیڈاں دی پرواہ نئیں اے۔ چَنگا ایّالی مَیں آں تے مَیں اپنیاں نُوں جاننا آں تے میرِیاں مَینُوں جاندِیاں نیں۔ جیویں باپ مَینُوں جان دا اے تے مَیں باپ نُوں جاننا آں۔ تے بھیڈاں لئی مَیں اپنی جان دینا آں۔ میرِیاں ہور وی بھیڈاں نیں جیہڑیاں ایس واڑے دِیاں نئیں۔ اوہناں نُوں وی مَیں لیاؤنا اے تے اوہ میری اواز سُنن گِیاں تے اوہ اِک اِجّڑ تے اِک ایّالی ہو جان گِیاں۔ باپ مَینُوں ایسے گلّے پیار کر دا اے پئی مَیں اپنی جان دینا آں تاں جو فیر مَیں اوہنوں لے لَواں۔ کوئی مَیتھوں اوہنوں نئیں کھوندا پر مَیں اوہنوں آپے ای دینا آں۔ میرا اختیار اے پئی اوہنوں دے دیاں تے میرا اختیار اے پئی مُڑ اوہنوں لے لَواں۔ ایہہ حُکم مَینُوں اپنے باپ کولوں مِلیا اے۔ ایہناں گلّاں دے سببّوں یہُودِیاں دے وِچ فیر پُھٹ پئی۔ تے اوہناں وِچوں بتھیریاں آکھیا اوہدے وِچ بد رُوح اے۔ ایہہ کملا اے۔ کیوں اوہدی سُندے ہو؟ ہورناں آکھیا ایہہ اوہدیاں گلّاں نئیں جِہنُوں بدرُوح چمبڑی ہوئے۔ کِیہ بدرُوح اَنھیاں دِیاں اَکھّیاں کھول سکدی اے؟ تے یرُوشلِیم وِچ تجدید دی عید آئی۔ اوہ سِیال دی بہار سی۔ تے یِسُوع ہیکل دے سُلیمانی برانڈے وِچ پِھردا سی۔ تے یہُودِیاں گھیرا پا کے اوہنوں آکھیا کِنا کُو چِر تُوں ساڈے جی نُوں شک وِچ رکھنا ایں؟ جے تُوں مسِیح ایں تے سانُوں صاف دس۔ یِسُوع اوہناں نُوں جواب دِتّا مَیں تُہانوں دسیا تے تُسی نئیں مَن دے۔ جیہڑے کمّ مَیں اپنے باپ دے ناں اُتّے کرنا آں میرے گواہ نیں۔ پر تُسی نئیں مَن دے کیوں جو تُسی میرِیاں بھیڈاں وِچوں نئیں ہو۔ میرِیاں بھیڈاں میری اواز سُندیاں نیں تے مَیں اوہناں نُوں جاننا آں تے اوہ میرے مگر ٹُر دِیاں نیں۔ تے مَیں اوہناں نُوں سدا دی زِندگی دینا آں۔ تے اوہ کدی ہلاک نا ہون گِیاں۔ تے کوئی میرے ہتھّوں اوہناں نُوں نئیں کھووے گا۔ میرا باپ جِس اوہناں نُوں مَینُوں دِتّا اے ساریاں نالوں وَڈا اے تے کوئی باپ دے ہتھّوں کھو نئیں سکدا۔ مَیں تے باپ اِک آں۔ یہُودِیاں فیر پتّھر چُکے پئی اوہنوں مارن۔ یِسُوع اوہناں نُوں جواب دِتّا پئی بتھیرے چنگے کمّ مَیں باپ ولّوں تُہانوں وکھائے۔ اوہناں وِچوں کیہڑے کمّ بدلے مَینُوں پتّھر مار دے ہو؟ یہُودِیاں اوہنوں جواب دِتّا اسی تینُوں چنگے کمّ لئی پتّھر نئیں مار دے پر کُفر لئی کیوں جو تُوں بندہ ہو کے اپنے آپ نُوں خُدا بنانا ایں۔ یِسُوع اوہناں نُوں جواب دِتّا تُہاڈی شریعت وِچ ایہہ نئیں لِکھیا پئی مَیں آکھنا تُسی خُدا ہو؟ جد اوس اوہناں نُوں جِنہاں نُوں خُدا دا کلام آیا خُدا آکھیا۔ (تے پاک کتاب جُھوٹھی نئیں ہو سکدی۔) جِہنُوں باپ نیں مُقدّس کِیتا تے دُنیا وِچ گھلّیا۔ تُسی اوہنوں آکھدے ہو پئی تُوں کُفر بکنا ایں۔ جد مَیں آکھیا پئی مَیں خُدا دا پُتر آں؟ جے مَیں اپنے باپ دے کمّ نا کراں تے مَینُوں نا مَنّو۔ پر جے مَیں کرنا آں۔ تَد مَینُوں بھانویں نا ای مَنّو پر میرے کمّاں نُوں تے مَنّو تاں جو تُسی جانوں تے سمجھو پئی باپ میرے وِچ اے تے مَیں باپ وِچ۔ سو اوہ فیر اوہنوں پھڑن دا داء لان لگّے تے اوہ اوہناں دے ہتھّوں نِکل گیا۔ تَد فیر اوہ یَردنوں پار گیا جیہڑے تھاں یُوحنّا پہلاں بپتِسمہ دیندا ہوندا سی تے اوتھے رہیا۔ تے بہتیاں اوہدے کول آن کے آکھیا یُوحنّا کوئی مُعجزہ نا کِیتا پر جِنّیاں گلّاں یُوحنّا اوہدے حق وِچ آکھیاں ساریاں سَچ نِکلیاں۔ تے اوس تھاں بتھیریاں اوہدے اُتّے اِیمان لیاندا۔ اِک بندہ لعزر کر کے بیمار سی۔ جیہڑا مریم تے اوہدی بھین مرتھا دے پِنڈ بَیت عَنِیاہ دا سی۔ تے ایہہ مریم اوہ سی۔ جِس خُداوند نُوں عِطر مَلیا تے اوہدے پَیر اپنے والاں نال پُونجھے سن۔ اوسے دا بھرا لعزر ماندا سی۔ تَد اوہدی بھیناں اوہنوں ایہہ سنیہا گھلّیا۔ پئی اَے خُداوند ویکھ جِہنُوں تُوں پیار کرنا ایں اوہ ماندا اے۔ یِسُوع ایہہ سُن کے آکھیا ایہہ بیماری مَوت دی نئیں اے پر خُدا دے جلال لئی۔ تاں جو خُدا دے پُتر دا اوہدے کر کے جلال ہوئے۔ مرتھا نُوں تے اوہدی بھین تے لعزر نُوں یِسُوع پیار کر دا سی۔ سو جد اوس سُنیا پئی اوہ ماندا اے تے جِتّھے اودُوں سی اوتھے دو دِن رہیا۔ اوہدے پِچّھوں یِسُوع شاگِرداں نُوں آکھن لگّا چلّو یہُودیہ نُوں فیر چلّئے۔ شاگِرد اوہنوں آکھن لگّے اَے ربّی یہُودی ہُنے تینُوں پتّھر مارنا چاہندے سن تے تُوں فیر اوتھے جانا ایں؟ یِسُوع جواب دِتّا دِن دے باراں گھینٹے نئیں ہوندے جے کوئی دِن نُوں ٹُرے تے ٹھوکر نئیں کھاندا کیوں جو اوہ ایس دُنیا دا چانن ویکھ دا اے۔ پر جے کوئی رات نُوں ٹُرے تے ٹھوکر کھاندا اے کیوں جو اوہدے اندر چانن نئیں اے۔ ایہہ گلّاں آکھ کے اوہناں نُوں آکھن لگّا پئی ساڈا دوست لعزر سَوں گیا اے۔ پر مَیں جانا آں پئی اوہنوں جگاواں۔ تَد شاگِرداں نیں اوہنوں آکھیا۔ اَے خُداوندا جے سَوں گیا اے تے چَنگا بھلا ہو جائے گا۔ یِسُوع نیں اوہدے مرن ولّوں آکھیا سی پر اوہناں سمجھیا اوس نِیندر دے آرام دی گلّ کِیتی اے۔ تَد فیر یِسُوع اوہناں نُوں صاف آکھیا پئی لعزر مر گیا اے۔ تے مَیں تُہاڈے لئی ایس گلّے خُوش آں پئی مَیں اوتھے نئیں ساں تاں جو تُسی اِیمان لیاؤ۔ پر چلّو اوہدے کول چلّئے۔ تَد تُوما جِہنُوں جوڑا آکھدے نیں اپنے نال دے شاگِرداں نُوں آکھیا آؤ اسی وی چلّئے تاں جو اوہدے نال مریئے۔ تَد یِسُوع آ کے معلُوم کِیتا پئی اوہنوں قبر وِچ پَیاں چار دِن ہوئے نیں۔ تے بَیت عَنِیاہ یرُوشلِیم دے نیڑے سی۔ یعنی ڈیڑھ کوہ دے نیڑے تریڑے۔ تے بتھیرے یہُودی مرتھا تے مریم کول اوہناں دے بھرا دی مُکانیں آئے ہوئے سن۔ جد مرتھا سُنیا پئی یِسُوع آیا اے اگّوں والی مِلن گئی۔ پر مریم گھر ای رہی۔ تَد مرتھا یِسُوع نُوں آکھیا اَے خُداوند جے تُوں ایتھے ہوندوں تے میرا بھرا نا مر دا۔ تے ہُن وی مَیں جاننی آں پئی جو کُجھ تُوں خُدا کولوں منگیں خُدا تینُوں دیوے گا۔ یِسُوع اوہنوں آکھیا تیرا بھرا فیر جی اُٹھے گا۔ مرتھا اوہنوں آکھیا مَیں جاننی آں پئی اوڑک دے دِہاڑے قیامت نُوں اوہ جی اُٹھے گا۔ یِسُوع اوہنوں آکھیا قیامت تے زِندگی مَیں آں۔ جیہڑا میرے اُتّے اِیمان لیاؤندا اے بھانویں اوہ مر جائے تَد وی جِیئے گا۔ تے جیہڑا کوئی جِیوندا اے تے میرے اُتّے اِیمان لیاؤندا اے کدی وی نئیں مرے گا۔ تُوں ایہہ گلّ مننی ایں؟ اوہ اوہنوں آکھن لگّی آں خُداوند مَیں مَن لیا اے پئی تُوں مسِیح خُدا دا پُتر ایں جیہڑا دُنیا وِچ آؤن والا اے۔ تے ایہہ آکھ کے ٹُر گئی تے اپنی بھین مریم نُوں چُپ کِیتیاں سَدّ کے آکھن لگّی۔ اُستاد آگیا اے تے تینُوں سدّدا اے۔ جد اوس ایہہ گلّ سُنی تَد چھیتی اُٹھ کے اوہدے کول گئی۔ (تے یِسُوع اجے پِنڈ وِچ نئیں سی اَپڑیا۔ پر جِتّھے اوہنوں مرتھا مِلی سی اوسے تھاں سی) سو اوہ یہُودی جیہڑے اوہدے نال گھر وِچ سن تے اوہدے ولّ مُکانی آئے سن۔ جد مریم نُوں ویکھیا پئی اوہ چھیتی اُٹھ کے باہر گئی اے۔ ایہہ سمجھ کے اوہدے مگر ٹُر پئے پئی اوہ قبر اُتّے رون جاندی اے۔ سو مریم جد اوتھے آئی جِتّھے یِسُوع سی۔ اوہنوں ویکھ دیاں ای ایہہ آکھ کے اوہدی پَیرِیں ڈِگّ پئی تے آکھن لگّی خُداوند جے تُوں ایتھے ہوندوں تے میرا بھرا ناں مر دا۔ جد یِسُوع اوہنوں روندیاں تے اوہدے نال دے یہُودِیاں نُوں روندیاں ویکھیا تے اوہ رُوح وِچ رنج ہویا تے اپنے آپ وِچ گھابریا۔ تے آکھیا تُساں اوہنوں کِتّھے دھریا اے؟ اوہ اوہنوں آکھن لگّے اَے خُداوند چَل تے ویکھ۔ یِسُوع دے اتھرُو وَگ پئے۔ تَد یہُودِیاں آکھیا ویکھو اوہ اوہنوں کِنّاں پیار کر دا سی۔ پر اوہناں وِچوں کئیاں آکھیا۔ ایہہ بندے جِس اَنھے دِیاں اَکھّیاں کھول دِتّیاں اینا نا کر سکیا پئی ایہہ نا مر دا؟ تَد فیر یِسُوع اپنے آپ وِچ غم کر دا قبر اُتّے آیا۔ اوہ اِک غار سی تے اوہدے اگّے پتّھر رکھیا ہویا سی۔ یِسُوع آکھیا پتّھر نُوں ہٹا دیو۔ مرتھا اوس موئے ہوئے دی بھین اوہنوں آکھن لگّی۔ اَے خُداوند ہُن تے اوہدے وِچوں مُشک آؤندی اے۔ کیوں جو اَج اوہنوں چوتھا دِن ہوگیا اے۔ یِسُوع اوہنوں آکھیا مَیں تینُوں نئیں سی آکھیا جے تُوں اِیمان لِیاویں تے خُدا دا جلال ویکھیں گی؟ سو اوہناں پتّھر نُوں ہٹایا تے یِسُوع اَکھّیاں اُتانہہ کر کے آکھیا۔ اَے باپ مَیں تیرا شُکر کرنا ہاں پئی تُوں میری سُنی۔ تے مَینُوں تے پتا سی پئی تُوں ہمیش میری سُندا ایں۔ پر لوکاں لئی جیہڑے میرے آلے دوالے کھلوتے ہوئے نیں مَیں ایہہ آکھیا تاں جو اِیمان لیاؤن پئی تُوں مَینُوں گھلّیا اے۔ تے ایہہ آکھ کے بڑے زور نال آکھیا اَے لعزر باہر آ۔ مُردہ پَٹّیِاں نال ہتّھ پَیر بَدّھے ہوئے نِکل آیا تے اوہدا مُنھ رُومال نال وھلیٹیا ہویا سی۔ یِسُوع اوہناں نُوں آکھیا۔ اوہنوں کھولو تے اوہنوں جان دیو۔ تَد بتھیرے یہُودی جیہڑے مریم دے نال آئے ہوئے سن۔ جو کُجھ اوس کِیتا سی ویکھ کے اوہدے اُتّے اِیمان لیا وے۔ پر کئی اوہناں وِچوں فرِیسیاں دے کول گئے تے جو کُجھ یِسُوع کِیتا سی اوہناں نُوں دسیا۔ تَد سردار کاہِناں تے فرِیسیاں اپنی جماعت اکٹّھی کر کے آکھیا۔ اسی کِیہ کرنے آں؟ ایہہ بندہ تے بڑے مُعجزے کر دا اے۔ اوہنوں اسی ایویں چھڈ دئیے تے سارے لوک اوہدے اُتّے اِیمان لیاؤن گے۔ تے رُومی آ کے ساڈا مُلک تے قوم کھولین گے۔ اوہناں وِچوں اِک کائفا کر کے اوس ورھے دے سردار کاہِن نیں اوہناں نُوں آکھیا تُسی کُجھ نئیں جان دے۔ تے نا خیال کر دے ہو پئی تُہاڈے لئی چَنگا اے پئی سارے لوکاں دے بدلے اِک بندہ مر جائے تے ساری قوم برباد نا ہوئے۔ ایہہ اوس اپنے ولّوں نئیں سی آکھیا۔ پر اوس ورھے دا سردار کاہِن ہو کے اوس اگیتری خبر دِتّی پئی یِسُوع ایس قوم دے بدلے مرے گا۔ تے صرف اوس قوم دے بدلے نئیں۔ پر ایس گلّے وی پئی خُدا دے پُتراں نُوں جیہڑے کھِلّرے پُلّرے نیں اکٹّھیاں کر کے اِک بنا دے۔ سو اوس دِن توں اوہناں صلاح کِیتی پئی اوہنوں مار سُٹّن۔ تَد یِسُوع اوہدے مگروں یہُودِیاں وِچ کُھلا نا پِھریا سو اوہ اوتھوں ٹُر کے بیابان دے نیڑے دے مُلک وِچ اِفرائیم کر کے اِک شہر وِچ ٹُر گیا تے شاگِرداں نال اوتھے رہیا۔ تے یہُودِیاں دی عید فسح نیڑے سی تے بُہت لوک فسح دے پہلاں پِنڈاں توں یرُوشلِیم نُوں گئے تاں جو اپنے آپ نُوں پاک کر لین۔ تَد اوہ یِسُوع نُوں لبّھدے سن تے ہیکل وِچ کھلو کے آپو وِچ آکھن لگّے۔ پئی تُہاڈا کِیہ خیال اے اوہ عید وِچ نئیں آئے گا؟ تے سردار کاہِناں تے فرِیسیاں حُکم دِتّا سی پئی جے کِسے نُوں معلُوم ہوئے پئی اوہ کِتّھے اے تے خبر دیوے تاں جو اوہ اوہنوں پھڑ لین۔ تَد یِسُوع عید فسح توں چھ دِن پہلاں بَیت عَنِیاہ وِچ آیا جِتّھے لعزر سی جِہنُوں یِسُوع مُردیاں وِچوں جوالیا سی۔ تے اوتھے اوہناں اوہدی روٹی ورجی۔ تے مرتھا سیوا کر دی سی پر لعزر اوہناں وِچوں اِک سی جیہڑے اوہدے نال کھان بَیٹھے سن۔ تَد مریم ادھ سیر خالص تے بڑا مہنگا وال چھڑ دا عِطر لے کے یِسُوع دے پیراں نُوں مَلیا تے اپنے والاں نال اوہدے پَیر پُونجھے۔ تے گھر عِطر دی خوشبو نال بھر گیا۔ تَد اوہدے شاگِرداں وِچوں اِک جَنا یہُوداہ اِسکریُوتی جِس اوہنوں پھڑانا سی آکھن لگّا۔ پئی ایہہ عِطر تَرے سَو دینار توں ویچ کے مَسکِیناں نُوں کیوں نا دِتّا گیا؟ ایہہ گلّ اوس ایس کر کے نئیں سی آکھی پئی اوہنوں مَسکِیناں دا فِکر سی پر ایس لئی پئی اوہ چور سی تے بٹوا کول رکھ کے جو کُجھ اوہدے وِچ ہوندا سی اوہ لے لَیندا سی۔ تَد یِسُوع آکھیا ایہہ میرے دفن دے دِن لئی ایہنوں رکھن دے۔ مَسکِین تے ہر ویلے تُہاڈے کول نیں پر مَیں ہر ویلے تُہاڈے نال نئیں آں۔ تَد یہُودِیاں وِچوں بُہتے لوک جان گئے پئی اوہ اوتھے اے تے اوہ آئے۔ نا نِرا یِسُوع دے واسطے پر ایس واسطے پئی لعزر نُوں وی ویکھن۔ جِہنُوں اوس مُردیاں وِچوں جوالیا سی۔ پر سردار کاہِناں صلاح کِیتی پئی لعزر نُوں وی مار سُٹّیئے۔ کیوں جو اوہدے سبّب کر کے یہُودِیاں وِچوں بتھیرے ٹُر گئے تے یِسُوع اُتّے اِیمان لیاندا۔ اگلے دِن بتھیرے لوکاں جیہڑے عید اُتّے آئے ہوئے سن۔ جد سُنیا پئی یِسُوع یرُوشلِیم نُوں آؤندا اے۔ کھجُوراں دِیاں ٹہنِیاں لیّاں تے اگّوں والی اوہنوں مِلن لئی نِکلے تے زور نال آکھن لگّے ہوشعنا! دھنّ اوہ اے جیہڑا خُداوند دے ناں اُتّے آؤندا اے۔ اِسرائیل دا بادشاہ۔ تے یِسُوع چھوٹا جِہیا کھوتا لَبّھ کے اوہدے اُتّے چڑھ بَیٹھا۔ جیویں لِکھیا ہویا اے۔ اَے صِیُّون دی دِھی نا ڈر ویکھ تیرا بادشاہ کھوتے دے بچّے اُتّے چڑھیا ہویا آؤندا اے۔ اوہدے شاگِرد پہلاں اوہناں گلّاں نُوں نا سمجھے۔ پر جد یِسُوع اپنے جلال نُوں پہنچ گیا سی۔ تَد اوہناں نُوں یاد آیا پئی ایہہ گلّاں اوہدی بابت لِکھیاں ہویاں سن۔ تے نالے ایہہ پئی اوہناں اوہدے نال ایہہ سلُوک کِیتا سی۔ تَد اوہناں لوکاں جیہڑے اوس ویلے اوہدے نال سن جد اوس لعزر نُوں قبروں باہر سدّیا تے مُردیاں وِچوں جوالیا سی گواہی دِتّی۔ تے لوک ایس کر کے اوہنوں اگّوں والی مِلن گئے پئی اوہناں سُنیا سی پئی اوس ایہہ مُعجزہ کِیتا سی۔ تَد فریسی آپو وِچ آکھن لگّے ویکھو تے تُہاتھوں کُجھ نئیں بن دا ویکھو دُنیا اوہدے مگر ٹُر پئی اے۔ تے اوہناں وِچوں جیہڑے عید اُتّے بندگی کرن گئے کئی یُونانی سن۔ تَد اوہ فِلپُّس کول آئے جیہڑا گلِیل دے بَیت صَیدا دا سی تے عرض کِیتی جناب اسی یِسُوع نُوں ویکھنا چاہنے آں۔ فِلپُّس آ کے اندریاس نُوں دسیا۔ اندریاس تے فِلپُّس نیں آ کے یِسُوع نُوں خبر دِتّی۔ یِسُوع نیں اوہناں نُوں جواب دِتّا ویلا آگیا اے پئی اِبنِ آدم دا جلال ہوئے۔ مَیں تُہانوں سَچ سَچ آکھنا آں پئی جِنّاں چِر کنک دا دانہ زمین وِچ پَے کے نا مرے اوہ اکلّا ای رہندا اے۔ پر جے مر جاوے تے بوہتا پَھل لیاؤندا اے۔ اوہ جیہڑا اپنی جان پیاری سمجھدا اے۔ اوہ اوہنوں گواؤندا اے۔ تے اوہ جیہڑا اپنی جان نال ایس دُنیا وِچ وَیر رکھدا اے سدا دی زِندگی تِیکر اوہنوں سانبھی رکھّے گا۔ جے کوئی میری سیوا کرے تے اوہ میرے مگر آئے۔ تے جِتّھے مَیں آں میری سیوا کرن والا وی اوتھے ہوئے گا۔ جے کوئی میری سیوا کرے تے باپ اوہدی عِزّت کرے گا۔ ہُن میرا جی گھبراؤندا اے تے مَیں کِیہ آکھاں؟ پئی اَے باپ مَینُوں ایس گھڑیوں بچا۔ پر مَیں ایسے سبّب ایس گھڑی تِیکر آیا۔ اَے باپ اپنے ناں نُوں جلال دے۔ تَد اسمانوں اواز آئی پئی مَیں جلال دِتّا اے تے فیر وی جلال دیاں گا۔ تَد اوہ لوک جیہڑے کول کھلوتے سُندے سن آکھن لگّے پئی بدّل گجّیا اے۔ ہورناں آکھیا فرِشتہ اوہدے نال بولیا اے۔ یِسُوع جواب دِتّا ایہہ اواز میرے واسطے نئیں پر تُہاڈے واسطے آئی اے۔ ہُن ایس دُنیا دی عدالت ہوندی اے۔ ہُن ایس دُنیا دا سردار باہر کڈھیا جائے گا۔ تے مَیں جے زمین اُتّوں اُچّا کِیتا جاواں تے ساریاں نُوں اپنے ولّ کِھچّاں گا۔ ایہہ آکھ کے اوس اِشارے نال دسیا پئی اوس کیہڑی مَوت نال مرنا سی۔ ایس گلّ اُتّے لوکاں اوہنوں جواب دِتّا پئی اساں شریعت وِچوں سُنیا پئی مسِیح سدا تِیکر رہے گا۔ تے تُوں کِیویں آکھناں ایں پئی اِبنِ آدم دا اُچّا کِیتا جانا ضرُور اے؟ اوہ اِبنِ آدم کون اے؟ تَد یِسُوع اوہناں نُوں آکھیا۔ اجے تھوڑا چِر چانن تُہاڈے وِچ اے۔ جِنّاں چِر تُہاڈے وِچ چانن اے ٹُرو پِھرو اجیہا نا ہوئے پئی ہنیرا تُہانوں آگھیرے۔ تے ہنیرے وِچ ٹُرن والے نُوں پتا نئیں لگ دا پئی کِتّھے جاندا اے۔ جِنّاں چِر چانن تُہاڈے وِچ اے چانن نُوں مَنّو تاں جو تُسی چانن دے پُتر بن جاؤ۔ یِسُوع ایہہ گلّاں آکھیاں تے جا کے اوہناں کولوں چُھپ گیا۔ پر بھانویں اوس اینِیاں کراماتاں اوہناں دے سامھنے وکھائیاں سن تَد وی اوہ اوہدے اُتّے اِیمان نا لیائے۔ تاں جو یسعیاہ نبی دا کلام جیہڑا اوس آکھیا سی پُورا ہوئے پئی اَے خُداوند ساڈے سنیہے نُوں کِس مَنّیا۔ تے خُداوند دی بانہہ کِہدے اُتّے ظاہر ہوئی۔ اوہ ایس کر کے اِیمان نئیں لیا سکے کیوں جو یسعیاہ نیں فیر آکھیا۔ اوس اوہناں دِیاں اَکھّیاں اَنھیاں کِیتیاں نیں تے اوہناں دے دِل سخت کِیتے۔ کِتے ایویں نا ہوئے پئی اوہ اَکھّیاں نال ویکھن تے دِل نال سمجھن تے مُڑن تے مَیں اوہناں نُوں ولّ کراں۔ یسعیاہ ایہہ گلّاں آکھیاں کیوں جو اوس اوہدا جلال دیکھیا تے اوس اوہدیاں گلّاں کِیتیاں۔ تَد وی سرداراں وِچوں بتھیریاں نیں اوہدے اُتّے اِیمان لیاندا پر فرِیسیاں دے ڈر دے مارِیاں اِقرار نا کِیتا۔ اجیہا نا ہوئے۔ پئی جماعتوں کڈھے جان۔ کیوں جو اوہ بندیاں دی وڈیائی نُوں خُدا دی وڈیائی نالوں وَدّھ پیار کر دے سن۔ یِسُوع اُچّی اُچّی آکھیا پئی اوہ جیہڑا میرے اُتّے اِیمان لیاؤندا اے میرے اُتّے نئیں پر میرے گھلّن والے اُتّے اِیمان لیاؤندا اے۔ تے اوہ جیہڑا مَینُوں ویکھدا اے میرے گھلّن والے نُوں ویکھدا اے۔ مَیں دُنیا وِچ چانن ہو کے آیا آں تاں جو جیہڑا کوئی میرے اُتّے اِیمان لیاؤندا اے۔ ہنیرے وِچ نا رہے۔ تے جے کوئی میرِیاں گلّاں سُنے تے نا مَنّے مَیں اوہدی عدالت نئیں کر دا کیوں جو مَیں دُنیا دی عدالت کرن واسطے نئیں آیا پر دُنیا نُوں بچان دے واسطے۔ اوہ جیہڑا مَینُوں رَدّ کر کے میرِیاں گلّاں نُوں نئیں قبولدا اوہدا اِک عدالت کرن والا تے اے۔ کلام جیہڑا مَیں آکھیا۔ اوہ ای اوڑک دے دِن اوہدی عدالت کرے گا۔ کیوں جو مَیں اپنے ولّوں نئیں بولیا پر باپ جِس مَینُوں گھلّیا اوس مَینُوں حُکم دِتّا اے پئی مَیں کِیہ آکھاں تے کِیہ بولاں۔ تے مَیں جاننا آں پئی اوہدا حُکم سدا دی زِندگی اے۔ سو جو کُجھ مَیں بولنا آں جیویں باپ نیں مَینُوں آکھیا اے اوسے طرح بولنا آں۔ عِیدِ فسح توں پہلاں جد یِسُوع ایہہ جان لیا پئی میری گھڑی آ پجی اے پئی دُنیا توں باپ کول جاواں اوہ اوہناں اپنیاں لوکاں نُوں جیہڑے دُنیا وِچ سن جیویں پیار کر دا سی اخِیر تِیکر پیار کر دا رہیا۔ تے جد ابلیس شمعُون دے پُتر یہُوداہ اِسکریُوتی دے دِل وِچ ایہہ پایا سی پئی اوہ اوہنوں پھڑا دیوے۔ تے رات دی روٹی کھاندیاں ہویاں یِسُوع ایہہ جان کے پئی باپ نیں سبھ کُجھ میرے ہتّھ وِچ دِتّا تے مَیں خُدا ولّوں آیا تے خُدا کول جاناں آں۔ کھانے توں اُٹھیا تے اپنے کپڑے لاہے تَد رُومال لے کے لکّ نال بنھیا۔ تے فیر بھانڈے وِچ پانی پا کے شاگِرداں دے پَیر دھون لگّا۔ تے اوس رُومال نال جیہڑا لکّ دوالے بَدّھا ہویا سی پُونجھن لگّا۔ سو اوہ شمعُون پطرس تِیکر آیا۔ اوہ اوہنوں آکھن لگّا اَے خُداوند تُوں میرے پَیر دھونا ایں؟ یِسُوع اوہنوں جواب دِتّا۔ جو کُجھ مَیں کرنا آں اجے تُوں نئیں جان دا پر میرے مگروں تُوں سمجھیں گا پطرس اوہنوں آکھیا تُوں میرے پَیر کَدے نا دھوئیں گا۔ یِسُوع اوہنوں جواب دِتّا جے مَیں تینُوں نا دھوواں تاں میرے نال تیرا کوئی حِصّہ نئیں اے۔ شمعُون پطرس اوہنوں آکھیا اَے خُداوند تَد نِرے میرے پَیر ای نئیں پر ہتّھ تے سِر وی دھو دے۔ یِسُوع اوہنوں آکھیا اوہ جِس نہا لیا اے اوہنوں بِناں پَیر دھون دے ہور کُجھ لوڑ نئیں۔ پر بالکل پاک اے۔ تے تُسی صاف ہو پر سارے نئیں۔ کیوں جو اوہ اپنے پھڑاں والے نُوں جان دا سی۔ تَدے اوس آکھیا پئی تُسی سارے پاک نئیں ہو۔ سو جد اوس اوہناں دے پَیر دھو لَئے تے اپنے کپڑے پا لَئے تَد فیر بَیہہ کے اوہناں نُوں آکھن لگّا۔ تُسی سمجھدے ہو پئی مَیں تُہاڈے نال کِیہ کِیتا اے؟ تُسی مَینُوں اُستاد تے خُداوند آکھدے ہو۔ چَنگا آکھدے ہو۔ کیوں جو مَیں آں وی۔ سو جد مَیں خُداوند تے اُستاد ہو کے تُہاڈے پَیر دھوتے نیں۔ تے تُہانوں وی چاہیدا اے پئی اِک دُوجے دے پَیر دھوؤ۔ کیوں جو مَیں تُہانوں نمونہ دِتّا اے پئی جیویں مَیں تُہاڈے نال کِیتا تُسی وی کریا کرو۔ مَیں تُہانوں سَچ سَچ آکھنا آں پئی نوکر اپنے مالک نالوں وَڈا نئیں اے تے نا گھلّیا ہویا اپنے گھلّن والے نالوں۔ جے تسِیں ایہہ گلّاں جان دے ہو تے اوہناں اُتّے چلدے ہو تاں مُبارک اوہ۔ مَیں تُہاڈی سبھناں دی گلّ نئیں کر دا جِنہاں نُوں مَیں چُنیا اے۔ اوہناں نُوں مَیں جاننا آں۔ پر ایہہ ایس لئی اے پئی پہلوں توں لِکھیا پُورا ہوئے پئی جیہڑا میری روٹی کھاندا اے اوس مَینُوں لَت ماری۔ ہُن اوس گلّ دے ہون توں پہلاں مَیں تُہانوں خبر دینا آں تاں جو جد ہوئے۔ تُسی مَنّوں پئی مَیں اوہ ای آں۔ مَیں تُہانوں سَچ سَچ آکھنا آں جے کوئی میرے گھلّے ہوئے نُوں قبول کرے مَینُوں قبول کر دا اے تے اوہ جیہڑا مَینُوں قبول کر دا اے میرے گھلّن والے نُوں قبول کر دا اے۔ ایہہ آکھدیاں ای یِسُوع دا جی گھبرایا تے ایہہ گواہی دِتّی۔ مَیں تُہانوں سَچ سَچ آکھنا آں پئی تُہاڈے وِچوں اِک مَینُوں پھڑوائے گا۔ شاگِرد ایس شُبے وِچ ہو کے پئی اوہ کدی گلّ کر دا اے اِک دُوجے ولّ ویکھن لگّے۔ اوہدے شاگِرداں وِچوں اِک جِہنُوں یِسُوع پیار کر دا سی۔ کھانا کھاندیاں یِسُوع دی ہِک ولّ سِر جُھکایا ہویا سی۔ ایس لئی شمعُون پطرس اوہنوں سینت ماری پئی سانُوں دس اوہ کِہدی گلّ کر دا اے۔ اوس یِسُوع دی ہِک دا اُنجے ڈھاسنا لاکے اوہنوں آکھیا اَے خُداوند اوہ کون اے؟ سو یِسُوع جواب دِتّا اوہ اوہی اے جِہنُوں مَیں بُرکی بھیوں کے دیاں گا۔ تَد بُرکی نُوں بھیوں کے اوس شمعُون اِسکریُوتی دے پُتر یہُوداہ نُوں دِتّی۔ تے بُرکی لین دے پِچّھوں اوسے ویلے شیطان اوہدے اندر وڑ گیا۔ تَد یِسُوع اوہنوں آکھیا جو کُجھ تُوں کرنا اے سو چھیتی کر۔ پر کھانے اُتّے بیہن والیاں وِچوں کوئی نئیں سی جان دا پئی اوس ایہہ کاہدے لئی اوہنوں آکھیا۔ کئیاں سمجھیا پئی ایس کر کے پئی یہُوداہ کول بٹوا اے یِسُوع اوہنوں آکھیا ہوئے گا پئی جو کُجھ سانُوں عید لئی چاہیدا اے سو مُل لَئے۔ یاں ایہہ پئی غرِیباں نُوں کُجھ دیوے۔ سو اوہ بُرکی لے کے جھٹ باہر نِکل گیا۔ تے اوہ رات دا ویلا سی۔ جد اوہ باہر نِکل گیا تَد یِسُوع آکھن لگّا پئی ہُن اِبنِ آدم نُوں جلال مِلیا اے تے خُدا نُوں اوہدے وِچ جلال مِلیا اے۔ تے خُدا اوہنوں وی اپنے وِچ جلال دیوے گا۔ تے چھیتی اوہنوں جلال دیوے گا۔ اَے بچّیو اجے تھوڑا چِر مَیں تُہاڈے نال آں۔ تُسی مَینُوں لَبّھو گے تے جیویں مَیں یہُودِیاں نُوں آکھیا سی پئی جِتّھے مَیں جاناں آں تُسی نئیں آسکدے ہُن تُہانوں وی آکھنا آں۔ مَیں تُہانوں اِک نواں حُکم دینا آں پئی تُسی اِک دُوجے نُوں پیار کرو۔ جیویں مَیں تُہانوں پیار کِیتا۔ ایس گلّوں سارے جانن گے پئی تُسی میرے شاگِرد ہو جے آپو وِچ پیار رکھو۔ شمعُون پطرس اوہنوں آکھیا اَے خُداوند تُوں کِتّھے جاناں ایں؟ یِسُوع جواب دِتّا پئی جِتّھے مَیں جاناں آں تُوں ہُن میرے مگر نئیں آسکدا پر پِچّھوں تُوں میرے مگر آویں گا۔ پطرس اوہنوں آکھیا اے خُداوند مَیں ہُنے تیرے مگر کیوں نئیں آسکدا؟ مَیں تے تیرے بدلے اپنی جان دیاں گا۔ یِسُوع جواب دِتّا تُوں اپنی جان میرے بدلے دیں گا؟ مَیں تینُوں سَچ سَچ آکھنا آں پئی کُکّڑ بانگ نا دے گا جد تِیکر تُوں تَرے واری میرا اِنکار نا کریں۔ تُہاڈا دِل نا گھبرائے۔ تُسی خُدا اُتّے یقِین کر دے ہو میرے اُتّے وی یقِین کرو۔ میرے باپ دے گھر وِچ بتھیرے مکان نیں جے ناں ہوندے تے مَیں تُہانوں آکھ دیندا کیوں جو مَیں تُہاڈے لئی تھاں تیار کرن جاناں آں۔ تے جے مَیں جا کے تُہاڈے لئی تھاں تیار کراں مَیں مُڑ آ کے تُہانوں اپنے نال لے لاں گا پئی جِتّھے مَیں آں تُسی وی ہوؤ۔ تے جِتّھے مَیں جاناں آں تُہانوں راہ معلُوم اے۔ تُوما اوہنوں آکھیا اَے خُداوند سانُوں معلُوم نئیں پئی تُوں کِتّھے جاناں ایں۔ سانُوں راہ کِیویں معلُوم ہوئے۔ یِسُوع اوہنوں آکھیا مَیں ای راہ تے سچیائی تے زِندگی آں۔ میرے بِناں کوئی باپ دے کول نئیں آؤندا۔ جے تُسی مَینُوں جان دے تے میرے باپ نُوں وی جان دے۔ تے ہُن توں تُسی اوہنوں جان دے ہو۔ تے اوہنوں ویکھ لیا اے۔ فِلپُّس اوہنوں آکھیا اَے خُداوند سانُوں باپ وکھا تے سانُوں ایہو ای بس اے۔ یِسُوع اوہنوں آکھیا اَے فِلپُّس مَیں اینے چِر دا تُہاڈے نال آں تے تُوں مَینُوں نئیں جان دا؟ جِس مَینُوں ویکھیا اے اوس باپ نُوں ویکھ لیا اے۔ تے تُوں کِیویں آکھنا ایں پئی باپ سانُوں وکھال؟ تُوں سَچ نئیں مَن دا پئی مَیں باپ وِچ آں تے باپ میرے وِچ اے؟ جیہڑیاں گلّاں مَیں تُہانوں آکھنا آں مَیں اپنے ولّوں نئیں آکھدا۔ پر باپ میرے وِچ رہ کے اپنے کمّ کر دا اے۔ مَینُوں مَنّو پئی مَیں باپ وِچ آں تے باپ میرے وِچ اے۔ جے ایویں نئیں تے اوہناں کمّاں دے سبّب ای مَینُوں مَنّو۔ مَیں تُہانوں سَچ سَچ آکھنا آں پئی اوہ جیہڑا میرے اُتّے اِیمان لیاؤندا اے جیہڑے کمّ مَیں کرنا آں اوہ وی کرے گا۔ تے ایہناں نالوں وی وڈّے کرے گا کیوں جو مَیں باپ کول جاناں آں۔ تاں جو کُجھ تُسی میرا ناں لے کے منگو گے مَیں اوہ کراں گا تاں جو پُتر وِچ باپ نُوں جلال مِلے۔ جے تُسی میرا ناں لے کے میرے کولوں کُجھ منگو گے مَیں اوہ کراں گا۔ جے تُسی مَینُوں پیار کر دے ہو تاں میرے حُکماں نُوں مَنّو گے۔ تے مَیں باپ کول عرض کراں گا تے اوہ تُہانوں دُوجا مددگار بخشے گا پئی اوہ سدا تُہاڈے نال ہوئے۔ یعنی سچیائی دا رُوح جِہنُوں دُنیا نئیں پا سکدی کیوں جو اوہ نا اوہنوں ویکھدی اے تے نا اوہنوں جاندی اے۔ تُسی اوہنوں جان دے ہو کیوں جو اوہ تُہاڈے نال رہندا اے تے تُہاڈے وِچ ہوئے گا۔ مَیں تُہانوں یتِیم نا چھڈاں گا۔ مَیں تُہاڈے کول آواں گا۔ اجے تھوڑا چِر اے تے دُنیا مَینُوں فیر نا ویکھے گی پر تُسی ویکھدے رہو گے ایس کر کے پئی مَیں جِیونا آں تُسی وی جیوگے۔ اوس دِن تُسی جانو گے پئی مَیں اپنے باپ وِچ آں تے تُسی میرے وِچ تے مَیں تُہاڈے وِچ۔ جِہدے کول میرے حُکم نیں تے اوہ اوہناں نُوں مَندا اے اوہ ای اے جیہڑا مَینُوں پیار کر دا اے تے جیہڑا مَینُوں پیار کر دا اے میرے باپ دا پیارا ہوئے گا تے مَیں اوہنوں پیار کراں گا۔ تے اپنے آپ نُوں اوہدے اُتّے ظاہر کراں گا۔ اوس یہُوداہ نیں جیہڑا اِسکریُوتی نئیں سی اوہنوں آکھیا اَے خُداوند ایہہ کِیہ ہویا اے پئی تُوں اپنا آپ ساڈے اُتّے ظاہر کریں گا تے دُنیا اُتّے نئیں۔ یِسُوع اوہنوں جواب دِتّا جے کوئی مَینُوں پیار کر دا اے اوہ میرے کلام نُوں مَنّے گا۔ تے میرا باپ اوہنوں پیار کرے گا۔ تے اسی اوہدے کول آواں گے تے اوہدے نال رہاں گے۔ اوہ جیہڑا مَینُوں پیار نئیں کر دا اوہ میرے کلام نُوں نئیں مَن دا۔ تے جیہڑا کلام تُسی سُندے ہو میرا نئیں پر باپ دا اے جِس مَینُوں گھلّیا۔ ایہہ گلّاں مَیں تُہاڈے نال رہندیاں تُہانوں آکھیاں نیں۔ پر مددگار جیہڑا پاک رُوح اے جِہنُوں باپ میرے ناں اُتّے گھلّے گا اوہو تُہانوں سبھ کُجھ سکھالے گا۔ تے جو کُجھ مَیں تُہانوں آکھیا اے تُہانوں یاد کرا دے گا۔ سُکھ مَیں تُہانوں دیئی جاناں آں۔ اپنا سُکھ مَیں تُہانوں دینا آں۔ جیویں دُنیا دیندی اے اوس طرح تُہانوں نئیں دیندا۔ تُہاڈا دِل نا گھبرائے تے نا ڈرے۔ تُساں سُن لیا اے پئی مَیں تُہانوں آکھیا پئی مَیں جاناں تے تُہاڈے کول فیر آؤناں آں۔ جے تُسی مَینُوں پیار کر دے تے خُوش ہوندے پئی مَیں باپ کول جاناں آں کیوں جو باپ مَیتھوں وَڈا اے۔ تے ہُن مَیں تُہانوں اوہدے ہون توں پہلاں ای دس چھڈیا اے تاں جو جد اوہ ہو لَوے تُسی اِیمان لیاؤ۔ ایدوں پِچّھوں مَیں تُہاڈے نال بُہت گلّاں نا کراں گا کیوں جو دُنیا دا سردار آؤندا اے تے میرے وِچ اوہدا کُجھ نئیں اے۔ ایہہ ایس لئی ہوندا اے۔ تاں جو دُنیا جانے پئی مَیں باپ نُوں پیار کرنا آں تے جیویں باپ نے مَینُوں حُکم دِتّا اوسے طرح مَیں کرنا آں۔ اُٹھو ایتھوں چلّئے۔ انگور دا سُچّا بُوٹا مَیں آں۔ تے میرا باپ مالی اے۔ جیہڑی ٹہنی میرے وِچ ہو کے پَھل نئیں لیاؤندی اوہنوں اوہ وَڈّھ دیندا اے۔ تے جیہڑی پَھل لیاؤندی اے اوہنوں اوہ صاف کر دا اے۔ تاں جو اوہ ہور وی پَھل لیاوے۔ ہُن اوس گلّ دے سبّب جیہڑی مَیں تُہانوں آکھی اے تُسی پاک اوہ۔ تُسی میرے وِچ رہو تے مَیں تُہاڈے وِچ۔ جیویں ٹہنی جِنّاں چِر انگور دے بُوٹے وِچ نا رہے۔ آپے پَھل نئیں لیا سکدی ایسے طرح تُسی پَھل نئیں لیا سکدے۔ جِنّاں چِر میرے وِچ نا رہو۔ مَیں انگور دا بُوٹا آں تے تُسی ٹہنِیاں ہو۔ اوہ جیہڑا میرے وِچ رہندا تے مَیں اوہدے وِچ۔ اوہو بُہت پَھل لیاؤندا اے۔ کیوں جو مَیتھوں وَکھ ہو کے تُسی کُجھ نئیں کر سکدے۔ جے کوئی میرے وِچ نا رہے اوہ ٹہنی وانگُوں باہر سُٹّیا جاندا تے سُک جاندا اے تے لوک اوہناں نُوں اکٹّھیاں کر کے اَگ وِچ سُٹ دیندے نیں تے اوہ بل جاندِیاں نیں۔ جے تُسی میرے وِچ رہو تے میرِیاں گلّاں تُہاڈے وِچ رہن۔ تاں جو چاہو منگو تے اوہ تُہاڈے لئی ہوئے گا۔ میرے باپ دا جلال ایہدے وِچ اے پئی تُسی بُہت پَھل لیاؤ تَد ای میرے شاگِرد ہوؤگے۔ جیویں باپ مَینُوں پیار کِیتا اوسے طرح مَیں وی تُہانوں کِیتا۔ تُسی میرے پیار وِچ رہو۔ جے میرے حُکماں نُوں مَنّو تے میرے پیار وِچ رہو گے۔ جیویں مَیں اپنے باپ دے حُکماں نُوں مَنّیا اے تے اوہدے پیار وِچ رہنا آں۔ ایہہ گلّاں مَیں تُہانوں آکھیاں نیں تاں جو میری خُوشی تُہاڈے وِچ رہے۔ تے تُہاڈی خُوشی پُوری ہو جاوے۔ میرا حُکم ایہہ اے پئی تُسی اِک دُوجے نُوں پیار کرو۔ جیویں مَیں تُہانوں پیار کِیتا کوئی بندہ ایہدے توں وَدّھ پیار نئیں کر دا پئی اپنے دوستاں لئی اپنی جان دیوے۔ تُسی تَد ای میرے دوست ہو۔ جے میرے حُکماں نُوں پُوریاں کرو۔ ایدوں اگّے مَیں تُہانوں نوکر نئیں آکھاں گا کیوں جو نوکر نئیں جان دا پئی اوہدا مالک کِیہ کر دا اے۔ پر مَیں تُہانوں دوست آکھیا اے۔ کیوں جو ساریاں گلّاں جیہڑیاں مَیں اپنے باپ کولوں سُنیاں نیں تُہانوں دسیاں۔ تُساں مَینُوں نئیں چُنیا پر مَیں تُہانوں چُنیا تے تُہانوں مُقرّر کِیتا۔ پئی تُسی جاؤ تے پَھل لیاؤ تے تُہاڈا پَھل قیم رہے تاں جو تُسی باپ کولوں میرے ناں اُتّے جو کُجھ منگو گے اوہ تُہانوں دیوے۔ ایہناں گلّاں دا مَیں تُہانوں ایس واسطے حُکم دینا آں پئی تُسی اِک دُوجے نُوں پیار کرو۔ جے دُنیا تُہاڈے نال وَیر رکھدی اے تُسی جان دے ہو پئی اوس تُہاتھوں پہلاں میرے نال وَیر کِیتا اے۔ جے تُسی دُنیا دے ہوندے تے دُنیا اپنیاں نُوں پیار کر دی۔ پر تُسی دُنیا دے جو نئیں ہو ایس لئی پئی مَیں تُہانوں دُنیا وِچوں چُنیا دُنیا تُہاڈے نال وَیر رکھدی اے۔ اوہ گلّ یاد کرو جیہڑی مَیں تُہانوں آکھی پئی نوکر اپنے مالک نالوں وَڈا نئیں۔ جے اوہناں مَینُوں ستایا تے تُہانوں وی ستاؤن گے۔ جے اوہناں میرے کلام نُوں مَنّیاں تے تُہاڈے کلام نُوں وی مَنّن گے۔ پر ایہہ سبھ کُجھ میرے ناں کر کے تُہاڈے نال کرن گے ایس لئی پئی اوہ اوہنوں نئیں جان دے جِس مَینُوں گھلّیا اے۔ جے مَیں نا آیا ہوندا تے اوہناں نُوں نا دِسدا تَد اوہناں دا گُناہ نا ہوندا۔ پر ہُن تے اوہناں کول اوہناں دے گُناہ دا کُجھ عُذر نئیں۔ جیہڑا میرے نال وَیر رکھدا اے میرے باپ نال وی وَیر رکھدا اے۔ جے مَیں اوہناں وِچ اوہ کمّ جیہڑے کِسے دُوجے نیں نئیں کِیتے نا کر دا تے اوہناں دا گُناہ نا ہوندا پر ہُن تے اوہناں مَینُوں تے میرے باپ نُوں دوہاں نُوں ویکھیا تے ساڈے نال وَیر وی کِیتا اے۔ پر ایہہ ایس کر کے ہویا پئی اوہ گلّ جیہڑی اوہناں دی شریعت وِچ لِکھی ہوئی اے پُوری ہوئے پئی اوہناں ایویں میرے نال وَیر رکھیا۔ پر جدوں اوہ مددگار آوے گا جِہنُوں مَیں باپ ولّوں تُہاڈے کول گھلاں گا۔ یعنی سچیائی دا رُوح جیہڑا باپ ولّوں نِکلدا اے تے اوہ میری بابت گواہی دے گا۔ تے تُسی وی گواہ ہو کیوں جو تُسی مُڈھوں میرے نال ہو۔ ایہہ گلّاں مَیں تُہانوں آکھیاں نیں تاں جو تُسی ٹھوکر نا کھاؤ۔ لوک تُہانوں جماعتوں کڈھ دین گے تے اوہ گھڑی آؤندی اے پئی جیویں کوئی تُہاڈا خُون کرے اوہ ایہہ سمجھے گا پئی مَیں خُدا دی خِدمت کرنا آں۔ اوہ ایس واسطے ایہہ کرن گے کیوں جو نا اوہناں باپ نُوں جانیا اے نا مَینُوں۔ پر ایہہ گلّاں مَیں تُہانوں آکھیاں نیں پئی جد اوہناں دی گھڑی آوے تَد اوہناں نُوں یاد کرو پئی مَیں تُہانوں آکھیاں سن۔ تے ایہہ گلّاں مَیں شُروع توں تُہانوں نئیں دسیاں کیوں جو مَیں تُہاڈے نال ساں۔ تے ہُن مَیں اوہدے کول جاناں آں جِس مَینُوں گھلّیا سی۔ تَد وی تُہاڈے وِچوں کوئی نئیں پُچھدا پئی تُوں کِتّھے جاناں ایں۔ پر ایس کر کے پئی مَیں ایہہ گلّاں تُہانوں آکھیاں نیں تُہاڈا دِل غم نال بھر گیا اے۔ تَد وی مَیں تُہانوں ٹھیک آکھنا آں پئی میرا ٹُر جانا تُہاڈے واسطے چَنگا اے کیوں جو جے مَیں نا جاواں تے مددگار تُہاڈے کول نئیں آوے گا۔ پر جے مَیں جاواں تے اوہنوں تُہاڈے کول گھلاں گا۔ تے اوہ آ کے دُنیا نُوں گُناہ تے نیکی تے عدالت دی بابت قصوروار بنائے گا۔ گُناہ دی بابت ایس لئی پئی اوہ میرے اُتّے اِیمان نئیں لیاؤندے۔ نیکی دی بابت ایس لئی پئی مَیں باپ کول جاناں آں تے تُسی مَینُوں فیر نا ویکھو گے۔ عدالت دی بابت ایس لئی پئی دُنیا دا سردار مُجرم کِیتا گیا۔ مَیں اجے بُہت سارِیاں گلّاں تُہانوں آکھنیاں نیں پر تُسی اوہناں نُوں ہُن نئیں سہہ سکدے۔ پر جد اوہ آوے گا جیہڑا سچیائی دا رُوح اے تَد اوہ تُہانوں ساری سچیائی دے راہ پائے گا کیوں جو اوہ اپنے ولّوں نئیں آکھے گا۔ پر جو کُجھ سُنے گا سو ای آکھے گا تے آؤن والِیاں گلّاں دی خبر تُہانوں دے گا۔ اوہ میرا جلال ظاہر کرے گا۔ ایس لئی پئی اوہ میرِیاں شیواں وِچوں لَئے گا تے تُہانوں خبر دے گا۔ سارِیاں شیواں جیہڑیاں باپ دِیاں نیں میرِیاں نیں۔ تَدے مَیں آکھیا پئی اوہ میرِیاں شیواں وِچوں لَیندا اے تے تُہانوں خبر دے گا۔ تھوڑے چِر نُوں تُسی مَینُوں فیر نا ویکھو گے تے فیر تھوڑے چِر نُوں مَینُوں ویکھو گے۔ تَد شاگِرداں وِچوں کئیاں اِک دُوجے نُوں آکھیا ایہہ کِیہ اے جو اوہ سانُوں آکھدا اے۔ تھوڑے چِر نُوں تُسی مَینُوں نا ویکھو گے تے فیر تھوڑے چِر نُوں مَینُوں تُسی ویکھو گے ایہہ گلّ وی۔ کیوں جو مَیں باپ کول جاناں آں۔ ایس لئی اوہناں آکھیا ایہہ کِیہ اے جو اوہ آکھدا اے۔ تھوڑا چِر؟ اسی نئیں سمجھدے پئی اوہ کِیہ آکھدا اے۔ یِسُوع جان گیا پئی اوہ مَیتھوں پُچھنا چاہندے نیں۔ تَد اوہناں نُوں آکھیا تُسی کِیہ آپو وِچ ایہدی بابت پُچھدے ہو پئی مَیں آکھیا تھوڑے چِر نُوں تُسی مَینُوں فیر نا ویکھو گے تے فیر تھوڑے چِر نُوں تُسی مَینُوں ویکھو گے؟ مَیں تُہانوں سَچ سَچ آکھنا آں تُسی روؤ گے تے کرلاؤ گے۔ پر دُنیا خُوشی کرے گی۔ تُسی غم کرو گے پر تُہاڈا غم خُوشی بن جائے گا۔ زنانی جد بچّہ جمّن لگدی اے غم کر دی اے کیوں جو اوہدی گھڑی آ پہنچی اے۔ پر جد بچّہ جَم پیا اوہ اپنے دُکھ نُوں مُڑ یاد نئیں کر دی۔ ایس خُوشی دی ماری پئی دُنیا وِچ اِک بندہ جمّیا اے۔ سو ہُن تے تُہانوں غم اے پر مَیں تُہانوں فیر ویکھیاں گا تے تُہاڈا دِل خُوشی کرے گا تے تُہاڈی خُوشی تُہاتھوں کوئی کھو نئیں لَیندا۔ تے اوس دِن تُسی مَیتھوں کُجھ نا پُچھو گے۔ مَیں تُہانوں سَچ سَچ آکھنا آں جے تُسی باپ کولوں کُجھ منگو گے تے اوہ میرے ناں اُتّے تُہانوں دیوے گا۔ اجے تِیکر تُساں میرے ناں اُتّے کُجھ نئیں منگیا۔ منگو تے تُہانوں مِلے گا تاں جو تُہاڈی خُوشی پُوری ہو جاوے۔ ایہہ گلّاں مَیں تُہانوں تمثِیلاں وِچ آکھیاں نیں۔ اوہ گھڑی آؤندی اے جد مَیں تُہاڈے نال تمثِیلاں وِچ نئیں بولاں گا پر صاف صاف تُہانوں باپ دی خبر دیاں گا۔ اوس دِن تُسی میرے ناں اُتّے منگو گے تے مَیں تُہانوں ایہہ نئیں آکھدا پئی باپ کول تُہاڈے لئی عرض کراں گا۔ کیوں جو باپ آپ ای تُہانوں پیار کر دا اے ایس لئی پئی تُساں مَینُوں پیار کِیتا اے تے اِیمان لیاؤندا اے پئی مَیں باپ کولوں نِکلیا آں۔ مَیں باپ وِچوں نِکلیا تے دُنیا وِچ آیا آں۔ فیر دُنیا توں وِداع ہو کے باپ کول جاناں آں۔ اوہدے شاگِرد آکھن لگّے لو ہُن تے تُوں صاف صاف آکھنا ایں تے کوئی تمثِیل نئیں دیندا۔ ہُن اسی جاننے آں پئی تُوں سبھ کُجھ جاننا ایں تے تینُوں لوڑ نئیں پئی کوئی تَیتھوں پُچھے۔ ایس گلّ توں سانُوں یقِین آؤندا اے پئی تُوں خُدا توں نِکلیا ایں۔ یِسُوع اوہناں نُوں جواب دِتّا ہُن تُہانوں یقِین آؤندا اے؟ ویکھو اوہ گھڑی آؤندی اے۔ سگوں آگئی اے پئی تُسی ہر اِک آپو اپنی تھائِیں کھِلرپُلر جاؤ گے تے مَینُوں اکلّیاں چھڈ جاؤ گے تَد وی مَیں اکلّا نئیں کیوں جو باپ میرے نال اے۔ ایہہ گلّاں مَیں تُہانوں آکھیاں نیں تاں جو تُہانوں میرے وِچ سُکھ مِلے۔ دُنیا وِچ تُہانوں دُکھ اے پر تگڑے رہو کیوں جو مَیں دُنیا نُوں جِت لیا اے۔ یِسُوع ایہہ گلّاں آکھیاں تے اَکھّیاں اسمان ولّ کر کے آکھیا اَے باپ گھڑی آگئی اے۔ اپنے پُتر نُوں جلال دے تاں جو پُتر تینُوں جلال دیوے۔ جیویں تُوں اوہنوں کُل اِنسان اُتّے اختیار دِتّا اے پئی جیہڑے تُوں اوہنوں دِتّے نیں اوہ اوہناں سبھناں نُوں سدا دی زِندگی دیوے۔ تے سدا دی زِندگی ایہہ اے پئی اوہ تینُوں جانن جیہڑا اکلّا سَچّا خُدا ایں تے نالے یِسُوع مسِیح نُوں جِہنُوں تُوں گھلّیا اے۔ مَیں اوس کمّ نُوں جیہڑا تُوں مَینُوں کرن نُوں دِتّا سی پُورا کر کے زمین اُتّے تیرا جلال ظاہر کِیتا۔ تے ہُن اَے باپ تُوں مَینُوں اپنے نال جلال دے اوسے جلال نال جیہڑا مَیں دُنیا دے ہون توں پہلاں ای تیرے نال رکھدا ساں۔ مَیں تیرے ناں نُوں اوہناں بندیاں اُتّے ظاہر کِیتا اے جیہڑے تُوں مَینُوں دُنیا وِچوں دِتّے۔ اوہ تے تیرے سن تے تُوں مَینُوں دِتّے نیں۔ تے اوہناں تیرا کلام مَن لیا اے۔ تے ہُن اوہناں جان لیا اے۔ پئی اوہ سارِیاں شیواں جیہڑیاں تُوں مَینُوں دِتّیاں نیں تیرے ولّوں نیں۔ ایس لئی پئی ایہہ کلام جیہڑا تُوں مَینُوں دِتّا مَیں اوہناں نُوں دِتّا اے۔ تے اوہناں قبول کِیتا تے سَچ مَنّیا پئی مَیں تیرے ولّوں نِکلیا۔ تے اِیمان لیاندا پئی تُوں مَینُوں گھلّیا۔ مَیں اوہناں لئی درخواست کرنا آں مَیں دُنیا لئی درخواست نئیں کر دا پر اوہناں لئی جیہڑے تُوں مَینُوں دِتّے نیں کیوں جو اوہ تیرے نیں۔ تے میرِیاں سارِیاں شیواں تیریاں نیں تے تیریاں میرِیاں نیں۔ تے اوہناں وِچ میرا جلال ظاہر ہویا اے۔ تے ہُن مَیں دُنیا وِچ ہور نئیں رہنا۔ تے ایہہ دُنیا وِچ نیں۔ تے مَیں تیرے کول آؤناں آں۔ اَے قُدُّوس باپ! تُوں اپنے اوس ناں دی راہِیں جیہڑا تُوں مَینُوں دِتّا اے اوہناں دی سنبھالنا کر تاں جو اوہ ساڈے وانگُوں اِک ہون۔ جد مَیں اوہناں دے نال ساں تیرے ناں دی راہِیں جیہڑا تُوں مَینُوں دِتّا اے اوہناں دی سنبھالنا کِیتی تے مَیں اوہناں دی راکھی کِیتی۔ تے ہلاکت دے پُتر دے باہجوں کِسے دا ناس نئیں ہویا تاں جو نوِشتہ پُورا ہوئے۔ پر ہُن مَیں تیرے کول آؤنا آں۔ تے ایہہ گلّاں مَیں ایس واسطے دُنیا وِچ آکھنا آں پئی میری خُوشی اوہناں وِچ پُوری ہو جاوے۔ مَیں اوہناں نُوں تیرا کلام دِتّا اے تے دُنیا اوہناں نال وَیر رکھیا کیوں جو اوہ دُنیا دے نئیں جیویں مَیں دُنیا دا نئیں آں۔ میری ایہہ درخواست نئیں اے پئی تُوں اوہناں نُوں دُنیا وِچوں چُک لَویں پر ایہہ پئی تُوں اوس شریر توں اوہناں دی راکھی کر۔ اوہ دُنیا دے نئیں جیویں مَیں وی دُنیا دا نئیں آں۔ اوہناں نُوں سچیائی دی راہِیں مُقدّس کر۔ تیرا کلام سچیائی اے۔ جیویں تُوں مَینُوں دُنیا وِچ گھلّیا۔ اوسے طرح مَیں وی اوہناں نُوں دُنیا وِچ گھلّیا۔ تے اوہناں دے سببّوں مَیں اپنے آپ نُوں مُقدّس کرنا آں تاں جو اوہ وی سچیائی دی راہِیں پاک ہون۔ مَیں نِرا ایہناں ای لئی درخواست نئیں کر دا پر اوہناں لئی وی جیہڑے اوہناں دے کلام دی راہِیں میرے اُتّے اِیمان لیاؤندے نیں۔ تاں جو سبھ اِک ہون پئی جیویں اَے باپ تُوں میرے وِچ تے مَیں تیرے وِچ آں اوہ وی ساڈے وِچ ہون تاں جو دُنیا اِیمان لیاوے پئی تُوں مَینُوں گھلّیا۔ تے مَیں اوہناں نُوں اوہ جلال دِتّا اے جیہڑا تُوں مَینُوں دِتّا اے۔ تاں جو اوہ اِک ہون جیویں اسی اِک آں۔ مَیں اوہناں وِچ تے تُوں میرے وِچ تاں جو کامِل ہو کے اِک ہو جان۔ تے دُنیا جانے پئی تُوں مَینُوں گھلّیا۔ تے جِس طرح تُوں مَینُوں پیار کِیتا اوسے طرح تُوں اوہناں نُوں وی پیار کِیتا۔ اَے باپ مَیں چاہناں آں پئی جِتّھے مَیں آں اوہ وی جیہڑے تُوں مَینُوں دِتّے نیں۔ میرے نال ہون۔ تاں جو اوہ میرا جلال جیہڑا تُوں مَینُوں دِتّا اے ویکھن کیوں جو تُوں دُنیا دے بنن توں پہلا ای مَینُوں پیار کِیتا۔ اے سَچّے مُنصف باپ دُنیا تینُوں نئیں جانیا پر مَیں تینُوں جانیا۔ تے اوہناں جانیا پئی تُوں مَینُوں گھلّیا۔ تے مَیں اوہناں نُوں تیرے ناں توں واقف کرایا تے کر لواں گا وی۔ تاں جو اوہ پیار جِہدے نال توں مَینُوں پیار کِیتا اوہناں وِچ ہوئے تے مَیں اوہناں وِچ ہوواں۔ ایہہ گلّاں آکھ کے یِسُوع اپنے شاگِرداں نال قِدرون دے نالیوں پار گیا اوتھے اِک باغ سی جِہدے وِچ اوہ تے اوہدے شاگِرد جاوڑے۔ تے یہُوداہ اوہدے پھڑان والے نُوں ایہہ تھاں معلُوم سی کیوں جو یِسُوع اکثر اپنے شاگِرداں نال اوتھے بُہت جاندا ہوندا سی۔ سو یہُوداہ سپاہیاں دی پلٹن تے سردار کاہِناں نیں فرِیسیاں ولّوں پیادے لے کے لالٹیناں تے مسالاں تے ہتّھیاراں سَنے اوتھے آیا۔ تَد یِسُوع جو کُجھ اوہدے اُتّے ہوناں سی جان کے باہر نِکلیا تے اوہناں نُوں آکھیا تُسی کِنوں لبّھدے ہو؟ اوہناں اوہنوں جواب دِتّا۔ یِسُوع ناصری نُوں۔ یِسُوع اوہناں نُوں آکھیا اوہ مَیں ای آں۔ تے یہُوداہ وی جِس اوہنوں پھڑ وایا اوہناں دے نال کھلوتا ہویا سی۔ تے جد اوس آکھیا مَیں ای آں اوہ پِچھّاں ہَٹ کے زمین اُتّے ڈِگّ پئے۔ ایس لئی اوس اوہناں توں فیر پُچھیا تُسی کِنوں لبّھدے ہو؟ اوہناں آکھیا یِسُوع ناصری نُوں۔ یِسُوع جواب دِتّا مَیں جو تُہانوں آکھیا پئی اوہ مَیں ای آں۔ سو جے کر تُسی مَینُوں لبّھدے ہو تاں ایہناں نُوں جان دیو۔ تاں جو اوہ گلّ جیہڑی اوس آکھی سی پُوری ہوئے پئی جِنہاں نُوں تُوں مَینُوں دِتّا اے اوہناں وِچوں مَیں اِک وی نا گوایا۔ تَد شمعُون پطرس تلوار جیہڑی اوہدے کول سی کھِچّی تے سردار کاہِن دے نوکر اُتّے چلائی تے اوہدا سَجّا کنّ وَڈّھ سُٹّیا۔ اوس نوکر دا ناں ملخُس سی۔ تَد یِسُوع پطرس نُوں آکھیا تلوار نُوں میان کر۔ اوہ پیالہ جیہڑا باپ مَینُوں دِتّا اے کِیہ مَیں نا پئیاں؟ سپاہیاں دی پلٹن تے صُوبیدار تے یہُودِیاں دے پیادیاں رَل کے یِسُوع نُوں پھڑ لیا تے اوہنوں بَنّھ لیا۔ تے پہلاں اوہنوں حنّا کول لے گئے۔ کیوں جو اوہ کائفا دا سَوہرا سی جیہڑا اوس ورھے سردار کاہِن سی۔ تے کائفا اوہو سی جِہنے یہُودِیاں نُوں صلاح دِتّی پئی قوم دے بدلے اِک بندے دا مرنا چَنگا اے۔ تے شمعُون پطرس یِسُوع دے مگر ٹُر پیا تے دُوجا شاگِرد وی۔ تے اوہ شاگِرد سردار کاہِن دا واقف سی۔ تے اوہ یِسُوع دے نال ای سردار کاہِن دے ویہڑے دے اندر ٹُر گیا۔ پر پطرس باہر بُوہے کول کھلوتا رہیا۔ تَد دُوجا شاگِرد جیہڑا سردار کاہِن دا واقف سی باہر گیا تے دربانن نُوں آکھ کے پطرس نُوں اندر واڑ لیا۔ تَد اوہ ٹہلن جیہڑی دربانن سی پطرس نُوں آکھن لگّی تُوں وی ایس بندے دے شاگِرداں وِچوں ایں؟ اوس آکھیا مَیں نئیں آں۔ تے نوکر تے پیادے کولیاں دی اَگ بَھکھا کے پَے سیک دے سن کیوں جو پالا پَیندا سی۔ تے پطرس وی اوہناں دے نال کھلو کے پیا سیکدا سی۔ سو سردار کاہِن یِسُوع نُوں اوہدے شاگِرداں تے اوہدی تعلِیم دی بابت پُچھیا۔ یِسُوع اوہنوں جواب دِتّا پئی مَیں کُھلّم کُھلا دُنیا وِچ گلّاں کِیتیاں نیں تے ہمیش عبادت خانے تے ہیکل وِچ جِتّھے سارے یہُودی اکٹّھے ہوندے نیں مَیں تعلِیم دِتّی۔ تے چُھپا کے مَیں کُجھ نئیں آکھیا۔ تُوں مَیتھوں کیوں پُچھناں ایں؟ اوہناں سُنیا اے اوہناں کولوں پُچھ لے پئی مَیں اوہناں نُوں کِیہ آکھیا۔ ویکھ جو کُجھ مَیں آکھیا سو اوہ جان دے نیں۔ تے جد اوس ایہہ آکھیا پیادیاں وِچوں اِک نیں جیہڑا کول کھلوتا ہویا سی یِسُوع نُوں ایہہ آکھ کے دھپّا ماریا پئی سردار کاہِن نُوں تُوں ایس طرح جواب دینا ایں؟ یِسُوع اوہنوں جواب دِتّا جے مَیں بُرا آکھیا تے اوس بُریائی دی گواہی دے۔ پر جے چَنگا آکھیا تے تُوں مَینُوں کاہِنُوں مارنا ایں۔ تَد حنّا نے کائفا سردار کاہِن کول اوہنوں بَدّھیاں بَدّھایاں گھل دِتّا۔ تے شمعُون پطرس کھلو کے اَگ پیا سیکدا سی تَد اوہناں اوہنوں آکھیا تُوں وی اوہدے شاگِرداں وِچوں ایں؟ اوہ مُکّر پیا تے آکھیا مَیں نئیں آں۔ سردار کاہِن دے نَوکراں وِچوں اِک نیں جیہڑا اوہدا ساک سی جِہدا کنّ پطرس وَڈّھ سُٹّیا سی آکھیا مَیں تینُوں اوہدے نال باغ وِچ نئیں سی ویکھیا؟ تَد پطرس فیر مُکّر گیا تے جھٹ کُکّڑ نیں بانگ دِتّی۔ تَد اوہ یِسُوع نُوں کائفا کولوں کچہری وِچ لے گئے تے سویر دا ویلا سی۔ تے اوہ آپ کچہری دے اندر نا وڑے پئی کِتے پلِیت نا ہو جان پر فسح کھا سکن۔ سو پِیلاطُس اوہناں دے کول باہر نِکل آیا تے آکھن لگّا تُسی ایس بندے اُتّے کِیہ جُرم لاندے ہو؟ اوہناں اوہنوں جواب دِتّا جے ایہہ بدکار نا ہوندا تے اسی اوہنوں تیرے حوالے نا کر دے۔ سو پِیلاطُس اوہناں نُوں آکھیا تُسی اوہنوں لے جاؤ تے اپنی شریعت دے سببّوں اوہدا فیصلہ کرو۔ یہُودِیاں اوہنوں آکھیا پئی ساڈے واسطے روا نئیں پئی کِسے نُوں مار دئیے۔ تاں جو یِسُوع دی ایہہ گلّ جیہڑی اوس اِشارے نال آکھی سی پُوری ہوئے پئی مَیں کیہڑی مَوت نال مراں گا۔ تَد پِیلاطُس فیر کچہری دے اندر گیا تے یِسُوع نُوں سَدّ کے اوہنوں آکھیا تُوں ای یہُودِیاں دا بادشاہ ایں؟ یِسُوع اوہنوں جواب دِتّا تُوں اپنے ولّوں ایہہ گلّ آکھنا ایں۔ یا ہورناں تینُوں میرے ولّوں آکھیا اے؟ پِیلاطُس جواب دِتّا مَیں کوئی یہُودی آں؟ تیری ای قوم تے سردار کاہِناں تینُوں میرے حوالے کِیتا اے۔ تُوں کِیہ کِیتا اے؟ یِسُوع جواب دِتّا میرا راج ایس دُنیا دا نئیں اے جے میرا راج ایس دُنیا دا ہوندا تے میرے پیادے لڑائی کر دے تاں جو مَیں یہُودِیاں دے حوالے نا کِیتا جاندا۔ پر اجے تے میرا راج ایتھوں دا نئیں اے۔ تَد پِیلاطُس اوہنوں آکھیا۔ تے فیر تُوں بادشاہ ایں؟ یِسُوع جواب دِتّا تے آکھیا تُوں آپی آکھنا ایں پئی مَیں بادشاہ آں۔ مَیں ایس گلّ لئی جمّیا تے ایس گلّ لئی دُنیا وِچ آیا آں پئی مَیں سچیائی اُتّے گواہی دیاں۔ ہر اِک جیہڑا سچیائی دا اے میری اواز سُندا اے۔ پِیلاطُس اوہنوں آکھیا۔ سچیائی کِیہ ہوندی اے؟ تے آکھ کے اوہ فیر یہُودِیاں کول باہر گیا تے اوہناں نُوں آکھن لگّا مَینُوں اوہدے وِچ کُجھ جُرم نئیں لَبّھدا۔ پر تُہاڈی رِیت اے پئی مَیں عید فسح اُتّے تُہاڈے لئی کِسے اِک نُوں چھڈ دیاں سو تُسی چاہندے ہو پئی تُہاڈے لئی مَیں یہُودِیاں دے بادشاہ نُوں چھڈ دیاں؟ تَد اوہناں اُچّی اُچّی آکھیا پئی اوہنوں نئیں پر برابّا نُوں۔ تے برابّا اِک ڈاکُو سی۔ سو اوس ویلے پِیلاطُس یِسُوع نُوں لے کے کولڑے مروائے۔ تے سپاہیاں نیں کنڈیاں دا تاج بنا کے اوہدے سِر اُتّے رکھیا تے نالے اوہنوں قِرمزی چوغہ پایا۔ تے اوہدے کول آ کے آکھن لگّے اَے یہُودِیاں دے بادشاہ سلام۔ تے اوہنوں دَھپّے مارے۔ تَد پِیلاطُس فیر باہر جا کے اوہناں نُوں آکھیا ویکھو مَیں اوہنوں تُہاڈے کول لیاؤنا واں تاں جو تُہانوں معلُوم ہوئے پئی مَیں اوہدے وِچ کوئی جُرم نئیں ویکھدا۔ تَد یِسُوع کنڈیاں دا تاج تے قِرمزی چوغہ پایاں ہویاں باہر آیا۔ تے پِیلاطُس اوہناں نُوں آکھیا ویکھو ایس بندے نُوں۔ سو جد سردار کاہِناں تے پیادیاں اوہنوں ویکھیا اوہناں اُچّی اُچّی آکھیا۔ صلِیب دے صلِیب۔ پِیلاطُس اوہناں نُوں آکھیا تُسی آپے لوؤ تے اوہنوں صلِیب دیو۔ کیوں جو مَیں اوہدے وِچ کوئی جُرم نئیں ویکھدا۔ یہُودِیاں اوہنوں جواب دِتّا پئی اسی شریعت والے آں تے شریعت دے سببّوں اوہ قتل کرن دے لائق اے ایس لئی پئی ایس اپنے آپ نُوں خُدا دا پُتر بنایا۔ سو جد پِیلاطُس ایہہ گلّ سُنی تے ہور وی ڈر گیا۔ تے کچہری دے اندر فیر گیا تے یِسُوع نُوں آکھیا پئی تُوں کِتّھوں دا ایں؟ پر یِسُوع اوہنوں جواب نا دِتّا۔ پِیلاطُس اوہنوں آکھیا میرے نال تُوں نئیں بولدا؟ تُوں نئیں جان دا۔ پئی میرے وَس وِچ اے تینُوں چھڈنا تے میرے وَس وِچ اے تینُوں صلِیب دینا؟ یِسُوع اوہنوں جواب دِتّا پئی تیرا میرے اُتّے کُجھ وی وَس نا ہوندا جے تینُوں اُتّوں دِتّا نا جاندا۔ ایس لئی جِس مَینُوں تیرے حوالے کِیتا اوہدا وَدّھ گُناہ اے۔ ایس گلّے پِیلاطُس اوہنوں چھڈن دا موقع لَبّھیا۔ پر یہُودِیاں اُچّی اُچّی آکھیا پئی جے تُوں اوہنوں چھڈ دیں گا تے تُوں قَیصر دا دوست نئیں ایں۔ ہر اِک جیہڑا اپنے آپ نُوں بادشاہ بناندا اے قَیصر دے خلاف آکھدا اے۔ تَد پِیلاطُس ایہہ گلّاں سُن کے یِسُوع نُوں باہر لے آیا تے اِک تھاں جِہدا ناں چبُوترہ تے عِبرانی بولی وِچ گبّتا سی اے تخت اُتّے بَیہہ گیا۔ تے فسح دی تیاری سی تے چھیویں کُو گھڑی سی تے اوہ یہُودِیاں نُوں آکھن لگّا ویکھو اپنا بادشاہ۔ پر اوہ اُچّی اُچّی آکھن لگّے پئی لے جا لے جا اوہنوں صلِیب دے۔ پِیلاطُس اوہناں نُوں آکھیا مَیں تُہاڈے بادشاہ نُوں صلِیب دیاں؟ سردار کاہِناں جواب دِتّا قَیصر باہجوں ساڈا کوئی بادشاہ نئیں اے۔ تَد اوس اوہنوں صلِیب دین نُوں اوہناں دے حوالے کِیتا۔ تَد اوہ یِسُوع نُوں لے گئے۔ تے اوہ اپنی صلِیب چُک کے شہروں باہر اوس تھاں نُوں جِہنُوں کھوپڑی دی جگہ تے عِبرانی بولی وِچ گُلگُتا آکھدے نیں گیا۔ اوتھے اوہناں اوہنوں صلِیب دِتّا تے اوہدے نال ہور دو نُوں اِک نُوں اِک پاسے تے اِک نُوں دُوجے پاسے تے یِسُوع نُوں وِچکار۔ تے پِیلاطُس نیں اِک پٹّی وی لِکھ کے صلِیب اُتّے لَوا دِتّی۔ تے لِکھیا ہویا ایہہ سی یِسُوع ناصری یہُودِیاں دا بادشاہ۔ تے ایس پٹّی نُوں بُہت یہُودِیاں نیں پڑھیا کیوں جو اوہ تھاں جِتّھے یِسُوع صلِیب دِتّا گیا سی شہر دے نیڑے سی۔ تے اوہ عِبرانی تے لاطینی تے یُونانی بولی وِچ لِکھیا ہویا سی۔ تَد یہُودِیاں دے سردار کاہِناں پِیلاطُس نُوں آکھیا یہُودِیاں دا بادشاہ نا لِکھ پر ایہہ پئی اوس آپی آکھیا پئی مَیں یہُودِیاں دا بادشاہ آں۔ پِیلاطُس جواب دِتّا پئی جو مَیں لِکھیا سو لِکھ چھڈیا۔ تَد سپاہیاں جد یِسُوع نُوں صلِیب دے دِتّا اوہدے کپڑے لے کے چار حِصّے کِیتے اِک اِک واسطے اِک اِک حِصّہ۔ تے اوہدا کُڑتا وی لیا۔ تے اوہ کُڑتا اَن سِتیا سارا اُنیا ہویا سی۔ تَد اوہناں اِک دُوجے نُوں آکھیا اوہنوں پاڑیئے نا پر اوہدے اُتّے گُنے پائیے پئی کِہدا ہوئے تاں جو اوہ نوِشتہ پُورا ہوئے جیہڑا آکھیا گیا سی۔ پئی اوہناں میرے کپڑے ونڈ لَئے تے میری پوشاک اُتّے قُرعہ پائے۔ سو ایہہ گلّاں سپاہیاں کِیتیاں۔ پر یِسُوع دی صلِیب کول اوہدی ماں تے اوہدی ماسی کلوپاس دی بیوی مریم تے مریم مگدلِینی کھلوتیاں ہویاں سن۔ سو یِسُوع اپنی ماں نُوں تے نالے اوس شاگِرد نُوں جِہنُوں پیار کر دا سی کول کھلوتا ہویا ویکھ کے اپنی ماں نُوں آکھیا بی بی ایہہ تیرا پُتر اے۔ فیر شاگِرد نُوں آکھیا پئی ویکھ ایہہ تیری ماں۔ تے اوسے گھڑی اوہ شاگِرد اوہنوں اپنے گھر لے گیا۔ اوہدے پِچّھوں یِسُوع ایہہ جان کے پئی ہُن سبھ کُجھ پُورا ہوگیا اے تاں جو نوِشتہ وی پُورا ہوئے۔ آکھیا مَیں تریہایا آں۔ اوتھے اِک سر کے دا بھریا ہویا بھانڈا رکھیا ہویا سی۔ سو اوہناں سپنج نُوں سر کے نال بھیوں کے تے زُوفے دی لکڑی اُتّے رکھ کے اوہدے مُنھ نال لایا۔ جد یِسُوع سِرکہ چَکھّیا تے آکھیا پُورا ہویا۔ تے سِر جُھکا کے جان دے دِتّی۔ تَد ایس لئی پئی تیاری دا دِن سی۔ یہُودِیاں پِیلاطُس اگّے عرض کِیتی پئی اوہناں دِیاں لتّاں بھنِّیاں جان تے اوہ لا اے جان تاں جو سبت دے دِن صلِیب اُتّے لوتھاں نا رہن کیوں جو اوہ سبت دا دِن وَڈا دِن سی۔ تَد سپاہیاں آ کے پہلے دِیاں لتّاں بھنِّیاں تے دُوجے دِیاں وی جیہڑا اوہدے نال صلِیب دِتّا گیا سی پر یِسُوع دے کول آ کے جد ویکھیا پئی اوہ مر گیا اے۔ تے اوہدیاں لتّاں نا بھنِّیاں۔ تَد وی سپاہیاں وِچوں اِک نیں برچھی نال اوہدی وَکھّی وِہنّی تے اونویں ای لہو تے پانی نِکلیا۔ تے جِس ویکھیا ایہہ گواہی دِتّی اے۔ تے اوہدی گواہی سَچّی اے۔ تے اوہ جان دا اے پئی مَیں سَچ آکھنا آں۔ تاں جو تُسی وی اِیمان لیاؤ۔ ایہہ ایس کر کے ہویا تاں جو نوِشتہ پُورا ہوئے پئی اوہدی کوئی ہڈّی بھنّی نا جاوے گی۔ تے دُوجا نوِشتہ وی آکھدا اے پئی اوہ اوہدے ولّ ویکھن گے جِہنُوں اوہناں وِنّھیا اے۔ ایدوں پِچّھوں ارِمَتِیاہ دے رہن والے یُوسف نیں جیہڑا یِسُوع دا شاگِرد سی۔ (پر یہُودِیاں دے ڈر دے مارِیاں گُجھّے گُجھّے) پِیلاطُس اگّے عرض کِیتی پئی مَیں یِسُوع دی لوتھ لے جاواں۔ تے پِیلاطُس اجازت دِتّی سو اوہ آ کے اوہدی لوتھ لے گیا۔ تے نِیکُدِیمُس وی جیہڑا پہلاں یِسُوع کول آیا سی پنجاہ کُو سیر مُر تے عود رَلے ہوئے نال لے کے آیا۔ سو اوہناں یِسُوع دی لوتھ لے کے سُوتی کپڑے وِچ مصالے پا کے یہُودِیاں دے دَبّن دے دستُور دے دے سببّوں وھلیٹی۔ تے اوس تھاں جِتّھے اوہ صلِیب دِتّا گیا اِک باغ سی۔ تے اوس باغ وِچ اِک نَوِیں قبر سی جِہدے وِچ کَدے کوئی نئیں سی رکھیا گیا۔ اوتھے ای یہُودِیاں دی تیاری دے سبّب کر کے یِسُوع نُوں رکھیا کیوں جو قبر کول جو سی۔ ہفتے دے پہلے دِن مریم مگدلِینی وڈّے ویلے اجے ہنیرا ای سی قبر اُتّے آئی تے ویکھیا پئی قبروں پتّھر رہڑیا ہویا اے۔ تَد اوہ شمعُون پطرس تے اوس دُوجے شاگِرد کول جِہنُوں یِسُوع پیار کر دا سی نٹّھی آئی تے اوہناں نُوں آکھن لگّی اوہناں خُداوند نُوں قبروں کڈھ لیا اے تے سانُوں پتا نئیں پئی اوہنوں کِتّھے رکھیا۔ تَد پطرس تے اوہ دُوجا شاگِرد نِکلے تے قبر اُتّے آئے۔ تے دونویں اکٹّھے بَھجّے تے دُوجا شاگِرد پطرس نالوں بَھجّن وِچ وَدّھ گیا۔ تے قبر اُتّے پہلاں اَپڑیا۔ تے جھاتی مار کے سُوتی کپڑیاں نُوں پیا ہویا ویکھیا۔ پر اوہ اندر نا وڑیا۔ تَد شمعُون پطرس وی اوہدے مگروں اَپڑ گیا تے قبر دے اندر وڑیا۔ تے سُوتی کپڑیاں نُوں پیا ہویا ویکھیا۔ تے اوس رُومال نُوں۔ جیہڑا اوہدے سِر دوالے سی سُوتی کپڑیاں دے نال نئیں۔ سگوں اِک تھاں وکھرا وھلیٹیا ہویا پیا سی۔ سو اوس ویلے دُوجے شاگِرد نیں وی جیہڑا پہلاں قبر اُتّے اَپڑیا اندر وڑ کے ویکھیا۔ تے یقِین کِیتا۔ ایس لئی پئی اجے تِیکر اوہ اوس نوِشتے نُوں نئیں سن سمجھدے پئی اوس ضرُور مُردیاں وِچوں جی اُٹھنا اے۔ سو شاگِرد اپنے گھر نُوں فیر مُڑ گئے۔ پر مریم باہر وار قبر دے کول کھلوتی۔ ہوئی روندی سی۔ تے روندیاں ہویاں جھاتی مار کے قبر دے اندر ویکھیا۔ پئی دو فرِشتے چِٹّے کپڑے پائے ہوئے اِک سرہانے تے دُوجا پیندانے جِتّھے یِسُوع دی لوتھ پئی سی۔ بَیٹھے نیں۔ تے اوہ اوہنوں آکھن لگّے اَے عورت تُوں کیوں رونی ایں؟ اوس اوہناں نُوں آکھیا ایس لئی پئی میرے خُداوند نُوں چُک لے گئے نیں تے مَیں نئیں جاندی پئی اوہنوں کِتّھے رکھیا اے۔ ایہہ آکھ کے اوہ پِچھّاں مُڑی تے یِسُوع نُوں کھلوتا ویکھیا تے نا پہچانیا پئی ایہہ یِسُوع اے۔ یِسُوع اوہنوں آکھیا اَے عورت تُوں کیوں رونی ایں؟ تُوں کِنوں لَبّھنی ایں؟ اوس ایہہ سمجھ کے پئی مالی اے اوہنوں آکھیا اَے میاں جے تُوں اوہنوں لے گیا ایں تے مَینُوں دس پئی کِتّھے رکھیا اے تے مَیں اوہنوں لے جاواں گی۔ یِسُوع اوہنوں آکھیا اَے مریم! اوس پِچھّاں مُڑ کے عِبرانی بولی وِچ آکھیا ربونی یعنی اَے اُستاد۔ یِسُوع اوہنوں آکھیا مَینُوں نا چُھو کیوں جو اجے مَیں باپ کول اُتانہہ نئیں گیا آں۔ پر میرے بھراواں دے کول جا۔ تے اوہناں نُوں آکھ پئی مَیں اپنے باپ تے تُہاڈے باپ کول تے اپنے خُدا تے تُہاڈے خُدا کول اُتانہہ جانا آں۔ مریم مگدلِینی آ کے شاگِرداں نُوں دسیا پئی مَیں خُداوند نُوں ویکھیا اے تے اوس مَینُوں ایہہ گلّاں آکھیاں نیں۔ فیر اوسے دِن جیہڑا ہفتے دا پہلا دِن سی شاماں ویلے جیہڑے تھاں یہُودِیاں دے ڈر دے مارِیاں شاگِرداں بُوہے مارے ہوئے سن یِسُوع وِچکار آکھلوتا تے اوہناں نُوں آکھیا تُہاڈی سلامتی ہوئے۔ تے ایہہ آکھ کے اوہناں نُوں اپنے ہتّھ تے وَکھّی وکھالی۔ تَد شاگِرد خُداوند نُوں ویکھ کے خُوش ہوئے۔ تَد یِسُوع اوہناں نُوں فیر آکھیا تُہاڈی سلامتی ہوئے۔ باپ نیں جیویں مَینُوں گھلّیا اے اوسے طرح مَیں تُہانوں گھلّنا آں۔ تے ایہہ آکھ کے اوہناں اُتّے پُھوک ماری تے اوہناں نُوں آکھیا پاک رُوح لوؤ۔ جِنہاں دے گُناہاں نُوں تُسی بخشو اوہناں دے بخشے گئے نیں تے جِنہاں دے تُسی قیم رکھو اوہناں دے قیم رکھّے گئے نیں۔ پر جدوں یِسُوع آیا تَد اوہناں باراں وِچوں اِک جَنا تُوما جِہنُوں جوڑا آکھدے نیں اوہناں دے نال نئیں سی۔ دُوجے شاگِرداں آکھیا اساں خُداوند نُوں ویکھیا اے۔ پر اوس اوہناں نُوں آکھیا جِنّاں چِر مَیں اوہدے ہتّھاں وِچ کِلاّں دے چھیک نا ویکھیاں تے کِلاّں دے چھیکاں وِچ اپنی اُنگلی نا پاں تے نا اوہدی وَکھّی وِچ اپنا ہتّھ پاں اوناں چِر مَیں کَدے نا منّاں گا۔ تے اَٹھاں دِناں پِچّھوں فیر اوہدے شاگِرد اندر سن تے تُوما اوہناں دے نال سی۔ بُوہے وَجّے ہوئے سن یِسُوع آیا تے وِچکار کھلو کے آکھیا تُہاڈی سلامتی ہوئے۔ تَد اوس تُوما نُوں آکھیا اپنی اُنگل اُراں کر تے میرے ہتّھاں نُوں ویکھ تے اپنا ہتّھ اُراں کر تے میری وَکھّی وِچ پا تے بےاعتبار نا ہو پر اعتبار کر۔ تُوما اوہنوں آکھیا اے میرے خُداوند اے میرے خُدا۔ یِسُوع اوہنوں آکھیا ایس کر کے پئی تُوں مَینُوں ویکھیا اے تُوں اِیمان لیاندا اے۔ مُبارک اوہ نیں جِنہاں ویکھیا نئیں تَد وی اِیمان لیاندا۔ تے بُہت ہور وی کراماتاں یِسُوع شاگِرداں دے سامھنے کِیتیاں جیہڑیاں ایس کتاب وِچ نئیں لِکھیاں گِئیاں۔ پر ایہہ لِکھیاں گِئیاں نیں تاں جو تُسی اِیمان لیاؤ پئی یِسُوع جو اے اوہو مسِیح خُدا دا پُتر اے۔ تے اِیمان لیا کے اوہدے ناں توں تُہانوں زِندگی مِلے۔ ایہناں گلّاں دے پِچّھوں یِسُوع فیر تِبریاس دے سمُندر اُتّے اپنے آپ نُوں شاگِرداں اُتّے ظاہر کِیتا۔ تے اوس ایس طرح ظاہر کِیتا۔ شمعُون پطرس تے تُوما جِہنُوں جوڑا آکھدے نیں۔ تے گلِیل دے قانا دا نتنی ایل تے زبدی دے پُتر تے اوہدے شاگِرداں وِچوں دو ہور اکٹّھے ہوئے ہوئے سن۔ شمعُون پطرس اوہناں نُوں آکھیا مَیں مچھّیاں پھڑن جانا آں۔ اوہ اوہنوں آکھن لگّے۔ اسی وی تیرے نال چلنے آں۔ اوہ باہر نِکلے تے بیڑی اُتّے چڑھ بَیٹھے تے اوس رات کُجھ نا پھڑیا۔ پر جد دِن چڑھن لگّا یِسُوع کنڈھے اُتّے آ کے کھلو گیا پر شاگِرد نئیں سن جان دے پئی ایہہ یِسُوع اے۔ تَد یِسُوع اوہناں نُوں آکھیا اَے بچّیو! تُہاڈے کول کُجھ کھان نُوں اے؟ اوہناں اوہنوں جواب دِتّا پئی نئیں۔ اوس اوہناں نُوں آکھیا بیڑیوں سَجّے پاسے جال سُٹّو تاں پھڑو گے۔ سو اوہناں سُٹّیا تے ہُن بتھیریاں مچھّیاں دے سبّب کر کے اوہ اوہنوں کھِچّ نا سکے۔ ایس لئی اوہ شاگِرد جِہنُوں یِسُوع پیار کر دا سی پطرس نُوں آکھن لگّا ایہہ تے خُداوند اے۔ سو جد شمعُون پطرس ایہہ سُنیا پئی ایہہ خُداوند اے تَد اپنا کپڑا لکّ نال بَنّھ لیا کیوں جو ننگا سی تے سمُندر وِچ چھال ماری۔ پر ہور شاگِرد مچھّیاں دا جال کھِچّدے ہوئے نِکّی بیڑی وِچ آئے ایس لئی پئی اوہ کنڈھے توں دُراڈے نئیں سن پر دوکوُ سَو ہتّھ دی وِتھ سی۔ سو جد اوہ کنڈھے اُتّے اُترے۔ کولیاں دی اَگ دھری ویکھی تے اوہدے اُتّے مچّھی رکھی ہوئی تے نال روٹی۔ یِسُوع اوہناں نُوں آکھیا جیہڑیاں مچھّیاں تُساں ہُن پَھڑیاں نیں اوہناں وِچوں لیاؤ۔ سو شمعُون پطرس بیڑی اُتّے چڑھ کے جال نُوں زمین اُتّے کھِچّیا۔ تے اوہ اِک سَو ترونجاں وڈّیاں مچھّیاں نال بھریا ہویا سی۔ تے بھانویں اینِیاں سارِیاں سن پر جال نا ٹُٹّا۔ یِسُوع اوہناں نُوں آکھیا آؤ روٹی کھاؤ تے شاگِرداں وِچوں کِسے نُوں پچُھّن دی دلیری نا ہوئی پئی تُوں کون ایں؟ کیوں جو اوہ جان دے سن پئی اوہ خُداوند ای اے۔ یِسُوع آ کے روٹی لئی تے اوہناں نُوں دِتّی ایسے طرح مچّھی وی۔ ہُن ایہہ ترِیجی وار اے پئی یِسُوع مُردیاں وِچوں جی اُٹھن دے پِچّھوں شاگِرداں نُوں وکھالی دِتّی۔ سو جد اوہناں کھالیا۔ یِسُوع نیں شمعُون پطرس نُوں آکھیا۔ اَے شمعُون یُوحنّا دے پُتر تُوں ایہناں توں میرے نال وَدّھ مُحبّت رکھنا ایں؟ تے اوس اوہنوں آکھیا اَے خُداوند تُوں تے جاننا ایں پئی مَیں تینُوں پیار کرنا آں اوس اوہنوں آکھیا میرے لیلے چار۔ فیر دُوجی وار اوہنوں آکھیا اَے شمعُون یُوحنّا دے پُتر توں میرے نال مُحبّت رکھنا ایں؟ اوس اوہنوں آکھیا خُداوند تُوں تے جاننا ایں پئی مَیں تینُوں پیار کرنا ہاں۔ اوس اوہنوں آکھیا میرِیاں بھیڈاں نُوں پال۔ اوس اوہنوں ترِیجی وار آکھیا اَے شمعُون یُوحنّا دے پُتر تُوں مَینُوں پیار کرنا ایں؟ ایس گلّے پئی اوس ترِیجی وار اوہنوں آکھیا تُوں مَینُوں پیار کرنا ایں؟ پطرس اُداس ہویا تے اوہنوں آکھیا اَے خُداوند تُوں ای سبھ کُجھ جاننا ایں تینُوں معلُوم اے پئی مَیں تینُوں پیار کرنا آں۔ یِسُوع اوہنوں آکھیا میرِیاں بھیڈاں نُوں چار۔ مَیں تینُوں سَچ سَچ آکھنا آں جد تُوں جوان سَیں تُوں اپنا لکّ آپ بنھدا تے جِتّھے جی کر دا سی ٹُردا پِھردا سَیں۔ پر جدوں تُوں بُڈّھا ہوویں گا تَد اپنے ہتّھ پَساریں گا تے دُوجا تیرا لکّ بنھے گا تے جِتّھے تیرا جی نئیں کر دا اوتھے تینُوں چُک لے جائے گا۔ اوس ایس گلّ نال اشارہ کِیتا پئی اوہ کیہڑی مَوت نال خُدا دی وڈیائی کرے گا تے ایہہ آکھ کے آکھیا میرے مگر آ۔ پطرس پِچھّاں مُڑ کے اوس شاگِرد نُوں جِہنُوں یِسُوع پیار کر دا سی مگر آؤندیاں ویکھیا جِس رات دی روٹی ویلے وی اوہدی ہِک اُتّے ڈھاسنا لائیاں ہویاں آکھیا سی ”اَے خُداوند اوہ کون اے جیہڑا تینُوں پھڑواؤندا اے؟“ سو پطرس اوہنوں ویکھ کے یِسُوع نُوں آکھیا اَے خُداوند اوہدا کِیہ ہوئے گا؟ یِسُوع اوہنوں آکھیا جے میری مرضی ہوئے پئی ایہہ میرے آؤن تِیکر اے تے تینُوں کِیہ؟ تُوں میرے مگر آ تَد بھراواں وِچ ایہہ گلّ مشہُور ہوگئی پئی اوہ شاگِرد نا مرے گا پر یِسُوع اوہنوں ایہہ نئیں سی آکھیا پئی ایہہ نا مرے گا پر ایہہ پئی جے میری مرضی ہوئے پئی ایہہ میرے آؤن تِیکر اے تے تینُوں کِیہ؟ ایہہ اوہو ای شاگِرد اے جیہڑا اوہناں گلّاں دی گواہی دیندا اے تے جِس ایہہ گلّاں لِکھیاں۔ تے اسی جاننے آں پئی اوہدی گواہی سَچّی اے۔ تے ہور ڈھیر سارے کمّ نیں جیہڑے یِسُوع کِیتے۔ جے اوہ وَکھو وکھرے لِکھے جاندے تے مَیں سمجھنا آں پئی جیہڑیاں کِتاباں لِکھیاں جاندِیاں اوہ دُنیا وِچ نا سماندِیاں۔ اَے تھِیُفِلُس مَیں اوہناں سارِیاں گلّاں دی پہلی کتاب بنائی اے۔ جیہڑیاں یِسُوع شُروع وِچ کر دا تے سِکھاؤندا رہیا۔ اوس دِن تِیکر پئی جد پاک رُوح دی راہِیں اپنے چُنیاں ہویاں رسُولاں نُوں حُکم دین دے پِچّھوں اوہ اُتانہہ چُکیا گیا۔ اوہناں نُوں اوس اپنے دُکھ سہن دے پِچّھوں بتھیریاں ثبُوتاں نال اپنے آپ نُوں جِیوندا وکھایا۔ چاھلیاں دِناں تِیکر اوہ اوہناں نُوں وکھالی دیندا تے خُدا دی بادشاہی دِیاں گلّاں دسدا رہیا۔ تے اوہناں دے نال رَل کے اوہناں نُوں حُکم دِتّا پئی یرُوشلِیم توں باہر نا جاؤ۔ سگوں باپ دے اوس وعدہ دی اُڈِیک رکھو۔ جیہڑا تُساں سُنیا اے۔ کیوں جو یُوحنّا تے پانی نال بپتِسمہ دِتّا۔ پر تُہانوں تھوڑے دِناں دے پِچّھوں پاک رُوح دا بپتِسمہ مِلے گا۔ سو اوہناں اکٹّھے ہو کے اوہدے کولوں ایہہ پُچھیا۔ پئی اَے خُداوند تُوں ایسے ویلے اِسرائیل نُوں بادشاہی فیر دیویں گا؟ پر اوس اوہناں نُوں آکھیا تُہاڈا کمّ نئیں پئی اوہناں ویلیاں یا وقتاں نُوں جانو جِنہاں نُوں باپ اپنے ای وَس وِچ رکھیا اے۔ پر جدوں پاک رُوح تُہاڈے اُتّے آوے گا۔ تے تُہانوں طاقت مِلے گی۔ تے یرُوشلِیم تے سارے یہُودیہ تے سامریہ وِچ نالے دھرتی دے اخِیر تِیکر۔ تُسی میرے گواہ ہوؤ گے۔ تے ایہہ آکھ کے اوہناں دیاں ویکھدیاں اوہ اُتانہہ چُکیا گیا۔ تے بدّل اوہنوں اوہناں دِیاں نظراں توں لُکا لیا۔ تے اوہدے جاندِیاں ہویاں۔ جد اوہ اسمان ولّ پئے ویکھدے سن ویکھو دو بندے چِٹّے کپڑے پائے ہوئے اوہناں دے کول آ کھلوتے۔ تے اوہ آکھن لگّے۔ اَے گلِیلیو تُسی کاہِنُوں اسمان ولّ ویکھدے ہو؟ ایہو یِسُوع جیہڑا تُہاڈے کولوں اسمان نُوں چُکیا گیا۔ اوسے طرح فیر آوے گا۔ جیویں تُساں اوہنوں اسمان نُوں جاندِیاں ویکھیا۔ تَد اوہ پہاڑ توں جیہڑا زَیتُون دا اکھواؤندا اے جیہڑا یرُوشلِیم دے نیڑے سبت دے دِن دا پَینڈا اے یرُوشلِیم نُوں مُڑ پئے۔ تے جدوں اَپڑے تے اِک چوبارے اُتّے جا چڑھے۔ جِتّھے پطرس تے یُوحنّا تے یعقُوب تے اندریاس تے فِلپُّس تے تُوما۔ تے برتُلمائی تے متّی۔ حلفئی دا پُتر یعقُوب۔ تے زیلوتیس والا شمعُون۔ تے یعقُوب دا پُتر یہُوداہ رہندے سن۔ ایہہ ساریاں دے سارے کئیاں زنانِیاں دے نال تے نالے یِسُوع دی ماں مریم تے اوہدے بھراواں دے نال اِک دِل ہو کے دُعا منگن وِچ لگے رہندے سن۔ تے اوہناں دِناں وِچ پطرس بھراواں دے وِچ جیہڑے اِکّو تھانویں اِک سو وِیہہ کُو بندے سن کھلو کے آکھن لگّا۔ بھراؤ۔ ضرُور سی پئی اوہ نوِشتہ پُورا ہوئے۔ جیہڑا پاک رُوح پہلاں توں داؤد دی زبانی یہُوداہ دی بابت جیہڑا یِسُوع دے پھڑن والیاں دا آگُو بن گیا سی آکھیا۔ کیوں جو اوہ ساڈے وِچ گِنیا گیا۔ تے اوہنوں ایس خِدمت دا حِصّہ مِلیا سی۔ (اوہنے بُریائی دی مزدُوری نال اِک پَیلی مُل لئی۔ تے مُنھ پرنے ڈِگّیا۔ تے اوہدا ڈِھڈ پاٹ گیا تے اوہدیاں سارِیاں آندراں نِکل گِئیاں۔ تے ایہہ حال یرُوشلِیم دے سارے رہن والیاں نُوں معلُوم ہویا ایتھوں تِیکر پئی اوہناں دی بولی وِچ اوس پَیلی دا ناں ہَقَل دما یعنی خُون دی پَیلی پَے گیا۔) کیوں جو زبُوراں دی کتاب وِچ لِکھیا اے پئی اوہدا گھر اُجّڑ جائے۔ تے اوہدے وِچ کوئی وَسّن والا نا ہوئے۔ تے ایہہ وی پئی اوہدا درجہ دُوجا لے لَوے۔ سو ضرُور چاہیدا اے۔ پئی ایہناں بندیاں وِچوں جیہڑے ہر ویلے ساڈے نال رہے۔ جِنّاں چِر خُداوند یِسُوع ساڈے وِچ آؤندا جاندا سی۔ یُوحنّا دے بپتِسمے توں لے کے اوس دِن تِیکر جدوں اوہ ساڈے کولوں چُک لیا گیا سی۔ اِک بندہ اوہدے جی اُٹھن دا گواہ ساڈے نال بنے۔ تَد اوہناں دو جِنّیاں نُوں سامھنے کِیتا۔ اِک یُوسف نُوں جیہڑا برسبّا اکھواؤندا اے جِہدا لقب یُوستُس سی۔ دُوجا متّیاہ نُوں۔ تَد اوہناں دُعا منگ کے آکھیا اَے خُداوند تُوں جیہڑا ساریاں دے دِلاں دا حال جاننا ایں۔ ایہہ دس پئی ایہناں دوہاں وِچوں تُوں کِنوں چُنیا اے۔ پئی اوہنوں تھاں مِلے اوس خِدمت تے رسالت دے کمّ وِچ جِہنُوں یہُوداہ چھڈ کے اپنے تھاں گیا۔ تے اوہناں نیں اوہناں لئی گُنا پایا۔ تے گُنا متّیاہ دے ناں دا نِکلیا۔ تَد اوہ یارھاں رسُولاں نال گِنیا گیا۔ تے جد پینتِیکُست دا دِن آگیا۔ سارے اِک تھاں اکٹّھے ہوئے۔ تے اِک دم اسمان توں اِک اواز آئی۔ جیویں وڈّی ہنیری دی شُوکر ہوئے۔ تے سارا گھر جِتّھے اوہ بَیٹھے سن اوہدے نال بھر گیا۔ تے اَگ دِیاں پاٹیاں ہویاں لاٹاں وانگُوں اوہناں نُوں بولیاں ویکھالی دِتّیاں۔ تے اوہناں وِچوں ہر اِک دے سِر اُتّے آ گِئیاں۔ تَد اوہ سارے پاک رُوح نال بھر گئے۔ تے اوپریاں بولیاں بولن لگّے جیویں رُوح اوہناں نُوں بولن دی طاقت دِتّی۔ تے دِیندار یہُودی ہر اِک قوم وِچوں جیہڑی اسمان دے ہیٹھ اے اودُوں یرُوشلِیم وِچ رہندے سن۔ سو جد ایہہ اواز آئی تَد بُہت لوک جمع ہوئے۔ تے حَیران ہوئے۔ کیوں جو ساریاں سُنیا پئی ایہہ ساڈیاں بولیاں بولدے نیں۔ تے سارے حَیران ہون لگّے۔ تے آکھن لگّے۔ ایہہ جیہڑے بولدے نیں سارے گلِیلی نئیں؟ فیر اَسی کِیویں اپنے اپنے وطن دی بولی سُننے آں؟ اسی پارتھی تے مادی تے عِیلامی تے مسوپتامِیہ دے رہن والے تے یہُودیہ تے کَپّدُکیہ۔ پُنطُس تے آسِیہ فرُوگیہ تے پمفِیلیہ۔ مِصر تے لِبوآ دے علاقہ دے جیہڑا کرینے ولّ اے۔ نالے رُومی مُسافر بھانویں یہُودی تے بھانویں ایہناں دے مُرید۔ کریتی تے عربی آں تے اپنیاں اپنیاں بولیاں وِچ ایہناں نُوں خُدا دِیاں وڈّیاں گلّاں بولدے سُننے آں۔ تے سارے تعجُّب کرن لگّے۔ تے گھبرائے۔ تے اِک دُوجے نُوں آکھن لگّے پئی ایہہ کِیہ ہون لگّا اے؟ ہورناں مخَول کر کے آکھیا ایہناں نُوں سجری مَے دا نشہ اے۔ تَد پطرس نے یاراں دے نال کھلو کے اُچّی اواز نال اوہناں نُوں آکھیا۔ اَے یہُودیہ تے یرُوشلِیم دے سارے رہن والیو! ایہہ جان لیؤ۔ تے کنّ لا کے میرِیاں گلّاں سُنو۔ ایہہ لوک نشے وِچ نئیں جیویں تُسی سمجھدے ہو۔ کیوں جو اجے تیجا پَہر ای چڑھیا اے۔ پر ایہہ اوہ گلّ اے جیہڑی یُوایل نبی دی راہِیں آکھی گئی اے۔ پئی خُدا آکھدا اے پئی اخِیری دہاڑیاں وِچ اِنج ہوئے گا۔ پئی مَیں اپنے رُوح وِچوں ساریاں انساناں اُتّے ڈوہلاں گا۔ تے تُہاڈے پُتر تے تُہاڈیاں دِھیاں نبُوّت کرن گِیاں تے تُہاڈے جوان رویا ویکھن گے۔ تے تُہاڈے بُڈّھے سُفنہ ویکھن گے۔ تے مَیں اوہناں دِناں وِچ اپنے بندے بندیاں اُتّے اپنے رُوح وِچوں ڈوہلاں گا۔ تے اوہ نبُوّت کرن گے۔ تے مَیں اُتانہہ اسمان وِچ عجب کمّ تے ہیٹھاں زمین اُتّے کراماتاں وکھاواں گا۔ یعنی لہو تے اَگ تے دُھوں دا بدّل وکھاواں گا۔ سُورج ہنیرا تے چَنّ لہو ہو جائے گا خُداوند دے وڈّے تے جلال والے دِن دے آؤن توں پہلاں۔ تے اینج ہوئے گا پئی ہر اِک جیہڑا خُدا دا ناں لَئے گا اوہنوں نجات مِلے گی۔ اَے اِسرائیلیو! ایہہ گلّاں سُنو پئی یِسُوع ناصری اِک بندہ سی جِہدا خُدا دے ولّوں ہونا تُہاڈے اُتّے اوہناں کراماتاں تے نشانِیاں تے عجب کمّاں نال ثابت ہویا جیہڑے خُدا اوہدی ہتّھِیں تُہاڈے وِچ وکھالے۔ جیویں تُسی آپ جان دے ہو۔ جد خُدا دے ٹھہرائے ہوئے انتظام تے غَیب دے عِلم نال اوہ پھڑایا گیا۔ تُساں غیر شرِعاں دے۔ ہتھّوں کِل ٹُھکّاکے مروا دِتّا۔ اوسے نُوں خُدا مَوت دے بندھ توں چھڈا کے جوالیا۔ کیوں جو ایہہ نئیں سی ہو سکدا پئی اوہ اوہدے وَس وِچ رہے۔ کیوں جو داؤد اوہدے حق وِچ آکھدا اے پئی مَیں خُداوند نُوں ہمیش اپنے سامھنے ویکھیا پئی اوہ میرے سَجّے پاسے اَے تاں جو مَیں نا ہِلّاں۔ ایس کر کے میرا دِل خُوش ہویا۔ تے میری زبانوں خُوشی نِکلدی اے۔ سگوں میرا جِسم وی آس وِچ رہے گا۔ پئی تُوں میری جان نُوں پاتال وِچ نا چھڈیں گا تے نا اپنے قُدُّوس نُوں ترکّن دئیں گا۔ تُوں مَینُوں زِندگی دے راہ دسے نیں۔ تُوں اپنے دِیدار دی خُوشی نال مَینُوں بھر دیں گا۔ بھراؤ! تُہانوں کُھلا ڈُلہا ساڈے وَڈارُو داؤد ولّوں ایہہ آکھنا چَنگا اے پئی اوہ مر وی گیا تے نالے دَبّیا گیا۔ تے اَج تِیکر اوہدی قبر ساڈے کول اے۔ سو ایس کر کے پئی اوہ نبی سی تے جان دا سی پئی خُدا میرے نال سَونہہ کھادِی پئی تیری اَنس وِچوں کِسے نُوں تیری گدّی اُتّے بھاواں گا۔ اوس نبُوّت کر کے مسِیح دے جی اُٹھن دا ذِکر کِیتا۔ پئی نا اوہدی جان پاتال وِچ چھڈی گئی تے نا اوہدا جِسم گلیا سڑیا۔ ایسے یِسُوع نُوں خُدا جوالیا جِہدے اسی سارے گواہ ہاں۔ سو جد اوہ خُدا دے سَجّے پاسے اُچّا کِیتا گیا تے اوس باپ کولوں پاک رُوح دا وعدہ پایا تاں اوس ایہہ جو تُسی ویکھدے تے سُندے ہو بخش دِتّا۔ کیوں جو داؤد تاں اسمان اُتّے نئیں چڑھیا۔ سگوں آپی آکھدا اے۔ پئی خُداوند میرے خُداوند نُوں آکھیا۔ پئی میرے سَجّے ہتّھ بَیہہ جا۔ جِنّاں چِر مَیں تیرے وَیرِیاں نُوں تیرے پیراں دی چَوکی نا بناواں۔ سو اِسرائیل دا سارا گھرانا پَکّی طرح جانے پئی خُدا نے اوسے یِسُوع نُوں جِہنُوں تُساں صلِیب دِتّا۔ خُداوند تے مسِیح وی کِیتا۔ جدوں اوہناں ایہہ سُنیا تَد اوہناں دے دِل وِنّھے گئے تے پطرس تے باقی رسُولاں نُوں آکھیا۔ بھراؤ اسی کِیہ کریئے۔ تَد پطرس اوہناں نُوں آکھیا۔ تَوبہ کرو۔ تے تُہاڈے وِچوں ہر اِک اپنے گُناہاں دی مُعافی لئی یِسُوع مسِیح دے ناں اُتّے بپتِسمہ لے لَئے۔ تاں پاک رُوح تُہانوں اِنعام وِچ مِلے گا۔ کیوں جو ایہہ وعدہ تُہاڈے نال تے تُہاڈی اولاد نال اے تے اوہناں سبھناں نال وی جیہڑے دُراڈے نیں جِنہاں نُوں خُداوند ساڈا خُدا اپنے کول سَدّے گا۔ تے ہور بتھیریاں گلّاں نال پَکّ کر کے اوس اوہناں نُوں نصِیحت کِیتی۔ پئی ایس پُٹھی قوم توں اپنا آپ بچاؤ۔ سو جِنہاں اوہدی گلّ مَن لئی اوہناں بپتِسمہ لیا۔ تے اوسے دِن تِنّ کُو ہزار لوک اوہناں نال رَل گئے۔ تے اوہ رسُولاں دی تعلِیم تے سنگت وِچ تے روٹی توڑن تے دُعا منگن وِچ لگے رہندے سن۔ تے ہر اِک جان نُوں ڈر لگّا۔ تے بتھیرے عجب کمّ تے نشانِیاں رسُولاں دی راہِیں وکھالِیاں گِئیاں۔ تے سارے جِنہاں اِیمان لیاندا سی اکٹّھے رہندے سن۔ تے سارِیاں شیواں وِچ سانجھ رکھدے سن۔ تے اپنی ملکیّت تے شیواں ویچ ویچ کے جیویں کِسے نُوں لوڑ پَیندی ساریاں نُوں ونڈ دیندے سن۔ تے روز دِہاڑے اِک دِل ہو کے ہیکل وِچ اکٹّھے ہوندے سن۔ تے گھراں وِچ روٹی توڑ کے خُوشی تے صاف دِلی نال اَن پانی کھاندے سن۔ تے خُدا دی وڈیائی کر دے سن۔ تے سبھناں لوکاں نُوں پیارے لگدے سن۔ تے جیہڑے نجات پاندے سن خُدا روز اوہناں نُوں اوہناں دے نال رلاؤندا سی۔ پطرس تے یُوحنّا ترِیجے پَہر دی عبادت دے ویلے ہیکل نُوں پئے جاندے سن۔ تے لوک اِک جماندرُو لنگے نُوں چُک کے لئی جاندے سن تے روز اوس بُوہے اُتّے جیہڑا سوہناں اکھواؤندا اے ایس لئی بہا دیندے سن پئی ہیکل وِچ وڑن والیاں توں خَیرات منگے۔ جدوں اوس بندے پطرس تے یُوحنّا نُوں ویکھیا پئی اوہ ہیکل وِچ جانا چاہندے نیں تے سوال کِیتا پئی مَینُوں خَیرات مِلے۔ تَد پطرس یُوحنّا سَنے اوہدے ولّ نظر کر کے آکھیا۔ تُوں ساڈے ولّ ویکھ۔ تے ایس آس اُتّے پئی اوہناں کولوں کُجھ مِلے اوس اوہناں ولّ دھیان کِیتا۔ پطرس آکھیا۔ چاندی سونا تاں میرے کول نئیں اے پر جو کُجھ میرے کول اے اوہ تینُوں دینا آں۔ پئی یِسُوع مسِیح ناصری دے ناں وِچ ٹُر پَو۔ تے اوس اوہدا سَجّا ہتّھ پَھڑکے اوہنوں چُکیا۔ اوسے ویلے اوہدے پَیر تے گِٹے تگڑے ہوگئے۔ تے اوہ چھال مار کے اُٹھ کھلوتا تے ٹُرن پِھرن لگ پیا۔ تے اوہ خُدا دی وڈیائی کر دا تے چھالاں مار دا اوہناں دے نال ہیکل وِچ گیا۔ تے ساریاں لوکاں اوہنوں ٹُردیاں پِھردیاں تے خُدا دی وڈیائی کر دیاں ویکھیا۔ تے اوہنوں پچھان لیا۔ پئی ایہہ اوہ اے جیہڑا ہیکل دے سوہنے بُوہے اُتّے خَیرات منگن نُوں بہایا جاندا سی تے اوہ اوس حال توں جیہڑا اوہدے اُتّے گُذریا سی بُہت حَیران ہو کے ہکّے بکّے ہوگئے۔ تے جد اوہ پطرس تے یُوحنّا دا پِچھّا نئیں سی چھڈ دا تَد سارے لوک بڑے حَیران ہو کے اوس برانڈے ولّ جیہڑا سُلیمان دا اکھواؤندا اے۔ اوہناں کول نسّے آئے۔ تَد پطرس ایہہ حال ویکھ کے لوکاں نُوں آکھیا۔ اَے اِسرائیلیو! ایس گلّ اُتّے تُسی کیوں حَیران ہوندے ہو۔ تے سانُوں کیوں اینج ویکھدے ہو پئی اساں اپنی قُدرت یا دِینداری نال اوہنوں ٹُرن دی طاقت بخشی اے؟ ابرہام تے اِضحاق تے یعقُوب دے خُدا۔ ساڈے پئیو دادیاں دے خُدا اپنے خادم یِسُوع نُوں جلال دِتّا۔ اوہنوں تُساں حوالے کِیتا۔ تے پِیلاطُس دے سامھنے اِنکاری ہوئے جِس ویلے اوس اوہنوں چھڈ دین دا اِرادہ کِیتا۔ سگوں تُسی اوہدا جیہڑا قُدُّوس تے سَچّا سی اِنکار کِیتا۔ تے اِک خُونی بندے نُوں منگ لیا۔ پئی اوہ تُہاڈے لئی چھڈیا جاوے۔ پر تُساں زِندگی دے مالک نُوں قتل کِیتا۔ جِہنُوں خُدا مُردیاں وِچوں جوالیا۔ تے اسی اوہدے گواہ آں۔ تے اوہدے ناں اُتّے اِیمان رکھن دے سبّب اوہدے ناں تے ایس بندے نُوں تگڑیاں کِیتا۔ جِہنُوں تُسی ویکھدے تے پچھاندے ہو۔ اوس اِیمان نے جیہڑا اوہدی راہِیں اے تُہاڈے ساریاں دے سامھنے ایہنوں ایہہ پُوری تندرستی دِتّی۔ ہُن بھراؤ! مَیں جاننا آں پئی تُساں ایہہ کمّ نادانی نال کِیتا۔ جیویں تُہاڈے سرداراں نیں وی۔ پر جیہڑیاں گلّاں دی خبر خُدا ساریاں نبیاں دی زبانی پہلوں ای دِتّی سی پئی اوہدا مسِیح دُکھ چُکے گا۔ اوس ایویں پُوریاں کِیتیاں۔ سو تَوبہ کرو تے پِھرو تاں جو تُہاڈے گُناہ مٹائے جان۔ تے جد خُداوند دی درگاہوں خُوشحالی دے دِن آؤن۔ تے اوہ مسِیح یِسُوع نُوں گھلّے۔ جیہڑا تُہاڈے لئی مُقرّر کِیتا گیا ایہہ ضرُوری اے پئی اوہ اسمان وِچ اودُوں تِیکر رہے جد تِیکر سارِیاں شیواں بحال نا کِیتیاں جان جِنہاں دا ذِکر خُدا نے مُڈھوں اپنے پاک نبیاں دی زبانی کِیتا۔ مُوسیٰ نے آکھیا سی پئی خُداوند خُدا تُہاڈے بھراواں وِچوں اِک نبی میرے جِہیا کھڑا کرے گا۔ جو کُجھ اوہ تُہانوں آکھے سارے سُنو۔ تے اینج ہوئے گا۔ پئی ہر اِک جان جیہڑی اوس نبی دی نا سُنے اوہدا قوم وِچوں ناس ہو جاوے گا۔ تے سموئیل توں لے کے تے اوہدے مگروں آؤن والیاں سارے نبیاں نیں جِنہاں کلام کِیتا اے ایہناں دِناں دی خبر دِتّی۔ تُسی نبیاں دی اولاد ہو۔ تے اوس عہد دے سانجھی جیہڑا خُدا تُہاڈے پئیو دادیاں نال کِیتا۔ جد ابرہام نُوں ایہہ آکھیا۔ پئی تیری نسل توں دُنیا دے سارے گھرانیاں نُوں برکت مِلے گی۔ تُہاڈے ای کول سبھ توں پہلاں خُدا اپنے خادم نُوں اُٹھال کے ایس لئی گھلّیا پئی تُہاڈے وِچوں ہر اِک نُوں اوہدیاں بُرائیاں توں پھیر کے برکت دیوے۔ جد اوہ لوکاں نُوں ایہہ پئے آکھدے سن۔ تَد کاہِن تے ہیکل دا سردار تے صدوقی اوہناں اُتّے چڑھ آئے۔ کیوں جو بڑے غُصّے ہوئے پئی اوہ لوکاں نُوں سکھالدے سن۔ تے یِسُوع دی مِثال دے کے مُردیاں وِچوں جی اُٹھن دی منادی کر دے سن۔ تے اوہناں اُتّے ہتّھ پائے تے دُوجے دِن تِیکر قید رکھیا۔ کیوں جو اودُوں شام ہوگئی سی۔ پر بتھیریاں اوہناں وِچوں جِنہاں کلام سُنیا اِیمان لیاندا تے اوہ بندے گنتری وِچ پنج کُو ہزار ہوگئے سن۔ تے اگلے بَھلک اِنج ہویا پئی اوہناں دے سردار تے بزُرگ تے فقِیہ یرُوشلِیم وِچ اکٹّھے ہوئے سن۔ تے حنّا سردار کاہِن نال سی۔ تے کائفا تے یُوحنّا۔ تے اِسکندر تے جِنّے سردار کاہِن دے ساک سن۔ تے اوہناں نُوں وِچ کھلار کے اوہناں پُچھیا۔ پئی تُساں کیہڑی قُدرت نال تے کیہڑے ناں اُتّے ایہہ کمّ کِیتا؟ تَد پطرس پاک رُوح نال بھر کے اوہناں نُوں آکھن لگّا۔ اَے قوم دے سردارو تے بزُرگو۔ جے ساتھوں اَج پُچھیا جاندا اے ایس احسان دی بابت جیہڑا ایس کمزور بندے اُتّے ہویا۔ پئی اوہ کِیویں چَنگا ہوگیا اے۔ تاں تُہانوں سبھناں نُوں تے اِسرائیل دی ساری قوم نُوں معلُوم ہوئے۔ پئی یِسُوع مسِیح ناصری دے ناں اُتّے جِہنُوں تُساں صلِیب دِتّی تے خُدا نے اوہنوں مُردیاں وِچوں جوالیا۔ اوہدے ناں اُتّے تُہاڈے سامھنے ایہہ بندہ بھلا چَنگا کھلوتا اے۔ ایہہ اوہو پتّھر اے جِہنُوں تُساں راجاں رَدّ کِیتا اوہ تاں گُٹّھ دا سِرا ہوگیا۔ تے کِسے دُوجے توں نجات نئیں اے ایس لئی پئی اسمانوں ہیٹھاں بندیاں نُوں کوئی ہور ناں دِتّا نئیں گیا۔ جِہدی راہِیں اسی نجات پا سکیئے۔ جدوں اوہناں پطرس تے یُوحنّا دی دلیری ویکھی۔ تے جانیا پئی ایہہ اَن پڑھ تے مُورکھ نیں۔ تے تعجُّب کِیتا تے اوہناں نُوں پِچھانیا پئی اوہ یِسُوع دے نال سن۔ تے اوس بندے نُوں جیہڑا چَنگا ہویا سی اوہناں دے نال کھلوتیاں ویکھ کے کُجھ خلاف نا آکھ سکے۔ پر اوہناں نُوں حُکم دے کے پئی مجلسیوں باہر جاؤ۔ آپو وِچ صلاح کر کے آکھن لگّے۔ پئی اسی ایہناں بندیاں نال کِیہ کرئیے۔ کیوں جو اوہناں توں اِک مَنّی ہوئی کرامات ہو گئی اے۔ جیہڑی یرُوشلِیم دے سارے رہن والیاں نُوں معلُوم اے۔ تے اسی مُکّر نئیں سکدے۔ پر کِتے ایویں نا ہوئے پئی لوکاں وِچ گلّ ہور وی کھِلّر جاوے۔ اسی اوہناں نُوں دھمکی دئیے پئی ایس ناں دا فیر کِسے بندے اگّے ذِکر نا کرن۔ تَد اوہناں نُوں سَدّ کے تاکِید کِیتی پئی یِسُوع دے ناں اُتّے بالکل نا بولنا تے نا تعلِیم دینا۔ پر پطرس تے یُوحنّا اوہناں نُوں آکھیا۔ تُسی آپ انصاف کرو۔ پئی خُدا دے اگّے ایہہ ٹھیک اے۔ پئی اسی خُدا دی گلّ نالوں وَدّھ تُہاڈی گلّ سُنئے؟ کیوں جو ایہہ ساتھوں ہو نئیں سکدا اے۔ پئی جو کُجھ اساں ویکھیا تے سُنیا اے سو نا آکھیئے؟ تَد اوہناں فیر دھمکی دے کے اوہناں نُوں چھڈ دِتّا۔ کیوں جو لوکاں دے سبّب اوہناں نُوں سزا دین دا کوئی راہ نا لَبّھیا ایس واسطے پئی اوس کمّ دے سببّوں جیہڑا ہویا سی سارے خُدا دی وڈیائی کر دے سن۔ کیوں جو اوہ جَنا جِہدے اُتّے چَنگا ہون دی کرامات ہوئی سی چاھلیاں ورھیاں دے اُتّے اُتّے سی۔ تَد اوہ چُھٹ کے اپنے جوٹی داراں دے کول آئے۔ تے جو کُجھ سردار کاہِناں تے بزُرگاں اوہناں نُوں آکھیا سی بیان کِیتا۔ تے اوہناں جدوں سُنیا اِک دِل ہو کے خُدا نُوں اُچّی اواز نال آکھیا۔ اَے مالک تُوں ای اسمان تے زمین تے سمُندر تے سبھ جو کُجھ اوہناں دے وِچ اے بنایا۔ تُوں پاک رُوح دی راہِیں اپنے بندے ساڈے پئیو داؤد دی زبانی آکھیا۔ پئی غیر قوماں کاہِنُوں شور مچایا۔ تے لوکاں نیں کُوڑے خیال بَدّھے؟ خُداوند تے اوہدے مسِیح دے برخلاف زمین دے بادشاہ اُٹھے۔ تے حاکم اِک سَنگ اکٹّھے ہوئے۔ کیوں جو سَچ مُچ ایس شہر وِچ تیرے پاک خادم یِسُوع دے برخلاف جِہنُوں تُوں مسَح کِیتا۔ ہیرودیس تے پُنطِیُس پِیلاطُس غیر قوماں تے اِسرائیلیاں سَنے ایس لئی اکٹّھے ہوئے۔ پئی اوہ کمّ کرن جِہدا ہونا تیرے ہتّھ تے تیری صلاح نے پہلے ای ٹھہرا رکھیا سی۔ تے ہُن اَے خُداوند ایہناں دِیاں دھمکیاں نُوں ویکھ تے اپنے بندیاں نُوں ایہہ ہِمّت دے پئی بڑی دلیری نال تیرا کلام سُناؤن۔ تے تُوں اپنا ہتّھ ولّ کرن لئی وَدّھا تے تیرے پاک خادم یِسُوع دے ناں اُتّے نشانِیاں تے عجب کمّ وکھائے جان۔ جد اوہناں دُعا منگ لئی تَد اوہ تھاں ہِل گیا جِہدے وِچ اوہ اکٹّھے ہوئے ہوئے سن۔ تے سبھو پاک رُوح نال بھر گئے۔ تے خُدا دا کلام دلیری نال سُنان لگّے۔ تے اِیمانداراں دی جماعت اِک دِل تے اِک جان سی۔ تے کوئی اپنے مال وِچوں کِسے شے نُوں اپنا نئیں سی آکھدا پر اوہ سبھ کُجھ سانجھا رکھدے سن۔ تے رسُول خُداوند یِسُوع مسِیح دے جی اُٹھن دی گواہی بڑی طاقت نال دیندے سن۔ تے اوہناں سبھناں اُتّے بڑا فضل سی۔ کیوں جو اوہناں وِچوں کوئی محتاج نا سی۔ ایس لئی پئی جِنّے زمین تے مکان دے مالک سن اوہنوں ویچ کے وِکِیاں ہویاں شیواں دا مُل لیاؤندے سن۔ تے رسُولاں دے پیراں وِچ رکھدے سن۔ تے ہر اِک نُوں اوہدی لوڑ دے سببّوں وَنڈیا جاندا سی۔ تے یُوسف قوم دا لاوی سی تے کُپرُس دا سی۔ اوہدا ناں رسُولاں نیں برنباس یعنی نصِیحت دا پُتر رکھیا۔ اوہدے کول اِک پَیلی سی۔ جِہنُوں ویچ کے اوس رقم لیا کے رسُولاں دِیاں پیراں وِچ لیا رکھی۔ تے حننیاہ کر کے اِک بندے نے اپنی گھرالی سفِیرہ نال رَل کے ملکیّت ویچی۔ تے گھر والی نال صلاح رَلا کے مُل وِچوں کُجھ رکھ لیا۔ تے کُجھ حِصّہ لے کے رسُولاں دے پیراں وِچ لیا رکھیا۔ پر پطرس آکھیا۔ اَے حننیاہ شیطان تیرے دِل وِچ ایہہ گلّ کیوں پائی پئی تُوں پاک رُوح نُوں فریب دیویں تے زمین دے مُل وِچوں کُجھ رکھ چھڈیں؟ جد تِیکر اوہ رہی تے تیری ای نئیں سی۔ تے جد وِک گئی۔ تے تیرے اختیار وِچ نا رہی؟ تُوں کیوں ایس گلّ نُوں دِل وِچ رکھیا؟ تُوں بندیاں نال فریب نئیں کِیتا پر خُدا نال۔ ایہہ گلّاں سُندیاں ای حننیاہ ڈِگّ پیا۔ تے اوہدا دَم نِکل گیا تے جِنّیاں سُنیا ساریاں نُوں بڑا ڈر لگّا۔ تے جواناں اُٹھ کے اوہنوں کفنایا تے باہر لے جا کے دفنایا۔ تے تِنّ کُو گھنٹیاں دے پِچّھوں اوہدی گھر والی ایس حال توں بے خبر ہو کے اندر آئی۔ تَد پطرس اوہنوں آکھیا مَینُوں دس تُساں پَیلی نُوں اینے توں ویچیا؟ اوہ آکھن لگّی آہو۔ اینے ای توں۔ فیر پطرس اوہنوں آکھیا۔ تُساں کاہِنُوں صلاح کِیتی پئی خُداوند دے رُوح نُوں ازماؤ۔ ویکھ تیرے گھر والے دے دفنان والیاں دے پَیر بُوہے اُتّے نیں تے تینُوں وی باہر لے جان گے۔ اوسے ویلے اوہ اوہدے پیراں کول ڈِگّی۔ تے اوہدا دَم نِکل گیا۔ تے جواناں اندر آ کے اوہنوں مُردہ ویکھیا۔ تے باہر لیجا کے اوہدے گھر والے دے کول دفنایا۔ تے ساری کلِیسیا نُوں تے جِنہاں ایہہ گلّ سُنی ساریاں نُوں بڑا ڈر لگّا۔ تے رسُولاں دے ہتھّوں بُہت کراماتاں تے مُعجزے لوکاں وِچ ظاہر ہوئے تے سبھ اِک دِل ہو کے سُلیمان دے برانڈے وِچ اکٹّھے سن۔ پر ہورناں وِچوں کِسے دا حَوصلہ نا پیا پئی اوہناں وِچ رَل جائے۔ تَد وی لوک اوہناں دی تعرِیف کر دے سن۔ تے ہور وی وَدّھ بندے تے زنانِیاں سگوں جماعتاں دِیاں جماعتاں اِیمان لیا کے خُداوند دے نال مِلدے جاندے سن۔ ایتھوں تِیکر پئی لوک اپنیاں روگِیاں نُوں لیاؤندے۔ تے پلنگاں تے مَنجِیاں اُتّے رکھدے سن ایس لئی پئی پطرس جد آوے اوہدا پر چھاواں ای اوہناں وِچوں کِسے اُتّے پَے جاوے۔ تے یرُوشلِیم دے آلے دوالے دیاں نگراں توں وی بڑا مُلکھ اکٹّھا ہویا تے اوہ اپنیاں روگِیاں نُوں تے اوہناں نُوں جیہڑے پلِیت رُوحاں توں اَوکھے سن لیاؤندے رہے تے اوہناں وِچوں اِک اِک چَنگا ہوگیا۔ تَد سردار کاہِن اُٹھیا۔ تے اوہدے سارے جوٹی دار وی جیہڑے صدوقیاں دے فِرقے دے نیں ساڑے نال بھرے ہوئے سن۔ تے رسُولاں اُتّے ہتّھ چُکے۔ تے اوہناں نُوں عام قیدخانے دے وِچ سُٹ دِتّا۔ پر خُداوند دے فرِشتے رات نُوں قیدخانے دا بُوہا کھو لیا۔ تے اوہناں نُوں باہر لیا کے آکھیا۔ جاؤ تے ہیکل وِچ کھلو کے ایس زِندگی دِیاں سارِیاں گلّاں لوکاں نُوں سُناؤ۔ سو ایہہ سُن کے اوہ سویرے ہیکل وِچ گئے۔ تے سکھالن لگّے۔ جدوں سردار کاہِن اپنے جوٹی داراں دے نال آیا۔ اوہناں صدرِ مجلس نُوں تے بنی اِسرائیل دے بزُرگاں نُوں جمع کِیتا تے قیدخانے وِچ اکھوا گھلّیا پئی اوہناں نُوں لے آؤن۔ جدوں سپاہی اوتھے اَپڑے اوہناں نُوں قیدخانے وِچ نا ویکھیا۔ تے مُڑ کے اوہناں نُوں خبر دِتّی۔ پئی اساں قیدخانے نُوں بڑا ٹکاؤ بند کِیتا ہویا ویکھیا تے پہرے والے بُوہیاں اُتّے کھلوتے ہوئے سن۔ تے جد کھو لیا تے کِسے نُوں اندر نا ویکھیا۔ جد ہیکل دے سردار تے سردار کاہِناں ایہہ گلّاں سُنیاں اوہناں دی بابت بُہت گھبرا گئے۔ پئی ایہہ گلّ کِتّھوں تِیکر وَدھے گی۔ تے کِسے آ کے اوہناں نُوں خبر دِتّی۔ پئی ویکھو اوہ بندے جِنہاں نُوں تُساں قیدخانے وِچ پا دِتّا۔ اوہ ہیکل وِچ کھلو کے لوکاں نُوں سکھالدے نیں۔ تَد سردار سپاہیاں سَنے گیا۔ تے اوہناں نُوں لے آیا۔ پر زبردستی نال نئیں کیوں جو اوہ لوکاں توں ڈر دے سن۔ کِتے اوہ سانُوں پتّھر نا مارن۔ تے اوہناں نُوں لیا کے پنچایت وِچ کھلار دِتّا تے سردار کاہِن اوہناں نُوں پچُھّن لگّا۔ پئی اساں تُہانوں تاکِید نال حُکم دِتّا سی پئی ایس ناں اُتّے نا سکھالو؟ تے تُساں یرُوشلِیم نُوں اپنی تعلِیم نال بھر دِتّا اے۔ تے ایس بندے دا خُون ساڈے اُتّے لیاؤنا چاہندے ہو۔ پر پطرس تے رسُولاں آکھیا سانُوں خُدا دا حُکم بندیاں دے حُکم نالوں وَدّھ مَنّنا چاہیدا اے۔ ساڈے پئیو دادیاں دے خُدا نے یِسُوع نُوں جوالیا۔ جِہنُوں تُساں لکڑی اُتّے ٹنگ کے مار سُٹّیا۔ اوسے نُوں خُدا مالک تے نجات دین والا مُقرّر کر کے اپنے سَجّے ہتّھ نال اُچیاں کِیتا پئی اِسرائیل نُوں تَوبہ تے گُناہاں دی مُعافی بخشے۔ تے اسی ایہناں گلّاں دے گواہ آں۔ تے پاک رُوح وی گواہ اے۔ جیہڑا خُدا اپنے مَنّن والیاں نُوں دِتّا۔ پر اوہ ایہہ سُن کے اپنے دِل وِچ سڑ گئے۔ تے صلاح کِیتی پئی اوہناں نُوں مار سُٹّیئے۔ تَد گملی ایل ناں دے اِک فریسی نے جیہڑا شریعت دا مُعلّم تے سبھناں لوکاں وِچ عِزّت والا سی۔ صدرِ مجلس وِچ کھلو کے حُکم دِتّا۔ پئی ایہناں بندیاں نُوں ذرا کُو باہر کر دئیو۔ تے اوہناں نُوں آکھیا۔ اے اِسرائیلیو ہوش کرو پئی تُسی ایہناں بندیاں نال کِیہ کرنا چاہندے ہو۔ کیوں جو ایہناں دِناں توں پہلاں تھیُوداس نے اُٹھ کے آکھیا پئی مَیں وی کُجھ آں۔ اوہدے نال چار کُو سو بندے رَل گئے اوہ تاں مار یا گیا تے جِنّے اوہنوں مَن دے سن سارے کھِلرپُلر گئے۔ تے اوہناں دا ککّھ نئیں رہیا۔ اوہدے پِچّھوں مردم شُماری دے دِناں وِچ گلِیل دا یہُوداہ اُٹھیا تے لوکاں نُوں ورغلا کے اپنے مگر کھِچّ لیا۔ اوہ وی ہلاک ہویا تے جِنّے اوہنوں مَن دے سن سبھ کھِلّرپُلّڑ گئے۔ سو ہُن مَیں تُہانوں آکھنا آں۔ پئی ایہناں بندیاں توں ہٹے رہو۔ تے اوہناں نُوں جان دیو۔ کیوں جو جے ایہہ ہدایت تے ایہہ کمّ بندیاں ولّوں اے۔ تاں اوہ برباد کِیتا جائے گا۔ پر جے خُدا ولّوں اے۔ تاں تُسی اوہناں نُوں برباد کر نئیں سکو گے۔ کِتے تُسی خُدا نال وی سامنا کرن والے نا بنو۔ تے اوہناں اوہدی مَن لئی۔ تے جد اوہناں رسُولاں نُوں سدّیا تے مار پَوا کے حُکم کِیتا۔ پئی یِسُوع دے ناں اُتّے گلّ نا کرو۔ تَد اوہناں نُوں چھڈ دِتّا۔ سو اوہ صدرِ مجلس دے اگّوں خُوش ہو کے ٹُر گئے پئی اسی ایس ناں دی خاطر بے عِزّت ہون دے لائق تاں سمجھے گئے۔ تے روز دِہاڑے ہیکل وِچ تے گھر وِچ تعلِیم دین توں تے مسِیح یِسُوع دی اِنجِیل سُنان توں نا مُڑے۔ تے اوہناں دِناں وِچ جد شاگِرد بُہت ہوندے جاندے سن۔ یُونان دے یہُودی عِبرانیاں دے نال کُڑکُڑان لگّے۔ کیوں جو روز دی خبر گِیری وِچ اوہناں دِیاں بیوہ عَورتاں دی پرواہ نئیں سی کِیتی جاندی۔ تَد باراں رسُولاں نیں شاگِرداں دی جماعت نُوں کول سَدّ کے آکھیا۔ ایہہ تے چَنگا نئیں پئی اسی خُدا دا کلام چھڈ کے کھان پِین دا بندوبست کرئیے۔ سو بھراؤ۔ اپنے وِچوں سَتّ نیک ناں بندیاں نُوں لَبّھو۔ جیہڑے رُوح تے دانائی نال بھرے ہوئے ہون۔ پئی اسی اوہناں نُوں ایس کمّ اُتّے مُقرّر کریئے۔ تے اسی آپ دُعا تے کلام دی خِدمت وِچ رُدھے رہاں گے۔ تَد ایہہ گلّ ساری جماعت نُوں چنگی لگّی۔ تے اوہناں ستِفنُس کر کے اِک جَنے نُوں جیہڑا اِیمان تے پاک رُوح نال بھریا ہویا سی۔ تے فِلپُّس تے پرُخُرس تے نیکانور۔ تے تِیمون تے پرمناس۔ تے نیکُلاؤس انطاکی نُوں جیہڑا نواں یہُودی مُرید سی چُنیا۔ تے اوہناں نُوں رسُولاں دے اگّے کھلار دِتّا۔ تے اوہناں دُعا منگ کے اوہناں اُتّے ہتّھ رکھّے۔ تے خُدا دا کلام وَدھدا گیا۔ تے یرُوشلِیم وِچ شاگِرداں دی گنتری بُہت وَدّھ گئی۔ تے بتھیرے کاہِن ایس دِین وِچ آگئے۔ تے ستِفنُس فضل تے طاقت نال بھریا ہویا وڈّے وڈّے مُعجزے لوکاں وِچ کر دا سی۔ تَد اوس جماعت وِچوں جیہڑی لِبرتیِنیاں دی اکھواؤندی اے۔ تے کُرینی تے اِسکندریہ دے لوکاں وِچوں۔ تے اوہنوں وِچوں وی جیہڑے کِلِکیہ تے آسِیہ توں آئے ہوئے سن۔ کئی بندے اُٹھ کے ستِفنُس نال بحث کرن لگّے۔ تے اوہ اوس دانائی تے رُوح اگّے جِہدے نال اوہ بولدا سی کھلو نا سکے۔ تَد اوہناں بندیاں نُوں چُکیا۔ پئی آکھن۔ پئی اساں اوہنوں مُوسیٰ تے خُدا دی بابت کُفر دِیاں گلّاں آکھدیاں سُنیا اے۔ تے اوہناں لوکاں تے بزُرگاں تے فقِیہاں نُوں اُبھاریا۔ تے اوہدے اُتّے چڑھ آئے۔ تے اوہنوں پھڑ کے پنچایت وِچ لے گئے۔ تے گواہاں نُوں ایہہ آکھن لئی کھلاریا پئی ایہہ جَنا ایس پاک تھاں تے شریعت دے برخلاف بولن توں باز نئیں آؤندا۔ اساں اوہنوں ایہہ آکھدیاں سُنیا اے پئی ایہہ ای یِسُوع ناصری ایس تھاں نُوں ڈھاوے گا۔ تے جیہڑیاں رِیتاں مُوسیٰ دے راہِیں سانُوں مِلیاں نیں بدل دیوے گا۔ تے صدرِ مجلس دے سارے بہن والیاں اوہدے ولّ دھیان کر کے ویکھیا پئی اوہدا مُکھڑا فرِشتے دے مُکھڑے وانگر اے۔ تَد سردار کاہِن آکھیا پئی ایہہ گلّاں ایسے طرح نیں؟ اوہ آکھن لگّا۔ بھراؤ تے بزُرگو سُنو! ساڈے پئیو ابرہام نُوں جدوں مسوپتامِیہ وِچ سی اوہدے حاران وِچ وَسّن توں پہلاں جلال دے خُدا نے وکھالی دِتّی۔ تے اوہنوں آکھیا پئی اپنے دیس تے انگ ساکاں وِچوں نِکل جا۔ تے جیہڑا دیس مَیں تینُوں دساں اوتھے ٹُر جا۔ تَد کسدِیاں دے دیس وِچوں نِکل کے اوہ حاران وِچ جا وسّیا۔ تے اوہدے پئیو دے مرن پِچّھوں خُدا نے اوہنوں اوتھوں ٹور کے ایس دیس وِچ وسایا جِتّھے ہُن تُسی رہندے ہو۔ تے اوہدے وِچ کُجھ وِرثہ سگوں پَیر رکھن دا تھاں نا بخشیا۔ تے اوس وعدہ کِیتا۔ پئی وِرثہ لئی مَیں تینُوں تے تیرے پِچّھوں تیری اولاد نُوں ایہہ دیاں گا۔ بھانویں اوہدا اجے کوئی بچّہ نئیں سی۔ تے خُدا اینج آکھیا پئی اوہدی اولاد پردیس وِچ اوپری ہو کے رہے گی۔ اوہ اوہنوں چار سَو ورھیاں تِیکر غلامی وِچ رکھن گے۔ تے اوہناں نُوں خراب کرن گے۔ تے خُدا آکھیا پئی مَیں اوس قوم نُوں جِہدے اوہ غلام بنن گے سزا دیاں گا تے اوہ مگروں نِکلن گے۔ تے ایسے تھاں میری عبادت کرن گے۔ تے اوس اوہدے نال سُنتی بہن دا عہد بَدّھا۔ تے ایویں اِضحاق اوہدے توں جمّیا۔ تے اٹھویں دِہاڑے اوس اوہنوں سُنتی بہایا تے اِضحاق توں یعقُوب تے یعقُوب توں باراں وَڈارُو جمّے۔ تے اوہناں وَڈّارواں یُوسف نُوں ساڑے نال ویچ دِتّا پئی مِصر نُوں کھڑیا جائے تے خُدا اوہدے نال سی۔ تے اوہنوں اوہدیاں سارِیاں تنگِیاں توں چھڈایا۔ تے مِصر دے بادشاہ فِرعون دی نظر وِچ اوہنوں فضل تے دانائی دِتّی۔ تے اوس اوہنوں مِصر اُتّے تے اپنے سارے گھر اُتّے سردار مُقرّر کِیتا۔ پر سارے مِصر تے کِنعان وِچ کال پیا۔ تے بڑی تنگی آئی۔ تے ساڈے وڈّیاں نُوں خُوراک نئیں سی لَبھّدی۔ تے یعقُوب جد سُنیا پئی مِصر وِچ اَن پانی اے۔ تَد پہلی واری ساڈے وڈّیاں نُوں گھلّیا۔ تے دُوجی وار یُوسف اپنے بھراواں توں سہیانیا گیا نالے یُوسف دا گھرانا فِرعون نُوں معلُوم ہو گیا۔ تَد یُوسف اپنے پئیو یعقُوب تے سارے انگ ساکاں نُوں جیہڑے پنجہتر بندے سن سدّیا۔ تے یعقُوب مِصر وِچ گیا۔ تے اوہ آپ مر گیا۔ تے ساڈے وڈّے وی۔ تے اوہناں نُوں سِکم نُوں چُک کے لے گئے۔ تے اوس مقبرے وِچ دفنایا جیہڑا ابرہام نے ہمُور دے پُتراں کولوں سِکم وِچ رُپئے دے کے مُل لیا سی۔ پر جدوں اوس وعدے دا ویلا جیہڑا خُدا ابرہام نال کِیتا سی نیڑے آیا۔ تاں اوہ لوک مِصر وِچ وَدھے تے گنتری وِچ بُہت ہوگئے۔ اوس ویلے تِیکر پئی مِصر دا اِک ہور بادشاہ ہویا۔ جیہڑا یُوسف نُوں نئیں سی جان دا۔ اوس ساڈی قوم نال چترائی کر کے ساڈے وڈّیاں نال بدسلوکی کِیتی۔ پئی اوہ اپنے بچّیاں نُوں ایس لئی باہر سُٹّن پئی اوہ جِیوندے نا رہن۔ اوس سَمے وِچ مُوسیٰ جمّیا جیہڑا بڑا ای سوہنا سی۔ اوہ تِنّ مہینے پئیو دے گھر وِچ پلیا۔ جد باہر سُٹّیا گیا۔ تَد فِرعون دی دِھی اوہنوں چُک لیا۔ تے اپنا پُتر کر کے پالیا۔ تے مُوسیٰ مِصریاں دے سارے عِلم وِچ تعلِیم پائی تے اپنے کلام تے کمّ وِچ تگڑا سی۔ تے جد اوہ چاہلِیاں کُو ورھیاں دا ہویا۔ اوہدے جی وِچ آیا۔ پئی مَیں اپنے بھراواں بنی اِسرائیل دی خبر لَواں۔ تے اوہناں وِچوں اِک نُوں ظُلم سہندیاں ویکھ کے اوہدی حمایت کِیتی۔ تے مِصری نُوں مار کے اوس دُکھی دا بدلہ لیا۔ کیوں جو اوس سوچیا پئی میرے بھرا سمجھ لین گے پئی خُدا میری ہتّھِیں اوہناں نُوں چُھٹکارا پیا دیندا اے۔ پر اوہ نا سمجھے۔ تے اگلے بَھلک اوہناں وِچ دو پئے لڑ دے سن۔ اوہناں دے کول آیا تے ایہہ آکھ کے اوہناں وِچ صُلح کرانی چاہندا سی پئی اَے بندیو! تُسی تے بھرا بھرا ہو کیوں اِک دُوجے اُتّے ظُلم کر دے ہو؟ پر اوہ جیہڑا اپنے گواہنڈی اُتّے سختی پیا کر دا سی اوہنوں ایہہ آکھ کے دھکّا دِتّا۔ پئی کِس تینُوں ساڈے اُتّے حاکم تے مُنصف مُقرّر کِیتا اے۔ تُوں چاہنا ایں پئی جیویں کل مِصری نُوں وَڈّھ سُٹّیا اے مَینُوں وی وَڈّھ سُٹّیں۔ مُوسیٰ ایس گلّ توں بھجیا۔ تے مِدیان دے دیس وِچ پردیسی ہویا۔ تے اوتھے اوہدے دو پُتر جمّے۔ جد پُورے چالی ورھے ہو گئے۔ تَد سِینا پہاڑ دے بیابان وِچ اِک فرِشتے نے بَلدی جھاڑی دے۔ بھانبڑ وِچ وکھالی دِتّی۔ مُوسیٰ ایہہ اچرج وکھالی ویکھ کے حَیران ہویا۔ تے پتا لین لئی اگّے وَدّھیا۔ تاں خُداوند دی اواز آئی۔ پئی مَیں تیرے پئیو دادیاں دا خُدا ابرہام تے اِضحاق تے یعقُوب دا خُدا ہاں۔ تَد مُوسیٰ کمبیا تے اوہنوں ویکھن دا حَوصلہ نا پیا۔ تے خُداوند اوہنوں آکھیا۔ اپنے پیراں توں جُتّی لاہ۔ کیوں جو جیہڑے تھاں تُوں کھلوتا ایں اوہ پاک زمین اے۔ مَیں نِگاہ کر کے اپنے لوکاں دا جیہڑے مِصر وِچ نیں بُرا حال ویکھیا تے مَیں اوہناں دے ہو کے سُنے۔ تے اوہناں نُوں چھڈان لئی اُتریا آں۔ ایس لئی ہُنے چَل مَیں تینُوں مِصر وِچ گھلاں گا۔ جیہڑے مُوسیٰ توں اوہناں مُنھ موڑیا تے آکھیا پئی کِس تینُوں حاکم تے مُنصف کِیتا اوسے ای نُوں خُدا نے اوس فرِشتے دے راہِیں جِس اوہنوں جھاڑی وِچ وکھالی دِتّی حاکم تے چھڈواؤن والا بنا کے گھلّیا۔ اوہو اوہناں نُوں کڈھ لیایا تے مِصر تے لال سمُندر وِچ تے بیابان وِچ چالی ورھے کراماتاں تے نشانِیاں وکھاؤندا رہیا۔ ایہہ اوہو مُوسیٰ اے جِس بنی اِسرائیل نُوں آکھیا۔ پئی خُدا تُہاڈے بھراواں وِچوں تُہاڈے لئی میرے جِہیا اِک نبی کھلا کرے گا۔ ایہہ اوہ ای جَنا اے۔ جیہڑا بیابان دی کلِیسیا وِچ اوس فرِشتے دے نال سی جیہڑا سِینا پہاڑ اُتّے اوہدے نال گلّاں کر دا سی تے نالے ساڈیاں پئیو دادیاں دے نال سی اوسے نُوں جیون دا کلام مِلیا پئی ساڈے تِیکر پہنچائے۔ اوہدے تابعدار ہونا ساڈے پئیو دادے نئیں سن چاہندے۔ سگوں اوہنوں ہٹا دِتّا تے اپنے دِلاں وِچ مِصر نُوں مُڑ گئے۔ تے ہارُون نُوں آکھن لگّے پئی ساڈے لئی اجیہے بُت بنا جیہڑے ساڈے اگّے اگّے ٹُرن۔ کیوں جو ایہہ مُوسیٰ جیہڑا مِصر دے دیس وِچوں سانُوں کڈھ لیا یا اسی نئیں جان دے پئی اوہنوں کِیہ ہویا۔ تے اوہناں ای دِناں اوہناں اِک وَچّھا بنایا۔ تے اوس بُت اگّے قُربانی لیائے تے اپنے ہتّھاں دے کمّاں اُتّے خُوشی کِیتی۔ تَد خُدا نے اوہناں توں مُنھ موڑیا تے اوہناں نُوں چھڈ دِتّا۔ پئی اسمان دی فَوج نُوں پُوجن جیویں نبیاں دی کتاب وِچ لِکھیا اے۔ پئی اے اِسرائیل دے گھرانے تُسی چالی ورھے تِیکر بیابان وِچ میرے اگّے ذِبح کِیتے ہوئے جنَوراں تے قُربانِیاں نُوں لیاندا؟ سگوں جد تُسی مولک دا تنبُو تے رفان دیوتے دے تارے نُوں چُکی پِھردے سو یعنی اوہ مُورتاں جیہڑیاں تُساں مَتّھا ٹیکن لئی بنائِیاں۔ ایس لئی مَیں تُہانوں کڈھ کے بابل دے پرے چُک کھڑاں گا۔ گواہی دا خیمہ ساڈے وڈّیاں دے نال بیابان وِچ اوہدے حُکم دے سببّوں سی جِس مُوسیٰ نال کلام کر کے آکھیا۔ پئی ایس نمونے وانگر جیہڑا تُوں ویکھیا اے اوہنوں بنا۔ اوسے تنبُو نُوں ساڈیاں پئیو دادیاں اپنے وڈّیاں کولوں لے کے یشُوع دے نال لیاندا جیہڑے ویلے اوہناں قوماں دی ملکیّت اُتّے قبضہ کِیتا جِنہاں نُوں خُدا نے ساڈیاں پئیو دادیاں دے اگّوں کڈھ دِتّا۔ تے اوہ داؤد دے سَمے تِیکر رہیا۔ اوسے دے اُتّے خُدا دی درگاہوں فضل ہویا۔ تے اوس عرض کِیتی۔ پئی یعقُوب دے خُدا دے لئی ڈیرہ بناواں۔ پر سُلیمان اوہدے لئی اِک گھر اُساریا۔ تَد وی حق تعالیٰ ہتّھاں دے بنائے ہوئے تھانواں وِچ نئیں رہندا۔ جیویں نبی آکھدا اے۔ پئی خُدا آکھدا اے۔ اسمان میرا تخت تے زمین میرے پیراں دی چَوکی اے۔ میرے لئی تُسی کِیویں دا گھر اُسارو گے؟ یا کیہڑی جگہ میرے آرام دی اے؟ میرے ہتھّوں ایہہ سارِیاں شیواں نئیں بنیاں؟ اَے ہُوڑمت والیو جیہڑے دِل تے کنّ ولّوں سُنتی نئیں بَیٹھے۔ تُسی ہر ویلے پاک رُوح دا سامنا کر دے ہو جیویں تُہاڈے وڈّے کر دے سن۔ اوسے طرح تُسی کر دے ہو۔ نبیاں وِچوں تُہاڈے وڈّیاں کِنوں نئیں ستایا؟ ہاں اوہناں اوہناں نُوں مار وی چھڈیا جِنہاں اوس راستباز دے آؤن دی خبر اگّوں دِتّی۔ اوہدے ہُن تُسی پھڑان والے تے قتل کرن والے وی بنے ہو۔ تُسی اوہ لوک ہو جِنہاں نُوں فرِشتیاں دی راہِیں شریعت مِلی تَد وی تُساں عمل نا کِیتا۔ ایہہ گلّاں سُندیاں ای اوہ دِلاں وِچ سڑ گئے تے اوہدے اُتّے کچیچیاں وَٹن لگّے۔ پر اوہ پاک رُوح نال بھریا ہویا اسمان ولّ پیا ویکھدا سی۔ تے خُدا دے جلال تے یِسُوع نُوں خُدا دے سَجّے ہتّھ کھلوتیاں ویکھیا۔ تے آکھیا مَیں اسمان نُوں کُھلیا ہویا۔ تے اِبنِ آدم نُوں خُدا دے سَجّے ہتّھ کھلوتا ویکھنا ہاں۔ تے اوہناں اُچّی ڈنڈ پا کے اپنے کنّ بند کِیتے۔ تے اِک دِل ہو کے اوہدے اُتّے آپئے۔ تے شہروں باہر کڈھ کے اوہنوں روڑے مارن لگ پئے تے گواہاں نیں اپنے کپڑے ساؤُل نال دے اِک جوان دے پیراں کول رکھ دِتّے۔ تے ایہہ تاں ستِفنُس نُوں روڑے مار دے رہے تے اوہ ایہہ آکھ کے دُعا پیا منگدا سی۔ پئی اَے خُداوند یِسُوع میری رُوح نُوں قبول کر۔ فیر اوس گوڈے نواکے آکھیا۔ پئی اَے خُداوند ایہہ گُناہ ایہناں دے پیٹے نا پا۔ تے ایہہ آکھ کے اوہ سوؤں گیا۔ تے ساؤُل اوہدے مار دین اُتّے راضی سی۔ تے اوس دِن توں یرُوشلِیم دی کلِیسیا اُتّے بڑا ظُلم ہون لگّا۔ تے رسُولاں نُوں چھڈ کے اوہ سارے یہُودیہ تے سامریہ دے مُلک وِچ کھِلّر گئے۔ تے دِیندار بندیاں ستِفنُس دا کفن دفن کِیتا تے اوہدے لئی بُہت روئے پِٹّے۔ تے ساؤُل گھر گھر وڑ کے کلِیسیا دا ناس کر دا سی تے بندیاں تے زنانِیاں نُوں گھسِیٹ کے قید وِچ پواندا سی۔ سو اوہ جیہڑے کھِلّر گئے سن کلام دی خُوشخبری سُناندے پِھرے۔ تے فِلپُّس سامریہ شہر وِچ جا کے لوکاں وِچ مسِیح دی منادی کرن لگّا۔ تے جد اوہناں سُنیا تے اوہدیاں کراماتاں جیہڑیاں اوہ کر دا سی ویکھیاں تَد بُہت لوکاں اِک دِل ہو کے فِلپُّس دِیاں گلّاں ولّ دھیان کِیتا۔ ایس لئی پئی بتھیرے لوکاں وِچوں پلِیت رُوحاں بڑی ڈنڈ پا کے نِکل آئِیاں۔ تے بتھیرے مفلُوج تے لُوہلے لنگے چنگے بھلے کِیتے گئے۔ تے اوس شہر وِچ بڑی خُوشی ہوئی۔ تے اوہدے توں پہلاں اِک جَنا شمعُون کر کے اوس شہر وِچ رہندا سی جِس اپنے جادُو نال سامریہ دے سارے لوکاں نُوں حَیران کر چھڈیا سی تے اپنے آپ نُوں دسدا سی پئی مَیں بڑا کُجھ ہاں۔ اوہنوں سارے نِکّے توں لے کے وڈّے تِیکر مَن دے تے آکھدے سن پئی ایہہ بندہ خُدا دی اوہ قُدرت اے جیہڑی وڈّی اکھواؤندی اے۔ تے اوس بتھیرے چِر دا جادُو نال اوہناں نُوں حَیران کِیتا ہویا سی ایس لئی اوہ اوہنوں مَن دے سن۔ پر جد اوہناں فِلپُّس نُوں سَچّا مَنّیا۔ جیہڑا خُدا دی بادشاہی تے یِسُوع مسِیح دے ناں دی بابت خُوشخبری دیندا سی تاں بندے تے زنانِیاں سارے بپتِسمہ لین لگّے۔ تے شمعُون آپ وی مَن گیا تے بپتِسمہ لے کے فِلپُّس دے نال ای رہیا۔ تے مُعجزے تے بڑیاں کراماتاں جیہڑیاں ہوندیاں سن ویکھ کے حَیران ہویا۔ تے جد رسُولاں نیں۔ جیہڑے یرُوشلِیم وِچ سن سُنیا پئی سامریاں نیں خُدا دا کلام قبولیا اے۔ تَد پطرس تے یُوحنّا نُوں اوہناں دے کول گھلّیا۔ اوہناں اوتھے جا کے اوہناں دے واسطے دُعا منگی۔ پئی اوہناں نُوں پاک رُوح مِلے۔ کیوں جو اجے توڑی اوہناں وِچوں اوہ کِسے اُتّے اُتریا نئیں سی۔ اوہناں نِرا خُداوند یِسُوع دے ناں دا بپتِسمہ لیا سی۔ تَد اوہناں نیں اوہناں اُتّے ہتّھ رکھّے۔ تے اوہناں نُوں پاک رُوح مِلیا۔ سو شمعُون ایہہ ویکھ کے پئی رسُولاں دے ہتّھ رکھن نال پاک رُوح دِتّا جاندا اے اوہناں اگّے رُپئے کِیتے۔ تے آکھیا ایہہ اختیار مَینُوں وی دیو پئی جِہدے اُتّے مَیں ہتّھ رکھاں پاک رُوح اوہنوں مِلے۔ پر پطرس اوہنوں آکھیا جا تیرے رُپئے تیرے نال ای برباد ہون کیوں جو تُوں خیال کِیتا پئی خُدا دی بخشِش رُپئیاں نال مِل جائے۔ تیرا ایس گلّ وِچ نا حِصّہ اے نا ونڈ کیوں جو تیرا دِل خُدا دے اگّے سِدّھا نئیں اے۔ سو تُوں اپنی ایس بُریائی توں تَوبہ کر۔ تے خُداوند دی مِنّت کر۔ متاں تیرے دِل دی دلیل تینُوں مُعاف کِیتی جاوے۔ کیوں جو مَیں تینُوں لاگا لگّی کَڑتّن تے بدی دے قابُو وِچ ویکھنا آں۔ شمعُون جواب دِتّا۔ پئی تُسی ای میرے لئی خُدا دے اگّے مِنّت کرو۔ پئی جِہدا تُساں ذِکر کِیتا میرے اُتّے کُجھ نا آوے۔ تے جد اوہناں خُوب گواہی دِتّی تے خُدا دا کلام سُنایا تَد یرُوشلِیم نُوں مُڑے تے سامریاں دے بتھیریاں پِنڈاں وِچ خُوشخبری سُناندے گئے۔ پر خُداوند دے فرِشتے فِلپُّس نال کلام کر کے آکھیا۔ پئی اُٹھ۔ تے دَکھّن ولّ اوس راہ اُتّے جا جیہڑا یرُوشلِیم توں غَزّہ نُوں جاندا اے۔ اوہ بیابان اے۔ تے اوہ اُٹھ کے ٹُرپیا تے ویکھو اِک حبشی کُھسرا سی۔ تے حبشِیاں دی رانی کندا دا وزِیر تے اوہدے سارے خزانیاں اُتّے سی یرُوشلِیم وِچ عبادت کرن نُوں آ گیا سی۔ اوہ پرتدیاں ہویاں اپنے رَتھ اُتّے بَیٹھا ہویا۔ یسعیاہ نبی دی کتاب پیا پڑھدا سی۔ تے رُوح فِلپُّس نُوں آکھیا۔ اگّے ہو تے اوس رَتھ نُوں جا رَل۔ تے فِلپُّس اوہدے ولّ بھجیا تے اوہنوں یسعیاہ نبی دی کتاب پڑھدیاں سُنیا۔ تے آکھیا جو کُجھ تُوں پڑھنا ایں اوہدی کُجھ سمجھ وی آؤندی اے؟ اوس آکھیا۔ مَیں کِیویں سمجھاں۔ جِنّاں چِر کوئی مَینُوں راہ نا پائے؟ تے اوس فِلپُّس دی مِنّت کِیتی پئی چڑھ کے میرے نال بَہو۔ تے پاک کتاب دا تھاں جیہڑا اوہ پیا پڑھدا سی سو ایہہ سی۔ پئی اوہ بھیڈ وانگُوں ذِبح ہون لئی کھڑیا گیا۔ تے جیویں لیلا اپنے مُنّن والیاں اگّے بے زبان رہندا اے۔ اوس طرح اپنا مُنھ نا کھولیا۔ اوہدی غرِیبی وِچ اوہدا انصاف نا ہویا۔ تے اوہدی نسل دا بیان کون کرے گا؟ کیوں جو اوہدی زِندگی دھرتی اُتّوں مٹائی جاندی اے۔ تے کُھسرے نے فِلپُّس نُوں آکھیا۔ مِہربانی کر کے مَینُوں دس ایہہ گلّ نبی کِہدے بارے آکھدا اے؟ اپنی یا کِسے ہور دی۔ تَد فِلپُّس اپنا مُنھ کھولیا تے اوس نوِشتے نُوں مُڈھوں لے کے یِسُوع دی خُوشخبری اوہنوں سُنائی۔ تے جاندِیاں جاندِیاں راہ وِچ اوہ اِک پانی اُتّے اَپڑے۔ تاں کُھسرے آکھیا۔ ویکھ ایہہ پانی اے بپتِسمہ لین توں مَینُوں کِیہ روکدا اے؟ [تَد فِلپُّس آکھیا پئی جے توں دِل لا کے اِیمان لِیاویں تے بپتِسمہ لے سکدا ایں۔ اوس جواب دِتّا پئی مَیں اِیمان لیاؤنا پئی یِسُوع مسِیح خُدا دا پُتر ایہہ۔] تَد اوس حُکم کِیتا۔ پئی رَتھ کھلارو۔ تے اوہ دوویں پانی وِچ اُترے فِلپُّس تے کُھسرا وی تے اوس اوہنوں بپتِسمہ دِتّا۔ تے جد اوہ پانیوں نِکل کے باہر آئے۔ تاں خُداوند دا رُوح فِلپُّس نُوں لے گیا۔ تے کُھسرے اوہنوں فیر نا ویکھیا۔ کیوں جو اوہ خُوش ہو کے اپنے راہ ٹُر گیا۔ پر فِلپُّس اشدُود وِچ آ نِکلیا تے اوس لنگھدیاں ہویاں سبھناں شہراں وِچ اِنجِیل سُنائی جدوں تِیکر قَیصریہ وِچ نا آیا۔ تے ساؤُل جیہڑا خُداوند دے شاگِرداں نُوں دھمکان تے قتل کرن پیچھے پیا سی۔ سردار کاہِن دے کول جا کے۔ اوہدے توں دمِشق دیاں عبادت خانیاں دے ناں اُتّے ایس مضمُون دِیاں چِٹّھیاں منگِیاں پئی جے ایس طریقے دے کوئی بندے مِلن بھانویں بندے بھانویں زنانِیاں ہون۔ تے اوہناں نُوں یرُوشلِیم وِچ بَنّھ کے لے آواں۔ تے ایویں ہویا جد اوہ پَینڈا کر دیاں دمِشق دے نیڑے آیا تے اِک دم اسمانوں نُور اوہدے چَوفیرے چمکیا۔ تَد اوہ زمین اُتّے ڈِگّ پیا تے اِک اواز سُنی جیہڑی اوہنوں آکھدی سی۔ اَے ساؤُل۔ اَے ساؤُل تُوں مَینُوں کیوں ستانا ایں؟ اوس آکھیا اَے خُداوند تُوں کون ایں؟ اوس آکھیا مَیں یِسُوع آں جِہنُوں تُوں ستانا ایں۔ پر اُٹھ کھلو تے شہر وِچ جا تے جو کُجھ تینُوں کرنا چاہیدا اے۔ تینُوں دسیا جائے گا۔ تے جیہڑے بندے اوہدے نال پئے پَینڈا کر دے سن چُپ کِیتیاں کھلوتے رہے۔ کیوں جو اواز تے سُندے سن پر کِسے نُوں ویکھدے نئیں سن۔ تے ساؤُل زمین توں اُٹھیا۔ تے جدوں اوہدیاں اَکھّیاں کُھلِیاں اوہنوں کُجھ نظر نا آیا۔ تے اوہدا ہتّھ پھڑ کے اوہنوں دمِشق وِچ لیائے۔ تے تِنّ دِن تِیکر اوہ اَنھا رہیا تے نا کھاندا تے نا پَیندا سی۔ تے دمِشق وِچ حننیاہ کر کے اِک شاگِرد سی۔ اوہنوں خُداوند رویا وِچ آکھیا۔ اے حننیاہ۔ اوس آکھیا اَے خُداوند ویکھ مَیں حاضر آں۔ تَد خُداوند اوہنوں آکھیا اُٹھ تے اوس گلی وِچ جا جیہڑی سِدّھی اکھواؤندی اے۔ تے یہُوداہ دے گھر ساؤُل ناں دے ترسی بندے نُوں پُچھ۔ کیوں جو ویکھ اوہ دُعا پیا منگدا اے۔ تے اوس حننیاہ کر کے اِک بندے نُوں ویکھیا۔ جِس اندر آ کے اوہدے اُتّے ہتّھ رکھیا پئی فیر سُجاکھا ہوئے۔ حننیاہ جواب دِتّا پئی اے خُداوند مَیں بتھیریاں لوکاں کولوں ایس بندے دے بارے سُنیا اے پئی اوس یرُوشلِیم وِچ تیرے پاک لوکاں نال کِنیاں خرابیاں کِیتیاں۔ تے ایتھے وی سردار کاہِناں ولّوں اوہنوں اختیار مِلیا اے۔ پئی تیرا ناں لین والیاں سبھناں نُوں بَنّھ لَوے۔ پر خُداوند اوہنوں آکھیا تُوں جا۔ کیوں جو اوہ غیر قوماں تے بادشاہاں تے بنی اِسرائیل دے اگّے میرا ناں پُہنچان نُوں میرا چُنیا ہویا وسیلہ اے۔ کیوں جو مَیں اوہنوں دس دیاں گا۔ پئی میرے ناں دے بدلے اوہنوں کیڈے کیڈے دُکھ جَھلّنے پَین گے۔ تَد حننیاہ گیا۔ تے اوس گھر وِچ وڑیا تے اپنے ہتّھ اوہدے اُتّے رکھّے تے آکھیا۔ اَے بھرا ساؤُل! خُداوند یعنی یِسُوع جیہڑا تیرے اُتّے اوس راہ وِچ جیہڑے راہ تُوں آیا ایں۔ ظاہر ہویا مَینُوں گھلّیا اے پئی تُوں فیر سُجاکھا ہوویں۔ تے پاک رُوح نال بھر جاویں۔ تے اونویں اوہدیاں اَکھّیاں توں چھائی جِہی لتّھی تے اوہ ویکھن لگ پیا تے اُٹھ کے بپتِسمہ لیا۔ تے کھانا کھا کے اوہنوں طاقت آئی۔ پر اوہ کئی دِن دمِشق وِچ شاگِرداں دے نال رہیا۔ تے اوسے ویلے ای عبادت خانیاں وِچ یِسُوع دی منادی کِیتی پئی اوہ خُدا دا پُتر اے۔ تے سبھ سُنن والے حَیران ہو کے آکھن لگّے۔ ایہہ اوہ نئیں جیہڑا یرُوشلِیم وِچ ایس ناں دے لین والیاں نُوں برباد کر دا سی؟ تے ایتھے وی ایسے مطلب لئی آیا سی پئی اوہناں نُوں بَنّھ کے سردار کاہِناں دے کول اپڑا وے۔ پر ساؤُل نُوں ہور وی طاقت مِلدی رہی ایس گلّ نُوں ثابت کر کے پئی مسِیح ایہو اے۔ اوہنے اوہناں یہُودِیاں نُوں جیہڑے دمِشق وِچ رہندے سن حَیران کِیتا۔ تے جد بُہت دِن لنگھ گئے یہُودِیاں آپو وِچ اوہدے مار سُٹّن دا مَتا پکائیا۔ پر اوہناں دے مَتے دا ساؤُل نُوں پتا لگ گیا۔ تے اوہ رات دِن دروازیاں دے اگّے لگّے رہندے سن۔ پئی اوہنوں مار سُٹّن۔ تَد اوہدے شاگِرداں رات دے ویلے ٹوکرے وِچ بٹھا کے کندھ وِچوں اوہنوں لاہ دِتّا۔ تے جد اوہ یرُوشلِیم وِچ اَپڑیا اوس کوشش کِیتی۔ پئی شاگِرداں دے نال رَل جائے۔ تے سارے اوہدے توں ڈردے سن۔ کیوں جو اوہدے شاگِرد ہون دا یقِین نئیں سن کر دے۔ پر برنباس اوہنوں لے کے رسُولاں دے کول اپڑا دِتّا۔ تے اوہناں نُوں دسیا پئی اوہنے راہ وِچ خُداوند نُوں کِیویں ویکھیا سی تے خُداوند اوہدے نال گلّاں کِیتیاں۔ تے کِس طرح دمِشق وِچ یِسُوع دے ناں اُتّے اوس دلیری نال کلام سُنایا سی۔ تے اوہ اوہناں نال یرُوشلِیم وِچ اندر باہر آؤندا جاندا رہیا۔ تے خُداوند دے ناں اُتّے دلیری نال کلام سُناندا سی۔ تے یُونانی یہُودِیاں نال گلّاں کر دا تے بحث کر دا سی۔ پر اوہ اوہدے مار سُٹّن دا داء لَبّھن لگّے۔ پر جد بھراواں نُوں ایہہ گلّ معلُوم ہوگئی تاں قَیصریہ وِچ لیا کے اوہنوں تَرسُس ولّ ٹور دِتّا۔ تَد سارے یہُودیہ تے گلِیل تے سامریہ وِچ کلِیسیا سُکھ پایا۔ تے ترقی کر دی جاندی سی۔ تے خُداوند دے خَوف تے پاک رُوح دی تسلّی اُتّے چَلدی تے وَدّھدِی جاندی سی۔ تے ایویں ہویا پئی پطرس ہر تھاں پِھردا ہویا اوہناں پاک لوکاں کول وی آیا۔ جیہڑے لُدّہ وِچ رہندے سن۔ تے اوتھے اَینیاس کر کے اِک بندہ اوہنوں ٹکّریا۔ جیہڑا اَٹھاں ورھیاں توں فالج دا ماریا ہویا مَنجی اُتّے پیا سی۔ تے پطرس اوہنوں آکھیا۔ اَے اَینیاس یِسُوع مسِیح تینُوں چَنگا کر دا اے۔ تُوں اُٹھ تے اپنا بسترا سانبھ لے۔ تے اوہ اوسے ویلے اُٹھیا۔ تے لُدّہ تے شارُون دے سارے رہن والے اوہنوں ویکھ کے خُداوند دے ولّ پِھرے۔ تے یافا وِچ اِک شاگِردنی سی جِہدا ناں تبِیتا سی جِہدا مطلب ہرنی اے۔ اوہ نیک کمّاں تے خَیرات کرن وِچ رُدھی رہندی سی۔ تے ایویں ہویا۔ پئی اوہناں دِناں وِچ اوہ بیمار ہو کے مر گئی۔ تے اوہنوں نوھا کے چوبارے اُتّے رکھ دِتّا۔ تے لُدّہ یافا دے نیڑے جو سی ایس واسطے جد شاگِرداں نیں سُنیا۔ پئی پطرس اوتھے ای اے۔ تَد اوہناں دو بندیاں نُوں اوہدے کول گھلّیا پئی عرض کرن پئی ساڈے کول آؤن وِچ چِر نا لا۔ تے پطرس اُٹھ کے اوہناں دے نال ٹُر پیا تے جد اَپڑیا۔ اوہ اوہنوں چوبارے اُتّے لے گئے۔ تے سارِیاں بیوہ زنانِیاں اوہدے کول آ کھلوتیاں۔ تے روندیاں ہویاں جِنّے کُرتے۔ تے کپڑے ہرنی نے اوہناں دے نال ہوندیاں بنائے سن وکھالِدیاں سن۔ پر پطرس اوہناں سبھناں نُوں باہر کڈھ کے تے گوڈے نواکے دُعا منگی۔ تے مَیّت ولّ مُنھ کر کے آکھیا۔ تبِیتا اُٹھ۔ تَد اوس اَکھّیاں کھولِیاں تے پطرس نُوں ویکھ کے اُٹھ بَیٹھی۔ تے اوس ہتّھ وَدّھا کے اوہنوں کھڑیاں کِیتا۔ تے پاک لوکاں تے بیوہ زنانِیاں نُوں سَدّ کے اوہنوں جیوندی اوہناں دے حوالے کِیتا۔ تے ایہہ گلّ سارے یافا وِچ مشہُور ہوگئی۔ تے بُہت لوکاں خُداوند اُتّے اِیمان لیاندا۔ تے اوہ بُہت دِناں تِیکر یافا وِچ شمعُون ناں دے اِک چمرنگ گھر رہیا۔ قَیصریہ وِچ کُرنِیلِیُس کر کے اِک بندہ سی جیہڑا اِطالِیانی کر کے اِک پلٹن دا صُوبیدار سی۔ اوہ اپنے سارے گھرانے سَنے دِیندار تے خُدا کولوں ڈردا سی۔ تے لوکاں نُوں بُہت خَیرات دیندا تے نِت خُدا کولوں دُعا منگدا سی۔ اوس رویا وِچ دِن دے ترِیجے پَہر صاف صاف ویکھیا۔ پئی خُدا دا اِک فرِشتہ اوہدے کول اندر آیا۔ تے اوہنوں آکھیا۔ اَے کُرنِیلِیُس۔ اوس اوہدے ولّ دھیان کر کے ویکھیا۔ تے ڈر کے آکھیا۔ اَے خُداوند کِیہ اے؟ اوس اوہنوں آکھیا۔ تیریاں عرضاں تے تیریاں خَیراتاں یادگیری لئی خُدا دی درگاہ وِچ اَپڑ گِئیاں نیں۔ سو ہُنے ای یافا نُوں بندے گھل تے شمعُون نُوں جیہڑا پطرس اکھواؤندا اے۔ سَدّ لے۔ اوہ شمعُون کر کے اِک چمرنگ دے کول۔ جِہدا گھر سمُندر دے کنڈھے اُتّے اے۔ پَروہنا اے۔ جد فرِشتہ جِس اوس دے نال گلّاں کِیتیاں سن ٹُر گیا۔ تاں اوس اپنے گھر دیاں نَوکراں وِچوں دو زنانِیاں نُوں تے اپنے اردلِیاں وِچوں اِک دِیندار بندے نُوں بُلایا۔ تے سارِیاں گلّاں اوہناں نُوں دسیاں۔ تے اوہناں نُوں یافا ولّ ٹور دِتّا۔ دُوجے دِن جدوں اوہ راہ وِچ لگے جاندے سن۔ تے شہر دے نیڑے اَپڑے۔ پطرس دوپہراں ویلے کوٹھے اُتّے دُعا منگن گیا۔ تے اوہنوں بُھکھ لگّی۔ تے دِل کِیتا پئی کُجھ کھاوے۔ پر جدوں اوہ تیار پئے کر دے سن۔ اوہنوں بے خود ہوگیا۔ تے اسمان نُوں کھلا تے وڈّی چادر وانگُوں اِک شے نُوں چَوہاں پَلیاں توں زمین ولّ لمکدِی ویکھیا۔ اوہدے وِچ وَن سَووَنے چَوکُھر تے زمین دے کِیڑے کاڑے تے وَا دے پنچھی سن۔ تے اوہنوں اِک اواز آئی۔ پئی اَے پطرس اُٹھ ہلال کر کے کھا۔ پطرس نے آکھیا۔ اَے خُداوند کدی وی نئیں۔ کیوں جو مَیں کوئی ناپاک تے پلِیت شے کدی نئیں کھادِی۔ تے دُوجی واری اوہنوں اواز آئی پئی جِہنُوں خُدا پاک کِیتا اے۔ تُوں ناپاک نا بنا۔ ایہہ تِنّ واری ہویا۔ تے اونویں اوہ شے اسمان اُتّے چُکی گئی۔ جد پطرس اپنے دِل وِچ بڑا حَیران پیا ہوندا سی پئی ایہہ رویا جیہڑی مَیں ویکھی اے کِیہ اے۔ تَد ویکھو اوہ بندے جِنہاں نُوں کُرنِیلِیُس گھلّیا سی۔ شمعُون دا گھر پُچھدیاں پُچھدیاں بُوہے دے اگّے آ کھلوتے۔ تے اواز مار کے پُچھیا پئی شمعُون جیہڑا پطرس اکھواؤندا اے ایتھے پَروہناں اے؟ جد پطرس اوس رویا دی سوچ وِچ سی۔ رُوح اوہنوں آکھیا۔ ویکھ تِنّ بندے تینُوں لبّھدے نیں۔ پر تُوں اُٹھ تے اُتر جا تے اوہناں دے نال جا تے جھجھگ نا کر۔ کیوں جو اوہ میرے گھلّے آئے نیں۔ تَد پطرس اُٹھ کے اوہناں بندیاں نُوں آکھیا۔ جِہنُوں تُسی لبّھدے ہو ویکھو مَیں ای آں۔ تُسی کِس کر کے آئے ہو؟ اوہناں آکھیا پئی کُرنِیلِیُس صُوبیدار جیہڑا نیک تے خُدا کولوں ڈردا اے۔ تے یہُودِیاں دی ساری قوم وِچ نیک ناں اے اوہنوں اِک پاک فرِشتہ دی راہِیں حُکم مِلیا۔ پئی تینُوں اپنے گھر وِچ سَدّ لیا وے تے تَیتھوں گلّاں سُنے۔ سو اوس اوہناں نُوں اندر لے جا کے سیوا کِیتی۔ تے دُوجے دِن اُٹھ کے اوہناں دے نال ٹُر پیا۔ تے یافا دے بھراواں وِچوں کئی اوہدے نال ٹُر پئے۔ تے اگلے دیہاڑے اوہ قَیصریہ وِچ اَپڑے۔ تے کُرنِیلِیُس اپنے ساکاں انگاں تے گُوڑھیاں دوستاں نُوں اکٹّھے کر کے اوہناں دا راہ پیا ویکھدا سی۔ تے جد پطرس اندر جان لگّا کُرنِیلِیُس اوہنوں آ مِلیا۔ تے اوہدی پَیرِیں پَے کے مَتّھا ٹیکیا۔ پر پطرس اوہنوں اُٹھا کے آکھیا۔ اُٹھ کھلو۔ کیوں جو مَیں وی تے بندہ آں۔ تے اوہدے نال گلّاں کر دا ہویا اندر گیا۔ تے بتھیرے لوک اکٹّھے ہوئے ویکھے۔ تے اوہناں نُوں آکھیا تُسی آپ جان دے اوہ پئی دُوجی قوم والے نال سنگت کرنی یا اوہدے گھر وِچ جانا۔ یہُودی نُوں روا نئیں۔ پر خُدا مَینُوں وکھا لیا اے۔ پئی مَیں کِسے نُوں ناپاک یا پلِیت نا آکھاں۔ ایس لئی مَیں تُہاڈے سَدّن اُتّے بے عُذر آگیا آں۔ ہُن مَیں پُچھنا آں۔ پئی مَینُوں کیہڑی گلّ لئی سدّیا اے؟ تَد کُرنِیلِیُس نے آکھیا چار دِن ہوئے نیں پئی مَیں ایس ویلے تِیکر ترِیجے پَہر دی اپنے گھر وِچ دُعا پیا منگدا ساں۔ تے کِیہ ویکھنا آں پئی میرے سامھنے اِک بندہ چمکن والے کپڑے پائے ہوئے کھلوتا ہویا۔ آکھدا اے۔ اَے کُرنِیلِیُس تیری دُعا سُنی گئی۔ تے تیری خَیرات دی خُدا دی درگاہ وِچ یاد ہوئی۔ ایس لئی یافا وِچ کِسے نُوں گھل کے شمعُون نُوں جیہڑا پطرس اکھواؤندا اے۔ اپنے کول سَدّ۔ اوہ شمعُون چمرنگ دے گھر وِچ سمُندر دے کنڈھے اُتّے پَروہنا اے۔ خَیر مَیں اوسے ویلے تیرے کول گھلّیا تے تُوں چَنگا کِیتا پئی آ گیا ایں۔ سو ہُن اسی سبھو خُدا دے اگّے حاضر ہاں۔ پئی جو کُجھ خُداوند ولّوں تینُوں حُکم مِلیا ہوئے سو سُنیے۔ تَد پطرس نے مُنھ کھول کے آکھیا۔ سَچ مُچ مَیں جان لیا پئی خُدا کِسے دا لحاظ کرن والا نئیں۔ پر ہر قوم وِچ جیہڑا اوہدے توں ڈردا تے نیکی کر دا اے۔ اوہنوں منظُور اے۔ اوہ کلام جیہڑا اوس یِسُوع مسِیح دی راہِیں (جیہڑا سبھناں دا خُداوند اے۔) بنی اِسرائیل دے کول صُلح دی خُوشخبری سُنا کے گھلّیا۔ اوس گلّ نُوں تُسی جان دے اوہ۔ جیہڑی یُوحنّا دے بپتِسمہ دی منادی دے پِچّھوں گلِیل توں شُروع کر کے سارے یہُودیہ وِچ کھِلّر گئی۔ یعنی یِسُوع ناصری دی بابت پئی خُدا نے پاک رُوح تے قُدرت نال اوہنوں کِیویں مسَح کِیتا۔ اوہ تاں بھلیائی کر دا تے ابلیس دے سارے قابُو کِیتیاں ہویاں نُوں چَنگا کر دا پِھریا۔ کیوں جو خُدا اوہدے نال سی۔ اسی اوہناں ساریاں کمّاں دے گواہ آں جیہڑے اوس یہُودیہ دے دیس تے یرُوشلِیم وِچ کِیتے۔ اوہنوں اوہناں صلِیب اُتّے ٹنگ کے مار وی سُٹّیا۔ پر خُدا نے ترِیجے دِہاڑے اوہنوں فیر جوالیا تے اوہنوں ظاہر ہون دِتّا۔ ساری قوم اُتّے نئیں پر اوہناں گواہاں اُتّے جیہڑے اگیترے خُدا دے چُنے ہوئے سن یعنی ساڈے اُتّے جِنہاں اوہدے مُردیاں وِچوں جی اُٹھن دے مگروں اوہدے نال کھادا پِیتا۔ تے اوس سانُوں حُکم دِتّا پئی لوکاں نُوں منادی کرو۔ تے گواہی دیو پئی ایہہ اوہو اے جیہڑا خُدا ولّوں مُقرّر ہویا پئی جِیوندیاں تے مُردیاں دا انصاف کرن والا ہوئے۔ سارے نبی اوہدے اُتّے گواہی دیندے نیں۔ پئی جو کوئی اوہدے اُتّے اِیمان لیاوے۔ اوہدے ناں اُتّے اپنے گُناہاں دی مُعافی پاوے گا۔ پطرس ایہہ گلّاں اجے پیا آکھدا ای سی پئی کلام دے ساریاں سُنن والیاں اُتّے پاک رُوح اُتریا۔ تے سُنتی بَیٹھے ہویاں اِیمانداراں وِچوں جِنّے پطرس دے نال آئے سن حَیران ہوگئے۔ پئی غیر قوماں دے وِچ وی پاک رُوح دا اِنعام جاری ہو گیا۔ کیوں جو اوہ اوہناں نُوں کئی طرح دی بولیاں بولدے تے خُدا دی وڈیائی کر دیاں پئے سُندے سن۔ تَد پطرس آکھیا۔ کِیہ کوئی بندہ پانی نُوں روک سکدا اے۔ پئی جِنہاں نُوں پاک رُوح مِلیا اے جیویں سانُوں وی مِلیا سی بپتِسمہ نا دِتّا جائے؟ تَد اوس حُکم دِتّا پئی یِسُوع مسِیح دے ناں اُتّے اوہناں نُوں بپتِسمہ دِتّا جاوے۔ فیر اوہناں اوہدی مِنّت کِیتی پئی کُجھ دِن ساڈے کول رہو۔ تَد اوہناں رسُولاں تے بھراواں نُوں جیہڑے یہُودیہ وِچ سن خبر ہوئی۔ پئی غیر قوماں نیں وی خُدا دے کلام نُوں قبول کِیتا۔ تے جدوں پطرس یرُوشلِیم وِچ آیا۔ اوہ جیہڑے سُنتی بَیٹھے ہوئے سن اوہدے نال جھگڑن لگّے۔ پئی تُوں اوہناں بندیاں کول گیا جیہڑے سُنتی نئیں بَیٹھے ہوئے۔ تے اوہناں دے نال کھادا۔ پر پطرس مُڈھ توں اوہناں دے اگّے ترتیب نال بیان کِیتا۔ پئی مَیں یافا دے شہر وِچ دُعا پیا منگدا ساں۔ تے بے خود ہو کے اِک رویا ویکھی۔ تے اسمانوں چَوہاں پَلیاں توں لمکائی ہوئی کِسے وڈّی چادر جِہی اِک شے اُتر دی میرے تِیکر آئی۔ مَیں اوہنوں دھیان کر کے سوچیا تے زمین دے ڈنگر تے بیابانی جنَور تے کِیڑے کاڑے تے وَا دے پنچھیاں نُوں ویکھیا۔ تے مَیں اِک اواز وی سُنی جیہڑی مَینُوں آکھدی سی اَے پطرس اُٹھ ہلال کر کے کھا۔ مَیں آکھیا اَے خُداوند کدی نئیں کیوں جو کوئی ناپاک یا پلِیت شے کدی میرے مُنھ وِچ نئیں گئی۔ تے جواب وِچ دُوجی وار اسمانوں اواز آئی۔ پئی جِہنُوں خُدا پاک کِیتا اے اوہنوں تُوں ناپاک نا بنا۔ ایہہ تِنّ واری ہویا۔ فیر سبھ کُجھ اسمان ولّ کھِچّیا گیا۔ تے ویکھو اوسے ویلے تِنّ بندے جیہڑے قَیصریہ توں میرے کول گھلّے گئے سن۔ اوس گھر اگّے جِتّھے اسی ساں پہنچ گئے۔ تے رُوح مَینُوں آکھیا۔ تُوں جھجھگیا نا کر۔ اوہناں دے نال ٹُر جا۔ تے ایہہ چھ بھرا میرے نال ٹُر پئے۔ تے اسی اوس بندے دے گھر وِچ گئے۔ تے اوس سانُوں دسیا پئی کِیویں اوس اِک فرِشتے نُوں اپنے گھر وِچ کھلوتا ویکھیا۔ جِس اوہنوں آکھیا۔ پئی یافا وِچ گھل تے شمعُون نُوں جیہڑا پطرس اکھواؤندا اے سَدّ۔ اوہ تینُوں اجیہاں گلّاں سُنائے گا جِنہاں توں تینُوں تے تیرے سارے گھرانے نُوں وی نجات مِلے گی۔ تے جیویں مَیں بیان کرن لگّا۔ تَد پاک رُوح اوہناں دے اُتّے اُتریا۔ جیویں پہلاں ساڈے اُتّے وی اُتریا سی۔ تَد مَینُوں خُداوند دی گلّ جیہڑی اوس آکھی یاد آئی۔ پئی یُوحنّا تاں پانی نال بپتِسمہ دِتّا۔ پر تُہانوں پاک رُوح نال بپتِسمہ مِلے گا۔ سو جدوں خُدا اوہناں نُوں اوہی نِعمت دِتّی جیہڑی سانُوں دِتّی گئی۔ جِس ویلے اسی خُداوند یِسُوع مسِیح اُتّے اِیمان لیائے تاں مَیں کون ساں جیہڑا خُدا نُوں روک سکدا؟ اوہ ایہہ سُن کے چُپ کر گئے۔ تے خُدا دی وڈیائی کر کے آکھن لگّے۔ تَد تے غیر قوماں نُوں وی خُدا زِندگی لئی تَوبہ بخشی اے۔ تے جیہڑے بندے اوس دُکھ مُصِیبت دے سببّوں جیہڑی ستِفنُس دے سبّب نال پئی سی کھِلّر گئے سن۔ سو فینِیکے کُپرُس تے انطاکیہ تِیکر اَپڑے۔ تے یہُودِیاں باہجوں کِسے نُوں کلام نئیں سن سُناندے۔ تے اوہناں وِچوں کئی کُپرُسی تے کئی کُرینی سن جِنہاں انطاکیہ وِچ آن کے یُونانِیاں نال وی کلام کِیتا۔ تے خُداوند یِسُوع دی خُوشخبری سُنائی۔ تے خُداوند دا ہتّھ اوہناں دے اُتّے سی۔ تے بتھیرے لوک جیہڑے اِیمان لیائے خُداوند ولّ پِھرے۔ تے اوہناں دی بابت یرُوشلِیم دی کلِیسیا دے کنّ وِچ خبر آئی۔ تَد اوہناں برنباس نُوں انطاکیہ تِیکر گھلّیا۔ جد اوہ اَپڑیا تے خُدا دا فضل ویکھیا۔ تَد خُوش ہویا۔ تے اوس اوہناں سبھناں نُوں نصِیحت کِیتی پئی دِل لا کے خُداوند نال مِلے رہن۔ کیوں جو اوہ چَنگا بندہ سی تے پاک رُوح تے اِیمان نال بھریا ہویا سی۔ تے بتھیرے لوک خُداوند دی کلِیسیا نال آ رَلے۔ تے ساؤُل نُوں لَبّھن لئی اوہ تَرسُس نُوں ٹُر گیا۔ تے اوہنوں لَبّھ کے انطاکیہ وِچ لے آیا۔ تے ایویں ہویا پئی اِک سال تِیکر اوہ کلِیسیا دے نال اکٹّھے رہے۔ تے بُہت لوکاں نُوں تعلِیم دیندے سن۔ تے شاگِرد پہلاں انطاکیہ وِچ ای مسِیحی اکھوائے۔ اونہی دِنیں کئی نبی یرُوشلِیم توں انطاکیہ وِچ آئے۔ اوہناں وِچوں اِک اَگَبُس کر کے اُٹھیا۔ تے رُوح دی راہِیں خبر دِتّی۔ پئی ساری دُنیا وِچ بڑا کال پَین والا اے۔ تے کلَودِیُس دے سَمے وِچ ایہہ کال پَے گیا۔ تَد شاگِرداں وِچوں ہر اِک نے اپنی اپنی توفِیق دے سببّوں ایہہ ٹھہرایا۔ پئی اوہناں بھراواں کول جیہڑے یہُودیہ وِچ رہندے نیں کُجھ مدد واسطے گھلِئے۔ تے اوہناں ایویں کِیتا تے برنباس تے ساؤُل دی ہتّھِیں بزُرگاں کول گھل دِتّا۔ تے اوہناں دِناں وِچ ہیرودیس بادشاہ کلِیسیا دے کئی لوکاں نُوں دُکھ دین اُتّے لکّ بَدّھا۔ تے یُوحنّا دے بھرا یعقُوب نُوں تلوار نال مار سُٹّیا۔ تے جد ویکھیا پئی یہُودِیاں نُوں ایہہ گلّ چنگی لگدی اے۔ تَد ہور وی وادھا کِیتا پئی پطرس نُوں وی پھڑ لیا ایہہ بے خمیری روٹی دے دِناں وِچ ہویا۔ سو اوہنوں قابُو کر کے قید وِچ پا دِتّا۔ تے چَوہاں چَوہاں سپاہیاں دے چَوہاں پَہریاں وِچ سونپیا۔ پئی اوہدی خبرداری کرن۔ تے ایہہ صلاح کِیتی پئی اوہنوں فسح دی عید دے پِچّھوں لوکاں دے سامھنے لیاوے۔ سو قید وِچ پطرس دی خبرداری ہوندی رہی۔ پر کلِیسیا دِل لا کے اوہدے لئی خُدا کولوں دُعا منگدی سی۔ تے جدوں ہیرودیس اوہنوں باہر لیاؤن نُوں تیار سی۔ اوسے رات پطرس دو سنگلاں وِچ بَدّھا ہویا دو سپاہیاں دے وِچکار سُتّا ہویا سی۔ تے پہرے والے قیدخانے دے بُوہے اگّے پَہرا پئے دیندے سن۔ تے ویکھو خُدا دا اِک فرِشتہ آ کھلوتا۔ تے اوس کوٹھڑی وِچ نُور چمکیا تے اوس پطرس دی وَکھّی اُتّے مار کے جگایا۔ تے اوہنوں آکھیا چھیتی نال اُٹھ کھلو۔ تے اوہدیاں ہتھکڑیاں اوہدیاں ہتّھاں توں جھڑ پئیاں۔ تے فرِشتے اوہنوں آکھیا لکّ بَنّھ تے اپنی جُتّی پا۔ اوس اوسے طرح کِیتا۔ فیر اوس اوہنوں آکھیا۔ اپنا کپڑا دوالے پا۔ تے میرے مگر آ۔ تے نِکل کے اوہ پِچّھے پِچّھے ٹُر پیا تے نئیں سی جان دا پئی جو کُجھ فرِشتے ولّوں پیا ہوندا اے سو سَچ اے۔ پر سمجھیا پئی مَیں رویا پیا ویکھنا ہاں۔ تَد اوہ پہلے تے دُوجے پہرے وِچوں دی نِکل گئے۔ تے لوہے دے پھاٹک تِیکر اَپڑے۔ جیہڑا شہر ولّ اے اوہ آپی اوہناں لئی کُھل گیا۔ تے اوہ نِکل کے اِک گلی وِچوں دی ٹُر پئے فرِشتہ اوس ویلے اوہدے توں وکھرا ہوگیا۔ تے پطرس نے سُرت وِچ آ کے آکھیا۔ ہُن مَیں ٹھیک جانیا پئی خُداوند نے اپنا فرِشتہ گھلّیا۔ تے ہیرودیس دے ہتھّوں مَینُوں بچایا۔ تے یہُودِیاں دی قوم دی ساری آس توڑ دِتّی۔ تَد وچار کر کے اوہ یُوحنّا دی ماں مریم دے گھر آیا۔ جیہڑا مرقس اکھواؤندا اے۔ اوتھے بتھیرے لوک اکٹّھے ہو کے دُعا پئے منگدے سن۔ تے جد اوہ بُوہے دی باری کھڑکاؤندا سی۔ تَد رُدی ناں دی ٹہلن سُنن آئی۔ تے پطرس دی بولی پچھان کے خُوشی نال بُوہا نا کھولیا پر اندر دَوڑ کے خبر دِتّی پئی بُوہے اگّے پطرس کھلوتا اے۔ اوہناں اوہنوں آکھیا۔ تُوں کملی ہوئی ایں۔ پر اوہ اپنی گلّ اُتّے پَکّی رہی۔ پئی ایسے طرح اے۔ تَد اوہناں آکھیا پئی اوہدا فرِشتہ ہوئے گا۔ پر پطرس بُوہا کھڑکاؤندا رہیا۔ تَد اوہناں کھول کے ویکھیا تے حَیران ہوگئے۔ پر اوس ہتّھ نال سینت کِیتی پئی چُپ کر رہن تے اوہناں نُوں دسیا پئی خُداوند مَینُوں کِس طرح قیدخانے توں باہر لیایا۔ تے اوس آکھیا یعقُوب نُوں تے بھراواں نُوں ایہناں گلّاں دی خبر کر دین تے اوہ باہر جا کے دُوجے تھاں ٹُر گیا۔ تے جدوں نِکلیا سپاہیاں وِچ بڑا رَولا پَے گیا۔ پئی پطرس کِیہ ہویا تے جدوں ہیرودیس اوہنوں بھپا تے اوہ نا لَبھّا۔ تے پہرے والیاں توں پُچھ گچھ کر کے اوہناں نُوں قتل کرن دا حُکم دِتّا۔ تے آپ یہُودیہ ٹُرکے قَیصریہ وِچ جا رہیا۔ تے صُور تے صَیدا دے لوکاں نال ہیرودیس بُہت ناراض سی۔ تے اِک دِل ہو کے اوہ اوہدے کول آئے تے بلَستُس نال مَیل کر کے صُلح صفائی کرنی چاہی۔ کیوں جو اوہناں دے مُلک نُوں بادشاہ دے مُلک توں رسد دِیاں شیواں آؤندیاں سن۔ تے ہیرودیس اِک تاریخ مِتھ کے بادشاہی کپڑے پا کے تخت اُتّے بَیٹھ گیا۔ تے اوہناں نال گلّ کرن لگّا۔ تے لوک بول اُٹھے پئی ایہہ تاں خُدا دی اواز اے نا بندے دی۔ تے اونویں خُداوند دے فرِشتے اوہنوں ماریا۔ ایس لئی پئی اوس خُدا دی وڈیائی نئیں کِیتی۔ تے اوہنوں کِیڑے پَے گئے تے مر گیا۔ پر خُدا دا کلام وَدھدا تے پَھلدا رہیا۔ تے برنباس تے ساؤُل اپنی خِدمت پُوری کر کے۔ تے یُوحنّا نُوں جیہڑا مرقس اکھواؤندا اے نال لے کے یرُوشلِیم توں ٹُر گئے۔ تے انطاکیہ دی کلِیسیا وِچ کئی نبی تے اُستاد سن یعنی برنباس تے شمعُون جیہڑا کالا اکھواؤندا اے۔ تے لُوکِیُس کُرینی تے مناہیم جیہڑا چوتھائی مُلک دے حاکم ہیرودیس دے نال پلیا سی۔ تے ساؤُل۔ جد ایہہ خُداوند دی سیوا پئے کر دے سن۔ تے روزے رکھدے سن تَد پاک رُوح آکھیا میرے لئی برنباس تے ساؤُل نُوں وکھرا کرو اوس کمّ واسطے جِہدے لئی مَیں اوہناں نُوں سدّیا اے۔ تَد اوہناں روزہ رکھ کے تے دُعا منگ کے اوہناں اُتّے ہتّھ رکھّے تے گھلّیا۔ سو اوہ پاک رُوح دے گھلّے ہوئے سِلُوکیہ نُوں گئے تے اوتھوں جہاز اُتّے چڑھ کے کُپرُس نُوں ٹُر پئے۔ تے اوہناں سَلَمِیس وِچ اَپڑ کے یہُودِیاں دے عبادت خانیاں وِچ خُدا دا کلام سُنایا۔ تے یُوحنّا اوہناں دی خِدمت کرن والا سی۔ تے جد پافُس تِیکر سارے ٹاپُو دا پھیرا کر لیا۔ تَد بریِسُوع اِک جادُوگر تے جُھوٹھا نبی قوم دا یہُودی اوہناں نُوں مِلیا۔ ایہہ تے سرِگیُس پَولُس صُوبے دار دے نال سی جیہڑا سمجھدار بندہ سی۔ ایہہ برنباس تے ساؤُل نُوں اپنے کول سَدّ کے بُہت چاہندا سی پئی خُدا دا کلام سُنے۔ پر الِیماس جادُوگر نے (کیوں جو ایہو اوہدے ناں دا مطلب اے) اوہناں دی برخلافی کِیتی۔ تے چاہندا سی پئی ڈِپٹی نُوں اِیمان توں ہٹاوے۔ تَد ساؤُل جِہدا ناں پَولُس وی اے پاک رُوح نال بھر کے اوہدے اُتّے تاڑ لائی۔ تے آکھیا سارے مکر فریب دے بھرے ہوئے ابلیس دے بچّے سارِیاں نیکِیاں دے دُشمن تُوں خُداوند دے سِدّھیاں راہاں نُوں ڈِنگا کرنا نئیں چھڈیں گا؟ ہُن ویکھ خُداوند دا ہتّھ تیرے اُتّے اے۔ تُوں اَنھا ہو جاویں گا۔ تے کُجھ چِر تِیکر سُورج نا ویکھیں گا۔ اوسے ویلے اوہدے اُتّے دُھند تے ہنیرا پَے گیا۔ تے اوہ لَبّھدا پِھریا پئی کوئی میرا ہتّھ پھڑ کے لے چلّے۔ تَد صُوبے دار ایہہ حال ویکھ کے تے خُداوند دی تعلِیم توں حَیران ہو کے اِیمان لیاندا۔ تے پافُس توں جہاز اُتّے ٹُر کے پَولُس تے اوہدے جوٹی دار پمفِیلیہ دیس دے پرگہ شہر وِچ آئے پر یُوحنّا اوہناں نُوں چھڈ کے یرُوشلِیم نُوں مُڑ گیا۔ تے پرگہ توں لنگھ کے اوہ پِسدِیہ دے انطاکیہ وِچ اَپڑے۔ تے سبت دے دِن عبادت خانے وِچ جا بَیٹھے۔ تے توریت تے نبیاں دی کتاب پڑھن دے مگروں عبادت خانے دے سرداراں اوہناں نُوں اکھوا گھلّیا۔ پئی بھراؤ جے لوکاں لئی کوئی نصِیحت دی گلّ تُہاڈے کول ہوئے تے آکھو۔ تَد پَولُس اُٹھ کھلوتا۔ تے ہتّھ نال سَینت کر کے آکھیا۔ اَے اِسرائیلیو تے خُدا توں ڈرن والیو سُنو۔ ایس قوم اِسرائیل دے خُدا ساڈے وڈّیاں نُوں چُن لیا۔ تے قوم دا درجہ وَدھایا جدوں ایہہ مِصر دے دیس وِچ پردیسی سی تے زبردست ہتّھ نال اوہناں لوکاں نُوں اوتھوں کڈھ لیایا۔ تے چاھلیاں کُو ورھیاں تِیکر بیابان وِچ اوہناں دی برداشت کِیتی۔ تے کِنعان دے دیس وِچ ستّاں قوماں دا ناس کر کے اوس اوہناں لوکاں دی زمین ایہناں نُوں ساڈھے چار سَو ورھیاں وِچ ونڈ دِتّی۔ تے اوہدے مگروں سموئیل نبی تِیکر اوہناں نُوں قاضی دِتّے۔ اودُوں پِچّھوں اوہناں بادشاہ منگیا۔ تے خُدا چاھلیاں ورھیاں واسطے بِنیمِین دے گھرانے وِچوں قِیس دا پُتر ساؤُل اوہناں نُوں دِتّا۔ فیر اوہنوں ہٹا کے داؤد نُوں اوہناں لئی کھڑا کِیتا پئی اوہناں دا بادشاہ ہوئے۔ تے اوہدی بابت ایہہ گواہی دِتّی۔ پئی مَیں یسّی دے پُتر داؤد نُوں اپنے مَن بھاؤن دا اِک بندہ لَبّھیا۔ اوہو میری ساری مرضی پُوری کرے گا۔ اوسے دی نسل وِچوں خُدا اپنے وعدے دے سببّوں اِسرائیل دے لئی اِک نجات دین والے یِسُوع نُوں ظاہر کِیتا۔ اوہدے آؤن توں پہلاں یُوحنّا اِسرائیل دے ساریاں لوکاں وِچ تَوبہ دے بپتِسمے دی منادی کِیتی۔ تے جدوں یُوحنّا اپنی دَوڑ مُکان نُوں سی اوس آکھیا۔ تُسی مَینُوں کِیہ سمجھدے ہو؟ مَیں اوہ نئیں آں پر ویکھو اِک میرے پِچّھے آؤندا اے۔ جِہدے پیراں دی جُتّی مَیں کھولن دے لائق نئیں۔ بھراؤ۔ ابرہام دئیو پُترو۔ تے تُہاڈے وِچوں جِنّے خُدا توں ڈردے ہو۔ ساڈے لئی ایس نجات دا کلام گھلّیا گیا اے۔ کیوں جو یرُوشلِیم دے رہن والے تے اوہناں دے سرداراں نا اوہنوں پِچھانیا۔ تے نا نبیاں دِیاں گلّاں سمجھِیاں جیہڑیاں سبت نُوں سُنائیاں جاندِیاں نیں۔ ایس واسطے اوہنوں مُجرم کر کے اوہناں نُوں پُوریاں کِیتا۔ تے بھانویں اوہدی مَوت دا کوئی سبّب اوہناں نُوں نا لَبھّا۔ تاں وی اوہناں پِیلاطُس کول درخواست کِیتی۔ پئی اوہ قتل کِیتا جائے۔ جد اوہناں سبھ کُجھ جو اوہدے حق وِچ لِکھیا ہویا سی پُورا کر لیا۔ تَد اوہنوں صلِیب توں لاہ کے قبر وِچ دھریا۔ پر خُدا اوہنوں مُردیاں وِچوں جوالیا۔ تے بُہت دِناں تِیکر اوہناں بندیاں نُوں جیہڑے گلِیل توں یرُوشلِیم نُوں اوہدے نال آئے سن۔ اوہ وکھالی دِتّا۔ تے اوہ ای اوہدے گواہ نیں۔ تے اسی تُہانوں اوس قَول قرار دی خُوشخبری سُنانے آں جیہڑا ساڈے پئیو دادیاں نال ہویا سی۔ پئی یِسُوع نُوں جوا کے ساڈی اولاد لئی خُدا اوسے وعدے نُوں پُوریاں کِیتا اے۔ جیویں دُوجے زبُور وِچ لِکھیا ہویا اے۔ پئی تُوں میرا پُتر ایں۔ اَج تُوں مَیتھوں جمّیا۔ تے ایس گلّ دی بابت پئی اوس اوہنوں مُردیاں وِچوں جوالیا۔ پئی مُڑ مر کے کدی نا ترّکے۔ اوس ایہہ آکھیا اے۔ پئی مَیں داؤد دِیاں پاک تے سَچیاں نِعمتاں تُہانوں بخشاں گا۔ کیوں جو اوہ اِک ہور زبُور وِچ آ کھدا اے۔ تُوں اپنے قُدُّوس نُوں سڑن نا دئیں گا۔ داؤد تاں اپنے سَمے وِچ خُدا دی مرضی دا تابعدار رہ کے سَوں گیا۔ تے اپنے وڈّیاں وِچ جا رلیا تے ترّک گیا۔ پر جِہنُوں خُدا جوالیا۔ اوہ نا ترّکیا۔ بھراؤ تُہانوں پتا ہوئے۔ پئی اوسے دی راہِیں تُہانوں گُناہاں دی مُعافی دی خبر دِتّی جاندی اے۔ تے اوسے دی راہِیں ہر اِک اِیماندار سارِیاں گلّاں توں بَری ہوندا اے۔ جِنہاں گلّاں توں مُوسیٰ دی شریعت نال تُسی بَری نئیں ہو سکدے سو۔ سو خبردار رہو۔ کِتے اجیہا نا ہوئے۔ پئی اوہ گلّ جیہڑی نبیاں دی کِتاباں وِچ آکھی گئی اے۔ تُہاڈے اُتّے آ پَوے۔ پئی اَے حقارت کرن والیو۔ دھیان کرو تے تعجُّب کرو۔ تے فنا ہو جاؤ۔ کیوں جو مَیں تُہاڈے دِناں وِچ اِک کمّ کرنا آں اجیہا کمّ پئی جے کوئی تُہاڈے اگّے بیان کرے تُسی کدی وی سَچ نا مَنّو گے۔ تے باہر جاندِیاں ہویاں لوکاں مِنّت کِیتی پئی اگلے سبت نُوں وی ایہہ گلّاں سانُوں سُنائیاں جان۔ تے جد مجلس اُٹھ گئی۔ تے بُہت یہُودی تے دِیندار یہُودی مُرید پَولُس تے برنباس دے پِچّھے لگ پئے۔ اوہناں نیں اوہناں نُوں گلّاں کر کے مَنالیا۔ پئی تُسی خُدا دے فضل دے اُتّے قیم رہو۔ اگلے سبت دے دِن لگ بھگ سارا شہر خُدا دا کلام سُنن نُوں اکٹّھا ہویا۔ پر یہُودی لوک بِھیڑ نُوں ویکھ کے ساڑے نال بھر گئے۔ تے پَولُس دِیاں گلّاں دی مخالفت کر دے تے کُفر بَکدے سن۔ تَد پَولُس تے برنباس دلیر ہو کے بول اُٹھے۔ ضرُور چاہیدا سی پئی خُدا دا کلام پہلے تُہانوں سُنایا جاندا۔ پر جدوں تُسی اوہنوں رَدّ کر دے ہو۔ تے اپنے آپ نُوں سدا دی زِندگی دے لائق نئیں سمجھدے ہو تے ویکھو اسی غیر قوماں ولّ جانے آں۔ کیوں جو خُدا سانُوں اینج حُکم دِتّا اے پئی مَیں تینُوں غیر قوماں لئی نُور ٹھہرایا۔ پئی تُوں دھرتی دی اخِیر تِیکر نجات دا سبّب ہوویں۔ غیر قوم والے ایہہ گلّاں سُن کے خُوش ہوئے۔ تے خُدا دے کلام دی وڈیائی کرن لگّے تے جِنّے سدا دی زِندگی لئی ٹھہرائے گئے سن سو اِیمان لیائے۔ تے خُدا دا کلام اوس دیس وِچ کھِلّر گیا۔ پر یہُودِیاں نیں دِیندار تے عِزّت دار زنانِیاں تے شہر دے وڈّے بندیاں نُوں چُکیا تے پَولُس تے برنباس دے ستان واسطے اُبھار کے اوہناں نُوں اپنی حدّوں باہر کڈھ دِتّا۔ پر اوہ اپنے پیراں دا گھٹّا اوہناں دے اگّے جھاڑ کے اِکُنِیُم وِچ آئے۔ تے شاگِرد خُوشی تے پاک رُوح نال بھر دے جاندے سن۔ تے اِکُنِیُم وِچ اینج ہویا پئی اوہ دونویں مِل کے یہُودِیاں دے عبادت خانے وِچ گئے تے ایس ڈھنگ نال بولے پئی یہُودِیاں تے یُونانِیاں دی اِک بڑی جماعت نے اِیمان لیاندا۔ پر بے اِیمان یہُودِیاں غیر قوم والیاں نُوں اُبھار کے اوہناں دے دِل بھراواں ولّوں بُرے کر دِتّے۔ سو اوہناں اوس تھاں بڑا چِر لایا۔ تے خُداوند اُتّے آسرا کر کے دلیری نال کلام سُناندے رہے۔ تے اوہ اوہناں دی ہتّھِیں نشانِیاں تے کراماتاں وکھال کے اپنے فضل دے کلام اُتّے گواہی دیندا رہیا۔ تے شہر دے لوکاں وِچ پُھٹ پَے گئی۔ کُجھ تاں یہُودِیاں ولّ تے کُجھ رسُولاں ولّ ہو گئے۔ تے جد غیر قوماں تے یہُودِیاں اپنے سرداراں سَنے فساد چُکیا تاں جو اوہناں نال بدسلوکی کرن۔ تے اوہناں نُوں مارن۔ اوہ ایس گلّ نُوں معلُوم کر کے لُکااُنیہ دے شہراں لُسترہ۔ تے دِربے۔ تے آلے دوالے دے دیس وِچ نَسّ گئے۔ تے اوتھے خُوشخبری سُناندے رہے۔ تے لُسترہ وِچ اِک جَنا جِہدے پیراں وِچ طاقت نئیں سی۔ بَیٹھا ہویا سی۔ اوہ جماندرُو لنگا سی تے کدی ٹُریا نئیں سی۔ اوس پَولُس نُوں گلّاں کر دیاں سُنیاں تے پَولُس اوہدے ولّ غَور نال دھیان کر کے ویکھیا پئی ایہدے وِچ چَنگا ہون نُوں اِیمان اے۔ تاں بڑی اواز نال آکھیا پئی اپنے پیراں اُتّے سِدّھا کھلو تے اوہ چھال مار کے ٹُرن پِھرن لگ پیا جد سارے لوکاں ویکھیا پئی پَولُس کِیہ کِیتا۔ تَد اپنی لُکااُنیہ دی بولی وِچ اُچّی اُچّی آکھن لگّے۔ پئی دیوتے بندے دا رُوپ دھار کے ساڈے کول اُتر آئے نیں۔ تے اوہناں برنباس نُوں زیوس آکھیا تے پَولُس نُوں ہرمِیس آکھیا۔ ایس کر کے پئی بولن وِچ اوہ آگُو سی۔ تے زیوس جِہدا مندر شہر دے سامھنے سی۔ اوہدا پُجاری ڈھگّا تے پُھلّاں دے ہار پھاٹک اُتّے لیا کے سارے لوکاں دے نال قُربانی کرنی چاہندا سی۔ جد رسُولاں برنباس تے پَولُس ایہہ سُنیا۔ تَد اپنے کپڑے پھاڑ کے تے لوکاں دے وِچ چھالاں مار کے کُد پئے۔ تے بڑی اواز نال آکھیا۔ اَے بندیو! تُسی ایہہ کِیہ کر دے ہو؟ اسی وی تُہاڈے جیہے دُکھ سُکھ سہن والے بندے آں تے تُہانوں خُوشخبری دینے آں پئی ایہناں واہیات گلّاں توں لانبھے ہو کے زِندہ خُدا ولّ پِھرو۔ اوسے ای اسمان تے زمین۔ تے سمُندر نُوں۔ تے سبھ کُجھ جو اوہناں دے وِچ اے بنایا اے؟ اوس اگلیاں زمانیاں وِچ سارِیاں قوماں نُوں اپنے اپنے راہاں اُتّے ٹُرن دِتّا۔ تَد وی اوس اپنے آپ نُوں بے گواہ نئیں چھڈیا۔ اوس مہربانِیاں کِیتیاں۔ تے اسمانوں تُہاڈے لئی مینہ وسایا۔ تے فصل والے مَوسم گھلّے۔ تے تُہاڈے دِل اَن پانی تے خُوشی نال بھر دِتّے۔ تے اوہناں ایہہ گلّاں آکھ کے لوکاں نُوں مَساں مَساں روکیا۔ پئی اوہ اوہناں اگّے قُربانی نا چڑھان۔ پر انطاکیہ تے اِکُنِیُم توں آ کے یہُودِیاں لوکاں نُوں اپنے نال رَلایا۔ تے پَولُس نُوں روڑے مارے۔ تے ایہہ سمجھ کے پئی اوہ مر گیا اے شہروں باہر گھسِیٹ کے لے گئے۔ پر جد شاگِرد اوہدے چَوفیرے اکٹّھے ہوئے۔ تَد اوہ اُٹھ کھلوتا۔ تے شہر وِچ آیا۔ تے دُوجے دِن برنباس دے نال دِربے نُوں ٹُر گیا۔ تے اوس شہر وِچ وی خُوشخبری سُنائی۔ تے بتھیریاں نُوں شاگِرد کر کے لُسترہ تے اِکُنِیُم تے انطاکیہ نُوں پِچھّاں پرت گئے۔ تے شاگِرداں دے دِلاں نُوں تگڑیاں کر دے سن تے نصِیحت دیندے سن۔ پئی اِیمان اُتّے قیم رہو۔ تے آکھیا پئی ایہہ ضرُور اے۔ پئی بُہت مُصِیبتاں سہہ کے اسی خُدا دی بادشاہی وِچ داخل ہو جائیے۔ تے روزے تے دُعا نال ہر اِک کلِیسیا وِچ اوہناں دے لئی بزُرگاں نُوں مُقرّر کِیتا۔ تے اوہناں نُوں خُداوند دے سپُرد کِیتا جِہدے اُتّے اوہ اِیمان لیائے سن۔ تے پِسدِیہ دے وِچوں دی لنگھ کے پمفِیلیہ وِچ آئے۔ تے جد پرگہ وِچ کلام سُنا چُکے۔ تَد اتّلیہ وِچ گئے۔ تے اوتھوں جہاز اُتّے چڑھ کے انطاکیہ ولّ گئے۔ جِتّھوں اوہ اوس کمّ دے لئی جیہڑا ہُن اوہناں پُورا کِیتا سی خُدا دے فضل نُوں دِتّے گئے سن۔ تے اوتھے اَپڑ کے کلِیسیا نُوں اکٹّھا کِیتا۔ تے اوہناں نُوں خبر دِتّی۔ پئی خُدا نے ساڈی راہِیں کِیہ کِیہ کمّ کِیتے۔ تے غیر قوماں دے اگّے اِیمان دا بُوہا کھول دِتّا۔ تے شاگِرداں نال چِر تِیکر اوہ اوتھے رہے۔ تے کئی یہُودیہ توں آ کے بھراواں نُوں سکھان لگّے پئی جے مُوسیٰ دی رِیت دے سببّوں تُسی سُنتی نا بَہو تے تُہاڈی نجات نئیں ہو سکدی۔ جد پَولُس تے برنباس دا اوہناں لوکاں نال بُہت جھگڑا تے بحث ہوئی۔ تَد ایہہ گلّ ٹھہرائی پئی پَولُس برنباس تے کئی ہور بندے اوہناں وِچوں ایس مسئلے دے پچُھّن لئی رسُولاں تے بزُرگاں دے کول یرُوشلِیم نُوں جان۔ سو کلِیسیا ولّوں اوہ ٹورے گئے۔ تے غیر قوماں دے اِیمان لیاؤن دا بیان کر دے ہوئے فینِیکے تے سامریہ توں لنگھ گئے۔ تے سبھناں بھراواں نُوں بُہت خُوش کِیتا۔ تے جد یرُوشلِیم اَپڑے۔ تَد کلِیسیا تے رسُولاں تے بزُرگاں نیں اوہناں دی خاطر کِیتی۔ تے جو کُجھ خُدا اوہناں دے نال کِیتا سی۔ سو اوہناں آکھ سُنایا۔ پر فرِیسیاں دے فِرقے وِچوں بعضے جیہڑے اِیمان لیائے سن اُٹھ کے آکھن لگّے پئی ضرُور اوہناں نُوں سُنتی بہن دا تے مُوسیٰ دی شریعت نُوں مَنّن دا حُکم دین۔ تے رسُول تے بزُرگ اکٹّھے ہوئے پئی ایس گلّ نُوں سوچن۔ تے جد بُہت بحث ہوئی۔ پطرس اُٹھ کے اوہناں نُوں آکھن لگّا۔ اَے بھراؤ تُسی جان دے ہو۔ پئی وَاہوَا چِر ہویا اے۔ خُدا تُہاڈے وِچوں مَینُوں چُن لیا۔ پئی میری زبانی غیر قوم خُوشخبری دا کلام سُنن تے اِیمان لیاؤن۔ تے خُدا جیہڑا دِلاں نُوں جانن والا اے اوہناں اُتّے گواہی دِتّی۔ پئی جیویں سانُوں تے اوہناں نُوں وی اوس پاک رُوح دِتّا۔ تے اوہناں دے دِل اِیمان نال پاک صاف کر کے ساڈے تے اوہناں دے وِچ کُجھ فرق نا رکھیا۔ سو ہُن تُسی کیوں خُدا نُوں ازماؤندے ہو۔ پئی شاگِرداں دی دَھون اُتّے اجیہی پنجالی رکھو۔ جِہنُوں نا اسی چُک سکدے تے نا ساڈے پئیو دادے چُک سکدے سن؟ سگوں سانُوں یقِین اے۔ پئی جیویں اوہناں نُوں اوسے طرح سانُوں وی خُداوند یِسُوع دے فضل نال نجات مِلے گی۔ تَد ساری جماعت چُپ کر گئی۔ تے برنباس تے پَولُس توں سُنن لگّے۔ پئی خُدا نے کہیو جِہیاں نشانِیاں تے کراماتاں اوہناں دی ہتّھِیں غیر قوماں وِچ وکھالِیاں سن۔ تے جدوں اوہ چُپ ہوئے۔ تے یعقُوب آکھن لگّا پئی بھراؤ! میری سُنو۔ شمعُون بیان کِیتا اے۔ پئی کِیویں خُدا پہلوں غیر قوماں اُتّے نِگاہ کِیتی۔ پئی اوہناں وِچوں اِک اُمّت نُوں اپنے ناں دے لئی چُن لَوے۔ تے ایس گلّ نال نبیاں دے کلام رَلدے نیں۔ جیویں لِکھیا اے۔ پئی ایہدے توں پِچّھے مَیں فیر آواں گا۔ تے داؤد دے ڈِگّے ہوئے ڈیرے نُوں مُڑ کھلا کراں گا۔ تے اوہدے کھولے فیر کھلے کراں گا۔ تے اوہنوں مُڑ کے اُساراں گا۔ تاں جو باقی دے بندے خُداوند نُوں لَبّھن۔ نالے سارے غیر قوم والے وی۔ جیہڑے میرے ناں دے اکھواؤندے نیں۔ اوہ خُداوند ای ایہہ گلّاں آکھدا اے۔ جِس دُنیا دے مُڈھوں ایہناں گلّاں دی خبر دِتّی اے۔ ایس کر کے میری صلاح اے۔ پئی اوہناں لوکاں نُوں جیہڑے غیر قوماں وِچوں خُدا ولّ مُڑ دے نیں اسی اَوکھیاں نا کریئے۔ پر اوہناں نُوں لِکھئے۔ پئی بُتاں دِیاں پلِیتیاں توں تے حرامکاری توں تے گل گُھٹّیاں ہویاں شیواں توں تے لہو توں بچے رہن۔ کیوں جو پرانے زمانے توں شہر شہر مُوسیٰ دی توریت دی منادی کرن والے ہوندے آئے نیں۔ تے اوہ ہر سبت نُوں عبادت خانیاں وِچ پڑھی جاندی اے۔ تَد رسُولاں تے بزُرگاں نیں ساری کلِیسیا سَنے ہَچھّا جانیا۔ پئی اپنے وِچوں کُجھ بندے چُنن تے پَولُس تے برنباس دے نال انطاکیہ نُوں گھلّن۔ یعنی یہُوداہ نُوں جیہڑا برسبّا اکھواؤندا اے۔ تے سِیلاس نُوں جیہڑے بھراواں وِچ وڈّے بندے سن۔ تے اوہناں دے ہتّھ ایہہ لِکھ گھلّیا۔ پئی اوہناں بھراواں نُوں۔ جیہڑے انطاکیہ تے سُوریہ تے کِلِکیہ وِچ رہندے نیں تے غیر قوماں وِچوں نیں۔ رسُولاں تے بزُرگ بھراواں دا سلام۔ اساں سُنیا پئی ساڈے وِچوں کئیاں جا کے گلّاں نال تُہانوں گھبرا دِتّا۔ تے تُہاڈے دِلاں نُوں وگاڑیا پر اساں اوہناں نُوں حُکم نئیں سی دِتّا۔ ایس واسطے اساں اِک دِل ہو کے ہَچھّا جانیا پئی کئی بندیاں نُوں چُن کے اپنے پیارے برنباس تے پَولُس دے نال۔ جیہڑے ایس قِسم دے بندے نیں جِنہاں اپنیاں جاناں نُوں ساڈے خُداوند یِسُوع مسِیح دے ناں اُتّے خطرے وِچ پا دِتّا۔ تُہاڈے کول گھلِئے۔ سو اساں یہُوداہ تے سِیلاس نُوں گھلّیا اے۔ اوہ آپ ایہہ گلّاں مُنھ زبانی دسن گے۔ کیوں جو پاک رُوح نُوں تے سانُوں چَنگا لگّا۔ پئی ایہناں ضرُوری گلّاں دے بِناں تُہاڈے اُتّے ہور کُجھ بھار نا پائیے۔ پئی تُسی بُتاں دے چڑھاویاں توں۔ تے لہو توں۔ تے گل گُھٹّیاں ہویاں شیواں توں۔ تے حرامکاری توں بچے رہو۔ جے تُسی ایہناں شیواں توں اپنے آپ نُوں بچائے رکھو گے۔ تاں چَنگا کرو گے۔ سلامت رہو۔ سو اوہ بھیجوا کے انطاکیہ نُوں آئے۔ تے جماعت نُوں اکٹّھیاں کر کے اوہناں نُوں چِٹّھی دِتّی۔ اوہ اوہنوں پڑھ کے تسلّی دی گلّ توں بُہت خُوش ہوئے۔ تے یہُوداہ تے سِیلاس نے کیوں جو اوہ وی نبی سن بھراواں نُوں بُہت سارِیاں گلّاں دی نصِیحت دے کے تگڑیاں کِیتا۔ تے اوہ کُجھ چِر رہ کے اپنے گھلّن والیاں دے کول راضی خُوشی بھراواں کولوں بھیجوائے۔ [پر سِیلاس نُوں اوتھے رہنا چَنگا لگّا۔] تے پَولُس تے برنباس انطاکیہ وِچ رہ گئے تے بتھیریاں ہورناں لوکاں سَنے خُداوند دے کلام دی تعلِیم تے خُوشخبری دیندے رہے۔ تے کُجھ دِناں پِچّھوں پَولُس نے برنباس نُوں آکھیا۔ پئی چلّئے تے ہر اِک شہر وِچ جِتّھے کِتّھے اساں خُدا دا کلام سُنایا اے۔ فیر بھراواں دی خبر لئیے۔ پئی اوہناں دا کِیہ حال اے۔ تے برنباس دی صلاح سی پئی یُوحنّا نُوں وی۔ جیہڑا مرقس اکھواؤندا اے۔ اپنے نال لے جاوے۔ تے پَولُس ٹھیک نا جانیا پئی اوہنوں نال لے جاوے کیوں جو اوہ پمفِیلیہ وِچ اوہناں توں وَکھ ہوگیا۔ تے کمّ کرن نُوں اوہناں دے نال نئیں سی گیا۔ تے اوہناں وِچ ایڈی اَن بَن ہوگئی۔ پئی اوہ اِک دُوجے توں وکھرے ہوگئے تے برنباس مرقس نُوں نال لے کے جہاز اُتّے چڑھیا تے کُپرُس نُوں ٹُرگیا۔ پر پَولُس سِیلاس نُوں چُنیا۔ تے بھراواں توں خُدا دے فضل دے حوالے ہو کے ٹُرپیا۔ تے کلِیسیاواں نُوں مضبُوط کر دا ہویا سُوریہ تے کِلِکیہ وِچوں لنگھیا۔ تے اوہ دِربے تے لُسترہ وی اَپڑیا۔ تے ویکھو اوتھے تِیمُتِھیُس کر کے اِک شاگِرد سی۔ اوہ اِک اِیمان دار یہُودن دا پُتر سی۔ پر اوہدا پئیو یُونانی سی۔ تے اوہ لُسترہ تے اِکُنِیُم دے بھراواں وِچ نیک نام سی۔ پَولُس دی مرضی سی پئی ایہہ میرے نال چلّے۔ تے اوس علاقہ دے یہُودِیاں دے سبّب اوہنوں لے کے اوہنوں سُنتی بہایا۔ کیوں جو اوہ سبھ جان دے سن پئی اوہدا پئیو یُونانی سی۔ تے شہر شہر لنگھدے ہوئے اوہ اوہناں حُکماں نُوں جیہڑے یرُوشلِیم وِچ رسُولاں تے بزُرگاں نیں ٹھہرائے سن۔ اوہناں نُوں مَنّن واسطے سونپے جاندے سن۔ سو کلِیسیاواں اِیمان وِچ تگڑیاں۔ تے گنتری وِچ دِن بدن وَدّھ ہُندیاں گِئیاں۔ تے اوہ فرُوگیہ تے گلِتیہ دے دیس وِچوں لنگھے۔ کیوں جو پاک رُوح اوہناں نُوں منع کِیتا۔ پئی آسِیہ وِچ کلام نا سُنان۔ تے جد اوہ مُوسیہ دے نیڑے آئے۔ تَد بِتُونیہ وِچ جان دا حیلہ کِیتا پر یِسُوع دے رُوح اوہناں نُوں جان نا دِتّا۔ سو مُوسیہ دے کولوں لنگھ کے اوہ تروآس وِچ آئے۔ تے پَولُس رات دے ویلے رویا ویکھیا۔ پئی اِک مَکِدُنی بندے کھلو کے اوہدی مِنّت پیا کر دا اے پئی ایس پار مَکِدُنیہ وِچ آ کے ساڈی مدد کر۔ جد اوس ایہہ رویا ویکھی اوسے وقت اساں مَکِدُنیہ نُوں جان دا اِرادہ کِیتا۔ ایہہ یقِین کر کے پئی خُدا اوہناں نُوں خُوشخبری سُنان لئی سانُوں سدّیا اے۔ سو تروآس توں جہاز وِچ بَہہ کے سِدّھے سمُتراکے نُوں آئے۔ تے دُوجے دِن نیاپُلِس وِچ۔ تے اوتھوں فِلپّی نُوں جیہڑا مَکِدُنیہ دا شہر اے۔ تے اوس ضِلعے دا پہلا شہر تے رُومِیاں دی بَستی اے۔ آ پہنچے۔ تے کئی دِن اوس شہر وِچ اسی رہے۔ تے سبت دے دِن پھاٹکوں باہر ندی دے کنڈھے اُتّے گئے۔ جِتّھے ساڈی سمجھ وِچ دُعا منگن دا تھاں سی۔ تے بَہہ کے اوہناں زنانِیاں نال جیہڑیاں اکٹّھیاں ہویاں سن گلّاں کرن لگّے۔ تے تھواتِیرہ شہر دی اِک زنانی۔ خُدا دی عبادت کرن والی لُدِیہ کر کے جامنو رنگ ویچن والی وی سُندی سی۔ اوہدا دِل خُداوند کھو لیا پئی پَولُس دِیاں گلّاں اُتّے دِل لاوے۔ تے جد اوس اپنے ٹبّر سَنے بپتِسمہ لیا۔ تَد مِنّتاں کرن لگّی۔ پئی جے تُسی مَینُوں خُداوند دی اِیمان دار سمجھدے ہو۔ تاں میرے گھر وِچ آ کے رہو تے سانُوں مجبُور کر کے لے گئی۔ تے ایویں ہویا پئی جد اسی دُعا منگن دے تھاں نُوں پَے جاندے ساں۔ تاں ٹہلن سانُوں مِلی جِہدے وِچ غَیب دِیاں گلّاں دی رُوح سی۔ تے غَیب دِیاں گلّاں دے دسن نال اوہ اپنے مالکاں لئی بُہت کُجھ کماندِی سی۔ اوس پَولُس دے تے ساڈے مگر لگ کے اُچّی اواز نال آکھیا۔ پئی ایہہ بندے خُدا تعالیٰ دے بندے نیں۔ جیہڑے نجات دا راہ تُہانوں دسدے نیں۔ تے اوہ بُہت دِناں تِیکر ایس طرح کر دی رہی تے پَولُس بڑا کلپیا۔ تے پِچّھے مُڑ کے اوس رُوح نُوں آکھیا۔ مَیں یِسُوع مسِیح دا ناں لے کے تینُوں حُکم کرنا آں پئی ایہدے وِچوں نِکل جا۔ تے اوہ اوسے گھڑی نِکل گئی۔ پر اوہدے مالکاں نیں جدوں ویکھیا پئی ساڈی کمائی دی آس جاندی رہی۔ تاں پَولُس تے سِیلاس نُوں پھڑ کے چَوک وِچ سرداراں دے کول کھِچّ لے گئے۔ تے اوہناں نُوں حاکماں دے اگّے کھڑ کے آکھیا۔ پئی ایہہ بندے یہُودی ہو کے ساڈے شہر نُوں بڑا اَوکھیاں کر دے نیں۔ تے اجیہاں رسماں نُوں دسدے نیں جِنہاں دا مَنّنا تے وَرتنا ساڈے رُومِیاں تے جائز نئیں اے۔ تے بِھیڑ مِل کے اوہناں دے خلاف کھلو گئی۔ تے حاکماں نیں اوہناں دے کپڑے دھُروہ کے پاڑے تے ڈنڈے مارن دا حُکم دِتّا۔ تے اوہناں نُوں بتھیرے ڈنڈے مار کے قید وِچ پا دِتّا۔ تے قیدخانے دے داروغے نُوں پَکّی کِیتی۔ پئی بڑی ہُشیاری نال ایہناں دی راکھی کر۔ اوس ایہہ حُکم پا کے اوہناں نُوں اندرلی جیل وِچ پا دِتّا۔ تے اوہناں دے پیراں نُوں شکنجا ماریا۔ اَدھی رات نُوں پَولُس تے سِیلاس دُعا پئے منگدے سن۔ تے خُدا دے گِیت پئے گاؤندے سن تے قیدی اوہناں دی پئے سُندے سن۔ تے یکدم ایڈا وَڈا بھونچال آیا۔ پئی قیدخانے دِیاں نِیہیاں ہِل گِئیاں تے اوسے ویلے سارے بُوہے کُھل گئے۔ تے سبھناں دِیاں بیڑیاں کُھل گِئیاں۔ تے قیدخانے دا داروغہ جاگ پیا تے جدوں قیدخانے دے بُوہے کُھلے ویکھے۔ تے تلوار کھِچّ کے اپنے آپ نُوں مارنا چاہندا سی۔ کیوں جو اوس سمجھیا پئی قیدی بھج گئے ہون گے۔ تَد پَولُس اُچّی اواز نال آکھیا۔ تُوں اپنا کُجھ نُقصان نا کر۔ اسی سارے ایتھے ای آں۔ تَد اوہ لو منگا کے چھال مار کے اندر آیا۔ تے کنمبدا کنمبدا پَولُس تے سِیلاس دی پَیرِیں ڈِگّا۔ تے اوہناں نُوں باہر لیا کے آکھیا۔ اے صاحَبو! مَینُوں کِیہ کرنا چاہیدا اے۔ پئی میری نجات ہوئے؟ اوہناں آکھیا۔ خُداوند یِسُوع اُتّے اِیمان لیا۔ تاں تُوں تے تیرا ٹبّر بچ جائے گا۔ تَد اوہناں اوہنوں تے نالے سبھناں نُوں جیہڑے اوہدے گھر وِچ سن خُداوند دا کلام سُنایا۔ تے اوہنے رات دی اوسے گھڑی اوہناں نُوں لے کے اوہناں دے پھَٹ دھوتے۔ تے اوہنے تے اوہدے سبھ لوکاں اوسے ویلے بپتِسمہ لیا۔ تے اوہناں نُوں گھر لیا کے اوہناں دے اگّے روٹی رکھی۔ تے اوس خُدا اُتّے اِیمان لیا کے سارے ٹبّر نال بڑی خُوشی کِیتی۔ جد دِن چڑھیا حاکماں نیں پیادیاں دے ہتّھ اکھوا گھلّیا۔ پئی اوہناں بندیاں نُوں چھڈ دیو۔ تَد داروغے نے ایہناں گلّاں دی خبر پَولُس نُوں دِتّی۔ پئی حاکماں تُہاڈے چھڈ دین دا حُکم دِتّا اے۔ سو ہُن نِکلو تے سلامت ٹُر جاؤ۔ پر پَولُس اوہناں نُوں آکھیا۔ ایہناں سانُوں جیہڑے رُومی آں قصور ثابت کِیتیاں بِناں سارے لوکاں دے سامھنے ماریا۔ تے قید وِچ سُٹّیا۔ تے ہُن سانُوں چُپ کِیتیاں کڈھ دیندے نیں؟ ایہہ نئیں ہو سکدا۔ سگوں اوہ آپ آ کے سانُوں باہر لے چَلّن۔ تَد پیادیاں حاکماں نُوں ایہناں گلّاں دی خبر دِتّی تے اوہ ڈر گئے جد سُنیا پئی اوہ رُومی نیں۔ تے آ کے اوہناں تَرلے مِنّت کِیتی تے باہر لیا کے عرض کرن لگّے پئی شہر توں ٹُر جاؤ۔ تے قیدخانے توں نِکل کے اوہ لُدِیہ دے گھر گئے۔ تے بھراواں نُوں ویکھ کے اوہناں نُوں تسلّی دِتّی تے ٹُر پئے۔ تے اوہ امفِپُلِس تے اَپُلّونیہ توں لنگھ کے تھِسّلُنِیکے وِچ اَپڑے۔ اوتھے یہُودِیاں دا اِک عبادت خانہ سی۔ تے پَولُس اپنے دستُور دے سببّوں اوہناں کول گیا۔ تے تِنّاں سبتاں تِیکر پاک کتاب وِچوں اوہناں نُوں سِکھالدا رہیا۔ تے اَنترے کڈھ کے اوہ ثابت کر دا رہیا پئی مسِیح دا دُکھ اُٹھانا تے مُردیاں وِچوں جی اُٹھنا ضرُور سی۔ تے ایہو یِسُوع جِہدی خبر مَیں تُہانوں دینا آں اوہو مسِیح اے۔ اوہناں وِچوں کئیاں مَن لیا۔ تے پَولُس تے سِیلاس نال رَل گئے۔ تے ایسے طرح دِیندار یُونانِیاں دی اِک بڑی جماعت۔ تے نالے بتھیریاں اشراف زنانِیاں وی۔ پر یہُودِیاں نُوں ساڑا پَے گیا۔ تے کئی بازاری شوہدے اوہناں اپنے نال رَلا کے بِھیڑ نُوں اکٹّھا کِیتا تے شہر وِچ رَولا پا دِتّا۔ تے یاسون دا گھر گھیر کے چاہندے سن پئی اوہناں نُوں لوکاں دے اگّے لے آؤن۔ جدوں اوہناں نُوں نا لَبھّا۔ تاں یاسون نُوں۔ تے کئی بھراواں نُوں شہر دے حاکماں کول کھِچّ لیاندا پئی ایہہ بندہ جِنہاں نیں جہان نُوں اُلٹا دِتّا اے۔ ایتھے وی آئے نیں۔ تے یاسون نے ایہناں نُوں پَروہناں رکھیا اے۔ تے ایہناں ساریاں دی کارروائی قَیصر دے حُکماں دے خلاف اے۔ کیوں جو اوہ آکھدے نیں پئی بادشاہ تے ہور ای اے۔ یعنی یِسُوع۔ تے اوہناں لوکاں نُوں تے شہر دیاں حاکماں نُوں ایہہ گلّ سُنا کے گھبرا دِتّا۔ سو اوہناں یاسون تے دُوجیاں توں ضمانت لے کے اوہناں نُوں چھڈ دِتّا۔ پر بھراواں فٹافٹ راتوں رات پَولُس تے سِیلاس نُوں بِیرِیّہ شہر وِچ گھل دِتّا۔ اوہ اوتھے اَپڑ کے یہُودِیاں دے عبادت خانہ وِچ گئے۔ ایس شہر دے لوک تھِسّلُنِیکے دے لوکاں نالوں بھلے مانس سن۔ کیوں جو اوہناں نیں بڑے شَوق نال کلام مَن لیا۔ تے روز روز پاک کتاب وِچ لبّھدے رہئے۔ پئی ایہہ گلّاں ٹھیک ایسے طرح نیں کہ نئیں۔ ایس کر کے اوہناں وِچوں بتھیرے اِیمان لیائے تے نالے بُہت سارِیاں اشراف یُونانی زنانِیاں تے بندے وی اِیمان لیائے۔ جد تھِسّلُنِیکے دے یہُودِیاں نُوں معلُوم ہویا۔ پئی پَولُس خُداوند دا کلام بِیرِیّہ وِچ وی سُناندا اے تاں اوتھے وی لوکاں نُوں چُکیا تے اوہناں وِچ گڑ بڑی پائی۔ تَد بھراواں نیں اوسے ویلے پَولُس نُوں بھیجیا۔ پئی سمُندر ولّ ٹُر جائے۔ پر سِیلاس تے تِیمُتِھیُس اوتھے ای رہے۔ تے پَولُس دے پُہنچان والے اوہنوں اتھینے تِیکر لے گئے تے سِیلاس تے تِیمُتِھیُس دے لئی ایہہ حُکم لے کے ٹُر پئے۔ پئی جیویں ہوئے چھیتی نال اوہدے کول آؤن۔ تے جدوں پَولُس اتھینے وِچ اوہناں نُوں اُڈِیکدا سی۔ تاں شہر نُوں بُتاں نال بھریا ہویا ویکھ کے اوہنوں دِلوں کَوڑ لگّی۔ ایس لئی یہُودِیاں تے دِیندار لوکاں نال عبادت خانے وِچ۔ تے روز روز اوہناں دے نال جیہڑے مِلدے سن۔ بازار وِچ اوہ بحث کر دا سی۔ تے بعضے اِپِکُوری تے ستوئِیکی سِیانے اوہدے نال مُقابلہ کرن لگّے۔ تے بعضیاں نیں آکھیا۔ پئی ایہہ گپّی کِیہ آکھنا چاہندا اے؟ تے ہورناں نیں آکھیا۔ پئی ایہہ بندہ اوپرے دیوتیاں دی خبر دسن والا معلُوم ہوندا اے۔ ایس لئی پئی اوہ یِسُوع دی تے قیامت دی خُوشخبری دیندا سی۔ تے اوہنوں اپنے نال اریوپگُس وِچ لے گئے۔ تے پُچھیا۔ پئی سانُوں معلُوم ہوسکدا اے پئی ایہہ نَوِیں تعلِیم جیہڑی تُوں دسنا ایں کِیہ اے؟ کیوں جو تُوں کُجھ اوپریاں گلّاں ساڈے کنّاں وِچ پانا ایں۔ سو اسی جاننا چاہنے آں۔ پئی ایہناں گلّاں دا کِیہ مطلب اے۔ (کیوں جو سارے اتھینے دے لوک تے پردیسی جیہڑے اوتھے رہندے سن نَوِیاں نَوِیاں گلّاں آکھن تے سُنن دے بِناں اپنا ویہلا ویلا ہور کِسے کمّ وِچ نئیں سن لاندے۔) تے پَولُس تے اریوپگُس دے وِچکار کھلو کے آکھیا۔ اَے اتھینے والیو! مَیں ویکھنا آں پئی سارِیاں گلّاں وِچ تُسی دیوتیاں دے مَنّن والے ہو۔ کیوں جو مَیں لنگھدیاں لنگھدیاں تُہاڈے دیوتیاں اُتّے نظر کر دیاں اِک قُربان گاہ وی ویکھی جِہدے اُتّے ایہہ لِکھیا ہویا سی پئی انجان خُدا دے لئی۔ سو جِہنُوں تُسی انجاتیاں پُوجدے ہو اوہدی خبر مَیں تُہانوں دینا آں۔ خُدا جِہنے جہان تے جو کُجھ اوہدے وِچ اے بنایا۔ اوہ اسمان تے زمین دا مالک ہو کے ہتّھاں دے بنایاں ہویاں بُت خانیاں وِچ نئیں وَسدا۔ تے نا بندیاں دے ہتھّوں سیوا کراندا اے۔ پئی اوہنوں کِسے شے دی تُھڑ پئی ہوئی ہوئے۔ کیوں جو اوہ آپے سبھناں نُوں زِندگی تے ساہ تے سبھ کُجھ دیندا اے۔ تے اوس اِک ای اصل توں بندیاں دِیاں سبھناں قوماں نُوں ساری دھرتی اُتّے دسن لئی پَیدا کِیتا۔ تے اوہناں دِیاں میعاداں تے رہن دِیاں حداں ٹھہرائیاں۔ تاں جو اوہ خُدا نُوں لَبّھن۔ شاید ٹوہ ٹوہ کے اوہنوں لَبّھ وی لین۔ بھانویں اوہ ساڈے وِچوں کِسے توں دُراڈے نئیں اے۔ کیوں جو اوہدے وِچ اسی جِیوندے تے ٹُردے پِھرے دے تے موجُود رہنے آں۔ جیویں بعضے تُہاڈے اپنے شاعِراں نیں وی آکھیا اے۔ پئی اسی تاں اوسے دی نسل آں۔ سو خُدا دی نسل ہو کے سانُوں نئیں چاہیدا پئی ایہہ سمجھیئے۔ پئی ذاتِ اِلہٰی سونے چاندی یا پتّھر وانگُوں اے۔ جیہڑے بندے دی کاریگری تے عقل نال گھڑے ہوئے نیں۔ خُدا تے ناواقفی دے ویلے وِچ خیال نا کر کے ہُن بندیاں نُوں حُکم دیندا اے پئی ساریاں دے سارے ہر تھاں تَوبہ کرن۔ تے اوس اِک دِن وی رکھیا اے۔ جِہدے وِچ اوہ سچیائی نال دُنیا دی عدالت اوس بندے دی راہِیں کرے گا۔ جِہنُوں اوس مُقرّر کِیتا۔ تے اوسے نُوں مُردیاں وِچوں جوال کے لوکاں نُوں ایس گلّ دا یقِین دوایا اے۔ تے جد اوہناں مُردیاں وِچوں جی اُٹھن دی گلّ سُنی تَد کئی مخَول کرن لگّے۔ تے ہورناں آکھیا۔ پئی اسی ایہہ گلّ تَیتھوں فیر سُناں گے۔ سو پَولُس ایویں اوہناں دے وِچوں ٹُر گیا۔ پر کئیاں اوہدے نال رَل کے اِیمان لیاندا۔ اوہناں وِچ دِیونُسی یُس۔ اریوپگُس دا اِک حاکم سی۔ تے دَمَرِس کر کے اِک زنانی تے ہور کئی اوہناں دے نال سن۔ ایدوں پِچّھوں پَولُس اتھینے توں ٹُر کے کُرِنتِھس وِچ آیا۔ تے اوتھے اَکوِلہ کر کے اِک یہُودی اوہنوں مِلیا۔ جِہدا جنم پُنطُس دا سی۔ تے تھوڑا چِر ہویا پئی اوہ اپنی بیوی پرسِکّلہ دے نال اِطالِیہ توں آیا سی کیوں جو کلَودِیُس نے حُکم دِتّا سی پئی سارے یہُودی رُومہ توں ٹُر جان۔ سو اوہ اوہناں دے کول گیا۔ تے ایس لئی پئی اوہناں دا وِپار اِکّو سی۔ اوہناں دے نال رہیا۔ تے اوہ رَل کے کمّ کرن لگّے۔ کیوں جو اوہ وِپار ولّوں تنبُو سیون والے سن۔ تے اوہ ہر سبت نُوں عبادت خانے وِچ جا کے بحث کر دا تے یہُودِیاں تے یُونانِیاں نُوں مناندا سی۔ تے جد سِیلاس تے تِیمُتِھیُس مَکِدُنیہ توں آگئے تَد پَولُس کلام سُنان دے جوش نال مجبُور ہو کے یہُودِیاں اگّے گواہی پیا دیندا سی۔ پئی یِسُوع ای مسِیح اے۔ تے جد اوہ مخالفت کرن تے کُفر بکن لگّے۔ تے اوس اپنے کپڑے پھاڑ کے اوہناں نُوں آکھیا۔ تُہاڈا خُون تُہاڈے سِر اُتّے ہوئے میرے ذِمّے نئیں رہیا۔ ایدوں اگّے غیر قوماں ولّ جاواں گا۔ سو اوہ اوتھوں ٹُرگیا۔ تے طِطُس یُوستُس کر کے خُدا دے اِک بَھگت دے گھر گیا۔ جیہڑا عبادت خانے دا گواہنڈ سی۔ تے عبادت خانے دا سردار کرِسپُس کر کے اپنے سارے گھرانے سَنے خُداوند اُتّے اِیمان لیایا تے بتھیرے کُرِنتھی سُن کے اِیمان لیائے۔ تے بپتِسمہ لیا۔ تَد خُداوند رات دے ویلے رویا وِچ پَولُس نُوں آکھیا پئی نا ڈر سگوں آ کھدا جا تے چُپ نا ہو۔ کیوں جو مَیں تیرے نال ہاں۔ تے کوئی تیرے اُتّے حملہ کر کے تیرا نُقصان نا کر سکے گا۔ کیوں جو ایس شہر وِچ میرے بتھیرے لوک نیں۔ سو اوہ ڈیڑھ وَرھا اوتھے رہیا۔ تے اوہناں وِچ خُدا دا کلام سِکھالدا رہیا۔ تے جد گلیّو اَخیہ دا صُوبے دار سی۔ یہُودی اِک صلاح کر کے پَولُس اُتّے چڑھ آئے۔ تے اوہنوں کچہری وِچ لے گئے۔ تے آکھن لگّے ایہہ جَنا لوکاں نُوں مناندا اے پئی شریعت دے خلاف خُدا دی عبادت کرن۔ تے جد پَولُس اپنا مُنھ کھولن لگّا۔ گلیّو نے یہُودِیاں نُوں آکھیا اَے یہُودیو جے ایہہ ظُلم یا کوئی سخت شرارت ہوندی۔ تے عقل آکھدی اے پئی مَیں تُہاڈی سَہجے نال سُن لَیندا۔ پر جے نِرے لفظاں تے نانواں تے تُہاڈی شریعت دِیاں گلّاں نیں۔ تے تُسی جانو۔ میری نئیں صلاح پئی ایہناں گلّاں دا مُنصف ہوواں۔ تے اوس اوہناں نُوں کچہری وِچوں کڈھ دِتّا۔ تے ساریاں نیں عبادت خانے دے سردار سوستِھینس نُوں پھڑ کے کچہری دے سامھنے ماریا پر گلیّو نے ایہناں گلّاں دی کُجھ پرواہ نا کِیتی۔ تے پَولُس اجے ہور بتھیرے دِن اوتھے رہ کے بھراواں توں وِداع ہویا۔ تے اوس کِنخریہ دے وِچ سِر مُنایا سی کیوں جو اوس مَنّت مَنّی سی۔ تے جہاز اُتّے چڑھ کے سُوریہ نُوں ٹُر پیا۔ تے پرسِکّلہ تے اَکوِلہ اوہدے نال سن۔ تے اِفِسُس وِچ اَپڑ کے اوس اوہناں نُوں اوتھے چھڈیا تے آپی عبادت خانے وِچ جا کے یہُودِیاں نال بحث کرن لگّا۔ تے جد اوہناں اوہدی مِنّت کِیتی پئی ہور تھوڑا چِر رہے اوس نا مَنّیاں۔ سگوں ایہہ آکھ کے۔ پئی جے خُدا چاہے تُہاڈے کول مُڑ آواں گا۔ تے اوہ اوہناں توں وِداع ہویا۔ تے جہاز اُتّے چڑھ کے اِفِسُس توں ٹُر پیا۔ تے اوہ قَیصریہ وِچ اُتر کے یرُوشلِیم نُوں گیا۔ تے کلِیسیا نُوں سلام کر کے انطاکیہ نُوں گیا۔ تے کُجھ چِر اوتھے رہ کے ٹُر پیا۔ تے گلِتیہ تے فرُوگیہ دے دیس وِچ دی لنگھدیاں ہویاں ساریاں شاگِرداں نُوں تگڑا کر دا گیا۔ تے اِک یہُودی اُپلّوس کر کے جِہدا جنم اِسکندریہ دا سی۔ اِک عالِم بندہ اِفِسُس وِچ آیا۔ تے اوہ پاک کتاب وِچ بڑا سُگھڑ سی۔ ایہہ بندہ خُدا دی راہ سِکھیا ہویا سی۔ تے بڑے جوش نال گلّاں کر دا سی۔ تے یِسُوع دی بابت ٹھیک ٹھیک سِکھالدا سی۔ پر نِرا یُوحنّا دا بپتِسمہ جان دا سی۔ تے عبادت خانے وِچ اوہ دلیری نال بولن لگّا۔ جدوں پرسِکّلہ تے اَکوِلہ نے اوہدی سُنی اوہناں اپنے کول لیا کے خُدا دا راہ ہور وی ٹھیک طرح نال اوہنوں دسیا۔ تے جد اوہ اَخیہ نُوں لنگھناں چاہندا سی۔ بھراواں اوہدی ہِمّت وَدّھا کے شاگِرداں نُوں لِکھ گھلّیا۔ پئی اوہنوں چنگی طرح مِلن۔ تے اوس اَپڑ کے اوہناں لوکاں دی بڑی مدد کِیتی جِنہاں فضل نال اِیمان لیاندا سی۔ کیوں جو اوس یہُودِیاں نُوں ساریاں دے سامھنے بڑے زور نال قائل کر دِتّا۔ تے پاک کتاب دی راہِیں صاف ثابت کِیتا۔ پئی یِسُوع ای مسِیح اے۔ تے اینج ہویا جدوں اُپلّوس کُرِنتِھس وِچ سی۔ تَد پَولُس اُپرلے علاقیاں وِچوں دی ہو کے اِفِسُس نُوں آیا۔ تے اوتھے کئی شاگِرد مِلے۔ تے اوس اوہناں نُوں آکھیا۔ جدوں تُساں اِیمان لیاندا۔ تُہانوں پاک رُوح مِلیا؟ اوہناں اوہنوں آکھیا۔ اساں تے اینا سُنیا وی نئیں۔ پئی پاک رُوح وی کُجھ اے۔ تَد اوس آکھیا۔ فیر تُہانوں کِہدا بپتِسمہ مِلیا اے؟ اوہ آکھن لگّے یُوحنّا دا۔ پَولُس آکھیا پئی یُوحنّا نے تَوبہ دا بپتِسمہ دِتّا۔ تے لوکاں نُوں ایہہ آکھیا۔ پئی تُسی اوہدے اُتّے جیہڑا میرے پِچّھے آؤندا اے یعنی یِسُوع اُتّے اِیمان لیاؤ۔ اوہناں ایہہ سُن کے خُداوند یِسُوع دے ناں اُتّے بپتِسمہ لیا۔ جدوں پَولُس اوہناں اُتّے ہتّھ رکھّے۔ تے پاک رُوح اوہناں اُتّے آیا۔ تے اوہ بولیاں بولن تے نبُوّت کرن لگّے۔ اوہ سارے بندے باراں کُو سن۔ فیر اوہ عبادت خانے وِچ جا کے تِنّاں مہِینیاں تِیکر دلیری نال بولدا۔ تے خُدا دی بادشاہی دِیاں گلّاں دی بابت بحث کر دا تے مناندا رہیا۔ تے جد بعضے سخت دِل تے نافرمان ہو گئے۔ تے ساریاں لوکاں دے اگّے ایس راہ نُوں بُرا آکھن لگّے۔ تَد اوس اوہناں توں وَکھریاں ہو کے شاگِرداں نُوں وَکھ کِیتا۔ تے تُرنّس دے مدرسہ وِچ روز بحث کر دا سی۔ ایہہ دو ورھیاں تِیکر ہوندا رہیا۔ ایتھوں توڑی پئی آسِیہ دے سارے رہن والیاں نیں یہُودِیاں تے یُونانِیاں نیں وی خُداوند دا کلام سُنیا۔ تے پَولُس دے ہتھّوں خُدا عجِیب طاقتاں وکھاؤندا سی۔ ایتھوں تِیکر پئی رُومال تے پٹکے۔ اوہدے پنڈے نُوں چُھوا کے بِیماراں اُتّے پاندے سن تے روگ اوہناں توں ہَٹ جاندے سن۔ تے بُریاں رُوحاں نِکل جاندِیاں سن۔ تے کئی یہُودی جھاڑن پُھوکن والے وی اوہناں لوکاں اُتّے جِنہاں نُوں بُریاں رُوحاں چمبڑیاں سن خُداوند یِسُوع دا ناں ایس طرح آکھ کے پُھوکن لگّے پئی جیہڑے یِسُوع دی منادی پَولُس کر دا اے۔ مَیں اوہدی تُہانوں سَونہہ چُکانا آں۔ تے سِکِوا کر کے اِک یہُودی سردار کاہِن دے سَتّ پُتر ایس طرح کر دے سن۔ تے بُری رُوح نے اوہناں نُوں آکھیا۔ پئی یِسُوع نُوں مَیں جاننی آں۔ تے پَولُس نُوں وی پہچاننی آں۔ پر تُسی کون ہو؟ تے اوہ بندہ جِہدے وِچ بُری رُوح سی اوہناں اُتّے کُد کے چڑھ گیا دوہاں اُتّے دابا پا کے اوہناں نُوں اپنے وَس وِچ کر لیا ایتھوں تائیں پئی اوہ اوس گھروں ننگے تے پھٹّے ہوئے بھج نِکلے۔ تے ایہہ گلّ ساریاں یہُودِیاں تے یُونانِیاں نُوں جیہڑے اِفِسُس وِچ رہندے سن معلُوم ہوگئی۔ تے اوہ سبھ ڈر گئے۔ تے خُداوند یِسُوع دے ناں دی وڈیائی ہوئی۔ تے اوہناں وِچوں جِنہاں اِیمان لیاندا سی بتھیریاں آ کے مَن لیا۔ تے اپنے کرتوت دس دِتّے۔ تے بتھیریاں جیہڑے جادُو کر دے سن اپنیاں کِتاباں کٹھِیاں کر کے سبھناں دے اگّے ساڑ دِتّیاں۔ تے جد اوہناں نیں اوہناں دے مُل دا حِساب کِیتا۔ تاں پنجاہ ہزار رُپئے دا ہویا۔ ایسے طرح قُدرت نال خُدا دا کلام وَدھدا تے زور پھڑدا گیا۔ جدوں ایہہ گلّاں ہو گِئیاں۔ تَد پَولُس دِل وِچ فیصلہ کِیتا۔ پئی مَکِدُنیہ تے اَخیہ دے وِچوں ہو کے یرُوشلِیم نُوں جاوے۔ تے آکھیا پئی اوتھے جان دے مگروں مَینُوں رُومہ وی ویکھنا پَوے گا۔ تے اوس اپنے سیوا کرن والیاں وِچوں دو بندے تِیمُتِھیُس تے اِراستُس نُوں مَکِدُنیہ ولّ ٹور دِتّا۔ پر اوہ آپ آسِیہ وِچ کُجھ چِر رہیا۔ تے اوس ویلے ایس راہ دی بابت بڑا رَولا پیا۔ کیوں جو دیمتیِریُس کر کے اِک سُنیارا سی جیہڑا اَرتمس دیوی دے چاندی دے مَندراں نُوں بناندا سی۔ تے کاریگراں نُوں بڑا کھٹاندا سی۔ اوس اوہناں نُوں تے ہورناں نُوں جیہڑے ایہو کسب کر دے سن۔ اکٹّھا کر کے آکھیا۔ اَے لوکو تُسی جان دے ہو پئی ایس کمّ نال ساڈا چَنگا گُذارا چلدا اے۔ تے تُسی ویکھدے تے سُندے ہو۔ پئی نِرا اِفِسُس وِچ نئیں سگوں سارے آسِیہ وِچ۔ ایس پَولُس ایہہ آکھ کے پئی جیہڑے ہتّھاں نال بنائے جاندے نیں۔ اوہ خُدا نئیں۔ بڑی خلقت نُوں سمجھا کے ورغلا یا اے۔ سو نِرا ایہہ خطرہ نئیں پئی ساڈے کمّ دا قدر جاندا رہے پر وڈّی دیوی اَرتمس دا مندر وی اُڈ جائے۔ تے اوہدی وڈیائی وی جاندی رہے جِہنُوں سارا آسِیہ تے ساری دُنیا پُوجدی اے۔ ایہہ گلّ سُن کے اوہ غُصّے نال بھر گئے۔ تے ڈنڈ پا کے آکھن لگّے۔ اِفسِیاں دی اَرتمس وڈّی اے۔ تے سارے شہر وِچ ہُلّڑ مَچ گیا۔ تے سبھ مِل کے گَیُس تے ارِسترخُس نُوں جیہڑے مَکِدُنیہ دے رہن والے تے پَولُس دے سفر وِچ ساتھی سن پَھڑکے تماشے دی تھانویں اِک دِل ہو کے بھج گئے۔ تے جد پَولُس دی مرضی سی۔ پئی مَیں لوکاں دے وِچ جاواں۔ تَد شاگِرداں اوہنوں جان نا دِتّا۔ تے آسِیہ دے کئی سرداراں جیہڑے اوہدے دوست سن آکھ گھلّیا۔ تے اوہدی مِنّت کِیتی۔ پئی تماشے دی تھانویں جان دی دلیری نا کرے۔ کوئی کُجھ رَولا پاندا سی۔ تے کوئی کُجھ۔ تے جماعت وِچ گڑبڑی پَے گئی۔ کیوں جو پَتا نا لگّا۔ پئی اسی کاہدے لئی اکٹّھے ہوئے آں۔ فیر اوہناں اِسکندر نُوں جِہنُوں یہُودی پیش کر دے سن بِھیڑ وِچوں کڈھ کے اگّے کر دِتّا۔ تے اِسکندر ہتّھ نال سینت کر کے چاہندا سی پئی لوکاں دے سامھنے عُذر کرے۔ پر جد اوہناں نیں جانیا پئی ایہہ یہُودی اے تَد دو کُو گھینٹیاں تِیکر اِک اواز ہو کے اُچّی اُچّی آکھدے رہے۔ پئی اِفسِیاں دی اَرتمس وڈّی اے۔ فیر شہر دے مُحرّر نے جماعت نُوں ٹھنڈا کِیتا۔ تے آکھیا۔ اَے اِفسِیو! اوہ کیہڑا بندہ اے۔ جو نئیں جان دا پئی اِفسِیاں دا شہر وڈّی دیوی اَرتمس دے مندر تے اوس مُورت دا رکھوالا اے۔ جیہڑی زیوس ولّوں ڈِگّ پئی سی؟ سو جدوں ایہناں گلّاں دے برخلاف کوئی کُجھ نئیں آکھ سکدا۔ تُہانوں چاہیدا اے۔ پئی صبر کرو۔ تے بِن سوچے کُجھ نا کرو۔ کیوں جو تُسی ایہناں بندیاں نُوں لے آئے ہو جیہڑے نا تے مندر دے چور نے۔ تے نا ساڈی دیوی دی نِندیا کرن والے۔ جے دیمتیِریُس تے اوہدے نال دے کاریگر کِسے اُتّے دعویٰ رکھدے نیں۔ تاں کچہری کُھلی اے۔ نالے نمائندے موجُود نیں۔ اِک دُوجے اُتّے نالش کرن۔ پر جے تُہانوں کوئی ہور گلّ پُچھنی ہوئے۔ تاں اوہ قانُونی مجلس وِچ فیصلہ ہوئے گا۔ کیوں جو اَج دے فسادی دی بابت ڈر اے۔ پئی ساتھوں پُچھیا جائے۔ اوہدا کوئی سبّب جو نئیں ہویا۔ اوہدی بابت اسی جواب نا دے سَکاں گے۔ پئی ایہہ شور کاہِنُوں ہویا۔ تے ایہہ آکھ کے اوس جماعت نُوں برخواست کِیتا۔ جد رَولا ٹل گیا۔ تَد پَولُس شاگِرداں نُوں سدّیا تے نصِیحت دِتّی تے اوہناں توں وِداع ہو کے مَکِدُنیہ ولّ ٹُر پیا۔ تے اوہناں علاقیاں وِچ پھیرا کر کے تے بُہت نصِیحت دے کے۔ یُونان وِچ آیا۔ جد تِنّ مہینے رہ کے جہاز اُتّے چڑھ کے سُوریہ ولّ جان نُوں تیار سی۔ تَد یہُودِیاں اوہدے اُتّے مَتا پکائیا۔ فیر اوس ایہہ اِرادہ کِیتا۔ پئی مَیں مَکِدُنیہ دے راہ ہو کے پرت جاواں۔ تے پُرُس دا پُتر سوپَترُس جیہڑا بِیرِیّہ دا سی تے تھِسّلُنِیکیاں وِچوں ارِسترخُس تے سِکُندُس تے دِربے دا گَیُس تے تِیمُتِھیُس تے آسِیہ دا تُخِکس تے ترُفِمُس اوہدے نال آسِیہ تِیکر گئے۔ ایہہ اگّے جا کے تروآس وِچ سانُوں اُڈِیکدے سن۔ تے فطِیری روٹی دے دِناں پِچّھوں اسی جہاز اُتّے فِلپّی توں ٹُر گئے۔ تے پن جیویں دِن تروآس وِچ اوہناں کول اَپڑے۔ تے اوتھے سَتّ دِن رہے۔ تے ہفتے دے پہلے دِن جِس ویلے اسی روٹی توڑن لئی اکٹّھے ہوئے۔ پَولُس دُوجے دِن ٹُرن دا اِرادہ کر کے اوہناں نال کلام کِیتا۔ تے اَدھی رات تِیکر اپنا وعظ کر دا رہیا۔ تے اوس چوبارے وِچ جِتّھے اسی اکٹّھے ہوئے ساں۔ بتھیرے دِیوے بَلدے سن۔ تے اِک جوان یُوتخُس کر کے کھِڑکی اُتّے بَیٹھا ہویا نِیندر نال بڑا دَبّیا ہویا سی۔ تے پَولُس دے وعظ کر دیاں کر دیاں اوہ اپنی نِیندر دا ماریا ہویا ترِیجی منزلوں ہیٹھاں ڈِگّ پیا۔ تے مُردہ چُکیا گیا۔ تَد پَولُس ہیٹھاں لَہہ کے اوہدے اُتّے ڈھیہ پیا تے اوہنوں جَپھّے وِچ لے لیا۔ تے گلّ لا کے آکھن لگّا۔ تُسی گھابرو نا کیوں جو اوہدی جان اوہدے وِچ ای اے۔ تے اُتانہہ جا کے جد اوس روٹی توڑی تے کھادِی۔ بڑے چِر تِیکر سگوں دِن چڑھے تِیکر اوہناں نال گلّاں کِیتیاں فیر اوہ ٹُر پیا۔ تے اوہ اوس مُنڈے نُوں جِیوندا لیائے تے حدّوں وڈّی تسلّی پائی۔ تے اسی اگیترے جہاز اُتّے چڑھ گئے۔ تے اسُّس نُوں ایس دلیل نال گئے۔ پئی پَولُس نُوں وی اوتھوں چڑھا لئیے۔ کیوں جو اوہ پَیدل جان دا اِرادہ کر کے ایسے طرح آکھ گیا سی۔ جدوں اوہ اسُّس وِچ سانُوں مِلیا۔ اساں اوہنوں چڑھا لیا۔ تے مِتُلینے نُوں آئے۔ تے اوتھوں جہاز کھول کے دُوجے دِن خِیُس دے سامھنے آئے۔ تے ترِیجے دِن سامُس وِچ جا لگّے۔ تے اگلے دِن مِیلیتُس اَپڑے۔ کیوں جو پَولُس دی صلاح سی پئی اِفِسُس توں لانبھے ہو کے جاواں کِتے اجیہا نا ہوئے پئی آسِیہ وِچ چِر لانا پَوے۔ ایس لئی پئی اوہ چھیتی کر دا سی۔ پئی جے ہو سکے تے پِنتیکُست دا دِن یرُوشلِیم وِچ کٹّے۔ تے مِیلیتُس توں اوس اِفِسُس وِچ سنیہا گھل کے کلِیسیا دے بزُرگاں نُوں سدّیا۔ تے جد اوہ اوہدے کول آئے۔ اوس اوہناں نُوں آکھیا۔ تُسی جان دے اوہ۔ پئی مَیں جدوں آسِیہ وِچ آیا پہلے دِن توں کِس طرح ہر ویلے تُہاڈے کول رہیا۔ پئی بڑی حلِیمی نال تے اتھرُو وَہا وَہا کے اوہناں ازمایشاں وِچ جیہڑیاں یہُودِیاں دے مَتے پکان نال میرے اُتّے آ پئیاں مَیں خُداوند دی خِدمت کر دا رہیا۔ نالے تُسی جان دے ہو۔ پئی تُہانوں کوئی فائدے دی گلّ دسن وِچ تے تُہانوں کُھلی طرح تے گھر گھر جا کے وی مَیں تعلِیم دین توں نئیں جھکّیا۔ تے مَیں یہُودِیاں تے یُونانِیاں دے اگّے گواہی دیندا رہیا پئی خُدا اگّے تَوبہ کرن۔ تے ساڈے خُداوند یِسُوع مسِیح اُتّے اِیمان لیاؤن۔ تے ہُن ویکھو۔ مَیں رُوح وِچ قیدی ہو کے یرُوشلِیم نُوں جاناں آں۔ تے نئیں جان دا پئی اوس تھاں میرے نال کِیہ ہوئے گا۔ پر اینا ای معلُوم اے۔ پئی ہر شہر وِچ پاک رُوح مَینُوں صاف گواہی دے کے ایہہ آکھدا اے۔ پئی مَینُوں بیڑیاں تے مُصِیبتاں پیّاں اُڈِیکدیاں نیں۔ پر مَیں اپنی جان دا خیال بالکل نئیں کر دا۔ پئی اوہ مَینُوں پیاری لگدی اے۔ تاں جو مَیں اپنی دَوڑ نُوں تے اوس خِدمت نُوں جیہڑی خُداوند یِسُوع توں مَینُوں سپُرد ہوئی۔ پُورا کراں۔ تے خُدا دے کرم دی خُوشخبری اُتّے گواہی دیاں۔ تے ہُن ویکھو مَینُوں پتا اے۔ پئی تُسی سارے جِنہاں دے وِچ مَیں بادشاہی دی منادی کر دا رہیا۔ میرا مُنھ فیر کدی نا ویکھو گے۔ ایس کر کے مَیں اَج دے دِن تُہانوں گواہ رکھنا آں۔ پئی مَیں سبھناں دے خُون توں پاک آں۔ کیوں جو تُہانوں خُدا دی ساری صلاح دسن توں مَیں نئیں جھکّیا۔ تُسی اپنی اوس سارے اِجّڑ دی خبرداری کرو۔ جِہدا پاک رُوح نے تُہانوں نِگہبان بنایا۔ پئی خُدا دی کلِیسیا نُوں چارو جِہنُوں اوس اپنے ای لہو نال مُل لیا۔ مَیں جاننا آں پئی میرے کُوچ کرن دے مگروں بُرے بگھیاڑ تُہاڈے وِچ آ وڑن گے جیہڑے اِجّڑ نُوں نئیں چھڈن گے۔ نالے تُہاڈے اپنے ای وِچوں بندے اُٹھ کھلون گے جیہڑے اُلٹِیاں گلّاں شاگِرداں نُوں اپنے مگر کھِچّ لیجان لئی آکھن گے۔ سو جاگدے رہو۔ تے یاد رکھو۔ پئی مَیں تِنّ ورھے رات تے دِن رو رو کے ہر اِک نُوں دسن توں نئیں رُکیا۔ تے ہُن مَیں تُہانوں خُدا تے اوہدے کرم دے کلام دے سپُرد کرنا آں۔ کیوں جو اوہدے وِچ طاقت اے۔ پئی تُہانوں وَدھاوے تے سارے پاک لوکاں دے وِچ وِرثہ بخشے۔ مَیں تے کِسے دی چاندی یا سونے یا کپڑے دا لالچ نئیں کِیتا۔ تُسی آپ ای جان دے ہو۔ پئی ایہو ہتّھ میرِیاں تے میرے نالدیاں دِیاں لوڑاں نُوں پُورا کر دے رہے۔ مَیں سارِیاں گلّاں وِچ تُہانوں نمونہ وکھالیا۔ پئی ایس طرح محنت کر کے کمزوراں دی مدد کرنی تے خُداوند یِسُوع دی گلّ یاد کرنی چاہیدی اے۔ جیہڑی اوس آپے آکھی۔ پئی دینا لین نالوں مُبارک اے۔ تے ایویں آکھ کے اوس گوڈے نوائے۔ تے اوہناں سبھناں نال دُعا منگی۔ تے سبھو وَاہوَا روئے۔ تے پَولُس دے گلّ نال جَپھّی پا کے اوہنوں چُمّیا۔ تے ساریاں توں وَدّھ ایس گلّ دا اوہناں نُوں غم ہویا۔ جیہڑی گلّ اوس آکھی۔ پئی تُسی میرا مُنھ فیر کدی نا ویکھو گے۔ تے اوہناں جہاز تِیکر اوہنوں اَپڑایا۔ تے ایویں ہویا پئی جد اسی اوہناں توں وِداع ہو کے جہاز اُتّے ٹھِلّ پئے۔ تَد سِدّھے راہ کوس نُوں آئے تے دُوجے دِن رُدُس نُوں۔ تے اوتھوں پترہ نُوں۔ تے اِک جہاز سِدّھا فینِیکے نُوں جان والا لَبھّا تے اسی اوہدے اُتّے چڑھ کے ٹُر پئے۔ تے جد کُپرُس وکھالی دِتّا۔ اساں اوہنوں کھبّے ہتّھ ولّ چھڈیا۔ تے سُوریہ ولّ ٹُر گئے۔ تے صُور وِچ جا اُترے۔ کیوں جو اوتھے جہاز دا بھار لُہاؤنا سی۔ تے شاگِرداں نُوں لَبّھ کے اسی سَتّ دِہاڑے اوتھے رہے۔ تے اوہناں رُوح دی راہِیں پَولُس نُوں آکھیا۔ پئی یرُوشلِیم وِچ پَیر نا پا۔ تے جد اساں اوہ دِن پُورے کِیتے تَد ٹُرپَئے۔ تے سارے لوک اپنیاں وَوہٹِیاں تے بال بچّیاں سَنے شہر دے باہر تِیکر ساڈے نال آئے تے سمُندر دے کنڈھے اُتّے اساں گوڈے نواکے دُعا منگی۔ تے اِک دُوجے توں وِداع ہو کے اسی جہاز اُتّے چڑھے تے اوہ اپنے گھراں نُوں پرت گئے۔ تے جد صُور توں سمُندر دا راہ مُک گیا۔ اسی پَتُلمَیِس اَپڑے تے بھراواں نُوں سلام کِیتا تے اوہناں دے نال اِک دِن رہے۔ دُوجے دِہاڑے اسی ٹُر پئے۔ تے قَیصریہ نُوں آئے۔ تے فِلپُّس دے گھر جا کے پَروہنے رہے۔ اوہ اِک اِنجِیل سُنان والا تے اوہناں ستّاں وِچوں اِک سی۔ اوس بندے دِیاں چار کوارِیاں دِھیاں سن۔ جیہڑیاں نبُوّت کر دیاں سن۔ تے جد اسی اوتھے وَاہوَا دِناں تِیکر رہے۔ یہُودیہ توں اِک نبی آیا۔ جِہدا ناں اَگَبُس سی۔ اوس ساڈے کول آ کے پَولُس دے لکّ دا پٹکا لیا۔ تے اپنے ہتّھ پَیر بَنّھ کے آکھیا۔ پئی پاک رُوح اینج آ کھدا اے۔ پئی یرُوشلِیم وِچ اوس بندے نُوں جِہدا ایہہ پٹکا اے یہُودی ایسے طرح بنھن گے۔ تے غیر قوماں دے حوالے کرن گے۔ جد اساں ایہہ سُنیا تَد اساں تے اوس تھاں دے لوکاں وی اوہدی مِنّت کِیتی۔ پئی یرُوشلِیم نُوں نا جا۔ تَد پَولُس جواب دِتّا۔ پئی تُسی کِیہ کر دے ہو؟ روندے تے میرا دِل توڑ دے ہو؟ کیوں جو مَیں صرف یرُوشلِیم وِچ خُداوند یِسُوع دے ناں پِچّھے بَدّھے جان نُوں سگوں مر جان نُوں وی تیار آں۔ سو جد اوہ نا مَنّیا اسی ایہہ آکھ کے چُپ کر گئے پئی جو خُداوند دی مرضی اے سو ہوئے۔ تے اوہناں دِناں مگروں اپنا اسباب سانبھ کے اسی یرُوشلِیم نُوں گئے۔ تے قَیصریہ توں کئی شاگِرد وی ساڈے نال ٹُر پئے۔ تے مَنَاسون کر کے کُپرُس دا اِک پرانا شاگِرد جِہدے کول اسی اُترن والے ساں۔ اپنے نال لے آئے۔ جدوں اسی یرُوشلِیم اَپڑے بھراواں نیں سانُوں خُوشی نال قبول کِیتا۔ تے دُوجے دِن پَولُس ساڈے نال یعقُوب دے گھر گیا۔ تے بزُرگ سارے حاضر سن۔ تے جد اوس اوہناں نُوں سلام آکھیا۔ تَد جو کُجھ خُدا غیر قوماں وِچ اوہدی خِدمت دی راہِیں کرایا سی سبھ کُجھ دس دِتّا۔ اوہناں سُن کے خُدا دی وڈیائی کِیتی۔ تے اوہنوں آکھیا بھرا تُوں جاننا ایں۔ پئی یہُودِیاں وِچوں کِنے ہزار بندے نیں۔ جِنہاں اِیمان لیاندا اے۔ تے اوہناں ساریاں تُوں شریعت وِچ سرگرم اے۔ تے تیرے حق وِچ اوہناں نُوں خبر مِلی اے۔ پئی سارے یہُودِیاں نُوں جیہڑے غیر قوماں وِچ وَسدے نیں تُوں ایہہ سکھالنا ایں۔ پئی مُوسیٰ نُوں چھڈن۔ تے آکھنا ایں۔ پئی اپنے مُنڈیاں نُوں سُنتی نا بٹھان تے نا رِیت رسماں اُتّے چَلّن۔ سو کِیہ کرئیے؟ لوک تاں ضرُور سُن لین گے پئی تُوں آ گیا ایں۔ ایس لئی ایویں کر جو کُجھ اسی تینُوں دسنے آں۔ ساڈے چار بندے نیں جِنہاں مَنّت مَنّی اے۔ تُوں اوہناں نُوں نال لے تے اوہناں دے نال اپنے آپ نُوں پاک کر۔ تے اوہناں دا خرچ اپنے ذِمّے لے پئی اپنے سِر مُنان تے سارے لوک جانن گے پئی جیہڑیاں گلّاں تیری بابت سِکھالِیاں گِئیاں نیں۔ ٹھیک نئیں۔ سگوں تُوں آپ وی ٹھیک چلدا تے شریعت نُوں مَنّنا ایں۔ پر غیر قوماں وِچوں جیہڑے اِیمان لیائے اوہناں دی بابت اساں ایہہ فیصلہ کر کے لِکھیا اے۔ پئی اوہ بُتاں دے چڑھاویاں توں تے لہو توں تے گل گُھٹّیاں ہویاں شیواں توں تے حرامکاری توں اپنے آپ نُوں بچائے رکھن۔ تَد پَولُس اوہناں بندیاں نُوں لیا۔ تے دُوجے دِن اوہناں دے نال اپنے آپ نُوں پاک کر کے ہیکل دے اندر گیا تے خبر دِتّی پئی پاک ہون دے دِن تَد پُورے کراں گے۔ جد اوہناں وِچوں ہر اِک لئی چڑھاوا چڑھایا جائے۔ تے جد ایہہ سَتّ دِہاڑے پُورے ہوگئے سن۔ آسِیہ دے یہُودِیاں اوہنوں ہیکل وِچ ویکھ کے سارے لوکاں نُوں چُکیا۔ تے اوہدے اُتّے ہتّھ پا کے اُچّی اُچّی آکھیا۔ پئی اَے اِسرائیلی جَنیو! مدد کرو۔ ایہہ اوہ ای بندہ اے۔ جیہڑا ہر تھاں ایس قوم تے شریعت تے ایس جگہ دے اُلٹ سبھناں نُوں سِکھالدا اے۔ نالے اوہ یُونانِیاں نُوں وی ہیکل وِچ لے آیا اے۔ تے ایس مکان نُوں پلِیت کِیتا۔ کیوں جو اوہناں پہلے ترُفِمُس اِفِسی نُوں اوہدے نال شہر وِچ ویکھیا سی۔ تے سمجھدے سن پئی پَولُس اوہنوں ہیکل وِچ لیاندا سی۔ تَد سارے شہر وِچ رَولا پَے گیا تے لوک بھج بھج کے کٹّھے ہوئے۔ تے پَولُس نُوں پھڑ کے ہیکلوں باہر کھِچّ لیاندا۔ تے جھٹ پَٹ دروازے بند کِیتے گئے۔ تے جیویں اوہ اوہدے مار سُٹّن دے مگر پئے تے پلٹن دے سردار نُوں خبر ہوئی۔ پئی سارے یرُوشلِیم وِچ تَرتھل مَچ گئی اے۔ اوہ اوسے ویلے سپاہیاں تے صُوبیداراں نُوں نال لے کے اوہناں ولّ نَسّیا۔ تے سردار تے سپاہیاں نُوں ویکھ کے اوہ پَولُس نُوں مارن توں مُڑ گئے۔ تَد سردار نیڑے آیا۔ تے اوہنوں پھڑ کے حُکم دِتّا پئی دو سنگلاں نال بَنّھ لین تے پُچھیا۔ پئی ایہہ کون اے۔ تے ایس کِیتا کِیہ اے؟ تے بِھیڑ وِچوں کئیاں نیں کُجھ۔ تے کئیاں نیں کُجھ اواز ماری۔ تے رَولے دے صدقہ اوہنوں جد پَکّی گلّ معلُوم نا ہو سکی۔ اوس حُکم دِتّا پئی اوہنوں قِلعے وِچ لے جان۔ تے جد اوہ پَوڑِیاں اُتّے اَپڑیا۔ لوکاں دے زور تے زبردستی دے صدقے سپاہیاں نیں چُک لیا۔ کیوں جو لوکاں دی بِھیڑ ایہہ ڈنڈ پاندی ہوئی مگر ٹُر آئی۔ پئی اوہنوں مار چھڈ۔ تے جد پَولُس نُوں قِلعے دے اندر لیجان لگّے۔ اوس سردار نُوں آکھیا مَینُوں اجازت اے۔ پئی تینُوں کُجھ آکھاں؟ اوس آکھیا تُوں یُونانی بولی جاننا ایں؟ تُوں اوہو مِصری بندے نئیں۔ جیہڑا ایہناں دِناں توں پہلاں ڈاکُوؤاں دے چار ہزار بندے بیابان وِچ ورغلا کے لے گیا سَیں؟ پر پَولُس آکھیا۔ مَیں تے یہُودی آں کِلِکیہ دے تَرسُس دا رہن والا جیہڑا مشہُور شہر اے۔ تے مَیں تیری مِنّت کرنا آں پئی مَینُوں لوکاں نال بولن دی اجازت دے۔ جد اوس اوہنوں اجازت دِتّی تَد پَولُس پَوڑِیاں اُتّے کھلو کے لوکاں نُوں ہتّھ نال سینت کِیتی۔ تے جد سارے چُپ کر گئے۔ عِبرانی بولی وِچ اوہ آکھن لگّا۔ میرے بھراؤ تے بزُرگو! میرا عُذر سُنو۔ جیہڑا ایس ویلے مَیں تُہاڈے اگّے کرنا آں۔ تے اوہناں جد سُنیا۔ پئی اوہ عِبرانی بولی وِچ ساڈے نال گلّاں کر دا اے۔ تے ہور وی چُپ کر گئے۔ تَد اوس آکھیا۔ مَیں یہُودی بندے آں۔ مَیں کِلِکیہ دے تَرسُس وِچ جمّیا۔ پر ایس شہر وِچ گملی ایل دے پیراں وِچ پلیا تے پئیو دادیاں دی شریعت پُورے چج نال سِکھی۔ تے خُدا دے لئی اجیہا سرگرم ساں جیہے تُسی سارے اَج دے دِن ہو۔ مَیں بندیاں تے زنانِیاں نُوں بَنّھ بَنّھ کے قیدخانے وِچ پا پا کے ایس راہ والیاں نُوں مَوت تِیکر ستایا۔ تے ایس گلّ دا سردار کاہِن میرا گواہ اے۔ تے بزُرگاں دی ساری جماعت وی۔ جِنہاں توں مَیں بھراواں دے لئی چِٹّھیاں وی لے کے دمِشق نُوں ایس واسطے گیا۔ پئی جیہڑے اوتھے سن۔ اوہناں نُوں وی بَنّھ کے یرُوشلِیم وِچ سزا پان نُوں لیاواں۔ تے جد مَیں جاندِیاں جاندِیاں دمِشق دے نیڑے اَپڑیا۔ تاں دوپہر دے ویلے اینج ہویا۔ پئی میرے چَوفیرے اِک دم بڑا نُور اسمانوں چمکیا۔ تے مَیں زمین اُتّے ڈِگّ پیا۔ تے اواز سُنی جیہڑی مَینُوں آکھدی سی۔ اَے ساؤُل اَے ساؤُل تُوں مَینُوں کیوں ستانا ایں؟ تے مَیں جواب دِتّا۔ اَے خُداوند تُوں کون ایں؟ تے اوس مَینُوں آکھیا۔ مَیں یِسُوع ناصری آں جِہنُوں تُوں ستانا ایں۔ تے میرے نالدیاں نُور تے ویکھیا پر اوہدی اواز جیہڑا میرے نال بولدا سی اوہناں نا سُنی۔ مَیں آکھیا اَے خُداوند۔ مَیں کِیہ کراں؟ خُداوند مَینُوں آکھیا۔ اُٹھ دمِشق نُوں جا۔ تے سبھو کُجھ جو تیرے کرن لئی مُقرّر ہویا اے۔ اوتھے ای تینُوں دسیا جائے گا۔ تے جد مَیں اوس نُور دے تیز ہون دے صدقہ ویکھ نا سکیا۔ تَد میرے ساتھی میرا ہتّھ پھڑ کے دمِشق وِچ لے آئے۔ تے حننیاہ کر کے اِک بندہ سی۔ شریعت دے سببّوں دِیندار تے اوتھے وَسّن والے سارے یہُودِیاں وِچ نیک نام۔ اوہ میرے کول آیا۔ تے کول کھلو کے مَینُوں آکھن لگّا۔ بھرا ساؤُل سُجاکھا ہو اوسے گھڑی مَیں اوہدے اُتّے نظر کِیتی۔ تے اوس آکھیا۔ ساڈے پئیو دادیاں دے خُدا تینُوں مُقرّر کِیتا اے پئی تُوں اوہدی مرضی نُوں جانیں۔ تے اوس نیک نُوں ویکھیں تے اوہدے مُنھ دی اواز سُنیں۔ کیوں جو تُوں سارے بندیاں دے اگّے اوہدے ولّوں اوہناں گلّاں دا گواہ ہوویں گا۔ جیہڑیاں تُوں ویکھیاں تے سُنیاں نیں۔ تے ہُن تُوں کیوں چِر لانا ایں؟ اُٹھ کھلو تے بپتِسمہ لے۔ تے اوہدا ناں لے کے اپنے گُناہاں نُوں دھو دے۔ تے جد مَیں یرُوشلِیم نُوں مُڑ آیا۔ تے ہیکل وِچ دُعا پیا منگدا ساں۔ ایویں ہویا پئی مَینُوں ہول پَے گیا۔ تے اوہ مَینُوں آکھدا سی۔ پئی چھیتی کر۔ یرُوشلِیم توں فٹافٹ نِکل جا۔ کیوں جو تیری گواہی نُوں میری بابت اوہ قبول نا کرن گے۔ تے مَیں آکھیا اَے خُداوند اوہ آپ جان دے نیں پئی مَیں اوہناں لوکاں نُوں جِنہاں تیرے ناں اُتّے اِیمان لیاندا اے قید وِچ پاندا ساں تے ہر اِک عبادت خانے وِچ کولڑے مرواؤندا ساں۔ تے جِس ویلے تیرے شہید ستِفنُس دا لہو وگایا گیا۔ مَیں وی آپ کول کھلوتا ہویا تے حامی بھردا ساں۔ تے اوہدے خُونِیاں دے کپڑیاں دی راکھی کر دا ساں۔ تَد اوس مَینُوں آکھیا۔ ٹُرپَو۔ کیوں جو مَیں تینُوں دُراڈے سارے غیر قوماں ولّ گھلاں گا۔ ایس گلّ توڑی اوہ اوہدی سُندے رہے تَد اُچّی اواز نال آکھن لگّے پئی اجیہے بندے نُوں زمین اُتّوں دُور کر۔ کیوں جو اوہدا جِیوندیاں رہناں چَنگا نئیں اے۔ تے جد اوہ رَولا پان تے کپڑے لاہن تے مِٹّی اُڈان لگّے۔ تاں پلٹن دے سردار حُکم دِتّا۔ پئی اوہنوں قِلعے دے اندر لے آؤن تے آکھیا پئی اوہنوں کولڑے مار کے اوہدا بیان لوؤ۔ تاں جو مَینُوں معلُوم ہوئے پئی کِیہ سبّب اے جو اوہ اوہدی ضِد وِچ اِنج ڈنڈ پاندے نیں۔ تے جد اوہناں اوہنوں وَدّھراں نال بَدّھا۔ تَد پَولُس اِک صُوبیدار نُوں جیہڑا کول کھلوتا سی آکھیا۔ تُہانوں حُکم اے۔ پئی رُومی بندے نُوں کولڑے مارو۔ تے اوہ وی ڈنڈ لائے بِناں؟ صُوبیدار ایہہ سُن کے سردار کول جا کے خبر دِتّی۔ تے آکھیا۔ تُوں کِیہ کرن لگّا ایں؟ ایہہ بندہ تے رُومی اے۔ تے سردار اوہدے کول آ کے اوہنوں آکھیا۔ مَینُوں دس۔ تُوں رُومی ایں؟ اوس آکھیا آہو۔ سردار جواب دِتّا۔ مَیں بُہت خرچ کر کے رُومی ہون دا حق مُل لیا۔ پَولُس آکھیا۔ مَیں جمّیا ای ایسے طرح ساں۔ اوہدا بیان لین والے اونویں اوہدے توں ہَٹ گئے۔ تے سردار وی ڈر گیا۔ جدوں جانیا پئی ایہہ بندے رُومی اے تے مَیں اوہنوں بَدّھا اے۔ سویر نُوں ایس اِرادے نال پئی پَکّا پَتا لگ جائے پئی یہُودی اوہدے اُتّے کِیہ دعویٰ کر دے نیں اوس اوہنوں چھڈ دِتّا۔ تے حُکم کِیتا پئی سردار کاہِن تے سارے صدرِ مجلس اکٹّھے ہون۔ تے اوس پَولُس نُوں لیا کے اوہناں دے سامھنے کھلا کِیتا۔ تے پَولُس صدرِ مجلس والیاں نُوں دھیان نال ویکھ کے آکھیا۔ بھراؤ اَج تِیکر مَیں پُوری نیک نِیتی نال خُدا دے اگّے چلدا رہیا آں۔ ایہدے اُتّے سردار کاہِن حننیاہ نے کول کھلون والیاں نُوں حُکم دِتّا پئی اوہدے مُنھ اُتّے چپیڑاں مارن۔ تَد پَولُس اوہنوں آکھیا اَے چُونہ پھیری ہوئی کندھ خُدا تینُوں مارے گا۔ تُوں شریعت دے سببّوں میرا انصاف کرن لئی بَیٹھا ایں۔ تے شریعت دے اُلٹ مَینُوں مارن دا حُکم دینا ایں؟ تے کول کھلون والے آکھن لگّے۔ تُوں خُدا دے سردار کاہِن دی نِندیا کرنا ایں؟ تے پَولُس آکھیا بھراؤ! مَینُوں خبر نئیں سی پئی ایہہ سردار کاہِن اے۔ کیوں جو لِکھیا اے۔ پئی تُوں اپنی قوم دے سرداراں نُوں بُرا نا آکھ۔ پر جد پَولُس نے معلُوم کِیتا۔ پئی اوہناں وِچ بعضے صدوقی تے بعضے فریسی نیں۔ تَد مجلس وِچ آکھیا پئی بھراؤ۔ مَیں فریسی تے فرِیسیاں دا پُتر آں۔ مُردیاں دی آس تے جی اُٹھن دی بابت میرے اُتّے مُقدّمہ ہوندا اے۔ جدوں اوس ایہہ آکھیا تاں صدوقیاں تے فرِیسیاں وِچ جھگڑا ہویا۔ تے جماعت وِچ پُھٹ پَے گئی۔ کیوں جو صدوقی آکھدے نیں پئی قیامت نئیں ہونی تے نا کوئی فرِشتہ نا رُوح اے۔ پر فریسی دوہاں نُوں مَن دے نیں۔ تَد بڑا رَولا پیا۔ تے فرِیسیاں ولّ دے کئی فقِیہ اُٹھے۔ تے تکرار کر کے آکھن لگّے۔ پئی ایس بندے وِچ اسی کوئی بُریائی نئیں ویکھنے آں۔ پر کِیہ عجب پئی کِسے رُوح یا فرِشتے نے اوہدے نال گلّ کِیتی ہوئے؟ تے جدوں بڑا جھگڑا ہو پیا تے ایس ڈر دے مارِیاں پئی اوہ پَولُس دے ٹوٹے ٹوٹے نا کر سُٹّن۔ پلٹن دے سردار نے سپاہیاں نُوں حُکم دِتّا پئی اُتر کے اوہنوں اوہناں وِچوں بدوبدی کڈھ کے قِلعے دے اندر لیاؤن۔ تے اوسے رات خُداوند اوہدے کول آ کے آکھیا حَوصلہ رکھ کیوں جو جیویں تُوں یرُوشلِیم وِچ میرِیاں گلّاں اُتّے گواہی دِتّی اے۔ اوسے طرح تینُوں رُومہ وِچ وی گواہی دینی پَوے گی۔ تے جد دِن چڑھیا۔ یہُودِیاں مَتا پکا کے اپنے آپ اُتّے سَونہہ دی مار پائی۔ تے آکھیا۔ پئی جد تِیکر اسی پَولُس نُوں نا مارِیئے اسی کُجھ نا کھاواں پِیاں گے۔ تے جِنہاں رَل کے ایہہ سَونہہ آپو وِچ چُکی چاھلیاں توں وَدّھ سن۔ اوہناں سردار کاہِن تے بزُرگاں دے کول آ کے آکھیا۔ اساں اپنے اُتّے وڈّی سَونہہ دی مار پائی اے۔ پئی جد تِیکر پَولُس نُوں نا مارِیئے۔ اسی کُجھ وی نا چکھّاں گے۔ سو صدرِ مجلس دے نال رَل کے تُسی پلٹن دے سردار اگّے عرض کرو۔ پئی بھلکے پَولُس نُوں اوہ ایس طرح تُہاڈے کول لے آوے۔ جیویں پئی اوہدی حِقیقت ہور وی معلُوم کرنی چاہندے ہو۔ اوہدے نیڑے آؤن توں پہلاں اسی اوہنوں مارن لئی تیار آں۔ پر پَولُس دا بھنیواں اوہناں دی چھیہہ لان دی خبر سُن کے آیا تے قِلعے دے اندر جا کے پَولُس نُوں دس دِتّا۔ تے پَولُس صُوبیداراں وِچوں اِک نُوں سَدّ کے آکھیا۔ پئی ایس جوان نُوں پلٹن دے سردار کول لے کے جا کیوں جو اوس اوہنوں کُجھ آکھنا اے۔ سو اوہ اوہنوں نال لے کے سردار کول ٹُر گیا۔ تے آکھیا پئی پَولُس قیدی مَینُوں سَدّ کے مِنّت کِیتی پئی ایس جوان نُوں تیرے کول لیاواں کیوں جو ایس تیرے نال کوئی گلّ کرنی اے۔ سردار اوہدا ہتّھ پھڑیا تے وَکھریاں لے جا کے پُچھیا۔ تُوں مَینُوں کِیہ دسنا چاہنا ایں؟ اوس آکھیا یہُودِیاں تیرے اگّے درخواست کرن لئی ایکا کِیتا اے۔ پئی تُوں بھلکے پَولُس نُوں مجلس وِچ اِنج لے آویں جیویں اوہدی بابت تُوں کُجھ ہور وی ٹھیک دریافت کرنا ایں۔ پر تُوں اوہناں دی نا مَنّیں۔ کیوں جو اوہناں وِچوں چاھلیاں توں وَدّھ بندے اوہدی چھیہہ وِچ لگّے ہوئے نیں جِنہاں اپنے اُتّے سَونہہ دی مار پائی اے۔ پئی جِنّاں چِر اوہنوں نا مار سُٹّیئے اسی نا کھاواں گے نا پِیاں گے۔ تے ہُن اوہ تیار ای نیں۔ تے اوہناں نُوں تیرے اِقرار دی اوڈِیک اے۔ سو پلٹن دے سردار نے اوس جوان نُوں ایہہ حُکم دے کے وِداع کِیتا۔ پئی کِسے نُوں نا آکھیں پئی تُوں ایہہ گلّاں مَینُوں دسیاں نیں۔ تے صُوبیداراں وِچوں دو نُوں سَدّ کے اوس آکھیا۔ پئی دو سو سپاہی قَیصریہ تِیکر جان لئی تے ستّر سوار تے دو سو برچھے پہر رات گئی نُوں تیار رکھو۔ تے ویہتر تیار رکھو۔ پئی اوہ پَولُس نُوں چڑھا کے فیلِکس حاکم دے کول سلامت لے جان۔ فیر اوس ایس مضمُون دا خط لِکھیا۔ کلَودِیُس لُوسِیاس دا فیلِکس بہادر حاکم نُوں سلام۔ ایس بندے نُوں یہُودِیاں پھڑیا۔ تے اوہ اوہناں دی ہتّھِیں ماریا جان والا سی۔ مَینُوں جد پتا لگّا پئی اوہ رُومی اے۔ تے سپاہیاں سَنے جا کے چھڈا لیایا۔ تے جدوں مَیں سبھ معلُوم کرنا چاہندا ساں۔ پئی اوہ اوہدے اُتّے کاہدا الزام دیندے نیں۔ تاں اوہناں دی صدرِ مجلس وِچ اوہنوں پُہنچا دِتّا۔ مَیں دریافت کِیتا پئی اوہناں دی شریعت دے مسئلیاں دا اوہنوں الزام دیندے نیں پر کوئی اِنج الزام نئیں جیہڑا اوہدے قتل یا قید دا سبّب ہوئے۔ تے جدوں مَینُوں خبر ہوئی۔ پئی اوہدے اُتّے مَتا پکُّو اے۔ اوس ویلے مَیں اوہنوں تیرے کول گھل دِتّا۔ تے اوہدے مُدّعیاں نُوں وی حُکم کِیتا پئی تیرے اگّے اوہدے اُتّے دعویٰ کرن۔ سو سپاہیاں حُکم دے سببّوں پَولُس نُوں لے کے راتوں رات انتیپترِس وِچ اَپڑایا۔ تے دُوجے دِن سواراں نُوں اوہدے نال ٹُرن لئی چھڈ کے۔ اوہ قِلعے نُوں مُڑے۔ تے اوہ جد قَیصریہ وِچ آئے تاں حاکم نُوں خط دِتّا۔ تے پَولُس نُوں وی اوہدے اگّے حاضر کِیتا۔ جد اوس خط پڑھیا۔ تاں پُچھیا۔ پئی اوہ کیہڑے صُوبے دا اے؟ تے معلُوم کر کے پئی کِلِکیہ توں اے۔ اوس آکھیا۔ جد تیرے مُدّعی وی آؤن گے۔ تَد مَیں تیری سُناں گا۔ تے حُکم دِتّا پئی اوہنوں ہیرودیس دے محل وِچ حفاظت نال رکھو۔ تے پنج دِناں پِچّھوں سردار کاہِن حننیاہ بعضے بزُرگاں تے اِک وکِیل تِرطُلُس نُوں لے کے آیا۔ اوہناں پَولُس دے برخلاف حاکم نُوں سمجھایا۔ تے جد اوہ سدّیا گیا۔ تَد تِرطُلُس الزام لاکے ایہہ آکھن لگّا۔ پئی اَے فیلِکس بہادر ایس واسطے پئی اسی لوک تیری راہِیں بڑا سُکھ پانے آں۔ تے ایس قوم لئی تیری دُور اندیشی توں چنگے چنگے انتظام کِیتے جاندے نیں۔ اسی ہر گلّ تے ہر تھاں وِچ ایہناں گلّاں توں بڑی شُکر گُزاری نال تیرا احسان مَنّنے آں۔ پر ایس واسطے پئی مَیں تینُوں بُہتی تکلیف نا دیاں۔ تیری مِنّت کرنا آں پئی مِہربانی کر کے ساڈیاں تھوڑیاں جِہیاں گلّاں سُن۔ کیوں جو اساں ایس بندے نُوں اِک بلا۔ تے دُنیا دے سارے یہُودِیاں وِچوں فسادی۔ تے ناصریاں دے بِدعتی فِرقے دا موہر لا ویکھیا اے۔ اوس کوشش وی کِیتی پئی ہیکل نُوں پلِیت کرے۔ تے اوہنوں اساں قابُو کِیتا۔ [تے اسی چاہندے ساں کہ اپنی شریعت دے مطابق اوہدی عدالت کرئیے۔ پر سردار لُوسِیاس آ کے بڑا زور پا کے اوہنوں ساڈے ہتھّوں کھو لیا۔ تے اوہدے مُدّعیاں نُوں حُکم کِیتا پئی تیرے کول جان] ایہناں سارِیاں گلّاں دی بابت جِنہاں دا الزام اسی اوہدے اُتّے لانے آں تُوں آپ جاچ کے اوہدے توں معلُوم کر سکیں گا۔ تے یہُودِیاں وی رَل کے دعویٰ کِیتا پئی ایہہ گلّاں ایسے طرح نیں۔ تے جد حاکم اوہنوں بولن دی سینت کِیتی تاں پَولُس جواب دِتّا۔ ایس کر کے پئی مَیں جاننا آں پئی تُوں بُہت ورھیاں توں ایس قوم دا مُنصف ایں۔ مَیں خُوشی نال اپنی بابت عُذر کرنا آں۔ کیوں جو تُوں معلُوم کر سکنا ایں پئی باراں دِناں توں وَدّھ نئیں ہوئے۔ جدوں مَیں عبادت کرن لئی یرُوشلِیم نُوں گیا۔ تے اوہناں مَینُوں نا ہیکل وِچ کِسے دے نال جھگڑ دیاں تے نا لوکاں وِچ فساد کر دیاں ویکھیا نا عبادت خانیاں وِچ تے نا شہر وِچ۔ تے نا ایہناں گلّاں نُوں جِنہاں دی بابت ہُن میرے اُتّے الزام لاندے نیں۔ تیرے سامھنے اوہ ثابت کر سکدے نیں۔ پر ایہہ مَیں تیرے اگّے مَن لینا آں۔ پئی جِس راہ نُوں اوہ بِدعت آکھدے نیں۔ مَیں اوسے دے مطابق اپنے پئیو دادیاں دے خُدا دی سیوا کرنا آں۔ تے جو کُجھ توریت تے نبیاں دِیاں کِتاباں وِچ لِکھیا ہویا اے۔ اوس سارے اُتّے میرا اِیمان اے۔ تے مَیں خُدا کولوں آس رکھنا آں پئی نیکاں تے بداں دی قیامت ہوئے گی جِہنُوں ایہہ آپ وی پئے اُڈِیکدے نیں۔ مَیں وی ایہدے وِچ کوشش کرنا آں۔ پئی خُدا تے بندیاں دے اگّے میرا دِل کَدے مَینُوں ملامت نا کرے۔ تے بُہت ورھیاں پِچّھوں مَیں اپنی قوم نُوں خَیرات پُہنچان تے چڑھاوے چڑھان آیا۔ اوہناں مَینُوں پاک ہویاں ہویاں بِھیڑ تے شور شرابے بِناں ایہہ کمّ کر دیاں ہویاں ہیکل وِچ ویکھیا نا بِھیڑ نال نا شور شرابے نال۔ ہاں آسِیہ دے کُجھ یہُودی ہے سن۔ تے اوہناں نُوں چاہیدا سی پئی تیرے اگّے حاضر ہوندے۔ تے جے میرے اُتّے کوئی گلّ ہوندی تے اوہ نالش کر دے۔ یا ایہہ آپی دسن۔ پئی جد مَیں صدرِ مجلس دے اگّے کھلوتا ساں اوہناں میرے وِچ کِیہ بُریائی ویکھی۔ سِوا اِک گلّ دے جیہڑی اوہناں دے وِچکار کھلوتیاں ہویاں مَیں اُچّی اواز نال آکھی۔ پئی مُردیاں دے جی اُٹھن دی بابت اَج تُہاڈے سامھنے میرے اُتّے مُقدّمہ پیا ہوندا اے۔ پر فیلِکس جیہڑا ایس راہ دے حال توں بُہتا واقف سی۔ اوہناں نُوں دِتّا۔ تے ایہہ آکھیا پئی جدوں پلٹن دا سردار لُوسِیاس آوے گا تَد مَیں تُہاڈیاں گلّاں نبیڑاں گا۔ تے اوس صُوبیدار نُوں حُکم دِتّا۔ پئی پَولُس دی راکھی کر۔ تے اوہنوں سُکھ نال رکھ۔ تے اوہدے دوستاں وِچوں کِسے نُوں اوہدی سیوا کرن توں نا روک۔ پر کُجھ دِناں پِچّھوں فیلِکس اپنی بیوی درُوسِلّہ دے نال جیہڑی یہُودن سی آگیا تے پَولُس نُوں سَدّ گھلّیا تے اوہدے کولوں مسِیح یِسُوع دے دِین دی بابت سُنیا۔ تے جد اوہ نیکی تے پرہیزگاری تے آؤن والی عدالت دی بابت بیان پیا کر دا سی۔ تَد فیلِکس نے خَوف کھا کے جواب دِتّا۔ ایس ویلے تُوں جا۔ موقع ویکھ کے مَیں تینُوں سدّاں گا۔ نالے اوہنوں آس سی پئی پَولُس کولوں مَینُوں کُجھ رُپئے مِلن گے۔ ایسے گلّے اوہ اوہنوں گھڑی مُڑی سَدّ کے اوہدے نال گلّاں کر دا رہندا سی۔ پر جد دو ورھے پُورے ہوئے فیلِکس دے تھاں پُرکِیُس فیستُس مُقرّر ہویا تَد فیلِکس ایس نِیّت اُتّے پئی یہُودِیاں نُوں احسان مند رکھّے۔ پَولُس نُوں قید وِچ ای چھڈ گیا۔ سو فیستُس ضِلعے وِچ اَپڑ کے تِنّاں دِناں دے پِچّھوں قَیصریہ توں یرُوشلِیم نُوں گیا۔ تے سردار کاہِناں تے یہُودِیاں دے وڈّے وڈّے بندیاں پَولُس دے برخلاف اوہدے اگّے فریاد کِیتی تے اوہدی مِنّت کِیتی۔ تے اوہدی بابت ایہہ رعایت منگی پئی فیستُس اوہنوں یرُوشلِیم وِچ سَدّ گھلّے تے ایہہ مَتا پکائیا ہویا سی پئی راہ وِچ اوہنوں مار سُٹّن۔ فیستُس جواب دِتّا پئی پَولُس قَیصریہ وِچ قید اے۔ تے مَیں آپ وی چھیتی اوتھے جاواں گا۔ تے آکھن لگّا پئی تُہاڈے وِچوں جیہڑے اختیار والے ہون سو میرے نال چَلّن۔ جے اوس بندے وِچ کوئی بُھل ہوئے تاں الزام دین۔ تے کوئی اَٹھ دَس دِن اوہناں دے نال رہ کے قَیصریہ نُوں ٹُر گیا تے دُوجے دِن عدالت دی گدّی اُتّے بَیہہ کے پَولُس نُوں لیاؤن دا حُکم دِتّا۔ جدوں اوہ حاضر ہویا۔ یہُودی جیہڑے یرُوشلِیم توں آئے ہوئے سن اوہدے آلے دوالے کھلو گئے تے بتھیرے بھارے بھارے الزام اوہدے اُتّے لان لگّے۔ جِنہاں نُوں اوہ ثابت نا کر سکے۔ پَولُس عُذر کِیتا پئی نا تے یہُودِیاں دی شریعت دا نا ہیکل دا نا قَیصر دا مَیں کُجھ گُناہ کِیتا اے۔ پر فیستُس ایس اِرادے نال پئی یہُودِیاں اُتّے احسان چڑھاوے پَولُس نُوں جواب دِتّا۔ تُوں یرُوشلِیم جاناں چاہنا ایں پئی اوتھے میرے سامھنے ایہناں گلّاں دی بابت تیرا فیصلہ کِیتا جائے؟ پر پَولُس آکھیا پئی مَیں قَیصر دی عدالت وِچ حاضر آں۔ چاہیدا اے پئی میرا فیصلہ ایتھے ای ہوئے یہُودِیاں دا جیویں تُوں آپ وی چنگی طرح جاننا ایں مَیں کُجھ گُناہ نئیں کِیتا۔ سو جے مَیں تقصِیری آں۔ تے مَوت دے لائق کُجھ کِیتا ہوئے۔ تاں مَیں مرن توں عُذر نئیں کر دا۔ پر جے ایہناں گلّاں وِچ جِنہاں دا ایہہ میرے اُتّے الزام لاؤندے نیں کُجھ اصل نئیں اے تَد کِسے دا حق نئیں پئی مَینُوں اوہناں دی رَئی نال اوہناں دے ہتّھ دے چھڈے مَیں قَیصر اگّے دوہائی دینا آں۔ تَد فیستُس نے کونسل نال صلاح کر کے جواب دِتّا تُوں قَیصر دی دوہائی دِتّی اے تُوں قَیصر کول ای جائیں گا۔ تے کُجھ دِناں پِچّھوں اگرِپّا بادشاہ تے برنِیکے نے قَیصریہ وِچ آ کے فیستُس نُوں سلام کِیتا۔ جد اوتھے بُہت دِن رہ پئے فیستُس بادشاہ نُوں پَولُس دا حال دس دِتّا تے آکھیا پئی اِک بندہ اے جِہنُوں فیلِکس قید وِچ چھڈ گیا۔ جدوں مَیں یرُوشلِیم وِچ ساں سردار کاہِناں تے یہُودِیاں دیاں بزُرگاں نیں اوہدی بابت شکایت کِیتی۔ تے اوہدے لئی سزا دا حُکم منگیا۔ مَیں اوہناں نُوں ایہہ جواب دِتّا۔ پئی رُومِیاں دا دستُور نئیں اے۔ پئی کِسے بندے نُوں رَئی نال سزا واسطے دے چھڈن۔ جِنّاں چِر مُلزم نُوں اپنے الزام دین والیاں دے آمھے سامھنے دعویٰ دے جواب دین دا موقع نا مِلے۔ سو جد اوہ ایتھے اکٹّھے ہوئے۔ مَیں کِسے طرح چِر نا لایا سگوں دُوجے دِن ای عدالت دی گدّی اُتّے بَیہہ کے حُکم دِتّا پئی اوس بندے نُوں لیاؤن۔ جد اوہدے الزام دین والے کھلو گئے تے اوہناں نیں اوہناں بُرائیاں دا جیہڑیاں مَیں سمجھدا ساں اوہدے اُتّے کوئی الزام نئیں لایا۔ پر اپنے دِین دی بابت بحث کر دے سن۔ تے کِسے بندے یِسُوع دی بابت جیہڑا مر گیا سی تے پَولُس اوہنوں جِیوندیاں آکھدا اے۔ تے جد مَیں شک وِچ پیا پئی ایہناں گلّاں دی کِس طرح تحقیقات کراں تَد مَیں اوہنوں پُچھیا پئی یرُوشلِیم نُوں جان دی تیری صلاح اے؟ پئی ایہناں گلّاں دی بابت تیرا فیصلہ ہوئے؟ پر پَولُس نے جد دوہائی دِتّی پئی شہنشاہ دی عدالت وِچ میرا فیصلہ ہوئے تاں مَیں حُکم دِتّا پئی جد تِیکر مَیں اوہنوں قَیصر کول نا گھلاں قید وِچ رکھیا جائے۔ تے اگرِپّا فیستُس نُوں آکھیا میری مرضی اے۔ پئی مَیں آپ وی ایس بندے دِیاں گلّاں سُناں۔ اوس آکھیا تُوں بھلکے اوہدیاں سُن لئیں۔ سو دُوجے دِن جدوں اگرِپّا تے برنِیکے وی بڑے بن پھّب کے آئے۔ تے فَوج دے سرداراں تے شہر دے رئیساں سَنے اوہ دیوان خانے وِچ گئے۔ تاں فیستُس دے حُکم نال پَولُس حاضر کِیتا گیا۔ تَد فیستُس آکھن لگّا۔ اے اگرِپّا بادشاہ تے سارے جیہڑے حاضر ہو تُسی ایس بندے نُوں ویکھدے ہو جِہدی بابت سارے یہُودی یرُوشلِیم وِچ تے ایتھے وی میرے مگر پئے تے رَولا پا کے آکھدے سن پئی اگّے نُوں اوہدا جِیوندیاں رہنا مناسب نئیں۔ پر مَیں سمجھیا اوس مَوت دے لائق کوئی کمّ نئیں کِیتا تے جِس حالت وِچ اوس آپی شہنشاہ دی دوہائی دِتّی۔ مَیں اوہنوں گھل دین دا اِرادہ کِیتا۔ اوہدی بابت میرے کول کوئی پَکّی گلّ اے نئیں پئی اپنے مالک نُوں لِکھاں۔ ایس کر کے مَیں اوہنوں تُہاڈے اگّے خاص کر کے اگرِپّا بادشاہ تیرے اگّے لے آیا تاں جو تحقیقات کر کے میرے کول کُجھ لِکھن جوگا ہو جائے۔ کیوں جو مَینُوں ایہہ عقل دی گلّ نئیں جاپدی پئی قیدی نُوں گھلاں۔ تے نال ای ایہہ نا دساں پئی کیہڑے کیہڑے الزام اوہدے اُتّے لائے نیں۔ تے اگرِپّا پَولُس نُوں آکھیا۔ تینُوں اپنی بابت بولن دی اجازت اے۔ تَد پَولُس اپنا ہتّھ وَدّھا کے جواب دین لگّا۔ اَے اگرِپّا بادشاہ۔ مَیں اپنی نیک بختی سمجھنا آں۔ پئی اوہناں سبھناں گلّاں دا جیہڑیاں یہُودی میرے اُتّے لاندے نیں اَج تیرے اگّے جواب دیاں۔ خاص ایس لئی پئی یہُودِیاں دِیاں سارِیاں رسماں۔ تے مسئلیاں توں تُوں واقف ایں۔ ایس واسطے میری عرض اے۔ پئی تُوں صبر نال میری گلّ سُن۔ سارے یہُودی جان دے نیں پئی میری قوم دے وِچ تے یرُوشلِیم وِچ جوانی توں لے کے ہُن تِیکر میرا چال چَلّن کیہو جِہیا رہیا اے۔ شُروع توں اوہناں نُوں میری بابت معلُوم اے جے گواہی دینی چاہن پئی اپنے پَرلے درجے دے دِیندار فِرقے وانگر مَیں فریسی ہو کے رہندا ساں۔ تے ہُن اوس وعدے دی آس پِچّھے جیہڑا خُدا ولّوں۔ ساڈے پئیو دادیاں دے نال کِیتا گیا سی۔ مَیں عدالت وِچ کھلوتا آں۔ اوسے وعدے دے پُورے ہون دی آس اُتّے ساڈے باراں گھرانے دِلوں جانوں رات دِن بندگی کر دے نیں۔ اَے بادشاہ ایسے آس دے سبّب یہُودی مَینُوں الزام دیندے نیں۔ جد خُدا مُردیاں نُوں جوالدا اے تے تُسی ایس گلّ نُوں کیوں مَنّن والی نئیں سمجھدے۔ مَیں وی سمجھدا ساں پئی یِسُوع ناصری دے ناں دے برخلاف بُہت کُجھ کرنا چاہیدا اے۔ سو ایہو ای مَیں یرُوشلِیم وِچ کِیتا۔ تے سردار کاہِناں توں اختیار لے کے بتھیریاں پاک لوکاں نُوں قید وِچ پایا۔ تے جد اوہ مارے جاندے سن اوہناں دے برخلاف مَیں رائے دیندا ساں۔ تے سارے عبادت خانیاں وِچ اوہناں نُوں کئی واری سزا دے کے مَیں اوہناں توں کُفر اکھواؤندا ساں۔ تے اوہناں اُتّے بڑا سَودائی ہو کے مَیں اوہناں نُوں اوپریاں شہراں تِیکر وی تنگ کِیتا۔ جِس ویلے سردار کاہِناں توں وَس تے سونپنا لے کے مَیں ایسے حال وِچ دمِشق ولّ پیا جاندا ساں۔ تاں اَے بادشاہ۔ مَیں راہ وِچ دوپہر ویلے اِک چانن ویکھیا۔ جیہڑا سُورج دے چانن نالوں بوہتا سی تے اوہ میرے تے میرے نال دیاں دے چَوفیرے چمکیا۔ تے جد اسی سارے زمین اُتّے ڈِگّ پئے مَیں اِک اواز سُنی جیہڑی عِبرانی بولی وِچ آکھدی سی۔ اَے ساؤُل اَے ساؤُل تُوں مَینُوں کیوں ستانا ایں؟ پرانی اُتّے چھڑ مارنا تیرے لئی اَوکھا اے۔ تے مَیں آکھیا اے خُداوند تُوں کون ایں؟ تے خُداوند آکھیا۔ مَیں یِسُوع آں۔ جِہنُوں تُوں ستانا ایں۔ اُٹھ تے اپنے پیراں اُتّے کھلو جا۔ کیوں جو مَیں ایس لئی تینُوں وکھالی دِتّی اے۔ پئی تینُوں اوہناں گلّاں دا جِنہاں وِچ تُوں مَینُوں ویکھیا اے۔ تے جِنہاں وِچ مَیں تینُوں وکھالی دیاں گا۔ مَیں تینُوں خادم تے گواہ بناواں۔ تینُوں ایس قوم تے غیر قوماں توں بچا کے اوہناں دے کول مَیں تینُوں ایس لئی گھلّنا آں۔ پئی تُوں اوہناں دِیاں اَکھّیاں کھولیں۔ تاں جو اوہ ہنیریوں چانن ولّ۔ تے شیطان دے وَس توں خُدا ولّ مُڑن پئی گُناہاں دی مُعافی لین۔ تے اوہناں لوکاں وِچ جیہڑے میرے اُتّے اِیمان رکھن نال پاک ہوئے نیں وِرثہ لین۔ ایس کر کے اَے اگرِپّا بادشاہ مَیں اوس اسمانی رویا دی نافرمانی نئیں کِیتی۔ پر پہلاں دمِشق تے یرُوشلِیم دے رہن والیاں نُوں تے یہُودیہ دے سارے دیس وِچ تے غیر قوماں نُوں وی دسدا رہیا۔ پئی تَوبہ کرو تے خُدا ولّ پھر کے تَوبہ دے لائق کمّ کرو۔ ایس سبّب کر کے یہُودِیاں مَینُوں ہیکل وِچ پَھڑکے میرے مار سُٹّن دی کوشش کِیتی۔ پر خُدا دی مدد نال مَیں اَج دے دِن تِیکر کھلوتا ہویا آں۔ تے نِکّیاں وڈّیاں اگّے گواہی دینا آں تے جیہڑیاں گلّاں نبیاں تے مُوسیٰ نے دسیاں سن پئی ہون والیاں نیں۔ اوہناں دے بِناں ہور کُجھ مَیں نئیں آکھدا۔ پئی مسِیح ضرُور دُکھ سہے گا۔ تے مُردیاں وِچوں اُٹھ کے ایس قوم نُوں تے غیر قوماں نُوں وی پہلاں اوہ ای چانن دی خبر دے گا۔ تے جد اوہ اینج اجے اپنا جواب پیا دیندا سی فیستُس اُچّی اواز نال آکھن لگّا۔ پَولُس تُوں تے پاگل ایں۔ بُہتے عِلم تیری عقل مار چھڈی اے۔ پَولُس آکھیا اَے فیستُس بہادر مَیں تاں پاگل نئیں آں۔ سگوں سچیائی تے سُرت والیاں گلّاں صاف سُناناں آں۔ کیوں جو بادشاہ جِہدے حضُور مَیں دلیری نال بولنا آں ایہناں گلّاں دی بابت جان دا اے مَینُوں یقِین اے پئی ایہناں گلّاں وِچوں کوئی وی اوہدے توں لُکی ہوئی نئیں ایس لئی پئی ایہہ کمّ کِسے گُٹّھے نئیں ہویا۔ اَے اگرِپّا بادشاہ تُوں نبیاں نُوں مَنّنا ایں؟ مَیں جاننا آں پئی تُوں مَنّنا ایں۔ اگرِپّا پَولُس نُوں آکھیا۔ تُوں تے چاہنا ایں پئی تھوڑی جِہی نصِیحت نال مَینُوں مسِیحی کر لئیں۔ پَولُس آکھیا مَیں تے خُدا توں چاہناں آں پئی بھانویں تھوڑی نصِیحت نال بھانویں بُہتی نصِیحت نال نا نِرا تُوں سگوں جِنّے اَج میری پئے سُندے نیں ایہناں بیڑیاں نُوں چھڈ کے میرے جیہے ہو جان۔ تے بادشاہ تے حاکم تے برنِیکے تے جیہڑے اوہناں دے نال بَیٹھے ہوئے سن اُٹھ کھلوتے۔ تے وکھرے ہو کے آپو وِچ گلّاں کرن لگّے۔ پئی ایہہ جِنہاں قتل یا قید دے لائق کُجھ نئیں کر دا۔ تے اگرِپّا نے فیستُس نُوں آکھیا۔ پئی ایہہ بندے جے قَیصر دی دوہائی نا دیندا تاں چُھٹ سکدا سی۔ تے جدوں فیصلہ ہوگیا۔ پئی اسی جہاز اُتّے اِطالِیہ نُوں جائیے اوہناں پَولُس تے ہور قیدِیاں نُوں یُولِیُس کر کے شہنشاہی پلٹن دے اِک صُوبیدار دے حوالے کِیتا۔ تے ادرمُتّیُم دے اِک جہاز اُتّے جِس آسِیہ دے کنڈھے کنڈھے دے شہراں نُوں جانا سی۔ چڑھ کے اسی ٹُر پئے۔ تے ارِسترخُس تھِسّلُنِیکے دا اِک مَکِدُنی ساڈے نال سی۔ تے دُوجے دِن اسی صَیدا وِچ جا لگّے۔ تے یُولِیُس نے پَولُس نال چَنگا سلُوک کر کے اوہنوں دوستاں کول جان دِتّا۔ پئی اوہدی سیوا خِدمت ہوئے۔ تے اوتھوں ٹُرے تے وَا سامنی ہون دے سببّوں اسی کُپرُس دے اوہلے اوہلے چلّے۔ تے کِلِکیہ تے پمفِیلیہ دے سامھنے دے سمُندر نُوں لنگھ کے اسی لُوکیہ دے مُورہ وِچ اُترے۔ تے اوتھے صُوبیدار نُوں اِسکندریہ دا اِک جہاز لَبھّا جیہڑا اِطالِیہ ولّ جان والا سی۔ تے اوس اوہدے اُتّے سانُوں چڑھا دِتّا۔ تے جد بُہت دِن تِیکر ہَولے ہَولے ٹُر کے اسی مَساں کَنِدُس دے سامھنے اَپڑے تے ایس واسطے پئی وَا سانُوں اگّے نئیں سی جان دیندی۔ اسی سلمونے دے ساہمنیوں ہو کے کریتے دے اوہلے اوہلے چلّے۔ تے اوہدے کنڈھے کنڈھے مُشکل نال چَل کے اسی اِک تھاں جِہدا ناں سوہنا پتّن سی اَپڑے اوہدے نیڑے لَسَیَہ شہر سی۔ تے جد بُہت ویلا لنگھ گیا تے سمُندر دا سفر خطرے والا سی ایس کر کے پئی روزے دا دِن وی ہُن لنگھ گیا سی پَولُس اوہناں نُوں سمجھا کے آکھیا۔ صاحَبو مَینُوں پتا اے۔ پئی ایس سفر وِچ مُصِیبت تے بڑا نُقصان ہون والا اے نِرا مال دا تے جہاز دا نئیں۔ پر ساڈیاں جاناں دا وی۔ پر صُوبیدار پَولُس دِیاں گلّاں نالوں مَلّاحاں دے سردار دی تے جہاز دے مالک دی گلّ بُہتی مَن لئی۔ تے ایس لئی پئی اوہ پتّن سِیال ٹپان لئی چَنگا نئیں سی بتھیریاں دی صلاح سی پئی ایتھوں ٹُر چلّئے۔ پئی کِسے طرح فِینِکس نُوں اَپڑ سکِئے۔ تے اوتھے سِیال لنگھائیے اوہ تاں کریتے دا اِک پتّن اے۔ تے اوہدا مُہاڑ پہاڑ چڑھدے تے دَکھّن چڑھدے ولّ اے۔ تے جدوں دکھنی وَا ہَولی ہَولی وَگن لگّی۔ تَد ایہہ سمجھ کے پئی ساڈا مطلب ہتّھ آیا اوہناں لنگر نُوں چُک لیا۔ تے کریتے دے کنڈھے دے نال نال ٹُرے۔ پر تھوڑے چِر پِچّھوں اِک بڑی تگڑی ہنیری جِہنُوں یُورکلُون آکھدے نیں اودھروں جہاز اُتّے آ گئی۔ تے جدوں جہاز اوہدے قابُو آگیا۔ تے وَا دا سامنا نا کر سکیا۔ اساں اوہدے توں لاچار ہو کے اوہنوں چَلّن دِتّا۔ تے کَودہ کر کے اِک نِکّے ٹاپُو دے اوہلے جاندِیاں جاندِیاں اساں مَساں بیڑی نُوں قابُو کِیتا۔ جدوں اوس بیڑی نُوں اُتانہہ چڑھا لیا تَد ولّ نال جہاز نُوں تھلیوں کسّیا۔ تے ایس ڈر دے مارِیاں پئی کِتے سُورتِس دے بریتیاں اُتّے نا جا لگیئے۔ اوہ سامان لاہ کے ایویں رُڑھدے رُڑھدے ٹُر دے گئے۔ تے جدوں ہنیری دے سببّوں اساں بڑے ہُجکے کھادے۔ تاں دُوجے دِن بھار باہر سُٹّن لگّے۔ تے ترِیجے دِہاڑے اپنے ہتّھاں نال جہاز دِیاں جہتراں سُٹ دِتّیاں۔ تے جدوں بُہت دِناں تِیکر نا سُورج نا تارے دِسے۔ تے ہنیری بڑے زور دی وَگدی سی تَد اخِیر سانُوں بچن دی آس نا رہی۔ تے جدوں اوہناں نُوں روٹی کھادِیاں بُہت چِر ہو گیا۔ تَد پَولُس اوہناں وِچ کھلو کے آکھن لگّا۔ صاحَبو۔ تُہانوں چاہیدا سی پئی میرے آکھے لگدے تے کریتے توں نا ٹُر دے تے ایہہ مُصِیبت تے نُقصان نا ہوندا۔ تے ہُن مَیں تُہاڈی مِنّت کرنا آں پئی تسلّی رکھو کیوں جو تُہاڈے وِچوں کِسے دی جان دا نُقصان نا ہوئے گا۔ پر نِرا جہاز دا۔ کیوں جو خُدا جِہدا مَیں آں تے جِہدی عبادت وی کرنا آں۔ اوہدا فرِشتہ اَج راتِیں میرے کول آیا۔ تے آکھیا۔ اَے پَولُس۔ تُوں نا ڈر۔ ایس لئی پئی تینُوں قَیصر دے اگّے کھلونا اے۔ تے ویکھ خُدا ایہناں سبھناں نُوں جیہڑے تیرے نال سوار نیں تینُوں بخش دِتّا اے۔ سو صاحَبو تسلّی رکھو۔ کیوں جو میرا خُدا اُتّے یقِین اے۔ پئی جیویں مَینُوں آکھیا گیا اے اوسے طرح ہوئے گا۔ پر کِسے ٹاپُو وِچ اسی ضرُور جا پواں گے۔ تے جدوں چودھویں رات آئی تے اسی ادریہ دے سمُندر وِچ رُڑھدے پِھردے ساں۔ تَد اسی رات نُوں مَلّاحاں نیں جاچیا پئی کِسے مُلک دے نیڑے اَپڑے آں۔ تے اوہناں پانی نُوں مِتھیا تے اوہ اَسّی ہتّھ نِکلیا۔ تھوڑا ہور وَدّھ کے فیر مِتھیا تے سَٹّھ ہتّھ نِکلیا۔ تے ایس ڈر دے مارے پئی اسی کِتے پتّھر والے تھاں نا جا پئیے اوہناں جہاز دے پِچّھلے پاسیوں چار لنگر سُٹ دِتّے تے دِن چڑھن دی دُعا منگدے رہے۔ تے جدوں ملّاح جہاز وِچوں بھج جانا چاہندے سن تے ایس بہانے نال بیڑی نُوں سمُندر وِچ ہیٹھاں لمکایا۔ پئی جیویں اگلے پاسیوں لنگر سُٹّیا اے۔ تَد پَولُس صُوبیدار نُوں تے سپاہیاں نُوں آکھیا۔ جے ایہہ جہاز وِچ نا رہن تاں تُسی بچ نئیں سکدے۔ تَد سپاہیاں نیں بیڑی دِیاں رَسّیاں وَڈّھ سُٹِّیاں تے اوہنوں ڈِگّن دِتّا۔ تے دِن اجے نئیں سی نِکلیا تے پَولُس نے سبھناں دی مِنّت کِیتی پئی کُجھ کھاؤ۔ تے ایہہ آکھیا اَج چودھواں دِن ہویا پئی اُڈِیکدیاں اُڈِیکدیاں تُساں کُجھ نئیں کھادا تے بُھکھے رہے ہو۔ ایس واسطے مَیں تُہاڈی مِنّت کرنا آں پئی کُجھ کھاؤ پِیو۔ کیوں جو ایہدے وِچ تُہاڈا بچاؤ اے۔ ایس کر کے پئی تُہاڈے وِچوں کِسے دے سِر دا وال وی وِنگا نا ہوئے گا۔ تے ایہہ آکھ کے اوس روٹی لئی تے خُدا دا شُکر سبھناں دے سامھنے کِیتا تَد توڑ کے کھان لگّا۔ تَد ساریاں نُوں تسلّی ہوئی تے اوہناں آپ وی اَن پانی کھادا۔ تے جہاز اُتّے سارے مِل کے اسی دو سو چھہتّر بندے سن۔ تے جدوں کھا کے اوہ رَجّ گئے تاں اوہناں کنک نُوں سمُندر وِچ سُٹ کے جہاز نُوں ہولیاں کِیتا۔ جدوں دِن ہویا اوہناں اوس دیس نُوں نا سہاتا پر اِک پَدھرا تھاں ویکھ کے جِہدا کنڈھا صاف سی۔ اوہناں آپو وِچ صلاح کِیتی پئی جے ہو سکے تاں جہاز اوتھے چڑھا لئیے۔ تے لنگراں نُوں کٹ کے اوہناں نیں اوہناں نُوں سمُندر وِچ چھڈ دِتّا۔ نالے پتوار دِیاں رَسّیاں کھولِیاں۔ تے اگلے پاسے دے پال نُوں وَا دے مُہاڑ چاہڑ کے کنڈھے ولّ ہو پئے۔ پر اِک تھاں اَپڑ کے۔ جِتّھے دو پاسے سمُندر دا زور سی اوہناں جہاز نُوں زمین اُتّے لگّن دِتّا تے اگلا پاسا دھکّا کھا کے کُھب گیا۔ تے پِچّھلا پاسا ٹھاٹھاں دے زور نال ٹُٹن لگّا۔ تے سپاہیاں دی صلاح سی پئی قیدِیاں نُوں مار سُٹّیئے کِتے اجیہا نا ہوئے پئی کوئی تَر کے بھج نِکلے۔ پر صُوبیدار پَولُس نُوں بچانا چاہندا سی تے اوہناں نُوں اوس اِرادے توں ڈکیا۔ تے حُکم دِتّا پئی جیہڑے جیہڑے تَر سکدے نیں سو جہاز توں چھال مار کے پہلاں زمین اُتّے جا لگّن۔ تے باقی کئی پھَٹیاں اُتّے تے کئی جہاز دی ہور کِسے شے اُتّے ٹُر جان۔ تے ایس طرح ہویا پئی ساریاں دے سارے بچ کے زمین اُتّے سلامتی نال اَپڑ گئے۔ جدوں اسی بچ نِکلے تاں معلُوم کِیتا پئی ایہہ ٹاپُو مِلتِے اکھواؤندا اے۔ تے اوس تھاں اوپرے لوکاں ساڈے اُتّے بڑی مِہربانی کِیتی۔ پئی اوہناں مینہ دی جھڑی تے پالے دے سبّب اَگ بالی۔ تے ساڈے سبھناں دی خاطر کِیتی۔ جد پَولُس نے لکڑیاں کٹھِیاں کِیتیاں۔ تے اَگ اُتّے رَکھیّاں۔ تَد اِک سَپّ سیک نال نِکلیا۔ تے اوہدے ہتّھ نُوں چَمّڑ گیا۔ جدوں اوہناں اوپریاں کِیڑے نُوں اوہدے ہتّھ نال لمکیا ہویا ویکھیا تے آپو وِچ آکھن لگّے۔ بے شک ایہہ خُونی بندہ اے۔ بھانویں سمُندروں بچ گیا۔ فیر وی انصاف اوہنوں جیون نئیں دیندا۔ تَد اوہنے کِیڑے نُوں اَگ وِچ چھنڈ دِتّا تے کُجھ نُقصان نا ہویا۔ تے اوہ ویکھدے سن پئی ہُن سُج جائے گا۔ یا اِک دم مر کے ڈِگّ پَوے گا۔ پر جدوں اوہناں بُہت چِر اُڈِیک کِیتی تے ویکھیا پئی اوہدا کُجھ نئیں وِگڑیا۔ تاں اوہناں دا ہور خیال ہویا تے آکھن لگّے۔ پئی ایہہ کوئی دیوتا اے۔ تے اوس تھاں دے نیڑے ٹاپُو دے سردار پُبلِیُس دی ملکیّت سی۔ اوس سانُوں اپنے گھر کھڑ کے تَرے دِہاڑے ساڈی بڑی خاطر تواضع کِیتی۔ تے اینج ہویا پئی پُبلِیُس دا پئیو تاپ تے مروڑے نال ماندا پیا ہویا سی۔ اوہدے کول جا کے پَولُس دُعا منگی۔ تے اپنے ہتّھ اوہدے اُتّے رکھ کے اوہنوں ولّ کِیتا۔ تے ایس حال دے ہون نال ٹاپُو دے ہور لوک وی جیہڑے روگی سن آئے تے چنگے کِیتے گئے۔ تے اوہناں ساڈی بُہت ای عِزّت کِیتی۔ تے جِس ویلے اسی ٹُرن لگّے تاں جیہڑیاں شیواں دی سانُوں لوڑ سی اوہناں جہاز اُتّے لَدّ دِتّیاں۔ تے تِنّاں مہِینیاں پِچّھوں اسی اِسکندریہ دے اِک جہاز اُتّے ٹُرپَئے جِہدا نِشان دِیُسکُوری سی تے جِس اوسے ٹاپُو وِچ سِیال کَٹیا ہویا سی۔ تے سرَکُوسہ وِچ اُتر کے اسی تِنّ دِن رہے۔ اوتھوں وَلا پا کے ریِگیُم وِچ اَپڑے تے اِک دِن پِچّھوں دَکھّن دی وَا وَگ پئی تے دُوجے دِن اسی پُتیُلِی وِچ اَپڑے۔ اوتھے سانُوں بھرا مِلے۔ جِنہاں ساڈی مِنّت کِیتی۔ پئی اِک ہفتہ ساڈے کول رہ جاؤ۔ تے اسی ایسے طرح رُومہ وِچ اَپڑے۔ اوتھوں وی بھرا ساڈی خبر سُن کے اَپّیُس دے چَوک تے تَرے سراواں تِیکر ساڈے مِلن نُوں اگّوں والی آئے۔ اوہناں نُوں ویکھ کے پَولُس خُدا دا شُکر کِیتا تے اوہنوں تسلّی ہوئی۔ تے جدوں اسی رُومہ وِچ اَپڑے پَولُس نُوں ایہہ اجازت مِلی۔ پئی اوس سپاہی نال اکلّا رہے جیہڑا اوہدی راکھی کر دا سی۔ تے اینج ہویا پئی تِنّ دِن پِچّھوں اوس یہُودِیاں دے وڈّے وڈّے بندیاں نُوں سدّیا تے جدوں اوہ اکٹّھے ہوئے اوس اوہناں نُوں آکھیا۔ بھراؤ! بھانویں مَیں اپنی قوم دے یا پئیو دادیاں دِیاں رسماں دے اُلٹ کُجھ وی نئیں کِیتا۔ تَد وی یرُوشلِیم توں قیدی ہو کے مَیں رُومِیاں دے ہتّھ پھڑوایا گیا۔ جدوں ایہناں تحقیقات کِیتی۔ مَینُوں چھڈ دینا چاہندے سن کیوں جو میرے وِچ کوئی مَوت دا سبّب نئیں سی۔ تے جدوں یہُودی ایس گلّ دے خلاف بولے مَیں مجبُور ہو کے قَیصر دی دوہائی دِتّی۔ پر ایس لئی نئیں پئی مَیں اپنی قوم اُتّے کُجھ فریاد کرنی سی۔ ایسے واسطے مَیں تُہانوں سدّیا پئی تُہانوں مِلاں تے گلّ بات کراں۔ کیوں جو اِسرائیل دی آس دے سببّوں مَیں ایس سَنگل نال بَدّھا ہویا ہاں۔ تَد اوہناں اوہنوں آکھیا نا سانُوں یہُودِیاں ولّوں تیری بابت چِٹّھیاں مِلیاں۔ تے نا بھراواں وِچوں کِسے آ کے تیری کوئی خبر دِتّی نا بُرائی دسی۔ پر اسی چاہنے آں پئی تیرے کولوں سُنیے۔ پئی تیرے کِیہ خیال نیں۔ کیوں جو ایس فِرقے دی بابت اسی جاننے آں۔ پئی سبھنیں تھائِیں اوہنوں بُرا آکھدے نیں۔ تے جد اوہناں اوہدے لئی اِک دِن مُقرّر کِیتا۔ بتھیرے اوہدے ڈیرے اُتّے اوہدے کول آئے اوہناں نُوں اوس کھول کے سکھالیا تے خُدا دی بادشاہی دی گواہی دِتّی تے سویرے توں لے کے شام تِیکر مُوسیٰ دی توریت تے نبیاں دِیاں کِتاباں وِچوں یِسُوع دی بابت دلِیلاں کڈھ کے دسیاں۔ تے بعضیاں اوہناں گلّاں نُوں جیہڑیاں اوس آکھیاں سن مَن لیا۔ تے بعضیاں نا مَنّیا۔ تے جد اوہناں دی آپو وِچ اِکّو صلاح نا بنی۔ تَد پَولُس دے ایہہ گلّ آکھدیاں سار ای اوہ ٹُر گئے۔ پئی پاک رُوح نے یسعیاہ نبی دی زبانی تُہاڈے پئیو دادیاں نُوں چَنگا آکھیا۔ پئی تُوں ایس قوم دے کول جا کے آکھ پئی تُسی کنّاں نال سُنو گے پر کَدے نئیں سمجھو گے۔ تے اَکھّیاں نال ویکھو گے پر کدی نئیں پہچانو گے۔ کیوں جو ایس قوم دا دِل موٹا ہو گیا اے۔ تے اوہناں دے کنّ اُچّے سُندے نیں تے اپنیاں اَکھّیاں اوہناں مِیٹِیاں ہویاں نیں۔ کِتے اجیہا نا ہوئے پئی اوہ اپنیاں اَکھّیاں نال پہچانن۔ تے اپنے کنّاں نال سُنن۔ تے دِل نال سمجھن۔ تے مُڑ جان۔ تے مَیں اوہناں نُوں ولّ کراں۔ سو تُسی جان لو پئی خُدا دی ایس نجات دی خبر غیر قوماں ولّ گھلّی گئی اے۔ تے اوہ اوہنوں سُن وی لین گِیاں۔ [جدوں اوس ایہہ آکھیا تے یہُودی آپو وِچ بحث کر دے ہوئے چلّے گئے۔] اوہ پُورے دو ورھیاں تِیکر اپنے کرائے دے گھر وِچ رہیا سبھناں نُوں جیہڑے اوہدے کول آوندے سن اوہناں نُوں مِلدا رہیا۔ تے پُوری دلیری نال خُدا دی بادشاہی دی منادی کر دا تے خُداوند یِسُوع مسِیح دی بابت سِکھالدا رہیا تے کوئی اوہنوں روکدا نئیں سی۔ پَولُس ولّوں جیہڑا یِسُوع مسِیح دا غلام سدّیا ہویا رسُول تے خُدا دی خُوشخبری لئی وَکھ کِیتا گیا۔ جِہدا اوس اگّے توں اپنے نبیاں دی راہِیں پاک کتاب وِچ۔ اپنے پُتر ساڈے خُداوند یِسُوع مسِیح دی بابت وعدہ کِیتا سی جیہڑا جِسم ولّوں تے داؤد دی نسلوں پَیدا ہویا۔ پر پاکیزگی دی رُوح ولّوں مُردیاں وِچوں جی اُٹھن دے سبّب قُدرت نال خُدا دا پُتر ثابت ہویا۔ جِہدی راہِیں سانُوں فضل تے رسالت مِلی۔ تاں جو اوہدے ناں واسطے سارِیاں قوماں وِچوں لوک اِیمان دے تابعیاں ہون۔ اوہناں قوماں وِچوں تُسی وی یِسُوع مسِیح دے ہون لئی سَدّے گئے ہو۔ اوہناں ساریاں دے ناں جیہڑے رُومہ وِچ خُدا دے پیارے پاک ہون لئی سَدّے گئے نیں۔ ساڈے باپ خُدا تے خُداوند یِسُوع مسِیح ولّوں تُہانوں فضل تے سلامتی مِلدی رئے۔ پہلاں تے مَیں یِسُوع مسِیح دی راہِیں تُہاڈے سبھناں لئی اپنے خُدا دا شُکر کرنا آں۔ پئی تُہاڈے اِیمان دی مشہُوری سارے جہان وِچ ہوندی اے۔ تے خُدا جِہدی بندگی مَیں اپنی رُوح نال اوہدے پُتر دی خُوشخبری سُنان وِچ کرنا آں۔ میرا گواہ اے پئی کِس طرح ہرویلے تُہانوں یاد رکھنا آں۔ تے سدا اپنی دُعاواں وِچ درخواست کر دا رہناں آں پئی کِسے طرح جے خُدا چاہے مَیں کِیویں نا کِیویں خَیر نال ہُن وی تُہاڈے کول اَپڑ جاواں۔ کیوں جو مَینُوں تُہاڈے ویکھن دا بُہت ای شَوق اے۔ پئی کوئی رُوحانی بخشِش تُہانوں پُچاواں۔ جِہدے نال تُسی تگڑے ہو جاؤ۔ سو مَینُوں وی تُہاڈے وِچ ہو کے تُہاڈے نال اوس اِیمان دے سببّوں تسلّی مِلے۔ جیہڑا میرے تے تُہاڈے دوہاں وِچ اے۔ بھراؤ مَیں نئیں چاہندا۔ پئی تُسی ایس گلّوں بے خبر رہو۔ پئی مَیں کئی وار تُہاڈے کول آؤن دا اِرادہ کِیتا۔ پئی جیویں مَینُوں ہورناں غیر قوماں وِچ پَھل مِلیا اے۔ اوسے طرح تُہاڈے وِچ وی مِلے۔ پر اَج تِیکر رُکیا رہیا۔ مَیں یُونانِیاں تے غیر یُونانِیاں۔ داناواں تے ناداناں دا قرضئی آں۔ سو مَیں اپنی طاقت دے سببّوں تُہانوں وی جیہڑے رُومہ وِچ اوہ۔ خُوشخبری سُنان نُوں تیار آں۔ کیوں جو مَیں اِنجِیل توں شرماں دا نئیں۔ ایس کر کے پئی اوہ ہر اِک دی نجات دے لئی۔ جیہڑا اِیمان لیاؤندا اے۔ پہلاں یہُودی تے فیر یُونانی دے لئی خُدا دی قُدرت اے۔ ایس لئی پئی خُدا دی راستبازی اِیمان توں تے اِیمان لئی اوہدے وِچ ظاہر ہوندی اے۔ جیویں لِکھیا ہویا اے۔ پئی راستباز اِیمان توں جیوے گا۔ کیوں جو خُدا دا غضب اوہناں بندیاں دی ساری بے دِینی تے ناراستی اُتّے اسمان توں ظاہر ہوندا اے۔ جیہڑے سچیائی نُوں ناراستی نال دباندے نیں۔ کیوں جو خُدا دی بابت جو کُجھ معلُوم ہوسکدا اے۔ اوہناں دے دِل وِچ ظاہر اے۔ کیوں جو خُدا اوہناں اُتّے اوہنوں ظاہر کر دِتّا۔ کیوں جو دُنیا دی پَیدایش دے ویلیوں اوہدیاں صِفتاں جیہڑیاں دیکھیاں نئیں جاندِیاں یعنی اوہدی مُڈھ قدِیم دی قُدرت تے خُدائی۔ اوہدی بنائِیاں ہویاں شیواں دی راہِیں صاف ظاہر ہوندیاں نیں۔ ایتھوں توڑی پئی ایہہ بے عُذر نیں۔ کیوں جو اوہناں بھانویں خُدا نُوں پچھانیاں تے وی اوہدی خُدائی دے لائق اوہدی وڈیائی نا کِیتی۔ تے نا اوہدا شُکر کِیتا۔ سگوں اپنے بَھرماں وِچ نکمّے ہوگئے۔ نالے اوہناں دے بے سمجھ دِل ہنیرے ہوگئے۔ اوہ اپنے آپ نُوں عقل والے آکھ کے مُورکھ بن گئے۔ تے نا فنا ہون والے خُدا دے جلال نُوں فانی بندیاں تے پکھیرُواں تے چَوپایاں تے کِیڑے مکوڑیاں دی صُورت بنا دِتّی۔ ایس لئی خُدا اوہناں دے دِلاں دِیاں خواہشاں دے سببّوں اوہناں نُوں پلِیتی وِچ چھڈ دِتّا پئی اپنے بدناں نُوں آپو وِچ بے عِزّت کرن۔ سو اوہناں خُدا دی سچیائی نُوں وَٹا کے جُھوٹھ بنا دِتّا۔ تے خلقت دی بندگی تے سیوا خالق نالوں وَدّھ کے کِیتی۔ جیہڑا سدا تِیکر مُبارک اے آمِین۔ ایسے سببّوں خُدا نے اوہناں نُوں گندِیاں بَھیڑیاں خواہشاں وِچ چھڈ دِتّا پئی اوہناں دِیاں زنانِیاں اپنے اصلی کمّ نُوں چھڈ کے اوہ کمّ شُروع کِیتے جیہڑے قُدرت دے خلاف نیں۔ تے ایسے طرح بندے وی زنانِیاں نال اصلی کمّ چھڈ کے لُچ پُنے نال آپو وِچ مست ہوگئے۔ مرد نے مرد نال بے شرمی دے کمّ کِیتے۔ تے اپنی بدراہی دے لائق اپنے وِچ بدلہ پایا۔ تے جدوں خُدا نُوں اپنی پِچھّاں وِچ رکھناں اوہناں نُوں چَنگا نا لگّا تَد خُدا وی اوہناں نُوں بیواقوفی وِچ چھڈ دِتّا۔ پئی نالائق کمّ کرن۔ اوہ ساری بے انصافی۔ بُریائی۔ حرص۔ وَیر نال بھر گئے۔ تے ساڑے۔ خُون۔ جھگڑے۔ دغے تے دُشمنی نال بھرے ہوئے چُغلی کرن والے۔ بُرا آکھن والے۔ خُدا اگّے نفرتی۔ طعنے مارن والے گُھمنّڈی۔ گپّی۔ بدیاں دے بانی۔ ماپیاں دا آکھا نا مَنّن والے۔ ناسمجھ۔ اِقراراں دے جُھوٹھے۔ بے دَرد۔ بے رَحم ہوئے۔ اوہ بھانویں خُدا دا حُکم جان دے نیں۔ پئی اجیہے کمّ کرن والے مَوت دے لائق نیں فیر وی نِرے اوہ آپ ای ایہہ کمّ نئیں کر دے پر کرن والیاں نال راضی وی ہوندے نیں۔ سو اَے عیب لان والیا۔ بھانویں کون ہوویں تُوں جو عیب لانا ایں تیرا کُجھ عُذر نئیں۔ کیوں جو جیہڑی گلّ دا تُوں دُوجے اُتّے عیب لانا ایں اوسے دا تُوں اپنے آپ نُوں وَدّھ عَیبی بنانا ایں۔ تُوں جیہڑا عیب لانا ایں آپے ای اوہو کمّ کرنا ایں۔ تے اسی جاننے آں۔ پئی اجیہے کمّ کرن والیاں اُتّے خُدا سچیائی نال حُکم لاندا اے۔ اَے مر دا تُوں جیہڑا اجیہے کمّ کرن والیاں اُتّے عیب لانا ایں تے آپ ای اوہو کمّ کرنا ایں۔ ایہہ سمجھنا ایں۔ پئی تُوں خُدا دی عدالت توں بچ نکلیں گا؟ یا تُوں اوہدی مِہربانی تے تحمّل تے صبر دی دَولت نُوں ماڑا جاننا ایں۔ تے نئیں سمجھدا پئی خُدا دی مِہربانی تینُوں تَوبہ دے راہ پاندی اے؟ سگوں تُوں اپنے ڈاہڈے تے نا تَوبہ کرن والے دِل دے سببّوں اوس دِن لئی جِہدے وِچ قَہر تے خُدا دی سَچّی عدالت ظاہر ہوئے گی۔ اپنے لئی قَہر اکٹّھا کرنا ایں۔ اوہ تے ہر اِک نُوں اوہدے کمّاں دے سببّوں بدلا دے گا۔ اوہناں نُوں جیہڑے نیک کمّاں دی پَیروی کر کے وڈیائی تے عِزّت تے بقا نُوں لبّھدے نیں سدا دی زِندگی دے گا۔ پر اوہناں اُتّے جیہڑے لڑاکے نیں تے سچیائی نُوں نئیں سگوں ناراستی نُوں مَن دے نیں قَہر تے غضب ہوئے گا۔ ہر اِک بندے دی جان اُتّے جیہڑا بُریائی کر دا اے۔ بِپتا تے تنگی ہوئے گی۔ پہلاں یہُودی تے فیر یُونانی اُتّے۔ پر وڈیائی تے عِزّت تے سلامتی ہر اِک نُوں جیہڑا نیک کمّ کر دا اے۔ پہلے یہُودی نُوں تے فیر یُونانی نُوں مِلے گی۔ کیوں جو خُدا دے اگّے کِسے دی رَئی نئیں ہوندی۔ ایس لئی پئی جِنہاں بِناں شریعت پایاں گُناہ کِیتے اوہ بِناں شریعت دے ہلاک وی ہون گے تے جِنہاں شریعت پا کے گُناہ کِیتے اوہناں دا فیصلہ شریعت دے سببّوں ہوئے گا۔ کیوں جو شریعت مَنّن والے وی خُدا دے اگّے راستباز نئیں ٹَھیرن گے۔ سگوں شریعت اُتّے چلّن والے۔ ایس لئی پئی جد اوہ قوماں جیہڑیاں شریعت نئیں رکھدیاں اپنے سبھاؤ توں وی شریعت دے کمّ کرن تے اوہ بھانویں شریعت نئیں رکھدیاں اپنے لئی آپ شریعت نیں کیوں جو شریعت دِیاں گلّاں اپنے دِلاں وِچ لِکھیاں ہویاں وکھاؤندِیاں تے اوہناں دے دِل وی گواہی دیندے نیں۔ تے اوہناں دے خیال آپو وِچ الزام لاندے یا عُذر کر دے نیں۔ اوس دِن جد خُدا میری خُوشخبری دے سببّوں یِسُوع مسِیح دی راہِیں بندیاں دِیاں لُکِیاں ہویاں گلّاں دا انصاف کرے گا۔ پر جے تُوں یہُودی اکھواؤندا ایں۔ تے شریعت اُتّے بھروسا رکھنا ایں۔ تے خُدا اُتّے فخر کرنا ایں۔ تے اوہدی مرضی جاننا ایں۔ تے شریعت دی تعلِیم پا کے چنگیاں شیواں پسند کرنا ایں۔ تے اپنے اُتّے یقِین کر بَیٹھنا ایں۔ پئی مَیں اَنھیاں نُوں راہ پان والا تے ہنیرے وِچ بیہن والیاں لئی چانن۔ تے ناداناں دا گُرو تے نیانیاں دا اُستاد آں تے شریعت دے عِلم تے سچیائی دا نمونہ میرے کول اے۔ تُوں جیہڑا دُوجے نُوں سکھانا ایں۔ اپنے آپ نُوں نئیں سِکھالدا۔ تُوں جیہڑا منادی کرنا ایں۔ پئی چوری نا کر۔ آپے ای چوری کرنا ایں؟ تُوں جیہڑا آکھنا ایں زنا نا کرنا۔ آپے ای زنا کرنا ایں؟ تُوں جیہڑا بُتاں توں نفرت کرنا ایں۔ آپ ای مَندراں نُوں لُٹّناں ایں۔ تُوں جیہڑا شریعت اُتّے فخر کرنا ایں۔ شریعت دے ٹالن نال خُدا دی بے عِزّتی کرنا ایں؟ کیوں جو لِکھیا ہویا اے۔ پئی تُہاڈے سبّب غیر قوماں وِچ خُدا دے ناں دی بے عِزّتی کِیتی جاندی اے۔ سُنتی بہن توں فائدہ تے اے جے تُوں شریعت اُتّے چلّیں۔ پر جے تُوں شریعت دا ٹالن والا ہوویں۔ تے تیرا سُنتی بہنا بے سُنتی جیہا ہوگیا۔ پر جے سُنتی نا بَیٹھے ہوئے شریعت دے حُکم مَنّن۔ تے اوہناں دا سُننی نا بہنا بہن دے برابر نا سمجھیا جائے گا؟ تے جیہڑے اُنج بیٹھے ای نئیں۔ جے شریعت نُوں مَنّن اوہ تینُوں جیہڑا سگوں سُنتی بَہہ کے تے کلام نُوں کول رکھ کے شریعت دا ٹالن والا ایں گُناہی نا ٹھہران گے؟ کیوں جو اوہ یہُودی نئیں جیہڑا وکھالے دا اے۔ تے نا اوہ سُنتی بہنا اے جیہڑا نِرا جِسمانی اے۔ سگوں ٹھیک یہُودی اوہو اے۔ جیہڑا اندروں اے تے سُنتی بہنا اوہو اے۔ جیہڑا دِل دا اے رسمی نا ہوئے پر رُوحانی ہوئے۔ اجیہے دی وڈیائی بندیاں ولّوں نئیں پر خُدا ولّوں اے۔ فیر یہُودی کیہڑی گلّوں وَدّھ اے تے سُنتی بہن دا کِیہ فائدہ اے؟ ہر طرح نال بُہت اے خاص ایس گلّے پئی خُدا دا کلام اوہناں دے سپُرد کِیتا گیا۔ فیر جے کئی اِیمان نا وی لیائے تے کِیہ؟ اوہناں دی بے اِیمان خُدا دی وفاداری نُوں نکمّیاں کر سکدی اے؟ کدی نئیں سگوں خُدا سَچّا ٹھہرے۔ بھانویں سارے بندے جُھوٹھے ہون جیویں لِکھیا اے۔ پئی تُوں اپنیاں گلّاں وِچ سَچّا ٹھہریں۔ تے عدالت وِچ جِت جاویں۔ پر جے ساڈی ناراستی خُدا دی راستبازی نُوں قیم کر دی اے۔ تے اسی کِیہ آکھیئے؟ خُدا ناراست اے۔ جیہڑا قَہر گھلدا اے؟ (مَیں اِنسان ہوندیاں گلّ کرنا آں۔) کدی وی نئیں۔ جے ہوئے تے خُدا دُنیا دی عدالت کِیویں کرے گا؟ پر جے میرے جُھوٹھ دے سببّوں خُدا دی سچیائی اوہدی وڈیائی لئی وَدھی۔ تے مَیں کاہِنُوں گُناہی ہویا۔ تے اسی بُریائی کیوں نا کریئے پئی بھلیائی نِکلے؟ جیویں ساڈے اُتّے تُہمت لاندے نیں کئیاں وِچ افواہ اے۔ پئی اسی ایسے طرح آکھنے آں۔ ایہو جِہیاں اُتّے سزا دا حُکم ٹھیک اے۔ فیر کِیہ ہویا اسی اوہناں نالوں چنگے آں؟ کَدے وی نئیں کیوں جو اسی آکھ بَیٹھے آں۔ پئی یہُودی تے یُونانی ساریاں دے سارے گُناہ دے ہیٹھ نیں۔ جیویں لِکھیا ہویا اے۔ پئی کوئی راستباز نئیں اِک وی نئیں۔ کوئی سمجھن والا نئیں کوئی خُدا دا لَبّھن والا نئیں۔ سارے بدراہ نیں۔ تے رَل کے نکمّے نیں۔ کوئی نیکی کرن والا نئیں اِک وی نئیں۔ اوہناں دا سَنگھ کُھلی قبر اے۔ اوہناں اپنی زبانوں فریب دِتّا اے۔ اوہناں دے مُنھاں وِچ سپّاں دا زہر اے۔ اوہناں دا مُنھ لعنت تے کَڑتّن دا بھریا ہویا اے۔ اوہناں دے پَیر خُون کرن وِچ کاہلے نیں۔ اوہناں دِیاں راہاں وِچ بربادی تے مُصِیبت اے۔ تے اوہناں سلامتی دا راہ سہاتا نئیں۔ اوہناں دِیاں اَکھّیاں وِچ خُدا دا خوف نئیں اے۔ ہُن اسی جاننے آں پئی شریعت جو کُجھ آکھدی اے شریعت والیاں ای نُوں آکھدی اے تاں جو ہر اِک دا مُنھ بند ہو جائے۔ تے ساری دُنیا خُدا دی عدالت دے ہیٹھ آ جائے۔ کیوں جو کوئی بندے شریعت دے کمّاں نال اوہدی نظر وِچ راستباز نا ٹھہرے گا۔ ایس لئی پئی شریعت نال ای گُناہ دی پہچان اے۔ پر ہُن شریعت دے بغیر خُدا دی راستبازی ظاہر ہوئی اے۔ تے اوہدے اُتّے شریعت تے نبی گواہی دیندے نیں۔ یعنی خُدا دی اوہ راستبازی جیہڑی یِسُوع مسِیح اُتّے اِیمان لیاؤن نال ساریاں اِیمانداراں نُوں مِلدی اے کیوں جو کُجھ فرق نئیں۔ ایس لئی پئی سبھناں گُناہ کِیتا تے خُدا دے جلال توں رَیہہ جاندے نیں۔ پر اوہدے فضل توں اوس چُھٹکارے دے سبّب جیہڑا مسِیح یِسُوع وِچ ہوندا اے۔ مُفت راستباز گِنے جاندے نیں۔ اوہنوں خُدا نے مُقرّر کِیتا۔ پئی اوہدے لہو اُتّے اِیمان لیاؤن نال کفّارہ ہوئے۔ تاں جو اوہدی راستبازی دِکھائی جاوے۔ کیوں جو خُدا صبر کر کے پِچّھلے گُناہاں نُوں چھڈ دِتّا۔ تے ایس زمانے وِچ وی اپنی راستبازی ظاہر کرے۔ تاں جو اوہ آپ راستباز رہے۔ تے اوہنوں جیہڑا یِسُوع اُتّے اِیمان لیاوے راستباز ٹھہرائے۔ فیر ہُن فخر کِتّھے رہیا۔ اوہدا تھاں ای نا رہیا کیہڑی شریعت نال؟ عملاں دی شریعت نال؟ نئیں سگوں اِیمان دی شریعت نال۔ ایس لئی اسی ایہہ سمجھنے آں پئی بندہ اِیمان ای نال شریعت دے کمّاں بِناں راستباز ٹھہر دا اے۔ خُدا نِرا یہُودِیاں دا ای اے تے غیر قوماں دا نئیں؟ ہاں اوہ غیر قوماں دا وی اے۔ کیوں جو اِکّو خُدا اے جیہڑا سُنتی بہن والیاں نُوں اِیمان نال تے نا بہن والیاں نُوں وی اِیمان دی راہِیں راستباز ٹھہراوے گا۔ فیر اسی شریعت نُوں اِیمان دی راہِیں ردّ کرنے آں؟ خُدا نا کرے۔ سگوں اسی تے شریعت نُوں قیم رکھنے آں۔ فیر اسی کِیہ آکھیئے۔ پئی ابرہام نُوں جیہڑا ساڈا جِسمانی پئیو اے کِیہ مِلیا اے؟ کیوں جو جے ابرہام کمّاں نال راستباز گِنیا گیا۔ تے اوہدا فخر دا تھاں اے۔ تَد وی خُدا دے اگّے نئیں۔ نوِشتہ کِیہ آکھدا اے؟ ایہہ پئی ابرہام خُدا اُتّے اِیمان لیا یا تے ایہہ اوہدے لئی راستبازی گِنیا گیا۔ ہُن کمّ کرن والے نُوں مزدُوری دینی بخشِش نئیں اے۔ سگوں اوہدا حق گِنیا جاندا اے۔ پر جیہڑا کمّ نئیں کر دا سگوں گُنہگار نُوں راستباز ٹھہران والے اُتّے اِیمان لیاؤندا اے۔ اوہدے لئی اوہدا اِیمان راستبازی گِنیا جاندا اے۔ جیویں داؤد دی اوس بندے دے مُبارک حال دا ذِکر کر دا اے۔ جِہدے لئی خُدا بِناں کمّاں دے راستبازی گِن لَیندا اے۔ پئی دھنّ نیں اوہ جِنہاں دے گُناہ بخشے گئے۔ تے جِنہاں دِیاں تقصِیراں کجِّیاں گِئیاں۔ دھنّ اے۔ اوہ بندہ جِہدے لیکھے وِچ خُداوند گُناہ نا گِنے گا۔ فیر اوہ مُبارکبادی سُنتی بہن والیاں اُتّے آؤندی اے یا نا بہن والیاں اُتّے وی؟ کیوں جو اسی آکھنے آں پئی ابرہام لئی اوہدا اِیمان ای راستبازی گِنیا گیا سی۔ فیر اوہ کِس حال وِچ گِنیا گیا۔ جدوں اوہ سُنتی بَیٹھا ہویا سی۔ یا اجے نئیں سی بَیٹھا؟ سُنت وِچ نئیں سگوں نا سُنت وِچ۔ تے اوہنوں سُنتی بہن دا نِشان مِلیا۔ پئی اوس اِیمان دی راستبازی دی مُہر ہوئے۔ جیہڑا اوہ ناسُنتی دے حال وِچ لیایا۔ تاں جو اوہ سبھناں دا پئیو ہوئے۔ جیہڑے نا سُنت ہوندیاں اِیمان لیاؤندے نیں پئی اوہناں لئی راستبازی گِنی جاوے۔ تے نا سُنت والیاں دا پئیو ہوئے جیہڑے نِرے سُنتی بَیٹھے ہوئے ای نئیں۔ سگوں اوس اِیمان دے کُھرے اُتّے چلدے نیں جیہڑا ساڈے پئیو ابرہام دا ناسُنتا ہوندیاں ہوئیا سی۔ کیوں جو ایہہ وعدہ پئی دُنیا تیری وِرثہ اے شریعت دی راہِیں ابرہام یا اوہدی نسل نال نئیں سی کِیتا گیا پر اِیمان دی راستبازی دی راہِیں کِیتا گیا۔ پر جے شریعت والے ای وارث نیں۔ تے اِیمان بے فائدہ تے وعدہ ردّیا گیا۔ کیوں جو شریعت قَہر پَیدا کر دی اے۔ پر جِتّھے شریعت نئیں اوتھے اوہدا ٹالنا وی نئیں۔ ایس کر کے اوہ وِرثہ اِیمان توں اے۔ تاں جو فضل وانگُوں ہوئے تے ایہہ وعدہ کُل نسل لئی قیم رہے نا نِرا اوس نسل لئی جیہڑی شریعت والی اے۔ سگوں اوس لئی وی جیہڑی ابرہام وانگر اِیمان والی اے۔ جیہڑا ساڈے سبھناں دا پئیو اے۔ (جیویں لِکھیا اے۔ پئی مَیں تینُوں بتھیریاں قوماں دا پئیو بنایا اے) اوس خُدا دی حضُوری وِچ جِہدے اُتّے اوس اِیمان لیاندا جیہڑا مُردیاں نُوں جوالدا تے اوہناں شیواں نُوں جیہڑیاں ہَین نئیں ایس طرح سَدّ دا اے پئی اوہ ہَین۔ اوس نااُمیدی وِچ آس نال اِیمان لیاندا۔ تاں جو اوس وعدے دے سببّوں پئی تیری نسل ایس طرح ہوئے گی۔ اوہ بتھیریاں قوماں دا پئیو بنے۔ تے جد سَو کُو ورھیاں دا سی اوس بھانویں اپنے بدن دا جیہڑا موئے برابر سی تے سارہ دے کُکھ دی مُردگی دا وچار کِیتا پر اِیمان وِچ ڈِھلّا نا ہویا۔ خُدا دے وعدے اُتّے بے اِیمانی نال شک نا کِیتا۔ سگوں اِیمان دی راہِیں تگڑیاں ہو کے خُدا دی وڈیائی کِیتی۔ تے اوہنوں پَکّا یقِین ہویا۔ پئی جیہڑا اوس وعدہ کِیتا اے سو پُورا وی کر سکدا اے۔ تے ایس کر کے اوہدے لئی ایہہ راستبازی وی گِنی گئی۔ تے ایہہ گلّ پئی اِیمان اوہدے لئی راستبازی گِنیا گیا۔ نِری اوہدے لئی نئیں لِکھی گئی۔ پر ساڈی خاطر وی لِکھی گئی۔ جِنہاں لئی گِنی جائے گی۔ جے اسی اوہدے اُتّے اِیمان رکھنے آں جِس ساڈے خُداوند یِسُوع نُوں مُردیاں توں جوالیا۔ جیہڑا ساڈیاں قصوراں دے لئی حوالے کِیتا گیا۔ تے سانُوں راستباز ٹھہران لئی جوایا گیا۔ سو جد اسی اِیمان توں راستباز ٹھہرائے گئے تے اسی اپنے خُداوند یِسُوع مسِیح دی راہِیں خُدا نال صُلح رکھیے۔ جِہدی راہِیں اِیمان نال ساڈی فضل تِیکر پہنچ اے۔ جِہدے وِچ اسی قیم آں۔ تے خُدا دے جلال دی آس اُتّے اسی فخر کریئے۔ تے نِرا ایہو نئیں سگوں اسی اپنیاں تنگِیاں وِچ وی فخر کریئے۔ ایہہ جان کے پئی تنگی صبر پَیدا کر دی اے۔ تے صبر تجربے نُوں تے تجربہ آس نُوں۔ تے آس شرمندہ ایس لئی نئیں کر دی۔ پئی خُدا دی مُحبّت پاک رُوح دی راہِیں جیہڑا سانُوں دِتّا گیا ساڈے دِلاں وِچ پائی ہوئی اے۔ ایس کر کے مسِیح جد اسی کمزور ساں ویلے سر بے دِیناں دے بدلے مویا۔ ہُن مَساں کوئی کِسے راستباز بندے لئی مرے گا۔ پر شاید کِسے نیک بندے دے بدلے کوئی مرن دی دلیری کرے۔ پر خُدا اپنی مُحبّت دی خُوبی ساڈے اُتّے ایس طرح ظاہر کر دا اے۔ پئی جد اسی اجے گُناہی ساں مسِیح ساڈے بدلے مویا۔ ہُن جد اسی اوہدے خُون نال راستباز ٹھہرائے گئے تے اوہدی راہِیں قَہر توں ضرُور ای بچائے جاواں گے۔ کیوں جو جے اسی وَیری ہو کے خُدا نال اوہدے پُتر دی مَوت دی راہِیں مِلائے گئے تے ہُن جد میل ہوگیا اسی اوہدی زِندگی وِچ ضرُور ای بچائے جاواں گے۔ تے نِرا ایہو نئیں سگوں اسی خُدا وِچ فخر وی کرنے آں۔ اپنے خُداوند یِسُوع مسِیح دی خاطر جِہدی راہِیں ہُن اسی مِلائے گئے آں۔ ایس کر کے جیویں اِک بندے توں گُناہ دُنیا وِچ آ وڑیا تے گُناہ توں مَوت۔ تے ایویں مَوت ساریاں بندیاں اُتّے آئی ایس لئی پئی سبھناں گُناہ کِیتا۔ کیوں جو شریعت دے آؤن تِیکر گُناہ تے دُنیا وِچ ای سی۔ پر جِتّھے شریعت نئیں اوتھے گُناہ گِنیا نئیں جاندا۔ تَد وی آدم توں لے کے مُوسیٰ تِیکر مَوت نے اوہناں اُتّے وی بادشاہی کِیتی۔ جِنہاں آدم دی نافرمانی وانگر گُناہ نا کِیتا۔ جیہڑا آؤن والے دا نمونہ سی۔ پر ایہہ نئیں پئی جِہیا قصور تیِہی بخشِش کیوں جو جد اِک دے قصور نال بتھیرے موئے تے خُدا دا فضل تے اوہ بخشِش جیہڑی اِک بندے یعنی یِسُوع مسِیح دے فضل توں اے ضرُور ای بتھیریاں لئی وَاہوَا ساری ہوئی۔ جیویں اِک بندے دے قصور کرن دا نتیجہ ہویا تیہا بخشِش دا حال نئیں کیوں جو اِکّی دے سببّوں اوہ فیصلہ ہویا۔ جِہدا نتیجہ سزا دا حُکم اے پر بتھیرے قصوراں توں ایہہ نِعمت پَیدا ہوئی پئی لوک راستباز ٹھہرن۔ کیوں جو اِک دے قصور دے سببّوں جے مَوت نے اِک دی راہِیں بادشاہی کِیتی۔ تے اوہ لوک جیہڑے فضل تے راستبازی دی بخشِش وَدّھ پاندے نیں۔ اِک دی راہِیں جیہڑا یِسُوع مسِیح اے۔ ضرُور ای زِندگی وِچ بادشاہی کرن گے۔ جیویں اِک قصور دی راہِیں سزا دا حُکم ساریاں بندیاں اُتّے آیا ایسے طرح راستبازی دے اِک کمّ توں سارے بندیاں نُوں راستباز ٹھہرا کے زِندگی مِلی۔ کیوں جو جیویں اِک بندے دے حُکم موڑن نال بتھیرے گُناہیں ٹھہرائے گئے۔ ایسے طرح اِک بندے دے حُکم مَنّن نال بتھیرے راستباز ٹھہرائے جان گے۔ تے شریعت نال ای آوڑِی تاں جو قصور بُہتا ہوئے۔ پر جِتّھے گُناہ بُہتا ہویا۔ اوتھے فضل حدّوں باہر وَدّھ ہویا۔ تاں جو جیویں گُناہ مَوت وِچ بادشاہی کِیتی۔ ایسے طرح فضل دی زِندگی توڑی راستبازی دی راہِیں یِسُوع مسِیح ساڈے خُداوند دی راہِیں بادشاہی کرے۔ اسی فیر کِیہ آکھئے۔ گُناہ وِچ رہئے تاں جو فضل بُہتا ہوئے؟ خُدا نا کرے۔ اسی جیہڑے گُناہ ولّوں مر گئے کِیویں اگّے نُوں اوہدے وِچ زِندگی کِٹئے؟ یا تُسی بے خبر ہو پئی اساں جِنّیاں مسِیح یِسُوع دا بپتِسمہ لیا اوہدی مَوت دا بپتِسمہ لیا؟ سو بپتِسمے دی راہِیں اوہدی مَوت وِچ اسی اوہدے نال دفنائے گئے۔ تاں جو جیویں مسِیح باپ دے جلال دی راہِیں مُردیاں وِچوں جوالیا گیا۔ ایسے طرح اسی وی نَوِیں زِندگی وِچ چلّئے۔ کیوں جو جیویں اسی اوہدی مَوت دی صُورت وِچ اوہدے نال جوڑے گئے آں۔ اوسے طرح اسی اوہدے جی اُٹھن دی صُورت وِچ ہوواں گے۔ ایہہ جان کے پئی ساڈی پرانی اِنسانِیّت اوہدے نال صلِیب دِتّی گئی۔ تاں جو گُنہگار بدن رَدّ کِیتا جائے تے اگّے نُوں اسی گُناہ دی غلامی نا کریئے۔ ایس کر کے پئی جیہڑا مر چُکیا سو گُناہ توں بَری ہویا اے۔ پر جد اسی مسِیح نال موئے۔ سانُوں یقِین اے پئی اسی اوہدے نال زِندہ وی ہوواں گے۔ ایہہ جان کے پئی مسِیح مُردیاں وِچوں جد جوالیا گیا اوہ مُڑ نئیں مر دا۔ مَوت دا مُڑ اوہدے اُتّے وَس نئیں چلدا۔ کیوں جو مسِیح جو مر گیا تے گُناہ ولّوں اِک وار مویا۔ پر ہُن جو جِیوندا اے خُدا واسطے جِیوندا اے۔ ایسے طرح تُسی وی اپنے آپ نُوں گُناہ ولّوں مُردے پر مسِیح یِسُوع وِچ خُدا واسطے جِیوندے سمجھو۔ سو گُناہ تُہاڈے فانی بدن وِچ بادشاہی نا کرے۔ پئی تُسی اوہدیاں شہوتاں نُوں مَنّوں۔ تے نا تُسی اپنے انگاں نُوں گُناہ دے حوالے کرو پئی ناراستی دے ہتّھیار ہون۔ پر اپنے آپ نُوں مُردیاں وِچوں جِیوندے جان کے خُدا دے حوالے کرو۔ تے اپنا انگاں نُوں راستبازی دے ہتّھیار ہون لئی خُدا دے حوالے کرو۔ کیوں جو گُناہ دا تُہاڈے اُتّے وَس نا چلّے گا۔ ایس کر کے پئی تُسی شریعت دے ہیٹھ نئیں پر فضل دے ہیٹھ ہو۔ فیر کِیہ ہویا ایس کر کے پئی اسی شریعت ہیٹھ نئیں سگوں فضل ہیٹھ آں۔ اسی گُناہ کریئے؟ خُدا نا کرے۔ تُسی نئیں جان دے پئی جِہدے تُسی اپنے آپ نُوں تابعداری لئی غلام کر کے حوالے کر دے ہو اوسے دے تُسی غلام ہو جِہدے تابعیاں اوہ۔ بھانویں مَوت لئی گُناہ دے بھانویں راستبازی لئی تابعداری دے؟ پر شُکر خُدا دا پئی بھانویں تُسی گُناہ دے غلام سو۔ تُسی اوس تعلِیم دے جِہدے سَچّے وِچ ڈھالے گئے سو۔ دِلوں تابعدار بنے۔ تے گُناہ توں چُھٹ کے تُسی راستبازی دے غلام بنے۔ تُہاڈے جِسم دی کمزوری دے سببّوں مَیں اِنسانی سبھا وانگُوں گلّ کرنا آں کیوں جو جیویں تُساں اپنے انگاں نُوں شرارت کرن لئی پلِیتی تے شرارت دی غلامی دے حوالے کِیتا اوسے طرح ہُن تُسی اپنے انگاں نُوں پاک ہون لئی راستبازی دی غلامی دے حوالے کر دیو۔ کیوں جو جد تُسی گُناہ دے غلام سو تُسی راستبازی ولّوں اَزاد سو۔ سو اودُوں تُہانوں اوہناں گلّاں دا جِنہاں توں ہُن شرماؤندے ہو کِیہ پَھل لَبّھیا؟ کیوں جو اوہناں دا اوڑک تے مَوت اے۔ پر ہُن گُناہ توں چُھٹ کے تے خُدا دے غلام بن کے تُہاڈا پَھل پاکیزگی لئی اے۔ تے اوڑک ہمیشہ دی زِندگی۔ کیوں جو گُناہ دی مزدُوری مَوت اے۔ پر خُدا دی بخشِش ساڈے خُداوند یِسُوع مسِیح وِچ ہمیشہ دی زِندگی اے۔ بھراؤ! تُسی نئیں جان دے (مَیں اوہناں نُوں آکھنا آں جیہڑے شریعت توں واقف نیں) پئی بندہ جد تیک جِیوندا رہندا اے اوہدے اُتّے شریعت دا وَس چلدا اے۔ کیوں جو وِیاہی ہوئی زنانی جد تِیکر بندہ جِیوندا اے۔ شریعت ولّوں اوہدے تابع وِچ اے۔ پر جے اوہدا بندہ مر جائے۔ تے اوہ بندے دی شریعت توں چھڈائی گئی۔ جے اوہ اپنے بندے دے جِیوندے جی دُوجے بندے دی ہو جائے تے اوہ بدکار اکھوائے گی پر جے اوہدا بندہ مر جائے۔ تے اوہ اوس شریعت توں اَزاد اے پئی جے اوہ دُوجے مرد دی ہو وی جائے۔ تے بدکار نئیں اے۔ سو میرے بھراؤ! تُسی مسِیح دے بدن دی راہِیں شریعت ولّوں ایس کر کے مر گئے اوہ۔ پئی تُسی دُوجے دے جیہڑا مُردیاں وِچوں جوالیا گیا۔ ہو جاؤ۔ تاں جو اسی خُدا دے لئی پَھل لیاوے۔ کیوں جو جد اسی جِسمانی ساں تَد گُناہ دِیاں خواہشاں جیہڑیاں شریعت دے سببّوں سن۔ ساڈے انگاں وِچ مَوت دے لئی پَھل لیاؤن نُوں زور کر دِیاں سن۔ پر اسی اوہدے ولّوں مر کے جِہدے وِچ بَدّھے ساں شریعت توں ہُن ایتھوں تِیکر چھڈائے گئے آں۔ پئی اسی رُوح دے نَوِیں طریقے اُتّے خِدمت کریئے نا حرف دی پرانی رِیت اُتّے۔ فیر اسی کِیہ آکھیئے؟ شریعت گُناہ اے؟ خُدا نا کرے سگوں بِناں شریعت دے مَیں گُناہ نُوں نئیں پچھاندا۔ کیوں مَیں لالچ نا جان دا جے شریعت نا آکھدی پئی تُوں لالچ نا کر۔ پر گُناہ شریعت دے سبّب موقع پا کے میرے وِچ ہر طرح دا لالچ پَیدا کِیتا۔ کیوں جو شریعت باہجوں گُناہ مُردہ اے۔ تے مَیں اگّے شریعت باہجوں جِیوندا ساں پر جد حُکم آیا گُناہ مُڑ جی اُٹھیا تے مَیں مر گیا۔ تے اوہ حُکم جیہڑا زِندگی دے لئی سی۔ مَینُوں مَوت دے لئی معلُوم ہویا۔ کیوں جو گُناہ حُکم دی راہِیں موقع پا کے مَینُوں دھوکھا دِتّا تے اوسے دی راہِیں مَینُوں مار سُٹّیا۔ سو شریعت تے پاک اے۔ تے حُکم پاک تے راست تے چَنگا اے۔ پر جیہڑی شے چنگی اے۔ کِیہ میرے لئی مَوت بن گئی؟ خُدا نا کرے۔ پر گُناہ نے اوس چنگی شے دی راہِیں میرے لئی مَوت پَیدا کِیتی۔ پئی اوہدا گُناہ ہونا ظاہر ہوئے تاں جو گُناہ حُکم دی راہِیں حدّوں وَدّھ بُرا معلُوم ہوئے۔ کیوں جو اسی جاننے آں پئی شریعت رُوحانی اے۔ پر مَیں جِسمانی آں تے گُناہ دے ہتّھ وِکیا ہویا۔ کیوں جو جیہڑا کمّ مَیں کرنا آں اوہ مَیں نئیں جان دا۔ پر جیہڑا کمّ مَیں نئیں چاہندا سو مَیں کرنا آں۔ تے جِہدے توں مَینُوں کراہت اے اوہی مَیتھوں ہوندا اے۔ سو جے مَیتھوں اوہی ہوندا اے جیہڑا مَیں نئیں چاہندا۔ تے مَیں اِقرار کرنا آں۔ پئی شریعت چنگی اے۔ تے ہُن مَیں اوہدا کرن والا نئیں رہیا سگوں گُناہ جیہڑا میرے وِچ وَسدا اے۔ اوہو ای کر دا اے۔ کیوں جو مَینُوں معلُوم اے پئی میرے وِچ یعنی میرے جِسم وِچ کوئی چنگی شے نئیں وَسدی۔ سو چاہ تے مَیں کرنا آں۔ پر جو کُجھ چَنگا اے۔ اوہ مَیتھوں نئیں ہوندا۔ پئی جیہڑی بھلیائی مَیں چاہناں آں مَیں نئیں کر دا۔ پر بَھیڑے کمّ جیہڑے مَیں نئیں چاہندا اوہی مَیں کرنا آں۔ سو جے مَیں اوہو کرنا آں جیہڑا نئیں چاہندا تے ہُن مَیں اوہدا کرن والا نا رہیا۔ سگوں گُناہ جیہڑا میرے وِچ وَسدا اے۔ فیر مَینُوں شریعت ایویں معلُوم ہوندی اے۔ پئی جد مَیں نیکی کرنی چاہناں آں۔ تے بدی میرے سامھنے اے۔ کیوں جو مَیں تے دِلوں خُدا دی شریعت توں خُوش آں۔ پر دُوجی شریعت مَیں اپنے انگاں وِچ ویکھنا آں۔ جیہڑی میری عقل دی شریعت نال لڑائی کر کے مَینُوں گُناہ دی اوس شریعت دے ہتّھ جیہڑی میرے انگاں وِچ اے قید کر کے پھڑاؤندی اے۔ ہائے مَیں تے بڑا اَوکھا آں۔ ایس مَوت دے بدن توں مَینُوں کون چھڈاوے گا؟ مَیں اپنے خُداوند یِسُوع مسِیح دی راہِیں خُدا دا شُکر کرنا آں۔ ایس طرح مَیں آپ اپنی عقل نال تے خُدا دی شریعت دا غلام آں۔ پر اپنے جِسم نال گُناہ دی شریعت دا۔ سو ہُن اوہناں اُتّے کُجھ وی سزا دا حُکم نئیں۔ جیہڑے مسِیح یِسُوع وِچ نیں۔ کیوں جو جیہڑی زِندگی مسِیح یِسُوع وِچ اے۔ اوہدے رُوح دی شریعت مَینُوں گُناہ تے مَوت دی شریعت توں چھڈا دِتّا۔ ایس لئی پئی جیہڑی گلّ جِسم دی کمزوری دے سببّوں شریعت توں نا ہو سکی۔ خُدا اپنے ای پُتر نُوں گُناہی جِسم دی صُورت وِچ تے گُناہ دی قُربانی لئی گھل کے جِسم وِچ گُناہ دی سزا دا حُکم کِیتا۔ تاں جو شریعت دا راست حُکم ساڈے وِچ جیہڑے جِسم دے سببّوں نئیں سگوں رُوح دے سببّوں ٹُر نیں آں۔ پُورا کِیتا جائے۔ کیوں جو اوہ لوک جیہڑے جِسمانی نیں اوہ جِسمانی گلّاں سوچدے نیں پر اوہ جیہڑے رُوحانی نیں اوہ رُوحانی گلّاں سوچدے نیں۔ کیوں جو جِسمانی نِیّت مَوت اے پر رُوحانی نِیّت زِندگی تے چَین اے۔ ایس لئی پئی جِسمانی نِیّت خُدا دے برخلاف اے۔ کیوں جو اوہ خُدا دی شریعت دی تابعدار نئیں اے۔ تے نا ہو سکدی اے۔ تے جیہڑے جِسمانی نیں خُدا نُوں خُوش نئیں کر سکدے۔ پر تُسی جِسمانی نئیں سگوں رُوحانی ہو۔ جے خُدا دا رُوح تُہاڈے وِچ وَسدا ہوئے۔ پر جِہدے وِچ مسِیح دا رُوح نئیں اوہ اوہدا نئیں اے۔ تے جے مسِیح تُہاڈے وِچ اے تاں بدن گُناہ دے سبّب مُردہ اے۔ پر رُوح راستبازی دے سبّب زِندہ اے۔ پر جے اوہدا رُوح جِس یِسُوع نُوں مُردیاں وِچوں جوالیا تُہاڈے وِچ وَسدا اے تے اوہ جِس مسِیح یِسُوع نُوں مُردیاں وِچوں جوالیا تُہاڈیاں مرن والیاں بدناں نُوں وی اپنے رُوح دی راہِیں جیہڑا تُہاڈے وِچ وَسدا اے جوا لے گا۔ سو بھراؤ! اسی قرضئی تے آں پر جِسم دے نئیں پئی جِسم دے سببّوں زِندگی کِٹئے۔ کیوں جو جے جِسم دے سببّوں زِندگی کٹّو تاں تُہانوں مرنا پئے گا۔ پر جے تُسی رُوح نال بدن دیاں کمّاں نُوں مار دے رہو۔ تے جِیوندے رہو گے۔ ایس لئی پئی جِنّے خُدا دے رُوح دے سببّوں چلدے نیں اوہو ای خُدا دے پُتر نیں۔ کیوں جو تُہانوں تے غلامی دی رُوح نئیں مِلی۔ پئی فیر ڈر جاؤ سگوں پُتریلا ہون دا رُوح مِلیا جِہدے وِچ اسی ابّا یعنی اَے باپ آکھ کے سَدّ نیں آں۔ رُوح آپ ای ساڈے رُوح نال گواہی دیندا اے پئی اسی خُدا دے بچّے آں۔ تے جد بچّے ہوئے تے وارث وی یعنی وارث خُدا دے۔ تے وِرثے وِچ مسِیح نال شریک ایس شرط اُتّے پئی اسی اوہدے نال دُکھ وِچ بھوگِیئے پئی اوہدے نال سانُوں وی جلال لَبھّے۔ کیوں جو میری سمجھ وِچ ایس ویلے دے دُکھ دَرد اوس جلال دے اگّے کُجھ وی نئیں جیہڑا ساڈے اُتّے ظاہر ہوئے گا۔ پئی خلقت بڑی چاہ نال خُدا دے پُتراں دے ظاہر ہون دا راہ ویکھدی اے۔ کیوں جو خلقت نکمّے پن دے تابعیاں کِیتی گئی۔ اپنی مرضی نال نئیں پر اوہدے سبّب جِس اوہنوں تابعیاں کِیتا۔ ایس آس اُتّے پئی خلقت فنا دے قبضے توں چُھٹ کے خُدا دے بچّیاں دی جلال والی خلاصی نُوں حاصِل کرے گی۔ کیوں جو اسی جاننے آں پئی ساری خلقت رَل کے تڑپھدی اے تے ہُن تِیکر اوہنوں پِیڑاں لگِیاں ہویاں نیں۔ تے نِری اوہو نئیں پر اسی وی جِنہاں نُوں رُوح دے پہلے پَھل مِلے۔ آپ ای اپنے وِچ تڑپھنے آں۔ تے پُتریلے ہون دے یعنی اپنے بدن دے چُھٹکارے دی اُڈِیک وِچ آں۔ پئی اسی تے آس نال بچ گئے ساں۔ پر اوہ آس جیہڑی دِسدی اے آس نا رہی کیوں جو جیہڑی شے نظر آوے اوہدی کون آس رکھّے؟ پر جِہنُوں اسی نئیں ویکھدے جے اوہدی آس رکھیے۔ تے صبر نال اوہدی اُڈِیک وِچ رہنے آں۔ تے ایسے طرح رُوح وی ساڈیاں کمزوریاں وِچ ساڈی مدد کر دا اے کیوں جو جیویں چاہیدا اے۔ اسی نئیں جان دے پئی کِیہ دُعا منگیے۔ پر اوہ رُوح اجیہے ہوکے بھرکے جِنہاں دا بیان نئیں ہوسکدا۔ ساڈی سفارِش کر دا اے۔ تے اوہ جیہڑا دِلاں دا جانن والا اے جان دا اے۔ پئی رُوح دی کِیہ نِیّت اے۔ کیوں جو اوہ خُدا دی مرضی دے سببّوں پاک لوکاں دی سفارِش کر دا اے۔ تے اسی جاننے آں پئی سارِیاں شیواں اوہناں لئی جیہڑے خُدا نال مُحبّت رکھدے نیں رَل کے فائدہ پَیدا کر دیاں نیں ایہہ اوہ نیں جیہڑے خُدا دے اِرادے دے سببّوں سَدّے گئے نیں۔ کیوں جو جِنہاں نُوں اوس پہلے توں جانیا۔ اوہناں نُوں اگّے توں مُقرّر وی کِیتا پئی اوہدے پُتر دی شکل بنن۔ تاں جو اوہ بتھیرے بھراواں وِچ پلیٹھا ہوئے۔ تے جِنہاں نُوں اوس اگّے توں مُقرّر کِیتا اوس اوہناں نُوں سدّیا وی۔ تے جِنہاں نُوں سدّیا اوہناں نُوں راستباز وی ٹھیرایا۔ تے جِنہاں نُوں راستباز ٹھیرایا اوہناں نُوں اوس جلال وی دِتّا۔ ہُن اسی ایہناں گلّاں دی بابت کِیہ آکھئے؟ جے خُدا ساڈے ولّ اے۔ تے کون ساڈے برخلاف ہوئے گا؟ جِس اپنے ای پُتر نُوں بچا نا رکھیا۔ سگوں اوہنوں اساں سبھناں دے بدلے حوالے کِیتا سو اوہدے نال ای سانُوں سارِیاں شیواں وی کِیویں نا بخشے گا؟ خُدا دے چُنیاں ہویاں نُوں کیہڑا الزام دے گا؟ ایہہ خُدا ای جیہڑا سَتی بناندا اے۔ کیہڑا اے جیہڑا ڈنڈ لاندا اے؟ ایہہ مسِیح یِسُوع اے جیہڑا مر گیا۔ آہو سگوں اوہی جیہڑا مُردیاں وِچوں جوالیا گیا تے خُدا دے سَجّے پاسے اے۔ تے ساڈی سفارِش وی کر دا اے۔ کون سانُوں مسِیح دی مُحبّت توں وَکھ کرے گا؟ مُصِیبت یا تنگی یا ظُلم یا کال یا ننگ یا خطرہ یا تلوار؟ جیویں لِکھیا اے۔ اسی تیری خاطر سارا دِن مارے جانے آں۔ اسی کوہِیاں جان والِیاں بھیڈاں وانگُوں گِنے جانے آں۔ تَد وی اسی ایہناں سبھناں گلّاں وِچ اوہدی راہِیں جِس ساڈے نال مُحبّت کِیتی حدّوں وَدّھ فتح پانے آں۔ کیوں جو مَینُوں یقِین اے پئی نا مَوت نا زِندگی۔ نا فرِشتے نا حکُومتاں۔ نا ہُن دِیاں شیواں تے نا آؤن والِیاں۔ تے نا طاقتاں۔ نا اُچیائی نا ڈونگھیائی تے نا کوئی ہور مخلُوق سانُوں خُدا دی اوس مُحبّت توں جیہڑی یِسُوع مسِیح ساڈے خُداوند وِچ اے وَکھ کر سکے گی۔ مسِیح وِچ ہو کے مَیں سَچ آکھنا آں۔ جُھوٹھ نئیں آکھدا میرا دِل پاک رُوح وِچ میرے نال ایہو گواہی دیندا اے۔ پئی مَینُوں بُہت رنج اے۔ تے میرا دِل ہر ویلے دُکھی رہندا اے۔ کیوں جو مَینُوں ایتھوں تِیکر وی منظُور ہوندا۔ پئی اپنے بھراواں واسطے جیہڑے جِسم ولّوں میرے انگ ساک نیں مَیں آپ ای مسِیح توں لعنتی ہوندا۔ اوہ تے اِسرائیلی نیں۔ پُتریلے ہونا تے جلال تے عہد تے شریعت دا سونپیا جانا تے عبادت تے وعدے اوہناں دے نیں۔ بزُرگ اوہناں دے نیں۔ نالے مسِیح جِسم ولّوں اوہناں وِچوں ہویا جیہڑا سبھناں توں اُچّا خُدا سدا توڑی مُبارک اے آمِین۔ پر ایہہ نئیں پئی خُدا دا کلام ایویں گیا۔ کیوں جو اوہ سارے اِسرائیلی نئیں جیہڑے اِسرائیل وِچوں نیں۔ تے نا ابرہام دی نسل ہون کر کے سارے پُتر نیں۔ پر لِکھیا اے پئی اِضحاق توں تیری نسل اکھوائے گی۔ گلّ تے اِنج اے پئی نا اوہ جیہڑے جِسم ولّوں پُتر ہوئے اوہی خُدا دے پُتر نیں۔ پر وعدے دے پُتر نسل گِنی دی اے۔ کیوں جو وعدے دا کلام ایہہ اے۔ ”پئی ایسے ویلے دے سببّوں مَیں آواں گا تے سارہ نُوں پُتر ہوئے گا۔“ تے نِرا ایہہ ای نئیں۔ سگوں رِبقہ وی اِک بندے توں یعنی ساڈے پئیو اِضحاق توں حاملہ سی۔ کیوں جو اوہ تے اجے نئیں سن جمّے تے نا کُجھ بھلا بُرا کِیتا سی۔ ایس مطلب واسطے پئی خُدا دا اِرادہ جیہڑا چُنن دی بابت اے۔ اوہ کمّاں اُتّے نا رہے۔ سگوں سَدّن والے دی مرضی اُتّے رہے۔ تَد اوہنوں آکھیا گیا سی پئی وَڈا چھوٹے دی سیوا کرے گا۔ جیویں لِکھیا ہویا اے۔ پئی مَیں یعقُوب نال پیار کِیتا۔ پر عیسَو توں نفرت۔ فیر اسی کِیہ آکھئے پئی خُدا دی درگاہ وِچ بے انصافی اے؟ خُدا نا کرے۔ کیوں جو اوہ مُوسیٰ نُوں آکھدا اے۔ پئی جِہدے اُتّے مَیں رَحم کرنا آں رَحم کراں گا تے جِہدے اُتّے ترس کرنا آں ترس کراں گا۔ سو ایہہ تے نا چاہن والے توں تے نا دَوڑ بھج کرن والے توں پر خُدا توں حُکم اے جیہڑا رَحم کر دا اے۔ کیوں جو پاک کلام فِرعون نُوں آکھدا اے۔ پئی ”مَیں ایس لئی تینُوں کھڑا کِیتا اے۔ پئی تیرے وِچ اپنی قُدرت وکھالاں تے ساری دھرتی اُتّے میرا ناں مشہُور کِیتا جائے۔“ سو جِہدے اُتّے اوہ چاہندا اے رَحم کر دا اے تے جِہنُوں اوہ چاہندا اے۔ سخت کر دا اے۔ فیر تُوں مَینُوں ایہہ آکھیں گا۔ ”پئی اوہ کاہِنُوں عیب لاندا اے اوہدی مرضی دا کِس سامنا کِیتا؟“ اوہ بندیا۔ تُوں کون ایں۔ جیہڑا خُدا نال مُڑ مُڑ جواب کرنا ایں؟ کاریگری کاریگر نُوں آکھے گی پئی تُوں مَینُوں اجیہا کیوں بنایا؟ گھمیار دا مِٹّی اُتّے وَس نئیں پئی اِکّو تھوبے وِچوں اِک بھانڈا عِزّت دا تے دُوجا بے عِزّتی دا بنائے؟ تے کِیہ ہویا جے خُدا ایس غرض نال پئی اپنا غُصّہ وکھا لے تے اپنی قُدرت معلُوم کراوے۔ غُصّے دے بھانڈیاں دی جیہڑے ناس ہون لئی تیار کِیتے گئے سن بڑے صبر نال سہندا رہیا۔ تاں جو رَحم دے بھانڈیاں نُوں اپنے جلال دی دَولت معلُوم کراوے۔ جِنہاں نُوں اوس اگّے توں جلال لئی تیار کِیتا۔ یعنی سانُوں جِنہاں نُوں اوس نِرا یہُودِیاں وِچوں ای نئیں سگوں غیر قوماں وِچوں وی سدّیا۔ جیویں ہوسیع وِچ وی آکھدا اے۔ پئی جیہڑی میری قوم نئیں سی۔ اوہنوں مَیں اپنی قوم آکھاں گا۔ تے جیہڑی پیاری نئیں سی اوہنوں پیاری آکھاں گا۔ تے اِنج ہوئے گا پئی جِس تھاں اوہناں نُوں آکھیا گیا سی۔ پئی تُسی میری قوم نئیں اوہ۔ اوتھے اوہ جِیوندے خُدا دے پُتر اکھوان گے۔ پر یسعیاہ اِسرائیل دی بابت ہوکا دیندا اے۔ پئی ”اِسرائیل دے پُتر بھانویں گنتری وِچ سمُندر دی رِیت دے برابر ہون۔ پر باقِیاں وِچوں تھوڑے ای بچائے جان گے۔“ کیوں جو خُدا اپنا لیکھا زمین اُتّے تمام کر کے تے چھیتی مُکا کے پُورا کرے گا۔ تے جیویں یسعیاہ نے اگّے وی آکھیا اے پئی جے فَوجاں دا خُداوند ساڈے لئی نسل نا چھڈ دا تے اسی سدُوم وانگُوں بن جاندے تے عمُورہ جیہے ہو جاندے۔ پھر اسی کِیہ آکھئے؟ پئی غیر قوماں جیہڑیاں راستبازی دا پِچھّا نئیں سن کر دیاں اوہناں نُوں راستبازی ہتّھ آئی؟ یعنی اوہ راستبازی جیہڑی اِیمان توں ہوندی اے؟ پر اِسرائیل جِس راستبازی دا پِچھّا کِیتا اوس شریعت تِیکر نئیں اَپڑیا۔ کاہِنُوں؟ کیوں جو اوہناں اِیمان دے راہ نئیں سگوں عملاں دے راہ نال اوہدا پِچھّا کِیتا۔ اوہناں ٹھیڈے والے پتّھر نال ٹھیڈا کھادا۔ جیویں لِکھیا اے پئی ویکھ مَیں صِیُّون وِچ ٹھیڈے دی چٹان تے ٹھوکر دا پتّھر رکھنا آں۔ تے جیہڑا اوہدے اُتّے اِیمان لیاؤندا اے اوہ شرمندہ نئیں کِیتا جاوے گا۔ بھراؤ۔ میرے دِل دی چاہ تے خُدا اگّے میری دُعا اوہناں دے لئی ایہہ اے پئی اوہ نجات پان۔ کیوں جو مَیں اوہناں دا گواہ آں پئی اوہناں نُوں خُدا دی بابت غیرت تے ہے۔ پر عِلم دے سببّوں نئیں۔ کیوں جو خُدا دی راستبازی توں نا واقف ہو کے تے اپنی ای راستبازی نُوں قیم کرن دے شَوق نال۔ اوہ خُدا دی راستبازی دے تابعیاں نا ہوئے۔ کیوں جو راستبازی لئی مسِیح ہر اِک اِیمان لیاؤن والے واسطے شریعت دا خاتمہ اے۔ کیوں جو مُوسیٰ لِکھدا اے۔ پئی جیہڑا جَنا اوس راستبازی نُوں جیہڑی شریعت توں ہوندی اے پُورا کرے اوہ اوہدے سبّب جِیوندا رہے گا۔ پر اوہ راستبازی جیہڑی اِیمان توں اے ایویں آکھدی اے۔ پئی تُوں اپنے دِل وِچ نا آکھ پئی اسمان اُتّے کون چڑھے گا؟ (ایس لئی پئی مسِیح نُوں ہیٹھاں اُتارے۔) یا اتھاہ کھڈے وِچ کون اُترے گا۔ (ایس لئی پئی مسِیح نُوں مُردیاں وِچوں جوال کے اُتانہہ چڑھائے) فیر اوہ کِیہ آکھدی اے؟ ایہہ پئی ”کلام تیرے نیڑے اے۔ تیرے مُنھ تے تیرے دِل وِچ اے۔“ ایہہ اوہ اِیمان دا کلام اے۔ جِہدی اسی منادی کرنے آں۔ کیوں جو جے تُوں اپنے مُنھوں یِسُوع دے خُداوند ہون دا اِقرار کریں تے اپنے دِل وِچ اِیمان لِیاویں پئی خُدا نے اوہنوں مُردیاں وِچوں جوالیا۔ تے تُوں بچایا جائیں گا۔ کیوں جو راستبازی لئی دِلوں اِیمان لیاوی دا اے۔ تے نجات لئی مُنھ توں اِقرار کری دا اے۔ کیوں جو پاک کلام آکھدا اے پئی ”ہر کوئی جیہڑا اوہدے اُتّے اِیمان لیاؤندا اے۔ شرمندہ نئیں کِیتا جائے گا۔“ کیوں جو یہُودی تے یُونانی وِچ کُجھ فرق نئیں اے۔ ایس لئی پئی سبھناں دا اوہی خُدا اے۔ جیہڑا اپنے سوالِیاں دے لئی دَھنّی اے کیوں جو ہر کوئی جیہڑا خُداوند دا ناں لَئے گا۔ بچایا جاوے گا۔ فیر جِہدے اُتّے اِیمان نئیں لیائے۔ اوہ اوہدا ناں کِیویں لین گے؟ تے جِہدی بابت اوہناں سُنیا ای نئیں۔ اوہدے اُتّے کِیویں اِیمان لیاؤن؟ تے منادی کرن والے باہجوں کِیویں سُنن۔ تے جے گھلّے نا جان اوہ منادی کِیویں کرن؟ جیویں لِکھیا ہویا اے کہے سوہنے اوہناں دے قدم جیہڑے چَنگیاں گلّاں دی خُوشخبری سُنان والے نیں۔ پر سبھناں خُوشخبری نُوں نئیں مَنّیا۔ یسعیاہ جو آکھدا اے خُداوند ساڈے سنیہے دا کِس یقِین کِیتا؟ سو اِیمان سُنن توں۔ تے سُننا مسِیح دے کلام دی راہِیں آؤندا اے۔ پر مَیں آکھنا آں کِیہ اوہناں نئیں سُنیا؟ بے شک اوہناں دی اواز ساری دھرتی اُتّے نِکل ٹُری تے اوہناں دا کلام دُنیا دِیاں حداں تِیکر۔ فیر مَیں آکھنا آں۔ اِسرائیل نُوں معلُوم نا ہویا؟ اوّل تے مُوسیٰ آکھدا اے پئی مَیں تُہانوں اوہناں توں جیہڑے قوم نئیں غیرت دواں گا۔ تے نادان قوم توں تُہانوں غُصّہ چڑھاواں گا۔ فیر یسعیاہ بڑا دلیر ہو کے بولدا اے۔ پئی جِنہاں مَینُوں نا لَبّھیا اوہناں مَینُوں لَبّھ لیا تے جِنہاں مَینُوں نا پُچھیا اوہناں اُتّے مَیں ظاہر ہویا۔ پر اِسرائیل نُوں آکھدا اے۔ پئی نافرمان تے حُجتّی قوم دے ولّ مَیں سارا دِن اپنے ہتّھ وَدھائے رہیا۔ فیر مَیں آکھنا آں کِیہ خُدا نے اپنی قوم نُوں رَدّ کر دِتّا؟ خُدا نا کرے۔ کیوں جو مَیں وی تے ابرہام دی نسلوں بِنیمِین دے فِرقے دا اِسرائیلی آں۔ خُدا اپنی قوم نُوں جِہنُوں اوس پہلے توں جانیا رَدّ نئیں کِیتا۔ تُسی نئیں جان دے پئی ایلیّاہ دے بیان وِچ پاک کتاب کِیہ آکھدی اے؟ پئی اوہ خُدا دے اگّے اِسرائیل دے لئی کِس طرح فریاد کر دا اے۔ پئی اَے خُداوندا۔ اوہناں تیرے پیغمبراں نُوں جانوں مار دِتّا تے تیریاں قُربان گاہاں نُوں ڈھا دِتّا تے مَیں اکلّا ای رہ گیا آں۔ تے اوہ میری جان دے وی پِچّھے پئے ہوئے نیں۔ پر اوہنوں خُدا غَیب توں کِیہ جواب دیندا اے؟ ایہہ پئی مَیں اپنے لئی سَتّ ہزار بندے رکھ لَئے۔ جِنہاں بَعَل دے اگّے گوڈے نئیں نوائے۔ سو ایسے طرح ایس ویلے وِچ وی فضل دے چُنن دے سببّوں کُجھ باقی رکھّے ہوئے نیں۔ پر ایہہ جے فضل توں ہویا تے فیر عملاں توں نا ہویا۔ نئیں تے فضل فیر فضل ای نا رہیا۔ فیر کِیہ ہویا۔ جِس گلّ نُوں اِسرائیل لَبّھدا اے سو ہتّھ نا لگّی۔ پر چُنیاں ہویاں نُوں ہتّھ لگّی۔ تے باقی سخت دِل کِیتے گئے۔ جیویں لِکھیا ہویا اے پئی خُدا اوہناں نُوں اجے تِیکر سُست طبیعت دِتّی۔ ایہو جِہیاں اَکھّیاں جو نا ویکھن تے۔ اجیہے کنّ جیہڑے نا سُنن۔ تے داؤد آکھدا اے۔ اوہناں دا دسترخوان پھاہی تے جال تے ٹھوکر تے اوہناں لئی بدلہ بن جائے۔ اوہناں دِیاں اَکھّیاں اگّے ہنیرا آ جائے پئی اوہ نا ویکھن۔ تے تُوں اوہناں دی پِٹھ سدا کُبّی رکھ۔ فیر مَیں آکھنا آں اوہناں ایس لئی ٹھیڈا کھادا پئی ڈِگّ پَین؟ خُدا نا کرے سگوں اوہناں دی بُھل دے سبّب غیر قوماں نُوں نجات مِلی۔ تاں جو اوہناں نُوں غیرت آوے۔ تے جے اوہناں دی بُھل دُنیا وی دَولت ہوئی تے اوہناں دا گھٹنا غیر قوماں دی دَولت ہوئی۔ تے اوہناں دا وَدھنا ضرُور ای اوہناں دی دَولت دا سبّب ہوئے گا۔ پر مَیں تُساں غیر قوماں نال گلّ کرنا آں۔ سو جِس حال وِچ مَیں غیر قوماں دا رسُول آں مَیں اپنی خِدمت نُوں وڈیاناں آں۔ پئی مَیں کِسے طرح اپنی قوم والیاں نُوں غیرت دواکے اوہناں وِچوں کئیاں نُوں بچاواں۔ کیوں جو جے اوہناں دے ردّے جان توں دُنیا دا میل ہویا تے اوہناں دے قبول ہون توں مُردیاں دا جی اُٹھنا ای نا ہوئے گا؟ تے جے نذرانے دا پہلا پیڑا پاک اے تے ساری تَون پاک اے۔ تے جے جڑ پاک اے۔ تے ٹہنِیاں وی پاک نیں۔ پر جے ٹہنِیاں وِچوں کئی اِک بَھن کے سُٹِّیاں گِئیاں تے تُوں جنگلی زَیتُون ہو کے اوہناں دے وِچ پَیوند کِیتا گیا۔ تے اوہناں دے نال زَیتُون دی تھندی جڑ دا سانجھی بن گیا۔ تے ٹہنِیاں اُتّے نا آکڑ۔ پر جے تُوں آکڑیں گا وی تے تُوں جڑ نُوں نئیں سنبھالدا پر جڑ تینُوں سنبھالدی اے۔ فیر تُوں آکھیں گا۔ ٹہنِیاں ایس لئی بَھن کے سُٹِّیاں گِئیاں پئی مَیں پَیوند کِیتا جاواں۔ ہَچھّا اوہ تے بے اِیمانی دے سبّب بَھن کے سُٹِّیاں گِئیاں۔ تے تُوں اپنے اِیمان دے سبّب کھلوتا ایں۔ مغرُور نا بن سگوں ڈر۔ کیوں جو جد خُدا اصلی ٹہنِیاں نُوں نئیں چھڈیا۔ تے اوہ تینُوں وی نئیں چھڈے گا۔ سو خُدا دی مِہربانی تے سختی دیکھ ڈِگّن والیاں اُتّے سختی پر تیرے اُتّے مِہربانی خُدا دی۔ پئی جے تُوں اوہدی مِہربانی اُتّے ٹِکیا رہَیں۔ نئیں تے تُوں وی وَڈّھ سُٹّیا جائیں گا۔ تے اوہ وی جے بے اِیمانی وِچ ٹِکے نا رہن۔ تے پَیوند کِیتے جان گے۔ کیوں جو خُدا قُدرت والا اے۔ پئی اوہناں نُوں وی مُڑ پَیوند کرے۔ کیوں جو جے تُوں اوس رُکھّ نالوں جیہڑا اصلی جنگلی زَیتُون اے۔ وَڈّھیا گِیؤں۔ تے اصل دے برخلاف چنگے زَیتُون اُتّے پَیوند کِیتا گِیؤں۔ تے اوہ جیہڑیاں اصلی ٹہنِیاں نیں اپنے زَیتُون دے رُکھّ وِچ ضرُور ای پَیوند کِیتیاں جان گِیئاں۔ بھراؤ کِتے اجیہا نا ہوئے پئی تُسی اپنے آپ نُوں سِیانے سمجھو۔ مَیں نئیں چاہندا۔ پئی تُسی ایس بھید توں ناواقِف رہو۔ پئی اِسرائیل دے اِک حِصّے اُتّے۔ جد تِیکر غیر قوماں دی بھرتی پُوری نا ہوئے۔ سخت دِلی آگئی اے۔ تے ایسے طرح سارا اِسرائیل بچایا جاوے گا۔ جیویں لِکھیا ہویا اے۔ پئی صِیُّون توں اِک چھڈواؤن والا آوے گا۔ جیہڑا یعقُوب توں بے دِینیاں ہٹائے گا۔ تے اوہناں دے نال میرا ایہو عہد اے۔ جِس ویلے مَیں اوہناں دے گُناہاں نُوں اُٹھا لواں۔ اِنجِیل ولّوں اوہ تے تُہاڈے سبّب دُشمن نیں پر چُنن ولّوں وڈّیاں دے سبّب پیارے۔ کیوں جو خُدا دِیاں نِعمتاں تے اوہدا بُلاوا مُڑن والیاں گلّاں نئیں۔ کیوں جو جیویں تُسی کِسے ویلے خُدا نُوں نئیں سو مَن دے پر ایس ویلے ایہناں دے نا مَنّن دے سببّوں تُہاڈے اُتّے رَحم کِیتا گیا۔ ایسے طرح ہُن ایہہ وی مَنّن والے نا ہوئے تاں جو تُہاڈے اُتّے رَحم ہون دے سبّب ہُن اوہناں اُتّے وی رَحم کِیتا جائے۔ کیوں جو خُدا سبھناں نُوں نافرمانی وِچ شامل کِیتا۔ تاں جو ساریاں اُتّے رَحم کرے۔ واہ خُدا دی بھرمار تے عقل تے سمجھ کیڈے ڈُونگھے نیں! اوہدیاں عدالتاں دی تھاہ کدوں مِلدی اے۔ تے اوہدیاں راہاں دا کھوج کدوں مِلدا اے۔ کِس خُدا دے خیالاں نُوں جاچیا اے؟ یا کیہڑا اوہدا صلاح کار بنیا؟ یا کِس اوہنوں پہلاں کُجھ دِتّا جِہدا مُڑ اوہنوں بدلا دِتّا جائے؟ کیوں جو اوسے توں تے اوسے دی راہِیں تے اوسے لئی سارِیاں شیواں ہویاں نیں۔ اوہدی وڈیائی سدا تِیکر ہوئے۔ آمِین۔ سو بھراؤ۔ مَیں خُدا دِیاں مہربانِیاں دے سببّوں تُہاڈی مِنّت کرنا آں۔ پئی تُسی اپنے بدناں نُوں جیوندی پاک قُربانی چڑھاؤ۔ جیہڑی خُدا نُوں چنگی لگّے۔ پئی ایہو تُہاڈی رُوحانی بندگی اے۔ تے ایس جہان دی شکل ورگے نا بنو۔ سگوں نَوِیں عقل ہون نال اپنی صُورت بدل دے جاؤ۔ تاں جو خُدا دی نیک تے چنگی لگّن والی تے کامِل مرضی تجربے نال معلُوم کر دے رہو۔ کیوں جو اوس فضل نال جیہڑا مَینُوں بخشیا گیا اے۔ مَیں تُہاڈے وِچوں ہر اِک نُوں آکھنا آں۔ پئی جیہڑا اپنی بابت تُہانوں خیال کرنا چاہیدا اے۔ اوہدے توں وَدّھ نا کرو۔ پر سُرت نال اوسے طرح خیال کرو۔ جیویں خُدا نے ہر اِک نُوں اِیمان دا حِصّہ ونڈ دِتّا۔ کیوں جو جیویں اِک بدن وِچ ساڈے بتھیرے انگ نیں تے سارے انگاں دا اِکّو کمّ نئیں۔ اوسے طرح اسی جیہڑے بتھیرے آں پر مسِیح وِچ اِک بدن آں۔ تے اِک اِک کر کے اِک دُوجے دے انگ آں۔ سو اوس فضل دے سببّوں جیہڑا سانُوں بخشیا گیا۔ سانُوں وَکھو وَکھریاں برکتاں مِلیاں۔ جے نبُوّت اے تے اِیمان دے اندازے نال نبُوّت کریئے۔ جے خِدمت اے تے خِدمت وِچ لگّے رہیئے۔ جے کوئی سکھان والا ہوئے تے سکھان وِچ۔ تے جے وعظ نصِیحت کرن والا ہوئے۔ تے وعظ نصِیحت وِچ لگّا رہے۔ خَیرات کرن والا کُھلِّیں ہتّھِیں کرے۔ پیشوا کوشش نال پیشوائی کرے۔ رَحم کرن والا خُوشی نال کرے۔ مُحبّت بِناں مکّارِیوں ہوئے۔ بُریائی توں نفرت کرو۔ بھلیائی نال چمبڑے رہو۔ بھراواں وَرگی مُحبّت نال آپو وِچ بڑا پیار رکھو۔ عِزّت ولّوں اِک دُوجے نُوں چَنگا سمجھو۔ کمّ کرن وِچ سُستی نا کرو۔ رُوح وِچ سرگرم ہوؤو۔ خُداوند دی سیوا کر دے رہو۔ آس وِچ خُوش رہو۔ تنگی وِچ صبر کرو۔ دُعا منگن وِچ لگّے رہو۔ پاک لوکاں دِیاں لوڑاں پُوریاں کرو۔ مُسافراں دی سیوا وِچ لگے رہو۔ اپنے ستان والیاں نُوں دُعا دیو۔ دُعا دیو۔ تے بددُعا نا دیو۔ خُوشی کرن والیاں نال خُوشی کرو۔ رون والیاں نال روؤ۔ آپو وِچ اِکّو جِہیا خیال رکھو۔ اُچّے اُچّے خیال نا بنھنو۔ سگوں نِیویاں ولّ دھیان کرو۔ اپنے ولّوں سِیانے نا بن بَیٹھو۔ بدی دے بدلے کِسے نال بدی نا کرو۔ جیہڑیاں گلّاں سبھناں نُوں چَنگیاں لگدِیاں نیں اوہناں نُوں سوچو۔ جِتّھوں تِیکر ہو سکے۔ ساریاں لوکاں نال صُلح رکھو۔ پیاریو! آپے اپنا بدلہ نا لوؤ۔ سگوں غُصّے نُوں جان دیو۔ کیوں جو لِکھیا ہویا اے پئی خُداوند آکھدا اے۔ بدلہ لینا میرا کمّ اے۔ مَیں ای بدلہ لَواں گا۔ پر جے تیرا وَیری بُھکھا ہوئے اوہنوں کھوال۔ جے تریہایا ہوئے اوہنوں پیال کیوں جو جے ایہہ کریں تے تُوں اوہدے سِر اُتّے اَنگیاراں دا ڈھیر لا دیں گا۔ بُریائی کولوں ہار نا جا سگوں بھلیائی نال بُریائی نُوں ہرا دے۔ ہر اِک بندہ اعلیٰ حکُومتاں دے تابعیاں رہے۔ کیوں جو کوئی حکُومت نئیں جیہڑی خُدا ولّوں نا ہوئے۔ تے جِنّیاں ہَین سو خُدا ولّوں ٹھہرائیاں ہویاں نیں۔ ایس لئی جیہڑا حکُومت دی مخالفت کر دا اے سو خُدا دے بندوبست دا سامنا کر دا اے تے سامنا کرن والیاں نُوں آپ ای سزا مِلے گی۔ کیوں جو حاکم چنگے کمّ لئی نئیں پر بُرے کمّ لئی ڈراوا نیں۔ جے تُوں چاہنا ایں پئی حکُومت توں نا ڈریں تاں بھلا کر اوہدے ولّوں تینُوں شاواشے مِلے گی۔ کیوں جو اوہ تیرے بھلے لئی خُدا دا نوکر اے۔ پر جے تُوں بُرا کریں تے ڈر۔ ایس لئی پئی اوہ تلوار ایویں نئیں لئی پھر دا کیوں جو اوہ خُدا دا نوکر اے۔ تے اوہدے قَہر دے سببّوں بدکار نُوں سزا دیندا اے۔ ایس لئی تابعیاں رہنا ضرُور چاہیدا اے۔ نِرا غضب دے ڈر دے مارِیاں نئیں پر خُدا دا خَوف کر کے وی۔ کیوں جو تُسی ایسے سببّوں چُنگی وی بھر دے اوہ۔ پئی اوہ خُدا دے ٹہلئے نیں جیہڑے ایسے کمّ وِچ رُجھّے رہندے نیں۔ سبھناں دا حق دے چھڈو۔ جِہنُوں چُنگی چاہیدی اے۔ چُنگی دیو جِہنُوں محصُول چاہیدا اے۔ اوہنوں محصُول دیو۔ جِہدے کولوں ڈرنا چاہیدا اے ڈرو۔ جِہدی عِزّت کرنی چاہیدی اے۔ عِزّت کرو۔ اِک دُوجے نال پیار کرن توں بِناں کِسے گلّے کِسے دے دیندار نا رہو۔ کیوں جو جیہڑا دُوجے نال پیار کر دا اے۔ اوہنے شریعت نُوں پُورا کِیتا اے۔ کیوں جو ایہہ پئی تُوں زنا نا کر۔ خُون نا کر۔ چوری نا کر۔ لالچ نا کر۔ تے جے کوئی ہور حُکم وی ہوئے۔ اوہ ایس گلّ وِچ ای آ جاندا اے پئی تُوں اپنے گواہنڈی نُوں اپنے جِہیا پیار کر۔ مُحبّت گواہنڈی دا بُرا نئیں کر دی۔ ایس کر کے مُحبّت رکھنا شریعت دا پُورا کرنا اے۔ تے زمانے نُوں جان کے پئی ہُنے ای نِیندر توں تُہاڈے جاگن دا ویلا اے۔ ایس طرح کریا کرو۔ کیوں جو اوس ویلے نالوں جدوں اساں اِیمان لیاندا ہُن ساڈی نجات نیڑے آئی۔ رات بڑی لنگھ گئی دِن نیڑے آیا۔ سو ہنیرے دے کمّ چھڈ کے چانن دے ہتّھیار پا لیئے۔ جیویں دِن نُوں چاہیدا اے۔ بھلمانسی نال چلیئے۔ نا لُچ پنیاں تے نشیاں وِچ۔ نا حرامکاری تے بدماشِیاں وِچ۔ نا جھگڑے تے ساڑے وِچ۔ سگوں خُداوند یِسُوع مسِیح نُوں پا لوؤ تے جِسم دِیاں خواہشاں پُوریاں کرن لئی سوچ فِکر نا کرو۔ اوہنوں جیہڑا اِیمان وِچ کمزور اے۔ تُسی قبول تے کرو۔ پر شک شُبہ دے جھگڑیاں لئی نئیں۔ کِسے دا اِیمان اے پئی مَیں سبھ کُجھ کھاواں پر ہور کوئی جیہڑا کمزور اے۔ سو ساگ پَتّر کھاندا اے۔ تے جیہڑا کھان والا اے اوہ اوہنوں جیہڑا نئیں کھاندا۔ ماڑیاں نا جانے۔ تے جیہڑا نئیں کھاندا اوہ کھان والے اُتّے عیب نا لاوے کیوں جو خُدا اوہنوں قبول کِیتا اے۔ تُوں کون ہوناں ایں۔ پئی پرائے ٹہلئے اُتّے عیب لاویں؟ اوہدا اُٹھنا ڈِگّنا اوہدا اپنا ای مالک سگوں اوہ اُٹھا لیا جائے گا۔ کیوں جو خُدا اوہنوں کھلھارن اُتّے قادر اے۔ کوئی اِک دِن نُوں دُوجے دِن نالوں چَنگا سمجھدا اے۔ تے کوئی سبھناں دِناں نُوں چَنگا سمجھدا اے۔ ہر کوئی آپو اپنے مَن وِچ پَکّا ہوئے۔ جیہڑا کِسے دِن نُوں مَندا اے۔ اوہ خُداوند دی خاطر مَندا اے۔ تے جیہڑا کھاندا اے۔ اوہ خُداوند دی خاطر کھاندا اے کیوں جو اوہ خُدا دا شُکر کر دا اے۔ تے جیہڑا نئیں کھاندا اوہ خُداوند دی خاطر نئیں کھاندا تے خُدا دا شُکر کر دا اے۔ کیوں جو ساڈے وِچوں کوئی اپنی خاطر نئیں جِیوندا تے نا کوئی اپنی خاطر مر دا اے۔ ایس واسطے بھانویں اسی جِیوئیے خُداوند دی خاطر جیونے آں۔ تے بھانویں اسی مریئے خُداوند دی خاطر مرنے آں۔ بس بھانویں جیویئے بھانویں مریئے اسی خُداوند دے ای آں۔ کیوں جو ایسے واسطے مسِیح مویا تے جِیو پیا۔ پئی مُردیاں تے جِیوندیاں دا وی خُداوند ہوئے۔ پر تُوں اپنے بھرا اُتّے کاہِنُوں عیب لانا ایں؟ یا تُوں کاہِنُوں اپنے بھرا نُوں ماڑیاں جاننا ایں۔ کیوں جو اسی سارے خُدا دے تخت دے اگّے حاضر ہوواں گے۔ کیوں جو ایہہ لِکھیا ہویا اے۔ پئی خُداوند آکھدا اے۔ میری حیاتی دی سَونہہ میرے اگّے سارے گوڈے نوان گے تے سارِیاں زباناں خُدا دا اِقرار کرن گِیاں۔ سو ساڈے وِچوں ہر کوئی خُدا نُوں اپنا اپنا حِساب دے گا۔ ایس لئی اسی اگّے نُوں اِک دُوجے اُتّے عیب نا لایئے۔ سگوں تُسی اپنے مَن وِچ ایہہ ٹھہراؤ۔ پئی اسی اپنے بھرا دے اگّے کوئی ٹھوکر نا رکھیے۔ مَیں جاننا آں تے خُداوند یِسُوع وِچ مَینُوں یقِین ہویا اے۔ پئی کوئی شے اپنے آپ وِچ ناپاک نئیں اے۔ پر جیہڑا کِسے شے نُوں ناپاک گندا اے۔ اوہدے لئی ناپاک اے۔ سو جے کھان دے سببّوں تیرے بھراواں نُوں دُکھ ہوندا اے۔ تے تُوں فیر مُحبّت وِچ نئیں چلدا۔ اپنے کھان نال اوہدا ناس نا کر۔ جِہدے بدلے مسِیح مویا۔ سو تُہاڈی بھلیائی دی بدنامی نا کِیتی جاوے۔ کیوں جو خُداوند دی بادشاہی کھانا پِینا نئیں اے۔ سگوں راستبازی تے میل ملاپ تے پاک رُوح وِچ خُوشی اے۔ کیوں جو جیہڑا ایس طرح مسِیح دا غلام ہوندا اے۔ اوہ خُدا اگّے چَنگا اے۔ تے بندیاں اگّے کھرا اے۔ سو آؤ اسی اوہناں گلّاں دا پِچھّا کریئے۔ جِنہاں توں میل ملاپ تے اِک دُوجے دی ترقی ہوئے۔ کھان دے سبّب خُدا دے کمّ نُوں نا وگاڑ۔ سارِیاں شیواں تے پاک نیں پر اوس بندے دے لئی بُریاں نیں جِہنُوں کھان نال ٹھوکر لگدی اے۔ چنگی گلّ ایہہ اے نا تُوں گوشت کھائیں نا شراب پِیویں۔ نا کوئی اجیہا کمّ کریں۔ جِہدے توں تیرا بھرا ٹھوکر کھاوے۔ جیہڑا تُوں اِیمان رکھنا ایں۔ اپنے لئی خُدا دے اگّے رکھ۔ دھنّ اے اوہ بندہ جِہدا دِل اپنے آپ نُوں اوس گلّ اُتّے جِہنُوں اوہ کھری سمجھدا اے۔ عَیبی نا ٹھہراوے۔ پر جیہڑا شک رکھ کے کھاندا اے۔ اوہ گُنہگار ٹھہریا۔ ایس لئی پئی اِیمان نال نئیں کھاندا تاں جو کُجھ اِیمان نال نئیں۔ سو گُناہ اے۔ ہُن سانُوں جیہڑے تگڑے آں چاہیدا اے۔ پئی ماڑیاں دِیاں کمزوریاں دی برداشت کریئے۔ تے اپنی خُوشی نا کریئے۔ ساڈے وِچوں ہر کوئی آپو اپنے گواہنڈی نُوں اوہدی بھلیائی لئی خُوش کرے۔ پئی اوہدی ترقی ہوئے۔ کیوں جو مسِیح نے وی اپنے آپ نُوں خُوش نئیں کِیتا۔ پر جیویں لِکھیا ہویا اے۔ تیرے طعنے مارن والیاں دے طعنے میرے اُتّے آپئے۔ کیوں جو جو کُجھ اگّے لِکھیا گیا سی ساڈی تعلِیم دے لئی لِکھیا گیا۔ تے جو اسی صبر نال تے پاک کتاب دی تسلّی نال آس رکھیے۔ ہُن صبر تے تسلّی دا خُدا تُہانوں ایہہ بخشے۔ پئی مسِیح یِسُوع دے طَور طریقے اُتّے آپو وِچ اِکّو جیہے خیال رکھو۔ تاں جو تُسی اِک دِل ہو کے اِک مُنھ نال خُدا تے ساڈے خُداوند یِسُوع مسِیح دے باپ دی وڈیائی کرو۔ ایس کر کے تُسی اِک دُوجے نُوں قبول کرو۔ جیویں مسِیح وی تُہانوں قبول کِیتا۔ تاں جو خُدا دی وڈیائی ہوئے۔ کیوں جو مَیں آکھنا آں پئی خُدا دی سچیائی ثابت کرن لئی ایس کر کے مسِیح سُنتی بہن والیاں دا خادم کِیتا گیا۔ تاں جو اوہناں وعدیاں نُوں۔ جیہڑے پئیو دادیاں نال کِیتے گئے سن۔ پَکیّاں کرے۔ تے غیر قوماں رَحم دے سببّوں خُدا دی وڈیائی کرن جیویں لِکھیا ہویا اے۔ پئی ایس لئی مَیں غیر قوماں وِچ تیرا قرار کراں گا۔ تے تیرے ناں دا گِیت گاواں گا۔ تے فیر اوہ آکھدا اے۔ پئی اَے غیر قوم والیو۔ اوہدی اُمّت دے نال خُوشی کرو۔ تے فیر ایہہ پئی سارے غیر قوم والیو۔ خُداوند دی وڈیائی کرو۔ تے سارِیاں اُمّتاں اوہدیاں صِفتاں کرن۔ تے فیر یسعیاہ ایہہ آکھدا اے۔ یسّی دی جڑ ظاہر ہوئے گی۔ تے جیہڑا غیر قوماں اُتّے حکُومت کرن نُوں اُٹھدا اے۔ اوہدے اُتّے غیر قوماں آس رکھن گِیاں۔ ہُن اوس آس دا خُدا تُہاڈے اِیمان لیاؤن دے سبّب ساری خُوشی تے چَین نال تُہانوں بھر دیوے تاں جو تُسی پاک رُوح دی قُدرت نال آس وِچ وَدھدے جاؤ۔ تے میرے بھراؤ! مَیں آپ تُہاڈی بابت ایہہ یقِین رکھنا آں پئی تُسی آپ نیکی نال بھرپُور تے ساری دانائی نال بھرے ہوئے ہو تے اِک دُوجے نُوں سمجھان جوگے اوہ۔ پر مَیں تُہانوں چیتا دوان واسطے تھوڑا تھوڑا لِکھیا۔ سو اوہدے وِچ بُہتی دلیری کِیتی اوس فضل دے سببّوں جیہڑا خُدا ولّوں مَینُوں بخشیا گیا اے پئی مَیں خُدا دی خُوشخبری دی سیوا کاہِن وانگر کر کے غیر قوماں دے لئی مسِیح یِسُوع دا سیوک ہوواں۔ تاں جو غیر قوماں دا چڑھاوا پاک رُوح توں پاک ہو کے منظُور کِیتا جاوے۔ سو مَیں ایہناں گلّاں دی بابت جیہڑیاں خُدا ولّوں نیں۔ مسِیح یِسُوع وِچ فخر کرنا آں کیوں جو مَیں ایہہ دلیری نئیں کراں گا۔ پئی مَیں ہور کِسے گلّ دا ذِکر کراں بنا اوہناں دے جیہڑیاں مسِیح میری راہِیں غیر قوماں دے منان لئی کِیتیاں بھانویں کلام تے کمّاں نال۔ بھانویں نشانِیاں تے کراماتاں دی قُدرت نال بھانویں پاک رُوح دی قُدرت نال۔ ایتھوں تِیکر پئی یرُوشلِیم توں لے کے اِلّرِکُم تِیکر وی مَیں پھیرا مار کے مسِیح دی خُوشخبری دی پُوری منادی کِیتی۔ پر مَینُوں ایہہ چاہ سی۔ پئی مَیں خُوشخبری دی منادی اوتھے نا کراں جِتّھے مسِیح دا ناں سُنایا گیا۔ کِتے اجیہا نا ہوئے پئی مَیں دُوجے دی نِینّھ اُتّے ردّہ رکھاں۔ سگوں جیویں لِکھیا ہویا اے پئی اوہ ویکھن گے جِنہاں نُوں اوہدی خبر نئیں سی دِتّی گئی۔ تے اوہ سمجھن گے۔ جِنہاں نئیں سُنیا۔ ایسے سببّوں مَیں اکثر تُہاڈے کول آؤن توں وی رُکیا رہیا۔ پر ہُن ایسے کر کے پئی ایہناں دیساں وِچ تاں نئیں رہیا۔ نالے بتھیرے ورھیاں توں مَینُوں تُہاڈے کول آؤن دا دِلی شَوق سی۔ سو جد مَیں اِسفانیہ ولّ جاواں گا۔ مَینُوں آس اے پئی واٹے تُہانوں مِل کے جاواں گا تے جد پہلاں تُہاڈی سنگت نال میری کُجھ تسلّی ہو جاوے گی۔ تے تُسی مَینُوں اوس پاسے ٹور دیو گے۔ پر ایس ویلے مَیں پاک لوکاں دی خِدمت کرن لئی یرُوشلِیم نُوں جانا آں۔ کیوں جو مَکِدُنیہ تے اَخیہ دے لوکاں نُوں ایہہ چَنگا لگّا۔ پئی اوہ یرُوشلِیم دے پاک لوکاں وِچوں جیہڑے غرِیب نیں اوہناں لئی چندہ کرن۔ کِیتا تے رضامندی نال پر اوہ اوہناں دے دیندار وی نیں۔ کیوں جو جد غیر قوماں اوہناں دِیاں رُوحانی برکتاں وِچ شریک ہوئیاں۔ تے اوہناں نُوں وی چاہیدا سی پئی جِسمانی برکتاں وِچ اوہناں دی سیوا کرن۔ سو جد مَیں ایس کمّ نُوں مُکالاں گا تے ایس پَھل اُتّے اوہناں لئی مُہر لاواں گا۔ تے مَیں تُہاڈے کولوں ہو کے اِسفانیہ نُوں جاواں گا تے مَیں جاننا آں پئی جدوں تُہاڈے کول آواں گا۔ تدوں مسِیح دی پُوری برکت لے کے آواں گا۔ بھراؤ مَیں یِسُوع مسِیح دا جیہڑا ساڈا خُداوند اے۔ واسطہ دے کے تے رُوح دی مُحبّت نُوں یاد دوا کے تُہاڈی مِنّت کرنا آں۔ پئی میرے لئی خُدا کولوں دُعا منگن وِچ میرے نال کوشش کرو۔ پئی مَیں اوہناں توں جیہڑے یہُودیہ وِچ نافرمان نیں بچ جاواں نالے اوہ میری خِدمت جیہڑی مَیں یرُوشلِیم لئی کرنا آں پاک لوکاں نُوں منظُور ہوئے۔ تے مَیں جے خُدا چاہے تُہاڈے کول خُوشی نال آواں تے تُہاڈی سنگت وِچ سُکھ پاواں۔ ہُن تسلّی دا خُدا تُہاڈے سبھناں نال ہوئے آمِین۔ مَیں فِیبے دی جیہڑی ساڈی بھین تے کِنخریہ دی کلِیسیا دی ٹہلن اے۔ تُہانوں سونپیا آں۔ پئی تُسی اوہنوں خُداوند وِچ قبول کرو۔ جیویں پاک لوکاں نُوں چاہیدا اے۔ تے جِس کِسے کمّ وِچ اوہنوں تُہاڈی لوڑ پَوے۔ تُسی اوہدی مدد کرو۔ کیوں جو اوہ آپ وی بتھیریاں دی سگوں میری وی مدد کرن والی سی۔ پرسِکّلہ تے اَکوِلہ نُوں جیہڑے مسِیح یِسُوع وِچ میرے نال دے کمّ کرن والے نیں سلام آکھو۔ اوہناں تے میری جان دے بدلے اپنا گلّ ڈاہ دِتّا۔ اوہناں دا نِرا مَیں ای نئیں پر غیر قوماں دِیاں سارِیاں کلِیسیاواں شُکر گُزار نیں۔ نالے اوس کلِیسیا نُوں جیہڑی اوہناں دے گھر وِچ اے۔ سلام آکھو۔ میرے پیارے اِپینِتُس نُوں جیہڑا مسِیح لئی آسِیہ دا پہلا پَھل اے سلام آکھو۔ مریم نُوں جِس تُہاڈے نال بُہت محنت کِیتی سلام آکھو۔ میرے ساکاں اندرُنِیکُس تے یُونِیاس نُوں سلام آکھو۔ اوہ تے قید وِچ میرے ساتھی سن تے رسُولاں وِچ مشہُور نیں۔ تے مَیتھوں اگیترے مسِیح وِچ سن۔ میرے خُداوند دے وِچ پیارے اَمپلیاطُس نُوں سلام آکھنا۔ اُربانُس مسِیح وِچ ساڈے نال دے کمّ کرن والے نُوں تے میرے پیارے استخُس نُوں سلام آکھنا۔ اَپلِّیس نُوں جیہڑا مسِیح وِچ مقبُول اے۔ سلام آکھنا۔ اَرِستُِبُولُس دے گھر دیاں نُوں میرا سلام آکھو۔ ہیرودیاں نُوں جیہڑا میرا ساک اے سلام آکھو نَرکِسُّس دے ٹبّر دے جِنّے خُداوند وِچ نیں۔ اوہناں نُوں سلام آکھو۔ ترُوفَینہ تے ترُوفوسہ نُوں جیہڑیاں خُداوند وِچ محنت کر دیاں نیں سلام آکھو۔ پیاری پرسِس نُوں جِس خُداوند وِچ بُہت محنت کِیتی سلام آکھو۔ رُوفس نُوں جیہڑا خُداوند وِچ چُنیا ہویا اے۔ تے اوہدی ماں نُوں جیہڑی میری وی ماں اے۔ سلام آکھو۔ اَسُنکرِتُس تے فلِگون تے ہرمِیس تے پترُباس تے ہرماس تے بھراواں نُوں جیہڑے اوہناں دے نال نیں سلام آکھو۔ فِلُلُگس تے یُولیہ تے نیریُوس تے اوہدی بھین تے اُلُمپاس تے سارے پاک لوکاں نُوں جیہڑے اوہناں دے نال نیں سلام آکھو۔ تُسی پاک بوسہ لے کے اِک دُوجے نُوں سلام آکھو۔ مسِیح دِیاں سارِیاں کلِیسیاواں تُہانوں سلام آکھدیاں نیں۔ پر بھراؤ! مَیں تُہاڈی مِنّت کرنا آں۔ تُسی اوہناں لوکاں توں جیہڑے اوس تعلِیم دے اُلٹ جیہڑی تُہانوں مِلی پُھٹ پان والے تے ٹھوکر دین والے نیں خبردار رہو تے اوہناں توں لانبھے رہو۔ کیوں جو ایہو جِہے ساڈے خُداوند مسِیح دے غلام نئیں سگوں اپنے ڈِھڈ دے غلام نیں۔ تے چوپڑیاں چاپڑیاں گلّاں نال اوہ بھولیاں دیاں دِلاں نُوں بھچلاندے نیں۔ کیوں جو تُہاڈی تابعداری ساریاں وِچ مشہُور ہوئی اے ایس کر کے مَیں تُہاڈے اُتّے خُوش آں پر مَیں چاہناں آں پئی تُسی بھلیائی وِچ سِیانے تے بُریائی وِچ نِیانے رہو۔ تسلّی دا خُدا چھیتی تُہاڈے پیراں ہیٹھ شیطان نُوں لتاڑے گا۔ ساڈے خُداوند یِسُوع مسِیح دا فضل تُہاڈے نال ہوئے۔ تِیمُتِھیُس جیہڑا میرے نال کمّ کر دا اے۔ تے لُوکِیُس تے یاسون تے سوسِپطرُس جیہڑے میرے ساک نیں تُہانوں سلام آکھدے نیں۔ مَیں ترتِیُس جیہڑا خُداوند وِچ ایس خط دا لِکھن والا آں۔ تُہانوں سلام آکھنا آں۔ گَیُس جِہدے مَیں تے ساری کلِیسیا پَروہنے آں۔ تُہانوں سلام آکھدا اے۔ اِراستُس جیہڑا شہر دا خزانچی اے۔ تے بھرا کوارتُس تُہانوں سلام آکھدے نیں۔ [ساڈے خُداوند یِسُوع مسِیح دا فضل تُہاڈے سبھناں نال ہوئے۔ آمِین۔] ہُن اوہدی جِہدی قُدرت اے۔ پئی میری خُوشخبری تے یِسُوع مسِیح دے ناں دی منادی دے سببّوں تُہانوں قیم رکھّے۔ اوس بھید دے ظاہر ہون دے سببّوں جیہڑا مُڈھوں ای چُھپیا رہیا۔ پر ہُن نبیاں دِیاں کِتاباں دی راہِیں ظاہر کِیتا گیا۔ تے ہمیشہ دے خُدا دے حُکم دے سببّوں سارِیاں قوماں نُوں ایس لئی دسیا گیا۔ پئی اوہ اِیمان دے تابعدار ہون۔ اوسے اکلّے سیانپ والے خُدا دی۔ یِسُوع مسِیح دی راہِیں سدا وڈیائی ہوئے۔ آمِین پَولُس ولّوں جیہڑا خُداوند دی مرضی نال یِسُوع مسِیح دا رسُول ہون لئی سدّیا گیا تے بھرا سوستِھینس ولّوں۔ خُدا دی اوس کلِیسیا نُوں جیہڑی کُرِنتِھس وِچ اے۔ یعنی اوہناں نُوں جیہڑے مسِیح یِسُوع دی راہِیں پاک کِیتے گئے تے پاک لوک ہون دے لئی سَدّے گئے نیں تے اوہناں ساریاں نُوں وی جیہڑے سبھنیں تھائِیں ساڈے تے اپنے خُداوند یِسُوع مسِیح دا ناں لَیندے نیں۔ ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔ مَیں تُہاڈے لئی خُدا دے اوس فضل دے سببّوں جیہڑا مسِیح یِسُوع دی راہِیں تُہاڈے اُتّے ہویا۔ سدا اپنے خُدا دا شُکر کرنا آں۔ پئی تُسی اوہدے وِچ ہو کے کلام تے عِلم دی ہر طرح دی دَولت نال دَولتمند ہوگئے اوہ۔ سو مسِیح دی گواہی تُہاڈے وِچ قیم ہوئی۔ ایتھوں توڑی پئی تُسی کِسے نِعمت وِچ ہورناں نالوں گھٹ نئیں تے ساڈے خُداوند یِسُوع مسِیح دے ظاہر ہون دی اُڈِیک وِچ اوہ۔ جیہڑا تُہانوں اوڑک تِیکر قیم وی رکھّے گا۔ تاں جو تُسی ساڈے خُداوند یِسُوع مسِیح دے دِن بے عیب ٹھیرو خُدا سَچّا اے۔ جِس تُہانوں اپنے پُتر ساڈے خُداوند یِسُوع مسِیح دی سنگت لئی سدّیا اے۔ ہُن بھراؤ! مَیں یِسُوع مسِیح دا جیہڑا ساڈا خُداوند اے ناں یاد دوا کے تُہاڈے اگّے مِنّت کرنا آں۔ پئی اِکّو جِہی گلّ آکھو تے تُہاڈے وِچ دُوجا پن نا ہوئے۔ سگوں آپو وِچ اِک دِل تے اِک صلاح ہو کے کامِل بنے رہو۔ کیوں جو بھراؤ! تُہاڈی بابت مَینُوں خلوئے دے کئیاں توں پتا لگّا۔ پئی تُہاڈے وِچ جھگڑے ہوندے نیں۔ میرا مطلب ایہہ اے پئی تُہاڈے وِچوں کوئی تے اپنے آپ نُوں پَولُس دا آکھدا اے۔ کوئی اُپلّوس دا کوئی کیفا دا۔ کوئی مسِیح دا۔ کِیہ مسِیح وَنڈیا گیا؟ یا پَولُس تُہاڈے لئی صلِیب دِتّا گیا؟ یا تُساں پَولُس دے ناں اُتّے بپتِسمہ لیا اے؟ مَیں خُدا دا شُکر کرنا آں پئی کرِسپُس تے گَیُس دے بِناں مَیں تُہاڈے وِچوں کِسے نُوں بپتِسمہ نئیں دِتّا۔ متے کوئی ایہہ آکھے پئی تُساں میرے ناں اُتّے بپتِسمہ لیا۔ ہاں ستِفناس دے ٹبّر نُوں وی مَیں بپتِسمہ دِتّا تے اوہناں دے بِناں مَینُوں نئیں پتا۔ پئی مَیں کِسے ہور نُوں بپتِسمہ دِتّا ہوئے۔ کیوں جو مسِیح مَینُوں بپتِسمے لئی نئیں سگوں خُوشخبری سُنان لئی گھلّیا اے تے اوہ وی کلام دی دنائی نال نئیں۔ تاں جو مسِیح دی صلِیب بے اثر نا ہو جائے۔ کیوں جو صلِیب دی منادی ناس ہون والیاں واسطے تے مُورکھ اے۔ پر ساڈے نجات لین والیاں واسطے خُدا دی قُدرت اے۔ کیوں جو لِکھیا اے۔ پئی مَیں سیانیاں دی دنائی دا ناس تے عقل والیاں دی عقل نُوں رَدّ کر دیاں گا۔ کِتّھوں دا سیانا۔ کِتّھوں دا منشی۔ کِتّھوں دا ایس دُنیا دا بحث کرن والا۔ کِیہ خُدا نے دُنیا دی دنائی نُوں مُورکھ نئیں کِیتا؟ ایس لئی پئی جد خُدا دی دنائی دے سببّوں دُنیا اپنی دنائی نال خُدا نُوں نا سہاتا۔ تَد خُدا نُوں ایہہ چَنگا لگّا۔ پئی ایس منادی دی مُورکھ دی راہِیں اِیمان لیاؤن والیاں نُوں نجات دیوے۔ جیویں یہُودی نِشان منگدے نیں۔ تے یُونانی دانائی دی کھوج کر دے نیں۔ پر اسی اوس صلِیب دِتّے ہوئے مسِیح دی منادی کرنے آں۔ جیہڑا یہُودِیاں لئی ٹھوکر تے غیر قوماں بھانے مُورکھ اے۔ پر جیہڑے سَدّے ہوئے نیں یہُودی ہون بھانویں یُونانی۔ اوہناں بھانے مسِیح خُدا دی قُدرت تے خُدا دی حِکمت اے۔ کیوں جو خُدا دی مُورکھ بندیاں دی حِکمت نالوں چنگی اے تے خُدا دی کمزوری بندیاں دے زور نالوں زور والی اے۔ بھراؤ! اپنے سَدّے جان اُتّے تے دھیان کرو پئی تُہاڈے وِچوں دُنیا دے بتھیرے حکِیم۔ بتھیرے اختیار والے۔ بتھیرے اشراف نئیں سَدّے گئے۔ سگوں خُدا نے دُنیا دے مُورکھاں نُوں چُن لیا۔ پئی حکیماں نُوں شرمندیاں کرے۔ تے خُدا نے دُنیا دیاں ماڑیاں نُوں چُنیا پئی تگڑیاں نُوں شرمندیاں کرے۔ تے کوئی بندہ خُدا دے اگّے فخر نا کرے۔ پر تُسی اوہدے ولّوں یِسُوع مسِیح وِچ ہو جیہڑا ساڈے لئی خُدا ولّوں حِکمت ہویا یعنی راستبازی تے پاکیزگی تے مُکتی۔ تاں جو جیویں لِکھیا اے۔ اوسے طرح ای ہوئے پئی جیہڑا فخر کرے اوہ خُداوند اُتّے فخر کرے۔ تے بھراؤ! جد مَیں خُدا دے بھیت دی منادی کر دا ہویا تُہاڈے کول آیا۔ تے اُچّے درجے دے کلام یا دنائی نال نئیں آیا کیوں جو مَیں ایہہ اِرادہ کر لیا سی پئی تُہاڈے وِچ یِسُوع مسِیح سگوں صلِیب دِتّے ہوئے مسِیح دے بِناں ہور کُجھ نا جاناں گا۔ تے مَیں کمزوری تے ڈر تے بڑے تَھر تَھر کمبن دی حالت وِچ تُہاڈے کول رہیا۔ تے میرے کلام تے میری منادی وِچ دنائی دِیاں پَرچا لین والِیاں گلّاں نئیں سن سگوں اوہ رُوح تے قُدرت نال ثابت ہوندیاں سن۔ تاں جو تُہاڈا اِیمان بندیاں دی دنائی اُتّے نا بنیا ہوئے۔ سگوں خُدا دی قُدرت اُتّے۔ فیر وی سیانیاں وِچ اسی حِکمت دِیاں گلّاں کرنے آں۔ پر ایس دُنیا دی تے ایس جہان دے ناس ہون والیاں سرداراں دی حِکمت نئیں۔ سگوں اسی خُدا دی اوہ لُکی ہوئی حِکمت بھیت وانگر بیان کرنے آں۔ جِہنُوں خُدا نے دُنیا دے مُڈھ توں پہلاں ساڈے جلال واسطے مُقرّر کِیتا سی۔ تے اوہنوں ایس جہان دے سرداراں وِچوں کِسے نا سہاتا کیوں جو جے سمجھدے تے جلال دے خُداوند نُوں صلِیب نا دیندے۔ سگوں جیویں لِکھیا اے۔ اوسے طرح ہویا پئی جیہڑیاں شیواں نا اَکھّیاں ویکھیاں نا کنّاں سُنیاں نا بندیاں دے دِلاں وِچ آئِیاں۔ جِنّیاں شیواں خُدا نے اپنے پیار کرن والیاں لئی تیار کر دِتّیاں۔ پر ساڈے اُتّے خُدا اوہناں نُوں رُوح دی راہِیں ظاہر کِیتا۔ کیوں جو رُوح سارِیاں گلّاں سگوں خُدا دِیاں ڈُوہنِگیاں گلّاں وی بھال کر لَیندا اے۔ کیوں جو بندیاں وِچوں کون کِسے بندے دا حال جان دا اے۔ اوس بندے دی رُوح دے بِناں جیہڑی اوہدے وِچ اے۔ ایس طرح خُدا دے رُوح بِناں کوئی خُدا دا حال نئیں جان دا۔ پر سانُوں دُنیا دی رُوح نئیں۔ سگوں اوہ رُوح مِلیا اے جیہڑا خُدا ولّوں اے۔ تاں جو اوہناں گلّاں نُوں جانئے جیہڑیاں خُدا سانُوں دان کِیتیاں نیں۔ تے اسی ایہناں گلّاں نُوں اوہناں لفظاں وِچ نئیں بیان کر دے۔ جیہڑے اِنسانی حِکمت نال سانُوں سِکھائے گئے ہون۔ سگوں اوہناں لفظاں وِچ جیہڑے رُوح سِکھائے نیں۔ تے رُوحانی گلّاں نُوں رُوحانی گلّاں نال جاچنے آں۔ پر نفس دا بندہ خُدا دے رُوح دِیاں گلّاں نئیں مَندا کیوں جو اوہ اوہدے بھانیں مُورکھ دِیاں گلّاں نیں۔ تے اوہ اوہناں نُوں سمجھ نئیں سکدا اے۔ کیوں جو اوہ رُوحانی طرح پرکھیاں جاندِیاں نیں۔ پر رُوحانی بندہ سارِیاں گلّاں نُوں پرکھ لَیندا اے۔ پر آپ کِسے توں پرکھیا نئیں جاندا۔ خُداوند دی عقل نُوں کِس جانیا اے۔ پئی اوہنوں کوئی سِکھا سکے۔ پر ساڈے وِچ مسِیح دی عقل رہندی اے۔ تے بھراؤ! مَیں تُہاڈے نال ایس طرح کلام نا کر سکیا جیویں رُوحانِیاں نال سگوں جیویں جسمانِیاں نال تے اوہناں نال جیہڑے مسِیح وِچ نِیانے نیں۔ مَیں تُہانوں دُدّھ پیایا۔ تے روٹی نا کھوائی۔ کیوں جو تُسی اوہنوں پچا نئیں سو سکدے۔ سگوں اجے وی پچا نئیں سکدے ہو۔ کیوں جو اجے تِیکر جِسمانی ہو۔ ایس لئی پئی جد تُہاڈے وِچ ساڑا تے جھگڑا اے۔ تے تُسی جِسمانی نا ہوئے؟ تے بندیاں دِیاں طریقیاں اُتّے ٹُرن والے نا ہوئے؟ ایس لئی پئی جد اِک آکھدا اے۔ پئی مَیں پَولُس دا آں۔ تے دُوجا آکھدا اے مَیں اُپلّوس دا آں۔ تے تُسی اِنسان نا ہوئے؟ اُپلّوس کِیہ شے اے؟ تے پَولُس کِیہ اے؟ سیوائے جِنہاں دی راہِیں تُساں اِیمان لیاندا۔ تے ہر اِک دا اوناں ای درجہ اے۔ جِنّاں خُداوند دِتّا اے مَیں بُوٹا لا یا تے اُپلّوس پیایا پر وَدھایا خُدا نے۔ سو نا تے لان والا کُجھ شے اے۔ نا پیان والا پر خُدا جیہڑا وَدھان والا اے۔ لان والا تے پانی دین والا دونویں اِکّو جیہے نیں۔ پر ہر اِک نُوں بدلہ اوہدی اپنی محنت پِچّھے مِلے گا۔ کیوں جو اسی خُدا دے نال کمّ کرن والے آں۔ تے تُسی خُدا دی پَیلی اوہ۔ تے خُدا دی عمارت۔ مَیں اوس توفِیق دے سببّوں جیہڑی خُدا مَینُوں بخشی۔ عقلمند راج وانگر نِینّھ رکھی تے دُوجا اوہدے اُتّے عمارت اُسار دا اے۔ سو ہر اِک خبردار رہے۔ پئی کہیو جِہی عمارت اُسار دا اے۔ کیوں جو بِناں اوس نِینّھ دے جیہڑی دھری ہوئی اے۔ تے اوہ یِسُوع مسِیح اے۔ کوئی ہور نِینّھ رکھ نئیں سکدا۔ تے جے کوئی اوس نِینّھ اُتّے سونے یا چاندی یا قِیمتی پتّھراں یا لکّڑیا گھاہ یا بھوہ دا ردّہ رکھّے۔ تے ہر کِسے دا کمّ دِس پووے گا۔ کیوں جو جیہڑا دِن اَگ نال ظاہر ہوئے گا۔ اوہ اوس کمّ نُوں دس دے گا۔ تے اوہ اَگ ہر اِک دا کمّ آپی پرکھ لَئے گی۔ پئی کیہو جِہیا اے۔ جِہدا کمّ اوہدے اُتّے اُساریا ہویا باقی رہے گا۔ اوہنوں بدلہ مِلے گا۔ تے جِہدا کمّ سڑ جائے گا۔ اوہ گھاٹا پائے گا۔ اوہ آپی بھانویں بچ تے جائے گا۔ پر سڑدیاں سڑدیاں۔ تُسی نئیں جان دے ہو۔ پئی تُسی خُدا دی ہیکل ہو تے خُدا دا رُوح تُہاڈے وِچ وَسدا اے؟ جے کوئی خُدا دی ہیکل نُوں برباد کرے گا۔ خُدا اوہنوں برباد کرے گا۔ کیوں جو خُدا دی ہیکل پاک اے۔ تے اوہ تُسی ہو۔ کوئی اپنے آپ نُوں دھوکھا نا دے۔ جیہڑا تُہاڈے وِچوں اپنے آپ نُوں ایس جہان دا سیانا سمجھے اوہ مُورکھ بنے تاں جو سیانا ہو جائے۔ کیوں جو دُنیا دی حِکمت خُدا دے بھانے مُورکھ اے۔ جیویں لِکھیا ہویا اے پئی اوہ سیانیاں نُوں اوہناں دی چالاکی وِچ پھسا دیندا اے۔ تے ایہہ وی لِکھیا ہویا اے۔ پئی خُدا سیانیاں دِیاں خیالاں نُوں جان دا اے۔ پئی جُھوٹھے نیں۔ سو بندے اُتّے کوئی فخر نا کرے کیوں جو سارِیاں شیواں تُہاڈیاں نیں۔ بھانویں پَولُس ہوئے بھانویں اُپلّوس بھانویں کیفا بھانویں دُنیا بھانویں زِندگی بھانویں مَوت بھانویں ہُن دِیاں شیواں تے بھانویں آؤن والِیاں۔ سارِیاں تُہاڈیاں نیں تے تُسی مسِیح دے اوہ۔ تے مسِیح خُدا دا اے۔ بندہ سانُوں اجیہا جانے پئی اسی مسِیح دے سیوائے تے خُدا دے بھیتاں دے مُختِیار آں۔ تے ایتھے مُختِیار وِچ ایہہ گلّ ویکھی جاندی اے۔ پئی دیانتدار ہوئے۔ پر میرے بھانیں ایہہ نکمّی جیہی گلّ اے۔ پئی تُسی یا کوئی بندیاں دی عدالت مَینُوں پرکھے۔ سگوں مَیں آپ وی اپنے آپ نُوں نئیں پرکھدا۔ کیوں جو میرا دِل تے مَینُوں ملامت نئیں کر دا پر اوہدے توں مَیں راستباز نئیں ٹھہردا۔ سگوں میرا پرکھن والا خُداوند اے۔ سو جد تِیکر خُداوند نا آوے۔ ویلے توں پہلاں کِسے کمّ دا فیصلہ نا کرو اوہو ہنیرے دِیاں چُھپیاں ہویاں گلّاں نُوں روشن کر دے گا۔ تے دِلاں دے منصُوبے ظاہر کر دے گا۔ اوس ویلے ہر اِک دی وڈیائی خُدا ولّوں ہوئے گی۔ تے بھراؤ! مَیں ایہناں گلّاں وِچ تُہاڈی خاطر اپنا تے اُپلّوس دا ذِکر مِثال دے طَور کِیتا اے۔ تاں جو تُسی ساڈی راہِیں ایہہ سِکھّو پئی لِکھے ہوئے توں اگانہہ نا لنگھ جاؤ۔ پئی کوئی اِک دے نال ہو کے دُوجے دے برخلاف شیخی نا مارے۔ تیرے وِچ تے دُوجے وِچ ونڈ کون کر دا اے۔ تے تیرے کول کیہڑی اجیہی شے اے۔ جیہڑی تُوں نئیں لئی تے جد اوہ لئی ہوئی اے۔ تے فخر کیوں کرناں ایں؟ پئی لئی نئیں؟ تُسی تے پہلاں توں ای رجّے ہوئے اوہ۔ تے پہلاں توں ای دَولت والے اوہ۔ تے تُساں ساڈے بِناں بادشاہی کِیتی تے چَنگا سی پئی تُسی بادشاہی کر دے تاں جو اسی وی تُہاڈے نال بادشاہی کر دے۔ میری سمجھ وِچ خُدا سانُوں رسُولاں نُوں ساریاں توں چھیکڑلا بنا کے قتل ہون والیاں وانگُوں دھریا اے۔ کیوں جو اسی دُنیا تے فرِشتیاں تے بندیاں واسطے اِک تماشہ بن گئے آں۔ اسی مسِیح دی خاطر مُورکھ آں۔ پر تُسی مسِیح وِچ عقل والے ہو اسی ماڑے آں تے تُسی زور والے۔ تُسی عِزّت والے اسی بے عِزّت آں۔ اسی ایس ویلے تِیکر بُھکھے تریہائے تے ننگے آں۔ تے ہُورے کھاندے تے آوارہ آں۔ تے اپنے ہتّھاں نال محنت کرنے آں لوک بُرا آکھدے نیں اسی دُعا دینے آں۔ اوہ دُکھ دیندے نیں اسی سہنے آں۔ اوہ بدنام کر دے نیں اسی تَرلے کرنے آں۔ اسی اَج تِیکر دُنیا دے کُوڑے تے سبھناں دی مَیل آں۔ مَیں تُہانوں شرمندیاں کرن لئی ایہہ گلّاں نئیں لِکھدا سگوں پیارے پُتر جان کے مَت دینا آں۔ کیوں جو جے مسِیح وِچ تُہاڈے اُستاد دَس ہزار وی ہون۔ تَد وی تُہاڈے رُوحانی پئیو بتھیرے نئیں۔ ایس لئی پئی مَیں ای اِنجِیل دی راہِیں مسِیح یِسُوع وِچ تُہاڈا پئیو بنیا۔ سو مَیں تُہاڈی مِنّت کرنا آں پئی میرے وانگر بنو۔ ایس لئی مَیں تِیمُتِھیُس نُوں تُہاڈے کول گھلّیا۔ اوہ خُداوند وِچ میرا پیارا تے دیانتدار پُتر اے۔ تے میرے اوہناں مسِیحی طریقیاں دا تُہانوں چیتا کراوے گا۔ جِنہاں دی مَیں ہر تھاں دی کلِیسیا وِچ تعلِیم دینا آں۔ کئی اجیہی شیخی مار دے نیں۔ پئی جیویں مَیں تُہاڈے کول آؤنا ای نئیں۔ پر خُداوند دی مرضی ہوئی تے مَیں تُہاڈے کول چھیتی آواں گا۔ تے شیخی خوریاں دِیاں گلّاں نُوں نئیں سگوں اوہناں دی قُدرت نُوں معلُوم کراں گا۔ کیوں جو خُدا دی بادشاہی گلّاں اُتّے نئیں سگوں قُدرت اُتّے قیم اے۔ تُسی کِیہ چاہندے ہو؟ پئی مَیں سوٹا لے کے تُہاڈے کول آواں یاں مُحبّت تے حلِیمی نال؟ ایتھوں تِیکر سُنن وِچ آیا اے۔ پئی تُہاڈے وِچ حرامکاری ہوندی اے۔ سگوں اِنج حرامکاری جیہڑی غیر قوماں وِچ وی نئیں ہوندی۔ پئی تُہاڈے وِچوں اِک بندہ اپنے پئیو دی بیوی رکھدا اے۔ تے تُسی افسوس تے کر دے نئیں۔ تاں جو جِس ایہہ کمّ کِیتا اے۔ اوہ تُہاڈے وِچوں کڈھیا جائے۔ سگوں شیخیاں مار دے ہو۔ پر مَیں بھانویں جِسم ولّوں موجُود نئیں۔ پر رُوح ولّوں حاضر ہو کے موجُود وانگُوں۔ جیہا کرن والے دی بابت ایہہ حُکم دے دِتّا اے۔ پئی جد تُسی تے میری رُوح ساڈے خُداوند یِسُوع دی قُدرت نال اکٹّھے ہوؤ۔ تے جیہا بندہ ساڈے خُداوند یِسُوع دے ناں نال۔ جِسم دی ہلاکت لئی شیطان دے حوالے کِیتا جاوے تے جو اوہدی رُوح خُداوند یِسُوع دے دِن بچ جائے۔ تُہاڈا فخر کرنا چَنگا نئیں۔ تُسی نئیں جان دے ہو۔ پئی تھوڑا جیہا خمیر ساری تَون نُوں خمیرا کر دیندا اے؟ پرانا خمیر کڈھ کے اپنے آپ نُوں پاک کرو۔ تاں جو تازی تَون بن جاؤ۔ سو تُسی بے خمیر ہو۔ کیوں جو ساڈا وی فسح یعنی مسِیح قُربان ہویا۔ سو آؤ اسی عید کریئے نا پرانے خمیر نال تے نا بُرائی تے شرارت دے خمیر نال۔ سگوں صاف دِلی تے سچیائی دی بے خمیری روٹی نال۔ مَیں اپنے خط وِچ تُہانوں ایہہ لِکھیا سی۔ پئی حرامکاراں نال صُحبت نا رکھنا۔ ایہہ تے نئیں پئی بالکل دُنیا دے حرامکاراں یا لالچیاں یا ظالماں یا بُت پرستاں نال مِلنا ای نئیں۔ کیوں جو ایس طرح تُہانوں دُنیا وِچوں ای نِکلنا پَیندا۔ پر تُہانوں مَیں ایہہ لِکھیا سی۔ پئی جے کوئی بھرا اکھوا کے حرامکار یا لالچی یا بُت پرست یا گالی کڈھن والا یا شرابی یا ظالم ہوئے تے اوہدے نال صُحبت نا رکھو سگوں اجیہے نال روٹی وی نا کھاؤ۔ کیوں جو مَینُوں باہر والیاں اُتّے حُکم کرن دا کِیہ واسطہ اے؟ تُسی اندر والیاں اُتّے حُکم نئیں کر دے ہو؟ پر باہر والیاں اُتّے خُدا حُکم کر دا اے۔ سو اوس شریر بندے نُوں اپنے وِچوں کڈھ دیو۔ تُہاڈے وِچوں کِسے نُوں ایہہ دلیری اے۔ پئی جد دُوجے دے نال مُقدّمہ ہوئے۔ تے فیصلے دے لئی بے دِیناں کول جاوے۔ تے پاک لوکاں کول نا جائے؟ تُسی نئیں جان دے پئی پاک لوک دُنیا دا نیاں کرن گے؟ سو جد تُساں دُنیا دا نیاں کرنا اے۔ تے نِکّے توں نِکّے جھگڑیاں دے وی نبیڑیاں دے قابل نئیں ہو۔ تُسی نئیں جان دے پئی اسی فرِشتیاں دا نیاں کراں گے؟ تے ایس دُنیا دے مُعاملے دا فیصلہ نا کریئے؟ سو جے تُہاڈے وِچ دُنیا دے مُقدّمے ہون۔ تے اوہناں نُوں مُنصف مُقرّر کرو گے۔ جیہڑے کلِیسیا وِچ حِقیر سمجھے جاندے نیں؟ مَیں تُہانوں شرمندیاں کرن لئی ایہہ آکھنا آں۔ سَچ مُچ تُہاڈے وِچ اِک وی سیانا نئیں۔ جیہڑا اپنے بھراواں دا فیصلہ کر سکے؟ سگوں بھراواں بھراواں وِچ مُقدّمہ ہوندا اے۔ سو اوہ وی بیدیناں اگّے۔ پر اصل وِچ تُہاڈا وَڈا نُقص ایہہ اے۔ پئی آپو وِچ مُقدّمہ بازی کر دے ہو۔ ظُلم سہنا کیوں نئیں ہَچھّا سمجھدے۔ نُقصان کیوں نئیں منظُور کر دے؟ سگوں تُسی آپ ای ظُلم کر دے تے نُقصان پُہنچاندے ہو۔ تے اوہ وی بھراواں نُوں۔ تُسی نئیں جان دے۔ پئی بدکار خُدا دی بادشاہی دے وارث نا ہون گے؟ فریب نا کھاؤ۔ نا حرامکار خُدا دی بادشاہی دے وارث ہون گے۔ نا بُت پرست نا زناہی۔ نا لُچّے۔ نا مُنڈے باز۔ نا چور نا لالچی نا شرابی نا گالاں کڈھن والے نا ظالم۔ تے کئی تُہاڈے وِچ اجیہے اے سن وی۔ پر تُسی خُداوند یِسُوع مسِیح دے ناں اُتّے تے ساڈے خُدا دے رُوح نال دھوئے گئے تے پاک ہوئے تے راستباز ٹھہرے۔ سارِیاں شیواں میرے واسطے روا تے نیں پر سارِیاں شیواں فائدے والیاں نئیں۔ سارِیاں شیواں میرے لئی روا تے نیں۔ پر مَیں کِسے شے دے قابُو وِچ نا ہوواں گا۔ کھانے ڈِھڈ لئی نیں تے ڈِھڈ کھانیاں لئی۔ پر خُدا اوہنوں تے اوہناں نُوں فنا کرے گا۔ پر بدن حرامکاری لئی نئیں سگوں خُداوند لئی اے۔ تے خُداوند بدن لئی۔ تے خُدا نے خُداوند نُوں جوالیا۔ تے سانُوں وی اپنی قُدرت نال جوالے گا۔ تُسی نئیں جان دے پئی تُہاڈے بدن مسِیح دے انگ نیں؟ سو مَیں مسِیح دے انگ لے کے کسبی دے انگ بناواں؟ کدی نئیں۔ تُسی نئیں جان دے پئی جیہڑا کسبی نال رلیا ہویا اے اوہدے نال اِک تَن ہو جاندا اے؟ کیوں جو اوہ آکھدا اے پئی اوہ دونویں اِک تَن ہون گے۔ تے جیہڑا خُداوند دی صُحبت وِچ رہندا اے اوہ اوہدے نال اِک رُوح ہو جاندا اے۔ حرامکاری توں نسّو جِنّے گُناہ بندہ کر دا اے اوہ بدن توں باہر نیں پر حرامکار اپنے بدن دا وی گُناہگار اے۔ تُسی نئیں جان دے پئی تُہاڈا بدن پاک رُوح دی ہیکل اے جیہڑا تُہاڈے وِچ وَسدا اے۔ تے تُہانوں خُدا ولّوں مِلیا اے۔ تے تُسی اپنے نئیں۔ کیوں جو مُل لَئے گئے ہو۔ سو اپنے بدن نال خُدا دا جلال ظاہر کرو۔ جیہڑیاں گلّاں تُسی لِکھیاں مَیں اوہناں دی بابت پہلے ایہہ آکھنا آں۔ بندے لئی چَنگا اے پئی زنانی نُوں نا چُھوئے۔ پر حرامکاری دے خطریوں ہر اِک مرد اپنی بیوی تے ہر اِک زنانی اپنا شوہر رکھّے۔ شوہر بیوی دا حق ادا کرے۔ ایسے طرح بیوی شوہر دا۔ بیوی اپنے جِسم دی مُختِیار نئیں۔ سگوں شوہر مُختِیار اے۔ ایسے طرح شوہر وی اپنے جِسم دا مُختِیار نئیں سگوں بیوی اے۔ تُسی اِک دُوجے توں وَکھ نا رہو پر تھوڑے چِر تِیکر سو ایہہ وی آپو وِچ رضامندی نال۔ تاں جو دُعا لئی ویہل مِلے۔ تے مُڑ کٹّھے ہو جاؤ۔ اجیہا نا ہوئے پئی نا جَرن دے سببّوں شیطان تُہانوں ازمائے۔ پر ایہدے وِچ مَیں اجازت دینا آں۔ حُکم نئیں دیندا۔ پر مَیں ایہہ چاہناں آں پئی جیہا مَیں آں اوہو جیہے سارے بندے ہون۔ پر ہر اِک نُوں خُدا ولّوں خاص خاص توفِیق مِلی اے۔ کِسے نُوں کِسے طرح دی کِسے نُوں کِسے طرح دی۔ مَیں بِن وِیاہیاں تے رَنڈِیاں دے حق وِچ ایہہ آکھنا آں پئی اوہناں دے لئی ایہو جیہا رہنا چَنگا اے جیہا مَیں آں۔ پر جے رُک نا سکن تے ویاہ کر لین۔ کیوں جو ویاہ کرنا مسَتی نالوں چَنگا اے۔ پر جِنہاں دا ویاہ ہوگیا اے اوہناں نُوں مَیں نئیں سگوں خُداوند حُکم دیندا اے۔ پئی بیوی اپنے شوہر نُوں نا چھڈے۔ (جے چھڈے تے بے نکاحی رہے یا اپنے بندے نال فیر مِل کے رہے۔) تے نا ای شوہر بیوی نُوں چھڈے۔ باقِیاں نُوں مَیں ای آکھنا آں نا خُداوند۔ پئی جے کِسے بھرا دی بیوی بے اِیمان ہوئے تے اوہدے نال رہن نُوں راضی ہوئے۔ تے اوہ اوہنوں نا چھڈے۔ تے جیہڑی زنانی دا شوہر بے اِیمان ہوئے تے اوہدے نال رہن نُوں راضی ہوئے۔ تے اوہ شوہر نُوں نا چھڈے۔ کیوں جو جیہڑا شوہر اِیماندار نئیں اوہ بیوی دے سببّوں پاک ہوندا اے۔ تے جیہڑی بیوی اِیماندار نئیں اوہ مسِیحی شوہر دے سببّوں پاک ہوندی اے۔ نئیں تے تُہاڈی اولاد پلِیت ہوندی۔ پر ہُن پاک اے۔ پر بندہ جیہڑا بے اِیمان ہوئے۔ جے اوہ وَکھ ہوئے۔ تے ہون دیو۔ اجیہے حال وِچ کوئی بھرا یا بھین بَدّھی ہوئی نئیں۔ تے خُدا سانُوں وی میل ملاپ لئی سدّیا اے۔ کیوں جو اَے زنانی! تینُوں کِیہ پَتا اے۔ پئی شاید تُوں اپنے شوہر نُوں بچا لئیں۔ تے بندیا! تینُوں کِیہ پَتا اے۔ پئی تُوں اپنی بیوی نُوں بچا لئیں۔ پر جیہا خُدا ہر اِک نُوں حِصّہ دِتّا اے تے جیویں خُدا ہر اِک نُوں سدّیا اے۔ اوہ اوسے طرح ٹُرے۔ تے مَیں ساریاں کلِیسیاواں وِچ ایسے طرح حُکم دینا آں۔ تے جیہڑا سُنتی والا سدّیا گیا اے۔ اوہ نا سُنت نا ہو جائے۔ جیہڑا نا سُنتی دی حالت وِچ سدّیا گیا اے۔ اوہ سُنتی نا بَہے۔ نا تے سُنت کُجھ شے اے تے نا ناسُنتی سگوں خُدا دے حُکماں اُتّے ٹُرناں ای سبھ کُجھ اے۔ ہر کوئی جِس حال وِچ سدّیا گیا اے اوسے وِچ رہے۔ جے تُوں غلامی دی حالت وِچ سدّیا گیا ایں۔ تے فِکر نا کر پر جے تُوں اَزاد وی ہو سکیں۔ تَد وی اوسے نُوں منظُور کر۔ کیوں جو جیہڑا غلام خُداوند وِچ سدّیا گیا اے اوہ خُداوند دا اَزاد کِیتا ہویا اے۔ ایسے طرح جیہڑا اَزادی دی حالت وِچ سدّیا گیا اے۔ اوہ مسِیح دا غلام اے۔ تُسی مُل لَئے گئے ہو بندیاں دے غلام نا بنو۔ بھراؤ! جیہڑا جیہڑی حالت وِچ سدّیا گیا اے۔ اوہ اوسے حالت وِچ خُدا دے نال رہے۔ تے کوارِیاں لئی میرے کول خُداوند دا کوئی حُکم نئیں پر ایس کر کے۔ پئی میرے اُتّے دیانتدار ہون لئی اجیہا خُداوند ولّوں رَحم ہویا۔ مَیں ایہہ صلاح دینا آں۔ سو ہُن دی مُصِیبت دا خیال کر کے میری رائے وِچ بندے دے لئی ایہو چَنگا اے۔ پئی جِہیا اے۔ اوہو جِہیا رہے۔ جے تیری بیوی اے۔ تے اوہدے توں وَکھریاں ہون دی کوشش نا کر۔ تے جے تیری بیوی نئیں تے بیوی دی بھال نا کر۔ پر جے تُوں ویاہ کر لیں۔ تے کوئی گُناہ وی نئیں۔ تے جے کواری وِیاہی جائے تے کوئی گُناہ نئیں۔ اجیہے بندے جِسم دا دُکھ پان گے تے مَیں تُہانوں بچانا چاہناں آں۔ پر بھراؤ! مَیں ایہہ آکھنا آں۔ پئی ویلا تنگ اے۔ سو اگّے نُوں چاہیدا اے۔ پئی وَوہٹِیاں والے اجیہے ہون۔ پئی اوہناں دِیاں وَوہٹِیاں نئیں۔ تے رون والے اجیہے ہون جیویں نئیں روندے۔ تے خُوشی کرن والے اجیہے ہون جیویں خُوشی نئیں کر دے۔ تے مُل لین والے اجیہے ہون جیویں مال نئیں رکھدے۔ تے دُنیا دے کاروبار کرن والے اجیہے ہون پئی دُنیا ای دے نا ہو جان۔ کیوں جو دُنیا دا رُوپ بدلدا جاندا اے۔ سو مَیں ایہہ چاہناں آں۔ پئی تُسی بے فِکر رہو۔ جیہڑا وِیاہیا ہویا نئیں۔ اوہ خُداوند دے فِکر وِچ رہندا اے۔ پئی کِسے طرح خُداوند نُوں خُوش کرے۔ پر وِیاہیا ہویا دُنیا دے فِکر وِچ رہندا اے۔ پئی کِسے طرح اپنی بیوی نُوں خُوش کرے۔ وِیاہی ہوئی تے نا وِیاہی وِچ وی فرق اے۔ نا وِیاہی ہوئی خُداوند دے فِکر وِچ رہندی اے تاں جو اوہدا جِسم تے رُوح دونویں پاک ہون۔ پر وِیاہی ہوئی زنانی دُنیا دے فِکر وِچ رہندی اے پئی کِسے طرح اپنے بندے نُوں خُوش کرے۔ ایہہ مَیں تُہاڈے فائدے لئی آکھنا آں۔ نا تُہانوں پَھسان لئی۔ سگوں ایس کر کے پئی جو کُجھ ٹھیک اے اوہو عمل وِچ آوے تے تُسی خُداوند دی سیوا وِچ بے فِکر لگے رہو۔ تے جے کوئی ایہہ سوچ کرے پئی مَیں اپنی اوس کواری دِھی دا حق مارنا آں جِہدی جوانی ڈَھلدی جاندی اے۔ تے نالے لوڑ وی معلُوم کرے۔ تے اوہنوں اختیار اے ایہدے وِچ کوئی گُناہ نئیں اوہ اوہنوں ویاہ دے۔ پر جیہڑا اپنے دِل وِچ پَکّا ہوئے۔ تے اوہنوں لوڑ وی نا ہوئے سگوں اپنے اِرادے نُوں پُوریاں کرن وِچ پَکّا ہوئے۔ تے دِل وِچ اِرادہ کر لیا ہوئے۔ پئی اوہ اپنی دِھی نُوں بے نکاحی رکھّے گا۔ اوہ چَنگا کر دا اے۔ سو جیہڑا اپنی کواری دِھی نُوں ویاہ دیندا اے اوہ چَنگا کر دا اے۔ تے جیہڑا نئیں وِیاہندا اوہ اودُوں چَنگا کر دا اے۔ جد تِیکر زنانی دا بندہ جِیوندا اے اوہ اوہدے وَس وِچ اے۔ پر جد اوہدا بندہ مر جائے تے جِہدے نال مرضی ہوئے ویاہ کر سکدی اے۔ پر نِری خُداوند وِچ۔ پر جے جِہی اے اوہو جِہی رہے۔ تے میری رائے وِچ اوہ بُہتی چنگی رہے گی۔ تے مَیں سمجھنا آں۔ پئی خُداوند دا رُوح میرے وِچ اے۔ ہُن بُتاں دی قُربانی دی بابت ایہہ گلّ اے اسی جاننے آں پئی اسی سارے عِلم رکھنے آں۔ عِلم مان پَیدا کر دا اے پر مُحبّت ترقی دا سبّب اے۔ جے کوئی خیال کرے پئی مَیں کُجھ جاننا آں تے وی جِنّاں جاننا چاہیدا اے۔ اوہو جِہیا اجے تِیکر نئیں جان دا۔ پر جیہڑا خُدا نال مُحبّت رکھدا اے خُدا اوہنوں پچھاندا اے۔ سو بُتاں دی قُربانی دا ماس کھان دی بابت اسی جاننے آں۔ پئی بُت دُنیا وِچ کوئی شے نئیں۔ تے بِناں اِک دے ہور کوئی خُدا نئیں۔ بھانویں اسمان تے زمین وِچ بتھیرے خُدا اکھواؤندے نیں۔ (جیویں بتھیرے خُدا تے بتھیرے خُداوند نیں۔) پر ساڈے بھانیں تے اِکّوئی خُدا اے۔ یعنی ربّ جِہدے ولّوں سارِیاں شیواں نیں۔ تے اسی اوہدے لئی آں۔ تے اِکّوئی خُداوند اے۔ یعنی یِسُوع مسِیح جِہدی راہِیں سارِیاں شیواں بنیاں نیں۔ تے اسی وی اوسے دی راہِیں آں۔ پر سبھناں نُوں ایہہ عِلم نئیں۔ سگوں کئیاں نُوں اجے تِیکر بُت پُوجن دی عادت اے۔ ایس لئی اوس ماس نُوں بُت دی قُربانی جان کے کھاندے نیں۔ تے اوہناں دا دِل ایس کر کے پئی کمزور اے پلِیت ہو جاندا اے۔ کھانا سانُوں خُدا نال نئیں مِلاوے گا۔ جے نا کھایئے تے ساڈا کُجھ وِگڑدا نئیں۔ تے جے کھایئے تے کُجھ نفع نئیں۔ پر خبردار رہو۔ اجیہا نا ہوئے پئی تُہاڈی ایہہ کُھل کمزوراں دی ٹھوکر دا سبّب بن جائے۔ کیوں جو جے کوئی تینُوں عِلم والے نُوں بُت خانے وِچ کھانا کھاندیاں ہویاں ویکھے تے اوہ کمزور بندہ ہوئے۔ تے اوہدا دِل بُتاں دی قُربانی کھان لئی دلیر نا ہو جائے گا؟ سو تیرے عِلم دے سببّوں اوہ کمزور بندہ یعنی اوہ بھرا جِہدی خاطر مسِیح مویا ہلاک ہو جائے گا۔ تے تُسی ایس طرح بھراواں دے گُنہگار ہو کے تے اوہناں کمزور دِلاں نُوں زخمی کر کے مسِیح دے گُنہگار ہوندے ہو۔ ایس لئی جے کھانا میرے بھرا نُوں ٹھوکر کھواوے تے مَیں کدی وی ماس نا کھاں گا۔ تاں جو اپنے بھرا دے ٹھوکر کھان دا سبّب نا ہوواں۔ کِیہ مَیں اَزاد نئیں؟ مَیں رسُول نئیں؟ مَیں یِسُوع نُوں نئیں ویکھیا۔ جیہڑا ساڈا خُداوند اے؟ تُسی خُداوند وِچ میرے لئی بنائے ہوئے نئیں؟ جے مَیں ہورناں دا رسُول نئیں۔ پر تُہاڈے لئی تے ضرُور آں۔ کیوں جو تُسی آپ ای خُداوند وِچ میرے رسُول ہون اُتّے موہر ہو۔ جیہڑے مَینُوں ازماندے نیں۔ اوہناں لئی میرا ایہو ای جواب اے۔ پئی سانُوں کھان پِین دا اختیار نئیں؟ سانُوں ایہہ اختیار نئیں پئی کِسے مسِیحی بھین نُوں ویاہ کے لئی پِھریئے جیویں ہور رسُول تے خُداوند دے بھرا تے کیفا کر دے نیں۔ یا نِرا مَینُوں تے برنباس نُوں محنت نا کرن دا اختیار نئیں؟ کیہڑا سپاہی اپنے پلّیوں کھا کے لڑائی کر دا اے۔ کون انگور دا باغ لاکے پَھل نئیں کھاندا؟ یا کون اِجّڑ چار کے اوس اِجّڑ دا دُدّھ نئیں پَیندا؟ کِیہ مَیں ایہہ گلّاں اِنسانی خیال ولّوں ای آکھنا آں؟ توریت وی ایسے طرح ای نئیں آکھدی؟ جیویں مُوسیٰ دی توریت وِچ لِکھیا ہویا اے۔ پئی گاہ وِچ وَگدے ڈھگّے دا مُنھ نا بنھنو۔ خُدا نُوں ڈھگّیاں دا فِکر اے۔ یا خاص ساڈے واسطے ایہہ آکھدا اے؟ ہاں ایہہ ساڈے واسطے لِکھیا گیا اے۔ کیوں جو چاہیدا اے۔ جون والا آس نال جوئے تے گاہن والا حِصّہ لین دی آس اُتّے گاہے۔ سو اساں تُہاڈے لئی رُوحانی شیواں بِیجیاں۔ تے ایہہ کوئی وڈّی گلّ اے۔ پئی اسی تُہاڈیاں جِسمانی شیواں دی فصل وَڈّھئے؟ جے ہورناں دا تُہاڈے اُتّے ایہہ اختیار اے تے ساڈا اوہدے نالوں وَدّھ نا ہوئے گا؟ پر اساں اختیار نال کمّ نا لیا۔ سگوں ہر شے دی برداشت کرنے آں۔ تاں جو ساڈے سبّبوں یِسُوع مسِیح دی خُوشخبری وِچ اڑِکا نا ہوئے۔ تُسی نئیں جان دے۔ پئی جیہڑے پاک شیواں دی سیوا کر دے نیں۔ اوہ ہیکل وِچوں کھاندے نیں؟ تے جیہڑے قُربان گاہ دی سیوا کر دے نیں۔ اوہ قُربان گاہ دے نال حِصّہ لَیندے نیں۔ ایسے طرح خُداوند وی حُکم دِتّا اے۔ پئی خُوشخبری سُنان والے خُوشخبری دی راہِیں گذارہ کرن۔ پر مَیں ایہناں وِچوں کِسے اُتّے عمل نئیں کِیتا۔ نا ایس مطلب نال ایہہ لِکھیا۔ پئی میرے لئی اجیہا ہوئے۔ کیوں جو میرا مر جانا ای اوہدے نالوں چَنگا اے۔ پئی کوئی میرا فخر گواوے۔ جے خُوشخبری سُناواں تے میرا کوئی فخر نئیں کیوں جو ایہہ تے میرے لئی ضرُوری گلّ اے۔ سگوں میرے اُتّے افسوس اے جے خُوشخبری نا سُناواں۔ کیوں جو جے اپنی مرضی نال ایہہ کرنا آں۔ تے میرے لئی بدلہ اے تے جے اپنی مرضی نال نئیں کر دا۔ تے مُختیاری میرے سپُرد ہوئی اے۔ سو مَینُوں کِیہ بدلہ مِلدا اے؟ ایہہ پئی جدوں خُوشخبری دی منادی کراں تے خُوشخبری نُوں مُفت کر دیاں۔ تاں جو جیہڑا اختیار مَینُوں خُوشخبری دے لئی مِلیا ہویا اے۔ اوہدے سببّوں پُورا عمل نا کراں۔ بھانویں مَیں ساریاں لوکاں توں اَزاد آں تَد وی مَیں اپنے آپ نُوں سبھناں دا غلام بنا دِتّا اے۔ تاں جو ہور وی وَدّھ لوکاں نُوں کھِچّ لیاواں۔ مَیں یہُودِیاں لئی یہُودی بنیا تاں جو یہُودِیاں نُوں کھِچّ لیاواں۔ جیہڑے لوک شریعت دے وَس وِچ نیں اوہناں لئی مَیں شریعت دے ہیٹھ ہویا۔ تاں جو اوہناں نُوں جیہڑے شریعت دے وَس وِچ نیں کھِچّ لیاواں۔ بھانویں آپ شریعت دے وَس وِچ نئیں۔ بے شریعت لوکاں لئی مَیں بے شریعت بنیا۔ تاں جو بے شریعت لوکاں نُوں کھِچّ لیاواں (بھانویں خُدا دے اگّے بے شریعت نئیں) سگوں مسِیح دی شریعت دے تابع۔ کمزوراں لئی مَیں کمزور بنیا۔ تاں جو کمزوراں نُوں کھِچّ لیاواں۔ مَیں ساریاں بندیاں لئی سبھ کُجھ بنیا ہویا آں۔ تاں جو کِسے طرح نال بعضیاں نُوں بچاواں۔ تے مَیں سبھ کُجھ اِنجِیل دی خاطر کرنا آں۔ تاں جو ہورناں نال اوہدے وِچ شریک ہوواں۔ تُسی نئیں جان دے پئی میدان دے دَوڑن والے دَوڑ دے تے سارے ای نیں۔ پر اِنعام اِکّوئی لے جاندا اے۔ تُسی وی اجیہے دَوڑو پئی جِت لوؤ۔ تے ہر اِک پہلوان سبھ طرح دا پرہیز کر دا اے۔ اوہ لوک تے کُملان والا سِہرا لین لئی ایہہ کر دے نیں۔ پر اسی اوس سِہرے لئی کرنے آں۔ جیہڑا کُملاؤندا نئیں۔ سو مَیں وی ایسے طرح دَوڑناں آں۔ پئی بے ٹِکانے نئیں۔ مَیں ایس طرح ہُوریاں نال لڑنا آں۔ پئی اوہدے وانگر نئیں جیہڑا وَا نُوں مار دا اے۔ سگوں مَیں اپنے جِسم نُوں مار دا کُٹدا تے اوہنوں قابُو وِچ رکھنا آں تاں جو اجیہا نا ہوئے پئی ہورناں وِچ منادی کر دا کر دا آپی قبول نا ہوواں۔ بھراؤ! مَیں نئیں چاہندا۔ پئی تُسی ایس گلّ نُوں نا جانو۔ پئی ساڈے سارے پئیو دا دے بدّل دے ہیٹھ سن۔ تے سارے سمُندر وِچوں لنگھ گئے۔ تے سبھناں ای اوس بدّل تے سمُندر وِچ مُوسیٰ دا بپتِسمہ لیا۔ تے سبھناں اِکّوئی رُوحانی خُوراک کھادِی۔ تے سبھناں اِکّوئی رُوحانی پانی پِیتا۔ کیوں جو اوہ اوس رُوحانی چٹان وِچوں پانی پِیندے سن۔ جیہڑی اوہناں دے نال نال ٹُردی سی۔ تے اوہ چٹان مسِیح سی۔ پر اوہناں وِچوں بتھیریاں نال خُدا خُوش نا ہویا۔ سو اوہ بیابان وِچ ڈھیر ہوگئے۔ ہُن ایہہ گلّاں ساڈے واسطے نصِیحت ہویاں۔ تاں جو اسی بُریاں شیواں دی چاہ نا کریئے۔ جیویں اوہناں کِیتی۔ تے تُسی بُتاں دے پُوجن والے نا بنو۔ جیویں اوہناں وِچوں بعضے بن گئے سن۔ جیویں لِکھیا اے پئی لوک کھان پِین بَیٹھے۔ فیر اُٹھ کے نچّن کُدّن لگّے۔ تے اسی حرامکاری نا کریئے۔ جیویں اوہناں وِچوں بعضیاں کِیتی۔ تے اِکّوئی دِن وِچ تریئی ہزار مارے گئے۔ تے اسی خُداوند نُوں نا ازمایئے۔ جیویں اوہناں وِچوں بعضیاں ازمایا۔ تے سپّاں اوہناں نُوں ہلاک کِیتا۔ تُسی نا کُڑ کُڑاؤ جیویں اوہناں وِچوں کئی کُڑ کُڑائے۔ تے ہلاک کرن والے توں ہلاک ہوئے۔ ایہہ گلّاں اوہناں دی نصِیحت لئی ہویاں۔ تے ساڈے اخِیری زمانے والیاں دے سمجھان واسطے لِکھیاں گِئیاں۔ سو جیہڑا اپنے آپ نُوں پَکیّاں سمجھدا اے سو خبردار رہے پئی ڈِگّ نا پَوے۔ تُسی کِسے اجیہی ازمایش وِچ نئیں پئے۔ جیہڑی بندے دی برداشت توں باہر ہوئے۔ تے خُدا سَچّا اے۔ اوہ تُہانوں تُہاڈی طاقت توں وَدّھ ازمایش وِچ نئیں پَین دے گا۔ سگوں ازمایش وِچوں نِکل جان دا راہ وی بناوے گا۔ تاں جو تُسی برداشت کر سکو۔ ایس لئی میرے بھراؤ۔ بُتاں دی پُوجا توں بچو۔ مَیں تُہانوں سیانیاں سمجھ کے تُہاڈے نال گلّ کرنا آں۔ جو کُجھ مَیں آکھنا آں۔ تُسی آپ اوہنوں ازماؤ۔ اوہ برکت دا پیالہ جِہدے اُتّے اسی برکت منگنے آں۔ مسِیح دے خُون دی شراکت نئیں؟ اوہ روٹی جیہڑی اسی توڑنے آں۔ مسِیح دے بدن دی شراکت نئیں؟ ایس کر کے پئی روٹی اِکّوئی اے۔ ایس لئی اسی جو بتھیرے آں اِکّوئی جِسم آں۔ کیوں جو اسی سارے اوسے اِکّوئی روٹی وِچ سِیری ہُنے آں۔ جیہڑے جِسم ولّوں اِسرائیلی نئیں اوہناں ولّوں ویکھو۔ قُربانی دا گوشت کھان والے قُربان گاہ دے شریک نئیں؟ سو مَیں کِیہ آکھنا آں؟ پئی بُتاں دی قُربانی کوئی شے اے؟ یا بُت کُجھ شے اے؟ نئیں مَیں سگوں ایہہ آکھنا آں پئی جیہڑی قُربانی غیر قوماں کر دیاں نیں۔ شیطاناں اگّے قُربانی کر دیاں نیں نا خُدا اگّے۔ تے مَیں نئیں چاہندا پئی تُسی شیطاناں دے شریک ہوؤو۔ تُسی خُداوند دے پیالے تے شیطاناں دے پیالے دوہاں وِچوں نئیں پی سکدے۔ خُداوند دے دسترخوان تے شیطان دے دسترخوان دوہاں وِچ شریک نئیں ہوسکدے۔ کِیہ اسی خُداوند نُوں غیرت دوانے آں؟ کِیہ اسی اوہدے نالوں زوراور آں؟ سارِیاں شیواں روا تے ہَین۔ پر سارِیاں شیواں فائدے والیاں نئیں۔ سارِیاں شیواں روا تے ہَین۔ پر سارِیاں ترقی دا سبّب نئیں۔ کوئی اپنا فائدہ نا لَبھّے سگوں دُوجے دا۔ جو کُجھ قصائِیاں دی دُکاناں اُتّے وِکدا اے۔ سو کھاؤ۔ تے دِین دا خیال کر کے کُجھ نا پُچھو۔ کیوں جو زمین تے اوہدی بھرپُوری خُداوند دی اے۔ جے بے اِیماناں وِچوں کوئی تُہاڈی روٹی ٹھاکے تے تُہاڈی مرضی ہوئے تاں جو کُجھ تُہاڈے اگّے رکھیا جائے کھالَو۔ تے دین دا خیال کر کے کُجھ نا پُچھو۔ پر جے کوئی تُہانوں آکھے۔ پئی ایہہ قُربانی دا گوشت اے۔ تے اوہدے سببّوں جِس تُہانوں دسیا تے دِین دے خیال دے سبّب نا کھاؤ۔ دِینی خیال توں میرا مطلب تیرا خیال نئیں۔ سگوں اوس دُوجے دا اے۔ میری اَزادی دُوجے بندے دے خیال نال کیوں ویکھی جائے۔ جے مَیں شُکر کر کے کھاناں آں۔ تے جیہڑی شے اُتّے شُکر کرنا آں۔ اوہدے سببّوں کاہدے لئی بدنام کِیتا جاناں آں۔ سو تُسی کھاؤ یا پِیو جو کُجھ کرو سبھ کُجھ خُدا دے جلال لئی کرو۔ تُسی نا یہُودِیاں دی ٹھوکر دا سبّب بنو۔ نا یُونانِیاں تے نا خُدا دی کلِیسیا دے۔ سو مَیں وی سبھناں گلّاں وِچ سبھناں نُوں خُوش کرنا آں۔ تے اپنا نئیں پر بتھیریاں دا فائدہ لبّھنا آں۔ پئی بچ جان۔ تُسی میرے وانگر بنو جیویں مَیں مسِیح وانگر بنیا آں۔ مَیں تُہاڈی وڈیائی کرنا آں۔ پئی تُسی سبھناں گلّاں وِچ مَینُوں یاد رکھدے ہو۔ تے جیویں مَیں تُہانوں روائِتاں اپڑائیاں۔ تُسی اوسے طرح اوہناں نُوں برقرار رکھدے اوہ۔ سو مَیں تُہانوں دسنا چاہناں آں۔ پئی ہر بندے دا سِر مسِیح تے زنانی دا سِر بندہ تے مسِیح دا سِر خُدا اے۔ جیہڑا مرد سِر کجّ کے دُعا یا نبُوّت کر دا اے اوہ اپنے سِر نُوں بے عِزّت کر دا اے۔ تے جیہڑی زنانی سِر نا کجّ کے دُعا یا نبُوّت کر دی اے۔ اوہ اپنے سِر نُوں بے عِزّت کر دی اے۔ کیوں جو اوہ سِر مُنّی ہوئی وانگر اے۔ تے جے عورت چادر اُتّے نا لَئے تے وال وی کٹا چھڈے۔ جے عورت دا وال کٹانا یا سِر مُنانا شرم دی گلّ اے تے چادر اُتّے لَئے۔ بے شک مرد نُوں اپنا سِر ڈھکنا نئیں چاہیدا کیوں جو اوہ خُدا دی صُورت تے اوہدا جلال اے۔ پر عورت مرد دا جلال اے۔ ایس لئی پئی مرد عورت توں نئیں سگوں عورت مرد توں اے۔ تے مرد عورت لئی نئیں۔ سگوں عورت مرد لئی پَیدا ہوئی اے۔ سو فرِشتیاں دے سبّب عورت نُوں چاہیدا اے۔ پئی اپنے سِر اُتّے حُکم دے ہیٹھ ہون دا نِشان رکھّے۔ تَد وی خُداوند وِچ نا عورت مرد دے بِناں اے نا مرد عورت بِناں۔ کیوں جو جیویں زنانی مرد توں اے۔ اوسے طرح مرد وی عورت دی راہِیں اے۔ پر سارِیاں شیواں خُداوند ولّوں نیں۔ تُسی آپی نیاں کرو۔ پئی عورت دا سِر کجّے بِناں دُعا منگنا ٹھیک اے؟ تُہانوں اپنی طبیعت وِچ وی پَتا نئیں لگدا پئی جے مرد لمّے وال رکھّے۔ تے اوہدی بے عِزّتی اے۔ تے جے عورت دے لمّے وال ہون تے اوہدی شان اے۔ کیوں جو وال اوہنوں پردے لئی دِتّے گئے نیں۔ پر جے کوئی حُجتّاں کرن والا ہوئے تے ایہہ جان چھڈو۔ پئی نا ساڈا اجیہا کوئی دستُور اے نا خُداوند دِیاں کلِیسیاواں دا۔ پر ایہہ حُکم جو دینا آں ایہدے وِچ تُہاڈی وڈیائی نئیں کر دا۔ ایس لئی پئی تُہاڈے اکٹّھیاں ہون توں فائدہ نئیں۔ سگوں نُقصان ہوندا اے۔ کیوں جو پہلاں تے مَیں ایہہ سُننا آں پئی جِس ویلے تُہاڈی کلِیسیا اکٹّھی ہوندی اے تے تُہاڈے وِچ ونڈاں ہوندیاں نیں۔ تے مَیں ایہنوں کُجھ کُجھ مَن وی لینا آں۔ کیوں جو تُہاڈے وِچ بِدعتاں دا ہونا ضرُوری اے۔ تاں جو پَتا لگ جائے پئی تُہاڈے وِچ قبول کِیتے ہوئے کیہڑے کیہڑے نیں۔ سو جدوں تُسی آپو وِچ اکٹّھے ہوندے اوہ۔ تے تُہاڈا اوہ کھانا عشائے ربّانی نئیں ہوسکدا۔ کیوں جو کھان دے ویلے ہر کوئی دُوجے نالوں پہلے اپنا عِشاء کھالَیندا اے۔ تے کوئی بُھکھا رہ جاندا اے تے کِسے نُوں نشہ ہو جاندا اے۔ کیوں؟ کھان پِین لئی تُہاڈے گھر نئیں؟ یا خُدا دی کلِیسیا نُوں حِقیر جان دے تے جِنہاں کول نئیں اوہناں نُوں شرمندیاں کر دے ہو۔ ایس گلّ وِچ تُہاڈی وڈیائی کراں؟ مَیں وڈیائی نئیں کر دا۔ کیوں جو ایہہ گلّ مَینُوں خُداوند ولّوں اَپڑی تے مَیں تُہانوں وی اپڑا دِتّی۔ پئی خُداوند یِسُوع مسِیح جیہڑی رات اوہ پھڑوایا گیا روٹی لئی۔ تے شُکر کر کے توڑی تے آکھیا۔ پئی ایہہ میرا بدن اے۔ جیہڑا تُہاڈے لئی اے میری یادگیری لئی ایسے طرح کریا کرو۔ ایسے طرح اوس کھانیوں پِچّھوں پیالہ وی لیا۔ تے آکھیا پئی ایہہ پیالہ میرے لہو وِچ نواں عہد اے۔ جدوں کدی پِیو میری یادگیری لئی ایہو کریا کرو۔ کیوں جو جدوں کَدے تُسی ایہہ روٹی کھاندے تے ایس پیالے وِچوں پِیندے اوہ۔ تے خُداوند دی مَوت دا ہوکا دیندے اوہ۔ جد تِیکر نا آوے۔ ایس واسطے جیہڑا نامناسب طَور نال خُداوند دی روٹی کھاوے یا اوہدے پیالے وِچوں پِیوے اوہ خُداوند دے بدن تے لہو دا قصوروار ہوئے گا۔ سو بندہ اپنے آپ نُوں ازمائے تے ایسے طرح اوس روٹی وِچوں کھائے۔ تے اوس پیالے وِچوں پِیوے۔ کیوں جو جیہڑا کھان پِین دے ویلے خُداوند دے بدن نُوں نا پچھانے۔ اوہنوں ایس کھان پِین دے سببّوں سزا ہوئے گی۔ ایسے سبّب تُہاڈے وِچوں بتھیرے ماڑے تے بیمار نیں تے بتھیرے سَوں وی گئے نیں۔ پر جے اسی اپنے آپ نُوں ازماؤندے تے سانُوں سزا نا مِلدی۔ پر خُداوند سانُوں سزا دے کے سِکھاؤندا اے تاں جو دُنیا دے نال قصوروار نا ٹھیریئے۔ بھراؤ! جد تُسی کھان دے لئی اکٹّھے ہوؤو تے اِک دُوجے نُوں اُڈِیکو۔ جے کوئی بُھکھا ہوئے تے اپنے گھر وِچ کھائے۔ تاں جو تُہاڈا اکٹّھا ہونا سزا دا سبّب نا ہوئے۔ تے باقی گلّاں مَیں آ کے ٹھیک کراں گا۔ ہُن بھراؤ! مَیں نئیں چاہندا پئی تُسی رُوحانی نِعمتاں ولّوں بے خبر رہو۔ تُسی جان دے ہو پئی جد تُسی غیر قوم سو۔ تے گُونگے بُتاں دے پِچّھے جیویں کوئی لے جاندا سی اوسے طرح جاندے سو۔ سو مَیں تُہانوں دسنا آں پئی جیہڑا خُدا دے رُوح دی ہدایت نال بولدا اے اوہ نئیں آکھدا پئی یِسُوع لعنتی اے۔ تے نا کوئی پاک رُوح بِناں آکھ سکدا ایہہ۔ پئی یِسُوع خُداوند اے۔ نِعمتاں تے طرح طرح دِیاں نیں پر رُوح اِکّوئی اے۔ تے خِدمتاں وی طرح طرح دِیاں نیں پر خُداوند اِکّوئی اے۔ تے تاثِیراں وی طرح طرح دِیاں نیں پر خُداوند اِکّوئی اے۔ جیہڑا ساریاں وِچ ہر طرح دا اثر پَیدا کر دا اے۔ پر ہر کِسے وِچ رُوح دا ظاہر ہونا فائدہ پُچان لئی ہوندا اے۔ کیوں جو اِک نُوں رُوح دی راہِیں حِکمت دا کلام مِلدا اے تے دُوجے نُوں اوسے رُوح دی مرضی نال عِلم دا کلام۔ کِسے نُوں اوسے رُوح نال اِیمان تے کِسے نُوں اوسے اِک رُوح نال شفا دین دی نِعمت۔ تے کِسے نُوں کراماتاں کرن دِیاں قُدرتاں۔ کِسے نُوں نبُوّت کِسے نُوں رُوحاں دی پہچان۔ کِسے نُوں طرح طرح دِیاں زباناں۔ کِسے نُوں زباناں دا ترجمہ کرنا۔ پر ایہہ سارِیاں اوہو اِکّو رُوح کر دا اے تے جِہنُوں چاہندا اے۔ ونڈ دا اے۔ کیوں جو جیویں جِسم اِک اے تے اوہدے انگ بتھیرے نیں۔ تے جِسم دے سارے انگ بھانویں بتھیرے نیں پر آپو وِچ رَل کے اِکّوئی جِسم نے۔ ایسے طرح مسِیح وی اے۔ کیوں جو اساں ساریاں بھانویں یہُودی ہوئے بھانویں یُونانی بھانویں غلام بھانویں اَزاد اِکّو رُوح دی راہِیں اِک جِسم ہون لئی بپتِسمہ لیا تے سبھناں نُوں اِکّو رُوح پیا یا گیا۔ کیوں جو جِسم وِچ اِکّو انگ نئیں سگوں بتھیرے نیں۔ جے پَیر آکھے پئی ایس کر کے پئی مَیں ہتّھ نئیں ایس لئی بدن دا نئیں تے اوہ ایس سببّوں جِسم وِچوں خارج تے نئیں ہو جاندا۔ تے جے کنّ آکھے پئی ایس کر کے پئی مَیں اَکھ نئیں ایس لئی جِسم دا نئیں تے اوہ ایس سببّوں جِسم وِچوں خارج تے نئیں۔ جے سارا جِسم اَکھ ای ہوندا تے سُننا کِتّھوں ہوندا جے سُننا ای سُننا ہوندا تے سُنگھنا کِتّھوں ہوندا۔ پر اصل وِچ خُدا ہر اِک انگ نُوں جِسم وِچ اپنی مرضی دے سببّوں رکھیا اے۔ جے اوہ سارے اِکّو انگ ہوندے۔ تے بدن کِتّھے ہوندا۔ پر ہُن انگ تے بتھیرے نیں پر جِسم اِکّوئی اے۔ سو اَکھ ہتّھ نُوں نئیں آکھ سکدی پئی مَینُوں تیری کوئی لوڑ نئیں۔ تے نا سِر پَیر نُوں آکھ سکدا اے۔ پئی مَینُوں تیری لوڑ نئیں۔ سگوں جِسم دے اوہ انگ جیہڑے ساریاں نالوں ماڑے معلُوم ہوندے نیں بُہت ای ضرُوری نیں۔ تے جِسم دے اوہ انگ جِنہاں نُوں ہورناں نالوں اسی حِقیر جاننے آں اوہناں نُوں ای وَدّھ عِزّت دینے آں۔ تے ساڈے کوجھے انگ بُہت سوچَجّے ہو جاندے نیں۔ پر ساڈے سوچَجّے انگاں نُوں لوڑ نئیں۔ پر خُدا نے جِسم نُوں ایس طرح بنایا اے۔ پئی جیہڑے انگ لوڑ والے اوسے نُوں وَدّھ عِزّت دِتّی جاوے۔ تاں جو جِسم وِچ ونڈ نا پَے جاوے۔ سگوں سارے انگ اِک دُوجے دا اِکّو جیہا فِکر کرن۔ سو جے اِک انگ نُوں دُکھ ہوندا اے۔ تے ساریاں انگاں نُوں اوہدے نال دُکھ ہوندا اے۔ تے جے اِک انگ نُوں عِزّت مِلدی اے تے سارے انگ اوہدے نال خُوش ہوندے نیں۔ ایویں تُسی مِل کے مسِیح دا بدن ہو تے وکھرے وکھرے انگ ہو۔ تے خُدا نے کلِیسیا وِچ وَکھو وَکھ بندے مُقرّر کِیتے۔ پہلے رسُول دُوجے نبی ترِیجے اُستاد فیر کراماتاں وکھان والے۔ فیر بیماریاں ولّ کرن والے۔ مدد کرن والے۔ انتظام کرن والے۔ وَن سَووَنِیاں زباناں بولن والے۔ کِیہ سارے رسُول نیں؟ کِیہ سارے نبی نیں؟ کِیہ سارے اُستاد نیں؟ کِیہ سارے کراماتاں وکھان والے نیں؟ کِیہ ساریاں نُوں چَنگیاں کرن دی قُوّت مِلی ہوئی اے؟ کِیہ سارے وَن سَووَنِیاں بولیاں بولدے نیں؟ کِیہ سارے ترجمہ کر دے نیں؟ تُسی وی وڈّی توں وڈّی نِعمتاں دی چاہ رکھو۔ پر ساریاں نالوں ہور وی چَنگا طریقہ مَیں تُہانوں دسنا آں۔ جے مَیں بندیاں تے فرِشتیاں دِیاں زباناں بولاں تے مُحبّت نا رکھاں تے کھڑکھڑ کرن والا پِتّل تے چَھن کن والی کھڑتال آں۔ تے جے مَینُوں نبُوّت مِلے تے ساریاں بھیتاں تے سارے عِلم دی واقفی ہوئے تے میرا اِیمان ایتھوں تِیکر پَکّا ہوئے۔ پئی پہاڑاں نُوں ہٹا دیاں۔ تے مَیں مُحبّت نا رکھاں تے مَیں کُجھ وی نئیں۔ تے جے اپنا سارا مال غرِیباں نُوں کھوا دیاں۔ یا اپنا جِسم ساڑن لئی دے دیاں۔ پر مُحبّت نا رکھاں۔ تے مَینُوں کُجھ وی فائدہ نئیں۔ مُحبّت صبر کرن والی اے۔ تے مہربان اے۔ مُحبّت وِچ ساڑا نئیں۔ مُحبّت شیخی نئیں مار دی تے پُھلدی نئیں۔ کوچَجّے کمّ نئیں کر دی۔ اپنی بھلیائی نئیں چاہندی غُصّے نئیں ہوندی بدگمانی نئیں کر دی۔ بدکاری توں خُوش نئیں ہوندی۔ سگوں سچیائی توں خُوش ہوندی اے۔ سبھ کُجھ سہہ لَیندی اے۔ سارِیاں گلّاں دا یقِین کر دی اے۔ سارِیاں گلّاں دی آس رکھدی اے۔ سارِیاں گلّاں نُوں جَر لَیندی اے۔ مُحبّت نُوں زوال نئیں۔ نبُوّتاں ہون تے مَوقُوف ہو جان گِیاں تے زباناں ہون تے جاندِیاں رہن گِیاں۔ عِلم ہوئے تے مِٹ جائے گا۔ کیوں جو ساڈا عِلم اُدھورا اے۔ تے ساڈی نبُوّت پُوری نئیں۔ پر جد کامِل آوے گا۔ تے اُدھورا جاندا رہے گا۔ جد مَیں بچّہ ساں تَد بچّیاں وانگُوں بولدا ساں۔ بچّیاں جیہی طبیعت سی۔ بچّیاں جیہی سمجھ سی۔ پر جد جوان ہویا تَد بچّے پُنے دِیاں گلّاں چھڈ دِتّیاں۔ ہُن سانُوں شیشے وِچوں دُھندلا جیہا وکھائی دیندا اے پر اوس ویلے آہمنوں سامھنے ویکھاں گے۔ ایس ویلے میرا عِلم اُدھورا اے پر اوس ویلے اجیہا پُوری طرح نال پچھاناں گا۔ جیویں مَیں پچھانیاں گیا۔ سو اِیمان اُمّید مُحبّت تِنّے سدا رہن والِیاں نیں پر اوہناں وِچوں وَدّھیا مُحبّت اے۔ مُحبّت دے طالب رہو۔ تے رُوحانی نِعمتاں دی چاہ رکھو۔ خاص کر ایس گلّ دی پئی نبُوّت کرو۔ کیوں جو جیہڑا اوپری زبان وِچ گلّ کر دا اے۔ اوہ بندیاں نال گلّاں نئیں کر دا سگوں خُدا نال۔ ایس لئی پئی اوہدی کوئی نئیں سمجھدا بھانویں اوہ اپنی رُوح دی راہِیں بھیت دِیاں گلّاں آکھدا اے۔ پر جیہڑا نبُوّت کر دا اے۔ اوہ بندیاں دی ترقی تے نصِیحت تے تسلّی دِیاں گلّاں آکھدا اے۔ جیہڑا اوپری زبان وِچ گلّاں کر دا اے۔ اوہ اپنی ترقی کر دا اے۔ تے جیہڑا نبُوّت کر دا اے۔ اوہ کلِیسیا دی ترقی کر دا اے۔ بھانویں مَیں ایہہ چاہناں آں پئی تُسی سارے اوپری زبان وِچ گلّاں کرو۔ پر بُہتا ایہو ای چاہناں آں پئی نبُوّت کرو۔ تے جے اوپری زبان بولن والا کلِیسیا دی ترقی دے لئی ترجمہ نا کرے تے نبُوّت کرن والا اوہدے نالوں وَڈا اے۔ سو بھراؤ جے مَیں تُہاڈے کول آ کے اوپری زبان وِچ گلّاں کراں تے اِلہام یا عِلم یا نبُوّت یا تعلِیم دِیاں گلّاں نا کراں تے تُہانوں مَیتھوں کِیہ فائدہ ہوئے گا؟ ایسے طرح بے جان شیواں وی جِنہاں وِچوں اواز نِکلدی اے۔ بھانویں بانسری بھانویں بربط جے ایہناں دِیاں اَوازاں وِچ فرق نا ہوئے تاں جو کُجھ پُھوک ماریا یا وجایا جاندا اے۔ اوہ کِیویں پچھانیاں جاوے؟ تے جے تُرہی دی اواز صاف نا ہوئے۔ تے کون لڑائی دے لئی تیاری کرے گا؟ ایسے طرح جے تُسی وی زبان توں صاف گلّ نا آکھو تاں جو کُجھ آکھیا جاندا اے کِیویں سمجھیا جائے گا؟ تُسی وَا نال گلّاں کرن والے ٹھیرو گے۔ دُنیا وِچ کِنیاں ای وَن سَووَنِیاں بولیاں بھانویں ہون۔ پر اوہناں وِچوں کوئی وی بے معنے نا ہوئے گی۔ سو جے مَیں کِسے بولی دے معنے نا سمجھاں تے بولن والے دے بھانے مَیں اوپرا ٹھہراں گا۔ تے بولن والا میرے بھانے اوپرا ہوئے گا۔ سو جد رُوحانی نِعمتاں دی چاہ رکھدے ہو تاں ایہہ کوشش کرو پئی تُہاڈیاں نِعمتاں دے وَدھن نال کلِیسیا دی ترقی ہوئے۔ ایس لئی جیہڑا اوپری بولی وِچ گلّاں کر دا اے۔ اوہ دُعا منگے پئی ترجمہ وی کر سکے۔ سو جے مَیں کِسے اوپری بولی وِچ دُعا منگاں تے میری رُوح تے منگدی اے۔ پر میری عقل نکمّی اے۔ سو کِیہ کرناں چاہیدا اے؟ مَیں رُوح نال وی دُعا منگاں گا تے عقل نال وی دُعا منگاں گا۔ رُوح نال وی گاواں گا تے عقل نال وی گاواں گا۔ نئیں تے جے تُوں رُوح نال ای حمد کریں گا تے ناواقِف بندہ تیری شُکر گُزاری اُتّے آمِین کِس طرح آکھے گا؟ ایس لئی پئی اوہ نئیں جان دا پئی توں کِیہ آکھنا ایں۔ تُوں تے بے شک چنگی طرح نال شُکر گُزاری کرنا ایں پر دُوجے دی ترقی نئیں ہوندی۔ مَیں خُدا دا شُکر کرنا آں پئی مَیں تُہاڈے سبھناں نالوں وَدّھ بولیاں بولنا آں۔ پر کلِیسیا وِچ اوپری بولی وِچ دَس ہزار گلّاں آکھن نالوں مَینُوں ایہہ بُہتا چَنگا لگدا اے پئی ہورناں نُوں سکھان دے لئی پنج ای گلّاں آکھاں۔ بھراؤ! تُسی سمجھ وِچ بچّے نا بنو۔ بُریائی وِچ تے بچّے رہو پر سمجھ وِچ جوان بنو۔ توریت وِچ لِکھیا اے۔ پئی خُداوند آکھدا اے مَیں اوپریاں زباناں تے اوپریاں ہونٹھاں نال ایس اُمّت نال گلّاں کراں گا۔ تَد وی ایہہ میری نا سُنن گے۔ سو اوپریاں زباناں اِیمانداراں لئی نئیں سگوں بے اِیماناں لئی نِشان نیں۔ تے نبُوّت بے اِیماناں لئی نئیں سگوں اِیمانداراں لئی نِشان اے۔ سو جے ساری کلِیسیا اِک تھاں وِچ اکٹّھی ہوئے۔ تے ساریاں دے سارے اوپریاں زباناں بولن تے ناواقِف بے اِیمان لوک اندر آ جان۔ تے اوہ تُہانوں پاگل نا آکھن گے؟ پر جے سارے نبُوّت کرن تے کوئی بے اِیمان یا ناواقِف اندر آ جائے۔ تے سارے اوہنوں قائل کر دین گے۔ تے سارے اوہنوں ازما لین گے۔ تے اوہدے دِل دے بھیت ظاہر ہو جان گے تے اوہ مُنھ پرنیں ڈِگّ کے خُدا نُوں سجدہ کرے گا۔ تے اوہ اِقرار کرے گا۔ پئی بے شک خُدا تُہاڈے وِچ اے۔ سو بھراؤ! کِیہ کرنا چاہیدا اے؟ جد تُسی اکٹّھے ہوندے ہو تے ہر اِک دے دِل وِچ زبُور یا تعلِیم یا مُکاشفہ یا اوپری زبان یا ترجمہ ہوندا اے۔ سبھ کُجھ رُوحانی ترقی دے لئی ہونا چاہیدا اے۔ جے اوپری بولی وِچ گلّاں کرنِیاں ہون تے دو دو یا وَدّھ توں وَدّھ تِنّ تِنّ بندے واری واری نال بولن۔ تے اِک بندہ ترجمہ کرے۔ تے جے کوئی ترجمہ کرن والا نا ہوئے تے کلِیسیا وِچ چُپ کِیتی رکھّے تے اپنے دِل نال تے خُدا نال گلّاں کرے۔ نبیاں وِچوں دو یا تِنّ بولن تے باقی اوہناں دے کلام نُوں ازمان۔ پر جے دُوجے کولدے بَیٹھے ہوئے اُتّے وحی اُترے تے پہلا چُپ کر جائے۔ کیوں جو تُسی ساریاں دے سارے اِک اِک کر کے نبُوّت کر سکدے ہو تاں جو سارے سِکھّن تے سبھناں نُوں نصِیحت ہوئے۔ تے نبیاں دِیاں رُوحاں نبیاں دے تابعیاں نیں۔ کیوں جو خُدا گڑبڑی دا نئیں سگوں امن دا بانی اے۔ جیویں پاک لوکاں دِیاں سارِیاں کلِیسیاواں وِچ اے۔ زنانِیاں کلِیسیا دی مجلس وِچ چُپ کِیتیاں رہن کیوں جو اوہناں نُوں بولن دا حُکم نئیں سگوں تابعیاں رہن جیویں توریت وِچ وی لِکھیا اے۔ تے جے کُجھ سِکھنا چاہن تے اپنے گھر وِچ اپنے اپنے خصماں نُوں پچُھّن۔ کیوں جو زنانی دا کلِیسیا دی مجلس وِچ بولنا شرم دی گلّ اے۔ خُدا دا کلام تُہاڈے وِچوں نِکلیا اے؟ یا نِرا تُہاڈے کول ای اَپڑیا اے؟ جے کوئی اپنے آپ نُوں نبی یا رُوحانی سمجھے تے ایہہ جان لَئے پئی جیہڑیاں گلّاں مَیں تُہانوں لِکھنا آں اوہ خُداوند دے حُکم نے۔ پر جے کوئی نا جانے تے نا جانے۔ سو بھراؤ! نبُوّت کرن دی چاہ رکھو۔ تے بولیاں بولن توں منع نا کرو۔ پر سارِیاں گلّاں دُرستی تے ٹھیک طریقے نال ہون۔ ہُن بھراؤ! مَیں تُہانوں اوہی خُوشخبری دس چھڈناں آں جیہڑی پہلاں دسی سی۔ جِہنُوں تُساں مَن وی لیا سی تے جِہدے اُتّے پکّے وی ہو۔ اوسے دی راہِیں تُہانوں نجات وی مِلدی اے۔ جیویں اوہ خُوشخبری جیہڑی مَیں تُہانوں دِتّی سی یاد رکھدے ہو۔ نئیں تے تُہاڈا اِیمان لیاؤنا بے فائدہ ہویا۔ سو مَیں سبھناں توں پہلاں تُہانوں اوہو گلّ اپڑا دِتّی جیہڑی مَینُوں اَپڑی۔ پئی مسِیح پاک کتاب دے سببّوں ساڈیاں گُناہاں دے لئی مویا۔ تے دفن ہویا تے ترِیجے دِن پاک کتاب دے سببّوں جی اُٹھیا۔ تے کیفا نُوں تے اوہدے مگروں اوہناں باراں نُوں وکھالی دِتّا۔ فیر پنج سَو نالوں وَدّھ بھراواں نُوں اِکّو واری وکھالی دِتّا۔ جِنہاں وِچوں ادّھیوں وَدّھ اجے تِیکر جِیوندے نیں۔ تے بعضے سَوں گئے نیں۔ فیر یعقُوب نُوں وکھالی دِتّا۔ فیر ساریاں رسُولاں نُوں۔ تے سبھناں توں پِچّھوں مَینُوں وی جیہڑا ادھماہنُو جِہیا آں وکھائی دِتّا۔ کیوں جو مَیں رسُولاں وِچوں ساریاں نالوں نِکّا آں سگوں رسُول اکھوان دے لائق نئیں ایس لئی پئی مَیں خُدا دی کلِیسیا نُوں ستایا سی۔ پر جو کُجھ آں خُدا دے فضل توں آں۔ تے اوہدا فضل جیہڑا میرے اُتّے ہویا بے فائدہ نا ہویا۔ سگوں مَیں اوہناں ساریاں نالوں وَدّھ محنت کِیتی۔ تے ایہہ میرے ولّوں نئیں ہوئی سگوں خُدا دے فضل توں جیہڑا میرے اُتّے سی۔ سو بھانویں مَیں بھانویں اوہ ہون اسی ایہو منادی کرنے آں تے ایسے اُتّے تُساں اِیمان وی لیاندا اے۔ سو جد مسِیح دی ایہہ منادی کِیتی جاندی اے۔ پئی اوہ مُردیاں وِچوں جی اُٹھیا۔ تے تُہاڈے وِچوں بعضے کِیویں آکھدے نیں پئی مُردیاں دی قیامت ہے ای نئیں؟ جے مُردیاں دی قیامت نئیں تے مسِیح وی نئیں جی اُٹھیا۔ تے جے مسِیح نئیں جی اُٹھیا۔ تے ساڈی منادی وی بے فائدہ اے۔ تے تُہاڈا اِیمان وی بے فائدہ۔ سگوں اسی خُدا دے جُھوٹھے گواہ بنے۔ کیوں جو اساں خُدا دی بابت ایہو گواہی دِتّی پئی اوس مسِیح نُوں جوالیا کیوں جے اوس نئیں مُردے نئیں جی اُٹھدے۔ تے جے مُردے نئیں جی اُٹھدے۔ تے مسِیح وی نئیں جی اُٹھیا۔ تے جے مسِیح نئیں جی اُٹھیا تے تُہاڈا اِیمان بے فائدہ اے۔ تُسی اجے تِیکر اپنیاں گُناہاں وِچ پَھسے ہوئے ہو۔ سگوں جیہڑے مسِیح وِچ سَوں گئے نیں اوہ وی ہلاک ہوئے۔ جے اسی نِرے پُرے ایسے زِندگی وِچ مسِیح اُتّے آس رکھنے آں۔ تے اسی ساریاں بندیاں نالوں وَدّھ بَھیڑے نصیب والے آں۔ پر سَچ مُچ مسِیح تے مُردیاں وِچوں جی اُٹھیا اے تے اوہناں وِچوں جیہڑے سَوں گئے نیں پہلا پَھل ہویا۔ کیوں جو جدوں بندے دے سببّوں مَوت اے۔ تے بندے دے سببّوں مُردیاں دا اُٹھنا وی اے۔ تے جیویں آدم وِچ سارے مر دے نیں۔ ایسے طرح مسِیح وِچ سارے جوالے جان گے۔ پر ہر اِک اپنی اپنی واری سِر پہلا پَھل مسِیح فیر مسِیح دے آؤن اُتّے سارے لوک۔ ایہدے مگروں اوڑک اے۔ اوس ویلے اوہ ساری حکُومت تے سارا اختیار تے قُدرت دا ناس کر کے بادشاہی نُوں خُدا باپ دے حوالے کر دے گا۔ کیوں جو جد تِیکر اوہ ساریاں وَیرِیاں نُوں اپنے پیراں ہیٹھ نا لیاوے۔ تَد تِیکر اوہنوں بادشاہی کرنی ضرُور اے۔ ساریاں نالوں پِچّھلا وَیری جِہدا ناس کِیتا جائے سو مَوت اے۔ کیوں جو خُدا سبھو کُجھ اوہدے پیراں ہیٹھ کِیتا اے۔ پر جد اوہ آکھدا اے۔ پئی سبھو کُجھ اوہدے پیراں ہیٹھ کِیتا گیا اے۔ تے صاف معلُوم ہوندا اے۔ پئی جِس سارِیاں شیواں اوہدے تابعیاں کر دِتّیاں۔ اوہ آپ تابعیاں نئیں ہویا۔ تے جدوں سبھو کُجھ اوہدے تابعیاں ہو جائے گا۔ تے پُتر آپ اوہدے تابعیاں ہو جائے گا جِس سارِیاں شیواں اوہدے ہیٹھ کر دِیتّاں۔ تاں جو خُدا ای سبھناں وِچ سبھ کُجھ ہوئے۔ نئیں تے اوہ جیہڑے مُردیاں لئی بپتِسمہ لَیندے نیں سو کِیہ کرن گے؟ جے مُردے جی اُٹھدے ای نئیں تے فیر اوہناں دے لئی کیوں بپتِسمہ لَیندے نیں؟ تے اسی کیوں ہر ویلے خطرے وِچ رہنے آں۔ بھراؤ! مَینُوں اوس مان دی سَونہہ جیہڑا خُداوند یِسُوع مسِیح وِچ تُہاڈے اُتّے اے۔ مَیں روز دِہاڑی مرنا آں۔ جے مَیں بندے وانگ اِفِسُس وِچ درِندیاں نال لڑیا۔ تے مَینُوں کِیہ فائدہ اے۔ جے مُردے نا جی اُٹھن گے تے آؤ کھایئے پِیئے۔ بھلکے تے مر ای جانا اے دھوکھا نا کھاؤ بُریاں سنگتاں چَنگیاں عادتاں نُوں وگاڑ دیندیاں نیں اِیماندار ہون لئی ہوش وِچ آؤ۔ تے گُناہ نا کرو۔ کیوں جو کئیاں وِچ خُدا دی پچھان نئیں۔ مَیں تُہانوں شرمندیاں کرن لئی ایہہ آکھنا آں۔ ہُن کوئی آکھے پئی مُردے کِس طرح جی اُٹھدے نیں تے کِس طرح دے جِسم وِچ آوندے نیں؟ مُورکھا تُوں آپ جو کُجھ بِیجنا ایں جد تِیکر اوہ نا مرے۔ جوالیا نئیں جاندا؟ تے ایہہ جو کُجھ تُوں بِیجنا ایں۔ سو اوہ جِسم نئیں جیہڑا ہونا اے سگوں نِرا دانہ اے بھانویں کنک دا بھانویں کِسے ہور شے دا۔ پر خُدا جِہیا چاہندا اے۔ اوہنوں جِسم دیندا اے۔ تے ہر اِک بی نُوں اپنا اپنا جِسم۔ سارے ماس اِکّو جیہے ماس نئیں۔ پر بندیاں دا ماس ہور اے۔ ڈنگراں دا ماس ہور اے پنچھیاں دا ماس ہور اے۔ مچھّیاں دا ماس ہور اے۔ اسمانی جِسم وی نیں تے زمِینی وی۔ پر اسمانِیاں دا جلال ہور اے تے زمِینِیاں دا ہور۔ سُورج دا جلال ہور اے چَنّ دا ہور تے تاریاں دا جلال ہور اے۔ کیوں جو تارے تارے دے جلال وِچ فرق اے۔ مُردیاں دی قیامت وی ایہو جیہی اے۔ جِسم ناس ہو جان والی حالت وِچ بِیجیا جاندا اے۔ سدا رہن والی حالت وِچ جی اُٹھدا اے۔ بے عِزّتی دے حال وِچ بِیجیا جاندا اے۔ تے جلال دی حالت وِچ جی اُٹھدا اے۔ کمزوری دی حالت وِچ بِیجیا جاندا اے۔ تے زور دی حالت وِچ جی اُٹھدا اے۔ نفسانی جِسم بِیجیا جاندا اے۔ تے رُوحانی جِسم جی اُٹھدا اے۔ جے اِنسانی جِسم اے تے رُوحانی جِسم وی اے۔ جیویں لِکھیا وی اے۔ پئی پہلا بندہ یعنی آدم جِیوندا جی بنیا پِچّھلا آدم زِندگی دین والی رُوح بنیا۔ پر رُوحانی پہلاں نئیں سی سگوں نفسانی سی۔ پِچّھوں رُوحانی ہویا۔ پہلا بندہ زمین وِچوں یعنی خاکی سی دُوجا بندہ اسمانی اے۔ جیویں اوہ خاکی اے۔ اوسے طرح ہور وی خاکی نیں تے جیویں اوہ اسمان اے اوسے طرح ہور وی اسمانی نیں۔ تے جیویں اسی اوس خاکی دی صُورت اُتّے ہوئے اوسے طرح اوس اسمانی دی صُورت اُتّے وی ہوواں گے۔ بھراؤ! مَیں ایہہ آکھنا آں۔ پئی ماس تے لہو خُدا دی بادشاہی دے وارث نئیں ہوسکدے نا ناس ہون والا بقا دا وارث ہوسکدا اے۔ ویکھو مَیں تُہانوں ایہہ بھیت دی گلّ دسنا آں۔ اسی سارے سَنواں گے نئیں۔ پر سارے بدل جاواں گے۔ تے اِک دم وِچ اِک پَل وِچ پِچّھلی تُرہی پُھوکدیاں ای ہو جائے گا۔ کیوں جو تُرہی پُھوکی جائے گی تے مُردے بقا دی حالت وِچ اُٹھن گے۔ تے اسی بدل جاواں گے۔ کیوں جو ضرُور اے پئی ایہہ ناس ہون والا جِسم بقا دا جامہ پائے تے ایہہ مرن والا جِسم سدا دی زِندگی دا جامہ پائے۔ تے جدوں ایہہ ناس ہون والا جِسم بقا دا جامہ پائے گا۔ تے ایہہ مرن والا جِسم سدا دی زِندگی دا جامہ پا لے گا۔ تاں اوہ گلّ پُوری ہوئے گی۔ جیہڑی لِکھی اے۔ پئی مَوت فتح دی بُرکی بن گئی۔ مَوت تیری فتح کِتّھے اے؟ مَوت تیرا ڈنگ کِتّھے رہیا؟ مَوت دا ڈنگ گُناہ اے۔ تے گُناہ دا ڈنگ شریعت اے۔ پر خُدا دا شُکر اے۔ جیہڑا ساڈے خُداوند یِسُوع مسِیح دی راہِیں سانُوں فتح دیندا اے۔ سو میرے پیارے بھراؤ! پیراں اُتّے پکّے رہو۔ تے خُداوند دے کمّ وِچ سدا وَدھدے جاؤ۔ کیوں جو تُسی ایہہ جان دے ہو پئی تُہاڈی محنت خُداوند وِچ ایویں نئیں اے۔ ہُن اوس چندے دی بابت جیہڑا پاک لوکاں لئی کِیتا جاندا اے۔ جیویں مَیں گلِتیہ دی کلِیسیاواں نُوں حُکم دِتّا اے۔ اوسے طرح تُسی وی کرو۔ ہفتے دے پہلے دِن تُہاڈے وِچوں ہر اِک اپنے قدر سیتی کُجھ اپنے کول رکھ چھڈے تاں جو میرے آؤن اُتّے چندے نا کرنے پَین۔ تے جدوں مَیں آواں گا تَد جِنہاں نُوں تُسی منظُور کرو گے اوہناں نُوں مَیں خط دے کے گھل دیاں گا۔ پئی تُہاڈی خَیرات یرُوشلِیم وِچ اپڑا دین۔ تے جے میرا وی جانا ٹھیک ہوئے تے اوہ میرے نال جان گے۔ تے مَیں مَکِدُنیہ ہو کے تُہاڈے کول آواں گا۔ کیوں جو مَیں مَکِدُنیہ وِچوں ای ہو کے جاناں اے۔ پر شاید مَیں تُہاڈے کول ای رہواں گا تے سِیال وی تُہاڈے کول کٹّاں گا۔ تاں جو جیہڑے پاسے جانا چاہاں۔ تُسی مَینُوں اوس پاسے ٹور دیو۔ کیوں جو مَیں ہُن راہ وِچ تُہانوں نئیں مِلنا چاہندا سگوں مَینُوں آس اے۔ پئی جے خُداوند دی مرضی ہوئی تے کُجھ چِر تُہاڈے کول ٹِکاں گا۔ پر مَیں پِنتیکُست دی عید توڑی اِفِسُس وِچ رہاں گا۔ کیوں جو میرے لئی اِک وَڈا سارے کمّ دا بُوہا لتّھا اے۔ تے وَیری بتھیرے نیں۔ جے تِیمُتِھیُس آ جائے تے خیال رکھنا۔ پئی اوہ تُہاڈے کول بے فِکر رہے کیوں جو اوہ میرے وانگُوں خُدا دا کمّ کر دا اے۔ سو کوئی اوہنوں ماڑا نا جانے سگوں اوہنوں خیریں مِہریں ایدھر ٹور دیو۔ تاں جو میرے کول آ جائے مَیں اوہنوں پیا اُڈِیکناں آں۔ پئی بھراواں سَنے آ جاوے۔ تے بھرا اُپلّوس دے مَیں بڑے تَرلے کِیتے۔ پئی بھراواں نال تُہاڈے کول جائے پر اجے تے اوہ جان نُوں بالکل راضی نئیں ہویا۔ پر جد اوہنوں موقع مِلے گا۔ تے جائے گا۔ جاگدے رہو اِیمان وِچ پکّے رہو۔ بندے بنو تگڑے ہوؤ۔ جو کُجھ کر دے ہو مُحبّت نال کرو۔ بھراؤ! تُسی ستِفناس دے ٹبّر نُوں جان دے اوہ۔ پئی اوہ اَخیہ دے پہلے پَھل نیں تے پاک لوکاں دی سیوا لئی تیار رہندے نیں۔ سو تُہاڈے اگّے عرض کرنا آں پئی اجیہے لوکاں دے تابعیاں رہو۔ سگوں ہر اِک دے جیہڑے ایس کمّ تے محنت وِچ سِیری نیں۔ تے مَیں ستِفناس تے فرتُوناتُس تے اخیکُس دے آؤن توں خُوش آں۔ کیوں جو کُجھ تُہاڈے توں رہ گیا سی اوہناں پُورا کر دِتّا۔ تے اوہناں میری تے تُہاڈی رُوح نُوں تازیاں کِیتا سو ایہو جِہیاں نُوں مَنّوں۔ آسِیہ دِیاں کلِیسیاواں تُہانوں سلام آکھدیاں نیں اَکوِلہ تے پرسِکّلہ اوس کلِیسیا سَنے جیہڑی اوہناں دے گھر وِچ اے۔ تُہانوں خُداوند وِچ بُہت بُہت سلام آکھدے نیں۔ سارے بھرا تُہانوں سلام آکھدے نیں۔ پاک بوسہ لے کے آپو وِچ سلام آکھو۔ مَیں پَولُس اپنے ہتّھ نال سلام لِکھناں آں جیہڑا خُداوند نُوں پیار نئیں کر دا سو لعنتی ہوئے۔ ساڈے خُداوندا آ۔ خُداوند یِسُوع مسِیح دا فصل تُہاڈے اُتّے ہوندا رہے۔ میری مُحبّت مسِیح یِسُوع وِچ تُہاڈے سبھناں دے نال رہے۔ آمِین پَولُس ولّوں جیہڑا خُدا دی مرضی نال مسِیح یِسُوع دا رسُول اے۔ تے بھرا تِیمُتِھیُس ولّوں خُدا دی اوس کلِیسیا دے ناں جیہڑی کُرِنتِھس وِچ اے۔ تے کُل اَخیہ دے ساریاں پاک لوکاں دے ناں۔ ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔ ساڈے خُداوند یِسُوع مسِیح دے خُدا تے باپ دی وڈیائی ہوئے جیہڑا رحمتاں دا باپ تے ہر طرح دی تسلّی دا خُدا اے۔ اوہ ساڈیاں سارِیاں مُصِیبتاں وِچ سانُوں تسلّی دیندا اے۔ تاں جو اسی اوس تسلّی دے سبّب جیہڑی خُدا سانُوں دیندا اے۔ اوہناں نُوں وی تسلّی دے سکِئے۔ جیہڑے کِسے نا کِسے طرح دی مُصِیبت وِچ پئے ہوئے نیں۔ کیوں جو جیویں مسِیح دے دُکھ سانُوں وَدّھ پُہنچدے نیں اوسے طرح ساڈی تسلّی وی مسِیح دی راہِیں وَدّھ ہوندی اے۔ جے ساڈے اُتّے مُصِیبت آؤندی اے تے تُہاڈی تسلّی تے نجات لئی۔ تے جے سانُوں تسلّی مِلدی اے۔ تے تُہاڈی تسلّی دے لئی جِہدے اثر نال تُسی صبر کر کے اوہناں دُکھاں نُوں سہہ لَیندے ہو۔ جیہڑے اسی وی سہنے آں۔ تے ساڈی آس تُہاڈی بابت پَکّی اے۔ کیوں جو اسی جاننے آں پئی جیویں تُسی دُکھاں وِچ سِیری ہو۔ اوسے طرح تسلّی وِچ وی ہو۔ بھراؤ! اسی نئیں چاہندے پئی تُسی اوس مُصِیبت توں ناواقِف رہو۔ جیہڑی آسِیہ وِچ ساڈے اُتّے پئی۔ تے اسی حدّوں وَدّھ تے طاقتوں باہر تنگ ہوگئے۔ ایتھوں توڑی پئی اساں اپنی جانوں وی ہتّھ دھوئے۔ سگوں اپنے اُتّے مَوت دا حُکم یقِین کر لیا سی۔ تاں جو اپنا بھروسا نا رکھیے سگوں خُدا دا جیہڑا مُردیاں نُوں جوالدا اے۔ سو اوسے سانُوں ایڈی وڈّی ہلاکت توں چھڈایا تے چھڈاوے گا تے سانُوں اوہدے توں آس اے۔ پئی اگّے نُوں وی چھڈاؤندا رہے گا۔ جے تُسی وی رَل مِل کے دُعا نال ساڈی مدد کرو گے۔ پئی جیہڑی بخشِش سانُوں بتھیریاں لوکاں دی راہِیں مِلی اوہدا شُکر وی بُہتے لوک ساڈے ولّوں کرن۔ کیوں جو سانُوں اپنے دِل دی ایس گواہی اُتّے فخر اے پئی ساڈا چال چَلّن دُنیا وِچ تے خاص کر تُہاڈے وِچ جِسمانی حِکمت نال نئیں۔ سگوں خُدا دے فضل دے نال یعنی اجیہی پاکیزگی تے صفائی دے نال رہیا۔ جیہڑا خُدا دے لائق اے۔ اسی ہور گلّاں تُہانوں نئیں لِکھدے۔ اوہناں دے بِناں جیہڑیاں تُسی پڑھدے یا مَن دے اوہ۔ تے مَینُوں آس اے۔ پئی اوڑک تِیکر مَن دے رہو گے۔ جیویں تُہاڈے وِچوں کئیاں مَن وی لیا اے پئی اسی تُہاڈا فخر آں۔ جیویں ساڈے خُداوند یِسُوع مسِیح دے دِن تُسی وی ساڈا فخر ہوؤ گے۔ تے ایسے بھروسے اُتّے مَیں ایہہ اِرادہ کِیتا سی پئی پہلاں تُہاڈے کول آواں تاں جو تُہانوں اِک ہور بخشِش مِلے۔ تے تُہاڈے کول ہوندا ہویا مَکِدُنیہ نُوں جاواں۔ تے مَکِدُنیہ توں فیر تُہاڈے کول آواں۔ تے تُسی مَینُوں یہُودیہ ولّ ٹور دیو۔ سو مَیں جو ایہہ اِرادہ کِیتا سی کِیہ مَیں اِقرار دا کچّا ساں؟ یا جِنہاں گلّاں دا اِرادہ کرنا آں جِسم ولّوں کرنا آں پئی ہاں ہاں وی کراں تے نئیں نئیں وی؟ خُدا دی سچیائی دی سَونہہ پئی ساڈے اوس کلام وِچ جیہڑا تُہاڈے نال کِیتا جاندا اے۔ ہاں تے نئیں دونویں ای نئیں ہوندے۔ کیوں جو خُدا دا پُتر یِسُوع مسِیح جِہدی منادی اساں یعنی مَیں تے سِلوانُس تے تِیمُتِھیُس نیں تُہاڈے وِچ کِیتی۔ اوہدے وِچ ہاں تے نئیں دونویں نئیں سن۔ سگوں اوہدے وِچ ہاں ای ہاں ہوئی۔ کیوں جو خُدا دے جِنّے وعدے نیں۔ اوہ سارے اوہدے وِچ ہاں دے نال نیں۔ ایس کر کے اوہدی راہِیں آمِین وی ہوئی۔ تاں جو ساڈی راہِیں خُدا دا جلال ہوئے۔ تے جیہڑا سانُوں تُہاڈے نال مسِیح وِچ قیم کر دا اے۔ تے جِس سانُوں مسَح کِیتا اوہ خُدا اے۔ جِس ساڈے اُتّے مُہر وی لائی۔ تے رُوح دی سائی ساڈے دِلاں وِچ دِتّی۔ مَیں خُدا نُوں گواہ کرناں آں پئی مَیں اجے تِیکر کُرِنتِھس وِچ ایس کر کے نئیں آیا۔ کیوں جو مَینُوں تُہاڈے اُتّے ترس آؤندا سی۔ ایہہ نئیں پئی اسی اِیمان ولّوں تُہاڈے اُتّے حکُومت کرنے آں سگوں خُوشی وِچ تُہاڈے مددگار ہاں کیوں جو تُسی اِیمان ای نال قیم رہندے ہو۔ مَیں اپنے دِل وِچ ایہہ اِرادہ کِیتا سی۔ پئی فیر تُہاڈے کول دلگِیر ہو کے نا آواں۔ کیوں جو جے مَیں تُہانوں دلگِیر کراں۔ تے مَینُوں کون خُوش کرے گا۔ بِناں اوہدے جیہڑا میرے سببّوں دلگِیر ہویا؟ تے مَیں تُہانوں ایہو گلّ لِکھی سی۔ تاں جو اجیہا نا ہوئے پئی مَیں آ کے جِنہاں توں خُوش ہونا چاہندا ساں۔ اوہناں ای دے سببّوں دلگِیر ہوواں۔ کیوں جو مَینُوں تُہاڈے ساریاں اُتّے ایس گلّ دا بھروسا اے۔ پئی جیہڑی میری خُوشی اے سو ای تُہاڈی سبھناں دی اے۔ کیوں جو مَیں بڑی مُصِیبت تے دلگِیری دی حالت وِچ بتھیرے اتھرُو وَہا وَہا کے تُہانوں لِکھیا سی۔ پر ایس واسطے نئیں پئی تُہانوں غم ہوئے۔ سگوں ایس واسطے پئی تُسی اوس مُحبّت نُوں معلُوم کرو۔ جیہڑی مَینُوں تُہاڈے نال اے۔ تے جے کوئی بندہ غم دا سبّب ہویا اے۔ تے میرے ای غم دا نئیں سگوں (اوہدے اُتّے وَدّھ سختی نا کراں) کِسے قدر تُہاڈے سبھناں دے غم دا سبّب ہویا۔ ایہو سزا جیہڑی اوہنوں کئیاں ولّوں مِلی اجیہے بندے لئی بس اے۔ سو اوہدے بدلے وِچ ایہو چَنگا اے پئی اوہدا قصور مُعاف کرو۔ تے تسلّی دیو تاں جو اوہ بُہتے غم دے سبّب برباد نا ہو جائے۔ ایس لئی مَیں تُہاڈی مِنّت کرنا آں پئی اوہدی بابت اپنی مُحبّت نُوں پَکیّاں کرو۔ کیوں جو مَیں ایس کر کے وی لِکھیا سی پئی تُہانوں ازمانواں پئی سارِیاں گلّاں وِچ فرمانبردار ہویا نئیں۔ جِہنُوں تُسی مُعاف کر دے اوہ۔ اوہنوں مَیں وی مُعاف کرنا آں کیوں جو جو کُجھ مَیں مُعاف کِیتا۔ جے کر مَیں کُجھ مُعاف کِیتا اے۔ اوہ مسِیح دا قیم مقام ہو کے تُہاڈی خاطر مُعاف کِیتا۔ تاں جو شیطان دا ساڈے اُتّے داء نا چلّے کیوں جو اسی ایہدیاں فریباں توں ناواقِف نئیں آں۔ تے جد مَیں مسِیح دی خُوشخبری دین لئی تروآس وِچ آیا۔ تے خُداوند وِچ میرے لئی بُوہا کُھل گیا۔ تے میری رُوح نُوں آرام نا مِلیا۔ ایس لئی پئی مَیں اپنے بھرا طِطُس نُوں نا ویکھیا۔ سگوں اوہناں توں وِداع ہو کے مَکِدُنیہ نُوں ٹُر گیا۔ پر خُدا دا شُکر اے۔ جیہڑا مسِیح وِچ سانُوں سدا قیدِیاں وانگُوں گشت کراندا اے۔ تے اپنے عِلم دی خُوشبوئی ساڈی راہِیں ہر تھاں پَھیلاؤندا اے۔ کیوں جو اسی خُدا دے اگّے نجات لین والیاں تے ہلاک ہون والیاں دوہاں دے لئی مسِیح دی خُوشبوئی آں۔ کئیاں واسطے تے مرن دے لئی مَوت دی بو تے کئیاں واسطے جیون دے لئی زِندگی دی بو آں۔ تے کون ایہناں گلّاں دے لائق اے؟ کیوں جو اسی اوہناں بتھیریاں لوکاں وانگر نئیں جیہڑے خُدا دے کلام وِچ مِلاوٹ کر دے نیں۔ سگوں دِل دی صفائی نال تے خُدا ولّوں خُدا نُوں حاضر جان کے مسِیح وِچ بولنے آں۔ کِیہ اسی فیر اپنی نیک نامی دسنی شُروع کرنے آں؟ یا سانُوں کئیاں وانگر نیک نامی دِیاں چِٹّھیاں تُہاڈے کول لیاؤن یا تُہاتھوں لین دی لوڑ اے؟ ساڈا خط جیہڑا ساڈیاں دِلاں اُتّے لِکھیا ہویا اے۔ سو تُسی ہو تے اوہنوں سارے بندے جان دے تے پڑھدے نیں۔ ظاہر اے پئی تُسی مسِیح دا اوہ خط اوہ جیہڑا اساں خادماں دے طَور اُتّے لِکھیا۔ سیاہی نال نئیں سگوں زِندہ خُدا دے رُوح نال پتّھر دِیاں تختِیاں اُتّے نئیں سگوں گوشت دی یعنی دِل دِیاں تختِیاں اُتّے۔ اسی مسِیح دی راہِیں خُدا اُتّے اجیہا ای بھروسا رکھنے آں۔ ایہہ نئیں پئی آپ ای اسی ایس لائق آں۔ پئی اپنے ولّوں کُجھ خیال وی کر سکِئے۔ سگوں ساڈی لیاقت خُدا ولّوں اے۔ جِس سانُوں نَوِیں عہد دے خادم ہون جوگیاں وی کِیتا۔ لفظاں دے خادم نئیں سگوں رُوح دے کیوں جو لفظ مار سُٹّدے نیں پر رُوح جوالدی اے۔ تے جد مَوت دا اوہ عہد جِہدے حرف پتّھراں اُتّے اُکرے گئے نیں اجیہا جلال والا ہویا۔ پئی بنی اِسرائیل مُوسیٰ دے مُنھ نُوں اوس جلال دے سببّوں جیہڑا اوہدے مُنھ اُتّے آیا سی تاڑ نا سکے بھانویں اوہ گھٹدا جاندا سی۔ تے رُوح دا عہد تے ضرُور ای جلال والا ہوئے گا۔ کیوں جو جد قصوروار ٹھہرن والا عہد جلال والا سی۔ تے راستبازی دا عہد تے ضرُور ای جلال والا ہوئے گا۔ سگوں ایس حال اوہ جلال والا ایس وڈّے جلال دے سبّب بے جلال ہویا۔ کیوں جو جد مِٹن والی شے جلال والی سی تے باقی رہن والی شے تے ضرُور ای جلال والی ہوئے گی۔ سو اسی اجیہی آس کر کے بڑی دلیری نال بولنے آں۔ تے مُوسیٰ وانگر نئیں آں جِس اپنے مُنھ اُتّے پردہ پایا تاں جو بنی اِسرائیل ایس مِٹن والی شے دے اوڑک نُوں نا ویکھ سکن۔ پر اوہناں دے دِل سخت ہوگئے۔ کیوں جو اَج توڑی پرانے عہد نامے نُوں پڑھدیاں اوہناں دے دِلاں اُتّے اوہو پردہ پیا رہندا اے۔ تے اوہ مسِیح وِچ اُٹھایا جاندا اے۔ پر اَج تِیکر جد کدِیں مُوسیٰ دی کتاب پڑھی جاندی اے تے اوہناں دے دِل اُتّے پردہ پیا رہندا اے۔ پر جد کدی اوہناں دا دِل خُداوند ولّ پِھرے گا۔ تے اوہ پردہ اُٹھایا جائے گا۔ تے اوہ خُداوند رُوح اے۔ تے جِتّھے کِتّھے خُداوند دا رُوح اے اوتھے اَزادی اے۔ پر جد اساں سبھناں دے بے پردہ چِہریاں توں خُداوند دے جلال دا ایس طرح عکس پَیندا اے جیویں شیشے توں۔ تے اوس خُداوند دی راہِیں جیہڑا رُوح اے۔ اسی اوسے ای جلالی صُورت وِچ درجہ بدرجہ بدلدے جانے آں۔ سو جد ساڈے اُتّے اجیہا رَحم ہویا پئی سانُوں ایہہ خِدمت مِلی۔ تاں اسی ہِمّت نئیں ہار دے۔ سگوں اساں شرم دِیاں لُکِیاں ہویاں گلّاں نُوں چھڈ دِتّا۔ تے مکّاری دی چال نئیں چلدے۔ نا خُدا دے کلام وِچ کُجھ رَلا دینے آں۔ سگوں سچیائی ظاہر کر کے خُدا دے اگّے ہر اِک بندے دے دِل وِچ اپنی نیکی بٹھالنے آں۔ تے جے ساڈی خُوشخبری اُتّے پردہ پیا ہویا اے۔ تے ہلاک ہون والیاں ای دے لئی پیا اے۔ یعنی اوہناں بے اِیماناں لئی جِنہاں دِیاں اَکھّیاں نُوں ایس جہان دے خُدا اَنھیاں کر دِتّا اے۔ تاں جو مسِیح جیہڑا خُدا دی صُورت اے اوہدے جلال دی خُوشخبری دا چانن اوہناں اُتّے نا پئے۔ کیوں جو اسی اپنی نئیں سگوں مسِیح یِسُوع دی منادی کرنے آں۔ پئی اوہ خُداوند اے۔ تے اپنی بابت ایہہ آکھنے آں۔ پئی یِسُوع دی خاطر تُہاڈے نوکر آں۔ ایس لئی پئی خُدا ای اے جِس آکھیا پئی ہنیرے وِچوں نُور چمکے تے اوہو ای ساڈیاں دِلاں وِچ چمکیا۔ تاں جو خُدا دے جلال دی پچھان دا نُور یِسُوع مسِیح دے چِہرے توں چمکارا مارے۔ پر ساڈے کول ایہہ خزانہ مِٹّی دیاں بھانڈیاں وِچ رکھیا ہویا اے۔ تاں جو اوہ حدّوں وَدّھ قُدرت ساڈے ولّوں نئیں سگوں خُدا ولّوں معلُوم ہوئے۔ اسی ہر اِک گلّ وِچ مُصِیبت تے چُکنے آں۔ پر لاچار نئیں ہوندے۔ حَیران تے ہُنے آں پر نا آس نئیں ہوندے۔ ستائے تے جانے آں پر اکلّے نئیں چھڈے جاندے۔ ڈیگے تے جانے آں پر ہلاک نئیں ہوندے۔ اسی ہر ویلے اپنے جِسم وِچ یِسُوع دی مَوت لئی پِھرنے آں۔ تاں جو یِسُوع دی زِندگی ساڈے بدن وِچ ظاہر ہوئے۔ کیوں جو اسی جِیوندے ای یِسُوع دی خاطر سدا مَوت دے حوالے کِیتے جانے آں۔ تاں جو یِسُوع دی زِندگی ساڈے فنا ہون والے جِسم وِچ ظاہر ہوئے۔ سو مَوت تے ساڈے وِچ اثر کر دی اے تے زِندگی تُہاڈے وِچ۔ تے ایس کر کے پئی ساڈے وِچ اوہو ای اِیمان دی رُوح اے۔ جِہدی بابت لِکھیا اے۔ پئی مَیں اِیمان لیایا تے ایس لئی بولیا۔ سو اسی اِیمان وی لیاؤنے آں تے ایسے لئی آکھنے آں۔ کیوں جو اسی جاننے آں۔ پئی جِس خُداوند یِسُوع نُوں جوالیا اوہ سانُوں وی یِسُوع دے نال جوالے گا۔ تے تُہاڈے نال اپنے اگّے حاضر کرے گا۔ ایس لئی پئی سارِیاں شیواں تُہاڈے واسطے نیں تاں جو بتھیریاں لوکاں دے سببّوں فضل بُہتا ہو کے خُدا دے جلال لئی شُکر گُزاری نُوں وی وَدھائے۔ ایس لئی اسی ہِمّت نئیں ہار دے سگوں بھانویں ساڈی ظاہری اِنسانِیّت برباد ہوندی اے۔ فیر وی ساڈی اندرلی اِنسانِیّت دِنوں دِن نَوِیں ہوندی جاندی اے۔ کیوں جو ساڈی پَل کُو دی ہَولی جیہی مُصِیبت ساڈے لئی بُہت ای بھارا تے سدا دا جلال پَیدا کر دی جاندی اے۔ جِس حال اسی ویکھیاں ہویاں شیواں اُتّے نئیں سگوں اَن ویکھیاں شیواں اُتّے نِگاہ کرنے آں۔ کیوں جو ویکھیاں ہویاں شیواں تھوڑیاں دِناں دِیاں نیں۔ پر اَن ویکھیاں شیواں سدا رہن والیاں نیں۔ کیوں جو اسی جاننے آں پئی جد ساڈا ایہہ تنبُو جیہا گھر جیہڑا زمین اُتّے اے ڈیگیا جائے گا۔ تے سانُوں خُدا ولّوں اسماناں اُتّے اِک اجیہی عمارت مِلے گی۔ جیہڑا ہتّھاں دا بنیا ہویا گھر نئیں سگوں سدا رہن والا اے۔ سو اسی ایہدے وِچ کُرلاؤندے آں۔ تے بڑی چاہ رکھنے آں۔ پئی اپنے اسمانی گھر نُوں کپڑیاں وانگُوں پا لیئے۔ تاں جو کپڑا پا لَیندے سببّوں ننگے نا رہیئے۔ کیوں جو اسی ایس ڈیرے وِچ رہ کے بھار دیاں مارِیاں کُرلاؤندے آں۔ ایس کر کے نئیں پئی ایہہ پوشاک لاہنی چاہنے آں۔ سگوں ایس اُتّے ہور پانی چاہنے آں۔ تاں جو اوہ جیہڑی فنا ہو جان والی اے۔ زِندگی دے وِچ ڈُب جائے۔ تے جِس سانُوں ایس گلّ واسطے تیار کِیتا سو خُدا اے تے اوسے سانُوں رُوح سائی وِچ دِتّا۔ سو ساڈی ہمیش ای خاطرجمع رہندی اے۔ تے ایہہ جاننے آں پئی جدوں تِیکر اسی بدن دے وطن وِچ آں۔ خُداوند دے دیسوں دُراڈے آں۔ کیوں جو اسی اِیمان نال ٹُرنے آں نا اَکھّیں ویکھے اُتّے۔ سو ساڈی خاطرجمع اے تے سانُوں بدن دے وطن توں وَکھریاں ہو کے خُداوند دے وطن وِچ رہنا وَدّھ منظُور اے۔ ایسے واسطے سانُوں ایہہ حَوصلہ اے پئی دیس وِچ ہوئیے تے بھانویں دیسوں باہر اسی اوسے نُوں خُوش کریئے۔ کیوں جو ضرُوری گلّ اے پئی مسِیح دے عدالت دے تخت دے اگّے جا کے ساڈے سبھناں دا حال کُھل جاوے۔ تاں جو ہر کِسے نُوں اوہدیاں اوہناں کمّاں دا بدلہ مِلے۔ جیہڑے اوس بدن دی راہِیں کِیتے ہون۔ بھانویں بھلے تے بھانویں بُرے۔ سو اسی خُدا دے خَوف نُوں جان کے بندیاں نُوں سمجھانے آں تے خُدا نُوں ساڈا حال معلُوم اے۔ تے آس اے پئی تُہاڈے دِلاں اُتّے وی ظاہر ہویا ہوئے گا۔ اسی فیر اپنی نیک نامی تُہاڈے اُتّے نئیں جتاؤندے سگوں اپنے سبّب اسی تُہانوں فخر کرن دا موقع دینے آں تاں جو تُسی اوہناں نُوں جواب دے سکو۔ جیہڑے ظاہر اُتّے شیخی مار دے نیں۔ تے باطن اُتّے نئیں۔ جے اسی بے خود آں۔ تاں خُدا دے لئی آں۔ تے جے سُرت والے آں تے تُہاڈے لئی۔ کیوں جو مسِیح دی مُحبّت سانُوں لاچار کر دیندی اے۔ ایس لئی پئی اسی ایہہ سمجھنے آں پئی جد اِک ساریاں لئی مویا۔ تے سارے مر گئے۔ تے اوہ ایس لئی ساریاں لئی مویا پئی جیہڑے جِیوندے نیں اوہ اگّے نُوں اپنے واسطے نا جیون سگوں اوہدے لئی جیہڑا اوہناں واسطے مویا تے فیر جی اُٹھیا۔ سو ہُن توں اسی کِسے نُوں جِسم ولّوں نا سنجھاناں گے۔ آں بھانویں مسِیح نُوں وی جِسم ولّوں جانیا سی۔ پر ہُن توں نا جاناں گے۔ ایس لئی جے کوئی مسِیح وِچ اے۔ تے اوہ نواں مخلُوق اے پرانیاں شیواں جاندِیاں رہیاں۔ ویکھو اوہ نَوِیاں ہوگِئیاں۔ تے سارِیاں شیواں خُدا ولّوں نیں۔ جِس مسِیح دی راہِیں اپنے نال ساڈا میل کر لیا تے میل دی خِدمت ساڈے سپُرد کِیتی۔ مطلب ایہہ اے پئی خُدا نے مسِیح وِچ ہو کے اپنے نال دُنیا دا میل کر لیا تے اوہناں دِیاں تقصِیراں نُوں اوہناں دے ذِمّے نا لایا۔ تے اوس میل دا سنیہا سانُوں سونپ دِتّا اے۔ سو اسی مسِیح دے ایلچی آں۔ جیویں خُدا ساڈی راہِیں مِنّت کر دا اے اسی مسِیح ولّوں مِنّت کرنے آں پئی خُدا نال میل کرو۔ جیہڑا گُناہ توں واقف نئیں سی اوسے نُوں اوس ساڈے لئی گُناہ ٹھہرایا۔ تاں جو اسی اوہدے وِچ ہو کے خُدا دی راست بازی ہو جائیے۔ تے اسی جیہڑے اوہدے نال کمّ وِچ سِیری آں ایہہ عرض وی کرنے آں۔ پئی خُدا دا فضل جیہڑا تُہاڈے اُتّے ہویا بے فائدہ نا رہن دیو۔ کیوں جو اوہ آکھدا اے پئی مَیں قبولِیّت دے ویلے تیری سُن لئی تے نجات دے دِن تیری مدد کِیتی۔ ویکھو ہُن قبولِیّت دا ویلا اے ویکھو ایہہ نجات دا دِن اے۔ اسی کِسے گلّ وِچ ٹھوکر کھان دا کوئی موقع نئیں دیندے تاں جو ساڈی خِدمت اُتّے حرف نا آوے۔ سگوں خُدا دے کامیاں وانگ اپنی خُوبی ظاہر کرنے آں۔ بڑے صبر نال۔ مُصِیبتاں نال۔ لوڑاں نال ۔تنگِیاں نال۔ کولڑے کھان نال۔ قید ہون نال۔ ہنگامیاں نال۔ محِنتاں نال۔ جاگدیاں رہن نال۔ بُھکھیاں رہن نال۔ پاکیزگی نال۔ عِلم نال ۔تحمّل نال۔ مِہربانی نال۔ پاک رُوح نال۔ سَچّی مُحبّت نال۔ سچیائی دے کلام نال۔ خُدا دی قُدرت نال۔ راست بازی دے ہتّھیاراں دی راہِیں جیہڑے سَجّے کھبّے نیں۔ عِزّت تے بے عِزّتی دی راہِیں۔ بدنامی تے نیک نامی دی راہِیں۔ بھانویں بد راہ کرن والے معلُوم ہُنے آں فیر وی سَچّے آں۔ گُمناماں وانگر آں تَد وی مشہُور آں۔ مویاں ہویاں وانگر آں۔ پر ویکھو جیونے آں۔ مار کھان والیاں وانگر آں پر جانوں مارے نئیں جاندے۔ اُداساں وانگر آں پر سدا خُوش رہنے آں۔ کنگالاں جیہے آں پر بتھیریاں نُوں دَولت مند کر دینے آں۔ ناداراں وانگر آں۔ تَد وی سبھ کُجھ رکھنے آں۔ پئی کُرِنتھیو! اساں تُہاڈے نال کُھل کے گلّاں کِیتیاں نیں۔ ساڈا دِل تُہاڈے ولّوں کُھلا ہوگیا اے۔ ساڈے دِلاں وِچ تُہاڈے لئی تنگی نئیں پر تُہاڈے دِلاں وِچ تنگی اے۔ سو مَیں پُتر جان کے تُہانوں آکھنا آں پئی تُسی ایہدے بدلے وِچ کُھلے دِل والے ہو جاؤ۔ بے اِیماناں دے نال ڈِنگی پنجالی وِچ نا جُپو۔ کیوں جو راستبازی تے بے دِینی وِچ کِیہ میل جول اے؟ یا چانن تے ہنیرے وِچ کِیہ میل اے؟ مسِیح دا بلِیعال دے نال کِیہ واسطہ؟ یا اِیماندار دابے اِیمان نال کِیہ واسطہ؟ تے خُدا دے مَقدِس نُوں بُتاں نال کِیہ تعلق اے؟ کیوں جو اسی زِندہ خُدا دا مَقدِس آں۔ جیویں خُدا آکھیا اے پئی مَیں اوہناں وِچ وَسّاں گا تے اوہناں وِچ ٹُراں پھراں گا۔ تے مَیں اوہناں دا خُدا ہوواں گا۔ تے اوہ میری اُمّت ہون گے۔ ایس واسطے خُداوند آکھدا اے پئی ایہناں وِچوں نِکل کے وکھرے رہو تے ناپاک شے نُوں ہتّھ نا لاؤ۔ تے مَیں تُہانوں قبول کر لاں گا۔ تے تُہاڈا باپ ہوواں گا۔ تے تُسی میرے دِھیاں پُتر ہوؤ گے۔ ایہہ خُداوند قادرِ مُطلق دا قَول اے۔ سو اَے عزِیزو! ایس کر کے پئی ساڈے نال اجیہے وعدے کِیتے گئے۔ تے آؤ اپنے آپ نُوں ہر طرح دی جِسمانی تے رُوحانی گندگی توں پاک کریئے تے خُدا دے خَوف نال پاکیزگی نُوں کمال تِیکر پُچایئے۔ سانُوں اپنے دِلاں وِچ تھاں دیو۔ اساں کِسے نال بے انصافی نئیں کِیتی۔ کِسے نُوں وگاڑیا نئیں۔ کِسے نُوں دھوکھا نئیں دِتّا۔ مَیں تُہانوں مُجرم بنان لئی ایہہ نئیں آکھدا کیوں جو پہلاں ای آکھ چُکیا آں پئی تُسی ساڈیاں دِلاں وِچ اجیہے وَس گئے اوہ۔ پئی اسی تُسی اکٹّھے ای رہئے۔ تے جیویئے۔ مَیں تُہاڈے نال بڑی دلیری نال گلّاں کرنا آں۔ مَینُوں تُہاڈے اُتّے بڑا فخر اے۔ مَینُوں پُوری تسلّی ہوگئی اے۔ جِنّیاں مُصِیبتاں ساڈے اُتّے آؤندیاں نیں۔ اوہناں سبھناں وِچ میرا دِل خُوشی نال بھریا رہندا اے۔ کیوں جو جد اسی مَکِدُنیہ وِچ آئے۔ اوس ویلے وی ساڈے جِسم نُوں چَین نا مِلیا سگوں ہر پاسیوں مُصِیبت وِچ ای پَھسے رہے۔ باہر لڑائِیاں سن اندر خَوف۔ تَد وی عاجزاں نُوں تسلّی دین والے یعنی خُدا نے طِطُس دے آؤن نال سانُوں تسلّی دِتّی۔ تے نا نِرا اوہدے آؤن نال۔ سگوں اوہدی اوس تسلّی نال وی جیہڑی اوہنوں تُہاڈے ولّوں ہوئی تے اوس تُہاڈا شَوق۔ تُہاڈا غم۔ تے تُہاڈا جوش۔ جیہڑا میری بابت سی ساڈے اگّے بیان کِیتا۔ جِہدے توں مَیں ہور وی خُوش ہویا۔ مَیں تُہانوں اپنے خط نال اُداس تے کِیتا پر اوہدے توں پچھتاندا نئیں بھانویں پہلاں پچھتاندا ساں۔ کیوں جو ویکھنا آں پئی اوس خط توں تُہانوں غم ہویا بھانویں تھوڑے ای چِر تِیکر رہیا۔ ہُن مَیں ایس کر کے خُوش نئیں ہویا۔ پئی تُہانوں غم ہویا سگوں ایس لئی پئی تُہاڈے غم دا نتیجہ تَوبہ ہویا۔ کیوں جو تُہاڈا غم خُدا پرستی دا سی تاں جو تُہانوں ساڈے ولّوں کِسے طرح دا نُقصان نا ہوئے۔ کیوں جو خُدا پرستی دا غم اجیہی تَوبہ پَیدا کر دا اے جِہدا نتیجہ نجات اے۔ تے اوہدے توں پچھتانا نئیں پَیندا۔ پر دُنیا دا غم مَوت پَیدا کر دا اے۔ سو ویکھو ایس گلّ نے پئی تُسی خُدا پرستی دے نال اُداس ہوئے تُہاڈے وِچ کِنی کُو سرگرمی تے عُذر تے خفگی تے خَوف تے شَوق تے جوش تے بدلے دا خیال پَیدا کر دِتّا۔ تُساں ہر طرح نال ثابت کر وکھایا۔ پئی تُسی ایس گلّ وِچ بَری اوہ۔ سو بھانویں مَیں تُہانوں لِکھیا سی۔ پر نا اوہدے سبّب لِکھیا۔ جِس بے انصافی کِیتی۔ تے نا اوہدے سبّب جِہدے اُتّے بے انصافی ہوئی۔ پر ایس لئی پئی تُہاڈی سرگرمی جیہڑی ساڈے واسطے اے خُدا دے حضُور تُہاڈے اُتّے ظاہر ہو جائے۔ ایسے لئی سانُوں تسلّی ہوئی اے۔ تے ساڈی ایس تسلّی وِچ سانُوں طِطُس دی خُوشی دے سببّوں ہور وی وَدّھ خُوشی ہوئی کیوں جو تُہاڈے سبھناں دے سببّوں ایہدی رُوح فیر نَوِیں ہوگئی۔ تے جے مَیں اوہدے اگّے تُہاڈی بابت کُجھ فخر کِیتا تے شرمندہ نا ہویا سگوں جیویں اساں سارِیاں گلّاں تُہانوں سَچ سَچ آکھیاں ایسے طرح جیہڑا فخر اساں طِطُس دے اگّے کِیتا۔ اوہ وی سَچ نِکلیا۔ تے جدوں اوہنوں تُہاڈی سبھناں دی فرمانبرداری یاد آؤندی اے۔ پئی تُسی کِس طرح ڈر دے تے کمبدے ہوئے اوہدے نال مِلے۔ تے اوہدی دِلی مُحبّت تُہاڈے نال ہور وی وَدھیری ہوندی جاندی اے۔ مَیں خُوش آں پئی ہر گلّ وِچ تُہاڈے ولّوں میری تسلّی اے۔ ہُن بھراؤ! اسی تُہانوں خُدا دے اوس فضل دی خبر دینے آں۔ جیہڑا مَکِدُنیہ دِیاں کلِیسیاواں اُتّے ہویا۔ پئی مُصِیبت دی وڈّی ازمایش وِچ اوہناں دی بڑی خُوشی تے سخت غرِیبی نے اوہناں دی سخاوت نُوں حدّوں وَدّھ کر دِتّا۔ تے مَیں گواہی دینا آں پئی اوہناں قدر دے سببّوں سگوں قدروں وَدّھ کے اپنی خُوشی نال دِتّا۔ تے ایس خَیرات تے پاک لوکاں دی خِدمت وِچ سِیری ہوندی بابت ساڈے اگّے بڑی مِنّت نال عرض کِیتی۔ تے ساڈی آس دے سببّوں ای نئیں دِتّا۔ سگوں اپنے آپ نُوں پہلاں خُداوند دے تے فیر خُدا دی مرضی نال ساڈے سپُرد کِیتا۔ ایس واسطے اساں طِطُس نُوں نصِیحت کِیتی پئی جیویں اوس پہلاں شُروع کِیتا سی اوسے طرح ای تُہاڈے وِچ ایس خَیرات دے کمّ نُوں پُوریاں وی کرے۔ سو جیویں تُسی ہر گلّ وِچ اِیمان تے کلام تے عِلم تے پُوری سرگرمی تے اوس مُحبّت وِچ جیہڑی ساڈے نال رکھدے ہو اگّے وَدّھ گئے ہو ایسے طرح ای ایس خَیرات دے کمّ وِچ وی اگّے وَدّھ جاؤ۔ مَیں حُکم دے طَور نال نئیں آکھدا سگوں ایس لئی پئی ہورناں دی سرگرمی نال تُہاڈی مُحبّت وِچ سچیائی نُوں ازماواں۔ کیوں جو تُسی ساڈے خُداوند یِسُوع مسِیح دے فضل نُوں جان دے اوہ۔ پئی اوہ بھانویں دَولتمند سی پر تُہاڈی خاطر غرِیب بن گیا۔ تاں جو تُسی اوہدی غرِیبی دے سبّب دَولت مند بن جاؤ۔ تے مَیں ایس گلّ وِچ اپنی صلاح دینا آں کیوں جو ایہہ تُہاڈے لئی فائدے والی اے۔ ایس لئی پئی تُسی پِچّھلے ورھے توں نا نِرے ایس کمّ وِچ سگوں ایہدے اِرادے کرن وِچ وی پہلے سو۔ سو ہُن ایس کمّ نُوں پُوریاں وی کرو۔ تاں جو جیویں تُسی اِرادہ کرن وِچ تگڑے سو۔ اوسے طرح قدر دے سببّوں اوہنوں پُوریاں وی کرو۔ کیوں جو جے نِیّت ہوئے تے خَیرات اوہدے دے سببّوں قبول ہوئے گی۔ جو کُجھ بندے دے کول اے۔ نا اوس دے سببّوں جو کُجھ اوہدے کول نئیں۔ ایہہ نئیں پئی ہورناں نُوں آرام مِلے۔ تے تُہانوں اَوکھ ہوئے۔ سگوں برابری دے طَور نال ایس ویلے تُہاڈی دَولت نال اوہناں دا گھاٹا پُورا ہوئے۔ تاں جو اوہناں دی دَولت نال وی تُہاڈا گھاٹا پُورا ہوئے۔ تے ایس طرح نال برابری ہو جائے۔ جیویں لِکھیا ہویا اے۔ پئی جِس کِسے بُہتا اکٹّھا کِیتا اوہدا کُجھ وَدّھ نا نِکلیا تے جِس تھوڑا اکٹّھا کِیتا اوہدا کُجھ گھٹ نا نِکلیا۔ خُدا دا شُکر اے جیہڑا طِطُس دے دِل وِچ تُہاڈے واسطے اوہو جیہی ای سرگرمی پَیدا کر دا اے۔ کیوں جو اوس ساڈی نصِیحت نُوں مَن لیا۔ سگوں بُہت سرگرم ہو کے اپنی خُوشی نال تُہاڈے ولّ ٹُر پیا۔ تے اساں اوہدے نال اوس بھرا نُوں گھلّیا۔ جِہدی وڈیائی خُوشخبری دے سبّب سارِیاں کلِیسیاواں وِچ ہوندی اے۔ تے نِرا اوہو ای نئیں سگوں اوہ کلِیسیاواں ولّوں ایس خَیرات دے سببّوں ساڈے نال سفر کرن والا مُقرّر ہویا تے اسی ایہہ خِدمت ایس لئی کرنے آں پئی خُداوند دا جلال تے ساڈا شَوق ظاہر ہوئے۔ تے اسی بچدے رہنے آں۔ پئی جِس وڈّی خَیرات لئی خِدمت کرنے آں اوہدی بابت کوئی ساڈے اُتّے کوئی گلّ نا بنائے۔ کیوں جو اسی اجیہی شیواں دی تدبیر کرنے آں جیہڑیاں نا نِریاں خُداوند دے اگّے بھلیاں نیں سگوں بندیاں دے اگّے وی۔ تے اساں اوہناں نال اپنے اوس بھرا نُوں گھلّیا اے۔ جِہنُوں اساں بُہت سارِیاں گلّاں وِچ کئی وار ازما کے سرگرم ویکھیا اے پر ایس کر کے پئی اوہنوں تُہاڈے اُتّے بھروسا اے۔ ایس لئی ہُن بُہت وَدّھ سرگرم اے۔ جے کوئی طِطُس دی بابت پُچھے۔ تے اوہ میرا سِیری تے تُہاڈے واسطے میرے نال خِدمت کرن والا اے۔ جے ساڈیاں بھراواں دی بابت پُچھیا جاوے۔ تے اوہ کلِیسیاواں دے گھلّے ہوئے تے مسِیح دا جلال نیں۔ سو اپنی اوہ مُحبّت تے ساڈا اوہ فخر جیہڑا تُہاڈے اُتّے اے کلِیسیاواں دے رُوبرُو اوہناں اُتّے ثابت کرو۔ جیہڑی خِدمت پاک لوکاں دے واسطے کِیتی جاندی اے اوہدی بابت میرا تُہانوں لِکھنا بے فائدہ اے۔ کیوں جو مَیں تُہاڈا شَوق جاننا آں۔ جِہدے سبّب مَکِدُنیہ دیاں لوکاں اگّے تُہاڈے اُتّے فخر کرنا آں۔ پئی اَخیہ دے لوک پِچّھلے ورھے توں تیار نیں۔ تے تُہاڈی سرگرمی نے کئیاں لوکاں نُوں جوش دوایا۔ پر مَیں بھراواں نُوں ایس لئی گھلّیا۔ پئی اسی جیہڑا فخر ایس گلّے تُہاڈے اُتّے کرنے آں۔ اوہ بے اصل نا ٹھہرے سگوں تُسی میرے آکھے دے سببّوں تیار رہو۔ اجیہا نا ہوئے۔ پئی جے مَکِدُنیہ دے لوک میرے نال آؤن۔ تاں تُہانوں تیار نا ویکھن۔ تے اسی (ایہہ نئیں آکھدے پئی تُسی) اوس بھروسے دے سبّب شرمندے ہوئیے۔ ایس لئی مَیں بھراواں اگّے ایہہ درخواست کرنی ضرُور سمجھی۔ پئی اوہ جا کے تُہاڈی وعدہ کِیتی ہوئی بخشِش نُوں اگیترے ای تیار کر چھڈن۔ تے جو اوہ بخشِش وانگر تیار رہے نا بدوبدی دے طریقے نال۔ پر گلّ ایہہ اے پئی جیہڑا تھوڑا بِیجدا اے۔ اوہ تھوڑا وَڈّھے گا تے جیہڑا بُہتا بِیجدا اے اوہ بُہتا وَڈّھے گا۔ جِنّاں کِسے اپنے دِل وِچ ٹھہرایا اے۔ اوناں ای دیوے رنج ہو کے نئیں تے نا لاچاری نال۔ کیوں جو خُدا خُوشی نال دین والے نُوں پیار کر دا اے۔ تے خُدا تُہاڈے اُتّے ہر طرح دا فضل بُہتا کر سکدا اے۔ تاں جو تُہانوں سدا ہر شے وادُھو مِلیا کرے۔ تے ہر نیک کمّ لئی تُہاڈے کول بُہت کُجھ موجُود رہیا کرے۔ جیویں لِکھیا اے پئی اوس کھنڈایا اے۔ اوس کنگالاں نُوں دِتّا اے۔ اوہدی راستبازی سدا تِیکر باقی رہے گی۔ سو جیہڑا بِیجن والے نُوں وی تے کھان لئی روٹی دیندا اے۔ اوہ ای تُہاڈے لئی وی دے گا۔ تے اوہدے وِچ وادھا کر دے گا۔ تے تُہاڈی راستبازی دیاں پَھلاں نُوں وَدھائے گا۔ تُسی ہر شے نُوں وادھے نال لے کے سبھ طرح دی سخاوت کرو گے۔ جیہڑی ساڈی راہِیں خُدا دی شُکر گُزاری دا سبّب ہوندی اے۔ کیوں جو ایس سیوا نُوں پُوریاں کرن نال نا نِریاں پاک لوکاں دِیاں لوڑاں پُوریاں ہوندیاں نیں سگوں بتھیریاں لوکاں ولّوں خُدا دی بڑی شُکر گُزاری ہوندی اے۔ ایس لئی پئی جیہڑی نِیّت ایس خِدمت توں ثابت ہوئی اوہدے سببّوں اوہ خُدا دی وڈیائی کر دے نیں پئی تُسی مسِیح دی خُوشخبری دا اِقرار کر کے اوہدے اُتّے تابعداری نال عمل کر دے ہو۔ تے اوہناں دی تے ساریاں لوکاں دی مدد کرن وِچ سخی ہو۔ تے اوہ تُہاڈے لئی دُعا منگدے نیں تے تُہانوں پیار کر دے نیں۔ ایس لئی پئی تُہاڈے اُتّے خُدا دا بڑا ای فضل اے۔ شُکر خُدا دا اوہدی اوس بخشِش لئی جیہڑی بیانوں باہر اے۔ مَیں پَولُس جیہڑا تُہاڈے سامھنے عاجز تے پِٹھ پِچّھے تُہاڈے اُتّے دلیر آں۔ مسِیح دی حلِیمی تے نرمی یاد دوا کے آپ تُہاڈے اگّے عرض کرنا آں۔ سگوں مِنّت کرنا آں۔ پئی مَینُوں حاضر ہو کے اوس بے دھڑکی نال دلیر نا ہونا پَوے جِس نال مَیں کئیاں لوکاں اُتّے دلیر ہون دا اِرادہ کرنا آں جیہڑے سانُوں ایس طرح سمجھدے نیں۔ پئی اسی جِسم دے سببّوں زِندگی کٹنے آں۔ کیوں جو اسی بھانویں جِسم وِچ زِندگی کٹنے آں پر جِسم دے سببّوں لڑدے نئیں۔ ایس لئی پئی ساڈی لڑائی دے ہتّھیار جِسمانی نئیں۔ سگوں خُدا دے اگّے قِلعیاں نُوں ڈھاہ سُٹّن جو گے نیں۔ سو اسی وہماں تے ہر اُچّی شے نُوں جِس خُدا دی پہچان دے برخلاف سِر چُکیا ہویا اے۔ ڈھاہ دینے آں۔ تے ہر اِک خیال نُوں قید کر کے مسِیح دا تابعدار بنا دینے آں۔ تے اسی تیار آں پئی جد تُہاڈی تابعداری پُوری ہوئے تے ہر طرح دی نافرمانی دا بدلہ لئیے۔ تُسی تے اوہناں شیواں نُوں ویکھدے ہو۔ جیہڑیاں اَکھّیاں اگّے نیں۔ جے کِسے نُوں اپنے اُتّے بھروسا ہوئے۔ پئی اوہ مسِیح دا اے۔ تے اپنے دِل وِچ ایہہ وی سوچ لَوے۔ پئی جیویں اوہ مسِیح دا اے۔ اوسے طرح اسی وی آں۔ کیوں جو جے مَیں ایس اختیار اُتّے کُجھ وَدّھ فخر وی کراں۔ جیہڑا خُداوند تُہاڈے بنان لئی مَینُوں دِتّا اے۔ تے تُہاڈے وگاڑن لئی نئیں۔ تے مَیں شرمندہ نا ہوواں گا۔ ایہہ مَیں ایس کر کے آکھنا آں پئی خطاں نال تُہانوں ڈران والا نا بناواں۔ کیوں جو آکھدے نیں پئی اوہدے خط تے ضرُور تاثِیر کرن والے زبردست نیں پر جد آپی موجُود ہوندا اے۔ تے ماڑا جِہیا معلُوم ہوندا اے۔ تے اوہدا بولنا ایویں کوِیں ای اے۔ سو ایس طرح آکھن والا سمجھ چھڈے پئی جیویں پِٹھ پِچّھے خطاں وِچ ساڈا کلام اے اوہو جِہیا ای آپے ہوندیاں ہویاں ساڈا کمّ وی ہوئے گا۔ کیوں جو ساڈے وِچ ایہہ حَوصلہ نئیں پئی اپنے آپ نُوں اوہناں بندیاں وِچ رلایئے۔ یاں اوہناں نال کوئی برابری کریئے جیہڑے اپنی نیک نامی جتاؤندے نیں۔ پر اوہ آپ ای اپنے آپ نُوں مَن کے تے اپنے آپ دی اِک دُوجے نال برابری کر کے نادان بن دے نیں۔ پر اسی اندازیوں وَدّھ فخر نا کراں گے۔ سگوں اوسے ای حد دے اندازے دے سببّوں جیہڑی خُدا ساڈے لئی مُقرّر کِیتی اے۔ جِہدے اندر تُسی وی آگئے ہو۔ کیوں جو اسی اپنے آپ نُوں حدّوں وَدّھ نئیں وَدھاندے جِہیا تُہاڈے کول نا اپڑن ویلے ہوندا۔ سگوں اسی مسِیح دی خُوشخبری دیندے ہوئے تُہاڈے کول اَپڑ گئے ساں۔ تے اسی اندازیوں وَدّھ کے یعنی ہورناں دِیاں محِنتاں اُتّے فخر نئیں کر دے۔ پر اُمّیدوار آں پئی جد تُہاڈے اِیمان وِچ وادھا ہوئے تے اسی تُہاڈے سببّوں اپنی حد دے سببّوں ہور وی وَدِھیئے۔ تاں جو تُہاڈیاں حداں توں پرانہہ خُوشخبری پُچایئے۔ نا پئی ہورناں دی حد وِچ بنیاں بنائِیاں شیواں اُتّے فخر کریئے۔ سو جیہڑا کوئی فخر کرے۔ سو خُداوند اُتّے فخر کرے۔ کیوں جو جیہڑا کوئی اپنی نیک نامی جتاؤندا اے۔ اوہ قبولیا ہویا نئیں۔ سگوں جِہنُوں خُداوند نیک نام ٹھہراؤندا اے اوہو ای قبولیا ہویا اے۔ چَنگا ہوندا جے تُسی میری تھوڑی جیہی بیواقوفی دی برداشت کر سکدے۔ ہاں تُسی میری برداشت کر دے تے اوہ۔ مَینُوں تُہاڈے لئی خُدا جیہی غیرت اے۔ کیوں جو اِکّو ای بندے دے نال تُہاڈی منگنی کِیتی اے۔ تاں جو تُہانوں پاک کواری وانگُوں مسِیح دے کول حاضر کراں۔ پر مَیں ڈرناں آں۔ کِتے اجیہا نا ہوئے۔ جِہیا سَپّ نیں اپنی مکّاری نال حوّا نُوں چُکیا ایسے طرح تُہاڈے خیال وی اوس سادگی تے پاکیزگی توں ہَٹ جان جیہڑی مسِیح دے نال ہونی چاہیدی اے۔ کیوں جو جیہڑا آؤندا اے جے اوہ کِسے دُوجے یِسُوع دی منادی کر دا اے۔ جِہدی اساں منادی نئیں کِیتی۔ یا کوئی ہور رُوح تُہانوں مِلدا اے۔ جیہڑا نئیں سی مِلیا۔ یا دُوجی خُوشخبری مِلی۔ جِہنُوں تُساں قبول نئیں سی کِیتا۔ تے تُہاڈا سہہ لینا ٹھیک اے مَیں تے اپنے آپ نُوں اوہناں وڈّیاں رسُولاں نالوں کُجھ گھٹ نئیں سمجھدا۔ تے جے بولن دا مَینُوں ولّ نئیں آؤندا تے عِلم تے آؤندا اے۔ سگوں اساں اوہنوں ہر گلّے ساریاں لوکاں اُتّے تُہاڈی خاطر ظاہر کر دِتّا۔ کِیہ ایہہ مَیتھوں خطا ہوئی؟ پئی مَیں تُہانوں خُدا دی خُوشخبری مُفت اپڑا کے اپنے آپ نُوں نِیویاں کِیتا۔ تاں جو تُسی اُچّے ہو جاؤ؟ مَیں ہورناں کلِیسیاواں نُوں لُٹیا۔ یعنی اوہناں کولوں مزدُوری لئی۔ تاں جو تُہاڈی خِدمت کراں۔ تے جد مَیں تُہاڈے کول ساں تے ضرورت مند ہوگیا ساں۔ تَد وی مَیں کِسے اُتّے بھار نا پایا۔ کیوں جو بھراواں مَکِدُنیہ توں آ کے میری لوڑ پُوری کر دِتّی سی۔ تے مَیں ہر گلّ وِچ تُہاڈے اُتّے بھار پان توں رُکیا رہیا۔ تے رہاں گا وی۔ مسِیح دی سچیائی دی سَونہہ جیہڑی میرے وِچ اے۔ اَخیہ دے علاقے وِچ کوئی بندہ مَینُوں ایہہ فخر کرن توں نا روکے گا۔ کیوں؟ ایس کر کے پئی مَیں تُہاڈے نال مُحبّت نئیں رکھدا؟ ایہہ خُدا جان دا اے۔ پر جو کُجھ کرناں آں اوہ ای کر دا رہاں گا۔ تاں جو داء لَبّھن والیاں دا داء لگّن نا دیاں۔ سگوں جِس گلّے اوہ فخر کر دے نیں اوہدے وِچ ساڈے جیہے ای نِکلن۔ کیوں جو اجیہے لوک جُھوٹھے رسُول تے دغابازی دے کمّ کرن والے نیں تے اپنے آپ نُوں مسِیح دے رسُولاں جیہے بناندے نیں۔ تے کُجھ عجب نئیں۔ کیوں جو شیطان وی اپنے آپ نُوں نُورانی فرِشتے جِہیا بناندا اے۔ سو جے اوہدے خادم وی راستبازی دے خادماں جیہے بن جان تے کوئی وڈّی گلّ نئیں۔ پر اوہناں دا اوڑک اوہناں دے کمّاں دے سببّوں ہوئے گا۔ مَیں فیر آکھنا آں۔ پئی مَینُوں کوئی مُورکھ نا سمجھے۔ نئیں تے مُورکھ ای سمجھ کے مَینُوں قبول کرو۔ تاں جو مَیں وی تھوڑا جِہیا فخر کراں۔ جو کُجھ مَیں آکھنا آں۔ اوہ خُداوند وانگر نئیں سگوں جیویں مُورکھ وانگُوں تے اوس حَوصلے نال آکھنا آں۔ جیہڑا فخر کرن وِچ ہوندا اے۔ جِتّھے ہور بتھیرے جِسمانی طَور نال فخر کر دے نیں۔ مَیں وی کراں گا۔ کیوں جو تُسی تے سِیانے ہو کے خُوشی نال مُورکھاں دی برداشت کر دے ہو۔ جد کوئی تُہانوں غلام بناندا اے یا کھا لَیندا اے۔ یا پھسا لَیندا اے۔ یا اپنے آپ نُوں وَڈا بناندا اے۔ یا تُہاڈے مُنھ اُتّے چپیڑ مار دا اے۔ تے تُسی سہہ لَیندے ہو۔ میرا ایہہ آکھنا بے عِزّتی دے طَور اُتّے ای سہی۔ پئی اسی ماڑے جیہے ساں۔ پر جِس کِسے گلّ وِچ کوئی دلیر اے (بھانویں ایہہ آکھنا کملی گلّ اے) مَیں وی دلیر آں۔ اوہ عِبرانی نیں؟ مَیں وی آں۔ اوہ اِسرائیلی نیں؟ مَیں وی آں اوہ ابرہام دی نسل وِچوں نیں؟ مَیں وی آں۔ اوہ مسِیح دے خادم نیں؟ (میرا ایہہ آکھنا نادانی اے) مَیں وَدّھ آں۔ محِنتاں وِچ وَدّھ کے۔ قید وِچ وَدّھ کے کولڑے کھان وِچ حدّوں وَدّھ۔ کئی واری مَوت دے خطریاں وِچ رہیا آں۔ مَیں یہُودِیاں توں پنج واری اِک گھٹ چالی چالی کولڑے کھادے۔ تِنّ واری بیَنت کھادے اِک وار پتّھراں نال ماریا گیا۔ تِنّ واری جہاز ٹُٹن دی بلا وِچ پیا۔ اِک رات دِن سمُندر وِچ کَٹیا۔ مَیں کئی واری سفراں وِچ۔ دریاواں دے خطریاں وِچ۔ ڈاکُوؤاں دے خطریاں وِچ۔ اپنی قوم توں خطریاں وِچ۔ غیر قوماں توں خطریاں وِچ۔ شہر دیاں خطریاں وِچ۔ بیابان دیاں خطریاں وِچ۔ سمُندر دیاں خطریاں وِچ۔ جُھوٹھے بھراواں دے خطریاں وِچ۔ محنت تے مُشقّت وِچ۔ کئی واری جاگدیاں رہن۔ بُھکھ تے تَریہہ دی مُصِیبت وِچ۔ کئی واری فاقے وِچ۔ پالے تے ننگے رہن دی حالت وِچ رہیا آں۔ ہورناں گلّاں دے سِوا جِنہاں دا مَیں ذِکر نئیں کر دا۔ سارِیاں کلِیسیاواں دا فِکر مَینُوں روز دِہاڑے آ دبدا اے۔ کِہدی کمزوری توں مَیں کمزور نئیں ہوندا؟ کِہدے ٹھوکر کھان توں میرا دِل نئیں دُکھدا؟ جے فخر ای کرنا پئے۔ تے اوہناں گلّاں دا فخر کراں گا۔ جیہڑیاں میری کمزوری دِیاں نیں۔ خُداوند یِسُوع دا خُدا تے باپ جِہدی سدا تِیکر حمد ہوئے۔ جان دا اے۔ پئی مَیں جُھوٹھ نئیں آکھدا۔ دمِشق وِچ اوس حاکم جیہڑا بادشاہ اَرِتاس ولّوں سی۔ میرے پھڑن دے لئی دمشقیاں دے شہر اُتّے پَہرا بہال چھڈیا سی۔ فیر مَیں ٹوکرے وِچ باری دی راہِیں کوٹ وِچوں لمکایا گیا۔ تے مَیں اوہدے ہتھّوں بچ گیا۔ مَینُوں فخر کرنا ضرُور ہویا بھانویں فائدہ مند نئیں۔ سو جیہڑے رویا تے اِلہام مَینُوں خُداوند ولّوں مِلے۔ مَیں اوہناں دا بیان کرنا آں۔ مَیں مسِیح وِچ اِک بندے نُوں جاننا آں چَوداں ورھے ہوئے پئی اوہ اِک دم ترِیجے اسمان تِیکر اُٹھا لیا گیا۔ مَینُوں پتا نئیں پئی بدن سَنے یا بدن بِناں۔ ایہہ خُدا نُوں پتا اے۔ تے مَیں ایہہ وی جاننا آں پئی اوس بندے نیں (بدن سَنے یا بدن بِناں۔ ایہہ مَینُوں پتا نئیں خُدا نُوں پتا اے۔) اِک دم بہشت وِچ اَپڑ کے اِنج دِیاں گلّاں سُنیاں جیہڑیاں آکھن والِیاں نئیں۔ تے جِنہاں دا آکھنا بندے نُوں روا نئیں۔ مَیں اجیہے بندے اُتّے تے فخر کراں گا پر اپنے اُتّے اپنی کمزوری دے بِناں فخر نا کراں گا۔ تے جے فخر کرنا چاہاں وی۔ تے مُورکھ نا ٹھہراں گا۔ ایس لئی پئی سَچ بولاں گا۔ پر تَد وی رُکیا رہنا آں۔ تاں جو کوئی مَینُوں اوہدے نالوں وَدّھ نا سمجھے جِہیا مَینُوں ویکھدا اے۔ یا میرے کولوں سُندا اے۔ تے الہاماں دے بُہتے ہون دے سببّوں پئی متے مَیں پُھل نا جاواں میرے جِسم وِچ کنڈا چوبھیا گیا اے۔ یعنی شیطان دا گھلّیا ہویا تاں جو مَینُوں ہُورے مارے تے مَیں پُھل نا جاواں۔ ایہدے لئی مَیں تَرے واری خُدا اگّے عرض کِیتی۔ پئی ایہہ مَیتھوں دُراڈے ہو جائے۔ پر اوس مَینُوں آکھیا پئی میرا فضل تیرے لئی بہتیرا اے۔ کیوں جو میری قُدرت کمزوری وِچ پُوری ہوندی اے سو مَیں بڑی خُوشی نال اپنیاں کمزوریاں اُتّے فخر کراں گا۔ تاں جو مسِیح دی قُدرت میرے اُتّے رہے۔ ایس لئی مَیں مسِیح دی خاطر کمزوری وِچ۔ بے عزّتِیاں وِچ۔ لوڑاں وِچ۔ ستائے جان وِچ۔ تنگِیاں وِچ خُوش آں۔ کیوں جو جد مَیں کمزور ہوناں آں۔ اوسے ویلے زور والا ہوناں آں۔ مَیں مُورکھ تے بنیاں پر تُساں ای مَینُوں لاچار کِیتا کیوں جو تُہانوں میری وڈیائی کرنی چاہیدی سی۔ ایس لئی پئی مَیں اوہناں وڈّیاں رسُولاں نالوں کِسے گلّ وِچ گھٹ نئیں بھانویں کُجھ وی نئیں ساں۔ رسُول ہوندیاں نشانِیاں پُورے صبر دے نال نشاناں تے عجب کمّاں تے کراماتاں دے وسیلے تُہاڈے وِچ ظاہر ہوئیاں۔ تُسی کیہڑی گلّ وِچ ہورناں کلِیسیاواں نالوں گھٹ نِکلے۔ ایہدے سِوا پئی مَیں تُہاڈے اُتّے بھار نا پایا؟ میری ایہہ بے انصافی مُعاف کرو۔ ویکھو ایہہ ترِیجی واری مَیں تُہاڈے کول آؤن لئی تیار آں۔ تے تُہاڈے اُتّے بھار نا پاں گا۔ ایس لئی پئی مَیں تُہاڈا مال نئیں سگوں تُہانوں چاہناں آں۔ کیوں جو بچّیاں نُوں ماں پئیو لئی جوڑنا نئیں چاہیدا سگوں ماپیاں نُوں بچّیاں لئی جوڑنا چاہیدا اے۔ تے مَیں تُہاڈیاں رُوحاں واسطے بُہت خُوشی نال خرچ کراں گا۔ سگوں آپ وی خرچ ہو جاواں گا۔ جے مَیں تُہاڈے نال وَدّھ مُحبّت رکھاں تے تُسی میرے نال گھٹ مُحبّت رکھو گے؟ پر ہوسکدا اے پئی مَیں آپے ای تُہاڈے اُتّے بھار نا پایا ہوئے۔ پر مکّار جو ہویا ایس لئی تُہانوں دھوکھا دے کے پھسا لیا ہوئے۔ جِنہاں نُوں مَیں تُہاڈے کول گھلّیا۔ اوہناں وِچوں کِسے دی راہِیں دغے نال تُہاڈے کولوں کُجھ لے لیا؟ مَیں طِطُس نُوں سمجھا کے اوہدے نال اوس بھرا نُوں گھلّیا۔ سو طِطُس تُہاڈے کولوں دغے نال کُجھ لے لیا؟ ساڈے دوہاں دا چال چَلّن اِکّو ای رُوح دی ہدایت دے سببّوں نئیں سی؟ اسی اِکّو ای کُھرے اُتّے نا ٹُریئے؟ تُسی اجے تِیکر ایہو ای سمجھدے ہوؤگے پئی اسی تُہاڈے اگّے عُذر کرنے آں۔ اسی تے خُدا نُوں حاضر جان کے مسِیح وِچ سَچ بولنے آں۔ تے پیاریو! ایہہ سبھ کُجھ تُہاڈی ترقی دے لئی اے۔ کیوں جو مَیں ڈرنا آں۔ کِتے اجیہا نا ہوئے۔ پئی مَیں آ کے جیویں تُہانوں چاہناں آں ایہو جِہیا نا ویکھیاں۔ تے مَینُوں جیہا تُسی نئیں چاہندے اوہو جِہیا ای ویکھو۔ پئی تُہاڈے وِچ جھگڑا۔ ساڑا۔ غُصّہ۔ جُدائِیاں۔ بدگوئِیاں۔ چُغلیاں۔ شیخیاں تے فساد ہون۔ تے فیر مَیں جد آواں۔ تے میرا خُدا مَینُوں تُہاڈے اگّے عاجز کرے۔ تے مَینُوں بتھیریاں لئی افسوس کرنا پَوے۔ جِنہاں پہلاں گُناہ کِیتے نیں۔ تے اوس پلِیتی تے زنا۔ تے شہوت پرستی توں جیہڑی اوہناں توں ہوئی تَوبہ نا کِیتی۔ ہُن ترِیجی وار مَیں تُہاڈے کول آؤناں آں دو یا تِنّ گواہاں دی زبانی ہر اِک گلّ ثابت ہو جائے گی۔ جیویں مَیں جد دُوجی وار حاضر ساں۔ تے پہلاں توں آکھ دِتّا سی۔ ایسے طرح ای ہُن حاضر نا ہو کے وی اوہناں لوکاں نُوں جِنہاں پہلاں گُناہ کِیتے نیں۔ تے ہور ساریاں لوکاں نُوں پہلوں ای آکھ دینا آں پئی جے فیر آواں تے چھڈاں گا نئیں۔ کیوں جو تُسی ایہدی دلیل چاہندے اوہ۔ پئی مسِیح میرے وِچ بولدا اے۔ تے اوہ ساڈے لئی کمزور نئیں۔ سگوں تُہاڈے وِچ زوراور اے۔ ہاں اوہ کمزوری دے سببّوں صلِیب دِتّا گیا پر خُدا دی قُدرت دے سببّوں زِندہ اے۔ تے اسی وی اوہدے وِچ کمزور تے آں پر اوہدے نال خُدا دی اوس قُدرت نال زِندہ ہوواں گے جیہڑی تُہاڈے لئی اے۔ تُسی اپنے آپ نُوں ازماؤ پئی اِیمان وِچ ہویا نئیں۔ اپنے آپ نُوں پرکھو تُسی اپنی بابت ایہہ نئیں جان دے پئی یِسُوع مسِیح تُہاڈے وِچ اے؟ نئیں تے تُسی نامقبُول اوہ۔ پر مَیں آس رکھنا آں پئی تُسی معلُوم کر لو گے پئی اسی تے نامقبُول نئیں۔ تے اسی خُدا توں دُعا منگنے آں۔ پئی تُسی کوئی بُریائی نا کرو۔ نا ایس لئی پئی اسی قبولے ہوئے معلُوم ہوئے۔ سگوں ایس لئی پئی تُسی نیکی کرو۔ بھانویں اسی نامقبُول وی ٹھہریئے۔ کیوں جو اسی سچیائی دے برخلاف کُجھ نئیں کر سکدے۔ پر نِرا سچیائی دے لئی کر سکنے آں۔ جدوں اسی کمزور آں تے تُسی زوراور تَد اسی خُوش آں تے ایہہ دُعا وی منگنے آں۔ پئی تُسی کامِل بنو۔ ایس لئی مَیں غیر حاضری وِچ ایہہ گلّاں لِکھنا آں۔ تاں جو حاضر ہو کے مَینُوں اوس اختیار دے سببّوں سختی نا کرنی پَوے۔ جیہڑا خُداوند مَینُوں بنان لئی دِتّا اے نا وگاڑن لئی۔ سو بھراؤ! خُوش رہو۔ کامِل بنو۔ خاطرجمع رکھو۔ اِک دِل رہو۔ میل ملاپ رکھو۔ تے خُدا مُحبّت تے تسلّی دا سرچشمہ تُہاڈے نال ہوئے گا۔ آپو وِچ پاک بوسہ لے کے سلام آکھو۔ سارے پاک لوک تُہانوں سلام آکھدے نیں۔ خُداوند یِسُوع مسِیح دا فضل تے خُدا دی مُحبّت تے پاک رُوح دی سنگت تُہاڈے سبھناں نال ہوندی رہے۔ پَولُس ولّوں جیہڑا نا بندیاں ولّوں تے نا بندیاں دی راہِیں پر یِسُوع مسِیح تے خُدا باپ ولّوں جِس اوہنوں مُردیاں وِچوں جوالیا رسُول اے۔ تے ساریاں بھراواں ولّوں جیہڑے میرے نال ہَین گلِتیہ دِیاں کلِیسیاواں دے ناں۔ خُدا باپ تے ساڈے خُداوند یِسُوع مسِیح ولّوں فضل تے تسلّی تُہانوں مِلدی رہے۔ جِس ساڈیاں گُناہاں دے بدلے اپنے آپ نُوں قُربان کر دِتّا۔ ایس کر کے پئی ساڈے خُدا تے باپ دی مرضی دے سببّوں سانُوں ہُن وی بَھیڑی دُنیا توں چھڈائے۔ اوہدی وڈیائی سدا تِیکر ہوندی رہے۔ آمِین۔ مَینُوں اچرج جاپدا اے پئی تُسی ایڈی چھیتی اوہدے ولّوں پھر کے جِس تُہانوں مسِیح دے فضل نال سدّیا کِسے ہور خُوشخبری ولّ دھیان کر دے ہو۔ پر اوہ دُوجی خُوشخبری نئیں۔ ہاں بعضے اجیہے نیں جیہڑے تُہانوں گھبراؤندے تے مسِیح دی خُوشخبری نُوں وِگاڑنا چاہندے نیں۔ پر جے اسی یا اسمانوں کوئی فرِشتہ وی بِناں اوس خُوشخبری دے جیہڑی اساں تُہانوں سُنائی اے۔ کوئی ہور خُوشخبری تُہانوں سُنائے تے لعنتی ہوئے۔ جیہا اسی پہلاں آکھ چُکے آں۔ تِہا ای ہُن مَیں فیر وی تُہانوں آکھنا آں۔ پئی اوس خُوشخبری دے بِناں جیہڑی تُساں قبول کِیتی سی جے کوئی تُہانوں ہور خُوشخبری سُنائے سو لعنتی ہوئے۔ ہُن مَیں بندیاں نُوں سجن بنانا آں یا خُدا نُوں؟ مَیں بندیاں نُوں راضی کرنا چاہناں آں؟ جے مَیں ہُن تِیکر بندیاں نُوں خُوش کر دا رہندا تے مسِیح دا بندہ نا ہوندا۔ بھراؤ مَیں تُہانوں دس چھڈناں آں۔ پئی جیہڑی خُوشخبری مَیں تُہانوں سُنائی اوہ بندے وانگر نئیں۔ کیوں جو نا تے اوہ مَینُوں بندیاں ولّوں اَپڑی تے نا مَینُوں کِسے سِکھائی۔ پر یِسُوع مسِیح ولّوں مَینُوں اوہدا اِلہام ہویا۔ ایس لئی پئی یہُودی طریقے وِچ جیہڑا میرا حال سی۔ تُساں سُن ای لیا اے۔ مَیں خُدا دی کلِیسیا نُوں حدّوں وَدّھ کے ستاؤندا تے برباد کر دا ساں۔ تے مَیں یہُودی طریقے وِچ اپنی قوم دِیاں بتھیریاں ہانِیاں نالوں وَدھدا جان دا ساں تے وڈّیاں دِیاں رِیتاں دے وِچ بڑے جوش نال لگّا ہویا ساں۔ پر جدوں اوس خُدا دی جِس مَینُوں میری ماں دے ڈِھڈ توں وَکھریاں کِیتا تے اپنے فضل نال سدّیا ایہہ مرضی ہوئی۔ پئی اپنے پُتر نُوں میرے دِل وِچ ظاہر کرے۔ ایس کر کے پئی غیر قوماں وِچ مَیں اوہدی خُوشخبری دیاں۔ تے نا مَیں گوشت تے لہو کولوں صلاح پُچھی۔ تے نا یرُوشلِیم وِچ اوہناں دے کول گیا۔ جیہڑے مَیتھوں پہلے رسُول سن۔ سگوں عرب نُوں ٹُر گیا۔ تے فیر اوتھوں دمِشق پرت آیا۔ تَد تِنّاں ورھیاں پِچّھوں کیفا نُوں مِلن لئی مَیں فیر یرُوشلِیم گیا۔ تے پندراں دِن اوہدے کول رہیا۔ پر ہورناں رسُولاں وِچوں خُداوند دے بھرا یعقُوب دے بِناں کِسے نُوں نا ویکھیا۔ جیہڑیاں گلّاں مَیں تُہانوں لِکھناں آں ویکھو خُدا نُوں گواہ کر کے آکھنا آں۔ پئی اوہ جُھوٹھیاں نئیں۔ ایدوں پِچّھے مَیں سُوریہ تے کِلِکیہ دے علاقیاں وِچ آیا۔ تے یہُودیہ دِیاں کلِیسیاواں جیہڑیاں مسِیح وِچ سن میرِیاں واقف تے نئیں سن۔ پر سُندیاں سن پئی جیہڑا پہلاں سانُوں ستاؤندا سی۔ ہُن اوسے اِیمان دی جِہنُوں برباد کر دا سی۔ خُوشخبری دیندا اے۔ تے اوہ میرے صدقہ خُدا دی وڈیائی کر دیاں سن۔ فیر چَوداں ورھیاں پِچّھوں برنباس دے نال مَیں دُوجی وار یرُوشلِیم گیا تے طِطُس نُوں وی نال لے گیا۔ تے میرا جانا اِلہام دے سببّوں ہویا تے اوہناں نُوں اوہ خُوشخبری دسی جِہدی منادی مَیں غیر قوماں وِچ کرنا آں تے اوہناں لوکاں نُوں جیہڑے کِسے گنتری وِچ سن۔ پڑدے نال دسی۔ ایس کر کے پئی متے میری اگلی پِچّھلی کِیتی کتری ایویں نا جائے۔ پر طِطُس جیہڑا میرے نال سی۔ تے یُونانی اے سُنتی بہن لئی مجبُور نا کِیتا گیا۔ ایہہ اوہناں جُھوٹھیاں بھراواں دے سببّوں ہویا جیہڑے چوری چوری آ وڑے سن ایس کر کے پئی اوس اَزادی دا جیہڑی سانُوں مسِیح وِچ مِلدی اے سُوہے بن کے پتا لین۔ تے سانُوں غلامی وِچ لیاؤن۔ اِک گھڑی وی اوہناں دا تابعیاں رہنا سانُوں نا سکھایا۔ ایس کر کے پئی خُوشخبری دی سچیائی تُہاڈے وِچ قیم رہے۔ تے جیہڑے لوک کِسے گنتری وِچ سن (بھانویں کیویں وی سن۔) مَینُوں ایس گلّ نال کِیہ۔ خُدا کِسے بندے دی رَئی نئیں کر دا۔ اوہناں لوکاں جیہڑے کِسے گنتری وِچ سن مَینُوں کوئی صلاح نا دِتّی۔ پر اُلٹا جدوں اوہناں ایہہ ویکھیا۔ پئی سُنتِیاں نُوں خُوشخبری دین دا کمّ پطرس نُوں سونپیا گیا۔ ایسے طرح بے سُنتِیاں نُوں سُنان دا میرے سپُرد ہویا۔ (کیوں جو جِس سُنتِیاں دی رسالت لئی پطرس وِچ اثر کِیتا اوسے ای غیر قوماں لئی میرے وِچ اثر کِیتا۔) تے یعقُوب تے کیفا تے یُوحنّا نے جیہڑے کلِیسیا دے سرپَینچ سمجھے جاندے سن۔ جدوں اوس فضل نُوں جیہڑا مَینُوں مِلیا سی معلُوم کِیتا تے سانجھداری دا سَجّا ہتّھ دے کے مَینُوں تے برنباس نُوں جوڑی دار بنا لیا۔ پئی اسی غیر قوماں ولّ جائیے۔ تے اوہ سُنتِیاں ولّ۔ تے نِرا ایہہ آکھیا پئی غرِیباں نُوں یاد رکھو۔ جِس گلّ دی مَینُوں آپ وی لگن سی۔ تے جدوں کیفا انطاکیہ وِچ آیا۔ مَیں رُوبرُو ہو کے اوہدا مُقابلہ کِیتا۔ کیوں جو اوہ تقصِیری سی۔ ایس لئی پئی یعقُوب ولّوں کُجھ جِنّیاں دے آؤن توں پہلاں تے اوہ غیر قوماں نال کھاندا ہوندا سی۔ پر جدوں اوہ آ گئے تے سُنتِیاں توں ڈر دا مارا ہَٹ گیا۔ تے وکھرا ہوگیا۔ تے رہندے یہُودی وی اوہدے نال رَل کے دو رنگی چلّے۔ ایتھوں تِیکر پئی برنباس وی اوہناں نال دو رنگی وِچ رُڑھ وَگیا۔ جدوں مَیں ویکھیا پئی اوہ اِنجِیل دی سچیائی دے سببّوں سِدّھے راہ نئیں ٹُردے تے مَیں سبھناں دے سامھنے کیفا نُوں آکھیا۔ پئی جے یہُودی ہوندیاں تیرا ورتاوا غیر قوماں وانگر رہیا اے۔ نا یہُودِیاں وانگر تے تُوں یہُودِیاں دِیاں رِیتاں اُتّے چَلّن لئی غیر قوماں نُوں مجبُور کیوں کرنا ایں؟ بھانویں اسی جنم دے یہُودی آں تے گُناہی غیر قوماں وِچوں نئیں۔ تَد وی ایہہ جان کے پئی بندہ شریعت دے کمّاں نال نئیں سگوں نِرا یِسُوع مسِیح اُتّے اِیمان لیاؤن نال راستباز ٹھہردا اے۔ اساں آپ وی مسِیح یِسُوع اُتّے اِیمان لیاندا۔ ایس کر کے پئی اسی مسِیح اُتّے اِیمان لیاؤن نال راستباز سمجھے جائیے نا شریعت دیاں کمّاں نال۔ کیوں جو شریعت دیاں کمّاں نال کِسے راستباز نئیں ٹھہرنا۔ پر اسی جیہڑے مسِیح وِچ راستباز ٹھہرن دی چاہ کرنے آں جے آپی گُناہیں نِکلئے تے دسو گُناہ دا مسِیح سیوادار اے؟ کدی وی نئیں۔ کیوں جو جے مَیں اوہناں شیواں نُوں جِنہاں نُوں ڈھاہ چھڈیا اے فیر بناواں۔ تے اپنے آپ نُوں تقصِیری ٹھہرانا آں۔ ایس کر کے پئی مَیں شریعت دی راہِیں شریعت ولّوں مر گیا تاں جو خُدا ولّوں جِیُوپَواں۔ مَیں مسِیح دے نال سُولی دِتّا گیا آں ہُن مَیں جِیوندا نا رہیا۔ سگوں مسِیح میرے وِچ جِیوندا اے۔ تے مَیں جیہڑا ہُن جِسم وِچ جِیوناں آں۔ تے خُدا دے پُتر اُتّے اِیمان لیاؤن نال جِیوناں آں۔ جِس مَینُوں پیار کِیتا تے میری تھانویں اپنا آپ دے دِتّا۔ مَیں خُدا دے فضل نُوں ایویں نئیں گواؤندا۔ کیوں جو جے راست بازی شریعت دی راہِیں ہوندی اے تے مسِیح ایویں موئیا۔ اَے مُورکھ گلِتیو! کِس تُہاڈے اُتّے ٹُونا کِیتا اے؟ جِنہاں دِیاں اَکھّیاں سامھنے یِسُوع مسِیح سُولی چاہڑیا ہویا وکھالی دِتّا۔ مَیں تُہانوں ایہی گلّ پُچھنی چاہناں آں پئی تُہانوں شریعت دیاں کمّاں پِچھّے رُوح مِلیا یا اِیمان دے سنیہے نال؟ تُسی اجیہے مُورکھ ہو۔ پئی رُوح نال شُروع کر کے ہُن جِسم نال پُورا کرنا چاہندے ہو؟ تُساں اینِیاں تکلیفاں بے فید جھلیاں نیں؟ پر سَچّی مُچّی بے فید نئیں۔ تَد جیہڑا تُہانوں رُوح بخشدا اے تے تُہاڈے وِچ کراماتاں وکھاؤندا اے اوہ شریعت دے کمّاں نال اجیہا کر دا اے۔ یا اِیمان دے سنیہے نال؟ جیویں ابرہام خُدا اُتّے اِیمان لیاندا تے اوہ اوہدے حق وِچ راستبازی گِنیا گیا۔ سو جان لوؤ پئی جیہڑے اِیمان والے نیں۔ اوہو ابرہام دے پُتر نیں۔ تے پاک کتاب نے پہلاں ای ایہہ جان کے پئی خُدا غیر قوماں نُوں اِیمان دی راہِیں راست باز ٹھہرائے گا ابرہام نُوں اگیتری ایہہ خُوشخبری سُنا دِتّی۔ پئی سارِیاں قوماں تیرے وِچ برکتاں پان گِئیاں۔ ایس لئی جیہڑے اِیمان والے نیں اوہ اِیماندار ابرہام نال برکت پاندے نیں۔ کیوں جو جِنّے شریعت دیاں کمّاں اُتّے بھروسا رکھدے نیں۔ اوہ سارے لعنت دے ہیٹھ نیں۔ ایس کر کے لِکھیا اے۔ پئی اوہ جیہڑا سارِیاں گلّاں جیہڑیاں کتاب وِچ لِکھیاں ہویاں نیں۔ کرن وِچ لگّا نئیں رہندا لعنتی اے۔ تے ایہہ گلّ ظاہر اے۔ پئی شریعت دی راہِیں کوئی بندہ خُدا اگّے راستباز نئیں ٹھہردا۔ کیوں جو راستباز اِیمان نال جِیوندا رہے گا۔ تے شریعت نُوں اِیمان نال کُجھ واسطہ نئیں۔ سگوں لِکھیا ہویا اے پئی جِس ایہناں اُتّے عمل کِیتا۔ اوہ ایہناں دے سببّوں جیوندا رہے گا۔ مسِیح ساڈے لئی لعنتی بن کے تے سانُوں مُل لے کے شریعت دی لعنت توں چھڈایا۔ کیوں جو لِکھیا ہویا اے پئی جیہڑا کاٹھ اُتّے ٹنگیا گیا اوہ لعنتی اے۔ ایس کر کے پئی مسِیح یِسُوع وِچ ابرہام دی برکت غیر قوماں تِیکر وی اَپڑے۔ تے اسی اِیمان دی راہِیں اوس رُوح نُوں حاصِل کریئے جِہدا وعدہ ہویا اے۔ بھراؤ! مَیں لوکاں وانگر آکھنا آں۔ پئی بھانویں بندیاں دا ای عہد ہوئے۔ جدوں اوہ پَکّا ہوگیا۔ تدوں کوئی اوہنوں جُھوٹھا نئیں کر دا۔ تے نا اوہدے اُتّے کُجھ وَدھاندا ای اے۔ ہُن ابرہام تے اوہدی نسل نال وعدے کِیتے گئے اوہ ایہہ نئیں آکھدا پئی تیریاں نسلاں نال جِیکن چوکھیاں نیں۔ سگوں تیری نسل نال جیویں اِک نال تے اوہ مسِیح اے۔ میرا ایہہ مطلب اے۔ پئی جیہڑا عہد خُدا پہلاں توں کِیتا سی۔ اوہنوں شریعت چار سَو ترِیہاں ورھیاں پِچھّوں آ کے جُھوٹھا نئیں کر سکدی۔ پئی اوہ وعدہ ایویں جائے۔ کیوں جو جے وِرثہ شریعت دے سببّوں مِلدی اے۔ فیر وعدے دے سببّوں تے نا ہوئی۔ ابرہام نُوں خُدا وعدے دے سببّوں ای دِتّی۔ تَد شریعت کاہدی رہی۔ اوہ قصوراں دے سببّوں اوس نسل دے آؤن تِیکر دِتّی گئی جِہدے نال وعدہ کِیتا گیا سی۔ تے اوہ فرِشتیاں دے وسیلے اِک وچولے دی راہِیں مُقرّر کِیتی گئی۔ ہُن وچولا اِک دا نئیں ہوندا پر خُدا اِکّو ای اے۔ مُڑ دسو کِیہ شریعت خُدا دیاں وعدیاں دے اُلٹ اے؟ کدی نئیں! کیوں جو جے کوئی اجیہی شریعت دِتّی جاندی۔ جیہڑی زِندگی دے سکدی۔ تے راست بازی شریعت دے سببّوں ہوندی۔ پر پاک کتاب ساریاں نُوں گُناہ دے ہیٹھ کر دِتّا۔ ایس کر کے پئی اوہ وعدہ جیہڑا یِسُوع مسِیح نُوں مَنّن دے سببّوں اے اِیمانداراں دے حق وِچ پُورا کِیتا جاوے۔ اِیمان دے آؤن توں پہلاں شریعت دے ہیٹھ ساڈی رکھوالی ہوندی سی۔ تے اوس اِیمان دے آؤن تِیکر جیہڑا ظاہر ہون والا سی۔ اسی اوسے دے ڈَکے وِچ رہے۔ ایس لئی شریعت مسِیح تِیکراں اپڑان لئی ساڈا اُستاد بنی۔ ایس کر کے پئی اسی اِیمان نال راستباز ٹھہرئیے۔ پر جد اِیمان آ گیا۔ تَد اسی اُستاد دے ہیٹھ نا رہے۔ کیوں جو تُسی سارے اوس اِیمان دی راہِیں جیہڑا مسِیح یِسُوع اُتّے اے خُدا دے پُتر ہو۔ تے تُساں ساریاں بندیاں مسِیح وِچ بپتِسمہ لیا۔ مسِیح نُوں پہن لیا۔ نا کوئی یہُودی رہیا نا یُونانی۔ نا کوئی غلام نا اَزاد نا کوئی جَنا نا زنانی۔ کیوں جو تُسی سارے مسِیح یِسُوع وِچ اِک ہو۔ تے جے تُسی مسِیح دے ہو۔ تے ابرہام دی نسل یعنی وعدے دے سببّوں وارث ہو۔ میرا مطلب ایہہ اے پئی وارث جِچر تِیکر بال اے۔ بھانویں سبھ کُجھ اوسے دا ای اے۔ پر اوہدے وِچ تے غلام وِچ فرق نئیں۔ سگوں جیہڑی میعاد باپ مُقرّر کِیتی اُچر تِیکر سَربراہاں تے مُختِیاراں دے اختیار وِچ رہندا اے۔ ایسے طرح اسی وی جدوں نِیانے ساں۔ تے دُنیا دی مُڈھ دِیاں گلّاں دی غلامی وِچ ڈکے رہے۔ پر جدوں پُورا ویلا آ گیا خُدا اپنے پُتر نُوں گھلّیا جیہڑا عورت توں جمّیا۔ تے جنم توں شریعت دا ہٹھارُو بنیا۔ ایس کر کے پئی شریعت دِیاں ہٹھارُواں نُوں مُل لے کے چھڈا لَئے۔ تے سانُوں پُتر ہون دا درجہ مِلے۔ تے تُسی پُتر جو ہوئے ایس کر کے خُدا اپنے پُتر دا رُوح ساڈیاں دِلاں وِچ گھلّیا جیہڑا ابّا یعنی اَے باپ کر کے پُکار دا اے۔ سو ہُن تُوں غلام نئیں۔ سگوں پُتر ایں تے جد پُتر ہوئیوں۔ تے خُدا دے سببّوں وارث وی ہوئیوں۔ پر اوس ویلے تُسی خُدا نُوں نئیں سو جان دے۔ تے تُسی اوہناں بُتاں دی غلامی وِچ سو جیہڑے اصلوں خُدا نئیں۔ پر ہُن جو تُساں خُدا نُوں پِچھانیا۔ سگوں خُدا تُہانوں پِچھانیا تے اوہناں کمزوراں تے نکمّیاں مُڈھ والِیاں گلّاں ولّ کیوں پِھردے ہو۔ جِنہاں دی دُوجی وار غلامی کرنی چاہندے ہو۔ تُسی دِناں تے مہِینیاں تے بنھیاں ہویاں ویلیاں تے ورھیاں نُوں مَن دے ہو۔ مَیں ڈرنا آں پئی اوہ محنت جیہڑی مَیں تُہاڈے اُتّے کِیتی اے۔ کِتے ایویں نا جائے۔ بھراؤ! مَیں تُہاڈی مِنّت کرنا آں۔ پئی میرے وانگر ہو جاؤ۔ کیوں جو مَیں وی تُہاڈے وانگر آں۔ تُساں میرا کُجھ وگاڑیا نئیں۔ سگوں تُسی جان دے ہو۔ پئی مَیں پہلی واری تُہانوں جِسمانی کمزوری دے سببّوں خُوشخبری سُنائی سی۔ تے تُساں میرے جِسم نُوں جِہدے وِچ تُہاڈی ازمایش سی نا ماڑا جانیا نا اوس توں نفرت کِیتی۔ پر خُدا دے فرِشتے سگوں مسِیح یِسُوع وانگر مَینُوں مَن لیا۔ سو تُہاڈی اوہ خُوشی کِتّھے گئی؟ مَیں تُہاڈا گواہ آں پئی جے ہو سکدا تے تُسی اپنیاں اَکھّیاں وی کڈھ کے مَینُوں دے دیندے۔ تے تُہاڈے نال سَچّی گلّ کرن دے سببّوں مَیں تُہاڈا وَیری بن گیا؟ اوہ تُہانوں سجن بنان دی کوشش تے کر دے نیں پر نیک نِیتی نال نئیں۔ سگوں اوہ تُہانوں چھیکنا چاہندے نیں۔ ایس کر کے پئی تُسی اوہناں نُوں سجن بنان دی کوشش کرو۔ پر ایہہ چنگی گلّ اے پئی نیک کمّ وِچ سجن بنان دی ہر ویلے کوشش کِیتی جائے نا نِرا اوسے ویلے جِس ویلے تُہاڈے کول ہوواں۔ میرے بالو! تُہاڈے ولّوں مَینُوں نَوِیں سِریوں جمّن دِیاں پِیڑاں لگِیاں نیں۔ جدوں تِیکر مسِیح تُہاڈے وِچ صُورت نا پھڑ لَئے۔ پر مَیں ایہہ چاہناں آں پئی ہُن تُہاڈے کول حاضر ہو کے ہوری طرح بولاں۔ کیوں جو مَینُوں تُہاڈے ولّوں فِکر اے۔ مَینُوں دَسّو کھاں تُسی جیہڑے شریعت دے ہٹھارُو ہونا چاہندے ہو۔ تُسی شریعت دی گلّ نُوں نئیں سُندے؟ کیوں جو ایہہ لِکھیا ہویا اے پئی ابرہام دے دو پُتر سن۔ اِک ٹہلن وِچوں تے دُوجا ویاہڑ وِچوں۔ پر ٹہلن دا مُنڈا جِسمانی طَور تے ویاہڑ دا مُنڈا وعدے دے سببّوں جمّیا۔ ایہناں گلّاں وِچ مِثال پائی جاندی اے۔ ایس کر کے پئی ایہہ زنانِیاں گویا دو عہد نیں۔ اِک سِینا پہاڑ دا جِہدے توں غلام ای جمدے نیں۔ تے اوہ ہاجرہ اے۔ تے ہاجرہ عرب دا سِینا پہاڑ اے۔ تے ہُن دا یرُوشلِیم اوہدے نال مِلدا اے کیوں جو اوہ اپنیاں بالاں سَنے غلامی وِچ اے۔ پر اُتلا یرُوشلِیم اَزاد اے۔ تے اوہ ساڈی ماں اے۔ کیوں جو لِکھیا ہویا اے۔ پئی اَے بے اولاد تُوں جِہدے گھر اولاد نئیں خُوشی کر تُوں جیہڑی جمّن دِیاں پِیڑاں نُوں نئیں جاندی اُچّی اُچّی رو کیوں جو جیہڑی وچاری چھڈی گئی سی۔ اوہدی اولاد سُہاگن نالوں وَدّھ اے۔ سو بھراؤ! اسی اِضحاق وانگر وعدے دے پُتر آں۔ تے جیویں اودُوں جِسم توں جمّیا ہویا رُوح توں جمّے ہوئے نُوں ستاؤندا ہوندا سی اوسے طرح ہُن وی ہوندا اے۔ پر پاک کتاب کِیہ آکھدی اے؟ پئی ٹہلن تے اوہدے پُتر نُوں کڈھ دے کیوں جو ٹہلن دا پُتر ویاہڑ دے پُتر نال کدی وارث نا ہوئے گا۔ سو بھراؤ اسی ٹہلن دے پُتر نئیں سگوں ویاہڑ دے آں۔ مسِیح نے سانُوں اَزاد رہن لئی اَزاد کِیتا اے۔ سو تگڑے رہو تے فیر غلامی دے جُولے ہیٹھ نا جُپّو۔ ویکھو مَیں پَولُس تُہانوں آکھنا آں پئی جے تُسی سُنتی بَہو گے۔ تے مسِیح توں تُہانوں کُجھ فائدہ نا ہوئے گا۔ سگوں مَیں ہر اِک سُنتی بہن والے اگّے فیر گواہی دینا آں۔ پئی ساری شریعت اُتّے عمل کرنا اوہدا فرض اے۔ تُسی جیہڑے شریعت دی راہِیں راستباز ٹھہرنا چاہندے ہو مسِیح توں وکھرے ہو گئے۔ تے فضل ولّوں رہ گئے۔ کیوں جو اسی رُوح دے سبّب اِیمان دی راہِیں راست بازی دی آس پُوری ہون دی اُڈِیک وِچ آں۔ تے مسِیح یِسُوع وِچ نا تے سُنتی بہنا کِسے کمّ دا اے۔ تے نا سُنتی نا بہنا۔ پر اوہ اِیمان جیہڑا مُحبّت دی راہِیں اثر کر دا اے۔ تُسی تے چنگی طرح پئے دَوڑ دے سو۔ کِس تُہانوں سچیائی دے مَنّن توں ڈکیا؟ ایہہ چُک تُہاڈے سَدّن والے ولّوں نئیں؟ تھوڑا جِہیا خمیر ساری تَون نُوں خمیرا کر دیندا اے۔ مَینُوں خُداوند وِچ تُہاڈے اُتّے ایہہ وساہ اے پئی تُسی ہور طرح دا خیال نا کرو گے۔ پر جیہڑا تُہانوں گھبراؤندا اے اوہ بھانویں کیہڑا ہوئے سزا پائے گا۔ تے بھراؤ مَیں جے اجے تِیکر سُنتی بہن دی منادی کرنا آں تے ہُن تِیکر ستایا کیوں جانا آں؟ تے صلِیب دی ٹھوکر تے جاندی رہی۔ چَنگا ہوئے جے تُہانوں سَوڑِیاں پان والے اپنا آپ سارا وَڈّھ لین۔ بھراؤ! تُسی اَزادی لئی سَدّے گئے سو پر اجیہا نا ہوئے پئی اوہ اَزادی جِسم دِیاں گلّاں دا موقع بنے۔ سگوں پیار نال اِک دُوجے دی سیوا کرو۔ کیوں جو ساری شریعت اِکّی گلّ وِچ پُوری ہوندی اے۔ پئی تُوں اپنے گواہنڈی نال اپنے جِہیا پیار رکھ۔ پر جے تُسی اِک دُوجے نُوں وَڈّھ دے تے پاڑ کھاندے ہو۔ تے خبردار رہو۔ پئی تُہاڈا اِک دُوجے کولوں ستیاناس نا ہوئے۔ پر مَیں ایہہ آکھنا آں پئی رُوح دے طَور نال چلّو ایس طرح نال تُسی جِسم دی خواہش نُوں کدی پُورا نا کرو گے۔ کیوں جو جِسم دی خواہش رُوح دے اُلٹ اے۔ تے رُوح جِسم دے اُلٹ۔ تے ایہہ اِک دُوجے دے دُشمن نیں۔ ایس کر کے پئی جو کُجھ تُسی چاہندے ہو نا کرو۔ تے جے تُسی رُوح دے طَور نال ٹُردے ہو۔ تے شریعت دے ہیٹھ نئیں رہے۔ ہُن جِسم دے کمّ تے ظاہر نیں یعنی زناکاری۔ پلِیتی۔ لُچ پُناں۔ بُت پرستی۔ جادُوگری۔ دُشمنیاں۔ جھگڑا۔ ساڑا۔ غُصّہ۔ دھڑے بازی۔ دوجائیگِیاں۔ بِدعتاں۔ بُغض۔ نشے بازی۔ ناچ رنگ تے ہور ایہو جیہے۔ ایہناں دی بابت تُہانوں اگیترا دس دیناں آں جیویں پہلاں وی دسیا سی۔ پئی اجیہے کمّ کرن والے خُدا دی بادشاہی دے وارث نا ہون گے۔ پر رُوح دا پَھل پیار۔ خُوشی۔ تسلّی۔ برداشت۔ مِہربانی۔ نیکی۔ دیانتداری۔ حلِیمی پرہیزگاری اے۔ اجیہاں کمّاں دے برخلاف کوئی شریعت نئیں۔ تے جیہڑے مسِیح یِسُوع دے نیں۔ اوہناں جِسم نُوں اوہدیاں چاہواں تے خواہشاں سَنے سُولی چاڑھ دِتّا اے۔ جے اسی رُوح دے سببّوں جیونے آں۔ تے رُوح دے طَور نال چلنا وی چاہیدا اے۔ اسی نا حق فخر کر کے نا اِک دُوجے نُوں چِڑائیے۔ تے نا اِک دُوجے ولّوں سڑئیے۔ بھراؤ جے کوئی تُہاڈے وِچوں کِسے قصور وِچ پھڑیا وی جائے۔ تے تُسی جیہڑے رُوحانی اوہ۔ اوہنوں حلِیمی نال سمبھالو۔ تے اپنا وی سمبھالا رکھّیں کِتے تُوں وی ازمایش وِچ نا پَے جائیں۔ تُسی اِک دُوجے دے بھار وَنڈو تے ایس طرح مسِیح دی شریعت نُوں پُوریاں کرو۔ کیوں جو جے کوئی اپنے آپ نُوں کُجھ سمجھے تے اصل ہوئے کُجھ نا۔ تاں اوہ اپنے آپ نُوں دھوکھا دیندا اے۔ سو ہر کوئی اپنے ای کمّ نُوں جاچے۔ ایس طرح اوہدے کمّ واسطے اوہدی وڈیائی ہوئے گی نا کِسے ہور دے کمّ واسطے۔ کیوں جو ہر کوئی اپنا ای بھار چُکے گا۔ کلام دے سِکھّن والے نُوں چاہیدا اے۔ پئی اُستاد نُوں سارِیاں نِعمتاں وِچ حِصّہ دار بنائے۔ دھوکھا نا کھاؤ خُدا دے نال مخَول نئیں کری دا۔ کیوں جو جو کُجھ بندہ بِیجدا اے سوئیو وَڈّھے گا۔ جیہڑا اپنے جِسم لئی بِیجدا اے اوہ جِسم توں ہلاکت دا پَھل وَڈّھے گا۔ تے جیہڑا رُوح لئی بِیجدا اے۔ اوہ رُوح توں سدا دی زِندگی دا پَھل وڈّے گا۔ نیک کمّ کرن وِچ ہِمّت نئیں ہارنی چاہیدی۔ کیوں جو جے اسی نا گھابرِئیے تے ٹھیک ویلے سِر وَڈّھاں گے۔ سو جدوں موقع مِلے۔ ساریاں نال نیکی کریئے۔ خاص کر اِیمانداراں نال۔ ویکھو مَیں کئیاں موٹیاں موٹیاں حرفاں وِچ تُہانوں اپنی ہتّھِیں لِکھیا اے۔ جِنّے لوک جِسمانی وکھالا چاہندے نیں اوہ تُہانوں سُنتی بہن اُتّے مجبُور کر دے نیں۔ نِرا ایس کر کے پئی مسِیح دی صلِیب دے سببّوں ستائے نا جان۔ کیوں جو سُنتی بَیٹھے ہوئے آپ وی شریعت اُتّے عمل نئیں کر دے پر ایس واسطے تُہانوں سُنتی بہانا چاہندے نیں۔ پئی تُہاڈے جِسمانی حال اُتّے فخر کرن۔ پر خُدا نا کرے۔ پئی مَیں کِسے شے اُتّے فخر کراں۔ بِناں اپنے خُداوند یِسُوع مسِیح دی صلِیب دے جِہدے توں دُنیا میرے ولّوں صلِیب دِتّی گئی۔ تے مَیں دُنیا دے ولّوں۔ کیوں جو نا تے سُنتی بہنا ای کوئی شے اے۔ تے نا سُنتی نا بہنا۔ پر نَوِیں سِریوں جمّنا۔ تے جِنّے ایس قاعدے اُتّے ٹُرن اوہناں اُتّے تے خُدا دے اِسرائیل اُتّے تسلّی تے رَحم ہوئے۔ ایدوں اگّے کوئی مَینُوں دُکھ نا دے کیوں جو مَیں اپنے بدن اُتّے یِسُوع دے داغ لئی پِھرنا آں۔ بھراؤ! ساڈے خُداوند یِسُوع مسِیح دا فضل تُہاڈی رُوح دے نال رہے۔ آمِین۔ پَولُس ولّوں جیہڑا خُدا دی مرضی نال مسِیح یِسُوع دا رسُول اے۔ اِفِسُس دے پاک لوکاں دے ناں جیہڑے مسِیح یِسُوع وِچ اِیماندار نیں۔ ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔ ساڈے خُداوند یِسُوع مسِیح دے خُدا تے باپ دی وڈیائی ہوئے۔ جِس سانُوں مسِیح وِچ اسمانی تھانواں اُتّے ہر طرح دی رُوحانی برکت دِتّی۔ تے اوس سانُوں دُنیا دے مُڈھ توں پہلاں اوہدے وِچ ایس لئی چُن لیا پئی اسی اوہدے سامھنے مُحبّت وِچ پاک تے بے نُقص ہوئے۔ تے اوس اپنی مرضی دے نیک اِرادے نال سانُوں اپنے لئی پہلاں توں مُقرّر کِیتا۔ پئی یِسُوع مسِیح دی راہِیں اوہدے پُتریلے ہوئے۔ تاں جو اوہدے اوس فضل دے جلال دی وڈیائی ہوئے جیہڑا اوس سانُوں اوس پیارے وِچ مُفت دِتّا۔ اسی اوہدے وِچ اوہدے خُون دی راہِیں رہائی یعنی قصوراں دی مُعافی پانے آں۔ اوہدے اوس فضل دی دَولت دے سببّوں۔ جیہڑا اوس سانُوں ساری حِکمت تے دانائی دے نال چوکھا دِتّا۔ تے نالے اوہنے اپنی مرضی دے بھیت نُوں اپنے اوس نیک اِرادے دے سببّوں ساڈے اُتّے کھولیا جیہڑا اوہنے اوہدے وِچ دھاریا سی۔ تاں جو زمانیاں دے پُورا ہون دا اِنج بندوبست ہوئے۔ پئی مسِیح وِچ سارِیاں شیواں اکٹّھیاں ہو جان۔ بھانویں اسمان دِیاں ہون بھانویں زمین دِیاں۔ اوسے وِچ اسی وی اوسے اِرادے دے سببّوں جیہڑا اپنی مرضی دی صلاح نال سبھ کُجھ کر دا اے۔ مُڈھوں ای مُقرّر ہو کے وِرثہ بنے۔ ایس کر کے پئی اسی جیہڑے پہلاں توں مسِیح دی آس وِچ ساں اوہدے جلال دی وڈیائی دا سبّب ہوئے۔ تے تُساں وی جدوں سچیائی دا کلام سُنیا جیہڑا تُہاڈی نجات دی خُوشخبری اے۔ نالے اوہدے اُتّے اِیمان لیاندا تے مسِیح وِچ تُہاڈے اُتّے وعدہ کِیتے ہوئے پاک رُوح دی مُہر لگّی۔ اوہ ای خُدا دی ملکیّت دی رہائی واسطے ساڈے وِرثے دی سائی اے۔ تاں جو اوہدے جلال دی وڈیائی ہوئے۔ ایس واسطے مَیں وی تُہاڈے اوس اِیمان دا جیہڑا خُداوند یِسُوع اُتّے اے تے اوس مُحبّت دا جیہڑی ساریاں پاک لوکاں نال اے حال سُن کے۔ تُہاڈے واسطے ہر ویلے شُکر کر دا رہنا آں تے اپنیاں دُعاواں وِچ تُہاڈا ذِکر کرنا ہُناں آں۔ پئی ساڈے خُداوند یِسُوع مسِیح دا خُدا جیہڑا جلال دا باپ اے۔ تُہانوں اپنی پچھان لئی حِکمت تے اِلہام دی رُوح دیوے۔ تے تُہاڈے دِل دِیاں اَکھّیاں سوجاکھِیاں ہو جان۔ تاں جو تُہانوں پتا لگّے۔ پئی اوہدے سَدّن توں کیہو جیہی آس اے۔ تے اوہدی میراث دے جلال دی دَولت پاک لوکاں وِچ کیڈی کُو اے۔ تے ساڈے اِیمان لیاؤن والیاں واسطے اوہدی قُدرت کیڈی وڈّی اے اوہدی اوس وڈّی قُوّت دے اثر دے سببّوں۔ جیہڑا اوس مسِیح وِچ اوس ویلے کِیتا جدوں اوہنوں مُردیاں وِچوں جوا کے اپنے سَجّے پاسے اسمانی تھانواں اُتّے بہایا۔ تے ہر طرح دی حکُومت تے اختیار تے قُدرت تے ریاست تے ہر اِک ناں توں وَاہوَا اُچّا کِیتا۔ جیہڑا نِرا ایسے جہان وِچ نئیں سگوں آؤن والے جہان وِچ وی لیا جائے گا۔ تے سبھ کُجھ اوہدے پیراں ہیٹھ کر دِتّا۔ تے اوہنوں سارِیاں شیواں دا سردار بنا کے کلِیسیا نُوں دے دِتّا۔ ایہہ اوہدا بدن اے تے اوسے نال رچی ہوئی اے۔ جیہڑا سبھنیں پلِّیں سبھناں دا بھرن والا اے۔ تے اوس تُہانوں وی جوالیا جیہڑے اپنے قصوراں تے گُناہاں دے سببّوں موئے ہوئے سو۔ جِنہاں وِچ تُسی پہلاں ایس دُنیا دی چال اُتّے ٹُر دے سو۔ وَا دے پتّے دے حاکم یعنی اوس رُوح دے مگر مگر ٹُردے سو۔ جیہڑی ہُن نافرمان لوکاں وِچ اثر کر دی اے۔ اوہناں وِچ اسی وی ساریاں دے سارے پہلاں اپنے جِسم دِیاں خواہشاں وِچ رہندے ساں۔ تے جِسم تے عقل دے اِرادے پُورے کر دے ساں۔ تے ہورناں وانگر قُدرتی طَور اُتّے غضب دے بال ساں۔ پر خُدا اپنے رَحم دی دَولت نال اوس وڈّی مُحبّت دے سببّوں جیہڑی اوس ساڈے نال کِیتی۔ جدوں قصوراں دے سببّوں موئے ہوئے ساں تدوں سانُوں مسِیح دے نال زِندہ کِیتا (تُہانوں فضل نال ای نجات مِلی اے۔) تے مسِیح یِسُوع وِچ رَلا کے اوہدے نال جوالیا تے اسمانی تھانواں اُتّے اوہدے نال بٹھایا۔ ایس کر کے پئی اوہ آؤن والیاں زمانیاں وِچ اپنے فضل دی باہلی دَولت وکھائے جیہڑا مسِیح یِسُوع وِچ ساڈے اُتّے مِہربانی نال ہویا سی۔ کیوں جو تُہانوں اِیمان دی راہِیں فضل نال ای نجات مِلی اے۔ تے ایہہ ساڈے ولّوں نئیں پر خُدا دی بخشِش اے۔ تے نا کمّاں دے سببّوں مِلی اے تاں جو کوئی فخر نا کرے۔ کیوں جو اسی اوسے دی کاریگری آں تے مسِیح یِسُوع وِچ اوہناں نیک کمّاں دے واسطے پَیدا کِیتے گئے ساں جیہڑے خُدا مُڈھوں ای ساڈے کرن لئی تیار کِیتے سن۔ سو ایس کر کے یاد کرو پئی کَدے تُسی جیہڑے جِسم ولّوں اوہناں کولوں بے سُنتے اکھواؤندے ہو جیہڑے جِسم ولّوں ہتّھاں نال سُنتی بَیٹھے ہوئے اکھواؤندے نیں۔ اگلے زمانے وِچ مسِیح توں وکھرے تے اِسرائیل دی بادشاہی وِچوں خارج تے ایہناں دے وعدے والے عَہداں توں ناواقِف سو تے نااُمید تے دُنیا وِچ بے خُدا سو۔ پر تُسی جیہڑے پہلاں دُراڈے سو ہُن مسِیح یِسُوع وِچ مسِیح دے خُون دے سببّوں نیڑے ہوگئے ہو۔ کیوں جو اوہ ای ساڈی صُلح اے۔ جِس دوہاں نُوں اِک کر لیا۔ تے جُدائی دی کندھ نُوں جیہڑی وِچکار سی ڈھا دِتّا۔ تے اوس اپنے جِسم دی راہِیں وَیر نُوں یعنی اوس شریعت نُوں جِہدے حُکم ضابطے نال سن۔ مَوقُوف کر دِتّا۔ تاں جو اپنے وِچ دوہاں توں اِک نواں اِنسان پَیدا کر کے صُلح کرا وے۔ تے صلِیب اُتّے وَیر نُوں ہٹا کے اوہدے سببّوں دوہاں نُوں اِک تَن بنا کے خُدا نال مِلائے۔ تے اوس آ کے خُوشخبری دِتّی۔ تُہاڈے لئی جیہڑے دُراڈے سو صُلح تے اوہناں لئی وی جیہڑے نیڑے سن صُلح دی خُوشخبری دِتّی۔ کیوں جو اوسے دی راہِیں ساڈی دوہاں دی اِکّو جِہی رُوح وِچ باپ کول ڈھوئی اے۔ سو ہُن تُسی پردیسی تے راہی نئیں۔ سگوں پاک لوکاں دے وطنی تے خُدا دے ٹبّر دے اوہ۔ تے رسُولاں تے نبیاں دی نِینّھ اُتّے جِہدی گُٹّھ دا پتّھر آپی مسِیح یِسُوع اے اُسارے گئے اوہ۔ اوسے وِچ ہر اِک مکان جُڑ کے خُداوند وِچ اِک پاک ہیکل بن دا جاندا اے۔ تے تُسی وی اوہدے وِچ رَل کے اُسارے جاندے ہو۔ تاں جو رُوح وِچ خُدا دا گھر بنو۔ ایسے واسطے مَیں پَولُس جیہڑا تُساں غیر قوم والیاں دی خاطر مسِیح یِسُوع دا قیدی آں۔ شاید تُساں خُدا دے فضل دا ناں سُنیا ہوئے گا۔ جیہڑا تُہاڈے لئی مَینُوں مِلیا۔ یعنی ایہہ پئی اوہ بھیت مَینُوں اِلہام نال معلُوم ہویا تے نالے مَیں پہلاں اوہدا تھوڑا جیہا حال لِکھیا سی۔ جِہنُوں پڑھ کے تُسی معلُوم کر سکدے ہو۔ پئی مَیں مسِیح دا اوہ بھیت کِتّھوں تِیکر سمجھنا آں۔ جیہڑا ہورناں زمانیاں وِچ بنی آدم نُوں ایس طرح معلُوم نئیں سی ہویا۔ جیویں اوہدے پاک رسُولاں تے نبیاں اُتّے رُوح نال ہُن ظاہر ہویا اے۔ یعنی ایہہ پئی مسِیح یِسُوع وِچ غیر قوم والے خُوشخبری دی راہِیں وِرثے وِچ سانجھے تے بدن وِچ شامل تے وعدے وِچ داخل نیں۔ تے خُدا دے فضل دی بخشِش نال جیہڑا قُدرت دے اثر نال میرے اُتّے ہویا مَیں ایس خُوشخبری دا نوکر بنیا۔ میرے اُتّے جیہڑا ساریاں پاک لوکاں وِچ حِقیر توں حِقیر ساں ایہہ فضل ہویا۔ پئی مَیں غیر قوماں نُوں مسِیح دی بے انت دَولت دی خُوشخبری دیاں۔ تے ساریاں نُوں اِک گلّ دس دیاں۔ پئی جیہڑا بھیت مُڈھوں سارِیاں شیواں دے پَیدا کرن والے خُدا وِچ چُھپیا رہیا۔ اوہدا کِیہ بندوبست اے۔ تاں جو ہُن کلِیسیا دی راہِیں خُدا دی طرح طرح دی حِکمت اوہناں حکُومت تے اختیار والیاں نُوں معلُوم ہو جائے۔ جیہڑے اسمانی تھانواں وِچ نیں۔ اوس ازلی اِرادے دے سببّوں جیہڑا اوس ساڈے خُداوند مسِیح یِسُوع وِچ کِیتا سی۔ جِہدے وِچ سانُوں اوہدے اُتّے اِیمان رکھن نال دلیری تے بھروسے نال ڈھوئی اے۔ سو مَیں درخواست کرنا آں پئی تُسی میرِیاں اوہناں تنگِیاں دے سببّوں جیہڑیاں تُہاڈی خاطر سہنا آں ہِمّت نا ہارو۔ اوہ تُہاڈا ٹھاٹھ نیں۔ ایس لئی مَیں باپ اگّے گوڈے نِیؤنا آں۔ جِہدے ناں اُتّے زمین تے اسمان دِیاں سارِیاں ٹابریاں اکھواؤندیاں نیں۔ پئی اوہ اپنے جلال دی دَولت دے سببّوں تُہانوں ایہہ بخشے پئی تُسی اوہدی رُوح توں اپنی اندرلی اِنسانِیّت وِچ چوکھے تگڑے ہو جاؤ۔ تے اِیمان دی راہِیں مسِیح تُہاڈے دِلاں وِچ وَسّے پئی مُحبّت وِچ گڈ کے تے ٹُھک کے۔ ساریاں پاک لوکاں سَنے چنگی طرح معلُوم کر سکو۔ پئی اوہدی چوڑائی تے لمبائی تے اُچیائی تے ڈونگھیائی کِنی اے۔ تے مسِیح دی راہِیں اوس مُحبّت نُوں جان سکو جیہڑی جانن توں پراں اے۔ پئی خُدا دی پُوری بھرپُوری تِیکر بھر جاؤ۔ ہُن جیہڑا اِنج قُدرت والا اے۔ پئی اوس قُدرت دے سببّوں جیہڑی ساڈے وِچ اثر کر دی اے۔ ساڈی درخواست تے خیال توں بُہت وَدّھ کر سکدا اے۔ کلِیسیا وِچ تے مسِیح یِسُوع وِچ سارِیاں پِیہڑیاں تِیکر تے سدا تِیکر اوسے دا جلال ہوندا رہے۔ آمِین۔ سو مَیں جیہڑا خُداوند دے سببّوں قیدی آں تُہاڈے اگّے عرض کرنا آں پئی جیویں سَدّے گئے سو۔ اوسے طرح چلّو۔ یعنی پُوری عاجزی تے حلِیمی نال صبر کر کے مُحبّت نال اِک دُوجے دی برداشت کرو۔ تے ایہو ای کوشش کر دے رہو۔ پئی رُوح دی اِکتائی صُلح دے بند نال بَدّھی رہے۔ اِکّو ای بدن اے تے اِکّو ای رُوح اے۔ جیویں تُہانوں وی جیہڑے سَدّے گئے سو تُہاڈے سَدّے جان توں آس وی اِکّو ای اے۔ اِکّو ای خُداوند اے۔ اِکّو ای اِیمان۔ اِکّو ای بپتِسمہ۔ تے ساریاں دا اِکّو ای خُدا تے باپ اے۔ جیہڑا ساریاں اُتّے تے ساریاں وِچ تے ساریاں دے اندر اے۔ تے ساڈے وِچوں ہر اِک اُتّے مسِیح دی بخشِش دے اندازے دے سببّوں فضل ہویا اے۔ ایسے واسطے اوہ آکھدا اے۔ پئی جد اوہ عالمِ بالا اُتّے چڑھیا تے قیدِیاں نُوں نال لے گیا۔ تے بندیاں نُوں اِنعام دِتّے۔ (ہُن اوہدے چڑھن دا ایہدے بِناں ہور کِیہ مطلب اے پئی زمین دے ہیٹھلے علاقے وِچ وی اُتریا سی؟ تے ایہہ اُترن والا اوہو ای اے۔ جیہڑا ساریاں اسماناں توں اُچّا چڑھیا تاں جو سارِیاں شیواں نُوں بھر دے۔) تے اوسے ای بعضیاں نُوں رسُول تے بعضیاں نُوں نبی تے بعضیاں نُوں اِنجِیل سُنان والے تے بعضیاں نُوں آجڑی تے اُستاد بنا کے دے دِتّا۔ تاں جو پاک لوک کامِل بنن تے سیوا دا کمّ کِیتا جائے۔ تے مسِیح دا جِسم وَدھے۔ جدوں تِیکر اسی سارے خُدا دے پُتر تے اِیمان تے اوہدی پچھان وِچ اِک نا ہو جائیے تے پُورے اِنسان یعنی مسِیح دے پُورے قد جیڈے نا ہو جائیے۔ پئی اسی اگّے نُوں بچّے نا رہیئے۔ یعنی بندیاں دے فریب تے مکر دے سبّب اوہناں دی بھڑکان والی چالاکی پِچّھے ہر اِک تعلِیم دی وَا نال ڈولدے نا پِھریئے۔ سگوں مُحبّت تے سچیائی اُتّے چَل کے اوہدے وِچ جیہڑا سِر اے۔ مطلب اے مسِیح وِچ سبھنیں گلِّیں وَدھدے جائیے۔ جِہدے توں سارا تَن اِک اِک جوڑ دی مدد نال جوڑیا تے گنڈھیا جاندا اے تے اِک اِک انگ دے ولّ کمّ کرن نال مُحبّت وِچ اپنے آپ نُوں اُسارن لئی تَن دا وادھا ہوندا اے۔ ایس لئی مَیں ایہہ آکھنا آں تے خُدا ولّوں ایہہ دس دینا آں پئی جِیکن غیر قوماں اپنے واہیات خیالاں وِچ ٹُردیاں نیں۔ تُسی اوس طرح نا ٹُرناں۔ کیوں جو اوہناں دی عقل اَنھی ہوگئی۔ تے اوہ اوس نادانی دے سببّوں جیہڑی اوہناں وِچ اے۔ تے اپنے دِلاں دی سختی دے سببّوں خُدا دی زِندگی توں خارج نیں۔ اوہناں سُنّ ہو کے اپنے آپ نُوں لُچ پُنے مگر لا دِتّا۔ پئی سارے گندے کمّ لوبھ نال کرن۔ پر تُساں مسِیح دی بابت ایہو جیہی تعلِیم نئیں سِکھی۔ سگوں تُساں اوس سچیائی دے سببّوں جیہڑی یِسُوع وِچ اے اوسے دی سُنی تے اوسے دی ایہہ تعلِیم سِکھی۔ پئی تُسی اپنے اگلے چال چَلّن دی اوس پرانی اِنسانِیّت نُوں لاہ چھڈو۔ جیہڑی فریب دین والِیاں شہوتاں پِچّھے خراب ہوندی جاندی اے۔ تے اپنی عقل دی رُوحانی حالت وِچ نَوِیں بندے جاؤ۔ تے نَوِیں اِنسانِیّت نُوں پاؤ جیہڑی خُدا دے سببّوں اوس سچیائی دی راستبازی تے پاکیزگی وِچ پَیدا کِیتی گئی اے۔ سو جُھوٹھ بولنا چھڈ کے ہر اِک اپنے گواہنڈی نال سَچ بولے۔ کیوں جو اسی آپو وِچ اِک دُوجے دے انگ آں۔ غُصّے تے ہوؤ پر گُناہ نا کرو۔ دِن ڈُبن تِیکر تُہاڈی خفگی نا رہے۔ تے نا ابلیس نُوں تھاں دیو۔ چوری کرن والا فیر چوری نا کرے سگوں چَنگا پیشہ مَل کے ہتّھاں نال کمّ کرے۔ تاں جو غرِیب نُوں کُجھ دے سکے۔ کوئی گندی گلّ تُہاڈے مُنھ توں نا نِکلے۔ سگوں اوہو جیہڑی ویلے سر فائدہ دیوے۔ تاں جو اوہدے توں سُنن والیاں اُتّے فضل ہوئے۔ تے خُدا دے پاک رُوح نُوں نا کلپاؤ جِہدی ساڈے اُتّے چُھٹکارے دے دِن لئی مُہر لگّی ہوئی اے۔ ہر اِک طرح دی کَوڑ تے کرودھ تے دھُروہ تے رَولا تے بھنڈی ساری کِڑ سَنے دُراڈے کرو۔ تے اِک دُوجے اُتّے مہربان تے نرم دِل ہوؤ۔ تے جیویں مسِیح دے سببّوں خُدا ساڈے قصور بخش دِتّے نیں۔ تُسی وی اِک دُوجے نُوں بخشو۔ ایس لئی پیاریاں بچّیاں وانگر خُدا دی رِیس۔ تے تُہاڈا چالا مُحبّت وِچ ہوئے جیویں مسِیح وی تُہاڈے نال مُحبّت کِیتی۔ تے ساڈے واسطے اپنے آپ نُوں خُوشبوئی وانگر خُدا دی نظر کر کے قُربان کِیتا۔ تے جیویں پاک لوکاں نُوں پھبدا اے۔ تُہاڈے وِچ زناکاری تے گندگی یا لالچ دا ناں وی نا آوے۔ تے نا بے لہنگی تے بکواس یا پھکّڑ۔ کیوں جو ایہہ نئیں۔ سگوں شُکر کرو۔ کیوں جو تُسی چنگی طرح جان دے ہو۔ پئی کِسے زنائی یا گندے بندے یا لالچی دی جیہڑا بُت پرست دے برابر اے۔ مسِیح تے خُدا دی بادشاہی وِچ کوئی وِرثہ نئیں۔ کوئی تُہانوں بے فائدہ گلّاں نال دھوکھا نا دے۔ کیوں جو ایہناں دے سببّوں نافرمان لوکاں اُتّے خُدا دا غُصّہ آؤندا اے۔ سو اوہناں دیاں کمّاں وِچ نا رَلو۔ کیوں جو تُسی پہلاں ہنیرا سو۔ ہُن خُداوند وِچ چانن ہو۔ سو چانن دے بچّیاں وانگر چلّو۔ (ایس لئی پئی چانن دا پَھل پُوری نیکی تے راستبازی تے سچیائی اے۔) تے پَتا لاندے رہو۔ پئی خُداوند نُوں کِیہ چَنگا لگدا اے۔ ہنیرے دے بے فائدہ کمّاں وِچ نا رَلو۔ سگوں اوہناں نُوں جِھڑکو۔ کیوں جو اوہناں دے اوہلے دے کمّاں دی گلّ کرنی وی بے لہنگی دی گلّ اے۔ تے جِنہاں گلّاں نُوں جِھڑکیا جاندا اے اوہ سارِیاں چانن وِچ اُگھڑدیاں نیں ایس لئی پئی جیہڑی شے اُگھیڑی جاندی اے اوہ چانن اے۔ ایس لئی اوہ آکھدا اے۔ پئی اے سُتّیا ہویا جاگ تے مُردیاں وِچوں جِیو اُٹھ۔ تے مسِیح دا چانن تیرے اُتّے چمکے گا۔ سو دھیان کرو۔ پئی کِس طرح ٹُر دے ہو۔ جھلیاں وانگر نئیں سگوں سیانیاں وانگر ٹُرو۔ تے ویلے نُوں چَنگا کر کے ورتو ایس لئی پئی دِن بَھیڑے نیں۔ ایس سبّب بال نا رہو۔ سگوں خُدا دی مرضی نُوں سمجھو۔ پئی کِیہ اے۔ تے شراب پی کے مست نا ہوؤ۔ کیوں جو ایہدے وِچ بدچلنی ہوندی اے۔ سگوں رُوح نال بھر دے جاؤ۔ تے آپو وِچ زبُور تے گِیت تے رُوحانی غزلاں گایا کرو۔ تے دِل وِچ خُداوند لئی گاؤندے وجاؤندے رہیا کرو۔ تے سارِیاں گلّاں واسطے ساڈے خُداوند یِسُوع مسِیح دے ناں اُتّے سدا خُدا باپ دا شُکر کر دے رہو۔ تے مسِیح دے ڈر نال اِک دُوجے دے تابعیاں رہو۔ اَے زنانِیو! اپنے گھر والیاں دی اجیہی تابعیاں رہو۔ جیویں خُداوند دی۔ کیوں جو گھر والا زنانی دا سِر اے۔ جیویں مسِیح کلِیسیا دا سِر اے۔ تے اوہ آپی ای بدن دا بچاؤن والا اے۔ پر جیویں کلِیسیا مسِیح دے تابعیاں اے۔ اوسے طرح زنانِیاں وی سبھناں گلّاں وِچ اپنے گھر والیاں دے تابعیاں ہون۔ گھر والیو! اپنیاں زنانِیاں نُوں پیار کرو جیویں مسِیح وی کلِیسیا نُوں پیار کر کے اپنے آپ نُوں اوہدی خاطر مَوت دے حوالے کر دِتّا۔ تاں جو اوہنوں کلام دی راہِیں پانی نال نوھا کے تے صاف کر کے پاک بنائے۔ تے اِک اجیہی جلالی کلِیسیا بنا کے اپنے اگّے حاضر کرے۔ جِہدے بدن وِچ داغ یا جُھری یا کوئی ہور اجیہی شے نا ہوئے۔ سگوں پاک تے بے نُقص ہوئے۔ ایسے طرح گھر والیاں نُوں چاہیدا اے پئی اپنیاں زنانِیاں نُوں اپنے بدن وانگر پیار کرن جیہڑا زنانی نُوں پیار کر دا اے اوہ اپنے آپ نُوں پیار کر دا اے۔ کیوں جو کدی کِسے اپنے جِسم نال وَیر نئیں رکھیا سگوں اوہدی پالنا کر دا اے۔ جیویں مسِیح کلِیسیا دی۔ ایس لئی پئی اسی اوہدے جِسم دے انگ آں۔ ایسے سبّب بندے اپنے ماں پئیو توں وَکھریاں ہو کے اپنی زنانی نال جُڑیا رہے گا۔ تے اوہ دو نَوِیں اِک تَن ہون گے۔ ایہہ بھیت تے وَڈا اے۔ پر مَیں مسِیح تے کلِیسیا دی بابت آکھنا آں۔ ہر صُورت تُہاڈے وِچوں وی ہر اِک اپنی زنانی نُوں اپنے وانگر پیار کرے۔ تے زنانی ایس گلّ دا خیال رکھّے پئی اپنے گھر والے کولوں ڈر دی رہے۔ بچّیو! تُسی خُداوند وِچ اپنے ماں پئیو دے آکھے لگو۔ کیوں جو ایہہ چاہیدا اے۔ اپنے ماں پئیو دی عِزّت کر۔ (ایہہ پہلا حُکم اے جِہدے نال وعدہ اے۔) تاں جو تیرا بھلا ہوئے۔ تے تیری عُمر زمین اُتّے وڈّی ہوئے۔ تے بچّیاں والیو۔ اپنے بچّیاں نُوں غُصّہ نا دواؤ۔ سگوں خُدا ولّوں تعلِیم تے نصِیحت دے دے کے اوہناں دی پالنا کرو۔ نَوکرو۔ جیہڑے جِسم ولّوں تُہاڈے مالک نیں صاف دِلی نال ڈردے تے کمبدے ہوئے اوہناں دے اجیہے آکھے لگو۔ جیویں مسِیح دے۔ تے بندیاں نُوں خُوش کرن والیاں وانگر وکھالے لئی سیوا نا کرو۔ سگوں مسِیح دیاں بندیاں وانگر دِل نال خُدا دی مرضی پُوری کرو۔ تے اوہ خِدمت بندیاں دی نئیں۔ سگوں خُداوند دی جان کے دِل نال کرو۔ کیوں جو تُسی جان دے ہو۔ پئی جیہڑا اجیہا چَنگا کمّ کرے گا۔ بھانویں غلام ہوئے بھانویں اَزاد۔ خُداوند کولوں اوہو جیہا ای پاوے گا۔ تے اے مالِکو! تُسی جِھڑکاں چھڈ کے اوہناں نال ایہو جیہا سلُوک کرو کیوں جو تُسی جان دے اوہ۔ پئی اوہناں دا تے تُہاڈا دوہاں دا مالک اسمان اُتّے اے۔ تے اوہ کِسے دی رَئی نئیں کر دا۔ باقی خُداوند تے اوہدی بڑی قُوّت دی طاقت وِچ تگڑے رہو۔ خُداوند دے سارے ہتّھیار لا لوؤ۔ پئی تُسی ابلیس دِیاں چالاکیاں اگّے کھلون جوگے ہوؤ۔ کیوں جو اساں لہو تے جِسم نال نئیں سگوں اساں حکُومت تے اختیار والیاں تے ایس دُنیا دے ہنیرے دِیاں حاکماں تے شرارت دِیاں رُوحانی فَوجاں نال گُھلنا اے۔ جیہڑیاں اسمانی تھانواں وِچ نیں۔ ایس واسطے تُسی خُدا دے سارے ہتّھیار بَنّھ لو۔ تاں جو بَھیڑے دِن وِچ تُسی مُقابلہ کرن جوگے ہوؤ۔ تے سارے کمّاں نُوں مُکا کے قیم رَیہہ سکو۔ سو سچیائی دی پیٹی لکّ بَنّھ کے تے راستبازی دا بکتر پا کے۔ تے پیراں وِچ تسلّی دی خُوشخبری دی تیاری دی جُتّی پا کے اوہناں ساریاں اُتّے اِیمان دی سِپر لاکے کھلے رہو۔ جِہدے نال تُسی اوس شرِیر دے بَلدے ہوئے تِیراں نُوں بُجھا سکو۔ تے نجات دا خود پاؤ تے رُوح دی تلوار جیہڑی خُدا دا کلام اے۔ لے لوؤ۔ تے ہر ویلے تے سبھنیں گلِّیں رُوح وِچ دُعا تے مِنّت کر دے رہو۔ تے ایسے مطلب واسطے جاگدے رہو پئی تُسی سارے پاک لوکاں لئی دُعا منگدے رہو۔ تے میرے لئی وی۔ تاں جو بولن دے ویلے مَینُوں کلام کرن دی ہِمّت مِلے۔ جِہدے نال مَیں ایس خُوشخبری دے بھیت نُوں دلیری نال ظاہر کراں۔ جِہدے واسطے سنگلی نال بَدّھا ہویا ایلچی آں۔ تے اوہنوں دلیری نال بیان کراں جیویں چاہیدا اے۔ تے تُخِکس جیہڑا پیارا بھرا تے خُداوند دا دیانتدار نوکر اے تُہانوں میرِیاں سارِیاں گلّاں دسے گا۔ تاں جو تُسی جانو پئی مَیں کِیہ کرنا آں۔ اوہنوں مَیں تُہاڈے کول ایسے واسطے گھلّیا اے۔ پئی تُسی ساڈے حال توں واقف ہو جاؤ۔ تے اوہ تُہاڈے دِلاں نُوں تسلّی دے۔ خُدا باپ تے خُداوند یِسُوع مسِیح ولّوں بھراواں نُوں تسلّی مِلے۔ تے اوہناں وِچ اِیمان دے نال مُحبّت ہوئے۔ جیہڑے ساڈے خُداوند یِسُوع مسِیح نال سدا قیم رہن والی مُحبّت رکھدے نیں۔ اوہناں ساریاں اُتّے فضل ہوئے۔ مسِیح یِسُوع دیاں غلاماں پَولُس تے تِیمُتِھیُس ولّوں فِلپّی دیاں ساریاں پاک لوکاں دے ناں جیہڑے مسِیح یِسُوع وِچ نیں نگہباناں تے خادماں سَنے۔ ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔ مَیں جدوں تُہانوں یاد کرنا آں تَد ہرویلے اپنے خُدا دا شُکر کرنا آں۔ تے ہر اِک دُعا وِچ جیہڑی تُہاڈے لئی منگنا آں سدا خُوشی نال تُہاڈے لئی مِنّت کرنا آں۔ ایس لئی پئی تُسی پہلے دِن توں لگ کے اَج تِیکر خُوشخبری دے پَھیلان وِچ میرے سنگی رہے ہو۔ تے مَینُوں یقِین اے پئی جِس تُہاڈے وِچ نیک کمّ شُروع کِیتا اے۔ اوہ اوہنوں یِسُوع مسِیح دے دِن تِیکر پُورا کر دے گا۔ تے چاہیدا وی اے پئی مَیں تُہاڈے سبھناں دی بابت اجیہا ای خیال کراں کیوں جو تُسی میرے دِل وِچ وَسدے اوہ۔ ایس لئی میری قید تے خُوشخبری دے جواب دین تے ثابت کرن وِچ تُسی سارے میرے نال فضل وِچ سنگی ہو۔ خُدا میرا گواہ اے پئی مَیں کِیویں مسِیح یِسُوع دیاں ترساں نال تُہاڈی ساریاں دی چاہ کرنا آں۔ تے ایہہ دُعا کرنا آں پئی تُہاڈی مُحبّت عِلم تے ہر طرح دی پچھان نال ہور وی وَدّھدِی جاوے۔ تاں جو چَنگیاں چَنگیاں شیواں نُوں پرکھ سکو تے مسِیح دے دِن تِیکر صاف دِل رہو۔ تے کدی ٹھیڈا نا کھاؤ۔ تے راستبازی دے پَھل نال جیہڑا مسِیح یِسُوع دے سببّوں اے بھرے رہو۔ تاں جو خُدا دا جلال تے وڈیائی ہوئے۔ تے بھراؤ! مَیں تُہانوں دسنا چاہناں آں پئی جو کُجھ میرے اُتّے بِیتیا اوہ خُوشخبری دی ترقی ای دا سبّب بنیا۔ ایتھوں تِیکر پئی قَیصری سپاہیاں دی ساری پلٹن تے باقی ساریاں لوکاں وِچ مشہُور ہوگیا پئی مَیں مسِیح دے واسطے قید آں۔ تے جیہڑے خُداوند وِچ بھرا نیں کئی میرے قید ہون دے سببّوں دلیر ہو کے بے دھڑک خُدا دا کلام سُنان وِچ وَدّھ کے حَوصلہ کر دے نیں۔ کئی تے ساڑے تے جھگڑے دے سببّوں مسِیح دی منادی کر دے نیں۔ تے کئی نیک نِیتی نال۔ اِک تے مُحبّت دے سببّوں ایہہ جان کے مسِیح دا ہوکا دیندے نیں۔ پئی مَیں خُوشخبری دا جواب دین لئی مُقرّر آں۔ پر دُوجے دھڑے صدقہ صاف دِل نال نئیں سگوں ایس خیال نال پئی میری قید وِچ میرے لئی دُکھ پَیدا کرن۔ سو فیر کِیہ ہویا؟ نِرا ایہہ پئی سبھ طرح نال مسِیح دا ہوکا دِتّا جاندا اے۔ بھانویں پّج نال ہوئے بھانویں سچیائی نال تے ایس توں مَیں خُوش آں تے رہاں گا وی۔ کیوں جو مَیں جاننا آں پئی تُہاڈی دُعا تے یِسُوع مسِیح دے رُوح دے اِنعام توں ایہدا انت میری نجات ہوئے گا۔ ایس لئی پئی میرے دِل دی تاہنگ تے آس ایہو ای اے پئی مَیں کِسے گلّ وِچ شرمندہ نا ہوواں سگوں پُوری دلیری صدقہ جیویں مسِیح دی وڈیائی میرے بدن دے سببّوں سدا ہوندی رہی اے اوسے طرح ہُن وی ہوئے گی۔ بھانویں مَیں مر جاواں تے بھانویں مَیں جِیوندا رہاں۔ ایس لئی پئی جِیونا میرے بھانے مسِیح اے۔ تے مرنا کھٹّی۔ پر جے میرا جِسم وِچ جِیونا میری کمائی نُوں پَھل لائے۔ تے میری سمجھ وِچ نئیں آؤندا پئی مَیں کِنوں چُناں۔ مَیں دو وَلّیِں پھسیا ہویا آں۔ پر جی تے ایہہ چاہندا اے۔ پئی مسِیح کول کُوچ کر کے جا رہواں ایس لئی پئی ایہہ اودُوں چوکھا چَنگا اے۔ پر جِسم وِچ رہنا تُہاڈی خاطر بُہتا ضرُوری اے۔ تے ایس کر کے پئی مَینُوں ایہدا یقِین اے۔ ایس لئی مَیں جاننا آں پئی جِیوندا رہاں گا۔ سگوں تُہاڈے سبھناں دے نال رہواں گا تاں جو تُسی اِیمان وِچ وَدھو۔ تے اوہدے وِچ خُوش رہو۔ تے جیہڑا مان تُہانوں میرے اُتّے اے۔ اوہ میرے تُہاڈے کول مُڑ آؤن نال مسِیح یِسُوع وِچ وَدھیرا ہو جائے۔ نِرا ایہہ کرو پئی تُہاڈا چال چَلّن مسِیح دی خُوشخبری دے لائق ہوئے۔ تاں جو بھانویں مَیں آواں تے تُہانوں ویکھاں تے بھانویں نا آواں تُہاڈا ایہہ حال سُناں۔ پئی تُسی اِکّو رُوح وِچ پکّے اوہ۔ تے اِنجِیل دے اِیمان دے لئی تُسی رَل کے اِک جان ہو کے دِلوں محنت کر دے ہو۔ تے کِسے گلّ وِچ دُشمناں کولوں نئیں ڈردے۔ ایہہ اوہناں لئی ہلاکت دا صاف نِشان اے۔ تے تُہاڈے لئی خُدا ولّوں نجات دا۔ کیوں جو مسِیح دی خاطر تُہاڈے اُتّے ایہہ فضل ہویا۔ پئی نا نِرے اوہدے اُتّے اِیمان لیاؤ سگوں اوہدی خاطر دُکھ وی سَہندے رہو۔ تے تُسی اوسے طرح پُورے دِلوں کوشش کر دے ہو۔ جیویں مَینُوں کر دیاں ویکھیا سی۔ تے ہُن وی سُندے ہو پئی مَیں اوسے طرح کرنا آں۔ ایس لئی جیکر مسِیح وِچ کُجھ نصِیحت اے تے جیکر کُجھ مُحبّت پاروں دلاسا اے تے جیکر رُوح دی کُجھ سانجھ اے تے جیکر کُجھ کھِچّ پِیڑ اے۔ تے میری ایہہ رِیجھ پُوری کرو۔ پئی اِکّو جیہا وچار کرو۔ اِکّو جیہی مُحبّت رکھو۔ اِک جان ہوؤ۔ اِکّو وچار کرو۔ دھڑے بازی تے پھنڈ مارِیاں کُجھ نا کرو۔ سگوں عاجزی نال اِک دُوجے نُوں اپنے نالوں چَنگا جانو۔ ہر کوئی اپنیاں ولّ ای نا ویکھے سگوں دُوجیاں ولّ وی۔ سو اوہو جیہا ای سبھا رکھو جیہا یِسُوع مسِیح دا سی۔ اوہ بھانویں خُدا دی صُورت وِچ سی۔ پر اوہنے خُدا دے برابر ہون نُوں اپنے قبضے وِچ رکھن دی شے نا جانیا۔ سگوں اپنے آپ نُوں خالی کر دِتّا۔ تے ٹہلئے دی صُورت مَل لئی۔ تے بندیاں وانگر ہو گیا۔ تے اِنسانی شکل وِچ ظاہر ہو کے اپنے آپ نُوں نِیویاں کر دِتّا تے ایتھوں تِیکر تابعدار ہویا پئی مَوت سگوں صلِیب دی مَوت جَھل لئی ایس کر کے خُدا اوہنوں بُہت اُچّا کِیتا تے اوہنوں ایہہ ناں دِتّا۔ جیہڑا ساریاں نانواں نالوں اعلیٰ اے۔ تاں جو یِسُوع دے ناں اُتّے سارے گوڈے ٹیکن بھانویں اسمانی ہون بھانویں زمِینی بھانویں اوہ جیہڑے زمین دے ہیٹھاں نیں۔ تے خُدا باپ دے جلال دے لئی ہر اِک زبان مَن لَئے پئی یِسُوع مسِیح خُداوند اے۔ سو میرے پیاریو۔ جیویں مُڈھوں ای تُسی تابعداری کر دے رہے ہو اوسے طرح ہُن وی نا نِرے میرے ہوندیاں سگوں ایہدے نالوں وَدّھ میرے نا ہوندیاں ڈردے تے کمبدے ہوئے اپنی نجات دا کمّ کر دے جاؤ۔ کیوں جو جیہڑا تُہاڈے وِچ نِیّت تے عمل دوہاں نُوں اپنا نیک اِرادہ پُورا کرن لئی پَیدا کر دا اے سو خُدا ای اے۔ سارے کمّ بِناں شکایت تے بِناں حُجتّاں کریا کرو۔ تاں جو تُسی بے عیب تے حلِیم ہو کے ڈِنگیاں تے پُٹھے چَلّن والیاں لوکاں وِچ خُدا دے بے نُقص پُتر بنے رہو۔ (جِنہاں وِچ تُسی دُنیا وِچ چانن وانگُوں ظاہر ہوندے ہو۔ تے زِندگی دا کلام پیش کر دے ہو۔) تاں جو مسِیح دے دِن مَینُوں فخر ہوئے۔ پئی نا میری بھج دَوڑ بے فائدہ ہوئی نا میری محنت ایویں گئی۔ تے جے تُہاڈے اِیمان دی قُربانی تے سیوا اُتّوں مَیں گھولیا وی جاواں تَد وی خُوش آں۔ تے تُہاڈے سبھناں نال خُوشی کرنا آں۔ تُسی وی ایسے طرح خُوش ہوؤ۔ تے میرے نال خُوشی کرو۔ پر مَینُوں خُداوند یِسُوع وِچ آس اے۔ پئی تِیمُتِھیُس نُوں تُہاڈے کول چھیتی گھلاں گا۔ تاں جو تُہاڈا حال معلُوم کر کے تے میرے دِل نُوں وی ارمان ہوئے۔ کیوں جو اجیہا جانی جان میرے کول کوئی نئیں۔ جِہنُوں تُہاڈی سَچّی فِکر ہوئے۔ سارے آپو اپنیاں شیواں دے فِکر وِچ نیں۔ یِسُوع مسِیح دِیاں شیواں دے نئیں۔ پر تُسی اوہدی پکیائی نُوں جان دے ہو۔ پئی جیویں پُتر پئیو دی سیوا کر دا اے اونویں ای اوس میرے نال خُوشخبری سُنان وِچ خِدمت کِیتی۔ ایس لئی مَیں آس کرنا آں پئی ایہہ ویکھدیاں ساری ای پئی میرے نال کِیہ ہوئے گا۔ تے اوہنوں اودُوں ای گھل دیاں گا۔ تے مَینُوں خُداوند اُتّے یقِین اے۔ پئی مَیں آپ وی چھیتی آواں گا۔ تے مَیں اِپفُردِتُس نُوں تُہاڈے کول گھلّنا ضرُوری سمجھیا ایہہ میرا بھرا تے کمّ کرن وِچ میرا سنگی تے میرے نال دا سپاہی تے تُہاڈے ولّوں گھلّیا ہویا تے میرِیاں لوڑاں پُوریاں کرن لئی ٹہلیا اے۔ کیوں جو اوہ تُہانوں سبھناں نُوں بُہت چاہندا سی تے ایس کر کے بے چَین رہندا سی۔ پئی تُساں اوہدی بیماری دا حال سُنیا سی۔ بے شک اوہ بیماری نال مرن والا ہویا سی۔ پر خُدا اوہدے اُتّے رَحم کِیتا۔ تے نِرا اوسے اُتّے ای نئیں۔ سگوں میرے اُتّے وی۔ تاں جو مَینُوں غم اُتّے غم نا ہوئے۔ ایس لئی مَینُوں اوہدے گھلّن دا ہور وی وَدّھ خیال سی۔ تے تُسی وی اوہنوں مِل کے فیر خُوش ہو جاؤ تے میرا غم وی گھٹ جائے۔ سو خُداوند ولّوں تُسی اوہنوں بڑی خُوشی نال قبول کرنا۔ تے اجیہے بندیاں دی عِزّت کریا کرو۔ ایس لئی پئی اوہ مسِیح دے کمّ دی خاطر مرن دے نیڑے اَپڑ گیا سی۔ اوہ ایس کر کے جان اُتّے کھیڈ گیا پئی جِنّاں گھاٹا تُہاڈے ولّوں میری سیوا وِچ ہویا اے۔ اوہنوں پُوریاں کرے۔ ہور بھراؤ! خُداوند وِچ خُوش رہو۔ تُہانوں اِکّو گلّ گھڑی مُڑی لِکھن وِچ مَینُوں تے کوئی اَوکھ نئیں۔ تے تُہاڈا ایہدے وِچ بچاؤ اے۔ کُتّیاں توں خبردار رہو۔ بدکاراں توں خبردار رہو۔ ماس وَڈّھان والیاں توں خبردار رہو۔ کیوں جو سُنت والے تے اسی آں۔ جیہڑے خُدا دے رُوح دی ہدایت نال عبادت کرنے آں۔ تے مسِیح یِسُوع اُتّے فخر کرنے آں۔ تے جِسم دا بھروسا نئیں کر دے۔ پر مَیں تے جِسم دا وی بھروسا کر سکنا آں۔ جے کِسے ہور نُوں جِسم اُتّے بھروسا کرن دا خیال ہوئے۔ تے مَیں اوہدے نالوں وی وَدّھ کر سکنا آں۔ اٹھویں دِن مَیں سُنتی بَیٹھا۔ مَیں اِسرائیل دی قوم تے بِنیمِین دے فِرقے دا آں۔ عِبرانِیاں دا عِبرانی تے شریعت ولّوں فریسی آں۔ جوش ولّوں کلِیسیا دا ستان والا۔ شریعت دی راستی ولّوں بے عیب ساں۔ پر جِنّیاں شیواں میرے نفع دِیاں سن اوہناں نُوں مَیں مسِیح دی خاطر گھاٹا سمجھیا۔ سگوں مَیں اپنے خُداوند یِسُوع مسِیح دی پہچان دی بُہتی خُوبی دے سبّب سارِیاں شیواں نُوں گھاٹا سمجھنا آں۔ جِہدے لئی مَیں ساریاں شیواں دا گھاٹا جھلیا تے اوہناں نُوں کُوڑا سمجھنا آں پئی مسِیح نُوں کھٹ لَواں۔ تے مَیں اوہدے وِچ لَبّھاں تے میرے کول اپنی اوہ راست بازی نا ہوئے جیہڑی شریعت ولّوں اے۔ پر اوہ جیہڑی مسِیح اُتّے اِیمان رکھن دے سببّوں اے پئی اوہ راستبازی جیہڑی خُدا ولّوں اِیمان دی راہِیں مِلدی اے۔ تے مَیں اوہنوں تے اوہدے جِیو اُٹھن دی قُدرت نُوں تے اوہدے نال دُکھاں وِچ شریک ہون نُوں معلُوم کراں۔ تے اوہدی مَوت ورگا ہو جاواں۔ پئی کوِیں مُردیاں وِچوں جی اُٹھن دے درجے نُوں اپڑاں۔ ایہہ نئیں پئی مَینُوں ہُن تِیکر لَبھّا اے یا مَیں ہُن تِیکر پُگ گیا آں پر مَیں بھجا جانا آں۔ پئی اوس گلّ نُوں ہتّھ پاں جِہدے مارِیاں مسِیح یِسُوع مَینُوں ہتّھ پایا اے۔ بھراؤ! میرا ایہہ خیال نئیں۔ پئی میرے ہتّھ لگ گیا اے پر اِک گلّ کرنا آں جیہڑیاں شیواں پِچّھے رہ گِئیاں نیں اوہناں نُوں وسار کے اگلیاں شیواں ولّ وَدھدا جاناں آں۔ نشانے ولّ بھجا جاناں آں۔ تاں جو اوس اِنعام نُوں لے لَواں جِہدے لئی خُدا نے مسِیح یِسُوع دی راہِیں مَینُوں اُتانہہ سدّیا۔ سو جِنّے ساڈے وِچوں کامِل نیں ایسے طرح ای سمجھن۔ تے جے کِسے گلّ وِچ تُہاڈا ہور خیال ہوئے تے تاں خُدا اوہ وی تُہاڈے اُتّے ظاہر کر دے گا۔ تَد وی جِتّھوں تِیکر اسی پُجے آں اوسے ای سیدھ اُتّے ٹُریئے۔ بھراؤ! تُسی رَل کے میری رِیس کرو تے اوہناں نُوں سنجھانو جیہڑے اِنج ٹُردے نیں جِیکُوں تُہاڈے لئی ساڈا وی نمونہ اے۔ ایس لئی پئی بتھیرے اِنج ٹُردے نیں جِنہاں ولّوں مَیں تُہانوں بہتیری واری دسیا اے تے ہُن وی رو رو کے دسنا آں پئی اوہ مسِیح دی صلِیب دے وَیری نیں۔ اوہناں دا انت ہلاکت اے۔ ڈِھڈ اوہناں واسطے خُدا اے۔ اوہ اپنی شرم دِیاں گلّاں اُتّے پُھلدے نیں۔ تے دُنیا دِیاں شیواں ولّ دھیان رکھدے نیں۔ پر ساڈا وطن اسمان اے۔ تے اسی اِک نجات دین والے یعنی خُداوند یِسُوع مسِیح دے آؤن دی اُڈِیک وِچ آں۔ اوہ اپنی اوس قُدرت دے اثر دے سببّوں جِہدے توں سارِیاں شیواں اپنے تابعیاں وِچ کر سکدا اے۔ ساڈے نِکھد بدن دی شکل بدل کے اپنے جلالی بدن دی صُورت اُتّے بنائے گا۔ ایس لئی میرے پیارے بھراؤ! جِنہاں دی مَینُوں چاہ اے۔ تے جیہڑے میری خُوشی تے تاج ہو۔ میرے پیاریو! خُداوند وِچ پکّے رہو۔ مَیں یُوؤدیہ نُوں وی نصِیحت کرنا آں تے سنُتخے نُوں وی پئی اوہ خُداوند وِچ اِک دِل ہون۔ ہَلا اَے میرے سَچّے ساتھی تیرے اگّے وی عرض کرنا آں۔ پئی تُوں اوہناں زنانِیاں دی مدد کر کیوں جو اوہناں میرے نال خُوشخبری سُنان وِچ کلیمینس تے میرے اوہناں باقی ساتھِیاں سَنے جان مار کے محنت کِیتی۔ جِنہاں دے ناں زِندگی دی کتاب وِچ لِکھے ہوئے نیں۔ خُداوند وِچ ہرویلے خُوش رہو۔ فیر آکھنا آں۔ پئی خُوش رہو۔ تُہاڈی نرم دِلی ساریاں اُتّے ظاہر ہوئے۔ خُداوند نیڑے اے۔ کِسے گلّ دی فِکر نا کرو۔ سگوں سارِیاں گلّاں وِچ دُعا تے مِنّت کر کے اپنیاں عرضاں شُکر گُزاری نال خُدا دے اگّے کرو۔ تے خُدا دی تسلّی جیہڑی سمجھ توں بالکل باہر اے۔ تُہاڈے دِلاں تے خیالاں دی مسِیح یِسُوع وِچ رکھوالی کرے گی۔ بھراؤ! ہور ایہہ گلّ اے جیہڑیاں گلّاں سَچیاں نیں جیہڑیاں عِزّت جوگیاں نیں جیہڑیاں نیک نیں۔ جیہڑیاں سُدّھ نیں۔ جیہڑیاں پیاریاں نیں۔ جیہڑیاں بھلیاں نیں۔ جیہڑیاں گُن دِیاں نیں تے جیہڑیاں تعرِیف دِیاں نیں اوہناں اُتّے دھیان رکھو۔ جیہڑیاں گلّاں تُساں مَیتھوں سِکھیاں تے پائیاں تے سُنیاں تے میرے وِچ ویکھیاں نیں اوہناں اُتّے عمل کرو۔ تے جیہڑا تسلّی دا خُدا اے۔ تُہاڈے نال رہے گا۔ مَیں خُداوند وِچ بُہت خُوش آں۔ پئی اینے چِر پِچّھوں تُساں مُڑ میرا خیال کِیتا۔ آں پہلاں وی تُہانوں ایہدا خیال سی۔ پر موقع نا مِلیا۔ مَیں ایس لئی نئیں آکھدا کہ مَینُوں لوڑ ایہہ۔ کیوں جو مَیں ایہہ سِکھیا اے۔ پئی جیہڑے حال وِچ ہوواں اوسے وِچ راضی رہواں۔ مَیں گھٹناں وی جاننا آں تے وَدھنا وی۔ سارِیاں گلّاں تے ہر حالت وِچ مَیں رجناں تے بُھکھیاں رہنا تے وَدھنا گھٹنا سِکھ لیا اے۔ جیہڑا مَینُوں طاقت دیندا اے اوہدے سببّوں مَیں سبھ کُجھ کر سکنا آں۔ فیر وی تُساں چَنگا کِیتا۔ پئی میری تنگی وِچ تُساں میرا ساتھ دِتّا۔ تے فِلِپّیو! تُسی آپ وی جان دے ہو۔ پئی خُوشخبری دے شُروع وِچ جد مَیں مَکِدُنیہ وِچوں ٹُرپیا۔ تُہاڈے باہجوں کِسے کلِیسیا لین دین وِچ میری مدد نا کِیتی۔ تھِسّلُنِیکے وِچ میری تُھڑ پُوری کرن لئی اِکّو واری نئیں سگوں دو واری کُجھ گھلّیا۔ ایہہ نئیں پئی اِنعام منگنا آں پر اجیہا پَھل چاہناں آں۔ جیہڑا تُہاڈے لیکھے وِچ وَدّھ ہو جائے۔ میرے کول سبھو کُجھ اے۔ سگوں بُہت وَدّھ اے۔ تُہاڈیاں گھلّیاں ہویاں شیواں اِپفُردِتُس دے ہتھّوں لے کے مَیں رَجّ گیا آں۔ اوہ اِک خُوشبوئی تے اجیہی قُربانی نیں۔ جیہڑی قبول ہوئی تے خُدا نُوں پسند اے۔ میرا خُدا اپنی دَولت دے سببّوں مسِیح یِسُوع وِچ تُہاڈی ہر اِک تُھڑ اپنے جلال نال پُوری کرے گا۔ ساڈے خُدا تے باپ دی وڈیائی سدا تِیکر ہوندی رہے۔ آمِین۔ ہر اِک پاک نُوں جیہڑا مسِیح یِسُوع وِچ اے۔ سلام آکھو۔ جیہڑے بھرا میرے نال نیں تُہانوں سلام آکھدے نیں۔ سارے پاک لوک خاص کر قَیصر دے گھر والے تُہانوں سلام آکھدے نیں۔ خُداوند یِسُوع مسِیح دا فضل تُہاڈی رُوح دے نال رہے۔ پَولُس ولّوں جیہڑا خُدا دی مرضی نال مسِیح یِسُوع دا رسُول اے تے بھرا تِیمُتِھیُس ولّوں۔ اوہناں پاک لوکاں یعنی مسِیح وِچ اِیماندار بھراواں دے نال جیہڑے کُلُسِّے وِچ نیں۔ ساڈے باپ خُدا ولّوں تُہانوں فضل تے تسلّی مِلدی رہے۔ اسی تُہاڈے لئی سدا دُعا کر کے اپنے خُداوند یِسُوع مسِیح دے باپ یعنی خُدا دا شُکر کرنے آں۔ کیوں جو اساں سُنیا اے۔ پئی تُساں مسِیح یِسُوع اُتّے اِیمان لیاندا اے۔ تے سارے پاک لوکاں نال پیار کر دے ہو۔ اوس آس کِیتی ہوئی شے دے سببّوں جیہڑی تُہاڈے واسطے اسمان اُتّے رکھی ہوئی اے۔ جِہدا ذِکر تُساں اوس خُوشخبری دے سَچّے کلام وِچ سُنیا اے۔ جیہڑا تُہاڈے کول اَپڑیا اے۔ تے سارے جہان وِچ پَھلدا اے۔ تے وَدھدا جاندا اے۔ تُہاڈے وِچ وی جد توں تُساں خُدا دے فضل نُوں سُنیا تے اوہنوں سَچ کر کے جانیا اے۔ اینج ای کر دا اے۔ جیویں تُساں ساڈے پیارے ساتھی اِپَفراس کولوں سُنیا اے۔ جیہڑا ساڈے ولّوں مسِیح دا دیانتدار نوکر اے۔ اوسے ای تُہاڈی مُحبّت جیہڑی رُوح ولّوں اے۔ ساڈے اُتّے ظاہر کِیتی۔ ایس کر کے جد توں اساں سُنیا اے۔ اسی تُہاڈے لئی دُعا تے مِنّت کرنی نئیں چھڈ دے۔ پئی تُسی ساری رُوحانی حِکمت تے سمجھ نال اوہدی مرضی دے عِلم نال بھر جاؤ۔ تاں جو تُہاڈا چال چَلّن خُدا دے لائق ہوئے تے تُسی اوہنوں سارِیاں گلّاں وِچ خُوش کرو۔ تے تُہاڈے ساریاں نیک کمّاں وِچ پَھل لگّے۔ تے تُسی خُدا دی پچھان وِچ وَدھدے جاؤ۔ تے اوہدے جلال دی قُدرت دے سببّوں ہر طرح دی قُوّت پَیدا کرو۔ تاں جو خُوشی نال سارِیاں گلّاں وِچ صبر تے حَوصلہ کرو۔ تے باپ دا شُکر کر دے رہو۔ جِس سانُوں ایس لائق کِیتا پئی چانن وِچ پاک لوکاں دے وِرثے دا حِصّہ پایئے۔ اوسے ای سانُوں ہنیرے دے ہتھّوں چھڈا کے اپنے پیارے پُتر دی بادشاہی وِچ واڑیا۔ جِہدے توں سانُوں رہائی یعنی گُناہ دی مُعافی مِلی۔ اوہ اَن ویکھے خُدا دی صُورت تے ساری خلقت وِچوں پلیٹھا اے۔ کیوں جو اوسے توں سارِیاں شیواں پَیدا کِیتیاں گِئیاں۔ بھانویں اسمان دِیاں ہون۔ بھانویں زمین دِیاں۔ ویکھیاں ہویاں ہون بھانویں انویکھیاں۔ تخت ہون بھانویں ریاستاں۔ بھانویں حکُومتاں بھانویں اختیار۔ سارِیاں شیواں اوسے دی راہِیں تے اوہدے واسطے پَیدا کِیتیاں ہویاں نیں۔ تے اوہ سارِیاں شیواں توں پہلاں اے۔ تے اوسے توں ای سارِیاں قیم رہندیاں نیں۔ تے اوہ ای بدن یعنی کلِیسیا دا سِر اے۔ اوہ ای مُڈھ اے۔ تے مُردیاں وِچوں جی اُٹھن وِچ پلیٹھا اے پئی سارِیاں گلّاں وِچ موہرلا ہوئے۔ کیوں جو باپ دی خُوشی سی پئی سارا کمال اوسے وِچ ہوئے۔ تے اوہدے لہو دے سببّوں جیہڑا صلِیب اُتّے وَگیا۔ صُلح کر کے سارِیاں شیواں دا اوہدی راہِیں اپنے نال میل کرائے بھانویں اوہ زمین دِیاں ہون بھانویں اسمان دِیاں۔ تے اوس ہُن اپنے جِسمانی بدن دے سببّوں مَوت دی راہِیں تُہاڈا وی میل کرایا۔ جیہڑے پہلاں خارج تے بُریاں کمّاں دے سببّوں وَیری سو۔ تاں جو اوہ تُہانوں پاک تے بے نُقص تے بے الزام بنا کے اپنے اگّے حاضر کرے۔ ایس شرط نال پئی تُسی اِیمان دی نِینّھ اُتّے قیم تے پکّے رہو۔ تے اوس خُوشخبری دی آس نُوں جِہنُوں تُساں سُنیا اے۔ نا چھڈو۔ جِہدی منادی اسمان دے ہیٹھ ساری خلقت وِچ کِیتی گئی۔ تے مَیں پَولُس اوسے دا نوکر بنیاں۔ ہُن مَیں اوہناں دُکھاں توں خُوش آں۔ جیہڑے تُہاڈے لئی سہنا آں۔ تے مسِیح دے دُکھاں دا گھاٹا اوہدے بدن یعنی کلِیسیا دی خاطر اپنے جِسم وِچ پُورا کرنا آں۔ جِہدا مَیں خُدا دے اوس بندوبست دے سببّوں نوکر بنیاں۔ جیہڑا تُہاڈے لئی میرے سپُرد ہویا۔ تاں جو مَیں خُدا دے کلام دی پُوری پُوری منادی کراں۔ یعنی اوس بھیت دی جیہڑا ساریاں زمانیاں تے پِیڑھیاں وِچ چُھپیا رہیا تے ہُن اوہدے ایہناں پاک لوکاں اُتّے ظاہر ہویا۔ جِنہاں اُتّے خُدا ظاہر کرنا چاہندا سی۔ پئی غیر قوماں وِچ اوس بھیت دے جلال دی دَولت کیہو جیہی اے۔ تے اوہ ایہہ اے۔ پئی مسِیح جیہڑا جلال دی آس اے۔ تُہاڈے وِچ رہندا اے۔ جِہدی منادی کر کے اسی ہر اِک بندے نُوں نصِیحت کرنے آں۔ تے ہر اِک نُوں پُوری دانائی نال تعلِیم دینے آں۔ تاں جو اسی ہر اِک بندے نُوں مسِیح وِچ کامِل کر کے پیش کریئے۔ تے ایسے لئی مَیں اوہدی اوس قُوّت دے سببّوں دِل توڑ کے محنت کرنا آں۔ جیہڑی میرے وِچ زور نال اثر کر دی اے۔ مَیں تُہانوں دسنا چاہناں آں۔ پئی تُہاڈے تے لَودِیکیہ والیاں تے اوہناں سبھناں لئی جِنہاں میرا مُنھ نئیں ویکھیا کِنّاں ای دَوڑ بھج کرنا آں۔ تاں جو اوہناں دے دِلاں نُوں تسلّی ہوئے۔ تے اوہ آپو وِچ مُحبّت نال گنڈھے رہن۔ تے پُوری سمجھ دی ساری دَولت لے لین۔ تے خُدا دے یعنی مسِیح دے بھیت نُوں پچھانن۔ جِہدے وِچ حِکمت تے عِلم دے سارے خزانے چُھپے ہوئے نیں۔ ایہہ مَیں ایس لئی آکھنا آں پئی کوئی جَنا مِٹّھیاں گلّاں نال تُہانوں دھوکھا نا دیوے۔ تے بھانویں میرا جِسم تُہاتھوں دُور اے پر میری رُوح تُہاڈے نال اے۔ تے تُہاڈے ڈھب تے پکّے اِیمان نُوں ویکھ کے خُوش آں جیہڑا مسِیح اُتّے اے۔ ایس لئی جیویں تُساں مسِیح یِسُوع خُداوند نُوں مَنّیا جھلیا اے اوسے طرح اوہدے وِچ ای چلدے رہو تے اوہدے وِچ جڑ پھڑ کے وَدھدے جاؤ۔ تے جیویں تُہانوں تعلِیم مِلی اے اوسے طرح اِیمان وِچ پکّے رہو۔ تے شُکرانے وِچ وَدھدے جاؤ۔ خبردار تُہانوں کوئی بندہ اوس فلسفی تے بے فائدہ فریب نال لُٹ نا لَئے۔ جیہڑے بندیاں دِیاں روائِتاں تے دُنیا دِیاں مُڈھ والِیاں گلّاں وانگر نیں۔ پر مسِیح وانگر نئیں۔ کیوں جو ساری کمال الُوہیّت اوسے وِچ جِسم لے کے وَسدی اے۔ تے تُسی اوسے وِچ کامِل بن گئے ہو۔ جیہڑا ساری حِکمت تے اختیار دا سِر اے۔ اوسے وِچ تُسی ایس طرح سُنتی بَیٹھے جیہڑی سُنت ہتّھاں نال نئیں ہوندی۔ سگوں مسِیح دی سُنت جِہدے وِچ نفسانی بدن لاہ چھڈی دا اے۔ تے اوہدے ای نال بپتِسمے وِچ دبّے گئے تے اوسے وِچ خُدا دی قُوّت اُتّے اِیمان لیا کے اوہدے نال جی وی اُٹھے۔ جِس اوہنوں مُردیاں وِچوں جوالیا۔ تے اوس تُہانوں وی جیہڑے اپنے قصوراں تے جِسم دی نا سُنتی دے سببّوں موئے ہوئے سو اوہدے نال جوالیا تے سارے ساڈے قصور بخش دِتّے۔ تے حُکماں دی اوہ اُلیکھ مِٹا چھڈی جیہڑی ساڈے ناں تے ساڈے سِر سی۔ تے اوہنوں صلِیب اُتّے کِلاّں نال جَڑھ کے اگّوں ہٹا دِتّا۔ اوس حکُومتاں تے اِختیاراں نُوں اپنے اُتّوں ہٹا کے اوہناں دا کُھلا تماشہ بنایا تے صلِیب دے سببّوں اوہناں اُتّے فتح پا لین دی خُوشی کِیتی۔ سو کھان پِین یا عید یا نَوِیں چَنّ یا سبت دی بابت کوئی تُہاڈے اُتّے الزام نا لائے۔ کیوں جو اوہ آؤن والِیاں شیواں دا پرچھاواں اے۔ پر اصل شیواں مسِیح دِیاں نیں۔ کوئی بندہ عاجزی یا فرِشتیاں دی بندگی نُوں پسند کر کے تُہاڈا دَوڑ والا اِنعام نا کھو لَئے۔ اجیہا بندے اپنے جِسم دی عقل اُتّے بے فائدہ شیخی مار کے ویکھیاں ہویاں شیواں وِچ لگّا رہندا اے۔ پر اوس سِر نُوں پَھڑی نئیں رہندا جِہدے توں سارا بدن جوڑاں تے پٹّھیاں دی راہِیں پَلدا اے۔ تے آپو وِچ مِل جُل کے خُدا ولّوں وَدھدا جاندا اے۔ جد تُسی مسِیح نال دُنیا دِیاں مُڈھ والِیاں گلّاں ولّوں مر گئے۔ تے فیر اوہناں وانگر جیہڑے دُنیا وِچ جِیوندے نیں بندیاں دے حُکماں تے تعلِیماں وِچوں اجیہاں رسماں نُوں کیوں مَن دے ہو۔ پئی ایہنوں نا چُھونا۔ اوہنوں نا چکھّنا تے اوہنوں ہتّھ نا لانا۔ (کیوں جو ایہہ سارِیاں شیواں ورتدیاں ورتدیاں مُک جان گِیاں۔) ایہناں گلّاں وِچ اپنی مرضی دی بندگی تے عاجزی تے بدن نال سختی کرن دے سببّوں حِکمت دی صُورت تے اے۔ پر جِسمانی خواہشاں دے روکن وِچ کِسے کمّ دِیاں نئیں۔ سو جے تُسی مسِیح نال جوالے گئے ہو تاں اُتّے دِیاں شیواں نُوں لبّھدے رہو۔ جِتّھے مسِیح رہندا اے تے خُدا دے سَجّے ہتّھ بَیٹھا اے۔ اُتّے دِیاں شیواں دے دھیان وِچ رہو زمین دِیاں شیواں دے نئیں۔ کیوں جو تُسی مر گئے تے تُہاڈی زِندگی مسِیح وِچ چُھپی ہوئی اے۔ جد مسِیح جیہڑا ساڈی زِندگی اے۔ ظاہر کِیتا جائے گا تے تُسی وی جلال وِچ اوہدے نال ظاہر کِیتے جاؤ گے۔ سو اپنے اوہناں انگاں نُوں مار چھڈو۔ جیہڑے زمین اُتّے نیں۔ یعنی زنا تے پلِیتی۔ شہوت تے بُری خواہش تے لالچ نُوں جیہڑا بُت پرستی دے برابر اے۔ کیوں جو اوہناں دے سببّوں خُدا دا غضب نافرمان لوکاں اُتّے آؤندا اے۔ تے تُسی وی جد اوہناں گلّاں وِچ جِیوندے سو اوس ویلے اوہناں اُتّے عمل کر دے سو۔ پر ہُن تُسی وی اوہناں سبھناں نُوں یعنی غُصّہ تے قَہر تے وَیر تے بُرا آکھنا تے مُنھوں گندِیاں گلّاں آکھنیاں چھڈ دیو۔ آپو وِچ جُھوٹھ نا مارو کیوں جو تُساں پرانی اِنسانِیّت نُوں اوہدیاں کمّاں سَنے لاہ چھڈیا۔ تے نَوِیں اِنسانِیّت نُوں پالیا اے۔ جیہڑی خُدا دے عِلم لئی اپنے پَیدا کرن والے دی صُورت اُتّے نَوِیں بندی جاندی اے۔ اوتھے نا یُونانی رہیا نا یہُودی نا سُنتی بَیٹھے ہوئے نا بَیٹھے ہوئے نا وحشی نا سکُوتی نا غلام نا اَزاد نِرا مسِیح سبھ کُجھ تے ساریاں وِچ اے۔ سو خُدا دے چُنیاں ہویاں وانگر۔ جیہڑے پاک تے پیارے نیں۔ رَحم دِلی تے مِہربانی تے عاجزی تے حلِیمی تے برداشت دا لباس پاؤ۔ جے کِسے نُوں دُوجے دی شکایت ہوئے تے اِک دُوجے دی برداشت کرے۔ تے اِک دُوجے دے قصور مُعاف کرے۔ جیویں خُداوند تُہاڈے قصور مُعاف کِیتے نیں اوسے طرح تُسی وی کرو۔ تے اوہناں ساریاں اُتّے مُحبّت پا لوؤ۔ کیوں جو اوہ کمال دی پیٹی اے۔ تے مسِیح دی تسلّی جِہدے لئی تُسی اِک تَن ہو کے سَدّے گئے سو۔ تُہاڈے دِلاں وِچ حکُومت کرے تے نالے تُسی شُکر کرو۔ مسِیح دے کلام نُوں پُوری دانائی نال اپنے دِل وِچ چنگی طرح وَسّن دیو۔ تے تُسی زبُوراں تے گِیتاں تے رُوحانی غزلاں نال آپو وِچ سکھاؤ تے نصِیحت کرو تے اپنے دِلاں وِچ فضل نال خُدا لئی گاؤ۔ تے کلام یا کمّ جو کُجھ کر دے ہو اوہ سبھ خُداوند یِسُوع دے ناں اُتّے کرو۔ تے اوسے دی راہِیں خُدا باپ دا شُکر کرو۔ زنانِیو! جیویں خُداوند وِچ چَنگا اے اپنے گھر والیاں دی تابعیاں رہو۔ گھر والوں اپنیاں زنانِیاں نُوں پیار کرو۔ تے اوہناں نال کَوڑے نا ہوؤ۔ بچّیو! سارِیاں گلّاں وِچ اپنے ماں پئیو دا آکھا مَنّو کیوں جو ایہہ خُداوند نُوں چَنگا لگدا اے۔ بچّیاں والیو! اپنے پُتراں نُوں دِق نا کرو۔ تاں جو اوہ دِل نا چھڈ دین۔ نَوکرو جیہڑے جِسم ولّوں تُہاڈے مالک نیں سارِیاں گلّاں وِچ اوہناں دا آکھا مَنّو۔ بندیاں دے خُوش کرن والیاں وانگر وکھا لے لئی نئیں سگوں صاف دِلی تے خُدا دے خَوف نال۔ جیہڑا کمّ کرو دِل نال کرو۔ ایہہ جان کے پئی خُداوند لئی کر دے اوہ۔ بندیاں واسطے نئیں۔ کیوں جو تُسی جان دے ہو پئی خُداوند ولّوں تُہانوں اوہدے بدلے وِرثہ مِلے گی۔ خُداوند مسِیح دی سیوا کرو۔ کیوں جو جیہڑا بُرا کر دا اے۔ اوہ اپنی بُریائی دا بدلہ پائے گا۔ اوتھے کِسے دی رَئی نئیں ہوندی۔ مالِکو! اپنے نَوکراں نال ایہہ جان کے عدل تے انصاف کرو پئی اسمان اُتّے ساڈا وی اِک مالک اے۔ دُعا منگن وِچ لگے رہو۔ تے شُکر نال اوہدے واسطے جاگدے رہو۔ تے نال نال ساڈے لئی وی دُعا منگیا کرو پئی خُدا ساڈے اُتّے کلام دا بُوہا کھولے۔ تاں جو مَیں مسِیح دا اوہ بھیت بیان کراں جِہدے سببّوں بَدّھا ہویا آں۔ تے اوہنوں اجیہا بیان کراں۔ جِہیا مَینُوں چاہیدا اے۔ وقت نُوں قِیمتی جان کے باہر والیاں نال ہوش نال ورتو۔ تُہاڈیاں گلّاں سدا اجیہاں فضل والِیاں تے سوادلِیاں ہون۔ پئی تُسی ساریاں نُوں ٹھیک جواب دے سکو۔ پیارا بھرا تے دیانتدار خادم تُخِکس جیہڑا خُداوند دی سیوا وِچ سنگی اے۔ میرا سارا حال تُہانوں دسے گا۔ اوہنوں مَیں ایسے لئی تُہاڈے کول گھلّیا اے۔ پئی تُہانوں ساڈے حال دا پتا لگ جائے۔ تے اوہ تُہاڈے دِلاں نُوں تسلّی دے۔ تے اوہدے نال اُنیسِمُس نُوں وی گھلّیا اے۔ جیہڑا دیانتدار تے پیارا بھرا تے تُہاڈے وِچوں اے۔ ایہہ تُہانوں ایتھوں دِیاں سارِیاں گلّاں دسن گے۔ ارِسترخُس جیہڑا میرے نال قید اے تے برنباس دا بھرا مرقس (جِہدی بابت تُہانوں حُکم مِلے سن جے اوہ تُہاڈے کول آوے تے اوہنوں چنگی طرح مِلنا۔) تے یِسُوع جیہڑا یُوستُس اکھواؤندا اے اوہ سارے جیہڑے سُنت والیاں وِچوں نیں تُہانوں سلام آکھدے نیں۔ نِرے ایہو ای خُدا دی بادشاہی واسطے میرے ساتھی رہے نیں۔ اوہناں توں میری تسلّی ہوئی اے۔ اِپَفراس جیہڑا تُہاڈے وِچوں اے تے مسِیح یِسُوع دا خادم اے تُہانوں سلام آکھدا اے۔ اوہ تُہاڈے لئی دُعا وِچ سدا دَوڑ بھج کر دا رہندا اے۔ تاں جو تُسی خُدا دی پُوری مرضی وِچ کامِل تے پکّے یقِین والے رہو۔ مَیں اوہدا گواہ آں پئی اوہ تُہاڈے تے لَودِیکیہ تے ہِیراپُلس دے لوکاں لئی بڑی محنت کر دا اے۔ پیارا حکِیم لُوقا تے دِیماس تُہانوں سلام آکھدے نیں۔ لَودِیکیہ دے بھرا نُوں تے نُمفاس تے اوہناں دے گھراں دی کلِیسیاواں نُوں سلام آکھنا۔ تے جدوں ایہہ خط تُسی پڑھ لو تے فیر لَودِیکیہ دی کلِیسیا وِچ گھل دیو۔ تاں جو اوہ وی پڑھ لین۔ تے خط جیہڑا لَودِیکیہ وِچوں آوے پڑھ لوؤ۔ تے ارخِپُّس نُوں آکھنا پئی جیہڑی خِدمت تینُوں خُداوند ولّوں مِلی اے۔ اوہنوں ہوش نال سمبھالِیں۔ میرا پَولُس دا اپنی ہتّھِیں سلام۔ میرِیاں بیڑیاں نُوں چیتے رکھو۔ تُہاڈے اُتّے فضل ہوندا رہے۔ پَولُس تے سِلوانُس تے تِیمُتِھیُس ولّوں تھِسّلُنِیکیاں دی کلِیسیا دے ناں جیہڑی خُدا باپ تے خُداوند یِسُوع مسِیح وِچ اے فضل تے تسلّی تُہانوں مِلدی رہے۔ تُہاڈے سبھناں ولّوں اسی خُدا دا شُکر کرنے آں۔ تے اپنیاں دُعاواں وِچ سدا تُہانوں یاد کرنے آں۔ تے اپنے خُدا تے باپ اگّے تُہاڈے اِیمان دے کمّ تے مُحبّت دی محنت تے اوس آس دے صبر نُوں جیہڑا ساڈے خُداوند یِسُوع مسِیح دے اُتّے اے۔ ہر ویلے یاد کرنے آں۔ بھراؤ! خُدا دے پیاریو! اسی جاننے آں۔ پئی تُسی چُنے ہوئے اوہ۔ ایس لئی پئی ساڈی خُوشخبری تُہاڈے کول نِریاں گلّاں نال نئیں پر زور تے پاک رُوح تے پُورے اعتقاد نال اَپڑی جیویں تُہانوں پتا اے۔ پئی اساں تُہاڈی خاطر تُہاڈے وِچ کیہو جِہیا بن وکھایا۔ تے تُسی کلام نُوں بڑی مُصِیبت وِچ پاک رُوح دی خُوشی نال مَن کے ساڈے تے نالے خُداوند دے نمونے اُتّے چَلّن والے بنے۔ ایتھوں تِیکر پئی مَکِدُنیہ تے اَخیہ وِچ سارے اِیمانداراں لئی نمونہ بن گئے۔ کیوں جو تُہاڈے کولوں نا نِرا مَکِدُنیہ تے اَخیہ وِچ خُداوند دے کلام دی پُکار ہوئی سگوں تُہاڈا اِیمان جیہڑا خُدا اُتّے اے ہر تھاں اجیہا دُھم گیا۔ پئی ساڈے آکھن دی کوئی لوڑ نئیں۔ ایس لئی پئی اوہ آپ ساڈا ذِکر کر دے نیں پئی ساڈا تُہاڈے کول آؤنا کیہو جِہیا ہویا تے تُسی کِس طرح بُتاں ولّوں خُدا ولّ مُڑے۔ تاں جو زِندہ تے سَچّے خُدا دے بندے بنو۔ تے اوہدے پُتر دے اسمان ولّوں آؤن دی اُڈِیک وِچ رہو۔ جِہنُوں اوس مُردیاں وِچوں جوایا۔ جِہدا ناں اے یِسُوع۔ جیہڑا سانُوں آؤن والے غضبوں چھڈاؤندا اے۔ بھراؤ! تُسی جان دے ہو پئی ساڈا تُہاڈے کول آؤنا بے فائدہ نا ہویا۔ سگوں تُہانوں پتا اے۔ پئی بھانویں اساں فِلپّی وِچ دُکھ جھلیا تے بے عِزّت ہوئے۔ پر فیر وی سانُوں اپنے خُداوند وِچ ایہہ دلیری مِلی۔ پئی خُداوند دی خُوشخبری جان توڑ کے تُہانوں سُنائیے۔ کیوں جو ساڈی نصِیحت نا بدراہی نال نا ناپاکی نال نا دھوکھے بازی نال اے۔ پر جیویں اسی خُدا کولوں منظُور ہوئے۔ پئی خُوشخبری ساڈے سپُرد کِیتی جائے۔ اوسے طرح اسی بیان کرنے آں۔ بندیاں نُوں نئیں پر خُدا نُوں خُوش کرن لئی۔ جیہڑا ساڈے دِلاں نُوں پرکھدا اے۔ کیوں جو تُسی جان دے ہو پئی اساں کدی وی خُوشامد والیاں گلّاں نا کِیتیاں۔ نا اوہناں نُوں لوبھ دا پردہ بنایا۔ خُدا گواہ اے۔ تے اسی لوکاں توں عِزّت نئیں چاہندے نا تُہاتھوں نا ہورناں توں۔ بھانویں مسِیح دے رسُول ہون دے سببّوں تُہاڈے اُتّے بھار پا سکنے آں۔ سگوں جیویں دائی اپنے بچّیاں نُوں پالدی اے۔ اوسے طرح اسی تُہاڈے وِچ نرمی نال رہے۔ ایسے طرح اسی تُہاڈے چاہ وند ہو کے نِرے خُدا دی خُوشخبری نئیں پر اپنی جان تِیکر دے دین نُوں راضی ساں۔ ایس لئی پئی تُسی ساڈے پیارے ہوگئے سو۔ کیوں جو بھراؤ تُہانوں ساڈی محنت تے سختی یاد اے۔ دِنے راتِیں مزدُوری کر کے تُہاڈے کول خُدا دی خُوشخبری دی منادی کِیتی۔ تاں جو تُہاڈے وِچوں کِسے اُتّے بھارُو نا ہوئے۔ تُسی گواہ ہو۔ تے خُدا وی گواہ اے۔ پئی ساڈا رویّہ تُہاڈے نال جِنہاں اِیمان لے آؤندا اے کیہو جیہا پاک تے راست تے بے عیب سی۔ جیویں تُسی جان دے ہو۔ پئی پئیو اپنے بچّیاں نال کر دا اے ایویں ای اسی وی تُہاڈے وِچوں ہر اِک نُوں نصِیحت کر دے تے دلاسا دیندے تے سمجھاؤندے رہے۔ تاں جو تُہاڈا چال چَلّن اوس خُدا دے وانگُوں ہوئے جیہڑا تُہانوں اپنی بادشاہی تے جلال وِچ سدّدا اے۔ ایس لئی اسی وی ہر ویلے خُدا دا شُکر کرنے آں پئی جدوں تُساں خُدا دے سنیہے دا کلام ساڈی راہِیں سُنیاں تدوں تُساں اوہنوں بندیاں دا کلام سمجھ کے نئیں پر (جو اوہ سَچ مُچ ہے وی۔) خُدا دا کلام جان کے قبول کِیتا تے اوہ تُہاڈے اِیمان لیاؤن والیاں وِچ کمّ وی پیا کر دا اے۔ ایس لئی پئی تُسی بھراؤ خُدا دی اوہناں کلِیسیاواں دے نمونے اُتّے چَلّن والے بن گئے۔ جیہڑیاں یہُودیہ وِچ مسِیح یِسُوع وِچ نیں۔ کیوں جو تُساں وی اپنے مُلکی بھراواں توں ہو تکلیفاں سَہیاں جیہڑیاں اوہناں وی یہُودِیاں کولوں۔ جِنہاں خُداوند یِسُوع مسِیح تے نبیاں نُوں وی مار سُٹّیا تے سانُوں دھکّے مار کے باہر کڈھ چھڈیا۔ اوہ خُدا نُوں پسند نئیں۔ تے سارے بندیاں دے برخلاف نیں۔ اوہ سانُوں غیر قوماں اگّے اوہناں دی نجات لئی کلام سُنان توں ڈَکدے نیں تاں جو اوہناں دے گُناہاں دا پیالہ سدا بھریا رہے۔ پر اوہناں اُتّے حد درجے دا غضب آگیا۔ پر بھراؤ! اسی جو تھوڑے چِر تِیکر تُہاڈے نالوں نِکھڑ گئے۔ بھانویں دِلوں نئیں ساں نِکھڑے۔ اساں بڑی چاہ نال تُہاڈی صُورت ویکھن دی ہور وی وَدّھ حیلہ کِیتا۔ ایس لئی اساں (یعنی مَیں پَولُس) اِک وار نئیں سگوں دو واری تُہاڈے کول آؤن دا اِرادہ کِیتا۔ تے شیطان سانُوں ڈکیا۔ بھلا آس تے خُوشی تے فخر دا تاج کِیہ اے؟ کِیہ اوہ ساڈے خُداوند یِسُوع دے سامھنے اوہدے آؤن دے ویلے تُسی نا ہوؤگے؟ کیوں جو ساڈا جلال تے ساڈی خُوشی تُسی ای ہو۔ ایس واسطے جد اسی ہور سہار نا سکے اساں اتھینے وِچ اکلّے رہنا منظُور کِیتا۔ تے اساں تِیمُتِھیُس نُوں جیہڑا ساڈا بھرا تے مسِیح دی خُوشخبری وِچ خُدا دا نوکر اے۔ ایسے واسطے گھلّیا پئی اوہ تُہانوں پَکیّاں کرے۔ تے تُہاڈے اِیمان ولّوں تُہانوں تسلّی دیوے۔ پئی کوئی بندہ ایہناں مُصِیبتاں توں گھابر نا جائے۔ کیوں جو تُسی آپ جان دے اوہ۔ پئی اسی ایہناں ای لئی مُقرّر ہوئے آں۔ سگوں پہلاں وی جد اسی تُہاڈے کول ساں تُہانوں آکھدے ہوندے ساں۔ پئی سانُوں مُصِیبت سہنی پَوے گی۔ فیر ایسے طرح ہویا تے تُسی جان دے وی ہو۔ ایس واسطے جد مَیں ہور برداشت نا کر سکیا۔ تَد تُہاڈے اِیمان دا حال دریافت کرن لئی گھلّیا۔ پئی اجیہا نا ہوئے۔ پئی ازمان والے تُہاڈی ازمایش کِیتی ہوئے۔ تے ساڈی محنت ایویں گئی ہوئے۔ پر ہُن جو تِیمُتِھیُس تُہاڈے کول آ کے تُہاڈے اِیمان تے مُحبّت دی تے نالے ایس گلّ دی خُوشخبری دِتّی پئی تُسی سدا سانُوں نیک یاد کر دے ہو۔ تے ساڈے ویکھن دی اجیہی چاہ رکھدے ہو۔ جیویں اسی تُہاڈے ویکھن دی۔ ایس لئی بھراؤ! سانُوں ساری تنگی تے مُصِیبت وِچ تُہاڈے اِیمان دے سبّب تُہاڈے ولّوں تسلّی ہوئی۔ کیوں جو ہُن جے تُسی خُداوند وِچ قیم ہو۔ تے اسی جیونے آں۔ تُہاڈے ولّوں خُدا دے سامھنے سانُوں جِنّی خُوشی مِلی اے۔ اوہدے بدلے کِس طرح تُہاڈی بابت خُدا دا شُکر کرئیے؟ اسی دِنے راتِیں بُہت وَدّھ کے دُعا منگنے آں۔ پئی تُہاڈی صُورت ویکھئے۔ تے تُہاڈے اِیمان دے گھاٹے نُوں پُوریاں کرئیے۔ ہُن آپ ساڈا خُدا تے باپ تے ساڈا خُداوند یِسُوع تُہاڈے ولّ ساڈا راہ بنائے۔ تے خُداوند کرے پئی جیویں سانُوں تُہاڈے نال مُحبّت اے اوسے طرح تُہاڈی مُحبّت وی آپو وِچ تے ساریاں بندیاں نال بُہتی ہوئے۔ تے وَدھے۔ تاں جو تُہاڈے دِلاں نُوں اجیہا تگڑیاں کرے۔ پئی جد ساڈا خُداوند یِسُوع اپنے ساریاں پاک لوکاں نال آوے۔ اوہ ساڈے خُدا تے باپ دے سامھنے پاکیزگی وِچ بے عیب ہون۔ باقی بھراؤ! اسی تُہاڈی مِنّت کرنے آں تے خُداوند یِسُوع مسِیح وِچ تُہانوں ایہہ نصِیحت کرنے آں۔ پئی جیویں تُساں ساڈے کولوں سِکھیا۔ پئی جیویں ٹُرناں تے خُدا نُوں خُوش کرنا چاہیدا اے تے جیویں تُسی ٹُر دے وی ہو اوسے طرح وَدھدے جاؤ۔ کیوں جو تُسی جان دے ہو پئی اساں تُہانوں خُداوند یِسُوع ولّوں کِیہ کِیہ حُکم سُنایا۔ سو خُدا دی مرضی ایہہ اے پئی تُسی پاک بنو تے زنا توں بچے رہو۔ تے ہر اِک تُہاڈے وِچوں اپنے بدن نُوں پاکیزگی تے عِزّت نال قابُو رکھنا جانے۔ نا شہوت دے جوش نال اوہناں قوماں وانگر جیہڑیاں خُدا نُوں نئیں جان دِیاں۔ تے کوئی بندہ اپنے بھرا نال ایس گلّ وِچ وادھا تے دَغا نا کرے۔ کیوں جو خُدا ایہناں ساریاں کمّاں دا بدلہ دین والا اے۔ جیویں اساں پہلاں تُہانوں صاف صاف دس چھڈیا۔ ایس لئی پئی خُدا سانُوں پلِیتی دے واسطے نئیں پر پاکیزگی دے واسطے سدّیا اے۔ ایس واسطے جیہڑا نئیں مَندا اوہ بندے دی نئیں پر اوس خُدا دی گلّ نئیں مَندا جیہڑا تُہانوں اپنا پاک رُوح دیندا اے۔ پر بھراواں دی مُحبّت ولّوں تُہانوں کُجھ لِکھن دی لوڑ نئیں۔ کیوں جو تُساں آپو وِچ مُحبّت رکھنا خُدا کولوں سِکھیا اے۔ تے سارے مَکِدُنیہ دے سارے بھراواں نال ایسے طرح کر دے ہو۔ پر بھراؤ! اسی تُہانوں نصِیحت کرنے آں پئی ہور وی وَدھدے جاؤ۔ تے جیویں اساں تُہانوں حُکم دِتّا تُسی ہِمّت کر کے چُپ چاپ رہو تے اپنا کمّ دھندا کرو تے اپنے ہتّھاں نال محنت کرو۔ تاں جو باہر والے لوکاں نال بھلمانسی دے نال چلّو۔ تے کِسے شے دی لوڑ نا رکھو۔ پر بھراؤ! اسی نئیں چاہندے۔ پئی تُسی اوہناں ولّوں نا واقف رہو۔ جیہڑے سَوں جاندے نیں۔ تاں جو تُسی ہورناں وانگر جیہڑے نا آس نیں غم نا کرو۔ کیوں جو جد سانُوں ایہہ یقِین اے پئی یِسُوع مر گیا تے فیر جی اُٹھیا۔ تے ایسے طرح خُدا اوہناں نُوں وی جیہڑے یِسُوع وِچ سَوں گئے نیں اوہدے نال لے آوے گا۔ سگوں اسی تُہانوں خُدا دے کلام دے سببّوں آکھنے آں پئی اسی جیہڑے جیونے آں تے خُداوند دے آؤن توڑی باقی رہاں گے سُتّیاں ہویاں توں کِسے طرح اگّے نا وَدھاں گے۔ کیوں جو خُداوند آپ اسمانوں اُتر آوے گا۔ اوس ویلے بڑی پُکار تے سردار فرِشتے دی اواز سُنائی دیوے گی۔ تے خُدا دی تُرہی وَجائی جائے گی۔ تے پہلاں اوہ جی اُٹھن گے جیہڑے مسِیح وِچ موئے ہوئے نیں۔ فیر اسی جیہڑے جِیوندے باقی ہوواں گے۔ اوہناں دے نال بدّلاں اُتّے چُکے جاواں گے تاں جو وَا وِچ خُداوند دی اگّوالی کریئے۔ تے ایس طرح سدا خُداوند دے نال رہاں گے۔ سو تُسی ایہناں گلّاں نال اِک دُوجے نُوں تسلّی دَیا کرو۔ پر بھراؤ! کوئی لوڑ نئیں۔ پئی ویلیاں تے مَوقعیاں ولّوں تُہانوں کُجھ لِکھیا جائے۔ ایس لئی پئی تُسی آپ چنگی طرح جان دے ہو۔ پئی خُداوند دا دِن ایس طرح آؤن والا اے۔ جیویں رات نُوں چور آؤندا اے۔ جِس ویلے لوک آکھدے ہون گے۔ پئی خَیر سُکھ اے۔ اوس ویلے اوہناں اُتّے ایس طرح اِک دم تباہی آوے گی۔ جیویں جمّن والی عورت نُوں پِیڑاں۔ تے اوہ کِسے طرح نا بچن گے۔ پر تُسی بھراؤ ہنیرے وِچ نئیں۔ پئی اوہ دِن چور وانگر تُہاڈے اُتّے آوے۔ کیوں جو تُسی سارے چانن دے پُتر تے دِن دے پُتر اوہ۔ اسی نا رات دے آں نا ہنیرے دے۔ سو ہورناں وانگر سَوں نا رہئے۔ پر جاگدے تے ہوش وِچ رہئے۔ کیوں جو جیہڑے سَوندے نیں اوہ راتِیں سَوندے نیں۔ تے جیہڑے نشہ پِیندے نیں سو راتِیں پِیندے نیں۔ پر اسی جیہڑے دِن دے آں اِیمان تے مُحبّت دی بکتر پا کے تے نجات دی آس دا خود پا کے ہُشیار رہئے۔ کیوں جو خُدا سانُوں غضب واسطے نئیں پر ایس واسطے مُقرّر کِیتا اے۔ پئی سانُوں اپنے خُداوند یِسُوع مسِیح دی راہِیں نجات مِلے۔ اوہ ساڈی خاطر ایس لئی مویا۔ پئی اسی بھانویں جاگدے بھانویں سُتّے سارے مِل کے اوسے دے نال جِیوئیے۔ سو تُسی اِک دُوجے نُوں تسلّی دیو تے اِک دُوجے دی ترقی دا سبّب بنو جیویں تُسی کر دے وی ہو۔ تے بھراؤ! اسی تُہاڈے اگّے درخواست کرنے آں پئی جیہڑے تُہاڈے وِچ محنت کر دے تے خُداوند وِچ تُہاڈے آگُو نیں تے تُہانوں نصِیحت کر دے نیں اوہناں دے آکھے وِچ رہو۔ تے اوہناں دے کمّ دے سبّب مُحبّت نال اوہناں دی بُہتی عِزّت کرو۔ تے آپو وِچ میل ملاپ رکھو۔ تے بھراؤ! اسی تُہانوں نصِیحت کرنے آں پئی بے قاعدہ ٹُرن والیاں نُوں سمجھاؤ۔ نِگھریاں ہویاں نُوں دلاسا دیو ماڑیاں نُوں سنبھالو۔ سبھناں نال صبر دا سلُوک کرو۔ خیال رکھو پئی کوئی کِسے نال بدی دے بدلے بدی نا کرے۔ سگوں ہر ویلے آپو وِچ تے سبھناں نال نیکی کرن دے پِچّھے لگّے رو۔ ہر ویلے خُوش رہو۔ ہر ویلے دُعا منگو۔ سبھناں گلّاں وِچ شُکر گُزاری کرو۔ کیوں جو مسِیح یِسُوع وِچ تُہاڈے واسطے خُدا دی ایہو مرضی اے۔ رُوح نُوں نا بُجھاؤ۔ نبُوّتاں دی حقارت نا کرو۔ سارِیاں گلّاں پرکھو جیہڑی چنگی اے اوہنوں قابُو رکھو۔ بدی دی ہر صُورت توں لانبھے رہو۔ خُدا جیہڑا تسلّی دا چشمہ اے آپ تُہانوں بالکل پاک کرے تے تُہاڈی رُوح تے جان تے بدن ساڈے خُداوند یِسُوع مسِیح دے آؤن تِیکر ثابت ثبُوت تے بے عیب بچے رہن۔ تُہاڈا سَدّن والا وفادار اے۔ اوہ ایسے طرح کرے گا۔ بھراؤ! ساڈے لئی دُعا منگو۔ پاک بوسنے نال سارے بھراواں نُوں سلام آکھو۔ مَیں تُہانوں خُدا دی سَونہہ چُکانا آں۔ پئی ایہہ خط سارے بھراواں نُوں سُنایا جاوے۔ ساڈے خُداوند یِسُوع مسِیح دا فضل تُہاڈے اُتّے رہے۔ آمِین۔ پَولُس تے سِلوانُس نے تِیمُتِھیُس ولّوں تھِسّلُنِیکیاں دی کلِیسیا دے ناں جیہڑی ساڈے باپ خُدا تے خُداوند یِسُوع مسِیح وِچ اے۔ تُہانوں خُدا باپ تے خُداوند یِسُوع مسِیح ولّوں کرم تے تسلّی مِلدی رہے۔ بھراؤ! تُہاڈے ولّوں ہر ویلے خُدا دا شُکر کرنا ساڈے اُتّے فرض اے تے چاہیدا وی اے۔ کیوں جو تُہاڈا اِیمان بُہت وَدھدا جاندا اے۔ تے تُہاڈی ساریاں دی مُحبّت آپو وِچ بُہت وَدّھدِی جاندی اے۔ ایتھوں تِیکر پئی اسی آپ خُدا دی کلِیسیاواں وِچ تُہاڈے ولّوں فخر کرنے آں۔ پئی جِنّے ظُلم تے مُصِیبتاں تُسی سَہندے ہو۔ اوہناں ساریاں وِچ تُہاڈا صبر تے اِیمان ظاہر ہوندا اے۔ ایہہ خُدا دی سَچّی عدالت دی صاف نشانی اے۔ تاں جو تُسی خُدا دی بادشاہی دے قابل ٹھیرو۔ جِہدے لئی تُسی دُکھ وی سَہندے ہو۔ کیوں جو خُدا دے اگّے ایہہ نیاں اے۔ پئی بدلے وِچ تُہاڈے دُکھ دین والِیاں نُوں دُکھ۔ تے تُہانوں دُکھ سہن والیاں نُوں ساڈے نال آرام دیوے۔ اوس ویلے جدوں خُداوند یِسُوع اپنیاں زوراور فرِشتیاں نال مُچّی ہوئی اَگ وِچ اسمانوں ظاہر ہوئے گا۔ تے جیہڑے خُدا نُوں نئیں پچھاندے تے ساڈے خُداوند یِسُوع دی اِنجِیل نُوں نئیں مَن دے۔ اوہناں نُوں بدلہ دے گا۔ اوہ خُداوند دے چِہرے تے اوہدی قُدرت دے جلال کولوں دُراڈے ہو کے سدا دی ہلاکت دی سزا پان گے۔ ایہہ اوس دِن ہوئے گا۔ جدوں اوہ اپنے پاک لوکاں وِچ جلال پان تے ساریاں اِیمان لیاؤن والیاں لئی اچرج دسن لئی آوے گا۔ کیوں جو تُساں ساڈی گواہی اُتّے اِیمان لیاندا۔ ایس لئی اسی تُہاڈے لئی ہر ویلے دُعا وی منگدے رہنے آں پئی ساڈا خُدا تُہانوں ایس بُلاوے دے قابل جانے تے نیکی دی ہر خواہش تے اِیمان دے ہر کمّ نُوں قُدرت نال پُوریاں کرے۔ تاں جو ساڈے خُدا تے خُداوند یِسُوع مسِیح دے فضل دے سببّوں ساڈے خُداوند یِسُوع دا ناں تُہاڈے وِچ جلال پاوے تے تُسی اوہدے وِچ۔ بھراؤ! اسی اپنے خُداوند یِسُوع مسِیح دے آؤن تے اوہدے کول اپنے اکٹّھے ہون دی بابت تُہاڈی مِنّت کرنے آں۔ پئی جے کِسے رُوح دی گلّ یا کوئی کلام یا اجیہا خط آوے۔ جیہڑا ساڈے خط وانگُوں دسے اوس توں ایہہ سمجھ کے پئی خُداوند دا دِن پُج گیا اے۔ تُسی دِلوں نا ڈولو تے نا تُسی گھابر جاؤ۔ کِسے طرح کِسے دے دھوکھے وِچ نا آ جانا کیوں جو اوہ دِن نئیں آؤنا جد تِیکر پہلاں برگشتگی نا ہوئے۔ تے اوہ گُناہ دا بندہ یعنی ہلاکت دا پُتر ظاہر نا ہوئے۔ جیہڑا مخالفت کر دا اے۔ تے ہر اِک کولوں جیہڑا خُدا اکھواؤندا اے۔ یا جِہدی مَنتا ہوندی اے۔ اپنے آپ نُوں اُچّا کر دا اے۔ ایتھوں تِیکر پئی اوہ خُدا دے مَقدِس وِچ بَہہ کے اپنے آپ نُوں خُدا ظاہر کر دا اے۔ تُہانوں یاد نئیں پئی جد مَیں تُہاڈے کول ساں تَد مَیں ایہہ گلّاں تُہانوں آکھدا ساں۔ تے ہُن جیہڑی شے اوہنوں ڈکدی اے۔ پئی اوہ اپنے ویلے سِر ظاہر ہوئے۔ تُسی جان دے اوہ۔ کیوں جو بے دِینی دا بھیت ہُن وی عمل پیا کر دا اے۔ پر ہُن اِک ڈکن والا اے۔ تے جد تِیکر اوہ ہٹایا نا جائے ڈکدا رہے گا۔ تے فیر اوہ بے دِین بندہ جِہنُوں خُداوند یِسُوع اپنے مُنھ دی پُھوک نال ہلاک تے اپنے آؤن دے جَلوے نال فنا کرے گا ظاہر کِیتا جائے گا۔ یعنی اوہ بندہ جِہدا آؤنا شیطان دی تاثِیر دے سببّوں ہر طرح دی طاقت تے نشانِیاں تے جُھوٹھے عجوبیاں نال۔ تے ہلاک ہون والیاں لئی ناراستی دے ہر طرح دے دھوکھے نال ہوئے گا۔ ایس لئی پئی اوہناں سچیائی دی مُحبّت نُوں قبول نا کِیتا جِہدے نال اوہناں دی نجات ہوندی۔ ایس لئی خُدا اوہناں اُتّے بدراہی دی تاثِیر گھلّے گا۔ تاں جو اوہ جُھوٹھ نُوں سَچ جانن۔ تے جِنّے سچیائی دا یقِین نئیں سن کر دے سگوں ناراستی نُوں پسند کر دے سن اوہ سارے سزا پان۔ پر بھراؤ! خُدا دے پیاریو ساڈا فرض اے پئی ہرویلے تُہاڈے ولّوں خُدا دا شُکر کریئے۔ کیوں جو خُدا مُڈھوں تُہانوں چُن لیا۔ پئی رُوح دی راہِیں پاک بن کے تے سچیائی اُتّے اِیمان لیا کے نجات پاؤ۔ جِہدے لئی اوس تُہانوں ساڈی اِنجِیل دی راہِیں سدّیا تاں جو تُسی ساڈے خُداوند یِسُوع مسِیح دا جلال حاصِل کرو۔ سو بھراؤ تگڑے ہو کے کھلے رہو۔ تے جِنہاں روائِتاں دی بابت تُساں ساڈی زبانی یا ساڈے خط دی راہِیں تعلِیم پائی۔ اوہناں اُتّے قیم رہو۔ ہُن ساڈا خُداوند یِسُوع مسِیح آپ تے ساڈا باپ خُدا جِس ساڈے نال مُحبّت رکھی تے فضل نال سدا دی تسلّی تے چنگی آس سانُوں بخشی۔ تُہاڈے دِلاں نُوں تسلّی دے تے ہر نیک کمّ تے گلّ وِچ پَکیّاں کرے۔ سو بھراؤ! ساڈے حق اندر دُعا کرو۔ پئی خُدا دا کلام ایڈی چھیتی پھیل جائے۔ تے جلال پائے۔ جیویں تُہاڈے وِچ۔ پُٹھے تے بُرے بندیاں توں بچے رہو۔ کیوں جو ساریاں وِچ اِیمان نئیں۔ پر خُدا وفادار اے اوہ تُہانوں مضبُوط رکھّے گا۔ تے اوس شریر توں تُہاڈی راکھی کرے گا۔ تے سانُوں تُہاڈے ولّوں خُداوند وِچ وساہ اے۔ پئی جیہڑے حُکم اسی تُہانوں دینے آں۔ تُسی اوہناں اُتّے عمل کر دے ہو تے کر دے وی رہو گے۔ تے خُداوند تُہاڈے دِلاں نُوں خُدا دی مُحبّت تے مسِیح دے صبر ولّ ہدایت کرے۔ ہُن بھراؤ! اسی اپنے خُداوند یِسُوع مسِیح دے ناں وِچ تُہانوں حُکم دینے آں پئی اجیہے ہر اِک بھرا توں بچے رہو۔ جیہڑا بے قاعدہ ٹُردا اے تے اوس روائت اُتّے عمل نئیں کر دا جیہڑی اوہنوں ساڈے ولّوں مِلی اے۔ کیوں جو تُسی آپ جان دے ہو پئی تُہانوں ساڈے نمونے اُتّے کِس طرح ٹُرناں چاہیدا اے۔ ایس لئی پئی اسی تُہاڈے وِچ بے قاعدہ نئیں ساں ٹُردے۔ تے نا کِسے دی روٹی مُفت کھاندے ساں سگوں محنت مُشقّت نال دِنے راتِیں کمّ کر دے ساں تاں جو تُہاڈے وِچوں کِسے اُتّے بھارُو نا ہوئے۔ ایس لئی نئیں پئی سانُوں اختیار نئیں سی۔ پر ایس واسطے پئی اسی اپنے آپ نُوں تُہاڈے لئی نمونہ بنایئے تاں جو تُسی ساڈے وانگر بنو۔ جد اسی تُہاڈے کول ساں اساں تُہانوں ایہہ حُکم دِتّا سی پئی جیہڑا کمّ نا کرے اوہنوں کھانا وی نا مِلے۔ کیوں جو اسی سُننے آں۔ پئی تُہاڈے وِچوں بعضے بے قاعدہ ٹُردے نیں تے کوئی کمّ نئیں کر دے۔ سگوں ہورناں دے کمّ وِچ ہتّھ پاندے نیں۔ ہُن اجیہاں نُوں اسی خُداوند یِسُوع مسِیح وِچ حُکم دیندے تے نصِیحت کرنے آں۔ پئی چُپ چاپ کمّ کر کے اپنی ای روٹی کھاؤ۔ تے تُسی بھراؤ! نیک کمّ کرن وِچ تھک نا جاؤ۔ تے جیہڑا ساڈے ایس خط دی گلّ نا مَنّے اوہدے ولّ خیال رکھو۔ اوہدے نال نا بَہو نا کھلو۔ تاں جو اوہ شرمندہ ہوئے۔ اوہنوں وَیری نا سمجھو سگوں بھرا سمجھ کے نصِیحت کرو۔ ہُن تسلّی دا خُداوند آپے تُہانوں ہمیشہ تے ہر طرح نال تسلّی بخشے۔ خُداوند تُہاڈے سبھناں نال رہے۔ مَیں پَولُس اپنے ہتّھ نال سلام لِکھناں آں۔ ہر خط وِچ میری ایہو نشانی اے۔ مَیں ایسے طرح لِکھنا ہُناں آں۔ ساڈے خُداوند یِسُوع مسِیح دا فضل تُہاڈے سبھناں اُتّے ہوئے۔ پَولُس ولّوں جیہڑا ساڈے نجات دین والے خُدا تے ساڈی آس۔ مسِیح یِسُوع دے حُکم نال مسِیح یِسُوع دا رسُول اے۔ تِیمُتِھیُس دے ناں جیہڑا اِیمان وِچ میرا سَچّا پُتر اے خُدا باپ تے ساڈے خُداوند مسِیح یِسُوع ولّوں فضل رَحم تے تسلّی ہوئے۔ جیویں مَکِدُنیہ جان دے ویلے مَیں تینُوں نصِیحت دِتّی سی۔ پئی اِفِسُس وِچ رہ کے بعضیاں بندیاں نُوں حُکم دَیا کر پئی اوہ ہور طرح دی تعلِیم نا دین۔ تے اوہناں کہانِیاں تے بے انت شجریاں دا خیال نا کرن۔ جیہڑے جھگڑے دا سبّب ہوندے نیں۔ تے اوس خُدائی۔ بندوبست دے سببّوں نئیں جیہڑا اِیمان اُتّے بنیا ہویا اے۔ اوسے طرح مَیں ہُن وی کرنا آں۔ حُکم دا مطلب ایہہ اے پئی پاک دِلی تے نیک نِیتی تے سَچّے اِیمان نال مُحبّت ہوئے ایہناں توں کُھنج کے کُجھ بندے تھوتھے بکواس ولّ پرت گئے نیں۔ تے شریعت دے اُستاد بننا چاہندے نیں بھانویں جیہڑیاں گلّاں آکھدے نیں تے جِنہاں دا پَکّ کر دے نیں اوہ اوہناں نُوں سمجھدے وی نئیں۔ پر اسی جاننے آں۔ پئی شریعت چنگی اے۔ جے کوئی اوہنوں شریعت وانگُوں ورتے۔ یعنی ایہہ سمجھ کے پئی شریعت راست لوکاں لئی مُقرّر نئیں ہوئی سگوں بے شریعت تے کھبّے لوکاں تے بے دِیناں۔ تے گُناہِیاں تے پِلیتاں تے بے اِیمان تے ماں پئیو دے قتل کرن والیاں تے خُونِیاں۔ تے زناہیاں تے مُنڈے بازاں تے بردہ فروشاں تے جُھوٹھیاں تے جُھوٹھی سَونہہ کھان والیاں تے جو کُجھ وی ہور ٹھیک تعلِیم دے اُلٹ ہوئے۔ ایہہ مُبارک خُدا دے جلال دی اوس خُوشخبری دے سببّوں اے۔ جیہڑی میرے سپُرد ہوئی اے۔ مَیں اپنے طاقت دِین والے مسِیح یِسُوع دا ایس لئی شُکر کرنا آں۔ پئی اوس مَینُوں دیانتدار جان کے اپنی سیوا لئی مُقرّر کِیتا۔ بھانویں مَیں پہلاں کُفر آکھن والا تے ستان والا تے بے عِزّت کرن والا ساں تَد وی میرے اُتّے رَحم ہویا ایس واسطے پئی مَیں بے اِیمانی دی حالت وِچ نادانی نال ایہہ کمّ کِیتے سن۔ تے ساڈے خُداوند دا فضل اوس اِیمان تے پیار دی راہِیں جیہڑا مسِیح یِسُوع وِچ اے بُہت وَدّھ کے ہویا۔ ایہہ سَچّی گلّ اے تے سبھنیں پاسیں مَنّن والی اے پئی مسِیح یِسُوع گُناہِیاں نُوں نجات دین واسطے دُنیا وِچ آیا جِنہاں وِچوں مَیں موہرلا آں۔ میرے اُتّے ایس لئی رَحم ہویا پئی یِسُوع مسِیح میرے سببّوں جیہڑا موہرلا ہاں سارا صبر وکھائے پئی جِنہاں لوکاں سدا دی زِندگی لئی اوہدے اُتّے اِیمان لیاؤنا اے اوہناں لئی مَیں نمونہ بناں۔ ہُن جُگّاں دے بادشاہ سدا حیات۔ اَن ڈِٹھ۔ اِکّو خُدا دی عِزّت تے ٹھاٹھ باٹھ سدا دے لئی ہوئے۔ آمِین۔ میرے پُتر تِیمُتِھیُس۔ اوہناں پیشِینگوئِیاں دے سببّوں جِنہاں تینُوں راہ پایا۔ مَیں ایہہ حُکم کرنا آں۔ پئی تُوں اوہناں دی راہِیں چنگی لڑائی لڑیں۔ اِیمان تے نیک نِیتی نُوں پَکیّاں رکھّیں۔ جِنہاں دے چھڈن دے سببّوں بتھیریاں لوکاں دے اِیمان دا بیڑا ڈُب گیا اے۔ اوہناں وِچوں ہُمِنِیُس تے سکندر نیں۔ اوہناں نُوں مَیں شیطان دے ہتّھ وِچ دے دِتّا اے۔ پئی کُفر توں مُڑنا سِکھّن۔ مَیں ساریاں توں پہلاں ایہہ نصِیحت دینا آں۔ پئی ساریاں بندیاں لئی دُعا تے بینتی تے عرض تے شُکر کِیتے جان۔ بادشاہاں تے اُچّے رُتبے والیاں واسطے ایس لئی کِیتے جان۔ پئی اسی پُوری دِینداری تے حلِیمی تے امن تے ارمان نال زِندگی کِٹئے۔ ایہہ ساڈے نجات دین والے خُدا نُوں پسند تے چَنگا لگدا اے۔ اوہ چاہندا اے پئی سارے لوک نجات پان۔ تے سچیائی دی پچھان تِیکر اَپڑ جان۔ کیوں جو خُدا اِکّو ای اے تے خُدا تے بندیاں وِچ وچولا وی اِکّو ای اے۔ یعنی یِسُوع مسِیح جیہڑا اِنسان اے۔ جِس سبھناں دی تھانویں ڈنڈ بھرن لئی اپنا آپ دے دِتّا۔ پئی ویلیاں سِر اوہدی گواہی دِتّی جاوے۔ مَیں سَچ آکھناں آں تے جُھوٹھ نئیں آکھدا۔ پئی مَیں ایسے مطلب نال منادی کرن والا تے رسُول تے غیر قوماں نُوں اِیمان تے سچیائی دِیاں گلّاں سکھان والا لگّا آں۔ ایس لئی مَیں چاہناں آں پئی مرد سبھنیں تھائِیں غُصیّوں تے جھگڑے بِناں پاک ہتّھ چُک کے دُعا منگیا کرن۔ ایسے طرح زنانِیاں سُچجیاں کپڑیاں نال لنگھ تے سُرت نال اپنے آپ نُوں سنگارن۔ وال گُندن۔ تے سونے تے موتِیاں تے بُہتے مُل والیاں کپڑیاں نال نئیں۔ سگوں جیویں خُدا دِیاں مَنّن والیاں نُوں پھبدا اے پئی اپنے آپ نُوں چنگے کمّاں نال سنگارن۔ زنانی چُپ چپاتیاں پُوری تابعداری نال سِکھّے۔ تے مَیں ایہہ اجازت نئیں دیندا پئی زنانی سِکھائے۔ یا مرد اُتّے حُکم کرے۔ سگوں چُپ رہوے۔ کیوں جو پہلاں آدم بنایا گیا سی۔ تے اودُوں پِچّھوں حوّا۔ تے آدم فریب نئیں سی کھادا سگوں زنانی فریب کھا کے گُناہ وِچ پَے گئی۔ پر اولاد جمّن دے سببّوں نجات پائے گی۔ جے اِیمان تے پیار تے پاکیزگی تے پرہیزگاری اُتّے قیم رہے۔ ایہہ گلّ سَچّی اے۔ پئی جیہڑا بندہ نگران ہونا چاہندا اے اوہ چنگے کمّ دی تانگہہ کر دا اے۔ ایس لئی نگران بے نُقص تے اِک زنانی دا بندہ۔ تے پرہیزگار تے سُرت والا تے سُچجا تے مُسافراں دی سیوا کرن والا تے سکھان وِچ چَنگا ہوئے۔ تے نا نشے وِچ ڈنڈ پان والا تے نا مارن کُٹّن والا ہوئے سگوں حلِیم ہوئے۔ تے جھگڑا کرن والا تے پَیسے دا پیارا نا ہوئے۔ اپنے گھر دا چنگی طرح بندوبست کرن والا ہوئے تے اپنیاں بچّیاں نُوں پُوری سنجِیدگی نال تابعیاں رکھن والا ہوئے۔ (جدوں کوئی اپنے گھر دا ای بندوبست نئیں کر سکدا تے اوہ خُدا دی کلِیسیا دی کِیویں راکھی کرے گا؟) نواں مُرید نا ہوئے متے فخر کر کے ابلیس دی سزا پائے۔ تے باہر والیاں وِچ نیک نام ہونا چاہیدا اے۔ تاں جو ملامت وِچ تے ابلیس دی پھاہی وِچ پَھس نا جائے۔ ایسے طرح معاونین نُوں وی سنجیدہ ہونا چاہیدا اے۔ نِگلّے تے شرابی تے ناجائز نفع لین دے لالچی نا ہون۔ تے خُدا دے اِیمان دے بھیت نُوں صاف دِل وِچ حفاظت نال رکھن۔ اوہ وی پہلاں ازمائے جان۔ پِچّھوں جے بے نُقص نِکلن۔ تے خِدمت دا کمّ کرن۔ ایسے طرح زنانِیاں وی سنجیدہ ہونیاں چاہیدیاں نیں۔ اُوج لان والِیاں نا ہون سگوں پرہیزگار تے سارِیاں گلّاں وِچ اِیمان دار ہون۔ خادم اِکّو اِک زنانی دے بندے ہون تے اپنے اپنے بچّیاں تے گھراں دا چنگی طرح بندوبست کر دے ہون۔ کیوں جو جیہڑے خِدمت دا کمّ چنگی طرح مُکاندے نیں اوہ اپنے لئی چَنگا رُتبہ تے اوس اِیمان وِچ جیہڑا یِسُوع مسِیح اُتّے اے۔ بڑی دلیری پاندے نیں۔ تیرے کول چھیتی آؤن دی آس کر کے مَیں ایہہ گلّاں تینُوں لِکھنا آں۔ تے جے مَینُوں چِر لگّے تے تُوں جان لے پئی خُدا دے گھر یعنی جِیوندے خُدا دی کلِیسیا وِچ جیہڑی سچیائی دا تھم تے نِیہہ اے۔ کِیویں وَرتنا چاہیدا اے۔ ایہدے وِچ شک نئیں پئی دِینداری دا بھید وَڈا اے یعنی اوہ جیہڑا جِسم وِچ ظاہر ہویا۔ تے رُوح وِچ راستباز مِتھیا گیا۔ تے فرِشتیاں وِچ وکھالی دِتّا۔ غیر قوماں وِچ اوہدی منادی ہوئی دُنیا وِچ مَنّیا گیا۔ تے جلال وِچ اُتانہہ چُکیا گیا۔ پر رُوح صاف آکھدا اے۔ پئی آؤن والیاں زمانیاں وِچ کُجھ اِیمان نُوں چھڈ جان گے بُھلان والِیاں رُوحاں تے شیطان دِیاں تعلِیماں ولّ گَوہ کرن گے۔ تے اِیمان نُوں بُھل جان گئے۔ ایہہ اوہناں جُھوٹھیاں بندیاں دے فریب دے سببّوں ہوئے گا۔ جِنہاں اپنے دِلاں نُوں گویا تّتے لوہے نال داغی کِیتا۔ ایہہ لوک ویاہ کرن توں ٹھاکن گے تے اوہناں کھانیاں توں لانبھے رہن دا حُکم دین گے۔ جیہڑے خُدا ایسے لئی بنائے نیں۔ پئی اِیماندار تے سَچ نُوں پچھانن والے لوک اوہناں نُوں شُکر کر کے کھان۔ کیوں جو خُدا دِیاں بنائِیاں ہویاں سارِیاں شیواں چَنگیاں نیں تے کوئی شے اِنکار کرن جوگی نئیں۔ ایس شرط نال پئی شُکر کر کے لئی جائے۔ ایس لئی پئی خُدا دے کلام تے دُعا نال پاک ہوندی اے۔ جے تُوں بھراواں نُوں ایہہ گلّ یاد کرائیں گا۔ تے مسِیح یِسُوع دا چَنگا خادم بنیں گا۔ تے اِیمان تے اوس چنگی سِکھیا نال جِنہاں نُوں تُوں مَندا آیا ایں پلدا رہیں گا۔ پر بے اِیمانی دِیاں تے بُڈِّھیاں دِیاں کہانِیاں توں لانبھے رہو۔ تے دِینداری لئی مشق کریا کر۔ کیوں جو جِسمانی مشق دا فائدہ تھوڑے چِر لئی اے۔ پر دِینداری سارِیاں گلّاں وِچ فائدہ دیندی اے۔ ایس لئی پئی ہُن وی تے آؤن والی زِندگی دا وعدہ وی ایہدے نال ای اے۔ ایہہ سَچّی گلّ اے تے سبھنیں پاسیں مَنّن والی اے۔ کیوں جو اسی ایسے واسطے محنت تے جتن کرنے آں۔ پئی ساڈی آس اوس جِیوندے خُدا توں اے جیہڑا سارے بندیاں نُوں نجات دین والا اے۔ تے خاص کر اِیمان والیاں نُوں۔ ایہناں گلّاں دا حُکم دے تے سِکھا۔ کوئی تیری جوانی ولّوں تیری حقارت نا کرے۔ سگوں اِیمان والیاں لئی گلّاں کرن تے چال چَلّن تے پیار تے اِیمان پاکیزگی وِچ نمونہ بن۔ جد تِیکر مَیں نا آواں۔ پڑھن تے نصِیحت کرن تے سکھان ولّ دھیان رکھ۔ اوس بخشِش نُوں نا بُھل جیہڑی تیرے کول اے۔ تے نبُوّت دی راہِیں بزُرگاں دے ہتّھ رکھن نال تینُوں مِلی سی۔ ایہناں گلّاں دا فِکر کر تے ایہناں وِچ لگّا رہو۔ تاں جو تیرے وَدھن دا ساریاں نُوں پتا لگّے۔ اپنی تے اپنی تعلِیم دی راکھی کر۔ اوہناں گلّاں اُتّے پَکّا رہو۔ کیوں جو اجیہا کرن نال تُوں اپنی تے سُنن والیاں دی نجات دا سبّب ہوویں گا۔ کِسے بُڈّھے نُوں نا جِھڑکیں۔ سگوں پئیو سمجھ کے نصِیحت کریں۔ تے گبھرُوآں نُوں بھرا سمجھ کے۔ تے بُڈِّھیاں زنانِیاں نُوں ماں سمجھ کے تے مُٹیاراں زنانِیاں نُوں پُوری پاکیزگی نال بھین سمجھ کے۔ اوہناں رَنڈِیاں زنانِیاں دی جیہڑیاں سَچّی مُچّی رَنڈِیاں نیں عِزّت کریں۔ تے جے کِسے رَنڈی زنانی دے پُتر پوترے ہون تے پہلاں اپنے گھرانے نال دِینداری دا ورتاؤ کرنا سِکھّن تے ماں باپ دا حق دین۔ کیوں جو ایہہ خُدا نُوں پسند اے۔ جیہڑی سَچّی مُچّی رَنڈی اے۔ تے اوہدا کوئی وی نئیں۔ اوہ خُدا اُتّے آس رکھدی اے۔ تے راتِیں دِنے بینتی تے دُعا وِچ لگّی رہندی اے۔ پر جیہڑی شوقِین بن گئی اے اوہ جِیوندیاں ای مر گئی اے۔ ایہناں گلّاں دا وی حُکم دے۔ تاں جو اوہ بے الزام رہن۔ جے کوئی اپنیاں تے خاص کر اپنے گھر والیاں دی وی خبر نا لَوے۔ تے اوہ اِیمان دا مُنکر تے بے اِیمان نالوں وی بَھیڑا اے۔ اوہ ای رَنڈی کتاب وِچ لِکھی جائے۔ جیہڑی سٹّھاں ورھیاں توں گھٹ نا ہوئے تے اِکّو ای بندہ کِیتا ہوئے۔ تے چَنگیاں کمّاں وِچ مشہُور ہوئے۔ بچّیاں نُوں پا لیا ہوئے تے پردیسیاں دی سیوا کِیتی ہوئے تے پاک لوکاں دے پَیر دھوتے ہون۔ تے خستہ حال والیاں دی مدد کِیتی ہوئے تے سارے نیک کمّ کرن وِچ لگّی رہی ہوئے۔ پر مُٹیار رَنڈِیاں دے نال نا لِکھیں۔ کیوں جو جد اوہ مسِیح دے اُلٹ جِسم دے تابعیاں ہو جاندِیاں نیں تے ویاہ کرنا چاہندیاں نیں۔ تے سزا دے لائق بن جاندِیاں نیں ایس لئی پئی اوہناں اپنے پہلے اِیمان نُوں چھڈ دِتّا۔ تے نالے گھر گھر پِھرکے وِھلِیاں رہناں سِکھ جاندِیاں نیں تے نِریاں وِھلِیاں ای نئیں رہندیاں سگوں بکواس کر دیاں رہندیاں نیں تے دُوجیاں دے کمّاں وِچ دخل وی دیندیاں نیں تے ناجائز گلّاں آکھدیاں نیں۔ سو مَیں چاہناں آں۔ پئی مُٹیار رَنڈِیاں ویاہ کر لین۔ تے اولاد جمّن تے گھر دا بندوبست کرن۔ تے کوئی وَیری بھلا بُرا نا آکھ سکے۔ کیوں جو بتھیریاں بُھل کے شیطان دِیاں ہوگِئیاں نیں۔ جے کِسے اِیمان والی زنانی کول رَنڈِیاں زنانِیاں ہون۔ تے اوہ ای اوہناں دی مدد کرے۔ تے کلِیسیا اُتّے بھار نا پائے۔ تاں جو اوہ اصلی رَنڈِیاں دی مدد کر سکے۔ جیہڑے بزُرگ چَنگے آگُو نیں۔ خاص کر کے اوہ جیہڑے کلام تے تعلِیم دی محنت کر دے نیں دُونی عِزّت دے قابل سمجھے جان۔ کیوں جو پاک کتاب ایہہ آکھدی اے۔ پئی گاہ وِچ وَگدے ڈھگّے دا مُنھ نا بَنّھ تے مزدُوری مزدُور دا حق اے۔ جیہڑا دعویٰ کِسے بزُرگ اُتّے کِیتا جائے۔ اوہنوں دو تِنّ گواہاں بِناں نا سُنیں۔ گُناہ کرن والیاں نُوں ساریاں دے سامھنے جِھڑک تاں جو دُوجیاں نُوں وی ڈر ہوئے۔ خُدا تے خُداوند یِسُوع مسِیح تے چُنیاں ہویاں فرِشتیاں دے سامھنے مَیں تینُوں آکھ دینا آں پئی ایہناں گلّاں اُتّے انصاف نال عمل کریں تے کوئی کمّ رَئی نال نا کریں۔ کِسے بندے اُتّے چھیتی نا ہتّھ رکھّیں تے دُوجیاں دے گُناہ وِچ نا رَلیں۔ تے اپنے آپ نُوں پاک رکھّیں۔ اگّے نُوں نِرا پانی نا پِیویں۔ سگوں اپنے ڈِھڈ تے ویلے کویلے دی کمزوری دے سببّوں تھوڑی جیہی مَے وی ورتیا کریں۔ بُہتے بندیاں دے گُناہ ظاہر ہو جاندے نیں۔ تے پہلاں ای عدالت وِچ اَپڑ جاندے نیں۔ تے بتھیریاں دے پِچّھوں اَپڑ دے نیں۔ ایسے طرح بُہتے چنگے کمّ وی ظاہر ہو جاندے نیں تے جیہڑے ہوری طرح دے نیں اوہ وی چُھپ نئیں سکدے۔ جیہڑے نوکر جُولے ہیٹھ نیں اپنے اپنے مالکاں نُوں پُوری عِزّت دے قابل جانن۔ تاں جو خُدا دا ناں تے تعلِیم بدنام نا ہوئے۔ تے جِنہاں دے مالک اِیمان والے نیں اوہ اوہناں نُوں بھرا ہون دے سببّوں حِقیر نا جانن سگوں ایس لئی وَدّھ کے اوہناں دی سیوا کرن۔ پئی فائدہ لین والے اِیماندار تے پیارے نیں۔ تُوں ایہناں گلّاں دی تعلِیم تے نصِیحت دے۔ جے کوئی بندہ ہور تعلِیم دیندا اے۔ تے ٹھیک گلّاں نُوں یعنی ساڈے خُداوند یِسُوع مسِیح دِیاں گلّاں تے تعلِیم نئیں مَندا جیہڑی دِینداری دے سببّوں اے۔ اوہ مغرُور اے تے کُجھ وی نئیں جان دا سگوں اوہنوں بحث تے لفظی جھگڑیاں دی بیماری اے۔ جِنہاں توں ساڑا۔ لڑائِیاں۔ تے بدگوئِیاں تے بدنِیتی۔ تے اوہناں بندیاں وِچ جھگڑے ہوندے نیں جِنہاں دی عقل وِگڑ گئی اے۔ تے سچیائی توں خالی نیں۔ تے دِینداری نُوں نفع لین دا وسیلہ سمجھدے نیں۔ ہاں دِینداری صبر دے نال تے بڑے نفع دا وسیلہ اے۔ کیوں جو نا اسی دُنیا وِچ کُجھ لیائے تے نا ہُن کُجھ ایہدے وِچوں لے جا سکنے آں۔ سو جے ساڈے کول کھان ہنڈان نُوں اے تے اوسے اُتّے صبر کریئے۔ پر جیہڑے دَولتمند بننا چاہندے نیں اوہ ایسے ای ازمایش تے پھاہی تے بُہت ساری واہیات تے نُقصان دین والِیاں خواہشاں وِچ پَھس جاندے نیں جیہڑیاں بندیاں نُوں بربادی تے مَوت دے دریا وِچ ڈوب دیندیاں نیں۔ کیوں جو پَیسے دی مُحبّت سارِیاں بُرائیاں دی اِک جڑ اے۔ جِہدی تانگھ وِچ بتھیریاں اِیمان ولّوں پرت کے اپنے دِلاں نُوں وَن سَونّے روگاں نال وِنّھ لیا اے۔ پر تُوں اَے خُدا دے بندیا۔ ایہناں گلّاں توں نَسّ تے راستبازی تے دِینداری تے اِیمان تے مُحبّت تے صبر تے حلِیمی دے مگر لگ۔ اِیمان دی چنگی کُشتی گُھل اوس سدا دی زِندگی اُتّے قبضہ کر لے۔ جِہدے لئی سدّیا گیا سَیں۔ تے بتھیرے گواہاں اگّے چَنگا اِقرار کِیتا سی۔ مَیں اوس خُدا نُوں جیہڑا سارِیاں شیواں نُوں جوالدا اے۔ تے مسِیح یِسُوع نُوں جِس پُنطِیُس پِیلاطُس دے اگّے چَنگا اِقرار کِیتا سی گواہ کر کے تینُوں پَکّی کرنا آں۔ پئی ساڈے خُداوند یِسُوع مسِیح دے ظاہر ہون تِیکر حُکم نُوں بے نُقص تے بے عیب رکھ۔ اوہنوں اوہ چنگے ویلے وِچ ظاہر کرے گا۔ جیہڑا مُبارک تے اِکّو حاکم تے بادشاہاں دا بادشاہ تے خُداونداں دا خُداوند اے۔ بے انت زِندگی نِری اوہدی اے۔ تے اوہ چانن وِچ رہندا اے۔ جِتّھے کوئی اَپڑ نئیں سکدا۔ تے نا کِسے بندے اوہنوں ویکھیا اے۔ تے نا ویکھ سکدا اے۔ اوہدی عِزّت تے بادشاہی سدا تِیکر رہے۔ آمِین۔ ہُن دے جہان دیاں دَولت منداں نُوں حُکم دے۔ پئی مغرُور نا ہون تے قیم نا رہن والی دَولت اُتّے نئیں سگوں خُدا اُتّے آس رکھن۔ جیہڑا سانُوں سواد لین واسطے سارِیاں شیواں کُھلے دِل نال دیندا اے۔ تے نیکی کرن تے چنگے کمّاں وِچ دَولتمند بنن تے سخی ہون نُوں تیار تے مدد کرن اُتّے قیم ہون۔ تے اگّے واسطے اِک چنگی نِینّھ قیم کر رکھن۔ تاں جو اصلی زِندگی اُتّے قبضہ کر لین۔ اَے تِیمُتِھیُس ایس امانت نُوں چنگی طرح رکھ۔ تے جیہڑے عِلم نُوں عِلم آکھنا ای نئیں چاہیدا۔ اوہدی واہیات بکواساں تے مخالفتاں اُتّے دھیان نا کر۔ بُہتے اوہدا اِقرار کر کے اِیمان ولّوں بُھل گئے نیں۔ تُہاڈے اُتّے فضل ہوندا رہے۔ پَولُس ولّوں جیہڑا خُدا دی مرضی نال مسِیح یِسُوع دا رسُول اے اوس زِندگی دے وعدے دے سببّوں جیہڑا مسِیح یِسُوع وِچ اے۔ پیارے پُتر تِیمُتِھیُس دے ناں۔ خُدا باپ تے ساڈے خُداوند مسِیح یِسُوع ولّوں فضل تے رَحم تے تسلّی ہوئے۔ جیہڑے خُدا دی بندگی وِچ صاف دِل نال پئیو دادیاں دے طریقے اُتّے کرنا واں اوہدا شُکر کرنا آں۔ پئی اپنیاں دُعاواں وِچ ہرویلے تینُوں یاد کرنا آں۔ تے تیرے اَتھرُواں نُوں یاد کر کے راتِیں دِنے تیرے مِلن دی چاہ رکھنا آں۔ پئی خُوشی وِچ بھر جاواں۔ تے مَینُوں تیرا اوہ سَچّا اِیمان یاد کرایا گیا اے۔ جیہڑا پہلاں تیری نانی لُوئس تے تیری ماں یُونِیکے رکھدی سی۔ تے مَینُوں یقِین اے۔ پئی تُوں وی رکھیا اے۔ ایسے سبّب مَیں تینُوں یاد کراناں آں۔ پئی تُوں خُدا دی اوس برکت نُوں بَھکھا جیہڑی تینُوں میرے ہتّھ رکھن نال مِلی۔ کیوں جو خُدا سانُوں ڈرن والی رُوح نئیں سگوں طاقت تے پیار تے سُرت دی رُوح دِتّی اے۔ سو ساڈے خُداوند دی گواہی توں تے میرے کولوں جیہڑا اوہدا قیدی آں شرم نا کر۔ سگوں اوس خُدا دی قُدرت نال خُوشخبری دی خاطر میرے نال دُکھ سہہ۔ جِس سانُوں نجات دِتّی تے پاک بُلاوے نال بُلایا۔ ساڈے کمّاں دے سببّوں نئیں۔ سگوں اپنے خاص اِرادے تے اوس فضل دے سببّوں جیہڑا مسِیح یِسُوع وِچ ساڈے اُتّے مُڈھوں ای ہویا۔ پر ہُن ساڈے نجات دین والے مسِیح یِسُوع دے ظاہر ہون توں ظاہر ہویا۔ جِس مَوت نُوں برباد تے زِندگی تے بقا نُوں اوس خُوشخبری دی راہِیں چانن والا کر دِتّا۔ جِہدے لئی مَیں مَنّاد تے رسُول تے اُستاد بنیا آں۔ ایسے سبّب مَیں ایہہ دُکھ وی سہنا آں۔ پر شرماؤندا نئیں۔ کیوں جو جِہدے اُتّے مَیں اِیمان لیاندا اے۔ اوہنوں جاننا آں تے مَینُوں یقِین اے پئی اوہ میری امانت دی اوس دِن تِیکر حفاظت کر سکدا اے۔ جیہڑیاں ٹھیک گلّاں تُوں میرے کولوں سُنیاں اوس اِیمان تے پیار دے نال جیہڑا مسِیح یِسُوع وِچ اے۔ اوہناں دا خُلاصہ یاد رکھ۔ اوس پاک رُوح دی راہِیں جیہڑا ساڈے وِچ وسّیا ہویا اے۔ اوس چنگی امانت دی حفاظت کر۔ تے تُوں ایہہ جاننا ایں پئی آسِیہ دے سارے لوک میرے ولّوں پھر گئے جِنہاں وِچوں فُوگلُس تے ہرمُگِنیُس نیں۔ خُداوند اُنیسِفرُس دے ٹبّر اُتّے رَحم کرے۔ کیوں جو اوس بُہتی واری مَینُوں تازیاں کِیتا تے میری قید تُوں شرمندہ نا ہویا۔ سو جد اوہ رُومہ وِچ آیا تے کوشش نال لَبّھ کے مَینُوں مِلیا۔ (خُداوند اوہنوں ایہہ بخشے۔ پئی اوس دِن اوہدے اُتّے خُداوند دا رَحم ہوئے۔) تے جیہڑیاں خِدمتاں اوس اِفِسُس وِچ کِیتیاں تُوں چنگی طرح جاننا ایں۔ سو میرے پُتر تُوں اوس فضل نال جیہڑا مسِیح یِسُوع وِچ اے تگڑا ہو۔ تے جیہڑیاں گلّاں میرے کولوں بتھیرے گواہاں دے سامھنے سُنیاں نیں اوہناں نُوں اجیہے دیانتدار بندیاں نُوں سونپ جیہڑے ہورناں نُوں وی سکھان دے لائق ہون۔ مسِیح یِسُوع دے چنگے سپاہی وانگر میرے نال دُکھ سہہ۔ کوئی سپاہی لڑائی دے ویلے دُنیا دے معاملیاں وِچ نئیں پھسدا۔ سگوں اپنے بھرتی کرن والے نُوں خُوش کر دا اے۔ دنگل وِچ گُھلن والے نُوں وی جد تِیکر قاعدے نال نا گُھلے تاج نئیں مِلدا۔ جیہڑا زمیندار محنت کر دا اے۔ اوہنوں فصل دا حِصّہ پہلاں مِلنا چاہیدا اے۔ جو کُجھ مَیں آکھنا آں۔ اوہدے اُتّے خیال کر۔ خُداوند تینُوں سارِیاں گلّاں دی سمجھ دے گا۔ یِسُوع مسِیح نُوں یاد رکھ جیہڑا داؤد دی نسل وِچوں اے۔ تے میری اوس خُوشخبری دے سببّوں مُردیاں وِچوں جی اُٹھیا۔ جِہدے لئی مَیں بدکار وانگر دُکھ سہناں آں۔ ایتھوں تِیکر پئی قید آں۔ پر خُدا دا کلام قید نئیں۔ ایسے سبّب مَیں چُنیاں ہویاں لوکاں دی خاطر سبھ کُجھ سہنا آں پئی اوہناں نُوں وی اوہ نجات جیہڑی مسِیح یِسُوع وِچ اے۔ سدا دے جلال نال مِل جائے۔ سَچّی گلّ ایہہ اے پئی جے اسی اوہدے نال مر گئے۔ تے اوہدے نال جی وی اُٹھاں گے۔ جے اسی دُکھ سہاں گے۔ تے اوہدے نال بادشاہی وی کراں گے۔ جے اسی اوہدا اِنکار کراں گے۔ تے اوہ وی ساڈا اِنکار کرے گا۔ جے اسی بے وفا ہو جاواں گے۔ تَد اوہ وفادار ای رہے گا۔ کیوں جو اوہ اپنا اِنکار نئیں کر سکدا۔ ایہہ گلّاں اوہناں نُوں یاد کرا۔ تے خُداوند دے سامھنے پَکّی کر پئی لفظی تکرار نا کرن جِہدے توں کُجھ وی فائدہ نئیں سگوں سُنن والے وِگڑ جاندے نیں۔ اپنے آپ نُوں خُدا دے سامھنے مقبُول تے اجیہے کمّ کرن والے وانگر پیش کرن دی کوشش کر جِہنُوں شرمندہ ہونا نا پَوے۔ جیہڑا سَچّے کلام نُوں چج نال کمّ وِچ لیاؤندا اے۔ پر واہیات بکواس توں پرہیز کر۔ کیوں جو اجیہے بندے ہور وی بیدینی وِچ وَدھن گے۔ تے اوہناں دا کلام گھنبِیر وانگر کھاندا رہے گا۔ ہُمِنِیُس تے فِلیتُس اوہناں وِچوں ای نیں۔ اوہ ایہہ آکھ کے پئی قیامت ہوگئی اے سچیائی توں پھر گئے نیں۔ تے بعضیاں دا اِیمان وگاڑ دے نیں۔ تَد وی خُدا دی پَکّی نِینّھ قیم رہندی اے۔ تے اوہدے اُتّے ایہہ مُہر اے پئی خُداوند اپنیاں نُوں پچھاندا اے۔ تاں جو کوئی خُداوند دا ناں لَیندا اے۔ ناراستی توں مُڑ جائے۔ وڈّے گھر وِچ نا نِرے سونے چاندی دے بھانڈے ہوندے نیں سگوں لکڑ تے مِٹّی دے وی بعضے عِزّت تے بعضے بے عِزّتی دے لئی۔ سو جیہڑا اوہناں توں وکھرا ہو کے اپنے آپ نُوں پاک کرے گا اوہ عِزّت دا بھانڈا ہوئے گا تے پاک بنے گا۔ تے مالک دے کمّ دے لائق تے ہر اِک نیک کمّ دے لئی تیار ہوئے گا۔ جوانی دِیاں خواہشاں توں بچ۔ جیہڑے صاف دِلی نال خُداوند توں دُعا منگدے نیں۔ اوہناں دے نال راستبازی تے اِیمان تے پیار تے صُلح دا لَبّھن والا ہو۔ پر بےکل تے نادانی دے مخولاں توں ایہہ جان کے وکھرا رہ۔ پئی اوہ جھگڑا پَیدا کر دے نیں۔ تے چَنگا نئیں پئی خُداوند دا بندہ جھگڑا کرے سگوں ساریاں دے نال نرمی کرے تے تعلِیم دین دے لائق تے صبر کرن والا ہوئے۔ تے مخالفت کرن والیاں نُوں حلِیمی نال تعلِیم دے۔ شاید خُدا اوہناں نُوں تَوبہ دی طاقت بخشے پئی اوہ سچیائی نُوں جانن۔ تے خُداوند دے بندے دے ہتھّوں خُدا دی مرضی دے قیدی ہون تے ابلیس دی پھاہی تُوں چُھٹن۔ تے ایہہ جان رکھ پئی اخِیری زمانے وِچ بَھیڑے دِن آؤن گے۔ پئی بندے خود غرض پَیسے دے پیارے شیخی مارن والے مغرُور بُرا آکھن والے ماں پئیو دے نافرمان ناشکرے تے ناپاک۔ اصلی پیار توں خالی پتّھر دِل تُہمت لان والے تے بے مُہّار بَھیڑی طبیعت والے نیکی دے وَیری۔ دغاباز۔ ڈِھیٹھ۔ گُھمنّڈی۔ خُدا نالوں دُنیا دِیاں خُوشیاں نُوں بُہتا پسند کرن والے ہون گے۔ اوہ دِینداری دی ڈول تے رکھن گے۔ پر اوہدے اثر نُوں نا مَنّن گے۔ اجیہے تُوں وکھرا ہو جا۔ اوہناں ای وِچوں اوہ لوک نیں جیہڑے گھراں وِچ چُپ چاپ وڑے ہوئے نیں۔ تے اوہناں بَھیڑیاں زنانِیاں نُوں وی وَس وِچ کر لَیندے نیں۔ جیہڑیاں گُناہ وِچ پھسیاں ہویاں نیں۔ تے ہر طرح دی خواہشاں دے وِچ نیں۔ تے سدا سِکھدِیاں رہندیاں نیں۔ پر سچیائی دی پچھان تِیکر کدی وی نئیں اَپڑ دِیاں۔ تے جیویں ینیّس تے یمبریس نیں مُوسیٰ دی مخالفت کِیتی سی۔ ایسے طرح ایہہ لوک وی سچیائی دی مخالفت کر دے نیں۔ ایہہ اجیہے بندے نیں جِنہاں دی عقل وِگڑی ہوئی اے۔ تے اِیمان ولّوں مقبُول نئیں۔ پر اوہ ایدوں وَدّھ نا کر سکن گے۔ ایس کر کے پئی اوہناں دی بے وقوفی ساریاں بندیاں اُتّے ظاہر ہو جائے گی۔ جیویں اوہناں دی وی ہوگئی سی۔ پر تُوں تعلِیم۔ چال چَلّن۔ اِرادے۔ اِیمان۔ صبر۔ مُحبّت۔ برداشت۔ ستائے جان۔ تے دُکھ دَرد سہن وِچ میری پَیروی کِیتی۔ یعنی اجیہے دُکھاں وِچ جیہڑے انطاکیہ تے اِکُنِیُم تے لُسترہ وِچ میرے اُتّے پئے تے ہورناں دُکھاں وِچ وی جیہڑے مَیں سہے نیں۔ پر خُداوند مَینُوں اوہناں ساریاں توں بچایا۔ سگوں جِنّے مسِیح یِسُوع وِچ دِینداری دے نال زِندگی کٹنی چاہندے نیں۔ اوہ سارے ستائے جان گے۔ تے بُرے تے دھوکھے باز بندے فریب دیندے تے فریب کھاندے وِگڑدے لگے جان گے۔ پر تُوں اوہناں گلّاں اُتّے جیہڑیاں تُوں سِکھیاں سن۔ تے جِنہاں دا یقِین تینُوں دوایا گیا سی ایہہ جان کے قیم رہ پئی تُوں کِنّاں لوکاں کولوں سِکھیاں سن۔ تے ایہہ وی پئی شُروع توں اوہناں پاک کِتاباں توں تُوں واقف سَیں جیہڑیاں تینُوں مسِیح یِسُوع اُتّے اِیمان لیاؤن نال نجات حاصِل کرن دے لئی دانائی دے سکدِیاں نیں۔ ہر اِک کتاب جیہڑی خُدا دے اِلہام توں اے۔ اوہ تعلِیم تے الزام تے صلاح تے راستبازی دی تعلِیم واسطے فائدہ مند وی اے۔ تاں جو خُداوند دا بندہ کامِل بنے تے ہر اِک نیک کمّ دے واسطے بالکل تیار ہوئے۔ خُدا تے مسِیح یِسُوع نُوں جیہڑا جِیوندیاں تے مویاں ہویاں دی عدالت کرے گا۔ گواہ کر کے تے اوہدے ظاہر ہون توں بادشاہی نُوں یاد دوا کے مَیں تینُوں آکھنا آں۔ پئی تُوں کلام دی منادی کر۔ ویلے کویلے تیار رہ۔ تے ہر طرح دے صبر تے تعلِیم دے نال الزام دے۔ تے ملامت تے نصِیحت کر۔ کیوں جو اجیہا ویلا آوے گا۔ پئی لوک صحِیح تعلِیم دی برداشت نا کرن گے۔ سگوں کنّاں دی جلُون دے سببّوں اپنیاں اپنیاں خواہشاں دے سببّوں بتھیرے اُستاد کرن گے۔ تے اپنے کنّاں نُوں سچیائی ولّوں فیر کے کہانِیاں اُتّے لان گے۔ پر تُوں سارِیاں گلّاں وِچ ہُشیار رہ۔ دُکھ سہہ۔ اِنجِیل دا کمّ کر۔ اپنی خِدمت نُوں پُوریاں کر۔ پئی مَیں ہُنے قُربان پیا ہُنا آں۔ تے میرے کُوچ دا ویلا آ پُجیا اے۔ مَیں چَنگا دنگل گھلّیا اے مَیں دَوڑ مُکا چھڈی۔ مَیں اِیمان نُوں سانبھ رکھیا۔ اگّے لئی میرے واسطے راستبازی دا اوہ تاج رکھیا ہویا اے۔ جیہڑا راستباز نیائِیں یعنی خُداوند مَینُوں اوس دِن دے گا۔ تے نِرا مَینُوں ای نئیں سگوں اوہناں ساریاں نُوں وی جیہڑے اوہدے ظاہر ہون دی اُڈِیک وِچ نیں۔ میرے کول چھیتی آؤن دی کوشش کر۔ کیوں جو دِیماس ایس دُنیا نُوں پیار کر کے مَینُوں چھڈ کے تھِسّلُنِیکے نُوں ٹُر گیا۔ تے کریسکینس گلِتیہ نُوں تے طِطُس دِلمتیہ نُوں۔ اِکّو لُوقا میرے نال اے۔ مرقس نُوں نال لے کے آجا کیوں جو خِدمت لئی اوہ میرے کمّ دا اے۔ مَیں تُخِکس نُوں اِفِسُس وِچ گھل دِتّا اے۔ جیہڑا چوغہ مَیں تروآس وِچ کرپُس دے کول چھڈ آیا آں جدوں تُوں آویں اوہ تے کِتاباں خاص کر چَمّ پتّر لَیندا آویں۔ سکندر ٹھٹھیار میرے نال بُہت بُرائیاں کِیتیاں۔ خُداوند اوہنوں اوہدے کمّاں پِچّھے بدلہ دے گا۔ اوہدے توں تُوں ہُشیار رہ۔ کیوں جو اوس ساڈیاں گلّاں دی بڑی مخالفت کِیتی۔ میری پہلی پیشی میرے نال کوئی نئیں سی۔ سگوں مَینُوں ساریاں چھڈ دِتّا۔ اوہناں نُوں ایہدا حِساب نا دینا پَوے۔ پر خُداوند میرا مددگار سی۔ تے مَینُوں ہِمّت دِتّی۔ تاں جو میری راہِیں اِنجِیل دا سنیہا مشہُور ہو جائے تے سارِیاں قوماں سُن لین۔ تے مَیں شیر دے مُنھ وِچوں چھڈایا گیا۔ خُداوند ہر اِک بُرے کمّ توں بچاوے گا۔ تے اپنی اسمانی بادشاہی وِچ صحِیح سلامت اَپڑائے گا۔ اوہدا جلال سدا تِیکر ہوندا رہے آمِین۔ پرسِکّلہ تے اَکوِلہ تے اُنیسِفرُس دے ٹبّر نُوں سلام آکھنا۔ اِراستُس کُرِنتِھس وِچ رہیا تے ترُفِمُس نُوں مَیں مِیلیتُس وِچ بیمار چھڈیا۔ سِیال توں پہلاں میرے کول آؤن دی کوشش کر۔ یُوبُولُس تے پُودینس تے لِینُس تے کلودِیہ تے سارے بھرا تینُوں سلام آکھدے نیں۔ خُداوند تیری رُوح دے نال رہے۔ تُہاڈے اُتّے فضل ہوندا رہے۔ پَولُس ولّوں جیہڑا خُدا دا غلام تے یِسُوع مسِیح دا رسُول اے خُدا دے چُنیاں ہویاں دے اِیمان تے اوس سچیائی دی پچھان لئی جیہڑی دِینداری سیتی اے۔ اوس سدا دی زِندگی دی آس وِچ جِہدا وعدہ مُڈھ تِھیں خُدا کِیتا سی۔ جیہڑا جُھوٹھ نئیں مار سکدا۔ پر اپنے ویلے سِر اپنے کلام نُوں اوس سنیہے وِچ اُگھیڑیا۔ جیہڑا ساڈے نجات دین والے خُدا دے حُکم دے سببّوں میرے سپُرد ہویا۔ طِطُس دے ناں جیہڑا اِیمان دی سانجھ وِچ میرا سَچّا پُتر اے۔ خُدا باپ تے ساڈے نجات دین والے مسِیح یِسُوع ولّوں فضل تے تسلّی ہوئے۔ مَیں کریتے وِچ تینُوں ایس لئی چھڈیا سی پئی تُوں جِنہاں گلّاں وِچ کسر رہ گئی سی ٹھیک کریں۔ تے جیویں مَیں حُکم دِتّا ساریاں شہراں وِچ اجیہے بزُرگ نامزد کر۔ جیہڑے بے الزام تے اِک زنانی دے گھر والے ہون۔ تے اوہناں دی اولاد اِیمان والی ہوئے تے بدچلنی تے سرکشی دے سبّب بدنام نا ہوئے۔ کیوں جو نِگہبان ایس واسطے پئی خُدا دا مُختِیار اے بے الزام ہونا چاہیدا اے۔ نا ضِدی ہوئے۔ نا غُصّے والا۔ نا نشئی ہو کے شور کرن والا۔ نا مارن والا۔ نا ناجائز نفع دا لالچی۔ پر مُسافراں دی تواضع کرن والا۔ نیکی نُوں پسند کرن والا۔ سُرت والا تے نیائِیں۔ پاک تے پرہیزگار ہوئے۔ تے اِیمان دے کلام نُوں جیہڑا ایس تعلِیم دے سببّوں اے پَھڑی رکھّے۔ پئی ٹھیک تعلِیم نال نصِیحت وی کرے۔ تے مخالفاں نُوں وی منائے۔ کیوں جو بتھیرے لوک نافرمان تے بیُہودہ گلّاں کرن والے تے دھوکھے باز نیں خاص کر سُنت والیاں وِچوں۔ اوہناں دا مُنھ بند کرنا چاہیدا اے اوہناں لوکاں ناجائز نفع لئی بَھیڑیاں گلّاں سِکھا کے گھراں دے گھر اُجاڑ چھڈے۔ اوہناں وِچوں اِکّی آکھیا اے۔ جیہڑا سگوں اوہناں دا اپنا نبی سی۔ پئی کریتی سدا جُھوٹھے بَھیڑے پشُو۔ آہلکی پیٹُو ہوندے نیں۔ ایہہ گواہی سَچّی اے۔ پر اوہناں نُوں چنگی طرح جھاڑ پئی اوہناں دا اِیمان ٹھیک ہوئے۔ تے یہُودِیاں دِیاں کہانِیاں تے اوہناں بندیاں دے حُکماں اُتّے دھیان نا کرن۔ جیہڑے سچیائی ولّوں بَھوں جاندے نیں۔ پاک لوکاں واسطے سارِیاں شیواں پاک نیں۔ پر پلِیت تے بے اِیمان لوکاں واسطے کُجھ وی پاک نئیں۔ پر اوہناں دی عقل تے دِل دونویں پلِیت نیں۔ اوہ خُدا دی پچھان دا دعویٰ کر دے نیں۔ پر اپنے کمّاں نال اوہدا اِنکار کر دے نیں۔ کیوں جو اوہ مکرُوہ تے نافرمان نیں تے کِسے نیک کمّ دے لائق نئیں۔ پر تُوں اوہ گلّاں دس جیہڑیاں ٹھیک تعلِیم نُوں پَھبدِیاں نیں۔ ایہہ پئی بُڈّھے پرہیزگار سنجیدہ تے سُرت والے ہون۔ اوہناں دا اِیمان۔ تے مُحبّت۔ تے صبر ٹھیک ہوئے۔ ایسے طرح بُڈِّھیاں زنانِیاں دی چال ڈھال ادب والی ہوئے۔ چُغلی کرن والِیاں تے شرابی نا ہون پر ٹھیک گلّاں دسن والِیاں ہون۔ مُٹیاراں نُوں سکھان پئی اپنے اپنے گھر والیاں نُوں پیار کرن بچّیاں نُوں پیار کرن۔ تے پرہیزگار۔ تے پاک۔ تے گھر دے کمّ کرن والیاں۔ تے مہربان ہون۔ تے اپنے اپنے گھر والیاں دے حُکم وِچ رہن تاں جو خُدا دا کلام بدنام نا ہوئے۔ جواناں نُوں وی ایسے طرح مَت دے۔ پئی پرہیزگار بنن۔ سارِیاں گلّاں وِچ اپنے آپ نُوں نیک گلّاں دا نمونہ بنا۔ تیری تعلِیم وِچ صفائی تے سنجِیدگی ہوئے۔ تے اجیہا نیک کلام ہوئے جیہڑا الزام ہیٹھ نا آوے۔ تاں جو مخالف ساڈے اُتّے کوئی عیب نا لاسکن سگوں شرمندے ہون۔ نَوکراں نُوں نصِیحت کر۔ پئی اپنے مالکاں دے تابِع رہن سارِیاں گلّاں وِچ اوہناں نُوں خُوش رکھن۔ مالک دا آکھا نا موڑن۔ چوری تے چالاکی نا کرن۔ سگوں پُوری دیانتداری نُوں چنگی طرح ظاہر کرن۔ پئی اوہ سارِیاں گلّاں وِچ ساڈے نجات دین والے خُدا دی تعلِیم نُوں سنگارن۔ کیوں جو خُدا دا اوہ فضل دِس پیا اے۔ جیہڑا سارے بندیاں دی نجات دا سبّب اے۔ تے سانُوں سِکھاؤندا اے۔ پئی بیدینی تے دُنیاوی خواہشاں نُوں چھڈ کے ایس جہان وِچ پرہیز تے نیکی تے دِینداری نال زِندگی کٹیئے۔ تے اوس مُبارک آس یعنی اپنے بزُرگ خُدا تے نجات دین والے یِسُوع مسِیح دے جلال دے ظاہر ہون دی اُڈِیک وِچ رہئے۔ جِس اپنے آپ نُوں ساڈے لئی دے دِتّا۔ پئی سانُوں ساری بیدینی توں ڈنڈ بھرکے چھڈائے تے پاک کر کے اپنے خاص وِرثہ لئی اِک اُمّت بنائے۔ جیہڑی نیک کمّاں وِچ سرگرم ہوئے۔ پُورے اختیار نال ایہہ گلّاں آکھ تے نصِیحت دے تے جِھڑک کوئی تینُوں ماڑا نا سمجھے۔ اوہناں نُوں یاد دوا پئی حاکماں تے اختیار والیاں دے تابعیاں رہن اوہناں دا حُکم مَنّن تے سارے نیک کمّاں لئی تیار رہن۔ کِسے نُوں بُرا بھلا نا آکھن۔ جھگڑالو نا ہون پر نرم طبیعت ہون تے سارے بندیاں نال حلِیمی دا سلُوک کرن۔ کیوں جو اسی وی پہلاں نادان۔ نافرمان۔ دھوکھا کھان والے تے بُریاں خواہشاں تے خُوشیاں دے غلام ساں۔ تے دُکھ۔ تے ساڑا کر دے ساں۔ نفرت دے لائق ساں تے آپو وِچ وَیر رکھدے ساں۔ پر جد ساڈے نجات دین والے خُدا دی مِہربانی تے بندیاں نال اوہدی مُحبّت دِس پئی۔ تے اوس سانُوں چھڈایا۔ پر راستبازی دے کمّاں دے سببّوں نئیں جیہڑے اساں کِیتے پر اپنی رحمت نال نَوِیں پَیدایش تے نہاؤن تے پاک رُوح دے سانُوں نَوِیاں بناؤن دے وسیلے نال۔ جِہنُوں اوس ساڈے نجات دین والے یِسُوع مسِیح دی راہِیں ساڈے اُتّے چوکھا ڈوہلیا۔ تاں جو اسی اوہدے فضل نال راستباز ٹھہر کے سدا دی زِندگی دی آس وِچ وارث بنیئے۔ ایہہ گلّ سَچ اے۔ تے مَیں چاہناں آں پئی تُوں ایہہ گلّاں بڑا پَکّ کر کے دسیں۔ تاں جو جِنہاں خُدا نُوں مَنّیا اے۔ اوہ چنگے کمّاں وِچ لگّے رہن دا خیال رکھن۔ ایہہ گلّاں بندیاں لئی چَنگیاں تے فائدے والِیاں نیں۔ پر بیواقوفی دِیاں حُجتّاں تے شجریاں تے جھگڑیاں تے شریعت دِیاں لڑائِیاں توں پرہیز کر۔ ایس لئی پئی ایہہ بے فائدہ تے تھوتھیاں نیں۔ اِک دو واری نصِیحت کر کے بِدعتی بندے توں وکھرا ہو جا۔ ایہہ جان کے پئی اجیہا بندہ بد راہ ہوگیا اے تے اپنے آپ نُوں مُجرم ٹھہرا کے گُناہ کر دا رہندا اے۔ جد مَیں تیرے کول اَرتِماس یا تُخِکس نُوں گھلاں۔ تُوں میرے کول نِیکُپُلس آؤن دی کوشش کریں۔ کیوں جو اوتھے ای میری سِیال کٹّن دی دلیل اے۔ زیناس شریعت دے عالِم تے اُپلّوس نُوں کوشش کر کے ٹور دے۔ ایس طرح پئی اوہناں نُوں کِسے شے دی لوڑ نا رہے۔ تے ساڈے لوک ضرُورتاں پُوریاں کرن لئی چَنگیاں کمّاں وِچ لگِیاں رہنا سِکھّن۔ تاں جو اوہ اپّھل نا ہون۔ میرے سارے جوٹی دار تینُوں سلام آکھدے نیں تے جیہڑے اِیمان دی راہِیں ساڈے نال مُحبّت کر دے نیں اوہناں نُوں سلام آکھ۔ تُہاڈے ساریاں اُتّے فضل ہوندا رہے۔ پَولُس ولّوں جیہڑا مسِیح یِسُوع دا قیدی اے۔ تے بھرا تِیمُتِھیُس ولّوں ساڈے پیارے تے جوٹی دار فلِیمون۔ تے بھین افیہ تے ساڈے جوٹی دار سپاہی ارخِپُّس تے تیرے گھر دی کلِیسیا دے ناں۔ فضل تے تسلّی ساڈے باپ خُدا تے خُداوند یِسُوع مسِیح ولّوں تُہانوں مِلدی رہے۔ مَیں تیرے پیار دا تے اوس اِیمان دا حال سُن کے جیہڑا خُداوند یِسُوع تے ساریاں پاک لوکاں نال اے۔ ہرویلے خُدا دا شُکر کرنا آں تے اپنیاں دُعاواں وِچ تینُوں یاد کرنا آں۔ تاں جو تیرے اِیمان دی سنگت تُہاڈی ہر نیکی دی پچھان وِچ مسِیح دے واسطے کمّ دیوے۔ کیوں جو بھرا! مَینُوں تیرے پیار نال بڑی خُوشی تے تسلّی ہوئی۔ ایس کر کے پئی تیری راہِیں پاک لوکاں دے دِلاں نُوں ٹھنڈ پئی اے۔ ہُن بھانویں مسِیح وِچ میرا بڑا حَوصلہ اے۔ پئی تینُوں ٹھیک گلّ دا حُکم دیاں۔ تے وی مَینُوں ایہہ بُہتا چَنگا لگدا اے۔ پئی مَیں بُڈّھا پَولُس سگوں ایس ویلے مسِیح یِسُوع دا قیدی ہو کے پیار نال مِنّتاں کراں۔ سو اپنے پُتر اُنیسِمُس دے لئی جیہڑا قید وِچ مَیتھوں جمّیا۔ تیری مِنّت کرنا آں۔ پہلاں اوہ تیرے کِسے کمّ دا نئیں سی۔ پر ہُن تیرے تے میرے دوہاں دے کمّ دا اے۔ اوہنوں اپنے کلیجے دا ٹوٹا جان کے مَیں تیرے کول مُڑ کے گھلّنا آں۔ اوہنوں مَیں اپنے کول ای رکھنا چاہندا ساں۔ تاں جو تیرے ولّوں ایس قید وِچ جیہڑی خُوشخبری دے سبّب اے میری سیوا کرے۔ پر تیری مرضی باہجوں کُجھ کرنا نئیں ساں چاہندا تاں جو تیرا چَنگا کمّ لاچاری نال نئیں سگوں خُوشی ناں ہوئے۔ شاید تیرے توں اوہ تھوڑے دِناں لئی ایس واسطے اَڈ ہویا سی پئی سدا تیرے کول رہے۔ پر اگّے نُوں غلام وانگر نئیں سگوں غلام نالوں چَنگا ہو کے اجیہے بھرا وانگر جیہڑا جِسم ولّوں وی تے خُداوند ولّوں وی میرا بُہتا پیارا تے تیرا اودُوں وَدّھ پیارا ہوئے۔ سو جے تُوں مَینُوں سنگی جاننا ایں تے اوہنوں اجیہا قبول کر جِہیا مَینُوں۔ جے اوس تیرا کُجھ نُقصان کِیتا اے یا اوہدے ولّ تیرا کُجھ رہندا اے اوہ میرے ناں لِکھ لے۔ مَیں پَولُس اپنی ہتّھِیں لِکھنا آں پئی مَیں آپی دے چھڈاں گا۔ تے ایس گلّ دے آکھن دی لوڑ نئیں پئی میرا قرض جیہڑا تیرے ولّ اے اوہ تُوں آپی ایں۔ بھرا! مَیں چاہناں آں۔ پئی مَینُوں تیرے ولّوں خُداوند وِچ تسلّی ہوئے تُوں مسِیح وِچ میرے دِل نُوں ٹھنڈ پا۔ ایس لئی مَیں لِکھنا آں پئی مَینُوں یقِین اے پئی تُوں میرے آکھے لگیں گا تے مَینُوں معلُوم اے پئی جو کُجھ مَیں آکھنا آں تُوں اودُوں وی ودِھیک کریں گا۔ نالے میرے لئی رہن دا تھاں بنائِیں۔ کیوں جو مَینُوں آس اے پئی تُہاڈیاں دُعاواں دی راہِیں مَیں تُہانوں بخشیا جاواں گا۔ اِپَفراس جیہڑا مسِیح یِسُوع وِچ میرے نال قید اے۔ تے مرقس تے ارِسترخُس تے دِیماس تے لُوقا جیہڑے میرے نال کمّ کرن والے نیں۔ تینُوں سلام آکھدے نیں۔ ساڈے خُداوند یِسُوع مسِیح دا فضل تُہاڈی رُوح اُتّے ہوندا رہے۔ آمِین۔ اگّے خُدا نبیاں دی راہِیں پئیو دادیاں نال کئیاں اٹکلاں تے کئیاں ونڈاں نال بول کے۔ ایہناں اخِیری دِناں وِچ ساڈے نال پُتر دی راہِیں بولیا۔ جِہنُوں اوس سارِیاں شیواں دا وارث بنایا۔ تے اوہدی راہِیں اوہنے جہان وی بنائے۔ اوہ اوہدے جلال دا لشکارا تے اوہدی ذات دا ٹھپّہ ہو کے سارِیاں شیواں نُوں اپنی قُدرت دے کلام نال سمبھالدا اے۔ اوہ ساڈے گُناہاں نُوں دھو کے بلندی اُتّے جناب باری دے سَجّے پاسے جا بَیٹھا۔ تے اوہ فرِشتیاں نالوں اینا بُہتا بزُرگ اے جِنّاں اوس میراث وِچ اوہناں نالوں چَنگا ناں پایا۔ کیوں جو فرِشتیاں وِچوں کدوں کِسے نُوں اوس آکھیا پئی تُوں میرا پُتر ایں۔ اَج تُوں مَیتھوں جمّیا ایں۔ تے فیر ایہہ وی پئی مَیں اوہدا باپ ہوواں گا تے اوہ میرا پُتر ہوئے گا۔ تے جد پلیٹھے نُوں دُنیا وِچ فیر لے آؤندا اے تے آکھدا اے۔ پئی خُدا دے سارے فرِشتے اوہنوں سجدہ کرن۔ تے فرِشتیاں دی بابت ایہہ آکھدا اے پئی اوہ اپنے فرِشتیاں نُوں وَاوَاں تے اپنے ٹہلِیاں نُوں اَگ دے بھانبڑ بناندا اے۔ پر پُتر دی بابت آکھدا اے پئی اے خُدا تیرا تخت سدا تِیکر رہے گا۔ تے تیرے راج دا ڈنڈا سچیائی دا ڈنڈا اے۔ تُوں راستی نال پیار کِیتا تے بدکاری نال وَیر رکھیا۔ ایسے سبّب خُدا یعنی تیرے خُدا خُوشی دے تیل نال تیرے شریکاں نالوں تینُوں بُہتا مسَح کِیتا۔ تے ایہہ پئی اَے خُداوند تُوں مُڈھ توں زمین دی نِیہہ رکھی تے اسمان تیرے ہتّھ دی کاریگری نیں۔ اوہ نیست ہو جان گے پر تُوں باقی رہیں گا۔ تے اوہ سارے کپڑے وانگر پرانے ہو جان گے۔ تے چادر وانگر تُوں اوہناں نُوں وھلیٹیں گا تے اوہ کپڑے وانگر بدل جان گے۔ پر تُوں اوہ ای رہیں گا۔ تے تیرے ورھیاں دا انت نا ہوئے گا۔ فیر اوس فرِشتیاں وِچوں کِنوں کَدے آکھیا پئی تُوں میرے سَجّے ہتّھ بَہہ جا جد تِیکر مَیں تیرے وَیرِیاں نُوں تیرے پیراں دی چَوکی نا بناواں؟ اوہ سارے سیوا کرن والِیاں رُوحاں نئیں؟ جیہڑیاں نجات دی وِرثہ پان والیاں دی سیوا لئی گھلّیاں جاندِیاں نیں۔ ایس لئی چاہیدا اے۔ پئی اوہناں گلّاں اُتّے جیہڑیاں اساں سُنیاں نیں ہور وی دِل لاکے دھیان کریئے۔ متے اوہناں توں رُڑھ کے دُور نا لگے جائیے۔ کیوں جو جد اوہ کلام جیہڑا فرِشتیاں دی راہِیں کِیتا گیا سی قیم رہیا تے ہر قصور تے نافرمانی دا ٹھیک ٹھیک بدلہ مِلیا۔ تے اینی وڈّی نجات توں بے پرواہ رہ کے اسی کِیویں بچ سکنے آں۔ جِہدا بیان پہلاں خُداوند دی راہِیں ہویا۔ تے سُنن والیاں توں سانُوں پَکّی طرح ثبُوت اَپڑیا۔ تے نال ای خُدا وی اپنی مرضی دے سببّوں نشاناں تے کراماتاں تے طرح طرح دے مُعجزیاں تے پاک رُوح دِیاں نِعمتاں دی راہِیں اوہدی گواہی دیندا رہیا۔ اوس آؤن والی دُنیا نُوں جِہدا اسی ذِکر کرنے آں۔ اوس فرِشتیاں دے ہیٹھ نئیں کِیتا۔ سگوں اِکّی بندے اِک تھاں ایہہ لِکھیا اے۔ پئی اِنسان کِیہ شے اے۔ پئی تُوں اوہدا خیال کریں یا بندے دا پُتر کِیہ اے۔ پئی تُوں اوہدا دھیان کریں۔ تُوں اوہنوں فرِشتیاں نالوں کُجھ ای گھٹ کِیتا۔ تُوں اوہدے اُتّے جلال تے عِزّت دا تاج رکھیا۔ تے اپنے ہتّھ دے کمّاں اُتّے اوہنوں مُختِیار کِیتا۔ تُوں سارِیاں شیواں اوہدے پیراں ہیٹھ کر دِتّیاں نیں۔ سو جد سبھ کُجھ اوہدے ہیٹھ کر دِتّا تے کوئی شے نا چھڈی جیہڑی اوہدے ہیٹھ نا کِیتی۔ پر اسی اجے تِیکر سارِیاں شیواں اوہدے ہیٹھ نئیں ویکھدے۔ ہاں اوہنوں ویکھنے آں جیہڑا فرِشتیاں نالوں کُجھ ای گھٹ کِیتا گیا اے یعنی یِسُوع نُوں جِس مَوت دا دُکھ سہہ کے جلال تے عِزّت دا تاج پایا۔ تاں جو خُدا دے فضل نال اوہ ہر اِک بندے دی خاطر مَوت دا سواد لَئے۔ کیوں جو جِہدے لئی سارِیاں شیواں نیں تے جِہدی راہِیں سارِیاں شیواں نیں اوہنوں ایہہ پھبدا سی پئی جد بُہت ساریاں پُتراں نُوں جلال وِچ لے آوے تے اوہناں دی نجات دے بانی نُوں دُکھاں دے سبّب کامِل بنائے۔ کیوں جو پاک کرن والے تے پاک ہون والے سارے اِک ای اصل توں نیں۔ ایس لئی اوہ اوہناں نُوں بھرا آکھن توں نئیں شرماؤندا۔ سو اوہ آکھدا اے پئی تیرا ناں مَیں اپنے بھراواں اگّے بیان کراں گا۔ تے کلِیسیا وِچ تیری وڈیائی دے گِیت گاواں۔ تے فیر ایہہ پئی مَیں اوہدے اُتّے بھروسا رکھاں گا فیر ایہہ وی پئی ویکھ مَیں اوہناں بچّیاں سَنے جیہڑے خُدا مَینُوں دِتّے نیں۔ سو جِس حال بچّے خُون تے گوشت وِچ سنگی نیں اوسے طرح اوہ اوہناں وانگر آپ وی اوہناں وِچ شریک ہویا۔ تاں جو اوہ مَوت دی راہِیں اوہنوں جِہنُوں مَوت اُتّے طاقت مِلی یعنی ابلیس نُوں بے کار کر دے۔ تے اوہناں نُوں چھڈا لَئے جیہڑے ساری عُمر مَوت دے ڈر نال غلامی وِچ پَھسے رہے۔ اوس فرِشتیاں دا نئیں سگوں ابرہام دی نسل دا رُوپ دھاریا۔ سو اوہنوں سارِیاں گلّاں وِچ اپنے بھراواں وانگر ضرُور بننا پیا۔ تاں جو ایہناں گلّاں وِچ جیہڑیاں خُدا نال تعلق رکھدیاں نیں۔ اوہ رَحم دِل تے دیانتدار سردار کاہِن بنے تے اُمّت دے گُناہاں دا کفّارہ دے۔ کیوں جو جد اوس آپ ای ازمایشاں دا دُکھ سہیا۔ اوہ اوہناں دی وی مدد کر سکدا اے۔ جِنہاں دی ازمایش ہوندی اے۔ سو پاک بھراؤ! تُسی جیہڑے اسمانی بُلاوے وِچ شریک ہو۔ اوس رسُول تے سردار کاہِن یِسُوع اُتّے دھیان کرو۔ جِہنُوں اسی مَنّنے آں۔ اوہ اپنے مُقرّر کرن والے نال دیانتدار سی۔ جیویں مُوسیٰ وی اوہدے سارے گھر وِچ سی۔ کیوں جو مُوسیٰ نالوں اوہدی عِزّت اینی وَدّھ سمجھی گئی جِنّی گھر بنان والے دی گھر نالوں عِزّت وَدّھ ہوندی اے۔ تے ہر اِک گھر دا کوئی نا کوئی بنان والا ہوندا اے۔ پر جِس سارِیاں شیواں بنائِیاں اوہ خُدا اے۔ مُوسیٰ تے اوہدے گھر وِچ نوکر وانگر دیانتدار رہیا۔ تاں جو اگّے نُوں بیان ہون والیاں گلّاں دی گواہی دے۔ پر مسِیح پُتر وانگر اوہدے سارے گھر دا مُختِیار اے۔ تے اوہدا گھر اسی آں۔ پر ایہہ شرط اے۔ پئی اپنی دلیری تے آس دا فخر اوڑک تِیکر قیم رکھیے۔ جیویں پاک رُوح آکھدا اے۔ جے اَج تُسی اوہدی اواز سُنو۔ تے تُسی اپنے دِلاں نُوں ڈاھڈیاں نا کرو۔ جیویں غُصّہ دوان دے ویلے ازمایش دے دِن بیابان وِچ ہویا سی۔ جِتّھے تُہاڈیاں پئیو دادیاں مَینُوں جاچیا تے پرکھیا۔ تے چالی ورھے میرے کمّ ویکھے۔ ایسے لئی مَیں اوس پِیڑھی نال ناراض ہویا تے آکھیا پئی اوہناں دے دِل سدا بدراہ ہوندے رہندے نیں تے اوہناں میرِیاں راہاں نُوں نئیں پِچھانیا۔ تے مَیں وی اپنے غُصّے وِچ سَونہہ کھادِی۔ پئی ایہہ میرے آرام وِچ داخل نا ہو سکن گے۔ بھراؤ! خبردار تُہاڈے وِچوں کِسے دا اجیہا بَھیڑا تے بے اِیمان دِل نا ہوئے۔ جیہڑا جِیوندے خُدا توں پھر جاوے۔ سگوں تُسی روز دِہاڑی جد تِیکر اَج دا دِن ای اکھواؤندا اے۔ آپو وِچ اِک دُوجے نُوں نصِیحت کریا کرو۔ تاں جو تُہاڈے وِچوں کوئی گُناہ دے فریب نال سخت دِل نا ہو جائے۔ کیوں جو اسی مسِیح وِچ شریک ہوئے آں جے اسی اپنے شُروع دے بھروسے وِچ اوڑک تِیکر مضبُوطی نال قیم رہئے۔ جیویں آکھیا جاندا اے۔ پئی جے اَج اوہدی اواز سُنو تے غُصّہ دوان دے ویلے وانگر اپنے دِلاں نُوں ڈاھڈیاں نا کرو۔ کِنّاں لوکاں اواز سُن کے غُصّہ دوایا؟ اوہناں ساریاں نئیں دوایا؟ جیہڑے مُوسیٰ دی راہِیں مِصروں نِکلے سن؟ تے اوہ کِنّاں نال چالی ورھے ناراض رہیا؟ اوہناں نال نئیں جِنہاں گُناہ کِیتا؟ تے اوہناں دِیاں مَیتّاں بیابان وِچ پیّاں رہیاں؟ تے کِنّاں دی بابت اوس سَونہہ کھادِی پئی اوہ میرے آرام وِچ نا وڑن گے۔ بِناں اوہناں دے جِنہاں نافرمانی کِیتی؟ تے اسی ویکھنے آں۔ پئی اوہ بے اِیمانی دے سبّب داخل نا ہوسکے۔ فیر جد اوہدے آرام وِچ وڑن دا وعدہ باقی اے۔ تے سانُوں ڈرنا چاہیدا اے۔ پئی تُہاڈے وِچوں کوئی پِچّھے رہیا ہویا معلُوم نا ہوئے۔ کیوں جو سانُوں وی اوہناں وانگر خُوشخبری سُنائی گئی۔ پر سُنے ہوئے کلام اوہناں نُوں ایس لئی کُجھ فائدہ نا دِتّا۔ پئی سُنن والیاں دے دِلاں وِچ اِیمان نال نا رچیا۔ کیوں جو اسی جیہڑے اِیمان لیائے اوس آرام وِچ داخل ہُنے آں۔ جیویں اوس آکھیا۔ پئی مَیں اپنے غُصّے وِچ سَونہہ کھادِی۔ پئی ایہہ میرے آرام وِچ داخل نا ہون گے۔ بھانویں دُنیا بنن توں پہلاں اوہدے کمّ مُک گئے سن۔ اوس ستویں دِن دی بابت کِسے تھاں ایہہ آکھیا۔ پئی خُدا اپنے سارے کمّاں توں وِھلِیاں ہو کے ستویں دِن آرام کِیتا۔ تے ایسے تھاں وِچ پئی اوہ میرے آرام وِچ داخل نا ہون گے۔ جد ایہہ گلّ باقی اے۔ پئی بعضے اوس آرام وِچ داخل ہون۔ تے جِنہاں نُوں پہلاں خُوشخبری سُنائی گئی سی۔ اوہ نافرمانی دے سبّب داخل نا ہوسکے۔ فیر اِک خاص دِن ٹھیراکے اینی مُدّت پِچّھوں داؤد دی کتاب وِچ اوہنوں اَج دا دِن آکھدا اے۔ جیویں پہلاں آکھیا گیا۔ پئی جے اَج تُسی اوہدی اواز سُنو تے اپنے دِلاں نُوں ڈاھڈیاں نا کرو۔ تے جے یشُوع اوہناں نُوں آرام وِچ لیاؤندا۔ تے اوہ اوس ویلے اوہدے پِچّھوں اِک دُوجے دِن دا ذِکر نا کر دا۔ ایس لئی خُدا دے لوکاں واسطے اِک خاص سبت دا آرام باتی اے۔ کیوں جو جیہڑا اوہدے آرام وِچ داخل ہویا اے اوس وی اپنے کمّاں نُوں پُوریاں کر کے آرام کِیتا۔ جیویں خُدا وی آرام کِیتا۔ سو بھراؤ اسی اوس آرام وِچ داخل ہون دا جتن کریئے۔ اجیہا نا ہوئے پئی اوہناں وانگر نافرمانی کر کے کوئی بندہ ڈِگّ پَوے۔ کیوں جو خُدا دا کلام زِندہ تے اثر کرن والا تے ہر اِک دو مُونہی تلوار نالوں تیز اے۔ تے جان تے رُوح تے جوڑ جوڑ تے مِنّجھ مِنّجھ وَکھو وکھرے کر کے دُسّر لنگھ جاندا اے۔ تے دِل دیاں خیالاں تے اِرادیاں نُوں جاچدا اے۔ جِہدے نال سانُوں کمّ اے۔ اوہدے کولوں دُنیا دی کوئی شے چُھپی ہوئی نئیں۔ سگوں اوہدیاں اکھّاں اگّے سارِیاں شیواں ننگِیاں تے کُھلِیاں ہویاں نیں۔ سو جد ساڈا اجیہا اِک وَڈا سردار کاہِن اے جیہڑا اسماناں وِچوں لنگھ گیا۔ یعنی خُدا دا پُتر یِسُوع۔ تے اسی اپنے اِقرار اُتّے پکّے پَیر رہئے۔ کیوں جو ساڈا اجیہا سردار کاہِن نئیں جیہڑا ساڈیاں کمزوریاں وِچ ساڈا دردی نا ہوسکے سگوں سارِیاں گلّاں وِچ ساڈے وانگر ازمایا گیا۔ تَد وی بے گُناہ رہیا۔ سو اسی فضل دے تخت کول دلیری نال چلّئے۔ تاں جو ساڈے اُتّے رَحم ہوئے تے اوہ فضل پایئے جیہڑا لوڑ دے ویلے ساڈی مدد کرے۔ کیوں جو ہر اِک سردار کاہِن بندیاں وِچوں چُنیا بندیاں دی خاطر اوہناں گلّاں دے لئی مُقرّر کِیتا جاندا اے۔ جیہڑیاں خُدا دے نال تعلق رکھدیاں نیں۔ پئی نذراں تے گُناہ دِیاں قُربانِیاں چاہڑے۔ تے اوہ ناداناں تے بدراہاں نال نرمی دا سلُوک کرن جوگا ہوندا اے۔ ایس لئی پئی اوہ آپ وی اپنی کمزوری تھلے رہندا اے۔ ایس لئی اوہدا فرض اے پئی جیویں اوہ اُمّت دیاں گُناہاں دے سببّوں قُربانی دیوے اوسے طرح اوہ اپنے ولّوں وی دیوے۔ تے کوئی بندہ آپے ایہہ عِزّت نئیں لَیندا جد توڑی ہارُون وانگر خُدا ولّوں نا سدّیا جائے۔ ایسے طرح مسِیح وی سردار کاہِن ہون دی بزُرگی آپے نا لئی سگوں اوسے دِتّی جِس اوہنوں آکھیا۔ پئی تُوں میرا پُتر ایں اَج تُوں مَیتھوں جمّیا۔ جِیکُوں اِک ہوری تھاں اوہ آکھدا اے۔ پئی تُوں مَلکِ صدق دے طریقے اُتّے اوڑک تِیکر کاہِن ایں۔ جدوں اپنی جِسم دے چولے وِچ سی تَد اوس ڈاہڈے وَین کر کے تے اتھرُو وگا کے اوہدے اگّے دُعا تے مِنّتاں کِیتیاں جیہڑا اوہنوں مَوتوں بچا سکدا سی تے اوہدی خُدا ترسی دے سبّب اوہدی سُنی گئی۔ تے بھانویں اوہ پُتر سی تے وی اوس دُکھ سہہ سہہ کے فرمانبرداری سِکھی۔ تے کامِل بن کے اوہناں لئی جیہڑے اوہدے آکھے لگدے نیں سدا دی نجات دا سبّب ہویا۔ تے اوسے نُوں خُدا ولّوں مَلکِ صدق دے طریقے اُتّے سردار کاہِن دا خطاب مِلیا۔ ایہدی بابت اساں بُہت سارِیاں گلّاں آکھنیاں نیں جِنہاں دا سمجھانا مُشکل اے۔ ایس لئی پئی تُسی سُنن ولّوں ڈِھلّے ہوگئے اوہ۔ پر جدوں ویلا سی پئی تُسی اُستاد ہوندے اجے ایس گلّ دی لوڑ اے۔ پئی کوئی خُدا دے کلام دِیاں مُڈھ والِیاں گلّاں تُہانوں فیر سِکھائے۔ تے اِنج ہوگئے ہو پئی ڈاہڈی خُوراک دی تھانویں تُہانوں دُدّھ دی لوڑ اے۔ کیوں جو دُدّھ پِیندے ہوئے نُوں راستبازی دے کلام دا تجربہ نئیں ہوندا ایس لئی اوہ نیانا اے۔ تے ڈاہڈی خُوراک پُوری عُمر دیاں لئی ہوندی اے۔ جِنہاں دی عقل کمّ کر دیاں کر دیاں نیکی بدی نُوں چنگی طرح نال پچھان سکدی اے۔ سو مسِیح دی تعلِیم دِیاں مُڈھ والِیاں گلّاں چھڈ کے تے کمال ولّ وَدِھیئے۔ تے مُردہ کمّاں توں تَوبہ کرن تے خُداوند اُتّے اِیمان لے آؤن۔ تے بَپتسِمیاں تے ہتّھ رکھن تے مُردیاں دے جی اُٹھن تے سدا دی عدالت دی تعلِیم دی نِینّھ دُوجی واری نا دھریئے۔ تے خُدا چاہے اسی ایہو ای کراں گے۔ ایس لئی پئی جِنہاں نُوں اِک واری لو لگ گئی تے اوہناں اسمانی بخشِش دا سواد لے لیا۔ تے پاک رُوح دے سنگی ہوئے۔ تے خُدا دے چنگے کلام تے اگلے جہان دِیاں قُدرتاں دا سواد لیا۔ جے اوہ بَھوں جان تے اوہناں نُوں تَوبہ دے لئی فیر نواں بنانا اَنہونی گلّ اے۔ ایس لئی پئی اوہ خُدا دے پُتر نُوں اپنے ولّوں دُوجی وار صلِیب دیندے نیں تے اوہدی کُھلی بے عِزّتی کر دے نیں۔ کیوں جو جیہڑی زمین اوس مینہ دا پانی پی لَیندی اے۔ جیہڑا اوہدے اُتّے بڑی واری وَسدا اے تے اوہناں دے ورتن لئی سبزیاں اُگاندی اے جِنہاں ولّوں واہی جاندی اے۔ اوہ خُدا ولّوں برکت پاندی اے۔ تے جے مَلہے تے پوہلیاں اُگاندی اے۔ تے ردّی جاندی اے۔ تے لعنت دے نیڑے آگئی اے۔ تے جِہدا انت سَڑنا اے۔ پر پیاریو! بھانویں اسی ایہہ گلّاں آکھنے آں پر تَد وی اسی تُہاڈے کولوں اوہناں توں چَنگیاں تے نجات والیاں گلّاں دا یقِین کرنے آں۔ ایس لئی خُدا بے نیاں نئیں پئی تُہاڈے کمّ تے اوس پیار نُوں بُھل جائے۔ جیہڑا تُساں اوہدے ناں لئی ایس طرح ظاہر کِیتا پئی پاک لوکاں دی سیوا کِیتی تے اجے پئے کر دے ہو۔ اسی ایس گلّ دی چاہ کرنے آں۔ پئی تُہاڈے وِچوں ہر کوئی پُوری آس دے لئی اوڑک تِیکر ہر طرح کوشش ظاہر کر دا رہے۔ تاں جو تُسی ڈِھلّے نا ہو جاؤ۔ سگوں اوہناں وانگر ہو۔ جیہڑے اِیمان تے صبر دی راہِیں وعدے دے وارث بن دے نیں۔ کیوں جو جد خُدا ابرہام نال وعدہ کِیتا۔ تے سَونہہ کھان لئی کِسے نُوں اپنے نالوں وَڈا نا ویکھیا۔ تے اپنی سَونہہ کھا کے۔ آکھیا ضرُور مَیں تینُوں برکتاں اُتّے برکتاں دیاں گا تے تیری نسل نُوں بُہت وَدھاواں گا۔ تے اوس ایسے طرح صبر کر کے اوس وعدہ کِیتی ہوئی شے نُوں لے گیا۔ ہُن بندے تے اپنے نالوں وڈّے دی سَونہہ کھاندے نیں تے اوہناں دے ہر اِک جھگڑے دا اخِیری ثبُوت سَونہہ ہوندی اے۔ جِس مارِیاں جد خُدا چاہندا سی پئی وعدے دے وارثاں اُتّے ہور وی صفائی نال ظاہر کرے۔ پئی میرا اِرادہ بدل نئیں سکدا اوس وِچکار سَونہہ رکھی۔ تاں جو دو نا بدلن والِیاں شیواں دے سبّب جِنہاں دی بابت خُدا دا جُھوٹھ بولنا مُمکِن نئیں۔ ساڈی چنگی طرح دِل دی تسلّی ہو جائے۔ جیہڑے پناہ لین نُوں ایس لئی دَوڑنے آں۔ پئی اوس آس کِیتی ہوئی شے نُوں جیہڑی اگّے رکھی ہوئی اے۔ ہتّھ وِچ لے لَئے۔ اوس شے دی آس ساڈی جان دا اجیہا لنگر اے۔ جیہڑا ثابت تے قیم رہندا اے۔ تے پردے دے اندر تِیکر اَپڑ جاندا اے۔ جِتّھے یِسُوع مَلکِ صدق دے طریقے اُتّے سدا لئی سردار کاہِن بن کے ساڈی خاطر آگُو ہو کے اندر وڑیا اے۔ ہُن ایہہ مَلکِ صدق سالِم دا بادشاہ خُدا تعالیٰ دا کاہِن سدا کاہِن رہندا اے جد ابرہام بادشاہاں نُوں مار کے مُڑیا آؤندا سی۔ تے اوہ اوہنوں اگّوں مِلیا تے اوہنوں برکت دِتّی۔ اوہنوں ای ابرہام سارِیاں شیواں دا دسوواں حِصّہ دِتّا۔ تے ایہہ پہلاں تے اپنے ناں دے معنے دے سببّوں نیکی دا بادشاہ اے تے فیر سالِم پئی صُلح دا بادشاہ۔ اوہدا نا پئیو تے نا ماں تے نا شجرہ اے۔ نا مُڈھ مول تے نا انت۔ سگوں خُدا دے پُتر وانگر بنیا۔ سوچ لوؤ پئی ایہہ کیڈا بزُرگ سی جِہنُوں قوم دے بزُرگ ابرہام لُٹ وِچوں چنگے توں چنگے مال دا دسواں حِصّہ دِتّا۔ ہُن لاوی دی نسل وِچوں جیہڑے کاہِن دا عُہدہ پاندے نے اوہناں نُوں حُکم اے۔ پئی اُمّت لئی اپنے بھراواں کولوں بھانویں اوہ ابرہام دی نسل وِچوں ہون شریعت دے سببّوں دسوواں حِصّہ لین۔ پر جِہدا شجرہ اوہناں توں وکھرا اے اوس ابرہام کولوں دسوواں حِصّہ لیا۔ تے جِہدے نال وعدے کِیتے گئے سن اوہنوں برکت دِتّی ایہدے وِچ شک نئیں پئی نِکّا وڈّے کولوں برکت لَیندا اے تے ایتھے تے مرن والے بندے دسواں حِصّہ لَیندے نیں۔ پر اوتھے اوہ ای لَیندا اے جِہدی بابت ایہہ گواہی دِتّی جاندی اے۔ پئی جِیوندا اے۔ اسی آکھ سکنے آں۔ پئی لاوی وی جیہڑا دسوواں حِصّہ لَیندا اے اوس ابرہام دی ہتّھِیں دسوواں حِصّہ دِتّا۔ ایس لئی پئی جِس ویلے مَلکِ صدق اوہنوں اگّوں والی مِلیا اوہ اپنے پئیو دی پِٹھ وِچ سی۔ ہُن جے لاویاں دی کہانت توں پُوری پَیندی (کیوں جو اوہناں دی راہِیں اُمّت نُوں شریعت جو مِلی سی) تے فیر کِیہ لوڑ سی پئی دُوجا کاہِن مَلکِ صدق دے طریقے اُتّے اُٹھے۔ تے ہارُون دے طریقے دا نا گِنیا جائے؟ تے جد کاہِناں دا طریقہ بدل گیا۔ تے شریعت دا وی بدلناں ضرُور اے۔ ایس لئی پئی جِہدی بابت ایہہ گلّاں آکھیاں گِئیاں سن اوہ دُوجے فِرقے وِچوں اے۔ جِہدے وِچوں کِسے قُربان گاہ دی خِدمت نئیں کِیتی۔ کیوں جو صاف پتا اے۔ پئی ساڈا خُداوند یہُوداہ توں جمّیا تے ایس فِرقے دی بابت مُوسیٰ کاہِناں دا ذِکر کوئی نئیں کِیتا۔ ایس طرح ایہہ دعویٰ ہور وی صاف ظاہر ہوگیا جے مَلکِ صدق وانگر اِک ہور اِنج سردار کاہِن اُٹھن والا اے۔ جیہڑا جِسمانی حُکماں دی شریعت پِچّھے نئیں سگوں سدا دی زِندگی دی قُوّت دے سببّوں مُقرّر ہوئے گا۔ کیوں جو اوہدی بابت ایہہ گواہی دِتّی گئی اے۔ پئی تُوں مَلکِ صدق دے طریقے اُتّے اوڑک تِیکر کاہِن ایں۔ ایس لئی پئی پہلا حُکم کمزور تے نکمّا ہون دا سبّب ڈھایا گیا۔ (کیوں جو شریعت کِسے شے نُوں کامِل نئیں کِیتا۔) تے اوہدے تھاں اِک چنگی آس پَیدا ہوئی۔ جِہدی راہِیں اسی خُدا دے نیڑے جا سکنے آں۔ جیویں مسِیح سَونہہ توں بغیر قیم نئیں ہویا۔ (کیوں جو اوہ تے بغیر سَونہہ توں کاہِن بنے پر اوہ سَونہہ دے نال اوہدے ولّوں ہویا جِس اوہدی بابت آکھیا خُداوند سَونہہ کھادِی اے تے نئیں مُڑے گا پئی تُوں اوڑک تِیکر کاہِن ایں۔) اونویں یِسُوع اِک بہتر عہد دا ضامن ہویا۔ نالے اوہ کاہِن تے بُہت بنے سن۔ ایس لئی پئی مَوت مارِیاں رہ نئیں سن سکدے۔ پر ایس لئی پئی اوہ ہمیشہ تِیکر جِیوندا رہے گا۔ اوہدے کاہِن ہون وِچ کدی فرق نئیں آوے گا۔ ایس واسطے جیہڑے اوہدے راہِیں خُدا کول آوندے نیں اوہ اوہناں نُوں پُوری نجات دے سکدا اے۔ کیوں جو اوہ اوہناں دی سفارِش لئی ہمیشہ جِیوندا اے۔ کیوں جو سانُوں ایس طرح دا سردار کاہِن پھبدا سی جیہڑا پاک تے صاف دِل تے بے داغ تے گُنہگاراں توں وکھرا تے اسماناں توں اُچّا کِیتا گیا ہوئے۔ تے اوہناں سردار کاہِناں وانگر ایس گلّ دی اوہنوں لوڑ نا ہوئے۔ پئی روز دیہاڑی پہلاں اپنے گُناہاں تے فیر اُمّت دے گُناہاں دے لئی قُربانِیاں چاہڑے کیوں جو ایہہ اوس اِکّو واری کِیتا۔ جد اپنے آپ نُوں قُربان کِیتا۔ کیوں جو شریعت تے کمزور بندیاں نُوں سردار کاہِن بناندی اے۔ پر اوس سَونہہ دا کلام جیہڑی شریعت دے پِچّھوں کھادِی گئی اوس پُتر نُوں جیہڑا ہمیشہ تِیکر کامِل کِیتا گیا سردار کاہِن بناندا اے۔ ہُن جیہڑیاں گلّاں اسی پئے آکھنے آں اوہناں وِچوں وڈّی گلّ ایہہ اے پئی ساڈا اجیہا سردار کاہِن اے۔ جیہڑا اسماناں اُتّے جناب باری دے تخت دے سَجّے پاسے بَیٹھا اے۔ تے اوس پاک مکان تے سَچّے تنبُو دا ٹہلیا اے جِہنُوں خُداوند کھلھاریا اے اِنسان نے نئیں۔ تے ایس کر کے پئی سردار کاہِن نذراں تے قُربانِیاں چاہڑن لئی ہوندا اے۔ ایس لئی ضرُور ہویا۔ پئی اوہدے کول وی کُجھ چاہڑن جوگا ہوئے۔ تے جے اوہ زمین اُتّے ہوندا تے کدی وی کاہِن نا ہوندا۔ ایس لئی شریعت دے سببّوں نذراں چاہڑن والے تے اگّے ای نیں۔ ایہہ اسمان دِیاں شیواں دی نقل تے پرچھانویں دی سیوا کر دے نے جِیکُوں مُوسیٰ وی جد تنبُو بنان نُوں تیار سی تے اوہنوں ایہہ ہدایت ہوئی پئی ویکھ جیہڑا نمونہ پہاڑ اُتّے وکھایا گیا سی اوہدے وانگر سارِیاں شیواں بنائِیاں۔ پر ہُن اوہنوں اودُوں اینی چنگی سیوا لَبّھی۔ جِنّاں اوہ اودُوں چنگے عہد دا وی وچولا اے۔ جیہڑا اودُوں چَنگیاں وعدیاں اُتّے بَدّھا گیا۔ کیوں جو جے پہلا عہد بے نُقص ہوندا تاں دُوجے لئی تھاں نا لَبھّدی۔ سو اوہ اوہناں دے عیب دس کے آکھدا اے۔ پئی خُداوند آکھدا اے۔ ویکھ! اوہ دِن آوندے نیں پئی مَیں اِسرائیل دے ٹبّر تے یہُوداہ دے ٹبّر ٹور نال اِک نواں عہد بَنّھاں گا۔ ایہہ اوس عہد وانگر نا ہوئے گا۔ جیہڑا مَیں اوہناں دے پئیو دادیاں نال اوس دِن بَدّھا سی جد مِصر دے مُلک توں کڈھ لیاؤن لئی اوہناں دا ہتّھ پھڑیا ایس لئی پئی اوہ میرے عہد اُتّے قیم نئیں رہے۔ تے خُداوند آکھدا اے۔ پئی مَیں اوہناں دی کُجھ پرواہ نئیں کِیتی۔ فیر خُداوند آکھدا اے۔ پئی جیہڑا عہد اِسرائیل دے ٹبّر نال اوہناں دِناں پِچّھوں بَنّھاں گا اوہ ایہہ اے پئی مَیں اپنے قانُون اوہناں دِیاں عقلاں وِچ پاں گا تے اوہناں دیاں دِلاں اُتّے لِکھاں گا۔ تے مَیں اوہناں دا خُدا ہوواں گا۔ تے اوہ میری اُمّت ہون گے۔ تے اوہناں ساریاں نُوں اپنے اپنے وطنی تے اپنے اپنے بھرا نُوں ایہہ تعلِیم نا دینی پَوے گی۔ پئی تُوں خُداوند نُوں جان کیوں جو نِکّے توں لے کے وڈّے تِیکر سارے مَینُوں جانن گے۔ ایس لئی پئی مَیں اوہناں دِیاں بدکارِیاں اُتّے رَحم کراں گا۔ تے اوہناں دے گُناہاں نُوں فیر کدی یاد نا کراں گا۔ جد اوہ اوہنوں نواں عہد آکھدا اے۔ تے پہلے نُوں پرانا کِیتا۔ تے جیہڑی شے پرانی تے مُدّت دی ہو جاندی اے سو اوہ مِٹن دے نیڑے اے۔ ہُن پہلے عہد وِچ وی عبادت دے حُکم سن تے پاک مکان جیہڑا دُنیا دا سی۔ پئی اِک تنبُو بنایا گیا سی اگلے ولّ جِہدے وِچ دیوڑی تے میز تے نذر دِیاں روٹِیاں سن تے اوہنوں پاک مکان آکھدے نیں۔ تے دُوجے پردے دے پِچّھے اوہ تنبُو سی جِہنُوں سبھناں نالوں پاک آکھدے نیں۔ جِہدا سونے دا دُھوف دان تے عہد دا صندُوق سبھنیں پاسیں سونے دا مَڑھیا ہویا سی اوہدے وِچ مَن نال بھریا ہویا اِک سونے دا مرتبان تے ہارُون دا پُنگریا ہویا ڈنڈا تے عہد دِیاں تختِیاں سن۔ تے اوہدے اُتّے جلالی کروبی سن جیہڑے کفّارہ دے تھاں اُتّے چھاں کر دے سن۔ ایہناں گلّاں دا وَکھو وکھرا بیان کرن دا ایہہ تھاں نئیں۔ جد ایہہ شیواں ایس طرح بن گِئیاں سن تے پہلے تنبُو وِچ کاہِن ہر ویلے جاندے سن تے بندگی دے کمّ پُورے کر دے نیں۔ پر دُوجے وِچ وَڈا سردار کاہِن ای ورھے پِچّھوں اِکّو وار جاندا اے تے خُون بِناں نئیں جاندا۔ جِہنُوں اپنی تے اُمّت دی بُھل چُک دے لئی نذر چاہڑدا اے۔ ایس توں پاک رُوح دا ایہہ اشارہ اے پئی جد تِیکر پہلا تنبُو کھلوتا ہویا اے۔ پاک مکان دا راہ ظاہر نا ہویا۔ اوہ تنبُو ایس ویلے لئی اِک مِثال اے تے اوہدے سببّوں اجیہاں نذراں تے قُربانِیاں چاہڑیاں جاندِیاں نیں جیہڑیاں بندگی کرن والیاں نُوں دِلوں کامِل نئیں کر سکدِیاں۔ ایس لئی پئی اوہ نِریاں کھان پِین تے نہاؤن دھون دِیاں جِسمانی رسماں نیں جیہڑیاں سُدھارن دے ویلے تِیکر مُقرّر ہویاں۔ پر جد مسِیح آؤن والِیاں چَنگیاں شیواں دا سردار کاہِن ہو کے آیا یعنی ایدوں وڈّے تے کامِل تنبُو دے راہ آیا جیہڑا ہتّھاں دا یعنی ایس دُنیا دا بنایا ہویا نئیں۔ تے بکرِیاں تے وَچّھیاں دا لہو نئیں سگوں اپنا ای لہو لے کے آیا تے پاک مکان وِچ اِکّووار وڑ گیا تے سدا دی وی خلاصی کرائی۔ کیوں جو جد بکرِیاں تے ڈھگّیاں دے لہو تے وَہڑی دی سواہ ناپاکاں اُتّے ترونکن نال جِسمانی پاکیزگی مِلدی اے۔ تے مسِیح دا لہو جِس اپنے آپ نُوں سدا دی رُوح دی راہِیں خُدا دے اگّے بے عیب قُربان کِیتا۔ تُہاڈے دِلاں نُوں مُردہ کمّاں توں کِنّاں کُو چوکھا پاک کرے گا۔ تاں جو تُسی جِیوندے خُدا دی بندگی کرو۔ تے ایسے سبّب اوہ نَوِیں عہد دا وچولا اے۔ تاں جو اوس مَوت دی راہِیں جو پہلے عہد دے قصوراں دی مُعافی لئی ہوئی اے۔ سَدّے ہوئے لوک وعدے دے سببّوں سدا دی وِرثہ پا لین۔ کیوں جو جِتّھے وصیّت اے اوتھے وصیّت کرن والے دی مَوت دا ثبُوت وی چاہیدا اے۔ ایس لئی پئی وصیّت مرن دے پِچّھوں ای کمّ دیندی اے۔ تے جد تِیکر وصیّت کرن والا جِیوندا اے۔ اوہ کِسے کمّ دی نئیں۔ ایس لئی پہلا عہد وی خُون بِناں نئیں بَجھّیا۔ کیوں جو جد مُوسیٰ ساری اُمّت نُوں شریعت دے سارے حُکم سُنا بَیٹھا۔ فیر وَچّھیاں تے بکرِیاں دا لہو لے کے پانی تے لال پشم تے زُوفے دے نال اوس کتاب تے ساری اُمّت اُتّے چھڑک دِتّا۔ تے آکھیا پئی ایہہ اوس عہد دا لہو اے جِہدا حُکم خُدا تُہانوں دِتّا اے۔ ایس طرح اوس تنبُو تے سیوا دِیاں سارِیاں شیواں اُتّے رَت ترونکی۔ تے قریبن سارِیاں شیواں شریعت دے سببّوں لہو نال پاک کِیتیاں جاندِیاں نیں تے لہو وَگیاں بِناں مُعافی نئیں ہوندی۔ ایس لئی ضرُوری سی پئی اسمانی شیواں دِیاں نقلاں ایہناں دی راہِیں پاک کِیتیاں جاندِیاں پر آپ اسمانی شیواں ایہناں نالوں چَنگیاں قُربانِیاں دی راہِیں۔ کیوں جو مسِیح اوس ہتّھاں نال بنائے ہوئے پاک مکان وِچ نئیں وڑیا۔ جیہڑا اصلی مکان دی نقل اے پر اصلی اسمان وِچ وڑیا تاں جو خُدا دے اگّے ساڈے لئی حاضر ہوئے۔ ایہہ نئیں پئی اوہ اپنے آپ نُوں بڑی واری قُربان کرے۔ جیویں سردار کاہِن پاک مکان وِچ ورھے دے ورھے دُوجے دا لہو لے کے جاندا اے۔ نئیں تے دُنیا دے شُروع توں لے کے اوہنوں بڑی واری دُکھ جھلنا پَیندا۔ پر ہُن اخِیری زمانے وِچ اِکّو وار ظاہر ہویا۔ تاں جو اپنے آپ نُوں قُربان کرن نال گُناہ نُوں دفع کر دے۔ تے جیویں بندیاں نُوں اِک وار مرنا ہوندا اے تے مگروں عدالت ہوندی اے۔ ایسے طرح مسِیح وی جیہڑا اِک وار بتھیریاں لوکاں دے گُناہ چُکن لئی قُربان ہویا دُوجی وار گُناہ دے بِناں نجات لئی اوہناں نُوں وکھالی دے گا۔ جیہڑے اوہنوں اوڈِیک دے نیں۔ کیوں جو شریعت جیہڑی آؤن والیاں چَنگیاں شیواں دا پرچھاواں اے تے اوہناں شیواں دی اصلی صُورت نئیں کول آؤن والیاں نُوں کدی وی کامِل نئیں کر سکدی جیہڑے ہر ورھے کُھنجایاں بِناں اِکّو طرح دِیاں قُربانِیاں چاہڑدے نیں۔ نئیں تے بند نا ہو جاندِیاں؟ ایس لئی پئی جد بندگی کرن والے اِک وار پاک ہو جاندے تے فیر اوہناں دا دِل اوہناں نُوں الزام نا دیندا؟ سگوں اوہ قُربانِیاں ورھے دے ورھے گُناہ یاد کراندِیاں نیں۔ کیوں جو ہو نئیں سکدا پئی ڈھگّیاں تے بکرِیاں دا لہو گُناہ نُوں دُور کرے۔ ایس لئی اوہ دُنیا وِچ آؤندیاں ہویاں آکھدا اے۔ تُوں قُربانی تے نذراں دی چاہ نئیں کِیتی۔ سگوں میرے لئی اِک جِسم تیار کِیتا۔ پُوریاں سوختنی قُربانِیاں تے گُناہ دِیاں قُربانِیاں توں تُوں خُوش نا ہوئیوں۔ تَد مَیں آکھیا پئی اَے خُدا ویکھ مَیں آیا آں۔ (کتاب دے ورقیاں وِچ میری بابت لِکھیا ہویا اے) پئی تیری مرضی پُوری کراں۔ پہلے تے اوہ آکھدا اے پئی نا تُوں قُربانِیاں تے نذراں تے پُوری سوختنی قُربانِیاں تے گُناہ دِیاں قُربانِیاں دی چاہ کِیتی۔ تے نا اوہناں توں خُوش ہوئیوں بھانویں ایہو ای قُربانِیاں شریعت دے سببّوں چاہڑیاں جاندِیاں نیں۔ فیر اوس آکھیا ویکھ مَیں آیا آں۔ پئی تیری مرضی پُوری کراں۔ اوہ پہلے نُوں ہٹاندا اے پئی دُوجے نُوں قیم کرے۔ اوسے مرضی دے سبّب اسی مسِیح یِسُوع دے بدن دے اِکّو واری قُربان ہون دی راہِیں پاک کِیتے گئے آں۔ تے سارے کاہِن کھلو کے روز سیوا کر دے نیں۔ تے کِسے طرح دِیاں قُربانِیاں بڑی واری چاہڑدے نیں جیہڑیاں کدی وی گُناہ ہٹان جوگیاں نئیں۔ پر ایہہ سدا لئی گُناہ دے بدلے اِکّو ای قُربانی چاہڑ کے خُدا دے سَجّے پاسے بَہہ گیا۔ تے اودُوں دا اُڈِیکدا اے۔ پئی میرے وَیری میرے پیراں دی چَوکی بنن۔ کیوں جو اوس اِکّو ای قُربانی چاہڑن نال اوہناں لوکاں نُوں سدا لئی کامِل کر دِتّا اے جیہڑے پاک کِیتے جاندے نیں۔ تے پاک رُوح وی سانُوں گواہی دیندا اے۔ پہلے تے ایہہ آکھدا اے۔ پئی خُداوند آکھدا اے۔ جیہڑا عہد مَیں اوہناں دِناں پِچّھوں اوہناں نال بَنّھاں گا ایہہ اے پئی مَیں اپنے قانُون اوہناں دے دِلاں اُتّے رکھاں گا۔ تے اوہناں دیاں مَناں اُتّے لِکھاں گا۔ تے اوہناں دے گُناہ تے بدکارِیاں نُوں فیر کدی یاد نا کراں گا۔ تے جد اوہناں دی مُعافی ہوگئی اے۔ تے فیر گُناہ دی قُربانی دا تھاں نا رہیا۔ ایس لئی بھراؤ جد سانُوں یِسُوع دے لہو دے سبّب اوس نَوِیں تے جِیوندے راہ پاک مکان وِچ وڑن دی دلیری اے۔ جیہڑا اوہنے پردے یعنی اپنے جِسم وِچوں ہو کے ساڈے لئی پاک کِیتا اے۔ تے جد ساڈا وَڈا کاہِن اے جیہڑا خُدا دے گھر دا مُختِیار اے۔ تے فیر اسی سَچّے دِل تے پُورے اِیمان نال تے دِل دے الزام نُوں دُور کرن لئی دِل اُتّے چھٹّے مار کے تے بدن نُوں سُتھرے پانی نال صاف کر کے خُدا دے کول چلّئے۔ تے اپنی آس دے اِقرار نُوں پَکّی طرح نال پَھڑی رکھیے کیوں جو جِس وعدہ کِیتا اے اوہ سَچّا اے۔ تے مُحبّت تے نیک کمّاں ولّ اُکسان لئی اِک دُوجے دا خیال رکھیے۔ تے اکٹّھے ہون توں نا مُڑیئے۔ جیویں کئیاں لوکاں دی عادت اے۔ سگوں آپو وِچ نصِیحت کریئے تے جِنّاں اوس دِن نُوں نیڑے ہوندیاں ویکھدے ہو۔ اوناں ای ایہہ گلّاں وَدّھ کریا کرو۔ ایس لئی جے سچیائی نُوں پچھانن دے پِچّھے اسی جان کے گُناہ کریئے متاں گُناہاں دے بدلے کوئی ہور قُربانی باقی نئیں رہندی۔ سگوں عدالت دی ڈران والی تے اجیہی مُچّی ہوئی اَگ دی اوڈِیک۔ جیہڑی وَیرِیاں نُوں کھا چھڈے گی۔ جیہڑا جَنا مُوسیٰ دی شریعت نُوں ککّھ نئیں جان دا۔ دُوں ترہوں بندیاں دی گواہی نال بِناں رَحم ماریا جاندا اے۔ تے خیال کرو۔ پئی اوس بندے دی سزا کیڈی کُو ہوئے گی۔ جِس خُدا دے پُتر نُوں لتاڑیا اے۔ تے عہد دے لہو نُوں جِہدے نال اوہ پاک ہویا سی ناپاک جانیا تے فضل دے رُوح دی بے عِزّتی کِیتی۔ کیوں جو اسی اوہنوں جاننے آں جِس ایہہ آکھیا۔ پئی بدلہ لینا میرا کمّ اے۔ مَیں ای بدلہ دیاں گا تے فیر ایہہ وی پئی خُداوند اپنی اُمّت دی عدالت کرے گا۔ جِیوندے خُدا دے وَس وِچ پینا بڑی ڈرن والی گلّ اے۔ پر تُسی اوہناں پہلیاں دِناں دا چیتا کرو۔ جِنہاں وِچ تُساں لو لگّن دے پِچّھوں دُکھاں دی ڈاہڈی ٹّکر جَھلّی۔ تے ایس سبّب پئی طعنے مِہنے تے مُصِیبتاں دے پاروں تُہاڈا تماشہ بنیا۔ تے کُجھ ایس لئی پئی تُسی اوہناں دے ساتھی ہوئے جِنہاں دے نال ایہہ بَھیڑا سلُوک ہوندا سی۔ تے تُساں قیدِیاں دا ورد کِیتا تے اپنے مال دا لُٹیا جانا وی خُوشی نال سہہ لیا۔ ایہہ جان کے پئی ساڈے کول ایدوں چنگی ملکیّت اے جیہڑی اوڑک تِیکر رہے گی۔ ایس لئی اپنی دلیری نُوں نا چھڈو جِہدا بڑا اَجر اے۔ کیوں جو تُہانوں صبر کرن دی لوڑ اے۔ تاں جو خُدا دی مرضی پُوری کر کے وعدہ کِیتی ہوئی شے لے لوؤ۔ تے ہُن بُہت ای تھوڑا چِر باقی اے۔ پئی آؤن والا آوے گا تے چِر نا لائے گا۔ پر میرا سَچّا بندہ اِیمان نال جِیوندا رہے گا تے جے اوہ پِچھّاں ہٹے تے میرا دِل اوہدے نال راضی نئیں رہندا۔ پر اسی ناس ہون لئی پِچھّاں کھِسکن والے نئیں سگوں اوہناں وِچوں آں جیہڑے جان بچان لئی اِیمان لیاؤندے نیں۔ ہُن اِیمان آس کِیتیاں ہویاں شیواں دا پَکّ تے اَن ڈِٹھ شیواں دا ثبُوت اے۔ کیوں جو اوہدی بابت بزُرگاں دے حق وِچ چنگی گواہی دِتّی گئی۔ اِیمان دی راہِیں اسی پتا کرنے آں پئی جہان خُدا دے حُکم نال بنے ایتھوں توڑی پئی جو کُجھ دِسدا اے۔ ظاہری شیواں توں نئیں بنیا۔ اِیمان دی راہِیں ہابل قائن نالوں چنگی قُربانی خُدا اگّے چاہڑی تے اوہدے سبّب اوہدے راستباز ہون دی گواہی ہوئی۔ کیوں جو خُدا اوہدیاں نذراں دی بابت گواہی دِتّی تے بھانویں اوہ مر گیا تَد وی اوسے دی راہِیں ہُن تِیکر گلّ کر دا اے۔ اِیمان دی راہِیں حنوک چُکیا گیا پئی مَوت نُوں نا ویکھے تے ایس لئی پئی خُدا اوہنوں چُک لیا سی اوہ نا لَبّھیا۔ ایس لئی پئی چُکے جان توں پہلاں اوہدے حق وِچ ایہہ گواہی دِتّی گئی سی پئی اوہ خُدا نُوں پسند آیا سی۔ تے بِناں اِیمان اوہنوں پسند آؤنا اَنہونی گلّ اے۔ ایس لئی پئی خُدا دے کول آؤن والے نُوں اِیمان رکھنا پَیندا اے۔ پئی خُدا اے تے اپنے لَبّھن والیاں نُوں اَجر دیندا اے۔ اِیمان دی راہِیں نُوح نُوں اوہناں شیواں دی بابت جیہڑیاں اودُوں تِیکر نئیں سن دِسدیاں۔ ہدایت ہوئی۔ اوس خُدا کولوں ڈردِیاں اپنے ٹبّر دے بچان لئی بیڑی بنائی جِہدی راہِیں اوس دُنیا نُوں مُجرم ٹھہرایا۔ تے اوس راستبازی دا وارث ہویا جیہڑی اِیمان سیتی ہوندی اے۔ اِیمان دی راہِیں ابرہام جد سدّیا گیا حُکم مَن کے اوس تھاں ٹُر گیا۔ جیہڑا وِرثے وِچ اوہنوں مِلن والا سی تے بھانویں اوہ نئیں سی جان دا پئی مَیں کِتّھے لگا جانا آں تَد وی ٹُرپیا۔ اِیمان دی راہِیں اوہ وعدے دے مُلک وِچ پرائے مُلک وانگُوں بے وطن ہویا تے اِضحاق تے یعقُوب سَنے جیہڑے اوسے وعدے دے اوہدے نال وارث سن تنبُوآں وِچ وَسّن لگّا۔ ایس لئی پئی اوس سدا رہن والے شہر دی اوڈِیک وِچ سی جِہنُوں اُسارن والا تے بنان والا خُدا اے۔ اِیمان دی راہِیں آپے سارہ نُوں وی عُمر لنگھا کے پیٹ ہون دی طاقت لَبّھی ایس لئی پئی اوس وعدہ کرن والے نُوں سَچّا جانیا۔ سو اِک بندے وِچوں جیہڑا مُردے جِہیا سی اسمان دے تاریاں دے برابر بے انت تے سمُندر دی ریت وانگر اَن گنت اولاد پَیدا ہوئی۔ ایہہ سارے اِیمان وِچ مر گئے تے وعدے دِیاں شیواں نئیں ساں لَیاں سگوں دُوروں ای ویکھ کے اوہناں نُوں چاء چڑھیا تے مَن لیا پئی اسی دُنیا اُتّے پردیسی تے راہی آں۔ جیہڑے اجیہاں گلّاں آکھدے نیں اوہ ظاہر کر دے نیں پئی اسی اپنا وطن لَبّھنے آں۔ تے جِہدے وِچوں اوہ نِکل آئے سن۔ جے اوہ اوہدا خیال کر دے تے اوہناں نُوں پرت جان دی ویہل لگدی۔ پر اوہ اِک اودُوں چنگے پئی اسمانی مُلک دی چاہ کر دے نیں ایس لئی خُدا اوہناں دا خُدا اکھوان توں نئیں سنگدا ایس لئی پئی اوس اوہناں لئی اِک شہر وی تیار کِیتا اے۔ اِیمان دی راہِیں ابرہام ازمایش دے ویلے اِضحاق نُوں نذر چاڑھیا۔ جِس وعدیاں نُوں سَچ مَن لیا سی اوہ اپنے اوس اِکّی پُتر نُوں نذر کرن لگّا۔ جِہدی بابت ایہہ آکھیا گیا سی پئی اِضحاق وِچوں تیری نسل اکھوائے گی۔ کیوں جو اوہ ایہہ سمجھیا۔ پئی خُدا مویاں وِچوں وی جوال سکدا اے۔ تے مِثال وانگُوں مویاں وِچوں اوہنوں فیر مِلیا سی۔ اِیمان دی راہِیں اِضحاق وی آؤن والِیاں شیواں دی بابت یعقُوب تے عیسَو دوہاں نُوں دُعا دِتّی۔ اِیمان دی راہِیں یعقُوب مر دے ویلے یُوسف دے دوہاں پُتراں واسطے وَکھو وَکھ برکت منگی تے اپنے سوٹے دے سِرے دا آسرا لے کے سجدہ کِیتا۔ اِیمان دی راہِیں یُوسف جد اوہ مرن دے نیڑے سی۔ بنی اِسرائیل دے اوتھوں نِکل جان دا ذِکر کِیتا۔ تے اپنی ہڈِّیاں دی بابت حُکم دِتّا۔ اِیمان دی راہِیں مُوسیٰ دے ماں پئیو نیں اوہدے جمّن پِچّھوں اوہنوں تَرے مہینے لُکا رکھیا۔ کیوں جو اوہناں ویکھیا۔ پئی مُنڈا سوہنا اے۔ تے اوہ بادشاہ دے حُکموں نا ڈرے۔ اِیمان دی راہِیں مُوسیٰ وڈّیاں ہو کے فِرعون دی دِھی دا پُتر ہون توں مُکّریا۔ ایس لئی پئی اوس گُناہ دا تھوڑے چِر دا سواد چکھّن نالوں خُدا دی اُمّت نال رَل کے ماڑا سلُوک جھلنا بُہتا پسند کِیتا۔ تے مسِیح لئی طعنے مِہنے جِرنا مِصر دے خزانیاں نالوں وڈّی دَولت جانیا کیوں جو اوہنوں اَجر دا خیال سی۔ اِیمان دی راہِیں اوس بادشاہ دے غُصّے دا ڈر نا کِیتا تے مِصر نُوں چھڈ دِتّا ایس لئی پئی اوہ اینج پکّے پَیر رہیا جیویں اوہ اَن ڈِٹھ نُوں پیا ویکھدا اے۔ اِیمان دی راہِیں فسح کرن تے لہو چھڑکن اُتّے عمل کِیتا تاں جو پلیٹھی دیاں دا مارن والا اوہناں نُوں چھڈ دے۔ اِیمان دی راہِیں اوہ لال سمُندر وِچوں ایس طرح لنگھ گئے۔ جیویں سُکّی زمین اُتّوں۔ تے جد مِصر والیاں لنگھن دا اِرادہ کِیتا تے اوہ ڈُب گئے۔ اِیمان دی راہِیں یرِیحُو دا کوٹ جد سَتّ دِن تِیکر اوہدے دوالے پھیریاں مارِیاں تے ڈِگّ پیا۔ اِیمان دی راہِیں راحب کسبی نافرماناں نال ہلاک نا ہوئی۔ کیوں جو اوس جاسُوساں نُوں آرام نال رکھیا سی۔ ہُن ہور کِیہ آکھاں اینی ویہل کِتّھے پئی جَدعون تے برق تے سمسُون تے اِفتاہ تے داؤد تے سموئیل تے ہورناں نبیاں دا حال بیان کراں۔ اوہناں اِیمان دی راہِیں بادشاہیاں جِت لَیاں۔ نیکی دے کمّ کِیتے وعدے دِیاں شیواں نُوں لے لیا شیراں دے مُنھ بند کِیتے۔ اَگ دی تیزی نُوں بُجھایا تے تلوار دی دھار توں بچ نِکلے۔ کمزوری وِچ زور والے ہوئے تے لڑائی وِچ بہادر نِکلے۔ تے وَیرِیاں دی فَوجاں نُوں بھجا دِتّا۔ زنانِیاں اپنے مُردے فیر جِیوندے لے لَئے۔ تے ہور کلپائے گئے۔ پر خلاصی منظُور نا کِیتی۔ تاں جو اوہناں نُوں چنگی قیامت مِل جائے۔ تے ہور اِنج جا پَے گئے۔ پئی اوہناں نال مخَول ہویا تے کولڑے کھادے سگوں اوہناں نُوں بیڑیاں تے قیداں پئیاں۔ اوہناں نُوں پتّھر مارے گئے۔ آرے نال چیرے گئے۔ ازمایش وِچ پئے۔ تلوار نال مارے گئے۔ بھیڈاں تے بکرِیاں دِیاں کھلّاں اُتّے پائیاں تنگی وِچ۔ مُصِیبت وِچ۔ لوکاں دے بَھیڑے سلُوک دے سببّوں پَھوندے رہے۔ دُنیا اوہناں دے لائق نئیں سی۔ اوہ بیاباناں تے پہاڑاں غاراں تے زمین دیاں ٹویاں وِچ خجل خوار ہوندے رہے۔ تے بھانویں اوہناں سبھناں دی بابت اِیمان دے سبّب چنگی گواہی دِتّی گئی۔ تَد وی اوہناں نُوں وعدے دی شے نا مِلی۔ ایس لئی پئی خُدا اگّے ای ساڈے لئی کوئی بہتر شے سوچی سی تاں جو اوہ ساڈے بِناں کامِل نا بنن۔ ایس لئی جد گواہاں دے اَیڈے وڈّے بدّل سانُوں گھیرا پا لیا اے تے آؤ اسی سارے بھار لاہ کے تے اوس گُناہ نُوں جیہڑا سانُوں شتابی پھسا لَیندا اے۔ ہٹا کے اوس دَوڑ وِچ صبر نال دَوڑیئے جِہدے نال سانُوں واہ پیا اے۔ تے اِیمان دے بانی تے کامِل کرن والے یِسُوع نُوں ویکھدے رہیئے۔ جِس اوس خُوشی دے سبّب جیہڑی اوہدے اگّے پئی ہوئی سی بے عِزّتی دی پرواہ نا کِیتی تے صلِیب دا دُکھ جَھل کے خُدا دے تخت دے سَجّے پاسے جا بَیٹھا۔ تے اوہدے ولّ دھیان کرو۔ جِس اوہدے اپنے نال مَندا کرن والیاں گُنہگاراں دی ایڈی لاگت بازی دا صبر کِیتا۔ پئی تُسی بے دِل ہو کے ہِمّت نا ہارو۔ تُساں گُناہ نال اجے اجیہی لڑائی نئیں کِیتی جِہدے وِچ لہو وگایا ہوئے۔ تے تُسی اوس نصِیحت نُوں بُھل گئے۔ جیہڑی تُہانوں پُتراں وانگر دِتّی جاندی اے۔ پئی اَے میرے پُتر خُدا دی جِھڑک دی بے پرواہی نا کر تے جد اوہ تینُوں ملامت کرے بے دِل نا ہو۔ کیوں جو جِہنُوں خُداوند پیار کر دا اے۔ اوہنوں جِھڑکدا وی اے تے جِہنُوں پُتر بناندا اے۔ اوہنوں کولڑے وی مار دا اے۔ تُسی اپنے سوارن لئی دُکھ جَھلدے ہو۔ خُدا پُتر جان کے تُہاڈے نال سلُوک کر دا اے۔ اوہ کیہڑا پُتر اے جِہنُوں پئیو نئیں جِھڑکدا؟ تے جے تُہانوں ایہہ جِھڑک نا دِتّی گئی۔ جیہڑی ساریاں نُوں مِلدی اے۔ تے تُسی حرامدے ہوئے تے پُتر نئیں۔ نالے جد ساڈے جِسمانی پئیو سانُوں جِھڑکدے سن تے اسی اوہناں دی عِزّت کر دے ساں تے رُوحاں دے باپ دی ایدوں وَدّھ تابعداری نا کریئے؟ پئی جِیوندے رہئے؟ اوہ تے تھوڑے چِر تِیکر اپنی سمجھ نال جِھڑکدے سن پر ایہہ ساڈے فائدے لئی کر دا اے۔ پئی اسی وی اوہدی پاکیزگی وِچ شامل ہو جائیے۔ تے ہُن سارِیاں جِھڑکاں خُوشی دا نئیں پر غم دا سبّب معلُوم ہوندیاں نیں پر جیہڑے اوہناں نُوں سَہندے سَہندے پکّے ہوگئے۔ اوہناں نُوں پِچّھوں آرام دے نال راستبازی دا پَھل دیندیاں نیں۔ تَد ڈِھلّے ہتّھاں تے سُست گوڈیاں نُوں ٹھیک کرو۔ تے اپنے ٹُرن لئی سِدّھے راہ بناؤ۔ پئی لنگا بدراہ نا ہو جائے۔ سگوں ولّ کِیتا جائے۔ سبھناں نال میل رکھن دی کوشش کرو۔ تے اوس پاکیزگی نُوں لَبّھو۔ جِہدے بِناں کوئی خُداوند نُوں نا ویکھے گا۔ دھیان نال ویکھدے رہو۔ پئی کوئی بندہ خُدا دے فضل توں خالی نا رہ جائے۔ اینج نا ہوئے۔ پئی کوئی کَوڑی جڑ پُھٹ کے تُہانوں دُکھ دے تے اوہدے سبّب بُہتے لوک پلِیت ہو جان۔ متے کوئی زنائی تے عیسَو وانگر بے دین ہوئے جِس اِک ڈنگ دے کھان بدلے اپنا پلیٹھی دا حق ویچ چھڈیا۔ کیوں جو تُسی جان دے ہو۔ پئی اودُوں پِچّھوں جدوں اوہ برکت دا وارث ہونا چاہندا سی پر ردّیا گیا۔ ایس لئی پئی بھانویں اوس اتھرُو وگا کے اوہدی بڑی بھال کِیتی تَد وی اوہنوں نِیّت بدلن دا تھاں نا مِلیا۔ ایس لئی پئی تُسی اوس پہاڑ دے کول نئیں آئے۔ جِہنُوں ہتّھ نئیں سی لا سکدا تے اَگ نال بلدا سی تے اوہدے اُتّے کالی گَھٹ تے ہنیرا تے طوفان۔ تے تُرہی دا شور تے کلام کرن والے دی اجیہی اواز سی جِنہاں اوہنوں سُنیا اوہناں تَرلے کِیتے۔ پئی ساڈے نال ہور گلّ نا کِیتی جائے۔ کیوں جو اوہ ایس حُکم نُوں جَھل نا سکے۔ پئی جے کوئی جنَور وی ایس پہاڑ نُوں چُھوئے تے پتّھراں نال ماریا جائے۔ تے جو کُجھ دسیا اوہ اینج ڈرؤانا سی پئی مُوسیٰ آکھیا پئی مَیں ڈرناں تے کمبناں آں۔ سگوں تُسی صِیُّون دے پہاڑ تے جِیوندے خُدا دے شہر یعنی اسمانی یرُوشلِیم دے کول آئے ہو تے لَکّھاں فرِشتیاں۔ تے اوہناں پلیٹھی دیاں دی عام جماعت یعنی کلِیسیا جِنہاں دے ناں اسماناں اُتّے لِکھے ہوئے نیں۔ تے ساریاں دے مُنصف خُدا تے کامِل کِیتے ہوئے راستباز لوکاں دِیاں رُوحاں۔ تے نَوِیں عہد دے وچولے یِسُوع تے اوس چِھڑکے ہوئے لہو دے کول آئے ہو جیہڑا ہابل دے لہو نالوں چَنگیاں گلّاں کر دا اے۔ خبردار اوس آکھن والے توں نا مُکّرو۔ کیوں جو جد اوہ لوک زمین اُتّے ہدایت کرن والے توں مُکّر کے نا بچ سکے۔ تے اسی اسمان اُتّوں ہدایت کرن والے توں مُنھ موڑ کے کِیویں بچاں گے۔ اوہدی اواز اوس ویلے تے زمین نُوں ہلا دِتّا سی پر ہُن اوس ایہہ وعدہ کِیتا۔ پئی فیر اِک واری مَیں نِرا زمین ای نئیں سگوں اسمان نُوں وی ہلا دیاں گا۔ تے ایہہ گلّ یعنی فیر اِک واری۔ ایس گلّ نُوں ظاہر کر دی اے۔ پئی ہلائِیاں ہویاں شیواں ایس کر کے ٹل جان گِیاں پئی بنائِیاں ہویاں نیں تاں جو جیہڑیاں نئیں ہلائِیاں جاندِیاں قیم رہن۔ تَد اسی اوہ بادشاہی لے کے جیہڑی ہِلن والی نئیں اوس فضل نُوں نا چھڈئیے۔ جِہدے پاروں اسی ادب تے ڈر نال خُدا دی اوہ بندگی کریئے جیہڑی اوہنوں چنگی لگّے۔ کیوں جو ساڈا خُدا ساڑ چھڈن والی اَگ اے۔ بھراواں نال مُحبّت قیم رکھو۔ مُسافراں دی خاطر تواضع کرنا نا بُھلو کیوں جو اینج کئیاں پچھانے بِناں فرِشتیاں نُوں اپنے گھر رکھیا۔ قیدِیاں نُوں ایس طرح یاد کرو جیویں اوہناں دے نال قید ہو۔ تے جِنہاں نال بَھیڑا سلُوک ہوندا اے۔ اوہناں نُوں وی ایہہ سمجھ کے یاد کرو۔ پئی اسی وی جِسم والے آں۔ ویاہ کرناں ساریاں وِچ عِزّت دی گلّ سمجھی جائے تے کوئی زنا نا ہوئے۔ ایس لئی پئی خُدا زناکاراں تے حرامکاراں دا نیاں کرے گا۔ رُپئے دی مُحبّت تُہاڈے وِچ نا ہوئے۔ جو کُجھ تُہاڈے کول اے اوہدے اُتّے صبر کرو۔ کیوں جو اوس آپ آکھیا اے۔ پئی مَیں تُہانوں نا کدی وساراں گا۔ تے نا کدی تُہانوں چھڈاں گا۔ ایس لئی اسی دلیری نال آکھنے آں۔ پئی خُداوند میرا مددگار اے۔ مَیں خَوف نا کراں گا بندہ میرا کِیہ وگاڑے گا؟ جیہڑے تُہاڈے رہبر سن تے جِنہاں تُہانوں خُدا دا کلام سُنایا اوہناں نُوں یاد رکھو اوہناں دی زِندگی دے نتیجے اُتّے دھیان کر کے اوہناں جیہے اِیماندار ہو جاؤ۔ یِسُوع مسِیح کل تے اَج سگوں سدا تِیکر اِکّو جِہیا اے۔ وَکھو وَکھ تے اوپریاں تعلِیماں پِچّھے بُھلّے نا پِھرو۔ کیوں جو ایہہ چَنگا اے۔ پئی فضل نال دِل تگڑا رہے اوہناں خُوراکاں نال نئیں جِنہاں دے ورتن والیاں نُوں کُجھ فائدہ نئیں ہویا۔ ساڈی اِک اجیہی قُربان گاہ اے جِہدے توں تبنُو دی سیوا کرن والیاں نُوں کھان دا اختیار نئیں۔ کیوں جو جِنہاں جنَوراں دا لہو سردار کاہِن پاک مکان وِچ گُناہ دے بدلے واسطے لے جاندا اے۔ اوہناں دے بدن ڈیریوں باہر ساڑے جاندے نیں۔ ایس لئی یِسُوع وی لوکاں نُوں آپ اپنے لہو نال پاک کرن لئی دروازے دے باہر دُکھ سہیا۔ ایس لئی آؤ اسی اوہدی بے عِزّتی سہہ کے ڈیریوں باہر اوہدے کول چلّئے۔ کیوں جو ایتھے ساڈا کوئی قیم رہن والا شہر نئیں۔ سگوں اسی آؤن والے شہر نُوں لَبّھنے آں۔ سو اسی اوہدی راہِیں شُکر دی قُربانی یعنی اجیہے ہونٹھاں دا پَھل جیہڑے اوہدے ناں دا اِقرار کر دے نیں خُدا دے لئی ہر ویلے چاہڑیا کریئے۔ تے بھلا کرنا تے سخی ہونا ہونا نا بُھلو۔ ایس لئی پئی خُدا اجیہاں قُربانِیاں توں خُوش ہوندا اے۔ اپنے راہبراں دے آکھے لگو تے تابعیاں رہو کیوں جو اوہ تُہاڈیاں جاناں دے فائدے لئی اوہناں وانگر جاگدے رہندے نیں۔ جِنہاں نُوں حِساب دینا پَوے گا تاں جو اوہ خُوشی نال ایہہ کمّ کرن نا دُکھ نال کیوں جو ایس گلّ توں تُہانوں کُجھ فائدہ نئیں۔ ساڈے لئی دُعا کرو۔ کیوں جو سانُوں یقِین اے پئی ساڈا دِل صاف اے۔ تے اسی سبھنیں گلِّیں نیکی نال جِیوندیاں رہنا چاہنے آں۔ مَیں تُہانوں ایہہ کمّ کرن دی ایس لئی ہور وی نصِیحت کرنا آں۔ پئی مَیں چھتی تُہاڈے کول فیر آ سَکاں۔ ہُن تسلّی دا خُدا جِس بھیڈاں دے وڈّے ایّالی یعنی ساڈے خُداوند یِسُوع نُوں ہمیشہ دے عہد دے لہو دے سبّب مُردیاں وِچوں جوال کے آندا۔ تُہانوں ساریاں نیک کمّاں وِچ پُوریاں کرے تاں جو اوہدی مرضی پُوری کرو۔ تاں جو کُجھ اوہنوں پسند آؤندا اے۔ یِسُوع مسِیح دی راہِیں ساڈے سبھناں وِچ پَیدا کرے۔ جِہدی وڈیائی سدا تِیکر ہوئے۔ آمِین۔ بھراؤ مَیں تُہاڈی مِنّت کرنا آں۔ پئی تُسی ایس نصِیحت دے کلام دی برداشت کرو۔ کیوں جو مَیں تُہانوں تھوڑیاں گلّاں وِچ لِکھیا اے۔ تُہانوں پتا ہوئے پئی ساڈا بھرا تِیمُتِھیُس چُھٹ گیا اے۔ جے اوہ چھتی آگیا۔ تے مَیں اوہدے نال تُہانوں مِلاں گا۔ اپنے سارے رہبراں تے سارے پاک لوکاں نُوں سلام آکھو۔ اِطالِیہ والے تُہانوں سلام آکھدے نیں۔ تُہاڈے سبھناں اُتّے فضل ہوندا رہے۔ آمِین۔ خُدا دے تے خُداوند یِسُوع مسِیح دے غلام یعقُوب ولّوں اوہناں باراں قبیلیاں نُوں جیہڑے تھائِیں تھائِیں رہندے نیں سلام۔ میرے بھراؤ جدوں تُسی کئی طرح دِیاں ازمایشاں وِچ پَوو۔ ایہہ جان کے بڑی خُوشی دی گلّ سمجھناں پئی تُہاڈے اِیمان دی ازمایش صبر پَیدا کر دی اے۔ تے صبر نُوں اپنا پُورا اثر کرن دیو۔ تاں جو تُسی پُورے تے کامِل ہو جاؤ۔ تے تُہاڈے وِچ کِسے گلّ دا گھاٹا نا رہے۔ پر جے تُہاڈے وِچ کِسے نُوں دانائی دا گھاٹا ہوئے تے اوہ خُدا کولوں منگے جیہڑا ساریاں نُوں بِناں جِھڑکیاں کُھلے دِل نال دیندا اے تے اوہنوں مِل جائے گی۔ پر اِیمان نال منگے تے کُجھ شک نا کرے کیوں جو شکی سمُندر دی ٹَھل وانگر ہوندا اے جیہڑی وَا نال دھکی جاندی اے تے چھالاں مار دی اے۔ اجیہا بندہ ایہہ نا سمجھے۔ پئی مَینُوں خُداوند کولوں کُجھ لَبھّے گا۔ اوہ بندہ دو دِلا اے۔ تے اپنیاں سارِیاں گلّاں وِچ قیم نئیں رہندا۔ عاجز بھرا اپنے اُچّے درجے اُتّے فخر کرے تے دَولتمند اپنی نِیچ حالت اُتّے۔ ایس لئی پئی گھاہ دے پُھل وانگر جاندا رہے گا۔ کیوں جو سُورج چڑھدیاں ای لو وَگن لگدی اے۔ تے گھاہ نُوں سُکّا دیندی اے۔ تے اوہدا پَھل ڈِگّ پَیندا اے تے اوہدا رُوپ جاندا رہندا اے۔ ایسے طرح دَولتمند وی اپنے راہاں وِچ ٹُردیاں ٹُردیاں مِٹّی وِچ رَل جائے گا۔ دھنّ اوہ بندہ اے جیہڑا ازمایش سہندا اے کیوں جو اوہ جدوں قبول ہویا تے اوہنوں زِندگی دا اوہ تاج مِلے گا۔ جِہدا خُداوند اپنیاں پیار کرن والیاں نال وعدہ کِیتا اے۔ جدوں کوئی ازمایا جائے اوہ ایہہ نا آکھے۔ پئی میری ازمایش خُدا ولّوں ہوندی اے کیوں جو نا تے خُدا کَدے بدی نال ازمایا جا سکدا اے تے نا اوہ کِسے نُوں ازماندا اے۔ ہاں بندہ اپنیاں ای خواہشاں دی کھِچّ نال پَھس کے ازمایا جاندا اے۔ فیر خواہش حاملہ ہو کے گُناہ جَمدی اے۔ تے گُناہ وَدّھ کے مَوت نُوں جمدا اے۔ میرے پیارے بھراؤ! دھوکھا نا کھاؤ۔ سارِیاں چَنگیاں نِعمتاں تے اِنعام اُتّوں نیں۔ تے چانن دے باپ ولّوں مِلدے نیں۔ جیہڑا نا بدل سکدا اے نا بھون دے سبّب اوہدے اُتّے کوئی پر چھاواں پَے سکدا اے۔ اوس اپنی مرضی نال سَچّے کلام دی راہِیں سانُوں پَیدا کِیتا تاں جو اوہدی خلقت وِچوں اِک طرح دے پہلے پَھل ہوئیے۔ میرے پیارے بھراؤ! ایہہ گلّ تُسی جان دے ہو سو سارے سُنن وِچ تیز تے بولن وِچ مِٹّھے تے غُصّے وِچ صبر کرن والے ہو۔ کیوں جو اِنسان دا غُصّہ خُدا دی راستبازی دا کمّ نئیں کر دا۔ ایس لئی ساری پلِیتی تے وَدھن والی بُرائی نُوں چھڈ کے اوس کلام نُوں حلِیمی نال مَن لوؤ جیہڑا دِل وِچ بِیجیا گیا اے۔ تے تُہاڈیاں رُوحاں نُوں نجات دے سکدا اے۔ پر کلام اُتّے عمل کرن والے بنو نا نِرے سُنن والے جیہڑے اپنے آپ نُوں دھوکھا دیندے نیں۔ کیوں جو جیہڑا کلام سُنن والا اے تے اوہدے اُتّے عمل نئیں کر دا اوہ اوس بندے وانگر اے۔ جیہڑا اپنا مُنھ شیشے وِچ ویکھدا اے۔ ایس لئی پئی اوہ اپنا مُنھ ویکھ کے ٹُر جاندا اے تے چھیتی بُھل جاندا اے۔ پئی مَیں کہیو جِہیا ساں۔ پر جیہڑا بندہ اَزادی دی پُوری شریعت اُتّے دِل نال سوچدا رہندا اے۔ اوہ اپنے کمّ وِچ برکت پائے گا۔ ایس لئی پئی اوہ سُن کے بُھلدا نئیں سگوں عمل کر دا اے۔ جے کوئی اپنے آپ نُوں دِیندار سمجھے تے اپنی جِیبھ نُوں لگام نا چاہڑے سگوں اپنے دِل نُوں دھوکھا دے تے اوہدی دِینداری کِسے کمّ دی نئیں۔ ساڈے خُدا تے باپ دے اگّے پاک تے بے نُقص دِینداری ایہہ اے پئی دُکھ دے ویلے یتِیماں تے رَنڈِیاں دی خبر لئیے۔ تے اپنے آپ نُوں دُنیا وِچ بے نُقص رکھیے۔ میرے بھراؤ ساڈے جلالی خُداوند یِسُوع مسِیح دا اِیمان تُہاڈے وِچ رَئی نال نا ہوئے۔ کیوں جو جے اِک بندہ تے سونے دی چھاپ تے چنگے کپڑے پا کے تُہاڈی جماعت وِچ آوے۔ تے اِک غرِیب بندے مَیلے مَیلے کپڑے پا کے آوے۔ تے تُسی اوس چنگے کپڑے والے دی رَئی کرو تے آکھو پئی تُوں ایتھے چنگے تھاں بَہہ جا۔ تے اوس غرِیب بندے نُوں آکھو پئی تُوں ایتھے کھلوتا رہو یا میرے پیراں کول بَہہ جا۔ تے تُساں آپو وِچ رَئی نا کِیتی؟ تے بَھیڑی نِیّت والے مُنصف نا بنے؟ میرے پیارے بھراؤ! سُنو۔ خُدا ایس جہان دیاں غرِیباں نُوں اِیمان وِچ دَولتمند ہون لئی نئیں چُنیا؟ تے اپنے پیار کرن والیاں نال بادشاہی دا وارث ہون دا وعدہ نئیں کِیتا؟ پر تُساں غرِیب بندے دی بے عِزّتی کِیتی۔ دَولتمند تُہاڈے اُتّے ظُلم نئیں کر دے تے اوہ ای تُہانوں کھِچّ کے کچہریاں وِچ نئیں لے جاندے؟ تے اوس بزُرگ ناں اُتّے کُفر نئیں بَکدے جیہڑا تُہاڈے اُتّے لگّا ہویا اے؟ تَد وی جے پاک کتاب دی گلّ دے سببّوں بادشاہی شریعت نُوں پُوریاں کر دے ہو پئی اپنے گواہنڈی نُوں اپنے وانگر پیار کر تے چَنگا کر دے ہو۔ پر جے تُسی رَئی کر دے ہو تے گُناہ کر دے ہو تے شریعت تُہانوں قصوروار بناندی اے۔ کیوں جو جِس ساری شریعت اُتّے عمل کِیتا تے اِک گلّوں بُھل گیا اوہ سارِیاں گلّاں دا قصوروار بنیا۔ ایس لئی پئی جِس ایہہ آکھیا پئی زنا نا کر اوسے ای ایہہ آکھیا تُوں خُون نا کر۔ پر جے تُوں زنا تے نا کِیتا۔ پر خُون کِیتا تَد وی تُوں شریعت دا قصوروار بنیا۔ تُسی اوہناں لوکاں وانگر کلام وی کرو تے کمّ وی کرو۔ جِنہاں دی اَزادی دی شریعت دے سببّوں عدالت ہوئے گی۔ کیوں جو جِس رَحم نئیں کِیتا اوہدا نیاں رَحم بِناں ہوئے گا۔ رَحم عدالت نُوں جِت جاندا اے۔ میرے بھراؤ! جے کوئی آکھے پئی مَیں اِیمان دار آں پر عمل نا کر دا ہوئے تے کِیہ فائدہ اے؟ اجیہا اِیمان اوہنوں نجات دے سکدا اے؟ جے کوئی بھرا بھین ننگے ہون تے اوہناں نُوں روز دی روٹی دا گھاٹا ہوئے۔ تے تُہاڈے وِچوں کوئی اوہناں نُوں آکھے پئی خَیر نال جاؤ تے نِگہے ہو تے رجّے رہو۔ پر جیہڑیاں شیواں جِسم نُوں لوڑ دِیاں نیں اوہناں نُوں نا دیو تے کِیہ فائدہ اے؟ ایسے طرح اِیمان وی جے اوہدے نال عمل نا ہون تے اپنے آپ وِچ مُردہ اے۔ سگوں کوئی آکھ سکدا اے۔ پئی تُوں اِیمان والا ایں تے مَیں عملاں والا۔ تُوں اپنا اِیمان عملاں بِناں مَینُوں وکھا تے مَیں اپنا اِیمان عملاں نال تینُوں وِکھانا آں؟ تُوں ایس گلّ اُتّے اِیمان رکھنا ایں پئی خُدا اِکّو اے۔ خَیر چَنگا کرنا ایں۔ شیطان وی اِیمان رکھدے۔ تے کمبدے نیں۔ پر اَے نکمّے بندے تُوں ایہہ وی نئیں جان دا پئی اِیمان بِن عملاں کِسے کمّ دا نئیں؟ جدوں ساڈے پئیو ابرہام اپنے پُتر اِضحاق نُوں قُربان گاہ اُتّے قُربان کِیتا تے اوہ عملاں دے سبّب راستباز نا ہویا؟ سو تُوں ویکھ لیا اے پئی اِیمان اوہدیاں عملاں نال مِل کے اثر کِیتا تے عملاں دے سبّب اِیمان پُورا ہویا۔ تے ایہہ نوِشتہ پُورا ہویا پئی ابرہام خُدا اُتّے اِیمان لیایا تے ایہہ اوہدے واسطے راستبازی گِنی گئی تے اوہ خُدا دا دوست اکھوایا۔ سو تُساں ایہہ ویکھ لیا اے۔ پئی بندہ نِرا اِیمان نال ای نئیں سگوں عملاں نال راستباز ٹھہردا اے۔ ایسے طرح راحب کسبی وی جد اوس قاصداں نُوں اپنے گھر وِچ رکھیا تے دُوجے راہ وِداع کِیتا تے اوہ عملاں دے سبّب راستباز نا بنی؟ سو جیویں جِسم رُوح بِناں مویا ہویا اے ایسے طرح اِیمان وی عملاں بِناں مویا ہویا اے۔ میرے بھراؤ! تُہاڈے وِچوں بتھیرے اُستاد نا بنن کیوں جو اسی جاننے آں۔ پئی اسی جیہڑے اُستاد آں وَدّھ سزا پاں گے۔ ایس واسطے پئی اسی سارے دے سارے قصور کرنے آں۔ کامِل بندہ اوہ اے جیہڑا گلّاں وِچ قصور نا کرے اوہ سارے بدن نُوں وی قابُو وِچ رکھ سکدا اے۔ جد اسی اپنے قابُو وِچ لیاؤن واسطے گھوڑیاں دے مُنھ وِچ لگام چاہڑنے آں تے اوہناں دے سارے بدن نُوں وی ایدھر اودھر پِھرا سکنے آں۔ ویکھو جہاز وی بھانویں وڈّے وڈّے ہوندے نیں تے تیز وَا نال ٹورے جاندے نیں تَد وی اِک نِکّی جِہی پتوار دی راہِیں ملّاح دی مرضی نال پھرائے جاندے نیں۔ ایسے طرح جِیبھ وی اِک نِکّا جِہیا انگ اے تے بڑی شیخی مار دی اے۔ ویکھو تھوڑی جِہی اَگ کیڈے وڈّے بیابان وِچ اَگ لا دیندی اے۔ جِیبھ وی اِک اَگ اے۔ جِیبھ ساڈے انگاں وِچوں شرارت دا اِک جہان اے تے سارے بدن نُوں پلِیت کر دی اے تے ساری دُنیا نُوں اَگ لاندی اے۔ تے دوزخ دی اَگ نال بَلدی رہندی اے۔ کیوں جو سارے چَوکُھر تے پکھیرُو تے کِیڑے کاڑے تے دریا دے جنَور اِنسان اپنے قابُو وِچ لیا سکدا اے۔ تے لیایا وی اے۔ تے جِیبھ نُوں کوئی قابُو نئیں کر سکدا اوہ اِک بلا اے جیہڑی ڈکی نئیں جاندی۔ مار چھڈن والے زہر نال بھری ہوئی اے۔ ایسے نال اسی خُداوند تے باپ دی وڈیائی کرنے آں تے ایسے نال ای اسی بندیاں نُوں جیہڑے خُدا دی صُورت اُتّے بنائے گئے نیں بد دُعا دینے آں۔ اِکّی مُنھ توں نیک دُعا تے بد دُعا نِکلدی اے۔ میرے بھراؤ! ایہہ نئیں ہونا چاہیدا۔ کَدے اِکّی تھاؤں چشمے وِچوں مِٹّھا تے کھارا پانی نِکل سکدا اے؟ میرے بھراؤ! ہنجیر دے رُکھّ نال زَیتُون یا انگور دے رُکھّ نال ہنجیر لگ سکدے نیں؟ ایسے طرح کھارے چشمے وِچوں مِٹّھا پانی نئیں نِکل سکدا۔ تُہاڈے وِچوں سیانا تے سمجھ والا کون اے؟ جیہڑا اجیہا ہوئے اوہ اپنے کمّاں نُوں نیک چال چَلّن دی راہِیں اوس حلِیمی نال ظاہر کرے جیہڑی حِکمت وِچوں پَیدا ہوندی اے۔ پر جے تُسی اپنے دِلاں وِچ ڈاہڈا ساڑا تے جُدائِیاں رکھدے ہو۔ تے سچیائی دے برخلاف نا شیخی مارو نا جُھوٹھ بولو۔ ایہہ دانائی اوہ نئیں جیہڑی اُتّوں آؤندی اے سگوں دُنیاوی تے نفسانی تے شیطانی اے۔ ایس واسطے جِتّھے ساڑا تے جُدائی ہوندی اے اوتھے فساد تے ہر طرح دا بُرا کمّ وی ہوندا اے۔ پر جیہڑی دانائی اُتّوں آؤندی اے اوّل تے اوہ پاک ہوندی اے۔ فیر مِلاپڑی تے حلِیم تے مَت لین والی۔ رَحم تے چنگے پَھلاں نال لدّی ہوئی۔ تے رَئی تے مکر نئیں کر دی۔ تے صُلح کران والیاں لئی نیکی دا پَھل صُلح نال بِیجیا جاندا اے۔ تُہاڈے وِچ لڑائِیاں تے جھگڑے کِتّھوں آ گئے نیں ایہہ اوہناں خواہشاں توں نئیں جیہڑیاں تُہاڈے انگاں وِچ فساد کر دِیاں نیں؟ تُسی خواہش کر دے ہو پر تُہانوں مِلدا نئیں۔ خُون تے ساڑا کر دے ہو پر کُجھ تُہانوں لَبّھدا نئیں تُسی لڑدے تے جھگڑ دے ہو۔ تُہانوں ایس لئی نئیں مِلدا پئی منگدے نئیں۔ تُسی منگدے ہو پر نئیں مِلدا۔ ایس لئی پئی بُری نِیّت نال منگدے ہو تاں جو اپنی خُوشی وِچ خرچ کرو۔ زنا کرن والیو! تُسی نئیں جاندِیاں پئی دُنیا دی یاری خُدا دا وَیر اے؟ سو جیہڑا دُنیا دا یار بننا چاہندا اے اوہ اپنے آپ نُوں خُدا دا وَیری بناندا اے۔ تُسی ایہہ سمجھدے ہو پئی پاک کتاب ایویں آکھدی اے؟ پئی رُوح جیہڑا ساڈے وِچ اوس وسایا اے اوہ غیرت نال چاہ کر دا اے؟ اوہ تے بُہتا فضل دیندا اے۔ ایس لئی ایہہ لِکھیا ہویا اے۔ پئی خُدا مغرُوراں دا سامنا کر دا اے۔ تے حلِیماں نُوں فضل دیندا اے۔ سو خُدا دے تابعیاں ہو جاؤ تے ابلیس نال لڑائی کرو تے اوہ تُہاڈے توں بھج جائے گا۔ خُدا دے نیڑے جاؤ تے اوہ تُہاڈے نیڑے آوے گا۔ گُناہیو۔ اپنے ہتّھاں نُوں صاف کرو تے دو دِلیؤ اپنے دِلاں نُوں پاک کرو۔ افسوس تے سیاپا کرو تے روؤ تُہاڈا ہاسا سیاپا ہو جائے تے تُہاڈی خُوشی اُداسی ہو جائے۔ خُدا اگّے نِیویں ہوؤ۔ تے اوہ تُہانوں اُچّا کرے گا۔ بھراؤ! اِک دُوجے دی بدگوئی نا کرو۔ جیہڑا اپنے بھرا دی بدگوئی کر دا اے یا الزام لاندا اے اوہ شریعت دی بدگوئی کر دا اے تے شریعت اُتّے الزام لاندا اے۔ جے تُوں شریعت اُتّے الزام لانا ایں تے تُوں شریعت اُتّے عمل نئیں کِیتا۔ سگوں اوہدے اُتّے حاکم بنیا۔ شریعت دا دین والا تے حاکم اِکّو اے جیہڑا بچا سکدا اے۔ تے مار وی سکدا اے۔ تُوں کون ایں جیہڑا اپنے گواہنڈی اُتّے الزام لانا ایں؟ تُسی جیہڑے ایہہ آکھدے ہو پئی اسی اَج تے بھلکے فلانے شہر وِچ جاواں گے تے اوتھے وَرھا رہاں گے۔ تے سوداگری کر کے نفع لاں گے۔ تے ایہہ نئیں جان دے پئی کل کِیہ ہوئے گا۔ تُہاڈی زِندگی شے ای کِیہ اے۔ ہواڑ جِہیا حال اے ہُن دسی ہُنے گواچ گئی۔ تُہانوں سگوں ایہہ آکھنا چاہیدا اے پئی جے خُداوند چاہے تے اسی جِیوندے وی رہاں گے۔ تے ایہہ یا اوہ کمّ وی کراں گے۔ پر ہُن تُسی اپنیاں شیخیاں دا فخر کر دے ہو۔ پر تُہاڈا فخر بَھیڑا اے۔ سو جیہڑا بھلا کرنا جان دا اے تے نئیں کر دا اوہ گُناہ کر دا اے۔ دَولت مندو۔ ذرا سُنو تے! تُہانوں اپنیاں تنگِیاں اُتّے جیہڑیاں آؤن والِیاں نیں رونا تے پِٹناں چاہیدا اے۔ تُہاڈا مال وِگڑ گیا تے تُہاڈیاں کپڑیاں نُوں کِیڑا کھا گیا۔ تُہاڈے سونے چاندی نُوں جنگال لگ گیا تے اوہ جنگال تُہاڈے اُتّے گواہی دے گا۔ تے اَگ وانگر تُہاڈا گوشت کھائے گا۔ تُساں چھیکڑے دِناں وِچ خزانہ جمع کِیتا اے۔ ویکھو مزدُوراں تُہاڈیاں پَیلِیاں وَڈھِیاں تے تُساں دغے نال اوہناں دی مزدُوری رکھ لئی۔ اوہناں دی اوہ مزدُوری پئی کُوکدی اے۔ تے فصل وَڈّھن والیاں دی فریاد فَوجاں دے ربّ دے کنّاں وِچ اَپڑ گئی اے۔ تُساں زمین اُتّے شُوکا شاکی کِیتی تے مَوجاں کِیتیاں۔ تُساں اپنے دِلاں نُوں ذِبح دے دِن موٹا کِیتا۔ تُساں راستباز بندے نُوں قصوروار بنا کے اوہنوں قتل کِیتا پر اوس تُہاڈا سامنا نئیں کِیتا۔ سو بھراؤ! خُداوند دے آؤن تِیکر صبر کرو۔ ویکھو زمیندار زمین دی قِیمتی پَیداوار نُوں اوڈِیکدا اے۔ تے پہلے تے پِچّھلے مینہ دے وَسّن تِیکر صبر کر دا رہندا اے۔ تُسی وی صبر کرو۔ تے اپنے دِلاں نُوں تگڑیاں رکھو۔ کیوں جو خُداوند چھیتی آؤندا اے۔ بھراؤ! اِک دُوجے دی چُغلی نا کرو۔ تاں جو سزا نا پاؤ۔ ویکھو مُنصف بُوہے اُتّے کھلوتا اے۔ بھراؤ جِنہاں نبیاں خُداوند دے ناں اُتّے کلام کِیتا اے اوہناں نُوں دُکھ سہن تے صبر کرن دا نمونہ سمجھو۔ ویکھو صبر کرن والیاں نُوں اسی دھنّ آکھنے آں۔ تُساں ایُّوب دے صبر دا حال تے سُنیا ای اے تے خُداوند ولّوں جیہڑا اوہدا انت ہویا اوہنوں وی معلُوم کر لیا۔ جِہدے توں خُداوند دا بڑا ترس تے رَحم ظاہر ہوندا اے۔ پر میرے بھراؤ! ساریاں توں وَدّھ کے ایہہ اے۔ پئی سَونہہ نا کھاؤ۔ نا اسمان دی نا زمین دی نا کِسے ہور شے دی۔ سگوں ہاں دے تھاں ہاں کرو۔ تے نا دے تھاں نا۔ تاں جو سزا دے لائق نا ہوؤ۔ جے تُہاڈے وِچوں کوئی تنگ ہوئے۔ تے دُعا منگے جے خُوش ہوئے تے وڈیائی دے گِیت گاوے۔ جے تُہاڈے وِچ کوئی بیمار ہوئے تے کلِیسیا دے بزُرگاں نُوں سَدّے تے اوہ خُداوند دے ناں اُتّے اوہنوں تیل مَل کے اوہدے لئی دُعا منگن۔ جیہڑی دُعا اِیمان نال ہوئے گی۔ اوہدے نال بیمار بچ جاوے گا۔ تے خُداوند اوہنوں بچائے گا۔ تے جے اوس گُناہ کِیتے ہون اوہ وی مُعاف ہو جان گے۔ سو تُسی آپو وِچ اِک دُوجے دے اگّے اپنے اپنے گُناہ دا اِقرار کرو۔ تے اِک دُوجے واسطے دُعا منگو تاں جو چنگے ہو جاؤ۔ راستباز بندے دی دُعا نال بڑا اثر ہوندا اے۔ ایلیّاہ ساڈے وانگر بندہ سی۔ اوس بڑے زور نال دُعا منگی۔ پئی مینہ نا وَسّے۔ سو ساڈھے تَرے ورھے دھرتی اُتّے مینہ نا وسّیا۔ فیر اوس دُعا منگی تے اسمان توں پانی وسّیا۔ تے زمین اُتّے پَیداوار ہوئی۔ میرے بھراؤ! جے تُہاڈے وِچوں کوئی ٹھیک راہ توں گُھس جاوے تے کوئی اوہنوں فیر لیاوے۔ تے اوہ ایہہ جانے پئی جیہڑا کِسے گُناہی نُوں اوہدے گُھس جان توں فیر لیاوے گا۔ اوہ اِک جان نُوں مَوت توں بچائے گا۔ تے بتھیرے گُناہاں اُتّے پردہ پائے گا۔ یِسُوع مسِیح دے رسُول پطرس ولّوں اوہناں کھِلّرے ہوئے پردیسیاں نُوں جیہڑے پُنطُس۔ گلِتیہ۔ کَپّدُکیہ۔ آسِیہ تے بتُھنیہ وِچ نیں۔ خُدا باپ دے اگیترے عِلم دے سببّوں رُوح دے پاک کرن نال تابعدار ہون تے یِسُوع مسِیح دا لہو چِھڑکے جان واسطے چُنے ہوئے نیں۔ فضل تے تسلّی تُہانوں مِلدی رہے۔ ساڈے خُداوند یِسُوع مسِیح دے خُدا تے باپ دی وڈیائی ہوئے۔ جِس یِسُوع مسِیح دے مُردیاں وِچوں جی اُٹھن دا سبّب اپنی بڑی رحمت نال سانُوں زِندہ آس دین لئی نَوِیں سِریوں پَیدا کِیتا۔ پئی اِک وِرثہ جیہڑی نا ناس ہون والی نا نُقص والی تے نا کُملان والی اے۔ سگوں اسمان اُتّے تُہاڈے لئی رکھی ہوئی اے۔ تُہانوں مِل جائے۔ (جِنہاں دی راکھی خُدا دی قُدرت نال اِیمان دی راہِیں اوس نجات واسطے ہوندی اے جیہڑی چھیکڑلے ویلے ظاہر ہون والی اے۔) ایہدے سبّب تُسی بڑی خُوشی کر دے ہو۔ بھانویں ہُن تھوڑے چِر لوڑاں توں کِیتے وَن سَووَنِیاں ازمایشاں دے سببّوں تُہانوں تکلیف ہوئی اے۔ تے ایہہ ایس واسطے ہویا اے۔ پئی تُہاڈا پرکھیا ہویا اِیمان جیہڑا اَگ نال پرکھے ہوئے فانی سونے نالوں بُہتے مُل دا اے یِسُوع مسِیح دے ظاہر ہون دے ویلے وڈیائی تے جلال تے عِزّت دا سبّب ہوئے۔ اوہدے نال تُسی بِن ویکھیاں مُحبّت رکھدے ہو تے بھانویں اوہنوں ایس ویلے نئیں ویکھدے فیر وی اوہدے اُتّے اِیمان لیا کے اجیہی خُوشی کر دے ہو۔ تے جِہدا بیان نئیں ہو سکدا تے جیہڑی جلال نال بھری ہوئی اے۔ تے اپنے اِیمان دا مطلب یعنی رُوحاں دی نجات پاندے ہو۔ ایسے نجات دی بابت اوہناں نبیاں بڑی بھال تے چھان بِین کِیتی جِنہاں اوس فضل دی نبُوّت کِیتی جیہڑا تُہاڈے اُتّے ہون والا سی۔ اوہ ایس گلّ دی چھان بِین کر دے سن پئی مسِیح دا رُوح جیہڑا اوہناں وِچ سی۔ اوہنے اگیتریاں مسِیح دی تکلیفاں دی خبر دِتّی تے اوس جلال دی وی جیہڑا اوہناں توں پِچّھے آؤن والا سی۔ کیہڑے یا کہیو جِہے ویلے دی گلّ دا ذِکر کر دا سی۔ اوہناں اُتّے ایہہ اِلہام اُگھیڑیا گیا پئی اوہناں گلّاں وِچ اپنی نئیں سگوں تُہاڈی سیوا کر دے سن تے ایہناں گلّاں دی خبر تُہانوں ہُن اوہناں دی راہِیں ہوئی اے۔ جِنہاں پاک رُوح دی راہِیں جیہڑا اسمانوں گھلّیا گیا تُہانوں خُوشخبری سُنائی۔ ایہناں گلّاں اُتّے فرِشتے وی دھیان کرنا چاہندے نیں۔ ایس واسطے اپنی عقل دا لکّ بَنّھ کے تے ہُشیار ہو کے اوس فضل دی پُوری آس رکھو جیہڑا یِسُوع مسِیح دے وکھالی دین دے ویلے تُہاڈے اُتّے ہون والا اے۔ تے تابعدار بچّیاں وانگر اپنے آپ نُوں اپنی بیواقوفی دِیاں پرانیاں خواہشاں اُتّے نا ڈولو۔ سگوں جیویں تُہاڈا سَدّن والا پاک اے اوسے طرح تُسی وی اپنے چال چَلّن وِچ پاک بنو۔ کیوں جو لِکھیا اے۔ پئی پاک بنو۔ ایس لئی جو مَیں پاک آں۔ تے جد تُسی باپ کر کے اوہدے کولوں دُعا منگدے ہو۔ جیہڑا ہر اِک دے کمّ دے سببّوں رَئی بِناں عدالت کر دا اے۔ تے اپنی مُسافری دا ویلا خَوف نال کٹّو۔ کیوں جو تُسی جان دے ہو پئی تُہاڈا نکمّا چال چَلّن جیہڑا پئیو دادیاں توں لگا آؤندا سی۔ اوہدے توں تُہاڈی خلاصی ناس ہون والِیاں شیواں یعنی سونے چاندی نال نئیں ہوئی۔ سگوں اِک بے نُقص تے بے داغ لیلے دے قِیمتی لہو نال یعنی مسِیح دے لہو نال۔ تے خُدا نُوں دُنیا دے بنن توں پہلاں اوہدا عِلم سی پر تُہاڈی خاطر چھیکڑے ویلے ظاہر کِیتا گیا۔ تے تُساں اوہدی راہِیں خُدا اُتّے اِیمان لیاندا اے۔ جِس اوہنوں مُردیاں وِچوں جوایا اے۔ تے جلال وی دِتّا۔ تاں جو تُہاڈا اِیمان تے آس خُدا اُتّے ہوئے۔ ایس کر کے پئی تُساں سچیائی نُوں مَن کے بھراواں نال سَچّی مُحبّت کرن لئی اپنیاں دِلاں نُوں پاک کِیتا اے۔ دِلوں جانوں آپو وِچ مُحبّت کرو۔ کیوں جو تُسی جِسمانی تُخم توں نئیں۔ سگوں رُوحانی توں۔ خُدا دے کلام دی راہِیں جیہڑا جِیوندا تے قیم اے نَوِیں سِریوں جمّے ہو۔ فیر ایہہ آیا اے۔ پئی اِنسان گھاہ وانگر اے تے اوہدی ساری شان و شوکت گھاہ دے پُھل وانگر اے گھاہ تے کُرما جاندا اے تے پُھل ڈِگّ پَیندا اے۔ پر خُداوند دا کلام سدا تِیکر قیم رہے گا۔ ایہہ اوہ ای خُوشخبری دا کلام اے۔ جیہڑا تُہانوں سُنایا گیا سی۔ فیر ساری بدی تے سارے فریب تے مکّاری تے ساڑا تے بُرا آکھنا چھڈ کے۔ نَوِیں جمّیاں ہویاں بچّیاں وانگر کلام دے نَروَیر رُوحانی دُدّھ دی چاہ رکھو۔ پئی اوہدی راہِیں نجات پان لئی وَدھدے جاؤ۔ جے تُہانوں خُداوند دے مہربان ہون دا سواد آگیا اے۔ اوہدے کول آ کے جیہڑا بندیاں دا ردّیا ہویا پر خُدا دا چُنیا تے قِیمتی جِیوندا پتّھر اے۔ تُسی وی جِیوندے پتّھراں وانگر رُوحانی گھر بندے جاندے ہو۔ تاں جو کاہِناں دا پاک فِرقہ بن کے اجیہاں رُوحانی قُربانِیاں چاہڑو۔ جیہڑیاں یِسُوع مسِیح دی راہِیں چَنگیاں لگدِیاں نیں ایس واسطے پاک کتاب وِچ لِکھیا اے۔ پئی ویکھو مَیں صِیُّون وِچ نُکّر دے سِرے دا چُنیا ہویا تے قِیمتی پتّھر دھرنا آں۔ جیہڑا اوہدے اُتّے اِیمان لیاؤندا اے۔ اوہنوں کدی نموشی نا ہوئے گی۔ سو تُہاڈے اِیمان لیاؤن والیاں لئی تے اوہ قِیمتی اے۔ پر نا مَنّن والیاں لئی اوہ پتّھر جِہنُوں راجاں نیں رَدّ کِیتا اوہ ای نُکّر دے سِرے دا پتّھر ہوگیا۔ تے ٹھیڈا لگّن دا پتّھر تے ٹھوکر کھان دی چٹان ہویا کیوں جو اوہ نافرمان ہو کے کلام توں ٹھیڈا کھاندے نیں۔ تے ایہدے لئی مُقرّر وی ہوئے سن۔ پر تُسی اِک چُنی ہوئی نسل تے بادشاہی کاہِناں دا فِرقہ پاک قوم تے اجیہی اُمّت ہو جیہڑی خُدا دی خاص ملکیّت اے۔ تاں جو اوہدیاں خُوبِیاں ظاہر کرو۔ جِس تُہانوں ہنیرے وِچوں اپنے عجب چانن وِچ سدّیا اے۔ پہلاں تُسی کوئی اُمّت نئیں سو پر ہُن خُدا دی اُمّت اوہ۔ تُہاڈے اُتّے رَحم نئیں سی ہویا پر ہُن تُہاڈے اُتّے رَحم ہویا اے۔ پیاریو مَیں تُہاڈی مِنّت کرنا آں۔ پئی تُسی اپنے آپ نُوں پردیسی تے مُسافر جان کے اوہناں جِسم دِیاں خواہشاں توں بچے رہو جیہڑیاں رُوح نال لڑائی رکھدیاں نیں۔ تے غیر قوماں وِچ اپنا چال چَلّن نیک رکھو۔ تاں جو جیہڑیاں گلّاں وِچ اوہ تُہانوں بدکار جان کے تُہاڈے اُتّے عیب لاندے نیں تُہاڈے نیک کمّاں نُوں ویکھ کے اوہناں دے سببّوں پڑتال دے دِہاڑے خُدا دی وڈیائی کرن۔ خُداوند دے لئی اِنسان دے ہر اِک انتظام دے تابعدار رہو۔ بادشاہ دے ایس لئی پئی اوہ سبھناں توں وَڈا اے۔ تے حاکماں دے ایس لئی پئی اوہ بدکاراں دی سزا تے نیکاں دی وڈیائی دے لئی اوہدے ولّوں گھلّے ہوئے نیں۔ کیوں جو خُدا دی ایہہ مرضی اے پئی تُسی نیکی کر کے جاہلاں دی نادانی دِیاں گلّاں نُوں بند کر دیو۔ تے اپنے آپ نُوں اَزاد سمجھو۔ پر ایس اَزادی نُوں بدی دا پردہ نا بناؤ۔ سگوں اپنے آپ نُوں خُدا دے غلام سمجھو۔ ساریاں دی عِزّت کرو۔ برادری نال مُحبّت رکھو۔ خُدا توں ڈرو بادشاہ دی عِزّت کرو۔ نَوکرو! بڑے خَوف نال اپنے مالکاں دے تابعیاں رہو۔ نا نِرے نیکاں تے حلِیماں ای دے۔ سگوں ڈاھڈیاں دے وی۔ کیوں جو جے کوئی خُدا دا خیال کر کے بے انصافی نال دُکھ سہے تے ایہہ چَنگا اے۔ ایس لئی پئی جے تُساں گُناہ کر کے ہُورے کھادے تے صبر کِیتا تے کِیہ وڈیائی اے؟ ہاں جے نیکی کر دیاں دُکھ پاندے تے صبر کر دے ہو۔ تے ایہہ خُدا دے اگّے چَنگا اے۔ تے تُسی ایسے لئی سَدّے گئے سو۔ کیوں جو مسِیح وی تُہاڈے لئی دُکھ پا کے تُہانوں اِک نمونہ دے گیا تاں جو اوہدے کُھرے اُتّے ٹُرو۔ نا اوس گُناہ کِیتا۔ تے نا ای اوہدے مُنھ توں مکر دی کوئی گلّ نِکلی۔ نا اوہ گالاں لے کے گالاں دیندا سی۔ نا ای دُکھ پا کے کِسے نُوں جِھڑکدا سی۔ سگوں اپنے آپ نُوں سَچّے مُنصف دے ہتّھ سونپدا سی۔ اوہ آپ ساڈے گُناہ نُوں اپنے بدن اُتّے چُک کے صلِیب اُتّے چڑھ گیا۔ تاں جو اسی گُناہ ولّوں مر کے راستبازی ولّوں جِیوئیے۔ تے اوہدے مار کھان نال تُسی چنگے کِیتے گئے۔ کیوں جو پہلاں تُسی بھیڈاں وانگر بُھلّے پِھردے سو۔ پر ہُن اپنیاں رُوحاں دے ایّالی تے نِگہبان دے کول فیر آ گئے ہو۔ زنانِیو! تُسی وی اپنے اپنے گھر والیاں دی تابعدار رہو۔ ایس لئی پئی جے کوئی بندہ کلام نُوں نا وی مَنّے تَد وی زنانی دے پاک چال چَلّن نال تے خَوف نُوں ویکھ کے بِناں کلام دے کھِچّے جان۔ تے تُہاڈی سجاوٹ وکھالے دی نا ہوئے پئی سِر گُندنا تے سونے دے گہنے تے کپڑے۔ سگوں تُہاڈے دِل دی چُھپی ہوئی اِنسانِیّت نرمی تے حلِیمی دی نا ناس ہون والی سجاوٹ نال سَجی رہے۔ کیوں جو خُدا دے کول ایہدی بتھیری قدر اے۔ تے پِچّھلے زمانے وِچ وی خُدا اُتّے آس رکھن والِیاں پاک زنانِیاں اپنے آپ نُوں ایسے طرح سنگار دِیاں تے اپنے اپنے گھر والیاں دے حُکم وِچ رہندیاں سن۔ جیویں سارہ ابرہام دے حُکم وِچ رہندی تے اوہنوں خُداوند آکھدی سی تُسی وی جے نیکی کرو تے کِسے ڈراوے توں نا ڈرو۔ تے اوہدیاں دِھئیاں ہویاں۔ گھر والیو! تُسی وی اپنیاں زنانِیاں نال عقل نال وسّیا کرو تے زنانی نُوں کمزور جان کے اوہدی عِزّت کرو تے ایسے طرح سمجھو پئی اسی دونویں زِندگی دی نِعمت دے وارث آں۔ تاں جو تُہاڈیاں دُعاواں رُک نا جان۔ چھیکڑلی گلّ ایہہ اے۔ پئی سارے اِک دِل تے ہمدرد ہوؤ۔ بھراواں وانگر مُحبّت کرو۔ نرم دِل تے نِیویں رہو۔ بدی دے بدلے بدی نا کرو۔ تے گال دے بدلے گال نا دیو۔ سگوں برکت منگو۔ کیوں جو تُسی برکت دے وارث ہون لئی سَدّے گئے ہو۔ جیہڑا زِندگی توں خُوش ہونا تے چنگے دِن ویکھنے چاہندا اے اوہ زبان نُوں بدی توں تے مُنھ نُوں مکر دی گلّ آکھن توں موڑے۔ بدی توں لانبھے رہے تے نیکی کر دا رہے۔ صُلح لَبّھدا رہے تے اوہدا پِچھّا کر دا رہے۔ کیوں جو خُداوند دِیاں اَکھّیاں راستبازاں ولّ نیں تے اوہدے کنّ اوہناں دِیاں دُعاواں ولّ نیں۔ پر بدکار خُداوند دی نظر وِچ نیں۔ جے تُسی شَوق نال نیکی کرو۔ تے تُہاڈے نال بدی کیہڑا کرن والا اے؟ تے جے راستبازی دی خاطر دُکھ سَہو تے تُسی مُبارک ہو۔ نا اوہناں دے ڈران توں ڈرو تے نا گھابرو۔ سگوں مسِیح نُوں خُداوند جان کے اپنے دِلاں وِچ پاک سمجھو۔ تے جیہڑا تُہاڈے کولوں تُہاڈی آس دا سبّب پُچھے اوہدا جواب دین لئی ہر ویلے تیار رہو پر حلِیمی تے خَوف نال۔ تے نِیّت وی نیک رکھو۔ تاں جو جِنہاں گلّاں وِچ تُہاڈے اُتّے عیب لایا جاندا اے۔ اوہناں وِچ اوہ لوک شرمندے ہون جیہڑے تُہاڈے مسِیح وِچ نیک روَئیے اُتّے طعنے دیندے نیں۔ کیوں جو جے خُدا دی ایہو مرضی ہوئے پئی تُسی بھلا کر کے دُکھ سَہو تے اوہ بُرا کر کے دُکھ سہن نالوں چَنگا اے۔ ایس لئی پئی مسِیح وی راستباز ناراستاں دے لئی اِکّو وار دُکھ اُٹھایا۔ تاں جو سانُوں خُدا دے کول اَپڑائے۔ اوہ جِسم ولّوں ماریا گیا پر رُوح ولّوں جوالیا گیا۔ جِہدے وِچ اوس جا کے اوہناں قیدی رُوحاں وِچ منادی کِیتی۔ جیہڑیاں اوس اگلے زمانے وِچ نافرمان سن۔ جدوں خُدا نُوح دے ویلے صبر کر کے اوڈِیکدا رہیا سی تے اوہ بیڑی تیار کِیتی جاندی سی جِہدے اُتّے سوار ہو کے تھوڑے جیہے بندے یعنی کُل اَٹھ جاناں پانی دی راہِیں بچِئیاں۔ تے ٹھیک اوسے پانی وانگر بپتِسمہ وی یِسُوع مسِیح دے جی اُٹھن دی راہِیں ہُن تُہانوں بچاندا اے۔ اوہدے توں جِسم دی مَیل دُور کرنا نئیں پر چنگی نِیّت نال خُدا دا طالب ہونا مُراد اے۔ اوہ اسمان اُتّے جا کے خُدا دے سَجّے پاسے بَیٹھا ہویا اے تے فرِشتے تے اختیار تے قُدرتاں اوہدے تابعیاں کِیتیاں گِئیاں نیں۔ جد مسِیح ساڈے واسطے جِسم دا دُکھ چُکیا۔ تے تُسی وی اوسے طبیعت دے ہتّھیار بنو۔ کیوں جو جِس جِسم دا دُکھ چُکیا اوس گُناہ توں خلاصی پائی اے۔ تاں جو تُسی اگّے نُوں باقی عُمر جِسم دِیاں خواہشاں وِچ نئیں سگوں خُدا دی مرضی نال کٹّو۔ ایس لئی پئی جِنّاں چِر تُساں غیر قوماں دی مرضی دے سببّوں کمّ کِیتا تے جِنّاں چِر پہلاں تُساں لُچ پُنے تے بُریاں خواہشاں شراب پِین وِچ ناچ رنگ تے نشے بازیاں تے مکرُوہ بُت پرستی وِچ لایا اوناں ای بُہت اے۔ ایہدے اُتّے اوہ اچرج ہوندے نیں۔ پئی تُسی اوہناں دے نال ایڈی بدچلنی نئیں کر دے تے طعنے مِہنے دیندے نیں۔ اوہ اوسے نُوں لیکھا دین گے۔ جیہڑا جِیوندیاں تے مُردیاں دی عدالت کرن نُوں تیار اے۔ کیوں جو مُردیاں نُوں وی خُوشخبری ایسے لئی سُنائی گئی سی۔ پئی جِسم ولّوں بندیاں وانگر اوہناں دی عدالت ہوئے۔ پر رُوح ولّوں اوہ خُدا دے سببّوں جِیوندے رہن۔ سارِیاں شیواں ہُن مُک چلیاں نیں ایس لئی سُرت والے ہوؤ تے دُعاواں لئی تیار رہو۔ ساریاں نالوں پہلاں ایہہ چنگی گلّ اے پئی آپو وِچ بڑی مُحبّت کرو۔ کیوں جو مُحبّت بُہتے گُناہاں اُتّے پردہ پا چھڈ دی اے۔ بُڑبُڑ کِیتیاں بِناں آپو وِچ مُسافراں دی خاطر تواضع کرو۔ جِنّی نِعمت کِسے نُوں مِلی اے اوہ اوہنوں خُدا دِیاں سارِیاں نِعمتاں دے چنگے نَوکراں وانگر دُوجے دی سیوا واسطے ورتیا کرے۔ جے کوئی کُجھ آکھے تے اجیہا آکھے جیویں خُدا دا کلام اے۔ جے کوئی سیوا کرے تے اونہی طاقت نال کرے۔ جِنّی خُدا دیندا اے۔ تاں جو سارِیاں گلّاں وِچ یِسُوع مسِیح دی راہِیں خُدا دا جلال ظاہر ہوئے۔ جلال تے سلطنت ہمیشہ تِیکر اوہدی ای اے۔ آمِین۔ پیاریو! جیہڑی مُصِیبت دی اَگ تُہاڈی ازمایش دے لئی تُہاڈے وِچ بھکھی ہوئی اے۔ ایہہ سمجھ کے اچرج نا ہوؤ پئی ایہہ کوئی انوکھی گلّ ساڈے اُتّے ہوئی اے۔ سگوں تُسی خُوشی کرو۔ پئی تُسی مسِیح دیاں دُکھاں وِچ سنگی اوہ۔ تاں جو اوہدے جلال دے ظاہر ہون دے ویلے بے انت خُوشی کرو۔ جے مسِیح دے ناں دے سببّوں تُہانوں طعنے مِہنے مِلدے نیں تے تُسی مُبارک ہو۔ کیوں جو جلال دا یعنی خُدا دا رُوح تُہاڈے اُتّے رہندا اے۔ تُہاڈے وِچوں کوئی جَنا خُونی یا چور یا بدکار یا ہورناں دے کمّ وِچ دخل دین والا ہو کے دُکھ نا پائے۔ پر جے مسِیحی ہون دے سببّوں کوئی بندہ دُکھ پائے۔ تے نا شرمائے۔ سگوں ایس ناں دے سببّوں خُدا دی وڈیائی کرے۔ کیوں جو اوہ ویلا آ پُجیا اے پئی خُدا دے گھروں عدالت شُروع ہوئے۔ تے جد ساتھوں ای شُروع ہوئے گی تے اوہناں دا کِیہ اوڑک ہوئے گا جیہڑے خُدا دی خُوشخبری نُوں نئیں مَن دے۔ جے راستباز بندے مَساں نجات پان گے تے بے دین تے گُنہگار کِتّھے کھلون گے۔ سو جیہڑے خُدا دی مرضی دے سببّوں دُکھ پاندے نیں اوہ راستبازی نال اپنیاں جاناں وفادار خالق نُوں سونپ دین۔ مَیں اوہناں نُوں نصِیحت کرنا آں جیہڑے تُہاڈے وِچوں بزُرگ نیں اوہناں وانگر بزُرگ تے مَیں وی آں تے مسِیح دے دُکھاں دا گواہ تے ظاہر ہون والے جلال وِچ سنگی آں۔ پئی خُدا دے اوس اِجّڑ دی رکھوالی کرو۔ جیہڑا تُہاڈے وِچ اے۔ لاچاری نال نِگہبانی نا کرو۔ سگوں خُوش ہو کے خُدا دی مرضی نال۔ تے ناجائز نفع واسطے نئیں سگوں دِل دے شَوق نال۔ تے جیہڑے لوک تُہاڈے سپُرد نیں اوہناں اُتّے دابا نا پاؤ سگوں اِجّڑ لئی نمونہ بنو۔ تے جدوں وَڈا آجڑی ظاہر ہوئے گا۔ تے تُہانوں جلال دا اجیہا سِہرا مِلے گا جیہڑا کُملاؤندا نئیں۔ جوانو! تُسی وی بزُرگاں دی تابعیاں وِچ رہو اِک دُوجے دی سیوا واسطے عاجزی نال لکّ بنھیں رکھو۔ ایس لئی پئی خُدا مغرُوراں دا سامنا کر دا اے پر عاجزاں نُوں فضل دیندا اے۔ خُدا دے قُوّت والے ہتّھ دے ہیٹھ رہو تاں جو اوہ تُہانوں ویلے سر اُچّا کرے۔ تے اپنا سارا فِکر اوسے اُتّے سُٹ دیو۔ کیوں جو اوہنوں تُہاڈا فِکر اے۔ تُسی ہوش رکھو تے جاگدے رہو تُہاڈا وَیری ابلیس گرجن والے شیر وانگر لَبّھدا پِھردا اے پئی کِنوں پاڑ کھاواں۔ تُسی اِیمان وِچ پکّے ہو کے اوہدا سامنا کرو۔ کیوں جو تُسی جان دے ہو پئی تُہاڈے بھرا جیہڑے دُنیا وِچ نیں اجیہے ای دُکھ پئے سَہندے نیں۔ ہُن تُہاڈے تھوڑے چِر تِیکر تکلیف سہن دے پِچّھوں جیہڑا سارے فضل دا خُدا اے جِس تُہانوں مسِیح وِچ اپنے سدا دے جلال واسطے سدّیا اے۔ آپ ای تُہانوں کامِل تے قیم تے مضبُوط کرے گا۔ اوڑک تِیکر اوسے دی بادشاہی رہے آمِین۔ مَیں تُہانوں سِلوانُس دی راہِیں جیہڑا میری سمجھ وِچ اِیماندار بھرا اے تھوڑا جِہیا لِکھ کے تُہانوں نصِیحت کِیتی تے ایہہ گواہی دِتّی پئی خُدا دا سَچّا فضل ایہو ای اے۔ ایسے اُتّے قیم رہو۔ اوہ کلِیسیا جیہڑی بابل وِچ تُہاڈے وانگر چُنی ہوئی اے تے میرا پُتر مرقس وی تُہانوں سلام آکھدے نیں۔ مُحبّت نال اِک دُوجے نُوں چُمّ کے سلام آکھو۔ تُہانوں سبھناں نُوں جیہڑے مسِیح وِچ ہو۔ تسلّی مِلدی رہے۔ شمعُون پطرس ولّوں جیہڑا یِسُوع مسِیح دا غلام تے رسُول اے۔ اوہناں لوکاں دے ناں جِنہاں ساڈے خُدا تے نجات دین والے یِسُوع مسِیح دی راستبازی دی راہِیں ساڈے وانگر قِیمتی اِیمان پایا اے۔ خُدا تے ساڈے خُداوند یِسُوع دی پہچان دی راہِیں۔ تُہانوں بُہتا فضل تے تسلّی مِلدی رہے۔ کیوں جو اوہدی اِلہٰی قُدرت نے اوہ سارِیاں شیواں جیہڑیاں زِندگی تے دِینداری دِیاں ہوندیاں نیں سانُوں اوہدی پہچان دی راہِیں دِتّیاں۔ جِس سانُوں اپنے خاص جلال تے نیکی دی راہِیں سدّیا۔ تے اوہناں دی راہِیں اوس ساڈے نال قِیمتی تے بتھیرے وڈّے وعدے کِیتے۔ تاں جو اوہناں دی راہِیں تُسی اوس خرابی توں چُھٹ کے جیہڑی دُنیا وِچ بُری خواہش دے سببّوں اے۔ اوہناں دی راہِیں ذاتِ اِلہٰی وِچ سنگی ہو جاؤ۔ سو ایس کر کے تُسی اپنے ولّوں بڑی کوشش کر کے اپنے اِیمان اُتّے نیکی وَدھاؤ۔ تے نیکی اُتّے عِلم۔ تے عِلم اُتّے پرہیزگاری تے پرہیزگاری اُتّے صبر تے صبر اُتّے دِینداری۔ تے دِینداری اُتّے بھراواں دا پیار۔ تے بھراواں دے پیار اُتّے وی مُحبّت وَدھاؤ۔ کیوں جو جے ایہہ گلّاں تُہاڈے وِچ ہون تے وَدّھ دِیاں جان تے ساڈے خُداوند یِسُوع مسِیح دے پچھانن وِچ تُہانوں بیکار تے بے پَھل نا ہون دین گِئیاں۔ تے جِہدے وِچ ایہہ گلّاں نا ہون اوہ اَنھا تے مَٹّھی نظر والا اے تے اپنے پرانے گُناہ توں پاک ہونا بُھل گیا۔ سو بھراؤ! اپنے بُلاوے تے برگزیدگی نُوں ثابت کرن دی وَدّھ کے کوشش کرو۔ کیوں جو جے تُسی ایس طرح کرو۔ تے کدی وی ٹھیڈا نا کھاؤ گے۔ سگوں ایس توں تُسی ساڈے خُداوند تے نجات دین والے یِسُوع مسِیح دی سدا دی بادشاہی وِچ بڑی عِزّت نال داخل کِیتے جاؤ گے۔ ایس لئی مَیں تُہانوں ایہہ گلّاں یاد دوان نُوں سدا تیار رہاں گا۔ بھانویں تُسی اوہناں نُوں جان دے ہو۔ تے اوس سَچّی گلّ اُتّے قیم ہو جیہڑی تُہانوں مِلی ہوئی اے۔ تے جد تِیکر مَیں ایس تنبُو وِچ آں تُہانوں یاد دوا دوا کے اُبھارنا واجب سمجھنا آں۔ کیوں جو ساڈے خُداوند یِسُوع مسِیح دے دسن نال مَینُوں پتا اے پئی میرے تنبُو دے ڈَھے جان دا ویلا چھیتی آؤن والا اے۔ سو مَیں اجیہی کوشش کراں گا پئی میرے مرن پِچّھوں تُسی ایہناں گلّاں نُوں سدا یاد رکھ سکو۔ کیوں جو جد اساں تُہانوں اپنے خُداوند یِسُوع مسِیح دی قُدرت تے آؤن توں واقف کِیتا سی۔ تاں دھوکھے بازی دِیاں بنائِیاں ہویاں کہانِیاں دی پَیروی نئیں سی کِیتی سگوں آپ ای اوہدی مَہما نُوں ویکھیاں سی۔ پئی اوس خُدا باپ اوس ویلے عِزّت تے جلال پایا جد اوس بڑے جلال وِچوں اوہنوں ایہہ اواز آئی پئی ایہہ میرا پیارا پُتر اے جِہدے توں مَیں خُوش آں۔ تے جدوں اسی اوہدے نال پاک پہاڑ اُتّے ساں۔ تے اسمانوں ایہہ اواز آؤندی سُنی۔ تے ساڈے کول نبیاں دا اوہ کلام اے جیہڑا وَدّھ اعتبار والا اے۔ تے تُسی چَنگا کر دے ہو جو ایہہ سمجھ کے اوہدے اُتّے دھیان کر دے ہو پئی اوہ اِک دِیوا اے۔ جیہڑا ہنیرے تھاں وِچ چانن کر دا اے۔ جد تِیکر دِن نا چڑھے تے صُبح دا ستارہ تُہاڈے دِلاں وِچ نا چمکے۔ تے پہلاں ایہہ جان لو پئی پاک کتاب دی کِسے نبُوّت دا بیان کِسے دے ذاتی اختیار وِچ نئیں۔ کیوں جو کوئی نبُوّت بندیاں دی مرضی نال نئیں ہوئی سگوں بندے پاک رُوح دی جُنبش نال خُدا ولّوں بولدے سن۔ تے جیویں اوس اُمّت وِچ جُھوٹھے نبی اُٹھے سن ایسے طرح تُہاڈے وِچ وی جُھوٹھے اُستاد ہون گے جیہڑے لُک چُھپ کے ہلاک کرن والِیاں بِدعتاں کڈھن گے۔ تے اوس مالک دا اِنکار کرن گے جِس اوہناں نُوں مُل لیا سی تے اپنے آپ نُوں شتابی ہلاکت وِچ سُٹّن گے۔ تے بتھیرے اوہناں دے لُچ پُنے مگر ٹُرن گے جِنہاں دے سبّب سچیائی دے راہ دی بدنامی ہوئے گی۔ تے اوہ لالچ نال داء والیاں گلّاں بنا کے تُہانوں ویچ چھڈن گے۔ تے جیہڑا مُڈھوں اوہناں دی سزا دا حُکم ہوگیا اے۔ اوہدے آؤن وِچ کوئی چِر نئیں تے اوہناں دی ہلاکت سَوندی نئیں۔ کیوں جو جد خُدا گُناہ کرن والیاں فرِشتیاں نُوں نا چھڈیا۔ سگوں جہنّم وِچ گھل کے ہنیرے کُھوہ وِچ سُٹّیا۔ تاں جو عدالت دے دِن تِیکر ڈَکے رہن۔ تے نا پہلی دُنیا نُوں چھڈیا سگوں جِس ویلے بے دِین دُنیا اُتّے طوفان گھلّیا راستبازی دی منادی کرن والے نُوح نُوں ہور ستّاں بندیاں سَنے بچا لیا۔ تے سدُوم تے عمُورہ دے شہراں نُوں خاک سیاہ کر دِتّا۔ تے اوہناں نُوں ہلاکت دی سزا دِتّی تے آؤن والے زمانے دے بے دِیناں لئی اِک مِثال قیم کر دِتّی۔ تے سَچیار لُوط نُوں جیہڑا بے دِیناں دے پلِیت چال چَلّن توں اَکیّا ہویا سی خلاصی بخشی۔ (تے اوہ سَچیار اوہناں وِچ رہ کے تے اوہناں دے بے شریعت کمّ ویکھدا تے سُندا ہوندا سی۔ روز اوہدا راستباز دِل اَوکھا ہوندا سی۔) تے خُداوند دِینداراں نُوں ازمایش وِچوں کڈھ لینا تے بدکاراں نُوں عدالت دے دِن تِیکر سزا وِچ رکھنا جان دا اے۔ خاص کر اوہناں نُوں جیہڑے پلِیت خواہشاں نال جِسم دی پَیروی کر دے نیں۔ تے حکُومت نُوں کُجھ نئیں جان دے تے۔ اوہ گُستاخ تے اَڑی کرن والے نیں تے عِزّت والیاں نُوں طعنے مِہنے مارن توں نئیں ڈر دے۔ پر فرِشتے جیہڑے طاقت تے قُدرت وِچ اوہناں نالوں وڈّے نیں خُداوند دے سامھنے اوہناں اُتّے طعنے مار کے نالش نئیں کر دے۔ سگوں ایہہ لوک بے عقل جنَوراں وانگر نیں جیہڑے پھڑے جان تے ہلاک ہون لئی پَیدا ہوئے نیں۔ جِنہاں گلّاں توں ناواقِف نیں اوہناں دی بابت ہورناں نُوں طعنے مِہنے دیندے نیں۔ پر اپنی خرابی وِچ آپ ای خراب کِیتے جان گے۔ دُوجیاں دا بُرا کرن دے بدلے ایہناں ای دا بُرا ہوئے گا۔ ایہناں نُوں دِن دِہاڑے عیاشی کرن وِچ سواد آؤندا اے۔ ایہہ داغ تے عیب نیں۔ جدوں تُہاڈے نال کھاندے پِیندے نیں تے اپنے ولّوں مُحبّت دی ضیافت کر کے عَیش تے عشرت کر دے نیں۔ اوہناں دِیاں اَکھّیاں جِنہاں وِچ زناکار عَورتاں وسِیاں ہویاں نیں گُناہ توں رُک نئیں سکدِیاں۔ اوہ ڈانواں ڈول دِلاں نُوں پھساندے نیں اوہناں دا دِل لالچ نال بھریا ہویا اے اوہ لعنت دی اولاد نیں۔ اوہ سِدّھا راہ چھڈ کے بدراہ ہوگئے نیں۔ تے بعُور دے پُتر بِلعام دے راہ اُتّے ٹُرے جِس ناراستی دی مزدُوری نُوں پیارا جانیا۔ پر اپنے قصور اُتّوں جِھڑکیا گیا۔ پئی اِک بے زبان کھوتی بندے وانگر بول کے ایس نبی نُوں احمق پُنے توں موڑیا۔ اوہ اَنھے کُھوہ نیں تے اجیہے بدّل جِنہاں نُوں ہنیری اُڈا دیندی اے۔ اوہناں لئی بے حد ہنیرا رکھیا ہویا اے۔ اوہ مغرُوری دِیاں واہیات گلّاں بَک بَک کے لُچ پُنے دی راہِیں اوہناں لوکاں نُوں جِسمانی خواہشاں وِچ پھساندے نیں جیہڑے بدراہاں وِچوں مَساں مَساں پئے نِکلدے نیں۔ اوہ اوہناں نال تے اَزادی دا وعدہ کر دے نیں تے آپی خرابی دے غلام بنے ہوئے نیں۔ ایس لئی پئی بندے اُتّے جِہدا دابا اے اوہ اوہدا غلام اے۔ تے جد اوہ خُداوند تے نجات دین والے یِسُوع مسِیح دی پہچان دے سببّوں دُنیاوی پلِیتی توں چُھٹ کے فیر اوہدے وِچ پَھسے تے دَبّ گھتّے تے اوہناں دا چھیکڑلا حال پہلاں نالوں بُرا ہویا۔ کیوں جو راستبازی دے راہ دا نا جاننا اوہناں دے لئی ایہدے توں چَنگا ہوندا۔ پئی اوہنوں جان کے اوس پاک حُکم توں پھر جاندے جیہڑا اوہناں نُوں مِلیا سی۔ اوہناں اُتّے ایہہ سَچّی مِثال ٹھیک آؤندی اے۔ پئی کُتّا اپنی قَے ولّ پرتدا اے۔ تے نہاتی ہوئی سُؤرنی چِکڑ وِچ فیر لیٹن لگ پَیندی اے۔ پیاریو! ہُن مَیں ایہہ دُوجا خط تُہانوں لِکھنا آں تے یاد دوان لئی دوہاں خطاں توں تُہاڈے صاف دِلاں نُوں جوش دوانا آں۔ پئی تُسی اوہناں گلّاں نُوں جیہڑیاں پاک نبیاں پہلاں آکھیاں نیں تے خُداوند تے نجات دین والے دے اوس حُکم نُوں یاد رکھو۔ جیہڑا تُہاڈے رسُولاں دی راہِیں آیا سی۔ تے ایہہ پہلاں جان لوؤ پئی اخِیری دِناں وِچ اجیہے مخَولئے آؤن گے۔ جیہڑے اپنیاں خواہشاں دے سببّوں ٹُرن گے۔ تے آکھن گے پئی اوہدے آؤن دا وعدہ کِتّھے گیا؟ کیوں جو جدوں توں پئیو دادے سَوں گئے نیں اوس ویلے توں ہُن تِیکر سبھ کُجھ اوسے طرح ای اے۔ جیویں خلقت دے شُروع توں سی۔ اوہ تے جان بُجھ کے بُھل جاندے نیں پئی خُدا دے کلام دی راہِیں اسمان پرانیاں زمانیاں توں نیں۔ تے زمین پانی وِچ بنی تے پانی وِچ قیم اے۔ ایہناں دے سبّب اوس ویلے دی دُنیا ڈُب کے ہلاک ہوئی۔ سگوں ایس ویلے دے اسمان تے زمین اوسے کلام دی راہِیں ایس لئی رکھّے ہوئے نیں پئی ساڑے جان تے اوہ بے دِین بندیاں دی عدالت تے ہلاکت دے دِن تِیکر سانبھے رہن گے۔ پیاریو! ایہہ گلّ نا بُھلو۔ پئی خُداوند دے اگّے اِک دِن ہزار ورھے جِہیا اے۔ تے ہزار وَرھا اِک دِن جِہیا اے۔ خُداوند اپنے وعدے وِچ چِر نئیں لاندا جیویں بعضے سمجھدے نیں۔ سگوں تُہاڈی بابت صبر کر دا اے۔ ایس لئی پئی اوہ کِسے دی ہلاکت نئیں چاہندا۔ سگوں ایہہ چاہندا اے۔ پئی سارے تَوبہ کرن۔ پر خُداوند دا دِن چور وانگر آوے گا۔ اوس دِن اسمان بڑے شور نال برباد ہو جان گے۔ تے عناصر ڈاہڈی گرمی نال پِگھر جان گے۔ تے زمین تے اوہدے کمّ سڑ جان گے۔ جد ایہہ سارِیاں شیواں ایس طرح پگھرن والِیاں نیں تے تُہانوں پاک چال چَلّن تے دِینداری وِچ کیہو جِہیا ہونا چاہیدا اے۔ تے خُدا دے اوس دِن دے آؤن دی چاہ تے اوڈِیک کِنی چاہیدی اے۔ جِہدے سبّب اسمان اَگ نال پِگھر جان گے تے عناصر ڈاہڈی گرمی نال گلّ جان گے۔ پر اوہدے وعدے دے سببّوں اسی نَوِیں اسمان تے نَوِیں زمین دی اوڈِیک وِچ آں جِہدے وِچ راستبازی وَسدی اے۔ سو پیاریو! ایس کر کے پئی تُسی ایہناں گلّاں دی اوڈِیک وِچ ہو اوہدے اگّے تسلّی دی حالت وِچ بِناں داغ تے بے عیب ہون دی کوشش کرو۔ تے ساڈے خُداوند دے صبر نُوں نجات سمجھو جیویں ساڈے پیارے بھرا پَولُس وی اوس حِکمت دے سببّوں جیہڑی اوہنوں مِلی تُہانوں لِکھیا اے۔ تے اپنے ساریاں خطاں وِچ ایہناں گلّاں دا ذِکر کِیتا اے۔ جِنہاں وِچ کئی گلّاں اجیہاں نیں جِنہاں دا سمجھنا مُشکل اے تے جاہل تے ڈانواں ڈول لوک اوہناں دے مطلب نُوں وی ہورناں صحِیفیاں وانگر کھِچّ کھِچّ کے اپنے لئی ہلاکت پَیدا کر دے نیں۔ سو پیاریو! ایس کر کے پئی تُسی ایہناں گلّاں نُوں اگیترے جان دے ہو۔ خبردار ہو تاں جو بے دِیناں وی بد راہی ولّ کھِچّے جا کے اپنی پُختیائی چھڈ نا دیو۔ سگوں ساڈے خُداوند تے نجات دین والے یِسُوع مسِیح دے فضل تے پہچان وِچ وَدھدے جاؤ۔ اوسے دا جلال ہُن وی ہوئے۔ تے سدا تِیکر رہے۔ آمِین۔ اوس زِندگی دے کلام دی بابت جیہڑا مُڈھوں سی۔ تے جِہنُوں اساں سُنیا تے اپنیاں اَکھّیاں نال ویکھیا۔ سگوں چنگی طرح ویکھیا۔ تے اپنیاں ہتّھاں نال چُھوئیا۔ (ایہہ زِندگی ظاہر ہوئی تے اساں اوہنوں ویکھیا۔ تے اوہدے اُتّے گواہی دینے آں۔ تے اوسے سدا دی زِندگی دی تُہانوں خبر دینے آں۔ جیہڑی باپ دے نال سی۔ تے ساڈے اُتّے ظاہر ہوئی۔) جو کُجھ اساں ویکھیا تے سُنیا اے۔ تُہانوں وی اوہ دسنے آں۔ تاں جو تُسی وی ساڈے نال سنگت رکھو۔ تے ساڈی سنگت باپ دے نال تے اوہدے پُتر یِسُوع مسِیح دے نال اے۔ تے ایہہ گلّاں اسی ایس لئی لکھنے آں پئی ساڈی خُوشی پُوری ہو جائے۔ جیہڑا سنیہا اسی اوہدے کولوں سُن کے تُہانوں دینے آں اوہ ایہہ اے۔ پئی خُدا چانن اے تے اوہدے وِچ کُجھ وی ہنیرا نئیں۔ جے اسی آکھنے آں پئی ساڈی اوہدے نال سنگت اے تے فیر ہنیرے وِچ ٹُر نیں آں تے اسی جُھوٹھے آں تے سچیائی اُتّے عمل نئیں کر دے۔ پر جے اسی چانن وِچ ٹُر نیں آں۔ جیویں اوہ چانن وِچ اے تے ساڈی آپو وِچ سنگت اے تے اوہدے پُتر یِسُوع مسِیح دا لہو سانُوں ساریاں گُناہاں توں پاک کر دا اے۔ جے اسی آکھیئے پئی ساڈے وِچ گُناہ نئیں تے اسی اپنے آپ نُوں دھوکھا دینے آں تے ساڈے وِچ سچیائی نئیں۔ جے اپنے گُناہ مَن لَئے تے اوہ ساڈے گُناہ مُعاف کرن۔ تے سانُوں ساری بُریائی توں پاک کرن وِچ سَچّا تے نیائِیں اے۔ جے آکھئے پئی اساں گُناہ نئیں کِیتا۔ تے اوہنوں جُھوٹھا بنانے آں۔ تے اوہدا کلام ساڈے وِچ نئیں۔ بچّیو! ایہہ گلّاں مَیں تُہانوں ایس لئی لِکھنا آں۔ پئی تُسی گُناہ نا کرو۔ تے جے کوئی گُناہ کرے تے باپ دے کول ساڈا اِک مددگار رہندا اے۔ تے اوہ یِسُوع مسِیح اے جیہڑا راستباز اے۔ تے اوہ ساڈے گُناہاں دا کفّارہ اے۔ تے نِرے ساڈیاں دا ای نئیں سگوں ساری دُنیا دا وی۔ جے اسی اوہدے حُکماں نُوں منیئے تے سانُوں پتا لگدا اے۔ پئی اسی اوہنوں جاننے آں۔ جیہڑا ایہہ آکھدا اے پئی مَیں اوہنوں جاننا آں تے اوہدے حُکماں نُوں نئیں مَندا اوہ جُھوٹھا اے تے اوہدے وِچ سچیائی نئیں۔ آں جیہڑا اوہدے کلام نُوں مَندا اے۔ سَچّی مُچّی اوہدے وِچ خُدا دی مُحبّت پُوری ہوگئی اے ایس توں پتا لگدا اے۔ پئی اسی اوہدے وِچ آں۔ جیہڑا ایہہ آکھدا اے۔ پئی مَیں اوہدے وِچ رہنا آں۔ تے اوہنوں اوسے طرح ٹُرناں چاہیدا اے۔ جیویں اوہ ٹُردا ہوندا سی۔ پیاریو۔ مَیں تُہانوں کوئی نواں حُکم نئیں لِکھدا۔ سگوں اوہ ای پرانا حُکم جیہڑا مُڈھوں تُہانوں مِلیا سی۔ ایہہ پرانا حُکم اوہ ای کلام اے جیہڑا تُساں سُنیا سی۔ فیر تُہانوں اِک نواں حُکم لِکھناں آں۔ تے ایہہ گلّ اوہدے اُتّے تے تُہاڈے اُتّے ٹھیک آؤندی اے۔ کیوں جو ہنیرا ہَٹ دا جاندا اے تے سَچّا چانن چمکن لگ پیا اے۔ جیہڑا ایہہ آکھدا اے۔ پئی مَیں چانن وِچ آں تے اپنے بھرا نال وَیر رکھدا اے اوہ اجے تِیکر ہنیرے وِچ ای رہندا اے۔ تے جیہڑا اپنے بھرا نال مُحبّت رکھدا اے اوہ چانن وِچ رہندا اے تے اوہدے وِچ تے اوہنوں ٹھیڈا نئیں لگدا۔ پر جیہڑا اپنے بھرا نال وَیر رکھدا اے اوہ ہنیرے وِچ ای اے۔ تے ہنیرے وِچ ٹُردا اے۔ تے اوہنوں پتا نئیں پئی مَیں کِتّھے لگا جاناں آں کیوں جو ہنیرے اوہدیاں اَکھّیاں اَنھیاں کر چھڈیاں نیں۔ بچّیو! مَیں تُہانوں ایس کر کے لِکھنا آں۔ پئی اوہدے ناں سببّوں تُہاڈے گُناہ مُعاف ہوئے ہوئے نیں۔ بزُرگو۔ مَیں تُہانوں ایس کر کے لِکھنا آں۔ پئی جیہڑا مُڈھوں اے اوہنوں تُسی جان دے ہو۔ جوانو۔ مَیں تُہانوں ایس کر کے لِکھنا آں پئی تُساں شریر نُوں جِت لیا اے۔ مُنڈیو۔ مَیں تُہانوں ایس کر کے لِکھیا اے۔ پئی تُسی باپ نُوں جان دے ہو۔ بزُرگو۔ مَیں تُہانوں ایس کر کے لِکھیا اے۔ پئی جیہڑا مُڈھوں اے۔ اوہنوں تُسی جان گئے ہو۔ جوانو۔ مَیں تُہانوں ایس کر کے لِکھیا اے۔ پئی تُسی تگڑے ہو۔ تے خُدا دا کلام تُہاڈے وِچ رہندا اے۔ تے تُساں شریر نُوں جِت لیا اے۔ نا دُنیا نال مُحبّت رکھو۔ نا اوہناں شیواں نال جیہڑیاں دُنیا وِچ نیں۔ جیہڑا دُنیا نال مُحبّت رکھدا اے۔ اوہدے وِچ باپ دی مُحبّت نئیں۔ کیوں جو دُنیا وِچ جیہڑیاں شیواں نیں یعنی جِسم دی خواہش تے اَکھّیاں دی خواہش تے زِندگی دی شیخی اوہ باپ ولّوں نئیں سگوں دُنیا ولّوں نیں۔ دُنیا تے اوہدی خواہش ٹل جان گِئیاں پر جیہڑا خُدا دی مرضی اُتّے ٹُردا اے اوہ سدا تِیکر رہندا اے۔ مُنڈیو۔ ایہہ چھیکڑلا ویلا اے تے جِہیا تُساں سُنیا اے۔ پئی مسِیح دا وَیری آؤن والا اے سو ہُن وی مسِیح دے بتھیرے وَیری اُٹھ کھلوتے نیں۔ ایس توں اسی جاننے آں پئی ایہہ اخِیری ویلا اے۔ نِکلے تے اوہ ساڈے وِچوں ای سن۔ پر ساڈے نئیں سن۔ ایس لئی پئی جے اوہ ساڈے ہوندے تے ساڈے نال رہندے پر ایس لئی نِکل گئے تاں جو پَتا لگ جائے۔ پئی اوہ سارے ساڈے نئیں۔ پر تُسی اوس قُدُّوس ولّوں مسَح کِیتے گئے ہو۔ تے تُسی سبھو کُجھ جان دے ہو۔ مَیں تُہانوں ایس کر کے نئیں لِکھیا۔ پئی تُسی سچیائی نُوں نئیں جاندے سگوں ایس کر کے پئی تُسی اوہنوں جان دے ہو۔ تے ایس لئی پئی کوئی جُھوٹھ سچیائی ولّوں نئیں۔ جیہڑا یِسُوع دے مسِیح ہون توں مُکّر دا اے۔ اوہدے سِوا ہور کون جُھوٹھا اے؟ مسِیح دا وَیری اوہو ای اے۔ جیہڑا باپ تے پُتر توں مُکّر دا اے۔ جیہڑا پُتر توں مُکّر دا اے۔ اوہدے کول باپ وی نئیں۔ جیہڑا پُتر نُوں مَندا اے۔ اوہدے کول باپ وی اے۔ جیہڑی گلّ تُساں مُڈھوں سُنی اے اوہ ای تُہاڈے وِچ رہے تے جیہڑی گلّ مُڈھوں تُساں سُنی اے جے اوہ تُہاڈے وِچ رہے۔ تے تُسی وی پُتر تے باپ وِچ رہو گے۔ تے جیہڑی گلّ دا اوس ساڈے نال وعدہ کِیتا اے اوہ سدا دی زِندگی اے۔ مَیں ایہہ گلّاں تُہانوں اوہناں لوکاں دی بابت لِکھیاں نیں جیہڑے تُہانوں فریب دیندے نیں۔ تے تُہاڈا اوہ مسَح جیہڑا اوہدے ولّوں کِیتا گیا تُہاڈے وِچ قیم رہندا اے۔ تے تُہانوں ایس گلّ دی لوڑ نئیں۔ پئی کوئی تُہانوں سِکھائے۔ سگوں جیویں اوہ مسَح جیہڑا اوہدے ولّوں تُہاڈے اُتّے کِیتا گیا۔ تُہانوں سارِیاں گلّاں سِکھالدا اے تے سَچّا اے۔ تے جُھوٹھا نئیں تے جیویں اوس تُہانوں سکھایا اے۔ اوسے طرح اوہدے وِچ قیم رہو۔ سو بچّیو! اوہدے وِچ قیم رہو۔ تاں جو اوہدے ظاہر ہون دے ویلے سانُوں دلیری ہوئے۔ تے اوہدے آؤن دے ویلے اوہدے اگّے سانُوں نموشی نا ہوئے۔ جے تُسی ایہہ جان دے ہو۔ پئی اوہ راستباز اے تے ایہہ وی جان دے ہو۔ پئی جیہڑا راستبازی کر دا اے۔ اوہ اوہدے توں جمّیا اے۔ ویکھو باپ ساڈے نال کیڈی مُحبّت کِیتی اے۔ پئی اسی خُدا دے پُتر اکھوایئے تے اسی ہاں وی۔ دُنیا سانُوں ایس لئی نئیں جاندی پئی اساں اوہنوں نئیں جانیا۔ پیاریو! اسی ہُن خُدا دے پُتر آں۔ تے اجے تِیکر ایہہ ظاہر وی نئیں ہویا پئی کِیہ ہوواں گے۔ اَیناں جاننے آں پئی جدوں اوہ ظاہر ہوئے گا۔ تے اسی وی اوہدے وانگر ہوواں گے۔ کیوں جو جِہا اوہ ہے تِہا ای اوہنوں ویکھاں گے۔ تے جیہڑا اوہدے توں ایہہ آس رکھدا اے اپنے آپ نُوں تِہا ای پاک کر دا اے۔ جِہیو جِہیا اوہ پاک اے۔ جیہڑا گُناہ کر دا اے اوہ شریعت دے اُلٹ کر دا اے تے گُناہ شریعت دا اُلٹ اے۔ تے تُسی جان دے ہو۔ پئی اوہ ایس لئی ظاہر ہویا پئی گُناہ نُوں چُک لے جائے تے اوہدی ذات وِچ گُناہ نئیں۔ جیہڑا اوہدے وِچ رہندا اے اوہ گُناہ نئیں کر دا۔ جیہڑا گُناہ کر دا اے اوس اوہنوں نئیں ویکھیا تے نا اوہنوں جان دا اے۔ بچّیو۔ کوئی تُہانوں فریب نا دے۔ جیہڑا نیکی دے کمّ کر دا اے اوہ ای اوہدے وانگُوں راستباز اے۔ جیہڑا بندہ گُناہ کر دا اے۔ ابلیس ولّوں اے کیوں جو ابلیس مُڈھوں ای گُناہ کر دا اے۔ ایسے واسطے خُدا دا پُتر ظاہر ہویا۔ پئی ابلیس دے کمّاں دا ناس کرے۔ جیہڑا خُدا توں جمّیا اے۔ اوہ گُناہ نئیں کر دا۔ کیوں جو اوہدا بی اوہدے وِچ رہندا اے سگوں اوہ گُناہ کر ای نئیں سکدا کیوں جو اوہ خُدا توں جمّیا ہویا اے۔ ایسے توں خُدا دے پُتر تے ابلیس دے پُتر ظاہر ہوندے نیں۔ جیہڑا راستبازی نئیں کر دا اوہ خُدا توں نئیں تے اوہ وی خُدا توں نئیں جیہڑا اپنے بھرا نال مُحبّت نئیں رکھدا۔ کیوں جو جیہڑا سنیہا تُساں مُڈھوں سُنیا اوہ ایہہ اے پئی اسی اِک دُوجے نال مُحبّت رکھیے۔ تے قائن وانگر نا بنِئے۔ جیہڑا شریر ولّوں سی تے جِس اپنے بھرا نُوں مار چھڈیا سی تے اوس کِس کر کے اوہنوں مار چھڈیا سی؟ پئی اوہدے اپنے ای کمّ بَھیڑے سن تے بھرا دے کمّ راستباز سن۔ بھراؤ! جے دُنیا تُہاڈے نال وَیر رکھدی اے۔ تے حَیران نا ہوؤ۔ ایس کر کے سانُوں پتا اے۔ پئی اسی مَوت وِچوں نِکل کے زِندگی وِچ آئے ہوئے آں۔ کیوں جو اسی بھرا نُوں نال مُحبّت کرنے آں۔ جیہڑا مُحبّت نئیں کر دا اوہ مَوت وِچ رہندا اے۔ جیہڑا اپنے بھرا نال وَیر رکھدا اے اوہ خُونی اے۔ تے تُسی جان دے ہو پئی کِسے خُونی وِچ سدا دی زِندگی نئیں ہوندی۔ اساں مُحبّت نُوں ایتھوں ای پہچانیا اے۔ پئی اوس ساڈے لئی جان دے دِتّی تے سانُوں وی بھرا نُوں لئی جان دینی چاہیدی اے۔ پر جِہدے کول دُنیا دا مال اے تے اوہ اپنے بھرا نُوں کنگال ویکھ کے اوہدے اُتّے ترس نئیں کر دا۔ تے اوہدے وِچ خُدا دی مُحبّت کِتّھے رہندی اے؟ بچّیو! اسی گلّاں دی تے زبان دی مُحبّت نا کریئے۔ سگوں عمل تے سچیائی دی مُحبّت کریئے۔ ایس توں سانُوں پَتا لگ جائے گا پئی سچیائی دے آں۔ تے جیہڑی گلّ دا الزام ساڈے اُتّے ساڈا دِل لائے گا اوہدے اگّے سانُوں اوسے گلّ دا پَکّ ہوئے گا۔ کیوں جو خُدا ساڈے دِل نالوں وَڈا اے۔ تے سبھو کُجھ جان دا اے۔ پیاریو۔ جے ساڈا دِل ساڈے اُتّے الزام نئیں لاندا تے سانُوں خُدا اگّے حَوصلہ ہو جاندا اے۔ تاں جو کُجھ اسی منگنے آں سو اوہدے ولّوں سانُوں مِلدا اے کیوں جو اسی اوہدے حُکماں نُوں مَنّنے آں تاں جو کُجھ اوہنوں پسند آؤندا اے اوہو ای کرنے آں۔ اوہدا حُکم ایہہ اے پئی اسی اوہدے پُتر یِسُوع مسِیح دے ناں اُتّے اِیمان لیاوے تے جِہیا اوس سانُوں حُکم دِتّا اے تہیا اِک دُوجے نال مُحبّت کریئے۔ تے جیہڑا اوہدے حُکماں نُوں مَندا اے اوہ ایہدے وِچ رہندا اے۔ تے ایہہ اوہدے وِچ۔ تے اوس رُوح توں جیہڑا اوس سانُوں دِتّا اے اسی جاننے آں پئی اوہ ساڈے وِچ رہندا اے۔ پیاریو۔ سارِیاں رُوحاں نُوں نا مَنّو۔ سگوں رُوحاں نُوں پر کھو پئی خُدا ولّوں نیں کہ نئیں۔ کیوں جو بتھیرے جُھوٹھے نبی دُنیا وِچ نِکل گئے نیں۔ خُدا دے رُوح نُوں تُسی ایس طرح پچھان سکدے ہو۔ پئی جیہڑی رُوح اِقرار کر دی اے پئی یِسُوع مسِیح جِسم وِچ ہو کے آیا اوہ خُدا ولّوں اے۔ تے جیہڑی رُوح یِسُوع دا اِقرار نا کرے اوہ خُدا ولّوں نئیں۔ تے ایہو ای مسِیح دے وَیری دی رُوح اے۔ جِہدی خبر تُساں سُن لئی اے۔ پئی آؤن والی اے۔ سگوں ہُن وی دُنیا وِچ اے۔ بچّیو! تُسی خُدا ولّوں ہو تے تُساں اوہناں نُوں جِت لیا اے کیوں جو جیہڑا تُہاڈے وِچ اے اوہ اوہدے نالوں وَڈا اے جیہڑا دُنیا وِچ اے۔ اوہ دُنیا وِچوں نیں ایس واسطے دُنیا وانگر بولدے نیں۔ تے دُنیا اوہناں دی سُندی اے۔ اسی خُدا ولّوں آں۔ جیہڑا خُدا نُوں جان دا اے اوہ ساڈی سُندا اے۔ جیہڑا خُدا ولّوں نئیں اوہ ساڈی نئیں سُندا۔ ایسے توں اسی سچیائی دی رُوح تے بدراہی دی رُوح نُوں پچھان لینے آں۔ پیاریو! اسی اِک دُوجے نُوں مُحبّت کریئے۔ کیوں جو مُحبّت خُدا ولّوں اے تے جیہڑا مُحبّت کر دا اے اوہ خُدا توں جمّیا اے تے خُدا نُوں جان دا اے۔ جیہڑا مُحبّت نئیں کر دا اوہ خُدا نُوں نئیں جان دا کیوں جو خُدا مُحبّت اے۔ ایتھوں ساڈے نال خُدا دی مُحبّت جاپدی اے۔ پئی خُدا اپنے اِکلَوتے پُتر نُوں دُنیا وِچ گھلّیا اے۔ پئی اسی اوہدی راہِیں جِیوندے رہئے۔ مُحبّت ایہدے وِچ نئیں۔ پئی اساں خُدا نال مُحبّت کِیتی سگوں ایہدے وِچ اے پئی اوس ساڈے نال مُحبّت کِیتی تے ساڈے گُناہاں دے کفّارے لئی اپنے پُتر نُوں گھلّیا۔ پیاریو۔ جد خُدا ساڈے نال اجیہی مُحبّت کِیتی۔ تے سانُوں وی اِک دُوجے نال مُحبّت کرنی چاہیدی اے۔ خُدا نُوں کَدے کِسے نئیں ویکھیا۔ جے اسی اِک دُوجے نُوں مُحبّت کرنے آں۔ تے خُدا ساڈے وِچ رہندا اے۔ تے اوہدی مُحبّت ساڈیاں دِلاں وِچ پُوری ہوندی اے۔ ایس گلّ توں پئی اوہ سانُوں اپنے رُوح وِچوں دیندا اے اسی جاننے آں۔ پئی اسی اوہدے وِچ رہنے آں تے اوہ ساڈے وِچ۔ تے اساں ویکھ لیا اے تے گواہی دینے آں پئی باپ پُتر نُوں دُنیا دا نجات دین والا ہون واسطے گھلّیا۔ جیہڑا مَندا اے پئی یِسُوع خُدا دا پُتر اے خُدا اوہدے وِچ تے اوہ خُدا وِچ رہندا اے۔ جیہڑی مُحبّت خُدا دی ساڈے نال اے اوہنوں اساں جانیا اے تے اوہدے اُتّے ساڈا اِیمان اے۔ خُدا مُحبّت اے۔ تے جیہڑا مُحبّت وِچ رہندا اے اوہ خُدا وِچ رہندا اے۔ تے خُدا اوہدے وِچ رہندا اے۔ ایس کر کے مُحبّت ساڈے وِچ پُوری ہوندی اے۔ پئی سانُوں عدالت دے دِن حَوصلہ ہوئے۔ کیوں جو جِہیا اوہ اے۔ تہے دُنیا وِچ اسی وی آں۔ مُحبّت وِچ ڈر نئیں ہوندا۔ سگوں پُوری مُحبّت ڈر نُوں کڈھ دیندی اے۔ کیوں جو ڈر توں دُکھ ہوندا اے۔ تے کوئی ڈرن والا مُحبّت وِچ پُورا نئیں ہویا۔ اسی ایس لئی مُحبّت کرنے آں پئی پہلا اوس ساڈے نال مُحبّت کِیتی۔ جے کوئی آکھے پئی مَیں خُدا نال مُحبّت کرنا آں تے اوہ اپنے بھرا نال وَیر رکھّے اوہ جُھوٹھا اے کیوں جو جیہڑا اپنے بھرا نال جِہنُوں اوس ویکھیا اے مُحبّت نئیں کر دا اوہ خُدا نال وی جِہنُوں اوس نئیں ویکھیا مُحبّت نئیں کر سکدا۔ تے سانُوں اوہدے ولّوں ایہہ حُکم مِلیا اے پئی جیہڑا خُدا نال مُحبّت رکھدا اے اوہ اپنے بھرا نال وی مُحبّت رکھّے۔ جِہدا اِیمان اے۔ پئی یِسُوع ای مسِیح اے۔ اوہ خُدا توں جمّیا اے۔ تے جیہڑا کوئی جمان والے نال مُحبّت کر دا اے۔ اوہ اوہدے جمّیاں نال وی مُحبّت کر دا اے۔ جدوں اسی خُدا دے نال مُحبّت کرنے آں۔ تے اوہدے حُکماں نُوں پُوریاں کرنے آں تے اوہدے توں معلُوم ہوندا اے۔ پئی خُدا دے پُتراں نال وی مُحبّت کرنے آں۔ تے خُدا دی مُحبّت ایہہ اے پئی اسی اوہدے حُکماں نُوں پُوریاں کریئے۔ تے اوہدے حُکم اَوکھے نئیں۔ جیہڑا خُدا توں جمّیا ہویا اے اوہ دُنیا نُوں جِت لَیندا اے۔ تے اوہ فتح جِہدے نال دُنیا جِتّی گئی اے ساڈا اِیمان اے۔ اوس بندے دے سِوا جِہدا اِیمان اے پئی یِسُوع خُدا دا پُتر اے۔ دُنیا نُوں جتن والا کون اے؟ ایہہ اوہ اے جیہڑا پانی تے لہو دوہاں دی راہِیں آیا سی یعنی یِسُوع مسِیح نِرا پانی دے راہِیں نئیں۔ سگوں پانی تے لہو دو آں دی راہِیں۔ تے رُوح ای گواہی دین والا اے۔ کیوں جو رُوح سچیائی اے۔ تے گواہی دین والے تَرے نیں رُوح تے پانی تے لہو تے ایہہ تَرے اِکّو گلّ وِچ رَلدے نیں۔ جے اسی بندیاں دی گواہی منظُور کر لینے آں تے خُدا دی گواہی اودُوں وڈّی اے تے خُدا دی گواہی ایہہ اے۔ پئی اوس اپنے پُتر دے حق وِچ گواہی دِتّی اے۔ جیہڑا خُدا دے پُتر اُتّے اِیمان لیاؤندا اے گواہی اوہدے وِچ ای اے تے جِس خُدا دی گواہی نئیں مَنّی اوس اوہنوں جُھوٹھا بنایا۔ کیوں جو اوس گواہی اُتّے جیہڑی خُدا اپنے پُتر دی بابت دِتّی اوہنے اِیمان نئیں لیاندا۔ تے اوہ گواہی ایہہ اے۔ پئی خُدا سانُوں سدا دی زِندگی دِتّی اے۔ تے ایہہ زِندگی اوہدے پُتر وِچ اے۔ جِہدے کول پُتر اے اوہدے کول زِندگی اے۔ تے جِہدے کول خُدا دا پُتر نئیں اوہدے کول زِندگی وی نئیں۔ مَیں تُہانوں جیہڑے خُدا دے پُتر دے ناں اُتّے اِیمان لیائے ہو ایہہ گلّاں ایس لئی لِکھیاں۔ پئی تُہانوں پتا ہوئے پئی سدا دی زِندگی تُہانوں مِلی اے۔ تے اوہدے اگّے ساڈا ایہو ای حَوصلہ اے۔ پئی جے اوہدی مرضی دے سببّوں کُجھ منگِئے اوہ ساڈی سُندا اے۔ تے جے اسی جاننے آں پئی جو کُجھ اساں منگیا اے اوہ ساڈی سُندا اے۔ تے ایہہ وی جاننے آں پئی جو کُجھ اساں اوہدے کولوں منگیا اے اساں لَبّھ لیا اے۔ جے کوئی اپنے بھرا نُوں اجیہا گُناہ کر دیاں ویکھے جِہدا انت مَوت نا ہوئے تے دُعا منگے خُدا اوہدی راہِیں اوہناں لوکاں نُوں زِندگی دیوے گا جِنہاں اجیہا گُناہ نئیں کِیتا جِہدا انت مَوت ہوئے۔ گُناہ اجیہا وی اے جِہدا انت مَوت اے۔ اوہدے لئی مَیں دُعا منگن نُوں نئیں آکھدا۔ ہر طرح دی بُرائی گُناہ اے۔ پر اجیہا گُناہ وی اے۔ جِہدا انت مَوت نئیں۔ اسی جاننے آں پئی جیہڑا خُدا توں جمّیا اے اوہ گُناہ نئیں کر دا سگوں اوہدی راکھی اوہ کر دا اے۔ جیہڑا خُدا توں جمّیا اے۔ تے اوہ شریر اوہنوں نئیں چھوندا۔ سانُوں پتا اے پئی اسی خُدا ولّوں آں تے ساری دُنیا اوس شریر دے ہتّھ وِچ پئی ہوئی اے۔ تے ایہہ وی جاننے آں پئی خُدا دا پُتر آگیا اے۔ تے اوس سانُوں سمجھ دِتّی اے۔ تاں جو اوہنوں جیہڑا اصلی اے جانئے۔ تے اسی اوہدے وِچ۔ جیہڑا اصلی اے یعنی اوہدے پُتر یِسُوع مسِیح وِچ آں۔ اصلی خُدا تے ہمیشہ دی زِندگی ایہی اے۔ بچّیو۔ بُتاں توں اپنی راکھی کرو۔ میرے ولّوں جیہڑا بزُرگ آں اوس چُنی ہوئی بی بی تے اوہدے پُتراں دے نال جِنہاں نال مَیں اوس سچیائی دے سببّوں سَچّی مُحبّت رکھنا آں جیہڑی ساڈے وِچ قیم رہندی اے۔ تے سدا تِیکر ساڈے نال رہے گی۔ تے اِکّو مَیں ای نئیں سگوں اوہ سارے لوک وی مُحبّت کر دے نیں جیہڑے سچیائی نُوں جان دے نیں۔ خُدا باپ تے باپ دے پُتر یِسُوع مسِیح ولّوں سچیائی تے مُحبّت وِچ فضل تے رَحم تے تسلّی ساڈے نال رہوے گی۔ مَیں بُہت خُوش ہویا۔ جدوں مَیں تیرے کئی مُنڈیاں نُوں اوس حُکم اُتّے جیہڑا سانُوں باپ ولّوں مِلیا سی۔ ٹھیک ٹھیک ٹُردیاں دیکھیا۔ ہُن بی بی مَیں تینُوں کوئی نواں حُکم نئیں سگوں اوہ ای جیہڑا مُڈھوں ساڈے کول اے لِکھنا آں تے تیری مِنّت کرنا آں۔ پئی اسی اِک دُوجے دے نال مُحبّت کریئے۔ تے مُحبّت ایہہ اے پئی اسی اوہدے حُکماں اُتّے چلّئے۔ ایہہ اوہی حُکم اے جیہڑا مُڈھوں تُساں سُنیا۔ پئی تُہانوں اوہدے اُتّے چلنا چاہیدا اے۔ کیوں جو کئی بدراہ کرن والے دُنیا وِچ آگئے نیں جیہڑے یِسُوع مسِیح دے اوتاری ہو کے آؤناں نئیں مَن دے۔ دھوکھا دین والا تے مسِیح دا وَیری ایہو ای اے۔ اپنا دھیان رکھو۔ پئی جیہڑی محنت اساں کِیتی اے۔ اوہ تُہاڈی راہِیں اوگت نا جائے سگوں تُہانوں پُورا بدلہ مِلے۔ جیہڑا اگّے وَدّھ جاندا اے تے مسِیح دی تعلِیم اُتّے قیم نئیں رہندا اوہدے کول خُدا نئیں۔ جیہڑا اوس تعلِیم اُتّے پَکّا رہندا اے اوہدے کول باپ وی اے تے پُتر وی۔ جے کوئی تُہاڈے کول آوے تے ایہہ تعلِیم نا دیوے۔ اوہنوں گھر وِچ نا وڑن دیو تے نا سلام کرو۔ کیوں جو جیہڑا اجیہے بندے نُوں سلام کر دا اے۔ اوہ اوہدیاں بُریاں کمّاں وِچ سنگی ہوندا اے۔ مَیں بتھیریاں گلّاں تُہانوں لِکھنِیاں نیں پر کاغذ تے سیاہی نال لِکھنا نئیں چاہندا سگوں تُہاڈے کول آ کے آمھنے سامھنے گلّ بات کرن دی آس رکھنا آں۔ تاں جو تُہاڈی خُوشی پُوری ہوئے۔ تیری چُنی ہوئی بھین دے پُتر تینُوں سلام آکھدے نیں۔ میرے ولّوں جیہڑا بزُرگ آں پیارے گَیُس دے ناں۔ جِہدے نال مَیں سَچّی مُحبّت کرنا آں۔ پیارے۔ مَیں ایہہ دُعا کرنا آں پئی جیویں تُوں رُوحانی ترقی کرنا ایں اوسے طرح تُوں سارِیاں گلّاں وِچ ترقی کریں تے تگڑا رہَیں۔ کیوں جو جدوں بھراواں آ کے تیری اوس سچیائی دی گواہی دِتّی جِہدے اُتّے تُوں ٹھیک ٹھیک چلنا ایں تے مَیں بُہت ای خُوش ہویا۔ میرے لئی ایس توں وَدّھ کے ہور کوئی خُوشی نئیں۔ پئی مَیں اپنے بچّیاں نُوں سچیائی اُتّے چلدیاں سُناں۔ پیارے۔ جیہڑا سلُوک تُوں اوہناں بھراواں نال کرنا ایں۔ جیہڑے پردیسی نیں اوہ نیک نِیتی نال کرنا ایں۔ اوہناں کلِیسیا دے اگّے تیری مُحبّت دی گواہی دِتّی سی۔ جے تُوں اوہناں نُوں ایس طرح وِداع کریں گا۔ جیویں خُدا دے لوکاں نُوں چاہیدا اے تے چَنگا کریں گا۔ کیوں جو اوہ اوس ناں دے لئی نِکلے نیں۔ تے غیر قوماں کولوں کُجھ نئیں لَیندے۔ سو سانُوں چاہیدا اے۔ پئی ایہو جِہیاں دی حمایت کریئے۔ تاں جو اسی وی سچیائی دے نال کمّ کرن والے ہویئے۔ مَیں کلِیسیا نُوں کُجھ لِکھیا سی پر دِیُترِفِیس جیہڑا اوہناں وِچوں وَڈا ہونا چاہندا اے۔ سانُوں قبول نئیں کر دا۔ سو جدوں مَیں آواں گا تے اوہدیاں کمّاں نُوں جیہڑے اوہ کر دا اے یاد دواواں گا پئی ساڈی بابت بُریاں گلّاں بَکدا اے تے فیر وی بس نئیں کر دا سگوں آپ وی بھراواں نُوں قبول نئیں کر دا تے جیہڑے قبول کرنا چاہندے نیں اوہناں نُوں وی ڈکدا اے۔ تے کلِیسیا وِچوں کڈھ دیندا اے۔ پیارے! بُرائی دے پِچّھے نا جا سگوں نیکی پِچّھے جا۔ کیوں جو نیکی کرن والا خُدا ولّوں اے تے بُریائی کرن والے خُدا نُوں نئیں ویکھیا۔ دیمتیِریُس دی بابت ساریاں بندیاں نیں تے سچیائی نے آپ وی گواہی دِتّی اے۔ تے اسی وی گواہی دینے آں تے تُوں جان دا ایں پئی ساڈی گواہی سَچّی اے۔ مَیں لِکھنا تے بتھیرا کُجھ سی پر سیاہی تے قلم نال لِکھنا نئیں چاہندا۔ سگوں تینُوں چھیتی مِلن دی آس رکھنا آں تے اوس ویلے آمھنے سامھنے گلّ بات کراں گے۔ تینُوں تسلّی مِلدی رہے۔ ایس تھاں دے دوست تینُوں سلام آکھدے نیں توں اوس تھاں دیاں دوستاں نُوں اِک اِک کر کے سلام آکھیں۔ یہُوداہ ولّوں جیہڑا یِسُوع مسِیح دا غلام تے یعقُوب دا بھرا اے۔ اوہناں سَدّے ہویاں دے ناں جیہڑے خُدا باپ وِچ پیارے تے یِسُوع مسِیح لئی رکھّے ہوئے نیں۔ رَحم تے تسلّی تے مُحبّت تُہانوں بُہتی مِلدی رہے۔ پیاریو! جِس ویلے مَیں تُہانوں اوس نجات دی بابت لِکھن دی پُوری کوشش کر دا ساں جِہدے وِچ اسی سارے سنگی آں مَیں تُہانوں ایہہ لِکھ کے مَت دینی ضرُوری سمجھی۔ پئی تُسی اِیمان دِیاں اوہناں گلّاں لئی گھلّو جیہڑیاں پاک لوکاں نُوں اِک واری حوالے کِیتاں گِئیاں سن۔ کیوں جو کئی اجیہے بندے چُپ کِیتے ساڈے وِچ آ وڑے نیں۔ جِنہاں دی ایس سزا دا چَرچا پرانے زمانے توں پہلاں لِکھیا گیا سی۔ ایہہ بے دین نیں تے ساڈے خُداوند دے فضل نُوں لُچ پُناں بناندے نیں۔ تے ساڈے اِکّو مالک تے خُداوند یِسُوع مسِیح توں مُکّر جاندے نیں۔ بھانویں تُساں سارِیاں گلّاں اِکّو واری جان لَیاں تَد وی ایہہ گلّ تُہانوں یاد دوانی چاہناں آں۔ پئی خُداوند اِک اُمّت نُوں مِصر دے مُلک وِچوں چھڈایا تے مگروں اوہناں دا ناس کِیتا جِنہاں اِیمان نئیں سی لیاندا۔ تے جِنہاں فرِشتیاں اپنی حکُومت نُوں قیم نا رکھیا۔ سگوں اپنی تھاں نُوں چھڈ دِتّا۔ اوہناں نُوں اوس ہنیرے تے سدا دی قید وِچ اوس وڈّے دِن دی عدالت تِیکر رکھیا اے۔ ایسے طرح سدُوم تے عمُورہ تے اوہناں دے آلے دوالے دے شہر جیہڑے اوہناں وانگر حرامکاری وِچ پَے گئے تے پرائے جِسم مگر لگ پئے۔ سدا دی اَگ دی سزا جَھل کے اِک مِثال بنے۔ تَد وی اینج ای ایہہ وی لوک اپنے سُفنیاں وِچ جِسم نُوں پلِیت کر دے تے حکُومت نُوں کُجھ نئیں سمجھدے۔ تے عِزّت والیاں نُوں بَھنڈدے نیں۔ پر جد سردار فرِشتے میکائیل مُوسیٰ دی مَیّت دی بابت ابلیس نال تکرار کِیتی تے بَھنڈدیاں ہویاں اوہنوں اُلاہما دین دی ہِمّت نا کِیتی۔ سگوں اَیناں آکھیا پئی خُداوند تینُوں جھڑکے۔ پر ایہہ جِنہاں گلّاں نُوں نئیں جان دے اوہناں نُوں بَھنڈدے نیں۔ تے جِنہاں نُوں بے عقل جنَوراں وانگُوں قُدرتی طَور اُتّے سمجھدے نیں اوہناں وِچ خراب ہو جاندے نیں۔ اوہناں اُتّے افسوس اے پئی اوہ قائن دے راہ ٹُرے تے مزدُوری دے بدلے بڑے لالچ نال بِلعام وانگُوں بدراہ ہوگئے۔ تے قورح وانگُوں برخلاف ہو کے برباد ہوئے۔ جد اوہ تُہاڈیاں مُحبّت دِیاں ضِیافتاں وِچ تُہاڈے نال کھان پِین دے ویلے اینج سن جیویں دریا وِچ لُکِیاں چٹاناں۔ تے اجیہے ایّالی جیہڑے بے ڈر ہو کے ڈِھڈ بھردے نیں۔ بِناں پانیوں بدّل نیں جِنہاں نُوں وَا اُڈا کے لے جاندی اے۔ پچّھیترے پتجھڑ دے بے پَھل بُوٹے۔ دُوں وِری مرے ہوئے۔ جڑوں پُٹے ہوئے۔ سمُندر دِیاں اکھڑ ٹھاٹھاں نیں جِنہاں توں اپنی بے لہنگی دی جھگ چُھٹ دی اے۔ ایویں بھون والے تارے جِنہاں دے لئی سدا دے ہنیرے دا مُکالا پیا ہویا اے۔ اوہناں دے لئی حنوک وی جیہڑا آدم توں ستوِیں پِیڑھی سی ایہہ نبُوّت کِیتی۔ پئی ویکھو خُداوند اپنے لَکّھاں پاک لوکاں نال ایس کر کے آیا۔ پئی سارے بندیاں دی عدالت کرے تے بے دِیناں نُوں اوہناں دی بے دِینی دے سارے کمّاں پِچّھے قصور وار ٹھہرائے جیہڑے اوہناں بے دِینی نال کِیتے نیں۔ تے اوہناں سارِیاں ڈاہڈِیاں گلّاں دے پِچّھے جیہڑیاں بے دِین گُناہِیاں اوہدے برخلاف کِیتیاں سن۔ ایہہ بُڑبُڑ تے شکایت کرن والے نیں تے اپنیاں حِرصاں دے اُتّے ٹُر دے نیں۔ نالے اپنے مُنھوں وڈّے وڈّے بول بولدے نیں۔ تے نفع لئی لوکاں دی رَئی کر دے نیں۔ پر پیاریو۔ ایہناں گلّاں نُوں یاد رکھو۔ جیہڑیاں ساڈے خُداوند یِسُوع مسِیح دے رسُولاں پہلاں آکھیاں نیں۔ اوہ تُہانوں آکھدے ہوندے سن پئی چھیکڑ دے ویلے اجیہے مخَول کرن والے ہون گے۔ جیہڑے اپنی بے دِینی دِیاں حِرصاں اُتّے ٹُرن گے۔ ایہہ اوہ بندے نیں جیہڑے وِچھوڑا پاندے نیں تے نفسی بندے نیں تے رُوح نئیں رکھدے۔ پر تُسی پیاریو! اپنے چوکھے پاک اِیمان وِچ وَدّھ کے تے پاک رُوح وِچ دُعا منگ کے۔ اپنے آپ نُوں خُدا دی مُحبّت وِچ پَکیّاں رکھو۔ تے سدا دی زِندگی لئی ساڈے خُداوند یِسُوع مسِیح دی رحمت دی اُڈِیک رکھو۔ تے کئیاں لوکاں اُتّے جیہڑے شک وِچ نیں رَحم کرو۔ تے کئیاں نُوں پھڑ کے اَگ وِچوں کڈھو۔ تے کئیاں اُتّے ڈر کے رَحم کرو۔ سگوں اوس کپڑیوں وی گھِن کرو۔ جیہڑا جِسم دے سبّب داغی ہوگیا اے۔ ہُن جیہڑا تُہانوں ٹھوکر کھان توں بچا سکدا اے۔ تے اپنی جلالی حضُوری وِچ پُوری خُوشی نال بے عیب کر کے کھلھار سکدا اے۔ اوس اِکّو خُدا دا جیہڑا ساڈا نجات دین والا اے۔ ساڈے خُداوند یِسُوع مسِیح دی راہِیں جلال تے عِزّت تے حکُومت تے قُدرت مُڈھوں وی اے تے ہُن تے اوڑک تِیکر ہوئے۔ آمِین۔ یِسُوع مسِیح دا مُکاشفہ جیہڑا اوہنوں خُدا ولّوں ایس لئی ہویا۔ پئی اپنے بندیاں نُوں اوہ گلّاں وکھائے جیہڑیاں چھیتی ہون والیاں نیں۔ تے اوس اپنے فرِشتے نُوں گھلّیا۔ پئی اوہدی راہِیں اوہناں نُوں اپنے بندے یُوحنّا اُتّے ظاہر کرے۔ جِس خُدا دے کلام تے یِسُوع مسِیح دی گواہی دِتّی۔ یعنی اوہناں سارِیاں شیواں دی جیہڑیاں اوس ویکھیاں سن شہادت دِتّی۔ ایس نبُوّت دی کتاب دا پڑھن والا تے اوہدے سُنن والے تاں جو کُجھ اوہدے وِچ لِکھیا ہویا اَے اوہدے اُتّے عمل کرن والے مُبارک نیں۔ کیوں جو ویلا نیڑے اے۔ یُوحنّا ولّوں اوہناں ستّاں کلِیسیاواں دے ناں جیہڑیاں آسِیہ وِچ نیں اوہدے ولّوں جیہڑا اَے۔ تے جیہڑا اَے سی تے جیہڑا آؤن والا اے۔ تے اوہناں ستّاں رُوحاں ولّوں جیہڑیاں اوہدے تخت دے سامھنے نیں۔ تُہانوں فضل تے تسلّی مِلدی رہے۔ تے یِسُوع مسِیح ولّوں جیہڑا سَچّا گواہ تے مُردیاں وِچوں جی اُٹھن والیاں دا پلیٹھا اے۔ تے دُنیا دے بادشاہاں دا حاکم اے۔ جیہڑا ساڈے نال مُحبّت رکھدا اے تے جِس اپنے خُون دی راہِیں سانُوں گُناہ توں خلاصی بخشی۔ تے سانُوں اِک بادشاہی بنایا تے اپنے خُدا تے باپ دے لئی کاہِن وی بنا دِتّا۔ اوہدا جلال تے سلطنت ہمیشہ تِیکر رہے۔ آمِین۔ ویکھو اوہ بدّلاں دے نال آؤن والا اَے۔ تے ہر اِک اَکھ اوہنوں ویکھے گی۔ تے جِنہاں اوہنوں وِنّھیا سی۔ اوہ وی ویکھن گے تے زمین دے سارے خاندان اوہدے سبّب پٹنگے بے شک۔ آمِین۔ خُداوند خُدا جیہڑا اَے تے جیہڑا اَے سی تے جیہڑا آؤن والا اے۔ یعنی قادرِمُطلق آکھدا اَے۔ پئی مَیں الفا تے اومیگا ہاں۔ مَیں یُوحنّا جیہڑا تُہاڈا بھرا تے یِسُوع دی مُصِیبت تے بادشاہی تے صبر دے وِچ تُہاڈا سنگی آں۔ خُدا دے کلام تے یِسُوع دی بابت گواہی دین دے سببّوں اوس ٹاپُو وِچ ساں جیہڑا پتمُس اکھواؤندا اے۔ مَیں خُداوند دے دِن رُوح وِچ آگیا۔ تے اپنے پِچّھے تُرہی وانگر اِک اُوچی اواز سُنی۔ پئی جو کُجھ تُوں ویکھنا ایں۔ اوہنوں کتاب وِچ لِکھ کے ستّاں کلِیسیاواں دے کول گھل دے۔ جیہڑیاں اِفِسُس تے سمُرنہ تے پرگُمن تے تھواتِیرہ تے سردِیس تے فِلَدِلفیہ تے لَودِیکیہ وِچ نیں۔ مَیں اوس اواز دین والے نُوں ویکھن لئی مُنھ پھیریا۔ جِس میرے نال گلّ کِیتی سی۔ تے پھر کے سونے دے سَتّ دِیوے ویکھے۔ تے اوہناں دِیویاں دے وِچکار آدم دے جائے وانگر کِسے نُوں ویکھیا۔ جِس پیراں تِیکر چوغہ پایا ہویا سی۔ تے چھاتی اُتّے سونے دی پیٹی پائی ہوئی سی۔ اوہدے سِر اُتّے وال چِٹّی اُنّ سگوں برف وانگر چِٹّے سن۔ تے اوہدیاں اَکھّیاں اَگ دی لاٹ وانگر سن۔ تے اوہدے پَیر اوس پِتّل وانگر سن جیہڑا بھٹّھی وِچ تایا ہویا ہوئے۔ تے اوہدی اواز چھلّاں مار دے پانی دے زور وانگر سی۔ تے اوہدے سَجّے ہتّھ وِچ سَتّ تارے سن تے اوہدے مُنھ وِچوں اِک دو مُونہی تیز تلوار نِکلدی سی۔ تے اوہدا چہرہ ایس طرح چمکدا سی جیویں ٹِلّ دے ویلے دِن۔ جدوں مَیں اوہنوں ویکھیا مُردے وانگر اوہدی پَیرِیں ڈِگّ پیا۔ تے اوس ایہہ آکھ کے اپنا سَجّا ہتّھ میرے اُتّے رکھیا۔ پئی نا ڈر مَیں شُروع تے اخِیر ہاں۔ تے جِیونا ہاں۔ مَیں مر گیا ساں تے ویکھ ہُن ہمیشہ تِیکر جِیوندا رہاں گا۔ تے مَوت تے پاتال دِیاں کُنجیاں میرے کول نیں۔ تَد جیہڑیاں گلّاں تُوں ویکھیاں نیں تے جیہڑیاں ہَین تے جیہڑیاں ایہناں دے پِچّھوں ہون والیاں نیں۔ اوہناں سارِیاں نُوں لِکھ لے۔ یعنی اوہناں ستّاں تاریاں دا بھیت جیہڑے تُوں میرے سَجّے ہتّھ وِچ ویکھے سن۔ تے اوہناں سونے دِیاں ستّاں دِیویاں دا بھیت وی۔ اوہ سَتّ ستارے ستّاں کلِیسیاواں دے سَتّ فرِشتے نیں۔ تے اوہ سَتّ دیوے سَتّ کلِیسیاواں نیں۔ اِفِسُس دی کلِیسیا دے فرِشتے نُوں ایہہ لِکھ۔ پئی جِس اپنے سَجّے ہتّھ وِچ سَتّ تارے لَئے ہوئے نیں تے سونے دِیاں ستّاں دِیویاں وِچ پِھردا اے۔ اوہ ایہہ آکھدا اے پئی۔ مَیں تیرے کمّ تے تیری محنت تے تیرے صبر نُوں تے جاننا آں تے ایہہ وی پئی تُوں بُریاں نُوں ویکھ نئیں سکدا۔ تے جیہڑے اپنے آپ نُوں رسُول آکھدے نیں تے ہَین نئیں۔ تُوں اوہناں نُوں ازما کے جُھوٹھیاں ویکھیا۔ تے تُوں صبر کرنا ایں تے میرے ناں دی خاطر مُصِیبت سہہ سہہ کے تھکیا نئیں۔ پر مَینُوں تیرے اُتّے ایہہ شکایت اے۔ پئی تُوں اپنی پہلی مُحبّت نُوں چھڈ دِتّا۔ ایس لئی تُوں چیتا کر پئی تُوں کِتّھوں ڈِگّا ایں۔ تے تَوبہ کر کے پہلے وانگر کمّ کر۔ تے جے تُوں تَوبہ نا کریں گا۔ تے تیرے کول مَیں آ کے تیرا دِیوا اوہدی تھاں توں ہٹا دیاں گا۔ بے شک تیرے وِچ ایہہ گلّ تے اے۔ پئی تُوں نِیکُلیوں دے کمّاں توں نفرت کرنا ایں جِنہاں توں مَیں وی نفرت کرنا آں۔ جِہدے کنّ ہون اوہ سُن لَئے۔ پئی رُوح کلِیسیاواں نُوں کِیہ آکھدا اے۔ جیہڑا جِتّے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔ تے سمُرنہ دی کلِیسیا دے فرِشتے نُوں ایہہ لِکھ پئی جیہڑا شُروع تے اخِیر اے تے جیہڑا مر گیا سی تے جِیوپیا۔ اوہ ایہہ آکھدا اے۔ پئی مَیں تیری مُصِیبت تے غرِیبی نُوں جاننا آں (پر تُوں دَولتمند ایں) تے جیہڑے اپنے آپ نُوں یہُودی آکھدے نیں تے اوہ ہَین نئیں سگوں شیطان دی جماعت نیں اوہناں دِیاں طعنیاں مہِنیاں نُوں وی جاننا آں۔ جیہڑے دُکھ تینُوں جَھلّنے پَین گے۔ اوہناں توں نا ڈر۔ ویکھو ابلیس تُہاڈے وِچوں کُجھ نُوں قید وِچ پان نُوں تیار اے۔ پئی تُسی ازمائے جاؤ تے دَس دِناں تِیکر مُصِیبت پاؤ گے۔ جان دین تِیکر وی وفادار رہو تے مَیں تینُوں زِندگی دا تاج دیاں گا۔ جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جِتّے اوہنوں دُوجی مَوت توں نُقصان نا پہنچے گا۔ تے پرگُمن دی کلِیسیا دے فرِشتے نُوں ایہہ لِکھ پئی جِہدے کول دو مُونہی تِکھی تلوار اے اوہ ایہہ آکھدا اے پئی۔ مَیں ایہہ تے جاننا آں پئی تُوں شیطان دے تخت دے تھاں وِچ رہنا ایں۔ تے میرے ناں اُتّے قیم رہنا ایں۔ تے جِنہاں دِناں وِچ میرا وفادار گواہ اِنتپاس تُہاڈے وِچ اوس تھاں قتل ہویا سی جِتّھے شیطان رہندا اے اوہناں دِناں وِچ وی تُوں میرے اُتّے اِیمان رکھن توں اِنکار نا کِیتا۔ پر مَینُوں کُجھ گلّاں دی تیرے اُتّے شکایت اے ایس لئی پئی تیرے اوتھے کُجھ لوک بِلعام دی تعلِیم مَنّن والے نیں جِس بلق نُوں بنی اِسرائیل اگّے ٹھوکر رکھن دی تعلِیم دِتّی یعنی ایہہ پئی اوہ بُتاں دِیاں قُربانِیاں کھان تے حرامکاری کرن۔ اِنجے ایتھے وی تیرے کُجھ لوک ایسے طرح نِیکُلیوں دی تعلِیم نُوں مَن دے نیں۔ تَد تَوبہ کر نئیں تے مَیں تیرے کول چھیتی آ کے اپنے مُنھ دی تلوار نال اوہناں دے نال لڑاں گا۔ جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جِتّے مَیں اوہنوں لُکے ہوئے مَن وِچوں دیاں گا۔ تے اِک چِٹّا پتّھر دیاں گا اوس پتّھر اُتّے اِک نواں ناں لِکھیا ہویا ہوئے گا جِہنُوں اوہدے لین والے دے سِوا کوئی نا جانے گا۔ تے تھواتِیرہ دی کلِیسیا دے فرِشتے نُوں ایہہ لِکھ پئی۔ خُدا دا پُتر جِہدِیاں اَکھّیاں اَگ دی لاٹ وانگر تے پَیر خالص پِتّل وانگر نیں ایہہ آکھدا اے پئی۔ مَیں تیرے کمّاں تے مُحبّت تے اِیمان تے خِدمت تے صبر نُوں تے جاننا آں۔ تے ایہہ وی پئی تیرے پِچّھلے کمّ پہلے کمّاں نالوں وَدّھ نیں۔ پر مَینُوں تیرے اُتّے ایہہ شکایت اے۔ پئی تُوں اوس عورت اِیزبِل نُوں رہن دِتّا اے۔ جیہڑی اپنے آپ نُوں نَبِیہ آکھدی اے۔ تے میرے بندیاں نُوں حرامکاری کرن تے بُتاں دِیاں قُربانِیاں کھان دی تعلِیم دے کے بد راہ کر دی اے۔ تے مَیں اوہنوں تَوبہ کرن دی مُہلت دِتّی پر اوہ اپنی حرامکاری توں تَوبہ نئیں کرنا چاہندی۔ ویکھ مَیں اوہنوں مَنجی اُتّے سُٹّناں آں۔ تے جیہڑے اوہدے نال زنا کر دے نیں جے اوہدے جِہے کمّاں توں تَوبہ نا کرن۔ تے اوہناں نُوں بڑی مُصِیبت وِچ سُٹّناں آں۔ تے اوہدے پُتراں نُوں جانوں ماراں گا۔ تے سارِیاں کلِیسیاواں نُوں پتا لگّے گا۔ پئی گُردیاں تے دِلاں دا جانن والا مَیں آں۔ تے مَیں تُہاڈے وِچوں ہر اِک نُوں اوہدیاں کمّاں دے سببّوں بدلہ دیاں گا۔ پر تُہانوں تھواتِیرہ دے لوکاں نُوں جیہڑے اوس تعلِیم نُوں نئیں مَن دے تے اوہناں گلّاں توں جِنہاں نُوں لوک شیطان دِیاں ڈونگھیاں گلّاں آکھدے نیں ناواقِف ہو۔ ایہہ آکھنا آں۔ پئی تُہاڈے اُتّے ہور بھار نا پاواں گا۔ بے شک جو کُجھ تُہاڈے کول اے۔ میرے آؤن تِیکر گُھٹ کے پَھڑی رکھو۔ جیہڑا جِتّے تے جیہڑا میرے کمّاں دے سببّوں اخِیر تِیکر عمل کرے مَیں اوہنوں قوماں اُتّے اختیار دیاں گا۔ تے اوہ لوہے دے ڈنڈے نال اوہناں اُتّے حکُومت کرے گا۔ جیویں گھمیار دے بھانڈے ٹُٹ پُھٹ جاندے نیں۔ ایسے طرح مَیں وی اجیہا اختیار اپنے باپ کولوں لیا اے۔ تے مَیں اوہنوں سویر دا تارا دیاں گا۔ جِہدے کنّ ہَین اوہ سُنے پئی رُوح کلِیسیاواں نُوں کِیہ آکھدا اے۔ تے سردِیس دی کلِیسیا دے فرِشتے نُوں ایہہ لِکھ۔ پئی جِہدے کول خُدا دِیاں سَتّ رُوحاں تے سَتّ تارے نیں اوہ ایہہ آکھدا اے پئی مَیں تیرے کمّاں نُوں جاننا آں پئی تُوں زِندہ اکھواؤندا ایں۔ پر ہیں مُردہ۔ جاگدا رہو تے اوہناں شیواں نُوں جیہڑیاں باقی نیں تے جیہڑیاں مِٹن والِیاں سن مضبُوط کر۔ کیوں جو مَیں تیرے کِسے کمّ نُوں اپنے خُدا دے اگّے پُورا نئیں ویکھیا تَد یاد کر پئی تُوں کِیویں دی تعلِیم سِکھی تے سُنی سی۔ تے اوہدے اُتّے قیم رہو تے تَوبہ کر۔ جے تُوں جاگدا نا رہیں گا۔ تے مَیں چور وانگر آ جاواں گا تے تینُوں کدی پتا نا ہوئے گا۔ پئی مَیں کیہڑے ویلے تیرے اُتّے آپَواں گا بے شک سردِیس وِچ تیری تھاں تھوڑے اجیہے بندے نیں۔ جِنہاں اپنے کپڑے پلِیت نئیں کِیتے۔ اوہ چِٹّی پوشاک پا کے میرے نال سَیر کرن گے۔ کیوں جو اوہ ایسے لائق نیں۔ جیہڑا جِتّے اوہنوں ایسے طرح چِٹّے کپڑے پوائے جان گے تے مَیں اوہدا ناں زِندگی دی کتاب وِچوں کدی نا کٹّاں گا۔ سگوں اپنے باپ تے اوہدے فرِشتیاں اگّے اوہدے ناں دا اِقرار کراں گا۔ جِہدے کنّ ہَین سُنے پئی رُوح کلِیسیاواں نُوں کِیہ آکھدا اے۔ تے فِلَدِلفیہ دی کلِیسیا دے فرِشتے نُوں ایہہ لِکھ پئی۔ جیہڑا قُدُّوس تے سَچّا اے تے داؤد دی کُنجی اوہدے کول اے جِہدے کھولے ہوئے نُوں کوئی بند نئیں کر دا تے بند کِیتے ہوئے نُوں کوئی کھولدا نئیں۔ اوہ ایہہ آکھدا اے۔ پئی مَیں تیرے کمّاں نُوں جاننا آں (ویکھ مَیں تیرے سامھنے اِک بُوہا کھولیا ہویا اے۔ کوئی اوہنوں بند نئیں کر سکدا) کیوں جو تیرے وِچ تھوڑا جِہیا زور اے۔ تے تُوں میرے کلام اُتّے عمل کِیتا اے۔ تے میرے ناں دا اِنکار نئیں کِیتا۔ ویکھ مَیں شیطان دی جماعت دے اوہناں لوکاں نُوں تیرے قابُو وِچ کر دیاں گا۔ جیہڑے اپنے آپ نُوں یہُودی آکھدے نیں تے ہَین نئیں۔ سگوں جُھوٹھ بول دے نیں۔ ویکھ مَیں ایہہ کراں گا پئی اوہ آ کے تیرے پیراں وِچ سجدہ کرن گے تے جانن گے پئی مَیں تینُوں پیار کرنا آں۔ ایس کر کے پئی تُوں میرے صبر دے کلام اُتّے عمل کِیتا ایس لئی مَیں وی ازمایش دے اوس ویلے تیری حفاظت کراں گا۔ جیہڑا زمین دے رہن والیاں دے ازمان لئی ساری دُنیا اُتّے آؤن والا ہے۔ مَیں چھیتی آؤن والا آں جو کُجھ تیرے کول اے اوہنوں گُھٹ کے پَھڑی رکھ پئی کوئی تیرا تاج نا کھوہ لَوے۔ جیہڑا جِتّے مَیں اوہنوں اپنے خُدا دی ہیکل وِچ اِک تھم بناواں گا اوہ فیر کدی باہر نا نِکلے گا تے مَیں اپنے خُدا دا ناں تے اپنے خُدا دے شہر یعنی اوس نَوِیں یرُوشلِیم دا ناں جیہڑا میرے خُدا کولوں اسمان توں آؤن والا اے تے اپنا نواں ناں اوہدے اُتّے لِکھاں گا۔ جِہدے کنّ ہَین اوہ سُنے پئی رُوح کلِیسیاواں نُوں کِیہ آکھدا اے۔ تے لَودِیکیہ دی کلِیسیا دے فرِشتے نُوں ایہہ لِکھ پئی جیہڑا آمِین تے سَچّا تے برحق گواہ تے خُدا دی خلقت دا مُڈھ اے اوہ ایہہ آکھدا اے پئی۔ مَیں تیرے کمّاں نُوں جاننا آں۔ پئی نا تے تُوں ٹھنڈا ایں تے نا گرم۔ چَنگا ہوندا جے تُوں ٹھنڈا ہوندوں یا گرم۔ اِنجے ای ایس واسطے پئی نا تُوں گرم ایں نا ٹھنڈا۔ سگوں کوسا ایں ایس لئی مَیں تینُوں اپنے مُنھ توں اُباک چھڈاں گا۔ تے ایس واسطے پئی توں آکھنا ایں پئی مَیں دَولت مند آں تے مالدار بن گیا آں تے تینُوں کِسے شے دی لوڑ نئیں۔ تے ایہہ نئیں جان دا پئی تُوں بد نصیب تے خوار تے غرِیب تے اَنھا تے ننگا ایں۔ مَیں تینُوں صلاح دینا آں۔ پئی مَیتھوں اَگ وِچ تایا ہویا سونا مُل لے لے۔ پئی تُوں دَھنی ہو جائیں۔ تے چِٹّے کپڑے پا لے پئی اوہناں نُوں پا کے تُوں ننگے پن دی بے لہنگی توں بچیں۔ تے اَکھّیاں وِچ پان لئی سُرمہ لے پئی فیر سُجاکھا ہو جاویں۔ مَیں جِنہاں نُوں پیار کرنا آں اوہناں نُوں جِھڑکدا تے سزا وی دینا آں۔ ایس لئی سرگرم ہو تے تَوبہ کر۔ ویکھ مَیں بُوہے اُتّے کھلوتا ہویا کھڑکانا آں۔ جے کوئی میری اواز سُن کے بُوہا کھولے گا تے مَیں اوہدے کول اندر جا کے اوہدے نال کھانا کھاں گا تے اوہ میرے نال کھائے گا۔ جیہڑا جِتّے مَیں اوہنوں اپنے نال تخت اُتّے بہاواں گا۔ جیویں مَیں وی جِت کے اپنے باپ نال اوہدے تخت اُتّے بَہہ گیا۔ جِہدے کنّ ہَین سُنے پئی رُوح کلِیسیاواں نُوں کِیہ آکھدا اے۔ ایہناں گلّاں دے پِچّھوں مَیں دھیان کِیتا۔ تے کِیہ ویکھنا آں پئی اسمان وِچ اِک بُوہا کُھلیا ہویا اے۔ تے جِہنُوں مَیں پہلاں تُرہی دی اواز وانگر اپنے نال گلّاں کر دیاں سُنیا سی اوہ ای آکھدا اے پئی ایتھے اُتّے آجا مَیں تینُوں اوہ گلّاں وکھاواں گا جیہڑیاں ایہناں گلّاں دے پِچّھوں ضرُور ہون گِیاں۔ جھٹ پَٹ مَیں رُوح وِچ آگیا تے کِیہ ویکھنا آں پئی اسمان دے وِچ اِک تخت ڈَٹّھا ہویا اے۔ تے اوس تخت اُتّے کوئی بَیٹھا ہویا اے۔ تے جیہڑا اوہدے اُتّے بَیٹھا ہویا اے اوہ یشب تے عقِیق پتّھر وانگر معلُوم ہوندا اے۔ تے اوس تخت دے آلے دوالے زمُرّد وانگر اِک اسمانی پینگھ معلُوم ہوندی اے۔ تے اوس تخت دے آلے دوالے چوّی تخت تے اوہناں تختاں اُتّے چوّی بزُرگ چِٹّے کپڑے پا کے بَیٹھے ہوئے نیں۔ تے اوہناں دے سِراں اُتّے سونے دے تاج نیں۔ تے اوس تخت وِچوں چمکن تے کڑکن والے بدّل تے اَوازاں پئیاں نِکلدیاں نیں۔ تے اوس تخت دے سامھنے اَگ دِیاں سَتّ بتیاں پئیاں بلدیاں نیں ایہہ خُدا دِیاں سَتّ رُوحاں نیں۔ تے اوس تخت دے سامھنے شیشے دا سمُندر بلّور وانگر اے۔ تے تخت وِچ تے آلے دوالے چار جاندار نیں جِنہاں دِیاں اگّے پِچّھے اَکھّیاں نیں۔ پہلا جاندار شیر وانگر اے تے دُوجا جاندار وَچّھے وانگر تے ترِیجے جاندار دا مُنھ بندے وانگر اے تے چوتھا جاندار اُڈ دے ہوئے عُقاب وانگر اے۔ ایہناں چَوہاں جانداراں دے چھ چھ پَر تے چَونہہ پاسے تے اندر اَکھّیاں ای اَکھّیاں نیں۔ تے دِنے راتِیں آرام نئیں کر دے۔ تے ایہو آکھدے رہندے نیں۔ پئی قُدُّوس قُدُّوس قُدُّوس خُداوند خُدا قادرِ مُطلق جیہڑا ہے سی تے جیہڑا ہے تے جیہڑا آؤن والا اے۔ تے جد اوہ جاندار اوہدی وڈیائی تے عِزّت تے شُکر گُزاری کرن گے جیہڑا تخت اُتّے بَیٹھا اے تے ہمیشہ تِیکر زِندہ رہے گا۔ تے اوہ چوّی بزُرگ اوہدے سامھنے جیہڑا تخت اُتّے بَیٹھا ہویا اے ڈِگّ پَین گے تے اوہنوں سجدہ کرن گے جیہڑا ہمیشہ تِیکر زِندہ رہے گا۔ تے اپنے تاج ایہہ آکھ کے اوس تخت دے سامھنے دھر دین گے۔ پئی۔ اَے ساڈے خُداوند تے خُدا تُوہی وڈیائی تے عِزّت تے قُدرت دے لائق ایں۔ کیوں جو تُوہی سارِیاں شیواں پَیدا کِیتیاں تے اوہ تیری ای مرضی نال سن تے پَیدا ہویاں۔ تے جیہڑا تخت اُتّے بَیٹھا سی مَیں اوہدے سَجّے ہتّھ وِچ اِک کتاب ویکھی۔ جیہڑی اندروں باہروں لِکھی ہوئی تے سَتّ مُہراں نال بند کِیتی ہوئی سی۔ فیر مَیں اِک زوراور فرِشتے نُوں اُچّی اُچّی ایہہ منادی کر دیاں ویکھیا پئی کیہڑا ایس کتاب نُوں کھولن تے اوہدیاں مُہراں توڑن دے لائق اے؟ تے کوئی جَنا اسمان اُتّے یا زمین اُتّے یا زمین دے ہیٹھاں اوس کتاب نُوں کھول نا سکیا تے نا اوہدے اُتّے نظر کر سکیا۔ تے مَیں ایس گلّ اُتّے بڑا رویا۔ پئی کوئی ایس کتاب دے کھولن یا اوہدے اُتّے نظر کرن دے لائق نا نِکلیا۔ فیر اوہناں بزُرگاں وِچوں اِکّی مَینُوں آکھیا نا رو۔ ویکھ یہُوداہ دے گھرانے دا اوہ شیر ببّر جیہڑا داؤد دی نسل اے۔ اوس کتاب تے اوہدیاں ستّاں مُہراں توڑن وِچ غالب آیا۔ تے مَیں اوس تخت تے چَوہاں جانداراں تے اوہناں بزُرگاں دے وِچکار جیویں حلال کِیتا ہویا لیلا کھلوتا ہوندا اے ویکھیا اوہدے سَتّ سِنگ تے سَتّ اَکھّیاں سن ایہہ خُدا دِیاں سَتّ رُوحاں نیں۔ جیہڑیاں ساری زمین اُتّے گھلّیاں ہویاں نیں۔ اوس آ کے تخت اُتّے بَیٹھے ہوئے دے سَجّے ہتھّوں اوس کتاب نُوں لے لیا۔ جد اوس کتاب لے لئی تے اوہ چارے جاندار تے چوّی بزُرگ اوس لیلے دے سامھنے ڈِگّ پئے تے ہر اِک دے ہتّھ وِچ بربط تے دُھوف نال بھرے ہوئے سونے دے پیالے سن۔ ایہہ پاک لوکاں دِیاں دُعاواں نیں۔ تے اوہ نواں گِیت گاؤن لگّے پئی تُوں ای اوس کتاب دے لین تے اوہدیاں مُہراں توڑن دے لائق ایں۔ کیوں جو تُوں ہلال ہو کے اپنے خُون توں ساریاں گھرانیاں تے زبان والیاں تے اُمّتاں تے قوماں وِچوں خُدا دے لئی لوکاں نُوں مُل لیا۔ تے اوہناں نُوں ساڈے خُدا دے لئی اِک بادشاہی تے کاہِن بنا دِتّا۔ تے اوہ زمین اُتّے بادشاہی کر دے نیں۔ تے جد مَیں دھیان کِیتا۔ تے اوس تخت تے اوہناں جانداراں تے بزُرگاں دے آلے دوالے کِنے سارے فرِشتیاں دی اواز سُنی۔ جِنہاں دی گنتری لَکّھاں تے کروڑاں تِیکر سی۔ تے اوہ اُچّی اواز نال آکھدے سن پئی ذِبح کِیتا ہویا لیلا ای قُدرت دَولت تے حِکمت تے طاقت تے عِزّت تے جلال تے وڈیائی دے لائق اے۔ فیر مَیں اسمان تے زمین تے زمین دے ہیٹھلی تے سمُندر دی ساری مخلُوقات نُوں یعنی سارِیاں شیواں نُوں جیہڑیاں اوہناں دے وِچ نیں ایہہ آکھدیاں سُنیا۔ پئی جیہڑا تخت اُتّے بَیٹھا ہویا اے اوہدی تے لیلے دی وڈیائی تے عِزّت تے جلال تے سلطنت سدا تِیکر رہے۔ تے چَوہاں جانداراں آکھیا۔ آمِین۔ تے بزُرگاں ڈِگّ کے سجدہ کِیتا۔ فیر مَیں ویکھیا پئی لیلے اوہناں ستّاں مُہراں وِچوں اِک نُوں توڑیا تے اوہناں چَوہاں جانداراں وِچوں اِک دی بدّل دے گجّن وانگر اواز سُنی پئی آ۔ تے مَیں دھیان کِیتا تے کِیہ ویکھنا آں پئی اِک چِٹّا گھوڑا اے تے اوہدے سوار کول اِک کمان اے تے اوہنوں اِک تاج دِتّا گیا تے اوہ فتح کر دا ہویا نِکلیا۔ پئی ہور وی فتح کرے۔ تے جد اوس دُوجی مُہر توڑی تے مَیں دُوجے جاندار نُوں ایہہ آکھدیاں سُنیا پئی آ۔ فیر اِک ہور گھوڑا نِکلیا جیہڑا لال رنگ دا سی تے اوہدے سوار نُوں ایہہ اختیار دِتّا گیا پئی زمین اُتّوں صُلح نُوں چُک لے پئی لوک اِک دُوجے نُوں قتل کرن تے اوہنوں اِک وڈّی ساری تلوار دِتّی گئی۔ تے جد اوس ترِیجی مُہر توڑی تے مَیں ترِیجے جاندار نُوں ایہہ آکھدیاں سُنیا پئی آ تے مَیں دھیان کِیتا تے کِیہ ویکھنا آں پئی اِک کالا گھوڑا اے۔ تے اوہدے سوار دے ہتّھ وِچ اِک ترکڑی اے۔ تے مَیں اوہناں چَوہاں جانداراں وِچوں اِنج دی اواز آؤندی سُنی۔ پئی کنک دینار دی اِک سیر تے جَوں دینار دے تَرے سیر تے تیل تے مَے دا نُقصان نا کر۔ تے جد اوس چَوتھی مُہر توڑی تے مَیں چوتھے جاندار نُوں ایہہ آکھدیاں سُنیاں پئی آ۔ تے مَیں دھیان کِیتا تے کِیہ ویکھنا آں پئی اِک پِیلا جیہا گھوڑا اے تے اوہدے سوار دا ناں مَوت اے تے پاتال اوہدے پِچّھے پِچّھے اے تے اوہناں نُوں زمین دی چوتھائی اُتّے ایہہ اختیار دِتّا گیا۔ پئی تلوار تے کال تے ڈاکی تے زمین دے پشُوآں نال لوکاں نُوں مارن۔ تے جد اوس پن جیویں مُہر توڑی تے مَیں قُربان گاہ دے ہیٹھ اوہناں دِیاں رُوحاں ویکھیاں جیہڑے خُدا دے کلام تے گواہی اُتّے قیم رہن دے سببّوں مارے گئے سن۔ تے اوہ اُچّی اُچّی آکھن لگِیاں پئی اَے مالک قُدُّوس تے سَچّے تُوں کد تِیکر انصاف نا کریں گا تے زمین دے رہن والیاں توں ساڈے خُون دا بدلہ نا لَویں گا؟ تے اوہناں وِچوں ہر اِک نُوں چِٹّا چوغہ دِتّا گیا تے اوہناں نُوں آکھیا گیا۔ پئی ہور تھوڑا چِر آرام کرو۔ جد تِیکر تُہاڈے سَنگیاں تے بھراواں دی گنتری پُوری نا ہو جائے۔ جیہڑے تُہاڈے وانگر قتل ہون والے نیں۔ تے جد اوس چھیویں مُہر توڑی تے مَیں ویکھیا پئی اِک وَڈا سارا بھنچال آیا اے۔ تے سُورج بورے وانگر کالا تے سارا چَنّ لہو وانگر ہوگیا۔ تے اسمان دے تارے اینج زمین اُتّے ڈِگّ پئے۔ جیویں زور دی ہنیری نال ہنجیر دے بُوٹے نالوں کچّے پَھل ڈِگّ پَیندے نیں۔ تے اسمان اینج کھِسک گیا جیویں لِکھیا ہویا مُٹّھا وھلیٹن نال کھِسک جاندا اے۔ تے ہر اِک پہاڑ تے ٹاپُو اپنے اپنے تھاں توں ٹل گئے۔ تے زمین دے بادشاہ تے امیر تے فوجی سردار تے مالدار تے زوراور تے سارے غلام تے اَزاد پہاڑاں دِیاں کُھندڑاں تے چٹاناں دے وِچ جا لُکے۔ تے پہاڑاں تے چٹاناں نُوں آکھن لگّے پئی ساڈے اُتّے ڈِگّ پَوو تے سانُوں اوہدی نظر توں جیہڑا تخت اُتّے بَیٹھا ہویا اے تے لیلے دے غضب توں لُکا لوؤ۔ کیوں جو اوہناں دے غضب دا وَڈا دِن آگیا اے۔ ہُن کون کھلو سکدا اے؟ ایہدے پِچّھوں مَیں زمین دی چَوہاں نُکرِیں چَوہ فرِشتے کھلوتے ویکھے اوہناں زمین دیاں چَوہاں وَاوَاں نُوں تھمیا ہویا سی پئی زمین یا سمُندر یا کِسے بُوٹے نُوں وَا نا لگّے۔ فیر مَیں اِک ہور فرِشتے نُوں ویکھیا پئی جِیوندے خُدا دی مُہر لے کے چڑھدے ولّوں اُتانہہ آیا۔ اوس اوہناں چَوہاں فرِشتیاں نُوں جِنہاں نُوں زمین تے سمُندر دے نُقصان کرن دا اختیار دِتّا گیا سی اُچّی اواز نال آکھیا۔ پئی جد تِیکر اسی خُدا دے بندیاں دے مَتّھے اُتّے مُہر نا لا لَئے۔ زمین تے سمُندر تے بُوٹیاں دا نُقصان نا کریو۔ تے جِنہاں اُتّے مُہر لائی گئی۔ اوہناں دی گنتری سُنی پئی بنی اِسرائیل دے سارے گھرانیاں وِچوں اِک لَکّھ چتالی ہزار اُتّے مُہر لائی گئی۔ یہُوداہ دے گھرانے وِچوں باراں ہزار اُتّے مُہر لائی گئی۔ رُوبن دے گھرانے وِچوں باراں ہزار اُتّے۔ جَدّ دے گھرانے وِچوں باراں ہزار اُتّے۔ آشر دے گھرانے وِچوں باراں ہزار اُتّے۔ نفتالی دے گھرانے وِچوں باراں ہزار اُتّے۔ منسّی دے گھرانے وِچوں باراں ہزار اُتّے۔ شمعُون دے گھرانے وِچوں باراں ہزار اُتّے۔ لاوی دے گھرانے وِچوں باراں ہزار اُتّے۔ اِشکار دے گھرانے وِچوں باراں ہزار اُتّے۔ زبُولُون دے گھرانے وِچوں باراں ہزار اُتّے۔ یُوسف دے گھرانے وِچوں باراں ہزار اُتّے۔ بِنیمِین دے گھرانے وِچوں باراں ہزار اُتّے۔ اوہناں گلّاں دے پِچّھوں مَیں دھیان کِیتا۔ تے کِیہ ویکھنا آں پئی ہر اِک قوم تے گھرانے تے اُمّت تے اہلِ زبان دی اِک ایڈی وڈّی بِھیڑ جِہنُوں کوئی گِن نئیں سکدا چِٹّے کپڑے پا کے تے کھجور دِیاں ٹہنِیاں اپنیاں ہتّھاں وِچ لے کے تخت تے لیلے دے اگّے کھلوتی اے۔ تے اُچّی اُچّی چِیک چِیک کے آکھدی اے۔ پئی نجات ساڈے خُدا ولّوں اے۔ جیہڑا تخت اُتّے بَیٹھا اے تے لیلے ولّوں۔ تے سارے فرِشتے اوس تخت تے بزُرگان تے چَوہاں جانداراں دے آلے دوالے کھلوتے نیں۔ فیر اوہ تخت دے اگّے مُنھ پرنے ڈِگّ پئے تے خُدا نُوں سجدہ کر کے۔ آکھیا آمِین وڈیائی تے جلال تے حِکمت تے شُکر تے عِزّت تے قُدرت تے طاقت ہمیشہ تِیکر ساڈے خُدا دی ہوئے آمِین۔ تے بزُرگاں وِچوں اِک مَینُوں آکھن لگّا پئی ایہہ جِنہاں چِٹّے کپڑے پائے ہوئے نیں کون نیں تے کِتّھوں آئے ہوئے نیں؟ مَیں اوہنوں آکھیا اَے میرے خُداوند تُوں ای جاندا ایں۔ اوس مَینُوں آکھیا ایہہ اوہ نیں جیہڑے اوس وڈّی مُصِیبت وِچوں نِکل کے آئے ہوئے نیں ایہناں اپنے کپڑیاں نُوں لیلے دے لہو وِچ دھوکھے چٹیاں کِیتا ہویا اے۔ ایسے صدقہ ایہہ خُدا دے تخت اگّے نیں تے ہیکل وِچ دِنے راتِیں اوہدی بندگی کر دے نیں۔ تے جیہڑا تخت اُتّے بَیٹھا ہویا اے اوہ اپنا تنبُو اوہناں دے اُتّے تانیں گا۔ ایہدے پِچّھوں نا کدی اوہناں نُوں بُھکھ لگّے گی نا تَریہہ نا کدی اوہناں نُوں دُھپ ستائے گی نا گرمی۔ کیوں جو جیہڑا لیلا تخت دے وِچ اے۔ اوہ اوہناں دی نِگہبانی کرے گا۔ تے اوہناں نُوں زِندگی دے پانی دے سوتیاں کول لے جائے گا۔ تے خُدا اوہناں دِیاں اَکھّیاں توں سارے اتھرُو پُونجھ دے گا۔ تے جد اوس ستوِیں مُہر توڑی تے ادھے گھنٹے تِیکر اسمان وِچ چُپ لگّی رہی۔ تے مَیں اوہناں ستّاں فرِشتیاں نُوں ویکھیا۔ جیہڑے خُدا دے سامھنے کھلوتے رہندے نیں۔ تے اوہناں نُوں سَتّ تُرہیاں دِتّیاں گِئیاں۔ فیر اِک ہور فرِشتہ سونے دا دُھوف دان لے کے آیا۔ تے قُربان گاہ دے اُتّے کھلو گیا تے اوہنوں بُہت ساری دُھوف دِتّی گئی پئی سارے پاک لوکاں دی دُعاواں دے نال اوس سونے دی قُربان گاہ اُتّے چاہڑے جیہڑی تخت دے سامھنے اے۔ تے اوس دُھوف دا دُھوں فرِشتے دے ہتھّوں پاک لوکاں دی دُعاواں دے نال خُدا دے اگّے اَپڑ گیا۔ تے فرِشتے دُھوف دان نُوں لے کے اوہدے وِچ قُربان گاہ دی اَگ بھری تے زمین اُتّے لُد دِتّی تے بدّل گجّن تے چمکن لگّے تے اَوازاں تے بھنچال آئے۔ تے اوہ سَتّے فرِشتے جِنہاں دے کول اوہ سَتّ تُرہیاں سن پُھوکن نُوں تیار ہو گئے۔ تے جد پہلی تُرہی وَجّی تے گڑے تے اَگ جِنہاں وِچ لہو رلیا ہویا سی جمّے تے زمین اُتّے سُٹّے گئے۔ تے زمین دا ترِیجا حِصّہ سڑ گیا تے ترِیجا حِصّہ بُوٹے تے سارا ہرا گھاہ سڑ گیا۔ تے جد دُوجے فرِشتے تُرہی نُوں پُھوک ماری تے اَگ نال بلدا ہویا اِک وَڈا پہاڑ سمُندر وِچ سُٹّیا گیا تے سمُندر دا ترِیجا حِصّہ لہو ہو گیا۔ تے سمُندر دی جیوندی خلقت دا ترِیجا حِصّہ مر گیا۔ تے بیڑیاں دا ترِیجا حِصّہ برباد ہوگیا۔ تے جد ترِیجے فرِشتے تُرہی نُوں پُھوک ماری تے اِک وَڈا سارا تارہ مشال وانگر بلدا ہویا اسمانوں ٹُٹ پیا تے ترِیجے حِصّے دریاواں تے پانی دے چشمیاں اُتّے آ پیا۔ اوس تارے دا ناں ناگ دُونا اکھواؤندا اے تے پانی دا ترِیجا حِصّہ ناگ دونے وانگر کَوڑا ہوگیا تے پانی دے کَوڑے ہو جان توں بتھیرے بندے مر گئے۔ تے جد چوتھے فرِشتے تُرہی نُوں پُھوک ماری تے سُورج دا ترِیجا حِصّہ تے چَنّ دا ترِیجا حِصّہ تے تاریاں دا ترِیجا حِصّہ ماریا گیا۔ ایتھوں تِیکر پئی اوہناں دا ترِیجا حِصّہ ہنیرا ہوگیا تے دِن دے ترِیجے حِصّے وِچ دُھپ نا رہی تے ایسے طرح رات دے ترِیجے حِصّے وِچ وی۔ تے جد مَیں فیر دھیان کِیتا تے اسمان دے وِچ اِک عُقاب نُوں اُڈدیاں ہویاں تے اُچّی اُچّی ایہہ آکھدیاں سُنیاں پئی اوہناں تریہوں فرِشتیاں دِیاں تُرہیاں دِیاں اَوازاں دے سبّب جیہڑیاں اجے پُھوکن والیاں نیں زمین دے رہن والِیاں اُتّے افسوس افسوس افسوس۔ جد پن جیویں فرِشتے تُرہی نُوں پُھوک ماری تے مَیں اسمانوں زمین اُتّے اِک تارا ڈِگّا ہویا ویکھیا تے اوہنوں اتھاہ کھڈے دی کُنجی دِتّی گئی۔ تے اوس اتھاہ کھڈا کھولیا۔ تے کھڈے وِچوں اِک وڈّی بھٹّی جِہیا دُھوں نِکلیا تے کُھوہ دے دُھوں دا سببّوں سُورج تے وَا ہنیرے ہوگئے۔ تے اوس دُھوں وِچوں زمین اُتّے ٹڈّیاں نِکلیاں تے اوہناں نُوں زمین دے ٹھوہنیاں وانگر طاقت دِتّی گئی۔ تے اوہناں نُوں آکھیا گیا پئی اوہناں بندیاں دے بِناں جِنہاں دے مَتّھے اُتّے خُدا دی مُہر نئیں زمین دے گھاہ یا کِسے سبزی یا کِسے بُوٹے نُوں نُقصان نا پُچاؤ۔ تے اوہناں نُوں جانوں مارن دا نئیں سگوں پنجاں مہِینیاں تِیکر لوکاں نُوں تڑپان دا اختیار دِتّا گیا تے اوہناں دی پِیڑ اجیہی سی جیویں ٹُھوہاں دے ڈنگ مارن توں بندے نُوں ہوندی اے۔ اوہناں دِناں وِچ لوک مَوت لَبّھن گے پرکدی نا مِلے گی۔ تے مرن دی چاہ کرن گے تے مَوت اوہناں توں نسّے گی۔ تے ٹڈّیاں دی صُورت اوہناں گھوڑیاں وانگر سی جیہڑے لڑائی دی لئی تیار کِیتے گئے ہون تے اوہناں دیاں سِراں اُتّے سونے دے تاج جیہے سن تے اوہناں دِیاں شکلاں بندیاں وانگر سن۔ تے اوہناں دے وال زنانِیاں وانگر سن تے دَند شیر ببّر وانگر سن۔ تے اوہناں دے کول لوہے وانگر بکتر سن تے اوہناں دے پَراں دی اواز اینج سی جیویں رَتھاں تے کِنے سارے گھوڑیاں دی جیہڑے لڑائی وِچ بھَجدے ہون۔ تے اوہناں دے بُونڈے ٹھوہنیاں وانگر سن تے اوہناں دے وِچ ڈنگ وی ہے سن تے اوہناں دیاں بُونڈیاں وِچ پنج مہینے تِیکر بندیاں نُوں نُقصان پَہُچان دی طاقت سی۔ اتھاہ کھڈے دا فرِشتہ اوہناں اُتّے بادشاہ سی اوہدا ناں عِبرانی وِچ ابدّون تے یُونانی وِچ اپُلّیون اے۔ پہلا افسوس تے مُک گیا ویکھو ایہدے پِچّھوں دو افسوس ہور آؤن والے نیں۔ جد چھیویں فرِشتے تُرہی نُوں پُھوک ماری۔ تے مَیں اوس سونے دی قُربان گا دے سِنگاں وِچوں جیہڑی خُدا دے سامھنے اے اجیہی اواز سُنی۔ پئی اوس چھیویں فرِشتے نُوں جِہدے کول تُرہی سی۔ کوئی پیا آکھدا اے۔ پئی وڈّے دریا فرات دے کول جیہڑے چار فرِشتے بَدّھے ہوئے نیں اوہناں نُوں کھول چھڈ۔ تے اوہ چارے فرِشتے کُھل گئے جیہڑے مُقرّر کِیتی گئی گھڑی تے دِن تے مہینے تے ورھے دے لئی بندیاں دا ترِیجا حِصّہ مارن نُوں تیار کِیتے گئے سن۔ تے گھوڑ چڑھیاندیاں فَوجاں گنتری وِچ وِیہہ کروڑ سن مَیں اوہناں دی گنتری سُنی۔ تے مَینُوں ایس رویا وِچ گھوڑے تے اوہناں دے اجیہے سوار وکھالی دِتّے جِنہاں دے بکتر اَگ تے سُنبل تے گندھک وانگر سن تے اوہناں گھوڑیاں دے سِر شیر ببّر وانگر سن تے اوہناں دے مُنھاں وِچوں اَگ تے دُھوں تے گندھک نِکلدی سی۔ اوہناں تِنّاں آفتاں یعنی اوس اَگ تے دُھوں تے گندھک نال جیہڑی اوہناں دے مُنھوں نِکلدی سی ترِیجا حِصّہ بندے مر گئے۔ کیوں جو اوہناں گھوڑیاں دی طاقت اوہناں دِیاں پُوشلاں وِچ سی۔ ایسے واسطے پئی اوہناں دِیاں پُوشلاں سپّاں وانگر سن۔ تے پُوشلاں وِچ سِر وی سن۔ اوہناں نال ای اوہ نُقصان کر دے سن۔ تے باقی بندیاں جیہڑے ایہناں آفتاں نال نئیں سن موئے اپنیاں ہتّھاں دے کمّاں توں تَوبہ نا کِیتی۔ پئی شیطان تے سونے چاندی تے پِتّل تے پتّھر تے لکڑ دِیاں مُورتاں دی بندگی توں مُڑ جاندے جیہڑیاں نا ویکھ سکدِیاں نیں نا سُن سکدِیاں نا چَل سکدِیاں نیں۔ تے خُون تے جادُو تے حرامکاریاں تے چوریاں جیہڑیاں اوہناں کِیتیاں سن اوہناں توں تَوبہ نا کِیتی۔ فیر مَیں اِک ہور زوراور فرِشتے نُوں بدّل نُوں کپڑے وانگر اُتّے لیاں ہویاں اسمانوں اُتر دیاں ویکھیا اوہدے سِر اُتّے اسمانی پینگھ سی تے اوہدی شکل سُورج وانگر سی تے اوہدے پَیر اَگ دے تھماں وانگر۔ تے اوہدے ہتّھ وِچ اِک نِکّی جِہی کُھلی کتاب سی۔ اوس اپنا سَجّا پَیر سمُندر اُتّے رکھیا تے کھبّا زمین اُتّے۔ تے اینج اُچّی اُچّی چیکیا۔ جیویں شیر ببّر بولدا اے۔ تے بدّل گجّن دِیاں سَتّ اَوازاں آئِیاں۔ جد بدّل دِیاں سَتّ اَوازاں آئِیاں تے مَیں لِکھن لگّا تے اسمانوں ایہہ اواز آؤندی سُنی۔ جیہڑیاں گجّن دِیاں گلّاں ایہناں ستّاں اَوازاں توں سُنیاں نیں اوہناں نُوں ٹھپّی رکھ۔ تے نا لِکھ۔ تے جیہڑے فرِشتے نُوں مَیں سمُندر تے زمین اُتّے کھلوتا ہویا ویکھیا سی اوس اپنا سَجّا ہتّھ اسمان ولّ چُکیا۔ تے جیہڑا ہمیشہ تِیکر جِیوندا رہے گا۔ تے جِس اسمان تے اوہدیاں سارِیاں شیواں تے زمین تے اوہدیاں سارِیاں شیواں تے سمُندر تے اوہدیاں سارِیاں شیواں پَیدا کِیتیاں نیں اوہدی سَونہہ کھا کے آکھیا پئی ہُن ہور چِر نا لگّے گا۔ سگوں ستویں فرِشتے دی اواز دین دے سَمے وِچ جد اوہ تُرہی پُھوکن لگّے گا۔ تے خُدا دا بھیت اوس خُوشخبری دے سببّوں جیہڑی اوس اپنے بندیاں نبیاں نُوں دِتّی سی پُورا ہوئے گا۔ تے جِس اواز دین والے نُوں مَیں اسمان اُتّے بولدیاں سُنیا سی اوس فیر مَینُوں آکھیا پئی جا اوس فرِشتے دے ہتھّوں جیہڑا سمُندر تے زمین اُتّے کھلوتا ہویا اے اوہ کُھلی ہوئی کتاب لے لے۔ تَد مَیں اوس فرِشتے کول جا کے آکھیا پئی ایہہ نِکّی کتاب مَینُوں دے چھڈ۔ اوس مَینُوں آکھیا لے ایہنوں کھالَے ایہہ تیرا ڈِھڈ تے کَوڑا کر چھڈے گی پر تیرے مُنھ وِچ شہد وانگر مِٹّھی لگّے گی۔ سو مَیں اوہ نِکّی کتاب اوس فرِشتے دے ہتھّوں لے کے کھا چھڈی اوہ میرے مُنھ وِچ تے شہد وانگر مِٹّھی لگّی پر جد اوہنوں مَیں کھالیا میرا ڈِھڈ کَوڑا ہوگیا۔ تے مَینُوں آکھیا گیا پئی تینُوں بتھیریاں اُمّتاں تے قوماں تے زباناں والیاں تے بادشاہاں اُتّے فیر نبُوّت کرنی ضرُور پَوے گی۔ تے مَینُوں ڈنڈے وانگر اِک کانا دِتّا گیا تے کِسے آکھیا پئی اُٹھ کے خُدا دی ہیکل تے قُربان گاہ تے اوہدے وِچ بندگی کرن والیاں نُوں کچّھ۔ تے اوس ویہڑے نُوں جیہڑا ہیکل دے باہر اے اوہنوں چھڈ دے تے اوہنوں نا کچّھ کیوں جو اوہ غیر قوماں نُوں دِتّا گیا ہے۔ اوہ پاک شہر نُوں بتالی مِہنے پیراں ہیٹھ لتاڑن گِیاں۔ تے مَیں اپنے دو گواہاں نُوں اختیار دیاں گا تے اوہ ترپّڑ اُتّے لے کے اِک ہزار دو سَو سَٹّھ دِن نبُوّت کرن گے۔ ایہہ اوہ ای زَیتُون دے دو بُوٹے تے دو دیوے نیں جیہڑے زمین دے خُداوند دے سامھنے کھلوتے نیں۔ تے جے کوئی اوہناں دا نُقصان کرنا چاہندا اے تے اوہناں دے مُنھ توں اَگ نِکل کے اوہناں دیاں وَیرِیاں نُوں کھا جاندی اے تے جے کوئی اوہناں دا نُقصان چاہے گا تاں اوہ ضرُور اِنجے ماریا جائے گا۔ اوہناں نُوں اختیار اے۔ پئی اسمان نُوں بند کر دین تاں جو اوہناں دی نبُوّت دے زمانے وِچ مینہ نا وَسّے تے پانیاں اُتّے اوہناں دا اختیار اے پئی اوہناں نُوں لہو بنا دین تے جِنّی وار اوہناں دا دِل کرے۔ زمین اُتّے ہر طرح دی بلا لیاؤن۔ جد اوہ اپنی گواہی دے لین گے تے اوہ پشُو جیہڑا کھڈے وِچوں نِکلے گا اوہناں نال لڑ کے اوہناں نُوں جِت لے گا۔ تے اوہناں نُوں مار چھڈے گا۔ تے اوہناں دِیاں لاشاں اوس وڈّے شہر دے بازار وِچ پئیاں رہن گِیاں جیہڑا رُوحانی طَور نال سدُوم تے مِصر اکھواؤندا اے جِتّھے اوہناں دا خُداوند وی صلِیب دِتّا گیا سی۔ تے اُمّتاں تے گھرانیاں تے اہلِ زبان تے قوماں وِچوں لوک اوہناں دِیاں لاشاں نُوں ساڈھے تَرے دِن تِیکر ویکھدے رہن گے تے اوہناں دِیاں لاشاں نُوں قبر وِچ نا رکھن دین گے۔ تے زمین دے رہن والے اوہناں دے مرن توں خُوش ہون گے تے مَوج کرن گے تے آپو وِچ تحفے گھلّن گے۔ کیوں جو ایہناں دوہاں نبیاں زمین دے رہن والیاں نُوں ستایا سی۔ تے ساڈھے تَرے دِناں پِچّھوں خُدا ولّوں اوہناں وِچ زِندگی دی رُوح آئی تے اوہ اپنے پیراں اُتّے کھلو گئے تے اوہناں دے ویکھن والیاں نُوں بڑا ڈر لگّا۔ تے اوہناں نُوں اسمان اُتّوں اِک زور دی اواز سُنائی دِتّی۔ پئی ایتھے اُتّے آ جاؤ۔ تے اوہ بدّلاں اُتّے سوار ہو کے اسمان اُتّے چڑھ گئے تے اوہناں دے وَیری اوہناں نُوں ویکھدے پئے سن۔ فیر اوسے ویلے اِک وَڈا سارا بھنچال آگیا تے شہر دا دسواں حِصّہ ڈِگّ پیا تے اوس بھنچال نال سَتّ ہزار بندے مر گئے تے باقی ڈر گئے۔ تے اسمان دے خُدا دی وڈیائی کِیتی۔ دُوجا افسوس ہوگیا ویکھو ترِیجا افسوس چھیتی آؤن والا اے۔ تے جدوں ستویں فرِشتے تُرہی نُوں پُھوک ماری۔ تے اسمان اُتّے بڑیاں اَوازاں ایہہ آکھدیاں پَیدا ہویاں۔ پئی دُنیا دی بادشاہی ساڈے خُداوند تے اوہدے مسِیح دی ہوگئی تے اوہ ہمیشہ تِیکر بادشاہی کرے گا۔ تے چَوہاں بزُرگاں جیہڑے خُدا دے سامھنے اپنیاں اپنیاں تختاں اُتّے بَیٹھے ہوئے سن مُنھ پرنے ڈِگّ کے خُدا نُوں سجدہ کِیتا۔ تے ایہہ آکھیا پئی اَے خُداوند خُدا قادرِ مُطلق جیہڑا ہے تے جیہڑا ہے سی۔ اسی تیرا شُکر کرنے آں کیوں جو تُوں اپنی بڑی قُدرت نُوں ہتّھ وِچ لے کے بادشاہی کِیتی۔ تے قوماں نُوں غُصّہ آیا تے تیرا غضب اُتر آیا۔ تے اوہ ویلا آ گیا پئی مُردیاں دی عدالت کِیتی جائے تے تیرے بندیاں نبیاں تے پاک لوکاں تے اوہناں نِکّے وڈّیاں نُوں جیہڑے تیرے ناں توں ڈردے نیں بدلہ دِتّا جائے تے زمین دے برباد کرن والیاں نُوں برباد کِیتا جائے۔ تے خُدا دی ہیکل جیہڑی اسمان اُتّے اے کھولی گئی تے اوہدی ہیکل وِچ اوہدے عہد دا صندُوق وکھالی دِتّا تے بدّلِیاں چمکیاں تے گِجّیاں تے اَوازاں آئِیاں۔ تے بھنچال آیا۔ تے بڑا گڑا پیا۔ فیر اسمان اُتّے اِک وَڈا سارا نِشان دِسّیا۔ یعنی اِک زنانی نظر آئی۔ جِس سُورج نُوں کپڑے وانگر اُتّے لیا ہویا سی تے چَنّ اوہدے پیراں ہیٹھ سی۔ تے باراں تاریاں دا تاج اوہدے سِر اُتّے سی۔ اوہ جمّن والی سی۔ تے جنیپے دِیاں پِیڑاں نال چِیکدی سی۔ تے بچّہ جمّن دی تکلیف وِچ سی۔ فیر اِک ہور نِشان اسمان اُتّے دِسّیا۔ یعنی اِک وَڈا سارا لال ناگ۔ اوہدے سَتّ سِر تے دَس سِنگ سن تے اوہدے سِراں اُتّے سَتّ تاج۔ تے اوہدی پُوشل نے اسمان دے ترِیجے حِصّہ تاریاں نُوں کھِچّ کے زمین اُتّے سُٹ لیا تے اوہ ناگ اوس زنانی دے اگّے جا کھلوتا جیہڑی جمّن والی سی پئی جدوں اوہ جمّے اوہدے بچّے نُوں کھالَئے۔ تے اوس پُتر جمّیا یعنی اوہ مُنڈا جیہڑا لوہے دے ڈنڈے نال سارِیاں قوماں اُتّے حکُومت کرے گا۔ تے اوہدا بچّہ جھٹ پَٹ خُدا تے اوہدے تخت کول اَپڑایا گیا۔ تے اوہ زنانی اوس بیابان نُوں بھج گئی جِتّھے اوہدے لئی خُدا ولّوں اِک تھاں تیار کِیتی گئی سی۔ پئی اوتھے اِک ہزار دو سَو سَٹّھ دِن تِیکر اوہنوں پالن۔ فیر اسمان اُتّے لڑائی ہوئی۔ میکائیل تے اوہدے فرِشتے ناگ نال لڑن نِکلے۔ تے ناگ تے اوہدے فرِشتے اوہناں نال لڑے۔ پر جِت نا سکے۔ تے ایہدے پِچّھوں اسمان اُتّے اوہناں دے لئی تھاں نا رہیا۔ تے اوہ وَڈا ناگ یعنی اوہو ای پرانا سَپّ جیہڑا ابلیس تے شیطان اکھواؤندا اے تے سارے جہان نُوں بدراہ کر دیندا اے۔ زمین اُتّے ڈیگیا گیا تے اوہدے فرِشتے وی اوہدے نال ڈیگے گئے۔ فیر مَیں اسمان توں ایہہ زور دی اواز آؤندی سُنی پئی ہُن ساڈے خُدا دی نجات تے قُدرت تے بادشاہی تے اوہدے مسِیح دا اختیار ظاہر ہویا۔ کیوں جو ساڈیاں بھراواں اُتّے الزام لان والا جیہڑا دِنے راتِیں ساڈے خُدا دے اگّے اوہناں اُتّے الزام لاندا رہندا سی ڈیگیا گیا۔ تے اوہناں لیلے دے خُون تے اپنی گواہی دے کلام دے سبّب اوہنوں جِت لیا تے اوہناں اپنیاں جاناں نُوں پیارا نا رکھیا۔ ایتھوں تِیکر پئی مَوت وی جَھل لئی۔ ایس لئی اَے اسمانوں تے اوہناں دے رہن والیو خُوشیاں کرو۔ اَے زمین تے سمُندر تُہاڈے اُتّے افسوس اے کیوں جو ابلیس بڑے غُصّہ وِچ اُتر کے تُہاڈے کول آیا اے ایس لئی پئی اوہ جان دا اے پئی میرا تھوڑا جِہیا ویلا باقی اے۔ تے جد ناگ ڈِٹّھا پئی مَیں زمین اُتّے ڈیگیا گیا آں تے اوس زنانی نُوں ستایا جِس پُتر جمّیا سی۔ تے اوس زنانی نُوں وڈّے عُقاب دے دو پَر دِتّے گئے۔ پئی سَپّ دے اگّوں اُڈ کے بیابان وِچ اپنے اوس تھاں اَپڑ جائے جِتّھے اِک زمانے تے زمانیاں تے ادھے زمانے تِیکر اوہدی پالنا ہوندی اے۔ تے سَپّ نے اوس زنانی دے مگر اپنے مُنھ توں ندی وانگر پانی وگایا۔ پئی اوہنوں ایس ندی نال روہڑ دیوے۔ پر زمین اوس زنانی دی مدد کِیتی تے اپنا مُنھ کھول کے اوس ندی دا گُھٹّ بھر گئی۔ جیہڑی ناگ اپنے مُونہو وگائی سی۔ تے ناگ نُوں زنانی اُتّے غُصّہ آیا۔ تے اوہدی باقی اولاد نال جیہڑی خُدا دے حُکماں اُتّے عمل کر دی اے تے یِسُوع دی گواہی دین اُتّے قیم اے لڑن نِکلیا۔ تے سمُندر دی ریت اُتّے جا کھلوتا۔ فیر مَیں اِک پشُو نُوں سمُندر وِچوں نِکلدیاں ویکھیا اوہدے دَس سِنگ تے سَتّ سِر سن تے اوہدیاں سِنگاں اُتّے دَس تاج تے اوہدیاں سِراں اُتّے کُفر دے ناں لِکھے ہوئے سن۔ تے جیہڑا پشُو مَیں ویکھیا سی اوہدی شکل چِیتے وانگر سی تے پَیر رِچھ وانگر تے مُنھ شیرببر وانگر۔ تے اوس ناگ اپنی قُدرت تے اپنا تخت تے بڑا اختیار اوہنوں دے دِتّا۔ تے مَیں اوہدے سِراں وِچوں اِک نُوں جیویں مَوت دا چمرس لگّا ہویا ویکھیا پر اوہدا مَوت دا چمرس ولّ ہوگیا۔ تے ساری دُنیا تعجُّب کر کے اوس پشُو دے پِچّھے پِچّھے ٹُر پئی۔ تے ایس واسطے پئی اوس ناگ اپنا اختیار اوس بیابانی نُوں دے دِتّا سی ایس لئی اوہناں لوکاں ناگ دی پُوجا کِیتی تے اوس پشُو دی وی ایہہ آکھ کے پُوجا کِیتی۔ پئی ایس پشُو وانگر کون اے؟ تے کون اوہدے نال بِھڑ سکدا اے؟ تے اوہنوں اِک مُنھ دِتّا گیا۔ جیہڑا بڑے بول بولدا سی تے کُفر آکھدا سی۔ تے اوہنوں بتالی مہینے تِیکر کمّ کرن دا اختیار دِتّا گیا۔ تے اوس خُدا دے بارے کُفر بکن لئی مُنھ کھولیا پئی اوہدے ناں تے اوہدے خیمے دے بارے یعنی اسمان دے رہن والیاں دے بارے کُفر بکے۔ تے اوہنوں ایہہ اختیار دِتّا گیا پئی پاک لوکاں نال لڑے تے اوہناں نُوں جِت لَئے تے اوہنوں ہر اِک گھرانے تے اُمّت تے قوم اُتّے اختیار دِتّا گیا۔ تے زمین دے اوہ سارے رہن والے اوہدی پُوجا کرن گے جِنہاں دے ناں اوس لیلے دی حیاتی دی کتاب وِچ لِکھے نئیں سن گئے جیہڑا دُنیا دے مُڈھ توں پہلاں ہلال ہویا ہویا اے۔ جِہدے کنّ ہون اوہ سُنے۔ جِہنُوں قید ہون والی اے اوہ قید وِچ پَوے گا۔ جیہڑا تلوار نال قتل کرے گا اوہ ضرُور تلوار نال قتل کِیتا جائے گا۔ پاک لوکاں دے صبر تے اِیمان دا ایہو ویلا اے۔ فیر مَیں اِک ہور پشُو نُوں زمین وِچوں نِکلدیاں ویکھیا اوہدے لیلے وانگُوں دو سِنگ سن تے ناگ وانگر بولدا سی۔ تے ایہہ پہلے پشُو دا سارا اختیار اوہدے سامھنے کمّ وِچ لیاؤندا سی تے زمین تے اوہدے رہن والیاں توں اوس پہلے جنَور دی پُوجا کراندا سی جِہدا مَوت دا چمرس ولّ ہوگیا سی۔ تے اوہ وڈّے وڈّے نِشان وکھاؤندا سی ایتھوں تِیکر پئی بندیاں دے سامھنے اسمان توں اَگ وَرھاندا سی۔ تے زمین دے رہن والیاں نُوں اوہناں نشاناں دے نال جیہڑے اوس پشُو دے سامھنے وکھان دا اوہنوں اختیار دِتّا گیا سی ایس طرح بدراہ کر دیندا سی پئی زمین دے رہن والیاں نُوں آکھدا سی پئی جِس پشُو نُوں تلوار لگّی سی تے اوہ جِیوپیا اے اوہدا بُت بناؤ۔ تے اوہنوں اوس پشُو دے بُت وِچ رُوح پُھوکن دا اختیار دِتّا گیا۔ تاں جو اوس پشُو دا بُت بولے وی۔ تے جِنّے لوک اوس پشُو دے بُت دی پُوجا نا کرن قتل کِیتے جان۔ تے اوس ساریاں نِکّیاں وڈّیاں دَولت منداں تے غرِیباں اَزاداں تے غلاماں دے سَجّے ہتّھ یا اوہناں دیاں متّھیاں اُتّے ٹھپّہ لوایا۔ پئی اوہدے بِناں جِہدے اُتّے ٹھپّہ یعنی اوس پشُو دا ناں یا اوہدے ناں دی گنتری ہوئے ہور کوئی بیوپار نا کر سکے۔ ایہہ حِکمت دی گلّ اے جِہدے وِچ سمجھ اے اوہ پشُو دی گنتری جوڑ لَئے۔ کیوں جو اوہ بندے دی گنتری اے تے اوہدی گنتری چھ سَو چھیاٹھ اے۔ فیر مَیں دھیان کِیتا تے کِیہ ویکھنا آں پئی اوہ لیلا صِیُّون دے پہاڑ اُتّے کھلوتا اے تے اوہدے نال اِک لَکّھ چتالی ہزار بندے نیں جِنہاں دے متّھیاں اُتّے اوہدا تے اوہدے باپ دا ناں لِکھیا ہویا اے۔ تے مَینُوں اسمان اُتّوں اِک اجیہی اواز سُنائی دِتّی جیہڑی زور دے پانی تے بڑے بدّل دے گجّن وانگر سی۔ تے جیہڑی اواز مَیں سُنی اوہ اجیہی سی جیویں بربط والے بربط وجاندے ہون۔ اوہ تخت دے سامھنے تے چَوہاں جانداراں تے بزُرگاں دے سامھنے اِک نواں گِیت پئے گاؤندے سن تے اوہناں اِک لَکّھ چتالی ہزار بندیاں دے بِناں جیہڑے دُنیا وِچوں مُل لَئے گئے سن ہور کوئی اوس گِیت نُوں نا سِکھ سکیا۔ ایہہ اوہ نیں جیہڑے زنانِیاں نال پلید نئیں ہوئے تے سگوں کوارے نیں ایہہ اوہ نیں جیہڑے لیلے دے پِچّھے پِچّھے جِتّھے اوہ جاندا اے ٹُردے نیں۔ ایہہ خُدا تے لیلے دے لئی پہلے پَھل ہون لئی بندیاں وِچوں مُل لَئے گئے نیں۔ تے اوہناں دے مُنھ وِچوں جُھوٹھ نئیں سی لَبّھدا۔ تے اوہ بے عیب نیں۔ فیر مَیں اِک ہور فرِشتے نُوں اسمان دے وِچ اُڈدیاں ہویاں ویکھیا جِہدے کول زمین دے رہن والیاں دی ہر اِک قوم تے گھرانے تے اہلِ زبان تے اُمّت دے سُنان لئی ہمیشہ دی خُوشخبری سی۔ تے اوس اُچّی اواز نال آکھیا پئی خُدا توں ڈرو تے اوہدا جلال ظاہر کرو۔ کیوں جو اوہدی عدالت دا ویلا آ گیا اے تے اوسے دی بندگی کرو جِس اسمان تے زمین تے سمُندر تے پانی دے چشمے پَیدا کِیتے۔ فیر ایہدے پِچّھوں اِک ہور دُوجا فرِشتہ ایہہ آکھدا ہویا آیا پئی ڈِگّ پیا اوہ وَڈا شہر بابل ڈِگّ پیا جِس اپنی حرامکاری دی غضب والی مَے سارِیاں قوماں نُوں پیائی اے۔ فیر ایہناں دے پِچّھوں اِک ہور ترِیجے فرِشتے آ کے اُچّی اواز نال آکھیا پئی جیہڑا اوس پشُو تے اوہدے بُت دی پُوجا کرے اوہ اپنے مَتّھے اُتّے یا اپنے ہتّھ اُتّے اوہدا ٹھپّہ لوائے۔ اوہ خُدا دے قَہر دی اوس خالص مَے نُوں پئے گا۔ جیہڑی اوہدے غضب دے پیالے وِچ بھری ہوئی اے تے پاک فرِشتیاں تے لیلے دے سامھنے اَگ تے گندھک دے عذاب وِچ پَوے گا۔ تے اوہناں دے عذاب دا دُھواں ہمیشہ تِیکر اُٹھدا رہے گا تے جیہڑے اوس پشُو تے اوہدے بُت دی پُوجا کر دے نیں تے جیہڑے اوہدے ناں دا ٹھپّہ لواندے نیں اوہناں نُوں دِنے راتِیں آرام نا مِلے گا۔ پاک لوکاں یعنی خُدا دے حُکماں اُتّے عمل کرن والیاں تے یِسُوع اُتّے اِیمان لیاؤن والیاں دے صبر دا ایہو ویلا اے۔ فیر مَیں اسمان وِچوں ایہہ اواز سُنی پئی لِکھ دھنّ نیں اوہ مُردے جیہڑے ہُن توں خُداوند وِچ مر دے نیں۔ رُوح آکھدا اے۔ پئی بے شک کیوں جو اوہ اپنیاں محِنتاں توں آرام پان گے تے اوہناں دے عمل اوہناں دے نال نال ہوندے نیں۔ فیر مَیں دھیان کِیتا تے کِیہ ویکھنا آں پئی اِک چِٹّا بدّل اے تے اوس بدّل اُتّے آدم دے جائے وانگر کوئی بَیٹھا اے۔ جِہدے سِر اُتّے سونے دا تاج تے ہتّھ وِچ تِکھی داتری اے۔ فیر اِک ہور فرِشتے ہیکل وِچوں نِکل کے اوس بدّل اُتّے بَیٹھے ہوئے نُوں اُچّی اواز نال آکھیا پئی اپنی داتری ڈاھ تے وَڈّھ کیوں جو وَڈّھن دا ویلا آگیا ایس لئی پئی دھرتی دی فصل بُہت پکّ گئی۔ سو جیہڑا بدّل اُتّے بَیٹھا ہویا سی اوس اپنی داتری دھرتی اُتّے واہی تے دھرتی دی فصل وَڈّھی گئی۔ فیر اِک ہور فرِشتہ اوس ہیکل وِچوں نِکلیا جیہڑی اسمان اُتّے اے اوہدے کول وی تِکھی داتری سی۔ فیر اِک ہور فرِشتہ قُربان گاہ وِچوں نِکلیا جِہدا اَگ اُتّے اختیار سی اوس تیز داتری والے نُوں اُچّی اُچّی آکھیا پئی اپنی تیز داتری ڈاھ کے زمین دے انگوراں دے بُوٹیاں دے گُچھّے وَڈّھ لے کیوں جو اوہدے انگور بالکل پکّ گئے نیں۔ تے اوس فرِشتے اپنی داتری زمین اُتّے واہی تے زمین دے انگوراں دے بُوٹیاں دی فصل وَڈّھ کے خُدا دے قَہر دے وڈّے حوض وِچ پا دِتّی۔ تے شہر دے باہر اوس حوض وِچ انگور لتاڑے گئے تے حوض وِچوں اینا خُون نِکلیا پئی گھوڑیاں دِیاں لگاماں تِیکر اَپڑ گیا تے سولاں سَو فرلانگ تِیکر وَگیا۔ فیر مَیں اسمان اُتّے اِک ہور وَڈا تے اچرج نِشان ویکھیا یعنی ستّاں فرِشتیاں پِچّھلیاں سَتّ آفتاں لئیاں ہویاں سن کیوں جو ایہناں آفتاں وِچ خُدا دا قَہر مُک گیا اے۔ فیر مَیں شیشے دا اِک سمُندر جیہا ویکھیا جِہدے وِچ اَگ مِلی ہوئی سی تے جِنہاں اوس پشُو تے اوہدے بُت تے اوہدے ناں دی گنتری نُوں جِت لیا سی اوہناں نُوں اوس شیشے دے سمُندر کول خُدا دِیاں بربطاں لے کے کھلوتیاں ڈِٹّھا۔ تے اوہ خُدا دے بندے مُوسیٰ دا گِیت تے لیلے دا گِیت گا گا کے آکھدے سن پئی اَے خُداوند خُدا قادرِ مُطلق! تیرے کمّ وڈّے تے اچرج نیں اَے ہمیشہ دے بادشاہ! تیریاں راہاں راست تے ٹھیک نیں۔ اے خُداوند! کون تَیتھوں نا ڈرے گا؟ تے کون تیرے جلال دا ناں ظاہر نا کرے گا؟ کیوں جو نِرا توں ای قُدُّوس ایں تے سارِیاں قوماں آ کے تینُوں سجدہ کرن گِیاں کیوں جو تیرے انصاف دے کمّ ظاہر ہو گئے نیں۔ ایہناں گلّاں دے پِچّھوں مَیں ویکھیا پئی شہادت دے خیمے دی ہیکل اسمان وِچ کھولی گئی۔ تے اوہ سَتّے فرِشتے جِنہاں کول سَتّے آفتاں سن تیز تے چمکدار جواہراں دے نال سَجّے ہوئے تے سینے اُتّے سونے دی پیٹی بَنّھ کے خُدا دی ہیکل وِچوں نِکلے۔ تے اوہناں چَوہاں جانداراں وِچوں اِک نے سَتّ سونے دے پیالے ہمیشہ تِیکر زِندہ رہن والے خُدا دے قَہر نال بھرے ہوئے اوہناں ستّاں فرِشتیاں نُوں دِتّے۔ تے خُدا دے جلال تے اوہدی قُدرت دے سببّوں ہیکل دُھوں نال بھر گئی تے جد تِیکر اوہناں ستّاں فرِشتیاں دِیاں سَتّے آفتاں مُک نا گِئیاں کوئی اوس ہیکل وِچ وڑ نا سکیا۔ فیر مَیں خُدا دی ہیکل وِچوں کِسے نُوں اُچّی اُچّی اوہناں ستّاں فرِشتیاں نُوں ایہہ آکھدیاں سُنیا پئی جاؤ خُدا دے قَہر دے سَتّے پیالے زمین اُتّے لُدّو۔ سو پہلے نے جا کے اپنا پیالہ زمین اُتّے لُد دِتّا۔ تے جِنہاں بندیاں اُتّے اوس پشُو دا ٹھپّہ سی۔ تے جیہڑے اوہدے بُت دی پُوجا کر دے سن اوہناں نُوں اِک بُرا تے تکلیف دین والا چمرس پَیدا ہوگیا۔ تے دُوجے نیں اپنا پیالہ سمُندر وِچ لُدیا۔ تے اوہ مُردے دے لہو وانگر بن گیا۔ تے سمُندر دے سارے جاندار مر گئے۔ تے ترِیجے اپنا پیالہ دریاواں تے پانیاں دیاں چشمیاں اُتّے لُدیا تے اوہ لہو بن گئے۔ تے مَیں پانی دے فرِشتے نُوں ایہہ آکھدیاں سُنیا پئی اے قُدُّوس جیہڑا ہیں تے جیہڑا ہے سی۔ توں عادل ایں پئی تُوں ایہہ انصاف کِیتا۔ کیوں جو ایہناں پاک لوکاں تے نبیاں دا لہو ڈوہلیا سی تے تُوں اوہناں نُوں لہو پیایا تے اوہ ایسے جوگے نیں۔ فیر مَیں قُربان گاہ وِچوں ایہہ اواز سُنی پئی اَے خُداوند خُدا قادرِ مُطلق بے شک تیرے فیصلے ٹھیک تے سَچّے نیں۔ تے چوتھے اپنا پیالہ سُورج اُتّے لُدیا تے اوہنوں بندیاں نُوں سیک نال ساڑ دین دا اختیار دِتّا گیا۔ تے بندے ڈاڈھے سیک نال سڑ گئے۔ تے اوہناں خُدا دے ناں دی بابت کُفر بکیا جیہڑا ایہناں آفتاں اُتّے اختیار رکھدا اے۔ تے تَوبہ نا کِیتی پئی اوہدی وڈیائی کر دے۔ تے پن جیویں اپنا پیالہ اوس پشُو دے تخت اُتّے لُدیا۔ تے اوہدی بادشاہی وِچ ہنیرا پَے گیا۔ تے پِیڑ دے مارِیاں لوک اپنیاں جِیبھاں وَڈّھن لگّے۔ تے اپنے دُکھاں تے چمرساں دے سببّوں اسمان دے خُدا دی بابت کُفر بکیا تے اپنیاں کمّاں توں تَوبہ نا کِیتی۔ تے چھیویں اپنا پیالہ وڈّے دریا فرات اُتّے لُدیا تے۔ اوہدا پانی سُک گیا پئی چڑھدے ولّوں آؤن والیاں بادشاہاں دے لئی راہ تیار ہو جاوے۔ فیر مَیں اوس ناگ دے مُنھ وِچوں تے اوس پشُو دے مُنھ توں تے اوس جُھوٹھے نبی دے مُنھ وِچوں تَرے ناپاک رُوحاں ڈَڈُؤاں وانگر نِکل دیاں ویکھیاں۔ ایہہ شیطاناں دِیاں نِشان وکھان والیاں رُوحاں نیں جیہڑیاں قادرِ مُطلق خُدا دے وڈّے دِن دی لڑائی دے واسطے اکٹّھیاں کرن لئی ساری دُنیا دے بادشاہاں کول نِکل کے جاندِیاں نیں (ویکھو مَیں چور وانگر آؤناں آں دھنّ اوہ اے جیہڑا جاگدا اے تے اپنی پوشاک دی راکھی کر دا اے پئی ننگا نا پِھرے تے لوک اوہنوں بے لہنگا نا ویکھن۔) تے اوہناں نیں اوہناں نُوں اوتھے اکٹّھیاں کِیتا جِہدا ناں عِبرانی وِچ ہرمجدون اے۔ تے ستویں اپنا پیالہ وَا اُتّے لُدیا تے خُدا دی ہیکل دے تخت ولّوں بڑے زور دی ایہہ اواز آئی۔ پئی مُک گیا۔ فیر بدّلی چمکن تے گجّن لگّی تے اَوازاں آئِیاں تے اِک ایڈا وَڈا بھنچال آیا پئی جدوں توں اِنسان پَیدا ہویا اے ایڈا وَڈا تے ڈاہڈا بھنچال کَدے نئیں سی آیا۔ فیر اوس وڈّے شہر دے تَرے ٹوٹے ہوگئے۔ تے قوماں دے شہر ڈِگّ پئے تے وَڈا شہر بابل خُدا دے حضُور یاد کِیتا گیا پئی اوہنوں اپنے ڈاہڈے غضب دی مَے دا پیالہ پِیائے۔ تے ہر اِک ٹاپُو اپنے تھاں توں ٹل گیا تے پہاڑاں دا پَتا نا لگّا۔ تے اسمان توں بندیاں اُتّے مَن مَن جیڈے وڈّے وڈّے گڑے پئے تے ایس واسطے پئی ایہہ آفت بڑی ڈاھڈی سی ایس لئی لوکاں گڑیاں دی آفت دے سببّوں خُدا دی بابت کُفر بکیا۔ تے اوہناں ستّاں فرِشتیاں وِچوں جِنہاں کول سَتّ پیالے سن اِک آ کے مَینُوں ایہہ آکھیا۔ پئی ایدھر آ مَیں تینُوں اوس وڈّی کنَجری دی سزا وکھاواں جیہڑی وڈّے پانیاں اُتّے بَیٹھی ہوئی اے۔ تے جِہدے نال دھرتی دیاں بادشاہاں حرامکاری کِیتی تے دھرتی دے رہن والے اوہدی حرامکاری دی مَے پی کے مست ہوگئے سن۔ سو اوہ مَینُوں رُوح وِچ بیابان ولّ لے گیا۔ تے مَیں سُوہے رنگ دے پشُو اُتّے جیہڑا کُفر دے نانواں نال بھریا ہویا سی تے جِہدے سَتّ سِر تے دَس سِنگ سن۔ اِک زنانی نُوں بَیٹھے ہویاں ویکھیا۔ تے ایس زنانی جامنو تے سُوہے رنگ دے کپڑے پائے ہوئے سن تے سونے تے جواہر تے موتِیاں نال سَجی ہوئی سی۔ تے اِک سونے دا پیالہ مکرُوہات یعنی اوہدی حرامکاری دِیاں پلِیتیاں نال بھریا ہویا اوہدے ہتّھ وِچ سی۔ تے اوہدے مَتّھے اُتّے ایہہ ناں لِکھیا ہویا سی۔ بھیت۔ وَڈا بابل۔ کسبیاں تے دھرتی دِیاں پلِیتیاں دی ماں۔ تے مَیں اوس زنانی نُوں پاک لوکاں دے لہو تے یِسُوع دیاں شہیداں دے لہو پِین توں مست ویکھیا تے اوہنوں ویکھ کے بڑا حَیران ہویا۔ اوس فرِشتے مَینُوں آکھیا تُوں کاہدے توں حَیران ہویا ایں؟ اوس زنانی تے اوس پشُو دا جِہدے اُتّے اوہ سوار اے۔ تے جِہدے سَتّ سِر تے دَس سِنگ نیں تینُوں بھیت دسنا آں۔ ایہہ جیہڑا تُوں پشُو ویکھیا اے۔ ایہہ پہلاں تے ہے سی پر ہُن نئیں اے تے اگّوں نُوں اتھاہ کھڈے وِچوں نِکل کے ہلاکت وِچ پَوے گا تے زمین دے رہن والے جِنہاں دے ناں دُنیا دے مُڈھ توں پہلاں حیاتی دی کتاب وِچ لِکھے نئیں گئے ایس پشُو دا ایہہ حال ویکھ کے پئی پہلاں ہے سی تے ہُن نئیں اے تے فیر ہوئے گا۔ تعجُّب کرن گے۔ ایتھے ای بودھا والے دی سیانپ اے۔ اوہ سَتّے سِر سَتّ پہاڑ نیں جِنہاں اُتّے اوہ زنانی بَیٹھی ہوئی اے۔ تے اوہ سَتّ بادشاہ وی نیں پنج تے ڈِگّ پئے نیں تے اِک ہُن اے تے اِک اجے آیا نئیں تے جدوں آوے گا تے کُجھ چِر تِیکر اوہدا رہنا ضرُوری اے۔ تے جیہڑا پشُو پہلاں ہے سی۔ تے ہُن نئیں اوہ آپے اَٹھواں اے تے ایہناں ستّاں وِچوں پَیدا ہویا تے ہلاکت وِچ پَوے گا۔ تے اوہ دَس سِنگ جیہڑے تُوں ویکھے نیں دَس بادشاہ نیں اجے تِیکر اوہناں نُوں بادشاہی نئیں مِلی۔ پر اوس پشُو نال اِک گھڑی لئی بادشاہاں وانگر اوہناں نُوں اختیار دِتّا جاوے گا۔ ایہناں سبھناں دی اِکّو ای رائے ہوئے گی تے اوہ اپنی قُدرت تے اختیار اوس پشُو نُوں دے دین گے۔ اوہ لیلے نال لڑن گے تے لیلا اوہناں نُوں جِت لے گا۔ کیوں جو اوہ خُداونداں دا خُداوند تے بادشاہاں دا بادشاہ اے۔ تے جیہڑے سَدّے ہوئے تے چُنے ہوئے تے وفادار اوہدے نال نیں اوہ وی جتن گے۔ فیر اوس مَینُوں آکھیا پئی جیہڑے پانی توں ویکھے نیں جِنہاں اُتّے کسبی بَیٹھی ہوئی اے۔ اوہ اُمّتاں تے بِھیڑاں تے قوماں تے اہلِ زبان نیں۔ تے جیہڑے دَس سِنگ تُوں ویکھے نیں اوہ وی تے پشُو وی اوس کسبی نال وَیر رکھن گے اوہ اوہنوں اُجاڑن گے تے ننگا کر دین گے۔ تے اوہدا گوشت کھا جان گے۔ تے اوہنوں اَگ وِچ ساڑ چھڈن گے۔ کیوں جو خُدا اوہناں دیاں دِلاں وِچ ایہہ پایا۔ پئی اوہ اوسے دی رائے اُتّے ٹُرن تے جدوں تِیکر خُدا دِیاں گلّاں پُوریاں نا ہو جان اوہ اِک رائے ہو کے بادشاہی اوس پشُو نُوں دے دین۔ تے اوہ زنانی جیہڑی تُوں ویکھی اے اوہ وَڈا شہر اے جیہڑا زمین دیاں بادشاہاں اُتّے حکُومت کر دا اے۔ ایہناں گلّاں دے پِچّھوں مَیں اِک ہور فرِشتے نُوں اسمان توں اُتر دیاں ہویاں ویکھیا۔ جِہدا بڑا اختیار سی تے زمین اوہدے جلال توں روشن ہوگئی۔ اوس اُچّی تگڑی اواز نال چلّا کے آکھیا پئی ڈِگّ پیا وَڈا شہر بابل ڈِگّ پیا تے شیطاناں دا گھر تے ہر اِک پلِیت رُوح دا اڈّا تے ہر اِک پلِیت تے مکرُوہ پکھیرُو دا اڈّا ہوگیا اے۔ کیوں جو اوہدی حرامکاری دی غضب والی مَے دے سببّوں سارِیاں قوماں ڈِگّ پئیاں نیں۔ تے زمین دیاں بادشاہاں اوہدے نال حرامکاری کِیتی اے۔ تے دُنیا دے سوداگر اوہدی عَیش عشرت دے سبّب دَولت مند بن گئے۔ فیر مَیں اسمان وِچوں کِسے ہور نُوں ایہہ آکھدیاں سُنیا پئی اَے میری اُمّت دے لوکو اوہدے وِچوں نِکل آؤ۔ تاں جو تُسی اوہدیاں گُناہاں وِچ شریک نا ہوؤ۔ تے اوہدیاں آفتاں وِچوں کوئی تُہاڈے اُتّے نا آوے۔ کیوں جو اوہدے گُناہ اسمان تِیکر اَپڑ گئے نیں تے اوہدیاں بدکارِیاں خُدا نُوں یاد آگئیاں نیں۔ جیویں اوس کِیتا تُسی وی اوہدے نال کرو۔ تے اوہنوں اوہدے کمّاں دا دُونا بدلہ دیو۔ تے جِنّاں پیالہ اوس بھریا تُسی اوہدے لئی دُونا بھر دیو۔ جِنّاں اوس اپنے آپ نُوں سوہنا بنایا تے شان شوکت کِیتی سی۔ اوناں ای اوہنوں عذاب تے غم وِچ پا دیو کیوں جو اوہ اپنے دِل وِچ آکھدی اے پئی۔ مَیں رانی بَیٹھی آں تے مَیں بیوہ نئیں۔ تے کدی غم نا ویکھاں گی۔ ایس لئی اوہدے اُتّے اِکّو دِن وِچ ایہہ آفتاں آؤن گِیاں یعنی مَوت تے غم تے کال اوہ اَگ وِچ ساڑ کے سواہ کِیتی جائے گی۔ کیوں جو اوہدا نیاں کرن والا خُداوند خُدا زوراور اے۔ تے اوہدے نال حرامکاری تے عیاشی کرن والے زمین دے بادشاہ جد اوہدے سڑن دا دُھوں ویکھن گے تَد اوہنوں رون تے پِٹن گے۔ تے اوہدے عذاب دے ڈر توں دُراڈے کھلو کے آکھن گے اَے وڈّے شہر اَے بابل! اَے مضبُوط شہر! افسوس! افسوس! گھڑی وِچ ای تینُوں سزا مِل گئی۔ تے دُنیا دے سوداگر اوہنوں رون گے تے ماتم کرن گے کیوں جو ہُن کوئی اوہناں دا مال نئیں خریدے گا۔ تے اوہ مال ایہہ اے سونا۔ چاندی۔ جواہر۔ موتی۔ تے سُچے کتانی تے جامنو رنگ دے تے ریشمی تے سُوہے کپڑے تے ہر طرح دِیاں خُوشبودار لکڑاں تے ہاتھی دَند دِیاں طرح طرح دِیاں شیواں۔ تے بے بہا مہنگی لکڑ تے پِتّل تے لوہے تے سنگِ مَرمَر دِیاں طرح طرح دِیاں شیواں۔ تے دارچینی تے مصالے۔ تے دُھوف تے عِطر۔ تے لوبان تے مَے۔ تے تیل تے میدہ۔ تے کنک تے مال ڈنگر۔ تے بھیڈاں تے گھوڑے۔ تے گڈِیاں تے غلام تے بندیاں دِیاں جاناں۔ ہُن تیرے دِل پسند میوے تیرے کولوں دُور ہوگئے تے سارِیاں سوادلیاں تے چمکدار شیواں تَیتھوں جاندِیاں رہیاں۔ ہُن کدی وی ہتّھ نا آؤن گِیاں۔ ایہناں شیواں دے سوداگر جیہڑے اوہدے سببّوں مالدار بن گئے سن اوہدے عذاب دے ڈر دے سببّوں دُور ای کھلو کے روؤن گے تے غم کرن گے۔ تے آکھن گے پئی افسوس! افسوس! اوہ وَڈا شہر جیہڑا مہِین کتانی تے جامنو رنگ تے سُوہے کپڑے پا کے تے سونے تے جواہر تے موتِیاں نال شنگاریا ہویا سی۔ گھڑی وِچ ای اوہدی اینی چوکھی دَولت اُجّڑ گئی۔ تے سارے جہازاں والے تے جہازاں دے مُسافر تے ملّاح تے ہور جِنّے سمُندر دا کمّ کر دے نیں۔ جدوں اوہدے سڑن دا دُھوں ویکھن گے تدوں دُور ای کھلو کے چلّاؤن گے تے آکھن گے۔ پئی کیہڑا شہر ایس وڈّے شہر وانگر اے؟ تے اپنے سِراں وِچ سواہ پان گے تے روکے تے ماتم کر کے اُچّی اُچّی آکھن گے پئی۔ افسوس! افسوس اوہ وَڈا شہر جِہدی دَولت توں سمُندر دے سارے جہازاں والے دَولتمند بن گئے! گھڑی وِچ اُجّڑ گیا۔ اَے اسمانوں تے اَے پاک لوکو۔ تے رسُولو تے نبیو۔ اوہدے اُتّے خُوشی کرو کیوں جو خُدا انصاف کر کے اوہدے کولوں تُہاڈا بدلہ لے لیا۔ فیر اِک ہور زوراور فرِشتے وڈّی چکّی دے پُڑ وانگر اِک پتّھر چُکیا۔ تے ایہہ آکھ کے سمُندر وِچ سُٹ دِتّا پئی بابل دا وَڈا شہر وی اینج ای زور نال ڈھایا جائے گا تے فیر کِیتے اوہدا پَتا نا مِلے گا۔ تے بربط وجان والے تے گویّاں تے بانسری وجان والیاں تے تُرہی پُھوکن والیاں دی اواز فیر کدی تیرے وِچوں سُنی نا جائے گی۔ تے کِسے پیشے دا کاریگر تیرے وِچ فیر کدی نا لَبھّے گا تے چکّی دی اواز فیر کدی تیرے وِچ سُنائی نا دیوے گی۔ تے دِیوے دی روشنی فیر کدی تیرے وِچ نا چمکے گی تے لاڑے وَوہٹی دی اواز فیر کَدے تیرے وِچ سُنی نا جائے گی کیوں جو تیرے سوداگر زمین دے امیر سن۔ تے تیری جادُوگری توں سارِیاں قوماں بدراہ ہوگِئیاں۔ تے نبیاں تے پاک لوکاں تے دھرتی اُتّے سارے قتل ہون والیاں دا خُون اوہدے وِچ پایا گیا۔ ایہناں گلّاں دے پِچّھوں مَیں اسمان دے اُتّے جیویں اِک وڈّی جماعت نُوں اُچّی اواز نال ایہہ آکھدیاں سُنیا۔ ہلَّلُویاہ۔ نجات تے جلال تے قُدرت ساڈے خُدا ای دی اے۔ کیوں جو اوہدے فیصلے ٹھیک تے دُرست نیں۔ ایس لئی پئی اوس نے اوس وڈّی کسبی دا انصاف کِیتا۔ جِس اپنی حرامکاری نال دُنیا نُوں خراب کِیتا سی۔ تے اوس تُھوں اپنے بندیاں دے لہو دا بدلہ لیا۔ فیر دُوجی وار اوہناں آکھیا ہلَّلُویاہ۔ تے اوہدے سڑن دا دُھوں سدا تِیکر اُٹھدا رہے گا۔ تے چَوہاں بزُرگاں تے چَوہاں جانداراں ڈِگّ کے خُدا نُوں سجدہ کِیتا جیہڑا تخت اُتّے بَیٹھا ہویا سی۔ تے ایہہ آکھیا پئی آمِین ہلَّلُویاہ۔ تے تخت وِچوں ایہہ اواز آئی پئی اوہدے توں ڈرن والیو بندیو نِکّے ہو بھانویں وڈّے تُسی سارے ساڈے خُدا دی وڈیائی کرو۔ فیر مَیں وڈّی جماعت جِہی اواز تے زور دے پانی جِہی اواز تے بدّلاں دے گجّن جِہی اواز سُنی پئی ہلَّلُویاہ! ایس لئی پئی خُداوند ساڈا خُدا قادرِ مُطلق بادشاہی کر دا اے۔ آؤ اسی خُوشی کریئے۔ تے بڑے خُوش ہویئے تے اوہدی وڈیائی کریئے۔ ایس لئی پئی لیلے دا ویاہ آگیا۔ تے اوہدی وَوہٹی اپنے آپ نُوں تیار کر لیا اے۔ تے اوہنوں چمکن والے تے صاف مہِین کتانی کپڑے پان دا اختیار دِتّا گیا اے کیوں جو سُچے کتانی کپڑیاں توں پاک لوکاں دی راستبازی دے کمّ مُراد نیں۔ تے اوس مَینُوں آکھیا لِکھ۔ مُبارک نیں اوہ جیہڑے لیلے دے ویاہ دے میل وِچ سَدّے گئے نیں۔ فیر اوس مَینُوں آکھیا پئی ایہہ خُدا دِیاں سَچیاں گلّاں نیں۔ تے مَیں اوہنوں سجدہ کرن لئی اوہدیاں پیراں اُتّے ڈِگّا۔ اوس مَینُوں آکھیا خبردار ایہہ نا کر۔ مَیں وی تیرے تے تیرے اوہناں بھراواں دے نال دا بندہ ہاں۔ جِنہاں دے کول یِسُوع دی گواہی اے۔ خُدا نُوں ای سجدہ کر۔ کیوں جو یِسُوع دی گواہی نبُوّت دی رُوح اے۔ فیر مَیں اسمان نُوں کُھلا ہویا ویکھیا۔ تے کِیہ ویکھنا آں پئی اِک چِٹّا گھوڑا اے۔ تے اوہدے اُتّے اِک سوار اے جیہڑا سَچّا تے برحق اکھواؤندا اے۔ تے اوہ راستی دے نال انصاف تے لڑائی کر دا اے۔ تے اوہدیاں اَکھّیاں اَگ دِیاں لاٹاں نیں تے اوہدے سِر اُتّے کِنے سارے تاج نیں۔ تے اوہدا اِک ناں لِکھیا ہویا اے جِہنُوں اوہدے بِناں کوئی ہور نئیں جان دا۔ تے اوس ایہو جئے کپڑے پائے ہوئے نیں۔ جِنہاں اُتّے لہو چھِڑکیا ہویا اے۔ تے اوہدا ناں خُدا دا کلام اکھواؤندا اے۔ تے اسمان دِیاں فَوجاں چِٹّے گھوڑیاں اُتّے سوار ہو کے تے چِٹّے تے صاف سُچے کتانی کپڑے پا کے اوہدے پِچّھے پِچّھے نیں۔ تے قوماں دے مارن لئی اوہدے مُنھ وِچوں اِک تیز تلوار پئی نِکلدی اے۔ تے اوہ لوہے دے ڈنڈے نال اوہناں اُتّے حکُومت کرے گا تے قادرِ مُطلق خُدا دے سخت غضب دی مَے دے حوض وِچ انگور لتاڑے گا۔ تے اوہدیاں کپڑیاں تے پٹّ اُتّے ایہہ ناں لِکھیا ہویا اے۔ بادشاہاں دا بادشاہ تے خُداونداں دا خُداوند۔ فیر مَیں ہور فرِشتے نُوں سُورج اُتّے کھلوتا ہویا ویکھیا تے اوس اُچّی اُچّی اسمان دے وِچکار سارے اُڈن والیاں پکھیرُواں نُوں آکھیا۔ پئی آؤ خُدا دی وڈّی ضیافت وِچ شریک ہون لئی اکٹّھے ہو جاؤ۔ پئی تُسی بادشاہاں دا گوشت تے فوجی سرداراں دا گوشت تے زوراوراں دا گوشت تے گھوڑیاں تے اوہناں دے سواراں دا گوشت تے ساریاں بندیاں دا گوشت کھاؤ بھانویں اَزاد ہون بھانویں غُلام۔ بھانویں نِکّے ہون بھانویں وڈّے۔ فیر مَیں اوس پشُو تے زمین دے بادشاہاں تے اوہناں دِیاں فَوجاں نُوں اوس گھوڑے دے سوار تے اوہدی فَوج نال لڑائی کرن لئی اکٹّھا ہویاں ویکھیا۔ تے اوہ پشُو تے اوہدے نال اوہ جُھوٹھا نبی پھڑیا گیا۔ جِس اوہدے سامھنے ایہو جئے نِشان وکھائے سن جِنہاں نال اوس پشُو دا ٹھپّہ لین والیاں تے اوہدے بُت دی پُوجا کرن والیاں نُوں بدراہ کر دِتّا سی۔ اوہ دونویں اَگ دی اوس جِھیل وِچ جِیوندے سُٹّے گئے۔ جیہڑی گندھک نال بَلدی اے۔ تے باقی اوس گھوڑے دے سوار دی تلوار نال جیہڑی اوہدے مُنھ وِچوں نِکلدی سی قتل کِیتے گئے تے سارے پکھیرُو اوہناں دے گوشت نال رَجّ گئے۔ فیر مَیں اِک فرِشتے نُوں اسمانوں اُتر دیاں ویکھیا جِہدے ہتّھ وِچ اتھاہ کھڈے دی کُنجی تے وَڈا سَنگل سی۔ اوس ناگ یعنی پرانے سَپّ نُوں جیہڑا ابلیس تے شیطان اے پَھڑکے ہزار ورھے لئی بنھیا۔ تے اوہنوں اتھاہ کھڈے وِچ بند کر چھڈیا۔ تے اوہدے اُتّے مُہر لا چھڈی۔ پئی اوہ ہزار ورھے دے پُورے ہون تِیکر قوماں نُوں فیر بدراہ نا کرے ایہدے پِچّھوں ضرُور اے۔ پئی تھوڑے چِر لئی فیر کھولیا جائے۔ فیر مَیں تخت ویکھے تے لوک اوہناں اُتّے بَیٹھ گئے تے عدالت اوہناں دے سپُرد کِیتی گئی۔ تے اوہناں دِیاں رُوحاں نُوں وی ویکھیا۔ جِنہاں دے یِسُوع دی گواہی دین مارِیاں تے خُدا دے کلام مارِیاں سِر وَڈّھے گئے سن۔ تے جِنہاں نا اوس پشُو دی پُوجا کِیتی سی۔ تے نا اوہدے بُت دی۔ تے نا اوہدا ٹھپّہ اپنے مَتّھے تے ہتّھاں اُتّے لیا سی۔ تے اوہ زِندہ ہو کے ہزار ورھے تِیکر مسِیح دے نال بادشاہی کر دے رہے۔ تے جد تِیکر ایہہ ہزار ورھے مُک نا گئے۔ باقی مُردے زِندہ نا ہوئے۔ پہلی قیامت ایہو اے۔ مُبارک تے پاک اوہ اے جیہڑا پہلی قیامت وِچ شریک ہوئے اجیہاں اُتّے دُوجی مَوت دا کُجھ وَس نئیں سگوں اوہ خُدا تے مسِیح دے کاہِن ہون گے۔ تے اوہدے نال ہزار ورھے تِیکر بادشاہی کرن گے۔ تے جد ہزار ورھے مُک جان گے تے شیطان قید وِچوں چھڈیا جائے گا۔ تے اوہناں قوماں نُوں جیہڑیاں زمین دے چَواں پاسے ہون گِیاں۔ یعنی جوج تے ماجوج نُوں بدراہ کر کے لڑائی دے لئی اکٹّھیاں کرن نُوں نِکلے گا۔ اوہناں دی گنتری سمُندر دی ریت وانگر ہوئے گی۔ تے ساری زمین اُتّے کھِلّر جان گِیاں۔ تے پاک لوکاں دیاں پڑاواں نُوں تے پیارے شہر نُوں چَواں پاسیوں گھیر لین گِیاں۔ تے اسمانوں اَگ وَرھ کے اوہناں نُوں کھا جائے گی۔ تے اوہناں دا بدراہ کرن والا ابلیس اَگ تے گندھک دی اوس جِھیل وِچ سُٹّیا جائے گا۔ جِتّھے اوہ پشُو تے جُھوٹھا نبی وی ہوئے گا۔ تے اوہ دِنے راتِیں ہمیشہ تِیکر عذاب وِچ رہن گے۔ فیر مَیں اِک وڈّے چِٹّے تخت نُوں تے اوہنوں جیہڑا اوہدے اُتّے بَیٹھا ہویا سی ویکھیا۔ جِہدے اگّوں زمین تے اسمان بھج گئے۔ تے اوہناں نُوں کِدھرے تھاں نا مِلیا۔ فیر مَیں سارے نِکّے وڈّے مُردے اوس تخت دے اگّے کھلوتے ہوئے ویکھے۔ تے کِتاباں کھولِیاں گِئیاں۔ فیر اِک ہور کتاب کھولی گئی یعنی حیاتی دی کتاب۔ جیویں اوہناں کِتاباں وِچ لِکھیا ہویا سی۔ اوہناں دیاں کمّاں دے سببّوں مُردیاں دا انصاف کِیتا گیا۔ تے سمُندر اپنے وِچلے مُردے دے دِتّے۔ تے مَوت تے پاتال نیں اپنے وِچلے مُردے دے دِتّے۔ تے اوہناں وِچوں ہر اِک دے کمّاں پِچّھے اوہدا انصاف کِیتا گیا۔ فیر مَوت تے پاتال اَگ دی جِھیل وِچ سُٹّے گئے۔ ایہہ اَگ دی جِھیل دُوجی مَوت اے۔ تے جِس کِسے دا ناں حیاتی دی کتاب وِچ نا لَبّھیا۔ اوہ اَگ دی جِھیل وِچ سُٹّیا گیا۔ فیر مَیں اِک نَوِیں اسمان تے نَوِیں زمین نُوں ویکھیا کیوں جو پہلا اسمان تے پہلی زمین جاندے رہے۔ تے سمُندر وی نا رہیا۔ فیر مَیں پاک شہر نُوں یرُوشلِیم نُوں اسمانوں خُدا دے کولوں اُتر دیاں ویکھیا۔ تے اوہ اوس وَوہٹی وانگر شنگاری ہوئی سی۔ جِس اپنے بندے واسطے شنگار کِیتا ہوئے۔ فیر مَیں کِسے نُوں تخت وِچوں اُچّی اواز نال ایہہ آکھدیاں سُنیا۔ پئی ویکھو خُدا دا تنبُو بندیاں دے وِچ اے۔ اوہ اوہناں دے نال تنبُو لائے گا۔ تے اوہ اوہدے لوک ہون گے۔ تے اوہ آپ اوہناں دے نال رہے گا۔ تے اوہناں دا خُدا ہوئے گا۔ تے اوہ اوہناں دِیاں اَکھّیاں دے سارے اتھرُو پُونجھے گا۔ ایہدے پِچّھوں مَوت نا رہے گی تے نا ماتم رہے گا۔ تے نا رونا۔ نا پِیڑ۔ پہلیاں شیواں جاندِیاں رہیاں۔ تے جیہڑا تخت اُتّے بَیٹھا ہویا سی۔ اوس آکھیا ویکھ مَیں سارِیاں شیواں نَوِیاں بنا دینا آں۔ فیر اوس آکھیا۔ پئی لِکھ لے۔ کیوں جو ایہہ گلّاں سَچ تے برحق نیں۔ فیر اوس مَینُوں آکھیا۔ پئی ایہہ گلّاں پُوریاں ہوگِئیاں۔ مَیں الفا تے اومیگا شُروع تے اخِیر ہاں۔ مَیں تریہائے نُوں زِندگی دے پانی دے چشمے وِچوں مُفت پیاواں گا۔ جیہڑا جِتّے اوہ ای ایہناں شیواں دا وارث ہوئے گا۔ تے مَیں اوہدا خُدا ہوواں گا۔ تے اوہ میرا پُتر ہوئے گا۔ پر ڈرپوکاں تے بے اِیماناں تے پلِیت لوکاں تے خُونِیاں تے حرامکاراں تے جادُوگراں تے بُت پرستاں تے سارے جُھوٹھیاں دا حِصّہ اَگ تے گندھک دی بلن والی جِھیل وِچ ہوئے گا ایہہ دُوجی مَوت اے۔ فیر اوہناں ستّاں فرِشتیاں وِچوں جِنہاں کول سَتّ پیالے سن تے اوہ پِچّھلیاں ستّاں آفتاں نال بھرے ہوئے سن اِک آ کے مَینُوں آکھیا۔ پئی ایدھر آئیں تینُوں وَوہٹی یعنی لیلے دی بیوی وکھاواں۔ تے اوہ مَینُوں رُوح وِچ اِک وڈّے تے اُچّے پہاڑ اُتّے لے گیا۔ تے پاک شہر یرُوشلِیم نُوں اسمانوں خُدا کولوں اُتر دیاں وکھایا۔ اوہدے وِچ خُدا دا جلال سی۔ تے اوہدی چمک بڑے قِیمتی پتّھر یعنی اوس یشب وانگر سی۔ جیہڑا بلّور وانگر چمکدا ہوئے۔ تے اوہدی چوفیری کندھ وڈّی تے اُچّی سی تے اوہدے باراں پھاٹک تے پھاٹکاں اُتّے باراں فرِشتے سن تے اوہناں اُتّے بنی اِسرائیل دے باراں گھرانیاں دے ناں لِکھے ہوئے سن۔ تَرے پھاٹک چڑھدے ولّ سن تَرے پھاٹک پہاڑ ولّ تَرے پھاٹک دَکھّن ولّ تے تَرے پھاٹک لہندے ولّ۔ تے اوس شہر دی چوفیری کندھ دِیاں باراں نِیہیاں سن تے اوہناں اُتّے لیلے دیاں باراں رسُولاں دے باراں ناں لِکھے ہوئے سن۔ تے جیہڑا مَینُوں پیا آکھدا سی۔ اوہدے کول شہر تے اوہدیاں پھاٹکاں تے اوہدی چوفیری کندھ دے کچّھن لئی اِک کاچھ یعنی سونے دا گز سی۔ تے اوہ شہر چَوکُٹھا پیا ہویا سی تے اوہدی لمبائی چوڑائی دے برابر سی۔ اوہنے شہر نُوں اوس گز نال کچھّیا تے اوہ باراں ہزار فرلانگ ہویا اوہدی لمبائی۔ چوڑائی تے اُچیائی اِکّو جِہی سی۔ تے اوس اوہدی چوفیری کندھ نُوں بندے دے یعنی فرِشتے دی کاچھ دے سببّوں کچھّیا تے اوہ اِک سَو چتالی ہتّھ ہوئی۔ تے اوہدی چوفیر کندھ وی اُساری یشب دی سی۔ تے شہر اجیہے سُچے سونے دا سی۔ جیہڑا سُچے شیشے وانگر ہوئے۔ تے اوس شہر دی چوفیری کندھ دِیاں نِیہیاں ہر طرح دے جواہر نال شنگارِیاں ہویاں سن۔ پہلی نِیہہ یشب دی سی دُوجی نیلّم دی ترِیجی شب چراغ دی۔ چَوتھی زمُرّد دی۔ پن جیویں عقِیق دی چھیویں لعل دی ستویں سُنہلے پتّھر دی اٹھویں فیروزے دی نَوِیں زبرجد دی دسویں یمنی دی یاروِیں سنگِ سُنبلی دی۔ بارویں یاقُوت دی۔ تے باراں پھاٹک باراں موتِیاں دے سن۔ اِک اِک پھاٹک اِک اِک موتی دا سی۔ تے شہر دی سڑک شفاف شیشے وانگر سُچے سونے دی سی۔ تے مَیں اوہدے وِچ کوئی ہیکل نا ویکھی ایس لئی پئی خُداوند خُدا قادرِ مُطلق تے لیلا اوہدی ہیکل نیں۔ تے اوس شہر وِچ سُورج یا چَنّ دی روشنی دی کوئی لوڑ نئیں۔ کیوں جو خُدا دے جلال اوہنوں روشن کِیتا اے۔ تے لیلا اوہدا دِیوا اے۔ تے قوماں اوہدی روشنی وِچ ٹُرن پِھرن گِیاں۔ تے زمین دے بادشاہ اپنی شان شوکت دا سامان اوہدے وِچ لیاؤن گے۔ تے اوہدے پھاٹک دِنے کدی بند نا ہون گے۔ (تے اوتھے رات نا ہوئے گی۔) تے لوک قوماں دی شان و شوکت دا سامان اوہدے وِچ لیاؤن گے۔ تے اوہدے وِچ کوئی پلِیت شے یا کوئی جَنا جیہڑا گندا کمّ کر دا یا جُھوٹھیاں گلّاں گھڑدا اے۔ کدی داخل نا ہوئے گا۔ سگوں اوہ ای داخل ہون گے جِنہاں دے ناں لیلے دی زِندگی دی کتاب وِچ لِکھے ہوئے نیں۔ فیر اوس مَینُوں بلّور وانگر چمکدا ہویا حیاتی دے پانی دا اِک دریا وکھایا جیہڑا خُدا تے لیلے دے تخت وِچوں نِکل کے اوس شہر دی سڑک دے وِچ پیا وگدا سی۔ تے دریا دے پرلے وار حیاتی دا بُوٹا سی۔ اوہنوں باراں قِسماں دے پَھل لگدے سن تے ہر مہینے پَھلدا سی۔ تے اوس بُوٹے دے پَتّراں توں قوماں نُوں شفا مِلدی سی۔ تے فیر لعنت نا ہوئے گی تے خُدا تے لیلے دا تخت اوس شہر وِچ ہوئے گا۔ تے اوہدے بندے اوہدی بندگی کرن گے۔ تے اوہ اوہدا مُنھ ویکھن گے تے اوہدا ناں اوہناں دیاں متّھیاں اُتّے لِکھیا ہویا ہوئے گا۔ تے فیر رات نا ہوئے گی۔ تے اوہناں نُوں دِیوے تے سُورج دی روشنی دی لوڑ نئیں ہوئے گی۔ کیوں جو خُداوند خُدا اوہناں نُوں روشن کرے گا۔ تے اوہ ہمیشہ تِیکر بادشاہی کرن گے۔ فیر اوس مَینُوں آکھیا پئی ایہہ گلّاں سَچ تے برحق نیں تے خُداوند نے جیہڑا نبیاں دِیاں رُوحاں دا خُدا اے اپنے فرِشتے نُوں ایس لئی گھلّیا پئی اپنیاں بندیاں نُوں اوہ گلّاں وکھائے جیہڑیاں ضرُور چھیتی ہونیاں نیں۔ تے ویکھ مَیں چھیتی آؤن والا آں۔ مُبارک اوہ اے جیہڑا ایس کتاب دی نبُوّت دِیاں گلّاں اُتّے عمل کر دا اے۔ مَیں اوہ ای یُوحنّا آں جیہڑا ایہناں گلّاں نُوں سُندا تے ویکھدا ساں۔ تے جد مَیں سُنیاں تے ویکھیاں تَد جیہڑے فرِشتے مَینُوں ایہہ گلّاں وکھائیاں مَیں اوہدیاں پیراں اُتّے سجدہ کرن لئی ڈِگّ پیا۔ اوس مَینُوں آکھیا خبردار ایہہ نا کر مَیں تیرے نال دا تے تیرے بھراواں نبیاں دے نال دا تے ایس کتاب دِیاں گلّاں اُتّے عمل کرن والیاں دے نال دا بندہ آں۔ خُدا نُوں ای سجدہ کر۔ فیر اوس مَینُوں آکھیا ایس کتاب دی نبُوّت دِیاں گلّاں اُتّے مُہر نا لا۔ کیوں جو ویلا نیڑے آگیا اے۔ جیہڑا بُرائی کر دا اے۔ بُرائی ای کر دا رہے۔ تے جیہڑا پلِیت اے پلِیت ای روے۔ تے جیہڑا راستباز اے اوہ راستبازی ای کر دا رہے تے جیہڑا پاک اے۔ پاک ای ہوندا رہے۔ ویکھ مَیں چھیتی آؤن والا آں تے ہر اِک دے کمّاں دے سببّوں بدلہ دینا میرے کول اے۔ مَیں الفا تے اومیگا اوّل تے اخِیر۔ شُروع تے چھیکڑ آں۔ مُبارک نیں اوہ جیہڑے اپنے کپڑے دھوندے نیں۔ کیوں جو زِندگی دے بُوٹے کول آؤن دا اختیار پان گے تے اوہناں پھاٹکاں توں شہر وِچ داخل ہون گے۔ پر کُتّے تے جادُوگر تے حرامکار تے خُونی تے بُت پرست تے جُھوٹھی گلّ دا ہر اِک پسند کرن تے گھڑن والا باہر رہوے گا۔ مَیں یِسُوع اپنا فرِشتہ ایس لئی گھلّیا۔ پئی کلِیسیاواں دی بابت تُہاڈے اگّے ایہناں گلّاں دی گواہی دے۔ مَیں داؤد دی اصل تے نسل تے صُبح دا چمکدا ہویا تارا ہاں۔ رُوح تے وَوہٹی آکھدے نیں پئی آ تے سُنن والا وی آکھے آ تے جیہڑا تریہایا اے آوے تے جیہڑا چاہے حیاتی دا پانی مُفت لے لَئے۔ مَیں ہر اِک بندے اگّے جیہڑا ایس کتاب دی نبُوّت دِیاں گلّاں سُندا اے گواہی دینا آں۔ پئی جے کوئی بندہ ایہناں وِچ کُجھ وَدھائے تے خُدا ایس کتاب وِچ لِکھیاں ہوئیاں آفتاں اوہدے اُتّے وَدھائے گا۔ تے جے کوئی ایس کتاب دی نبُوّت دِیاں گلّاں وِچوں کُجھ کڈھے تے خُدا اوس زِندگی دے بُوٹے تے پاک شہر وِچوں جِنہاں دا ایس کتاب وِچ ذِکر ہویا اے اوہدا حِصّہ کڈھ چھڈے گا۔ جیہڑا ایہناں گلّاں دی گواہی دیندا اے۔ اوہ ایہہ آکھدا اے۔ پئی بے شک مَیں چھیتی آؤن والا آں۔ آمِین اَے خُداوند یِسُوع آ۔ خُداوند یِسُوع دا فضل پاک لوکاں دے نال رہے۔ آمِین۔